गजेन्द्र ठाकुर- नाटक- संकर्षण

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒢𑒰𑒙𑒏- 𑒮𑓀𑒏𑒩𑓂𑒭𑒝

(𑒋𑒏-𑒋𑒏 𑒁𑓀𑒏𑒏 𑒠𑒴 𑒏𑒪𑓂𑒪𑒼𑒪 𑒂 𑒠𑒴-𑒠𑒴 𑒁𑓀𑒏𑒏 𑒞𑒲𑒢𑒙𑒰 𑒏𑒪𑓂𑒪𑒼𑒪- 𑒧𑒰𑒢𑒹 𑒣𑒰𑒿𑒔 𑒏𑒪𑓂𑒪𑒼𑒪𑒏 𑒁𑒢𑓂𑒞𑒩𑓂𑒑𑒞 𑒂𑒚 𑒁𑓀𑒏𑒏 𑒧𑒻𑒟𑒱𑒪𑒲 𑒢𑒰𑒙𑒏)
𑒣𑒰𑒞𑓂𑒩 𑒣𑒩𑒱𑒔𑒨
𑒮𑓀𑒏𑒩𑓂𑒭𑒝- 𑒁𑒦𑒱𑒢𑒹𑒞𑒰 𑒂 𑒐𑒪𑒢𑒰𑒨𑒏 𑒠𑒳𑒢𑒴- 𑒪𑒱𑒏𑒪𑒱𑒏 𑒏𑒩𑒻𑒞 𑒦𑒴𑒞 𑒮𑒢 𑒏𑒰𑒩𑒲 𑒩𑓀𑒑, 𑒏𑒞𑒹𑒏 𑒏𑒰𑒩𑒲 𑒮𑒹 𑒍𑒯𑒱 𑒐𑒰𑒣𑒛𑓃𑒱𑒏𑒹𑒿 𑒠𑒹𑒐𑒱 𑒪𑒱𑒁 𑒞𑒞𑒹𑒏।
𑒮𑓀𑒏𑒩𑓂𑒭𑒝𑒏 𑒥𑒰𑒥𑒴
𑒮𑓀𑒏𑒩𑓂𑒭𑒝𑒏 𑒏𑒢𑒱𑒨𑒰𑒿
𑒦𑒰𑒭𑓂𑒏𑒩
𑒦𑒰𑒭𑓂𑒏𑒩𑒏 𑒥𑒰𑒥𑒴𑒖𑒲𑒏 𑒮𑓀𑒑𑒲
𑒥𑓀𑒑𑒰𑒪𑒲 𑒥𑒰𑒥𑒴
𑒏𑒪𑒏𑓂𑒙𑒩
𑒏𑒪𑒏𑓂𑒙𑒩𑒏 𑒮𑓂𑒙𑒹𑒢𑒼
𑒞𑒲𑒢 𑒙𑒰 𑒏𑒰𑒩𑒲 𑒏𑒳𑒏𑒴𑒩- 𑒋𑒏𑒩 𑒁𑒦𑒱𑒢𑒨 𑒞𑒲𑒢 𑒑𑒼𑒙𑒹 𑒏𑒰𑒩𑒲 𑒏𑒣𑒛𑓃𑒰 𑒣𑒯𑒱𑒛𑓃𑒱 𑒏𑓄 𑒮𑒏𑒻𑒞 𑒕𑒟𑒱
𑒋𑒏𑒙𑒰 𑒯𑒪𑒫𑒰𑒄- 𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏 𑒯𑒱𑒢𑒏𑒰 𑒪𑒑 𑒧𑒱𑒚𑒰𑒄 𑒕𑒢𑒥𑒰𑒏 𑒏𑒩𑒰𑒯, 𑒥𑒛𑓃𑒏𑒰 𑒧𑒼𑒙𑒑𑒩 𑒥𑒛𑓃𑒠𑒰𑒧𑒲, 𑒋𑒏𑒙𑒰 𑒧𑒼𑒙𑒑𑒩 𑒪𑒰𑒚𑒲 𑒂 𑒋𑒏 𑒑𑒼𑒙𑒹 𑒏𑒩𑓂𑒧𑒔𑒰𑒩𑒲 𑒩𑒯𑒞𑒢𑓂𑒯𑒱 𑒞𑒿 𑒯𑒱𑒢𑒏𑒰 𑒁𑒦𑒱𑒢𑒨𑒧𑒹 𑒮𑒳𑒫𑒱𑒡𑒰 𑒯𑒹𑒞𑒢𑓂𑒯𑒱।
𑒯𑒪𑒫𑒰𑒄 𑒖𑒲𑒏 𑒏𑒩𑓂𑒧𑒔𑒰𑒩𑒲 𑒪𑒳𑒞𑓂𑒞𑒲 𑒗𑒰 𑒞𑒐𑒢 𑒁𑒥𑒮𑓂𑒮𑒹
𑒋𑒏𑒙𑒰 𑒬𑒱𑒫𑒪𑒱𑓀𑒑-𑒧𑒢𑓂𑒠𑒱𑒩, 𑒤𑒹𑒩 𑒏𑒢𑒹𑒏 𑒅𑒖𑒩𑒰 𑒠𑒴𑒡- 𑒔𑒴𑒢𑒏𑒹𑒿 𑒒𑒼𑒩𑒱 𑒥𑒢𑒰 𑒮𑒏𑒻𑒞 𑒕𑒲।
𑒋𑒏𑒙𑒰 𑒣𑒳𑒖𑒹𑒑𑒩𑒲 𑒂 𑒥𑒛𑓃 𑒩𑒰𑒮 𑒦𑒏𑓂𑒞- 𑒏𑒱𑒕𑒳 𑒑𑒼𑒙𑒹 𑒠𑒩𑓂𑒬𑒏𑒏𑒹𑒿 𑒥𑒖𑒰 𑒏𑒋 𑒮𑒧𑓂𑒧𑒱𑒪𑒱𑒞 𑒮𑒹𑒯𑒼 𑒏𑒋 𑒮𑒏𑒻𑒞 𑒕𑒲।
𑒑𑒼𑒢𑒩 𑒦𑒰𑒃
𑒢𑒱𑒞𑓂𑒨𑒰 𑒏𑒰𑒏𑒰
𑒖𑒨𑒩𑒰𑒧
𑒪𑒰𑒪 𑒏𑒰𑒏𑒰
𑒪𑒰𑒪 𑒏𑒰𑒏𑒲
𑒒𑒙𑒏
𑒠𑒴 𑒙𑒰 𑒣𑒳𑒪𑒱𑒮 𑒂 𑒋𑒏𑒙𑒰 𑒍𑒏𑒩 𑒁𑒤𑒮𑒩
𑒋𑒏𑒙𑒰 𑒥𑒴𑒜𑓃𑒲- 𑒙𑓂𑒩𑒹𑒢𑒏 𑒣𑒮𑒱𑒢𑓂𑒖𑒩
𑒔𑒼𑒩 𑒥𑒖𑒰𑒩𑒏 𑒠𑒼𑒏𑒰𑒢𑒠𑒰𑒩, 𑒥𑒖𑒰𑒩𑒧𑒹 𑒂𑒢 𑒠𑒼𑒏𑒰𑒢𑒠𑒰𑒩 𑒂 𑒦𑒲𑒛𑓃-𑒦𑒩𑒏𑓂𑒏𑒰



𑒣𑒯𑒱𑒪 𑒏𑒪𑓂𑒪𑒼𑒪- 𑒣𑒯𑒱𑒪 𑒁𑓀𑒏
(𑒑𑒰𑒧। 𑒪𑒑𑒏 𑒖𑒱𑒪𑒰 𑒏𑒰𑒩𑓂𑒨𑒰𑒪𑒨 𑒖𑒞𑒋 𑒑𑒰𑒧𑒏 𑒪𑒼𑒏𑒏 𑒂𑒿𑒐𑒱𑒧𑒹 𑒠𑒳𑒢𑒱𑒨𑒰𑒿𑒏 𑒮𑒦𑒮𑒿 𑒣𑒻𑒒 𑒯𑒰𑒏𑒱𑒧 𑒏𑒪𑒏𑓂𑒙𑒩 𑒥𑒻𑒮𑒻𑒞 𑒕𑒟𑒱। 𑒖𑒏𑒩𑒰 𑒁𑒦𑒱𑒢𑒹𑒞𑒰-𑒁𑒦𑒱𑒢𑒹𑒞𑓂𑒩𑒲 𑒏𑒰𑒪𑒱𑒠𑒰𑒮𑒏 “𑒃𑒞𑒱 𑒬𑒩𑒮𑓀𑒡𑒰𑒢𑓀 𑒢𑒰𑒙𑒨𑒞𑒱” 𑒖𑒹𑒏𑒰𑒿 𑒮𑒰𑓀𑒏𑒹𑒞𑒱𑒏 𑒩𑒴𑒣𑒧𑒹 𑒠𑒹𑒐𑒰 𑒮𑒏𑒻𑒞 𑒕𑒟𑒱। 𑒥𑒰𑒠𑒧𑒹 𑒙𑓂𑒩𑒹𑒢𑒏 𑒨𑒰𑒞𑓂𑒩𑒰𑒏 𑒂 𑒠𑒱𑒪𑓂𑒪𑒲 𑒢𑒑𑒩𑒏 𑒫𑒩𑓂𑒝𑒢 𑒮𑒹𑒯𑒼 𑒁𑒯𑒱𑒢𑒰 𑒏𑓄 𑒮𑒏𑒻𑒞 𑒕𑒟𑒱।)
(𑒦𑒰𑒭𑓂𑒏𑒩 𑒁𑒣𑒢 𑒠𑒪𑒰𑒢𑒣𑒩 𑒥𑒻𑒮𑒪 𑒕𑒟𑒱 𑒂𑒏𑒱 𑒍𑒧𑓂𑒯𑒩𑒮𑒿 𑒮𑓀𑒏𑒩𑓂𑒭𑒝 𑒁𑒥𑒻𑒞 𑒕𑒟𑒱।)

𑒮𑓀𑒏𑒩𑓂𑒭𑒝: 𑒦𑒰𑒭𑓂𑒏𑒩 𑒦𑒰𑒃, 𑒮𑒳𑒢𑒪𑒯𑒳𑒿 𑒏𑒼𑒢𑒼 𑒏𑒰𑒖 𑒁𑒙𑒏𑒪 𑒁𑒕𑒱।
𑒦𑒰𑒭𑓂𑒏𑒩: 𑒯𑒿 𑒦𑒰𑒃। 𑒏𑒪𑒏𑓂𑒙𑒩 𑒂𑒤𑒱𑒮𑒧𑒹 𑒋𑒏𑒙𑒰 𑒏𑒰𑒖 𑒍𑒗𑒩𑒰𑒨𑒪 𑒁𑒕𑒱।
𑒮𑓀𑒏𑒩𑓂𑒭𑒝: 𑒏𑒼𑒢𑒼 𑒏𑒰𑒖 𑒣𑒛𑓃𑒪𑒰𑒣𑒩 𑒯𑒧𑒩𑒰𑒮𑒿 𑒏𑒯𑒥। 𑒏𑒪𑒏𑓂𑒙𑒩𑒏 𑒍𑒯𑒱𑒚𑒰𑒧 𑒦𑒼𑒩-𑒮𑒰𑒿𑒗𑒏 𑒥𑒻𑒮𑒰𑒩𑒲 𑒯𑒼𑒃𑒞 𑒁𑒕𑒱 𑒯𑒧𑒩। 𑒒𑓀𑒙𑒰𑒏-𑒒𑓀𑒙𑒰 𑒥𑒻𑒮𑒪 𑒩𑒯𑒻𑒞 𑒕𑒲, 𑒂𑒥𑒋 𑒪𑒑𑒻𑒞 𑒕𑒲 𑒞𑒿 𑒩𑒼𑒏𑒱 𑒏𑓄 𑒤𑒹𑒩 𑒥𑒻𑒮𑒰 𑒪𑒻𑒞 𑒁𑒕𑒱, 𑒠𑒼𑒮𑒩-𑒠𑒼𑒮𑒩 𑒑𑒣 𑒮𑒦 𑒬𑒳𑒩𑒴 𑒏𑒋 𑒠𑒻𑒞 𑒁𑒕𑒱।
𑒦𑒰𑒭𑓂𑒏𑒩: 𑒚𑒲𑒏 𑒕𑒻𑒏 𑒦𑒰𑒃 𑒖𑒲। 𑒏𑒼𑒢𑒼 𑒖𑒩𑒴𑒩𑒲 𑒣𑒛𑓃𑒞 𑒞𑒿 𑒏𑒯𑒥। 𑒢𑒰𑒧 𑒏𑒲 𑒕𑒢𑓂𑒯𑒱 𑒯𑒳𑒢𑒏𑒩 𑒮𑒹𑒯𑒼 𑒢𑒯𑒱 𑒥𑒳𑒗𑒪 𑒁𑒕𑒱 𑒯𑒧𑒩𑒰।
𑒮𑓀𑒏𑒩𑓂𑒭𑒝: 𑒥𑒛𑓂𑒛 𑒢𑒧𑒑𑒩 𑒢𑒰𑒧 𑒕𑒢𑓂𑒯𑒱, 𑒦𑒰.𑒣𑓂𑒩.𑒮𑒹. 𑒣𑓂𑒩𑒬𑒰𑓀𑒞। 𑒂𑒥 𑒦𑒰.𑒣𑓂𑒩.𑒮𑒹. 𑒏𑒹𑒩 𑒣𑒴𑒩𑓂𑒝 𑒩𑒴𑒣 𑒯𑒳𑒢𑒏𑒰𑒮𑒿 𑒏𑒹 𑒣𑒳𑒕𑒞𑒢𑓂𑒯𑒱, 𑒮𑒹 𑒣𑓂𑒩𑒬𑒰𑓀𑒞𑒹 𑒏𑒯𑒻𑒞 𑒕𑒢𑓂𑒯𑒱।
𑒦𑒰𑒭𑓂𑒏𑒩: 𑒦𑒰𑒩𑒞𑒲𑒨 𑒣𑓂𑒩𑒬𑒰𑒮𑒢𑒱𑒏 𑒮𑒹𑒫𑒰𑒏 𑒮𑓀𑒏𑓂𑒭𑒱𑒣𑓂𑒞 𑒩𑒴𑒣 𑒕𑒻𑒏 𑒦𑒰.𑒣𑓂𑒩.𑒮𑒹., 𑒄 𑒯𑒳𑒢𑒏𑒩 𑒢𑒰𑒧𑒏 𑒁𑓀𑒑 𑒢𑒯𑒱 𑒯𑒹𑒞𑒢𑓂𑒯𑒱।
𑒮𑓀𑒏𑒩𑓂𑒭𑒝: 𑒁𑒔𑓂𑒕𑒰 𑒞𑒿 𑒤𑒹𑒩 𑒮𑒻𑒯 𑒯𑒼𑒨𑒞𑒻𑒏। 𑒞𑒰𑒯𑒱 𑒠𑓂𑒫𑒰𑒩𑒹 𑒢𑒹𑒧-𑒣𑓂𑒪𑒹𑒙 𑒣𑒩 𑒢𑒰𑒧𑒏 𑒢𑒲𑒔𑒰𑒿𑒧𑒹 𑒄 𑒪𑒱𑒐𑒪 𑒩𑒯𑒻𑒞 𑒕𑒻𑒏, 𑒦𑒰.𑒣𑓂𑒩.𑒮𑒹.।
𑒦𑒰𑒭𑓂𑒏𑒩: 𑒚𑒲𑒏 𑒕𑒻𑒏 𑒦𑒰𑒃 𑒖𑒲। 𑒏𑒼𑒢𑒼 𑒖𑒩𑒴𑒩𑒲 𑒣𑒛𑓃𑒞 𑒞𑒿 𑒁𑒯𑒰𑒿𑒏𑒹𑒿 𑒏𑒯𑒥।
(𑒮𑓀𑒏𑒩𑓂𑒭𑒝 𑒔𑒪𑒱 𑒖𑒰𑒃𑒞 𑒕𑒟𑒱 𑒂 𑒦𑒰𑒭𑓂𑒏𑒩 𑒮𑒼𑒔𑒋 𑒪𑒑𑒻𑒞 𑒕𑒟𑒱 𑒖𑒹 𑒣𑒩𑒳𑒏𑒰𑒿 𑒖𑒐𑒢 𑒋𑒏𑒙𑒰 𑒂𑒢 𑒏𑒰𑒖 𑒮𑓀𑒏𑒩𑓂𑒭𑒝𑒮𑒿 𑒣𑒛𑓃𑒪 𑒩𑒯𑒋 𑒞𑒿 𑒍 𑒏𑒲 𑒏𑒯𑒢𑒹 𑒩𑒯𑒟𑒱, 𑒦𑒰𑒭𑓂𑒏𑒩 𑒮𑒼𑒔𑒱𑒞𑒹 𑒕𑒟𑒱 𑒂𑒏𑒱 𑒏𑒢𑒹𑒏 𑒠𑒴𑒩𑒧𑒹 𑒣𑒕𑒳𑒪𑒏𑒰 𑒑𑒣𑒏 𑒫𑒩𑓂𑒝𑒢𑒏 𑒪𑒹𑒪 𑒢𑒰𑒙𑒏𑒏 𑒢𑒱𑒩𑓂𑒠𑒹𑒬𑒏 𑒮𑓀𑒏𑒩𑓂𑒭𑒝𑒏𑒹𑒿 𑒧𑓀𑒔𑒣𑒩 𑒏𑒢𑒹𑒏 𑒠𑒼𑒮𑒩 𑒏𑒰𑒞 𑒥𑒖𑒰 𑒪𑒻𑒞 𑒕𑒟𑒱।)
𑒦𑒰𑒭𑓂𑒏𑒩: (𑒧𑒼𑒢𑒯𑒱 𑒧𑒼𑒢) 𑒄𑒯𑒼 𑒏𑒧𑒰𑒪 𑒕𑒟𑒱 𑒣𑒩𑒳𑒏𑒰𑒿 𑒖𑒹 𑒏𑒰𑒖 𑒣𑒛𑓃𑒪 𑒩𑒯𑒋 𑒞𑒿 𑒥𑒖𑒻𑒞 𑒩𑒯𑒟𑒱 𑒖𑒹...
𑒮𑓀𑒏𑒩𑓂𑒭𑒝: 𑒣𑒩𑒳𑒏𑒰𑒿 𑒮𑒰𑒪 𑒏𑒱𑒋𑒏 𑒢𑒯𑒱 𑒏𑒯𑒪𑒯𑒳𑒿, 𑒏𑒏𑒩-𑒏𑒏𑒩 𑒏𑒰𑒖 𑒢𑒯𑒱 𑒏𑒩𑒋𑒪𑒯𑒳𑒿। 𑒧𑒳𑒠𑒰 𑒋𑒯𑒱 𑒥𑒹𑒩 𑒞𑒿 𑒏𑒼𑒢𑒼 𑒖𑒼𑒑𑒰𑒩𑒹 𑒢𑒯𑒱 𑒁𑒕𑒱। 𑒏𑒯𑒱𑒨𑒼 𑒏𑒼𑒢𑒼 𑒏𑒰𑒖 𑒢𑒯𑒱 𑒏𑒯𑒢𑒹 𑒕𑒪𑒯𑒳𑒿 𑒂 𑒂𑒃 𑒏𑒯𑒪𑒯𑒳𑒿 𑒞𑒿 𑒯𑒧𑒩𑒰𑒮𑒿 𑒢𑒯𑒱 𑒦𑓄 𑒣𑒰𑒥𑒱 𑒩𑒯𑒪 𑒁𑒕𑒱। 𑒂 𑒮𑒹 𑒖𑒰𑒢𑒱 𑒏𑒔𑒼𑒙 𑒦𑓄 𑒩𑒯𑒪 𑒁𑒕𑒱।
(𑒮𑓀𑒏𑒩𑓂𑒭𑒝 𑒤𑒹𑒩 𑒔𑒪𑒱 𑒖𑒰𑒃𑒞 𑒕𑒟𑒱, 𑒦𑒰𑒭𑓂𑒏𑒩 𑒮𑒹𑒯𑒼 𑒖𑒰𑒃𑒞 𑒕𑒟𑒱 𑒧𑒳𑒠𑒰 𑒞𑒐𑒢𑒹 𑒮𑓀𑒏𑒩𑓂𑒭𑒝 𑒤𑒹𑒩 𑒁𑒥𑒻𑒞 𑒕𑒟𑒱।)
𑒮𑓀𑒏𑒩𑓂𑒭𑒝: 𑒮𑒞𑓂𑒨𑒰𑒩𑓂𑒟𑒲𑒏 𑒥𑒰𑒪-𑒥𑒔𑓂𑒔𑒰 𑒮𑒦 𑒥𑒛𑓃 𑒙𑒹𑒜𑓃। 𑒏𑒯𑒱𑒨𑒼 𑒒𑒳𑒩𑒱 𑒏𑒋 𑒢𑒯𑒱 𑒂𑒨𑒪 𑒕𑒪 𑒦𑒹𑒿𑒙 𑒏𑒩𑒋। 𑒂 𑒂𑒃 𑒏𑒰𑒖 𑒣𑒛𑓃𑒪 𑒕𑒻𑒏 𑒞𑒐𑒢 𑒂𑒨𑒪 𑒁𑒕𑒱।
(𑒮𑓀𑒏𑒩𑓂𑒭𑒝 𑒤𑒹𑒩 𑒔𑒪𑒱 𑒖𑒰𑒃𑒞 𑒕𑒟𑒱, 𑒦𑒰𑒭𑓂𑒏𑒩 𑒞𑒐𑒢𑒹 𑒁𑒥𑒻𑒞 𑒕𑒟𑒱।)

𑒦𑒰𑒭𑓂𑒏𑒩: (𑒋𑒏𑒙𑒰 𑒣𑒳𑒩𑒰𑒢 𑒑𑒣 𑒮𑒼𑒔𑒻𑒞- 𑒥𑒰𑒥𑒴𑒖𑒲𑒏 𑒮𑓀𑒑𑒲 𑒋𑒏 𑒠𑒱𑒢 𑒫𑒰𑒞𑓂𑒮𑒪𑓂𑒨𑒮𑒿 𑒋𑒏 𑒥𑒹𑒩 𑒏𑒼𑒢𑒼 𑒥𑒓𑓂𑒑𑒰𑒪𑒲 𑒥𑒰𑒥𑒴𑒏𑒹𑒿, 𑒦𑒰𑒭𑓂𑒏𑒩𑒏 𑒮𑒼𑒿𑒗𑒰𑒧𑒹 𑒋𑒏 𑒑𑒼𑒙 𑒥𑒛𑓃 𑒢𑒲𑒏 𑒑𑒣 𑒏𑒯𑒢𑒹 𑒕𑒪𑒰𑒯।)
𑒦𑒰𑒭𑓂𑒏𑒩𑒏 𑒥𑒰𑒥𑒴𑒖𑒲𑒏 𑒮𑓀𑒑𑒲: (𑒧𑓀𑒔𑒏 𑒠𑒼𑒮𑒩 𑒏𑒰𑒞 𑒏𑒼𑒢𑒼 𑒥𑓀𑒑𑒰𑒪𑒲 𑒥𑒰𑒥𑒴𑒏𑒹𑒿 𑒦𑒰𑒭𑓂𑒏𑒩𑒏𑒹𑒿 𑒠𑒹𑒐𑒥𑒻𑒞 𑒂 𑒏𑒯𑒻𑒞) 𑒠𑒹𑒐𑒴 𑒠𑒰𑒠𑒰। 𑒄 𑒕𑒟𑒱 𑒦𑒰𑒭𑓂𑒏𑒩। 𑒯𑒧𑒩 𑒁𑒞𑓂𑒨𑓀𑒞 𑒣𑓂𑒩𑒱𑒨 𑒧𑒱𑒞𑓂𑒩 𑒮𑒞𑓂𑒨𑒰𑒩𑓂𑒟𑒲𑒏 𑒥𑒹𑒙𑒰।
𑒥𑓀𑒑𑒰𑒪𑒲 𑒥𑒰𑒥𑒴: 𑒯𑒳𑒢𑒏𑒩 𑒥𑒹𑒙𑒰 𑒞𑒿 𑒥𑒛𑓂𑒛 𑒕𑒼𑒙 𑒕𑒪।
𑒦𑒰𑒭𑓂𑒏𑒩𑒏 𑒥𑒰𑒥𑒴𑒖𑒲𑒏 𑒮𑓀𑒑𑒲: 𑒨𑒻𑒯 𑒕𑒟𑒱। 𑒁𑒯𑒰𑒿 𑒥𑒛𑓂𑒛 𑒠𑒱𑒢 𑒣𑒯𑒱𑒢𑒹 𑒠𑒹𑒐𑒢𑒹 𑒕𑒪𑒱𑒨𑒢𑓂𑒯𑒱 𑒞𑒐𑒢 𑒕𑒼𑒙 𑒕𑒪𑒰𑒯, 𑒂𑒥 𑒣𑒻𑒒 𑒦𑒋 𑒑𑒹𑒪 𑒕𑒟𑒱। 𑒏𑒯𑒻𑒞 𑒕𑒪𑒯𑒳𑒿 𑒖𑒹 𑒯𑒱𑒢𑒏𑒩 𑒣𑒱𑒞𑒰 𑒯𑒱𑒢𑒏𑒰 𑒪𑒹𑒪 𑒏𑒱𑒕𑒳 𑒢𑒯𑒱 𑒕𑒼𑒛𑓃𑒱 𑒑𑒹𑒪𑒰𑒯। 𑒧𑒳𑒠𑒰 𑒯𑒧𑒩 𑒣𑒱𑒞𑒰𑒏 𑒧𑒵𑒞𑓂𑒨𑒳 𑓑𑓙𑓖𑓐 𑒄. 𑒧𑒹 𑒦𑒹𑒪 𑒕𑒪 𑒂 𑒯𑒧𑒩𑒰 𑒪𑒹𑒪 𑒍 𑒢𑒑𑒩𑒧𑒹 𑓑𑓒 𑒏𑒙𑓂𑒚𑒰 𑒖𑒧𑒲𑒢, 𑒋𑒏𑒙𑒰 𑒒𑒩 𑒂 𑒋𑒏𑒙𑒰 𑒮𑓂𑒏𑒴𑒙𑒩 𑒍𑒯𑒱 𑒖𑒧𑒰𑒢𑒰𑒧𑒹 𑒕𑒼𑒛𑓃𑒱 𑒑𑒹𑒪 𑒕𑒪𑒰𑒯। 𑒂 𑒂𑒥 𑒖𑓂𑒨𑒼𑒿 𑒄 𑒥𑒔𑓂𑒔𑒰 𑒏𑒏𑒩𑒼 𑒪𑒑 𑒏𑒼𑒢𑒼 𑒏𑒰𑒖𑒏 𑒪𑒹𑒪 𑒖𑒰𑒨𑒞, 𑒞𑒿 𑒋𑒏𑒩𑒰 𑒅𑒞𑓂𑒞𑒩 𑒦𑒹𑒙𑒞𑒻𑒏 𑒖𑒹 𑒣𑒩𑒳𑒏𑒰𑒿 𑒏𑒱𑒋𑒏 𑒢𑒘𑒱 𑒁𑒋𑒪𑒯𑒳𑒿 𑒂 𑒣𑒩𑒼𑒕𑒧𑒹 𑒏𑒯𑒞𑒢𑓂𑒯𑒱, 𑒖𑒹 𑒏𑒰𑒖 𑒣𑒛𑓃𑒪𑒢𑓂𑒯𑒱 𑒞𑒐𑒢 𑒂𑒨𑒪 𑒕𑒟𑒱।
𑒥𑓀𑒑𑒰𑒪𑒲 𑒥𑒰𑒥𑒴: 𑒄 𑒞𑒿 𑒑𑒪𑒞 𑒥𑒰𑒞।
𑒦𑒰𑒭𑓂𑒏𑒩𑒏 𑒥𑒰𑒥𑒴𑒖𑒲𑒏 𑒮𑓀𑒑𑒲: 𑒧𑒳𑒠𑒰 𑒋𑒏𑒩𑒰 𑒖𑒐𑒢 𑒮𑒧𑒮𑓂𑒨𑒰 𑒣𑒛𑓃𑒪𑒻𑒏 𑒞𑒐𑒢𑒹 𑒁𑒯𑒰𑒿𑒏𑒹𑒿 𑒣𑒳𑒕𑒥𑒰𑒏 𑒔𑒰𑒯𑒲 𑒕𑒪, 𑒧𑒳𑒠𑒰 𑒮𑒹 𑒞𑒿 𑒁𑒯𑒰𑒿 𑒢𑒯𑒱 𑒣𑒳𑒕𑒪𑒱𑒨𑒢𑓂𑒯𑒱। 𑒂 𑒁𑒯𑒰𑒿𑒏 𑒪𑒑 𑒂𑒨𑒪 𑒁𑒕𑒱, 𑒞𑒐𑒢 𑒁𑒯𑒰𑒿 𑒅𑒪𑓂𑒙𑒰 𑒑𑒣 𑒏𑒩𑒻𑒞 𑒕𑒲। 𑒂 𑒖𑓂𑒨𑒼𑒿 𑒄 𑒥𑒔𑓂𑒔𑒰 𑒮𑒯𑒰𑒨𑒞𑒰𑒏 𑒪𑒹𑒪 𑒢𑒯𑒱 𑒖𑒰𑒨𑒞 𑒂 𑒁𑒣𑒢 𑒏𑒰𑒖 𑒮𑓂𑒫𑒨𑓀 𑒏𑒋 𑒪𑒹𑒞 𑒂 𑒍𑒯𑒱 𑒬𑓂𑒩𑒲𑒧𑒰𑒢𑒏𑒹𑒿 𑒮𑒹 𑒮𑒳𑒢𑒥𑒰𑒧𑒹 𑒂𑒥𑒱 𑒖𑒋𑒞𑒢𑓂𑒯𑒱, 𑒞𑒿 𑒅𑒣𑒏𑒩𑒱 𑒏𑒋 𑒁𑒍𑒞𑒰𑒯 𑒂 𑒣𑒳𑒕𑒟𑒱𑒢𑓂𑒯 𑒖𑒹 𑒏𑒰𑒖 𑒦𑓄 𑒑𑒹𑒪 𑒂𑒏𑒱 𑒢𑒯𑒱। 𑒏𑒯𑒪𑒯𑒳𑒿 𑒏𑒱𑒋𑒏 𑒢𑒯𑒱। 𑒂 𑒞𑒐𑒢 𑒄 𑒥𑒔𑓂𑒔𑒰 𑒏𑒯𑒞 𑒖𑒹 𑒏𑒰𑒖 𑒦𑓄 𑒑𑒹𑒪, 𑒦𑒑𑒫𑒰𑒢𑒏 𑒠𑒨𑒰 𑒩𑒯𑒪। 𑒮𑒹 𑒠𑒰𑒠𑒰 𑒏𑓂𑒨𑒼 𑒏𑒼𑒢𑒼 𑒏𑒰𑒖𑒏 𑒪𑒹𑒪 𑒂𑒥𑒋 𑒞𑒿 𑒥𑒳𑒗𑒴 𑒖𑒹 𑒏𑒳𑒧𑒼𑒢𑒮𑒿 𑒂𑒨𑒪 𑒁𑒕𑒱 𑒂 𑒮𑒧𑒮𑓂𑒨𑒰 𑒦𑒹𑒪𑒹 𑒅𑒞𑓂𑒞𑒩 𑒂𑒨𑒪 𑒁𑒕𑒱 𑒂 𑒞𑒹𑒿 𑒍𑒏𑒩 𑒮𑒯𑒰𑒨𑒞𑒰 𑒏𑒩𑒴।
(𑒦𑒰𑒭𑓂𑒏𑒩𑒏 𑒥𑒰𑒥𑒴𑒖𑒲𑒏 𑒮𑓀𑒑𑒲 𑒂 𑒥𑓀𑒑𑒰𑒪𑒲 𑒥𑒰𑒥𑒴 𑒔𑒪𑒱 𑒖𑒰𑒃𑒞 𑒕𑒟𑒱। 𑒦𑒰𑒭𑓂𑒏𑒩 𑒮𑒹𑒯𑒼 𑒔𑒪𑒱 𑒖𑒰𑒃𑒞 𑒕𑒟𑒱।)
𑒣𑒯𑒱𑒪 𑒏𑒪𑓂𑒪𑒼𑒪𑒏 𑒠𑒼𑒮𑒩 𑒁𑓀𑒏
(𑒏𑒪𑒏𑓂𑒙𑒩𑒏 𑒂𑒤𑒱𑒮। 𑒏𑒪𑒏𑓂𑒙𑒩𑒏 𑒔𑒹𑒧𑓂𑒥𑒩। 𑒥𑒰𑒯𑒩 𑒮𑓂𑒙𑒹𑒢𑒼 𑒥𑒻𑒮𑒪, 𑒧𑓀𑒔𑒣𑒩 𑒠𑒼𑒮𑒩 𑒏𑒰𑒞𑒧𑒹 𑒮𑓂𑒟𑒰𑒢 𑒠𑓄 𑒠𑒱𑒨𑒢𑓂𑒯𑒳। 𑒦𑒰𑒭𑓂𑒏𑒩 𑒏𑒪𑒏𑓂𑒙𑒩𑒮𑒿 𑒏𑒱𑒕𑒳 𑒑𑒣 𑒏𑓄 𑒩𑒯𑒪 𑒕𑒟𑒱। 𑒠𑒴 𑒙𑒰 𑒏𑒳𑒩𑒮𑒲 𑒞𑒹𑒢𑒰 𑒏𑓄 𑒩𑒰𑒐𑒱 𑒠𑒱𑒨𑒾𑒏 𑒖𑒹 𑒦𑒰𑒭𑓂𑒏𑒩 𑒖𑒲 𑒂𑒥𑒟𑒱 𑒞𑒿 𑒏𑒪𑒏𑓂𑒙𑒩𑒏 𑒧𑒳𑒿𑒯 𑒮𑒼𑒗𑒰𑒿 𑒣𑒛𑓃𑒢𑓂𑒯𑒱 𑒧𑒳𑒠𑒰 𑒦𑒰𑒭𑓂𑒏𑒩𑒏 𑒣𑒲𑒚 𑒠𑒹𑒐𑒰 𑒣𑒛𑓃𑒢𑓂𑒯𑒱, 𑒧𑒳𑒿𑒯 𑒢𑒯𑒱। 𑒦𑒰𑒭𑓂𑒏𑒩 𑒏𑒼𑒢𑒼 𑒏𑒰𑒖𑒹 𑒏𑒪𑒏𑓂𑒙𑒩𑒏 𑒂𑒤𑒱𑒮 𑒑𑒹𑒪 𑒕𑒟𑒱। 𑒑𑒣𑒬𑒣 𑒦𑒃𑒋 𑒩𑒯𑒪 𑒕𑒢𑓂𑒯𑒱 𑒂𑒏𑒱 𑒮𑓀𑒏𑒩𑓂𑒭𑒝 𑒡𑒩𑒡𑒛𑓃𑒰𑒃𑒞 𑒔𑒻𑒧𑓂𑒥𑒩𑒧𑒹 𑒁𑒥𑒻𑒞 𑒕𑒟𑒱।)

𑒏𑒪𑒏𑓂𑒙𑒩: (𑒞𑒧𑒮𑒰 𑒏𑒋) 𑒥𑒰𑒯𑒩 𑒖𑒰𑒆 𑒠𑒹𑒐𑒻𑒞 𑒢𑒯𑒱 𑒕𑒲 𑒑𑒣 𑒦𑓄 𑒩𑒯𑒪 𑒁𑒕𑒱।
(𑒮𑓀𑒏𑒩𑓂𑒭𑒝 𑒥𑒰𑒯𑒩 𑒩𑒴𑒧𑒮𑒿 𑒢𑒱𑒏𑒪𑒱 𑒮𑓂𑒙𑒹𑒢𑒼𑒏 𑒏𑒏𑓂𑒭𑒧𑒹 𑒥𑒻𑒮𑒱 𑒩𑒯𑒪𑒰𑒯। 𑓑𑓐-𑓑𑓕 𑒧𑒱𑒢𑒙𑒏 𑒥𑒰𑒠- 𑒖𑒩𑒴𑒩𑒲 𑒢𑒯𑒱 𑒋𑒞𑒹𑒏 𑒏𑒰𑒪 𑒦𑒰𑒭𑓂𑒏𑒩 𑒂 𑒏𑒪𑒏𑓂𑒙𑒩 𑒑𑒣 𑒏𑒩𑒟𑒱, 𑒒𑒛𑓃𑒲 𑒠𑒹𑒐𑒱 𑓑𑓐-𑓑𑓕 𑒧𑒱𑒢𑒙 𑓑𑓕 𑒮𑒹𑒏𑒹𑒢𑓂𑒛𑒧𑒹 𑒐𑒞𑒧 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱। 𑒖𑒐𑒢 𑒦𑒰𑒭𑓂𑒏𑒩 𑒥𑒰𑒯𑒩 𑒢𑒱𑒏𑒪𑒪𑒰𑒯 𑒞𑒿 𑒮𑓂𑒙𑒹𑒢𑒼𑒏 𑒩𑒴𑒧𑒮𑒿 𑒮𑓀𑒏𑒩𑓂𑒭𑒝 𑒥𑒯𑒩𑒰𑒃𑒞 𑒕𑒪𑒰𑒯। 𑒋𑒯𑒱 𑒥𑒹𑒩 𑒮𑓀𑒏𑒩𑓂𑒭𑒝𑒏 𑒣𑒲𑒚 𑒦𑒰𑒭𑓂𑒏𑒩𑒏 𑒮𑒼𑒗𑒰𑒿 𑒕𑒪𑒢𑓂𑒯𑒱 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒯𑒱 𑒥𑒹𑒩 𑒮𑒹𑒯𑒼 𑒠𑒳𑒢𑒴 𑒑𑒼𑒙𑒹𑒧𑒹 𑒮𑒼𑒗𑒰𑒿-𑒮𑒼𑒿𑒗𑒲 𑒢𑒯𑒱 𑒦𑓄 𑒮𑒏𑒪। 𑒞𑒐𑒢𑒹 𑒣𑒙𑒰𑒏𑓂𑒭𑒹𑒣 𑒏𑒩𑒥𑒰𑒆 । 𑒣𑒙𑒰𑒏𑓂𑒭𑒹𑒣𑒏 𑒥𑒰𑒠 𑒑𑒰𑒧𑒣𑒩 𑒠𑒳𑒢𑒴 𑒑𑒼𑒙𑒹 𑒣𑒯𑒳𑒿𑒔𑒻𑒞 𑒠𑒹𑒐𑒪 𑒖𑒰𑒃𑒞 𑒕𑒟𑒱)
𑒦𑒰𑒭𑓂𑒏𑒩: 𑒏𑒯𑒴 𑒮𑓀𑒏𑒩𑓂𑒭𑒝। 𑒏𑒞𑒋𑒮𑒿 𑒂𑒥𑒱 𑒩𑒯𑒪 𑒕𑒲।
𑒮𑓀𑒏𑒩𑓂𑒭𑒝: 𑒍𑒯। 𑒏𑒲 𑒏𑒯𑒴 𑒏𑒪𑒏𑓂𑒙𑒩 𑒮𑒰𑒯𑒹𑒥 𑒩𑒼𑒏𑒱 𑒪𑒹𑒪𑒢𑓂𑒯𑒱। 𑒍𑒞𑒯𑒱 𑒠𑒹𑒩𑒲 𑒦𑓄 𑒑𑒹𑒪।
𑒦𑒰𑒭𑓂𑒏𑒩: 𑒯𑒳𑒢𑒏𑒩 𑒮𑓂𑒙𑒹𑒢𑒼𑒮𑒿 𑒮𑒹𑒯𑒼 𑒦𑒹𑒿𑒙 𑒦𑒹𑒪 𑒩𑒯𑒨?
𑒮𑓀𑒏𑒩𑓂𑒭𑒝: 𑒢𑒯𑒱। 𑒍𑒢𑒰 𑒥𑒯𑒩𑒋𑒥𑒰𑒏 𑒩𑒮𑓂𑒞𑒰 𑒮𑓂𑒙𑒹𑒢𑒼𑒏 𑒣𑓂𑒩𑒏𑒼𑒭𑓂𑒚𑒹𑒮𑒿 𑒕𑒻𑒏। 𑒧𑒳𑒠𑒰 𑒍 𑒮𑒦 𑒞𑒿 𑒛𑒩𑒹 𑒮𑒩𑓂𑒠 𑒩𑒯𑒻𑒞 𑒁𑒕𑒱।
(𑒞𑒐𑒢 𑒦𑒰𑒭𑓂𑒏𑒩𑒏𑒹𑒿 𑒢𑒯𑒱 𑒩𑒯𑒪 𑒑𑒹𑒪𑒢𑓂𑒯𑒱 𑒂 𑒋𑒏𑒙𑒰 𑒐𑒱𑒮𑓂𑒮𑒰 𑒮𑒳𑒢𑒥𑒋 𑒪𑒑𑒪𑒰𑒯 𑒍 𑒮𑓀𑒏𑒩𑓂𑒭𑒝𑒏𑒹𑒿। 𑒂𑒥 𑒋𑒞𑒋 𑒏𑒰𑒩𑒲 𑒫𑒮𑓂𑒞𑓂𑒩 𑒣𑒯𑒱𑒩𑒢𑒹 𑒞𑒲𑒢 𑒙𑒰 𑒁𑒦𑒱𑒢𑒹𑒞𑒰 𑒦𑒼𑓀-𑒦𑒼𑓀 𑒏𑒩𑒻𑒞 𑒖𑒹𑒢𑒰 𑒏𑒳𑒏𑒳𑒩 𑒯𑒼𑒟𑒱, 𑒧𑓀𑒔𑒏 𑒠𑒼𑒮𑒩 𑒏𑒰𑒞 𑒂𑒥𑒱 𑒖𑒰𑒃𑒞 𑒕𑒟𑒱।)
𑒦𑒰𑒭𑓂𑒏𑒩: 𑒮𑓀𑒏𑒩𑓂𑒭𑒝। 𑒮𑒳𑒢𑒴, 𑒋𑒏𑒙𑒰 𑒐𑒱𑒮𑓂𑒮𑒰 𑒮𑒳𑒢𑒥𑒻𑒞 𑒕𑒲। 𑒞𑒲𑒢 𑒙𑒰 𑒏𑒰𑒩𑒲 𑒏𑒳𑒏𑒳𑒩 𑒕𑒪। 𑒋𑒏𑒹 𑒩𑒓-𑒩𑒴𑒣𑒏। 𑒍𑒏𑒩𑒰 𑒮𑒦𑒏𑒹𑒿 𑒧𑒼𑒢 𑒦𑒹𑒪𑒻𑒏 𑒖𑒹 𑒑𑒩𑒧𑒰-𑒑𑒩𑒧 𑒖𑒱𑒪𑒹𑒥𑒲 𑒧𑒡𑒳𑒩𑒏 𑒠𑒼𑒏𑒰𑒢 𑒖𑒰 𑒏𑒋 𑒐𑒰𑒃। 𑒮𑒹 𑒥𑒹𑒩𑒰-𑒥𑒹𑒩𑒲 𑒍𑒞𑒋 𑒖𑒋𑒥𑒰𑒏 𑒣𑓂𑒩𑒏𑓂𑒩𑒧 𑒬𑒳𑒩𑒴 𑒦𑓄 𑒑𑒹𑒪।
(𑒐𑒱𑒮𑓂𑒮𑒰 𑒬𑒳𑒩𑒴 𑒯𑒼𑒃𑒞𑒹 𑒦𑒰𑒭𑓂𑒏𑒩 𑒂 𑒮𑓀𑒏𑒩𑓂𑒭𑒝 𑒧𑓀𑒔 𑒮𑒿 𑒯𑒙𑒱 𑒖𑒰𑒃𑒞 𑒕𑒟𑒱। 𑒥𑒲𑒔-𑒥𑒲𑒔𑒧𑒹 𑒦𑒰𑒭𑓂𑒏𑒩𑒏 𑒁𑒥𑒰𑒖 𑒧𑓀𑒔𑒏 𑒣𑒰𑒕𑒰𑒿𑒮𑒿 𑒁𑒥𑒻𑒞 𑒁𑒕𑒱।)
𑒦𑒰𑒭𑓂𑒏𑒩: (𑒧𑓀𑒔𑒏 𑒣𑒰𑒕𑒰𑒿𑒮𑒿) 𑒣𑒯𑒱𑒢𑒹 𑒣𑒯𑒱𑒪 𑒏𑒳𑒏𑒳𑒩 𑒣𑒯𑒳𑒿𑒔𑒪 𑒍𑒯𑒱 𑒠𑒼𑒏𑒰𑒢 𑒣𑒩।
(𑒧𑒡𑒳𑒩𑒏 𑒠𑒼𑒏𑒰𑒢। 𑒧𑒰𑒪𑒱𑒏 𑒁𑒣𑒢 𑒏𑒩𑓂𑒧𑒔𑒰𑒩𑒲 𑒮𑓀𑒑𑒹 𑒗𑒰𑒿𑒗𑒮𑒿 𑒖𑒱𑒪𑒹𑒥𑒲 𑒕𑒰𑒢𑒱 𑒩𑒯𑒪 𑒕𑒟𑒱। 𑒞𑒐𑒢𑒹 𑒧𑒰𑒪𑒱𑒏 𑒠𑒹𑒐𑒪𑒢𑒱 𑒖𑒹 𑒏𑒳𑒏𑒳𑒩 𑒠𑒼𑒏𑒰𑒢𑒧𑒹 𑒣𑒻𑒮𑒱 𑒩𑒯𑒪 𑒁𑒕𑒱, 𑒮𑒹 𑒥𑒙𑒐𑒩𑒰 𑒤𑒹𑓀𑒏𑒱 𑒏𑒋 𑒍𑒏𑒩𑒰 𑒧𑒰𑒩𑒪𑒏। 𑒣𑒯𑒱𑒪 𑒏𑒳𑒏𑒳𑒩-𑒥𑒹𑒔𑒰𑒩𑒰𑒏𑒹𑒿 𑒥𑒛𑓃 𑒔𑒼𑒙 𑒪𑒑𑒪𑒻𑒏। 𑒧𑒳𑒠𑒰 𑒖𑒐𑒢 𑒒𑒳𑒩𑒱 𑒏𑒋 𑒑𑒰𑒧 𑒣𑒩- 𑒧𑒰𑒢𑒹 𑒧𑓀𑒔𑒏 𑒠𑒼𑒮𑒩 𑒏𑒰𑒞 𑒁𑒣𑒢 𑒠𑒼𑒮𑒩 𑒠𑒳𑒢𑒴 𑒮𑓀𑒑𑒲 𑒪𑒑 𑒣𑒯𑒳𑒿𑒔𑒪 𑒞𑒿 𑒣𑒳𑒕𑒪𑒰 𑒣𑒩 𑒮𑒳𑒢𑒴 𑒏𑒲 𑒏𑒯𑒪𑒏।)
𑒠𑒼𑒮𑒩 𑒏𑒳𑒏𑒳𑒩: 𑒏𑒲 𑒦𑒰𑒃 𑒏𑒹𑒯𑒢 𑒩𑒯𑒪।
𑒞𑒹𑒮𑒩 𑒏𑒳𑒏𑒳𑒩: 𑒥𑒛𑓂𑒛 𑒁𑒑𑒩𑒰𑒃𑒞 𑒔𑒪𑒻𑒞 𑒂𑒥𑒱 𑒩𑒯𑒪 𑒕𑒲।
𑒣𑒯𑒱𑒪 𑒏𑒳𑒏𑒳𑒩: (𑒣𑒲𑒚𑒣𑒩 𑒥𑒙𑒐𑒩𑒰𑒏 𑒔𑒼𑒙𑒣𑒩 𑒯𑒰𑒟 𑒠𑒻𑒞) 𑒋𑒯 𑒏𑒲 𑒏𑒯𑒴। 𑒥𑒛𑓃 𑒮𑒞𑓂𑒏𑒰𑒩 𑒦𑒹𑒪। 𑒥𑒙𑒐𑒩𑒰𑒮𑒿 𑒖𑒼𑒐𑒱 𑒏𑒋 𑒖𑒱𑒪𑒹𑒥𑒲 𑒐𑒋𑒥𑒰𑒏 𑒪𑒹𑒪 𑒦𑒹𑒙𑒪। 𑒥𑒙𑒐𑒩𑒰𑒮𑒿 𑒖𑒼𑒐𑒻𑒞 𑒑𑒹𑒪, 𑒠𑒻𑒞 𑒑𑒹𑒪, 𑒣𑒻𑒒 𑒥𑒙𑒐𑒩𑒰, 𑒕𑒼𑒙 𑒥𑒙𑒐𑒩𑒰, 𑒮𑒦𑒮𑒿 𑒖𑒼𑒐𑒱-𑒖𑒼𑒐𑒱 𑒠𑒻𑒞 𑒑𑒹𑒪।
𑒠𑒼𑒮𑒩 𑒏𑒳𑒏𑒳𑒩: 𑒞𑒐𑒢 𑒯𑒧𑒯𑒲𑓀 𑒏𑒱𑒋𑒏 𑒣𑒰𑒕𑒰𑒿 𑒩𑒯𑒥 𑒮𑒞𑓂𑒏𑒰𑒩 𑒏𑒩𑒰𑒥𑒋𑒧𑒹।
(𑒂𑒥 𑒠𑒼𑒮𑒩 𑒏𑒳𑒏𑒳𑒩 𑒁𑒣𑒢𑒰𑒏𑒹𑒿 𑒩𑒼𑒏𑒱 𑒢𑒯𑒱 𑒮𑒏𑒪 𑒂 𑒁𑒣𑒢 𑒮𑒞𑒏𑒰𑒩 𑒏𑒩𑒋𑒥𑒰𑒏 𑒯𑒹𑒞𑒳 𑒣𑒯𑒳𑒿𑒔𑒱 𑒑𑒹𑒪 𑒧𑒡𑒳𑒩𑒏 𑒠𑒼𑒏𑒰𑒢 𑒣𑒩। 𑒩𑒴𑒣-𑒩𑒓 𑒞𑒿 𑒋𑒏𑒹 𑒩𑒓 𑒩𑒯𑒋 𑒍𑒏𑒩𑒰 𑒮𑒦𑒏, 𑒮𑒹 𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏𑒏𑒹𑒿 𑒦𑒹𑒪𑒻𑒏 𑒖𑒹 𑒫𑒻𑒯 𑒏𑒳𑒏𑒳𑒩 𑒤𑒹𑒩𑒮𑒿 𑒂𑒥𑒱 𑒑𑒹𑒪 𑒁𑒕𑒱। 𑒍 𑒣𑒰𑒢𑒱 𑒑𑒩𑒧 𑒏𑒋 𑒩𑒯𑒪 𑒕𑒪।)
𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏: (𑒦𑒩𑒱 𑒙𑒼𑒏𑒢𑒰 𑒡𑒲𑒣𑒪 𑒣𑒰𑒢𑒱 𑒍𑒯𑒱 𑒏𑒳𑒏𑒳𑒩𑒏 𑒠𑒹𑒯 𑒣𑒩 𑒤𑒹𑒏𑒻𑒞) 𑒠𑒹𑒐𑒴 𑒄 𑒤𑒹𑒩 𑒂𑒥𑒱 𑒑𑒹𑒪। 𑒣𑒕𑒱𑒪𑒰 𑒥𑒹𑒩 𑒥𑒙𑒐𑒰𑒩𑒰 𑒤𑒹𑓀𑒏𑒱 𑒏𑒋 𑒧𑒰𑒩𑒪𑒱𑒨𑒻𑒏 𑒞𑒏𑒩 𑒥𑒰𑒠 𑒖𑒹 𑒂𑒋𑒪 𑒞𑒿 𑒨𑒻𑒯 𑒙𑒰 𑒢𑒹 𑒅𑒣𑒰𑒋 𑒥𑒰𑒿𑒔𑒪 𑒩𑒯𑒋।
(𑒥𑒹𑒔𑒰𑒩𑒰 𑒏𑒳𑒏𑒳𑒩 𑒖𑒰𑒢 𑒥𑒔𑒰 𑒏𑒋 𑒦𑒰𑒑𑒪। 𑒂𑒥 𑒑𑒰𑒧 𑒣𑒩- 𑒧𑒰𑒢𑒹 𑒧𑓀𑒔𑒏 𑒠𑒼𑒮𑒩 𑒏𑒰𑒞 𑒣𑒯𑒳𑒿𑒔𑒪𑒰 𑒣𑒩 𑒍𑒏𑒩𑒰 𑒞𑒹𑒮𑒩 𑒏𑒳𑒏𑒳𑒩 𑒣𑒳𑒕𑒪𑒏𑒻𑒏-)
𑒞𑒹𑒮𑒩 𑒏𑒳𑒏𑒳𑒩: 𑒏𑒹𑒯𑒢 𑒮𑒞𑓂𑒏𑒰𑒩 𑒦𑒹𑒪।
𑒠𑒼𑒮𑒩 𑒏𑒳𑒏𑒳𑒩: 𑒏𑒲 𑒏𑒯𑒴। (𑒣𑒲𑒚𑒣𑒩 𑒑𑒩𑒧 𑒣𑒰𑒢𑒱𑒮𑒿 𑒖𑒩𑒪 𑒮𑓂𑒟𑒰𑒢𑒏𑒹𑒿 𑒕𑒳𑒥𑒻𑒞) 𑒑𑒩𑒧𑒰-𑒑𑒩𑒧 𑒖𑒱𑒪𑒹𑒥𑒲 𑒕𑒰𑒢𑒱 𑒏𑒋 𑒐𑒳𑒋𑒪𑒏। 𑒥𑒛𑓃 𑒢𑒲𑒏 𑒪𑒼𑒏 𑒁𑒕𑒱 𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏। 𑒕𑒢𑒻𑒞 𑒑𑒹𑒪 𑒂 𑒑𑒩𑒧𑒰𑒑𑒩𑒧 𑒐𑒳𑒂𑒥𑒻𑒞 𑒑𑒹𑒪।
(𑒞𑒹𑒮𑒩 𑒏𑒳𑒏𑒳𑒩𑒏 𑒧𑒼𑒢 𑒪𑒮𑒤𑒮𑒰 𑒖𑒰𑒃𑒞 𑒕𑒻𑒏। 𑒍 𑒢𑒱𑒏𑒪𑒻𑒞 𑒁𑒕𑒱 𑒁𑒣𑒢 𑒮𑒞𑓂𑒏𑒰𑒩 𑒏𑒩𑒰𑒥𑒋 𑒪𑒹𑒪।)
𑒞𑒹𑒮𑒩 𑒏𑒳𑒏𑒳𑒩: 𑒞𑒐𑒢 𑒯𑒧𑒯𑒴𑒿 𑒔𑒪𑒻𑒞 𑒕𑒲 𑒁𑒣𑒢 𑒮𑒞𑓂𑒏𑒰𑒩 𑒏𑒩𑒰𑒥𑒋।
(𑒠𑒼𑒏𑒰𑒢𑒣𑒩 𑒯𑒪𑓂𑒪𑒰 𑒦𑓄 𑒩𑒯𑒪 𑒕𑒻𑒏 𑒖𑒹 𑒬𑒱𑒫𑒪𑒱𑓀𑒑 𑒠𑒴𑒡 𑒣𑒲𑒥𑒱 𑒩𑒯𑒪 𑒕𑒟𑒱, 𑒮𑒼𑒩 𑒦𑓄 𑒩𑒯𑒪 𑒁𑒕𑒱।)
𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏𑒏 𑒏𑒩𑓂𑒧𑒔𑒰𑒩𑒲 𑒪𑒳𑒞𑓂𑒞𑒲 𑒗𑒰: 𑒧𑒯𑒰𑒠𑒹𑒫 𑒦𑒑𑒫𑒰𑒢 𑒠𑒴𑒡 𑒣𑒲𑒥𑒱 𑒩𑒯𑒪 𑒕𑒟𑒱, 𑒔𑒪𑒴 𑒢𑒹 𑒏𑒢𑒹𑒏 𑒁𑒣𑒢𑒼 𑒮𑒦 𑒠𑒴𑒡 𑒣𑒱𑒨𑒰 𑒂𑒥𑒲।
𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏: 𑒮𑒞𑓂𑒞𑒹 𑒪𑒳𑒞𑓂𑒞𑒲 𑒗𑒰। 𑒔𑒪𑒯 𑒠𑒹𑒐𑒲।
(𑒞𑒹𑒮𑒩 𑒏𑒳𑒏𑒳𑒩 𑒠𑒼𑒏𑒰𑒢𑒧𑒹 𑒣𑒻𑒮𑒻𑒞 𑒁𑒕𑒱 𑒂𑒏𑒱 𑒧𑒰𑒪𑒱𑒏 𑒂 𑒪𑒳𑒞𑓂𑒞𑒲 𑒗𑒰 𑒮𑒙𑒩 𑒐𑒮𑒰 𑒠𑒻𑒞 𑒕𑒻𑒏। 𑒥𑒹𑒔𑒰𑒩𑒰 𑒥𑒢𑓂𑒢 𑒦𑓄 𑒖𑒰𑒃𑒞 𑒁𑒕𑒱। 𑒧𑒰𑒪𑒱𑒏 𑒂 𑒪𑒳𑒞𑓂𑒞𑒲 𑒗𑒰 𑒧𑒢𑓂𑒠𑒱𑒩 𑒣𑒯𑒳𑒿𑒔𑒻𑒞 𑒕𑒟𑒱, 𑒋𑒏𑒙𑒰 𑒪𑒼𑒙𑒰𑒧𑒹 𑒠𑒴𑒡 𑒪𑓄 𑒏𑒋।)
𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏: (𑒧𑒢𑓂𑒠𑒱𑒩 𑒪𑒑 𑒦𑒲𑒛𑓃 𑒠𑒹𑒐𑒻𑒞) 𑒋𑒏𑓂𑒏𑒹 𑒪𑒼𑒙𑒰 𑒠𑒴𑒡 𑒁𑒕𑒱, 𑒞𑒼𑒿 𑒖𑒹𑒥𑒯 𑒂𑒏𑒱 𑒯𑒧 𑒖𑒰𑒃।
𑒪𑒳𑒞𑓂𑒞𑒲 𑒗𑒰: 𑒁𑒯𑒲𑓀 𑒖𑒰𑒆 𑒢𑒹। 𑒋𑒏𑓂𑒏𑒹 𑒑𑒣 𑒢𑒹 𑒕𑒻𑒏।
(𑒧𑒰𑒪𑒱𑒏 𑒠𑒴𑒡 𑒔𑒜𑓃𑒰 𑒏𑒋 𑒠𑒹𑒐𑒻𑒞 𑒕𑒟𑒱, 𑒮𑒦𑒙𑒰 𑒠𑒴𑒡 𑒢𑒰𑒪𑒲 𑒥𑒰𑒙𑒹 𑒥𑒰𑒯𑒩 𑒢𑒱𑒏𑒪𑒱 𑒖𑒰𑒃𑒞 𑒕𑒢𑓂𑒯𑒱।)
𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏: (𑒮𑓂𑒫𑒞𑓁 𑒮𑒼𑒔𑒻𑒞 𑒥𑒰𑒯𑒩 𑒢𑒱𑒏𑒪𑒻𑒞) 𑒦𑒑𑒫𑒰𑒢 𑒮𑒦𑒏 𑒯𑒰𑒟𑒹 𑒠𑒴𑒡 𑒣𑒲𑒪𑒢𑓂𑒯𑒱 𑒧𑒳𑒠𑒰 𑒯𑒧 𑒖𑒹 𑒮𑒦𑒏𑒹𑒿 𑒏𑒯𑒥𑒻𑒏 𑒖𑒹 𑒯𑒧𑒩𑒰 𑒯𑒰𑒟𑒹 𑒢𑒯𑒱 𑒣𑒲𑒪𑒢𑓂𑒯𑒱 𑒞𑒿 𑒮𑒦 𑒏𑒯𑒞 𑒖𑒹 𑒯𑒧 𑒣𑒰𑒣𑒲 𑒕𑒲 𑒞𑒹𑒿 𑒦𑒑𑒫𑒰𑒢 𑒯𑒧𑒩𑒰 𑒯𑒰𑒟𑒹 𑒠𑒴𑒡 𑒢𑒯𑒱 𑒣𑒲𑒪𑒢𑓂𑒯𑒱।
𑒪𑒳𑒞𑓂𑒞𑒲 𑒗𑒰: 𑒏𑒲 𑒧𑒰𑒪𑒱𑒏। 𑒧𑒯𑒰𑒠𑒹𑒫 𑒠𑒴𑒡 𑒣𑒲𑒪𑒢𑓂𑒯𑒱।
𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏: 𑒯𑒿 𑒯𑒾 𑒪𑒳𑒞𑓂𑒞𑒲 𑒗𑒰। 𑒋𑒞𑒹𑒏 𑒣𑓂𑒩𑒞𑒱𑒭𑓂𑒚𑒱𑒞 𑒖𑒲𑒫𑒢 𑒥𑒱𑒞𑒰 𑒩𑒯𑒪 𑒕𑒲 𑒮𑒹 𑒧𑒯𑒰𑒠𑒹𑒫 𑒮𑒦𑒏 𑒯𑒰𑒟𑒹 𑒠𑒴𑒡 𑒣𑒲𑒪𑒢𑓂𑒯𑒱 𑒞𑒿 𑒯𑒧𑒩𑒼 𑒯𑒰𑒟𑒹 𑒣𑒲𑒪𑒢𑓂𑒯𑒱।
(𑒠𑒳𑒢𑒴 𑒑𑒼𑒙𑒹 𑒠𑒼𑒏𑒰𑒢 𑒐𑒼𑒪𑒻𑒞 𑒕𑒟𑒱 𑒞𑒿 𑒤𑒹𑒩𑒮𑒿 𑒏𑒰𑒩𑒲 𑒏𑒳𑒏𑒳𑒩 𑒠𑒹𑒐𑒻𑒞 𑒕𑒟𑒱। 𑒧𑒰𑒪𑒱𑒏𑒏 𑒮𑒾𑒿𑒮𑒹 𑒠𑒹𑒯 𑒣𑒱𑒞𑓂𑒞 𑒪𑒯𑒩𑒱 𑒑𑒹𑒪𑒢𑓂𑒯𑒱।)
𑒧𑒡𑒳𑒩𑒏 𑒠𑒼𑒏𑒰𑒢𑒏 𑒧𑒰𑒪𑒱𑒏: 𑒪𑒳𑒞𑓂𑒞𑒲 𑒗𑒰। 𑒦𑒰𑒑𑒋 𑒢𑒯𑒱 𑒣𑒰𑒥𑒋 𑒄। 𑒠𑒴 𑒥𑒹𑒩𑒧𑒹 𑒧𑒼𑒢 𑒢𑒯𑒱 𑒦𑒩𑒪𑒻𑒏। 𑒩𑒮𑓂𑒮𑒰 𑒪𑒰, 𑒪𑒰𑒚𑒲 𑒪𑒰𑒥𑒯।
(𑒠𑒳𑒢𑒴 𑒑𑒼𑒙𑒹 𑒩𑒮𑓂𑒮𑒰𑒧𑒹 𑒥𑒰𑒢𑓂𑒯𑒱 𑒏𑓄 𑒏𑒳𑒏𑒳𑒩𑒏𑒹𑒿 𑒪𑒰𑒚𑒲𑒮𑒿 𑒣𑒳𑒭𑓂𑒙 𑒣𑒱𑒙𑒰𑒢 𑒣𑒱𑒙𑒻𑒞 𑒕𑒟𑒱। 𑒤𑒹𑒩 𑒥𑒹𑒔𑒰𑒩𑒰 𑒏𑒼𑒯𑒳𑒢𑒰 𑒥𑒢𑓂𑒯𑒢 𑒕𑒼𑒛𑓃𑒰 𑒏𑓄 𑒪𑒿𑒑𑒛𑓃𑒰𑒃𑒞 𑒑𑒰𑒧 𑒠𑒱𑒮 𑒣𑒛𑓃𑒰𑒃𑒞 𑒁𑒕𑒱। 𑒍𑒞𑒋 𑒣𑒯𑒱𑒪 𑒂 𑒠𑒼𑒮𑒩 𑒏𑒳𑒏𑒳𑒩 𑒕𑒟𑒱।)
𑒣𑒯𑒱𑒪 𑒏𑒳𑒏𑒳𑒩: 𑒁𑒯𑒰𑒿𑒏𑒹𑒿 𑒞𑒿 𑒥𑒛𑓂𑒛 𑒏𑒰𑒪 𑒪𑒰𑒑𑒱 𑒑𑒹𑒪, 𑒏𑒲 𑒏𑒲 𑒮𑒞𑓂𑒏𑒰𑒩 𑒦𑒹𑒪।
𑒠𑒼𑒮𑒩 𑒏𑒳𑒏𑒳𑒩: 𑒯𑒿 𑒚𑒲𑒏𑒹। 𑒥𑒛𑓃𑒲 𑒏𑒰𑒪 𑒪𑒰𑒑𑒪, 𑒠𑒼𑒏𑒰𑒢 𑒞𑒿 𑒥𑒢𑓂𑒢 𑒢𑒯𑒱 𑒩𑒯𑒋।
𑒞𑒹𑒮𑒩 𑒏𑒳𑒏𑒳𑒩: 𑒥𑒛𑓂𑒛 𑒮𑒞𑓂𑒏𑒰𑒩 𑒦𑒹𑒪। 𑒂𑒥𑒻𑒨𑒹 𑒢𑒯𑒱 𑒠𑒻𑒞 𑒩𑒯𑒟𑒱। 𑒏𑒯𑒻𑒞 𑒩𑒯𑒟𑒱 𑒖𑒹 𑒂𑒩 𑒐𑒰𑒆, 𑒂𑒩 𑒐𑒰𑒆। 𑒏𑒼𑒯𑒳𑒢𑒰 𑒏𑓄 𑒖𑒰𑒢 𑒥𑒔𑒰 𑒏𑓄 𑒂𑒋𑒪 𑒕𑒲 𑒖𑒹 𑒂𑒥 𑒢𑒯𑒱 𑒐𑒰𑒋𑒪 𑒖𑒋𑒞, 𑒣𑒹𑒙 𑒤𑒰𑒙𑒱 𑒖𑒋𑒞। (𑒪𑒓𑒩𑒰𑒃𑒞) 𑒠𑒹𑒐𑒻𑒞 𑒢𑒯𑒱 𑒕𑒲 𑒖𑒹 𑒔𑒪𑒱𑒨𑒼 𑒢𑒯𑒱 𑒦𑓄 𑒩𑒯𑒪 𑒁𑒕𑒱।
(𑒞𑒲𑒢𑒴 𑒏𑒳𑒏𑒳𑒩 𑒖𑒰𑒃𑒞 𑒕𑒟𑒱 𑒂 𑒦𑒰𑒭𑓂𑒏𑒩 𑒂 𑒮𑓀𑒏𑒩𑓂𑒭𑒝 𑒧𑓀𑒔𑒣𑒩 𑒁𑒥𑒻𑒞 𑒕𑒟𑒱।)
𑒦𑒰𑒭𑓂𑒏𑒩: 𑒮𑒳𑒢𑒪𑒱𑒨𑒻𑒏 𑒮𑓀𑒏𑒩𑓂𑒭𑒝 𑒄 𑒐𑒱𑒮𑓂𑒮𑒰। 𑒮𑒹 𑒖𑒐𑒢 𑒏𑒪𑒏𑓂𑒙𑒩 𑒁𑒯𑒰𑓀𑒏𑒹𑒿 𑒠𑒥𑒰𑒛𑓃𑒱 𑒩𑒯𑒪 𑒕𑒪 𑒞𑒐𑒢 𑒍𑒏𑒩𑒰 𑒮𑒼𑒗𑒰𑒿 𑒯𑒧𑒯𑒲 𑒥𑒻𑒮𑒪 𑒕𑒪𑒯𑒳𑒿। 𑒯𑒧𑒩 𑒣𑒲𑒚 𑒁𑒯𑒰𑒿𑒏 𑒮𑒼𑒗𑒰𑒿 𑒕𑒪 𑒞𑒹𑒿 𑒁𑒯𑒰𑒿 𑒯𑒧𑒩𑒰 𑒢𑒯𑒱 𑒠𑒹𑒐𑒱 𑒮𑒏𑒪𑒯𑒳𑒿। 𑒤𑒹𑒩 𑒁𑒯𑒰𑒿 𑒮𑓂𑒙𑒹𑒢𑒼𑒏 𑒣𑓂𑒩𑒏𑒼𑒭𑓂𑒚𑒧𑒹 𑒏𑒱𑒕𑒳 𑒏𑒰𑒪 𑒥𑒻𑒮𑒪𑒯𑒳𑒿 𑒂 𑒖𑒐𑒢 𑒍𑒞𑒋𑒮𑒿 𑒥𑒰𑒯𑒩 𑒢𑒱𑒏𑒪𑒪𑒯𑒳𑒿 𑒞𑒿 𑒪𑒼𑒏 𑒮𑒦𑒏𑒹𑒿 𑒦𑒹𑒪 𑒯𑒼𑒋𑒞𑒻𑒏, 𑒖𑒹 𑒁𑒯𑒰𑒿 𑒏𑒪𑒏𑓂𑒙𑒩𑒮𑒿 𑒍𑒞𑒹𑒏 𑒏𑒰𑒪 𑒡𑒩𑒱 𑒑𑒣 𑒏𑒋 𑒩𑒯𑒪 𑒕𑒪𑒯𑒳𑒿। 𑒧𑒳𑒠𑒰 𑒏𑒼𑒢𑒼 𑒥𑒰𑒞 𑒢𑒯𑒱। 𑒯𑒧 𑒄 𑒑𑒣 𑒏𑒏𑒩𑒼 𑒢𑒯𑒱 𑒏𑒯𑒥𑒻𑒏। 𑒧𑒳𑒠𑒰 𑒂𑒖𑒳𑒏 𑒥𑒰𑒠 𑒧𑒱𑒟𑓂𑒨𑒰 𑒏𑒟𑒢𑒮𑒿 𑒁𑒯𑒰𑒿 𑒁𑒣𑒢𑒰𑒏𑒹𑒿 𑒠𑒴𑒩 𑒩𑒰𑒐𑒴।
(𑒮𑓀𑒏𑒩𑓂𑒭𑒝 𑒧𑒳𑒿𑒯 𑒑𑒼𑒞𑒢𑒹 𑒥𑒻𑒮𑒪 𑒩𑒯𑒪𑒰𑒯।)

𑒦𑒰𑒭𑓂𑒏𑒩: 𑒂𑒅, 𑒧𑒳𑒩𑒯𑒲𑒏 𑒦𑒳𑒖𑓂𑒖𑒰 𑒥𑒢𑒥𑒻𑒞 𑒕𑒲।
(𑒠𑒳𑒢𑒴 𑒑𑒼𑒙𑒹 𑒦𑒳𑒖𑓂𑒖𑒰 𑒤𑒰𑒿𑒏𑒨 𑒪𑒑𑒻𑒞 𑒕𑒟𑒱।)

𑒠𑒼𑒮𑒩 𑒏𑒪𑓂𑒪𑒼𑒪 𑒣𑒯𑒱𑒪 𑒁𑓀𑒏
(𑒣𑒳𑒩𑒢𑒏𑒰 𑒑𑒰𑒧𑒏 𑒠𑒵𑒬𑓂𑒨। 𑒖𑒨𑒩𑒰𑒧 𑒠𑒾𑒑𑒪-𑒠𑒾𑒑𑒪 𑒁𑒥𑒻𑒞 𑒕𑒟𑒱। 𑒮𑓀𑒏𑒩𑓂𑒭𑒝 𑒮𑒼𑒗𑒰𑒿 𑒕𑒟𑒱।)

𑒖𑒨𑒩𑒰𑒧: 𑒮𑓀𑒏𑒩𑓂𑒭𑒝। 𑒢𑒲𑒏 𑒦𑒹𑒪 𑒦𑒹𑒙𑒱 𑒑𑒹𑒪𑒯𑒳𑒿। 𑒢𑒱𑒞𑓂𑒨𑒰 𑒏𑒰𑒏𑒰 𑒪𑒑 𑒖𑒰𑒃𑒞 𑒩𑒯𑒲 𑒧𑒳𑒠𑒰 𑒍𑒞𑒋 𑒖𑒰𑒃𑒞-𑒖𑒰𑒃𑒞 𑒠𑒹𑒩𑒲 𑒦𑓄 𑒖𑒋𑒞। 𑒢𑒢𑒏𑒱𑒛𑓃𑒥𑒰𑒏 𑒧𑒼𑒢 𑒥𑒛𑓂𑒛 𑒐𑒩𑒰𑒣 𑒕𑒻𑒏। 𑒥𑒼𑒐𑒰𑒩, 𑒩𑒠𑓂𑒠-𑒠𑒮𑓂𑒞 𑒮𑒦 𑒋𑒏𑓂𑒏𑒹-𑒥𑒹𑒩 𑒬𑒳𑒩𑒴 𑒦𑓄 𑒑𑒹𑒪 𑒕𑒻𑒏।
𑒮𑓀𑒏𑒩𑓂𑒭𑒝: 𑒡𑒳𑒩 𑒥𑒞𑒰𑒯, 𑒣𑒮𑒲𑒗𑒏 𑒏𑒰𑒿𑒙𑒏 𑒩𑒮 𑒣𑒱𑒂 𑒢𑒹 𑒠𑒯𑒲𑓀। 𑒯𑒧 𑒖𑒰𑒃𑒞 𑒕𑒲 𑒧𑒯𑒲𑒿𑒮 𑒔𑒩𑒹𑒥𑒰𑒏 𑒪𑒹𑒪 𑒛𑒲𑒯 𑒠𑒱𑒬𑒱। 𑒏𑒼𑒢𑒼 𑒔𑒱𑒢𑓂𑒞𑒰 𑒖𑒳𑒢𑒱 𑒏𑒩𑒥। 𑒖𑒳𑒪𑓂𑒧𑒲 𑒠𑒥𑒰𑒃 𑒕𑒻𑒏। 𑒋𑒏𑓂𑒏𑒹 𑒔𑒼𑒙𑒧𑒹 𑒮𑒦 𑒥𑒹𑒧𑒰𑒩𑒲 𑒐𑒞𑒧।
(𑒮𑓀𑒏𑒩𑓂𑒭𑒝 𑒋𑒏 𑒠𑒱𑒮 𑒂 𑒖𑒨𑒩𑒰𑒧 𑒠𑒼𑒮𑒩 𑒠𑒱𑒮 𑒖𑒰𑒃𑒞 𑒕𑒟𑒱। 𑒤𑒹𑒩 𑒢𑒱𑒞𑓂𑒨𑒰 𑒏𑒰𑒏𑒰 𑒋𑒏 𑒠𑒱𑒮𑒮𑒿 𑒂 𑒖𑒨𑒩𑒰𑒧 𑒠𑒼𑒮𑒩 𑒠𑒱𑒮𑒮𑒿 𑒁𑒥𑒻𑒞 𑒕𑒟𑒱।)
𑒢𑒱𑒞𑓂𑒨𑒰 𑒏𑒰𑒏𑒰: 𑒏𑒲 𑒖𑒨𑒩𑒰𑒧? 𑒏𑒪𑒧 𑒠𑒱𑒮𑒮𑒿 𑒏𑒲 𑒂𑒢𑒱 𑒩𑒯𑒪 𑒕𑒲।
𑒖𑒨𑒩𑒰𑒧: 𑒏𑒲 𑒏𑒯𑒴 𑒏𑒰𑒏𑒰। 𑒢𑒢𑒏𑒱𑒛𑓃𑒥𑒰𑒏𑒹𑒿 𑒥𑒼𑒐𑒰𑒩, 𑒩𑒠𑓂𑒠-𑒠𑒮𑓂𑒞 𑒮𑒦 𑒋𑒏𑓂𑒏𑒹-𑒥𑒹𑒩 𑒬𑒳𑒩𑒴 𑒦𑓄 𑒑𑒹𑒪 𑒕𑒻𑒏। 𑒮𑓀𑒏𑒩𑓂𑒭𑒝 𑒏𑒯𑒪𑒢𑓂𑒯𑒱 𑒖𑒹 𑒣𑒮𑒲𑒗𑒏 𑒏𑒰𑒿𑒙𑒏 𑒩𑒮 𑒣𑒱𑒂 𑒠𑒹𑒥𑒰 𑒪𑒹𑒪 𑒮𑒦 𑒥𑒹𑒧𑒰𑒩𑒲 𑒐𑒞𑒧 𑒦𑓄 𑒖𑒋𑒞𑒻𑒏। 𑒮𑒻𑒯 𑒂𑒢𑒋 𑒪𑒹𑒪 𑒑𑒹𑒪 𑒩𑒯𑒲।
𑒢𑒱𑒞𑓂𑒨𑒰 𑒏𑒏𑓂𑒏𑒰: 𑒄 𑒮𑓀𑒏𑒩𑓂𑒭𑒝 𑒥𑒛𑓃 𑒥𑒳𑒩𑒱 𑒁𑒕𑒱। 𑒣𑒩𑒳𑒏𑒰𑒿 𑒣𑒮𑒲𑒗𑒏 𑒏𑒰𑒿𑒙𑒏 𑒩𑒮 𑒣𑒼𑒐𑒩𑒱𑒧𑒹 𑒠𑓄 𑒏𑒋 𑒮𑒦𑒙𑒰 𑒧𑒰𑒿𑒕 𑒧𑒰𑒩𑒱 𑒠𑒹𑒢𑒹 𑒩𑒯𑒋 𑒄। 𑒄 𑒖𑒯𑒩 𑒥𑒔𑓂𑒔𑒰𑒏𑒹𑒿 𑒣𑒱𑒋𑒥𑒢𑓂𑒯𑒱 𑒞𑒿 𑒧𑒼𑒢 𑒚𑒲𑒏 𑒢𑒯𑒱 𑒯𑒼𑒋𑒞𑒢𑓂𑒯𑒱, 𑒮𑒼𑒗𑒹 𑒣𑓂𑒩𑒰𑒝 𑒢𑒱𑒏𑒪𑒱 𑒖𑒨𑒞𑒢𑓂𑒯𑒱। 𑒔𑒪𑒯 𑒠𑒥𑒰𑒃-𑒠𑒼𑒏𑒰𑒢 𑒠𑒱𑒮, 𑒠𑒥𑒰𑒃 𑒠𑒱𑒁𑒥𑒻𑒞 𑒕𑒱𑒁𑒯।
(𑒠𑒳𑒢𑒴 𑒑𑒼𑒙𑒹 𑒖𑒰𑒃𑒞 𑒕𑒟𑒱 𑒂 𑒍𑒧𑓂𑒯𑒩 𑒛𑒲𑒯𑒣𑒩 𑒧𑒯𑒲𑓀𑒮𑒏 𑒣𑒲𑒚𑒣𑒩 𑒮𑓀𑒏𑒩𑓂𑒭𑒝 𑒥𑒻𑒮𑒪 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒕𑒟𑒱। 𑒠𑒼𑒮𑒩 𑒠𑒱𑒮𑒮𑒿 𑒋𑒏𑒙𑒰 𑒠𑒼𑒮𑒩 𑒧𑒯𑒱𑒮𑒥𑒰𑒩 𑒑𑒰𑒧𑒣𑒩𑒮𑒿 𑒂𑒥𑒱𑒨𑒹 𑒩𑒯𑒪 𑒕𑒟𑒱।)
𑒮𑓀𑒏𑒩𑓂𑒭𑒝: 𑒏𑒲 𑒦𑒰𑒃, 𑒑𑒰𑒧𑒹𑒣𑒩𑒮𑒿 𑒂𑒥𑒱 𑒩𑒯𑒪 𑒕𑒲।
𑒧𑒯𑒱𑒮𑒥𑒰𑒩: 𑒯𑒿 𑒦𑒰𑒃।
𑒮𑓀𑒏𑒩𑓂𑒭𑒝: 𑒖𑒨𑒩𑒰𑒧𑒏 𑒙𑒼𑒪𑒮𑒿 𑒏𑒢𑓂𑒢𑒰𑒩𑒼𑒯𑒙𑒼 𑒮𑒳𑒢𑒥𑒰𑒧𑒹 𑒂𑒋𑒪 𑒩𑒯𑒋।
𑒧𑒯𑒱𑒮𑒥𑒰𑒩: 𑒏𑒢𑓂𑒢𑒰𑒩𑒼𑒯𑒙 𑒞𑒿 𑒢𑒯𑒱, 𑒧𑒳𑒠𑒰 𑒛𑒱𑒯𑒥𑒰𑒩𑒏 𑒮𑓂𑒟𑒰𑒢𑒣𑒩 𑒣𑓀𑒔𑒻𑒞𑒲 𑒥𑒻𑒮𑒪 𑒁𑒕𑒱, 𑒁𑒯𑒰𑒿𑒏𑒹𑒿 𑒥𑒖𑒰𑒥𑒋 𑒪𑒹𑒪 𑒯𑒧 𑒂𑒋𑒪 𑒕𑒲।
(𑒧𑒯𑒱𑒮𑒥𑒰𑒩 𑒮𑓀𑒏𑒩𑓂𑒭𑒝𑒏𑒹𑒿 𑒪𑒹𑒢𑒹 𑒧𑓀𑒔𑒮𑒿 𑒖𑒰𑒃𑒞 𑒕𑒟𑒱। 𑒤𑒹𑒩 𑒣𑓀𑒔 𑒮𑒦𑒏 𑒪𑒑 𑒮𑒦 𑒤𑒹𑒩𑒮𑒿 𑒁𑒥𑒻𑒞 𑒕𑒟𑒱 𑒂 𑒮𑓀𑒏𑒩𑓂𑒭𑒝𑒣𑒩 𑒮𑒦 𑒟𑒴-𑒟𑒴 𑒏𑒩𑒻𑒞 𑒕𑒟𑒱। 𑒒𑒼𑒿𑒒𑒰𑒅𑒖 𑒯𑒼𑒃𑒞 𑒁𑒕𑒱 𑒂 𑒮𑓀𑒏𑒩𑓂𑒭𑒝𑒣𑒩 𑒠𑒝𑓂𑒛 𑒮𑒹𑒯𑒼 𑒪𑒑𑒻𑒞 𑒕𑒢𑓂𑒯𑒱।)
𑒮𑓀𑒏𑒩𑓂𑒭𑒝: 𑒯𑒧 𑒁𑒣𑒢 𑒒𑒙𑓂𑒙𑒲 𑒧𑒰𑒢𑒻𑒞 𑒕𑒲 𑒂 𑒂𑒃 𑒠𑒱𑒢𑒮𑒿 𑒏𑓀𑒚𑒲 𑒪𑓄 𑒩𑒯𑒪 𑒕𑒲। 𑒠𑒝𑓂𑒛 𑒮𑒹𑒯𑒼 𑒏𑒰𑒪𑓂𑒯𑒱 𑒮𑒰𑒿𑒗 𑒡𑒩𑒱 𑒠𑓄 𑒠𑒹𑒥।
(𑒣𑒙𑒰𑒏𑓂𑒭𑒹𑒣 𑒯𑒼𑒃𑒞 𑒁𑒕𑒱।)

𑒠𑒼𑒮𑒩 𑒏𑒪𑓂𑒪𑒼𑒪 𑒠𑒼𑒮𑒩 𑒁𑓀𑒏
(𑒮𑓀𑒏𑒩𑓂𑒭𑒝 𑒦𑒼𑒩𑒹- 𑒦𑒼𑒩 𑒐𑒹𑒞 𑒠𑒱𑒬𑒱 𑒏𑒼𑒠𑒰𑒩𑒱 𑒂 𑒕𑒱𑒙𑓂𑒙𑒰 𑒪𑒋 𑒥𑒱𑒠𑒰 𑒦𑒹𑒪 𑒕𑒟𑒱। 𑒥𑒳𑒢𑓂𑒢𑒰-𑒥𑒰𑒢𑓂𑒢𑒲 𑒯𑒼𑒃𑒞 𑒕𑒪। 𑒞𑒐𑒢𑒹 𑒂𑒩𑒱𑒏𑒹𑒿 𑒞𑒩𑒣𑒻𑒞 𑒋𑒏𑒙𑒰 𑒣𑒻𑒒 𑒩𑒼𑒯𑒳𑒏𑒹𑒿 𑒠𑒹𑒐𑒱 𑒏𑒋 𑒮𑓀𑒏𑒩𑓂𑒭𑒝 𑒏𑒼𑒠𑒰𑒩𑒱 𑒔𑒪𑒰 𑒠𑒹𑒪𑒢𑓂𑒯𑒱। 𑒂 𑒩𑒼𑒯𑒳 𑒠𑒴 𑒏𑒳𑒙𑓂𑒙𑒲 𑒦𑓄 𑒑𑒹𑒪।)
𑒮𑓀𑒏𑒩𑓂𑒭𑒝: 𑒂𑒩𑒾 𑒞𑒼𑒩𑒲 𑒏𑒹। 𑒂𑒥 𑒠𑒼𑒮𑒩 𑒏𑒰𑒖 𑒕𑒼𑒛𑓃𑒲 𑒂 𑒑𑒰𑒧𑒣𑒩 𑒔𑒪𑒲।
(𑒠𑒳𑒢𑒴 𑒙𑓂𑒏𑒛𑓃𑒲𑒏𑒹𑒿 𑒕𑒱𑒙𑓂𑒙𑒰𑒧𑒹 𑒩𑒰𑒐𑒱 𑒧𑒰𑒟 𑒣𑒩 𑒅𑒚𑒰 𑒏𑒋 𑒫𑒱𑒠𑒰 𑒦𑒹𑒪𑒰𑒯 𑒮𑓀𑒏𑒩𑓂𑒭𑒝 𑒑𑒰𑒧 𑒠𑒱𑒬𑒱। 𑒞𑒏𑒩𑒰 𑒠𑒹𑒐𑒱 𑒯𑒳𑒢𑒏𑒩 𑒮𑒧𑒫𑒨𑒮𑓂𑒏 𑒑𑒼𑒢𑒩 𑒦𑒰𑒋 𑒑𑒰𑒧 𑒣𑒩 𑒖𑒰𑒃𑒞 𑒏𑒰𑒪 𑒑𑒰𑒧𑒏 𑒥𑒰𑒥𑒰 𑒠𑒼𑒑𑒯𑒲 𑒪𑒑 𑒚𑒧𑒏𑒱 𑒏𑒋 𑒚𑒰𑒜𑓃 𑒦𑒋 𑒑𑒹𑒪𑒰𑒯।)
𑒑𑒼𑒢𑒩 𑒦𑒰𑒃: (𑒧𑒼𑒢𑒧𑒹 𑒮𑒼𑒔𑒻𑒞 𑒕𑒟𑒱 ) 𑒫𑒻𑒭𑓂𑒝𑒫 𑒖𑒲𑒮𑒿 𑒩𑒼𑒯𑒳 𑒏𑒼𑒢𑒰 𑒏𑒋 𑒪𑒋 𑒪𑒲। (𑒣𑓂𑒩𑒞𑓂𑒨𑒏𑓂𑒭 𑒦𑓄) 𑒨𑒾 𑒮𑓀𑒏𑒩𑓂𑒭𑒝 𑒦𑒰𑒃। 𑒄 𑒏𑒲 𑒏𑒋𑒪𑒯𑒳𑒿। 𑒫𑒻𑒭𑓂𑒝𑒫 𑒦𑓄 𑒏𑒋 𑒧𑒰𑒕 𑒅𑒒𑒻𑒞 𑒕𑒲।
𑒮𑓀𑒏𑒩𑓂𑒭𑒝: 𑒩𑒾 𑒑𑒼𑒢𑒩। 𑒯𑒧𑒩 𑒥𑒞𑒰𑒩𑒲 𑒕𑒯 𑒧𑒳𑒠𑒰 𑒞𑒻𑒨𑒼 𑒯𑒧 𑒞𑒼𑒯𑒩 𑒦𑒰𑒃 𑒏𑒼𑒢𑒰 𑒦𑒹𑒪𑒱𑒨𑒯। 𑒞𑒼𑒩𑒰 𑒥𑒳𑒗𑒪 𑒢𑒯𑒱 𑒕𑒯 𑒖𑒹 𑒖𑒞𑒋 𑒞𑒼𑒿 𑒚𑒰𑒜𑓃 𑒕𑒯 𑒮𑒹 𑒏𑒯𑒥𑒻𑒞 𑒕𑒻𑒏 𑒥𑒰𑒥𑒰 𑒠𑒼𑒑𑒯𑒲। 𑒋𑒞𑒋 𑒖𑒢𑒧𑒪𑒼 𑒥𑒔𑓂𑒔𑒰 𑒑𑒰𑒧𑒏 𑒪𑒼𑒏𑒮𑒿 𑒮𑒧𑓂𑒥𑒢𑓂𑒡𑒧𑒹 𑒥𑒰𑒥𑒰 𑒯𑒼𑒃𑒞 𑒁𑒕𑒱।
𑒑𑒼𑒢𑒩 𑒦𑒰𑒃: 𑒚𑒲𑒏𑒹 𑒏𑒯𑒪𑒯𑒳𑒿 𑒮𑓀𑒏𑒩𑓂𑒭𑒝। 𑒧𑒳𑒠𑒰 𑒯𑒧 𑒏𑒯𑒻𑒞 𑒩𑒯𑒲 𑒖𑒹......
𑒮𑓀𑒏𑒩𑓂𑒭𑒝: (𑒑𑒣 𑒏𑒰𑒙𑒻𑒞) 𑒩𑒾 𑒧𑒰𑒕 𑒐𑒰𑒨𑒥 𑒢𑒹 𑒕𑒼𑒛𑓃𑒢𑒹 𑒕𑒱𑒨𑒻𑒏। 𑒧𑒰𑒩𑒢𑒰𑒃 𑒞𑒿 𑒢𑒘𑒱 𑒢𑒹।
(𑒁𑒣𑒢 𑒮𑒢𑒏 𑒧𑒳𑒿𑒯 𑒪𑒋 𑒑𑒼𑒢𑒩 𑒦𑒰𑒃 𑒫𑒱𑒠𑒰 𑒦𑒋 𑒑𑒹𑒪𑒰𑒯। 𑒤𑒹𑒩 𑒠𑒳𑒢𑒴 𑒑𑒼𑒙𑒹 𑒧𑓀𑒔𑒮𑒿 𑒖𑒰𑒃𑒞 𑒕𑒟𑒱 𑒂 𑒤𑒹𑒩 𑒁𑒥𑒻𑒞 𑒕𑒟𑒱। 𑒑𑒼𑒢𑒩 𑒗𑒰 𑒙𑒹𑒪𑒲𑒤𑒼𑒢 𑒛𑒰𑒨𑒩𑒲 𑒠𑒹𑒐𑒱 𑒩𑒯𑒪 𑒕𑒟𑒱।)
𑒮𑓀𑒏𑒩𑓂𑒭𑒝: 𑒏𑒲 𑒠𑒹𑒐𑒱 𑒩𑒯𑒪 𑒕𑒲।
𑒑𑒼𑒢𑒩 𑒗𑒰: 𑒙𑒹𑒪𑒲𑒤𑒼𑒢 𑒢𑓀𑒥𑒩 𑒮𑒦 𑒪𑒱𑒐𑒱 𑒏𑒋 𑒩𑒐𑒢𑒹 𑒕𑒲, 𑒞𑒰𑒯𑒱𑒧𑒹 𑒮𑒿 𑒋𑒏𑒙𑒰 𑒢𑓀𑒥𑒩 𑒞𑒰𑒏𑒱 𑒩𑒯𑒪 𑒕𑒲।
𑒮𑓀𑒏𑒩𑓂𑒭𑒝: 𑒂 𑒖𑓂𑒨𑒼𑒿 𑒥𑒰𑒯𑒩𑒧𑒹 𑒩𑒮𑓂𑒞𑒰𑒧𑒹 𑒏𑒞𑒯𑒳 𑒣𑒳𑒪𑒱𑒮 𑒣𑒴𑒕𑒱 𑒠𑒹𑒞 𑒖𑒹 𑒄 𑒏𑒲 𑒩𑒐𑒢𑒹 𑒕𑒲 𑒞𑒐𑒢।
𑒑𑒼𑒢𑒩 𑒗𑒰: 𑒌𑒿 𑒨𑒾 𑒮𑒹 𑒏𑒲 𑒏𑒯𑒻𑒞 𑒕𑒲। 𑒙𑒹𑒪𑒲𑒤𑒼𑒢 𑒢𑓀𑒥𑒩 𑒮𑒦 𑒮𑒹𑒯𑒼 𑒪𑒼𑒏 𑒢𑒯𑒱 𑒩𑒰𑒐𑒨।
𑒮𑓀𑒏𑒩𑓂𑒭𑒝: 𑒮𑒹 𑒞𑒿 𑒚𑒲𑒏। 𑒧𑒳𑒠𑒰 𑒋𑒞𑒹𑒏 𑒢𑓀𑒥𑒩 𑒏𑒱𑒋𑒏 𑒩𑒐𑒢𑒹 𑒕𑒲, 𑒄 𑒣𑒳𑒕𑒪𑒰 𑒣𑒩 𑒖𑓂𑒨𑒼𑒿 𑒖𑒥𑒰𑒥 𑒢𑒯𑒱 𑒠𑒹𑒥 𑒞𑒿 𑒂𑒞𑓀𑒏𑒲 𑒥𑒳𑒗𑒱 𑒣𑒳𑒪𑒱𑒮 𑒖𑒹𑒪𑒧𑒹 𑒢𑒯𑒱 𑒡𑒋 𑒠𑒹𑒞?
𑒑𑒼𑒢𑒩 𑒗𑒰: 𑒮𑒹 𑒏𑒼𑒢𑒰 𑒡𑒋 𑒠𑒹𑒞। 𑒋𑒐𑒢𑒹 𑒯𑒧 𑒋𑒯𑒱 𑒛𑒰𑒨𑒩𑒲𑒏𑒹𑒿 𑒙𑒳𑒏𑒛𑓃𑒲-𑒙𑒳𑒏𑒛𑓃𑒲 𑒏𑓄 𑒏𑒋 𑒤𑒹𑓀𑒏𑒱 𑒠𑒻𑒞 𑒕𑒱𑒨𑒻𑒏।
(𑒑𑒼𑒢𑒩 𑒦𑒰𑒃 𑒍𑒯𑒱 𑒛𑒰𑒨𑒩𑒲𑒏𑒹𑒿 𑒤𑒰𑒛𑓃𑒱-𑒤𑒴𑒛𑓃𑒱 𑒏𑒋 𑒤𑒹𑓀𑒏𑒱 𑒠𑒻𑒞 𑒕𑒟𑒱।)

𑒞𑒹𑒮𑒩 𑒏𑒪𑓂𑒪𑒼𑒪
(𑒮𑓀𑒏𑒩𑓂𑒭𑒝𑒏 𑒥𑒰𑒥𑒴 𑒠𑒪𑒰𑒢𑒣𑒩 𑒥𑒻𑒮𑒪 𑒕𑒟𑒱। 𑒋𑒏 𑒑𑒼𑒙 𑒒𑒙𑒏 𑒔𑒴𑒛𑓃𑒰-𑒠𑒯𑒲-𑒧𑒡𑒳𑒩 𑒮𑒩𑒣𑒹𑒙𑒢𑒹 𑒖𑒰 𑒩𑒯𑒪 𑒕𑒟𑒱।)
𑒒𑒙𑒏: 𑒧𑒲𑒞𑒏 𑒔𑒹𑒯𑒩𑒰𑒣𑒩 𑒖𑒹 𑒣𑒰𑒢𑒱 𑒕𑒢𑓂𑒯𑒱 𑒮𑒹 𑒪𑒼𑒏 𑒢𑒘𑒱 𑒠𑒹𑒐𑒻𑒞 𑒁𑒕𑒱। 𑒏𑒰𑒩𑒲 𑒙𑒳𑒯𑒙𑒳𑒯 𑒕𑒟𑒱 𑒮𑓀𑒏𑒩𑓂𑒭𑒝 𑒏𑒰𑒩𑒲-𑒐𑒙𑒐𑒙 𑒢𑒯𑒱। 𑒔𑒢𑓂𑒮𑒑𑒩 𑒕𑒟𑒱।
𑒮𑓀𑒏𑒩𑓂𑒭𑒝𑒏 𑒥𑒰𑒥𑒴: 𑒯𑒹 𑒋𑒏𑒙𑒰 𑒂𑒩 𑒧𑒡𑒳𑒩 𑒪𑒱𑒨𑒾𑒏 𑒢𑒹।
𑒒𑒙𑒏: 𑒠𑒱𑒨𑒾𑒏। 𑒨𑒾 𑒪𑒰𑒃𑒢 𑒪𑒰𑒑𑒱 𑒖𑒋𑒞 𑒪𑒛𑓃𑒏𑒲 𑒥𑒪𑒰𑒏। 𑒡𑒩𑒤𑒩𑒰𑒆 𑒡𑒩𑒱 𑒖𑒳𑒢𑒱।
(𑒍 𑒒𑒙𑒏 𑒖𑒰𑒃𑒞 𑒕𑒟𑒱 𑒂𑒏𑒱 𑒠𑒼𑒮𑒩 𑒒𑒙𑒏 𑒁𑒥𑒻𑒞 𑒕𑒟𑒱 𑒂 𑒍𑒯𑒼 𑒃𑒬𑒰𑒩𑒰𑒧𑒹 𑒑𑒣 𑒏𑒩𑒻𑒞 𑒔𑒪𑒱 𑒖𑒰𑒃𑒞 𑒕𑒟𑒱।)
𑒮𑓀𑒏𑒩𑓂𑒭𑒝𑒏 𑒧𑒰𑒋: 𑒯𑒹 𑒋𑒏𑒙𑒰 𑒏𑒢𑓂𑒨𑒰𑒑𑒞 𑒁𑒍𑒞𑒰𑒯 𑒂𑒃। 𑒪𑒰𑒪 𑒏𑒰𑒏𑒲𑒏 𑒤𑒼𑒢 𑒂𑒋𑒪 𑒕𑒢𑓂𑒯𑒱 𑒠𑒱𑒪𑓂𑒪𑒲𑒮𑒿।
𑒮𑓀𑒏𑒩𑓂𑒭𑒝𑒏 𑒥𑒰𑒥𑒴: 𑒬𑒩𑒥𑒞 𑒒𑒼𑒩𑒱 𑒏𑒋 𑒩𑒰𑒐𑒴 𑒞𑒐𑒢। 𑒏𑒰𑒑𑒖𑒲 𑒢𑒹𑒥𑒼 𑒞𑒿 𑒒𑒙𑒏 𑒮𑒦𑒏𑒹𑒿 𑒬𑒩𑒥𑒞 𑒣𑒱𑒨𑒰𑒥𑒻𑒞-𑒣𑒱𑒨𑒰𑒥𑒻𑒞 𑒐𑒞𑒧 𑒦𑓄 𑒑𑒹𑒪 𑒠𑒹𑒐𑒻𑒞 𑒕𑒲 𑒑𑒰𑒕𑒧𑒹 𑒖𑒧𑒲𑒩𑒲 𑒢𑒹𑒥𑒼 𑒮𑒹𑒯𑒼 𑒥𑒰𑒿𑒔𑒪 𑒁𑒕𑒱 𑒂𑒏𑒱 𑒢𑒯𑒱।

(𑒧𑓀𑒔𑒮𑒿 𑒮𑒦 𑒖𑒰𑒃𑒞 𑒕𑒟𑒱 𑒂 𑒥𑒳𑒗𑒢𑒰 𑒖𑒰𑒃𑒞 𑒁𑒕𑒱 𑒖𑒹 𑒮𑓀𑒏𑒩𑓂𑒭𑒝 𑒮𑒰𑒮𑒳𑒩𑒮𑒿 𑒂𑒋𑒪𑒹 𑒕𑒟𑒱, 𑒏𑒢𑒹𑒏 𑒧𑒼𑒙 𑒦𑓄 𑒑𑒹𑒪 𑒕𑒟𑒱। 𑒑𑒼𑒢𑒩 𑒦𑒰𑒃 𑒩𑒮𑓂𑒞𑒰𑒧𑒹 𑒦𑒹𑒙𑒱 𑒖𑒰𑒃𑒞 𑒕𑒟𑒱𑒢𑓂𑒯।)
𑒑𑒼𑒢𑒩 𑒦𑒰𑒃: 𑒧𑒲𑒞 𑒨𑒾, 𑒏𑒢𑒱𑒨𑒰 𑒏𑒹𑒯𑒢 𑒕𑒟𑒱, 𑒣𑒮𑒱𑒢𑓂𑒢 𑒣𑒛𑓃𑒪𑒟𑒱 𑒢𑒹।
𑒮𑓀𑒏𑒩𑓂𑒭𑒝: 𑒯𑒿, 𑒯𑒿 𑒖𑒑𑒢𑓂𑒢𑒰𑒟 𑒦𑒰𑒃। 𑒥𑒛𑓃 𑒮𑒳𑒢𑓂𑒠𑒩 𑒕𑒟𑒱। 𑒯𑒹𑒧𑒰𑒧𑒰𑒪𑒱𑒢𑒲𑒏𑒹𑒿 𑒠𑒹𑒐𑒢𑒹 𑒕𑒱𑒨𑒢𑓂𑒯𑒱? 𑒋𑒢-𑒧𑒹𑒢 𑒍𑒯𑒢𑒹।
𑒑𑒼𑒢𑒩 𑒦𑒰𑒃: 𑒁𑒔𑓂𑒕𑒰।
𑒮𑓀𑒏𑒩𑓂𑒭𑒝: 𑒧𑒳𑒠𑒰 𑒩𑓀𑒑 𑒏𑒢𑒹𑒏 𑒯𑒧𑒩𑒰𑒮𑒿 𑒛𑒲𑒣 𑒕𑒢𑓂𑒯𑒱।
(𑒑𑒼𑒢𑒩 𑒦𑒰𑒃 𑒧𑒳𑒿𑒯 𑒥𑒰𑒥𑒱 𑒠𑒻𑒞 𑒕𑒟𑒱। 𑒠𑒳𑒢𑒴 𑒑𑒼𑒙𑒹 𑒧𑓀𑒔𑒮𑒿 𑒖𑒰𑒃𑒞 𑒕𑒟𑒱 𑒂 𑒤𑒹𑒩 𑒁𑒥𑒻𑒞 𑒕𑒟𑒱। 𑒮𑓀𑒏𑒩𑓂𑒭𑒝 𑒯𑒰𑒟𑒧𑒹 𑒪𑒼𑒙𑒰 𑒪𑒹𑒢𑒹 𑒣𑒼𑒐𑒩𑒱 𑒠𑒱𑒬𑒱 𑒖𑒰 𑒩𑒯𑒪 𑒕𑒟𑒱 𑒞𑒿 𑒑𑒼𑒢𑒩 𑒑𑒼𑒥𑒩 𑒏𑒰𑒜𑓃𑒱 𑒕𑒟𑒱। 𑒥𑒑𑒪𑒧𑒹 𑒑𑒼𑒢𑒩 𑒦𑒰𑒃𑒏 𑒏𑒢𑒱𑒨𑒰𑒿 𑒚𑒰𑒜𑓃𑒱 𑒩𑒯𑒟𑒱𑒢𑓂𑒯।)
𑒑𑒼𑒢𑒩 𑒦𑒰𑒃: 𑒨𑒾 𑒧𑒲𑒞, 𑒯𑒧𑒩𑒹 𑒖𑒹𑒏𑒰𑒿 𑒁𑒯𑒴𑒿 𑒮𑒦𑒏𑒹𑒿 𑒦𑒼𑒩𑒹-𑒦𑒼𑒩 𑒑𑒼𑒥𑒩 𑒏𑒰𑒜𑓃𑒨 𑒣𑒛𑓃𑒻𑒞 𑒁𑒕𑒱?
(𑒮𑓀𑒏𑒩𑓂𑒭𑒝 𑒠𑒹𑒐𑒪𑒢𑓂𑒯𑒱 𑒖𑒹 𑒑𑒼𑒢𑒩𑒏 𑒏𑒢𑒱𑒘𑒰 𑒮𑒹𑒯𑒼 𑒥𑒑𑒪𑒧𑒹 𑒚𑒰𑒜𑓃𑒱 𑒕𑒪𑒐𑒱𑒢𑓂𑒯। 𑒮𑒹 𑒋𑒐𑒢 𑒏𑒱𑒕𑒳 𑒏𑒯𑒥𑒢𑓂𑒯𑒱 𑒞𑒿 𑒪𑒰𑒖 𑒯𑒼𑒋𑒞𑒢𑓂𑒯𑒱। 𑒮𑒹 𑒥𑒱𑒢𑒳 𑒏𑒱𑒕𑒳 𑒏𑒯𑒢𑒹 𑒂𑒑𑒴 𑒥𑒜𑓃𑒱 𑒑𑒹𑒪𑒰𑒯। 𑒖𑒐𑒢 𑒒𑒳𑒩𑒪𑒰𑒯 𑒞𑒿.........)
𑒮𑓀𑒏𑒩𑓂𑒭𑒝: 𑒦𑒰𑒃, 𑒣𑒯𑒱𑒢𑒹 𑒥𑒱𑒨𑒰𑒯𑒧𑒹 𑒣𑒰𑒃 𑒠𑒹𑒥𑒨 𑒣𑒛𑓃𑒻𑒞 𑒕𑒪𑒻𑒏, 𑒮𑒹 𑒁𑒯𑒰𑒿𑒏𑒹𑒿 𑒮𑒹𑒯𑒼 𑒪𑒰𑒑𑒪 𑒯𑒼𑒋𑒞। 𑒞𑒰𑒯𑒱 𑒠𑓂𑒫𑒰𑒩𑒹 𑒢𑒹 𑒅𑒧𑒩𑒱𑒑𑒩𑒧𑒹 𑒥𑒱𑒨𑒰𑒯 𑒦𑒹𑒪।
𑒑𑒼𑒢𑒩 𑒦𑒰𑒃: 𑒯𑒿 𑒮𑒹 𑒞𑒿 𑒣𑒰𑒃 𑒪𑒰𑒑𑒪𑒹 𑒕𑒪।
𑒮𑓀𑒏𑒩𑓂𑒭𑒝: 𑒧𑒳𑒠𑒰 𑒯𑒧𑒩𑒰 𑒮𑒦𑒏𑒹𑒿 𑒣𑒰𑒃 𑒢𑒯𑒱 𑒠𑒹𑒥𑒨 𑒣𑒛𑓃𑒪 𑒕𑒪 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒑𑒼𑒥𑒩𑒼 𑒢𑒯𑒱 𑒏𑒰𑒜𑓃𑒨 𑒣𑒛𑓃𑒻𑒞 𑒁𑒕𑒱, 𑒏𑒰𑒩𑒝 𑒏𑒢𑒱𑒨𑒰𑒿 𑒍𑒞𑒹𑒏 𑒠𑒳𑒪𑒰𑒩𑒴 𑒢𑒯𑒱 𑒕𑒟𑒱 𑒢𑒹।
(𑒑𑒼𑒢𑒩 𑒦𑒰𑒃 𑒧𑒳𑒿𑒯 𑒥𑒰𑒥𑒱 𑒠𑒻𑒞 𑒕𑒟𑒱। 𑒠𑒳𑒢𑒴 𑒑𑒼𑒙𑒹 𑒧𑓀𑒔𑒮𑒿 𑒖𑒰𑒃𑒞 𑒕𑒟𑒱 𑒂 𑒤𑒹𑒩 𑒁𑒥𑒻𑒞 𑒕𑒟𑒱।)
𑒑𑒼𑒢𑒩 𑒦𑒰𑒃: 𑒮𑒩𑓂𑒠𑒧𑒹 𑒑𑒳𑒩𑒮𑒿 𑒐𑒴𑒥 𑒪𑒰𑒦 𑒯𑒼𑒃𑒞 𑒕𑒻𑒏, 𑒄 𑒚𑒹𑒯𑒲 𑒯𑒿𑒙𑒥𑒻𑒞 𑒁𑒕𑒱। 𑒑𑒴𑒩𑒏 𑒔𑒰𑒯 𑒣𑒲𑒥 𑒧𑒲𑒞।
𑒧𑒲𑒞 𑒦𑒰𑒋: (𑒮𑓂𑒫𑒑𑒞) 𑒏𑒱𑒕𑒳 𑒠𑒱𑒢 𑒣𑒯𑒱𑒢𑒹 𑒑𑒼𑒢𑒩 𑒋𑒯𑒱 𑒑𑒣𑒏 𑒔𑒩𑓂𑒔 𑒏𑒋𑒢𑒹 𑒕𑒪𑒰𑒯 𑒖𑒹 𑒍 𑒖𑒼𑒧𑒢𑒲 𑒕𑒼𑒛𑓃𑓂𑒢𑒹 𑒕𑒪𑒰𑒯 𑒞𑒲𑒩𑓂𑒟𑒮𑓂𑒟𑒰𑒢𑒧𑒹 𑒂 𑒞𑒻𑒿 𑒖𑒼𑒧 𑒐𑒰𑒃𑒞 𑒕𑒪𑒰𑒯। 𑒯𑒩𑒖𑒹 𑒏𑒲 𑒋𑒯𑒱𑒧𑒹। 𑒁𑒡𑒱𑒏 𑒤𑒪𑒧𑓂 𑒛𑒴𑒥𑒰𑒛𑒴𑒥𑒲। (𑒣𑓂𑒩𑒞𑓂𑒨𑒏𑓂𑒭) 𑒣𑒩𑒳𑒏𑒰𑒿 𑒖𑒹 𑒣𑒳𑒩𑒲 𑒖𑒑𑒢𑓂𑒢𑒰𑒟𑒖𑒲 𑒑𑒹𑒪 𑒕𑒪𑒯𑒳𑒿, 𑒮𑒹 𑒏𑒼𑒢𑒼 𑒋𑒏𑒙𑒰 𑒤𑒪 𑒕𑒼𑒛𑓃𑒥𑒰𑒏 𑒕𑒪 𑒮𑒹 𑒏𑒳𑒮𑒱𑒨𑒰𑒩 𑒕𑒼𑒛𑓃𑒱 𑒠𑒹𑒪𑒯𑒳𑒿। 𑒂 𑒏𑒳𑒮𑒱𑒨𑒰𑒩𑒹𑒮𑒿 𑒞𑒿 𑒑𑒳𑒩 𑒥𑒢𑒻𑒞 𑒕𑒻𑒏। 𑒔𑒳𑒏𑒢𑓂𑒠𑒩𑒏 𑒣𑒰𑒞𑒩 𑒩𑒮𑒱𑒨𑒢 𑒔𑒲𑒢𑒲 𑒥𑒪𑒰 𑒔𑒰𑒯𑒹 𑒢𑒹 𑒣𑒱𑒂 𑒠𑒱𑒁।
(𑒑𑒼𑒢𑒩 𑒦𑒰𑒃 𑒧𑒳𑒿𑒯 𑒥𑒰𑒥𑒱 𑒠𑒻𑒞 𑒕𑒟𑒱। 𑒠𑒳𑒢𑒴 𑒑𑒼𑒙𑒹 𑒧𑓀𑒔𑒮𑒿 𑒖𑒰𑒃𑒞 𑒕𑒟𑒱 𑒂 𑒤𑒹𑒩 𑒁𑒥𑒻𑒞 𑒕𑒟𑒱। 𑒪𑒑𑒻𑒞 𑒁𑒕𑒱 𑒖𑒹 𑒣𑒢𑓂𑒠𑓂𑒩𑒯 𑒥𑒩𑒱𑒐𑒏 𑒥𑒰𑒠𑒏 𑒑𑒣 𑒁𑒕𑒱। 𑒠𑒳𑒢𑒴 𑒑𑒼𑒙𑒹 𑒅𑒧𑒩𑒱𑒑𑒩 𑒦𑓄 𑒑𑒹𑒪 𑒕𑒟𑒱।)
𑒮𑓀𑒏𑒩𑓂𑒭𑒝: 𑒨𑒾,𑒪𑒼𑒏 𑒮𑒦 𑒨𑒾 𑒪𑒼𑒏 𑒮𑒦। 𑒪𑒰𑒪 𑒏𑒰𑒏𑒰 𑒥𑒱𑒨𑒰𑒯 𑒞𑒿 𑒏𑒩𑒰 𑒠𑒹𑒪𑒢𑓂𑒯𑒱 𑒧𑒳𑒠𑒰 𑒞𑒐𑒢 𑒄 𑒏𑒯𑒰𑒿 𑒏𑒯𑒪𑒢𑓂𑒯𑒱 𑒖𑒹 𑒥𑒱𑒨𑒰𑒯𑒏 𑒥𑒰𑒠 𑒥𑒹𑒙𑒼 𑒯𑒼𑒃𑒞 𑒕𑒻𑒏। 𑒖𑒥𑒰𑒢 𑒥𑒹𑒙𑒰 𑒒𑒩 𑒕𑒼𑒛𑓃𑒱 𑒦𑒰𑒑𑒱 𑒑𑒹𑒪। 𑒂𑒥 𑒏𑒲 𑒏𑒩𑒥 ?
𑒑𑒼𑒢𑒩 𑒦𑒰𑒃: 𑒯𑒼 𑒢𑒯𑒱 𑒯𑒼 𑒠𑒱𑒪𑓂𑒪𑒲𑒨𑒹 𑒑𑒹𑒪 𑒯𑒼𑒋𑒞। 𑒮𑒦 𑒍𑒞𑒯𑒱 𑒖𑒰𑒃𑒞 𑒁𑒕𑒱 𑒦𑒰𑒑𑒱 𑒏𑓄।
𑒮𑓀𑒏𑒩𑓂𑒭𑒝: 𑒂𑒥 𑒥𑒹𑒙𑒰𑒏𑒹𑒿 𑒞𑒰𑒏𑒋 𑒪𑒹𑒪 𑒂 𑒥𑒹𑒙𑒰𑒏 𑒢𑒯𑒱 𑒦𑒹𑒙𑒪𑒰 𑒅𑒞𑓂𑒞𑒩 𑒁𑒣𑒢𑒰 𑒪𑒹𑒪 𑒢𑒼𑒏𑒩𑒲 𑒞𑒏𑒥𑒰𑒏 𑒯𑒹𑒞𑒳 𑒯𑒧𑒩𑒼 𑒠𑒱𑒪𑓂𑒪𑒲𑒏 𑒩𑒮𑓂𑒞𑒰 𑒡𑒩𑒋 𑒣𑒛𑓃𑒞।
(𑒢𑒱𑒩𑓂𑒠𑒹𑒬𑒏 𑒣𑒰𑒕𑒰𑒿 𑒮𑒿 𑒥𑒖𑒻𑒞 𑒕𑒟𑒱- 𑒠𑒱𑒪𑓂𑒪𑒲𑒏 𑒩𑒮𑓂𑒞𑒰𑒧𑒹 𑒮𑓀𑒏𑒩𑓂𑒭𑒝𑒏 𑒮𑓀𑒑 𑒏𑒲 𑒦𑒹𑒪𑒢𑓂𑒯𑒱 𑒯𑒳𑒢𑒏𑒩 𑒥𑒳𑒡𑒱𑒨𑒰𑒩𑒲 𑒂𑒏𑒱 𑒏𑒥𑒱𑒪𑒣𑒢𑒲 𑒏𑒰𑒖 𑒁𑒋𑒪𑒢𑓂𑒯𑒱 𑒫𑒰 𑒢𑒯𑒱, 𑒋𑒯𑒱 𑒪𑒹𑒪 𑒏𑒢𑒹𑒏 𑒡𑒻𑒩𑓂𑒨 𑒩𑒰𑒐𑒋 𑒣𑒛𑓃𑒞। 𑒏𑒰𑒩𑒝 𑒙𑓂𑒩𑒹𑒢𑒏 𑒮𑒫𑒰𑒩𑒲 𑒁𑒕𑒱 𑒂 𑒧𑓀𑒔 𑒏𑒪𑒰𑒏𑒰𑒩 𑒅𑒞𑓂𑒮𑒰𑒯𑒱𑒞 𑒕𑒟𑒱 𑒧𑒳𑒠𑒰 𑒠𑒹𑒐𑒱𑒢𑒯𑒰𑒩 𑒟𑒰𑒏𑒪 𑒥𑒳𑒗𑒱 𑒣𑒛𑓃𑒻𑒞 𑒕𑒟𑒱। 𑒣𑒙𑒰𑒏𑓂𑒭𑒹𑒣 𑒯𑒼𑒃𑒞 𑒁𑒕𑒱।)

𑒔𑒰𑒩𑒱𑒧 𑒏𑒪𑓂𑒪𑒼𑒪
(𑒙𑓂𑒩𑒹𑒢𑒏 𑒠𑒵𑒬𑓂𑒨। 𑒮𑓀𑒏𑒩𑓂𑒭𑒝 𑒖𑒢𑒏𑒣𑒳𑒩𑒮𑒿 𑒖𑒨𑒢𑒑𑒩 𑒁𑒥𑒻𑒞 𑒕𑒟𑒱 𑒮𑒹 𑒖𑒢𑒏𑒣𑒳𑒩 𑒂 𑒖𑒨𑒢𑒑𑒩𑒏 𑒥𑒼𑒩𑓂𑒛 𑒪𑒑𑒰 𑒏𑒋 𑒧𑓀𑒔𑒱𑒞 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱। 𑒖𑒨𑒢𑒑𑒩 𑒧𑒹 𑒙𑓂𑒩𑒹𑒢𑒣𑒩 𑒮𑓀𑒏𑒩𑓂𑒭𑒝 𑒔𑒜𑓃𑒻𑒞 𑒕𑒟𑒱 । 𑒙𑓂𑒩𑒹𑒢 𑒐𑒳𑒖𑒻𑒞 𑒁𑒕𑒱 𑒂 𑒮𑓀𑒏𑒩𑓂𑒭𑒝 𑒙𑓂𑒩𑒹𑒢𑒧𑒹 𑒏𑒼𑒢𑒯𑒳𑒢𑒰 𑒥𑒻𑒮𑒻𑒞 𑒕𑒟𑒱।)
𑒋𑒏𑒙𑒰 𑒥𑒴𑒜𑓃𑒲: (𑒮𑓀𑒏𑒩𑓂𑒭𑒝𑒮𑒿) 𑒥𑒾𑒂 𑒏𑒢𑒹𑒏 𑒮𑒲𑒙 𑒢𑒘𑒱 𑒕𑒼𑒛𑓃𑒱 𑒠𑒹𑒥।
𑒮𑓀𑒏𑒩𑓂𑒭𑒝: 𑒧𑒰𑒿। 𑒄 𑒥𑒾𑒂 𑒢𑒯𑒱। 𑒥𑒾𑒂𑒏 𑒞𑒲𑒢 𑒙𑒰 𑒥𑒾𑒂।
(𑒥𑒴𑒜𑓃𑒲 𑒧𑒳𑒿𑒯 𑒥𑒰𑒥𑒱 𑒪𑒻𑒞 𑒕𑒟𑒱। 𑒙𑓂𑒩𑒹𑒢 𑒂𑒑𑒰𑒿 𑒥𑒜𑓃𑒻𑒞 𑒁𑒕𑒱 𑒁𑒪𑒲𑒑𑒜𑓃𑒧𑒹 𑒣𑒳𑒪𑒱𑒮 𑒂𑒨𑒪 𑒥𑒼𑒑𑒲𑒧𑒹। 𑒮𑓀𑒏𑒩𑓂𑒭𑒝𑒏 𑒗𑒼𑒛𑓃𑒰-𑒗𑒣𑒙𑒰 𑒮𑒦 𑒠𑒹𑒐𑒋 𑒪𑒑𑒪𑒢𑓂𑒯𑒱। 𑒔𑒹𑒏𑒱𑓀𑒑 𑒏𑒱𑒠𑒢𑒱 𑒯𑒼𑒃𑒞 𑒕𑒻𑒏 𑒮𑒹। 𑒞𑒰𑒯𑒱𑒧𑒹 𑒏𑒱𑒕𑒳 𑒢𑒯𑒱 𑒦𑒹𑒙𑒪𑒻𑒏 𑒍𑒏𑒩𑒰 𑒮𑒦𑒏𑒹𑒿। 𑒯𑒿 𑒐𑒹𑒮𑒰𑒩𑒲 𑒮𑒰𑒑𑒏 𑒥𑒱𑒛𑓃𑒱𑒨𑒰 𑒥𑒢𑒰 𑒏𑒋 𑒮𑓀𑒏𑒩𑓂𑒭𑒝𑒏 𑒏𑒢𑒱𑒨𑒰𑒿 𑒮𑒢𑒹𑒮𑒏 𑒯𑒹𑒞𑒳 𑒠𑒹𑒢𑒹 𑒩𑒯𑒟𑒱𑒢𑓂𑒯, 𑒪𑒰𑒪 𑒏𑒰𑒏𑒲𑒏 𑒯𑒹𑒞𑒳। 𑒧𑒳𑒠𑒰 𑒣𑒳𑒪𑒱𑒮𑒥𑒰 𑒮𑒦 𑒋𑒯𑒱𑒣𑒩 𑒯𑒳𑒢𑒏𑒰 𑒪𑒼𑒏𑒱 𑒪𑒹𑒪𑒏𑒢𑓂𑒯𑒱।)
𑒮𑒱𑒣𑒰𑒯𑒲 𑒋𑒏: 𑒄 𑒏𑒲 𑒕𑒲।
𑒮𑓀𑒏𑒩𑓂𑒭𑒝: 𑒄 𑒞𑒿 𑒮𑒩𑒏𑒰𑒩, 𑒕𑒲 𑒐𑒹𑒮𑒰𑒩𑒲𑒏 𑒥𑒱𑒛𑓃𑒱𑒨𑒰।
𑒮𑒱𑒣𑒰𑒯𑒲𑒏 𑒁𑒤𑒮𑒩: 𑒁𑒔𑓂𑒕𑒰, 𑒥𑒹𑒏𑒴𑒤 𑒥𑒳𑒗𑒻𑒞 𑒕𑒲 𑒯𑒧𑒩𑒰। 𑒧𑒼𑒯𑒢 𑒮𑒱𑓀𑒯 𑒥𑒞𑒰𑒆 𑒞𑒿 𑒄 𑒏𑒲 𑒕𑒲।
𑒮𑒱𑒣𑒰𑒯𑒲 𑒠𑒴: 𑒑𑒰𑒖𑒰 𑒕𑒻𑒏 𑒮𑒩𑒏𑒰𑒩। 𑒑𑒖𑒹𑒩𑒲 𑒥𑒳𑒗𑒰𑒃𑒞 𑒁𑒕𑒱 𑒄।
𑒮𑒱𑒣𑒰𑒯𑒲𑒏 𑒁𑒤𑒮𑒩: 𑒂𑒥 𑒏𑒯𑒴 𑒨𑒾 𑒮𑒫𑒰𑒩𑒲। 𑒯𑒧 𑒞𑒿 𑒧𑒼𑒯𑒢 𑒮𑒱𑓀𑒯𑒏𑒹𑒿 𑒢𑒯𑒱 𑒏𑒯𑒪𑒱𑒨𑒻𑒏, 𑒖𑒹 𑒄 𑒑𑒰𑒖𑒰 𑒕𑒲। 𑒧𑒳𑒠𑒰 𑒖𑒹𑒿 𑒞𑒿 𑒄 𑒕𑒲 𑒑𑒰𑒖𑒰, 𑒞𑒹𑒿 𑒧𑒼𑒯𑒢 𑒮𑒱𑓀𑒯 𑒮𑒹 𑒏𑒯𑒪𑒏।
𑒮𑓀𑒏𑒩𑓂𑒭𑒝: 𑒮𑒩𑒏𑒰𑒩 𑒕𑒱𑒨𑒻𑒏 𑒞𑒿 𑒄 𑒥𑒱𑒛𑓃𑒱𑒨𑒰, 𑒯𑒧𑒩 𑒏𑒢𑒱𑒨𑒰𑒿 𑒮𑒢𑒹𑒮 𑒥𑒢𑓂𑒯𑒪𑒏 𑒁𑒕𑒱 𑒪𑒰𑒪 𑒏𑒰𑒏𑒲𑒏..........
𑒮𑒱𑒣𑒰𑒯𑒲 𑒋𑒏: 𑒪𑓄 𑒔𑒪𑒴 𑒋𑒏𑒩𑒰 𑒖𑒹𑒪𑒧𑒹 𑒮𑒦𑒙𑒰 𑒏𑒯𑒱 𑒠𑒹𑒞।
(𑒮𑓀𑒏𑒩𑓂𑒭𑒝𑒏 𑒂𑒿𑒐𑒱𑒮𑒿 𑒠𑒯𑒼-𑒥𑒯𑒼 𑒢𑒼𑒩 𑒥𑒯𑒨 𑒪𑒑𑒻𑒞 𑒕𑒢𑓂𑒯𑒱। 𑒧𑒳𑒠𑒰 𑒮𑒱𑒣𑒰𑒯𑒲 𑒕𑒪 𑒥𑒳𑒗𑒢𑒳𑒏।)
𑒮𑒱𑒣𑒰𑒯𑒲 𑒠𑒴: 𑒏𑒞𑒹𑒏 𑒣𑒰𑒃 𑒁𑒕𑒱 𑒮𑒿𑒑𑒧𑒹।
(𑒠𑒱𑒪𑓂𑒪𑒲𑒧𑒹 𑒮𑓂𑒙𑒹𑒬𑒢𑒮𑒿 𑒪𑒰𑒪𑒏𑒰𑒏𑒰𑒏 𑒒𑒩 𑒡𑒩𑒱 𑒠𑒴 𑒥𑒮 𑒥𑒠𑒪𑒱 𑒏𑒋 𑒖𑒰𑒋 𑒣𑒛𑓃𑒻𑒞 𑒕𑒻𑒏। 𑒮𑒹 𑒮𑒦 𑒯𑒱𑒮𑒰𑒥 𑒪𑒑𑒰 𑒏𑒋 𑒥𑒲𑒮 𑒙𑒰𑒏𑒰 𑒕𑒼𑒛𑓃𑒱 𑒏𑒋 𑒣𑒳𑒪𑒱𑒮𑒥𑒰 𑒮𑒦𑒙𑒰 𑒪𑓄 𑒪𑒹𑒪𑒏𑒢𑓂𑒯𑒱। 𑒯𑒿 𑒐𑒹𑒮𑒰𑒩𑒲𑒏 𑒥𑒱𑒛𑓃𑒱𑒨𑒰 𑒡𑒩𑒱 𑒕𑒼𑒛𑓃𑒱 𑒠𑒹𑒪𑒏𑒢𑓂𑒯𑒱। 𑒣𑒰𑒃𑒏 𑒂𑒠𑒰𑒢 𑒣𑓂𑒩𑒠𑒰𑒢 𑒦𑒹𑒪। 𑒣𑒳𑒪𑒱𑒮𑒥𑒰 𑒮𑒦 𑒅𑒞𑒩𑒱 𑒑𑒹𑒪। 𑒮𑓀𑒏𑒩𑓂𑒭𑒝 𑒮𑒹𑒯𑒼 𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒠𑒱𑒪𑓂𑒪𑒲 𑒮𑓂𑒙𑒹𑒬𑒢𑒣𑒩 𑒅𑒞𑒩𑒱 𑒑𑒹𑒪𑒰𑒯। 𑒤𑒹𑒩 𑒧𑓀𑒔𑒣𑒩 𑒪𑒰𑒪 𑒏𑒰𑒏𑒰, 𑒪𑒰𑒪 𑒏𑒰𑒏𑒲 𑒂 𑒮𑓀𑒏𑒩𑓂𑒭𑒝 𑒛𑓂𑒩𑒰𑒃𑓀𑒑 𑒩𑒴𑒧𑒧𑒹 𑒥𑒻𑒮𑒪 𑒕𑒟𑒱।)
𑒪𑒰𑒪 𑒏𑒰𑒏𑒰: (𑒤𑒼𑒢𑒣𑒩) 𑒁𑒔𑓂𑒕𑒰। 𑒄 𑒞𑒿 𑒢𑒲𑒏 𑒐𑒥𑒩𑒱 𑒮𑒳𑒢𑒹𑒪𑒯𑒳𑒿। 𑒧𑒲𑒞 𑒞𑒿 𑒩𑒯𑒻𑒞 𑒕𑒟𑒱, 𑒩𑒯𑒻𑒞 𑒕𑒟𑒱 𑒏𑒲 𑒮𑒦𑒙𑒰 𑒑𑒣 𑒮𑒼𑒔𑒰 𑒖𑒰𑒃𑒞 𑒕𑒪𑒢𑓂𑒯𑒱 𑒂 𑒏𑒼𑒜𑓃 𑒤𑒰𑒙𑒱 𑒖𑒰𑒃𑒞 𑒕𑒢𑓂𑒯𑒱। (𑒤𑒼𑒢 𑒩𑒰𑒐𑒻𑒞) 𑒮𑒳𑒢𑒪𑒱𑒨𑒻 𑒨𑒻। 𑒧𑒲𑒞𑒏 𑒥𑒹𑒙𑒰 𑒑𑒰𑒧 𑒣𑒯𑒳𑒿𑒔𑒱 𑒑𑒹𑒪𑒢𑓂𑒯𑒱।
𑒪𑒰𑒪 𑒏𑒰𑒏𑒲: 𑒥𑒰𑒯। 𑒩𑒔𑓂𑒕 𑒦𑒑𑒫𑒰𑒢। 𑒧𑒳𑒠𑒰 𑒥𑒾𑒂 𑒄 𑒮𑒣𑓂𑒣𑒞 𑒐𑒰𑒆 𑒖𑒹 𑒂𑒥 𑒣𑒮𑒲𑒗𑒏 𑒏𑒰𑒿𑒙 𑒖𑒹𑒯𑒢 𑒯𑒿𑒮𑒲 𑒢𑒯𑒱 𑒏𑒩𑒥। (𑒪𑒰𑒪 𑒏𑒰𑒏𑒰 𑒠𑒱𑒮 𑒧𑒳𑒿𑒯 𑒏𑒋) 𑒯𑒱𑒢𑒏𑒩 𑒢𑒼𑒏𑒩𑒲𑒏 𑒏𑒲 𑒦𑒹𑒪𑒢𑓂𑒯𑒱।
𑒮𑓀𑒏𑒩𑓂𑒭𑒝: 𑒢𑒼𑒏𑒩𑒲-𑒞𑒼𑒏𑒩𑒲 𑒢𑒯𑒱 𑒯𑒼𑒨𑒞 𑒏𑒰𑒏𑒲 𑒯𑒧𑒩𑒰𑒮𑒿। 𑒮𑒣𑓂𑒣𑒞 𑒐𑒰𑒃𑒞 𑒕𑒲 𑒖𑒹 𑒣𑒮𑒲𑒗𑒏 𑒏𑒰𑒿𑒙 𑒥𑒪𑒰 𑒯𑒿𑒮𑒲 𑒂𑒥 𑒢𑒯𑒱 𑒏𑒩𑒥। 𑒂𑒥 𑒞𑒿 𑒑𑒰𑒧 𑒒𑒳𑒩𑒥𑒰𑒏 𑒞𑒻𑒨𑒰𑒩𑒲 𑒏𑒩𑒋 𑒠𑒱𑒁।
𑒪𑒰𑒪 𑒏𑒰𑒏𑒲: 𑒠𑒱𑒪𑓂𑒪𑒲 𑒞𑒿 𑒒𑒳𑒧𑒱 𑒪𑒱𑒁। 𑒪𑒰𑒪 𑒏𑒱𑒪𑒰 𑒠𑒹𑒐𑒱 𑒪𑒱𑒁।

𑒣𑒰𑒿𑒔𑒧 𑒏𑒪𑓂𑒪𑒼𑒪 𑒣𑒯𑒱𑒪 𑒁𑓀𑒏
(𑒠𑒱𑒪𑓂𑒪𑒲𑒏 𑒪𑒰𑒪 𑒏𑒱𑒪𑒰𑒏 𑒣𑒰𑒕𑒴𑒧𑒹 𑒩𑒫𑒱 𑒠𑒱𑒢 𑒦𑒼𑒩𑒧𑒹 𑒖𑒹 𑒔𑒼𑒩 𑒥𑒖𑒰𑒩 𑒪𑒑𑒻𑒞 𑒩𑒯𑒋 𑒞𑒰𑒯𑒱𑒧𑒹 𑒮𑓀𑒏𑒩𑓂𑒭𑒝 𑒁𑒣𑒢 𑒦𑒰𑒑𑓂𑒨𑒏 𑒣𑒩𑒲𑒏𑓂𑒭𑒝𑒏 𑒯𑒹𑒞𑒳 𑒣𑒯𑒳𑒿𑒔𑒻𑒞 𑒕𑒟𑒱। 𑒮𑓀𑒏𑒩𑓂𑒭𑒝𑒏𑒹𑒿 𑒋𑒯𑒱 𑒥𑒖𑒰𑒩𑒮𑒿, 𑒮𑒮𑓂𑒞 𑒂 𑒢𑒲𑒏 𑒔𑒲𑒖 𑒏𑒱𑒢𑒥𑒰𑒏 𑒪𑒴𑒩𑒱 𑒢𑒯𑒱 𑒕𑒢𑓂𑒯𑒱 𑒮𑒹 𑒮𑒦 𑒏𑒯𑒻𑒞 𑒕𑒪𑒢𑓂𑒯𑒱। 𑒮𑒹 𑒑𑒰𑒧𑒏 𑒥𑒳𑒡𑒱𑒨𑒰𑒩 𑒮𑓀𑒏𑒩𑓂𑒭𑒝 𑒣𑒯𑒳𑒿𑒔𑒪𑒰𑒯 𑒋𑒞𑒋।𑒍𑒯𑒱 𑒣𑒩𑒲𑒏𑓂𑒭𑒝𑒏 𑒠𑒱𑒢, 𑒮𑓀𑒏𑒩𑓂𑒭𑒝𑒏 𑒍𑒞𑒨 𑒣𑒯𑒳𑒿𑒔𑒥𑒰𑒏 𑒠𑒹𑒩𑒲 𑒕𑒪𑒢𑓂𑒯𑒱 𑒂𑒏𑒱 𑒋𑒏 𑒑𑒼𑒙𑒹 𑒮𑓀𑒏𑒩𑓂𑒭𑒝𑒏 𑒂𑒿𑒐𑒱𑒮𑒿 𑒢𑒳𑒏𑒰 𑒏𑒨 𑒏𑒱𑒕𑒳 𑒫𑒮𑓂𑒞𑒳 𑒩𑒰𑒐𑒨 𑒪𑒰𑒑𑒪 𑒂 𑒠𑒹𑒐𑒱𑒞𑒹-𑒠𑒹𑒐𑒱𑒞𑒹 𑒍𑒞𑒋𑒮𑒿 𑒢𑒱𑒣𑒞𑓂𑒞𑒰 𑒦𑒨 𑒑𑒹𑒪। 𑒮𑓀𑒏𑒩𑓂𑒭𑒝𑒏 𑒧𑒼𑒢 𑒍𑒧𑓂𑒯𑒩 𑒑𑒹𑒪𑒢𑓂𑒯𑒱 𑒂 𑒍 𑒍𑒏𑒩 𑒣𑒰𑒕𑒰𑒿 𑒡𑒨 𑒪𑒹𑒪𑒢𑓂𑒯𑒱। 𑒥𑒛𑓂𑒛 𑒧𑒳𑒬𑓂𑒏𑒱𑒪𑒮𑒿 𑒮𑓀𑒏𑒩𑓂𑒭𑒝 𑒍𑒏𑒩𑒰 𑒞𑒰𑒏𑒱 𑒪𑒹𑒪𑒢𑓂𑒯𑒱।)
𑒮𑓀𑒏𑒩𑓂𑒭𑒝: 𑒏𑒲 𑒢𑒳𑒏𑒰 𑒩𑒯𑒪 𑒕𑒲 ?
𑒔𑒼𑒩 𑒥𑒖𑒰𑒩𑒏 𑒠𑒼𑒏𑒰𑒢𑒠𑒰𑒩: 𑒄 𑒁𑒯𑒰𑒿𑒏 𑒥𑒳𑒞𑓂𑒞𑒰𑒏 𑒥𑒰𑒯𑒩 𑒁𑒕𑒱।
𑒮𑓀𑒏𑒩𑓂𑒭𑒝: 𑒁𑒯𑒰𑒿 𑒏𑒯𑒴 𑒞𑒿 𑒚𑒲𑒏, 𑒖𑒹 𑒏𑒲 𑒋𑒯𑒢 𑒁𑒪𑒦𑓂𑒨 𑒁𑒯𑒰𑒿𑒏 𑒏𑒼𑒩𑒧𑒹 𑒁𑒕𑒱।
𑒔𑒼𑒩 𑒥𑒖𑒰𑒩𑒏 𑒠𑒼𑒏𑒰𑒢𑒠𑒰𑒩: (𑒗𑒰𑒛𑓃𑒱-𑒣𑒼𑒕𑒱 𑒏𑒨 𑒋𑒏 𑒖𑒼𑒛𑓃 𑒖𑒳𑒞𑓂𑒞𑒰 𑒢𑒱𑒏𑒰𑒪𑒪𑒢𑓂𑒯𑒱) 𑒏𑒼𑒢𑒼 𑒣𑒻𑒒 𑒑𑒰𑒛𑓃𑒲 𑒥𑒪𑒰𑒏 𑒥𑒰𑒙𑒧𑒹 𑒕𑒲 𑒖𑒹 𑒑𑒰𑒛𑓃𑒲𑒮𑒿 𑒅𑒞𑒩𑒱 𑒋𑒯𑒱 𑒖𑒳𑒞𑓂𑒞𑒰𑒏 𑒮𑒯𑒲 𑒣𑒩𑒲𑒏𑓂𑒭𑒝 𑒏𑒩𑒥𑒰𑒧𑒹 𑒮𑒧𑒩𑓂𑒟 𑒯𑒼𑒋𑒞 𑒂 𑒮𑒯𑒲 𑒠𑒰𑒧 𑒠𑒹𑒞।
𑒮𑓀𑒏𑒩𑓂𑒭𑒝: 𑒠𑒰𑒧 𑒞𑒿 𑒏𑒯𑒴।
𑒔𑒼𑒩 𑒥𑒖𑒰𑒩𑒏 𑒠𑒼𑒏𑒰𑒢𑒠𑒰𑒩: 𑒁𑒯𑒰𑒿 𑒏𑒯𑒻𑒞 𑒕𑒲 𑒞𑒿 𑒮𑒳𑒢𑒴। 𑒔𑒰𑒩𑒱 𑒮𑒋 𑒙𑒰𑒏𑒰 𑒠𑒰𑒧 𑒁𑒕𑒱 𑒋𑒏𑒩। 𑒯𑒿।
𑒮𑓀𑒏𑒩𑓂𑒭𑒝: 𑒯𑒧𑒩𑒰 𑒪𑒑 𑒞𑒿 𑒧𑒰𑒞𑓂𑒩 𑒞𑒲𑒢 𑒮𑒋 𑒮𑒰𑒚𑒱 𑒙𑒰𑒏𑒰 𑒁𑒕𑒱।
𑒔𑒼𑒩 𑒥𑒖𑒰𑒩𑒏 𑒠𑒼𑒏𑒰𑒢𑒠𑒰𑒩: 𑒯𑒧 𑒣𑒯𑒱𑒢𑒯𑒱𑒨𑒹 𑒢𑒹 𑒏𑒯𑒢𑒹 𑒕𑒪𑒯𑒳𑒿। 𑒏𑒞𑒋 𑒒𑒩 𑒦𑒹𑒪 𑒁𑒯𑒰𑒿𑒏।
𑒮𑓀𑒏𑒩𑓂𑒭𑒝: 𑒖𑒢𑒏𑒣𑒳𑒩।
𑒔𑒼𑒩 𑒥𑒖𑒰𑒩𑒏 𑒠𑒼𑒏𑒰𑒢𑒠𑒰𑒩: 𑒣𑒛𑓃𑒼𑒮𑒱𑒨𑒰 𑒕𑒲 𑒞𑒐𑒢 𑒞𑒿। 𑒁𑒯𑒰𑒿𑒮𑒿 𑒏𑒲 𑒪𑒰𑒦 𑒏𑒧𑒰𑒋𑒥। 𑒠𑒮 𑒙𑒰𑒏𑒰 𑒞𑒿 𑒛𑒲.𑒙𑒲.𑒮𑒲. 𑒥𑒮𑒏 𑒏𑒱𑒩𑒹𑒖𑒰 𑒮𑒹𑒯𑒼 𑒪𑒰𑒑𑒞। 𑒔𑒪𑒴 𑒮𑒰𑒜𑓃𑒹 𑒞𑒲𑒢 𑒮𑒨 𑒠𑒱𑒁।
𑒮𑓀𑒏𑒩𑓂𑒭𑒝: 𑒔𑒪𑒴 𑒂𑒃 𑒏𑒰𑒪𑓂𑒯𑒱𑒏 𑒨𑒳𑒑𑒧𑒹 𑒁𑒯𑒰𑒿 𑒮𑒢 𑒪𑒼𑒏 𑒁𑒕𑒱 𑒖𑒹 𑒣𑒛𑓃𑒼𑒮𑒲𑒏 𑒏𑒠𑒩 𑒏𑒩𑒻𑒞 𑒁𑒕𑒱।
𑒔𑒼𑒩 𑒥𑒖𑒰𑒩𑒏 𑒠𑒼𑒏𑒰𑒢𑒠𑒰𑒩: 𑒠𑒱𑒪𑓂𑒪𑒲𑒧𑒹 𑒮𑒦 𑒁𑒣𑒢𑒹 𑒪𑒼𑒏 𑒁𑒕𑒱। 𑒋𑒞𑒋 𑒞𑒿 𑒟𑒴𑒏𑒼 𑒤𑒹𑒏𑒻𑒞 𑒕𑒲 𑒞𑒿 𑒁𑒣𑒢𑒹 𑒪𑒼𑒏𑒣𑒩 𑒣𑒛𑓃𑒻𑒞 𑒁𑒕𑒱।

𑒣𑒰𑒿𑒔𑒧 𑒏𑒪𑓂𑒪𑒼𑒪 𑒠𑒼𑒮𑒩 𑒁𑓀𑒏
(𑒮𑓀𑒏𑒩𑓂𑒭𑒝 𑒑𑒰𑒧 𑒒𑒳𑒩𑒪𑒰𑒯। 𑒖𑒰𑒯𑒱 𑒠𑒱𑒢𑒮𑒿 𑒄 𑒖𑒳𑒞𑓂𑒞𑒰 𑒂𑒨𑒪, 𑒋𑒏𑒩𑒰𑒧𑒹 𑒣𑒰𑒢𑒱 𑒢𑒯𑒱 𑒪𑒰𑒑𑒨 𑒠𑒹𑒪𑒢𑓂𑒯𑒱। 𑒑𑒼𑒢𑒩 𑒦𑒰𑒃 𑒂 𑒮𑓀𑒏𑒩𑓂𑒭𑒝𑒏 𑒧𑓀𑒔𑒣𑒩 𑒣𑒠𑒰𑒩𑓂𑒣𑒝।)
𑒑𑒼𑒢𑒩 𑒦𑒰𑒃: 𑒨𑒾 𑒧𑒲𑒞 𑒖𑒳𑒞𑓂𑒞𑒰 𑒏𑒱𑒋𑒯 𑒯𑒰𑒟𑒧𑒹 𑒅𑒚𑒹𑒢𑒹 𑒕𑒲।
𑒮𑓀𑒏𑒩𑓂𑒭𑒝: 𑒯𑒾 𑒑𑒼𑒢𑒩। 𑒣𑒰𑒢𑒱 𑒏𑒼𑒢𑒰 𑒪𑒰𑒑𑒋 𑒠𑒹𑒥𑒻𑒏 𑒋𑒏𑒩𑒰। 𑒣𑒻𑒩𑒏 𑒔𑒧𑒛𑓃𑒰 𑒮𑒛𑓃𑒞 𑒞𑒿 𑒤𑒹𑒩 𑒢𑒫𑒏𑒰 𑒂𑒥𑒱 𑒖𑒋𑒞। 𑒧𑒳𑒠𑒰 𑒄 𑒮𑒛𑓃𑒱 𑒖𑒋𑒞 𑒞𑒐𑒢 𑒏𑒞𑒋 𑒮𑒿 𑒁𑒋𑒞।
(𑒠𑒳𑒢𑒴 𑒑𑒼𑒙𑒹 𑒖𑒰𑒃𑒞 𑒕𑒟𑒱 𑒂 𑒤𑒹𑒩 𑒂𑒥𑒱 𑒖𑒰𑒃𑒞 𑒕𑒟𑒱। 𑒮𑓀𑒏𑒩𑓂𑒭𑒝 𑒖𑒳𑒞𑓂𑒞𑒰 𑒮𑒱𑒁𑒥𑒰 𑒩𑒯𑒪 𑒕𑒟𑒱।)

𑒑𑒼𑒢𑒩 𑒦𑒰𑒃: 𑒄 𑒏𑒲 𑒏𑓄 𑒩𑒯𑒪 𑒕𑒲 𑒧𑒲𑒞। 𑒋𑒞𑒹𑒏 𑒢𑒲𑒏 𑒩𑓀𑒑 𑒩𑒴𑒣𑒏 𑒖𑒳𑒞𑓂𑒞𑒰𑒏𑒹𑒿 𑒮𑒱𑒁𑒥𑒰 𑒩𑒯𑒪 𑒕𑒲।
𑒮𑓀𑒏𑒩𑓂𑒭𑒝: 𑒯𑒾 𑒑𑒼𑒢𑒩। 𑒥𑒛𑓂𑒛 𑒚𑒏𑒰𑒢 𑒚𑒏𑒹𑒪𑒯𑒳𑒿। 𑒏𑒞𑒍 𑒣𑒰𑒢𑒱 𑒠𑒹𑒐𑒲 𑒞𑒿 𑒣𑒻𑒩𑒏𑒹 𑒮𑒛𑓃𑒰 𑒠𑒻𑒞 𑒩𑒯𑒲 𑒂 𑒋𑒯𑒱 𑒖𑒳𑒞𑓂𑒞𑒰𑒏𑒹𑒿 𑒯𑒰𑒟𑒧𑒹 𑒅𑒚𑒰 𑒪𑒻𑒞 𑒕𑒪𑒯𑒳𑒿। 𑒔𑒰𑒩𑒱𑒨𑒹 𑒠𑒱𑒢𑒞𑒿 𑒣𑒯𑒱𑒩𑒢𑒹 𑒯𑒼𑒋𑒥। 𑒂𑒃 𑒖𑒳𑒞𑓂𑒞𑒰𑒏 𑒣𑒴𑒩𑒰 𑒮𑒼𑒪, 𑒏𑒩𑒹𑒖 𑒖𑒹𑒏𑒰𑒿, 𑒁𑒣𑒢 𑒋𑒯𑒱 𑒂𑒿𑒐𑒱𑒏 𑒮𑒼𑒗𑒰𑒿 𑒖𑒳𑒞𑓂𑒞𑒰𑒮𑒿 𑒥𑒰𑒯𑒩 𑒂𑒥𑒱 𑒑𑒹𑒪।
𑒑𑒼𑒢𑒩 𑒦𑒰𑒃: 𑒁𑒯𑒰𑒿𑒏𑒹𑒿 𑒏𑒹 𑒚𑒏𑒱 𑒪𑒹𑒪𑒏। 𑒁𑒯𑒰𑒿𑒏 𑒢𑒰𑒧 𑒞𑒿 𑒥𑒳𑒗𑒢𑒳𑒏 𑒪𑒼𑒏𑒧𑒹 𑒁𑒥𑒻𑒞 𑒁𑒕𑒱।
𑒮𑓀𑒏𑒩𑓂𑒭𑒝: 𑒧𑒱𑒞𑓂𑒩 𑒏𑒲 𑒏𑒯𑒴? 𑒏𑓂𑒨𑒼 𑒥𑒳𑒗𑒢𑒳𑒏 𑒏𑒯𑒻𑒞 𑒁𑒕𑒱 𑒂𑒏𑒱 𑒋𑒯𑒱 𑒖𑒳𑒞𑓂𑒞𑒰𑒏 𑒥𑒛𑓃𑒰𑒃 𑒏𑒩𑒻𑒞 𑒁𑒕𑒱, 𑒞𑒿 𑒏𑒼𑒜𑓃 𑒤𑒰𑒙𑒨 𑒪𑒑𑒻𑒞 𑒁𑒕𑒱। 𑒏𑒼𑒢𑒯𑒳𑒢𑒰 𑒮𑒱𑒨𑒰-𑒤𑒛𑓃𑒰 𑒏𑒨 𑒣𑒰𑒃 𑒆𑒣𑓂𑒣𑒩 𑒏𑒩𑒥। 𑒥𑒛𑓂𑒛 𑒠𑒰𑒥𑒲 𑒕𑒪, 𑒖𑒹 𑒧𑒻𑒟𑒱𑒪 𑒕𑒲 𑒂 𑒥𑒳𑒡𑒱𑒨𑒰𑒩𑒲𑒧𑒹 𑒏𑒼𑒢𑒼 𑒮𑒰𑒢𑒲 𑒢𑒯𑒱 𑒁𑒕𑒱। 𑒧𑒳𑒠𑒰 𑒄 𑒚𑒏𑒰𑒢 𑒖𑒹 𑒠𑒱𑒪𑓂𑒪𑒲𑒧𑒹 𑒚𑒏𑒹𑒪𑒯𑒳𑒿 𑒞𑒿 𑒂𑒥 𑒞𑒿 𑒍𑒞𑒳𑒏𑓂𑒏𑒰 𑒪𑒼𑒏𑒏𑒹𑒿 𑒠𑒝𑓂𑒛𑒫𑒞𑒹 𑒏𑒩𑒻𑒞 𑒩𑒯𑒥𑒰𑒏 𑒧𑒼𑒢 𑒏𑒩𑒻𑒞 𑒁𑒕𑒱। 𑒋𑒯𑒱 𑒪𑒰𑒪𑒏𑒱𑒪𑒰𑒏 𑒔𑒼𑒩-𑒥𑒖𑒰𑒩𑒏 𑒪𑒼𑒏 𑒮𑒦 𑒞𑒿 𑒏𑒞𑒹𑒏𑒼 𑒧𑒯𑒼𑒧𑒯𑒰𑒣𑒰𑒡𑓂𑒨𑒰𑒨𑒏 𑒥𑒳𑒠𑓂𑒡𑒱𑒏𑒹𑒿 𑒑𑒩𑒠𑒰𑒧𑒹 𑒧𑒱𑒪𑒰 𑒠𑒹𑒞𑒢𑓂𑒯𑒱। 𑒁𑒅 𑒖𑒲, 𑒦𑒰𑒩𑒞-𑒩𑒞𑓂𑒢 𑒥𑒿𑒙𑒻𑒞 𑒕𑒲, 𑒂 𑒞𑒐𑒢 𑒋𑒯𑒱 𑒣𑒩 𑒏𑓀𑒙𑓂𑒩𑒼𑒫𑒩𑓂𑒮𑒲 𑒏𑒩𑒻𑒞 𑒕𑒲। 𑒁𑒮𑒪 𑒦𑒰𑒩𑒞-𑒩𑒞𑓂𑒢 𑒮𑒦 𑒞𑒿 𑒪𑒰𑒪𑒏𑒱𑒪𑒰𑒏 𑒣𑒰𑒿𑒕𑒰𑒿𑒧𑒹 𑒁𑒕𑒱, 𑒮𑒹 𑒋𑒏 𑒠𑒴 𑒙𑒰 𑒢𑒯𑒱 𑒫𑒩𑒢𑓂 𑒧𑒰𑒞𑓂𑒩𑒰 𑒧𑒹।
𑒑𑒼𑒢𑒩 𑒦𑒰𑒃: 𑒦𑒰𑒩𑒞 𑒩𑒞𑓂𑒢 𑒮𑒦!
𑒮𑓀𑒏𑒩𑓂𑒭𑒝: 𑒂𑒢 𑒮𑒦𑒞𑒿 𑒋𑒯𑒱 𑒒𑒙𑒢𑒰𑒏𑒹𑒿 𑒪𑓄 𑒏𑒨 𑒏𑒱𑒔𑒏𑒱𑒔𑒥𑒻𑒞𑒹 𑒩𑒯𑒻𑒞 𑒁𑒕𑒱, 𑒏𑒧 𑒮𑒿 𑒏𑒧 𑒨𑒾 𑒦𑒖𑒰𑒩, 𑒁𑒯𑒰𑒿 𑒞𑒿 𑒋𑒯𑒱 𑒒𑒙𑒢𑒰𑒏 𑒧𑒼𑒢 𑒢𑒯𑒱 𑒣𑒰𑒩𑒴।
(𑒣𑒙𑒰𑒏𑓂𑒭𑒹𑒣)