𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑓒 𑒙𑒰 𑒑𑒲𑒞-𑒣𑓂𑒩𑒥𑒢𑓂𑒡
𑒞𑓂𑒫𑒘𑓂𑒔𑒰𑒯𑒘𑓂𑒔 𑒂 𑒁𑒮𑒘𑓂𑒖𑒰𑒞𑒱 𑒧𑒢
𑒞𑓂𑒫𑒘𑓂𑒔𑒰𑒯𑒘𑓂𑒔 𑓖.𑓓
𑒁𑒮𑒘𑓂𑒖𑒰𑒞𑒱 𑒧𑒢 𑓖.𑓘𑓒
𑒞𑓂𑒫𑒘𑓂𑒔𑒰𑒯𑒘𑓂𑒔
𑒄 𑒦𑒰𑒩𑒞 𑒑𑓂𑒩𑓀𑒟 𑒖𑒨𑒏 𑒖𑒰𑒯𑒱𑒧𑒹 𑒑𑒰𑒢
𑒞𑒐𑒢 𑒏𑒯𑒱𑒨𑒰𑒮𑒿 𑒦𑒹𑒪𑒰𑒯 𑒋𑒞𑒳𑒏𑓂𑒏𑒰 𑒪𑒼𑒏, 𑒏𑒩𑓂𑒧𑒯𑒲𑒢, 𑒮𑓀𑒏𑒲𑒩𑓂𑒝, 𑒏𑒼𑒢𑒰 𑒯𑒰𑒩𑒻𑒞 𑒑𑒹𑒪𑒰𑒯 𑒮𑒻𑒢𑓂𑒨𑒥𑒪𑒮𑒿 𑒂 𑒠𑒩𑓂𑒬𑒢𑒯𑒳𑒮𑒿, 𑒏𑒹 𑒒𑒼𑒮𑒱𑒨𑒰𑒥𑒻𑒞 𑒑𑒹𑒪 𑒁𑒮𑒧𑒰𑒢𑒞𑒰𑒏 𑒣𑒰𑒚 𑒋𑒏𑒩 𑒥𑒱𑒔।
𑒏𑒹 𑒏𑒹𑒪𑒢𑓂𑒯𑒱 𑒬𑒳𑒩𑒴 𑒄 𑒞𑓂𑒫𑒘𑓂𑒔𑒰𑒯𑒘𑓂𑒔।
𑒑𑒰𑓀𑒡𑒩𑓂𑒫, 𑒋𑒏𑒪𑒫𑓂𑒨𑒏 𑒫𑒲𑒩𑒞𑒰𑒮𑒿 𑒦𑒩𑒪, 𑒒𑒵𑒝𑒰-𑒣𑓂𑒩𑒹𑒧, 𑒮𑒞𑓂𑒨-𑒁𑒮𑒞𑓂𑒨𑒏 𑒡𑒩𑒰𑒞𑒪,
𑒂𑒯 𑒣𑒰𑒩𑒰𑒬𑒩 𑒣𑒳𑒞𑓂𑒩 𑒦𑒑𑒫𑒰𑒢 𑒫𑓂𑒨𑒰𑒮, 𑒢𑒧𑒢-𑒢𑒧𑒢 𑒬𑒞 𑒢𑒧𑒢।
𑒣𑓂𑒩𑒮𑒢𑓂𑒢𑒫𑒠𑒢𑒏𑒹𑒿 𑒪𑒱𑒐𑒥𑒰𑒏 𑒏𑒯𑒱 𑒥𑒰𑒞, 𑒫𑒰𑒝𑒲 𑒢𑒯𑒱 𑒩𑒳𑒏𑒞 𑒁𑒯𑒰𑒿𑒏 𑒑𑒝𑒹𑒬𑒏 𑒬𑒩𑓂𑒞, 𑒏𑒫𑒱𑒏 𑒏𑒪𑓂𑒣𑒢𑒰𑒏 𑒄 𑒅𑒞𑓂𑒏𑒩𑓂𑒭, 𑒧𑒳𑒠𑒰 𑒥𑒢𑒰𑒍𑒪 𑒏𑒱𑒋𑒏 𑒁𑒯𑒰𑒿 𑒯𑒼𑒁𑒋 𑒖𑒹𑒢𑒰 𑒡𑒩𑓂𑒧𑒑𑓂𑒩𑓀𑒟।
𑒫𑓂𑒨𑒰𑒮 𑒪𑒹𑒐𑒏 𑒯𑒼𑒃𑒞𑒯𑒳𑒿 𑒕𑒟𑒱 𑒋𑒯𑒱𑒧𑒹 𑒋𑒏𑒙𑒰 𑒣𑒰𑒞𑓂𑒩, 𑒏𑒹𑒯𑒢 𑒢𑒫 𑒩𑒮, 𑒢𑒫 𑒕𑒪 𑒫𑒰𑒠 !
𑒑𑒝𑒹𑒬𑒏 𑒑𑒞𑒱 𑒁𑒞𑒱 𑒞𑒲𑒫𑓂𑒩, 𑒠𑒹𑒐𑒱 𑒫𑓂𑒨𑒰𑒮 𑒏𑒋𑒪 𑒬𑓂𑒪𑒼𑒏 𑒖𑒙𑒱𑒪। 𑒬𑓂𑒪𑒼𑒏𑒏 𑒦𑒰𑒭𑓂𑒨 𑒥𑒴𑒗𑒱 𑒬𑒲𑒒𑓂𑒩, 𑒫𑒱𑒒𑓂𑒢𑒏𑒩𑓂𑒞𑒰 𑒪𑒱𑒐𑒞𑒰𑒯 𑒄।
𑒬𑓂𑒪𑒼𑒏𑒏 𑒖𑒙𑒱𑒪𑒞𑒰𑒏 𑒪𑒹𑒪 𑒄 𑒞𑒩𑓂𑒏 !
𑒣𑒳𑒞𑓂𑒩 𑒬𑒳𑒏𑒠𑒹𑒫 𑒢𑒰𑒩𑒠𑒧𑒳𑒢𑒱 𑒠𑒹𑒫𑒑𑒝 𑒑𑓀𑒡𑒩𑓂𑒫 𑒩𑒰𑒏𑓂𑒭𑒮 𑒨𑒏𑓂𑒭
𑒫𑓂𑒨𑒰𑒮 𑒬𑒱𑒭𑓂𑒨 𑒫𑒻𑒬𑓀𑒣𑒰𑒨𑒢 𑒂 𑒣𑒩𑒲𑒏𑓂𑒭𑒱𑒞 𑒣𑒳𑒞𑓂𑒩 𑒖𑒢𑒧𑒹𑒖𑒨𑒏 𑒢𑒱𑒮𑓂𑒞𑒰𑒩।
𑒣𑒾𑒩𑒰𑒝𑒱𑒏 𑒮𑒴𑒞𑒖𑒲 𑒩𑒯𑒟𑒱, 𑒞𑒞 𑒧𑒡𑓂𑒨। 𑒏𑒩𑒱 𑒇𑒭𑒱𑒮𑒦𑒰 𑒢𑒻𑒧𑒱𑒭𑒰𑒩𑒝𑓂𑒨𑒧𑒹,𑒧𑒯𑒩𑓂𑒭𑒱 𑒬𑒾𑒢𑒏 𑒁𑒡𑓂𑒨𑒏𑓂𑒭।
𑒮𑒴𑒞𑒖𑒲 𑒏𑒋𑒪 𑒬𑒳𑒩𑒳,𑒮𑓀𑒯𑒱𑒞𑒰 𑒮𑒞𑒮𑒯𑒮𑓂𑒞𑓂𑒩।
𑒂𑒃 𑒄 𑒧𑒢 𑒏𑒯𑒋 𑒁𑒕𑒱, 𑒄 𑒮𑒞𑓂𑒨 𑒠𑒹𑒐𑒲, 𑒏𑒫𑒱𑒏 𑒏𑒪𑓂𑒣𑒢𑒰 𑒧𑒡𑓂𑒨 𑒕𑒪 𑒏𑒲 𑒮𑒲𑒐𑒱 𑒣𑒩𑒐𑒲। 𑒁𑒩𑓂𑒟 𑒏𑒹𑒩 𑒁𑒢𑒩𑓂𑒟 𑒏𑓂𑒭𑒹𑒣𑒏 𑒮𑒦 𑒏𑒹𑒪𑒏 𑒖𑒹, 𑒯𑒩𑓂𑒭 𑒂 𑒬𑓂𑒩𑒧𑒮𑒿 𑒏𑒢𑒹𑒏 𑒠𑒹𑒐𑒰𑒥𑒲 𑒠𑒹𑒐𑒲 ।
𑒯𑒮𑓂𑒞𑒱𑒢𑒰𑒣𑒳𑒩 𑒮𑒧𑓂𑒩𑒰𑒙 𑒬𑒰𑓀𑒞𑒳𑒢𑒳, 𑒑𑓀𑒑 𑒞𑒙 𑒦𑓂𑒩𑒧𑒝 𑒏𑒩𑒱 𑒩𑒯𑒪। 𑒨𑒳𑒫𑒞𑒲 𑒥𑒢𑒱 𑒠𑒹𑒫𑒱 𑒑𑓀𑒑𑒰,𑒞𑒙 𑒖𑒏𑒩 𑒕𑒪𑒱 𑒚𑒰𑒜𑓃 𑒢𑒱𑒬𑓂𑒔𑒪 !
𑒞𑒹𑒿 𑒣𑒛𑓃𑒪 𑒯𑒼𑒁𑒋 𑒢𑒰𑒧 𑒯𑒳𑒢𑒏𑒩,
𑒡𑒰𑒩 𑒑𑓀𑒑𑒰𑒖𑒲𑒏 𑒢𑒰𑒧𑒣𑒩 𑒦𑒋 𑒁𑒦𑒱𑒦𑒴𑒞 𑒏𑒯𑒪 𑒯𑒹 𑒮𑒳𑒢𑓂𑒠𑒩𑒱,
𑒏𑒩𑒳 𑒣𑓂𑒩𑒹𑒧 𑒮𑓂𑒫𑒲𑒏𑒰𑒩 𑒯𑒧𑒩। 𑒣𑒞𑓂𑒢𑒲 𑒥𑒢𑒱 𑒏𑒩𑒳 𑒩𑒰𑒖,
𑒩𑒰𑒖𑓂𑒨-𑒡𑒢-𑒣𑓂𑒩𑒰𑒝 𑒣𑒩।
𑒁𑒕𑒱 𑒮𑒧𑒩𑓂𑒣𑒝 𑒮𑒦 𑒁𑒯𑒰𑒿 𑒣𑒩,
𑒏𑒱𑓀𑒞𑒳 𑒁𑒕𑒱 𑒏𑒱𑒕𑒳 𑒥𑓀𑒡𑒢 𑒯𑒧𑒩। 𑒏𑓂𑒨𑒼 𑒣𑒴𑒕𑒨 𑒢𑒯𑒱 𑒣𑒩𑒱𑒔𑒨 𑒯𑒧𑒩,
𑒢𑒯𑒱 𑒏𑒩𑒨 𑒩𑒼𑒏-𑒙𑒼𑒏 𑒯𑒧𑒩 𑒏𑒰𑒩𑓂𑒨 𑒣𑒩।
𑒣𑓂𑒩𑒹𑒧-𑒫𑒱𑒯𑓂𑒫𑒪 𑒬𑒰𑓀𑒞𑒳𑒢𑒳,
𑒏𑒩𑒱 𑒮𑓂𑒫𑒲𑒏𑒰𑒩 𑒥𑓀𑒡𑒢 𑒮𑒏𑒪। 𑒂𑒢𑒪 𑒧𑒯𑒪 𑒧𑒰𑒢𑒫-𑒑𑓀𑒑𑒰𑒏𑒹𑒿,
𑒮𑒧𑒨 𑒥𑒱𑒞𑒪 𑒥𑒱𑒞𑒱𑒞𑒹 𑒩𑒯𑒪। 𑒦𑒹𑒪 𑒥𑒰𑒞 𑒫𑒱𑒔𑒱𑒞𑓂𑒩 𑒄 𑒖𑒹,
𑒮𑒰𑒞 𑒣𑒳𑒞𑓂𑒩 𑒬𑒰𑓀𑒞𑒳𑒢𑒳𑒏𑒹𑒿 𑒦𑒹𑒪। 𑒨𑒳𑒫𑒞𑒲 𑒤𑒹𑒏𑒪 𑒮𑒦𑒏𑒹𑒿 𑒑𑓀𑒑𑒡𑒰𑒩𑒧𑒹,
𑒩𑒰𑒖𑒰𑒢𑒹 𑒏𑒱𑒕𑒳 𑒣𑒳𑒕𑒱 𑒮𑒏𑒪।
𑒏𑒫𑒱𑒏 𑒕𑒪 𑒄 𑒏𑒪𑓂𑒣𑒢𑒰 𑒄 𑒨𑒳𑒫𑒞𑒲 𑒏𑒹 𑒁𑒕𑒱,
𑒥𑒳𑒗𑒱 𑒣𑒩𑒻𑒕 𑒏𑓂𑒭𑒝 𑒏𑒼𑒧𑒪, 𑒏𑓂𑒭𑒝 𑒏𑓂𑒩𑒴𑒩-𑒏𑓂𑒩𑒴𑒩𑒞𑒧 𑒖𑒹, 𑒁𑒥𑒼𑒡 𑒥𑒰𑒪𑒏 𑒏𑒹𑒩 𑒣𑓂𑒩𑒰𑒝𑒏 𑒯𑒹𑒞𑒳 𑒫𑒱𑒏𑒪 !
𑒣𑒴𑒕𑒪 𑒩𑒰𑒖𑒰 𑒬𑒰𑓀𑒞𑒢𑒳,
𑒂𑒚𑒧 𑒥𑒹𑒩 𑒁𑒣𑒢𑒰𑒏𑒹𑒿 𑒢𑒯𑒱 𑒩𑒼𑒏𑒱 𑒮𑒏𑒪। 𑒠𑒹𑒪𑒏 𑒨𑒳𑒫𑒞𑒲 𑒣𑒩𑒱𑒔𑒨 𑒮𑒏𑒪,
𑒯𑒧 𑒑𑓀𑒑 𑒂 𑒄 𑒂𑒚 𑒫𑒮𑒳 𑒕𑒪। 𑒠𑒹𑒪𑒢𑓂𑒯𑒱 𑒧𑒯𑒩𑓂𑒭𑒱 𑒫𑒬𑒱𑒭𑓂𑒚 𑒬𑒰𑒣 𑒞𑒢𑒱𑒏𑒰,
𑒧𑒩𑓂𑒞𑓂𑒨𑒪𑒼𑒏𑒏 𑒖𑒢𑓂𑒧 𑒪𑒹𑒥𑒰𑒏। 𑒂𑒚𑒧 𑒣𑒳𑒞𑓂𑒩𑒏𑒹𑒿 𑒩𑒰𑒐𑒥 𑒯𑒧 𑒏𑒱𑒕𑒳 𑒠𑒱𑒢, 𑒠𑒹𑒫𑒫𑓂𑒩𑒞 𑒠𑒹𑒥 𑒮𑓂𑒫𑒩𑒴𑒣 𑒮𑒹𑒫𑒏।
𑒧𑒯𑒩𑓂𑒭𑒱 𑒫𑒬𑒱𑒭𑓂𑒚𑒏 𑒢𑒢𑓂𑒠𑒱𑒢𑒲𑒏𑒹𑒿, 𑒠𑒹𑒐𑒱 𑒣𑒞𑓂𑒢𑒲 𑒫𑒮𑒳 𑒣𑓂𑒩𑒦𑒰𑒮𑒏,
𑒧𑒩𑓂𑒞𑓂𑒨𑒪𑒼𑒏𑒏 𑒮𑒐𑒲 𑒯𑒹𑒞𑒳, 𑒣𑓂𑒩𑒨𑒰𑒮 𑒢𑒢𑓂𑒠𑒱𑒢𑒲𑒏 𑒯𑒩𑒝𑒏 ।
𑒇𑒭𑒱 𑒞𑒰𑒏𑒪 𑒑𑒾-𑒠𑒹𑒫𑒱𑒏𑒹𑒿, 𑒖𑓂𑒘𑒰𑒢-𑒔𑒏𑓂𑒭𑒳𑒮𑒿। 𑒠𑒹𑒪𑒏 𑒬𑒰𑒣 𑒫𑒮𑒳𑒑𑒝𑒏𑒹𑒿 𑒦𑒨-𑒏𑓂𑒩𑒼𑒡𑒱𑒞, 𑒏𑒋𑒪 𑒣𑓂𑒩𑒰𑒩𑓂𑒟𑒢𑒰 𑒫𑒮𑒳 𑒮𑒦 𑒬𑒰𑒣𑒱𑒞। 𑒯𑒧𑒩 𑒬𑒰𑒣 𑒢𑒯𑒱 𑒒𑒴𑒩𑒱 𑒮𑒏𑒞 𑒣𑒩𑒘𑓂𑒔, 𑒮𑒰𑒞 𑒫𑒮𑒳 𑒦𑒨 𑒖𑒰𑒨𑒞 𑒧𑒳𑒏𑓂𑒞 𑒞𑒳𑒩𑒞।
𑒣𑓂𑒩𑒦𑒰𑒮𑒏𑒹𑒿 𑒩𑒯𑒨 𑒣𑒩𑒞 𑒞𑒞𑒨, 𑒏𑒱𑒕𑒳 𑒠𑒱𑒢 𑒡𑒩𑒱 𑒧𑒩𑓂𑒞𑓂𑒨𑒪𑒼𑒏𑒏 𑒬𑒩𑒝
𑒯𑒼𑒨𑒞 𑒨𑒬𑒮𑓂𑒫𑒲 𑒄 𑒥𑒯𑒳𑒞, 𑒒𑒳𑒩𑒱 𑒂𑒨𑒪 𑒫𑒮𑒳𑒑𑒝 𑒑𑓀𑒑 𑒪𑒑। 𑒯𑒹 𑒠𑒹𑒫𑒱 𑒥𑒢𑒴 𑒧𑒰𑒞𑒰 𑒯𑒧𑒩𑒰 𑒮𑒦𑒏, 𑒠𑒱𑒁’ 𑒧𑒳𑒏𑓂𑒞𑒱 𑒞𑒐𑒢 𑒂𑒮 𑒁𑒯𑒲𑓀𑒏।
𑒏𑒫𑒱-𑒏𑒪𑓂𑒣𑓂𑒢𑒰𑒏 𑒛𑒼𑒩𑒲 𑒠𑒹𑒐𑒪,
𑒧𑒰𑒢𑒫-𑒑𑓀𑒑 𑒏𑒹𑒩 𑒎𑒔𑒱𑒞𑓂𑒨 𑒪𑒹𑒪!
𑒬𑒰𑓀𑒞𑒳𑒢𑒳 𑒦𑒋 𑒑𑒹𑒪 𑒫𑒱𑒩𑒏𑓂𑒞,
𑒕𑒴𑒙𑒱 𑒑𑒹𑒪 𑒑𑓀𑒑𑒏 𑒮𑒰𑒢𑒱𑒡𑓂𑒨। 𑒮𑒧𑒨 𑒥𑒲𑒞𑒪 𑒞𑒿 𑒑𑒹𑒪 𑒍 𑒋𑒏 𑒠𑒱𑒢, 𑒞𑒙, 𑒡𑒰𑒩𑒏 𑒮𑒧𑒏𑓂𑒭।
𑒠𑒱𑒫𑓂𑒨 𑒥𑒰𑒪𑒏𑒏𑒹𑒿 𑒍𑒞𑒋 𑒠𑒹𑒐𑒪, 𑒏𑒩𑒱 𑒩𑒯𑒪 𑒏𑒹𑒪𑒱 𑒍𑒞𑒋। 𑒩𑒼𑒏𑒱 𑒩𑒯𑒪 𑒫𑒰𑒝𑒏 𑒡𑒰𑒩𑒮𑒿, 𑒑𑓀𑒑𑒡𑒰𑒩𑒏𑒹𑒿 𑒖𑒞𑒋।
𑒣𑓂𑒩𑒮𑓂𑒞𑒳𑒞 𑒦𑒹𑒪𑒲𑒯 𑒑𑓀𑒑 𑒞𑒐𑒢, 𑒮𑒾𑓀𑒣𑒱 𑒠𑒹𑒪 𑒠𑒹𑒫𑒫𑓂𑒩𑒞𑒏𑒹𑒿 𑒏𑒯𑒪। 𑒧𑒯𑒩𑓂𑒭𑒱 𑒫𑒬𑒱𑒭𑓂𑒚 𑒮𑒿 𑒪𑒋 𑒬𑒱𑒏𑓂𑒭𑒰, 𑒫𑒹𑒠-𑒫𑒹𑒠𑒰𑓀𑒑𑒏 𑒢𑒱𑒐𑒱𑒪। 𑒬𑒰𑒮𑓂𑒞𑓂𑒩-𑒖𑓂𑒘𑒰𑒢 𑒬𑒳𑒏𑓂𑒩𑒰𑒔𑒰𑒩𑓂𑒨 𑒖𑒹𑒏𑒰𑒿, 𑒬𑒮𑓂𑒞𑓂𑒩𑒧𑒹 𑒣𑒩𑒬𑒳𑒩𑒰𑒧 𑒮𑒢।
𑒦𑒹𑒙𑒱 𑒑𑒹𑒪𑒢𑓂𑒯𑒱 𑒣𑒳𑒞𑓂𑒩 𑒞𑒹𑒖𑒮𑓂𑒫𑒲 𑒒𑒳𑒩𑒱 𑒁𑒋𑒪𑒰𑒯 𑒬𑒰𑒢𑓂𑒞𑒢𑒳, 𑒠𑒹𑒫𑒫𑓂𑒩𑒞𑒏𑒹𑒿 𑒥𑒢𑒰𑒋𑒪 𑒩𑒰𑒖𑒏𑒳𑒧𑒰𑒩,
𑒂𑒃 𑒁𑒕𑒱 𑒄 𑒮𑒧𑓂𑒦𑒫,
𑒁𑒣𑒢 𑒠𑒼𑒮𑒩 𑒚𑒰𑒧 𑒣𑒼𑒮𑒪𑒰𑒯𑒰 𑒣𑒳𑒞𑓂𑒩𑒏𑒹𑒿,
𑒏𑒩𑒞 𑒄 𑒮𑓀𑒏𑒲𑒩𑓂𑒝 𑒮𑒧𑒰𑒖!
𑒏𑒱𑒋𑒏 𑒢𑒯𑒱 𑒯𑒼𑒋 𑒠𑒹𑒫𑒫𑓂𑒩𑒞 𑒮𑒢 𑒨𑒬𑒮𑓂𑒫𑒲 𑒞𑒐𑒢𑒯𑒳?
𑒏𑒻𑒏 𑒫𑒩𑓂𑒭 𑒥𑒲𑒞𑒪 𑒋𑒢𑒰, 𑒣𑒳𑒢𑒱 𑒋𑒏 𑒠𑒱𑒢 𑒂𑒋𑒪,
𑒬𑒰𑒢𑓂𑒞𑒢𑒳 𑒠𑒹𑒐𑒪𑒢𑓂𑒯𑒱 𑒨𑒧𑒳𑒢𑒰 𑒞𑒙 𑒞𑒩 𑒁𑒠𑓂𑒦𑒳𑒞 𑒮𑒳𑒫𑒰𑒮,
𑒂𑒥𑒱 𑒩𑒯𑒪 𑒞𑒩𑒳𑒝𑒲 𑒮𑒞𑓂𑒨𑒫𑒞𑒲 𑒧𑒪𑒰𑒯𑒏 𑒥𑒹𑒙𑒲,
𑒂𑒃 𑒖𑒐𑒢 𑒑𑒼𑒞𑓂𑒩-𑒧𑒴𑒪, 𑒣𑒰𑒃-𑒏𑒾𑒛𑓃𑒲𑒏 𑒥𑒰𑒢𑓂𑒯,
𑒞𑒯𑒱𑒨𑒰 𑒩𑒰𑒖𑒰𑒮𑒿 𑒫𑒱𑒫𑒰𑒯𑒏 𑒪𑒹𑒪 𑒮𑒹𑒯𑒼,
𑒩𑒰𑒐𑒪 𑒬𑒩𑓂𑒞𑓂𑒞 𑒧𑒪𑓂𑒪𑒰𑒯𑒏 𑒮𑒩𑒠𑒰𑒩।
𑒥𑒢𑒞 𑒯𑒧𑒩 𑒢𑒰𑒞𑒱𑒨𑒹𑒙𑒰, 𑒯𑒮𑓂𑒞𑒱𑒢𑒰𑒣𑒳𑒩𑒏 𑒩𑒰𑒖𑒰,
𑒞𑒐𑒢𑒹 𑒯𑒼𑒋𑒞 𑒄 𑒫𑒱𑒫𑒰𑒯।
𑒬𑒰𑒢𑓂𑒞𑒢𑒳 𑒄 𑒫𑒔𑒢 𑒠𑒱𑒞𑒟𑒱 𑒏𑒼𑒢𑒰, 𑒮𑒹 𑒒𑒳𑒩𑒱 𑒁𑒨𑒪𑒰𑒯 𑒢𑒑𑒩 𑒁𑒣𑒢 । 𑒔𑒱𑒢𑓂𑒞𑒰 𑒒𑒴𑒢 𑒥𑒢𑒱 𑒏𑒰𑒙𑒋 𑒪𑒰𑒑𑒪 𑒬𑒩𑒲𑒩𑒏 𑒏𑒰𑒢𑓂𑒞𑒱𑒏𑒹𑒿।
𑒠𑒹𑒫𑒫𑓂𑒩𑒞 𑒣𑒴𑒕𑒪𑒢𑓂𑒯𑒱 𑒣𑒱𑒞𑒰𑒮𑒿, 𑒏𑒲 𑒦𑒹𑒪 𑒣𑒱𑒞𑒰𑒬𑓂𑒩𑒲,
𑒯𑒹 𑒣𑒳𑒞𑓂𑒩 𑒏𑒲 𑒏𑒯𑒴, 𑒁𑒕𑒱 𑒋𑒏𑒙𑒰 𑒔𑒱𑒢𑓂𑒞𑒰, 𑒏𑒲 𑒯𑒼𑒋𑒞 𑒩𑒰𑒖𑓂𑒨𑒏
𑒖𑒹 𑒯𑒼𑒋𑒞 𑒯𑒼𑒋𑒞 𑒨𑒳𑒠𑓂𑒡𑒧𑒹 𑒏𑒱𑒕𑒳 𑒁𑒯𑒰𑒿𑒏𑒹𑒿,
𑒏𑒏𑒩 𑒂𑒬,
𑒏𑒹 𑒥𑒜𑓃𑒰𑒍𑒞,
𑒫𑓀𑒬 𑒯𑒮𑓂𑒞𑒱𑒢𑒰𑒣𑒳𑒩𑒏 ।
𑒏𑒳𑒬𑒰𑒑𑓂𑒩 𑒥𑒳𑒠𑓂𑒡𑒱𑒏 𑒠𑒹𑒫𑒫𑓂𑒩𑒞
𑒥𑒳𑒗𑒪𑒢𑓂𑒯𑒱 𑒖𑒹 𑒥𑒰𑒞 𑒏𑒱𑒕𑒳 𑒂𑒩 𑒁𑒕𑒱,
𑒣𑒴𑒕𑒪𑒢𑓂𑒯𑒱 𑒮𑒰𑒩𑒟𑒲𑒮𑒿 𑒮𑒦 𑒑𑒣, 𑒑𑒹𑒪𑒟𑒱 𑒏𑒹𑒫𑒙𑒩𑒰𑒖 𑒪𑒑,
𑒂 𑒩𑒰𑒖𑒣𑒰𑒙 𑒞𑓂𑒨𑒰𑒑𑒱 𑒁𑒋𑒪𑒰𑒯।
𑒏𑒹𑒫𑒙𑒩𑒰𑒖 𑒣𑒩𑒘𑓂𑒔 𑒩𑒰𑒐𑒪 𑒋𑒏𑒙𑒰 𑒬𑓀𑒏𑒰, 𑒏𑒲 𑒯𑒼𑒋𑒞 𑒖𑒹 𑒁𑒯𑒰𑒿𑒏, 𑒣𑒳𑒞𑓂𑒩 𑒁𑒯𑒰𑒿𑒏 𑒖𑒹 𑒕𑒲𑒢𑒱 𑒪𑒋, 𑒯𑒧𑒩 𑒢𑒰𑒞𑒱𑒮𑒿 𑒩𑒰𑒖𑓂𑒨।
𑒁𑒣𑓂𑒩𑒞𑓂𑒨𑒰𑒬𑒱𑒞 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩,
𑒮𑒹𑒯𑒼 𑒁𑒣𑓂𑒩𑒞𑓂𑒨𑒰𑒬𑒱𑒞 ।
𑒃𑒞𑒱𑒯𑒰𑒮 𑒥𑒢𑒞, 𑒄 𑒣𑓂𑒩𑒞𑒱𑒖𑓂𑒘𑒰। 𑒢𑒯𑒱 𑒏𑒩𑒥 𑒯𑒧 𑒫𑒱𑒫𑒰𑒯 𑒂𑒖𑒢𑓂𑒧, 𑒑𑒰𑒩𑓂𑒯𑒮𑓂𑒟𑓂𑒨 𑒂𑒬𑓂𑒩𑒧 𑒕𑒼𑒛𑓃𑒥,
𑒩𑒯𑒥 𑒂𑒖𑒢𑓂𑒧 𑒥𑓂𑒩𑒯𑓂𑒧𑒔𑒰𑒩𑒲, 𑒕𑒼𑒛𑓃𑒥 𑒫𑒰𑒢𑒣𑓂𑒩𑒮𑓂𑒟 𑒂𑒬𑓂𑒩𑒧, 𑒯𑒮𑓂𑒞𑒱𑒢𑒰𑒣𑒳𑒩 𑒮𑒱𑓀𑒯𑒰𑒮𑒢𑒏 𑒧𑒰𑒞𑓂𑒩 𑒩𑒏𑓂𑒭𑒰, 𑒏𑒩𑒥 𑒯𑒧 𑒂𑒖𑒢𑓂𑒧।
𑒮𑓀𑒢𑓂𑒨𑒰𑒮 𑒂𑒬𑓂𑒩𑒧 𑒮𑒹𑒯𑒼 𑒕𑒼𑒛𑓃𑒥, 𑒮𑓀𑒞𑒰𑒢 𑒥𑒴𑒗𑒥 𑒯𑒮𑓂𑒞𑒱𑒢𑒰𑒣𑒳𑒩 𑒮𑒱𑓀𑒯𑒰𑒮𑒢𑒏𑒹𑒿। 𑒏𑓂𑒨𑒼 𑒢𑒯𑒱 𑒕𑒴𑒥𑒱 𑒮𑒏𑒞 𑒞𑒏𑒩𑒰, 𑒯𑒧𑒩𑒰 𑒖𑒱𑒥𑒻𑒞-𑒖𑒲𑒥𑒻𑒞।
𑒡𑒢𑓂𑒨-𑒡𑒢𑓂𑒨 𑒠𑒱𑒑𑒰𑒢𑓂𑒞 𑒥𑒰𑒖𑒪, 𑒣𑒳𑒭𑓂𑒣 𑒫𑒩𑓂𑒭𑒰 𑒏𑒋𑒪𑒢𑓂𑒯𑒱 𑒠𑒹𑒫𑒞𑒰𑒑𑒝,
𑒧𑓀𑒔𑒮𑒖𑓂𑒖𑒰𑒏 𑒪𑒹𑒪 𑒅𑒣𑒨𑒳𑒏𑓂𑒞 𑒏𑒫𑒱 𑒥𑓂𑒨𑒰𑒮𑒏 𑒏𑒟𑒢 𑒥𑒳𑒗𑒳 𑒋𑒞𑒋।
𑒦𑒲𑒭𑓂𑒧-𑒦𑒲𑒭𑓂𑒧 𑒡𑒢𑓂𑒨-𑒡𑒢𑓂𑒨, 𑒥𑒰𑒖𑒱 𑒅𑒚𑒪 𑒪𑒼𑒏 𑒮𑒦।
𑒏𑒹𑒫𑒙𑒩𑒰𑒖 𑒏𑒹𑒪𑒢𑓂𑒯𑒱 𑒫𑒱𑒠𑒰, 𑒮𑒞𑓂𑒨𑒫𑒞𑒲𑒏𑒹𑒿 𑒮𑒰𑒢𑒢𑓂𑒠। 𑒏𑒰𑒪𑒰𑓀𑒞𑒩𑒧𑒹 𑒣𑒳𑒞𑓂𑒩 𑒠𑒴, 𑒣𑒰𑒍𑒪 𑒫𑒱𑒔𑒱𑒞𑓂𑒩𑒫𑒲𑒩𑓂𑒨 𑒂 𑒔𑒱𑒞𑓂𑒩𑒰𑓀𑒑𑒠 ।
𑒥𑒰𑒪𑒏 𑒠𑒳𑒢𑒴 𑒕𑒼𑒙𑒹 𑒕𑒪, 𑒬𑒰𑓀𑒞𑒢𑒳𑒏 𑒣𑓂𑒩𑒨𑒰𑒝 𑒦𑒹𑒪। 𑒔𑒱𑒞𑓂𑒩𑒰𑓀𑒑𑒠𑒏 𑒦𑒲𑒭𑓂𑒧, 𑒞𑒐𑒢 𑒩𑒰𑒖𑓂𑒨𑒰𑒦𑒱𑒭𑒹𑒏 𑒏𑒋𑒪।
𑒒𑒧𑓀𑒛𑒲 𑒮𑒹 𑒕𑒪 𑒋𑒯𑒢 𑒏𑒲 𑒠𑒹𑒫 𑒏𑒲 𑒠𑒰𑒢𑒫 𑒥𑒳𑒗𑒨, 𑒏𑒲 𑒑𑓀𑒡𑒩𑓂𑒫 𑒏𑒲 𑒧𑒰𑒢𑒫 𑒏𑒏𑒩𑒼 𑒢𑒯𑒱 𑒙𑒹𑒩 𑒏𑒩𑒨। 𑒂 𑒠𑒹𑒯 𑒕𑒼𑒛𑓃𑒪, 𑒨𑒳𑒠𑓂𑒡 𑒮𑓀𑒑 𑒑𑓀𑒡𑒩𑓂𑒫𑒏 𑒏𑒋|
𑒫𑒱𑒔𑒱𑒞𑓂𑒩𑒫𑒲𑒩𑓂𑒨𑒏 𑒂𑒋𑒪 𑒩𑒰𑒖𑓂𑒨,
𑒦𑒲𑒭𑓂𑒧𑒏𑒹𑒿 𑒣𑒛𑓃𑒪 𑒮𑒧𑓂𑒯𑒰𑒩𑒋, 𑒮𑒦𑒙𑒰 𑒦𑒰𑒩 𑒏𑒰𑒩𑒝 𑒫𑒱𑒔𑒱𑒞𑓂𑒩𑒫𑒲𑒩𑓂𑒨 𑒩𑒯𑒟𑒱 𑒕𑒼𑒙।
𑒤𑒹𑒩 𑒖𑒐𑒢 𑒍 𑒦𑒹𑒪𑒰𑒯 𑒫𑒱𑒫𑒰𑒯 𑒨𑒼𑒑𑓂𑒨,
𑒏𑒰𑒬𑒲𑒩𑒰𑒖𑒏 𑒏𑒢𑓂𑒨𑒰 𑒮𑒦𑒏 𑒮𑓂𑒫𑒨𑓀𑒥𑒩𑒧𑒹,
𑒦𑒲𑒭𑓂𑒧 𑒫𑒱𑒠𑒰 𑒦𑒹𑒪𑒰𑒯 𑒏𑒰𑒬𑒲, 𑒖𑒞𑒋 𑒣𑒯𑒳𑒿𑒔𑒪 𑒕𑒪𑒰𑒯 𑒩𑒰𑒖𑒰 𑒬𑒪𑓂𑒫, 𑒏𑒰𑒬𑒲𑒩𑒰𑒖𑒏 𑒖𑓂𑒨𑒹𑒭𑓂𑒚 𑒣𑒳𑒞𑓂𑒩𑒲, 𑒁𑒧𑓂𑒥𑒰 𑒕𑒪𑒲𑒯 𑒯𑒳𑒢𑒏𑒰𑒣𑒩 𑒁𑒢𑒳𑒩𑒏𑓂𑒞 । 𑒁𑒧𑓂𑒥𑒰,𑒁𑒧𑓂𑒥𑒱𑒏𑒰,𑒁𑒧𑓂𑒥𑒰𑒪𑒱𑒏𑒰, 𑒠𑒵𑒭𑓂𑒙𑒱 𑒤𑒹𑒩𑒪 𑒦𑒲𑒭𑓂𑒧 𑒠𑒱𑒬𑒱। 𑒥𑒜𑒱 𑒑𑒹𑒪𑒲𑒯 𑒂𑒑𑒴 𑒞𑒐𑒢, 𑒦𑒲𑒭𑓂𑒧 𑒏𑓂𑒩𑒼𑒡𑒱𑒞 𑒦𑒋 𑒠𑒯𑒼𑒠𑒱𑒬, 𑒪𑒪𑒏𑒰𑒩𑒱𑒏𑒹𑒿 𑒏𑒯𑒪𑒢𑓂𑒯𑒱 𑒞𑒐𑒢 𑒍 𑒮𑒧𑒮𑓂𑒞 𑒩𑒰𑒖𑒰 𑒮𑒳𑒢𑒱 𑒪𑒱𑒁𑒯 𑒄, 𑒖𑒹 𑒣𑒩𑒰𑒖𑒱𑒞 𑒏𑒋 𑒮𑒏𑒲 𑒞𑒿, 𑒮𑓂𑒫𑒨𑓀𑒥𑒩𑒏 𑒦𑒰𑒑𑒲 𑒥𑒢𑒴 𑒤𑒹𑒩।
𑒮𑒦𑒏𑒹𑒿 𑒯𑒩𑒰𑒏𑒋 𑒦𑒲𑒭𑓂𑒧 𑒖𑒐𑒢, 𑒔𑒪𑒪𑒰𑒯 𑒏𑒰𑒬𑒲𑒩𑒰𑒖𑒏 𑒏𑒢𑓂𑒨𑒰 𑒮𑒧𑒹𑒞। 𑒬𑒪𑓂𑒫 𑒩𑒟𑒏 𑒣𑒰𑒕𑒴 𑒣𑒛𑓃𑒪 𑒂, 𑒪𑒪𑒏𑒰𑒩𑒪 𑒨𑒳𑒠𑓂𑒡𑒏 𑒪𑒹𑒪।
𑒡𑒢𑒳𑒭-𑒫𑒱𑒠𑓂𑒨𑒰 𑒡𑒢𑒲 𑒦𑒲𑒭𑓂𑒧𑒮𑒿, 𑒏𑒰𑒬𑒲𑒩𑒰𑒖𑒏 𑒏𑒢𑓂𑒨𑒰𑒮𑒦 𑒏𑒋𑒪 𑒣𑓂𑒩𑒰𑒩𑓂𑒟𑒢𑒰, 𑒦𑒲𑒭𑓂𑒧 𑒕𑒼𑒛𑓃𑒪 𑒣𑓂𑒩𑒰𑒝 𑒬𑒪𑓂𑒫𑒏, 𑒧𑒳𑒠𑒰 𑒁𑒧𑓂𑒥𑒰 𑒏𑒯𑒪𑒢𑓂𑒯𑒱 𑒦𑒲𑒭𑓂𑒧𑒮𑒿 𑒋𑒏𑒰𑓀𑒞𑒲𑒧𑒹, 𑒯𑒹 𑒑𑓀𑒑𑒹𑒨 𑒡𑒩𑓂𑒧𑒖𑓂𑒘, 𑒯𑒧𑒩𑒰 𑒧𑒼𑒢𑒧𑒹 𑒁𑒕𑒱 𑒋𑒏 𑒑𑒼𑒙 𑒬𑓀𑒏𑒰, 𑒧𑒰𑒢𑒱 𑒪𑒹𑒪 𑒮𑒾𑒦 𑒠𑒹𑒬 𑒩𑒰𑒖𑒰𑒏𑒹𑒿, 𑒣𑒞𑒱 𑒯𑒧 𑒁𑒣𑒢𑒰 𑒯𑒵𑒠𑒨-𑒥𑒱𑒔, 𑒡𑒩𑓂𑒧𑒰𑒞𑓂𑒧𑒰, 𑒧𑒯𑒰𑒞𑓂𑒧𑒰,𑒦𑒲𑒭𑓂𑒧𑒏 𑒢𑒱𑒩𑓂𑒝𑒨,
𑒖𑒰𑒟𑒳 𑒁𑒧𑓂𑒥𑒰 𑒬𑒪𑓂𑒫 𑒪𑒑।
𑒏𑒩𑒰𑒍𑒪 𑒫𑒱𑒫𑒰𑒯 𑒫𑒱𑒔𑒱𑒞𑓂𑒩𑒫𑒲𑒩𑓂𑒨𑒏, 𑒁𑒧𑓂𑒥𑒰-𑒁𑒧𑓂𑒥𑒰𑒪𑒱𑒏𑒰𑒏 𑒮𑓀𑒑।
𑒬𑒰𑒪𑓂𑒫 𑒕𑒪𑒰𑒯 𑒫𑒲𑒩,
𑒦𑒲𑒭𑓂𑒧 𑒯𑒩𑒰𑒍𑒪 𑒪𑒼𑒏 𑒮𑒦𑒏 𑒥𑒱𑒔, 𑒖𑒲𑒞𑒱 𑒪𑒋 𑒑𑒹𑒪 𑒁𑒯𑒰𑒿𑒏𑒹𑒿,
𑒋𑒯𑒱 𑒁𑒣𑒧𑒰𑒢𑒏 𑒥𑒰𑒠 𑒏𑒲 𑒄, 𑒥𑒰𑒞 𑒯𑒧𑒩𑒰 𑒮𑓂𑒫𑒲𑒏𑒰𑒩 𑒯𑒼?
𑒫𑒱𑒔𑒱𑒞𑓂𑒩𑒫𑒲𑒩𑓂𑒨 𑒏𑒯𑒪 𑒮𑒹𑒯𑒼 𑒁𑒧𑓂𑒥𑒰𑒮𑒿 𑒫𑒱𑒫𑒰𑒯 𑒁𑒏𑓂𑒭𑒞𑓂𑒩𑒱𑒨𑒼𑒔𑒱𑒞,
𑒁𑒧𑓂𑒥𑒰 𑒏𑒯𑒪𑒢𑓂𑒯𑒱 𑒦𑒲𑒭𑓂𑒧𑒏𑒹𑒿
𑒫𑒱𑒫𑒰𑒯 𑒏𑒩𑒴 𑒁𑒯𑒰𑒿 𑒯𑒧𑒩𑒰𑒮𑒿।
𑒯𑒩𑒱 𑒁𑒢𑒪𑒯𑒳𑒿, 𑒥𑒲𑒞𑒪 𑒕𑒯 𑒫𑒩𑓂𑒭 𑒯𑒮𑓂𑒞𑒱𑒢𑒰𑒣𑒳𑒩-𑒮𑒾𑒦𑒏 𑒥𑒲𑒔, 𑒦𑒲𑒭𑓂𑒧𑒏 𑒣𑓂𑒩𑒞𑒱𑒖𑓂𑒘𑒰
𑒧𑒳𑒠𑒰 𑒥𑒲𑒔𑒧𑒹 𑒚𑒰𑒜𑓃,
𑒑𑒹𑒪𑒲𑒯 𑒨𑒳𑒠𑓂𑒡𑒠𑒹𑒫 𑒏𑒰𑒩𑓂𑒞𑒱𑒏𑒹𑒨 𑒪𑒑।
𑒁𑒧𑓂𑒥𑒰 𑒦𑒩𑒱 𑒅𑒚𑒪𑒲𑒯 𑒣𑓂𑒩𑒞𑒱𑒬𑒼𑒡𑒮𑒿 ।
𑒠𑒹𑒪𑒢𑓂𑒯𑒱 𑒍 𑒢𑒯𑒱 𑒧𑒾𑒪𑒰𑒨𑒥𑒪𑒰 𑒏𑒧𑒪𑒏 𑒧𑒰𑒪𑒰,
𑒯𑒹 𑒁𑒧𑓂𑒥𑒹! 𑒪𑒱𑒁 𑒄 𑒬𑒮𑓂𑒞𑓂𑒩, 𑒖𑒏𑒩 𑒑𑒰𑒩 𑒣𑒯𑒱𑒩𑒰𑒨𑒥 𑒮𑒻𑒯 𑒏𑒩𑒞 𑒦𑒲𑒭𑓂𑒧𑒏𑒹𑒿 𑒢𑒭𑓂𑒙। 𑒦𑒲𑒭𑓂𑒧𑒏 𑒦𑒨 𑒣𑒩𑒘𑓂𑒔 𑒕𑒪 𑒞𑒞𑒹𑒏, 𑒢𑒯𑒱 𑒞𑒻𑒨𑒰𑒩 𑒦𑒹𑒪 𑒣𑒯𑒱𑒩𑒨 𑒄 𑒧𑒰𑒪𑒰 𑒏𑓂𑒨𑒼 𑒋𑒏। 𑒮𑒳𑒢𑒪𑒢𑓂𑒯𑒱 𑒕𑒟𑒱 𑒠𑓂𑒩𑒳𑒣𑒠 𑒫𑒲𑒩 𑒣𑒰𑓀𑒔𑒰𑒪, 𑒮𑒹𑒯𑒼 𑒞𑒻𑒨𑒰𑒩 𑒢𑒯𑒱 𑒦𑒹𑒪𑒰𑒯 𑒣𑒯𑒱𑒩𑒋 𑒄 𑒧𑒰𑒪। 𑒒𑒳𑒩𑒪𑒲𑒯 𑒁𑒧𑓂𑒥𑒰 𑒁𑓀𑒞𑒧𑒹 𑒯𑒰𑒩𑒱, 𑒢𑒱𑒩𑒰𑒬 𑒯𑒞𑒰𑒬 𑒪𑒙𑒏𑒹𑒪𑒢𑓂𑒯𑒱 𑒠𑓂𑒩𑒳𑒣𑒠𑒏 𑒧𑒯𑒪𑒏 𑒠𑓂𑒫𑒰𑒩𑒱।
𑒑𑒹𑒪𑒲𑒯 𑒍 𑒞𑒣𑒮𑓂𑒫𑒲𑒏 𑒬𑒩𑒝। 𑒮𑒦 𑒞𑒣𑒮𑓂𑒫𑒲 𑒏𑒋 𑒫𑒱𑒔𑒰𑒩 𑒏𑒯𑒪𑒢𑓂𑒯𑒱, 𑒖𑒰𑒆 𑒁𑒯𑒰𑒿 𑒣𑒩𑒳𑒬𑒩𑒰𑒧𑒏 𑒂𑒬𑓂𑒩𑒧।
𑒏𑓂𑒭𑒞𑓂𑒩𑒱𑒨-𑒠𑒧𑒢 𑒕𑒟𑒱 𑒍 𑒠𑒹𑒟𑒱𑒢𑓂𑒯 𑒠𑒝𑓂𑒛 𑒦𑒲𑒭𑓂𑒧𑒏𑒹𑒿, 𑒖𑒹 𑒏𑒭𑓂𑒙 𑒠𑒹𑒪𑒢𑓂𑒯𑒱 𑒁𑒏𑒰𑒩𑒝।
𑒣𑒩𑒬𑒳𑒩𑒰𑒧 𑒪𑒑 𑒣𑒯𑒳𑒿𑒔𑒱 𑒏𑒹𑒪𑒢𑓂𑒯𑒱 𑒣𑓂𑒩𑒰𑒩𑓂𑒟𑒢𑒰, 𑒮𑒳𑒢𑒰 𑒏𑒋 𑒁𑒣𑒢 𑒁𑒦𑓂𑒨𑒩𑓂𑒟𑒢𑒰। 𑒣𑒩𑒬𑒳𑒩𑒰𑒧 𑒏𑒯𑒪 𑒬𑒪𑓂𑒫 𑒁𑒕𑒱 𑒣𑓂𑒩𑒱𑒨 𑒯𑒧𑒩,
𑒥𑒰𑒞 𑒢𑒯𑒱 𑒏𑒰𑒙𑒞 𑒫𑒱𑒫𑒰𑒯 𑒬𑒪𑓂𑒫𑒮𑒿 𑒏𑒩𑒏 𑒪𑒹𑒪 𑒕𑒲 𑒞𑒻𑒨𑒰𑒩 𑒁𑒯𑒰𑒿 ? 𑒁𑒧𑓂𑒥𑒰 𑒏𑒯𑒪 𑒯𑒧 𑒂𑒥 𑒫𑒱𑒫𑒰𑒯 𑒢𑒯𑒱 𑒏𑒩𑒋 𑒔𑒰𑒯𑒻𑒞 𑒕𑒲।
𑒁𑒕𑒱 𑒯𑒧𑒩 𑒂𑒥 𑒄 𑒃𑒔𑓂𑒕𑒰 𑒧𑒰𑒞𑓂𑒩, 𑒏𑒩𑒴 𑒦𑒲𑒭𑓂𑒧𑒮𑒿 𑒨𑒳𑒠𑓂𑒡 𑒁𑒯𑒰𑒿।
𑒣𑒩𑒬𑒳𑒩𑒰𑒧 𑒏𑒋 𑒮𑓂𑒫𑒲𑒏𑒰𑒩 𑒄 𑒣𑓂𑒩𑒰𑒩𑓂𑒟𑒢𑒰, 𑒠𑒹𑒪𑒢𑓂𑒯𑒱 𑒦𑒲𑒭𑓂𑒧𑒏𑒹𑒿 𑒪𑒪𑒏𑒰𑒩𑒰, 𑒖𑒱𑒞𑒹𑒢𑓂𑒠𑓂𑒩𑒲𑒨,𑒥𑓂𑒩𑒯𑓂𑒧𑒔𑒰𑒩𑒲 𑒕𑒪𑒰𑒯 𑒠𑒳𑒢𑒴, 𑒡𑒢𑒳𑒩𑓂𑒡𑒰𑒩𑒲-𑒨𑒼𑒠𑓂𑒡𑒰 𑒧𑒡𑓂𑒨 𑒨𑒳𑒠𑓂𑒡𑒒𑒼𑒭 𑒥𑒩𑒳।
𑒯𑒰𑒩𑒱-𑒖𑒲𑒞𑒏 𑒣𑓂𑒩𑒬𑓂𑒢 𑒢𑒯𑒱 𑒕𑒪 𑒖𑓂𑒨𑒼𑒿, 𑒁𑒢𑒱𑒩𑓂𑒝𑒰𑒨𑒏 𑒨𑒳𑒠𑓂𑒡 𑒥𑒢𑒪,
𑒁𑒧𑓂𑒥𑒰 𑒯𑒰𑒩𑒱 𑒏𑒻𑒪𑒰𑒬𑒏 𑒠𑒱𑒬𑒱 𑒣𑓂𑒩𑒨𑒰𑒝 𑒏𑒋𑒪, 𑒑𑒹𑒪𑒲𑒯 𑒬𑒧𑓂𑒦𑒴𑒏 𑒬𑒩𑒝𑒧𑒹।
𑒣𑒰𑒥𑒱 𑒫𑒩 𑒣𑒳𑒢𑒩𑓂𑒖𑒢𑓂𑒧𑒏 𑒥𑒰𑒠, 𑒦𑒲𑒭𑓂𑒧𑒏 𑒧𑒵𑒞𑓂𑒨𑒳 𑒧𑒹 𑒯𑒼𑒋𑒞 𑒁𑒯𑒲𑓀𑒏 𑒯𑒰𑒟।
𑒁𑒧𑓂𑒥𑒰𑒏 𑒮𑓀𑒨𑒧𑒏 𑒮𑒹𑒯𑒼 𑒕𑒪 𑒮𑒲𑒧𑒰, 𑒏𑒴𑒠𑒱 𑒔𑒱𑒞𑒰𑒧𑒹 𑒣𑒳𑒢𑒩𑓂𑒖𑒢𑓂𑒧𑒏 𑒪𑒾𑒪𑒮𑒰𑒧𑒹। 𑒧𑒵𑒞𑓂𑒨𑒳 𑒣𑒰𑒥𑒱 𑒖𑒢𑓂𑒧 𑒪𑒹𑒪 𑒞𑒐𑒢, 𑒏𑒢𑓂𑒨𑒰 𑒥𑒢𑒱 𑒠𑓂𑒩𑒳𑒣𑒠𑒏 𑒧𑒯𑒪𑒧𑒹।
𑒐𑒹𑒪-𑒐𑒹𑒪𑒧𑒹 𑒧𑒰𑒪𑒰 𑒣𑒯𑒱𑒩𑒪 𑒁𑒣𑒢 𑒙𑒰𑒿𑒑𑒪, 𑒠𑓂𑒩𑒳𑒣𑒠 𑒮𑒼𑒔𑒪 𑒯𑒼𑒋𑒞 𑒋𑒏𑒙𑒰 𑒤𑒹𑒩, 𑒫𑒻𑒩 𑒦𑒲𑒭𑓂𑒧𑒏 𑒁𑒋𑒞 𑒑𑓄 𑒗𑒧𑒹𑒪।
𑒢𑒱𑒏𑒰𑒪𑒱 𑒩𑒰𑒖𑒧𑒯𑒪𑒮𑒿 𑒏𑒢𑓂𑒨𑒰𑒏𑒹𑒿, 𑒖𑓀𑒑𑒪 𑒠𑒱𑒬𑒱 𑒍 𑒑𑒹𑒪𑒱 𑒞𑒣𑒮𑓂𑒨𑒰 𑒏𑒋𑒪,
𑒣𑒰𑒍𑒪 𑒣𑒳𑒩𑒳𑒭 𑒩𑒴𑒣 𑒡𑒩𑒪 𑒬𑒱𑒐𑒝𑓂𑒛𑒲 𑒢𑒰𑒧, 𑒍𑒏𑒩𑒰 𑒕𑒪 𑒮𑒦𑒙𑒰 𑒧𑒼𑒢।
𑒫𑒱𑒔𑒱𑒞𑓂𑒩𑒫𑒲𑒩𑓂𑒨𑒏 𑒩𑒰𑒖 𑒮𑒹𑒯𑒼 𑒔𑒪𑒪 𑒥𑒛𑓂𑒛 𑒟𑒼𑒛𑓃 𑒠𑒱𑒢। 𑒏𑓂𑒭𑒨𑒏 𑒥𑒲𑒧𑒰𑒩𑒲 𑒕𑒪 𑒁𑒪𑓂𑒣𑒰𑒨𑒳 𑒧𑒹 𑒧𑒵𑒞𑓂𑒨𑒳𑒏 𑒁𑒠𑒱𑒢। 𑒡𑒵𑒞𑒩𑒰𑒭𑓂𑒙𑓂𑒩𑒏 𑒂 𑒣𑒰𑓀𑒛𑒳𑒏 𑒖𑒢𑓂𑒧𑒼 𑒢𑒯𑒱 𑒦𑒹𑒪।
𑒁𑓀𑒥𑒱𑒏𑒰𑒏 𑒣𑒳𑒞𑓂𑒩 𑒡𑒵𑒞𑒩𑒰𑒭𑓂𑒙𑓂𑒩,𑒁𑓀𑒥𑒰𑒪𑒱𑒏𑒰 𑒣𑒳𑒞𑓂𑒩 𑒣𑒰𑒝𑓂𑒛𑒳 𑒕𑒪।
𑒫𑒱𑒡𑒱𑒏 𑒫𑒱𑒡𑒰𑒢 𑒕𑒪, 𑒖𑓂𑒨𑒹𑒭𑓂𑒚 𑒣𑒳𑒞𑓂𑒩 𑒁𑓀𑒡 𑒦𑒹𑒪, 𑒁𑒧𑓂𑒥𑒱𑒏𑒰 𑒮𑒿 𑒣𑒳𑒞𑓂𑒩 𑒡𑒵𑒞𑒩𑒰𑒭𑓂𑒙𑓂𑒩, 𑒏𑒰𑒪 𑒕𑒱𑒢𑒪𑒏 𑒂𑒿𑒐𑒱, 𑒂 𑒏𑒰𑒪 𑒥𑒢𑒍𑒪𑒏 𑒏𑒯𑒥𑒲𑒏 𑒣𑒰𑒿𑒞𑒱
𑒁𑒧𑓂𑒥𑒰𑒪𑒱𑒏𑒰 𑒣𑒳𑒞𑓂𑒩 𑒣𑒰𑒝𑓂𑒛𑒳, 𑒣𑒾𑒝𑓂𑒛𑓂𑒩 𑒩𑒼𑒑 𑒑𑓂𑒩𑒮𑒱𑒞 𑒞𑒹𑒿 𑒥𑓂𑒨𑒰𑒮 𑒠𑒹𑒪 𑒢𑒰𑒧 𑒄,
𑒂𑒏𑒱 𑒯𑒳𑒢𑒏𑒹𑒿 𑒮𑒿 𑒩𑒼𑒑𑒏 𑒣𑒛𑓃𑒪 𑒢𑒰𑒧 𑒄।
𑒣𑒾𑒝𑓂𑒛𑓂𑒩 𑒑𑓂𑒩𑒮𑓂𑒞 𑒣𑒰𑒝𑓂𑒛𑒳𑒏𑒹𑒿 𑒩𑒰𑒖𑓂𑒨-𑒏𑒰𑒖 𑒑𑒹𑒪 𑒠𑒹𑒪 ।
𑒁𑓀𑒥𑒱𑒏𑒰𑒏 𑒠𑒰𑒮𑒲𑒮𑒿 𑒫𑒱𑒠𑒳𑒩𑒏 𑒦𑒹𑒪 𑒖𑒢𑓂𑒧 𑒕𑒪। 𑒬𑒱𑒏𑓂𑒭𑒰 𑒯𑒼𑒧𑒨 𑒪𑒰𑒑𑒪 𑒮𑒦𑒏 𑒦𑒲𑒭𑓂𑒧𑒏 𑒮𑓀𑒩𑒏𑓂𑒭𑒝𑒧𑒹, 𑒦𑒲𑒭𑓂𑒧𑒏𑒹𑒿 𑒔𑒱𑓀𑒞𑒰 𑒦𑒹𑒪 𑒫𑒱𑒫𑒰𑒯 𑒏𑒼𑒢𑒰 𑒯𑒼𑒨𑒞 𑒑𑒋, 𑒡𑒵𑒞𑒩𑒰𑒭𑓂𑒙𑓂𑒩𑒏 𑒯𑒹𑒞𑒳 𑒞𑒰𑒏𑒪 𑒋𑒏 𑒏𑒢𑓂𑒨𑒰𑒏𑒹𑒿। 𑒬𑒱𑒫𑒏 𑒫𑒩𑒠𑒰𑒢 𑒕𑒪 𑒑𑒰𑓀𑒡𑒰𑒩𑒲𑒏𑒹 𑒮𑒋 𑒣𑒳𑒞𑓂𑒩𑒏, 𑒥𑒜𑓃𑒞 𑒫𑓀𑒬 𑒬𑒼𑒔𑒪 𑒄 𑒣𑓂𑒩𑒨𑒞𑓂𑒢 𑒮𑒹 𑒣𑓂𑒩𑒰𑒩𑒧𑓂𑒦 𑒏𑒋𑒪।
𑒑𑒰𑓀𑒡𑒰𑒩 𑒢𑒩𑒹𑒬 𑒮𑒳𑒥𑒪 𑒦𑒹𑒪𑒰𑒯 𑒏𑒟𑒰 𑒪𑒹𑒪 𑒞𑒻𑒨𑒰𑒩 𑒖𑒐𑒢, 𑒫𑒱𑒫𑒰𑒯 𑒡𑒵𑒞𑒩𑒰𑒭𑓂𑒙𑓂𑒩𑒏 𑒦𑒹𑒪 𑒕𑒪𑒲𑒯 𑒍 𑒬𑒏𑒳𑒢𑒱𑒏 𑒥𑒯𑒱𑒢।
𑒮𑒳𑒢𑒱 𑒣𑒞𑒱𑒏 𑒁𑓀𑒡𑒞𑒰𑒏 𑒑𑒣𑓂𑒣 𑒣𑒙𑓂𑒙𑒲 𑒥𑒰𑒢𑓂𑒯𑒪, 𑒂𑒿𑒐𑒱 𑒩𑒯𑒱𑒞𑒯𑒳 𑒢𑒹𑒞𑓂𑒩𑒯𑒲𑒢𑒏 𑒖𑒱𑒢𑒑𑒲 𑒑𑒳𑒖𑒰𑒩𑒪।
𑒮𑒨 𑒣𑒳𑒞𑓂𑒩𑒏 𑒧𑒰𑒞𑒰 𑒕𑒪 𑒠𑒳𑓁𑒬𑒪𑒰 𑒋𑒏 𑒣𑒳𑒞𑓂𑒩𑒲, 𑒮𑒱𑓀𑒡𑒳 𑒢𑒩𑒹𑒬 𑒖𑒨𑒠𑓂𑒩𑒟 𑒦𑒹𑒪 𑒖𑒱𑒢𑒏𑒩 𑒣𑒞𑒱।
𑒏𑒵𑒭𑓂𑒝𑒏 𑒣𑒱𑒞𑒰 𑒫𑒰𑒮𑒳𑒠𑒹𑒫𑒏 𑒥𑒯𑒱𑒢 𑒕𑒪𑒱 𑒣𑒵𑒟𑒰, 𑒬𑒴𑒩𑒮𑒹𑒢𑒏 𑒣𑒳𑒞𑓂𑒩𑒲 𑒕𑒪𑒲𑒯 𑒩𑒯𑒪𑒲𑒯 𑒖𑒰𑒋 𑒧𑒳𑒠𑒰, 𑒣𑒱𑒞𑒰𑒏 𑒣𑒱𑒮𑒱𑒨𑒾𑒞 𑒏𑒳𑓀𑒞𑒲𑒦𑒼𑒖 𑒕𑒪 𑒮𑓀𑒞𑒰𑒢𑒯𑒲𑒢, 𑒯𑒳𑒢𑒏𑒹 𑒮𑓂𑒢𑒹𑒯 𑒦𑒹𑒙𑒪 𑒣𑒵𑒟𑒰 𑒦𑒹𑒪𑒱 𑒏𑒳𑓀𑒞𑒲 𑒣𑒳𑒢𑒱।
𑒏𑒵𑒭𑓂𑒝-𑒮𑒳𑒠𑒩𑓂𑒬𑒢, 𑒥𑒪𑒩𑒰𑒧𑒏 𑒠𑒲𑒠𑒲 𑒦𑒹𑒪𑒲𑒯, 𑒮𑒞𑓂𑒏𑒰𑒩 𑒫𑒱𑒣𑓂𑒩𑒫𑒩𑒏 𑒏𑒩𑒻𑒞 𑒕𑒪𑒲𑒯। 𑒋𑒯𑒱𑒢𑒰 𑒋𑒏 𑒥𑒹𑒩 𑒠𑒳𑒩𑓂𑒫𑒰𑒮𑒰 𑒠𑒹𑒪 𑒧𑓀𑒞𑓂𑒩 𑒋𑒏𑒙𑒰, 𑒣𑒜𑓃𑒥 𑒧𑒼𑒢𑒮𑒿 𑒠𑒹𑒫 𑒁𑒋𑒞 𑒥𑒖𑒹𑒥𑒢𑒱 𑒖𑒱𑒢𑒏𑒰।
𑒥𑓂𑒨𑒰𑒮𑒏 𑒄 𑒏𑒫𑒱𑒞𑓂𑒫 𑒧𑒼𑒢𑒏 𑒥𑒰𑒞 𑒏𑒯𑒪𑒏,
𑒫𑒩-𑒧𑓀𑒞𑓂𑒩-𑒣𑒳𑒢𑒩𑓂𑒖𑒢𑓂𑒧 𑒮𑒥𑒯𑒏 𑒞𑒞𑓂𑒞𑓂𑒫 𑒞𑒏𑒪𑒏।
𑒢𑒹𑒢𑒧𑒞𑒱 𑒥𑒳𑒠𑓂𑒡𑒱 𑒕𑒪 𑒏𑒳𑒢𑓂𑒞𑒲𑒏, 𑒮𑒴𑒩𑓂𑒨𑒏𑒹𑒿 𑒥𑒖𑒰𑒍𑒪,
𑒣𑒳𑒞𑓂𑒩-𑒣𑓂𑒩𑒰𑒣𑓂𑒞𑒱 𑒦𑒹𑒪 𑒮𑒹 𑒥𑒰𑒡𑒏 𑒕𑒪 𑒪𑒼𑒏𑒪𑒰𑒖, 𑒥𑒯𑒰 𑒠𑒹𑒪 𑒥𑒔𑓂𑒔𑒰𑒏𑒹𑒿 𑒥𑒱𑒔 𑒑𑓀𑒑𑒡𑒰𑒩।
𑒏𑒾𑒩𑒫𑒏 𑒮𑒰𑒩𑒟𑒲 𑒁𑒡𑒲𑒩𑒟𑒏𑒹𑒿 𑒦𑒹𑒙𑒪 𑒍, 𑒏𑒩𑓂𑒝 𑒩𑒰𑒡𑒹𑒨 𑒧𑒰𑒋 𑒩𑒰𑒡𑒰 𑒣𑒼𑒭𑒱𑒞 𑒮𑒴𑒞𑒣𑒳𑒞𑓂𑒩 𑒣𑒩𑒰𑒏𑓂𑒩𑒧𑒲, 𑒬𑒩𑒲𑒩 𑒏𑒫𑒔𑒨𑒳𑒏𑓂𑒞 𑒏𑒰𑒢 𑒏𑒳𑓀𑒛𑒪𑒮𑒿 𑒬𑒼𑒦𑒱𑒞।
𑒣𑒰𑒝𑓂𑒛𑒳𑒏 𑒤𑒹𑒩 𑒏𑒳𑓀𑒞𑒲𑒮𑒿 𑒫𑒱𑒫𑒰𑒯 𑒦𑒹𑒪,
𑒧𑒠𑓂𑒩𑒢𑒩𑒹𑒬𑒏 𑒣𑒳𑒞𑓂𑒩𑒲 𑒧𑒰𑒠𑓂𑒩𑒲 𑒠𑒼𑒮𑒩 𑒣𑒞𑓂𑒢𑒲 𑒦𑒹𑒪𑒱।
𑒣𑒰𑒝𑓂𑒛𑒳 𑒨𑒳𑒠𑓂𑒡-𑒏𑒰𑒩𑓂𑒨 𑒧𑒰𑒞𑓂𑒩 𑒏𑒋𑒪 𑒖𑒲𑒞𑒱 𑒩𑒰𑒖, 𑒠𑒴𑒩 𑒩𑒯𑒱 𑒩𑒰𑒖-𑒏𑒰𑒖 𑒦𑒼𑒑𑒪 𑒮𑒳𑒐 𑒧𑒰𑒞𑓂𑒩 !
𑒏𑒳𑓀𑒞𑒲-𑒧𑒰𑒠𑓂𑒩𑒲𑒏 𑒮𑓀𑒑 𑒫𑒢-𑒫𑒱𑒔𑒩𑒝 𑒧𑒹 𑒩𑒞।
𑒬𑒱𑒏𑒰𑒩 𑒐𑒹𑒪𑒰𑒃𑒞 𑒫𑒢𑒧𑒹,
𑒋𑒏 𑒧𑒳𑒢𑒱 𑒬𑓂𑒩𑒰𑒣 𑒠𑒹𑒪 𑒮𑓀𑒞𑒰𑒢𑒫𑒱𑒯𑒲𑒢𑒞𑒰𑒏।
𑒣𑒰𑒝𑓂𑒛𑒳𑒏 𑒮𑓀𑒞𑒰𑒢 𑒣𑓂𑒩𑒰𑒣𑓂𑒞𑒱𑒏 𑒃𑒔𑓂𑒕𑒰 𑒠𑒹𑒐𑒱 𑒏𑒳𑓀𑒞𑒲, 𑒐𑒼𑒪𑒪𑒢𑓂𑒯𑒱 𑒠𑒳𑒩𑓂𑒫𑒰𑒮𑒰𑒏 𑒠𑒹𑒪 𑒧𑓀𑒞𑓂𑒩𑒏 𑒦𑒹𑒠। 𑒨𑒧𑒮𑒿 𑒡𑒩𑓂𑒧𑒩𑒰𑒖,𑒦𑒲𑒧𑒮𑒹𑒢 𑒫𑒰𑒨𑒳𑒮𑒿,
𑒃𑓀𑒠𑓂𑒩𑒮𑒿 𑒁𑒩𑓂𑒖𑒳𑒢 𑒏𑒳𑓀𑒞𑒲𑒏 𑒣𑒳𑒞𑓂𑒩 𑒞𑒲𑒢 𑒦𑒹𑒪।
𑒏𑒳𑓀𑒞𑒲𑒏 𑒧𑓀𑒞𑓂𑒩𑒮𑒿 𑒧𑒰𑒠𑓂𑒩𑒲𑒏𑒹𑒿 𑒦𑒹𑒪 𑒣𑒳𑒞𑓂𑒩𑒏 𑒂𑒬।
𑒁𑒬𑓂𑒫𑒱𑒢𑒠𑓂𑒫𑒨 𑒮𑒿 𑒦𑒹𑒪 𑒢𑒏𑒳𑒪-𑒮𑒯𑒠𑒹𑒫 𑒣𑓂𑒩𑒰𑒣𑓂𑒞।
𑒣𑒰𑒝𑓂𑒛𑒳𑒏 𑒧𑒵𑒞𑓂𑒨𑒳 𑒣𑓀𑒔𑒣𑒰𑒝𑓂𑒛𑒫 𑒖𑒢𑓂𑒧𑒏 𑒥𑒰𑒠, 𑒦𑒹𑒪𑒲𑒯 𑒮𑒞𑒲 𑒣𑒞𑒱𑒏 𑒮𑓀𑒑 𑒧𑒰𑒠𑓂𑒩𑒲 𑒫𑒢𑒯𑒱𑒧𑒹।
𑒣𑒰𑒝𑓂𑒛𑒫 𑒍 𑒏𑒳𑓀𑒞𑒲𑒏𑒹𑒿 𑒥𑒼𑒢𑒮𑒿 𑒯𑒮𑓂𑒞𑒱𑒢𑒰𑒣𑒳𑒩,
𑒁𑒢𑒪𑒢𑓂𑒯𑒱 𑒢𑒑𑒩𑒧𑒹 𑒮𑒦 𑒫𑒢𑒏 𑒧𑒳𑒢𑒱𑒫𑒩 𑒮𑒦। 𑒣𑓀𑒔 𑒣𑒰𑒝𑓂𑒛𑒫𑒏 𑒮𑓀𑒑 𑒂𑒨𑒪𑒱 𑒏𑒳𑓀𑒞𑒲 𑒢𑒑𑒩।
𑒖𑒳𑒧𑒱 𑒑𑒹𑒪 𑒮𑒦 𑒢𑒩 𑒢𑒰𑒩𑒲 𑒚𑒰𑒧-𑒚𑒰𑒧𑒹। 𑒇𑒭𑒱-𑒧𑒳𑒢𑒱 𑒫𑒢 𑒣𑓂𑒩𑒰𑒝𑒲𑒏 𑒮𑓀𑒑𑒞𑒱𑒧𑒹 𑒬𑒲𑒪। 𑒧𑒳𑒑𑓂𑒡𑒱𑒞 𑒮𑒳𑒬𑒲𑒪 𑒣𑒰𑒝𑓂𑒛𑒫𑒏𑒹𑒿 𑒧𑒼𑒢 𑒦𑒩𑒱 𑒠𑒹𑒐𑒱-𑒑𑒳𑒝𑒱।
𑒏𑒵𑒣𑒰𑒔𑒰𑒩𑓂𑒨𑒏 𑒂𑒔𑒰𑒩𑓂𑒨𑒞𑓂𑒫𑒧𑒹 𑒬𑒱𑒏𑓂𑒭𑒰, 𑒣𑒰𑒥𑒱 𑒩𑒯𑒪 𑒠𑒳𑒩𑓂𑒨𑒼𑒡𑒢 𑒏𑒾𑒩𑒫, 𑒣𑒰𑒥𑒱 𑒮𑒏𑒋 𑒕𑒟𑒱 𑒯𑒳𑒢𑒏𑒹 𑒪𑒑 𑒩𑒯𑒱, 𑒣𑒰𑒝𑓂𑒛𑒫 𑒖𑒢 𑒮𑒦 𑒬𑒱𑒏𑓂𑒭𑒰 𑒄 𑒮𑒦 ।
𑒡𑒵𑒞𑒩𑒰𑒭𑓂𑒙𑓂𑒩 𑒮𑒼𑒔𑒱 𑒄 𑒞𑒐𑒢 𑒏𑒋𑒪, 𑒞𑒰𑒯𑒱 𑒞𑒩𑒯𑒏 𑒫𑓂𑒨𑒫𑒮𑓂𑒟𑒰, 𑒠𑒳𑒩𑓂𑒨𑒼𑒡𑒢-𑒏𑒾𑒩𑒫𑒏 𑒮𑓀𑒑 𑒩𑒯𑒞𑒰𑒯
𑒣𑓀𑒔 𑒣𑒰𑒝𑓂𑒛𑒫 𑒦𑓂𑒩𑒰𑒞𑒰।
𑒦𑒲𑒧 𑒕𑒪𑒰𑒯 𑒥𑒪𑒬𑒰𑒪𑒲 𑒮𑒦𑒧𑒹, 𑒠𑒳𑒩𑓂𑒨𑒼𑒡𑒢𑒧𑒹 𑒕𑒪 𑒃𑒩𑒐𑒰 𑒥𑒛𑓃। 𑒏𑒩𑒋 𑒪𑒰𑒑𑒪 𑒠𑒳𑒩𑓂𑒨𑒼𑒡𑒢 𑒦𑒲𑒧𑒏, 𑒧𑒵𑒞𑓂𑒨𑒳 𑒨𑒼𑒖𑒢𑒰 𑒑𑓀𑒑𑒹 𑒞𑒙 !
𑒖𑒪 𑒏𑓂𑒩𑒲𑒛𑓃𑒰𑒏 𑒯𑒹𑒞𑒳 𑒑𑒹𑒪 𑒪𑒋, 𑒞𑒙 𑒠𑒳𑒩𑓂𑒨𑒼𑒡𑒢 𑒣𑒰𑒝𑓂𑒛𑒫𑒏𑒹𑒿। 𑒐𑒰𑒠𑓂𑒨 𑒧𑒡𑓂𑒨 𑒧𑒱𑒪𑒰𑒍𑒪 𑒫𑒱𑒭, 𑒐𑒼𑒂𑒍𑒪 𑒦𑒼𑒖𑒢 𑒦𑒲𑒧𑒯𑒱𑒏𑒹𑒿।
𑒮𑒦 𑒑𑒹𑒪 𑒢𑒯𑒰𑒥𑒋 𑒑𑓀𑒑𑒧𑒡𑓂𑒨, 𑒢𑒬𑒰 𑒦𑒲𑒧𑒏𑒹𑒿 𑒂𑒨𑒪,
𑒏𑒰𑒞 𑒁𑒥𑒻𑒞 𑒐𑒮𑒪𑒰𑒯 𑒍𑒞𑒋 𑒦𑒲𑒧 𑒁𑒛𑓃𑒩𑒰 𑒏𑒨 ।
𑒠𑒳𑒩𑓂𑒨𑒼𑒡𑒢 𑒥𑒰𑒢𑓂𑒯𑒪 𑒪𑒞𑒰𑒏𑒳𑒘𑓂𑒖 𑒮𑒿 । 𑒤𑒹𑒏𑒪 𑒡𑒰𑒩𑒧𑒹 𑒍𑒏𑒩𑒰 𑒢𑒱𑒬𑓂𑒔𑒱𑓀𑒞, 𑒞𑓂𑒩𑒰𑒮 𑒧𑒳𑒏𑓂𑒞 𑒏𑒾𑒩𑒫𑒒𑒳𑒩𑒱 𑒂𑒨𑒪। 𑒑𑓀𑒑 𑒧𑒡𑓂𑒨 𑒛𑒿𑒮𑒪𑒏 𑒋𑒏 𑒢𑒰𑒑, 𑒫𑒱𑒭 𑒏𑒙𑒪𑒏 𑒫𑒱𑒭𑒏𑒹𑒿 !
𑒮𑒹 𑒠𑒹𑒐𑒴 𑒏𑒰𑒙𑒞 𑒏𑒹 𑒣𑒰𑒝𑓂𑒛𑒫𑒏 𑒦𑒰𑒑।
𑒫𑒱𑒭𑒏 𑒣𑓂𑒩𑒦𑒰𑒫 𑒦𑒹𑒪 𑒠𑒴𑒩, 𑒦𑒲𑒧 𑒔𑒪𑒪𑒰𑒯 𑒒𑒩𑒏𑒹𑒿, 𑒅𑒚𑒪𑒰𑒯 𑒗𑒳𑒧𑒻𑒞 𑒯𑒼𑒃𑒞 𑒧𑒠𑒧𑒮𑓂𑒞, 𑒏𑒟𑒰 𑒮𑒳𑒢𑒰𑒥𑒋 𑒦𑓂𑒩𑒰𑒞𑒰𑒏𑒹𑒿।
𑒨𑒳𑒡𑒱𑒭𑓂𑒚𑒱𑒩 𑒒𑒩𑒧𑒹 𑒮𑒼𑒔𑒟𑒱, 𑒦𑒲𑒧 𑒣𑒯𑒳𑒿𑒔𑒱 𑒑𑒹𑒪 𑒯𑒼𑒋𑒞𑒰𑒯। 𑒢𑒯𑒱 𑒠𑒹𑒐𑒪 𑒒𑒩 𑒦𑒲𑒧, 𑒧𑒰𑒟 𑒣𑒩 𑒥𑒪 𑒁𑒋𑒪𑒢𑓂𑒯𑒱 𑒏𑒢𑒹𑒙𑒰।
𑒞𑒰𑒫𑒞 𑒦𑒲𑒧 𑒗𑒴𑒧𑒱 𑒁𑒋𑒪𑒰𑒯, 𑒭𑒛𑒨𑓀𑒞𑓂𑒩𑒏 𑒏𑒟𑒰 𑒮𑒳𑒢𑒰𑒍𑒪 । 𑒏𑒳𑓀𑒞𑒲 𑒔𑒱𑓀𑒞𑒱𑒞 𑒦𑒹𑒪𑒱 𑒫𑒱𑒠𑒳𑒩𑒮𑒿, 𑒣𑒴𑒕𑒪 𑒦𑒹𑒪 𑒄 𑒅𑒔𑒱𑒞 !
𑒫𑒱𑒠𑒳𑒩 𑒥𑒳𑒗𑒰𑒍𑒪 𑒣𑒰𑒝𑓂𑒛𑒫 𑒕𑒟𑒱 𑒥𑒪𑒬𑒰𑒪𑒲 𑒏𑒱𑒘𑓂𑒔𑒱𑒞। 𑒯𑒳𑒢𑒏𑒩 𑒠𑒳𑒩𑓂𑒨𑒼𑒡𑒢 𑒏𑒩𑒱 𑒣𑒰𑒍𑒞, 𑒢𑒯𑒱 𑒏𑒼𑒢𑒼 𑒁𑒯𑒱𑒞।
𑒦𑒲𑒧𑒏𑒹𑒿 𑒖𑒱𑒥𑒻𑒞 𑒠𑒹𑒐𑒱 𑒠𑒳𑒩𑓂𑒨𑒼𑒡𑒢-𑒦𑓂𑒩𑒰𑒞𑒰, 𑒧𑒼𑒢 𑒧𑒮𑒼𑒮𑒱 𑒩𑒯𑒱 𑒑𑒹𑒪 𑒍 𑒠𑒳𑒭𑓂𑒙 𑒠𑒳𑒩𑒰𑒞𑓂𑒧𑒰।
𑒏𑒾𑒩𑒫 𑒣𑒰𑒝𑓂𑒛𑒫 𑒪𑒲𑒢 𑒏𑓀𑒠𑒳𑒏 𑒐𑒹𑒪𑒱 𑒩𑒯𑒪। 𑒏𑓀𑒠𑒳𑒏 𑒐𑒮𑒪 𑒃𑒢𑒰𑒩𑒧𑒹 𑒢𑒯𑒱 𑒢𑒱𑒏𑒪𑒱 𑒩𑒯𑒪। 𑒮𑒼𑒗𑒯𑒱 𑒕𑒪 𑒋𑒏 𑒬𑒱𑒁𑒏 𑒥𑒰𑒙𑒹 𑒂𑒥𑒱 𑒩𑒯𑒪, 𑒞𑒹𑒖 𑒖𑒏𑒩 𑒍𑒏𑒩 𑒧𑒯𑒱𑒧𑒰 𑒕𑒪 𑒑𑒰𑒥𑒱 𑒩𑒯𑒪।
𑒥𑒰𑒝𑒏 𑒫𑒰𑒩 𑒣𑒳𑒢𑒱 𑒣𑒳𑒢𑒱 𑒏𑒋𑒪 𑒤𑒹𑒩 𑒆𑒣𑒩𑒮𑒿, 𑒐𑒹𑓀𑒔𑒱 𑒏𑒨 𑒢𑒱𑒏𑒰𑒪𑒪 𑒑𑒹𑓀𑒠 𑒡𑒢𑒳𑒩𑓂𑒫𑒱𑒠𑓂𑒨𑒰𑒏𑒾𑒬𑒪𑒮𑒿।
𑒦𑒲𑒭𑓂𑒧𑒏𑒹𑒿 𑒮𑒳𑒢𑒰𑒋𑒪 𑒥𑒰𑒪𑒫𑒵𑒢𑓂𑒠 𑒏𑒪𑒰𑒏𑒰𑒩𑒲 𑒍𑒏𑒩, 𑒠𑓂𑒩𑒼𑒝 𑒢𑒰𑒧𑓂𑒢𑒰 𑒏𑒵𑒣𑒰𑒔𑒰𑒩𑓂𑒨𑒏 𑒕𑒪 𑒖𑒹 𑒥𑒯𑒱𑒢𑒱 𑒫𑒩।
𑒁𑒬𑓂𑒫𑒞𑓂𑒟𑒰𑒧𑒰 𑒣𑒳𑒞𑓂𑒩 𑒖𑒢𑒱𑒏 𑒮𑒯𑒣𑒰𑒚𑒲 𑒠𑓂𑒩𑒳𑒣𑒠 𑒕𑒪। 𑒠𑓂𑒩𑒳𑒣𑒠 𑒠𑒹𑒪 𑒋𑒏𑒫𑒔𑒢 𑒩𑒰𑒖 𑒠𑒹𑒥 𑒂𑒡 𑒯𑒧। 𑒠𑒹𑒪 𑒫𑒔𑒢 𑒥𑒱𑒮𑒩𑒪𑒮𑒹 𑒩𑒰𑒖𑒰 𑒥𑒢𑒪𑒰 𑒅𑒞𑓂𑒞𑒩। 𑒁𑒣𑒧𑒰𑒢𑒱𑒞 𑒏𑒋𑒪 𑒮𑒹 𑒤𑒴𑒙𑒱, 𑒩𑒰𑒖𑒰 𑒍 𑒠𑓀𑒦𑒲। 𑒣𑓂𑒩𑒞𑒱𑒬𑒼𑒡𑒏 𑒥𑒰𑒙 𑒞𑒰𑒏𑒱 𑒩𑒯𑒪 𑒠𑓂𑒩𑒼𑒝 𑒥𑒢𑒱 𑒣𑓂𑒩𑒞𑒱𑒠𑓂𑒫𑒢𑓂𑒠𑒲।
𑒢𑒱𑒩𑓂𑒡𑒢𑒞𑒰𑒏 𑒖𑒱𑒢𑒑𑒲 𑒖𑒱𑒥𑒻𑒞 𑒕𑒪𑒰𑒯 𑒒𑒴𑒧𑒱 𑒩𑒯𑒪। 𑒁𑒬𑓂𑒫𑒞𑓂𑒟𑒰𑒧𑒰𑒏 𑒮𑓀𑒑 𑒂𑒖𑒲𑒫𑒱𑒏𑒰𑒏 𑒞𑒰𑒏𑒱𑒧𑒹 𑒣𑒛𑓃𑒪। 𑒯𑒮𑓂𑒞𑒱𑒢𑒰𑒣𑒳𑒩𑒏 𑒂𑒑𑓂𑒩𑒯 𑒕𑒪𑒰𑒯 𑒢𑒯𑒱 𑒙𑒰𑒩𑒱 𑒮𑒏𑒪। 𑒏𑒵𑒞𑒖𑓂𑒘𑒞𑒰𑒏 𑒦𑒰𑒩𑒮𑒿 𑒁𑒬𑓂𑒫𑒞𑓂𑒟𑒰𑒧𑒰-𑒠𑓂𑒩𑒼𑒝 𑒯𑒮𑓂𑒞𑒱𑒢𑒰𑒣𑒳𑒩𑒏।
𑒡𑒢𑒳𑒩𑓂𑒫𑒱𑒠𑓂𑒨𑒰𑒏 𑒣𑒰𑒚 𑒬𑒳𑒩𑒳 𑒏𑒋𑒪 𑒏𑒾𑒩𑒫𑒏 𑒂 𑒣𑒰𑒝𑓂𑒛𑒫𑒏। 𑒣𑒰𑒚𑒏 𑒅𑒣𑒩𑒰𑓀𑒞 𑒮𑒧𑒨 𑒂𑒋𑒪 𑒕𑒪 𑒪𑒏𑓂𑒭𑓂𑒨 𑒦𑒹𑒠𑒏।
𑒣𑒩𑒲𑒏𑓂𑒭𑒰𑒏 𑒔𑒰𑒞𑒳𑒩𑓂𑒨𑒏 𑒮𑓀𑒑𑒯𑒱 𑒏𑒳𑒬𑒪𑒞𑒰𑒏 𑒩𑒝-𑒏𑒾𑒬𑒪𑒏। 𑒪𑒏𑓂𑒭𑓂𑒨 𑒥𑒢𑒪 𑒋𑒏𑒙𑒰 𑒑𑒼𑒙-𑒥𑒹𑒬 𑒆𑒿𑒔 𑒫𑒵𑒏𑓂𑒭 𑒣𑒩, 𑒩𑒰𑒐𑒪 𑒏𑒰𑒚𑒏 𑒔𑒱𑒛𑓃𑒻 𑒂𑒿𑒐𑒱 𑒖𑒏𑒩 𑒪𑒏𑓂𑒭𑓂𑒨 𑒕𑒪।
𑒮𑒦𑒏𑒹𑒿 𑒣𑒴𑒕𑒪 𑒠𑓂𑒩𑒼𑒝 𑒥𑒰𑒖𑒴 𑒏𑒲 𑒕𑒲 𑒠𑒹𑒐𑒱 𑒩𑒯𑒪? 𑒮𑒦 𑒏𑓂𑒨𑒼 𑒑𑒰𑒕 𑒫𑒵𑒏𑓂𑒭 𑒣𑒏𑓂𑒭𑒱𑒏 𑒮𑓀𑒑 𑒠𑒹𑒐𑒱 𑒩𑒯𑒪।
𑒣𑒰𑒩𑓂𑒟𑒏𑒹𑒿 𑒣𑒴𑒕𑒪 𑒁𑒯𑒰𑒿 𑒕𑒲 𑒏𑒟𑒲 𑒠𑒹𑒐𑒱 𑒩𑒯𑒪 𑒮𑒏𑒪। 𑒧𑒰𑒟 𑒣𑒏𑓂𑒭𑒱𑒏 𑒁𑒞𑒱𑒩𑒱𑒏𑓂𑒞 𑒢𑒯𑒱 𑒏𑒱𑒕𑒳 𑒕𑒲 𑒠𑒹𑒐𑒪। 𑒁𑒩𑓂𑒖𑒳𑒢𑒏 𑒥𑒰𑒝 𑒣𑒏𑓂𑒭𑒱𑒏 𑒬𑒱𑒩𑒼𑒔𑓂𑒕𑒹𑒠𑒢 𑒏𑒋𑒪𑒏।
𑒁𑒩𑓂𑒖𑒳𑒢 𑒦𑒹𑒪𑒰𑒯 𑒣𑓂𑒩𑒱𑒨-𑒮𑓂𑒢𑒹𑒯𑒱𑒪 𑒠𑓂𑒩𑒼𑒝𑒏 𑒯𑒵𑒠𑒨𑒏।
𑒥𑒲𑒞𑒪 𑒮𑒧𑒨 𑒬𑒮𑓂𑒞𑓂𑒩-𑒣𑓂𑒩𑒠𑒩𑓂𑒬𑒢𑒏 𑒕𑒪 𑒂𑒋𑒪।
𑒮𑒧𑒨 𑒥𑒲𑒞𑒪 𑒣𑓂𑒩𑒠𑒩𑓂𑒬𑒢-𑒬𑒮𑓂𑒞𑓂𑒩𑒏 𑒕𑒪 𑒂𑒨𑒪।
𑒦𑒲𑒭𑓂𑒧 𑒣𑒴𑒕𑒪 𑒠𑓂𑒩𑒼𑒝𑒮𑒿 𑒏𑒲-𑒏𑒲 𑒮𑒱𑒐𑒰𑒍𑒪, 𑒨𑒳𑒠𑓂𑒡-𑒏𑒾𑒬𑒪,𑒫𑓂𑒨𑒴𑒯 𑒩𑒔𑒢𑒰 𑒂 𑒬𑒮𑓂𑒞𑓂𑒩𑒏𑒾𑒬𑒪।
𑒣𑓂𑒩𑒠𑒩𑓂𑒬𑒢𑒏 𑒫𑓂𑒨𑒫𑒮𑓂𑒟𑒰 𑒦𑒹𑒪 𑒖𑒢𑒏 𑒥𑒲𑒔𑒯𑒱,
𑒋𑒏𑒰𑒋𑒏𑒲 𑒮𑒦 𑒦𑒹𑒪𑒰𑒯 𑒣𑒩𑒲𑒏𑓂𑒭𑒱𑒞 𑒮𑓀𑒑𑒯𑒱।
𑒦𑒹𑒪 𑒦𑒲𑒧-𑒠𑒳𑒩𑓂𑒨𑒼𑒡𑒢𑒏 𑒑𑒠𑒰-𑒨𑒳𑒠𑓂𑒡𑒏 𑒣𑓂𑒩𑒠𑒩𑓂𑒬𑒢। 𑒦𑒲𑒭𑓂𑒧-𑒡𑒵𑒞𑒩𑒰𑒭𑓂𑒙𑓂𑒩𑒏 𑒯𑒵𑒠𑒨-𑒥𑒱𑒔 𑒫𑒰𑒞𑒮𑒪𑓂𑒨𑒏, 𑒖𑒐𑒢 𑒕𑒪 𑒠𑓂𑒫𑓀𑒠𑒏𑒥𑒲𑒔 𑒁𑒩𑓂𑒖𑒳𑒏 𑒥𑒹𑒩 𑒂𑒨𑒪। 𑒋𑒏𑒰𑒢𑒹𑒏 𑒥𑒰𑒝-𑒫𑒱𑒠𑓂𑒨𑒰𑒮𑒿 𑒩𑓀𑒑𑒮𑓂𑒟𑒪𑒲 𑒑𑒳𑓀𑒖𑒱𑒞, 𑒒𑒼𑒭 𑒁𑒩𑓂𑒖𑒳𑒢𑒏 𑒦𑒹𑒪 𑒥𑒲𑒔𑒯𑒱 𑒏𑒩𑓂𑒝 𑒂𑒋𑒪।
𑒣𑒩𑒬𑒳𑒩𑒰𑒧 𑒬𑒱𑒭𑓂𑒨 𑒏𑒩𑓂𑒝 𑒏𑒋𑒪𑒏 𑒫𑒱𑒢𑒨, 𑒏𑒋 𑒕𑒲 𑒮𑒏𑒻𑒞 𑒯𑒧 𑒣𑓂𑒩𑒠𑒩𑓂𑒬𑒢 𑒮𑒦𑒏 𑒖𑒹, 𑒫𑒱𑒠𑓂𑒨𑒰 𑒖𑒢𑒻𑒞 𑒕𑒟𑒱 𑒁𑒩𑓂𑒖𑒳𑒢 𑒮𑒏𑒪 𑒮𑒦,
𑒣𑒰𑒥𑒱 𑒮𑒯 𑒠𑒳𑒩𑓂𑒨𑒼𑒡𑒢𑒏, 𑒪𑒪𑒏𑒰𑒩𑒰 𑒠𑒹𑒪𑒏, 𑒁𑒩𑓂𑒖𑒳𑒢 𑒠𑓂𑒫𑓀𑒠 𑒯𑒧𑒩𑒰𑒮𑒿 𑒪𑒛𑓃𑒴 𑒮𑒹 𑒣𑓂𑒩𑒟𑒧𑒞𑓁।
𑒏𑒵𑒣𑒰𑒔𑒰𑒩𑓂𑒨 𑒏𑒯𑒪 𑒮𑒰𑒩𑒟𑒲𑒣𑒳𑒞𑓂𑒩 𑒕𑒲 𑒁𑒯𑒰𑒿, 𑒩𑒰𑒖𑒏𑒳𑒧𑒰𑒩𑒮𑒿 𑒠𑓂𑒫𑓀𑒠𑒏 𑒁𑒡𑒱𑒏𑒰𑒩𑒲 𑒏𑒯𑒰𑒿?
𑒠𑓂𑒫𑓀𑒠𑒞𑒰 𑒢𑒯𑒱 𑒁𑒯𑒰𑒿𑒮𑒿 𑒤𑒹𑒩 𑒥𑒰𑒞 𑒠𑓂𑒫𑓀𑒠𑒏, 𑒠𑓂𑒫𑓀𑒠-𑒨𑒳𑒠𑓂𑒡𑒏 𑒑𑒣 𑒂𑒋𑒪 𑒍𑒢𑒰-𑒏𑒼𑒢𑒰?
𑒯𑒰 ! 𑒯𑒰! 𑒯𑒰! 𑒔𑒱𑒞𑓂𑒏𑒰𑒩 𑒯𑒵𑒠𑒨𑒏,
𑒏𑒩𑓂𑒝𑒏 𑒯𑒵𑒠𑒨𑒏 𑒔𑒱𑒞𑓂𑒏𑒰𑒩 𑒠𑒳𑒩𑓂𑒨𑒼𑒡𑒢𑒹𑒙𑒰 𑒮𑒳𑒢𑒪𑒏।
𑒄 𑒮𑒳𑒢𑒱 𑒠𑒳𑒩𑓂𑒨𑒼𑒡𑒢 𑒏𑒹𑒪𑒏 𑒄 𑒒𑒼𑒭𑒝𑒰, 𑒥𑒰𑒞 𑒄 𑒁𑒕𑒱 𑒞𑒿 𑒮𑒦 𑒮𑒳𑒢𑒻𑒞 𑒖𑒰𑒆, 𑒁𑓀𑒑-𑒠𑒹𑒬𑒏 𑒢𑒵𑒣 𑒏𑒩𑓂𑒝𑒏𑒹𑒿 𑒥𑒢𑒥𑒻𑒞 𑒕𑒲, 𑒨𑒼𑒠𑓂𑒡𑒰𑒏 𑒣𑒩𑒲𑒏𑓂𑒭𑒝 𑒏𑒩𑒻𑒞 𑒁𑒕𑒱 𑒥𑒰𑒯𑒳,
𑒄 𑒥𑒰𑒯𑒳 ! 𑒣𑒏𑒛𑓃𑒱 𑒏𑒩𑓂𑒝𑒏 𑒥𑒰𑒯𑒳 𑒏𑒯𑒪𑒏 ।
𑒁𑓀𑒑 𑒠𑒹𑒬𑒏 𑒢𑒵𑒣 𑒏𑒩𑓂𑒝𑒏𑒹𑒿 𑒥𑒢𑒥𑒻𑒞 𑒕𑒲।
𑒏𑒯𑒱 𑒄 𑒁𑒦𑒱𑒭𑒹𑒏 𑒏𑒋𑒪 𑒮𑒦𑒰𑒑𑒰𑒩𑒹𑒧𑒹,
𑒁𑓀𑒏𑒧𑒹 𑒪𑒹𑒪 𑒏𑒩𑓂𑒝 𑒦𑒹𑒪 𑒏𑒵𑒞𑒖𑓂𑒘 𑒍𑒏𑒩।
𑒅𑒚𑒱 𑒁𑒩𑓂𑒖𑒳𑒢 𑒞𑒐𑒢 𑒄 𑒥𑒰𑒞 𑒥𑒰𑒖𑒪, 𑒯𑒹 𑒏𑒩𑓂𑒝 𑒁𑒯𑒰𑒿 𑒖𑒹 𑒏𑓂𑒨𑒼 𑒕𑒲, 𑒮𑒳𑒢𑒴 𑒄, 𑒯𑒧 𑒠𑓂𑒩𑒼𑒝 𑒬𑒱𑒭𑓂𑒨 𑒁𑒩𑓂𑒖𑒳𑒢 𑒄 𑒏𑒯𑒋 𑒕𑒲, 𑒥𑒳𑒗𑒴 𑒢𑒯𑒱 𑒖𑒹 𑒄 𑒫𑒲𑒩𑒞𑒰𑒏 𑒫𑒩𑒠𑒰𑒢 𑒙𑒰, 𑒢𑒯𑒱 𑒦𑒹𑒙𑒪 𑒁𑒕𑒱 𑒮𑒹 𑒁𑒯𑒲𑒿𑒏 𑒮𑒦𑒙𑒰।
𑒑𑒳𑒩𑒳 𑒢𑒯𑒱 𑒮𑒱𑒐𑒍𑒪𑒢𑓂𑒯𑒱 𑒯𑒰𑒩𑒱 𑒧𑒰𑒢𑒥,
𑒣𑓂𑒩𑒞𑒱𑒠𑓂𑒫𑓀𑒠𑒲𑒮𑒿 𑒠𑓂𑒫𑓀𑒠 𑒏𑒩𑒥 𑒖𑒐𑒢 𑒔𑒰𑒯𑒥।
𑒏𑒩𑒞𑒪 𑒡𑓂𑒫𑒢𑒱𑒮𑒿 𑒮𑒦𑒰𑒑𑒰𑒩 𑒦𑒹𑒪 𑒤𑒹𑒩 𑒑𑒳𑓀𑒖𑒱𑒞, 𑒦𑒲𑒭𑓂𑒧 𑒅𑒚𑒱 𑒏𑒋𑒪 𑒮𑓀𑒡𑓂𑒨𑒰𑒏 𑒂𑒑𑒧𑒢 𑒮𑒴𑒔𑒱𑒞।
𑒁𑒩𑓂𑒖𑒳𑒢𑒏 𑒑𑒩𑓂𑒫𑒼𑒏𑓂𑒞𑒱 𑒮𑒳𑒢𑒱 𑒏𑒩𑓂𑒝𑒏 𑒯𑒵𑒠𑒨 𑒕𑒪, 𑒧𑒼𑒢 𑒧𑒮𑒼𑒮𑒱 𑒢𑒵𑒣 𑒁𑓀𑒑𑒏 𑒑𑒰𑒧𑒣𑒩 𑒣𑒯𑒳𑒿𑒔𑒪।
𑒬𑒱𑒭𑓂𑒙𑒞𑒰𑒏 𑒯𑒹𑒞𑒳 𑒣𑒰𑒝𑓂𑒛𑒫 𑒦𑒹𑒪𑒰𑒯 𑒣𑓂𑒩𑒬𑓀𑒮𑒱𑒞। 𑒦𑒹𑒪 𑒋𑒯𑒱𑒮𑒿 𑒠𑒳𑒩𑓂𑒨𑒼𑒡𑒢𑒏 𑒧𑒼𑒢 𑒬𑓀𑒏𑒱𑒞। 𑒬𑒏𑒳𑒢𑒱 𑒠𑒳𑓁𑒬𑒰𑒮𑒢 𑒕𑒪 𑒍𑒏𑒩 𑒦𑒏𑓂𑒞, 𑒏𑒩𑓂𑒝𑒮𑒿 𑒦𑒹𑒿𑒙 𑒅𑒞𑓂𑒞𑒩 𑒍 𑒦𑒹𑒪 𑒂𑒬𑓂𑒫𑒮𑓂𑒞, 𑒡𑒵𑒞𑒩𑒰𑒭𑓂𑒙𑓂𑒩𑒏𑒹𑒿 𑒮𑒦𑒏 𑒏𑒢𑒤𑒳𑒮𑒏𑒲𑒮𑒿 𑒏𑒋 𑒞𑓂𑒩𑒮𑓂𑒞।
𑒣𑒱𑒞𑒰 𑒕𑒪𑒯𑒳𑒿 𑒁𑒯𑒰𑒿 𑒮𑒱𑓀𑒯𑒰𑒮𑒢𑒏 𑒁𑒡𑒱𑒏𑒰𑒩𑒲, 𑒖𑒢𑓂𑒧-𑒁𑓀𑒡𑒞𑒰𑒏 𑒩𑒼𑒏𑒪 𑒩𑒰𑒖𑒮𑒿 𑒁𑒯𑒰𑒿𑒏𑒹𑒿, 𑒯𑒧𑒩𑒰 𑒞𑒿 𑒢𑒯𑒱 𑒁𑒕𑒱 𑒋𑒯𑒢 𑒪𑒰𑒔𑒰𑒩𑒲।
𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒮𑒦 𑒧𑒰𑒢𑒨 𑒪𑒰𑒑𑒪, 𑒮𑒱𑓀𑒯𑒰𑒮𑒢𑒏 𑒁𑒡𑒱𑒏𑒰𑒩𑒲 𑒏𑒱𑒋𑒏 ? 𑒁𑒯𑒿𑒏 𑒮𑒹𑒯𑓀𑒞𑒰 𑒏𑒲 𑒦𑒋 𑒣𑒰𑒋𑒪, 𑒤𑒪𑒰𑒦𑒴𑒞 𑒏𑒼𑒢𑒰 𑒁𑒯𑒳𑒢𑒰 𑒄𑒋𑒯।
𑒨𑒳𑒡𑒱𑒭𑓂𑒚𑒱𑒩 𑒖𑓂𑒨𑒹𑒭𑓂𑒚 𑒯𑒧𑒩𑒰𑒮𑒿 𑒁𑒕𑒱, 𑒣𑒩𑓀𑒞𑒳 𑒁𑒕𑒱 𑒁𑒯𑒰𑒿𑒏 𑒁𑒢𑒳𑒖𑒏 𑒣𑒳𑒞𑓂𑒩 𑒮𑒋𑒯।
𑒏𑒋𑒪 𑒂𑒑𑓂𑒩𑒯 𑒖𑒋𑒥𑒰𑒏 𑒧𑒹𑒪𑒰 𑒫𑒰𑒩𑒝𑒰𑒫𑒞𑒏,
𑒣𑒰𑒝𑓂𑒛𑒫𑒮𑒿𑒏 𑒏𑒩𑒴। 𑒞𑒰 𑒮𑒳𑒡𑒰𑒩𑒥 𑒫𑓂𑒨𑒫𑒮𑓂𑒟𑒰 𑒮𑒦, 𑒏𑒪𑓂𑒨𑒰𑒝𑒏𑒰𑒩𑒲 𑒏𑒰𑒩𑓂𑒨 𑒮𑒦𑒮𑒿, 𑒥𑒱𑒮𑒩𑒱 𑒖𑒋𑒞 𑒣𑒳𑒞𑓂𑒩 𑒏𑒳𑓀𑒞𑒲𑒏, 𑒖𑒢 𑒮𑒏𑒪 𑒯𑒮𑓂𑒞𑒱𑒢𑒰𑒣𑒳𑒩𑒏।
𑒡𑒵𑒞𑒩𑒰𑒭𑓂𑒙𑓂𑒩 𑒧𑒰𑒢𑒪 𑒮𑒦𑒙𑒰 𑒥𑒰𑒞, 𑒂𑒠𑒹𑒬 𑒠𑒹𑒪 𑒫𑒰𑒩𑒝𑒰𑒫𑒞 𑒖𑒰𑒟𑒳, 𑒏𑒳𑓀𑒞𑒱 𑒠𑒹𑒐𑒱 𑒧𑒹𑒪𑒰-𑒚𑒹𑒪𑒰 𑒂𑒅।
𑒫𑒱𑒠𑒳𑒩 𑒦𑒹𑒪 𑒮𑒰𑒏𑓀𑒏𑓂𑒭 𑒦𑒹𑒠 𑒄 𑒏𑒲, 𑒮𑒔𑒩 𑒩𑒯𑒥 𑒨𑒳𑒡𑒱𑒭𑓂𑒚𑒱𑒩, 𑒏𑒯𑒪 𑒄।
𑒫𑒱𑒠𑒳𑒩𑒏 𑒢𑒲𑒞𑒱 𑒏𑒋𑒪 𑒮𑒰𑒏𑓀𑒏𑓂𑒭, 𑒠𑒳𑒩𑓂𑒨𑒼𑒡𑒢𑒏 𑒏𑒰𑒙𑒪 𑒮𑒠𑒱 𑒣𑓂𑒩𑒣𑓀𑒔।
𑒧𑓀𑒞𑓂𑒩𑒲 𑒣𑒳𑒩𑒼𑒔𑒢𑒮𑒿 𑒧𑒱𑒪𑒱 𑒠𑒳𑒩𑓂𑒨𑒼𑒡𑒢, 𑒪𑒰𑒐𑒏 𑒧𑒯𑒪 𑒥𑒢𑒥𑒍𑒢𑒹 𑒕𑒪, 𑒫𑒱𑒠𑒳𑒩 𑒪𑒑𑒹𑒪𑒢𑓂𑒯𑒱 𑒋𑒏𑒩 𑒣𑒞𑒰, 𑒮𑓀𑒫𑒰𑒠 𑒮𑒹𑒯𑒼 𑒣𑒚𑒍𑒢𑒹 𑒕𑒪।
𑒫𑒰𑒯𑒏 𑒮𑓀𑒠𑒹𑒬𑒏 𑒕𑒪 𑒏𑒰𑒩𑒲𑒑𑒩, 𑒢𑒱𑒩𑓂𑒧𑒰𑒝 𑒮𑒳𑒩𑒿𑒑𑒏 𑒏𑒋𑒪। 𑒪𑒰𑒐𑒏 𑒧𑒯𑒪𑒏 𑒦𑒲𑒞𑒩 𑒕𑒪, 𑒢𑒱𑒩𑓂𑒧𑒰𑒝 𑒮𑒹 𑒏𑓂𑒭𑒝𑒯𑒱𑒧𑒹 𑒦𑒋𑒪।
𑒣𑒰𑒝𑓂𑒛𑒫𑒏𑒹𑒿 𑒢𑒱𑒩𑓂𑒠𑒹𑒬 𑒦𑒹𑒪 𑒕𑒪, 𑒐𑒼𑒯 𑒮𑒳𑒩𑒿𑒑𑒯𑒱𑒧𑒹 𑒮𑒴𑒞𑒃 𑒖𑒰𑒅,
𑒂𑒑𑒱𑒏 𑒣𑒴𑒩𑓂𑒝 𑒬𑓀𑒏𑒰 𑒮𑒹 𑒕𑒪, 𑒪𑒑𑒱𑒞𑒹 𑒦𑒲𑒞𑒩𑒮𑒿 𑒥𑒰𑒯𑒩 𑒁𑒥𑒻 𑒖𑒰𑒅।
𑒏𑒵𑒭𑓂𑒝 𑒔𑒞𑒳𑒩𑓂𑒠𑒬𑒲𑒏 𑒕𑒪 𑒍 𑒠𑒱𑒢, 𑒣𑒳𑒩𑒼𑒔𑒢 𑒦𑒹𑒪 𑒮𑒹 𑒁𑒞𑒱𑒬𑒨 𑒔𑓀𑒔𑒪,
𑒂𑒑𑒱 𑒪𑒑𑒰𑒋𑒞 𑒂𑒃 𑒍 𑒕𑒪 𑒮𑒿, 𑒨𑒳𑒡𑒱𑒭𑓂𑒚𑒱𑒩 𑒕𑒪 𑒄 𑒮𑒦 𑒥𑒴𑒗𑒱 𑒩𑒯𑒪।
𑒏𑒋 𑒮𑒔𑒹𑒞 𑒁𑒣𑒢 𑒧𑒰𑒞𑒰-𑒦𑓂𑒩𑒰𑒞𑒰𑒏𑒹𑒿, 𑒨𑒖𑓂𑒘 𑒏𑒋𑒪𑒢𑓂𑒯𑒱 𑒍𑒯𑒱 𑒠𑒱𑒢 𑒮𑒹,
𑒦𑒰𑒞-𑒦𑒼𑒖 𑒠𑒹𑒪𑒢𑓂𑒯𑒱 𑒢𑒑𑒩𑒫𑒰𑒮𑒲𑒏𑒹𑒿, 𑒣𑓀𑒔𑒣𑒳𑒞𑓂𑒩 𑒕𑒪𑒱 𑒦𑒲𑒪𑒢𑒲 𑒮𑒹𑒯𑒼 𑒋𑒏।
𑒂𑒯 𑒥𑒹𑒔𑒰𑒩𑒲 ! 𑒏𑒰𑒪𑒏 𑒧𑒰𑒩𑒪 𑒫𑒰 𑒧𑒰𑒩𑒪,
𑒠𑒴 𑒑𑒼𑒙 𑒠𑓂𑒫𑒢𑓂𑒠𑒞𑒰𑒧𑒹 𑒞𑒹𑒮𑒩?
𑒏𑒰𑒪𑒏 𑒮𑒼𑒗𑒰𑒿 𑒏𑒏𑒩 𑒔𑒪𑒪 𑒖𑒹, 𑒮𑒴𑒞𑒪𑒱 𑒩𑒰𑒞𑒱 𑒍𑒞𑒯𑒱 𑒮𑒦 𑒞𑒹𑒿।
𑒣𑒳𑒩𑒼𑒔𑒢 𑒮𑒹𑒯𑒼 𑒮𑒳𑒞𑒪 𑒍𑒞𑒯𑒱, 𑒥𑒰𑒯𑒩 𑒠𑒱𑒬 𑒕𑒪 𑒏𑒼𑒚𑒪𑒲 𑒋𑒏, 𑒂𑒑𑒱 𑒪𑒑𑒰𑒍𑒪 𑒦𑒲𑒧 𑒞𑒐𑒢, 𑒥𑒲𑒔 𑒩𑒰𑒞𑒱𑒧𑒹 𑒧𑒾𑒏𑒰 𑒏𑒹𑒿 𑒠𑒹𑒐𑒱।
𑒪𑒰𑒏𑓂𑒭𑒰𑒑𑒵𑒯 𑒕𑒪 𑒥𑒢 𑒮𑒹 𑒍𑒞𑒋, 𑒁𑒑𑓂𑒢𑒱 𑒠𑒹𑒫𑒞𑒰 𑒁𑒯𑒱 𑒏𑒹𑒩 𑒪𑒹𑒪।
𑒒𑒩𑒏 𑒮𑒳𑒛𑓂𑒛𑒰𑒯 𑒯𑒼𑒃𑒧𑒹 𑒪𑒰𑒑𑒞, 𑒮𑒹 𑒋𑒏𑒯𑒳 𑒏𑓂𑒭𑒝 𑒏𑒱𑒋𑒏?
𑒢𑒯𑒱 𑒥𑒱𑒪𑒧𑒱 𑒧𑒰𑒞𑒰- 𑒦𑓂𑒩𑒰𑒞𑒰, 𑒣𑓂𑒩𑒝𑒰𑒧𑒁𑒑𑓂𑒢𑒱𑒠𑒹𑒫𑒏𑒹𑒿𑒏𑒋।
𑒢𑒱𑒏𑒪𑒱 𑒏𑒳𑓀𑒞𑒱 𑒏𑒰𑒪𑒏 𑒑𑒰𑒪𑒮𑒿, 𑒥𑒔𑒪𑒱 𑒠𑒳𑒩𑓂𑒨𑒼𑒡𑒢𑒏 𑒏𑒳𑒔𑒰𑒪𑒱𑒮𑒿।
𑒣𑒳𑒩𑒼𑒔𑒢 𑒁𑒑𑓂𑒢𑒱 𑒧𑒡𑓂𑒨 𑒮𑒹 𑒅𑒔𑒱𑒞𑒹 𑒦𑒹𑒪, 𑒏𑒱𑒢𑓂𑒞𑒳 𑒦𑒲𑒪𑒢𑒱 𑒖𑒩𑒪𑒱 𑒥𑒹𑒔𑒰𑒩𑒲,
𑒣𑒳𑒞𑓂𑒩 𑒮𑒯𑒱𑒞 𑒮𑒹 𑒮𑒴𑒞𑒪, 𑒏𑒏𑒩𑒼 𑒥𑒳𑒗𑒢𑒰 𑒕𑒪 𑒢𑒯𑒱 𑒑𑒹𑒪 𑒄 𑒕𑒪।
𑒢𑒑𑒩𑒫𑒰𑒮𑒲 𑒥𑒳𑒗𑒪𑒢𑓂𑒯𑒱 𑒖𑒹 𑒖𑒩𑒪𑒱, 𑒏𑒳𑓀𑒞𑒲 𑒣𑒰𑒿𑒔𑒼 𑒣𑒳𑒞𑓂𑒩 𑒮𑒦𑒯𑒱𑒏 𑒮𑓀𑒑𑒹।
𑒢𑒑𑒩 𑒬𑒼𑒏𑒮𑒿 𑒦𑒹𑒪 𑒬𑒼𑒏𑒰𑒏𑒳𑒪, 𑒐𑒥𑒩𑒱 𑒯𑒮𑓂𑒞𑒱𑒢𑒰𑒣𑒳𑒩 𑒖𑓂𑒨𑒼𑒿 𑒑𑒹𑒪𑒹𑒿।
𑒠𑒳𑒩𑓂𑒨𑒼𑒡𑒢 𑒕𑒪 𑒁𑒞𑒱 𑒣𑓂𑒩𑒮𑒢𑓂𑒢𑒰 𑒂, 𑒡𑒵𑒞𑒩𑒰𑒭𑓂𑒙𑓂𑒩 𑒣𑓂𑒩𑒮𑒢𑓂𑒢 𑒕𑒪 𑒧𑒼𑒢𑒹-𑒧𑒼𑒢𑒹।
𑒣𑒩𑓀𑒞𑒳 𑒫𑒱𑒠𑒳𑒩 𑒮𑒦𑒮𑒿 𑒥𑒹𑒬𑒲 𑒣𑓂𑒩𑒮𑒢𑓂𑒢, 𑒏𑒱𑒋𑒏 𑒞𑒿 𑒮𑒞𑓂𑒨 𑒥𑒴𑒗𑒱 𑒕𑒪 𑒑𑒹𑒪𑒹।
𑒮𑒹 𑒍 𑒏𑒯𑒪 𑒦𑒲𑒭𑓂𑒧𑒏𑒹𑒿 𑒮𑒦𑒙𑒰, 𑒥𑒰𑒞 𑒩𑒯𑒮𑓂𑒨𑒏 𑒖𑒰 𑒏𑒋 𑒍𑒞𑒋।
𑒦𑒲𑒭𑓂𑒧𑒏 𑒔𑒱𑓀𑒞𑒰 𑒠𑒴𑒩 𑒏𑒋𑒪𑒢𑓂𑒯𑒱,
𑒄 𑒮𑒦 𑒑𑒣 𑒖𑒰𑒨 𑒥𑒳𑒗𑒰 𑒏𑒋 ।
𑒁𑒏𑒰𑒥𑒼𑒢 𑒣𑒯𑒳𑒿𑒔𑒻𑒞 𑒑𑒹𑒪𑒰𑒯 𑒑𑒋, 𑒣𑒰𑒝𑓂𑒛𑒫-𑒖𑒢 𑒏𑒭𑓂𑒙 𑒅𑒚𑒰 𑒏𑒋। 𑒢𑒰𑒫𑒱𑒏 𑒢𑒰𑒫𑒏 𑒮𑓀𑒑 𑒣𑓂𑒩𑒞𑒲𑒏𑓂𑒭𑒰, 𑒏𑒩𑒱 𑒕𑒪 𑒩𑒯𑒨 𑒫𑒱𑒏𑒪 𑒦𑒋।
𑒏𑒯𑒪𑒢𑓂𑒯𑒱 𑒫𑒱𑒠𑒳𑒩 𑒣𑒚𑒹𑒪𑒢𑓂𑒯𑒱 𑒯𑒧𑒩𑒰, 𑒂𑒖𑓂𑒘𑒰 𑒠𑒲 𑒑𑓀𑒑𑒞𑒙 𑒮𑒹𑒫𑒰 𑒏𑒩𑒥𑒰𑒏।
𑒑𑓀𑒑𑒰 𑒣𑒰𑒩 𑒦𑒹𑒪𑒟𑒱 𑒣𑒰𑒝𑓂𑒛𑒫 𑒖𑒢, 𑒣𑒰𑒕𑒴 𑒕𑒴𑒙𑒪 𑒏𑒞𑒹𑒏 𑒦𑒦𑒙𑒣𑒢।
𑒡𑒵𑒞𑓂𑒩𑒰𑒭𑓂𑒙𑓂𑒩𑒏,𑒠𑒳𑒩𑓂𑒨𑒼𑒡𑒢 𑒂 𑒬𑒏𑒳𑒢𑒲𑒏, 𑒂 𑒠𑒳𑓁𑒬𑒰𑒮𑒢 𑒏𑒩𑓂𑒝 𑒮𑒥𑒯𑒲𑒏। 𑒮𑓀𑒑 𑒧𑒳𑒠𑒰 𑒪𑒰𑒑𑒪 𑒣𑓂𑒩𑒞𑒱𑒬𑒼𑒡, 𑒯𑒮𑓂𑒞𑒱𑒢𑒰𑒣𑒳𑒩𑒏 𑒕𑒪 𑒄 𑒠𑒳𑒩𑓂𑒨𑒼𑒑।
𑒢𑒯𑒱 𑒖𑒰𑒢𑒱 𑒖𑒋𑒞 𑒏𑒄 𑒣𑒟 𑒄, 𑒣𑒟 𑒢 𑒖𑒞𑒋 𑒕𑒪 𑒍𑒯𑒱 𑒫𑒢𑒧𑒹, 𑒛𑒹𑒑 𑒠𑒏𑓂𑒭𑒱𑒝 𑒠𑒱𑒬𑒰 𑒠𑒱𑒬 𑒠𑒲, 𑒑𑓀𑒞𑒫𑓂𑒨𑒏 𑒕𑒪 𑒢𑒯𑒱 𑒖𑓂𑒘𑒰𑒢 𑒏𑒼𑒢𑒼 𑒖𑒹 !
𑒠𑒻𑒞 𑒛𑒹𑒑 𑒥𑒜𑓃𑒻𑒞 𑒂𑒑𑒴, 𑒦𑒴𑒐𑒪-𑒣𑒱𑒨𑒰𑒮𑒪 𑒟𑒰𑒏𑒪 𑒚𑒹𑒯𑒱𑒂𑒨𑒪, 𑒂𑒯 𑒠𑒳𑒩𑓂𑒠𑒬𑒰 𑒠𑒹𑒐𑒴 !
𑒏𑒳𑓀𑒞𑒲𑒏 𑒄 𑒠𑒬𑒰 𑒠𑒹𑒐𑒱, 𑒦𑒲𑒧𑒮𑒿 𑒢𑒯𑒱 𑒕𑒪 𑒑𑒹𑒪 𑒩𑒯𑒪, 𑒫𑒙-𑒫𑒵𑒏𑓂𑒭𑒏 𑒢𑒲𑒔𑒰𑒿 𑒥𑒻𑒮𑒰 𑒏𑒋, 𑒔𑒜𑒪 𑒠𑒹𑒐𑒪 𑒮𑒖𑒑 𑒦𑓄।
𑒣𑒏𑓂𑒭𑒲 𑒏𑒱𑒕𑒳 𑒠𑒴𑒩 𑒕𑒪 𑒍𑒞𑒋, 𑒦𑒲𑒧 𑒖𑒰𑒋 𑒣𑒯𑒳𑒿𑒔𑒪 𑒖𑒪𑒰𑒬𑒨, 𑒣𑒰𑒢𑒱 𑒣𑒲𑒥 𑒂𑒢𑒱 𑒣𑒱𑒨𑒰𑒍𑒪, 𑒮𑒳𑒞𑒪 𑒮𑒦 𑒏𑒳𑒧𑓂𑒯𑒪𑒰𑒨 𑒍𑒞𑒋।
𑒦𑒲𑒧𑒏𑒹𑒿 𑒢𑒯𑒱 𑒑𑒹𑒪 𑒠𑒹𑒐𑒪, 𑒏𑒩𑒟𑒱 𑒏𑒲 𑒯𑒴𑒮𑒱 𑒧𑒼𑒢 𑒯𑒼𑒁𑒨, 𑒣𑒼𑒐𑒩𑒱𑒏 𑒑𑒰𑒕𑒏 𑒆𑒣𑒩 𑒕𑒪 𑒩𑒰𑒏𑓂𑒭𑒮 𑒢𑒰𑒧 𑒯𑒱𑒛𑒱𑓀𑒥 𑒖𑒹𑒏𑒩।
𑒯𑒱𑒛𑒱𑓀𑒥𑒰 𑒥𑒯𑒱𑒢𑒏 𑒮𑓀𑒑 𑒕𑒪, 𑒞𑒰𑒏𑒱 𑒩𑒯𑒪 𑒁𑒣𑒢 𑒦𑒼𑒖𑒢। 𑒧𑒢𑒳𑒏𑓂𑒐-𑒑𑓀𑒡 𑒮𑒴𑓀𑒒𑒱 𑒏𑒋, 𑒔𑒪𑒪 𑒢𑒩-𑒧𑒰𑓀𑒮 𑒞𑒰𑒏𑒱𑒧𑒹 𑒍, 𑒯𑒱𑒛𑒱𑓀𑒥𑒹 𑒖𑒼 𑒧𑒾𑒮-𑒧𑒢𑒳𑒏𑓂𑒐𑒏, 𑒂𑒢 𑒖𑒪𑓂𑒠𑒲 𑒍𑒞𑒋 𑒖𑒰𑒏𑒋। 𑒠𑒹𑒐𑒱 𑒏𑒳𑓀𑒞𑒲-𑒣𑒳𑒞𑓂𑒩 𑒮𑓀𑒑 𑒮𑒴𑒞𑒪, 𑒠𑒳𑓁𑒐𑒱𑒞 𑒯𑒱𑒛𑒱𑓀𑒥𑒰 𑒕𑒪 𑒞𑒰𑒏𑒻𑒞, 𑒦𑒲𑒧𑒏 𑒯𑒵𑒭𑓂𑒙-𑒣𑒳𑒭𑓂𑒙 𑒬𑒩𑒲𑒩 𑒠𑒹𑒐𑒱, 𑒚𑒰𑒜 𑒢𑒹𑒞𑓂𑒩𑒹 𑒩𑒯𑒪𑒱 𑒞𑒰𑒏𑒋।
𑒡𑒩𑒱 𑒡𑒰𑒩𑒝 𑒩𑒴𑒣 𑒮𑒳𑒢𑓂𑒠𑒩𑒲𑒏, 𑒏𑒯𑒪 𑒦𑒲𑒧 𑒖𑒰𑒆 𑒅𑒚𑒰𑒆, 𑒁𑒣𑒢 𑒧𑒰𑒞𑒰 𑒥𑒢𑓂𑒡𑒳𑒏𑒹𑒿, 𑒠𑒴𑒩 𑒮𑒳𑒩𑒏𑓂𑒭𑒱𑒞 𑒯𑒱𑒢𑒏𑒰 𑒣𑒯𑒳𑒿𑒔𑒰𑒋𑒥।
𑒧𑒼𑒯𑒱𑒞 𑒕𑒲 𑒯𑒧 𑒁𑒯𑒰𑒿 𑒣𑒩, 𑒔𑒰𑒯 𑒯𑒧𑒩𑒰 𑒁𑒕𑒱 𑒫𑒱𑒫𑒰𑒯𑒏,
𑒧𑒰𑒨𑒰𑒮𑒿 𑒯𑒧 𑒥𑒔𑒰𑒋𑒥, 𑒥𑒪𑒫𑒰𑒢 𑒏𑓂𑒩𑒴𑒩 𑒯𑒱𑒛𑒱𑒧𑓂𑒥𑒏 𑒧𑒰𑒩𑒱𑒏।
𑒦𑒲𑒧 𑒏𑒯𑒪 𑒯𑒧 𑒏𑒱𑒋 𑒅𑒚𑒰𑒋𑒥, 𑒥𑓀𑒡𑒳 𑒏𑒹𑒿 𑒮𑒳𑒞𑒪 𑒁𑒣𑒢, 𑒥𑒪𑒫𑒰𑒢 𑒁𑒕𑒱 𑒯𑒱𑒛𑒱𑓀𑒥 𑒋𑒯𑒢, 𑒥𑒪 𑒠𑒹𑒐𑒋 𑒯𑒧𑒩𑒼 𑒞𑒐𑒢।
𑒯𑒱𑒛𑒱𑒧𑓂𑒥 𑒣𑒯𑒳𑒿𑒔𑒪 𑒍𑒞𑒋, 𑒯𑒱𑒛𑒱𑒧𑓂𑒥𑒰 𑒕𑒪𑒱 𑒮𑒳𑒢𑓂𑒠𑒩𑒲𑒏 𑒩𑒴𑒣 𑒥𑒢𑒍𑒢𑒹, 𑒦𑒲𑒧𑒮𑒿 𑒏𑒩𑒱 𑒩𑒯𑒪𑒱 𑒕𑒪𑒱 𑒑𑒣, 𑒏𑓂𑒩𑒼𑒡𑒮𑒿 𑒏𑓂𑒩𑒼𑒡𑒱𑒞 𑒯𑒱𑒛𑒱𑒧𑓂𑒥𑒏𑒹𑒿 𑒏𑒋𑒢𑒹।
𑒍 𑒠𑒾𑒛𑓃𑒪 𑒯𑒱𑒛𑒱𑒧𑓂𑒥𑒰 𑒣𑒩 𑒧𑒰𑒩𑒏 𑒯𑒹𑒞𑒳, 𑒦𑒲𑒧 𑒣𑒏𑒛𑓃𑒪 𑒥𑒱𑒔𑓂𑒔𑒯𑒱𑒧𑒹, 𑒧𑒪𑓂𑒪𑒨𑒳𑒠𑓂𑒡 𑒣𑒮𑒩𑒪 𑒍𑒞𑒋 𑒮𑒹, 𑒫𑒱𑒏𑒙 𑒠𑓂𑒫𑓀𑒠𑒏 𑒯𑒳𑒿𑒏𑒰𑒩 𑒕𑒪 𑒑𑒴𑒿𑒖𑒻𑒞।
𑒫𑒢𑓂𑒨𑒣𑓂𑒩𑒰𑒝𑒲 𑒦𑒰𑒑𑒋 𑒪𑒰𑒑𑒪 𑒂 𑒅𑒚𑒪𑒱 𑒏𑒳𑓀𑒞𑒲-𑒣𑒰𑓀𑒛𑒫 𑒍𑒞𑒋, 𑒣𑒯𑒳𑒿𑒔𑒻𑒞 𑒑𑒹𑒪 𑒠𑒾𑒑𑒻𑒞 𑒍𑒞𑒋, 𑒩𑒝𑒦𑒴𑒧𑒱 𑒮𑒰𑒖𑒪 𑒕𑒪 𑒖𑒞𑒋। 𑒧𑒰𑒩𑒱 𑒠𑒹𑒪𑒏 𑒦𑒲𑒧 𑒞𑒰𑒫𑒞, 𑒦𑒹𑒪 𑒯𑒱𑒛𑒱𑒧𑓂𑒥 𑒬𑒫𑒩𑒴𑒣 𑒨𑒰𑒫𑒞।
𑒦𑒲𑒧𑒏 𑒫𑒲𑒩𑒞𑒰𑒮𑒿 𑒯𑒱𑒛𑒱𑒧𑓂𑒥𑒰 𑒦𑒹𑒪𑒱 𑒕𑒪𑒱 𑒂𑒢𑓀𑒠𑒱𑒞, 𑒫𑒰𑒏𑒔𑒰𑒞𑒳𑒩𑓂𑒨𑒮𑒿 𑒏𑒋𑒢𑒹 𑒕𑒪𑒱 𑒏𑒳𑓀𑒞𑒱𑒏𑒹𑒿 𑒣𑓂𑒩𑒮𑒢𑓂𑒢 𑒏𑒱𑓀𑒔𑒱𑒞𑓂।
𑒨𑒳𑒡𑒱𑒭𑓂𑒚𑒱𑒩 𑒮𑒹𑒯𑒼 𑒠𑒹𑒪 𑒮𑓂𑒫𑒲𑒏𑒵𑒞𑒱 𑒧𑒰𑒞𑒰 𑒏𑒳𑓀𑒞𑒲𑒏 𑒫𑒱𑒔𑒰𑒩 𑒖𑒰𑒢𑒱, 𑒫𑒱𑒫𑒰𑒯 𑒏𑒩𑒱 𑒏𑒋 𑒩𑒯𑒋 𑒪𑒰𑒑𑒪, 𑒦𑒲𑒧 𑒯𑒱𑒛𑒱𑒧𑓂𑒥𑒰𑒏𑒹𑒿 𑒂𑒢𑒱। 𑒒𑒙𑒼𑒞𑓂𑒏𑒔 𑒅𑒞𑓂𑒣𑒢𑓂𑒢 𑒦𑒹𑒪, 𑒣𑒱𑒞𑒰 𑒞𑒳𑒪𑓂𑒨 𑒣𑒩𑒰𑒏𑓂𑒩𑒧 𑒖𑒏𑒩 𑒕𑒪।
𑒠𑒱𑒢 𑒥𑒲𑒞𑒪 𑒣𑒰𑒝𑓂𑒛𑒫 𑒫𑒢 𑒕𑒼𑒛𑓃𑒱 𑒏𑒋 𑒂𑒑𑒰𑒿 𑒖𑒰𑒋 𑒪𑒰𑒑𑒪, 𑒖𑒰𑒋𑒥 𑒯𑒱𑒧𑒰𑒪𑒨 𑒠𑒱𑒬𑒱 𑒣𑒳𑒞𑓂𑒩𑒏 𑒮𑓀𑒑 𑒄 𑒯𑒱𑒛𑒱𑒧𑓂𑒥𑒰 𑒥𑒰𑒖𑒪𑒱।
𑒒𑒙𑒼𑒞𑓂𑒏𑒔 𑒏𑒯𑒪 𑒣𑒱𑒞𑒳 𑒧𑒰𑒞𑒰𑒏 𑒯𑒧 𑒮𑒠𑒱𑒏𑒰𑒪 𑒮𑓀𑒑𑒹 𑒩𑒯𑒥, 𑒯𑒼𑒋𑒞 𑒏𑒼𑒢𑒼 𑒏𑒰𑒩𑓂𑒨 𑒁𑒯𑒰𑒿𑒏, 𑒥𑒖𑒰𑒥𑒋𑒧𑒹 𑒢𑒯𑒱 𑒮𑓀𑒏𑒼𑒔 𑒏𑒩𑒥।
𑒖𑒰𑒃𑒞 𑒏𑒰𑒪 𑒥𑓂𑒨𑒰𑒮 𑒦𑒹𑒙𑒪𑒰𑒯 𑒏𑒳𑓀𑒞𑒲 𑒏𑒰𑒢𑒪𑒱 𑒯𑒰𑒏𑓂𑒩𑒼𑒮 𑒦𑒋,
𑒦𑒰𑒩𑒞𑒏 𑒪𑒹𑒐𑒏 𑒂𑒋𑒪 𑒥𑒢𑒱 𑒏𑒰𑒫𑓂𑒨𑒏 𑒣𑒰𑒞𑓂𑒩 𑒦𑒋 !! 𑒥𑓂𑒨𑒰𑒮 𑒏𑒯𑒪 𑒢𑒯𑒱 𑒏𑒰𑒢𑒴 𑒠𑒱𑒢 𑒕𑒼𑒙 𑒣𑒻𑒒 𑒯𑒼𑒋𑒥𑒹 𑒏𑒩𑒨। 𑒠𑒳𑓁𑒐 𑒂𑒏𑒱 𑒮𑒳𑒐𑒧𑒹 𑒁𑒣𑒢𑒰 𑒣𑒩 𑒢𑒯𑒱 𑒕𑒼𑒛𑓃𑒋 𑒁𑒕𑒱 𑒢𑒱𑒨𑓀𑒞𑓂𑒩𑒝, 𑒡𑒩𑓂𑒧𑒣𑒟 𑒣𑒩 𑒖𑒹 𑒔𑒪𑒋,𑒞𑒏𑒩𑒹 𑒏𑒯𑒋 𑒕𑒲 𑒧𑒢𑒳𑒭𑓂𑒨 𑒞𑒐𑒢।
𑒑𑒩𑓂𑒫𑒱𑒞 𑒮𑒳𑒐𑒹 𑒢𑒯𑒱 𑒯𑒼𑒋, 𑒠𑒳𑓁𑒐𑒧𑒹 𑒡𑒻𑒩𑓂𑒨𑒏 𑒢 𑒁𑒫𑒪𑓀𑒥 𑒕𑒼𑒛𑓃𑒋, 𑒏𑒳𑓀𑒞𑒲 𑒂 𑒁𑒯𑒿𑒏 𑒣𑒳𑒞𑓂𑒩 𑒕𑒟𑒱, 𑒞𑒹𑒯𑒢 𑒖𑒹𑒯𑒢 𑒄 𑒧𑒢𑒳𑒭𑓂𑒨 𑒯𑒼𑒧𑒋।
𑒥𑓂𑒨𑒰𑒮 𑒏𑒰𑒫𑓂𑒨𑒏 𑒣𑒰𑒞𑓂𑒩𑒏𑒹𑒿 𑒠𑒹𑒐𑒰𑒋 𑒩𑒮𑓂𑒞𑒰 𑒮𑒼𑒗 𑒏𑒱𑒢𑓂𑒞𑒳,
𑒣𑒰𑒞𑓂𑒩𑒏 𑒔𑒩𑒱𑒞𑓂𑒩𑒧𑒹 𑒢𑒯𑒱 𑒁𑒛𑓃𑒰𑒍𑒪 𑒁𑒣𑒢 𑒂𑒏𑒰𑓀𑒏𑓂𑒭𑒰 𑒋𑒏𑒼 𑒩𑒞𑒱 ।
𑒡𑒢𑓂𑒨 𑒞𑒹𑒿 𑒍 𑒏𑒫𑒱 𑒂 𑒍𑒏𑒩 𑒏𑒵𑒞𑒱 !!
𑒣𑒰𑒝𑓂𑒛𑒫𑒖𑒢 𑒣𑒰𑒥𑒱 𑒄 𑒮𑓀𑒥𑒪, 𑒣𑒯𑒱𑒩𑒪 𑒧𑒵𑒑𑒔𑒩𑓂𑒧 𑒫𑒪𑓂𑒏𑒪, 𑒥𑓂𑒩𑒯𑓂𑒧𑒔𑒰𑒩𑒲 𑒏𑒹𑒩 𑒦𑒹𑒭 𑒥𑒢𑒰𑒍𑒪, 𑒋𑒏𑒔𑒏𑓂𑒩𑒲 𑒢𑒑𑒩 𑒣𑒯𑒳𑒿𑒔𑒪।
𑒩𑒯𑒪 𑒥𑒢𑒱 𑒁𑒞𑒱𑒟𑒱 𑒍𑒞𑒋, 𑒂𑒞𑒱𑒟𑓂𑒨 𑒥𑓂𑒩𑒰𑒯𑓂𑒧𑒝𑒏 𑒣𑒰𑒍𑒪, 𑒦𑒰𑒃 𑒮𑒦 𑒖𑒰𑒟𑒱 𑒂𑒢𑒟𑒱 𑒮𑒦 𑒩𑒰𑒐𑒟𑒱 𑒧𑒰𑒞𑒰𑒏 𑒮𑒧𑒏𑓂𑒭।
𑒏𑒳𑓀𑒞𑒲 𑒠𑒹𑒟𑒱 𑒂𑒡-𑒦𑒲𑒧𑒏𑒹𑒿 𑒂𑒡𑒧𑒹 𑒬𑒹𑒭 𑒮𑒦 𑒧𑒱𑒪𑒱 𑒐𑒰𑒟𑒱, 𑒦𑒲𑒧𑒏 𑒞𑒻𑒨𑒼 𑒦𑒴𑒐 𑒧𑒹𑒙𑒰𑒃𑒢𑓂𑒯𑒱 𑒢𑒯𑒱 𑒦𑒳𑒐𑒪𑒹 𑒍 𑒩𑒯𑒱 𑒖𑒰𑒟𑒱।
𑒦𑒳𑒐𑒪𑒹 𑒕𑒪𑒰𑒯 𑒦𑒲𑒧 𑒋𑒏 𑒠𑒱𑒢 𑒑𑒹𑒪𑒰𑒯 𑒢𑒯𑒱 𑒦𑒱𑒏𑓂𑒭𑒰𑒙𑒢𑒧𑒹, 𑒮𑒳𑒢𑒪 𑒒𑒼𑒩 𑒏𑒢𑓂𑒢𑒰𑒩𑒼𑒯𑒙 𑒒𑒩𑒧𑒹, 𑒣𑒴𑒕𑒪 𑒏𑒰𑒩𑒝 𑒖𑒰𑒢𑒪 𑒮𑒹।
𑒥𑒏𑒰𑒮𑒳𑒩 𑒩𑒰𑒏𑓂𑒭𑒮 𑒍𑒞𑒋 𑒕𑒪 𑒢𑒑𑒩 𑒥𑒰𑒯𑒩 𑒢𑒱𑒫𑒰𑒮 𑒖𑒏𑒩, 𑒩𑒰𑒖𑒰 𑒁𑒮𑒧𑒩𑓂𑒟 𑒕𑒪, 𑒩𑒰𑒏𑓂𑒭𑒮 𑒏𑒩𑒋 𑒁𑒞𑓂𑒨𑒰𑒔𑒰𑒩 𑒥𑒛𑓃-𑒥𑒛𑓃।
𑒕𑒪 𑒢𑒱𑒏𑒰𑒪𑒪 𑒮𑒧𑒰𑒡𑒰𑒢 𑒖𑒹 𑒮𑒦 𑒣𑒩𑒱𑒫𑒰𑒩𑒮𑒿 𑒣𑓂𑒩𑒞𑒱𑒠𑒱𑒢 𑒋𑒏, 𑒏𑒙𑒯𑒲 𑒑𑒰𑒛𑓃𑒲 𑒦𑒩𑒱 𑒁𑒢𑓂𑒢 𑒧𑒠𑒱𑒩𑒰 𑒧𑒾𑒮, 𑒖𑒰𑒟𑒱 𑒥𑒯𑒪𑒧𑒰𑒢।
𑒥𑒏 𑒐𑒰𑒃𑒞 𑒕𑒪 𑒮𑒦𑒙𑒰 𑒦𑒼𑒖𑒢 𑒮𑓀𑒑 𑒥𑒯𑒪𑒧𑒰𑒢𑒯𑒳𑒏𑒹𑒿 𑒮𑒹, 𑒏𑒢𑓂𑒢𑒰𑒩𑒼𑒯𑒙 𑒧𑒔𑒪 𑒕𑒪 𑒒𑒩 𑒥𑓂𑒩𑒰𑒯𑓂𑒧𑒝 𑒣𑒩𑒱𑒫𑒰𑒩𑒏 𑒧𑒡𑓂𑒨𑒹।
𑒣𑒰𑒩 𑒕𑒪 𑒣𑒩𑒱𑒫𑒰𑒩𑒏 𑒂𑒃 𑒮𑒦 𑒣𑒩𑒱𑒫𑒰𑒩 𑒠𑒳𑓁𑒐𑒱𑒞 𑒕𑒪,
𑒏𑒳𑓀𑒞𑒲 𑒏𑒯𑒪 𑒣𑒰𑒿𑒔 𑒣𑒳𑒞𑓂𑒩 𑒁𑒕𑒱, 𑒦𑒲𑒧𑒏 𑒥𑒪 𑒮𑒳𑒢𑒰𑒋𑒪। 𑒦𑒲𑒧𑒏 𑒥𑒪𑒏 𑒔𑒩𑓂𑒔 𑒮𑒳𑒢𑒱-𑒮𑒳𑒢𑒱 𑒏𑒋 𑒥𑓂𑒩𑒰𑒯𑓂𑒧𑒝 𑒧𑒰𑒢𑒪, 𑒏𑒵𑒞𑒖𑓂𑒘 𑒦𑒹𑒪 𑒦𑒲𑒧𑒏𑒹𑒿 𑒍 𑒑𑒰𑒛𑓃𑒲𑒏 𑒮𑓀𑒑 𑒐𑒼𑒯 𑒣𑒚𑒰𑒍𑒪।
𑒐𑒼𑒯 𑒩𑒰𑒏𑓂𑒭𑒮𑒏 𑒞𑒰𑒏𑒱 𑒦𑒲𑒧 𑒐𑒹𑒪𑒏, 𑒕𑒪 𑒍 𑒦𑒳𑒐𑒰𑒋𑒪, 𑒞𑒵𑒣𑓂𑒞 𑒮𑓂𑒫𑒨𑓀 𑒦𑒲𑒧 𑒕𑒪 𑒠𑒹𑒩𑒲 𑒮𑒿 𑒁𑒞𑒵𑒣𑓂𑒞 𑒥𑒏𑒰𑒮𑒳𑒩 𑒂𑒋𑒪।
𑒞𑒰𑒧𑒮𑒹 𑒂𑒏𑓂𑒩𑒧𑒝 𑒏𑒋𑒪𑒏 𑒏𑒱𑓀𑒞𑒳 𑒪𑒰𑒞-𑒧𑒳𑒏𑓂𑒏𑒰 𑒧𑒰𑒩𑒱 𑒏𑒋,
𑒦𑒲𑒧 𑒣𑓂𑒩𑒰𑒝 𑒪𑒹𑒪𑒏 𑒍𑒏𑒩𑒰 𑒐𑒲𑓀𑒔𑒱 𑒢𑒑𑒩 𑒠𑓂𑒫𑒰𑒩 𑒂𑒢𑒱 𑒏𑒋।
𑒦𑒹𑒪 𑒣𑓂𑒩𑒮𑒢𑓂𑒢 𑒮𑒦 𑒖𑒢 𑒧𑒢𑒍𑒪𑒏 𑒣𑒴𑒖𑒰-𑒣𑒩𑓂𑒫 𑒍𑒞𑒋, 𑒏𑒳𑓀𑒞𑒲 𑒔𑒪𑒪𑒲𑒯 𑒂𑒩 𑒏𑒱𑒕𑒳 𑒠𑒱𑒢 𑒍𑒯𑒱 𑒢𑒑𑒩 𑒩𑒯𑒱 𑒏𑒋।
𑒮𑒳𑒢𑒪 𑒣𑒰𑓀𑒔𑒰𑒪𑒏 𑒮𑓂𑒫𑒨𑓀𑒥𑒩𑒏, 𑒏𑒟𑒰 𑒣𑒰𑓀𑒔𑒰𑒪𑒲𑒏 𑒠𑓂𑒩𑒳𑒣𑒠𑒏,
𑒋𑒏𑒔𑒏𑓂𑒩𑒰 𑒢𑒑𑒩𑒲𑒮𑒿 𑒜𑒹𑒩𑒏-𑒜𑒹𑒩 𑒥𑓂𑒩𑒰𑒯𑓂𑒧𑒝 𑒣𑒯𑒳𑒿𑒔𑒻𑒞 𑒍𑒞𑒋।
𑒣𑒰𑒝𑓂𑒛𑒫𑒖𑒢 𑒪𑒋 𑒩𑒯𑒪 𑒂𑒖𑓂𑒘𑒰 𑒧𑒰𑒞𑒵 𑒏𑒳𑓀𑒞𑒲𑒮𑒿 𑒩𑒯𑒟𑒱,
𑒥𑓂𑒨𑒰𑒮 𑒣𑒯𑒳𑒿𑒔𑒱 𑒏𑒯𑒪 𑒖𑒰𑒅 𑒮𑓂𑒫𑒨𑓀𑒥𑒩 𑒍𑒞𑒋 𑒠𑒹𑒐𑒋 !
𑒧𑒰𑒩𑓂𑒑𑒧𑒹 𑒇𑒭𑒱 𑒡𑒾𑒧𑓂𑒨 𑒦𑒹𑒙𑒪𑒰𑒯 𑒕𑒪𑒰𑒯 𑒣𑓀𑒛𑒱𑒞 𑒖𑓂𑒘𑒰𑒢𑒲, 𑒥𑒜𑓃𑒪 𑒂𑒑𑒴 𑒞𑒐𑒢 𑒧𑒱𑒪𑒱 𑒮𑓀𑒏𑒪𑓂𑒣𑒱𑒞 𑒦𑓄 𑒮𑒦 𑒣𑓂𑒩𑒰𑒝𑒲।
𑒮𑒳𑒢𑒱 𑒏𑒟𑒰 𑒣𑓂𑒩𑒬𑓀𑒮𑒰 𑒨𑒖𑓂𑒘𑒮𑒿 𑒢𑒱𑒏𑒪𑒪𑒱 𑒨𑒰𑒖𑓂𑒘𑒮𑒹𑒢𑒲𑒏, 𑒧𑒞𑓂𑒮𑓂𑒨𑒦𑒹𑒠 𑒏𑒩𑒞𑒰𑒯 𑒖𑒹 𑒏𑓂𑒨𑒼 𑒠𑓂𑒩𑒾𑒣𑒠𑒲 𑒫𑒩𑒝 𑒏𑒩𑒞𑒲𑒯।
𑒮𑓂𑒫𑒨𑓀𑒥𑒩𑒏 𑒮𑓂𑒟𑒰𑒢𑒏 𑒩𑒮𑓂𑒞𑒰 𑒞𑒏𑒪𑒢𑓂𑒯𑒱 𑒣𑒰𑓀𑒔𑒰𑒪𑒧𑒹 𑒖𑒰 𑒏𑒋,
𑒏𑒳𑒧𑓂𑒦𑒏𑒰𑒩𑒏 𑒒𑒩 𑒛𑒹𑒩𑒰 𑒠𑒹𑒪𑒢𑓂𑒯𑒱 𑒫𑒱𑒔𑒰𑒩 𑒏𑒳𑓀𑒞𑒲𑒏 𑒧𑒰𑒢𑒱 𑒏𑒋।
𑒏𑒩𑓂𑒝 𑒂𑒋𑒪 𑒕𑒪 𑒠𑒳𑓁𑒬𑒰𑒮𑒢, 𑒠𑒳𑒩𑓂𑒨𑒼𑒡𑒢𑒏 𑒮𑓀𑒑 𑒮𑒖𑓂𑒖𑒱𑒞, 𑒠𑒹𑒬-𑒠𑒹𑒬𑒏 𑒩𑒰𑒖𑒰 𑒂𑒋𑒪 𑒕𑒪 𑒩𑓀𑒑𑒦𑒴𑒧𑒱 𑒫𑒲𑒩𑒮𑒿 𑒐𑒔𑒱𑒞।
𑒞𑒐𑒢 𑒂𑒨𑒪𑒱 𑒠𑓂𑒩𑒾𑒣𑒠𑒲 𑒦𑒰𑒃 𑒡𑒵𑒭𑓂𑒙𑒠𑓂𑒨𑒳𑒧𑓂𑒢𑒏 𑒮𑓀𑒑 𑒮𑒳𑒮𑒖𑓂𑒖𑒱𑒞, 𑒣𑒳𑒭𑓂𑒣𑒧𑒰𑒪 𑒪𑒹𑒢𑒹 𑒂𑒨𑒪𑒱 𑒏𑒹𑒪𑒢𑒱 𑒮𑒦𑒏 𑒢𑒖𑒩𑒱 𑒂𑒏𑒵𑒭𑓂𑒙।
𑒥𑒲𑒔 𑒮𑓂𑒫𑒨𑓀𑒥𑒩𑒏 𑒦𑒴𑒧𑒱𑒏 𑒆𑒣𑒩 𑒧𑒞𑓂𑒮𑓂𑒨 𑒋𑒏𑒙𑒰 𑒪𑒙𑒏𑒪, 𑒍𑒏𑒩 𑒢𑒲𑒔𑒰𑒿 𑒔𑒏𑓂𑒩 𑒋𑒏𑒙𑒰 𑒞𑒲𑒫𑓂𑒩 𑒑𑒞𑒱𑒨𑒹 𑒕𑒪 𑒒𑒴𑒧𑒱 𑒩𑒯𑒪।
𑒢𑒲𑒔𑒰𑒿 𑒣𑒰𑒢𑒱𑒧𑒹 𑒕𑒰𑒯 𑒠𑒹𑒐𑒱 𑒖𑒹 𑒔𑒏𑓂𑒩𑒧𑒡𑓂𑒨 𑒣𑒰𑒞𑒩 𑒦𑒳𑒩𑒏𑒲 𑒞𑒩, 𑒠𑒰𑒑𑒱 𑒮𑒏𑒞 𑒧𑒞𑓂𑒮𑓂𑒨 𑒂𑒿𑒐𑒱𑒏𑒹𑒿 𑒣𑒳𑒭𑓂𑒣𑒧𑒰𑒪 𑒣𑒛𑓃𑒞 𑒞𑒏𑒩𑒹 𑒑𑒩।
𑒮𑒦𑒙𑒰 𑒩𑒰𑒖𑒰 𑒯𑒰𑒩𑒱 𑒟𑒰𑒏𑒱 𑒏𑒋 𑒦𑒹𑒪 𑒫𑒱𑒐𑒱𑒢𑓂𑒢 𑒟𑒰𑒏𑒪 𑒕𑒪, 𑒏𑒩𑓂𑒝 𑒠𑒹𑒐𑒱 𑒖𑒢 𑒥𑒰𑒖𑒱 𑒅𑒚𑒪 𑒮𑒴𑒞 𑒣𑒳𑒞𑓂𑒩 𑒏𑒱𑒋 𑒂𑒋𑒪 𑒕𑒪?
𑒠𑓂𑒩𑒾𑒣𑒠𑒲 𑒥𑒰𑒖𑒪𑒱 𑒑𑒰𑒿𑒟𑒱𑒨𑒼 𑒠𑒹𑒞 𑒖𑓂𑒨𑒼𑒿 𑒏𑒩𑓂𑒝 𑒧𑒞𑓂𑒮𑓂𑒨-𑒪𑒼𑒔𑒢𑒏𑒹𑒿, 𑒢𑒯𑒱 𑒣𑒯𑒱𑒩𑒰𑒋𑒥 𑒫𑒩𑒧𑒰𑒪𑒰 𑒢𑒯𑒱 𑒏𑒩𑒥 𑒫𑒩𑒝 𑒍𑒏𑒩𑒰𑒏𑒹𑒿।
𑒫𑒱𑒫𑒬 𑒏𑒩𑓂𑒝𑒏𑒹𑒿 𑒥𑒻𑒮𑒪 𑒠𑒹𑒐𑒱 𑒇𑒭𑒱𑒫𑒹𑒬 𑒁𑒩𑓂𑒖𑒳𑒢 𑒂𑒋𑒪 𑒕𑒪, 𑒋𑒏𑒯𑒱 𑒬𑒩-𑒮𑓀𑒡𑒰𑒢𑒮𑒿 𑒥𑒹𑒡𑒪 𑒧𑒞𑓂𑒮𑓂𑒨 𑒮𑒳𑒨𑒬 𑒣𑒰𑒍𑒪 𑒕𑒪।
𑒥𑓂𑒩𑒰𑒯𑓂𑒧𑒝-𑒧𑓀𑒛𑒪𑒲 𑒏𑒋𑒢𑒹 𑒕𑒪 𑒥𑒳𑒗𑒱 𑒍𑒏𑒩𑒰 𑒥𑓂𑒩𑒰𑒯𑓂𑒧𑒝 𑒖𑒨-𑒖𑒨𑒏𑒰𑒩 𑒍𑒞𑒋, 𑒏𑓂𑒭𑒞𑓂𑒩𑒱𑒨 𑒩𑒰𑒖𑒰 𑒮𑒦 𑒏𑒋𑒪 𑒫𑒱𑒩𑒼𑒡, 𑒞𑒻𑒨𑒰𑒩 𑒁𑒩𑓂𑒖𑒳𑒢 𑒣𑒳𑒢𑒱 𑒮𑓀𑒡𑒰𑒢 𑒏𑒋।
𑒥𑒱𑒠𑓂𑒡 𑒧𑒞𑓂𑒮𑓂𑒨 𑒦𑒴 𑒐𑒮𑒪 𑒦𑒴𑒧𑒱 𑒥𑒪𑒩𑒰𑒧 𑒏𑒵𑒭𑓂𑒝 𑒂𑒑𑒰𑒿 𑒂𑒍𑒪, 𑒮𑒦 𑒩𑒰𑒖𑒰𑒏𑒹𑒿 𑒥𑒳𑒗𑒰𑒋 𑒮𑒳𑒗𑒰𑒋 𑒕𑒪 𑒮𑒯𑒙𑒰𑒨 𑒍𑒞𑒋𑒮𑒿 𑒯𑒙𑒰𑒍𑒪।
𑒏𑒵𑒭𑓂𑒝 𑒋𑒏𑒰𑓀𑒞𑒲 𑒏𑒯𑒪 𑒠𑒰𑒆 𑒮𑒳𑒢𑒴 𑒄, 𑒮𑒳𑒢𑒪 𑒕𑒪 𑒋𑒏 𑒅𑒩𑒢𑓂𑒞𑒲, 𑒫𑒰𑒩𑒝𑒰𑒫𑒞 𑒂𑒑𑒱 𑒥𑒱𑒔 𑒥𑒔𑒪 𑒣𑒰𑓀𑒛𑒫, 𑒥𑒔𑒪 𑒕𑒪𑒱 𑒏𑒳𑓀𑒞𑒲 𑒠𑒲𑒠𑒲।
𑒦𑒲𑒧 𑒞𑒐𑒢𑒹 𑒅𑒐𑒰𑒛𑓃𑒱 𑒫𑒵𑒏𑓂𑒭 𑒕𑒪 𑒦𑒹𑒪 𑒚𑒰𑒜𑓃 𑒮𑒯𑒙𑒱 𑒁𑒩𑓂𑒖𑒳𑒢 𑒏𑒋, 𑒏𑒵𑒭𑓂𑒝 𑒏𑒯𑒪 𑒯𑒹 𑒠𑒰𑒆 𑒏𑒰𑒪𑒔𑒏𑓂𑒩 𑒁𑒢𑒪𑒏 𑒋𑒞𑒋 𑒦𑒲𑒧 𑒁𑒩𑓂𑒖𑒳𑒢𑒏𑒹𑒿।
𑒠𑒹𑒐𑒱 𑒣𑒩𑒰𑒏𑓂𑒩𑒧 𑒯𑒞𑒼𑒞𑓂𑒮𑒰𑒯𑒱𑒞 𑒦𑒹𑒪 𑒩𑒰𑒖𑒰 𑒮𑒦 𑒣𑓂𑒩𑒨𑒰𑒝 𑒏𑒋𑒢𑒹 𑒕𑒪, 𑒣𑒰𑓀𑒛𑒫 𑒪𑒋 𑒔𑒪𑒪𑒰𑒯 𑒠𑓂𑒩𑒾𑒣𑒠𑒲𑒏𑒹𑒿 𑒫𑓂𑒨𑒑𑓂𑒩 𑒋𑒯𑒱 𑒮𑒦𑒮𑒿 𑒍 𑒦𑒹𑒪𑒱 𑒕𑒪𑒱।
𑒁𑒩𑓂𑒖𑒳𑒢 𑒐𑒼𑒪𑒱 𑒁𑒣𑒢 𑒩𑒯𑒮𑓂𑒨, 𑒐𑒱𑒮𑓂𑒮𑒰𑒮𑒿 𑒠𑓂𑒩𑒾𑒣𑒠𑒲𑒏𑒹𑒿 𑒏𑒋𑒪 𑒫𑒱𑒯𑓂𑒫𑒪,
𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒔𑒳𑒣𑒔𑒰𑒣 𑒮𑒳𑒢𑒋 𑒕𑒪, 𑒒𑒳𑒩𑒱 𑒣𑒱𑒞𑒰𑒏𑒹𑒿 𑒏𑒟𑒰 𑒄 𑒏𑒯𑒪𑒏।
𑒏𑒳𑒧𑓂𑒦𑒏𑒰𑒩𑒏 𑒒𑒩 𑒣𑒯𑒳𑒿𑒔𑒱 𑒣𑒰𑓀𑒛𑒫 𑒏𑒯𑒪 𑒠𑒹𑒐𑒴 𑒏𑒲 𑒯𑒧 𑒮𑒦 𑒂𑒢𑒪, 𑒏𑒳𑓀𑒞𑒲 𑒏𑒯𑒪 𑒂𑒢𑒪 𑒁𑒕𑒱 𑒖𑒹 𑒮𑒦 𑒞𑒏𑒩𑒰 𑒥𑒰𑒿𑒙𑒴 𑒣𑒰𑒿𑒔𑒴 𑒣𑒰𑒝𑓂𑒛𑒫 !!
𑒏𑒯𑒪 𑒁𑒩𑓂𑒖𑒳𑒢 𑒯𑒹 𑒧𑒰𑒞𑒰 𑒯𑒼𑒋𑒞 𑒢𑒯𑒱 𑒫𑓂𑒨𑒩𑓂𑒟 𑒁𑒯𑒰𑒿𑒏 𑒄 𑒥𑒰𑒞, 𑒮𑓀𑒑 𑒠𑓂𑒩𑒾𑒣𑒠𑒲𑒏 𑒯𑒼𑒋𑒞 𑒫𑒱𑒫𑒰𑒯 𑒣𑒰𑒿𑒔𑒴-𑒣𑒰𑒝𑓂𑒛𑒫𑒏 𑒮𑓀𑒑- 𑒮𑒰𑒟।
𑒠𑓂𑒩𑒳𑒣𑒠 𑒣𑒚𑒹𑒪𑒢𑓂𑒯𑒱 𑒣𑒳𑒩𑒯𑒱𑒞𑒏𑒹𑒿 𑒡𑒵𑒭𑓂𑒙𑒠𑓂𑒨𑒳𑒧𑓂𑒢𑒏 𑒮𑓀𑒑 𑒍𑒞𑒋, 𑒏𑒳𑓀𑒞𑒲𑒏𑒹𑒿 𑒢𑒼𑒞𑒪 𑒂 𑒮𑒦𑒏𑒹𑒿 𑒪𑒋 𑒑𑒹𑒪 𑒮𑓀𑒑 𑒁𑒣𑒢 । 𑒠𑓂𑒩𑒳𑒣𑒠 𑒮𑒳𑒢𑒪 𑒖𑒹 𑒣𑒰𑒿𑒔𑒴-𑒣𑒰𑒝𑓂𑒛𑒫 𑒏𑒩𑒞𑒰𑒯 𑒫𑒱𑒫𑒰𑒯 𑒠𑓂𑒩𑒾𑒣𑒠𑒲𑒮𑒿, 𑒞𑒐𑒢𑒯𑒱 𑒄 𑒏𑒟𑒰 𑒁𑒕𑒱 𑒣𑒴𑒩𑓂𑒫𑒖𑒢𑓂𑒧𑒯𑒱𑒏 𑒥𑓂𑒨𑒰𑒮 𑒂𑒥𑒱 𑒮𑒳𑒢𑒰𑒍𑒪!!
𑒦𑒹𑒙𑒪 𑒕𑒪𑒢𑓂𑒯𑒱 𑒫𑒩𑒠𑒰𑒢 𑒬𑒱𑒫𑒮𑒿 𑒖𑒹 𑒣𑒰𑒿𑒔 𑒣𑒞𑒱 𑒁𑒯𑒰𑒿 𑒣𑒰𑒋𑒥, 𑒮𑒳𑒢𑒱 𑒮𑒦 𑒠𑓂𑒩𑒾𑒣𑒠𑒲 𑒫𑒱𑒫𑒰𑒯 𑒠𑓂𑒩𑒳𑒣𑒠 𑒩𑒲𑒞𑒱 𑒫𑒻𑒠𑒱𑒏 𑒮𑒿 𑒏𑒩𑒰𑒍𑒪।
𑒮𑒦 𑒏𑒱𑒕𑒳 𑒠𑒱𑒢 𑒩𑒯𑒪 𑒍𑒞𑒋 𑒏𑒳𑒬𑒪𑒮𑒿 𑒠𑓂𑒩𑒳𑒣𑒠 𑒏𑒹𑒩 𑒧𑒯𑒪𑒧𑒹, 𑒣𑒮𑒩𑒪 𑒄 𑒔𑒩𑓂𑒔𑒰 𑒮𑒑𑒩𑒼 𑒡𑒩𑒱 𑒑𑒹𑒪 𑒑𑒣 𑒯𑒮𑓂𑒞𑒱𑒢𑒰𑒣𑒳𑒩 𑒧𑒯𑒪𑒧𑒹।
𑒪𑒼𑒏𑒪𑒰𑒖𑒮𑒿 𑒥𑒰𑒯𑓂𑒨 𑒣𑓂𑒩𑒮𑒢𑓂𑒢𑒞𑒰 𑒡𑒵𑒞𑒩𑒰𑒭𑓂𑒙𑓂𑒩 𑒕𑒪 𑒍𑒞𑒋 𑒠𑒹𑒐𑒍𑒢𑒹, 𑒧𑒰𑒢𑒱 𑒦𑒲𑒭𑓂𑒧-𑒠𑓂𑒩𑒼𑒝𑒏 𑒫𑒱𑒔𑒰𑒩 𑒣𑒚𑒰𑒍𑒪 𑒮𑒧𑒰𑒠 𑒁𑒑𑒳𑒞𑒍𑒢𑒹।
𑒂𑒢𑒲 𑒁𑒢𑒳𑒖 𑒣𑒞𑓂𑒢𑒲 𑒣𑒳𑒞𑒼𑒯𑒳 𑒍 𑒁𑒢𑒳𑒖 𑒣𑒳𑒞𑓂𑒩 𑒮𑒦𑒏𑒹𑒿 𑒂𑒠𑒩𑒮𑒿, 𑒠𑒳𑒩𑓂𑒨𑒼𑒡𑒢𑒏 𑒏𑒩𑓂𑒝𑒏 𑒫𑒱𑒩𑒼𑒡 𑒣𑒩 𑒏𑒋𑒪 𑒫𑒱𑒔𑒰𑒩 𑒫𑒱𑒠𑒳𑒩𑒏𑒹𑒿 𑒥𑒖𑒰𑒏𑒨, 𑒬𑒰𑒮𑓂𑒞𑓂𑒩𑒰𑒢𑒳𑒮𑒰𑒩 𑒫𑒱𑒔𑒰𑒩 𑒠𑒹𑒪𑒢𑓂𑒯𑒱 𑒂𑒡𑒰 𑒩𑒰𑒖𑓂𑒨 𑒠𑒹𑒥𑒰𑒏 𑒍 𑒖𑒰𑒏𑒋।
𑒫𑒱𑒠𑒳𑒩𑒯𑒱𑒏𑒹𑒿 𑒣𑒚𑒰𑒍𑒪 𑒡𑒵𑒞𑒩𑒰𑒭𑓂𑒙𑓂𑒩 𑒂𑒢𑒋 𑒩𑒰𑒖𑒧𑒯𑒪𑒮𑒿 𑒠𑓂𑒩𑒳𑒣𑒠𑒏, 𑒮𑒦𑒏𑒹𑒿 𑒪𑒋 𑒂𑒢𑒪 𑒣𑒯𑒳𑒿𑒔𑒪 𑒍 𑒖𑒢 𑒚𑒰𑒜𑓃 𑒏𑒩𑒋 𑒮𑓂𑒫𑒰𑒑𑒞। 𑒡𑒵𑒞𑒩𑒰𑒭𑓂𑒙𑓂𑒩 𑒏𑒯𑒪 𑒯𑒹 𑒨𑒳𑒡𑒱𑒭𑓂𑒚𑒱𑒩 𑒑𑒵𑒯 𑒏𑒪𑒯𑒮𑒿 𑒄 𑒢𑒲𑒏 𑒯𑒼𑒨𑒞, 𑒖𑒰𑒋 𑒐𑒰𑒝𑓂𑒛𑒫𑒣𑓂𑒩𑒮𑓂𑒟 𑒥𑒮𑒰𑒅 𑒢𑒫 𑒢𑒑𑒩 𑒂𑒡 𑒩𑒰𑒖 𑒪𑓄 𑒏𑒋।
𑒐𑒰𑒝𑓂𑒛𑒫𑒣𑓂𑒩𑒮𑓂𑒟 𑒁𑒕𑒱 𑒥𑒼𑒢 𑒋𑒐𑒢 𑒣𑒯𑒱𑒢𑒹 𑒕𑒪 𑒩𑒰𑒖𑒰𑒏 𑒢𑒑𑒩𑒲, 𑒧𑒰𑒢𑒱 𑒨𑒳𑒡𑒱𑒭𑓂𑒚𑒱𑒩 𑒑𑒹𑒪 𑒍𑒞𑒋 𑒥𑒢𑒰𑒨 𑒢𑒫 𑒒𑒩 𑒠𑓂𑒫𑒰𑒩 𑒮𑒖𑓂𑒖𑒱𑒞।
𑒃𑒢𑓂𑒠𑓂𑒩𑒣𑓂𑒩𑒮𑓂𑒟 𑒕𑒪 𑒣𑒛𑓃𑒪 𑒢𑒰𑒧 𑒂 𑒞𑒹𑒩𑒯 𑒫𑒩𑓂𑒭 𑒡𑒩𑒱 𑒏𑒹𑒪𑒢𑓂𑒯𑒱 𑒩𑒰𑒖, 𑒨𑒬 𑒕𑒪 𑒮𑒳𑒬𑒰𑒮𑒢𑒮𑒿 𑒂 𑒕𑒪 𑒖𑒢-𑒖𑒲𑒫𑒢 𑒁𑒞𑒱 𑒮𑓀𑒣𑒢𑓂𑒢।
𑒕𑒪 𑒁𑒯𑒱𑒢𑒰 𑒠𑒱𑒢 𑒥𑒲𑒞𑒱 𑒩𑒯𑒪 𑒁𑒋𑒪𑒰𑒯 𑒢𑒰𑒩𑒠 𑒋𑒏𑒠𑒱𑒢 𑒖𑒐𑒢, 𑒮𑓂𑒫𑒰𑒑𑒞 𑒦𑒹𑒪𑒢𑓂𑒯𑒱 𑒐𑒴𑒥 𑒯𑒳𑒢𑒏𑒩 𑒍𑒯𑒼 𑒩𑒯𑒟𑒱 𑒂𑒢𑓀𑒠𑒱𑒞 𑒞𑒐𑒢।
𑒠𑒹𑒐𑒪 𑒬𑒲𑒪-𑒑𑒳𑒝 𑒣𑒰𑓀𑒛𑒫𑒏 𑒧𑒳𑒠𑒰 𑒏𑒯𑒪 𑒠𑓂𑒩𑒾𑒣𑒠𑒲𑒮𑒿 𑒮𑒳𑒢𑒴 𑒥𑒰𑒞 𑒄, 𑒕𑒲 𑒣𑒞𑓂𑒢𑒲 𑒣𑒰𑓀𑒛𑒫𑒏 𑒧𑒳𑒠𑒰 𑒢𑒱𑒫𑒰𑒮𑒏 𑒢𑒱𑒁𑒧 𑒏𑒱𑒋 𑒢𑒯𑒱 𑒥𑒢𑒹𑒢𑒹 𑒕𑒲 ?
𑒢𑒰𑒩𑒠𑒏 𑒥𑒰𑒞 𑒮𑒧𑒲𑒔𑒲𑒢 𑒕𑒪 𑒮𑒹 𑒢𑒱𑒁𑒧 𑒥𑒢𑒹𑒪𑒟𑒱 𑒣𑒰𑒿𑒔𑒼 𑒑𑒼𑒙𑒹, 𑒋𑒏-𑒋𑒏 𑒧𑒰𑒮 𑒩𑒯𑒟𑒳 𑒮𑒦 𑒪𑒑 𑒠𑓂𑒩𑒾𑒣𑒠𑒲 𑒢𑒱𑒁𑒧 𑒢𑒯𑒱 𑒦𑓀𑒑 𑒯𑒼 !
𑒥𑒰𑒩𑒯 𑒫𑒩𑓂𑒭 𑒣𑒩𑓂𑒨𑓀𑒞 𑒕𑒼𑒛𑓃𑒋 𑒣𑒛𑓃𑒞 𑒑𑒵𑒯 𑒞𑓂𑒩𑒳𑒙𑒱 𑒦𑒹𑒪 𑒖𑓂𑒨𑒼𑒿, 𑒣𑒰𑒪𑒢 𑒢𑒱𑒁𑒧𑒏 𑒯𑒼𑒧𑒋 𑒪𑒰𑒑𑒪 𑒏𑒱𑒕𑒳 𑒏𑒰𑒪 𑒡𑒩𑒱 𑒄 । 𑒏𑒢𑒻𑒞 𑒁𑒋𑒪𑒰𑒯 𑒫𑒱𑒣𑓂𑒩 𑒋𑒏 𑒁𑒩𑓂𑒖𑒳𑒢 𑒣𑒳𑒕𑒪𑒢𑓂𑒯𑒱 𑒥𑒰𑒞 𑒏𑒲 ?
𑒔𑒼𑒩 𑒕𑒪 𑒔𑒼𑒩𑒹𑒢𑒹 𑒑𑒾𑒏𑒹𑒿 𑒯𑒰𑒏𑓂𑒩𑒼𑒮 𑒫𑒱𑒣𑓂𑒩 𑒕𑒪 𑒏𑒩𑒱 𑒩𑒯𑒪, 𑒬𑒮𑓂𑒞𑓂𑒩 𑒕𑒪 𑒑𑒵𑒯𑒧𑒹 𑒠𑓂𑒩𑒾𑒣𑒠𑒲 𑒮𑓀𑒑 𑒨𑒳𑒡𑒱𑒭𑓂𑒚𑒱𑒩 𑒖𑒹 𑒩𑒯𑒱 𑒩𑒯𑒪।
𑒫𑒱𑒣𑓂𑒩𑒏 𑒬𑒰𑒣𑒮𑒿 𑒢𑒲𑒏 𑒮𑒼𑒔𑒱 𑒧𑒴𑒩𑒲 𑒗𑒳𑒏𑒹𑒢𑒹 𑒑𑒹𑒪 𑒁𑒩𑓂𑒖𑒳𑒢, 𑒬𑒮𑓂𑒞𑓂𑒩 𑒂𑒢𑒱 𑒕𑒼𑒛𑓃𑒰𑒨𑒪 𑒑𑒾𑒏𑒹𑒿 𑒒𑒳𑒩𑒱 𑒂𑒋𑒪 𑒑𑒵𑒯 𑒞𑒐𑒢।
𑒧𑒰𑒿𑒑𑒪 𑒂𑒖𑓂𑒘𑒰 𑒨𑒳𑒡𑒱𑒭𑓂𑒚𑒱𑒩𑒮𑒿 𑒠𑒱𑒁 𑒑𑒵𑒯𑒞𑓂𑒨𑒰𑒑𑒏 𑒂𑒖𑓂𑒘𑒰, 𑒢𑒱𑒁𑒧 𑒦𑓀𑒑𑒏 𑒏𑒋𑒪 𑒯𑒧 𑒁𑒣𑒩𑒰𑒡, 𑒏𑒲 𑒥𑒰𑒖𑒪 𑒁𑒯𑒰𑒿 ?
𑒁𑒩𑓂𑒖𑒳𑒢 𑒄 𑒁𑒣𑒩𑒰𑒡 𑒪𑒰𑒑𑒞 𑒖𑒐𑒢 𑒣𑒻𑒒𑒏 𑒠𑓂𑒫𑒰𑒩𑒰 𑒯𑒼𑒋𑒞, 𑒕𑒼𑒙 𑒦𑒰𑒋 𑒏𑒐𑒢𑒼 𑒁𑒕𑒱 𑒂𑒥𑒱 𑒮𑒏𑒻𑒞 𑒥𑒛𑓃 𑒦𑒰𑒨 𑒒𑒩।
𑒧𑒳𑒠𑒰 𑒢𑒱𑒏𑒪𑒱 𑒑𑒹𑒪𑒰𑒯 𑒁𑒩𑓂𑒖𑒳𑒢 𑒂𑒖𑓂𑒘𑒰 𑒪𑒋 𑒧𑒰𑒞𑒰 𑒦𑒰𑒋𑒮𑒿, 𑒦𑓂𑒩𑒧𑒝 𑒠𑒹𑒬-𑒏𑒼𑒮𑒏 𑒏𑒩𑒻𑒞 𑒣𑒯𑒳𑒿𑒔𑒪 𑒯𑒩𑒱𑒠𑓂𑒫𑒰𑒩 𑒑𑓀𑒑 𑒞𑒙, 𑒮𑓂𑒢𑒰𑒢 𑒏𑒩𑒻𑒞 𑒏𑒰𑒪, 𑒢𑒖𑒩𑒱 𑒕𑒪 𑒢𑒰𑒑 𑒏𑒰𑒢𑓂𑒨𑒰𑒏 𑒖𑓂𑒨𑒼𑒿, 𑒏𑒼𑒢𑒰 𑒥𑒔𑒱 𑒮𑒏𑒻𑒞 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒣𑒰𑒞𑒰𑒪𑒏 𑒢𑒱𑒏𑒙।
𑒫𑒱𑒫𑒰𑒯 𑒣𑓂𑒩𑒰𑒩𑓂𑒟𑒢𑒰 𑒮𑓂𑒫𑒲𑒏𑒰𑒩𑒪 𑒁𑒩𑓂𑒖𑒳𑒢 𑒄 𑒕𑒪 𑒫𑒩𑒠𑒰𑒢 𑒦𑒹𑒙𑒪, 𑒖𑒪𑒧𑒹 𑒩𑒮𑓂𑒞𑒰 𑒥𑒢𑒞 𑒔𑒪𑒱 𑒮𑒏𑒥 𑒁𑒯𑒰𑒿 𑒫𑓂𑒨𑒫𑒡𑒰𑒢 𑒥𑒱𑒢।
𑒧𑒝𑒱𑒣𑒳𑒩 𑒣𑒯𑒳𑒿𑒔𑒱 𑒖𑒞𑒋 𑒔𑒱𑒞𑓂𑒩𑒰𑓀𑒑𑒠𑒰 𑒩𑒰𑒖𑒏𑒢𑓂𑒨𑒰 𑒕𑒪𑒱 𑒩𑒴𑒣𑒫𑒞𑒲, 𑒫𑒱𑒫𑒰𑒯𑒏 𑒣𑓂𑒩𑒮𑓂𑒞𑒰𑒫 𑒁𑒩𑓂𑒖𑒳𑒢𑒏 𑒮𑓂𑒫𑒲𑒏𑒰𑒩𑒪 𑒧𑒰𑒢𑒪 𑒩𑒰𑒖𑒰 𑒮𑒬𑒩𑓂𑒞, 𑒠𑒾𑒯𑒱𑒞𑓂𑒩 𑒯𑒼𑒋𑒞 𑒯𑒧𑒩 𑒫𑓀𑒬𑒖 𑒦𑒹𑒪 𑒄 𑒫𑒱𑒫𑒰𑒯 𑒞𑒐𑒢 𑒖𑒰 𑒏𑒋।
𑒔𑒱𑒞𑓂𑒩𑒰𑓀𑒑𑒠𑒰𑒏 𑒣𑒳𑒞𑓂𑒩 𑒦𑒹𑒪 𑒥𑒦𑓂𑒩𑒳𑒫𑒰𑒯𑒢 𑒢𑒰𑒧 𑒩𑒰𑒐𑒪 𑒑𑒹𑒪 𑒖𑒏𑒩 𑒄, 𑒣𑒩𑒧 𑒣𑓂𑒩𑒞𑒰𑒣𑒲 𑒣𑒩𑒰𑒏𑓂𑒩𑒧𑒲 𑒨𑒼𑒠𑓂𑒡𑒰 𑒥𑒢𑒪 𑒥𑒰𑒪𑒏 𑒣𑒰𑒕𑒴 𑒮𑒳𑒢𑒋 𑒕𑒲।
𑒤𑒹𑒩 𑒍𑒞𑒋𑒮𑒿 𑒢𑒱𑒏𑒪𑒱 𑒁𑒩𑓂𑒖𑒳𑒢 𑒣𑒯𑒳𑒿𑒔𑒪 𑒣𑓂𑒩𑒦𑒰𑒮 𑒞𑒲𑒩𑓂𑒟 𑒠𑓂𑒫𑒰𑒩𑒏𑒰 𑒢𑒱𑒏𑒙,
𑒬𑒮𑓂𑒞𑓂𑒩-𑒣𑓂𑒩𑒠𑒩𑓂𑒬𑒢𑒏 𑒂𑒨𑒼𑒖𑒢 𑒏𑒹𑒪𑒢𑓂𑒯𑒱 𑒏𑒵𑒭𑓂𑒝 𑒢𑒱𑒏𑒙 𑒣𑒩𑓂𑒫𑒞 𑒩𑒻𑒫𑒞𑒏।
𑒣𑓂𑒩𑒹𑒧 𑒠𑒹𑒐𑒱 𑒮𑒳𑒦𑒠𑓂𑒩𑒰𑒮𑒿 𑒏𑒵𑒭𑓂𑒝 𑒕𑒪𑒰𑒯 𑒮𑒳𑒗𑒍𑒢𑒹 𑒢𑒫 𑒅𑒣𑒰𑒨 𑒄, 𑒁𑒣𑒯𑒩𑒝 𑒏𑒩𑒥 𑒖𑒲𑒞𑒥 𑒨𑒳𑒠𑓂𑒡 𑒨𑒰𑒠𑒫𑒮𑒿 𑒥𑒢𑒞 𑒞𑒐𑒢𑒹 𑒥𑒰𑒞 𑒄।
𑒥𑒢𑒪𑒱 𑒮𑒰𑒩𑒟𑒲 𑒫𑒲𑒩 𑒮𑒳𑒦𑒠𑓂𑒩𑒰 𑒮𑓀𑒑𑓂𑒩𑒰𑒧 𑒕𑒪 𑒥𑒖𑒩𑒪 𑒖𑒐𑒢, 𑒥𑒳𑒗𑒰-𑒮𑒳𑒗𑒰 𑒧𑒹𑒪 𑒕𑒪 𑒏𑒩𑒍𑒢𑒹 𑒏𑒵𑒭𑓂𑒝 𑒖𑒰 𑒏𑒋 𑒞𑒐𑒢।
𑒫𑒱𑒫𑒰𑒯 𑒦𑒹𑒪 𑒞𑒠𑓀𑒞𑒩 𑒁𑒩𑓂𑒖𑒳𑒢 𑒮𑓀𑒑 𑒮𑒳𑒦𑒠𑓂𑒩𑒰 𑒑𑒋𑒪𑒰𑒯 𑒣𑒳𑒭𑓂𑒏𑒩, 𑒣𑒳𑒩𑒪 𑒖𑒐𑒢 𑒄 𑒫𑒢𑒫𑒰𑒮 𑒏𑒵𑒭𑓂𑒝𑒏 𑒮𑓀𑒑 𑒣𑒯𑒳𑒿𑒔𑒪 𑒃𑓀𑒠𑓂𑒩𑒣𑓂𑒩𑒮𑓂𑒟।
𑒠𑒹𑒐𑒱 𑒢𑒫𑒫𑒡𑒴 𑒣𑓂𑒩𑒮𑒢𑓂𑒢 𑒏𑒳𑓀𑒞𑒲 𑒂𑒢𑓀𑒠 𑒢𑒯𑒱 𑒮𑒧𑒙𑒰 𑒩𑒯𑒪, 𑒠𑓂𑒩𑒾𑒣𑒠𑒲𑒮𑒿 𑒣𑒰𑒿𑒔 𑒣𑒳𑒞𑓂𑒩, 𑒂 𑒁𑒦𑒱𑒧𑒢𑓂𑒨𑒳 𑒮𑒳𑒦𑒠𑓂𑒩𑒰𑒮𑒿 𑒦𑒹𑒪 𑒕𑒪।
𑒥𑒲𑒞𑒱 𑒕𑒪 𑒩𑒯𑒪 𑒠𑒱𑒢 𑒖𑒐𑒢 𑒁𑒋𑒪𑒰𑒯 𑒖𑒲𑒩𑓂𑒝 𑒬𑒩𑒲𑒩 𑒁𑒑𑓂𑒢𑒱, 𑒩𑒼𑒑𑒏 𑒢𑒱𑒠𑒰𑒢 𑒕𑒪 𑒐𑒰𑓀𑒛𑒫 𑒫𑒢 𑒩𑒯𑒋 𑒕𑒪 𑒍 𑒮𑒩𑓂𑒣 𑒞𑒏𑓂𑒭𑒏।
𑒃𑓀𑒠𑓂𑒩𑒏 𑒁𑒕𑒱 𑒧𑒱𑒞𑓂𑒩 𑒍 𑒖𑒐𑒢 𑒏𑒩𑒻𑒞 𑒕𑒲 𑒖𑒩𑒹𑒥𑒰𑒏 𑒯𑒧 𑒮𑒴𑒩𑒮𑒰𑒩, 𑒢𑒯𑒱 𑒖𑒩𑒥𑒋 𑒠𑒻𑒞 𑒕𑒟𑒱 𑒃𑓀𑒠𑓂𑒩, 𑒏𑒩𑒴 𑒏𑒵𑒣𑒰 𑒁𑒯𑒰𑒿 𑒯𑒹 𑒃𑓀𑒠𑓂𑒩 𑒁𑒫𑒞𑒰𑒩 ।
𑒕𑒲 𑒣𑓂𑒩𑒮𑓂𑒞𑒳𑒞 𑒧𑒳𑒠𑒰 𑒁𑒮𑓂𑒞𑓂𑒩 𑒁𑒕𑒱 𑒢𑒯𑒱 𑒯𑒧𑒩𑒰 𑒪𑒑 𑒍𑒞𑒹𑒏, 𑒃𑓀𑒠𑓂𑒩 𑒨𑒳𑒠𑓂𑒡𑒏 𑒯𑒹𑒞𑒳 𑒔𑒰𑒯𑒲 𑒨𑒼𑒑𑓂𑒨 𑒬𑒮𑓂𑒞𑓂𑒩𑒏 𑒧𑒰𑒞𑓂𑒩𑒰 𑒖𑒩𑒴𑒩𑒲 𑒖𑒞𑒹𑒏।
𑒠𑒹𑒪 𑒑𑒰𑓀𑒛𑒲𑒫 𑒡𑒢𑒳𑒭 𑒞𑒴𑒝𑒲𑒩 𑒁𑒏𑓂𑒭𑒨 𑒫𑒩𑒳𑒝𑒏 𑒩𑒟 𑒢𑓀𑒠𑒱𑒒𑒼𑒭, 𑒔𑒪𑒪 𑒛𑒰𑒯𑒥𑒰𑒏 𑒯𑒹𑒞𑒳 𑒁𑒑𑓂𑒢𑒱 𑒣𑒹𑒪𑒰𑒏 𑒥𑒰𑒠 𑒁𑒩𑓂𑒖𑒳𑒢𑒏 𑒞𑒼𑒭।
𑒃𑓀𑒠𑓂𑒩 𑒧𑒹𑒒𑒏𑒹𑒿 𑒣𑒚𑒍𑒪𑒢𑓂𑒯𑒱 𑒏𑒵𑒭𑓂𑒝 𑒏𑒋𑒪 𑒮𑒔𑒹𑒞 𑒖𑒹, 𑒫𑒰𑒨𑒫𑓂𑒨𑒏 𑒣𑓂𑒩𑒨𑒼𑒑 𑒏𑒋𑒪 𑒁𑒩𑓂𑒖𑒳𑒢 𑒧𑒹𑒒 𑒥𑒱𑒪𑒰𑒋𑒪 𑒮𑒹।
𑒞𑒏𑓂𑒭𑒏𑒏 𑒧𑒵𑒞𑓂𑒨𑒼𑒣𑒩𑒰𑒢𑓂𑒞 𑒃𑓀𑒠𑓂𑒩 𑒦𑒹𑒪𑒰𑒯 𑒣𑓂𑒩𑒏𑒙 𑒍𑒞𑒋, 𑒧𑒰𑒿𑒑𑒪 𑒁𑒩𑓂𑒖𑒳𑒢 𑒠𑒱𑒫𑓂𑒨𑒰𑒮𑓂𑒞𑓂𑒩 𑒯𑒳𑒢𑒏𑒰𑒮𑒿 𑒧𑒾𑒏𑒰 𑒠𑒹𑒐𑒱 𑒏𑒋।
𑒖𑒰𑒆 𑒬𑒱𑒫𑒏 𑒅𑒣𑒰𑒮𑒢𑒰 𑒏𑒩𑒴 𑒠𑒋 𑒮𑒏𑒻𑒞 𑒕𑒟𑒱 𑒫𑒩𑒠𑒰𑒢 𑒍, 𑒕𑒪 𑒧𑒨 𑒂𑒨𑒪 𑒁𑒑𑓂𑒢𑒱𑒏 𑒏𑒼𑒣𑒮𑒿 𑒥𑒔𑒱 𑒪𑒑 𑒁𑒩𑓂𑒖𑒳𑒢𑒏 𑒍।
𑒮𑒹𑒫𑒰 𑒏𑒩𑒥𑒰𑒏 𑒥𑒰𑒞 𑒕𑒪 𑒧𑒼𑒢𑒧𑒹 𑒪𑒹𑒢𑒹 𑒏𑒵𑒞𑒖𑓂𑒘 𑒕𑒪 𑒍, 𑒥𑒢𑒰𑒆 𑒮𑒦𑒰 𑒦𑒫𑒢 𑒁𑒢𑒳𑒣𑒧 𑒢𑒯𑒱 𑒥𑒢𑒪 𑒖𑒹 𑒏𑒞𑒯𑒳 𑒯𑒼𑓄।
𑒧𑒨 𑒠𑒰𑒢𑒫 𑒕𑒪 𑒏𑒋 𑒩𑒯𑒪 𑒢𑒫 𑒢𑒱𑒩𑓂𑒧𑒰𑒝, 𑒮𑒦𑒰 𑒦𑒫𑒢𑒏 𑒠𑒱𑒢-𑒩𑒰𑒞𑒱 𑒪𑒰𑒑𑒱 𑒅𑒞𑓂𑒟𑒰𑒢।
𑒮𑓂𑒤𑒙𑒱𑒏𑒮𑒿 𑒨𑒳𑒏𑓂𑒞 𑒬𑒲𑒮𑒧𑒯𑒪 𑒮𑒢 𑒏𑒾𑒬𑒪, 𑒨𑒳𑒡𑒱𑒭𑓂𑒚𑒱𑒩 𑒍𑒞𑒯𑒱 𑒞𑒐𑒢 𑒮𑒱𑓀𑒯𑒰𑒮𑒢 𑒥𑒻𑒮𑒪।
𑒇𑒭𑒱 𑒢𑒰𑒩𑒠𑒏 𑒂𑒑𑒧𑒢 𑒦𑒹𑒪 𑒍𑒞𑒋 𑒖𑒰𑒋, 𑒠𑒹𑒪𑒢𑓂𑒯𑒱 𑒏𑒩𑒥𑒰𑒏 𑒨𑒖𑓂𑒘 𑒖𑒹 𑒩𑒰𑒖𑒮𑒴𑒨 𑒏𑒯𑒰𑒨।
𑒥𑒖𑒰𑒍𑒪 𑒠𑓂𑒫𑒰𑒩𑒏𑒰𑒮𑒿 𑒏𑒵𑒭𑓂𑒝𑒏𑒹𑒿 𑒮𑒧𑒰𑒠 𑒣𑒚𑒰𑒨, 𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒮𑒦𑒰 𑒦𑒫𑒢𑒧𑒹 𑒂𑒥𑒱 𑒏𑒋, 𑒖𑒩𑒰𑒮𑓀𑒡 𑒧𑒑𑒡𑒏 𑒢𑒩𑒹𑒬 𑒩𑒯𑒞 𑒑𑒋 𑒨𑒰𑒫𑒞,
𑒩𑒰𑒖𑒮𑒴𑒨 𑒮𑒤𑒪 𑒢𑒯𑒱 𑒯𑒼𑒧𑒨 𑒠𑒹𑒞 𑒞𑒰𑒫𑒞।
𑒥𑓀𑒠𑒲 𑒥𑒢𑒹𑒪𑒏 𑒩𑒰𑒖𑒰 𑒪𑒼𑒏𑒢𑒱𑒏𑒹𑒿 𑒍 𑒯𑒩𑒰𑒨, 𑒂𑒏𑓂𑒩𑒧𑒝 𑒍𑒏𑒩 𑒦𑒹𑒪 𑒧𑒟𑒳𑒩𑒰 𑒣𑒩 𑒥𑒛𑓂𑒛, 𑒯𑒰𑒩𑒱 𑒠𑓂𑒫𑒰𑒩𑒏𑒰 𑒩𑒰𑒖𑒡𑒰𑒢𑒲 𑒥𑒢𑒰𑒍𑒪 𑒯𑒧 𑒖𑒰𑒋 ।
𑒨𑒳𑒡𑒱𑒭𑓂𑒚𑒱𑒩 𑒥𑒰𑒞 𑒮𑒳𑒢𑒻𑒞 𑒦𑒹𑒪𑒟𑒱 𑒯𑒞𑒰𑒮 𑒮𑒢, 𑒦𑒲𑒧 𑒁𑒩𑓂𑒖𑒳𑒢 𑒂𑒬𑒰 𑒥𑒢𑓂𑒯𑒹𑒪𑒢𑓂𑒯𑒱 𑒦𑓂𑒩𑒰𑒞𑒰 𑒮𑒳𑒢।
𑒏𑓂𑒭𑒞𑓂𑒩𑒱𑒨-𑒡𑒩𑓂𑒧 𑒁𑒕𑒱 𑒬𑒞𑓂𑒩𑒳𑒏𑒹𑒿 𑒫𑒬𑒧𑒹 𑒏𑒩𑒋, 𑒏𑒵𑒭𑓂𑒝,𑒁𑒩𑓂𑒖𑒳𑒢-𑒦𑒲𑒧 𑒮𑓀𑒑 𑒩𑒰𑒖𑒑𑒵𑒯 𑒔𑒪𑒪।
𑒇𑒭𑒱 𑒫𑒹𑒬𑒡𑒰𑒩𑒲 𑒩𑒰𑒖𑒑𑒲𑒩𑒏 𑒣𑓂𑒩𑒰𑒔𑒲𑒩 𑒪𑒰𑒿𑒒𑒱, 𑒣𑒯𑒳𑒿𑒔𑒪 𑒮𑒦 𑒮𑒼𑒗𑒹 𑒮𑒦𑒰-𑒦𑒫𑒢 𑒖𑒲-𑒖𑒰𑒿𑒞𑒱।
𑒮𑒞𑓂𑒏𑒰𑒩 𑒏𑒩𑒋 𑒔𑒰𑒯𑒪𑒏 𑒖𑒩𑒰𑒮𑓀𑒡 𑒥𑒳𑒗𑒱 𑒫𑒱𑒣𑓂𑒩, 𑒪𑒪𑒏𑒰𑒩𑒰 𑒠𑒹𑒪𑒏 𑒏𑒱𑓀𑒞𑒳 𑒦𑒲𑒧 𑒠𑓂𑒫𑓀𑒠-𑒨𑒳𑒠𑓂𑒡𑒏 𑒬𑒲𑒒।
𑒠𑒱𑒢 𑒥𑒲𑒞𑒪 𑒐𑒞𑓂𑒧𑒏 𑒢𑒰𑒧 𑒢𑒯𑒱 𑒪𑒻𑒕 𑒄 𑒨𑒳𑒠𑓂𑒡, 𑒏𑒵𑒭𑓂𑒝𑒏 𑒮𑓀𑒏𑒹𑒞 𑒣𑒰𑒥𑒱 𑒔𑒲𑒩𑒪 𑒍 𑒬𑒩𑒲𑒩 𑒮𑓀𑒡𑒱𑒮𑒿,
𑒦𑒲𑒧 𑒞𑒼𑒛𑓃𑒪 𑒬𑒩𑒲𑒩 𑒖𑒩𑒰𑒮𑓀𑒡𑒏 𑒅𑒢𑒙𑒱 𑒤𑒴𑒩𑓂𑒞𑓂𑒞𑒱𑒮𑒿, 𑒬𑒩𑒲𑒩 𑒤𑒹𑓀𑒏𑒪 𑒠𑒳𑒯𑒴 𑒠𑒱𑒬𑒱 𑒅𑒢𑒙𑒱 𑒋𑒧𑓂𑒯𑒩-𑒍𑒧𑓂𑒯𑒩, 𑒧𑒳𑒏𑓂𑒞 𑒏𑒋𑒪 𑒏𑒰𑒩𑒰𑒑𑒰𑒩𑒮𑒿 𑒥𑓀𑒠𑒲 𑒑𑒝 𑒩𑒰𑒖𑒰 𑒮𑒦𑒏𑒹𑒿।
𑒖𑒩𑒰𑒮𑓀𑒡-𑒣𑒳𑒞𑓂𑒩 𑒮𑒯𑒠𑒹𑒫𑒏𑒹𑒿 𑒠𑒋 𑒧𑒑𑒡 𑒩𑒰𑒖𑒏 𑒑𑒠𑓂𑒠𑒲, 𑒂𑒣𑒮 𑒦𑒹𑒪𑒰𑒯 𑒃𑓀𑒠𑓂𑒩𑒣𑓂𑒩𑒮𑓂𑒟 𑒒𑒳𑒩𑒪𑒰𑒯 𑒞𑒲𑒢𑒴 𑒫𑓂𑒨𑒏𑓂𑒞𑓂𑒞𑒱।
𑒣𑒴𑒩𑓂𑒫 𑒠𑒱𑒬𑒱 𑒦𑒲𑒧 𑒅𑒞𑓂𑒞𑒩 𑒁𑒩𑓂𑒖𑒳𑒢 𑒢𑒏𑒳𑒪 𑒠𑒏𑓂𑒭𑒱𑒝, 𑒮𑒯𑒠𑒹𑒫 𑒣𑒬𑓂𑒔𑒱𑒧 𑒠𑒱𑒬𑒰 𑒠𑒱𑒬𑒱 𑒠𑒱𑒑𑓂𑒫𑒱𑒖𑒨 𑒐𑒰𑒞𑒱𑒩।
𑒫𑒱𑒖𑒨 𑒩𑒟 𑒢𑒯𑒱 𑒏𑓂𑒨𑒼 𑒩𑒼𑒏𑒱 𑒮𑒏𑒪 𑒯𑒳𑒢𑒏𑒩, 𑒡𑒢-𑒡𑒰𑒢𑓂𑒨𑒮𑒿 𑒣𑒩𑒱𑒣𑒴𑒩𑓂𑒝 𑒮𑒦 𑒂𑒥𑒱 𑒏𑒋𑒪 𑒞𑒻𑒨𑒰𑒩𑒲, 𑒩𑒰𑒖𑒮𑒴𑒨 𑒨𑒖𑓂𑒘𑒏 𑒦𑒹𑒪 𑒩𑒰𑒖𑒰 𑒮𑒦𑒏 𑒃𑒢𑓂𑒠𑓂𑒩𑒣𑓂𑒩𑒮𑓂𑒟𑒧𑒹 𑒥𑒖𑒰𑒯𑒲।
𑒩𑒰𑒖𑒰 𑒪𑒼𑒏𑒢𑒱 𑒏𑒹𑒿 𑒠𑒨 𑒮𑒧𑒳𑒔𑒱𑒞 𑒏𑒰𑒩𑓂𑒨𑒏 𑒦𑒰𑒩, 𑒦𑒲𑒭𑓂𑒧-𑒠𑓂𑒩𑒼𑒝𑒏𑒹𑒿 𑒨𑒖𑓂𑒘-𑒢𑒱𑒩𑒲𑒏𑓂𑒭𑒝𑒏 𑒠𑒹𑒪 𑒣𑓂𑒩𑒦𑒰𑒩।
𑒏𑒵𑒭𑓂𑒝 𑒫𑒱𑒣𑓂𑒩 𑒔𑒩𑒝-𑒡𑒼𑒥𑒰𑒏 𑒪𑒹𑒪𑒢𑓂𑒯𑒱 𑒏𑒰𑒖 । 𑒯𑒮𑓂𑒞𑒱𑒢𑒰𑒣𑒳𑒩𑒮𑒿 𑒦𑒲𑒭𑓂𑒧, 𑒠𑓂𑒩𑒼𑒝𑒏 𑒮𑓀𑒑 𑒦𑒹𑒪 𑒂𑒑𑒧𑒢, 𑒡𑒵𑒞𑒩𑒰𑒭𑓂𑒙𑓂𑒩 𑒫𑒱𑒠𑒳𑒩 𑒏𑒵𑒣 𑒁𑒬𑓂𑒫𑒞𑓂𑒟𑒰𑒧𑒰 𑒠𑒳𑒩𑓂𑒨𑒼𑒡𑒢 𑒠𑒳𑓁𑒬𑒰𑒮𑒢।
𑒥𑒲𑒔 𑒨𑒖𑓂𑒘𑒧𑒹 𑒅𑒚𑒪 𑒕𑒪 𑒣𑓂𑒩𑒬𑓂𑒢 𑒁𑒑𑓂𑒩-𑒣𑒴𑒖𑒰𑒏, 𑒦𑒲𑒭𑓂𑒧𑒏 𑒮𑒧𑓂𑒧𑒞𑒱 𑒨𑒳𑒡𑒱𑒭𑓂𑒚𑒱𑒩 𑒣𑒳𑒕𑒪𑒢𑓂𑒯𑒱 𑒖𑒰𑒋, 𑒦𑒲𑒭𑓂𑒧 𑒏𑒯𑒪 𑒕𑒟𑒱 𑒬𑓂𑒩𑒹𑒭𑓂𑒚 𑒏𑒵𑒭𑓂𑒝 𑒢𑒵𑒣 𑒥𑒲𑒔, 𑒮𑒯𑒠𑒹𑒫 𑒮𑒳𑒢𑒱 𑒫𑒔𑒢 𑒔𑒩𑒝 𑒣𑒐𑒰𑒩𑒨 𑒪𑒰𑒑।
𑒔𑒹𑒠𑒱𑒩𑒰𑒖 𑒬𑒱𑒬𑒳𑒣𑒰𑒪𑒮𑒿 𑒮𑒯𑒪 𑒢𑒯𑒱 𑒦𑒹𑒪, 𑒁𑒣𑒬𑒥𑓂𑒠 𑒏𑒵𑒭𑓂𑒝-𑒦𑒲𑒭𑓂𑒧𑒏𑒹𑒿 𑒠𑒹𑒥𑒋 𑒪𑒰𑒑𑒪, 𑒠𑒳𑒩𑓂𑒨𑒼𑒡𑒢-𑒦𑓂𑒩𑒰𑒞𑒰 𑒣𑓂𑒩𑒮𑒢𑓂𑒢 𑒕𑒪 𑒦𑒹𑒪, 𑒦𑒲𑒧𑒏 𑒏𑓂𑒩𑒼𑒡 𑒥𑒜𑓃𑒪 𑒕𑒪 𑒍 𑒗𑒣𑒙𑒪,
𑒦𑒲𑒭𑓂𑒧 𑒩𑒼𑒏𑒱 𑒬𑒰𑓀𑒞 𑒕𑒪 𑒍𑒏𑒩𑒰 𑒏𑒋𑒪।
𑒬𑒱𑒬𑒳𑒣𑒰𑒪𑒏 𑒑𑒰𑒩𑒱 𑒮𑒳𑒢𑒱𑒨𑒼 𑒕𑒪 𑒏𑒵𑒭𑓂𑒝 𑒣𑓂𑒩𑒬𑒰𑓀𑒞, 𑒕𑒪𑒰𑒯 𑒏𑒱𑒋𑒏 𑒞𑒿 𑒍 𑒣𑒱𑒮𑒱𑒨𑒾𑒞 𑒏𑒵𑒭𑓂𑒝𑒏, 𑒠𑒱𑒢 𑒥𑒲𑒞𑒪 𑒏𑒵𑒭𑓂𑒝 𑒠𑒹𑒪𑒟𑒱 𑒫𑒔𑒢 𑒠𑒲𑒠𑒲𑒏𑒹𑒿 𑒋𑒏, 𑒮𑒋 𑒁𑒣𑒩𑒰𑒡 𑒏𑓂𑒭𑒧𑒰 𑒯𑒧 𑒏𑒩𑒥 𑒍𑒏𑒩।
𑒮𑒋 𑒑𑒰𑒩𑒱 𑒮𑒳𑒢𑒪𑒰𑒏 𑒅𑒣𑒩𑒰𑓀𑒞 𑒔𑒪𑒪 𑒮𑒳𑒠𑒩𑓂𑒬𑒢, 𑒔𑒏𑓂𑒩 𑒏𑒋𑒪𑒏 𑒔𑒹𑒠𑒱𑒩𑒰𑒖𑒏 𑒬𑒱𑒩𑒼𑒔𑓂𑒕𑒹𑒠 𑒞𑒐𑒢, 𑒮𑒦𑒰 𑒧𑒡𑓂𑒨 𑒬𑒰𑓀𑒞𑒱 – 𑒣𑒮𑒩𑒪 𑒕𑒪 𑒖𑒰𑒋, 𑒬𑒱𑒬𑒳𑒣𑒰𑒪 𑒣𑒳𑒞𑓂𑒩𑒏𑒹𑒿 𑒔𑒹𑒠𑒱𑒏 𑒑𑒠𑓂𑒠𑒲 𑒣𑒩 𑒥𑒻𑒮𑒰𑒨।
𑒨𑒖𑓂𑒘𑒏 𑒏𑓂𑒩𑒱𑒨𑒰 𑒢𑒱𑒩𑓂𑒫𑒱𑒒𑓂𑒢 𑒮𑓀𑒣𑒢𑓂𑒢 𑒕𑒪 𑒦𑒹𑒪, 𑒮𑒦 𑒩𑒰𑒖𑒰𑒏𑒹𑒿 𑒮𑒮𑒧𑓂𑒧𑒰𑒢 𑒫𑒱𑒠𑒰 𑒏𑒋𑒪 𑒑𑒹𑒪।
𑒮𑒦𑒰 𑒦𑒫𑒢𑒏 𑒔𑒰𑒧𑒞𑓂𑒏𑒵𑒞𑓂𑒨 𑒦𑒹𑒪 𑒔𑒩𑓂𑒔𑒱𑒞, 𑒠𑒳𑒩𑓂𑒨𑒼𑒡𑒢-𑒬𑒏𑒳𑒢𑒱 𑒦𑒫𑒢𑒏𑒹𑒿 𑒠𑒹𑒐𑒪 𑒔𑒏𑒱𑒞। 𑒢𑒲𑒔𑒰𑒿 𑒠𑒹𑒐𑒱 𑒧𑒵𑒑-𑒧𑒩𑒲𑒔𑒱𑒏𑒰 𑒥𑒰𑒢𑓂𑒯𑒪 𑒤𑒰𑒿𑒜𑓃, 𑒣𑒰𑒢𑒱 𑒢𑒯𑒱 𑒕𑒪 𑒯𑒮𑒪𑒱 𑒠𑓂𑒩𑒾𑒣𑒠𑒲 𑒄 𑒖𑒰𑒢𑒱, 𑒁𑒋𑒢𑒰 𑒮𑒼𑒿𑒗𑒰 𑒣𑒰𑒩𑒠𑒩𑒩𑓂𑒬𑒲 𑒢𑒯𑒱 𑒄 𑒠𑒹𑒐𑒪,
𑒍 𑒔𑒼𑒙𑒱𑒪 𑒦𑒲𑒧𑒏 𑒁𑒙𑓂𑒙𑒯𑒰𑒮𑒮𑒿 𑒫𑒱𑒏𑒪।
𑒂𑒿𑒑𑒰 𑒮𑓂𑒤𑒙𑒱𑒏 𑒤𑒩𑓂𑒬 𑒕𑒪 𑒖𑒏𑒩𑒰 𑒥𑒳𑒗𑒪, 𑒣𑒰𑒢𑒱 𑒦𑒩𑒪 𑒦𑒲𑒖𑒪 𑒕𑒪 𑒮𑒦 𑒯𑒿𑒮𑒪।
𑒁𑒣𑒧𑒰𑒢𑒱𑒞 𑒕𑒪 𑒪𑒋 𑒨𑒳𑒡𑒱𑒭𑓂𑒚𑒱𑒩𑒮𑒿 𑒂𑒖𑓂𑒘𑒰, 𑒔𑒪𑒪 𑒯𑒮𑓂𑒞𑒱𑒢𑒰𑒣𑒳𑒩 𑒬𑒲𑒒𑓂𑒩𑒯𑒱 𑒮𑒦 𑒦𑓂𑒩𑒰𑒞𑒰। 𑒏𑓂𑒩𑒼𑒡𑒱𑒞 𑒯𑒵𑒠𑒨 𑒄𑒩𑓂𑒭𑓂𑒨𑒰𑒏 𑒫𑒬𑒧𑒹 𑒕𑒪 𑒠𑒳𑒩𑓂𑒨𑒼𑒡𑒢, 𑒬𑒏𑒳𑒢𑒱 𑒮𑓀𑒑 𑒧𑓀𑒞𑓂𑒩𑒝𑒰 𑒏𑒋 𑒏𑓄𑒋𑒏𑒙𑒰 𑒫𑒱𑒔𑒰𑒩𑒪, 𑒮𑒼𑒗𑒹 𑒨𑒳𑒠𑓂𑒡𑒧𑒹 𑒣𑒰𑓀𑒛𑒫𑒏𑒹𑒿 𑒯𑒩𑒹𑒢𑒰𑒃 𑒁𑒕𑒱 𑒧𑒼𑒬𑓂𑒏𑒱𑒪, 𑒮𑒼𑒔𑒱 𑒄 𑒠𑒼𑒮𑒩 𑒫𑓂𑒨𑒴𑒯 𑒩𑒔𑒪𑒢𑓂𑒯𑒱 𑒠𑒳𑒭𑓂𑒙 𑒬𑒏𑒳𑒢𑒱।
𑒦𑒫𑓂𑒨 𑒮𑒦𑒰 𑒦𑒫𑒢 𑒋𑒏𑒙𑒰 𑒯𑒧 𑒮𑒦 𑒥𑒢𑒰𑒋𑒥,
𑒣𑒰𑒝𑓂𑒛𑒫-𑒖𑒢𑒏𑒹𑒿 𑒠𑒹𑒐𑒥𑒰 𑒪𑒹𑒪 𑒮𑒹𑒯𑒼 𑒥𑒖𑒰𑒋𑒥, 𑒠𑓂𑒨𑒴𑒞 𑒐𑒹𑒪𑒏 𑒕𑒲 𑒧𑒯𑒰𑒩𑒟𑒲 𑒯𑒧 𑒑𑒰𑓀𑒡𑒰𑒩𑒫𑒰𑒮𑒲, 𑒡𑒵𑒞𑒩𑒰𑒭𑓂𑒙𑓂𑒩𑒏𑒹𑒿 𑒏𑒯𑒱 𑒂𑒧𑓀𑒞𑓂𑒩𑒱𑒞 𑒏𑒩𑒰𑒆 𑒥𑒖𑒰𑒆। 𑒦𑒫𑒢 𑒥𑒢𑒱 𑒏𑒋 𑒞𑒻𑒨𑒰𑒩 𑒦𑒹𑒪 𑒋𑒏𑒹 𑒢𑒱𑒮𑒰𑒮𑒲।
𑒠𑓂𑒨𑒴𑒞 𑒐𑒹𑒪𑒏 𑒂𑒧𑓀𑒞𑓂𑒩𑒝𑒏 𑒯𑒹𑒞𑒳 𑒡𑒵𑒞𑒩𑒰𑒭𑓂𑒙𑓂𑒩 𑒫𑒱𑒔𑒰𑒩𑒪। 𑒫𑒱𑒠𑒳𑒩 𑒏𑒯𑒪 𑒩𑒰𑒖𑒢𑓂 𑒐𑒹𑒪 𑒏𑒩𑒞 𑒫𑒱𑒢𑒰𑒬 𑒮𑒦𑒏𑒹𑒿,
𑒠𑒳𑒩𑓂𑒨𑒼𑒡𑒢𑒏 𑒁𑓀𑒡𑒣𑓂𑒩𑒹𑒧𑒧𑒹 𑒡𑒵𑒞𑒩𑒰𑒭𑓂𑒙𑓂𑒩 𑒧𑒳𑒠𑒰 𑒢𑒯𑒱 𑒧𑒰𑒢𑒪।
𑒮𑓂𑒫𑒨𑓀 𑒫𑒱𑒠𑒳𑒩 𑒑𑒹𑒪𑒰𑒯 𑒠𑒹𑒥𑒋 𑒢𑒱𑒧𑓀𑒞𑓂𑒩𑒝 𑒃𑓀𑒠𑓂𑒩𑒣𑓂𑒩𑒮𑓂𑒟, 𑒣𑒰𑒝𑓂𑒛𑒫 𑒖𑒢𑒏𑒹𑒿 𑒁𑒋𑒪𑒰 𑒣𑒩 𑒦𑒹𑒪 𑒣𑓂𑒩𑒹𑒧-𑒧𑒱𑒪𑒢। 𑒧𑒳𑒠𑒰 𑒯𑒵𑒠𑒨𑒏 𑒫𑒱𑒭 𑒥𑒯𑒩𑒰𑒃𑒞 𑒖𑒪𑓂𑒠𑒲 𑒏𑒼𑒢𑒰 𑒏𑒋, 𑒠𑒳𑒩𑓂𑒨𑒼𑒡𑒢 𑒪𑒋 𑒑𑒹𑒪𑒰𑒯 𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒮𑒦𑒰 𑒦𑒫𑒢𑒧𑒹।
𑒠𑓂𑒨𑒴𑒞𑒏 𑒔𑒩𑓂𑒔 𑒮𑒑𑒩𑒨 𑒯𑒼𑒧𑒋 𑒪𑒑𑒪 𑒕𑒪 𑒍𑒞𑒋, 𑒬𑒏𑒳𑒢𑒱 𑒧𑒰𑒙𑒱 𑒤𑒹𑓀𑒏𑒱 𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒦𑓄 𑒖𑒰𑒋, 𑒮𑒏𑒳𑒔𑒰𑒃𑒞 𑒕𑒲 𑒏𑓂𑒭𑒞𑓂𑒩𑒱𑒨 𑒦𑓄 𑒏𑒩𑒋 𑒕𑒲 𑒁𑒢𑒳𑒔𑒱𑒞। 𑒨𑒳𑒡𑒱𑒭𑓂𑒚𑒱𑒩 𑒞𑒻𑒨𑒰𑒩 𑒖𑒐𑒢𑒹 𑒦𑒹𑒪𑒰𑒯, 𑒠𑒳𑓁𑒬𑒰𑒮𑒢 𑒏𑒯𑒪, 𑒄 𑒐𑒹𑒪 𑒯𑒼𑒋𑒞 𑒨𑒡𑒱𑒭𑓂𑒚𑒱𑒩 𑒂 𑒠𑒳𑒩𑓂𑒨𑒼𑒡𑒢𑒏 𑒥𑒱𑒔, 𑒧𑒰𑒧𑒰 𑒬𑒏𑒳𑒢𑒱 𑒣𑒰𑒮 𑒤𑒹𑓀𑒏𑒞𑒰𑒯 𑒠𑒳𑒩𑓂𑒨𑒼𑒡𑒢𑒏 𑒠𑒱𑒬𑒱𑒮𑒿, 𑒯𑒳𑒢𑒏 𑒯𑒰𑒩𑒱 𑒖𑒲𑒞 𑒧𑒰𑒢𑒪 𑒖𑒄𑒞 𑒠𑒳𑒩𑓂𑒨𑒼𑒡𑒢𑒏 𑒮𑒹, 𑒠𑒼𑒮𑒩 𑒠𑒱𑒢 𑒐𑒹𑒪 𑒦𑒹𑒪 𑒮𑒦𑒰 𑒦𑒫𑒢𑒧𑒹 𑒦𑒰𑒩𑒞𑒏 𑒯𑒹!! 𑒮𑒦𑒰 𑒦𑒫𑒢 𑒠𑒩𑓂𑒬𑒏𑒮𑒿 𑒕𑒪 𑒦𑒩𑒪,𑒕𑒪 𑒍𑒞𑒋,
𑒦𑒲𑒭𑓂𑒧, 𑒠𑓂𑒩𑒼𑒝, 𑒏𑒵𑒣𑒰𑒔𑒰𑒩𑓂𑒨, 𑒫𑒱𑒠𑒳𑒩, 𑒡𑒵𑒞𑒩𑒰𑒭𑓂𑒙𑓂𑒩 𑒅𑒣𑒮𑓂𑒟𑒱𑒞।
𑒣𑒯𑒱𑒢𑒹 𑒩𑒞𑓂𑒢𑒏 𑒥𑒰𑒖𑒲 𑒤𑒹𑒩 𑒔𑒰𑒢𑒲-𑒮𑒼𑒢𑒏 𑒪𑒰𑒑𑒪, 𑒤𑒹𑒩 𑒕𑒪 𑒮𑒦𑒏 𑒁𑒬𑓂𑒫-𑒩𑒟 𑒪𑒰𑒑𑒪 𑒖𑒳𑒂 𑒣𑒩 ।
𑒧𑒳𑒠𑒰 𑒖𑒐𑒢 𑒞𑒲𑒢𑒴 𑒙𑒰 𑒥𑒰𑒖𑒲 𑒨𑒳𑒡𑒱𑒭𑓂𑒚𑒱𑒩 𑒯𑒰𑒩𑒪, 𑒮𑒾𑒿𑒮𑒹 𑒮𑒹𑒢𑒰 𑒪𑒑𑒰𑒍𑒪 𑒠𑒰𑒿𑒫 𑒣𑒩 𑒍 𑒁𑒦𑒰𑒑𑒪। 𑒤𑒹𑒩 𑒥𑒹𑒩 𑒂𑒋𑒪 𑒩𑒰𑒖𑓂𑒨𑒏 𑒤𑒹𑒩 𑒔𑒰𑒩𑒴 𑒦𑒰𑒿𑒨 𑒏𑒹𑒩, 𑒨𑒳𑒡𑒱𑒭𑓂𑒚𑒱𑒩 𑒥𑒰𑒖𑒪 𑒢𑒯𑒱 𑒥𑒔𑒪 𑒪𑒑 𑒯𑒧𑒩𑒰 𑒪𑒹𑒪।
𑒬𑒏𑒳𑒢𑒱 𑒏𑒯𑒪 𑒕𑒟𑒱 𑒠𑓂𑒩𑒾𑒣𑒠𑒲 𑒁𑒯𑒰𑒿𑒏 𑒥𑒱𑒔𑒧𑒹। 𑒋𑒯𑒱 𑒥𑒹𑒩 𑒖𑓂𑒨𑒼𑒿 𑒖𑒲𑒞𑒥 𑒁𑒯𑒰𑒿, 𑒠𑒋 𑒠𑒹𑒥 𑒯𑒧 𑒮𑒦, 𑒦𑒰𑒃,𑒩𑒰𑒖𑓂𑒨𑒮𑒹𑒢𑒰,𑒁𑒬𑓂𑒫-𑒩𑒟,𑒩𑒞𑓂𑒢 𑒔𑒰𑒢𑒲 𑒮𑒼𑒢 𑒮𑒦।
𑒨𑒳𑒡𑒱𑒭𑓂𑒚𑒱𑒩 𑒮𑒳𑒢𑒱 𑒄 𑒦𑓄 𑒑𑒹𑒪 𑒕𑒪 𑒞𑒻𑒨𑒰𑒩 𑒖𑒐𑒢𑒹, 𑒯𑒰। 𑒡𑒱𑒏𑓂। 𑒣𑒰𑒣𑒏𑒩𑓂𑒧 𑒏𑒲 𑒦𑒋 𑒩𑒯𑒪 𑒁𑒕𑒱 𑒄। 𑒮𑒦𑒰 𑒥𑒱𑒔 𑒅𑒚𑒱 𑒣𑒛𑓃𑒪 𑒮𑒦𑒏 𑒢𑒰𑒠 𑒄 𑒮𑒦। 𑒨𑒳𑒡𑒱𑒭𑓂𑒚𑒱𑒩 𑒮𑒹𑒯𑒼 𑒏𑒯𑒪 𑒯𑒧 𑒏𑒋𑒪𑒯𑒳𑒿 𑒏𑒲 𑒄 ?
𑒂𑒢𑒢𑓂𑒠 𑒧𑒑𑓂𑒢 𑒏𑒾𑒩𑒫 𑒕𑒪, 𑒧𑒳𑒠𑒰 𑒮𑓀𑒞𑒣𑓂𑒞 𑒋𑒏𑒹𑒙𑒰, 𑒠𑒳𑒩𑓂𑒨𑒼𑒡𑒢-𑒦𑓂𑒩𑒰𑒞𑒰 𑒨𑒳𑒨𑒳𑒞𑓂𑒮𑒳 𑒕𑒪 𑒬𑒼𑒏𑒰𑒏𑒳𑒪 𑒮𑒋𑒯 𑒙𑒰, 𑒬𑒏𑒳𑒢𑒱 𑒂𑒥 𑒋𑒯𑒱 𑒮𑒦𑒏 𑒥𑒲𑒔, 𑒤𑒹𑒏𑒪𑒏 𑒣𑒰𑒮𑒰, 𑒄 𑒥𑒰𑒖𑒲 𑒯𑒧𑒩, 𑒯𑒳𑓀𑒏𑒰𑒩𑒪𑒏 𑒬𑒏𑒳𑒢𑒱 𑒯𑒰𑒩𑒪 𑒨𑒳𑒡𑒱𑒭𑓂𑒚𑒱𑒩 !!
𑒠𑓂𑒩𑒾𑒣𑒠𑒲𑒏𑒹𑒿 𑒯𑒰𑒩𑒱 𑒚𑒏𑒰𑒋𑒪 𑒚𑒰𑒜𑓃 𑒕𑒪 𑒮𑒦𑒰 𑒥𑒱𑒔।
𑒦𑒨 𑒧𑒠𑒰𑒢𑓂𑒡 𑒠𑒳𑒩𑓂𑒨𑒼𑒡𑒢 𑒏𑒯𑒪 𑒯𑒹 𑒫𑒱𑒠𑒳𑒩,
𑒖𑒰𑒆 𑒮𑒧𑒰𑒔𑒰𑒩 𑒄 𑒠𑓂𑒩𑒾𑒣𑒠𑒲𑒏𑒹𑒿 𑒖𑒰𑒋 𑒮𑒳𑒢𑒰𑒆।
𑒕𑒟𑒱 𑒍 𑒯𑒧𑒩 𑒠𑒰𑒮𑒲 𑒗𑒰𑒛𑓃𑒴-𑒥𑒯𑒰𑒩𑒴 𑒏𑒩𑒟𑒱,
𑒧𑒯𑒪𑒧𑒹 𑒂𑒥𑒱 𑒯𑒧𑒩 𑒄 𑒂𑒠𑒹𑒬 𑒮𑒳𑒢𑒰𑒆।
𑒫𑒱𑒠𑒳𑒩 𑒏𑒯𑒪 𑒎 𑒠𑒳𑒩𑓂𑒨𑒼𑒡𑒢 𑒒𑒧𑒝𑓂𑒛 𑒕𑒼𑒛𑓃𑒴,
𑒮𑓂𑒞𑓂𑒩𑒲𑒏 𑒖𑒳𑒂𑒩𑒲 𑒁𑒯𑒰𑒿 𑒯𑒧𑒩𑒰 𑒢𑒯𑒱 𑒥𑒳𑒗𑒳।
𑒠𑒹𑒐𑒱 𑒫𑒱𑒠𑒳𑒩𑒏 𑒄 𑒩𑒴𑒣 𑒣𑒚𑒰𑒍𑒪 𑒫𑒱𑒏𑒩𑓂𑒝𑒏𑒹𑒿,
𑒖𑒰𑒆 𑒠𑒰𑒮𑒲 𑒠𑓂𑒩𑒾𑒣𑒠𑒲𑒏𑒹𑒿 𑒖𑒰𑒋 𑒂𑒢𑒴 𑒑𑒋,
𑒫𑒱𑒏𑒩𑓂𑒝 𑒄 𑒠𑓂𑒩𑒾𑒣𑒠𑒲 𑒪𑒑 𑒏𑒯𑒱 𑒮𑒳𑒢𑒰𑒍𑒪।
𑒔𑒏𑒱𑒞 𑒠𑓂𑒩𑒾𑒣𑒠𑒲 𑒏𑒯𑒪 𑒮𑓂𑒫𑒨𑓀𑒏𑒹𑒿 𑒖𑒹 𑒯𑒰𑒩𑒪,
𑒨𑒳𑒡𑒱𑒭𑓂𑒚𑒱𑒩 𑒏𑒼𑒢𑒰𑒏𑒹𑒿 𑒁𑒡𑒱𑒏𑒰𑒩 𑒄 𑒣𑒰𑒍𑒪,
𑒁𑒣𑒢 𑒯𑒰𑒩𑒱𑒏 𑒥𑒰𑒠 𑒯𑒼𑒋𑒞 𑒏𑓂𑒨𑒼 𑒮𑒏𑓂𑒭𑒧,
𑒠𑒼𑒮𑒩𑒏𑒹𑒿 𑒯𑒹𑒞𑒳 𑒖𑒳𑒂𑒧𑒹 𑒪𑒑𑒰𑒥𑒋 𑒏𑒹𑒯𑒢।
𑒄 𑒣𑓂𑒩𑒬𑓂𑒢 𑒖𑒐𑒢 𑒩𑒰𑒐𑒪 𑒫𑒱𑒏𑒩𑓂𑒝 𑒮𑒦𑒰 𑒥𑒲𑒔 𑒂𑒥𑒱,
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒠𑒳𑓁𑒬𑒰𑒮𑒢 𑒖𑒰𑒆 𑒣𑒏𑒛𑓃𑒱𑒏𑒹𑒿 𑒪𑒰𑒆।
𑒥𑒳𑒗𑒰𑒍𑒪 𑒠𑓂𑒩𑒾𑒣𑒠𑒲 𑒠𑒳𑓁𑒬𑒰𑒮𑒢𑒏𑒹𑒿, 𑒖𑒐𑒢 𑒢𑒹 𑒧𑒰𑒢𑒪,
𑒦𑒰𑒑𑒪𑒱 𑒑𑒰𑓀𑒡𑒰𑒩𑒲𑒏 𑒦𑒫𑒢 𑒠𑒱𑒬𑒱, 𑒠𑒾𑒑𑒪 𑒠𑒳𑓁𑒬𑒰𑒮𑒢,
𑒐𑒴𑒖𑒪 𑒏𑒹𑒬𑒏𑒹𑒿 𑒣𑒏𑒛𑓃𑒱 𑒒𑒱𑒮𑒱𑒁𑒍𑒢𑒹 𑒕𑒪 𑒂𑒢𑒪।
𑒯𑒰! 𑒦𑒰𑒩𑒞 ! 𑒥𑓂𑒨𑒰𑒮 𑒧𑒳𑒠𑒰 𑒢𑒯𑒱 𑒁𑒯𑒰𑒿 𑒏𑒼𑒢𑒼 𑒞𑒟𑓂𑒨 𑒢𑒳𑒏𑒰𑒍𑒪 ।
𑒮𑒧𑓂𑒥𑒪 𑒅𑒠𑒰𑒩 𑒦𑒰𑒫𑒢𑒰𑒏 𑒠𑒹𑒪, 𑒞𑒳𑒭𑓂𑒙𑒱 𑒣𑒰𑒍𑒪!!
𑒮𑒦𑒰 𑒦𑒫𑒢 𑒧𑒯𑒰𑒣𑒳𑒩𑒳𑒭 𑒢𑒯𑒱 𑒟𑒼𑒛𑓃 𑒖𑒞𑒋 𑒕𑒪।
𑒦𑒲𑒭𑓂𑒧, 𑒫𑒱𑒠𑒳𑒩, 𑒠𑓂𑒩𑒼𑒝, 𑒏𑒵𑒣𑒰 𑒪𑒰𑒖𑒏 𑒪𑒹𑒪 𑒑𑒼𑒿𑒞𑒢𑒹,
𑒑𑒰𑒩𑒱 𑒧𑒰𑒟 𑒠𑒹𑒐𑒱 𑒩𑒯𑒪 𑒠𑓂𑒩𑒾𑒣𑒠𑒲𑒏 𑒁𑒬𑓂𑒩𑒳𑒣𑒰𑒞।
𑒮𑒱𑓀𑒯𑒢𑒰𑒠𑒧𑒹 𑒦𑒲𑒧 𑒞𑒐𑒢 𑒄 𑒥𑒰𑒖𑒪,
𑒮𑒴𑒩𑓂𑒨 𑒠𑒹𑒫𑒞𑒰𑒑𑒝 𑒩𑒯𑒥 𑒮𑒰𑒏𑓂𑒭𑒲 𑒁𑒯𑒰𑒿 𑒮𑒦,
𑒯𑒰𑒟𑒮𑒿 𑒠𑒳𑓁𑒬𑒰𑒮𑒢 𑒏𑒹𑒬 𑒠𑓂𑒩𑒾𑒣𑒠𑒲𑒏𑒹𑒿 𑒡𑒋𑒢𑒹,
𑒅𑒐𑒰𑒛𑓃𑒱 𑒤𑒹𑓀𑒏𑒥 𑒯𑒰𑒟 𑒍𑒏𑒩 𑒍 𑒠𑒴𑒢𑒴।
𑒏𑒾𑒩𑒫 𑒦𑒋 𑒮𑒿 𑒦𑒲𑒞 𑒦𑒹𑒪𑒰𑒯 𑒢𑒰𑒠𑒮𑒿 𑒦𑒲𑒧𑒏,
𑒠𑒳𑒩𑓂𑒨𑒼𑒡𑒢 𑒠𑒹𑒐𑒪 𑒧𑒳𑒠𑒰 𑒠𑒹𑒐𑒱 𑒄 𑒕𑒪 𑒥𑒰𑒖𑒪,
𑒖𑒰𑒿𑒒 𑒣𑒩 𑒠𑒻𑒞 𑒟𑒼𑒣𑒛𑓃𑒲 𑒏𑒩𑒻𑒞 𑒒𑒵𑒝𑒱𑒞 𑒃𑒬𑒰𑒩𑒰,
𑒠𑓂𑒩𑒾𑒣𑒠𑒲𑒏𑒹𑒿 𑒥𑒻𑒮𑒥𑒰 𑒪𑒋 𑒍𑒞𑒋 𑒏𑒯𑒻𑒞 𑒕𑒪।
𑒑𑒩𑒖𑒱 𑒏𑒯𑒪 𑒦𑒲𑒧 𑒁𑒡𑒧 𑒠𑒳𑒩𑓂𑒨𑒼𑒡𑒢𑒮𑒿,
𑒞𑒼𑒯𑒩 𑒖𑒰𑒿𑒒𑒏𑒹𑒿 𑒞𑒼𑒛𑒥 𑒣𑓂𑒩𑒔𑒝𑓂𑒛 𑒑𑒠𑒰𑒮𑒿।
𑒐𑒱𑒮𑒱𑒨𑒰𑒏𑒹𑒿 𑒠𑒳𑒩𑓂𑒨𑒼𑒡𑒢 𑒠𑒹𑒪𑒏 𑒄 𑒂𑒖𑓂𑒘𑒰 𑒣𑒳𑒢𑓁 𑒄,
𑒔𑒲𑒩-𑒯𑒩𑒝 𑒏𑒩𑒴 𑒠𑒳𑓁𑒬𑒰𑒮𑒢 𑒠𑓂𑒩𑒾𑒣𑒠𑒲 𑒠𑒰𑒮𑒲 𑒕𑒲।
𑒠𑓂𑒩𑒾𑒣𑒠𑒲 𑒏𑒋𑒪𑒢𑓂𑒯𑒱 𑒢𑒹𑒯𑒼𑒩𑒰 𑒬𑓂𑒩𑒹𑒭𑓂𑒚 𑒪𑒼𑒏𑒢𑒱𑒮𑒿
𑒫𑒱𑒢𑒨 𑒄 𑒁𑒕𑒱 𑒪𑒰𑒖 𑒥𑒔𑒰𑒆 𑒏𑒩𑒻𑒞 𑒕𑒲 𑒫𑒱𑒢𑒞𑒲।
𑒮𑒦 𑒏𑓂𑒨𑒼 𑒗𑒳𑒏𑒰 𑒧𑒰𑒟 𑒁𑒣𑒢 𑒍𑒯𑒱 𑒮𑒦𑒰𑒧𑒹,
𑒏𑒵𑒭𑓂𑒝𑒰 𑒕𑒼𑒛𑓃𑒪 𑒮𑒦 𑒂𑒬 𑒮𑒦 𑒠𑒱𑒬𑒰𑒮𑒿,
𑒦𑒏𑓂𑒞𑓂𑒞 𑒫𑒞𑓂𑒮𑒪 𑒁𑒯𑒰𑒿𑒮𑒿 𑒙𑒰 𑒁𑒕𑒱 𑒄 𑒂𑒬𑒰,
𑒏𑒼𑒯𑒳𑒢𑒰 𑒩𑒰𑒐𑒴 𑒯𑒧𑒩 𑒄 𑒪𑒰𑒖 𑒁𑒕𑒱 𑒣𑓂𑒩𑒞𑓂𑒨𑒰𑒬𑒰।
𑒂𑒩𑓂𑒠𑓂𑒩-𑒮𑓂𑒫𑒩𑒮𑒿 𑒕𑒪𑒱 𑒩𑒯𑒪𑒱 𑒣𑒳𑒏𑒰𑒩𑒱 𑒠𑓂𑒩𑒾𑒣𑒠𑒲,
𑒑𑒼𑒯𑒰𑒛𑓃𑒱 𑒐𑒮𑒪𑒱 𑒮𑒦𑒰-𑒥𑒱𑒔, 𑒧𑒴𑒩𑓂𑒔𑓂𑒕𑒱𑒞 ।
𑒪𑒰𑒑𑒪 𑒐𑒲𑒔𑒨 𑒠𑓂𑒩𑒾𑒣𑒠𑒲𑒏 𑒫𑒮𑓂𑒞𑓂𑒩 𑒠𑒳𑓁𑒬𑒰𑒮𑒢,
𑒮𑒦𑒰𑒮𑒠 𑒠𑒹𑒐𑒪 𑒔𑒧𑒞𑓂𑒏𑒰𑒩 𑒄 𑒣𑓂𑒩𑒞𑒱𑒣𑒪,
𑒨𑒰𑒫𑒞 𑒩𑒯𑒪 𑒐𑒱𑓀𑒔𑒻𑒞 𑒫𑒮𑓂𑒞𑓂𑒩𑒏𑒹𑒿 𑒠𑒳𑓁𑒬𑒰𑒮𑒢,
𑒥𑒜𑓃𑒻𑒞 𑒩𑒯𑒪 𑒫𑒮𑓂𑒞𑓂𑒩 𑒠𑓂𑒩𑒾𑒣𑒠𑒲𑒏 𑒞𑒰𑒫𑒞 𑒞𑒐𑒢।
𑒟𑒰𑒏𑒱-𑒯𑒰𑒿𑒤𑒱 𑒥𑒻𑒮𑒪 𑒖𑒐𑒢 𑒠𑒳𑓁𑒬𑒰𑒮𑒢,
𑒏𑒯𑒪 𑒦𑒲𑒧 𑒮𑒳𑒢𑒴 𑒮𑒦 𑒋𑒯𑒱 𑒦𑒫𑒢𑒧𑒹,
𑒨𑒰𑒫𑒞 𑒤𑒰𑒛𑓃𑒱 𑒕𑒰𑒞𑒲 𑒠𑒳𑓁𑒬𑒰𑒮𑒢𑒏 𑒆𑒭𑓂𑒧 𑒩𑒳𑒡𑒱𑒩𑒏𑒹𑒿,
𑒣𑒲𑒨𑒥, 𑒢𑒯𑒱 𑒣𑒱𑒨𑒰𑒮 𑒧𑒹𑒙𑒞 𑒧𑒵𑒞𑓂𑒨𑒳 𑒦𑒹𑒙𑒞 𑒢𑒯𑒱।
𑒮𑒳𑒢𑒱 𑒣𑓂𑒩𑒞𑒱𑒖𑓂𑒘𑒰 𑒄 𑒮𑒦 𑒦𑒨𑒮𑒿 𑒟𑒛𑓃𑒟𑒛𑓃𑒰𑒋 𑒪𑒰𑒑𑒪 𑒕𑒪।
𑒡𑒵𑒞𑒩𑒰𑒭𑓂𑒙𑓂𑒩 𑒠𑒹𑒐𑒱 𑒠𑒳𑒩𑓂𑒒𑒙𑒢𑒰 𑒠𑓂𑒩𑒾𑒣𑒠𑒲𑒏𑒹𑒿 𑒪𑒑𑒧𑒹 𑒥𑒖𑒰𑒍𑒪,
𑒮𑒰𑓀𑒞𑓂𑒫𑒢𑒰 𑒠𑒋 𑒬𑒰𑓀𑒞 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩𑒮𑒿 𑒕𑒪 𑒥𑒰𑒖𑒪,
𑒥𑒱𑒮𑒩𑒱 𑒖𑒰𑒆 𑒃𑒢𑓂𑒠𑓂𑒩𑒣𑓂𑒩𑒮𑓂𑒟 𑒮𑒳𑒐-𑒬𑒰𑓀𑒞𑒱𑒮𑒿 𑒩𑒯𑒋 𑒖𑒰𑒅,
𑒖𑒹 𑒯𑒰𑒛𑓃𑒪𑒯𑒳𑒿, 𑒮𑒹 𑒥𑒳𑒗𑒴 𑒠𑒹𑒪 𑒯𑒧 𑒚𑒰𑒧𑒯𑒱 𑒪𑒾𑒙𑒰𑒋𑒪 ।
𑒮𑓀𑒞𑒼𑒭 𑒦𑒹𑒪𑒢𑓂𑒯𑒱 𑒣𑒰𑒝𑓂𑒛𑒫-𑒖𑒢𑒏𑒹𑒿 𑒄 𑒮𑒳𑒢𑒱,
𑒏𑒟𑒰 𑒡𑒵𑒞𑒩𑒰𑒭𑓂𑒙𑓂𑒩𑒏 𑒒𑒳𑒩𑒪𑒰𑒯 𑒃𑒢𑓂𑒠𑓂𑒩𑒣𑓂𑒩𑒮𑓂𑒟 𑒣𑒳𑒢𑒱।
𑒠𑒳𑒩𑓂𑒨𑒼𑒡𑒢 𑒠𑒳𑓁𑒐𑒱𑒞 𑒧𑓀𑒞𑓂𑒩𑒝𑒰 𑒏𑒋𑒪 𑒬𑒏𑒳𑒢𑒱𑒮𑒿,
𑒮𑓀𑒑 𑒠𑒳𑓁𑒬𑒰𑒮𑒢 𑒏𑒩𑓂𑒝𑒏 𑒧𑓀𑒞𑓂𑒩𑒝𑒰 𑒤𑒹𑒩 𑒖𑒳𑒂𑒏,
𑒫𑒱𑒢𑒰𑒬𑒏 𑒯𑒮𑓂𑒞𑒱𑒢𑒰𑒣𑒳𑒩𑒏 𑒕𑒪 𑒥𑒹𑒩 𑒐𑒩𑒰𑒣।
𑒋𑒯𑒱 𑒥𑒹𑒩𑒏 𑒢𑒱𑒁𑒧 𑒩𑒰𑒐𑒪 𑒯𑒰𑒩𑒞 𑒖𑒹 𑒮𑒹 𑒏𑒩𑒞,
𑒥𑒰𑒩𑒯 𑒫𑒩𑓂𑒭𑒏 𑒫𑒢𑒫𑒰𑒮 𑒂 𑒋𑒏 𑒫𑒩𑓂𑒭 𑒁𑒖𑓂𑒘𑒰𑒞𑒫𑒰𑒮।
𑒡𑒵𑒞𑒩𑒰𑒭𑓂𑒙𑓂𑒩 𑒠𑒴𑒞 𑒣𑒚𑒰𑒍𑒪 𑒯𑒮𑓂𑒞𑒱𑒢𑒰𑒣𑒳𑒩 𑒤𑒹𑒩।
𑒨𑒳𑒡𑒱𑒭𑓂𑒚𑒱𑒩 𑒒𑒳𑒩𑒪𑒰𑒯 𑒦𑒰𑒋𑒏 𑒮𑓀𑒑 𑒥𑒹𑒩-𑒁𑒥𑒹𑒩,
𑒮𑒳𑒢𑒰𑒍𑒪 𑒑𑒹𑒪 𑒬𑒩𑓂𑒞𑓂𑒞 𑒮𑒦 𑒩𑒼𑒏𑒪 𑒋𑒏 𑒥𑒹𑒩।
𑒧𑒳𑒠𑒰 𑒦𑒰𑒑𑓂𑒨𑒩𑒰𑒖𑒏 𑒂𑒑𑒰𑒿 𑒏𑒏𑒩 𑒁𑒕𑒱 𑒔𑒪𑒪,
𑒢𑒯𑒱 𑒧𑒰𑒢𑒪 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩 𑒦𑒰𑒑𑓂𑒨𑒏 𑒐𑒹𑒪!
𑒔𑒪𑒱 𑒤𑒹𑒩 𑒣𑒰𑒮𑒰 𑒠𑒳𑒩𑓂𑒨𑒼𑒡𑒢𑒏, 𑒫𑒻𑒯 𑒐𑒹𑒩𑒯𑒰,
𑒤𑒹𑓀𑒏𑒱 𑒑𑒼𑒙𑒲 𑒖𑒱𑒞𑒰𑒍𑒪 𑒬𑒏𑒳𑒢𑒱 𑒍𑒏𑒩𑒰।
𑒯𑒰𑒩𑒱 𑒯𑒰𑒩𑒪 𑒩𑒰𑒖𑓂𑒨, 𑒣𑒰𑒍𑒪 𑒕𑒪 𑒥𑒢𑒥𑒰𑒮,
𑒨𑒳𑒡𑒱𑒭𑓂𑒚𑒱𑒩𑒏 𑒦𑒰𑒑𑓂𑒨 𑒔𑒰𑒪𑒱 𑒏𑒳𑒔𑒰𑒪𑒱𑒏 𑒖𑒲𑒞,
𑒩𑒰𑒖𑓂𑒨𑒏 𑒢𑒱𑒩𑓂𑒝𑒨 𑒖𑒳𑒂𑒏 𑒑𑒼𑒙𑒲𑒏 𑒮𑓀𑒑𑒲𑒞,
𑒏𑒲 𑒯𑒼𑒋𑒞 𑒮𑒹 𑒢𑒘𑒱 𑒖𑒰𑒢𑒱 𑒮𑒳𑒢𑓂𑒢 𑒁𑒏𑒰𑒮।
𑒡𑒩𑓂𑒧𑒩𑒰𑒖 𑒮𑒦 𑒯𑒰𑒩𑒱,
𑒔𑒪𑒪 𑒤𑒹𑒩 𑒫𑒻𑒯 𑒣𑒟,
𑒡𑒩𑓂𑒧𑒏 𑒂 𑒬𑒰𑒢𑓂𑒞𑒱𑒏,
𑒕𑒼𑒛𑓃𑒱 𑒮𑒦 𑒥𑒱𑒮𑒰𑒩𑒱।
𑒧𑒰𑒞𑒰 𑒏𑒳𑒢𑓂𑒞𑒲 𑒕𑒪𑒱 𑒫𑒵𑒠𑓂𑒡𑒰 𑒦𑒹𑒪𑒱 𑒏𑒯𑒪,
𑒏𑒯𑒪 𑒡𑒩𑓂𑒧𑒩𑒰𑒖 𑒢𑒘𑒱 𑒖𑒰 𑒮𑒏𑒥 𑒁𑒯𑒰𑒿,
𑒫𑒱𑒠𑒳𑒩 𑒏𑒰𑒏 𑒏𑒹𑒩 𑒒𑒩 𑒖𑒰 𑒩𑒯𑒥,
𑒖𑒰𑒋𑒥 𑒏𑒩𑓂𑒧 𑒦𑒼𑒑𑒋 𑒯𑒧 𑒮𑒦।
𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩 𑒂 𑒣𑒳𑒞𑓂𑒩 𑒁𑒦𑒱𑒧𑒢𑓂𑒨𑒳𑒏,
𑒮𑒳𑒦𑒠𑓂𑒩𑒰 𑒖𑒋𑒞𑒲𑒯 𑒁𑒣𑒢 𑒢𑒻𑒯𑒩 𑒠𑓂𑒫𑒰𑒩𑒏𑒰𑒣𑒳𑒩।
𑒡𑒾𑒧𑓂𑒨 𑒣𑒳𑒩𑒯𑒱𑒞 𑒮𑓀𑒑 𑒠𑓂𑒩𑒾𑒣𑒠𑒲 𑒂 𑒔𑒰𑒩𑒴 𑒦𑒰𑒋,
𑒏𑒰𑒙𑒥 𑒯𑒧 𑒮𑓀𑒑 𑒞𑒹𑒩𑒯 𑒫𑒩𑓂𑒭𑒏 𑒫𑒢𑒫𑒰𑒮 𑒖𑒰𑒋।
𑒢𑒑𑒩𑒫𑒰𑒮𑒲 𑒮𑒳𑒢𑒱 𑒑𑒧𑒢𑒏 𑒄 𑒮𑒧𑒰𑒔𑒰𑒩,
𑒏𑒋𑒪𑒢𑓂𑒯𑒱 𑒠𑒳𑒩𑓂-𑒠𑒳𑒩 𑒠𑒳𑒩𑓂𑒨𑒼𑒡𑒢𑒏 𑒁𑒞𑓂𑒨𑒰𑒔𑒰𑒩।
𑒖𑒰𑒋𑒥 𑒯𑒧𑒯𑒳𑒿 𑒮𑒦 𑒮𑓀𑒑, 𑒡𑒩𑓂𑒧𑒩𑒰𑒖 𑒂𑒃,
𑒡𑒩𑓂𑒧𑒩𑒰𑒖 𑒒𑒳𑒩𑒰𑒍𑒪 𑒮𑒦𑒏𑒹𑒿 𑒥𑒳𑒗𑒰𑒋 𑒖𑒰𑒋।
𑒮𑒦 𑒒𑒳𑒩𑒱 𑒑𑒹𑒪 𑒧𑒳𑒠𑒰, 𑒢𑒯𑒱 𑒒𑒳𑒩𑒪 𑒫𑒱𑒣𑓂𑒩 𑒖𑒢,
𑒣𑒳𑒩𑒯𑒱𑒞 𑒏𑒋𑒪𑒢𑓂𑒯𑒱 𑒅𑒣𑒰𑒮𑒢𑒰 𑒮𑒴𑒩𑓂𑒨𑒏 𑒋𑒯𑒱 𑒏𑓂𑒭𑒝।
𑒫𑒻𑒯 𑒠𑒻𑒞 𑒕𑒟𑒱 𑒁𑒢𑓂𑒢-𑒤𑒪 𑒮𑒧𑒑𑓂𑒩 𑒂𑒩𑓂𑒨,
𑒅𑒣𑒰𑒮𑒢𑒰𑒏 𑒅𑒣𑒩𑒰𑒢𑓂𑒞 𑒣𑓂𑒩𑒑𑒙 𑒦𑒹𑒪𑒰𑒯 𑒮𑒴𑒩𑓂𑒨।
𑒠𑒹𑒪𑒢𑓂𑒯𑒱 𑒁𑒏𑓂𑒭𑒨 𑒣𑒰𑒞𑓂𑒩 𑒢𑒯𑒱 𑒏𑒧 𑒯𑒼𑒋𑒞 𑒁𑒢𑓂𑒢,
𑒠𑓂𑒩𑒾𑒣𑒠𑒲 𑒮𑒦 𑒫𑒱𑒣𑓂𑒩𑒏𑒹𑒿 𑒂 𑒣𑒰𑒝𑓂𑒛𑒫𑒏𑒹𑒿 𑒐𑒼𑒂𑒥𑒟𑒱,
𑒤𑒹𑒩 𑒐𑒰𑒟𑒱, 𑒮𑒦 𑒁𑒒𑒰𑒟𑒱, 𑒢𑒘𑒱 𑒯𑒼𑒋 𑒐𑒞𑒧,
𑒖𑒐𑒢 𑒢𑒘𑒱 𑒯𑒼𑒋 𑒐𑒞𑒧 𑒣𑒰𑒞𑓂𑒩𑒮𑒿 𑒐𑒰𑒠𑓂𑒨𑒰𑒢𑓂𑒢।
𑒨𑒳𑒡𑒱𑒭𑓂𑒚𑒱𑒩 𑒣𑒯𑒳𑒿𑒔𑒱 𑒮𑒩𑒮𑓂𑒫𑒞𑒲 𑒡𑒰𑒩𑒏 𑒏𑒰𑒞,
𑒏𑒰𑒧𑓂𑒨𑒏 𑒫𑒢𑒧𑒹 𑒏𑒋𑒪𑒢𑓂𑒯𑒱 𑒢𑒱𑒫𑒰𑒮।
𑒋𑒯𑒱 𑒥𑒲𑒔 𑒮𑒳𑒢𑒻𑒞 𑒣𑒰𑒝𑓂𑒛𑒫-𑒣𑓂𑒩𑒬𑓀𑒮𑒰 𑒧𑒳𑒿𑒯𑒮𑒿 𑒫𑒱𑒠𑒳𑒩𑒏,
𑒡𑒵𑒞𑒩𑒰𑒭𑓂𑒙𑓂𑒩 𑒢𑒱𑒏𑒰𑒪𑒱 𑒯𑒙𑒰𑒍𑒪 𑒫𑒱𑒠𑒳𑒩𑒏𑒹𑒿 𑒠𑒩𑒥𑒰𑒩-𑒧𑒡𑓂𑒨।
𑒍𑒯𑒼 𑒂𑒥𑒱 𑒪𑒑𑒪𑒰𑒯 𑒩𑒯𑒋 𑒏𑒰𑒧𑓂𑒨𑒏𑒫𑒢𑒧𑒹,
𑒣𑒳𑒢𑒱 𑒣𑒚𑒰𑒍𑒪 𑒡𑒵𑒞𑒩𑒰𑒭𑓂𑒙𑓂𑒩 𑒍𑒞𑒋 𑒮𑓀𑒖𑒨𑒏𑒹𑒿।
𑒣𑒰𑒝𑓂𑒛𑒫-𑒖𑒢𑒏 𑒥𑒳𑒗𑒍𑒪𑒰 𑒅𑒞𑓂𑒞𑒩 𑒫𑒱𑒠𑒳𑒩,
𑒡𑒵𑒞𑒩𑒰𑒭𑓂𑒙𑓂𑒩 𑒮𑒿𑒑 𑒑𑒹𑒪𑒰𑒯 𑒣𑒳𑒢𑒱 𑒠𑒩𑒥𑒰𑒩 𑒒𑒳𑒩𑒱।
𑒇𑒭𑒱-𑒧𑒳𑒢𑒱𑒏 𑒮𑒞𑓂𑒮𑓀𑒑𑒮𑒿 𑒪𑒻𑒞 𑒬𑒱𑒏𑓂𑒭𑒰 𑒂 𑒠𑒲𑒏𑓂𑒭𑒰,
𑒁𑒑𑒮𑓂𑒞𑓂𑒨𑒏, 𑒇𑒭𑒱 𑒬𑓂𑒩𑒵𑓀𑒑, 𑒁𑒭𑓂𑒙𑒰𑒫𑒏𑓂𑒩𑒏, 𑒪𑒼𑒣𑒰𑒧𑒳𑒠𑓂𑒩𑒰𑒏,
𑒮𑒳𑒢𑒻𑒞 𑒕𑒪𑒰𑒯 𑒏𑒟𑒰 𑒮𑒩𑒱𑒞𑒰 𑒢𑒪 𑒠𑒧𑒨𑒢𑓂𑒞𑒲𑒏 ।
𑒏𑒵𑒭𑓂𑒝 𑒂𑒥𑒱 𑒥𑒳𑒗𑒰𑒍𑒪 𑒥𑓂𑒨𑒰𑒮 𑒁𑒋𑒪𑒰𑒯 !!
𑒥𑓂𑒨𑒰𑒮 𑒏𑒯𑒪 𑒨𑒳𑒠𑓂𑒡𑒏 𑒯𑒹𑒞𑒳 𑒏𑒩𑒴 𑒞𑒻𑒨𑓂𑒨𑒰𑒩𑒲,
𑒥𑒱𑒢𑒳 𑒃𑒢𑓂𑒠𑓂𑒩𑒏 𑒁𑒧𑒼𑒒 𑒬𑒱𑒫𑒏 𑒣𑒰𑒬𑒳𑒣𑒞𑓂𑒨𑒰𑒯,
𑒏𑒼𑒢𑒰 𑒪𑒛𑓃𑒥 𑒮𑓀𑒑 𑒦𑒲𑒭𑓂𑒧 𑒠𑓂𑒩𑒼𑒝 𑒧𑒯𑒰𑒩𑒟𑒲 ?
𑒣𑒰𑒥𑒱 𑒨𑒳𑒡𑒱𑒭𑓂𑒚𑒱𑒩𑒏 𑒂𑒖𑓂𑒘𑒰 𑒔𑒪𑒪𑒰𑒯 𑒁𑒩𑓂𑒖𑒳𑒢,
𑒣𑒩𑓂𑒫𑒞 𑒏𑒻𑒪𑒰𑒮 𑒣𑒩 𑒣𑒰𑒩 𑒏𑒋 𑒏𑓄 𑒑𑓀𑒡𑒧𑒠𑒢।
𑒞𑒴𑒝𑒲𑒩 𑒂 𑒡𑒢𑒳𑒭 𑒯𑒳𑒢𑒏𑒩 𑒮𑓀𑒑𑒧𑒹 𑒕𑒪,
𑒮𑒰𑒡𑒳 𑒖𑒙𑒰𑒡𑒰𑒩𑒲 𑒞𑒣𑒮𑓂𑒫𑒲 𑒁𑒩𑓂𑒖𑒳𑒢𑒮𑒿 𑒣𑒳𑒕𑒪।
𑒄 𑒕𑒲 𑒞𑒣𑒼𑒦𑒴𑒧𑒱 𑒬𑒮𑓂𑒞𑓂𑒩𑒏 𑒏𑒰𑒖 𑒢𑒯𑒱 𑒏𑒼𑒢𑒼,
𑒁𑒩𑓂𑒖𑒳𑒢 𑒏𑒯𑒪 𑒯𑒧 𑒏𑓂𑒭𑒰𑒞𑓂𑒩 𑒡𑒩𑓂𑒧 𑒏𑒯𑒰𑒿 𑒕𑒼𑒛𑓃𑒪।
𑒞𑒰𑒫𑒞 𑒬𑒮𑓂𑒞𑓂𑒩 𑒮𑒹𑒯𑒼 𑒞𑒰𑒯𑒱 𑒠𑓂𑒫𑒰𑒩𑒹 𑒩𑒰𑒐𑒪 𑒁𑒕𑒱,
𑒣𑓂𑒩𑒮𑒢𑓂𑒢 𑒦𑒋 𑒃𑒢𑓂𑒠𑓂𑒩 𑒁𑒣𑒢 𑒁𑒮𑒪 𑒩𑒴𑒣 𑒡𑒩𑒪।
𑒧𑒰𑒿𑒑𑒴 𑒫𑒞𑓂𑒮 𑒫𑒩 𑒯𑒧𑒩𑒰𑒮𑒿 𑒣𑓂𑒩𑒮𑒢𑓂𑒢 𑒕𑒲 𑒯𑒧,
𑒬𑒱𑒏𑓂𑒭𑒰𑒏 𑒮𑓀𑒑 𑒠𑒱𑒫𑓂𑒨𑒰𑒮𑓂𑒞𑓂𑒩 𑒦𑒹𑒙𑒋 𑒋𑒯𑒱 𑒏𑓂𑒭𑒝।
𑒁𑒩𑓂𑒖𑒳𑒢 𑒁𑒯𑒰𑒿𑒏 𑒄 𑒪𑒰𑒪𑒮𑒰 𑒣𑒴𑒩𑓂𑒝 𑒯𑒼𑒋𑒞 𑒧𑒳𑒠𑒰,
𑒖𑒰𑒆 𑒬𑒱𑒫𑒏𑒹𑒿 𑒣𑓂𑒩𑒮𑒢𑓂𑒢 𑒏𑒋 𑒣𑒰𑒬𑒳𑒣𑒞 𑒣𑒰𑒆।
𑒤𑒹𑒩 𑒠𑒹𑒫𑒑𑒝 𑒠𑒹𑒞𑒰𑒯 𑒠𑒱𑒫𑓂𑒨𑒰𑒮𑓂𑒞𑓂𑒩 𑒁𑒯𑒰𑒿𑒏𑒹𑒿,
𑒄 𑒬𑒮𑓂𑒞𑓂𑒩 𑒮𑒦 𑒧𑒰𑒢𑒫 𑒣𑒩 𑒔𑒪𑒰𑒋𑒥 𑒁𑒕𑒱 𑒫𑒩𑓂𑒖𑒱𑒞,
𑒏𑒯𑒴 𑒁𑒯𑒰𑒿 𑒣𑒰𑒥𑒱 𑒏𑒩𑒥 𑒏𑒲 𑒠𑒱𑒫𑓂𑒨𑒰𑒮𑓂𑒞𑓂𑒩 𑒮𑒦 𑒄।
𑒬𑒏𑓂𑒞𑓂𑒞𑒱-𑒮𑓀𑒔𑒨 𑒁𑒕𑒱 𑒯𑒧𑒩 𑒅𑒠𑓂𑒠𑒹𑒬𑓂𑒨 𑒧𑒰𑒞𑓂𑒩 𑒠𑒹𑒫,
𑒏𑒾𑒩𑒫 𑒕𑒲𑒢𑒪 𑒁𑒕𑒱 𑒩𑒰𑒖𑓂𑒨 𑒕𑒪𑒮𑒿 𑒣𑒩𑒘𑓂𑒔,
𑒢𑒯𑒱 𑒏𑒩𑒥 𑒋𑒏𑒩 𑒏𑒼𑒢𑒼 𑒏𑒳𑒣𑓂𑒩𑒨𑒼𑒑 𑒢𑒯𑒱 𑒯𑒧।
𑒃𑒢𑓂𑒠𑓂𑒩𑒏 𑒁𑒢𑓂𑒞𑒩𑓂𑒡𑒰𑒢 𑒦𑒹𑒪𑒰𑒏 𑒅𑒞𑓂𑒞𑒩 𑒁𑒩𑓂𑒖𑒳𑒢𑒏,
𑒬𑒱𑒫 𑒞𑒣𑒮𑓂𑒨𑒰 𑒏𑒚𑒼𑒩 𑒕𑒪 𑒯𑒼𑒧𑒋 𑒪𑒰𑒑𑒪।
𑒞𑒐𑒢 𑒣𑒰𑒩𑓂𑒫𑒞𑒲 𑒮𑓀𑒑 𑒬𑒱𑒫 𑒔𑒪𑒪𑒰𑒯 𑒞𑒣𑒼𑒦𑒴𑒧𑒱,
𑒁𑒩𑓂𑒖𑒳𑒢 𑒣𑒳𑒭𑓂𑒣 𑒥𑒲𑒕𑒱 𑒩𑒯𑒪 𑒕𑒪𑒰𑒯 𑒁𑒥𑒻𑒞 𑒏𑓂𑒭𑒝,
𑒫𑒰𑒩𑒰𑒯 𑒫𑒢𑒮𑒿 𑒢𑒱𑒏𑒪𑒱 𑒏𑒋 𑒮𑒧𑓂𑒧𑒳𑒐 𑒂𑒋𑒪।
𑒖𑒐𑒢𑒯𑒱𑒿 𑒞𑒴𑒝𑒲𑒩 𑒡𑒢𑒳𑒭 𑒩𑒰𑒐𑒱 𑒮𑓀𑒡𑒰𑒢 𑒏𑒋𑒪𑒏,
𑒏𑒱𑒩𑒰𑒞 𑒫𑒩𑒰𑒯𑒏𑒹𑒿 𑒪𑒏𑓂𑒭𑓂𑒨 𑒏𑒋𑒢𑒹 𑒠𑒵𑒭𑓂𑒙𑒱 𑒂𑒋𑒪।
𑒠𑒳𑒢𑒴 𑒑𑒼𑒙𑒹 𑒔𑒪𑒰𑒍𑒪 𑒫𑒰𑒝 𑒫𑒰𑒩𑒰𑒯 𑒧𑒰𑒩𑒪,
𑒋𑒯𑒱 𑒥𑒰𑒞 𑒣𑒩 𑒠𑒳𑒯𑒴 𑒑𑒼𑒙𑒹 𑒗𑒑𑒛𑓃𑒰 𑒥𑒖𑒰𑒩𑒪।
𑒁𑒩𑓂𑒖𑒳𑒢𑒏 𑒑𑒣 𑒣𑒩 𑒖𑒐𑒢 𑒚𑒚𑒰𑒃𑒞 𑒏𑒱𑒩𑒰𑒞,
𑒁𑒩𑓂𑒖𑒳𑒢 𑒍𑒏𑒩𑒰 𑒣𑒩 𑒞𑒐𑒢 𑒫𑒰𑒝 𑒔𑒪𑒰𑒍𑒪,
𑒣𑒩𑒘𑓂𑒔 𑒠𑒹𑒐𑒱 𑒢𑒯𑒱 𑒒𑒰𑒫 𑒏𑒼𑒢𑒼 𑒣𑓂𑒩𑒏𑒰𑒩𑒏,
𑒁𑒩𑓂𑒖𑒳𑒢 𑒏𑒱𑒩𑒰𑒞 𑒣𑒩 𑒕𑒪 𑒞𑒪𑒫𑒰𑒩 𑒦𑒰𑒿𑒖𑒪।
𑒧𑒳𑒠𑒰 𑒏𑒱𑒩𑒰𑒞𑒏 𑒠𑒹𑒯𑒮𑒿 𑒙𑒏𑒰𑒩𑒰𑒃𑒞 𑒠𑒹𑒩𑒲,
𑒦𑒹𑒪 𑒁𑒩𑓂𑒖𑒳𑒢𑒏 𑒐𑒛𑓂𑒑𑒏 𑒙𑒳𑒏𑒛𑓃𑒲 𑒕𑒳𑒥𑒻𑒞 𑒠𑒹𑒩𑒲।
𑒧𑒪𑓂𑒪 𑒨𑒳𑒠𑓂𑒡 𑒬𑒳𑒩𑒴 𑒦𑒹𑒪 𑒦𑒹𑒪 𑒁𑒔𑒹𑒞 𑒁𑒩𑓂𑒖𑒳𑒢,
𑒅𑒚𑒪 𑒖𑒐𑒢 𑒬𑒳𑒩𑒴 𑒏𑒋𑒪 𑒣𑒴𑒖𑒢 𑒏𑒳𑒪𑒠𑒹𑒫𑒏 𑒍,
𑒣𑒳𑒭𑓂𑒣 𑒣𑒯𑒱𑒩𑒰𑒋 𑒬𑒱𑒫𑒏𑒹𑒿 𑒅𑒚𑒪 𑒑𑒩 𑒕𑒪 𑒍 𑒧𑒰𑒪𑒰,
𑒏𑒱𑒩𑒰𑒞𑒏 𑒑𑒩𑒠𑒢𑒱 𑒧𑒡𑓂𑒨, 𑒠𑒹𑒐𑒱 𑒮𑒰𑒭𑓂𑒙𑒰𑓀𑒑 𑒏𑒋𑒪 𑒞𑒯𑒱𑒐𑒢।
𑒏𑒱𑒩𑒰𑒞 𑒫𑒹𑒬𑒡𑒰𑒩𑒲 𑒬𑒱𑒫 𑒏𑒯𑒪 𑒫𑒩 𑒧𑒰𑒿𑒑 𑒁𑒩𑓂𑒖𑒳𑒢,
𑒣𑒰𑒬𑒳𑒣𑒞 𑒁𑒮𑓂𑒞𑓂𑒩 𑒧𑒰𑒿𑒑𑒪, 𑒕𑒼𑒛𑓃𑒥 𑒩𑒼𑒏𑒥 𑒋𑒏𑒩𑒰 𑒮𑒲𑒐𑒪 𑒣𑒳𑒢𑒱।
𑒬𑒱𑒫 𑒏𑒯𑒪 𑒥𑒳𑒗𑒴 𑒧𑒳𑒠𑒰 𑒄 𑒞𑒟𑓂𑒨 𑒁𑒕𑒱 𑒖𑒹,
𑒧𑒢𑒳𑒭𑓂𑒨𑒏 𑒆𑒣𑒩 𑒋𑒏𑒩 𑒣𑓂𑒩𑒨𑒼𑒑 𑒏𑒐𑒢𑒯𑒳 𑒏𑒩𑒥 𑒢𑒘𑒱।
𑒞𑒐𑒢 𑒁𑒩𑓂𑒖𑒳𑒢 𑒢𑒱𑒏𑒪𑒱 𑒑𑒹𑒪 𑒃𑒢𑓂𑒠𑓂𑒩𑒪𑒼𑒏 𑒠𑒱𑒬𑒰𑒧𑒹,
𑒣𑒰𑒥𑒱 𑒠𑒱𑒫𑓂𑒨 𑒁𑒮𑓂𑒞𑓂𑒩𑒏 𑒬𑒱𑒏𑓂𑒭𑒰 𑒧𑒰𑒩𑒪 𑒁𑒮𑒳𑒩 𑒍𑒯𑒱𑒮𑒿।
𑒋𑒏 𑒠𑒱𑒢𑒳𑒏 𑒑𑒣 𑒅𑒩𑓂𑒫𑒬𑒰 𑒂𑒨𑒪𑒱 𑒏𑒩𑒻𑒞 𑒨𑒰𑒔𑒢𑒰 𑒣𑓂𑒩𑒹𑒧𑒏,
𑒁𑒩𑓂𑒖𑒳𑒢 𑒏𑒯𑒪 𑒁𑒯𑒰𑒿 𑒞𑒿 𑒕𑒲 𑒁𑒣𑓂𑒮𑒩𑒰 𑒑𑒳𑒩𑒳 𑒃𑒢𑓂𑒠𑓂𑒩𑒏।
𑒧𑒰𑒞𑒰 𑒞𑒳𑒪𑓂𑒨 𑒦𑒹𑒪𑒯𑒳𑒿 𑒍𑒯𑒱 𑒮𑓀𑒥𑓀𑒡𑒮𑒿 𑒁𑒯𑒰𑒿 𑒯𑒧𑒩,
𑒂𑒋𑒪 𑒕𑒲 𑒯𑒧 𑒋𑒞𑒋 𑒬𑒱𑒏𑓂𑒭𑒰 𑒣𑓂𑒩𑒰𑒣𑓂𑒞𑒱𑒏 𑒪𑒹𑒪 𑒬𑒮𑓂𑒞𑓂𑒩𑒏,
𑒞𑒣𑒮𑓂𑒨𑒰 𑒢𑒵𑒞𑓂𑒨𑒏 𑒂 𑒮𑓀𑒑𑒲𑒞𑒏 𑒏𑒩𑒋 𑒦𑒼𑒑 𑒢𑒯𑒱,
𑒞𑒰𑒯𑒱 𑒠𑒵𑒭𑓂𑒙𑒱𑒨𑒹 𑒁𑒯𑒰𑒿 𑒦𑒹𑒪𑒯𑒳𑒿 𑒯𑒧𑒩 𑒧𑒰𑒞𑒰 𑒑𑒳𑒩𑒳 𑒠𑒳𑒢𑒳।
𑒅𑒩𑓂𑒫𑒬𑒲 𑒞𑒐𑒢 𑒠𑒹𑒪𑒏 𑒍𑒏𑒩𑒰 𑒬𑒰𑒣 𑒄 𑒙𑒰,
𑒏𑒰𑒧𑒱𑒢𑒲𑒏 𑒁𑒯𑒰𑒿 𑒬𑒰𑒣 𑒮𑒳𑒢𑒴 𑒢𑒱𑒩𑓂𑒫𑒲𑒩𑓂𑒨 𑒩𑒯𑒥 𑒁𑒯𑒰𑒿 ।
𑒫𑒩𑓂𑒭 𑒦𑒩𑒱 𑒧𑒳𑒠𑒰 𑒏𑒱𑒋𑒏 𑒞𑒿 𑒏𑒯𑒪 𑒧𑒰𑒞𑒰,
𑒬𑒰𑒣 𑒄 𑒣𑒳𑒢𑒱 𑒥𑒢𑒞 𑒫𑒩𑒠𑒰𑒢 𑒢𑒳𑒏𑒰𑒋 𑒮𑒏𑒥 𑒁𑒯𑒰𑒿।
𑒣𑒰𑒝𑓂𑒛𑒫 𑒖𑒢 𑒮𑒹𑒯𑒼 𑒣𑒰𑒥𑒱 𑒩𑒯𑒪 𑒇𑒭𑒱 𑒧𑒳𑒢𑒱𑒮𑒿 𑒬𑒱𑒏𑓂𑒭𑒰,
𑒮𑒧𑒰𑒔𑒰𑒩 𑒠𑒹𑒪𑒢𑓂𑒯𑒱 𑒢𑒰𑒩𑒠 𑒁𑒩𑓂𑒖𑒳𑒢𑒏 𑒏𑒯𑒪 𑒁𑒋𑒞,
𑒪𑒼𑒧𑒬 𑒇𑒭𑒱 𑒂𑒥𑒱 𑒮𑒧𑒰𑒔𑒰𑒩 𑒁𑒩𑓂𑒖𑒳𑒢𑒏 𑒮𑒳𑒢𑒰𑒋𑒞।
𑒏𑒱𑒕𑒳 𑒠𑒱𑒢𑒧𑒹 𑒪𑒼𑒧𑒬 𑒇𑒭𑒱 𑒁𑒋𑒪𑒰𑒯 𑒍𑒞𑒋,
𑒏𑒯𑒪 𑒣𑓂𑒩𑒰𑒣𑓂𑒞 𑒏𑒋 𑒣𑒰𑒬𑒳𑒣𑒞 𑒬𑒱𑒫𑒮𑒿 𑒏𑒻𑒪𑒰𑒮𑒧𑒹,
𑒁𑒩𑓂𑒖𑒳𑒢 𑒠𑒹𑒫𑒪𑒼𑒏𑒧𑒹 𑒣𑓂𑒩𑒰𑒣𑓂𑒞 𑒠𑒱𑒫𑓂𑒨𑒰𑒬𑒮𑓂𑒞𑓂𑒩 𑒏𑒋𑒪,
𑒢𑒵𑒞𑓂𑒨 𑒮𑓀𑒑𑒲𑒞𑒏 𑒬𑒱𑒏𑓂𑒭𑒰 𑒁𑒣𑓂𑒮𑒩𑒰 𑒑𑓀𑒡𑒩𑓂𑒫𑒑𑒝𑒮𑒿
𑒪𑒋 𑒩𑒯𑒪 𑒬𑒱𑒏𑓂𑒭𑒰 𑒁𑒩𑓂𑒖𑒳𑒢 𑒠𑒹𑒫𑒪𑒼𑒏𑒧𑒹 𑒮𑒢𑒖𑒧 𑒮𑒿।
𑒞𑒐𑒢 𑒇𑒭𑒱 𑒞𑒲𑒩𑓂𑒟𑒰𑒙𑒢 𑒏𑒩𑒰𑒆 𑒯𑒧𑒩𑒰 𑒪𑒼𑒏𑒢𑒱𑒏𑒹𑒿,
𑒪𑒼𑒧𑒬 𑒞𑒐𑒢 𑒑𑒹𑒪𑒰𑒯 𑒢𑒻𑒧𑒱𑒭𑒰𑒩𑒝𑓂𑒨 𑒣𑒰𑒝𑓂𑒛𑒫 𑒮𑓀𑒑।
𑒣𑓂𑒩𑒨𑒰𑒑 𑒑𑒨𑒰 𑒑𑓀𑒑𑒰𑒮𑒰𑒑𑒩 𑒣𑒳𑒢𑒱 𑒙𑒣𑒱 𑒏𑒪𑒱𑓀𑒑 𑒣𑒯𑒳𑒿𑒔𑒪,
𑒣𑒔𑓂𑒕𑒱𑒧 𑒠𑒱𑒬𑒱 𑒣𑓂𑒩𑒦𑒰𑒮𑒞𑒲𑒩𑓂𑒟 𑒨𑒰𑒠𑒫𑒑𑒝 𑒖𑒞𑒋 𑒕𑒪।
𑒮𑓂𑒫𑒰𑒑𑒞 𑒦𑒹𑒪 𑒍𑒞𑒋 𑒮𑒳𑒦𑒠𑓂𑒩𑒰 𑒧𑒱𑒪𑒪𑒱 𑒠𑓂𑒩𑒾𑒣𑒠𑒲𑒮𑒿,
𑒥𑒪𑒩𑒰𑒧 𑒏𑒵𑒭𑓂𑒝𑒏 𑒮𑒰𑓀𑒞𑓂𑒫𑒢𑒰 𑒣𑒰𑒥𑒱 𑒥𑒜𑓃𑒪 𑒂𑒑𑒰𑒿,
𑒮𑒩𑒮𑓂𑒫𑒞𑒲 𑒣𑒰𑒩 𑒏𑒋 𑒏𑒬𑓂𑒧𑒲𑒩 𑒂 𑒑𑓀𑒡𑒧𑒰𑒠𑒢 𑒣𑒩𑓂𑒫𑒞,
𑒣𑒰𑒩 𑒏𑒋 𑒔𑒜𑓃𑒪 𑒣𑒩𑓂𑒫𑒞 𑒫𑒩𑓂𑒭𑒰 𑒂 𑒬𑒱𑒪𑒰𑒣𑒞𑒢 𑒥𑒱𑒔।
𑒣𑒯𑒳𑒿𑒔𑒱 𑒑𑒹𑒪𑒰𑒯 𑒥𑒠𑒩𑒱𑒏𑒰𑒬𑓂𑒩𑒧 𑒫𑒱𑒬𑓂𑒩𑒰𑒧 𑒏𑒋𑒪 𑒚𑒯𑒩𑒱।
𑒍𑒞𑒯𑒱 𑒠𑒳𑓁𑒬𑒪𑒰 𑒣𑒞𑒱 𑒖𑒨𑒠𑓂𑒩𑒟 𑒏𑒰𑒧𑓂𑒨𑒏 𑒫𑒢𑒮𑒿,
𑒕𑒪 𑒖𑒰 𑒩𑒯𑒪 𑒠𑒹𑒐𑒪 𑒠𑓂𑒩𑒾𑒣𑒠𑒲𑒏𑒹𑒿 𑒁𑒮𑒑𑒩 𑒍𑒞𑒋,
𑒣𑒰𑒝𑓂𑒛𑒫𑒑𑒝 𑒑𑒹𑒪 𑒕𑒪 𑒬𑒱𑒏𑒰𑒩𑒏 𑒪𑒹𑒪 𑒞𑒐𑒢।
𑒥𑒻𑒮𑒪 𑒏𑒳𑒙𑒲𑒧𑒹 𑒫𑒱𑒫𑒰𑒯 𑒣𑓂𑒩𑒮𑓂𑒞𑒰𑒫 𑒠𑒹𑒪 𑒠𑓂𑒩𑒾𑒣𑒠𑒲𑒏𑒹𑒿,
𑒢𑒲𑒔𑒞𑒰 𑒠𑒹𑒐𑒱 𑒠𑓂𑒩𑒾𑒣𑒠𑒲 𑒏𑒚𑒼𑒩 𑒫𑒔𑒢 𑒖𑒐𑒢 𑒏𑒯𑒪,
𑒩𑒟𑒧𑒹 𑒪𑒋 𑒦𑒰𑒑𑒪 𑒁𑒣𑒯𑒩𑒝 𑒏𑒋 𑒠𑒳𑒭𑓂𑒙 𑒖𑒨𑒠𑓂𑒩𑒟।
𑒂𑒬𑓂𑒩𑒧 𑒂𑒥𑒱 𑒣𑒰𑒥𑒱 𑒮𑒧𑒰𑒔𑒰𑒩 𑒦𑒲𑒧 𑒍𑒏𑒩𑒰 𑒣𑒩 𑒕𑒳𑒙𑒪,
𑒞𑒐𑒢𑒯𑒱 𑒁𑒩𑓂𑒖𑒳𑒢 𑒮𑒹𑒯𑒼 𑒂𑒋𑒪 𑒣𑒰𑒕𑒴 𑒖𑒨𑒠𑓂𑒩𑒟𑒏 𑒑𑒹𑒪,
𑒨𑒳𑒡𑒱𑒭𑓂𑒚𑒱𑒩 𑒏𑒯𑒪 𑒣𑓂𑒩𑒰𑒝𑒠𑒰𑒢 𑒠𑒹𑒥 𑒣𑒞𑒱 𑒠𑒳𑓁𑒬𑒪𑒰𑒏 𑒕𑒲 𑒍,
𑒖𑒨𑒠𑓂𑒩𑒟 𑒠𑒹𑒐𑒪 𑒁𑒥𑒻𑒞 𑒠𑒳𑒢𑒴 𑒦𑒰𑒋𑒏𑒹𑒿 𑒠𑓂𑒩𑒾𑒣𑒠𑒲𑒏𑒹𑒿 𑒕𑒼𑒛𑓃𑒱 𑒦𑒰𑒑𑒪,
𑒦𑒲𑒧 𑒣𑒙𑒏𑒱 𑒥𑒰𑒢𑓂𑒯𑒱 𑒂𑒢𑒪 𑒍𑒏𑒩𑒰 𑒠𑓂𑒩𑒾𑒣𑒠𑒲𑒏 𑒮𑒼𑒗𑒰𑒿,
𑒠𑓂𑒩𑒾𑒣𑒠𑒲 𑒁𑒣𑒧𑒰𑒢𑒱𑒞 𑒏𑒋 𑒕𑒼𑒛𑓃𑒥𑒰𑒍𑒪 𑒍𑒏𑒩𑒰।
𑒬𑒱𑒫𑒏 𑒞𑒣𑒮𑓂𑒨𑒰 𑒏𑒋𑒪 𑒖𑒨𑒠𑓂𑒩𑒟 𑒫𑒩𑒠𑒰𑒢 𑒧𑒰𑒿𑒑𑒪,
𑒖𑒱𑒞𑒥𑒰𑒏 𑒣𑒰𑒿𑒔𑒴 𑒣𑒰𑒝𑓂𑒛𑒫𑒮𑒿 𑒏𑒯𑒪 𑒬𑒱𑒫 𑒄,
𑒢𑒯𑒱 𑒯𑒰𑒩𑒥 𑒁𑒯𑒰𑒿 𑒏𑒼𑒢𑒼 𑒦𑒰𑒋𑒮𑒿 𑒁𑒩𑓂𑒖𑒳𑒢𑒏𑒹𑒿 𑒕𑒼𑒛𑓃𑒱।
𑒥𑓂𑒨𑒰𑒮 𑒣𑒩𑒱𑒬𑓂𑒩𑒧𑒏𑒹𑒿 𑒞𑒣𑒮𑓂𑒨𑒰𑒏 𑒢𑒰𑒧 𑒠𑒹𑒪,
𑒂𑒿𑒐𑒱 𑒧𑒴𑒢𑒱 𑒧𑒳𑒠𑒰 𑒄 𑒣𑒬𑓂𑒔𑒰𑒞𑓂 𑒧𑒘𑓂𑒔𑒱𑒞 𑒦𑒹𑒪 !!
𑒏𑒩𑓂𑒝 𑒕𑒪 𑒞𑒣𑒮𑓂𑒨𑒰 𑒏𑒋 𑒩𑒯𑒪 𑒁𑒩𑓂𑒖𑒳𑒢𑒏𑒿 𑒯𑒩𑒋𑒥𑒰 𑒪𑒹𑒪,
𑒃𑒢𑓂𑒠𑓂𑒩 𑒮𑒼𑒔𑒪 𑒬𑒩𑒲𑒩𑒏 𑒏𑒫𑒔 𑒏𑒳𑒝𑓂𑒛𑒪 𑒁𑒕𑒻𑒞 𑒍,
𑒯𑒰𑒩𑒞 𑒢𑒯𑒱 𑒏𑒏𑒩𑒯𑒳𑒮𑒿 𑒠𑒰𑒢𑒫𑒲𑒩 𑒣𑒩𑒰𑒏𑓂𑒩𑒧𑒲 𑒍 𑒕𑒪।
𑒮𑒼𑒔𑒱 𑒍𑒏𑒩𑒰𑒮𑒿 𑒯𑒧 𑒧𑒰𑒿𑒑𑒥 𑒏𑒫𑒔 𑒏𑒳𑒝𑓂𑒛𑒪,
𑒠𑒹𑒐𑒱 𑒄 𑒮𑒴𑒩𑓂𑒨 𑒏𑒋𑒪𑒢𑓂𑒯𑒱 𑒯𑒼𑒆 𑒮𑒔𑒹𑒞 𑒏𑒩𑓂𑒝,
𑒂𑒥𑒱 𑒩𑒯𑒪 𑒃𑒢𑓂𑒠𑓂𑒩 𑒕𑒠𑓂𑒧 𑒫𑒹𑒭𑒧𑒹 𑒨𑒰𑒔𑒢𑒰 𑒏𑒩𑒞 𑒄,
𑒏𑒫𑒔 𑒏𑒳𑒝𑓂𑒛𑒪 𑒕𑒼𑒛𑓃𑒱 𑒏𑒱𑒕𑒳 𑒧𑒰𑒿𑒑𑒞 𑒢𑒯𑒱 𑒍।
𑒏𑒯𑒪 𑒏𑒩𑓂𑒝 𑒨𑒰𑒔𑒏𑒏𑒹𑒿 𑒯𑒧 𑒢𑒯𑒱 𑒢𑒘𑒱 𑒏𑒯𑒥 𑒣𑓂𑒩𑒝,
𑒣𑓂𑒩𑒝 𑒯𑒧𑒩 𑒢𑒯𑒱 𑒙𑒴𑒙𑒞 𑒔𑒰𑒯𑒹 𑒖𑒹 𑒣𑒩𑒱𑒝𑒰𑒧 𑒯𑒼𑒧𑒋।
𑒞𑒐𑒢𑒯𑒱 𑒫𑒱𑒣𑓂𑒩 𑒫𑒹𑒬𑒧𑒹 𑒃𑒢𑓂𑒠𑓂𑒩 𑒂𑒥𑒱 𑒠𑒳𑒯𑒳 𑒫𑒮𑓂𑒞𑒳 𑒧𑒰𑒿𑒑𑒪,
𑒚𑒼𑒜𑓃 𑒣𑒩 𑒧𑒩𑓂𑒧𑒏 𑒧𑒳𑒮𑓂𑒏𑒲 𑒏𑒩𑓂𑒝𑒏 𑒯𑒰𑒟 𑒬𑒮𑓂𑒞𑓂𑒩 𑒂𑒋𑒪,
𑒏𑒰𑒙𑒱 𑒠𑒹𑒯𑒮𑒿 𑒏𑒫𑒔 𑒏𑒳𑒝𑓂𑒛𑒪 𑒮𑒧𑒩𑓂𑒣𑒱𑒞 𑒏𑒋𑒪 𑒞𑒐𑒢𑒯𑒱,
𑒃𑒢𑓂𑒠𑓂𑒩 𑒠𑒹𑒪 𑒫𑒩 𑒧𑒰𑒿𑒑𑒴 𑒕𑒼𑒛𑓃𑒱 𑒄 𑒫𑒖𑓂𑒩 𑒯𑒧𑒩 𑒂𑒩 𑒏𑒱𑒕𑒳𑒍,
𑒁𑒧𑒼𑒒 𑒬𑒏𑓂𑒞𑓂𑒞𑒱 𑒧𑒰𑒿𑒑𑒪 𑒏𑒩𑓂𑒝 𑒃𑒢𑓂𑒠𑓂𑒩 𑒠𑒹𑒪𑒢𑓂𑒯𑒱 𑒏𑒯𑒱 𑒏𑒋,
𑒧𑒰𑒩𑒞 𑒖𑒏𑒩𑒰 𑒣𑒩 𑒔𑒪𑒞 𑒣𑒳𑒢𑒱 𑒒𑒳𑒩𑒞 𑒪𑒑 𑒯𑒧𑒩 𑒁𑒋𑒞।
𑒬𑒢𑒻𑓁-𑒬𑒢𑒻𑓁 𑒕𑒪 𑒥𑒲𑒞𑒱 𑒩𑒯𑒪 𑒥𑒰𑒩𑒯 𑒫𑒩𑓂𑒭 𑒋𑒯𑒱𑒢𑒰,
𑒋𑒏 𑒫𑒩𑓂𑒭𑒏 𑒁𑒖𑓂𑒘𑒰𑒞𑒫𑒰𑒮𑒏 𑒫𑒱𑒭𑒨𑒧𑒹 𑒫𑒱𑒔𑒰𑒩𑒱 𑒩𑒯𑒪,
𑒫𑒱𑒔𑒰𑒩𑒱 𑒨𑒳𑒡𑒱𑒭𑓂𑒚𑒱𑒩 𑒩𑒯𑒪 𑒦𑒰𑒋 𑒂 𑒠𑓂𑒩𑒾𑒣𑒠𑒲𑒏 𑒮𑓀𑒑,
𑒞𑒐𑒢𑒹 𑒏𑒢𑒻𑒞 𑒐𑒱𑒖𑒻𑒞 𑒋𑒏𑒙𑒰 𑒫𑒱𑒣𑓂𑒩 𑒂𑒋𑒪 ।
𑒏𑒯𑒪 𑒁𑒩𑒝𑒲𑒏 𑒪𑒏𑒳𑒛𑓃𑒲 𑒕𑒪 𑒏𑒳𑒙𑒲𑒏 𑒥𑒰𑒯𑒩 𑒙𑒰𑒿𑒑𑒪,
𑒯𑒩𑒱𑒝 𑒋𑒏 𑒂𑒥𑒱 𑒏𑒳𑒩𑒨𑒰𑒥𑒋 𑒪𑒰𑒑𑒪 𑒍𑒯𑒱𑒮𑒿,
𑒖𑒰𑒋 𑒏𑒰𑒪 𑒮𑒱𑓀𑒯𑒧𑒹 𑒍𑒗𑒩𑒰𑒨𑒪 𑒁𑒩𑒱𑒝𑒲 𑒍𑒏𑒩,
𑒫𑒱𑒮𑓂𑒧𑒱𑒞 𑒦𑒰𑒑𑒪 𑒍 𑒪𑒋 𑒯𑒧𑒩 𑒪𑒏𑒳𑒛𑓃𑒲,
𑒏𑒼𑒢𑒰 𑒏𑒋 𑒯𑒼𑒧𑒏 𑒁𑒑𑓂𑒢𑒱 𑒂𑒢𑒥 𑒔𑒱𑒢𑓂𑒞𑒱𑒞 𑒕𑒲।
𑒫𑒱𑒣𑓂𑒩𑒏 𑒮𑓀𑒑 𑒣𑒰𑒿𑒔𑒼 𑒦𑒰𑒿𑒋 𑒯𑒩𑒱𑒝𑒏𑒹𑒿 𑒐𑒹𑒯𑒰𑒩𑒪,
𑒧𑒳𑒠𑒰 𑒕𑒪 𑒍 𑒔𑒣𑒪 𑒦𑒋 𑒑𑒹𑒪 𑒍𑒗𑒪।
𑒫𑒩𑒏 𑒑𑒰𑒕𑒏 𑒢𑒲𑒔𑒰𑒿 𑒍 𑒮𑒦 𑒪𑒖𑓂𑒖𑒱𑒞 𑒣𑒱𑒂𑒮𑒪,
𑒚𑒹𑒯𑒱𑒂𑒋𑒪 𑒥𑒻𑒮𑒪 𑒢𑒏𑒳𑒪 𑒑𑒹𑒪 𑒮𑒩𑒼𑒫𑒩 𑒣𑒰𑒢𑒱 𑒂𑒢𑒋।
𑒋𑒏𑒙𑒰 𑒡𑓂𑒫𑒢𑒱 𑒂𑒋𑒪 𑒄 𑒔𑒦𑒔𑓂𑒔𑒰 𑒯𑒧𑒩 𑒕𑒲,
𑒅𑒞𑓂𑒞𑒩 𑒯𑒧𑒩 𑒣𑓂𑒩𑒬𑓂𑒢𑒏 𑒥𑒱𑒢𑒳 𑒠𑒹𑒢𑒹 𑒣𑒰𑒢𑒱 𑒢𑒘𑒱 𑒦𑒹𑒙𑒞 𑒄।
𑒢𑒯𑒱 𑒏𑒰𑒢 𑒠𑒹𑒪 𑒍𑒯𑒱 𑒑𑒣 𑒣𑒩 𑒯𑒏𑒰𑒮𑒪 𑒣𑒱𑒂𑒮𑒪,
𑒣𑒰𑒢𑒱 𑒖𑒐𑒢𑒹 𑒣𑒱𑒋𑒪 𑒁𑒩𑒛𑓃𑒰 𑒏𑒋 𑒧𑒵𑒞 𑒍 𑒐𑒮𑒪।
𑒮𑒯𑒠𑒹𑒫𑒏 𑒮𑓀𑒑 𑒮𑒹𑒯𑒼 𑒋𑒯𑒢𑒹 𑒒𑒙𑒢𑒰 𑒒𑒙𑒪 𑒕𑒪,
𑒁𑒩𑓂𑒖𑒳𑒢 𑒖𑒐𑒢 𑒂𑒋𑒪 𑒤𑒹𑒩 𑒫𑒻𑒯 𑒡𑓂𑒫𑒢𑒱 𑒮𑒳𑒢𑒪 ।
𑒬𑒥𑓂𑒠𑒦𑒹𑒠𑒲 𑒥𑒰𑒝 𑒕𑒼𑒛𑓃𑒪 𑒧𑒳𑒠𑒰 𑒢𑒯𑒱 𑒏𑒼𑒢𑒼 𑒣𑓂𑒩𑒞𑒱𑒤𑒪,
𑒣𑒰𑒢𑒱 𑒣𑒲𑒥𑒻𑒞 𑒠𑒹𑒩𑒲 𑒍𑒯𑒼 𑒧𑒵𑒞 𑒦𑒋 𑒐𑒮𑒪 𑒕𑒪।
𑒨𑒳𑒡𑒱𑒭𑓂𑒚𑒱𑒩 𑒦𑒋 𑒔𑒱𑒢𑓂𑒞𑒱𑒞 𑒦𑒲𑒧𑒏𑒹𑒿 𑒣𑒚𑒰𑒍𑒪 𑒞𑒰𑒏𑒋,
𑒣𑒰𑒢𑒱 𑒣𑒲𑒥𑒱 𑒧𑒵𑒞 𑒦𑒋 𑒢𑒯𑒱 𑒒𑒳𑒩𑒪 𑒍𑒞𑒋।
𑒨𑒳𑒡𑒱𑒭𑓂𑒚𑒱𑒩 𑒖𑒐𑒢 𑒫𑒢 𑒥𑒲𑒔 𑒮𑒩𑒼𑒫𑒩 𑒣𑒯𑒳𑒿𑒔𑒪,
𑒧𑒵𑒞 𑒦𑒰𑒋 𑒮𑒦𑒏𑒹𑒿 𑒠𑒹𑒐𑒱 𑒫𑓂𑒨𑒰𑒏𑒳𑒪 𑒣𑒰𑒢𑒱𑒧𑒹 𑒅𑒞𑒩𑒪।
𑒫𑒻𑒯 𑒡𑓂𑒫𑒢𑒱 𑒂𑒋𑒪 𑒅𑒞𑓂𑒞𑒩𑒏 𑒥𑒱𑒢𑒰 𑒣𑓂𑒨𑒰𑒮𑒪 𑒩𑒯𑒥,
𑒯𑒼𑒋𑒞 𑒋𑒯𑒱 𑒞𑒩𑒯𑒏 𑒣𑒩𑒱𑒝𑒰𑒧 𑒖𑓂𑒨𑒼𑒿 𑒡𑒵𑒭𑓂𑒙𑒞𑒰 𑒏𑒩𑒥।
𑒄 𑒁𑒕𑒱 𑒏𑒼𑒢𑒼 𑒨𑒏𑓂𑒭 𑒮𑒼𑒔𑒱 𑒨𑒳𑒡𑒱𑒭𑓂𑒚𑒱𑒩 𑒥𑒰𑒖𑒪,
𑒣𑒳𑒕𑒴 𑒣𑓂𑒩𑒬𑓂𑒢 𑒅𑒞𑓂𑒞𑒩 𑒮𑒧𑓂𑒨𑒏 𑒠𑒹𑒥 𑒬𑒳𑒩𑒴 𑒦𑒹𑒪 𑒨𑒏𑓂𑒭।
𑒧𑒢𑒳𑒭𑓂𑒨𑒏 𑒮𑓀𑒑 𑒏𑒹 𑒁𑒕𑒱 𑒠𑒻𑒞? 𑒣𑓂𑒩𑒟𑒧𑒞𑓁 𑒄 𑒥𑒰𑒖𑒴,
𑒡𑒻𑒩𑓂𑒨 𑒙𑒰 𑒠𑒻𑒕 𑒮𑓀𑒑 𑒧𑒢𑒳𑒏𑓂𑒐𑒏 𑒮𑒠𑒱𑒐𑒢 𑒮𑒼𑒏𑒰𑒖𑒴।
𑒨𑒬𑒪𑒰𑒦𑒏 𑒁𑒕𑒱 𑒏𑒼𑒢 𑒅𑒣𑒰𑒨 𑒋𑒏𑒙𑒰?
𑒠𑒰𑒢 𑒥𑒱𑒢𑒳 𑒨𑒬 𑒢𑒯𑒱 𑒦𑒹𑒙𑒻𑒕 𑒏𑒼𑒢𑒼𑒙𑒰।
𑒫𑒰𑒨𑒳𑒮𑒿 𑒞𑓂𑒫𑒩𑒱𑒞 𑒁𑒕𑒱 𑒏𑒼𑒢 𑒫𑒮𑓂𑒞𑒳?
𑒧𑒢𑒏 𑒂𑒑𑒰𑒿 𑒫𑒰𑒨𑒳𑒏 𑒑𑒞𑒱 𑒢𑒯𑒱 𑒏𑒞𑒯𑒳 ।
𑒣𑓂𑒩𑒫𑒰𑒮𑒲𑒏 𑒮𑓀𑒑𑒲 𑒁𑒕𑒱 𑒏𑒹 𑒋𑒏𑒹𑒙𑒰 ?
𑒫𑒱𑒠𑓂𑒨𑒰𑒏 𑒃𑒞𑒩 𑒢𑒯𑒱 𑒮𑓀𑒑𑒲 𑒋𑒏𑒼𑒙𑒰।
𑒏𑒏𑒩𑒰 𑒞𑓂𑒨𑒖𑒱 𑒏𑒋 𑒧𑒢𑒳𑒏𑓂𑒐𑒏𑒹𑒿 𑒦𑒹𑒙𑒻𑒕 𑒧𑒳𑒏𑓂𑒞𑓂𑒞𑒱?
𑒁𑒯𑓀 𑒕𑒼𑒛𑓃𑒪 𑒞𑒐𑒢 𑒦𑒹𑒙𑒞 𑒫𑒱𑒧𑒳𑒏𑓂𑒞𑓂𑒞𑒱।
𑒏𑒼𑒢 𑒫𑒮𑓂𑒞𑒳𑒏 𑒯𑒩𑒰𑒋𑒪𑒰𑒮𑒿 𑒢𑒯𑒱 𑒯𑒼𑒃𑒕 𑒧𑒢 𑒠𑒳𑓁𑒐𑒱𑒞?
𑒏𑓂𑒩𑒼𑒡𑒏 𑒯𑒩𑒋𑒪𑒰𑒮𑒿 𑒏𑒱𑒋 𑒯𑒼𑒁𑒨 𑒏𑓂𑒨𑒼 𑒬𑒼𑒏𑒱𑒞।
𑒏𑒼𑒢 𑒫𑒮𑓂𑒞𑒳𑒏 𑒔𑒼𑒩𑒱𑒮𑒿 𑒯𑒼𑒃𑒕 𑒧𑒢𑒳𑒏𑓂𑒐 𑒡𑒢𑒱𑒏?
𑒪𑒼𑒦𑒏 𑒏𑓂𑒭𑒞𑒱 𑒥𑒢𑒥𑒻𑒕 𑒣𑒳𑒭𑓂𑒙 𑒮𑒥𑒯𑒱𑒿।
𑒥𑓂𑒩𑒰𑒯𑓂𑒧𑒝 𑒖𑒢𑓂𑒧, 𑒫𑒱𑒠𑓂𑒨𑒰, 𑒬𑒲𑒪 𑒏𑒼𑒢 𑒑𑒣 𑒣𑒩 𑒁𑒫𑒪𑒧𑓂𑒥𑒱𑒞?
𑒬𑒲𑒪 𑒮𑓂𑒫𑒦𑒰𑒫 𑒥𑒱𑒢𑒳 𑒥𑓂𑒩𑒰𑒯𑓂𑒧𑒝 𑒩𑒯𑒞 𑒢𑒯𑒱 𑒏𑒱𑒕𑒳।
𑒡𑒩𑓂𑒧𑒮𑒿 𑒥𑒜𑓃𑒱 𑒁𑒕𑒱 𑒏𑒲 𑒖𑒑𑒞𑒧𑒹?
𑒅𑒠𑒰𑒩 𑒧𑒢𑒮𑒱 𑒅𑒔𑓂𑒔 𑒣𑒠𑒮𑓂𑒟 𑒮𑒦𑒮𑒿।
𑒏𑒼𑒢 𑒧𑒱𑒞𑓂𑒩 𑒢𑒯𑒱 𑒯𑒼𑒃𑒞 𑒁𑒕𑒱 𑒣𑒳𑒩𑒰𑒢?
𑒮𑒖𑓂𑒖𑒢𑒮𑒿 𑒏𑒋𑒪 𑒑𑒹𑒪 𑒧𑒱𑒞𑓂𑒩𑒰𑒞𑒰𑒏 𑒏𑒼𑒢𑒰 𑒁𑒫𑒮𑒰𑒢।
𑒮𑒦𑒮𑒿 𑒣𑒻𑒒 𑒁𑒠𑓂𑒦𑒳𑒞 𑒏𑒲 𑒁𑒕𑒱 𑒋𑒯𑒱 𑒖𑒑𑒧𑒹?
𑒧𑒵𑒞𑓂𑒨𑒳 𑒮𑒦 𑒠𑒱𑒢𑒳 𑒠𑒹𑒐𑒢𑒯𑒳 𑒁𑒕𑒻𑒞𑒼 𑒖𑒲𑒫𑒢 𑒪𑒰𑒪𑒮𑒰,
𑒋𑒯𑒱𑒮𑒿 𑒥𑒜𑓃𑒱 𑒁𑒠𑓂𑒦𑒳𑒞 𑒂𑒬𑓂𑒔𑒩𑓂𑒨 𑒁𑒕𑒱 𑒏𑒲?
𑒣𑓂𑒩𑒮𑒢𑓂𑒢𑒔𑒱𑒞𑓂𑒞 𑒦𑒋 𑒨𑒏𑓂𑒭 𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒏𑒯𑒴,
𑒏𑒼𑒢𑒼 𑒋𑒏 𑒦𑒰𑒋𑒏𑒹𑒿 𑒯𑒧 𑒖𑒲𑒫𑒱𑒞 𑒏𑒋 𑒮𑒏𑒥।
𑒞𑒐𑒢 𑒢𑒏𑒳𑒪𑒏𑒹𑒿 𑒏𑒋 𑒠𑒱𑒁 𑒖𑒲𑒫𑒱𑒞,
𑒮𑒳𑒢𑒱 𑒨𑒏𑓂𑒭 𑒣𑒴𑒕𑒪 𑒏𑒯𑒥 𑒞𑒿 𑒦𑒲𑒧 𑒁𑒩𑓂𑒖𑒳𑒢 𑒏𑒼𑒢𑒼𑒏𑒹𑒿,
𑒖𑒲𑒫𑒱𑒞 𑒏𑒩𑒥 𑒖𑒏𑒩 𑒩𑒝 𑒏𑒾𑒬𑒪 𑒏𑒩𑒞 𑒩𑒏𑓂𑒭𑒰।
𑒡𑒩𑓂𑒧𑒩𑒰𑒖 𑒏𑒯𑒪 𑒡𑒩𑓂𑒧𑒏 𑒥𑒱𑒢𑒰 𑒢𑒯𑒱 𑒯𑒼𑒃𑒕 𑒩𑒏𑓂𑒭𑒰,
𑒏𑒳𑒢𑓂𑒞𑒲 𑒣𑒳𑒞𑓂𑒩 𑒯𑒧 𑒨𑒳𑒡𑒱𑒭𑓂𑒚𑒱𑒩 𑒖𑒱𑒥𑒻𑒞 𑒕𑒲,
𑒧𑒰𑒠𑓂𑒩𑒲 𑒧𑒰𑒞𑒳𑒏 𑒣𑒳𑒞𑓂𑒩 𑒖𑒱𑒥𑒟𑒳 𑒢𑒏𑒳𑒪 𑒮𑒻𑒯 𑒅𑒔𑒱𑒞।
𑒮𑒳𑒢𑒱 𑒏𑒯𑒪 𑒯𑒱𑒩𑒝 𑒫𑒹𑒬𑒡𑒰𑒩𑒲 𑒨𑒧𑒩𑒰𑒖 𑒯𑒹 𑒣𑒳𑒞𑓂𑒩,
𑒣𑒏𑓂𑒭𑒣𑒰𑒞 𑒩𑒯𑒱𑒞 𑒕𑒲 𑒁𑒯𑒰𑒿 𑒞𑒹𑒿 𑒮𑒦 𑒦𑒰𑒋 𑒖𑒲𑒥𑒟𑒳।
𑒣𑒳𑒞𑓂𑒩𑒏𑒹𑒿 𑒠𑒹𑒐𑒱 𑒧𑒼𑒢 𑒞𑒵𑒣𑓂𑒞 𑒦𑒹𑒪𑒢𑓂𑒯𑒱 𑒨𑒧𑒏,
𑒣𑒰𑒝𑓂𑒛𑒫 𑒑𑒝 𑒞𑒐𑒢 𑒒𑒳𑒩𑒱 𑒠𑓂𑒩𑒾𑒣𑒠𑒲𑒏 𑒪𑒑 𑒑𑒹𑒪𑒰𑒯।
𑒣𑒴𑒩𑓂𑒝 𑒦𑒹𑒪 𑒫𑒢𑒫𑒰𑒮𑒏 𑒫𑒩𑓂𑒭 𑒥𑒰𑒩𑒯 𑒁𑒞𑒲𑒞,
𑒋𑒏 𑒫𑒩𑓂𑒭𑒏 𑒕𑒪 𑒁𑒖𑓂𑒘𑒰𑒞𑒫𑒰𑒮 𑒥𑒛𑓃 𑒏𑒚𑒱𑒢,
𑒠𑒳𑒩𑓂𑒨𑒼𑒡𑒢𑒏𑒹𑒿 𑒨𑒠𑒱 𑒯𑒳𑒢𑒏 𑒮𑓀𑒏𑒹𑒞𑒏 𑒔𑒪𑒋 𑒣𑒞𑒰,
𑒣𑒳𑒢𑒱 𑒠𑓂𑒫𑒰𑒠𑒬 𑒫𑒩𑓂𑒭𑒏 𑒫𑒢𑒫𑒰𑒮𑒏 𑒕𑒪 𑒣𑓂𑒩𑒟𑒰।
𑒣𑓂𑒩𑒰𑒞𑓁𑒏𑒰𑒪 𑒮𑒦 𑒫𑒱𑒠𑒰 𑒦𑒹𑒪𑒰𑒯 𑒫𑒱𑒩𑒰𑒙 𑒢𑒑𑒩 𑒠𑒱𑒬𑒱,
𑒡𑒩𑓂𑒧𑒩𑒰𑒖 𑒏𑓀𑒏 𑒢𑒰𑒧𑓂𑒢𑒰 𑒥𑓂𑒩𑒰𑒯𑓂𑒧𑒝 𑒫𑒹𑒬 𑒡𑒰𑒩𑒱𑒞 𑒧𑒱𑒪𑒱।
𑒏𑒾𑒛𑓃𑒲 𑒂 𑒔𑒞𑒳𑒩𑓀𑒑 𑒑𑒼𑒙𑒲𑒮𑒿 𑒫𑒱𑒩𑒰𑒙𑒩𑒰𑒖𑒏 𑒧𑒼𑒢 𑒪𑒑𑒰𑒋𑒥,
𑒦𑒲𑒧 𑒥𑒢𑒱 𑒣𑒰𑒔𑒏 𑒢𑒰𑒧 𑒫𑒪𑓂𑒪𑒦𑒏 𑒣𑒰𑒏𑒬𑒰𑒪𑒰 𑒮𑒧𑓂𑒯𑒰𑒩𑒟𑒱।
𑒫𑒱𑒩𑒰𑒙𑒏 𑒣𑒳𑒞𑓂𑒩𑒲𑒏𑒹𑒿 𑒮𑓀𑒑𑒲𑒞 𑒢𑒵𑒞𑓂𑒨 𑒁𑒩𑓂𑒖𑒳𑒢,
𑒢𑒰𑒩𑒲 𑒫𑒵𑒯𑒢𑓂𑒢𑒪𑒰 𑒥𑒢𑒱 𑒮𑒱𑒐𑒰𑒥𑒟𑒳,
𑒑𑓂𑒩𑓀𑒟𑒱𑒏 𑒢𑒰𑒧𑒮𑒿 𑒢𑒏𑒳𑒪 𑒁𑒬𑓂𑒫𑒏 𑒏𑒩𑒋 𑒩𑒐𑒥𑒰𑒩𑒱,
𑒮𑒯𑒠𑒹𑒫𑒏 𑒢𑒰𑒧 𑒞𑓀𑒞𑓂𑒩𑒣𑒰𑒪 𑒦𑒹𑒪 𑒏𑒩𑒟𑒱 𑒔𑒩𑒥𑒰𑒯𑒱।
𑒩𑒰𑒢𑒲𑒏𑒹𑒿 𑒮𑒖𑒰𑒥𑒟𑒱 𑒠𑓂𑒩𑒾𑒣𑒠𑒲 𑒢𑒰𑒧 𑒡𑒩𑒱 𑒮𑒻𑒩𑒢𑓂𑒡𑓂𑒩𑒲𑒏।
𑒮𑒦 𑒄 𑒮𑒼𑒔𑒱 𑒢𑒳𑒏𑒰𑒍𑒪 𑒁𑒮𑓂𑒞𑓂𑒩-𑒬𑒮𑓂𑒞𑓂𑒩,
𑒬𑒰𑒐𑒰 𑒥𑒱𑒔 𑒬𑒧𑒲-𑒫𑒵𑒏𑓂𑒭 𑒋𑒏𑒙𑒰 𑒫𑒱𑒬𑒰𑒪 𑒧𑒡𑓂𑒨।
𑒖𑒐𑒢 𑒫𑒹𑒬 𑒡𑒩𑒱 𑒣𑒯𑒳𑒿𑒔𑒪𑒰𑒯 𑒫𑒱𑒩𑒰𑒙 𑒩𑒰𑒖𑒰 𑒪𑒑,
𑒮𑓂𑒫𑒲𑒏𑒰𑒩𑒪𑒢𑓂𑒯𑒱 𑒍 𑒮𑒦𑒙𑒰 𑒣𑓂𑒩𑒰𑒩𑓂𑒟𑒢𑒰 𑒮𑓂𑒫𑒞𑓁।
𑒠𑒱𑒢 𑒕𑒪 𑒥𑒲𑒞𑒱 𑒩𑒯𑒪 𑒧𑒳𑒠𑒰 𑒩𑒰𑒢𑒲 𑒮𑒳𑒠𑒹𑒭𑓂𑒝𑒰𑒏,
𑒦𑒰𑒋 𑒕𑒪 𑒏𑒲𑒔𑒏 𑒠𑒳𑒭𑓂𑒙 𑒠𑒹𑒐𑒱 𑒮𑒻𑒩𑒢𑓂𑒡𑓂𑒩𑒲𑒏 𑒦𑒹𑒪 𑒧𑒳𑒑𑓂𑒡।
𑒥𑒯𑒱𑒢𑒮𑒿 𑒣𑒴𑒕𑒪 𑒏𑒼𑒢 𑒠𑒹𑒬𑒏 𑒩𑒰𑒖𑒏𑒳𑒧𑒰𑒩𑒲 𑒕𑒟𑒱,
𑒏𑒯𑒪 𑒥𑒯𑒱𑒢 𑒢𑒯𑒱 𑒕𑒲 𑒢𑒱𑒏𑒵𑒭𑓂𑒙 𑒠𑒰𑒮𑒲 𑒄।
𑒧𑒳𑒠𑒰 𑒏𑒲𑒔𑒏 𑒣𑒯𑒳𑒿𑒔𑒱 𑒠𑓂𑒩𑒾𑒣𑒠𑒲 𑒪𑒑 𑒥𑒰𑒖𑒪,
𑒮𑒳𑒢𑓂𑒠𑒩𑒲 𑒠𑒰𑒮 𑒥𑒢𑒰𑒆 𑒯𑒧 𑒧𑒳𑒑𑓂𑒡 𑒣𑒰𑒑𑒪।
𑒮𑒻𑒩𑒢𑓂𑒡𑓂𑒩𑒲 𑒏𑒯𑒪𑒢𑓂𑒯𑒱, 𑒯𑒧 𑒫𑒱𑒫𑒰𑒯𑒱𑒞𑒰 𑒋𑒏 𑒠𑒰𑒮𑒲,
𑒁𑒯𑒰𑒿𑒏 𑒣𑒰𑒪𑒱𑒞𑒰 𑒕𑒲 𑒢𑒯𑒱 𑒣𑒳𑒢𑒱 𑒑𑒣 𑒄 𑒥𑒰𑒖𑒲।
𑒧𑒳𑒠𑒰 𑒏𑒲𑒔𑒏 𑒥𑒯𑒱𑒢𑒱𑒮𑒿 𑒣𑒳𑒢𑒱 𑒁𑒢𑒳𑒩𑒼𑒡 𑒏𑒋𑒪𑒏।
𑒣𑒩𑓂𑒫 𑒠𑒱𑒢 𑒮𑒳𑒠𑒹𑒭𑓂𑒝𑒰 𑒏𑒱𑒕𑒳 𑒫𑒮𑓂𑒞𑒳 𑒁𑒢𑒥𑒰 𑒯𑒹𑒞𑒳 𑒏𑒯𑒪𑒏,
𑒮𑒻𑒩𑒢𑓂𑒡𑓂𑒩𑒲𑒏𑒹𑒿 𑒏𑒲𑒔𑒏 𑒪𑒑 𑒖𑒰𑒋 𑒞𑒏𑒩𑒰 𑒂𑒢𑒋 𑒣𑒚𑒹𑒪𑒏।
𑒧𑒳𑒠𑒰 𑒍𑒞𑒋 𑒠𑒹𑒐𑒱 𑒫𑒰𑒮𑒢𑒰𑒏 𑒂𑒿𑒐𑒱 𑒦𑒰𑒑𑒪𑒱,
𑒦𑒲𑒧𑒮𑒿 𑒖𑒰𑒋 𑒥𑒰𑒖𑒪𑒱 𑒡𑒱𑒏 𑒏𑒯𑒪𑒱 𑒣𑒰𑒝𑓂𑒛𑒫𑒏𑒹𑒿 ।
𑒦𑒲𑒧 𑒥𑒰𑒖𑒪 𑒂𑒥 𑒖𑒹 𑒍 𑒦𑒹𑒿𑒙 𑒯𑒼𑒁𑒋,
𑒢𑒰𑒙𑓂𑒨𑒬𑒰𑒪𑒰𑒧𑒹 𑒥𑒖𑒰𑒆 𑒂𑒡 𑒩𑒰𑒞𑒱 𑒮𑒼𑒔𑒥 𑒤𑒹𑒩 𑒄,
𑒯𑒧𑒩𑒰 𑒏𑒲 𑒏𑒩𑒥𑒰𑒏 𑒁𑒕𑒱 𑒍𑒯𑒱 𑒠𑒳𑒭𑓂𑒙𑒏𑒹𑒿 𑒍𑒞𑒋।
𑒏𑒲𑒔𑒏 𑒫𑒱𑒩𑒰𑒙𑒏 𑒮𑒹𑒢𑒰𑒏 𑒣𑓂𑒩𑒧𑒳𑒐 𑒮𑒹𑒯𑒼 𑒕𑒪,
𑒮𑒻𑒩𑒢𑓂𑒡𑓂𑒩𑒲𑒏 𑒂𑒧𑓀𑒞𑓂𑒩𑒝𑒏𑒹𑒿 𑒢𑒯𑒱 𑒥𑒴𑒗𑒱 𑒣𑒯𑒳𑒿𑒔𑒪 𑒁𑒦𑒰𑒑𑒪।
𑒮𑓂𑒞𑓂𑒩𑒲 𑒫𑒹𑒭 𑒡𑒩𑒢𑒹 𑒦𑒲𑒧 𑒍𑒞𑒋 𑒣𑓂𑒩𑒞𑒲𑒏𑓂𑒭𑒱𑒞,
𑒏𑒹𑒬 𑒣𑒏𑒛𑓃𑒱 𑒣𑒙𑒏𑒪, 𑒪𑒰𑒞-𑒯𑒰𑒟 𑒧𑒰𑒩𑒪 𑒏𑒲𑒔𑒏𑒏𑒹𑒿 𑒍𑒞𑒯𑒱।
𑒦𑒼𑒩 𑒯𑒼𑒃𑒞 𑒄 𑒑𑒣 𑒣𑒮𑒩𑒱 𑒑𑒹𑒪 𑒔𑒰𑒩𑒴 𑒠𑒱𑒬𑒱,
𑒏𑒲𑒔𑒏𑒏𑒹𑒿 𑒧𑒰𑒩𑒪 𑒑𑓀𑒡𑒩𑓂𑒫𑒣𑒞𑒱 𑒮𑒻𑒩𑓀𑒡𑓂𑒩𑒲𑒏।
𑒮𑒻𑒩𑒢𑓂𑒡𑓂𑒩𑒲𑒏 𑒣𑓂𑒩𑒞𑒱 𑒦𑒨-𑒬𑓂𑒩𑒠𑓂𑒡𑒰 𑒠𑒳𑒢𑒴 𑒣𑒮𑒩𑒪,
𑒠𑒳𑒩𑓂𑒨𑒼𑒡𑒢 𑒕𑒪 𑒥𑒳𑒗𑒪 𑒁𑒖𑓂𑒘𑒰𑒞𑒫𑒰𑒮𑒏 𑒏𑒟𑒰,
𑒕𑒪 𑒞𑒰𑒏𑒱𑒧𑒹 𑒞𑒏𑒥𑒰𑒏 𑒣𑒰𑒝𑓂𑒛𑒫𑒏 𑒣𑒞𑒰,
𑒕𑒲 𑒄 𑒠𑓂𑒩𑒾𑒣𑒠𑒲 𑒮𑒻𑒩𑒢𑓂𑒡𑓂𑒩𑒲𑒏 𑒦𑒹𑒭𑒧𑒹 𑒁𑒦𑒩𑒪।
𑒣𑒰𑒝𑓂𑒛𑒫 𑒕𑒠𑓂𑒧-𑒦𑒹𑒭 𑒥𑒢𑒍𑒢𑒹 𑒕𑒟𑒱 𑒑𑒰𑓀𑒡𑒩𑓂𑒫𑒏,
𑒏𑒲𑒔𑒏𑒮𑒿 𑒁𑒣𑒧𑒰𑒢𑒱𑒞 𑒩𑒰𑒖𑒰 𑒞𑓂𑒩𑒱𑒑𑒩𑓂𑒞 𑒠𑒹𑒬𑒏,
𑒧𑒱𑒪𑒱 𑒠𑒳𑒩𑓂𑒨𑒼𑒡𑒢𑒮𑒿 𑒏𑒋 𑒑𑒾-𑒯𑒩𑒝𑒏 𑒫𑒱𑒔𑒰𑒩
𑒫𑒱𑒩𑒰𑒙 𑒩𑒰𑒖𑒮𑒿 𑒍 𑒪𑒹𑒞 𑒥𑒠𑒪𑒰 𑒂𑒥।
𑒠𑒳𑒩𑓂𑒨𑒼𑒡𑒢 𑒪𑒋 𑒮𑓀𑒑 𑒦𑒲𑒭𑓂𑒧, 𑒠𑓂𑒩𑒼𑒝, 𑒏𑒵𑒣, 𑒏𑒩𑓂𑒝,
𑒂𑒏𑓂𑒩𑒧𑒝 𑒫𑒱𑒩𑒰𑒙 𑒣𑒩 𑒪𑒋 𑒁𑒬𑓂𑒫𑒞𑓂𑒟𑒰𑒧𑒰 𑒮𑓀𑒑।
𑒞𑓂𑒩𑒱𑒑𑒩𑓂𑒞 𑒩𑒰𑒖 𑒮𑒳𑒬𑒩𑓂𑒧𑒰 𑒒𑒹𑒩𑒱 𑒑𑒾-𑒫𑒱𑒩𑒰𑒙𑒩𑒰𑒖𑒏,
𑒥𑒰𑒢𑓂𑒯𑒱 𑒫𑒱𑒩𑒰𑒙𑒏𑒹𑒿 𑒖𑒐𑒢 𑒍 𑒮𑒼𑒗𑒰𑒿 𑒂𑒋𑒪।
𑒪𑒪𑒏𑒰𑒩𑒱 𑒏𑒋𑒪 𑒦𑒲𑒧𑒏𑒹𑒿 𑒮𑒼𑒩 𑒨𑒳𑒡𑒱𑒭𑓂𑒚𑒱𑒩-𑒏𑓀𑒏,
𑒫𑒪𑓂𑒪𑒦-𑒦𑒲𑒧 𑒑𑓂𑒩𑓀𑒟𑒱𑒏-𑒢𑒏𑒳𑒪 𑒞𑓀𑒞𑓂𑒩𑒱𑒣𑒰𑒪-𑒮𑒯𑒠𑒹𑒫।
𑒐𑒼𑒪𑒱 𑒥𑒢𑓂𑒡𑒢 𑒫𑒱𑒩𑒰𑒙𑒏 𑒥𑒰𑒢𑓂𑒯𑒱 𑒠𑒹𑒪 𑒮𑒳𑒬𑒩𑓂𑒧𑒢𑓂,
𑒫𑒵𑒯𑒢𑓂𑒢𑒪𑒰 𑒥𑒢𑒱 𑒮𑒰𑒩𑒟𑒲 𑒣𑒳𑒞𑓂𑒩 𑒫𑒱𑒩𑒰𑒙𑒩𑒰𑒖 𑒅𑒞𑓂𑒞𑒧𑒏।
𑒩𑒟 𑒂𑒢𑒪 𑒩𑒝𑒏𑓂𑒭𑒹𑒞𑓂𑒩 𑒅𑒞𑓂𑒞𑒧𑒏𑒳𑒧𑒰𑒩 𑒦𑒹𑒪 𑒒𑒥𑒩𑒰𑒋𑒪,
𑒑𑒹𑒪 𑒁𑒩𑓂𑒖𑒳𑒢 𑒬𑒧𑒲 𑒑𑒰𑒕 𑒪𑒑 𑒅𑒞𑒰𑒩𑒱 𑒬𑒮𑓂𑒞𑓂𑒩 𑒂𑒋𑒪,
𑒑𑒰𑒝𑓂𑒛𑒲𑒫 𑒁𑒏𑓂𑒭𑒨 𑒞𑒳𑒝𑒲𑒩 𑒂𑒢𑒱 𑒣𑒩𑒱𑒔𑒨 𑒮𑒳𑒢𑒰𑒍𑒪।
𑒅𑒞𑓂𑒞𑒧𑒏𑒳𑒧𑒰𑒩 𑒥𑒢𑒪 𑒮𑒰𑒩𑒟𑒲 𑒫𑒵𑒯𑒢𑓂𑒢𑒪𑒰-𑒁𑒩𑓂𑒖𑒳𑒢𑒏 𑒮𑓀𑒑,
𑒫𑒹𑒑𑒬𑒰𑒪𑒲 𑒩𑒟 𑒠𑒹𑒐𑒱 𑒠𑒳𑒩𑓂𑒨𑒼𑒡𑒢 𑒣𑒳𑒕𑒪 𑒯𑒹 𑒦𑒲𑒭𑓂𑒧।
𑒁𑒖𑓂𑒘𑒰𑒞𑒫𑒰𑒮𑒏 𑒏𑒰𑒪 𑒦𑒹𑒪 𑒣𑒴𑒩𑓂𑒝 𑒫𑒰 𑒢 𑒫𑒰 𑒏𑒯𑒴,
𑒦𑒲𑒭𑓂𑒧 𑒏𑒯𑒪 𑒣𑒴𑒩𑓂𑒝 𑒞𑒹𑒩𑒯 𑒫𑒩𑓂𑒭𑒏 𑒁𑒫𑒡𑒱 𑒦𑒹𑒪 𑒎।
𑒁𑒩𑓂𑒖𑒳𑒢 𑒅𑒞𑒰𑒩𑒪 𑒁𑒣𑒢 𑒩𑒼𑒭 𑒏𑒩𑓂𑒝 𑒣𑒳𑒞𑓂𑒩 𑒫𑒱𑒏𑒩𑓂𑒝 𑒣𑒩,
𑒧𑒰𑒩𑒱 𑒍𑒏𑒩𑒰 𑒥𑒜𑓃𑒪 𑒂𑒑𑒰𑒿 𑒏𑒩𑓂𑒝𑒏𑒹𑒿 𑒥𑒹𑒡𑒪 𑒮𑒹𑒯𑒼।
𑒠𑓂𑒩𑒼𑒝-𑒦𑒲𑒭𑓂𑒧𑒏 𑒡𑒢𑒳𑒭 𑒏𑒰𑒙𑒪 𑒧𑒴𑒩𑓂𑒔𑓂𑒕𑒱𑒞 𑒏𑒋𑒪 𑒮𑒹𑒢𑒰 𑒮𑒏𑒪,
𑒠𑓂𑒩𑒼𑒝-𑒏𑒵𑒣-𑒏𑒩𑓂𑒝-𑒁𑒬𑓂𑒫𑒞𑓂𑒟𑒰𑒧𑒰-𑒠𑒳𑒩𑓂𑒨𑒼𑒡𑒢𑒏 𑒧𑒳𑒏𑒳𑒙 𑒫𑒮𑓂𑒞𑓂𑒩 𑒮𑒦,
𑒅𑒞𑓂𑒞𑒧𑒏𑒳𑒧𑒰𑒩 𑒅𑒞𑒰𑒩𑒪 𑒮𑒦𑒙𑒰 𑒑𑒾 𑒪𑒋 𑒢𑒑𑒩 𑒞𑒐𑒢 𑒒𑒳𑒩𑒪।
𑒧𑒴𑒩𑓂𑒔𑓂𑒕𑒰 𑒙𑒴𑒙𑒪 𑒮𑒦𑒏 𑒖𑒐𑒢 𑒏𑒯𑒪 𑒏𑒩𑒥 𑒨𑒳𑒠𑓂𑒡 𑒣𑒳𑒢𑓁,
𑒦𑒲𑒭𑓂𑒧 𑒢𑒯𑒱 𑒧𑒢𑒪𑒰𑒯 𑒠𑒳𑒩𑓂𑒨𑒼𑒡𑒢 𑒒𑒳𑒩𑒳 𑒥𑒯𑒳 𑒦𑒹𑒪 𑒂𑒥 𑒁𑓁।
𑒅𑒞𑓂𑒞𑒧𑒏𑒳𑒧𑒰𑒩 𑒢𑒯𑒱 𑒏𑒩𑒥 𑒣𑓂𑒩𑒑𑒙 𑒦𑒹𑒠 𑒯𑒧𑒩 𑒁𑒩𑓂𑒖𑒳𑒢 𑒏𑒯𑒪,
𑒫𑒱𑒩𑒰𑒙 𑒦𑒹𑒪 𑒣𑓂𑒩𑒮𑒢𑓂𑒢 𑒫𑒲𑒩𑒞𑒰 𑒮𑒳𑒢𑒱 𑒅𑒞𑓂𑒞𑒧𑒏 𑒂𑒥𑒱 𑒒𑒩।
𑒣𑒘𑓂𑒔 𑒣𑒰𑒝𑓂𑒛𑒫 𑒠𑓂𑒩𑒾𑒣𑒠𑒲𑒏 𑒞𑒐𑒢 𑒣𑒩𑒱𑒔𑒨 𑒯𑒳𑒢𑒏𑒰 𑒦𑒹𑒙𑒪,
𑒣𑓂𑒩𑒮𑓂𑒞𑒰𑒫 𑒏𑒋𑒪 𑒣𑒳𑒞𑓂𑒩𑒲 𑒅𑒞𑓂𑒞𑒩𑒰𑒏 𑒫𑒱𑒫𑒰𑒯 𑒁𑒩𑓂𑒖𑒳𑒢𑒮𑒿 𑒏𑒩𑒥।
𑒁𑒩𑓂𑒖𑒳𑒢 𑒏𑒯𑒪 𑒣𑒜𑓃𑒹𑒢𑒹 𑒕𑒲 𑒯𑒧𑒩 𑒬𑒱𑒭𑓂𑒨𑒰 𑒁𑒕𑒱 𑒍 𑒩𑒯𑒪𑒱,
𑒣𑒳𑒞𑓂𑒩 𑒁𑒦𑒱𑒧𑒢𑓂𑒨𑒳𑒮𑒿 𑒯𑒼𑒋𑒞 𑒫𑒱𑒫𑒰𑒯𑒱𑒞 𑒅𑒞𑓂𑒞𑒩𑒰 𑒄 𑒣𑓂𑒩𑒮𑓂𑒞𑒰𑒫 𑒕𑒪।
𑒫𑒰𑒯 𑒥𑓂𑒨𑒰𑒮 𑒫𑒰𑒯, 𑒥𑒰𑒪-𑒁𑒧𑒹𑒪 𑒫𑒱𑒫𑒰𑒯 𑒫𑒱𑒩𑒼𑒡, 𑒏𑒲 𑒔𑒞𑒳𑒩𑒞𑒰 𑒏𑒾𑒬𑒪 𑒏𑒫𑒱𑒞𑓂𑒫𑒏 𑒏𑒋𑒪 𑒎।
𑒏𑒵𑒭𑓂𑒝-𑒥𑒪𑒩𑒰𑒧 𑒠𑓂𑒫𑒰𑒩𑒏𑒰𑒮𑒿 𑒥𑒩𑒱𑒨𑒰𑒞𑒲 𑒁𑒦𑒱𑒧𑒢𑓂𑒨𑒳𑒏 𑒪𑒋 𑒁𑒋𑒪𑒰𑒯,
𑒅𑒞𑓂𑒞𑒩𑒰𑒏 𑒫𑒱𑒫𑒰𑒯 𑒁𑒦𑒱𑒧𑒢𑓂𑒨𑒳𑒏 𑒮𑓀𑒑 𑒦𑒹𑒪 𑒥𑒛𑓃 𑒙𑒼𑒣-𑒙𑒯𑓀𑒏𑒰𑒩𑒮𑒿।
𑒕𑒪𑒰𑒯 𑒂𑒋𑒪 𑒩𑒰𑒖𑒰 𑒫𑒵𑒢𑓂𑒠 𑒁𑒦𑒱𑒧𑒢𑓂𑒨𑒳𑒏 𑒫𑒱𑒫𑒰𑒯 𑒣𑒩,
𑒦𑒹𑒪 𑒩𑒰𑒖𑒰𑒏 𑒮𑒦𑒰 𑒖𑒞𑒋 𑒏𑒵𑒭𑓂𑒝 𑒏𑒋𑒪 𑒫𑒱𑒢𑒞𑒲 𑒍𑒞𑒋।
𑒠𑓂𑒨𑒴𑒞 𑒐𑒹𑒪 𑒬𑒏𑒳𑒢𑒲𑒏, 𑒁𑒣𑒧𑒰𑒢 𑒠𑓂𑒩𑒾𑒣𑒠𑒲𑒏 𑒏𑒋𑒪 𑒖𑒹,
𑒠𑒳𑒩𑓂𑒨𑒼𑒡𑒢 𑒕𑒲𑒢𑒪 𑒩𑒰𑒖𑓂𑒨 𑒨𑒳𑒡𑒱𑒭𑓂𑒚𑒱𑒩𑒏 𑒁𑒡𑒩𑓂𑒧𑒮𑒿 𑒮𑒹।
𑒥𑒰𑒖𑒴 𑒣𑓂𑒩𑒨𑒞𑓂𑒢 𑒩𑒰𑒖𑓂𑒨-𑒣𑓂𑒩𑒰𑒣𑓂𑒞𑒱𑒏 𑒏𑒼𑒢𑒰 𑒯𑒼𑒋𑒞 𑒫𑒰,
𑒠𑒳𑒩𑓂𑒨𑒼𑒡𑒢𑒏 𑒁𑒞𑓂𑒨𑒰𑒔𑒰𑒩 𑒮𑒯𑒻𑒞 𑒩𑒯𑒟𑒳 𑒣𑒰𑒝𑓂𑒛𑒫 𑒮𑒞𑒞।
𑒠𑓂𑒩𑒳𑒣𑒠 𑒅𑒚𑒱 𑒏𑒯𑒪 𑒠𑒳𑒩𑒰𑒔𑒰𑒩𑒲 𑒏𑒾𑒩𑒫𑒏𑒹𑒿 𑒮𑒦 𑒖𑒢𑒋 𑒕𑒟𑒱,
𑒏𑒩𑓂𑒞𑒫𑓂𑒨 𑒯𑒧𑒩𑒰 𑒮𑒦𑒏 𑒟𑒱𑒏 𑒮𑒯𑒰𑒨 𑒥𑒢𑒲 𑒣𑒰𑒝𑓂𑒛𑒫 𑒖𑒢𑒏।
𑒏𑒩𑒋 𑒪𑒑𑒪𑒰𑒯 𑒣𑒰𑓀𑒛𑒫 𑒨𑒳𑒠𑓂𑒡𑒏 𑒞𑒻𑒨𑒰𑒩𑒲 𑒫𑒱𑒩𑒰𑒙 𑒠𑓂𑒩𑒳𑒣𑒠𑒏 𑒮𑓀𑒑 𑒣𑒰𑒥𑒱
𑒪𑒑𑒰𑒋 𑒏𑒳𑒩𑒳𑒏𑓂𑒭𑒹𑒞𑓂𑒩 𑒪𑒑 𑒣𑒰𑓀𑒛𑒫 𑒩𑒳𑒏𑒪𑒰𑒯 𑒬𑒱𑒫𑒱𑒩 𑒣𑒮𑒰𑒩𑒱।
𑒠𑒳𑒩𑓂𑒨𑒼𑒡𑒢𑒏𑒹𑒿 𑒖𑒐𑒢 𑒪𑒰𑒑𑒪 𑒐𑒥𑒩𑒱 𑒍𑒯𑒼 𑒏𑒋𑒪𑒏 𑒞𑒻𑒨𑒰𑒩𑒲,
𑒮𑓀𑒠𑒹𑒬 𑒣𑒚𑒰𑒍𑒪 𑒩𑒰𑒖𑒰 𑒮𑒦𑒏𑒹𑒿 𑒏𑒾𑒩𑒫 𑒣𑒰𑓀𑒛𑒫 𑒞𑒐𑒢,
𑒁𑒣𑒢 𑒣𑒏𑓂𑒭𑒧𑒹 𑒏𑒩𑒥𑒰 𑒪𑒹𑒪 𑒨𑒳𑒠𑓂𑒡 𑒬𑒳𑒩𑒳 𑒯𑒼𑒋𑒞 𑒖𑒐𑒢।
𑒏𑒳𑒩𑒳𑒏𑓂𑒭𑒹𑒞𑓂𑒩𑒏 𑒮𑓂𑒟𑒪𑒲𑒧𑒹 𑒮𑒦𑒙𑒰 𑒖𑒳𑒙𑒰𑒢 𑒪𑒰𑒑𑒪 𑒯𑒼𑒋 𑒬𑒳𑒩𑒴,
𑒨𑒰𑒠𑒫 𑒑𑒝𑒏𑒹𑒿 𑒣𑒏𑓂𑒭 𑒏𑒩𑒥𑒰 𑒪𑒋 𑒠𑒳𑒩𑓂𑒨𑒼𑒡𑒢 𑒠𑓂𑒫𑒰𑒩𑒏𑒰 𑒑𑒹𑒪 𑒮𑓂𑒫𑒨𑓀।
𑒣𑒯𑒳𑒿𑒔𑒱 𑒠𑒳𑒩𑓂𑒨𑒼𑒡𑒢 𑒑𑒹𑒪 𑒠𑒹𑒐𑒪 𑒏𑒶𑒭𑓂𑒝 𑒕𑒪𑒰𑒯 𑒮𑒳𑒞𑒪 𑒍𑒞𑒋,
𑒁𑒩𑓂𑒖𑒳𑒢 𑒮𑒹𑒯𑒼 𑒣𑒯𑒳𑒿𑒔𑒪 𑒣𑒻𑒩 𑒠𑒱𑒬𑒱 𑒥𑒻𑒮𑒱 𑒑𑒹𑒪 𑒍 𑒍𑒞𑒋।
𑒏𑒵𑒭𑓂𑒝 𑒖𑒐𑒢 𑒅𑒚𑒱 𑒠𑒹𑒐𑒪 𑒁𑒩𑓂𑒖𑒳𑒢 𑒕𑒪 𑒍𑒞𑒋,
𑒏𑒯𑒴 𑒫𑒞𑓂𑒮 𑒏𑒲 𑒔𑒰𑒯𑒲 𑒁𑒯𑒰𑒿 𑒂𑒋𑒪 𑒕𑒲 𑒋𑒞𑒋।
𑒨𑒳𑒠𑓂𑒡𑒧𑒹 𑒮𑓀𑒑 𑒁𑒯𑒰𑒿𑒏 𑒯𑒧𑒩𑒰 𑒔𑒰𑒯𑒲 𑒯𑒹 𑒢𑒰𑒩𑒰𑒨𑒝,
𑒁𑒩𑓂𑒖𑒳𑒢𑒏𑒹𑒿 𑒥𑒖𑒱𑒞𑒹 𑒠𑒳𑒩𑓂𑒨𑒼𑒡𑒢 𑒙𑒼𑒏𑒪 𑒁𑒋𑒪𑒯𑒳𑒿 𑒣𑒯𑒱𑒢𑒹 𑒋𑒞𑒋।
𑒏𑒵𑒭𑓂𑒝 𑒏𑒯𑒪 𑒯𑒧 𑒬𑒮𑓂𑒞𑓂𑒩 𑒢𑒯𑒱 𑒅𑒚𑒰𑒋𑒥 𑒨𑒳𑒠𑓂𑒡𑒧𑒹,
𑒢𑒰𑒩𑒰𑒨𑒝𑒲 𑒮𑒹𑒢𑒰 𑒔𑒰𑒯𑒲 𑒫𑒰 𑒯𑒧𑒩𑒰 𑒏𑒩𑒥 𑒁𑒯𑒿 𑒣𑒏𑓂𑒭𑒧𑒹।
𑒠𑒳𑒩𑓂𑒨𑒼𑒡𑒢 𑒢𑒰𑒩𑒰𑒨𑒝𑒲 𑒮𑒹𑒢𑒰 𑒔𑒳𑒢𑒱 𑒦𑒹𑒪 𑒮𑓀𑒞𑒳𑒭𑓂𑒙 𑒂,
𑒁𑒩𑓂𑒖𑒳𑒢𑒏𑒹𑒿 𑒢𑒰𑒩𑒰𑒨𑒝 𑒦𑒹𑒙𑒪 𑒕𑒪 𑒣𑓂𑒩𑒤𑒳𑒪𑓂𑒪𑒱𑒞 𑒮𑒹𑒯𑒼।
𑒣𑒰𑓀𑒛𑒫 𑒧𑒰𑒧𑒰 𑒕𑒪𑒰𑒯 𑒬𑒪𑓂𑒨 𑒧𑒰𑒠𑓂𑒩𑒲𑒏 𑒦𑒰𑒋 𑒖𑒹,
𑒂𑒥𑒱 𑒩𑒯𑒪 𑒨𑒳𑒠𑓂𑒡𑒏 𑒪𑒹𑒪 𑒠𑒳𑒩𑓂𑒨𑒼𑒡𑒢 𑒮𑒳𑒢𑒱 𑒑𑒹𑒪 𑒍𑒞𑒋।
𑒩𑒮𑓂𑒞𑒰𑒧𑒹 𑒫𑓂𑒨𑒫𑒮𑓂𑒟𑒰-𑒥𑒰𑒞 𑒏𑒋𑒪 𑒞𑒹𑒯𑒢 𑒕𑒪,
𑒬𑒪𑓂𑒨 𑒏𑒯𑒪 𑒁𑒕𑒱 𑒧𑒼𑒢 𑒣𑒳𑒩𑒮𑓂𑒏𑒵𑒞 𑒏𑒩𑒲 𑒏𑒰𑒖 𑒖𑒏𑒩।
𑒠𑒳𑒩𑓂𑒨𑒼𑒡𑒢 𑒦𑒹𑒐 𑒥𑒢𑒰 𑒖𑒰𑒋 𑒩𑒯𑒪 𑒕𑒪 𑒍𑒞𑒋,
𑒣𑓂𑒩𑒏𑒙 𑒦𑒋 𑒧𑒰𑒿𑒑𑒪 𑒨𑒳𑒠𑓂𑒡𑒧𑒹 𑒯𑒼𑒆 𑒮𑒰𑒯𑒰𑒨𑓂𑒨 𑒯𑒧𑒩,
𑒋𑒯𑒱 𑒮𑒦 𑒫𑓂𑒨𑒫𑒮𑓂𑒟𑒰𑒏 𑒕𑒲 𑒯𑒧𑒯𑒲 𑒢𑒱𑒩𑓂𑒧𑒰𑒝 𑒏𑒋𑒪।
𑒬𑒪𑓂𑒨 𑒠𑒋 𑒮𑓂𑒫𑒮𑓂𑒞𑒱 𑒣𑒯𑒳𑒿𑒔𑒪𑒰𑒯 𑒖𑒐𑒢 𑒏𑒳𑒩𑒳𑒏𑓂𑒭𑒹𑒞𑓂𑒩,
𑒨𑒳𑒡𑒱𑒭𑓂𑒚𑒱𑒩 𑒮𑒳𑒢𑒴 𑒕𑒪 𑒦𑒹𑒪 𑒯𑒧𑒩𑒰 𑒮𑓀𑒑 𑒁𑒞𑒋।
𑒏𑒾𑒩𑒫𑒏 𑒣𑒏𑓂𑒭𑒧𑒹 𑒨𑒳𑒠𑓂𑒡 𑒏𑒩𑒥𑒰 𑒪𑒋 𑒫𑒔𑒢 𑒥𑒠𑓂𑒡,
𑒏𑒯𑒴 𑒏𑒼𑒢 𑒫𑒱𑒡 𑒯𑒼𑒋 𑒮𑒰𑒯𑒰𑒨𑓂𑒨 𑒁𑒯𑒰𑒿𑒏 𑒫𑒞𑓂𑒮।
𑒨𑒳𑒡𑒱𑒭𑓂𑒚𑒱𑒩 𑒏𑒯𑒪 𑒥𑒢𑒴 𑒮𑒰𑒩𑒟𑒲 𑒏𑒩𑓂𑒝𑒏 𑒂 𑒏𑒩𑒴,
𑒯𑒞𑒼𑒞𑓂𑒮𑒰𑒯𑒱𑒞 𑒏𑒩𑓂𑒝𑒏𑒹𑒿 𑒑𑒳𑒝𑒑𑒰𑒢 𑒑𑒰𑒥𑒱 𑒣𑒰𑓀𑒛𑒫𑒏।
𑒬𑒪𑓂𑒨 𑒏𑒾𑒩𑒫𑒏 𑒬𑒱𑒫𑒱𑒩 𑒠𑒱𑒬𑒱 𑒔𑒪𑒪𑒰𑒯 𑒞𑒐𑒢,
𑒨𑒳𑒠𑓂𑒡 𑒮𑒢𑓂𑒢𑒱𑒏𑒙 𑒁𑒕𑒱 𑒏𑒵𑒭𑓂𑒝 𑒁𑒋𑒪𑒰𑒯 𑒖𑒰𑒢𑒱 𑒮𑒹𑒯𑒼,
𑒋𑒞𑒋 𑒮𑒳𑒢𑒪 𑒠𑓂𑒩𑒳𑒣𑒠𑒏 𑒣𑒳𑒩𑒯𑒱𑒞 𑒑𑒹𑒪 𑒕𑒪 𑒡𑒵𑒞𑒩𑒰𑒭𑓂𑒙𑓂𑒩 𑒪𑒑।
𑒮𑓀𑒡𑒱𑒏 𑒣𑓂𑒩𑒮𑓂𑒞𑒰𑒫 𑒣𑒩 𑒠𑒹𑒪𑒏 𑒏𑓂𑒨𑒼 𑒢𑒯𑒱 𑒙𑒹𑒩 𑒍𑒞𑒋,
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒩𑒰𑒖𑓂𑒨 𑒕𑒼𑒛𑓃𑒴 𑒮𑒳𑒃𑒨𑒰𑒏 𑒢𑒼𑒏 𑒠𑒹𑒐𑒢𑒹 𑒕𑒲?
𑒢𑒯𑒱 𑒦𑒹𑒙𑒞 𑒣𑒵𑒟𑓂𑒫𑒲 𑒍𑒞𑒥𑒼 𑒩𑒰𑒖𑓂𑒨𑒏 𑒞𑒿 𑒕𑒼𑒛𑓃𑒴 𑒥𑒰𑒞 𑒄।
𑒄 𑒮𑒳𑒃𑒨𑒰𑒏 𑒢𑒼𑒿𑒏 𑒦𑒩𑒱 𑒣𑒵𑒟𑓂𑒫𑒲𑒏 𑒢𑒯𑒱 𑒠𑒹𑒥𑒰𑒏 𑒥𑒱𑒧𑓂𑒥 𑒕𑒪, 𑒠𑒳𑒩𑓂𑒨𑒼𑒡𑒢𑒏 𑒯𑒚𑒏 𑒄 𑒂 𑒡𑒵𑒞𑒩𑒰𑒭𑓂𑒙𑓂𑒩𑒏 𑒂𑒏𑒰𑓀𑒏𑓂𑒭𑒰𑒏 𑒣𑓂𑒩𑒞𑒲𑒏 𑒕𑒪।
𑒨𑒳𑒡𑒱𑒭𑓂𑒚𑒱𑒩 𑒏𑒯𑒪 𑒬𑓂𑒩𑒲𑒏𑒵𑒭𑓂𑒝𑒏𑒹𑒿 𑒂𑒡 𑒩𑒰𑒖𑓂𑒨 𑒕𑒼𑒛𑓃𑒻𑒞 𑒕𑒲,
𑒖𑒰𑒆 𑒏𑒵𑒭𑓂𑒝 𑒣𑒰𑒿𑒔 𑒑𑒰𑒧 𑒠𑒳𑒩𑓂𑒨𑒼𑒡𑒢 𑒠𑒹𑒞 𑒖𑓂𑒨𑒼𑒿 𑒩𑒰𑒐𑒴 𑒣𑓂𑒩𑒮𑓂𑒞𑒰𑒫 𑒄,
𑒍𑒞𑒥𑒯𑒱𑒧𑒹 𑒏𑒩𑒥 𑒯𑒧 𑒮𑒦 𑒦𑒰𑒿𑒋 𑒧𑒰𑒋𑒏 𑒮𑓀𑒑 𑒢𑒱𑒩𑓂𑒫𑒰𑒯।
𑒮𑒰𑒞𑓂𑒨𑒏𑒲𑒏 𑒮𑓀𑒑 𑒏𑒵𑒭𑓂𑒝 𑒯𑒮𑓂𑒞𑒱𑒢𑒰𑒣𑒳𑒩𑒏 𑒪𑒹𑒪 𑒔𑒪𑒪𑒰 𑒖𑒐𑒢,
𑒠𑓂𑒩𑒾𑒣𑒠𑒲 𑒏𑒯𑒪𑒢𑓂𑒯𑒱 𑒠𑒹𑒐𑒴 𑒏𑒹𑒬 𑒤𑒳𑒖𑒪𑒹 𑒁𑒕𑒱 𑒍𑒯𑒱𑒢𑒰 𑒡𑒩𑒱 𑒋𑒐𑒢,
𑒏𑒰𑒢𑒱 𑒏𑒯𑒪 𑒮𑓀𑒡𑒱 𑒯𑒼𑒋𑒞 𑒨𑒳𑒠𑓂𑒡 𑒥𑒱𑒢 𑒐𑒳𑒖𑒪𑒹 𑒩𑒯𑒞 𑒫𑒹𑒝𑒲 𑒞𑒐𑒢।
𑒏𑒫𑒱𑒏 𑒥𑒱𑒧𑓂𑒥 𑒮𑒳𑒃𑒨𑒰 𑒥𑒩𑒰𑒥𑒛𑓃𑒱 𑒖𑒹 𑒢𑒯𑒱 𑒕𑒼𑒛𑓃𑒞 𑒯𑒚 𑒁𑒣𑒢, 𑒣𑒰𑒿𑒔 𑒑𑒰𑒧𑒏𑒹𑒿 𑒞𑒿 𑒥𑒳𑒗𑒞 𑒥𑓂𑒩𑒯𑓂𑒧𑒰𑒝𑓂𑒛 𑒍 𑒯𑒚𑒲 𑒮𑒠𑒱𑒐𑒢।
𑒏𑒵𑒭𑓂𑒝 𑒏𑒯𑒪 𑒧𑒰𑒢𑒞 𑒢𑒯𑒱 𑒮𑓀𑒡𑒱𑒏 𑒑𑒣 𑒏𑒐𑒢𑒯𑒳𑒿 𑒠𑒳𑒩𑓂𑒨𑒼𑒡𑒢,
𑒨𑒳𑒠𑓂𑒡 𑒁𑒕𑒱 𑒁𑒢𑒱𑒫𑒰𑒩𑓂𑒨 𑒧𑒢𑒼𑒩𑒟 𑒣𑒴𑒩𑓂𑒝 𑒯𑒼𑒋𑒞 𑒠𑓂𑒩𑒾𑒣𑒠𑒲 𑒁𑒯𑒿𑒏।
𑒏𑒵𑒭𑓂𑒝 𑒖𑒐𑒢 𑒑𑒹𑒪𑒰𑒯 𑒯𑒮𑓂𑒞𑒱𑒢𑒰𑒣𑒳𑒩 𑒮𑒦 𑒣𑓂𑒩𑒮𑒢𑓂𑒢 𑒕𑒪,
𑒡𑒵𑒞𑒩𑒰𑒭𑓂𑒙𑓂𑒩, 𑒠𑒳𑓁𑒬𑒰𑒮𑒢-𑒠𑒳𑒩𑓂𑒨𑒼𑒡𑒢𑒏 𑒮𑓀𑒑 𑒮𑓂𑒫𑒰𑒑𑒞 𑒏𑒋𑒪।
𑒧𑒳𑒠𑒰 𑒏𑒵𑒭𑓂𑒝 𑒍𑒞𑒋 𑒢𑒯𑒱 𑒚𑒯𑒩𑒱 𑒠𑒲𑒠𑒲 𑒏𑒳𑒢𑓂𑒞𑒲𑒏 𑒪𑒑 𑒑𑒹𑒪𑒰𑒯,
𑒫𑒱𑒠𑒳𑒩𑒏 𑒑𑒵𑒯𑒧𑒹 𑒕𑒪𑒲𑒯 𑒍𑒞𑒋 𑒑𑒣 𑒫𑒱𑒮𑓂𑒞𑒵𑒞 𑒦𑒹𑒪 𑒂𑒥।
𑒏𑒯𑒪 𑒏𑒳𑒢𑓂𑒞𑒲 𑒠𑒲𑒠𑒲 𑒁𑒯𑒰𑒿 𑒖𑒰 𑒏𑒋 𑒏𑒩𑓂𑒝𑒏𑒹𑒿 𑒣𑒩𑒱𑒔𑒋 𑒠𑒱𑒁,
𑒂𑒥𑒱 𑒖𑒋𑒞 𑒦𑓂𑒩𑒰𑒞𑒵-𑒣𑒰𑒝𑓂𑒛𑒫 𑒪𑒑 𑒮𑒞𑓂𑒨 𑒍 𑒖𑒰𑒢𑒱 𑒏𑒋।
𑒠𑒼𑒮𑒩 𑒠𑒱𑒢 𑒮𑒦𑒰𑒧𑒹 𑒣𑒯𑒳𑒿𑒔𑒪𑒰𑒯 𑒏𑒵𑒭𑓂𑒝, 𑒕𑒪 𑒕𑒪 𑒍𑒞𑒋 𑒧𑒳𑒠𑒰,
𑒠𑒳𑒩𑓂𑒨𑒼𑒡𑒢 𑒫𑒱𑒔𑒰𑒩𑒪 𑒥𑒰𑒢𑓂𑒯𑒱 𑒩𑒰𑒐𑒥 𑒏𑒵𑒭𑓂𑒝𑒏𑒹𑒿 𑒁𑒋𑒞𑒰𑒯 𑒖𑓂𑒨𑒼𑒿।
𑒦𑒲𑒭𑓂𑒧 𑒡𑒵𑒞𑒩𑒰𑒭𑓂𑒙 𑒠𑓂𑒩𑒼𑒝 𑒏𑒵𑒣 𑒏𑒩𑓂𑒝 𑒬𑒏𑒳𑒢𑒱 𑒠𑒳𑓁𑒬𑒰𑒮𑒢 𑒍𑒞𑒋,
𑒏𑒵𑒭𑓂𑒝 𑒏𑒯𑒪 𑒬𑒏𑒳𑒢𑒱𑒏 𑒔𑒾𑒣𑒛𑓃 𑒠𑒳𑒩𑓂𑒨𑒼𑒡𑒢𑒏 𑒠𑒱𑒬𑒱𑒮𑒿 𑒤𑒹𑒏𑒥,
𑒁𑒢𑓂𑒨𑒰𑒨𑒣𑒴𑒩𑓂𑒝 𑒕𑒪 𑒍𑒯𑒱𑒢𑒰 𑒠𑓂𑒩𑒾𑒣𑒠𑒲𑒏 𑒁𑒣𑒧𑒰𑒢 𑒕𑒪 𑒏𑒩𑒥।
𑒫𑒱𑒩𑒰𑒙 𑒣𑒩 𑒂𑒏𑓂𑒩𑒧𑒝 𑒣𑒰𑒝𑓂𑒛𑒫𑒏𑒹𑒿 𑒮𑒞𑒹𑒥𑒰𑒏 𑒅𑒣𑒏𑓂𑒩𑒧 𑒥𑒢𑒪,
𑒂𑒡 𑒩𑒰𑒖𑓂𑒨 𑒖𑓂𑒨𑒼𑒿 𑒠𑒋 𑒠𑒲 𑒞𑒐𑒢𑒼 𑒬𑒰𑒢𑓂𑒞𑒱𑒮𑒿 𑒩𑒯𑒱 𑒮𑒏𑒻𑒕 𑒮𑒦।
𑒮𑒦 𑒏𑒋𑒪 𑒮𑓂𑒫𑒰𑒑𑒞 𑒋𑒏𑒩 𑒠𑒳𑒩𑓂𑒨𑒼𑒡𑒢 𑒧𑒳𑒠𑒰 𑒏𑓂𑒩𑒼𑒡𑒱𑒞 𑒥𑒢𑒪,
𑒏𑒵𑒭𑓂𑒝𑒏𑒹𑒿 𑒥𑒢𑓂𑒯𑒥𑒰𑒏 𑒂𑒖𑓂𑒘𑒰 𑒠𑒹𑒪𑒏 𑒦𑒲𑒭𑓂𑒧 𑒞𑒧𑒮𑒨𑒪𑒰𑒯 𑒥𑒛𑓃।
𑒞𑒹𑒖 𑒏𑒵𑒭𑓂𑒝𑒏 𑒧𑒳𑒐𑒏 𑒠𑒹𑒐𑒱 𑒏𑒾𑒩𑒫 𑒦𑒨𑒮𑒿 𑒕𑒪 𑒮𑒱𑒯𑒩𑒪।
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒣𑒱𑒞𑒰 𑒖𑓂𑒨𑒹𑒭𑓂𑒚 𑒯𑒧𑒩 𑒁𑓀𑒡 𑒕𑒪𑒰𑒯 𑒮𑒹 𑒩𑒰𑒖𑓂𑒨 𑒢𑒯𑒱 𑒦𑒹𑒙𑒪𑒢𑓂𑒯𑒱,
𑒯𑒳𑒢𑒏 𑒣𑒳𑒞𑓂𑒩 𑒖𑓂𑒨𑒹𑒭𑓂𑒚 𑒯𑒧 𑒮𑒹 𑒁𑒡𑒱𑒏𑒰𑒩 𑒯𑒮𑓂𑒞𑒱𑒢𑒰𑒣𑒳𑒩 𑒣𑒩 𑒁𑒕𑒱 𑒮𑒳𑒢𑒪𑒯𑒳𑒿।
𑒣𑒰𑒝𑓂𑒛𑒫 𑒁𑒢𑓂𑒨𑒰𑒨𑒮𑒿 𑒪𑒋 𑒩𑒰𑒖𑓂𑒨 𑒏𑒩𑒋 𑒕𑒟𑒱 𑒏𑒩𑒻𑒞 𑒞𑒻𑒨𑓂𑒨𑒰𑒩𑒲 𑒨𑒳𑒠𑓂𑒡𑒏,
𑒏𑒵𑒭𑓂𑒝 𑒁𑒕𑒱 𑒣𑒰𑒕𑒰𑒿 𑒍𑒏𑒩 𑒯𑒧 𑒞𑒿 𑒩𑒏𑓂𑒭𑒰 𑒩𑒰𑒖𑓂𑒨𑒏 𑒏𑒩𑒋 𑒕𑒲।
𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒞𑒐𑒢 𑒣𑒰𑒿𑒔 𑒑𑒰𑒧 𑒠𑒱𑒁 𑒏𑒩𑒥𑒰 𑒪𑒋 𑒢𑒱𑒩𑓂𑒫𑒰𑒯,
𑒧𑒳𑒠𑒰 𑒠𑒳𑒩𑓂𑒨𑒼𑒡𑒢 𑒏𑒯𑒪 𑒩𑒰𑒖𑓂𑒨𑒏 𑒦𑒰𑒑 𑒢𑒯𑒱 𑒯𑒼𑒋𑒞 𑒑𑒋 𑒂𑒥।
𑒏𑒵𑒭𑓂𑒝 𑒥𑒰𑒖𑒱 𑒖𑒹 𑒯𑒹 𑒠𑒳𑒩𑓂𑒨𑒼𑒡𑒢 𑒧𑒠𑒰𑒢𑓂𑒡 𑒕𑒲 𑒥𑒢𑒪 𑒁𑒯𑒰𑒿,
𑒣𑒰𑒝𑓂𑒛𑒫𑒏 𑒬𑒏𑓂𑒞𑓂𑒞𑒱𑒏 𑒮𑒼𑒗𑒰𑒿 𑒢𑒰𑒬 𑒯𑒼𑒋𑒞 𑒢𑒱𑒬𑓂𑒔𑒱𑒞 𑒥𑒳𑒗𑒴 𑒁𑒯𑒰𑒿𑒏।
𑒏𑒳𑒢𑓂𑒞𑒲 𑒥𑒰𑒠𑒧𑒹 𑒑𑒹𑒪𑒲𑒯 𑒏𑒩𑓂𑒝𑒏𑒹𑒿 𑒏𑒯𑒪 𑒠𑒳𑒩𑓂𑒫𑒰𑒮𑒰𑒏 𑒧𑓀𑒞𑓂𑒩 𑒦𑒹𑒙𑒪,
𑒣𑒜𑓃𑒪 𑒮𑒴𑒩𑓂𑒨𑒏𑒹𑒿 𑒮𑓂𑒧𑒩𑒝 𑒏𑒋 𑒣𑒳𑒞𑓂𑒩 𑒯𑒧𑒩 𑒦𑒹𑒪𑒯𑒳𑒿 𑒁𑒯𑒰𑒿 𑒞𑒐𑒢।
𑒣𑓂𑒩𑒝𑒰𑒧 𑒏𑒋𑒪 𑒧𑒰𑒞𑒰𑒏𑒹𑒿 𑒏𑒩𑓂𑒝 𑒞𑒐𑒢 𑒥𑒖𑒪𑒲𑒯 𑒮𑒳𑒢𑒴 𑒄,
𑒖𑓂𑒨𑒹𑒭𑓂𑒚 𑒣𑒰𑒝𑓂𑒛𑒫 𑒕𑒲 𑒁𑒯𑒰𑒿, 𑒩𑒰𑒖𑓂𑒨 𑒨𑒳𑒡𑒱𑒭𑓂𑒚𑒱𑒩 𑒠𑒹𑒞 𑒁𑒯𑒲𑒏𑒹𑒿।
𑒖𑒐𑒢 𑒢𑒯𑒱 𑒧𑒰𑒢𑒪 𑒏𑒩𑓂𑒝 𑒏𑒳𑒢𑓂𑒞𑒲 𑒣𑒳𑒕𑒪 𑒧𑒰𑒞𑒵𑒇𑒝𑒮𑒿,
𑒅𑒥𑒩𑒥 𑒏𑒼𑒢𑒰, 𑒏𑒩𑓂𑒝 𑒥𑒰𑒖𑒪 𑒯𑒹 𑒧𑒰𑒞𑒰 𑒞𑒐𑒢 𑒮𑒳𑒢𑒴 𑒄।
𑒁𑒩𑓂𑒖𑒳𑒢𑒏𑒹𑒿 𑒕𑒼𑒛𑓃𑒱 𑒔𑒰𑒩𑒴 𑒣𑒰𑒝𑓂𑒛𑒫𑒮𑒿 𑒢𑒯𑒱 𑒪𑒛𑓃𑒥 𑒣𑒴𑒩𑓂𑒝 𑒬𑒏𑓂𑒞𑓂𑒞𑒱𑒨𑒹𑒿,
𑒁𑒩𑓂𑒖𑒳𑒢𑒏𑒹𑒿 𑒧𑒰𑒩𑒥 𑒞𑒐𑒢 𑒥𑒢𑒥 𑒣𑒳𑒞𑓂𑒩 𑒁𑒯𑒲𑒏𑒹𑒿।
𑒫𑒰 𑒧𑒩𑒥 𑒯𑒧 𑒣𑒳𑒞𑓂𑒩 𑒞𑒻𑒨𑒼 𑒣𑒰𑒿𑒔 𑒙𑒰 𑒩𑒯𑒥𑒹 𑒏𑒩𑒞,
𑒄 𑒣𑓂𑒩𑒞𑒱𑒖𑓂𑒘𑒰 𑒯𑒧 𑒏𑒩𑒋 𑒕𑒲 𑒧𑒰𑒞𑒰 𑒏𑒳𑒢𑓂𑒞𑒲 𑒁𑒋𑒪𑒲𑒯 𑒒𑒳𑒩𑒱।
𑒏𑒵𑒭𑓂𑒝 𑒂𑒥𑒱 𑒒𑒳𑒩𑒱 𑒣𑒯𑒳𑒿𑒔𑒱 𑒬𑒱𑒫𑒱𑒩 𑒣𑒰𑒝𑓂𑒛𑒫𑒏 𑒖𑒐𑒢,
𑒣𑒰𑒝𑓂𑒛𑒫 𑒨𑒳𑒠𑓂𑒡𑒏 𑒏𑒋𑒪 𑒣𑓂𑒩𑒏𑓂𑒩𑒱𑒨𑒰 𑒬𑒳𑒩𑒴 𑒍𑒞𑒋 𑒞𑒐𑒢।
𑒮𑒰𑒞 𑒁𑒏𑓂𑒭𑒾𑒯𑒱𑒝𑒲 𑒮𑒹𑒢𑒰 𑒒𑒼𑒛𑓃𑒰, 𑒩𑒟, 𑒯𑒰𑒟𑒲, 𑒮𑒻𑒢𑒱𑒏𑒏,
𑒁𑒩𑓂𑒖𑒳𑒢 𑒦𑒲𑒧 𑒮𑒰𑒞𑓂𑒨𑒱𑒏𑒱 𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒠𑓂𑒩𑒳𑒣𑒠 𑒫𑒱𑒩𑒰𑒙 𑒪𑒑।
𑒏𑒾𑒩𑒫 𑒮𑒹𑒯𑒼 𑒋𑒑𑒰𑒩𑒯 𑒁𑒏𑓂𑒭𑒾𑒯𑒱𑒝𑒲 𑒮𑒹𑒢𑒰 𑒏𑒵𑒣𑒰𑒔𑒰𑒩𑓂𑒨 𑒬𑒪𑓂𑒨 𑒦𑒴𑒩𑒱𑒬𑓂𑒩𑒫𑒰,
𑒦𑒲𑒭𑓂𑒧 𑒠𑓂𑒩𑒼𑒝 𑒏𑒩𑓂𑒝 𑒁𑒬𑓂𑒫𑒞𑓂𑒟𑒰𑒧𑒰 𑒖𑒨𑒠𑓂𑒩𑒟 𑒏𑒵𑒞𑒫𑒩𑓂𑒧𑒰 𑒦𑒑𑒠𑒞𑓂𑒞 𑒕𑒪।
𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒮𑒹𑒢𑒰𑒣𑒞𑒱 𑒣𑒰𑒝𑓂𑒛𑒫𑒏 𑒦𑒲𑒭𑓂𑒧 𑒏𑒾𑒩𑒫𑒏 𑒥𑒢𑒪,
𑒏𑒩𑓂𑒝 𑒬𑒮𑓂𑒞𑓂𑒩 𑒢𑒯𑒱 𑒅𑒚𑒹𑒥𑒰𑒏 𑒏𑒋𑒪 𑒣𑓂𑒩𑒞𑒱𑒖𑓂𑒘𑒰
𑒦𑒲𑒭𑓂𑒧 𑒨𑒰𑒫𑒞 𑒨𑒳𑒠𑓂𑒡𑒏𑓂𑒭𑒹𑒞𑓂𑒩𑒧𑒹 𑒩𑒯𑒞𑒰𑒯 𑒑𑒋।
𑒦𑒲𑒭𑓂𑒧 𑒏𑒯𑒪 𑒧𑒰𑒩𑒥 𑒢𑒯𑒱 𑒣𑒰𑒝𑓂𑒛𑒫𑒏𑒹𑒿 𑒋𑒏𑒼𑒙𑒰,
𑒮𑒹𑒢𑒰𑒏 𑒮𑓀𑒯𑒰𑒩 𑒏𑒩𑒥 𑒨𑒟𑒰 𑒮𑓀𑒦𑒫 𑒯𑒼𑒋𑒞।
𑒥𑓂𑒨𑒰𑒮 𑒡𑒵𑒞𑒩𑒰𑒭𑓂𑒙𑓂𑒩𑒏 𑒪𑒑 𑒑𑒹𑒪𑒰𑒯 𑒏𑒯𑒪 𑒥𑓂𑒨𑒰𑒮𑒖𑒲 𑒮𑒳𑒢𑒴,
𑒁𑓀𑒡𑒞𑓂𑒫 𑒦𑒹𑒪 𑒫𑒩 𑒯𑒧𑒩 𑒏𑒳𑒪 𑒮𑓀𑒯𑒰𑒩 𑒠𑒹𑒐𑒥 𑒢𑒯𑒱 𑒏𑒱𑒋𑒏।
𑒧𑒳𑒠𑒰 𑒫𑒲𑒩𑒏 𑒑𑒰𑒟𑒰 𑒮𑒳𑒢𑒥𑒰𑒏 𑒁𑒕𑒱 𑒃𑒔𑓂𑒕𑒰 𑒥𑒯𑒳𑒞,
𑒥𑓂𑒨𑒰𑒮 𑒠𑒹𑒪 𑒨𑒼𑒑𑒮𑒿 𑒠𑒱𑒫𑓂𑒨𑒠𑒵𑒭𑓂𑒙𑒱 𑒮𑓀𑒖𑒨𑒏𑒹𑒿 𑒏𑒯𑒪,
𑒥𑒻𑒮𑒪𑒹-𑒥𑒻𑒮𑒪 𑒠𑒹𑒐𑒱 𑒮𑓀𑒖𑒨 𑒫𑒩𑓂𑒝𑒢 𑒏𑒩𑒞𑒰𑒯 𑒨𑒳𑒠𑓂𑒡𑒏,
𑒥𑒰𑒖𑒱 𑒄 𑒥𑓂𑒨𑒰𑒮 𑒥𑒱𑒠𑒰 𑒦𑒋 𑒑𑒹𑒪𑒰𑒯 𑒍𑒞𑒋𑒮𑒿।
𑒦𑒹𑒪 𑒦𑒼𑒩 𑒩𑒝𑒦𑒴𑒧𑒱𑒧𑒹 𑒏𑒾𑒩𑒫-𑒣𑒰𑒝𑓂𑒛𑒫 𑒖𑒳𑒙𑒪 𑒮𑒹𑒢𑒰 𑒮𑒯𑒱𑒞
𑒂𑒑𑒰𑒿 𑒦𑒲𑒭𑓂𑒧 𑒏𑒾𑒩𑒫𑒏 𑒂 𑒣𑒰𑒝𑓂𑒛𑒫𑒏 𑒁𑒩𑓂𑒖𑒳𑒢-𑒏𑒵𑒭𑓂𑒝 𑒩𑒯𑒟𑒱।
𑒦𑒲𑒭𑓂𑒧𑒏 𑒩𑒟𑒏 𑒠𑒳𑒯𑒳𑒍𑒩 𑒠𑒳𑓁𑒬𑒰𑒮𑒢 𑒠𑒳𑒩𑓂𑒨𑒼𑒡𑒢 𑒕𑒪𑒰𑒯,
𑒣𑒰𑒩𑓂𑒬𑓂𑒫𑒧𑒹 𑒁𑒬𑓂𑒫𑒞𑓂𑒟𑒰𑒧𑒰 𑒑𑒳𑒩𑒳 𑒠𑓂𑒩𑒼𑒝𑒏 𑒮𑓀𑒑 𑒦𑒰𑒑𑓂𑒨 𑒂𑒯।
𑒨𑒳𑒠𑓂𑒡 𑒏𑒋 𑒩𑒰𑒖𑓂𑒨 𑒣𑒰𑒋𑒥 𑒧𑒰𑒩𑒱 𑒦𑓂𑒩𑒰𑒞𑒰 𑒣𑓂𑒩𑒱𑒨𑒖𑒢𑒏𑒹𑒿,
𑒮𑒼𑒔𑒱 𑒫𑒱𑒯𑓂𑒫𑒪 𑒦𑒹𑒪 𑒁𑒩𑓂𑒖𑒳𑒢 𑒑𑒰𑓀𑒛𑒲𑒫 𑒐𑒮𑒞 𑒏𑒵𑒭𑓂𑒝 𑒯𑒧𑒩।
𑒏𑒩𑓂𑒧𑒨𑒼𑒑 𑒅𑒣𑒠𑒹𑒬 𑒠𑒹𑒪 𑒏𑒵𑒭𑓂𑒝 𑒠𑒴𑒩 𑒏𑒩𑒴 𑒧𑒼𑒯-𑒦𑓂𑒩𑒧,
𑒮𑓂𑒫𑒖𑒢 𑒣𑓂𑒩𑒞𑒱 𑒧𑒼𑒯 𑒏𑒩𑒱 𑒏𑓂𑒭𑒰𑒞𑓂𑒩𑒡𑒩𑓂𑒧𑒮𑒿 𑒫𑒱𑒧𑒳𑒐 𑒢 𑒯𑒼𑒆।
𑒁𑒡𑒩𑓂𑒧𑒮𑒿 𑒏𑒾𑒩𑒫𑒏 𑒁𑒕𑒱 𑒢𑒰𑒬 𑒦𑒹𑒪 𑒠𑒹𑒐𑒴 𑒄 𑒠𑒵𑒬𑓂𑒨।
𑒫𑒱𑒩𑒰𑒙𑒩𑒴𑒣 𑒠𑒹𑒐𑒱 𑒁𑒩𑓂𑒖𑒳𑒢 𑒫𑒱𑒬𑒰𑒪 𑒁𑒑𑓂𑒢𑒱 𑒖𑓂𑒫𑒰𑒪𑒧𑒹,
𑒖𑒲𑒫-𑒖𑒢𑓂𑒞𑒳 𑒂𑒥𑒱 𑒐𑒮𑒟𑒱 𑒦𑒮𑓂𑒧 𑒯𑒼𑒟𑒱 𑒏𑓂𑒭𑒝𑒯𑒱,
𑒏𑒾𑒩𑒫𑒑𑒝 𑒮𑒹𑒯𑒼 𑒦𑒮𑓂𑒧 𑒦𑒋 𑒩𑒯𑒪 𑒕𑒪𑒰𑒯,
𑒔𑒹𑒞𑒢𑒰 𑒖𑒰𑒑𑒪 𑒁𑒩𑓂𑒖𑒳𑒢𑒏 𑒮𑓂𑒞𑒳𑒞𑒱 𑒏𑒋𑒪 𑒮𑒠𑓂𑒨𑓁।
𑒤𑒪𑒏 𑒔𑒱𑒢𑓂𑒞𑒰 𑒕𑒼𑒛𑓃𑒱 𑒏𑒩𑓂𑒧 𑒏𑒩𑒥𑒰𑒏 𑒖𑓂𑒘𑒰𑒢𑒮𑒿,
𑒂𑒞𑓂𑒧𑒰 𑒁𑒧𑒩 𑒁𑒕𑒱 𑒬𑒼𑒏 𑒋𑒏𑒩 𑒪𑒹𑒪 𑒏𑒩𑒥 𑒢𑒯𑒱 𑒅𑒔𑒱𑒞।
𑒨𑒳𑒡𑒱𑒭𑓂𑒚𑒱𑒩 𑒅𑒞𑒩𑒱 𑒩𑒟𑒮𑒿 𑒦𑒲𑒭𑓂𑒧𑒏 𑒩𑒟𑒏 𑒠𑒱𑒮 𑒑𑒹𑒪,
𑒑𑒳𑒩𑒳𑒖𑒢𑒏 𑒂𑒬𑒲𑒩𑓂𑒫𑒰𑒠 𑒪𑒋 𑒡𑒩𑓂𑒧𑒣𑒰𑒪𑒢 𑒧𑒼𑒢 𑒩𑒰𑒐𑒪।
𑒦𑒲𑒭𑓂𑒧 𑒠𑓂𑒩𑒼𑒝 𑒏𑒵𑒣𑒰𑒔𑒰𑒩𑓂𑒨 𑒣𑒳𑒪𑒏𑒱𑒞 𑒫𑒱𑒖𑒨𑒏 𑒂𑒬𑒲𑒭 𑒠𑒹𑒪,
𑒡𑒵𑒞𑒩𑒰𑒭𑓂𑒙𑓂𑒩 𑒣𑒳𑒞𑓂𑒩 𑒨𑒳𑒨𑒳𑒞𑓂𑒮𑒳 𑒠𑒹𑒐𑒱 𑒩𑒯𑒪 𑒕𑒪 𑒡𑒩𑓂𑒧𑒢𑒲𑒞𑒱
𑒕𑒼𑒛𑓃𑒱 𑒏𑒾𑒩𑒫 𑒧𑒱𑒪𑒪 𑒣𑒰𑒝𑓂𑒛𑒫 𑒣𑒏𑓂𑒭𑒧𑒹 𑒞𑒞𑓂𑒏𑒰𑒪,
𑒨𑒳𑒭𑒱𑒭𑓂𑒚𑒱𑒩 𑒧𑒱𑒪𑒰𑒍𑒪 𑒑𑒩 𑒍𑒏𑒩𑒮𑒿 𑒦𑒹𑒪 𑒬𑓀𑒐𑒢𑒰𑒠।
𑒁𑒩𑓂𑒖𑒳𑒢 𑒬𑓀𑒐 𑒠𑒹𑒫𑒠𑒞𑓂𑒞 𑒤𑒴𑒏𑒱 𑒏𑒋𑒪 𑒨𑒳𑒠𑓂𑒡𑒏 𑒒𑒼𑒭𑒝𑒰,
𑒂𑒏𑓂𑒩𑒧𑒝 𑒏𑒾𑒩𑒫𑒣𑒩 𑒏𑒋 𑒩𑒟 𑒯𑒮𑓂𑒞𑒱 𑒒𑒼𑒙𑒏 𑒣𑒻𑒠𑒪,
𑒨𑒳𑒠𑓂𑒡𑒧𑒹 𑒣𑒯𑒱𑒪 𑒠𑒱𑒢 𑒧𑒳𑒃𑒪 𑒅𑒞𑓂𑒞𑒩 𑒫𑒱𑒩𑒰𑒙𑒏 𑒣𑒳𑒞𑓂𑒩 𑒕𑒪।
𑒦𑒲𑒭𑓂𑒧 𑒏𑒋𑒪 𑒦𑒲𑒭𑒝 𑒏𑓂𑒭𑒞𑒱 𑒮𑒰𑒿𑒗𑒧𑒹 𑒁𑒩𑓂𑒖𑒳𑒢𑒏 𑒬𑓀𑒐,
𑒥𑒰𑒖𑒱 𑒏𑒋𑒪 𑒨𑒳𑒠𑓂𑒡𑒏 𑒮𑒧𑒰𑒣𑓂𑒞𑒱 𑒦𑒲𑒭𑓂𑒧 𑒮𑒹𑒯𑒼 𑒥𑒖𑒰𑒍𑒪 𑒁𑒣𑒢।
𑒣𑒯𑒱𑒪 𑒠𑒱𑒢𑒏 𑒨𑒳𑒠𑓂𑒡𑒮𑒿 𑒣𑒰𑒝𑓂𑒛𑒫 𑒬𑒼𑒏𑒱𑒞 𑒠𑒳𑒩𑓂𑒨𑒼𑒡𑒢 𑒯𑒩𑓂𑒭𑒱𑒞।
𑒠𑒼𑒮𑒩 𑒠𑒱𑒢𑒏 𑒨𑒳𑒠𑓂𑒡 𑒖𑒐𑒢 𑒬𑒳𑒩𑒴 𑒦𑒲𑒭𑓂𑒧 𑒂𑒢𑒪 𑒣𑓂𑒩𑒪𑒨।
𑒏𑒵𑒭𑓂𑒝 𑒋𑒢𑒰 𑒦𑒋 𑒯𑒧𑒩 𑒮𑒹𑒢𑒰 𑒧𑒩𑒞 𑒔𑒪𑒴 𑒦𑒲𑒭𑓂𑒧 𑒪𑒑,
𑒯𑒿 𑒡𑒢𑒘𑓂𑒖𑒨 𑒩𑒟 𑒪𑒋 𑒖𑒰𑒃𑒞 𑒕𑒲 𑒦𑒲𑒭𑓂𑒧𑒏 𑒮𑒧𑒏𑓂𑒭।
𑒠𑒳𑒯𑒳𑒏 𑒥𑒲𑒔 𑒖𑒹 𑒨𑒳𑒠𑓂𑒡 𑒦𑒹𑒪 𑒫𑒱𑒏𑒩𑒰𑒪 𑒕𑒪 𑒟𑒩𑒟𑒩𑒰𑒋𑒪 𑒮𑒏𑒪।
𑒦𑒲𑒧 𑒮𑒹𑒯𑒼 𑒮𑓀𑒯𑒰𑒩𑒏 𑒥𑒢𑒪 𑒦𑒲𑒭𑓂𑒧 𑒕𑒼𑒛𑓃𑒱 𑒁𑒩𑓂𑒖𑒳𑒢𑒏𑒹𑒿 𑒍𑒧𑓂𑒯𑒩 𑒠𑒾𑒑𑒪,
𑒮𑒰𑒞𑓂𑒨𑒱𑒏𑒲𑒏 𑒫𑒰𑒝𑒮𑒿 𑒦𑒲𑒭𑓂𑒧𑒏 𑒮𑒯𑒲𑒮𑒏 𑒁𑒣𑒒𑒰𑒞 𑒦𑒹𑒪,
𑒐𑒮𑒪 𑒦𑒴𑒧𑒱 𑒞𑒐𑒢 𑒍 𑒦𑒲𑒭𑓂𑒧𑒏 𑒒𑒼𑒛𑓃𑒰 𑒦𑒰𑒑𑒪 𑒫𑒹𑒑𑒧𑒰𑒢 𑒦𑒋,
𑒮𑒰𑒿𑒗 𑒦𑒹𑒪 𑒬𑓀𑒐 𑒥𑒰𑒖𑒪 𑒨𑒳𑒠𑓂𑒡 𑒠𑒴 𑒠𑒱𑒢𑒏 𑒮𑒧𑒰𑒣𑓂𑒞 𑒦𑒹𑒪।
𑒞𑒹𑒮𑒩 𑒠𑒱𑒢 𑒮𑒰𑒞𑓂𑒨𑒱𑒏𑒲 𑒁𑒦𑒱𑒧𑒢𑓂𑒨𑒳 𑒏𑒾𑒩𑒫𑒣𑒩 𑒕𑒴𑒙𑒪,
𑒠𑓂𑒩𑒼𑒝𑒣𑒩 𑒮𑒯𑒠𑒹𑒫-𑒢𑒏𑒳𑒪 𑒨𑒳𑒡𑒱𑒭𑓂𑒚𑒱𑒩 𑒂𑒏𑓂𑒩𑒧𑒝 𑒏𑒋𑒪,
𑒠𑒳𑒩𑓂𑒨𑒼𑒡𑒢𑒣𑒩 𑒙𑒴𑒙𑒪 𑒦𑒲𑒧 𑒫𑒰𑒝 𑒧𑒰𑒩𑒱 𑒁𑒔𑒹𑒞 𑒏𑒋𑒪,
𑒍𑒏𑒩 𑒮𑒯𑒲𑒮 𑒠𑒳𑒩𑓂𑒨𑒼𑒡𑒢𑒏𑒹𑒿 𑒪𑒋 𑒔𑒪𑒪 𑒩𑒝𑒏𑓂𑒭𑒹𑒞𑓂𑒩𑒮𑒿,
𑒏𑒾𑒩𑒫 𑒮𑒹𑒢𑒰 𑒥𑒳𑒗𑒪 𑒦𑒰𑒑𑒪 𑒕𑒪 𑒍 𑒨𑒳𑒠𑓂𑒡 𑒕𑒼𑒛𑓃𑒱 𑒏𑒋।
𑒦𑒰𑒑𑒱 𑒩𑒯𑒪 𑒮𑒹𑒢𑒰𑒣𑒩 𑒦𑒲𑒧 𑒏𑒋𑒪𑒢𑓂𑒯𑒱 𑒂𑒏𑓂𑒩𑒧𑒝,
𑒮𑒰𑒿𑒗 𑒥𑒢𑒱 𑒩𑒏𑓂𑒭𑒏 𑒂𑒋𑒪 𑒠𑒳𑒩𑓂𑒨𑒼𑒡𑒢 𑒏𑒳𑒣𑒱𑒞 𑒦𑒋𑒪।
𑒦𑒲𑒭𑓂𑒧𑒏𑒹𑒿 𑒩𑒰𑒞𑓂𑒩𑒱𑒧𑒹 𑒏𑒯𑒪 𑒁𑒯𑒰𑒿𑒏 𑒯𑒵𑒠𑒨 𑒁𑒕𑒱 𑒣𑒏𑓂𑒭𑒧𑒹 𑒣𑒰𑓀𑒛𑒫𑒏,
𑒦𑒲𑒭𑓂𑒧 𑒏𑒯𑒪 𑒕𑒟𑒱 𑒍 𑒁𑒖𑒹𑒨 𑒣𑒩𑒘𑓂𑒔 𑒨𑒳𑒠𑓂𑒡 𑒦𑒩𑒱 𑒮𑒏 𑒏𑒩𑒥।
𑒮𑒏 𑒦𑒩𑒱 𑒨𑒳𑒠𑓂𑒡 𑒏𑒩𑒥𑒰𑒏 𑒥𑒰𑒞 𑒏𑒯𑒪 𑒦𑒲𑒭𑓂𑒧 𑒠𑒳𑒩𑓂𑒨𑒼𑒡𑒢𑒏𑒹𑒿,
𑒔𑒰𑒩𑒱𑒧 𑒠𑒱𑒢 𑒏𑒋𑒪 𑒂𑒏𑓂𑒩𑒧𑒝 𑒣𑓂𑒩𑒥𑒪 𑒫𑒹𑒑𑒹𑒿,
𑒁𑒩𑓂𑒖𑒳𑒢 𑒏𑒋𑒪 𑒣𑓂𑒩𑒨𑒞𑓂𑒢 𑒩𑒼𑒏𑒥𑒰𑒏 𑒯𑒳𑒢𑒏𑒰 𑒫𑓂𑒨𑒩𑓂𑒟,
𑒣𑒰𑒿𑒔𑒧 𑒕𑒚𑒧 𑒂 𑒮𑒰𑒞𑒧 𑒠𑒱𑒢 𑒋𑒯𑒱𑒢𑒰 𑒮𑒹𑒯𑒼 𑒥𑒲𑒞𑒪।
𑒂𑒚𑒧 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒒𑒢𑒒𑒼𑒩,
𑒁𑒩𑓂𑒖𑒳𑒢𑒏 𑒠𑒼𑒮𑒩 𑒣𑒞𑓂𑒢𑒲 𑒅𑒪𑒴𑒣𑒲𑒏 𑒣𑒳𑒞𑓂𑒩 𑒃𑒩𑒰𑒫𑒰𑒢,
𑒨𑒳𑒡𑓂𑒨 𑒧𑒡𑓂𑒨 𑒧𑒩𑒪 𑒁𑒩𑓂𑒖𑒳𑒢 𑒦𑒹𑒪 𑒁𑒡𑒻𑒩𑓂𑒨।
𑒏𑒋𑒪 𑒨𑒳𑒠𑓂𑒡 𑒦𑒨𑓀𑒏𑒩 𑒦𑒲𑒭𑓂𑒧𑒏𑒹𑒿 𑒢𑒯𑒱 𑒙𑒹𑒩𑒪,
𑒠𑒳𑒩𑓂𑒨𑒼𑒡𑒢 𑒕𑒪 𑒔𑒱𑒢𑓂𑒞𑒱𑒞 𑒏𑒩𑓂𑒝𑒏 𑒚𑒰𑒧 𑒑𑒹𑒪,
𑒒𑒳𑒩𑒱 𑒦𑒲𑒭𑓂𑒧𑒏𑒹𑒿 𑒏𑒯𑒪 𑒁𑒯𑒰𑒿 𑒕𑒲 𑒁𑒢𑓂𑒯𑒹𑒩 𑒏𑒋𑒪।
𑒋𑒯𑒢 𑒩𑒯𑒞 𑒞𑒐𑒢 𑒥𑒢𑒰𑒋𑒥 𑒏𑒩𑓂𑒝𑒏𑒹𑒿 𑒮𑒹𑒢𑒰𑒡𑓂𑒨𑒏𑓂𑒭,
𑒦𑒲𑒭𑓂𑒧 𑒏𑒯𑒪 𑒥𑒞𑒰𑒯 𑒕𑒲 𑒁𑒯𑒰𑒿 𑒦𑒹𑒪,
𑒏𑒩𑓂𑒝𑒏 𑒫𑒲𑒩𑒞𑒰 𑒫𑒱𑒩𑒰𑒙𑒨𑒳𑒠𑓂𑒡𑒧𑒹 𑒢𑒯𑒱 𑒠𑒹𑒐𑒪?
𑒢𑒫𑒧 𑒠𑒱𑒢𑒏 𑒨𑒳𑒠𑓂𑒡 𑒕𑒪 𑒦𑒨𑒓𑓂𑒏𑒩,
𑒁𑒩𑓂𑒖𑒳𑒢𑒏 𑒩𑒟𑒏𑒹𑒿 𑒦𑒲𑒭𑓂𑒧 𑒫𑒰𑒝𑒮𑒿 𑒞𑒼𑒣𑒪,
𑒏𑒵𑒭𑓂𑒝-𑒁𑒩𑓂𑒖𑒳𑒢 𑒁𑒣𑒒𑒰𑒞 𑒩𑒟 𑒏𑓂𑒭𑒞𑒱𑒑𑓂𑒩𑒮𑓂𑒞,
𑒒𑒼𑒙𑒏 𑒩𑒳𑒏𑒪 𑒁𑒩𑓂𑒖𑒳𑒢 𑒬𑒱𑒟𑒱𑒪 𑒣𑒮𑓂𑒞।
𑒏𑒾𑒩𑒫𑒏 𑒅𑒞𑓂𑒮𑒰𑒯 𑒕𑒪 𑒠𑒹𑒐𑒥𑒰 𑒖𑒼𑒑𑒩,
𑒏𑒵𑒭𑓂𑒝 𑒏𑓂𑒩𑒼𑒡𑒱𑒞 𑒩𑒟𑒏 𑒣𑒯𑒱𑒨𑒰 𑒪𑒋 𑒕𑒴𑒙𑒪,
𑒧𑒰𑒩𑒥 𑒦𑒲𑒭𑓂𑒧 𑒐𑒞𑒧 𑒏𑒩𑒥 𑒄 𑒨𑒳𑒠𑓂𑒡।
𑒁𑒩𑓂𑒖𑒳𑒢 𑒣𑒻𑒩 𑒣𑒏𑒛𑓃𑒱 𑒏𑒋 𑒏𑒯𑒪 𑒯𑒹 𑒏𑒵𑒭𑓂𑒝
𑒬𑒮𑓂𑒞𑓂𑒩 𑒢𑒯𑒱 𑒅𑒚𑒋𑒥𑒰𑒏 𑒏𑒋𑒢𑒹 𑒣𑓂𑒩𑒞𑒱𑒖𑓂𑒘𑒰 𑒕𑒲
𑒪𑒖𑓂𑒖𑒱𑒞 𑒩𑒟𑒮𑒿 𑒏𑒴𑒠𑒱 𑒕𑒲 𑒯𑒧 𑒂𑒋𑒪,
𑒦𑒲𑒭𑓂𑒧 𑒮𑒹𑒯𑒼 𑒠𑒹𑒐𑒪 𑒦𑒋 𑒦𑒰𑒫-𑒫𑒱𑒯𑓂𑒫𑒪।
𑒩𑒴𑒣 𑒞𑒹𑒖𑒧𑒨 𑒬𑒮𑓂𑒞𑓂𑒩 𑒪𑒹𑒢𑒹 𑒏𑒵𑒭𑓂𑒝।
𑒏𑒵𑒭𑓂𑒝𑒏 𑒏𑓂𑒩𑒼𑒡 𑒦𑒹𑒪 𑒖𑒰 𑒏𑒋 𑒬𑒰𑒢𑓂𑒞,
𑒮𑒰𑒿𑒗𑒏 𑒬𑓀𑒐 𑒏𑒋𑒪 𑒠𑒱𑒢𑒏 𑒨𑒳𑒠𑓂𑒡𑒰𑓀𑒞।
𑒩𑒰𑒞𑒱𑒧𑒹 𑒨𑒳𑒡𑒱𑒭𑓂𑒚𑒱𑒩 𑒣𑒳𑒕𑒪𑒢𑓂𑒯𑒱 𑒯𑒹 𑒢𑒢𑓂𑒠𑒏 𑒢𑒢𑓂𑒠,
𑒦𑒲𑒭𑓂𑒧𑒏 𑒣𑒩𑒰𑒖𑒨𑒏 𑒁𑒕𑒱 𑒏𑒲 𑒩𑒯𑒮𑓂𑒨,
𑒦𑒲𑒧 𑒏𑒯𑒪 𑒁𑒩𑓂𑒖𑒳𑒢 𑒢𑒯𑒱 𑒖𑒰𑒢𑒱 𑒏𑒱𑒋𑒏,
𑒢𑒯𑒱 𑒣𑓂𑒩𑒨𑒼𑒑 𑒏𑒋 𑒩𑒯𑒪 𑒠𑒱𑒫𑓂𑒨𑒰𑒮𑓂𑒞𑓂𑒩 𑒦𑒲𑒭𑓂𑒧𑒣𑒩।
𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒔𑒪𑒴 𑒣𑒰𑒿𑒔𑒴 𑒦𑒰𑒿𑒋,
𑒣𑒴𑒕𑒱 𑒂𑒥𑒲 𑒯𑒳𑒢𑒏𑒯𑒱𑒮𑒿 𑒯𑒳𑒢𑒏 𑒅𑒣𑒰𑒨।
𑒮𑒦 𑒣𑒯𑒳𑒿𑒔𑒱 𑒣𑒴𑒕𑒪 𑒥𑒞𑒰𑒆 𑒯𑒹 𑒦𑒲𑒭𑓂𑒧,
𑒁𑒯𑒰𑒿𑒏 𑒩𑒯𑒻𑒞 𑒢𑒯𑒱 𑒯𑒰𑒩𑒞 𑒏𑒾𑒩𑒫 𑒏𑒟𑒧𑒣𑒱।
𑒮𑒞𑓂𑒨 𑒡𑒩𑓂𑒧 𑒠𑒳𑒯𑒳 𑒦𑒋 𑒖𑒋𑒞 𑒁𑒪𑒼𑒣𑒱𑒞,
𑒦𑒲𑒭𑓂𑒧 𑒏𑒯𑒪 𑒕𑒲 𑒠𑒹𑒐𑒱 𑒩𑒯𑒪 𑒦𑒋 𑒞𑓂𑒩𑒮𑓂𑒞,
𑒁𑒩𑓂𑒖𑒳𑒢 𑒢𑒯𑒱 𑒏𑒩𑒱 𑒩𑒯𑒪 𑒣𑓂𑒩𑒨𑒼𑒑 𑒠𑒱𑒫𑓂𑒨𑒰𑒮𑓂𑒞𑓂𑒩,
𑒧𑒳𑒠𑒰 𑒯𑒮𑓂𑒞𑒱𑒢𑒰𑒣𑒳𑒩𑒏 𑒮𑒱𑓀𑒯𑒰𑒮𑒢𑒮𑒿 𑒏𑒙𑒱𑒥𑒠𑓂𑒡,
𑒯𑒰 𑒠𑒳𑒩𑓂𑒦𑒰𑒑𑓂𑒨! 𑒁𑒮𑒞𑓂𑒨𑒏 𑒧𑒩𑓂𑒨𑒰𑒠𑒰𑒏 𑒩𑒏𑓂𑒭𑒰𑒩𑓂𑒟 !
𑒁𑒕𑒱 𑒬𑒱𑒐𑒝𑓂𑒛𑒲 𑒠𑓂𑒩𑒳𑒣𑒠𑒏 𑒣𑒳𑒞𑓂𑒩 𑒁𑒯𑒰𑒿𑒏 𑒣𑒏𑓂𑒭,
𑒣𑒴𑒩𑓂𑒫𑒖𑒢𑓂𑒧𑒏 𑒮𑓂𑒞𑓂𑒩𑒲 𑒁𑒕𑒱 𑒬𑒱𑒫𑒏 𑒏𑒋𑒪 𑒫𑓂𑒩𑒞,
𑒯𑒧𑒩 𑒫𑒡𑒏 𑒪𑒹𑒪 𑒁𑒕𑒱 𑒮𑒞𑒞 𑒣𑓂𑒩𑒞𑒱𑒣𑒪।
𑒠𑓂𑒩𑒳𑒣𑒠𑒏 𑒒𑒩𑒧𑒹 𑒮𑓂𑒞𑓂𑒩𑒲𑒏 𑒩𑒴𑒣 𑒖𑒢𑓂𑒧 𑒕𑒪 𑒪𑒹𑒪,
𑒠𑒰𑒢𑒫𑒏 𑒫𑒩𑒮𑒿 𑒣𑒳𑒩𑒳𑒭 𑒩𑒴𑒣 𑒥𑒢𑒱 𑒑𑒹𑒪।
𑒑𑒳𑒝 𑒮𑓂𑒞𑓂𑒩𑒲𑒞𑓂𑒫𑒏 𑒁𑒕𑒱 𑒍𑒏𑒩𑒰𑒧𑒹 𑒣𑒰𑒩𑓂𑒟,
𑒮𑓂𑒞𑓂𑒩𑒲𑒑𑒝 𑒯𑒧𑒩 𑒫𑒰𑒝𑒏 𑒢𑒯𑒱 𑒕𑒟𑒱 𑒣𑒰𑒞𑓂𑒩।
𑒬𑒱𑒐𑒝𑓂𑒛𑒲𑒏𑒹𑒿 𑒮𑒼𑒗𑒰𑒿 𑒏𑒋 𑒖𑒹 𑒫𑒰𑒝 𑒁𑒯𑒰𑒿 𑒔𑒪𑒰𑒋𑒥,
𑒣𑒴𑒩𑓂𑒝 𑒫𑒱𑒫𑒬 𑒞𑒐𑒢𑒹 𑒯𑒧 𑒣𑒰𑒩𑓂𑒟 𑒦𑒋 𑒖𑒰𑒋𑒥।
𑒦𑒋 𑒂𑒮𑓂𑒫𑒮𑓂𑒞 𑒣𑓂𑒩𑒝𑒰𑒧 𑒏𑒋 𑒦𑒲𑒭𑓂𑒧 𑒣𑒰𑓀𑒛𑒫𑒑𑒝,
𑒒𑒳𑒩𑒪 𑒠𑒮𑒧 𑒠𑒱𑒢𑒳𑒏𑒰 𑒨𑒳𑒠𑓂𑒡𑒏 𑒕𑒪 𑒂𑒨𑒼𑒖𑒢।
𑒂𑒃 𑒮𑒹𑒯𑒼 𑒦𑒲𑒭𑓂𑒧𑒏 𑒫𑒰𑒝𑒏 𑒦𑒹𑒪 𑒥𑒩𑒐𑒰,
𑒧𑒳𑒠𑒰 𑒬𑒱𑒐𑒝𑓂𑒛𑒲 𑒂𑒋𑒪 𑒮𑒼𑒗𑒰𑒿 𑒯𑒳𑒢𑒏𑒩।
𑒩𑒰𑒐𑒪 𑒁𑒮𑓂𑒞𑓂𑒩 𑒦𑒲𑒭𑓂𑒧 𑒔𑒪𑒰𑒍𑒪 𑒫𑒰𑒝 𑒬𑒱𑒐𑒝𑓂𑒛𑒲,
𑒧𑒳𑒠𑒰 𑒏𑒼𑒢𑒼 𑒢𑒯𑒱 𑒖𑒼𑒛𑓃 𑒍𑒏𑒩 𑒫𑒰𑒝𑒏 𑒕𑒪 𑒏𑒱𑒢𑓂𑒞𑒳,
𑒏𑒵𑒭𑓂𑒝 𑒏𑒯𑒪 𑒪𑒋 𑒁𑒜𑓃 𑒬𑒱𑒐𑒝𑓂𑒛𑒲𑒏 𑒁𑒩𑓂𑒖𑒳𑒢,
𑒦𑒲𑒭𑓂𑒧𑒏 𑒠𑒹𑒯𑒏𑒹𑒿 𑒑𑒰𑒿𑒟𑒴 𑒏𑒩𑒴 𑒢𑒯𑒱 𑒔𑒱𑒢𑓂𑒞𑒢।
𑒁𑒩𑓂𑒖𑒳𑒢𑒏 𑒬𑓀𑒏𑒰 𑒮𑒳𑒢𑒱 𑒏𑒯𑒪 𑒞𑒐𑒢 𑒏𑒵𑒭𑓂𑒝,
𑒁𑒮𑓂𑒞𑓂𑒩-𑒬𑒮𑓂𑒞𑓂𑒩 𑒮𑓀𑒑 𑒖𑒲𑒞𑒞 𑒏𑓂𑒨𑒼 𑒢𑒯𑒱 𑒦𑒲𑒭𑓂𑒧,
𑒁𑒣𑒢𑒯𑒱 𑒕𑒟𑒱 𑒍 𑒅𑒣𑒰𑒨 𑒋𑒯𑒢 𑒥𑒞𑒰𑒍𑒪,
𑒥𑒱𑒢𑒳 𑒫𑒱𑒪𑒧𑓂𑒥 𑒏𑒋 𑒫𑒰𑒝 𑒁𑒯𑒰𑒿 𑒔𑒪𑒰𑒆।
𑒁𑒩𑓂𑒖𑒳𑒢𑒏 𑒫𑒰𑒝𑒏 𑒬𑒳𑒩𑒴 𑒦𑒹𑒪 𑒥𑒩𑒐𑒰,
𑒐𑒮𑒪 𑒦𑒲𑒭𑓂𑒧 𑒣𑒵𑒟𑓂𑒫𑒲 𑒬𑒨𑓂𑒨𑒰 𑒕𑒪 𑒫𑒰𑒝𑒏,
𑒬𑒩𑒬𑒨𑓂𑒨𑒰𑒣𑒩 𑒐𑒮𑒻𑒞 𑒦𑒲𑒭𑓂𑒧𑒏 𑒠𑒹𑒩𑒲 𑒕𑒪,
𑒨𑒳𑒠𑓂𑒡 𑒐𑒞𑒧 𑒦𑒹𑒪 𑒍𑒯𑒱 𑒠𑒱𑒢𑒏 𑒞𑒞𑓂𑒏𑒰𑒪।
𑒏𑒾𑒩𑒫 𑒣𑒰𑒝𑓂𑒛𑒫 𑒖𑒳𑒧𑒱 𑒁𑒋𑒪𑒰𑒯 𑒮𑒧𑒏𑓂𑒭,
𑒦𑒲𑒭𑓂𑒧 𑒏𑒯𑒪 𑒠𑒱𑒁 𑒑𑒹𑒩𑒳𑒂 𑒧𑒰𑒟𑒞𑒩। 𑒁𑒯।
𑒧𑒯𑒑 𑒑𑒹𑒩𑒳𑒂 𑒪𑒋 𑒣𑓂𑒩𑒮𑓂𑒞𑒳𑒞 𑒠𑒳𑒩𑓂𑒨𑒼𑒡𑒢 𑒕𑒪,
𑒞𑒰𑒏𑒪 𑒦𑒲𑒭𑓂𑒧 𑒁𑒩𑓂𑒖𑒳𑒢 𑒠𑒱𑒮 𑒁𑒩𑓂𑒖𑒳𑒢 𑒦𑒋 𑒮𑒰𑒏𑒰𑓀𑒏𑓂𑒭,
𑒞𑒲𑒢 𑒫𑒰𑒝 𑒔𑒪𑒰𑒍𑒪 𑒂𑒡𑒰𑒩 𑒧𑒰𑒟𑒏 𑒦𑒹𑒪 ।
𑒣𑓂𑒨𑒰𑒮𑒪 𑒦𑒲𑒭𑓂𑒧 𑒖𑒪𑒏 𑒪𑒹𑒪 𑒏𑒯𑒪 𑒣𑒳𑒢𑓁 𑒄,
𑒠𑒳𑒩𑓂𑒨𑒼𑒡𑒢 𑒮𑓂𑒫𑒩𑓂𑒝-𑒣𑒰𑒞𑓂𑒩𑒧𑒹 𑒖𑒪 𑒁𑒢𑒥𑒰𑒍𑒪,
𑒞𑒰𑒏𑒪 𑒦𑒲𑒭𑓂𑒧 𑒁𑒩𑓂𑒖𑒳𑒢 𑒠𑒱𑒮 𑒤𑒹𑒩 𑒣𑒰𑒩𑓂𑒟 𑒔𑒪𑒰𑒍𑒪,
𑒫𑒰𑒝𑒮𑒿 𑒮𑒼𑒞 𑒢𑒱𑒏𑒪𑒪 𑒖𑒪𑒏 𑒆𑒣𑒩 𑒠𑒱𑒮,
𑒣𑒰𑒢𑒱 𑒐𑒮𑒪 𑒧𑒳𑒐 𑒦𑒲𑒭𑓂𑒧 𑒦𑒹𑒪𑒰𑒯 𑒤𑒹𑒩 𑒞𑒱𑒩𑒣𑒱𑒞।
𑒮𑒴𑒩𑓂𑒨 𑒕𑒟𑒱 𑒁𑒐𑒢 𑒠𑒏𑓂𑒭𑒱𑒝𑒰𑒨𑒝𑒧𑒹 𑒖𑒰𑒆 𑒮𑒦 𑒏𑓂𑒨𑒼,
𑒣𑓂𑒩𑒰𑒝 𑒞𑓂𑒨𑒰𑒑𑒥 𑒯𑒧 𑒅𑒞𑓂𑒞𑒩𑒰𑒨𑒝𑒧𑒹 𑒣𑒯𑒳𑒿𑒔𑒪 𑒏𑒩𑓂𑒝 𑒮𑒹𑒯𑒼।
𑒏𑒩𑒥𑒠𑓂𑒡 𑒣𑓂𑒩𑒝𑒰𑒧 𑒏𑒋 𑒪𑒋 𑒂𑒬𑒲𑒩𑓂𑒫𑒰𑒠 𑒚𑒰𑒜𑓃 𑒍𑒞𑒋,
𑒦𑒲𑒭𑓂𑒧 𑒏𑒯𑒪 𑒯𑒹 𑒏𑒩𑓂𑒝 𑒨𑒳𑒠𑓂𑒡𑒏𑒹𑒿 𑒩𑒼𑒏𑒴 𑒏𑒳𑒢𑓂𑒞𑒲𑒣𑒳𑒞𑓂𑒩 𑒁𑒯𑒰𑒿 𑒕𑒲,
𑒁𑒩𑓂𑒖𑒳𑒢𑒏𑒹𑒿 𑒢𑒯𑒱 𑒯𑒩𑒰 𑒮𑒏𑒥 𑒁𑒯𑒿𑒏 𑒞𑒳𑒔𑓂𑒕 𑒃𑒔𑓂𑒕𑒰 𑒄।
𑒏𑒼𑒢 𑒨𑒳𑒠𑓂𑒡𑒧𑒹 𑒁𑒩𑓂𑒖𑒳𑒢𑒮𑒿 𑒕𑒲 𑒥𑒪𑒬𑒰𑒪𑒲 𑒠𑒹𑒪𑒯𑒳𑒿 𑒣𑓂𑒩𑒧𑒰𑒝?
𑒁𑒯𑒰𑒿 𑒥𑒳𑒗𑒰𑒋𑒥 𑒠𑒳𑒩𑓂𑒨𑒼𑒡𑒢 𑒧𑒰𑒢𑒞 𑒕𑒲 𑒯𑒧 𑒖𑒰𑒢𑒱।
𑒏𑒩𑓂𑒝 𑒏𑒯𑒪 𑒯𑒧 𑒮𑒰𑒩𑒟𑒲𑒣𑒳𑒞𑓂𑒩 𑒠𑒳𑒩𑓂𑒨𑒼𑒡𑒢𑒏 𑒣𑒰𑒍𑒪 𑒮𑒧𑓂𑒧𑒰𑒢,
𑒩𑒰𑒖𑒰 𑒦𑒹𑒪𑒯𑒳𑒿 𑒠𑒳𑒩𑓂𑒨𑒼𑒡𑒢𑒏 𑒆𑒿𑒔 𑒅𑒚𑒰𑒍𑒪 𑒯𑒧𑒩𑒰,
𑒣𑒰𑒝𑓂𑒛𑒫 𑒣𑒾𑒞𑓂𑒩 𑒁𑒯𑒰𑒿𑒏 𑒩𑒯𑒟𑒱 𑒬𑒮𑓂𑒞𑓂𑒩 𑒅𑒚𑒰𑒍𑒪 𑒏𑒱𑒋𑒏?
𑒏𑒾𑒩𑒫𑒑𑒝𑒏𑒹𑒿 𑒁𑒯𑒰𑒿 𑒏𑒱𑒋𑒏 𑒢𑒯𑒱 𑒥𑒳𑒗𑒰𑒍𑒪,
𑒨𑒳𑒠𑓂𑒡 𑒥𑒜𑓃𑒪 𑒁𑒕𑒱 𑒂𑒑𑒰𑒿, 𑒏𑒼𑒢𑒰 𑒯𑒧 𑒕𑒼𑒛𑓃𑒥 𑒠𑒳𑒩𑓂𑒨𑒼𑒡𑒢 𑒧𑒖𑒡𑒰𑒩।
𑒠𑒮 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒥𑒰𑒠,
𑒠𑓂𑒩𑒼𑒝 𑒥𑒢𑒪𑒰𑒯 𑒮𑒹𑒢𑒰𑒣𑒞𑒱 𑒂𑒥।
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒏𑒩𑒴 𑒋𑒏 𑒏𑒰𑒖,
𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒣𑒏𑒛𑓃𑒱 𑒏𑒩𑒴 𑒨𑒳𑒠𑓂𑒡 𑒮𑒧𑒰𑒣𑓂𑒞।
𑒧𑒳𑒠𑒰 𑒁𑒩𑓂𑒖𑒳𑒢 𑒁𑒕𑒱 𑒍𑒞𑒋 𑒮𑒞𑒞,
𑒠𑒴𑒩 𑒯𑒙𑒋𑒥𑒰𑒏 𑒏𑒩𑒴 𑒏𑒼𑒢𑒼 𑒁𑒩𑓂𑒟,
𑒠𑒳𑒩𑓂𑒨𑒼𑒡𑒢 𑒥𑒖𑒰𑒍𑒪 𑒩𑒰𑒖𑒰 𑒠𑒹𑒬 𑒞𑓂𑒩𑒱𑒑𑒩𑓂𑒞,
𑒩𑒰𑒖 𑒮𑒳𑒬𑒩𑓂𑒧𑒰 𑒮𑓀𑒮𑓂𑒣𑒞𑒏 𑒮𑓀𑒑 𑒔𑒪𑒞,
𑒪𑒋 𑒁𑒩𑓂𑒖𑒳𑒢𑒏𑒹𑒿 𑒠𑒴𑒩 𑒨𑒳𑒡𑒱𑒭𑓂𑒚𑒱𑒩𑒏।
𑒍𑒧𑓂𑒯𑒩 𑒣𑒰𑒝𑓂𑒛𑒫 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩𑒏 𑒩𑒏𑓂𑒭 𑒅𑒣𑒰𑒨,
𑒩𑒏𑓂𑒭𑒏 𑒩𑒯𑒞 𑒁𑒩𑓂𑒖𑒳𑒢-𑒦𑒲𑒧 𑒠𑒳𑒯𑒳 𑒍𑒩 𑒠𑒳𑒯𑒳 𑒦𑒰𑒋।
𑒯𑒼𑒋𑒞 𑒏𑒱𑓀 𑒏𑒰𑒩𑒝𑒮𑒿 𑒏𑒢𑒱𑒏𑒼 𑒠𑒴𑒩 𑒖𑓂𑒨𑒼𑒿 𑒏𑓂𑒨𑒼,
𑒢𑒏𑒳𑒪 𑒮𑒯𑒠𑒹𑒫 𑒮𑒰𑒞𑓂𑒨𑒱𑒏𑒲 𑒪𑒹𑒞 𑒮𑓂𑒟𑒰𑒢 𑒩𑒱𑒏𑓂𑒞 𑒍।
𑒠𑓂𑒩𑒼𑒝𑒏 𑒮𑓀𑒑 𑒕𑒪 𑒏𑒩𑓂𑒝 𑒁𑒬𑒫𑒞𑓂𑒟𑒰𑒧𑒰,
𑒖𑒨𑒠𑓂𑒩𑒟 𑒏𑒵𑒣,𑒏𑒵𑒞𑒫𑒩𑓂𑒧𑒰, 𑒏𑒪𑒱𑓀𑒑 𑒢𑒩𑒹𑒬।
𑒞𑓂𑒩𑒱𑒑𑒩𑓂𑒞𑒩𑒰𑒖 𑒮𑒳𑒬𑒩𑓂𑒧𑒰 𑒠𑒹𑒪𑒏 𑒪𑒪𑒏𑒰𑒩𑒰,
𑒁𑒩𑓂𑒖𑒳𑒢 𑒠𑒹𑒐𑒱 𑒮𑒞𑒩𑓂𑒏 𑒏𑒋𑒪 𑒮𑒰𑒞𑓂𑒨𑒱𑒏𑒲 𑒏𑒹𑒿।
𑒑𑒳𑒩𑒳𑒬𑒱𑒭𑓂𑒨 𑒥𑒱𑒔 𑒂𑒥 𑒬𑒳𑒩𑒳 𑒯𑒼𑒋𑒞 𑒨𑒳𑒠𑓂𑒡,
𑒞𑒲𑒩 𑒠𑒳𑒃 𑒙𑒰 𑒕𑒼𑒛𑓃𑒱 𑒁𑒩𑓂𑒖𑒳𑒢 𑒏𑒋𑒪 𑒂𑒩𑒧𑓂𑒦,
𑒐𑒮𑒪 𑒣𑒠𑒣𑒩 𑒠𑓂𑒩𑒼𑒝𑒏 𑒁𑒩𑓂𑒖𑒳𑒢𑒏 𑒄 𑒠𑒳𑒯𑒳 𑒫𑒰𑒝।
𑒂𑒯 𑒥𑓂𑒨𑒰𑒮 𑒣𑓂𑒩𑒝𑒰𑒧 !!
𑒏𑒋 𑒣𑓂𑒩𑒝𑒰𑒧 𑒪𑒋 𑒂𑒬𑒲𑒭 𑒑𑒳𑒩𑒳𑒏 𑒂𑒃 𑒁𑒩𑓂𑒖𑒳𑒢,
𑒦𑒱𑒢𑓂𑒢 𑒩𑒲𑒞𑒱𑒏 𑒣𑓂𑒩𑒹𑒧 𑒢𑒯𑒱 𑒕𑒪 𑒢𑒳𑒏𑒰𑒋𑒪 𑒏𑒯𑒰𑒿।
𑒏𑒋𑒪 𑒂𑒏𑓂𑒩𑒧𑒝 𑒣𑒰𑒝𑓂𑒛𑒫𑒣𑒩 𑒮𑒼𑒗𑒰𑒿𑒮𑒿 𑒠𑓂𑒩𑒼𑒝 𑒣𑒰𑒩𑓂𑒬𑓂𑒫𑒮𑒿 𑒏𑒩𑓂𑒝,
𑒮𑒳𑒬𑒩𑓂𑒧𑒰𑒏 𑒣𑒰𑒕𑒰𑒿 𑒁𑒩𑓂𑒖𑒳𑒢 𑒬𑒪𑓂𑒨 𑒂𑒥𑒱 𑒑𑒹𑒪 𑒪𑒛𑓃𑒥𑒰 𑒪𑒋 𑒦𑒲𑒧𑒮𑒿,
𑒏𑒩𑓂𑒝 𑒏𑒋𑒪 𑒂𑒏𑓂𑒩𑒧𑒝 𑒮𑒰𑒞𑓂𑒨𑒱𑒏𑒲 𑒕𑒪 𑒞𑓂𑒫𑒩𑒱𑒞 𑒍𑒞𑒋।
𑒮𑒯𑒠𑒹𑒫𑒮𑒿 𑒦𑒱𑒛𑓃𑒪 𑒬𑒏𑒳𑒢𑒱 𑒢𑒏𑒳𑒪 𑒙𑒰 𑒥𑒰𑒿𑒔𑒪 𑒍𑒞𑒋,
𑒠𑓂𑒩𑒼𑒝 𑒥𑒜𑓃𑒪 𑒮𑒼𑒩 𑒦𑒹𑒪 𑒣𑒏𑒛𑓃𑒪 𑒠𑓂𑒩𑒼𑒝 𑒨𑒳𑒡𑒱𑒭𑓂𑒚𑒱𑒩𑒏𑒹𑒿,
𑒁𑒩𑓂𑒖𑒳𑒢 𑒕𑒼𑒛𑓃𑒱 𑒞𑓂𑒩𑒱𑒑𑒩𑓂𑒞 𑒢𑒩𑒹𑒬 𑒒𑒳𑒩𑒱 𑒂𑒋𑒪 𑒖𑒹,
𑒠𑓂𑒩𑒼𑒝 𑒕𑒼𑒛𑓃𑒪 𑒂𑒬𑒰 𑒣𑒏𑒛𑓃𑒥𑒰𑒏 𑒨𑒳𑒡𑒱𑒭𑓂𑒚𑒱𑒩,
𑒮𑒰𑒿𑒗 𑒦𑒹𑒪 𑒨𑒳𑒠𑓂𑒡 𑒥𑒢𑓂𑒠𑒲𑒏 𑒬𑓀𑒐𑒢𑒰𑒠𑒏 𑒥𑒱𑒔।
𑒥𑒰𑒩𑒯𑒧 𑒠𑒱𑒢 𑒮𑒹𑒯𑒼 𑒞𑓂𑒩𑒱𑒑𑒩𑓂𑒞 𑒮𑒦 𑒠𑒹𑒪 𑒪𑒪𑒏𑒰𑒩𑒰,
𑒧𑒳𑒠𑒰 𑒫𑒹𑒑𑒮𑒿 𑒂𑒏𑓂𑒩𑒧𑒝 𑒏𑒋 𑒁𑒩𑓂𑒖𑒳𑒢 𑒏𑒋𑒪 𑒮𑓀𑒯𑒰𑒩,
𑒒𑒳𑒩𑒱 𑒥𑒜𑓃𑒪 𑒠𑒹𑒐𑒪 𑒦𑒑𑒠𑒞𑓂𑒞 𑒕𑒪 𑒯𑒰𑒟𑒲𑒣𑒩 𑒮𑒫𑒰𑒩,
𑒯𑒰𑒟𑒲𑒏-𑒁𑓀𑒏𑒳𑒬 𑒤𑒹𑓀𑒏𑒱 𑒏𑒋𑒪 𑒍 𑒁𑒩𑓂𑒖𑒳𑒢𑒣𑒩 𑒣𑓂𑒩𑒯𑒰𑒩,
𑒏𑒵𑒭𑓂𑒝 𑒩𑒼𑒏𑒪 𑒁𑓀𑒏𑒳𑒬, 𑒁𑒩𑓂𑒖𑒳𑒢 𑒪𑒹𑒪𑒏 𑒍𑒏𑒩 𑒣𑓂𑒩𑒰𑒝, 𑒁𑒩𑓂𑒡𑒔𑒢𑓂𑒠𑓂𑒩 𑒫𑒰𑒝𑒮𑒿।
𑒠𑓂𑒩𑒼𑒝 𑒥𑒜𑓃𑒪 𑒨𑒳𑒡𑒱𑒭𑓂𑒚𑒱𑒩 𑒠𑒱𑒮 𑒮𑒞𑓂𑒨𑒖𑒱𑒞 𑒩𑒏𑓂𑒭𑒏 𑒕𑒪 𑒂𑒃,
𑒧𑒰𑒩𑒱 𑒁𑒬𑓂𑒫𑒏𑒹𑒿 𑒠𑓂𑒩𑒼𑒝𑒏 𑒮𑒞𑓂𑒨𑒖𑒱𑒞 𑒩𑒟𑒏 𑒣𑒯𑒱𑒂 𑒠𑒹𑒪 𑒏𑒰𑒙𑒱।
𑒠𑓂𑒩𑒼𑒝𑒏 𑒁𑒩𑓂𑒡𑒔𑒢𑓂𑒠𑓂𑒩𑒫𑒰𑒝𑒮𑒿 𑒮𑒞𑓂𑒨𑒖𑒱𑒞𑒏 𑒑𑒩𑒠𑒢𑒱 𑒐𑒮𑒪 𑒁𑒩𑒛𑓃𑒰𑒋।
𑒨𑒳𑒡𑒱𑒭𑓂𑒚𑒱𑒩 𑒧𑒩𑒱𑒞𑒯𑒱 𑒠𑒹𑒐𑒱 𑒮𑒞𑓂𑒨𑒖𑒱𑒞𑒏𑒹𑒿 𑒒𑒳𑒩𑒪 𑒩𑒝𑒮𑒿 𑒁𑒫𑒱𑒪𑒧𑓂𑒥,
𑒁𑒩𑓂𑒖𑒳𑒢 𑒢𑒯𑒱 𑒣𑒰𑒥𑒱 𑒨𑒳𑒡𑒱𑒭𑓂𑒚𑒱𑒩 𑒦𑒹𑒪 𑒥𑒞𑒰𑒯 𑒧𑒰𑒩𑒪 𑒖𑒢 𑒁𑒟𑒰𑒯,
𑒠𑓂𑒩𑒼𑒝 𑒠𑒹𑒐𑒱 𑒁𑒩𑓂𑒖𑒳𑒢𑒏 𑒄 𑒩𑒴𑒣 𑒦𑒹𑒪𑒰𑒯 𑒯𑒞𑒰𑒬 𑒮𑓀𑒡𑓂𑒨𑒰𑒏 𑒬𑓀𑒐𑒏 𑒂𑒬।
𑒠𑒱𑒢 𑒥𑒱𑒞𑒪 𑒠𑒳𑒩𑓂𑒨𑒼𑒡𑒢 𑒏𑒯𑒪 𑒯𑒹 𑒑𑒳𑒩𑒳 𑒠𑓂𑒩𑒼𑒝,
𑒮𑓂𑒢𑒹𑒯 𑒁𑒕𑒱 𑒁𑒯𑒰𑒿𑒏 𑒣𑒰𑒝𑓂𑒛𑒫𑒏 𑒣𑓂𑒩𑒞𑒱 𑒞𑒹𑒿 𑒄 𑒠𑒼𑒭,
𑒠𑓂𑒩𑒼𑒝 𑒦𑒹𑒪 𑒏𑓂𑒭𑒼𑒦𑒱𑒞 𑒏𑒯𑒪 𑒥𑒢𑒰𑒋𑒥 𑒔𑒏𑓂𑒩𑒫𑓂𑒨𑒴𑒯 𑒖𑒏𑒩 𑒞𑒼𑒛𑓃,
𑒁𑒩𑓂𑒖𑒳𑒢𑒏 𑒁𑒞𑒱𑒩𑒱𑒏𑓂𑒞 𑒨𑒳𑒡𑒱𑒭𑓂𑒚𑒱𑒩𑒏 𑒪𑒑 𑒁𑒕𑒱 𑒢𑒯𑒱 𑒫𑓂𑒨𑒼𑒿𑒞।
𑒤𑒹𑒩 𑒞𑒹𑒩𑒯𑒧 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒬𑒳𑒩𑒳 𑒖𑒐𑒢,
𑒮𑓀𑒮𑒣𑓂𑒞𑒏 𑒂 𑒞𑓂𑒩𑒱𑒑𑒩𑓂𑒞𑒏𑒹𑒿 𑒣𑒕𑒳𑒂𑒥𑒻𑒞 𑒑𑒹𑒪 𑒁𑒩𑓂𑒖𑒳𑒢।
𑒞𑒐𑒢𑒯𑒱 𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒣𑒞𑒰 𑒔𑒪 𑒔𑒏𑓂𑒩𑒫𑓂𑒨𑒴𑒯𑒏,
𑒁𑒦𑒱𑒧𑒢𑓂𑒨𑒳 𑒠𑒹𑒐𑒱 𑒔𑒱𑒢𑓂𑒞𑒱𑒞 𑒏𑒰𑒏𑒰𑒏𑒹𑒿 𑒏𑒯𑒪,
𑒑𑒩𑓂𑒦𑒧𑒹 𑒮𑒳𑒢𑒪 𑒣𑒱𑒞𑒰 𑒧𑒰𑒞𑒰𑒏𑒹𑒿 𑒫𑒩𑓂𑒝𑒢 𑒮𑒳𑒢𑒥𑒻𑒞 𑒕𑒪,
𑒔𑓂𑒏𑓂𑒩𑒫𑓂𑒨𑒴𑒯𑒏 𑒕𑒯 𑒠𑓂𑒫𑒰𑒩𑒏𑒹𑒿 𑒞𑒼𑒛𑓃𑒥𑒰𑒏 𑒮𑒦𑒙𑒰,
𑒮𑓂𑒧𑒩𑒝 𑒨𑒳𑒠𑓂𑒡𑒏 𑒫𑒩𑓂𑒝𑒢𑒏 𑒫𑒱𑒡𑒱 𑒥𑒔𑒪 𑒢𑒯𑒱 𑒏𑒼𑒢𑒼𑒙𑒰।
𑒧𑒳𑒠𑒰 𑒮𑒰𑒞𑒧 𑒠𑓂𑒫𑒰𑒩𑒏 𑒨𑒳𑒠𑓂𑒡𑒏 𑒫𑒩𑓂𑒝𑒢 𑒮𑒳𑒢𑒪 𑒢𑒯𑒱,
𑒧𑒰𑒞𑒰 𑒮𑒳𑒞𑒪𑒱 𑒞𑒐𑒢𑒹 𑒥𑒔𑒪 𑒋𑒏𑒹𑒙𑒰 𑒠𑓂𑒫𑒰𑒩 𑒮𑒻𑒯।
𑒏𑒫𑒱 𑒥𑓂𑒨𑒰𑒮𑒏 𑒣𑒹𑒙𑒧𑒹 𑒮𑒲𑒐𑒱 𑒁𑒋𑒥𑒰𑒏 𑒥𑒱𑒧𑓂𑒥, 𑒬𑒥𑓂𑒠𑒰𑒩𑓂𑒟 𑒢𑒯𑒱 𑒫𑒲𑒩𑒏 𑒁𑒕𑒱 𑒄 𑒣𑓂𑒩𑒞𑒲𑒏 ।
𑒮𑒼𑒗𑒰𑒿 𑒞𑒐𑒢 𑒥𑒜𑓃𑒪 𑒁𑒦𑒱𑒧𑒢𑓂𑒨𑒳 𑒏𑒏𑒩𑒼 𑒢𑒯𑒱 𑒥𑒳𑒗𑒰𑒋𑒪,
𑒏𑒞𑒋 𑒁𑒕𑒱 𑒠𑓂𑒫𑒰𑒩 𑒏𑒞𑒋 𑒣𑓂𑒩𑒫𑒹𑒬 𑒖𑒨𑒠𑓂𑒩𑒟 𑒩𑒏𑓂𑒭𑒏 𑒖𑒞𑒋,
𑒂𑒅 𑒦𑒲𑒧 𑒏𑒰𑒏 𑒄 𑒁𑒕𑒱 𑒣𑓂𑒩𑒫𑒹𑒬 𑒠𑓂𑒫𑒰𑒩 𑒣𑒻𑒮𑒥 𑒋𑒞𑒯𑒱।
𑒁𑒦𑒱𑒧𑒢𑓂𑒨𑒳 𑒏𑒋 𑒣𑓂𑒩𑒯𑒰𑒩 𑒖𑒨𑒠𑓂𑒩𑒟𑒣𑒩 𑒫𑒰𑒝𑒮𑒿 𑒑𑒹𑒪 𑒦𑒲𑒞𑒩,
𑒦𑒲𑒧 𑒠𑒼𑒮𑒩 𑒮𑒹𑒢𑒰𑒢𑒲𑒏𑒹𑒿 𑒩𑒼𑒏𑒱 𑒖𑒨𑒠𑓂𑒩𑒟 𑒚𑒰𑒜𑓃 𑒍𑒞𑒯𑒱।
𑒠𑒼𑒮𑒩 𑒠𑓂𑒫𑒰𑒩𑒣𑒩 𑒠𑓂𑒩𑒼𑒝 𑒚𑒰𑒜𑓃 𑒖𑒐𑒢𑒹 𑒫𑒰𑒝 𑒔𑒪𑒰𑒥𑒟𑒱,
𑒏𑒰𑒙𑒪 𑒡𑒢𑒳𑒭 𑒠𑓂𑒩𑒼𑒝𑒏 𑒫𑓂𑒨𑒴𑒯 𑒦𑒹𑒠𑒱 𑒥𑒜𑓃𑒪𑒰𑒯 𑒂𑒑𑒴।
𑒞𑒹𑒮𑒩 𑒠𑓂𑒫𑒰𑒩𑒣𑒩 𑒔𑒏𑒱𑒞 𑒏𑒩𑓂𑒝𑒣𑒩 𑒏𑒋 𑒫𑒰𑒝 𑒥𑒩𑒐𑒰,
𑒥𑒜𑓃𑒪 𑒔𑒰𑒩𑒱𑒧 𑒠𑓂𑒫𑒰𑒩𑒣𑒩 𑒁𑒬𑓂𑒫𑒞𑓂𑒟𑒰𑒧𑒰 𑒖𑒞𑒋 𑒕𑒪,
𑒨𑒳𑒠𑓂𑒡 𑒦𑒹𑒪 𑒒𑒢𑒒𑒼𑒩 𑒋𑒞𑒋 𑒧𑒳𑒠𑒰 𑒩𑒼𑒏𑒱 𑒮𑒏𑒪 𑒢𑒯𑒱,
𑒁𑒦𑒱𑒧𑒢𑓂𑒨𑒳𑒏 𑒩𑒟 𑒥𑒜𑓃𑒪 𑒠𑒳𑒩𑓂𑒨𑒼𑒡𑒢 𑒦𑒹𑒪 𑒔𑒱𑒢𑓂𑒞𑒱𑒞,
𑒏𑒩𑓂𑒝 𑒂𑒥 𑒏𑒩𑒥 𑒏𑒲 𑒥𑒰𑒖𑒴 𑒣𑒩𑒰𑒖𑒨 𑒥𑒳𑒖𑒰𑒃𑒕 𑒢𑒱𑒬𑓂𑒔𑒱𑒞।
𑒏𑒩𑓂𑒝 𑒥𑒰𑒖𑒪 𑒮𑒦 𑒧𑒱𑒪𑒱 𑒮𑒰𑒞𑒼 𑒧𑒯𑒰𑒩𑒟𑒲 𑒯𑒧 𑒮𑒦,
𑒩𑒼𑒏𑒱 𑒮𑒏𑒥 𑒋𑒯𑒱 𑒥𑒰𑒪𑒏𑒏𑒹𑒿 𑒢𑒯𑒱 𑒏𑓂𑒨𑒼 𑒮𑒏𑒞 𑒁𑒮𑒑𑒩।
𑒮𑒦 𑒩𑒟𑒲 𑒂 𑒣𑒳𑒞𑓂𑒩 𑒠𑒳𑒩𑓂𑒨𑒼𑒡𑒢𑒏 𑒢𑒰𑒧 𑒪𑒏𑓂𑒭𑓂𑒧𑒝 𑒖𑒹𑒏𑒩,
𑒣𑒯𑒳𑒿𑒔𑒱 𑒑𑒹𑒪 𑒮𑒰𑒞𑒧 𑒠𑓂𑒫𑒰𑒩 𑒣𑒯𑒳𑒿𑒔𑒪 𑒁𑒦𑒱𑒧𑒢𑓂𑒨𑒳 𑒞𑒰𑒫𑒞।
𑒁𑒦𑒱𑒧𑒢𑓂𑒨𑒳𑒏 𑒮𑒰𑒩𑒟𑒲 𑒠𑒹𑒐𑒱 𑒄 𑒠𑒵𑒬𑓂𑒨 𑒍𑒞𑒋 𑒏𑒯𑒪,
𑒄 𑒮𑒦 𑒁𑒡𑒩𑓂𑒧𑒲 𑒁𑒕𑒱 𑒖𑒳𑒙𑒪, 𑒏𑒯𑒴 𑒞𑒿 𑒩𑒟 𑒒𑒳𑒩𑒰𑒋𑒥,
𑒁𑒩𑓂𑒖𑒳𑒢 𑒣𑒳𑒞𑓂𑒩 𑒯𑒧 𑒢𑒯𑒱 𑒕𑒼𑒛𑓃𑒥 𑒨𑒳𑒠𑓂𑒡 𑒯𑒧 𑒋𑒢𑒰 𑒠𑒹𑒐𑒴,
𑒣𑒰𑒩𑓂𑒟-𑒣𑒳𑒞𑓂𑒩𑒏 𑒬𑒾𑒩𑓂𑒨 𑒩𑒟 𑒒𑒳𑒧𑒰𑒆 𑒔𑒏𑓂𑒩𑒰𑒏𑒰𑒩 𑒏𑒋 𑒁𑒯𑒿।
𑒞𑒐𑒢 𑒪𑒏𑓂𑒭𑓂𑒧𑒝 𑒂𑒋𑒪 𑒮𑒼𑒗𑒰𑒿 𑒁𑒦𑒱𑒧𑒢𑓂𑒨𑒳𑒏 𑒍𑒞𑒋,
𑒫𑒰𑒝𑒮𑒿 𑒏𑒰𑒙𑒪 𑒧𑒮𑓂𑒞𑒏 𑒪𑒏𑓂𑒭𑓂𑒧𑒝𑒏, 𑒠𑓂𑒩𑒼𑒝 𑒏𑒯𑒪, 𑒁𑒖𑒹𑒨 𑒄 𑒁𑒕𑒱 𑒁𑒦𑒹𑒠𑓂𑒨 𑒋𑒏𑒩 𑒏𑒫𑒔 𑒏𑒩𑒴 𑒣𑓂𑒩𑒯𑒰𑒩 𑒮𑒱𑒩𑒮𑒱 𑒂
𑒞𑒐𑒢𑒯𑒱 𑒮𑒰𑒩𑒟𑒱 𑒁𑒦𑒱𑒧𑒢𑓂𑒨𑒳𑒏 𑒐𑒮𑒪 𑒙𑒴𑒙𑒱 𑒑𑒹𑒪 𑒩𑒟 ।
𑒢𑒲𑒔𑒰𑒿 𑒂𑒥𑒱 𑒞𑒩𑒳𑒂𑒩𑒱 𑒔𑒏𑓂𑒩 𑒑𑒠𑒰 𑒪𑒋 𑒍𑒞𑒋 𑒍 𑒔𑒪𑒪,
𑒠𑒳𑓁𑒬𑒰𑒮𑒢𑒏 𑒣𑒳𑒞𑓂𑒩𑒮𑒿 𑒑𑒠𑒰 𑒨𑒳𑒠𑓂𑒡 𑒦𑒹𑒪 𑒠𑒳𑒢𑒴 𑒍𑒞𑒯𑒱 𑒐𑒮𑒪 ।
𑒣𑒯𑒱𑒢𑒹 𑒅𑒚𑒱 𑒠𑒳𑓁𑒬𑒰𑒮𑒢𑒏 𑒣𑒳𑒞𑓂𑒩 𑒣𑓂𑒩𑒯𑒰𑒩 𑒏𑒋𑒪𑒏 𑒧𑒮𑓂𑒞𑒏𑒣𑒩,
𑒮𑒣𑓂𑒞𑒩𑒟𑒲𑒏 𑒥𑒲𑒔 𑒐𑒮𑒱 𑒣𑒛𑓃𑒪 𑒮𑒳𑒦𑒠𑓂𑒩𑒰𑒣𑒳𑒞𑓂𑒩 𑒣𑒞𑒱 𑒅𑒞𑓂𑒞𑒩𑒰𑒏।
𑒮𑒳𑒦𑒠𑓂𑒩𑒰 𑒅𑒞𑓂𑒞𑒩𑒰 𑒣𑒯𑒳𑒿𑒔𑒱 𑒑𑒹𑒪𑒲𑒯 𑒮𑒰𑒞𑒧 𑒠𑓂𑒫𑒰𑒩 𑒫𑒱𑒪𑒐𑒻𑒞,
𑒅𑒞𑓂𑒞𑒩𑒰 𑒏𑒯𑒪𑒢𑓂𑒯𑒱 𑒧𑒰𑒞𑒰 𑒧𑒵𑒞𑓂𑒨𑒳𑒏 𑒂𑒖𑓂𑒘𑒰 𑒠𑒱𑒁 𑒋𑒞𑒯𑒱।
𑒧𑒳𑒠𑒰 𑒑𑒩𑓂𑒦 𑒕𑒪 𑒅𑒞𑓂𑒞𑒩𑒰𑒏 𑒣𑒹𑒙𑒧𑒹 𑒮𑒳𑒦𑒠𑓂𑒩𑒰 𑒥𑒳𑒗𑒍𑒪𑒢𑓂𑒯𑒱,
𑒍𑒧𑓂𑒯𑒩 𑒞𑓂𑒩𑒱𑒑𑒩𑓂𑒞 𑒮𑓀𑒮𑒣𑓂𑒞𑒏𑒏𑒹𑒿 𑒏𑒩𑒱 𑒣𑒴𑒩𑓂𑒝𑒩𑒴𑒣𑒹𑒿 𑒮𑓀𑒯𑒰𑒩,
𑒁𑒩𑓂𑒖𑒳𑒢 𑒒𑒳𑒩𑒪 𑒮𑒼𑒔𑒻𑒞 𑒨𑒳𑒡𑒱𑒭𑓂𑒚𑒱𑒩 𑒯𑒼𑒟𑒱 𑒮𑒳𑒩𑒏𑓂𑒭𑒱𑒞 ।
𑒮𑒳𑒢𑒱 𑒧𑒵𑒞𑓂𑒨𑒳𑒏 𑒮𑒧𑒔𑒰𑒩 𑒫𑒱𑒔𑒪 𑒏𑒵𑒭𑓂𑒝 𑒏𑒯𑒪 𑒁𑒩𑓂𑒖𑒳𑒢,
𑒏𑒰𑒩𑒝 𑒧𑒵𑒞𑓂𑒨𑒳𑒏 𑒁𑒕𑒱 𑒧𑒰𑒞𑓂𑒩 𑒥𑒯𑒢𑒼𑒃-𑒖𑒨𑒠𑓂𑒩𑒟,
𑒏𑒋 𑒬𑒱𑒫𑒏 𑒞𑒣𑒮𑓂𑒨𑒰 𑒦𑒹𑒙𑒪 𑒫𑒩 𑒍𑒏𑒩𑒰 𑒄,
𑒁𑒩𑓂𑒖𑒳𑒢 𑒕𑒼𑒛𑓃𑒱 𑒂𑒢 𑒣𑒰𑒝𑓂𑒛𑒫 𑒢𑒯𑒱 𑒖𑒲𑒞𑒞𑒰𑒯 𑒍𑒏𑒩𑒰।
𑒣𑓂𑒩𑒟𑒧 𑒠𑓂𑒫𑒰𑒩𑒣𑒩 𑒚𑒰𑒜𑓃 𑒍 𑒩𑒼𑒏𑒪 𑒔𑒰𑒩𑒴 𑒦𑒰𑒿𑒋𑒏𑒹 𑒍𑒞𑒯𑒱।
𑒮𑒳𑒢𑒞𑒯𑒱 𑒄 𑒁𑒩𑓂𑒖𑒳𑒢 𑒏𑒋𑒪 𑒫𑒡 𑒏𑒩𑒥 𑒏𑒰𑒪𑓂𑒯𑒱 𑒮𑒴𑒩𑓂𑒨𑒰𑒮𑓂𑒞𑒏 𑒣𑒯𑒱𑒢𑒹,
𑒖𑒨𑒠𑓂𑒩𑒟𑒏 𑒫𑒡 𑒏𑒩𑒥 𑒢𑒯𑒱 𑒞𑒿 𑒏𑒩𑒥 𑒁𑒑𑓂𑒢𑒱𑒏𑒹𑒿 𑒮𑒧𑒩𑓂𑒣𑒱𑒞 𑒚𑒰𑒧𑒯𑒱।
𑒔𑒾𑒠𑒯𑒧 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒣𑓂𑒩𑒰𑒩𑒧𑓂𑒦,
𑒬𑒏𑒙-𑒫𑓂𑒨𑒴𑒯 𑒠𑓂𑒩𑒼𑒝𑒏 𑒗𑒰𑒿𑒣𑒪 𑒖𑒨𑒠𑓂𑒩𑒟 ।
𑒠𑓂𑒫𑒰𑒩𑒣𑒩 𑒫𑓂𑒨𑒴𑒯𑒏 𑒣𑓂𑒩𑒯𑒩𑒲 𑒠𑓂𑒩𑒼𑒝 𑒕𑒪𑒰𑒯 𑒚𑒰𑒜𑓃,
𑒫𑒱𑒏𑒙 𑒨𑒳𑒠𑓂𑒡 𑒏𑒵𑒭𑓂𑒝 𑒪𑒹𑒪 𑒩𑒟 𑒏𑒢𑒕𑒱𑒨𑒰𑒯 ।
𑒠𑓂𑒩𑒼𑒝 𑒪𑒪𑒏𑒰𑒩𑒱 𑒏𑒯𑒪 𑒁𑒩𑓂𑒖𑒳𑒢 𑒨𑒳𑒠𑓂𑒡𑒮𑒿 𑒩𑒯𑒪 𑒕𑒲 𑒦𑒰𑒑𑒱,
𑒧𑒳𑒠𑒰 𑒁𑒩𑓂𑒖𑒳𑒢𑒏𑒹𑒿 𑒂𑒃 𑒕𑒪 𑒠𑒼𑒮𑒩 𑒡𑒳𑒢𑒱 𑒮𑒥𑒰𑒩𑒱 ।
𑒏𑒵𑒭𑓂𑒝 𑒩𑒟 𑒪𑒋 𑒦𑒲𑒞𑒩 𑒫𑓂𑒨𑒴𑒯𑒧𑒹 𑒣𑒻𑒮𑒪𑒰𑒯,
𑒥𑒹𑒩𑒴 𑒣𑒯𑒩 𑒔𑒱𑒢𑓂𑒞𑒱𑒞 𑒨𑒳𑒡𑒱𑒭𑓂𑒚𑒱𑒩 𑒣𑒚𑒰𑒍𑒪 𑒮𑒰𑒞𑓂𑒨𑒱𑒏𑒲 𑒦𑒲𑒧,
𑒖𑒰𑒆 𑒁𑒩𑓂𑒖𑒳𑒢𑒏 𑒮𑒯𑒰𑒨𑒰𑒩𑓂𑒟 𑒏𑒯𑒱 𑒠𑒳𑒢𑒴 𑒥𑒜𑒪 𑒂𑒑𑒰𑒿 ।
𑒦𑒴𑒩𑒱𑒬𑓂𑒩𑒫𑒰 𑒏𑒋𑒪𑒏 𑒂𑒏𑓂𑒩𑒧𑒝 𑒮𑒰𑒞𑓂𑒨𑒱𑒏𑒲𑒣𑒩 𑒞𑒐𑒢,
𑒫𑒰𑒝 𑒁𑒩𑓂𑒖𑒳𑒢𑒏 𑒥𑒜𑓃𑒪 𑒍𑒏𑒩 𑒠𑒱𑒮 𑒠𑒳𑒯𑒳 𑒯𑒰𑒟 𑒏𑒙𑒪 𑒍𑒏𑒩 ।
𑒏𑒲 𑒏𑒋𑒪 𑒁𑒩𑓂𑒖𑒳𑒢 𑒁𑒯𑒰𑒿 𑒯𑒧 𑒪𑒛𑓃𑒱 𑒩𑒯𑒪 𑒕𑒪𑒯𑒳𑒿 𑒮𑒰𑒞𑓂𑒨𑒱𑒏𑒲𑒮𑒿,
𑒯𑒧𑒩 𑒯𑒰𑒟 𑒏𑒰𑒙𑒪 𑒁𑒯𑒰𑒿 𑒁𑒕𑒱 𑒏𑒼𑒢 𑒢𑓂𑒨𑒰𑒨 𑒥𑒞𑒰𑒆 𑒤𑒩𑒱𑒕𑒰𑒏𑒹𑒿।
𑒁𑒩𑓂𑒖𑒳𑒢 𑒏𑒯𑒪𑒢𑓂𑒯𑒱 𑒁𑒦𑒱𑒧𑒢𑓂𑒨𑒳𑒏 𑒫𑒡 𑒏𑒋𑒪 𑒁𑒯𑒰𑒿 𑒮𑒦 𑒏𑒼𑒢𑒰,
𑒢𑓂𑒨𑒰𑒨𑒏 𑒥𑒰𑒞 𑒏𑒩𑒋 𑒕𑒲, 𑒩𑒏𑓂𑒭𑒰 𑒏𑒋𑒪 𑒯𑒧 𑒮𑒞𑓂𑒨𑒱𑒏𑒲𑒏 𑒖𑒹𑒯𑒰𑒿।
𑒦𑒴𑒩𑒱𑒬𑓂𑒩𑒫𑒰 𑒐𑒮𑒪 𑒁𑒔𑒹𑒞 𑒮𑒰𑒞𑓂𑒨𑒱𑒏𑒲 𑒏𑒰𑒙𑒪 𑒧𑒴𑒛𑓃𑒲 𑒦𑒴𑒩𑒱𑒬𑓂𑒩𑒫𑒰𑒏 ।
𑒁𑒩𑓂𑒖𑒳𑒢 𑒠𑒹𑒐𑒱 𑒦𑒲𑒧 𑒮𑒰𑒞𑓂𑒨𑒱𑒏𑒲𑒏𑒹𑒿 𑒦𑒹𑒪 𑒔𑒱𑒢𑓂𑒞𑒱𑒞 𑒒𑒳𑒩𑒪,
𑒨𑒳𑒡𑒱𑒭𑓂𑒚𑒱𑒩𑒏 𑒧𑒼𑒢 𑒕𑒪𑒢𑓂𑒯𑒱 𑒯𑒳𑒢𑒏𑒰 𑒣𑒛𑓃𑒪 ।
𑒞𑒐𑒢𑒹 𑒮𑒴𑒩𑓂𑒨𑒰𑒮𑓂𑒞 𑒦𑒹𑒪 𑒁𑒩𑓂𑒖𑒳𑒢 𑒅𑒞𑒰𑒩𑒱 𑒠𑒹𑒪 𑒑𑒰𑒝𑓂𑒛𑒲𑒫,
𑒔𑒱𑒞𑒰 𑒕𑒪 𑒮𑒼𑒗𑒰𑒿 𑒂𑒑𑒱 𑒡𑒯𑒡𑒯,
𑒏𑒩𑒻𑒞 𑒣𑒰𑒝𑓂𑒛𑒫𑒏 𑒂𑒿𑒐𑒱 𑒗𑒱𑒪𑒧𑒱𑒪।
𑒥𑒜𑓃𑒪 𑒁𑒩𑓂𑒖𑒳𑒢 𑒥𑒱𑒢𑒰 𑒬𑒮𑓂𑒞𑓂𑒩-𑒁𑒮𑓂𑒞𑓂𑒩 𑒔𑒱𑒞𑒰 𑒠𑒱𑒮,
𑒥𑒰𑒖𑒪 𑒏𑒵𑒭𑓂𑒝 𑒏𑓂𑒭𑒞𑓂𑒩𑒱𑒨 𑒁𑒩𑓂𑒖𑒳𑒢 𑒪𑒋 𑒁𑒮𑓂𑒞𑓂𑒩 𑒖𑒰𑒆 𑒔𑒱𑒞𑒰𑒧𑒹,
𑒁𑒏𑓂𑒭𑒨 𑒞𑒴𑒝𑒲𑒩 𑒑𑒰𑒝𑓂𑒛𑒲𑒫 𑒢𑒯𑒱 𑒞𑓂𑒨𑒰𑒑𑒲 𑒧𑒵𑒞𑓂𑒨𑒳 𑒮𑓀𑒑 𑒖𑒋𑒞।
𑒧𑒳𑒠𑒰 𑒖𑒐𑒢𑒹 𑒁𑒮𑓂𑒞𑓂𑒩 𑒪𑒹𑒪𑒢𑓂𑒯𑒱 𑒁𑒩𑓂𑒖𑒳𑒢 𑒮𑒴𑒩𑓂𑒨 𑒢𑒱𑒏𑒪𑒪 𑒒𑒙𑒰𑒮𑒿,
𑒮𑒼𑒗𑒰𑒿 𑒕𑒪 𑒖𑒨𑒠𑓂𑒩𑒟 𑒁𑒣𑒙𑒲 𑒐𑒹𑒞𑒧𑒹 𑒧𑒩𑒪 𑒍𑒞𑒯𑒱 𑒁𑒩𑓂𑒖𑒳𑒢𑒏 𑒯𑒰𑒟𑒹𑒿।
𑒧𑒳𑒠𑒰 𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒂𑒥 𑒠𑒳𑒩𑓂𑒨𑒼𑒡𑒢 𑒏𑒩𑒥𑒰𑒍𑒞 𑒏𑒩𑓂𑒝𑒏 𑒁𑒧𑒼𑒒 𑒁𑒮𑓂𑒞𑓂𑒩𑒏 𑒣𑓂𑒩𑒨𑒼𑒑,
𑒦𑒲𑒧𑒣𑒳𑒞𑓂𑒩 𑒒𑒙𑒼𑒞𑓂𑒏𑒔𑒏𑒹𑒿 𑒥𑒖𑒰𑒆 𑒩𑒰𑒏𑓂𑒭𑒮𑒲 𑒨𑒳𑒠𑓂𑒡 𑒩𑒰𑒞𑒱𑒏 𑒏𑒩𑒞 𑒍 𑒦𑒨𑒓𑓂𑒏𑒩,
𑒂𑒋𑒪 𑒩𑒰𑒞𑒱𑒧𑒹 𑒒𑒙𑒼𑒞𑓂𑒏𑒔 𑒏𑒋 𑒥𑒩𑒐𑒰 𑒣𑒰𑒢𑒱 𑒂𑒿𑒏𑒛𑓃-𑒣𑒰𑒟𑒩𑒏 𑒞𑒞𑓂𑒏𑓂𑒭𑒝 ।
𑒠𑒳𑒩𑓂𑒨𑒼𑒡𑒢 𑒠𑒹𑒐𑒱 𑒩𑒴𑒣 𑒄 𑒫𑒱𑒏𑒩𑒰𑒪 𑒦𑒰𑒑𑒻𑒞 𑒏𑒾𑒩𑒫 𑒮𑒹𑒢𑒰𑒏𑒹𑒿 𑒠𑒹𑒐𑒪,
𑒏𑒩𑓂𑒝 𑒧𑒰𑒩𑒴 𑒋𑒏𑒩𑒰 𑒢𑒯𑒱 𑒞𑒿 𑒨𑒳𑒠𑓂𑒡 𑒢𑒱𑒏𑒪𑒪 𑒖𑒰𑒃𑒞 𑒁𑒕𑒱 𑒮𑒏𑒪।
𑒫𑒱𑒫𑒬 𑒦𑒋 𑒏𑒩𑓂𑒝 𑒕𑒼𑒛𑓃𑒪 𑒁𑒧𑒼𑒒 𑒧𑒩𑒪 𑒒𑒙𑒼𑒞𑓂𑒏𑒔 𑒞𑒐𑒢,
𑒣𑒰𑒝𑓂𑒛𑒫 𑒠𑒳𑒐𑒱𑒞 𑒦𑒋𑒪 𑒕𑒪 𑒏𑒩𑓂𑒝 𑒮𑒹𑒯𑒼 𑒔𑒱𑒢𑓂𑒞𑒱𑒞।
𑒩𑒰𑒞𑒱𑒏 𑒦𑒹𑒪 𑒂𑒏𑓂𑒩𑒧𑒝𑒮𑒿 𑒏𑓂𑒭𑒳𑒥𑓂𑒡 𑒏𑓂𑒩𑒳𑒠𑓂𑒡 𑒏𑒾𑒩𑒫 𑒂 𑒠𑓂𑒩𑒼𑒝 𑒁𑒋𑒪𑒰𑒯,
𑒨𑒳𑒡𑒱𑒭𑓂𑒚𑒱𑒩𑒏 𑒩𑒏𑓂𑒭𑒰𑒩𑓂𑒟 𑒋𑒏 𑒠𑒱𑒮 𑒠𑓂𑒩𑒳𑒣𑒠 𑒕𑒪 𑒠𑒼𑒮𑒩 𑒠𑒱𑒮 𑒫𑒱𑒩𑒰𑒙 𑒞𑒏𑒩𑒰।
𑒠𑒹𑒐𑒱𑒞𑒯𑒱 𑒠𑓂𑒩𑒳𑒣𑒠𑒏𑒹𑒿 𑒠𑓂𑒩𑒼𑒝𑒏 𑒐𑒴𑒢 𑒕𑒪 𑒐𑒾𑒪𑒱 𑒑𑒹𑒪 𑒠𑒱𑒫𑓂𑒨𑒰𑒮𑓂𑒞𑓂𑒩𑒮𑒿 𑒪𑒹𑒪 𑒣𑓂𑒩𑒰𑒝,
𑒠𑓂𑒩𑒳𑒣𑒠 𑒣𑒳𑒞𑓂𑒩 𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒣𑒰𑓀𑒔𑒰𑒪 𑒮𑒹𑒢𑒰𑒏 𑒮𑓀𑒑 𑒂𑒋𑒪 𑒥𑒱𑒔 𑒥𑒩𑒐𑒰𑒏 𑒫𑒰𑒝।
𑒣𑓂𑒩𑒔𑓀𑒛 𑒩𑒴𑒣 𑒠𑒹𑒐𑒱 𑒠𑓂𑒩𑒼𑒝𑒏 𑒏𑒵𑒭𑓂𑒝 𑒏𑒯𑒪 𑒯𑒹 𑒨𑒳𑒡𑒱𑒭𑓂𑒚𑒱𑒩 𑒁𑒫𑒢𑓂𑒞𑒱𑒩𑒰𑒖𑒏 𑒯𑒮𑓂𑒞𑒱,
𑒢𑒰𑒧 𑒁𑒕𑒱 𑒁𑒬𑓂𑒫𑒞𑓂𑒟𑒰𑒧𑒰 𑒍𑒏𑒩𑒰 𑒧𑒰𑒩𑒪 𑒁𑒕𑒱 𑒦𑒲𑒧 𑒮𑒠𑓂𑒨𑓁।
𑒣𑒴𑒕𑒟𑒱 𑒠𑓂𑒩𑒼𑒝 𑒖𑒹 𑒁𑒬𑓂𑒫𑒞𑓂𑒟𑒰𑒧𑒰 𑒁𑒕𑒱 𑒧𑒩𑒱 𑒑𑒹𑒪 𑒞𑒐𑒢 𑒁𑒯𑒿,
𑒏𑒯𑒴 𑒯𑒿, 𑒧𑒩𑒱 𑒑𑒹𑒪 𑒁𑒕𑒱 𑒦𑒲𑒧 𑒧𑒰𑒩𑒪 𑒋𑒐𑒢 𑒞𑒳𑒩𑒞।
𑒞𑒐𑒢𑒯𑒱 𑒮𑒼𑒩 𑒦𑒹𑒪 𑒧𑒩𑒥𑒰𑒏 𑒁𑒬𑓂𑒫𑒞𑓂𑒟𑒰𑒧𑒰𑒏 𑒮𑒾𑒿𑒮𑒹,
𑒠𑓂𑒩𑒼𑒝 𑒁𑒡𑒲𑒩 𑒩𑒟 𑒁𑒑𑒳𑒂𑒋 𑒣𑒴𑒕𑒪 𑒨𑒳𑒡𑒱𑒭𑓂𑒚𑒱𑒩,
𑒏𑒲 𑒁𑒕𑒱 𑒥𑒰𑒞 𑒮𑒞𑓂𑒨 𑒧𑒩𑒪 𑒁𑒬𑓂𑒫𑒞𑓂𑒟𑒰𑒧𑒰 𑒩𑒝𑒏 𑒥𑒱𑒔?
𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒯𑒿 𑒧𑒩𑒪 𑒁𑒕𑒱 𑒍 𑒢𑒩 𑒢𑒯𑒱, 𑒕𑒪 𑒍 𑒏𑒳𑒘𑓂𑒖𑒩,
𑒧𑒳𑒠𑒰 𑒢𑒩 𑒨𑒳𑒡𑒱𑒭𑓂𑒚𑒩𑒏 𑒏𑒯𑒱𑒞𑒯𑒱 𑒥𑒖𑒪 𑒕𑒪 𑒬𑓀𑒐 𑒏𑒵𑒭𑓂𑒝𑒏।
𑒬𑒼𑒏-𑒫𑒱𑒯𑓂𑒫𑒪 𑒠𑓂𑒩𑒼𑒝 𑒤𑒹𑒏𑒱 𑒬𑒮𑓂𑒞𑓂𑒩𑒰𑒩𑓂𑒟 𑒡𑓂𑒨𑒰𑒢𑒧𑒑𑓂𑒢 𑒥𑒻𑒮𑒪𑒰𑒯 𑒩𑒟𑒣𑒩,
𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒏𑒰𑒙𑒪 𑒯𑒳𑒢𑒏 𑒧𑒮𑓂𑒞𑒏 𑒐𑒛𑓂𑒑𑒮𑒿 𑒁𑒬𑓂𑒫𑒞𑓂𑒟𑒰𑒧𑒰 𑒦𑒹𑒪 𑒫𑓂𑒨𑒰𑒏𑒳𑒪।
𑒕𑒼𑒛𑓃𑒋 𑒪𑒰𑒑𑒪 𑒠𑒱𑒫𑓂𑒨𑒰𑒮𑓂𑒞𑓂𑒩 𑒣𑒰𑒝𑓂𑒛𑒫𑒣𑒩 𑒁𑒩𑓂𑒖𑒳𑒢𑒏𑒹𑒿 𑒕𑒼𑒛𑓃𑒱 𑒢𑒯𑒱 𑒕𑒪 𑒏𑓂𑒨𑒼 𑒮𑒏𑓂𑒭𑒧,
𑒮𑒰𑒿𑒗 𑒡𑒩𑒱 𑒁𑒩𑓂𑒖𑒳𑒢-𑒁𑒬𑓂𑒫𑒞𑓂𑒟𑒰𑒧𑒰 𑒠𑒳𑒯𑒳 𑒧𑒡𑓂𑒨 𑒯𑒼𑒃𑒞 𑒩𑒯𑒪 𑒄 𑒨𑒳𑒠𑓂𑒡 𑒢𑒱𑒩𑒢𑓂𑒞𑒩।
𑒩𑒰𑒞𑓂𑒩𑒱𑒧𑒹 𑒠𑒳𑒩𑓂𑒨𑒼𑒡𑒢 𑒏𑒋𑒪𑒏 𑒣𑓂𑒩𑒝
𑒁𑒩𑓂𑒖𑒳𑒢𑒏 𑒧𑒵𑒞𑓂𑒨𑒳𑒏 𑒦𑒹𑒪 𑒂𑒫𑒰𑒯𑒢,
𑒏𑒩𑓂𑒝𑒏𑒹𑒿 𑒮𑒹𑒢𑒰𑒣𑒞𑒱 𑒥𑒢𑒰𑒋 𑒏𑒋𑒪𑒢𑓂𑒯𑒱
𑒏𑒾𑒩𑒫𑒏 𑒑𑒝 𑒮𑒼𑒪𑒯𑒧 𑒠𑒱𑒢𑒏 𑒨𑒳𑒠𑓂𑒡𑒏 𑒣𑓂𑒩𑒰𑒩𑒧𑓂𑒦।
𑒏𑒩𑓂𑒝𑒏 𑒬𑓀𑒐𑒡𑓂𑒫𑒢𑒱𑒮𑒿 𑒦𑒹𑒪 𑒨𑒳𑒠𑓂𑒡 𑒬𑒳𑒩𑒴,
𑒏𑒩𑓂𑒝𑒏 𑒞𑒰𑒣𑒮𑒿 𑒨𑒳𑒠𑓂𑒡𑒦𑒴𑒧𑒱 𑒮𑓂𑒞𑒥𑓂𑒡,
𑒢𑒏𑒳𑒪 𑒮𑒼𑒗𑒰𑒿 𑒣𑒰𑒥𑒱 𑒁𑒣𑒒𑒰𑒞 𑒏𑒋 𑒕𑒼𑒛𑓃𑒪 𑒣𑓂𑒩𑒰𑒝
𑒏𑒳𑒢𑓂𑒞𑒲𑒏 𑒠𑒹𑒪 𑒏𑒩𑓂𑒝𑒏 𑒫𑒩 𑒣𑓂𑒩𑒰𑒝𑒠𑒰𑒢।
𑒏𑒵𑒭𑓂𑒝𑒏 𑒂𑒫𑒰𑒯𑒢 𑒁𑒩𑓂𑒖𑒳𑒢 𑒁𑒯𑒰𑒿𑒏𑒹𑒿 𑒕𑒼𑒛𑓃𑒱,
𑒏𑓂𑒨𑒼 𑒢𑒘𑒱 𑒏𑒋 𑒮𑒏𑒞 𑒫𑒱𑒖𑒨 𑒏𑒩𑓂𑒝𑒏 𑒆𑒣𑒩𑒱,
𑒫𑒹𑒑𑒮𑒿 𑒖𑒹 𑒥𑒜𑓃𑒪 𑒁𑒩𑓂𑒖𑒳𑒢 𑒂𑒑𑒰𑒿 𑒦𑒹𑒪 𑒬𑒳𑒩𑒳 𑒥𑒩𑒐𑒰,
𑒥𑒩𑒐𑒰 𑒫𑒰𑒝𑒏 𑒏𑒾𑒩𑒫𑒑𑒝𑒏 𑒁𑒩𑓂𑒖𑒳𑒢𑒏 𑒮𑒧𑒏𑓂𑒭,
𑒧𑒳𑒠𑒰 𑒁𑒩𑓂𑒖𑒳𑒢𑒏 𑒮𑒼𑒗𑒰𑒿 𑒮𑒦 𑒦𑒹𑒪𑒰𑒯 𑒣𑒮𑓂𑒞,
𑒧𑒳𑒠𑒰 𑒞𑒐𑒢𑒹 𑒦𑒹𑒪 𑒮𑒼𑒪𑒯𑒧 𑒠𑒱𑒢𑒏 𑒮𑒴𑒩𑓂𑒨𑒰𑒮𑓂𑒞।
𑒩𑒰𑒞𑓂𑒩𑒱𑒧𑒹 𑒏𑒩𑓂𑒝 𑒏𑒯𑒪𑒢𑓂𑒯𑒱 𑒯𑒹 𑒧𑒱𑒞𑓂𑒩 𑒠𑒳𑒩𑓂𑒨𑒼𑒡𑒢,
𑒁𑒩𑓂𑒖𑒳𑒢𑒏 𑒩𑒟𑒧𑒹 𑒯𑒼𑒃𑒕 𑒜𑒹𑒩-𑒩𑒰𑒮 𑒬𑒮𑓂𑒞𑓂𑒩𑒏 𑒁𑒙𑒰𑒫𑒹𑒬,
𑒑𑒰𑒝𑓂𑒛𑒲𑒫 𑒂 𑒁𑒏𑓂𑒭𑒨 𑒞𑒴𑒝𑒲𑒩𑒏 𑒢𑒯𑒱 𑒏𑒼𑒢𑒼 𑒖𑒼𑒛𑓃,
𑒯𑒳𑒢𑒏𑒩 𑒁𑒬𑓂𑒫𑒏 𑒑𑒞𑒱 𑒢𑒯𑒱 𑒏𑒼𑒢𑒼 𑒟𑒼𑒛𑓃, 𑒏𑒵𑒭𑓂𑒝 𑒮𑒢 𑒮𑒰𑒩𑒟𑒲।
𑒬𑒪𑓂𑒨 𑒥𑒢𑒟𑒱 𑒯𑒧𑒩 𑒮𑒰𑒩𑒟𑒲 𑒨𑒠𑒱, 𑒯𑒼𑒋𑒞𑒰𑒯 𑒍 𑒏𑒵𑒭𑓂𑒝𑒏 𑒞𑒼𑒛𑓃,
𑒧𑒳𑒠𑒰 𑒬𑒪𑓂𑒨 𑒏𑒯𑒪𑒢𑓂𑒯𑒱 𑒁𑒕𑒱 𑒯𑒧𑒩 𑒧𑒳𑒿𑒯𑒣𑒩 𑒢𑒯𑒱 𑒖𑒼𑒛𑓃,
𑒏𑒩𑓂𑒝𑒏𑒹𑒿 𑒮𑒹 𑒯𑒼𑒋 𑒮𑓂𑒫𑒲𑒏𑒰𑒩 𑒞𑒿 𑒯𑒧𑒩𑒰 𑒏𑒼𑒢𑒼 𑒯𑒩𑓂𑒖 𑒢𑒯𑒱।
𑒮𑒞𑓂𑒩𑒯𑒧 𑒠𑒱𑒢𑒳𑒏𑒰 𑒨𑒳𑒠𑓂𑒡 𑒦𑒹𑒪 𑒬𑒳𑒩𑒴 𑒏𑒩𑓂𑒝𑒏 𑒂𑒏𑓂𑒩𑒧𑒝 𑒬𑒳𑒩𑒴,
𑒁𑒩𑓂𑒖𑒳𑒢 𑒥𑒜𑓃𑒪 𑒂𑒑𑒴 𑒬𑒪𑓂𑒨 𑒏𑒯𑒪 𑒦𑒱𑒩𑒴 𑒧𑒯𑒰𑒣𑓂𑒩𑒰𑒏𑓂𑒩𑒧𑒲 𑒁𑒩𑓂𑒖𑒳𑒢𑒮𑒿,
𑒏𑒩𑓂𑒝 𑒠𑒹𑒐𑒪𑒢𑓂𑒯𑒱 𑒦𑒲𑒧𑒏𑒹𑒿 𑒏𑒩𑒻𑒞 𑒮𑓀𑒯𑒰𑒩 𑒔𑒪𑒴 𑒬𑒪𑓂𑒨 𑒍𑒯𑒱 𑒣𑒰𑒩,
𑒦𑒲𑒧𑒏 𑒩𑒴𑒣 𑒂𑒃 𑒣𑓂𑒩𑒔𑒝𑓂𑒛 𑒕𑒼𑒛𑓃𑒪 𑒫𑒰𑒝 𑒔𑒲𑒛𑓃𑒱 𑒏𑒫𑒔 𑒏𑒩𑓂𑒝𑒏 𑒑𑒰𑒿𑒟𑒪 𑒠𑒹𑒯,
𑒁𑒔𑒹𑒞 𑒏𑒩𑓂𑒝𑒏𑒹𑒿 𑒪𑒋 𑒦𑒑𑒪𑒰𑒯 𑒬𑒪𑓂𑒨 𑒩𑒝𑒦𑒴𑒧𑒱𑒏 𑒏𑒰𑒞-𑒏𑒩𑒼𑒙।
𑒠𑒹𑒐𑒱 𑒄 𑒠𑒵𑒬𑓂𑒨 𑒦𑒲𑒧 𑒦𑒹𑒪𑒰𑒯 𑒂𑒩 𑒞𑒲𑒫𑓂𑒩,
𑒠𑒳𑒩𑓂𑒨𑒼𑒡𑒢 𑒯𑒳𑒢𑒏𑒩 𑒮𑒼𑒗𑒰𑒿 𑒣𑒚𑒰𑒍𑒪 𑒠𑒳𑓁𑒬𑒰𑒮𑒢 𑒫𑒲𑒩।
𑒑𑒠𑒰 𑒨𑒳𑒠𑓂𑒡 𑒠𑒳𑒯𑒳𑒏 𑒧𑒡𑓂𑒨 𑒕𑒪 𑒦𑒹𑒪 𑒦𑒨𑒓𑓂𑒏𑒩,
𑒦𑒲𑒧𑒏 𑒧𑒮𑓂𑒞𑒏 𑒣𑓂𑒩𑒯𑒰𑒩 𑒐𑒮𑒪 𑒧𑒴𑒩𑓂𑒕𑒱𑒞 𑒠𑒳𑓁𑒬𑒰𑒮𑒢।
𑒦𑒲𑒧 𑒯𑒰𑒟 𑒅𑒐𑒰𑒛𑓃𑒱 𑒣𑒲𑒥𑒋 𑒪𑒰𑒑𑒪 𑒕𑒰𑒞𑒲𑒏 𑒩𑒏𑓂𑒞,
𑒦𑒰𑒑𑒪 𑒏𑒾𑒩𑒫𑒮𑒹𑒢𑒰 𑒠𑒹𑒐𑒱 𑒠𑒵𑒬𑓂𑒨 𑒋𑒯𑒱 𑒞𑒩𑒯𑒏।
𑒂𑒥 𑒮𑒼𑒗𑒰𑒿-𑒮𑒼𑒗𑒲 𑒁𑒩𑓂𑒖𑒳𑒢 𑒏𑒩𑓂𑒝𑒏 𑒨𑒳𑒠𑓂𑒡 𑒂𑒃 𑒬𑒳𑒩𑒴,
𑒏𑒩𑓂𑒝 𑒏𑒰𑒙𑒪 𑒑𑒰𑓀𑒛𑒲𑒫𑒏 𑒣𑓂𑒩𑒞𑓂𑒨𑓀𑒔𑒰 𑒨𑒰𑒫𑒞 𑒠𑒼𑒮𑒩 𑒔𑒜𑓃𑒰𑒥𑒟𑒱,
𑒏𑒋𑒪 𑒫𑒰𑒝𑒮𑒿 𑒂𑒏𑓂𑒩𑒧𑒝 𑒁𑒩𑓂𑒖𑒳𑒢 𑒏𑒼𑒯𑒳𑒢𑒰 𑒏𑒋 𑒣𑓂𑒩𑒞𑓂𑒨𑓀𑒔𑒰 𑒔𑒜𑓃𑒰𑒋,
𑒫𑒰𑒝-𑒫𑒩𑓂𑒭𑒰 𑒁𑒩𑓂𑒖𑒳𑒢𑒏𑒰 𑒖𑒐𑒢 𑒦𑒹𑒪 𑒬𑒳𑒩𑒴, 𑒏𑒩𑓂𑒝 𑒬𑒪𑓂𑒨 𑒦𑒹𑒪𑒰𑒯 𑒔𑒼𑒙𑒱𑒪,
𑒏𑒩𑓂𑒝𑒏 𑒮𑒯𑒰𑒨𑒏 𑒮𑒹𑒢𑒰 𑒦𑒹𑒪 𑒢𑒭𑓂𑒙 𑒏𑒩𑓂𑒝 𑒁𑒞𑒱 𑒫𑓂𑒨𑒰𑒏𑒳𑒪।
𑒕𑒼𑒛𑓃𑒪 𑒏𑒩𑓂𑒝 𑒫𑒰𑒝 𑒠𑒱𑒫𑓂𑒨 𑒁𑒩𑓂𑒖𑒳𑒢𑒣𑒩 𑒏𑒵𑒭𑓂𑒝 𑒏𑒋𑒪𑒢𑓂𑒯𑒱 𑒁𑒬𑓂𑒫𑒏𑒹𑒿 𑒚𑒹𑒯𑒳𑒢𑒣𑒩 𑒚𑒰𑒜𑓃,
𑒁𑒩𑓂𑒖𑒳𑒢𑒏 𑒧𑒳𑒏𑒳𑒙𑒏𑒹𑒿 𑒕𑒳𑒥𑒻𑒞 𑒍 𑒁𑒩𑓂𑒖𑒳𑒢𑒏 𑒣𑓂𑒩𑒰𑒝𑒏 𑒮𑓀𑒏𑒙 𑒦𑒹𑒪 𑒣𑒰𑒩।
𑒞𑒐𑒢𑒯𑒱 𑒏𑒩𑓂𑒝𑒏 𑒩𑒟𑒏 𑒣𑒯𑒱𑒨𑒰 𑒡𑒿𑒮𑒪 𑒨𑒳𑒠𑓂𑒡 𑒧𑒡𑓂𑒨,
𑒏𑒩𑓂𑒝𑒏 𑒣𑒳𑒏𑒰𑒩 𑒏𑒢𑒹𑒏 𑒏𑒰𑒪 𑒫𑒰𑒝 𑒢𑒯𑒱 𑒔𑒪𑒋𑒥𑒰𑒏 𑒡𑒩𑓂𑒧𑒏 𑒄 𑒨𑒳𑒠𑓂𑒡,
𑒫𑒱𑒩𑒰𑒙𑒏 𑒑𑒾𑒁𑒏 𑒔𑒼𑒩𑒱 𑒁𑒩𑓂𑒖𑒳𑒢 𑒏𑒯𑒪𑒢𑓂𑒯𑒱 𑒂 𑒁𑒦𑒱𑒧𑒢𑓂𑒨𑒳𑒏𑒹𑒿 𑒧𑒰𑒩𑒻𑒞 𑒏𑒰𑒪,
𑒡𑒩𑓂𑒧 𑒂 𑒡𑒩𑓂𑒧𑒨𑒳𑒠𑓂𑒡𑒏 𑒥𑒱𑒮𑒩𑒪 𑒕𑒪𑒯𑒳𑒿 𑒁𑒯𑒰𑒿 𑒣𑒰𑒚 ।
𑒣𑓂𑒩𑒰𑒝𑒏 𑒦𑒱𑒏𑓂𑒭𑒰 𑒧𑒿𑒑𑒻𑒞 𑒪𑒑𑒱𑒞𑒯𑒳𑒿 𑒁𑒕𑒱 𑒢𑒯𑒱 𑒪𑒰𑒖।
𑒏𑒩𑓂𑒝 𑒅𑒞𑒩𑒱 𑒪𑒑𑒪𑒰𑒯 𑒩𑒟𑒏 𑒣𑒯𑒱𑒨𑒰 𑒢𑒱𑒏𑒰𑒪𑒋,
𑒁𑒩𑓂𑒖𑒳𑒢𑒏 𑒫𑒰𑒝 𑒏𑒰𑒙𑒪 𑒧𑒮𑓂𑒞𑒏 𑒏𑒾𑒩𑒫𑒧𑒹 𑒯𑒰𑒯𑒰𑒏𑒰𑒩 𑒦𑒰𑒩𑒲।
𑒠𑒳𑒩𑓂𑒨𑒼𑒡𑒢𑒏 𑒮𑒦 𑒦𑒰𑒿𑒨𑒏𑒹𑒿 𑒧𑒰𑒩𑒢𑒹 𑒕𑒰𑒪𑒰𑒯 𑒦𑒲𑒧 𑒞𑒰𑒫𑒞,
𑒋𑒑𑒰𑒩𑒯 𑒁𑒏𑓂𑒭𑒾𑒯𑒱𑒝𑒲𑒧𑒹 𑒮𑒿 𑒥𑒛𑓃 𑒟𑒼𑒛𑓃 𑒏𑒾𑒩𑒫 𑒕𑒪 𑒥𑒰𑒿𑒔𑒪,
𑒏𑒵𑒣𑒰𑒔𑒰𑒩𑓂𑒨 𑒥𑒳𑒗𑒍𑒪𑒢𑓂𑒯𑒱 𑒠𑒳𑒩𑓂𑒨𑒼𑒡𑒢 𑒂𑒥𑒼 𑒏𑒩𑒴 𑒮𑒢𑓂𑒡𑒱,
𑒧𑒳𑒠𑒰 𑒍 𑒏𑒯𑒪 𑒯𑒧 𑒁𑒯𑒰𑒿 𑒏𑒵𑒞𑒫𑒩𑓂𑒧𑒰 𑒁𑒬𑓂𑒫𑒞𑓂𑒟𑒰𑒧 𑒂 𑒬𑒪𑓂𑒨 𑒁𑒕𑒻𑒞,
𑒮𑒢𑓂𑒡𑒱𑒏 𑒑𑒣 𑒕𑒲 𑒁𑒯𑒰𑒿 𑒏𑒩𑒻𑒞।
𑒬𑒪𑓂𑒨 𑒥𑒢𑒟𑒱 𑒮𑒹𑒢𑒰𑒣𑒞𑒱 𑒨𑒳𑒠𑓂𑒡 𑒁𑒚𑒰𑒩𑒯𑒧 𑒠𑒱𑒢 𑒩𑒯𑒞 𑒖𑒰𑒩𑒲।
𑒬𑒪𑓂𑒨𑒏 𑒦𑒹𑒪 𑒅𑒠𑓂𑒒𑒼𑒭 𑒍𑒏𑒩 𑒥𑒜𑓃𑒪 𑒣𑒑 𑒨𑒳𑒡𑒱𑒭𑓂𑒚𑒱𑒩 𑒕𑒪 𑒩𑒼𑒏𑒪।
𑒬𑒪𑓂𑒨 𑒖𑒐𑒢𑒯𑒱 𑒏𑒰𑒙𑒪 𑒯𑒳𑒢𑒏𑒩 𑒋𑒏 𑒡𑒢𑒳𑒭,
𑒨𑒳𑒡𑒱𑒭𑓂𑒚𑒱𑒩 𑒅𑒚𑒰𑒋 𑒠𑒼𑒮𑒩 𑒡𑒢𑒳𑒭 𑒧𑒰𑒩𑒪 𑒬𑒪𑓂𑒨𑒏 𑒁𑒬𑓂𑒫 𑒂 𑒮𑒯𑒲𑒮 ।
𑒦𑒹𑒪 𑒞𑒐𑒢 𑒒𑒧𑒰𑒮𑒰𑒢 𑒨𑒳𑒡𑒱𑒭𑓂𑒚𑒱𑒩 𑒪𑒹𑒪𑒢𑓂𑒯𑒱 𑒬𑒪𑓂𑒨𑒏 𑒣𑓂𑒩𑒰𑒝,
𑒮𑒯𑒠𑒹𑒫 𑒕𑒳𑒙𑒪𑒰𑒯 𑒬𑒏𑒳𑒢𑒱 𑒂 𑒍𑒏𑒩 𑒣𑒳𑒞𑓂𑒩 𑒅𑒪𑒴𑒏𑒣𑒩,
𑒪𑒹𑒪𑒢𑓂𑒯𑒱 𑒥𑒰𑒣-𑒥𑒹𑒙𑒰𑒏 𑒣𑓂𑒩𑒰𑒝 𑒖𑒳𑒂𑒩𑒲𑒏 𑒣𑓂𑒩𑒰𑒝𑒰𑒢𑓂𑒞।
𑒑𑒠𑒰 𑒪𑒋 𑒠𑒳𑒩𑓂𑒨𑒼𑒡𑒢 𑒢𑒱𑒏𑒪𑒱 𑒑𑒹𑒪𑒰𑒯 𑒕𑒼𑒛𑓃𑒱 𑒩𑒝,
𑒋𑒏𑒙𑒰 𑒮𑒩𑒼𑒫𑒩 𑒧𑒡𑓂𑒨 𑒕𑒪 𑒮𑓂𑒞𑓀𑒦, 𑒢𑒳𑒏𑒰𑒋𑒪 𑒍𑒞𑒋 𑒠𑒳𑒩𑓂𑒨𑒼𑒡𑒢,
𑒠𑒹𑒐𑒪𑒢𑓂𑒯𑒱 𑒖𑒰𑒃𑒞 𑒯𑒳𑒢𑒏𑒰 𑒏𑒱𑒕𑒳 𑒑𑓂𑒩𑒰𑒧𑒲𑒝।
𑒑𑓂𑒩𑒰𑒧𑒲𑒝𑒏 𑒔𑒩𑓂𑒔 𑒥𑓂𑒨𑒰𑒮 𑒏𑒹𑒪𑒯𑒳𑒿 𑒏𑒵𑒞𑒰𑒩𑓂𑒟 ।
𑒣𑒰𑒝𑓂𑒛𑒫𑒏 𑒮𑓀𑒑 𑒏𑒵𑒭𑓂𑒝 𑒣𑒯𑒳𑒿𑒔𑒪𑒰𑒯 𑒍𑒞𑒋,
𑒏𑒱𑒕𑒳 𑒑𑓂𑒩𑒰𑒧𑒲𑒝 𑒖𑒹 𑒠𑒹𑒪𑒢𑓂𑒯𑒱 𑒣𑒞𑒰 𑒍𑒞𑒋𑒏।
𑒦𑒲𑒧 𑒠𑒹𑒪𑒏 𑒪𑒪𑒏𑒰𑒩𑒰 𑒠𑒳𑒩𑓂𑒨𑒼𑒡𑒢 𑒢𑒱𑒏𑒪𑒱 𑒂𑒋𑒪,
𑒞𑒲𑒩𑓂𑒟𑒮𑒿 𑒒𑒳𑒩𑒻𑒞 𑒥𑒪𑒩𑒰𑒧 𑒮𑒹𑒯𑒼 𑒣𑒯𑒳𑒿𑒔𑒪𑒰𑒯 𑒍𑒞𑒋।
𑒬𑒱𑒭𑓂𑒨 𑒠𑒳𑒩𑓂𑒨𑒼𑒡𑒢𑒏𑒹𑒿 𑒠𑒋 𑒂𑒬𑒲𑒩𑓂𑒫𑒰𑒠 𑒏𑒋𑒪 𑒑𑒠𑒰 𑒨𑒳𑒠𑓂𑒡𑒏 𑒬𑒳𑒩𑒳𑒂𑒞,
𑒦𑒲𑒧 𑒠𑒳𑒩𑓂𑒨𑒼𑒡𑒢𑒏 𑒥𑒲𑒔 𑒥𑒰𑒗𑒪 𑒨𑒳𑒠𑓂𑒡 𑒒𑒢𑒒𑒼𑒩,
𑒏𑒵𑒭𑓂𑒝 𑒠𑒹𑒪 𑒖𑒰𑒿𑒒𑒣𑒩 𑒟𑒣𑒏𑒲 𑒧𑒼𑒢 𑒣𑒰𑒛𑓃𑒪 𑒦𑒲𑒧𑒏𑒹𑒿 𑒍𑒏𑒩 𑒣𑓂𑒩𑒞𑒱𑒖𑓂𑒘𑒰𑒏,
𑒞𑒼𑒛𑒱 𑒖𑒰𑒿𑒒𑒏 𑒯𑒛𑓂𑒛𑒲 𑒏𑒋 𑒧𑒮𑓂𑒞𑒏𑒣𑒩 𑒠𑒳𑒩𑓂𑒨𑒼𑒡𑒢𑒏 𑒑𑒠𑒰-𑒣𑒋𑒩𑒮𑒿 𑒣𑓂𑒩𑒯𑒰𑒩 ।
𑒦𑒲𑒧𑒏 𑒄 𑒏𑒵𑒞𑓂𑒨 𑒕𑒳𑒙𑒪𑒰𑒯 𑒥𑒪𑒩𑒰𑒧 𑒍𑒏𑒩𑒰 𑒣𑒩 𑒧𑒰𑒩-𑒧𑒰𑒩,
𑒏𑒵𑒭𑓂𑒝 𑒩𑒼𑒏𑒱 𑒠𑒰𑒆𑒏𑒹𑒿 𑒧𑒼𑒢 𑒣𑒰𑒛𑓃𑒪 𑒠𑓂𑒩𑒾𑒣𑒠𑒲𑒏 𑒁𑒣𑒧𑒰𑒢,
𑒦𑒲𑒧𑒏 𑒣𑓂𑒩𑒝।
𑒕𑒼𑒛𑓃𑒱 𑒠𑒳𑒩𑓂𑒨𑒼𑒡𑒢𑒏𑒹𑒿 𑒁𑒮𑒯𑒰𑒨,
𑒑𑒹𑒪𑒰𑒯 𑒮𑒦 𑒣𑒰𑒝𑓂𑒛𑒫 𑒦𑒰𑒋।
𑒮𑓀𑒡𑓂𑒨𑒰 𑒮𑒧𑒨 𑒏𑒵𑒞𑒫𑒩𑓂𑒧𑒰 𑒏𑒵𑒣𑒰𑒔𑒰𑒩𑓂𑒨 𑒂 𑒁𑒬𑓂𑒫𑒞𑓂𑒟𑒰𑒧𑒰
𑒣𑒯𑒳𑒿𑒔𑒱 𑒠𑒹𑒐𑒪 𑒠𑒳𑒩𑓂𑒨𑒼𑒡𑒢𑒏 𑒠𑒳𑒩𑓂𑒠𑒬𑒰 𑒂 𑒣𑓂𑒩𑒪𑒰𑒣 ।
𑒦𑒲𑒧𑒏 𑒣𑒰𑒠𑒮𑒿 𑒠𑒳𑒩𑓂𑒨𑒼𑒡𑒢𑒏 𑒧𑒮𑓂𑒞𑒏𑒣𑒩 𑒣𑓂𑒩𑒯𑒰𑒩,
𑒮𑒳𑒢𑒱 𑒄 𑒏𑒟𑓂𑒨 𑒁𑒬𑓂𑒫𑒞𑓂𑒟𑒰𑒧𑒰 𑒪𑒹𑒪 𑒣𑒰𑒝𑓂𑒛𑒫𑒏 𑒫𑒡𑒏 𑒫𑓂𑒩𑒞 । 𑒠𑒳𑒩𑓂𑒨𑒼𑒡𑒢 𑒏𑒋𑒪 𑒁𑒬𑓂𑒫𑒞𑓂𑒟𑒰𑒧𑒰𑒏 𑒮𑒹𑒢𑒰𑒣𑒞𑒱 𑒩𑒴𑒣𑒧𑒹 𑒁𑒦𑒱𑒭𑒹𑒏,
𑒏𑒵𑒞𑒫𑒩𑓂𑒧𑒰 𑒏𑒵𑒣𑒰𑒔𑒰𑒩𑓂𑒨 𑒂 𑒁𑒬𑓂𑒫𑒞𑓂𑒟𑒰𑒧𑒰 𑒥𑒜𑓃𑒪𑒰𑒯 𑒣𑒰𑒝𑓂𑒛𑒫-𑒬𑒱𑒫𑒱𑒩 𑒮𑒧𑒏𑓂𑒭।
𑒏𑒵𑒭𑓂𑒝 𑒪𑒋 𑒣𑒰𑓀𑒔𑒼 𑒣𑒰𑓀𑒛𑒫𑒏𑒹𑒿 𑒑𑒹𑒪𑒰𑒯 𑒏𑒞𑒯𑒳 𑒁𑒢𑓂𑒨𑒞𑓂𑒩।
𑒣𑒰𑒝𑓂𑒛𑒫-𑒬𑒱𑒫𑒱𑒩𑒏 𑒮𑒧𑒏𑓂𑒭 𑒋𑒏𑒙𑒰 𑒫𑒵𑒏𑓂𑒭, 𑒢𑒲𑒔𑒰𑒿 𑒮𑒳𑒞𑒪𑒰𑒯 𑒏𑒵𑒣𑒰 𑒂 𑒏𑒵𑒞 ।
𑒁𑒬𑓂𑒫𑒞𑓂𑒟𑒰𑒧𑒰𑒏 𑒂𑒿𑒐𑒱𑒧𑒹 𑒢𑒱𑒢𑓂𑒢𑒏 𑒢𑒘𑒱 𑒪𑒹𑒭, 𑒠𑒹𑒐𑒪 𑒋𑒏𑒙𑒰 𑒣𑒏𑓂𑒭𑒲 𑒁𑒥𑒻𑒞,
𑒍𑒯𑒱 𑒫𑒵𑒏𑓂𑒭𑒣𑒩 𑒏𑒾𑒂𑒮𑒦 𑒮𑒳𑒞𑒪 𑒧𑒰𑒩𑒱 𑒩𑒰𑒮, 𑒏𑒹𑒪𑒏 𑒍 𑒣𑒏𑓂𑒭𑒲 𑒮𑒦𑒏 𑒑𑓂𑒩𑒰𑒮।
𑒠𑒹𑒐𑒱 𑒄 𑒠𑒵𑒬𑓂𑒨 𑒁𑒬𑓂𑒫𑒞𑓂𑒟𑒰𑒧𑒰 𑒅𑒚𑒰𑒍𑒪 𑒏𑒵𑒣𑒰𑒔𑒰𑒩𑓂𑒨 𑒍 𑒏𑒵𑒞,
𑒦𑒼𑒩𑒏 𑒥𑒰𑒙 𑒞𑒰𑒏𑒥 𑒢𑒯𑒱 𑒮𑒳𑒥𑒳𑒠𑓂𑒡𑒱, 𑒄 𑒁𑒡𑒩𑓂𑒧 𑒏𑒯𑒪 𑒏𑒵𑒣 ।
𑒧𑒳𑒠𑒰 𑒁𑒬𑓂𑒫𑒞𑓂𑒟𑒰𑒧 𑒔𑒪𑒱 𑒣𑒛𑓃𑒪 𑒬𑒱𑒫𑒱𑒩 𑒠𑒱𑒬,
𑒯𑒰𑒩𑒱 𑒣𑒯𑒳𑓀𑒔𑒪 𑒣𑒰𑒕𑒰𑒿-𑒣𑒰𑒕𑒰𑒿 𑒏𑒵𑒞-𑒏𑒵𑒣,
𑒯𑒧 𑒣𑒻𑒮𑒻𑒞 𑒕𑒲 𑒦𑒲𑒞𑒩 𑒬𑒱𑒫𑒱𑒩 ।
𑒥𑒰𑒯𑒩 𑒯𑒼𑒃𑒞 𑒮𑒦𑒏𑒹𑒿 𑒣𑓂𑒩𑒰𑒝 𑒪𑒱𑒁 𑒁𑒯𑒰𑒿 𑒠𑒳𑒢𑒴 𑒑𑒼𑒙𑒹,
𑒋𑒞𑒋 𑒚𑒰𑒜𑓃 𑒪𑒑 𑒠𑓂𑒫𑒰𑒩।
𑒮𑒦 𑒣𑒰𑓀𑒔𑒰𑒪 𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒬𑒱𑒐𑒝𑓂𑒛𑒲 𑒮𑒧𑒹𑒞,
𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩𑒏𑒹𑒿 𑒥𑒳𑒗𑒱 𑒣𑒰𑒝𑓂𑒛𑒫 𑒠𑒹𑒪 𑒧𑒰𑒩𑒱,
𑒁𑒬𑓂𑒫𑒞𑓂𑒟𑒰𑒧𑒰 𑒠𑒹𑒪 𑒬𑒱𑒫𑒱𑒩𑒏𑒹𑒿 𑒂𑒑𑒱𑒮𑒿 𑒖𑒩𑒰𑒋।
𑒤𑒹𑒩 𑒣𑒯𑒳𑒿𑒔𑒱 𑒪𑒋 𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩𑒏 𑒧𑒰𑒟,
𑒠𑒳𑒩𑓂𑒨𑒼𑒡𑒢 𑒠𑒹𑒐𑒱 𑒧𑒰𑒿𑒑𑒪 𑒦𑒲𑒧𑒏 𑒧𑒮𑓂𑒞𑒏,
𑒍𑒏𑒩 𑒧𑒳𑒭𑓂𑒙𑒱𑒏𑒰𑒏 𑒣𑓂𑒩𑒯𑒰𑒩𑒮𑒿 𑒧𑒮𑓂𑒞𑒏 𑒦𑒹𑒪 𑒤𑒰𑒿𑒏,
𑒢𑒯𑒱 𑒄 𑒢𑒯𑒱 𑒦𑒲𑒧𑒏 𑒧𑒰𑒟 ।
𑒦𑒼𑒩𑒧𑒹 𑒠𑒹𑒐𑒪 𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩𑒏 𑒧𑒰𑒟,
𑒏𑒰𑒢𑒻𑒞 𑒯𑒰𑒏𑓂𑒩𑒼𑒬 𑒏𑒩𑒻𑒞 𑒦𑒹𑒪 𑒠𑒳𑒩𑓂𑒨𑒼𑒡𑒢𑒏 𑒣𑓂𑒩𑒰𑒝𑒰𑒢𑓂𑒞।
𑒦𑒼𑒩𑒧𑒹 𑒏𑒶𑒭𑓂𑒝 𑒣𑒯𑒳𑒿𑒔𑒪𑒰𑒯 𑒣𑒰𑒝𑓂𑒛𑒫-𑒠𑓂𑒩𑒾𑒣𑒠𑒲𑒏 𑒮𑓀𑒑,
𑒠𑒹𑒐𑒱 𑒫𑒱𑒢𑒰𑒬 𑒦𑒲𑒧 𑒔𑒪𑒪 𑒁𑒬𑓂𑒫𑒞𑓂𑒟𑒰𑒧𑒰𑒏 𑒞𑒰𑒏𑒱𑒧𑒹,
𑒕𑒪 𑒍 𑒑𑓀𑒑 𑒞𑒙𑒣𑒩 𑒥𑓂𑒨𑒰𑒮𑒏 𑒮𑒧𑒏𑓂𑒭 ।
𑒨𑒳𑒡𑒱𑒭𑓂𑒚𑒱𑒩-𑒁𑒩𑓂𑒖𑒳𑒢 𑒮𑓀𑒑 𑒏𑒵𑒭𑓂𑒝 𑒣𑒯𑒳𑒿𑒔𑒪 𑒖𑒰𑒋,
𑒣𑒰𑒝𑓂𑒛𑒫𑒏 𑒢𑒰𑒬𑒏 𑒮𑓀𑒏𑒪𑓂𑒣 𑒮𑓀𑒑 𑒁𑒬𑓂𑒫𑒞𑓂𑒟𑒰𑒧𑒰 𑒕𑒼𑒛𑓃𑒪 𑒥𑓂𑒩𑒯𑓂𑒧𑒬𑒱𑒩𑒰 𑒁𑒮𑓂𑒞𑓂𑒩,
𑒁𑒩𑓂𑒖𑒳𑒢𑒏 𑒕𑒼𑒛𑓃𑒪 𑒣𑒰𑒬𑒳𑒣𑒞 𑒧𑒯𑒰𑒮𑓂𑒞𑓂𑒩 𑒁𑒑𑓂𑒢𑒱 𑒫𑒵𑒭𑓂𑒙𑒱 𑒮𑒿 𑒮𑒵𑒭𑓂𑒙𑒱𑒏 𑒫𑒱𑒢𑒰𑒬,
𑒥𑒲𑒔𑒧𑒹 𑒁𑒮𑓂𑒞𑓂𑒩 𑒏𑒹𑒩 𑒁𑒋𑒪𑒰𑒯 𑒢𑒰𑒩𑒠 𑒂 𑒥𑓂𑒨𑒰𑒮 ।
𑒫𑒰𑒯 𑒥𑓂𑒨𑒰𑒮 । 𑒧𑒯𑒰𑒦𑒰𑒩𑒞𑒏 𑒪𑒱𑒐𑒢𑒱𑒯𑒰𑒩 ।
𑒂𑒑𑓂𑒩𑒯 𑒏𑒩𑒻𑒞 𑒖𑒹 𑒠𑒳𑒢𑒴 𑒑𑒼𑒙𑒹 𑒪𑒱𑒁 𑒁𑒣𑒢-𑒁𑒣𑒢 𑒁𑒮𑓂𑒞𑓂𑒩 𑒮𑒧𑓂𑒯𑒰𑒩𑒱,
𑒁𑒩𑓂𑒖𑒳𑒢 𑒪𑒹𑒪𑒢𑓂𑒯𑒱 𑒁𑒣𑒢 𑒁𑒮𑓂𑒞𑓂𑒩 𑒮𑒧𑓂𑒯𑒰𑒩𑒱 𑒧𑒳𑒠𑒰,
𑒁𑒬𑓂𑒫𑒞𑓂𑒟𑒰𑒧𑒰 𑒏𑒯𑒪 𑒢𑒯𑒱 𑒒𑒳𑒩𑒱 𑒮𑒏𑒞 𑒯𑒧𑒩 𑒁𑒮𑓂𑒞𑓂𑒩 𑒂𑒃 ।
𑒇𑒭𑒱𑒏 𑒣𑓂𑒩𑒞𑒱𑒏𑒰𑒩 𑒥𑓂𑒩𑒯𑓂𑒧𑒬𑒱𑒩𑒰𑒮𑒿 𑒯𑒼𑒋𑒞 𑒅𑒞𑓂𑒞𑒩𑒰𑒏 𑒑𑒩𑓂𑒦𑒏 𑒢𑒰𑒬,
𑒧𑒳𑒠𑒰 𑒁𑒬𑓂𑒫𑒞𑓂𑒟𑒰𑒧𑒏𑒹𑒿 𑒠𑒹𑒧𑒋 𑒣𑒛𑓃𑒞 𑒧𑒮𑓂𑒞𑒏𑒏 𑒧𑒝𑒱,
𑒦𑒹𑒪 𑒍 𑒢𑒱𑒩𑓂𑒥𑒪 𑒞𑒣𑒮𑓂𑒫𑒲, 𑒥𑓂𑒨𑒰𑒮𑒏 𑒂𑒬𑓂𑒩𑒧𑒧𑒹 𑒥𑒱𑒞𑒰𑒍𑒪 𑒖𑒲𑒫𑒢 𑒮𑒏𑒪।
𑒠𑒳𑒩𑓂𑒨𑒼𑒡𑒢𑒏 𑒣𑒞𑓂𑒢𑒲 𑒦𑒰𑒢𑒳𑒧𑒞𑒱 𑒕𑒪𑒱 𑒁𑒔𑒹𑒞, 𑒑𑒰𑓀𑒡𑒰𑒩𑒲 𑒏𑒩𑒟𑒱 𑒫𑒱𑒪𑒰𑒣,
𑒡𑒵𑒞𑒩𑒰𑒭𑓂𑒙𑓂𑒩 𑒧𑒴𑒩𑓂𑒕𑒱𑒞 𑒫𑒱𑒠𑒳𑒩𑒏 𑒯𑒰𑒏𑓂𑒩𑒼𑒬, 𑒣𑒰𑒝𑓂𑒛𑒫 𑒒𑒳𑒩𑒪 𑒁𑒬𑓂𑒫𑒞𑓂𑒟𑒰𑒧𑒰𑒏 𑒧𑒝𑒱 𑒮𑓀𑒑 ।
𑒏𑒵𑒭𑓂𑒝 𑒪𑒹𑒪𑒢𑓂𑒯𑒱 𑒪𑒾𑒯𑒏 𑒦𑒲𑒧𑒏 𑒮𑓂𑒫𑒰𑓀𑒑 𑒡𑒵𑒞𑒩𑒰𑒭𑓂𑒙𑓂𑒩 𑒣𑒯𑒳𑒿𑒔𑒪 𑒏𑒳𑒩𑒳𑒏𑓂𑒭𑒹𑒞𑓂𑒩 𑒫𑒡𑒴 𑒮𑒦𑒏 𑒮𑓀𑒑।
𑒦𑒲𑒧𑒏𑒹𑒿 𑒑𑒩 𑒪𑒑𑒰𑒋 𑒏𑒋𑒪 𑒍𑒏𑒩𑒰 𑒔𑒴𑒩𑓂𑒝 𑒤𑒹𑒩 𑒦𑒲𑒧-𑒦𑒲𑒧 𑒏𑒯𑒻𑒞 𑒣𑓂𑒩𑒪𑒰𑒣,
𑒏𑒵𑒭𑓂𑒝 𑒏𑒯𑒪 𑒢𑒯𑒱 𑒏𑒰𑒢𑒴 𑒯𑒹 𑒡𑒵𑒞𑒩𑒰𑒭𑓂𑒙𑓂𑒩, 𑒕𑒪 𑒄 𑒪𑒾𑒯𑒏 𑒦𑒲𑒧 𑒧𑒰𑒞𑓂𑒩 ।
𑒑𑒰𑓀𑒡𑒰𑒩𑒲 𑒠𑒹𑒪 𑒏𑒶𑒭𑓂𑒝𑒏𑒹𑒿 𑒬𑒰𑒣,
𑒖𑒹𑒢𑒰 𑒏𑒋𑒪 𑒁𑒯𑒰𑒿 𑒯𑒧𑒩 𑒫𑓀𑒬𑒏 𑒢𑒰𑒬,
𑒯𑒼𑒋𑒞 𑒁𑒯𑒴𑒿𑒏 𑒏𑒳𑒪 𑒢𑒭𑓂𑒙।
𑒧𑒵𑒞𑒏𑒏 𑒠𑒰𑒯 𑒮𑓀𑒮𑓂𑒏𑒰𑒩𑒏 𑒮𑓀𑒑 𑒋𑒏 𑒣𑒏𑓂𑒭 𑒮𑒧𑒰𑒣𑓂𑒞।
𑒨𑒳𑒡𑒱𑒭𑓂𑒚𑒱𑒩𑒏 𑒧𑒼𑒢 𑒫𑒱𑒐𑒱𑒢𑓂𑒢, 𑒕𑒼𑒛𑓃𑒪 𑒩𑒰𑒖-𑒣𑒰𑒙𑒏 𑒫𑒱𑒔𑒰𑒩,
𑒥𑓂𑒨𑒰𑒮 𑒂𑒥𑒱 𑒠𑒹𑒪𑒢𑓂𑒯𑒱 𑒅𑒣𑒠𑒹𑒬, 𑒣𑒪𑒰𑒨𑒢 𑒢𑒯𑒱 𑒁𑒯𑒰𑒿𑒏 𑒧𑒰𑒩𑓂𑒑।
𑒡𑒾𑒧𑓂𑒨 𑒏𑒋 𑒫𑒹𑒠 𑒧𑓀𑒞𑓂𑒩𑒏 𑒑𑒰𑒝 𑒩𑒰𑒖𑒞𑒱𑒪𑒏 𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒪𑒑𑒰𑒍𑒪।
𑒤𑒹𑒩 𑒣𑒯𑒳𑒿𑒔𑒱 𑒦𑒲𑒭𑓂𑒧𑒏 𑒮𑒧𑒏𑓂𑒭 𑒪𑒹𑒪 𑒁𑒢𑒳𑒬𑒰𑒮𑒢𑒏 𑒬𑒱𑒏𑓂𑒭𑒰,
𑒩𑒰𑒖𑒡𑒩𑓂𑒧,𑒪𑒼𑒏𑒡𑒩𑓂𑒧 𑒧𑒼𑒏𑓂𑒭𑒡𑒩𑓂𑒧𑒏 𑒖𑓂𑒘𑒰𑒢, 𑒣𑓂𑒩𑒖𑒰𑒣𑒰𑒪𑒢,
𑒅𑒚𑒱 𑒣𑓂𑒩𑒠𑒹𑒬 𑒖𑒰𑒞𑒱𑒏 𑒫𑒱𑒔𑒰𑒩𑒮𑒿 𑒆𑒣𑒩, 𑒩𑒰𑒖𑒰𑒏 𑒫𑓂𑒩𑒞𑒏 𑒏𑒩𑒴 𑒣𑒩𑒱𑒣𑒰𑒪𑒢।
𑒂𑒋𑒪 𑒍 𑒏𑒰𑒪 𑒖𑒐𑒢 𑒮𑒴𑒩𑓂𑒨 𑒦𑒹𑒪𑒰𑒯 𑒅𑒞𑓂𑒞𑒩𑒰𑒨𑒝,
𑒣𑒯𑒳𑒿𑒔𑒪𑒰𑒯 𑒨𑒳𑒡𑒱𑒭𑓂𑒚𑒱𑒩 𑒮𑓀𑒑 𑒧𑒰𑒞𑒰-𑒑𑒰𑓀𑒡𑒰𑒩𑒲-𑒏𑒳𑒢𑓂𑒞𑒲, 𑒡𑒵𑒞𑒩𑒰𑒭𑓂𑒙𑓂𑒩 𑒦𑓂𑒩𑒰𑒞𑒰 𑒧𑒱𑒪𑒱,
𑒁𑒙𑓂𑒚𑒰𑒫𑒢 𑒠𑒱𑒢𑒏 𑒬𑒩-𑒬𑒨𑓂𑒨𑒰𑒏 𑒁𑒢𑓂𑒞𑒱𑒧 𑒅𑒣𑒠𑒹𑒬 𑒂 𑒧𑒯𑒰𑒣𑓂𑒩𑒨𑒰𑒝,
𑒔𑒰𑒢𑒢𑒏 𑒔𑒱𑒞𑒰𑒣𑒩 𑒦𑒲𑒭𑓂𑒧𑒏𑒹𑒿 𑒨𑒳𑒡𑒱𑒭𑓂𑒚𑒱𑒩 𑒠𑒹𑒪 𑒂𑒑𑒱 𑒮𑒦 𑒂𑒏𑓂𑒩𑒰𑒢𑓂𑒞।
𑒯𑒮𑓂𑒞𑒱𑒢𑒰𑒣𑒳𑒩𑒏 𑒩𑒰𑒖𑓂𑒨𑒧𑒹 𑒂𑒋𑒪 𑒮𑒳𑒐 𑒮𑒧𑒵𑒠𑓂𑒡𑒱,
𑒨𑒳𑒡𑒱𑒭𑓂𑒚𑒱𑒩𑒏 𑒏𑒾𑒬𑒪 𑒏𑒋𑒪 𑒂𑒬𑒰𑒏 𑒫𑒵𑒠𑓂𑒡𑒱,
𑒅𑒞𑓂𑒞𑒩𑒰𑒏𑒹𑒿 𑒞𑒐𑒢𑒹 𑒦𑒹𑒪 𑒧𑒵𑒞-𑒣𑒳𑒞𑓂𑒩𑒏 𑒣𑓂𑒩𑒰𑒣𑓂𑒞𑒱,
𑒮𑒳𑒦𑒠𑓂𑒩𑒰 𑒐𑒮𑒪𑒱 𑒏𑒵𑒭𑓂𑒝 𑒪𑒑 𑒖𑒰𑒋।
𑒏𑒵𑒭𑓂𑒝 𑒅𑒚𑒰𑒋 𑒥𑒰𑒪𑒏𑒹𑒿 𑒏𑒯𑒪 𑒯𑒧 𑒢𑒯𑒱 𑒏𑒋𑒪 𑒣𑒪𑒰𑒨𑒢,
𑒮𑒞𑓂𑒨𑒮𑒿 𑒮𑒧𑓂𑒥𑒢𑓂𑒡 𑒩𑒯𑒪 𑒥𑒢𑒪, 𑒣𑒩𑒰𑒖𑒱𑒞 𑒬𑒞𑓂𑒩𑒳 𑒏𑒋 𑒢𑒯𑒱 𑒦𑒹𑒪𑒯𑒳𑒿 𑒯𑒱𑓀𑒮𑒏,
𑒨𑒠𑒱 𑒄 𑒮𑒞𑓂𑒨 𑒞𑒿 𑒥𑒰𑒪𑒏 𑒖𑒲𑒥𑒱 𑒅𑒚𑒟𑒱।
𑒄 𑒮𑒳𑒢𑒱𑒞𑒯𑒱 𑒬𑒱𑒬𑒳 𑒦𑒹𑒪 𑒖𑒲𑒫𑒱𑒞 𑒢𑒰𑒧 𑒣𑒛𑓃𑒪 𑒣𑒩𑒲𑒏𑓂𑒭𑒱𑒞।
𑒤𑒹𑒩 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩 𑒨𑒖𑓂𑒘 𑒁𑒬𑓂𑒫𑒧𑒹𑒡,
𑒮𑒱𑒪𑒹𑒥𑒲 𑒁𑒬𑓂𑒫𑒏 𑒑𑒩𑒧𑒹 𑒮𑓂𑒫𑒩𑓂𑒝𑒣𑒞𑓂𑒩,
𑒖𑒱𑒢𑒏𑒰 𑒨𑒳𑒡𑒱𑒭𑓂𑒚𑒱𑒩𑒏 𑒩𑒰𑒖𑓂𑒨𑒮𑒿 𑒣𑒩𑒯𑒹𑒖,
𑒮𑒹 𑒣𑒏𑒛𑓃𑒱 𑒒𑒼𑒙𑒏 𑒏𑒩𑒟𑒱 𑒋𑒏𑒩 𑒫𑒱𑒩𑒼𑒡।
𑒧𑒳𑒠𑒰 𑒒𑒳𑒩𑒱 𑒂𑒋𑒪 𑒁𑒬𑓂𑒫 𑒢𑒱𑒭𑓂𑒏𑓀𑒙𑒏,
𑒨𑒖𑓂𑒘 𑒦𑒹𑒪 𑒮𑒧𑒰𑒣𑓂𑒞 𑒢𑒱𑒩𑓂𑒫𑒱𑒒𑓂𑒢।
𑒥𑒩𑒐 𑒣𑒢𑓂𑒠𑓂𑒩𑒯 𑒥𑒲𑒞𑒪 𑒞𑒐𑒢 𑒁𑒋𑒪𑒰𑒯 𑒥𑓂𑒨𑒰𑒮,
𑒠𑒹𑒪 𑒅𑒣𑒠𑒹𑒬 𑒡𑒶𑒞𑒩𑒰𑒭𑓂𑒙𑓂𑒩 𑒪𑒹𑒪 𑒫𑒰𑒢𑒣𑓂𑒩𑒮𑓂𑒟 𑒡𑒩𑓂𑒧𑒏 𑒖𑓂𑒘𑒰𑒢,
𑒑𑒰𑓀𑒡𑒰𑒩𑒲, 𑒏𑒳𑒢𑓂𑒞𑒲, 𑒫𑒱𑒠𑒳𑒩, 𑒮𑓀𑒖𑒨𑒏 𑒮𑓀𑒑 𑒯𑒱𑒧𑒰𑒪𑒨 𑒣𑓂𑒩𑒨𑒰𑒝,
𑒫𑒱𑒠𑒳𑒩 𑒪𑒹𑒪𑒢𑒱 𑒫𑒢𑒯𑒱𑒧𑒹 𑒮𑒧𑒰𑒡𑒱,
𑒠𑒰𑒫𑒰𑒑𑓂𑒢𑒱 𑒪𑒹𑒪𑒏 𑒬𑒹𑒭 𑒮𑒦𑒏 𑒣𑓂𑒩𑒰𑒝।
𑒏𑒵𑒭𑓂𑒝 𑒨𑒳𑒠𑓂𑒡𑒏 𑒥𑒰𑒠 𑒑𑒹𑒪𑒰𑒯 𑒠𑓂𑒫𑒰𑒩𑒏𑒰,
𑒕𑒪𑒟𑒱 𑒣𑓂𑒩𑒰𑒣𑓂𑒞 𑒏𑒋𑒢𑒹 𑒮𑒧𑓂𑒧𑒰𑒢,
𑒧𑒳𑒠𑒰 𑒨𑒰𑒠𑒫 𑒩𑒰𑒖𑒏𑒳𑒧𑒰𑒩,
𑒏𑒩𑒟𑒱 𑒫𑒱𑒠𑓂𑒫𑒰𑒢𑒏 𑒁𑒣𑒧𑒰𑒢 ।
𑒧𑒰𑒩𑒱-𑒏𑒰𑒙𑒱 𑒏𑒩𑒟𑒱 𑒂𑒣𑒮𑒧𑒹 𑒐𑒞𑓂𑒧,
𑒠𑒹𑒐𑒱 𑒠𑒳𑒐𑒱𑒞 𑒥𑒪𑒩𑒰𑒧 𑒣𑓂𑒩𑒦𑒰𑒮𑒞𑒲𑒩𑓂𑒟 𑒖𑒰𑒋,
𑒍𑒞𑒯𑒱 𑒪𑒹𑒪 𑒠𑒰𑒆 𑒮𑒧𑒰𑒡𑒱,
𑒏𑒵𑒭𑓂𑒝 𑒣𑒯𑒳𑒿𑒔𑒱 𑒠𑒹𑒐𑒱 𑒯𑒳𑒢𑒏𑒩 𑒣𑓂𑒩𑒰𑒝𑒰𑒢𑓂𑒞,
𑒑𑒰𑒕 𑒣𑒏𑒛𑓃𑒱 𑒩𑒯𑒟𑒱 𑒚𑒹𑒯𑒱𑒂𑒋 ।
𑒥𑓂𑒨𑒰𑒡 𑒖𑒏𑒩 𑒕𑒪 𑒖𑒩𑒰 𑒢𑒰𑒧,
𑒯𑒩𑒱𑒝 𑒥𑒳𑒗𑒱 𑒣𑒻𑒩𑒏 𑒞𑒪𑒫𑒰𑒧𑒹 𑒧𑒰𑒩𑒪 𑒫𑒰𑒝,
𑒦𑒹𑒪 𑒏𑒵𑒭𑓂𑒝𑒏 𑒣𑓂𑒩𑒰𑒝𑒰𑒢𑓂𑒞 ।
𑒮𑒳𑒢𑒱 𑒄 𑒮𑒧𑒰𑒔𑒰𑒩 𑒧𑒵𑒞𑓂𑒨𑒳𑒏 𑒫𑒮𑒳𑒠𑒹𑒫𑒏,
𑒣𑒱𑒞𑒰 𑒫𑒰𑒮𑒳𑒠𑒹𑒫 𑒮𑒹𑒯𑒼 𑒏𑒋𑒪 𑒖𑒲𑒫𑒢𑒏 𑒁𑒢𑓂𑒞।
𑒏𑒵𑒭𑓂𑒝𑒏 𑒧𑒵𑒞𑓂𑒨𑒳𑒏 𑒮𑒧𑒰𑒔𑒰𑒩,
𑒣𑒰𑒝𑓂𑒛𑒫𑒩𑒰𑒖 𑒨𑒳𑒡𑒱𑒭𑓂𑒚𑒱𑒩 𑒠𑒹𑒪 𑒣𑒩𑒲𑒏𑓂𑒭𑒱𑒞𑒏𑒹𑒿 𑒩𑒰𑒖,
𑒮𑒳𑒦𑒠𑓂𑒩𑒰 𑒏𑒹𑒿 𑒠𑒋 𑒅𑒣𑒠𑒹𑒬,
𑒮𑓀𑒑 𑒠𑓂𑒩𑒾𑒣𑒠𑒲 𑒣𑒯𑒳𑒿𑒔𑒪 𑒠𑓂𑒫𑒰𑒩𑒏𑒰 𑒣𑒰𑒿𑒔𑒴 𑒦𑒰𑒋।
𑒍𑒞𑒋 𑒛𑒴𑒥𑒪 𑒮𑒧𑒳𑒠𑓂𑒩𑒧𑒹 𑒕𑒪 𑒍 𑒢𑒑𑒩𑒲,
𑒒𑒳𑒧𑒻𑒞 𑒤𑒱𑒩𑒻𑒞 𑒔𑒪𑒪𑒰𑒯 𑒯𑒱𑒧𑒰𑒪𑒨 𑒮𑒦 𑒑𑒼𑒙𑒹।
𑒋𑒏 𑒏𑒳𑒏𑒳𑒛𑓃 𑒕𑒪 𑒮𑓀𑒑 𑒔𑒪𑒻𑒞 𑒍𑒞𑒋,
𑒯𑒱𑒧𑒰𑒪𑒨 𑒫𑒵𑒯𑒠𑒰𑒏𑒰𑒩 𑒯𑒱𑒧𑒣𑒰𑒞𑒏 𑒧𑒰𑒩𑒱,
𑒠𑓂𑒩𑒾𑒣𑒠𑒲 𑒐𑒮𑒪𑒱 𑒧𑒩𑒪𑒱, 𑒤𑒹𑒩 𑒮𑒯𑒠𑒹𑒫,
𑒢𑒏𑒳𑒪 𑒁𑒩𑓂𑒖𑒳𑒢 𑒦𑒲𑒧 𑒐𑒮𑒱 𑒧𑒩𑒪 𑒤𑒹𑒩-𑒤𑒹𑒩।
𑒂𑒑𑒰𑒿 𑒠𑒹𑒫𑒪𑒼𑒏𑒏 𑒩𑒟 𑒕𑒪 𑒚𑒰𑒜𑓃,
𑒃𑒢𑓂𑒠𑓂𑒩 𑒏𑒯𑒪 𑒔𑒪𑒴 𑒁𑒮𑒑𑒩 𑒮𑒬𑒩𑒲𑒩 𑒨𑒳𑒡𑒱𑒭𑓂𑒚𑒱𑒩,
𑒄 𑒏𑒳𑒏𑒳𑒛𑓃 𑒢𑒯𑒱 𑒩𑒯𑒋 𑒮𑒰𑒟।
𑒨𑒳𑒡𑒱𑒭𑓂𑒚𑒱𑒩 𑒢𑒯𑒱 𑒧𑒰𑒢𑒪 𑒒𑒳𑒩𑒱 𑒖𑒰𑒆 𑒃𑒢𑓂𑒠𑓂𑒩,
𑒥𑒱𑒢 𑒋𑒏𑒩 𑒢𑒯𑒱 𑒖𑒰𑒋𑒥 𑒍𑒞𑒋 𑒯𑒼𑒋 𑒮𑓂𑒫𑒩𑓂𑒑 𑒁𑒯𑒱।
𑒕𑒪 𑒍 𑒏𑒳𑒏𑒳𑒛𑓃 𑒨𑒧𑒩𑒰𑒖 𑒮𑓂𑒫𑒨𑓀,
𑒣𑓂𑒩𑒏𑒙 𑒦𑒋 𑒠𑒹𑒪 𑒍 𑒂𑒬𑒲𑒩𑓂𑒫𑒰𑒠 𑒍𑒞𑒋।
𑒣𑒯𑒳𑒿𑒔𑒱 𑒮𑓂𑒫𑒩𑓂𑒑 𑒠𑒹𑒐𑒪 𑒏𑒾𑒩𑒫 𑒑𑒝 𑒮𑒦 𑒍𑒞𑒋,
𑒃𑒢𑓂𑒠𑓂𑒩 𑒯𑒧𑒩 𑒦𑓂𑒩𑒰𑒞𑒰 𑒕𑒟𑒱 𑒏𑒞𑒋।
𑒞𑒐𑒢 𑒋𑒏𑒙𑒰 𑒠𑒴𑒞 𑒪𑒋 𑒑𑒹𑒪 𑒯𑒳𑒢𑒏𑒰 𑒢𑒩𑓂𑒏𑒏 𑒠𑓂𑒫𑒰𑒩𑒱𑒣𑒩,
𑒠𑓂𑒩𑒾𑒣𑒠𑒲 𑒮𑓀𑒑 𑒣𑒰𑒿𑒔𑒴 𑒦𑒰𑒋 𑒕𑒪𑒰𑒯 𑒍𑒞𑒋।
𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒯𑒧 𑒩𑒯𑒥 𑒋𑒞𑒯𑒱 𑒯𑒹 𑒠𑒴𑒞,
𑒕𑒼𑒛𑓃𑒱 𑒯𑒱𑒢𑒏𑒰 𑒖𑒰𑒋𑒥 𑒢𑒯𑒱 𑒏𑒞𑒯𑒳।
𑒃𑒢𑓂𑒠𑓂𑒩 𑒨𑒧 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒍𑒞𑒋।
𑒨𑒧 𑒏𑒯𑒪 𑒨𑒏𑓂𑒭 𑒏𑒳𑒏𑒳𑒛𑓃 𑒥𑒢𑒱 𑒯𑒧 𑒁𑒯𑒰𑒿 𑒣𑒩𑒲𑒏𑓂𑒭𑒰 𑒪𑒹𑒪,
𑒂𑒃 𑒋𑒯𑒱 𑒞𑒹𑒮𑒩 𑒣𑒩𑒲𑒏𑓂𑒭𑒰𑒧𑒹 𑒮𑒹𑒯𑒼 𑒁𑒯𑒰𑒿𑒏𑒹𑒿 𑒅𑒞𑓂𑒞𑒲𑒩𑓂𑒝 𑒏𑒋𑒪।
𑒄 𑒁𑒕𑒱 𑒠𑒹𑒫𑒪𑒼𑒏 𑒧𑒳𑒠𑒰 𑒮𑒠𑒹𑒯 𑒩𑒰𑒖𑒰𑒏𑒹𑒿,
𑒋𑒞𑒳𑒏𑓂𑒏𑒰 𑒏𑒭𑓂𑒙 𑒠𑒹𑒐𑒏 𑒪𑒹𑒥𑒰𑒏 𑒔𑒰𑒯𑒲 𑒬𑒱𑒏𑓂𑒭𑒰 𑒞𑒹𑒿,
𑒏𑒱𑒕𑒳 𑒏𑒰𑒪𑒏 𑒏𑒭𑓂𑒙 𑒯𑒧 𑒁𑒯𑒰𑒿𑒏𑒹𑒿 𑒠𑒹𑒪।
𑒕𑒼𑒛𑓃𑒴 𑒄 𑒬𑒩𑒲𑒩 𑒪𑒱𑒁 𑒠𑒻𑒫𑒲 𑒩𑒴𑒣 𑒂𑒥,
𑒏𑒯𑒻𑒞 𑒨𑒧𑒏 𑒦𑒹𑒪 𑒄 𑒣𑒩𑒱𑒫𑒩𑓂𑒞𑒢,
𑒏𑒩𑓂𑒝 𑒮𑒹𑒯𑒼 𑒍𑒞𑒋 𑒥𑒰𑒩𑒯 𑒂𑒠𑒱𑒞𑓂𑒨𑒏 𑒮𑓀𑒑,
𑒩𑒞𑓂𑒢𑒖𑒙𑒱𑒞 𑒮𑒱𑓀𑒯𑒰𑒮𑒢𑒣𑒩 𑒕𑒪 𑒫𑒱𑒩𑒰𑒖𑒧𑒰𑒢,
𑒦𑒰𑒩𑒞𑒏 𑒨𑒳𑒠𑓂𑒡𑒏 𑒏𑒰𑒫𑓂𑒨𑒏 𑒮𑒧𑒰𑒣𑒢।
𑒞𑓂𑒫𑒘𑓂𑒔𑒰𑒯𑒘𑓂𑒔 𑒮𑒦 𑒂𑒣𑒮𑒏 𑒪𑒛𑓃𑒰𑒄,
𑒁𑒕𑒱 𑒋𑒐𑒢𑒼 𑒣𑒮𑒩𑒪 𑒄 𑒧𑒯𑒰𑒧𑒰𑒩𑒱।
𑒖𑒰𑒞𑒱-𑒡𑒩𑓂𑒧 𑒣𑒩𑒱𑒫𑒰𑒩 𑒣𑒳𑒞𑓂𑒩 𑒏𑒹𑒩 𑒧𑒼𑒯,
𑒨𑒰𑒫𑒞 𑒩𑒯𑒞 𑒣𑓂𑒩𑒞𑒱𑒦𑒰 𑒣𑒱𑒔𑒰𑒋𑒞 𑒂𑒯।
𑒞𑓂𑒫𑒘𑓂𑒔𑒰𑒯𑒘𑓂𑒔 𑒧𑒔𑒞 𑒡𑒵𑒞𑒩𑒰𑒭𑓂𑒙𑓂𑒩 𑒖𑒞𑒋 𑒏𑒩𑒞 𑒁𑒩𑒰𑒛𑓃𑒱,
𑒠𑒳𑒩𑓂𑒨𑒼𑒡𑒢 𑒏𑒩𑒞 𑒣𑓂𑒩𑒰𑒩𑒧𑓂𑒦 𑒨𑒳𑒡𑒱𑒭𑓂𑒚𑒱𑒩𑒏 𑒠𑒼𑒭 𑒏𑒲 𑒟𑒼𑒛𑓃?
𑒁𑒮𑒘𑓂𑒖𑒰𑒞𑒱 𑒧𑒢
𑒄 𑒣𑒳𑒩𑒰𑒞𑒢 𑒠𑒹𑒬 𑒢𑒰𑒧 𑒦𑒩𑒞,
𑒩𑒰𑒖 𑒏𑒩𑒟𑒱 𑒖𑒞𑒋 𑒃𑒏𑓂𑒭𑓂𑒫𑒰𑒏𑒳 𑒫𑓀𑒬𑒖।
𑒋𑒯𑒱 𑒫𑓀𑒬𑒏 𑒬𑒰𑒏𑓂𑒨 𑒏𑒳𑒪 𑒩𑒰𑒖𑒰 𑒬𑒳𑒠𑓂𑒡𑒼𑒡𑒢,
𑒣𑒞𑓂𑒢𑒲 𑒧𑒰𑒨𑒰 𑒕𑒪𑒱, 𑒏𑒣𑒱𑒪𑒫𑒮𑓂𑒞𑒳𑒧𑒹 𑒩𑒰𑒖 𑒏𑒩𑒟𑒱 𑒞𑒐𑒢।
𑒁𑒬𑓂𑒫𑒒𑒼𑒭𑒏 𑒫𑒩𑓂𑒝𑒢 𑒄 𑒮𑒏𑒪,
𑒠𑒻𑒞 𑒁𑒕𑒱 𑒮𑒧𑓂𑒥𑒪 𑒁𑒮𑒘𑓂𑒖𑒰𑒞𑒱 𑒧𑒢𑒏।
𑒧𑒰𑒨𑒰 𑒠𑒹𑒐𑒪𑒢𑓂𑒯𑒱 𑒮𑓂𑒫𑒣𑓂𑒢 𑒂𑒥𑒱 𑒩𑒯𑒪,
𑒋𑒏𑒙𑒰 𑒬𑓂𑒫𑒹𑒞 𑒯𑒰𑒟𑒲 𑒂𑒥𑒱 𑒧𑒰𑒨𑒰𑒏 𑒬𑒩𑒲𑒩𑒧𑒹,
𑒣𑒻𑒮𑒱 𑒕𑒪 𑒩𑒯𑒪 𑒯𑒰𑒟𑒲 𑒧𑒳𑒠𑒰,
𑒧𑒰𑒨𑒰𑒏𑒹𑒿 𑒦𑒋 𑒩𑒯𑒪 𑒕𑒪𑒢𑓂𑒯𑒱 𑒢𑒹 𑒏𑒼𑒢𑒼 𑒏𑒭𑓂𑒙,
𑒫𑒩𑒢𑓂 𑒪𑒑𑒪𑒢𑓂𑒯𑒱 𑒖𑒹 𑒂𑒋𑒪 𑒁𑒕𑒱 𑒧𑒡𑓂𑒨 𑒏𑓂𑒨𑒼 𑒑𑒩𑓂𑒦।
𑒑𑒩𑓂𑒦𑒏 𑒥𑒰𑒞 𑒧𑒳𑒠𑒰 𑒕𑒪 𑒮𑒞𑓂𑒞𑒹,
𑒦𑒹𑒪 𑒧𑒼𑒢 𑒫𑒢𑒑𑒧𑒢𑒏,
𑒪𑒳𑒧𑓂𑒥𑒱𑒢𑒲 𑒖𑒰𑒋 𑒩𑒯𑒥, 𑒏𑒯𑒪 𑒬𑒳𑒠𑓂𑒡𑒼𑒡𑒢𑒏𑒹𑒿।
𑒠𑒱𑒢 𑒥𑒲𑒞𑒪 𑒍𑒞𑒯𑒱 𑒪𑒳𑒧𑓂𑒥𑒢𑒲𑒧𑒹 𑒠𑒱𑒢 𑒋𑒏,
𑒥𑒱𑒢𑒰 𑒣𑓂𑒩𑒮𑒫-𑒣𑒲𑒛𑓃𑒰𑒏 𑒖𑒢𑓂𑒧 𑒠𑒹𑒪𑒢𑓂𑒯𑒱 𑒣𑒳𑒞𑓂𑒩𑒏,
𑒂𑒏𑒰𑒬𑒮𑒿 𑒬𑒲𑒞𑒪 𑒂 𑒑𑒩𑓂𑒧 𑒣𑒰𑒢𑒱𑒏 𑒠𑒴 𑒙𑒰 𑒡𑒰𑒩,
𑒏𑒋𑒪 𑒁𑒦𑒱𑒭𑒹𑒏 𑒥𑒰𑒪𑒏𑒏 𑒪𑒰𑒪-𑒢𑒲𑒪 𑒣𑒳𑒭𑓂𑒣 𑒏𑒧𑒪,
𑒥𑒩𑒮𑒱 𑒂𑒏𑒰𑒬।
𑒨𑒏𑓂𑒭𑒏 𑒩𑒰𑒖𑒰 𑒂 𑒠𑒱𑒫𑓂𑒨 𑒪𑒼𑒏𑒢𑒱𑒏 𑒦𑒹𑒪 𑒮𑒧𑒰𑒑𑒧,
𑒣𑒬𑒳 𑒕𑒼𑒛𑓃𑒪 𑒯𑒱𑓀𑒮𑒰 𑒣𑒏𑓂𑒭𑒲 𑒥𑒰𑒖𑒪 𑒧𑒡𑒳𑒩𑒫𑒰𑒝𑒲।
𑒡𑒰𑒩𑒏 𑒁𑒯𑓀𑒏𑒰𑒩𑒏 𑒬𑒥𑓂𑒠 𑒥𑒢𑒪 𑒏𑒪𑒏𑒪,
𑒕𑒼𑒛𑓃𑒱 “𑒧𑒰𑒩” 𑒂𑒢𑒢𑓂𑒠𑒱𑒞 𑒕𑒪 𑒫𑒱𑒬𑓂𑒫 𑒮𑒏𑒪,
“𑒧𑒰𑒩” 𑒩𑒳𑒭𑓂𑒙 𑒂𑒑𑒧𑒮𑒿 𑒥𑒳𑒠𑓂𑒡𑒞𑓂𑒫𑒣𑓂𑒩𑒰𑒣𑓂𑒞𑒱 𑒏𑒩𑒞 𑒄?
𑒧𑒰𑒨𑒰-𑒬𑒳𑒠𑓂𑒡𑒼𑒡𑒢𑒏 𑒫𑒱𑒯𑓂𑒫𑒪𑒞𑒰𑒏 𑒣𑓂𑒩𑒮𑒢𑓂𑒢𑒞𑒰𑒏,
𑒥𑓂𑒩𑒰𑒯𑓂𑒧𑒝 𑒮𑒦𑒮𑒿 𑒮𑒳𑒢𑒱 𑒁𑒣𑒴𑒩𑓂𑒫 𑒪𑒏𑓂𑒭𑒝 𑒥𑒔𑓂𑒔𑒰𑒏,
𑒦𑒨 𑒠𑒴𑒩 𑒦𑒹𑒪 𑒧𑒰𑒞𑒰-𑒣𑒱𑒞𑒰𑒏 𑒞𑒐𑒢 𑒖𑒰 𑒏𑓄,
𑒧𑒢𑒳𑒭𑓂𑒨𑒬𑓂𑒩𑒹𑒭𑓂𑒚 𑒣𑒳𑒞𑓂𑒩 𑒂𑒬𑓂𑒫𑒮𑓂𑒞 𑒠𑒳𑒢𑒴 𑒑𑒼𑒙𑒹 𑒣𑒰𑒥𑒱 𑒏𑓄।
𑒧𑒯𑒩𑓂𑒭𑒱 𑒁𑒮𑒱𑒞𑒏𑒹𑒿 𑒦𑒹𑒪 𑒦𑒰𑒢 𑒬𑒰𑒏𑓂𑒨 𑒧𑒳𑒢𑒱 𑒪𑒹𑒪 𑒖𑒢𑓂𑒧,
𑒔𑒪𑒲 𑒏𑒣𑒱𑒪𑒫𑒮𑓂𑒞𑒳 𑒮𑒳𑒢𑒱 𑒦𑒫𑒱𑒭𑓂𑒨𑒫𑒰𑒝𑒲 𑒥𑒳𑒠𑓂𑒡𑒞𑓂𑒫 𑒏𑒩𑒞 𑒣𑓂𑒩𑒰𑒣𑓂𑒞,
𑒫𑒰𑒨𑒳 𑒧𑒰𑒩𑓂𑒑𑒹 𑒁𑒋𑒪𑒰𑒯 𑒩𑒰𑒖𑓂𑒨 𑒫𑒢 𑒏𑒣𑒱𑒪𑒫𑒮𑓂𑒞𑒳𑒏,
𑒥𑒻𑒮𑒰𑒋𑒪 𑒮𑒱𑓀𑒯𑒰𑒮𑒢 𑒬𑒳𑒠𑓂𑒡𑒼𑒡𑒢 𑒞𑒳𑒩𑒞 ।
𑒩𑒰𑒖𑒢𑓂 𑒂𑒋𑒪 𑒕𑒲 𑒠𑒹𑒐𑒋 𑒥𑒳𑒠𑓂𑒡𑒞𑓂𑒫 𑒣𑓂𑒩𑒰𑒣𑓂𑒞 𑒏𑒩𑒞 𑒖𑒹 𑒥𑒰𑒪𑒏।
𑒥𑒔𑓂𑒔𑒰𑒏𑒹𑒿 𑒂𑒢𑒪 𑒑𑒹𑒪 𑒔𑒏𑓂𑒩 𑒣𑒻𑒩𑒧𑒹 𑒕𑒪 𑒖𑒏𑒩,
𑒠𑒹𑒐𑒱 𑒁𑒮𑒱𑒞 𑒏𑒯𑒪 𑒯𑒰 𑒧𑒵𑒞𑓂𑒨𑒳 𑒮𑒧𑒲𑒣 𑒁𑒕𑒱 𑒯𑒧𑒩,
𑒥𑒰𑒪𑒏𑒏 𑒬𑒱𑒏𑓂𑒭𑒰 𑒣𑓂𑒩𑒰𑒣𑓂𑒞 𑒏𑒩𑒱𑒞𑒯𑒳𑒿 𑒧𑒳𑒠𑒰 𑒫𑒵𑒠𑓂𑒡 𑒯𑒧 𑒁𑒟𑒥𑒪,
𑒅𑒣𑒠𑒹𑒬 𑒮𑒳𑒢𑒋 𑒪𑒹𑒪 𑒬𑒰𑒏𑓂𑒨 𑒧𑒳𑒢𑒱𑒏 𑒖𑒲𑒫𑒱𑒞 𑒏𑒯𑒰𑒿 𑒩𑒯𑒥।
𑒫𑒰𑒨𑒳𑒧𑒰𑒩𑓂𑒑𑒹 𑒒𑒳𑒩𑒪𑒰𑒯 𑒁𑒮𑒱𑒞 𑒏𑒋 𑒠𑒩𑓂𑒬𑒢 𑒬𑒰𑒏𑓂𑒨 𑒧𑒳𑒢𑒱𑒏,
𑒦𑒰𑒑𑒱𑒢𑒏𑒹𑒿 𑒥𑒳𑒗𑒰𑒍𑒪 𑒣𑒻𑒒 𑒦𑒋 𑒥𑒾𑒠𑓂𑒡𑒏 𑒁𑒢𑒳𑒮𑒩𑒝 𑒏𑒩𑒟𑒱।
𑒠𑒮 𑒠𑒱𑒢 𑒡𑒩𑒱 𑒏𑒋𑒪𑒢𑓂𑒯𑒱 𑒖𑒰𑒞-𑒮𑓀𑒮𑓂𑒏𑒰𑒩,
𑒤𑒹𑒩 𑒜𑓃𑒹𑒩 𑒩𑒰𑒮 𑒯𑒼𑒧 𑒖𑒰𑒣,
𑒏𑒩𑒱 𑒑𑒰𑒨𑒏 𑒠𑒰𑒢 𑒮𑒱𑓀𑒒 𑒮𑓂𑒫𑒩𑓂𑒝𑒮𑒿 𑒕𑒰𑒩𑒱,
𑒒𑒳𑒩𑒱 𑒢𑒑𑒩 𑒣𑓂𑒩𑒫𑒹𑒬 𑒏𑒋𑒪𑒢𑓂𑒯𑒱 𑒧𑒰𑒨𑒰,
𑒯𑒰𑒟𑒲-𑒠𑒰𑒿𑒞𑒏 𑒧𑒯𑒤𑒰 𑒔𑒜𑓃𑒱।
𑒡𑒢-𑒡𑒰𑒢𑓂𑒨𑒮𑒿 𑒣𑒴𑒩𑓂𑒝 𑒦𑒹𑒪 𑒩𑒰𑒖𑓂𑒨,
𑒁𑒩𑒱 𑒕𑒼𑒛𑓃𑒪 𑒬𑒞𑓂𑒩𑒳𑒞𑒰𑒏 𑒧𑒰𑒩𑓂𑒑,
𑒮𑒱𑒠𑓂𑒡𑒱 𑒮𑒰𑒡𑒪 𑒢𑒰𑒧 𑒣𑒛𑓃𑒪 𑒮𑒱𑒠𑓂𑒡𑒰𑒩𑓂𑒟।
𑒧𑒳𑒠𑒰 𑒧𑒰𑒨𑒰 𑒢𑒯𑒱 𑒮𑒯𑒱 𑒮𑒏𑒪𑒲𑒯 𑒣𑓂𑒩𑒮𑒢𑓂𑒢𑒞𑒰,
𑒧𑒵𑒞𑓂𑒨𑒳 𑒂𑒋𑒪 𑒧𑒾𑒮𑒲 𑒑𑒾𑒞𑒧𑒲 𑒏𑒋𑒪 𑒬𑒳𑒬𑓂𑒩𑒳𑒭𑒰।
𑒅𑒣𑒢𑒨𑒢 𑒮𑓀𑒮𑓂𑒏𑒰𑒩 𑒦𑒹𑒪 𑒥𑒰𑒪𑒏𑒏,
𑒬𑒱𑒏𑓂𑒭𑒰𑒧𑒹 𑒕𑒪 𑒔𑒞𑒳𑒩,
𑒁𑓀𑒞𑓁𑒣𑒳𑒩𑒧𑒹 𑒏𑒋 𑒜𑒹𑒩 𑒩𑒰𑒮 𑒫𑓂𑒨𑒫𑒮𑓂𑒟𑒰 𑒫𑒱𑒪𑒰𑒮𑒏,
𑒬𑒳𑒠𑓂𑒡𑒼𑒡𑒢𑒏𑒹𑒿 𑒕𑒪 𑒧𑒼𑒢 𑒁𑒮𑒱𑒞𑒏 𑒥𑒰𑒞,
𑒥𑒰𑒪𑒏𑒏 𑒨𑒼𑒑𑒲 𑒥𑒢𑒥𑒰𑒏।
𑒮𑒳𑒢𑓂𑒠𑒩𑒲 𑒨𑒬𑒼𑒡𑒩𑒰𑒮𑒿 𑒤𑒹𑒩 𑒏𑒩𑒥𑒰𑒍𑒪 𑒮𑒱𑒠𑓂𑒡𑒰𑒩𑓂𑒟𑒏 𑒫𑒱𑒫𑒰𑒯,
𑒮𑒧𑒨 𑒥𑒲𑒞𑒪 𑒮𑒱𑒠𑓂𑒡𑒰𑒩𑓂𑒟𑒏 𑒣𑒳𑒞𑓂𑒩 𑒩𑒰𑒯𑒳𑒪𑒏 𑒦𑒹𑒪 𑒖𑒢𑓂𑒧।
𑒅𑒞𑓂𑒮𑒫𑒏 𑒮𑓀𑒑 𑒥𑒱𑒞𑒻𑒞 𑒩𑒯𑒪 𑒠𑒱𑒢 𑒣𑒪,
𑒮𑒳𑒢𑒪𑒢𑓂𑒯𑒱 𑒔𑒩𑓂𑒔 𑒅𑒠𑓂𑒨𑒰𑒢𑒏 𑒏𑒧𑒪 𑒮𑒩𑒼𑒫𑒩𑒏,
𑒮𑒱𑒠𑓂𑒡𑒰𑒩𑓂𑒟 𑒃𑒔𑓂𑒕𑒰 𑒠𑒹𑒐𑒹𑒪𑒢𑓂𑒯𑒱 𑒒𑒳𑒧𑒏 ।
𑒮𑒾𑒿𑒮𑒹 𑒩𑒮𑓂𑒞𑒰𑒧𑒹 𑒂𑒠𑒹𑒬 𑒦𑒹𑒪 𑒩𑒰𑒖𑒰𑒏,
𑒏𑓂𑒨𑒼 𑒫𑒵𑒠𑓂𑒡 𑒠𑒳𑒐𑒲 𑒩𑒼𑒑𑒲 𑒩𑒯𑒟𑒱 𑒥𑒰𑒙 𑒢𑒹 𑒒𑒰𑒙।
𑒮𑒳𑒢𑒱 𑒢𑒑𑒩𑒫𑒰𑒮𑒲 𑒠𑒹𑒐𑒥𑒰 𑒪𑒹𑒪 𑒫𑓂𑒨𑒑𑓂𑒩,
𑒢𑒱𑒏𑒪𑒱 𑒂𑒋𑒪 𑒣𑒟𑒣𑒩 𑒠𑒩𑓂𑒬𑒢𑒏 𑒮𑒱𑒠𑓂𑒡𑒰𑒩𑓂𑒟𑒏 ।
𑒔𑒰𑒩𑒴 𑒏𑒰𑒞 𑒕𑒪 𑒧𑒢𑒼𑒩𑒧 𑒠𑒵𑒬𑓂𑒨,
𑒧𑒳𑒠𑒰 𑒞𑒐𑒢𑒹 𑒂𑒋𑒪 𑒣𑒟 𑒋𑒏 𑒫𑒵𑒠𑓂𑒡।
𑒯𑒹 𑒮𑒰𑒩𑒟𑒲, 𑒮𑒴𑒞𑒖𑒲 𑒏𑒹 𑒁𑒕𑒱 𑒄,
𑒂𑒿𑒐𑒱 𑒗𑒰𑒿𑒣𑒪 𑒦𑒾𑒿𑒯𑒮𑒿,
𑒬𑓂𑒫𑒹𑒞 𑒏𑒹𑒬,
𑒯𑒰𑒟 𑒪𑒰𑒚𑒲,
𑒗𑒳𑒏𑒪 𑒏𑒲 𑒁𑒕𑒱 𑒦𑒹𑒪?
𑒏𑒳𑒧𑒰𑒩 𑒁𑒕𑒱 𑒄 𑒫𑒵𑒠𑓂𑒡,
𑒦𑒼𑒑𑒱 𑒥𑒰𑒪 𑒨𑒳𑒫𑒰 𑒁𑒫𑒮𑓂𑒟𑒰 𑒖𑒰𑒋
𑒁𑒕𑒱 𑒦𑒹𑒪 𑒫𑒵𑒠𑓂𑒡 𑒂𑒃 ।
𑒏𑒲 𑒄 𑒯𑒼𑒋𑒞 𑒮𑒦𑒏 𑒮𑓀𑒑,
𑒯𑒧𑒯𑒴 𑒦𑒋 𑒖𑒰𑒋𑒥 𑒫𑒵𑒠𑓂𑒡 𑒋𑒏 𑒠𑒱𑒢?
𑒮𑒦𑒏𑒹𑒿 𑒁𑒕𑒱 𑒥𑒳𑒗𑒪 𑒄 𑒐𑒹𑒪,
𑒤𑒹𑒩 𑒔𑒯𑒳𑒠𑒱𑒮 𑒄 𑒮𑒦 𑒏𑒩𑒋 𑒏𑒱𑒪𑒼𑒪 ?
𑒯𑒩𑓂𑒭𑒱𑒞 𑒧𑒳𑒠𑒱𑒞 𑒥𑒞𑒰𑒯 𑒞𑒿 𑒢𑒯𑒱 𑒄 𑒦𑒲𑒛𑓃 ?
𑒒𑒳𑒩𑒱 𑒔𑒪𑒴 𑒮𑒴𑒞 𑒖𑒲 𑒂𑒥,
𑒅𑒠𑓂𑒨𑒰𑒢𑒧𑒹 𑒧𑒼𑒢 𑒏𑒞𑒋 𑒪𑒰𑒑 !
𑒧𑒯𑒪𑒧𑒹 𑒒𑒳𑒩𑒱-𑒤𑒱𑒩𑒱 𑒦𑓄 𑒔𑒱𑒢𑓂𑒞𑒰𑒧𑒑𑓂𑒢,
𑒣𑒳𑒢𑒱 𑒪𑓄 𑒂𑒖𑓂𑒘𑒰 𑒩𑒰𑒖𑒰𑒮𑒿 𑒢𑒱𑒏𑒪𑒪 𑒁𑒑𑓂𑒩 ।
𑒧𑒳𑒠𑒰 𑒋𑒯𑒱 𑒥𑒹𑒩 𑒦𑒹𑒙𑒪 𑒋𑒏𑒙𑒰 𑒪𑒼𑒏,
𑒣𑒹𑒙 𑒥𑒜𑓃𑒪, 𑒗𑒳𑒏𑒪 𑒪𑒻𑒞 𑒢𑒱𑒮𑒰𑒮,
𑒩𑒼𑒑𑒑𑓂𑒩𑒮𑓂𑒞 𑒕𑒪 𑒍 𑒣𑒴𑒕𑒪 𑒮𑒱𑒠𑓂𑒡𑒰𑒩𑓂𑒟,
𑒮𑒴𑒞 𑒖𑒲 𑒕𑒟𑒱 𑒄 𑒏𑒹, 𑒏𑒲 𑒦𑒹𑒪?
𑒩𑒼𑒑𑒑𑓂𑒩𑒮𑓂𑒞 𑒄 𑒏𑒳𑒧𑒰𑒩 𑒁𑒕𑒱 𑒄 𑒞𑒿 𑒐𑒹𑒪,
𑒏𑒐𑒢𑒼 𑒏𑒏𑒩𑒼 𑒪𑒻𑒞 𑒁𑒕𑒱 𑒁𑒣𑒢 𑒁𑒡𑒲𑒢 ।
𑒮𑒴𑒞 𑒖𑒲 𑒒𑒳𑒩𑒴 𑒦𑒨𑒦𑒲𑒞 𑒦𑒹𑒪𑒯𑒳𑒿 𑒯𑒧 𑒂𑒃 𑒤𑒹𑒩।
𑒒𑒳𑒩𑒱 𑒒𑒩 𑒫𑒱𑒔𑒩𑒱-𑒫𑒱𑒔𑒩𑒱 𑒏𑒨 𑒔𑒱𑒢𑓂𑒞𑒢,
𑒬𑒳𑒠𑓂𑒡𑒼𑒡𑒢 𑒔𑒱𑒢𑓂𑒞𑒱𑒞 𑒖𑒰𑒢𑒱 𑒄 𑒒𑒙𑒢𑒰𑒏𑓂𑒩𑒧।
𑒂𑒧𑒼𑒠 𑒣𑓂𑒩𑒧𑒼𑒠𑒏 𑒏𑒋 𑒂𑒩 𑒣𑓂𑒩𑒥𑒢𑓂𑒡,
𑒩𑒟 𑒮𑒰𑒩𑒟𑒲 𑒠𑒳𑒢𑒴 𑒢𑒫 𑒏𑒋𑒪 𑒬𑒳𑒠𑓂𑒡𑒼𑒡𑒢।
𑒤𑒹𑒩 𑒋𑒏 𑒠𑒱𑒢 𑒣𑒚𑒰𑒍𑒪 𑒩𑒰𑒖𑒏𑒳𑒧𑒰𑒩,
𑒨𑒳𑒫𑒏-𑒨𑒳𑒫𑒞𑒲 𑒮𑓀𑒑 𑒣𑒚𑒰𑒍𑒪 𑒏𑒩𑒋 𑒫𑒱𑒯𑒰𑒩 ।
𑒧𑒳𑒠𑒰 𑒞𑒐𑒢𑒹 𑒋𑒏𑒙𑒰 𑒨𑒰𑒞𑓂𑒩𑒰 𑒧𑒵𑒞𑓂𑒨𑒳𑒏,
𑒯𑒹 𑒮𑒴𑒞𑒖𑒲 𑒏𑒲 𑒁𑒕𑒱 𑒄 𑒠𑒵𑒬𑓂𑒨,
𑒮𑒖𑒰-𑒡𑒖𑒰 𑒏𑒋 𑒔𑒰𑒩𑒱 𑒑𑒼𑒙𑒹 𑒡𑒋 𑒏𑒰𑒢𑓂𑒯,
𑒧𑒳𑒠𑒰 𑒞𑒻𑒨𑒼 𑒮𑒦 𑒏𑒰𑒢𑒱 𑒩𑒯𑒪 𑒏𑒱𑒋 𑒢𑒯𑒱 𑒖𑒰𑒢 ?
𑒯𑒹 𑒏𑒳𑒧𑒰𑒩 𑒂𑒥 𑒄 𑒮𑒖𑒰𑒍𑒪 𑒧𑒢𑒳𑒏𑓂𑒐,
𑒢𑒯𑒱 𑒥𑒰𑒖𑒱 𑒮𑒏𑒞, 𑒁𑒕𑒱 𑒄 𑒏𑒰𑒚 𑒮𑒧𑒰𑒢।
𑒏𑒰𑒢𑒱-𑒐𑒲𑒖𑒱 𑒖𑒰𑒟𑒱 𑒮𑒧𑒮𑓂𑒞 𑒄 𑒪𑒼𑒏,
𑒕𑒼𑒛𑓃𑒋 𑒍𑒏𑒩𑒰 𑒧𑒵𑒞𑓂𑒨𑒳 𑒏𑒹𑒪𑒢𑓂𑒯𑒱 𑒖𑒹 𑒣𑓂𑒩𑒰𑒣𑓂𑒞।
𑒒𑒳𑒩𑒴 𑒮𑒰𑒩𑒟𑒲 𑒢𑒯𑒱 𑒯𑒼𑒋𑒞 𑒄 𑒥𑒩𑓂𑒠𑒰𑒬𑓂𑒞,
𑒦𑒨 𑒢𑒯𑒱 𑒁𑒕𑒱 𑒋𑒯𑒱 𑒥𑒹𑒩,
𑒧𑒳𑒠𑒰 𑒥𑒳𑒗𑒱𑒞𑒼 𑒂𑒧𑒼𑒠 𑒣𑓂𑒩𑒧𑒼𑒠𑒧𑒹 𑒦𑒹𑒩,
𑒁𑒖𑓂𑒘𑒰𑒢𑒲 𑒮𑒢 𑒏𑒼𑒢𑒰 𑒒𑒳𑒧𑒥 𑒅𑒠𑓂𑒨𑒰𑒢।
𑒧𑒳𑒠𑒰 𑒢𑒫 𑒮𑒰𑒩𑒟𑒲 𑒒𑒳𑒩𑒪 𑒢𑒯𑒱 𑒠𑓂𑒫𑒰𑒩,
𑒣𑒯𑒳𑒿𑒔𑒪 𑒅𑒠𑓂𑒨𑒰𑒢 𑒣𑒠𑓂𑒧 𑒐𑒝𑓂𑒛 𑒖𑒏𑒩 𑒢𑒰𑒧।
𑒨𑒳𑒫𑒞𑒲𑒑𑒝𑒏𑒹𑒿 𑒠𑒹𑒪𑒏 𑒂𑒠𑒹𑒬 𑒅𑒠𑒰𑒨𑒲, 𑒣𑒳𑒩𑒼𑒯𑒱𑒞 𑒣𑒳𑒞𑓂𑒩,
𑒏𑒩𑒴 𑒮𑒱𑒠𑓂𑒡𑒰𑒩𑓂𑒟𑒏𑒹𑒿 𑒂𑒧𑒼𑒠-𑒣𑓂𑒩𑒧𑒼𑒠𑒧𑒹 𑒪𑒲𑒢 ।
𑒧𑒳𑒠𑒰 𑒠𑒹𑒐𑒱 𑒃𑒢𑓂𑒠𑓂𑒩𑒖𑒲𑒞 𑒮𑒱𑒠𑓂𑒡𑒰𑒩𑓂𑒟𑒏 𑒁𑒢𑒰𑒮𑒏𑓂𑒞𑒱,
𑒣𑒳𑒕𑒪 𑒅𑒠𑒰𑒨𑒲 𑒦𑒹𑒪 𑒁𑒯𑒰𑒿𑒏𑒹𑒿 𑒄 𑒏𑒲?
𑒯𑒹 𑒧𑒱𑒞𑓂𑒩 𑒏𑓂𑒭𑒝𑒱𑒏 𑒄 𑒂𑒨𑒳,
𑒥𑒳𑒗𑒱𑒞𑒼 𑒯𑒧 𑒏𑒼𑒢𑒰 𑒑𑒧𑒰𑒆 ?
𑒮𑒰𑒿𑒗 𑒦𑒹𑒪 𑒒𑒳𑒩𑒱 𑒨𑒳𑒫𑒞𑒲𑒮𑒦 𑒑𑒹𑒪,
𑒮𑒴𑒩𑓂𑒨𑒏 𑒁𑒮𑓂𑒞𑒏 𑒮𑓀𑒑 𑒮𑓀𑒮𑒰𑒩𑒏 𑒁𑒢𑒱𑒞𑓂𑒨𑒞𑒰𑒏 𑒥𑒼𑒡,
𑒣𑒰𑒥𑒱 𑒮𑒱𑒠𑓂𑒡𑒰𑒩𑓂𑒟 𑒒𑒳𑒩𑒪 𑒒𑒩 𑒔𑒱𑒢𑓂𑒞𑒰 𑒧𑒑𑓂𑒢,
𑒬𑒳𑒠𑓂𑒡𑒼𑒡𑒢 𑒫𑒱𑒔𑒪𑒱𑒞 𑒧𑓀𑒞𑓂𑒩𑒝𑒰𑒧𑒹 𑒪𑒲𑒢।
𑒏𑒱𑒕𑒳 𑒠𑒱𑒢𑒏 𑒅𑒣𑒩𑒰𑒢𑓂𑒞,
𑒧𑒰𑒿𑒑𑒱 𑒂𑒖𑓂𑒘𑒰 𑒥𑒼𑒢 𑒖𑒋𑒥𑒰𑒏,
𑒮𑓀𑒑 𑒏𑒱𑒕𑒳 𑒮𑓀𑒑𑒲 𑒢𑒱𑒏𑒪𑒱 𑒥𑒱𑒔 𑒐𑒹𑒞-𑒣𑒟𑒰𑒩,
𑒠𑒹𑒐𑒱 𑒔𑒰𑒮 𑒠𑒹𑒪 𑒐𑒹𑒞 𑒧𑒩𑒪 𑒏𑒲𑒙-𑒣𑒞𑓀𑒑 ।
𑒠𑒳𑒐𑒱𑒞 𑒥𑒻𑒮𑒱 𑒅𑒞𑒛𑓃𑒪 𑒒𑒼𑒛𑓃𑒰𑒮𑒿 𑒁𑒡𑓁 𑒮𑒱𑒠𑓂𑒡𑒰𑒩𑓂𑒟,
𑒥𑒻𑒮𑒱 𑒖𑒼𑒧𑒏 𑒑𑒰𑒕𑒏 𑒢𑒲𑒔𑒰𑒿 𑒡𑒋 𑒡𑓂𑒨𑒰𑒢,
𑒣𑒰𑒍𑒪 𑒬𑒰𑒢𑓂𑒞𑒱 𑒞𑒐𑒢𑒹 𑒦𑒹𑒙𑒪 𑒋𑒏 𑒮𑒰𑒡𑒳।
𑒕𑒪 𑒍 𑒧𑒼𑒏𑓂𑒭𑒏 𑒞𑒰𑒏𑒱𑒧𑒹 𑒧𑒑𑓂𑒢,
𑒮𑒳𑒢𑒱 𑒍𑒏𑒩 𑒑𑒣 𑒠𑒹𑒐𑒪 𑒯𑒼𑒃𑒞 𑒁𑒢𑓂𑒞𑒩𑓂𑒡𑒰𑒢।
𑒑𑒵𑒯 𑒞𑓂𑒨𑒰𑒑𑒏 𑒂𑒋𑒪 𑒧𑒼𑒢𑒧𑒹 𑒦𑒰𑒫,
𑒥𑒼𑒢 𑒖𑒋𑒥𑒰𑒏 𑒂𑒥 𑒋𑒐𑒢 𑒢𑒯𑒱 𑒏𑒰𑒖।
𑒒𑒳𑒩𑒱 𑒮𑒦 𑒔𑒪𑒪 𑒑𑒵𑒯𑒏 𑒪𑒹𑒪,
𑒩𑒮𑓂𑒞𑒰𑒧𑒹 𑒦𑒹𑒙𑒪𑒱 𑒏𑒢𑓂𑒨𑒰 𑒋𑒏,
𑒏𑒯𑒪 𑒁𑒯𑒰𑒿 𑒕𑒲 𑒖𑒢𑒱𑒏 𑒣𑒞𑒱,
𑒮𑒹 𑒕𑒟𑒱 𑒢𑒱𑒬𑓂𑒔𑒨𑒹𑒢 𑒢𑒱𑒫𑒵𑒞𑓂𑒞।
𑒢𑒱𑒫𑒵𑒞𑓂𑒞 𑒬𑒥𑓂𑒠𑒮𑒿 𑒢𑒱𑒩𑓂𑒫𑒰𑒝𑒏 𑒣𑓂𑒩𑒮𑓀𑒑,
𑒮𑒼𑒔𑒱 𑒧𑒳𑒠𑒱𑒞 𑒮𑒱𑒠𑓂𑒡𑒰𑒩𑓂𑒟 𑒒𑒳𑒩𑒪 𑒩𑒰𑒖 𑒮𑒦𑒰,
𑒩𑒯𑒟𑒱 𑒍𑒞𑒋 𑒬𑒳𑒠𑓂𑒡𑒼𑒡𑒢 𑒧𑓀𑒞𑓂𑒩𑒲𑒑𑒝𑒏 𑒥𑒱𑒔।
𑒏𑒯𑒪 - 𑒪𑒋 𑒮𑓀𑒢𑓂𑒨𑒰𑒮 𑒧𑒼𑒏𑓂𑒭𑒏 𑒖𑓂𑒘𑒰𑒢𑒏 𑒪𑒹𑒪,
𑒏𑒩𑒴 𑒂𑒖𑓂𑒘𑒰 𑒣𑓂𑒩𑒠𑒰𑒢 𑒯𑒹 𑒦𑒴𑒠𑒹𑒫।
𑒯𑒹 𑒣𑒳𑒞𑓂𑒩 𑒏𑒋𑒪 𑒏𑒲 𑒑𑒣,
𑒖𑒰𑒆 𑒣𑒯𑒱𑒢𑒹 𑒣𑒰𑒪𑒢 𑒏𑒩𑒴 𑒦𑒋 𑒑𑒵𑒯𑒮𑓂𑒟 ।
𑒮𑓀𑒢𑓂𑒨𑒰𑒮𑒏 𑒢𑒯𑒱 𑒁𑒕𑒱 𑒂𑒋𑒪 𑒥𑒹𑒩,
𑒞𑒐𑒢 𑒮𑒱𑒠𑓂𑒡𑒰𑒩𑓂𑒟 𑒏𑒯𑒪 𑒁𑒕𑒱 𑒚𑒲𑒏,
𑒞𑒐𑒢 𑒠𑒴𑒩 𑒏𑒩𑒴 𑒔𑒰𑒩𑒱 𑒙𑒰 𑒯𑒧𑒩 𑒦𑒨,
𑒢𑒯𑒱 𑒧𑒵𑒞𑓂𑒨𑒳, 𑒩𑒼𑒑, 𑒫𑒵𑒠𑓂𑒡𑒰𑒫𑒮𑓂𑒟𑒰 𑒂𑒥𑒱 𑒮𑒏𑒨,
𑒡𑒢 𑒮𑒹𑒯𑒼 𑒢𑒯𑒱 𑒏𑓂𑒭𑒲𑒝 𑒯𑒼𑒋।
𑒬𑒳𑒠𑓂𑒡𑒼𑒡𑒢 𑒏𑒯𑒪 𑒁𑒕𑒱 𑒄 𑒁𑒮𑓀𑒦𑒫 𑒥𑒰𑒞,
𑒞𑒐𑒢 𑒯𑒧𑒩 𑒫𑒱𑒨𑒼𑒑𑒏 𑒏𑒩𑒴 𑒢𑒯𑒱 𑒣𑒬𑓂𑒔𑒰𑒞𑒰𑒣।
𑒏𑒯𑒱 𑒮𑒱𑒠𑓂𑒡𑒰𑒩𑓂𑒟 𑒑𑒹𑒪𑒰𑒯 𑒧𑒯𑒪 𑒥𑒱𑒔,
𑒔𑒱𑒢𑓂𑒞𑒱𑒞 𑒋𑒧𑓂𑒯𑒩-𑒍𑒧𑓂𑒯𑒩 𑒒𑒳𑒧𑒱 𑒢𑒱𑒏𑒪𑒪𑒱 𑒥𑒰𑒯𑓂𑒨 ।
𑒮𑒴𑒞𑒪 𑒕𑓀𑒠𑒏𑒏𑒹𑒿 𑒏𑒯𑒪 𑒬𑓂𑒫𑒹𑒞 𑒫𑒹𑒑𑒧𑒰𑒢,
𑒏𑓀𑒟𑒏 𑒒𑒼𑒛𑓃𑒰 𑒁𑒬𑓂𑒫𑒬𑒰𑒪𑒰𑒮𑒿 𑒪𑒰𑒆 ।
𑒮𑒦 𑒦𑒹𑒪 𑒢𑒱𑒢𑓂𑒢𑒧𑒹 𑒦𑒹𑒩 𑒏𑓀𑒟𑒏 𑒂𑒋𑒪,
𑒔𑒜𑒰 𑒮𑒱𑒠𑓂𑒡𑒰𑒩𑓂𑒟𑒏𑒹𑒿 𑒪𑒋 𑒑𑒹𑒪 𑒢𑒑𑒩𑒮𑒿 𑒠𑒴𑒩 ।
𑒢𑒧𑒮𑓂𑒏𑒰𑒩 𑒏𑒣𑒱𑒪𑒫𑒮𑓂𑒞𑒳 !
𑒒𑒳𑒩𑒥 𑒖𑒐𑒢 𑒣𑒰𑒋𑒥 𑒖𑒢𑓂𑒧-𑒧𑒵𑒞𑓂𑒨𑒳𑒏 𑒦𑒹𑒠 !
𑒮𑒼𑒗𑒰𑒿 𑒂𑒋𑒪 𑒦𑒰𑒩𑓂𑒑𑒫 𑒇𑒭𑒱𑒏 𑒏𑒳𑒙𑒲 𑒅𑒞𑒩𑒱 𑒮𑒱𑒠𑓂𑒡𑒰𑒩𑓂𑒟,
𑒪𑒹𑒪𑒢𑓂𑒯𑒱 𑒩𑒞𑓂𑒢𑒖𑒙𑒱𑒞 𑒏𑒵𑒣𑒰𑒝 𑒏𑒰𑒙𑒪 𑒏𑒹𑒬 ।
𑒧𑒳𑒏𑒳𑒙 𑒧𑒝𑒱 𑒂𑒦𑒴𑒭𑒝 𑒠𑒹𑒪 𑒕𑓀𑒠𑒏𑒏𑒹𑒿।
𑒁𑒬𑓂𑒩𑒳𑒡𑒰𑒩 𑒥𑒯𑒪 𑒕𑓀𑒠𑒏𑒏 𑒂𑒿𑒐𑒱,
𑒖𑒰𑒆 𑒕𑓀𑒠𑒏 𑒒𑒳𑒩𑒳 𑒢𑒑𑒩 𑒖𑒰𑒆 ।
𑒢𑒯𑒱 𑒮𑒱𑒠𑓂𑒡𑒰𑒩𑓂𑒟 𑒯𑒧 𑒢𑒯𑒱 𑒕𑒲 𑒮𑒳𑒧𑒢𑓂𑒞,
𑒕𑒼𑒛𑓃𑒱 𑒩𑒰𑒧 𑒒𑒳𑒩𑒪 𑒁𑒨𑒼𑒡𑓂𑒨𑒰 𑒢𑒑𑒩।
𑒒𑒼𑒙𑒏 𑒏𑓀𑒟𑒏𑒏 𑒂𑒿𑒐𑒱𑒧𑒹 𑒮𑒹𑒯𑒼 𑒢𑒼𑒩,
𑒞𑒐𑒢𑒹 𑒋𑒏 𑒫𑓂𑒨𑒰𑒡 𑒕𑒪 𑒂𑒋𑒪,
𑒏𑒭𑒰𑒨 𑒫𑒮𑓂𑒞𑓂𑒩 𑒣𑒯𑒱𑒩𑒢𑒹 𑒩𑒯𑒋, 𑒏𑒯𑒪 𑒮𑒱𑒠𑓂𑒡𑒰𑒩𑓂𑒟,
𑒯𑒧𑒩 𑒬𑒳𑒦𑓂𑒩 𑒫𑒮𑓂𑒞𑓂𑒩 𑒪𑒱𑒁 𑒠𑒱𑒁 𑒄 𑒫𑒮𑓂𑒞𑓂𑒩,
𑒁𑒠𑒪𑒱-𑒥𑒠𑒪𑒱 𑒠𑒳𑒢𑒳 𑒑𑒼𑒙𑒹 𑒫𑒮𑓂𑒞𑓂𑒩 𑒣𑒯𑒱𑒩𑒱,
𑒕𑓀𑒠𑒏 𑒠𑒹𑒐𑒱 𑒏𑒹𑒪𑒏 𑒣𑓂𑒩𑒝𑒰𑒧 𑒑𑒹𑒪 𑒒𑒳𑒩𑒱।
𑒮𑒱𑒠𑓂𑒡𑒰𑒩𑓂𑒟 𑒁𑒋𑒪𑒰𑒯 𑒂𑒬𑓂𑒩𑒧 𑒮𑒦 𑒦𑒹𑒪 𑒔𑒏𑒱𑒞,
𑒠𑒹𑒐𑒱 𑒢𑒰𑒢𑒰𑒫𑒱𑒡 𑒞𑒣𑒮𑓂𑒨𑒰 𑒏𑒚𑒼𑒩,
𑒢𑒯𑒱 𑒮𑓀𑒞𑒳𑒭𑓂𑒙 𑒏𑒭𑓂𑒙 𑒦𑒼𑒑𑒟𑒱 𑒣𑒰𑒥𑒨 𑒪𑒹𑒪 𑒮𑓂𑒫𑒩𑓂𑒑,
𑒁𑒑𑓂𑒢𑒱𑒯𑒼𑒞𑓂𑒩𑒏 𑒨𑒖𑓂𑒘 𑒞𑒣𑒏 𑒫𑒱𑒡𑒱 𑒠𑒹𑒐𑒱 ।
𑒢𑒱𑒏𑒪𑒱 𑒔𑒪𑒪 𑒏𑒱𑒕𑒳 𑒠𑒱𑒢𑒧𑒹 𑒮𑒱𑒠𑓂𑒡𑒰𑒩𑓂𑒟 𑒂𑒬𑓂𑒩𑒧 𑒕𑒼𑒛𑓃𑒱,
𑒮𑓂𑒫𑒩𑓂𑒑 𑒢𑒯𑒱 𑒧𑒼𑒏𑓂𑒭𑒏 𑒁𑒕𑒱 𑒯𑒧𑒩𑒰 𑒐𑒼𑒖 ।
𑒖𑒰𑒆 𑒞𑒐𑒢 𑒁𑒩𑒰𑒛 𑒧𑒳𑒢𑒱 𑒪𑒑 𑒫𑒱𑓀𑒡𑓂𑒨𑒏𑒼𑒭𑓂𑒚,
𑒢𑒧𑒮𑓂𑒏𑒰𑒩 𑒧𑒳𑒢𑒱 𑒣𑓂𑒩𑒝𑒰𑒧 𑒒𑒳𑒩𑒴 𑒮𑒦 𑒖𑒰𑒆,
𑒮𑒱𑒠𑓂𑒡𑒰𑒩𑓂𑒟 𑒢𑒱𑒏𑒪𑒱 𑒥𑒜𑓃𑒱 𑒣𑒯𑒳𑒿𑒔𑒪𑒰𑒯 𑒂𑒑𑒳।
𑒋𑒧𑓂𑒯𑒩 𑒏𑓀𑒟𑒏𑒏 𑒮𑓀𑒑 𑒕𑓀𑒠𑒏 𑒐𑒮𑒻𑒞-𑒣𑒛𑓃𑒻𑒞,
𑒋𑒏 𑒠𑒱𑒢𑒧𑒹 𑒂𑒋𑒪 𑒧𑒰𑒩𑓂𑒑 𑒂𑒚 𑒠𑒱𑒢𑒧𑒹 𑒔𑒪𑒻𑒞,
𑒒𑒩𑒧𑒳𑒿𑒯𑒰 𑒩𑒮𑓂𑒞𑒰 𑒂𑒃 𑒏𑒧 𑒢𑒯𑒱, 𑒁𑒕𑒱 𑒦𑒹𑒪 𑒁𑒢𑒢𑓂𑒞 ।
𑒒𑒳𑒩𑒱 𑒮𑒳𑒢𑒹𑒪𑒏 𑒐𑒥𑒩𑒱 𑒏𑒭𑒰𑒨 𑒫𑒮𑓂𑒞𑓂𑒩 𑒣𑒯𑒱𑒩𑒥𑒰𑒏 𑒮𑒱𑒠𑓂𑒡𑒰𑒩𑓂𑒟𑒏,
𑒑𑒾𑒞𑒧𑒲 𑒧𑒴𑒩𑓂𑒕𑒱𑒞, 𑒨𑒬𑒼𑒡𑒩𑒰 𑒏𑒰𑒢𑒟𑒱 𑒥𑒰𑒖𑒱-𑒥𑒰𑒖𑒱,
𑒋𑒯𑒢 𑒏𑒚𑒼𑒩 𑒯𑒵𑒠𑒨 𑒮𑒱𑒠𑓂𑒡𑒰𑒩𑓂𑒟𑒏 𑒧𑒳𑒐𑒹𑒙𑒰 𑒏𑒼𑒧𑒪 𑒩𑒯𑒋,
𑒍𑒏𑒩𑒼 𑒮𑒿 𑒏𑒚𑒼𑒩 𑒁𑒕𑒱 𑒯𑒵𑒠𑒨 𑒯𑒧𑒩 𑒖𑒹 𑒤𑒰𑒙𑒋 𑒁𑒕𑒱 𑒢𑒘𑒱 ।
𑒬𑒳𑒠𑓂𑒡𑒼𑒡𑒢 𑒏𑒯𑒟𑒱 𑒠𑒬𑒩𑒟𑒏 𑒕𑒪 𑒦𑒰𑒑𑓂𑒨,
𑒣𑒳𑒞𑓂𑒩 𑒫𑒱𑒨𑒼𑒑𑒧𑒹 𑒣𑓂𑒩𑒰𑒝 𑒯𑒧𑒩 𑒢𑒱𑒏𑒪𑒋 𑒢𑒘𑒱 𑒁𑒕𑒱।
𑒣𑒳𑒩𑒯𑒱𑒞 𑒂 𑒧𑓀𑒞𑓂𑒩𑒲𑒖𑒲 𑒢𑒱𑒏𑒪𑒱 𑒞𑒰𑒏𑒴 𑒖𑒰𑒨,
𑒦𑒰𑒩𑓂𑒑𑒫 𑒧𑒳𑒢𑒱𑒏 𑒂𑒬𑓂𑒩𑒧𑒧𑒹 𑒠𑒹𑒐𑒴 𑒣𑒴𑒕𑒴 𑒍𑒞𑒋।
𑒖𑒰𑒨 𑒖𑒐𑒢 𑒮𑒦 𑒍𑒞𑒋 𑒣𑒴𑒕𑒪 𑒦𑒰𑒩𑓂𑒑𑒫 𑒏𑒯𑒪,
𑒑𑒹𑒪𑒟𑒱 𑒁𑒩𑒰𑒛 𑒧𑒳𑒢𑒱𑒏 𑒂𑒬𑓂𑒩𑒧 𑒠𑒱𑒮 𑒧𑒼𑒏𑓂𑒭𑒏 𑒪𑒹𑒪 𑒥𑒹𑒏𑒪।
𑒠𑒳𑒢𑒴 𑒑𑒼𑒙𑒹 𑒥𑒜𑓃𑒱 𑒂𑒑𑒰𑒿 𑒠𑒹𑒐𑒻𑒞 𑒕𑒟𑒱 𑒏𑒲,
𑒏𑒳𑒧𑒰𑒩 𑒑𑒰𑒕𑒏 𑒢𑒲𑒔𑒰𑒿 𑒥𑒻𑒮𑒪 𑒍𑒞𑒋।
𑒣𑒳𑒩𑒼𑒯𑒱𑒞 𑒏𑒯𑒪 𑒯𑒹 𑒏𑒳𑒧𑒰𑒩 𑒣𑒱𑒞𑒰𑒏 𑒄 𑒑𑒣 𑒮𑒳𑒢𑒴,
𑒑𑒵𑒯𑒮𑓂𑒟 𑒩𑒰𑒖𑒰 𑒫𑒱𑒠𑒹𑒯, 𑒥𑒪𑒱, 𑒩𑒰𑒧 𑒂 𑒥𑒖𑓂𑒩𑒥𑒰𑒯𑒳,
𑒏𑒹𑒪𑒢𑓂𑒯𑒱 𑒣𑓂𑒩𑒰𑒣𑓂𑒞 𑒧𑒼𑒏𑓂𑒭 𑒏𑒩𑒴 𑒁𑒯𑒰𑒿 𑒮𑒹𑒯𑒼।
𑒧𑒳𑒠𑒰 𑒮𑒱𑒠𑓂𑒡𑒰𑒩𑓂𑒟 𑒥𑒼𑒢𑒮𑒿 𑒒𑒳𑒩𑒞𑒰𑒯 𑒢𑒯𑒱,
𑒧𑒼𑒏𑓂𑒭𑒏 𑒪𑒹𑒪𑒢𑓂𑒯𑒱 𑒁𑒕𑒱 𑒣𑓂𑒩𑒝 𑒞𑒼𑒛𑓃𑒞𑒰𑒯 𑒢𑒯𑒱।
𑒯𑒹 𑒮𑒱𑒠𑓂𑒡𑒰𑒩𑓂𑒟 𑒣𑒯𑒱𑒢𑒯𑒳 𑒒𑒳𑒩𑒪 𑒕𑒟𑒱 𑒥𑒼𑒢𑒮𑒿,
𑒁𑒨𑒼𑒡𑓂𑒨𑒰𑒏 𑒩𑒰𑒧, 𑒬𑒰𑒪𑓂𑒫 𑒠𑒹𑒬𑒏 𑒠𑓂𑒩𑒳𑒧 𑒂 𑒩𑒰𑒖𑒰 𑒁𑓀𑒥𑒩𑒲𑒭 ।
𑒯𑒹 𑒣𑒳𑒩𑒯𑒱𑒞 𑒖𑒲 𑒒𑒳𑒩𑒴 𑒫𑓂𑒨𑒩𑓂𑒟 𑒮𑒧𑒨 𑒢𑒭𑓂𑒙 𑒕𑒲 𑒏𑒋 𑒩𑒯𑒪,
𑒩𑒰𑒧 𑒂 𑒏𑒱 𑒂𑒢 𑒢𑒯𑒱 𑒅𑒠𑒰𑒯𑒩𑒝 𑒮𑒧𑒏𑓂𑒭 ।
𑒢𑒯𑒱 𑒥𑒱𑒢𑒰 𑒞𑒣 𑒏𑒼𑒢𑒼 𑒏𑓂𑒨𑒼 𑒥𑒯𑒙𑒰𑒩𑒱 𑒮𑒏𑒞,
𑒖𑓂𑒘𑒰𑒢 𑒮𑓂𑒫𑒨𑓀 𑒣𑒰𑒋𑒥 𑒢𑒫 𑒩𑒮𑓂𑒞𑒰 𑒞𑒏𑒻𑒞।
𑒒𑒳𑒩𑒪 𑒠𑒳𑒯𑒳 𑒑𑒼𑒙𑒹 𑒑𑒳𑒣𑓂𑒞-𑒠𑒴𑒞 𑒢𑒱𑒨𑒳𑒏𑓂𑒞 𑒏𑒋।
𑒮𑒱𑒠𑓂𑒡𑒰𑒩𑓂𑒟 𑒥𑒜𑓃𑒱 𑒂𑒑𑒰𑒿 𑒏𑒋𑒪 𑒑𑓀𑒑𑒰𑒏𑒹𑒿 𑒣𑒰𑒩,
𑒩𑒰𑒖𑒑𑒵𑒯 𑒢𑒑𑒩𑒲 𑒣𑒯𑒳𑒿𑒔𑒱 𑒏𑒋 𑒦𑒱𑒏𑓂𑒭𑒰 𑒑𑓂𑒩𑒯𑒝,
𑒣𑒯𑒳𑒿𑒔𑒱 𑒣𑒰𑒝𑓂𑒛𑒫-𑒣𑒩𑓂𑒫𑒞 𑒖𑒐𑒢 𑒥𑒻𑒮𑒪𑒟𑒱,
𑒩𑒰𑒖𑒰 𑒥𑒱𑒧𑓂𑒥𑒮𑒰𑒩 𑒂𑒥𑒱 𑒥𑒳𑒗𑒰𑒍𑒪 𑒥𑒯𑒳𑒞 ।
𑒮𑒴𑒩𑓂𑒨𑒫𑓀𑒬𑒲 𑒏𑒳𑒧𑒰𑒩 𑒖𑒰𑒆 𑒒𑒳𑒩𑒱,
𑒧𑒳𑒠𑒰 𑒮𑒱𑒠𑓂𑒡𑒰𑒩𑓂𑒟 𑒏𑒯𑒪 𑒯𑒩𑓂𑒨𑓀𑒏 𑒫𑓀𑒬𑒖,
𑒧𑒼𑒯𑒏𑒹𑒿 𑒕𑒼𑒛𑓃𑒪 𑒒𑒳𑒩𑒱 𑒖𑒰𑒋𑒥 𑒏𑒞𑒋 ?
𑒩𑒰𑒖𑒰 𑒮𑒹𑒯𑒼 𑒯𑒼𑒃𑒕 𑒏𑒐𑒢𑒯𑒳𑒿 𑒏𑒰𑒪 𑒠𑒳𑒐𑒱𑒞,
𑒠𑒰𑒮 𑒫𑒩𑓂𑒑𑒏𑒹𑒿 𑒮𑒹𑒯𑒼 𑒏𑒐𑒢𑒯𑒳𑒿 𑒦𑒹𑒙𑒋 𑒕𑒻 𑒐𑒳𑒬𑒲 ?
𑒏𑒩𑒴 𑒩𑒏𑓂𑒭𑒰𑒏 𑒣𑓂𑒩𑒖𑒰𑒏 𑒮𑓀𑒑 𑒁𑒣𑒢 𑒮𑒹𑒯𑒼,
𑒮𑒱𑒠𑓂𑒡𑒰𑒩𑓂𑒟 𑒫𑒻𑒬𑓂𑒫𑓀𑒞𑒩 𑒂𑒬𑓂𑒩𑒧 𑒠𑒱𑒬 𑒥𑒜𑓃𑒪𑒰𑒯,
𑒧𑒑𑒡𑒩𑒰𑒖 𑒔𑒏𑒱𑒞 !
𑒁𑒩𑒰𑒛𑒏 𑒂𑒬𑓂𑒩𑒧𑒧𑒹 𑒖𑓂𑒘𑒰𑒢 𑒪𑒹𑒪,
𑒑𑒹𑒪𑒰𑒯 𑒬𑒰𑒏𑓂𑒨,
𑒏𑒯𑒪 𑒧𑒳𑒢𑒱 𑒁𑒫𑒱𑒠𑓂𑒨𑒰 𑒁𑒕𑒱 𑒣𑒰𑒿𑒔𑒙𑒰,
𑒁𑒏𑒩𑓂𑒧𑒝𑓂𑒨𑒞𑒰 𑒂𑒪𑒮𑓂𑒨𑒏 𑒁𑒕𑒱 𑒁𑒢𑓂𑒯𑒰𑒩,
𑒁𑒢𑓂𑒯𑒰𑒩𑒏 𑒁𑓀𑒑 𑒁𑒕𑒱 𑒏𑓂𑒩𑒼𑒡 𑒂 𑒫𑒱𑒭𑒰𑒠,
𑒧𑒼𑒯 𑒁𑒕𑒱 𑒄 𑒫𑒰𑒮𑒢𑒰 𑒖𑒲𑒫𑒢𑒏 𑒂 𑒮𑓀𑒑𑒏 𑒧𑒵𑒞𑓂𑒨𑒳,
𑒏𑒪𑓂𑒨𑒰𑒝𑒏 𑒧𑒰𑒩𑓂𑒑 𑒁𑒕𑒱 𑒧𑒰𑒩𑓂𑒑 𑒧𑒼𑒏𑓂𑒭𑒏 ।
𑒧𑒳𑒠𑒰 𑒮𑒱𑒠𑓂𑒡𑒰𑒩𑓂𑒟 𑒏𑒯𑒪 𑒯𑒹 𑒧𑒳𑒢𑒱𑒫𑒩 !
𑒂𑒞𑓂𑒧𑒰𑒏 𑒧𑒰𑒢𑒥 𑒞𑒿 𑒁𑒕𑒱 𑒧𑒰𑒢𑒥 𑒁𑒯𑓀𑒏𑒰𑒩𑒏𑒹𑒿,
𑒁𑒯𑒰𑒿 𑒑𑒣 𑒢𑒯𑒱 𑒩𑒳𑒔𑒪 𑒥𑒜𑓃𑒪 𑒂𑒬𑓂𑒩𑒧 𑒅𑒠𑓂𑒩𑒏𑒏 𑒮𑒹।
𑒢𑒑𑒩𑒲 𑒑𑒹𑒪𑒰𑒯 𑒩𑒰𑒖𑒩𑓂𑒭𑒱𑒏 𑒖𑒹 𑒂𑒬𑓂𑒩𑒧 𑒕𑒪,
𑒧𑒳𑒠𑒰 𑒢𑒯𑒱 𑒅𑒞𑓂𑒞𑒩 𑒦𑒹𑒙𑒪 𑒍𑒞𑒯𑒳 𑒮𑒱𑒠𑓂𑒡𑒰𑒩𑓂𑒟𑒏।
𑒑𑒹𑒪𑒰𑒯 𑒞𑒐𑒢 𑒢𑒻𑒩𑓀𑒖𑒢𑒰 𑒞𑒙 𑒣𑒰𑒿𑒔𑒙𑒰 𑒦𑒱𑒏𑓂𑒭𑒳𑒏 𑒦𑒹𑒙𑒪,
𑒕𑒯 𑒥𑒩𑒐 𑒞𑒣 𑒏𑒋𑒪 𑒧𑒳𑒠𑒰 𑒣𑓂𑒩𑒬𑓂𑒢 𑒁𑒢𑒳𑒞𑓂𑒞𑒩𑒱𑒞 𑒕𑒪।
𑒮𑓂𑒫𑒮𑓂𑒟 𑒞𑒢𑒧𑒹 𑒦𑒹𑒙𑒞 𑒧𑒢𑒮𑒏 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩,
𑒣𑓂𑒩𑒝 𑒏𑒋𑒪 𑒄 𑒢𑒱𑒩𑓀𑒖𑒢𑒰𑒧𑒹 𑒏𑒋𑒪 𑒮𑓂𑒢𑒰𑒢 𑒍,
𑒥𑒰𑒯𑒩 𑒥𑒯𑒩𑒰𑒋 𑒁𑒋𑒪𑒰𑒯 𑒞𑒐𑒢𑒹 𑒏𑒢𑓂𑒨𑒰 𑒑𑒼𑒣𑒩𑒰𑒖𑒏,
𑒬𑓂𑒫𑒹𑒞 𑒩𑓀𑒑 𑒢𑒲𑒪 𑒫𑒮𑓂𑒞𑓂𑒩𑒧𑒹 𑒢𑒢𑓂𑒠 𑒥𑒰𑒪𑒰 𑒖𑒏𑒩 𑒢𑒰𑒧 𑒕𑒪 ।
𑒂𑒨𑒪𑒱 𑒣𑒰𑒨𑒮 𑒣𑒰𑒞𑓂𑒩 𑒪𑒹𑒢𑒹 𑒞𑒵𑒣𑓂𑒞 𑒦𑒋 𑒮𑒱𑒠𑓂𑒡𑒰𑒩𑓂𑒟 𑒦𑒼𑒖𑒢 𑒏𑒋𑒪।
𑒣𑒰𑒿𑒔𑒴 𑒮𑓀𑒑𑒲 𑒠𑒹𑒐𑒱 𑒄 𑒮𑒱𑒠𑓂𑒡𑒰𑒩𑓂𑒟𑒏 𑒮𑓀𑒑 𑒕𑒼𑒛𑓃𑒪 ।
𑒧𑒳𑒠𑒰 𑒍 𑒦𑒹𑒪𑒰𑒯 𑒮𑒥𑒪 𑒥𑒼𑒡𑒱𑒮𑒞𑓂𑒫𑒏 𑒣𑓂𑒩𑒰𑒣𑓂𑒞𑒱𑒏 𑒪𑒹𑒪,
𑒠𑒵𑒜𑓃 𑒣𑓂𑒩𑒝 𑒪𑒋 𑒣𑒲𑒣𑒩𑒏 𑒞𑒩 𑒍 𑒂𑒮𑒢 𑒠𑒹𑒪𑒢𑓂𑒯𑒱 ।
𑒏𑒰𑒪 𑒮𑒩𑓂𑒣 𑒏𑒯𑒪 𑒠𑒹𑒐𑒴 𑒄 𑒢𑒲𑒪𑒏𑓀𑒚𑒏 𑒗𑒳𑒝𑓂𑒛𑒏𑒹𑒿,
𑒒𑒳𑒧𑒱 𑒩𑒯𑒪 𑒔𑒰𑒩𑒴 𑒠𑒱𑒮 𑒁𑒯𑒰𑒿𑒏,
𑒣𑓂𑒩𑒧𑒰𑒝 𑒁𑒕𑒱 𑒖𑒹 𑒥𑒼𑒡𑒱𑒮𑒞𑓂𑒫 𑒣𑓂𑒩𑒰𑒣𑓂𑒞 𑒏𑒩𑒥 𑒁𑒯𑒰𑒿।
𑒮𑒳𑒢𑒱 𑒄 𑒞𑒵𑒝 𑒅𑒚𑒰𑒋 𑒏𑒋𑒪 𑒣𑓂𑒩𑒞𑒱𑒖𑓂𑒘𑒰 𑒞𑒐𑒢,
𑒮𑒱𑒠𑓂𑒡𑒰𑒩𑓂𑒟 𑒣𑒰𑒍𑒞 𑒖𑓂𑒘𑒰𑒢 𑒂 𑒞𑒐𑒢𑒹 𑒅𑒚𑒞 𑒕𑒼𑒛𑓃𑒱 𑒂𑒮𑒢।
𑒥𑓂𑒩𑒯𑓂𑒧𑒰𑓀𑒛 𑒕𑒪 𑒣𑓂𑒩𑒮𑒢𑓂𑒢 𑒧𑒳𑒠𑒰 𑒠𑒳𑒭𑓂𑒙 𑒧𑒰𑒩 𑒛𑒩𑒰𑒨𑒪,
𑒏𑒰𑒧𑒠𑒹𑒫, 𑒔𑒱𑒞𑓂𑒩𑒰𑒨𑒳𑒡 𑒣𑒳𑒭𑓂𑒣𑒮𑒩 𑒢𑒰𑒧 𑒧𑒰𑒩𑒏,
𑒮𑒱𑒠𑓂𑒡𑒰𑒩𑓂𑒟 𑒣𑓂𑒩𑒰𑒣𑓂𑒞 𑒏𑒋 𑒖𑓂𑒘𑒰𑒢 𑒖𑒑𑒏𑒹𑒿 𑒥𑒞𑒰𑒍𑒞।
𑒯𑒧𑒩 𑒮𑒰𑒧𑓂𑒩𑒰𑒖𑓂𑒨𑒏 𑒯𑒼𑒋𑒞 𑒏𑒲 𑒞𑒐𑒢,
𑒣𑒳𑒞𑓂𑒩 𑒫𑒱𑒦𑓂𑒩𑒧,𑒯𑒩𑓂𑒭, 𑒠𑒩𑓂𑒣 𑒕𑒪 𑒍𑒏𑒩,
𑒣𑒳𑒞𑓂𑒩𑒲 𑒁𑒩𑒞𑒱, 𑒣𑓂𑒩𑒲𑒞𑒱, 𑒞𑒵𑒭𑒰 𑒏𑒹 𑒮𑒹𑒯𑒼 𑒏𑒋 𑒮𑓀𑒑।
𑒔𑒪𑒴 𑒄 𑒪𑒹𑒢𑒹 𑒜𑒰𑒪 𑒣𑓂𑒩𑒞𑒱𑒖𑓂𑒘𑒰𑒏,
𑒮𑒞𑓂 𑒡𑒢𑒳𑒭𑒣𑒩 𑒥𑒳𑒠𑓂𑒡𑒱𑒏 𑒫𑒰𑒝 𑒔𑒜𑓃𑒰𑒋,
𑒖𑒲𑒞𑒞 𑒮𑒹 𑒏𑒲 𑒖𑒲𑒞𑒋 𑒠𑒹𑒥𑒋 𑒯𑒧𑒩𑒰 𑒮𑒦 𑒂𑒃 ?
𑒯𑒹 𑒮𑒱𑒠𑓂𑒡𑒰𑒩𑓂𑒟 𑒨𑒖𑓂𑒘 𑒏𑒋 𑒣𑒜𑓃𑒱 𑒏𑒋 𑒬𑒰𑒮𑓂𑒞𑓂𑒩,
𑒏𑒩𑒴 𑒃𑒢𑓂𑒠𑓂𑒩𑒣𑒠 𑒣𑓂𑒩𑒰𑒣𑓂𑒞 𑒦𑒼𑒑𑒴 𑒦𑒼𑒑,
𑒕𑒼𑒛𑓃𑒴 𑒂𑒮𑒢 𑒠𑒹𑒥 𑒫𑒰𑒝 𑒔𑒪𑒰𑒋।
𑒢𑒯𑒱 𑒠𑒹𑒪𑒢𑓂𑒯𑒱 𑒮𑒱𑒠𑓂𑒡𑒰𑒩𑓂𑒟 𑒋𑒯𑒱𑒣𑒩 𑒡𑓂𑒨𑒰𑒢,
𑒧𑒰𑒩 𑒞𑒐𑒢 𑒠𑒹𑒪𑒏 𑒫𑒰𑒝 𑒔𑒪𑒰𑒋,
𑒧𑒳𑒠𑒰 𑒦𑒹𑒪 𑒏𑒼𑒢𑒼 𑒢𑒯𑒱 𑒣𑒩𑒱𑒝𑒰𑒧।
𑒬𑒱𑒫𑒣𑒩 𑒮𑒹𑒯𑒼 𑒔𑒪𑒪 𑒩𑒯𑒋 𑒄 𑒫𑒰𑒝,
𑒫𑒱𑒔𑒪𑒱𑒞 𑒦𑒹𑒪 𑒩𑒯𑒟𑒱 𑒍 𑒮𑒹𑒯𑒼,
𑒏𑒹 𑒁𑒕𑒱 𑒄 𑒮𑒹 𑒢𑒯𑒱 𑒖𑒰𑒢 !!
𑒯𑒹 𑒮𑒻𑒢𑒱𑒏 𑒯𑒧𑒩 𑒫𑒱𑒏𑒩𑒰𑒪-𑒫𑒱𑒔𑒱𑒞𑓂𑒩,
𑒞𑓂𑒩𑒱𑒬𑒴𑒪 𑒒𑒳𑒧𑒰𑒋, 𑒑𑒠𑒰 𑒅𑒚𑒰𑒋,
𑒮𑒰𑒿𑒜𑓃𑒏 𑒮𑒢 𑒠𑒋 𑒯𑒳𑓀𑒏𑒰𑒩,
𑒂𑒆 𑒏𑒩𑒴 𑒫𑒱𑒖𑒱𑒞 𑒁𑒕𑒱 𑒬𑒞𑓂𑒩𑒳 𑒫𑒱𑒏𑒩𑒰𑒪।
𑒩𑒰𑒞𑒱 𑒒𑒢𑒒𑒼𑒩 𑒁𑒢𑓂𑒯𑒩𑒱𑒨𑒰𑒧𑒹 𑒏𑒞𑒋 𑒕𑒟𑒱 𑒔𑒢𑓂𑒠𑓂𑒩 ?
𑒞𑒩𑒹𑒑𑒝𑒏 𑒮𑒹𑒯𑒼 𑒏𑒼𑒢𑒼 𑒢𑒯𑒱 𑒠𑒩𑓂𑒬 !
𑒧𑒳𑒠𑒰 𑒮𑒦 𑒑𑒹𑒪 𑒫𑓂𑒨𑒩𑓂𑒟 𑒣𑒠𑒰𑒩𑓂𑒣𑒝 𑒦𑒹𑒪 𑒁𑒠𑒵𑒬𑓂𑒨,
𑒧𑒰𑒩 𑒖𑒰𑒆 𑒯𑒼𑒋𑒞 𑒢𑒯𑒱 𑒄 𑒫𑒱𑒔𑒪𑒱𑒞।
𑒠𑒹𑒐𑒴 𑒋𑒏𑒩 𑒏𑓂𑒭𑒧𑒰 𑒣𑓂𑒩𑒞𑒲𑒏 𑒖𑒙𑒰𑒏,
𑒡𑒻𑒩𑓂𑒨 𑒁𑒕𑒱 𑒋𑒏𑒩 𑒖𑒹𑒢𑒰 𑒑𑒰𑒕𑒏 𑒧𑒴𑒪,
𑒔𑒩𑒱𑒞𑓂𑒩 𑒣𑒳𑒭𑓂𑒣 𑒥𑒳𑒠𑓂𑒡𑒱 𑒬𑒰𑒐𑒰 𑒡𑒩𑓂𑒧 𑒤𑒪𑒏 𑒣𑓂𑒩𑒞𑒲𑒏।
𑒮𑓂𑒟𑒰𑒢 𑒖𑒞𑒋 𑒁𑒕𑒱 𑒂𑒮𑒢 𑒣𑒵𑒟𑓂𑒫𑒲𑒏 𑒟𑒱𑒏 𑒢𑒰𑒦𑒱,
𑒣𑓂𑒩𑒰𑒣𑓂𑒞 𑒏𑒩𑒞 𑒄 𑒖𑓂𑒘𑒰𑒢 𑒮𑒯𑒖𑒯𑒱 𑒂𑒃 ।
𑒣𑒩𑒰𑒖𑒱𑒞 𑒧𑒰𑒩 𑒑𑒹𑒪 𑒍𑒞𑒋𑒮𑒿 𑒦𑒰𑒑𑒱।
𑒩𑒰𑒞𑒱𑒏 𑒣𑒯𑒱𑒪 𑒣𑒯𑒩𑒱𑒧𑒹 𑒬𑒰𑒏𑓂𑒨 𑒧𑒳𑒢𑒱,
𑒣𑒰𑒍𑒪 𑒫𑒩𑓂𑒝𑒢 𑒮𑓂𑒧𑒩𑒝 𑒣𑒴𑒩𑓂𑒫 𑒖𑒢𑓂𑒧𑒏 𑒮𑒯𑒖𑒯𑒱 ।
𑒠𑒼𑒮𑒩 𑒣𑒯𑒩𑒧𑒹 𑒠𑒱𑒫𑓂𑒨 𑒔𑒏𑓂𑒭𑒳 𑒣𑒰𑒥𑒱,
𑒠𑒹𑒐𑒪 𑒏𑒩𑓂𑒧𑒏 𑒤𑒪 𑒫𑒹𑒠𑒢𑒰𑒏 𑒁𑒢𑒳𑒦𑒴𑒞𑒱 ।
𑒑𑒩𑓂𑒦 𑒮𑒩𑒼𑒫𑒩 𑒢𑒩𑒏 𑒂 𑒮𑓂𑒫𑒩𑓂𑒑 𑒠𑒳𑒯𑒳𑒏,
𑒣𑒰𑒍𑒪 𑒁𑒢𑒳𑒦𑒫 𑒠𑒹𑒐𑒪 𑒐𑒮𑒻𑒞 𑒮𑓂𑒫𑒩𑓂𑒑𑒯𑒳𑒮𑒿,
𑒁𑒞𑒵𑒣𑓂𑒞 𑒦𑒼𑒑𑒲 𑒖𑒢𑓂𑒧, 𑒖𑒩𑒰, 𑒧𑒵𑒞𑓂𑒨𑒳।
𑒥𑒲𑒞𑒪 𑒞𑒹𑒮𑒩 𑒣𑒯𑒩𑒱 𑒔𑒰𑒩𑒱𑒧𑒧𑒹 𑒖𑒰𑒋,
𑒣𑒰𑒍𑒪 𑒖𑓂𑒘𑒰𑒢 𑒥𑒳𑒠𑓂𑒡 𑒦𑒋 𑒣𑒰𑒍𑒪 𑒬𑒰𑒢𑓂𑒞𑒱।
𑒬𑒰𑒢𑓂𑒞 𑒧𑒢 𑒬𑒰𑒢𑓂𑒞 𑒕𑒪 𑒣𑒴𑒩𑓂𑒝 𑒖𑒑𑒞 !!!
𑒡𑒩𑓂𑒧 𑒔𑒰𑒩𑒴 𑒠𑒱𑒮 𑒥𑒱𑒢 𑒧𑒹𑒒 𑒁𑒕𑒰𑒩 !!
𑒮𑒴𑒔𑒢𑒰 𑒠𑒹𑒪 𑒠𑒳𑒢𑓂𑒠𑒦𑒱 𑒥𑒰𑒖𑒱 𑒁𑒏𑒰𑒬 !
𑒮𑒏𑒪 𑒠𑒱𑒬𑒰 𑒮𑒱𑒠𑓂𑒡𑒑𑒝𑒮𑒿 𑒠𑒲𑒣𑓂𑒞𑒧𑒨 𑒕𑒪,
𑒮𑓂𑒫𑒩𑓂𑒑𑒮𑒿 𑒫𑒵𑒭𑓂𑒙𑒱 𑒣𑒳𑒭𑓂𑒣𑒏 𑒃𑒏𑓂𑒭𑒫𑒰𑒏𑒳 𑒫𑓀𑒬𑒏 𑒄 𑒧𑒳𑒢𑒱 𑒕𑒪।
𑒥𑒻𑒮𑒪 𑒋𑒯𑒱 𑒁𑒫𑒮𑓂𑒟𑒰𑒧𑒹 𑒮𑒰𑒞 𑒠𑒱𑒢 𑒡𑒩𑒱 𑒧𑒳𑒢𑒱 𑒬𑒰𑒏𑓂𑒨,
𑒫𑒱𑒧𑒰𑒢 𑒔𑒜𑓃𑒱 𑒁𑒋𑒪𑒰𑒯 𑒞𑒐𑒢 𑒠𑒹𑒫𑒞𑒰 𑒠𑒴 𑒙𑒰,
𑒏𑒩𑒴 𑒅𑒠𑓂𑒡𑒰𑒩 𑒖𑒑𑒞𑒏 𑒠𑒋 𑒧𑒼𑒏𑓂𑒭𑒏 𑒬𑒱𑒏𑓂𑒭𑒰।
𑒂 𑒦𑒱𑒏𑓂𑒭𑒳𑒣𑒰𑒞𑓂𑒩 𑒪𑒋 𑒁𑒋𑒪𑒰𑒯 𑒤𑒹𑒩 𑒋𑒏 𑒠𑒹𑒫,
𑒏𑒋𑒪 𑒮𑓂𑒧𑒩𑒝 𑒁𑒩𑒰𑒛 𑒂 𑒅𑒠𑓂𑒩𑒏𑒏 𑒥𑒳𑒠𑓂𑒡,
𑒧𑒳𑒠𑒰 𑒠𑒳𑒯𑒳 𑒕𑒪 𑒕𑒼𑒛𑓃𑒪 𑒖𑒑𑒞 𑒄 𑒞𑒳𑒔𑓂𑒕।
𑒂𑒥 𑒖𑒰𑒋𑒥 𑒫𑒰𑒩𑒰𑒝𑒮𑒲 𑒦𑒱𑒏𑓂𑒭𑒳 𑒣𑒰𑒿𑒔𑒼 𑒮𑓀𑒑𑒲 𑒖𑒞𑒋,
𑒏𑒯𑒪 𑒠𑒹𑒐𑒱 𑒥𑒼𑒡𑒱𑒏 𑒑𑒰𑒕 𑒠𑒱𑒮 𑒮𑓂𑒢𑒹𑒯𑒮𑒿।
𑒥𑒳𑒠𑓂𑒡 𑒔𑒪𑒪𑒰𑒯 𑒁𑒮𑒑𑒩𑒹 𑒩𑒮𑓂𑒞𑒰𑒧𑒹 𑒦𑒱𑒏𑓂𑒭𑒳 𑒋𑒏 𑒦𑒹𑒙𑒪,
𑒞𑒹𑒖𑒧𑒨 𑒁𑒯𑒰𑒿 𑒏𑒹 𑒑𑒳𑒩𑒳 𑒏𑒹 𑒕𑒟𑒱 𑒁𑒯𑒰𑒿𑒏 ?
𑒯𑒹 𑒫𑒞𑓂𑒮 𑒑𑒳𑒩𑒳 𑒢𑒯𑒱 𑒏𑓂𑒨𑒼 𑒯𑒧𑒩
𑒣𑓂𑒩𑒰𑒣𑓂𑒞 𑒏𑒋𑒪 𑒢𑒱𑒩𑓂𑒫𑒰𑒝 𑒯𑒧,
𑒮𑒦 𑒏𑒱𑒕𑒳 𑒖𑒰𑒢𑒪 𑒖𑒹 𑒁𑒕𑒱 𑒖𑒢𑒥𑒰 𑒨𑒼𑒑𑓂𑒨
𑒪𑒼𑒏 𑒏𑒯𑒋 𑒕𑒟𑒱 𑒯𑒧𑒩𑒰 𑒥𑒳𑒠𑓂𑒡 !
𑒖𑒰 𑒩𑒯𑒪 𑒕𑒲 𑒏𑒰𑒬𑒲 𑒠𑒳𑒐𑒱𑒞 𑒏𑒪𑓂𑒨𑒰𑒝 𑒪𑒹𑒪
𑒠𑒴𑒩 𑒮𑒿 𑒠𑒹𑒐𑒪 𑒫𑒩𑒳𑒝𑒰 𑒂 𑒑𑓀𑒑𑒰𑒏 𑒧𑒱𑒪𑒢
𑒂 𑒑𑒹𑒪𑒰𑒯 𑒥𑒳𑒠𑓂𑒡 𑒪𑒑𑒯𑒱𑒧𑒹 𑒧𑒵𑒑𑒠𑒰𑒫 𑒫𑒢।
𑒣𑒰𑒿𑒔𑒴 𑒮𑓀𑒑𑒱 𑒯𑒳𑒢𑒏 𑒩𑒯𑒟𑒱 𑒍𑒞𑒯𑒱
𑒠𑒹𑒐𑒻𑒞 𑒁𑒥𑒻𑒞 𑒫𑒱𑒔𑒰𑒩𑒪 𑒏𑓂𑒨𑒼 𑒢𑒯𑒱 𑒏𑒩𑒞 𑒁𑒦𑒱𑒫𑒰𑒠𑒢 𑒯𑒳𑒢𑒏
𑒧𑒳𑒠𑒰 𑒣𑒯𑒳𑒿𑒔𑒱𑒞𑒹 𑒄 𑒏𑒲 𑒑𑒣 𑒦𑒹𑒪 ?
𑒮𑒦 𑒯𑒳𑒢𑒏 𑒮𑒞𑓂𑒏𑒰𑒩𑒧𑒹 𑒕𑒪 𑒪𑒰𑒑𑒱 𑒑𑒹𑒪?
𑒂𑒮𑒢 𑒠𑒋 𑒖𑒐𑒢 𑒥𑒻𑒮𑒹𑒪𑒢𑓂𑒯𑒱 𑒯𑒳𑒢𑒏𑒰 𑒮𑒦 𑒏𑓂𑒨𑒼,
𑒅𑒣𑒠𑒹𑒬 𑒠𑒹𑒥 𑒬𑒳𑒩𑒳 𑒏𑒩𑒱𑒞𑒟𑒱 𑒧𑒳𑒠𑒰 𑒞𑒐𑒢𑒹 𑒥𑒰𑒖𑒪 𑒏𑒱𑒨𑒼,
𑒁𑒯𑒰𑒿 𑒞𑒿 𑒞𑒞𑓂𑒫𑒏𑒹𑒿 𑒢𑒯𑒱 𑒕𑒲 𑒥𑒳𑒗𑒻𑒞,
𑒞𑒣 𑒕𑒼𑒛𑓃𑒱 𑒥𑒲𑒔𑒯𑒱 𑒅𑒚𑒪 𑒕𑒪𑒯𑒳𑒿 𑒏𑒱𑒋𑒏 ?
𑒥𑒳𑒠𑓂𑒡 𑒏𑒯𑒪 𑒒𑒼𑒩 𑒞𑒣 𑒂 𑒂𑒮𑒏𑓂𑒞𑒱 𑒠𑒳𑒢𑒳𑒏 𑒯𑒧 𑒞𑓂𑒨𑒰𑒑 𑒏𑒋𑒪
𑒧𑒡𑓂𑒨 𑒧𑒰𑒩𑓂𑒑𑒏𑒹𑒿 𑒣𑒏𑒛𑓃𑒱 𑒥𑒼𑒡𑒞𑓂𑒫 𑒣𑓂𑒩𑒰𑒣𑓂𑒞 𑒏𑒋𑒪 ।
𑒋𑒏𑒩 𑒮𑒴𑒩𑓂𑒨 𑒁𑒕𑒱 𑒮𑒧𑓂𑒨𑒏 𑒠𑒵𑒭𑓂𑒙𑒱 𑒂
𑒋𑒏𑒩 𑒮𑒳𑒢𑓂𑒠𑒩 𑒩𑒮𑓂𑒞𑒰𑒣𑒩 𑒔𑒪𑒻𑒋 𑒮𑒧𑓂𑒨𑒏 𑒮𑓀𑒏𑒪𑓂𑒣 ।
𑒄 𑒏𑒩𑒻𑒋 𑒫𑒱𑒯𑒰𑒩 𑒮𑒧𑓂𑒨𑒏 𑒂𑒔𑒩𑒝𑒏 𑒅𑒣𑒫𑒢𑒧𑒹
𑒮𑒧𑓂𑒨𑒏𑓂 𑒂𑒖𑒲𑒫𑒱𑒏𑒰 𑒁𑒕𑒱 𑒦𑒼𑒖𑒢 𑒋𑒏𑒩।
𑒮𑒹𑒫𑒏 𑒁𑒕𑒱 𑒮𑒧𑓂𑒨𑒏 𑒫𑓂𑒨𑒰𑒨𑒰𑒧,
𑒬𑒰𑒢𑓂𑒞𑒱 𑒦𑒹𑒙𑒻𑒋 𑒋𑒏𑒩𑒰 𑒮𑒧𑓂𑒨𑒏 𑒮𑓂𑒧𑒵𑒞𑒱 𑒩𑒴𑒣𑒲 𑒢𑒑𑒩𑒲𑒧𑒹
𑒂 𑒮𑒳𑒞𑒻𑒋 𑒮𑒧𑓂𑒨𑒏 𑒮𑒧𑒰𑒡𑒱𑒏 𑒥𑒱𑒕𑒰𑒍𑒢𑒣𑒩 𑒄।
𑒋𑒯𑒱 𑒁𑒭𑓂𑒙𑒰𑓀𑒑 𑒨𑒼𑒑𑒮𑒿 𑒁𑒕𑒱 𑒮𑒧𑓂𑒦𑒫 𑒄
𑒖𑒢𑓂𑒧, 𑒖𑒩𑒰, 𑒫𑓂𑒨𑒰𑒡𑒱 𑒂 𑒧𑒵𑒞𑓂𑒨𑒳𑒮𑒿 𑒧𑒳𑒏𑓂𑒞𑒱।
𑒧𑒡𑓂𑒨 𑒧𑒰𑒩𑓂𑒑 𑒔𑒰𑒩𑒱𑒙𑒰 𑒁𑒕𑒱 𑒡𑓂𑒩𑒳𑒫 𑒮𑒞𑓂𑒨
𑒠𑒳𑒐, 𑒁𑒕𑒱 𑒞𑒏𑒩 𑒏𑒰𑒩𑒝, 𑒠𑒳𑒐𑒏 𑒢𑒱𑒩𑒼𑒡
𑒂 𑒁𑒕𑒱 𑒅𑒣𑒰𑒨 𑒢𑒱𑒩𑒼𑒡𑒏 ।
𑒏𑒾𑓀𑒛𑒱𑒢𑓂𑒨 𑒂 𑒍𑒏𑒩 𑒔𑒰𑒩𑒴 𑒮𑓀𑒑𑒲 𑒮𑒳𑒢𑒪 𑒄,
𑒣𑓂𑒩𑒰𑒣𑓂𑒞 𑒏𑒋𑒪 𑒮𑒦 𑒠𑒱𑒫𑓂𑒨𑒖𑓂𑒘𑒰𑒢 ।
𑒯𑒹 𑒢𑒩𑒧𑒹 𑒅𑒞𑓂𑒞𑒧 𑒣𑒰𑒿𑒔𑒴 𑒑𑒼𑒙𑒹
𑒦𑒹𑒪 𑒖𑓂𑒘𑒰𑒢 𑒁𑒯𑒰𑒿 𑒪𑒼𑒏𑒢𑒱 𑒏𑒹?
𑒏𑒾𑓀𑒝𑓂𑒛𑒱𑒢𑓂𑒨 𑒏𑒯𑒪𑒢𑓂𑒯𑒱 𑒯𑒿, 𑒦𑒹𑒪 𑒦𑓀𑒞𑒹,
𑒏𑒾𑓀𑒛𑒱𑒢𑓂𑒨 𑒦𑒹𑒪𑒰𑒯 𑒞𑒐𑒢 𑒣𑓂𑒩𑒧𑒳𑒐 𑒡𑒩𑓂𑒧𑒫𑒹𑒞𑓂𑒞𑒰
𑒞𑒐𑒢𑒯𑒱 𑒨𑒏𑓂𑒭𑒮𑒦 𑒣𑒩𑓂𑒫𑒞𑒣𑒩𑒮𑒿 𑒏𑒋𑒪𑒏 𑒮𑒱𑓀𑒯𑒢𑒰𑒠,
𑒬𑒰𑒏𑓂𑒨𑒧𑒳𑒢𑒱 𑒁𑒕𑒱 𑒏𑒋𑒪𑒏 𑒡𑒩𑓂𑒧𑒔𑒏𑓂𑒩 𑒣𑓂𑒩𑒫𑒩𑓂𑒞𑒱𑒞 !!!!
𑒬𑒲𑒪 𑒏𑒲𑒪 𑒁𑒕𑒱 𑒏𑓂𑒭𑒧𑒰-𑒫𑒱𑒢𑒨 𑒁𑒕𑒱 𑒡𑒴𑒩𑒲,
𑒥𑒳𑒠𑓂𑒡𑒱-𑒮𑓂𑒧𑒵𑒞𑒱𑒏 𑒣𑒯𑒱𑒨𑒰 𑒁𑒕𑒱 𑒮𑒞𑓂𑒨 𑒁𑒯𑒱𑓀𑒮𑒰𑒮𑒿 𑒨𑒳𑒏𑓂𑒞,
𑒋𑒯𑒱𑒧𑒹 𑒥𑒻𑒮𑒱 𑒦𑒹𑒙𑒞 𑒬𑒰𑒢𑓂𑒞𑒱 𑒄 𑒥𑒰𑒖𑒪 𑒮𑒦 𑒨𑒏𑓂𑒭,
𑒧𑒵𑒑𑒠𑒰𑒫𑒧𑒹 𑒦𑒹𑒪 𑒡𑒩𑓂𑒧𑒔𑒏𑓂𑒩 𑒣𑓂𑒩𑒫𑒩𑓂𑒞𑒱𑒞।
𑒤𑒹𑒩 𑒁𑒬𑓂𑒫𑒖𑒱𑒞 𑒂 𑒍𑒏𑒩 𑒔𑒰𑒩𑒱 𑒙𑒰 𑒂𑒢 𑒦𑒱𑒏𑓂𑒭𑒳
𑒏𑒋𑒪 𑒢𑒱𑒩𑓂𑒫𑒰𑒝 𑒡𑒩𑓂𑒧𑒧𑒹 𑒥𑒳𑒠𑓂𑒡 𑒠𑒲𑒏𑓂𑒭𑒱𑒞,
𑒤𑒹𑒩 𑒏𑒳𑒪𑒣𑒳𑒞𑓂𑒩 𑒨𑒬 𑒣𑓂𑒩𑒰𑒣𑓂𑒞 𑒏𑒋𑒪 𑒁𑒩𑓂𑒯𑒞 𑒣𑒠
𑒨𑒬 𑒂 𑒔𑒾𑒫𑒢 𑒑𑒵𑒯𑒮𑓂𑒟𑒏𑒹𑒿
𑒏𑒋𑒪 𑒥𑒳𑒠𑓂𑒡 𑒮𑒠𑓂𑒡𑒩𑓂𑒧𑒧𑒹 𑒣𑓂𑒩𑒬𑒲𑒏𑓂𑒭𑒱𑒞 ।
𑒒𑒩𑒧𑒹 𑒩𑒯𑒱 𑒏𑓄 𑒦𑓄 𑒮𑒏𑒻 𑒕𑒲 𑒁𑒢𑒰𑒬𑒏𑓂𑒞
𑒂 𑒫𑒢𑒧𑒹 𑒩𑒯𑒱𑒨𑒼 𑒣𑓂𑒩𑒰𑒣𑓂𑒞 𑒏𑓄 𑒮𑒏𑒋 𑒕𑒲 𑒂𑒬𑒏𑓂𑒞𑒱 ।
𑒋𑒯𑒱𑒧𑒹𑒮𑒿 𑒂𑒚 𑒑𑒼𑒙 𑒁𑒩𑓂𑒯𑒞 𑒣𑓂𑒩𑒰𑒣𑓂𑒞 𑒬𑒱𑒭𑓂𑒨𑒏𑒹𑒿
𑒥𑒱𑒠𑒰 𑒏𑒋 𑒂𑒚𑒼 𑒠𑒱𑒬𑒰𑒧𑒹 𑒔𑒪𑒪𑒰𑒯 𑒥𑒳𑒠𑓂𑒡 ।
𑒣𑒯𑒳𑒿𑒔𑒱 𑒑𑒨𑒰 𑒖𑒱𑒞𑒥𑒰𑒏 𑒩𑒯𑒢𑓂𑒯𑒱 𑒃𑒔𑓂𑒕𑒰
𑒮𑒱𑒠𑓂𑒡𑒱 𑒮𑒦𑒮𑒿 𑒨𑒳𑒏𑓂𑒞 𑒏𑒰𑒬𑓂𑒨𑒣 𑒧𑒳𑒢𑒱𑒏𑒹𑒿।
𑒑𑒨𑒰𑒧𑒹 𑒏𑒰𑒬𑓂𑒨𑒣 𑒧𑒳𑒢𑒱 𑒏𑒋𑒪𑒢𑓂𑒯𑒱 𑒮𑓂𑒫𑒰𑒑𑒞 𑒥𑒳𑒠𑓂𑒡𑒏,
𑒧𑒳𑒠𑒰 𑒩𑒯𑒥𑒰𑒏 𑒪𑒹𑒪 𑒠𑒹𑒪 𑒁𑒑𑓂𑒢𑒱𑒬𑒰𑒪𑒰 𑒩𑒯𑒋 𑒕𑒪 𑒧𑒯𑒰𑒮𑒩𑓂𑒣 𑒖𑒞𑒋 ।
𑒩𑒰𑒞𑒱𑒧𑒹 𑒧𑒳𑒠𑒰 𑒍 𑒮𑒩𑓂𑒣 𑒣𑓂𑒩𑒝𑒰𑒧 𑒏𑒋𑒪 𑒥𑒳𑒠𑓂𑒡𑒏𑒹𑒿
𑒦𑒼𑒩𑒧𑒹 𑒏𑒰𑒬𑓂𑒨𑒣 𑒠𑒹𑒐𑒪 𑒮𑒩𑓂𑒣𑒏𑒹𑒿 𑒥𑒳𑒠𑓂𑒡𑒏 𑒦𑒱𑒏𑓂𑒭𑒰𑒣𑒰𑒞𑓂𑒩𑒧𑒹 ।
𑒏𑒋 𑒣𑓂𑒩𑒝𑒰𑒧 𑒍 𑒂 𑒯𑒳𑒢𑒏𑒩 𑒣𑒰𑒿𑒔 𑒮𑒋 𑒬𑒱𑒭𑓂𑒨
𑒮𑓀𑒑 𑒁𑒋𑒪𑒰𑒯 𑒏𑒰𑒬𑓂𑒨𑒏 𑒦𑒰𑒋 𑒑𑒨 𑒂 𑒢𑒠𑒲 ।
𑒏𑒋𑒪 𑒮𑓂𑒫𑒲𑒏𑒰𑒩 𑒡𑒩𑓂𑒧 𑒥𑒳𑒠𑓂𑒡𑒏
𑒣𑓂𑒩𑒰𑒣𑓂𑒞 𑒏𑒋𑒪 𑒑𑒨 𑒅𑒞𑓂𑒞𑒳𑓀𑒑𑒣𑒩 𑒢𑒱𑒩𑓂𑒫𑒰𑒝𑒡𑒩𑓂𑒧𑒏 𑒬𑒱𑒏𑓂𑒭𑒰
𑒪𑒋 𑒮𑒦 𑒏𑒰𑒬𑓂𑒨𑒣𑒏𑒹𑒿 𑒮𑓀𑒑 𑒥𑒳𑒠𑓂𑒡 𑒣𑒯𑒳𑒿𑒔𑒪 𑒩𑒰𑒖𑒑𑒵𑒯𑒏 𑒫𑒹𑒝𑒳𑒫𑒝 ।
𑒥𑒱𑒧𑓂𑒥𑒮𑒰𑒩 𑒮𑒳𑒢𑒱 𑒂𑒋𑒪 𑒍𑒞𑒋 𑒠𑒹𑒐𑒪 𑒏𑒰𑒬𑓂𑒨𑒣𑒏𑒹𑒿 𑒥𑒳𑒠𑓂𑒡𑒏 𑒬𑒱𑒭𑓂𑒨 𑒥𑒢𑒪
𑒣𑒴𑒕𑒪 𑒥𑒳𑒠𑓂𑒡 𑒞𑒐𑒢 𑒏𑒰𑒬𑓂𑒨𑒣𑒮𑒿,
𑒕𑒼𑒛𑓃𑒪 𑒁𑒯𑒰𑒿 𑒁𑒑𑓂𑒢𑒱𑒏 𑒅𑒣𑒰𑒮𑒢𑒰 𑒏𑒱𑒋𑒏 𑒦𑓀𑒞𑒹 ?
𑒏𑒰𑒬𑓂𑒨𑒣 𑒏𑒯𑒪 𑒧𑒼𑒯 𑒖𑒢𑓂𑒧 𑒩𑒯𑒱 𑒖𑒰𑒃𑒕 𑒠𑒹𑒢𑒹
𑒂𑒯𑒳𑒞𑒱 𑒁𑒑𑓂𑒢𑒱𑒧𑒹 𑒏𑒋𑒢𑒹 𑒣𑒴𑒖𑒰 𑒣𑒰𑒚 𑒍𑒏𑒩 𑒞𑒿𑒯𑒱 ।
𑒥𑒳𑒠𑓂𑒡𑒏 𑒂𑒖𑓂𑒘𑒰 𑒣𑒰𑒥𑒱 𑒏𑒋𑒪 𑒏𑒰𑒬𑓂𑒨𑒣 𑒠𑒱𑒫𑓂𑒨 𑒬𑒏𑓂𑒞𑒱𑒏 𑒣𑓂𑒩𑒠𑒩𑓂𑒬𑒢
𑒂𑒏𑒰𑒬𑒧𑒡𑓂𑒨 𑒅𑒛𑓃𑒱 𑒁𑒑𑓂𑒢𑒱𑒏 𑒮𑒧𑒰𑒢 𑒖𑒩𑒱 𑒏𑒋 ।
𑒞𑒐𑒢 𑒥𑒱𑒧𑓂𑒥𑒮𑒰𑒩𑒏𑒹𑒿 𑒠𑒹𑒪 𑒥𑒳𑒠𑓂𑒡 𑒁𑒢𑒰𑒞𑓂𑒧𑒫𑒰𑒠𑒏 𑒬𑒱𑒏𑓂𑒭𑒰
𑒫𑒱𑒭𑒨, 𑒥𑒳𑒠𑓂𑒡𑒱 𑒂 𑒃𑒢𑓂𑒠𑓂𑒩𑒱𑒏 𑒮𑓀𑒨𑒼𑒑𑒮𑒿 𑒁𑒥𑒻𑒕 𑒔𑒹𑒞𑒢𑒞𑒰
𑒬𑒩𑒲𑒩 𑒃𑒢𑓂𑒠𑓂𑒩𑒱𑒨 𑒂 𑒔𑒹𑒞𑒢𑒰 𑒁𑒕𑒱 𑒦𑒱𑒢𑓂𑒢
𑒂 𑒁𑒦𑒱𑒢𑓂𑒢 𑒮𑒹𑒯𑒼।
𑒥𑒱𑒧𑓂𑒥𑒮𑒰𑒩 𑒦𑓄 𑒣𑓂𑒩𑒮𑒢𑓂𑒢 𑒠𑒰𑒢 𑒥𑒳𑒠𑓂𑒡𑒏𑒹𑒿 𑒫𑒹𑒝𑒳𑒫𑒢 𑒠𑒹𑒪
𑒞𑒟𑒰𑒑𑒞𑒏 𑒬𑒱𑒭𑓂𑒨 𑒁𑒬𑓂𑒫𑒖𑒱𑒞 𑒢𑒑𑒩 𑒑𑒹𑒪 𑒦𑒱𑒏𑓂𑒭𑒰𑒏 𑒪𑒹𑒪 ।
𑒏𑒣𑒱𑒪 𑒮𑓀𑒣𑓂𑒩𑒠𑒰𑒨𑒏 𑒪𑒼𑒏 𑒠𑒹𑒐𑒱 𑒞𑒹𑒖 𑒣𑒴𑒕𑒪 𑒁𑒯𑒰𑒿𑒏 𑒑𑒳𑒩𑒳 𑒏𑒹?
𑒏𑒯𑒪 𑒁𑒬𑓂𑒫𑒖𑒱𑒞 𑒮𑒳𑒑𑒞 𑒥𑒳𑒠𑓂𑒡 𑒕𑒟𑒱 𑒖𑒹 𑒃𑒏𑓂𑒭𑒫𑒰𑒏𑒳𑒫𑓀𑒬𑒏।
𑒮𑒋𑒯 𑒯𑒧𑒩 𑒑𑒳𑒩𑒳 𑒏𑒯𑒋 𑒕𑒟𑒱 𑒥𑒱𑒢 𑒏𑒰𑒩𑒝𑒏 𑒢𑒯𑒱 𑒯𑒼𑒃𑒕 𑒏𑒱𑒕𑒳𑒍
𑒅𑒣𑒞𑒱𑒭𑓂𑒨 𑒥𑓂𑒩𑒰𑒯𑓂𑒧𑒝𑒏𑒹𑒿 𑒣𑓂𑒩𑒰𑒣𑓂𑒞 𑒦𑒹𑒪 𑒖𑓂𑒘𑒰𑒢 𑒏𑒯𑒪𑒏 𑒍 𑒧𑒾𑒠𑓂𑒑𑒪𑓂𑒨𑒰𑒨𑒢𑒏𑒹𑒿
𑒧𑒾𑒠𑓂𑒑𑒪𑓂𑒨𑒰𑒨𑒢𑒏𑒹𑒿 𑒮𑒹𑒯𑒼 𑒣𑓂𑒩𑒰𑒣𑓂𑒞 𑒦𑒹𑒪𑒻𑒏 𑒮𑒧𑓂𑒨𑒏 𑒠𑒵𑒭𑓂𑒙𑒱 𑒮𑒳𑒢𑒱𑒏𑒹𑒿।
𑒮𑒳𑒢𑒱 𑒫𑒹𑒝𑒳𑒫𑒢𑒧𑒹 𑒅𑒣𑒠𑒹𑒬 𑒞𑓂𑒨𑒰𑒑𑒪 𑒖𑒙𑒰 𑒠𑓀𑒛
𑒣𑒯𑒱𑒩𑒱 𑒏𑒰𑒭𑒰𑒨 𑒏𑒋𑒪 𑒮𑒰𑒡𑒢𑒰 𑒣𑓂𑒩𑒰𑒣𑓂𑒞 𑒏𑒋𑒪 𑒣𑒩𑒧 𑒣𑒠
𑒏𑒰𑒬𑓂𑒨𑒣 𑒫𑓀𑒬𑒏 𑒋𑒏𑒙𑒰 𑒡𑒢𑒱𑒏 𑒥𑓂𑒩𑒰𑒯𑓂𑒧𑒝 𑒕𑒼𑒛𑓃𑒪 𑒣𑒞𑓂𑒢𑒲 𑒣𑒩𑒱𑒖𑒢
𑒣𑓂𑒩𑒮𑒱𑒠𑓂𑒡𑒱 𑒦𑒹𑒙𑒪 𑒯𑒱𑒢𑒏𑒰 𑒧𑒯𑒰𑒏𑒰𑒬𑓂𑒨𑒣 𑒢𑒰𑒧𑒮𑒿।
𑒏𑒼𑒮𑒪𑒏 𑒬𑓂𑒩𑒰𑒫𑒮𑓂𑒞𑒲𑒏 𑒡𑒢𑒱𑒏 𑒮𑒳𑒠𑒞𑓂𑒞 𑒂𑒋𑒪 𑒫𑒹𑒝𑒳𑒫𑒢
𑒑𑒵𑒯𑒮𑓂𑒟 𑒩𑒯𑒱𑒞𑒼 𑒣𑓂𑒩𑒰𑒣𑓂𑒞 𑒦𑒹𑒪 𑒞𑒞𑓂𑒫𑒖𑓂𑒘𑒰𑒢 𑒍𑒏𑒩𑒰 ।
𑒅𑒣𑒞𑒱𑒭𑓂𑒨 𑒮𑓀𑒑𑒹 𑒮𑒳𑒠𑒞𑓂𑒞 𑒑𑒹𑒪 𑒬𑓂𑒩𑒰𑒫𑒮𑓂𑒞𑒲 𑒢𑒑𑒩
𑒖𑒹𑒞 𑒏𑒹𑒩 𑒫𑒢𑒧𑒹 𑒫𑒱𑒯𑒰𑒩 𑒥𑒢𑒋𑒥𑒰𑒏 𑒏𑒋𑒪 𑒢𑒱𑒬𑓂𑒔𑒱𑒞𑓂 ।
𑒖𑒹𑒞 𑒩𑒯𑒋 𑒪𑒼𑒦𑒲 𑒜𑒹𑒩 𑒣𑒰𑒃 𑒪𑒹𑒪𑒏 𑒖𑒹𑒞𑒫𑒢𑒏
𑒧𑒳𑒠𑒰 𑒠𑒹𑒐𑒱 𑒠𑒻𑒞 𑒣𑒰𑒃 𑒯𑒵𑒠𑒨 𑒣𑒩𑒱𑒫𑒩𑓂𑒞𑒱𑒞 𑒦𑒹𑒪 𑒍𑒏𑒩
𑒮𑒦𑒙𑒰 𑒫𑒢 𑒠𑒹𑒪𑒏 𑒍 𑒫𑒱𑒯𑒰𑒩𑒏 𑒪𑒹𑒪
𑒫𑒱𑒯𑒰𑒩 𑒬𑒲𑒒𑓂𑒩𑒹 𑒥𑒢𑒱 𑒑𑒹𑒪 𑒅𑒣𑒞𑒱𑒭𑓂𑒨𑒏 𑒮𑓀𑒩𑒏𑓂𑒭𑒏𑒞𑓂𑒫𑒧𑒹।
𑒥𑒳𑒠𑓂𑒡 𑒤𑒹𑒩 𑒩𑒰𑒖𑒑𑒵𑒯𑒮𑒿 𑒔𑒪𑒱 𑒠𑒹𑒪𑒢𑓂𑒯𑒱 𑒏𑒣𑒱𑒪𑒫𑒮𑓂𑒞𑒳 𑒠𑒱𑒮
𑒍𑒞𑒋 𑒣𑒱𑒞𑒰 𑒬𑒳𑒠𑓂𑒡𑒼𑒡𑒢𑒏𑒹𑒿 𑒠𑒹𑒪 𑒥𑒾𑒠𑓂𑒡 𑒩𑒴𑒣𑒲 𑒁𑒧𑒵𑒞
𑒏𑒼𑒢𑒼 𑒣𑒳𑒞𑓂𑒩 𑒣𑒱𑒞𑒰𑒏𑒹𑒿 𑒢𑒯𑒱 𑒠𑒹𑒢𑒹 𑒩𑒯𑒋 𑒄।
𑒏𑒩𑓂𑒧 𑒡𑒩𑒋 𑒁𑒕𑒱 𑒧𑒵𑒞𑓂𑒨𑒳𑒏 𑒥𑒰𑒠𑒼 𑒣𑒕𑒼𑒛𑓃
𑒏𑒩𑓂𑒧𑒏 𑒮𑓂𑒫𑒦𑒰𑒫, 𑒏𑒰𑒩𑒝, 𑒤𑒪, 𑒂𑒬𑓂𑒩𑒨𑒏 𑒩𑒯𑒮𑓂𑒨 𑒥𑒳𑒗𑒴,
𑒖𑒢𑓂𑒧, 𑒧𑒵𑒞𑓂𑒨𑒳, 𑒬𑓂𑒩𑒧, 𑒠𑒳𑒐𑒮𑒿 𑒤𑒩𑒰𑒏 𑒣𑒟 𑒞𑒰𑒏𑒴 ।
𑒂𑒢𑒢𑓂𑒠, 𑒢𑒢𑓂𑒠, 𑒏𑒵𑒧𑒱𑒪, 𑒁𑒢𑒳𑒩𑒳𑒠𑓂𑒡, 𑒏𑒳𑒢𑓂𑒛𑒡𑒰𑒢𑓂𑒨, 𑒠𑒹𑒫𑒠𑒞𑓂𑒞, 𑒅𑒠𑒰𑒨𑒱
𑒏𑒋 𑒑𑓂𑒩𑒯𑒝 𑒠𑒲𑒏𑓂𑒭𑒰 𑒕𑒼𑒛𑓃𑒪 𑒑𑒵𑒯 𑒮𑒦 ।
𑒁𑒞𑓂𑒩𑒱𑒢𑒢𑓂𑒠𑒢 𑒅𑒣𑒰𑒪𑒱 𑒮𑒹𑒯𑒼 𑒏𑒋𑒪 𑒑𑓂𑒩𑒯𑒝 𑒠𑒲𑒏𑓂𑒭𑒰
𑒬𑒳𑒠𑓂𑒡𑒼𑒡𑒢 𑒠𑒹𑒪 𑒩𑒰𑒖𑒏𑒰𑒖 𑒦𑒰𑒋 𑒏𑒹𑒿
𑒩𑒯𑒋 𑒪𑒑𑒪𑒰𑒯 𑒩𑒰𑒖𑒩𑓂𑒭𑒱 𑒖𑒹𑒏𑒰𑒿 𑒍 ।
𑒤𑒹𑒩 𑒥𑒳𑒠𑓂𑒡 𑒏𑒋𑒪 𑒣𑓂𑒩𑒫𑒹𑒬 𑒢𑒑𑒩𑒧𑒹
𑒢𑓂𑒨𑒑𑓂𑒩𑒼𑒡 𑒫𑒢𑒧𑒹 𑒥𑒳𑒠𑓂𑒡 𑒣𑒯𑒳𑒿𑒔𑒱
𑒔𑒱𑒢𑓂𑒞𑒢 𑒏𑒪𑓂𑒨𑒰𑒝𑒏 𑒖𑒲𑒫𑒏 𑒏𑒩𑒋 𑒪𑒑𑒪𑒰𑒯।
𑒤𑒹𑒩 𑒍 𑒍𑒞𑒋 𑒮𑒿 𑒢𑒱𑒏𑒪𑒱 𑒑𑒹𑒪𑒰𑒯 𑒣𑓂𑒩𑒮𑒹𑒢𑒖𑒱𑒞𑒏 𑒠𑒹𑒮 𑒏𑒼𑒮𑒪
𑒬𑓂𑒩𑒰𑒫𑒮𑓂𑒞𑒲𑒏 𑒖𑒹𑒞𑒫𑒢 𑒕𑒪 𑒬𑓂𑒫𑒹𑒞 𑒦𑒫𑒢 𑒂 𑒁𑒬𑒼𑒏𑒏 𑒑𑒰𑒕𑒮𑒿 𑒮𑒖𑓂𑒖𑒱𑒞
𑒮𑒳𑒠𑒞𑓂𑒞 𑒏𑒋𑒪 𑒮𑓂𑒫𑒩𑓂𑒝𑒧𑒰𑒪𑒰𑒮𑒿 𑒮𑓂𑒫𑒰𑒑𑒞 𑒥𑒳𑒠𑓂𑒡𑒏
𑒏𑒋𑒪 𑒖𑒹𑒞𑒫𑒢 𑒥𑒳𑒠𑓂𑒡𑒏 𑒔𑒩𑒝𑒧𑒹 𑒮𑒧𑒩𑓂𑒣𑒱𑒞।
𑒣𑓂𑒩𑒮𑒹𑒢𑒖𑒱𑒞 𑒦𑒹𑒪 𑒡𑒩𑓂𑒧𑒧𑒹 𑒠𑒲𑒏𑓂𑒭𑒱𑒞
𑒞𑒲𑒩𑓂𑒟𑒏 𑒮𑒰𑒡𑒳 𑒮𑒦𑒏 𑒏𑒋 𑒬𑓀𑒏𑒰𑒏 𑒮𑒧𑒰𑒡𑒰𑒢
𑒏𑒋𑒪 𑒥𑒳𑒠𑓂𑒡 𑒯𑒳𑒢𑒏𑒰 𑒮𑒦𑒏𑒹𑒿 𑒠𑒲𑒏𑓂𑒭𑒱𑒞।
𑒍𑒞𑒋𑒮𑒿 𑒁𑒋𑒪𑒰𑒯 𑒥𑒳𑒠𑓂𑒡 𑒤𑒹𑒩 𑒩𑒰𑒖𑒑𑒵𑒯
𑒖𑓂𑒨𑒼𑒞𑒱𑒭𑓂𑒏, 𑒖𑒲𑒫𑒏, 𑒬𑒴𑒩, 𑒬𑓂𑒩𑒼𑒝,𑒁𑓀𑒑𑒠𑒏𑒹𑒿 𑒅𑒣𑒠𑒹𑒬 𑒠𑒋,
𑒏𑒋𑒪 𑒮𑒦𑒏𑒹𑒿 𑒮𑓀𑒒𑒧𑒹 𑒠𑒲𑒏𑓂𑒭𑒱𑒞।
𑒍𑒞𑒋𑒮𑒿 𑒑𑓀𑒡𑒰𑒩 𑒖𑒰𑒋 𑒩𑒰𑒖𑒰 𑒣𑒳𑒭𑓂𑒏𑒩𑒏𑒹𑒿 𑒏𑒋𑒪 𑒠𑒲𑒏𑓂𑒭𑒱𑒞
𑒫𑒱𑒣𑒳𑒪 𑒣𑒩𑓂𑒫𑒞𑒣𑒩 𑒯𑒹𑒧𑒫𑒞 𑒂 𑒮𑒰𑒞𑒰𑒑𑓂𑒩 𑒠𑒳𑒢𑒴 𑒨𑒏𑓂𑒭𑒏𑒹𑒿 𑒅𑒣𑒠𑒹𑒬 𑒠𑒋
𑒁𑒋𑒪𑒰𑒯 𑒖𑒲𑒫𑒏𑒏 𑒂𑒧𑓂𑒩𑒫𑒢।
𑒍𑒞𑒋 𑒏𑒋 𑒫𑒱𑒬𑓂𑒩𑒰𑒧 𑒒𑒳𑒧𑒻𑒞-𑒤𑒱𑒩𑒻𑒞
𑒣𑒯𑒳𑒿𑒔𑒪 𑒂𑒣𑒝 𑒢𑒑𑒩,
𑒍𑒞𑒋 𑒁𑓀𑒑𑒳𑒪𑒲𑒧𑒰𑒪 𑒞𑒮𑓂𑒏𑒩𑒏𑒹𑒿
𑒏𑒋𑒪 𑒠𑒲𑒏𑓂𑒭𑒱𑒞 𑒣𑓂𑒩𑒹𑒧𑒏 𑒡𑒩𑓂𑒧𑒧𑒹।
𑒫𑒰𑒩𑒰𑒝𑒮𑒲𑒧𑒹 𑒁𑒮𑒱𑒞𑒏 𑒦𑒰𑒑𑒱𑒢 𑒏𑒰𑒞𑓂𑒨𑒰𑒨𑒢𑒏𑒹𑒿 𑒏𑒋𑒪 𑒠𑒲𑒏𑓂𑒭𑒱𑒞
𑒠𑒹𑒫𑒠𑒞𑓂𑒞 𑒧𑒳𑒠𑒰 𑒦𑒋 𑒄𑒩𑓂𑒭𑓂𑒨𑒰𑒪𑒳 𑒮𑓀𑒒𑒧𑒹 𑒔𑒰𑒯𑒪𑒏 𑒣𑒮𑒰𑒩𑒋 𑒁𑒩𑒰𑒩𑒱।
𑒑𑒵𑒡𑓂𑒩𑒏𑒴𑒙 𑒣𑒩𑓂𑒫𑒞𑒣𑒩 𑒐𑒮𑒰𑒍𑒪 𑒬𑒱𑒪𑒰𑒐𑓀𑒛 𑒥𑒳𑒠𑓂𑒡𑒣𑒩
𑒩𑒰𑒖𑒑𑒵𑒯 𑒧𑒰𑒩𑓂𑒑𑒧𑒹 𑒕𑒼𑒛𑓃𑒪 𑒯𑒳𑒢𑒏𑒰𑒣𑒩 𑒥𑒞𑒰𑒯 𑒯𑒰𑒟𑒲
𑒮𑒦 𑒦𑒰𑒑𑒪 𑒧𑒳𑒠𑒰 𑒂𑒢𑒢𑓂𑒠 𑒮𑓀𑒑 𑒩𑒯𑒪 𑒥𑒳𑒠𑓂𑒡𑒏
𑒪𑒑 𑒂𑒥𑒱 𑒑𑒖𑒩𑒰𑒖 𑒦𑒋 𑒑𑒹𑒪 𑒮𑓂𑒫𑒮𑓂𑒟 𑒏𑒋𑒪 𑒣𑓂𑒩𑒝𑒰𑒧 𑒗𑒳𑒏𑒱 𑒏𑒋
𑒅𑒣𑒠𑒹𑒬 𑒠𑒹𑒪 𑒑𑒖𑒩𑒰𑒖𑒏𑒹𑒿 𑒥𑒳𑒠𑓂𑒡।
𑒠𑒹𑒐𑒪 𑒄 𑒪𑒲𑒪𑒰 𑒩𑒰𑒖𑒧𑒯𑒪𑒮𑒿 𑒁𑒖𑒰𑒞𑒬𑒞𑓂𑒩𑒳
𑒦𑒋 𑒑𑒹𑒪 𑒍𑒯𑒼 𑒬𑒱𑒭𑓂𑒨 𑒞𑒐𑒢 𑒥𑒳𑒠𑓂𑒡𑒏।
𑒩𑒰𑒖𑒑𑒵𑒯𑒮𑒿 𑒥𑒳𑒠𑓂𑒡 𑒁𑒋𑒪𑒰𑒯 𑒣𑒰𑒙𑒪𑒱𑒣𑒳𑒞𑓂𑒩
𑒧𑒑𑒡𑒏 𑒧𑓀𑒞𑓂𑒩𑒲 𑒫𑒩𑓂𑒭𑒰𑒏𑒰𑒩 𑒥𑒢𑒰 𑒩𑒯𑒪 𑒕𑒪 𑒠𑒳𑒩𑓂𑒑,
𑒥𑒳𑒠𑓂𑒡 𑒏𑒋𑒪 𑒦𑒫𑒱𑒭𑓂𑒨𑒫𑒰𑒝𑒲 𑒯𑒼𑒋𑒞 𑒄 𑒢𑒑𑒩 𑒣𑓂𑒩𑒮𑒱𑒠𑓂𑒡
𑒞𑒐𑒢 𑒞𑒟𑒰𑒑𑒞 𑒑𑒹𑒪𑒰𑒯 𑒑𑒾𑒞𑒧 𑒠𑓂𑒫𑒰𑒩𑒮𑒿 𑒑𑓀𑒑𑒰 𑒠𑒱𑒮।
𑒑𑓀𑒑𑒰𑒣𑒰𑒩 𑒏𑒳𑒙𑒲 𑒑𑒰𑒧𑒧𑒹
𑒠𑒹𑒪 𑒅𑒣𑒠𑒹𑒬 𑒡𑒩𑓂𑒧𑒏
𑒤𑒹𑒩 𑒑𑒹𑒪𑒰𑒯 𑒢𑒢𑓂𑒠𑒱𑒑𑓂𑒩𑒰𑒧 𑒖𑒞𑒋 𑒦𑒹𑒪 𑒕𑒪 𑒥𑒯𑒳𑒞 𑒩𑒰𑒮 𑒧𑒵𑒞𑓂𑒨𑒳।
𑒠𑒋 𑒮𑒰𑒢𑓂𑒞𑓂𑒫𑒢𑒰 𑒑𑒹𑒪𑒰𑒯 𑒫𑒻𑒬𑒰𑒪𑒲 𑒢𑒑𑒩𑒲
𑒢𑒱𑒫𑒰𑒮 𑒏𑒋𑒪 𑒂𑒧𑓂𑒩𑒣𑒰𑒪𑒲𑒏 𑒅𑒠𑓂𑒨𑒰𑒢𑒧𑒹।
𑒬𑓂𑒫𑒹𑒞 𑒫𑒮𑓂𑒞𑓂𑒩 𑒡𑒩𑒱 𑒁𑒋𑒪𑒲𑒯 𑒍
𑒥𑒳𑒠𑓂𑒡 𑒔𑒹𑒞𑒰𑒍𑒪 𑒬𑒱𑒭𑓂𑒨 𑒮𑒦𑒏𑒹𑒿,
𑒡𑒩𑒴 𑒮𑓀𑒨𑒧 𑒩𑒯𑒥 𑒮𑓂𑒟𑒱𑒩𑒖𑓂𑒘𑒰𑒢𑒧𑒹 𑒪𑓄 𑒥𑒼𑒡𑒏 𑒍𑒐𑒡
𑒣𑓂𑒩𑒖𑓂𑒘𑒰𑒏 𑒫𑒰𑒝𑒮𑒿 𑒬𑒏𑓂𑒞𑒱𑒏 𑒡𑒢𑒳𑒭𑒮𑒿 𑒏𑒩𑒴 𑒁𑒣𑒢 𑒩𑒏𑓂𑒭𑒰।
𑒂𑒧𑓂𑒩𑒣𑒰𑒪𑒲 𑒂𑒥𑒱 𑒣𑒍𑒪𑒏 𑒅𑒣𑒠𑒹𑒬
𑒦𑒹𑒪𑒻𑒏 𑒍𑒏𑒩𑒰 𑒒𑒵𑒝𑒰 𑒁𑒣𑒢 𑒫𑒵𑒞𑓂𑒞𑒱𑒮𑒿
𑒧𑒰𑒿𑒑𑒪𑒏 𑒡𑒩𑓂𑒧𑒪𑒰𑒦𑒏 𑒦𑒱𑒏𑓂𑒭𑒰,
𑒥𑒳𑒠𑓂𑒡 𑒏𑒋𑒪𑒢𑓂𑒯𑒱 𑒣𑓂𑒩𑒰𑒩𑓂𑒟𑒢𑒰 𑒍𑒏𑒩 𑒮𑓂𑒫𑒲𑒏𑒰𑒩,
𑒮𑓀𑒑𑒯𑒱 𑒂𑒋𑒥 𑒦𑒱𑒏𑓂𑒭𑒰𑒏 𑒪𑒹𑒪 𑒁𑒯𑒰𑒿𑒏 𑒠𑓂𑒫𑒰𑒩 ।
𑒮𑒳𑒢𑒱 𑒄 𑒑𑒣 𑒖𑒹 𑒂𑒋𑒪 𑒕𑒟𑒱 𑒥𑒳𑒠𑓂𑒡 𑒂𑒧𑓂𑒩𑒣𑒰𑒪𑒲𑒏 𑒅𑒠𑓂𑒨𑒰𑒢
𑒪𑒱𑒔𑓂𑒕𑒫𑒲𑒑𑒝 𑒁𑒋𑒪𑒰𑒯 𑒥𑒳𑒠𑓂𑒡𑒏 𑒮𑒧𑒲𑒣
𑒥𑒳𑒠𑓂𑒡 𑒠𑒹𑒪𑒢𑓂𑒯𑒱 𑒬𑒲𑒪𑒫𑒰𑒢 𑒩𑒯𑒥𑒰𑒏 𑒮𑒢𑓂𑒠𑒹𑒬।
𑒪𑒱𑒔𑓂𑒕𑒫𑒲𑒑𑒝 𑒠𑒹𑒪𑒢𑓂𑒯𑒱 𑒦𑒱𑒏𑓂𑒭𑒰𑒏 𑒪𑒹𑒪 𑒁𑒣𑒢-𑒁𑒣𑒢 𑒒𑒩 𑒁𑒋𑒥𑒰𑒏 𑒂𑒧𑒢𑓂𑒞𑓂𑒩𑒝,
𑒣𑒰𑒥𑒱 𑒂𑒧𑒢𑓂𑒞𑓂𑒩𑒝 𑒏𑒯𑒪𑒢𑓂𑒯𑒱 𑒥𑒳𑒠𑓂𑒡
𑒧𑒳𑒠𑒰 𑒖𑒰𑒋𑒥 𑒯𑒧 𑒂𑒧𑓂𑒩𑒣𑒰𑒪𑒲𑒏 𑒠𑓂𑒫𑒰𑒩
𑒏𑒰𑒩𑒝 𑒯𑒳𑒢𑒏𑒰 𑒯𑒧 𑒠𑒹𑒪𑒱𑒨𑒢𑓂𑒯𑒱 𑒁𑒕𑒱 𑒫𑒔𑒢।
𑒪𑒱𑒔𑓂𑒕𑒫𑒲𑒑𑒝𑒏𑒹𑒿 𑒪𑒑𑒪𑒢𑓂𑒯𑒱 𑒄 𑒏𑒢𑒹𑒏 𑒁𑒢𑒮𑒼𑒯𑒰𑒿𑒞,
𑒧𑒳𑒠𑒰 𑒣𑒰𑒥𑒱 𑒅𑒣𑒠𑒹𑒬 𑒥𑒳𑒠𑓂𑒡𑒏,
𑒒𑒳𑒩𑒪𑒰𑒯 𑒁𑒣𑒢-𑒁𑒣𑒢 𑒒𑒩-𑒠𑓂𑒫𑒰𑒩।
𑒣𑒩𑒰𑒞𑒹 𑒂𑒧𑓂𑒩𑒣𑒰𑒪𑒲𑒮𑒿 𑒑𑓂𑒩𑒯𑒝 𑒏𑒋 𑒦𑒱𑒏𑓂𑒭𑒰
𑒥𑒳𑒠𑓂𑒡 𑒑𑒹𑒪𑒰𑒯 𑒫𑒹𑒝𑒳𑒧𑒞𑒲 𑒏𑒩𑒋 𑒔𑒰𑒩𑒱 𑒧𑒰𑒮𑒏 𑒥𑒮𑓂𑒮𑒰𑒫𑒰𑒮।
𑒔𑒰𑒩𑒱 𑒧𑒰𑒮 𑒥𑒱𑒞𑒍𑒪𑒰 𑒅𑒞𑓂𑒞𑒩,
𑒩𑒯𑒋 𑒪𑒑𑒪𑒰𑒯 𑒧𑒩𑓂𑒏𑒙 𑒮𑒩𑒼𑒫𑒩𑒏 𑒞𑒙।
𑒍𑒞𑒯𑒱 𑒂𑒋𑒪 𑒧𑒰𑒩,
𑒏𑒯𑒪𑒏 𑒯𑒹 𑒥𑒳𑒠𑓂𑒡 𑒢𑒻𑒩𑓀𑒖𑒢𑒰 𑒞𑒙𑒣𑒩 𑒁𑒯𑒰𑒿𑒏 𑒮𑓀𑒏𑒪𑓂𑒣
𑒖𑒹 𑒢𑒱𑒩𑓂𑒫𑒰𑒝𑒮𑒿 𑒣𑒴𑒩𑓂𑒫 𑒏𑒩𑒥 𑒅𑒠𑓂𑒡𑒰𑒩 𑒠𑒹𑒐𑒰𑒋𑒥 𑒩𑒮𑓂𑒞𑒰 𑒠𑒼𑒮𑒩𑒼𑒏𑒹𑒿,
𑒂𑒥 𑒞𑒿 𑒏𑒞𑒹𑒏 𑒕𑒟𑒱 𑒧𑒳𑒏𑓂𑒞, 𑒏𑒞𑒹𑒏 𑒕𑒟𑒱 𑒧𑒳𑒏𑓂𑒞𑒱 𑒣𑒟𑒏 𑒁𑒢𑒳𑒑𑒰𑒧𑒲,
𑒂𑒥 𑒏𑒼𑒢𑒼 𑒙𑒰 𑒢𑒯𑒱 𑒥𑒰𑒿𑒔𑒪 𑒁𑒕𑒱 𑒏𑒰𑒩𑒝
𑒏𑒩𑒴 𑒢𑒱𑒩𑓂𑒫𑒰𑒝 𑒣𑓂𑒩𑒰𑒣𑓂𑒞।
𑒏𑒯𑒪𑒢𑓂𑒯𑒱 𑒥𑒳𑒠𑓂𑒡, 𑒯𑒹 𑒧𑒰𑒩
𑒢𑒯𑒱 𑒏𑒩𑒴 𑒔𑒱𑒢𑓂𑒞𑒰,
𑒂𑒃𑒮𑒿 𑒞𑒲𑒢 𑒧𑒰𑒮𑒏 𑒥𑒰𑒠,
𑒣𑓂𑒩𑒰𑒣𑓂𑒞 𑒏𑒩𑒥 𑒯𑒧 𑒢𑒱𑒩𑓂𑒫𑒰𑒝,
𑒧𑒰𑒩 𑒯𑒼𑒃𑒞 𑒣𑓂𑒩𑒮𑒢𑓂𑒢 𑒞𑒵𑒣𑓂𑒞
𑒑𑒹𑒪 𑒒𑒳𑒩𑒱।
𑒥𑒳𑒠𑓂𑒡 𑒡𑓄 𑒂𑒮𑒢 𑒣𑓂𑒩𑒰𑒝𑒫𑒰𑒨𑒳𑒏𑒹𑒿 𑒪𑒹𑒪𑒢𑓂𑒯𑒱 𑒔𑒱𑒞𑓂𑒞𑒧𑒹
𑒂 𑒔𑒱𑒞𑓂𑒞𑒏𑒹𑒿 𑒣𑓂𑒩𑒰𑒝𑒮𑒿 𑒖𑒼𑒛𑓃𑒱 𑒨𑒼𑒑 𑒠𑓂𑒫𑒰𑒩𑒰 𑒮𑒧𑒰𑒡𑒱 𑒏𑒋𑒪 𑒣𑓂𑒩𑒰𑒣𑓂𑒞।
𑒣𑓂𑒩𑒰𑒝𑒏 𑒖𑒐𑒢𑒹 𑒦𑒹𑒪 𑒢𑒱𑒩𑒼𑒡,
𑒦𑒴𑒧𑒱 𑒫𑒱𑒔𑒪𑒱𑒞, 𑒫𑒱𑒔𑒪𑒱𑒞 𑒦𑒹𑒪 𑒁𑒏𑒰𑒮 !!
𑒂𑒢𑒢𑓂𑒠 𑒣𑒴𑒕𑒪 𑒏𑒩𑒴 𑒁𑒢𑒳𑒑𑓂𑒩𑒯 𑒪𑒱𑒔𑓂𑒕𑒫𑒲 𑒮𑒦𑒣𑒩,
𑒏𑒱𑒋𑒏 𑒄 𑒡𑒩𑒰 𑒂 𑒂𑒏𑒰𑒮,
𑒠𑒪𑒧𑒪𑒱𑒞 𑒧𑒩𑓂𑒞𑓂𑒨 𑒂 𑒠𑒱𑒫𑓂𑒨𑒪𑒼𑒏 !!!
𑒥𑒳𑒠𑓂𑒡 𑒏𑒯𑒪𑒢𑓂𑒯𑒱 𑒂𑒥𑒱 𑒑𑒹𑒪 𑒕𑒲 𑒯𑒧 𑒥𑒰𑒯𑒩,
𑒕𑒼𑒛𑓃𑒱 𑒁𑒣𑒢 𑒣𑓂𑒩𑒏𑒼𑒭𑓂𑒚,
𑒧𑒰𑒞𑓂𑒩 𑒞𑒲𑒢 𑒧𑒰𑒮 𑒁𑒢𑒢𑓂𑒞𑒩
𑒕𑒼𑒛𑓃𑒥 𑒄 𑒠𑒹𑒯,
𑒢𑒱𑒩𑓂𑒫𑒰𑒝 𑒧𑒹 𑒩𑒯𑒥𑒰 𑒪𑒹𑒪 𑒮𑒞𑒞 !!!!
𑒂𑒢𑒢𑓂𑒠 𑒮𑒳𑒢𑒱 𑒄 𑒏𑒩𑒋 𑒪𑒰𑒑𑒪 𑒯𑒰𑒏𑓂𑒩𑒼𑒮,
𑒮𑒳𑒢𑒱 𑒫𑒱𑒪𑒰𑒣 𑒪𑒱𑒔𑓂𑒕𑒫𑒲 𑒑𑒝 𑒖𑒳𑒙𑒱 𑒮𑒹𑒯𑒼,
𑒫𑒱𑒪𑒰𑒣𑒧𑒹 𑒦𑓄 𑒑𑒹𑒪𑒰𑒯 𑒮𑓀𑒑 𑒖𑒼𑒛𑓃 ।
𑒥𑒳𑒠𑓂𑒡 𑒮𑒦𑒏𑒹𑒿 𑒥𑒳𑒗𑒰-𑒮𑒳𑒗𑒰,
𑒔𑒪𑒪𑒰𑒯 𑒫𑒻𑒬𑒰𑒪𑒲𑒏 𑒅𑒞𑓂𑒞𑒩 𑒠𑒱𑒬𑒰।
𑒣𑒯𑒳𑒿𑒔𑒱 𑒦𑒼𑒑𑒫𑒞𑒲 𑒢𑒑𑒩𑒲,
𑒠𑒹𑒪 𑒬𑒱𑒏𑓂𑒭𑒰 𑒖𑒹 𑒫𑒱𑒢𑒨 𑒁𑒕𑒱 𑒯𑒧𑒩 𑒫𑒔𑒢,
𑒖𑒹 𑒥𑒼𑒪 𑒁𑒕𑒱 𑒫𑒱𑒢𑒨𑒫𑒱𑒯𑒲𑒢,
𑒮𑒹 𑒁𑒕𑒱 𑒢𑒯𑒱 𑒡𑒩𑓂𑒧।
𑒞𑒐𑒢 𑒧𑒪𑓂𑒪𑒏 𑒢𑒑𑒩𑒲 𑒣𑒰𑒣𑒳𑒩 𑒖𑒰𑒋,
𑒁𑒣𑒢 𑒦𑒏𑓂𑒞 𑒔𑒳𑓀𑒠𑒏 𑒒𑒩𑒧𑒹 𑒏𑒋𑒪 𑒦𑒼𑒖𑒢 𑒥𑒳𑒠𑓂𑒡,
𑒠𑒋 𑒍𑒏𑒩𑒰 𑒅𑒣𑒠𑒹𑒬 𑒥𑒱𑒠𑒰 𑒦𑒹𑒪𑒰𑒯 𑒏𑒳𑒬𑒲𑒢𑒑𑒩𑒏 𑒠𑒱𑒮।
𑒮𑓀𑒑𑒹 𑒔𑒳𑒢𑓂𑒠𑒏 𑒣𑒰𑒩 𑒏𑒋𑒪 𑒃𑒩𑒰𑒫𑒞𑒲 𑒡𑒰𑒩
𑒮𑒩𑒼𑒫𑒩 𑒞𑒙𑒣𑒩 𑒏𑒋 𑒫𑒱𑒬𑓂𑒩𑒰𑒧,
𑒏𑒋 𑒯𑒱𑒩𑒝𑓂𑒨𑒫𑒞𑒲 𑒡𑒰𑒩𑒧𑒹 𑒮𑓂𑒢𑒰𑒢,
𑒏𑒯𑒪 𑒯𑒹 𑒂𑒢𑒢𑓂𑒠,
𑒠𑒳𑒢𑒴 𑒬𑒰𑒪𑒏 𑒑𑒰𑒕𑒏 𑒥𑒲𑒔 𑒏𑒩𑒥 𑒯𑒧 𑒬𑒨𑒢।
𑒂𑒖𑒳𑒏 𑒩𑒰𑒞𑒱𑒏 𑒅𑒞𑓂𑒞𑒩 𑒣𑒯𑒩,
𑒏𑒩𑒥 𑒣𑓂𑒩𑒰𑒣𑓂𑒞 𑒢𑒱𑒩𑓂𑒫𑒰𑒝।
𑒯𑒰𑒟𑒏 𑒥𑒢𑒰𑒋 𑒑𑒹𑒩𑒳𑒂,
𑒠𑒋 𑒙𑒰𑒿𑒑𑒣𑒩 𑒙𑒰𑒿𑒑,
𑒪𑓄 𑒠𑒯𑒱𑒢𑒰 𑒏𑒩𑒼𑒙 𑒏𑒯𑒪 𑒯𑒹 𑒂𑒢𑒢𑓂𑒠,
𑒥𑒖𑒰 𑒂𑒢𑒴 𑒧𑒪𑓂𑒪 𑒪𑒼𑒏𑒢𑒱𑒏𑒹𑒿,
𑒦𑒹𑒿𑒙 𑒏𑒩𑒥𑒰 𑒪𑒹𑒪 𑒢𑒱𑒩𑓂𑒫𑒰𑒝 𑒣𑒴𑒩𑓂𑒫।
𑒬𑒰𑒢𑓂𑒞 𑒠𑒱𑒬𑒰, 𑒬𑒰𑒢𑓂𑒞 𑒫𑓂𑒨𑒰𑒒𑓂𑒩-𑒦𑒰𑒪𑒳,
𑒬𑒰𑒢𑓂𑒞 𑒔𑒱𑒛𑓃𑒃 𑒬𑒰𑒢𑓂𑒞 𑒮𑒦𑒙𑒰 𑒖𑒢𑓂𑒞𑒳।
𑒂𑒥𑒱 𑒧𑒪𑓂𑒪 𑒪𑒼𑒏𑒢𑒱 𑒏𑒋𑒪 𑒫𑒱𑒪𑒰𑒣,
𑒧𑒳𑒠𑒰 𑒥𑒳𑒠𑓂𑒡 𑒠𑒋 𑒮𑒰𑓀𑒞𑓂𑒫𑒢𑒰 𑒒𑒳𑒩𑒹𑒪𑒢𑓂𑒯𑒱 𑒮𑒦𑒏𑒹𑒿।
𑒂𑒋𑒪 𑒮𑒳𑒦𑒠𑓂𑒩 𑒞𑓂𑒩𑒱𑒠𑓀𑒛𑒲 𑒮𑓀𑒢𑓂𑒨𑒰𑒮𑒲 𑒞𑒏𑒩 𑒥𑒰𑒠,
𑒣𑒰𑒥𑒱 𑒁𑒭𑓂𑒙𑒰𑓀𑒑 𑒧𑒰𑒩𑓂𑒑𑒏 𑒬𑒱𑒏𑓂𑒭𑒰,
𑒏𑒯𑒪 𑒮𑒳𑒦𑒠𑓂𑒩 𑒯𑒹 𑒏𑒩𑒳𑒝𑒰𑒫𑒞𑒰𑒩
𑒁𑒯𑒰𑒿𑒏 𑒧𑒵𑒞𑓂𑒨𑒳𑒏 𑒠𑒩𑓂𑒬𑒢𑒮𑒿 𑒣𑒯𑒱𑒢𑒹 𑒯𑒧 𑒏𑒩𑒋
𑒔𑒰𑒯𑒻𑒞 𑒕𑒲 𑒢𑒱𑒩𑓂𑒫𑒰𑒝 𑒣𑓂𑒩𑒰𑒣𑓂𑒞 ।
𑒥𑒻𑒮𑒪 𑒍 𑒣𑒩𑓂𑒫𑒞 𑒖𑒹𑒏𑒰𑒿
𑒂 𑒖𑒹𑒢𑒰 𑒧𑒱𑒗𑒰 𑒖𑒰𑒃𑒞 𑒁𑒕𑒱 𑒠𑒲𑒣
𑒯𑒫𑒰𑒏 𑒗𑒼𑒿𑒏𑒮𑒿,
𑒞𑒯𑒱𑒢𑒰 𑒏𑓂𑒭𑒝𑒹𑒧𑒹 𑒏𑒋𑒪𑒏 𑒢𑒱𑒩𑓂𑒫𑒰𑒝 𑒣𑓂𑒩𑒰𑒣𑓂𑒞।
𑒕𑒪 𑒄 𑒯𑒧𑒩 𑒁𑒢𑓂𑒞𑒱𑒧 𑒬𑒱𑒭𑓂𑒨 !
𑒮𑒳𑒦𑒠𑓂𑒩𑒏 𑒏𑒩𑒴 𑒁𑒢𑓂𑒞𑒱𑒧 𑒮𑓀𑒮𑓂𑒏𑒰𑒩 !
𑒥𑒲𑒞𑒪 𑒂𑒡 𑒩𑒰𑒞𑒱,
𑒥𑒳𑒠𑓂𑒡 𑒥𑒖𑒰𑒋 𑒮𑒦 𑒬𑒱𑒭𑓂𑒨𑒏𑒹𑒿,
𑒠𑒹𑒪 𑒣𑓂𑒩𑒰𑒞𑒱𑒧𑒼𑒏𑓂𑒭𑒏 𑒅𑒣𑒠𑒹𑒬,
𑒏𑒼𑒢𑒼 𑒬𑓀𑒏𑒰 𑒯𑒼𑒋 𑒞𑒿 𑒣𑒴𑒕𑒴 𑒂𑒃 ।
𑒁𑒢𑒱𑒩𑒳𑒠𑓂𑒡 𑒏𑒯𑒪 𑒢𑒯𑒱 𑒁𑒕𑒱 𑒬𑓀𑒏𑒰 𑒂𑒩𑓂𑒨 𑒮𑒞𑓂𑒨𑒧𑒹 𑒏𑒏𑒩𑒼।
𑒥𑒳𑒠𑓂𑒡 𑒞𑒐𑒢 𑒡𑓂𑒨𑒰𑒢 𑒏𑓄 𑒋𑒏𑒮𑒿 𑒔𑒰𑒩𑒱𑒧 𑒞𑒯𑒧𑒹 𑒣𑒯𑒳𑒿𑒔𑒱,
𑒣𑓂𑒩𑒰𑒣𑓂𑒞 𑒏𑒋𑒪 𑒬𑒰𑒢𑓂𑒞𑒱।
𑒦𑒹𑒪 𑒄 𑒧𑒯𑒰𑒣𑒩𑒱𑒢𑒱𑒩𑓂𑒫𑒰𑒝 !
𑒧𑒪𑓂𑒪 𑒮𑒦 𑒂𑒥𑒱 𑒅𑒚𑒹𑒪𑒏 𑒥𑒳𑒠𑓂𑒡𑒏𑒹𑒿 𑒮𑓂𑒫𑒩𑓂𑒝𑒏 𑒬𑒫-𑒬𑒱𑒫𑒱𑒏𑒰𑒧𑒹,
𑒢𑒰𑒑𑒠𑓂𑒫𑒰𑒩𑒮𑒿 𑒥𑒰𑒯𑒩 𑒦𑒋 𑒏𑒋𑒪𑒢𑓂𑒯𑒱 𑒣𑒰𑒩 𑒯𑒱𑒩𑒝𑓂𑒨𑒫𑒞𑒲 𑒡𑒰𑒩,
𑒧𑒳𑒠𑒰 𑒬𑒫𑒏𑒹𑒿 𑒔𑒢𑓂𑒠𑒢𑒮𑒿 𑒮𑒖𑒰𑒋,
𑒖𑒐𑒢 𑒪𑒑𑒰𑒍𑒪 𑒂𑒑𑒱, 𑒢𑒯𑒱 𑒅𑒚𑒪 𑒔𑒱𑒢𑓂𑒑𑒰𑒩𑒱 ।
𑒬𑒱𑒭𑓂𑒨 𑒏𑒰𑒬𑓂𑒨𑒣 𑒕𑒪 𑒥𑒱𑒔 𑒧𑒰𑒩𑓂𑒑,
𑒍𑒏𑒩𑒰 𑒁𑒥𑒱𑒞𑒹 𑒪𑒰𑒑𑒪 𑒔𑒱𑒞𑒰𑒧𑒹 𑒂𑒑𑒱 !
𑒧𑒪𑓂𑒪 𑒪𑒼𑒏𑒢𑒱 𑒥𑒲𑒕𑒱 𑒁𑒮𑓂𑒟𑒱 𑒡𑓄 𑒮𑓂𑒫𑒩𑓂𑒝𑒏𑒪𑒬𑒧𑒹,
𑒂𑒢𑒪 𑒢𑒑𑒩 𑒧𑒡𑓂𑒨,
𑒥𑒰𑒠𑒧𑒹 𑒏𑒋 𑒦𑒫𑒢 𑒣𑒴𑒖𑒰𑒏 𑒢𑒱𑒩𑓂𑒧𑒰𑒝,
𑒏𑒋𑒪 𑒁𑒮𑓂𑒟𑒱𑒏𑒪𑒬 𑒍𑒞𑒋 𑒫𑒱𑒩𑒰𑒖𑒧𑒰𑒢।
𑒤𑒹𑒩 𑒮𑒰𑒞 𑒠𑒹𑒬𑒏 𑒠𑒴𑒞,
𑒂𑒥𑒱 𑒧𑒿𑒑𑒪𑒏 𑒥𑒳𑒠𑓂𑒡𑒏 𑒁𑒮𑓂𑒟𑒱,
𑒧𑒳𑒠𑒰 𑒧𑒪𑓂𑒪𑒑𑒝 𑒏𑒋𑒪 𑒁𑒮𑓂𑒫𑒲𑒏𑒰𑒩,
𑒞𑒿 𑒥𑒖𑒛𑓃𑒪 𑒨𑒳𑒠𑓂𑒡-𑒨𑒳𑒠𑓂𑒡 ।
𑒮𑒦 𑒂𑒥𑒱 𑒒𑒹𑒩𑒪 𑒏𑒳𑒬𑒲𑒢𑒑𑒩,
𑒧𑒳𑒠𑒰 𑒠𑓂𑒩𑒼𑒝 𑒥𑓂𑒩𑒰𑒯𑓂𑒧𑒝 𑒥𑒳𑒗𑒰𑒍𑒪 𑒠𑒳𑒢𑒴 𑒣𑒏𑓂𑒭।
𑒥𑒰𑒿𑒙𑒱 𑒁𑒮𑓂𑒟𑒱𑒏𑒹𑒿 𑒂𑒚 𑒦𑒰𑒑,
𑒠𑓂𑒩𑒼𑒝 𑒪𑒹𑒪𑒏 𑒍 𑒒𑒙 𑒂 𑒑𑒝 𑒣𑒱𑒮𑒪 𑒕𑒰𑒅𑒩 𑒥𑒳𑒠𑓂𑒡𑒏 ।
𑒮𑒦 𑒒𑒳𑒩𑒪𑒰𑒯 𑒁𑒣𑒢 𑒠𑒹𑒬 𑒂𑒥।
𑒁𑒮𑓂𑒟𑒱 𑒏𑒪𑒬 𑒕𑒰𑒅𑒩 𑒣𑒩 𑒥𑒢𑒰𑒋 𑒮𑓂𑒞𑒴𑒣,
𑒏𑒩𑒋 𑒑𑒹𑒪𑒰𑒯 𑒣𑒴𑒖𑒰 𑒁𑒩𑓂𑒔𑒢𑒰 𑒖𑒰𑒋,
𑒠𑒮𑒙𑒰 𑒮𑓂𑒞𑒴𑒣 𑒥𑒢𑒱 𑒦𑒹𑒪 𑒚𑒰𑒜𑓃,
𑒖𑒞𑒋 𑒁𑒐𑒝𑓂𑒛 𑒖𑓂𑒨𑒼𑒞𑒱 𑒂 𑒒𑒝𑓂𑒙𑒰𑒏 𑒯𑒼𑒋 𑒢𑒱𑒢𑒰𑒠।
𑒤𑒹𑒩 𑒩𑒰𑒖𑒑𑒵𑒯𑒮𑒿 𑒂𑒋𑒪 𑒣𑒰𑒿𑒔 𑒮𑒋 𑒦𑒱𑒏𑓂𑒭𑒳,
𑒂𑒢𑒢𑓂𑒠𑒏𑒹𑒿 𑒠𑒹𑒪 𑒑𑒹𑒪 𑒄 𑒏𑒰𑒖,
𑒥𑒳𑒠𑓂𑒡𑒏 𑒮𑒦 𑒬𑒱𑒏𑓂𑒭𑒰𑒏𑒹𑒿 𑒏𑒯𑒱 𑒮𑒳𑒢𑒰𑒆,
𑒯𑒼𑒋𑒞 𑒄 𑒮𑒦 𑒮𑒧𑒑𑓂𑒩 𑒂𑒥।
𑒯𑒧 𑒄 𑒕𑒪𑒯𑒳𑒿 𑒮𑒳𑒢𑒢𑒹 𑒋𑒯𑒱 𑒞𑒩𑒯𑒹𑒿,
𑒏𑒋𑒪 𑒮𑒧𑓂𑒣𑒴𑒩𑓂𑒝 𑒫𑒩𑓂𑒝𑒢 𑒢𑒲𑒏𑒹।
𑒏𑒰𑒪𑒰𑒢𑓂𑒞𑒩𑒧𑒹 𑒁𑒬𑒼𑒏 𑒮𑓂𑒞𑒴𑒣𑒮𑒿 𑒪𑒋 𑒡𑒰𑒞𑒳 𑒏𑒋 𑒏𑒋 𑒏𑓄 𑒮𑒋 𑒫𑒱𑒦𑒰𑒑,
𑒥𑒢𑒰𑒍𑒪 𑒏𑒋𑒏 𑒮𑒋 𑒮𑓂𑒞𑒴𑒣,
𑒬𑓂𑒩𑒠𑓂𑒡𑒰𑒏 𑒣𑓂𑒩𑒞𑒲𑒏।
𑒖𑒯𑒱𑒨𑒰 𑒡𑒩𑒱 𑒁𑒕𑒱 𑒖𑒢𑓂𑒧, 𑒁𑒕𑒱 𑒠𑒳𑒐,
𑒣𑒳𑒢𑒩𑓂𑒖𑒢𑓂𑒧𑒮𑒿 𑒧𑒳𑒏𑓂𑒞𑒱 𑒁𑒕𑒱 𑒧𑒰𑒞𑓂𑒩 𑒮𑒳𑒐,
𑒞𑒏𑒩 𑒧𑒰𑒩𑓂𑒑 𑒠𑒹𑒐𑒰𑒍𑒪 𑒖𑒹 𑒧𑒯𑒰𑒧𑒳𑒢𑒱,
𑒬𑒰𑒏𑓂𑒨𑒧𑒳𑒢𑒱 𑒮𑒢 𑒠𑒼𑒮𑒩 𑒏𑒹 𑒁𑒕𑒱 𑒬𑒳𑒠𑓂𑒡।
𑒁𑒮𑒘𑓂𑒖𑒰𑒞𑒱 𑒧𑒢𑒏 𑒄 𑒮𑒧𑓂𑒥𑒪,
𑒠𑒹𑒪𑒯𑒳𑒿 𑒁𑒯𑒰𑒿 𑒯𑒹 𑒥𑒳𑒠𑓂𑒡
𑒯𑒹 𑒥𑒳𑒠𑓂𑒡
𑒯𑒹 𑒥𑒳𑒠𑓂𑒡 ।
𑒞𑓂𑒫𑒘𑓂𑒔𑒰𑒯𑒘𑓂𑒔 𑒂 𑒁𑒮𑒘𑓂𑒖𑒰𑒞𑒱 𑒧𑒢
𑒞𑓂𑒫𑒘𑓂𑒔𑒰𑒯𑒘𑓂𑒔 𑓖.𑓓
𑒁𑒮𑒘𑓂𑒖𑒰𑒞𑒱 𑒧𑒢 𑓖.𑓘𑓒
𑒞𑓂𑒫𑒘𑓂𑒔𑒰𑒯𑒘𑓂𑒔
𑒄 𑒦𑒰𑒩𑒞 𑒑𑓂𑒩𑓀𑒟 𑒖𑒨𑒏 𑒖𑒰𑒯𑒱𑒧𑒹 𑒑𑒰𑒢
𑒞𑒐𑒢 𑒏𑒯𑒱𑒨𑒰𑒮𑒿 𑒦𑒹𑒪𑒰𑒯 𑒋𑒞𑒳𑒏𑓂𑒏𑒰 𑒪𑒼𑒏, 𑒏𑒩𑓂𑒧𑒯𑒲𑒢, 𑒮𑓀𑒏𑒲𑒩𑓂𑒝, 𑒏𑒼𑒢𑒰 𑒯𑒰𑒩𑒻𑒞 𑒑𑒹𑒪𑒰𑒯 𑒮𑒻𑒢𑓂𑒨𑒥𑒪𑒮𑒿 𑒂 𑒠𑒩𑓂𑒬𑒢𑒯𑒳𑒮𑒿, 𑒏𑒹 𑒒𑒼𑒮𑒱𑒨𑒰𑒥𑒻𑒞 𑒑𑒹𑒪 𑒁𑒮𑒧𑒰𑒢𑒞𑒰𑒏 𑒣𑒰𑒚 𑒋𑒏𑒩 𑒥𑒱𑒔।
𑒏𑒹 𑒏𑒹𑒪𑒢𑓂𑒯𑒱 𑒬𑒳𑒩𑒴 𑒄 𑒞𑓂𑒫𑒘𑓂𑒔𑒰𑒯𑒘𑓂𑒔।
𑒑𑒰𑓀𑒡𑒩𑓂𑒫, 𑒋𑒏𑒪𑒫𑓂𑒨𑒏 𑒫𑒲𑒩𑒞𑒰𑒮𑒿 𑒦𑒩𑒪, 𑒒𑒵𑒝𑒰-𑒣𑓂𑒩𑒹𑒧, 𑒮𑒞𑓂𑒨-𑒁𑒮𑒞𑓂𑒨𑒏 𑒡𑒩𑒰𑒞𑒪,
𑒂𑒯 𑒣𑒰𑒩𑒰𑒬𑒩 𑒣𑒳𑒞𑓂𑒩 𑒦𑒑𑒫𑒰𑒢 𑒫𑓂𑒨𑒰𑒮, 𑒢𑒧𑒢-𑒢𑒧𑒢 𑒬𑒞 𑒢𑒧𑒢।
𑒣𑓂𑒩𑒮𑒢𑓂𑒢𑒫𑒠𑒢𑒏𑒹𑒿 𑒪𑒱𑒐𑒥𑒰𑒏 𑒏𑒯𑒱 𑒥𑒰𑒞, 𑒫𑒰𑒝𑒲 𑒢𑒯𑒱 𑒩𑒳𑒏𑒞 𑒁𑒯𑒰𑒿𑒏 𑒑𑒝𑒹𑒬𑒏 𑒬𑒩𑓂𑒞, 𑒏𑒫𑒱𑒏 𑒏𑒪𑓂𑒣𑒢𑒰𑒏 𑒄 𑒅𑒞𑓂𑒏𑒩𑓂𑒭, 𑒧𑒳𑒠𑒰 𑒥𑒢𑒰𑒍𑒪 𑒏𑒱𑒋𑒏 𑒁𑒯𑒰𑒿 𑒯𑒼𑒁𑒋 𑒖𑒹𑒢𑒰 𑒡𑒩𑓂𑒧𑒑𑓂𑒩𑓀𑒟।
𑒫𑓂𑒨𑒰𑒮 𑒪𑒹𑒐𑒏 𑒯𑒼𑒃𑒞𑒯𑒳𑒿 𑒕𑒟𑒱 𑒋𑒯𑒱𑒧𑒹 𑒋𑒏𑒙𑒰 𑒣𑒰𑒞𑓂𑒩, 𑒏𑒹𑒯𑒢 𑒢𑒫 𑒩𑒮, 𑒢𑒫 𑒕𑒪 𑒫𑒰𑒠 !
𑒑𑒝𑒹𑒬𑒏 𑒑𑒞𑒱 𑒁𑒞𑒱 𑒞𑒲𑒫𑓂𑒩, 𑒠𑒹𑒐𑒱 𑒫𑓂𑒨𑒰𑒮 𑒏𑒋𑒪 𑒬𑓂𑒪𑒼𑒏 𑒖𑒙𑒱𑒪। 𑒬𑓂𑒪𑒼𑒏𑒏 𑒦𑒰𑒭𑓂𑒨 𑒥𑒴𑒗𑒱 𑒬𑒲𑒒𑓂𑒩, 𑒫𑒱𑒒𑓂𑒢𑒏𑒩𑓂𑒞𑒰 𑒪𑒱𑒐𑒞𑒰𑒯 𑒄।
𑒬𑓂𑒪𑒼𑒏𑒏 𑒖𑒙𑒱𑒪𑒞𑒰𑒏 𑒪𑒹𑒪 𑒄 𑒞𑒩𑓂𑒏 !
𑒣𑒳𑒞𑓂𑒩 𑒬𑒳𑒏𑒠𑒹𑒫 𑒢𑒰𑒩𑒠𑒧𑒳𑒢𑒱 𑒠𑒹𑒫𑒑𑒝 𑒑𑓀𑒡𑒩𑓂𑒫 𑒩𑒰𑒏𑓂𑒭𑒮 𑒨𑒏𑓂𑒭
𑒫𑓂𑒨𑒰𑒮 𑒬𑒱𑒭𑓂𑒨 𑒫𑒻𑒬𑓀𑒣𑒰𑒨𑒢 𑒂 𑒣𑒩𑒲𑒏𑓂𑒭𑒱𑒞 𑒣𑒳𑒞𑓂𑒩 𑒖𑒢𑒧𑒹𑒖𑒨𑒏 𑒢𑒱𑒮𑓂𑒞𑒰𑒩।
𑒣𑒾𑒩𑒰𑒝𑒱𑒏 𑒮𑒴𑒞𑒖𑒲 𑒩𑒯𑒟𑒱, 𑒞𑒞 𑒧𑒡𑓂𑒨। 𑒏𑒩𑒱 𑒇𑒭𑒱𑒮𑒦𑒰 𑒢𑒻𑒧𑒱𑒭𑒰𑒩𑒝𑓂𑒨𑒧𑒹,𑒧𑒯𑒩𑓂𑒭𑒱 𑒬𑒾𑒢𑒏 𑒁𑒡𑓂𑒨𑒏𑓂𑒭।
𑒮𑒴𑒞𑒖𑒲 𑒏𑒋𑒪 𑒬𑒳𑒩𑒳,𑒮𑓀𑒯𑒱𑒞𑒰 𑒮𑒞𑒮𑒯𑒮𑓂𑒞𑓂𑒩।
𑒂𑒃 𑒄 𑒧𑒢 𑒏𑒯𑒋 𑒁𑒕𑒱, 𑒄 𑒮𑒞𑓂𑒨 𑒠𑒹𑒐𑒲, 𑒏𑒫𑒱𑒏 𑒏𑒪𑓂𑒣𑒢𑒰 𑒧𑒡𑓂𑒨 𑒕𑒪 𑒏𑒲 𑒮𑒲𑒐𑒱 𑒣𑒩𑒐𑒲। 𑒁𑒩𑓂𑒟 𑒏𑒹𑒩 𑒁𑒢𑒩𑓂𑒟 𑒏𑓂𑒭𑒹𑒣𑒏 𑒮𑒦 𑒏𑒹𑒪𑒏 𑒖𑒹, 𑒯𑒩𑓂𑒭 𑒂 𑒬𑓂𑒩𑒧𑒮𑒿 𑒏𑒢𑒹𑒏 𑒠𑒹𑒐𑒰𑒥𑒲 𑒠𑒹𑒐𑒲 ।
𑒯𑒮𑓂𑒞𑒱𑒢𑒰𑒣𑒳𑒩 𑒮𑒧𑓂𑒩𑒰𑒙 𑒬𑒰𑓀𑒞𑒳𑒢𑒳, 𑒑𑓀𑒑 𑒞𑒙 𑒦𑓂𑒩𑒧𑒝 𑒏𑒩𑒱 𑒩𑒯𑒪। 𑒨𑒳𑒫𑒞𑒲 𑒥𑒢𑒱 𑒠𑒹𑒫𑒱 𑒑𑓀𑒑𑒰,𑒞𑒙 𑒖𑒏𑒩 𑒕𑒪𑒱 𑒚𑒰𑒜𑓃 𑒢𑒱𑒬𑓂𑒔𑒪 !
𑒞𑒹𑒿 𑒣𑒛𑓃𑒪 𑒯𑒼𑒁𑒋 𑒢𑒰𑒧 𑒯𑒳𑒢𑒏𑒩,
𑒡𑒰𑒩 𑒑𑓀𑒑𑒰𑒖𑒲𑒏 𑒢𑒰𑒧𑒣𑒩 𑒦𑒋 𑒁𑒦𑒱𑒦𑒴𑒞 𑒏𑒯𑒪 𑒯𑒹 𑒮𑒳𑒢𑓂𑒠𑒩𑒱,
𑒏𑒩𑒳 𑒣𑓂𑒩𑒹𑒧 𑒮𑓂𑒫𑒲𑒏𑒰𑒩 𑒯𑒧𑒩। 𑒣𑒞𑓂𑒢𑒲 𑒥𑒢𑒱 𑒏𑒩𑒳 𑒩𑒰𑒖,
𑒩𑒰𑒖𑓂𑒨-𑒡𑒢-𑒣𑓂𑒩𑒰𑒝 𑒣𑒩।
𑒁𑒕𑒱 𑒮𑒧𑒩𑓂𑒣𑒝 𑒮𑒦 𑒁𑒯𑒰𑒿 𑒣𑒩,
𑒏𑒱𑓀𑒞𑒳 𑒁𑒕𑒱 𑒏𑒱𑒕𑒳 𑒥𑓀𑒡𑒢 𑒯𑒧𑒩। 𑒏𑓂𑒨𑒼 𑒣𑒴𑒕𑒨 𑒢𑒯𑒱 𑒣𑒩𑒱𑒔𑒨 𑒯𑒧𑒩,
𑒢𑒯𑒱 𑒏𑒩𑒨 𑒩𑒼𑒏-𑒙𑒼𑒏 𑒯𑒧𑒩 𑒏𑒰𑒩𑓂𑒨 𑒣𑒩।
𑒣𑓂𑒩𑒹𑒧-𑒫𑒱𑒯𑓂𑒫𑒪 𑒬𑒰𑓀𑒞𑒳𑒢𑒳,
𑒏𑒩𑒱 𑒮𑓂𑒫𑒲𑒏𑒰𑒩 𑒥𑓀𑒡𑒢 𑒮𑒏𑒪। 𑒂𑒢𑒪 𑒧𑒯𑒪 𑒧𑒰𑒢𑒫-𑒑𑓀𑒑𑒰𑒏𑒹𑒿,
𑒮𑒧𑒨 𑒥𑒱𑒞𑒪 𑒥𑒱𑒞𑒱𑒞𑒹 𑒩𑒯𑒪। 𑒦𑒹𑒪 𑒥𑒰𑒞 𑒫𑒱𑒔𑒱𑒞𑓂𑒩 𑒄 𑒖𑒹,
𑒮𑒰𑒞 𑒣𑒳𑒞𑓂𑒩 𑒬𑒰𑓀𑒞𑒳𑒢𑒳𑒏𑒹𑒿 𑒦𑒹𑒪। 𑒨𑒳𑒫𑒞𑒲 𑒤𑒹𑒏𑒪 𑒮𑒦𑒏𑒹𑒿 𑒑𑓀𑒑𑒡𑒰𑒩𑒧𑒹,
𑒩𑒰𑒖𑒰𑒢𑒹 𑒏𑒱𑒕𑒳 𑒣𑒳𑒕𑒱 𑒮𑒏𑒪।
𑒏𑒫𑒱𑒏 𑒕𑒪 𑒄 𑒏𑒪𑓂𑒣𑒢𑒰 𑒄 𑒨𑒳𑒫𑒞𑒲 𑒏𑒹 𑒁𑒕𑒱,
𑒥𑒳𑒗𑒱 𑒣𑒩𑒻𑒕 𑒏𑓂𑒭𑒝 𑒏𑒼𑒧𑒪, 𑒏𑓂𑒭𑒝 𑒏𑓂𑒩𑒴𑒩-𑒏𑓂𑒩𑒴𑒩𑒞𑒧 𑒖𑒹, 𑒁𑒥𑒼𑒡 𑒥𑒰𑒪𑒏 𑒏𑒹𑒩 𑒣𑓂𑒩𑒰𑒝𑒏 𑒯𑒹𑒞𑒳 𑒫𑒱𑒏𑒪 !
𑒣𑒴𑒕𑒪 𑒩𑒰𑒖𑒰 𑒬𑒰𑓀𑒞𑒢𑒳,
𑒂𑒚𑒧 𑒥𑒹𑒩 𑒁𑒣𑒢𑒰𑒏𑒹𑒿 𑒢𑒯𑒱 𑒩𑒼𑒏𑒱 𑒮𑒏𑒪। 𑒠𑒹𑒪𑒏 𑒨𑒳𑒫𑒞𑒲 𑒣𑒩𑒱𑒔𑒨 𑒮𑒏𑒪,
𑒯𑒧 𑒑𑓀𑒑 𑒂 𑒄 𑒂𑒚 𑒫𑒮𑒳 𑒕𑒪। 𑒠𑒹𑒪𑒢𑓂𑒯𑒱 𑒧𑒯𑒩𑓂𑒭𑒱 𑒫𑒬𑒱𑒭𑓂𑒚 𑒬𑒰𑒣 𑒞𑒢𑒱𑒏𑒰,
𑒧𑒩𑓂𑒞𑓂𑒨𑒪𑒼𑒏𑒏 𑒖𑒢𑓂𑒧 𑒪𑒹𑒥𑒰𑒏। 𑒂𑒚𑒧 𑒣𑒳𑒞𑓂𑒩𑒏𑒹𑒿 𑒩𑒰𑒐𑒥 𑒯𑒧 𑒏𑒱𑒕𑒳 𑒠𑒱𑒢, 𑒠𑒹𑒫𑒫𑓂𑒩𑒞 𑒠𑒹𑒥 𑒮𑓂𑒫𑒩𑒴𑒣 𑒮𑒹𑒫𑒏।
𑒧𑒯𑒩𑓂𑒭𑒱 𑒫𑒬𑒱𑒭𑓂𑒚𑒏 𑒢𑒢𑓂𑒠𑒱𑒢𑒲𑒏𑒹𑒿, 𑒠𑒹𑒐𑒱 𑒣𑒞𑓂𑒢𑒲 𑒫𑒮𑒳 𑒣𑓂𑒩𑒦𑒰𑒮𑒏,
𑒧𑒩𑓂𑒞𑓂𑒨𑒪𑒼𑒏𑒏 𑒮𑒐𑒲 𑒯𑒹𑒞𑒳, 𑒣𑓂𑒩𑒨𑒰𑒮 𑒢𑒢𑓂𑒠𑒱𑒢𑒲𑒏 𑒯𑒩𑒝𑒏 ।
𑒇𑒭𑒱 𑒞𑒰𑒏𑒪 𑒑𑒾-𑒠𑒹𑒫𑒱𑒏𑒹𑒿, 𑒖𑓂𑒘𑒰𑒢-𑒔𑒏𑓂𑒭𑒳𑒮𑒿। 𑒠𑒹𑒪𑒏 𑒬𑒰𑒣 𑒫𑒮𑒳𑒑𑒝𑒏𑒹𑒿 𑒦𑒨-𑒏𑓂𑒩𑒼𑒡𑒱𑒞, 𑒏𑒋𑒪 𑒣𑓂𑒩𑒰𑒩𑓂𑒟𑒢𑒰 𑒫𑒮𑒳 𑒮𑒦 𑒬𑒰𑒣𑒱𑒞। 𑒯𑒧𑒩 𑒬𑒰𑒣 𑒢𑒯𑒱 𑒒𑒴𑒩𑒱 𑒮𑒏𑒞 𑒣𑒩𑒘𑓂𑒔, 𑒮𑒰𑒞 𑒫𑒮𑒳 𑒦𑒨 𑒖𑒰𑒨𑒞 𑒧𑒳𑒏𑓂𑒞 𑒞𑒳𑒩𑒞।
𑒣𑓂𑒩𑒦𑒰𑒮𑒏𑒹𑒿 𑒩𑒯𑒨 𑒣𑒩𑒞 𑒞𑒞𑒨, 𑒏𑒱𑒕𑒳 𑒠𑒱𑒢 𑒡𑒩𑒱 𑒧𑒩𑓂𑒞𑓂𑒨𑒪𑒼𑒏𑒏 𑒬𑒩𑒝
𑒯𑒼𑒨𑒞 𑒨𑒬𑒮𑓂𑒫𑒲 𑒄 𑒥𑒯𑒳𑒞, 𑒒𑒳𑒩𑒱 𑒂𑒨𑒪 𑒫𑒮𑒳𑒑𑒝 𑒑𑓀𑒑 𑒪𑒑। 𑒯𑒹 𑒠𑒹𑒫𑒱 𑒥𑒢𑒴 𑒧𑒰𑒞𑒰 𑒯𑒧𑒩𑒰 𑒮𑒦𑒏, 𑒠𑒱𑒁’ 𑒧𑒳𑒏𑓂𑒞𑒱 𑒞𑒐𑒢 𑒂𑒮 𑒁𑒯𑒲𑓀𑒏।
𑒏𑒫𑒱-𑒏𑒪𑓂𑒣𑓂𑒢𑒰𑒏 𑒛𑒼𑒩𑒲 𑒠𑒹𑒐𑒪,
𑒧𑒰𑒢𑒫-𑒑𑓀𑒑 𑒏𑒹𑒩 𑒎𑒔𑒱𑒞𑓂𑒨 𑒪𑒹𑒪!
𑒬𑒰𑓀𑒞𑒳𑒢𑒳 𑒦𑒋 𑒑𑒹𑒪 𑒫𑒱𑒩𑒏𑓂𑒞,
𑒕𑒴𑒙𑒱 𑒑𑒹𑒪 𑒑𑓀𑒑𑒏 𑒮𑒰𑒢𑒱𑒡𑓂𑒨। 𑒮𑒧𑒨 𑒥𑒲𑒞𑒪 𑒞𑒿 𑒑𑒹𑒪 𑒍 𑒋𑒏 𑒠𑒱𑒢, 𑒞𑒙, 𑒡𑒰𑒩𑒏 𑒮𑒧𑒏𑓂𑒭।
𑒠𑒱𑒫𑓂𑒨 𑒥𑒰𑒪𑒏𑒏𑒹𑒿 𑒍𑒞𑒋 𑒠𑒹𑒐𑒪, 𑒏𑒩𑒱 𑒩𑒯𑒪 𑒏𑒹𑒪𑒱 𑒍𑒞𑒋। 𑒩𑒼𑒏𑒱 𑒩𑒯𑒪 𑒫𑒰𑒝𑒏 𑒡𑒰𑒩𑒮𑒿, 𑒑𑓀𑒑𑒡𑒰𑒩𑒏𑒹𑒿 𑒖𑒞𑒋।
𑒣𑓂𑒩𑒮𑓂𑒞𑒳𑒞 𑒦𑒹𑒪𑒲𑒯 𑒑𑓀𑒑 𑒞𑒐𑒢, 𑒮𑒾𑓀𑒣𑒱 𑒠𑒹𑒪 𑒠𑒹𑒫𑒫𑓂𑒩𑒞𑒏𑒹𑒿 𑒏𑒯𑒪। 𑒧𑒯𑒩𑓂𑒭𑒱 𑒫𑒬𑒱𑒭𑓂𑒚 𑒮𑒿 𑒪𑒋 𑒬𑒱𑒏𑓂𑒭𑒰, 𑒫𑒹𑒠-𑒫𑒹𑒠𑒰𑓀𑒑𑒏 𑒢𑒱𑒐𑒱𑒪। 𑒬𑒰𑒮𑓂𑒞𑓂𑒩-𑒖𑓂𑒘𑒰𑒢 𑒬𑒳𑒏𑓂𑒩𑒰𑒔𑒰𑒩𑓂𑒨 𑒖𑒹𑒏𑒰𑒿, 𑒬𑒮𑓂𑒞𑓂𑒩𑒧𑒹 𑒣𑒩𑒬𑒳𑒩𑒰𑒧 𑒮𑒢।
𑒦𑒹𑒙𑒱 𑒑𑒹𑒪𑒢𑓂𑒯𑒱 𑒣𑒳𑒞𑓂𑒩 𑒞𑒹𑒖𑒮𑓂𑒫𑒲 𑒒𑒳𑒩𑒱 𑒁𑒋𑒪𑒰𑒯 𑒬𑒰𑒢𑓂𑒞𑒢𑒳, 𑒠𑒹𑒫𑒫𑓂𑒩𑒞𑒏𑒹𑒿 𑒥𑒢𑒰𑒋𑒪 𑒩𑒰𑒖𑒏𑒳𑒧𑒰𑒩,
𑒂𑒃 𑒁𑒕𑒱 𑒄 𑒮𑒧𑓂𑒦𑒫,
𑒁𑒣𑒢 𑒠𑒼𑒮𑒩 𑒚𑒰𑒧 𑒣𑒼𑒮𑒪𑒰𑒯𑒰 𑒣𑒳𑒞𑓂𑒩𑒏𑒹𑒿,
𑒏𑒩𑒞 𑒄 𑒮𑓀𑒏𑒲𑒩𑓂𑒝 𑒮𑒧𑒰𑒖!
𑒏𑒱𑒋𑒏 𑒢𑒯𑒱 𑒯𑒼𑒋 𑒠𑒹𑒫𑒫𑓂𑒩𑒞 𑒮𑒢 𑒨𑒬𑒮𑓂𑒫𑒲 𑒞𑒐𑒢𑒯𑒳?
𑒏𑒻𑒏 𑒫𑒩𑓂𑒭 𑒥𑒲𑒞𑒪 𑒋𑒢𑒰, 𑒣𑒳𑒢𑒱 𑒋𑒏 𑒠𑒱𑒢 𑒂𑒋𑒪,
𑒬𑒰𑒢𑓂𑒞𑒢𑒳 𑒠𑒹𑒐𑒪𑒢𑓂𑒯𑒱 𑒨𑒧𑒳𑒢𑒰 𑒞𑒙 𑒞𑒩 𑒁𑒠𑓂𑒦𑒳𑒞 𑒮𑒳𑒫𑒰𑒮,
𑒂𑒥𑒱 𑒩𑒯𑒪 𑒞𑒩𑒳𑒝𑒲 𑒮𑒞𑓂𑒨𑒫𑒞𑒲 𑒧𑒪𑒰𑒯𑒏 𑒥𑒹𑒙𑒲,
𑒂𑒃 𑒖𑒐𑒢 𑒑𑒼𑒞𑓂𑒩-𑒧𑒴𑒪, 𑒣𑒰𑒃-𑒏𑒾𑒛𑓃𑒲𑒏 𑒥𑒰𑒢𑓂𑒯,
𑒞𑒯𑒱𑒨𑒰 𑒩𑒰𑒖𑒰𑒮𑒿 𑒫𑒱𑒫𑒰𑒯𑒏 𑒪𑒹𑒪 𑒮𑒹𑒯𑒼,
𑒩𑒰𑒐𑒪 𑒬𑒩𑓂𑒞𑓂𑒞 𑒧𑒪𑓂𑒪𑒰𑒯𑒏 𑒮𑒩𑒠𑒰𑒩।
𑒥𑒢𑒞 𑒯𑒧𑒩 𑒢𑒰𑒞𑒱𑒨𑒹𑒙𑒰, 𑒯𑒮𑓂𑒞𑒱𑒢𑒰𑒣𑒳𑒩𑒏 𑒩𑒰𑒖𑒰,
𑒞𑒐𑒢𑒹 𑒯𑒼𑒋𑒞 𑒄 𑒫𑒱𑒫𑒰𑒯।
𑒬𑒰𑒢𑓂𑒞𑒢𑒳 𑒄 𑒫𑒔𑒢 𑒠𑒱𑒞𑒟𑒱 𑒏𑒼𑒢𑒰, 𑒮𑒹 𑒒𑒳𑒩𑒱 𑒁𑒨𑒪𑒰𑒯 𑒢𑒑𑒩 𑒁𑒣𑒢 । 𑒔𑒱𑒢𑓂𑒞𑒰 𑒒𑒴𑒢 𑒥𑒢𑒱 𑒏𑒰𑒙𑒋 𑒪𑒰𑒑𑒪 𑒬𑒩𑒲𑒩𑒏 𑒏𑒰𑒢𑓂𑒞𑒱𑒏𑒹𑒿।
𑒠𑒹𑒫𑒫𑓂𑒩𑒞 𑒣𑒴𑒕𑒪𑒢𑓂𑒯𑒱 𑒣𑒱𑒞𑒰𑒮𑒿, 𑒏𑒲 𑒦𑒹𑒪 𑒣𑒱𑒞𑒰𑒬𑓂𑒩𑒲,
𑒯𑒹 𑒣𑒳𑒞𑓂𑒩 𑒏𑒲 𑒏𑒯𑒴, 𑒁𑒕𑒱 𑒋𑒏𑒙𑒰 𑒔𑒱𑒢𑓂𑒞𑒰, 𑒏𑒲 𑒯𑒼𑒋𑒞 𑒩𑒰𑒖𑓂𑒨𑒏
𑒖𑒹 𑒯𑒼𑒋𑒞 𑒯𑒼𑒋𑒞 𑒨𑒳𑒠𑓂𑒡𑒧𑒹 𑒏𑒱𑒕𑒳 𑒁𑒯𑒰𑒿𑒏𑒹𑒿,
𑒏𑒏𑒩 𑒂𑒬,
𑒏𑒹 𑒥𑒜𑓃𑒰𑒍𑒞,
𑒫𑓀𑒬 𑒯𑒮𑓂𑒞𑒱𑒢𑒰𑒣𑒳𑒩𑒏 ।
𑒏𑒳𑒬𑒰𑒑𑓂𑒩 𑒥𑒳𑒠𑓂𑒡𑒱𑒏 𑒠𑒹𑒫𑒫𑓂𑒩𑒞
𑒥𑒳𑒗𑒪𑒢𑓂𑒯𑒱 𑒖𑒹 𑒥𑒰𑒞 𑒏𑒱𑒕𑒳 𑒂𑒩 𑒁𑒕𑒱,
𑒣𑒴𑒕𑒪𑒢𑓂𑒯𑒱 𑒮𑒰𑒩𑒟𑒲𑒮𑒿 𑒮𑒦 𑒑𑒣, 𑒑𑒹𑒪𑒟𑒱 𑒏𑒹𑒫𑒙𑒩𑒰𑒖 𑒪𑒑,
𑒂 𑒩𑒰𑒖𑒣𑒰𑒙 𑒞𑓂𑒨𑒰𑒑𑒱 𑒁𑒋𑒪𑒰𑒯।
𑒏𑒹𑒫𑒙𑒩𑒰𑒖 𑒣𑒩𑒘𑓂𑒔 𑒩𑒰𑒐𑒪 𑒋𑒏𑒙𑒰 𑒬𑓀𑒏𑒰, 𑒏𑒲 𑒯𑒼𑒋𑒞 𑒖𑒹 𑒁𑒯𑒰𑒿𑒏, 𑒣𑒳𑒞𑓂𑒩 𑒁𑒯𑒰𑒿𑒏 𑒖𑒹 𑒕𑒲𑒢𑒱 𑒪𑒋, 𑒯𑒧𑒩 𑒢𑒰𑒞𑒱𑒮𑒿 𑒩𑒰𑒖𑓂𑒨।
𑒁𑒣𑓂𑒩𑒞𑓂𑒨𑒰𑒬𑒱𑒞 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩,
𑒮𑒹𑒯𑒼 𑒁𑒣𑓂𑒩𑒞𑓂𑒨𑒰𑒬𑒱𑒞 ।
𑒃𑒞𑒱𑒯𑒰𑒮 𑒥𑒢𑒞, 𑒄 𑒣𑓂𑒩𑒞𑒱𑒖𑓂𑒘𑒰। 𑒢𑒯𑒱 𑒏𑒩𑒥 𑒯𑒧 𑒫𑒱𑒫𑒰𑒯 𑒂𑒖𑒢𑓂𑒧, 𑒑𑒰𑒩𑓂𑒯𑒮𑓂𑒟𑓂𑒨 𑒂𑒬𑓂𑒩𑒧 𑒕𑒼𑒛𑓃𑒥,
𑒩𑒯𑒥 𑒂𑒖𑒢𑓂𑒧 𑒥𑓂𑒩𑒯𑓂𑒧𑒔𑒰𑒩𑒲, 𑒕𑒼𑒛𑓃𑒥 𑒫𑒰𑒢𑒣𑓂𑒩𑒮𑓂𑒟 𑒂𑒬𑓂𑒩𑒧, 𑒯𑒮𑓂𑒞𑒱𑒢𑒰𑒣𑒳𑒩 𑒮𑒱𑓀𑒯𑒰𑒮𑒢𑒏 𑒧𑒰𑒞𑓂𑒩 𑒩𑒏𑓂𑒭𑒰, 𑒏𑒩𑒥 𑒯𑒧 𑒂𑒖𑒢𑓂𑒧।
𑒮𑓀𑒢𑓂𑒨𑒰𑒮 𑒂𑒬𑓂𑒩𑒧 𑒮𑒹𑒯𑒼 𑒕𑒼𑒛𑓃𑒥, 𑒮𑓀𑒞𑒰𑒢 𑒥𑒴𑒗𑒥 𑒯𑒮𑓂𑒞𑒱𑒢𑒰𑒣𑒳𑒩 𑒮𑒱𑓀𑒯𑒰𑒮𑒢𑒏𑒹𑒿। 𑒏𑓂𑒨𑒼 𑒢𑒯𑒱 𑒕𑒴𑒥𑒱 𑒮𑒏𑒞 𑒞𑒏𑒩𑒰, 𑒯𑒧𑒩𑒰 𑒖𑒱𑒥𑒻𑒞-𑒖𑒲𑒥𑒻𑒞।
𑒡𑒢𑓂𑒨-𑒡𑒢𑓂𑒨 𑒠𑒱𑒑𑒰𑒢𑓂𑒞 𑒥𑒰𑒖𑒪, 𑒣𑒳𑒭𑓂𑒣 𑒫𑒩𑓂𑒭𑒰 𑒏𑒋𑒪𑒢𑓂𑒯𑒱 𑒠𑒹𑒫𑒞𑒰𑒑𑒝,
𑒧𑓀𑒔𑒮𑒖𑓂𑒖𑒰𑒏 𑒪𑒹𑒪 𑒅𑒣𑒨𑒳𑒏𑓂𑒞 𑒏𑒫𑒱 𑒥𑓂𑒨𑒰𑒮𑒏 𑒏𑒟𑒢 𑒥𑒳𑒗𑒳 𑒋𑒞𑒋।
𑒦𑒲𑒭𑓂𑒧-𑒦𑒲𑒭𑓂𑒧 𑒡𑒢𑓂𑒨-𑒡𑒢𑓂𑒨, 𑒥𑒰𑒖𑒱 𑒅𑒚𑒪 𑒪𑒼𑒏 𑒮𑒦।
𑒏𑒹𑒫𑒙𑒩𑒰𑒖 𑒏𑒹𑒪𑒢𑓂𑒯𑒱 𑒫𑒱𑒠𑒰, 𑒮𑒞𑓂𑒨𑒫𑒞𑒲𑒏𑒹𑒿 𑒮𑒰𑒢𑒢𑓂𑒠। 𑒏𑒰𑒪𑒰𑓀𑒞𑒩𑒧𑒹 𑒣𑒳𑒞𑓂𑒩 𑒠𑒴, 𑒣𑒰𑒍𑒪 𑒫𑒱𑒔𑒱𑒞𑓂𑒩𑒫𑒲𑒩𑓂𑒨 𑒂 𑒔𑒱𑒞𑓂𑒩𑒰𑓀𑒑𑒠 ।
𑒥𑒰𑒪𑒏 𑒠𑒳𑒢𑒴 𑒕𑒼𑒙𑒹 𑒕𑒪, 𑒬𑒰𑓀𑒞𑒢𑒳𑒏 𑒣𑓂𑒩𑒨𑒰𑒝 𑒦𑒹𑒪। 𑒔𑒱𑒞𑓂𑒩𑒰𑓀𑒑𑒠𑒏 𑒦𑒲𑒭𑓂𑒧, 𑒞𑒐𑒢 𑒩𑒰𑒖𑓂𑒨𑒰𑒦𑒱𑒭𑒹𑒏 𑒏𑒋𑒪।
𑒒𑒧𑓀𑒛𑒲 𑒮𑒹 𑒕𑒪 𑒋𑒯𑒢 𑒏𑒲 𑒠𑒹𑒫 𑒏𑒲 𑒠𑒰𑒢𑒫 𑒥𑒳𑒗𑒨, 𑒏𑒲 𑒑𑓀𑒡𑒩𑓂𑒫 𑒏𑒲 𑒧𑒰𑒢𑒫 𑒏𑒏𑒩𑒼 𑒢𑒯𑒱 𑒙𑒹𑒩 𑒏𑒩𑒨। 𑒂 𑒠𑒹𑒯 𑒕𑒼𑒛𑓃𑒪, 𑒨𑒳𑒠𑓂𑒡 𑒮𑓀𑒑 𑒑𑓀𑒡𑒩𑓂𑒫𑒏 𑒏𑒋|
𑒫𑒱𑒔𑒱𑒞𑓂𑒩𑒫𑒲𑒩𑓂𑒨𑒏 𑒂𑒋𑒪 𑒩𑒰𑒖𑓂𑒨,
𑒦𑒲𑒭𑓂𑒧𑒏𑒹𑒿 𑒣𑒛𑓃𑒪 𑒮𑒧𑓂𑒯𑒰𑒩𑒋, 𑒮𑒦𑒙𑒰 𑒦𑒰𑒩 𑒏𑒰𑒩𑒝 𑒫𑒱𑒔𑒱𑒞𑓂𑒩𑒫𑒲𑒩𑓂𑒨 𑒩𑒯𑒟𑒱 𑒕𑒼𑒙।
𑒤𑒹𑒩 𑒖𑒐𑒢 𑒍 𑒦𑒹𑒪𑒰𑒯 𑒫𑒱𑒫𑒰𑒯 𑒨𑒼𑒑𑓂𑒨,
𑒏𑒰𑒬𑒲𑒩𑒰𑒖𑒏 𑒏𑒢𑓂𑒨𑒰 𑒮𑒦𑒏 𑒮𑓂𑒫𑒨𑓀𑒥𑒩𑒧𑒹,
𑒦𑒲𑒭𑓂𑒧 𑒫𑒱𑒠𑒰 𑒦𑒹𑒪𑒰𑒯 𑒏𑒰𑒬𑒲, 𑒖𑒞𑒋 𑒣𑒯𑒳𑒿𑒔𑒪 𑒕𑒪𑒰𑒯 𑒩𑒰𑒖𑒰 𑒬𑒪𑓂𑒫, 𑒏𑒰𑒬𑒲𑒩𑒰𑒖𑒏 𑒖𑓂𑒨𑒹𑒭𑓂𑒚 𑒣𑒳𑒞𑓂𑒩𑒲, 𑒁𑒧𑓂𑒥𑒰 𑒕𑒪𑒲𑒯 𑒯𑒳𑒢𑒏𑒰𑒣𑒩 𑒁𑒢𑒳𑒩𑒏𑓂𑒞 । 𑒁𑒧𑓂𑒥𑒰,𑒁𑒧𑓂𑒥𑒱𑒏𑒰,𑒁𑒧𑓂𑒥𑒰𑒪𑒱𑒏𑒰, 𑒠𑒵𑒭𑓂𑒙𑒱 𑒤𑒹𑒩𑒪 𑒦𑒲𑒭𑓂𑒧 𑒠𑒱𑒬𑒱। 𑒥𑒜𑒱 𑒑𑒹𑒪𑒲𑒯 𑒂𑒑𑒴 𑒞𑒐𑒢, 𑒦𑒲𑒭𑓂𑒧 𑒏𑓂𑒩𑒼𑒡𑒱𑒞 𑒦𑒋 𑒠𑒯𑒼𑒠𑒱𑒬, 𑒪𑒪𑒏𑒰𑒩𑒱𑒏𑒹𑒿 𑒏𑒯𑒪𑒢𑓂𑒯𑒱 𑒞𑒐𑒢 𑒍 𑒮𑒧𑒮𑓂𑒞 𑒩𑒰𑒖𑒰 𑒮𑒳𑒢𑒱 𑒪𑒱𑒁𑒯 𑒄, 𑒖𑒹 𑒣𑒩𑒰𑒖𑒱𑒞 𑒏𑒋 𑒮𑒏𑒲 𑒞𑒿, 𑒮𑓂𑒫𑒨𑓀𑒥𑒩𑒏 𑒦𑒰𑒑𑒲 𑒥𑒢𑒴 𑒤𑒹𑒩।
𑒮𑒦𑒏𑒹𑒿 𑒯𑒩𑒰𑒏𑒋 𑒦𑒲𑒭𑓂𑒧 𑒖𑒐𑒢, 𑒔𑒪𑒪𑒰𑒯 𑒏𑒰𑒬𑒲𑒩𑒰𑒖𑒏 𑒏𑒢𑓂𑒨𑒰 𑒮𑒧𑒹𑒞। 𑒬𑒪𑓂𑒫 𑒩𑒟𑒏 𑒣𑒰𑒕𑒴 𑒣𑒛𑓃𑒪 𑒂, 𑒪𑒪𑒏𑒰𑒩𑒪 𑒨𑒳𑒠𑓂𑒡𑒏 𑒪𑒹𑒪।
𑒡𑒢𑒳𑒭-𑒫𑒱𑒠𑓂𑒨𑒰 𑒡𑒢𑒲 𑒦𑒲𑒭𑓂𑒧𑒮𑒿, 𑒏𑒰𑒬𑒲𑒩𑒰𑒖𑒏 𑒏𑒢𑓂𑒨𑒰𑒮𑒦 𑒏𑒋𑒪 𑒣𑓂𑒩𑒰𑒩𑓂𑒟𑒢𑒰, 𑒦𑒲𑒭𑓂𑒧 𑒕𑒼𑒛𑓃𑒪 𑒣𑓂𑒩𑒰𑒝 𑒬𑒪𑓂𑒫𑒏, 𑒧𑒳𑒠𑒰 𑒁𑒧𑓂𑒥𑒰 𑒏𑒯𑒪𑒢𑓂𑒯𑒱 𑒦𑒲𑒭𑓂𑒧𑒮𑒿 𑒋𑒏𑒰𑓀𑒞𑒲𑒧𑒹, 𑒯𑒹 𑒑𑓀𑒑𑒹𑒨 𑒡𑒩𑓂𑒧𑒖𑓂𑒘, 𑒯𑒧𑒩𑒰 𑒧𑒼𑒢𑒧𑒹 𑒁𑒕𑒱 𑒋𑒏 𑒑𑒼𑒙 𑒬𑓀𑒏𑒰, 𑒧𑒰𑒢𑒱 𑒪𑒹𑒪 𑒮𑒾𑒦 𑒠𑒹𑒬 𑒩𑒰𑒖𑒰𑒏𑒹𑒿, 𑒣𑒞𑒱 𑒯𑒧 𑒁𑒣𑒢𑒰 𑒯𑒵𑒠𑒨-𑒥𑒱𑒔, 𑒡𑒩𑓂𑒧𑒰𑒞𑓂𑒧𑒰, 𑒧𑒯𑒰𑒞𑓂𑒧𑒰,𑒦𑒲𑒭𑓂𑒧𑒏 𑒢𑒱𑒩𑓂𑒝𑒨,
𑒖𑒰𑒟𑒳 𑒁𑒧𑓂𑒥𑒰 𑒬𑒪𑓂𑒫 𑒪𑒑।
𑒏𑒩𑒰𑒍𑒪 𑒫𑒱𑒫𑒰𑒯 𑒫𑒱𑒔𑒱𑒞𑓂𑒩𑒫𑒲𑒩𑓂𑒨𑒏, 𑒁𑒧𑓂𑒥𑒰-𑒁𑒧𑓂𑒥𑒰𑒪𑒱𑒏𑒰𑒏 𑒮𑓀𑒑।
𑒬𑒰𑒪𑓂𑒫 𑒕𑒪𑒰𑒯 𑒫𑒲𑒩,
𑒦𑒲𑒭𑓂𑒧 𑒯𑒩𑒰𑒍𑒪 𑒪𑒼𑒏 𑒮𑒦𑒏 𑒥𑒱𑒔, 𑒖𑒲𑒞𑒱 𑒪𑒋 𑒑𑒹𑒪 𑒁𑒯𑒰𑒿𑒏𑒹𑒿,
𑒋𑒯𑒱 𑒁𑒣𑒧𑒰𑒢𑒏 𑒥𑒰𑒠 𑒏𑒲 𑒄, 𑒥𑒰𑒞 𑒯𑒧𑒩𑒰 𑒮𑓂𑒫𑒲𑒏𑒰𑒩 𑒯𑒼?
𑒫𑒱𑒔𑒱𑒞𑓂𑒩𑒫𑒲𑒩𑓂𑒨 𑒏𑒯𑒪 𑒮𑒹𑒯𑒼 𑒁𑒧𑓂𑒥𑒰𑒮𑒿 𑒫𑒱𑒫𑒰𑒯 𑒁𑒏𑓂𑒭𑒞𑓂𑒩𑒱𑒨𑒼𑒔𑒱𑒞,
𑒁𑒧𑓂𑒥𑒰 𑒏𑒯𑒪𑒢𑓂𑒯𑒱 𑒦𑒲𑒭𑓂𑒧𑒏𑒹𑒿
𑒫𑒱𑒫𑒰𑒯 𑒏𑒩𑒴 𑒁𑒯𑒰𑒿 𑒯𑒧𑒩𑒰𑒮𑒿।
𑒯𑒩𑒱 𑒁𑒢𑒪𑒯𑒳𑒿, 𑒥𑒲𑒞𑒪 𑒕𑒯 𑒫𑒩𑓂𑒭 𑒯𑒮𑓂𑒞𑒱𑒢𑒰𑒣𑒳𑒩-𑒮𑒾𑒦𑒏 𑒥𑒲𑒔, 𑒦𑒲𑒭𑓂𑒧𑒏 𑒣𑓂𑒩𑒞𑒱𑒖𑓂𑒘𑒰
𑒧𑒳𑒠𑒰 𑒥𑒲𑒔𑒧𑒹 𑒚𑒰𑒜𑓃,
𑒑𑒹𑒪𑒲𑒯 𑒨𑒳𑒠𑓂𑒡𑒠𑒹𑒫 𑒏𑒰𑒩𑓂𑒞𑒱𑒏𑒹𑒨 𑒪𑒑।
𑒁𑒧𑓂𑒥𑒰 𑒦𑒩𑒱 𑒅𑒚𑒪𑒲𑒯 𑒣𑓂𑒩𑒞𑒱𑒬𑒼𑒡𑒮𑒿 ।
𑒠𑒹𑒪𑒢𑓂𑒯𑒱 𑒍 𑒢𑒯𑒱 𑒧𑒾𑒪𑒰𑒨𑒥𑒪𑒰 𑒏𑒧𑒪𑒏 𑒧𑒰𑒪𑒰,
𑒯𑒹 𑒁𑒧𑓂𑒥𑒹! 𑒪𑒱𑒁 𑒄 𑒬𑒮𑓂𑒞𑓂𑒩, 𑒖𑒏𑒩 𑒑𑒰𑒩 𑒣𑒯𑒱𑒩𑒰𑒨𑒥 𑒮𑒻𑒯 𑒏𑒩𑒞 𑒦𑒲𑒭𑓂𑒧𑒏𑒹𑒿 𑒢𑒭𑓂𑒙। 𑒦𑒲𑒭𑓂𑒧𑒏 𑒦𑒨 𑒣𑒩𑒘𑓂𑒔 𑒕𑒪 𑒞𑒞𑒹𑒏, 𑒢𑒯𑒱 𑒞𑒻𑒨𑒰𑒩 𑒦𑒹𑒪 𑒣𑒯𑒱𑒩𑒨 𑒄 𑒧𑒰𑒪𑒰 𑒏𑓂𑒨𑒼 𑒋𑒏। 𑒮𑒳𑒢𑒪𑒢𑓂𑒯𑒱 𑒕𑒟𑒱 𑒠𑓂𑒩𑒳𑒣𑒠 𑒫𑒲𑒩 𑒣𑒰𑓀𑒔𑒰𑒪, 𑒮𑒹𑒯𑒼 𑒞𑒻𑒨𑒰𑒩 𑒢𑒯𑒱 𑒦𑒹𑒪𑒰𑒯 𑒣𑒯𑒱𑒩𑒋 𑒄 𑒧𑒰𑒪। 𑒒𑒳𑒩𑒪𑒲𑒯 𑒁𑒧𑓂𑒥𑒰 𑒁𑓀𑒞𑒧𑒹 𑒯𑒰𑒩𑒱, 𑒢𑒱𑒩𑒰𑒬 𑒯𑒞𑒰𑒬 𑒪𑒙𑒏𑒹𑒪𑒢𑓂𑒯𑒱 𑒠𑓂𑒩𑒳𑒣𑒠𑒏 𑒧𑒯𑒪𑒏 𑒠𑓂𑒫𑒰𑒩𑒱।
𑒑𑒹𑒪𑒲𑒯 𑒍 𑒞𑒣𑒮𑓂𑒫𑒲𑒏 𑒬𑒩𑒝। 𑒮𑒦 𑒞𑒣𑒮𑓂𑒫𑒲 𑒏𑒋 𑒫𑒱𑒔𑒰𑒩 𑒏𑒯𑒪𑒢𑓂𑒯𑒱, 𑒖𑒰𑒆 𑒁𑒯𑒰𑒿 𑒣𑒩𑒳𑒬𑒩𑒰𑒧𑒏 𑒂𑒬𑓂𑒩𑒧।
𑒏𑓂𑒭𑒞𑓂𑒩𑒱𑒨-𑒠𑒧𑒢 𑒕𑒟𑒱 𑒍 𑒠𑒹𑒟𑒱𑒢𑓂𑒯 𑒠𑒝𑓂𑒛 𑒦𑒲𑒭𑓂𑒧𑒏𑒹𑒿, 𑒖𑒹 𑒏𑒭𑓂𑒙 𑒠𑒹𑒪𑒢𑓂𑒯𑒱 𑒁𑒏𑒰𑒩𑒝।
𑒣𑒩𑒬𑒳𑒩𑒰𑒧 𑒪𑒑 𑒣𑒯𑒳𑒿𑒔𑒱 𑒏𑒹𑒪𑒢𑓂𑒯𑒱 𑒣𑓂𑒩𑒰𑒩𑓂𑒟𑒢𑒰, 𑒮𑒳𑒢𑒰 𑒏𑒋 𑒁𑒣𑒢 𑒁𑒦𑓂𑒨𑒩𑓂𑒟𑒢𑒰। 𑒣𑒩𑒬𑒳𑒩𑒰𑒧 𑒏𑒯𑒪 𑒬𑒪𑓂𑒫 𑒁𑒕𑒱 𑒣𑓂𑒩𑒱𑒨 𑒯𑒧𑒩,
𑒥𑒰𑒞 𑒢𑒯𑒱 𑒏𑒰𑒙𑒞 𑒫𑒱𑒫𑒰𑒯 𑒬𑒪𑓂𑒫𑒮𑒿 𑒏𑒩𑒏 𑒪𑒹𑒪 𑒕𑒲 𑒞𑒻𑒨𑒰𑒩 𑒁𑒯𑒰𑒿 ? 𑒁𑒧𑓂𑒥𑒰 𑒏𑒯𑒪 𑒯𑒧 𑒂𑒥 𑒫𑒱𑒫𑒰𑒯 𑒢𑒯𑒱 𑒏𑒩𑒋 𑒔𑒰𑒯𑒻𑒞 𑒕𑒲।
𑒁𑒕𑒱 𑒯𑒧𑒩 𑒂𑒥 𑒄 𑒃𑒔𑓂𑒕𑒰 𑒧𑒰𑒞𑓂𑒩, 𑒏𑒩𑒴 𑒦𑒲𑒭𑓂𑒧𑒮𑒿 𑒨𑒳𑒠𑓂𑒡 𑒁𑒯𑒰𑒿।
𑒣𑒩𑒬𑒳𑒩𑒰𑒧 𑒏𑒋 𑒮𑓂𑒫𑒲𑒏𑒰𑒩 𑒄 𑒣𑓂𑒩𑒰𑒩𑓂𑒟𑒢𑒰, 𑒠𑒹𑒪𑒢𑓂𑒯𑒱 𑒦𑒲𑒭𑓂𑒧𑒏𑒹𑒿 𑒪𑒪𑒏𑒰𑒩𑒰, 𑒖𑒱𑒞𑒹𑒢𑓂𑒠𑓂𑒩𑒲𑒨,𑒥𑓂𑒩𑒯𑓂𑒧𑒔𑒰𑒩𑒲 𑒕𑒪𑒰𑒯 𑒠𑒳𑒢𑒴, 𑒡𑒢𑒳𑒩𑓂𑒡𑒰𑒩𑒲-𑒨𑒼𑒠𑓂𑒡𑒰 𑒧𑒡𑓂𑒨 𑒨𑒳𑒠𑓂𑒡𑒒𑒼𑒭 𑒥𑒩𑒳।
𑒯𑒰𑒩𑒱-𑒖𑒲𑒞𑒏 𑒣𑓂𑒩𑒬𑓂𑒢 𑒢𑒯𑒱 𑒕𑒪 𑒖𑓂𑒨𑒼𑒿, 𑒁𑒢𑒱𑒩𑓂𑒝𑒰𑒨𑒏 𑒨𑒳𑒠𑓂𑒡 𑒥𑒢𑒪,
𑒁𑒧𑓂𑒥𑒰 𑒯𑒰𑒩𑒱 𑒏𑒻𑒪𑒰𑒬𑒏 𑒠𑒱𑒬𑒱 𑒣𑓂𑒩𑒨𑒰𑒝 𑒏𑒋𑒪, 𑒑𑒹𑒪𑒲𑒯 𑒬𑒧𑓂𑒦𑒴𑒏 𑒬𑒩𑒝𑒧𑒹।
𑒣𑒰𑒥𑒱 𑒫𑒩 𑒣𑒳𑒢𑒩𑓂𑒖𑒢𑓂𑒧𑒏 𑒥𑒰𑒠, 𑒦𑒲𑒭𑓂𑒧𑒏 𑒧𑒵𑒞𑓂𑒨𑒳 𑒧𑒹 𑒯𑒼𑒋𑒞 𑒁𑒯𑒲𑓀𑒏 𑒯𑒰𑒟।
𑒁𑒧𑓂𑒥𑒰𑒏 𑒮𑓀𑒨𑒧𑒏 𑒮𑒹𑒯𑒼 𑒕𑒪 𑒮𑒲𑒧𑒰, 𑒏𑒴𑒠𑒱 𑒔𑒱𑒞𑒰𑒧𑒹 𑒣𑒳𑒢𑒩𑓂𑒖𑒢𑓂𑒧𑒏 𑒪𑒾𑒪𑒮𑒰𑒧𑒹। 𑒧𑒵𑒞𑓂𑒨𑒳 𑒣𑒰𑒥𑒱 𑒖𑒢𑓂𑒧 𑒪𑒹𑒪 𑒞𑒐𑒢, 𑒏𑒢𑓂𑒨𑒰 𑒥𑒢𑒱 𑒠𑓂𑒩𑒳𑒣𑒠𑒏 𑒧𑒯𑒪𑒧𑒹।
𑒐𑒹𑒪-𑒐𑒹𑒪𑒧𑒹 𑒧𑒰𑒪𑒰 𑒣𑒯𑒱𑒩𑒪 𑒁𑒣𑒢 𑒙𑒰𑒿𑒑𑒪, 𑒠𑓂𑒩𑒳𑒣𑒠 𑒮𑒼𑒔𑒪 𑒯𑒼𑒋𑒞 𑒋𑒏𑒙𑒰 𑒤𑒹𑒩, 𑒫𑒻𑒩 𑒦𑒲𑒭𑓂𑒧𑒏 𑒁𑒋𑒞 𑒑𑓄 𑒗𑒧𑒹𑒪।
𑒢𑒱𑒏𑒰𑒪𑒱 𑒩𑒰𑒖𑒧𑒯𑒪𑒮𑒿 𑒏𑒢𑓂𑒨𑒰𑒏𑒹𑒿, 𑒖𑓀𑒑𑒪 𑒠𑒱𑒬𑒱 𑒍 𑒑𑒹𑒪𑒱 𑒞𑒣𑒮𑓂𑒨𑒰 𑒏𑒋𑒪,
𑒣𑒰𑒍𑒪 𑒣𑒳𑒩𑒳𑒭 𑒩𑒴𑒣 𑒡𑒩𑒪 𑒬𑒱𑒐𑒝𑓂𑒛𑒲 𑒢𑒰𑒧, 𑒍𑒏𑒩𑒰 𑒕𑒪 𑒮𑒦𑒙𑒰 𑒧𑒼𑒢।
𑒫𑒱𑒔𑒱𑒞𑓂𑒩𑒫𑒲𑒩𑓂𑒨𑒏 𑒩𑒰𑒖 𑒮𑒹𑒯𑒼 𑒔𑒪𑒪 𑒥𑒛𑓂𑒛 𑒟𑒼𑒛𑓃 𑒠𑒱𑒢। 𑒏𑓂𑒭𑒨𑒏 𑒥𑒲𑒧𑒰𑒩𑒲 𑒕𑒪 𑒁𑒪𑓂𑒣𑒰𑒨𑒳 𑒧𑒹 𑒧𑒵𑒞𑓂𑒨𑒳𑒏 𑒁𑒠𑒱𑒢। 𑒡𑒵𑒞𑒩𑒰𑒭𑓂𑒙𑓂𑒩𑒏 𑒂 𑒣𑒰𑓀𑒛𑒳𑒏 𑒖𑒢𑓂𑒧𑒼 𑒢𑒯𑒱 𑒦𑒹𑒪।
𑒁𑓀𑒥𑒱𑒏𑒰𑒏 𑒣𑒳𑒞𑓂𑒩 𑒡𑒵𑒞𑒩𑒰𑒭𑓂𑒙𑓂𑒩,𑒁𑓀𑒥𑒰𑒪𑒱𑒏𑒰 𑒣𑒳𑒞𑓂𑒩 𑒣𑒰𑒝𑓂𑒛𑒳 𑒕𑒪।
𑒫𑒱𑒡𑒱𑒏 𑒫𑒱𑒡𑒰𑒢 𑒕𑒪, 𑒖𑓂𑒨𑒹𑒭𑓂𑒚 𑒣𑒳𑒞𑓂𑒩 𑒁𑓀𑒡 𑒦𑒹𑒪, 𑒁𑒧𑓂𑒥𑒱𑒏𑒰 𑒮𑒿 𑒣𑒳𑒞𑓂𑒩 𑒡𑒵𑒞𑒩𑒰𑒭𑓂𑒙𑓂𑒩, 𑒏𑒰𑒪 𑒕𑒱𑒢𑒪𑒏 𑒂𑒿𑒐𑒱, 𑒂 𑒏𑒰𑒪 𑒥𑒢𑒍𑒪𑒏 𑒏𑒯𑒥𑒲𑒏 𑒣𑒰𑒿𑒞𑒱
𑒁𑒧𑓂𑒥𑒰𑒪𑒱𑒏𑒰 𑒣𑒳𑒞𑓂𑒩 𑒣𑒰𑒝𑓂𑒛𑒳, 𑒣𑒾𑒝𑓂𑒛𑓂𑒩 𑒩𑒼𑒑 𑒑𑓂𑒩𑒮𑒱𑒞 𑒞𑒹𑒿 𑒥𑓂𑒨𑒰𑒮 𑒠𑒹𑒪 𑒢𑒰𑒧 𑒄,
𑒂𑒏𑒱 𑒯𑒳𑒢𑒏𑒹𑒿 𑒮𑒿 𑒩𑒼𑒑𑒏 𑒣𑒛𑓃𑒪 𑒢𑒰𑒧 𑒄।
𑒣𑒾𑒝𑓂𑒛𑓂𑒩 𑒑𑓂𑒩𑒮𑓂𑒞 𑒣𑒰𑒝𑓂𑒛𑒳𑒏𑒹𑒿 𑒩𑒰𑒖𑓂𑒨-𑒏𑒰𑒖 𑒑𑒹𑒪 𑒠𑒹𑒪 ।
𑒁𑓀𑒥𑒱𑒏𑒰𑒏 𑒠𑒰𑒮𑒲𑒮𑒿 𑒫𑒱𑒠𑒳𑒩𑒏 𑒦𑒹𑒪 𑒖𑒢𑓂𑒧 𑒕𑒪। 𑒬𑒱𑒏𑓂𑒭𑒰 𑒯𑒼𑒧𑒨 𑒪𑒰𑒑𑒪 𑒮𑒦𑒏 𑒦𑒲𑒭𑓂𑒧𑒏 𑒮𑓀𑒩𑒏𑓂𑒭𑒝𑒧𑒹, 𑒦𑒲𑒭𑓂𑒧𑒏𑒹𑒿 𑒔𑒱𑓀𑒞𑒰 𑒦𑒹𑒪 𑒫𑒱𑒫𑒰𑒯 𑒏𑒼𑒢𑒰 𑒯𑒼𑒨𑒞 𑒑𑒋, 𑒡𑒵𑒞𑒩𑒰𑒭𑓂𑒙𑓂𑒩𑒏 𑒯𑒹𑒞𑒳 𑒞𑒰𑒏𑒪 𑒋𑒏 𑒏𑒢𑓂𑒨𑒰𑒏𑒹𑒿। 𑒬𑒱𑒫𑒏 𑒫𑒩𑒠𑒰𑒢 𑒕𑒪 𑒑𑒰𑓀𑒡𑒰𑒩𑒲𑒏𑒹 𑒮𑒋 𑒣𑒳𑒞𑓂𑒩𑒏, 𑒥𑒜𑓃𑒞 𑒫𑓀𑒬 𑒬𑒼𑒔𑒪 𑒄 𑒣𑓂𑒩𑒨𑒞𑓂𑒢 𑒮𑒹 𑒣𑓂𑒩𑒰𑒩𑒧𑓂𑒦 𑒏𑒋𑒪।
𑒑𑒰𑓀𑒡𑒰𑒩 𑒢𑒩𑒹𑒬 𑒮𑒳𑒥𑒪 𑒦𑒹𑒪𑒰𑒯 𑒏𑒟𑒰 𑒪𑒹𑒪 𑒞𑒻𑒨𑒰𑒩 𑒖𑒐𑒢, 𑒫𑒱𑒫𑒰𑒯 𑒡𑒵𑒞𑒩𑒰𑒭𑓂𑒙𑓂𑒩𑒏 𑒦𑒹𑒪 𑒕𑒪𑒲𑒯 𑒍 𑒬𑒏𑒳𑒢𑒱𑒏 𑒥𑒯𑒱𑒢।
𑒮𑒳𑒢𑒱 𑒣𑒞𑒱𑒏 𑒁𑓀𑒡𑒞𑒰𑒏 𑒑𑒣𑓂𑒣 𑒣𑒙𑓂𑒙𑒲 𑒥𑒰𑒢𑓂𑒯𑒪, 𑒂𑒿𑒐𑒱 𑒩𑒯𑒱𑒞𑒯𑒳 𑒢𑒹𑒞𑓂𑒩𑒯𑒲𑒢𑒏 𑒖𑒱𑒢𑒑𑒲 𑒑𑒳𑒖𑒰𑒩𑒪।
𑒮𑒨 𑒣𑒳𑒞𑓂𑒩𑒏 𑒧𑒰𑒞𑒰 𑒕𑒪 𑒠𑒳𑓁𑒬𑒪𑒰 𑒋𑒏 𑒣𑒳𑒞𑓂𑒩𑒲, 𑒮𑒱𑓀𑒡𑒳 𑒢𑒩𑒹𑒬 𑒖𑒨𑒠𑓂𑒩𑒟 𑒦𑒹𑒪 𑒖𑒱𑒢𑒏𑒩 𑒣𑒞𑒱।
𑒏𑒵𑒭𑓂𑒝𑒏 𑒣𑒱𑒞𑒰 𑒫𑒰𑒮𑒳𑒠𑒹𑒫𑒏 𑒥𑒯𑒱𑒢 𑒕𑒪𑒱 𑒣𑒵𑒟𑒰, 𑒬𑒴𑒩𑒮𑒹𑒢𑒏 𑒣𑒳𑒞𑓂𑒩𑒲 𑒕𑒪𑒲𑒯 𑒩𑒯𑒪𑒲𑒯 𑒖𑒰𑒋 𑒧𑒳𑒠𑒰, 𑒣𑒱𑒞𑒰𑒏 𑒣𑒱𑒮𑒱𑒨𑒾𑒞 𑒏𑒳𑓀𑒞𑒲𑒦𑒼𑒖 𑒕𑒪 𑒮𑓀𑒞𑒰𑒢𑒯𑒲𑒢, 𑒯𑒳𑒢𑒏𑒹 𑒮𑓂𑒢𑒹𑒯 𑒦𑒹𑒙𑒪 𑒣𑒵𑒟𑒰 𑒦𑒹𑒪𑒱 𑒏𑒳𑓀𑒞𑒲 𑒣𑒳𑒢𑒱।
𑒏𑒵𑒭𑓂𑒝-𑒮𑒳𑒠𑒩𑓂𑒬𑒢, 𑒥𑒪𑒩𑒰𑒧𑒏 𑒠𑒲𑒠𑒲 𑒦𑒹𑒪𑒲𑒯, 𑒮𑒞𑓂𑒏𑒰𑒩 𑒫𑒱𑒣𑓂𑒩𑒫𑒩𑒏 𑒏𑒩𑒻𑒞 𑒕𑒪𑒲𑒯। 𑒋𑒯𑒱𑒢𑒰 𑒋𑒏 𑒥𑒹𑒩 𑒠𑒳𑒩𑓂𑒫𑒰𑒮𑒰 𑒠𑒹𑒪 𑒧𑓀𑒞𑓂𑒩 𑒋𑒏𑒙𑒰, 𑒣𑒜𑓃𑒥 𑒧𑒼𑒢𑒮𑒿 𑒠𑒹𑒫 𑒁𑒋𑒞 𑒥𑒖𑒹𑒥𑒢𑒱 𑒖𑒱𑒢𑒏𑒰।
𑒥𑓂𑒨𑒰𑒮𑒏 𑒄 𑒏𑒫𑒱𑒞𑓂𑒫 𑒧𑒼𑒢𑒏 𑒥𑒰𑒞 𑒏𑒯𑒪𑒏,
𑒫𑒩-𑒧𑓀𑒞𑓂𑒩-𑒣𑒳𑒢𑒩𑓂𑒖𑒢𑓂𑒧 𑒮𑒥𑒯𑒏 𑒞𑒞𑓂𑒞𑓂𑒫 𑒞𑒏𑒪𑒏।
𑒢𑒹𑒢𑒧𑒞𑒱 𑒥𑒳𑒠𑓂𑒡𑒱 𑒕𑒪 𑒏𑒳𑒢𑓂𑒞𑒲𑒏, 𑒮𑒴𑒩𑓂𑒨𑒏𑒹𑒿 𑒥𑒖𑒰𑒍𑒪,
𑒣𑒳𑒞𑓂𑒩-𑒣𑓂𑒩𑒰𑒣𑓂𑒞𑒱 𑒦𑒹𑒪 𑒮𑒹 𑒥𑒰𑒡𑒏 𑒕𑒪 𑒪𑒼𑒏𑒪𑒰𑒖, 𑒥𑒯𑒰 𑒠𑒹𑒪 𑒥𑒔𑓂𑒔𑒰𑒏𑒹𑒿 𑒥𑒱𑒔 𑒑𑓀𑒑𑒡𑒰𑒩।
𑒏𑒾𑒩𑒫𑒏 𑒮𑒰𑒩𑒟𑒲 𑒁𑒡𑒲𑒩𑒟𑒏𑒹𑒿 𑒦𑒹𑒙𑒪 𑒍, 𑒏𑒩𑓂𑒝 𑒩𑒰𑒡𑒹𑒨 𑒧𑒰𑒋 𑒩𑒰𑒡𑒰 𑒣𑒼𑒭𑒱𑒞 𑒮𑒴𑒞𑒣𑒳𑒞𑓂𑒩 𑒣𑒩𑒰𑒏𑓂𑒩𑒧𑒲, 𑒬𑒩𑒲𑒩 𑒏𑒫𑒔𑒨𑒳𑒏𑓂𑒞 𑒏𑒰𑒢 𑒏𑒳𑓀𑒛𑒪𑒮𑒿 𑒬𑒼𑒦𑒱𑒞।
𑒣𑒰𑒝𑓂𑒛𑒳𑒏 𑒤𑒹𑒩 𑒏𑒳𑓀𑒞𑒲𑒮𑒿 𑒫𑒱𑒫𑒰𑒯 𑒦𑒹𑒪,
𑒧𑒠𑓂𑒩𑒢𑒩𑒹𑒬𑒏 𑒣𑒳𑒞𑓂𑒩𑒲 𑒧𑒰𑒠𑓂𑒩𑒲 𑒠𑒼𑒮𑒩 𑒣𑒞𑓂𑒢𑒲 𑒦𑒹𑒪𑒱।
𑒣𑒰𑒝𑓂𑒛𑒳 𑒨𑒳𑒠𑓂𑒡-𑒏𑒰𑒩𑓂𑒨 𑒧𑒰𑒞𑓂𑒩 𑒏𑒋𑒪 𑒖𑒲𑒞𑒱 𑒩𑒰𑒖, 𑒠𑒴𑒩 𑒩𑒯𑒱 𑒩𑒰𑒖-𑒏𑒰𑒖 𑒦𑒼𑒑𑒪 𑒮𑒳𑒐 𑒧𑒰𑒞𑓂𑒩 !
𑒏𑒳𑓀𑒞𑒲-𑒧𑒰𑒠𑓂𑒩𑒲𑒏 𑒮𑓀𑒑 𑒫𑒢-𑒫𑒱𑒔𑒩𑒝 𑒧𑒹 𑒩𑒞।
𑒬𑒱𑒏𑒰𑒩 𑒐𑒹𑒪𑒰𑒃𑒞 𑒫𑒢𑒧𑒹,
𑒋𑒏 𑒧𑒳𑒢𑒱 𑒬𑓂𑒩𑒰𑒣 𑒠𑒹𑒪 𑒮𑓀𑒞𑒰𑒢𑒫𑒱𑒯𑒲𑒢𑒞𑒰𑒏।
𑒣𑒰𑒝𑓂𑒛𑒳𑒏 𑒮𑓀𑒞𑒰𑒢 𑒣𑓂𑒩𑒰𑒣𑓂𑒞𑒱𑒏 𑒃𑒔𑓂𑒕𑒰 𑒠𑒹𑒐𑒱 𑒏𑒳𑓀𑒞𑒲, 𑒐𑒼𑒪𑒪𑒢𑓂𑒯𑒱 𑒠𑒳𑒩𑓂𑒫𑒰𑒮𑒰𑒏 𑒠𑒹𑒪 𑒧𑓀𑒞𑓂𑒩𑒏 𑒦𑒹𑒠। 𑒨𑒧𑒮𑒿 𑒡𑒩𑓂𑒧𑒩𑒰𑒖,𑒦𑒲𑒧𑒮𑒹𑒢 𑒫𑒰𑒨𑒳𑒮𑒿,
𑒃𑓀𑒠𑓂𑒩𑒮𑒿 𑒁𑒩𑓂𑒖𑒳𑒢 𑒏𑒳𑓀𑒞𑒲𑒏 𑒣𑒳𑒞𑓂𑒩 𑒞𑒲𑒢 𑒦𑒹𑒪।
𑒏𑒳𑓀𑒞𑒲𑒏 𑒧𑓀𑒞𑓂𑒩𑒮𑒿 𑒧𑒰𑒠𑓂𑒩𑒲𑒏𑒹𑒿 𑒦𑒹𑒪 𑒣𑒳𑒞𑓂𑒩𑒏 𑒂𑒬।
𑒁𑒬𑓂𑒫𑒱𑒢𑒠𑓂𑒫𑒨 𑒮𑒿 𑒦𑒹𑒪 𑒢𑒏𑒳𑒪-𑒮𑒯𑒠𑒹𑒫 𑒣𑓂𑒩𑒰𑒣𑓂𑒞।
𑒣𑒰𑒝𑓂𑒛𑒳𑒏 𑒧𑒵𑒞𑓂𑒨𑒳 𑒣𑓀𑒔𑒣𑒰𑒝𑓂𑒛𑒫 𑒖𑒢𑓂𑒧𑒏 𑒥𑒰𑒠, 𑒦𑒹𑒪𑒲𑒯 𑒮𑒞𑒲 𑒣𑒞𑒱𑒏 𑒮𑓀𑒑 𑒧𑒰𑒠𑓂𑒩𑒲 𑒫𑒢𑒯𑒱𑒧𑒹।
𑒣𑒰𑒝𑓂𑒛𑒫 𑒍 𑒏𑒳𑓀𑒞𑒲𑒏𑒹𑒿 𑒥𑒼𑒢𑒮𑒿 𑒯𑒮𑓂𑒞𑒱𑒢𑒰𑒣𑒳𑒩,
𑒁𑒢𑒪𑒢𑓂𑒯𑒱 𑒢𑒑𑒩𑒧𑒹 𑒮𑒦 𑒫𑒢𑒏 𑒧𑒳𑒢𑒱𑒫𑒩 𑒮𑒦। 𑒣𑓀𑒔 𑒣𑒰𑒝𑓂𑒛𑒫𑒏 𑒮𑓀𑒑 𑒂𑒨𑒪𑒱 𑒏𑒳𑓀𑒞𑒲 𑒢𑒑𑒩।
𑒖𑒳𑒧𑒱 𑒑𑒹𑒪 𑒮𑒦 𑒢𑒩 𑒢𑒰𑒩𑒲 𑒚𑒰𑒧-𑒚𑒰𑒧𑒹। 𑒇𑒭𑒱-𑒧𑒳𑒢𑒱 𑒫𑒢 𑒣𑓂𑒩𑒰𑒝𑒲𑒏 𑒮𑓀𑒑𑒞𑒱𑒧𑒹 𑒬𑒲𑒪। 𑒧𑒳𑒑𑓂𑒡𑒱𑒞 𑒮𑒳𑒬𑒲𑒪 𑒣𑒰𑒝𑓂𑒛𑒫𑒏𑒹𑒿 𑒧𑒼𑒢 𑒦𑒩𑒱 𑒠𑒹𑒐𑒱-𑒑𑒳𑒝𑒱।
𑒏𑒵𑒣𑒰𑒔𑒰𑒩𑓂𑒨𑒏 𑒂𑒔𑒰𑒩𑓂𑒨𑒞𑓂𑒫𑒧𑒹 𑒬𑒱𑒏𑓂𑒭𑒰, 𑒣𑒰𑒥𑒱 𑒩𑒯𑒪 𑒠𑒳𑒩𑓂𑒨𑒼𑒡𑒢 𑒏𑒾𑒩𑒫, 𑒣𑒰𑒥𑒱 𑒮𑒏𑒋 𑒕𑒟𑒱 𑒯𑒳𑒢𑒏𑒹 𑒪𑒑 𑒩𑒯𑒱, 𑒣𑒰𑒝𑓂𑒛𑒫 𑒖𑒢 𑒮𑒦 𑒬𑒱𑒏𑓂𑒭𑒰 𑒄 𑒮𑒦 ।
𑒡𑒵𑒞𑒩𑒰𑒭𑓂𑒙𑓂𑒩 𑒮𑒼𑒔𑒱 𑒄 𑒞𑒐𑒢 𑒏𑒋𑒪, 𑒞𑒰𑒯𑒱 𑒞𑒩𑒯𑒏 𑒫𑓂𑒨𑒫𑒮𑓂𑒟𑒰, 𑒠𑒳𑒩𑓂𑒨𑒼𑒡𑒢-𑒏𑒾𑒩𑒫𑒏 𑒮𑓀𑒑 𑒩𑒯𑒞𑒰𑒯
𑒣𑓀𑒔 𑒣𑒰𑒝𑓂𑒛𑒫 𑒦𑓂𑒩𑒰𑒞𑒰।
𑒦𑒲𑒧 𑒕𑒪𑒰𑒯 𑒥𑒪𑒬𑒰𑒪𑒲 𑒮𑒦𑒧𑒹, 𑒠𑒳𑒩𑓂𑒨𑒼𑒡𑒢𑒧𑒹 𑒕𑒪 𑒃𑒩𑒐𑒰 𑒥𑒛𑓃। 𑒏𑒩𑒋 𑒪𑒰𑒑𑒪 𑒠𑒳𑒩𑓂𑒨𑒼𑒡𑒢 𑒦𑒲𑒧𑒏, 𑒧𑒵𑒞𑓂𑒨𑒳 𑒨𑒼𑒖𑒢𑒰 𑒑𑓀𑒑𑒹 𑒞𑒙 !
𑒖𑒪 𑒏𑓂𑒩𑒲𑒛𑓃𑒰𑒏 𑒯𑒹𑒞𑒳 𑒑𑒹𑒪 𑒪𑒋, 𑒞𑒙 𑒠𑒳𑒩𑓂𑒨𑒼𑒡𑒢 𑒣𑒰𑒝𑓂𑒛𑒫𑒏𑒹𑒿। 𑒐𑒰𑒠𑓂𑒨 𑒧𑒡𑓂𑒨 𑒧𑒱𑒪𑒰𑒍𑒪 𑒫𑒱𑒭, 𑒐𑒼𑒂𑒍𑒪 𑒦𑒼𑒖𑒢 𑒦𑒲𑒧𑒯𑒱𑒏𑒹𑒿।
𑒮𑒦 𑒑𑒹𑒪 𑒢𑒯𑒰𑒥𑒋 𑒑𑓀𑒑𑒧𑒡𑓂𑒨, 𑒢𑒬𑒰 𑒦𑒲𑒧𑒏𑒹𑒿 𑒂𑒨𑒪,
𑒏𑒰𑒞 𑒁𑒥𑒻𑒞 𑒐𑒮𑒪𑒰𑒯 𑒍𑒞𑒋 𑒦𑒲𑒧 𑒁𑒛𑓃𑒩𑒰 𑒏𑒨 ।
𑒠𑒳𑒩𑓂𑒨𑒼𑒡𑒢 𑒥𑒰𑒢𑓂𑒯𑒪 𑒪𑒞𑒰𑒏𑒳𑒘𑓂𑒖 𑒮𑒿 । 𑒤𑒹𑒏𑒪 𑒡𑒰𑒩𑒧𑒹 𑒍𑒏𑒩𑒰 𑒢𑒱𑒬𑓂𑒔𑒱𑓀𑒞, 𑒞𑓂𑒩𑒰𑒮 𑒧𑒳𑒏𑓂𑒞 𑒏𑒾𑒩𑒫𑒒𑒳𑒩𑒱 𑒂𑒨𑒪। 𑒑𑓀𑒑 𑒧𑒡𑓂𑒨 𑒛𑒿𑒮𑒪𑒏 𑒋𑒏 𑒢𑒰𑒑, 𑒫𑒱𑒭 𑒏𑒙𑒪𑒏 𑒫𑒱𑒭𑒏𑒹𑒿 !
𑒮𑒹 𑒠𑒹𑒐𑒴 𑒏𑒰𑒙𑒞 𑒏𑒹 𑒣𑒰𑒝𑓂𑒛𑒫𑒏 𑒦𑒰𑒑।
𑒫𑒱𑒭𑒏 𑒣𑓂𑒩𑒦𑒰𑒫 𑒦𑒹𑒪 𑒠𑒴𑒩, 𑒦𑒲𑒧 𑒔𑒪𑒪𑒰𑒯 𑒒𑒩𑒏𑒹𑒿, 𑒅𑒚𑒪𑒰𑒯 𑒗𑒳𑒧𑒻𑒞 𑒯𑒼𑒃𑒞 𑒧𑒠𑒧𑒮𑓂𑒞, 𑒏𑒟𑒰 𑒮𑒳𑒢𑒰𑒥𑒋 𑒦𑓂𑒩𑒰𑒞𑒰𑒏𑒹𑒿।
𑒨𑒳𑒡𑒱𑒭𑓂𑒚𑒱𑒩 𑒒𑒩𑒧𑒹 𑒮𑒼𑒔𑒟𑒱, 𑒦𑒲𑒧 𑒣𑒯𑒳𑒿𑒔𑒱 𑒑𑒹𑒪 𑒯𑒼𑒋𑒞𑒰𑒯। 𑒢𑒯𑒱 𑒠𑒹𑒐𑒪 𑒒𑒩 𑒦𑒲𑒧, 𑒧𑒰𑒟 𑒣𑒩 𑒥𑒪 𑒁𑒋𑒪𑒢𑓂𑒯𑒱 𑒏𑒢𑒹𑒙𑒰।
𑒞𑒰𑒫𑒞 𑒦𑒲𑒧 𑒗𑒴𑒧𑒱 𑒁𑒋𑒪𑒰𑒯, 𑒭𑒛𑒨𑓀𑒞𑓂𑒩𑒏 𑒏𑒟𑒰 𑒮𑒳𑒢𑒰𑒍𑒪 । 𑒏𑒳𑓀𑒞𑒲 𑒔𑒱𑓀𑒞𑒱𑒞 𑒦𑒹𑒪𑒱 𑒫𑒱𑒠𑒳𑒩𑒮𑒿, 𑒣𑒴𑒕𑒪 𑒦𑒹𑒪 𑒄 𑒅𑒔𑒱𑒞 !
𑒫𑒱𑒠𑒳𑒩 𑒥𑒳𑒗𑒰𑒍𑒪 𑒣𑒰𑒝𑓂𑒛𑒫 𑒕𑒟𑒱 𑒥𑒪𑒬𑒰𑒪𑒲 𑒏𑒱𑒘𑓂𑒔𑒱𑒞। 𑒯𑒳𑒢𑒏𑒩 𑒠𑒳𑒩𑓂𑒨𑒼𑒡𑒢 𑒏𑒩𑒱 𑒣𑒰𑒍𑒞, 𑒢𑒯𑒱 𑒏𑒼𑒢𑒼 𑒁𑒯𑒱𑒞।
𑒦𑒲𑒧𑒏𑒹𑒿 𑒖𑒱𑒥𑒻𑒞 𑒠𑒹𑒐𑒱 𑒠𑒳𑒩𑓂𑒨𑒼𑒡𑒢-𑒦𑓂𑒩𑒰𑒞𑒰, 𑒧𑒼𑒢 𑒧𑒮𑒼𑒮𑒱 𑒩𑒯𑒱 𑒑𑒹𑒪 𑒍 𑒠𑒳𑒭𑓂𑒙 𑒠𑒳𑒩𑒰𑒞𑓂𑒧𑒰।
𑒏𑒾𑒩𑒫 𑒣𑒰𑒝𑓂𑒛𑒫 𑒪𑒲𑒢 𑒏𑓀𑒠𑒳𑒏 𑒐𑒹𑒪𑒱 𑒩𑒯𑒪। 𑒏𑓀𑒠𑒳𑒏 𑒐𑒮𑒪 𑒃𑒢𑒰𑒩𑒧𑒹 𑒢𑒯𑒱 𑒢𑒱𑒏𑒪𑒱 𑒩𑒯𑒪। 𑒮𑒼𑒗𑒯𑒱 𑒕𑒪 𑒋𑒏 𑒬𑒱𑒁𑒏 𑒥𑒰𑒙𑒹 𑒂𑒥𑒱 𑒩𑒯𑒪, 𑒞𑒹𑒖 𑒖𑒏𑒩 𑒍𑒏𑒩 𑒧𑒯𑒱𑒧𑒰 𑒕𑒪 𑒑𑒰𑒥𑒱 𑒩𑒯𑒪।
𑒥𑒰𑒝𑒏 𑒫𑒰𑒩 𑒣𑒳𑒢𑒱 𑒣𑒳𑒢𑒱 𑒏𑒋𑒪 𑒤𑒹𑒩 𑒆𑒣𑒩𑒮𑒿, 𑒐𑒹𑓀𑒔𑒱 𑒏𑒨 𑒢𑒱𑒏𑒰𑒪𑒪 𑒑𑒹𑓀𑒠 𑒡𑒢𑒳𑒩𑓂𑒫𑒱𑒠𑓂𑒨𑒰𑒏𑒾𑒬𑒪𑒮𑒿।
𑒦𑒲𑒭𑓂𑒧𑒏𑒹𑒿 𑒮𑒳𑒢𑒰𑒋𑒪 𑒥𑒰𑒪𑒫𑒵𑒢𑓂𑒠 𑒏𑒪𑒰𑒏𑒰𑒩𑒲 𑒍𑒏𑒩, 𑒠𑓂𑒩𑒼𑒝 𑒢𑒰𑒧𑓂𑒢𑒰 𑒏𑒵𑒣𑒰𑒔𑒰𑒩𑓂𑒨𑒏 𑒕𑒪 𑒖𑒹 𑒥𑒯𑒱𑒢𑒱 𑒫𑒩।
𑒁𑒬𑓂𑒫𑒞𑓂𑒟𑒰𑒧𑒰 𑒣𑒳𑒞𑓂𑒩 𑒖𑒢𑒱𑒏 𑒮𑒯𑒣𑒰𑒚𑒲 𑒠𑓂𑒩𑒳𑒣𑒠 𑒕𑒪। 𑒠𑓂𑒩𑒳𑒣𑒠 𑒠𑒹𑒪 𑒋𑒏𑒫𑒔𑒢 𑒩𑒰𑒖 𑒠𑒹𑒥 𑒂𑒡 𑒯𑒧। 𑒠𑒹𑒪 𑒫𑒔𑒢 𑒥𑒱𑒮𑒩𑒪𑒮𑒹 𑒩𑒰𑒖𑒰 𑒥𑒢𑒪𑒰 𑒅𑒞𑓂𑒞𑒩। 𑒁𑒣𑒧𑒰𑒢𑒱𑒞 𑒏𑒋𑒪 𑒮𑒹 𑒤𑒴𑒙𑒱, 𑒩𑒰𑒖𑒰 𑒍 𑒠𑓀𑒦𑒲। 𑒣𑓂𑒩𑒞𑒱𑒬𑒼𑒡𑒏 𑒥𑒰𑒙 𑒞𑒰𑒏𑒱 𑒩𑒯𑒪 𑒠𑓂𑒩𑒼𑒝 𑒥𑒢𑒱 𑒣𑓂𑒩𑒞𑒱𑒠𑓂𑒫𑒢𑓂𑒠𑒲।
𑒢𑒱𑒩𑓂𑒡𑒢𑒞𑒰𑒏 𑒖𑒱𑒢𑒑𑒲 𑒖𑒱𑒥𑒻𑒞 𑒕𑒪𑒰𑒯 𑒒𑒴𑒧𑒱 𑒩𑒯𑒪। 𑒁𑒬𑓂𑒫𑒞𑓂𑒟𑒰𑒧𑒰𑒏 𑒮𑓀𑒑 𑒂𑒖𑒲𑒫𑒱𑒏𑒰𑒏 𑒞𑒰𑒏𑒱𑒧𑒹 𑒣𑒛𑓃𑒪। 𑒯𑒮𑓂𑒞𑒱𑒢𑒰𑒣𑒳𑒩𑒏 𑒂𑒑𑓂𑒩𑒯 𑒕𑒪𑒰𑒯 𑒢𑒯𑒱 𑒙𑒰𑒩𑒱 𑒮𑒏𑒪। 𑒏𑒵𑒞𑒖𑓂𑒘𑒞𑒰𑒏 𑒦𑒰𑒩𑒮𑒿 𑒁𑒬𑓂𑒫𑒞𑓂𑒟𑒰𑒧𑒰-𑒠𑓂𑒩𑒼𑒝 𑒯𑒮𑓂𑒞𑒱𑒢𑒰𑒣𑒳𑒩𑒏।
𑒡𑒢𑒳𑒩𑓂𑒫𑒱𑒠𑓂𑒨𑒰𑒏 𑒣𑒰𑒚 𑒬𑒳𑒩𑒳 𑒏𑒋𑒪 𑒏𑒾𑒩𑒫𑒏 𑒂 𑒣𑒰𑒝𑓂𑒛𑒫𑒏। 𑒣𑒰𑒚𑒏 𑒅𑒣𑒩𑒰𑓀𑒞 𑒮𑒧𑒨 𑒂𑒋𑒪 𑒕𑒪 𑒪𑒏𑓂𑒭𑓂𑒨 𑒦𑒹𑒠𑒏।
𑒣𑒩𑒲𑒏𑓂𑒭𑒰𑒏 𑒔𑒰𑒞𑒳𑒩𑓂𑒨𑒏 𑒮𑓀𑒑𑒯𑒱 𑒏𑒳𑒬𑒪𑒞𑒰𑒏 𑒩𑒝-𑒏𑒾𑒬𑒪𑒏। 𑒪𑒏𑓂𑒭𑓂𑒨 𑒥𑒢𑒪 𑒋𑒏𑒙𑒰 𑒑𑒼𑒙-𑒥𑒹𑒬 𑒆𑒿𑒔 𑒫𑒵𑒏𑓂𑒭 𑒣𑒩, 𑒩𑒰𑒐𑒪 𑒏𑒰𑒚𑒏 𑒔𑒱𑒛𑓃𑒻 𑒂𑒿𑒐𑒱 𑒖𑒏𑒩 𑒪𑒏𑓂𑒭𑓂𑒨 𑒕𑒪।
𑒮𑒦𑒏𑒹𑒿 𑒣𑒴𑒕𑒪 𑒠𑓂𑒩𑒼𑒝 𑒥𑒰𑒖𑒴 𑒏𑒲 𑒕𑒲 𑒠𑒹𑒐𑒱 𑒩𑒯𑒪? 𑒮𑒦 𑒏𑓂𑒨𑒼 𑒑𑒰𑒕 𑒫𑒵𑒏𑓂𑒭 𑒣𑒏𑓂𑒭𑒱𑒏 𑒮𑓀𑒑 𑒠𑒹𑒐𑒱 𑒩𑒯𑒪।
𑒣𑒰𑒩𑓂𑒟𑒏𑒹𑒿 𑒣𑒴𑒕𑒪 𑒁𑒯𑒰𑒿 𑒕𑒲 𑒏𑒟𑒲 𑒠𑒹𑒐𑒱 𑒩𑒯𑒪 𑒮𑒏𑒪। 𑒧𑒰𑒟 𑒣𑒏𑓂𑒭𑒱𑒏 𑒁𑒞𑒱𑒩𑒱𑒏𑓂𑒞 𑒢𑒯𑒱 𑒏𑒱𑒕𑒳 𑒕𑒲 𑒠𑒹𑒐𑒪। 𑒁𑒩𑓂𑒖𑒳𑒢𑒏 𑒥𑒰𑒝 𑒣𑒏𑓂𑒭𑒱𑒏 𑒬𑒱𑒩𑒼𑒔𑓂𑒕𑒹𑒠𑒢 𑒏𑒋𑒪𑒏।
𑒁𑒩𑓂𑒖𑒳𑒢 𑒦𑒹𑒪𑒰𑒯 𑒣𑓂𑒩𑒱𑒨-𑒮𑓂𑒢𑒹𑒯𑒱𑒪 𑒠𑓂𑒩𑒼𑒝𑒏 𑒯𑒵𑒠𑒨𑒏।
𑒥𑒲𑒞𑒪 𑒮𑒧𑒨 𑒬𑒮𑓂𑒞𑓂𑒩-𑒣𑓂𑒩𑒠𑒩𑓂𑒬𑒢𑒏 𑒕𑒪 𑒂𑒋𑒪।
𑒮𑒧𑒨 𑒥𑒲𑒞𑒪 𑒣𑓂𑒩𑒠𑒩𑓂𑒬𑒢-𑒬𑒮𑓂𑒞𑓂𑒩𑒏 𑒕𑒪 𑒂𑒨𑒪।
𑒦𑒲𑒭𑓂𑒧 𑒣𑒴𑒕𑒪 𑒠𑓂𑒩𑒼𑒝𑒮𑒿 𑒏𑒲-𑒏𑒲 𑒮𑒱𑒐𑒰𑒍𑒪, 𑒨𑒳𑒠𑓂𑒡-𑒏𑒾𑒬𑒪,𑒫𑓂𑒨𑒴𑒯 𑒩𑒔𑒢𑒰 𑒂 𑒬𑒮𑓂𑒞𑓂𑒩𑒏𑒾𑒬𑒪।
𑒣𑓂𑒩𑒠𑒩𑓂𑒬𑒢𑒏 𑒫𑓂𑒨𑒫𑒮𑓂𑒟𑒰 𑒦𑒹𑒪 𑒖𑒢𑒏 𑒥𑒲𑒔𑒯𑒱,
𑒋𑒏𑒰𑒋𑒏𑒲 𑒮𑒦 𑒦𑒹𑒪𑒰𑒯 𑒣𑒩𑒲𑒏𑓂𑒭𑒱𑒞 𑒮𑓀𑒑𑒯𑒱।
𑒦𑒹𑒪 𑒦𑒲𑒧-𑒠𑒳𑒩𑓂𑒨𑒼𑒡𑒢𑒏 𑒑𑒠𑒰-𑒨𑒳𑒠𑓂𑒡𑒏 𑒣𑓂𑒩𑒠𑒩𑓂𑒬𑒢। 𑒦𑒲𑒭𑓂𑒧-𑒡𑒵𑒞𑒩𑒰𑒭𑓂𑒙𑓂𑒩𑒏 𑒯𑒵𑒠𑒨-𑒥𑒱𑒔 𑒫𑒰𑒞𑒮𑒪𑓂𑒨𑒏, 𑒖𑒐𑒢 𑒕𑒪 𑒠𑓂𑒫𑓀𑒠𑒏𑒥𑒲𑒔 𑒁𑒩𑓂𑒖𑒳𑒏 𑒥𑒹𑒩 𑒂𑒨𑒪। 𑒋𑒏𑒰𑒢𑒹𑒏 𑒥𑒰𑒝-𑒫𑒱𑒠𑓂𑒨𑒰𑒮𑒿 𑒩𑓀𑒑𑒮𑓂𑒟𑒪𑒲 𑒑𑒳𑓀𑒖𑒱𑒞, 𑒒𑒼𑒭 𑒁𑒩𑓂𑒖𑒳𑒢𑒏 𑒦𑒹𑒪 𑒥𑒲𑒔𑒯𑒱 𑒏𑒩𑓂𑒝 𑒂𑒋𑒪।
𑒣𑒩𑒬𑒳𑒩𑒰𑒧 𑒬𑒱𑒭𑓂𑒨 𑒏𑒩𑓂𑒝 𑒏𑒋𑒪𑒏 𑒫𑒱𑒢𑒨, 𑒏𑒋 𑒕𑒲 𑒮𑒏𑒻𑒞 𑒯𑒧 𑒣𑓂𑒩𑒠𑒩𑓂𑒬𑒢 𑒮𑒦𑒏 𑒖𑒹, 𑒫𑒱𑒠𑓂𑒨𑒰 𑒖𑒢𑒻𑒞 𑒕𑒟𑒱 𑒁𑒩𑓂𑒖𑒳𑒢 𑒮𑒏𑒪 𑒮𑒦,
𑒣𑒰𑒥𑒱 𑒮𑒯 𑒠𑒳𑒩𑓂𑒨𑒼𑒡𑒢𑒏, 𑒪𑒪𑒏𑒰𑒩𑒰 𑒠𑒹𑒪𑒏, 𑒁𑒩𑓂𑒖𑒳𑒢 𑒠𑓂𑒫𑓀𑒠 𑒯𑒧𑒩𑒰𑒮𑒿 𑒪𑒛𑓃𑒴 𑒮𑒹 𑒣𑓂𑒩𑒟𑒧𑒞𑓁।
𑒏𑒵𑒣𑒰𑒔𑒰𑒩𑓂𑒨 𑒏𑒯𑒪 𑒮𑒰𑒩𑒟𑒲𑒣𑒳𑒞𑓂𑒩 𑒕𑒲 𑒁𑒯𑒰𑒿, 𑒩𑒰𑒖𑒏𑒳𑒧𑒰𑒩𑒮𑒿 𑒠𑓂𑒫𑓀𑒠𑒏 𑒁𑒡𑒱𑒏𑒰𑒩𑒲 𑒏𑒯𑒰𑒿?
𑒠𑓂𑒫𑓀𑒠𑒞𑒰 𑒢𑒯𑒱 𑒁𑒯𑒰𑒿𑒮𑒿 𑒤𑒹𑒩 𑒥𑒰𑒞 𑒠𑓂𑒫𑓀𑒠𑒏, 𑒠𑓂𑒫𑓀𑒠-𑒨𑒳𑒠𑓂𑒡𑒏 𑒑𑒣 𑒂𑒋𑒪 𑒍𑒢𑒰-𑒏𑒼𑒢𑒰?
𑒯𑒰 ! 𑒯𑒰! 𑒯𑒰! 𑒔𑒱𑒞𑓂𑒏𑒰𑒩 𑒯𑒵𑒠𑒨𑒏,
𑒏𑒩𑓂𑒝𑒏 𑒯𑒵𑒠𑒨𑒏 𑒔𑒱𑒞𑓂𑒏𑒰𑒩 𑒠𑒳𑒩𑓂𑒨𑒼𑒡𑒢𑒹𑒙𑒰 𑒮𑒳𑒢𑒪𑒏।
𑒄 𑒮𑒳𑒢𑒱 𑒠𑒳𑒩𑓂𑒨𑒼𑒡𑒢 𑒏𑒹𑒪𑒏 𑒄 𑒒𑒼𑒭𑒝𑒰, 𑒥𑒰𑒞 𑒄 𑒁𑒕𑒱 𑒞𑒿 𑒮𑒦 𑒮𑒳𑒢𑒻𑒞 𑒖𑒰𑒆, 𑒁𑓀𑒑-𑒠𑒹𑒬𑒏 𑒢𑒵𑒣 𑒏𑒩𑓂𑒝𑒏𑒹𑒿 𑒥𑒢𑒥𑒻𑒞 𑒕𑒲, 𑒨𑒼𑒠𑓂𑒡𑒰𑒏 𑒣𑒩𑒲𑒏𑓂𑒭𑒝 𑒏𑒩𑒻𑒞 𑒁𑒕𑒱 𑒥𑒰𑒯𑒳,
𑒄 𑒥𑒰𑒯𑒳 ! 𑒣𑒏𑒛𑓃𑒱 𑒏𑒩𑓂𑒝𑒏 𑒥𑒰𑒯𑒳 𑒏𑒯𑒪𑒏 ।
𑒁𑓀𑒑 𑒠𑒹𑒬𑒏 𑒢𑒵𑒣 𑒏𑒩𑓂𑒝𑒏𑒹𑒿 𑒥𑒢𑒥𑒻𑒞 𑒕𑒲।
𑒏𑒯𑒱 𑒄 𑒁𑒦𑒱𑒭𑒹𑒏 𑒏𑒋𑒪 𑒮𑒦𑒰𑒑𑒰𑒩𑒹𑒧𑒹,
𑒁𑓀𑒏𑒧𑒹 𑒪𑒹𑒪 𑒏𑒩𑓂𑒝 𑒦𑒹𑒪 𑒏𑒵𑒞𑒖𑓂𑒘 𑒍𑒏𑒩।
𑒅𑒚𑒱 𑒁𑒩𑓂𑒖𑒳𑒢 𑒞𑒐𑒢 𑒄 𑒥𑒰𑒞 𑒥𑒰𑒖𑒪, 𑒯𑒹 𑒏𑒩𑓂𑒝 𑒁𑒯𑒰𑒿 𑒖𑒹 𑒏𑓂𑒨𑒼 𑒕𑒲, 𑒮𑒳𑒢𑒴 𑒄, 𑒯𑒧 𑒠𑓂𑒩𑒼𑒝 𑒬𑒱𑒭𑓂𑒨 𑒁𑒩𑓂𑒖𑒳𑒢 𑒄 𑒏𑒯𑒋 𑒕𑒲, 𑒥𑒳𑒗𑒴 𑒢𑒯𑒱 𑒖𑒹 𑒄 𑒫𑒲𑒩𑒞𑒰𑒏 𑒫𑒩𑒠𑒰𑒢 𑒙𑒰, 𑒢𑒯𑒱 𑒦𑒹𑒙𑒪 𑒁𑒕𑒱 𑒮𑒹 𑒁𑒯𑒲𑒿𑒏 𑒮𑒦𑒙𑒰।
𑒑𑒳𑒩𑒳 𑒢𑒯𑒱 𑒮𑒱𑒐𑒍𑒪𑒢𑓂𑒯𑒱 𑒯𑒰𑒩𑒱 𑒧𑒰𑒢𑒥,
𑒣𑓂𑒩𑒞𑒱𑒠𑓂𑒫𑓀𑒠𑒲𑒮𑒿 𑒠𑓂𑒫𑓀𑒠 𑒏𑒩𑒥 𑒖𑒐𑒢 𑒔𑒰𑒯𑒥।
𑒏𑒩𑒞𑒪 𑒡𑓂𑒫𑒢𑒱𑒮𑒿 𑒮𑒦𑒰𑒑𑒰𑒩 𑒦𑒹𑒪 𑒤𑒹𑒩 𑒑𑒳𑓀𑒖𑒱𑒞, 𑒦𑒲𑒭𑓂𑒧 𑒅𑒚𑒱 𑒏𑒋𑒪 𑒮𑓀𑒡𑓂𑒨𑒰𑒏 𑒂𑒑𑒧𑒢 𑒮𑒴𑒔𑒱𑒞।
𑒁𑒩𑓂𑒖𑒳𑒢𑒏 𑒑𑒩𑓂𑒫𑒼𑒏𑓂𑒞𑒱 𑒮𑒳𑒢𑒱 𑒏𑒩𑓂𑒝𑒏 𑒯𑒵𑒠𑒨 𑒕𑒪, 𑒧𑒼𑒢 𑒧𑒮𑒼𑒮𑒱 𑒢𑒵𑒣 𑒁𑓀𑒑𑒏 𑒑𑒰𑒧𑒣𑒩 𑒣𑒯𑒳𑒿𑒔𑒪।
𑒬𑒱𑒭𑓂𑒙𑒞𑒰𑒏 𑒯𑒹𑒞𑒳 𑒣𑒰𑒝𑓂𑒛𑒫 𑒦𑒹𑒪𑒰𑒯 𑒣𑓂𑒩𑒬𑓀𑒮𑒱𑒞। 𑒦𑒹𑒪 𑒋𑒯𑒱𑒮𑒿 𑒠𑒳𑒩𑓂𑒨𑒼𑒡𑒢𑒏 𑒧𑒼𑒢 𑒬𑓀𑒏𑒱𑒞। 𑒬𑒏𑒳𑒢𑒱 𑒠𑒳𑓁𑒬𑒰𑒮𑒢 𑒕𑒪 𑒍𑒏𑒩 𑒦𑒏𑓂𑒞, 𑒏𑒩𑓂𑒝𑒮𑒿 𑒦𑒹𑒿𑒙 𑒅𑒞𑓂𑒞𑒩 𑒍 𑒦𑒹𑒪 𑒂𑒬𑓂𑒫𑒮𑓂𑒞, 𑒡𑒵𑒞𑒩𑒰𑒭𑓂𑒙𑓂𑒩𑒏𑒹𑒿 𑒮𑒦𑒏 𑒏𑒢𑒤𑒳𑒮𑒏𑒲𑒮𑒿 𑒏𑒋 𑒞𑓂𑒩𑒮𑓂𑒞।
𑒣𑒱𑒞𑒰 𑒕𑒪𑒯𑒳𑒿 𑒁𑒯𑒰𑒿 𑒮𑒱𑓀𑒯𑒰𑒮𑒢𑒏 𑒁𑒡𑒱𑒏𑒰𑒩𑒲, 𑒖𑒢𑓂𑒧-𑒁𑓀𑒡𑒞𑒰𑒏 𑒩𑒼𑒏𑒪 𑒩𑒰𑒖𑒮𑒿 𑒁𑒯𑒰𑒿𑒏𑒹𑒿, 𑒯𑒧𑒩𑒰 𑒞𑒿 𑒢𑒯𑒱 𑒁𑒕𑒱 𑒋𑒯𑒢 𑒪𑒰𑒔𑒰𑒩𑒲।
𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒮𑒦 𑒧𑒰𑒢𑒨 𑒪𑒰𑒑𑒪, 𑒮𑒱𑓀𑒯𑒰𑒮𑒢𑒏 𑒁𑒡𑒱𑒏𑒰𑒩𑒲 𑒏𑒱𑒋𑒏 ? 𑒁𑒯𑒿𑒏 𑒮𑒹𑒯𑓀𑒞𑒰 𑒏𑒲 𑒦𑒋 𑒣𑒰𑒋𑒪, 𑒤𑒪𑒰𑒦𑒴𑒞 𑒏𑒼𑒢𑒰 𑒁𑒯𑒳𑒢𑒰 𑒄𑒋𑒯।
𑒨𑒳𑒡𑒱𑒭𑓂𑒚𑒱𑒩 𑒖𑓂𑒨𑒹𑒭𑓂𑒚 𑒯𑒧𑒩𑒰𑒮𑒿 𑒁𑒕𑒱, 𑒣𑒩𑓀𑒞𑒳 𑒁𑒕𑒱 𑒁𑒯𑒰𑒿𑒏 𑒁𑒢𑒳𑒖𑒏 𑒣𑒳𑒞𑓂𑒩 𑒮𑒋𑒯।
𑒏𑒋𑒪 𑒂𑒑𑓂𑒩𑒯 𑒖𑒋𑒥𑒰𑒏 𑒧𑒹𑒪𑒰 𑒫𑒰𑒩𑒝𑒰𑒫𑒞𑒏,
𑒣𑒰𑒝𑓂𑒛𑒫𑒮𑒿𑒏 𑒏𑒩𑒴। 𑒞𑒰 𑒮𑒳𑒡𑒰𑒩𑒥 𑒫𑓂𑒨𑒫𑒮𑓂𑒟𑒰 𑒮𑒦, 𑒏𑒪𑓂𑒨𑒰𑒝𑒏𑒰𑒩𑒲 𑒏𑒰𑒩𑓂𑒨 𑒮𑒦𑒮𑒿, 𑒥𑒱𑒮𑒩𑒱 𑒖𑒋𑒞 𑒣𑒳𑒞𑓂𑒩 𑒏𑒳𑓀𑒞𑒲𑒏, 𑒖𑒢 𑒮𑒏𑒪 𑒯𑒮𑓂𑒞𑒱𑒢𑒰𑒣𑒳𑒩𑒏।
𑒡𑒵𑒞𑒩𑒰𑒭𑓂𑒙𑓂𑒩 𑒧𑒰𑒢𑒪 𑒮𑒦𑒙𑒰 𑒥𑒰𑒞, 𑒂𑒠𑒹𑒬 𑒠𑒹𑒪 𑒫𑒰𑒩𑒝𑒰𑒫𑒞 𑒖𑒰𑒟𑒳, 𑒏𑒳𑓀𑒞𑒱 𑒠𑒹𑒐𑒱 𑒧𑒹𑒪𑒰-𑒚𑒹𑒪𑒰 𑒂𑒅।
𑒫𑒱𑒠𑒳𑒩 𑒦𑒹𑒪 𑒮𑒰𑒏𑓀𑒏𑓂𑒭 𑒦𑒹𑒠 𑒄 𑒏𑒲, 𑒮𑒔𑒩 𑒩𑒯𑒥 𑒨𑒳𑒡𑒱𑒭𑓂𑒚𑒱𑒩, 𑒏𑒯𑒪 𑒄।
𑒫𑒱𑒠𑒳𑒩𑒏 𑒢𑒲𑒞𑒱 𑒏𑒋𑒪 𑒮𑒰𑒏𑓀𑒏𑓂𑒭, 𑒠𑒳𑒩𑓂𑒨𑒼𑒡𑒢𑒏 𑒏𑒰𑒙𑒪 𑒮𑒠𑒱 𑒣𑓂𑒩𑒣𑓀𑒔।
𑒧𑓀𑒞𑓂𑒩𑒲 𑒣𑒳𑒩𑒼𑒔𑒢𑒮𑒿 𑒧𑒱𑒪𑒱 𑒠𑒳𑒩𑓂𑒨𑒼𑒡𑒢, 𑒪𑒰𑒐𑒏 𑒧𑒯𑒪 𑒥𑒢𑒥𑒍𑒢𑒹 𑒕𑒪, 𑒫𑒱𑒠𑒳𑒩 𑒪𑒑𑒹𑒪𑒢𑓂𑒯𑒱 𑒋𑒏𑒩 𑒣𑒞𑒰, 𑒮𑓀𑒫𑒰𑒠 𑒮𑒹𑒯𑒼 𑒣𑒚𑒍𑒢𑒹 𑒕𑒪।
𑒫𑒰𑒯𑒏 𑒮𑓀𑒠𑒹𑒬𑒏 𑒕𑒪 𑒏𑒰𑒩𑒲𑒑𑒩, 𑒢𑒱𑒩𑓂𑒧𑒰𑒝 𑒮𑒳𑒩𑒿𑒑𑒏 𑒏𑒋𑒪। 𑒪𑒰𑒐𑒏 𑒧𑒯𑒪𑒏 𑒦𑒲𑒞𑒩 𑒕𑒪, 𑒢𑒱𑒩𑓂𑒧𑒰𑒝 𑒮𑒹 𑒏𑓂𑒭𑒝𑒯𑒱𑒧𑒹 𑒦𑒋𑒪।
𑒣𑒰𑒝𑓂𑒛𑒫𑒏𑒹𑒿 𑒢𑒱𑒩𑓂𑒠𑒹𑒬 𑒦𑒹𑒪 𑒕𑒪, 𑒐𑒼𑒯 𑒮𑒳𑒩𑒿𑒑𑒯𑒱𑒧𑒹 𑒮𑒴𑒞𑒃 𑒖𑒰𑒅,
𑒂𑒑𑒱𑒏 𑒣𑒴𑒩𑓂𑒝 𑒬𑓀𑒏𑒰 𑒮𑒹 𑒕𑒪, 𑒪𑒑𑒱𑒞𑒹 𑒦𑒲𑒞𑒩𑒮𑒿 𑒥𑒰𑒯𑒩 𑒁𑒥𑒻 𑒖𑒰𑒅।
𑒏𑒵𑒭𑓂𑒝 𑒔𑒞𑒳𑒩𑓂𑒠𑒬𑒲𑒏 𑒕𑒪 𑒍 𑒠𑒱𑒢, 𑒣𑒳𑒩𑒼𑒔𑒢 𑒦𑒹𑒪 𑒮𑒹 𑒁𑒞𑒱𑒬𑒨 𑒔𑓀𑒔𑒪,
𑒂𑒑𑒱 𑒪𑒑𑒰𑒋𑒞 𑒂𑒃 𑒍 𑒕𑒪 𑒮𑒿, 𑒨𑒳𑒡𑒱𑒭𑓂𑒚𑒱𑒩 𑒕𑒪 𑒄 𑒮𑒦 𑒥𑒴𑒗𑒱 𑒩𑒯𑒪।
𑒏𑒋 𑒮𑒔𑒹𑒞 𑒁𑒣𑒢 𑒧𑒰𑒞𑒰-𑒦𑓂𑒩𑒰𑒞𑒰𑒏𑒹𑒿, 𑒨𑒖𑓂𑒘 𑒏𑒋𑒪𑒢𑓂𑒯𑒱 𑒍𑒯𑒱 𑒠𑒱𑒢 𑒮𑒹,
𑒦𑒰𑒞-𑒦𑒼𑒖 𑒠𑒹𑒪𑒢𑓂𑒯𑒱 𑒢𑒑𑒩𑒫𑒰𑒮𑒲𑒏𑒹𑒿, 𑒣𑓀𑒔𑒣𑒳𑒞𑓂𑒩 𑒕𑒪𑒱 𑒦𑒲𑒪𑒢𑒲 𑒮𑒹𑒯𑒼 𑒋𑒏।
𑒂𑒯 𑒥𑒹𑒔𑒰𑒩𑒲 ! 𑒏𑒰𑒪𑒏 𑒧𑒰𑒩𑒪 𑒫𑒰 𑒧𑒰𑒩𑒪,
𑒠𑒴 𑒑𑒼𑒙 𑒠𑓂𑒫𑒢𑓂𑒠𑒞𑒰𑒧𑒹 𑒞𑒹𑒮𑒩?
𑒏𑒰𑒪𑒏 𑒮𑒼𑒗𑒰𑒿 𑒏𑒏𑒩 𑒔𑒪𑒪 𑒖𑒹, 𑒮𑒴𑒞𑒪𑒱 𑒩𑒰𑒞𑒱 𑒍𑒞𑒯𑒱 𑒮𑒦 𑒞𑒹𑒿।
𑒣𑒳𑒩𑒼𑒔𑒢 𑒮𑒹𑒯𑒼 𑒮𑒳𑒞𑒪 𑒍𑒞𑒯𑒱, 𑒥𑒰𑒯𑒩 𑒠𑒱𑒬 𑒕𑒪 𑒏𑒼𑒚𑒪𑒲 𑒋𑒏, 𑒂𑒑𑒱 𑒪𑒑𑒰𑒍𑒪 𑒦𑒲𑒧 𑒞𑒐𑒢, 𑒥𑒲𑒔 𑒩𑒰𑒞𑒱𑒧𑒹 𑒧𑒾𑒏𑒰 𑒏𑒹𑒿 𑒠𑒹𑒐𑒱।
𑒪𑒰𑒏𑓂𑒭𑒰𑒑𑒵𑒯 𑒕𑒪 𑒥𑒢 𑒮𑒹 𑒍𑒞𑒋, 𑒁𑒑𑓂𑒢𑒱 𑒠𑒹𑒫𑒞𑒰 𑒁𑒯𑒱 𑒏𑒹𑒩 𑒪𑒹𑒪।
𑒒𑒩𑒏 𑒮𑒳𑒛𑓂𑒛𑒰𑒯 𑒯𑒼𑒃𑒧𑒹 𑒪𑒰𑒑𑒞, 𑒮𑒹 𑒋𑒏𑒯𑒳 𑒏𑓂𑒭𑒝 𑒏𑒱𑒋𑒏?
𑒢𑒯𑒱 𑒥𑒱𑒪𑒧𑒱 𑒧𑒰𑒞𑒰- 𑒦𑓂𑒩𑒰𑒞𑒰, 𑒣𑓂𑒩𑒝𑒰𑒧𑒁𑒑𑓂𑒢𑒱𑒠𑒹𑒫𑒏𑒹𑒿𑒏𑒋।
𑒢𑒱𑒏𑒪𑒱 𑒏𑒳𑓀𑒞𑒱 𑒏𑒰𑒪𑒏 𑒑𑒰𑒪𑒮𑒿, 𑒥𑒔𑒪𑒱 𑒠𑒳𑒩𑓂𑒨𑒼𑒡𑒢𑒏 𑒏𑒳𑒔𑒰𑒪𑒱𑒮𑒿।
𑒣𑒳𑒩𑒼𑒔𑒢 𑒁𑒑𑓂𑒢𑒱 𑒧𑒡𑓂𑒨 𑒮𑒹 𑒅𑒔𑒱𑒞𑒹 𑒦𑒹𑒪, 𑒏𑒱𑒢𑓂𑒞𑒳 𑒦𑒲𑒪𑒢𑒱 𑒖𑒩𑒪𑒱 𑒥𑒹𑒔𑒰𑒩𑒲,
𑒣𑒳𑒞𑓂𑒩 𑒮𑒯𑒱𑒞 𑒮𑒹 𑒮𑒴𑒞𑒪, 𑒏𑒏𑒩𑒼 𑒥𑒳𑒗𑒢𑒰 𑒕𑒪 𑒢𑒯𑒱 𑒑𑒹𑒪 𑒄 𑒕𑒪।
𑒢𑒑𑒩𑒫𑒰𑒮𑒲 𑒥𑒳𑒗𑒪𑒢𑓂𑒯𑒱 𑒖𑒹 𑒖𑒩𑒪𑒱, 𑒏𑒳𑓀𑒞𑒲 𑒣𑒰𑒿𑒔𑒼 𑒣𑒳𑒞𑓂𑒩 𑒮𑒦𑒯𑒱𑒏 𑒮𑓀𑒑𑒹।
𑒢𑒑𑒩 𑒬𑒼𑒏𑒮𑒿 𑒦𑒹𑒪 𑒬𑒼𑒏𑒰𑒏𑒳𑒪, 𑒐𑒥𑒩𑒱 𑒯𑒮𑓂𑒞𑒱𑒢𑒰𑒣𑒳𑒩 𑒖𑓂𑒨𑒼𑒿 𑒑𑒹𑒪𑒹𑒿।
𑒠𑒳𑒩𑓂𑒨𑒼𑒡𑒢 𑒕𑒪 𑒁𑒞𑒱 𑒣𑓂𑒩𑒮𑒢𑓂𑒢𑒰 𑒂, 𑒡𑒵𑒞𑒩𑒰𑒭𑓂𑒙𑓂𑒩 𑒣𑓂𑒩𑒮𑒢𑓂𑒢 𑒕𑒪 𑒧𑒼𑒢𑒹-𑒧𑒼𑒢𑒹।
𑒣𑒩𑓀𑒞𑒳 𑒫𑒱𑒠𑒳𑒩 𑒮𑒦𑒮𑒿 𑒥𑒹𑒬𑒲 𑒣𑓂𑒩𑒮𑒢𑓂𑒢, 𑒏𑒱𑒋𑒏 𑒞𑒿 𑒮𑒞𑓂𑒨 𑒥𑒴𑒗𑒱 𑒕𑒪 𑒑𑒹𑒪𑒹।
𑒮𑒹 𑒍 𑒏𑒯𑒪 𑒦𑒲𑒭𑓂𑒧𑒏𑒹𑒿 𑒮𑒦𑒙𑒰, 𑒥𑒰𑒞 𑒩𑒯𑒮𑓂𑒨𑒏 𑒖𑒰 𑒏𑒋 𑒍𑒞𑒋।
𑒦𑒲𑒭𑓂𑒧𑒏 𑒔𑒱𑓀𑒞𑒰 𑒠𑒴𑒩 𑒏𑒋𑒪𑒢𑓂𑒯𑒱,
𑒄 𑒮𑒦 𑒑𑒣 𑒖𑒰𑒨 𑒥𑒳𑒗𑒰 𑒏𑒋 ।
𑒁𑒏𑒰𑒥𑒼𑒢 𑒣𑒯𑒳𑒿𑒔𑒻𑒞 𑒑𑒹𑒪𑒰𑒯 𑒑𑒋, 𑒣𑒰𑒝𑓂𑒛𑒫-𑒖𑒢 𑒏𑒭𑓂𑒙 𑒅𑒚𑒰 𑒏𑒋। 𑒢𑒰𑒫𑒱𑒏 𑒢𑒰𑒫𑒏 𑒮𑓀𑒑 𑒣𑓂𑒩𑒞𑒲𑒏𑓂𑒭𑒰, 𑒏𑒩𑒱 𑒕𑒪 𑒩𑒯𑒨 𑒫𑒱𑒏𑒪 𑒦𑒋।
𑒏𑒯𑒪𑒢𑓂𑒯𑒱 𑒫𑒱𑒠𑒳𑒩 𑒣𑒚𑒹𑒪𑒢𑓂𑒯𑒱 𑒯𑒧𑒩𑒰, 𑒂𑒖𑓂𑒘𑒰 𑒠𑒲 𑒑𑓀𑒑𑒞𑒙 𑒮𑒹𑒫𑒰 𑒏𑒩𑒥𑒰𑒏।
𑒑𑓀𑒑𑒰 𑒣𑒰𑒩 𑒦𑒹𑒪𑒟𑒱 𑒣𑒰𑒝𑓂𑒛𑒫 𑒖𑒢, 𑒣𑒰𑒕𑒴 𑒕𑒴𑒙𑒪 𑒏𑒞𑒹𑒏 𑒦𑒦𑒙𑒣𑒢।
𑒡𑒵𑒞𑓂𑒩𑒰𑒭𑓂𑒙𑓂𑒩𑒏,𑒠𑒳𑒩𑓂𑒨𑒼𑒡𑒢 𑒂 𑒬𑒏𑒳𑒢𑒲𑒏, 𑒂 𑒠𑒳𑓁𑒬𑒰𑒮𑒢 𑒏𑒩𑓂𑒝 𑒮𑒥𑒯𑒲𑒏। 𑒮𑓀𑒑 𑒧𑒳𑒠𑒰 𑒪𑒰𑒑𑒪 𑒣𑓂𑒩𑒞𑒱𑒬𑒼𑒡, 𑒯𑒮𑓂𑒞𑒱𑒢𑒰𑒣𑒳𑒩𑒏 𑒕𑒪 𑒄 𑒠𑒳𑒩𑓂𑒨𑒼𑒑।
𑒢𑒯𑒱 𑒖𑒰𑒢𑒱 𑒖𑒋𑒞 𑒏𑒄 𑒣𑒟 𑒄, 𑒣𑒟 𑒢 𑒖𑒞𑒋 𑒕𑒪 𑒍𑒯𑒱 𑒫𑒢𑒧𑒹, 𑒛𑒹𑒑 𑒠𑒏𑓂𑒭𑒱𑒝 𑒠𑒱𑒬𑒰 𑒠𑒱𑒬 𑒠𑒲, 𑒑𑓀𑒞𑒫𑓂𑒨𑒏 𑒕𑒪 𑒢𑒯𑒱 𑒖𑓂𑒘𑒰𑒢 𑒏𑒼𑒢𑒼 𑒖𑒹 !
𑒠𑒻𑒞 𑒛𑒹𑒑 𑒥𑒜𑓃𑒻𑒞 𑒂𑒑𑒴, 𑒦𑒴𑒐𑒪-𑒣𑒱𑒨𑒰𑒮𑒪 𑒟𑒰𑒏𑒪 𑒚𑒹𑒯𑒱𑒂𑒨𑒪, 𑒂𑒯 𑒠𑒳𑒩𑓂𑒠𑒬𑒰 𑒠𑒹𑒐𑒴 !
𑒏𑒳𑓀𑒞𑒲𑒏 𑒄 𑒠𑒬𑒰 𑒠𑒹𑒐𑒱, 𑒦𑒲𑒧𑒮𑒿 𑒢𑒯𑒱 𑒕𑒪 𑒑𑒹𑒪 𑒩𑒯𑒪, 𑒫𑒙-𑒫𑒵𑒏𑓂𑒭𑒏 𑒢𑒲𑒔𑒰𑒿 𑒥𑒻𑒮𑒰 𑒏𑒋, 𑒔𑒜𑒪 𑒠𑒹𑒐𑒪 𑒮𑒖𑒑 𑒦𑓄।
𑒣𑒏𑓂𑒭𑒲 𑒏𑒱𑒕𑒳 𑒠𑒴𑒩 𑒕𑒪 𑒍𑒞𑒋, 𑒦𑒲𑒧 𑒖𑒰𑒋 𑒣𑒯𑒳𑒿𑒔𑒪 𑒖𑒪𑒰𑒬𑒨, 𑒣𑒰𑒢𑒱 𑒣𑒲𑒥 𑒂𑒢𑒱 𑒣𑒱𑒨𑒰𑒍𑒪, 𑒮𑒳𑒞𑒪 𑒮𑒦 𑒏𑒳𑒧𑓂𑒯𑒪𑒰𑒨 𑒍𑒞𑒋।
𑒦𑒲𑒧𑒏𑒹𑒿 𑒢𑒯𑒱 𑒑𑒹𑒪 𑒠𑒹𑒐𑒪, 𑒏𑒩𑒟𑒱 𑒏𑒲 𑒯𑒴𑒮𑒱 𑒧𑒼𑒢 𑒯𑒼𑒁𑒨, 𑒣𑒼𑒐𑒩𑒱𑒏 𑒑𑒰𑒕𑒏 𑒆𑒣𑒩 𑒕𑒪 𑒩𑒰𑒏𑓂𑒭𑒮 𑒢𑒰𑒧 𑒯𑒱𑒛𑒱𑓀𑒥 𑒖𑒹𑒏𑒩।
𑒯𑒱𑒛𑒱𑓀𑒥𑒰 𑒥𑒯𑒱𑒢𑒏 𑒮𑓀𑒑 𑒕𑒪, 𑒞𑒰𑒏𑒱 𑒩𑒯𑒪 𑒁𑒣𑒢 𑒦𑒼𑒖𑒢। 𑒧𑒢𑒳𑒏𑓂𑒐-𑒑𑓀𑒡 𑒮𑒴𑓀𑒒𑒱 𑒏𑒋, 𑒔𑒪𑒪 𑒢𑒩-𑒧𑒰𑓀𑒮 𑒞𑒰𑒏𑒱𑒧𑒹 𑒍, 𑒯𑒱𑒛𑒱𑓀𑒥𑒹 𑒖𑒼 𑒧𑒾𑒮-𑒧𑒢𑒳𑒏𑓂𑒐𑒏, 𑒂𑒢 𑒖𑒪𑓂𑒠𑒲 𑒍𑒞𑒋 𑒖𑒰𑒏𑒋। 𑒠𑒹𑒐𑒱 𑒏𑒳𑓀𑒞𑒲-𑒣𑒳𑒞𑓂𑒩 𑒮𑓀𑒑 𑒮𑒴𑒞𑒪, 𑒠𑒳𑓁𑒐𑒱𑒞 𑒯𑒱𑒛𑒱𑓀𑒥𑒰 𑒕𑒪 𑒞𑒰𑒏𑒻𑒞, 𑒦𑒲𑒧𑒏 𑒯𑒵𑒭𑓂𑒙-𑒣𑒳𑒭𑓂𑒙 𑒬𑒩𑒲𑒩 𑒠𑒹𑒐𑒱, 𑒚𑒰𑒜 𑒢𑒹𑒞𑓂𑒩𑒹 𑒩𑒯𑒪𑒱 𑒞𑒰𑒏𑒋।
𑒡𑒩𑒱 𑒡𑒰𑒩𑒝 𑒩𑒴𑒣 𑒮𑒳𑒢𑓂𑒠𑒩𑒲𑒏, 𑒏𑒯𑒪 𑒦𑒲𑒧 𑒖𑒰𑒆 𑒅𑒚𑒰𑒆, 𑒁𑒣𑒢 𑒧𑒰𑒞𑒰 𑒥𑒢𑓂𑒡𑒳𑒏𑒹𑒿, 𑒠𑒴𑒩 𑒮𑒳𑒩𑒏𑓂𑒭𑒱𑒞 𑒯𑒱𑒢𑒏𑒰 𑒣𑒯𑒳𑒿𑒔𑒰𑒋𑒥।
𑒧𑒼𑒯𑒱𑒞 𑒕𑒲 𑒯𑒧 𑒁𑒯𑒰𑒿 𑒣𑒩, 𑒔𑒰𑒯 𑒯𑒧𑒩𑒰 𑒁𑒕𑒱 𑒫𑒱𑒫𑒰𑒯𑒏,
𑒧𑒰𑒨𑒰𑒮𑒿 𑒯𑒧 𑒥𑒔𑒰𑒋𑒥, 𑒥𑒪𑒫𑒰𑒢 𑒏𑓂𑒩𑒴𑒩 𑒯𑒱𑒛𑒱𑒧𑓂𑒥𑒏 𑒧𑒰𑒩𑒱𑒏।
𑒦𑒲𑒧 𑒏𑒯𑒪 𑒯𑒧 𑒏𑒱𑒋 𑒅𑒚𑒰𑒋𑒥, 𑒥𑓀𑒡𑒳 𑒏𑒹𑒿 𑒮𑒳𑒞𑒪 𑒁𑒣𑒢, 𑒥𑒪𑒫𑒰𑒢 𑒁𑒕𑒱 𑒯𑒱𑒛𑒱𑓀𑒥 𑒋𑒯𑒢, 𑒥𑒪 𑒠𑒹𑒐𑒋 𑒯𑒧𑒩𑒼 𑒞𑒐𑒢।
𑒯𑒱𑒛𑒱𑒧𑓂𑒥 𑒣𑒯𑒳𑒿𑒔𑒪 𑒍𑒞𑒋, 𑒯𑒱𑒛𑒱𑒧𑓂𑒥𑒰 𑒕𑒪𑒱 𑒮𑒳𑒢𑓂𑒠𑒩𑒲𑒏 𑒩𑒴𑒣 𑒥𑒢𑒍𑒢𑒹, 𑒦𑒲𑒧𑒮𑒿 𑒏𑒩𑒱 𑒩𑒯𑒪𑒱 𑒕𑒪𑒱 𑒑𑒣, 𑒏𑓂𑒩𑒼𑒡𑒮𑒿 𑒏𑓂𑒩𑒼𑒡𑒱𑒞 𑒯𑒱𑒛𑒱𑒧𑓂𑒥𑒏𑒹𑒿 𑒏𑒋𑒢𑒹।
𑒍 𑒠𑒾𑒛𑓃𑒪 𑒯𑒱𑒛𑒱𑒧𑓂𑒥𑒰 𑒣𑒩 𑒧𑒰𑒩𑒏 𑒯𑒹𑒞𑒳, 𑒦𑒲𑒧 𑒣𑒏𑒛𑓃𑒪 𑒥𑒱𑒔𑓂𑒔𑒯𑒱𑒧𑒹, 𑒧𑒪𑓂𑒪𑒨𑒳𑒠𑓂𑒡 𑒣𑒮𑒩𑒪 𑒍𑒞𑒋 𑒮𑒹, 𑒫𑒱𑒏𑒙 𑒠𑓂𑒫𑓀𑒠𑒏 𑒯𑒳𑒿𑒏𑒰𑒩 𑒕𑒪 𑒑𑒴𑒿𑒖𑒻𑒞।
𑒫𑒢𑓂𑒨𑒣𑓂𑒩𑒰𑒝𑒲 𑒦𑒰𑒑𑒋 𑒪𑒰𑒑𑒪 𑒂 𑒅𑒚𑒪𑒱 𑒏𑒳𑓀𑒞𑒲-𑒣𑒰𑓀𑒛𑒫 𑒍𑒞𑒋, 𑒣𑒯𑒳𑒿𑒔𑒻𑒞 𑒑𑒹𑒪 𑒠𑒾𑒑𑒻𑒞 𑒍𑒞𑒋, 𑒩𑒝𑒦𑒴𑒧𑒱 𑒮𑒰𑒖𑒪 𑒕𑒪 𑒖𑒞𑒋। 𑒧𑒰𑒩𑒱 𑒠𑒹𑒪𑒏 𑒦𑒲𑒧 𑒞𑒰𑒫𑒞, 𑒦𑒹𑒪 𑒯𑒱𑒛𑒱𑒧𑓂𑒥 𑒬𑒫𑒩𑒴𑒣 𑒨𑒰𑒫𑒞।
𑒦𑒲𑒧𑒏 𑒫𑒲𑒩𑒞𑒰𑒮𑒿 𑒯𑒱𑒛𑒱𑒧𑓂𑒥𑒰 𑒦𑒹𑒪𑒱 𑒕𑒪𑒱 𑒂𑒢𑓀𑒠𑒱𑒞, 𑒫𑒰𑒏𑒔𑒰𑒞𑒳𑒩𑓂𑒨𑒮𑒿 𑒏𑒋𑒢𑒹 𑒕𑒪𑒱 𑒏𑒳𑓀𑒞𑒱𑒏𑒹𑒿 𑒣𑓂𑒩𑒮𑒢𑓂𑒢 𑒏𑒱𑓀𑒔𑒱𑒞𑓂।
𑒨𑒳𑒡𑒱𑒭𑓂𑒚𑒱𑒩 𑒮𑒹𑒯𑒼 𑒠𑒹𑒪 𑒮𑓂𑒫𑒲𑒏𑒵𑒞𑒱 𑒧𑒰𑒞𑒰 𑒏𑒳𑓀𑒞𑒲𑒏 𑒫𑒱𑒔𑒰𑒩 𑒖𑒰𑒢𑒱, 𑒫𑒱𑒫𑒰𑒯 𑒏𑒩𑒱 𑒏𑒋 𑒩𑒯𑒋 𑒪𑒰𑒑𑒪, 𑒦𑒲𑒧 𑒯𑒱𑒛𑒱𑒧𑓂𑒥𑒰𑒏𑒹𑒿 𑒂𑒢𑒱। 𑒒𑒙𑒼𑒞𑓂𑒏𑒔 𑒅𑒞𑓂𑒣𑒢𑓂𑒢 𑒦𑒹𑒪, 𑒣𑒱𑒞𑒰 𑒞𑒳𑒪𑓂𑒨 𑒣𑒩𑒰𑒏𑓂𑒩𑒧 𑒖𑒏𑒩 𑒕𑒪।
𑒠𑒱𑒢 𑒥𑒲𑒞𑒪 𑒣𑒰𑒝𑓂𑒛𑒫 𑒫𑒢 𑒕𑒼𑒛𑓃𑒱 𑒏𑒋 𑒂𑒑𑒰𑒿 𑒖𑒰𑒋 𑒪𑒰𑒑𑒪, 𑒖𑒰𑒋𑒥 𑒯𑒱𑒧𑒰𑒪𑒨 𑒠𑒱𑒬𑒱 𑒣𑒳𑒞𑓂𑒩𑒏 𑒮𑓀𑒑 𑒄 𑒯𑒱𑒛𑒱𑒧𑓂𑒥𑒰 𑒥𑒰𑒖𑒪𑒱।
𑒒𑒙𑒼𑒞𑓂𑒏𑒔 𑒏𑒯𑒪 𑒣𑒱𑒞𑒳 𑒧𑒰𑒞𑒰𑒏 𑒯𑒧 𑒮𑒠𑒱𑒏𑒰𑒪 𑒮𑓀𑒑𑒹 𑒩𑒯𑒥, 𑒯𑒼𑒋𑒞 𑒏𑒼𑒢𑒼 𑒏𑒰𑒩𑓂𑒨 𑒁𑒯𑒰𑒿𑒏, 𑒥𑒖𑒰𑒥𑒋𑒧𑒹 𑒢𑒯𑒱 𑒮𑓀𑒏𑒼𑒔 𑒏𑒩𑒥।
𑒖𑒰𑒃𑒞 𑒏𑒰𑒪 𑒥𑓂𑒨𑒰𑒮 𑒦𑒹𑒙𑒪𑒰𑒯 𑒏𑒳𑓀𑒞𑒲 𑒏𑒰𑒢𑒪𑒱 𑒯𑒰𑒏𑓂𑒩𑒼𑒮 𑒦𑒋,
𑒦𑒰𑒩𑒞𑒏 𑒪𑒹𑒐𑒏 𑒂𑒋𑒪 𑒥𑒢𑒱 𑒏𑒰𑒫𑓂𑒨𑒏 𑒣𑒰𑒞𑓂𑒩 𑒦𑒋 !! 𑒥𑓂𑒨𑒰𑒮 𑒏𑒯𑒪 𑒢𑒯𑒱 𑒏𑒰𑒢𑒴 𑒠𑒱𑒢 𑒕𑒼𑒙 𑒣𑒻𑒒 𑒯𑒼𑒋𑒥𑒹 𑒏𑒩𑒨। 𑒠𑒳𑓁𑒐 𑒂𑒏𑒱 𑒮𑒳𑒐𑒧𑒹 𑒁𑒣𑒢𑒰 𑒣𑒩 𑒢𑒯𑒱 𑒕𑒼𑒛𑓃𑒋 𑒁𑒕𑒱 𑒢𑒱𑒨𑓀𑒞𑓂𑒩𑒝, 𑒡𑒩𑓂𑒧𑒣𑒟 𑒣𑒩 𑒖𑒹 𑒔𑒪𑒋,𑒞𑒏𑒩𑒹 𑒏𑒯𑒋 𑒕𑒲 𑒧𑒢𑒳𑒭𑓂𑒨 𑒞𑒐𑒢।
𑒑𑒩𑓂𑒫𑒱𑒞 𑒮𑒳𑒐𑒹 𑒢𑒯𑒱 𑒯𑒼𑒋, 𑒠𑒳𑓁𑒐𑒧𑒹 𑒡𑒻𑒩𑓂𑒨𑒏 𑒢 𑒁𑒫𑒪𑓀𑒥 𑒕𑒼𑒛𑓃𑒋, 𑒏𑒳𑓀𑒞𑒲 𑒂 𑒁𑒯𑒿𑒏 𑒣𑒳𑒞𑓂𑒩 𑒕𑒟𑒱, 𑒞𑒹𑒯𑒢 𑒖𑒹𑒯𑒢 𑒄 𑒧𑒢𑒳𑒭𑓂𑒨 𑒯𑒼𑒧𑒋।
𑒥𑓂𑒨𑒰𑒮 𑒏𑒰𑒫𑓂𑒨𑒏 𑒣𑒰𑒞𑓂𑒩𑒏𑒹𑒿 𑒠𑒹𑒐𑒰𑒋 𑒩𑒮𑓂𑒞𑒰 𑒮𑒼𑒗 𑒏𑒱𑒢𑓂𑒞𑒳,
𑒣𑒰𑒞𑓂𑒩𑒏 𑒔𑒩𑒱𑒞𑓂𑒩𑒧𑒹 𑒢𑒯𑒱 𑒁𑒛𑓃𑒰𑒍𑒪 𑒁𑒣𑒢 𑒂𑒏𑒰𑓀𑒏𑓂𑒭𑒰 𑒋𑒏𑒼 𑒩𑒞𑒱 ।
𑒡𑒢𑓂𑒨 𑒞𑒹𑒿 𑒍 𑒏𑒫𑒱 𑒂 𑒍𑒏𑒩 𑒏𑒵𑒞𑒱 !!
𑒣𑒰𑒝𑓂𑒛𑒫𑒖𑒢 𑒣𑒰𑒥𑒱 𑒄 𑒮𑓀𑒥𑒪, 𑒣𑒯𑒱𑒩𑒪 𑒧𑒵𑒑𑒔𑒩𑓂𑒧 𑒫𑒪𑓂𑒏𑒪, 𑒥𑓂𑒩𑒯𑓂𑒧𑒔𑒰𑒩𑒲 𑒏𑒹𑒩 𑒦𑒹𑒭 𑒥𑒢𑒰𑒍𑒪, 𑒋𑒏𑒔𑒏𑓂𑒩𑒲 𑒢𑒑𑒩 𑒣𑒯𑒳𑒿𑒔𑒪।
𑒩𑒯𑒪 𑒥𑒢𑒱 𑒁𑒞𑒱𑒟𑒱 𑒍𑒞𑒋, 𑒂𑒞𑒱𑒟𑓂𑒨 𑒥𑓂𑒩𑒰𑒯𑓂𑒧𑒝𑒏 𑒣𑒰𑒍𑒪, 𑒦𑒰𑒃 𑒮𑒦 𑒖𑒰𑒟𑒱 𑒂𑒢𑒟𑒱 𑒮𑒦 𑒩𑒰𑒐𑒟𑒱 𑒧𑒰𑒞𑒰𑒏 𑒮𑒧𑒏𑓂𑒭।
𑒏𑒳𑓀𑒞𑒲 𑒠𑒹𑒟𑒱 𑒂𑒡-𑒦𑒲𑒧𑒏𑒹𑒿 𑒂𑒡𑒧𑒹 𑒬𑒹𑒭 𑒮𑒦 𑒧𑒱𑒪𑒱 𑒐𑒰𑒟𑒱, 𑒦𑒲𑒧𑒏 𑒞𑒻𑒨𑒼 𑒦𑒴𑒐 𑒧𑒹𑒙𑒰𑒃𑒢𑓂𑒯𑒱 𑒢𑒯𑒱 𑒦𑒳𑒐𑒪𑒹 𑒍 𑒩𑒯𑒱 𑒖𑒰𑒟𑒱।
𑒦𑒳𑒐𑒪𑒹 𑒕𑒪𑒰𑒯 𑒦𑒲𑒧 𑒋𑒏 𑒠𑒱𑒢 𑒑𑒹𑒪𑒰𑒯 𑒢𑒯𑒱 𑒦𑒱𑒏𑓂𑒭𑒰𑒙𑒢𑒧𑒹, 𑒮𑒳𑒢𑒪 𑒒𑒼𑒩 𑒏𑒢𑓂𑒢𑒰𑒩𑒼𑒯𑒙 𑒒𑒩𑒧𑒹, 𑒣𑒴𑒕𑒪 𑒏𑒰𑒩𑒝 𑒖𑒰𑒢𑒪 𑒮𑒹।
𑒥𑒏𑒰𑒮𑒳𑒩 𑒩𑒰𑒏𑓂𑒭𑒮 𑒍𑒞𑒋 𑒕𑒪 𑒢𑒑𑒩 𑒥𑒰𑒯𑒩 𑒢𑒱𑒫𑒰𑒮 𑒖𑒏𑒩, 𑒩𑒰𑒖𑒰 𑒁𑒮𑒧𑒩𑓂𑒟 𑒕𑒪, 𑒩𑒰𑒏𑓂𑒭𑒮 𑒏𑒩𑒋 𑒁𑒞𑓂𑒨𑒰𑒔𑒰𑒩 𑒥𑒛𑓃-𑒥𑒛𑓃।
𑒕𑒪 𑒢𑒱𑒏𑒰𑒪𑒪 𑒮𑒧𑒰𑒡𑒰𑒢 𑒖𑒹 𑒮𑒦 𑒣𑒩𑒱𑒫𑒰𑒩𑒮𑒿 𑒣𑓂𑒩𑒞𑒱𑒠𑒱𑒢 𑒋𑒏, 𑒏𑒙𑒯𑒲 𑒑𑒰𑒛𑓃𑒲 𑒦𑒩𑒱 𑒁𑒢𑓂𑒢 𑒧𑒠𑒱𑒩𑒰 𑒧𑒾𑒮, 𑒖𑒰𑒟𑒱 𑒥𑒯𑒪𑒧𑒰𑒢।
𑒥𑒏 𑒐𑒰𑒃𑒞 𑒕𑒪 𑒮𑒦𑒙𑒰 𑒦𑒼𑒖𑒢 𑒮𑓀𑒑 𑒥𑒯𑒪𑒧𑒰𑒢𑒯𑒳𑒏𑒹𑒿 𑒮𑒹, 𑒏𑒢𑓂𑒢𑒰𑒩𑒼𑒯𑒙 𑒧𑒔𑒪 𑒕𑒪 𑒒𑒩 𑒥𑓂𑒩𑒰𑒯𑓂𑒧𑒝 𑒣𑒩𑒱𑒫𑒰𑒩𑒏 𑒧𑒡𑓂𑒨𑒹।
𑒣𑒰𑒩 𑒕𑒪 𑒣𑒩𑒱𑒫𑒰𑒩𑒏 𑒂𑒃 𑒮𑒦 𑒣𑒩𑒱𑒫𑒰𑒩 𑒠𑒳𑓁𑒐𑒱𑒞 𑒕𑒪,
𑒏𑒳𑓀𑒞𑒲 𑒏𑒯𑒪 𑒣𑒰𑒿𑒔 𑒣𑒳𑒞𑓂𑒩 𑒁𑒕𑒱, 𑒦𑒲𑒧𑒏 𑒥𑒪 𑒮𑒳𑒢𑒰𑒋𑒪। 𑒦𑒲𑒧𑒏 𑒥𑒪𑒏 𑒔𑒩𑓂𑒔 𑒮𑒳𑒢𑒱-𑒮𑒳𑒢𑒱 𑒏𑒋 𑒥𑓂𑒩𑒰𑒯𑓂𑒧𑒝 𑒧𑒰𑒢𑒪, 𑒏𑒵𑒞𑒖𑓂𑒘 𑒦𑒹𑒪 𑒦𑒲𑒧𑒏𑒹𑒿 𑒍 𑒑𑒰𑒛𑓃𑒲𑒏 𑒮𑓀𑒑 𑒐𑒼𑒯 𑒣𑒚𑒰𑒍𑒪।
𑒐𑒼𑒯 𑒩𑒰𑒏𑓂𑒭𑒮𑒏 𑒞𑒰𑒏𑒱 𑒦𑒲𑒧 𑒐𑒹𑒪𑒏, 𑒕𑒪 𑒍 𑒦𑒳𑒐𑒰𑒋𑒪, 𑒞𑒵𑒣𑓂𑒞 𑒮𑓂𑒫𑒨𑓀 𑒦𑒲𑒧 𑒕𑒪 𑒠𑒹𑒩𑒲 𑒮𑒿 𑒁𑒞𑒵𑒣𑓂𑒞 𑒥𑒏𑒰𑒮𑒳𑒩 𑒂𑒋𑒪।
𑒞𑒰𑒧𑒮𑒹 𑒂𑒏𑓂𑒩𑒧𑒝 𑒏𑒋𑒪𑒏 𑒏𑒱𑓀𑒞𑒳 𑒪𑒰𑒞-𑒧𑒳𑒏𑓂𑒏𑒰 𑒧𑒰𑒩𑒱 𑒏𑒋,
𑒦𑒲𑒧 𑒣𑓂𑒩𑒰𑒝 𑒪𑒹𑒪𑒏 𑒍𑒏𑒩𑒰 𑒐𑒲𑓀𑒔𑒱 𑒢𑒑𑒩 𑒠𑓂𑒫𑒰𑒩 𑒂𑒢𑒱 𑒏𑒋।
𑒦𑒹𑒪 𑒣𑓂𑒩𑒮𑒢𑓂𑒢 𑒮𑒦 𑒖𑒢 𑒧𑒢𑒍𑒪𑒏 𑒣𑒴𑒖𑒰-𑒣𑒩𑓂𑒫 𑒍𑒞𑒋, 𑒏𑒳𑓀𑒞𑒲 𑒔𑒪𑒪𑒲𑒯 𑒂𑒩 𑒏𑒱𑒕𑒳 𑒠𑒱𑒢 𑒍𑒯𑒱 𑒢𑒑𑒩 𑒩𑒯𑒱 𑒏𑒋।
𑒮𑒳𑒢𑒪 𑒣𑒰𑓀𑒔𑒰𑒪𑒏 𑒮𑓂𑒫𑒨𑓀𑒥𑒩𑒏, 𑒏𑒟𑒰 𑒣𑒰𑓀𑒔𑒰𑒪𑒲𑒏 𑒠𑓂𑒩𑒳𑒣𑒠𑒏,
𑒋𑒏𑒔𑒏𑓂𑒩𑒰 𑒢𑒑𑒩𑒲𑒮𑒿 𑒜𑒹𑒩𑒏-𑒜𑒹𑒩 𑒥𑓂𑒩𑒰𑒯𑓂𑒧𑒝 𑒣𑒯𑒳𑒿𑒔𑒻𑒞 𑒍𑒞𑒋।
𑒣𑒰𑒝𑓂𑒛𑒫𑒖𑒢 𑒪𑒋 𑒩𑒯𑒪 𑒂𑒖𑓂𑒘𑒰 𑒧𑒰𑒞𑒵 𑒏𑒳𑓀𑒞𑒲𑒮𑒿 𑒩𑒯𑒟𑒱,
𑒥𑓂𑒨𑒰𑒮 𑒣𑒯𑒳𑒿𑒔𑒱 𑒏𑒯𑒪 𑒖𑒰𑒅 𑒮𑓂𑒫𑒨𑓀𑒥𑒩 𑒍𑒞𑒋 𑒠𑒹𑒐𑒋 !
𑒧𑒰𑒩𑓂𑒑𑒧𑒹 𑒇𑒭𑒱 𑒡𑒾𑒧𑓂𑒨 𑒦𑒹𑒙𑒪𑒰𑒯 𑒕𑒪𑒰𑒯 𑒣𑓀𑒛𑒱𑒞 𑒖𑓂𑒘𑒰𑒢𑒲, 𑒥𑒜𑓃𑒪 𑒂𑒑𑒴 𑒞𑒐𑒢 𑒧𑒱𑒪𑒱 𑒮𑓀𑒏𑒪𑓂𑒣𑒱𑒞 𑒦𑓄 𑒮𑒦 𑒣𑓂𑒩𑒰𑒝𑒲।
𑒮𑒳𑒢𑒱 𑒏𑒟𑒰 𑒣𑓂𑒩𑒬𑓀𑒮𑒰 𑒨𑒖𑓂𑒘𑒮𑒿 𑒢𑒱𑒏𑒪𑒪𑒱 𑒨𑒰𑒖𑓂𑒘𑒮𑒹𑒢𑒲𑒏, 𑒧𑒞𑓂𑒮𑓂𑒨𑒦𑒹𑒠 𑒏𑒩𑒞𑒰𑒯 𑒖𑒹 𑒏𑓂𑒨𑒼 𑒠𑓂𑒩𑒾𑒣𑒠𑒲 𑒫𑒩𑒝 𑒏𑒩𑒞𑒲𑒯।
𑒮𑓂𑒫𑒨𑓀𑒥𑒩𑒏 𑒮𑓂𑒟𑒰𑒢𑒏 𑒩𑒮𑓂𑒞𑒰 𑒞𑒏𑒪𑒢𑓂𑒯𑒱 𑒣𑒰𑓀𑒔𑒰𑒪𑒧𑒹 𑒖𑒰 𑒏𑒋,
𑒏𑒳𑒧𑓂𑒦𑒏𑒰𑒩𑒏 𑒒𑒩 𑒛𑒹𑒩𑒰 𑒠𑒹𑒪𑒢𑓂𑒯𑒱 𑒫𑒱𑒔𑒰𑒩 𑒏𑒳𑓀𑒞𑒲𑒏 𑒧𑒰𑒢𑒱 𑒏𑒋।
𑒏𑒩𑓂𑒝 𑒂𑒋𑒪 𑒕𑒪 𑒠𑒳𑓁𑒬𑒰𑒮𑒢, 𑒠𑒳𑒩𑓂𑒨𑒼𑒡𑒢𑒏 𑒮𑓀𑒑 𑒮𑒖𑓂𑒖𑒱𑒞, 𑒠𑒹𑒬-𑒠𑒹𑒬𑒏 𑒩𑒰𑒖𑒰 𑒂𑒋𑒪 𑒕𑒪 𑒩𑓀𑒑𑒦𑒴𑒧𑒱 𑒫𑒲𑒩𑒮𑒿 𑒐𑒔𑒱𑒞।
𑒞𑒐𑒢 𑒂𑒨𑒪𑒱 𑒠𑓂𑒩𑒾𑒣𑒠𑒲 𑒦𑒰𑒃 𑒡𑒵𑒭𑓂𑒙𑒠𑓂𑒨𑒳𑒧𑓂𑒢𑒏 𑒮𑓀𑒑 𑒮𑒳𑒮𑒖𑓂𑒖𑒱𑒞, 𑒣𑒳𑒭𑓂𑒣𑒧𑒰𑒪 𑒪𑒹𑒢𑒹 𑒂𑒨𑒪𑒱 𑒏𑒹𑒪𑒢𑒱 𑒮𑒦𑒏 𑒢𑒖𑒩𑒱 𑒂𑒏𑒵𑒭𑓂𑒙।
𑒥𑒲𑒔 𑒮𑓂𑒫𑒨𑓀𑒥𑒩𑒏 𑒦𑒴𑒧𑒱𑒏 𑒆𑒣𑒩 𑒧𑒞𑓂𑒮𑓂𑒨 𑒋𑒏𑒙𑒰 𑒪𑒙𑒏𑒪, 𑒍𑒏𑒩 𑒢𑒲𑒔𑒰𑒿 𑒔𑒏𑓂𑒩 𑒋𑒏𑒙𑒰 𑒞𑒲𑒫𑓂𑒩 𑒑𑒞𑒱𑒨𑒹 𑒕𑒪 𑒒𑒴𑒧𑒱 𑒩𑒯𑒪।
𑒢𑒲𑒔𑒰𑒿 𑒣𑒰𑒢𑒱𑒧𑒹 𑒕𑒰𑒯 𑒠𑒹𑒐𑒱 𑒖𑒹 𑒔𑒏𑓂𑒩𑒧𑒡𑓂𑒨 𑒣𑒰𑒞𑒩 𑒦𑒳𑒩𑒏𑒲 𑒞𑒩, 𑒠𑒰𑒑𑒱 𑒮𑒏𑒞 𑒧𑒞𑓂𑒮𑓂𑒨 𑒂𑒿𑒐𑒱𑒏𑒹𑒿 𑒣𑒳𑒭𑓂𑒣𑒧𑒰𑒪 𑒣𑒛𑓃𑒞 𑒞𑒏𑒩𑒹 𑒑𑒩।
𑒮𑒦𑒙𑒰 𑒩𑒰𑒖𑒰 𑒯𑒰𑒩𑒱 𑒟𑒰𑒏𑒱 𑒏𑒋 𑒦𑒹𑒪 𑒫𑒱𑒐𑒱𑒢𑓂𑒢 𑒟𑒰𑒏𑒪 𑒕𑒪, 𑒏𑒩𑓂𑒝 𑒠𑒹𑒐𑒱 𑒖𑒢 𑒥𑒰𑒖𑒱 𑒅𑒚𑒪 𑒮𑒴𑒞 𑒣𑒳𑒞𑓂𑒩 𑒏𑒱𑒋 𑒂𑒋𑒪 𑒕𑒪?
𑒠𑓂𑒩𑒾𑒣𑒠𑒲 𑒥𑒰𑒖𑒪𑒱 𑒑𑒰𑒿𑒟𑒱𑒨𑒼 𑒠𑒹𑒞 𑒖𑓂𑒨𑒼𑒿 𑒏𑒩𑓂𑒝 𑒧𑒞𑓂𑒮𑓂𑒨-𑒪𑒼𑒔𑒢𑒏𑒹𑒿, 𑒢𑒯𑒱 𑒣𑒯𑒱𑒩𑒰𑒋𑒥 𑒫𑒩𑒧𑒰𑒪𑒰 𑒢𑒯𑒱 𑒏𑒩𑒥 𑒫𑒩𑒝 𑒍𑒏𑒩𑒰𑒏𑒹𑒿।
𑒫𑒱𑒫𑒬 𑒏𑒩𑓂𑒝𑒏𑒹𑒿 𑒥𑒻𑒮𑒪 𑒠𑒹𑒐𑒱 𑒇𑒭𑒱𑒫𑒹𑒬 𑒁𑒩𑓂𑒖𑒳𑒢 𑒂𑒋𑒪 𑒕𑒪, 𑒋𑒏𑒯𑒱 𑒬𑒩-𑒮𑓀𑒡𑒰𑒢𑒮𑒿 𑒥𑒹𑒡𑒪 𑒧𑒞𑓂𑒮𑓂𑒨 𑒮𑒳𑒨𑒬 𑒣𑒰𑒍𑒪 𑒕𑒪।
𑒥𑓂𑒩𑒰𑒯𑓂𑒧𑒝-𑒧𑓀𑒛𑒪𑒲 𑒏𑒋𑒢𑒹 𑒕𑒪 𑒥𑒳𑒗𑒱 𑒍𑒏𑒩𑒰 𑒥𑓂𑒩𑒰𑒯𑓂𑒧𑒝 𑒖𑒨-𑒖𑒨𑒏𑒰𑒩 𑒍𑒞𑒋, 𑒏𑓂𑒭𑒞𑓂𑒩𑒱𑒨 𑒩𑒰𑒖𑒰 𑒮𑒦 𑒏𑒋𑒪 𑒫𑒱𑒩𑒼𑒡, 𑒞𑒻𑒨𑒰𑒩 𑒁𑒩𑓂𑒖𑒳𑒢 𑒣𑒳𑒢𑒱 𑒮𑓀𑒡𑒰𑒢 𑒏𑒋।
𑒥𑒱𑒠𑓂𑒡 𑒧𑒞𑓂𑒮𑓂𑒨 𑒦𑒴 𑒐𑒮𑒪 𑒦𑒴𑒧𑒱 𑒥𑒪𑒩𑒰𑒧 𑒏𑒵𑒭𑓂𑒝 𑒂𑒑𑒰𑒿 𑒂𑒍𑒪, 𑒮𑒦 𑒩𑒰𑒖𑒰𑒏𑒹𑒿 𑒥𑒳𑒗𑒰𑒋 𑒮𑒳𑒗𑒰𑒋 𑒕𑒪 𑒮𑒯𑒙𑒰𑒨 𑒍𑒞𑒋𑒮𑒿 𑒯𑒙𑒰𑒍𑒪।
𑒏𑒵𑒭𑓂𑒝 𑒋𑒏𑒰𑓀𑒞𑒲 𑒏𑒯𑒪 𑒠𑒰𑒆 𑒮𑒳𑒢𑒴 𑒄, 𑒮𑒳𑒢𑒪 𑒕𑒪 𑒋𑒏 𑒅𑒩𑒢𑓂𑒞𑒲, 𑒫𑒰𑒩𑒝𑒰𑒫𑒞 𑒂𑒑𑒱 𑒥𑒱𑒔 𑒥𑒔𑒪 𑒣𑒰𑓀𑒛𑒫, 𑒥𑒔𑒪 𑒕𑒪𑒱 𑒏𑒳𑓀𑒞𑒲 𑒠𑒲𑒠𑒲।
𑒦𑒲𑒧 𑒞𑒐𑒢𑒹 𑒅𑒐𑒰𑒛𑓃𑒱 𑒫𑒵𑒏𑓂𑒭 𑒕𑒪 𑒦𑒹𑒪 𑒚𑒰𑒜𑓃 𑒮𑒯𑒙𑒱 𑒁𑒩𑓂𑒖𑒳𑒢 𑒏𑒋, 𑒏𑒵𑒭𑓂𑒝 𑒏𑒯𑒪 𑒯𑒹 𑒠𑒰𑒆 𑒏𑒰𑒪𑒔𑒏𑓂𑒩 𑒁𑒢𑒪𑒏 𑒋𑒞𑒋 𑒦𑒲𑒧 𑒁𑒩𑓂𑒖𑒳𑒢𑒏𑒹𑒿।
𑒠𑒹𑒐𑒱 𑒣𑒩𑒰𑒏𑓂𑒩𑒧 𑒯𑒞𑒼𑒞𑓂𑒮𑒰𑒯𑒱𑒞 𑒦𑒹𑒪 𑒩𑒰𑒖𑒰 𑒮𑒦 𑒣𑓂𑒩𑒨𑒰𑒝 𑒏𑒋𑒢𑒹 𑒕𑒪, 𑒣𑒰𑓀𑒛𑒫 𑒪𑒋 𑒔𑒪𑒪𑒰𑒯 𑒠𑓂𑒩𑒾𑒣𑒠𑒲𑒏𑒹𑒿 𑒫𑓂𑒨𑒑𑓂𑒩 𑒋𑒯𑒱 𑒮𑒦𑒮𑒿 𑒍 𑒦𑒹𑒪𑒱 𑒕𑒪𑒱।
𑒁𑒩𑓂𑒖𑒳𑒢 𑒐𑒼𑒪𑒱 𑒁𑒣𑒢 𑒩𑒯𑒮𑓂𑒨, 𑒐𑒱𑒮𑓂𑒮𑒰𑒮𑒿 𑒠𑓂𑒩𑒾𑒣𑒠𑒲𑒏𑒹𑒿 𑒏𑒋𑒪 𑒫𑒱𑒯𑓂𑒫𑒪,
𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒔𑒳𑒣𑒔𑒰𑒣 𑒮𑒳𑒢𑒋 𑒕𑒪, 𑒒𑒳𑒩𑒱 𑒣𑒱𑒞𑒰𑒏𑒹𑒿 𑒏𑒟𑒰 𑒄 𑒏𑒯𑒪𑒏।
𑒏𑒳𑒧𑓂𑒦𑒏𑒰𑒩𑒏 𑒒𑒩 𑒣𑒯𑒳𑒿𑒔𑒱 𑒣𑒰𑓀𑒛𑒫 𑒏𑒯𑒪 𑒠𑒹𑒐𑒴 𑒏𑒲 𑒯𑒧 𑒮𑒦 𑒂𑒢𑒪, 𑒏𑒳𑓀𑒞𑒲 𑒏𑒯𑒪 𑒂𑒢𑒪 𑒁𑒕𑒱 𑒖𑒹 𑒮𑒦 𑒞𑒏𑒩𑒰 𑒥𑒰𑒿𑒙𑒴 𑒣𑒰𑒿𑒔𑒴 𑒣𑒰𑒝𑓂𑒛𑒫 !!
𑒏𑒯𑒪 𑒁𑒩𑓂𑒖𑒳𑒢 𑒯𑒹 𑒧𑒰𑒞𑒰 𑒯𑒼𑒋𑒞 𑒢𑒯𑒱 𑒫𑓂𑒨𑒩𑓂𑒟 𑒁𑒯𑒰𑒿𑒏 𑒄 𑒥𑒰𑒞, 𑒮𑓀𑒑 𑒠𑓂𑒩𑒾𑒣𑒠𑒲𑒏 𑒯𑒼𑒋𑒞 𑒫𑒱𑒫𑒰𑒯 𑒣𑒰𑒿𑒔𑒴-𑒣𑒰𑒝𑓂𑒛𑒫𑒏 𑒮𑓀𑒑- 𑒮𑒰𑒟।
𑒠𑓂𑒩𑒳𑒣𑒠 𑒣𑒚𑒹𑒪𑒢𑓂𑒯𑒱 𑒣𑒳𑒩𑒯𑒱𑒞𑒏𑒹𑒿 𑒡𑒵𑒭𑓂𑒙𑒠𑓂𑒨𑒳𑒧𑓂𑒢𑒏 𑒮𑓀𑒑 𑒍𑒞𑒋, 𑒏𑒳𑓀𑒞𑒲𑒏𑒹𑒿 𑒢𑒼𑒞𑒪 𑒂 𑒮𑒦𑒏𑒹𑒿 𑒪𑒋 𑒑𑒹𑒪 𑒮𑓀𑒑 𑒁𑒣𑒢 । 𑒠𑓂𑒩𑒳𑒣𑒠 𑒮𑒳𑒢𑒪 𑒖𑒹 𑒣𑒰𑒿𑒔𑒴-𑒣𑒰𑒝𑓂𑒛𑒫 𑒏𑒩𑒞𑒰𑒯 𑒫𑒱𑒫𑒰𑒯 𑒠𑓂𑒩𑒾𑒣𑒠𑒲𑒮𑒿, 𑒞𑒐𑒢𑒯𑒱 𑒄 𑒏𑒟𑒰 𑒁𑒕𑒱 𑒣𑒴𑒩𑓂𑒫𑒖𑒢𑓂𑒧𑒯𑒱𑒏 𑒥𑓂𑒨𑒰𑒮 𑒂𑒥𑒱 𑒮𑒳𑒢𑒰𑒍𑒪!!
𑒦𑒹𑒙𑒪 𑒕𑒪𑒢𑓂𑒯𑒱 𑒫𑒩𑒠𑒰𑒢 𑒬𑒱𑒫𑒮𑒿 𑒖𑒹 𑒣𑒰𑒿𑒔 𑒣𑒞𑒱 𑒁𑒯𑒰𑒿 𑒣𑒰𑒋𑒥, 𑒮𑒳𑒢𑒱 𑒮𑒦 𑒠𑓂𑒩𑒾𑒣𑒠𑒲 𑒫𑒱𑒫𑒰𑒯 𑒠𑓂𑒩𑒳𑒣𑒠 𑒩𑒲𑒞𑒱 𑒫𑒻𑒠𑒱𑒏 𑒮𑒿 𑒏𑒩𑒰𑒍𑒪।
𑒮𑒦 𑒏𑒱𑒕𑒳 𑒠𑒱𑒢 𑒩𑒯𑒪 𑒍𑒞𑒋 𑒏𑒳𑒬𑒪𑒮𑒿 𑒠𑓂𑒩𑒳𑒣𑒠 𑒏𑒹𑒩 𑒧𑒯𑒪𑒧𑒹, 𑒣𑒮𑒩𑒪 𑒄 𑒔𑒩𑓂𑒔𑒰 𑒮𑒑𑒩𑒼 𑒡𑒩𑒱 𑒑𑒹𑒪 𑒑𑒣 𑒯𑒮𑓂𑒞𑒱𑒢𑒰𑒣𑒳𑒩 𑒧𑒯𑒪𑒧𑒹।
𑒪𑒼𑒏𑒪𑒰𑒖𑒮𑒿 𑒥𑒰𑒯𑓂𑒨 𑒣𑓂𑒩𑒮𑒢𑓂𑒢𑒞𑒰 𑒡𑒵𑒞𑒩𑒰𑒭𑓂𑒙𑓂𑒩 𑒕𑒪 𑒍𑒞𑒋 𑒠𑒹𑒐𑒍𑒢𑒹, 𑒧𑒰𑒢𑒱 𑒦𑒲𑒭𑓂𑒧-𑒠𑓂𑒩𑒼𑒝𑒏 𑒫𑒱𑒔𑒰𑒩 𑒣𑒚𑒰𑒍𑒪 𑒮𑒧𑒰𑒠 𑒁𑒑𑒳𑒞𑒍𑒢𑒹।
𑒂𑒢𑒲 𑒁𑒢𑒳𑒖 𑒣𑒞𑓂𑒢𑒲 𑒣𑒳𑒞𑒼𑒯𑒳 𑒍 𑒁𑒢𑒳𑒖 𑒣𑒳𑒞𑓂𑒩 𑒮𑒦𑒏𑒹𑒿 𑒂𑒠𑒩𑒮𑒿, 𑒠𑒳𑒩𑓂𑒨𑒼𑒡𑒢𑒏 𑒏𑒩𑓂𑒝𑒏 𑒫𑒱𑒩𑒼𑒡 𑒣𑒩 𑒏𑒋𑒪 𑒫𑒱𑒔𑒰𑒩 𑒫𑒱𑒠𑒳𑒩𑒏𑒹𑒿 𑒥𑒖𑒰𑒏𑒨, 𑒬𑒰𑒮𑓂𑒞𑓂𑒩𑒰𑒢𑒳𑒮𑒰𑒩 𑒫𑒱𑒔𑒰𑒩 𑒠𑒹𑒪𑒢𑓂𑒯𑒱 𑒂𑒡𑒰 𑒩𑒰𑒖𑓂𑒨 𑒠𑒹𑒥𑒰𑒏 𑒍 𑒖𑒰𑒏𑒋।
𑒫𑒱𑒠𑒳𑒩𑒯𑒱𑒏𑒹𑒿 𑒣𑒚𑒰𑒍𑒪 𑒡𑒵𑒞𑒩𑒰𑒭𑓂𑒙𑓂𑒩 𑒂𑒢𑒋 𑒩𑒰𑒖𑒧𑒯𑒪𑒮𑒿 𑒠𑓂𑒩𑒳𑒣𑒠𑒏, 𑒮𑒦𑒏𑒹𑒿 𑒪𑒋 𑒂𑒢𑒪 𑒣𑒯𑒳𑒿𑒔𑒪 𑒍 𑒖𑒢 𑒚𑒰𑒜𑓃 𑒏𑒩𑒋 𑒮𑓂𑒫𑒰𑒑𑒞। 𑒡𑒵𑒞𑒩𑒰𑒭𑓂𑒙𑓂𑒩 𑒏𑒯𑒪 𑒯𑒹 𑒨𑒳𑒡𑒱𑒭𑓂𑒚𑒱𑒩 𑒑𑒵𑒯 𑒏𑒪𑒯𑒮𑒿 𑒄 𑒢𑒲𑒏 𑒯𑒼𑒨𑒞, 𑒖𑒰𑒋 𑒐𑒰𑒝𑓂𑒛𑒫𑒣𑓂𑒩𑒮𑓂𑒟 𑒥𑒮𑒰𑒅 𑒢𑒫 𑒢𑒑𑒩 𑒂𑒡 𑒩𑒰𑒖 𑒪𑓄 𑒏𑒋।
𑒐𑒰𑒝𑓂𑒛𑒫𑒣𑓂𑒩𑒮𑓂𑒟 𑒁𑒕𑒱 𑒥𑒼𑒢 𑒋𑒐𑒢 𑒣𑒯𑒱𑒢𑒹 𑒕𑒪 𑒩𑒰𑒖𑒰𑒏 𑒢𑒑𑒩𑒲, 𑒧𑒰𑒢𑒱 𑒨𑒳𑒡𑒱𑒭𑓂𑒚𑒱𑒩 𑒑𑒹𑒪 𑒍𑒞𑒋 𑒥𑒢𑒰𑒨 𑒢𑒫 𑒒𑒩 𑒠𑓂𑒫𑒰𑒩 𑒮𑒖𑓂𑒖𑒱𑒞।
𑒃𑒢𑓂𑒠𑓂𑒩𑒣𑓂𑒩𑒮𑓂𑒟 𑒕𑒪 𑒣𑒛𑓃𑒪 𑒢𑒰𑒧 𑒂 𑒞𑒹𑒩𑒯 𑒫𑒩𑓂𑒭 𑒡𑒩𑒱 𑒏𑒹𑒪𑒢𑓂𑒯𑒱 𑒩𑒰𑒖, 𑒨𑒬 𑒕𑒪 𑒮𑒳𑒬𑒰𑒮𑒢𑒮𑒿 𑒂 𑒕𑒪 𑒖𑒢-𑒖𑒲𑒫𑒢 𑒁𑒞𑒱 𑒮𑓀𑒣𑒢𑓂𑒢।
𑒕𑒪 𑒁𑒯𑒱𑒢𑒰 𑒠𑒱𑒢 𑒥𑒲𑒞𑒱 𑒩𑒯𑒪 𑒁𑒋𑒪𑒰𑒯 𑒢𑒰𑒩𑒠 𑒋𑒏𑒠𑒱𑒢 𑒖𑒐𑒢, 𑒮𑓂𑒫𑒰𑒑𑒞 𑒦𑒹𑒪𑒢𑓂𑒯𑒱 𑒐𑒴𑒥 𑒯𑒳𑒢𑒏𑒩 𑒍𑒯𑒼 𑒩𑒯𑒟𑒱 𑒂𑒢𑓀𑒠𑒱𑒞 𑒞𑒐𑒢।
𑒠𑒹𑒐𑒪 𑒬𑒲𑒪-𑒑𑒳𑒝 𑒣𑒰𑓀𑒛𑒫𑒏 𑒧𑒳𑒠𑒰 𑒏𑒯𑒪 𑒠𑓂𑒩𑒾𑒣𑒠𑒲𑒮𑒿 𑒮𑒳𑒢𑒴 𑒥𑒰𑒞 𑒄, 𑒕𑒲 𑒣𑒞𑓂𑒢𑒲 𑒣𑒰𑓀𑒛𑒫𑒏 𑒧𑒳𑒠𑒰 𑒢𑒱𑒫𑒰𑒮𑒏 𑒢𑒱𑒁𑒧 𑒏𑒱𑒋 𑒢𑒯𑒱 𑒥𑒢𑒹𑒢𑒹 𑒕𑒲 ?
𑒢𑒰𑒩𑒠𑒏 𑒥𑒰𑒞 𑒮𑒧𑒲𑒔𑒲𑒢 𑒕𑒪 𑒮𑒹 𑒢𑒱𑒁𑒧 𑒥𑒢𑒹𑒪𑒟𑒱 𑒣𑒰𑒿𑒔𑒼 𑒑𑒼𑒙𑒹, 𑒋𑒏-𑒋𑒏 𑒧𑒰𑒮 𑒩𑒯𑒟𑒳 𑒮𑒦 𑒪𑒑 𑒠𑓂𑒩𑒾𑒣𑒠𑒲 𑒢𑒱𑒁𑒧 𑒢𑒯𑒱 𑒦𑓀𑒑 𑒯𑒼 !
𑒥𑒰𑒩𑒯 𑒫𑒩𑓂𑒭 𑒣𑒩𑓂𑒨𑓀𑒞 𑒕𑒼𑒛𑓃𑒋 𑒣𑒛𑓃𑒞 𑒑𑒵𑒯 𑒞𑓂𑒩𑒳𑒙𑒱 𑒦𑒹𑒪 𑒖𑓂𑒨𑒼𑒿, 𑒣𑒰𑒪𑒢 𑒢𑒱𑒁𑒧𑒏 𑒯𑒼𑒧𑒋 𑒪𑒰𑒑𑒪 𑒏𑒱𑒕𑒳 𑒏𑒰𑒪 𑒡𑒩𑒱 𑒄 । 𑒏𑒢𑒻𑒞 𑒁𑒋𑒪𑒰𑒯 𑒫𑒱𑒣𑓂𑒩 𑒋𑒏 𑒁𑒩𑓂𑒖𑒳𑒢 𑒣𑒳𑒕𑒪𑒢𑓂𑒯𑒱 𑒥𑒰𑒞 𑒏𑒲 ?
𑒔𑒼𑒩 𑒕𑒪 𑒔𑒼𑒩𑒹𑒢𑒹 𑒑𑒾𑒏𑒹𑒿 𑒯𑒰𑒏𑓂𑒩𑒼𑒮 𑒫𑒱𑒣𑓂𑒩 𑒕𑒪 𑒏𑒩𑒱 𑒩𑒯𑒪, 𑒬𑒮𑓂𑒞𑓂𑒩 𑒕𑒪 𑒑𑒵𑒯𑒧𑒹 𑒠𑓂𑒩𑒾𑒣𑒠𑒲 𑒮𑓀𑒑 𑒨𑒳𑒡𑒱𑒭𑓂𑒚𑒱𑒩 𑒖𑒹 𑒩𑒯𑒱 𑒩𑒯𑒪।
𑒫𑒱𑒣𑓂𑒩𑒏 𑒬𑒰𑒣𑒮𑒿 𑒢𑒲𑒏 𑒮𑒼𑒔𑒱 𑒧𑒴𑒩𑒲 𑒗𑒳𑒏𑒹𑒢𑒹 𑒑𑒹𑒪 𑒁𑒩𑓂𑒖𑒳𑒢, 𑒬𑒮𑓂𑒞𑓂𑒩 𑒂𑒢𑒱 𑒕𑒼𑒛𑓃𑒰𑒨𑒪 𑒑𑒾𑒏𑒹𑒿 𑒒𑒳𑒩𑒱 𑒂𑒋𑒪 𑒑𑒵𑒯 𑒞𑒐𑒢।
𑒧𑒰𑒿𑒑𑒪 𑒂𑒖𑓂𑒘𑒰 𑒨𑒳𑒡𑒱𑒭𑓂𑒚𑒱𑒩𑒮𑒿 𑒠𑒱𑒁 𑒑𑒵𑒯𑒞𑓂𑒨𑒰𑒑𑒏 𑒂𑒖𑓂𑒘𑒰, 𑒢𑒱𑒁𑒧 𑒦𑓀𑒑𑒏 𑒏𑒋𑒪 𑒯𑒧 𑒁𑒣𑒩𑒰𑒡, 𑒏𑒲 𑒥𑒰𑒖𑒪 𑒁𑒯𑒰𑒿 ?
𑒁𑒩𑓂𑒖𑒳𑒢 𑒄 𑒁𑒣𑒩𑒰𑒡 𑒪𑒰𑒑𑒞 𑒖𑒐𑒢 𑒣𑒻𑒒𑒏 𑒠𑓂𑒫𑒰𑒩𑒰 𑒯𑒼𑒋𑒞, 𑒕𑒼𑒙 𑒦𑒰𑒋 𑒏𑒐𑒢𑒼 𑒁𑒕𑒱 𑒂𑒥𑒱 𑒮𑒏𑒻𑒞 𑒥𑒛𑓃 𑒦𑒰𑒨 𑒒𑒩।
𑒧𑒳𑒠𑒰 𑒢𑒱𑒏𑒪𑒱 𑒑𑒹𑒪𑒰𑒯 𑒁𑒩𑓂𑒖𑒳𑒢 𑒂𑒖𑓂𑒘𑒰 𑒪𑒋 𑒧𑒰𑒞𑒰 𑒦𑒰𑒋𑒮𑒿, 𑒦𑓂𑒩𑒧𑒝 𑒠𑒹𑒬-𑒏𑒼𑒮𑒏 𑒏𑒩𑒻𑒞 𑒣𑒯𑒳𑒿𑒔𑒪 𑒯𑒩𑒱𑒠𑓂𑒫𑒰𑒩 𑒑𑓀𑒑 𑒞𑒙, 𑒮𑓂𑒢𑒰𑒢 𑒏𑒩𑒻𑒞 𑒏𑒰𑒪, 𑒢𑒖𑒩𑒱 𑒕𑒪 𑒢𑒰𑒑 𑒏𑒰𑒢𑓂𑒨𑒰𑒏 𑒖𑓂𑒨𑒼𑒿, 𑒏𑒼𑒢𑒰 𑒥𑒔𑒱 𑒮𑒏𑒻𑒞 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒣𑒰𑒞𑒰𑒪𑒏 𑒢𑒱𑒏𑒙।
𑒫𑒱𑒫𑒰𑒯 𑒣𑓂𑒩𑒰𑒩𑓂𑒟𑒢𑒰 𑒮𑓂𑒫𑒲𑒏𑒰𑒩𑒪 𑒁𑒩𑓂𑒖𑒳𑒢 𑒄 𑒕𑒪 𑒫𑒩𑒠𑒰𑒢 𑒦𑒹𑒙𑒪, 𑒖𑒪𑒧𑒹 𑒩𑒮𑓂𑒞𑒰 𑒥𑒢𑒞 𑒔𑒪𑒱 𑒮𑒏𑒥 𑒁𑒯𑒰𑒿 𑒫𑓂𑒨𑒫𑒡𑒰𑒢 𑒥𑒱𑒢।
𑒧𑒝𑒱𑒣𑒳𑒩 𑒣𑒯𑒳𑒿𑒔𑒱 𑒖𑒞𑒋 𑒔𑒱𑒞𑓂𑒩𑒰𑓀𑒑𑒠𑒰 𑒩𑒰𑒖𑒏𑒢𑓂𑒨𑒰 𑒕𑒪𑒱 𑒩𑒴𑒣𑒫𑒞𑒲, 𑒫𑒱𑒫𑒰𑒯𑒏 𑒣𑓂𑒩𑒮𑓂𑒞𑒰𑒫 𑒁𑒩𑓂𑒖𑒳𑒢𑒏 𑒮𑓂𑒫𑒲𑒏𑒰𑒩𑒪 𑒧𑒰𑒢𑒪 𑒩𑒰𑒖𑒰 𑒮𑒬𑒩𑓂𑒞, 𑒠𑒾𑒯𑒱𑒞𑓂𑒩 𑒯𑒼𑒋𑒞 𑒯𑒧𑒩 𑒫𑓀𑒬𑒖 𑒦𑒹𑒪 𑒄 𑒫𑒱𑒫𑒰𑒯 𑒞𑒐𑒢 𑒖𑒰 𑒏𑒋।
𑒔𑒱𑒞𑓂𑒩𑒰𑓀𑒑𑒠𑒰𑒏 𑒣𑒳𑒞𑓂𑒩 𑒦𑒹𑒪 𑒥𑒦𑓂𑒩𑒳𑒫𑒰𑒯𑒢 𑒢𑒰𑒧 𑒩𑒰𑒐𑒪 𑒑𑒹𑒪 𑒖𑒏𑒩 𑒄, 𑒣𑒩𑒧 𑒣𑓂𑒩𑒞𑒰𑒣𑒲 𑒣𑒩𑒰𑒏𑓂𑒩𑒧𑒲 𑒨𑒼𑒠𑓂𑒡𑒰 𑒥𑒢𑒪 𑒥𑒰𑒪𑒏 𑒣𑒰𑒕𑒴 𑒮𑒳𑒢𑒋 𑒕𑒲।
𑒤𑒹𑒩 𑒍𑒞𑒋𑒮𑒿 𑒢𑒱𑒏𑒪𑒱 𑒁𑒩𑓂𑒖𑒳𑒢 𑒣𑒯𑒳𑒿𑒔𑒪 𑒣𑓂𑒩𑒦𑒰𑒮 𑒞𑒲𑒩𑓂𑒟 𑒠𑓂𑒫𑒰𑒩𑒏𑒰 𑒢𑒱𑒏𑒙,
𑒬𑒮𑓂𑒞𑓂𑒩-𑒣𑓂𑒩𑒠𑒩𑓂𑒬𑒢𑒏 𑒂𑒨𑒼𑒖𑒢 𑒏𑒹𑒪𑒢𑓂𑒯𑒱 𑒏𑒵𑒭𑓂𑒝 𑒢𑒱𑒏𑒙 𑒣𑒩𑓂𑒫𑒞 𑒩𑒻𑒫𑒞𑒏।
𑒣𑓂𑒩𑒹𑒧 𑒠𑒹𑒐𑒱 𑒮𑒳𑒦𑒠𑓂𑒩𑒰𑒮𑒿 𑒏𑒵𑒭𑓂𑒝 𑒕𑒪𑒰𑒯 𑒮𑒳𑒗𑒍𑒢𑒹 𑒢𑒫 𑒅𑒣𑒰𑒨 𑒄, 𑒁𑒣𑒯𑒩𑒝 𑒏𑒩𑒥 𑒖𑒲𑒞𑒥 𑒨𑒳𑒠𑓂𑒡 𑒨𑒰𑒠𑒫𑒮𑒿 𑒥𑒢𑒞 𑒞𑒐𑒢𑒹 𑒥𑒰𑒞 𑒄।
𑒥𑒢𑒪𑒱 𑒮𑒰𑒩𑒟𑒲 𑒫𑒲𑒩 𑒮𑒳𑒦𑒠𑓂𑒩𑒰 𑒮𑓀𑒑𑓂𑒩𑒰𑒧 𑒕𑒪 𑒥𑒖𑒩𑒪 𑒖𑒐𑒢, 𑒥𑒳𑒗𑒰-𑒮𑒳𑒗𑒰 𑒧𑒹𑒪 𑒕𑒪 𑒏𑒩𑒍𑒢𑒹 𑒏𑒵𑒭𑓂𑒝 𑒖𑒰 𑒏𑒋 𑒞𑒐𑒢।
𑒫𑒱𑒫𑒰𑒯 𑒦𑒹𑒪 𑒞𑒠𑓀𑒞𑒩 𑒁𑒩𑓂𑒖𑒳𑒢 𑒮𑓀𑒑 𑒮𑒳𑒦𑒠𑓂𑒩𑒰 𑒑𑒋𑒪𑒰𑒯 𑒣𑒳𑒭𑓂𑒏𑒩, 𑒣𑒳𑒩𑒪 𑒖𑒐𑒢 𑒄 𑒫𑒢𑒫𑒰𑒮 𑒏𑒵𑒭𑓂𑒝𑒏 𑒮𑓀𑒑 𑒣𑒯𑒳𑒿𑒔𑒪 𑒃𑓀𑒠𑓂𑒩𑒣𑓂𑒩𑒮𑓂𑒟।
𑒠𑒹𑒐𑒱 𑒢𑒫𑒫𑒡𑒴 𑒣𑓂𑒩𑒮𑒢𑓂𑒢 𑒏𑒳𑓀𑒞𑒲 𑒂𑒢𑓀𑒠 𑒢𑒯𑒱 𑒮𑒧𑒙𑒰 𑒩𑒯𑒪, 𑒠𑓂𑒩𑒾𑒣𑒠𑒲𑒮𑒿 𑒣𑒰𑒿𑒔 𑒣𑒳𑒞𑓂𑒩, 𑒂 𑒁𑒦𑒱𑒧𑒢𑓂𑒨𑒳 𑒮𑒳𑒦𑒠𑓂𑒩𑒰𑒮𑒿 𑒦𑒹𑒪 𑒕𑒪।
𑒥𑒲𑒞𑒱 𑒕𑒪 𑒩𑒯𑒪 𑒠𑒱𑒢 𑒖𑒐𑒢 𑒁𑒋𑒪𑒰𑒯 𑒖𑒲𑒩𑓂𑒝 𑒬𑒩𑒲𑒩 𑒁𑒑𑓂𑒢𑒱, 𑒩𑒼𑒑𑒏 𑒢𑒱𑒠𑒰𑒢 𑒕𑒪 𑒐𑒰𑓀𑒛𑒫 𑒫𑒢 𑒩𑒯𑒋 𑒕𑒪 𑒍 𑒮𑒩𑓂𑒣 𑒞𑒏𑓂𑒭𑒏।
𑒃𑓀𑒠𑓂𑒩𑒏 𑒁𑒕𑒱 𑒧𑒱𑒞𑓂𑒩 𑒍 𑒖𑒐𑒢 𑒏𑒩𑒻𑒞 𑒕𑒲 𑒖𑒩𑒹𑒥𑒰𑒏 𑒯𑒧 𑒮𑒴𑒩𑒮𑒰𑒩, 𑒢𑒯𑒱 𑒖𑒩𑒥𑒋 𑒠𑒻𑒞 𑒕𑒟𑒱 𑒃𑓀𑒠𑓂𑒩, 𑒏𑒩𑒴 𑒏𑒵𑒣𑒰 𑒁𑒯𑒰𑒿 𑒯𑒹 𑒃𑓀𑒠𑓂𑒩 𑒁𑒫𑒞𑒰𑒩 ।
𑒕𑒲 𑒣𑓂𑒩𑒮𑓂𑒞𑒳𑒞 𑒧𑒳𑒠𑒰 𑒁𑒮𑓂𑒞𑓂𑒩 𑒁𑒕𑒱 𑒢𑒯𑒱 𑒯𑒧𑒩𑒰 𑒪𑒑 𑒍𑒞𑒹𑒏, 𑒃𑓀𑒠𑓂𑒩 𑒨𑒳𑒠𑓂𑒡𑒏 𑒯𑒹𑒞𑒳 𑒔𑒰𑒯𑒲 𑒨𑒼𑒑𑓂𑒨 𑒬𑒮𑓂𑒞𑓂𑒩𑒏 𑒧𑒰𑒞𑓂𑒩𑒰 𑒖𑒩𑒴𑒩𑒲 𑒖𑒞𑒹𑒏।
𑒠𑒹𑒪 𑒑𑒰𑓀𑒛𑒲𑒫 𑒡𑒢𑒳𑒭 𑒞𑒴𑒝𑒲𑒩 𑒁𑒏𑓂𑒭𑒨 𑒫𑒩𑒳𑒝𑒏 𑒩𑒟 𑒢𑓀𑒠𑒱𑒒𑒼𑒭, 𑒔𑒪𑒪 𑒛𑒰𑒯𑒥𑒰𑒏 𑒯𑒹𑒞𑒳 𑒁𑒑𑓂𑒢𑒱 𑒣𑒹𑒪𑒰𑒏 𑒥𑒰𑒠 𑒁𑒩𑓂𑒖𑒳𑒢𑒏 𑒞𑒼𑒭।
𑒃𑓀𑒠𑓂𑒩 𑒧𑒹𑒒𑒏𑒹𑒿 𑒣𑒚𑒍𑒪𑒢𑓂𑒯𑒱 𑒏𑒵𑒭𑓂𑒝 𑒏𑒋𑒪 𑒮𑒔𑒹𑒞 𑒖𑒹, 𑒫𑒰𑒨𑒫𑓂𑒨𑒏 𑒣𑓂𑒩𑒨𑒼𑒑 𑒏𑒋𑒪 𑒁𑒩𑓂𑒖𑒳𑒢 𑒧𑒹𑒒 𑒥𑒱𑒪𑒰𑒋𑒪 𑒮𑒹।
𑒞𑒏𑓂𑒭𑒏𑒏 𑒧𑒵𑒞𑓂𑒨𑒼𑒣𑒩𑒰𑒢𑓂𑒞 𑒃𑓀𑒠𑓂𑒩 𑒦𑒹𑒪𑒰𑒯 𑒣𑓂𑒩𑒏𑒙 𑒍𑒞𑒋, 𑒧𑒰𑒿𑒑𑒪 𑒁𑒩𑓂𑒖𑒳𑒢 𑒠𑒱𑒫𑓂𑒨𑒰𑒮𑓂𑒞𑓂𑒩 𑒯𑒳𑒢𑒏𑒰𑒮𑒿 𑒧𑒾𑒏𑒰 𑒠𑒹𑒐𑒱 𑒏𑒋।
𑒖𑒰𑒆 𑒬𑒱𑒫𑒏 𑒅𑒣𑒰𑒮𑒢𑒰 𑒏𑒩𑒴 𑒠𑒋 𑒮𑒏𑒻𑒞 𑒕𑒟𑒱 𑒫𑒩𑒠𑒰𑒢 𑒍, 𑒕𑒪 𑒧𑒨 𑒂𑒨𑒪 𑒁𑒑𑓂𑒢𑒱𑒏 𑒏𑒼𑒣𑒮𑒿 𑒥𑒔𑒱 𑒪𑒑 𑒁𑒩𑓂𑒖𑒳𑒢𑒏 𑒍।
𑒮𑒹𑒫𑒰 𑒏𑒩𑒥𑒰𑒏 𑒥𑒰𑒞 𑒕𑒪 𑒧𑒼𑒢𑒧𑒹 𑒪𑒹𑒢𑒹 𑒏𑒵𑒞𑒖𑓂𑒘 𑒕𑒪 𑒍, 𑒥𑒢𑒰𑒆 𑒮𑒦𑒰 𑒦𑒫𑒢 𑒁𑒢𑒳𑒣𑒧 𑒢𑒯𑒱 𑒥𑒢𑒪 𑒖𑒹 𑒏𑒞𑒯𑒳 𑒯𑒼𑓄।
𑒧𑒨 𑒠𑒰𑒢𑒫 𑒕𑒪 𑒏𑒋 𑒩𑒯𑒪 𑒢𑒫 𑒢𑒱𑒩𑓂𑒧𑒰𑒝, 𑒮𑒦𑒰 𑒦𑒫𑒢𑒏 𑒠𑒱𑒢-𑒩𑒰𑒞𑒱 𑒪𑒰𑒑𑒱 𑒅𑒞𑓂𑒟𑒰𑒢।
𑒮𑓂𑒤𑒙𑒱𑒏𑒮𑒿 𑒨𑒳𑒏𑓂𑒞 𑒬𑒲𑒮𑒧𑒯𑒪 𑒮𑒢 𑒏𑒾𑒬𑒪, 𑒨𑒳𑒡𑒱𑒭𑓂𑒚𑒱𑒩 𑒍𑒞𑒯𑒱 𑒞𑒐𑒢 𑒮𑒱𑓀𑒯𑒰𑒮𑒢 𑒥𑒻𑒮𑒪।
𑒇𑒭𑒱 𑒢𑒰𑒩𑒠𑒏 𑒂𑒑𑒧𑒢 𑒦𑒹𑒪 𑒍𑒞𑒋 𑒖𑒰𑒋, 𑒠𑒹𑒪𑒢𑓂𑒯𑒱 𑒏𑒩𑒥𑒰𑒏 𑒨𑒖𑓂𑒘 𑒖𑒹 𑒩𑒰𑒖𑒮𑒴𑒨 𑒏𑒯𑒰𑒨।
𑒥𑒖𑒰𑒍𑒪 𑒠𑓂𑒫𑒰𑒩𑒏𑒰𑒮𑒿 𑒏𑒵𑒭𑓂𑒝𑒏𑒹𑒿 𑒮𑒧𑒰𑒠 𑒣𑒚𑒰𑒨, 𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒮𑒦𑒰 𑒦𑒫𑒢𑒧𑒹 𑒂𑒥𑒱 𑒏𑒋, 𑒖𑒩𑒰𑒮𑓀𑒡 𑒧𑒑𑒡𑒏 𑒢𑒩𑒹𑒬 𑒩𑒯𑒞 𑒑𑒋 𑒨𑒰𑒫𑒞,
𑒩𑒰𑒖𑒮𑒴𑒨 𑒮𑒤𑒪 𑒢𑒯𑒱 𑒯𑒼𑒧𑒨 𑒠𑒹𑒞 𑒞𑒰𑒫𑒞।
𑒥𑓀𑒠𑒲 𑒥𑒢𑒹𑒪𑒏 𑒩𑒰𑒖𑒰 𑒪𑒼𑒏𑒢𑒱𑒏𑒹𑒿 𑒍 𑒯𑒩𑒰𑒨, 𑒂𑒏𑓂𑒩𑒧𑒝 𑒍𑒏𑒩 𑒦𑒹𑒪 𑒧𑒟𑒳𑒩𑒰 𑒣𑒩 𑒥𑒛𑓂𑒛, 𑒯𑒰𑒩𑒱 𑒠𑓂𑒫𑒰𑒩𑒏𑒰 𑒩𑒰𑒖𑒡𑒰𑒢𑒲 𑒥𑒢𑒰𑒍𑒪 𑒯𑒧 𑒖𑒰𑒋 ।
𑒨𑒳𑒡𑒱𑒭𑓂𑒚𑒱𑒩 𑒥𑒰𑒞 𑒮𑒳𑒢𑒻𑒞 𑒦𑒹𑒪𑒟𑒱 𑒯𑒞𑒰𑒮 𑒮𑒢, 𑒦𑒲𑒧 𑒁𑒩𑓂𑒖𑒳𑒢 𑒂𑒬𑒰 𑒥𑒢𑓂𑒯𑒹𑒪𑒢𑓂𑒯𑒱 𑒦𑓂𑒩𑒰𑒞𑒰 𑒮𑒳𑒢।
𑒏𑓂𑒭𑒞𑓂𑒩𑒱𑒨-𑒡𑒩𑓂𑒧 𑒁𑒕𑒱 𑒬𑒞𑓂𑒩𑒳𑒏𑒹𑒿 𑒫𑒬𑒧𑒹 𑒏𑒩𑒋, 𑒏𑒵𑒭𑓂𑒝,𑒁𑒩𑓂𑒖𑒳𑒢-𑒦𑒲𑒧 𑒮𑓀𑒑 𑒩𑒰𑒖𑒑𑒵𑒯 𑒔𑒪𑒪।
𑒇𑒭𑒱 𑒫𑒹𑒬𑒡𑒰𑒩𑒲 𑒩𑒰𑒖𑒑𑒲𑒩𑒏 𑒣𑓂𑒩𑒰𑒔𑒲𑒩 𑒪𑒰𑒿𑒒𑒱, 𑒣𑒯𑒳𑒿𑒔𑒪 𑒮𑒦 𑒮𑒼𑒗𑒹 𑒮𑒦𑒰-𑒦𑒫𑒢 𑒖𑒲-𑒖𑒰𑒿𑒞𑒱।
𑒮𑒞𑓂𑒏𑒰𑒩 𑒏𑒩𑒋 𑒔𑒰𑒯𑒪𑒏 𑒖𑒩𑒰𑒮𑓀𑒡 𑒥𑒳𑒗𑒱 𑒫𑒱𑒣𑓂𑒩, 𑒪𑒪𑒏𑒰𑒩𑒰 𑒠𑒹𑒪𑒏 𑒏𑒱𑓀𑒞𑒳 𑒦𑒲𑒧 𑒠𑓂𑒫𑓀𑒠-𑒨𑒳𑒠𑓂𑒡𑒏 𑒬𑒲𑒒।
𑒠𑒱𑒢 𑒥𑒲𑒞𑒪 𑒐𑒞𑓂𑒧𑒏 𑒢𑒰𑒧 𑒢𑒯𑒱 𑒪𑒻𑒕 𑒄 𑒨𑒳𑒠𑓂𑒡, 𑒏𑒵𑒭𑓂𑒝𑒏 𑒮𑓀𑒏𑒹𑒞 𑒣𑒰𑒥𑒱 𑒔𑒲𑒩𑒪 𑒍 𑒬𑒩𑒲𑒩 𑒮𑓀𑒡𑒱𑒮𑒿,
𑒦𑒲𑒧 𑒞𑒼𑒛𑓃𑒪 𑒬𑒩𑒲𑒩 𑒖𑒩𑒰𑒮𑓀𑒡𑒏 𑒅𑒢𑒙𑒱 𑒤𑒴𑒩𑓂𑒞𑓂𑒞𑒱𑒮𑒿, 𑒬𑒩𑒲𑒩 𑒤𑒹𑓀𑒏𑒪 𑒠𑒳𑒯𑒴 𑒠𑒱𑒬𑒱 𑒅𑒢𑒙𑒱 𑒋𑒧𑓂𑒯𑒩-𑒍𑒧𑓂𑒯𑒩, 𑒧𑒳𑒏𑓂𑒞 𑒏𑒋𑒪 𑒏𑒰𑒩𑒰𑒑𑒰𑒩𑒮𑒿 𑒥𑓀𑒠𑒲 𑒑𑒝 𑒩𑒰𑒖𑒰 𑒮𑒦𑒏𑒹𑒿।
𑒖𑒩𑒰𑒮𑓀𑒡-𑒣𑒳𑒞𑓂𑒩 𑒮𑒯𑒠𑒹𑒫𑒏𑒹𑒿 𑒠𑒋 𑒧𑒑𑒡 𑒩𑒰𑒖𑒏 𑒑𑒠𑓂𑒠𑒲, 𑒂𑒣𑒮 𑒦𑒹𑒪𑒰𑒯 𑒃𑓀𑒠𑓂𑒩𑒣𑓂𑒩𑒮𑓂𑒟 𑒒𑒳𑒩𑒪𑒰𑒯 𑒞𑒲𑒢𑒴 𑒫𑓂𑒨𑒏𑓂𑒞𑓂𑒞𑒱।
𑒣𑒴𑒩𑓂𑒫 𑒠𑒱𑒬𑒱 𑒦𑒲𑒧 𑒅𑒞𑓂𑒞𑒩 𑒁𑒩𑓂𑒖𑒳𑒢 𑒢𑒏𑒳𑒪 𑒠𑒏𑓂𑒭𑒱𑒝, 𑒮𑒯𑒠𑒹𑒫 𑒣𑒬𑓂𑒔𑒱𑒧 𑒠𑒱𑒬𑒰 𑒠𑒱𑒬𑒱 𑒠𑒱𑒑𑓂𑒫𑒱𑒖𑒨 𑒐𑒰𑒞𑒱𑒩।
𑒫𑒱𑒖𑒨 𑒩𑒟 𑒢𑒯𑒱 𑒏𑓂𑒨𑒼 𑒩𑒼𑒏𑒱 𑒮𑒏𑒪 𑒯𑒳𑒢𑒏𑒩, 𑒡𑒢-𑒡𑒰𑒢𑓂𑒨𑒮𑒿 𑒣𑒩𑒱𑒣𑒴𑒩𑓂𑒝 𑒮𑒦 𑒂𑒥𑒱 𑒏𑒋𑒪 𑒞𑒻𑒨𑒰𑒩𑒲, 𑒩𑒰𑒖𑒮𑒴𑒨 𑒨𑒖𑓂𑒘𑒏 𑒦𑒹𑒪 𑒩𑒰𑒖𑒰 𑒮𑒦𑒏 𑒃𑒢𑓂𑒠𑓂𑒩𑒣𑓂𑒩𑒮𑓂𑒟𑒧𑒹 𑒥𑒖𑒰𑒯𑒲।
𑒩𑒰𑒖𑒰 𑒪𑒼𑒏𑒢𑒱 𑒏𑒹𑒿 𑒠𑒨 𑒮𑒧𑒳𑒔𑒱𑒞 𑒏𑒰𑒩𑓂𑒨𑒏 𑒦𑒰𑒩, 𑒦𑒲𑒭𑓂𑒧-𑒠𑓂𑒩𑒼𑒝𑒏𑒹𑒿 𑒨𑒖𑓂𑒘-𑒢𑒱𑒩𑒲𑒏𑓂𑒭𑒝𑒏 𑒠𑒹𑒪 𑒣𑓂𑒩𑒦𑒰𑒩।
𑒏𑒵𑒭𑓂𑒝 𑒫𑒱𑒣𑓂𑒩 𑒔𑒩𑒝-𑒡𑒼𑒥𑒰𑒏 𑒪𑒹𑒪𑒢𑓂𑒯𑒱 𑒏𑒰𑒖 । 𑒯𑒮𑓂𑒞𑒱𑒢𑒰𑒣𑒳𑒩𑒮𑒿 𑒦𑒲𑒭𑓂𑒧, 𑒠𑓂𑒩𑒼𑒝𑒏 𑒮𑓀𑒑 𑒦𑒹𑒪 𑒂𑒑𑒧𑒢, 𑒡𑒵𑒞𑒩𑒰𑒭𑓂𑒙𑓂𑒩 𑒫𑒱𑒠𑒳𑒩 𑒏𑒵𑒣 𑒁𑒬𑓂𑒫𑒞𑓂𑒟𑒰𑒧𑒰 𑒠𑒳𑒩𑓂𑒨𑒼𑒡𑒢 𑒠𑒳𑓁𑒬𑒰𑒮𑒢।
𑒥𑒲𑒔 𑒨𑒖𑓂𑒘𑒧𑒹 𑒅𑒚𑒪 𑒕𑒪 𑒣𑓂𑒩𑒬𑓂𑒢 𑒁𑒑𑓂𑒩-𑒣𑒴𑒖𑒰𑒏, 𑒦𑒲𑒭𑓂𑒧𑒏 𑒮𑒧𑓂𑒧𑒞𑒱 𑒨𑒳𑒡𑒱𑒭𑓂𑒚𑒱𑒩 𑒣𑒳𑒕𑒪𑒢𑓂𑒯𑒱 𑒖𑒰𑒋, 𑒦𑒲𑒭𑓂𑒧 𑒏𑒯𑒪 𑒕𑒟𑒱 𑒬𑓂𑒩𑒹𑒭𑓂𑒚 𑒏𑒵𑒭𑓂𑒝 𑒢𑒵𑒣 𑒥𑒲𑒔, 𑒮𑒯𑒠𑒹𑒫 𑒮𑒳𑒢𑒱 𑒫𑒔𑒢 𑒔𑒩𑒝 𑒣𑒐𑒰𑒩𑒨 𑒪𑒰𑒑।
𑒔𑒹𑒠𑒱𑒩𑒰𑒖 𑒬𑒱𑒬𑒳𑒣𑒰𑒪𑒮𑒿 𑒮𑒯𑒪 𑒢𑒯𑒱 𑒦𑒹𑒪, 𑒁𑒣𑒬𑒥𑓂𑒠 𑒏𑒵𑒭𑓂𑒝-𑒦𑒲𑒭𑓂𑒧𑒏𑒹𑒿 𑒠𑒹𑒥𑒋 𑒪𑒰𑒑𑒪, 𑒠𑒳𑒩𑓂𑒨𑒼𑒡𑒢-𑒦𑓂𑒩𑒰𑒞𑒰 𑒣𑓂𑒩𑒮𑒢𑓂𑒢 𑒕𑒪 𑒦𑒹𑒪, 𑒦𑒲𑒧𑒏 𑒏𑓂𑒩𑒼𑒡 𑒥𑒜𑓃𑒪 𑒕𑒪 𑒍 𑒗𑒣𑒙𑒪,
𑒦𑒲𑒭𑓂𑒧 𑒩𑒼𑒏𑒱 𑒬𑒰𑓀𑒞 𑒕𑒪 𑒍𑒏𑒩𑒰 𑒏𑒋𑒪।
𑒬𑒱𑒬𑒳𑒣𑒰𑒪𑒏 𑒑𑒰𑒩𑒱 𑒮𑒳𑒢𑒱𑒨𑒼 𑒕𑒪 𑒏𑒵𑒭𑓂𑒝 𑒣𑓂𑒩𑒬𑒰𑓀𑒞, 𑒕𑒪𑒰𑒯 𑒏𑒱𑒋𑒏 𑒞𑒿 𑒍 𑒣𑒱𑒮𑒱𑒨𑒾𑒞 𑒏𑒵𑒭𑓂𑒝𑒏, 𑒠𑒱𑒢 𑒥𑒲𑒞𑒪 𑒏𑒵𑒭𑓂𑒝 𑒠𑒹𑒪𑒟𑒱 𑒫𑒔𑒢 𑒠𑒲𑒠𑒲𑒏𑒹𑒿 𑒋𑒏, 𑒮𑒋 𑒁𑒣𑒩𑒰𑒡 𑒏𑓂𑒭𑒧𑒰 𑒯𑒧 𑒏𑒩𑒥 𑒍𑒏𑒩।
𑒮𑒋 𑒑𑒰𑒩𑒱 𑒮𑒳𑒢𑒪𑒰𑒏 𑒅𑒣𑒩𑒰𑓀𑒞 𑒔𑒪𑒪 𑒮𑒳𑒠𑒩𑓂𑒬𑒢, 𑒔𑒏𑓂𑒩 𑒏𑒋𑒪𑒏 𑒔𑒹𑒠𑒱𑒩𑒰𑒖𑒏 𑒬𑒱𑒩𑒼𑒔𑓂𑒕𑒹𑒠 𑒞𑒐𑒢, 𑒮𑒦𑒰 𑒧𑒡𑓂𑒨 𑒬𑒰𑓀𑒞𑒱 – 𑒣𑒮𑒩𑒪 𑒕𑒪 𑒖𑒰𑒋, 𑒬𑒱𑒬𑒳𑒣𑒰𑒪 𑒣𑒳𑒞𑓂𑒩𑒏𑒹𑒿 𑒔𑒹𑒠𑒱𑒏 𑒑𑒠𑓂𑒠𑒲 𑒣𑒩 𑒥𑒻𑒮𑒰𑒨।
𑒨𑒖𑓂𑒘𑒏 𑒏𑓂𑒩𑒱𑒨𑒰 𑒢𑒱𑒩𑓂𑒫𑒱𑒒𑓂𑒢 𑒮𑓀𑒣𑒢𑓂𑒢 𑒕𑒪 𑒦𑒹𑒪, 𑒮𑒦 𑒩𑒰𑒖𑒰𑒏𑒹𑒿 𑒮𑒮𑒧𑓂𑒧𑒰𑒢 𑒫𑒱𑒠𑒰 𑒏𑒋𑒪 𑒑𑒹𑒪।
𑒮𑒦𑒰 𑒦𑒫𑒢𑒏 𑒔𑒰𑒧𑒞𑓂𑒏𑒵𑒞𑓂𑒨 𑒦𑒹𑒪 𑒔𑒩𑓂𑒔𑒱𑒞, 𑒠𑒳𑒩𑓂𑒨𑒼𑒡𑒢-𑒬𑒏𑒳𑒢𑒱 𑒦𑒫𑒢𑒏𑒹𑒿 𑒠𑒹𑒐𑒪 𑒔𑒏𑒱𑒞। 𑒢𑒲𑒔𑒰𑒿 𑒠𑒹𑒐𑒱 𑒧𑒵𑒑-𑒧𑒩𑒲𑒔𑒱𑒏𑒰 𑒥𑒰𑒢𑓂𑒯𑒪 𑒤𑒰𑒿𑒜𑓃, 𑒣𑒰𑒢𑒱 𑒢𑒯𑒱 𑒕𑒪 𑒯𑒮𑒪𑒱 𑒠𑓂𑒩𑒾𑒣𑒠𑒲 𑒄 𑒖𑒰𑒢𑒱, 𑒁𑒋𑒢𑒰 𑒮𑒼𑒿𑒗𑒰 𑒣𑒰𑒩𑒠𑒩𑒩𑓂𑒬𑒲 𑒢𑒯𑒱 𑒄 𑒠𑒹𑒐𑒪,
𑒍 𑒔𑒼𑒙𑒱𑒪 𑒦𑒲𑒧𑒏 𑒁𑒙𑓂𑒙𑒯𑒰𑒮𑒮𑒿 𑒫𑒱𑒏𑒪।
𑒂𑒿𑒑𑒰 𑒮𑓂𑒤𑒙𑒱𑒏 𑒤𑒩𑓂𑒬 𑒕𑒪 𑒖𑒏𑒩𑒰 𑒥𑒳𑒗𑒪, 𑒣𑒰𑒢𑒱 𑒦𑒩𑒪 𑒦𑒲𑒖𑒪 𑒕𑒪 𑒮𑒦 𑒯𑒿𑒮𑒪।
𑒁𑒣𑒧𑒰𑒢𑒱𑒞 𑒕𑒪 𑒪𑒋 𑒨𑒳𑒡𑒱𑒭𑓂𑒚𑒱𑒩𑒮𑒿 𑒂𑒖𑓂𑒘𑒰, 𑒔𑒪𑒪 𑒯𑒮𑓂𑒞𑒱𑒢𑒰𑒣𑒳𑒩 𑒬𑒲𑒒𑓂𑒩𑒯𑒱 𑒮𑒦 𑒦𑓂𑒩𑒰𑒞𑒰। 𑒏𑓂𑒩𑒼𑒡𑒱𑒞 𑒯𑒵𑒠𑒨 𑒄𑒩𑓂𑒭𑓂𑒨𑒰𑒏 𑒫𑒬𑒧𑒹 𑒕𑒪 𑒠𑒳𑒩𑓂𑒨𑒼𑒡𑒢, 𑒬𑒏𑒳𑒢𑒱 𑒮𑓀𑒑 𑒧𑓀𑒞𑓂𑒩𑒝𑒰 𑒏𑒋 𑒏𑓄𑒋𑒏𑒙𑒰 𑒫𑒱𑒔𑒰𑒩𑒪, 𑒮𑒼𑒗𑒹 𑒨𑒳𑒠𑓂𑒡𑒧𑒹 𑒣𑒰𑓀𑒛𑒫𑒏𑒹𑒿 𑒯𑒩𑒹𑒢𑒰𑒃 𑒁𑒕𑒱 𑒧𑒼𑒬𑓂𑒏𑒱𑒪, 𑒮𑒼𑒔𑒱 𑒄 𑒠𑒼𑒮𑒩 𑒫𑓂𑒨𑒴𑒯 𑒩𑒔𑒪𑒢𑓂𑒯𑒱 𑒠𑒳𑒭𑓂𑒙 𑒬𑒏𑒳𑒢𑒱।
𑒦𑒫𑓂𑒨 𑒮𑒦𑒰 𑒦𑒫𑒢 𑒋𑒏𑒙𑒰 𑒯𑒧 𑒮𑒦 𑒥𑒢𑒰𑒋𑒥,
𑒣𑒰𑒝𑓂𑒛𑒫-𑒖𑒢𑒏𑒹𑒿 𑒠𑒹𑒐𑒥𑒰 𑒪𑒹𑒪 𑒮𑒹𑒯𑒼 𑒥𑒖𑒰𑒋𑒥, 𑒠𑓂𑒨𑒴𑒞 𑒐𑒹𑒪𑒏 𑒕𑒲 𑒧𑒯𑒰𑒩𑒟𑒲 𑒯𑒧 𑒑𑒰𑓀𑒡𑒰𑒩𑒫𑒰𑒮𑒲, 𑒡𑒵𑒞𑒩𑒰𑒭𑓂𑒙𑓂𑒩𑒏𑒹𑒿 𑒏𑒯𑒱 𑒂𑒧𑓀𑒞𑓂𑒩𑒱𑒞 𑒏𑒩𑒰𑒆 𑒥𑒖𑒰𑒆। 𑒦𑒫𑒢 𑒥𑒢𑒱 𑒏𑒋 𑒞𑒻𑒨𑒰𑒩 𑒦𑒹𑒪 𑒋𑒏𑒹 𑒢𑒱𑒮𑒰𑒮𑒲।
𑒠𑓂𑒨𑒴𑒞 𑒐𑒹𑒪𑒏 𑒂𑒧𑓀𑒞𑓂𑒩𑒝𑒏 𑒯𑒹𑒞𑒳 𑒡𑒵𑒞𑒩𑒰𑒭𑓂𑒙𑓂𑒩 𑒫𑒱𑒔𑒰𑒩𑒪। 𑒫𑒱𑒠𑒳𑒩 𑒏𑒯𑒪 𑒩𑒰𑒖𑒢𑓂 𑒐𑒹𑒪 𑒏𑒩𑒞 𑒫𑒱𑒢𑒰𑒬 𑒮𑒦𑒏𑒹𑒿,
𑒠𑒳𑒩𑓂𑒨𑒼𑒡𑒢𑒏 𑒁𑓀𑒡𑒣𑓂𑒩𑒹𑒧𑒧𑒹 𑒡𑒵𑒞𑒩𑒰𑒭𑓂𑒙𑓂𑒩 𑒧𑒳𑒠𑒰 𑒢𑒯𑒱 𑒧𑒰𑒢𑒪।
𑒮𑓂𑒫𑒨𑓀 𑒫𑒱𑒠𑒳𑒩 𑒑𑒹𑒪𑒰𑒯 𑒠𑒹𑒥𑒋 𑒢𑒱𑒧𑓀𑒞𑓂𑒩𑒝 𑒃𑓀𑒠𑓂𑒩𑒣𑓂𑒩𑒮𑓂𑒟, 𑒣𑒰𑒝𑓂𑒛𑒫 𑒖𑒢𑒏𑒹𑒿 𑒁𑒋𑒪𑒰 𑒣𑒩 𑒦𑒹𑒪 𑒣𑓂𑒩𑒹𑒧-𑒧𑒱𑒪𑒢। 𑒧𑒳𑒠𑒰 𑒯𑒵𑒠𑒨𑒏 𑒫𑒱𑒭 𑒥𑒯𑒩𑒰𑒃𑒞 𑒖𑒪𑓂𑒠𑒲 𑒏𑒼𑒢𑒰 𑒏𑒋, 𑒠𑒳𑒩𑓂𑒨𑒼𑒡𑒢 𑒪𑒋 𑒑𑒹𑒪𑒰𑒯 𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒮𑒦𑒰 𑒦𑒫𑒢𑒧𑒹।
𑒠𑓂𑒨𑒴𑒞𑒏 𑒔𑒩𑓂𑒔 𑒮𑒑𑒩𑒨 𑒯𑒼𑒧𑒋 𑒪𑒑𑒪 𑒕𑒪 𑒍𑒞𑒋, 𑒬𑒏𑒳𑒢𑒱 𑒧𑒰𑒙𑒱 𑒤𑒹𑓀𑒏𑒱 𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒦𑓄 𑒖𑒰𑒋, 𑒮𑒏𑒳𑒔𑒰𑒃𑒞 𑒕𑒲 𑒏𑓂𑒭𑒞𑓂𑒩𑒱𑒨 𑒦𑓄 𑒏𑒩𑒋 𑒕𑒲 𑒁𑒢𑒳𑒔𑒱𑒞। 𑒨𑒳𑒡𑒱𑒭𑓂𑒚𑒱𑒩 𑒞𑒻𑒨𑒰𑒩 𑒖𑒐𑒢𑒹 𑒦𑒹𑒪𑒰𑒯, 𑒠𑒳𑓁𑒬𑒰𑒮𑒢 𑒏𑒯𑒪, 𑒄 𑒐𑒹𑒪 𑒯𑒼𑒋𑒞 𑒨𑒡𑒱𑒭𑓂𑒚𑒱𑒩 𑒂 𑒠𑒳𑒩𑓂𑒨𑒼𑒡𑒢𑒏 𑒥𑒱𑒔, 𑒧𑒰𑒧𑒰 𑒬𑒏𑒳𑒢𑒱 𑒣𑒰𑒮 𑒤𑒹𑓀𑒏𑒞𑒰𑒯 𑒠𑒳𑒩𑓂𑒨𑒼𑒡𑒢𑒏 𑒠𑒱𑒬𑒱𑒮𑒿, 𑒯𑒳𑒢𑒏 𑒯𑒰𑒩𑒱 𑒖𑒲𑒞 𑒧𑒰𑒢𑒪 𑒖𑒄𑒞 𑒠𑒳𑒩𑓂𑒨𑒼𑒡𑒢𑒏 𑒮𑒹, 𑒠𑒼𑒮𑒩 𑒠𑒱𑒢 𑒐𑒹𑒪 𑒦𑒹𑒪 𑒮𑒦𑒰 𑒦𑒫𑒢𑒧𑒹 𑒦𑒰𑒩𑒞𑒏 𑒯𑒹!! 𑒮𑒦𑒰 𑒦𑒫𑒢 𑒠𑒩𑓂𑒬𑒏𑒮𑒿 𑒕𑒪 𑒦𑒩𑒪,𑒕𑒪 𑒍𑒞𑒋,
𑒦𑒲𑒭𑓂𑒧, 𑒠𑓂𑒩𑒼𑒝, 𑒏𑒵𑒣𑒰𑒔𑒰𑒩𑓂𑒨, 𑒫𑒱𑒠𑒳𑒩, 𑒡𑒵𑒞𑒩𑒰𑒭𑓂𑒙𑓂𑒩 𑒅𑒣𑒮𑓂𑒟𑒱𑒞।
𑒣𑒯𑒱𑒢𑒹 𑒩𑒞𑓂𑒢𑒏 𑒥𑒰𑒖𑒲 𑒤𑒹𑒩 𑒔𑒰𑒢𑒲-𑒮𑒼𑒢𑒏 𑒪𑒰𑒑𑒪, 𑒤𑒹𑒩 𑒕𑒪 𑒮𑒦𑒏 𑒁𑒬𑓂𑒫-𑒩𑒟 𑒪𑒰𑒑𑒪 𑒖𑒳𑒂 𑒣𑒩 ।
𑒧𑒳𑒠𑒰 𑒖𑒐𑒢 𑒞𑒲𑒢𑒴 𑒙𑒰 𑒥𑒰𑒖𑒲 𑒨𑒳𑒡𑒱𑒭𑓂𑒚𑒱𑒩 𑒯𑒰𑒩𑒪, 𑒮𑒾𑒿𑒮𑒹 𑒮𑒹𑒢𑒰 𑒪𑒑𑒰𑒍𑒪 𑒠𑒰𑒿𑒫 𑒣𑒩 𑒍 𑒁𑒦𑒰𑒑𑒪। 𑒤𑒹𑒩 𑒥𑒹𑒩 𑒂𑒋𑒪 𑒩𑒰𑒖𑓂𑒨𑒏 𑒤𑒹𑒩 𑒔𑒰𑒩𑒴 𑒦𑒰𑒿𑒨 𑒏𑒹𑒩, 𑒨𑒳𑒡𑒱𑒭𑓂𑒚𑒱𑒩 𑒥𑒰𑒖𑒪 𑒢𑒯𑒱 𑒥𑒔𑒪 𑒪𑒑 𑒯𑒧𑒩𑒰 𑒪𑒹𑒪।
𑒬𑒏𑒳𑒢𑒱 𑒏𑒯𑒪 𑒕𑒟𑒱 𑒠𑓂𑒩𑒾𑒣𑒠𑒲 𑒁𑒯𑒰𑒿𑒏 𑒥𑒱𑒔𑒧𑒹। 𑒋𑒯𑒱 𑒥𑒹𑒩 𑒖𑓂𑒨𑒼𑒿 𑒖𑒲𑒞𑒥 𑒁𑒯𑒰𑒿, 𑒠𑒋 𑒠𑒹𑒥 𑒯𑒧 𑒮𑒦, 𑒦𑒰𑒃,𑒩𑒰𑒖𑓂𑒨𑒮𑒹𑒢𑒰,𑒁𑒬𑓂𑒫-𑒩𑒟,𑒩𑒞𑓂𑒢 𑒔𑒰𑒢𑒲 𑒮𑒼𑒢 𑒮𑒦।
𑒨𑒳𑒡𑒱𑒭𑓂𑒚𑒱𑒩 𑒮𑒳𑒢𑒱 𑒄 𑒦𑓄 𑒑𑒹𑒪 𑒕𑒪 𑒞𑒻𑒨𑒰𑒩 𑒖𑒐𑒢𑒹, 𑒯𑒰। 𑒡𑒱𑒏𑓂। 𑒣𑒰𑒣𑒏𑒩𑓂𑒧 𑒏𑒲 𑒦𑒋 𑒩𑒯𑒪 𑒁𑒕𑒱 𑒄। 𑒮𑒦𑒰 𑒥𑒱𑒔 𑒅𑒚𑒱 𑒣𑒛𑓃𑒪 𑒮𑒦𑒏 𑒢𑒰𑒠 𑒄 𑒮𑒦। 𑒨𑒳𑒡𑒱𑒭𑓂𑒚𑒱𑒩 𑒮𑒹𑒯𑒼 𑒏𑒯𑒪 𑒯𑒧 𑒏𑒋𑒪𑒯𑒳𑒿 𑒏𑒲 𑒄 ?
𑒂𑒢𑒢𑓂𑒠 𑒧𑒑𑓂𑒢 𑒏𑒾𑒩𑒫 𑒕𑒪, 𑒧𑒳𑒠𑒰 𑒮𑓀𑒞𑒣𑓂𑒞 𑒋𑒏𑒹𑒙𑒰, 𑒠𑒳𑒩𑓂𑒨𑒼𑒡𑒢-𑒦𑓂𑒩𑒰𑒞𑒰 𑒨𑒳𑒨𑒳𑒞𑓂𑒮𑒳 𑒕𑒪 𑒬𑒼𑒏𑒰𑒏𑒳𑒪 𑒮𑒋𑒯 𑒙𑒰, 𑒬𑒏𑒳𑒢𑒱 𑒂𑒥 𑒋𑒯𑒱 𑒮𑒦𑒏 𑒥𑒲𑒔, 𑒤𑒹𑒏𑒪𑒏 𑒣𑒰𑒮𑒰, 𑒄 𑒥𑒰𑒖𑒲 𑒯𑒧𑒩, 𑒯𑒳𑓀𑒏𑒰𑒩𑒪𑒏 𑒬𑒏𑒳𑒢𑒱 𑒯𑒰𑒩𑒪 𑒨𑒳𑒡𑒱𑒭𑓂𑒚𑒱𑒩 !!
𑒠𑓂𑒩𑒾𑒣𑒠𑒲𑒏𑒹𑒿 𑒯𑒰𑒩𑒱 𑒚𑒏𑒰𑒋𑒪 𑒚𑒰𑒜𑓃 𑒕𑒪 𑒮𑒦𑒰 𑒥𑒱𑒔।
𑒦𑒨 𑒧𑒠𑒰𑒢𑓂𑒡 𑒠𑒳𑒩𑓂𑒨𑒼𑒡𑒢 𑒏𑒯𑒪 𑒯𑒹 𑒫𑒱𑒠𑒳𑒩,
𑒖𑒰𑒆 𑒮𑒧𑒰𑒔𑒰𑒩 𑒄 𑒠𑓂𑒩𑒾𑒣𑒠𑒲𑒏𑒹𑒿 𑒖𑒰𑒋 𑒮𑒳𑒢𑒰𑒆।
𑒕𑒟𑒱 𑒍 𑒯𑒧𑒩 𑒠𑒰𑒮𑒲 𑒗𑒰𑒛𑓃𑒴-𑒥𑒯𑒰𑒩𑒴 𑒏𑒩𑒟𑒱,
𑒧𑒯𑒪𑒧𑒹 𑒂𑒥𑒱 𑒯𑒧𑒩 𑒄 𑒂𑒠𑒹𑒬 𑒮𑒳𑒢𑒰𑒆।
𑒫𑒱𑒠𑒳𑒩 𑒏𑒯𑒪 𑒎 𑒠𑒳𑒩𑓂𑒨𑒼𑒡𑒢 𑒒𑒧𑒝𑓂𑒛 𑒕𑒼𑒛𑓃𑒴,
𑒮𑓂𑒞𑓂𑒩𑒲𑒏 𑒖𑒳𑒂𑒩𑒲 𑒁𑒯𑒰𑒿 𑒯𑒧𑒩𑒰 𑒢𑒯𑒱 𑒥𑒳𑒗𑒳।
𑒠𑒹𑒐𑒱 𑒫𑒱𑒠𑒳𑒩𑒏 𑒄 𑒩𑒴𑒣 𑒣𑒚𑒰𑒍𑒪 𑒫𑒱𑒏𑒩𑓂𑒝𑒏𑒹𑒿,
𑒖𑒰𑒆 𑒠𑒰𑒮𑒲 𑒠𑓂𑒩𑒾𑒣𑒠𑒲𑒏𑒹𑒿 𑒖𑒰𑒋 𑒂𑒢𑒴 𑒑𑒋,
𑒫𑒱𑒏𑒩𑓂𑒝 𑒄 𑒠𑓂𑒩𑒾𑒣𑒠𑒲 𑒪𑒑 𑒏𑒯𑒱 𑒮𑒳𑒢𑒰𑒍𑒪।
𑒔𑒏𑒱𑒞 𑒠𑓂𑒩𑒾𑒣𑒠𑒲 𑒏𑒯𑒪 𑒮𑓂𑒫𑒨𑓀𑒏𑒹𑒿 𑒖𑒹 𑒯𑒰𑒩𑒪,
𑒨𑒳𑒡𑒱𑒭𑓂𑒚𑒱𑒩 𑒏𑒼𑒢𑒰𑒏𑒹𑒿 𑒁𑒡𑒱𑒏𑒰𑒩 𑒄 𑒣𑒰𑒍𑒪,
𑒁𑒣𑒢 𑒯𑒰𑒩𑒱𑒏 𑒥𑒰𑒠 𑒯𑒼𑒋𑒞 𑒏𑓂𑒨𑒼 𑒮𑒏𑓂𑒭𑒧,
𑒠𑒼𑒮𑒩𑒏𑒹𑒿 𑒯𑒹𑒞𑒳 𑒖𑒳𑒂𑒧𑒹 𑒪𑒑𑒰𑒥𑒋 𑒏𑒹𑒯𑒢।
𑒄 𑒣𑓂𑒩𑒬𑓂𑒢 𑒖𑒐𑒢 𑒩𑒰𑒐𑒪 𑒫𑒱𑒏𑒩𑓂𑒝 𑒮𑒦𑒰 𑒥𑒲𑒔 𑒂𑒥𑒱,
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒠𑒳𑓁𑒬𑒰𑒮𑒢 𑒖𑒰𑒆 𑒣𑒏𑒛𑓃𑒱𑒏𑒹𑒿 𑒪𑒰𑒆।
𑒥𑒳𑒗𑒰𑒍𑒪 𑒠𑓂𑒩𑒾𑒣𑒠𑒲 𑒠𑒳𑓁𑒬𑒰𑒮𑒢𑒏𑒹𑒿, 𑒖𑒐𑒢 𑒢𑒹 𑒧𑒰𑒢𑒪,
𑒦𑒰𑒑𑒪𑒱 𑒑𑒰𑓀𑒡𑒰𑒩𑒲𑒏 𑒦𑒫𑒢 𑒠𑒱𑒬𑒱, 𑒠𑒾𑒑𑒪 𑒠𑒳𑓁𑒬𑒰𑒮𑒢,
𑒐𑒴𑒖𑒪 𑒏𑒹𑒬𑒏𑒹𑒿 𑒣𑒏𑒛𑓃𑒱 𑒒𑒱𑒮𑒱𑒁𑒍𑒢𑒹 𑒕𑒪 𑒂𑒢𑒪।
𑒯𑒰! 𑒦𑒰𑒩𑒞 ! 𑒥𑓂𑒨𑒰𑒮 𑒧𑒳𑒠𑒰 𑒢𑒯𑒱 𑒁𑒯𑒰𑒿 𑒏𑒼𑒢𑒼 𑒞𑒟𑓂𑒨 𑒢𑒳𑒏𑒰𑒍𑒪 ।
𑒮𑒧𑓂𑒥𑒪 𑒅𑒠𑒰𑒩 𑒦𑒰𑒫𑒢𑒰𑒏 𑒠𑒹𑒪, 𑒞𑒳𑒭𑓂𑒙𑒱 𑒣𑒰𑒍𑒪!!
𑒮𑒦𑒰 𑒦𑒫𑒢 𑒧𑒯𑒰𑒣𑒳𑒩𑒳𑒭 𑒢𑒯𑒱 𑒟𑒼𑒛𑓃 𑒖𑒞𑒋 𑒕𑒪।
𑒦𑒲𑒭𑓂𑒧, 𑒫𑒱𑒠𑒳𑒩, 𑒠𑓂𑒩𑒼𑒝, 𑒏𑒵𑒣𑒰 𑒪𑒰𑒖𑒏 𑒪𑒹𑒪 𑒑𑒼𑒿𑒞𑒢𑒹,
𑒑𑒰𑒩𑒱 𑒧𑒰𑒟 𑒠𑒹𑒐𑒱 𑒩𑒯𑒪 𑒠𑓂𑒩𑒾𑒣𑒠𑒲𑒏 𑒁𑒬𑓂𑒩𑒳𑒣𑒰𑒞।
𑒮𑒱𑓀𑒯𑒢𑒰𑒠𑒧𑒹 𑒦𑒲𑒧 𑒞𑒐𑒢 𑒄 𑒥𑒰𑒖𑒪,
𑒮𑒴𑒩𑓂𑒨 𑒠𑒹𑒫𑒞𑒰𑒑𑒝 𑒩𑒯𑒥 𑒮𑒰𑒏𑓂𑒭𑒲 𑒁𑒯𑒰𑒿 𑒮𑒦,
𑒯𑒰𑒟𑒮𑒿 𑒠𑒳𑓁𑒬𑒰𑒮𑒢 𑒏𑒹𑒬 𑒠𑓂𑒩𑒾𑒣𑒠𑒲𑒏𑒹𑒿 𑒡𑒋𑒢𑒹,
𑒅𑒐𑒰𑒛𑓃𑒱 𑒤𑒹𑓀𑒏𑒥 𑒯𑒰𑒟 𑒍𑒏𑒩 𑒍 𑒠𑒴𑒢𑒴।
𑒏𑒾𑒩𑒫 𑒦𑒋 𑒮𑒿 𑒦𑒲𑒞 𑒦𑒹𑒪𑒰𑒯 𑒢𑒰𑒠𑒮𑒿 𑒦𑒲𑒧𑒏,
𑒠𑒳𑒩𑓂𑒨𑒼𑒡𑒢 𑒠𑒹𑒐𑒪 𑒧𑒳𑒠𑒰 𑒠𑒹𑒐𑒱 𑒄 𑒕𑒪 𑒥𑒰𑒖𑒪,
𑒖𑒰𑒿𑒒 𑒣𑒩 𑒠𑒻𑒞 𑒟𑒼𑒣𑒛𑓃𑒲 𑒏𑒩𑒻𑒞 𑒒𑒵𑒝𑒱𑒞 𑒃𑒬𑒰𑒩𑒰,
𑒠𑓂𑒩𑒾𑒣𑒠𑒲𑒏𑒹𑒿 𑒥𑒻𑒮𑒥𑒰 𑒪𑒋 𑒍𑒞𑒋 𑒏𑒯𑒻𑒞 𑒕𑒪।
𑒑𑒩𑒖𑒱 𑒏𑒯𑒪 𑒦𑒲𑒧 𑒁𑒡𑒧 𑒠𑒳𑒩𑓂𑒨𑒼𑒡𑒢𑒮𑒿,
𑒞𑒼𑒯𑒩 𑒖𑒰𑒿𑒒𑒏𑒹𑒿 𑒞𑒼𑒛𑒥 𑒣𑓂𑒩𑒔𑒝𑓂𑒛 𑒑𑒠𑒰𑒮𑒿।
𑒐𑒱𑒮𑒱𑒨𑒰𑒏𑒹𑒿 𑒠𑒳𑒩𑓂𑒨𑒼𑒡𑒢 𑒠𑒹𑒪𑒏 𑒄 𑒂𑒖𑓂𑒘𑒰 𑒣𑒳𑒢𑓁 𑒄,
𑒔𑒲𑒩-𑒯𑒩𑒝 𑒏𑒩𑒴 𑒠𑒳𑓁𑒬𑒰𑒮𑒢 𑒠𑓂𑒩𑒾𑒣𑒠𑒲 𑒠𑒰𑒮𑒲 𑒕𑒲।
𑒠𑓂𑒩𑒾𑒣𑒠𑒲 𑒏𑒋𑒪𑒢𑓂𑒯𑒱 𑒢𑒹𑒯𑒼𑒩𑒰 𑒬𑓂𑒩𑒹𑒭𑓂𑒚 𑒪𑒼𑒏𑒢𑒱𑒮𑒿
𑒫𑒱𑒢𑒨 𑒄 𑒁𑒕𑒱 𑒪𑒰𑒖 𑒥𑒔𑒰𑒆 𑒏𑒩𑒻𑒞 𑒕𑒲 𑒫𑒱𑒢𑒞𑒲।
𑒮𑒦 𑒏𑓂𑒨𑒼 𑒗𑒳𑒏𑒰 𑒧𑒰𑒟 𑒁𑒣𑒢 𑒍𑒯𑒱 𑒮𑒦𑒰𑒧𑒹,
𑒏𑒵𑒭𑓂𑒝𑒰 𑒕𑒼𑒛𑓃𑒪 𑒮𑒦 𑒂𑒬 𑒮𑒦 𑒠𑒱𑒬𑒰𑒮𑒿,
𑒦𑒏𑓂𑒞𑓂𑒞 𑒫𑒞𑓂𑒮𑒪 𑒁𑒯𑒰𑒿𑒮𑒿 𑒙𑒰 𑒁𑒕𑒱 𑒄 𑒂𑒬𑒰,
𑒏𑒼𑒯𑒳𑒢𑒰 𑒩𑒰𑒐𑒴 𑒯𑒧𑒩 𑒄 𑒪𑒰𑒖 𑒁𑒕𑒱 𑒣𑓂𑒩𑒞𑓂𑒨𑒰𑒬𑒰।
𑒂𑒩𑓂𑒠𑓂𑒩-𑒮𑓂𑒫𑒩𑒮𑒿 𑒕𑒪𑒱 𑒩𑒯𑒪𑒱 𑒣𑒳𑒏𑒰𑒩𑒱 𑒠𑓂𑒩𑒾𑒣𑒠𑒲,
𑒑𑒼𑒯𑒰𑒛𑓃𑒱 𑒐𑒮𑒪𑒱 𑒮𑒦𑒰-𑒥𑒱𑒔, 𑒧𑒴𑒩𑓂𑒔𑓂𑒕𑒱𑒞 ।
𑒪𑒰𑒑𑒪 𑒐𑒲𑒔𑒨 𑒠𑓂𑒩𑒾𑒣𑒠𑒲𑒏 𑒫𑒮𑓂𑒞𑓂𑒩 𑒠𑒳𑓁𑒬𑒰𑒮𑒢,
𑒮𑒦𑒰𑒮𑒠 𑒠𑒹𑒐𑒪 𑒔𑒧𑒞𑓂𑒏𑒰𑒩 𑒄 𑒣𑓂𑒩𑒞𑒱𑒣𑒪,
𑒨𑒰𑒫𑒞 𑒩𑒯𑒪 𑒐𑒱𑓀𑒔𑒻𑒞 𑒫𑒮𑓂𑒞𑓂𑒩𑒏𑒹𑒿 𑒠𑒳𑓁𑒬𑒰𑒮𑒢,
𑒥𑒜𑓃𑒻𑒞 𑒩𑒯𑒪 𑒫𑒮𑓂𑒞𑓂𑒩 𑒠𑓂𑒩𑒾𑒣𑒠𑒲𑒏 𑒞𑒰𑒫𑒞 𑒞𑒐𑒢।
𑒟𑒰𑒏𑒱-𑒯𑒰𑒿𑒤𑒱 𑒥𑒻𑒮𑒪 𑒖𑒐𑒢 𑒠𑒳𑓁𑒬𑒰𑒮𑒢,
𑒏𑒯𑒪 𑒦𑒲𑒧 𑒮𑒳𑒢𑒴 𑒮𑒦 𑒋𑒯𑒱 𑒦𑒫𑒢𑒧𑒹,
𑒨𑒰𑒫𑒞 𑒤𑒰𑒛𑓃𑒱 𑒕𑒰𑒞𑒲 𑒠𑒳𑓁𑒬𑒰𑒮𑒢𑒏 𑒆𑒭𑓂𑒧 𑒩𑒳𑒡𑒱𑒩𑒏𑒹𑒿,
𑒣𑒲𑒨𑒥, 𑒢𑒯𑒱 𑒣𑒱𑒨𑒰𑒮 𑒧𑒹𑒙𑒞 𑒧𑒵𑒞𑓂𑒨𑒳 𑒦𑒹𑒙𑒞 𑒢𑒯𑒱।
𑒮𑒳𑒢𑒱 𑒣𑓂𑒩𑒞𑒱𑒖𑓂𑒘𑒰 𑒄 𑒮𑒦 𑒦𑒨𑒮𑒿 𑒟𑒛𑓃𑒟𑒛𑓃𑒰𑒋 𑒪𑒰𑒑𑒪 𑒕𑒪।
𑒡𑒵𑒞𑒩𑒰𑒭𑓂𑒙𑓂𑒩 𑒠𑒹𑒐𑒱 𑒠𑒳𑒩𑓂𑒒𑒙𑒢𑒰 𑒠𑓂𑒩𑒾𑒣𑒠𑒲𑒏𑒹𑒿 𑒪𑒑𑒧𑒹 𑒥𑒖𑒰𑒍𑒪,
𑒮𑒰𑓀𑒞𑓂𑒫𑒢𑒰 𑒠𑒋 𑒬𑒰𑓀𑒞 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩𑒮𑒿 𑒕𑒪 𑒥𑒰𑒖𑒪,
𑒥𑒱𑒮𑒩𑒱 𑒖𑒰𑒆 𑒃𑒢𑓂𑒠𑓂𑒩𑒣𑓂𑒩𑒮𑓂𑒟 𑒮𑒳𑒐-𑒬𑒰𑓀𑒞𑒱𑒮𑒿 𑒩𑒯𑒋 𑒖𑒰𑒅,
𑒖𑒹 𑒯𑒰𑒛𑓃𑒪𑒯𑒳𑒿, 𑒮𑒹 𑒥𑒳𑒗𑒴 𑒠𑒹𑒪 𑒯𑒧 𑒚𑒰𑒧𑒯𑒱 𑒪𑒾𑒙𑒰𑒋𑒪 ।
𑒮𑓀𑒞𑒼𑒭 𑒦𑒹𑒪𑒢𑓂𑒯𑒱 𑒣𑒰𑒝𑓂𑒛𑒫-𑒖𑒢𑒏𑒹𑒿 𑒄 𑒮𑒳𑒢𑒱,
𑒏𑒟𑒰 𑒡𑒵𑒞𑒩𑒰𑒭𑓂𑒙𑓂𑒩𑒏 𑒒𑒳𑒩𑒪𑒰𑒯 𑒃𑒢𑓂𑒠𑓂𑒩𑒣𑓂𑒩𑒮𑓂𑒟 𑒣𑒳𑒢𑒱।
𑒠𑒳𑒩𑓂𑒨𑒼𑒡𑒢 𑒠𑒳𑓁𑒐𑒱𑒞 𑒧𑓀𑒞𑓂𑒩𑒝𑒰 𑒏𑒋𑒪 𑒬𑒏𑒳𑒢𑒱𑒮𑒿,
𑒮𑓀𑒑 𑒠𑒳𑓁𑒬𑒰𑒮𑒢 𑒏𑒩𑓂𑒝𑒏 𑒧𑓀𑒞𑓂𑒩𑒝𑒰 𑒤𑒹𑒩 𑒖𑒳𑒂𑒏,
𑒫𑒱𑒢𑒰𑒬𑒏 𑒯𑒮𑓂𑒞𑒱𑒢𑒰𑒣𑒳𑒩𑒏 𑒕𑒪 𑒥𑒹𑒩 𑒐𑒩𑒰𑒣।
𑒋𑒯𑒱 𑒥𑒹𑒩𑒏 𑒢𑒱𑒁𑒧 𑒩𑒰𑒐𑒪 𑒯𑒰𑒩𑒞 𑒖𑒹 𑒮𑒹 𑒏𑒩𑒞,
𑒥𑒰𑒩𑒯 𑒫𑒩𑓂𑒭𑒏 𑒫𑒢𑒫𑒰𑒮 𑒂 𑒋𑒏 𑒫𑒩𑓂𑒭 𑒁𑒖𑓂𑒘𑒰𑒞𑒫𑒰𑒮।
𑒡𑒵𑒞𑒩𑒰𑒭𑓂𑒙𑓂𑒩 𑒠𑒴𑒞 𑒣𑒚𑒰𑒍𑒪 𑒯𑒮𑓂𑒞𑒱𑒢𑒰𑒣𑒳𑒩 𑒤𑒹𑒩।
𑒨𑒳𑒡𑒱𑒭𑓂𑒚𑒱𑒩 𑒒𑒳𑒩𑒪𑒰𑒯 𑒦𑒰𑒋𑒏 𑒮𑓀𑒑 𑒥𑒹𑒩-𑒁𑒥𑒹𑒩,
𑒮𑒳𑒢𑒰𑒍𑒪 𑒑𑒹𑒪 𑒬𑒩𑓂𑒞𑓂𑒞 𑒮𑒦 𑒩𑒼𑒏𑒪 𑒋𑒏 𑒥𑒹𑒩।
𑒧𑒳𑒠𑒰 𑒦𑒰𑒑𑓂𑒨𑒩𑒰𑒖𑒏 𑒂𑒑𑒰𑒿 𑒏𑒏𑒩 𑒁𑒕𑒱 𑒔𑒪𑒪,
𑒢𑒯𑒱 𑒧𑒰𑒢𑒪 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩 𑒦𑒰𑒑𑓂𑒨𑒏 𑒐𑒹𑒪!
𑒔𑒪𑒱 𑒤𑒹𑒩 𑒣𑒰𑒮𑒰 𑒠𑒳𑒩𑓂𑒨𑒼𑒡𑒢𑒏, 𑒫𑒻𑒯 𑒐𑒹𑒩𑒯𑒰,
𑒤𑒹𑓀𑒏𑒱 𑒑𑒼𑒙𑒲 𑒖𑒱𑒞𑒰𑒍𑒪 𑒬𑒏𑒳𑒢𑒱 𑒍𑒏𑒩𑒰।
𑒯𑒰𑒩𑒱 𑒯𑒰𑒩𑒪 𑒩𑒰𑒖𑓂𑒨, 𑒣𑒰𑒍𑒪 𑒕𑒪 𑒥𑒢𑒥𑒰𑒮,
𑒨𑒳𑒡𑒱𑒭𑓂𑒚𑒱𑒩𑒏 𑒦𑒰𑒑𑓂𑒨 𑒔𑒰𑒪𑒱 𑒏𑒳𑒔𑒰𑒪𑒱𑒏 𑒖𑒲𑒞,
𑒩𑒰𑒖𑓂𑒨𑒏 𑒢𑒱𑒩𑓂𑒝𑒨 𑒖𑒳𑒂𑒏 𑒑𑒼𑒙𑒲𑒏 𑒮𑓀𑒑𑒲𑒞,
𑒏𑒲 𑒯𑒼𑒋𑒞 𑒮𑒹 𑒢𑒘𑒱 𑒖𑒰𑒢𑒱 𑒮𑒳𑒢𑓂𑒢 𑒁𑒏𑒰𑒮।
𑒡𑒩𑓂𑒧𑒩𑒰𑒖 𑒮𑒦 𑒯𑒰𑒩𑒱,
𑒔𑒪𑒪 𑒤𑒹𑒩 𑒫𑒻𑒯 𑒣𑒟,
𑒡𑒩𑓂𑒧𑒏 𑒂 𑒬𑒰𑒢𑓂𑒞𑒱𑒏,
𑒕𑒼𑒛𑓃𑒱 𑒮𑒦 𑒥𑒱𑒮𑒰𑒩𑒱।
𑒧𑒰𑒞𑒰 𑒏𑒳𑒢𑓂𑒞𑒲 𑒕𑒪𑒱 𑒫𑒵𑒠𑓂𑒡𑒰 𑒦𑒹𑒪𑒱 𑒏𑒯𑒪,
𑒏𑒯𑒪 𑒡𑒩𑓂𑒧𑒩𑒰𑒖 𑒢𑒘𑒱 𑒖𑒰 𑒮𑒏𑒥 𑒁𑒯𑒰𑒿,
𑒫𑒱𑒠𑒳𑒩 𑒏𑒰𑒏 𑒏𑒹𑒩 𑒒𑒩 𑒖𑒰 𑒩𑒯𑒥,
𑒖𑒰𑒋𑒥 𑒏𑒩𑓂𑒧 𑒦𑒼𑒑𑒋 𑒯𑒧 𑒮𑒦।
𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩 𑒂 𑒣𑒳𑒞𑓂𑒩 𑒁𑒦𑒱𑒧𑒢𑓂𑒨𑒳𑒏,
𑒮𑒳𑒦𑒠𑓂𑒩𑒰 𑒖𑒋𑒞𑒲𑒯 𑒁𑒣𑒢 𑒢𑒻𑒯𑒩 𑒠𑓂𑒫𑒰𑒩𑒏𑒰𑒣𑒳𑒩।
𑒡𑒾𑒧𑓂𑒨 𑒣𑒳𑒩𑒯𑒱𑒞 𑒮𑓀𑒑 𑒠𑓂𑒩𑒾𑒣𑒠𑒲 𑒂 𑒔𑒰𑒩𑒴 𑒦𑒰𑒋,
𑒏𑒰𑒙𑒥 𑒯𑒧 𑒮𑓀𑒑 𑒞𑒹𑒩𑒯 𑒫𑒩𑓂𑒭𑒏 𑒫𑒢𑒫𑒰𑒮 𑒖𑒰𑒋।
𑒢𑒑𑒩𑒫𑒰𑒮𑒲 𑒮𑒳𑒢𑒱 𑒑𑒧𑒢𑒏 𑒄 𑒮𑒧𑒰𑒔𑒰𑒩,
𑒏𑒋𑒪𑒢𑓂𑒯𑒱 𑒠𑒳𑒩𑓂-𑒠𑒳𑒩 𑒠𑒳𑒩𑓂𑒨𑒼𑒡𑒢𑒏 𑒁𑒞𑓂𑒨𑒰𑒔𑒰𑒩।
𑒖𑒰𑒋𑒥 𑒯𑒧𑒯𑒳𑒿 𑒮𑒦 𑒮𑓀𑒑, 𑒡𑒩𑓂𑒧𑒩𑒰𑒖 𑒂𑒃,
𑒡𑒩𑓂𑒧𑒩𑒰𑒖 𑒒𑒳𑒩𑒰𑒍𑒪 𑒮𑒦𑒏𑒹𑒿 𑒥𑒳𑒗𑒰𑒋 𑒖𑒰𑒋।
𑒮𑒦 𑒒𑒳𑒩𑒱 𑒑𑒹𑒪 𑒧𑒳𑒠𑒰, 𑒢𑒯𑒱 𑒒𑒳𑒩𑒪 𑒫𑒱𑒣𑓂𑒩 𑒖𑒢,
𑒣𑒳𑒩𑒯𑒱𑒞 𑒏𑒋𑒪𑒢𑓂𑒯𑒱 𑒅𑒣𑒰𑒮𑒢𑒰 𑒮𑒴𑒩𑓂𑒨𑒏 𑒋𑒯𑒱 𑒏𑓂𑒭𑒝।
𑒫𑒻𑒯 𑒠𑒻𑒞 𑒕𑒟𑒱 𑒁𑒢𑓂𑒢-𑒤𑒪 𑒮𑒧𑒑𑓂𑒩 𑒂𑒩𑓂𑒨,
𑒅𑒣𑒰𑒮𑒢𑒰𑒏 𑒅𑒣𑒩𑒰𑒢𑓂𑒞 𑒣𑓂𑒩𑒑𑒙 𑒦𑒹𑒪𑒰𑒯 𑒮𑒴𑒩𑓂𑒨।
𑒠𑒹𑒪𑒢𑓂𑒯𑒱 𑒁𑒏𑓂𑒭𑒨 𑒣𑒰𑒞𑓂𑒩 𑒢𑒯𑒱 𑒏𑒧 𑒯𑒼𑒋𑒞 𑒁𑒢𑓂𑒢,
𑒠𑓂𑒩𑒾𑒣𑒠𑒲 𑒮𑒦 𑒫𑒱𑒣𑓂𑒩𑒏𑒹𑒿 𑒂 𑒣𑒰𑒝𑓂𑒛𑒫𑒏𑒹𑒿 𑒐𑒼𑒂𑒥𑒟𑒱,
𑒤𑒹𑒩 𑒐𑒰𑒟𑒱, 𑒮𑒦 𑒁𑒒𑒰𑒟𑒱, 𑒢𑒘𑒱 𑒯𑒼𑒋 𑒐𑒞𑒧,
𑒖𑒐𑒢 𑒢𑒘𑒱 𑒯𑒼𑒋 𑒐𑒞𑒧 𑒣𑒰𑒞𑓂𑒩𑒮𑒿 𑒐𑒰𑒠𑓂𑒨𑒰𑒢𑓂𑒢।
𑒨𑒳𑒡𑒱𑒭𑓂𑒚𑒱𑒩 𑒣𑒯𑒳𑒿𑒔𑒱 𑒮𑒩𑒮𑓂𑒫𑒞𑒲 𑒡𑒰𑒩𑒏 𑒏𑒰𑒞,
𑒏𑒰𑒧𑓂𑒨𑒏 𑒫𑒢𑒧𑒹 𑒏𑒋𑒪𑒢𑓂𑒯𑒱 𑒢𑒱𑒫𑒰𑒮।
𑒋𑒯𑒱 𑒥𑒲𑒔 𑒮𑒳𑒢𑒻𑒞 𑒣𑒰𑒝𑓂𑒛𑒫-𑒣𑓂𑒩𑒬𑓀𑒮𑒰 𑒧𑒳𑒿𑒯𑒮𑒿 𑒫𑒱𑒠𑒳𑒩𑒏,
𑒡𑒵𑒞𑒩𑒰𑒭𑓂𑒙𑓂𑒩 𑒢𑒱𑒏𑒰𑒪𑒱 𑒯𑒙𑒰𑒍𑒪 𑒫𑒱𑒠𑒳𑒩𑒏𑒹𑒿 𑒠𑒩𑒥𑒰𑒩-𑒧𑒡𑓂𑒨।
𑒍𑒯𑒼 𑒂𑒥𑒱 𑒪𑒑𑒪𑒰𑒯 𑒩𑒯𑒋 𑒏𑒰𑒧𑓂𑒨𑒏𑒫𑒢𑒧𑒹,
𑒣𑒳𑒢𑒱 𑒣𑒚𑒰𑒍𑒪 𑒡𑒵𑒞𑒩𑒰𑒭𑓂𑒙𑓂𑒩 𑒍𑒞𑒋 𑒮𑓀𑒖𑒨𑒏𑒹𑒿।
𑒣𑒰𑒝𑓂𑒛𑒫-𑒖𑒢𑒏 𑒥𑒳𑒗𑒍𑒪𑒰 𑒅𑒞𑓂𑒞𑒩 𑒫𑒱𑒠𑒳𑒩,
𑒡𑒵𑒞𑒩𑒰𑒭𑓂𑒙𑓂𑒩 𑒮𑒿𑒑 𑒑𑒹𑒪𑒰𑒯 𑒣𑒳𑒢𑒱 𑒠𑒩𑒥𑒰𑒩 𑒒𑒳𑒩𑒱।
𑒇𑒭𑒱-𑒧𑒳𑒢𑒱𑒏 𑒮𑒞𑓂𑒮𑓀𑒑𑒮𑒿 𑒪𑒻𑒞 𑒬𑒱𑒏𑓂𑒭𑒰 𑒂 𑒠𑒲𑒏𑓂𑒭𑒰,
𑒁𑒑𑒮𑓂𑒞𑓂𑒨𑒏, 𑒇𑒭𑒱 𑒬𑓂𑒩𑒵𑓀𑒑, 𑒁𑒭𑓂𑒙𑒰𑒫𑒏𑓂𑒩𑒏, 𑒪𑒼𑒣𑒰𑒧𑒳𑒠𑓂𑒩𑒰𑒏,
𑒮𑒳𑒢𑒻𑒞 𑒕𑒪𑒰𑒯 𑒏𑒟𑒰 𑒮𑒩𑒱𑒞𑒰 𑒢𑒪 𑒠𑒧𑒨𑒢𑓂𑒞𑒲𑒏 ।
𑒏𑒵𑒭𑓂𑒝 𑒂𑒥𑒱 𑒥𑒳𑒗𑒰𑒍𑒪 𑒥𑓂𑒨𑒰𑒮 𑒁𑒋𑒪𑒰𑒯 !!
𑒥𑓂𑒨𑒰𑒮 𑒏𑒯𑒪 𑒨𑒳𑒠𑓂𑒡𑒏 𑒯𑒹𑒞𑒳 𑒏𑒩𑒴 𑒞𑒻𑒨𑓂𑒨𑒰𑒩𑒲,
𑒥𑒱𑒢𑒳 𑒃𑒢𑓂𑒠𑓂𑒩𑒏 𑒁𑒧𑒼𑒒 𑒬𑒱𑒫𑒏 𑒣𑒰𑒬𑒳𑒣𑒞𑓂𑒨𑒰𑒯,
𑒏𑒼𑒢𑒰 𑒪𑒛𑓃𑒥 𑒮𑓀𑒑 𑒦𑒲𑒭𑓂𑒧 𑒠𑓂𑒩𑒼𑒝 𑒧𑒯𑒰𑒩𑒟𑒲 ?
𑒣𑒰𑒥𑒱 𑒨𑒳𑒡𑒱𑒭𑓂𑒚𑒱𑒩𑒏 𑒂𑒖𑓂𑒘𑒰 𑒔𑒪𑒪𑒰𑒯 𑒁𑒩𑓂𑒖𑒳𑒢,
𑒣𑒩𑓂𑒫𑒞 𑒏𑒻𑒪𑒰𑒮 𑒣𑒩 𑒣𑒰𑒩 𑒏𑒋 𑒏𑓄 𑒑𑓀𑒡𑒧𑒠𑒢।
𑒞𑒴𑒝𑒲𑒩 𑒂 𑒡𑒢𑒳𑒭 𑒯𑒳𑒢𑒏𑒩 𑒮𑓀𑒑𑒧𑒹 𑒕𑒪,
𑒮𑒰𑒡𑒳 𑒖𑒙𑒰𑒡𑒰𑒩𑒲 𑒞𑒣𑒮𑓂𑒫𑒲 𑒁𑒩𑓂𑒖𑒳𑒢𑒮𑒿 𑒣𑒳𑒕𑒪।
𑒄 𑒕𑒲 𑒞𑒣𑒼𑒦𑒴𑒧𑒱 𑒬𑒮𑓂𑒞𑓂𑒩𑒏 𑒏𑒰𑒖 𑒢𑒯𑒱 𑒏𑒼𑒢𑒼,
𑒁𑒩𑓂𑒖𑒳𑒢 𑒏𑒯𑒪 𑒯𑒧 𑒏𑓂𑒭𑒰𑒞𑓂𑒩 𑒡𑒩𑓂𑒧 𑒏𑒯𑒰𑒿 𑒕𑒼𑒛𑓃𑒪।
𑒞𑒰𑒫𑒞 𑒬𑒮𑓂𑒞𑓂𑒩 𑒮𑒹𑒯𑒼 𑒞𑒰𑒯𑒱 𑒠𑓂𑒫𑒰𑒩𑒹 𑒩𑒰𑒐𑒪 𑒁𑒕𑒱,
𑒣𑓂𑒩𑒮𑒢𑓂𑒢 𑒦𑒋 𑒃𑒢𑓂𑒠𑓂𑒩 𑒁𑒣𑒢 𑒁𑒮𑒪 𑒩𑒴𑒣 𑒡𑒩𑒪।
𑒧𑒰𑒿𑒑𑒴 𑒫𑒞𑓂𑒮 𑒫𑒩 𑒯𑒧𑒩𑒰𑒮𑒿 𑒣𑓂𑒩𑒮𑒢𑓂𑒢 𑒕𑒲 𑒯𑒧,
𑒬𑒱𑒏𑓂𑒭𑒰𑒏 𑒮𑓀𑒑 𑒠𑒱𑒫𑓂𑒨𑒰𑒮𑓂𑒞𑓂𑒩 𑒦𑒹𑒙𑒋 𑒋𑒯𑒱 𑒏𑓂𑒭𑒝।
𑒁𑒩𑓂𑒖𑒳𑒢 𑒁𑒯𑒰𑒿𑒏 𑒄 𑒪𑒰𑒪𑒮𑒰 𑒣𑒴𑒩𑓂𑒝 𑒯𑒼𑒋𑒞 𑒧𑒳𑒠𑒰,
𑒖𑒰𑒆 𑒬𑒱𑒫𑒏𑒹𑒿 𑒣𑓂𑒩𑒮𑒢𑓂𑒢 𑒏𑒋 𑒣𑒰𑒬𑒳𑒣𑒞 𑒣𑒰𑒆।
𑒤𑒹𑒩 𑒠𑒹𑒫𑒑𑒝 𑒠𑒹𑒞𑒰𑒯 𑒠𑒱𑒫𑓂𑒨𑒰𑒮𑓂𑒞𑓂𑒩 𑒁𑒯𑒰𑒿𑒏𑒹𑒿,
𑒄 𑒬𑒮𑓂𑒞𑓂𑒩 𑒮𑒦 𑒧𑒰𑒢𑒫 𑒣𑒩 𑒔𑒪𑒰𑒋𑒥 𑒁𑒕𑒱 𑒫𑒩𑓂𑒖𑒱𑒞,
𑒏𑒯𑒴 𑒁𑒯𑒰𑒿 𑒣𑒰𑒥𑒱 𑒏𑒩𑒥 𑒏𑒲 𑒠𑒱𑒫𑓂𑒨𑒰𑒮𑓂𑒞𑓂𑒩 𑒮𑒦 𑒄।
𑒬𑒏𑓂𑒞𑓂𑒞𑒱-𑒮𑓀𑒔𑒨 𑒁𑒕𑒱 𑒯𑒧𑒩 𑒅𑒠𑓂𑒠𑒹𑒬𑓂𑒨 𑒧𑒰𑒞𑓂𑒩 𑒠𑒹𑒫,
𑒏𑒾𑒩𑒫 𑒕𑒲𑒢𑒪 𑒁𑒕𑒱 𑒩𑒰𑒖𑓂𑒨 𑒕𑒪𑒮𑒿 𑒣𑒩𑒘𑓂𑒔,
𑒢𑒯𑒱 𑒏𑒩𑒥 𑒋𑒏𑒩 𑒏𑒼𑒢𑒼 𑒏𑒳𑒣𑓂𑒩𑒨𑒼𑒑 𑒢𑒯𑒱 𑒯𑒧।
𑒃𑒢𑓂𑒠𑓂𑒩𑒏 𑒁𑒢𑓂𑒞𑒩𑓂𑒡𑒰𑒢 𑒦𑒹𑒪𑒰𑒏 𑒅𑒞𑓂𑒞𑒩 𑒁𑒩𑓂𑒖𑒳𑒢𑒏,
𑒬𑒱𑒫 𑒞𑒣𑒮𑓂𑒨𑒰 𑒏𑒚𑒼𑒩 𑒕𑒪 𑒯𑒼𑒧𑒋 𑒪𑒰𑒑𑒪।
𑒞𑒐𑒢 𑒣𑒰𑒩𑓂𑒫𑒞𑒲 𑒮𑓀𑒑 𑒬𑒱𑒫 𑒔𑒪𑒪𑒰𑒯 𑒞𑒣𑒼𑒦𑒴𑒧𑒱,
𑒁𑒩𑓂𑒖𑒳𑒢 𑒣𑒳𑒭𑓂𑒣 𑒥𑒲𑒕𑒱 𑒩𑒯𑒪 𑒕𑒪𑒰𑒯 𑒁𑒥𑒻𑒞 𑒏𑓂𑒭𑒝,
𑒫𑒰𑒩𑒰𑒯 𑒫𑒢𑒮𑒿 𑒢𑒱𑒏𑒪𑒱 𑒏𑒋 𑒮𑒧𑓂𑒧𑒳𑒐 𑒂𑒋𑒪।
𑒖𑒐𑒢𑒯𑒱𑒿 𑒞𑒴𑒝𑒲𑒩 𑒡𑒢𑒳𑒭 𑒩𑒰𑒐𑒱 𑒮𑓀𑒡𑒰𑒢 𑒏𑒋𑒪𑒏,
𑒏𑒱𑒩𑒰𑒞 𑒫𑒩𑒰𑒯𑒏𑒹𑒿 𑒪𑒏𑓂𑒭𑓂𑒨 𑒏𑒋𑒢𑒹 𑒠𑒵𑒭𑓂𑒙𑒱 𑒂𑒋𑒪।
𑒠𑒳𑒢𑒴 𑒑𑒼𑒙𑒹 𑒔𑒪𑒰𑒍𑒪 𑒫𑒰𑒝 𑒫𑒰𑒩𑒰𑒯 𑒧𑒰𑒩𑒪,
𑒋𑒯𑒱 𑒥𑒰𑒞 𑒣𑒩 𑒠𑒳𑒯𑒴 𑒑𑒼𑒙𑒹 𑒗𑒑𑒛𑓃𑒰 𑒥𑒖𑒰𑒩𑒪।
𑒁𑒩𑓂𑒖𑒳𑒢𑒏 𑒑𑒣 𑒣𑒩 𑒖𑒐𑒢 𑒚𑒚𑒰𑒃𑒞 𑒏𑒱𑒩𑒰𑒞,
𑒁𑒩𑓂𑒖𑒳𑒢 𑒍𑒏𑒩𑒰 𑒣𑒩 𑒞𑒐𑒢 𑒫𑒰𑒝 𑒔𑒪𑒰𑒍𑒪,
𑒣𑒩𑒘𑓂𑒔 𑒠𑒹𑒐𑒱 𑒢𑒯𑒱 𑒒𑒰𑒫 𑒏𑒼𑒢𑒼 𑒣𑓂𑒩𑒏𑒰𑒩𑒏,
𑒁𑒩𑓂𑒖𑒳𑒢 𑒏𑒱𑒩𑒰𑒞 𑒣𑒩 𑒕𑒪 𑒞𑒪𑒫𑒰𑒩 𑒦𑒰𑒿𑒖𑒪।
𑒧𑒳𑒠𑒰 𑒏𑒱𑒩𑒰𑒞𑒏 𑒠𑒹𑒯𑒮𑒿 𑒙𑒏𑒰𑒩𑒰𑒃𑒞 𑒠𑒹𑒩𑒲,
𑒦𑒹𑒪 𑒁𑒩𑓂𑒖𑒳𑒢𑒏 𑒐𑒛𑓂𑒑𑒏 𑒙𑒳𑒏𑒛𑓃𑒲 𑒕𑒳𑒥𑒻𑒞 𑒠𑒹𑒩𑒲।
𑒧𑒪𑓂𑒪 𑒨𑒳𑒠𑓂𑒡 𑒬𑒳𑒩𑒴 𑒦𑒹𑒪 𑒦𑒹𑒪 𑒁𑒔𑒹𑒞 𑒁𑒩𑓂𑒖𑒳𑒢,
𑒅𑒚𑒪 𑒖𑒐𑒢 𑒬𑒳𑒩𑒴 𑒏𑒋𑒪 𑒣𑒴𑒖𑒢 𑒏𑒳𑒪𑒠𑒹𑒫𑒏 𑒍,
𑒣𑒳𑒭𑓂𑒣 𑒣𑒯𑒱𑒩𑒰𑒋 𑒬𑒱𑒫𑒏𑒹𑒿 𑒅𑒚𑒪 𑒑𑒩 𑒕𑒪 𑒍 𑒧𑒰𑒪𑒰,
𑒏𑒱𑒩𑒰𑒞𑒏 𑒑𑒩𑒠𑒢𑒱 𑒧𑒡𑓂𑒨, 𑒠𑒹𑒐𑒱 𑒮𑒰𑒭𑓂𑒙𑒰𑓀𑒑 𑒏𑒋𑒪 𑒞𑒯𑒱𑒐𑒢।
𑒏𑒱𑒩𑒰𑒞 𑒫𑒹𑒬𑒡𑒰𑒩𑒲 𑒬𑒱𑒫 𑒏𑒯𑒪 𑒫𑒩 𑒧𑒰𑒿𑒑 𑒁𑒩𑓂𑒖𑒳𑒢,
𑒣𑒰𑒬𑒳𑒣𑒞 𑒁𑒮𑓂𑒞𑓂𑒩 𑒧𑒰𑒿𑒑𑒪, 𑒕𑒼𑒛𑓃𑒥 𑒩𑒼𑒏𑒥 𑒋𑒏𑒩𑒰 𑒮𑒲𑒐𑒪 𑒣𑒳𑒢𑒱।
𑒬𑒱𑒫 𑒏𑒯𑒪 𑒥𑒳𑒗𑒴 𑒧𑒳𑒠𑒰 𑒄 𑒞𑒟𑓂𑒨 𑒁𑒕𑒱 𑒖𑒹,
𑒧𑒢𑒳𑒭𑓂𑒨𑒏 𑒆𑒣𑒩 𑒋𑒏𑒩 𑒣𑓂𑒩𑒨𑒼𑒑 𑒏𑒐𑒢𑒯𑒳 𑒏𑒩𑒥 𑒢𑒘𑒱।
𑒞𑒐𑒢 𑒁𑒩𑓂𑒖𑒳𑒢 𑒢𑒱𑒏𑒪𑒱 𑒑𑒹𑒪 𑒃𑒢𑓂𑒠𑓂𑒩𑒪𑒼𑒏 𑒠𑒱𑒬𑒰𑒧𑒹,
𑒣𑒰𑒥𑒱 𑒠𑒱𑒫𑓂𑒨 𑒁𑒮𑓂𑒞𑓂𑒩𑒏 𑒬𑒱𑒏𑓂𑒭𑒰 𑒧𑒰𑒩𑒪 𑒁𑒮𑒳𑒩 𑒍𑒯𑒱𑒮𑒿।
𑒋𑒏 𑒠𑒱𑒢𑒳𑒏 𑒑𑒣 𑒅𑒩𑓂𑒫𑒬𑒰 𑒂𑒨𑒪𑒱 𑒏𑒩𑒻𑒞 𑒨𑒰𑒔𑒢𑒰 𑒣𑓂𑒩𑒹𑒧𑒏,
𑒁𑒩𑓂𑒖𑒳𑒢 𑒏𑒯𑒪 𑒁𑒯𑒰𑒿 𑒞𑒿 𑒕𑒲 𑒁𑒣𑓂𑒮𑒩𑒰 𑒑𑒳𑒩𑒳 𑒃𑒢𑓂𑒠𑓂𑒩𑒏।
𑒧𑒰𑒞𑒰 𑒞𑒳𑒪𑓂𑒨 𑒦𑒹𑒪𑒯𑒳𑒿 𑒍𑒯𑒱 𑒮𑓀𑒥𑓀𑒡𑒮𑒿 𑒁𑒯𑒰𑒿 𑒯𑒧𑒩,
𑒂𑒋𑒪 𑒕𑒲 𑒯𑒧 𑒋𑒞𑒋 𑒬𑒱𑒏𑓂𑒭𑒰 𑒣𑓂𑒩𑒰𑒣𑓂𑒞𑒱𑒏 𑒪𑒹𑒪 𑒬𑒮𑓂𑒞𑓂𑒩𑒏,
𑒞𑒣𑒮𑓂𑒨𑒰 𑒢𑒵𑒞𑓂𑒨𑒏 𑒂 𑒮𑓀𑒑𑒲𑒞𑒏 𑒏𑒩𑒋 𑒦𑒼𑒑 𑒢𑒯𑒱,
𑒞𑒰𑒯𑒱 𑒠𑒵𑒭𑓂𑒙𑒱𑒨𑒹 𑒁𑒯𑒰𑒿 𑒦𑒹𑒪𑒯𑒳𑒿 𑒯𑒧𑒩 𑒧𑒰𑒞𑒰 𑒑𑒳𑒩𑒳 𑒠𑒳𑒢𑒳।
𑒅𑒩𑓂𑒫𑒬𑒲 𑒞𑒐𑒢 𑒠𑒹𑒪𑒏 𑒍𑒏𑒩𑒰 𑒬𑒰𑒣 𑒄 𑒙𑒰,
𑒏𑒰𑒧𑒱𑒢𑒲𑒏 𑒁𑒯𑒰𑒿 𑒬𑒰𑒣 𑒮𑒳𑒢𑒴 𑒢𑒱𑒩𑓂𑒫𑒲𑒩𑓂𑒨 𑒩𑒯𑒥 𑒁𑒯𑒰𑒿 ।
𑒫𑒩𑓂𑒭 𑒦𑒩𑒱 𑒧𑒳𑒠𑒰 𑒏𑒱𑒋𑒏 𑒞𑒿 𑒏𑒯𑒪 𑒧𑒰𑒞𑒰,
𑒬𑒰𑒣 𑒄 𑒣𑒳𑒢𑒱 𑒥𑒢𑒞 𑒫𑒩𑒠𑒰𑒢 𑒢𑒳𑒏𑒰𑒋 𑒮𑒏𑒥 𑒁𑒯𑒰𑒿।
𑒣𑒰𑒝𑓂𑒛𑒫 𑒖𑒢 𑒮𑒹𑒯𑒼 𑒣𑒰𑒥𑒱 𑒩𑒯𑒪 𑒇𑒭𑒱 𑒧𑒳𑒢𑒱𑒮𑒿 𑒬𑒱𑒏𑓂𑒭𑒰,
𑒮𑒧𑒰𑒔𑒰𑒩 𑒠𑒹𑒪𑒢𑓂𑒯𑒱 𑒢𑒰𑒩𑒠 𑒁𑒩𑓂𑒖𑒳𑒢𑒏 𑒏𑒯𑒪 𑒁𑒋𑒞,
𑒪𑒼𑒧𑒬 𑒇𑒭𑒱 𑒂𑒥𑒱 𑒮𑒧𑒰𑒔𑒰𑒩 𑒁𑒩𑓂𑒖𑒳𑒢𑒏 𑒮𑒳𑒢𑒰𑒋𑒞।
𑒏𑒱𑒕𑒳 𑒠𑒱𑒢𑒧𑒹 𑒪𑒼𑒧𑒬 𑒇𑒭𑒱 𑒁𑒋𑒪𑒰𑒯 𑒍𑒞𑒋,
𑒏𑒯𑒪 𑒣𑓂𑒩𑒰𑒣𑓂𑒞 𑒏𑒋 𑒣𑒰𑒬𑒳𑒣𑒞 𑒬𑒱𑒫𑒮𑒿 𑒏𑒻𑒪𑒰𑒮𑒧𑒹,
𑒁𑒩𑓂𑒖𑒳𑒢 𑒠𑒹𑒫𑒪𑒼𑒏𑒧𑒹 𑒣𑓂𑒩𑒰𑒣𑓂𑒞 𑒠𑒱𑒫𑓂𑒨𑒰𑒬𑒮𑓂𑒞𑓂𑒩 𑒏𑒋𑒪,
𑒢𑒵𑒞𑓂𑒨 𑒮𑓀𑒑𑒲𑒞𑒏 𑒬𑒱𑒏𑓂𑒭𑒰 𑒁𑒣𑓂𑒮𑒩𑒰 𑒑𑓀𑒡𑒩𑓂𑒫𑒑𑒝𑒮𑒿
𑒪𑒋 𑒩𑒯𑒪 𑒬𑒱𑒏𑓂𑒭𑒰 𑒁𑒩𑓂𑒖𑒳𑒢 𑒠𑒹𑒫𑒪𑒼𑒏𑒧𑒹 𑒮𑒢𑒖𑒧 𑒮𑒿।
𑒞𑒐𑒢 𑒇𑒭𑒱 𑒞𑒲𑒩𑓂𑒟𑒰𑒙𑒢 𑒏𑒩𑒰𑒆 𑒯𑒧𑒩𑒰 𑒪𑒼𑒏𑒢𑒱𑒏𑒹𑒿,
𑒪𑒼𑒧𑒬 𑒞𑒐𑒢 𑒑𑒹𑒪𑒰𑒯 𑒢𑒻𑒧𑒱𑒭𑒰𑒩𑒝𑓂𑒨 𑒣𑒰𑒝𑓂𑒛𑒫 𑒮𑓀𑒑।
𑒣𑓂𑒩𑒨𑒰𑒑 𑒑𑒨𑒰 𑒑𑓀𑒑𑒰𑒮𑒰𑒑𑒩 𑒣𑒳𑒢𑒱 𑒙𑒣𑒱 𑒏𑒪𑒱𑓀𑒑 𑒣𑒯𑒳𑒿𑒔𑒪,
𑒣𑒔𑓂𑒕𑒱𑒧 𑒠𑒱𑒬𑒱 𑒣𑓂𑒩𑒦𑒰𑒮𑒞𑒲𑒩𑓂𑒟 𑒨𑒰𑒠𑒫𑒑𑒝 𑒖𑒞𑒋 𑒕𑒪।
𑒮𑓂𑒫𑒰𑒑𑒞 𑒦𑒹𑒪 𑒍𑒞𑒋 𑒮𑒳𑒦𑒠𑓂𑒩𑒰 𑒧𑒱𑒪𑒪𑒱 𑒠𑓂𑒩𑒾𑒣𑒠𑒲𑒮𑒿,
𑒥𑒪𑒩𑒰𑒧 𑒏𑒵𑒭𑓂𑒝𑒏 𑒮𑒰𑓀𑒞𑓂𑒫𑒢𑒰 𑒣𑒰𑒥𑒱 𑒥𑒜𑓃𑒪 𑒂𑒑𑒰𑒿,
𑒮𑒩𑒮𑓂𑒫𑒞𑒲 𑒣𑒰𑒩 𑒏𑒋 𑒏𑒬𑓂𑒧𑒲𑒩 𑒂 𑒑𑓀𑒡𑒧𑒰𑒠𑒢 𑒣𑒩𑓂𑒫𑒞,
𑒣𑒰𑒩 𑒏𑒋 𑒔𑒜𑓃𑒪 𑒣𑒩𑓂𑒫𑒞 𑒫𑒩𑓂𑒭𑒰 𑒂 𑒬𑒱𑒪𑒰𑒣𑒞𑒢 𑒥𑒱𑒔।
𑒣𑒯𑒳𑒿𑒔𑒱 𑒑𑒹𑒪𑒰𑒯 𑒥𑒠𑒩𑒱𑒏𑒰𑒬𑓂𑒩𑒧 𑒫𑒱𑒬𑓂𑒩𑒰𑒧 𑒏𑒋𑒪 𑒚𑒯𑒩𑒱।
𑒍𑒞𑒯𑒱 𑒠𑒳𑓁𑒬𑒪𑒰 𑒣𑒞𑒱 𑒖𑒨𑒠𑓂𑒩𑒟 𑒏𑒰𑒧𑓂𑒨𑒏 𑒫𑒢𑒮𑒿,
𑒕𑒪 𑒖𑒰 𑒩𑒯𑒪 𑒠𑒹𑒐𑒪 𑒠𑓂𑒩𑒾𑒣𑒠𑒲𑒏𑒹𑒿 𑒁𑒮𑒑𑒩 𑒍𑒞𑒋,
𑒣𑒰𑒝𑓂𑒛𑒫𑒑𑒝 𑒑𑒹𑒪 𑒕𑒪 𑒬𑒱𑒏𑒰𑒩𑒏 𑒪𑒹𑒪 𑒞𑒐𑒢।
𑒥𑒻𑒮𑒪 𑒏𑒳𑒙𑒲𑒧𑒹 𑒫𑒱𑒫𑒰𑒯 𑒣𑓂𑒩𑒮𑓂𑒞𑒰𑒫 𑒠𑒹𑒪 𑒠𑓂𑒩𑒾𑒣𑒠𑒲𑒏𑒹𑒿,
𑒢𑒲𑒔𑒞𑒰 𑒠𑒹𑒐𑒱 𑒠𑓂𑒩𑒾𑒣𑒠𑒲 𑒏𑒚𑒼𑒩 𑒫𑒔𑒢 𑒖𑒐𑒢 𑒏𑒯𑒪,
𑒩𑒟𑒧𑒹 𑒪𑒋 𑒦𑒰𑒑𑒪 𑒁𑒣𑒯𑒩𑒝 𑒏𑒋 𑒠𑒳𑒭𑓂𑒙 𑒖𑒨𑒠𑓂𑒩𑒟।
𑒂𑒬𑓂𑒩𑒧 𑒂𑒥𑒱 𑒣𑒰𑒥𑒱 𑒮𑒧𑒰𑒔𑒰𑒩 𑒦𑒲𑒧 𑒍𑒏𑒩𑒰 𑒣𑒩 𑒕𑒳𑒙𑒪,
𑒞𑒐𑒢𑒯𑒱 𑒁𑒩𑓂𑒖𑒳𑒢 𑒮𑒹𑒯𑒼 𑒂𑒋𑒪 𑒣𑒰𑒕𑒴 𑒖𑒨𑒠𑓂𑒩𑒟𑒏 𑒑𑒹𑒪,
𑒨𑒳𑒡𑒱𑒭𑓂𑒚𑒱𑒩 𑒏𑒯𑒪 𑒣𑓂𑒩𑒰𑒝𑒠𑒰𑒢 𑒠𑒹𑒥 𑒣𑒞𑒱 𑒠𑒳𑓁𑒬𑒪𑒰𑒏 𑒕𑒲 𑒍,
𑒖𑒨𑒠𑓂𑒩𑒟 𑒠𑒹𑒐𑒪 𑒁𑒥𑒻𑒞 𑒠𑒳𑒢𑒴 𑒦𑒰𑒋𑒏𑒹𑒿 𑒠𑓂𑒩𑒾𑒣𑒠𑒲𑒏𑒹𑒿 𑒕𑒼𑒛𑓃𑒱 𑒦𑒰𑒑𑒪,
𑒦𑒲𑒧 𑒣𑒙𑒏𑒱 𑒥𑒰𑒢𑓂𑒯𑒱 𑒂𑒢𑒪 𑒍𑒏𑒩𑒰 𑒠𑓂𑒩𑒾𑒣𑒠𑒲𑒏 𑒮𑒼𑒗𑒰𑒿,
𑒠𑓂𑒩𑒾𑒣𑒠𑒲 𑒁𑒣𑒧𑒰𑒢𑒱𑒞 𑒏𑒋 𑒕𑒼𑒛𑓃𑒥𑒰𑒍𑒪 𑒍𑒏𑒩𑒰।
𑒬𑒱𑒫𑒏 𑒞𑒣𑒮𑓂𑒨𑒰 𑒏𑒋𑒪 𑒖𑒨𑒠𑓂𑒩𑒟 𑒫𑒩𑒠𑒰𑒢 𑒧𑒰𑒿𑒑𑒪,
𑒖𑒱𑒞𑒥𑒰𑒏 𑒣𑒰𑒿𑒔𑒴 𑒣𑒰𑒝𑓂𑒛𑒫𑒮𑒿 𑒏𑒯𑒪 𑒬𑒱𑒫 𑒄,
𑒢𑒯𑒱 𑒯𑒰𑒩𑒥 𑒁𑒯𑒰𑒿 𑒏𑒼𑒢𑒼 𑒦𑒰𑒋𑒮𑒿 𑒁𑒩𑓂𑒖𑒳𑒢𑒏𑒹𑒿 𑒕𑒼𑒛𑓃𑒱।
𑒥𑓂𑒨𑒰𑒮 𑒣𑒩𑒱𑒬𑓂𑒩𑒧𑒏𑒹𑒿 𑒞𑒣𑒮𑓂𑒨𑒰𑒏 𑒢𑒰𑒧 𑒠𑒹𑒪,
𑒂𑒿𑒐𑒱 𑒧𑒴𑒢𑒱 𑒧𑒳𑒠𑒰 𑒄 𑒣𑒬𑓂𑒔𑒰𑒞𑓂 𑒧𑒘𑓂𑒔𑒱𑒞 𑒦𑒹𑒪 !!
𑒏𑒩𑓂𑒝 𑒕𑒪 𑒞𑒣𑒮𑓂𑒨𑒰 𑒏𑒋 𑒩𑒯𑒪 𑒁𑒩𑓂𑒖𑒳𑒢𑒏𑒿 𑒯𑒩𑒋𑒥𑒰 𑒪𑒹𑒪,
𑒃𑒢𑓂𑒠𑓂𑒩 𑒮𑒼𑒔𑒪 𑒬𑒩𑒲𑒩𑒏 𑒏𑒫𑒔 𑒏𑒳𑒝𑓂𑒛𑒪 𑒁𑒕𑒻𑒞 𑒍,
𑒯𑒰𑒩𑒞 𑒢𑒯𑒱 𑒏𑒏𑒩𑒯𑒳𑒮𑒿 𑒠𑒰𑒢𑒫𑒲𑒩 𑒣𑒩𑒰𑒏𑓂𑒩𑒧𑒲 𑒍 𑒕𑒪।
𑒮𑒼𑒔𑒱 𑒍𑒏𑒩𑒰𑒮𑒿 𑒯𑒧 𑒧𑒰𑒿𑒑𑒥 𑒏𑒫𑒔 𑒏𑒳𑒝𑓂𑒛𑒪,
𑒠𑒹𑒐𑒱 𑒄 𑒮𑒴𑒩𑓂𑒨 𑒏𑒋𑒪𑒢𑓂𑒯𑒱 𑒯𑒼𑒆 𑒮𑒔𑒹𑒞 𑒏𑒩𑓂𑒝,
𑒂𑒥𑒱 𑒩𑒯𑒪 𑒃𑒢𑓂𑒠𑓂𑒩 𑒕𑒠𑓂𑒧 𑒫𑒹𑒭𑒧𑒹 𑒨𑒰𑒔𑒢𑒰 𑒏𑒩𑒞 𑒄,
𑒏𑒫𑒔 𑒏𑒳𑒝𑓂𑒛𑒪 𑒕𑒼𑒛𑓃𑒱 𑒏𑒱𑒕𑒳 𑒧𑒰𑒿𑒑𑒞 𑒢𑒯𑒱 𑒍।
𑒏𑒯𑒪 𑒏𑒩𑓂𑒝 𑒨𑒰𑒔𑒏𑒏𑒹𑒿 𑒯𑒧 𑒢𑒯𑒱 𑒢𑒘𑒱 𑒏𑒯𑒥 𑒣𑓂𑒩𑒝,
𑒣𑓂𑒩𑒝 𑒯𑒧𑒩 𑒢𑒯𑒱 𑒙𑒴𑒙𑒞 𑒔𑒰𑒯𑒹 𑒖𑒹 𑒣𑒩𑒱𑒝𑒰𑒧 𑒯𑒼𑒧𑒋।
𑒞𑒐𑒢𑒯𑒱 𑒫𑒱𑒣𑓂𑒩 𑒫𑒹𑒬𑒧𑒹 𑒃𑒢𑓂𑒠𑓂𑒩 𑒂𑒥𑒱 𑒠𑒳𑒯𑒳 𑒫𑒮𑓂𑒞𑒳 𑒧𑒰𑒿𑒑𑒪,
𑒚𑒼𑒜𑓃 𑒣𑒩 𑒧𑒩𑓂𑒧𑒏 𑒧𑒳𑒮𑓂𑒏𑒲 𑒏𑒩𑓂𑒝𑒏 𑒯𑒰𑒟 𑒬𑒮𑓂𑒞𑓂𑒩 𑒂𑒋𑒪,
𑒏𑒰𑒙𑒱 𑒠𑒹𑒯𑒮𑒿 𑒏𑒫𑒔 𑒏𑒳𑒝𑓂𑒛𑒪 𑒮𑒧𑒩𑓂𑒣𑒱𑒞 𑒏𑒋𑒪 𑒞𑒐𑒢𑒯𑒱,
𑒃𑒢𑓂𑒠𑓂𑒩 𑒠𑒹𑒪 𑒫𑒩 𑒧𑒰𑒿𑒑𑒴 𑒕𑒼𑒛𑓃𑒱 𑒄 𑒫𑒖𑓂𑒩 𑒯𑒧𑒩 𑒂𑒩 𑒏𑒱𑒕𑒳𑒍,
𑒁𑒧𑒼𑒒 𑒬𑒏𑓂𑒞𑓂𑒞𑒱 𑒧𑒰𑒿𑒑𑒪 𑒏𑒩𑓂𑒝 𑒃𑒢𑓂𑒠𑓂𑒩 𑒠𑒹𑒪𑒢𑓂𑒯𑒱 𑒏𑒯𑒱 𑒏𑒋,
𑒧𑒰𑒩𑒞 𑒖𑒏𑒩𑒰 𑒣𑒩 𑒔𑒪𑒞 𑒣𑒳𑒢𑒱 𑒒𑒳𑒩𑒞 𑒪𑒑 𑒯𑒧𑒩 𑒁𑒋𑒞।
𑒬𑒢𑒻𑓁-𑒬𑒢𑒻𑓁 𑒕𑒪 𑒥𑒲𑒞𑒱 𑒩𑒯𑒪 𑒥𑒰𑒩𑒯 𑒫𑒩𑓂𑒭 𑒋𑒯𑒱𑒢𑒰,
𑒋𑒏 𑒫𑒩𑓂𑒭𑒏 𑒁𑒖𑓂𑒘𑒰𑒞𑒫𑒰𑒮𑒏 𑒫𑒱𑒭𑒨𑒧𑒹 𑒫𑒱𑒔𑒰𑒩𑒱 𑒩𑒯𑒪,
𑒫𑒱𑒔𑒰𑒩𑒱 𑒨𑒳𑒡𑒱𑒭𑓂𑒚𑒱𑒩 𑒩𑒯𑒪 𑒦𑒰𑒋 𑒂 𑒠𑓂𑒩𑒾𑒣𑒠𑒲𑒏 𑒮𑓀𑒑,
𑒞𑒐𑒢𑒹 𑒏𑒢𑒻𑒞 𑒐𑒱𑒖𑒻𑒞 𑒋𑒏𑒙𑒰 𑒫𑒱𑒣𑓂𑒩 𑒂𑒋𑒪 ।
𑒏𑒯𑒪 𑒁𑒩𑒝𑒲𑒏 𑒪𑒏𑒳𑒛𑓃𑒲 𑒕𑒪 𑒏𑒳𑒙𑒲𑒏 𑒥𑒰𑒯𑒩 𑒙𑒰𑒿𑒑𑒪,
𑒯𑒩𑒱𑒝 𑒋𑒏 𑒂𑒥𑒱 𑒏𑒳𑒩𑒨𑒰𑒥𑒋 𑒪𑒰𑒑𑒪 𑒍𑒯𑒱𑒮𑒿,
𑒖𑒰𑒋 𑒏𑒰𑒪 𑒮𑒱𑓀𑒯𑒧𑒹 𑒍𑒗𑒩𑒰𑒨𑒪 𑒁𑒩𑒱𑒝𑒲 𑒍𑒏𑒩,
𑒫𑒱𑒮𑓂𑒧𑒱𑒞 𑒦𑒰𑒑𑒪 𑒍 𑒪𑒋 𑒯𑒧𑒩 𑒪𑒏𑒳𑒛𑓃𑒲,
𑒏𑒼𑒢𑒰 𑒏𑒋 𑒯𑒼𑒧𑒏 𑒁𑒑𑓂𑒢𑒱 𑒂𑒢𑒥 𑒔𑒱𑒢𑓂𑒞𑒱𑒞 𑒕𑒲।
𑒫𑒱𑒣𑓂𑒩𑒏 𑒮𑓀𑒑 𑒣𑒰𑒿𑒔𑒼 𑒦𑒰𑒿𑒋 𑒯𑒩𑒱𑒝𑒏𑒹𑒿 𑒐𑒹𑒯𑒰𑒩𑒪,
𑒧𑒳𑒠𑒰 𑒕𑒪 𑒍 𑒔𑒣𑒪 𑒦𑒋 𑒑𑒹𑒪 𑒍𑒗𑒪।
𑒫𑒩𑒏 𑒑𑒰𑒕𑒏 𑒢𑒲𑒔𑒰𑒿 𑒍 𑒮𑒦 𑒪𑒖𑓂𑒖𑒱𑒞 𑒣𑒱𑒂𑒮𑒪,
𑒚𑒹𑒯𑒱𑒂𑒋𑒪 𑒥𑒻𑒮𑒪 𑒢𑒏𑒳𑒪 𑒑𑒹𑒪 𑒮𑒩𑒼𑒫𑒩 𑒣𑒰𑒢𑒱 𑒂𑒢𑒋।
𑒋𑒏𑒙𑒰 𑒡𑓂𑒫𑒢𑒱 𑒂𑒋𑒪 𑒄 𑒔𑒦𑒔𑓂𑒔𑒰 𑒯𑒧𑒩 𑒕𑒲,
𑒅𑒞𑓂𑒞𑒩 𑒯𑒧𑒩 𑒣𑓂𑒩𑒬𑓂𑒢𑒏 𑒥𑒱𑒢𑒳 𑒠𑒹𑒢𑒹 𑒣𑒰𑒢𑒱 𑒢𑒘𑒱 𑒦𑒹𑒙𑒞 𑒄।
𑒢𑒯𑒱 𑒏𑒰𑒢 𑒠𑒹𑒪 𑒍𑒯𑒱 𑒑𑒣 𑒣𑒩 𑒯𑒏𑒰𑒮𑒪 𑒣𑒱𑒂𑒮𑒪,
𑒣𑒰𑒢𑒱 𑒖𑒐𑒢𑒹 𑒣𑒱𑒋𑒪 𑒁𑒩𑒛𑓃𑒰 𑒏𑒋 𑒧𑒵𑒞 𑒍 𑒐𑒮𑒪।
𑒮𑒯𑒠𑒹𑒫𑒏 𑒮𑓀𑒑 𑒮𑒹𑒯𑒼 𑒋𑒯𑒢𑒹 𑒒𑒙𑒢𑒰 𑒒𑒙𑒪 𑒕𑒪,
𑒁𑒩𑓂𑒖𑒳𑒢 𑒖𑒐𑒢 𑒂𑒋𑒪 𑒤𑒹𑒩 𑒫𑒻𑒯 𑒡𑓂𑒫𑒢𑒱 𑒮𑒳𑒢𑒪 ।
𑒬𑒥𑓂𑒠𑒦𑒹𑒠𑒲 𑒥𑒰𑒝 𑒕𑒼𑒛𑓃𑒪 𑒧𑒳𑒠𑒰 𑒢𑒯𑒱 𑒏𑒼𑒢𑒼 𑒣𑓂𑒩𑒞𑒱𑒤𑒪,
𑒣𑒰𑒢𑒱 𑒣𑒲𑒥𑒻𑒞 𑒠𑒹𑒩𑒲 𑒍𑒯𑒼 𑒧𑒵𑒞 𑒦𑒋 𑒐𑒮𑒪 𑒕𑒪।
𑒨𑒳𑒡𑒱𑒭𑓂𑒚𑒱𑒩 𑒦𑒋 𑒔𑒱𑒢𑓂𑒞𑒱𑒞 𑒦𑒲𑒧𑒏𑒹𑒿 𑒣𑒚𑒰𑒍𑒪 𑒞𑒰𑒏𑒋,
𑒣𑒰𑒢𑒱 𑒣𑒲𑒥𑒱 𑒧𑒵𑒞 𑒦𑒋 𑒢𑒯𑒱 𑒒𑒳𑒩𑒪 𑒍𑒞𑒋।
𑒨𑒳𑒡𑒱𑒭𑓂𑒚𑒱𑒩 𑒖𑒐𑒢 𑒫𑒢 𑒥𑒲𑒔 𑒮𑒩𑒼𑒫𑒩 𑒣𑒯𑒳𑒿𑒔𑒪,
𑒧𑒵𑒞 𑒦𑒰𑒋 𑒮𑒦𑒏𑒹𑒿 𑒠𑒹𑒐𑒱 𑒫𑓂𑒨𑒰𑒏𑒳𑒪 𑒣𑒰𑒢𑒱𑒧𑒹 𑒅𑒞𑒩𑒪।
𑒫𑒻𑒯 𑒡𑓂𑒫𑒢𑒱 𑒂𑒋𑒪 𑒅𑒞𑓂𑒞𑒩𑒏 𑒥𑒱𑒢𑒰 𑒣𑓂𑒨𑒰𑒮𑒪 𑒩𑒯𑒥,
𑒯𑒼𑒋𑒞 𑒋𑒯𑒱 𑒞𑒩𑒯𑒏 𑒣𑒩𑒱𑒝𑒰𑒧 𑒖𑓂𑒨𑒼𑒿 𑒡𑒵𑒭𑓂𑒙𑒞𑒰 𑒏𑒩𑒥।
𑒄 𑒁𑒕𑒱 𑒏𑒼𑒢𑒼 𑒨𑒏𑓂𑒭 𑒮𑒼𑒔𑒱 𑒨𑒳𑒡𑒱𑒭𑓂𑒚𑒱𑒩 𑒥𑒰𑒖𑒪,
𑒣𑒳𑒕𑒴 𑒣𑓂𑒩𑒬𑓂𑒢 𑒅𑒞𑓂𑒞𑒩 𑒮𑒧𑓂𑒨𑒏 𑒠𑒹𑒥 𑒬𑒳𑒩𑒴 𑒦𑒹𑒪 𑒨𑒏𑓂𑒭।
𑒧𑒢𑒳𑒭𑓂𑒨𑒏 𑒮𑓀𑒑 𑒏𑒹 𑒁𑒕𑒱 𑒠𑒻𑒞? 𑒣𑓂𑒩𑒟𑒧𑒞𑓁 𑒄 𑒥𑒰𑒖𑒴,
𑒡𑒻𑒩𑓂𑒨 𑒙𑒰 𑒠𑒻𑒕 𑒮𑓀𑒑 𑒧𑒢𑒳𑒏𑓂𑒐𑒏 𑒮𑒠𑒱𑒐𑒢 𑒮𑒼𑒏𑒰𑒖𑒴।
𑒨𑒬𑒪𑒰𑒦𑒏 𑒁𑒕𑒱 𑒏𑒼𑒢 𑒅𑒣𑒰𑒨 𑒋𑒏𑒙𑒰?
𑒠𑒰𑒢 𑒥𑒱𑒢𑒳 𑒨𑒬 𑒢𑒯𑒱 𑒦𑒹𑒙𑒻𑒕 𑒏𑒼𑒢𑒼𑒙𑒰।
𑒫𑒰𑒨𑒳𑒮𑒿 𑒞𑓂𑒫𑒩𑒱𑒞 𑒁𑒕𑒱 𑒏𑒼𑒢 𑒫𑒮𑓂𑒞𑒳?
𑒧𑒢𑒏 𑒂𑒑𑒰𑒿 𑒫𑒰𑒨𑒳𑒏 𑒑𑒞𑒱 𑒢𑒯𑒱 𑒏𑒞𑒯𑒳 ।
𑒣𑓂𑒩𑒫𑒰𑒮𑒲𑒏 𑒮𑓀𑒑𑒲 𑒁𑒕𑒱 𑒏𑒹 𑒋𑒏𑒹𑒙𑒰 ?
𑒫𑒱𑒠𑓂𑒨𑒰𑒏 𑒃𑒞𑒩 𑒢𑒯𑒱 𑒮𑓀𑒑𑒲 𑒋𑒏𑒼𑒙𑒰।
𑒏𑒏𑒩𑒰 𑒞𑓂𑒨𑒖𑒱 𑒏𑒋 𑒧𑒢𑒳𑒏𑓂𑒐𑒏𑒹𑒿 𑒦𑒹𑒙𑒻𑒕 𑒧𑒳𑒏𑓂𑒞𑓂𑒞𑒱?
𑒁𑒯𑓀 𑒕𑒼𑒛𑓃𑒪 𑒞𑒐𑒢 𑒦𑒹𑒙𑒞 𑒫𑒱𑒧𑒳𑒏𑓂𑒞𑓂𑒞𑒱।
𑒏𑒼𑒢 𑒫𑒮𑓂𑒞𑒳𑒏 𑒯𑒩𑒰𑒋𑒪𑒰𑒮𑒿 𑒢𑒯𑒱 𑒯𑒼𑒃𑒕 𑒧𑒢 𑒠𑒳𑓁𑒐𑒱𑒞?
𑒏𑓂𑒩𑒼𑒡𑒏 𑒯𑒩𑒋𑒪𑒰𑒮𑒿 𑒏𑒱𑒋 𑒯𑒼𑒁𑒨 𑒏𑓂𑒨𑒼 𑒬𑒼𑒏𑒱𑒞।
𑒏𑒼𑒢 𑒫𑒮𑓂𑒞𑒳𑒏 𑒔𑒼𑒩𑒱𑒮𑒿 𑒯𑒼𑒃𑒕 𑒧𑒢𑒳𑒏𑓂𑒐 𑒡𑒢𑒱𑒏?
𑒪𑒼𑒦𑒏 𑒏𑓂𑒭𑒞𑒱 𑒥𑒢𑒥𑒻𑒕 𑒣𑒳𑒭𑓂𑒙 𑒮𑒥𑒯𑒱𑒿।
𑒥𑓂𑒩𑒰𑒯𑓂𑒧𑒝 𑒖𑒢𑓂𑒧, 𑒫𑒱𑒠𑓂𑒨𑒰, 𑒬𑒲𑒪 𑒏𑒼𑒢 𑒑𑒣 𑒣𑒩 𑒁𑒫𑒪𑒧𑓂𑒥𑒱𑒞?
𑒬𑒲𑒪 𑒮𑓂𑒫𑒦𑒰𑒫 𑒥𑒱𑒢𑒳 𑒥𑓂𑒩𑒰𑒯𑓂𑒧𑒝 𑒩𑒯𑒞 𑒢𑒯𑒱 𑒏𑒱𑒕𑒳।
𑒡𑒩𑓂𑒧𑒮𑒿 𑒥𑒜𑓃𑒱 𑒁𑒕𑒱 𑒏𑒲 𑒖𑒑𑒞𑒧𑒹?
𑒅𑒠𑒰𑒩 𑒧𑒢𑒮𑒱 𑒅𑒔𑓂𑒔 𑒣𑒠𑒮𑓂𑒟 𑒮𑒦𑒮𑒿।
𑒏𑒼𑒢 𑒧𑒱𑒞𑓂𑒩 𑒢𑒯𑒱 𑒯𑒼𑒃𑒞 𑒁𑒕𑒱 𑒣𑒳𑒩𑒰𑒢?
𑒮𑒖𑓂𑒖𑒢𑒮𑒿 𑒏𑒋𑒪 𑒑𑒹𑒪 𑒧𑒱𑒞𑓂𑒩𑒰𑒞𑒰𑒏 𑒏𑒼𑒢𑒰 𑒁𑒫𑒮𑒰𑒢।
𑒮𑒦𑒮𑒿 𑒣𑒻𑒒 𑒁𑒠𑓂𑒦𑒳𑒞 𑒏𑒲 𑒁𑒕𑒱 𑒋𑒯𑒱 𑒖𑒑𑒧𑒹?
𑒧𑒵𑒞𑓂𑒨𑒳 𑒮𑒦 𑒠𑒱𑒢𑒳 𑒠𑒹𑒐𑒢𑒯𑒳 𑒁𑒕𑒻𑒞𑒼 𑒖𑒲𑒫𑒢 𑒪𑒰𑒪𑒮𑒰,
𑒋𑒯𑒱𑒮𑒿 𑒥𑒜𑓃𑒱 𑒁𑒠𑓂𑒦𑒳𑒞 𑒂𑒬𑓂𑒔𑒩𑓂𑒨 𑒁𑒕𑒱 𑒏𑒲?
𑒣𑓂𑒩𑒮𑒢𑓂𑒢𑒔𑒱𑒞𑓂𑒞 𑒦𑒋 𑒨𑒏𑓂𑒭 𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒏𑒯𑒴,
𑒏𑒼𑒢𑒼 𑒋𑒏 𑒦𑒰𑒋𑒏𑒹𑒿 𑒯𑒧 𑒖𑒲𑒫𑒱𑒞 𑒏𑒋 𑒮𑒏𑒥।
𑒞𑒐𑒢 𑒢𑒏𑒳𑒪𑒏𑒹𑒿 𑒏𑒋 𑒠𑒱𑒁 𑒖𑒲𑒫𑒱𑒞,
𑒮𑒳𑒢𑒱 𑒨𑒏𑓂𑒭 𑒣𑒴𑒕𑒪 𑒏𑒯𑒥 𑒞𑒿 𑒦𑒲𑒧 𑒁𑒩𑓂𑒖𑒳𑒢 𑒏𑒼𑒢𑒼𑒏𑒹𑒿,
𑒖𑒲𑒫𑒱𑒞 𑒏𑒩𑒥 𑒖𑒏𑒩 𑒩𑒝 𑒏𑒾𑒬𑒪 𑒏𑒩𑒞 𑒩𑒏𑓂𑒭𑒰।
𑒡𑒩𑓂𑒧𑒩𑒰𑒖 𑒏𑒯𑒪 𑒡𑒩𑓂𑒧𑒏 𑒥𑒱𑒢𑒰 𑒢𑒯𑒱 𑒯𑒼𑒃𑒕 𑒩𑒏𑓂𑒭𑒰,
𑒏𑒳𑒢𑓂𑒞𑒲 𑒣𑒳𑒞𑓂𑒩 𑒯𑒧 𑒨𑒳𑒡𑒱𑒭𑓂𑒚𑒱𑒩 𑒖𑒱𑒥𑒻𑒞 𑒕𑒲,
𑒧𑒰𑒠𑓂𑒩𑒲 𑒧𑒰𑒞𑒳𑒏 𑒣𑒳𑒞𑓂𑒩 𑒖𑒱𑒥𑒟𑒳 𑒢𑒏𑒳𑒪 𑒮𑒻𑒯 𑒅𑒔𑒱𑒞।
𑒮𑒳𑒢𑒱 𑒏𑒯𑒪 𑒯𑒱𑒩𑒝 𑒫𑒹𑒬𑒡𑒰𑒩𑒲 𑒨𑒧𑒩𑒰𑒖 𑒯𑒹 𑒣𑒳𑒞𑓂𑒩,
𑒣𑒏𑓂𑒭𑒣𑒰𑒞 𑒩𑒯𑒱𑒞 𑒕𑒲 𑒁𑒯𑒰𑒿 𑒞𑒹𑒿 𑒮𑒦 𑒦𑒰𑒋 𑒖𑒲𑒥𑒟𑒳।
𑒣𑒳𑒞𑓂𑒩𑒏𑒹𑒿 𑒠𑒹𑒐𑒱 𑒧𑒼𑒢 𑒞𑒵𑒣𑓂𑒞 𑒦𑒹𑒪𑒢𑓂𑒯𑒱 𑒨𑒧𑒏,
𑒣𑒰𑒝𑓂𑒛𑒫 𑒑𑒝 𑒞𑒐𑒢 𑒒𑒳𑒩𑒱 𑒠𑓂𑒩𑒾𑒣𑒠𑒲𑒏 𑒪𑒑 𑒑𑒹𑒪𑒰𑒯।
𑒣𑒴𑒩𑓂𑒝 𑒦𑒹𑒪 𑒫𑒢𑒫𑒰𑒮𑒏 𑒫𑒩𑓂𑒭 𑒥𑒰𑒩𑒯 𑒁𑒞𑒲𑒞,
𑒋𑒏 𑒫𑒩𑓂𑒭𑒏 𑒕𑒪 𑒁𑒖𑓂𑒘𑒰𑒞𑒫𑒰𑒮 𑒥𑒛𑓃 𑒏𑒚𑒱𑒢,
𑒠𑒳𑒩𑓂𑒨𑒼𑒡𑒢𑒏𑒹𑒿 𑒨𑒠𑒱 𑒯𑒳𑒢𑒏 𑒮𑓀𑒏𑒹𑒞𑒏 𑒔𑒪𑒋 𑒣𑒞𑒰,
𑒣𑒳𑒢𑒱 𑒠𑓂𑒫𑒰𑒠𑒬 𑒫𑒩𑓂𑒭𑒏 𑒫𑒢𑒫𑒰𑒮𑒏 𑒕𑒪 𑒣𑓂𑒩𑒟𑒰।
𑒣𑓂𑒩𑒰𑒞𑓁𑒏𑒰𑒪 𑒮𑒦 𑒫𑒱𑒠𑒰 𑒦𑒹𑒪𑒰𑒯 𑒫𑒱𑒩𑒰𑒙 𑒢𑒑𑒩 𑒠𑒱𑒬𑒱,
𑒡𑒩𑓂𑒧𑒩𑒰𑒖 𑒏𑓀𑒏 𑒢𑒰𑒧𑓂𑒢𑒰 𑒥𑓂𑒩𑒰𑒯𑓂𑒧𑒝 𑒫𑒹𑒬 𑒡𑒰𑒩𑒱𑒞 𑒧𑒱𑒪𑒱।
𑒏𑒾𑒛𑓃𑒲 𑒂 𑒔𑒞𑒳𑒩𑓀𑒑 𑒑𑒼𑒙𑒲𑒮𑒿 𑒫𑒱𑒩𑒰𑒙𑒩𑒰𑒖𑒏 𑒧𑒼𑒢 𑒪𑒑𑒰𑒋𑒥,
𑒦𑒲𑒧 𑒥𑒢𑒱 𑒣𑒰𑒔𑒏 𑒢𑒰𑒧 𑒫𑒪𑓂𑒪𑒦𑒏 𑒣𑒰𑒏𑒬𑒰𑒪𑒰 𑒮𑒧𑓂𑒯𑒰𑒩𑒟𑒱।
𑒫𑒱𑒩𑒰𑒙𑒏 𑒣𑒳𑒞𑓂𑒩𑒲𑒏𑒹𑒿 𑒮𑓀𑒑𑒲𑒞 𑒢𑒵𑒞𑓂𑒨 𑒁𑒩𑓂𑒖𑒳𑒢,
𑒢𑒰𑒩𑒲 𑒫𑒵𑒯𑒢𑓂𑒢𑒪𑒰 𑒥𑒢𑒱 𑒮𑒱𑒐𑒰𑒥𑒟𑒳,
𑒑𑓂𑒩𑓀𑒟𑒱𑒏 𑒢𑒰𑒧𑒮𑒿 𑒢𑒏𑒳𑒪 𑒁𑒬𑓂𑒫𑒏 𑒏𑒩𑒋 𑒩𑒐𑒥𑒰𑒩𑒱,
𑒮𑒯𑒠𑒹𑒫𑒏 𑒢𑒰𑒧 𑒞𑓀𑒞𑓂𑒩𑒣𑒰𑒪 𑒦𑒹𑒪 𑒏𑒩𑒟𑒱 𑒔𑒩𑒥𑒰𑒯𑒱।
𑒩𑒰𑒢𑒲𑒏𑒹𑒿 𑒮𑒖𑒰𑒥𑒟𑒱 𑒠𑓂𑒩𑒾𑒣𑒠𑒲 𑒢𑒰𑒧 𑒡𑒩𑒱 𑒮𑒻𑒩𑒢𑓂𑒡𑓂𑒩𑒲𑒏।
𑒮𑒦 𑒄 𑒮𑒼𑒔𑒱 𑒢𑒳𑒏𑒰𑒍𑒪 𑒁𑒮𑓂𑒞𑓂𑒩-𑒬𑒮𑓂𑒞𑓂𑒩,
𑒬𑒰𑒐𑒰 𑒥𑒱𑒔 𑒬𑒧𑒲-𑒫𑒵𑒏𑓂𑒭 𑒋𑒏𑒙𑒰 𑒫𑒱𑒬𑒰𑒪 𑒧𑒡𑓂𑒨।
𑒖𑒐𑒢 𑒫𑒹𑒬 𑒡𑒩𑒱 𑒣𑒯𑒳𑒿𑒔𑒪𑒰𑒯 𑒫𑒱𑒩𑒰𑒙 𑒩𑒰𑒖𑒰 𑒪𑒑,
𑒮𑓂𑒫𑒲𑒏𑒰𑒩𑒪𑒢𑓂𑒯𑒱 𑒍 𑒮𑒦𑒙𑒰 𑒣𑓂𑒩𑒰𑒩𑓂𑒟𑒢𑒰 𑒮𑓂𑒫𑒞𑓁।
𑒠𑒱𑒢 𑒕𑒪 𑒥𑒲𑒞𑒱 𑒩𑒯𑒪 𑒧𑒳𑒠𑒰 𑒩𑒰𑒢𑒲 𑒮𑒳𑒠𑒹𑒭𑓂𑒝𑒰𑒏,
𑒦𑒰𑒋 𑒕𑒪 𑒏𑒲𑒔𑒏 𑒠𑒳𑒭𑓂𑒙 𑒠𑒹𑒐𑒱 𑒮𑒻𑒩𑒢𑓂𑒡𑓂𑒩𑒲𑒏 𑒦𑒹𑒪 𑒧𑒳𑒑𑓂𑒡।
𑒥𑒯𑒱𑒢𑒮𑒿 𑒣𑒴𑒕𑒪 𑒏𑒼𑒢 𑒠𑒹𑒬𑒏 𑒩𑒰𑒖𑒏𑒳𑒧𑒰𑒩𑒲 𑒕𑒟𑒱,
𑒏𑒯𑒪 𑒥𑒯𑒱𑒢 𑒢𑒯𑒱 𑒕𑒲 𑒢𑒱𑒏𑒵𑒭𑓂𑒙 𑒠𑒰𑒮𑒲 𑒄।
𑒧𑒳𑒠𑒰 𑒏𑒲𑒔𑒏 𑒣𑒯𑒳𑒿𑒔𑒱 𑒠𑓂𑒩𑒾𑒣𑒠𑒲 𑒪𑒑 𑒥𑒰𑒖𑒪,
𑒮𑒳𑒢𑓂𑒠𑒩𑒲 𑒠𑒰𑒮 𑒥𑒢𑒰𑒆 𑒯𑒧 𑒧𑒳𑒑𑓂𑒡 𑒣𑒰𑒑𑒪।
𑒮𑒻𑒩𑒢𑓂𑒡𑓂𑒩𑒲 𑒏𑒯𑒪𑒢𑓂𑒯𑒱, 𑒯𑒧 𑒫𑒱𑒫𑒰𑒯𑒱𑒞𑒰 𑒋𑒏 𑒠𑒰𑒮𑒲,
𑒁𑒯𑒰𑒿𑒏 𑒣𑒰𑒪𑒱𑒞𑒰 𑒕𑒲 𑒢𑒯𑒱 𑒣𑒳𑒢𑒱 𑒑𑒣 𑒄 𑒥𑒰𑒖𑒲।
𑒧𑒳𑒠𑒰 𑒏𑒲𑒔𑒏 𑒥𑒯𑒱𑒢𑒱𑒮𑒿 𑒣𑒳𑒢𑒱 𑒁𑒢𑒳𑒩𑒼𑒡 𑒏𑒋𑒪𑒏।
𑒣𑒩𑓂𑒫 𑒠𑒱𑒢 𑒮𑒳𑒠𑒹𑒭𑓂𑒝𑒰 𑒏𑒱𑒕𑒳 𑒫𑒮𑓂𑒞𑒳 𑒁𑒢𑒥𑒰 𑒯𑒹𑒞𑒳 𑒏𑒯𑒪𑒏,
𑒮𑒻𑒩𑒢𑓂𑒡𑓂𑒩𑒲𑒏𑒹𑒿 𑒏𑒲𑒔𑒏 𑒪𑒑 𑒖𑒰𑒋 𑒞𑒏𑒩𑒰 𑒂𑒢𑒋 𑒣𑒚𑒹𑒪𑒏।
𑒧𑒳𑒠𑒰 𑒍𑒞𑒋 𑒠𑒹𑒐𑒱 𑒫𑒰𑒮𑒢𑒰𑒏 𑒂𑒿𑒐𑒱 𑒦𑒰𑒑𑒪𑒱,
𑒦𑒲𑒧𑒮𑒿 𑒖𑒰𑒋 𑒥𑒰𑒖𑒪𑒱 𑒡𑒱𑒏 𑒏𑒯𑒪𑒱 𑒣𑒰𑒝𑓂𑒛𑒫𑒏𑒹𑒿 ।
𑒦𑒲𑒧 𑒥𑒰𑒖𑒪 𑒂𑒥 𑒖𑒹 𑒍 𑒦𑒹𑒿𑒙 𑒯𑒼𑒁𑒋,
𑒢𑒰𑒙𑓂𑒨𑒬𑒰𑒪𑒰𑒧𑒹 𑒥𑒖𑒰𑒆 𑒂𑒡 𑒩𑒰𑒞𑒱 𑒮𑒼𑒔𑒥 𑒤𑒹𑒩 𑒄,
𑒯𑒧𑒩𑒰 𑒏𑒲 𑒏𑒩𑒥𑒰𑒏 𑒁𑒕𑒱 𑒍𑒯𑒱 𑒠𑒳𑒭𑓂𑒙𑒏𑒹𑒿 𑒍𑒞𑒋।
𑒏𑒲𑒔𑒏 𑒫𑒱𑒩𑒰𑒙𑒏 𑒮𑒹𑒢𑒰𑒏 𑒣𑓂𑒩𑒧𑒳𑒐 𑒮𑒹𑒯𑒼 𑒕𑒪,
𑒮𑒻𑒩𑒢𑓂𑒡𑓂𑒩𑒲𑒏 𑒂𑒧𑓀𑒞𑓂𑒩𑒝𑒏𑒹𑒿 𑒢𑒯𑒱 𑒥𑒴𑒗𑒱 𑒣𑒯𑒳𑒿𑒔𑒪 𑒁𑒦𑒰𑒑𑒪।
𑒮𑓂𑒞𑓂𑒩𑒲 𑒫𑒹𑒭 𑒡𑒩𑒢𑒹 𑒦𑒲𑒧 𑒍𑒞𑒋 𑒣𑓂𑒩𑒞𑒲𑒏𑓂𑒭𑒱𑒞,
𑒏𑒹𑒬 𑒣𑒏𑒛𑓃𑒱 𑒣𑒙𑒏𑒪, 𑒪𑒰𑒞-𑒯𑒰𑒟 𑒧𑒰𑒩𑒪 𑒏𑒲𑒔𑒏𑒏𑒹𑒿 𑒍𑒞𑒯𑒱।
𑒦𑒼𑒩 𑒯𑒼𑒃𑒞 𑒄 𑒑𑒣 𑒣𑒮𑒩𑒱 𑒑𑒹𑒪 𑒔𑒰𑒩𑒴 𑒠𑒱𑒬𑒱,
𑒏𑒲𑒔𑒏𑒏𑒹𑒿 𑒧𑒰𑒩𑒪 𑒑𑓀𑒡𑒩𑓂𑒫𑒣𑒞𑒱 𑒮𑒻𑒩𑓀𑒡𑓂𑒩𑒲𑒏।
𑒮𑒻𑒩𑒢𑓂𑒡𑓂𑒩𑒲𑒏 𑒣𑓂𑒩𑒞𑒱 𑒦𑒨-𑒬𑓂𑒩𑒠𑓂𑒡𑒰 𑒠𑒳𑒢𑒴 𑒣𑒮𑒩𑒪,
𑒠𑒳𑒩𑓂𑒨𑒼𑒡𑒢 𑒕𑒪 𑒥𑒳𑒗𑒪 𑒁𑒖𑓂𑒘𑒰𑒞𑒫𑒰𑒮𑒏 𑒏𑒟𑒰,
𑒕𑒪 𑒞𑒰𑒏𑒱𑒧𑒹 𑒞𑒏𑒥𑒰𑒏 𑒣𑒰𑒝𑓂𑒛𑒫𑒏 𑒣𑒞𑒰,
𑒕𑒲 𑒄 𑒠𑓂𑒩𑒾𑒣𑒠𑒲 𑒮𑒻𑒩𑒢𑓂𑒡𑓂𑒩𑒲𑒏 𑒦𑒹𑒭𑒧𑒹 𑒁𑒦𑒩𑒪।
𑒣𑒰𑒝𑓂𑒛𑒫 𑒕𑒠𑓂𑒧-𑒦𑒹𑒭 𑒥𑒢𑒍𑒢𑒹 𑒕𑒟𑒱 𑒑𑒰𑓀𑒡𑒩𑓂𑒫𑒏,
𑒏𑒲𑒔𑒏𑒮𑒿 𑒁𑒣𑒧𑒰𑒢𑒱𑒞 𑒩𑒰𑒖𑒰 𑒞𑓂𑒩𑒱𑒑𑒩𑓂𑒞 𑒠𑒹𑒬𑒏,
𑒧𑒱𑒪𑒱 𑒠𑒳𑒩𑓂𑒨𑒼𑒡𑒢𑒮𑒿 𑒏𑒋 𑒑𑒾-𑒯𑒩𑒝𑒏 𑒫𑒱𑒔𑒰𑒩
𑒫𑒱𑒩𑒰𑒙 𑒩𑒰𑒖𑒮𑒿 𑒍 𑒪𑒹𑒞 𑒥𑒠𑒪𑒰 𑒂𑒥।
𑒠𑒳𑒩𑓂𑒨𑒼𑒡𑒢 𑒪𑒋 𑒮𑓀𑒑 𑒦𑒲𑒭𑓂𑒧, 𑒠𑓂𑒩𑒼𑒝, 𑒏𑒵𑒣, 𑒏𑒩𑓂𑒝,
𑒂𑒏𑓂𑒩𑒧𑒝 𑒫𑒱𑒩𑒰𑒙 𑒣𑒩 𑒪𑒋 𑒁𑒬𑓂𑒫𑒞𑓂𑒟𑒰𑒧𑒰 𑒮𑓀𑒑।
𑒞𑓂𑒩𑒱𑒑𑒩𑓂𑒞 𑒩𑒰𑒖 𑒮𑒳𑒬𑒩𑓂𑒧𑒰 𑒒𑒹𑒩𑒱 𑒑𑒾-𑒫𑒱𑒩𑒰𑒙𑒩𑒰𑒖𑒏,
𑒥𑒰𑒢𑓂𑒯𑒱 𑒫𑒱𑒩𑒰𑒙𑒏𑒹𑒿 𑒖𑒐𑒢 𑒍 𑒮𑒼𑒗𑒰𑒿 𑒂𑒋𑒪।
𑒪𑒪𑒏𑒰𑒩𑒱 𑒏𑒋𑒪 𑒦𑒲𑒧𑒏𑒹𑒿 𑒮𑒼𑒩 𑒨𑒳𑒡𑒱𑒭𑓂𑒚𑒱𑒩-𑒏𑓀𑒏,
𑒫𑒪𑓂𑒪𑒦-𑒦𑒲𑒧 𑒑𑓂𑒩𑓀𑒟𑒱𑒏-𑒢𑒏𑒳𑒪 𑒞𑓀𑒞𑓂𑒩𑒱𑒣𑒰𑒪-𑒮𑒯𑒠𑒹𑒫।
𑒐𑒼𑒪𑒱 𑒥𑒢𑓂𑒡𑒢 𑒫𑒱𑒩𑒰𑒙𑒏 𑒥𑒰𑒢𑓂𑒯𑒱 𑒠𑒹𑒪 𑒮𑒳𑒬𑒩𑓂𑒧𑒢𑓂,
𑒫𑒵𑒯𑒢𑓂𑒢𑒪𑒰 𑒥𑒢𑒱 𑒮𑒰𑒩𑒟𑒲 𑒣𑒳𑒞𑓂𑒩 𑒫𑒱𑒩𑒰𑒙𑒩𑒰𑒖 𑒅𑒞𑓂𑒞𑒧𑒏।
𑒩𑒟 𑒂𑒢𑒪 𑒩𑒝𑒏𑓂𑒭𑒹𑒞𑓂𑒩 𑒅𑒞𑓂𑒞𑒧𑒏𑒳𑒧𑒰𑒩 𑒦𑒹𑒪 𑒒𑒥𑒩𑒰𑒋𑒪,
𑒑𑒹𑒪 𑒁𑒩𑓂𑒖𑒳𑒢 𑒬𑒧𑒲 𑒑𑒰𑒕 𑒪𑒑 𑒅𑒞𑒰𑒩𑒱 𑒬𑒮𑓂𑒞𑓂𑒩 𑒂𑒋𑒪,
𑒑𑒰𑒝𑓂𑒛𑒲𑒫 𑒁𑒏𑓂𑒭𑒨 𑒞𑒳𑒝𑒲𑒩 𑒂𑒢𑒱 𑒣𑒩𑒱𑒔𑒨 𑒮𑒳𑒢𑒰𑒍𑒪।
𑒅𑒞𑓂𑒞𑒧𑒏𑒳𑒧𑒰𑒩 𑒥𑒢𑒪 𑒮𑒰𑒩𑒟𑒲 𑒫𑒵𑒯𑒢𑓂𑒢𑒪𑒰-𑒁𑒩𑓂𑒖𑒳𑒢𑒏 𑒮𑓀𑒑,
𑒫𑒹𑒑𑒬𑒰𑒪𑒲 𑒩𑒟 𑒠𑒹𑒐𑒱 𑒠𑒳𑒩𑓂𑒨𑒼𑒡𑒢 𑒣𑒳𑒕𑒪 𑒯𑒹 𑒦𑒲𑒭𑓂𑒧।
𑒁𑒖𑓂𑒘𑒰𑒞𑒫𑒰𑒮𑒏 𑒏𑒰𑒪 𑒦𑒹𑒪 𑒣𑒴𑒩𑓂𑒝 𑒫𑒰 𑒢 𑒫𑒰 𑒏𑒯𑒴,
𑒦𑒲𑒭𑓂𑒧 𑒏𑒯𑒪 𑒣𑒴𑒩𑓂𑒝 𑒞𑒹𑒩𑒯 𑒫𑒩𑓂𑒭𑒏 𑒁𑒫𑒡𑒱 𑒦𑒹𑒪 𑒎।
𑒁𑒩𑓂𑒖𑒳𑒢 𑒅𑒞𑒰𑒩𑒪 𑒁𑒣𑒢 𑒩𑒼𑒭 𑒏𑒩𑓂𑒝 𑒣𑒳𑒞𑓂𑒩 𑒫𑒱𑒏𑒩𑓂𑒝 𑒣𑒩,
𑒧𑒰𑒩𑒱 𑒍𑒏𑒩𑒰 𑒥𑒜𑓃𑒪 𑒂𑒑𑒰𑒿 𑒏𑒩𑓂𑒝𑒏𑒹𑒿 𑒥𑒹𑒡𑒪 𑒮𑒹𑒯𑒼।
𑒠𑓂𑒩𑒼𑒝-𑒦𑒲𑒭𑓂𑒧𑒏 𑒡𑒢𑒳𑒭 𑒏𑒰𑒙𑒪 𑒧𑒴𑒩𑓂𑒔𑓂𑒕𑒱𑒞 𑒏𑒋𑒪 𑒮𑒹𑒢𑒰 𑒮𑒏𑒪,
𑒠𑓂𑒩𑒼𑒝-𑒏𑒵𑒣-𑒏𑒩𑓂𑒝-𑒁𑒬𑓂𑒫𑒞𑓂𑒟𑒰𑒧𑒰-𑒠𑒳𑒩𑓂𑒨𑒼𑒡𑒢𑒏 𑒧𑒳𑒏𑒳𑒙 𑒫𑒮𑓂𑒞𑓂𑒩 𑒮𑒦,
𑒅𑒞𑓂𑒞𑒧𑒏𑒳𑒧𑒰𑒩 𑒅𑒞𑒰𑒩𑒪 𑒮𑒦𑒙𑒰 𑒑𑒾 𑒪𑒋 𑒢𑒑𑒩 𑒞𑒐𑒢 𑒒𑒳𑒩𑒪।
𑒧𑒴𑒩𑓂𑒔𑓂𑒕𑒰 𑒙𑒴𑒙𑒪 𑒮𑒦𑒏 𑒖𑒐𑒢 𑒏𑒯𑒪 𑒏𑒩𑒥 𑒨𑒳𑒠𑓂𑒡 𑒣𑒳𑒢𑓁,
𑒦𑒲𑒭𑓂𑒧 𑒢𑒯𑒱 𑒧𑒢𑒪𑒰𑒯 𑒠𑒳𑒩𑓂𑒨𑒼𑒡𑒢 𑒒𑒳𑒩𑒳 𑒥𑒯𑒳 𑒦𑒹𑒪 𑒂𑒥 𑒁𑓁।
𑒅𑒞𑓂𑒞𑒧𑒏𑒳𑒧𑒰𑒩 𑒢𑒯𑒱 𑒏𑒩𑒥 𑒣𑓂𑒩𑒑𑒙 𑒦𑒹𑒠 𑒯𑒧𑒩 𑒁𑒩𑓂𑒖𑒳𑒢 𑒏𑒯𑒪,
𑒫𑒱𑒩𑒰𑒙 𑒦𑒹𑒪 𑒣𑓂𑒩𑒮𑒢𑓂𑒢 𑒫𑒲𑒩𑒞𑒰 𑒮𑒳𑒢𑒱 𑒅𑒞𑓂𑒞𑒧𑒏 𑒂𑒥𑒱 𑒒𑒩।
𑒣𑒘𑓂𑒔 𑒣𑒰𑒝𑓂𑒛𑒫 𑒠𑓂𑒩𑒾𑒣𑒠𑒲𑒏 𑒞𑒐𑒢 𑒣𑒩𑒱𑒔𑒨 𑒯𑒳𑒢𑒏𑒰 𑒦𑒹𑒙𑒪,
𑒣𑓂𑒩𑒮𑓂𑒞𑒰𑒫 𑒏𑒋𑒪 𑒣𑒳𑒞𑓂𑒩𑒲 𑒅𑒞𑓂𑒞𑒩𑒰𑒏 𑒫𑒱𑒫𑒰𑒯 𑒁𑒩𑓂𑒖𑒳𑒢𑒮𑒿 𑒏𑒩𑒥।
𑒁𑒩𑓂𑒖𑒳𑒢 𑒏𑒯𑒪 𑒣𑒜𑓃𑒹𑒢𑒹 𑒕𑒲 𑒯𑒧𑒩 𑒬𑒱𑒭𑓂𑒨𑒰 𑒁𑒕𑒱 𑒍 𑒩𑒯𑒪𑒱,
𑒣𑒳𑒞𑓂𑒩 𑒁𑒦𑒱𑒧𑒢𑓂𑒨𑒳𑒮𑒿 𑒯𑒼𑒋𑒞 𑒫𑒱𑒫𑒰𑒯𑒱𑒞 𑒅𑒞𑓂𑒞𑒩𑒰 𑒄 𑒣𑓂𑒩𑒮𑓂𑒞𑒰𑒫 𑒕𑒪।
𑒫𑒰𑒯 𑒥𑓂𑒨𑒰𑒮 𑒫𑒰𑒯, 𑒥𑒰𑒪-𑒁𑒧𑒹𑒪 𑒫𑒱𑒫𑒰𑒯 𑒫𑒱𑒩𑒼𑒡, 𑒏𑒲 𑒔𑒞𑒳𑒩𑒞𑒰 𑒏𑒾𑒬𑒪 𑒏𑒫𑒱𑒞𑓂𑒫𑒏 𑒏𑒋𑒪 𑒎।
𑒏𑒵𑒭𑓂𑒝-𑒥𑒪𑒩𑒰𑒧 𑒠𑓂𑒫𑒰𑒩𑒏𑒰𑒮𑒿 𑒥𑒩𑒱𑒨𑒰𑒞𑒲 𑒁𑒦𑒱𑒧𑒢𑓂𑒨𑒳𑒏 𑒪𑒋 𑒁𑒋𑒪𑒰𑒯,
𑒅𑒞𑓂𑒞𑒩𑒰𑒏 𑒫𑒱𑒫𑒰𑒯 𑒁𑒦𑒱𑒧𑒢𑓂𑒨𑒳𑒏 𑒮𑓀𑒑 𑒦𑒹𑒪 𑒥𑒛𑓃 𑒙𑒼𑒣-𑒙𑒯𑓀𑒏𑒰𑒩𑒮𑒿।
𑒕𑒪𑒰𑒯 𑒂𑒋𑒪 𑒩𑒰𑒖𑒰 𑒫𑒵𑒢𑓂𑒠 𑒁𑒦𑒱𑒧𑒢𑓂𑒨𑒳𑒏 𑒫𑒱𑒫𑒰𑒯 𑒣𑒩,
𑒦𑒹𑒪 𑒩𑒰𑒖𑒰𑒏 𑒮𑒦𑒰 𑒖𑒞𑒋 𑒏𑒵𑒭𑓂𑒝 𑒏𑒋𑒪 𑒫𑒱𑒢𑒞𑒲 𑒍𑒞𑒋।
𑒠𑓂𑒨𑒴𑒞 𑒐𑒹𑒪 𑒬𑒏𑒳𑒢𑒲𑒏, 𑒁𑒣𑒧𑒰𑒢 𑒠𑓂𑒩𑒾𑒣𑒠𑒲𑒏 𑒏𑒋𑒪 𑒖𑒹,
𑒠𑒳𑒩𑓂𑒨𑒼𑒡𑒢 𑒕𑒲𑒢𑒪 𑒩𑒰𑒖𑓂𑒨 𑒨𑒳𑒡𑒱𑒭𑓂𑒚𑒱𑒩𑒏 𑒁𑒡𑒩𑓂𑒧𑒮𑒿 𑒮𑒹।
𑒥𑒰𑒖𑒴 𑒣𑓂𑒩𑒨𑒞𑓂𑒢 𑒩𑒰𑒖𑓂𑒨-𑒣𑓂𑒩𑒰𑒣𑓂𑒞𑒱𑒏 𑒏𑒼𑒢𑒰 𑒯𑒼𑒋𑒞 𑒫𑒰,
𑒠𑒳𑒩𑓂𑒨𑒼𑒡𑒢𑒏 𑒁𑒞𑓂𑒨𑒰𑒔𑒰𑒩 𑒮𑒯𑒻𑒞 𑒩𑒯𑒟𑒳 𑒣𑒰𑒝𑓂𑒛𑒫 𑒮𑒞𑒞।
𑒠𑓂𑒩𑒳𑒣𑒠 𑒅𑒚𑒱 𑒏𑒯𑒪 𑒠𑒳𑒩𑒰𑒔𑒰𑒩𑒲 𑒏𑒾𑒩𑒫𑒏𑒹𑒿 𑒮𑒦 𑒖𑒢𑒋 𑒕𑒟𑒱,
𑒏𑒩𑓂𑒞𑒫𑓂𑒨 𑒯𑒧𑒩𑒰 𑒮𑒦𑒏 𑒟𑒱𑒏 𑒮𑒯𑒰𑒨 𑒥𑒢𑒲 𑒣𑒰𑒝𑓂𑒛𑒫 𑒖𑒢𑒏।
𑒏𑒩𑒋 𑒪𑒑𑒪𑒰𑒯 𑒣𑒰𑓀𑒛𑒫 𑒨𑒳𑒠𑓂𑒡𑒏 𑒞𑒻𑒨𑒰𑒩𑒲 𑒫𑒱𑒩𑒰𑒙 𑒠𑓂𑒩𑒳𑒣𑒠𑒏 𑒮𑓀𑒑 𑒣𑒰𑒥𑒱
𑒪𑒑𑒰𑒋 𑒏𑒳𑒩𑒳𑒏𑓂𑒭𑒹𑒞𑓂𑒩 𑒪𑒑 𑒣𑒰𑓀𑒛𑒫 𑒩𑒳𑒏𑒪𑒰𑒯 𑒬𑒱𑒫𑒱𑒩 𑒣𑒮𑒰𑒩𑒱।
𑒠𑒳𑒩𑓂𑒨𑒼𑒡𑒢𑒏𑒹𑒿 𑒖𑒐𑒢 𑒪𑒰𑒑𑒪 𑒐𑒥𑒩𑒱 𑒍𑒯𑒼 𑒏𑒋𑒪𑒏 𑒞𑒻𑒨𑒰𑒩𑒲,
𑒮𑓀𑒠𑒹𑒬 𑒣𑒚𑒰𑒍𑒪 𑒩𑒰𑒖𑒰 𑒮𑒦𑒏𑒹𑒿 𑒏𑒾𑒩𑒫 𑒣𑒰𑓀𑒛𑒫 𑒞𑒐𑒢,
𑒁𑒣𑒢 𑒣𑒏𑓂𑒭𑒧𑒹 𑒏𑒩𑒥𑒰 𑒪𑒹𑒪 𑒨𑒳𑒠𑓂𑒡 𑒬𑒳𑒩𑒳 𑒯𑒼𑒋𑒞 𑒖𑒐𑒢।
𑒏𑒳𑒩𑒳𑒏𑓂𑒭𑒹𑒞𑓂𑒩𑒏 𑒮𑓂𑒟𑒪𑒲𑒧𑒹 𑒮𑒦𑒙𑒰 𑒖𑒳𑒙𑒰𑒢 𑒪𑒰𑒑𑒪 𑒯𑒼𑒋 𑒬𑒳𑒩𑒴,
𑒨𑒰𑒠𑒫 𑒑𑒝𑒏𑒹𑒿 𑒣𑒏𑓂𑒭 𑒏𑒩𑒥𑒰 𑒪𑒋 𑒠𑒳𑒩𑓂𑒨𑒼𑒡𑒢 𑒠𑓂𑒫𑒰𑒩𑒏𑒰 𑒑𑒹𑒪 𑒮𑓂𑒫𑒨𑓀।
𑒣𑒯𑒳𑒿𑒔𑒱 𑒠𑒳𑒩𑓂𑒨𑒼𑒡𑒢 𑒑𑒹𑒪 𑒠𑒹𑒐𑒪 𑒏𑒶𑒭𑓂𑒝 𑒕𑒪𑒰𑒯 𑒮𑒳𑒞𑒪 𑒍𑒞𑒋,
𑒁𑒩𑓂𑒖𑒳𑒢 𑒮𑒹𑒯𑒼 𑒣𑒯𑒳𑒿𑒔𑒪 𑒣𑒻𑒩 𑒠𑒱𑒬𑒱 𑒥𑒻𑒮𑒱 𑒑𑒹𑒪 𑒍 𑒍𑒞𑒋।
𑒏𑒵𑒭𑓂𑒝 𑒖𑒐𑒢 𑒅𑒚𑒱 𑒠𑒹𑒐𑒪 𑒁𑒩𑓂𑒖𑒳𑒢 𑒕𑒪 𑒍𑒞𑒋,
𑒏𑒯𑒴 𑒫𑒞𑓂𑒮 𑒏𑒲 𑒔𑒰𑒯𑒲 𑒁𑒯𑒰𑒿 𑒂𑒋𑒪 𑒕𑒲 𑒋𑒞𑒋।
𑒨𑒳𑒠𑓂𑒡𑒧𑒹 𑒮𑓀𑒑 𑒁𑒯𑒰𑒿𑒏 𑒯𑒧𑒩𑒰 𑒔𑒰𑒯𑒲 𑒯𑒹 𑒢𑒰𑒩𑒰𑒨𑒝,
𑒁𑒩𑓂𑒖𑒳𑒢𑒏𑒹𑒿 𑒥𑒖𑒱𑒞𑒹 𑒠𑒳𑒩𑓂𑒨𑒼𑒡𑒢 𑒙𑒼𑒏𑒪 𑒁𑒋𑒪𑒯𑒳𑒿 𑒣𑒯𑒱𑒢𑒹 𑒋𑒞𑒋।
𑒏𑒵𑒭𑓂𑒝 𑒏𑒯𑒪 𑒯𑒧 𑒬𑒮𑓂𑒞𑓂𑒩 𑒢𑒯𑒱 𑒅𑒚𑒰𑒋𑒥 𑒨𑒳𑒠𑓂𑒡𑒧𑒹,
𑒢𑒰𑒩𑒰𑒨𑒝𑒲 𑒮𑒹𑒢𑒰 𑒔𑒰𑒯𑒲 𑒫𑒰 𑒯𑒧𑒩𑒰 𑒏𑒩𑒥 𑒁𑒯𑒿 𑒣𑒏𑓂𑒭𑒧𑒹।
𑒠𑒳𑒩𑓂𑒨𑒼𑒡𑒢 𑒢𑒰𑒩𑒰𑒨𑒝𑒲 𑒮𑒹𑒢𑒰 𑒔𑒳𑒢𑒱 𑒦𑒹𑒪 𑒮𑓀𑒞𑒳𑒭𑓂𑒙 𑒂,
𑒁𑒩𑓂𑒖𑒳𑒢𑒏𑒹𑒿 𑒢𑒰𑒩𑒰𑒨𑒝 𑒦𑒹𑒙𑒪 𑒕𑒪 𑒣𑓂𑒩𑒤𑒳𑒪𑓂𑒪𑒱𑒞 𑒮𑒹𑒯𑒼।
𑒣𑒰𑓀𑒛𑒫 𑒧𑒰𑒧𑒰 𑒕𑒪𑒰𑒯 𑒬𑒪𑓂𑒨 𑒧𑒰𑒠𑓂𑒩𑒲𑒏 𑒦𑒰𑒋 𑒖𑒹,
𑒂𑒥𑒱 𑒩𑒯𑒪 𑒨𑒳𑒠𑓂𑒡𑒏 𑒪𑒹𑒪 𑒠𑒳𑒩𑓂𑒨𑒼𑒡𑒢 𑒮𑒳𑒢𑒱 𑒑𑒹𑒪 𑒍𑒞𑒋।
𑒩𑒮𑓂𑒞𑒰𑒧𑒹 𑒫𑓂𑒨𑒫𑒮𑓂𑒟𑒰-𑒥𑒰𑒞 𑒏𑒋𑒪 𑒞𑒹𑒯𑒢 𑒕𑒪,
𑒬𑒪𑓂𑒨 𑒏𑒯𑒪 𑒁𑒕𑒱 𑒧𑒼𑒢 𑒣𑒳𑒩𑒮𑓂𑒏𑒵𑒞 𑒏𑒩𑒲 𑒏𑒰𑒖 𑒖𑒏𑒩।
𑒠𑒳𑒩𑓂𑒨𑒼𑒡𑒢 𑒦𑒹𑒐 𑒥𑒢𑒰 𑒖𑒰𑒋 𑒩𑒯𑒪 𑒕𑒪 𑒍𑒞𑒋,
𑒣𑓂𑒩𑒏𑒙 𑒦𑒋 𑒧𑒰𑒿𑒑𑒪 𑒨𑒳𑒠𑓂𑒡𑒧𑒹 𑒯𑒼𑒆 𑒮𑒰𑒯𑒰𑒨𑓂𑒨 𑒯𑒧𑒩,
𑒋𑒯𑒱 𑒮𑒦 𑒫𑓂𑒨𑒫𑒮𑓂𑒟𑒰𑒏 𑒕𑒲 𑒯𑒧𑒯𑒲 𑒢𑒱𑒩𑓂𑒧𑒰𑒝 𑒏𑒋𑒪।
𑒬𑒪𑓂𑒨 𑒠𑒋 𑒮𑓂𑒫𑒮𑓂𑒞𑒱 𑒣𑒯𑒳𑒿𑒔𑒪𑒰𑒯 𑒖𑒐𑒢 𑒏𑒳𑒩𑒳𑒏𑓂𑒭𑒹𑒞𑓂𑒩,
𑒨𑒳𑒡𑒱𑒭𑓂𑒚𑒱𑒩 𑒮𑒳𑒢𑒴 𑒕𑒪 𑒦𑒹𑒪 𑒯𑒧𑒩𑒰 𑒮𑓀𑒑 𑒁𑒞𑒋।
𑒏𑒾𑒩𑒫𑒏 𑒣𑒏𑓂𑒭𑒧𑒹 𑒨𑒳𑒠𑓂𑒡 𑒏𑒩𑒥𑒰 𑒪𑒋 𑒫𑒔𑒢 𑒥𑒠𑓂𑒡,
𑒏𑒯𑒴 𑒏𑒼𑒢 𑒫𑒱𑒡 𑒯𑒼𑒋 𑒮𑒰𑒯𑒰𑒨𑓂𑒨 𑒁𑒯𑒰𑒿𑒏 𑒫𑒞𑓂𑒮।
𑒨𑒳𑒡𑒱𑒭𑓂𑒚𑒱𑒩 𑒏𑒯𑒪 𑒥𑒢𑒴 𑒮𑒰𑒩𑒟𑒲 𑒏𑒩𑓂𑒝𑒏 𑒂 𑒏𑒩𑒴,
𑒯𑒞𑒼𑒞𑓂𑒮𑒰𑒯𑒱𑒞 𑒏𑒩𑓂𑒝𑒏𑒹𑒿 𑒑𑒳𑒝𑒑𑒰𑒢 𑒑𑒰𑒥𑒱 𑒣𑒰𑓀𑒛𑒫𑒏।
𑒬𑒪𑓂𑒨 𑒏𑒾𑒩𑒫𑒏 𑒬𑒱𑒫𑒱𑒩 𑒠𑒱𑒬𑒱 𑒔𑒪𑒪𑒰𑒯 𑒞𑒐𑒢,
𑒨𑒳𑒠𑓂𑒡 𑒮𑒢𑓂𑒢𑒱𑒏𑒙 𑒁𑒕𑒱 𑒏𑒵𑒭𑓂𑒝 𑒁𑒋𑒪𑒰𑒯 𑒖𑒰𑒢𑒱 𑒮𑒹𑒯𑒼,
𑒋𑒞𑒋 𑒮𑒳𑒢𑒪 𑒠𑓂𑒩𑒳𑒣𑒠𑒏 𑒣𑒳𑒩𑒯𑒱𑒞 𑒑𑒹𑒪 𑒕𑒪 𑒡𑒵𑒞𑒩𑒰𑒭𑓂𑒙𑓂𑒩 𑒪𑒑।
𑒮𑓀𑒡𑒱𑒏 𑒣𑓂𑒩𑒮𑓂𑒞𑒰𑒫 𑒣𑒩 𑒠𑒹𑒪𑒏 𑒏𑓂𑒨𑒼 𑒢𑒯𑒱 𑒙𑒹𑒩 𑒍𑒞𑒋,
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒩𑒰𑒖𑓂𑒨 𑒕𑒼𑒛𑓃𑒴 𑒮𑒳𑒃𑒨𑒰𑒏 𑒢𑒼𑒏 𑒠𑒹𑒐𑒢𑒹 𑒕𑒲?
𑒢𑒯𑒱 𑒦𑒹𑒙𑒞 𑒣𑒵𑒟𑓂𑒫𑒲 𑒍𑒞𑒥𑒼 𑒩𑒰𑒖𑓂𑒨𑒏 𑒞𑒿 𑒕𑒼𑒛𑓃𑒴 𑒥𑒰𑒞 𑒄।
𑒄 𑒮𑒳𑒃𑒨𑒰𑒏 𑒢𑒼𑒿𑒏 𑒦𑒩𑒱 𑒣𑒵𑒟𑓂𑒫𑒲𑒏 𑒢𑒯𑒱 𑒠𑒹𑒥𑒰𑒏 𑒥𑒱𑒧𑓂𑒥 𑒕𑒪, 𑒠𑒳𑒩𑓂𑒨𑒼𑒡𑒢𑒏 𑒯𑒚𑒏 𑒄 𑒂 𑒡𑒵𑒞𑒩𑒰𑒭𑓂𑒙𑓂𑒩𑒏 𑒂𑒏𑒰𑓀𑒏𑓂𑒭𑒰𑒏 𑒣𑓂𑒩𑒞𑒲𑒏 𑒕𑒪।
𑒨𑒳𑒡𑒱𑒭𑓂𑒚𑒱𑒩 𑒏𑒯𑒪 𑒬𑓂𑒩𑒲𑒏𑒵𑒭𑓂𑒝𑒏𑒹𑒿 𑒂𑒡 𑒩𑒰𑒖𑓂𑒨 𑒕𑒼𑒛𑓃𑒻𑒞 𑒕𑒲,
𑒖𑒰𑒆 𑒏𑒵𑒭𑓂𑒝 𑒣𑒰𑒿𑒔 𑒑𑒰𑒧 𑒠𑒳𑒩𑓂𑒨𑒼𑒡𑒢 𑒠𑒹𑒞 𑒖𑓂𑒨𑒼𑒿 𑒩𑒰𑒐𑒴 𑒣𑓂𑒩𑒮𑓂𑒞𑒰𑒫 𑒄,
𑒍𑒞𑒥𑒯𑒱𑒧𑒹 𑒏𑒩𑒥 𑒯𑒧 𑒮𑒦 𑒦𑒰𑒿𑒋 𑒧𑒰𑒋𑒏 𑒮𑓀𑒑 𑒢𑒱𑒩𑓂𑒫𑒰𑒯।
𑒮𑒰𑒞𑓂𑒨𑒏𑒲𑒏 𑒮𑓀𑒑 𑒏𑒵𑒭𑓂𑒝 𑒯𑒮𑓂𑒞𑒱𑒢𑒰𑒣𑒳𑒩𑒏 𑒪𑒹𑒪 𑒔𑒪𑒪𑒰 𑒖𑒐𑒢,
𑒠𑓂𑒩𑒾𑒣𑒠𑒲 𑒏𑒯𑒪𑒢𑓂𑒯𑒱 𑒠𑒹𑒐𑒴 𑒏𑒹𑒬 𑒤𑒳𑒖𑒪𑒹 𑒁𑒕𑒱 𑒍𑒯𑒱𑒢𑒰 𑒡𑒩𑒱 𑒋𑒐𑒢,
𑒏𑒰𑒢𑒱 𑒏𑒯𑒪 𑒮𑓀𑒡𑒱 𑒯𑒼𑒋𑒞 𑒨𑒳𑒠𑓂𑒡 𑒥𑒱𑒢 𑒐𑒳𑒖𑒪𑒹 𑒩𑒯𑒞 𑒫𑒹𑒝𑒲 𑒞𑒐𑒢।
𑒏𑒫𑒱𑒏 𑒥𑒱𑒧𑓂𑒥 𑒮𑒳𑒃𑒨𑒰 𑒥𑒩𑒰𑒥𑒛𑓃𑒱 𑒖𑒹 𑒢𑒯𑒱 𑒕𑒼𑒛𑓃𑒞 𑒯𑒚 𑒁𑒣𑒢, 𑒣𑒰𑒿𑒔 𑒑𑒰𑒧𑒏𑒹𑒿 𑒞𑒿 𑒥𑒳𑒗𑒞 𑒥𑓂𑒩𑒯𑓂𑒧𑒰𑒝𑓂𑒛 𑒍 𑒯𑒚𑒲 𑒮𑒠𑒱𑒐𑒢।
𑒏𑒵𑒭𑓂𑒝 𑒏𑒯𑒪 𑒧𑒰𑒢𑒞 𑒢𑒯𑒱 𑒮𑓀𑒡𑒱𑒏 𑒑𑒣 𑒏𑒐𑒢𑒯𑒳𑒿 𑒠𑒳𑒩𑓂𑒨𑒼𑒡𑒢,
𑒨𑒳𑒠𑓂𑒡 𑒁𑒕𑒱 𑒁𑒢𑒱𑒫𑒰𑒩𑓂𑒨 𑒧𑒢𑒼𑒩𑒟 𑒣𑒴𑒩𑓂𑒝 𑒯𑒼𑒋𑒞 𑒠𑓂𑒩𑒾𑒣𑒠𑒲 𑒁𑒯𑒿𑒏।
𑒏𑒵𑒭𑓂𑒝 𑒖𑒐𑒢 𑒑𑒹𑒪𑒰𑒯 𑒯𑒮𑓂𑒞𑒱𑒢𑒰𑒣𑒳𑒩 𑒮𑒦 𑒣𑓂𑒩𑒮𑒢𑓂𑒢 𑒕𑒪,
𑒡𑒵𑒞𑒩𑒰𑒭𑓂𑒙𑓂𑒩, 𑒠𑒳𑓁𑒬𑒰𑒮𑒢-𑒠𑒳𑒩𑓂𑒨𑒼𑒡𑒢𑒏 𑒮𑓀𑒑 𑒮𑓂𑒫𑒰𑒑𑒞 𑒏𑒋𑒪।
𑒧𑒳𑒠𑒰 𑒏𑒵𑒭𑓂𑒝 𑒍𑒞𑒋 𑒢𑒯𑒱 𑒚𑒯𑒩𑒱 𑒠𑒲𑒠𑒲 𑒏𑒳𑒢𑓂𑒞𑒲𑒏 𑒪𑒑 𑒑𑒹𑒪𑒰𑒯,
𑒫𑒱𑒠𑒳𑒩𑒏 𑒑𑒵𑒯𑒧𑒹 𑒕𑒪𑒲𑒯 𑒍𑒞𑒋 𑒑𑒣 𑒫𑒱𑒮𑓂𑒞𑒵𑒞 𑒦𑒹𑒪 𑒂𑒥।
𑒏𑒯𑒪 𑒏𑒳𑒢𑓂𑒞𑒲 𑒠𑒲𑒠𑒲 𑒁𑒯𑒰𑒿 𑒖𑒰 𑒏𑒋 𑒏𑒩𑓂𑒝𑒏𑒹𑒿 𑒣𑒩𑒱𑒔𑒋 𑒠𑒱𑒁,
𑒂𑒥𑒱 𑒖𑒋𑒞 𑒦𑓂𑒩𑒰𑒞𑒵-𑒣𑒰𑒝𑓂𑒛𑒫 𑒪𑒑 𑒮𑒞𑓂𑒨 𑒍 𑒖𑒰𑒢𑒱 𑒏𑒋।
𑒠𑒼𑒮𑒩 𑒠𑒱𑒢 𑒮𑒦𑒰𑒧𑒹 𑒣𑒯𑒳𑒿𑒔𑒪𑒰𑒯 𑒏𑒵𑒭𑓂𑒝, 𑒕𑒪 𑒕𑒪 𑒍𑒞𑒋 𑒧𑒳𑒠𑒰,
𑒠𑒳𑒩𑓂𑒨𑒼𑒡𑒢 𑒫𑒱𑒔𑒰𑒩𑒪 𑒥𑒰𑒢𑓂𑒯𑒱 𑒩𑒰𑒐𑒥 𑒏𑒵𑒭𑓂𑒝𑒏𑒹𑒿 𑒁𑒋𑒞𑒰𑒯 𑒖𑓂𑒨𑒼𑒿।
𑒦𑒲𑒭𑓂𑒧 𑒡𑒵𑒞𑒩𑒰𑒭𑓂𑒙 𑒠𑓂𑒩𑒼𑒝 𑒏𑒵𑒣 𑒏𑒩𑓂𑒝 𑒬𑒏𑒳𑒢𑒱 𑒠𑒳𑓁𑒬𑒰𑒮𑒢 𑒍𑒞𑒋,
𑒏𑒵𑒭𑓂𑒝 𑒏𑒯𑒪 𑒬𑒏𑒳𑒢𑒱𑒏 𑒔𑒾𑒣𑒛𑓃 𑒠𑒳𑒩𑓂𑒨𑒼𑒡𑒢𑒏 𑒠𑒱𑒬𑒱𑒮𑒿 𑒤𑒹𑒏𑒥,
𑒁𑒢𑓂𑒨𑒰𑒨𑒣𑒴𑒩𑓂𑒝 𑒕𑒪 𑒍𑒯𑒱𑒢𑒰 𑒠𑓂𑒩𑒾𑒣𑒠𑒲𑒏 𑒁𑒣𑒧𑒰𑒢 𑒕𑒪 𑒏𑒩𑒥।
𑒫𑒱𑒩𑒰𑒙 𑒣𑒩 𑒂𑒏𑓂𑒩𑒧𑒝 𑒣𑒰𑒝𑓂𑒛𑒫𑒏𑒹𑒿 𑒮𑒞𑒹𑒥𑒰𑒏 𑒅𑒣𑒏𑓂𑒩𑒧 𑒥𑒢𑒪,
𑒂𑒡 𑒩𑒰𑒖𑓂𑒨 𑒖𑓂𑒨𑒼𑒿 𑒠𑒋 𑒠𑒲 𑒞𑒐𑒢𑒼 𑒬𑒰𑒢𑓂𑒞𑒱𑒮𑒿 𑒩𑒯𑒱 𑒮𑒏𑒻𑒕 𑒮𑒦।
𑒮𑒦 𑒏𑒋𑒪 𑒮𑓂𑒫𑒰𑒑𑒞 𑒋𑒏𑒩 𑒠𑒳𑒩𑓂𑒨𑒼𑒡𑒢 𑒧𑒳𑒠𑒰 𑒏𑓂𑒩𑒼𑒡𑒱𑒞 𑒥𑒢𑒪,
𑒏𑒵𑒭𑓂𑒝𑒏𑒹𑒿 𑒥𑒢𑓂𑒯𑒥𑒰𑒏 𑒂𑒖𑓂𑒘𑒰 𑒠𑒹𑒪𑒏 𑒦𑒲𑒭𑓂𑒧 𑒞𑒧𑒮𑒨𑒪𑒰𑒯 𑒥𑒛𑓃।
𑒞𑒹𑒖 𑒏𑒵𑒭𑓂𑒝𑒏 𑒧𑒳𑒐𑒏 𑒠𑒹𑒐𑒱 𑒏𑒾𑒩𑒫 𑒦𑒨𑒮𑒿 𑒕𑒪 𑒮𑒱𑒯𑒩𑒪।
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒣𑒱𑒞𑒰 𑒖𑓂𑒨𑒹𑒭𑓂𑒚 𑒯𑒧𑒩 𑒁𑓀𑒡 𑒕𑒪𑒰𑒯 𑒮𑒹 𑒩𑒰𑒖𑓂𑒨 𑒢𑒯𑒱 𑒦𑒹𑒙𑒪𑒢𑓂𑒯𑒱,
𑒯𑒳𑒢𑒏 𑒣𑒳𑒞𑓂𑒩 𑒖𑓂𑒨𑒹𑒭𑓂𑒚 𑒯𑒧 𑒮𑒹 𑒁𑒡𑒱𑒏𑒰𑒩 𑒯𑒮𑓂𑒞𑒱𑒢𑒰𑒣𑒳𑒩 𑒣𑒩 𑒁𑒕𑒱 𑒮𑒳𑒢𑒪𑒯𑒳𑒿।
𑒣𑒰𑒝𑓂𑒛𑒫 𑒁𑒢𑓂𑒨𑒰𑒨𑒮𑒿 𑒪𑒋 𑒩𑒰𑒖𑓂𑒨 𑒏𑒩𑒋 𑒕𑒟𑒱 𑒏𑒩𑒻𑒞 𑒞𑒻𑒨𑓂𑒨𑒰𑒩𑒲 𑒨𑒳𑒠𑓂𑒡𑒏,
𑒏𑒵𑒭𑓂𑒝 𑒁𑒕𑒱 𑒣𑒰𑒕𑒰𑒿 𑒍𑒏𑒩 𑒯𑒧 𑒞𑒿 𑒩𑒏𑓂𑒭𑒰 𑒩𑒰𑒖𑓂𑒨𑒏 𑒏𑒩𑒋 𑒕𑒲।
𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒞𑒐𑒢 𑒣𑒰𑒿𑒔 𑒑𑒰𑒧 𑒠𑒱𑒁 𑒏𑒩𑒥𑒰 𑒪𑒋 𑒢𑒱𑒩𑓂𑒫𑒰𑒯,
𑒧𑒳𑒠𑒰 𑒠𑒳𑒩𑓂𑒨𑒼𑒡𑒢 𑒏𑒯𑒪 𑒩𑒰𑒖𑓂𑒨𑒏 𑒦𑒰𑒑 𑒢𑒯𑒱 𑒯𑒼𑒋𑒞 𑒑𑒋 𑒂𑒥।
𑒏𑒵𑒭𑓂𑒝 𑒥𑒰𑒖𑒱 𑒖𑒹 𑒯𑒹 𑒠𑒳𑒩𑓂𑒨𑒼𑒡𑒢 𑒧𑒠𑒰𑒢𑓂𑒡 𑒕𑒲 𑒥𑒢𑒪 𑒁𑒯𑒰𑒿,
𑒣𑒰𑒝𑓂𑒛𑒫𑒏 𑒬𑒏𑓂𑒞𑓂𑒞𑒱𑒏 𑒮𑒼𑒗𑒰𑒿 𑒢𑒰𑒬 𑒯𑒼𑒋𑒞 𑒢𑒱𑒬𑓂𑒔𑒱𑒞 𑒥𑒳𑒗𑒴 𑒁𑒯𑒰𑒿𑒏।
𑒏𑒳𑒢𑓂𑒞𑒲 𑒥𑒰𑒠𑒧𑒹 𑒑𑒹𑒪𑒲𑒯 𑒏𑒩𑓂𑒝𑒏𑒹𑒿 𑒏𑒯𑒪 𑒠𑒳𑒩𑓂𑒫𑒰𑒮𑒰𑒏 𑒧𑓀𑒞𑓂𑒩 𑒦𑒹𑒙𑒪,
𑒣𑒜𑓃𑒪 𑒮𑒴𑒩𑓂𑒨𑒏𑒹𑒿 𑒮𑓂𑒧𑒩𑒝 𑒏𑒋 𑒣𑒳𑒞𑓂𑒩 𑒯𑒧𑒩 𑒦𑒹𑒪𑒯𑒳𑒿 𑒁𑒯𑒰𑒿 𑒞𑒐𑒢।
𑒣𑓂𑒩𑒝𑒰𑒧 𑒏𑒋𑒪 𑒧𑒰𑒞𑒰𑒏𑒹𑒿 𑒏𑒩𑓂𑒝 𑒞𑒐𑒢 𑒥𑒖𑒪𑒲𑒯 𑒮𑒳𑒢𑒴 𑒄,
𑒖𑓂𑒨𑒹𑒭𑓂𑒚 𑒣𑒰𑒝𑓂𑒛𑒫 𑒕𑒲 𑒁𑒯𑒰𑒿, 𑒩𑒰𑒖𑓂𑒨 𑒨𑒳𑒡𑒱𑒭𑓂𑒚𑒱𑒩 𑒠𑒹𑒞 𑒁𑒯𑒲𑒏𑒹𑒿।
𑒖𑒐𑒢 𑒢𑒯𑒱 𑒧𑒰𑒢𑒪 𑒏𑒩𑓂𑒝 𑒏𑒳𑒢𑓂𑒞𑒲 𑒣𑒳𑒕𑒪 𑒧𑒰𑒞𑒵𑒇𑒝𑒮𑒿,
𑒅𑒥𑒩𑒥 𑒏𑒼𑒢𑒰, 𑒏𑒩𑓂𑒝 𑒥𑒰𑒖𑒪 𑒯𑒹 𑒧𑒰𑒞𑒰 𑒞𑒐𑒢 𑒮𑒳𑒢𑒴 𑒄।
𑒁𑒩𑓂𑒖𑒳𑒢𑒏𑒹𑒿 𑒕𑒼𑒛𑓃𑒱 𑒔𑒰𑒩𑒴 𑒣𑒰𑒝𑓂𑒛𑒫𑒮𑒿 𑒢𑒯𑒱 𑒪𑒛𑓃𑒥 𑒣𑒴𑒩𑓂𑒝 𑒬𑒏𑓂𑒞𑓂𑒞𑒱𑒨𑒹𑒿,
𑒁𑒩𑓂𑒖𑒳𑒢𑒏𑒹𑒿 𑒧𑒰𑒩𑒥 𑒞𑒐𑒢 𑒥𑒢𑒥 𑒣𑒳𑒞𑓂𑒩 𑒁𑒯𑒲𑒏𑒹𑒿।
𑒫𑒰 𑒧𑒩𑒥 𑒯𑒧 𑒣𑒳𑒞𑓂𑒩 𑒞𑒻𑒨𑒼 𑒣𑒰𑒿𑒔 𑒙𑒰 𑒩𑒯𑒥𑒹 𑒏𑒩𑒞,
𑒄 𑒣𑓂𑒩𑒞𑒱𑒖𑓂𑒘𑒰 𑒯𑒧 𑒏𑒩𑒋 𑒕𑒲 𑒧𑒰𑒞𑒰 𑒏𑒳𑒢𑓂𑒞𑒲 𑒁𑒋𑒪𑒲𑒯 𑒒𑒳𑒩𑒱।
𑒏𑒵𑒭𑓂𑒝 𑒂𑒥𑒱 𑒒𑒳𑒩𑒱 𑒣𑒯𑒳𑒿𑒔𑒱 𑒬𑒱𑒫𑒱𑒩 𑒣𑒰𑒝𑓂𑒛𑒫𑒏 𑒖𑒐𑒢,
𑒣𑒰𑒝𑓂𑒛𑒫 𑒨𑒳𑒠𑓂𑒡𑒏 𑒏𑒋𑒪 𑒣𑓂𑒩𑒏𑓂𑒩𑒱𑒨𑒰 𑒬𑒳𑒩𑒴 𑒍𑒞𑒋 𑒞𑒐𑒢।
𑒮𑒰𑒞 𑒁𑒏𑓂𑒭𑒾𑒯𑒱𑒝𑒲 𑒮𑒹𑒢𑒰 𑒒𑒼𑒛𑓃𑒰, 𑒩𑒟, 𑒯𑒰𑒟𑒲, 𑒮𑒻𑒢𑒱𑒏𑒏,
𑒁𑒩𑓂𑒖𑒳𑒢 𑒦𑒲𑒧 𑒮𑒰𑒞𑓂𑒨𑒱𑒏𑒱 𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒠𑓂𑒩𑒳𑒣𑒠 𑒫𑒱𑒩𑒰𑒙 𑒪𑒑।
𑒏𑒾𑒩𑒫 𑒮𑒹𑒯𑒼 𑒋𑒑𑒰𑒩𑒯 𑒁𑒏𑓂𑒭𑒾𑒯𑒱𑒝𑒲 𑒮𑒹𑒢𑒰 𑒏𑒵𑒣𑒰𑒔𑒰𑒩𑓂𑒨 𑒬𑒪𑓂𑒨 𑒦𑒴𑒩𑒱𑒬𑓂𑒩𑒫𑒰,
𑒦𑒲𑒭𑓂𑒧 𑒠𑓂𑒩𑒼𑒝 𑒏𑒩𑓂𑒝 𑒁𑒬𑓂𑒫𑒞𑓂𑒟𑒰𑒧𑒰 𑒖𑒨𑒠𑓂𑒩𑒟 𑒏𑒵𑒞𑒫𑒩𑓂𑒧𑒰 𑒦𑒑𑒠𑒞𑓂𑒞 𑒕𑒪।
𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒮𑒹𑒢𑒰𑒣𑒞𑒱 𑒣𑒰𑒝𑓂𑒛𑒫𑒏 𑒦𑒲𑒭𑓂𑒧 𑒏𑒾𑒩𑒫𑒏 𑒥𑒢𑒪,
𑒏𑒩𑓂𑒝 𑒬𑒮𑓂𑒞𑓂𑒩 𑒢𑒯𑒱 𑒅𑒚𑒹𑒥𑒰𑒏 𑒏𑒋𑒪 𑒣𑓂𑒩𑒞𑒱𑒖𑓂𑒘𑒰
𑒦𑒲𑒭𑓂𑒧 𑒨𑒰𑒫𑒞 𑒨𑒳𑒠𑓂𑒡𑒏𑓂𑒭𑒹𑒞𑓂𑒩𑒧𑒹 𑒩𑒯𑒞𑒰𑒯 𑒑𑒋।
𑒦𑒲𑒭𑓂𑒧 𑒏𑒯𑒪 𑒧𑒰𑒩𑒥 𑒢𑒯𑒱 𑒣𑒰𑒝𑓂𑒛𑒫𑒏𑒹𑒿 𑒋𑒏𑒼𑒙𑒰,
𑒮𑒹𑒢𑒰𑒏 𑒮𑓀𑒯𑒰𑒩 𑒏𑒩𑒥 𑒨𑒟𑒰 𑒮𑓀𑒦𑒫 𑒯𑒼𑒋𑒞।
𑒥𑓂𑒨𑒰𑒮 𑒡𑒵𑒞𑒩𑒰𑒭𑓂𑒙𑓂𑒩𑒏 𑒪𑒑 𑒑𑒹𑒪𑒰𑒯 𑒏𑒯𑒪 𑒥𑓂𑒨𑒰𑒮𑒖𑒲 𑒮𑒳𑒢𑒴,
𑒁𑓀𑒡𑒞𑓂𑒫 𑒦𑒹𑒪 𑒫𑒩 𑒯𑒧𑒩 𑒏𑒳𑒪 𑒮𑓀𑒯𑒰𑒩 𑒠𑒹𑒐𑒥 𑒢𑒯𑒱 𑒏𑒱𑒋𑒏।
𑒧𑒳𑒠𑒰 𑒫𑒲𑒩𑒏 𑒑𑒰𑒟𑒰 𑒮𑒳𑒢𑒥𑒰𑒏 𑒁𑒕𑒱 𑒃𑒔𑓂𑒕𑒰 𑒥𑒯𑒳𑒞,
𑒥𑓂𑒨𑒰𑒮 𑒠𑒹𑒪 𑒨𑒼𑒑𑒮𑒿 𑒠𑒱𑒫𑓂𑒨𑒠𑒵𑒭𑓂𑒙𑒱 𑒮𑓀𑒖𑒨𑒏𑒹𑒿 𑒏𑒯𑒪,
𑒥𑒻𑒮𑒪𑒹-𑒥𑒻𑒮𑒪 𑒠𑒹𑒐𑒱 𑒮𑓀𑒖𑒨 𑒫𑒩𑓂𑒝𑒢 𑒏𑒩𑒞𑒰𑒯 𑒨𑒳𑒠𑓂𑒡𑒏,
𑒥𑒰𑒖𑒱 𑒄 𑒥𑓂𑒨𑒰𑒮 𑒥𑒱𑒠𑒰 𑒦𑒋 𑒑𑒹𑒪𑒰𑒯 𑒍𑒞𑒋𑒮𑒿।
𑒦𑒹𑒪 𑒦𑒼𑒩 𑒩𑒝𑒦𑒴𑒧𑒱𑒧𑒹 𑒏𑒾𑒩𑒫-𑒣𑒰𑒝𑓂𑒛𑒫 𑒖𑒳𑒙𑒪 𑒮𑒹𑒢𑒰 𑒮𑒯𑒱𑒞
𑒂𑒑𑒰𑒿 𑒦𑒲𑒭𑓂𑒧 𑒏𑒾𑒩𑒫𑒏 𑒂 𑒣𑒰𑒝𑓂𑒛𑒫𑒏 𑒁𑒩𑓂𑒖𑒳𑒢-𑒏𑒵𑒭𑓂𑒝 𑒩𑒯𑒟𑒱।
𑒦𑒲𑒭𑓂𑒧𑒏 𑒩𑒟𑒏 𑒠𑒳𑒯𑒳𑒍𑒩 𑒠𑒳𑓁𑒬𑒰𑒮𑒢 𑒠𑒳𑒩𑓂𑒨𑒼𑒡𑒢 𑒕𑒪𑒰𑒯,
𑒣𑒰𑒩𑓂𑒬𑓂𑒫𑒧𑒹 𑒁𑒬𑓂𑒫𑒞𑓂𑒟𑒰𑒧𑒰 𑒑𑒳𑒩𑒳 𑒠𑓂𑒩𑒼𑒝𑒏 𑒮𑓀𑒑 𑒦𑒰𑒑𑓂𑒨 𑒂𑒯।
𑒨𑒳𑒠𑓂𑒡 𑒏𑒋 𑒩𑒰𑒖𑓂𑒨 𑒣𑒰𑒋𑒥 𑒧𑒰𑒩𑒱 𑒦𑓂𑒩𑒰𑒞𑒰 𑒣𑓂𑒩𑒱𑒨𑒖𑒢𑒏𑒹𑒿,
𑒮𑒼𑒔𑒱 𑒫𑒱𑒯𑓂𑒫𑒪 𑒦𑒹𑒪 𑒁𑒩𑓂𑒖𑒳𑒢 𑒑𑒰𑓀𑒛𑒲𑒫 𑒐𑒮𑒞 𑒏𑒵𑒭𑓂𑒝 𑒯𑒧𑒩।
𑒏𑒩𑓂𑒧𑒨𑒼𑒑 𑒅𑒣𑒠𑒹𑒬 𑒠𑒹𑒪 𑒏𑒵𑒭𑓂𑒝 𑒠𑒴𑒩 𑒏𑒩𑒴 𑒧𑒼𑒯-𑒦𑓂𑒩𑒧,
𑒮𑓂𑒫𑒖𑒢 𑒣𑓂𑒩𑒞𑒱 𑒧𑒼𑒯 𑒏𑒩𑒱 𑒏𑓂𑒭𑒰𑒞𑓂𑒩𑒡𑒩𑓂𑒧𑒮𑒿 𑒫𑒱𑒧𑒳𑒐 𑒢 𑒯𑒼𑒆।
𑒁𑒡𑒩𑓂𑒧𑒮𑒿 𑒏𑒾𑒩𑒫𑒏 𑒁𑒕𑒱 𑒢𑒰𑒬 𑒦𑒹𑒪 𑒠𑒹𑒐𑒴 𑒄 𑒠𑒵𑒬𑓂𑒨।
𑒫𑒱𑒩𑒰𑒙𑒩𑒴𑒣 𑒠𑒹𑒐𑒱 𑒁𑒩𑓂𑒖𑒳𑒢 𑒫𑒱𑒬𑒰𑒪 𑒁𑒑𑓂𑒢𑒱 𑒖𑓂𑒫𑒰𑒪𑒧𑒹,
𑒖𑒲𑒫-𑒖𑒢𑓂𑒞𑒳 𑒂𑒥𑒱 𑒐𑒮𑒟𑒱 𑒦𑒮𑓂𑒧 𑒯𑒼𑒟𑒱 𑒏𑓂𑒭𑒝𑒯𑒱,
𑒏𑒾𑒩𑒫𑒑𑒝 𑒮𑒹𑒯𑒼 𑒦𑒮𑓂𑒧 𑒦𑒋 𑒩𑒯𑒪 𑒕𑒪𑒰𑒯,
𑒔𑒹𑒞𑒢𑒰 𑒖𑒰𑒑𑒪 𑒁𑒩𑓂𑒖𑒳𑒢𑒏 𑒮𑓂𑒞𑒳𑒞𑒱 𑒏𑒋𑒪 𑒮𑒠𑓂𑒨𑓁।
𑒤𑒪𑒏 𑒔𑒱𑒢𑓂𑒞𑒰 𑒕𑒼𑒛𑓃𑒱 𑒏𑒩𑓂𑒧 𑒏𑒩𑒥𑒰𑒏 𑒖𑓂𑒘𑒰𑒢𑒮𑒿,
𑒂𑒞𑓂𑒧𑒰 𑒁𑒧𑒩 𑒁𑒕𑒱 𑒬𑒼𑒏 𑒋𑒏𑒩 𑒪𑒹𑒪 𑒏𑒩𑒥 𑒢𑒯𑒱 𑒅𑒔𑒱𑒞।
𑒨𑒳𑒡𑒱𑒭𑓂𑒚𑒱𑒩 𑒅𑒞𑒩𑒱 𑒩𑒟𑒮𑒿 𑒦𑒲𑒭𑓂𑒧𑒏 𑒩𑒟𑒏 𑒠𑒱𑒮 𑒑𑒹𑒪,
𑒑𑒳𑒩𑒳𑒖𑒢𑒏 𑒂𑒬𑒲𑒩𑓂𑒫𑒰𑒠 𑒪𑒋 𑒡𑒩𑓂𑒧𑒣𑒰𑒪𑒢 𑒧𑒼𑒢 𑒩𑒰𑒐𑒪।
𑒦𑒲𑒭𑓂𑒧 𑒠𑓂𑒩𑒼𑒝 𑒏𑒵𑒣𑒰𑒔𑒰𑒩𑓂𑒨 𑒣𑒳𑒪𑒏𑒱𑒞 𑒫𑒱𑒖𑒨𑒏 𑒂𑒬𑒲𑒭 𑒠𑒹𑒪,
𑒡𑒵𑒞𑒩𑒰𑒭𑓂𑒙𑓂𑒩 𑒣𑒳𑒞𑓂𑒩 𑒨𑒳𑒨𑒳𑒞𑓂𑒮𑒳 𑒠𑒹𑒐𑒱 𑒩𑒯𑒪 𑒕𑒪 𑒡𑒩𑓂𑒧𑒢𑒲𑒞𑒱
𑒕𑒼𑒛𑓃𑒱 𑒏𑒾𑒩𑒫 𑒧𑒱𑒪𑒪 𑒣𑒰𑒝𑓂𑒛𑒫 𑒣𑒏𑓂𑒭𑒧𑒹 𑒞𑒞𑓂𑒏𑒰𑒪,
𑒨𑒳𑒭𑒱𑒭𑓂𑒚𑒱𑒩 𑒧𑒱𑒪𑒰𑒍𑒪 𑒑𑒩 𑒍𑒏𑒩𑒮𑒿 𑒦𑒹𑒪 𑒬𑓀𑒐𑒢𑒰𑒠।
𑒁𑒩𑓂𑒖𑒳𑒢 𑒬𑓀𑒐 𑒠𑒹𑒫𑒠𑒞𑓂𑒞 𑒤𑒴𑒏𑒱 𑒏𑒋𑒪 𑒨𑒳𑒠𑓂𑒡𑒏 𑒒𑒼𑒭𑒝𑒰,
𑒂𑒏𑓂𑒩𑒧𑒝 𑒏𑒾𑒩𑒫𑒣𑒩 𑒏𑒋 𑒩𑒟 𑒯𑒮𑓂𑒞𑒱 𑒒𑒼𑒙𑒏 𑒣𑒻𑒠𑒪,
𑒨𑒳𑒠𑓂𑒡𑒧𑒹 𑒣𑒯𑒱𑒪 𑒠𑒱𑒢 𑒧𑒳𑒃𑒪 𑒅𑒞𑓂𑒞𑒩 𑒫𑒱𑒩𑒰𑒙𑒏 𑒣𑒳𑒞𑓂𑒩 𑒕𑒪।
𑒦𑒲𑒭𑓂𑒧 𑒏𑒋𑒪 𑒦𑒲𑒭𑒝 𑒏𑓂𑒭𑒞𑒱 𑒮𑒰𑒿𑒗𑒧𑒹 𑒁𑒩𑓂𑒖𑒳𑒢𑒏 𑒬𑓀𑒐,
𑒥𑒰𑒖𑒱 𑒏𑒋𑒪 𑒨𑒳𑒠𑓂𑒡𑒏 𑒮𑒧𑒰𑒣𑓂𑒞𑒱 𑒦𑒲𑒭𑓂𑒧 𑒮𑒹𑒯𑒼 𑒥𑒖𑒰𑒍𑒪 𑒁𑒣𑒢।
𑒣𑒯𑒱𑒪 𑒠𑒱𑒢𑒏 𑒨𑒳𑒠𑓂𑒡𑒮𑒿 𑒣𑒰𑒝𑓂𑒛𑒫 𑒬𑒼𑒏𑒱𑒞 𑒠𑒳𑒩𑓂𑒨𑒼𑒡𑒢 𑒯𑒩𑓂𑒭𑒱𑒞।
𑒠𑒼𑒮𑒩 𑒠𑒱𑒢𑒏 𑒨𑒳𑒠𑓂𑒡 𑒖𑒐𑒢 𑒬𑒳𑒩𑒴 𑒦𑒲𑒭𑓂𑒧 𑒂𑒢𑒪 𑒣𑓂𑒩𑒪𑒨।
𑒏𑒵𑒭𑓂𑒝 𑒋𑒢𑒰 𑒦𑒋 𑒯𑒧𑒩 𑒮𑒹𑒢𑒰 𑒧𑒩𑒞 𑒔𑒪𑒴 𑒦𑒲𑒭𑓂𑒧 𑒪𑒑,
𑒯𑒿 𑒡𑒢𑒘𑓂𑒖𑒨 𑒩𑒟 𑒪𑒋 𑒖𑒰𑒃𑒞 𑒕𑒲 𑒦𑒲𑒭𑓂𑒧𑒏 𑒮𑒧𑒏𑓂𑒭।
𑒠𑒳𑒯𑒳𑒏 𑒥𑒲𑒔 𑒖𑒹 𑒨𑒳𑒠𑓂𑒡 𑒦𑒹𑒪 𑒫𑒱𑒏𑒩𑒰𑒪 𑒕𑒪 𑒟𑒩𑒟𑒩𑒰𑒋𑒪 𑒮𑒏𑒪।
𑒦𑒲𑒧 𑒮𑒹𑒯𑒼 𑒮𑓀𑒯𑒰𑒩𑒏 𑒥𑒢𑒪 𑒦𑒲𑒭𑓂𑒧 𑒕𑒼𑒛𑓃𑒱 𑒁𑒩𑓂𑒖𑒳𑒢𑒏𑒹𑒿 𑒍𑒧𑓂𑒯𑒩 𑒠𑒾𑒑𑒪,
𑒮𑒰𑒞𑓂𑒨𑒱𑒏𑒲𑒏 𑒫𑒰𑒝𑒮𑒿 𑒦𑒲𑒭𑓂𑒧𑒏 𑒮𑒯𑒲𑒮𑒏 𑒁𑒣𑒒𑒰𑒞 𑒦𑒹𑒪,
𑒐𑒮𑒪 𑒦𑒴𑒧𑒱 𑒞𑒐𑒢 𑒍 𑒦𑒲𑒭𑓂𑒧𑒏 𑒒𑒼𑒛𑓃𑒰 𑒦𑒰𑒑𑒪 𑒫𑒹𑒑𑒧𑒰𑒢 𑒦𑒋,
𑒮𑒰𑒿𑒗 𑒦𑒹𑒪 𑒬𑓀𑒐 𑒥𑒰𑒖𑒪 𑒨𑒳𑒠𑓂𑒡 𑒠𑒴 𑒠𑒱𑒢𑒏 𑒮𑒧𑒰𑒣𑓂𑒞 𑒦𑒹𑒪।
𑒞𑒹𑒮𑒩 𑒠𑒱𑒢 𑒮𑒰𑒞𑓂𑒨𑒱𑒏𑒲 𑒁𑒦𑒱𑒧𑒢𑓂𑒨𑒳 𑒏𑒾𑒩𑒫𑒣𑒩 𑒕𑒴𑒙𑒪,
𑒠𑓂𑒩𑒼𑒝𑒣𑒩 𑒮𑒯𑒠𑒹𑒫-𑒢𑒏𑒳𑒪 𑒨𑒳𑒡𑒱𑒭𑓂𑒚𑒱𑒩 𑒂𑒏𑓂𑒩𑒧𑒝 𑒏𑒋𑒪,
𑒠𑒳𑒩𑓂𑒨𑒼𑒡𑒢𑒣𑒩 𑒙𑒴𑒙𑒪 𑒦𑒲𑒧 𑒫𑒰𑒝 𑒧𑒰𑒩𑒱 𑒁𑒔𑒹𑒞 𑒏𑒋𑒪,
𑒍𑒏𑒩 𑒮𑒯𑒲𑒮 𑒠𑒳𑒩𑓂𑒨𑒼𑒡𑒢𑒏𑒹𑒿 𑒪𑒋 𑒔𑒪𑒪 𑒩𑒝𑒏𑓂𑒭𑒹𑒞𑓂𑒩𑒮𑒿,
𑒏𑒾𑒩𑒫 𑒮𑒹𑒢𑒰 𑒥𑒳𑒗𑒪 𑒦𑒰𑒑𑒪 𑒕𑒪 𑒍 𑒨𑒳𑒠𑓂𑒡 𑒕𑒼𑒛𑓃𑒱 𑒏𑒋।
𑒦𑒰𑒑𑒱 𑒩𑒯𑒪 𑒮𑒹𑒢𑒰𑒣𑒩 𑒦𑒲𑒧 𑒏𑒋𑒪𑒢𑓂𑒯𑒱 𑒂𑒏𑓂𑒩𑒧𑒝,
𑒮𑒰𑒿𑒗 𑒥𑒢𑒱 𑒩𑒏𑓂𑒭𑒏 𑒂𑒋𑒪 𑒠𑒳𑒩𑓂𑒨𑒼𑒡𑒢 𑒏𑒳𑒣𑒱𑒞 𑒦𑒋𑒪।
𑒦𑒲𑒭𑓂𑒧𑒏𑒹𑒿 𑒩𑒰𑒞𑓂𑒩𑒱𑒧𑒹 𑒏𑒯𑒪 𑒁𑒯𑒰𑒿𑒏 𑒯𑒵𑒠𑒨 𑒁𑒕𑒱 𑒣𑒏𑓂𑒭𑒧𑒹 𑒣𑒰𑓀𑒛𑒫𑒏,
𑒦𑒲𑒭𑓂𑒧 𑒏𑒯𑒪 𑒕𑒟𑒱 𑒍 𑒁𑒖𑒹𑒨 𑒣𑒩𑒘𑓂𑒔 𑒨𑒳𑒠𑓂𑒡 𑒦𑒩𑒱 𑒮𑒏 𑒏𑒩𑒥।
𑒮𑒏 𑒦𑒩𑒱 𑒨𑒳𑒠𑓂𑒡 𑒏𑒩𑒥𑒰𑒏 𑒥𑒰𑒞 𑒏𑒯𑒪 𑒦𑒲𑒭𑓂𑒧 𑒠𑒳𑒩𑓂𑒨𑒼𑒡𑒢𑒏𑒹𑒿,
𑒔𑒰𑒩𑒱𑒧 𑒠𑒱𑒢 𑒏𑒋𑒪 𑒂𑒏𑓂𑒩𑒧𑒝 𑒣𑓂𑒩𑒥𑒪 𑒫𑒹𑒑𑒹𑒿,
𑒁𑒩𑓂𑒖𑒳𑒢 𑒏𑒋𑒪 𑒣𑓂𑒩𑒨𑒞𑓂𑒢 𑒩𑒼𑒏𑒥𑒰𑒏 𑒯𑒳𑒢𑒏𑒰 𑒫𑓂𑒨𑒩𑓂𑒟,
𑒣𑒰𑒿𑒔𑒧 𑒕𑒚𑒧 𑒂 𑒮𑒰𑒞𑒧 𑒠𑒱𑒢 𑒋𑒯𑒱𑒢𑒰 𑒮𑒹𑒯𑒼 𑒥𑒲𑒞𑒪।
𑒂𑒚𑒧 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒒𑒢𑒒𑒼𑒩,
𑒁𑒩𑓂𑒖𑒳𑒢𑒏 𑒠𑒼𑒮𑒩 𑒣𑒞𑓂𑒢𑒲 𑒅𑒪𑒴𑒣𑒲𑒏 𑒣𑒳𑒞𑓂𑒩 𑒃𑒩𑒰𑒫𑒰𑒢,
𑒨𑒳𑒡𑓂𑒨 𑒧𑒡𑓂𑒨 𑒧𑒩𑒪 𑒁𑒩𑓂𑒖𑒳𑒢 𑒦𑒹𑒪 𑒁𑒡𑒻𑒩𑓂𑒨।
𑒏𑒋𑒪 𑒨𑒳𑒠𑓂𑒡 𑒦𑒨𑓀𑒏𑒩 𑒦𑒲𑒭𑓂𑒧𑒏𑒹𑒿 𑒢𑒯𑒱 𑒙𑒹𑒩𑒪,
𑒠𑒳𑒩𑓂𑒨𑒼𑒡𑒢 𑒕𑒪 𑒔𑒱𑒢𑓂𑒞𑒱𑒞 𑒏𑒩𑓂𑒝𑒏 𑒚𑒰𑒧 𑒑𑒹𑒪,
𑒒𑒳𑒩𑒱 𑒦𑒲𑒭𑓂𑒧𑒏𑒹𑒿 𑒏𑒯𑒪 𑒁𑒯𑒰𑒿 𑒕𑒲 𑒁𑒢𑓂𑒯𑒹𑒩 𑒏𑒋𑒪।
𑒋𑒯𑒢 𑒩𑒯𑒞 𑒞𑒐𑒢 𑒥𑒢𑒰𑒋𑒥 𑒏𑒩𑓂𑒝𑒏𑒹𑒿 𑒮𑒹𑒢𑒰𑒡𑓂𑒨𑒏𑓂𑒭,
𑒦𑒲𑒭𑓂𑒧 𑒏𑒯𑒪 𑒥𑒞𑒰𑒯 𑒕𑒲 𑒁𑒯𑒰𑒿 𑒦𑒹𑒪,
𑒏𑒩𑓂𑒝𑒏 𑒫𑒲𑒩𑒞𑒰 𑒫𑒱𑒩𑒰𑒙𑒨𑒳𑒠𑓂𑒡𑒧𑒹 𑒢𑒯𑒱 𑒠𑒹𑒐𑒪?
𑒢𑒫𑒧 𑒠𑒱𑒢𑒏 𑒨𑒳𑒠𑓂𑒡 𑒕𑒪 𑒦𑒨𑒓𑓂𑒏𑒩,
𑒁𑒩𑓂𑒖𑒳𑒢𑒏 𑒩𑒟𑒏𑒹𑒿 𑒦𑒲𑒭𑓂𑒧 𑒫𑒰𑒝𑒮𑒿 𑒞𑒼𑒣𑒪,
𑒏𑒵𑒭𑓂𑒝-𑒁𑒩𑓂𑒖𑒳𑒢 𑒁𑒣𑒒𑒰𑒞 𑒩𑒟 𑒏𑓂𑒭𑒞𑒱𑒑𑓂𑒩𑒮𑓂𑒞,
𑒒𑒼𑒙𑒏 𑒩𑒳𑒏𑒪 𑒁𑒩𑓂𑒖𑒳𑒢 𑒬𑒱𑒟𑒱𑒪 𑒣𑒮𑓂𑒞।
𑒏𑒾𑒩𑒫𑒏 𑒅𑒞𑓂𑒮𑒰𑒯 𑒕𑒪 𑒠𑒹𑒐𑒥𑒰 𑒖𑒼𑒑𑒩,
𑒏𑒵𑒭𑓂𑒝 𑒏𑓂𑒩𑒼𑒡𑒱𑒞 𑒩𑒟𑒏 𑒣𑒯𑒱𑒨𑒰 𑒪𑒋 𑒕𑒴𑒙𑒪,
𑒧𑒰𑒩𑒥 𑒦𑒲𑒭𑓂𑒧 𑒐𑒞𑒧 𑒏𑒩𑒥 𑒄 𑒨𑒳𑒠𑓂𑒡।
𑒁𑒩𑓂𑒖𑒳𑒢 𑒣𑒻𑒩 𑒣𑒏𑒛𑓃𑒱 𑒏𑒋 𑒏𑒯𑒪 𑒯𑒹 𑒏𑒵𑒭𑓂𑒝
𑒬𑒮𑓂𑒞𑓂𑒩 𑒢𑒯𑒱 𑒅𑒚𑒋𑒥𑒰𑒏 𑒏𑒋𑒢𑒹 𑒣𑓂𑒩𑒞𑒱𑒖𑓂𑒘𑒰 𑒕𑒲
𑒪𑒖𑓂𑒖𑒱𑒞 𑒩𑒟𑒮𑒿 𑒏𑒴𑒠𑒱 𑒕𑒲 𑒯𑒧 𑒂𑒋𑒪,
𑒦𑒲𑒭𑓂𑒧 𑒮𑒹𑒯𑒼 𑒠𑒹𑒐𑒪 𑒦𑒋 𑒦𑒰𑒫-𑒫𑒱𑒯𑓂𑒫𑒪।
𑒩𑒴𑒣 𑒞𑒹𑒖𑒧𑒨 𑒬𑒮𑓂𑒞𑓂𑒩 𑒪𑒹𑒢𑒹 𑒏𑒵𑒭𑓂𑒝।
𑒏𑒵𑒭𑓂𑒝𑒏 𑒏𑓂𑒩𑒼𑒡 𑒦𑒹𑒪 𑒖𑒰 𑒏𑒋 𑒬𑒰𑒢𑓂𑒞,
𑒮𑒰𑒿𑒗𑒏 𑒬𑓀𑒐 𑒏𑒋𑒪 𑒠𑒱𑒢𑒏 𑒨𑒳𑒠𑓂𑒡𑒰𑓀𑒞।
𑒩𑒰𑒞𑒱𑒧𑒹 𑒨𑒳𑒡𑒱𑒭𑓂𑒚𑒱𑒩 𑒣𑒳𑒕𑒪𑒢𑓂𑒯𑒱 𑒯𑒹 𑒢𑒢𑓂𑒠𑒏 𑒢𑒢𑓂𑒠,
𑒦𑒲𑒭𑓂𑒧𑒏 𑒣𑒩𑒰𑒖𑒨𑒏 𑒁𑒕𑒱 𑒏𑒲 𑒩𑒯𑒮𑓂𑒨,
𑒦𑒲𑒧 𑒏𑒯𑒪 𑒁𑒩𑓂𑒖𑒳𑒢 𑒢𑒯𑒱 𑒖𑒰𑒢𑒱 𑒏𑒱𑒋𑒏,
𑒢𑒯𑒱 𑒣𑓂𑒩𑒨𑒼𑒑 𑒏𑒋 𑒩𑒯𑒪 𑒠𑒱𑒫𑓂𑒨𑒰𑒮𑓂𑒞𑓂𑒩 𑒦𑒲𑒭𑓂𑒧𑒣𑒩।
𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒔𑒪𑒴 𑒣𑒰𑒿𑒔𑒴 𑒦𑒰𑒿𑒋,
𑒣𑒴𑒕𑒱 𑒂𑒥𑒲 𑒯𑒳𑒢𑒏𑒯𑒱𑒮𑒿 𑒯𑒳𑒢𑒏 𑒅𑒣𑒰𑒨।
𑒮𑒦 𑒣𑒯𑒳𑒿𑒔𑒱 𑒣𑒴𑒕𑒪 𑒥𑒞𑒰𑒆 𑒯𑒹 𑒦𑒲𑒭𑓂𑒧,
𑒁𑒯𑒰𑒿𑒏 𑒩𑒯𑒻𑒞 𑒢𑒯𑒱 𑒯𑒰𑒩𑒞 𑒏𑒾𑒩𑒫 𑒏𑒟𑒧𑒣𑒱।
𑒮𑒞𑓂𑒨 𑒡𑒩𑓂𑒧 𑒠𑒳𑒯𑒳 𑒦𑒋 𑒖𑒋𑒞 𑒁𑒪𑒼𑒣𑒱𑒞,
𑒦𑒲𑒭𑓂𑒧 𑒏𑒯𑒪 𑒕𑒲 𑒠𑒹𑒐𑒱 𑒩𑒯𑒪 𑒦𑒋 𑒞𑓂𑒩𑒮𑓂𑒞,
𑒁𑒩𑓂𑒖𑒳𑒢 𑒢𑒯𑒱 𑒏𑒩𑒱 𑒩𑒯𑒪 𑒣𑓂𑒩𑒨𑒼𑒑 𑒠𑒱𑒫𑓂𑒨𑒰𑒮𑓂𑒞𑓂𑒩,
𑒧𑒳𑒠𑒰 𑒯𑒮𑓂𑒞𑒱𑒢𑒰𑒣𑒳𑒩𑒏 𑒮𑒱𑓀𑒯𑒰𑒮𑒢𑒮𑒿 𑒏𑒙𑒱𑒥𑒠𑓂𑒡,
𑒯𑒰 𑒠𑒳𑒩𑓂𑒦𑒰𑒑𑓂𑒨! 𑒁𑒮𑒞𑓂𑒨𑒏 𑒧𑒩𑓂𑒨𑒰𑒠𑒰𑒏 𑒩𑒏𑓂𑒭𑒰𑒩𑓂𑒟 !
𑒁𑒕𑒱 𑒬𑒱𑒐𑒝𑓂𑒛𑒲 𑒠𑓂𑒩𑒳𑒣𑒠𑒏 𑒣𑒳𑒞𑓂𑒩 𑒁𑒯𑒰𑒿𑒏 𑒣𑒏𑓂𑒭,
𑒣𑒴𑒩𑓂𑒫𑒖𑒢𑓂𑒧𑒏 𑒮𑓂𑒞𑓂𑒩𑒲 𑒁𑒕𑒱 𑒬𑒱𑒫𑒏 𑒏𑒋𑒪 𑒫𑓂𑒩𑒞,
𑒯𑒧𑒩 𑒫𑒡𑒏 𑒪𑒹𑒪 𑒁𑒕𑒱 𑒮𑒞𑒞 𑒣𑓂𑒩𑒞𑒱𑒣𑒪।
𑒠𑓂𑒩𑒳𑒣𑒠𑒏 𑒒𑒩𑒧𑒹 𑒮𑓂𑒞𑓂𑒩𑒲𑒏 𑒩𑒴𑒣 𑒖𑒢𑓂𑒧 𑒕𑒪 𑒪𑒹𑒪,
𑒠𑒰𑒢𑒫𑒏 𑒫𑒩𑒮𑒿 𑒣𑒳𑒩𑒳𑒭 𑒩𑒴𑒣 𑒥𑒢𑒱 𑒑𑒹𑒪।
𑒑𑒳𑒝 𑒮𑓂𑒞𑓂𑒩𑒲𑒞𑓂𑒫𑒏 𑒁𑒕𑒱 𑒍𑒏𑒩𑒰𑒧𑒹 𑒣𑒰𑒩𑓂𑒟,
𑒮𑓂𑒞𑓂𑒩𑒲𑒑𑒝 𑒯𑒧𑒩 𑒫𑒰𑒝𑒏 𑒢𑒯𑒱 𑒕𑒟𑒱 𑒣𑒰𑒞𑓂𑒩।
𑒬𑒱𑒐𑒝𑓂𑒛𑒲𑒏𑒹𑒿 𑒮𑒼𑒗𑒰𑒿 𑒏𑒋 𑒖𑒹 𑒫𑒰𑒝 𑒁𑒯𑒰𑒿 𑒔𑒪𑒰𑒋𑒥,
𑒣𑒴𑒩𑓂𑒝 𑒫𑒱𑒫𑒬 𑒞𑒐𑒢𑒹 𑒯𑒧 𑒣𑒰𑒩𑓂𑒟 𑒦𑒋 𑒖𑒰𑒋𑒥।
𑒦𑒋 𑒂𑒮𑓂𑒫𑒮𑓂𑒞 𑒣𑓂𑒩𑒝𑒰𑒧 𑒏𑒋 𑒦𑒲𑒭𑓂𑒧 𑒣𑒰𑓀𑒛𑒫𑒑𑒝,
𑒒𑒳𑒩𑒪 𑒠𑒮𑒧 𑒠𑒱𑒢𑒳𑒏𑒰 𑒨𑒳𑒠𑓂𑒡𑒏 𑒕𑒪 𑒂𑒨𑒼𑒖𑒢।
𑒂𑒃 𑒮𑒹𑒯𑒼 𑒦𑒲𑒭𑓂𑒧𑒏 𑒫𑒰𑒝𑒏 𑒦𑒹𑒪 𑒥𑒩𑒐𑒰,
𑒧𑒳𑒠𑒰 𑒬𑒱𑒐𑒝𑓂𑒛𑒲 𑒂𑒋𑒪 𑒮𑒼𑒗𑒰𑒿 𑒯𑒳𑒢𑒏𑒩।
𑒩𑒰𑒐𑒪 𑒁𑒮𑓂𑒞𑓂𑒩 𑒦𑒲𑒭𑓂𑒧 𑒔𑒪𑒰𑒍𑒪 𑒫𑒰𑒝 𑒬𑒱𑒐𑒝𑓂𑒛𑒲,
𑒧𑒳𑒠𑒰 𑒏𑒼𑒢𑒼 𑒢𑒯𑒱 𑒖𑒼𑒛𑓃 𑒍𑒏𑒩 𑒫𑒰𑒝𑒏 𑒕𑒪 𑒏𑒱𑒢𑓂𑒞𑒳,
𑒏𑒵𑒭𑓂𑒝 𑒏𑒯𑒪 𑒪𑒋 𑒁𑒜𑓃 𑒬𑒱𑒐𑒝𑓂𑒛𑒲𑒏 𑒁𑒩𑓂𑒖𑒳𑒢,
𑒦𑒲𑒭𑓂𑒧𑒏 𑒠𑒹𑒯𑒏𑒹𑒿 𑒑𑒰𑒿𑒟𑒴 𑒏𑒩𑒴 𑒢𑒯𑒱 𑒔𑒱𑒢𑓂𑒞𑒢।
𑒁𑒩𑓂𑒖𑒳𑒢𑒏 𑒬𑓀𑒏𑒰 𑒮𑒳𑒢𑒱 𑒏𑒯𑒪 𑒞𑒐𑒢 𑒏𑒵𑒭𑓂𑒝,
𑒁𑒮𑓂𑒞𑓂𑒩-𑒬𑒮𑓂𑒞𑓂𑒩 𑒮𑓀𑒑 𑒖𑒲𑒞𑒞 𑒏𑓂𑒨𑒼 𑒢𑒯𑒱 𑒦𑒲𑒭𑓂𑒧,
𑒁𑒣𑒢𑒯𑒱 𑒕𑒟𑒱 𑒍 𑒅𑒣𑒰𑒨 𑒋𑒯𑒢 𑒥𑒞𑒰𑒍𑒪,
𑒥𑒱𑒢𑒳 𑒫𑒱𑒪𑒧𑓂𑒥 𑒏𑒋 𑒫𑒰𑒝 𑒁𑒯𑒰𑒿 𑒔𑒪𑒰𑒆।
𑒁𑒩𑓂𑒖𑒳𑒢𑒏 𑒫𑒰𑒝𑒏 𑒬𑒳𑒩𑒴 𑒦𑒹𑒪 𑒥𑒩𑒐𑒰,
𑒐𑒮𑒪 𑒦𑒲𑒭𑓂𑒧 𑒣𑒵𑒟𑓂𑒫𑒲 𑒬𑒨𑓂𑒨𑒰 𑒕𑒪 𑒫𑒰𑒝𑒏,
𑒬𑒩𑒬𑒨𑓂𑒨𑒰𑒣𑒩 𑒐𑒮𑒻𑒞 𑒦𑒲𑒭𑓂𑒧𑒏 𑒠𑒹𑒩𑒲 𑒕𑒪,
𑒨𑒳𑒠𑓂𑒡 𑒐𑒞𑒧 𑒦𑒹𑒪 𑒍𑒯𑒱 𑒠𑒱𑒢𑒏 𑒞𑒞𑓂𑒏𑒰𑒪।
𑒏𑒾𑒩𑒫 𑒣𑒰𑒝𑓂𑒛𑒫 𑒖𑒳𑒧𑒱 𑒁𑒋𑒪𑒰𑒯 𑒮𑒧𑒏𑓂𑒭,
𑒦𑒲𑒭𑓂𑒧 𑒏𑒯𑒪 𑒠𑒱𑒁 𑒑𑒹𑒩𑒳𑒂 𑒧𑒰𑒟𑒞𑒩। 𑒁𑒯।
𑒧𑒯𑒑 𑒑𑒹𑒩𑒳𑒂 𑒪𑒋 𑒣𑓂𑒩𑒮𑓂𑒞𑒳𑒞 𑒠𑒳𑒩𑓂𑒨𑒼𑒡𑒢 𑒕𑒪,
𑒞𑒰𑒏𑒪 𑒦𑒲𑒭𑓂𑒧 𑒁𑒩𑓂𑒖𑒳𑒢 𑒠𑒱𑒮 𑒁𑒩𑓂𑒖𑒳𑒢 𑒦𑒋 𑒮𑒰𑒏𑒰𑓀𑒏𑓂𑒭,
𑒞𑒲𑒢 𑒫𑒰𑒝 𑒔𑒪𑒰𑒍𑒪 𑒂𑒡𑒰𑒩 𑒧𑒰𑒟𑒏 𑒦𑒹𑒪 ।
𑒣𑓂𑒨𑒰𑒮𑒪 𑒦𑒲𑒭𑓂𑒧 𑒖𑒪𑒏 𑒪𑒹𑒪 𑒏𑒯𑒪 𑒣𑒳𑒢𑓁 𑒄,
𑒠𑒳𑒩𑓂𑒨𑒼𑒡𑒢 𑒮𑓂𑒫𑒩𑓂𑒝-𑒣𑒰𑒞𑓂𑒩𑒧𑒹 𑒖𑒪 𑒁𑒢𑒥𑒰𑒍𑒪,
𑒞𑒰𑒏𑒪 𑒦𑒲𑒭𑓂𑒧 𑒁𑒩𑓂𑒖𑒳𑒢 𑒠𑒱𑒮 𑒤𑒹𑒩 𑒣𑒰𑒩𑓂𑒟 𑒔𑒪𑒰𑒍𑒪,
𑒫𑒰𑒝𑒮𑒿 𑒮𑒼𑒞 𑒢𑒱𑒏𑒪𑒪 𑒖𑒪𑒏 𑒆𑒣𑒩 𑒠𑒱𑒮,
𑒣𑒰𑒢𑒱 𑒐𑒮𑒪 𑒧𑒳𑒐 𑒦𑒲𑒭𑓂𑒧 𑒦𑒹𑒪𑒰𑒯 𑒤𑒹𑒩 𑒞𑒱𑒩𑒣𑒱𑒞।
𑒮𑒴𑒩𑓂𑒨 𑒕𑒟𑒱 𑒁𑒐𑒢 𑒠𑒏𑓂𑒭𑒱𑒝𑒰𑒨𑒝𑒧𑒹 𑒖𑒰𑒆 𑒮𑒦 𑒏𑓂𑒨𑒼,
𑒣𑓂𑒩𑒰𑒝 𑒞𑓂𑒨𑒰𑒑𑒥 𑒯𑒧 𑒅𑒞𑓂𑒞𑒩𑒰𑒨𑒝𑒧𑒹 𑒣𑒯𑒳𑒿𑒔𑒪 𑒏𑒩𑓂𑒝 𑒮𑒹𑒯𑒼।
𑒏𑒩𑒥𑒠𑓂𑒡 𑒣𑓂𑒩𑒝𑒰𑒧 𑒏𑒋 𑒪𑒋 𑒂𑒬𑒲𑒩𑓂𑒫𑒰𑒠 𑒚𑒰𑒜𑓃 𑒍𑒞𑒋,
𑒦𑒲𑒭𑓂𑒧 𑒏𑒯𑒪 𑒯𑒹 𑒏𑒩𑓂𑒝 𑒨𑒳𑒠𑓂𑒡𑒏𑒹𑒿 𑒩𑒼𑒏𑒴 𑒏𑒳𑒢𑓂𑒞𑒲𑒣𑒳𑒞𑓂𑒩 𑒁𑒯𑒰𑒿 𑒕𑒲,
𑒁𑒩𑓂𑒖𑒳𑒢𑒏𑒹𑒿 𑒢𑒯𑒱 𑒯𑒩𑒰 𑒮𑒏𑒥 𑒁𑒯𑒿𑒏 𑒞𑒳𑒔𑓂𑒕 𑒃𑒔𑓂𑒕𑒰 𑒄।
𑒏𑒼𑒢 𑒨𑒳𑒠𑓂𑒡𑒧𑒹 𑒁𑒩𑓂𑒖𑒳𑒢𑒮𑒿 𑒕𑒲 𑒥𑒪𑒬𑒰𑒪𑒲 𑒠𑒹𑒪𑒯𑒳𑒿 𑒣𑓂𑒩𑒧𑒰𑒝?
𑒁𑒯𑒰𑒿 𑒥𑒳𑒗𑒰𑒋𑒥 𑒠𑒳𑒩𑓂𑒨𑒼𑒡𑒢 𑒧𑒰𑒢𑒞 𑒕𑒲 𑒯𑒧 𑒖𑒰𑒢𑒱।
𑒏𑒩𑓂𑒝 𑒏𑒯𑒪 𑒯𑒧 𑒮𑒰𑒩𑒟𑒲𑒣𑒳𑒞𑓂𑒩 𑒠𑒳𑒩𑓂𑒨𑒼𑒡𑒢𑒏 𑒣𑒰𑒍𑒪 𑒮𑒧𑓂𑒧𑒰𑒢,
𑒩𑒰𑒖𑒰 𑒦𑒹𑒪𑒯𑒳𑒿 𑒠𑒳𑒩𑓂𑒨𑒼𑒡𑒢𑒏 𑒆𑒿𑒔 𑒅𑒚𑒰𑒍𑒪 𑒯𑒧𑒩𑒰,
𑒣𑒰𑒝𑓂𑒛𑒫 𑒣𑒾𑒞𑓂𑒩 𑒁𑒯𑒰𑒿𑒏 𑒩𑒯𑒟𑒱 𑒬𑒮𑓂𑒞𑓂𑒩 𑒅𑒚𑒰𑒍𑒪 𑒏𑒱𑒋𑒏?
𑒏𑒾𑒩𑒫𑒑𑒝𑒏𑒹𑒿 𑒁𑒯𑒰𑒿 𑒏𑒱𑒋𑒏 𑒢𑒯𑒱 𑒥𑒳𑒗𑒰𑒍𑒪,
𑒨𑒳𑒠𑓂𑒡 𑒥𑒜𑓃𑒪 𑒁𑒕𑒱 𑒂𑒑𑒰𑒿, 𑒏𑒼𑒢𑒰 𑒯𑒧 𑒕𑒼𑒛𑓃𑒥 𑒠𑒳𑒩𑓂𑒨𑒼𑒡𑒢 𑒧𑒖𑒡𑒰𑒩।
𑒠𑒮 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒥𑒰𑒠,
𑒠𑓂𑒩𑒼𑒝 𑒥𑒢𑒪𑒰𑒯 𑒮𑒹𑒢𑒰𑒣𑒞𑒱 𑒂𑒥।
𑒠𑒳𑒩𑓂𑒨𑒼𑒡𑒢 𑒏𑒯𑒪 𑒏𑒩𑒴 𑒋𑒏 𑒏𑒰𑒖,
𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒣𑒏𑒛𑓃𑒱 𑒏𑒩𑒴 𑒨𑒳𑒠𑓂𑒡 𑒮𑒧𑒰𑒣𑓂𑒞।
𑒧𑒳𑒠𑒰 𑒁𑒩𑓂𑒖𑒳𑒢 𑒁𑒕𑒱 𑒍𑒞𑒋 𑒮𑒞𑒞,
𑒠𑒴𑒩 𑒯𑒙𑒋𑒥𑒰𑒏 𑒏𑒩𑒴 𑒏𑒼𑒢𑒼 𑒁𑒩𑓂𑒟,
𑒠𑒳𑒩𑓂𑒨𑒼𑒡𑒢 𑒥𑒖𑒰𑒍𑒪 𑒩𑒰𑒖𑒰 𑒠𑒹𑒬 𑒞𑓂𑒩𑒱𑒑𑒩𑓂𑒞,
𑒩𑒰𑒖 𑒮𑒳𑒬𑒩𑓂𑒧𑒰 𑒮𑓀𑒮𑓂𑒣𑒞𑒏 𑒮𑓀𑒑 𑒔𑒪𑒞,
𑒪𑒋 𑒁𑒩𑓂𑒖𑒳𑒢𑒏𑒹𑒿 𑒠𑒴𑒩 𑒨𑒳𑒡𑒱𑒭𑓂𑒚𑒱𑒩𑒏।
𑒍𑒧𑓂𑒯𑒩 𑒣𑒰𑒝𑓂𑒛𑒫 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩𑒏 𑒩𑒏𑓂𑒭 𑒅𑒣𑒰𑒨,
𑒩𑒏𑓂𑒭𑒏 𑒩𑒯𑒞 𑒁𑒩𑓂𑒖𑒳𑒢-𑒦𑒲𑒧 𑒠𑒳𑒯𑒳 𑒍𑒩 𑒠𑒳𑒯𑒳 𑒦𑒰𑒋।
𑒯𑒼𑒋𑒞 𑒏𑒱𑓀 𑒏𑒰𑒩𑒝𑒮𑒿 𑒏𑒢𑒱𑒏𑒼 𑒠𑒴𑒩 𑒖𑓂𑒨𑒼𑒿 𑒏𑓂𑒨𑒼,
𑒢𑒏𑒳𑒪 𑒮𑒯𑒠𑒹𑒫 𑒮𑒰𑒞𑓂𑒨𑒱𑒏𑒲 𑒪𑒹𑒞 𑒮𑓂𑒟𑒰𑒢 𑒩𑒱𑒏𑓂𑒞 𑒍।
𑒠𑓂𑒩𑒼𑒝𑒏 𑒮𑓀𑒑 𑒕𑒪 𑒏𑒩𑓂𑒝 𑒁𑒬𑒫𑒞𑓂𑒟𑒰𑒧𑒰,
𑒖𑒨𑒠𑓂𑒩𑒟 𑒏𑒵𑒣,𑒏𑒵𑒞𑒫𑒩𑓂𑒧𑒰, 𑒏𑒪𑒱𑓀𑒑 𑒢𑒩𑒹𑒬।
𑒞𑓂𑒩𑒱𑒑𑒩𑓂𑒞𑒩𑒰𑒖 𑒮𑒳𑒬𑒩𑓂𑒧𑒰 𑒠𑒹𑒪𑒏 𑒪𑒪𑒏𑒰𑒩𑒰,
𑒁𑒩𑓂𑒖𑒳𑒢 𑒠𑒹𑒐𑒱 𑒮𑒞𑒩𑓂𑒏 𑒏𑒋𑒪 𑒮𑒰𑒞𑓂𑒨𑒱𑒏𑒲 𑒏𑒹𑒿।
𑒑𑒳𑒩𑒳𑒬𑒱𑒭𑓂𑒨 𑒥𑒱𑒔 𑒂𑒥 𑒬𑒳𑒩𑒳 𑒯𑒼𑒋𑒞 𑒨𑒳𑒠𑓂𑒡,
𑒞𑒲𑒩 𑒠𑒳𑒃 𑒙𑒰 𑒕𑒼𑒛𑓃𑒱 𑒁𑒩𑓂𑒖𑒳𑒢 𑒏𑒋𑒪 𑒂𑒩𑒧𑓂𑒦,
𑒐𑒮𑒪 𑒣𑒠𑒣𑒩 𑒠𑓂𑒩𑒼𑒝𑒏 𑒁𑒩𑓂𑒖𑒳𑒢𑒏 𑒄 𑒠𑒳𑒯𑒳 𑒫𑒰𑒝।
𑒂𑒯 𑒥𑓂𑒨𑒰𑒮 𑒣𑓂𑒩𑒝𑒰𑒧 !!
𑒏𑒋 𑒣𑓂𑒩𑒝𑒰𑒧 𑒪𑒋 𑒂𑒬𑒲𑒭 𑒑𑒳𑒩𑒳𑒏 𑒂𑒃 𑒁𑒩𑓂𑒖𑒳𑒢,
𑒦𑒱𑒢𑓂𑒢 𑒩𑒲𑒞𑒱𑒏 𑒣𑓂𑒩𑒹𑒧 𑒢𑒯𑒱 𑒕𑒪 𑒢𑒳𑒏𑒰𑒋𑒪 𑒏𑒯𑒰𑒿।
𑒏𑒋𑒪 𑒂𑒏𑓂𑒩𑒧𑒝 𑒣𑒰𑒝𑓂𑒛𑒫𑒣𑒩 𑒮𑒼𑒗𑒰𑒿𑒮𑒿 𑒠𑓂𑒩𑒼𑒝 𑒣𑒰𑒩𑓂𑒬𑓂𑒫𑒮𑒿 𑒏𑒩𑓂𑒝,
𑒮𑒳𑒬𑒩𑓂𑒧𑒰𑒏 𑒣𑒰𑒕𑒰𑒿 𑒁𑒩𑓂𑒖𑒳𑒢 𑒬𑒪𑓂𑒨 𑒂𑒥𑒱 𑒑𑒹𑒪 𑒪𑒛𑓃𑒥𑒰 𑒪𑒋 𑒦𑒲𑒧𑒮𑒿,
𑒏𑒩𑓂𑒝 𑒏𑒋𑒪 𑒂𑒏𑓂𑒩𑒧𑒝 𑒮𑒰𑒞𑓂𑒨𑒱𑒏𑒲 𑒕𑒪 𑒞𑓂𑒫𑒩𑒱𑒞 𑒍𑒞𑒋।
𑒮𑒯𑒠𑒹𑒫𑒮𑒿 𑒦𑒱𑒛𑓃𑒪 𑒬𑒏𑒳𑒢𑒱 𑒢𑒏𑒳𑒪 𑒙𑒰 𑒥𑒰𑒿𑒔𑒪 𑒍𑒞𑒋,
𑒠𑓂𑒩𑒼𑒝 𑒥𑒜𑓃𑒪 𑒮𑒼𑒩 𑒦𑒹𑒪 𑒣𑒏𑒛𑓃𑒪 𑒠𑓂𑒩𑒼𑒝 𑒨𑒳𑒡𑒱𑒭𑓂𑒚𑒱𑒩𑒏𑒹𑒿,
𑒁𑒩𑓂𑒖𑒳𑒢 𑒕𑒼𑒛𑓃𑒱 𑒞𑓂𑒩𑒱𑒑𑒩𑓂𑒞 𑒢𑒩𑒹𑒬 𑒒𑒳𑒩𑒱 𑒂𑒋𑒪 𑒖𑒹,
𑒠𑓂𑒩𑒼𑒝 𑒕𑒼𑒛𑓃𑒪 𑒂𑒬𑒰 𑒣𑒏𑒛𑓃𑒥𑒰𑒏 𑒨𑒳𑒡𑒱𑒭𑓂𑒚𑒱𑒩,
𑒮𑒰𑒿𑒗 𑒦𑒹𑒪 𑒨𑒳𑒠𑓂𑒡 𑒥𑒢𑓂𑒠𑒲𑒏 𑒬𑓀𑒐𑒢𑒰𑒠𑒏 𑒥𑒱𑒔।
𑒥𑒰𑒩𑒯𑒧 𑒠𑒱𑒢 𑒮𑒹𑒯𑒼 𑒞𑓂𑒩𑒱𑒑𑒩𑓂𑒞 𑒮𑒦 𑒠𑒹𑒪 𑒪𑒪𑒏𑒰𑒩𑒰,
𑒧𑒳𑒠𑒰 𑒫𑒹𑒑𑒮𑒿 𑒂𑒏𑓂𑒩𑒧𑒝 𑒏𑒋 𑒁𑒩𑓂𑒖𑒳𑒢 𑒏𑒋𑒪 𑒮𑓀𑒯𑒰𑒩,
𑒒𑒳𑒩𑒱 𑒥𑒜𑓃𑒪 𑒠𑒹𑒐𑒪 𑒦𑒑𑒠𑒞𑓂𑒞 𑒕𑒪 𑒯𑒰𑒟𑒲𑒣𑒩 𑒮𑒫𑒰𑒩,
𑒯𑒰𑒟𑒲𑒏-𑒁𑓀𑒏𑒳𑒬 𑒤𑒹𑓀𑒏𑒱 𑒏𑒋𑒪 𑒍 𑒁𑒩𑓂𑒖𑒳𑒢𑒣𑒩 𑒣𑓂𑒩𑒯𑒰𑒩,
𑒏𑒵𑒭𑓂𑒝 𑒩𑒼𑒏𑒪 𑒁𑓀𑒏𑒳𑒬, 𑒁𑒩𑓂𑒖𑒳𑒢 𑒪𑒹𑒪𑒏 𑒍𑒏𑒩 𑒣𑓂𑒩𑒰𑒝, 𑒁𑒩𑓂𑒡𑒔𑒢𑓂𑒠𑓂𑒩 𑒫𑒰𑒝𑒮𑒿।
𑒠𑓂𑒩𑒼𑒝 𑒥𑒜𑓃𑒪 𑒨𑒳𑒡𑒱𑒭𑓂𑒚𑒱𑒩 𑒠𑒱𑒮 𑒮𑒞𑓂𑒨𑒖𑒱𑒞 𑒩𑒏𑓂𑒭𑒏 𑒕𑒪 𑒂𑒃,
𑒧𑒰𑒩𑒱 𑒁𑒬𑓂𑒫𑒏𑒹𑒿 𑒠𑓂𑒩𑒼𑒝𑒏 𑒮𑒞𑓂𑒨𑒖𑒱𑒞 𑒩𑒟𑒏 𑒣𑒯𑒱𑒂 𑒠𑒹𑒪 𑒏𑒰𑒙𑒱।
𑒠𑓂𑒩𑒼𑒝𑒏 𑒁𑒩𑓂𑒡𑒔𑒢𑓂𑒠𑓂𑒩𑒫𑒰𑒝𑒮𑒿 𑒮𑒞𑓂𑒨𑒖𑒱𑒞𑒏 𑒑𑒩𑒠𑒢𑒱 𑒐𑒮𑒪 𑒁𑒩𑒛𑓃𑒰𑒋।
𑒨𑒳𑒡𑒱𑒭𑓂𑒚𑒱𑒩 𑒧𑒩𑒱𑒞𑒯𑒱 𑒠𑒹𑒐𑒱 𑒮𑒞𑓂𑒨𑒖𑒱𑒞𑒏𑒹𑒿 𑒒𑒳𑒩𑒪 𑒩𑒝𑒮𑒿 𑒁𑒫𑒱𑒪𑒧𑓂𑒥,
𑒁𑒩𑓂𑒖𑒳𑒢 𑒢𑒯𑒱 𑒣𑒰𑒥𑒱 𑒨𑒳𑒡𑒱𑒭𑓂𑒚𑒱𑒩 𑒦𑒹𑒪 𑒥𑒞𑒰𑒯 𑒧𑒰𑒩𑒪 𑒖𑒢 𑒁𑒟𑒰𑒯,
𑒠𑓂𑒩𑒼𑒝 𑒠𑒹𑒐𑒱 𑒁𑒩𑓂𑒖𑒳𑒢𑒏 𑒄 𑒩𑒴𑒣 𑒦𑒹𑒪𑒰𑒯 𑒯𑒞𑒰𑒬 𑒮𑓀𑒡𑓂𑒨𑒰𑒏 𑒬𑓀𑒐𑒏 𑒂𑒬।
𑒠𑒱𑒢 𑒥𑒱𑒞𑒪 𑒠𑒳𑒩𑓂𑒨𑒼𑒡𑒢 𑒏𑒯𑒪 𑒯𑒹 𑒑𑒳𑒩𑒳 𑒠𑓂𑒩𑒼𑒝,
𑒮𑓂𑒢𑒹𑒯 𑒁𑒕𑒱 𑒁𑒯𑒰𑒿𑒏 𑒣𑒰𑒝𑓂𑒛𑒫𑒏 𑒣𑓂𑒩𑒞𑒱 𑒞𑒹𑒿 𑒄 𑒠𑒼𑒭,
𑒠𑓂𑒩𑒼𑒝 𑒦𑒹𑒪 𑒏𑓂𑒭𑒼𑒦𑒱𑒞 𑒏𑒯𑒪 𑒥𑒢𑒰𑒋𑒥 𑒔𑒏𑓂𑒩𑒫𑓂𑒨𑒴𑒯 𑒖𑒏𑒩 𑒞𑒼𑒛𑓃,
𑒁𑒩𑓂𑒖𑒳𑒢𑒏 𑒁𑒞𑒱𑒩𑒱𑒏𑓂𑒞 𑒨𑒳𑒡𑒱𑒭𑓂𑒚𑒱𑒩𑒏 𑒪𑒑 𑒁𑒕𑒱 𑒢𑒯𑒱 𑒫𑓂𑒨𑒼𑒿𑒞।
𑒤𑒹𑒩 𑒞𑒹𑒩𑒯𑒧 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒬𑒳𑒩𑒳 𑒖𑒐𑒢,
𑒮𑓀𑒮𑒣𑓂𑒞𑒏 𑒂 𑒞𑓂𑒩𑒱𑒑𑒩𑓂𑒞𑒏𑒹𑒿 𑒣𑒕𑒳𑒂𑒥𑒻𑒞 𑒑𑒹𑒪 𑒁𑒩𑓂𑒖𑒳𑒢।
𑒞𑒐𑒢𑒯𑒱 𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒣𑒞𑒰 𑒔𑒪 𑒔𑒏𑓂𑒩𑒫𑓂𑒨𑒴𑒯𑒏,
𑒁𑒦𑒱𑒧𑒢𑓂𑒨𑒳 𑒠𑒹𑒐𑒱 𑒔𑒱𑒢𑓂𑒞𑒱𑒞 𑒏𑒰𑒏𑒰𑒏𑒹𑒿 𑒏𑒯𑒪,
𑒑𑒩𑓂𑒦𑒧𑒹 𑒮𑒳𑒢𑒪 𑒣𑒱𑒞𑒰 𑒧𑒰𑒞𑒰𑒏𑒹𑒿 𑒫𑒩𑓂𑒝𑒢 𑒮𑒳𑒢𑒥𑒻𑒞 𑒕𑒪,
𑒔𑓂𑒏𑓂𑒩𑒫𑓂𑒨𑒴𑒯𑒏 𑒕𑒯 𑒠𑓂𑒫𑒰𑒩𑒏𑒹𑒿 𑒞𑒼𑒛𑓃𑒥𑒰𑒏 𑒮𑒦𑒙𑒰,
𑒮𑓂𑒧𑒩𑒝 𑒨𑒳𑒠𑓂𑒡𑒏 𑒫𑒩𑓂𑒝𑒢𑒏 𑒫𑒱𑒡𑒱 𑒥𑒔𑒪 𑒢𑒯𑒱 𑒏𑒼𑒢𑒼𑒙𑒰।
𑒧𑒳𑒠𑒰 𑒮𑒰𑒞𑒧 𑒠𑓂𑒫𑒰𑒩𑒏 𑒨𑒳𑒠𑓂𑒡𑒏 𑒫𑒩𑓂𑒝𑒢 𑒮𑒳𑒢𑒪 𑒢𑒯𑒱,
𑒧𑒰𑒞𑒰 𑒮𑒳𑒞𑒪𑒱 𑒞𑒐𑒢𑒹 𑒥𑒔𑒪 𑒋𑒏𑒹𑒙𑒰 𑒠𑓂𑒫𑒰𑒩 𑒮𑒻𑒯।
𑒏𑒫𑒱 𑒥𑓂𑒨𑒰𑒮𑒏 𑒣𑒹𑒙𑒧𑒹 𑒮𑒲𑒐𑒱 𑒁𑒋𑒥𑒰𑒏 𑒥𑒱𑒧𑓂𑒥, 𑒬𑒥𑓂𑒠𑒰𑒩𑓂𑒟 𑒢𑒯𑒱 𑒫𑒲𑒩𑒏 𑒁𑒕𑒱 𑒄 𑒣𑓂𑒩𑒞𑒲𑒏 ।
𑒮𑒼𑒗𑒰𑒿 𑒞𑒐𑒢 𑒥𑒜𑓃𑒪 𑒁𑒦𑒱𑒧𑒢𑓂𑒨𑒳 𑒏𑒏𑒩𑒼 𑒢𑒯𑒱 𑒥𑒳𑒗𑒰𑒋𑒪,
𑒏𑒞𑒋 𑒁𑒕𑒱 𑒠𑓂𑒫𑒰𑒩 𑒏𑒞𑒋 𑒣𑓂𑒩𑒫𑒹𑒬 𑒖𑒨𑒠𑓂𑒩𑒟 𑒩𑒏𑓂𑒭𑒏 𑒖𑒞𑒋,
𑒂𑒅 𑒦𑒲𑒧 𑒏𑒰𑒏 𑒄 𑒁𑒕𑒱 𑒣𑓂𑒩𑒫𑒹𑒬 𑒠𑓂𑒫𑒰𑒩 𑒣𑒻𑒮𑒥 𑒋𑒞𑒯𑒱।
𑒁𑒦𑒱𑒧𑒢𑓂𑒨𑒳 𑒏𑒋 𑒣𑓂𑒩𑒯𑒰𑒩 𑒖𑒨𑒠𑓂𑒩𑒟𑒣𑒩 𑒫𑒰𑒝𑒮𑒿 𑒑𑒹𑒪 𑒦𑒲𑒞𑒩,
𑒦𑒲𑒧 𑒠𑒼𑒮𑒩 𑒮𑒹𑒢𑒰𑒢𑒲𑒏𑒹𑒿 𑒩𑒼𑒏𑒱 𑒖𑒨𑒠𑓂𑒩𑒟 𑒚𑒰𑒜𑓃 𑒍𑒞𑒯𑒱।
𑒠𑒼𑒮𑒩 𑒠𑓂𑒫𑒰𑒩𑒣𑒩 𑒠𑓂𑒩𑒼𑒝 𑒚𑒰𑒜𑓃 𑒖𑒐𑒢𑒹 𑒫𑒰𑒝 𑒔𑒪𑒰𑒥𑒟𑒱,
𑒏𑒰𑒙𑒪 𑒡𑒢𑒳𑒭 𑒠𑓂𑒩𑒼𑒝𑒏 𑒫𑓂𑒨𑒴𑒯 𑒦𑒹𑒠𑒱 𑒥𑒜𑓃𑒪𑒰𑒯 𑒂𑒑𑒴।
𑒞𑒹𑒮𑒩 𑒠𑓂𑒫𑒰𑒩𑒣𑒩 𑒔𑒏𑒱𑒞 𑒏𑒩𑓂𑒝𑒣𑒩 𑒏𑒋 𑒫𑒰𑒝 𑒥𑒩𑒐𑒰,
𑒥𑒜𑓃𑒪 𑒔𑒰𑒩𑒱𑒧 𑒠𑓂𑒫𑒰𑒩𑒣𑒩 𑒁𑒬𑓂𑒫𑒞𑓂𑒟𑒰𑒧𑒰 𑒖𑒞𑒋 𑒕𑒪,
𑒨𑒳𑒠𑓂𑒡 𑒦𑒹𑒪 𑒒𑒢𑒒𑒼𑒩 𑒋𑒞𑒋 𑒧𑒳𑒠𑒰 𑒩𑒼𑒏𑒱 𑒮𑒏𑒪 𑒢𑒯𑒱,
𑒁𑒦𑒱𑒧𑒢𑓂𑒨𑒳𑒏 𑒩𑒟 𑒥𑒜𑓃𑒪 𑒠𑒳𑒩𑓂𑒨𑒼𑒡𑒢 𑒦𑒹𑒪 𑒔𑒱𑒢𑓂𑒞𑒱𑒞,
𑒏𑒩𑓂𑒝 𑒂𑒥 𑒏𑒩𑒥 𑒏𑒲 𑒥𑒰𑒖𑒴 𑒣𑒩𑒰𑒖𑒨 𑒥𑒳𑒖𑒰𑒃𑒕 𑒢𑒱𑒬𑓂𑒔𑒱𑒞।
𑒏𑒩𑓂𑒝 𑒥𑒰𑒖𑒪 𑒮𑒦 𑒧𑒱𑒪𑒱 𑒮𑒰𑒞𑒼 𑒧𑒯𑒰𑒩𑒟𑒲 𑒯𑒧 𑒮𑒦,
𑒩𑒼𑒏𑒱 𑒮𑒏𑒥 𑒋𑒯𑒱 𑒥𑒰𑒪𑒏𑒏𑒹𑒿 𑒢𑒯𑒱 𑒏𑓂𑒨𑒼 𑒮𑒏𑒞 𑒁𑒮𑒑𑒩।
𑒮𑒦 𑒩𑒟𑒲 𑒂 𑒣𑒳𑒞𑓂𑒩 𑒠𑒳𑒩𑓂𑒨𑒼𑒡𑒢𑒏 𑒢𑒰𑒧 𑒪𑒏𑓂𑒭𑓂𑒧𑒝 𑒖𑒹𑒏𑒩,
𑒣𑒯𑒳𑒿𑒔𑒱 𑒑𑒹𑒪 𑒮𑒰𑒞𑒧 𑒠𑓂𑒫𑒰𑒩 𑒣𑒯𑒳𑒿𑒔𑒪 𑒁𑒦𑒱𑒧𑒢𑓂𑒨𑒳 𑒞𑒰𑒫𑒞।
𑒁𑒦𑒱𑒧𑒢𑓂𑒨𑒳𑒏 𑒮𑒰𑒩𑒟𑒲 𑒠𑒹𑒐𑒱 𑒄 𑒠𑒵𑒬𑓂𑒨 𑒍𑒞𑒋 𑒏𑒯𑒪,
𑒄 𑒮𑒦 𑒁𑒡𑒩𑓂𑒧𑒲 𑒁𑒕𑒱 𑒖𑒳𑒙𑒪, 𑒏𑒯𑒴 𑒞𑒿 𑒩𑒟 𑒒𑒳𑒩𑒰𑒋𑒥,
𑒁𑒩𑓂𑒖𑒳𑒢 𑒣𑒳𑒞𑓂𑒩 𑒯𑒧 𑒢𑒯𑒱 𑒕𑒼𑒛𑓃𑒥 𑒨𑒳𑒠𑓂𑒡 𑒯𑒧 𑒋𑒢𑒰 𑒠𑒹𑒐𑒴,
𑒣𑒰𑒩𑓂𑒟-𑒣𑒳𑒞𑓂𑒩𑒏 𑒬𑒾𑒩𑓂𑒨 𑒩𑒟 𑒒𑒳𑒧𑒰𑒆 𑒔𑒏𑓂𑒩𑒰𑒏𑒰𑒩 𑒏𑒋 𑒁𑒯𑒿।
𑒞𑒐𑒢 𑒪𑒏𑓂𑒭𑓂𑒧𑒝 𑒂𑒋𑒪 𑒮𑒼𑒗𑒰𑒿 𑒁𑒦𑒱𑒧𑒢𑓂𑒨𑒳𑒏 𑒍𑒞𑒋,
𑒫𑒰𑒝𑒮𑒿 𑒏𑒰𑒙𑒪 𑒧𑒮𑓂𑒞𑒏 𑒪𑒏𑓂𑒭𑓂𑒧𑒝𑒏, 𑒠𑓂𑒩𑒼𑒝 𑒏𑒯𑒪, 𑒁𑒖𑒹𑒨 𑒄 𑒁𑒕𑒱 𑒁𑒦𑒹𑒠𑓂𑒨 𑒋𑒏𑒩 𑒏𑒫𑒔 𑒏𑒩𑒴 𑒣𑓂𑒩𑒯𑒰𑒩 𑒮𑒱𑒩𑒮𑒱 𑒂
𑒞𑒐𑒢𑒯𑒱 𑒮𑒰𑒩𑒟𑒱 𑒁𑒦𑒱𑒧𑒢𑓂𑒨𑒳𑒏 𑒐𑒮𑒪 𑒙𑒴𑒙𑒱 𑒑𑒹𑒪 𑒩𑒟 ।
𑒢𑒲𑒔𑒰𑒿 𑒂𑒥𑒱 𑒞𑒩𑒳𑒂𑒩𑒱 𑒔𑒏𑓂𑒩 𑒑𑒠𑒰 𑒪𑒋 𑒍𑒞𑒋 𑒍 𑒔𑒪𑒪,
𑒠𑒳𑓁𑒬𑒰𑒮𑒢𑒏 𑒣𑒳𑒞𑓂𑒩𑒮𑒿 𑒑𑒠𑒰 𑒨𑒳𑒠𑓂𑒡 𑒦𑒹𑒪 𑒠𑒳𑒢𑒴 𑒍𑒞𑒯𑒱 𑒐𑒮𑒪 ।
𑒣𑒯𑒱𑒢𑒹 𑒅𑒚𑒱 𑒠𑒳𑓁𑒬𑒰𑒮𑒢𑒏 𑒣𑒳𑒞𑓂𑒩 𑒣𑓂𑒩𑒯𑒰𑒩 𑒏𑒋𑒪𑒏 𑒧𑒮𑓂𑒞𑒏𑒣𑒩,
𑒮𑒣𑓂𑒞𑒩𑒟𑒲𑒏 𑒥𑒲𑒔 𑒐𑒮𑒱 𑒣𑒛𑓃𑒪 𑒮𑒳𑒦𑒠𑓂𑒩𑒰𑒣𑒳𑒞𑓂𑒩 𑒣𑒞𑒱 𑒅𑒞𑓂𑒞𑒩𑒰𑒏।
𑒮𑒳𑒦𑒠𑓂𑒩𑒰 𑒅𑒞𑓂𑒞𑒩𑒰 𑒣𑒯𑒳𑒿𑒔𑒱 𑒑𑒹𑒪𑒲𑒯 𑒮𑒰𑒞𑒧 𑒠𑓂𑒫𑒰𑒩 𑒫𑒱𑒪𑒐𑒻𑒞,
𑒅𑒞𑓂𑒞𑒩𑒰 𑒏𑒯𑒪𑒢𑓂𑒯𑒱 𑒧𑒰𑒞𑒰 𑒧𑒵𑒞𑓂𑒨𑒳𑒏 𑒂𑒖𑓂𑒘𑒰 𑒠𑒱𑒁 𑒋𑒞𑒯𑒱।
𑒧𑒳𑒠𑒰 𑒑𑒩𑓂𑒦 𑒕𑒪 𑒅𑒞𑓂𑒞𑒩𑒰𑒏 𑒣𑒹𑒙𑒧𑒹 𑒮𑒳𑒦𑒠𑓂𑒩𑒰 𑒥𑒳𑒗𑒍𑒪𑒢𑓂𑒯𑒱,
𑒍𑒧𑓂𑒯𑒩 𑒞𑓂𑒩𑒱𑒑𑒩𑓂𑒞 𑒮𑓀𑒮𑒣𑓂𑒞𑒏𑒏𑒹𑒿 𑒏𑒩𑒱 𑒣𑒴𑒩𑓂𑒝𑒩𑒴𑒣𑒹𑒿 𑒮𑓀𑒯𑒰𑒩,
𑒁𑒩𑓂𑒖𑒳𑒢 𑒒𑒳𑒩𑒪 𑒮𑒼𑒔𑒻𑒞 𑒨𑒳𑒡𑒱𑒭𑓂𑒚𑒱𑒩 𑒯𑒼𑒟𑒱 𑒮𑒳𑒩𑒏𑓂𑒭𑒱𑒞 ।
𑒮𑒳𑒢𑒱 𑒧𑒵𑒞𑓂𑒨𑒳𑒏 𑒮𑒧𑒔𑒰𑒩 𑒫𑒱𑒔𑒪 𑒏𑒵𑒭𑓂𑒝 𑒏𑒯𑒪 𑒁𑒩𑓂𑒖𑒳𑒢,
𑒏𑒰𑒩𑒝 𑒧𑒵𑒞𑓂𑒨𑒳𑒏 𑒁𑒕𑒱 𑒧𑒰𑒞𑓂𑒩 𑒥𑒯𑒢𑒼𑒃-𑒖𑒨𑒠𑓂𑒩𑒟,
𑒏𑒋 𑒬𑒱𑒫𑒏 𑒞𑒣𑒮𑓂𑒨𑒰 𑒦𑒹𑒙𑒪 𑒫𑒩 𑒍𑒏𑒩𑒰 𑒄,
𑒁𑒩𑓂𑒖𑒳𑒢 𑒕𑒼𑒛𑓃𑒱 𑒂𑒢 𑒣𑒰𑒝𑓂𑒛𑒫 𑒢𑒯𑒱 𑒖𑒲𑒞𑒞𑒰𑒯 𑒍𑒏𑒩𑒰।
𑒣𑓂𑒩𑒟𑒧 𑒠𑓂𑒫𑒰𑒩𑒣𑒩 𑒚𑒰𑒜𑓃 𑒍 𑒩𑒼𑒏𑒪 𑒔𑒰𑒩𑒴 𑒦𑒰𑒿𑒋𑒏𑒹 𑒍𑒞𑒯𑒱।
𑒮𑒳𑒢𑒞𑒯𑒱 𑒄 𑒁𑒩𑓂𑒖𑒳𑒢 𑒏𑒋𑒪 𑒫𑒡 𑒏𑒩𑒥 𑒏𑒰𑒪𑓂𑒯𑒱 𑒮𑒴𑒩𑓂𑒨𑒰𑒮𑓂𑒞𑒏 𑒣𑒯𑒱𑒢𑒹,
𑒖𑒨𑒠𑓂𑒩𑒟𑒏 𑒫𑒡 𑒏𑒩𑒥 𑒢𑒯𑒱 𑒞𑒿 𑒏𑒩𑒥 𑒁𑒑𑓂𑒢𑒱𑒏𑒹𑒿 𑒮𑒧𑒩𑓂𑒣𑒱𑒞 𑒚𑒰𑒧𑒯𑒱।
𑒔𑒾𑒠𑒯𑒧 𑒠𑒱𑒢𑒏 𑒨𑒳𑒠𑓂𑒡 𑒦𑒹𑒪 𑒣𑓂𑒩𑒰𑒩𑒧𑓂𑒦,
𑒬𑒏𑒙-𑒫𑓂𑒨𑒴𑒯 𑒠𑓂𑒩𑒼𑒝𑒏 𑒗𑒰𑒿𑒣𑒪 𑒖𑒨𑒠𑓂𑒩𑒟 ।
𑒠𑓂𑒫𑒰𑒩𑒣𑒩 𑒫𑓂𑒨𑒴𑒯𑒏 𑒣𑓂𑒩𑒯𑒩𑒲 𑒠𑓂𑒩𑒼𑒝 𑒕𑒪𑒰𑒯 𑒚𑒰𑒜𑓃,
𑒫𑒱𑒏𑒙 𑒨𑒳𑒠𑓂𑒡 𑒏𑒵𑒭𑓂𑒝 𑒪𑒹𑒪 𑒩𑒟 𑒏𑒢𑒕𑒱𑒨𑒰𑒯 ।
𑒠𑓂𑒩𑒼𑒝 𑒪𑒪𑒏𑒰𑒩𑒱 𑒏𑒯𑒪 𑒁𑒩𑓂𑒖𑒳𑒢 𑒨𑒳𑒠𑓂𑒡𑒮𑒿 𑒩𑒯𑒪 𑒕𑒲 𑒦𑒰𑒑𑒱,
𑒧𑒳𑒠𑒰 𑒁𑒩𑓂𑒖𑒳𑒢𑒏𑒹𑒿 𑒂𑒃 𑒕𑒪 𑒠𑒼𑒮𑒩 𑒡𑒳𑒢𑒱 𑒮𑒥𑒰𑒩𑒱 ।
𑒏𑒵𑒭𑓂𑒝 𑒩𑒟 𑒪𑒋 𑒦𑒲𑒞𑒩 𑒫𑓂𑒨𑒴𑒯𑒧𑒹 𑒣𑒻𑒮𑒪𑒰𑒯,
𑒥𑒹𑒩𑒴 𑒣𑒯𑒩 𑒔𑒱𑒢𑓂𑒞𑒱𑒞 𑒨𑒳𑒡𑒱𑒭𑓂𑒚𑒱𑒩 𑒣𑒚𑒰𑒍𑒪 𑒮𑒰𑒞𑓂𑒨𑒱𑒏𑒲 𑒦𑒲𑒧,
𑒖𑒰𑒆 𑒁𑒩𑓂𑒖𑒳𑒢𑒏 𑒮𑒯𑒰𑒨𑒰𑒩𑓂𑒟 𑒏𑒯𑒱 𑒠𑒳𑒢𑒴 𑒥𑒜𑒪 𑒂𑒑𑒰𑒿 ।
𑒦𑒴𑒩𑒱𑒬𑓂𑒩𑒫𑒰 𑒏𑒋𑒪𑒏 𑒂𑒏𑓂𑒩𑒧𑒝 𑒮𑒰𑒞𑓂𑒨𑒱𑒏𑒲𑒣𑒩 𑒞𑒐𑒢,
𑒫𑒰𑒝 𑒁𑒩𑓂𑒖𑒳𑒢𑒏 𑒥𑒜𑓃𑒪 𑒍𑒏𑒩 𑒠𑒱𑒮 𑒠𑒳𑒯𑒳 𑒯𑒰𑒟 𑒏𑒙𑒪 𑒍𑒏𑒩 ।
𑒏𑒲 𑒏𑒋𑒪 𑒁𑒩𑓂𑒖𑒳𑒢 𑒁𑒯𑒰𑒿 𑒯𑒧 𑒪𑒛𑓃𑒱 𑒩𑒯𑒪 𑒕𑒪𑒯𑒳𑒿 𑒮𑒰𑒞𑓂𑒨𑒱𑒏𑒲𑒮𑒿,
𑒯𑒧𑒩 𑒯𑒰𑒟 𑒏𑒰𑒙𑒪 𑒁𑒯𑒰𑒿 𑒁𑒕𑒱 𑒏𑒼𑒢 𑒢𑓂𑒨𑒰𑒨 𑒥𑒞𑒰𑒆 𑒤𑒩𑒱𑒕𑒰𑒏𑒹𑒿।
𑒁𑒩𑓂𑒖𑒳𑒢 𑒏𑒯𑒪𑒢𑓂𑒯𑒱 𑒁𑒦𑒱𑒧𑒢𑓂𑒨𑒳𑒏 𑒫𑒡 𑒏𑒋𑒪 𑒁𑒯𑒰𑒿 𑒮𑒦 𑒏𑒼𑒢𑒰,
𑒢𑓂𑒨𑒰𑒨𑒏 𑒥𑒰𑒞 𑒏𑒩𑒋 𑒕𑒲, 𑒩𑒏𑓂𑒭𑒰 𑒏𑒋𑒪 𑒯𑒧 𑒮𑒞𑓂𑒨𑒱𑒏𑒲𑒏 𑒖𑒹𑒯𑒰𑒿।
𑒦𑒴𑒩𑒱𑒬𑓂𑒩𑒫𑒰 𑒐𑒮𑒪 𑒁𑒔𑒹𑒞 𑒮𑒰𑒞𑓂𑒨𑒱𑒏𑒲 𑒏𑒰𑒙𑒪 𑒧𑒴𑒛𑓃𑒲 𑒦𑒴𑒩𑒱𑒬𑓂𑒩𑒫𑒰𑒏 ।
𑒁𑒩𑓂𑒖𑒳𑒢 𑒠𑒹𑒐𑒱 𑒦𑒲𑒧 𑒮𑒰𑒞𑓂𑒨𑒱𑒏𑒲𑒏𑒹𑒿 𑒦𑒹𑒪 𑒔𑒱𑒢𑓂𑒞𑒱𑒞 𑒒𑒳𑒩𑒪,
𑒨𑒳𑒡𑒱𑒭𑓂𑒚𑒱𑒩𑒏 𑒧𑒼𑒢 𑒕𑒪𑒢𑓂𑒯𑒱 𑒯𑒳𑒢𑒏𑒰 𑒣𑒛𑓃𑒪 ।
𑒞𑒐𑒢𑒹 𑒮𑒴𑒩𑓂𑒨𑒰𑒮𑓂𑒞 𑒦𑒹𑒪 𑒁𑒩𑓂𑒖𑒳𑒢 𑒅𑒞𑒰𑒩𑒱 𑒠𑒹𑒪 𑒑𑒰𑒝𑓂𑒛𑒲𑒫,
𑒔𑒱𑒞𑒰 𑒕𑒪 𑒮𑒼𑒗𑒰𑒿 𑒂𑒑𑒱 𑒡𑒯𑒡𑒯,
𑒏𑒩𑒻𑒞 𑒣𑒰𑒝𑓂𑒛𑒫𑒏 𑒂𑒿𑒐𑒱 𑒗𑒱𑒪𑒧𑒱𑒪।
𑒥𑒜𑓃𑒪 𑒁𑒩𑓂𑒖𑒳𑒢 𑒥𑒱𑒢𑒰 𑒬𑒮𑓂𑒞𑓂𑒩-𑒁𑒮𑓂𑒞𑓂𑒩 𑒔𑒱𑒞𑒰 𑒠𑒱𑒮,
𑒥𑒰𑒖𑒪 𑒏𑒵𑒭𑓂𑒝 𑒏𑓂𑒭𑒞𑓂𑒩𑒱𑒨 𑒁𑒩𑓂𑒖𑒳𑒢 𑒪𑒋 𑒁𑒮𑓂𑒞𑓂𑒩 𑒖𑒰𑒆 𑒔𑒱𑒞𑒰𑒧𑒹,
𑒁𑒏𑓂𑒭𑒨 𑒞𑒴𑒝𑒲𑒩 𑒑𑒰𑒝𑓂𑒛𑒲𑒫 𑒢𑒯𑒱 𑒞𑓂𑒨𑒰𑒑𑒲 𑒧𑒵𑒞𑓂𑒨𑒳 𑒮𑓀𑒑 𑒖𑒋𑒞।
𑒧𑒳𑒠𑒰 𑒖𑒐𑒢𑒹 𑒁𑒮𑓂𑒞𑓂𑒩 𑒪𑒹𑒪𑒢𑓂𑒯𑒱 𑒁𑒩𑓂𑒖𑒳𑒢 𑒮𑒴𑒩𑓂𑒨 𑒢𑒱𑒏𑒪𑒪 𑒒𑒙𑒰𑒮𑒿,
𑒮𑒼𑒗𑒰𑒿 𑒕𑒪 𑒖𑒨𑒠𑓂𑒩𑒟 𑒁𑒣𑒙𑒲 𑒐𑒹𑒞𑒧𑒹 𑒧𑒩𑒪 𑒍𑒞𑒯𑒱 𑒁𑒩𑓂𑒖𑒳𑒢𑒏 𑒯𑒰𑒟𑒹𑒿।
𑒧𑒳𑒠𑒰 𑒏𑒵𑒭𑓂𑒝 𑒏𑒯𑒪𑒢𑓂𑒯𑒱 𑒂𑒥 𑒠𑒳𑒩𑓂𑒨𑒼𑒡𑒢 𑒏𑒩𑒥𑒰𑒍𑒞 𑒏𑒩𑓂𑒝𑒏 𑒁𑒧𑒼𑒒 𑒁𑒮𑓂𑒞𑓂𑒩𑒏 𑒣𑓂𑒩𑒨𑒼𑒑,
𑒦𑒲𑒧𑒣𑒳𑒞𑓂𑒩 𑒒𑒙𑒼𑒞𑓂𑒏𑒔𑒏𑒹𑒿 𑒥𑒖𑒰𑒆 𑒩𑒰𑒏𑓂𑒭𑒮𑒲 𑒨𑒳𑒠𑓂𑒡 𑒩𑒰𑒞𑒱𑒏 𑒏𑒩𑒞 𑒍 𑒦𑒨𑒓𑓂𑒏𑒩,
𑒂𑒋𑒪 𑒩𑒰𑒞𑒱𑒧𑒹 𑒒𑒙𑒼𑒞𑓂𑒏𑒔 𑒏𑒋 𑒥𑒩𑒐𑒰 𑒣𑒰𑒢𑒱 𑒂𑒿𑒏𑒛𑓃-𑒣𑒰𑒟𑒩𑒏 𑒞𑒞𑓂𑒏𑓂𑒭𑒝 ।
𑒠𑒳𑒩𑓂𑒨𑒼𑒡𑒢 𑒠𑒹𑒐𑒱 𑒩𑒴𑒣 𑒄 𑒫𑒱𑒏𑒩𑒰𑒪 𑒦𑒰𑒑𑒻𑒞 𑒏𑒾𑒩𑒫 𑒮𑒹𑒢𑒰𑒏𑒹𑒿 𑒠𑒹𑒐𑒪,
𑒏𑒩𑓂𑒝 𑒧𑒰𑒩𑒴 𑒋𑒏𑒩𑒰 𑒢𑒯𑒱 𑒞𑒿 𑒨𑒳𑒠𑓂𑒡 𑒢𑒱𑒏𑒪𑒪 𑒖𑒰𑒃𑒞 𑒁𑒕𑒱 𑒮𑒏𑒪।
𑒫𑒱𑒫𑒬 𑒦𑒋 𑒏𑒩𑓂𑒝 𑒕𑒼𑒛𑓃𑒪 𑒁𑒧𑒼𑒒 𑒧𑒩𑒪 𑒒𑒙𑒼𑒞𑓂𑒏𑒔 𑒞𑒐𑒢,
𑒣𑒰𑒝𑓂𑒛𑒫 𑒠𑒳𑒐𑒱𑒞 𑒦𑒋𑒪 𑒕𑒪 𑒏𑒩𑓂𑒝 𑒮𑒹𑒯𑒼 𑒔𑒱𑒢𑓂𑒞𑒱𑒞।
𑒩𑒰𑒞𑒱𑒏 𑒦𑒹𑒪 𑒂𑒏𑓂𑒩𑒧𑒝𑒮𑒿 𑒏𑓂𑒭𑒳𑒥𑓂𑒡 𑒏𑓂𑒩𑒳𑒠𑓂𑒡 𑒏𑒾𑒩𑒫 𑒂 𑒠𑓂𑒩𑒼𑒝 𑒁𑒋𑒪𑒰𑒯,
𑒨𑒳𑒡𑒱𑒭𑓂𑒚𑒱𑒩𑒏 𑒩𑒏𑓂𑒭𑒰𑒩𑓂𑒟 𑒋𑒏 𑒠𑒱𑒮 𑒠𑓂𑒩𑒳𑒣𑒠 𑒕𑒪 𑒠𑒼𑒮𑒩 𑒠𑒱𑒮 𑒫𑒱𑒩𑒰𑒙 𑒞𑒏𑒩𑒰।
𑒠𑒹𑒐𑒱𑒞𑒯𑒱 𑒠𑓂𑒩𑒳𑒣𑒠𑒏𑒹𑒿 𑒠𑓂𑒩𑒼𑒝𑒏 𑒐𑒴𑒢 𑒕𑒪 𑒐𑒾𑒪𑒱 𑒑𑒹𑒪 𑒠𑒱𑒫𑓂𑒨𑒰𑒮𑓂𑒞𑓂𑒩𑒮𑒿 𑒪𑒹𑒪 𑒣𑓂𑒩𑒰𑒝,
𑒠𑓂𑒩𑒳𑒣𑒠 𑒣𑒳𑒞𑓂𑒩 𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒣𑒰𑓀𑒔𑒰𑒪 𑒮𑒹𑒢𑒰𑒏 𑒮𑓀𑒑 𑒂𑒋𑒪 𑒥𑒱𑒔 𑒥𑒩𑒐𑒰𑒏 𑒫𑒰𑒝।
𑒣𑓂𑒩𑒔𑓀𑒛 𑒩𑒴𑒣 𑒠𑒹𑒐𑒱 𑒠𑓂𑒩𑒼𑒝𑒏 𑒏𑒵𑒭𑓂𑒝 𑒏𑒯𑒪 𑒯𑒹 𑒨𑒳𑒡𑒱𑒭𑓂𑒚𑒱𑒩 𑒁𑒫𑒢𑓂𑒞𑒱𑒩𑒰𑒖𑒏 𑒯𑒮𑓂𑒞𑒱,
𑒢𑒰𑒧 𑒁𑒕𑒱 𑒁𑒬𑓂𑒫𑒞𑓂𑒟𑒰𑒧𑒰 𑒍𑒏𑒩𑒰 𑒧𑒰𑒩𑒪 𑒁𑒕𑒱 𑒦𑒲𑒧 𑒮𑒠𑓂𑒨𑓁।
𑒣𑒴𑒕𑒟𑒱 𑒠𑓂𑒩𑒼𑒝 𑒖𑒹 𑒁𑒬𑓂𑒫𑒞𑓂𑒟𑒰𑒧𑒰 𑒁𑒕𑒱 𑒧𑒩𑒱 𑒑𑒹𑒪 𑒞𑒐𑒢 𑒁𑒯𑒿,
𑒏𑒯𑒴 𑒯𑒿, 𑒧𑒩𑒱 𑒑𑒹𑒪 𑒁𑒕𑒱 𑒦𑒲𑒧 𑒧𑒰𑒩𑒪 𑒋𑒐𑒢 𑒞𑒳𑒩𑒞।
𑒞𑒐𑒢𑒯𑒱 𑒮𑒼𑒩 𑒦𑒹𑒪 𑒧𑒩𑒥𑒰𑒏 𑒁𑒬𑓂𑒫𑒞𑓂𑒟𑒰𑒧𑒰𑒏 𑒮𑒾𑒿𑒮𑒹,
𑒠𑓂𑒩𑒼𑒝 𑒁𑒡𑒲𑒩 𑒩𑒟 𑒁𑒑𑒳𑒂𑒋 𑒣𑒴𑒕𑒪 𑒨𑒳𑒡𑒱𑒭𑓂𑒚𑒱𑒩,
𑒏𑒲 𑒁𑒕𑒱 𑒥𑒰𑒞 𑒮𑒞𑓂𑒨 𑒧𑒩𑒪 𑒁𑒬𑓂𑒫𑒞𑓂𑒟𑒰𑒧𑒰 𑒩𑒝𑒏 𑒥𑒱𑒔?
𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒯𑒿 𑒧𑒩𑒪 𑒁𑒕𑒱 𑒍 𑒢𑒩 𑒢𑒯𑒱, 𑒕𑒪 𑒍 𑒏𑒳𑒘𑓂𑒖𑒩,
𑒧𑒳𑒠𑒰 𑒢𑒩 𑒨𑒳𑒡𑒱𑒭𑓂𑒚𑒩𑒏 𑒏𑒯𑒱𑒞𑒯𑒱 𑒥𑒖𑒪 𑒕𑒪 𑒬𑓀𑒐 𑒏𑒵𑒭𑓂𑒝𑒏।
𑒬𑒼𑒏-𑒫𑒱𑒯𑓂𑒫𑒪 𑒠𑓂𑒩𑒼𑒝 𑒤𑒹𑒏𑒱 𑒬𑒮𑓂𑒞𑓂𑒩𑒰𑒩𑓂𑒟 𑒡𑓂𑒨𑒰𑒢𑒧𑒑𑓂𑒢 𑒥𑒻𑒮𑒪𑒰𑒯 𑒩𑒟𑒣𑒩,
𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒏𑒰𑒙𑒪 𑒯𑒳𑒢𑒏 𑒧𑒮𑓂𑒞𑒏 𑒐𑒛𑓂𑒑𑒮𑒿 𑒁𑒬𑓂𑒫𑒞𑓂𑒟𑒰𑒧𑒰 𑒦𑒹𑒪 𑒫𑓂𑒨𑒰𑒏𑒳𑒪।
𑒕𑒼𑒛𑓃𑒋 𑒪𑒰𑒑𑒪 𑒠𑒱𑒫𑓂𑒨𑒰𑒮𑓂𑒞𑓂𑒩 𑒣𑒰𑒝𑓂𑒛𑒫𑒣𑒩 𑒁𑒩𑓂𑒖𑒳𑒢𑒏𑒹𑒿 𑒕𑒼𑒛𑓃𑒱 𑒢𑒯𑒱 𑒕𑒪 𑒏𑓂𑒨𑒼 𑒮𑒏𑓂𑒭𑒧,
𑒮𑒰𑒿𑒗 𑒡𑒩𑒱 𑒁𑒩𑓂𑒖𑒳𑒢-𑒁𑒬𑓂𑒫𑒞𑓂𑒟𑒰𑒧𑒰 𑒠𑒳𑒯𑒳 𑒧𑒡𑓂𑒨 𑒯𑒼𑒃𑒞 𑒩𑒯𑒪 𑒄 𑒨𑒳𑒠𑓂𑒡 𑒢𑒱𑒩𑒢𑓂𑒞𑒩।
𑒩𑒰𑒞𑓂𑒩𑒱𑒧𑒹 𑒠𑒳𑒩𑓂𑒨𑒼𑒡𑒢 𑒏𑒋𑒪𑒏 𑒣𑓂𑒩𑒝
𑒁𑒩𑓂𑒖𑒳𑒢𑒏 𑒧𑒵𑒞𑓂𑒨𑒳𑒏 𑒦𑒹𑒪 𑒂𑒫𑒰𑒯𑒢,
𑒏𑒩𑓂𑒝𑒏𑒹𑒿 𑒮𑒹𑒢𑒰𑒣𑒞𑒱 𑒥𑒢𑒰𑒋 𑒏𑒋𑒪𑒢𑓂𑒯𑒱
𑒏𑒾𑒩𑒫𑒏 𑒑𑒝 𑒮𑒼𑒪𑒯𑒧 𑒠𑒱𑒢𑒏 𑒨𑒳𑒠𑓂𑒡𑒏 𑒣𑓂𑒩𑒰𑒩𑒧𑓂𑒦।
𑒏𑒩𑓂𑒝𑒏 𑒬𑓀𑒐𑒡𑓂𑒫𑒢𑒱𑒮𑒿 𑒦𑒹𑒪 𑒨𑒳𑒠𑓂𑒡 𑒬𑒳𑒩𑒴,
𑒏𑒩𑓂𑒝𑒏 𑒞𑒰𑒣𑒮𑒿 𑒨𑒳𑒠𑓂𑒡𑒦𑒴𑒧𑒱 𑒮𑓂𑒞𑒥𑓂𑒡,
𑒢𑒏𑒳𑒪 𑒮𑒼𑒗𑒰𑒿 𑒣𑒰𑒥𑒱 𑒁𑒣𑒒𑒰𑒞 𑒏𑒋 𑒕𑒼𑒛𑓃𑒪 𑒣𑓂𑒩𑒰𑒝
𑒏𑒳𑒢𑓂𑒞𑒲𑒏 𑒠𑒹𑒪 𑒏𑒩𑓂𑒝𑒏 𑒫𑒩 𑒣𑓂𑒩𑒰𑒝𑒠𑒰𑒢।
𑒏𑒵𑒭𑓂𑒝𑒏 𑒂𑒫𑒰𑒯𑒢 𑒁𑒩𑓂𑒖𑒳𑒢 𑒁𑒯𑒰𑒿𑒏𑒹𑒿 𑒕𑒼𑒛𑓃𑒱,
𑒏𑓂𑒨𑒼 𑒢𑒘𑒱 𑒏𑒋 𑒮𑒏𑒞 𑒫𑒱𑒖𑒨 𑒏𑒩𑓂𑒝𑒏 𑒆𑒣𑒩𑒱,
𑒫𑒹𑒑𑒮𑒿 𑒖𑒹 𑒥𑒜𑓃𑒪 𑒁𑒩𑓂𑒖𑒳𑒢 𑒂𑒑𑒰𑒿 𑒦𑒹𑒪 𑒬𑒳𑒩𑒳 𑒥𑒩𑒐𑒰,
𑒥𑒩𑒐𑒰 𑒫𑒰𑒝𑒏 𑒏𑒾𑒩𑒫𑒑𑒝𑒏 𑒁𑒩𑓂𑒖𑒳𑒢𑒏 𑒮𑒧𑒏𑓂𑒭,
𑒧𑒳𑒠𑒰 𑒁𑒩𑓂𑒖𑒳𑒢𑒏 𑒮𑒼𑒗𑒰𑒿 𑒮𑒦 𑒦𑒹𑒪𑒰𑒯 𑒣𑒮𑓂𑒞,
𑒧𑒳𑒠𑒰 𑒞𑒐𑒢𑒹 𑒦𑒹𑒪 𑒮𑒼𑒪𑒯𑒧 𑒠𑒱𑒢𑒏 𑒮𑒴𑒩𑓂𑒨𑒰𑒮𑓂𑒞।
𑒩𑒰𑒞𑓂𑒩𑒱𑒧𑒹 𑒏𑒩𑓂𑒝 𑒏𑒯𑒪𑒢𑓂𑒯𑒱 𑒯𑒹 𑒧𑒱𑒞𑓂𑒩 𑒠𑒳𑒩𑓂𑒨𑒼𑒡𑒢,
𑒁𑒩𑓂𑒖𑒳𑒢𑒏 𑒩𑒟𑒧𑒹 𑒯𑒼𑒃𑒕 𑒜𑒹𑒩-𑒩𑒰𑒮 𑒬𑒮𑓂𑒞𑓂𑒩𑒏 𑒁𑒙𑒰𑒫𑒹𑒬,
𑒑𑒰𑒝𑓂𑒛𑒲𑒫 𑒂 𑒁𑒏𑓂𑒭𑒨 𑒞𑒴𑒝𑒲𑒩𑒏 𑒢𑒯𑒱 𑒏𑒼𑒢𑒼 𑒖𑒼𑒛𑓃,
𑒯𑒳𑒢𑒏𑒩 𑒁𑒬𑓂𑒫𑒏 𑒑𑒞𑒱 𑒢𑒯𑒱 𑒏𑒼𑒢𑒼 𑒟𑒼𑒛𑓃, 𑒏𑒵𑒭𑓂𑒝 𑒮𑒢 𑒮𑒰𑒩𑒟𑒲।
𑒬𑒪𑓂𑒨 𑒥𑒢𑒟𑒱 𑒯𑒧𑒩 𑒮𑒰𑒩𑒟𑒲 𑒨𑒠𑒱, 𑒯𑒼𑒋𑒞𑒰𑒯 𑒍 𑒏𑒵𑒭𑓂𑒝𑒏 𑒞𑒼𑒛𑓃,
𑒧𑒳𑒠𑒰 𑒬𑒪𑓂𑒨 𑒏𑒯𑒪𑒢𑓂𑒯𑒱 𑒁𑒕𑒱 𑒯𑒧𑒩 𑒧𑒳𑒿𑒯𑒣𑒩 𑒢𑒯𑒱 𑒖𑒼𑒛𑓃,
𑒏𑒩𑓂𑒝𑒏𑒹𑒿 𑒮𑒹 𑒯𑒼𑒋 𑒮𑓂𑒫𑒲𑒏𑒰𑒩 𑒞𑒿 𑒯𑒧𑒩𑒰 𑒏𑒼𑒢𑒼 𑒯𑒩𑓂𑒖 𑒢𑒯𑒱।
𑒮𑒞𑓂𑒩𑒯𑒧 𑒠𑒱𑒢𑒳𑒏𑒰 𑒨𑒳𑒠𑓂𑒡 𑒦𑒹𑒪 𑒬𑒳𑒩𑒴 𑒏𑒩𑓂𑒝𑒏 𑒂𑒏𑓂𑒩𑒧𑒝 𑒬𑒳𑒩𑒴,
𑒁𑒩𑓂𑒖𑒳𑒢 𑒥𑒜𑓃𑒪 𑒂𑒑𑒴 𑒬𑒪𑓂𑒨 𑒏𑒯𑒪 𑒦𑒱𑒩𑒴 𑒧𑒯𑒰𑒣𑓂𑒩𑒰𑒏𑓂𑒩𑒧𑒲 𑒁𑒩𑓂𑒖𑒳𑒢𑒮𑒿,
𑒏𑒩𑓂𑒝 𑒠𑒹𑒐𑒪𑒢𑓂𑒯𑒱 𑒦𑒲𑒧𑒏𑒹𑒿 𑒏𑒩𑒻𑒞 𑒮𑓀𑒯𑒰𑒩 𑒔𑒪𑒴 𑒬𑒪𑓂𑒨 𑒍𑒯𑒱 𑒣𑒰𑒩,
𑒦𑒲𑒧𑒏 𑒩𑒴𑒣 𑒂𑒃 𑒣𑓂𑒩𑒔𑒝𑓂𑒛 𑒕𑒼𑒛𑓃𑒪 𑒫𑒰𑒝 𑒔𑒲𑒛𑓃𑒱 𑒏𑒫𑒔 𑒏𑒩𑓂𑒝𑒏 𑒑𑒰𑒿𑒟𑒪 𑒠𑒹𑒯,
𑒁𑒔𑒹𑒞 𑒏𑒩𑓂𑒝𑒏𑒹𑒿 𑒪𑒋 𑒦𑒑𑒪𑒰𑒯 𑒬𑒪𑓂𑒨 𑒩𑒝𑒦𑒴𑒧𑒱𑒏 𑒏𑒰𑒞-𑒏𑒩𑒼𑒙।
𑒠𑒹𑒐𑒱 𑒄 𑒠𑒵𑒬𑓂𑒨 𑒦𑒲𑒧 𑒦𑒹𑒪𑒰𑒯 𑒂𑒩 𑒞𑒲𑒫𑓂𑒩,
𑒠𑒳𑒩𑓂𑒨𑒼𑒡𑒢 𑒯𑒳𑒢𑒏𑒩 𑒮𑒼𑒗𑒰𑒿 𑒣𑒚𑒰𑒍𑒪 𑒠𑒳𑓁𑒬𑒰𑒮𑒢 𑒫𑒲𑒩।
𑒑𑒠𑒰 𑒨𑒳𑒠𑓂𑒡 𑒠𑒳𑒯𑒳𑒏 𑒧𑒡𑓂𑒨 𑒕𑒪 𑒦𑒹𑒪 𑒦𑒨𑒓𑓂𑒏𑒩,
𑒦𑒲𑒧𑒏 𑒧𑒮𑓂𑒞𑒏 𑒣𑓂𑒩𑒯𑒰𑒩 𑒐𑒮𑒪 𑒧𑒴𑒩𑓂𑒕𑒱𑒞 𑒠𑒳𑓁𑒬𑒰𑒮𑒢।
𑒦𑒲𑒧 𑒯𑒰𑒟 𑒅𑒐𑒰𑒛𑓃𑒱 𑒣𑒲𑒥𑒋 𑒪𑒰𑒑𑒪 𑒕𑒰𑒞𑒲𑒏 𑒩𑒏𑓂𑒞,
𑒦𑒰𑒑𑒪 𑒏𑒾𑒩𑒫𑒮𑒹𑒢𑒰 𑒠𑒹𑒐𑒱 𑒠𑒵𑒬𑓂𑒨 𑒋𑒯𑒱 𑒞𑒩𑒯𑒏।
𑒂𑒥 𑒮𑒼𑒗𑒰𑒿-𑒮𑒼𑒗𑒲 𑒁𑒩𑓂𑒖𑒳𑒢 𑒏𑒩𑓂𑒝𑒏 𑒨𑒳𑒠𑓂𑒡 𑒂𑒃 𑒬𑒳𑒩𑒴,
𑒏𑒩𑓂𑒝 𑒏𑒰𑒙𑒪 𑒑𑒰𑓀𑒛𑒲𑒫𑒏 𑒣𑓂𑒩𑒞𑓂𑒨𑓀𑒔𑒰 𑒨𑒰𑒫𑒞 𑒠𑒼𑒮𑒩 𑒔𑒜𑓃𑒰𑒥𑒟𑒱,
𑒏𑒋𑒪 𑒫𑒰𑒝𑒮𑒿 𑒂𑒏𑓂𑒩𑒧𑒝 𑒁𑒩𑓂𑒖𑒳𑒢 𑒏𑒼𑒯𑒳𑒢𑒰 𑒏𑒋 𑒣𑓂𑒩𑒞𑓂𑒨𑓀𑒔𑒰 𑒔𑒜𑓃𑒰𑒋,
𑒫𑒰𑒝-𑒫𑒩𑓂𑒭𑒰 𑒁𑒩𑓂𑒖𑒳𑒢𑒏𑒰 𑒖𑒐𑒢 𑒦𑒹𑒪 𑒬𑒳𑒩𑒴, 𑒏𑒩𑓂𑒝 𑒬𑒪𑓂𑒨 𑒦𑒹𑒪𑒰𑒯 𑒔𑒼𑒙𑒱𑒪,
𑒏𑒩𑓂𑒝𑒏 𑒮𑒯𑒰𑒨𑒏 𑒮𑒹𑒢𑒰 𑒦𑒹𑒪 𑒢𑒭𑓂𑒙 𑒏𑒩𑓂𑒝 𑒁𑒞𑒱 𑒫𑓂𑒨𑒰𑒏𑒳𑒪।
𑒕𑒼𑒛𑓃𑒪 𑒏𑒩𑓂𑒝 𑒫𑒰𑒝 𑒠𑒱𑒫𑓂𑒨 𑒁𑒩𑓂𑒖𑒳𑒢𑒣𑒩 𑒏𑒵𑒭𑓂𑒝 𑒏𑒋𑒪𑒢𑓂𑒯𑒱 𑒁𑒬𑓂𑒫𑒏𑒹𑒿 𑒚𑒹𑒯𑒳𑒢𑒣𑒩 𑒚𑒰𑒜𑓃,
𑒁𑒩𑓂𑒖𑒳𑒢𑒏 𑒧𑒳𑒏𑒳𑒙𑒏𑒹𑒿 𑒕𑒳𑒥𑒻𑒞 𑒍 𑒁𑒩𑓂𑒖𑒳𑒢𑒏 𑒣𑓂𑒩𑒰𑒝𑒏 𑒮𑓀𑒏𑒙 𑒦𑒹𑒪 𑒣𑒰𑒩।
𑒞𑒐𑒢𑒯𑒱 𑒏𑒩𑓂𑒝𑒏 𑒩𑒟𑒏 𑒣𑒯𑒱𑒨𑒰 𑒡𑒿𑒮𑒪 𑒨𑒳𑒠𑓂𑒡 𑒧𑒡𑓂𑒨,
𑒏𑒩𑓂𑒝𑒏 𑒣𑒳𑒏𑒰𑒩 𑒏𑒢𑒹𑒏 𑒏𑒰𑒪 𑒫𑒰𑒝 𑒢𑒯𑒱 𑒔𑒪𑒋𑒥𑒰𑒏 𑒡𑒩𑓂𑒧𑒏 𑒄 𑒨𑒳𑒠𑓂𑒡,
𑒫𑒱𑒩𑒰𑒙𑒏 𑒑𑒾𑒁𑒏 𑒔𑒼𑒩𑒱 𑒁𑒩𑓂𑒖𑒳𑒢 𑒏𑒯𑒪𑒢𑓂𑒯𑒱 𑒂 𑒁𑒦𑒱𑒧𑒢𑓂𑒨𑒳𑒏𑒹𑒿 𑒧𑒰𑒩𑒻𑒞 𑒏𑒰𑒪,
𑒡𑒩𑓂𑒧 𑒂 𑒡𑒩𑓂𑒧𑒨𑒳𑒠𑓂𑒡𑒏 𑒥𑒱𑒮𑒩𑒪 𑒕𑒪𑒯𑒳𑒿 𑒁𑒯𑒰𑒿 𑒣𑒰𑒚 ।
𑒣𑓂𑒩𑒰𑒝𑒏 𑒦𑒱𑒏𑓂𑒭𑒰 𑒧𑒿𑒑𑒻𑒞 𑒪𑒑𑒱𑒞𑒯𑒳𑒿 𑒁𑒕𑒱 𑒢𑒯𑒱 𑒪𑒰𑒖।
𑒏𑒩𑓂𑒝 𑒅𑒞𑒩𑒱 𑒪𑒑𑒪𑒰𑒯 𑒩𑒟𑒏 𑒣𑒯𑒱𑒨𑒰 𑒢𑒱𑒏𑒰𑒪𑒋,
𑒁𑒩𑓂𑒖𑒳𑒢𑒏 𑒫𑒰𑒝 𑒏𑒰𑒙𑒪 𑒧𑒮𑓂𑒞𑒏 𑒏𑒾𑒩𑒫𑒧𑒹 𑒯𑒰𑒯𑒰𑒏𑒰𑒩 𑒦𑒰𑒩𑒲।
𑒠𑒳𑒩𑓂𑒨𑒼𑒡𑒢𑒏 𑒮𑒦 𑒦𑒰𑒿𑒨𑒏𑒹𑒿 𑒧𑒰𑒩𑒢𑒹 𑒕𑒰𑒪𑒰𑒯 𑒦𑒲𑒧 𑒞𑒰𑒫𑒞,
𑒋𑒑𑒰𑒩𑒯 𑒁𑒏𑓂𑒭𑒾𑒯𑒱𑒝𑒲𑒧𑒹 𑒮𑒿 𑒥𑒛𑓃 𑒟𑒼𑒛𑓃 𑒏𑒾𑒩𑒫 𑒕𑒪 𑒥𑒰𑒿𑒔𑒪,
𑒏𑒵𑒣𑒰𑒔𑒰𑒩𑓂𑒨 𑒥𑒳𑒗𑒍𑒪𑒢𑓂𑒯𑒱 𑒠𑒳𑒩𑓂𑒨𑒼𑒡𑒢 𑒂𑒥𑒼 𑒏𑒩𑒴 𑒮𑒢𑓂𑒡𑒱,
𑒧𑒳𑒠𑒰 𑒍 𑒏𑒯𑒪 𑒯𑒧 𑒁𑒯𑒰𑒿 𑒏𑒵𑒞𑒫𑒩𑓂𑒧𑒰 𑒁𑒬𑓂𑒫𑒞𑓂𑒟𑒰𑒧 𑒂 𑒬𑒪𑓂𑒨 𑒁𑒕𑒻𑒞,
𑒮𑒢𑓂𑒡𑒱𑒏 𑒑𑒣 𑒕𑒲 𑒁𑒯𑒰𑒿 𑒏𑒩𑒻𑒞।
𑒬𑒪𑓂𑒨 𑒥𑒢𑒟𑒱 𑒮𑒹𑒢𑒰𑒣𑒞𑒱 𑒨𑒳𑒠𑓂𑒡 𑒁𑒚𑒰𑒩𑒯𑒧 𑒠𑒱𑒢 𑒩𑒯𑒞 𑒖𑒰𑒩𑒲।
𑒬𑒪𑓂𑒨𑒏 𑒦𑒹𑒪 𑒅𑒠𑓂𑒒𑒼𑒭 𑒍𑒏𑒩 𑒥𑒜𑓃𑒪 𑒣𑒑 𑒨𑒳𑒡𑒱𑒭𑓂𑒚𑒱𑒩 𑒕𑒪 𑒩𑒼𑒏𑒪।
𑒬𑒪𑓂𑒨 𑒖𑒐𑒢𑒯𑒱 𑒏𑒰𑒙𑒪 𑒯𑒳𑒢𑒏𑒩 𑒋𑒏 𑒡𑒢𑒳𑒭,
𑒨𑒳𑒡𑒱𑒭𑓂𑒚𑒱𑒩 𑒅𑒚𑒰𑒋 𑒠𑒼𑒮𑒩 𑒡𑒢𑒳𑒭 𑒧𑒰𑒩𑒪 𑒬𑒪𑓂𑒨𑒏 𑒁𑒬𑓂𑒫 𑒂 𑒮𑒯𑒲𑒮 ।
𑒦𑒹𑒪 𑒞𑒐𑒢 𑒒𑒧𑒰𑒮𑒰𑒢 𑒨𑒳𑒡𑒱𑒭𑓂𑒚𑒱𑒩 𑒪𑒹𑒪𑒢𑓂𑒯𑒱 𑒬𑒪𑓂𑒨𑒏 𑒣𑓂𑒩𑒰𑒝,
𑒮𑒯𑒠𑒹𑒫 𑒕𑒳𑒙𑒪𑒰𑒯 𑒬𑒏𑒳𑒢𑒱 𑒂 𑒍𑒏𑒩 𑒣𑒳𑒞𑓂𑒩 𑒅𑒪𑒴𑒏𑒣𑒩,
𑒪𑒹𑒪𑒢𑓂𑒯𑒱 𑒥𑒰𑒣-𑒥𑒹𑒙𑒰𑒏 𑒣𑓂𑒩𑒰𑒝 𑒖𑒳𑒂𑒩𑒲𑒏 𑒣𑓂𑒩𑒰𑒝𑒰𑒢𑓂𑒞।
𑒑𑒠𑒰 𑒪𑒋 𑒠𑒳𑒩𑓂𑒨𑒼𑒡𑒢 𑒢𑒱𑒏𑒪𑒱 𑒑𑒹𑒪𑒰𑒯 𑒕𑒼𑒛𑓃𑒱 𑒩𑒝,
𑒋𑒏𑒙𑒰 𑒮𑒩𑒼𑒫𑒩 𑒧𑒡𑓂𑒨 𑒕𑒪 𑒮𑓂𑒞𑓀𑒦, 𑒢𑒳𑒏𑒰𑒋𑒪 𑒍𑒞𑒋 𑒠𑒳𑒩𑓂𑒨𑒼𑒡𑒢,
𑒠𑒹𑒐𑒪𑒢𑓂𑒯𑒱 𑒖𑒰𑒃𑒞 𑒯𑒳𑒢𑒏𑒰 𑒏𑒱𑒕𑒳 𑒑𑓂𑒩𑒰𑒧𑒲𑒝।
𑒑𑓂𑒩𑒰𑒧𑒲𑒝𑒏 𑒔𑒩𑓂𑒔 𑒥𑓂𑒨𑒰𑒮 𑒏𑒹𑒪𑒯𑒳𑒿 𑒏𑒵𑒞𑒰𑒩𑓂𑒟 ।
𑒣𑒰𑒝𑓂𑒛𑒫𑒏 𑒮𑓀𑒑 𑒏𑒵𑒭𑓂𑒝 𑒣𑒯𑒳𑒿𑒔𑒪𑒰𑒯 𑒍𑒞𑒋,
𑒏𑒱𑒕𑒳 𑒑𑓂𑒩𑒰𑒧𑒲𑒝 𑒖𑒹 𑒠𑒹𑒪𑒢𑓂𑒯𑒱 𑒣𑒞𑒰 𑒍𑒞𑒋𑒏।
𑒦𑒲𑒧 𑒠𑒹𑒪𑒏 𑒪𑒪𑒏𑒰𑒩𑒰 𑒠𑒳𑒩𑓂𑒨𑒼𑒡𑒢 𑒢𑒱𑒏𑒪𑒱 𑒂𑒋𑒪,
𑒞𑒲𑒩𑓂𑒟𑒮𑒿 𑒒𑒳𑒩𑒻𑒞 𑒥𑒪𑒩𑒰𑒧 𑒮𑒹𑒯𑒼 𑒣𑒯𑒳𑒿𑒔𑒪𑒰𑒯 𑒍𑒞𑒋।
𑒬𑒱𑒭𑓂𑒨 𑒠𑒳𑒩𑓂𑒨𑒼𑒡𑒢𑒏𑒹𑒿 𑒠𑒋 𑒂𑒬𑒲𑒩𑓂𑒫𑒰𑒠 𑒏𑒋𑒪 𑒑𑒠𑒰 𑒨𑒳𑒠𑓂𑒡𑒏 𑒬𑒳𑒩𑒳𑒂𑒞,
𑒦𑒲𑒧 𑒠𑒳𑒩𑓂𑒨𑒼𑒡𑒢𑒏 𑒥𑒲𑒔 𑒥𑒰𑒗𑒪 𑒨𑒳𑒠𑓂𑒡 𑒒𑒢𑒒𑒼𑒩,
𑒏𑒵𑒭𑓂𑒝 𑒠𑒹𑒪 𑒖𑒰𑒿𑒒𑒣𑒩 𑒟𑒣𑒏𑒲 𑒧𑒼𑒢 𑒣𑒰𑒛𑓃𑒪 𑒦𑒲𑒧𑒏𑒹𑒿 𑒍𑒏𑒩 𑒣𑓂𑒩𑒞𑒱𑒖𑓂𑒘𑒰𑒏,
𑒞𑒼𑒛𑒱 𑒖𑒰𑒿𑒒𑒏 𑒯𑒛𑓂𑒛𑒲 𑒏𑒋 𑒧𑒮𑓂𑒞𑒏𑒣𑒩 𑒠𑒳𑒩𑓂𑒨𑒼𑒡𑒢𑒏 𑒑𑒠𑒰-𑒣𑒋𑒩𑒮𑒿 𑒣𑓂𑒩𑒯𑒰𑒩 ।
𑒦𑒲𑒧𑒏 𑒄 𑒏𑒵𑒞𑓂𑒨 𑒕𑒳𑒙𑒪𑒰𑒯 𑒥𑒪𑒩𑒰𑒧 𑒍𑒏𑒩𑒰 𑒣𑒩 𑒧𑒰𑒩-𑒧𑒰𑒩,
𑒏𑒵𑒭𑓂𑒝 𑒩𑒼𑒏𑒱 𑒠𑒰𑒆𑒏𑒹𑒿 𑒧𑒼𑒢 𑒣𑒰𑒛𑓃𑒪 𑒠𑓂𑒩𑒾𑒣𑒠𑒲𑒏 𑒁𑒣𑒧𑒰𑒢,
𑒦𑒲𑒧𑒏 𑒣𑓂𑒩𑒝।
𑒕𑒼𑒛𑓃𑒱 𑒠𑒳𑒩𑓂𑒨𑒼𑒡𑒢𑒏𑒹𑒿 𑒁𑒮𑒯𑒰𑒨,
𑒑𑒹𑒪𑒰𑒯 𑒮𑒦 𑒣𑒰𑒝𑓂𑒛𑒫 𑒦𑒰𑒋।
𑒮𑓀𑒡𑓂𑒨𑒰 𑒮𑒧𑒨 𑒏𑒵𑒞𑒫𑒩𑓂𑒧𑒰 𑒏𑒵𑒣𑒰𑒔𑒰𑒩𑓂𑒨 𑒂 𑒁𑒬𑓂𑒫𑒞𑓂𑒟𑒰𑒧𑒰
𑒣𑒯𑒳𑒿𑒔𑒱 𑒠𑒹𑒐𑒪 𑒠𑒳𑒩𑓂𑒨𑒼𑒡𑒢𑒏 𑒠𑒳𑒩𑓂𑒠𑒬𑒰 𑒂 𑒣𑓂𑒩𑒪𑒰𑒣 ।
𑒦𑒲𑒧𑒏 𑒣𑒰𑒠𑒮𑒿 𑒠𑒳𑒩𑓂𑒨𑒼𑒡𑒢𑒏 𑒧𑒮𑓂𑒞𑒏𑒣𑒩 𑒣𑓂𑒩𑒯𑒰𑒩,
𑒮𑒳𑒢𑒱 𑒄 𑒏𑒟𑓂𑒨 𑒁𑒬𑓂𑒫𑒞𑓂𑒟𑒰𑒧𑒰 𑒪𑒹𑒪 𑒣𑒰𑒝𑓂𑒛𑒫𑒏 𑒫𑒡𑒏 𑒫𑓂𑒩𑒞 । 𑒠𑒳𑒩𑓂𑒨𑒼𑒡𑒢 𑒏𑒋𑒪 𑒁𑒬𑓂𑒫𑒞𑓂𑒟𑒰𑒧𑒰𑒏 𑒮𑒹𑒢𑒰𑒣𑒞𑒱 𑒩𑒴𑒣𑒧𑒹 𑒁𑒦𑒱𑒭𑒹𑒏,
𑒏𑒵𑒞𑒫𑒩𑓂𑒧𑒰 𑒏𑒵𑒣𑒰𑒔𑒰𑒩𑓂𑒨 𑒂 𑒁𑒬𑓂𑒫𑒞𑓂𑒟𑒰𑒧𑒰 𑒥𑒜𑓃𑒪𑒰𑒯 𑒣𑒰𑒝𑓂𑒛𑒫-𑒬𑒱𑒫𑒱𑒩 𑒮𑒧𑒏𑓂𑒭।
𑒏𑒵𑒭𑓂𑒝 𑒪𑒋 𑒣𑒰𑓀𑒔𑒼 𑒣𑒰𑓀𑒛𑒫𑒏𑒹𑒿 𑒑𑒹𑒪𑒰𑒯 𑒏𑒞𑒯𑒳 𑒁𑒢𑓂𑒨𑒞𑓂𑒩।
𑒣𑒰𑒝𑓂𑒛𑒫-𑒬𑒱𑒫𑒱𑒩𑒏 𑒮𑒧𑒏𑓂𑒭 𑒋𑒏𑒙𑒰 𑒫𑒵𑒏𑓂𑒭, 𑒢𑒲𑒔𑒰𑒿 𑒮𑒳𑒞𑒪𑒰𑒯 𑒏𑒵𑒣𑒰 𑒂 𑒏𑒵𑒞 ।
𑒁𑒬𑓂𑒫𑒞𑓂𑒟𑒰𑒧𑒰𑒏 𑒂𑒿𑒐𑒱𑒧𑒹 𑒢𑒱𑒢𑓂𑒢𑒏 𑒢𑒘𑒱 𑒪𑒹𑒭, 𑒠𑒹𑒐𑒪 𑒋𑒏𑒙𑒰 𑒣𑒏𑓂𑒭𑒲 𑒁𑒥𑒻𑒞,
𑒍𑒯𑒱 𑒫𑒵𑒏𑓂𑒭𑒣𑒩 𑒏𑒾𑒂𑒮𑒦 𑒮𑒳𑒞𑒪 𑒧𑒰𑒩𑒱 𑒩𑒰𑒮, 𑒏𑒹𑒪𑒏 𑒍 𑒣𑒏𑓂𑒭𑒲 𑒮𑒦𑒏 𑒑𑓂𑒩𑒰𑒮।
𑒠𑒹𑒐𑒱 𑒄 𑒠𑒵𑒬𑓂𑒨 𑒁𑒬𑓂𑒫𑒞𑓂𑒟𑒰𑒧𑒰 𑒅𑒚𑒰𑒍𑒪 𑒏𑒵𑒣𑒰𑒔𑒰𑒩𑓂𑒨 𑒍 𑒏𑒵𑒞,
𑒦𑒼𑒩𑒏 𑒥𑒰𑒙 𑒞𑒰𑒏𑒥 𑒢𑒯𑒱 𑒮𑒳𑒥𑒳𑒠𑓂𑒡𑒱, 𑒄 𑒁𑒡𑒩𑓂𑒧 𑒏𑒯𑒪 𑒏𑒵𑒣 ।
𑒧𑒳𑒠𑒰 𑒁𑒬𑓂𑒫𑒞𑓂𑒟𑒰𑒧 𑒔𑒪𑒱 𑒣𑒛𑓃𑒪 𑒬𑒱𑒫𑒱𑒩 𑒠𑒱𑒬,
𑒯𑒰𑒩𑒱 𑒣𑒯𑒳𑓀𑒔𑒪 𑒣𑒰𑒕𑒰𑒿-𑒣𑒰𑒕𑒰𑒿 𑒏𑒵𑒞-𑒏𑒵𑒣,
𑒯𑒧 𑒣𑒻𑒮𑒻𑒞 𑒕𑒲 𑒦𑒲𑒞𑒩 𑒬𑒱𑒫𑒱𑒩 ।
𑒥𑒰𑒯𑒩 𑒯𑒼𑒃𑒞 𑒮𑒦𑒏𑒹𑒿 𑒣𑓂𑒩𑒰𑒝 𑒪𑒱𑒁 𑒁𑒯𑒰𑒿 𑒠𑒳𑒢𑒴 𑒑𑒼𑒙𑒹,
𑒋𑒞𑒋 𑒚𑒰𑒜𑓃 𑒪𑒑 𑒠𑓂𑒫𑒰𑒩।
𑒮𑒦 𑒣𑒰𑓀𑒔𑒰𑒪 𑒡𑒵𑒭𑓂𑒙𑒠𑓂𑒨𑒳𑒧𑓂𑒢 𑒬𑒱𑒐𑒝𑓂𑒛𑒲 𑒮𑒧𑒹𑒞,
𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩𑒏𑒹𑒿 𑒥𑒳𑒗𑒱 𑒣𑒰𑒝𑓂𑒛𑒫 𑒠𑒹𑒪 𑒧𑒰𑒩𑒱,
𑒁𑒬𑓂𑒫𑒞𑓂𑒟𑒰𑒧𑒰 𑒠𑒹𑒪 𑒬𑒱𑒫𑒱𑒩𑒏𑒹𑒿 𑒂𑒑𑒱𑒮𑒿 𑒖𑒩𑒰𑒋।
𑒤𑒹𑒩 𑒣𑒯𑒳𑒿𑒔𑒱 𑒪𑒋 𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩𑒏 𑒧𑒰𑒟,
𑒠𑒳𑒩𑓂𑒨𑒼𑒡𑒢 𑒠𑒹𑒐𑒱 𑒧𑒰𑒿𑒑𑒪 𑒦𑒲𑒧𑒏 𑒧𑒮𑓂𑒞𑒏,
𑒍𑒏𑒩 𑒧𑒳𑒭𑓂𑒙𑒱𑒏𑒰𑒏 𑒣𑓂𑒩𑒯𑒰𑒩𑒮𑒿 𑒧𑒮𑓂𑒞𑒏 𑒦𑒹𑒪 𑒤𑒰𑒿𑒏,
𑒢𑒯𑒱 𑒄 𑒢𑒯𑒱 𑒦𑒲𑒧𑒏 𑒧𑒰𑒟 ।
𑒦𑒼𑒩𑒧𑒹 𑒠𑒹𑒐𑒪 𑒠𑓂𑒩𑒾𑒣𑒠𑒲𑒏 𑒣𑒰𑒿𑒔𑒴 𑒣𑒳𑒞𑓂𑒩𑒏 𑒧𑒰𑒟,
𑒏𑒰𑒢𑒻𑒞 𑒯𑒰𑒏𑓂𑒩𑒼𑒬 𑒏𑒩𑒻𑒞 𑒦𑒹𑒪 𑒠𑒳𑒩𑓂𑒨𑒼𑒡𑒢𑒏 𑒣𑓂𑒩𑒰𑒝𑒰𑒢𑓂𑒞।
𑒦𑒼𑒩𑒧𑒹 𑒏𑒶𑒭𑓂𑒝 𑒣𑒯𑒳𑒿𑒔𑒪𑒰𑒯 𑒣𑒰𑒝𑓂𑒛𑒫-𑒠𑓂𑒩𑒾𑒣𑒠𑒲𑒏 𑒮𑓀𑒑,
𑒠𑒹𑒐𑒱 𑒫𑒱𑒢𑒰𑒬 𑒦𑒲𑒧 𑒔𑒪𑒪 𑒁𑒬𑓂𑒫𑒞𑓂𑒟𑒰𑒧𑒰𑒏 𑒞𑒰𑒏𑒱𑒧𑒹,
𑒕𑒪 𑒍 𑒑𑓀𑒑 𑒞𑒙𑒣𑒩 𑒥𑓂𑒨𑒰𑒮𑒏 𑒮𑒧𑒏𑓂𑒭 ।
𑒨𑒳𑒡𑒱𑒭𑓂𑒚𑒱𑒩-𑒁𑒩𑓂𑒖𑒳𑒢 𑒮𑓀𑒑 𑒏𑒵𑒭𑓂𑒝 𑒣𑒯𑒳𑒿𑒔𑒪 𑒖𑒰𑒋,
𑒣𑒰𑒝𑓂𑒛𑒫𑒏 𑒢𑒰𑒬𑒏 𑒮𑓀𑒏𑒪𑓂𑒣 𑒮𑓀𑒑 𑒁𑒬𑓂𑒫𑒞𑓂𑒟𑒰𑒧𑒰 𑒕𑒼𑒛𑓃𑒪 𑒥𑓂𑒩𑒯𑓂𑒧𑒬𑒱𑒩𑒰 𑒁𑒮𑓂𑒞𑓂𑒩,
𑒁𑒩𑓂𑒖𑒳𑒢𑒏 𑒕𑒼𑒛𑓃𑒪 𑒣𑒰𑒬𑒳𑒣𑒞 𑒧𑒯𑒰𑒮𑓂𑒞𑓂𑒩 𑒁𑒑𑓂𑒢𑒱 𑒫𑒵𑒭𑓂𑒙𑒱 𑒮𑒿 𑒮𑒵𑒭𑓂𑒙𑒱𑒏 𑒫𑒱𑒢𑒰𑒬,
𑒥𑒲𑒔𑒧𑒹 𑒁𑒮𑓂𑒞𑓂𑒩 𑒏𑒹𑒩 𑒁𑒋𑒪𑒰𑒯 𑒢𑒰𑒩𑒠 𑒂 𑒥𑓂𑒨𑒰𑒮 ।
𑒫𑒰𑒯 𑒥𑓂𑒨𑒰𑒮 । 𑒧𑒯𑒰𑒦𑒰𑒩𑒞𑒏 𑒪𑒱𑒐𑒢𑒱𑒯𑒰𑒩 ।
𑒂𑒑𑓂𑒩𑒯 𑒏𑒩𑒻𑒞 𑒖𑒹 𑒠𑒳𑒢𑒴 𑒑𑒼𑒙𑒹 𑒪𑒱𑒁 𑒁𑒣𑒢-𑒁𑒣𑒢 𑒁𑒮𑓂𑒞𑓂𑒩 𑒮𑒧𑓂𑒯𑒰𑒩𑒱,
𑒁𑒩𑓂𑒖𑒳𑒢 𑒪𑒹𑒪𑒢𑓂𑒯𑒱 𑒁𑒣𑒢 𑒁𑒮𑓂𑒞𑓂𑒩 𑒮𑒧𑓂𑒯𑒰𑒩𑒱 𑒧𑒳𑒠𑒰,
𑒁𑒬𑓂𑒫𑒞𑓂𑒟𑒰𑒧𑒰 𑒏𑒯𑒪 𑒢𑒯𑒱 𑒒𑒳𑒩𑒱 𑒮𑒏𑒞 𑒯𑒧𑒩 𑒁𑒮𑓂𑒞𑓂𑒩 𑒂𑒃 ।
𑒇𑒭𑒱𑒏 𑒣𑓂𑒩𑒞𑒱𑒏𑒰𑒩 𑒥𑓂𑒩𑒯𑓂𑒧𑒬𑒱𑒩𑒰𑒮𑒿 𑒯𑒼𑒋𑒞 𑒅𑒞𑓂𑒞𑒩𑒰𑒏 𑒑𑒩𑓂𑒦𑒏 𑒢𑒰𑒬,
𑒧𑒳𑒠𑒰 𑒁𑒬𑓂𑒫𑒞𑓂𑒟𑒰𑒧𑒏𑒹𑒿 𑒠𑒹𑒧𑒋 𑒣𑒛𑓃𑒞 𑒧𑒮𑓂𑒞𑒏𑒏 𑒧𑒝𑒱,
𑒦𑒹𑒪 𑒍 𑒢𑒱𑒩𑓂𑒥𑒪 𑒞𑒣𑒮𑓂𑒫𑒲, 𑒥𑓂𑒨𑒰𑒮𑒏 𑒂𑒬𑓂𑒩𑒧𑒧𑒹 𑒥𑒱𑒞𑒰𑒍𑒪 𑒖𑒲𑒫𑒢 𑒮𑒏𑒪।
𑒠𑒳𑒩𑓂𑒨𑒼𑒡𑒢𑒏 𑒣𑒞𑓂𑒢𑒲 𑒦𑒰𑒢𑒳𑒧𑒞𑒱 𑒕𑒪𑒱 𑒁𑒔𑒹𑒞, 𑒑𑒰𑓀𑒡𑒰𑒩𑒲 𑒏𑒩𑒟𑒱 𑒫𑒱𑒪𑒰𑒣,
𑒡𑒵𑒞𑒩𑒰𑒭𑓂𑒙𑓂𑒩 𑒧𑒴𑒩𑓂𑒕𑒱𑒞 𑒫𑒱𑒠𑒳𑒩𑒏 𑒯𑒰𑒏𑓂𑒩𑒼𑒬, 𑒣𑒰𑒝𑓂𑒛𑒫 𑒒𑒳𑒩𑒪 𑒁𑒬𑓂𑒫𑒞𑓂𑒟𑒰𑒧𑒰𑒏 𑒧𑒝𑒱 𑒮𑓀𑒑 ।
𑒏𑒵𑒭𑓂𑒝 𑒪𑒹𑒪𑒢𑓂𑒯𑒱 𑒪𑒾𑒯𑒏 𑒦𑒲𑒧𑒏 𑒮𑓂𑒫𑒰𑓀𑒑 𑒡𑒵𑒞𑒩𑒰𑒭𑓂𑒙𑓂𑒩 𑒣𑒯𑒳𑒿𑒔𑒪 𑒏𑒳𑒩𑒳𑒏𑓂𑒭𑒹𑒞𑓂𑒩 𑒫𑒡𑒴 𑒮𑒦𑒏 𑒮𑓀𑒑।
𑒦𑒲𑒧𑒏𑒹𑒿 𑒑𑒩 𑒪𑒑𑒰𑒋 𑒏𑒋𑒪 𑒍𑒏𑒩𑒰 𑒔𑒴𑒩𑓂𑒝 𑒤𑒹𑒩 𑒦𑒲𑒧-𑒦𑒲𑒧 𑒏𑒯𑒻𑒞 𑒣𑓂𑒩𑒪𑒰𑒣,
𑒏𑒵𑒭𑓂𑒝 𑒏𑒯𑒪 𑒢𑒯𑒱 𑒏𑒰𑒢𑒴 𑒯𑒹 𑒡𑒵𑒞𑒩𑒰𑒭𑓂𑒙𑓂𑒩, 𑒕𑒪 𑒄 𑒪𑒾𑒯𑒏 𑒦𑒲𑒧 𑒧𑒰𑒞𑓂𑒩 ।
𑒑𑒰𑓀𑒡𑒰𑒩𑒲 𑒠𑒹𑒪 𑒏𑒶𑒭𑓂𑒝𑒏𑒹𑒿 𑒬𑒰𑒣,
𑒖𑒹𑒢𑒰 𑒏𑒋𑒪 𑒁𑒯𑒰𑒿 𑒯𑒧𑒩 𑒫𑓀𑒬𑒏 𑒢𑒰𑒬,
𑒯𑒼𑒋𑒞 𑒁𑒯𑒴𑒿𑒏 𑒏𑒳𑒪 𑒢𑒭𑓂𑒙।
𑒧𑒵𑒞𑒏𑒏 𑒠𑒰𑒯 𑒮𑓀𑒮𑓂𑒏𑒰𑒩𑒏 𑒮𑓀𑒑 𑒋𑒏 𑒣𑒏𑓂𑒭 𑒮𑒧𑒰𑒣𑓂𑒞।
𑒨𑒳𑒡𑒱𑒭𑓂𑒚𑒱𑒩𑒏 𑒧𑒼𑒢 𑒫𑒱𑒐𑒱𑒢𑓂𑒢, 𑒕𑒼𑒛𑓃𑒪 𑒩𑒰𑒖-𑒣𑒰𑒙𑒏 𑒫𑒱𑒔𑒰𑒩,
𑒥𑓂𑒨𑒰𑒮 𑒂𑒥𑒱 𑒠𑒹𑒪𑒢𑓂𑒯𑒱 𑒅𑒣𑒠𑒹𑒬, 𑒣𑒪𑒰𑒨𑒢 𑒢𑒯𑒱 𑒁𑒯𑒰𑒿𑒏 𑒧𑒰𑒩𑓂𑒑।
𑒡𑒾𑒧𑓂𑒨 𑒏𑒋 𑒫𑒹𑒠 𑒧𑓀𑒞𑓂𑒩𑒏 𑒑𑒰𑒝 𑒩𑒰𑒖𑒞𑒱𑒪𑒏 𑒨𑒳𑒡𑒱𑒭𑓂𑒚𑒱𑒩𑒏𑒹𑒿 𑒪𑒑𑒰𑒍𑒪।
𑒤𑒹𑒩 𑒣𑒯𑒳𑒿𑒔𑒱 𑒦𑒲𑒭𑓂𑒧𑒏 𑒮𑒧𑒏𑓂𑒭 𑒪𑒹𑒪 𑒁𑒢𑒳𑒬𑒰𑒮𑒢𑒏 𑒬𑒱𑒏𑓂𑒭𑒰,
𑒩𑒰𑒖𑒡𑒩𑓂𑒧,𑒪𑒼𑒏𑒡𑒩𑓂𑒧 𑒧𑒼𑒏𑓂𑒭𑒡𑒩𑓂𑒧𑒏 𑒖𑓂𑒘𑒰𑒢, 𑒣𑓂𑒩𑒖𑒰𑒣𑒰𑒪𑒢,
𑒅𑒚𑒱 𑒣𑓂𑒩𑒠𑒹𑒬 𑒖𑒰𑒞𑒱𑒏 𑒫𑒱𑒔𑒰𑒩𑒮𑒿 𑒆𑒣𑒩, 𑒩𑒰𑒖𑒰𑒏 𑒫𑓂𑒩𑒞𑒏 𑒏𑒩𑒴 𑒣𑒩𑒱𑒣𑒰𑒪𑒢।
𑒂𑒋𑒪 𑒍 𑒏𑒰𑒪 𑒖𑒐𑒢 𑒮𑒴𑒩𑓂𑒨 𑒦𑒹𑒪𑒰𑒯 𑒅𑒞𑓂𑒞𑒩𑒰𑒨𑒝,
𑒣𑒯𑒳𑒿𑒔𑒪𑒰𑒯 𑒨𑒳𑒡𑒱𑒭𑓂𑒚𑒱𑒩 𑒮𑓀𑒑 𑒧𑒰𑒞𑒰-𑒑𑒰𑓀𑒡𑒰𑒩𑒲-𑒏𑒳𑒢𑓂𑒞𑒲, 𑒡𑒵𑒞𑒩𑒰𑒭𑓂𑒙𑓂𑒩 𑒦𑓂𑒩𑒰𑒞𑒰 𑒧𑒱𑒪𑒱,
𑒁𑒙𑓂𑒚𑒰𑒫𑒢 𑒠𑒱𑒢𑒏 𑒬𑒩-𑒬𑒨𑓂𑒨𑒰𑒏 𑒁𑒢𑓂𑒞𑒱𑒧 𑒅𑒣𑒠𑒹𑒬 𑒂 𑒧𑒯𑒰𑒣𑓂𑒩𑒨𑒰𑒝,
𑒔𑒰𑒢𑒢𑒏 𑒔𑒱𑒞𑒰𑒣𑒩 𑒦𑒲𑒭𑓂𑒧𑒏𑒹𑒿 𑒨𑒳𑒡𑒱𑒭𑓂𑒚𑒱𑒩 𑒠𑒹𑒪 𑒂𑒑𑒱 𑒮𑒦 𑒂𑒏𑓂𑒩𑒰𑒢𑓂𑒞।
𑒯𑒮𑓂𑒞𑒱𑒢𑒰𑒣𑒳𑒩𑒏 𑒩𑒰𑒖𑓂𑒨𑒧𑒹 𑒂𑒋𑒪 𑒮𑒳𑒐 𑒮𑒧𑒵𑒠𑓂𑒡𑒱,
𑒨𑒳𑒡𑒱𑒭𑓂𑒚𑒱𑒩𑒏 𑒏𑒾𑒬𑒪 𑒏𑒋𑒪 𑒂𑒬𑒰𑒏 𑒫𑒵𑒠𑓂𑒡𑒱,
𑒅𑒞𑓂𑒞𑒩𑒰𑒏𑒹𑒿 𑒞𑒐𑒢𑒹 𑒦𑒹𑒪 𑒧𑒵𑒞-𑒣𑒳𑒞𑓂𑒩𑒏 𑒣𑓂𑒩𑒰𑒣𑓂𑒞𑒱,
𑒮𑒳𑒦𑒠𑓂𑒩𑒰 𑒐𑒮𑒪𑒱 𑒏𑒵𑒭𑓂𑒝 𑒪𑒑 𑒖𑒰𑒋।
𑒏𑒵𑒭𑓂𑒝 𑒅𑒚𑒰𑒋 𑒥𑒰𑒪𑒏𑒹𑒿 𑒏𑒯𑒪 𑒯𑒧 𑒢𑒯𑒱 𑒏𑒋𑒪 𑒣𑒪𑒰𑒨𑒢,
𑒮𑒞𑓂𑒨𑒮𑒿 𑒮𑒧𑓂𑒥𑒢𑓂𑒡 𑒩𑒯𑒪 𑒥𑒢𑒪, 𑒣𑒩𑒰𑒖𑒱𑒞 𑒬𑒞𑓂𑒩𑒳 𑒏𑒋 𑒢𑒯𑒱 𑒦𑒹𑒪𑒯𑒳𑒿 𑒯𑒱𑓀𑒮𑒏,
𑒨𑒠𑒱 𑒄 𑒮𑒞𑓂𑒨 𑒞𑒿 𑒥𑒰𑒪𑒏 𑒖𑒲𑒥𑒱 𑒅𑒚𑒟𑒱।
𑒄 𑒮𑒳𑒢𑒱𑒞𑒯𑒱 𑒬𑒱𑒬𑒳 𑒦𑒹𑒪 𑒖𑒲𑒫𑒱𑒞 𑒢𑒰𑒧 𑒣𑒛𑓃𑒪 𑒣𑒩𑒲𑒏𑓂𑒭𑒱𑒞।
𑒤𑒹𑒩 𑒏𑒋𑒪 𑒨𑒳𑒡𑒱𑒭𑓂𑒚𑒱𑒩 𑒨𑒖𑓂𑒘 𑒁𑒬𑓂𑒫𑒧𑒹𑒡,
𑒮𑒱𑒪𑒹𑒥𑒲 𑒁𑒬𑓂𑒫𑒏 𑒑𑒩𑒧𑒹 𑒮𑓂𑒫𑒩𑓂𑒝𑒣𑒞𑓂𑒩,
𑒖𑒱𑒢𑒏𑒰 𑒨𑒳𑒡𑒱𑒭𑓂𑒚𑒱𑒩𑒏 𑒩𑒰𑒖𑓂𑒨𑒮𑒿 𑒣𑒩𑒯𑒹𑒖,
𑒮𑒹 𑒣𑒏𑒛𑓃𑒱 𑒒𑒼𑒙𑒏 𑒏𑒩𑒟𑒱 𑒋𑒏𑒩 𑒫𑒱𑒩𑒼𑒡।
𑒧𑒳𑒠𑒰 𑒒𑒳𑒩𑒱 𑒂𑒋𑒪 𑒁𑒬𑓂𑒫 𑒢𑒱𑒭𑓂𑒏𑓀𑒙𑒏,
𑒨𑒖𑓂𑒘 𑒦𑒹𑒪 𑒮𑒧𑒰𑒣𑓂𑒞 𑒢𑒱𑒩𑓂𑒫𑒱𑒒𑓂𑒢।
𑒥𑒩𑒐 𑒣𑒢𑓂𑒠𑓂𑒩𑒯 𑒥𑒲𑒞𑒪 𑒞𑒐𑒢 𑒁𑒋𑒪𑒰𑒯 𑒥𑓂𑒨𑒰𑒮,
𑒠𑒹𑒪 𑒅𑒣𑒠𑒹𑒬 𑒡𑒶𑒞𑒩𑒰𑒭𑓂𑒙𑓂𑒩 𑒪𑒹𑒪 𑒫𑒰𑒢𑒣𑓂𑒩𑒮𑓂𑒟 𑒡𑒩𑓂𑒧𑒏 𑒖𑓂𑒘𑒰𑒢,
𑒑𑒰𑓀𑒡𑒰𑒩𑒲, 𑒏𑒳𑒢𑓂𑒞𑒲, 𑒫𑒱𑒠𑒳𑒩, 𑒮𑓀𑒖𑒨𑒏 𑒮𑓀𑒑 𑒯𑒱𑒧𑒰𑒪𑒨 𑒣𑓂𑒩𑒨𑒰𑒝,
𑒫𑒱𑒠𑒳𑒩 𑒪𑒹𑒪𑒢𑒱 𑒫𑒢𑒯𑒱𑒧𑒹 𑒮𑒧𑒰𑒡𑒱,
𑒠𑒰𑒫𑒰𑒑𑓂𑒢𑒱 𑒪𑒹𑒪𑒏 𑒬𑒹𑒭 𑒮𑒦𑒏 𑒣𑓂𑒩𑒰𑒝।
𑒏𑒵𑒭𑓂𑒝 𑒨𑒳𑒠𑓂𑒡𑒏 𑒥𑒰𑒠 𑒑𑒹𑒪𑒰𑒯 𑒠𑓂𑒫𑒰𑒩𑒏𑒰,
𑒕𑒪𑒟𑒱 𑒣𑓂𑒩𑒰𑒣𑓂𑒞 𑒏𑒋𑒢𑒹 𑒮𑒧𑓂𑒧𑒰𑒢,
𑒧𑒳𑒠𑒰 𑒨𑒰𑒠𑒫 𑒩𑒰𑒖𑒏𑒳𑒧𑒰𑒩,
𑒏𑒩𑒟𑒱 𑒫𑒱𑒠𑓂𑒫𑒰𑒢𑒏 𑒁𑒣𑒧𑒰𑒢 ।
𑒧𑒰𑒩𑒱-𑒏𑒰𑒙𑒱 𑒏𑒩𑒟𑒱 𑒂𑒣𑒮𑒧𑒹 𑒐𑒞𑓂𑒧,
𑒠𑒹𑒐𑒱 𑒠𑒳𑒐𑒱𑒞 𑒥𑒪𑒩𑒰𑒧 𑒣𑓂𑒩𑒦𑒰𑒮𑒞𑒲𑒩𑓂𑒟 𑒖𑒰𑒋,
𑒍𑒞𑒯𑒱 𑒪𑒹𑒪 𑒠𑒰𑒆 𑒮𑒧𑒰𑒡𑒱,
𑒏𑒵𑒭𑓂𑒝 𑒣𑒯𑒳𑒿𑒔𑒱 𑒠𑒹𑒐𑒱 𑒯𑒳𑒢𑒏𑒩 𑒣𑓂𑒩𑒰𑒝𑒰𑒢𑓂𑒞,
𑒑𑒰𑒕 𑒣𑒏𑒛𑓃𑒱 𑒩𑒯𑒟𑒱 𑒚𑒹𑒯𑒱𑒂𑒋 ।
𑒥𑓂𑒨𑒰𑒡 𑒖𑒏𑒩 𑒕𑒪 𑒖𑒩𑒰 𑒢𑒰𑒧,
𑒯𑒩𑒱𑒝 𑒥𑒳𑒗𑒱 𑒣𑒻𑒩𑒏 𑒞𑒪𑒫𑒰𑒧𑒹 𑒧𑒰𑒩𑒪 𑒫𑒰𑒝,
𑒦𑒹𑒪 𑒏𑒵𑒭𑓂𑒝𑒏 𑒣𑓂𑒩𑒰𑒝𑒰𑒢𑓂𑒞 ।
𑒮𑒳𑒢𑒱 𑒄 𑒮𑒧𑒰𑒔𑒰𑒩 𑒧𑒵𑒞𑓂𑒨𑒳𑒏 𑒫𑒮𑒳𑒠𑒹𑒫𑒏,
𑒣𑒱𑒞𑒰 𑒫𑒰𑒮𑒳𑒠𑒹𑒫 𑒮𑒹𑒯𑒼 𑒏𑒋𑒪 𑒖𑒲𑒫𑒢𑒏 𑒁𑒢𑓂𑒞।
𑒏𑒵𑒭𑓂𑒝𑒏 𑒧𑒵𑒞𑓂𑒨𑒳𑒏 𑒮𑒧𑒰𑒔𑒰𑒩,
𑒣𑒰𑒝𑓂𑒛𑒫𑒩𑒰𑒖 𑒨𑒳𑒡𑒱𑒭𑓂𑒚𑒱𑒩 𑒠𑒹𑒪 𑒣𑒩𑒲𑒏𑓂𑒭𑒱𑒞𑒏𑒹𑒿 𑒩𑒰𑒖,
𑒮𑒳𑒦𑒠𑓂𑒩𑒰 𑒏𑒹𑒿 𑒠𑒋 𑒅𑒣𑒠𑒹𑒬,
𑒮𑓀𑒑 𑒠𑓂𑒩𑒾𑒣𑒠𑒲 𑒣𑒯𑒳𑒿𑒔𑒪 𑒠𑓂𑒫𑒰𑒩𑒏𑒰 𑒣𑒰𑒿𑒔𑒴 𑒦𑒰𑒋।
𑒍𑒞𑒋 𑒛𑒴𑒥𑒪 𑒮𑒧𑒳𑒠𑓂𑒩𑒧𑒹 𑒕𑒪 𑒍 𑒢𑒑𑒩𑒲,
𑒒𑒳𑒧𑒻𑒞 𑒤𑒱𑒩𑒻𑒞 𑒔𑒪𑒪𑒰𑒯 𑒯𑒱𑒧𑒰𑒪𑒨 𑒮𑒦 𑒑𑒼𑒙𑒹।
𑒋𑒏 𑒏𑒳𑒏𑒳𑒛𑓃 𑒕𑒪 𑒮𑓀𑒑 𑒔𑒪𑒻𑒞 𑒍𑒞𑒋,
𑒯𑒱𑒧𑒰𑒪𑒨 𑒫𑒵𑒯𑒠𑒰𑒏𑒰𑒩 𑒯𑒱𑒧𑒣𑒰𑒞𑒏 𑒧𑒰𑒩𑒱,
𑒠𑓂𑒩𑒾𑒣𑒠𑒲 𑒐𑒮𑒪𑒱 𑒧𑒩𑒪𑒱, 𑒤𑒹𑒩 𑒮𑒯𑒠𑒹𑒫,
𑒢𑒏𑒳𑒪 𑒁𑒩𑓂𑒖𑒳𑒢 𑒦𑒲𑒧 𑒐𑒮𑒱 𑒧𑒩𑒪 𑒤𑒹𑒩-𑒤𑒹𑒩।
𑒂𑒑𑒰𑒿 𑒠𑒹𑒫𑒪𑒼𑒏𑒏 𑒩𑒟 𑒕𑒪 𑒚𑒰𑒜𑓃,
𑒃𑒢𑓂𑒠𑓂𑒩 𑒏𑒯𑒪 𑒔𑒪𑒴 𑒁𑒮𑒑𑒩 𑒮𑒬𑒩𑒲𑒩 𑒨𑒳𑒡𑒱𑒭𑓂𑒚𑒱𑒩,
𑒄 𑒏𑒳𑒏𑒳𑒛𑓃 𑒢𑒯𑒱 𑒩𑒯𑒋 𑒮𑒰𑒟।
𑒨𑒳𑒡𑒱𑒭𑓂𑒚𑒱𑒩 𑒢𑒯𑒱 𑒧𑒰𑒢𑒪 𑒒𑒳𑒩𑒱 𑒖𑒰𑒆 𑒃𑒢𑓂𑒠𑓂𑒩,
𑒥𑒱𑒢 𑒋𑒏𑒩 𑒢𑒯𑒱 𑒖𑒰𑒋𑒥 𑒍𑒞𑒋 𑒯𑒼𑒋 𑒮𑓂𑒫𑒩𑓂𑒑 𑒁𑒯𑒱।
𑒕𑒪 𑒍 𑒏𑒳𑒏𑒳𑒛𑓃 𑒨𑒧𑒩𑒰𑒖 𑒮𑓂𑒫𑒨𑓀,
𑒣𑓂𑒩𑒏𑒙 𑒦𑒋 𑒠𑒹𑒪 𑒍 𑒂𑒬𑒲𑒩𑓂𑒫𑒰𑒠 𑒍𑒞𑒋।
𑒣𑒯𑒳𑒿𑒔𑒱 𑒮𑓂𑒫𑒩𑓂𑒑 𑒠𑒹𑒐𑒪 𑒏𑒾𑒩𑒫 𑒑𑒝 𑒮𑒦 𑒍𑒞𑒋,
𑒃𑒢𑓂𑒠𑓂𑒩 𑒯𑒧𑒩 𑒦𑓂𑒩𑒰𑒞𑒰 𑒕𑒟𑒱 𑒏𑒞𑒋।
𑒞𑒐𑒢 𑒋𑒏𑒙𑒰 𑒠𑒴𑒞 𑒪𑒋 𑒑𑒹𑒪 𑒯𑒳𑒢𑒏𑒰 𑒢𑒩𑓂𑒏𑒏 𑒠𑓂𑒫𑒰𑒩𑒱𑒣𑒩,
𑒠𑓂𑒩𑒾𑒣𑒠𑒲 𑒮𑓀𑒑 𑒣𑒰𑒿𑒔𑒴 𑒦𑒰𑒋 𑒕𑒪𑒰𑒯 𑒍𑒞𑒋।
𑒏𑒯𑒪 𑒨𑒳𑒡𑒱𑒭𑓂𑒚𑒱𑒩 𑒯𑒧 𑒩𑒯𑒥 𑒋𑒞𑒯𑒱 𑒯𑒹 𑒠𑒴𑒞,
𑒕𑒼𑒛𑓃𑒱 𑒯𑒱𑒢𑒏𑒰 𑒖𑒰𑒋𑒥 𑒢𑒯𑒱 𑒏𑒞𑒯𑒳।
𑒃𑒢𑓂𑒠𑓂𑒩 𑒨𑒧 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒍𑒞𑒋।
𑒨𑒧 𑒏𑒯𑒪 𑒨𑒏𑓂𑒭 𑒏𑒳𑒏𑒳𑒛𑓃 𑒥𑒢𑒱 𑒯𑒧 𑒁𑒯𑒰𑒿 𑒣𑒩𑒲𑒏𑓂𑒭𑒰 𑒪𑒹𑒪,
𑒂𑒃 𑒋𑒯𑒱 𑒞𑒹𑒮𑒩 𑒣𑒩𑒲𑒏𑓂𑒭𑒰𑒧𑒹 𑒮𑒹𑒯𑒼 𑒁𑒯𑒰𑒿𑒏𑒹𑒿 𑒅𑒞𑓂𑒞𑒲𑒩𑓂𑒝 𑒏𑒋𑒪।
𑒄 𑒁𑒕𑒱 𑒠𑒹𑒫𑒪𑒼𑒏 𑒧𑒳𑒠𑒰 𑒮𑒠𑒹𑒯 𑒩𑒰𑒖𑒰𑒏𑒹𑒿,
𑒋𑒞𑒳𑒏𑓂𑒏𑒰 𑒏𑒭𑓂𑒙 𑒠𑒹𑒐𑒏 𑒪𑒹𑒥𑒰𑒏 𑒔𑒰𑒯𑒲 𑒬𑒱𑒏𑓂𑒭𑒰 𑒞𑒹𑒿,
𑒏𑒱𑒕𑒳 𑒏𑒰𑒪𑒏 𑒏𑒭𑓂𑒙 𑒯𑒧 𑒁𑒯𑒰𑒿𑒏𑒹𑒿 𑒠𑒹𑒪।
𑒕𑒼𑒛𑓃𑒴 𑒄 𑒬𑒩𑒲𑒩 𑒪𑒱𑒁 𑒠𑒻𑒫𑒲 𑒩𑒴𑒣 𑒂𑒥,
𑒏𑒯𑒻𑒞 𑒨𑒧𑒏 𑒦𑒹𑒪 𑒄 𑒣𑒩𑒱𑒫𑒩𑓂𑒞𑒢,
𑒏𑒩𑓂𑒝 𑒮𑒹𑒯𑒼 𑒍𑒞𑒋 𑒥𑒰𑒩𑒯 𑒂𑒠𑒱𑒞𑓂𑒨𑒏 𑒮𑓀𑒑,
𑒩𑒞𑓂𑒢𑒖𑒙𑒱𑒞 𑒮𑒱𑓀𑒯𑒰𑒮𑒢𑒣𑒩 𑒕𑒪 𑒫𑒱𑒩𑒰𑒖𑒧𑒰𑒢,
𑒦𑒰𑒩𑒞𑒏 𑒨𑒳𑒠𑓂𑒡𑒏 𑒏𑒰𑒫𑓂𑒨𑒏 𑒮𑒧𑒰𑒣𑒢।
𑒞𑓂𑒫𑒘𑓂𑒔𑒰𑒯𑒘𑓂𑒔 𑒮𑒦 𑒂𑒣𑒮𑒏 𑒪𑒛𑓃𑒰𑒄,
𑒁𑒕𑒱 𑒋𑒐𑒢𑒼 𑒣𑒮𑒩𑒪 𑒄 𑒧𑒯𑒰𑒧𑒰𑒩𑒱।
𑒖𑒰𑒞𑒱-𑒡𑒩𑓂𑒧 𑒣𑒩𑒱𑒫𑒰𑒩 𑒣𑒳𑒞𑓂𑒩 𑒏𑒹𑒩 𑒧𑒼𑒯,
𑒨𑒰𑒫𑒞 𑒩𑒯𑒞 𑒣𑓂𑒩𑒞𑒱𑒦𑒰 𑒣𑒱𑒔𑒰𑒋𑒞 𑒂𑒯।
𑒞𑓂𑒫𑒘𑓂𑒔𑒰𑒯𑒘𑓂𑒔 𑒧𑒔𑒞 𑒡𑒵𑒞𑒩𑒰𑒭𑓂𑒙𑓂𑒩 𑒖𑒞𑒋 𑒏𑒩𑒞 𑒁𑒩𑒰𑒛𑓃𑒱,
𑒠𑒳𑒩𑓂𑒨𑒼𑒡𑒢 𑒏𑒩𑒞 𑒣𑓂𑒩𑒰𑒩𑒧𑓂𑒦 𑒨𑒳𑒡𑒱𑒭𑓂𑒚𑒱𑒩𑒏 𑒠𑒼𑒭 𑒏𑒲 𑒟𑒼𑒛𑓃?
𑒁𑒮𑒘𑓂𑒖𑒰𑒞𑒱 𑒧𑒢
𑒄 𑒣𑒳𑒩𑒰𑒞𑒢 𑒠𑒹𑒬 𑒢𑒰𑒧 𑒦𑒩𑒞,
𑒩𑒰𑒖 𑒏𑒩𑒟𑒱 𑒖𑒞𑒋 𑒃𑒏𑓂𑒭𑓂𑒫𑒰𑒏𑒳 𑒫𑓀𑒬𑒖।
𑒋𑒯𑒱 𑒫𑓀𑒬𑒏 𑒬𑒰𑒏𑓂𑒨 𑒏𑒳𑒪 𑒩𑒰𑒖𑒰 𑒬𑒳𑒠𑓂𑒡𑒼𑒡𑒢,
𑒣𑒞𑓂𑒢𑒲 𑒧𑒰𑒨𑒰 𑒕𑒪𑒱, 𑒏𑒣𑒱𑒪𑒫𑒮𑓂𑒞𑒳𑒧𑒹 𑒩𑒰𑒖 𑒏𑒩𑒟𑒱 𑒞𑒐𑒢।
𑒁𑒬𑓂𑒫𑒒𑒼𑒭𑒏 𑒫𑒩𑓂𑒝𑒢 𑒄 𑒮𑒏𑒪,
𑒠𑒻𑒞 𑒁𑒕𑒱 𑒮𑒧𑓂𑒥𑒪 𑒁𑒮𑒘𑓂𑒖𑒰𑒞𑒱 𑒧𑒢𑒏।
𑒧𑒰𑒨𑒰 𑒠𑒹𑒐𑒪𑒢𑓂𑒯𑒱 𑒮𑓂𑒫𑒣𑓂𑒢 𑒂𑒥𑒱 𑒩𑒯𑒪,
𑒋𑒏𑒙𑒰 𑒬𑓂𑒫𑒹𑒞 𑒯𑒰𑒟𑒲 𑒂𑒥𑒱 𑒧𑒰𑒨𑒰𑒏 𑒬𑒩𑒲𑒩𑒧𑒹,
𑒣𑒻𑒮𑒱 𑒕𑒪 𑒩𑒯𑒪 𑒯𑒰𑒟𑒲 𑒧𑒳𑒠𑒰,
𑒧𑒰𑒨𑒰𑒏𑒹𑒿 𑒦𑒋 𑒩𑒯𑒪 𑒕𑒪𑒢𑓂𑒯𑒱 𑒢𑒹 𑒏𑒼𑒢𑒼 𑒏𑒭𑓂𑒙,
𑒫𑒩𑒢𑓂 𑒪𑒑𑒪𑒢𑓂𑒯𑒱 𑒖𑒹 𑒂𑒋𑒪 𑒁𑒕𑒱 𑒧𑒡𑓂𑒨 𑒏𑓂𑒨𑒼 𑒑𑒩𑓂𑒦।
𑒑𑒩𑓂𑒦𑒏 𑒥𑒰𑒞 𑒧𑒳𑒠𑒰 𑒕𑒪 𑒮𑒞𑓂𑒞𑒹,
𑒦𑒹𑒪 𑒧𑒼𑒢 𑒫𑒢𑒑𑒧𑒢𑒏,
𑒪𑒳𑒧𑓂𑒥𑒱𑒢𑒲 𑒖𑒰𑒋 𑒩𑒯𑒥, 𑒏𑒯𑒪 𑒬𑒳𑒠𑓂𑒡𑒼𑒡𑒢𑒏𑒹𑒿।
𑒠𑒱𑒢 𑒥𑒲𑒞𑒪 𑒍𑒞𑒯𑒱 𑒪𑒳𑒧𑓂𑒥𑒢𑒲𑒧𑒹 𑒠𑒱𑒢 𑒋𑒏,
𑒥𑒱𑒢𑒰 𑒣𑓂𑒩𑒮𑒫-𑒣𑒲𑒛𑓃𑒰𑒏 𑒖𑒢𑓂𑒧 𑒠𑒹𑒪𑒢𑓂𑒯𑒱 𑒣𑒳𑒞𑓂𑒩𑒏,
𑒂𑒏𑒰𑒬𑒮𑒿 𑒬𑒲𑒞𑒪 𑒂 𑒑𑒩𑓂𑒧 𑒣𑒰𑒢𑒱𑒏 𑒠𑒴 𑒙𑒰 𑒡𑒰𑒩,
𑒏𑒋𑒪 𑒁𑒦𑒱𑒭𑒹𑒏 𑒥𑒰𑒪𑒏𑒏 𑒪𑒰𑒪-𑒢𑒲𑒪 𑒣𑒳𑒭𑓂𑒣 𑒏𑒧𑒪,
𑒥𑒩𑒮𑒱 𑒂𑒏𑒰𑒬।
𑒨𑒏𑓂𑒭𑒏 𑒩𑒰𑒖𑒰 𑒂 𑒠𑒱𑒫𑓂𑒨 𑒪𑒼𑒏𑒢𑒱𑒏 𑒦𑒹𑒪 𑒮𑒧𑒰𑒑𑒧,
𑒣𑒬𑒳 𑒕𑒼𑒛𑓃𑒪 𑒯𑒱𑓀𑒮𑒰 𑒣𑒏𑓂𑒭𑒲 𑒥𑒰𑒖𑒪 𑒧𑒡𑒳𑒩𑒫𑒰𑒝𑒲।
𑒡𑒰𑒩𑒏 𑒁𑒯𑓀𑒏𑒰𑒩𑒏 𑒬𑒥𑓂𑒠 𑒥𑒢𑒪 𑒏𑒪𑒏𑒪,
𑒕𑒼𑒛𑓃𑒱 “𑒧𑒰𑒩” 𑒂𑒢𑒢𑓂𑒠𑒱𑒞 𑒕𑒪 𑒫𑒱𑒬𑓂𑒫 𑒮𑒏𑒪,
“𑒧𑒰𑒩” 𑒩𑒳𑒭𑓂𑒙 𑒂𑒑𑒧𑒮𑒿 𑒥𑒳𑒠𑓂𑒡𑒞𑓂𑒫𑒣𑓂𑒩𑒰𑒣𑓂𑒞𑒱 𑒏𑒩𑒞 𑒄?
𑒧𑒰𑒨𑒰-𑒬𑒳𑒠𑓂𑒡𑒼𑒡𑒢𑒏 𑒫𑒱𑒯𑓂𑒫𑒪𑒞𑒰𑒏 𑒣𑓂𑒩𑒮𑒢𑓂𑒢𑒞𑒰𑒏,
𑒥𑓂𑒩𑒰𑒯𑓂𑒧𑒝 𑒮𑒦𑒮𑒿 𑒮𑒳𑒢𑒱 𑒁𑒣𑒴𑒩𑓂𑒫 𑒪𑒏𑓂𑒭𑒝 𑒥𑒔𑓂𑒔𑒰𑒏,
𑒦𑒨 𑒠𑒴𑒩 𑒦𑒹𑒪 𑒧𑒰𑒞𑒰-𑒣𑒱𑒞𑒰𑒏 𑒞𑒐𑒢 𑒖𑒰 𑒏𑓄,
𑒧𑒢𑒳𑒭𑓂𑒨𑒬𑓂𑒩𑒹𑒭𑓂𑒚 𑒣𑒳𑒞𑓂𑒩 𑒂𑒬𑓂𑒫𑒮𑓂𑒞 𑒠𑒳𑒢𑒴 𑒑𑒼𑒙𑒹 𑒣𑒰𑒥𑒱 𑒏𑓄।
𑒧𑒯𑒩𑓂𑒭𑒱 𑒁𑒮𑒱𑒞𑒏𑒹𑒿 𑒦𑒹𑒪 𑒦𑒰𑒢 𑒬𑒰𑒏𑓂𑒨 𑒧𑒳𑒢𑒱 𑒪𑒹𑒪 𑒖𑒢𑓂𑒧,
𑒔𑒪𑒲 𑒏𑒣𑒱𑒪𑒫𑒮𑓂𑒞𑒳 𑒮𑒳𑒢𑒱 𑒦𑒫𑒱𑒭𑓂𑒨𑒫𑒰𑒝𑒲 𑒥𑒳𑒠𑓂𑒡𑒞𑓂𑒫 𑒏𑒩𑒞 𑒣𑓂𑒩𑒰𑒣𑓂𑒞,
𑒫𑒰𑒨𑒳 𑒧𑒰𑒩𑓂𑒑𑒹 𑒁𑒋𑒪𑒰𑒯 𑒩𑒰𑒖𑓂𑒨 𑒫𑒢 𑒏𑒣𑒱𑒪𑒫𑒮𑓂𑒞𑒳𑒏,
𑒥𑒻𑒮𑒰𑒋𑒪 𑒮𑒱𑓀𑒯𑒰𑒮𑒢 𑒬𑒳𑒠𑓂𑒡𑒼𑒡𑒢 𑒞𑒳𑒩𑒞 ।
𑒩𑒰𑒖𑒢𑓂 𑒂𑒋𑒪 𑒕𑒲 𑒠𑒹𑒐𑒋 𑒥𑒳𑒠𑓂𑒡𑒞𑓂𑒫 𑒣𑓂𑒩𑒰𑒣𑓂𑒞 𑒏𑒩𑒞 𑒖𑒹 𑒥𑒰𑒪𑒏।
𑒥𑒔𑓂𑒔𑒰𑒏𑒹𑒿 𑒂𑒢𑒪 𑒑𑒹𑒪 𑒔𑒏𑓂𑒩 𑒣𑒻𑒩𑒧𑒹 𑒕𑒪 𑒖𑒏𑒩,
𑒠𑒹𑒐𑒱 𑒁𑒮𑒱𑒞 𑒏𑒯𑒪 𑒯𑒰 𑒧𑒵𑒞𑓂𑒨𑒳 𑒮𑒧𑒲𑒣 𑒁𑒕𑒱 𑒯𑒧𑒩,
𑒥𑒰𑒪𑒏𑒏 𑒬𑒱𑒏𑓂𑒭𑒰 𑒣𑓂𑒩𑒰𑒣𑓂𑒞 𑒏𑒩𑒱𑒞𑒯𑒳𑒿 𑒧𑒳𑒠𑒰 𑒫𑒵𑒠𑓂𑒡 𑒯𑒧 𑒁𑒟𑒥𑒪,
𑒅𑒣𑒠𑒹𑒬 𑒮𑒳𑒢𑒋 𑒪𑒹𑒪 𑒬𑒰𑒏𑓂𑒨 𑒧𑒳𑒢𑒱𑒏 𑒖𑒲𑒫𑒱𑒞 𑒏𑒯𑒰𑒿 𑒩𑒯𑒥।
𑒫𑒰𑒨𑒳𑒧𑒰𑒩𑓂𑒑𑒹 𑒒𑒳𑒩𑒪𑒰𑒯 𑒁𑒮𑒱𑒞 𑒏𑒋 𑒠𑒩𑓂𑒬𑒢 𑒬𑒰𑒏𑓂𑒨 𑒧𑒳𑒢𑒱𑒏,
𑒦𑒰𑒑𑒱𑒢𑒏𑒹𑒿 𑒥𑒳𑒗𑒰𑒍𑒪 𑒣𑒻𑒒 𑒦𑒋 𑒥𑒾𑒠𑓂𑒡𑒏 𑒁𑒢𑒳𑒮𑒩𑒝 𑒏𑒩𑒟𑒱।
𑒠𑒮 𑒠𑒱𑒢 𑒡𑒩𑒱 𑒏𑒋𑒪𑒢𑓂𑒯𑒱 𑒖𑒰𑒞-𑒮𑓀𑒮𑓂𑒏𑒰𑒩,
𑒤𑒹𑒩 𑒜𑓃𑒹𑒩 𑒩𑒰𑒮 𑒯𑒼𑒧 𑒖𑒰𑒣,
𑒏𑒩𑒱 𑒑𑒰𑒨𑒏 𑒠𑒰𑒢 𑒮𑒱𑓀𑒒 𑒮𑓂𑒫𑒩𑓂𑒝𑒮𑒿 𑒕𑒰𑒩𑒱,
𑒒𑒳𑒩𑒱 𑒢𑒑𑒩 𑒣𑓂𑒩𑒫𑒹𑒬 𑒏𑒋𑒪𑒢𑓂𑒯𑒱 𑒧𑒰𑒨𑒰,
𑒯𑒰𑒟𑒲-𑒠𑒰𑒿𑒞𑒏 𑒧𑒯𑒤𑒰 𑒔𑒜𑓃𑒱।
𑒡𑒢-𑒡𑒰𑒢𑓂𑒨𑒮𑒿 𑒣𑒴𑒩𑓂𑒝 𑒦𑒹𑒪 𑒩𑒰𑒖𑓂𑒨,
𑒁𑒩𑒱 𑒕𑒼𑒛𑓃𑒪 𑒬𑒞𑓂𑒩𑒳𑒞𑒰𑒏 𑒧𑒰𑒩𑓂𑒑,
𑒮𑒱𑒠𑓂𑒡𑒱 𑒮𑒰𑒡𑒪 𑒢𑒰𑒧 𑒣𑒛𑓃𑒪 𑒮𑒱𑒠𑓂𑒡𑒰𑒩𑓂𑒟।
𑒧𑒳𑒠𑒰 𑒧𑒰𑒨𑒰 𑒢𑒯𑒱 𑒮𑒯𑒱 𑒮𑒏𑒪𑒲𑒯 𑒣𑓂𑒩𑒮𑒢𑓂𑒢𑒞𑒰,
𑒧𑒵𑒞𑓂𑒨𑒳 𑒂𑒋𑒪 𑒧𑒾𑒮𑒲 𑒑𑒾𑒞𑒧𑒲 𑒏𑒋𑒪 𑒬𑒳𑒬𑓂𑒩𑒳𑒭𑒰।
𑒅𑒣𑒢𑒨𑒢 𑒮𑓀𑒮𑓂𑒏𑒰𑒩 𑒦𑒹𑒪 𑒥𑒰𑒪𑒏𑒏,
𑒬𑒱𑒏𑓂𑒭𑒰𑒧𑒹 𑒕𑒪 𑒔𑒞𑒳𑒩,
𑒁𑓀𑒞𑓁𑒣𑒳𑒩𑒧𑒹 𑒏𑒋 𑒜𑒹𑒩 𑒩𑒰𑒮 𑒫𑓂𑒨𑒫𑒮𑓂𑒟𑒰 𑒫𑒱𑒪𑒰𑒮𑒏,
𑒬𑒳𑒠𑓂𑒡𑒼𑒡𑒢𑒏𑒹𑒿 𑒕𑒪 𑒧𑒼𑒢 𑒁𑒮𑒱𑒞𑒏 𑒥𑒰𑒞,
𑒥𑒰𑒪𑒏𑒏 𑒨𑒼𑒑𑒲 𑒥𑒢𑒥𑒰𑒏।
𑒮𑒳𑒢𑓂𑒠𑒩𑒲 𑒨𑒬𑒼𑒡𑒩𑒰𑒮𑒿 𑒤𑒹𑒩 𑒏𑒩𑒥𑒰𑒍𑒪 𑒮𑒱𑒠𑓂𑒡𑒰𑒩𑓂𑒟𑒏 𑒫𑒱𑒫𑒰𑒯,
𑒮𑒧𑒨 𑒥𑒲𑒞𑒪 𑒮𑒱𑒠𑓂𑒡𑒰𑒩𑓂𑒟𑒏 𑒣𑒳𑒞𑓂𑒩 𑒩𑒰𑒯𑒳𑒪𑒏 𑒦𑒹𑒪 𑒖𑒢𑓂𑒧।
𑒅𑒞𑓂𑒮𑒫𑒏 𑒮𑓀𑒑 𑒥𑒱𑒞𑒻𑒞 𑒩𑒯𑒪 𑒠𑒱𑒢 𑒣𑒪,
𑒮𑒳𑒢𑒪𑒢𑓂𑒯𑒱 𑒔𑒩𑓂𑒔 𑒅𑒠𑓂𑒨𑒰𑒢𑒏 𑒏𑒧𑒪 𑒮𑒩𑒼𑒫𑒩𑒏,
𑒮𑒱𑒠𑓂𑒡𑒰𑒩𑓂𑒟 𑒃𑒔𑓂𑒕𑒰 𑒠𑒹𑒐𑒹𑒪𑒢𑓂𑒯𑒱 𑒒𑒳𑒧𑒏 ।
𑒮𑒾𑒿𑒮𑒹 𑒩𑒮𑓂𑒞𑒰𑒧𑒹 𑒂𑒠𑒹𑒬 𑒦𑒹𑒪 𑒩𑒰𑒖𑒰𑒏,
𑒏𑓂𑒨𑒼 𑒫𑒵𑒠𑓂𑒡 𑒠𑒳𑒐𑒲 𑒩𑒼𑒑𑒲 𑒩𑒯𑒟𑒱 𑒥𑒰𑒙 𑒢𑒹 𑒒𑒰𑒙।
𑒮𑒳𑒢𑒱 𑒢𑒑𑒩𑒫𑒰𑒮𑒲 𑒠𑒹𑒐𑒥𑒰 𑒪𑒹𑒪 𑒫𑓂𑒨𑒑𑓂𑒩,
𑒢𑒱𑒏𑒪𑒱 𑒂𑒋𑒪 𑒣𑒟𑒣𑒩 𑒠𑒩𑓂𑒬𑒢𑒏 𑒮𑒱𑒠𑓂𑒡𑒰𑒩𑓂𑒟𑒏 ।
𑒔𑒰𑒩𑒴 𑒏𑒰𑒞 𑒕𑒪 𑒧𑒢𑒼𑒩𑒧 𑒠𑒵𑒬𑓂𑒨,
𑒧𑒳𑒠𑒰 𑒞𑒐𑒢𑒹 𑒂𑒋𑒪 𑒣𑒟 𑒋𑒏 𑒫𑒵𑒠𑓂𑒡।
𑒯𑒹 𑒮𑒰𑒩𑒟𑒲, 𑒮𑒴𑒞𑒖𑒲 𑒏𑒹 𑒁𑒕𑒱 𑒄,
𑒂𑒿𑒐𑒱 𑒗𑒰𑒿𑒣𑒪 𑒦𑒾𑒿𑒯𑒮𑒿,
𑒬𑓂𑒫𑒹𑒞 𑒏𑒹𑒬,
𑒯𑒰𑒟 𑒪𑒰𑒚𑒲,
𑒗𑒳𑒏𑒪 𑒏𑒲 𑒁𑒕𑒱 𑒦𑒹𑒪?
𑒏𑒳𑒧𑒰𑒩 𑒁𑒕𑒱 𑒄 𑒫𑒵𑒠𑓂𑒡,
𑒦𑒼𑒑𑒱 𑒥𑒰𑒪 𑒨𑒳𑒫𑒰 𑒁𑒫𑒮𑓂𑒟𑒰 𑒖𑒰𑒋
𑒁𑒕𑒱 𑒦𑒹𑒪 𑒫𑒵𑒠𑓂𑒡 𑒂𑒃 ।
𑒏𑒲 𑒄 𑒯𑒼𑒋𑒞 𑒮𑒦𑒏 𑒮𑓀𑒑,
𑒯𑒧𑒯𑒴 𑒦𑒋 𑒖𑒰𑒋𑒥 𑒫𑒵𑒠𑓂𑒡 𑒋𑒏 𑒠𑒱𑒢?
𑒮𑒦𑒏𑒹𑒿 𑒁𑒕𑒱 𑒥𑒳𑒗𑒪 𑒄 𑒐𑒹𑒪,
𑒤𑒹𑒩 𑒔𑒯𑒳𑒠𑒱𑒮 𑒄 𑒮𑒦 𑒏𑒩𑒋 𑒏𑒱𑒪𑒼𑒪 ?
𑒯𑒩𑓂𑒭𑒱𑒞 𑒧𑒳𑒠𑒱𑒞 𑒥𑒞𑒰𑒯 𑒞𑒿 𑒢𑒯𑒱 𑒄 𑒦𑒲𑒛𑓃 ?
𑒒𑒳𑒩𑒱 𑒔𑒪𑒴 𑒮𑒴𑒞 𑒖𑒲 𑒂𑒥,
𑒅𑒠𑓂𑒨𑒰𑒢𑒧𑒹 𑒧𑒼𑒢 𑒏𑒞𑒋 𑒪𑒰𑒑 !
𑒧𑒯𑒪𑒧𑒹 𑒒𑒳𑒩𑒱-𑒤𑒱𑒩𑒱 𑒦𑓄 𑒔𑒱𑒢𑓂𑒞𑒰𑒧𑒑𑓂𑒢,
𑒣𑒳𑒢𑒱 𑒪𑓄 𑒂𑒖𑓂𑒘𑒰 𑒩𑒰𑒖𑒰𑒮𑒿 𑒢𑒱𑒏𑒪𑒪 𑒁𑒑𑓂𑒩 ।
𑒧𑒳𑒠𑒰 𑒋𑒯𑒱 𑒥𑒹𑒩 𑒦𑒹𑒙𑒪 𑒋𑒏𑒙𑒰 𑒪𑒼𑒏,
𑒣𑒹𑒙 𑒥𑒜𑓃𑒪, 𑒗𑒳𑒏𑒪 𑒪𑒻𑒞 𑒢𑒱𑒮𑒰𑒮,
𑒩𑒼𑒑𑒑𑓂𑒩𑒮𑓂𑒞 𑒕𑒪 𑒍 𑒣𑒴𑒕𑒪 𑒮𑒱𑒠𑓂𑒡𑒰𑒩𑓂𑒟,
𑒮𑒴𑒞 𑒖𑒲 𑒕𑒟𑒱 𑒄 𑒏𑒹, 𑒏𑒲 𑒦𑒹𑒪?
𑒩𑒼𑒑𑒑𑓂𑒩𑒮𑓂𑒞 𑒄 𑒏𑒳𑒧𑒰𑒩 𑒁𑒕𑒱 𑒄 𑒞𑒿 𑒐𑒹𑒪,
𑒏𑒐𑒢𑒼 𑒏𑒏𑒩𑒼 𑒪𑒻𑒞 𑒁𑒕𑒱 𑒁𑒣𑒢 𑒁𑒡𑒲𑒢 ।
𑒮𑒴𑒞 𑒖𑒲 𑒒𑒳𑒩𑒴 𑒦𑒨𑒦𑒲𑒞 𑒦𑒹𑒪𑒯𑒳𑒿 𑒯𑒧 𑒂𑒃 𑒤𑒹𑒩।
𑒒𑒳𑒩𑒱 𑒒𑒩 𑒫𑒱𑒔𑒩𑒱-𑒫𑒱𑒔𑒩𑒱 𑒏𑒨 𑒔𑒱𑒢𑓂𑒞𑒢,
𑒬𑒳𑒠𑓂𑒡𑒼𑒡𑒢 𑒔𑒱𑒢𑓂𑒞𑒱𑒞 𑒖𑒰𑒢𑒱 𑒄 𑒒𑒙𑒢𑒰𑒏𑓂𑒩𑒧।
𑒂𑒧𑒼𑒠 𑒣𑓂𑒩𑒧𑒼𑒠𑒏 𑒏𑒋 𑒂𑒩 𑒣𑓂𑒩𑒥𑒢𑓂𑒡,
𑒩𑒟 𑒮𑒰𑒩𑒟𑒲 𑒠𑒳𑒢𑒴 𑒢𑒫 𑒏𑒋𑒪 𑒬𑒳𑒠𑓂𑒡𑒼𑒡𑒢।
𑒤𑒹𑒩 𑒋𑒏 𑒠𑒱𑒢 𑒣𑒚𑒰𑒍𑒪 𑒩𑒰𑒖𑒏𑒳𑒧𑒰𑒩,
𑒨𑒳𑒫𑒏-𑒨𑒳𑒫𑒞𑒲 𑒮𑓀𑒑 𑒣𑒚𑒰𑒍𑒪 𑒏𑒩𑒋 𑒫𑒱𑒯𑒰𑒩 ।
𑒧𑒳𑒠𑒰 𑒞𑒐𑒢𑒹 𑒋𑒏𑒙𑒰 𑒨𑒰𑒞𑓂𑒩𑒰 𑒧𑒵𑒞𑓂𑒨𑒳𑒏,
𑒯𑒹 𑒮𑒴𑒞𑒖𑒲 𑒏𑒲 𑒁𑒕𑒱 𑒄 𑒠𑒵𑒬𑓂𑒨,
𑒮𑒖𑒰-𑒡𑒖𑒰 𑒏𑒋 𑒔𑒰𑒩𑒱 𑒑𑒼𑒙𑒹 𑒡𑒋 𑒏𑒰𑒢𑓂𑒯,
𑒧𑒳𑒠𑒰 𑒞𑒻𑒨𑒼 𑒮𑒦 𑒏𑒰𑒢𑒱 𑒩𑒯𑒪 𑒏𑒱𑒋 𑒢𑒯𑒱 𑒖𑒰𑒢 ?
𑒯𑒹 𑒏𑒳𑒧𑒰𑒩 𑒂𑒥 𑒄 𑒮𑒖𑒰𑒍𑒪 𑒧𑒢𑒳𑒏𑓂𑒐,
𑒢𑒯𑒱 𑒥𑒰𑒖𑒱 𑒮𑒏𑒞, 𑒁𑒕𑒱 𑒄 𑒏𑒰𑒚 𑒮𑒧𑒰𑒢।
𑒏𑒰𑒢𑒱-𑒐𑒲𑒖𑒱 𑒖𑒰𑒟𑒱 𑒮𑒧𑒮𑓂𑒞 𑒄 𑒪𑒼𑒏,
𑒕𑒼𑒛𑓃𑒋 𑒍𑒏𑒩𑒰 𑒧𑒵𑒞𑓂𑒨𑒳 𑒏𑒹𑒪𑒢𑓂𑒯𑒱 𑒖𑒹 𑒣𑓂𑒩𑒰𑒣𑓂𑒞।
𑒒𑒳𑒩𑒴 𑒮𑒰𑒩𑒟𑒲 𑒢𑒯𑒱 𑒯𑒼𑒋𑒞 𑒄 𑒥𑒩𑓂𑒠𑒰𑒬𑓂𑒞,
𑒦𑒨 𑒢𑒯𑒱 𑒁𑒕𑒱 𑒋𑒯𑒱 𑒥𑒹𑒩,
𑒧𑒳𑒠𑒰 𑒥𑒳𑒗𑒱𑒞𑒼 𑒂𑒧𑒼𑒠 𑒣𑓂𑒩𑒧𑒼𑒠𑒧𑒹 𑒦𑒹𑒩,
𑒁𑒖𑓂𑒘𑒰𑒢𑒲 𑒮𑒢 𑒏𑒼𑒢𑒰 𑒒𑒳𑒧𑒥 𑒅𑒠𑓂𑒨𑒰𑒢।
𑒧𑒳𑒠𑒰 𑒢𑒫 𑒮𑒰𑒩𑒟𑒲 𑒒𑒳𑒩𑒪 𑒢𑒯𑒱 𑒠𑓂𑒫𑒰𑒩,
𑒣𑒯𑒳𑒿𑒔𑒪 𑒅𑒠𑓂𑒨𑒰𑒢 𑒣𑒠𑓂𑒧 𑒐𑒝𑓂𑒛 𑒖𑒏𑒩 𑒢𑒰𑒧।
𑒨𑒳𑒫𑒞𑒲𑒑𑒝𑒏𑒹𑒿 𑒠𑒹𑒪𑒏 𑒂𑒠𑒹𑒬 𑒅𑒠𑒰𑒨𑒲, 𑒣𑒳𑒩𑒼𑒯𑒱𑒞 𑒣𑒳𑒞𑓂𑒩,
𑒏𑒩𑒴 𑒮𑒱𑒠𑓂𑒡𑒰𑒩𑓂𑒟𑒏𑒹𑒿 𑒂𑒧𑒼𑒠-𑒣𑓂𑒩𑒧𑒼𑒠𑒧𑒹 𑒪𑒲𑒢 ।
𑒧𑒳𑒠𑒰 𑒠𑒹𑒐𑒱 𑒃𑒢𑓂𑒠𑓂𑒩𑒖𑒲𑒞 𑒮𑒱𑒠𑓂𑒡𑒰𑒩𑓂𑒟𑒏 𑒁𑒢𑒰𑒮𑒏𑓂𑒞𑒱,
𑒣𑒳𑒕𑒪 𑒅𑒠𑒰𑒨𑒲 𑒦𑒹𑒪 𑒁𑒯𑒰𑒿𑒏𑒹𑒿 𑒄 𑒏𑒲?
𑒯𑒹 𑒧𑒱𑒞𑓂𑒩 𑒏𑓂𑒭𑒝𑒱𑒏 𑒄 𑒂𑒨𑒳,
𑒥𑒳𑒗𑒱𑒞𑒼 𑒯𑒧 𑒏𑒼𑒢𑒰 𑒑𑒧𑒰𑒆 ?
𑒮𑒰𑒿𑒗 𑒦𑒹𑒪 𑒒𑒳𑒩𑒱 𑒨𑒳𑒫𑒞𑒲𑒮𑒦 𑒑𑒹𑒪,
𑒮𑒴𑒩𑓂𑒨𑒏 𑒁𑒮𑓂𑒞𑒏 𑒮𑓀𑒑 𑒮𑓀𑒮𑒰𑒩𑒏 𑒁𑒢𑒱𑒞𑓂𑒨𑒞𑒰𑒏 𑒥𑒼𑒡,
𑒣𑒰𑒥𑒱 𑒮𑒱𑒠𑓂𑒡𑒰𑒩𑓂𑒟 𑒒𑒳𑒩𑒪 𑒒𑒩 𑒔𑒱𑒢𑓂𑒞𑒰 𑒧𑒑𑓂𑒢,
𑒬𑒳𑒠𑓂𑒡𑒼𑒡𑒢 𑒫𑒱𑒔𑒪𑒱𑒞 𑒧𑓀𑒞𑓂𑒩𑒝𑒰𑒧𑒹 𑒪𑒲𑒢।
𑒏𑒱𑒕𑒳 𑒠𑒱𑒢𑒏 𑒅𑒣𑒩𑒰𑒢𑓂𑒞,
𑒧𑒰𑒿𑒑𑒱 𑒂𑒖𑓂𑒘𑒰 𑒥𑒼𑒢 𑒖𑒋𑒥𑒰𑒏,
𑒮𑓀𑒑 𑒏𑒱𑒕𑒳 𑒮𑓀𑒑𑒲 𑒢𑒱𑒏𑒪𑒱 𑒥𑒱𑒔 𑒐𑒹𑒞-𑒣𑒟𑒰𑒩,
𑒠𑒹𑒐𑒱 𑒔𑒰𑒮 𑒠𑒹𑒪 𑒐𑒹𑒞 𑒧𑒩𑒪 𑒏𑒲𑒙-𑒣𑒞𑓀𑒑 ।
𑒠𑒳𑒐𑒱𑒞 𑒥𑒻𑒮𑒱 𑒅𑒞𑒛𑓃𑒪 𑒒𑒼𑒛𑓃𑒰𑒮𑒿 𑒁𑒡𑓁 𑒮𑒱𑒠𑓂𑒡𑒰𑒩𑓂𑒟,
𑒥𑒻𑒮𑒱 𑒖𑒼𑒧𑒏 𑒑𑒰𑒕𑒏 𑒢𑒲𑒔𑒰𑒿 𑒡𑒋 𑒡𑓂𑒨𑒰𑒢,
𑒣𑒰𑒍𑒪 𑒬𑒰𑒢𑓂𑒞𑒱 𑒞𑒐𑒢𑒹 𑒦𑒹𑒙𑒪 𑒋𑒏 𑒮𑒰𑒡𑒳।
𑒕𑒪 𑒍 𑒧𑒼𑒏𑓂𑒭𑒏 𑒞𑒰𑒏𑒱𑒧𑒹 𑒧𑒑𑓂𑒢,
𑒮𑒳𑒢𑒱 𑒍𑒏𑒩 𑒑𑒣 𑒠𑒹𑒐𑒪 𑒯𑒼𑒃𑒞 𑒁𑒢𑓂𑒞𑒩𑓂𑒡𑒰𑒢।
𑒑𑒵𑒯 𑒞𑓂𑒨𑒰𑒑𑒏 𑒂𑒋𑒪 𑒧𑒼𑒢𑒧𑒹 𑒦𑒰𑒫,
𑒥𑒼𑒢 𑒖𑒋𑒥𑒰𑒏 𑒂𑒥 𑒋𑒐𑒢 𑒢𑒯𑒱 𑒏𑒰𑒖।
𑒒𑒳𑒩𑒱 𑒮𑒦 𑒔𑒪𑒪 𑒑𑒵𑒯𑒏 𑒪𑒹𑒪,
𑒩𑒮𑓂𑒞𑒰𑒧𑒹 𑒦𑒹𑒙𑒪𑒱 𑒏𑒢𑓂𑒨𑒰 𑒋𑒏,
𑒏𑒯𑒪 𑒁𑒯𑒰𑒿 𑒕𑒲 𑒖𑒢𑒱𑒏 𑒣𑒞𑒱,
𑒮𑒹 𑒕𑒟𑒱 𑒢𑒱𑒬𑓂𑒔𑒨𑒹𑒢 𑒢𑒱𑒫𑒵𑒞𑓂𑒞।
𑒢𑒱𑒫𑒵𑒞𑓂𑒞 𑒬𑒥𑓂𑒠𑒮𑒿 𑒢𑒱𑒩𑓂𑒫𑒰𑒝𑒏 𑒣𑓂𑒩𑒮𑓀𑒑,
𑒮𑒼𑒔𑒱 𑒧𑒳𑒠𑒱𑒞 𑒮𑒱𑒠𑓂𑒡𑒰𑒩𑓂𑒟 𑒒𑒳𑒩𑒪 𑒩𑒰𑒖 𑒮𑒦𑒰,
𑒩𑒯𑒟𑒱 𑒍𑒞𑒋 𑒬𑒳𑒠𑓂𑒡𑒼𑒡𑒢 𑒧𑓀𑒞𑓂𑒩𑒲𑒑𑒝𑒏 𑒥𑒱𑒔।
𑒏𑒯𑒪 - 𑒪𑒋 𑒮𑓀𑒢𑓂𑒨𑒰𑒮 𑒧𑒼𑒏𑓂𑒭𑒏 𑒖𑓂𑒘𑒰𑒢𑒏 𑒪𑒹𑒪,
𑒏𑒩𑒴 𑒂𑒖𑓂𑒘𑒰 𑒣𑓂𑒩𑒠𑒰𑒢 𑒯𑒹 𑒦𑒴𑒠𑒹𑒫।
𑒯𑒹 𑒣𑒳𑒞𑓂𑒩 𑒏𑒋𑒪 𑒏𑒲 𑒑𑒣,
𑒖𑒰𑒆 𑒣𑒯𑒱𑒢𑒹 𑒣𑒰𑒪𑒢 𑒏𑒩𑒴 𑒦𑒋 𑒑𑒵𑒯𑒮𑓂𑒟 ।
𑒮𑓀𑒢𑓂𑒨𑒰𑒮𑒏 𑒢𑒯𑒱 𑒁𑒕𑒱 𑒂𑒋𑒪 𑒥𑒹𑒩,
𑒞𑒐𑒢 𑒮𑒱𑒠𑓂𑒡𑒰𑒩𑓂𑒟 𑒏𑒯𑒪 𑒁𑒕𑒱 𑒚𑒲𑒏,
𑒞𑒐𑒢 𑒠𑒴𑒩 𑒏𑒩𑒴 𑒔𑒰𑒩𑒱 𑒙𑒰 𑒯𑒧𑒩 𑒦𑒨,
𑒢𑒯𑒱 𑒧𑒵𑒞𑓂𑒨𑒳, 𑒩𑒼𑒑, 𑒫𑒵𑒠𑓂𑒡𑒰𑒫𑒮𑓂𑒟𑒰 𑒂𑒥𑒱 𑒮𑒏𑒨,
𑒡𑒢 𑒮𑒹𑒯𑒼 𑒢𑒯𑒱 𑒏𑓂𑒭𑒲𑒝 𑒯𑒼𑒋।
𑒬𑒳𑒠𑓂𑒡𑒼𑒡𑒢 𑒏𑒯𑒪 𑒁𑒕𑒱 𑒄 𑒁𑒮𑓀𑒦𑒫 𑒥𑒰𑒞,
𑒞𑒐𑒢 𑒯𑒧𑒩 𑒫𑒱𑒨𑒼𑒑𑒏 𑒏𑒩𑒴 𑒢𑒯𑒱 𑒣𑒬𑓂𑒔𑒰𑒞𑒰𑒣।
𑒏𑒯𑒱 𑒮𑒱𑒠𑓂𑒡𑒰𑒩𑓂𑒟 𑒑𑒹𑒪𑒰𑒯 𑒧𑒯𑒪 𑒥𑒱𑒔,
𑒔𑒱𑒢𑓂𑒞𑒱𑒞 𑒋𑒧𑓂𑒯𑒩-𑒍𑒧𑓂𑒯𑒩 𑒒𑒳𑒧𑒱 𑒢𑒱𑒏𑒪𑒪𑒱 𑒥𑒰𑒯𑓂𑒨 ।
𑒮𑒴𑒞𑒪 𑒕𑓀𑒠𑒏𑒏𑒹𑒿 𑒏𑒯𑒪 𑒬𑓂𑒫𑒹𑒞 𑒫𑒹𑒑𑒧𑒰𑒢,
𑒏𑓀𑒟𑒏 𑒒𑒼𑒛𑓃𑒰 𑒁𑒬𑓂𑒫𑒬𑒰𑒪𑒰𑒮𑒿 𑒪𑒰𑒆 ।
𑒮𑒦 𑒦𑒹𑒪 𑒢𑒱𑒢𑓂𑒢𑒧𑒹 𑒦𑒹𑒩 𑒏𑓀𑒟𑒏 𑒂𑒋𑒪,
𑒔𑒜𑒰 𑒮𑒱𑒠𑓂𑒡𑒰𑒩𑓂𑒟𑒏𑒹𑒿 𑒪𑒋 𑒑𑒹𑒪 𑒢𑒑𑒩𑒮𑒿 𑒠𑒴𑒩 ।
𑒢𑒧𑒮𑓂𑒏𑒰𑒩 𑒏𑒣𑒱𑒪𑒫𑒮𑓂𑒞𑒳 !
𑒒𑒳𑒩𑒥 𑒖𑒐𑒢 𑒣𑒰𑒋𑒥 𑒖𑒢𑓂𑒧-𑒧𑒵𑒞𑓂𑒨𑒳𑒏 𑒦𑒹𑒠 !
𑒮𑒼𑒗𑒰𑒿 𑒂𑒋𑒪 𑒦𑒰𑒩𑓂𑒑𑒫 𑒇𑒭𑒱𑒏 𑒏𑒳𑒙𑒲 𑒅𑒞𑒩𑒱 𑒮𑒱𑒠𑓂𑒡𑒰𑒩𑓂𑒟,
𑒪𑒹𑒪𑒢𑓂𑒯𑒱 𑒩𑒞𑓂𑒢𑒖𑒙𑒱𑒞 𑒏𑒵𑒣𑒰𑒝 𑒏𑒰𑒙𑒪 𑒏𑒹𑒬 ।
𑒧𑒳𑒏𑒳𑒙 𑒧𑒝𑒱 𑒂𑒦𑒴𑒭𑒝 𑒠𑒹𑒪 𑒕𑓀𑒠𑒏𑒏𑒹𑒿।
𑒁𑒬𑓂𑒩𑒳𑒡𑒰𑒩 𑒥𑒯𑒪 𑒕𑓀𑒠𑒏𑒏 𑒂𑒿𑒐𑒱,
𑒖𑒰𑒆 𑒕𑓀𑒠𑒏 𑒒𑒳𑒩𑒳 𑒢𑒑𑒩 𑒖𑒰𑒆 ।
𑒢𑒯𑒱 𑒮𑒱𑒠𑓂𑒡𑒰𑒩𑓂𑒟 𑒯𑒧 𑒢𑒯𑒱 𑒕𑒲 𑒮𑒳𑒧𑒢𑓂𑒞,
𑒕𑒼𑒛𑓃𑒱 𑒩𑒰𑒧 𑒒𑒳𑒩𑒪 𑒁𑒨𑒼𑒡𑓂𑒨𑒰 𑒢𑒑𑒩।
𑒒𑒼𑒙𑒏 𑒏𑓀𑒟𑒏𑒏 𑒂𑒿𑒐𑒱𑒧𑒹 𑒮𑒹𑒯𑒼 𑒢𑒼𑒩,
𑒞𑒐𑒢𑒹 𑒋𑒏 𑒫𑓂𑒨𑒰𑒡 𑒕𑒪 𑒂𑒋𑒪,
𑒏𑒭𑒰𑒨 𑒫𑒮𑓂𑒞𑓂𑒩 𑒣𑒯𑒱𑒩𑒢𑒹 𑒩𑒯𑒋, 𑒏𑒯𑒪 𑒮𑒱𑒠𑓂𑒡𑒰𑒩𑓂𑒟,
𑒯𑒧𑒩 𑒬𑒳𑒦𑓂𑒩 𑒫𑒮𑓂𑒞𑓂𑒩 𑒪𑒱𑒁 𑒠𑒱𑒁 𑒄 𑒫𑒮𑓂𑒞𑓂𑒩,
𑒁𑒠𑒪𑒱-𑒥𑒠𑒪𑒱 𑒠𑒳𑒢𑒳 𑒑𑒼𑒙𑒹 𑒫𑒮𑓂𑒞𑓂𑒩 𑒣𑒯𑒱𑒩𑒱,
𑒕𑓀𑒠𑒏 𑒠𑒹𑒐𑒱 𑒏𑒹𑒪𑒏 𑒣𑓂𑒩𑒝𑒰𑒧 𑒑𑒹𑒪 𑒒𑒳𑒩𑒱।
𑒮𑒱𑒠𑓂𑒡𑒰𑒩𑓂𑒟 𑒁𑒋𑒪𑒰𑒯 𑒂𑒬𑓂𑒩𑒧 𑒮𑒦 𑒦𑒹𑒪 𑒔𑒏𑒱𑒞,
𑒠𑒹𑒐𑒱 𑒢𑒰𑒢𑒰𑒫𑒱𑒡 𑒞𑒣𑒮𑓂𑒨𑒰 𑒏𑒚𑒼𑒩,
𑒢𑒯𑒱 𑒮𑓀𑒞𑒳𑒭𑓂𑒙 𑒏𑒭𑓂𑒙 𑒦𑒼𑒑𑒟𑒱 𑒣𑒰𑒥𑒨 𑒪𑒹𑒪 𑒮𑓂𑒫𑒩𑓂𑒑,
𑒁𑒑𑓂𑒢𑒱𑒯𑒼𑒞𑓂𑒩𑒏 𑒨𑒖𑓂𑒘 𑒞𑒣𑒏 𑒫𑒱𑒡𑒱 𑒠𑒹𑒐𑒱 ।
𑒢𑒱𑒏𑒪𑒱 𑒔𑒪𑒪 𑒏𑒱𑒕𑒳 𑒠𑒱𑒢𑒧𑒹 𑒮𑒱𑒠𑓂𑒡𑒰𑒩𑓂𑒟 𑒂𑒬𑓂𑒩𑒧 𑒕𑒼𑒛𑓃𑒱,
𑒮𑓂𑒫𑒩𑓂𑒑 𑒢𑒯𑒱 𑒧𑒼𑒏𑓂𑒭𑒏 𑒁𑒕𑒱 𑒯𑒧𑒩𑒰 𑒐𑒼𑒖 ।
𑒖𑒰𑒆 𑒞𑒐𑒢 𑒁𑒩𑒰𑒛 𑒧𑒳𑒢𑒱 𑒪𑒑 𑒫𑒱𑓀𑒡𑓂𑒨𑒏𑒼𑒭𑓂𑒚,
𑒢𑒧𑒮𑓂𑒏𑒰𑒩 𑒧𑒳𑒢𑒱 𑒣𑓂𑒩𑒝𑒰𑒧 𑒒𑒳𑒩𑒴 𑒮𑒦 𑒖𑒰𑒆,
𑒮𑒱𑒠𑓂𑒡𑒰𑒩𑓂𑒟 𑒢𑒱𑒏𑒪𑒱 𑒥𑒜𑓃𑒱 𑒣𑒯𑒳𑒿𑒔𑒪𑒰𑒯 𑒂𑒑𑒳।
𑒋𑒧𑓂𑒯𑒩 𑒏𑓀𑒟𑒏𑒏 𑒮𑓀𑒑 𑒕𑓀𑒠𑒏 𑒐𑒮𑒻𑒞-𑒣𑒛𑓃𑒻𑒞,
𑒋𑒏 𑒠𑒱𑒢𑒧𑒹 𑒂𑒋𑒪 𑒧𑒰𑒩𑓂𑒑 𑒂𑒚 𑒠𑒱𑒢𑒧𑒹 𑒔𑒪𑒻𑒞,
𑒒𑒩𑒧𑒳𑒿𑒯𑒰 𑒩𑒮𑓂𑒞𑒰 𑒂𑒃 𑒏𑒧 𑒢𑒯𑒱, 𑒁𑒕𑒱 𑒦𑒹𑒪 𑒁𑒢𑒢𑓂𑒞 ।
𑒒𑒳𑒩𑒱 𑒮𑒳𑒢𑒹𑒪𑒏 𑒐𑒥𑒩𑒱 𑒏𑒭𑒰𑒨 𑒫𑒮𑓂𑒞𑓂𑒩 𑒣𑒯𑒱𑒩𑒥𑒰𑒏 𑒮𑒱𑒠𑓂𑒡𑒰𑒩𑓂𑒟𑒏,
𑒑𑒾𑒞𑒧𑒲 𑒧𑒴𑒩𑓂𑒕𑒱𑒞, 𑒨𑒬𑒼𑒡𑒩𑒰 𑒏𑒰𑒢𑒟𑒱 𑒥𑒰𑒖𑒱-𑒥𑒰𑒖𑒱,
𑒋𑒯𑒢 𑒏𑒚𑒼𑒩 𑒯𑒵𑒠𑒨 𑒮𑒱𑒠𑓂𑒡𑒰𑒩𑓂𑒟𑒏 𑒧𑒳𑒐𑒹𑒙𑒰 𑒏𑒼𑒧𑒪 𑒩𑒯𑒋,
𑒍𑒏𑒩𑒼 𑒮𑒿 𑒏𑒚𑒼𑒩 𑒁𑒕𑒱 𑒯𑒵𑒠𑒨 𑒯𑒧𑒩 𑒖𑒹 𑒤𑒰𑒙𑒋 𑒁𑒕𑒱 𑒢𑒘𑒱 ।
𑒬𑒳𑒠𑓂𑒡𑒼𑒡𑒢 𑒏𑒯𑒟𑒱 𑒠𑒬𑒩𑒟𑒏 𑒕𑒪 𑒦𑒰𑒑𑓂𑒨,
𑒣𑒳𑒞𑓂𑒩 𑒫𑒱𑒨𑒼𑒑𑒧𑒹 𑒣𑓂𑒩𑒰𑒝 𑒯𑒧𑒩 𑒢𑒱𑒏𑒪𑒋 𑒢𑒘𑒱 𑒁𑒕𑒱।
𑒣𑒳𑒩𑒯𑒱𑒞 𑒂 𑒧𑓀𑒞𑓂𑒩𑒲𑒖𑒲 𑒢𑒱𑒏𑒪𑒱 𑒞𑒰𑒏𑒴 𑒖𑒰𑒨,
𑒦𑒰𑒩𑓂𑒑𑒫 𑒧𑒳𑒢𑒱𑒏 𑒂𑒬𑓂𑒩𑒧𑒧𑒹 𑒠𑒹𑒐𑒴 𑒣𑒴𑒕𑒴 𑒍𑒞𑒋।
𑒖𑒰𑒨 𑒖𑒐𑒢 𑒮𑒦 𑒍𑒞𑒋 𑒣𑒴𑒕𑒪 𑒦𑒰𑒩𑓂𑒑𑒫 𑒏𑒯𑒪,
𑒑𑒹𑒪𑒟𑒱 𑒁𑒩𑒰𑒛 𑒧𑒳𑒢𑒱𑒏 𑒂𑒬𑓂𑒩𑒧 𑒠𑒱𑒮 𑒧𑒼𑒏𑓂𑒭𑒏 𑒪𑒹𑒪 𑒥𑒹𑒏𑒪।
𑒠𑒳𑒢𑒴 𑒑𑒼𑒙𑒹 𑒥𑒜𑓃𑒱 𑒂𑒑𑒰𑒿 𑒠𑒹𑒐𑒻𑒞 𑒕𑒟𑒱 𑒏𑒲,
𑒏𑒳𑒧𑒰𑒩 𑒑𑒰𑒕𑒏 𑒢𑒲𑒔𑒰𑒿 𑒥𑒻𑒮𑒪 𑒍𑒞𑒋।
𑒣𑒳𑒩𑒼𑒯𑒱𑒞 𑒏𑒯𑒪 𑒯𑒹 𑒏𑒳𑒧𑒰𑒩 𑒣𑒱𑒞𑒰𑒏 𑒄 𑒑𑒣 𑒮𑒳𑒢𑒴,
𑒑𑒵𑒯𑒮𑓂𑒟 𑒩𑒰𑒖𑒰 𑒫𑒱𑒠𑒹𑒯, 𑒥𑒪𑒱, 𑒩𑒰𑒧 𑒂 𑒥𑒖𑓂𑒩𑒥𑒰𑒯𑒳,
𑒏𑒹𑒪𑒢𑓂𑒯𑒱 𑒣𑓂𑒩𑒰𑒣𑓂𑒞 𑒧𑒼𑒏𑓂𑒭 𑒏𑒩𑒴 𑒁𑒯𑒰𑒿 𑒮𑒹𑒯𑒼।
𑒧𑒳𑒠𑒰 𑒮𑒱𑒠𑓂𑒡𑒰𑒩𑓂𑒟 𑒥𑒼𑒢𑒮𑒿 𑒒𑒳𑒩𑒞𑒰𑒯 𑒢𑒯𑒱,
𑒧𑒼𑒏𑓂𑒭𑒏 𑒪𑒹𑒪𑒢𑓂𑒯𑒱 𑒁𑒕𑒱 𑒣𑓂𑒩𑒝 𑒞𑒼𑒛𑓃𑒞𑒰𑒯 𑒢𑒯𑒱।
𑒯𑒹 𑒮𑒱𑒠𑓂𑒡𑒰𑒩𑓂𑒟 𑒣𑒯𑒱𑒢𑒯𑒳 𑒒𑒳𑒩𑒪 𑒕𑒟𑒱 𑒥𑒼𑒢𑒮𑒿,
𑒁𑒨𑒼𑒡𑓂𑒨𑒰𑒏 𑒩𑒰𑒧, 𑒬𑒰𑒪𑓂𑒫 𑒠𑒹𑒬𑒏 𑒠𑓂𑒩𑒳𑒧 𑒂 𑒩𑒰𑒖𑒰 𑒁𑓀𑒥𑒩𑒲𑒭 ।
𑒯𑒹 𑒣𑒳𑒩𑒯𑒱𑒞 𑒖𑒲 𑒒𑒳𑒩𑒴 𑒫𑓂𑒨𑒩𑓂𑒟 𑒮𑒧𑒨 𑒢𑒭𑓂𑒙 𑒕𑒲 𑒏𑒋 𑒩𑒯𑒪,
𑒩𑒰𑒧 𑒂 𑒏𑒱 𑒂𑒢 𑒢𑒯𑒱 𑒅𑒠𑒰𑒯𑒩𑒝 𑒮𑒧𑒏𑓂𑒭 ।
𑒢𑒯𑒱 𑒥𑒱𑒢𑒰 𑒞𑒣 𑒏𑒼𑒢𑒼 𑒏𑓂𑒨𑒼 𑒥𑒯𑒙𑒰𑒩𑒱 𑒮𑒏𑒞,
𑒖𑓂𑒘𑒰𑒢 𑒮𑓂𑒫𑒨𑓀 𑒣𑒰𑒋𑒥 𑒢𑒫 𑒩𑒮𑓂𑒞𑒰 𑒞𑒏𑒻𑒞।
𑒒𑒳𑒩𑒪 𑒠𑒳𑒯𑒳 𑒑𑒼𑒙𑒹 𑒑𑒳𑒣𑓂𑒞-𑒠𑒴𑒞 𑒢𑒱𑒨𑒳𑒏𑓂𑒞 𑒏𑒋।
𑒮𑒱𑒠𑓂𑒡𑒰𑒩𑓂𑒟 𑒥𑒜𑓃𑒱 𑒂𑒑𑒰𑒿 𑒏𑒋𑒪 𑒑𑓀𑒑𑒰𑒏𑒹𑒿 𑒣𑒰𑒩,
𑒩𑒰𑒖𑒑𑒵𑒯 𑒢𑒑𑒩𑒲 𑒣𑒯𑒳𑒿𑒔𑒱 𑒏𑒋 𑒦𑒱𑒏𑓂𑒭𑒰 𑒑𑓂𑒩𑒯𑒝,
𑒣𑒯𑒳𑒿𑒔𑒱 𑒣𑒰𑒝𑓂𑒛𑒫-𑒣𑒩𑓂𑒫𑒞 𑒖𑒐𑒢 𑒥𑒻𑒮𑒪𑒟𑒱,
𑒩𑒰𑒖𑒰 𑒥𑒱𑒧𑓂𑒥𑒮𑒰𑒩 𑒂𑒥𑒱 𑒥𑒳𑒗𑒰𑒍𑒪 𑒥𑒯𑒳𑒞 ।
𑒮𑒴𑒩𑓂𑒨𑒫𑓀𑒬𑒲 𑒏𑒳𑒧𑒰𑒩 𑒖𑒰𑒆 𑒒𑒳𑒩𑒱,
𑒧𑒳𑒠𑒰 𑒮𑒱𑒠𑓂𑒡𑒰𑒩𑓂𑒟 𑒏𑒯𑒪 𑒯𑒩𑓂𑒨𑓀𑒏 𑒫𑓀𑒬𑒖,
𑒧𑒼𑒯𑒏𑒹𑒿 𑒕𑒼𑒛𑓃𑒪 𑒒𑒳𑒩𑒱 𑒖𑒰𑒋𑒥 𑒏𑒞𑒋 ?
𑒩𑒰𑒖𑒰 𑒮𑒹𑒯𑒼 𑒯𑒼𑒃𑒕 𑒏𑒐𑒢𑒯𑒳𑒿 𑒏𑒰𑒪 𑒠𑒳𑒐𑒱𑒞,
𑒠𑒰𑒮 𑒫𑒩𑓂𑒑𑒏𑒹𑒿 𑒮𑒹𑒯𑒼 𑒏𑒐𑒢𑒯𑒳𑒿 𑒦𑒹𑒙𑒋 𑒕𑒻 𑒐𑒳𑒬𑒲 ?
𑒏𑒩𑒴 𑒩𑒏𑓂𑒭𑒰𑒏 𑒣𑓂𑒩𑒖𑒰𑒏 𑒮𑓀𑒑 𑒁𑒣𑒢 𑒮𑒹𑒯𑒼,
𑒮𑒱𑒠𑓂𑒡𑒰𑒩𑓂𑒟 𑒫𑒻𑒬𑓂𑒫𑓀𑒞𑒩 𑒂𑒬𑓂𑒩𑒧 𑒠𑒱𑒬 𑒥𑒜𑓃𑒪𑒰𑒯,
𑒧𑒑𑒡𑒩𑒰𑒖 𑒔𑒏𑒱𑒞 !
𑒁𑒩𑒰𑒛𑒏 𑒂𑒬𑓂𑒩𑒧𑒧𑒹 𑒖𑓂𑒘𑒰𑒢 𑒪𑒹𑒪,
𑒑𑒹𑒪𑒰𑒯 𑒬𑒰𑒏𑓂𑒨,
𑒏𑒯𑒪 𑒧𑒳𑒢𑒱 𑒁𑒫𑒱𑒠𑓂𑒨𑒰 𑒁𑒕𑒱 𑒣𑒰𑒿𑒔𑒙𑒰,
𑒁𑒏𑒩𑓂𑒧𑒝𑓂𑒨𑒞𑒰 𑒂𑒪𑒮𑓂𑒨𑒏 𑒁𑒕𑒱 𑒁𑒢𑓂𑒯𑒰𑒩,
𑒁𑒢𑓂𑒯𑒰𑒩𑒏 𑒁𑓀𑒑 𑒁𑒕𑒱 𑒏𑓂𑒩𑒼𑒡 𑒂 𑒫𑒱𑒭𑒰𑒠,
𑒧𑒼𑒯 𑒁𑒕𑒱 𑒄 𑒫𑒰𑒮𑒢𑒰 𑒖𑒲𑒫𑒢𑒏 𑒂 𑒮𑓀𑒑𑒏 𑒧𑒵𑒞𑓂𑒨𑒳,
𑒏𑒪𑓂𑒨𑒰𑒝𑒏 𑒧𑒰𑒩𑓂𑒑 𑒁𑒕𑒱 𑒧𑒰𑒩𑓂𑒑 𑒧𑒼𑒏𑓂𑒭𑒏 ।
𑒧𑒳𑒠𑒰 𑒮𑒱𑒠𑓂𑒡𑒰𑒩𑓂𑒟 𑒏𑒯𑒪 𑒯𑒹 𑒧𑒳𑒢𑒱𑒫𑒩 !
𑒂𑒞𑓂𑒧𑒰𑒏 𑒧𑒰𑒢𑒥 𑒞𑒿 𑒁𑒕𑒱 𑒧𑒰𑒢𑒥 𑒁𑒯𑓀𑒏𑒰𑒩𑒏𑒹𑒿,
𑒁𑒯𑒰𑒿 𑒑𑒣 𑒢𑒯𑒱 𑒩𑒳𑒔𑒪 𑒥𑒜𑓃𑒪 𑒂𑒬𑓂𑒩𑒧 𑒅𑒠𑓂𑒩𑒏𑒏 𑒮𑒹।
𑒢𑒑𑒩𑒲 𑒑𑒹𑒪𑒰𑒯 𑒩𑒰𑒖𑒩𑓂𑒭𑒱𑒏 𑒖𑒹 𑒂𑒬𑓂𑒩𑒧 𑒕𑒪,
𑒧𑒳𑒠𑒰 𑒢𑒯𑒱 𑒅𑒞𑓂𑒞𑒩 𑒦𑒹𑒙𑒪 𑒍𑒞𑒯𑒳 𑒮𑒱𑒠𑓂𑒡𑒰𑒩𑓂𑒟𑒏।
𑒑𑒹𑒪𑒰𑒯 𑒞𑒐𑒢 𑒢𑒻𑒩𑓀𑒖𑒢𑒰 𑒞𑒙 𑒣𑒰𑒿𑒔𑒙𑒰 𑒦𑒱𑒏𑓂𑒭𑒳𑒏 𑒦𑒹𑒙𑒪,
𑒕𑒯 𑒥𑒩𑒐 𑒞𑒣 𑒏𑒋𑒪 𑒧𑒳𑒠𑒰 𑒣𑓂𑒩𑒬𑓂𑒢 𑒁𑒢𑒳𑒞𑓂𑒞𑒩𑒱𑒞 𑒕𑒪।
𑒮𑓂𑒫𑒮𑓂𑒟 𑒞𑒢𑒧𑒹 𑒦𑒹𑒙𑒞 𑒧𑒢𑒮𑒏 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩,
𑒣𑓂𑒩𑒝 𑒏𑒋𑒪 𑒄 𑒢𑒱𑒩𑓀𑒖𑒢𑒰𑒧𑒹 𑒏𑒋𑒪 𑒮𑓂𑒢𑒰𑒢 𑒍,
𑒥𑒰𑒯𑒩 𑒥𑒯𑒩𑒰𑒋 𑒁𑒋𑒪𑒰𑒯 𑒞𑒐𑒢𑒹 𑒏𑒢𑓂𑒨𑒰 𑒑𑒼𑒣𑒩𑒰𑒖𑒏,
𑒬𑓂𑒫𑒹𑒞 𑒩𑓀𑒑 𑒢𑒲𑒪 𑒫𑒮𑓂𑒞𑓂𑒩𑒧𑒹 𑒢𑒢𑓂𑒠 𑒥𑒰𑒪𑒰 𑒖𑒏𑒩 𑒢𑒰𑒧 𑒕𑒪 ।
𑒂𑒨𑒪𑒱 𑒣𑒰𑒨𑒮 𑒣𑒰𑒞𑓂𑒩 𑒪𑒹𑒢𑒹 𑒞𑒵𑒣𑓂𑒞 𑒦𑒋 𑒮𑒱𑒠𑓂𑒡𑒰𑒩𑓂𑒟 𑒦𑒼𑒖𑒢 𑒏𑒋𑒪।
𑒣𑒰𑒿𑒔𑒴 𑒮𑓀𑒑𑒲 𑒠𑒹𑒐𑒱 𑒄 𑒮𑒱𑒠𑓂𑒡𑒰𑒩𑓂𑒟𑒏 𑒮𑓀𑒑 𑒕𑒼𑒛𑓃𑒪 ।
𑒧𑒳𑒠𑒰 𑒍 𑒦𑒹𑒪𑒰𑒯 𑒮𑒥𑒪 𑒥𑒼𑒡𑒱𑒮𑒞𑓂𑒫𑒏 𑒣𑓂𑒩𑒰𑒣𑓂𑒞𑒱𑒏 𑒪𑒹𑒪,
𑒠𑒵𑒜𑓃 𑒣𑓂𑒩𑒝 𑒪𑒋 𑒣𑒲𑒣𑒩𑒏 𑒞𑒩 𑒍 𑒂𑒮𑒢 𑒠𑒹𑒪𑒢𑓂𑒯𑒱 ।
𑒏𑒰𑒪 𑒮𑒩𑓂𑒣 𑒏𑒯𑒪 𑒠𑒹𑒐𑒴 𑒄 𑒢𑒲𑒪𑒏𑓀𑒚𑒏 𑒗𑒳𑒝𑓂𑒛𑒏𑒹𑒿,
𑒒𑒳𑒧𑒱 𑒩𑒯𑒪 𑒔𑒰𑒩𑒴 𑒠𑒱𑒮 𑒁𑒯𑒰𑒿𑒏,
𑒣𑓂𑒩𑒧𑒰𑒝 𑒁𑒕𑒱 𑒖𑒹 𑒥𑒼𑒡𑒱𑒮𑒞𑓂𑒫 𑒣𑓂𑒩𑒰𑒣𑓂𑒞 𑒏𑒩𑒥 𑒁𑒯𑒰𑒿।
𑒮𑒳𑒢𑒱 𑒄 𑒞𑒵𑒝 𑒅𑒚𑒰𑒋 𑒏𑒋𑒪 𑒣𑓂𑒩𑒞𑒱𑒖𑓂𑒘𑒰 𑒞𑒐𑒢,
𑒮𑒱𑒠𑓂𑒡𑒰𑒩𑓂𑒟 𑒣𑒰𑒍𑒞 𑒖𑓂𑒘𑒰𑒢 𑒂 𑒞𑒐𑒢𑒹 𑒅𑒚𑒞 𑒕𑒼𑒛𑓃𑒱 𑒂𑒮𑒢।
𑒥𑓂𑒩𑒯𑓂𑒧𑒰𑓀𑒛 𑒕𑒪 𑒣𑓂𑒩𑒮𑒢𑓂𑒢 𑒧𑒳𑒠𑒰 𑒠𑒳𑒭𑓂𑒙 𑒧𑒰𑒩 𑒛𑒩𑒰𑒨𑒪,
𑒏𑒰𑒧𑒠𑒹𑒫, 𑒔𑒱𑒞𑓂𑒩𑒰𑒨𑒳𑒡 𑒣𑒳𑒭𑓂𑒣𑒮𑒩 𑒢𑒰𑒧 𑒧𑒰𑒩𑒏,
𑒮𑒱𑒠𑓂𑒡𑒰𑒩𑓂𑒟 𑒣𑓂𑒩𑒰𑒣𑓂𑒞 𑒏𑒋 𑒖𑓂𑒘𑒰𑒢 𑒖𑒑𑒏𑒹𑒿 𑒥𑒞𑒰𑒍𑒞।
𑒯𑒧𑒩 𑒮𑒰𑒧𑓂𑒩𑒰𑒖𑓂𑒨𑒏 𑒯𑒼𑒋𑒞 𑒏𑒲 𑒞𑒐𑒢,
𑒣𑒳𑒞𑓂𑒩 𑒫𑒱𑒦𑓂𑒩𑒧,𑒯𑒩𑓂𑒭, 𑒠𑒩𑓂𑒣 𑒕𑒪 𑒍𑒏𑒩,
𑒣𑒳𑒞𑓂𑒩𑒲 𑒁𑒩𑒞𑒱, 𑒣𑓂𑒩𑒲𑒞𑒱, 𑒞𑒵𑒭𑒰 𑒏𑒹 𑒮𑒹𑒯𑒼 𑒏𑒋 𑒮𑓀𑒑।
𑒔𑒪𑒴 𑒄 𑒪𑒹𑒢𑒹 𑒜𑒰𑒪 𑒣𑓂𑒩𑒞𑒱𑒖𑓂𑒘𑒰𑒏,
𑒮𑒞𑓂 𑒡𑒢𑒳𑒭𑒣𑒩 𑒥𑒳𑒠𑓂𑒡𑒱𑒏 𑒫𑒰𑒝 𑒔𑒜𑓃𑒰𑒋,
𑒖𑒲𑒞𑒞 𑒮𑒹 𑒏𑒲 𑒖𑒲𑒞𑒋 𑒠𑒹𑒥𑒋 𑒯𑒧𑒩𑒰 𑒮𑒦 𑒂𑒃 ?
𑒯𑒹 𑒮𑒱𑒠𑓂𑒡𑒰𑒩𑓂𑒟 𑒨𑒖𑓂𑒘 𑒏𑒋 𑒣𑒜𑓃𑒱 𑒏𑒋 𑒬𑒰𑒮𑓂𑒞𑓂𑒩,
𑒏𑒩𑒴 𑒃𑒢𑓂𑒠𑓂𑒩𑒣𑒠 𑒣𑓂𑒩𑒰𑒣𑓂𑒞 𑒦𑒼𑒑𑒴 𑒦𑒼𑒑,
𑒕𑒼𑒛𑓃𑒴 𑒂𑒮𑒢 𑒠𑒹𑒥 𑒫𑒰𑒝 𑒔𑒪𑒰𑒋।
𑒢𑒯𑒱 𑒠𑒹𑒪𑒢𑓂𑒯𑒱 𑒮𑒱𑒠𑓂𑒡𑒰𑒩𑓂𑒟 𑒋𑒯𑒱𑒣𑒩 𑒡𑓂𑒨𑒰𑒢,
𑒧𑒰𑒩 𑒞𑒐𑒢 𑒠𑒹𑒪𑒏 𑒫𑒰𑒝 𑒔𑒪𑒰𑒋,
𑒧𑒳𑒠𑒰 𑒦𑒹𑒪 𑒏𑒼𑒢𑒼 𑒢𑒯𑒱 𑒣𑒩𑒱𑒝𑒰𑒧।
𑒬𑒱𑒫𑒣𑒩 𑒮𑒹𑒯𑒼 𑒔𑒪𑒪 𑒩𑒯𑒋 𑒄 𑒫𑒰𑒝,
𑒫𑒱𑒔𑒪𑒱𑒞 𑒦𑒹𑒪 𑒩𑒯𑒟𑒱 𑒍 𑒮𑒹𑒯𑒼,
𑒏𑒹 𑒁𑒕𑒱 𑒄 𑒮𑒹 𑒢𑒯𑒱 𑒖𑒰𑒢 !!
𑒯𑒹 𑒮𑒻𑒢𑒱𑒏 𑒯𑒧𑒩 𑒫𑒱𑒏𑒩𑒰𑒪-𑒫𑒱𑒔𑒱𑒞𑓂𑒩,
𑒞𑓂𑒩𑒱𑒬𑒴𑒪 𑒒𑒳𑒧𑒰𑒋, 𑒑𑒠𑒰 𑒅𑒚𑒰𑒋,
𑒮𑒰𑒿𑒜𑓃𑒏 𑒮𑒢 𑒠𑒋 𑒯𑒳𑓀𑒏𑒰𑒩,
𑒂𑒆 𑒏𑒩𑒴 𑒫𑒱𑒖𑒱𑒞 𑒁𑒕𑒱 𑒬𑒞𑓂𑒩𑒳 𑒫𑒱𑒏𑒩𑒰𑒪।
𑒩𑒰𑒞𑒱 𑒒𑒢𑒒𑒼𑒩 𑒁𑒢𑓂𑒯𑒩𑒱𑒨𑒰𑒧𑒹 𑒏𑒞𑒋 𑒕𑒟𑒱 𑒔𑒢𑓂𑒠𑓂𑒩 ?
𑒞𑒩𑒹𑒑𑒝𑒏 𑒮𑒹𑒯𑒼 𑒏𑒼𑒢𑒼 𑒢𑒯𑒱 𑒠𑒩𑓂𑒬 !
𑒧𑒳𑒠𑒰 𑒮𑒦 𑒑𑒹𑒪 𑒫𑓂𑒨𑒩𑓂𑒟 𑒣𑒠𑒰𑒩𑓂𑒣𑒝 𑒦𑒹𑒪 𑒁𑒠𑒵𑒬𑓂𑒨,
𑒧𑒰𑒩 𑒖𑒰𑒆 𑒯𑒼𑒋𑒞 𑒢𑒯𑒱 𑒄 𑒫𑒱𑒔𑒪𑒱𑒞।
𑒠𑒹𑒐𑒴 𑒋𑒏𑒩 𑒏𑓂𑒭𑒧𑒰 𑒣𑓂𑒩𑒞𑒲𑒏 𑒖𑒙𑒰𑒏,
𑒡𑒻𑒩𑓂𑒨 𑒁𑒕𑒱 𑒋𑒏𑒩 𑒖𑒹𑒢𑒰 𑒑𑒰𑒕𑒏 𑒧𑒴𑒪,
𑒔𑒩𑒱𑒞𑓂𑒩 𑒣𑒳𑒭𑓂𑒣 𑒥𑒳𑒠𑓂𑒡𑒱 𑒬𑒰𑒐𑒰 𑒡𑒩𑓂𑒧 𑒤𑒪𑒏 𑒣𑓂𑒩𑒞𑒲𑒏।
𑒮𑓂𑒟𑒰𑒢 𑒖𑒞𑒋 𑒁𑒕𑒱 𑒂𑒮𑒢 𑒣𑒵𑒟𑓂𑒫𑒲𑒏 𑒟𑒱𑒏 𑒢𑒰𑒦𑒱,
𑒣𑓂𑒩𑒰𑒣𑓂𑒞 𑒏𑒩𑒞 𑒄 𑒖𑓂𑒘𑒰𑒢 𑒮𑒯𑒖𑒯𑒱 𑒂𑒃 ।
𑒣𑒩𑒰𑒖𑒱𑒞 𑒧𑒰𑒩 𑒑𑒹𑒪 𑒍𑒞𑒋𑒮𑒿 𑒦𑒰𑒑𑒱।
𑒩𑒰𑒞𑒱𑒏 𑒣𑒯𑒱𑒪 𑒣𑒯𑒩𑒱𑒧𑒹 𑒬𑒰𑒏𑓂𑒨 𑒧𑒳𑒢𑒱,
𑒣𑒰𑒍𑒪 𑒫𑒩𑓂𑒝𑒢 𑒮𑓂𑒧𑒩𑒝 𑒣𑒴𑒩𑓂𑒫 𑒖𑒢𑓂𑒧𑒏 𑒮𑒯𑒖𑒯𑒱 ।
𑒠𑒼𑒮𑒩 𑒣𑒯𑒩𑒧𑒹 𑒠𑒱𑒫𑓂𑒨 𑒔𑒏𑓂𑒭𑒳 𑒣𑒰𑒥𑒱,
𑒠𑒹𑒐𑒪 𑒏𑒩𑓂𑒧𑒏 𑒤𑒪 𑒫𑒹𑒠𑒢𑒰𑒏 𑒁𑒢𑒳𑒦𑒴𑒞𑒱 ।
𑒑𑒩𑓂𑒦 𑒮𑒩𑒼𑒫𑒩 𑒢𑒩𑒏 𑒂 𑒮𑓂𑒫𑒩𑓂𑒑 𑒠𑒳𑒯𑒳𑒏,
𑒣𑒰𑒍𑒪 𑒁𑒢𑒳𑒦𑒫 𑒠𑒹𑒐𑒪 𑒐𑒮𑒻𑒞 𑒮𑓂𑒫𑒩𑓂𑒑𑒯𑒳𑒮𑒿,
𑒁𑒞𑒵𑒣𑓂𑒞 𑒦𑒼𑒑𑒲 𑒖𑒢𑓂𑒧, 𑒖𑒩𑒰, 𑒧𑒵𑒞𑓂𑒨𑒳।
𑒥𑒲𑒞𑒪 𑒞𑒹𑒮𑒩 𑒣𑒯𑒩𑒱 𑒔𑒰𑒩𑒱𑒧𑒧𑒹 𑒖𑒰𑒋,
𑒣𑒰𑒍𑒪 𑒖𑓂𑒘𑒰𑒢 𑒥𑒳𑒠𑓂𑒡 𑒦𑒋 𑒣𑒰𑒍𑒪 𑒬𑒰𑒢𑓂𑒞𑒱।
𑒬𑒰𑒢𑓂𑒞 𑒧𑒢 𑒬𑒰𑒢𑓂𑒞 𑒕𑒪 𑒣𑒴𑒩𑓂𑒝 𑒖𑒑𑒞 !!!
𑒡𑒩𑓂𑒧 𑒔𑒰𑒩𑒴 𑒠𑒱𑒮 𑒥𑒱𑒢 𑒧𑒹𑒒 𑒁𑒕𑒰𑒩 !!
𑒮𑒴𑒔𑒢𑒰 𑒠𑒹𑒪 𑒠𑒳𑒢𑓂𑒠𑒦𑒱 𑒥𑒰𑒖𑒱 𑒁𑒏𑒰𑒬 !
𑒮𑒏𑒪 𑒠𑒱𑒬𑒰 𑒮𑒱𑒠𑓂𑒡𑒑𑒝𑒮𑒿 𑒠𑒲𑒣𑓂𑒞𑒧𑒨 𑒕𑒪,
𑒮𑓂𑒫𑒩𑓂𑒑𑒮𑒿 𑒫𑒵𑒭𑓂𑒙𑒱 𑒣𑒳𑒭𑓂𑒣𑒏 𑒃𑒏𑓂𑒭𑒫𑒰𑒏𑒳 𑒫𑓀𑒬𑒏 𑒄 𑒧𑒳𑒢𑒱 𑒕𑒪।
𑒥𑒻𑒮𑒪 𑒋𑒯𑒱 𑒁𑒫𑒮𑓂𑒟𑒰𑒧𑒹 𑒮𑒰𑒞 𑒠𑒱𑒢 𑒡𑒩𑒱 𑒧𑒳𑒢𑒱 𑒬𑒰𑒏𑓂𑒨,
𑒫𑒱𑒧𑒰𑒢 𑒔𑒜𑓃𑒱 𑒁𑒋𑒪𑒰𑒯 𑒞𑒐𑒢 𑒠𑒹𑒫𑒞𑒰 𑒠𑒴 𑒙𑒰,
𑒏𑒩𑒴 𑒅𑒠𑓂𑒡𑒰𑒩 𑒖𑒑𑒞𑒏 𑒠𑒋 𑒧𑒼𑒏𑓂𑒭𑒏 𑒬𑒱𑒏𑓂𑒭𑒰।
𑒂 𑒦𑒱𑒏𑓂𑒭𑒳𑒣𑒰𑒞𑓂𑒩 𑒪𑒋 𑒁𑒋𑒪𑒰𑒯 𑒤𑒹𑒩 𑒋𑒏 𑒠𑒹𑒫,
𑒏𑒋𑒪 𑒮𑓂𑒧𑒩𑒝 𑒁𑒩𑒰𑒛 𑒂 𑒅𑒠𑓂𑒩𑒏𑒏 𑒥𑒳𑒠𑓂𑒡,
𑒧𑒳𑒠𑒰 𑒠𑒳𑒯𑒳 𑒕𑒪 𑒕𑒼𑒛𑓃𑒪 𑒖𑒑𑒞 𑒄 𑒞𑒳𑒔𑓂𑒕।
𑒂𑒥 𑒖𑒰𑒋𑒥 𑒫𑒰𑒩𑒰𑒝𑒮𑒲 𑒦𑒱𑒏𑓂𑒭𑒳 𑒣𑒰𑒿𑒔𑒼 𑒮𑓀𑒑𑒲 𑒖𑒞𑒋,
𑒏𑒯𑒪 𑒠𑒹𑒐𑒱 𑒥𑒼𑒡𑒱𑒏 𑒑𑒰𑒕 𑒠𑒱𑒮 𑒮𑓂𑒢𑒹𑒯𑒮𑒿।
𑒥𑒳𑒠𑓂𑒡 𑒔𑒪𑒪𑒰𑒯 𑒁𑒮𑒑𑒩𑒹 𑒩𑒮𑓂𑒞𑒰𑒧𑒹 𑒦𑒱𑒏𑓂𑒭𑒳 𑒋𑒏 𑒦𑒹𑒙𑒪,
𑒞𑒹𑒖𑒧𑒨 𑒁𑒯𑒰𑒿 𑒏𑒹 𑒑𑒳𑒩𑒳 𑒏𑒹 𑒕𑒟𑒱 𑒁𑒯𑒰𑒿𑒏 ?
𑒯𑒹 𑒫𑒞𑓂𑒮 𑒑𑒳𑒩𑒳 𑒢𑒯𑒱 𑒏𑓂𑒨𑒼 𑒯𑒧𑒩
𑒣𑓂𑒩𑒰𑒣𑓂𑒞 𑒏𑒋𑒪 𑒢𑒱𑒩𑓂𑒫𑒰𑒝 𑒯𑒧,
𑒮𑒦 𑒏𑒱𑒕𑒳 𑒖𑒰𑒢𑒪 𑒖𑒹 𑒁𑒕𑒱 𑒖𑒢𑒥𑒰 𑒨𑒼𑒑𑓂𑒨
𑒪𑒼𑒏 𑒏𑒯𑒋 𑒕𑒟𑒱 𑒯𑒧𑒩𑒰 𑒥𑒳𑒠𑓂𑒡 !
𑒖𑒰 𑒩𑒯𑒪 𑒕𑒲 𑒏𑒰𑒬𑒲 𑒠𑒳𑒐𑒱𑒞 𑒏𑒪𑓂𑒨𑒰𑒝 𑒪𑒹𑒪
𑒠𑒴𑒩 𑒮𑒿 𑒠𑒹𑒐𑒪 𑒫𑒩𑒳𑒝𑒰 𑒂 𑒑𑓀𑒑𑒰𑒏 𑒧𑒱𑒪𑒢
𑒂 𑒑𑒹𑒪𑒰𑒯 𑒥𑒳𑒠𑓂𑒡 𑒪𑒑𑒯𑒱𑒧𑒹 𑒧𑒵𑒑𑒠𑒰𑒫 𑒫𑒢।
𑒣𑒰𑒿𑒔𑒴 𑒮𑓀𑒑𑒱 𑒯𑒳𑒢𑒏 𑒩𑒯𑒟𑒱 𑒍𑒞𑒯𑒱
𑒠𑒹𑒐𑒻𑒞 𑒁𑒥𑒻𑒞 𑒫𑒱𑒔𑒰𑒩𑒪 𑒏𑓂𑒨𑒼 𑒢𑒯𑒱 𑒏𑒩𑒞 𑒁𑒦𑒱𑒫𑒰𑒠𑒢 𑒯𑒳𑒢𑒏
𑒧𑒳𑒠𑒰 𑒣𑒯𑒳𑒿𑒔𑒱𑒞𑒹 𑒄 𑒏𑒲 𑒑𑒣 𑒦𑒹𑒪 ?
𑒮𑒦 𑒯𑒳𑒢𑒏 𑒮𑒞𑓂𑒏𑒰𑒩𑒧𑒹 𑒕𑒪 𑒪𑒰𑒑𑒱 𑒑𑒹𑒪?
𑒂𑒮𑒢 𑒠𑒋 𑒖𑒐𑒢 𑒥𑒻𑒮𑒹𑒪𑒢𑓂𑒯𑒱 𑒯𑒳𑒢𑒏𑒰 𑒮𑒦 𑒏𑓂𑒨𑒼,
𑒅𑒣𑒠𑒹𑒬 𑒠𑒹𑒥 𑒬𑒳𑒩𑒳 𑒏𑒩𑒱𑒞𑒟𑒱 𑒧𑒳𑒠𑒰 𑒞𑒐𑒢𑒹 𑒥𑒰𑒖𑒪 𑒏𑒱𑒨𑒼,
𑒁𑒯𑒰𑒿 𑒞𑒿 𑒞𑒞𑓂𑒫𑒏𑒹𑒿 𑒢𑒯𑒱 𑒕𑒲 𑒥𑒳𑒗𑒻𑒞,
𑒞𑒣 𑒕𑒼𑒛𑓃𑒱 𑒥𑒲𑒔𑒯𑒱 𑒅𑒚𑒪 𑒕𑒪𑒯𑒳𑒿 𑒏𑒱𑒋𑒏 ?
𑒥𑒳𑒠𑓂𑒡 𑒏𑒯𑒪 𑒒𑒼𑒩 𑒞𑒣 𑒂 𑒂𑒮𑒏𑓂𑒞𑒱 𑒠𑒳𑒢𑒳𑒏 𑒯𑒧 𑒞𑓂𑒨𑒰𑒑 𑒏𑒋𑒪
𑒧𑒡𑓂𑒨 𑒧𑒰𑒩𑓂𑒑𑒏𑒹𑒿 𑒣𑒏𑒛𑓃𑒱 𑒥𑒼𑒡𑒞𑓂𑒫 𑒣𑓂𑒩𑒰𑒣𑓂𑒞 𑒏𑒋𑒪 ।
𑒋𑒏𑒩 𑒮𑒴𑒩𑓂𑒨 𑒁𑒕𑒱 𑒮𑒧𑓂𑒨𑒏 𑒠𑒵𑒭𑓂𑒙𑒱 𑒂
𑒋𑒏𑒩 𑒮𑒳𑒢𑓂𑒠𑒩 𑒩𑒮𑓂𑒞𑒰𑒣𑒩 𑒔𑒪𑒻𑒋 𑒮𑒧𑓂𑒨𑒏 𑒮𑓀𑒏𑒪𑓂𑒣 ।
𑒄 𑒏𑒩𑒻𑒋 𑒫𑒱𑒯𑒰𑒩 𑒮𑒧𑓂𑒨𑒏 𑒂𑒔𑒩𑒝𑒏 𑒅𑒣𑒫𑒢𑒧𑒹
𑒮𑒧𑓂𑒨𑒏𑓂 𑒂𑒖𑒲𑒫𑒱𑒏𑒰 𑒁𑒕𑒱 𑒦𑒼𑒖𑒢 𑒋𑒏𑒩।
𑒮𑒹𑒫𑒏 𑒁𑒕𑒱 𑒮𑒧𑓂𑒨𑒏 𑒫𑓂𑒨𑒰𑒨𑒰𑒧,
𑒬𑒰𑒢𑓂𑒞𑒱 𑒦𑒹𑒙𑒻𑒋 𑒋𑒏𑒩𑒰 𑒮𑒧𑓂𑒨𑒏 𑒮𑓂𑒧𑒵𑒞𑒱 𑒩𑒴𑒣𑒲 𑒢𑒑𑒩𑒲𑒧𑒹
𑒂 𑒮𑒳𑒞𑒻𑒋 𑒮𑒧𑓂𑒨𑒏 𑒮𑒧𑒰𑒡𑒱𑒏 𑒥𑒱𑒕𑒰𑒍𑒢𑒣𑒩 𑒄।
𑒋𑒯𑒱 𑒁𑒭𑓂𑒙𑒰𑓀𑒑 𑒨𑒼𑒑𑒮𑒿 𑒁𑒕𑒱 𑒮𑒧𑓂𑒦𑒫 𑒄
𑒖𑒢𑓂𑒧, 𑒖𑒩𑒰, 𑒫𑓂𑒨𑒰𑒡𑒱 𑒂 𑒧𑒵𑒞𑓂𑒨𑒳𑒮𑒿 𑒧𑒳𑒏𑓂𑒞𑒱।
𑒧𑒡𑓂𑒨 𑒧𑒰𑒩𑓂𑒑 𑒔𑒰𑒩𑒱𑒙𑒰 𑒁𑒕𑒱 𑒡𑓂𑒩𑒳𑒫 𑒮𑒞𑓂𑒨
𑒠𑒳𑒐, 𑒁𑒕𑒱 𑒞𑒏𑒩 𑒏𑒰𑒩𑒝, 𑒠𑒳𑒐𑒏 𑒢𑒱𑒩𑒼𑒡
𑒂 𑒁𑒕𑒱 𑒅𑒣𑒰𑒨 𑒢𑒱𑒩𑒼𑒡𑒏 ।
𑒏𑒾𑓀𑒛𑒱𑒢𑓂𑒨 𑒂 𑒍𑒏𑒩 𑒔𑒰𑒩𑒴 𑒮𑓀𑒑𑒲 𑒮𑒳𑒢𑒪 𑒄,
𑒣𑓂𑒩𑒰𑒣𑓂𑒞 𑒏𑒋𑒪 𑒮𑒦 𑒠𑒱𑒫𑓂𑒨𑒖𑓂𑒘𑒰𑒢 ।
𑒯𑒹 𑒢𑒩𑒧𑒹 𑒅𑒞𑓂𑒞𑒧 𑒣𑒰𑒿𑒔𑒴 𑒑𑒼𑒙𑒹
𑒦𑒹𑒪 𑒖𑓂𑒘𑒰𑒢 𑒁𑒯𑒰𑒿 𑒪𑒼𑒏𑒢𑒱 𑒏𑒹?
𑒏𑒾𑓀𑒝𑓂𑒛𑒱𑒢𑓂𑒨 𑒏𑒯𑒪𑒢𑓂𑒯𑒱 𑒯𑒿, 𑒦𑒹𑒪 𑒦𑓀𑒞𑒹,
𑒏𑒾𑓀𑒛𑒱𑒢𑓂𑒨 𑒦𑒹𑒪𑒰𑒯 𑒞𑒐𑒢 𑒣𑓂𑒩𑒧𑒳𑒐 𑒡𑒩𑓂𑒧𑒫𑒹𑒞𑓂𑒞𑒰
𑒞𑒐𑒢𑒯𑒱 𑒨𑒏𑓂𑒭𑒮𑒦 𑒣𑒩𑓂𑒫𑒞𑒣𑒩𑒮𑒿 𑒏𑒋𑒪𑒏 𑒮𑒱𑓀𑒯𑒢𑒰𑒠,
𑒬𑒰𑒏𑓂𑒨𑒧𑒳𑒢𑒱 𑒁𑒕𑒱 𑒏𑒋𑒪𑒏 𑒡𑒩𑓂𑒧𑒔𑒏𑓂𑒩 𑒣𑓂𑒩𑒫𑒩𑓂𑒞𑒱𑒞 !!!!
𑒬𑒲𑒪 𑒏𑒲𑒪 𑒁𑒕𑒱 𑒏𑓂𑒭𑒧𑒰-𑒫𑒱𑒢𑒨 𑒁𑒕𑒱 𑒡𑒴𑒩𑒲,
𑒥𑒳𑒠𑓂𑒡𑒱-𑒮𑓂𑒧𑒵𑒞𑒱𑒏 𑒣𑒯𑒱𑒨𑒰 𑒁𑒕𑒱 𑒮𑒞𑓂𑒨 𑒁𑒯𑒱𑓀𑒮𑒰𑒮𑒿 𑒨𑒳𑒏𑓂𑒞,
𑒋𑒯𑒱𑒧𑒹 𑒥𑒻𑒮𑒱 𑒦𑒹𑒙𑒞 𑒬𑒰𑒢𑓂𑒞𑒱 𑒄 𑒥𑒰𑒖𑒪 𑒮𑒦 𑒨𑒏𑓂𑒭,
𑒧𑒵𑒑𑒠𑒰𑒫𑒧𑒹 𑒦𑒹𑒪 𑒡𑒩𑓂𑒧𑒔𑒏𑓂𑒩 𑒣𑓂𑒩𑒫𑒩𑓂𑒞𑒱𑒞।
𑒤𑒹𑒩 𑒁𑒬𑓂𑒫𑒖𑒱𑒞 𑒂 𑒍𑒏𑒩 𑒔𑒰𑒩𑒱 𑒙𑒰 𑒂𑒢 𑒦𑒱𑒏𑓂𑒭𑒳
𑒏𑒋𑒪 𑒢𑒱𑒩𑓂𑒫𑒰𑒝 𑒡𑒩𑓂𑒧𑒧𑒹 𑒥𑒳𑒠𑓂𑒡 𑒠𑒲𑒏𑓂𑒭𑒱𑒞,
𑒤𑒹𑒩 𑒏𑒳𑒪𑒣𑒳𑒞𑓂𑒩 𑒨𑒬 𑒣𑓂𑒩𑒰𑒣𑓂𑒞 𑒏𑒋𑒪 𑒁𑒩𑓂𑒯𑒞 𑒣𑒠
𑒨𑒬 𑒂 𑒔𑒾𑒫𑒢 𑒑𑒵𑒯𑒮𑓂𑒟𑒏𑒹𑒿
𑒏𑒋𑒪 𑒥𑒳𑒠𑓂𑒡 𑒮𑒠𑓂𑒡𑒩𑓂𑒧𑒧𑒹 𑒣𑓂𑒩𑒬𑒲𑒏𑓂𑒭𑒱𑒞 ।
𑒒𑒩𑒧𑒹 𑒩𑒯𑒱 𑒏𑓄 𑒦𑓄 𑒮𑒏𑒻 𑒕𑒲 𑒁𑒢𑒰𑒬𑒏𑓂𑒞
𑒂 𑒫𑒢𑒧𑒹 𑒩𑒯𑒱𑒨𑒼 𑒣𑓂𑒩𑒰𑒣𑓂𑒞 𑒏𑓄 𑒮𑒏𑒋 𑒕𑒲 𑒂𑒬𑒏𑓂𑒞𑒱 ।
𑒋𑒯𑒱𑒧𑒹𑒮𑒿 𑒂𑒚 𑒑𑒼𑒙 𑒁𑒩𑓂𑒯𑒞 𑒣𑓂𑒩𑒰𑒣𑓂𑒞 𑒬𑒱𑒭𑓂𑒨𑒏𑒹𑒿
𑒥𑒱𑒠𑒰 𑒏𑒋 𑒂𑒚𑒼 𑒠𑒱𑒬𑒰𑒧𑒹 𑒔𑒪𑒪𑒰𑒯 𑒥𑒳𑒠𑓂𑒡 ।
𑒣𑒯𑒳𑒿𑒔𑒱 𑒑𑒨𑒰 𑒖𑒱𑒞𑒥𑒰𑒏 𑒩𑒯𑒢𑓂𑒯𑒱 𑒃𑒔𑓂𑒕𑒰
𑒮𑒱𑒠𑓂𑒡𑒱 𑒮𑒦𑒮𑒿 𑒨𑒳𑒏𑓂𑒞 𑒏𑒰𑒬𑓂𑒨𑒣 𑒧𑒳𑒢𑒱𑒏𑒹𑒿।
𑒑𑒨𑒰𑒧𑒹 𑒏𑒰𑒬𑓂𑒨𑒣 𑒧𑒳𑒢𑒱 𑒏𑒋𑒪𑒢𑓂𑒯𑒱 𑒮𑓂𑒫𑒰𑒑𑒞 𑒥𑒳𑒠𑓂𑒡𑒏,
𑒧𑒳𑒠𑒰 𑒩𑒯𑒥𑒰𑒏 𑒪𑒹𑒪 𑒠𑒹𑒪 𑒁𑒑𑓂𑒢𑒱𑒬𑒰𑒪𑒰 𑒩𑒯𑒋 𑒕𑒪 𑒧𑒯𑒰𑒮𑒩𑓂𑒣 𑒖𑒞𑒋 ।
𑒩𑒰𑒞𑒱𑒧𑒹 𑒧𑒳𑒠𑒰 𑒍 𑒮𑒩𑓂𑒣 𑒣𑓂𑒩𑒝𑒰𑒧 𑒏𑒋𑒪 𑒥𑒳𑒠𑓂𑒡𑒏𑒹𑒿
𑒦𑒼𑒩𑒧𑒹 𑒏𑒰𑒬𑓂𑒨𑒣 𑒠𑒹𑒐𑒪 𑒮𑒩𑓂𑒣𑒏𑒹𑒿 𑒥𑒳𑒠𑓂𑒡𑒏 𑒦𑒱𑒏𑓂𑒭𑒰𑒣𑒰𑒞𑓂𑒩𑒧𑒹 ।
𑒏𑒋 𑒣𑓂𑒩𑒝𑒰𑒧 𑒍 𑒂 𑒯𑒳𑒢𑒏𑒩 𑒣𑒰𑒿𑒔 𑒮𑒋 𑒬𑒱𑒭𑓂𑒨
𑒮𑓀𑒑 𑒁𑒋𑒪𑒰𑒯 𑒏𑒰𑒬𑓂𑒨𑒏 𑒦𑒰𑒋 𑒑𑒨 𑒂 𑒢𑒠𑒲 ।
𑒏𑒋𑒪 𑒮𑓂𑒫𑒲𑒏𑒰𑒩 𑒡𑒩𑓂𑒧 𑒥𑒳𑒠𑓂𑒡𑒏
𑒣𑓂𑒩𑒰𑒣𑓂𑒞 𑒏𑒋𑒪 𑒑𑒨 𑒅𑒞𑓂𑒞𑒳𑓀𑒑𑒣𑒩 𑒢𑒱𑒩𑓂𑒫𑒰𑒝𑒡𑒩𑓂𑒧𑒏 𑒬𑒱𑒏𑓂𑒭𑒰
𑒪𑒋 𑒮𑒦 𑒏𑒰𑒬𑓂𑒨𑒣𑒏𑒹𑒿 𑒮𑓀𑒑 𑒥𑒳𑒠𑓂𑒡 𑒣𑒯𑒳𑒿𑒔𑒪 𑒩𑒰𑒖𑒑𑒵𑒯𑒏 𑒫𑒹𑒝𑒳𑒫𑒝 ।
𑒥𑒱𑒧𑓂𑒥𑒮𑒰𑒩 𑒮𑒳𑒢𑒱 𑒂𑒋𑒪 𑒍𑒞𑒋 𑒠𑒹𑒐𑒪 𑒏𑒰𑒬𑓂𑒨𑒣𑒏𑒹𑒿 𑒥𑒳𑒠𑓂𑒡𑒏 𑒬𑒱𑒭𑓂𑒨 𑒥𑒢𑒪
𑒣𑒴𑒕𑒪 𑒥𑒳𑒠𑓂𑒡 𑒞𑒐𑒢 𑒏𑒰𑒬𑓂𑒨𑒣𑒮𑒿,
𑒕𑒼𑒛𑓃𑒪 𑒁𑒯𑒰𑒿 𑒁𑒑𑓂𑒢𑒱𑒏 𑒅𑒣𑒰𑒮𑒢𑒰 𑒏𑒱𑒋𑒏 𑒦𑓀𑒞𑒹 ?
𑒏𑒰𑒬𑓂𑒨𑒣 𑒏𑒯𑒪 𑒧𑒼𑒯 𑒖𑒢𑓂𑒧 𑒩𑒯𑒱 𑒖𑒰𑒃𑒕 𑒠𑒹𑒢𑒹
𑒂𑒯𑒳𑒞𑒱 𑒁𑒑𑓂𑒢𑒱𑒧𑒹 𑒏𑒋𑒢𑒹 𑒣𑒴𑒖𑒰 𑒣𑒰𑒚 𑒍𑒏𑒩 𑒞𑒿𑒯𑒱 ।
𑒥𑒳𑒠𑓂𑒡𑒏 𑒂𑒖𑓂𑒘𑒰 𑒣𑒰𑒥𑒱 𑒏𑒋𑒪 𑒏𑒰𑒬𑓂𑒨𑒣 𑒠𑒱𑒫𑓂𑒨 𑒬𑒏𑓂𑒞𑒱𑒏 𑒣𑓂𑒩𑒠𑒩𑓂𑒬𑒢
𑒂𑒏𑒰𑒬𑒧𑒡𑓂𑒨 𑒅𑒛𑓃𑒱 𑒁𑒑𑓂𑒢𑒱𑒏 𑒮𑒧𑒰𑒢 𑒖𑒩𑒱 𑒏𑒋 ।
𑒞𑒐𑒢 𑒥𑒱𑒧𑓂𑒥𑒮𑒰𑒩𑒏𑒹𑒿 𑒠𑒹𑒪 𑒥𑒳𑒠𑓂𑒡 𑒁𑒢𑒰𑒞𑓂𑒧𑒫𑒰𑒠𑒏 𑒬𑒱𑒏𑓂𑒭𑒰
𑒫𑒱𑒭𑒨, 𑒥𑒳𑒠𑓂𑒡𑒱 𑒂 𑒃𑒢𑓂𑒠𑓂𑒩𑒱𑒏 𑒮𑓀𑒨𑒼𑒑𑒮𑒿 𑒁𑒥𑒻𑒕 𑒔𑒹𑒞𑒢𑒞𑒰
𑒬𑒩𑒲𑒩 𑒃𑒢𑓂𑒠𑓂𑒩𑒱𑒨 𑒂 𑒔𑒹𑒞𑒢𑒰 𑒁𑒕𑒱 𑒦𑒱𑒢𑓂𑒢
𑒂 𑒁𑒦𑒱𑒢𑓂𑒢 𑒮𑒹𑒯𑒼।
𑒥𑒱𑒧𑓂𑒥𑒮𑒰𑒩 𑒦𑓄 𑒣𑓂𑒩𑒮𑒢𑓂𑒢 𑒠𑒰𑒢 𑒥𑒳𑒠𑓂𑒡𑒏𑒹𑒿 𑒫𑒹𑒝𑒳𑒫𑒢 𑒠𑒹𑒪
𑒞𑒟𑒰𑒑𑒞𑒏 𑒬𑒱𑒭𑓂𑒨 𑒁𑒬𑓂𑒫𑒖𑒱𑒞 𑒢𑒑𑒩 𑒑𑒹𑒪 𑒦𑒱𑒏𑓂𑒭𑒰𑒏 𑒪𑒹𑒪 ।
𑒏𑒣𑒱𑒪 𑒮𑓀𑒣𑓂𑒩𑒠𑒰𑒨𑒏 𑒪𑒼𑒏 𑒠𑒹𑒐𑒱 𑒞𑒹𑒖 𑒣𑒴𑒕𑒪 𑒁𑒯𑒰𑒿𑒏 𑒑𑒳𑒩𑒳 𑒏𑒹?
𑒏𑒯𑒪 𑒁𑒬𑓂𑒫𑒖𑒱𑒞 𑒮𑒳𑒑𑒞 𑒥𑒳𑒠𑓂𑒡 𑒕𑒟𑒱 𑒖𑒹 𑒃𑒏𑓂𑒭𑒫𑒰𑒏𑒳𑒫𑓀𑒬𑒏।
𑒮𑒋𑒯 𑒯𑒧𑒩 𑒑𑒳𑒩𑒳 𑒏𑒯𑒋 𑒕𑒟𑒱 𑒥𑒱𑒢 𑒏𑒰𑒩𑒝𑒏 𑒢𑒯𑒱 𑒯𑒼𑒃𑒕 𑒏𑒱𑒕𑒳𑒍
𑒅𑒣𑒞𑒱𑒭𑓂𑒨 𑒥𑓂𑒩𑒰𑒯𑓂𑒧𑒝𑒏𑒹𑒿 𑒣𑓂𑒩𑒰𑒣𑓂𑒞 𑒦𑒹𑒪 𑒖𑓂𑒘𑒰𑒢 𑒏𑒯𑒪𑒏 𑒍 𑒧𑒾𑒠𑓂𑒑𑒪𑓂𑒨𑒰𑒨𑒢𑒏𑒹𑒿
𑒧𑒾𑒠𑓂𑒑𑒪𑓂𑒨𑒰𑒨𑒢𑒏𑒹𑒿 𑒮𑒹𑒯𑒼 𑒣𑓂𑒩𑒰𑒣𑓂𑒞 𑒦𑒹𑒪𑒻𑒏 𑒮𑒧𑓂𑒨𑒏 𑒠𑒵𑒭𑓂𑒙𑒱 𑒮𑒳𑒢𑒱𑒏𑒹𑒿।
𑒮𑒳𑒢𑒱 𑒫𑒹𑒝𑒳𑒫𑒢𑒧𑒹 𑒅𑒣𑒠𑒹𑒬 𑒞𑓂𑒨𑒰𑒑𑒪 𑒖𑒙𑒰 𑒠𑓀𑒛
𑒣𑒯𑒱𑒩𑒱 𑒏𑒰𑒭𑒰𑒨 𑒏𑒋𑒪 𑒮𑒰𑒡𑒢𑒰 𑒣𑓂𑒩𑒰𑒣𑓂𑒞 𑒏𑒋𑒪 𑒣𑒩𑒧 𑒣𑒠
𑒏𑒰𑒬𑓂𑒨𑒣 𑒫𑓀𑒬𑒏 𑒋𑒏𑒙𑒰 𑒡𑒢𑒱𑒏 𑒥𑓂𑒩𑒰𑒯𑓂𑒧𑒝 𑒕𑒼𑒛𑓃𑒪 𑒣𑒞𑓂𑒢𑒲 𑒣𑒩𑒱𑒖𑒢
𑒣𑓂𑒩𑒮𑒱𑒠𑓂𑒡𑒱 𑒦𑒹𑒙𑒪 𑒯𑒱𑒢𑒏𑒰 𑒧𑒯𑒰𑒏𑒰𑒬𑓂𑒨𑒣 𑒢𑒰𑒧𑒮𑒿।
𑒏𑒼𑒮𑒪𑒏 𑒬𑓂𑒩𑒰𑒫𑒮𑓂𑒞𑒲𑒏 𑒡𑒢𑒱𑒏 𑒮𑒳𑒠𑒞𑓂𑒞 𑒂𑒋𑒪 𑒫𑒹𑒝𑒳𑒫𑒢
𑒑𑒵𑒯𑒮𑓂𑒟 𑒩𑒯𑒱𑒞𑒼 𑒣𑓂𑒩𑒰𑒣𑓂𑒞 𑒦𑒹𑒪 𑒞𑒞𑓂𑒫𑒖𑓂𑒘𑒰𑒢 𑒍𑒏𑒩𑒰 ।
𑒅𑒣𑒞𑒱𑒭𑓂𑒨 𑒮𑓀𑒑𑒹 𑒮𑒳𑒠𑒞𑓂𑒞 𑒑𑒹𑒪 𑒬𑓂𑒩𑒰𑒫𑒮𑓂𑒞𑒲 𑒢𑒑𑒩
𑒖𑒹𑒞 𑒏𑒹𑒩 𑒫𑒢𑒧𑒹 𑒫𑒱𑒯𑒰𑒩 𑒥𑒢𑒋𑒥𑒰𑒏 𑒏𑒋𑒪 𑒢𑒱𑒬𑓂𑒔𑒱𑒞𑓂 ।
𑒖𑒹𑒞 𑒩𑒯𑒋 𑒪𑒼𑒦𑒲 𑒜𑒹𑒩 𑒣𑒰𑒃 𑒪𑒹𑒪𑒏 𑒖𑒹𑒞𑒫𑒢𑒏
𑒧𑒳𑒠𑒰 𑒠𑒹𑒐𑒱 𑒠𑒻𑒞 𑒣𑒰𑒃 𑒯𑒵𑒠𑒨 𑒣𑒩𑒱𑒫𑒩𑓂𑒞𑒱𑒞 𑒦𑒹𑒪 𑒍𑒏𑒩
𑒮𑒦𑒙𑒰 𑒫𑒢 𑒠𑒹𑒪𑒏 𑒍 𑒫𑒱𑒯𑒰𑒩𑒏 𑒪𑒹𑒪
𑒫𑒱𑒯𑒰𑒩 𑒬𑒲𑒒𑓂𑒩𑒹 𑒥𑒢𑒱 𑒑𑒹𑒪 𑒅𑒣𑒞𑒱𑒭𑓂𑒨𑒏 𑒮𑓀𑒩𑒏𑓂𑒭𑒏𑒞𑓂𑒫𑒧𑒹।
𑒥𑒳𑒠𑓂𑒡 𑒤𑒹𑒩 𑒩𑒰𑒖𑒑𑒵𑒯𑒮𑒿 𑒔𑒪𑒱 𑒠𑒹𑒪𑒢𑓂𑒯𑒱 𑒏𑒣𑒱𑒪𑒫𑒮𑓂𑒞𑒳 𑒠𑒱𑒮
𑒍𑒞𑒋 𑒣𑒱𑒞𑒰 𑒬𑒳𑒠𑓂𑒡𑒼𑒡𑒢𑒏𑒹𑒿 𑒠𑒹𑒪 𑒥𑒾𑒠𑓂𑒡 𑒩𑒴𑒣𑒲 𑒁𑒧𑒵𑒞
𑒏𑒼𑒢𑒼 𑒣𑒳𑒞𑓂𑒩 𑒣𑒱𑒞𑒰𑒏𑒹𑒿 𑒢𑒯𑒱 𑒠𑒹𑒢𑒹 𑒩𑒯𑒋 𑒄।
𑒏𑒩𑓂𑒧 𑒡𑒩𑒋 𑒁𑒕𑒱 𑒧𑒵𑒞𑓂𑒨𑒳𑒏 𑒥𑒰𑒠𑒼 𑒣𑒕𑒼𑒛𑓃
𑒏𑒩𑓂𑒧𑒏 𑒮𑓂𑒫𑒦𑒰𑒫, 𑒏𑒰𑒩𑒝, 𑒤𑒪, 𑒂𑒬𑓂𑒩𑒨𑒏 𑒩𑒯𑒮𑓂𑒨 𑒥𑒳𑒗𑒴,
𑒖𑒢𑓂𑒧, 𑒧𑒵𑒞𑓂𑒨𑒳, 𑒬𑓂𑒩𑒧, 𑒠𑒳𑒐𑒮𑒿 𑒤𑒩𑒰𑒏 𑒣𑒟 𑒞𑒰𑒏𑒴 ।
𑒂𑒢𑒢𑓂𑒠, 𑒢𑒢𑓂𑒠, 𑒏𑒵𑒧𑒱𑒪, 𑒁𑒢𑒳𑒩𑒳𑒠𑓂𑒡, 𑒏𑒳𑒢𑓂𑒛𑒡𑒰𑒢𑓂𑒨, 𑒠𑒹𑒫𑒠𑒞𑓂𑒞, 𑒅𑒠𑒰𑒨𑒱
𑒏𑒋 𑒑𑓂𑒩𑒯𑒝 𑒠𑒲𑒏𑓂𑒭𑒰 𑒕𑒼𑒛𑓃𑒪 𑒑𑒵𑒯 𑒮𑒦 ।
𑒁𑒞𑓂𑒩𑒱𑒢𑒢𑓂𑒠𑒢 𑒅𑒣𑒰𑒪𑒱 𑒮𑒹𑒯𑒼 𑒏𑒋𑒪 𑒑𑓂𑒩𑒯𑒝 𑒠𑒲𑒏𑓂𑒭𑒰
𑒬𑒳𑒠𑓂𑒡𑒼𑒡𑒢 𑒠𑒹𑒪 𑒩𑒰𑒖𑒏𑒰𑒖 𑒦𑒰𑒋 𑒏𑒹𑒿
𑒩𑒯𑒋 𑒪𑒑𑒪𑒰𑒯 𑒩𑒰𑒖𑒩𑓂𑒭𑒱 𑒖𑒹𑒏𑒰𑒿 𑒍 ।
𑒤𑒹𑒩 𑒥𑒳𑒠𑓂𑒡 𑒏𑒋𑒪 𑒣𑓂𑒩𑒫𑒹𑒬 𑒢𑒑𑒩𑒧𑒹
𑒢𑓂𑒨𑒑𑓂𑒩𑒼𑒡 𑒫𑒢𑒧𑒹 𑒥𑒳𑒠𑓂𑒡 𑒣𑒯𑒳𑒿𑒔𑒱
𑒔𑒱𑒢𑓂𑒞𑒢 𑒏𑒪𑓂𑒨𑒰𑒝𑒏 𑒖𑒲𑒫𑒏 𑒏𑒩𑒋 𑒪𑒑𑒪𑒰𑒯।
𑒤𑒹𑒩 𑒍 𑒍𑒞𑒋 𑒮𑒿 𑒢𑒱𑒏𑒪𑒱 𑒑𑒹𑒪𑒰𑒯 𑒣𑓂𑒩𑒮𑒹𑒢𑒖𑒱𑒞𑒏 𑒠𑒹𑒮 𑒏𑒼𑒮𑒪
𑒬𑓂𑒩𑒰𑒫𑒮𑓂𑒞𑒲𑒏 𑒖𑒹𑒞𑒫𑒢 𑒕𑒪 𑒬𑓂𑒫𑒹𑒞 𑒦𑒫𑒢 𑒂 𑒁𑒬𑒼𑒏𑒏 𑒑𑒰𑒕𑒮𑒿 𑒮𑒖𑓂𑒖𑒱𑒞
𑒮𑒳𑒠𑒞𑓂𑒞 𑒏𑒋𑒪 𑒮𑓂𑒫𑒩𑓂𑒝𑒧𑒰𑒪𑒰𑒮𑒿 𑒮𑓂𑒫𑒰𑒑𑒞 𑒥𑒳𑒠𑓂𑒡𑒏
𑒏𑒋𑒪 𑒖𑒹𑒞𑒫𑒢 𑒥𑒳𑒠𑓂𑒡𑒏 𑒔𑒩𑒝𑒧𑒹 𑒮𑒧𑒩𑓂𑒣𑒱𑒞।
𑒣𑓂𑒩𑒮𑒹𑒢𑒖𑒱𑒞 𑒦𑒹𑒪 𑒡𑒩𑓂𑒧𑒧𑒹 𑒠𑒲𑒏𑓂𑒭𑒱𑒞
𑒞𑒲𑒩𑓂𑒟𑒏 𑒮𑒰𑒡𑒳 𑒮𑒦𑒏 𑒏𑒋 𑒬𑓀𑒏𑒰𑒏 𑒮𑒧𑒰𑒡𑒰𑒢
𑒏𑒋𑒪 𑒥𑒳𑒠𑓂𑒡 𑒯𑒳𑒢𑒏𑒰 𑒮𑒦𑒏𑒹𑒿 𑒠𑒲𑒏𑓂𑒭𑒱𑒞।
𑒍𑒞𑒋𑒮𑒿 𑒁𑒋𑒪𑒰𑒯 𑒥𑒳𑒠𑓂𑒡 𑒤𑒹𑒩 𑒩𑒰𑒖𑒑𑒵𑒯
𑒖𑓂𑒨𑒼𑒞𑒱𑒭𑓂𑒏, 𑒖𑒲𑒫𑒏, 𑒬𑒴𑒩, 𑒬𑓂𑒩𑒼𑒝,𑒁𑓀𑒑𑒠𑒏𑒹𑒿 𑒅𑒣𑒠𑒹𑒬 𑒠𑒋,
𑒏𑒋𑒪 𑒮𑒦𑒏𑒹𑒿 𑒮𑓀𑒒𑒧𑒹 𑒠𑒲𑒏𑓂𑒭𑒱𑒞।
𑒍𑒞𑒋𑒮𑒿 𑒑𑓀𑒡𑒰𑒩 𑒖𑒰𑒋 𑒩𑒰𑒖𑒰 𑒣𑒳𑒭𑓂𑒏𑒩𑒏𑒹𑒿 𑒏𑒋𑒪 𑒠𑒲𑒏𑓂𑒭𑒱𑒞
𑒫𑒱𑒣𑒳𑒪 𑒣𑒩𑓂𑒫𑒞𑒣𑒩 𑒯𑒹𑒧𑒫𑒞 𑒂 𑒮𑒰𑒞𑒰𑒑𑓂𑒩 𑒠𑒳𑒢𑒴 𑒨𑒏𑓂𑒭𑒏𑒹𑒿 𑒅𑒣𑒠𑒹𑒬 𑒠𑒋
𑒁𑒋𑒪𑒰𑒯 𑒖𑒲𑒫𑒏𑒏 𑒂𑒧𑓂𑒩𑒫𑒢।
𑒍𑒞𑒋 𑒏𑒋 𑒫𑒱𑒬𑓂𑒩𑒰𑒧 𑒒𑒳𑒧𑒻𑒞-𑒤𑒱𑒩𑒻𑒞
𑒣𑒯𑒳𑒿𑒔𑒪 𑒂𑒣𑒝 𑒢𑒑𑒩,
𑒍𑒞𑒋 𑒁𑓀𑒑𑒳𑒪𑒲𑒧𑒰𑒪 𑒞𑒮𑓂𑒏𑒩𑒏𑒹𑒿
𑒏𑒋𑒪 𑒠𑒲𑒏𑓂𑒭𑒱𑒞 𑒣𑓂𑒩𑒹𑒧𑒏 𑒡𑒩𑓂𑒧𑒧𑒹।
𑒫𑒰𑒩𑒰𑒝𑒮𑒲𑒧𑒹 𑒁𑒮𑒱𑒞𑒏 𑒦𑒰𑒑𑒱𑒢 𑒏𑒰𑒞𑓂𑒨𑒰𑒨𑒢𑒏𑒹𑒿 𑒏𑒋𑒪 𑒠𑒲𑒏𑓂𑒭𑒱𑒞
𑒠𑒹𑒫𑒠𑒞𑓂𑒞 𑒧𑒳𑒠𑒰 𑒦𑒋 𑒄𑒩𑓂𑒭𑓂𑒨𑒰𑒪𑒳 𑒮𑓀𑒒𑒧𑒹 𑒔𑒰𑒯𑒪𑒏 𑒣𑒮𑒰𑒩𑒋 𑒁𑒩𑒰𑒩𑒱।
𑒑𑒵𑒡𑓂𑒩𑒏𑒴𑒙 𑒣𑒩𑓂𑒫𑒞𑒣𑒩 𑒐𑒮𑒰𑒍𑒪 𑒬𑒱𑒪𑒰𑒐𑓀𑒛 𑒥𑒳𑒠𑓂𑒡𑒣𑒩
𑒩𑒰𑒖𑒑𑒵𑒯 𑒧𑒰𑒩𑓂𑒑𑒧𑒹 𑒕𑒼𑒛𑓃𑒪 𑒯𑒳𑒢𑒏𑒰𑒣𑒩 𑒥𑒞𑒰𑒯 𑒯𑒰𑒟𑒲
𑒮𑒦 𑒦𑒰𑒑𑒪 𑒧𑒳𑒠𑒰 𑒂𑒢𑒢𑓂𑒠 𑒮𑓀𑒑 𑒩𑒯𑒪 𑒥𑒳𑒠𑓂𑒡𑒏
𑒪𑒑 𑒂𑒥𑒱 𑒑𑒖𑒩𑒰𑒖 𑒦𑒋 𑒑𑒹𑒪 𑒮𑓂𑒫𑒮𑓂𑒟 𑒏𑒋𑒪 𑒣𑓂𑒩𑒝𑒰𑒧 𑒗𑒳𑒏𑒱 𑒏𑒋
𑒅𑒣𑒠𑒹𑒬 𑒠𑒹𑒪 𑒑𑒖𑒩𑒰𑒖𑒏𑒹𑒿 𑒥𑒳𑒠𑓂𑒡।
𑒠𑒹𑒐𑒪 𑒄 𑒪𑒲𑒪𑒰 𑒩𑒰𑒖𑒧𑒯𑒪𑒮𑒿 𑒁𑒖𑒰𑒞𑒬𑒞𑓂𑒩𑒳
𑒦𑒋 𑒑𑒹𑒪 𑒍𑒯𑒼 𑒬𑒱𑒭𑓂𑒨 𑒞𑒐𑒢 𑒥𑒳𑒠𑓂𑒡𑒏।
𑒩𑒰𑒖𑒑𑒵𑒯𑒮𑒿 𑒥𑒳𑒠𑓂𑒡 𑒁𑒋𑒪𑒰𑒯 𑒣𑒰𑒙𑒪𑒱𑒣𑒳𑒞𑓂𑒩
𑒧𑒑𑒡𑒏 𑒧𑓀𑒞𑓂𑒩𑒲 𑒫𑒩𑓂𑒭𑒰𑒏𑒰𑒩 𑒥𑒢𑒰 𑒩𑒯𑒪 𑒕𑒪 𑒠𑒳𑒩𑓂𑒑,
𑒥𑒳𑒠𑓂𑒡 𑒏𑒋𑒪 𑒦𑒫𑒱𑒭𑓂𑒨𑒫𑒰𑒝𑒲 𑒯𑒼𑒋𑒞 𑒄 𑒢𑒑𑒩 𑒣𑓂𑒩𑒮𑒱𑒠𑓂𑒡
𑒞𑒐𑒢 𑒞𑒟𑒰𑒑𑒞 𑒑𑒹𑒪𑒰𑒯 𑒑𑒾𑒞𑒧 𑒠𑓂𑒫𑒰𑒩𑒮𑒿 𑒑𑓀𑒑𑒰 𑒠𑒱𑒮।
𑒑𑓀𑒑𑒰𑒣𑒰𑒩 𑒏𑒳𑒙𑒲 𑒑𑒰𑒧𑒧𑒹
𑒠𑒹𑒪 𑒅𑒣𑒠𑒹𑒬 𑒡𑒩𑓂𑒧𑒏
𑒤𑒹𑒩 𑒑𑒹𑒪𑒰𑒯 𑒢𑒢𑓂𑒠𑒱𑒑𑓂𑒩𑒰𑒧 𑒖𑒞𑒋 𑒦𑒹𑒪 𑒕𑒪 𑒥𑒯𑒳𑒞 𑒩𑒰𑒮 𑒧𑒵𑒞𑓂𑒨𑒳।
𑒠𑒋 𑒮𑒰𑒢𑓂𑒞𑓂𑒫𑒢𑒰 𑒑𑒹𑒪𑒰𑒯 𑒫𑒻𑒬𑒰𑒪𑒲 𑒢𑒑𑒩𑒲
𑒢𑒱𑒫𑒰𑒮 𑒏𑒋𑒪 𑒂𑒧𑓂𑒩𑒣𑒰𑒪𑒲𑒏 𑒅𑒠𑓂𑒨𑒰𑒢𑒧𑒹।
𑒬𑓂𑒫𑒹𑒞 𑒫𑒮𑓂𑒞𑓂𑒩 𑒡𑒩𑒱 𑒁𑒋𑒪𑒲𑒯 𑒍
𑒥𑒳𑒠𑓂𑒡 𑒔𑒹𑒞𑒰𑒍𑒪 𑒬𑒱𑒭𑓂𑒨 𑒮𑒦𑒏𑒹𑒿,
𑒡𑒩𑒴 𑒮𑓀𑒨𑒧 𑒩𑒯𑒥 𑒮𑓂𑒟𑒱𑒩𑒖𑓂𑒘𑒰𑒢𑒧𑒹 𑒪𑓄 𑒥𑒼𑒡𑒏 𑒍𑒐𑒡
𑒣𑓂𑒩𑒖𑓂𑒘𑒰𑒏 𑒫𑒰𑒝𑒮𑒿 𑒬𑒏𑓂𑒞𑒱𑒏 𑒡𑒢𑒳𑒭𑒮𑒿 𑒏𑒩𑒴 𑒁𑒣𑒢 𑒩𑒏𑓂𑒭𑒰।
𑒂𑒧𑓂𑒩𑒣𑒰𑒪𑒲 𑒂𑒥𑒱 𑒣𑒍𑒪𑒏 𑒅𑒣𑒠𑒹𑒬
𑒦𑒹𑒪𑒻𑒏 𑒍𑒏𑒩𑒰 𑒒𑒵𑒝𑒰 𑒁𑒣𑒢 𑒫𑒵𑒞𑓂𑒞𑒱𑒮𑒿
𑒧𑒰𑒿𑒑𑒪𑒏 𑒡𑒩𑓂𑒧𑒪𑒰𑒦𑒏 𑒦𑒱𑒏𑓂𑒭𑒰,
𑒥𑒳𑒠𑓂𑒡 𑒏𑒋𑒪𑒢𑓂𑒯𑒱 𑒣𑓂𑒩𑒰𑒩𑓂𑒟𑒢𑒰 𑒍𑒏𑒩 𑒮𑓂𑒫𑒲𑒏𑒰𑒩,
𑒮𑓀𑒑𑒯𑒱 𑒂𑒋𑒥 𑒦𑒱𑒏𑓂𑒭𑒰𑒏 𑒪𑒹𑒪 𑒁𑒯𑒰𑒿𑒏 𑒠𑓂𑒫𑒰𑒩 ।
𑒮𑒳𑒢𑒱 𑒄 𑒑𑒣 𑒖𑒹 𑒂𑒋𑒪 𑒕𑒟𑒱 𑒥𑒳𑒠𑓂𑒡 𑒂𑒧𑓂𑒩𑒣𑒰𑒪𑒲𑒏 𑒅𑒠𑓂𑒨𑒰𑒢
𑒪𑒱𑒔𑓂𑒕𑒫𑒲𑒑𑒝 𑒁𑒋𑒪𑒰𑒯 𑒥𑒳𑒠𑓂𑒡𑒏 𑒮𑒧𑒲𑒣
𑒥𑒳𑒠𑓂𑒡 𑒠𑒹𑒪𑒢𑓂𑒯𑒱 𑒬𑒲𑒪𑒫𑒰𑒢 𑒩𑒯𑒥𑒰𑒏 𑒮𑒢𑓂𑒠𑒹𑒬।
𑒪𑒱𑒔𑓂𑒕𑒫𑒲𑒑𑒝 𑒠𑒹𑒪𑒢𑓂𑒯𑒱 𑒦𑒱𑒏𑓂𑒭𑒰𑒏 𑒪𑒹𑒪 𑒁𑒣𑒢-𑒁𑒣𑒢 𑒒𑒩 𑒁𑒋𑒥𑒰𑒏 𑒂𑒧𑒢𑓂𑒞𑓂𑒩𑒝,
𑒣𑒰𑒥𑒱 𑒂𑒧𑒢𑓂𑒞𑓂𑒩𑒝 𑒏𑒯𑒪𑒢𑓂𑒯𑒱 𑒥𑒳𑒠𑓂𑒡
𑒧𑒳𑒠𑒰 𑒖𑒰𑒋𑒥 𑒯𑒧 𑒂𑒧𑓂𑒩𑒣𑒰𑒪𑒲𑒏 𑒠𑓂𑒫𑒰𑒩
𑒏𑒰𑒩𑒝 𑒯𑒳𑒢𑒏𑒰 𑒯𑒧 𑒠𑒹𑒪𑒱𑒨𑒢𑓂𑒯𑒱 𑒁𑒕𑒱 𑒫𑒔𑒢।
𑒪𑒱𑒔𑓂𑒕𑒫𑒲𑒑𑒝𑒏𑒹𑒿 𑒪𑒑𑒪𑒢𑓂𑒯𑒱 𑒄 𑒏𑒢𑒹𑒏 𑒁𑒢𑒮𑒼𑒯𑒰𑒿𑒞,
𑒧𑒳𑒠𑒰 𑒣𑒰𑒥𑒱 𑒅𑒣𑒠𑒹𑒬 𑒥𑒳𑒠𑓂𑒡𑒏,
𑒒𑒳𑒩𑒪𑒰𑒯 𑒁𑒣𑒢-𑒁𑒣𑒢 𑒒𑒩-𑒠𑓂𑒫𑒰𑒩।
𑒣𑒩𑒰𑒞𑒹 𑒂𑒧𑓂𑒩𑒣𑒰𑒪𑒲𑒮𑒿 𑒑𑓂𑒩𑒯𑒝 𑒏𑒋 𑒦𑒱𑒏𑓂𑒭𑒰
𑒥𑒳𑒠𑓂𑒡 𑒑𑒹𑒪𑒰𑒯 𑒫𑒹𑒝𑒳𑒧𑒞𑒲 𑒏𑒩𑒋 𑒔𑒰𑒩𑒱 𑒧𑒰𑒮𑒏 𑒥𑒮𑓂𑒮𑒰𑒫𑒰𑒮।
𑒔𑒰𑒩𑒱 𑒧𑒰𑒮 𑒥𑒱𑒞𑒍𑒪𑒰 𑒅𑒞𑓂𑒞𑒩,
𑒩𑒯𑒋 𑒪𑒑𑒪𑒰𑒯 𑒧𑒩𑓂𑒏𑒙 𑒮𑒩𑒼𑒫𑒩𑒏 𑒞𑒙।
𑒍𑒞𑒯𑒱 𑒂𑒋𑒪 𑒧𑒰𑒩,
𑒏𑒯𑒪𑒏 𑒯𑒹 𑒥𑒳𑒠𑓂𑒡 𑒢𑒻𑒩𑓀𑒖𑒢𑒰 𑒞𑒙𑒣𑒩 𑒁𑒯𑒰𑒿𑒏 𑒮𑓀𑒏𑒪𑓂𑒣
𑒖𑒹 𑒢𑒱𑒩𑓂𑒫𑒰𑒝𑒮𑒿 𑒣𑒴𑒩𑓂𑒫 𑒏𑒩𑒥 𑒅𑒠𑓂𑒡𑒰𑒩 𑒠𑒹𑒐𑒰𑒋𑒥 𑒩𑒮𑓂𑒞𑒰 𑒠𑒼𑒮𑒩𑒼𑒏𑒹𑒿,
𑒂𑒥 𑒞𑒿 𑒏𑒞𑒹𑒏 𑒕𑒟𑒱 𑒧𑒳𑒏𑓂𑒞, 𑒏𑒞𑒹𑒏 𑒕𑒟𑒱 𑒧𑒳𑒏𑓂𑒞𑒱 𑒣𑒟𑒏 𑒁𑒢𑒳𑒑𑒰𑒧𑒲,
𑒂𑒥 𑒏𑒼𑒢𑒼 𑒙𑒰 𑒢𑒯𑒱 𑒥𑒰𑒿𑒔𑒪 𑒁𑒕𑒱 𑒏𑒰𑒩𑒝
𑒏𑒩𑒴 𑒢𑒱𑒩𑓂𑒫𑒰𑒝 𑒣𑓂𑒩𑒰𑒣𑓂𑒞।
𑒏𑒯𑒪𑒢𑓂𑒯𑒱 𑒥𑒳𑒠𑓂𑒡, 𑒯𑒹 𑒧𑒰𑒩
𑒢𑒯𑒱 𑒏𑒩𑒴 𑒔𑒱𑒢𑓂𑒞𑒰,
𑒂𑒃𑒮𑒿 𑒞𑒲𑒢 𑒧𑒰𑒮𑒏 𑒥𑒰𑒠,
𑒣𑓂𑒩𑒰𑒣𑓂𑒞 𑒏𑒩𑒥 𑒯𑒧 𑒢𑒱𑒩𑓂𑒫𑒰𑒝,
𑒧𑒰𑒩 𑒯𑒼𑒃𑒞 𑒣𑓂𑒩𑒮𑒢𑓂𑒢 𑒞𑒵𑒣𑓂𑒞
𑒑𑒹𑒪 𑒒𑒳𑒩𑒱।
𑒥𑒳𑒠𑓂𑒡 𑒡𑓄 𑒂𑒮𑒢 𑒣𑓂𑒩𑒰𑒝𑒫𑒰𑒨𑒳𑒏𑒹𑒿 𑒪𑒹𑒪𑒢𑓂𑒯𑒱 𑒔𑒱𑒞𑓂𑒞𑒧𑒹
𑒂 𑒔𑒱𑒞𑓂𑒞𑒏𑒹𑒿 𑒣𑓂𑒩𑒰𑒝𑒮𑒿 𑒖𑒼𑒛𑓃𑒱 𑒨𑒼𑒑 𑒠𑓂𑒫𑒰𑒩𑒰 𑒮𑒧𑒰𑒡𑒱 𑒏𑒋𑒪 𑒣𑓂𑒩𑒰𑒣𑓂𑒞।
𑒣𑓂𑒩𑒰𑒝𑒏 𑒖𑒐𑒢𑒹 𑒦𑒹𑒪 𑒢𑒱𑒩𑒼𑒡,
𑒦𑒴𑒧𑒱 𑒫𑒱𑒔𑒪𑒱𑒞, 𑒫𑒱𑒔𑒪𑒱𑒞 𑒦𑒹𑒪 𑒁𑒏𑒰𑒮 !!
𑒂𑒢𑒢𑓂𑒠 𑒣𑒴𑒕𑒪 𑒏𑒩𑒴 𑒁𑒢𑒳𑒑𑓂𑒩𑒯 𑒪𑒱𑒔𑓂𑒕𑒫𑒲 𑒮𑒦𑒣𑒩,
𑒏𑒱𑒋𑒏 𑒄 𑒡𑒩𑒰 𑒂 𑒂𑒏𑒰𑒮,
𑒠𑒪𑒧𑒪𑒱𑒞 𑒧𑒩𑓂𑒞𑓂𑒨 𑒂 𑒠𑒱𑒫𑓂𑒨𑒪𑒼𑒏 !!!
𑒥𑒳𑒠𑓂𑒡 𑒏𑒯𑒪𑒢𑓂𑒯𑒱 𑒂𑒥𑒱 𑒑𑒹𑒪 𑒕𑒲 𑒯𑒧 𑒥𑒰𑒯𑒩,
𑒕𑒼𑒛𑓃𑒱 𑒁𑒣𑒢 𑒣𑓂𑒩𑒏𑒼𑒭𑓂𑒚,
𑒧𑒰𑒞𑓂𑒩 𑒞𑒲𑒢 𑒧𑒰𑒮 𑒁𑒢𑒢𑓂𑒞𑒩
𑒕𑒼𑒛𑓃𑒥 𑒄 𑒠𑒹𑒯,
𑒢𑒱𑒩𑓂𑒫𑒰𑒝 𑒧𑒹 𑒩𑒯𑒥𑒰 𑒪𑒹𑒪 𑒮𑒞𑒞 !!!!
𑒂𑒢𑒢𑓂𑒠 𑒮𑒳𑒢𑒱 𑒄 𑒏𑒩𑒋 𑒪𑒰𑒑𑒪 𑒯𑒰𑒏𑓂𑒩𑒼𑒮,
𑒮𑒳𑒢𑒱 𑒫𑒱𑒪𑒰𑒣 𑒪𑒱𑒔𑓂𑒕𑒫𑒲 𑒑𑒝 𑒖𑒳𑒙𑒱 𑒮𑒹𑒯𑒼,
𑒫𑒱𑒪𑒰𑒣𑒧𑒹 𑒦𑓄 𑒑𑒹𑒪𑒰𑒯 𑒮𑓀𑒑 𑒖𑒼𑒛𑓃 ।
𑒥𑒳𑒠𑓂𑒡 𑒮𑒦𑒏𑒹𑒿 𑒥𑒳𑒗𑒰-𑒮𑒳𑒗𑒰,
𑒔𑒪𑒪𑒰𑒯 𑒫𑒻𑒬𑒰𑒪𑒲𑒏 𑒅𑒞𑓂𑒞𑒩 𑒠𑒱𑒬𑒰।
𑒣𑒯𑒳𑒿𑒔𑒱 𑒦𑒼𑒑𑒫𑒞𑒲 𑒢𑒑𑒩𑒲,
𑒠𑒹𑒪 𑒬𑒱𑒏𑓂𑒭𑒰 𑒖𑒹 𑒫𑒱𑒢𑒨 𑒁𑒕𑒱 𑒯𑒧𑒩 𑒫𑒔𑒢,
𑒖𑒹 𑒥𑒼𑒪 𑒁𑒕𑒱 𑒫𑒱𑒢𑒨𑒫𑒱𑒯𑒲𑒢,
𑒮𑒹 𑒁𑒕𑒱 𑒢𑒯𑒱 𑒡𑒩𑓂𑒧।
𑒞𑒐𑒢 𑒧𑒪𑓂𑒪𑒏 𑒢𑒑𑒩𑒲 𑒣𑒰𑒣𑒳𑒩 𑒖𑒰𑒋,
𑒁𑒣𑒢 𑒦𑒏𑓂𑒞 𑒔𑒳𑓀𑒠𑒏 𑒒𑒩𑒧𑒹 𑒏𑒋𑒪 𑒦𑒼𑒖𑒢 𑒥𑒳𑒠𑓂𑒡,
𑒠𑒋 𑒍𑒏𑒩𑒰 𑒅𑒣𑒠𑒹𑒬 𑒥𑒱𑒠𑒰 𑒦𑒹𑒪𑒰𑒯 𑒏𑒳𑒬𑒲𑒢𑒑𑒩𑒏 𑒠𑒱𑒮।
𑒮𑓀𑒑𑒹 𑒔𑒳𑒢𑓂𑒠𑒏 𑒣𑒰𑒩 𑒏𑒋𑒪 𑒃𑒩𑒰𑒫𑒞𑒲 𑒡𑒰𑒩
𑒮𑒩𑒼𑒫𑒩 𑒞𑒙𑒣𑒩 𑒏𑒋 𑒫𑒱𑒬𑓂𑒩𑒰𑒧,
𑒏𑒋 𑒯𑒱𑒩𑒝𑓂𑒨𑒫𑒞𑒲 𑒡𑒰𑒩𑒧𑒹 𑒮𑓂𑒢𑒰𑒢,
𑒏𑒯𑒪 𑒯𑒹 𑒂𑒢𑒢𑓂𑒠,
𑒠𑒳𑒢𑒴 𑒬𑒰𑒪𑒏 𑒑𑒰𑒕𑒏 𑒥𑒲𑒔 𑒏𑒩𑒥 𑒯𑒧 𑒬𑒨𑒢।
𑒂𑒖𑒳𑒏 𑒩𑒰𑒞𑒱𑒏 𑒅𑒞𑓂𑒞𑒩 𑒣𑒯𑒩,
𑒏𑒩𑒥 𑒣𑓂𑒩𑒰𑒣𑓂𑒞 𑒢𑒱𑒩𑓂𑒫𑒰𑒝।
𑒯𑒰𑒟𑒏 𑒥𑒢𑒰𑒋 𑒑𑒹𑒩𑒳𑒂,
𑒠𑒋 𑒙𑒰𑒿𑒑𑒣𑒩 𑒙𑒰𑒿𑒑,
𑒪𑓄 𑒠𑒯𑒱𑒢𑒰 𑒏𑒩𑒼𑒙 𑒏𑒯𑒪 𑒯𑒹 𑒂𑒢𑒢𑓂𑒠,
𑒥𑒖𑒰 𑒂𑒢𑒴 𑒧𑒪𑓂𑒪 𑒪𑒼𑒏𑒢𑒱𑒏𑒹𑒿,
𑒦𑒹𑒿𑒙 𑒏𑒩𑒥𑒰 𑒪𑒹𑒪 𑒢𑒱𑒩𑓂𑒫𑒰𑒝 𑒣𑒴𑒩𑓂𑒫।
𑒬𑒰𑒢𑓂𑒞 𑒠𑒱𑒬𑒰, 𑒬𑒰𑒢𑓂𑒞 𑒫𑓂𑒨𑒰𑒒𑓂𑒩-𑒦𑒰𑒪𑒳,
𑒬𑒰𑒢𑓂𑒞 𑒔𑒱𑒛𑓃𑒃 𑒬𑒰𑒢𑓂𑒞 𑒮𑒦𑒙𑒰 𑒖𑒢𑓂𑒞𑒳।
𑒂𑒥𑒱 𑒧𑒪𑓂𑒪 𑒪𑒼𑒏𑒢𑒱 𑒏𑒋𑒪 𑒫𑒱𑒪𑒰𑒣,
𑒧𑒳𑒠𑒰 𑒥𑒳𑒠𑓂𑒡 𑒠𑒋 𑒮𑒰𑓀𑒞𑓂𑒫𑒢𑒰 𑒒𑒳𑒩𑒹𑒪𑒢𑓂𑒯𑒱 𑒮𑒦𑒏𑒹𑒿।
𑒂𑒋𑒪 𑒮𑒳𑒦𑒠𑓂𑒩 𑒞𑓂𑒩𑒱𑒠𑓀𑒛𑒲 𑒮𑓀𑒢𑓂𑒨𑒰𑒮𑒲 𑒞𑒏𑒩 𑒥𑒰𑒠,
𑒣𑒰𑒥𑒱 𑒁𑒭𑓂𑒙𑒰𑓀𑒑 𑒧𑒰𑒩𑓂𑒑𑒏 𑒬𑒱𑒏𑓂𑒭𑒰,
𑒏𑒯𑒪 𑒮𑒳𑒦𑒠𑓂𑒩 𑒯𑒹 𑒏𑒩𑒳𑒝𑒰𑒫𑒞𑒰𑒩
𑒁𑒯𑒰𑒿𑒏 𑒧𑒵𑒞𑓂𑒨𑒳𑒏 𑒠𑒩𑓂𑒬𑒢𑒮𑒿 𑒣𑒯𑒱𑒢𑒹 𑒯𑒧 𑒏𑒩𑒋
𑒔𑒰𑒯𑒻𑒞 𑒕𑒲 𑒢𑒱𑒩𑓂𑒫𑒰𑒝 𑒣𑓂𑒩𑒰𑒣𑓂𑒞 ।
𑒥𑒻𑒮𑒪 𑒍 𑒣𑒩𑓂𑒫𑒞 𑒖𑒹𑒏𑒰𑒿
𑒂 𑒖𑒹𑒢𑒰 𑒧𑒱𑒗𑒰 𑒖𑒰𑒃𑒞 𑒁𑒕𑒱 𑒠𑒲𑒣
𑒯𑒫𑒰𑒏 𑒗𑒼𑒿𑒏𑒮𑒿,
𑒞𑒯𑒱𑒢𑒰 𑒏𑓂𑒭𑒝𑒹𑒧𑒹 𑒏𑒋𑒪𑒏 𑒢𑒱𑒩𑓂𑒫𑒰𑒝 𑒣𑓂𑒩𑒰𑒣𑓂𑒞।
𑒕𑒪 𑒄 𑒯𑒧𑒩 𑒁𑒢𑓂𑒞𑒱𑒧 𑒬𑒱𑒭𑓂𑒨 !
𑒮𑒳𑒦𑒠𑓂𑒩𑒏 𑒏𑒩𑒴 𑒁𑒢𑓂𑒞𑒱𑒧 𑒮𑓀𑒮𑓂𑒏𑒰𑒩 !
𑒥𑒲𑒞𑒪 𑒂𑒡 𑒩𑒰𑒞𑒱,
𑒥𑒳𑒠𑓂𑒡 𑒥𑒖𑒰𑒋 𑒮𑒦 𑒬𑒱𑒭𑓂𑒨𑒏𑒹𑒿,
𑒠𑒹𑒪 𑒣𑓂𑒩𑒰𑒞𑒱𑒧𑒼𑒏𑓂𑒭𑒏 𑒅𑒣𑒠𑒹𑒬,
𑒏𑒼𑒢𑒼 𑒬𑓀𑒏𑒰 𑒯𑒼𑒋 𑒞𑒿 𑒣𑒴𑒕𑒴 𑒂𑒃 ।
𑒁𑒢𑒱𑒩𑒳𑒠𑓂𑒡 𑒏𑒯𑒪 𑒢𑒯𑒱 𑒁𑒕𑒱 𑒬𑓀𑒏𑒰 𑒂𑒩𑓂𑒨 𑒮𑒞𑓂𑒨𑒧𑒹 𑒏𑒏𑒩𑒼।
𑒥𑒳𑒠𑓂𑒡 𑒞𑒐𑒢 𑒡𑓂𑒨𑒰𑒢 𑒏𑓄 𑒋𑒏𑒮𑒿 𑒔𑒰𑒩𑒱𑒧 𑒞𑒯𑒧𑒹 𑒣𑒯𑒳𑒿𑒔𑒱,
𑒣𑓂𑒩𑒰𑒣𑓂𑒞 𑒏𑒋𑒪 𑒬𑒰𑒢𑓂𑒞𑒱।
𑒦𑒹𑒪 𑒄 𑒧𑒯𑒰𑒣𑒩𑒱𑒢𑒱𑒩𑓂𑒫𑒰𑒝 !
𑒧𑒪𑓂𑒪 𑒮𑒦 𑒂𑒥𑒱 𑒅𑒚𑒹𑒪𑒏 𑒥𑒳𑒠𑓂𑒡𑒏𑒹𑒿 𑒮𑓂𑒫𑒩𑓂𑒝𑒏 𑒬𑒫-𑒬𑒱𑒫𑒱𑒏𑒰𑒧𑒹,
𑒢𑒰𑒑𑒠𑓂𑒫𑒰𑒩𑒮𑒿 𑒥𑒰𑒯𑒩 𑒦𑒋 𑒏𑒋𑒪𑒢𑓂𑒯𑒱 𑒣𑒰𑒩 𑒯𑒱𑒩𑒝𑓂𑒨𑒫𑒞𑒲 𑒡𑒰𑒩,
𑒧𑒳𑒠𑒰 𑒬𑒫𑒏𑒹𑒿 𑒔𑒢𑓂𑒠𑒢𑒮𑒿 𑒮𑒖𑒰𑒋,
𑒖𑒐𑒢 𑒪𑒑𑒰𑒍𑒪 𑒂𑒑𑒱, 𑒢𑒯𑒱 𑒅𑒚𑒪 𑒔𑒱𑒢𑓂𑒑𑒰𑒩𑒱 ।
𑒬𑒱𑒭𑓂𑒨 𑒏𑒰𑒬𑓂𑒨𑒣 𑒕𑒪 𑒥𑒱𑒔 𑒧𑒰𑒩𑓂𑒑,
𑒍𑒏𑒩𑒰 𑒁𑒥𑒱𑒞𑒹 𑒪𑒰𑒑𑒪 𑒔𑒱𑒞𑒰𑒧𑒹 𑒂𑒑𑒱 !
𑒧𑒪𑓂𑒪 𑒪𑒼𑒏𑒢𑒱 𑒥𑒲𑒕𑒱 𑒁𑒮𑓂𑒟𑒱 𑒡𑓄 𑒮𑓂𑒫𑒩𑓂𑒝𑒏𑒪𑒬𑒧𑒹,
𑒂𑒢𑒪 𑒢𑒑𑒩 𑒧𑒡𑓂𑒨,
𑒥𑒰𑒠𑒧𑒹 𑒏𑒋 𑒦𑒫𑒢 𑒣𑒴𑒖𑒰𑒏 𑒢𑒱𑒩𑓂𑒧𑒰𑒝,
𑒏𑒋𑒪 𑒁𑒮𑓂𑒟𑒱𑒏𑒪𑒬 𑒍𑒞𑒋 𑒫𑒱𑒩𑒰𑒖𑒧𑒰𑒢।
𑒤𑒹𑒩 𑒮𑒰𑒞 𑒠𑒹𑒬𑒏 𑒠𑒴𑒞,
𑒂𑒥𑒱 𑒧𑒿𑒑𑒪𑒏 𑒥𑒳𑒠𑓂𑒡𑒏 𑒁𑒮𑓂𑒟𑒱,
𑒧𑒳𑒠𑒰 𑒧𑒪𑓂𑒪𑒑𑒝 𑒏𑒋𑒪 𑒁𑒮𑓂𑒫𑒲𑒏𑒰𑒩,
𑒞𑒿 𑒥𑒖𑒛𑓃𑒪 𑒨𑒳𑒠𑓂𑒡-𑒨𑒳𑒠𑓂𑒡 ।
𑒮𑒦 𑒂𑒥𑒱 𑒒𑒹𑒩𑒪 𑒏𑒳𑒬𑒲𑒢𑒑𑒩,
𑒧𑒳𑒠𑒰 𑒠𑓂𑒩𑒼𑒝 𑒥𑓂𑒩𑒰𑒯𑓂𑒧𑒝 𑒥𑒳𑒗𑒰𑒍𑒪 𑒠𑒳𑒢𑒴 𑒣𑒏𑓂𑒭।
𑒥𑒰𑒿𑒙𑒱 𑒁𑒮𑓂𑒟𑒱𑒏𑒹𑒿 𑒂𑒚 𑒦𑒰𑒑,
𑒠𑓂𑒩𑒼𑒝 𑒪𑒹𑒪𑒏 𑒍 𑒒𑒙 𑒂 𑒑𑒝 𑒣𑒱𑒮𑒪 𑒕𑒰𑒅𑒩 𑒥𑒳𑒠𑓂𑒡𑒏 ।
𑒮𑒦 𑒒𑒳𑒩𑒪𑒰𑒯 𑒁𑒣𑒢 𑒠𑒹𑒬 𑒂𑒥।
𑒁𑒮𑓂𑒟𑒱 𑒏𑒪𑒬 𑒕𑒰𑒅𑒩 𑒣𑒩 𑒥𑒢𑒰𑒋 𑒮𑓂𑒞𑒴𑒣,
𑒏𑒩𑒋 𑒑𑒹𑒪𑒰𑒯 𑒣𑒴𑒖𑒰 𑒁𑒩𑓂𑒔𑒢𑒰 𑒖𑒰𑒋,
𑒠𑒮𑒙𑒰 𑒮𑓂𑒞𑒴𑒣 𑒥𑒢𑒱 𑒦𑒹𑒪 𑒚𑒰𑒜𑓃,
𑒖𑒞𑒋 𑒁𑒐𑒝𑓂𑒛 𑒖𑓂𑒨𑒼𑒞𑒱 𑒂 𑒒𑒝𑓂𑒙𑒰𑒏 𑒯𑒼𑒋 𑒢𑒱𑒢𑒰𑒠।
𑒤𑒹𑒩 𑒩𑒰𑒖𑒑𑒵𑒯𑒮𑒿 𑒂𑒋𑒪 𑒣𑒰𑒿𑒔 𑒮𑒋 𑒦𑒱𑒏𑓂𑒭𑒳,
𑒂𑒢𑒢𑓂𑒠𑒏𑒹𑒿 𑒠𑒹𑒪 𑒑𑒹𑒪 𑒄 𑒏𑒰𑒖,
𑒥𑒳𑒠𑓂𑒡𑒏 𑒮𑒦 𑒬𑒱𑒏𑓂𑒭𑒰𑒏𑒹𑒿 𑒏𑒯𑒱 𑒮𑒳𑒢𑒰𑒆,
𑒯𑒼𑒋𑒞 𑒄 𑒮𑒦 𑒮𑒧𑒑𑓂𑒩 𑒂𑒥।
𑒯𑒧 𑒄 𑒕𑒪𑒯𑒳𑒿 𑒮𑒳𑒢𑒢𑒹 𑒋𑒯𑒱 𑒞𑒩𑒯𑒹𑒿,
𑒏𑒋𑒪 𑒮𑒧𑓂𑒣𑒴𑒩𑓂𑒝 𑒫𑒩𑓂𑒝𑒢 𑒢𑒲𑒏𑒹।
𑒏𑒰𑒪𑒰𑒢𑓂𑒞𑒩𑒧𑒹 𑒁𑒬𑒼𑒏 𑒮𑓂𑒞𑒴𑒣𑒮𑒿 𑒪𑒋 𑒡𑒰𑒞𑒳 𑒏𑒋 𑒏𑒋 𑒏𑓄 𑒮𑒋 𑒫𑒱𑒦𑒰𑒑,
𑒥𑒢𑒰𑒍𑒪 𑒏𑒋𑒏 𑒮𑒋 𑒮𑓂𑒞𑒴𑒣,
𑒬𑓂𑒩𑒠𑓂𑒡𑒰𑒏 𑒣𑓂𑒩𑒞𑒲𑒏।
𑒖𑒯𑒱𑒨𑒰 𑒡𑒩𑒱 𑒁𑒕𑒱 𑒖𑒢𑓂𑒧, 𑒁𑒕𑒱 𑒠𑒳𑒐,
𑒣𑒳𑒢𑒩𑓂𑒖𑒢𑓂𑒧𑒮𑒿 𑒧𑒳𑒏𑓂𑒞𑒱 𑒁𑒕𑒱 𑒧𑒰𑒞𑓂𑒩 𑒮𑒳𑒐,
𑒞𑒏𑒩 𑒧𑒰𑒩𑓂𑒑 𑒠𑒹𑒐𑒰𑒍𑒪 𑒖𑒹 𑒧𑒯𑒰𑒧𑒳𑒢𑒱,
𑒬𑒰𑒏𑓂𑒨𑒧𑒳𑒢𑒱 𑒮𑒢 𑒠𑒼𑒮𑒩 𑒏𑒹 𑒁𑒕𑒱 𑒬𑒳𑒠𑓂𑒡।
𑒁𑒮𑒘𑓂𑒖𑒰𑒞𑒱 𑒧𑒢𑒏 𑒄 𑒮𑒧𑓂𑒥𑒪,
𑒠𑒹𑒪𑒯𑒳𑒿 𑒁𑒯𑒰𑒿 𑒯𑒹 𑒥𑒳𑒠𑓂𑒡
𑒯𑒹 𑒥𑒳𑒠𑓂𑒡
𑒯𑒹 𑒥𑒳𑒠𑓂𑒡 ।
No comments:
Post a Comment
"विदेह" प्रथम मैथिली पाक्षिक ई पत्रिका http://www.videha.co.in/:-
सम्पादक/ लेखककेँ अपन रचनात्मक सुझाव आ टीका-टिप्पणीसँ अवगत कराऊ, जेना:-
1. रचना/ प्रस्तुतिमे की तथ्यगत कमी अछि:- (स्पष्ट करैत लिखू)|
2. रचना/ प्रस्तुतिमे की कोनो सम्पादकीय परिमार्जन आवश्यक अछि: (सङ्केत दिअ)|
3. रचना/ प्रस्तुतिमे की कोनो भाषागत, तकनीकी वा टंकन सम्बन्धी अस्पष्टता अछि: (निर्दिष्ट करू कतए-कतए आ कोन पाँतीमे वा कोन ठाम)|
4. रचना/ प्रस्तुतिमे की कोनो आर त्रुटि भेटल ।
5. रचना/ प्रस्तुतिपर अहाँक कोनो आर सुझाव ।
6. रचना/ प्रस्तुतिक उज्जवल पक्ष/ विशेषता|
7. रचना प्रस्तुतिक शास्त्रीय समीक्षा।
अपन टीका-टिप्पणीमे रचना आ रचनाकार/ प्रस्तुतकर्ताक नाम अवश्य लिखी, से आग्रह, जाहिसँ हुनका लोकनिकेँ त्वरित संदेश प्रेषण कएल जा सकय। अहाँ अपन सुझाव ई-पत्र द्वारा editorial.staff.videha@gmail.com पर सेहो पठा सकैत छी।
"विदेह" मानुषिमिह संस्कृताम् :- मैथिली साहित्य आन्दोलनकेँ आगाँ बढ़ाऊ।- सम्पादक। http://www.videha.co.in/
पूर्वपीठिका : इंटरनेटपर मैथिलीक प्रारम्भ हम कएने रही 2000 ई. मे अपन भेल एक्सीडेंट केर बाद, याहू जियोसिटीजपर 2000-2001 मे ढेर रास साइट मैथिलीमे बनेलहुँ, मुदा ओ सभ फ्री साइट छल से किछु दिनमे अपने डिलीट भऽ जाइत छल। ५ जुलाई २००४ केँ बनाओल “भालसरिक गाछ” जे http://gajendrathakur.blogspot.com/ पर एखनो उपलब्ध अछि, मैथिलीक इंटरनेटपर प्रथम उपस्थितिक रूपमे अखनो विद्यमान अछि। फेर आएल “विदेह” प्रथम मैथिली पाक्षिक ई-पत्रिका http://www.videha.co.in/पर। “विदेह” देश-विदेशक मैथिलीभाषीक बीच विभिन्न कारणसँ लोकप्रिय भेल। “विदेह” मैथिलक लेल मैथिली साहित्यक नवीन आन्दोलनक प्रारम्भ कएने अछि। प्रिंट फॉर्ममे, ऑडियो-विजुअल आ सूचनाक सभटा नवीनतम तकनीक द्वारा साहित्यक आदान-प्रदानक लेखकसँ पाठक धरि करबामे हमरा सभ जुटल छी। नीक साहित्यकेँ सेहो सभ फॉरमपर प्रचार चाही, लोकसँ आ माटिसँ स्नेह चाही। “विदेह” एहि कुप्रचारकेँ तोड़ि देलक, जे मैथिलीमे लेखक आ पाठक एके छथि। कथा, महाकाव्य,नाटक, एकाङ्की आ उपन्यासक संग, कला-चित्रकला, संगीत, पाबनि-तिहार, मिथिलाक-तीर्थ,मिथिला-रत्न, मिथिलाक-खोज आ सामाजिक-आर्थिक-राजनैतिक समस्यापर सारगर्भित मनन। “विदेह” मे संस्कृत आ इंग्लिश कॉलम सेहो देल गेल, कारण ई ई-पत्रिका मैथिलक लेल अछि, मैथिली शिक्षाक प्रारम्भ कएल गेल संस्कृत शिक्षाक संग। रचना लेखन आ शोध-प्रबंधक संग पञ्जी आ मैथिली-इंग्लिश कोषक डेटाबेस देखिते-देखिते ठाढ़ भए गेल। इंटरनेट पर ई-प्रकाशित करबाक उद्देश्य छल एकटा एहन फॉरम केर स्थापना जाहिमे लेखक आ पाठकक बीच एकटा एहन माध्यम होए जे कतहुसँ चौबीसो घंटा आ सातो दिन उपलब्ध होअए। जाहिमे प्रकाशनक नियमितता होअए आ जाहिसँ वितरण केर समस्या आ भौगोलिक दूरीक अंत भऽ जाय। फेर सूचना-प्रौद्योगिकीक क्षेत्रमे क्रांतिक फलस्वरूप एकटा नव पाठक आ लेखक वर्गक हेतु, पुरान पाठक आ लेखकक संग, फॉरम प्रदान कएनाइ सेहो एकर उद्देश्य छ्ल। एहि हेतु दू टा काज भेल। नव अंकक संग पुरान अंक सेहो देल जा रहल अछि। विदेहक सभटा पुरान अंक pdf स्वरूपमे देवनागरी, मिथिलाक्षर आ ब्रेल, तीनू लिपिमे, डाउनलोड लेल उपलब्ध अछि आ जतए इंटरनेटक स्पीड कम छैक वा इंटरनेट महग छैक ओतहु ग्राहक बड्ड कम समयमे ‘विदेह’ केर पुरान अंकक फाइल डाउनलोड कए अपन कंप्युटरमे सुरक्षित राखि सकैत छथि आ अपना सुविधानुसारे एकरा पढ़ि सकैत छथि।
मुदा ई तँ मात्र प्रारम्भ अछि।
अपन टीका-टिप्पणी एतए पोस्ट करू वा अपन सुझाव ई-पत्र द्वारा editorial.staff.videha@gmail.com पर पठाऊ।