𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒏𑒟𑒰-𑒑𑒪𑓂𑒣 𑒮𑓀𑒑𑓂𑒩𑒯- 𑒑𑒪𑓂𑒣 𑒑𑒳𑒔𑓂𑒕
𑒑𑒪𑓂𑒣 𑒑𑒳𑒔𑓂𑒕
𑒮𑒩-𑒮𑒧𑒰𑒖 𑓓.𑓓
𑒯𑒧 𑒢𑒯𑒱 𑒖𑒰𑒨𑒥 𑒫𑒱𑒠𑒹𑒬 𑓓.𑓑𑓖
𑒩𑒰𑒑 𑒫𑒻𑒠𑒹𑒯𑒲 𑒦𑒻𑒩𑒫𑒲 𑓓.𑓒𑓐
𑒏𑒰𑒪-𑒮𑓂𑒟𑒰𑒢 𑒫𑒱𑒮𑓂𑒟𑒰𑒣𑒢 𑓓.𑓒𑓕
𑒥𑒻𑒮𑒰𑒐𑒲𑒣𑒩 𑒖𑒱𑒢𑒑𑒲 𑓓.𑓒𑓙
𑒮𑒩𑓂𑒫𑒬𑒱𑒏𑓂𑒭𑒰 𑒁𑒦𑒱𑒨𑒰𑒢 𑓓.𑓓𑓒
𑒖𑒰𑒞𑒱𑒫𑒰𑒠𑒲 𑒧𑒩𑒰𑒚𑒲 𑓓.𑓓𑓔
𑒟𑒹𑒟𑒩 𑒧𑒢𑒳𑒏𑓂𑒐 𑓓.𑓓𑓕
𑒥𑒯𑒳𑒣𑒞𑓂𑒢𑒲 𑒫𑒱𑒫𑒰𑒯 𑒂 𑒯𑒱𑒖𑒛𑓃𑒰 𑓔.𑓓𑓖
𑒮𑓂𑒞𑓂𑒩𑒲-𑒥𑒹𑒙𑒲 𑓔.𑓓𑓗
𑒥𑒱𑒂𑒯 𑒂 𑒑𑒼𑒩𑒪𑒑𑒰𑒃 𑓔.𑓓𑓘
𑒣𑓂𑒩𑒞𑒱𑒦𑒰 𑓔.𑓓𑓙
𑒖𑒰𑒞𑒱-𑒣𑒰𑒞𑒱 𑓔.𑓔𑓐
𑒁𑒢𑒳𑒏𑒧𑓂𑒣𑒰𑒏 𑒢𑒼𑒏𑒩𑒲 𑓔.𑓔𑓑
𑒢𑒴𑒞𑒢 𑒧𑒲𑒛𑒱𑒂 𑓔.𑓔𑓒
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑 𑓔.𑓔𑓓
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑-𑓒 𑓔.𑓔𑓕
𑒥𑒰𑒜𑓃𑒱, 𑒦𑒴𑒐 𑒂 𑒣𑓂𑒩𑒫𑒰𑒮 𑓔.𑓔𑓗
𑒢𑒫-𑒮𑒰𑒧𑒢𑓂𑒞 𑓔.𑓔𑓘
𑒩𑒏𑒙𑒪 𑒕𑒪𑒯𑒳𑒿 𑒏𑒼𑒯𑒥𑒩 𑒪𑒨 𑓔.𑓔𑓙
𑒧𑒵𑒞𑓂𑒨𑒳𑒠𑒝𑓂𑒛 𑓔.𑓕𑓕
𑒥𑒰𑒝𑒫𑒲𑒩 𑓔.𑓕𑓘
𑒣𑓂𑒩𑒫𑒰𑒮 𑓔.𑓖𑓑
𑒮𑒩-𑒮𑒧𑒰𑒖
“𑒋𑒏𑒙𑒰 𑒣𑓂𑒪𑒧𑓂𑒥𑒩, 𑒋𑒏𑒙𑒰 𑒣𑒹𑒢𑓂𑒙𑒩 𑒂 𑒞𑒲𑒢 𑒙𑒰 𑒖𑒼𑒢 𑒪𑒰𑒑𑒞। 𑒮𑒰𑒞 𑒠𑒱𑒢𑒧𑒹 𑒒𑒩 𑒔𑒧𑒏𑒰 𑒠𑒹𑒥। 𑒁𑒯𑒰𑒿𑒏 𑒏𑒰𑒖𑒧𑒹 𑒏𑒧𑒰𑒃 𑒢𑒯𑒱 𑒏𑒩𑒥𑒰𑒏 𑒁𑒕𑒱 𑒯𑒧𑒩𑒰। 𑒁𑒯𑒰𑒿𑒏 𑒁𑒯𑒱𑒚𑒰𑒧 𑒋𑒞𑒹𑒏 𑒩𑒰𑒮 𑒪𑒼𑒏 𑒁𑒥𑒻𑒞 𑒕𑒟𑒱, 𑒪𑒼𑒏 𑒠𑒹𑒐𑒞 𑒞𑒿 𑒣𑒴𑒕𑒞 𑒖𑒹 𑒄 𑒏𑒰𑒖 𑒏𑒹 𑒏𑒋𑒢𑒹 𑒁𑒕𑒱। 𑒞𑒯𑒲𑒮𑒿 𑒯𑒧𑒩𑒰 𑒔𑒰𑒩𑒱 𑒚𑒰𑒧 𑒏𑒰𑒖 𑒦𑒹𑒙𑒱 𑒖𑒋𑒞 𑒞𑒹𑒿। 𑒁𑒣𑒢 𑒋𑒩𑒱𑒨𑒰𑒏 𑒪𑒼𑒏 𑒠𑒱𑒪𑓂𑒪𑒲𑒧𑒹 𑒏𑒞𑒋 𑒣𑒰𑒥𑒲”- 𑒢𑒥𑒲 𑒥𑒏𑒮 𑒢𑒰𑒧 𑒩𑒯𑒋 𑒍𑒏𑒩।
“𑒁𑒣𑒢 𑒋𑒩𑒱𑒨𑒰𑒏 𑒪𑒼𑒏 𑒕𑒲, 𑒏𑒞𑒋 𑒒𑒩 𑒁𑒕𑒱”?
“𑒏𑒙𑒱𑒯𑒰𑒩। 𑒯𑒧 𑒞𑒿 𑒏𑒯𑒥 𑒖𑒹 𑒥𑒰𑒟𑒩𑒴𑒧 𑒂 𑒏𑒱𑒔𑒢𑒏 𑒏𑒰𑒖 𑒮𑒹𑒯𑒼 𑒏𑒩𑒥𑒰𑒃𑒋 𑒪𑒱𑒁”।
“𑒁𑒯𑒰𑒿 𑒞𑒿 𑒣𑒼𑒔𑒰𑒩𑒰 𑒂 𑒣𑒹𑒢𑓂𑒙 𑒏𑒩𑒻𑒞 𑒕𑒲, 𑒮𑓀𑒑𑒧𑒹 𑒩𑒰𑒖𑒧𑒱𑒮𑓂𑒞𑓂𑒩𑒲𑒏 𑒏𑒰𑒖 𑒮𑒹𑒯𑒼 𑒏𑒩𑒻𑒞 𑒕𑒲 𑒏𑒲”?
“𑒯𑒧 𑒢𑒯𑒱 𑒏𑒩𑒻𑒞 𑒕𑒲 𑒧𑒳𑒠𑒰 𑒯𑒧𑒩 𑒑𑒾𑒂𑒿 𑒄 𑒏𑒰𑒖 𑒏𑒩𑒻𑒞 𑒁𑒕𑒱। 𑒍 𑒏𑒯𑒻𑒞 𑒩𑒯𑒋 𑒖𑒹 𑒮𑒰𑒯𑒥𑒮𑒿 𑒣𑒳𑒕𑒴 𑒏𑒰𑒖𑒏 𑒪𑒹𑒪। 𑒍𑒢𑒰 𑒍𑒏𑒩 𑒏𑒰𑒖 𑒥𑒛𑓂𑒛 𑒚𑒼𑒮 𑒯𑒼𑒃𑒞 𑒕𑒻𑒏। 𑒯𑒧 𑒥𑒖𑒥𑒻𑒞 𑒕𑒲, 𑒧𑒰𑒞𑓂𑒩 𑒦𑒹𑒿𑒙 𑒏𑓄 𑒪𑒱𑒨𑒾𑒏। 𑒢𑒯𑒱 𑒞𑒿 𑒯𑒧𑒩𑒰 𑒏𑒯𑒞 𑒖𑒹 𑒞𑒴𑒿 𑒮𑒰𑒯𑒥𑒮𑒿 𑒣𑒳𑒕𑒢𑒯𑒱𑒨𑒹 𑒢𑒯𑒱 𑒯𑒹𑒥𑒯𑒳𑒢𑓂𑒯”।
𑒍 𑒧𑒼𑒥𑒰𑒃𑒪𑒣𑒩 𑒤𑒼𑒢 𑒧𑒱𑒪𑒹𑒪𑒏 𑒂 𑒏𑒼𑒢𑒼 𑒮𑒩𑓂𑒤𑒳𑒠𑓂𑒠𑒲𑒢𑒏𑒹𑒿 𑒥𑒖𑒹𑒪𑒏।
𑒮𑒩𑓂𑒤𑒳𑒠𑓂𑒠𑒲𑒢 𑒏𑒱𑒔𑒹𑒢 𑒥𑒰𑒟𑒩𑒴𑒧 𑒮𑒦𑒏 𑒧𑒳𑒂𑒋𑒢𑒰 𑒏𑒹𑒪𑒏 𑒂 𑒏𑒩𑒝𑒲𑒮𑒿 𑒠𑒹𑒥𑒰𑒪𑒣𑒩 𑒧𑒰𑒩𑒪𑒏 𑒞𑒿 𑒣𑓂𑒪𑒰𑒮𑓂𑒙𑒩 𑒗𑒯𑒩𑒱 𑒏𑓄 𑒐𑒮𑒱 𑒣𑒛𑓃𑒪𑒻𑒏। 𑒢𑒪𑒏 𑒙𑒼𑒙𑒲𑒏𑒹𑒿 𑒒𑒳𑒧𑒹𑒪𑒏 𑒞𑒿 𑒍 𑒙𑒴𑒙𑒱 𑒏𑓄 𑒐𑒮𑒱 𑒣𑒛𑓃𑒪𑒻𑒏। 𑒤𑒹𑒩 𑒍 𑒥𑒰𑒖𑒪-
“𑒮𑒩𑒏𑒰𑒩𑒲 𑒏𑒰𑒖 𑒕𑒱𑒨𑒻𑒏। 𑒢𑒲𑒫 𑒞𑒿 𑒧𑒖𑒑𑒴𑒞 𑒯𑒼𑒃𑒞 𑒕𑒻𑒏 𑒧𑒳𑒠𑒰 𑒤𑒱𑒢𑒱𑒮𑒱𑓀𑒑 𑒢𑒯𑒱 𑒯𑒼𑒃𑒞 𑒕𑒻𑒏। 𑒂 𑒦𑒃𑒨𑒼 𑒑𑒹𑒪𑒋 𑓒𑓐 𑒮𑒰𑒪 𑒣𑒳𑒩𑒰𑒢 𑒄 𑒮𑒦। 𑒠𑒹𑒐𑒴 𑒋𑒯𑒱 𑒠𑒹𑒥𑒰𑒪 𑒮𑒦𑒏 𑒯𑒰𑒪। 𑒮𑒦𑒙𑒰 𑒁𑒢𑓂𑒛𑒩𑒑𑓂𑒩𑒰𑒅𑒢𑓂𑒛 𑒣𑒰𑒃𑒣 𑒮𑒦 𑒮𑒩𑒱-𑒑𑒪𑒱 𑒑𑒹𑒪 𑒁𑒕𑒱। 𑒞𑒏𑒩𑒹 𑒪𑒲𑒏𑒹𑒖𑒮𑒿 𑒠𑒹𑒥𑒰𑒪 𑒮𑒦𑒏 𑒄 𑒯𑒰𑒪 𑒁𑒕𑒱। 𑒮𑒦𑒙𑒰 𑒣𑒰𑒃𑒣 𑒥𑒠𑒪𑒋 𑒣𑒛𑓃𑒞 𑒮𑒹 𑒮𑒲𑒧𑒹𑒢𑓂𑒙 𑒞𑒿 𑒗𑒰𑒛𑓃𑒃𑒨𑒹 𑒣𑒛𑓃𑒞। 𑒍𑒢𑒰 𑒮𑒲𑒧𑒹𑒢𑓂𑒙𑒧𑒹 𑒏𑒼𑒢𑒼 𑒖𑒰𑒢 𑒥𑒰𑒿𑒔𑒪𑒼 𑒢𑒯𑒱 𑒕𑒻𑒏। 𑒞𑒐𑒢 𑒠𑒹𑒥𑒰𑒪𑒧𑒹 𑒣𑒰𑒟𑒩 𑒮𑒹𑒯𑒼 𑒪𑒑𑒥𑒰𑒃𑒨𑒹 𑒪𑒱𑒁। 𑒄 𑒥𑒧𑓂𑒥𑒃𑒨𑒰-𑒧𑒱𑒮𑓂𑒞𑓂𑒩𑒲 𑒑𑒝𑒹𑒬𑒲𑒮𑒿 𑒖𑒹 𑒁𑒯𑒰𑒿 𑒥𑒩𑒢𑓂𑒛𑒰 𑒩𑒱𑒣𑒹𑒨𑒩 𑒏𑒩𑒹𑒢𑒹 𑒕𑒪𑒯𑒳𑒿 𑒞𑒏𑒩 𑒥𑒰𑒪𑒳 𑒠𑒹𑒐𑒱𑒨𑒾𑒏 𑒏𑒼𑒢𑒰 𑒗𑒛𑓃𑒱 𑒩𑒯𑒪 𑒁𑒕𑒱। 𑒙𑒹𑒮𑓂𑒙 𑒏𑒩𑒋 𑒪𑒹𑒪 𑒋𑒯𑒱 𑒮𑒲𑒧𑒹𑒢𑓂𑒙𑒏𑒹𑒿 𑒯𑒧 𑒗𑒰𑒛𑓃𑒱 𑒏𑓄 𑒢𑒫 𑒮𑒲𑒧𑒹𑒢𑓂𑒙 𑒪𑒑𑒥𑒻𑒞 𑒕𑒲, 𑒣𑒰𑒟𑒩 𑒢𑒯𑒱 𑒥𑒢𑒱 𑒖𑒰𑒋 𑒞𑒿 𑒏𑒯𑒥। 𑒞𑒐𑒢 𑒧𑒼𑒢 𑒯𑒳𑒁𑒋 𑒞𑒿 𑒏𑒰𑒖 𑒠𑒹𑒥 𑒂 𑒢𑒯𑒱 𑒞𑒿 𑒢𑒯𑒱 𑒠𑒹𑒥”- 𑒮𑒹 𑒏𑒯𑒱 𑒍 𑒥𑒩𑒢𑓂𑒛𑒰𑒏 𑒏𑒱𑒕𑒳 𑒯𑒱𑒮𑓂𑒮𑒰𑒏 𑒮𑒲𑒧𑒹𑒢𑓂𑒙 𑒗𑒰𑒛𑓃𑒱 𑒏𑓄 𑒏𑒩𑒱𑒨𑒰 𑒮𑒲𑒧𑒹𑒢𑓂𑒙 𑒪𑒑𑒰 𑒠𑒹𑒪𑒏 𑒂 𑒔𑒪𑒱 𑒑𑒹𑒪।
“𑒄 𑒢𑒥𑒲 𑒥𑒏𑒮𑒏 𑒕𑒼𑒙 𑒦𑒰𑒋 𑒕𑒱𑒨𑒻𑒏। 𑒥𑒛𑓂𑒛 𑒏𑒰𑒖𑒳𑒪। 𑒠𑒱𑒢 𑒦𑒩𑒱 𑒪𑒰𑒑𑒪𑒹 𑒩𑒯𑒻𑒞 𑒁𑒕𑒱, 𑒢𑒰𑒧 𑒕𑒱𑒨𑒻𑒏 𑒍𑒏𑒲𑒪। 𑒢𑒥𑒲 𑒥𑒏𑒮 𑒞𑒿 𑒂𑒥 𑒚𑒱𑒏𑒹𑒠𑒰𑒩 𑒦𑓄 𑒑𑒹𑒪 𑒁𑒕𑒱, 𑒏𑒩𑒝𑒲𑒏𑒹𑒿 𑒯𑒰𑒟𑒼 𑒏𑒯𑒰𑒿 𑒪𑒑𑒥𑒻𑒋। 𑒍𑒏𑒲𑒪 𑒥𑒳𑒗𑒳 𑒧𑒖𑒠𑒴𑒩𑒲 𑒏𑒩𑒻𑒋 𑒁𑒣𑒢 𑒦𑒰𑒋 𑒪𑒑। 𑒂 𑒚𑒲𑒏𑒹𑒠𑒰𑒩𑒏 𑒦𑒰𑒋𑒏 𑒍𑒯𑒠𑒰𑒮𑒿 𑒂𑒢 𑒧𑒖𑒠𑒴𑒩 𑒮𑒦𑒣𑒩 𑒢𑒖𑒩𑒱 𑒮𑒹𑒯𑒼 𑒩𑒐𑒻𑒋”- 𑒤𑒹𑒩 𑒏𑒢𑒹𑒏 𑒏𑒰𑒪 𑒡𑒩𑒱, 𑒄 𑒖𑒹 𑒣𑓂𑒪𑒧𑓂𑒥𑒩 𑒧𑒱𑒮𑓂𑒞𑓂𑒩𑒲 𑒩𑒯𑒋, 𑒐𑒪𑒲𑒪 𑒖𑒏𑒩 𑒢𑒰𑒧 𑒩𑒯𑒻𑒏, 𑒮𑒹 𑒔𑒳𑒣 𑒩𑒯𑒪।
𑒐𑒪𑒲𑒪 𑒯𑒩𑒱𑒨𑒰𑒝𑒰𑒏 𑒩𑒯𑒋 𑒂 𑒥𑒳𑒗𑒴 𑒖𑒹 𑒢𑒥𑒲 𑒥𑒏𑒮𑒏𑒹𑒿 𑒯𑒧𑒩𑒰𑒮𑒿 𑒦𑒹𑒿𑒙 𑒏𑒩𑒹𑒢𑒱𑒯𑒰𑒩 𑒄𑒋𑒯 𑒩𑒯𑒋। 𑒋𑒏𑒙𑒰 𑒕𑒼𑒙 𑒦𑒓𑓂𑒑𑒚𑒲 𑒏𑒩𑒹𑒥𑒰𑒏 𑒩𑒯𑒋 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒏𑒩𑒰 𑒥𑒖𑒹𑒢𑒹 𑒩𑒯𑒲। 𑒥𑒩𑓀𑒛𑒰𑒏 𑒋𑒏𑒙𑒰 𑒏𑒼𑒢𑒏 𑒧𑒩𑒧𑓂𑒧𑒞𑒱𑒏 𑒏𑒰𑒖 𑒩𑒯𑒋। 𑒐𑒪𑒲𑒪𑒏𑒹𑒿 𑒏𑒯𑒪𑒱𑒨𑒻𑒏 𑒞𑒿 𑒍 𑒋𑒏𑒙𑒰 𑒑𑒝𑒹𑒬𑒲 𑒧𑒱𑒮𑓂𑒞𑓂𑒩𑒲, 𑒖𑒏𑒩𑒰 𑒮𑒦 𑒥𑒧𑓂𑒥𑒃𑒨𑒰 𑒏𑒯𑒻𑒞 𑒩𑒯𑒋, 𑒏𑒹𑒿 𑒥𑒖𑒰 𑒏𑒋 𑒏𑒰𑒖 𑒏𑒩𑒰 𑒠𑒹𑒪𑒏। 𑒤𑒹𑒩 𑒣𑒼𑒔𑒰𑒩𑒰 𑒥𑒪𑒰 𑒂𑒏𑒱 𑒣𑒹𑓀𑒙𑒥𑒪𑒰 𑒢𑒥𑒲 𑒥𑒏𑒮𑒏𑒹𑒿 𑒄 𑒥𑒖𑒹𑒪𑒏। 𑒂𑒥 𑒄 𑒣𑒼𑒔𑒰𑒩𑒰-𑒣𑒹𑒢𑓂𑒙𑒥𑒪𑒰 𑒢𑒥𑒲 𑒥𑒏𑒮 𑒍𑒯𑒱 𑒮𑒩𑓂𑒤𑒳𑒠𑓂𑒠𑒲𑒢 𑒩𑒰𑒖-𑒧𑒱𑒮𑓂𑒞𑓂𑒩𑒲𑒏𑒹𑒿 𑒥𑒖𑒰 𑒪𑒹𑒢𑒹 𑒁𑒕𑒱। 𑒮𑒩𑓂𑒤𑒳𑒠𑓂𑒠𑒲𑒢 𑒣𑒰𑒃𑒣 𑒮𑒦𑒏 𑒏𑒰𑒖 𑒐𑒪𑒲𑒪 𑒣𑓂𑒪𑒧𑓂𑒥𑒩𑒏𑒹𑒿 𑒠𑒱𑒂 𑒠𑒹𑒪𑒏 𑒮𑒹 𑒐𑒪𑒲𑒪𑒏𑒹𑒿 𑒥𑒱𑒢 𑒧𑒿𑒑𑒢𑒹 𑒏𑒰𑒖 𑒦𑒹𑒙𑒱 𑒑𑒹𑒪𑒻𑒏। 𑒂 𑒋𑒏 𑒠𑒼𑒮𑒩𑒰𑒏𑒹𑒿 𑒣𑒩𑒱𑒔𑒨 𑒏𑒩𑒥𑒻𑒞 𑒂𑒥 𑒞𑒿 𑒪𑒏𑒛𑓃𑒲 𑒥𑒪𑒰 𑒂 𑒥𑒱𑒖𑒪𑒲 𑒧𑒱𑒮𑓂𑒞𑓂𑒩𑒲 𑒮𑒹𑒯𑒼 𑒒𑒩𑒧𑒹 𑒣𑒻𑒮𑒱 𑒑𑒹𑒪 𑒕𑒪।
“𑒠𑒳𑒢𑒴 𑒑𑒼𑒙𑒹 -𑒢𑒥𑒲 𑒥𑒏𑒮 𑒂 𑒮𑒩𑓂𑒤𑒳𑒠𑓂𑒠𑒲𑒢- 𑒮𑓀𑒑𑒹 𑒩𑒰𑒖-𑒧𑒱𑒮𑓂𑒞𑓂𑒩𑒲 𑒩𑒯𑒋। 𑒧𑒳𑒠𑒰 𑒢𑒥𑒲-𑒥𑒏𑒮 𑒪𑒰𑒃𑒢 𑒥𑒠𑒪𑒱 𑒪𑒹𑒪𑒏। 𑒂 𑒂𑒥 𑒋𑒏-𑒠𑒼𑒮𑒩𑒰𑒏𑒹𑒿 𑒏𑒰𑒖 𑒠𑒱𑒁𑒥𑒻𑒞 𑒩𑒯𑒻𑒞 𑒁𑒕𑒱”।
𑒤𑒹𑒩 𑒐𑒪𑒲𑒪 𑒯𑒧𑒩𑒰 𑒠𑒱𑒮 𑒞𑒰𑒏𑒱 𑒥𑒰𑒖𑒪-
“𑒁𑒯𑒰𑒿 𑒠𑒱𑒮𑒏𑒰 𑒪𑒼𑒏 𑒮𑒦𑒧𑒹 𑒥𑒛𑓂𑒛 𑒋𑒏𑒞𑒰 𑒯𑒼𑒃𑒞 𑒕𑒻𑒏”।
𑒍𑒏𑒲𑒪 𑒂 𑒐𑒪𑒲𑒪𑒧𑒹 𑒏𑒰𑒖𑒏 𑒥𑒱𑒔𑒧𑒹 𑒑𑒣-𑒬𑒣 𑒯𑒼𑒃𑒞 𑒩𑒯𑒻𑒞 𑒕𑒪𑒻𑒏।
“𑒯𑒧𑒩𑒰 𑒮𑒦𑒏 𑒣𑒳𑒩𑒐𑒰 𑒧𑒳𑒮𑒪𑒧𑒰𑒢 𑒥𑒢𑒥𑒰𑒮𑒿 𑒣𑒴𑒩𑓂𑒫 𑒩𑒰𑒖𑒣𑒴𑒞 𑒩𑒯𑒟𑒱 𑒧𑒳𑒠𑒰 𑒄 𑒮𑒦 𑒩𑒰𑒖𑒧𑒱𑒮𑓂𑒞𑓂𑒩𑒲 𑒩𑒯𑒋-𑒡𑒲𑒧𑒰𑒢, 𑒋𑒐𑒢𑒼 𑒯𑒩𑒱𑒨𑒰𑒝𑒰𑒧𑒹 𑒯𑒼𑒃𑒞 𑒁𑒕𑒱”- 𑒐𑒪𑒲𑒪 𑒃𑒬𑒰𑒩𑒰𑒮𑒿 𑒍𑒏𑒲𑒪 𑒠𑒱𑒮 𑒠𑒹𑒐𑒻𑒞 𑒯𑒧𑒩𑒰 𑒮𑒳𑒢𑒰 𑒏𑒋 𑒏𑒯𑒪𑒏।
“𑒯𑒧 𑒮𑒦 𑒞𑒿 𑒡𑒲𑒧𑒰𑒢 𑒕𑒪𑒯𑒳𑒿 𑒧𑒳𑒠𑒰 𑒞𑒼𑒩𑒰 𑒮𑒦 𑒏𑒹 𑒕𑒪𑒿𑒯 𑒮𑒹 𑒞𑒼𑒩𑒰 𑒋𑒞𑒹𑒏 𑒤𑒩𑒱𑒕𑒰 𑒏𑒋 𑒏𑒼𑒢𑒰 𑒥𑒳𑒗𑒪 𑒕𑒾𑒏”- 𑒥𑒯𑒳𑒞 𑒏𑒰𑒪𑒮𑒿 𑒍𑒏𑒲𑒪 𑒥𑒱𑒢 𑒥𑒖𑒢𑒹 𑒏𑒰𑒖 𑒏𑒋 𑒩𑒯𑒪 𑒕𑒪। 𑒧𑒳𑒠𑒰 𑒣𑒯𑒱𑒪 𑒥𑒹𑒩 𑒍𑒏𑒩𑒰 𑒅𑒞𑓂𑒞𑒩 𑒠𑒻𑒞 𑒮𑒳𑒢𑒪𑒱𑒨𑒻𑒏। 𑒍𑒏𑒩 𑒮𑒦𑒏 𑒥𑒲𑒔 𑒑𑒣 𑒂 𑒯𑒿𑒮𑒲 𑒚𑒙𑓂𑒚𑒰 𑒔𑒪𑒻𑒞 𑒩𑒯𑒻𑒞 𑒕𑒪𑒋।
𑒋𑒏 𑒠𑒱𑒢 𑒮𑒩𑓂𑒤𑒳𑒠𑓂𑒠𑒲𑒢 𑒧𑒳𑒿𑒯 𑒪𑒙𑒏𑒹𑒢𑒹 𑒂𑒋𑒪। 𑒏𑒯𑒪𑒏 𑒖𑒹 𑒑𑒝𑒹𑒬𑒲𑒮𑒿 𑒗𑒑𑒛𑓃𑒰 𑒦𑒋 𑒑𑒹𑒪।
“𑒮𑒹 𑒏𑒼𑒢𑒰”?
“𑒏𑒯𑒻𑒋 𑒖𑒹 𑒞𑒼𑒿 𑒮𑒰𑒯𑒹𑒥𑒏 𑒒𑒩𑒏 𑒏𑒰𑒖 𑒯𑒧𑒩𑒰𑒮𑒿 𑒕𑒲𑒢𑒱 𑒪𑒹𑒪𑒿𑒯, 𑒃𑒪𑒰𑒏𑒰𑒏 𑒪𑒼𑒏𑒏 𑒢𑒰𑒧 𑒣𑒩। 𑒥𑒳𑒗𑒴, 𑒁𑒯𑒰𑒿 𑒯𑒧𑒩 𑒏𑒰𑒖 𑒠𑒹𑒐𑒱 𑒏𑓄 𑒢𑒹 𑒯𑒧𑒩𑒰 𑒏𑒰𑒖 𑒠𑒹𑒢𑒹 𑒕𑒪𑒯𑒳𑒿। 𑒂 𑒄 𑒞𑒿 𑒕𑒼𑒛𑓃𑒴, 𑒄𑒯𑒼 𑒏𑒯𑒻𑒞 𑒩𑒯𑒋 𑒖𑒹...”।
“𑒏𑒲? 𑒏𑒯𑒴 𑒢𑒹”।
“𑒏𑒯𑒻𑒞 𑒩𑒯𑒋 𑒖𑒹 𑒧𑒳𑒮𑒪𑒧𑒰𑒢𑒣𑒩 𑒏𑒯𑒱𑒨𑒼 𑒫𑒱𑒬𑓂𑒫𑒰𑒮 𑒢𑒯𑒱 𑒏𑒩𑒥𑒰𑒏 𑒔𑒰𑒯𑒲”।
𑒯𑒧𑒩 𑒞𑒿 𑒞𑒰𑒧𑒮𑒹 𑒠𑒹𑒯 𑒪𑒯𑒩𑒱 𑒑𑒹𑒪। 𑒏𑒯𑒪𑒱𑒨𑒻𑒏 𑒖𑒹 𑒞𑒳𑒩𑒞 𑒍𑒏𑒩𑒰 𑒥𑒖𑒰 𑒏𑒋 𑒂𑒢𑒴 𑒑𑓄। 𑒧𑒳𑒠𑒰 𑒍 𑒟𑒼𑒧𑓂𑒯-𑒟𑒰𑒧𑓂𑒯 𑒪𑒑𑒰 𑒠𑒹𑒪𑒏। 𑒤𑒹𑒩 𑒥𑒰𑒠𑒧𑒹 𑒋𑒏 𑒠𑒱𑒢 𑒑𑒝𑒹𑒬𑒲𑒏𑒹𑒿 𑒥𑒖𑒰 𑒏𑒋 𑒯𑒧 𑒥𑒳𑒗𑒰 𑒠𑒹𑒪𑒱𑒨𑒻𑒏- “𑒋𑒯𑒱 𑒧𑒯𑒰𑒢𑒑𑒩𑒧𑒹 𑒯𑒧 𑒂 𑒮𑒩𑓂𑒤𑒳𑒠𑓂𑒠𑒲𑒢 𑒋𑒏𑒹 𑒦𑒰𑒭𑒰 𑒥𑒖𑒻𑒞 𑒕𑒲, 𑒄 𑒧𑒰𑒞𑓂𑒩 𑒋𑒏𑒙𑒰 𑒮𑓀𑒖𑒼𑒑 𑒁𑒕𑒱। 𑒋𑒏𑒩 𑒏𑒰𑒖 𑒠𑒹𑒐𑒱𑒨𑒾𑒏 𑒂 𑒁𑒣𑒢 𑒏𑒰𑒖 𑒠𑒹𑒐𑒴, 𑒤𑒹𑒩 𑒁𑒯𑒰𑒿𑒏𑒹𑒿 𑒥𑒳𑒗𑒰 𑒣𑒛𑓃𑒞 𑒖𑒹 𑒮𑒩𑓂𑒤𑒳𑒠𑓂𑒠𑒲𑒢𑒮𑒿 𑒁𑒯𑒰𑒿 𑒏𑒱𑒋𑒏 𑒣𑒰𑒕𑒰𑒿 𑒩𑒯𑒱 𑒖𑒰𑒃𑒞 𑒕𑒲”।
𑒍𑒧𑓂𑒯𑒩 𑒋𑒏 𑒑𑒼𑒙𑒹 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒏𑒹𑒩 𑒫𑒱𑒔𑒰𑒩 𑒠𑒹𑒪𑒏 𑒞𑒰𑒯𑒱𑒣𑒩 𑒮𑒩𑓂𑒤𑒳𑒠𑓂𑒠𑒲𑒢 𑒍𑒏𑒩𑒰𑒮𑒿 𑒪𑒛𑓃𑒱 𑒑𑒹𑒪 𑒖𑒹 𑒢𑒲𑒔𑒰𑒿 𑒧𑒹 𑒣𑒰𑒟𑒩𑒹 𑒢𑒲𑒏 𑒯𑒼𑒋𑒞 । 𑒥𑒰𑒟𑒩𑒴𑒧 𑒂 𑒏𑒱𑒔𑒢𑒧𑒹 𑒣𑒰𑒟𑒩 𑒁𑒕𑒱 𑒞𑒿 𑒮𑒦 𑒚𑒰𑒧 𑒄𑒋𑒯 𑒩𑒯𑒥𑒰𑒏 𑒔𑒰𑒯𑒲। 𑒩𑒴𑒧𑒧𑒹 𑒏𑒱𑒋𑒏 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒯𑒼𑒋𑒞? 𑒧𑒳𑒠𑒰 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒥𑒪𑒰 𑒏𑒯𑒪𑒏 𑒖𑒹 𑒋𑒏 𑒠𑒱𑒢𑒧𑒹 𑒪𑒑𑒰 𑒠𑒹𑒥 𑒂 𑒣𑒰𑒃𑒨𑒼 𑒮𑒮𑓂𑒞 𑒏𑒯𑒪𑒏 𑒮𑒹 𑒯𑒧 𑒍𑒏𑒩𑒹 𑒯𑒿 𑒏𑒯𑒱 𑒠𑒹𑒪𑒱𑒨𑒻𑒏।
𑒦𑒩𑒱 𑒠𑒱𑒢 𑒁𑒢𑒒𑒼𑒪 𑒯𑒼𑒃𑒞 𑒩𑒯𑒻𑒞 𑒕𑒪। 𑒢𑒲𑒔𑒰𑒿𑒏 𑒤𑓂𑒪𑒼𑒩 𑒥𑒪𑒰𑒏 𑒥𑒹𑒙𑒰𑒏 𑒥𑒰𑒩𑒯𑒧 𑒏𑒏𑓂𑒭𑒰𑒏 𑒣𑒩𑒲𑒏𑓂𑒭𑒰 𑒩𑒯𑒋 𑒮𑒹 𑒍 𑒖𑒹 𑒩𑒰𑒖𑒧𑒱𑒮𑓂𑒞𑓂𑒩𑒲 𑒮𑒦𑒏 𑒂𑒥𑒰𑒖𑒰𑒯𑒲 𑒠𑒹𑒐𑒪𑒏 𑒞𑒿 𑒏𑒯𑒋 𑒪𑒰𑒑𑒪, 𑒖𑒹 𑒩𑒴𑒧 𑒮𑒦𑒧𑒹 𑒞𑒿 𑒣𑒰𑒟𑒩 𑒢𑒯𑒱 𑒪𑒰𑒑𑒞 ? 𑒯𑒧 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒢𑒯𑒱 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒏𑒰𑒪𑓂𑒯𑒱 𑒏𑒋 𑒖𑒋𑒞, 𑒞𑒿 𑒯𑒳𑒢𑒏𑒰 𑒮𑒰𑒿𑒮𑒧𑒹 𑒮𑒰𑒿𑒮 𑒁𑒋𑒪𑒢𑓂𑒯𑒱।
”𑒣𑒰𑒟𑒩 𑒪𑒑𑒰𑒥𑒋𑒧𑒹 𑒞𑒿 𑒧𑒰𑒮𑒮𑒿 𑒆𑒣𑒩 𑒄 𑒮𑒦 𑒪𑒑𑒥𑒱𑒞𑒋, 𑒯𑒧𑒩 𑒥𑒹𑒙𑒰𑒏 𑒣𑒩𑒲𑒏𑓂𑒭𑒰 𑒁𑒕𑒱, 𑒮𑒹 𑒯𑒧 𑒞𑒿 𑒣𑒰𑒟𑒩 𑒮𑒦 𑒣𑒮𑒩𑒪 𑒠𑒹𑒐𑒱 𑒏𑒋 𑒔𑒱𑒢𑓂𑒞𑒱𑒞 𑒦𑒋 𑒑𑒹𑒪 𑒩𑒯𑒲”।
“𑒢𑒯𑒱 𑒧𑒰𑒞𑓂𑒩 𑒥𑒰𑒟𑒩𑒴𑒧 𑒂 𑒏𑒱𑒔𑒹𑒢 𑒪𑒹𑒪 𑒄 𑒣𑒰𑒟𑒩 𑒮𑒦 𑒁𑒕𑒱”।
𑒮𑒩𑓂𑒤𑒳𑒠𑓂𑒠𑒲𑒢, 𑒐𑒪𑒲𑒪 𑒂 𑒢𑒥𑒲 𑒥𑒏𑒮𑒮𑒿 𑒁𑒥𑒻𑒞 𑒖𑒰𑒃𑒞 𑒏𑒰𑒖𑒏 𑒁𑒞𑒱𑒩𑒱𑒏𑓂𑒞 𑒒𑒩-𑒠𑓂𑒫𑒰𑒩𑒏 𑒑𑒣 𑒮𑒹𑒯𑒼 𑒯𑒼𑒧𑒋 𑒪𑒰𑒑𑒪। 𑒢𑒥𑒲 𑒥𑒏𑒮 𑒏𑒙𑒱𑒯𑒰𑒩𑒮𑒿 𑒠𑒱𑒪𑓂𑒪𑒲 𑒂𑒋𑒪, 𑒕𑒯 𑒦𑒻𑒨𑒰𑒩𑒲𑒧𑒹 𑒮𑒦𑒮𑒿 𑒣𑒻𑒒, 𑒋𑒏𑒙𑒰 𑒥𑒯𑒱𑒢 𑒮𑒹𑒯𑒼 𑒩𑒯𑒻𑒏। 𑒁𑒣𑒢 𑒯𑒧𑒬𑒲𑒩𑒰(𑒥𑒯𑒱𑒢)𑒏 𑒫𑒩 𑒂 𑒍𑒏𑒩 𑒮𑒰𑒮𑒳𑒩𑒏 𑒫𑒱𑒭𑒨𑒧𑒹 𑒢𑒥𑒲 𑒥𑒏𑒮 𑒣𑓂𑒩𑒹𑒧𑒣𑒴𑒩𑓂𑒫𑒏 𑒮𑒳𑒢𑒥𑒻𑒞 𑒩𑒯𑒻𑒞 𑒕𑒪। 𑒮𑒩𑓂𑒤𑒳𑒠𑓂𑒠𑒲𑒢𑒏 𑒬𑒰𑒑𑒱𑒩𑓂𑒠𑒲𑒧𑒹 𑒍 𑒩𑒰𑒖 𑒧𑒱𑒮𑓂𑒞𑓂𑒩𑒲𑒏 𑒏𑒰𑒖 𑒮𑒱𑒐𑒪𑒏। 𑒂𑒮𑓂𑒞𑒹-𑒂𑒮𑓂𑒞𑒹 𑒔𑒰𑒩𑒱 𑒦𑒰𑒿𑒋𑒏𑒹𑒿 𑒠𑒱𑒪𑓂𑒪𑒲 𑒥𑒖𑒰 𑒪𑒹𑒪𑒏। 𑒍𑒏𑒲𑒪 𑒞𑒿 𑒍𑒏𑒩𑒹 𑒮𑓀𑒑 𑒩𑒯𑒻𑒞 𑒕𑒻𑒏, 𑒂𑒢 𑒦𑒰𑒋 𑒮𑒦 𑒥𑒱𑒨𑒰𑒯 𑒏𑒩𑒻𑒞 𑒑𑒹𑒪 𑒂 𑒁𑒪𑒑 𑒯𑒼𑒃𑒞 𑒑𑒹𑒪। 𑒧𑒳𑒠𑒰 𑒍𑒯𑒼 𑒮𑒦 𑒂𑒮𑒹-𑒣𑒰𑒮𑒧𑒹 𑒩𑒯𑒋 𑒖𑒰𑒃𑒋। 𑒥𑒱𑒨𑒰𑒯 𑒞𑒿 𑒍𑒏𑒲𑒪𑒼𑒏 𑒦𑒹𑒪 𑒕𑒻𑒏, 𑒧𑒳𑒠𑒰 𑒁𑒕𑒱 𑒍 𑒮𑒳𑒡𑓀𑒑। 𑒮𑒹 𑒂𑒢 𑒦𑒰𑒋 𑒮𑒦 𑒏𑒯𑒻𑒞-𑒏𑒯𑒻𑒞 𑒩𑒯𑒱 𑒑𑒹𑒪𑒻𑒏 𑒖𑒹 𑒢𑒥𑒲 𑒥𑒏𑒮 𑒧𑒿𑒑𑒢𑒲𑒧𑒹 𑒐𑒙𑒥𑒻𑒞 𑒩𑒯𑒻𑒞 𑒕𑒾𑒏, 𑒁𑒪𑒑 𑒦𑒋 𑒖𑒼 𑒑𑓄, 𑒧𑒳𑒠𑒰 𑒍 𑒞𑒿 𑒦𑒰𑒋𑒏 𑒦𑒏𑓂𑒞 𑒁𑒕𑒱। 𑒦𑒰𑒋𑒏 𑒮𑒼𑒗𑒰𑒿𑒧𑒹 𑒋𑒏𑒼 𑒬𑒥𑓂𑒠 𑒏𑒲 𑒥𑒰𑒖𑒪 𑒯𑒼𑒃𑒞 𑒕𑒻𑒏?
𑒋𑒏 𑒠𑒱𑒢 𑒍𑒏𑒲𑒪𑒏𑒹𑒿 𑒥𑒼𑒐𑒰𑒩 𑒦𑒹𑒪 𑒩𑒯𑒋 𑒂 𑒠𑒼𑒮𑒩 𑒦𑒰𑒋 𑒮𑒦 𑒍𑒏𑒩𑒰 𑒏𑒰𑒖𑒣𑒩 𑒁𑒋𑒥𑒰𑒮𑒿 𑒧𑒢𑒰 𑒏𑒋𑒢𑒹 𑒩𑒯𑒻𑒏। 𑒧𑒳𑒠𑒰 𑒍 𑒢𑒯𑒱 𑒧𑒰𑒢𑒪। 𑒍𑒏𑒩 𑒮𑒳𑒡𑓀𑒑𑒣𑒢𑒰 𑒠𑒹𑒐𑒱 𑒯𑒧𑒩 𑒧𑒰𑒿, 𑒣𑒞𑓂𑒢𑒲, 𑒥𑒔𑓂𑒔𑒰 𑒮𑒦 𑒍𑒏𑒩𑒰 𑒐𑒴𑒥 𑒧𑒰𑒢𑒋 𑒪𑒰𑒑𑒪 𑒩𑒯𑒟𑒱। 𑒍𑒯𑒱 𑒠𑒱𑒢 𑒏𑒰𑒖𑒏 𑒥𑒲𑒔𑒧𑒹 𑒍 𑒐𑒋𑒥𑒰 𑒪𑒹𑒪 𑒧𑒰𑒿𑒑𑒪𑒏 𑒂 𑒥𑒰𑒪𑒏𑒼𑒢𑒲𑒧𑒹 𑒮𑒴𑒞𑒱 𑒩𑒯𑒪। 𑒤𑒹𑒩 𑒥𑒹𑒩𑒱𑒨𑒰 𑒣𑒯𑒩𑒮𑒿 𑒏𑒰𑒖 𑒬𑒳𑒩𑒴 𑒏𑒋𑒪𑒏। 𑒮𑒰𑒿𑒗𑒧𑒹 𑒒𑒩 𑒖𑒋𑒥𑒰𑒏 𑒥𑒹𑒩𑒧𑒹 𑒖𑒐𑒢 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒛𑒹𑒩𑒰 𑒖𑒋𑒥𑒰𑒏 𑒥𑒹𑒩 𑒦𑒋 𑒑𑒹𑒪 𑒞𑒿 𑒏𑒯𑒪𑒏 𑒖𑒹 𑒢𑒯𑒱, 𑒂𑒃 𑒏𑒰𑒖 𑒪𑒹𑒙𑒮𑒿 𑒬𑒳𑒩𑒴 𑒏𑒋𑒢𑒹 𑒩𑒯𑒲 𑒮𑒹 𑒐𑒞𑒧 𑒏𑒃𑒨𑒹 𑒏𑓄 𑒖𑒰𑒋𑒥। 𑒂 𑒂𑒮𑓂𑒞𑒹𑒮𑒿 𑒥𑒛𑓃𑒥𑒛𑓃𑒰𑒃𑒞 𑒥𑒰𑒖𑒪 𑒖𑒹 𑒠𑒹𑒐𑒻𑒞 𑒕𑒱𑒨𑒻𑒏 𑒖𑒹 𑒂𑒃 𑒏𑓂𑒨𑒼 𑒥𑒖𑒥𑒋 𑒪𑒹𑒪 𑒂𑒥𑒻𑒋 𑒂𑒏𑒱 𑒢𑒯𑒱।
𑒂𑒚 𑒥𑒖𑒹 𑒏𑒩𑒲𑒥 𑒧𑒼𑒙𑒩𑒮𑒰𑒃𑒏𑒱𑒪𑒣𑒩 𑒠𑒴 𑒑𑒼𑒙𑒹 𑒂𑒋𑒪। 𑒍𑒏𑒲𑒪 𑒏𑒯𑒪𑒏 𑒖𑒹 𑒄 𑒠𑒳𑒢𑒴 𑒍𑒏𑒩 𑒕𑒼𑒙𑒏𑒰 𑒦𑒰𑒋 𑒮𑒦 𑒕𑒻𑒏। 𑒠𑒳𑒢𑒴 𑒑𑒼𑒙𑒹 𑒞𑒹𑒮𑒩 𑒞𑒪𑓂𑒪𑒰 𑒮𑓂𑒟𑒱𑒞 𑒯𑒧𑒩 𑒤𑓂𑒪𑒻𑒙𑒣𑒩 𑒂𑒋𑒪 𑒂 𑒍𑒏𑒲𑒪𑒏𑒹𑓀 𑒑𑒣 𑒏𑒩𑒥𑒰 𑒪𑒹𑒪 𑒥𑒖𑒹𑒪𑒏। 𑒍𑒏𑒩 𑒮𑒦𑒏 𑒑𑒣𑒧𑒹 𑒂𑒣𑒏𑒞𑒰 𑒧𑒱𑒬𑓂𑒩𑒱𑒞 𑒏𑓂𑒩𑒼𑒡 𑒩𑒯𑒻𑒏। 𑒍𑒏𑒲𑒪 𑒍𑒏𑒩𑒰 𑒮𑒦𑒏𑒹𑒿 𑒏𑒯𑒻𑒞 𑒩𑒯𑒋 𑒖𑒹 𑒍𑒯𑒹𑒢 𑒏𑒼𑒢𑒼 𑒑𑒣 𑒢𑒯𑒱 𑒕𑒻𑒏, 𑒂𑒃 𑒂𑒡𑒰 𑒠𑒱𑒢 𑒮𑒳𑒞𑒪 𑒩𑒯𑒋 𑒞𑒹𑒿 𑒮𑒼𑒔𑒪𑒏 𑒖𑒹 𑒏𑒰𑒖 𑒣𑒴𑒩𑒰 𑒏𑒃𑒋 𑒏𑒋 𑒖𑒰𑒋। 𑒞𑒰𑒫𑒞 𑒢𑒥𑒲 𑒥𑒏𑒮 𑒮𑒹𑒯𑒼 𑒍𑒞𑒋 𑒣𑒯𑒳𑒿𑒔𑒱 𑒑𑒹𑒪 𑒂 𑒍𑒏𑒲𑒪𑒏𑒹𑒿 𑒪𑒋 𑒑𑒹𑒪।
𑒠𑒼𑒮𑒩 𑒠𑒱𑒢 𑒢𑒥𑒲 𑒥𑒏𑒮 𑒦𑒼𑒩𑒹-𑒦𑒼𑒩 𑒂𑒋𑒪।
“𑒠𑒹𑒐𑒱𑒨𑒾𑒏 𑒄 𑒦𑒰𑒋 𑒮𑒦।...
-“𑒥𑒹𑒙𑒰 𑒖𑒹𑒏𑒰𑒿 𑒥𑒳𑒗𑒪𑒱𑒨𑒻𑒏 𑒋𑒏𑒩𑒰 𑒮𑒦𑒏𑒹𑒿 𑒂 𑒯𑒧𑒩𑒰𑒣𑒩 𑒏𑒪𑓀𑒏 𑒪𑒑𑒥𑒻𑒞 𑒁𑒕𑒱 𑒖𑒹 𑒞𑒴𑒿 𑒠𑒴 𑒩𑓀𑒑 𑒏𑒩𑒻𑒞 𑒕𑒯। 𑒞𑒲𑒢𑒴 𑒦𑒰𑒿𑒋 𑒏𑒰𑒪𑓂𑒯𑒱 𑒯𑒧𑒩𑒰𑒮𑒿 𑒐𑒴𑒥 𑒗𑒑𑒛𑓃𑒰 𑒏𑒩𑒋 𑒑𑒹𑒪 𑒖𑒹 𑒞𑒴𑒿 𑒍𑒏𑒲𑒪𑒏𑒹𑒿 𑒢𑒼𑒏𑒩 𑒖𑒹𑒏𑒰𑒿 𑒩𑒐𑒻𑒞 𑒕𑒯𑒏। 𑒥𑒳𑒗𑒴 ! 𑒄 𑒍𑒏𑒲𑒪 𑒁𑒕𑒱 𑒮𑒳𑒡𑓀𑒑। 𑒏𑒞𑒥𑒼 𑒏𑒯𑒻𑒞 𑒕𑒱𑒨𑒻𑒏 𑒖𑒹 𑒢𑒲𑒏𑒮𑒿 𑒏𑒣𑒛𑓃𑒰 𑒪𑒞𑓂𑒞𑒰 𑒣𑒯𑒱𑒩, 𑒞𑒿 𑒍𑒯𑒼 𑒗𑒼𑒪𑓀𑒑𑒹 𑒖𑒹𑒏𑒰𑒿 𑒩𑒯𑒻𑒞 𑒁𑒕𑒱।
-“𑒏𑒰𑒪𑓂𑒯𑒱 𑒯𑒧𑒩𑒰 𑒞𑒿 𑒍𑒏𑒲𑒪𑒮𑒿 𑒦𑒹𑒿𑒙𑒼 𑒢𑒯𑒱 𑒁𑒕𑒱। 𑒮𑒩𑓂𑒤𑒳𑒏 𑒏𑒰𑒖 𑒠𑒼𑒮𑒩 𑒮𑒰𑒃𑒙𑒣𑒩 𑒔𑒪𑒱 𑒩𑒯𑒪 𑒕𑒻𑒏, 𑒍𑒞𑒯𑒱 𑒑𑒹𑒪 𑒕𑒪𑒯𑒳𑒿 𑒖𑒹 𑒏𑒼𑒢𑒼 𑒮𑓂𑒏𑒲𑒧𑒮𑒿 𑒏𑒰𑒖 𑒦𑒹𑒙𑒱 𑒖𑒃𑒞𑒋 𑒞𑒿 𑒁𑒯𑒰𑒿𑒏 𑒋𑒯𑒱𑒚𑒰𑒧 𑒏𑒰𑒖 𑒐𑒞𑒧 𑒦𑒹𑒪𑒰𑒣𑒩 𑒍𑒞𑒯𑒱 𑒪𑒰𑒑𑒱 𑒖𑒃𑒞𑒯𑒳𑒿। 𑒥𑒱𑒪𑓂𑒛𑒩 𑒁𑓀𑒮𑒪 𑒥𑒪𑒰𑒏 𑒂𑒤𑒩 𑒂𑒋𑒪 𑒩𑒯𑒋 𑒖𑒹 𑒯𑒧𑒩𑒰 𑒋𑒯𑒱𑒚𑒰𑒧 𑒂𑒥𑒱 𑒖𑒰𑒆 𑒧𑒳𑒠𑒰 𑒦𑒰𑒋 𑒮𑒦𑒏 𑒠𑓂𑒫𑒰𑒩𑒹 𑒯𑒧 𑒧𑒢𑒰 𑒏𑒋 𑒠𑒹𑒪𑒱𑒨𑒻𑒏। 𑒂 𑒄 𑒮𑒦.. 𑒍𑒢𑒰 𑒄 𑒮𑒦𑒙𑒰 𑒯𑒧𑒩 𑒣𑒙𑒢𑒰 𑒥𑒪𑒰 𑒦𑒰𑒋 𑒧𑓀𑒛𑒪𑒥𑒰𑒏 𑒏𑒩𑒞𑒴𑒞 𑒕𑒲”।
“𑒧𑓀𑒛𑒪!!”, 𑒯𑒧𑒩𑒰 𑒏𑒱𑒕𑒳 𑒣𑒳𑒩𑒰𑒢 𑒑𑒣 𑒧𑒼𑒢 𑒣𑒛𑓃𑒪, -“𑒁𑒯𑒰𑒿𑒏 𑒑𑒰𑒧𑒧𑒹 𑒋𑒏𑒙𑒰 𑒖𑒨𑒬𑓀𑒏𑒩 𑒮𑒹𑒯𑒼 𑒕𑒟𑒱 𑒏𑒲”?
“𑒯𑒿! 𑒯𑒿! 𑒁𑒯𑒰𑒿 𑒏𑒼𑒢𑒰 𑒔𑒱𑒢𑓂𑒯𑒻𑒞 𑒕𑒱𑒨𑒢𑓂𑒯𑒱 𑒯𑒱𑒢𑒏𑒰 𑒮𑒦𑒏𑒹𑒿। 𑒍𑒢𑒰 𑒁𑒮𑒪𑒲 𑒢𑒰𑒧 𑒞𑒿 𑒯𑒧𑒩 𑒦𑒰𑒋𑒏 𑒮𑒪𑒲𑒧 𑒕𑒱𑒨𑒻𑒏। 𑒂𑒤𑒱𑒮𑒏 𑒢𑒰𑒧 𑒧𑓀𑒛𑒪। 𑒒𑒩𑒏 𑒮𑒪𑒲𑒧। 𑒮𑒩𑒏𑒰𑒩𑒲 𑒛𑓂𑒩𑒰𑒃𑒫𑒩 𑒁𑒕𑒱। 𑒒𑒩𑒧𑒹 𑒮𑒪𑒲𑒧 𑒏𑒯𑒢𑒹 𑒍𑒏𑒩 𑒁𑒯𑒪𑒱𑒨𑒰 (𑒏𑒢𑒱𑒨𑒰𑒿) 𑒥𑒛𑓃 𑒒𑒥𑒛𑓃𑒰𑒃 𑒕𑒻𑒏”।
“𑒮𑒦𑒙𑒰 𑒥𑒳𑒗𑒪 𑒁𑒕𑒱 𑒯𑒧𑒩𑒰”।
𑒁𑒣𑒢 𑒫𑒱𑒠𑓂𑒨𑒰𑒩𑓂𑒟𑒲 𑒖𑒲𑒫𑒢𑒏 𑒋𑒏𑒙𑒰 𑒒𑒙𑒢𑒰 𑒧𑒼𑒢 𑒣𑒛𑓃𑒱 𑒑𑒹𑒪 𑒯𑒧𑒩𑒰।
𑒣𑒙𑒢𑒰𑒧𑒹 𑒣𑒜𑓃𑒻𑒞 𑒩𑒯𑒲। 𑒣𑒛𑓃𑒼𑒮𑒧𑒹 𑒋𑒏 𑒑𑒼𑒙𑒹 𑒖𑒨𑒬𑓀𑒏𑒩 𑒩𑒯𑒻𑒞 𑒕𑒪𑒰𑒯। 𑒦𑒰𑒃-𑒦𑒰𑒃 𑒏𑒯𑒻𑒞 𑒕𑒪𑒱𑒨𑒢𑓂𑒯𑒱। 𑒠𑒴 𑒥𑒱𑒨𑒰𑒯। 𑒣𑒯𑒱𑒪 𑒥𑒱𑒨𑒰𑒯𑒏 𑒯𑒳𑒢𑒏𑒩 𑒥𑒹𑒙𑒰 𑒦𑒰𑒑𑒱 𑒑𑒹𑒪 𑒕𑒪𑒢𑓂𑒯𑒱। 𑒍𑒢𑒰 𑒠𑒼𑒮𑒩 𑒥𑒱𑒨𑒰𑒯 𑒣𑒯𑒱𑒪 𑒣𑒞𑓂𑒢𑒲𑒏 𑒧𑒳𑒃𑒪𑒰𑒏 𑒁𑒢𑓀𑒞𑒩 𑒦𑒹𑒪 𑒕𑒪𑒢𑓂𑒯𑒱। 𑒏𑒱𑒕𑒳 𑒠𑒱𑒢 𑒠𑒱𑒪𑓂𑒪𑒲-𑒥𑒧𑓂𑒥𑒃 𑒒𑒳𑒧𑒱 𑒣𑒯𑒱𑒪 𑒥𑒱𑒨𑒰𑒯𑒏 𑒍 𑒥𑒹𑒙𑒰 𑒂𑒣𑒮 𑒁𑒋𑒪𑒢𑓂𑒯𑒱। 𑒮𑒦 𑒍𑒏𑒩𑒰 𑒣𑒳𑒕𑒪𑒏𑒻 𑒖𑒹 𑒏𑒲 𑒏𑒩𑒧𑒹? 𑒍 𑒏𑒯𑒪𑒏 𑒖𑒹 𑒮𑒦 𑒏𑒰𑒖 𑒯𑒧𑒩𑒰𑒮𑒿 𑒯𑒼𑒋𑒞 𑒧𑒳𑒠𑒰 𑒣𑒜𑓃𑒰𑒃 𑒕𑒼𑒛𑓃𑒱 𑒏𑒋। 𑒤𑒹𑒩 𑒮𑒦 𑒧𑒱𑒪𑒱 𑒏𑒋 𑒍𑒏𑒩𑒰 𑒛𑓂𑒩𑒰𑒃𑒫𑒩𑒲𑒏 𑒪𑒰𑒃𑒢𑒧𑒹 𑒖𑒋𑒥𑒰𑒏 𑒪𑒹𑒪 𑒏𑒯𑒪𑒏। 𑒍𑒏𑒩𑒼 𑒧𑒼𑒢 𑒩𑒯𑒻𑒏 𑒛𑓂𑒩𑒰𑒃𑒫𑒩𑒲 𑒮𑒱𑒐𑒥𑒰𑒏। 𑒦𑒼𑒩𑒹-𑒦𑒼𑒩 𑒋𑒏 𑒠𑒱𑒢 𑒖𑒨𑒬𑓀𑒏𑒩 𑒏𑒯𑒪𑒢𑓂𑒯𑒱 𑒖𑒹 𑒂𑒃 𑒋𑒏 𑒚𑒰𑒧 𑒔𑒪𑒥𑒰𑒏 𑒁𑒕𑒱।
“𑒥𑒹𑒙𑒰 𑒏𑒯𑒻𑒞 𑒁𑒕𑒱 𑒖𑒹 𑒛𑓂𑒩𑒰𑒃𑒫𑒩𑒲 𑒮𑒲𑒐𑒥। 𑒛𑓂𑒩𑒰𑒃𑒫𑒱𑓀𑒑 𑒮𑓂𑒏𑒴𑒪 𑒥𑒛𑓂𑒛 𑒧𑒯𑒑। 𑒋𑒏 𑒑𑒼𑒙𑒹 𑒑𑒾𑒂𑒿 𑒮𑒪𑒲𑒧 𑒁𑒕𑒱 𑒛𑓂𑒩𑒰𑒃𑒫𑒩, 𑒮𑒩𑒏𑒰𑒩𑒲 𑒂𑒤𑒱𑒮𑒧𑒹। 𑒑𑒰𑒧𑒧𑒹 𑒋𑒯𑒱 𑒥𑒹𑒩 𑒕𑒳𑒙𑓂𑒙𑒲𑒧𑒹 𑒦𑒹𑒙𑒪 𑒩𑒯𑒋। 𑒍𑒏𑒩𑒼 𑒮𑒦𑒏 𑒄𑒠 𑒣𑒰𑒥𑒢𑒱 𑒕𑒪𑒋, 𑒮𑒹 𑒂𑒋𑒪 𑒩𑒯𑒋 𑒑𑒰𑒧। 𑒏𑒯𑒪𑒏 𑒖𑒹 𑒩𑒫𑒱 𑒠𑒱𑒢 𑒏𑓄 𑒍𑒏𑒩𑒰 𑒕𑒳𑒙𑓂𑒙𑒲 𑒯𑒼𑒃𑒞 𑒕𑒻𑒏 𑒂𑒤𑒱𑒮𑒧𑒹 𑒂 𑒂𑒢 𑒠𑒱𑒢 𑒣𑒰𑒿𑒔 𑒥𑒖𑒹 𑒦𑒼𑒩𑒹𑒮𑒿 𑒮𑒱𑒐𑒰 𑒮𑒏𑒻𑒞 𑒁𑒕𑒱। 𑒠𑒴 𑒮𑒋 𑒙𑒰𑒏𑒰𑒧𑒹 𑒋𑒏𑒙𑒰 𑒮𑒹𑒏𑒹𑓀𑒛 𑒯𑒻𑓀𑒛 𑒮𑒰𑒃𑒏𑒱𑒪 𑒥𑒹𑒙𑒰𑒏𑒹𑒿 𑒏𑒲𑒢𑒱 𑒠𑒹𑒢𑒹 𑒕𑒱𑒨𑒻𑒏।
-“𑒍𑒏𑒩 𑒛𑒹𑒩𑒰 𑒂𑒤𑒱𑒮𑒹 𑒪𑒑 𑒕𑒻𑒏। 𑒂𑒤𑒱𑒮 𑒥𑒖𑒹𑒢𑒹 𑒁𑒕𑒱, 𑒍𑒞𑒯𑒱𑒮𑒿 𑒒𑒩 𑒠𑒹𑒐𑒰𑒍𑒞”।
“𑒂𑒤𑒱𑒮 𑒠𑒹𑒐𑒪 𑒁𑒕𑒱?”
“𑒯𑒿, 𑒏𑒞𑒰𑒏 𑒥𑒹𑒩 𑒑𑒹𑒪 𑒕𑒲”।
𑒂𑒤𑒱𑒮𑒏 𑒥𑒹𑒩𑒧𑒹 𑒯𑒧 𑒮𑒦 𑒑𑒰𑒿𑒡𑒲 𑒧𑒻𑒠𑒰𑒢𑒏 𑒥𑒑𑒪𑒏 𑒏𑒔𑒯𑒩𑒲 𑒮𑒢 𑒂𑒤𑒱𑒮 𑒣𑒯𑒳𑒿𑒔𑒻𑒞 𑒑𑒹𑒪𑒯𑒳𑒿।
“𑒧𑓀𑒛𑒪𑒖𑒲 𑒛𑓂𑒩𑒰𑒃𑒫𑒩 𑒮𑒰𑒯𑒹𑒥 𑒕𑒟𑒱?” - 𑒖𑒨𑒬𑓀𑒏𑒩 𑒋𑒏 𑒑𑒼𑒙 𑒯𑒰𑒏𑒱𑒧𑒏 𑒂𑒤𑒱𑒮𑒏 𑒥𑒰𑒯𑒩 𑒚𑒰𑒜𑓃 𑒔𑒣𑒩𑒰𑒮𑒲𑒮𑒿 𑒣𑒳𑒕𑒪𑒢𑓂𑒯𑒱।
“𑒯𑒿, 𑒍𑒧𑓂𑒯𑒩 𑒕𑒟𑒱”।
𑒯𑒧 𑒖𑒨𑒬𑓀𑒏𑒩𑒏𑒹𑒿 𑒣𑒳𑒕𑒪𑒱𑒨𑒢𑓂𑒯𑒱 𑒖𑒹 𑒯𑒧𑒩𑒰 𑒮𑒦 𑒞𑒿 𑒮𑒪𑒲𑒧𑒮𑒿 𑒦𑒹𑒿𑒙 𑒏𑒩𑒥𑒰 𑒪𑒹𑒪 𑒂𑒋𑒪 𑒕𑒲, 𑒄 𑒧𑓀𑒛𑒪 𑒏𑒹 𑒕𑒟𑒱?
𑒍 𑒃𑒬𑒰𑒩𑒰𑒧𑒹 𑒯𑒧𑒩𑒰 𑒔𑒳𑒣 𑒩𑒯𑒋 𑒪𑒹𑒪 𑒏𑒯𑒪𑒢𑓂𑒯𑒱 𑒂 𑒄𑒯𑒼 𑒧𑒳𑒐𑒩 𑒩𑒴𑒣𑒧𑒹 𑒏𑒯𑒪𑒢𑓂𑒯𑒱 𑒖𑒹 𑒋𑒯𑒱𑒧𑒹 𑒏𑒼𑒢𑒼 𑒥𑒰𑒞 𑒕𑒻𑒏, 𑒥𑒰𑒠𑒧𑒹 𑒏𑒯𑒞𑒰𑒯।
𑒂𑒥 𑒖𑒹 𑒧𑓀𑒛𑒪𑒖𑒲𑒮𑒿 𑒯𑒳𑒢𑒏𑒰 𑒑𑒣 𑒯𑒼𑒧𑒋 𑒪𑒑𑒪𑒢𑓂𑒯𑒱 𑒞𑒿 𑒥𑒲𑒔-𑒥𑒲𑒔𑒧𑒹 𑒍 𑒮𑒪𑒲𑒧 𑒦𑒰𑒃, 𑒮𑒪𑒲𑒧 𑒦𑒰𑒃 𑒏𑒯𑒱 𑒯𑒳𑒢𑒏𑒰 𑒮𑒧𑓂𑒥𑒼𑒡𑒢 𑒏𑒩𑒻𑒞 𑒩𑒯𑒪𑒰𑒯। 𑒤𑒹𑒩 𑒯𑒳𑒢𑒏𑒰 𑒮𑓀𑒑𑒹 𑒯𑒧 𑒮𑒦 𑒯𑒳𑒢𑒏𑒩 𑒛𑒹𑒩𑒰 𑒣𑒯𑒳𑒿𑒔𑒪𑒯𑒳𑒿। 𑒤𑒹𑒩 𑒥𑒱𑒠𑒰 𑒯𑒼𑒃𑒞 𑒏𑒰𑒪 𑒮𑒪𑒲𑒧 𑒦𑒰𑒃 𑒖𑒨𑒬𑓀𑒏𑒩𑒏𑒹𑒿 𑒯𑒧𑒩𑒰 𑒠𑒱𑒬 𑒃𑒬𑒰𑒩𑒰 𑒏𑒩𑒻𑒞 𑒏𑒯𑒪𑒢𑓂𑒯𑒱 𑒖𑒹 𑒯𑒱𑒢𑒏𑒰 𑒏𑒯𑒱 𑒠𑒹𑒪𑒱𑒨𑒢𑓂𑒯𑒱 𑒢𑒹। 𑒖𑒨𑒬𑓀𑒏𑒩 𑒏𑒯𑒪𑒐𑒱𑒢𑓂𑒯 𑒖𑒹 𑒏𑒯𑒱 𑒠𑒹𑒥𑒢𑓂𑒯𑒱।
𑒍𑒞𑒋 𑒮𑒿 𑒢𑒱𑒏𑒪𑒪𑒰𑒏 𑒥𑒰𑒠 𑒖𑒨𑒬𑓀𑒏𑒩 𑒏𑒯𑒪𑒢𑓂𑒯𑒱 𑒖𑒹 𑒏𑒙𑒱𑒯𑒰𑒩 𑒪𑒑 𑒖𑒨𑒬𑓀𑒏𑒩𑒏 𑒑𑒰𑒧 𑒕𑒢𑓂𑒯𑒱। 𑒧𑒰𑒩𑒞𑒹 𑒩𑒰𑒮 𑒦𑒰𑒃 𑒥𑒯𑒱𑒢 𑒕𑒻𑒏 𑒮𑒪𑒲𑒧𑒏। 𑒮𑒪𑒲𑒧 𑒯𑒳𑒢𑒏𑒩 𑒪𑓀𑒑𑒼𑒙𑒱𑒨𑒰 𑒨𑒰𑒩, 𑒮𑓀𑒑𑒹 𑒣𑒜𑓃𑒪𑒢𑓂𑒯𑒱। 𑒤𑒹𑒩 𑒩𑒼𑒖𑒑𑒰𑒩𑒏 𑒏𑓂𑒩𑒧𑒧𑒹 𑒠𑒳𑒢𑒴 𑒑𑒼𑒙𑒹 𑒠𑒴𑒩 𑒔𑒪𑒱 𑒑𑒹𑒪𑒰𑒯। 𑒮𑒪𑒲𑒧 𑒏𑒼𑒢𑒼 𑒯𑒰𑒏𑒱𑒧𑒏 𑒒𑒩𑒣𑒩 𑒏𑒰𑒖 𑒏𑒩𑒋 𑒪𑒰𑒑𑒪। 𑒛𑓂𑒩𑒰𑒃𑒫𑒩𑒲 𑒏𑒯𑒱𑒨𑒰 𑒏𑒞𑒋 𑒮𑒿 𑒍 𑒮𑒲𑒐𑒱 𑒪𑒹𑒢𑒹 𑒕𑒪, 𑒮𑒹 𑒯𑒳𑒢𑒩𑒥𑒪𑒰𑒏𑒹𑒿 𑒢𑒼𑒏𑒩𑒲𑒏 𑒞𑒿 𑒍𑒯𑒳𑒢𑒰 𑒠𑒱𑒏𑓂𑒏𑒞 𑒢𑒯𑒱 𑒯𑒼𑒃𑒞 𑒕𑒻𑒏। 𑒥𑒰𑒠𑒧𑒹 𑒋𑒏𑒩 𑒮𑓂𑒫𑒦𑒰𑒫 𑒠𑒹𑒐𑒱 𑒏𑒋 𑒍 𑒯𑒰𑒏𑒱𑒧 𑒋𑒏𑒩𑒰 𑒏𑒼𑒢𑒼 𑒠𑒼𑒮𑒩 𑒂𑒠𑒧𑒲 𑒖𑒏𑒩 𑒢𑒰𑒧 𑒧𑓀𑒛𑒪 𑒩𑒯𑒋, 𑒂 𑒏𑒞𑒯𑒳 𑒧𑒩𑒱-𑒐𑒣𑒱 𑒑𑒹𑒪 𑒩𑒯𑒋, 𑒏𑒹𑒩 𑒢𑒰𑒧𑒣𑒩 𑒙𑒹𑒧𑓂𑒣𑒩𑒼𑒩𑒲 𑒩𑒰𑒐𑒱 𑒪𑒹𑒪𑒏𑒻𑒏। 𑒤𑒹𑒩 𑒏𑒱𑒕𑒳 𑒠𑒱𑒢𑒧𑒹 𑒍 𑒣𑒩𑓂𑒧𑒰𑒢𑒹𑒢𑓂𑒙 𑒦𑒋 𑒑𑒹𑒪।
𑒖𑒨𑒬𑓀𑒏𑒩 𑒯𑒧𑒩𑒰𑒮𑒿 𑒏𑒯𑒪𑒢𑓂𑒯𑒱 - “𑒋𑒏𑒩 𑒂𑒤𑒱𑒮𑒧𑒹 𑒫𑒰 𑒋𑒏𑒩 𑒮𑓀𑒑𑒲 𑒮𑒰𑒟𑒲 𑒪𑒑- 𑒍𑒢𑒰 𑒁𑒯𑒰𑒿𑒮𑒿 𑒤𑒹𑒩 𑒏𑒯𑒱𑒨𑒰 𑒋𑒏𑒩 𑒦𑒹𑒿𑒙 𑒯𑒹𑒞𑒋- 𑒋𑒯𑒱 𑒑𑒣𑒏 𑒡𑒼𑒐𑒼𑒮𑒿 𑒔𑒩𑒔𑒰 𑒢𑒯𑒱 𑒏𑒩𑒥। 𑒍𑒢𑒰 𑒣𑒩𑓂𑒧𑒰𑒢𑒹𑒢𑓂𑒙 𑒦𑒋 𑒑𑒹𑒪 𑒕𑒻𑒏 𑒧𑒳𑒠𑒰 𑒪𑒼𑒏 𑒮𑒦 𑒏𑒹𑒯𑒢 𑒯𑒼𑒃 𑒕𑒻𑒏 𑒮𑒹 𑒢𑒯𑒱 𑒠𑒹𑒐𑒃 𑒕𑒱𑒨𑒻𑒏। 𑒏𑓂𑒨𑒼 𑒏𑒱𑒕𑒳 𑒪𑒱𑒐𑒱 𑒣𑒜𑓃𑒱 𑒠𑒹𑒞𑒻𑒏 𑒞𑒿 𑒧𑓀𑒑𑒢𑒲𑒧𑒹 𑒥𑒹𑒔𑒰𑒩𑒏𑒹𑒿 𑒤𑒹𑒩𑒰 𑒪𑒰𑒑𑒱 𑒖𑒋𑒞𑒻𑒏”।
𑒧𑒼𑒢𑒧𑒹 𑒒𑒳𑒧𑒩𑒪 𑒋𑒯𑒱 𑒑𑒣𑒏𑒹𑒿 𑒢𑒥𑒲 𑒥𑒏𑒮𑒏𑒹𑒿 𑒯𑒧 𑒏𑒯𑒪𑒱𑒨𑒻𑒏। 𑒞𑒰𑒯𑒱𑒣𑒩 𑒍 𑒥𑒰𑒖𑒪-
“𑒍𑒯𑒼 𑒮𑓂𑒏𑒲𑒧 𑒡𑒩𑒹𑒢𑒱𑒯𑒰𑒩 𑒯𑒧𑒯𑒲𑓀 𑒕𑒲। 𑒋𑒏𑒙𑒰 𑒏𑒧𑓂𑒣𑓂𑒪𑒹𑒢 𑒏𑓄 𑒠𑒹𑒥𑒻𑒏 𑒞𑒿 𑒖𑒰𑒯𑒱 𑒢𑒼𑒏𑒩𑒲𑒣𑒩 𑒋𑒞𑒹𑒏 𑒤𑒳𑒩𑒤𑒳𑒩𑒲 𑒕𑒻𑒏 𑒮𑒹 𑒒𑒼𑒮𑒩𑒱 𑒖𑒋𑒞𑒻𑒏। 𑒧𑒳𑒠𑒰 𑒮𑒼𑒔𑒻𑒞 𑒕𑒲 𑒖𑒹 𑒍𑒏𑒩 𑒢𑒼𑒏𑒩𑒲 𑒖𑒋𑒞𑒻𑒏 𑒞𑒿 𑒯𑒧𑒩𑒹 𑒧𑒰𑒟𑒣𑒩 𑒂𑒥𑒱 𑒐𑒮𑒞। 𑒞𑒹𑒿 𑒁𑒪𑓂𑒪𑒰 𑒣𑒩 𑒮𑒦𑒙𑒰 𑒕𑒼𑒛𑓃𑒱 𑒠𑒹𑒢𑒹 𑒕𑒱𑒨𑒻𑒏”।
𑒢𑒥𑒲 𑒥𑒏𑒮 𑒍𑒢𑒰 𑒞𑒿 𑒥𑒛𑓂𑒛 𑒫𑓂𑒨𑒮𑓂𑒞 𑒩𑒯𑒻𑒞 𑒕𑒪 𑒧𑒳𑒠𑒰 𑒍𑒯𑒱 𑒠𑒱𑒢 𑒪𑒰𑒑𑒻𑒋 𑒯𑒧𑒩𑒹 𑒮𑒿 𑒑𑒣 𑒏𑒩𑒥𑒰 𑒪𑒹𑒪 𑒮𑒧𑒨 𑒢𑒱𑒏𑒰𑒪𑒱 𑒏𑒋 𑒂𑒋𑒪 𑒩𑒯𑒋। 𑒖𑒐𑒢 𑒪𑒼𑒏 𑒧𑒰𑒢𑒮𑒱𑒏 𑒤𑒱𑒩𑒹𑒬𑒰𑒢𑒲𑒧𑒹 𑒩𑒯𑒻𑒞 𑒁𑒕𑒱 𑒞𑒿 𑒁𑒣𑒢 𑒠𑒳𑒐𑒢𑒰𑒧𑒰 𑒠𑒼𑒮𑒩𑒰𑒏𑒹𑒿 𑒮𑒳𑒢𑒥𑒋 𑒔𑒰𑒯𑒻𑒞 𑒁𑒕𑒱। 𑒧𑒳𑒠𑒰 𑒞𑒏𑒩 𑒬𑓂𑒩𑒼𑒞𑒰 𑒦𑒹𑒙𑒥 𑒧𑒼𑒬𑓂𑒏𑒱𑒪। 𑒧𑒳𑒠𑒰 𑒯𑒧 𑒁𑒣𑒢 𑒧𑒰𑒢𑒫𑒫𑒱𑒖𑓂𑒘𑒰𑒢𑒏 𑒏𑒰𑒪𑒹𑒖𑒱𑒨𑒰 𑒣𑒜𑓃𑒰𑒃𑒏 𑒣𑓂𑒩𑒦𑒰𑒫𑒏 𑒏𑒰𑒩𑒝 𑒮𑒦 𑒏𑒰𑒖 𑒕𑒼𑒛𑓃𑒱 𑒁𑒢𑒰𑒨𑒰𑒮 𑒬𑓂𑒩𑒼𑒞𑒰 𑒥𑒢𑒱 𑒖𑒰𑒃𑒞 𑒕𑒲 𑒮𑒹 𑒢𑒥𑒲𑒏𑒹𑒿 𑒥𑒳𑒗𑒪 𑒩𑒯𑒻𑒏। 𑒦𑒠𑒥𑒩𑒱𑒨𑒰 𑒪𑒡𑒢𑒹 𑒕𑒪 𑒮𑒹 𑒯𑒧𑒯𑒴𑒿 𑒏𑒞𑒯𑒳 𑒥𑒰𑒯𑒩 𑒖𑒋𑒥𑒰𑒏 𑒯𑒩𑒥𑒛𑓃𑒲𑒧𑒹 𑒢𑒯𑒱 𑒕𑒪𑒯𑒳𑒿। 𑒮𑒹 𑒍 𑒁𑒣𑒢 𑒐𑒱𑒮𑓂𑒮𑒰 𑒬𑒳𑒩𑒳 𑒏𑒋𑒪𑒏।
“𑒏𑒞𑒹𑒏 𑒏𑒭𑓂𑒙 𑒏𑒙𑒢𑒹 𑒕𑒲 𑒮𑒹 𑒏𑒲 𑒥𑒨𑒰𑒢 𑒏𑒩𑒴। 𑒂 𑒧𑒠𑒞𑒱 𑒏𑒹 𑒮𑒦 𑒏𑒋𑒪𑒏 ? 𑒋𑒏𑒙𑒰 𑒐𑒰𑒪𑒴-𑒐𑒰𑒪𑒰 (𑒧𑒾𑒮𑒰-𑒧𑒾𑒮𑒲) 𑒂 𑒐𑒪𑒹𑒩𑒰 𑒦𑒰𑒋 𑒂 𑒐𑒪𑒹𑒩𑒲 𑒥𑒯𑒱𑒢 𑒧𑒼𑒢 𑒣𑒛𑓃𑒻𑒋 𑒂𑒩 𑒏𑓂𑒨𑒼 𑒢𑒯𑒱। 𑒁𑒥𑓂𑒥𑒴𑒏 𑒧𑒩𑒪𑒰𑒏 𑒥𑒰𑒠 𑒥𑒛𑓃𑒰 𑒁𑒥𑓂𑒥𑒴 (𑒥𑒛𑓃𑒏𑒰 𑒏𑒰𑒏𑒰), 𑒕𑒼𑒙𑒰 𑒁𑒥𑓂𑒥𑒴 (𑒕𑒼𑒙𑒏𑒰 𑒏𑒰𑒏𑒰) 𑒮𑒦 𑒣𑒩𑒰𑒨𑒰 𑒦𑒋 𑒑𑒹𑒪। 𑒬𑒾𑒯𑒩𑒏 𑒧𑒩𑒪𑒰𑒏 𑒥𑒰𑒠 𑒁𑒧𑓂𑒧𑒲𑒏 𑒯𑒰𑒪𑒞 𑒏𑒲 𑒩𑒯𑒻𑒏 𑒮𑒹 𑒄 𑒦𑒰𑒋 𑒮𑒦 𑒏𑒲 𑒥𑒳𑒗𑒞-𑒑𑒧𑒞? -“𑒐𑒰𑒪𑒰 𑒠𑒱𑒪𑓂𑒪𑒲𑒧𑒹 𑒩𑒯𑒻𑒞 𑒩𑒯𑒟𑒱। 𑒁𑒧𑓂𑒧𑒲𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒯𑒧𑒩 𑒣𑒜𑓃𑒰𑒃 𑒕𑒳𑒙𑒱 𑒑𑒹𑒪। 𑒏𑒙𑒱𑒯𑒰𑒩𑒧𑒹 𑒣𑒜𑓃𑒻𑒞 𑒩𑒯𑒱𑒞𑒯𑒳𑒿, 𑒤𑒴𑒤𑒲𑒖𑒰𑒠 𑒦𑒰𑒋 (𑒣𑒱𑒮𑒱𑒨𑒾𑒞) 𑒏𑒯𑒢𑒯𑒱𑒨𑒼 𑒩𑒯𑒋 𑒖𑒹 𑒞𑒼𑒩𑒰 𑒖𑒞𑒹𑒏 𑒣𑒜𑓃𑒥𑒰𑒏 𑒕𑒾𑒏 𑒣𑒜𑓃, 𑒧𑒳𑒠𑒰 𑒄 𑒮𑒦 𑒞𑒐𑒢 𑒑𑒰𑒧𑒧𑒹 𑒄𑒿𑒙𑒰 𑒅𑒚𑒥𑒱𑒞𑒋 𑒮𑒹 𑒯𑒧𑒩𑒰 𑒠𑒹𑒐𑒪 𑒯𑒼𑒃𑒞𑒋? 𑒂 𑒄 𑒑𑒣 𑒋𑒏𑒩𑒰 𑒮𑒦𑒏𑒹𑒿 𑒯𑒧 𑒥𑒳𑒗𑒻𑒨𑒼 𑒢𑒯𑒱 𑒠𑒹𑒢𑒹 𑒕𑒱𑒨𑒻𑒏। -“𑒂 𑒄 𑒮𑒦 𑒏𑒲 𑒏𑒯𑒻𑒨𑒹 𑒖𑒹 𑒯𑒧 𑒁𑒣𑒢 𑒁𑒯𑒪𑒱𑒨𑒰 (𑒮𑓂𑒞𑓂𑒩𑒲) 𑒂 𑒮𑒰𑒩𑒱-𑒯𑒧𑒖𑒳𑒪𑓂𑒤(𑒮𑒰𑒩𑒱-𑒮𑒰𑒜𑓃𑒴)𑒏 𑒣𑒰𑒕𑒰𑒿 𑒋𑒏𑒩𑒰 𑒮𑒦𑒣𑒩 𑒡𑓂𑒨𑒰𑒢 𑒢𑒯𑒱 𑒠𑓄 𑒩𑒯𑒪 𑒕𑒱𑒨𑒻𑒏? 𑒠𑒴 𑒩𑓀𑒑 𑒏𑒩𑒻𑒞 𑒕𑒱𑒨𑒻𑒏?
-“𑒠𑒱𑒪𑓂𑒪𑒲𑒧𑒹 𑒂𑒋𑒪 𑒩𑒯𑒲 𑒑𑒰𑒧 𑒕𑒼𑒛𑓃𑒱 𑒏𑒋 𑒞𑒿 𑒣𑒯𑒱𑒢𑒹 𑒢𑒼𑒋𑒛𑒰𑒧𑒹 𑒣𑒱𑒞𑒩𑒱𑒨𑒰 𑒥𑒩𑓂𑒞𑓂𑒞𑒢𑒏 𑒠𑒼𑒏𑒰𑒢𑒧𑒹 𑒥𑓂𑒩𑒰𑒮𑒼𑒮𑒿 𑒥𑒩𑓂𑒞𑒢 𑒮𑒰𑒤 𑒏𑒩𑒻𑒞 𑒩𑒯𑒲। 𑒁𑒪𑓂𑒪𑒰𑒯𑒏 𑒏𑒩𑒧𑒮𑒿 𑒮𑒩𑓂𑒤𑒴 𑒦𑒹𑒙𑒱 𑒑𑒹𑒪। 𑒐𑒰𑒪𑒰𑒖𑒰𑒠 𑒦𑒰𑒋 (𑒧𑒾𑒮𑒹𑒩𑒰 𑒦𑒰𑒋) 𑒏𑒹𑒩 𑒮𑓀𑒑𑒲 𑒩𑒯𑒋 𑒮𑒩𑓂𑒤𑒴। 𑒍𑒏𑒩𑒹𑒮𑒿 𑒮𑒦 𑒄𑒪𑒧 𑒮𑒱𑒐𑒪𑒯𑒳𑒿। 𑒧𑒳𑒠𑒰 𑒄 𑒏𑒯𑒱 𑒠𑒱𑒁𑒋 𑒖𑒹 𑒯𑒧 𑒏𑒯𑒱𑒨𑒼 𑒍𑒏𑒩𑒰 𑒠𑒑𑒰 𑒠𑒹𑒢𑒹 𑒯𑒼𑒃𑒨𑒻𑒏। 𑒮𑒩𑓂𑒤𑒴𑒏 𑒮𑓂𑒫𑒦𑒰𑒫 𑒞𑒿 𑒁𑒯𑒰𑒿𑒏𑒹𑒿 𑒥𑒳𑒗𑒪𑒹 𑒁𑒕𑒱। 𑒏𑒢𑒱𑒨𑒼 𑒁𑒢𑓂𑒨𑒰𑒨 𑒂 𑒥𑒹𑒃𑒧𑒰𑒢𑒲 𑒍𑒏𑒩𑒰 𑒣𑒮𑒢𑓂𑒠 𑒢𑒯𑒱 𑒕𑒻𑒏, 𑒮𑒦𑒮𑒿 𑒥𑒞𑒏𑒯𑒲 𑒦𑒹𑒪 𑒕𑒻𑒏, 𑒧𑒳𑒠𑒰 𑒯𑒧𑒩𑒰𑒮𑒿 𑒂𑒃 𑒡𑒩𑒱 𑒏𑒼𑒢𑒼 𑒧𑒼𑒢 𑒧𑒳𑒙𑒫𑓂𑒫𑒪 𑒢𑒯𑒱 𑒦𑒹𑒪 𑒕𑒻𑒏। 𑒯𑒧𑒩 𑒮𑒹 𑒢𑒲𑒨𑒞 𑒩𑒯𑒱𑒞𑒋 𑒞𑒿 𑒍𑒏𑒩𑒼 𑒮𑓀𑒑 𑒢𑒹 𑒯𑒧𑒩 𑒮𑓀𑒥𑓀𑒡 𑒙𑒳𑒙𑒱𑒞𑒋। 𑒂 𑒋𑒯𑒱 𑒬𑒯𑒩𑒧𑒹 𑒍 𑒂𑒢 𑒦𑒋 𑒯𑒧𑒩𑒰 𑒁𑒣𑓂𑒣𑒢 𑒥𑒳𑒗𑒪𑒏 𑒂 𑒄 𑒮𑒦 ? 𑒍 𑒞𑒿 𑒑𑒾𑒂𑒿 𑒕𑒲, 𑒧𑒳𑒠𑒰 𑒐𑒪𑒲𑒪? 𑒍𑒏𑒩𑒼𑒮𑒿 𑒣𑒳𑒕𑒱𑒨𑒾𑒏।
-“𑒧𑒰𑒋𑒏 𑒧𑒼𑒢 𑒣𑒛𑓃𑒱 𑒖𑒰𑒃𑒋 𑒖𑒯𑒱𑒨𑒰 𑒄 𑒦𑒠𑒫𑒩𑒱𑒨𑒰 𑒪𑒰𑒡𑒻𑒋। 𑒧𑒼𑒢 𑒢𑒯𑒱 𑒣𑒰𑒛𑓃𑒋 𑒔𑒰𑒯𑒻𑒞 𑒕𑒲, 𑒂 𑒞𑒰𑒯𑒱 𑒪𑒹𑒪 𑒫𑓂𑒨𑒮𑓂𑒞 𑒩𑒯𑒻𑒞 𑒕𑒲। 𑒧𑒳𑒠𑒰 𑒂𑒃 𑒧𑒰𑒋𑒏 𑒍 𑒧𑒵𑒞𑓂𑒨𑒳 𑒩𑒯𑒱-𑒩𑒯𑒱 𑒏𑒼𑒜𑓃 𑒞𑒼𑒛𑓃𑒱 𑒩𑒯𑒪 𑒁𑒕𑒱।
𑒢𑒥𑒲 𑒥𑒏𑒮𑒏 𑒏𑓀𑒚 𑒏𑒯𑒻𑒞-𑒏𑒯𑒻𑒞 𑒦𑒩𑒱𑒨𑒰 𑒑𑒹𑒪𑒻𑒏। 𑒧𑒳𑒠𑒰 𑒏𑒢𑒹𑒏 𑒣𑒰𑒢𑒱 𑒣𑒲𑒥𑒱 𑒤𑒹𑒩 𑒍 𑒧𑒰𑒋𑒏 𑒮𑓂𑒧𑒩𑒝 𑒏𑒩𑒋 𑒪𑒰𑒑𑒪।
-“𑒢𑒥𑒲 𑒮𑒰𑒯𑒹𑒥𑒖𑒰𑒠𑒹, 𑒏𑒢𑒹𑒏 𑒍𑒯𑒱 𑒏𑒚𑒾𑒞𑒏𑒹𑒿 𑒐𑒳𑒙𑓂𑒙𑒰𑒏 𑒪𑒑 𑒏𑒋 𑒠𑒱𑒎𑒏। 𑒥𑒛𑓂𑒛 𑒣𑒰𑒢𑒱 𑒔𑒴𑒥𑒱 𑒩𑒯𑒪 𑒕𑒻𑒏 𑒍𑒞𑒋। 𑒄 𑒥𑒰𑒠𑒩𑒏𑒰𑒪 𑒮𑒦 𑒮𑒰𑒪 𑒠𑒳𑓁𑒐 𑒠𑒻𑒞 𑒁𑒕𑒱। 𑒮𑒼𑒔𑒱𑒞𑒹 𑒩𑒯𑒱 𑒑𑒹𑒪𑒯𑒳𑒿 𑒖𑒹 𑒒𑒩 𑒕𑒛𑓃𑒰𑒨𑒥। 𑒧𑒳𑒠𑒰 𑒢𑒯𑒱 𑒦𑒋 𑒮𑒏𑒪। 𑒒𑒩𑒼𑒏 𑒏𑒢𑒲 𑒧𑒩𑒼𑒧𑒞𑒱 𑒏𑒩𑒰𑒋𑒥 𑒂𑒫𑒬𑓂𑒨𑒏 𑒕𑒪, 𑒧𑒳𑒠𑒰 𑒮𑒹𑒯𑒼 𑒢𑒯𑒱 𑒦𑒋 𑒮𑒏𑒪। 𑒚𑒰𑒧-𑒚𑒰𑒧 𑒮𑒼𑓀𑒑𑒩 𑒪𑒰𑒑𑒪 𑒁𑒕𑒱। 𑒤𑒴𑒮𑒼𑒏 𑒒𑒩 𑒏𑒼𑒢𑒼 𑒒𑒩 𑒯𑒼𑒃𑒞 𑒕𑒻𑒏? 𑒚𑒰𑒧-𑒚𑒰𑒧 𑒔𑒳𑒥𑒱 𑒩𑒯𑒪 𑒁𑒕𑒱, 𑒍𑒞𑒹𑒏 𑒏𑒚𑒾𑒞𑒼 𑒢𑒯𑒱 𑒁𑒕𑒱 𑒒𑒩𑒧𑒹। 𑒐𑒹𑒢𑒰𑒃 𑒏𑒼𑒢𑒰 𑒥𑒢𑒞 𑒮𑒹 𑒢𑒯𑒱 𑒖𑒰𑒢𑒱। 𑒍𑒮𑒰𑒩𑒰𑒣𑒩𑒏 𑒔𑒴𑒪𑓂𑒯𑒱𑒣𑒩 𑒞𑒿 𑒣𑒰𑒢𑒱𑒏 𑒧𑒼𑒙 𑒙𑒒𑒰𑒩 𑒐𑒮𑒱 𑒩𑒯𑒪 𑒁𑒕𑒱। 𑒋𑒏𑒙𑒰 𑒂𑒩 𑒁𑒐𑒛𑓃𑒰 𑒔𑒴𑒪𑓂𑒯𑒱 𑒁𑒕𑒱, 𑒧𑒳𑒠𑒰 𑒖𑒹 𑒍 𑒙𑒴𑒙𑒱 𑒖𑒋𑒞, 𑒞𑒐𑒢 𑒞𑒿 𑒔𑒴𑒛𑓃𑒰-𑒑𑒳𑒛𑓃 𑒤𑒰𑒿𑒏𑒱 𑒏𑒋 𑒏𑒰𑒖 𑒔𑒪𑒥𑒋 𑒣𑒛𑓃𑒞। 𑒮𑒧𑒨-𑒮𑒰𑒪 𑒋𑒯𑒹𑒢 𑒕𑒻𑒏 𑒖𑒹 𑒔𑒴𑒪𑓂𑒯𑒱 𑒥𑒢𑒰𑒋𑒥 𑒞𑒿 𑒮𑒳𑒐𑒹𑒥𑒹 𑒢𑒯𑒱 𑒏𑒩𑒞। 𑒖𑒰𑒛𑓃𑒢𑒱 𑒮𑒹𑒯𑒼 𑒮𑒦𑒙𑒰 𑒦𑒲𑒖𑒱 𑒑𑒹𑒪 𑒁𑒕𑒱। 𑒦𑒳𑒮𑓂𑒮𑒲𑒣𑒩 𑒐𑒹𑒢𑒰𑒃 𑒥𑒢𑒰𑒥𑒋 𑒣𑒛𑓃𑒞”।
-“𑒣𑒃𑒜𑓃𑒱𑒨𑒰 𑒅𑒖𑒩𑒰 𑒢𑒳𑒂𑒏 𑒂𑒿𑒔𑒩 𑒍𑒜𑓃𑒢𑒹, 𑒟𑒩𑒟𑒩𑒰𑒃𑒞 𑒏𑒩𑒲𑒧𑒰 𑒥𑒹𑒑𑒧 𑒧𑒰𑒢𑒹 𑒯𑒧𑒩 𑒧𑒰𑒋, 𑒔𑒾𑒠𑒯 𑒥𑒩𑒐𑒏 𑒁𑒣𑒢 𑒥𑒹𑒙𑒰𑒏 𑒧𑒰𑒢𑒹 𑒯𑒧𑒩 𑒮𑓀𑒑, 𑒏𑒐𑒢𑒼 𑒮𑒼𑓀𑒑𑒩𑒏𑒹𑒿 𑒮𑒼𑒗 𑒏𑒩𑒟𑒱 𑒞𑒿 𑒏𑒐𑒢𑒼 𑒏𑒚𑒾𑒞𑒏𑒹𑒿 𑒋𑒞𑒋𑒮𑒿 𑒍𑒞𑒋 𑒒𑒳𑒮𑒏𑒰𑒥𑒟𑒱। 𑒖𑒞𑒋 𑒙𑒒𑒰𑒩 𑒏𑒧 𑒪𑒰𑒑𑒢𑓂𑒯𑒱 𑒍𑒞𑒋𑒮𑒿 𑒒𑒳𑒮𑒏𑒰𑒏𑒋, 𑒖𑒞𑒋 𑒥𑒹𑒬𑒲 𑒪𑒰𑒑𑒢𑓂𑒯𑒱 𑒍𑒞𑒋 𑒠𑒋 𑒠𑒻𑒞 𑒕𑒪𑒲𑒯। 𑒮𑒾𑒿𑒮𑒹 𑒒𑒩-𑒣𑒱𑒔𑓂𑒕𑒩 𑒦𑒋 𑒑𑒹𑒪 𑒕𑒪। 𑒏𑒼𑒢𑒙𑒰 𑒪𑒑 𑒋𑒏 𑒚𑒰𑒧 𑒣𑒰𑒢𑒱 𑒢𑒘𑒱 𑒔𑒴𑒥𑒱 𑒩𑒯𑒪 𑒕𑒪, 𑒞𑒞𑒋 𑒖𑒰𑒋 𑒚𑒰𑒜𑓃 𑒦𑒋 𑒑𑒹𑒪𑒲𑒯।
-“𑒏𑒞𑒹𑒏 𑒩𑒰𑒮 𑒐𑒜𑓃 𑒔𑒩𑒧𑒹 𑒁𑒢𑒹𑒩 𑒣𑒛𑓃𑒪 𑒕𑒪। 𑒣𑒜𑓃𑒳𑒂 𑒏𑒰𑒏𑒰𑒏𑒹𑒿 𑒏𑒯𑒪𑒱𑒨𑒢𑓂𑒯𑒱 𑒢𑒯𑒱। 𑒒𑒩 𑒕𑒛𑓃𑒥𑒰 𑒪𑒹𑒢𑒹 𑒩𑒯𑒱𑒞𑒯𑒳𑒿”।
-“𑒨𑒾 𑒥𑒰𑒥𑒴। 𑒒𑒩 𑒕𑒛𑓃𑒋𑒥𑒰𑒏 𑒪𑒹𑒪 𑒣𑒳𑒂𑒩 𑒞𑒿 𑒦𑒹𑒙𑒢𑒱𑒯𑒰𑒩 𑒢𑒯𑒱। 𑒂 𑒑𑒩𑒲𑒥-𑒧𑒮𑒼𑒧𑒰𑒞𑒏 𑒒𑒩 𑒐𑒜𑓃𑒮𑒿 𑒏𑒹 𑒕𑒛𑓃𑒰𑒥𑒋 𑒠𑒹𑒞”।
-“𑒯𑒧𑒩𑒰 𑒐𑒜𑓃𑒮𑒿 𑒂 𑒣𑒳𑒂𑒩𑒮𑒿 𑒒𑒩 𑒕𑒛𑓃𑒥𑒨𑒥𑒰𑒧𑒹 𑒯𑒼𑒧𑒨𑒥𑒪𑒰 𑒐𑒩𑒔𑒰𑒏 𑒁𑒢𑓂𑒞𑒩 𑒞𑒯𑒱𑒨𑒰 𑒢𑒯𑒱 𑒥𑒳𑒗𑒪 𑒕𑒪।
-“𑒮𑒹 𑒞𑒿 𑒁𑒧𑓂𑒧𑒲, 𑒐𑒜𑓃𑒮𑒿 𑒕𑒛𑓃𑒰𑒋𑒪 𑒒𑒩𑒏 𑒬𑒰𑒢 𑒞𑒿 𑒠𑒹𑒐𑒥𑒰 𑒖𑒼𑒑 𑒯𑒼𑒃𑒞 𑒕𑒻𑒏। 𑒣𑒜𑓃𑒳𑒂 𑒏𑒰𑒏𑒰𑒏 𑒒𑒩 𑒠𑒹𑒐𑒻𑒞 𑒕𑒱𑒨𑒢𑓂𑒯𑒱। 𑒠𑒹𑒐𑒋𑒧𑒹 𑒏𑒞𑒹𑒏 𑒮𑒳𑒢𑓂𑒠𑒩 𑒪𑒑𑒻𑒞 𑒁𑒕𑒱 𑒂 𑒏𑒹𑒯𑒢𑒼 𑒥𑒩𑒐𑒰 𑒯𑒼𑒁𑒋, 𑒋𑒏𑒼 𑒚𑒼𑒣 𑒣𑒰𑒢𑒱 𑒢𑒯𑒱 𑒔𑒳𑒥𑒻𑒞 𑒁𑒕𑒱”।
-“𑒮𑒹 𑒞𑒿 𑒮𑒦𑒮𑒿 𑒢𑒲𑒏 𑒒𑒩 𑒯𑒼𑒃𑒞 𑒁𑒕𑒱 𑒏𑒼𑒚𑒰𑒥𑒪𑒰”।
-“𑒋𑒯, 𑒏𑒲 𑒏𑒯𑒻𑒞 𑒕𑒲? 𑒑𑒱𑒪𑒹𑒥𑒰𑒮𑒿 𑒂 𑒮𑒳𑒩𑒐𑒲𑒮𑒿 𑒄𑒿𑒙𑒰 𑒖𑒼𑒛𑓃𑒹𑒢𑒹 𑒏𑒼𑒚𑒰𑒏 𑒒𑒩 𑒦𑒋 𑒖𑒰𑒃𑒞 𑒁𑒕𑒱? 𑒂 𑒢𑒹𑒓𑒩𑒰𑒏 𑒒𑒩 𑒞𑒿 𑒮𑒲𑒧𑒹𑒢𑓂𑒙𑒮𑒿 𑒖𑒼𑒛𑓃𑒪 𑒕𑒻𑒏, 𑒧𑒳𑒠𑒰 𑒣𑒩𑒳𑒏𑒰𑒿 𑒞𑒞𑒹𑒏 𑒔𑒳𑒥𑒻𑒞 𑒕𑒪 𑒮𑒹 𑒣𑒴𑒕𑒴 𑒢𑒯𑒱”।
-“𑒮𑒹?”
-“𑒯𑒿 𑒨𑒻 𑒁𑒧𑓂𑒧𑒲। 𑒮𑒦 𑒥𑒩𑒐 𑒖𑓂𑒨𑒼𑒿 𑒕𑒛𑓃𑒥𑒰 𑒠𑒲, 𑒞𑒿 𑒍𑒯𑒱𑒮𑒿 𑒢𑒲𑒏 𑒏𑒼𑒢𑒼 𑒒𑒩 𑒯𑒼𑒃𑒞 𑒕𑒻𑒏?”
-“𑒔𑒰𑒩𑒱𑒧 𑒥𑒩𑒐 𑒖𑒹 𑒕𑒛𑓃𑒥𑒹𑒢𑒹 𑒕𑒪𑒯𑒳𑒿 𑒞𑒏𑒩 𑒥𑒰𑒠𑒼 𑒣𑒯𑒱𑒪 𑒥𑒩𑒐𑒰𑒧𑒹 𑒐𑒴𑒥 𑒔𑒳𑒁𑒪 𑒕𑒪”।
-“𑒣𑒯𑒱𑒪𑒳𑒏𑒹 𑒥𑒩𑒐𑒰𑒧𑒹 𑒔𑒳𑒁𑒪 𑒕𑒪 𑒢𑒹 𑒂 𑒤𑒹𑒩 𑒮𑒦 𑒞𑒯 𑒁𑒣𑒢 𑒖𑒑𑒯 𑒡𑓄 𑒪𑒹𑒢𑒹 𑒯𑒼𑒋𑒞। 𑒞𑒐𑒢 𑒢𑒯𑒱 𑒔𑒳𑒁𑒪 𑒢𑒹 𑒥𑒰𑒠𑒧𑒹”।
-“𑒯𑒿, 𑒮𑒹 𑒞𑒿 𑒞𑒏𑒩𑒰 𑒥𑒰𑒠 𑒞𑒲𑒢 𑒥𑒩𑒐 𑒢𑒯𑒱 𑒔𑒳𑒁𑒪”।
-“𑒞𑒐𑒢𑒹 𑒏𑒰𑒏𑒲 𑒥𑒖𑒻𑒞 𑒁𑒋𑒪𑒲𑒯-
-“𑒖𑒢𑒧𑒱 𑒏𑒋 𑒚𑒰𑒜𑓃 𑒦𑒹𑒪 𑒁𑒕𑒱 𑒂 𑒏𑒲 𑒮𑒦 𑒁𑒯𑒰𑒿𑒏𑒹𑒿 𑒮𑒱𑒐𑒰 𑒩𑒯𑒪 𑒁𑒕𑒱। 𑒏𑒢𑒹𑒏 𑒅𑒥𑒹𑒛𑓃 𑒖𑒹𑒏𑒰𑒿 𑒦𑒹𑒪𑒻𑒏 𑒞𑒿 𑒮𑒼𑒔𑒪𑒯𑒳𑒿 𑒖𑒹 𑒥𑒯𑒱𑒢-𑒠𑒰𑒃𑒏 𑒐𑒼𑒖 𑒣𑒳𑒕𑒰𑒩𑒱 𑒏𑒋 𑒂𑒥𑒲”।
-“𑒥𑒳𑒢𑓂𑒢𑒲 𑒩𑒳𑒏𑒱 𑒑𑒹𑒪 𑒕𑒪। 𑒯𑒧 𑒏𑒰𑒏𑒰𑒏 𑒒𑒩 𑒠𑒱𑒮 𑒑𑒹𑒪𑒯𑒳𑒿 𑒂 𑒠𑒳𑒢𑒴 𑒠𑒱𑒨𑒰𑒠𑒢𑒲𑒧𑒹 𑒑𑒣-𑒬𑒣 𑒬𑒳𑒩𑒴 𑒦𑒋 𑒑𑒹𑒪𑒢𑓂𑒯𑒱।
-“𑒮𑒰𑒿𑒗𑒏 𑒗𑒪𑒤𑒪𑒲 𑒬𑒳𑒩𑒴 𑒦𑒹𑒪, 𑒦𑒠𑒥𑒩𑒱𑒨𑒰 𑒁𑒢𑓂𑒯𑒰𑒩𑒏, 𑒞𑒿 𑒏𑒰𑒏𑒲 𑒥𑒯𑒩𑒰𑒃𑒞 𑒏𑒯𑒻𑒞 𑒑𑒹𑒪𑒲𑒯-
-“𑒥𑒯𑒱𑒢 𑒠𑒰𑒃, 𑒂𑒑𑒱𑒏 𑒖𑒩𑒴𑒩𑒲 𑒣𑒛𑓃𑒨 𑒞𑒿 𑒯𑒧𑒩 𑒒𑒩𑒮𑒿 𑒪𑒋 𑒖𑒰𑒋𑒥”।
-“𑒢𑒘𑒱 𑒥𑒯𑒱𑒢𑒠𑒰𑒃। 𑒮𑒪𑒰𑒃𑒧𑒹 𑒠𑒴-𑒞𑒲𑒢 𑒙𑒰 𑒏𑒰𑒚𑒲 𑒕𑒻𑒏। 𑒧𑒳𑒠𑒰 𑒧𑒮𑒳𑒂 𑒑𑒹𑒪 𑒕𑒻𑒏। 𑒯𑒹, 𑒄 𑒛𑒱𑒥𑓂𑒥𑒲 𑒠𑒻𑒞 𑒕𑒱𑒨𑒢𑓂𑒯𑒱, 𑒏𑒢𑒹𑒏𑒏𑒰𑒪 𑒁𑒣𑒢 𑒔𑒳𑒪𑓂𑒯𑒰 𑒪𑒑 𑒩𑒰𑒐𑒱 𑒠𑒹𑒟𑒱𑒢𑓂𑒯 𑒞𑒿 𑒏𑒰𑒖𑒏 𑒖𑒼𑒑𑒩 𑒦𑒋 𑒖𑒋𑒞। 𑒢𑒥𑒲 𑒠𑒱𑒂 𑒣𑒚𑒰 𑒠𑒱𑒯𑒟𑒱”।
-“𑒠𑒹𑒐𑒱𑒯𑒟𑒱। 𑒅𑒣𑒰𑒮 𑒢𑒘𑒱 𑒏𑓄 𑒪𑒱𑒯𑒟𑒱 𑒮𑒹 𑒏𑒯𑒱 𑒠𑒻𑒞 𑒕𑒱𑒨𑒢𑓂𑒯𑒱, 𑒥𑒔𑓂𑒔𑒰 𑒮𑒦 𑒞𑒿 𑒯𑒧𑒩𑒰 𑒋𑒯𑒱𑒚𑒰𑒧 𑒐𑒰 𑒪𑒹𑒞”-𑒠𑒱𑒨𑒰𑒠𑒱𑒢𑒲 𑒏𑒯𑒻𑒞 𑒥𑒱𑒠𑒰 𑒦𑒹𑒪𑒲𑒯।
-“𑒏𑒩𑒲𑒧𑒰 𑒥𑒹𑒑𑒧 𑒧𑒰𑒢𑒹 𑒯𑒧𑒩 𑒧𑒰𑒋 𑒍𑒮𑒰𑒩𑒰𑒣𑒩 𑒐𑒳𑒙𑓂𑒙𑒰 𑒦𑒩𑒹 𑒣𑒲𑒚 𑒮𑒙𑒰 𑒥𑒻𑒮𑒱 𑒑𑒹𑒪𑒲𑒯।
-“𑒏𑒲 𑒮𑒼𑒔𑒱 𑒩𑒯𑒪 𑒕𑒲 𑒁𑒧𑓂𑒧𑒲। 𑒏𑒯𑒴 𑒢𑒹 ?”
-“𑒨𑒻𑒯 𑒤𑒳𑒮𑒱𑒨𑒰𑒯𑒲 𑒑𑒣 𑒮𑒦, 𑒁𑒯𑒰𑒿𑒏 𑒁𑒥𑓂𑒥𑒴𑒏 𑒣𑒯𑒪𑒧𑒰𑒢𑒲𑒏। 𑒏𑒰𑒏𑒰 𑒯𑒳𑒢𑒏𑒰 𑒖𑒹 𑒏𑒯𑒻𑒞 𑒩𑒯𑒟𑒱𑒢𑓂𑒯 𑒮𑒻𑒯।
-“𑒐𑒳𑒙𑓂𑒙𑒰 𑒣𑒯𑒪𑒧𑒰𑒢 𑒕𑒟𑒱 𑒄”।
-“𑒮𑒹 𑒢𑒯𑒱 𑒏𑒯𑒴 𑒏𑒰𑒏𑒰। 𑒖𑒥𑒩𑒠𑒮𑓂𑒞𑒲𑒏 𑒧𑒰𑒩𑒱-𑒣𑒲𑒙𑒱 𑒯𑒧 𑒢𑒯𑒱 𑒏𑒩𑒻𑒞 𑒕𑒲, 𑒞𑒰𑒯𑒱 𑒠𑓂𑒫𑒰𑒩𑒹 𑒢𑒹 𑒁𑒯𑒰𑒿 𑒄 𑒑𑒣 𑒏𑒯𑒱 𑒩𑒯𑒪 𑒕𑒲”।
-“𑒩𑒯𑒧𑒰𑒢 𑒏𑒰𑒏𑒰 𑒂 𑒯𑒳𑒧𑒰𑒨𑒴𑒿 𑒦𑒰𑒞𑒱𑒖। 𑒣𑒱𑒞𑓂𑒞𑒲-𑒦𑒰𑒞𑒱𑒖𑒧𑒹 𑒍𑒯𑒱𑒢𑒰 𑒑𑒣 𑒯𑒼𑒃𑒞 𑒕𑒪𑒢𑓂𑒯𑒱, 𑒖𑒹𑒢𑒰 𑒠𑒼𑒮𑓂𑒞𑒱𑒨𑒰𑒩𑒲𑒧𑒹 𑒑𑒣 𑒯𑒼𑒃𑒞 𑒕𑒻𑒏। 𑒁𑒐𑒩𑒰𑒯𑒰𑒧𑒹 𑒖𑒐𑒢 𑒯𑒳𑒧𑒰𑒨𑒴𑒿 𑒮𑒦𑒏𑒹𑒿 𑒥𑒖𑒰𑒛𑓃𑒱 𑒠𑒹𑒟𑒱 𑒞𑒐𑒢 𑒁𑒢𑓂𑒞𑒱𑒧𑒧𑒹 𑒩𑒯𑒧𑒰𑒢 𑒯𑒳𑒢𑒏𑒰𑒮𑒿 𑒪𑒛𑓃𑒨 𑒂𑒥𑒟𑒱। 𑒏𑒰𑒏𑒰 𑒏𑒯𑒱𑒨𑒼 𑒯𑒳𑒢𑒏𑒰 𑒢𑒯𑒱 𑒖𑒲𑒞𑒋 𑒠𑒹𑒪𑒐𑒱𑒢𑓂𑒯।
-“𑒯𑒳𑒧𑒰𑒨𑒴𑒿𑒏 𑒏𑒢𑒱𑒨𑒰𑒿 𑒧𑒰𑒢𑒹 𑒯𑒧 𑒢𑒫𑒹-𑒢𑒫 𑒒𑒩𑒧𑒹 𑒂𑒋𑒪 𑒕𑒪𑒯𑒳𑒿। 𑒏𑒼𑒯𑒥𑒩 𑒪𑒯𑒚𑒲 𑒮𑒦 𑒯𑒼𑒃𑒞 𑒕𑒪𑒻𑒏 𑒍𑒯𑒱 𑒮𑒧𑒨𑒧𑒹। 𑒂𑒥 𑒢𑒹 𑒖𑒰𑒢𑒱 𑒧𑒳𑒪𑓂𑒪𑒰 𑒮𑒦 𑒏𑒱𑒋𑒏 𑒋𑒏𑒩 𑒫𑒱𑒩𑒼𑒡𑒲 𑒦𑒋 𑒑𑒹𑒪 𑒁𑒕𑒱, 𑒞𑒻𑒨𑒼 𑒪𑒼𑒏 𑒏𑒩𑒱𑒞𑒹 𑒁𑒕𑒱 𑒏𑒲 ? 𑒧𑒳𑒪𑓂𑒪𑒰 𑒮𑒦𑒏 𑒑𑒣 𑒖𑒹 𑒧𑒰𑒢𑒋 𑒪𑒰𑒑𑒲 𑒮𑒦 𑒚𑒰𑒧 𑒞𑒐𑒢 𑒞𑒿 𑒦𑒹𑒪 !
-“𑒂 𑒋𑒯𑒱 𑒞𑒩𑒯𑒏 𑒫𑒰𑒞𑒰𑒫𑒩𑒝 𑒒𑒩𑒧𑒹 𑒠𑒹𑒐𑒪𑒯𑒳𑒿 𑒞𑒿 𑒧𑒼𑒢 𑒣𑓂𑒩𑒮𑒢𑓂𑒢 𑒦𑓄 𑒑𑒹𑒪। 𑒒𑒩𑒏 𑒠𑒳𑒪𑒰𑒩𑒱 𑒕𑒪𑒯𑒳𑒿 𑒂 𑒮𑒰𑒮𑒳𑒩𑒼 𑒞𑒹𑒯𑒢𑒹 𑒦𑒹𑒙𑒱 𑒑𑒹𑒪। 𑒮𑒧𑒨 𑒥𑒲𑒞𑒋 𑒪𑒰𑒑𑒪। 𑒧𑒳𑒠𑒰 𑒯𑒳𑒧𑒰𑒨𑒴𑒿𑒏 𑒫𑒱𑒡𑒫𑒰 𑒋𑒞𑒹𑒏 𑒖𑒪𑓂𑒠𑒲 𑒏𑒯𑒰𑒨 𑒪𑒰𑒑𑒥 𑒮𑒹 𑒢𑒯𑒱 𑒥𑒳𑒗𑒪 𑒕𑒪 𑒞𑒯𑒱𑒨𑒰। 𑒂𑒥 𑒞𑒿 𑒮𑒦 𑒣𑓂𑒩𑒏𑒰𑒩𑒏 𑒫𑒱𑒬𑒹𑒭𑒝𑒏 𑒁𑒦𑓂𑒨𑒰𑒮 𑒦𑓄 𑒑𑒹𑒪 𑒁𑒕𑒱। 𑒗𑒑𑒛𑓃𑒰-𑒗𑒰𑒿𑒙𑒱𑒏 𑒥𑒲𑒔 𑒏𑓂𑒨𑒼 𑒄𑒯𑒼 𑒏𑒯𑒱 𑒠𑒻𑒞 𑒁𑒕𑒱- 𑒫𑒩𑒐𑒾𑒏𑒲, 𑒫𑒩𑒏𑒹𑒿 𑒧𑒰𑒩𑒱 𑒛𑒰𑒃𑒢 𑒮𑒱𑒐𑒢𑒹 𑒁𑒕𑒱 !
-“𑒯𑒳𑒧𑒰𑒨𑒴𑒿𑒏 𑒖𑒱𑒫𑒻𑒞 𑒖𑒹 𑒮𑒦𑒏 𑒠𑒳𑒪𑒰𑒩𑒱 𑒕𑒪𑒯𑒳𑒿 𑒞𑒏𑒩 𑒥𑒰𑒠 𑒮𑒦𑒏 𑒂𑒿𑒐𑒱𑒏 𑒏𑒰𑒿𑒙 𑒦𑒋 𑒑𑒹𑒪𑒯𑒳𑒿। 𑒃𑒠𑓂𑒠𑒞𑒏 𑒥𑒰𑒠 𑒢𑒻𑒯𑒩𑒮𑒿 𑒠𑒼𑒮𑒩 𑒥𑒱𑒨𑒰𑒯 𑒏𑒩𑒋𑒥𑒰 𑒪𑒹𑒪 𑒮𑒹𑒯𑒼 𑒦𑒰𑒋 𑒮𑒦 𑒂𑒋𑒪 𑒧𑒳𑒠𑒰 𑒁𑒯𑒰𑒿 𑒮𑒦𑒏 𑒧𑒳𑒿𑒯 𑒠𑒹𑒐𑒻𑒞 𑒩𑒯𑒥𑒰𑒏 𑒃𑒔𑓂𑒕𑒰 𑒧𑒰𑒞𑓂𑒩 𑒩𑒯𑒪”।
𑒢𑒥𑒲 𑒥𑒏𑒮 𑒥𑒰𑒖𑒪-“𑒅𑒖𑒩𑒰 𑒢𑒴𑒂, 𑒥𑒱𑒢 𑒔𑒴𑒛𑓃𑒲-𑒮𑒱𑒢𑓂𑒠𑒴𑒩𑒏 𑒧𑒰𑒋𑒏 𑒫𑒻𑒡𑒫𑓂𑒨 𑒥𑒪𑒰 𑒔𑒹𑒯𑒩𑒰 𑒋𑒐𑒢𑒼 𑒯𑒧𑒩𑒰 𑒧𑒼𑒢𑒹 𑒁𑒕𑒱। 𑒤𑒹𑒩 𑒍𑒯𑒱 𑒦𑒠𑒥𑒩𑒱𑒨𑒰 𑒩𑒰𑒞𑒱𑒧𑒹 𑒧𑒰𑒋 𑒂𑒑𑒰𑒿 𑒏𑒯𑒋 𑒪𑒑𑒪𑒲𑒯।
-“𑒩𑒯𑒧𑒰𑒢 𑒏𑒰𑒏𑒰 𑒯𑒧𑒩 𑒣𑒏𑓂𑒭 𑒪𑒋 𑒏𑒱𑒕𑒳 𑒥𑒰𑒖𑒱 𑒠𑒹𑒪𑒐𑒱𑒢𑓂𑒯 𑒋𑒏 𑒥𑒹𑒩, 𑒞𑒿 𑒯𑒧𑒩 𑒮𑒰𑒮𑒳-𑒮𑒮𑒳𑒩 𑒏𑒯𑒋 𑒪𑒑𑒪𑒐𑒱𑒢𑓂𑒯 𑒖𑒹 𑒯𑒧𑒩 𑒣𑒳𑒞𑒼𑒯𑒳𑒏𑒹𑒿 𑒠𑒴𑒩𑒱 𑒏𑒋 𑒩𑒯𑒪 𑒕𑒲। 𑒂 𑒄𑒯𑒼 𑒖𑒹 𑒧𑒳𑒠𑓂𑒠𑒲𑒥𑒰 𑒮𑒦𑒏 𑒁𑒣𑒢𑒰 𑒒𑒩𑒧𑒹 𑒒𑒙𑒢𑒰 𑒯𑒹𑒞𑒻𑒏, 𑒞𑒐𑒢 𑒢𑒹 𑒥𑒳𑒗𑒋 𑒖𑒋𑒞।
-“𑒂𑒥 𑒞𑒿 𑒢𑒹 𑒩𑒯𑒧𑒰𑒢𑒹 𑒔𑒰𑒔𑒴 𑒕𑒟𑒱 𑒂 𑒢𑒹 𑒮𑒰𑒮𑒳 𑒮𑒮𑒳𑒩 𑒮𑒹 𑒧𑒩𑒪 𑒂𑒠𑒧𑒲𑒏 𑒏𑒲 𑒐𑒱𑒡𑒰𑓀𑒬 𑒏𑒩𑒴। 𑒧𑒳𑒠𑒰 𑒋𑒏𑒼𑒙𑒰 𑒗𑒴𑒚 𑒑𑒣 𑒄 𑒮𑒦 𑒢𑒯𑒱 𑒁𑒕𑒱।
-“𑒪𑒼𑒏 𑒏𑒯𑒻𑒞 𑒕𑒻𑒏 𑒖𑒹 𑒮𑒳𑒐𑒏 𑒠𑒱𑒢 𑒖𑒪𑓂𑒠𑒲 𑒥𑒲𑒞𑒱 𑒖𑒰𑒃𑒞 𑒁𑒕𑒱, 𑒧𑒳𑒠𑒰 𑒯𑒧𑒩 𑒠𑒳𑒐𑒏 𑒠𑒱𑒢 𑒖𑒪𑓂𑒠𑒲 𑒥𑒲𑒞𑒻𑒞 𑒑𑒹𑒪, 𑒮𑒳𑒐𑒏 𑒠𑒱𑒢 𑒞𑒿 𑒋𑒐𑒢𑒼 𑒋𑒏-𑒮𑓀𑒗𑒴 𑒅𑒣𑒰𑒮𑒧𑒹 𑒐𑒳𑒖𑒪 𑒂𑒿𑒐𑒱𑒮𑒿 𑒯𑒧 𑒠𑒹𑒐𑒻𑒞 𑒩𑒯𑒻𑒞 𑒕𑒲, 𑒐𑒞𑒧𑒹 𑒢𑒯𑒱 𑒯𑒼𑒃𑒞 𑒁𑒕𑒱।
-“𑒫𑒱𑒡𑒫𑒰 𑒦𑒹𑒪𑒰𑒏 𑒁𑒞𑒱𑒩𑒱𑒏𑓂𑒞 𑒂𑒢 𑒒𑒙𑒢𑒰𑒏𑓂𑒩𑒧 𑒁𑒣𑒢 𑒢𑒱𑒨𑒞 𑒮𑒧𑒨𑒮𑒿 𑒯𑒼𑒃𑒞 𑒩𑒯𑒪। 𑒯𑒧𑒩 𑒁𑒥𑓂𑒥𑒴-𑒁𑒧𑓂𑒧𑒲𑒏 𑒧𑒵𑒞𑓂𑒨𑒳 𑒦𑒹𑒪, 𑒮𑒰𑒮-𑒮𑒮𑒳𑒩 𑒂 𑒣𑒱𑒞𑒱𑒨𑒰 𑒮𑒮𑒳𑒩 𑒩𑒯𑒧𑒰𑒢 𑒏𑒏𑒰 𑒞𑒿 𑒣𑒯𑒱𑒢𑒯𑒱𑒨𑒹 𑒑𑒳𑒖𑒩𑒱 𑒑𑒹𑒪 𑒕𑒪𑒰𑒯।
-“𑒒𑒩𑒧𑒹 𑒖𑒐𑒢 𑒥𑒿𑒙𑒥𑒰𑒩𑒰 𑒯𑒼𑒧𑒨 𑒪𑒰𑒑𑒪 𑒞𑒐𑒢 𑒮𑒧𑓂𑒣𑒞𑓂𑒞𑒱𑒏 𑒂 𑒐𑒹𑒞-𑒣𑒟𑒰𑒩𑒏 𑒥𑒐𑒩𑒰, 𑒔𑒰𑒩𑒱 𑒦𑒻𑒨𑒰𑒩𑒲𑒧𑒹 𑒧𑒰𑒞𑓂𑒩 𑒞𑒲𑒢 𑒚𑒰𑒧 𑒯𑒼𑒧𑒨 𑒪𑒰𑒑𑒪। 𑒯𑒳𑒧𑒰𑒨𑒴𑒿𑒏 𑒯𑒱𑒮𑓂𑒮𑒰 𑒞𑒲𑒢𑒴 𑒑𑒼𑒙𑒹 (𑒖𑒱𑒥𑒻𑒞 𑒦𑒻𑒨𑒰𑒩𑒲 𑒮𑒦) 𑒥𑒰𑒿𑒙𑒱 𑒪𑒹𑒪𑒢𑓂𑒯𑒱। 𑒯𑒧 𑒏𑒱𑒕𑒳 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒯𑒧𑒩 𑒑𑒳𑒖𑒩 𑒏𑒼𑒢𑒰 𑒯𑒼𑒋𑒞, 𑒕𑒯 𑒙𑒰 𑒥𑒹𑒙𑒰 𑒂 𑒋𑒏 𑒙𑒰 𑒥𑒹𑒙𑒲 𑒁𑒕𑒱 𑒞𑒿 𑒯𑒳𑒧𑒰𑒨𑒴𑒿𑒏 𑒧𑒵𑒞𑓂𑒨𑒳𑒏 𑒠𑒼𑒭 𑒯𑒧𑒩𑒰 𑒧𑒰𑒟𑒣𑒩 𑒠𑒋 𑒯𑒧𑒩 𑒧𑒳𑒿𑒯 𑒥𑒢𑓂𑒢 𑒏𑒋 𑒠𑒹𑒪 𑒑𑒹𑒪।
-“𑒞𑒲𑒢𑒴 𑒦𑒰𑒿𑒋𑒏 𑒧𑒳𑒿𑒯 𑒯𑒳𑒧𑒰𑒨𑒴𑒿𑒏 𑒮𑒧𑒏𑓂𑒭 𑒐𑒳𑒖𑒻𑒞 𑒢𑒯𑒱 𑒕𑒪𑒢𑓂𑒯𑒱 𑒧𑒳𑒠𑒰 𑒯𑒳𑒢𑒏𑒩 𑒧𑒵𑒞𑓂𑒨𑒳𑒏 𑒥𑒰𑒠 𑒯𑒳𑒢𑒏𑒩 𑒫𑒱𑒡𑒫𑒰𑒏𑒹𑒿 𑒯𑒱𑒮𑓂𑒮𑒰 𑒢𑒯𑒱 𑒠𑒹𑒥𑓄 𑒪𑒹𑒪 𑒞𑒲𑒢𑒴 𑒦𑒰𑒿𑒨 𑒮𑒦 𑒞𑒩𑒯𑒏 𑒅𑒣𑒰𑒨 𑒏𑒹𑒪𑒢𑓂𑒯𑒱। 𑒯𑒧 𑒢𑒻𑒯𑒩 𑒖𑒰 𑒏𑒋 𑒁𑒣𑒢 𑒦𑒰𑒨𑒏𑒹𑒿 𑒥𑒖𑒰 𑒏𑒋 𑒁𑒢𑒪𑒯𑒳𑒿। 𑒣𑓀𑒔𑒻𑒞𑒲 𑒦𑒹𑒪 𑒂 𑒤𑒹𑒩 𑒁𑒿𑒑𑒢𑒰𑒏 𑒏𑒰𑒞𑒧𑒹 𑒋𑒏𑒙𑒰 𑒐𑒼𑒣𑒛𑓃𑒲 𑒁𑒪𑒑𑒮𑒿 𑒞𑒲𑒢𑒴 𑒦𑒰𑒿𑒨 𑒥𑒰𑒢𑓂𑒯𑒱 𑒠𑒹𑒪𑒢𑓂𑒯𑒱, 𑒯𑒧𑒩𑒰 𑒂 𑒯𑒧𑒩 𑒥𑒔𑓂𑒔𑒰 𑒮𑒦𑒏 𑒪𑒹𑒪। 𑒡𑒰𑒢, 𑒤𑒮𑒱𑒪 𑒮𑒦 𑒮𑒹𑒯𑒼 𑒖𑒲𑒫𑒢 𑒢𑒱𑒩𑓂𑒫𑒰𑒯𑒏 𑒪𑒹𑒪 𑒠𑒹𑒥𑒰𑒏 𑒢𑒱𑒩𑓂𑒝𑒨 𑒦𑒹𑒪। 𑒯𑒧 𑒔𑒩𑒐𑒰 𑒏𑒰𑒙𑒋 𑒪𑒑𑒪𑒯𑒳𑒿। 𑒮𑒹 𑒏𑒣𑒛𑓃𑒰-𑒪𑒞𑓂𑒞𑒰 𑒍𑒞𑒋𑒮𑒿 𑒞𑒹𑒢𑒰 𑒢𑒱𑒏𑒪𑒱 𑒖𑒰𑒋।
-“𑒪𑒱𑒁 𑒮𑒪𑒰𑒃”। 𑒠𑒱𑒨𑒰𑒠𑒱𑒢𑒲 𑒂𑒥𑒱 𑒏𑒯𑒪𑒢𑓂𑒯𑒱।
“𑒯𑒿”- 𑒦𑒏 𑒙𑒳𑒙𑒪𑒢𑓂𑒯𑒱 𑒏𑒩𑒲𑒧𑒰 𑒥𑒹𑒑𑒧𑒏 𑒧𑒰𑒢𑒹 𑒯𑒧𑒩 𑒧𑒰𑒋𑒏। 𑒠𑒱𑒨𑒰𑒠𑒱𑒢𑒲 𑒮𑒪𑒰𑒃 𑒣𑒏𑒛𑓃𑒰𑒋 𑒔𑒪𑒱 𑒑𑒹𑒪𑒲𑒯।
-“𑒋𑒯𑒱 𑒥𑒹𑒩 𑒥𑒰𑒜𑒱𑒏 𑒮𑒧𑒰𑒔𑒰𑒩 𑒩𑒯𑒱 𑒩𑒯𑒱 𑒏𑒋 𑒂𑒥𑒱 𑒩𑒯𑒪 𑒁𑒕𑒱। 𑒥𑒰𑒙 𑒒𑒰𑒙 𑒮𑒦 𑒖𑒞𑒋 𑒞𑒞𑒋 𑒛𑒴𑒧𑒱 𑒩𑒯𑒪 𑒕𑒪𑒋, 𑒐𑒹𑒞 𑒮𑒦 𑒞𑒿 𑒣𑒯𑒱𑒢𑒯𑒱 𑒛𑒴𑒧𑒱 𑒑𑒹𑒪 𑒕𑒪𑒋। 𑒁𑒯𑒰𑒿𑒏 𑒣𑒜𑓃𑒳𑒂 𑒏𑒰𑒏𑒲 𑒣𑒯𑒱𑒢𑒯𑒱𑒨𑒹 𑒮𑒳𑒢𑒰 𑒠𑒹𑒢𑒹 𑒕𑒟𑒱 𑒖𑒹 𑒋𑒯𑒱 𑒥𑒹𑒩 𑒫𑒰𑒩𑓂𑒭𑒱𑒏 𑒐𑒩𑓂𑒔𑒰𑒧𑒹 𑒏𑒙𑒾𑒞𑒲 𑒯𑒼𑒋𑒞। 𑒏𑒰𑒪𑓂𑒯𑒱 𑒏𑒯𑒻𑒞 𑒩𑒯𑒟𑒱 𑒖𑒹 𑒏𑒢𑒱𑒨𑒰𑒿 𑒮𑒦𑒙𑒰 𑒤𑒮𑒱𑒪 𑒛𑒴𑒧𑒱 𑒑𑒹𑒪, 𑒋𑒯𑒱 𑒥𑒹𑒩 𑒫𑒰𑒩𑓂𑒭𑒱𑒏 𑒐𑒩𑒔𑒰𑒧𑒹 𑒏𑒙𑒾𑒞𑒲 𑒯𑒹𑒞𑒢𑓂𑒯𑒱। 𑒯𑒧 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒋𑒿 𑒨𑒻 । 𑒖𑒯𑒱𑒨𑒰 𑒤𑒮𑒱𑒪 𑒢𑒲𑒏 𑒯𑒼𑒃𑒋 𑒞𑒿 𑒯𑒧𑒩 𑒐𑒩𑒔𑒰𑒧𑒹 𑒏𑒯𑒰𑒿 𑒏𑒯𑒱𑒨𑒼 𑒥𑒹𑒬𑒲 𑒡𑒰𑒢 𑒠𑒻𑒞 𑒕𑒲 ? 𑒄 𑒑𑒣 𑒁𑒯𑒰𑒿𑒏 𑒣𑒜𑓃𑒳𑒂 𑒏𑒰𑒏𑒰 𑒮𑒳𑒢𑒱 𑒩𑒯𑒪 𑒕𑒪𑒰𑒯। 𑒥𑒖𑒪𑒰𑒯-𑒩𑒰𑒿𑒛𑓃 𑒞𑒿 𑒮𑒰𑒿𑒜𑓃 𑒦𑒋 𑒑𑒹𑒪। 𑒁𑒯𑒰𑒿𑒏 𑒣𑒜𑓃𑒳𑒂 𑒏𑒰𑒏𑒲𑒏 𑒃𑒬𑒰𑒩𑒰 𑒏𑒹𑒪𑒰𑒣𑒩 𑒍 𑒮𑒮𑒩𑒱 𑒏𑒋 𑒠𑒪𑒰𑒢 𑒠𑒱𑒬𑒱 𑒥𑒯𑒩𑒰 𑒑𑒹𑒪𑒰𑒯 𑒂 𑒯𑒧 𑒢𑒼𑒩 𑒮𑒼𑓀𑒐𑒱 𑒑𑒹𑒪𑒯𑒳𑒿। 𑒂𑒃 𑒑𑒣 𑒢𑒱𑒏𑒪𑒪 𑒞𑒿.......”।
𑒧𑒰𑒋𑒏 𑒐𑒱𑒮𑓂𑒮𑒰 𑒏𑒯𑒻𑒞-𑒏𑒯𑒻𑒞 𑒢𑒥𑒲 𑒤𑒹𑒩 𑒩𑒳𑒏𑒱 𑒑𑒹𑒪। 𑒂𑒿𑒐𑒱 𑒂 𑒏𑓀𑒚 𑒠𑒳𑒢𑒴 𑒮𑓀𑒑 𑒕𑒼𑒛𑓃𑒱 𑒩𑒯𑒪 𑒕𑒪𑒻𑒏 𑒍𑒏𑒩। 𑒏𑒱𑒕𑒳 𑒏𑒰𑒪 𑒔𑒳𑒣 𑒩𑒯𑒱 𑒥𑒰𑒖𑒪।
“𑒄 𑒐𑒱𑒮𑓂𑒮𑒰 𑒦𑒰𑒋 𑒮𑒦𑒏𑒹𑒿 𑒯𑒧 𑒏𑒯𑒥𑒼 𑒢𑒯𑒱 𑒏𑒋𑒢𑒹 𑒕𑒱𑒨𑒻𑒏। 𑒮𑒼𑒔𑒪𑒯𑒳𑒿 𑒖𑒹 𑒏𑒯𑒥𑒻𑒏 𑒞𑒿 𑒧𑒿𑒑𑒢𑒲𑒧𑒹 𑒣𑓂𑒩𑒞𑒱𑒬𑒼𑒡 𑒖𑒑𑒞𑒻𑒏। 𑒖𑒹 𑒏𑒰𑒖 𑒏𑒩𑒥𑒰𑒏 𑒮𑒹 𑒢𑒯𑒱 𑒏𑒋𑒪 𑒯𑒼𑒋𑒞𑒻𑒏। 𑒂 𑒮𑒳𑒢𑒪𑒱𑒨𑒻𑒏 𑒁𑒕𑒱 𑒖𑒹 𑒯𑒧𑒩 𑒍 𑒧𑓀𑒛𑒪𑒥𑒰 𑒦𑒰𑒋 𑒍𑒯𑒱 𑒣𑒜𑓃𑒳𑒂 𑒏𑒰𑒏𑒰𑒏 𑒏𑒯𑒪𑒧𑒹 𑒂𑒥𑒱 𑒑𑒹𑒪 𑒁𑒕𑒱”।
𑒢𑒥𑒲 𑒥𑒏𑒮 𑒤𑒹𑒩 𑒔𑒳𑒣 𑒩𑒯𑒪। 𑒦𑒰𑒋 𑒮𑒦𑒏 𑒣𑓂𑒩𑒞𑒱 𑒍𑒏𑒩 𑒣𑓂𑒩𑒹𑒧 𑒍𑒏𑒩𑒰 𑒮𑒦𑒏 𑒫𑒱𑒭𑒨𑒧𑒹 𑒥𑒹𑒬𑒲 𑒥𑒖𑒥𑒰𑒮𑒿 𑒍𑒏𑒩𑒰 𑒩𑒼𑒏𑒻𑒞 𑒕𑒪𑒻𑒏। 𑒤𑒹𑒩 𑒍 𑒧𑒰𑒋𑒏 𑒐𑒱𑒮𑓂𑒮𑒰 𑒬𑒳𑒩𑒴 𑒏𑒋𑒪𑒏।
-“𑒧𑒰𑒋 𑒂𑒑𑒰𑒿 𑒥𑒖𑒻𑒞 𑒩𑒯𑒪𑒲𑒯।
-“𑒡𑒳𑒞𑓂𑒞 𑒠𑒱𑒢𑒧𑒹 𑒞𑒿 𑒐𑒹𑒢𑒯𑒱𑒨𑒹 𑒕𑒪𑒯𑒳𑒿, 𑒋𑒯𑒱 𑒁𑒏𑒪-𑒥𑒹𑒩𑒧𑒹 𑒏𑒹𑒢𑒰 𑒐𑒹𑒢𑒰𑒃 𑒥𑒢𑒰𑒋𑒥। 𑒏𑒢𑒱𑒨𑒰𑒿-𑒧𑒢𑒱𑒨𑒰𑒿 𑒕𑒪𑒯𑒳𑒿 𑒞𑒐𑒢𑒹 𑒫𑒱𑒡𑒫𑒰 𑒦𑓄 𑒑𑒹𑒪𑒯𑒳𑒿 𑒂 𑒁𑒯𑒴 𑒫𑒨𑒮𑒧𑒹 𑒞𑒻𑒿 𑒮𑒦 𑒏𑒢𑒱𑒨𑒰𑒿-𑒏𑒰𑒏𑒲 𑒏𑒯𑒻𑒞 𑒁𑒕𑒱। 𑒯𑒳𑒧𑒰𑒨𑒴𑒿 𑒏𑒞𑒹𑒏 𑒧𑒰𑒢𑒻𑒞 𑒕𑒪 𑒁𑒣𑒢 𑒦𑒰𑒋 𑒮𑒦𑒏𑒹𑒿। 𑒁𑒣𑒢 𑒣𑒹𑒙 𑒏𑒰𑒙𑒱 𑒦𑒰𑒑𑒪𑒣𑒳𑒩𑒧𑒹 𑒩𑒰𑒐𑒱 𑒣𑒜𑓃𑒍𑒪𑒢𑓂𑒯𑒱 𑒕𑒼𑒙𑒏𑒰 𑒦𑒰𑒃𑒏𑒹𑒿 𑒂 𑒂𑒥 𑒍 𑒣𑒜𑓃𑒳𑒂 𑒥𑒾𑒂 𑒋𑒯𑒹𑒢 𑒑𑒣 𑒏𑒯𑒻𑒞 𑒕𑒟𑒱।
-“ 𑒮𑒼𑒔𑒱𑒞𑒹-𑒮𑒼𑒔𑒱𑒞𑒹 𑒢𑒼𑒩 𑒦𑒩𑒱 𑒑𑒹𑒪𑒢𑓂𑒯𑒱 𑒧𑒰𑒋𑒏 𑒂𑒿𑒐𑒱𑒧𑒹।
-“𑒯𑒧𑒩𑒰 𑒮𑓀𑒑 𑒋𑒏𑒥𑒹𑒩 𑒯𑒖 𑒏𑒩𑒋 𑒪𑒹𑒪 𑒑𑒹𑒪 𑒩𑒯𑒟𑒱 𑒧𑒰𑒋। 𑒡𑒢𑓂𑒨 𑒦𑒰𑒩𑒞 𑒮𑒩𑒏𑒰𑒩 𑒖𑒹 𑒯𑒧𑒩𑒰 𑒮𑒢𑒏 𑒑𑒩𑒲𑒥-𑒑𑒳𑒩𑒥𑒰𑒏 𑒧𑒰𑒋 𑒮𑒹𑒯𑒼 𑒯𑒖 𑒏𑒋 𑒂𑒋𑒪। 𑒂 𑒁𑒣𑒢 𑒥𑒛𑓃𑒏𑒲 𑒠𑒱𑒨𑒰𑒠𑒱𑒢𑒲𑒏𑒹𑒿 𑒮𑒳𑒢𑒥𑒻𑒞 𑒩𑒯𑒟𑒱 𑒐𑒱𑒮𑓂𑒮𑒰 𑒖𑒹 𑒥𑒯𑒱𑒢𑒠𑒰𑒃, 𑒞𑒞𑒹𑒏 𑒦𑒲𑒛𑓃 𑒕𑒪𑒋 𑒙𑓂𑒩𑒹𑒢𑒧𑒹, 𑒑𑒳𑒧𑒰𑒩 𑒞𑒞𑒥𑒹। 𑒑𑒰𑒛𑓃𑒲𑒧𑒹 𑒥𑒹𑒬𑒲 𑒧𑒮𑒼𑒧𑒰𑒞𑒹 𑒮𑒦 𑒕𑒪𑒲𑒯। 𑒋𑒏 𑒑𑒼𑒙𑒹 𑒏𑒯𑒻𑒞 𑒕𑒪𑒲𑒯 𑒖𑒹 𑒖𑒞𑒹𑒏 𑒏𑒭𑓂𑒙 𑒂𑒃 𑒦𑒹𑒪 𑒞𑒞𑒹𑒏 𑒞𑒿 𑒖𑒯𑒱𑒨𑒰 𑒩𑒰𑒿𑒛𑓃 𑒦𑒹𑒪 𑒕𑒪𑒯𑒳𑒿 𑒞𑒯𑒱𑒨𑒼 𑒢𑒘𑒱 𑒦𑒹𑒪 𑒕𑒪𑒋। 𑒯𑒫𑒰𑒃 𑒖𑒯𑒰𑒖𑒏𑒹𑒿 𑒁𑒧𑓂𑒧𑒲 𑒑𑒰𑒛𑓃𑒲 𑒏𑒯𑒻𑒞 𑒕𑒪𑒲𑒯।
-“𑒤𑒹𑒩 𑒍𑒯𑒱 𑒦𑒠𑒥𑒩𑒱𑒨𑒰𑒏 𑒩𑒰𑒞𑒱𑒧𑒹 𑒯𑒧𑒩 𑒁𑒧𑓂𑒧𑒲 𑒏𑒩𑒲𑒧𑒰 𑒥𑒹𑒑𑒧𑒏 𑒧𑒳𑒿𑒯𑒣𑒩 𑒥𑒰𑒛𑓃𑒲𑒏 𑒯𑒯𑒰𑒃𑒞 𑒣𑒰𑒢𑒱 𑒂 𑒔𑒰𑒩𑒮𑒿 𑒙𑒣𑒙𑒣 𑒔𑒳𑒥𑒻𑒞 𑒣𑒰𑒢𑒱𑒏 𑒚𑒼𑒣𑒏 𑒂 𑒒𑒙𑒰𑒙𑒼𑒣 𑒁𑒢𑓂𑒯𑒰𑒩𑒏 𑒥𑒲𑒔 𑒏𑒢𑒹𑒏 𑒧𑒳𑒮𑓂𑒏𑒲 𑒂𑒥𑒱 𑒑𑒹𑒪𑒢𑓂𑒯𑒱। 𑒯𑒧𑒩𑒰 𑒏𑒰𑒏𑒰𑒏 𑒠𑒪𑒰𑒢𑒣𑒩 𑒖𑒰𑒋 𑒪𑒹𑒪 𑒏𑒯𑒪𑒢𑓂𑒯𑒱 𑒖𑒞𑒋 𑒂𑒩 𑒦𑒰𑒋 𑒥𑒯𑒱𑒢 𑒮𑒦 𑒕𑒪।
-“𑒤𑒹𑒩 𑒮𑒼𑒔𑒱𑒞𑒹-𑒮𑒼𑒔𑒱𑒞𑒹 𑒐𑒰𑒙𑒣𑒩 𑒙𑒒𑒩𑒱 𑒑𑒹𑒪𑒲𑒯 𑒏𑒩𑒲𑒧𑒰 𑒥𑒹𑒑𑒧, 𑒧𑒰𑒢𑒹 𑒯𑒧𑒩 𑒧𑒰𑒋 । 𑒦𑒼𑒩 𑒯𑒼𑒃𑒞-𑒯𑒼𑒃𑒞 𑒥𑒰𑒛𑓃𑒲𑒏 𑒣𑒰𑒢𑒱 𑒥𑒰𑒢𑓂𑒯𑒣𑒩𑒮𑒿 𑒁𑒿𑒑𑒢𑒰 𑒠𑒱𑒮 𑒂𑒥𑒱 𑒑𑒹𑒪।𑒞𑒲𑒢𑒴 𑒦𑒻𑒨𑒰𑒩𑒲 𑒁𑒣𑒢-𑒁𑒣𑒢 𑒯𑒱𑒮𑓂𑒮𑒰𑒏 𑒂𑓀𑒑𑒢 𑒦𑒩𑒰 𑒪𑒹𑒢𑒹 𑒕𑒪𑒰𑒯 𑒮𑒹 𑒮𑒦𑒙𑒰 𑒣𑒰𑒢𑒱 𑒮𑒯𑒙𑒱 𑒏𑓄 𑒯𑒧𑒩 𑒮𑒦𑒏 𑒡𑒮𑒪 𑒂𑒿𑒑𑒢𑒮𑒿 𑒐𑒼𑒣𑒛𑓃𑒲 𑒠𑒱𑒮 𑒥𑒜𑓃𑒱 𑒑𑒹𑒪। 𑒒𑒩𑒧𑒹 𑒔𑒰𑒩𑒱 𑒂𑒿𑒑𑒳𑒩 𑒣𑒰𑒢𑒱 𑒦𑒩𑒱 𑒑𑒹𑒪। 𑒦𑒼𑒩𑒧𑒹 𑒏𑒱𑒕𑒳 𑒁𑒥𑒰𑒖 𑒦𑒹𑒪 𑒂 𑒖𑒹 𑒅𑒚𑒻𑒞 𑒕𑒲 𑒞𑒿 𑒐𑒰𑒙𑒏 𑒢𑒲𑒔𑒰𑒿 𑒣𑒰𑒢𑒱 𑒦𑒩𑒪 𑒕𑒪, 𑒋𑒏-𑒏𑒼𑒚𑒲 𑒠𑒼𑒮𑒩 𑒏𑒼𑒚𑒲𑒣𑒩 𑒁𑒣𑒢 𑒁𑒢𑓂𑒢-𑒣𑒰𑒢𑒱𑒏 𑒮𑓀𑒑 𑒙𑒴𑒙𑒱 𑒏𑓄 𑒐𑒮𑒪 𑒕𑒪। 𑒂𑒥 𑒏𑒲 𑒯𑒼, 𑒥𑒛𑓃𑒏𑒲 𑒠𑒱𑒨𑒰𑒠𑒢𑒲𑒏 𑒥𑒹𑒙𑒰 𑒮𑒦𑒮𑒿 𑒣𑒯𑒱𑒢𑒹 𑒂𑒥𑒱 𑒏𑓄 𑒐𑒼𑒖 𑒣𑒳𑒕𑒰𑒛𑓃𑒱 𑒏𑒹𑒪𑒏𑒢𑓂𑒯𑒱, 𑒁𑒥𑒰𑒖 𑒠𑒴𑒩 𑒡𑒩𑒱 𑒑𑒹𑒪 𑒕𑒪𑒋। 𑒮𑒦𑒙𑒰 𑒁𑒢𑓂𑒢-𑒣𑒰𑒢𑒱 𑒢𑒰𑒬 𑒦𑓄 𑒑𑒹𑒪𑒢𑓂𑒯𑒱। 𑒁𑒢𑓂𑒢 𑒣𑒰𑒢𑒱 𑒕𑒪𑒻𑒢𑓂𑒯𑒹 𑒏𑒼𑒢? 𑒠𑒴-𑒙𑒰 𑒕𑒼𑒙-𑒕𑒼𑒙 𑒏𑒼𑒚𑒲, 𑒍𑒏𑒩𑒹 𑒐𑒐𑒩𑒲-𑒧𑒰𑒙𑒱 𑒧𑒱𑒪𑒰 𑒏𑓄 𑒠𑒜𑓃 𑒏𑒩𑒻𑒞 𑒩𑒯𑒻𑒞 𑒕𑒪𑒲𑒯 𑒯𑒧𑒩 𑒂𑒧𑓂𑒧𑒲।
-“𑒧𑒳𑒠𑒰 𑒦𑒼𑒩 𑒡𑒩𑒱 𑒍 𑒯𑒯𑒰 𑒏𑓄 𑒐𑒮𑒪 𑒂 𑒧𑒮𑒼𑒧𑒰𑒞𑒏 𑒖𑒹 𑒥𑒩𑒐 𑒦𑒩𑒱𑒏 𑒥𑒰𑒿𑒔𑒪 𑒧𑒰𑒮𑒏 𑒐𑒼𑒩𑒱𑒮 𑒕𑒪 𑒞𑒏𑒩𑒰 𑒩𑒰𑒃-𑒕𑒱𑒞𑓂𑒞𑒲 𑒏𑓄 𑒠𑒹𑒪𑒏। 𑒏𑒩𑒲𑒧𑒰 𑒥𑒹𑒑𑒧 𑒧𑒰𑒢𑒹 𑒯𑒧𑒩 𑒁𑒧𑓂𑒧𑒲 𑒮𑒴𑒣 𑒪𑓄 𑒏𑓄 𑒁𑒢𑓂𑒢𑒏𑒹𑒿 𑒮𑒧𑒙𑒋 𑒪𑒹𑒪 𑒥𑒜𑓃𑒪𑒲𑒯, 𑒯𑒧𑒩 𑒂𑒿𑒐𑒱𑒏 𑒠𑒹𑒐𑒪 𑒁𑒕𑒱।
-“𑒧𑒳𑒠𑒰 𑒥𑒰𑒜𑓃𑒱𑒏 𑒣𑒰𑒢𑒱𑒏 𑒮𑓀𑒑 𑒣𑒰𑒿𑒏𑒏 𑒋𑒏 𑒞𑒯 𑒂𑒥𑒱 𑒑𑒹𑒪 𑒕𑒪 𑒒𑒩𑒧𑒹। 𑒮𑒾𑒿𑒮𑒹 𑒙𑒼𑒪 𑒯𑒪𑓂𑒪𑒰 𑒦𑓄 𑒑𑒹𑒪 𑒖𑒹 𑒠𑒹𑒐𑒱𑒎 𑒏𑒹𑒯𑒢 𑒦𑒻𑓀𑒮𑒳𑒩 𑒠𑒱𑒁𑒩 𑒮𑒦 𑒕𑒻𑒏, 𑒁𑒣𑒢𑒰-𑒁𑒣𑒢𑒲𑒏𑒹𑒿 𑒁𑒣𑒢-𑒁𑒣𑒢 𑒁𑒿𑒑𑒢𑒰 𑒦𑒩𑒱 𑒪𑒋 𑒑𑒹𑒪 𑒁𑒕𑒱। 𑒧𑒮𑒼𑒧𑒰𑒞𑒏 𑒁𑒿𑒑𑒢𑒰 𑒞𑒿 𑒁𑒠𑒯𑒰𑒮𑒿 𑒥𑒹𑒬𑒲 𑒡𑒏𑒱𑒂 𑒪𑓄 𑒑𑒹𑒪 𑒕𑒪𑒻𑒯𑒹, 𑒖𑒹 𑒥𑒹𑒔𑒰𑒩𑒲𑒏 𑒥𑒔𑒪 𑒁𑒿𑒑𑒢𑒰 𑒁𑒕𑒱 𑒮𑒹 𑒐𑒡𑒰𑒃 𑒥𑒢𑒱 𑒑𑒹𑒪 𑒁𑒕𑒱। 𑒥𑒛𑓃𑒏𑒲 𑒠𑒱𑒨𑒰𑒠𑒱𑒢𑒲 𑒮𑒯𑒙𑒱 𑒏𑓄 𑒁𑒋𑒪𑒲𑒯 𑒏𑒰𑒩𑒝 𑒠𑒱𑒂𑒠 𑒙𑒼𑒪𑒏 𑒪𑒼𑒏 𑒮𑒦 𑒂𑒥𑒋 𑒪𑒰𑒑𑒪 𑒩𑒯𑒟𑒱। 𑒏𑒩𑒲𑒧𑒰 𑒥𑒹𑒑𑒧𑒏 𑒮𑒼𑓀𑒑𑒩𑒣𑒩 𑒚𑒰𑒜𑓃 𑒒𑒩𑒏 𑒠𑒳𑒩𑓂𑒠𑒬𑒰 𑒠𑒹𑒐𑒱 𑒮𑒦 𑒏𑒰𑒢𑒰-𑒤𑒴𑒮𑒲 𑒏𑒩𑒋 𑒪𑒰𑒑𑒪 𑒩𑒯𑒋। 𑒁𑒿𑒑𑒢𑒰𑒏 𑒋𑒏 𑒏𑒼𑒢𑒮𑒿 𑒠𑒼𑒮𑒩 𑒏𑒼𑒢, 𑒁𑒣𑒢 𑒒𑒩𑒮𑒿 𑒠𑒼𑒮𑒩𑒰𑒏 𑒒𑒩 !
-“𑒣𑒰𑒢𑒱 𑒣𑒻𑒮𑒥𑒰𑒏 𑒠𑒹𑒩𑒲 𑒩𑒯𑒻𑒏 𑒂 𑒂𑒮𑓂𑒞𑒹-𑒂𑒮𑓂𑒞𑒹 𑒯𑒧𑒩 𑒒𑒩𑒏 𑒋𑒏 𑒏𑒰𑒞𑒏 𑒦𑒲𑒞𑒏 𑒠𑒹𑒥𑒰𑒪 𑒜𑒯𑒱 𑒑𑒹𑒪। 𑒙𑒼𑒪𑒥𑒻𑒨𑒰 𑒮𑒦 𑒯𑒪𑓂𑒪𑒰 𑒏𑒩𑒋 𑒪𑒰𑒑𑒪 𑒖𑒹 𑒏𑒩𑒲𑒧𑒰 𑒥𑒹𑒑𑒧 𑒦𑒱𑒞𑒩𑒹 𑒞𑒿 𑒢𑒘𑒱 𑒩𑒯𑒱 𑒑𑒹𑒪𑒟𑒱। 𑒥𑒛𑓃𑒏𑒲 𑒠𑒱𑒂𑒠𑒱𑒢𑒲 𑒐𑒮𑒪 𑒒𑒩 𑒠𑒹𑒐𑒱 𑒯𑒠𑒮𑒱 𑒑𑒹𑒪𑒲𑒯। 𑒥𑒖𑒪𑒲𑒯 𑒖𑒹 𑒁𑒪𑓂𑒪𑒰 𑒩𑒏𑓂𑒭 𑒩𑒐𑒪𑒢𑓂𑒯𑒱 𑒖𑒹 𑒮𑒳𑒩𑒞𑒰 𑒦𑒹𑒪 𑒂 𑒢𑒥𑒲𑒏 𑒦𑒰𑒃-𑒥𑒯𑒱𑒢𑒏𑒹𑒿 𑒒𑒩 𑒪𑒋 𑒁𑒢𑒪𑒱𑒨𑒻𑒏 𑒢𑒯𑒱 𑒞𑒿 𑒠𑒱𑒨𑒰𑒠𑒲 𑒛𑒰𑒯 𑒢𑒯𑒱 𑒥𑒳𑒗𑒪 𑒁𑒕𑒱। 𑒮𑒦 𑒏𑒪𑓀𑒏 𑒪𑒑𑒥𑒱𑒞𑒋 𑒁𑒐𑒢𑒹।
-“𑒧𑒳𑒠𑒰 𑒠𑒱𑒨𑒰𑒠𑒱𑒢𑒲”!
-“𑒠𑒱𑒨𑒰𑒠 𑒮𑒦 𑒮𑒦 𑒑𑒣 𑒥𑒴𑒗𑒱 𑒁𑒣𑒢-𑒁𑒣𑒢 𑒒𑒩 𑒖𑒰𑒋 𑒑𑒹𑒪𑒰𑒯। 𑒯𑒧 𑒁𑒧𑓂𑒧𑒲 𑒪𑒑 𑒁𑒋𑒪𑒯𑒳𑒿। 𑒧𑒰𑒩𑓂𑒏𑓂𑒮𑒫𑒰𑒠𑒲 𑒫𑒱𑒔𑒰𑒩𑒏 𑒩𑒯𑒲, 𑒏𑒙𑒱𑒯𑒰𑒩𑒧𑒹 𑒣𑒜𑓃𑒻𑒞 𑒕𑒪𑒯𑒳𑒿। 𑒫𑒱𑒡𑒫𑒰-𑒫𑒱𑒫𑒰𑒯, 𑒖𑒰𑒞𑒱-𑒣𑓂𑒩𑒟𑒰 𑒮𑒦 𑒥𑒱𑒢𑓂𑒠𑒳𑒣𑒩 𑒣𑒜𑓃𑒳𑒂 𑒏𑒰𑒏𑒰𑒮𑒿 𑒦𑒱𑒢𑓂𑒢 𑒫𑒱𑒔𑒰𑒩 𑒩𑒐𑒻𑒞 𑒕𑒪𑒯𑒳𑒿। 𑒒𑒩𑒏 𑒢𑒰𑒧 𑒢𑒥𑒲 𑒕𑒪 𑒧𑒳𑒠𑒰 𑒮𑓂𑒏𑒴𑒪 𑒏𑒰𑒪𑒹𑒖𑒏 𑒢𑒰𑒧 𑒢𑒥𑒲 𑒥𑒏𑒮।𑒑𑒰𑒧𑒧𑒹 𑒦𑒼𑒖𑒧𑒹 𑒐𑒜𑓃𑒱𑒯𑒰𑒢𑒏 𑒣𑒰𑒿𑒞𑒱 𑒂 𑒥𑒰𑒢𑓂𑒯𑒣𑒩𑒏 𑒣𑒰𑒿𑒞𑒱 𑒠𑒹𑒐𑒱 𑒫𑒱𑒔𑒪𑒱𑒞 𑒯𑒼𑒃𑒞 𑒕𑒪𑒯𑒳𑒿। 𑒖𑒼𑒢-𑒥𑒼𑒢𑒱𑒯𑒰𑒩𑒏𑒹𑒿 𑒥𑒰𑒢𑓂𑒯𑒣𑒩 𑒥𑒻𑒮𑒰 𑒏𑓄 𑒐𑒳𑒂𑒥𑒻𑒞 𑒠𑒹𑒐𑒻𑒞 𑒕𑒪𑒯𑒳𑒿 𑒂 𑒥𑒰𑒥𑒴-𑒦𑒻𑒨𑒰𑒏𑒹𑒿 𑒐𑒜𑓃𑒱𑒯𑒰𑒢𑒧𑒹। 𑒐𑒜𑓃𑒱𑒯𑒰𑒢𑒧𑒹 𑒥𑒰𑒩𑒱𑒏 𑒪𑒼𑒏𑒢𑒱 𑒠𑓂𑒫𑒰𑒩𑒰 𑒐𑒰𑒖𑒰-𑒪𑒛𑓂𑒛𑒴 𑒏𑒻𑒏 𑒥𑒹𑒩 𑒂𑒢𑒪 𑒖𑒰𑒃𑒞 𑒕𑒪 । 𑒥𑒰𑒢𑓂𑒯𑒣𑒩𑒏 𑒣𑒰𑒿𑒞𑒲𑒧𑒹 𑒋𑒏 𑒥𑒹𑒩 𑒂 𑒢𑒯𑒱𑒨𑒼। 𑒧𑒳𑒠𑒰 𑒒𑒩𑒧𑒹 𑒏𑒼𑒢𑒼 𑒧𑒼𑒖𑒩 𑒢𑒯𑒱 𑒕𑒪, 𑒏𑒯𑒪 𑒖𑒰𑒃𑒞 𑒩𑒯𑒋 𑒖𑒹 𑒣𑒯𑒱𑒢𑒹 𑒣𑒜𑓃𑒱-𑒪𑒱𑒐𑒱 𑒏𑓄 𑒏𑒱𑒕𑒳 𑒏𑒩𑒴।
-“𑒁𑒧𑓂𑒧𑒲𑒮𑒿 𑒏𑒞𑒹𑒏 𑒑𑒧𑒕𑒰-𑒗𑒼𑒛𑓃𑒰 𑒦𑒹𑒙𑒻𑒞 𑒕𑒪, 𑒔𑒩𑒐𑒰𑒏 𑒮𑒴𑒞𑒏 𑒏𑒧𑒰𑒃𑒏। 𑒖𑒨 𑒑𑒰𑒿𑒡𑒲 𑒥𑒰𑒥𑒰, 𑒫𑒱𑒡𑒫𑒰 𑒪𑒼𑒏𑒢𑒱 𑒪𑒹𑒪 𑒄 𑒏𑒰𑒖 𑒡𑒩𑒱 𑒏𑓄 𑒑𑒹𑒪𑒰𑒯।
-“𑒧𑒳𑒠𑒰 𑒯𑒧𑒩 𑒁𑒧𑓂𑒧𑒲। 𑒏𑒲 𑒦𑒹𑒪𑒢𑓂𑒯𑒱 𑒯𑒳𑒢𑒏𑒰। 𑒦𑒰𑒋 𑒥𑒯𑒱𑒢 𑒮𑒦 𑒞𑒿 𑒍𑒧𑓂𑒯𑒩 𑒁𑒕𑒱!”
-“𑒁𑒧𑓂𑒧𑒲!!!!!!!!!!!!!!
-“𑒯𑒧𑒩 𑒔𑒱𑒞𑓂𑒏𑒰𑒩𑒮𑒿 𑒮𑒾𑒿𑒮𑒹 𑒙𑒼𑒪𑒧𑒹 𑒟𑒩𑒟𑒛𑓃𑒲 𑒣𑒻𑒮𑒱 𑒑𑒹𑒪 𑒩𑒯𑒋। 𑒢𑒥𑒲 𑒏𑒯𑒱𑒨𑒼 𑒏𑒢𑒻𑒞 𑒢𑒯𑒱 𑒁𑒕𑒱, 𑒏𑒰𑒢𑒪 𑒁𑒕𑒱 𑒞𑒿 𑒏𑒼𑒢𑒼 𑒑𑒣 𑒕𑒻𑒏।
-“𑒢𑒘𑒱 𑒁𑒧𑓂𑒧𑒲। 𑒄 𑒏𑒼𑒢𑒼 𑒑𑒣 𑒢𑒯𑒱 𑒦𑒹𑒪। 𑒏𑒱𑒋𑒏 𑒯𑒧𑒩𑒰𑒣𑒩 𑒁𑒯𑒰𑒿 𑒦𑒩𑒼𑒮 𑒕𑒼𑒛𑓃𑒱 𑒠𑒹𑒪𑒯𑒳𑒿। 𑒢𑒥𑒲 𑒥𑒏𑒮 𑒢𑒰𑒧 𑒕𑒲 𑒯𑒧𑒩। 𑒣𑒰𑒿𑒔𑒼 𑒦𑒰𑒋 𑒂 𑒕𑒼𑒙𑒏𑒲 𑒥𑒯𑒱𑒢𑒏 𑒦𑒰𑒋 𑒢𑒯𑒱 𑒥𑒰𑒣 𑒕𑒱𑒨𑒻𑒏 𑒯𑒧। 𑒧𑒳𑒠𑒰 𑒁𑒯𑒰𑒿 𑒯𑒧𑒩𑒰𑒣𑒩 𑒦𑒩𑒼𑒮 𑒕𑒼𑒛𑓃𑒱 𑒔𑒪𑒱 𑒑𑒹𑒪𑒯𑒳𑒿। 𑒨𑒰 𑒁𑒪𑓂𑒪𑒰!!!!!!!!!!!”
-“𑒙𑒼𑒪 𑒖𑒳𑒙𑒱 𑒑𑒹𑒪 𑒧𑒻𑒨𑒞𑒏 𑒔𑒰𑒩𑒴 𑒠𑒱𑒬। 𑒏𑒹 𑒏𑒲 𑒮𑒦 𑒏𑒋𑒪𑒏 𑒮𑒹 𑒢𑒯𑒱 𑒥𑒳𑒗𑒪𑒯𑒳𑒿। 𑒁𑒧𑓂𑒧𑒲𑒏𑒹𑒿 𑒑𑒳𑒮𑒳𑒪 (𑒢𑒯𑒰𑒍𑒪) 𑒏𑒩𑒰𑒍𑒪 𑒑𑒹𑒪। 𑒏𑒤𑒢 𑒣𑒯𑒱𑒩𑒰𑒍𑒪 𑒑𑒹𑒪। 𑒖𑒢𑒰𑒖𑒰𑒏 𑒐𑒰𑒙 𑒂𑒋𑒪। 𑒞𑒰𑒯𑒱𑒣𑒩𑒮𑒿 𑒧𑒰𑒋𑒏 𑒑𑒰𑒿𑒡𑒲 𑒔𑒩𑒐𑒰𑒮𑒿 𑒥𑒢𑒰𑒍𑒪 𑒔𑒰𑒠𑒩𑒱 𑒍𑒜𑓃𑒰𑒍𑒪 𑒑𑒹𑒪। 𑒞𑒲𑒢𑒴 𑒏𑒰𑒏𑒰 𑒂 𑒯𑒧 𑒖𑒢𑒰𑒖𑒰𑒏 𑒐𑒰𑒙𑒏𑒹𑒿 𑒏𑒰𑒢𑓂𑒯 𑒠𑒹𑒪𑒯𑒳𑒿। 𑒏𑒥𑓂𑒩𑒱𑒮𑓂𑒞𑒰𑒢 𑒪𑒑 𑒚𑒰𑒜𑓃 𑒦𑒋 𑒖𑒢𑒰𑒖𑒰𑒏 𑒢𑒧𑒰𑒖 𑒣𑒜𑓃𑒪𑒯𑒳𑒿 𑒂 𑒁𑒧𑓂𑒧𑒲𑒏𑒹𑒿 𑒠𑒤𑒢 𑒏𑒋𑒪𑒯𑒳𑒿।
𑒢𑒥𑒲 𑒥𑒏𑒮 𑒤𑒹𑒩 𑒔𑒳𑒣 𑒦𑒋 𑒑𑒹𑒪। 𑒯𑒧 𑒍𑒏𑒩𑒰 𑒙𑒼𑒏𑒋 𑒢𑒯𑒱 𑒔𑒰𑒯𑒻𑒞 𑒕𑒪𑒯𑒳𑒿। 𑒠𑒮 𑒧𑒱𑒢𑒙 𑒡𑒩𑒱 𑒍 𑒔𑒳𑒣𑓂𑒣𑒹 𑒩𑒯𑒪 𑒂 𑒯𑒧 𑒥𑒻𑒮𑒪 𑒩𑒯𑒪𑒯𑒳𑒿। 𑒤𑒹𑒩 𑒍 𑒥𑒰𑒖𑒪।
-“𑒁𑒧𑓂𑒧𑒲𑒏 𑒧𑒵𑒞𑓂𑒨𑒳𑒏 𑒔𑒰𑒪𑒲𑒮 𑒠𑒱𑒢 𑒡𑒩𑒱 𑒬𑒼𑒏 𑒧𑒢𑒍𑒪𑒯𑒳𑒿। 𑒂 𑒫𑒻𑒯 𑒔𑒰𑒪𑒲𑒮 𑒠𑒱𑒢𑒏 𑒂𑒩𑒰𑒧 𑒯𑒧𑒩𑒰 𑒋𑒯𑒱 𑒖𑒼𑒑 𑒥𑒢𑒹𑒪𑒏 𑒖𑒹 𑒤𑒹𑒩 𑒣𑒋𑒩𑒧𑒹 𑒒𑒱𑒩𑒝𑒲 𑒪𑒰𑒑𑒱 𑒑𑒹𑒪। 𑒁𑒧𑓂𑒧𑒲𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒣𑒜𑓃𑒰𑒃𑒏𑒹𑒿 𑒢𑒧𑒮𑓂𑒏𑒰𑒩 𑒏𑒋 𑒐𑒰𑒪𑒰 𑒪𑒑 𑒂𑒥𑒱 𑒑𑒹𑒪𑒯𑒳𑒿, 𑒠𑒱𑒪𑓂𑒪𑒲 𑒢𑒑𑒩𑒱𑒨𑒰𑒧𑒹 ।
𑒢𑒥𑒲 𑒥𑒏𑒮 𑒁𑒣𑒢 𑒂𑒿𑒐𑒱 𑒣𑒼𑒕𑒱 𑒩𑒯𑒪 𑒕𑒪। 𑒤𑒹𑒩 𑒠𑒮 𑒧𑒱𑒢𑒙 𑒍 𑒔𑒳𑒣 𑒩𑒯𑒪।
“𑒢𑒥𑒲 𑒥𑒏𑒮𑒏𑒹𑒿 𑒁𑒧𑓂𑒧𑒲𑒏 𑒃𑒢𑓂𑒞𑒏𑒰𑒪𑒏 𑒠𑒱𑒢 𑒪𑒼𑒏 𑒣𑒯𑒱𑒪 𑒂 𑒁𑒢𑓂𑒞𑒱𑒧 𑒥𑒹𑒩 𑒏𑒢𑒻𑒞 𑒠𑒹𑒐𑒢𑒹 𑒩𑒯𑒋। 𑒧𑒳𑒠𑒰 𑒄 𑒮𑒦 𑒂𑒃 𑒤𑒹𑒩 𑒯𑒧𑒩𑒰 𑒂𑒿𑒐𑒱𑒮𑒿 𑒢𑒼𑒩 𑒔𑒳𑒂 𑒠𑒹𑒪𑒏। 𑒍𑒏𑒲𑒪𑒏 𑒞𑒿 𑒥𑒱𑒨𑒰𑒯𑒼 𑒢𑒯𑒱 𑒯𑒼𑒃𑒞 𑒩𑒯𑒋। 𑒮𑒦 𑒏𑒯𑒻𑒞 𑒕𑒪 𑒖𑒹 𑒥𑒳𑒩𑒥𑒏 𑒕𑒻𑒏। 𑒧𑒳𑒠𑒰 𑒖𑒹𑒢𑒰 𑒦𑒲𑒭𑓂𑒧 𑒣𑒱𑒞𑒰𑒧𑒯 𑒡𑒵𑒞𑒩𑒰𑒭𑓂𑒙𑓂𑒩𑒏 𑒥𑒱𑒨𑒰𑒯 𑒏𑒩𑒹𑒪𑒢𑓂𑒯𑒱 𑒞𑒯𑒱𑒢𑒰 𑒯𑒧 𑒋𑒏𑒩 𑒥𑒱𑒨𑒰𑒯 𑒏𑒩𑒥𑒍𑒪𑒯𑒳𑒿 𑒂 𑒄 𑒮𑒦 𑒏𑒯𑒻𑒞 𑒁𑒕𑒱 𑒖𑒹 𑒯𑒧 𑒍𑒏𑒩𑒰 𑒢𑒼𑒏𑒩 𑒖𑒹𑒏𑒰𑒿 𑒩𑒐𑒻𑒞 𑒕𑒱𑒨𑒻𑒏”।
𑒞𑒰𑒫𑒞 𑒏𑒰𑒪𑒥𑒹𑒪𑒏 𑒒𑓀𑒙𑒲 𑒥𑒰𑒖𑒪 𑒩𑒯𑒋। 𑒍𑒏𑒲𑒪 𑒢𑒥𑒲 𑒥𑒏𑒮𑒏 𑒮𑒼𑒗𑒰𑒿𑒧𑒹 𑒂𑒥𑒱 𑒚𑒰𑒜𑓃 𑒦𑓄 𑒑𑒹𑒪।
“𑒦𑒻𑒨𑒰, 𑒮𑒦 𑒏𑒯𑒻𑒞 𑒁𑒕𑒱 𑒖𑒹 𑒯𑒧 𑒥𑒳𑒩𑒥𑒏 𑒕𑒲। 𑒏𑒰𑒪𑓂𑒯𑒱 𑒁𑒯𑒪𑒱𑒨𑒰 (𑒏𑒢𑒱𑒨𑒼𑒿) 𑒏𑒹𑒿 𑒄 𑒮𑒦 𑒨𑒻𑒯 𑒑𑒣 𑒏𑒯𑒱 𑒠𑒹𑒪𑒏𑒻𑒏। 𑒍 𑒏𑒯𑒪𑒏 𑒖𑒹 𑒞𑒼𑒯𑒩 𑒔𑒱𑒢𑓂𑒞𑒰 𑒏𑒏𑒩𑒼 𑒢𑒯𑒱 𑒩𑒯𑒋 𑒕𑒻𑒏, 𑒧𑒳𑒠𑒰 𑒯𑒧 𑒢𑒯𑒱 𑒧𑒰𑒢𑒪𑒯𑒳𑒿। 𑒮𑒹 𑒏𑒰𑒪𑓂𑒯𑒱 𑒯𑒧 𑒏𑒢𑒹𑒏 𑒪𑒹𑒙 𑒦𑒋 𑒑𑒹𑒪𑒯𑒳𑒿। 𑒮𑒩𑒏𑒹𑒿 𑒏𑒯𑒥𑒼 𑒏𑒹𑒪𑒱𑒨𑒢𑓂𑒯𑒱 𑒖𑒹 𑒠𑒹𑒐𑒻𑒞 𑒕𑒲 𑒖𑒹 𑒍 𑒮𑒦 𑒂𑒥𑒻𑒋 𑒂𑒏𑒱 𑒢𑒯𑒱। 𑒏𑒢𑒱𑒨𑒼 𑒞𑒿 𑒮𑒳𑒡𑓀𑒑𑒹 𑒢𑒹 𑒁𑒕𑒱। 𑒂𑒃 𑒍𑒯𑒼 𑒠𑒱𑒨𑒰𑒠𑒱𑒢𑒲𑒏 𑒑𑒩𑒰 𑒣𑒏𑒛𑓃𑒱 𑒏𑓄 𑒐𑒴𑒥 𑒏𑒰𑒢𑒪 𑒁𑒕𑒱। 𑒥𑒳𑒡𑒱𑒨𑒰𑒩 𑒮𑒦 𑒢𑒹 𑒁𑒯𑒰𑒿𑒏𑒹𑒿 𑒕𑒼𑒛𑓃𑒱 𑒔𑒪𑒱 𑒑𑒹𑒪, 𑒧𑒳𑒠𑒰 𑒄 𑒥𑒳𑒩𑒥𑒏𑒯𑒰 𑒁𑒯𑒰𑒿𑒏𑒹𑒿 𑒕𑒼𑒛𑓃𑒱 𑒏𑒯𑒱𑒨𑒼 𑒢𑒯𑒱 𑒖𑒋𑒞, 𑒦𑒰𑒋”।
𑒯𑒧 𑒢𑒯𑒱 𑒖𑒰𑒨𑒥 𑒫𑒱𑒠𑒹𑒬
“𑒨𑒾 𑒦𑒻𑒨𑓂𑒨𑒰। 𑒏𑒢𑒹𑒏 𑒏𑒰𑒏𑒰𑒮𑒿 𑒦𑒹𑒿𑒙 𑒢𑒯𑒱 𑒏𑒩𑒰 𑒠𑒹𑒥”।
“𑒏𑒰𑒏𑒰 𑒕𑒟𑒱 𑒁𑒯𑒰𑒿𑒏। 𑒂 𑒦𑒹𑒿𑒙 𑒏𑒩𑒰 𑒠𑒱𑒁 𑒯𑒧?”
“𑒨𑒾। 𑒍 𑒞𑒿 𑒯𑒧𑒩𑒰 𑒮𑒦𑒏𑒹𑒿 𑒔𑒱𑒢𑓂𑒯𑒱𑒞𑒼 𑒢𑒯𑒱 𑒕𑒟𑒱। 𑒥𑒔𑓂𑒔𑒹𑒧𑒹 𑒑𑒰𑒧𑒮𑒿 𑒥𑒯𑒩𑒰 𑒑𑒹𑒪𑒟𑒱, 𑒮𑒹 𑒒𑒳𑒩𑒱 𑒏𑒋 𑒏𑒯𑒰𑒿 𑒁𑒋𑒪𑒰𑒯”।
“𑒥𑒹𑒬। 𑒞𑒐𑒢 𑒔𑒪𑒴 𑒦𑒹𑒿𑒙 𑒏𑒩𑒥𑒰 𑒠𑒻𑒞 𑒕𑒲। 𑒧𑒳𑒠𑒰 𑒏𑒼𑒢𑒼 𑒣𑒻𑒩𑒫𑒲 𑒂𑒏𑒱 𑒏𑒰𑒖 𑒯𑒼𑒁𑒋 𑒞𑒿 𑒣𑒯𑒱𑒢𑒹 𑒏𑒯𑒱 𑒠𑒻𑒞 𑒕𑒲, 𑒮𑒹 𑒍 𑒢𑒯𑒱 𑒏𑒩𑒞𑒰𑒯”।
“𑒢𑒯𑒱। 𑒏𑒼𑒢𑒼 𑒏𑒰𑒖 𑒢𑒯𑒱 𑒁𑒕𑒱। 𑒧𑒰𑒞𑓂𑒩 𑒦𑒹𑒿𑒙 𑒏𑒩𑒥𑒰𑒏 𑒃𑒔𑓂𑒕𑒰 𑒁𑒕𑒱। 𑒦𑒰𑒩𑒞 𑒫𑒩𑓂𑒭𑒧𑒹 𑒋𑒞𑒹𑒏 𑒢𑒰𑒧 𑒕𑒢𑓂𑒯𑒱, 𑒮𑒦 𑒔𑒱𑒢𑓂𑒯𑒻𑒞 𑒕𑒢𑓂𑒯𑒱 𑒧𑒳𑒠𑒰 𑒢𑒯𑒱𑒨𑒹 𑒯𑒧𑒩𑒰 𑒮𑒦 𑒔𑒱𑒢𑓂𑒯𑒻𑒞 𑒕𑒱𑒨𑒢𑓂𑒯𑒱 𑒂 𑒢𑒯𑒱 𑒫𑒻𑒯 𑒔𑒱𑒢𑓂𑒯𑒻𑒞 𑒕𑒟𑒱”।
𑒪𑒰𑒪 𑒑𑒹𑒪 𑒕𑒪𑒰𑒯 𑒠𑒮 𑒠𑒱𑒢 𑒣𑒯𑒱𑒢𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒖𑒲𑒏 𑒒𑒩 𑒣𑒩। 𑒖𑒰𑒃𑒞𑒹 𑒠𑒹𑒩𑒲 𑒪𑒰𑒪𑒏 𑒏𑒙𑒰𑒏𑓂𑒭 𑒬𑒳𑒩𑒴 𑒦𑓄 𑒖𑒰𑒃𑒞 𑒕𑒢𑓂𑒯𑒱।
-𑒑𑒰𑒧𑒏𑒹𑒿 𑒥𑒱𑒮𑒩𑒱 𑒑𑒹𑒪𑒱𑒨𑒻𑒏। 𑒒𑒳𑒩𑒱 𑒏𑓄 𑒠𑒹𑒐𑒥𑒼 𑒢𑒯𑒱 𑒏𑒋𑒪𑒯𑒳𑒿। 𑒐𑒼𑒣𑒛𑓃𑒲𑒏𑒹𑒿 𑒒𑒩 𑒞𑓄 𑒥𑒢𑒰 𑒪𑒻𑒞𑒯𑒳𑒿।
𑒂 𑒖𑒥𑒰𑒥𑒼 𑒦𑒹𑒙𑒢𑓂𑒯𑒱 𑒍𑒯𑒱𑒢𑒰 𑒥𑒢𑒪 𑒥𑒢𑒰𑒍𑒪।
-𑒏𑒲 𑒯𑒋𑒞 ? 𑒖𑒰 𑒏𑒋 𑒏𑒲 𑒏𑒩𑒥। 𑒋𑒏 𑒏𑒙𑓂𑒚𑒰𑒏 𑒒𑒩𑒰𑒩𑒲 𑒂 𑒞𑒰𑒯𑒱 𑒣𑒩 𑒥𑒰𑒥𑒴𑒏 𑒏𑒞𑒹𑒏 𑒦𑒰𑒿𑒋। 𑒂 𑒤𑒹𑒩 𑒫𑒰𑒧𑒣𑓀𑒟𑒲 𑒫𑒱𑒔𑒰𑒩𑒡𑒰𑒩𑒰𑒏 𑒔𑒱𑒢𑓂𑒞𑒢 𑒬𑒳𑒩𑒴 𑒦𑓄 𑒖𑒰𑒃𑒞 𑒕𑒪𑒢𑓂𑒯𑒱।
-𑒑𑒰𑒧 𑒁𑒕𑒱 𑒡𑒢𑒱𑒏𑒏 𑒪𑒹𑒪। 𑒨𑒰𑒫𑒞 𑒑𑒰𑒧𑒏 𑒖𑒢𑒮𑓀𑒐𑓂𑒨𑒰 𑒏𑒧 𑒢𑒯𑒱 𑒯𑒼𑒋𑒞 𑒞𑒰𑒫𑒞 𑒡𑒩𑒱 𑒞𑒿 𑒁𑒫𑒬𑓂𑒨𑒹। 𑒑𑒩𑒲𑒥𑒲𑒧𑒹 𑒪𑒼𑒏𑒏𑒹𑒿 𑒪𑒼𑒏 𑒢𑒯𑒱 𑒥𑒳𑒗𑒻𑒞 𑒁𑒕𑒱 𑒏𑓂𑒨𑒼। 𑒧𑒳𑒠𑒰 𑒢𑒑𑒩 𑒧𑒰𑒞𑓂𑒩 𑒠𑒱𑒪𑓂𑒪𑒲, 𑒏𑒪𑒏𑒞𑓂𑒞𑒰 𑒢𑒯𑒱 𑒁𑒕𑒱। 𑒨𑒰𑒫𑒞 𑒧𑒡𑒹𑒣𑒳𑒩, 𑒧𑒡𑒹𑒣𑒳𑒩𑒰, 𑒧𑒯𑒼𑒞𑓂𑒞𑒩𑒲, 𑒖𑒢𑒏𑒣𑒳𑒩, 𑒥𑒢𑒻𑒪𑒲 𑒂 𑒗𑓀𑒗𑒰𑒩𑒣𑒳𑒩𑒏 𑒫𑒱𑒏𑒰𑒮 𑒢𑒯𑒱 𑒯𑒼𑒋𑒞, 𑒬𑒼𑒭𑒱𑒞 𑒫𑒩𑓂𑒑 𑒩𑒯𑒥𑒹 𑒏𑒩𑒞।
𑒞𑒰𑒫𑒞 𑒠𑓂𑒫𑒱𑒖𑒹𑒢𑓂𑒠𑓂𑒩 𑒖𑒲𑒏 𑒏𑒢𑒱𑒨𑒰𑒿 𑒔𑒰𑒯 𑒩𑒰𑒐𑒱 𑒑𑒹𑒪𑒐𑒱𑒢𑓂𑒯।
𑒠𑓂𑒫𑒱𑒖𑒹𑒢𑓂𑒠𑓂𑒩𑒖𑒲 𑒑𑒰𑒧𑒹𑒧𑒹 𑒣𑓂𑒩𑒰𑒟𑒧𑒱𑒏 𑒬𑒱𑒏𑓂𑒭𑒰 𑒣𑓂𑒩𑒰𑒣𑓂𑒞 𑒏𑒋𑒪𑒢𑓂𑒯𑒱। 𑒗𑓀𑒗𑒰𑒩𑒣𑒳𑒩𑒧𑒹 𑒧𑒱𑒛𑓂𑒪 𑒮𑓂𑒏𑒴𑒪 𑒂 𑒯𑒰𑒃 𑒮𑓂𑒏𑒴𑒪 𑒣𑒋𑒩𑒹 𑒖𑒰𑒟𑒱। 𑒣𑒱𑒞𑒰𑒖𑒲 𑒩𑒰𑒿𑒔𑒲𑒧𑒹 𑒚𑒱𑒏𑒹𑒠𑒰𑒩𑒲 𑒏𑒩𑒻𑒞 𑒕𑒪𑒐𑒱𑒢𑓂𑒯। 𑒧𑒰𑒋 𑒣𑒜𑓃𑒪-𑒪𑒱𑒐𑒪 𑒕𑒪𑒐𑒱𑒢𑓂𑒯।
𑒪𑒼𑒏 𑒏𑒯𑒻𑒞 𑒕𑒪 𑒖𑒹 𑒅𑒣𑒢𑓂𑒨𑒰𑒮 𑒮𑒹𑒯𑒼 𑒣𑒜𑓃𑒻𑒞 𑒕𑒪𑒲𑒯।
𑒠𑒩𑒦𑓀𑒑𑒰𑒮𑒿 𑒮𑒼𑒗𑒹 𑒣𑓂𑒩𑒨𑒰𑒑 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩। 𑒣𑒱𑒞𑒰 𑒕𑒪𑒰𑒯 𑒢𑒥𑒏𑒰 𑒥𑒮𑒰𑒞𑒏 𑒪𑒼𑒏। 𑒐𑒴𑒥 𑒏𑒧𑒰𑒟𑒱 𑒂 𑒐𑒴𑒥 𑒐𑒩𑓂𑒔 𑒏𑒩𑒟𑒱। 𑒑𑒰𑒧𑒮𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒢𑒯𑒱। 𑒏𑒢𑒱𑒨𑒰𑒿𑒏 𑒐𑒼𑒖𑒼-𑒐𑒥𑒩𑒱 𑒢𑒯𑒱 𑒪𑒻𑒞 𑒕𑒪𑒰𑒯। 𑒪𑒼𑒏 𑒏𑒯𑒻𑒞 𑒕𑒪 𑒖𑒹 𑒠𑒼𑒮𑒩 𑒥𑒱𑒂𑒯 𑒏𑓄 𑒪𑒹𑒢𑒹 𑒕𑒪𑒰𑒯 𑒩𑒰𑒿𑒔𑒲𑒧𑒹। 𑒪𑒼𑒏 𑒄𑒯𑒼 𑒏𑒯𑒻𑒞 𑒁𑒕𑒱 𑒖𑒹 𑒨𑒰𑒫𑒞 𑒍 𑒑𑒰𑒧𑒧𑒹 𑒕𑒪𑒰𑒯 𑒞𑒯𑒱𑒨𑒼 𑒫𑒻𑒯 𑒯𑒰𑒪 𑒕𑒪𑒢𑓂𑒯𑒱। 𑒥𑒹𑒩𑒴 𑒣𑒯𑒩 𑒞𑒲𑒢 𑒥𑒖𑒹𑒮𑒿 𑒏𑒢𑒱𑒨𑒰𑒿 𑒯𑒳𑒢𑒏𑒰 𑒪𑒹𑒪 𑒦𑒰𑒓 𑒣𑒲𑒮𑒥 𑒣𑓂𑒩𑒰𑒩𑒧𑓂𑒦 𑒏𑓄 𑒠𑒻𑒞 𑒕𑒪𑒐𑒱𑒢𑓂𑒯। 𑒧𑒳𑒠𑒰 𑒥𑒛𑓃𑒏𑒰 𑒥𑒹𑒙𑒰𑒏𑒹𑒿 𑒐𑒴𑒥 𑒧𑒰𑒢𑒻𑒞 𑒕𑒪𑒰𑒯। 𑒏𑒰𑒩𑒝 𑒕𑒼𑒙𑒏𑒰 𑒥𑒹𑒙𑒰 𑒥𑒰𑒣𑒹𑒣𑒩 𑒑𑒹𑒪 𑒕𑒪, 𑒖𑒏𑒩 𑒢𑒰𑒧 𑒩𑒯𑒋 𑒯𑒩𑒹𑒢𑓂𑒠𑓂𑒩।
𑒂 𑒪𑒼𑒏 𑒏𑒯𑒻𑒞 𑒁𑒕𑒱 𑒖𑒹 𑒯𑒩𑒹𑒢𑓂𑒠𑓂𑒩 𑒣𑒙𑒢𑒰𑒏 𑒏𑒼𑒢𑒼 𑒑𑒻𑒩𑒰𑒖𑒧𑒹 𑒏𑒰𑒖 𑒏𑒩𑒻𑒞 𑒩𑒯𑒟𑒱। 𑒠𑓂𑒫𑒱𑒖𑒹𑒢𑓂𑒠𑓂𑒩 𑒑𑒳𑒩𑒳-𑒑𑒧𑓂𑒦𑒲𑒩, 𑒣𑒜𑓃𑒥𑒰𑒧𑒹 𑒞𑒹𑒖, 𑒮𑒦 𑒫𑒱𑒭𑒨𑒧𑒹 𑒣𑒱𑒞𑒰𑒮𑒿 𑒫𑒱𑒣𑒩𑒲𑒞 𑒂 𑒞𑒹𑒿 𑒣𑒱𑒞𑒰 𑒧𑒰𑒢𑒥𑒼 𑒏𑒩𑒻𑒞 𑒕𑒪𑒐𑒱𑒢𑓂𑒯। 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒣𑒱𑒞𑒰 𑒯𑒳𑒢𑒏𑒩 𑒐𑒩𑓂𑒔 𑒣𑒚𑒹𑒥𑒰𑒧𑒹 𑒏𑒼𑒢𑒼 𑒫𑒱𑒪𑒧𑓂𑒥 𑒢𑒯𑒱 𑒏𑒩𑒻𑒞 𑒕𑒪𑒰𑒯। 𑒋𑒯𑒱 𑒣𑒚𑒰𑒍𑒪 𑒣𑒰𑒃𑒮𑒿 𑒠𑓂𑒫𑒱𑒖𑒹𑒢𑓂𑒠𑓂𑒩 𑒕𑒼𑒙 𑒦𑒰𑒃𑒏𑒹𑒿 𑒮𑒹𑒯𑒼 𑒢𑒳𑒏𑒰𑒏𑒹𑒿 𑒣𑒰𑒃 𑒣𑒚𑒰 𑒠𑒻𑒞 𑒕𑒪𑒰𑒯। 𑒂 𑒪𑒼𑒏 𑒏𑒯𑒻𑒞 𑒁𑒕𑒱 𑒖𑒹 𑒧𑒰𑒋𑒏 𑒮𑒳𑒡𑒱 𑒧𑒳𑒠𑒰 𑒯𑒳𑒢𑒏𑒼 𑒢𑒯𑒱 𑒩𑒯𑒻𑒞 𑒕𑒪𑒢𑓂𑒯𑒱 𑒂𑒏𑒱 𑒦𑓄 𑒮𑒏𑒻𑒞 𑒁𑒕𑒱 𑒖𑒹 𑒍𑒞𑒹𑒏 𑒣𑒰𑒃 𑒂 𑒮𑒧𑒨 𑒢𑒯𑒱 𑒩𑒯𑒻𑒞 𑒯𑒼𑒋𑒞𑒢𑓂𑒯𑒱।
𑒧𑒰𑒋 𑒥𑒹𑒔𑒰𑒩𑒲𑒏𑒹𑒿 𑒏𑓂𑒨𑒼 𑒏𑒯𑒱 𑒠𑒻𑒢𑓂𑒯𑒱 𑒖𑒹 𑒥𑒹𑒙𑒰𑒏𑒹𑒿 𑒤𑒹𑒩 𑒤𑒩𑓂𑒮𑓂𑒙 𑒛𑒱𑒫𑒲𑒖𑒢 𑒦𑒹𑒪 𑒁𑒕𑒱 𑒂𑒏𑒱 𑒣𑒞𑒱𑒏𑒹𑒿 𑒯𑒰𑒃𑒫𑒹 𑒏𑒹𑒩 𑒚𑒹𑒏𑒰 𑒦𑒹𑒙𑒱 𑒑𑒹𑒪 𑒕𑒢𑓂𑒯𑒱, 𑒞𑒿 𑒍 𑒞𑒱𑒩𑒣𑒱𑒞 𑒦𑓄 𑒖𑒰𑒃𑒞 𑒕𑒪𑒲𑒯। 𑒑𑒰𑒧𑒧𑒹 𑒥𑒙𑒰𑒃𑒠𑒰𑒩 𑒮𑒦 𑒖𑒹 𑒏𑒱𑒕𑒳 𑒠𑓄 𑒠𑒻𑒢𑓂𑒯𑒱 𑒞𑒰𑒯𑒱𑒮𑒿 𑒏𑒼𑒢𑒼 𑒞𑒩𑒯𑒹𑒿 𑒑𑒳𑒖𑒩 𑒔𑒪𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒢𑒲𑒪 𑒩𑓀𑒑𑒏 𑒢𑒴𑒂, 𑒩𑒳𑒥𑒱𑒨𑒰 𑒫𑒰𑒃𑒪 𑒏𑒯𑒻𑒞 𑒕𑒪 𑒏𑒼𑒙𑒰𑒏 𑒠𑒼𑒏𑒰𑒢 𑒥𑒪𑒰 𑒮𑒦 𑒍𑒯𑒱 𑒢𑒴𑒂𑒏𑒹𑒿, 𑒮𑒹𑒯𑒼 𑒮𑒮𑓂𑒞𑒧𑒹 𑒦𑒹𑒙𑒱 𑒖𑒰𑒃𑒞 𑒕𑒪𑒢𑓂𑒯𑒱, 𑒍𑒯𑒱 𑒏𑒼𑒙𑒰 𑒥𑒪𑒰 𑒠𑒼𑒏𑒰𑒢𑒮𑒿। 𑒩𑒢𑒹-𑒥𑒢𑒹 𑒑𑒰𑒕𑒲𑒧𑒹 𑒒𑒳𑒧𑒋 𑒣𑒛𑓃𑒻𑒞 𑒕𑒪𑒢𑓂𑒯𑒱 𑒖𑒰𑒩𑒢𑒱𑒏 𑒪𑒹𑒪। 𑒑𑒰𑒧𑒧𑒹 𑒮𑒦𑒏 𑒑𑒳𑒖𑒩 𑒏𑒼𑒯𑒳𑒢𑒰𑒏𑒹𑒿 𑒦𑓄 𑒖𑒰𑒃𑒞 𑒕𑒻𑒏 ।
𑒂 𑒋𑒧𑓂𑒯𑒩 𑒚𑒹𑒏𑒹𑒠𑒰𑒩 𑒮𑒰𑒯𑒹𑒥 𑒣𑒻𑒒 𑒥𑒹𑒙𑒰𑒏𑒹𑒿 𑒮𑒧𑒨 𑒣𑒩 𑒣𑒰𑒃 𑒣𑒚𑒹𑒥𑒰𑒏 𑒁𑒞𑒱𑒩𑒱𑒏𑓂𑒞𑓂𑒞 𑒁𑒣𑒢 𑒮𑒦 𑒏𑒩𑓂𑒞𑓂𑒞𑒫𑓂𑒨 𑒥𑒱𑒮𑒩𑒱 𑒑𑒹𑒪 𑒕𑒪𑒰𑒯। 𑒏𑒧𑒰𑒅 𑒂 𑒐𑒰𑒅 𑒕𑒪 𑒧𑒰𑒞𑓂𑒩 𑒯𑒳𑒢𑒏𑒩 𑒧𑓀𑒞𑓂𑒩। 𑒑𑒰𑒧-𑒒𑒩𑒮𑒿 𑒏𑒼𑒢𑒼 𑒧𑒞𑒪𑒥𑒹 𑒢𑒯𑒱।
𑒠𑓂𑒫𑒱𑒖𑒹𑒢𑓂𑒠𑓂𑒩 𑒃𑒪𑒰𑒯𑒰𑒥𑒰𑒠 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒮𑒦𑒏 𑒂𑒠𑒩𑓂𑒬 𑒥𑒢𑒱 𑒑𑒹𑒪 𑒕𑒪𑒰𑒯। 𑒃𑒞𑒱𑒯𑒰𑒮 𑒫𑒱𑒭𑒨𑒏 𑒞𑒱𑒟𑒱 𑒮𑒦 𑒯𑒳𑒢𑒏𑒩 𑒮𑓀𑒑𑒲 𑒥𑒢𑒱 𑒑𑒹𑒪 𑒕𑒪। 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒣𑓂𑒩𑒟𑒧 𑒞𑒿 𑒁𑒥𑒱𑒞𑒹 𑒩𑒯𑒟𑒱, 𑒮𑓀𑒑𑒯𑒱 𑒯𑒳𑒢𑒏𑒩 𑒔𑒰𑒪𑒱-𑒔𑒪𑒢, 𑒑𑒳𑒩𑒳-𑒑𑒧𑓂𑒦𑒲𑒩 𑒮𑓂𑒫𑒦𑒰𑒫, 𑒣𑒩𑒱𑒣𑒏𑓂𑒫 𑒧𑒰𑒢𑒮𑒱𑒏𑒞𑒰 𑒋𑒯𑒱 𑒮𑒦𑒮𑒿 𑒮𑒦 𑒏𑓂𑒨𑒼 𑒣𑓂𑒩𑒦𑒰𑒫𑒱𑒞 𑒩𑒯𑒻𑒞 𑒕𑒪। 𑒮𑓀𑒑𑒲-𑒮𑒰𑒟𑒲 𑒮𑒹𑒯𑒼 𑒏𑒧𑓂𑒧𑒹 𑒕𑒪𑒢𑓂𑒯𑒱। 𑒋𑒏𑒙𑒰 𑒮𑓀𑒑𑒲 𑒕𑒪𑒢𑓂𑒯𑒱 𑒅𑒣𑒹𑒢𑓂𑒠𑓂𑒩 𑒂 𑒋𑒏𑒙𑒰 𑒂𑒪𑒼𑒏। 𑒧𑒯𑒱𑒪𑒰 𑒮𑓀𑒑𑒲 𑒏𑒼𑒢𑒼𑒙𑒰 𑒢𑒯𑒱।
𑒂 𑒮𑒹 𑒍 𑒮𑒦 𑒏𑒯𑒱𑒞𑒼 𑒕𑒪𑒲𑒯 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒞𑒿 𑒒𑒳𑒩𑒱 𑒞𑒏𑒱𑒞𑒼 𑒢𑒯𑒱 𑒕𑒟𑒱। 𑒍𑒯𑒱𑒧𑒹 𑒋𑒏𑒙𑒰 𑒕𑒪𑒲𑒯 𑒁𑒩𑒳𑒢𑓂𑒡𑒞𑒲।𑒣𑒜𑓃𑒥𑒰𑒧𑒹 𑒞𑒹𑒖, 𑒩𑒰𑒖𑒢𑒲𑒞𑒱 𑒫𑒱𑒖𑓂𑒘𑒰𑒢𑒏 𑒫𑒱𑒠𑓂𑒨𑒰𑒩𑓂𑒟𑒲। 𑒣𑓂𑒩𑒞𑒱𑒨𑒼𑒑𑒲 𑒮𑓂𑒫𑒦𑒰𑒫𑒏 𑒕𑒪𑒲𑒯। 𑒥𑒰𑒣𑒏 𑒠𑒳𑒪𑒰𑒩𑒴 𑒂 𑒣𑒱𑒞𑒰𑒏𑒹𑒿 𑒯𑒳𑒢𑒏𑒰 𑒣𑒩 𑒮𑒹𑒯𑒼 𑒁𑒮𑒲𑒧 𑒫𑒱𑒬𑓂𑒫𑒰𑒮 𑒕𑒪𑒢𑓂𑒯𑒱।𑒋𑒛𑒫𑒰𑒢𑓂𑒮 𑒏𑒯𑒱 𑒮𑒏𑒻𑒞 𑒕𑒲। 𑒠𑓂𑒫𑒱𑒖𑒹𑒢𑓂𑒠𑓂𑒩𑒮𑒿 𑒥𑒯𑒳𑒞 𑒥𑒱𑒢𑓂𑒠𑒳 𑒣𑒩 𑒮𑒳𑒗𑒰𑒫𑒏 𑒂𑒏𑒰𑓀𑒏𑓂𑒭𑒲 𑒕𑒪𑒲𑒯। 𑒧𑒳𑒠𑒰 𑒠𑓂𑒫𑒱𑒖𑒹𑒢𑓂𑒠𑓂𑒩 𑒞𑒿 𑒠𑒼𑒮𑒩𑒹 𑒪𑒼𑒏 𑒕𑒪𑒰𑒯। 𑒯𑒳𑒢𑒏𑒩 𑒒𑒩𑒏 𑒏𑒼𑒢𑒼 𑒑𑒣 𑒞𑒿 𑒏𑒏𑒩𑒼 𑒥𑒳𑒗𑒪 𑒢𑒯𑒱 𑒩𑒯𑒻𑒏। 𑒧𑒳𑒠𑒰 𑒮𑒹 𑒏𑒰𑒩𑒝 𑒕𑒪 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒮𑒦𑒏 𑒣𑓂𑒩𑒞𑒱 𑒢𑒱𑒩𑒣𑒹𑒏𑓂𑒭 𑒩𑒯𑒻𑒞 𑒕𑒪𑒰𑒯।
“𑒨𑒾 𑒅𑒣𑒹𑒢𑓂𑒠𑓂𑒩। 𑒩𑒰𑒖𑒢𑒲𑒞𑒱 𑒫𑒱𑒖𑓂𑒘𑒰𑒢𑒧𑒹 𑒞𑒿 𑒯𑒧𑒩𑒰 𑒏𑒼𑒢𑒼 𑒠𑒱𑒏𑓂𑒏𑒞 𑒢𑒯𑒱 𑒁𑒕𑒱 𑒧𑒳𑒠𑒰 𑒃𑒞𑒱𑒯𑒰𑒮𑒧𑒹 𑒞𑒱𑒟𑒱 𑒂 𑒠𑒵𑒭𑓂𑒙𑒱𑒏𑒼𑒝𑒮𑒿 𑒥𑒛𑓂𑒛 𑒠𑒱𑒏𑓂𑒏𑒞𑒱𑒧𑒹 𑒣𑒛𑓃𑒱 𑒑𑒹𑒪 𑒕𑒲”।𑒁𑒩𑒳𑒢𑓂𑒡𑒞𑒲 𑒅𑒣𑒹𑒢𑓂𑒠𑓂𑒩𑒮𑒿 𑒣𑒳𑒕𑒪𑒢𑓂𑒯𑒱।
𑒂 𑒠𑒳𑒢𑒴 𑒑𑒼𑒙𑒹 𑒃𑒞𑒱𑒯𑒰𑒮 𑒣𑒩 𑒁𑒣𑒢-𑒁𑒣𑒢 𑒠𑒵𑒭𑓂𑒙𑒱𑒏𑒼𑒝 𑒋𑒏 𑒠𑒼𑒮𑒩𑒏𑒹𑒿 𑒠𑒹𑒥𑒋 𑒪𑒑𑒪𑒟𑒱।𑒩𑒰𑒮𑒥𑒱𑒯𑒰𑒩𑒲 𑒥𑒼𑒮 𑒂𑒖𑒰𑒠 𑒯𑒱𑒢𑓂𑒠 𑒤𑒾𑒖𑒏 𑒮𑓂𑒟𑒰𑒣𑒢𑒰 𑒏𑒋𑒪𑒢𑓂𑒯𑒱 𑒮𑒳𑒦𑒰𑒭 𑒔𑒢𑓂𑒠𑓂𑒩 𑒥𑒼𑒮 𑒢𑒯𑒱 𑒂 𑒢𑒲𑒪𑒏 𑒐𑒹𑒞𑒲𑒏 𑒯𑒹𑒞𑒳 𑒮𑒩𑒐𑒹𑒖 𑒖𑒹 𑒑𑒳𑒖𑒩𑒰𑒞𑒧𑒹 𑒕𑒪 𑒥𑒛𑓂𑒛 𑒣𑓂𑒩𑒮𑒱𑒠𑓂𑒡 𑒕𑒪, 𑒡𑒼𑒪𑒰𑒫𑒲𑒩 𑒮𑒦𑒮𑒿 𑒣𑒻𑒒 𑒮𑒱𑒢𑓂𑒡𑒳 𑒒𑒰𑒙𑒲 𑒂𑒏𑒱 𑒮𑒩𑒮𑓂𑒫𑒞𑒲 𑒢𑒠𑒲 𑒮𑒦𑓂𑒨𑒞𑒰𑒏 𑒮𑓂𑒟𑒪 𑒕𑒪 𑒂 𑒠𑒰𑒩𑒰 𑒬𑒱𑒏𑒼𑒯𑒏𑒹𑒿 𑒮𑒦𑒮𑒿 𑒣𑒻𑒒 𑒧𑒢𑒮𑒥 𑒠𑒹𑒪 𑒑𑒹𑒪 𑒕𑒪 । 𑒅𑒣𑒹𑒢𑓂𑒠𑓂𑒩 𑒄 𑒮𑒦 𑒑𑒣 𑒠𑓂𑒫𑒱𑒖𑒹𑒢𑓂𑒠𑓂𑒩𑒮𑒿 𑒣𑒴𑒕𑒱 𑒏𑒋 𑒂𑒥𑒟𑒱 𑒂 𑒤𑒹𑒩 𑒁𑒩𑒳𑒢𑓂𑒡𑒞𑒲𑒮𑒿 𑒫𑒰𑒩𑓂𑒞𑓂𑒞𑒰𑒪𑒰𑒣 𑒏𑒩𑒟𑒱। 𑒋𑒯𑒱𑒧𑒹 𑒮𑒧𑒨𑒏 𑒯𑒰𑒢𑒱 𑒯𑒼𑒃𑒞 𑒕𑒪𑒢𑓂𑒯𑒱, 𑒮𑒹 𑒅𑒣𑒹𑒢𑓂𑒠𑓂𑒩 𑒏𑒯𑒪𑒢𑓂𑒯𑒱 𑒖𑒹 𑒏𑒱𑒋𑒏 𑒢𑒯𑒱 𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒮𑒹𑒯𑒼 𑒁𑒣𑒢 𑒮𑒧𑒴𑒯𑒧𑒹 𑒬𑒰𑒧𑒱𑒪 𑒏𑒋 𑒪𑒹𑒪 𑒖𑒰𑒨।
“𑒧𑒰𑒞𑓂𑒩 𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒬𑒰𑒧𑒱𑒪 𑒏𑒩𑒴। 𑒥𑒹𑒬𑒲 𑒑𑒼𑒙𑒹𑒏𑒹𑒿 𑒂𑒢𑒥 𑒞𑒿 𑒣𑒜𑓃𑒰𑒃 𑒏𑒧 𑒂 𑒑𑒣 𑒮𑒩𑒏𑓂𑒏𑒰 𑒥𑒹𑒬𑒲 𑒯𑒼𑒋𑒞”। 𑒁𑒩𑒳𑒢𑓂𑒡𑒞𑒲𑒏 𑒄 𑒫𑒱𑒔𑒰𑒩 𑒥𑒢𑒪।
𑒅𑒣𑒹𑒢𑓂𑒠𑓂𑒩𑒏 𑒏𑒯𑒪𑒰𑒮𑒿 𑒠𑓂𑒫𑒱𑒖𑒹𑒢𑓂𑒠𑓂𑒩 𑒂𑒥𑒋 𑒪𑒑𑒪𑒰𑒯, 𑒍𑒯𑒱 𑒮𑒰𑒧𑒴𑒯𑒱𑒏 𑒁𑒡𑓂𑒨𑒨𑒢𑒧𑒹।
𑒞𑒰𑒫𑒞 𑒋𑒏 𑒠𑒱𑒢 𑒮𑒧𑒰𑒔𑒰𑒩 𑒂𑒋𑒪 𑒖𑒹 𑒣𑒱𑒞𑒰𑒏 𑒧𑒼𑒢 𑒥𑒛𑓂𑒛 𑒐𑒩𑒰𑒥 𑒕𑒢𑓂𑒯𑒱। 𑒣𑒯𑒳𑒿𑒔𑒪𑒰𑒯 𑒞𑒿 𑒪𑒲𑒫𑒩 𑒐𑒩𑒰𑒥 𑒯𑒼𑒋𑒥𑒰𑒏 𑒮𑒧𑒰𑒔𑒰𑒩 𑒦𑒹𑒙𑒪𑒢𑓂𑒯𑒱। 𑒮𑒞𑒧𑒰𑒋𑒮𑒿 𑒮𑒹𑒯𑒼 𑒦𑒹𑒿𑒙 𑒦𑒹𑒪𑒢𑓂𑒯𑒱।𑒑𑒰𑒧-𑒒𑒩 𑒣𑒩 𑒏𑒼𑒢𑒼 𑒐𑒥𑒩𑒱 𑒢𑒯𑒱। 𑒤𑒹𑒩 𑓑𑓕 𑒠𑒱𑒢𑒧𑒹 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒢𑓂𑒯𑒱 𑒣𑒱𑒞𑒰𑒏। 𑒑𑒰𑒧 𑒣𑒩 𑒞𑒐𑒢 𑒖𑒰 𑒏𑒋 𑒐𑒥𑒩𑒱 𑒦𑒹𑒪। 𑒢𑒯𑒱 𑒞𑒿 𑒏𑒼𑒢𑒼 𑒣𑒞𑒰, 𑒢𑒯𑒱𑒨𑒹 𑒏𑒼𑒢𑒼 𑒤𑒼𑒢। 𑒧𑒰𑒋 𑒥𑒹𑒔𑒰𑒩𑒲 𑒏𑒢𑒻𑒞 𑒩𑒯𑒱 𑒑𑒹𑒪𑒲𑒯। 𑒥𑒹𑒙𑒰 𑒠𑒰𑒯-𑒮𑓀𑒮𑓂𑒏𑒰𑒩𑒏 𑒥𑒰𑒠 𑒮𑒼𑒗𑒹 𑒣𑓂𑒩𑒨𑒰𑒑 𑒔𑒪𑒱 𑒑𑒹𑒪𑒰𑒯। 𑒑𑒰𑒧 𑒒𑒳𑒩𑒱𑒨𑒼 𑒏𑓄 𑒢𑒯𑒱 𑒑𑒹𑒪𑒰𑒯।
𑒧𑒰𑒋𑒏 𑒐𑒱𑒮𑓂𑒮𑒰 𑒨𑒻𑒯 𑒁𑒕𑒱 𑒖𑒹 𑒤𑒹𑒩 𑒍 𑒑𑒳𑒧-𑒬𑒳𑒧 𑒩𑒯𑒋 𑒪𑒑𑒪𑒲𑒯। 𑒏𑒼𑒢𑒼 𑒔𑒲𑒖𑒏 𑒚𑒹𑒏𑒰𑒢 𑒢𑒯𑒱 𑒩𑒯𑒢𑓂𑒯𑒱। 𑒋𑒏 𑒥𑒹𑒩 𑒞𑒿 𑒛𑒱𑒥𑒱𑒨𑒰 𑒮𑒿 𑒔𑒰𑒩𑒏 𑒒𑒩𑒧𑒹 𑒞𑒹𑒯𑒢 𑒂𑒑𑒱 𑒪𑒰𑒑𑒱 𑒑𑒹𑒪 𑒖𑒹 𑒮𑒾𑒿𑒮𑒹 𑒙𑒼𑒪 𑒖𑒩𑒱 𑒑𑒹𑒪। 𑒍𑒯𑒱 𑒮𑒧𑒨𑒧𑒹 𑒮𑒦𑒏𑒹𑒿 𑒔𑒰𑒩𑒏 𑒒𑒩 𑒩𑒯𑒻𑒏। 𑒮𑒦 𑒒𑒩 𑒋𑒏 𑒠𑒼𑒮𑒩𑒮𑒿 𑒮𑒙𑒪। 𑒮𑒹 𑒮𑒾𑓀𑒮𑒹 𑒙𑒼𑒪 𑒖𑒩𑒱 𑒑𑒹𑒪। 𑒮𑒦 𑒏𑒯𑒋 𑒂𑒏𑒱 𑒥𑒢𑒞𑒲 𑒥𑒢𑒰𑒥𑒋 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒧𑒰𑒋 𑒅𑒣𑒢𑓂𑒨𑒰𑒮 𑒣𑒜𑓃𑒻𑒞-𑒣𑒜𑓃𑒻𑒞 𑒮𑒳𑒞𑒱 𑒑𑒹𑒪𑒲𑒯 𑒂 𑒛𑒱𑒥𑒱𑒨𑒰𑒧𑒹 𑒯𑒰𑒟 𑒪𑒰𑒑𑒱 𑒑𑒹𑒪𑒢𑓂𑒯𑒱।𑒮𑒾𑒿𑒮𑒹 𑒙𑒼𑒪 𑒖𑒩𑒻𑒞 𑒩𑒯𑒋 𑒂 𑒍 𑒦𑒹𑒩 𑒡𑒩𑒱 𑒮𑒴𑒞𑒪 𑒩𑒯𑒪𑒲𑒯। 𑒏𑒏𑒩𑒼 𑒤𑒳𑒩𑒹𑒪𑒃 𑒞𑒿 𑒯𑒳𑒢𑒏𑒰 𑒅𑒚𑒰-𑒣𑒳𑒚𑒰 𑒏𑓄 𑒥𑒰𑒯𑒩 𑒏𑒋𑒪𑒏। 𑒥𑒰𑒠𑒧𑒹 𑒯𑒳𑒢𑒏𑒩 𑒂𑒩𑒼 𑒁𑒫𑒯𑒹𑒪𑒢𑒰 𑒯𑒼𑒧𑒋 𑒪𑒑𑒪𑒢𑓂𑒯𑒱। 𑒪𑒼𑒏 𑒑𑒰𑒩𑒱 𑒮𑒹𑒯𑒼 𑒣𑒜𑓃𑒱 𑒠𑒹𑒢𑒹 𑒕𑒪𑒢𑓂𑒯𑒱 𑒏𑒞𑒰𑒏 𑒥𑒹𑒩।
𑒍𑒯𑒱𑒢𑒰𑒧𑒹 𑒋𑒏 𑒥𑒹𑒩 𑒖𑒰𑒛𑓃𑒏 𑒗𑒣𑒮𑒲𑒧𑒹 𑒑𑒳𑒖𑒩𑒱 𑒑𑒹𑒪𑒲𑒯। 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒣𑒞𑒰 𑒮𑒹𑒯𑒼 𑒢𑒯𑒱 𑒕𑒪𑒢𑓂𑒯𑒱 𑒏𑒏𑒩𑒼 𑒪𑒑। 𑒒𑒩𑒰𑒩𑒲𑒏 𑒪𑒼𑒦𑒧𑒹 𑒋𑒏 𑒑𑒼𑒙 𑒮𑒧𑒰𑒓 𑒂𑒑𑒱 𑒠𑒹𑒪𑒏𑒢𑓂𑒯𑒱।
𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒢𑒱𑒏𑒙𑒞𑒰 𑒁𑒩𑒳𑒢𑓂𑒡𑒞𑒲𑒮𑒿 𑒥𑒜𑓃𑒋 𑒪𑒑𑒪𑒢𑓂𑒯𑒱। 𑒅𑒣𑒹𑒢𑓂𑒠𑓂𑒩𑒏𑒹𑒿 𑒁𑒩𑒳𑒢𑓂𑒡𑒞𑒲 𑒋𑒏 𑒥𑒹𑒩 𑒏𑒯𑒱𑒨𑒼 𑒠𑒹𑒪𑒐𑒱𑒢𑓂𑒯 𑒖𑒹 𑒁𑒯𑒰𑒿 𑒮𑒲𑒜𑓃𑒲 𑒕𑒪𑒯𑒳𑒿 𑒯𑒧𑒩 𑒂 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒥𑒲𑒔𑒧𑒹।
𑒁𑒩𑒳𑒢𑓂𑒡𑒞𑒲𑒏 𑒧𑒰𑒋 𑒮𑒹𑒯𑒼 𑒥𑒔𑓂𑒔𑒹𑒧𑒹 𑒑𑒳𑒖𑒩𑒱 𑒑𑒹𑒪 𑒕𑒪𑒲𑒯। 𑒣𑒱𑒞𑒰𑒏 𑒠𑒳𑒪𑒩𑒲 𑒕𑒪𑒲𑒯𑒹 𑒍। 𑒁𑒩𑒳𑒢𑓂𑒡𑒞𑒲𑒏 𑒏𑒯𑒪𑒰 𑒣𑒩 𑒠𑓂𑒫𑒱𑒖𑒹𑒢𑓂𑒠𑓂𑒩 𑒂𑒥𑒱 𑒑𑒹𑒪𑒰𑒯 𑒯𑒳𑒢𑒏𑒰 𑒒𑒩 𑒣𑒩 𑒩𑒯𑒥𑒰𑒏 𑒪𑒹𑒪। 𑒮𑓀𑒑𑒹 𑒣𑒜𑓃𑒪𑒢𑓂𑒯𑒱 𑒂 𑒤𑒹𑒩 𑒠𑒳𑒢𑒴 𑒑𑒼𑒙𑒹 𑒣𑓂𑒩𑒨𑒰𑒑 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒣𑓂𑒩𑒼𑒤𑒹𑒮𑒩 𑒥𑒢𑒱 𑒑𑒹𑒪𑒰𑒯।𑒫𑒱𑒫𑒰𑒯 𑒮𑒹𑒯𑒼 𑒦𑓄 𑒑𑒹𑒪𑒢𑓂𑒯𑒱। 𑒧𑒰𑒞𑓂𑒩 𑒧𑒡𑒳𑒥𑒢𑒲𑒏 𑒋𑒏 𑒑𑒼𑒙 𑒣𑒲𑒮𑒰𑒏𑒹𑒿 𑒥𑒳𑒗𑒪 𑒕𑒪𑒢𑓂𑒯𑒱 𑒯𑒱𑒢𑒏𑒩 𑒫𑒱𑒫𑒰𑒯𑒏 𑒫𑒱𑒭𑒨𑒧𑒹।𑒣𑒲𑒮𑒰 𑒕𑒪𑒰𑒯 𑒣𑒞𑓂𑒩𑒏𑒰𑒩 𑒂 𑒧𑒡𑒳𑒥𑒢𑒲𑒏 𑒏𑒼𑒢𑒼 𑒯𑒰𑒮𑓂𑒣𑒲𑒙𑒪𑒧𑒹 𑒏𑒰𑒖 𑒏𑒹𑒢𑒯𑒰𑒩𑒱 𑒏𑒹𑒩𑒪𑒏 𑒢𑒩𑓂𑒮 𑒮𑒿 𑒞𑒰𑒯𑒱 𑒖𑒧𑒰𑒢𑒰𑒧𑒹 𑒫𑒱𑒫𑒰𑒯 𑒏𑒋𑒢𑒹 𑒕𑒪𑒰𑒯।𑒒𑒩 𑒣𑒩𑒱𑒫𑒰𑒩 𑒯𑒳𑒢𑒏𑒰 𑒮𑒹𑒯𑒼 𑒥𑒰𑒩𑒱 𑒖𑒹𑒏𑒰𑒿 𑒠𑒹𑒢𑒹 𑒕𑒪𑒢𑓂𑒯𑒱। 𑒧𑒳𑒠𑒰 𑒕𑒪𑒰𑒯 𑒥𑒛𑓂𑒛 𑒢𑒲𑒏 𑒪𑒼𑒏।
𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒫𑒻𑒯 𑒥𑒹𑒩-𑒥𑒐𑒞 𑒣𑒩 𑒏𑒯𑒱𑒨𑒼 𑒏𑒰𑒪 𑒧𑒠𑒞𑒱 𑒏𑒩𑒻𑒞 𑒕𑒪𑒰𑒯।𑒧𑒳𑒠𑒰 𑒫𑒱𑒫𑒰𑒯𑒧𑒹 𑒍𑒯𑒼 𑒢𑒯𑒱 𑒁𑒋𑒪𑒰𑒯।𑒁𑒣𑒢 𑒮𑒪𑒰𑒯 𑒠𑒹𑒢𑒹 𑒕𑒪𑒰𑒯 𑒋𑒯𑒱 𑒫𑒱𑒫𑒰𑒯𑒏 𑒫𑒱𑒩𑒳𑒠𑓂𑒡। 𑒁𑒣𑒢 𑒅𑒠𑒰𑒯𑒩𑒝 𑒠𑒹𑒪𑒢𑓂𑒯𑒱 𑒖𑒹 𑒏𑒞𑒹𑒏 𑒠𑒱𑒏𑓂𑒏𑒞 𑒦𑒹𑒪𑒢𑓂𑒯𑒱। 𑒧𑒳𑒠𑒰 𑒮𑓀𑒑𑒧𑒹 𑒄𑒯𑒼 𑒏𑒯𑒪𑒢𑓂𑒯𑒱 𑒖𑒹 𑒁𑒯𑒰𑒿𑒏𑒹𑒿 𑒞𑒿 𑒥𑒰𑒯𑒩 𑒩𑒯𑒥𑒰𑒏 𑒁𑒕𑒱, 𑒮𑒹 𑒍𑒞𑒹𑒏 𑒠𑒱𑒏𑓂𑒏𑒞 𑒢𑒯𑒱 𑒯𑒼𑒋𑒞। 𑒯𑒧 𑒞𑒿 𑒧𑒡𑒳𑒥𑒢𑒲𑒧𑒹 𑒩𑒯𑒻𑒞 𑒕𑒪𑒯𑒳𑒿, 𑒏𑒯𑒱𑒨𑒼 𑒏𑒢𑒱𑒨𑒰𑒏𑒹𑒿 𑒑𑒰𑒧𑒼 𑒢𑒯𑒱 𑒪𑓄 𑒖𑒰 𑒮𑒏𑒪𑒯𑒳𑒿।
𑒠𑓂𑒫𑒱𑒖𑒹𑓀𑒢𑓂𑒠𑓂𑒩𑒏 𑒩𑒱𑒮𑒩𑓂𑒔 𑒣𑒩 𑒩𑒱𑒮𑒩𑓂𑒔 𑒣𑓂𑒩𑒏𑒰𑒬𑒱𑒞 𑒯𑒼𑒃𑒞 𑒑𑒹𑒪𑒢𑓂𑒯𑒱। 𑒠𑒹𑒬-𑒫𑒱𑒠𑒹𑒬𑒧𑒹 𑒮𑒹𑒧𑒲𑒢𑒰𑒩 𑒣𑒩 𑒖𑒰𑒟𑒱। 𑒁𑒩𑒳𑒢𑓂𑒡𑒞𑒲 𑒖𑒹𑒢𑒰 𑒥𑒹𑒩 𑒣𑒩 𑒧𑒠𑒞𑒱 𑒏𑒋𑒢𑒹 𑒕𑒪𑒲𑒯 𑒞𑒏𑒩𑒰 𑒥𑒰𑒠 𑒠𑓂𑒫𑒱𑒖𑒹𑒢𑓂𑒠𑓂𑒩 𑒁𑒣𑒢𑒰 𑒣𑒩 𑒦𑒩𑒼𑒮 𑒏𑒋𑒢𑒰𑒃 𑒕𑒼𑒛𑓃𑒱 𑒠𑒹𑒢𑒹 𑒕𑒪𑒰𑒯। 𑒫𑒰𑒧𑒣𑓀𑒟𑒲 𑒃𑒞𑒱𑒯𑒰𑒮𑒏𑒰𑒩𑒏 𑒩𑒴𑒣𑒧𑒹 𑒕𑒫𑒱 𑒥𑒢𑒰 𑒏𑒋 𑒧𑒰𑒞𑓂𑒩 𑒃𑒞𑒱𑒯𑒰𑒮 𑒂 𑒣𑒳𑒩𑒰𑒞𑒞𑓂𑒞𑓂𑒫 𑒮𑒿 𑒮𑒧𑓂𑒣𑒩𑓂𑒏 𑒥𑒢𑒍𑒢𑒹 𑒕𑒪𑒰𑒯। 𑒮𑒰𑒪𑒏-𑒮𑒰𑒪 𑒥𑒱𑒞𑒻𑒞 𑒑𑒹𑒪। 𑒑𑒰𑒧𑒏 𑒪𑒼𑒏𑒧𑒹 𑒧𑒰𑒞𑓂𑒩 𑒪𑒰𑒪 𑒕𑒪𑒰𑒯 𑒖𑒹 𑒍𑒯𑒱 𑒢𑒑𑒩𑒧𑒹 𑒩𑒯𑒻𑒞 𑒕𑒪𑒰𑒯 𑒂 𑒏𑒯𑒱𑒨𑒼 𑒏𑒰𑒪 𑒍 𑒦𑒹𑒿𑒙 𑒏𑓄 𑒁𑒥𑒻𑒞 𑒕𑒪𑒐𑒱𑒢𑓂𑒯।
𑒪𑒰𑒪𑒏 𑒑𑒣 𑒣𑒩 𑒁𑒢𑒳𑒞𑓂𑒞𑒩𑒱𑒞 𑒦𑓄 𑒖𑒰𑒃𑒞 𑒕𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩। 𑒧𑒰𑒋𑒏 𑒏𑒼𑒢𑒼 𑒔𑒩𑓂𑒔𑒰 𑒣𑒩 𑒢𑒼𑒩 𑒣𑒲𑒥𑒱 𑒖𑒰𑒃𑒞 𑒕𑒪𑒰𑒯। 𑒮𑒼𑒔𑒢𑒹 𑒩𑒯𑒟𑒱 𑒖𑒹 𑒏𑒱𑒕𑒳 𑒥𑒢𑒱 𑒖𑒋𑒞𑒰𑒯 𑒞𑒿 𑒧𑒰𑒋𑒏𑒹𑒿 𑒮𑓀𑒑 𑒂𑒢𑒱 𑒩𑒐𑒱𑒞𑒟𑒱 𑒂 𑒮𑒦 𑒣𑒰𑒣𑒏 𑒣𑒬𑓂𑒔𑒰𑒞𑒰𑒣 𑒏𑓄 𑒪𑒱𑒞𑒟𑒱। 𑒧𑒳𑒠𑒰 𑒨𑒰𑒫𑒞 𑒁𑒣𑒢 𑒐𑒩𑓂𑒔𑒰 𑒢𑒯𑒱 𑒖𑒳𑒧𑒢𑓂𑒯𑒱 𑒞𑒰𑒫𑒞 𑒞𑒿 𑒍 𑒖𑒲𑒫𑒱𑒞 𑒩𑒯𑒪𑒲𑒯 𑒂 𑒖𑒐𑒢 𑒏𑒱𑒕𑒳 𑒥𑒢𑒪𑒰𑒯 𑒞𑒿 𑒞𑒏𑒩 𑒣𑒯𑒱𑒢𑒯𑒱 𑒕𑒼𑒛𑓃𑒱 𑒑𑒹𑒪𑒲𑒯। 𑒏𑒼𑒢 𑒧𑒳𑒿𑒯 𑒏𑒏𑒩𑒰 𑒠𑒹𑒐𑒹𑒞𑒟𑒱।
𑒂 𑒖𑒐𑒢 𑒪𑒰𑒪 𑒣𑒯𑒳𑒿𑒔𑒪𑒰𑒯 𑒯𑒳𑒢𑒏𑒰 𑒪𑒑𑒧𑒹 𑒄 𑒥𑒖𑒻𑒞 𑒖𑒹 𑒪𑒱𑒨𑒯, 𑒦𑒰𑒞𑒱𑒖 𑒂𑒋𑒪 𑒕𑒟𑒱 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳, 𑒁𑒯𑒰𑒿 𑒞𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒏𑒏𑒩𑒼𑒮𑒿 𑒩𑒐𑒥𑒹 𑒢𑒯𑒱 𑒏𑒋𑒪𑒯𑒳𑒿, 𑒞𑒿 𑒣𑒯𑒱𑒪 𑒥𑒹𑒩 𑒥𑒖𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩-
“𑒏𑒼𑒢 𑒮𑒩𑒼𑒏𑒰𑒩 𑒧𑒰𑒋𑒮𑒿 𑒣𑒻𑒒 𑒕𑒪 𑒨𑒾 𑒪𑒰𑒪 । 𑒖𑒹 𑒁𑒯𑒰𑒿 𑒏𑒯𑒻𑒞 𑒕𑒲 𑒖𑒹 𑒯𑒧 𑒏𑒏𑒩𑒼𑒮𑒿 𑒮𑒩𑒼𑒏𑒰𑒩 𑒢𑒯𑒱 𑒩𑒐𑒢𑒹 𑒕𑒲”।
𑒩𑒰𑒑 𑒫𑒻𑒠𑒹𑒯𑒲 𑒦𑒻𑒩𑒫𑒲
“𑒑𑒥𑒻𑒨𑒰 𑒣𑒩𑒱𑒥𑒰𑒩 𑒕𑒻𑒏। 𑒞𑒰𑒢 𑒖𑒿 𑒔𑒜𑓃𑒻𑒞 𑒕𑒻𑒏 𑒞𑒿 𑒅𑒞𑒩𑒱𑒞𑒹 𑒢𑒘𑒱 𑒕𑒻𑒏”।
“𑒋𑒏𑒮𑒿 𑒋𑒏 𑒏𑒥𑒱𑒏𑒰𑒚𑒲 𑒮𑒦𑒙𑒰, 𑒣𑒩𑒱𑒥𑒰𑒩𑒧𑒹 𑒏𑓂𑒨𑒼 𑒑𑒣 𑒕𑒼𑒛𑓃𑒥𑒰𑒧𑒹 𑒏𑒏𑒩𑒼𑒮𑒿 𑒏𑒧 𑒢𑒯𑒱”।
“𑒮𑒹 𑒏𑒲 𑒏𑒯𑒻𑒞 𑒕𑒱𑒨𑒻𑒏। 𑒣𑒩𑒱𑒥𑒰𑒩𑒏 𑒏𑒼𑒢 𑒏𑒟𑒰, 𑒮𑒾𑒿𑒮𑒹 𑒙𑒼𑒪 𑒧𑒹 𑒮𑒦𑒙𑒰 𑒏𑒥𑒱𑒏𑒰𑒚𑒱𑒨𑒹 𑒦𑒹𑒙𑒞”।
𑒅𑒠𑒱𑒞𑒏 𑒯𑒰𑒩𑒧𑒼𑒢𑒱𑒨𑒧𑒏 𑒞𑒰𑒢𑒏 𑒫𑒱𑒫𑒹𑒔𑒢 𑒮𑒾𑒿𑒮𑒹 𑒑𑒰𑒧 𑒏𑒋 𑒩𑒯𑒪 𑒕𑒪।
𑒅𑒠𑒱𑒞𑒏 𑒥𑒰𑒥𑒴 𑒂 𑒏𑒰𑒏𑒰 𑒠𑒳𑒢𑒴 𑒑𑒼𑒙𑒹 𑒥𑒛𑓂𑒛 𑒣𑒻𑒒 𑒑𑒥𑒻𑒨𑓂𑒨𑒰। 𑒐𑒰𑒢𑒠𑒰𑒢𑒲 𑒑𑒰𑒨𑒢 𑒂 𑒫𑒰𑒠𑒢 𑒣𑓂𑒩𑒞𑒱𑒦𑒰 𑒯𑒳𑒢𑒏𑒰 𑒪𑒼𑒏𑒢𑒱𑒏 𑒩𑒏𑓂𑒞𑓂𑒞𑒧𑒹 𑒕𑒪𑒢𑓂𑒯𑒱। 𑒅𑒠𑒱𑒞 𑒣𑒰𑒿𑒔𑒹 𑒫𑒩𑓂𑒭𑒮𑒿 𑒮𑓀𑒑𑒲𑒞 𑒮𑒲𑒐𑒋 𑒪𑒰𑒑𑒪 𑒕𑒪𑒰𑒯, 𑒯𑒳𑒢𑒏𑒩 𑒮𑓂𑒫𑒩𑒏 𑒮𑓂𑒫𑒰𑒦𑒰𑒫𑒱𑒏 𑒅𑒠𑒰𑒞𑓂𑒞 𑒂 𑒁𑒢𑒳𑒠𑒰𑒞𑓂𑒞 𑒮𑓂𑒫𑒩𑒴𑒣𑒮𑒿 𑒣𑒱𑒞𑒰 𑒧𑒳𑒑𑓂𑒡 𑒦𑒋 𑒖𑒰𑒃𑒞 𑒕𑒪𑒰𑒯। 𑒧𑒳𑒠𑒰 𑒑𑒰𑒧𑒏 𑒪𑒼𑒏𑒏 𑒮𑓀𑒑𑒲𑒞𑒏 𑒖𑓂𑒘𑒰𑒢 𑒁𑒭𑓂𑒙𑒖𑒰𑒧𑒧𑒹 𑒧𑒵𑒠𑓀𑒑, 𑒗𑒰𑒃𑒪 𑒂 𑒯𑒰𑒩𑒧𑒼𑒢𑒱𑒨𑒧 𑒥𑒖𑒹𑒥𑒰 𑒡𑒩𑒱 𑒂 𑒢𑒱𑒩𑓂𑒠𑒱𑒭𑓂𑒙 𑒫𑒰𑒏𑓂𑒨𑒏𑒹𑒿 𑒑𑒋𑒥𑒰 𑒡𑒩𑒱 𑒮𑒲𑒧𑒱𑒞 𑒕𑒪 । 𑒂 𑒮𑒹 𑒣𑓂𑒩𑒰𑒨𑓁 𑒮𑒦 𑒑𑒼𑒙𑒹 𑒮𑒯𑒖 𑒩𑒴𑒣𑒹𑒿 𑒏𑒋 𑒪𑒻𑒞 𑒕𑒪𑒰𑒯।
“𑒂𑒓𑓂𑒪 𑒪𑒼𑒏𑒢𑒱𑒏 𑒩𑒰𑒖𑓂𑒨 𑒕𑒪, 𑒧𑒻𑒏𑒰𑒪𑒹 𑒧𑒯𑒼𑒠𑒨 𑒮𑓀𑒮𑓂𑒏𑒵𑒞 𑒬𑒱𑒏𑓂𑒭𑒰𑒏 𑒮𑓂𑒟𑒰𑒢 𑒣𑒩 𑒂𑒓𑓂𑒪 𑒦𑒰𑒭𑒰 𑒁𑒢𑒥𑒰 𑒣𑒩 𑒅𑒞𑒰𑒩𑒴 𑒕𑒪𑒰𑒯।
𑒅𑒠𑒱𑒞𑒏 𑒣𑒱𑒞𑒰𑒖𑒲 𑒋𑒯𑒱𑒮𑒿 𑒮𑓀𑒥𑓀𑒡𑒱𑒞 𑒋𑒏𑒙𑒰 𑒏𑒟𑒰 𑒏𑒯𑒻𑒞 𑒕𑒪𑒰𑒯।
“𑒧𑒻𑒏𑒰𑒪𑒹 𑒧𑒯𑒼𑒠𑒨 𑒖𑒐𑒢 𑒦𑒰𑒩𑒞 𑒁𑒋𑒪𑒰𑒯 𑒞𑒿 𑒋𑒏𑒙𑒰 𑒑𑒹𑒮𑓂𑒙 𑒯𑒰𑒅𑒮𑒧𑒹 𑒚𑒯𑒩𑒪 𑒕𑒪𑒰𑒯। 𑒐𑒱𑒛𑓃𑒏𑒲𑒮𑒿 𑒥𑒰𑒯𑒩 𑒠𑒹𑒐𑒱 𑒩𑒯𑒪 𑒕𑒪𑒰𑒯 𑒞𑒿 𑒠𑒹𑒐𑒪𑒢𑓂𑒯𑒱 𑒖𑒹 𑒑𑒹𑒮𑓂𑒙 𑒯𑒰𑒅𑒮𑒏 𑒧𑒻𑒢𑒹𑒖𑒩 𑒣𑒩𑒱𑒮𑒩𑒧𑒹 𑒣𑓂𑒩𑒫𑒹𑒬 𑒏𑒋 𑒩𑒯𑒪 𑒕𑒪𑒰𑒯। 𑒂 𑒍 𑒣𑓂𑒩𑒫𑒹𑒬 𑒏𑒋𑒪𑒰 𑒅𑒞𑓂𑒞𑒩 𑒑𑒹𑒮𑓂𑒙 𑒯𑒰𑒅𑒮𑒏 𑒠𑒩𑒥𑒰𑒢𑒏𑒹𑒿 𑒣𑒋𑒩 𑒕𑒳𑒥𑒱 𑒏𑒋 𑒣𑓂𑒩𑒝𑒰𑒧 𑒏𑒋𑒪𑒢𑓂𑒯𑒱। 𑒥𑒰𑒠𑒧𑒹 𑒖𑒐𑒢 𑒧𑒻𑒏𑒰𑒪𑒹 𑒯𑒳𑒢𑒏𑒰𑒮𑒿 𑒣𑒳𑒕𑒪𑒢𑓂𑒯𑒱, 𑒖𑒹 𑒁𑒯𑒰𑒿 𑒧𑒻𑒢𑒹𑒖𑒩 𑒕𑒲 𑒂 𑒞𑒐𑒢 𑒮𑒰𑒧𑒰𑒢𑓂𑒨 𑒠𑒩𑒥𑒰𑒢𑒏𑒹𑒿 𑒣𑒋𑒩 𑒕𑒳𑒥𑒱 𑒏𑒱𑒋𑒏 𑒣𑓂𑒩𑒝𑒰𑒧 𑒏𑒋 𑒩𑒯𑒪 𑒕𑒪𑒯𑒳𑒿 ? 𑒋𑒯𑒱 𑒣𑒩 𑒯𑒳𑒢𑒏𑒰 𑒣𑓂𑒩𑒞𑓂𑒨𑒳𑒞𑓂𑒞𑒩 𑒦𑒹𑒙𑒪𑒢𑓂𑒯𑒱 𑒖𑒹 𑒍 𑒮𑒰𑒧𑒰𑒢𑓂𑒨 𑒠𑒩𑒥𑒰𑒢 𑒢𑒘𑒱 𑒕𑒪 𑒫𑒩𑒢𑓂 𑒮𑓀𑒮𑓂𑒏𑒵𑒞𑒖𑓂𑒘 𑒮𑒹𑒯𑒼 𑒕𑒪। 𑒞𑒰𑒯𑒱 𑒠𑒱𑒢 𑒧𑒻𑒏𑒰𑒪𑒹 𑒮𑒼𑒔𑒱 𑒪𑒹𑒪𑒢𑓂𑒯𑒱 𑒖𑒹 𑒦𑒰𑒩𑒞𑒏𑒹𑒿 𑒣𑒩𑒰𑒖𑒱𑒞 𑒏𑒩𑒥𑒰𑒏 𑒪𑒹𑒪 𑒦𑒰𑒩𑒞𑒏 𑒮𑓀𑒮𑓂𑒏𑒵𑒞𑒱𑒏𑒹𑒿 𑒢𑒭𑓂𑒙 𑒏𑒩𑒋 𑒣𑒛𑓃𑒞। 𑒂 𑒋𑒯𑒱 𑒪𑒹𑒪 𑒮𑓀𑒮𑓂𑒏𑒵𑒞𑒏𑒹𑒿 𑒢𑒭𑓂𑒙 𑒏𑒩𑒥𑒰𑒏 𑒣𑓂𑒩𑒝 𑒪𑒹𑒪𑒢𑓂𑒯𑒱, 𑒖𑒏𑒩 𑒁𑒕𑒻𑒞 𑒦𑒰𑒩𑒞𑒲𑒨 𑒏𑒪𑒰 𑒮𑓀𑒑𑒲𑒞 𑒂 𑒮𑓀𑒮𑓂𑒏𑒵𑒞𑒱𑒮𑒿 𑒣𑒩𑒰𑒓𑒧𑒳𑒐 𑒦𑒋 𑒖𑒋𑒞𑒰𑒯”। 𑒅𑒠𑒱𑒞 𑒣𑒱𑒞𑒰𑒏 𑒧𑒳𑒿𑒯𑒹 𑒄 𑒐𑒱𑒮𑓂𑒮𑒰 𑒏𑒞𑒰𑒏 𑒥𑒹𑒩 𑒮𑒳𑒢𑒢𑒹 𑒕𑒪𑒰𑒯। 𑒁𑒮𑓂𑒞𑒳 𑒞𑒰𑒫𑒞, 𑒅𑒠𑒱𑒞 𑒋𑒯𑒱 𑒞𑒩𑒯𑒏 𑒫𑒰𑒞𑒰𑒫𑒩𑒝𑒧𑒹 𑒂𑒑𑒰𑒿 𑒥𑒜𑓃𑒋 𑒪𑒑𑒪𑒰𑒯।
𑒁𑒓𑒩𑒹𑒖 𑒪𑒼𑒏𑒢𑒱 𑒠𑓂𑒫𑒰𑒩𑒰 𑒣𑒰𑒬𑓂𑒔𑒰𑒞𑓂𑒨 𑒮𑒓𑓂𑒑𑒲𑒞𑒏𑒹𑒿 𑒁𑒢𑒥𑒰𑒏 𑒣𑓂𑒩𑒨𑒰𑒮𑒏 𑒣𑒪𑒳𑒮𑓂𑒏𑒩, 𑒦𑒰𑒞𑒐𑒝𑓂𑒛𑒹 𑒂 𑒩𑒰𑒧𑒰𑒧𑒰𑒞𑓂𑒨 𑒠𑓂𑒫𑒰𑒩𑒰 𑒠𑒹𑒪 𑒑𑒹𑒪 𑒮𑒧𑒲𑒔𑒲𑒢 𑒅𑒞𑓂𑒞𑒩, 𑒄 𑒬𑒱𑒏𑓂𑒭𑒰𑒏 𑒏𑓂𑒭𑒹𑒞𑓂𑒩𑒧𑒹 𑒏𑒱𑒋𑒏 𑒢𑒘𑒱 𑒦𑒋 𑒮𑒏𑒪, 𑒅𑒠𑒱𑒞𑒏 𑒥𑒰𑒪 𑒧𑒼𑒢 𑒁𑒏𑒳𑒪𑒰𑒃𑒞 𑒕𑒪। 𑒁𑒮𑓂𑒞𑒳 𑒞𑒰𑒫𑒞 𑒅𑒠𑒱𑒞 𑒮𑓀𑒑𑒲𑒞𑒼𑒠𑓂𑒡𑒰𑒩𑒏 𑒦𑒰𑒞𑒐𑒝𑓂𑒛𑒹𑒏𑒹𑒿 𑒂𑒠𑒩𑓂𑒬 𑒥𑒢𑒰𑒋 𑒂𑒑𑒰𑒿 𑒥𑒜𑓃𑒋 𑒪𑒑𑒪𑒰𑒯।
𑒪𑒼𑒏 𑒑𑒥𑒻𑒨𑓂𑒨𑒰 𑒏𑒯𑒋 𑒞𑒿 𑒏𑒼𑒢𑒼 𑒥𑒰𑒞 𑒢𑒯𑒱, 𑒋𑒏 𑒠𑒱𑒢 𑒁𑒋𑒞 𑒖𑒐𑒢 𑒋𑒯𑒱 𑒑𑒥𑒻𑒨𑓂𑒨𑒰𑒏 𑒮𑒼𑒗𑒰𑒿 𑒮𑒧𑒮𑓂𑒞 𑒁𑒐𑒝𑓂𑒛 𑒦𑒰𑒩𑒞𑒏 𑒧𑒢𑒮𑒱 𑒬𑓂𑒩𑒠𑓂𑒡𑒰𑒮𑒿 𑒠𑒹𑒐𑒞, 𑒁𑒮𑓂𑒞𑒳 𑒞𑒰𑒫𑒞।
𑒏𑒰𑒏𑒰 𑒂 𑒣𑒱𑒞𑒰𑒏 𑒮𑓀𑒩𑒏𑓂𑒭𑒝𑒧𑒹 𑒑𑒰𑒧𑒏 𑒩𑒰𑒧𑒪𑒲𑒪𑒰 𑒧𑓀𑒛𑒪𑒲 𑒠𑓂𑒫𑒰𑒩𑒰 𑒣𑓂𑒩𑒮𑓂𑒞𑒳𑒞 𑒏𑒋𑒪 𑒖𑒰𑒋𑒥𑒪𑒰 𑒢𑒰𑒙𑒏𑒧𑒹 𑒮𑒹𑒯𑒼 𑒅𑒠𑒱𑒞 𑒦𑒰𑒑 𑒪𑒻𑒞 𑒕𑒪𑒰𑒯, 𑒯𑒳𑒢𑒏𑒩 𑒑𑒰𑒍𑒪 𑒑𑒲𑒞 𑒑𑒰𑒧𑒧𑒹 𑒮𑒦𑒏 𑒚𑒼𑒩 𑒣𑒩 𑒂𑒥𑒱 𑒑𑒹𑒪 𑒕𑒪। 𑒧𑒳𑒠𑒰 𑒐𑒹𑒞𑒲 𑒥𑒰𑒩𑒲 𑒞𑒹𑒯𑒢 𑒮𑒢 𑒢𑒯𑒱 𑒕𑒪𑒢𑓂𑒯𑒱। 𑒋𑒏 𑒥𑒲𑒒𑒰 𑒥𑒙𑒰𑒃 𑒏𑒩𑒻𑒞 𑒖𑒰𑒃𑒞 𑒕𑒪𑒰𑒯, 𑒮𑒹𑒯𑒼 𑒮𑒳𑒢𑒋 𑒣𑒛𑓃𑒢𑓂𑒯𑒱 𑒖𑒹 𑒑𑒥𑒻𑒨𑓂𑒨𑒰𑒖𑒲 𑒥𑒳𑒞𑒹 𑒏𑒲 𑒐𑒹𑒞𑒲 𑒏𑒋𑒪 𑒯𑒼𑒋𑒞𑒢𑓂𑒯𑒱, 𑒧𑒳𑒿𑒯𑒮𑒿 𑒑𑒍𑒢𑒰𑒃 𑒂 𑒯𑒰𑒟𑒮𑒿 𑒏𑒰𑒖 𑒏𑒩𑒥𑒰𑒧𑒹 𑒥𑒛𑓂𑒛 𑒁𑓀𑒞𑒩 𑒕𑒻𑒏।
𑒖𑒲𑒫𑒢𑒏 𑒩𑒟 𑒂𑒑𑒰𑒿 𑒥𑒜𑓃𑒻𑒞 𑒩𑒯𑒻𑒞 𑒧𑒳𑒠𑒰 𑒫𑒱𑒠𑒹𑒬𑒲𑒏 𑒬𑒰𑒮𑒢𑒧𑒹 𑒮𑒹𑒯𑒼 𑒡𑒩𑒱 𑒮𑓀𑒦𑒫 𑒢𑒯𑒱 𑒯𑒼𑒃𑒞 𑒕𑒪। 𑒏𑒐𑒢𑒼 𑒯𑒻𑒖𑒰 𑒞𑒿 𑒏𑒐𑒢𑒼 𑒣𑓂𑒪𑒹𑒑 𑒞𑒿 𑒏𑒐𑒢𑒼 𑒧𑒪𑒹𑒩𑒱𑒂। 𑒁𑒯𑒱𑒢𑒰 𑒋𑒏 𑒥𑒹𑒩 𑒑𑒰𑒧𑒧𑒹 𑒣𑓂𑒪𑒹𑒑 𑒣𑒮𑒩𑒪। 𑒪𑒼𑒏 𑒋𑒏 𑒑𑒼𑒙𑒰𑒏𑒹𑒿 𑒛𑒰𑒯𑒱 𑒏𑒋 𑒂𑒥𑒨 𑒞𑒿 𑒑𑒰𑒧 𑒣𑒩 𑒠𑒼𑒮𑒩 𑒫𑓂𑒨𑒏𑓂𑒞𑒱 𑒧𑒵𑒞 𑒣𑒛𑓃𑒪 𑒩𑒯𑒻𑒞 𑒕𑒪। 𑒅𑒠𑒱𑒞𑒏 𑒧𑒰𑒋𑒏𑒹𑒿 𑒮𑒹𑒯𑒼 𑒣𑒹𑒙 𑒂 𑒢𑒰𑒏 𑒔𑒪𑒋 𑒪𑒑𑒪𑒢𑓂𑒯𑒱, 𑒠𑒹𑒯 𑒂𑒑𑒱 𑒖𑒹𑒏𑒰𑒿 𑒖𑒩𑒻𑒞 𑒩𑒯𑒢𑓂𑒯𑒱 𑒧𑒳𑒠𑒰 𑒥𑒹𑒙𑒰𑒏𑒹𑒿 𑒪𑒑 𑒢𑒯𑒱 𑒂𑒥𑒋 𑒠𑒹𑒟𑒱𑒢𑓂𑒯 𑒖𑒹 𑒏𑒞𑒯𑒳 𑒯𑒳𑒢𑒏𑒼 𑒣𑓂𑒪𑒹𑒑 𑒢𑒯𑒱 𑒦𑒋 𑒖𑒰𑒃𑒢𑓂𑒯। 𑒠𑒴 𑒠𑒱𑒢𑒳𑒏𑒰 𑒥𑒰𑒠 𑒥𑒹𑒔𑒰𑒩𑒲 𑒠𑒳𑒢𑒱𑒨𑒰𑒿 𑒕𑒼𑒛𑓃𑒱 𑒑𑒹𑒪𑒲𑒯। 𑒠𑒳𑒢𑒴 𑒥𑒰𑒣-𑒥𑒹𑒙𑒰 𑒠𑒰𑒯 𑒮𑓀𑒮𑓂𑒏𑒰𑒩 𑒏𑒋 𑒁𑒋𑒪𑒰𑒯। 𑒠𑒳𑒢𑒴 𑒑𑒼𑒙𑒹𑒏 𑒂𑒿𑒐𑒱𑒧𑒹 𑒢𑒼𑒩 𑒖𑒹𑒢𑒰 𑒮𑒳𑒐𑒰 𑒑𑒹𑒪 𑒕𑒪𑒢𑓂𑒯𑒱। 𑒣𑒱𑒞𑒰 𑒑𑒳𑒧-𑒮𑒳𑒧 𑒩𑒯𑒋 𑒪𑒑𑒪𑒰𑒯। 𑒏𑒝𑓂𑒚𑒮𑒿 𑒮𑓂𑒫𑒩 𑒢𑒯𑒱 𑒢𑒱𑒏𑒪𑒢𑓂𑒯𑒱 𑒧𑒳𑒠𑒰 𑒯𑒮𑓂𑒞 𑒣𑒩𑒱𑒔𑒰𑒪𑒢𑒮𑒿 𑒥𑒹𑒙𑒰𑒏𑒹𑒿 𑒁𑒦𑓂𑒨𑒰𑒮 𑒏𑒩𑒰𑒥𑒟𑒱। 𑒠𑒴-𑒞𑒲𑒢 𑒥𑒩𑓂𑒭 𑒥𑒲𑒞𑒪 𑒅𑒠𑒱𑒞𑒏 𑒥𑒨𑒮 𑒫𑒻𑒯 𑓑𑓐-𑓑𑓑 𑒮𑒰𑒪 𑒯𑒼𑒋𑒞𑒢𑓂𑒯𑒱 𑒂𑒏𑒱 𑒣𑒱𑒞𑒰𑒏𑒹𑒿 𑒧𑒪𑒹𑒩𑒱𑒂 𑒣𑒏𑒛𑓃𑒱 𑒪𑒹𑒪𑒏𑒢𑓂𑒯𑒱।
𑒩𑒰𑒞𑒱𑒧𑒹 𑒢𑒱𑒢𑓂𑒠 𑒢𑒯𑒱 𑒯𑒼𑒃𑒢𑓂𑒯। 𑒮𑒱𑒩𑒧𑒰𑒧𑒹 𑒦𑒰𑒞𑒐𑒝𑓂𑒛𑒹 𑒮𑓂𑒫𑒩𑒪𑒱𑒣𑒱 𑒩𑒯𑒻𑒞 𑒕𑒪𑒢𑓂𑒯𑒱 𑒞𑒰𑒯𑒱 𑒂𑒡𑒰𑒩 𑒣𑒩 𑒥𑒹𑒙𑒰𑒏𑒹𑒿 𑒏𑒱𑒕𑒳 𑒑𑒰𑒥𑒱 𑒮𑒳𑒢𑒰𑒥𑒋 𑒏𑒯𑒻𑒞 𑒕𑒪𑒐𑒱𑒢𑓂𑒯। 𑒅𑒠𑒱𑒞𑒏𑒹𑒿 𑒂𑒦𑒰𑒮 𑒦𑒋 𑒑𑒹𑒪𑒢𑓂𑒯𑒱 𑒖𑒹 𑒧𑒰𑒞𑒰𑒏 𑒮𑓀𑒑 𑒣𑒱𑒞𑒰 𑒮𑒹𑒯𑒼 𑒠𑒴𑒩 𑒦𑒋 𑒖𑒋𑒞𑒰𑒯। 𑒄 𑒮𑒼𑒔𑒱 𑒏𑒼𑒜𑓃 𑒤𑒰𑒙𑒱 𑒖𑒰𑒃𑒢𑓂𑒯। 𑒏𑒳𑒢𑒻𑒢𑒏 𑒣𑓂𑒩𑒦𑒰𑒫 𑒮𑒹𑒯𑒼 𑒂𑒥 𑒣𑒱𑒞𑒰 𑒣𑒩 𑒢𑒯𑒱 𑒯𑒼𑒃𑒞 𑒕𑒪𑒢𑓂𑒯𑒱। 𑒩𑒰𑒞𑒱𑒧𑒹 𑒟𑒩𑒟𑒩𑒲 𑒣𑒻𑒮𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒅𑒠𑒱𑒞 𑒮𑒦𑒙𑒰 𑒏𑒹𑒟𑒩𑒲-𑒍𑒜𑓃𑒢𑒰 𑒮𑒦 𑒍𑒜𑓃𑒰 𑒠𑒻𑒞 𑒕𑒪𑒐𑒱𑒢𑓂𑒯, 𑒧𑒳𑒠𑒰 𑒞𑒻𑒨𑒼 𑒟𑒩𑒟𑒩𑒲 𑒢𑒯𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒪𑒼𑒏 𑒮𑒦 𑒠𑒱𑒢𑒧𑒹 𑒂𑒥𑒱 𑒐𑒼𑒖-𑒣𑒳𑒕𑒰𑒛𑓃𑒲 𑒏𑒋 𑒖𑒰𑒃𑒞 𑒕𑒪𑒢𑓂𑒯𑒱। 𑒑𑒰𑒧𑒏 𑒢𑒰𑒙𑒏 𑒧𑒝𑓂𑒛𑒪𑒲 𑒮𑒹𑒯𑒼 𑒥𑒢𑓂𑒠𑒹 𑒕𑒪 𑒏𑒰𑒩𑒝 𑒧𑒳𑒐𑓂𑒨 𑒏𑒰𑒩𑓂𑒨𑒏𑒩𑓂𑒞𑓂𑒞𑒰 𑒯𑒩𑓂𑒭𑒱𑒞 𑒢𑒰𑒩𑒰𑒨𑒝 𑒕𑒪𑒰𑒯 𑒂 𑒍 𑒥𑒢𑒰𑒩𑒮 𑒔𑒪𑒱 𑒑𑒹𑒪 𑒕𑒪𑒰𑒯 𑒏𑒼𑒢𑒼 𑒢𑒰𑒙𑒏 𑒧𑒝𑓂𑒛𑒪𑒲𑒧𑒹। 𑒍 𑒑𑒰𑒧 𑒂𑒋𑒪 𑒕𑒪𑒰𑒯 𑒂 𑒖𑒐𑒢 𑒮𑒳𑒢𑒪𑒢𑓂𑒯𑒱 𑒖𑒹 𑒅𑒠𑒱𑒞𑒏 𑒣𑒱𑒞𑒰𑒏 𑒧𑒼𑒢 𑒐𑒩𑒰𑒣 𑒕𑒢𑓂𑒯𑒱 𑒞𑒿 𑒣𑒳𑒕𑒰𑒛𑓃𑒲 𑒏𑒩𑒋 𑒁𑒋𑒪𑒰𑒯।
“𑒯𑒩𑓂𑒭𑒱𑒞। 𑒯𑒧 𑒞𑒿 𑒂𑒥 𑒖𑒰 𑒩𑒯𑒪 𑒕𑒲। 𑒅𑒠𑒱𑒞 𑒢𑒹𑒢𑒰 𑒕𑒟𑒱। 𑒏𑒰𑒏𑒰 𑒣𑒩 𑒥𑒼𑒗 𑒥𑒢𑒞𑒰𑒯 𑒞𑒰𑒯𑒱𑒮𑒿 𑒢𑒲𑒏 𑒖𑒹 𑒁𑒣𑒢 𑒣𑒋𑒩 𑒣𑒩 𑒚𑒰𑒜𑓃 𑒦𑒋 𑒖𑒰𑒟𑒱, 𑒮𑓀𑒑𑒲𑒞 𑒮𑒰𑒡𑒢𑒰 𑒏𑒩𑒟𑒱। 𑒄 𑒠𑒹𑒫𑒏 𑒪𑒲𑒪𑒰 𑒁𑒕𑒱 𑒖𑒹 𑒋𑒯𑒱 𑒮𑒧𑒨 𑒣𑒩 𑒁𑒯𑒰𑒿 𑒑𑒰𑒧 𑒂𑒥𑒱 𑒑𑒹𑒪𑒯𑒳𑒿। 𑒑𑒰𑒧𑒏 𑒯𑒥𑒰𑒧𑒹 𑒖𑒹𑒢𑒰 𑒩𑒼𑒑𑒏 𑒏𑒲𑒙𑒰𑒝𑒳 𑒂𑒥𑒱 𑒑𑒹𑒪 𑒕𑒻𑒏। 𑒋𑒞𑒋 𑒧𑒞𑓂𑒨𑒳 𑒙𑒰 𑒢𑒱𑒬𑓂𑒔𑒱𑒞 𑒕𑒻𑒏 𑒂𑒩 𑒏𑒱𑒕𑒳 𑒢𑒯𑒱। 𑒋𑒯𑒢𑒰 𑒮𑓂𑒟𑒱𑒞𑒱𑒧𑒹 𑒮𑓀𑒑𑒲𑒞𑒏 𑒧𑒵𑒞𑓂𑒨𑒳 𑒦𑒋 𑒖𑒰𑒋 𑒞𑒰𑒯𑒱𑒮𑒿 𑒢𑒲𑒏 𑒖𑒹 𑒅𑒠𑒱𑒞 𑒁𑒯𑒰𑒿𑒏 𑒮𑓀𑒑 𑒥𑒢𑒰𑒩𑒮 𑒢𑒰𑒙𑒏 𑒧𑒝𑓂𑒛𑒪𑒲𑒧𑒹 𑒔𑒪𑒱 𑒖𑒰𑒟𑒱। 𑒁𑒯𑒰𑒿 𑒥𑒳𑒞𑒹 𑒄 𑒯𑒼𑒋𑒞 𑒯𑒩𑓂𑒭𑒱𑒞”?
“𑒏𑒲 𑒏𑒯𑒻𑒞 𑒕𑒲 𑒑𑒳𑒪𑒰𑒥 𑒦𑒰𑒃। 𑒅𑒠𑒱𑒞 𑒁𑒯𑒰𑒿𑒏 𑒣𑒳𑒞𑓂𑒩 𑒕𑒲 𑒂 𑒯𑒧𑒩 𑒏𑓂𑒨𑒼 𑒢𑒯𑒱? 𑒧𑒳𑒠𑒰 𑒮𑓀𑒑𑒲𑒞𑒏 𑒣𑒰𑒩𑒐𑒲𑒏 𑒣𑓂𑒩𑒞𑒱𑒦𑒰 𑒢𑒰𑒙𑒏 𑒧𑒝𑓂𑒛𑒪𑒲𑒧𑒹 𑒏𑒳𑒝𑓂𑒚𑒱𑒞 𑒢𑒯𑒱 𑒦𑒋 𑒖𑒋𑒞𑒻𑒏? 𑒢𑒰𑒙𑒏 𑒧𑒝𑓂𑒛𑒪𑒲 𑒞𑒿 𑒯𑒧𑒩𑒰 𑒮𑒢𑒏 𑒁𑒪𑓂𑒣 𑒖𑓂𑒘𑒰𑒢𑒲𑒏 𑒪𑒹𑒪 𑒕𑒻𑒏”।
“𑒢𑒯𑒱 𑒯𑒩𑓂𑒭𑒱𑒞। 𑒍𑒞𑒋 𑒅𑒠𑒱𑒞𑒏𑒹𑒿 𑒯𑒢𑒳𑒧𑒰𑒢𑒏 𑒂 𑒩𑒰𑒧𑒏 𑒂𑒬𑒲𑒩𑓂𑒫𑒰𑒠 𑒦𑒹𑒙𑒞𑒢𑓂𑒯𑒱। 𑒮𑓀𑒑𑒲𑒞𑒏 𑒏𑒞𑒹𑒏 𑒩𑒰𑒮 𑒣𑒏𑓂𑒭 𑒕𑒻𑒏। 𑒢𑒫-𑒢𑒫 𑒥𑒰𑒡𑒰 𑒣𑒰𑒩 𑒏𑒩𑒞𑒰𑒯 𑒂 𑒁𑒪𑓂𑒣 𑒮𑒧𑒨𑒧𑒹 𑒮𑓀𑒑𑒲𑒞 𑒤𑒳𑒩𑒹𑒞𑒢𑓂𑒯𑒱। 𑒍𑒞𑒋𑒮𑒿 𑒯𑒱𑒢𑒏𑒩 𑒮𑒰𑒡𑒢𑒰 𑒂𑒑𑒰𑒿 𑒥𑒜𑓃𑒞𑒢𑓂𑒯𑒱”।
𑒑𑒳𑒪𑒰𑒥 𑒖𑒹𑒢𑒰 𑒯𑒩𑓂𑒭𑒱𑒞𑒏 𑒥𑒰𑒙 𑒖𑒼𑒯𑒱 𑒩𑒯𑒪 𑒕𑒪𑒰𑒯। 𑒥𑒖𑒱𑒞𑒹-𑒥𑒖𑒱𑒞𑒹 𑒣𑓂𑒩𑒰𑒝 𑒖𑒹𑒢𑒰 𑒅𑒐𑒛𑓃𑒋 𑒪𑒑𑒪𑒢𑓂𑒯𑒱। 𑒥𑒹𑒙𑒰𑒏 𑒧𑒰𑒟 𑒣𑒩 𑒟𑒩𑒟𑒛𑓃𑒰𑒃𑒞 𑒯𑒰𑒟 𑒩𑒐𑒪𑒢𑓂𑒯𑒱 𑒞𑒿 𑒠𑒾𑒑𑒱 𑒏𑒋 𑒯𑒩𑓂𑒭𑒱𑒞 𑒑𑓀𑒑𑒰 𑒖𑒪 𑒂𑒢𑒱 𑒧𑒳𑒿𑒯𑒧𑒹 𑒋𑒏 𑒠𑒱𑒬𑒱𑒮𑒿 𑒠𑒹𑒪𑒢𑓂𑒯𑒱 𑒧𑒳𑒠𑒰 𑒖𑒪 𑒧𑒳𑒿𑒯𑒏 𑒠𑒼𑒮𑒩 𑒠𑒱𑒬𑒱𑒮𑒿 𑒙𑒒𑒩𑒱 𑒏𑒋 𑒥𑒰𑒯𑒩 𑒂𑒥𑒱 𑒑𑒹𑒪।
𑒏𑒰𑒬𑒲𑒏 𑒞𑒙 𑒣𑒩 𑒫𑒱𑒠𑓂𑒨𑒰𑒣𑒞𑒱𑒏 𑒥𑒛𑓃 𑒮𑒳𑒐 𑒮𑒰𑒩 𑒣𑒰𑒍𑒪 𑒞𑒳𑒁 𑒞𑒲𑒩𑒹 𑒮𑒿 𑒪𑓄 𑒏𑒋 𑒦𑒱𑒢𑓂𑒢-𑒦𑒱𑒢𑓂𑒢 𑒡𑒰𑒩𑓂𑒧𑒱𑒏 𑒂 𑒪𑒾𑒏𑒱𑒏 𑒑𑒲𑒞 𑒑𑒰𑒥𑒟𑒱 𑒍𑒏𑒩 𑒮𑒳𑒩 𑒥𑒢𑒰𑒥𑒟𑒱 𑒂 𑒞𑒰𑒯𑒱 𑒪𑒹𑒪 𑒅𑒠𑒱𑒞𑒏𑒹𑒿 𑒣𑓂𑒩𑒬𑓀𑒮𑒰 𑒮𑒹𑒯𑒼 𑒦𑒹𑒙𑒢𑓂𑒯𑒱। 𑒂𑒨𑒳𑒏 𑒢𑓂𑒨𑒴𑒢𑒞𑒰 𑒮𑒹𑒯𑒼 𑒏𑒯𑒱𑒨𑒼 𑒏𑒰𑒪 𑒅𑒣𑒪𑒥𑓂𑒡𑒱𑒏 𑒧𑒰𑒩𑓂𑒑𑒏𑒹𑒿 𑒩𑒼𑒏𑒱 𑒠𑒻𑒞 𑒕𑒻𑒏। 𑒅𑒠𑒱𑒞 𑒧𑒰𑒞𑓂𑒩 𑓑𑓑 𑒫𑒩𑓂𑒭𑒧𑒹 𑒏𑒰𑒬𑒲 𑒑𑒹𑒪𑒰𑒯 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒳𑒢𑒏𑒩 𑒮𑓂𑒫𑒩𑒏 𑒂 𑒮𑒳𑒩𑒏 𑒥𑒯𑒳𑒞 𑒑𑒼𑒙𑒹 𑒑𑓂𑒩𑒰𑒯𑒏 𑒥𑒢𑒱 𑒑𑒹𑒪𑒢𑓂𑒯𑒱, 𑒑𑓂𑒩𑒰𑒯𑒏 𑒢𑒘𑒱 𑒬𑒼𑒭𑒏 𑒏𑒯𑒴। 𑒮𑒦𑒙𑒰 𑒣𑒩𑒱𑒬𑓂𑒩𑒧 𑒯𑒱𑒢𑒏𑒰𑒮𑒿 𑒏𑒩𑒥𑒰𑒋 𑒪𑒻𑒞 𑒕𑒪𑒢𑓂𑒯𑒱 𑒂 𑒢𑒰𑒧 𑒁𑒣𑒢 𑒠𑓄 𑒠𑒋 𑒖𑒰𑒃𑒞 𑒕𑒪𑒰𑒯। 𑒧𑒳𑒠𑒰 𑒅𑒠𑒱𑒞 𑒮𑒧𑒨, 𑒂𑒨𑒳 𑒂 𑒑𑒳𑒩𑒳𑒏 𑒂𑒮𑒧𑒹 𑒠𑒱𑒢 𑒏𑒰𑒙𑒱 𑒩𑒯𑒪 𑒕𑒪𑒰𑒯। 𑒠𑒱𑒢 𑒥𑒛𑓃 𑒧𑒳𑒬𑒏𑒱𑒪𑒮𑒿 𑒏𑒙𑒻𑒞 𑒕𑒻𑒏 𑒧𑒳𑒠𑒰 𑒖𑓂𑒨𑒼𑒿 𑒋𑒏𑒯𑒱 𑒜𑒩𑓂𑒩𑒰 𑒣𑒩 𑒔𑒪𑒻𑒞 𑒖𑒰𑒃𑒞 𑒕𑒻𑒏 𑒞𑒿 𑒪𑒰𑒑𑒋 𑒪𑒑𑒻𑒞 𑒕𑒻𑒏 𑒖𑒹 𑒮𑒰𑒪𑒏 𑒮𑒰𑒪 𑒏𑒼𑒢𑒰 𑒥𑒲𑒞𑒱 𑒑𑒹𑒪। 𑒅𑒠𑒱𑒞 𑓑𑓑 𑒫𑒩𑓂𑒭𑒮𑒿 𑓒𑓖 𑒫𑒩𑓂𑒭𑒏 𑒅𑒧𑒩𑒱 𑒡𑒩𑒱 𑒢𑒰𑒙𑒏 𑒏𑒧𑓂𑒣𑒢𑒲𑒧𑒹 𑒏𑒰𑒖 𑒏𑒩𑒻𑒞 𑒩𑒯𑒪𑒰𑒯।
“𑒬𑒰𑒮𑓂𑒞𑓂𑒩𑒲 𑒖𑒲। 𑒄 𑒮𑒳𑒩 𑒞𑒿 𑒯𑒧𑒯𑒲 𑒥𑒢𑒍𑒢𑒹 𑒕𑒲 𑒧𑒳𑒠𑒰 𑒧𑒼𑒢 𑒏𑒢𑒹𑒏 𑒫𑒱𑒔𑒪𑒱𑒞 𑒁𑒕𑒱 𑒞𑒰𑒯𑒱 𑒠𑓂𑒫𑒰𑒩𑒹 𑒠𑒼𑒮𑒩 𑒮𑒳𑒩 𑒢𑒘𑒱 𑒥𑒢𑒱 𑒣𑒰𑒥𑒱 𑒩𑒯𑒪 𑒁𑒕𑒱। 𑒅𑒠𑒱𑒞𑒏𑒹𑒿 𑒥𑒖𑒰 𑒪𑒻𑒞 𑒕𑒲। 𑒍𑒯𑒼 𑒯𑒧𑒩𑒰𑒮𑒿 𑒏𑒱𑒕𑒳 𑒮𑒱𑒐𑒢𑒹 𑒁𑒕𑒱, 𑒏𑒱𑒕𑒳 𑒮𑒧𑒰𑒡𑒰𑒢 𑒢𑒱𑒏𑒰𑒪𑒱 𑒪𑒹𑒞”। 𑒧𑒯𑒰𑒢 𑒮𑓀𑒑𑒲𑒞 𑒅𑒣𑒰𑒮𑒏 𑒦𑒙𑓂𑒙 𑒖𑒲𑒏 𑒮𑒼𑒗𑒰𑒿 𑒯𑒩𑓂𑒭𑒱𑒞 𑒥𑒰𑒖𑒱 𑒩𑒯𑒪 𑒕𑒪𑒰𑒯।
“𑒯𑒿 𑒯𑒿। 𑒁𑒫𑒬𑓂𑒨 𑒥𑒖𑒰 𑒪𑒱𑒎𑒏”। 𑒦𑒙𑓂𑒙 𑒖𑒲 𑒥𑒖𑒪𑒰𑒯।
𑒧𑒳𑒠𑒰 𑒅𑒠𑒱𑒞 𑒖𑒐𑒢 𑒂𑒥𑒱 𑒏𑒋 𑒮𑓀𑒑𑒲𑒞𑒏𑒹𑒿 𑒮𑒩𑒪𑒞𑒰𑒮𑒿 𑒮𑒱𑒠𑓂𑒡 𑒏𑒋 𑒮𑒳𑒩 𑒑𑒰𑒥𑒱 𑒠𑒹𑒪𑒢𑓂𑒯𑒱, 𑒞𑒰𑒯𑒱𑒮𑒿 𑒦𑒙𑓂𑒙𑒖𑒲𑒏𑒹𑒿 𑒥𑒳𑒗𑒥𑒰𑒧𑒹 𑒦𑒰𑒿𑒑𑒚 𑒢𑒯𑒱 𑒩𑒯𑒪𑒢𑓂𑒯𑒱, 𑒖𑒹 𑒫𑒰𑒮𑓂𑒞𑒫𑒱𑒏 𑒏𑒪𑒰𑒏𑒰𑒩 𑒯𑒩𑓂𑒭𑒱𑒞 𑒢𑒯𑒱 𑒅𑒠𑒱𑒞 𑒕𑒟𑒱। 𑒦𑒙𑓂𑒙 𑒖𑒲 𑒋𑒏𑒙𑒰 𑒋𑒯𑒢 𑒬𑒱𑒭𑓂𑒨𑒏 𑒞𑒰𑒏𑒱𑒧𑒹 𑒕𑒪𑒰𑒯 𑒖𑒹 𑒣𑓂𑒩𑒞𑒱𑒦𑒰𑒫𑒰𑒢 𑒂 𑒮𑒰𑒡𑒏 𑒯𑒼𑒟𑒱, 𑒖𑒱𑒢𑒏𑒰 𑒦𑒙𑓂𑒙𑒖𑒲 𑒁𑒣𑒢 𑒮𑒦𑒙𑒰 𑒏𑒪𑒰 𑒢𑒱𑒬𑓂𑒔𑒱𑒢𑓂𑒞 𑒦𑒋 𑒠𑒋 𑒮𑒏𑒟𑒱। 𑒂𑒃 𑒮𑒹 𑒬𑒱𑒭𑓂𑒨 𑒦𑒹𑒙𑒱 𑒑𑒹𑒪𑒢𑓂𑒯𑒱 𑒯𑒳𑒢𑒏𑒰।
𑒅𑒠𑒱𑒞𑒏𑒹𑒿 𑒁𑒣𑒢𑒰 𑒂𑒬𑓂𑒩𑒧𑒧𑒹 𑒔𑒪𑒥𑒰𑒏 𑒖𑒐𑒢 𑒍 𑒑𑒳𑒩𑒳 𑒢𑒼𑒞 𑒠𑒹𑒪𑒢𑓂𑒯𑒱 𑒞𑒿 𑒅𑒠𑒱𑒞 𑒠𑒾𑒑𑒱 𑒏𑒋 𑒁𑒣𑒢 𑒣𑓂𑒩𑒏𑒼𑒭𑓂𑒚 𑒔𑒪𑒱 𑒑𑒹𑒪𑒰𑒯 𑒂 𑒣𑒱𑒞𑒰𑒏 𑒤𑒼𑒙𑒼 𑒢𑒱𑒏𑒰𑒪𑒱 𑒏𑒋 𑒖𑒹 𑒏𑒢𑒢𑒰𑒃 𑒬𑒳𑒩𑒴 𑒏𑒋𑒪𑒢𑓂𑒯𑒱 𑒞𑒿 𑓑𑓕 𑒮𑒰𑒪𑒮𑒿 𑒩𑒼𑒏𑒪 𑒡𑒰𑒩 𑒕𑒯𑒩 𑒞𑒼𑒛𑓃𑒱 𑒥𑒯𑒩𑒰𑒋 𑒪𑒰𑒑𑒪। 𑒁𑒮𑓂𑒞𑒳 𑒞𑒰𑒫𑒞।
𑒢𑒰𑒙𑒏 𑒏𑒧𑓂𑒣𑒢𑒲𑒧𑒹 𑒖𑒹𑒯𑒢 𑒋𑒏𑒩𑒴𑒣𑒞𑒰 𑒕𑒪, 𑒞𑒏𑒩 𑒫𑒱𑒣𑒩𑒲𑒞 𑒑𑒳𑒩𑒳𑒂𑒬𑓂𑒩𑒧𑒧𑒹 𑒫𑒻𑒫𑒱𑒡𑓂𑒨𑒞𑒰 𑒕𑒪। 𑒮𑒦 𑒠𑒱𑒢 𑒅𑒠𑒱𑒞 𑒮𑒴𑒩𑓂𑒨𑒼𑒠𑒨𑒮𑒿 𑒣𑒴𑒩𑓂𑒫 𑒅𑒚𑒻𑒞 𑒕𑒪𑒰𑒯 𑒂 𑒮𑓀𑒑𑒲𑒞 𑒮𑒰𑒡𑒢𑒰𑒧𑒹 𑒪𑒲𑒢 𑒦𑒋 𑒖𑒰𑒃𑒞 𑒕𑒪𑒰𑒯। 𑒬𑒱𑒭𑓂𑒨 𑒑𑒳𑒩𑒳𑒏𑒹𑒿 𑒣𑒰𑒥𑒱 𑒡𑒢𑓂𑒨 𑒕𑒪 𑒂 𑒑𑒳𑒩𑒳 𑒬𑒱𑒭𑓂𑒨𑒏𑒹𑒿 𑒣𑒰𑒥𑒱 𑒏𑒋। 𑒠𑒱𑒢 𑒥𑒲𑒞𑒋 𑒪𑒰𑒑𑒪 𑒧𑒳𑒠𑒰 𑒦𑒰𑒞𑒐𑒝𑓂𑒛𑒹 𑒂 𑒣𑒪𑒳𑒮𑓂𑒏𑒩 𑒧𑒯𑒰𑒩𑒰𑒖 𑒠𑓂𑒫𑒰𑒩𑒰 𑒮𑓀𑒮𑓂𑒏𑒵𑒞 𑒮𑒰𑒯𑒱𑒞𑓂𑒨𑒏 𑒂𑒡𑒰𑒩 𑒣𑒩 𑒮𑓀𑒑𑒲𑒞𑒏 𑒏𑒋𑒪 𑒑𑒹𑒪 𑒣𑒳𑒢𑒳𑒩𑒼𑒠𑓂𑒡𑒰𑒩 𑒞𑒿 𑒑𑒓𑓂𑒑𑒰𑒏 𑒡𑒰𑒩 𑒖𑒹𑒏𑒰𑒿 𑒢𑒱𑒩𑓂𑒧𑒪 𑒂 𑒔𑒱𑒩 𑒕𑒪। 𑒖𑒞𑒹𑒏 𑒑𑒯𑒲𑒿𑒩 𑒅𑒠𑒱𑒞 𑒍𑒯𑒱 𑒡𑒰𑒩𑒧𑒹 𑒅𑒞𑒩𑒟𑒱, 𑒧𑒼𑒢 𑒏𑒩𑒢𑓂𑒯𑒱 𑒖𑒹 𑒂𑒩 𑒑𑒯𑒲𑒿𑒩 𑒖𑒰𑒃। 𑓒𑓕 𑒮𑒰𑒪 𑒡𑒩𑒱 𑒑𑒳𑒩𑒳𑒏 𑒂𑒬𑓂𑒩𑒧𑒧𑒹 𑒅𑒠𑒱𑒞 𑒩𑒯𑒪𑒰𑒯। 𑓕𑓑 𑒫𑒩𑓂𑒭𑒏 𑒖𑒐𑒢 𑒦𑒹𑒪𑒰𑒯 𑒞𑒿 𑒑𑒳𑒩𑒳 𑒄 𑒏𑒯𑒱 𑒥𑒱𑒠𑒰 𑒏𑒋𑒪𑒢𑓂𑒯𑒱 𑒖𑒹 𑒅𑒠𑒱𑒞 𑒂𑒥 𑒁𑒯𑒰𑒿 𑒬𑒱𑒭𑓂𑒨 𑒢𑒯𑒱 𑒑𑒳𑒩𑒳𑒏 𑒦𑒴𑒧𑒱𑒏𑒰 𑒏𑒩𑒴। 𑒮𑓀𑒑𑒲𑒞𑒬𑒰𑒮𑓂𑒞𑓂𑒩𑒏 𑒣𑒳𑒢𑒩𑒼𑒠𑓂𑒡𑒰𑒩 𑒦𑒋 𑒔𑒳𑒏𑒪 𑒕𑒻𑒏, 𑒂𑒓𑓂𑒪 𑒪𑒼𑒏𑒢𑒱𑒏 𑒣𑒰𑒬𑓂𑒔𑒰𑒞𑓂𑒨 𑒮𑓀𑒑𑒲𑒞 𑒣𑒠𑓂𑒡𑒞𑒱 𑒁𑒢𑒥𑒰𑒏 𑒣𑓂𑒩𑒨𑒰𑒮 𑒫𑒱𑒤𑒪 𑒦𑒋 𑒔𑒳𑒏𑒪 𑒁𑒕𑒱, 𑒂 𑒂𑒥 𑒦𑒰𑒩𑒞 𑒮𑓂𑒫𑒞𑓀𑒞𑓂𑒩 𑒮𑒹𑒯𑒼 𑒦𑒋 𑒔𑒳𑒏𑒪 𑒁𑒕𑒱। 𑒖𑒰𑒆 𑒂 𑒬𑒰𑒮𑓂𑒞𑓂𑒩 𑒠𑓂𑒫𑒰𑒩𑒰 𑒣𑓂𑒩𑒠𑒞𑓂𑒞 𑒮𑓀𑒑𑒲𑒞𑒏 𑒠𑒼𑒮𑒩 𑒣𑒳𑒢𑒩𑓂𑒖𑒰𑒑𑒩𑒝𑒏 𑒨𑒼𑒠𑓂𑒡𑒰 𑒥𑒢𑒴।
𑓕𑓑 𑒫𑒩𑓂𑒭𑒏 𑒂𑒨𑒳𑒧𑒹 𑒮𑓂𑒫𑒞𑓀𑒞𑓂𑒩 𑒦𑒰𑒩𑒞𑒧𑒹 𑒅𑒠𑒱𑒞 𑒢𑒼𑒏𑒩𑒲 𑒞𑒏𑒢𑒰𑒃 𑒬𑒳𑒩𑒴 𑒏𑒋𑒪𑒢𑓂𑒯𑒱। 𑒏𑒰𑒬𑒲𑒏 𑒋𑒏𑒙𑒰 𑒮𑓀𑒑𑒲𑒞 𑒫𑒱𑒠𑓂𑒨𑒰𑒪𑒨 𑒮𑒯𑒩𑓂𑒭 𑒯𑒳𑒢𑒏𑒰 𑒮𑓂𑒫𑒲𑒏𑒰𑒩 𑒏𑒋 𑒪𑒹𑒪𑒏𑒢𑓂𑒯𑒱। 𑒧𑒳𑒠𑒰 𑓓𑓖 𑒫𑒩𑓂𑒭𑒏 𑒮𑓀𑒑𑒲𑒞 𑒮𑒰𑒡𑒢𑒰𑒏 𑒮𑒰𑒡𑒪 𑒮𑓂𑒫𑒩 𑒏𑒰𑒬𑒲 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒡𑒩𑒱 𑒣𑒯𑒳𑒿𑒔𑒱 𑒑𑒹𑒪𑒻𑒏। 𑒬𑒱𑒭𑓂𑒨𑒏 𑒣𑓀𑒏𑓂𑒞𑓂𑒞𑒱 𑒪𑒰𑒑𑒋 𑒪𑒑𑒪𑒢𑓂𑒯𑒱। 𑒦𑒰𑒩𑒞𑒏 𑒢𑒫 𑒮𑓂𑒫𑒩𑒴𑒣𑒧𑒹 𑒬𑓂𑒩𑒠𑓂𑒡𑒰𑒏 𑒣𑓂𑒩𑒞𑒲𑒏 𑒩𑒴𑒣𑒧𑓂 𑒏𑒞𑒹𑒏𑒼 𑒑𑒼𑒙𑒹 𑒬𑒰𑒮𑓂𑒞𑓂𑒩𑒲𑒨 𑒮𑓀𑒑𑒲𑒞𑒏 𑒫𑓂𑒨𑒰𑒣𑒰𑒩 𑒮𑒹𑒯𑒼 𑒬𑒳𑒩𑒳 𑒏𑒋𑒪𑒢𑓂𑒯𑒱। 𑒧𑒳𑒠𑒰 𑒣𑓂𑒩𑒔𑒰𑒩𑒮𑒿 𑒠𑒴𑒩 𑒧𑒰𑒞𑓂𑒩 𑒑𑒳𑒩𑒳 𑒬𑒱𑒭𑓂𑒨 𑒣𑒩𑒧𑓂𑒣𑒩𑒰𑒏𑒹𑒿 𑒂𑒡𑒰𑒩 𑒥𑒢𑒰 𑒏𑒋 𑒂𑒑𑒴 𑒥𑒜𑓃𑒥𑒻𑒞 𑒩𑒯𑒪𑒰𑒯 𑒅𑒠𑒱𑒞। 𑒯𑒳𑒢𑒏𑒩 𑒬𑒱𑒭𑓂𑒨 𑒮𑒦 𑒠𑒹𑒬 𑒫𑒱𑒠𑒹𑒮𑒧𑒹 𑒢𑒰𑒧 𑒏𑒩𑒋 𑒪𑒰𑒑𑒪। 𑒞𑒐𑒢 𑒏𑒰𑒬𑒲 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒬𑒱𑒏𑓂𑒭𑒏 𑒩𑒴𑒣𑒧𑒹 𑒯𑒱𑒢𑒏𑒰 𑒢𑒱𑒨𑒳𑒏𑓂𑒞𑓂𑒞 𑒏𑒋 𑒪𑒹𑒪𑒏𑒢𑓂𑒯𑒱। 𑒧𑒳𑒠𑒰 𑒍𑒞𑒋 𑒢𑒱𑒨𑒧 𑒕𑒪 𑒖𑒹 𑒥𑒱𑒢𑒰 𑒣𑒲.𑒋𑒔.𑒛𑒲. 𑒏𑒋𑒢𑒹 𑒏𑒏𑒩𑒼 𑒫𑒱𑒦𑒰𑒑𑒏 𑒁𑒡𑓂𑒨𑒏𑓂𑒭 𑒢𑒯𑒱 𑒥𑒢𑒰𑒍𑒪 𑒖𑒰 𑒮𑒏𑒻𑒞 𑒁𑒕𑒱। 𑒧𑒳𑒠𑒰 𑒫𑒱𑒦𑒰𑒑𑒧𑒹 𑒅𑒠𑒱𑒞𑒮𑒿 𑒥𑒹𑒬𑒲 𑒬𑓂𑒩𑒹𑒭𑓂𑒚 𑒞𑒿 𑒏𑓂𑒨𑒼 𑒕𑒪 𑒢𑒯𑒱। 𑒖𑒹𑒢𑒰 𑒂𑒓𑓂𑒪 𑒖𑒢 𑒏𑒋 𑒑𑒹𑒪 𑒕𑒪𑒰𑒯, 𑒑𑒳𑒩𑒳𑒏𑒳𑒪𑒮𑒿 𑒣𑒜𑓃𑒢𑒱𑒯𑒰𑒩𑒏𑒹𑒿 𑒏𑒼𑒢𑒼 𑒛𑒱𑒑𑓂𑒩𑒲 𑒢𑒯𑒱 𑒦𑒹𑒙𑒻𑒞 𑒕𑒪 𑒂 𑒍 𑒮𑒩𑒏𑒰𑒩𑒲 𑒢𑒼𑒏𑒩𑒲𑒏 𑒨𑒼𑒑𑓂𑒨 𑒢𑒯𑒱 𑒯𑒼𑒃𑒞 𑒕𑒪। 𑒅𑒠𑒱𑒞𑒏 𑒪𑒑𑒧𑒹 𑒮𑒹𑒯𑒼 𑒞𑒰𑒯𑒱 𑒣𑓂𑒩𑒏𑒰𑒩𑒏 𑒏𑒼𑒢𑒼 𑒎𑒣𑒔𑒰𑒩𑒱𑒏 𑒛𑒱𑒑𑓂𑒩𑒲 𑒢𑒯𑒱 𑒕𑒪𑒢𑓂𑒯𑒱। 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒏 𑒮𑒲𑒢𑒹𑒙𑒏 𑒥𑒻𑒮𑒏𑒲 𑒦𑒹𑒪 𑒂 𑒞𑒰𑒯𑒱𑒧𑒹 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒁𑒣𑒢 𑒢𑒱𑒨𑒧𑒏𑒹𑒿 𑒬𑒱𑒟𑒱𑒪 𑒏𑒋𑒪𑒏 𑒂 𑒅𑒠𑒱𑒞𑒏𑒹𑒿 𑒮𑓀𑒑𑒲𑒞𑒏 𑒫𑒱𑒦𑒰𑒑𑒰𑒡𑓂𑒨𑒏𑓂𑒭 𑒥𑒢𑒰𑒍𑒪 𑒑𑒹𑒪। 𑒍𑒞𑒋 𑒮𑒹𑒫𑒰𑒢𑒱𑒫𑒵𑒞𑓂𑒞𑒱 𑒡𑒩𑒱 𑒅𑒠𑒱𑒞 𑒁𑒣𑒢 𑒣𑓂𑒩𑒬𑒰𑒮𑒢𑒱𑒏 𑒏𑓂𑒭𑒧𑒞𑒰𑒏 𑒣𑒩𑒱𑒔𑒨 𑒠𑒹𑒪𑒢𑓂𑒯𑒱। 𑒦𑒰𑒞𑒐𑒝𑓂𑒛𑒹𑒏 𑒁𑒢𑒳𑒩𑒴𑒣 𑒏𑒞𑒹𑒏 𑒐𑒝𑓂𑒛𑒧𑒹 𑒮𑓀𑒑𑒲𑒞𑒏 𑒬𑒰𑒮𑓂𑒞𑓂𑒩𑒏 𑒣𑒩𑒱𑒔𑒨 𑒠𑒹𑒪𑒢𑓂𑒯𑒱 𑒅𑒠𑒱𑒞। 𑒅𑒠𑒱𑒞𑒏 𑒬𑒱𑒭𑓂𑒨 𑒮𑒦𑒏 𑒠𑒵𑒬𑓂𑒨-𑒬𑓂𑒩𑒫𑓂𑒨 𑒩𑒹𑒏𑒰𑒩𑓂𑒛 𑒥𑒯𑒩𑒰 𑒑𑒹𑒪 𑒕𑒪𑒢𑓂𑒯𑒱 𑒧𑒳𑒠𑒰 𑒅𑒠𑒱𑒞 𑒮𑓂𑒙𑒳𑒛𑒱𑒨𑒼 𑒂 𑒖𑒢𑒞𑒰𑒏 𑒮𑒧𑒏𑓂𑒭 𑒁𑒣𑒢 𑒏𑒰𑒩𑓂𑒨𑒏𑓂𑒩𑒧𑒮𑒿 𑒁𑒣𑒢 𑒮𑒰𑒡𑒢𑒰 𑒦𑓀𑒑 𑒢𑒯𑒱 𑒏𑒩𑒻𑒞 𑒕𑒪𑒰𑒯। 𑒦𑒼𑒩𑒏 𑒮𑒰𑒡𑒢𑒰𑒮𑒿 𑒮𑒰𑒿𑒗𑒏 𑒮𑒳𑒩 𑒦𑒹𑒙𑒢𑓂𑒯𑒱 𑒂 𑒮𑒰𑒿𑒗𑒏 𑒮𑒰𑒡𑒢𑒰𑒮𑒿 𑒦𑒼𑒩𑒏। 𑒁𑒮𑓂𑒞𑒳 𑒞𑒰𑒫𑒞।
𑒯𑒳𑒢𑒏𑒩 𑒬𑒱𑒭𑓂𑒨 𑒮𑒦 𑒅𑒠𑒱𑒞𑒏𑒹𑒿 𑒥𑒱𑒢𑒰 𑒏𑒯𑒢𑒹 𑒋𑒏𑒙𑒰 𑒁𑒦𑒱𑒢𑒢𑓂𑒠𑒢 𑒏𑒰𑒩𑓂𑒨𑒏𑓂𑒩𑒧 𑒩𑒐𑒪𑒢𑓂𑒯𑒱। 𑒍𑒞𑒋 𑒩𑒹𑒏𑒰𑒩𑓂𑒛𑒱𑒓𑓂𑒑 𑒏𑒹𑒩 𑒫𑓂𑒨𑒫𑒮𑓂𑒟𑒰 𑒕𑒪। 𑒅𑒠𑒱𑒞 𑒁𑒦𑒱𑒢𑒢𑓂𑒠𑒢 𑒏𑒰𑒩𑓂𑒨𑒏𑓂𑒩𑒧𑒧𑒹 𑒁𑒋𑒪𑒰𑒯। 𑒂𑒨𑒳 𑓗𑓕 𑒫𑒩𑓂𑒭𑒏 𑒕𑒪𑒢𑓂𑒯𑒱 𑒯𑒳𑒢𑒏𑒩। 𑒬𑓂𑒩𑒼𑒞𑒰 𑒩𑒯𑒟𑒱 𑒠𑒹𑒬𑒏 𑒮𑒩𑓂𑒫𑒬𑓂𑒩𑒹𑒭𑓂𑒚 𑒬𑒰𑒮𑓂𑒞𑓂𑒩𑒲𑒨 𑒮𑓀𑒑𑒲𑒞𑒏𑒰𑒩 𑒪𑒼𑒏𑒢𑒱 𑒂 𑒅𑒠𑒱𑒞𑒏 𑒬𑒱𑒭𑓂𑒨-𑒧𑒝𑓂𑒛𑒪𑒲।
𑒖𑒐𑒢 𑒅𑒠𑒱𑒞 𑒬𑒳𑒩𑒴 𑒦𑒹𑒪𑒰𑒯 𑒞𑒐𑒢 𑒯𑒳𑒢𑒏𑒩 𑒬𑒱𑒭𑓂𑒨 𑒪𑒼𑒏𑒢𑒱 𑒔𑒰𑒩𑒴 𑒠𑒱𑒬𑒱 𑒞𑒰𑒏𑒱 𑒩𑒯𑒪 𑒕𑒪𑒰𑒯। 𑒯𑒳𑒢𑒏𑒩 𑒪𑒼𑒏𑒢𑒱𑒏 𑒑𑒳𑒩𑒳𑒏 𑒮𑓂𑒫𑒩 𑒩𑒰𑒑 𑒫𑒻𑒠𑒹𑒯𑒲 𑒦𑒻𑒩𑒫𑒲 𑒯𑒳𑒢𑒏𑒰 𑒮𑒦𑒏𑒹𑒿 𑒕𑒼𑒛𑓃𑒱 𑒮𑒠𑓂𑒨𑓁 𑒂𑒩 𑒏𑓂𑒨𑒼 𑒢𑒯𑒱 𑒮𑒳𑒢𑒢𑒹 𑒕𑒪। 𑒧𑒳𑒠𑒰 𑒬𑒱𑒭𑓂𑒨 𑒪𑒼𑒏𑒢𑒱𑒏𑒹𑒿 𑒮𑒳𑒢𑒪𑒰 𑒅𑒞𑓂𑒞𑒩 𑒮𑒦𑒏𑒹𑒿 𑒁𑒦𑒱𑒪𑒰𑒭𑒰 𑒕𑒪𑒻𑒏 𑒖𑒹 𑒖𑒐𑒢 𑒬𑒱𑒭𑓂𑒨 𑒪𑒼𑒏𑒢𑒱 𑒋𑒯𑒢 𑒕𑒟𑒱 𑒞𑒐𑒢 𑒑𑒳𑒩𑒳 𑒏𑒹𑒯𑒢 𑒯𑒼𑒋𑒞𑒰𑒯। 𑓗𑓕 𑒫𑒩𑓂𑒭𑒏 𑒋𑒯𑒱 𑒨𑒼𑒠𑓂𑒡𑒰𑒏𑒹𑒿 𑒮𑒳𑒢𑒻𑒞 𑒮𑒳𑒢𑒻𑒞 𑒮𑒑𑒲𑒞𑒏 𑒧𑒯𑒰𑒩𑒟𑒲 𑒢𑒫 𑒩𑒮𑒏 𑒮𑓀𑒑 𑒯𑒿𑒮𑒟𑒱 𑒂 𑒣𑓂𑒩𑒮𑒢𑓂𑒢 𑒦𑒋 𑒩𑒯𑒪 𑒕𑒪𑒰𑒯 𑒧𑒳𑒠𑒰 𑒬𑒱𑒭𑓂𑒨 𑒪𑒼𑒏𑒢𑒱 𑒫𑒱𑒦𑒼𑒩 𑒦𑒋 𑒧𑒰𑒞𑓂𑒩 𑒏𑒰𑒢𑒱 𑒩𑒯𑒪 𑒕𑒪𑒰𑒯।
𑒏𑒰𑒪-𑒮𑓂𑒟𑒰𑒢 𑒫𑒱𑒮𑓂𑒟𑒰𑒣𑒢
“𑒮𑒳𑒢𑒴। 𑒣𑓂𑒩𑒨𑒼𑒑𑒬𑒰𑒪𑒰𑒏 𑒮𑓂𑒫𑒱𑒔 𑒂𑒤 𑒏𑒋 𑒠𑒱𑒨𑒾𑒏”।
𑒔𑒰𑒩𑒱 𑒛𑒰𑒃𑒧𑒹𑒢𑓂𑒬𑒢𑒏 𑒫𑒰𑒞𑒰𑒫𑒩𑒝𑒧𑒹 𑒁𑒣𑒢 𑒮𑒦𑒙𑒰 𑒠𑓂𑒫𑒱 𑒂 𑒞𑓂𑒩𑒱 𑒛𑒰𑒃𑒧𑒹𑒢𑓂𑒬𑒢𑒏 𑒫𑒮𑓂𑒞𑒳𑒏 𑒣𑓂𑒩𑒨𑒼𑒑 𑒏𑒩𑒥𑒰𑒏 𑒪𑒹𑒪 𑒡𑒾𑒧𑓂𑒨 𑒣𑓂𑒩𑒨𑒼𑒑𑒬𑒰𑒪𑒰𑒧𑒹 𑒣𑓂𑒩𑒨𑒼𑒑 𑒬𑒳𑒩𑒴 𑒏𑒩𑒋 𑒥𑒪𑒰 𑒕𑒟𑒱। 𑒯𑒳𑒢𑒏𑒩 𑒮𑓀𑒑𑒲-𑒮𑒰𑒟𑒲 𑒮𑒦 𑒅𑒞𑓂𑒮𑒳𑒏𑒞𑒰𑒮𑒿 𑒮𑒦𑒙𑒰 𑒠𑒹𑒐𑒱 𑒩𑒯𑒪 𑒕𑒟𑒱।
“𑒠𑒴 𑒛𑒰𑒃𑒧𑒹𑒢𑓂𑒬𑒢𑒧𑒹 𑒖𑒲𑒥𑒋 𑒥𑒪𑒰 𑒖𑒲𑒫 𑒞𑒲𑒢 𑒛𑒰𑒃𑒧𑒹𑒢𑓂𑒬𑒢𑒧𑒹 𑒖𑒲𑒥𑒋 𑒥𑒪𑒰 𑒧𑒢𑒳𑒏𑓂𑒐𑒏 𑒮𑒦 𑒏𑒰𑒩𑓂𑒨𑒏𑒹𑒿 𑒠𑒹𑒐𑒱 𑒞𑓄 𑒢𑒯𑒱 𑒮𑒏𑒻𑒞 𑒕𑒟𑒱 𑒧𑒳𑒠𑒰 𑒍𑒏𑒩 𑒮𑒦𑒙𑒰 𑒣𑒩𑒱𑒝𑒰𑒧𑒏 𑒁𑒢𑒳𑒦𑒫 𑒏𑒩𑒻𑒞 𑒕𑒟𑒱। 𑒁𑒣𑒢 𑒋𑒏𑒙𑒰 𑒖𑒲𑒫𑒢-𑒬𑒻𑒪𑒲𑒏 𑒍 𑒢𑒱𑒩𑓂𑒧𑒰𑒝 𑒏𑒋𑒢𑒹 𑒕𑒟𑒱। 𑒍𑒯𑒱 𑒣𑒩𑒱𑒝𑒰𑒧𑒮𑒿 𑒪𑒛𑓃𑒥𑒰𑒏 𑒫𑓂𑒨𑒫𑒮𑓂𑒟𑒰 𑒏𑒋𑒢𑒹 𑒕𑒟𑒱। 𑒞𑒯𑒱𑒢𑒰 𑒯𑒧𑒩𑒰 𑒪𑒼𑒏𑒢𑒱 𑒮𑒹𑒯𑒼 𑒔𑒰𑒩𑒱 𑒛𑒰𑒃𑒧𑒹𑒢𑓂𑒬𑒢𑒧𑒹 𑒩𑒯𑒋 𑒥𑒪𑒰 𑒏𑒼𑒢𑒼 𑒮𑒧𑓂𑒦𑒰𑒫𑒱𑒞 𑒖𑒲𑒫𑒏 𑒫𑒰 𑒄 𑒏𑒯𑒴 𑒖𑒹 𑒞𑒲𑒢𑒮𑒿 𑒥𑒹𑒬𑒲 𑒛𑒰𑒃𑒧𑒹𑒢𑓂𑒬𑒢𑒧𑒹 𑒖𑒱𑒢𑒯𑒰𑒩 𑒖𑒲𑒫𑒏 𑒯𑒮𑓂𑒞𑒏𑓂𑒭𑒹𑒣𑒏𑒹𑒿 𑒔𑒱𑒢𑓂𑒯𑒥𑒰𑒏 𑒣𑓂𑒩𑒨𑒰𑒮 𑒏𑒩𑒥”। 𑒡𑒾𑒧𑓂𑒨 𑒏𑒯𑒻𑒞 𑒩𑒯𑒪𑒰𑒯।
𑒋𑒏 𑒂 𑒠𑒴 𑒛𑒰𑒃𑒧𑒹𑒢𑓂𑒬𑒢𑒧𑒹 𑒩𑒯𑒢𑒱𑒯𑒰𑒩𑒏 𑒠𑒴 𑒑𑒼𑒙 𑒣𑓂𑒩𑒨𑒼𑒑𑒬𑒰𑒪𑒰𑒏 𑒮𑒤𑒪𑒞𑒰𑒏 𑒥𑒰𑒠 𑒡𑒾𑒧𑓂𑒨𑒏 𑒄 𑒞𑒹𑒮𑒩 𑒣𑓂𑒩𑒨𑒼𑒑 𑒕𑒪।
𑒋𑒏 𑒫𑒱𑒧𑒲𑒨 𑒖𑒲𑒫 𑒖𑒹𑒢𑒰 𑒋𑒏𑒙𑒰 𑒥𑒱𑒢𑓂𑒠𑒳। 𑒥𑒔𑓂𑒔𑒰𑒧𑒹 𑒍 𑒣𑒜𑓃𑒻𑒞 𑒕𑒪𑒰𑒯 𑒖𑒹 𑒩𑒹𑒐𑒰 𑒠𑒴 𑒙𑒰 𑒥𑒱𑒢𑓂𑒠𑒳𑒏𑒹𑒿 𑒖𑒼𑒛𑓃𑒻𑒞 𑒕𑒻𑒏। 𑒢𑒘𑒱 𑒞𑓄 𑒥𑒱𑒢𑓂𑒠𑒳𑒧𑒹 𑒏𑒼𑒢𑒼 𑒔𑒾𑒛𑓃𑒰𑒃 𑒠𑒹𑒐𑒢𑒰 𑒖𑒰𑒃𑒞 𑒁𑒕𑒱 𑒂 𑒢𑒯𑒱𑒨𑒹 𑒩𑒹𑒐𑒰𑒧𑒹। 𑒩𑒹𑒐𑒰 𑒢𑒧𑒑𑒩 𑒩𑒯𑒻𑒞 𑒁𑒕𑒱 𑒧𑒳𑒠𑒰 𑒥𑒱𑒢𑓂𑒠𑒳𑒧𑒹 𑒞𑒿 𑒔𑒾𑒛𑓃𑒰𑒃𑒏 𑒮𑓀𑒑 𑒪𑒧𑓂𑒥𑒰𑒃 𑒮𑒹𑒯𑒼 𑒢𑒯𑒱 𑒩𑒯𑒻𑒞 𑒕𑒻𑒏। 𑒋𑒏 𑒫𑒱𑒧𑒲𑒨 𑒫𑒱𑒬𑓂𑒫𑒧𑒹 𑒧𑒰𑒞𑓂𑒩 𑒂𑒑𑒰𑒿 𑒂 𑒣𑒰𑒕𑒰𑒿 𑒩𑒯𑒻𑒞 𑒁𑒕𑒱। 𑒢𑒘𑒱 𑒁𑒕𑒱 𑒫𑒰𑒧 𑒠𑒯𑒱𑒢𑒏 𑒥𑒼𑒡 𑒢𑒯𑒱𑒨𑒹 𑒆𑒣𑒩 𑒢𑒲𑒔𑒰𑒿𑒏। 𑒧𑒰𑒞𑓂𑒩 𑒮𑒩𑒪 𑒩𑒹𑒐𑒰, 𑒫𑒏𑓂𑒩𑒞𑒰 𑒏𑒢𑒱𑒨𑒼 𑒢𑒯𑒱। 𑒂𑒥 𑒄 𑒢𑒹 𑒥𑒳𑒗𑒱 𑒪𑒱𑒁 𑒖𑒹 𑒁𑒯𑒰𑒿 𑒖𑒞𑒋 𑒥𑒻𑒮𑒪 𑒕𑒲, 𑒍𑒞𑒋 𑒋𑒏𑒙𑒰 𑒩𑒹𑒐𑒰 𑒫𑒱𑒔𑒩𑒝 𑒏𑒩𑒋 𑒪𑒰𑒑𑒞। 𑒫𑒩𑒝 𑒄 𑒥𑒳𑒗𑒴 𑒖𑒹 𑒍 𑒩𑒹𑒐𑒰 𑒧𑒰𑒞𑓂𑒩 𑒁𑒕𑒱, 𑒢𑒯𑒱 𑒏𑒼𑒢𑒼 𑒂𑒢 𑒥𑒯𑒱𑓁।
“𑒠𑓂𑒫𑒱 𑒥𑒲𑒧𑒲𑒨 𑒥𑓂𑒩𑒯𑓂𑒧𑒰𑒝𑓂𑒛 𑒦𑒹𑒪 𑒖𑒞𑒋 𑒂𑒑𑒴 𑒣𑒰𑒕𑒴𑒏 𑒫𑒱𑒯𑒰𑒨 𑒫𑒰𑒧 𑒠𑒯𑒱𑒢 𑒮𑒹𑒯𑒼 𑒁𑒕𑒱 𑒧𑒳𑒠𑒰 𑒆𑒣𑒩 𑒂 𑒢𑒲𑒕𑒰𑒿 𑒋𑒞𑒋 𑒢𑒯𑒱 𑒁𑒕𑒱। 𑒥𑒳𑒗𑒴 𑒖𑒹 𑒁𑒯𑒰𑒿𑒏 𑒮𑒼𑒗𑒰𑒿 𑒩𑒰𑒐𑒪 𑒮𑒱𑒞𑒪𑒣𑒰𑒙𑒲𑒏 𑒮𑒠𑒵𑒬 𑒄 𑒯𑒼𑒋𑒞, 𑒖𑒰𑒯𑒱𑒧𑒹 𑒔𑒾𑒛𑓃𑒰𑒃 𑒫𑒱𑒠𑓂𑒨𑒧𑒰𑒢 𑒢𑒯𑒱 𑒁𑒕𑒱।”
“𑒧𑒳𑒠𑒰 𑒬𑓂𑒩𑒲𑒧𑒰𑒢𑓂 𑒄 𑒔𑒪𑒻𑒞 𑒁𑒕𑒱 𑒏𑒼𑒢𑒰। 𑒑𑒣 𑒏𑒼𑒢𑒰 𑒏𑒩𑒞, 𑒋𑒏 𑒠𑒼𑒮𑒩𑒏𑒹𑒿 𑒮𑓀𑒠𑒹𑒬 𑒏𑒼𑒢𑒰 𑒠𑒹𑒞”।
“𑒂𑒆। 𑒣𑒯𑒱𑒢𑒹 𑒋𑒏 𑒫𑒱𑒧𑒲𑒨 𑒥𑓂𑒩𑒯𑓂𑒧𑒰𑒝𑓂𑒛𑒏 𑒁𑒫𑒪𑒼𑒏𑒢 𑒏𑒩𑒻𑒞 𑒕𑒲”।
𑒡𑒾𑒧𑓂𑒨 𑒋𑒏 𑒫𑒱𑒧𑒲𑒨 𑒣𑓂𑒩𑒨𑒼𑒑𑒬𑒰𑒪𑒰𑒏 𑒪𑒑 𑒖𑒰𑒃𑒞 𑒕𑒟𑒱। 𑒍𑒞𑒋 𑒥𑒱𑒢𑓂𑒠𑒳 𑒂 𑒥𑒱𑒢𑓂𑒠𑒳𑒏 𑒮𑒧𑓂𑒧𑒱𑒪𑒢 𑒮𑓂𑒫𑒩𑒴𑒣 𑒥𑒢𑒪 𑒩𑒹𑒐𑒰 𑒮𑒦 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱। 𑒄 𑒖𑒲𑒫 𑒮𑒦 𑒁𑒕𑒱। 𑒋𑒏 𑒫𑒱𑒧𑒲𑒨 𑒥𑓂𑒩𑒯𑓂𑒧𑒰𑒝𑓂𑒛𑒏 𑒖𑒲𑒫 𑒖𑒹 𑒋𑒯𑒱 𑒞𑒟𑓂𑒨𑒮𑒿 𑒁𑒢𑒦𑒱𑒖𑓂𑒘 𑒁𑒕𑒱 𑒖𑒹 𑒞𑒲𑒢 𑒫𑒱𑒧𑒲𑒨 𑒏𑒼𑒢𑒼 𑒖𑒲𑒫 𑒍𑒏𑒩𑒰 𑒮𑒦𑒏𑒹𑒿 𑒠𑒹𑒐𑒱 𑒩𑒯𑒪 𑒕𑒻𑒏।
“𑒠𑒹𑒐𑒴। 𑒄 𑒮𑒦 𑒖𑒲𑒫 𑒋𑒏 𑒠𑒼𑒮𑒩𑒰𑒏𑒹𑒿 𑒣𑒰𑒩 𑒢𑒯𑒱 𑒏𑒋 𑒮𑒏𑒻𑒞 𑒁𑒕𑒱। 𑒂𑒑𑒴 𑒥𑒜𑓃𑒞 𑒞𑒿 𑒞𑒰𑒫𑒞 𑒡𑒩𑒱 𑒖𑒰 𑒡𑒩𑒱 𑒏𑒼𑒢𑒼 𑒥𑒱𑒢𑓂𑒠𑒳 𑒫𑒰 𑒩𑒹𑒐𑒰𑒮𑒿 𑒙𑒏𑓂𑒏𑒩 𑒢𑒯𑒱 𑒦𑒋 𑒖𑒋𑒞𑒻𑒏। 𑒂 𑒣𑒰𑒕𑒰𑒿 𑒯𑒙𑒞 𑒞𑒰𑒫𑒞 𑒡𑒩𑒱 𑒨𑒰𑒫𑒞 𑒤𑒹𑒩 𑒏𑒼𑒢𑒼 𑒖𑒲𑒫𑒮𑒿 𑒦𑒹𑒿𑒙 𑒢𑒯𑒱 𑒯𑒼𑒋𑒞𑒻𑒏। 𑒋𑒏 𑒠𑒼𑒮𑒩𑒰𑒏𑒹𑒿 𑒮𑓀𑒠𑒹𑒬 𑒮𑒹𑒯𑒼 𑒧𑒰𑒞𑓂𑒩 𑒋𑒏𑒯𑒱 𑒣𑒿𑒏𑓂𑒞𑓂𑒞𑒱𑒧𑒹 𑒠𑒋 𑒮𑒏𑒞 𑒏𑒰𑒩𑒝 𑒣𑓀𑒏𑓂𑒞𑓂𑒞𑒱𑒏 𑒥𑒰𑒯𑒩 𑒏𑒱𑒕𑒳 𑒢𑒯𑒱 𑒕𑒻𑒏। 𑒍𑒏𑒩 𑒥𑓂𑒩𑒯𑓂𑒧𑒰𑒝𑓂𑒛 𑒋𑒏𑒯𑒱 𑒣𑓀𑒏𑓂𑒞𑓂𑒞𑒱𑒧𑒹 𑒮𑒧𑒰𑒣𑓂𑒞 𑒦𑒋 𑒖𑒰𑒃𑒞 𑒁𑒕𑒱।
“𑒂𑒥 𑒔𑒪𑒴 𑒠𑓂𑒫𑒱 𑒥𑒲𑒧𑒲𑒨 𑒣𑓂𑒩𑒨𑒼𑒑𑒬𑒰𑒪𑒰𑒧𑒹”।
𑒮𑒦 𑒏𑓂𑒨𑒼 𑒣𑒰𑒕𑒰𑒿-𑒣𑒰𑒕𑒰𑒿 𑒖𑒰𑒃𑒞 𑒕𑒟𑒱।
“𑒋𑒞𑒨 𑒏𑒱𑒕𑒳 𑒩𑒧𑒝 𑒔𑒧𑒢 𑒁𑒕𑒱। 𑒣𑒯𑒱𑒪 𑒣𑓂𑒩𑒨𑒼𑒑𑒬𑒰𑒪𑒰 𑒞𑒿 𑒠𑒴 𑒞𑒯𑒮𑒿 𑒖𑒰𑒿𑒞𑒪 𑒕𑒪, 𑒠𑒳𑒢𑒴 𑒠𑒱𑒬𑒱𑒮𑒿 𑒂 𑒆𑒣𑒩𑒮𑒿 𑒮𑒹𑒯𑒼। 𑒧𑒰𑒞𑓂𑒩 𑒪𑒧𑓂𑒥𑒰𑒃 𑒁𑒢𑒢𑓂𑒞 𑒡𑒩𑒱 𑒖𑒰𑒃𑒞 𑒕𑒪। 𑒧𑒳𑒠𑒰 𑒋𑒞𑒨 𑒆𑒣𑒩 𑒂 𑒢𑒲𑒔𑒰𑒿𑒏 𑒮𑒞𑒯 𑒖𑒰𑒿𑒞𑒪 𑒁𑒕𑒱। 𑒄 𑒂𑒑𑒰𑒿 𑒣𑒰𑒕𑒰𑒿 𑒂 𑒫𑒰𑒧 𑒠𑒯𑒱𑒢 𑒠𑒳𑒢𑒴 𑒠𑒱𑒬𑒱 𑒁𑒢𑒢𑓂𑒞 𑒡𑒩𑒱 𑒖𑒰 𑒩𑒯𑒪 𑒁𑒕𑒱। 𑒞𑒰𑒯𑒱 𑒯𑒹𑒞𑒳 𑒯𑒧 𑒠𑒳𑒢𑒴 𑒣𑓂𑒩𑒨𑒼𑒬𑒰𑒪𑒰𑒏𑒹𑒿 𑒣𑒵𑒟𑓂𑒫𑒲𑒏 𑒆𑒣𑒩 𑒮𑓂𑒫𑒞𑓀𑒞𑓂𑒩 𑒢𑒦𑒧𑒹 𑒥𑒢𑒍𑒢𑒹 𑒕𑒲। 𑒋𑒞𑒳𑒏𑓂𑒏𑒰 𑒖𑒲𑒫𑒏𑒹𑒿 𑒠𑒹𑒐𑒴। 𑒮𑒲𑒞𑒪𑒣𑒰𑒙𑒲 𑒣𑒩 𑒏𑒱𑒕𑒳𑒍 𑒥𑒢𑒰 𑒠𑒱𑒨𑒾𑒏। 𑒖𑒹𑒢𑒰 𑒕𑒼𑒙 𑒥𑒔𑓂𑒔𑒰 𑒖𑒹 𑒂𑒡𑒳𑒢𑒱𑒏 𑒔𑒱𑒞𑓂𑒩 𑒥𑒢𑒥𑒻𑒞 𑒕𑒟𑒱। 𑒋𑒞𑒋 𑒍 𑒮𑒦 𑒣𑓂𑒩𑒏𑒰𑒩 𑒦𑒹𑒙𑒱 𑒖𑒋𑒞। 𑒧𑒳𑒠𑒰 𑒆𑒿𑒔𑒰𑒃𑒏 𑒖𑓂𑒘𑒰𑒢 𑒋𑒞𑒋 𑒢𑒯𑒱 𑒁𑒕𑒱। 𑒋𑒏 𑒠𑒼𑒮𑒩𑒏𑒹𑒿 𑒋𑒏 𑒥𑒹𑒩𑒧𑒹 𑒧𑒰𑒞𑓂𑒩 𑒩𑒹𑒐𑒰𑒏 𑒩𑒴𑒣𑒧𑒹 𑒠𑒹𑒐𑒻𑒞 𑒁𑒕𑒱 𑒄 𑒮𑒦। 𑒠𑒼𑒮𑒩 𑒏𑒼𑒝𑒮𑒿 𑒠𑒼𑒮𑒩 𑒩𑒹𑒐𑒰 𑒂 𑒞𑒐𑒢 𑒮𑓂𑒫𑒩𑒴𑒣𑒏 𑒖𑓂𑒘𑒰𑒢 𑒏𑒩𑒻𑒞 𑒖𑒰𑒃𑒞 𑒁𑒕𑒱। 𑒪𑒧𑓂𑒥𑒰𑒃 𑒂 𑒔𑒾𑒛𑓃𑒰𑒃 𑒮𑒦 𑒏𑒼𑒝𑒮𑒿 𑒥𑒠𑒪𑒞। 𑒧𑒳𑒠𑒰 𑒫𑒵𑒞𑓂𑒞𑒰𑒏𑒰𑒩 𑒖𑒲𑒫 𑒮𑒹𑒯𑒼 𑒯𑒼𑒃𑒞 𑒁𑒕𑒱। 𑒖𑒹𑒢𑒰 𑒠𑒹𑒐𑒴 𑒍 𑒖𑒲𑒫 𑒫𑒰𑒧 𑒏𑒰𑒞𑒧𑒹। 𑒋𑒏 𑒠𑒼𑒮𑒩𑒰𑒏𑒹𑒿 𑒮𑓀𑒠𑒹𑒬 𑒍𑒏𑒩𑒰 𑒪𑒑 𑒖𑒰 𑒏𑒋 𑒠𑒹𑒪 𑒖𑒰𑒃𑒞 𑒁𑒕𑒱। 𑒣𑒻𑒒 𑒮𑒧𑒴𑒯𑒧𑒹 𑒮𑓀𑒠𑒹𑒬 𑒣𑓂𑒩𑒮𑒰𑒩𑒱𑒞 𑒯𑒼𑒨𑒥𑒰𑒧𑒹 𑒜𑓃𑒹𑒩 𑒮𑒧𑒨 𑒪𑒰𑒑𑒱 𑒖𑒰𑒃𑒞 𑒁𑒕𑒱”।
“𑒬𑓂𑒩𑒲𑒧𑒰𑒢, 𑒏𑒲 𑒄 𑒮𑓀𑒦𑒫 𑒁𑒕𑒱, 𑒖𑒹𑒢𑒰 𑒯𑒧𑒩𑒰 𑒮𑒦𑒏 𑒮𑒼𑒗𑒰𑒿 𑒩𑒯𑒪𑒼 𑒅𑒞𑓂𑒞𑒩 𑒍 𑒮𑒦 𑒯𑒧𑒩𑒰 𑒪𑒼𑒏𑒢𑒱𑒏 𑒁𑒮𑓂𑒞𑒱𑒞𑓂𑒫𑒮𑒿 𑒁𑒢𑒦𑒱𑒖𑓂𑒘 𑒁𑒕𑒱 𑒞𑒯𑒱𑒢𑒰 𑒯𑒧𑒩𑒰 𑒮𑒦 𑒮𑒹𑒯𑒼 𑒏𑒼𑒢𑒼 𑒔𑒰𑒩𑒱 𑒂 𑒥𑒹𑒬𑒲 𑒫𑒱𑒧𑒲𑒨 𑒖𑒲𑒫𑒏 𑒁𑒮𑓂𑒞𑒱𑒞𑓂𑒫𑒮𑒿 𑒁𑒢𑒦𑒱𑒖𑓂𑒘 𑒯𑒼𑒃”।
“𑒯𑒿 𑒞𑒏𑒩𑒹 𑒔𑒩𑓂𑒔𑒰 𑒂 𑒣𑓂𑒩𑒨𑒼𑒑 𑒏𑒩𑒥𑒰𑒏 𑒯𑒹𑒞𑒳 𑒯𑒧𑒩𑒰 𑒮𑒦 𑒋𑒞𑒋 𑒋𑒏𑒞𑓂𑒩 𑒦𑒹𑒪 𑒕𑒲। 𑒁𑒯𑒰𑒿𑒧𑒹 𑒮𑒿 𑒔𑒰𑒩𑒱 𑒑𑒼𑒙𑒹 𑒯𑒧𑒩𑒰 𑒮𑓀𑒑 𑒋𑒯𑒱 𑒢𑒫 𑒏𑒰𑒩𑓂𑒨𑒏 𑒯𑒹𑒞𑒳 𑒂𑒥𑒱 𑒮𑒏𑒻𑒞 𑒕𑒲। 𑒄 𑒨𑒼𑒖𑒢𑒰 𑒏𑒢𑒹𑒏 𑒏𑒚𑒱𑒢𑒰𑒯 𑒁𑒕𑒱। 𑒏𑒞𑒹𑒏 𑒮𑒰𑒪 𑒡𑒩𑒱 𑒄 𑒨𑒼𑒖𑒢𑒰 𑒔𑒪𑒞 𑒂 𑒣𑒩𑒱𑒝𑒰𑒧 𑒏𑒯𑒱𑒨𑒰 𑒖𑒰 𑒏𑒋 𑒦𑒹𑒙𑒞, 𑒞𑒏𑒩 𑒏𑒼𑒢𑒼 𑒮𑒲𑒧𑒰 𑒢𑒱𑒩𑓂𑒡𑒰𑒩𑒝 𑒢𑒯𑒱 𑒁𑒕𑒱”।
𑒣𑒰𑒿𑒔 𑒙𑒰 𑒫𑒱𑒠𑓂𑒨𑒰𑒩𑓂𑒟𑒲 𑒬𑓂𑒫𑒹𑒞𑒏𑒹𑒞𑒳, 𑒁𑒣𑒰𑒪𑒰, 𑒮𑒞𑓂𑒨𑒏𑒰𑒧, 𑒩𑒻𑒏𑓂𑒫 𑒂 𑒒𑒼𑒭𑒰 𑒋𑒯𑒱 𑒏𑒰𑒩𑓂𑒨𑒏 𑒯𑒹𑒞𑒳 𑒮𑒯𑒩𑓂𑒭 𑒞𑒻𑒨𑒰𑒩 𑒦𑒹𑒪𑒰𑒯। 𑒡𑒾𑒧𑓂𑒨 𑒣𑒰𑒿𑒔𑒴 𑒑𑒼𑒙𑒹𑒏𑒹𑒿 𑒁𑒣𑒢 𑒨𑒼𑒖𑒢𑒰𑒧𑒹 𑒮𑒧𑓂𑒧𑒱𑒪𑒱𑒞 𑒏𑒋 𑒪𑒹𑒪𑒢𑓂𑒯𑒱।
“𑒔𑒰𑒩𑒱 𑒥𑒲𑒧𑒲𑒨 𑒫𑒱𑒬𑓂𑒫𑒧𑒹 𑒞𑒲𑒢 𑒥𑒲𑒧𑒲𑒨 𑒫𑒱𑒬𑓂𑒫𑒮𑒿 𑒏𑒱𑒕𑒳 𑒁𑒢𑓂𑒞𑒩 𑒁𑒕𑒱। 𑒞𑒲𑒢 𑒥𑒲𑒧𑒲𑒨 𑒫𑒱𑒬𑓂𑒫 𑒦𑒹𑒪 𑒞𑒲𑒢 𑒙𑒰 𑒪𑒧𑓂𑒥𑒰𑒃, 𑒔𑒾𑒛𑓃𑒰𑒃 𑒂 𑒑𑒯𑒩𑒰𑒃 𑒧𑒳𑒠𑒰 𑒋𑒯𑒱𑒧𑒹 𑒮𑒧𑒨𑒏 𑒋𑒏𑒙𑒰 𑒥𑒲𑒧 𑒮𑒹𑒯𑒼 𑒮𑒧𑓂𑒧𑒱𑒪𑒱𑒞 𑒁𑒕𑒱। 𑒞𑒿 𑒔𑒰𑒩𑒱 𑒥𑒲𑒧𑒲𑒨 𑒫𑒱𑒬𑓂𑒫𑒧𑒹 𑒂𑒏𑒱 𑒣𑒰𑒿𑒔 𑒥𑒲𑒧𑒲𑒨 𑒫𑒱𑒬𑓂𑒫𑒧𑒹 𑒮𑒧𑒨𑒏 𑒋𑒏𑒮𑒿 𑒥𑒹𑒬𑒲 𑒥𑒲𑒧𑒏 𑒮𑒧𑓂𑒦𑒰𑒫𑒢𑒰 𑒣𑒩 𑒮𑒹𑒯𑒼 𑒫𑒱𑒔𑒰𑒩 𑒏𑒋𑒪 𑒖𑒋𑒞। 𑒧𑒳𑒠𑒰 𑒣𑒯𑒱𑒢𑒹 𑒔𑒰𑒩𑒱 𑒥𑒲𑒧𑒲𑒨 𑒫𑒱𑒬𑓂𑒫 𑒣𑒩 𑒯𑒧𑒩𑒰 𑒮𑒦 𑒬𑒼𑒡 𑒂𑒑𑒰𑒿 𑒥𑒜𑓃𑒰𑒋𑒥। 𑒋𑒯𑒱𑒧𑒹 𑒧𑒴𑒪𑒞𑓁 𑒮𑒧𑒨𑒏 𑒋𑒏𑒙𑒰 𑒥𑒲𑒧 𑒮𑒹𑒯𑒼 𑒩𑒯𑒞 𑒂 𑒞𑒰𑒯𑒱𑒮𑒿 𑒥𑒲𑒧𑒏 𑒮𑓀𑒐𑓂𑒨𑒰 𑒣𑒰𑒿𑒔 𑒦𑒋 𑒖𑒰𑒨𑒞। 𑒮𑒧𑒨𑒏𑒹𑒿 𑒧𑒱𑒪𑒰𑒏𑒋 𑒔𑒰𑒩𑒱 𑒥𑒲𑒧𑒏 𑒫𑒱𑒬𑓂𑒫𑒧𑒹 𑒯𑒧𑒩𑒰 𑒮𑒦 𑒖𑒲𑒥𑒱 𑒩𑒯𑒪 𑒕𑒲। 𑒖𑒹𑒢𑒰 𑒫𑒩𑓂𑒝 𑒁𑒢𑓂𑒡𑒞𑒰𑒮𑒿 𑒑𑓂𑒩𑒮𑒱𑒞 𑒪𑒼𑒏𑒏𑒹𑒿 𑒪𑒰𑒪 𑒂 𑒯𑒩𑒱𑒁𑒩𑒏 𑒁𑒢𑓂𑒞𑒩 𑒢𑒯𑒱 𑒥𑒳𑒗𑒱 𑒣𑒛𑓃𑒻𑒞 𑒕𑒻𑒏 𑒞𑒰𑒯𑒱 𑒣𑓂𑒩𑒏𑒰𑒩𑒮𑒿 𑒯𑒧𑒩𑒰 𑒮𑒦 𑒋𑒏𑒙𑒰 𑒥𑒹𑒬𑒲 𑒥𑒲𑒧𑒏 𑒫𑒱𑒬𑓂𑒫𑒏 𑒏𑒪𑓂𑒣𑒢𑒰 𑒏𑒋 𑒮𑒏𑒻𑒞 𑒕𑒲, 𑒁𑒣𑓂𑒩𑒞𑓂𑒨𑒏𑓂𑒭 𑒁𑒢𑒳𑒦𑒫 𑒮𑒹𑒯𑒼 𑒏𑒋 𑒮𑒏𑒻𑒞 𑒕𑒲”। 𑒡𑒾𑒧𑓂𑒨 𑒥𑒖𑒪𑒰𑒯।
𑒫𑓂𑒨𑒰𑒐𑓂𑒨𑒰𑒢 𑒮𑒧𑒰𑒣𑓂𑒞 𑒦𑒹𑒪 𑒂 𑒮𑒦 𑒏𑓂𑒨𑒼 𑒁𑒣𑒢-𑒁𑒣𑒢 𑒣𑓂𑒩𑒏𑒼𑒭𑓂𑒚𑒧𑒹 𑒔𑒪𑒱 𑒑𑒹𑒪𑒰𑒯। 𑒮𑒻𑒠𑓂𑒡𑒰𑓀𑒞𑒱𑒏 𑒬𑒼𑒡 𑒂 𑒞𑒏𑒩 𑒥𑒰𑒠 𑒍𑒏𑒩 𑒣𑓂𑒩𑒰𑒨𑒼𑒑𑒱𑒏 𑒣𑓂𑒩𑒨𑒼𑒑𑒧𑒹 𑒮𑒦 𑒑𑒼𑒙𑒹 𑒪𑒰𑒑𑒱 𑒑𑒹𑒪𑒰𑒯।
𑒡𑒩𑒰𑒞𑒪 𑒣𑒩 𑒞𑓂𑒩𑒱𑒦𑒳𑒖 𑒐𑒹𑓀𑒔𑒱 𑒏𑒋 𑒋𑒏 𑒮𑒨 𑒁𑒮𑓂𑒮𑒲 𑒁𑓀𑒬𑒏 𑒏𑒼𑒝 𑒖𑒼𑒛𑓃𑒱 𑒏𑒋 𑒥𑒢𑒋𑒥𑒰𑒏 𑒁𑒞𑒱𑒩𑒱𑒏𑓂𑒞𑓂𑒞 𑒣𑒵𑒟𑓂𑒫𑒲𑒏𑒰𑒩 𑒂𑒏𑒵𑒞𑒱𑒧𑒹 𑒐𑒹𑓀𑒔𑒪 𑒑𑒹𑒪 𑒞𑓂𑒩𑒱𑒦𑒳𑒖 𑒖𑒰𑒯𑒱 𑒧𑒹 𑒣𑓂𑒩𑒞𑓂𑒨𑒹𑒏 𑒩𑒹𑒐𑒰 𑒋𑒏 𑒠𑒼𑒮𑒩𑒰𑒮𑒿 𑒢𑒥𑓂𑒥𑒹 𑒁𑓀𑒬𑒏 𑒏𑒼𑒝 𑒣𑒩 𑒩𑒯𑒻𑒞 𑒁𑒕𑒱 ।
𑒧𑒳𑒠𑒰 𑒋𑒞𑒋 𑒩𑒹𑒐𑒰 𑒮𑒼𑒗 𑒢𑒯𑒱 𑒙𑒹𑒜𑓃 𑒩𑒯𑒻𑒞 𑒁𑒕𑒱। 𑒍𑒯𑒱𑒢𑒰 𑒮𑒧𑒨 𑒂 𑒮𑓂𑒟𑒰𑒢𑒏𑒹𑒿 𑒙𑒹𑒜 𑒦𑒹𑒪𑒰 𑒣𑒩 𑒋𑒯𑒢 𑒮𑓀𑒦𑒫 𑒦𑒋 𑒮𑒏𑒻𑒞 𑒁𑒕𑒱 𑒖𑒹 𑒯𑒧𑒩𑒰 𑒮𑒦 𑒣𑓂𑒩𑒏𑒰𑒬𑒏 𑒑𑒞𑒱𑒮𑒿 𑒍𑒯𑒱 𑒧𑒰𑒩𑓂𑒑𑒹 𑒖𑒰𑒃 𑒂 𑒣𑒳𑒢𑓁 𑒒𑒳𑒩𑒱 𑒂𑒥𑒲। 𑒣𑓂𑒩𑒏𑒰𑒬 𑒮𑒴𑒩𑓂𑒨𑒏 𑒪𑒑𑒮𑒿 𑒖𑒰𑒃𑒞 𑒁𑒕𑒱 𑒞𑒿 𑒍𑒏𑒩 𑒩𑒮𑓂𑒞𑒰 𑒏𑒢𑒹𑒏 𑒥𑒠𑒪𑒱 𑒖𑒰𑒃𑒞 𑒕𑒻𑒏।
𑒬𑓂𑒫𑒹𑒞𑒏𑒹𑒞𑒳 𑒂 𑒩𑒻𑒏𑓂𑒫 𑒋𑒏𑒙𑒰 𑒮𑒱𑒠𑓂𑒡𑒰𑒢𑓂𑒞 𑒠𑒹𑒪𑒢𑓂𑒯𑒱 । 𑒖𑒹𑒢𑒰 𑒏𑒚𑒤𑒼𑒩𑒥𑒰 𑒏𑒰𑒚𑒧𑒹, 𑒫𑒵𑒏𑓂𑒭𑒧𑒹 𑒐𑒼𑒯 𑒥𑒢𑒥𑒻𑒞 𑒁𑒕𑒱, 𑒞𑒯𑒱𑒢𑒰 𑒋𑒏𑒙𑒰 𑒮𑒧𑒨 𑒂 𑒮𑓂𑒟𑒰𑒢𑒏𑒹𑒿 𑒖𑒼𑒛𑓃𑒋𑒥𑒪𑒰 𑒐𑒼𑒯𑒏 𑒢𑒱𑒩𑓂𑒧𑒰𑒝 𑒬𑒳𑒩𑒴 𑒦𑒋 𑒑𑒹𑒪। 𑒁𑒣𑒰𑒪𑒰 𑒋𑒏𑒙𑒰 𑒥𑓂𑒩𑒯𑓂𑒧𑒰𑒝𑓂𑒛𑒏 𑒛𑒼𑒩𑒲𑒏 𑒢𑒱𑒩𑓂𑒧𑒰𑒝 𑒏𑒋𑒪𑒢𑓂𑒯𑒱, 𑒖𑒏𑒩𑒰 𑒥𑒰𑒢𑓂𑒯𑒱 𑒏𑒋 𑒣𑓂𑒩𑒏𑒰𑒬 𑒫𑒰 𑒍𑒯𑒴𑒮𑒿 𑒥𑒹𑒬𑒲 𑒑𑒞𑒱𑒮𑒿 𑒅𑒛𑓃𑒥𑒰𑒏 𑒮𑒧𑓂𑒦𑒰𑒫𑒢𑒰 𑒕𑒪। 𑒮𑒞𑓂𑒨𑒏𑒰𑒧 𑒋𑒏𑒙𑒰 𑒋𑒯𑒢 𑒮𑒱𑒠𑓂𑒡𑒰𑒢𑓂𑒞𑒏 𑒮𑒧𑓂𑒦𑒰𑒫𑒢𑒰 𑒣𑒩 𑒏𑒰𑒩𑓂𑒨 𑒬𑒳𑒩𑒴 𑒏𑒋𑒢𑒹 𑒕𑒪𑒰𑒯, 𑒖𑒏𑒩 𑒧𑒰𑒡𑓂𑒨𑒧𑒮𑒿 𑒞𑒲𑒢 𑒙𑒰 𑒮𑓂𑒟𑒰𑒢𑒱𑒏 𑒂 𑒋𑒏𑒙𑒰 𑒮𑒧𑒨𑒏 𑒥𑒲𑒧𑒏 𑒁𑒞𑒱𑒩𑒱𑒏𑓂𑒞𑓂𑒞 𑒏𑒞𑒰𑒏 𑒂𑒩 𑒥𑒲𑒧 𑒕𑒪 𑒖𑒹 𑒥𑒛𑓃 𑒪𑒒𑒳 𑒕𑒪, 𑒙𑒹𑒜 𑒕𑒪 𑒂 𑒋𑒯𑒱 𑒞𑒩𑒯𑒹𑒿 𑒫𑒩𑓂𑒞𑓂𑒞𑒧𑒰𑒢 𑒫𑒱𑒬𑓂𑒫 𑒪𑒑𑒦𑒑 𑒠𑒮 𑒥𑒲𑒧𑒲𑒨 𑒕𑒪।
𑒒𑒼𑒭𑒰 𑒮𑓂𑒟𑒰𑒢 𑒮𑒧𑒨𑒏 𑒧𑒰𑒡𑓂𑒨𑒧𑒮𑒿 𑒦𑒴𑒞𑒏𑒰𑒪𑒧𑒹 𑒣𑒯𑒳𑒿𑒔𑒥𑒰𑒮𑒿 𑒣𑒴𑒩𑓂𑒫 𑒠𑒹𑒬𑒏 𑒏𑒰𑒢𑒴𑒢-𑒫𑒱𑒡𑒱𑒧𑒹 𑒄 𑒣𑒩𑒱𑒫𑒩𑓂𑒞𑓂𑒞𑒢 𑒏𑒩𑒥𑒰𑒏 𑒯𑒹𑒞𑒳 𑒏𑒯𑒪𑒢𑓂𑒯𑒱 𑒖𑒰𑒯𑒱𑒮𑒿 𑒏𑒼𑒢𑒼 𑒫𑒻𑒖𑓂𑒘𑒰𑒢𑒱𑒏 𑒦𑒴𑒞𑒏𑒰𑒪𑒧𑒹 𑒣𑒯𑒳𑒿𑒔𑒱 𑒏𑒋 𑒁𑒣𑒢 𑒫𑒰 𑒁𑒣𑒢 𑒬𑒞𑓂𑒩𑒳𑒏𑒹𑒿 𑒖𑒢𑓂𑒧𑒮𑒿 𑒣𑒴𑒩𑓂𑒫 𑒢𑒯𑒱 𑒧𑒰𑒩𑒱 𑒠𑒋। 𑒒𑒼𑒭𑒰 𑒫𑒱𑒬𑓂𑒫𑒏 𑒢𑒱𑒩𑓂𑒧𑒰𑒝𑒧𑒹 𑒦𑒑𑒫𑒰𑒢𑒏 𑒨𑒼𑒑𑒠𑒰𑒢𑒏 𑒔𑒩𑒔𑒰 𑒏𑒩𑒻𑒞 𑒩𑒯𑒻𑒞 𑒕𑒪𑒲𑒯। 𑒖𑓂𑒨𑒼𑒿 𑒫𑒱𑒬𑓂𑒫𑒏 𑒢𑒱𑒩𑓂𑒧𑒰𑒝 𑒦𑒑𑒫𑒰𑒢 𑒏𑒋𑒪𑒢𑓂𑒯𑒱, 𑒋𑒏𑒙𑒰 𑒫𑒱𑒮𑓂𑒤𑒼𑒙 𑒠𑓂𑒫𑒰𑒩𑒰 𑒂 𑒋𑒏𑒩𑒰 𑒮𑒰𑒣𑒹𑒏𑓂𑒭𑒞𑒰 𑒂 𑒁𑒢𑒱𑒬𑓂𑒔𑒱𑒞𑒞𑒰𑒏 𑒮𑒱𑒠𑓂𑒡𑒰𑓀𑒞𑒏 𑒁𑒢𑓂𑒞𑒩𑓂𑒑𑒞 𑒕𑒼𑒛𑓃𑒱 𑒠𑒹𑒪𑒢𑓂𑒯𑒱 𑒥𑒜𑓃𑒥𑒰𑒏 𑒪𑒹𑒪 𑒞𑒿 𑒤𑒹𑒩 𑒮𑒧𑒨𑒏 𑒔𑒰𑒦𑒲 𑒞𑒿 𑒯𑒳𑒢𑒏𑒹 𑒯𑒰𑒟𑒧𑒹 𑒕𑒢𑓂𑒯𑒱। 𑒖𑒐𑒢 𑒍 𑒔𑒰𑒯𑒞𑒰𑒯 𑒤𑒹𑒩𑒮𑒿 𑒮𑒦𑒙𑒰 𑒬𑒳𑒩𑒴 𑒦𑒋 𑒖𑒰𑒨𑒞। 𑒖𑓂𑒨𑒼𑒿 𑒮𑒹 𑒢𑒯𑒱 𑒁𑒕𑒱, 𑒞𑒐𑒢 𑒮𑒧𑒨 𑒮𑓂𑒟𑒰𑒢𑒏 𑒏𑒼𑒢𑒼 𑒮𑒲𑒧𑒰, 𑒏𑒼𑒢𑒼 𑒞𑒙-𑒏𑒱𑒢𑒰𑒩 𑒢𑒯𑒱 𑒁𑒕𑒱, 𑒞𑒐𑒢 𑒞𑒿 𑒄 𑒥𑓂𑒩𑒯𑓂𑒧𑒰𑒝𑓂𑒛 𑒁𑒣𑒢𑒹 𑒮𑒦 𑒏𑒱𑒕𑒳 𑒁𑒕𑒱, 𑒫𑒱𑒬𑓂𑒫𑒠𑒹𑒫 । 𑒞𑒐𑒢 𑒦𑒑𑒫𑒰𑒢𑒏 𑒏𑒼𑒢 𑒮𑓂𑒟𑒰𑒢? 𑒒𑒼𑒭𑒰 𑒮𑒼𑒔𑒻𑒞 𑒩𑒯𑒪𑒲𑒯।
𑒂𑒥 𑒡𑒾𑒧𑓂𑒨𑒏 𑒪𑒹𑒪 𑒮𑒧𑒨 𑒂𑒥𑒱 𑒑𑒹𑒪 𑒕𑒪। 𑒁𑒣𑒢 𑒣𑒰𑒿𑒔𑒴 𑒫𑒱𑒠𑓂𑒨𑒰𑒩𑓂𑒟𑒲𑒏 𑒮𑒦 𑒮𑒱𑒠𑓂𑒡𑒰𑓀𑒞𑒏𑒹𑒿 𑒍 𑒣𑓂𑒩𑒨𑒼𑒑𑒧𑒹 𑒥𑒠𑒪𑒱 𑒠𑒹𑒪𑒢𑓂𑒯𑒱। 𑒂 𑒂𑒥 𑒮𑒧𑒨 𑒂𑒥𑒱 𑒑𑒹𑒪। 𑒣𑒯𑒩𑒩𑒰𑒞𑒱।
𑒣𑒳𑒭𑓂𑒣𑒏 𑒫𑒱𑒧𑒰𑒢 𑒞𑒻𑒨𑒰𑒩 𑒦𑒹𑒪 𑒮𑓂𑒟𑒰𑒢-𑒮𑒧𑒨𑒏 𑒐𑒼𑒯𑒮𑒿 𑒔𑒪𑒥𑒰𑒏 𑒪𑒹𑒪। 𑒥𑓂𑒩𑒯𑓂𑒧𑒰𑒝𑓂𑒛𑒲𑒨 𑒛𑒼𑒩𑒲 𑒥𑒰𑒢𑓂𑒯𑒱 𑒠𑒹𑒪 𑒑𑒹𑒪 𑒣𑒳𑒭𑓂𑒣𑒏 𑒣𑒩। 𑒡𑒾𑒧𑓂𑒨 𑒮𑒦𑒮𑒿 𑒫𑒱𑒠𑒰 𑒪𑒹𑒪𑒢𑓂𑒯𑒱। 𑒣𑓂𑒩𑒏𑒰𑒬𑒏 𑒑𑒞𑒱𑒮𑒿 𑒔𑒪𑒪 𑒫𑒱𑒧𑒰𑒢 𑒂 𑒐𑒼𑒯𑒧𑒹 𑒮𑓂𑒟𑒰𑒢 𑒂 𑒮𑒧𑒨𑒏𑒹𑒿 𑒙𑒹𑒜𑓃 𑒏𑒩𑒻𑒞 𑒂𑒑𑒰𑒿 𑒥𑒜𑓃𑒱 𑒑𑒹𑒪। 𑒥𑓂𑒩𑒯𑓂𑒧𑒰𑒝𑓂𑒛𑒏 𑒏𑒹𑒢𑓂𑒠𑓂𑒩𑒧𑒹 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒡𑒾𑒧𑓂𑒨। 𑒣𑒯𑒩𑒩𑒰𑒞𑒱 𑒥𑒲𑒞𑒪 𑒕𑒪। 𑒂𑒑𑒰𑒿 𑒏𑒰𑒩𑒲 𑒑𑒯𑓂𑒫𑒩 𑒮𑒦 𑒋𑒯𑒱 𑒮𑒧𑒨 𑒂 𑒮𑓂𑒟𑒰𑒢𑒏𑒹𑒿 𑒙𑒹𑒜𑓃 𑒏𑒋𑒪 𑒐𑒼𑒯𑒧𑒹 𑒔𑒪𑒋 𑒥𑒪𑒰 𑒣𑒳𑒭𑓂𑒣𑒏𑒏 𑒮𑒼𑒗𑒰𑒿 𑒁𑒣𑒢 𑒮𑒦𑒙𑒰 𑒦𑒹𑒠 𑒩𑒰𑒐𑒱 𑒠𑒹𑒪𑒏।
𑒦𑒼𑒩𑒳𑒏𑒰 𑒣𑒯𑒩𑒏 𑒣𑒯𑒱𑒢𑒹 𑒡𑒾𑒧𑓂𑒨𑒏 𑒫𑒱𑒧𑒰𑒢 𑒣𑒳𑒢𑓁 𑒣𑒵𑒟𑓂𑒫𑒲 𑒣𑒩 𑒂𑒥𑒱 𑒑𑒹𑒪।
𑒧𑒳𑒠𑒰 𑒋𑒞𑒋 𑒂𑒥𑒱 𑒯𑒳𑒢𑒏𑒰 𑒄 𑒫𑒱𑒬𑓂𑒫 𑒏𑒱𑒕𑒳 𑒥𑒠𑒪𑒪 𑒮𑒢 𑒪𑒑𑒪𑒢𑓂𑒯𑒱। 𑒬𑓂𑒫𑒹𑒞𑒏𑒹𑒞𑒳, 𑒁𑒣𑒰𑒪𑒰, 𑒮𑒞𑓂𑒨𑒏𑒰𑒧, 𑒩𑒻𑒏𑓂𑒫 𑒂 𑒒𑒼𑒭𑒰 𑒏𑓂𑒨𑒼 𑒢𑒯𑒱 𑒕𑒪𑒰𑒯 𑒍𑒞𑒋। 𑒫𑒱𑒧𑒰𑒢𑒣𑒙𑓂𑒙𑒲 𑒮𑒹𑒯𑒼 𑒥𑒠𑒪𑒪 𑒮𑒢। 𑒫𑒱𑒬𑓂𑒫𑒧𑒹 𑒮𑒧𑒨-𑒮𑓂𑒟𑒰𑒢𑒏 𑒣𑒙𑓂𑒙𑒲 𑒮𑒦 𑒦𑒩𑒪 𑒣𑒛𑓃𑒪 𑒕𑒪।
“𑒨𑒾। 𑒮𑒧𑒨 𑒥𑒞𑒰𑒆 𑒏𑒞𑒹𑒏 𑒦𑒹𑒪 𑒁𑒕𑒱”।
“𑒏𑒼𑒢 𑒮𑒧𑒨। 𑒮𑒼𑒗 𑒥𑒪𑒰 𑒫𑒰 𑒮𑓂𑒟𑒰𑒢-𑒮𑒧𑒨 𑒫𑒱𑒮𑓂𑒟𑒰𑒣𑒢 𑒥𑒪𑒰। 𑒮𑒼𑒗 𑒥𑒪𑒰 𑒮𑒧𑒨 𑒁𑒕𑒱, 𑒮𑒢𑓂 𑓓𑓑𑓐𑓐 𑒧𑒰𑒮...”।
𑒍 𑒥𑒖𑒱𑒞𑒹 𑒩𑒯𑒱 𑒑𑒹𑒪 𑒕𑒪 𑒧𑒳𑒠𑒰 𑒡𑒾𑒧𑓂𑒨 𑒮𑒼𑒔𑒱 𑒩𑒯𑒪 𑒕𑒪𑒰𑒯 𑒖𑒹 𑒮𑓂𑒟𑒰𑒢-𑒮𑒧𑒨 𑒫𑒱𑒮𑓂𑒟𑒰𑒣𑒢𑒏 𑒣𑒯𑒩𑒩𑒰𑒞𑒱𑒧𑒹 𑒯𑒖𑒰𑒩 𑒮𑒰𑒪 𑒫𑓂𑒨𑒞𑒲𑒞 𑒦𑒋 𑒑𑒹𑒪। 𑒏𑒏𑒩𑒰 𑒥𑒞𑒍𑒞𑒰𑒯 𑒍 𑒁𑒣𑒢 𑒞𑒰𑒏𑒪 𑒩𑒯𑒮𑓂𑒨। 𑒂𑒏𑒱 𑒋𑒞𑒳𑒏𑓂𑒏𑒰 𑒪𑒼𑒏 𑒍 𑒩𑒯𑒮𑓂𑒨 𑒞𑒰𑒏𑒱 𑒏𑒋 𑒢𑒱𑒬𑓂𑒔𑒱𑒢𑓂𑒞 𑒞𑒿 𑒢𑒯𑒱 𑒦𑒋 𑒑𑒹𑒪 𑒁𑒕𑒱?
𑒥𑒻𑒮𑒰𑒐𑒲𑒣𑒩 𑒖𑒱𑒢𑒑𑒲
“𑒑𑒩𑒧𑒲 𑒞𑒰𑒞𑒱𑒪𑒏 𑒕𑒳𑒙𑓂𑒙𑒲𑒏 𑒥𑒰𑒠 𑒏𑒰𑒪𑒹𑒖 𑒏𑒯𑒱𑒨𑒰 𑒐𑒳𑒖𑒞𑒻𑒏”। 𑒋𑒏𑒙𑒰 𑒫𑒱𑒠𑓂𑒨𑒰𑒩𑓂𑒟𑒲 𑒏𑒰𑒪𑒹𑒖𑒏 𑒋𑒏𑒙𑒰 𑒏𑒩𑓂𑒧𑒔𑒰𑒩𑒲𑒏𑒹𑒿 𑒣𑒳𑒕𑒢𑒹 𑒕𑒪𑒰𑒯।
“𑒯𑒧𑒩𑒰 𑒏𑒣𑒰𑒩 𑒣𑒩 𑒪𑒱𑒐𑒪 𑒕𑒻𑒏 𑒂𑒏𑒱 𑒢𑒼𑒙𑒱𑒮 𑒥𑒼𑒩𑓂𑒛 𑒣𑒩 𑒖𑒰 𑒏𑒋 𑒠𑒹𑒐𑒥𑒻𑒏”। 𑒍𑒪 𑒮𑒢𑒏 𑒥𑒼𑒪 𑒥𑒰𑒖𑒪 𑒍 𑒏𑒩𑓂𑒧𑒔𑒰𑒩𑒲 𑒖𑒏𑒩 𑒢𑒰𑒧 𑒑𑒳𑒝𑒠𑒹𑒫 𑒕𑒪।
“𑒍𑒯𑒼 𑒑𑒳𑒝𑒠𑒹𑒥𑒰 𑒦𑒨𑒓𑓂𑒏𑒩𑒹 𑒕𑒪। 𑒋𑒛𑒧𑒱𑒬𑒢 𑒏𑓂𑒪𑒩𑓂𑒏 𑒕𑒪, 𑒞𑒰𑒯𑒱 𑒠𑓂𑒫𑒰𑒩𑒹 𑒔𑒪𑒞𑒲𑒧𑒹 𑒕𑒪”।
“𑒢𑒘𑒱 𑒨𑒾। 𑒔𑒣𑒩𑒰𑒮𑒲 𑒕𑒪। 𑒋𑒛𑒧𑒱𑒬𑒢 𑒏𑓂𑒪𑒩𑓂𑒏 𑒞𑒿 𑒧𑒳𑒿𑒯𑒠𑒳𑒥𑓂𑒥𑒩 𑒩𑒯𑒋 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒮𑒦 𑒍𑒏𑒩𑒹 𑒋𑒛𑒧𑒱𑒬𑒢 𑒏𑓂𑒪𑒩𑓂𑒏 𑒥𑒳𑒗𑒻𑒞 𑒕𑒪𑒰𑒯”।
𑒩𑒞𑒲𑒬 𑒂 𑒤𑒴𑒪𑒏 𑒥𑒲𑒔𑒧𑒹 𑒄 𑒫𑒰𑒩𑓂𑒞𑓂𑒞𑒰𑒪𑒰𑒣 𑒔𑒪𑒱 𑒩𑒯𑒪 𑒕𑒪। 𑒥𑒯𑒳𑒞 𑒠𑒱𑒢𑒏𑒰 𑒥𑒰𑒠 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒋𑒏 𑒠𑒼𑒮𑒩𑒰𑒮𑒿 𑒦𑒹𑒿𑒙 𑒦𑒹𑒪 𑒕𑒪𑒢𑓂𑒯𑒱। 𑒮𑓂𑒏𑒴𑒪 𑒂 𑒏𑒰𑒪𑒹𑒖𑒧𑒹 𑒮𑓀𑒑𑒹-𑒮𑓀𑒑 𑒠𑒳𑒢𑒴 𑒑𑒼𑒙𑒹 𑒣𑒜𑓃𑒢𑒹 𑒕𑒪𑒰𑒯। 𑒧𑒳𑒠𑒰 𑒞𑒏𑒩𑒰 𑒥𑒰𑒠 𑒮𑒰𑒪𑒏 𑒮𑒰𑒪 𑒥𑒲𑒞𑒱 𑒑𑒹𑒪 𑒕𑒪, 𑒂 𑒂𑒃 𑒋𑒯𑒱 𑒏𑒰𑒪𑒹𑒖𑒧𑒹 𑒁𑒣𑒢-𑒁𑒣𑒢 𑒥𑒹𑒙𑒰𑒏𑒹𑒿 𑒁𑒦𑒱𑒨𑒰𑒢𑓂𑒞𑓂𑒩𑒱𑒏𑒲𑒏 𑒣𑓂𑒩𑒫𑒹𑒬 𑒣𑒩𑒲𑒏𑓂𑒭𑒰 𑒠𑒱𑒁𑒋𑒥𑒰𑒏 𑒪𑒹𑒪 𑒠𑒳𑒢𑒴 𑒑𑒼𑒙𑒹 𑒂𑒋𑒪 𑒕𑒪𑒰𑒯 𑒂𑒏𑒱 𑒁𑒢𑒰𑒨𑒰𑒮𑒯𑒱 𑒋𑒏-𑒠𑒼𑒮𑒩𑒰𑒮𑒿 𑒦𑒹𑒿𑒙 𑒦𑒋 𑒑𑒹𑒪𑒢𑓂𑒯𑒱। 𑒠𑒳𑒢𑒴 𑒑𑒼𑒙𑒹𑒏 𑒥𑒰𑒪𑒏 𑒣𑒩𑒲𑒏𑓂𑒭𑒰 𑒯𑒰𑒪𑒧𑒹 𑒩𑒯𑒟𑒱 𑒮𑒹 𑒠𑒳𑒢𑒴 𑒑𑒼𑒙𑒹𑒏 𑒪𑒑 𑒑𑒣 𑒏𑒩𑒥𑒰𑒏 𑒪𑒹𑒪 𑒞𑒲𑒢 𑒒𑒝𑓂𑒙𑒰𑒏 𑒮𑒧𑒨 𑒕𑒪𑒢𑓂𑒯𑒱।
𑒏𑒩𑒔𑒲 𑒏𑒪𑒧𑒮𑒿 𑒪𑒱𑒐𑒢𑒰 𑒪𑒱𑒐𑒻𑒞-𑒪𑒱𑒐𑒻𑒞 𑒩𑒞𑒲𑒬 𑒂 𑒤𑒴𑒪 𑒠𑒳𑒢𑒴 𑒑𑒼𑒙𑒹𑒏 𑒁𑒏𑓂𑒭𑒩 𑒮𑒳𑒢𑓂𑒠𑒩 𑒦𑒋 𑒑𑒹𑒪 𑒕𑒪𑒢𑓂𑒯𑒱। 𑒩𑒼𑒬𑒢𑒰𑒃𑒏 𑒑𑒼𑒙𑒲𑒏𑒹𑒿 𑒑𑒩𑒧 𑒣𑒰𑒢𑒱𑒧𑒹 𑒠𑒋 𑒂 𑒞𑒐𑒢 𑒠𑒫𑒰𑒞𑒧𑒹 𑒠𑒋 𑒍𑒯𑒱𑒧𑒹 𑒏𑒩𑒔𑒲 𑒏𑒪𑒧 𑒛𑒳𑒥𑒰 𑒏𑒋 𑒪𑒱𑒐𑒢𑒰 𑒪𑒱𑒐𑒻𑒞 𑒕𑒪𑒰𑒯 𑒠𑒳𑒢𑒴 𑒑𑒼𑒙𑒹। 𑒁𑒣𑒢-𑒁𑒣𑒢 𑒑𑒰𑒧𑒮𑒿 𑒯𑒰𑒃 𑒮𑓂𑒏𑒴𑒪 𑒣𑒯𑒳𑒿𑒔𑒻𑒞 𑒖𑒰𑒃 𑒕𑒪𑒰𑒯 । 𑒫𑒱𑒖𑓂𑒘𑒰𑒢𑒏 𑒣𑓂𑒩𑒰𑒨𑒼𑒑𑒱𑒏 𑒏𑒏𑓂𑒭𑒰𑒏 𑒏𑒰𑒣𑒲 𑒍𑒢𑒰 𑒞𑒿 𑒩𑒞𑒲𑒬𑒏 𑒮𑒹𑒯𑒼 𑒮𑒰𑒤 𑒂 𑒮𑓂𑒣𑒭𑓂𑒙 𑒯𑒼𑒃𑒞 𑒕𑒪𑒢𑓂𑒯𑒱 𑒧𑒳𑒠𑒰 𑒤𑒴𑒪𑒏 𑒁𑒏𑓂𑒭𑒩 𑒤𑒴𑒪 𑒮𑒢 𑒮𑒳𑒢𑓂𑒠𑒩 𑒯𑒼𑒃𑒞 𑒕𑒪𑒢𑓂𑒯𑒱। 𑒧𑒻𑒙𑓂𑒩𑒱𑒏𑒧𑒹 𑒩𑒞𑒲𑒬𑒏𑒹𑒿 𑒣𑓂𑒩𑒟𑒧 𑒬𑓂𑒩𑒹𑒝𑒲 𑒂𑒋𑒪 𑒕𑒪𑒢𑓂𑒯𑒱 𑒧𑒳𑒠𑒰 𑒤𑒴𑒪𑒏𑒹𑒿 𑒠𑓂𑒫𑒱𑒞𑒲𑒨 𑒬𑓂𑒩𑒹𑒝𑒲 𑒁𑒋𑒪𑒢𑓂𑒯𑒱। 𑒂𑒃.𑒋𑒮.𑒮𑒲. 𑒏𑒹𑒩 𑒥𑒰𑒠 𑒩𑒞𑒲𑒬 𑒞𑒿 𑒃𑓀𑒖𑒲𑒢𑒱𑒨𑒩𑒱𑒓𑒧𑒹 𑒢𑒰𑒧 𑒪𑒱𑒐𑒰 𑒪𑒹𑒪𑒢𑓂𑒯𑒱 𑒧𑒳𑒠𑒰 𑒩𑒞𑒲𑒬 𑒣𑒼𑒮𑓂𑒙𑒂𑒤𑒱𑒮𑒧𑒹 𑒏𑒱𑒩𑒰𑒢𑒲𑒏 𑒢𑒼𑒏𑒩𑒲 𑒣𑒏𑒛𑓃𑒱 𑒪𑒹𑒢𑒹 𑒕𑒪𑒰𑒯। 𑒂 𑒞𑒏𑒩 𑒥𑒰𑒠 𑓑𑓘 𑒮𑒰𑒪 𑒡𑒩𑒱 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒋𑒏 𑒠𑒼𑒮𑒩𑒰𑒮𑒿 𑒦𑒹𑒿𑒙 𑒢𑒯𑒱 𑒦𑒹𑒪 𑒕𑒪𑒢𑓂𑒯𑒱। 𑒢𑒼𑒏𑒩𑒲 𑒪𑒑𑒪𑒰𑒏 𑒥𑒰𑒠 𑒤𑒴𑒪𑒏 𑒫𑒱𑒫𑒰𑒯 𑒦𑒋 𑒑𑒹𑒪𑒢𑓂𑒯𑒱।
“𑒫𑒱𑒫𑒰𑒯𑒏 𑒥𑒰𑒠 𑒏𑒲 𑒦𑒹𑒪। 𑒯𑒧 𑒞𑒿 𑒫𑒱𑒫𑒰𑒯𑒼𑒧𑒹 𑒢𑒯𑒱 𑒖𑒰 𑒮𑒏𑒪 𑒕𑒪𑒯𑒳𑒿। 𑒣𑒯𑒱𑒢𑒹 𑒍𑒞𑒹𑒏 𑒤𑒼𑒢-𑒤𑒰𑒢𑒏 𑒮𑒹𑒯𑒼 𑒣𑓂𑒩𑒔𑒪𑒢 𑒢𑒯𑒱 𑒕𑒪। 𑒞𑒰𑒯𑒱 𑒠𑓂𑒫𑒰𑒩𑒹 𑒮𑒧𑓂𑒣𑒩𑓂𑒏 𑒮𑒹𑒯𑒼 𑒢𑒯𑒱 𑒩𑒯𑒪”।
“𑒢𑒼𑒏𑒩𑒲𑒏 𑒥𑒰𑒠 𑒕𑒼𑒙 𑒦𑒰𑒋 𑒂 𑒏𑒢𑒱𑒨𑒰𑒿𑒏𑒹𑒿 𑒪𑒋 𑒢𑒼𑒏𑒩𑒲 𑒣𑒩 𑒏𑒼𑒯𑒱𑒧𑒰 𑒔𑒪 𑒑𑒹𑒪𑒯𑒳𑒿। 𑒕𑒼𑒙 𑒦𑒰𑒋 𑒋𑒏𑒙𑒰 𑒯𑒰𑒟𑒮𑒿 𑒪𑒳𑒪𑓂𑒯 𑒩𑒯𑒟𑒱। 𑒠𑒼𑒮𑒩 𑒯𑒰𑒟𑒹 𑒣𑓂𑒩𑒨𑒰𑒮𑒮𑒿 𑒪𑒱𑒐𑒻𑒞 𑒕𑒪𑒰𑒯। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒫𑒱𑒏𑒪𑒰𑓀𑒑𑒏 𑒪𑒹𑒪 𑒂𑒩𑒏𑓂𑒭𑒝𑒏 𑒁𑓀𑒞𑒩𑓂𑒑𑒞 𑒯𑒳𑒢𑒏𑒰 𑒮𑒹𑒯𑒼 𑒏𑒱𑒩𑒰𑒢𑒲𑒧𑒹 𑒏𑒹𑒢𑓂𑒠𑓂𑒩 𑒮𑒩𑒏𑒰𑒩𑒏 𑒁𑓀𑒞𑒩𑓂𑒑𑒞 𑒢𑒼𑒏𑒩𑒲 𑒪𑒰𑒑𑒱 𑒑𑒹𑒪𑒢𑓂𑒯𑒱 𑒂 𑒍 𑒣𑒙𑒢𑒰 𑒔𑒪𑒱 𑒑𑒹𑒪𑒰𑒯। 𑒯𑒧𑒩 𑒧𑒰𑒋𑒏𑒹𑒿 𑒯𑒳𑒢𑒏𑒩 𑒫𑒱𑒫𑒰𑒯𑒏 𑒥𑒛𑓃 𑒮𑒾𑒐 𑒕𑒪𑒢𑓂𑒯𑒱। 𑒧𑒳𑒠𑒰 𑒒𑒙𑒏𑒼 𑒂𑒥𑒋 𑒞𑒐𑒢 𑒢𑒹 ? 𑒮𑒹 𑒏𑒞𑒹𑒏 𑒠𑒱𑒢𑒳𑒏𑒰 𑒥𑒰𑒠 𑒖𑒐𑒢 𑒧𑒰𑒋 𑒯𑒧𑒩𑒰 𑒍𑒯𑒱𑒚𑒰𑒧 𑒂𑒋𑒪 𑒕𑒪𑒲𑒯 𑒞𑒿 𑒋𑒏 𑒑𑒼𑒙 𑒧𑒻𑒟𑒱𑒪 𑒣𑒩𑒱𑒫𑒰𑒩 𑒯𑒧𑒩𑒰 𑒍𑒯𑒱𑒚𑒰𑒧 𑒒𑒳𑒧𑒋 𑒪𑒹𑒪 𑒂𑒋𑒪 𑒩𑒯𑒟𑒱। 𑒯𑒧𑒩 𑒧𑒰𑒋𑒏 𑒫𑒨𑒮𑒏 𑒋𑒏 𑒑𑒼𑒙 𑒧𑒯𑒱𑒪𑒰 𑒕𑒪𑒲𑒯 𑒖𑒹 𑒁𑒣𑒢 𑒣𑒳𑒞𑒼𑒯𑒳𑒏 𑒮𑓀𑒑 𑒂𑒋𑒪 𑒕𑒪𑒲𑒯। 𑒑𑒣𑒹-𑒬𑒣𑒧𑒹 𑒯𑒳𑒢𑒏𑒰 𑒣𑒞𑒰 𑒔𑒪𑒱 𑒑𑒹𑒪𑒢𑓂𑒯𑒱 𑒖𑒹 𑒋𑒯𑒱 𑒒𑒩𑒧𑒹 𑒋𑒏𑒙𑒰 𑒫𑒱𑒏𑒪𑒰𑓀𑒑 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒥𑒪𑒰 𑒫𑒱𑒫𑒰𑒯𑒨𑒼𑒑𑓂𑒨 𑒥𑒰𑒪𑒏 𑒕𑒻𑒏। 𑒮𑒹 𑒍 𑒯𑒚𑒰𑒞𑓂 𑒁𑒣𑒢 𑒣𑒳𑒞𑓂𑒩𑒲𑒏 𑒫𑒱𑒫𑒰𑒯𑒏 𑒣𑓂𑒩𑒮𑓂𑒞𑒰𑒫 𑒮𑒼𑒗𑒰𑒿 𑒂𑒢𑒱 𑒩𑒐𑒪𑒢𑓂𑒯𑒱।
-𑒯𑒧𑒩 𑒧𑒰𑒨 𑒥𑒖𑒪𑒲𑒯, “𑒥𑒯𑒱𑒢𑒠𑒰𑒃। 𑒁𑒕𑒱 𑒞𑒿 𑒯𑒧𑒩 𑒥𑒹𑒙𑒰 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒏𑒩𑒻𑒞 𑒧𑒳𑒠𑒰 𑒄 𑒣𑒯𑒱𑒢𑒯𑒱𑒨𑒹 𑒏𑒯𑒱 𑒠𑒹𑒢𑒰𑒃 𑒚𑒲𑒏 𑒥𑒳𑒗𑒻𑒞 𑒕𑒲 𑒖𑒹 𑒥𑒰𑒠𑒧𑒹 𑒁𑒯𑒰𑒿 𑒮𑒹 𑒢𑒯𑒱 𑒏𑒯𑒲। 𑒬𑒲𑒪-𑒮𑓂𑒫𑒦𑒰𑒫 𑒮𑒦𑒧𑒹 𑒏𑒼𑒢𑒼 𑒏𑒧𑒲 𑒢𑒯𑒱 𑒕𑒻𑒏 𑒧𑒳𑒠𑒰 𑒢𑒯𑒱 𑒖𑒰𑒢𑒱 𑒏𑒱𑒋𑒏 𑒦𑒑𑒫𑒰𑒢 𑒋𑒏 𑒯𑒰𑒟𑒮𑒿 𑒪𑒳𑒪𑓂𑒯 𑒏𑒋 𑒠𑒹𑒪𑒐𑒱𑒢𑓂𑒯। 𑒑𑒰𑒧𑒧𑒹 𑒪𑒼𑒏 𑒮𑒦 𑒪𑒳𑒪𑓂𑒯𑒰-𑒪𑒳𑒪𑓂𑒯𑒰 𑒏𑒯𑒱 𑒏𑒋 𑒮𑒼𑒩 𑒏𑒩𑒻𑒞 𑒕𑒻𑒏। 𑒬𑒳𑒩𑒴𑒧𑒹 𑒞𑒿 𑒯𑒧𑒩𑒰 𑒥𑒩𑒠𑒰𑒮𑓂𑒞 𑒢𑒯𑒱 𑒯𑒼𑒃𑒞 𑒕𑒪, 𑒋𑒯𑒱 𑒑𑒣 𑒣𑒩 𑒗𑒑𑒛𑓃𑒰 𑒦𑒋 𑒖𑒰𑒃𑒞 𑒕𑒪। 𑒧𑒳𑒠𑒰 𑒥𑒰𑒠𑒧𑒹 𑒯𑒧𑒯𑒴 𑒄 𑒮𑒼𑒔𑒱 𑒡𑒻𑒩𑓂𑒨 𑒡𑒋 𑒪𑒹𑒪𑒯𑒳𑒿 𑒖𑒹 𑒖𑒐𑒢 𑒦𑒑𑒫𑒰𑒢𑒹 𑒢𑒖𑒩𑒱 𑒒𑒳𑒧𑒰 𑒪𑒹𑒪𑒢𑓂𑒯𑒱 𑒞𑒿 𑒏𑒏𑒩𑒰 𑒏𑒲 𑒏𑒯𑒥𑒻𑒏”।
“𑒮𑒹 𑒞𑒿 𑒯𑒧𑒩𑒰 𑒑𑒣-𑒬𑒣𑒧𑒹 𑒥𑒳𑒗𑒥𑒰𑒧𑒹 𑒂𑒥𑒱 𑒑𑒹𑒪 𑒕𑒪। 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒄 𑒏𑒟𑒰 𑒏𑒩𑒥𑒰𑒏 𑒮𑒰𑒯𑒮𑒼 𑒦𑒹𑒪। 𑒁𑒯𑒰𑒿 𑒮𑒿 𑒏𑒲 𑒏𑒯𑒴। 𑒯𑒧𑒩 𑒥𑒹𑒙𑒲 𑒣𑒹𑒠𑒰𑒩 𑒁𑒕𑒱। 𑒣𑒻𑒩 𑒕𑒼𑒙-𑒣𑒻𑒒 𑒕𑒻𑒏। 𑒮𑒹 𑒮𑒾𑒿𑒮𑒹 𑒞𑒹𑒯𑒪𑓂𑒪𑒰𑒏𑒹𑒿 𑒥𑒳𑒗𑒪 𑒕𑒻𑒏। 𑒃𑒪𑒰𑒏𑒰𑒧𑒹 𑒏𑒏𑒩𑒼 𑒪𑒑 𑒏𑒟𑒰𑒏 𑒪𑒹𑒪 𑒖𑒰𑒋𑒥 𑒮𑒹𑒯𑒼 𑒯𑒱𑒨𑒰𑒅 𑒢𑒯𑒱 𑒯𑒼𑒃𑒞 𑒁𑒕𑒱। 𑒦𑒑𑒫𑒰𑒢 𑒕𑒟𑒱𑒢𑓂𑒯, 𑒢𑒘𑒱 𑒢𑒻𑒯𑒩𑒹 𑒂 𑒢𑒯𑒱𑒨𑒹 𑒮𑒰𑒮𑒳𑒩𑒧𑒹 𑒏𑓂𑒨𑒼 𑒣𑒹𑒠𑒰𑒩 𑒦𑒹𑒪 𑒕𑒪। 𑒦𑒑𑒫𑒰𑒢 𑒦𑒪 𑒏𑒩𑒟𑒱𑒢𑓂𑒯, 𑒠𑒹𑒐𑒥𑒻𑒏 𑒯𑒧𑒩 𑒥𑒳𑒔𑒱𑒨𑒰𑒏 𑒥𑒔𑓂𑒔𑒰-𑒮𑒦 𑒮𑒩𑓂𑒫𑒑𑒳𑒝 𑒮𑒧𑓂𑒣𑒢𑓂𑒢 𑒯𑒼𑒋𑒞”।
-𑒄 𑒑𑒣 𑒮𑒳𑒢𑒱𑒞𑒹 𑒯𑒧𑒩 𑒧𑒰𑒋 𑒞𑒿 𑒮𑒢𑓂𑒢 𑒠𑒋 𑒩𑒯𑒱 𑒑𑒹𑒪𑒲𑒯। 𑒏𑒢𑒹𑒏 𑒏𑒰𑒪 𑒡𑒩𑒱 𑒑𑒳𑒧-𑒮𑒳𑒧 𑒩𑒯𑒪𑒰𑒏 𑒥𑒰𑒠 𑒏𑒯𑒪𑒢𑓂𑒯𑒱 𑒖𑒹 𑒮𑒼𑒔𑒱 𑒏𑒋 𑒐𑒥𑒩𑒱 𑒣𑒚𑒰𑒋𑒥। 𑒒𑒩𑒧𑒹 𑒏𑒱𑒕𑒳 𑒠𑒱𑒢 𑒡𑒩𑒱 𑒋𑒯𑒱 𑒑𑒣 𑒣𑒩 𑒔𑒩𑒔𑒰 𑒦𑒹𑒪 𑒂 𑒂𑒑𑒰𑒿 𑒖𑒰 𑒏𑒋 𑒧𑒰𑒋𑒏 𑒫𑒱𑒔𑒰𑒩 𑒦𑒹𑒪𑒢𑓂𑒯𑒱 𑒖𑒹 𑒫𑒱𑒫𑒰𑒯 𑒦𑒋 𑒖𑒋𑒥𑒰𑒏 𑒔𑒰𑒯𑒲।
-𑒫𑒱𑒫𑒰𑒯𑒏 𑒅𑒣𑒩𑒰𑒢𑓂𑒞 𑒏𑒞𑒰𑒏 𑒥𑒹𑒩 𑒥𑒔𑓂𑒔𑒰 𑒐𑒩𑒰𑒣 𑒦𑒋 𑒖𑒰𑒃𑒞 𑒕𑒪। 𑒞𑒲𑒢 𑒔𑒰𑒩𑒱 𑒥𑒹𑒩 𑒋𑒯𑒱𑒢𑒰 𑒦𑒹𑒪। 𑒯𑒧𑒩 𑒦𑒰𑒋 𑒞𑒿 𑒧𑒼𑒢𑒏𑒹𑒿 𑒥𑒳𑒗𑒰 𑒪𑒹𑒪𑒢𑓂𑒯𑒱 𑒧𑒳𑒠𑒰 𑒦𑒰𑒥𑒯𑒳 𑒫𑒱𑒏𑓂𑒭𑒱𑒣𑓂𑒞 𑒖𑒹𑒏𑒰𑒿 𑒦𑒋 𑒑𑒹𑒪𑒲𑒯। 𑒩𑒰𑒞𑒱-𑒠𑒱𑒢 𑒒𑒩𑒧𑒹 𑒅𑒚𑒰-𑒣𑒙𑒏𑒏 𑒁𑒥𑒰𑒖 𑒣𑒛𑓃𑒼𑒮𑒲 𑒮𑒦 𑒮𑒳𑒢𑒻𑒞 𑒕𑒪। 𑒧𑒳𑒠𑒰 𑒂𑒮𑓂𑒞𑒹-𑒂𑒮𑓂𑒞𑒹 𑒍𑒯𑒼 𑒧𑒼𑒢𑒏𑒹𑒿 𑒥𑒯𑒙𑒰𑒩𑒱 𑒪𑒹𑒪𑒢𑓂𑒯𑒱। 𑒧𑒳𑒠𑒰 𑒠𑒮 𑒥𑒩𑒐𑒏 𑒥𑒰𑒠 𑒦𑒑𑒫𑒰𑒢𑒏 𑒏𑒵𑒣𑒰 𑒖𑒹 𑒋𑒏𑒙𑒰 𑒥𑒔𑓂𑒔𑒰 𑒦𑒹𑒪𑒢𑓂𑒯𑒱, 𑒮𑒦 𑒁𑓀𑒑 𑒠𑒳𑒩𑒳𑒮𑓂𑒞। 𑒧𑒳𑒠𑒰 𑒋𑒏 𑒠𑒱𑒢 𑒥𑒔𑓂𑒔𑒰𑒏𑒹𑒿 𑒞𑒹𑒪-𑒏𑒴𑒛𑓃 𑒪𑒑𑒰 𑒏𑒋 𑒥𑒰𑒯𑒩 𑒯𑒥𑒰𑒧𑒹 𑒠𑒹𑒪𑒐𑒱𑒢𑓂𑒯 𑒦𑒰𑒥𑒯𑒳। 𑒦𑒰𑒋 𑒏𑒯𑒥𑒼 𑒏𑒋𑒪𑒢𑓂𑒯𑒱 𑒖𑒹 𑒥𑒔𑓂𑒔𑒰𑒏𑒹𑒿 𑒦𑒲𑒞𑒩 𑒏𑒋 𑒪𑒱𑒁 𑒧𑒳𑒠𑒰 𑒯𑒼𑒢𑒲 𑒖𑒹 𑒏𑒯𑒻𑒞 𑒕𑒻𑒏। 𑒮𑒰𑒿𑒗𑒮𑒿 𑒥𑒔𑓂𑒔𑒰𑒏𑒹𑒿 𑒯𑒳𑒏𑒯𑒳𑒏𑓂𑒏𑒲 𑒪𑒰𑒑𑒱 𑒑𑒹𑒪𑒻𑒏। 𑒁𑒑𑒱𑒪𑒰 𑒠𑒱𑒢 𑒦𑒼𑒩 𑒡𑒩𑒱 𑒍 𑒋𑒯𑒱 𑒖𑒑𑒏𑒹𑒿 𑒕𑒼𑒛𑓃𑒱 𑒔𑒪𑒱 𑒑𑒹𑒪। 𑒯𑒧𑒩𑒼 𑒣𑒠𑒮𑓂𑒟𑒰𑒣𑒢 𑒞𑒰𑒡𑒩𑒱 𑒣𑒙𑒢𑒹 𑒦𑒋 𑒑𑒹𑒪 𑒕𑒪 𑒂 𑒮𑒦 𑒑𑒼𑒙𑒹 𑒮𑓀𑒑𑒹 𑒩𑒯𑒻𑒞 𑒕𑒪𑒯𑒳𑒿।
-𑒧𑒳𑒠𑒰 𑒦𑒑𑒫𑒰𑒢𑒼𑒏 𑒪𑒲𑒪𑒰। 𑒖𑒐𑒢 𑒮𑒦 𑒂𑒮 𑒕𑒼𑒛𑓃𑒱 𑒠𑒹𑒢𑒹 𑒕𑒪, 𑒞𑒐𑒢 𑒤𑒹𑒩 𑒋𑒏𑒙𑒰 𑒥𑒰𑒪𑒏 𑒦𑒹𑒪𑒢𑓂𑒯𑒱 𑒕𑒼𑒙 𑒦𑒰𑒿𑒨𑒏𑒹𑒿। 𑒋𑒯𑒱 𑒥𑒹𑒩 𑒯𑒳𑒢𑒏𑒩 𑒮𑒰𑒮𑒳 𑒮𑒹𑒯𑒼 𑒥𑒔𑓂𑒔𑒰𑒏 𑒙𑒯𑒪-𑒙𑒱𑒏𑒼𑒩 𑒏𑒩𑒥𑒰𑒏 𑒪𑒹𑒪 𑒂𑒥𑒱 𑒑𑒹𑒪𑒐𑒱𑒢𑓂𑒯। 𑒂𑒥 𑒞𑒿 𑒥𑒹𑒬 𑒙𑒪𑓂𑒯𑒑𑒩 𑒦𑒋 𑒑𑒹𑒪 𑒁𑒕𑒱, 𑒯𑒵𑒭𑓂𑒙-𑒣𑒳𑒭𑓂𑒙 𑒏𑒼𑒢𑒼 𑒣𑒻𑒁 𑒢𑒯𑒱 𑒕𑒻𑒏”। 𑒤𑒴𑒪 𑒥𑒖𑒱𑒞𑒹 𑒩𑒯𑒪𑒰𑒯।
𑒩𑒞𑒲𑒬 𑒏𑒯𑒪𑒢𑓂𑒯𑒱-“𑒁𑒯𑒰𑒿 𑒋𑒞𑒹𑒏 𑒣𑒩𑒹𑒬𑒰𑒢𑒲𑒧𑒹 𑒩𑒯𑒪𑒯𑒳𑒿 𑒋𑒞𑒹𑒏 𑒠𑒱𑒢 𑒡𑒩𑒱। 𑒧𑒳𑒠𑒰 𑒁𑒯𑒰𑒿𑒏𑒹𑒿 𑒏𑒻𑒏𑒙𑒰 𑒥𑒔𑓂𑒔𑒰 𑒁𑒕𑒱, 𑒏𑒲 𑒏𑒩𑒋 𑒖𑒰𑒃𑒞 𑒕𑒟𑒱 𑒮𑒹 𑒢𑒯𑒱 𑒏𑒯𑒪𑒯𑒳𑒿”।
“𑒋𑒏𑒹𑒙𑒰 𑒕𑒟𑒱 𑒮𑒹 𑒣𑒩𑒲𑒏𑓂𑒭𑒰 𑒯𑒰𑒪𑒧𑒹 𑒕𑒟𑒱, 𑒏𑒢𑒹𑒏 𑒏𑒰𑒪𑒧𑒹 𑒠𑒹𑒐𑒱𑒋 𑒪𑒹𑒥𑒢𑓂𑒯𑒱। 𑒧𑒳𑒠𑒰 𑒁𑒯𑒰𑒿 𑒁𑒣𑒢 𑒥𑒔𑓂𑒔𑒰𑒏𑒹𑒿 𑒣𑒩𑒲𑒏𑓂𑒭𑒰 𑒠𑒱𑒂𑒥𑒋 𑒏𑒱𑒋𑒏 𑒂𑒨𑒪 𑒕𑒲। 𑒂𑒃.𑒋𑒮.𑒮𑒲. 𑒣𑒰𑒮 𑒏𑒋𑒢𑒹 𑒕𑒟𑒱, 𑒥𑒹𑒬 𑒔𑒹𑒞𑒢𑒑𑒩 𑒦𑒋 𑒑𑒹𑒪 𑒯𑒼𑒋𑒞𑒰𑒯”। 𑒤𑒴𑒪 𑒦𑒰𑒋 𑒏𑒯𑒪𑒢𑓂𑒯𑒱।
“𑒧𑒳𑒠𑒰 𑒁𑒯𑒴𑒿 𑒞𑒿 𑒂𑒋𑒪 𑒕𑒲...”।
𑒩𑒞𑒲𑒬 𑒥𑒖𑒻𑒞 𑒔𑒳𑒣 𑒦𑒋 𑒑𑒹𑒪𑒰𑒯। 𑒏𑒰𑒩𑒝 𑒋𑒏 𑒑𑒼𑒙 𑒥𑒰𑒪𑒏 𑒫𑒻𑒬𑒰𑒐𑒲 𑒣𑒩 𑒔𑒪𑒱 𑒤𑒴𑒪𑒏 𑒪𑒑 𑒂𑒥𑒱 𑒚𑒰𑒜𑓃 𑒦𑒋 𑒑𑒹𑒪 𑒕𑒪। 𑒣𑒩𑒲𑒏𑓂𑒭𑒰 𑒐𑒞𑒧 𑒦𑒋 𑒑𑒹𑒪 𑒕𑒪 𑒂 𑒩𑒞𑒲𑒬𑒏𑒹𑒿 𑒄 𑒥𑒳𑒗𑒥𑒰𑒧𑒹 𑒥𑒰𑒓𑒚 𑒢𑒯𑒱 𑒩𑒯𑒪𑒢𑓂𑒯𑒱 𑒖𑒹 𑒄 𑒥𑒰𑒪𑒏 𑒤𑒴𑒪𑒏 𑒕𑒟𑒱𑒢𑓂𑒯। 𑒏𑒰𑒪𑒏 𑒫𑒱𑒔𑒱𑒞𑓂𑒩 𑒑𑒞𑒱, 𑒦𑒰𑒋-𑒦𑒰𑒥𑒯𑒳 𑒫𑒱𑒏𑒪𑒰𑓀𑒑 𑒕𑒢𑓂𑒯𑒱 𑒧𑒳𑒠𑒰 𑒞𑒞𑓂𑒞𑒰-𑒮𑒱𑒯𑒩 𑒠𑒹𑒐𑒹𑒪𑒰𑒏 𑒥𑒰𑒠𑒼 𑒦𑒑𑒫𑒰𑒢 𑒯𑒵𑒭𑓂𑒙-𑒣𑒳𑒭𑓂𑒙 𑒢𑒹𑒢𑒰 𑒠𑒹𑒪𑒐𑒱𑒢𑓂𑒯, 𑒂 𑒤𑒴𑒪 𑒮𑒢 𑒪𑒱𑒐𑒢𑒯𑒰𑒩 𑒤𑒴𑒪 𑒦𑒰𑒃𑒏 𑒪𑒹𑒪 𑒫𑒱𑒡𑒢𑒰𑒏 𑒏𑒪𑒧 𑒢𑒯𑒱 𑒔𑒪𑒪𑒢𑓂𑒯𑒱। 𑒧𑒳𑒠𑒰 𑒤𑒴𑒪 𑒦𑒰𑒋 𑒬𑒰𑓀𑒞, 𑒡𑒻𑒩𑓂𑒨 𑒡𑒋 𑒥𑒹𑒙𑒰𑒮𑒿 𑒣𑒩𑒲𑒏𑓂𑒭𑒰𑒏 𑒫𑒱𑒭𑒨𑒧𑒹 𑒣𑒴𑒕𑒱 𑒩𑒯𑒪 𑒕𑒪𑒰𑒯।
𑒮𑒩𑓂𑒫𑒬𑒱𑒏𑓂𑒭𑒰 𑒁𑒦𑒱𑒨𑒰𑒢
“𑒯𑒹 𑒯𑒧 𑒛𑒼𑒧𑒰𑒏𑒹𑒿 𑒣𑒜𑓃𑒰 𑒪𑒱𑒐𑒰 𑒏𑒋 𑒏𑒱𑒕𑒳 𑒥𑒢𑒥𑒋 𑒔𑒰𑒯𑒻𑒞 𑒕𑒲” । 𑒥𑒳𑒡𑒢 𑒣𑒰𑒮𑒫𑒰𑒢 𑒥𑒰𑒖𑒪 । 𑒔𑒝𑓂𑒛𑒲𑒑𑒜𑓃𑒧𑒹 𑒍 𑒩𑒱𑒏𑓂𑒬𑒰 𑒔𑒪𑒥𑒻𑒞 𑒕𑒟𑒱 । 𑒂𑒥 𑒑𑒰𑒧𑒧𑒹 𑒐𑒹𑒞𑒲 𑒥𑒰𑒩𑒲𑒧𑒹 𑒏𑒱𑒕𑒳 𑒢𑒯𑒱 𑒥𑒔𑒪𑒻𑒏 ।
𑒕𑒼𑒙𑒏𑒰 𑒦𑒰𑒋 𑒮𑒦 𑒖𑒢𑒧𑒱𑒞𑒹 𑒧𑒩𑒱 𑒖𑒰𑒃𑒞 𑒩𑒯𑒋।
𑒮𑒹 𑒥𑒳𑒡𑒢𑒏 𑒋𑒏𑒙𑒰 𑒕𑒼𑒙𑒏𑒰 𑒦𑒰𑒋𑒏𑒹𑒿 𑒧𑒰𑒋-𑒥𑒰𑒣 𑒖𑒢𑒧𑒪𑒰𑒏 𑒥𑒰𑒠 𑒛𑒼𑒧𑒏 𑒯𑒰𑒟𑒮𑒿 𑒥𑒹𑒔𑒪𑒢𑓂𑒯𑒱 𑒂 𑒤𑒹𑒩 𑒣𑒰𑒃 𑒠𑓄 𑒏𑒋 𑒏𑒱𑒢𑒪𑒢𑓂𑒯𑒱 । 𑒄 𑒮𑒦𑒙𑒰 𑒏𑒰𑒖 𑒍𑒢𑒰 𑒞𑒿 𑒮𑒰𑓀𑒏𑒹𑒞𑒱𑒏 𑒩𑒴𑒣𑒹𑒿 𑒦𑒹𑒪 𑒧𑒳𑒠𑒰 𑒋𑒯𑒱𑒮𑒿 𑒑𑓂𑒩𑒯 𑒏𑒙𑒱𑒞 𑒦𑓄 𑒑𑒹𑒪𑒻𑒏। 𑒂 𑒕𑒼𑒙𑒏𑒰 𑒦𑒰𑒋 𑒖𑒹 𑒥𑒳𑒡𑒢 𑒣𑒰𑒮𑒫𑒰𑒢𑒮𑒿 𑓑𑓒 𑒥𑒩𑒱𑒐 𑒕𑒼𑒙 𑒩𑒯𑒢𑓂𑒯𑒱 𑒥𑒔𑒱 𑒑𑒹𑒪𑒰𑒯 ।
𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒍𑒏𑒩𑒰 𑒮𑒦 𑒛𑒼𑒧𑒰 𑒏𑒯𑒱 𑒮𑒼𑒩 𑒏𑒩𑒋 𑒪𑒰𑒑𑒪 ।
𑒥𑒳𑒡𑒢 𑒁𑒣𑒢 𑒥𑒰𑒣-𑒧𑒰𑒋𑒏 𑒮𑓀𑒑 𑒯𑒩𑒫𑒰𑒯𑒲 𑒏𑒩𑒟𑒱 𑒧𑒳𑒠𑒰 𑒦𑒰𑒋𑒏𑒹𑒿 𑒣𑒜𑓃𑒹𑒥𑒰𑒏 𑒥𑒛𑓂𑒛 𑒪𑒰𑒪𑒮𑒰 𑒩𑒯𑒢𑓂𑒯𑒱 ।
“𑒮𑒳𑒢𑒻𑒞 𑒕𑒱𑒁𑒋 𑒖𑒹 𑒯𑒧𑒩𑒰 𑒮𑒦𑒧𑒹 𑒏𑒢𑒱𑒍 𑒣𑒜𑓃𑒱-𑒪𑒱𑒐𑒱 𑒪𑒹𑒪𑒰𑒮𑒿 𑒢𑒼𑒏𑒩𑒲 𑒦𑒹𑒙𑒱 𑒖𑒰𑒃𑒞 𑒕𑒻𑒏। 𑒋𑒏𑒩𑒰 𑒖𑒩𑒴𑒩 𑒣𑒜𑓃𑒰𑒋𑒥, 𑒔𑒰𑒯𑒹 𑒞𑒰𑒯𑒱 𑒪𑒹𑒪 𑒣𑒹𑒙 𑒏𑒰𑒙𑒋 𑒣𑒛𑓃𑒋 𑒂𑒏𑒱 𑒦𑒲𑒐 𑒧𑒰𑒿𑒑𑒨 𑒣𑒛𑓃𑒋”।
𑒦𑒲𑒐 𑒞𑒿 𑒢𑒯𑒱 𑒧𑒰𑒿𑒑𑒪𑒢𑓂𑒯𑒱 𑒧𑒳𑒠𑒰 𑒔𑒝𑓂𑒛𑒲𑒑𑒜𑓃𑒏 𑒩𑒮𑓂𑒞𑒰 𑒡𑒹𑒪𑒢𑓂𑒯𑒱 𑒥𑒳𑒡𑒢।
𑒦𑒩𑒱 𑒠𑒱𑒢 𑒩𑒱𑒏𑓂𑒮𑒰 𑒔𑒪𑒰𑒥𑒟𑒱 𑒂 𑒮𑒰𑒿𑒗𑒧𑒹 𑒖𑒐𑒢 𑒠𑒼𑒮𑒩 𑒮𑓀𑒑𑒲-𑒮𑒰𑒟𑒲 𑒮𑒦 𑒠𑒹𑒮𑒲 𑒚𑒹𑒏𑒰𑒧𑒹 𑒁𑒣𑒢 𑒚𑒹𑒯𑒲 𑒠𑒴𑒩 𑒏𑒩𑒥𑒰𑒏 𑒪𑒹𑒪 𑒖𑒰𑒟𑒱 𑒞𑒐𑒢 𑒠𑒮 𑒞𑒩𑒯𑒏 𑒑𑒣 𑒮𑒳𑒢𑒰 𑒏𑒋 𑒥𑒯𑒢𑓂𑒢𑒰 𑒥𑒢𑒰 𑒏𑒋 𑒥𑒳𑒡𑒢 𑒁𑒣𑒢 𑒒𑒩 𑒠𑒱𑒮 𑒒𑒳𑒧𑒱 𑒖𑒰𑒟𑒱।
“𑒏𑒲 𑒩𑒹 𑒧𑒲𑒞𑒰। 𑒥𑒰𑒧𑒰-𑒠𑒯𑒱𑒢𑒰 𑒏𑒩𑒻 𑒕𑒹𑒿, 𑒢𑒱𑒢𑓂𑒠 𑒢𑒯𑒱 𑒯𑒼𑒃 𑒕𑒾”।
“𑒢𑒘𑒱 𑒩𑒾 𑒦𑒰𑒃। 𑒦𑒩𑒱 𑒠𑒱𑒢 𑒞𑒿 𑒥𑒰𑒃 𑒧𑒹 𑒩𑒱𑒏𑓂𑒮𑒰 𑒒𑒱𑒔𑒻𑒞 𑒩𑒯𑒻𑒞 𑒕𑒲 𑒧𑒳𑒠𑒰 𑒮𑒰𑒿𑒗 𑒯𑒼𑒃𑒞𑒹 𑒁𑓀𑒑𑒏 𑒣𑒼𑒩-𑒣𑒼𑒩 𑒠𑒳𑒐𑒰𑒋 𑒪𑒑𑒻-𑒋”।
“𑒩𑒾 𑒦𑒰𑒃। 𑒏𑒯𑒻𑒞 𑒕𑒱𑒨𑒾𑒏 𑒖𑒹 𑒚𑒹𑒏𑒰𑒣𑒩 𑒔𑒪 𑒞𑒿 𑒠𑒮 𑒥𑒯𑒢𑓂𑒢𑒰 𑒥𑒢𑒰 𑒏𑒋 𑒒𑒳𑒩𑒱 𑒖𑒰𑒃 𑒕𑒱𑒯𑒲𑒿। 𑒠𑒹𑒐 𑒯𑒧𑒩𑒰 𑒂𑒅𑒩 𑒏𑒹𑒿, 𑒣𑒲𑒥𑒱 𑒏𑒋 𑒤𑒼𑒿𑒤 𑒏𑒙𑒻𑒞 𑒩𑒯𑒻𑒞 𑒕𑒲। 𑒋𑒏𑓂𑒏𑒹 𑒢𑒱𑒢𑓂𑒢𑒧𑒹 𑒦𑒼𑒩 𑒂 𑒮𑒦 𑒚𑒹𑒯𑒲 𑒐𑒞𑒧”।
𑒏𑒼𑒩𑒃𑒪𑒰𑒏 𑒮𑒦 𑒑𑒣 𑒮𑒳𑒢𑒱 𑒏𑓄 𑒑𑒳𑒧𑒏𑒲 𑒪𑒰𑒡𑒱 𑒠𑒻𑒞 𑒕𑒟𑒱 𑒥𑒳𑒡𑒢। 𑒧𑒼𑒢𑒧𑒹 𑒄𑒯𑒼 𑒯𑒼𑒃𑒞 𑒕𑒢𑓂𑒯𑒱 𑒖𑒹 𑒏𑒱𑓀𑒮𑒰𑒃𑒞 𑒛𑒼𑒧𑒰 𑒣𑒜𑓃𑒋 𑒂𑒏𑒱 𑒢𑒯𑒱 𑒣𑒜𑓃𑒋।
𑒞𑒐𑒢 𑒖𑒹 𑒂𑒃 𑒮𑒦 𑒑𑒣 𑒣𑒹𑒙𑒮𑒿 𑒢𑒱𑒏𑒰𑒪𑒱 𑒠𑒹𑒞𑒟𑒱 𑒞𑒿 𑒨𑒻𑒯 𑒮𑒦 𑒮𑓀𑒑𑒲-𑒮𑒰𑒟𑒲 𑒮𑒦 𑒏𑒰𑒪𑓂𑒯𑒱 𑒦𑒹𑒢𑒹 𑒁𑒯𑒲 𑒑𑒣𑒏𑒹𑒿 𑒪𑓄 𑒏𑓄 𑒯𑒿𑒮𑒲 𑒏𑒩𑒞𑒢𑓂𑒯𑒱। 𑒠𑒴 𑒔𑒰𑒩𑒱-𑒙𑒰 𑒣𑒰𑒃 𑒖𑒹 𑒥𑒔𑒞 𑒞𑒏𑒩𑒰 𑒑𑒰𑒧𑒣𑒩 𑒣𑒚𑒰𑒋𑒥। 𑒂 𑒞𑒰𑒯𑒱𑒮𑒿 𑒛𑒼𑒧𑒰 𑒣𑒜𑓃𑒞।
𑒧𑒳𑒠𑒰 𑒑𑒰𑒧𑒧𑒹 𑒖𑒹 𑒮𑓂𑒏𑒴𑒪 𑒩𑒯𑒋 𑒍𑒞𑒨 𑒏𑒱𑒍 𑒙𑒰 𑒠𑒪𑒱𑒞 𑒂𑒏𑒱 𑒑𑒩𑒲𑒥𑒏 𑒥𑒔𑓂𑒔𑒰 𑒢𑒯𑒱 𑒣𑒜𑓃𑒻𑒞 𑒩𑒯𑒟𑒱।
𑒮𑒩𑒏𑒰𑒩 𑒋𑒏𑒙𑒰 𑒨𑒼𑒖𑒢𑒰 𑒔𑒪𑒹𑒪𑒏, 𑒠𑒪𑒱𑒞𑒏 𑒥𑒔𑓂𑒔𑒰 𑒮𑒦𑒏𑒹𑒿 𑒥𑒱𑒢𑒰 𑒣𑒰𑒃 𑒪𑒹𑒢𑒹 𑒏𑒱𑒞𑒰𑒥 𑒥𑒰𑒿𑒙𑒥𑒰𑒏 । 𑒏𑒱𑒞𑒰𑒥 𑒪𑒹𑒥𑒰𑒏 𑒪𑒹𑒪 𑒒𑒩-𑒒𑒩 𑒖𑒰 𑒏𑒋 𑒨𑒰𑒠𑒫 𑒖𑒲 𑒧𑒰𑒮𑓂𑒙𑒩 𑒮𑒰𑒯𑒹𑒥 𑒥𑒔𑓂𑒔𑒰 𑒮𑒦𑒏𑒹𑒿 𑒮𑓂𑒏𑒴𑒪 𑒥𑒖𑒹𑒪𑒢𑓂𑒯𑒱। 𑒢𑒰𑒧 𑒪𑒱𑒐𑒪𑒢𑓂𑒯𑒱, 𑒥𑒱𑒢𑒰 𑒤𑒲𑒮𑒏, 𑒧𑒰𑒮𑒴𑒪𑒏 । 𑒮𑒦 𑒯𑒤𑒞𑒰-𑒠𑒮 𑒠𑒱𑒢 𑒁𑒋𑒥𑒼 𑒏𑒋𑒪 𑒮𑓂𑒏𑒴𑒪। 𑒠𑒳𑒮𑒡𑒙𑒼𑒪𑒲𑒮𑒿, 𑒔𑒧𑒩𑒙𑒼𑒪𑒲𑒮𑒿, 𑒡𑒼𑒥𑒱𑒨𑒰 𑒙𑒼𑒪𑒲𑒮𑒿 𑒮𑒦। 𑒛𑒼𑒧𑒰 𑒮𑒹𑒯𑒼। 𑒮𑒦𑒏𑒹𑒿 𑒏𑒱𑒞𑒰𑒥 𑒦𑒹𑒙𑒪𑒻𑒏 𑒂 𑒮𑒦 𑒮𑒣𑓂𑒞𑒰𑒯-𑒠𑒮 𑒠𑒱𑒢𑒏 𑒥𑒰𑒠 𑒢𑒱𑒣𑒞𑓂𑒞𑒰 𑒦𑓄 𑒖𑒰𑒃 𑒑𑒹𑒪 । 𑒠𑒹𑒐𑒰 –𑒠𑒹𑒐𑒲 𑒏𑒧𑒩𑒙𑒼𑒪𑒲 𑒂 𑒯𑒖𑒰𑒧𑒙𑒼𑒪𑒲𑒏 𑒥𑒔𑓂𑒔𑒰 𑒮𑒦 𑒮𑒹𑒯𑒼 𑒁𑒋𑒪𑒰𑒯 𑒣𑒜𑓃𑒋, 𑒏𑒱𑒞𑒰𑒥 𑒧𑒿𑒑𑒢𑒲𑒧𑒹 𑒦𑒹𑒙𑒥𑒰𑒏 𑒪𑒼𑒦𑒹 । 𑒧𑒳𑒠𑒰 𑒍𑒞𑒋 𑒄 𑒏𑒯𑒪 𑒑𑒹𑒪 𑒖𑒹 𑒁𑒯𑒰𑒿 𑒮𑒦 𑒣𑒻𑒒 𑒖𑒰𑒞𑒱𑒏 𑒕𑒲, 𑒧𑒳𑒤𑓂𑒞 𑒏𑒱𑒞𑒰𑒥 𑒨𑒼𑒖𑒢𑒰 𑒁𑒯𑒰𑒿 𑒮𑒢 𑒡𑒢𑒱𑒏𑒏 𑒪𑒹𑒪 𑒢𑒯𑒱 𑒕𑒻𑒏 ।
“𑒥𑒰𑒥𑒴 𑒄 𑒏𑒰𑒙𑒋 𑒥𑒪𑒰 𑒑𑒣 𑒕𑒻𑒏 𑒏𑒲, 𑒕𑒼𑒙-𑒕𑒼𑒙𑒹 𑒯𑒼𑒃𑒞 𑒕𑒻𑒏 𑒂 𑒣𑒻𑒒-𑒣𑒻𑒒𑒹 । 𑒮𑓂𑒙𑒹𑒙𑒏 𑒂𑒃 𑒡𑒩𑒱𑒏 𑒮𑒦𑒮𑒿 𑒢𑒲𑒏 𑒔𑒲𑒤-𑒧𑒱𑒢𑒱𑒮𑓂𑒙𑒩 𑒏𑒩𑓂𑒣𑒴𑒩𑒲 𑒚𑒰𑒏𑒳𑒩 𑒦𑒹𑒪 𑒕𑒻𑒏, 𑒏𑒲 𑒢𑒘𑒱 𑒕𑒻 𑒯𑒾 𑒁𑒮𑒲𑒢 𑒗𑒰” । 𑒖𑒨𑒩𑒰𑒧 𑒚𑒰𑒏𑒳𑒩 𑒁𑒣𑒢 𑒐𑒼𑒣𑒛𑓃𑒲𑒏 𑒙𑒴𑒙𑒪 𑒔𑒰𑒩𑒮𑒿 𑒯𑒳𑒪𑒏𑒻𑒞 𑒮𑒴𑒩𑓂𑒨𑒏 𑒣𑓂𑒩𑒏𑒰𑒬𑒏 𑒂𑒮𑒢𑒲𑒣𑒩 𑒁𑒮𑒲𑒢 𑒖𑒲𑒏 𑒏𑒹𑒬 𑒏𑒙𑒻𑒞 𑒥𑒖𑒪𑒰𑒯।
“𑒮𑒹 𑒞𑒿 𑒥𑒰𑒥𑒴 𑒚𑒲𑒏𑒹”। 𑒁𑒮𑒲𑒢 𑒥𑒖𑒪𑒰𑒯 ।
𑒮𑒹 𑒑𑒰𑒧𑒧𑒹 𑒤𑒹𑒩 𑒥𑓂𑒩𑒰𑒯𑒰𑒝 𑒂 𑒦𑒴𑒧𑒱𑒯𑒰𑒩𑒏𑒹 𑒕𑒼𑒛𑓃𑒱 𑒂𑒩 𑒏𑓂𑒨𑒼 𑒮𑓂𑒏𑒴𑒪𑒧𑒹 𑒣𑒜𑓃𑒋𑒫𑒪𑒰 𑒢𑒯𑒱 𑒥𑒔𑒪 । 𑒁𑒠𑒯𑒩𑒧𑒹 𑒮𑒦𑒙𑒰 𑒏𑒱𑒞𑒰𑒥 𑒄 𑒪𑒼𑒏𑒢𑒱 𑒏𑒱𑒢𑒻𑒞 𑒑𑒹𑒪𑒰𑒯 ।
“𑒯𑒹 𑒁𑒠𑒯𑒩𑒮𑒿 𑒥𑒹𑒮𑒲𑒧𑒹 𑒢𑒯𑒱 𑒠𑒹𑒥, 𑒧𑒰𑒢𑒪𑒯𑒳𑒿 𑒏𑒱𑒞𑒰𑒥 𑒢𑒫 𑒁𑒕𑒱, 𑒧𑒳𑒠𑒰 𑒁𑒯𑒰𑒿 𑒮𑒦𑒏𑒹𑒿 𑒞𑒿 𑒧𑒿𑒑𑒢𑒲𑒨𑒹𑒧𑒹 𑒢𑒹 𑒦𑒹𑒙𑒪 𑒁𑒕𑒱”।
𑒂 𑒠𑒳𑒮𑒡 𑒙𑒼𑒪𑒲, 𑒔𑒧𑒩𑒙𑒼𑒪𑒲 𑒂 𑒡𑒼𑒥𑒱𑒨𑒰 𑒙𑒼𑒪𑒲𑒮𑒿 𑒮𑒦𑒙𑒰 𑒏𑒱𑒞𑒰𑒥 𑒮𑒯𑒙𑒱 𑒏𑓄 𑒢𑒱𑒏𑒪𑒱 𑒑𑒹𑒪 ।
𑒂 𑒣𑒞𑒰 𑒢𑒯𑒱 𑒛𑒼𑒧𑒰 𑒣𑒜𑓃𑒪𑒏 𑒂𑒏𑒱 𑒢𑒯𑒱।
𑒖𑒰𑒞𑒱𑒫𑒰𑒠𑒲 𑒧𑒩𑒰𑒚𑒲
“𑒌𑒿 𑒨𑒾 𑒄 𑒏𑒲 𑒠𑒹𑒐𑒻𑒞 𑒕𑒲, 𑒂𑒤𑒱𑒮𑒧𑒹 𑒁𑒤𑒮𑒩 𑒮𑒹𑒯𑒼 𑒧𑒱𑒟𑒱𑒪𑒰𑒏 𑒂 𑒥𑒱𑒯𑒰𑒩𑒏
𑒂 𑒩𑒱𑒏𑓂𑒬𑒰𑒥𑒪𑒰, 𑒐𑒹𑒢𑒰𑒃 𑒥𑒢𑒥𑒋 𑒥𑒪𑒰 𑒮𑒹𑒯𑒼 𑒮𑒦 𑒧𑒱𑒟𑒱𑒪𑒰𑒏 𑒂 𑒥𑒱𑒯𑒰𑒩𑒏 । 𑒮𑒹 𑒏𑒼𑒢 𑒑𑒣 𑒦𑒹𑒪”।
𑒣𑒳𑒝𑒹 𑒧𑒹 𑒮𑒱𑓀𑒯𑒖𑒲 𑒏𑒹𑒿 𑒋𑒏 𑒑𑒼𑒙 𑒧𑒩𑒰𑒚𑒲 𑒮𑒖𑓂𑒖𑒢 𑒣𑒳𑒕𑒪𑒐𑒱𑒢𑓂𑒯।
𑒥𑒰𑒞 𑒮𑒹𑒯𑒼 𑒚𑒲𑒏 𑒩𑒯𑒋 𑒧𑒳𑒠𑒰 𑒥𑒰𑒯𑒩𑒲 𑒪𑒼𑒏𑒏𑒹𑒿 𑒥𑒳𑒗𑒥𑒰𑒧𑒹 𑒢𑒯𑒱 𑒂𑒥𑒋 ।
𑒮𑒱𑓀𑒯 𑒮𑒰𑒯𑒹𑒥 𑒦𑒰𑒩𑒞𑒲𑒨 𑒣𑒳𑒪𑒱𑒮 𑒮𑒹𑒫𑒰 𑒧𑒹 𑒩𑒯𑒟𑒱 𑒂 𑒯𑒳𑒢𑒏𑒩 𑒮𑒯𑒼𑒠𑒩 𑒦𑒱𑒐𑒢𑒰-𑒣𑒯𑒰𑒛𑓃𑒲𑒧𑒹 𑒣𑓂𑒩𑒱𑓀𑒙𑒱𑓀𑒑 𑒣𑓂𑒩𑒹𑒮𑒧𑒹 𑒏-𑒙 𑒮𑒦 𑒖𑒼𑒛𑓃𑒻𑒞 𑒕𑒪𑒰𑒯, 𑒮𑒹 𑒯𑒳𑒢𑒏𑒰 𑒏𑒢𑒹𑒏𑒼 𑒁𑒢𑒮𑒼𑒯𑒰𑒿𑒞 𑒢𑒯𑒱 𑒪𑒰𑒑𑒪𑒢𑓂𑒯𑒱। 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨𑒧𑒹 𑒠𑒹𑒐𑒻𑒞 𑒂𑒋𑒪 𑒕𑒟𑒱 𑒧𑒰𑒞𑓂𑒩 𑒧𑒻𑒟𑒱𑒪 𑒥𑓂𑒩𑒰𑒯𑒰𑒝 𑒂 𑒏𑒩𑓂𑒝 𑒏𑒰𑒨𑒮𑓂𑒟𑒏 𑒪𑒹𑒐𑒢𑒲𑒏𑒹𑒿 𑒔𑒧𑒏𑒻𑒞।
𑒩𑒱𑒏𑓂𑒬𑒰𑒥𑒪𑒰 𑒞𑒿 𑒠𑒩𑒦𑓀𑒑𑒰𑒏 𑒯𑒼𑒋 𑒂𑒏𑒱 𑒏𑒙𑒱𑒯𑒰𑒩𑒏,
𑒐𑒹𑒢𑒰𑒃 𑒥𑒢𑒥𑒋𑒥𑒪𑒰 𑒗𑒾𑒂 𑒩𑒯𑒥𑒹 𑒙𑒰 𑒢𑒹 𑒏𑒩𑒻𑒞 𑒁𑒕𑒱।
𑒄 𑒧𑒩𑒰𑒚𑒲 𑒮𑒦𑒏𑒹𑒿 𑒣𑒞𑒰 𑒢𑒯𑒱 𑒏𑒱𑒋𑒏 𑒁𑒢𑒮𑒼𑒯𑒰𑒿𑒞 𑒪𑒑𑒻𑒞 𑒕𑒻𑒏।
𑒥𑒛𑓂𑒛 𑒖𑒰𑒞𑒱𑒫𑒰𑒠𑒲 𑒮𑒦 𑒁𑒕𑒱 𑒄 𑒧𑒩𑒰𑒚𑒲 𑒮𑒦।
𑒟𑒹𑒟𑒩 𑒧𑒢𑒳𑒏𑓂𑒐
𑒠𑒴 𑒠𑒱𑒢𑒮𑒿 𑒣𑒩𑒥𑒰 𑒁𑒮𑒑𑒩𑒹 𑒥𑒻𑒮𑒪 𑒩𑒯𑒋 । 𑒍𑒏𑒩 𑒏𑒢𑒱𑒨𑒰𑒿 𑒅𑒜𑓃𑒩𑒱 𑒏𑒋 𑒏𑒞𑒯𑒳 𑒔𑒪𑒱 𑒑𑒻𑒪𑒻𑒏 । 𑒥𑒔𑓂𑒔𑒰 𑒮𑒦 𑒏𑒞𑒹𑒏𑒼 𑒥𑒹𑒩 𑒍𑒏𑒩 𑒐𑒼𑒣𑒛𑓃𑒲𑒧𑒹 𑒣𑒰𑒢𑒱 𑒂 𑒠𑒰𑒢𑒰 𑒠𑓄 𑒂𑒋𑒪 𑒩𑒯𑒋। 𑒧𑒳𑒠𑒰 𑒂𑒃 𑒦𑒼𑒩𑒹 𑒍 𑒐𑒼𑒣𑒛𑓃𑒲 𑒅𑒖𑒰𑒩𑒱 𑒏𑒞𑒯𑒳 𑒔𑒪𑒱 𑒑𑒹𑒪”।
“𑒏𑒱𑒋 𑒨𑒻 𑒢𑒰𑒢𑒲 । 𑒍𑒯𑒼 𑒏𑒱𑒋𑒏 𑒢𑒯𑒱 𑒠𑒼𑒮𑒩 𑒥𑒱𑒨𑒰𑒯 𑒏𑓄 𑒪𑒹𑒪𑒏 । 𑒥𑒹𑒬𑒲 𑒣𑓂𑒩𑒹𑒧 𑒏𑒩𑒻𑒞 𑒩𑒯𑒋 𑒏𑒢𑒱𑒨𑒰𑒿𑒮𑒿”।
“𑒁𑒯𑒰𑒿 𑒢𑒹𑒢𑒰 𑒕𑒲 । 𑒄 𑒏𑒼𑒢𑒼 𑒟𑒹𑒟𑒩 𑒧𑒢𑒳𑒏𑓂𑒐 𑒟𑒼𑒛𑓃𑒹 𑒕𑒲 𑒖𑒹 𑒏𑒢𑒱𑒨𑒰𑒿 𑒧𑒩𑒋, 𑒧𑒰𑒨-𑒥𑒰𑒣 𑒧𑒩𑒋, 𑒥𑒹𑒙𑒰-𑒣𑒳𑒞𑒼𑒯𑒳 𑒧𑒩𑒋, 𑒮𑒩-𑒮𑒧𑒰𑒖 𑒧𑒩𑒋, 𑒔𑒰𑒩𑒱 𑒠𑒱𑒢 𑒧𑒳𑒿𑒯 𑒪𑒙𑒏𑒰𑒋𑒞 𑒂 𑒣𑒰𑒿𑒔𑒧 𑒠𑒱𑒢𑒮𑒿 𑒤𑒹𑒩 𑒟𑒹𑒟𑒩 𑒧𑓄 𑒖𑒋𑒞 “।
𑒥𑒯𑒳𑒣𑒞𑓂𑒢𑒲 𑒫𑒱𑒫𑒰𑒯 𑒂 𑒯𑒱𑒖𑒛𑓃𑒰
“𑒧𑒩𑒱 𑒑𑒹𑒪𑒱 𑒥𑒹𑒔𑒰𑒩𑒲 “। 𑒑𑒾𑒂𑒿 𑒮𑒦 𑒤𑒪𑒢𑒰 𑒥𑒰𑒥𑒴𑒏 𑒞𑒹𑒮𑒩 𑒏𑒢𑒱𑒂𑒿𑒏 𑒧𑒳𑒃𑒪𑒰𑒣𑒩 𑒏𑒯𑒪𑒢𑓂𑒯𑒱 ।
“𑒤𑒪𑒢𑒰 𑒥𑒰𑒥𑒴 𑒞𑒹𑒮𑒩 𑒏𑒢𑒱𑒨𑒰𑒿𑒏 𑒑𑒩𑒠𑒢𑒱 𑒏𑒰𑒙𑒱 𑒪𑒹𑒪𑒢𑓂𑒯𑒱”। 𑒋𑒏 𑒑𑒼𑒙𑒹 𑒏𑒯𑒪𑒰𑒢𑓂𑒯𑒱।
“𑒮𑒹 𑒚𑒲𑒏𑒹 𑒏𑒯𑒻𑒞 𑒕𑒲 । 𑒣𑒯𑒱𑒪 𑒏𑒢𑒱𑒨𑒰𑒿𑒧𑒹 𑒥𑒔𑓂𑒔𑒰 𑒢𑒯𑒱 𑒦𑒹𑒪𑒻𑒏 𑒞𑒿 𑒠𑒼𑒮𑒩 𑒥𑒱𑒨𑒰𑒯 𑒏𑒋𑒪𑒏 । 𑒧𑒳𑒠𑒰 𑒖𑒐𑒢 𑒠𑒼𑒮𑒩𑒼𑒧𑒹 𑒥𑒔𑓂𑒔𑒰 𑒢𑒯𑒱 𑒦𑒹𑒪𑒻𑒏 𑒞𑒿 𑒥𑒳𑒗𑒥𑒰𑒏 𑒔𑒰𑒯𑒲 𑒕𑒪𑒋 𑒢𑒹”।- 𑒠𑒼𑒮𑒩 𑒑𑒼𑒙𑒹 𑒏𑒯𑒪𑒢𑓂𑒯𑒱 ।
“𑒯𑒿 𑒂 𑒅𑒢𑒙𑒹 𑒞𑒹𑒮𑒩 𑒏𑒢𑒱𑒨𑒰𑒿𑒏𑒹𑒿 𑒏𑒯𑒻𑒞 𑒩𑒯𑒟𑒱 𑒖𑒹 𑒦𑒰𑒞𑒱𑒖 𑒮𑒦𑒏𑒹𑒿 𑒢𑒯𑒱 𑒧𑒰𑒢𑒻𑒞 𑒕𑒱𑒌𑒏 𑒞𑒹𑒿 𑒦𑒑𑒫𑒰𑒢 𑒥𑒔𑓂𑒔𑒰 𑒢𑒯𑒱 𑒠𑒹𑒪𑒢𑓂𑒯𑒱 । 𑒥𑒳𑒗𑒴”?-𑒞𑒹𑒮𑒩 𑒑𑒼𑒙𑒹 𑒏𑒯𑒪𑒢𑓂𑒯𑒱 ।
“𑒯𑒱𑒖𑒛𑓃𑒰 𑒮𑒰𑒩”।- 𑒔𑒰𑒩𑒱𑒧 𑒑𑒼𑒙𑒹 𑒮𑒦𑒰 𑒮𑒧𑒰𑒣𑓂𑒞 𑒏𑒩𑒻𑒞 𑒥𑒰𑒖𑒪 ।
𑒧𑒳𑒠𑒰 𑒔𑒰𑒩𑒱 𑒑𑒼𑒙𑒹𑒏 𑒄 𑒧𑒯𑒰-𑒮𑒧𑓂𑒧𑒹𑒪𑒢 𑒋𑒯𑒱 𑒑𑒣𑒣𑒩 𑒮𑒯𑒧𑒞𑒱 𑒧𑒹 𑒕𑒪 𑒖𑒹 𑒣𑒯𑒱𑒪 𑒠𑒴 𑒙𑒰 𑒥𑒱𑒨𑒰𑒯 𑒏𑒩𑒥 𑒅𑒔𑒱𑒞 𑒩𑒯𑒋।
𑒮𑓂𑒞𑓂𑒩𑒲-𑒥𑒹𑒙𑒲
“𑒥𑒰𑒥𑒴𑒏 𑒮𑓀𑒑𑒹 𑒐𑒰𑒋𑒥”।-𑒥𑒳𑒔𑒱𑒨𑒰 𑒥𑒰𑒖𑒪𑒱 ।
“𑒯𑒹 𑒂𑒥 𑒞𑒴𑒿 𑒕𑒼𑒙 𑒢𑒯𑒱 𑒕𑒹𑒿, 𑒋𑒧𑓂𑒯𑒩 𑒥𑒻𑒮”। 𑒧𑒰𑒋 𑒏𑒯𑒪𑒢𑓂𑒯𑒱 ।
𑒤𑒹𑒩 𑒦𑒰𑒋 𑒮𑒦 𑒐𑒹𑒢𑒰𑒃 𑒐𑒹𑒪𑒏 𑒂 𑒂𑒥 𑒥𑒳𑒔𑒱𑒨𑒰 𑒂 𑒥𑒳𑒔𑒱𑒨𑒰 𑒧𑒰𑒋𑒏 𑒥𑒹𑒩 𑒂𑒋𑒪 ।
𑒞𑒩𑒏𑒰𑒩𑒲 𑒮𑒚𑒱 𑒖𑒹𑒏𑒰𑒿 𑒑𑒹𑒪 𑒩𑒯𑒋, 𑒠𑒴𑒡 𑒞𑒿 𑒥𑒰𑒥𑒴 𑒂 𑒦𑒰𑒋𑒏𑒹𑒿 𑒧𑒰𑒞𑓂𑒩 𑒦𑒹𑒙𑒪𑒻𑒏 ।
𑒧𑒰𑒋 𑒥𑒳𑒔𑒱𑒨𑒰𑒏𑒹𑒿 𑒮𑒚𑒪 𑒖𑒹𑒏𑒰𑒿 𑒞𑒩𑒏𑒰𑒩𑒲 𑒪𑒼𑒯𑒱𑒨𑒰𑒧𑒹 𑒮𑒿 𑒕𑒼𑒪𑒢𑒲𑒮𑒿 𑒖𑒹𑒢𑒰 –𑒞𑒹𑒢𑒰 𑒢𑒱𑒏𑒰𑒪𑒱 𑒏𑒋 𑒠𑒹𑒪𑒢𑓂𑒯𑒱 𑒂 𑒁𑒣𑒢𑒹 𑒦𑒰𑒞 𑒂 𑒢𑒴𑒢 –𑒞𑒹𑒪 𑒪𑒋 𑒥𑒻𑒮𑒪𑒲𑒯। 𑒠𑒴𑒡𑒏 𑒥𑒩𑓂𑒞𑒢𑒮𑒿 𑒠𑒰𑒜𑓃𑒲 𑒐𑒐𑒼𑒛𑓃𑒱 𑒏𑒋 𑒥𑒰𑒠𑒧𑒹 𑒥𑒳𑒔𑒱𑒨𑒰 𑒐𑒹𑒪𑒏।
- 𑒄 𑒐𑒱𑒮𑓂𑒮𑒰 𑒮𑒳𑒢𑒥𑒻𑒞 𑒧𑒢𑒼𑒯𑒩 𑒥𑒖𑒪𑒰𑒯 𑒖𑒹 𑒯𑒧𑒩𑒰 𑒮𑒦 𑒂𑒥 𑒄 𑒏𑓄 𑒮𑒏𑒻𑒞 𑒕𑒲 𑒏𑒲 ?
𑒣𑒯𑒱𑒢𑒹 𑒐𑒹𑒢𑒰𑒃-𑒣𑒱𑒢𑒰𑒃𑒮𑒿 𑒪𑓄 𑒏𑓄 𑒣𑒜𑓃𑒢𑒰𑒃-𑒪𑒱𑒐𑒢𑒰𑒃 𑒡𑒩𑒱 𑒥𑒹𑒙𑒲𑒏 𑒮𑓀𑒑 𑒁𑒢𑓂𑒨𑒰𑒨 𑒯𑒼𑒃𑒞 𑒩𑒯𑒋। 𑒁𑒣𑒰𑒪𑒰-𑒑𑒰𑒩𑓂𑒑𑒲-𑒧𑒻𑒞𑓂𑒩𑒹𑒨𑒲𑒏 𑒮𑒧𑒨 𑒞𑒿 𑒂𑒥 𑒖𑒰 𑒏𑓄 𑒤𑒹𑒩𑒮𑒿 𑒂𑒋𑒪 𑒁𑒕𑒱 ।
𑒥𑒱𑒂𑒯 𑒂 𑒑𑒼𑒩𑒪𑒑𑒰𑒃
𑒖𑒧𑒰𑒨 𑒣𑒋𑒩 𑒕𑒴𑒥𑒱 𑒏𑒋 𑒣𑓂𑒩𑒝𑒰𑒧 𑒏𑒋𑒪𑒢𑓂𑒯𑒱 𑒞𑒿 𑒮𑒮𑒳𑒩 𑒮𑒋 𑒙𑒏𑒰 𑒢𑒱𑒏𑒰𑒪𑒱 𑒋𑒏 𑒙𑒰𑒏𑒰𑒏 𑒢𑒼𑒙𑒏 𑒮𑒱𑒏𑓂𑒏𑒰𑒏 𑒪𑒹𑒪 𑒏𑒢𑒱𑒨𑒰𑒿𑒏𑒹𑒿 𑒮𑒼𑒩 𑒏𑒹𑒪𑒢𑓂𑒯𑒱।
𑒐𑒴𑒥 𑒐𑒩𑓂𑒔-𑒥𑒩𑓂𑒔 𑒏𑒋𑒢𑒹 𑒕𑒪𑒰𑒯 𑒥𑒹𑒙𑒲𑒏 𑒥𑒱𑒨𑒰𑒯𑒧𑒹 𑒣𑒰𑒃 𑒁𑒪𑒑 𑒑𑒢𑒢𑒹 𑒕𑒪𑒰𑒯 𑒂 𑒢𑒑𑒩𑒏 𑒔𑒰𑒩𑒱 𑒏𑒚𑓂𑒙𑒰 𑒖𑒧𑒲𑒢 𑒮𑒹𑒯𑒼 𑒥𑒹𑒙𑒲𑒏 𑒢𑒰𑒧𑒹 𑒪𑒱𑒐𑒱 𑒠𑒹𑒢𑒹 𑒕𑒪𑒰𑒯।
“𑒢𑒘𑒱 𑒥𑒰𑒥𑒴𑒖𑒲। 𑒄 𑒑𑒼𑒩-𑒪𑒑𑒰𑒃𑒏 𑒏𑒼𑒢 𑒖𑒩𑒴𑒩𑒲 𑒕𑒻𑒏”?
𑒞𑒰𑒫𑒞 𑒏𑒢𑒱𑒨𑒰𑒿 𑒂𑒥𑒱 𑒑𑒹𑒪 𑒩𑒯𑒟𑒱𑒢𑓂𑒯, 𑒋𑒏 𑒙𑒏𑒰𑒏 𑒮𑒱𑒏𑓂𑒏𑒰 𑒪𑓄 𑒏𑒋।
𑒋𑒏 𑒮𑒋 𑒋𑒏 𑒙𑒰𑒏𑒰 𑒖𑒧𑒰𑒨𑒏 𑒯𑒰𑒟𑒧𑒹 𑒩𑒐𑒻𑒞 𑒮𑒮𑒳𑒩 𑒧𑒯𑒩𑒰𑒖 𑒥𑒖𑒪𑒰𑒯- –
“𑒩𑒰𑒐𑒴-𑒩𑒰𑒐𑒴 । 𑒄 𑒞𑒿 𑒣𑒯𑒱𑒢𑒯𑒱𑒨𑒼 𑒢𑒹 𑒮𑒼𑒔𑒱𑒞𑒱𑒨𑒻𑒏”।
𑒣𑓂𑒩𑒞𑒱𑒦𑒰
𑒧𑒮𑒴𑒩𑒲𑒧𑒹 𑒂𑒃.𑒋.𑒋𑒮. 𑒂 𑒂𑒃. 𑒣𑒲. 𑒋𑒮. 𑒣𑓂𑒩𑒼𑒥𑒹𑒬𑒢𑒩 𑒮𑒦𑒏 𑒠𑒰𑒩𑒳 𑒣𑒰𑒩𑓂𑒙𑒲 𑒔𑒪𑒱 𑒩𑒯𑒪 𑒕𑒪 ।
“𑒯𑒧 𑒮𑒦 𑒋𑒞𑒹𑒏 𑒞𑒹𑒖 𑒕𑒲 𑒋𑒏 𑒮𑒨 𑒣𑓂𑒩𑒬𑓂𑒢𑒏 𑒮𑒹𑒙 𑒥𑒢𑒰 𑒏𑓄 𑒞𑒻𑒨𑒰𑒩𑒲 𑒏𑒋𑒪𑒯𑒳𑒿 𑒞𑒐𑒢 𑒖𑒰 𑒏𑒋 𑒮𑒤𑒪 𑒦𑒹𑒪𑒯𑒳𑒿 । 𑒏𑒹 𑒁𑒕𑒱 𑒯𑒧𑒩𑒰𑒮𑒿 𑒥𑒹𑒬𑒲 𑒞𑒹𑒖?”।
“𑒩𑒾 𑒠𑒱𑒢𑒹𑒮𑒥𑒰 । 𑒮𑒞𑒧𑒰𑒧𑒹 𑒞𑒴𑒿 𑒣𑒰𑒮 𑒢𑒯𑒱 𑒦𑒹𑒪𑒿𑒯, 𑒁𑒚𑒧𑒰𑒧𑒹 𑒮𑒹𑒯𑒼 𑒋𑒏 𑒥𑒹𑒩𑒹 𑒣𑒰𑒮 𑒢𑒯𑒱 𑒦𑒹𑒪𑒿𑒯 । 𑒠𑒮𑒧𑒰𑒧𑒹 𑒠𑓂𑒫𑒱𑒞𑒲𑒨 𑒬𑓂𑒩𑒹𑒝𑒲 𑒦𑒹𑒪𑒰𑒣𑒩 𑒞𑒼𑒩𑒰 𑒮𑓂𑒏𑒴𑒪𑒮𑒿 𑒢𑒱𑒏𑒰𑒪𑒱 𑒠𑒹𑒪𑒏𑒆। 𑒣𑓂𑒩𑒬𑓂𑒢𑒏 𑒣𑒻𑒙𑒩𑓂𑒢𑒏 𑒯𑒧 𑒂 𑒞𑒴𑒿 𑒣𑓂𑒩𑒻𑒏𑓂𑒙𑒱𑒮 𑒏𑒹𑒪𑒯𑒳𑒿 𑒂 𑒮𑒤𑒪 𑒦𑒹𑒪𑒯𑒳𑒿 𑒞𑒿 𑒋𑒯𑒱𑒧𑒹 𑒞𑒹𑒖𑒲 𑒏𑒹𑒩 𑒏𑒼𑒢 𑒥𑒰𑒞 𑒂𑒋𑒪”।
𑒖𑒰𑒞𑒱-𑒣𑒰𑒞𑒱
𑒯𑒻𑒠𑒩𑒰𑒥𑒰𑒠 𑒣𑒳𑒪𑒱𑒮 𑒋𑒏𑒹𑒛𑒧𑒲𑒧𑒹 𑒠𑒰𑒩𑒴𑒏 𑒣𑒰𑒩𑓂𑒙𑒲 𑒔𑒪𑒱 𑒩𑒯𑒪 𑒕𑒪 ।
“𑒏𑓂𑒨𑒼 𑒏𑒱𑒕𑒳 𑒢𑒯𑒱 𑒥𑒰𑒖𑒞, 𑒥𑒮 𑒯𑒧𑒯𑒲 𑒙𑒰 𑒥𑒰𑒖𑒥”।
𑒕𑒰𑒞𑒲 𑒣𑒱𑒙𑒻𑒞- “𑒩𑒰𑒖𑒣𑒴𑒞𑒏 𑒕𑒰𑒞𑒲 𑒕𑒲 𑒄, 𑒏𑓂𑒨𑒼 𑒏𑒱𑒕𑒳 𑒢𑒯𑒱 𑒥𑒰𑒖 “।
“:𑒦𑒰𑒃 𑒨𑒻𑒯 𑒞𑒿 𑒁𑓀𑒞𑒩 𑒕𑒻𑒏, 𑒠𑒳𑒢𑒴 𑒑𑒼𑒙𑒹 𑒂𑒃.𑒣𑒲.𑒋𑒮. 𑒕𑒲, 𑒠𑒳𑒢𑒴 𑒑𑒼𑒙𑒹 𑒣𑒲𑒢𑒹 𑒕𑒲। 𑒧𑒳𑒠𑒰 𑒏𑒲 𑒯𑒧 𑒄 𑒏𑒯𑒱 𑒮𑒏𑒻𑒞 𑒕𑒲 𑒕𑒰𑒞𑒲 𑒣𑒲𑒙𑒱 𑒏𑒋- 𑒖𑒹 𑒯𑒧 𑒛𑒼𑒧 𑒕𑒲, 𑒏𑓂𑒨𑒼 𑒏𑒱𑒕𑒳 𑒢𑒯𑒱 𑒥𑒰𑒖”!:
𑒁𑒢𑒳𑒏𑒧𑓂𑒣𑒰𑒏 𑒢𑒼𑒏𑒩𑒲
“𑒥𑒛𑓂𑒛 𑒠𑒩𑓂𑒠 𑒦𑓄 𑒩𑒯𑒪 𑒁𑒕𑒱 𑒥𑒰𑒥𑒴, 𑒂𑒥 𑒥𑒩𑓂𑒠𑒰𑒮𑓂𑒞 𑒢𑒯𑒱 𑒦𑓄 𑒩𑒯𑒪 𑒁𑒕𑒱” ।
𑒣𑒞𑒰 𑒢𑒯𑒱 𑒏𑒼𑒢 𑒒𑒰𑒫 𑒩𑒯𑒻𑒏 । 𑒣𑒳𑒏𑒰𑒩 𑒏𑒳𑒯𑒩𑒱 𑒩𑒯𑒪 𑒕𑒟𑒱 । 𑒣𑒱𑒞𑒰 𑒮𑓂𑒫𑒞𑓀𑒞𑓂𑒩𑒞𑒰 𑒮𑒹𑒢𑒰𑒢𑒲 𑒩𑒯𑒟𑒱, 𑒖𑒐𑒢 𑒛𑒰𑒏𑓂𑒙𑒩 𑒂 𑒏𑒧𑓂𑒣𑒰𑒅𑒢𑓂𑒛𑒩 𑒧𑒢𑒰 𑒏𑓄 𑒠𑒹𑒪𑒏 𑒒𑒰𑒫 𑒕𑒳𑒥𑒋𑒮𑒿 𑒞𑒿 𑒁𑒣𑒢𑒹 𑒯𑒰𑒟𑒹 𑒮𑒹𑒫𑒰 𑒏𑓄 𑒩𑒯𑒪 𑒕𑒟𑒱 । 𑒅𑒖𑒩𑒰 𑒣𑒰𑒅𑒛𑒩𑒏𑒹𑒿 𑒢𑒰𑒩𑒱𑒏𑒹𑒩𑒏 𑒞𑒹𑒪𑒧𑒹 𑒧𑒱𑒪𑒰 𑒏𑓄 𑒒𑒰𑒫𑒏 𑒐𑒣𑒪𑒾𑒃𑒨𑒰 𑒯𑒙𑒰 𑒏𑓄 𑒍𑒯𑒱𑒧𑒹 𑒪𑒑𑒰𑒥𑒟𑒱। 𑒣𑒲𑒖𑒏𑒹𑒿 𑒣𑒼𑒕𑒟𑒱। 𑒥𑒰𑒣 𑒂 𑒕𑒼𑒙 𑒦𑒰𑒋 𑒠𑒳𑒢𑒴 𑒮𑒹𑒫𑒰𑒧𑒹 𑒪𑒰𑒑𑒪 𑒩𑒯𑒟𑒱 ।
𑒣𑒩𑒴𑒏𑒰𑒿 𑒣𑓂𑒩𑒟𑒧 𑒬𑓂𑒩𑒹𑒝𑒲𑒧𑒹 𑒅𑒞𑓂𑒞𑒲𑒩𑓂𑒝 𑒦𑒹𑒪 𑒕𑒪𑒐𑒱𑒢𑓂𑒯 𑒣𑒻𑒒 𑒥𑒹𑒙𑒰, 𑒮𑒞𑓂𑒨𑒢𑒰𑒩𑒰𑒨𑒝 𑒦𑒑𑒫𑒰𑒢𑒏 𑒣𑒴𑒖𑒰 𑒦𑒹𑒪 𑒩𑒯𑒋।
𑒥𑒴𑒜𑓃 𑒥𑒰𑒣𑒏 𑒣𑒻𑒒 𑒂𑒬 𑒩𑒯𑒟𑒱 𑒥𑒛𑓃𑒏𑒰 𑒥𑒹𑒙𑒰।
𑒕𑒼𑒙𑒏𑒰 𑒥𑒹𑒙𑒰 𑒏𑒼𑒢𑒼 𑒞𑒹𑒯𑒢 𑒞𑒹𑒖𑒑𑒩 𑒢𑒯𑒱 𑒩𑒯𑒟𑒱𑒢।
𑒧𑒳𑒠𑒰 𑒩𑒼𑒑 𑒋𑒯𑒢 𑒩𑒯𑒋 𑒖𑒹 𑒋𑒏 𑒠𑒱𑒢 𑒥𑒛𑓃𑒏𑒰 𑒥𑒹𑒙𑒰𑒏 𑒣𑓂𑒩𑒰𑒝 𑒪𑒋 𑒪𑒹𑒪𑒏।
𑒁𑓀𑒑𑓂𑒩𑒹𑒖𑒮𑒿 𑒪𑒛𑓃𑒻𑒞 𑒐𑒳𑒬𑒲-𑒐𑒳𑒬𑒲 𑒖𑒹𑒪 𑒑𑒹𑒪 𑒩𑒯𑒟𑒱 𑒧𑒳𑒠𑒰 𑒞𑒐𑒢 𑒨𑒳𑒫𑒰 𑒩𑒯𑒟𑒱। 𑒥𑒳𑒜𑓃𑒰𑒩𑒲𑒧𑒹 𑒄 𑒬𑒼𑒏 𑒯𑒳𑒢𑒏𑒰 𑒞𑒼𑒛𑓃𑒱 𑒠𑒹𑒪𑒏𑒢𑓂𑒯𑒱 । 𑒑𑒳𑒧𑒬𑒳𑒧 𑒂 𑒁𑒣𑒢𑒹𑒧𑒹 𑒧𑒑𑒢 𑒩𑒯𑒋 𑒪𑒑𑒪𑒰𑒯 । 𑒮𑓂𑒫𑒞𑒞𑓂𑒩𑒞𑒰 𑒮𑒹𑒢𑒰𑒢𑒲 𑒣𑒹𑓀𑒬𑒢𑒮𑒿 𑒒𑒩 𑒔𑒪𑒰𑒥𑒟𑒱 । 𑒯𑒿 𑒕𑒼𑒙𑒏𑒰 𑒥𑒹𑒙𑒰 𑒣𑒻𑒒 𑒦𑒰𑒋𑒏 𑒮𑒙𑒱𑒩𑓂𑒤𑒱𑒏𑒹𑒙 𑒪𑓄 𑒏𑒪𑒏𑒞𑒰 𑒑𑒹𑒪𑒰𑒯 𑒂 𑒍𑒯𑒱 𑒮𑒙𑒱𑒩𑓂𑒤𑒱𑒏𑒹𑒙𑒏 𑒂𑒡𑒰𑒩𑒣𑒩 𑒯𑒳𑒢𑒏𑒰 𑒋𑒏𑒙𑒰 𑒣𑓂𑒩𑒰𑒃𑒫𑒹𑒙 𑒏𑒧𑓂𑒣𑒢𑒲𑒧𑒹 𑒢𑒲𑒏 𑒢𑒼𑒏𑒩𑒲 𑒦𑒹𑒙𑒱 𑒑𑒹𑒪𑒢𑓂𑒯𑒱। 𑒧𑒰𑒢𑒹 𑒧𑒰𑒞𑓂𑒩 𑒢𑒰𑒧 𑒥𑒠𑒪𑒱 𑒑𑒹𑒪𑒢𑓂𑒯𑒱।
𑒪𑒼𑒏𑒏𑒹𑒿 𑒥𑒰𑒣 𑒧𑒩𑒪𑒰𑒣𑒩 𑒢𑒼𑒏𑒩𑒲 𑒦𑒹𑒙𑒻𑒞 𑒕𑒻𑒏, 𑒯𑒳𑒢𑒏𑒰 𑒦𑒰𑒋𑒏 𑒧𑒩𑒪𑒰𑒣𑒩 𑒦𑒹𑒙𑒪𑒢𑓂𑒯𑒱 ।
𑒢𑒴𑒞𑒢 𑒧𑒲𑒛𑒱𑒂
𑒢𑒑𑒩𑒧𑒹 𑒛𑒏𑒻𑒞𑒲𑒏 𑒒𑒙𑒢𑒰 𑒦𑒹𑒪 ।
𑒢𑒴𑒞𑒢 𑒧𑒲𑒛𑒱𑒨𑒰 𑒁𑒣𑒢-𑒁𑒣𑒢 𑒔𑒻𑒢𑒪𑒧𑒹 -𑒮𑒩𑓂𑒫𑒣𑓂𑒩𑒟𑒧 𑒍𑒏𑒩𑒹 𑒔𑒻𑒢𑒪𑒣𑒩 𑒋𑒏𑒩 𑒮𑒴𑒔𑒢𑒰 𑒠𑒹𑒪 𑒖𑒰 𑒩𑒯𑒪 𑒁𑒕𑒱- 𑒄 𑒥𑓂𑒨𑒾𑒩𑒰 𑒠𑒻𑒞, 𑒠𑒴-𑒠𑒱𑒢𑒧𑒹 𑒋𑒏𑒼𑒙𑒰 𑒑𑒱𑒩𑒤𑒞𑒰𑒩𑒲 𑒢𑒯𑒱 𑒯𑒼𑒋𑒥𑒰𑒏 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒣𑒳𑒪𑒱𑒮𑒏 𑒁𑒏𑓂𑒭𑒧𑒞𑒰𑒏 𑒔𑒩𑓂𑒔 𑒏𑒩𑒻𑒞 𑒑𑒹𑒪।
𑒣𑒳𑒪𑒱𑒮 𑒯𑒹𑒛𑒏𑓂𑒫𑒰𑒩𑓂𑒙𑒩𑒧𑒹 𑒥𑒻𑒚𑒏𑒲 𑒦𑒹𑒪 । 𑒮𑒦 𑒙𑒲.𑒫𑒲. 𑒔𑒻𑒢𑒪 𑒏𑒯𑒱 𑒩𑒯𑒪 𑒕𑒪 𑒖𑒹 𑒔𑒰𑒩𑒱 𑒑𑒼𑒙𑒹 𑒧𑒱𑒪𑒱 𑒏𑒋 𑒛𑒏𑒻𑒞𑒲 𑒏𑒹𑒪𑒢𑓂𑒯𑒱 𑒧𑒳𑒠𑒰 𑒋𑒐𑒢 𑒡𑒩𑒱 𑒋𑒏𑒼 𑒑𑒼𑒙𑒹𑒏 𑒑𑒱𑒩𑒤𑒞𑒰𑒩𑒲 𑒢𑒯𑒱 𑒦𑒹𑒪 𑒁𑒕𑒱। 𑒋𑒢𑒏𑒰𑒅𑒢𑓂𑒙𑒩 𑒮𑓂𑒣𑒹𑒬𑒪𑒱𑒮𑓂𑒙 𑒥𑒖𑒰𑒍𑒪 𑒑𑒹𑒪𑒰𑒯। 𑒖𑒹𑒢𑒰 𑒮𑒦 𑒥𑒹𑒩 𑒯𑒼𑒃𑒞 𑒩𑒯𑒋 𑒋𑒯𑒱 𑒥𑒹𑒩 𑒮𑒹𑒯𑒼 𑒍 𑒋𑒏 𑒑𑒼𑒙𑒹𑒿 𑒣𑒏𑒛𑓃𑒱 𑒏𑒋 𑒁𑒢𑒪𑒢𑓂𑒯𑒱। 𑒔𑒰𑒩𑒱 𑒛𑒰𑒿𑒑 𑒣𑒛𑓃𑒥𑒰𑒏 𑒠𑒹𑒩𑒲 𑒕𑒪 𑒂𑒏𑒱 𑒍 𑒁𑒣𑒢 𑒛𑒏𑒻𑒞 𑒯𑒼𑒋𑒥𑒰𑒏 𑒑𑒣 𑒮𑓂𑒫𑒲𑒏𑒰𑒩 𑒏𑒋 𑒪𑒹𑒪𑒏। 𑒤𑒹𑒩 𑒋𑒢𑒏𑒰𑒅𑒢𑓂𑒙𑒩 𑒮𑓂𑒣𑒹𑒬𑒪𑒱𑒮𑓂𑒙𑒏 𑒮𑓀𑒑 𑒂𑒤𑒱𑒮𑒩 𑒪𑒼𑒏𑒢𑒱 𑒏𑒻𑒧𑒩𑒰𑒏 𑒮𑒼𑒗𑒰𑒿 𑒤𑒼𑒙𑒼 𑒐𑒱𑒔𑒥𑒹𑒪𑒢𑓂𑒯𑒱। 𑒍 𑒛𑒏𑒻𑒞 𑒁𑒣𑒢 𑒛𑒏𑒻𑒞 𑒯𑒼𑒋𑒥𑒰𑒏 𑒑𑒣 𑒮𑒹𑒯𑒼 𑒮𑓂𑒫𑒲𑒏𑒰𑒩 𑒏𑒋𑒪𑒏।
𑒔𑒰𑒩𑒱 𑒠𑒱𑒢 𑒂𑒩 𑒥𑒲𑒞𑒪। 𑒮𑒦 𑒠𑒱𑒢 𑒞𑒩𑒯-𑒞𑒩𑒯 𑒮𑒿 𑒍𑒯𑒱 𑒏𑒟𑒱𑒞 𑒛𑒏𑒻𑒞𑒏𑒹𑒿 𑒣𑒲𑒙𑒪 𑒖𑒰𑒃𑒞 𑒩𑒯𑒪,
-“𑒥𑒞𑒰 𑒁𑒣𑒢 𑒞𑒲𑒢 𑒮𑓀𑒑𑒲𑒏 𑒢𑒰𑒧 𑒖𑒏𑒩𑒰 𑒮𑓀𑒑𑒹 𑒛𑒏𑒻𑒞𑒲 𑒏𑒋𑒢𑒹 𑒕𑒪𑒯”।
-“𑒮𑒩𑒏𑒰𑒩 𑒔𑒰𑒩𑒱𑒋 𑒛𑒰𑒿𑒑𑒧𑒹 𑒁𑒣𑒢 𑒛𑒏𑒻𑒞 𑒯𑒼𑒋𑒥𑒰𑒏 𑒑𑒣 𑒮𑓂𑒫𑒲𑒏𑒰𑒩 𑒏𑒋 𑒪𑒹𑒪𑒯𑒳𑒿, 𑒯𑒧 𑒛𑒏𑒻𑒞 𑒩𑒯𑒱𑒞𑒯𑒳𑒿 𑒞𑒿 𑒄 𑒏𑒩𑒱𑒞𑒯𑒳𑒿 ? 𑒧𑒳𑒠𑒰 𑒂𑒩 𑒞𑒲𑒢𑒙𑒰 𑒮𑓀𑒑𑒲𑒏 𑒢𑒰𑒧 𑒏𑒞𑒋 𑒮𑒿 𑒂𑒢𑒴 𑒂 𑒏𑒏𑒩𑒰 𑒤𑒳𑒮𑒱𑒨𑒰𑒯𑒲𑓀𑒏𑒹𑒿 𑒤𑒿𑒮𑒰𑒥𑒲”।
𑒮𑒣𑓂𑒞𑒰𑒯 𑒦𑒩𑒱𑒏 𑒥𑒰𑒠 𑒧𑒲𑒛𑒱𑒨𑒰 𑒋𑒏𑒙𑒰 𑒥𑒧 𑒫𑒱𑒮𑓂𑒤𑒼𑒙𑒏 𑒁𑒢𑓂𑒫𑒹𑒭𑒝𑒧𑒹 𑒥𑒰𑒿𑒗𑒱 𑒑𑒹𑒪 । 𑒧𑒳𑒐𑓂𑒨 𑒛𑒏𑒻𑒞 𑒞𑒿 𑒣𑒏𑒛𑓃𑒰𑒃𑒨𑒹 𑒢𑒹 𑒑𑒹𑒪 𑒮𑒹 𑒂𑒥 𑒛𑒏𑒻𑒞𑒲𑒏 𑒏𑒰𑒫𑒩𑒹𑒖 𑒠𑒩𑓂𑒬𑒏 𑒢𑒯𑒱 𑒢𑒹 𑒠𑒹𑒐𑒋 𑒔𑒰𑒯𑒻𑒞 𑒕𑒟𑒱!
𑒣𑒥𑓂𑒪𑒱𑒏 𑒛𑒱𑒧𑒰𑒢𑓂𑒛 𑒢𑒯𑒱 𑒕𑒻𑒏 𑒮𑒹 𑒍𑒯𑒱 𑒛𑒏𑒻𑒞𑒏𑒹𑒿 𑒥𑒹𑒪 𑒦𑒹𑒙𑒪𑒻𑒏 𑒂𑒏𑒱 𑒢𑒯𑒱 𑒮𑒹 𑒏𑒼𑒢𑒼 𑒮𑒧𑒰𑒔𑒰𑒩 𑒢𑒯𑒱 𑒂𑒋𑒪।
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑
𑒑𑒰𑒧𑒧𑒹 𑒔𑒾𑒡𑒩𑒲𑒖𑒲𑒏 𑒥𑒛𑓂𑒛 𑒩𑒴𑒞𑒥𑒰, 𑒛𑒩𑒹 𑒮𑒦 𑒮𑒩𑓂𑒠 𑒩𑒯𑒻𑒞 𑒕𑒪 । 𑒏𑒏𑒩 𑒠𑒲𑒢 𑒁𑒕𑒱 𑒖𑒹 𑒯𑒳𑒢𑒏𑒩 𑒑𑒧𑓂𑒯𑒩𑒰𑒨𑒪 𑒡𑒰𑒢 𑒏𑒰𑒙𑒱 𑒪𑒹𑒞 𑒂𑒏𑒱 ... ।
𑒍 𑒋𑒏𑒙𑒰 𑒥𑒮 𑒐𑒼𑒪𑒪𑒢𑓂𑒯𑒱-
“𑒠𑒩𑒦𑓀𑒑𑒰𑒮𑒿 𑒑𑒰𑒧 𑒡𑒩𑒱 𑒔𑒪𑒞 । 𑒮𑒹𑒏𑒹𑓀𑒛 𑒯𑒻𑓀𑒛𑒧𑒹 𑒦𑒹𑒙𑒪 𑒁𑒕𑒱 । 𑒣𑒳𑒩𑒢𑒏𑒰 𑒧𑒰𑒪𑒱𑒏𑒏 𑒪𑒰𑒃𑒮𑒹𑓀𑒮 𑒏𑒰𑒖 𑒠𑒹𑒞। 𑒮𑓀𑒑𑒧𑒹 𑒥𑒮𑒏 𑒣𑒳𑒩𑒢𑒏𑒰 𑒧𑒰𑒪𑒱𑒏 𑒞𑒲𑒢 𑒧𑒰𑒮𑒏 𑒪𑒹𑒪 𑒁𑒣𑒢 𑒛𑓂𑒩𑒰𑒃𑒫𑒩 𑒂 𑒐𑒪𑒰𑒮𑒲 𑒮𑒹𑒯𑒼 𑒠𑒹𑒪𑒏 𑒁𑒕𑒱, 𑒞𑒏𑒩 𑒥𑒰𑒠 𑒁𑒣𑒢 𑒞𑒰𑒏𑒱 𑒪𑒹𑒥”।
𑒔𑒾𑒡𑒩𑒲𑒖𑒲 𑒧𑒢𑓂𑒠𑒱𑒩𑒣𑒩 𑒥𑒮𑒏 𑒣𑒴𑒖𑒰 𑒏𑒩𑒻𑒞 𑒏𑒰𑒪 𑒑𑒾𑒂𑒿 𑒮𑒦𑓃𑒮𑒿 𑒥𑒖𑒪𑒰𑒯 ।
“𑒮𑒳𑒢𑒻𑒞 𑒕𑒱𑒌𑒏 𑒥𑒮-𑒮𑓂𑒙𑒻𑒝𑓂𑒛𑒧𑒹 𑒥𑒛𑓃 𑒥𑒠𑒧𑒮𑓂𑒞𑒲 𑒏𑒩𑒻𑒞 𑒖𑒰𑒃𑒞 𑒕𑒻𑒏”- 𑒋𑒏 𑒑𑒼𑒙𑒹 𑒑𑒾𑒂𑒿 𑒥𑒖𑒪𑒰𑒯
“𑒡𑒳𑒩, 𑒔𑒾𑒡𑒩𑒲𑒖𑒲𑒏 𑒥𑒮 𑒂 𑒂𑒠𑒧𑒲𑒏𑒹𑒿 𑒏𑒹 𑒕𑒳𑒥𑒰𑒏 𑒮𑒰𑒯𑒮 𑒏𑒩𑒞”? 𑒠𑒼𑒮𑒩 𑒑𑒼𑒙𑒹 𑒣𑓂𑒩𑒮𑒰𑒠 𑒪𑒻𑒞 𑒥𑒖𑒪𑒰𑒯।
𑒥𑒮𑒏 𑒩𑒴𑒙 𑒂𑒏𑒱 𑒩𑒮𑓂𑒞𑒰 𑒨𑒰𑒞𑓂𑒩𑒲𑒑𑒝𑒏 𑒪𑒹𑒪 𑒮𑒳𑒦𑒱𑒞𑒑𑒩 𑒩𑒯𑒻𑒏 𑒮𑒹 𑒍𑒯𑒱 𑒑𑒰𑒛𑓃𑒲𑒧𑒹 𑒣𑒻𑒮𑒹𑒢𑓂𑒖𑒩 𑒦𑒩𑒱 𑒖𑒰𑒃𑒞 𑒩𑒯𑒋। 𑒠𑒼𑒮𑒩 𑒥𑒮𑒥𑒪𑒰 𑒮𑒦 𑒠𑒥𑓀𑒑 𑒮𑒦।
𑒬𑒰𑒯𑒲𑒖𑒲 𑒂 𑒧𑒱𑒬𑓂𑒩𑒰𑒖𑒲𑒏 𑒮𑓂𑒙𑒰𑒤 𑒮𑒦 𑒥𑒛𑓃 𑒮𑒘𑓂𑒖𑒞! 𑒮𑒹 𑒔𑒾𑒡𑒩𑒲𑒖𑒲𑒏 𑒮𑓂𑒙𑒰𑒤𑒏𑒹𑒿 𑒑𑒩𑒑𑒼𑒙𑒱𑒨𑒰 𑒠𑓄 𑒥𑒮 𑒮𑓂𑒙𑒻𑒝𑓂𑒛 𑒮𑒿 𑒥𑒰𑒯𑒩 𑒢𑒱𑒏𑒰𑒪𑒱 𑒠𑒹𑒪𑒏𑒢𑓂𑒯𑒱।
𑒣𑒼𑒐𑒩𑒱𑒏 𑒧𑒯𑒰𑒩𑒣𑒩𑒮𑒿 𑒔𑒾𑒡𑒩𑒲𑒖𑒲𑒏 𑒥𑒮 𑒐𑒳𑒖𑒋 𑒪𑒰𑒑𑒪 𑒞𑒿 𑒍𑒞𑒯𑒳 𑒨𑒰𑒞𑓂𑒩𑒲 𑒣𑒯𑒳𑒿𑒔𑒋 𑒪𑒑𑒪𑒰𑒯।
𑒂𑒥 𑒞𑒿 𑒥𑒮-𑒮𑓂𑒙𑒻𑒝𑓂𑒛𑒏 𑒠𑒰𑒠𑒰 𑒮𑒦𑒏𑒹𑒿 𑒥𑒛𑓂𑒛 𑒞𑒰𑒧𑒮 𑒅𑒚𑒪𑒢𑓂𑒯𑒱 ।
𑒠𑒳𑒢𑒳 𑒛𑓂𑒩𑒰𑒃𑒫𑒩 𑒂 𑒐𑒪𑒰𑒮𑒲𑒏𑒹𑒿 𑒣𑒳𑒭𑓂𑒙 𑒣𑒲𑒙𑒪 𑒑𑒹𑒪 𑒂 𑒄𑒯𑒼 𑒏𑒯𑒪 𑒑𑒹𑒪 𑒖𑒹 𑒤𑒹𑒩 𑒋𑒯𑒱 𑒩𑒴𑒙𑒣𑒩 𑒔𑒪𑒞𑒰𑒯 𑒞𑒿 𑒥𑒮𑒏 𑒋𑒏𑓂𑒮𑒲𑒛𑒹𑒢𑓂𑒙 𑒏𑒩𑒥𑒰 𑒠𑒹𑒪 𑒖𑒋𑒞𑒢𑓂𑒯𑒱। 𑒬𑒰𑒯𑒲 𑒂 𑒧𑒱𑒬𑓂𑒩𑒰 𑒖𑒲𑒏 𑒞𑒿 𑒣𑒔𑒰𑒮𑒼 𑒙𑒰 𑒑𑒰𑒛𑓃𑒲 𑒕𑒢𑓂𑒯𑒱 𑒋𑒏𑒙𑒰 𑒟𑒰𑒢𑒰𑒧𑒹 𑒋𑒏𑓂𑒮𑒲𑒛𑒹𑒢𑓂𑒙𑒏 𑒥𑒰𑒠 𑒣𑒛𑓃𑒪𑒹 𑒩𑒯𑒞 𑒞𑒿 𑒏𑒲 ?
𑒑𑒰𑒧𑒏 𑒩𑒼𑒂𑒥 –𑒠𑒰𑒥 𑒥𑒪𑒰 𑒏𑒾𑒡𑒩𑒲𑒖𑒲 𑒥𑒮-𑒮𑓂𑒙𑒹𑒝𑓂𑒛𑒏 𑒠𑒰𑒠𑒰 𑒮𑒦𑒏 𑒮𑒼𑒗𑒰𑒿 𑒖𑒹𑒢𑒰 𑒥𑒏𑒛𑓃𑒲 𑒥𑒢𑒱 𑒑𑒹𑒪𑒰𑒯।
𑒑𑒰𑒧𑒧𑒹 𑒧𑒢𑓂𑒠𑒱𑒩𑒣𑒩 𑒑𑒰𑒛𑓃𑒲 𑒚𑒰𑒜𑓃 𑒕𑒢𑓂𑒯𑒱, 𑒍𑒯𑒱 𑒣𑒩 𑒏𑒠𑒲𑒧𑒰𑒏 𑒪𑒞𑓂𑒞𑒲 𑒔𑒜𑓃𑒱 𑒑𑒹𑒪 𑒁𑒕𑒱 𑒣𑒻𑒒-𑒣𑒻𑒒 𑒏𑒠𑒲𑒧𑒰𑒮𑒿 𑒥𑒮 𑒗𑒣𑒰 𑒑𑒹𑒪 𑒁𑒕𑒱। 𑒐𑒴𑒥 𑒤𑒛𑓃𑒪 𑒕𑒻𑒏।
𑒑𑒾𑒂𑒿𑒮𑒦 𑒯𑒿𑒮𑒲𑒧𑒹 𑒏𑒯𑒱 𑒩𑒯𑒪 𑒕𑒟𑒱-
“𑒔𑒾𑒡𑒩𑒲𑒖𑒲𑒏 𑒥𑒮𑒏 𑒣𑒰𑒃 𑒞𑒿 𑒋𑒯𑒱 𑒥𑒹𑒩 𑒏𑒠𑒲𑒧𑒰 𑒥𑒹𑒔𑒱𑒨𑒹 𑒏𑓄 𑒅𑒣𑓂𑒣𑒩 𑒦𑓄 𑒖𑒋𑒞𑒢𑓂𑒯𑒱”।
“𑒠𑒩𑒦𑓀𑒑𑒰𑒏 𑒃𑒢𑓂𑒛𑒮𑓂𑒙𑓂𑒩𑒲𑒨𑒪 𑒮𑓂𑒙𑒹𑒙𑒧𑒹 𑒮𑒹𑒯𑒼 𑒤𑒻𑒏𑓂𑒙𑓂𑒩𑒲 𑒮𑒦 𑒋𑒯𑒱𑒢𑒰 𑒥𑒢𑓂𑒠 𑒁𑒕𑒱 𑒂 𑒍𑒏𑒩 𑒠𑒹𑒥𑒰𑒪 𑒮𑒦𑒣𑒩 𑒋𑒯𑒱𑒢𑒰 𑒞𑒩-𑒞𑒲𑒧𑒢𑒏 𑒪𑒞𑓂𑒞𑒲 𑒮𑒦 𑒦𑒩𑒪 𑒕𑒻𑒏”- 𑒠𑒼𑒮𑒩 𑒑𑒾𑒂𑒿 𑒥𑒰𑒖𑒪।
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑-𑓒
𑒧𑒱𑒟𑒱𑒪𑒰𑒏 𑒥𑒼𑒢𑒧𑒹 𑒩𑒯𑒢𑒱𑒯𑒰𑒩 𑒖𑒲𑒫-𑒖𑒢𑓂𑒞𑒳 𑒮𑒦 𑒂𑒣𑒮𑒧𑒹 𑒫𑒱𑒔𑒰𑒩 𑒏𑒋𑒪𑒏- –
“𑒁𑒣𑒢 𑒏𑓂𑒭𑒹𑒞𑓂𑒩𑒏 𑒠𑒰𑒠𑒰 𑒮𑒦 𑒅𑒠𑓂𑒨𑒼𑒑𑒏 𑒫𑒱𑒢𑒰𑒬 𑒏𑒋𑒢𑒹 𑒁𑒕𑒱, 𑒍𑒞𑒳𑒏𑓂𑒏𑒰 𑒦𑒲𑒩𑒴 𑒪𑒼𑒏 𑒮𑒦 𑒅𑒠𑓂𑒨𑒼𑒑 𑒪𑒑𑒹𑒥𑒰𑒮𑒿 𑒣𑒩𑒯𑒹𑒖 𑒏𑒩𑒻𑒞 𑒁𑒕𑒱”- 𑒑𑒲𑒠𑒛𑓃 𑒥𑒰𑒖𑒪।
“𑒞𑒐𑒢 𑒁𑒣𑒢𑒯𑒱 𑒮𑒦 𑒏𑒱𑒋𑒏 𑒢𑒯𑒱 𑒤𑒻𑒏𑓂𑒙𑒩𑒲 𑒐𑒼𑒪𑒻𑒞 𑒕𑒲, 𑒏𑒼𑒢 𑒠𑒰𑒠𑒰𑒏 𑒧𑒖𑒰𑒪 𑒖𑒹 𑒯𑒧𑒩𑒰 𑒮𑒦 𑒪𑒑 𑒂𑒍𑒞”।-𑒥𑒰𑒒 𑒏𑒛𑓃𑒏𑒪।
𑒣𑓂𑒩𑒮𑓂𑒞𑒰𑒫 𑒣𑒰𑒮 𑒦𑒹𑒪 𑒖𑒹 𑒂𑒥 𑒖𑓀𑒑𑒪𑒧𑒹 𑒤𑒻𑒏𑓂𑒙𑓂𑒩𑒲 𑒐𑒳𑒖𑒞 𑒂 𑒢𑒑𑒩 𑒖𑒰 𑒏𑒋 𑒅𑒠𑓂𑒨𑒼𑒑 𑒫𑒱𑒦𑒰𑒑𑒮𑒿 𑒋𑒏𑒩 𑒣𑓀𑒖𑒲𑒏𑒩𑒝 𑒏𑒩𑒥𑒰𑒍𑒪 𑒖𑒋𑒞। 𑒍𑒞𑒋 𑒦𑒲𑒩𑒴 𑒧𑒻𑒟𑒱𑒪 𑒥𑓂𑒩𑒰𑒯𑓂𑒧𑒝 𑒂 𑒏𑒩𑓂𑒝 𑒏𑒰𑒨𑒮𑓂𑒟 𑒮𑒦𑒏 𑒩𑒰𑒖 𑒁𑒕𑒱, 𑒍 𑒮𑒦 𑒥𑒛𑓂𑒛 𑒍𑒮𑓂𑒞𑒰𑒖 𑒯𑒼𑒃𑒞 𑒁𑒕𑒱।
𑒑𑒲𑒠𑒛𑓃, 𑒥𑒰𑒢𑒩, 𑒪𑒼𑒧𑒛𑓃𑒱, 𑒢𑒲𑒪𑒑𑒰𑒨 𑒮𑒦𑒏 𑒮𑓀𑒑 𑒑𑒠𑒯𑒰 𑒮𑒹𑒯𑒼 𑒣𑓀𑒖𑒲𑒏𑒩𑒝 𑒪𑒹𑒪 𑒁𑒣𑒢 𑒮𑒹𑒫𑒰 𑒠𑒹𑒥𑒰𑒏 𑒪𑒹𑒪 𑒁𑒑𑒴 𑒥𑒜𑓃𑒪𑒰𑒯। 𑒮𑒦𑒮𑒿 𑒣𑒯𑒱𑒢𑒹 𑒪𑒼𑒧𑒛𑓃𑒱𑒏𑒹𑒿 𑒧𑒾𑒏𑒰 𑒦𑒹𑒙𑒪 𑒏𑒰𑒩𑒝 𑒍 𑒮𑒹𑒯𑒼 𑒖𑓀𑒑𑒪𑒏 𑒍𑒮𑓂𑒞𑒰𑒖 𑒁𑒕𑒱।
𑒏𑒱𑒕𑒳 𑒠𑒳𑒢𑒳𑒏𑒰 𑒥𑒰𑒠 𑒠𑒾𑒑-𑒥𑒩𑒯𑒰 𑒏𑒹𑒪𑒰𑒏 𑒥𑒰𑒠 𑒍 𑒯𑒰𑒩𑒱 𑒧𑒰𑒢𑒱 𑒪𑒹𑒪𑒏।
“𑒨𑒾 𑒥𑒰𑒒 𑒧𑒯𑒰𑒩𑒰𑒖। 𑒥𑒛𑓂𑒛 𑒏𑒼𑒢-𑒏𑒼𑒢 𑒞𑒩𑒯𑒏 𑒠𑒮𑓂𑒞𑒰𑒫𑒹𑒖 𑒧𑒿𑒑𑒻𑒞 𑒁𑒕𑒱 𑒢𑒯𑒱 𑒦𑓄 𑒮𑒏𑒞 𑒯𑒧𑒩𑒰 𑒥𑒳𑒞𑒹”।
𑒤𑒹𑒩 𑒋𑒏 𑒋𑒏 𑒏𑒋 𑒮𑒦 𑒖𑒰𑒃𑒞 𑒑𑒹𑒪𑒰𑒯 𑒂 𑒒𑒳𑒩𑒱 𑒏𑒋 𑒁𑒥𑒻𑒞 𑒑𑒹𑒪𑒰𑒯 ।
𑒑𑒠𑒯𑒰 𑒏𑒯𑒻𑒞 𑒩𑒯𑒪 𑒖𑒹 𑒋𑒏 𑒧𑒾𑒏𑒰 𑒯𑒧𑒩𑒼 𑒠𑒹𑒪 𑒖𑒰𑒋 ।
𑒧𑒳𑒠𑒰 𑒮𑒦 𑒮𑒼𑒔𑒟𑒱 𑒖𑒹 𑒥𑒳𑒗𑒴, 𑒋𑒯𑒹𑒢 𑒣𑒹𑓀𑒔𑒲𑒪𑒰 𑒮𑒦 𑒫𑒱𑒤𑒪 𑒦𑓄 𑒂𑒥𑒱 𑒑𑒹𑒪𑒰𑒯 𑒧𑒳𑒠𑒰 𑒤𑒻𑒏𑓂𑒙𑒩𑒲𑒏 𑒣𑓀𑒖𑒲𑒏𑒩𑒝 𑒢𑒯𑒱 𑒏𑒩𑒥𑒰𑒋 𑒮𑒏𑒪𑒰𑒯 𑒂 𑒄 𑒑𑒠𑒯𑒰 𑒖𑒹 𑒧𑒴𑒩𑓂𑒐𑒞𑒰𑒏 𑒪𑒹𑒪 𑒂 𑒥𑒼𑒗 𑒥𑒯𑒥𑒰𑒏 𑒪𑒹𑒪 𑒣𑓂𑒩𑒮𑒱𑒠𑓂𑒡 𑒁𑒕𑒱, 𑒏𑒲 𑒏𑓄 𑒮𑒏𑒞 ?
“𑒚𑒲𑒏 𑒕𑒻𑒏”- 𑒁𑒢𑓂𑒞𑒧𑒹 𑒯𑒰𑒩𑒱 𑒏𑒋 𑒥𑒰𑒒 𑒏𑒯𑒪𑒢𑓂𑒯𑒱- –
“𑒖𑒰𑒅 𑒁𑒯𑒴𑒿 𑒠𑒹𑒐𑒱 𑒂𑒅 𑒋𑒏 𑒥𑒹𑒩”।
𑒧𑒳𑒠𑒰 𑒄 𑒏𑒲 ? 𑒮𑒰𑒿𑒗 𑒯𑒼𑒃𑒞 𑒠𑒹𑒩𑒲 𑒑𑒠𑒯𑒰 𑒧𑒯𑒰𑒩𑒰𑒖 𑒖𑒹 𑒕𑒪𑒰𑒯 𑒮𑒹 𑒤𑒻𑒏𑓂𑒙𑓂𑒩𑒲𑒏 𑒣𑓀𑒖𑒲𑒏𑒩𑒝 𑒣𑓂𑒩𑒧𑒰𑒝𑒣𑒞𑓂𑒩 𑒪𑓄 𑒮𑒼𑒗𑒰𑒿 𑒯𑒰𑒖𑒱𑒩 𑒦𑓄 𑒑𑒹𑒪𑒰𑒯।
𑒥𑒰𑒒 𑒣𑒳𑒕𑒪𑒢𑓂𑒯𑒱- –“𑒎 𑒖𑒲 𑒑𑒠𑒯𑒰 𑒧𑒯𑒰𑒩𑒰𑒖 ! 𑒋𑒞𑒹𑒏 𑒏𑒪𑒰𑒧𑒲 𑒖𑒢𑓂𑒞𑒳 𑒮𑒦 𑒖𑒞𑒋 𑒫𑒱𑒤𑒪 𑒦𑓄 𑒑𑒹𑒪𑒟𑒱 𑒍𑒞𑒋 𑒁𑒯𑒰𑒿𑒏 𑒮𑒤𑒪𑒞𑒰𑒏 𑒧𑓀𑒞𑓂𑒩 𑒏𑒲”?
𑒑𑒠𑒯𑒰 𑒧𑒯𑒰𑒩𑒰𑒖 𑒅𑒞𑓂𑒞𑒩 𑒠𑒹𑒪𑒢𑓂𑒯𑒱-
“𑒧𑒯𑒰𑒩𑒰𑒖 𑒋𑒏𑒩 𑒧𑓀𑒞𑓂𑒩 𑒁𑒕𑒱 𑒖𑒰𑒞𑒱𑒫𑒰𑒠 𑒂 𑒦𑒰𑒃-𑒦𑒞𑒲𑒖𑒰𑒫𑒰𑒠। 𑒅𑒠𑓂𑒨𑒼𑒑 𑒫𑒱𑒦𑒰𑒑𑒧𑒹 𑒯𑒧𑒩 𑒮𑒦 𑒮𑒩𑒹-𑒮𑒧𑓂𑒥𑒢𑓂𑒡𑒲 𑒪𑒼𑒏𑒢𑒱 𑒕𑒟𑒱 𑒢𑒹”!
𑒥𑒰𑒜𑓃𑒱, 𑒦𑒴𑒐 𑒂 𑒣𑓂𑒩𑒫𑒰𑒮
𑒋𑒯𑒱 𑒥𑒹𑒩𑒏 𑒥𑒰𑒜𑓃𑒱 𑒣𑒕𑒱𑒪𑒰 𑒖𑒹𑒏𑒰𑒿 𑒮𑒢 𑒢𑒯𑒱 । 𑒮𑒦𑒙𑒰 𑒮𑒳𑒛𑓂𑒛𑒰𑒯 𑒏𑓄 𑒠𑒹𑒪𑒏 𑒂𑒑𑒱𑒨𑒼𑒮𑒿 𑒖𑒪𑓂𑒠𑒲। 𑒐𑒹𑒞 𑒣𑒟𑒰𑒩𑒧𑒹 𑒩𑒹𑒞 𑒂 𑒥𑒰𑒪𑒳𑒧𑒹 𑒐𑒰𑒪𑒲 𑒁𑒪𑓂𑒯𑒳𑒂𑒏 𑒐𑒹𑒞𑒲। 𑒠𑒳𑒢𑒴 𑒮𑒰𑒿𑒗 𑒣𑒣𑓂𑒣𑒴 𑒦𑒰𑒃 𑒁𑒪𑓂𑒯𑒳𑒂 𑒐𑒰𑒃𑒞 𑒁𑒏𑒔𑓂𑒕 𑒦𑓄 𑒑𑒹𑒪 𑒕𑒟𑒱। 𑒫𑒻𑒠𑒱𑒏 𑒟𑒱𑒏𑒰𑒯, 𑒧𑒳𑒠𑒰 𑒋𑒯𑒱 𑒏𑒼𑒮𑒱𑒏𑒢𑓂𑒯𑒰𑒧𑒹 ...
𑒧𑒳𑒠𑒰 𑒠𑒹𑒐𑒴 𑒦𑒰𑒑𑓂𑒨!
𑒯𑒩𑒱𑒠𑓂𑒫𑒰𑒩 𑒮𑒿 𑒦𑒰𑒞𑒱𑒖𑒏 𑒔𑒱𑒚𑓂𑒙𑒲 𑒁𑒥𑒻𑒞 𑒁𑒕𑒱- “𑒂𑒥𑒱 𑒖𑒰𑒆 𑒏𑒰𑒏𑒰, 𑒋𑒞𑒋 𑒫𑒻𑒠𑒱𑒏 𑒪𑒼𑒏𑒢𑒱𑒏 𑒥𑒛𑓂𑒛 𑒣𑒴𑒕𑒱 𑒁𑒕𑒱। 𑒦𑒩𑒱 𑒠𑒱𑒢 𑒯𑒮𑓂𑒞-𑒮𑒢𑓂𑒔𑒰𑒪𑒢 𑒂 𑒅𑒠𑒰𑒞𑓂𑒞, 𑒁𑒢𑒳𑒠𑒰𑒞𑓂𑒞 𑒂 𑒮𑓂𑒫𑒩𑒱𑒞 𑒮𑓂𑒫𑒩𑒏 𑒧𑒹𑒪𑒮𑒿 𑒫𑒹𑒠𑒏 𑒣𑒰𑒚 𑒏𑒩𑒴 𑒂 𑒮𑒰𑒿𑒗𑒧𑒹 𑒢𑒲𑒏 – 𑒢𑒱𑒏𑒳𑒃𑒞 𑒧𑒱𑒭𑓂𑒙𑒰𑒢𑓂𑒢, 𑒐𑒲𑒩-𑒣𑒴𑒩𑒲 𑒐𑒰𑒆”।
𑒫𑒻𑒠𑒱𑒏 𑒖𑒲 𑒙𑓂𑒩𑒹𑒢 𑒡𑒹𑒪𑒢𑓂𑒯𑒱 𑒂 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒯𑒩𑒱𑒠𑓂𑒫𑒰𑒩 । 𑒍𑒞𑒋 𑒣𑒯𑒳𑒿𑒔𑒱 𑒮𑓂𑒢𑒰𑒢-𑒡𑓂𑒨𑒰𑒢 𑒏𑓄 𑒦𑒩𑒱 𑒠𑒱𑒢 𑒏𑓀𑒚 𑒤𑒰𑒛𑓃𑒱 𑒂 𑒯𑒰𑒟 𑒒𑒳𑒧𑒰𑒋 𑒫𑒻𑒠𑒱𑒏 𑒧𑓀𑒞𑓂𑒩𑒏 𑒣𑒰𑒚 𑒏𑒹𑒪𑒢𑓂𑒯𑒱 । 𑒮𑒰𑒿𑒗𑒧𑒹 𑒧𑒢𑒮𑒴𑒥𑒰 𑒥𑒰𑒢𑓂𑒯𑒱 𑒐𑒹𑒢𑒰𑒃𑒣𑒩 𑒥𑒻𑒮𑒪𑒰𑒯 𑒖𑒹 𑒂𑒥 𑒥𑒛𑓂𑒛 𑒠𑒱𑒢𑒳𑒏𑒰 𑒥𑒰𑒠 𑒐𑒲𑒩-𑒣𑒴𑒛𑓃𑒲 𑒐𑒋𑒥𑒰𑒏 𑒁𑒫𑒮𑒩 𑒦𑒹𑒙𑒞।
𑒧𑒳𑒠𑒰 𑒋𑒧𑓂𑒯𑒩 𑒯𑒱𑒢𑒏𑒰 𑒯𑒩𑒱𑒠𑓂𑒫𑒰𑒩 𑒣𑒯𑒳𑒿𑒔𑒥𑒰𑒮𑒿 𑒣𑒯𑒱𑒢𑒯𑒱 𑒠𑒼𑒮𑒩 𑒣𑓀𑒛𑒱𑒞 𑒪𑒼𑒏𑒢𑒱𑒧𑒹 𑒫𑒱𑒔𑒰𑒩-𑒫𑒱𑒧𑒩𑓂𑒬 𑒦𑒹𑒪 𑒏𑒰𑒩𑒝 𑒍 𑒪𑒼𑒏𑒢𑒱 𑒐𑒲𑒩- 𑒣𑒴𑒛𑓃𑒲 𑒐𑒰𑒃𑒞-𑒐𑒰𑒃𑒞 𑒁𑒏𑒔𑓂𑒕 𑒦𑓄 𑒑𑒹𑒪 𑒕𑒪𑒰𑒯। 𑒮𑒹 𑒮𑒩𑓂𑒫𑒮𑒧𑓂𑒧𑒞𑒱𑒮𑒿 𑒫𑒱𑒔𑒰𑒩 𑒏𑒋𑒪 𑒑𑒹𑒪 𑒖𑒹 𑒂𑒃𑒮𑒿 𑒏𑒱𑒕𑒳 𑒠𑒱𑒢𑒏 𑒪𑒹𑒪 𑒐𑒹𑒢𑒰𑒃𑒏 𑒧𑒹𑒢𑓂𑒨𑒴 𑒥𑒠𑒪𑒪 𑒖𑒰𑒋। 𑒫𑒱𑒔𑒰𑒩 𑒦𑒹𑒪 𑒖𑒹 𑒂𑒃𑒮𑒿 𑒫𑒹𑒠𑒣𑒰𑒚𑒏 𑒥𑒰𑒠 𑒁𑒪𑓂𑒯𑒳𑒂 𑒂 𑒠𑒴𑒡 𑒏𑒱𑒕𑒳 𑒠𑒱𑒢 𑒡𑒩𑒱 𑒠𑒹𑒪 𑒖𑒰𑒋।
𑒫𑒻𑒠𑒱𑒏 𑒖𑒲 𑒐𑒰𑒃 𑒪𑒹𑒪 𑒧𑒢𑒮𑒴𑒥𑒰 𑒥𑒢𑓂𑒯𑒢𑒹 𑒥𑒻𑒮𑒪 𑒕𑒪𑒰𑒯 𑒖𑒹 𑒂𑒃 𑒖𑒹 𑒐𑒹𑒢𑒰𑒃 𑒁𑒋𑒞 𑒞𑒿 𑒍𑒯𑒱 𑒐𑒹𑒢𑒰𑒃𑒏𑒹𑒿 𑒯𑒱𑒮𑓂𑒮𑒏 𑒕𑒼𑒛𑓃𑒰 𑒠𑒹𑒥𑒻𑒏।
𑒧𑒳𑒠𑒰 𑒞𑒐𑒢𑒹 𑒫𑒖𑓂𑒩𑒣𑒰𑒞 𑒦𑒹𑒪, –𑒮𑒼𑒗𑒰𑒿 𑒁𑒪𑓂𑒯𑒳𑒂 𑒧𑒯𑒰𑒩𑒰𑒖 𑒫𑒱𑒠𑓂𑒨𑒧𑒰𑒢 ।
𑒫𑒻𑒠𑒱𑒏 𑒖𑒲 𑒯𑒰𑒟 𑒖𑒼𑒛𑓃𑒻𑒞 𑒁𑒪𑓂𑒯𑒳𑒂 𑒧𑒯𑒩𑒰𑒖𑒮𑒿 𑒥𑒖𑒪𑒰𑒯-
“𑒮𑒩𑒏𑒰𑒩 𑒯𑒧 𑒞𑒿 𑒙𑓂𑒩𑒹𑒢𑒮𑒿 𑒂𑒋𑒪 𑒕𑒲 𑒧𑒳𑒠𑒰 𑒁𑒯𑒰𑒿 𑒏𑒼𑒢 𑒮𑒫𑒰𑒩𑒲𑒮𑒿 𑒁𑒋𑒪𑒯𑒳𑒿 𑒖𑒹 𑒯𑒧𑒩𑒰𑒮𑒿 𑒣𑒯𑒱𑒢𑒯𑒱𑒮𑒿 𑒫𑒱𑒩𑒰𑒖𑒧𑒰𑒢 𑒕𑒲 ।“
𑒢𑒫-𑒮𑒰𑒧𑒢𑓂𑒞
𑒮𑓀𑒑𑒲𑒏 𑒕𑒼𑒙 𑒦𑒰𑒋 𑒑𑒰𑒧𑒧𑒹 𑒩𑒯𑒟𑒱। 𑒑𑒰𑒧𑒧𑒹 𑒧𑒰𑒩𑒱-𑒣𑒲𑒙 𑒏𑒩𑒻𑒞 𑒕𑒪𑒰𑒯 𑒮𑒹 𑒯𑒳𑒢𑒏𑒰 𑒠𑒱𑒪𑓂𑒪𑒲 𑒥𑒖𑒰𑒍𑒪 𑒑𑒹𑒪 । 𑒋𑒞𑒯𑒳 𑒑𑒣-𑒑𑒣 𑒣𑒩 𑒗𑒑𑒛𑓃𑒰 𑒏𑒩𑒋 𑒪𑒰𑒑𑒟𑒱।
𑒯𑒧𑒩𑒰 𑒮𑒼𑒗𑒹𑒿𑒧𑒹 𑒋𑒏 𑒑𑒼𑒙𑒹𑒏𑒹𑒿 𑒡𑒧𑒏𑒲 𑒠𑓄 𑒩𑒯𑒪 𑒕𑒪𑒰𑒯-
“𑒠𑒮 𑒧𑒱𑒢𑒙𑒧𑒹 𑒣𑒯𑒳𑒿𑒔𑒱 𑒖𑒰𑒯 𑒢𑒯𑒱 𑒞𑒿 𑒑𑒼𑒪𑒲 𑒧𑒰𑒩𑒱 𑒠𑒹𑒥𑒯। 𑒥𑒲𑒮 𑒏𑒱𑒪𑒼𑒧𑒲𑒙𑒩 𑒠𑒴𑒩𑒧𑒹 𑒕𑒯 𑒂𑒏𑒱 𑒔𑒰𑒪𑒲𑒮 𑒏𑒱𑒪𑒼𑒧𑒲𑒙𑒩 𑒠𑒴𑒩 𑒯𑒧𑒩𑒰 𑒍𑒯𑒱𑒮𑒿 𑒏𑒼𑒢𑒼 𑒧𑒞𑒪𑒥 𑒢𑒯𑒱 𑒁𑒕𑒱”।
𑒯𑒧 𑒯𑒳𑒢𑒏𑒰 𑒫𑒱𑒭𑒨𑒧𑒹 𑒮𑒳𑒢𑒱𑒞𑒹 𑒩𑒯𑒲 𑒧𑒳𑒠𑒰 𑒂𑒃 𑒠𑒹𑒐𑒪𑒯𑒳𑒿 ।
𑒯𑒧𑒩 𑒮𑓀𑒑𑒲 𑒥𑒳𑒗𑒥𑒋 𑒪𑒑𑒪𑒐𑒱𑒢𑓂𑒯- “𑒚𑒲𑒏 𑒕𑒻𑒏, 𑒯𑒧 𑒢𑒯𑒱 𑒏𑒯𑒻𑒞 𑒕𑒲 𑒖𑒹 𑒢𑒯𑒱 𑒧𑒰𑒩𑒱𑒨𑒾𑒏। 𑒧𑒳𑒠𑒰 𑒋𑒏𑒙𑒰 𑒑𑒣 𑒏𑒯𑒴 𑒖𑒹 𑒠𑒱𑒪𑓂𑒪𑒲𑒧𑒹 𑒥𑒲𑒮 𑒏𑒱𑒪𑒼𑒧𑒲𑒙𑒩 𑒠𑒴𑒩𑒮𑒿 𑒂𑒥𑒋𑒧𑒹 𑒞𑒲𑒢 𑒧𑒱𑒢𑒙 𑒣𑓂𑒩𑒞𑒱 𑒏𑒱𑒪𑒼𑒧𑒲𑒙𑒩𑒏 𑒯𑒱𑒮𑒰𑒥𑒮𑒿 𑒮𑒰𑒚𑒱 𑒧𑒱𑒢𑒙 𑒪𑒑𑒞𑒻𑒏 𑒮𑒹 𑒍 𑒠𑒮 𑒧𑒱𑒢𑒙𑒧𑒹 𑒏𑒼𑒢𑒰 𑒂𑒍𑒞”?
𑒫𑒱𑒠𑓂𑒨𑒰𑒩𑓂𑒟𑒲 𑒦𑒲𑒞𑒩 𑒔𑒪𑒱 𑒑𑒹𑒪𑒰𑒯। 𑒯𑒧 𑒮𑓀𑒑𑒲𑒏𑒹𑒿 𑒣𑒳𑒕𑒪𑒱𑒨𑒢𑓂𑒯𑒱-
“𑒫𑒱𑒠𑓂𑒨𑒰𑒩𑓂𑒟𑒲 𑒞𑒿 𑒏𑒞𑒯𑒳 𑒑𑒳𑒛𑓃𑒑𑒰𑒿𑒫𑒧𑒹 𑒢𑒼𑒏𑒩𑒲 𑒢𑒹 𑒏𑒩𑒻𑒞 𑒩𑒯𑒟𑒱” ?
“𑒯𑒿 𑒋𑒏 𑒚𑒰𑒧 𑒠𑒮 𑒯𑒖𑒰𑒩𑒏 𑒢𑒼𑒏𑒩𑒲 𑒡𑒩𑒹𑒢𑒹 𑒩𑒯𑒱𑒨𑒢𑓂𑒯𑒱 𑒧𑒳𑒠𑒰 𑒕𑒼𑒛𑓃𑒱 𑒠𑒹𑒪𑒢𑓂𑒯𑒱। 𑒏𑒯𑒪𑒢𑓂𑒯𑒱 𑒖𑒹 𑒯𑒧𑒩 𑒪𑒹𑒥𑒪𑒏 𑒣𑒳𑒩𑒰𑒢 𑒮𑒰𑒧𑒢𑓂𑒞 𑒖𑒼𑒏𑒩 𑒄 𑒢𑒼𑒏𑒩𑒲 𑒢𑒯𑒱। 𑒂𑒥 𑒯𑒱𑒢𑒏𑒩 𑒪𑒹𑒥𑒪 𑒏𑒯𑒻𑒞 𑒕𑒲- 𑒏𑒞𑒰𑒏 𑒣𑓂𑒩𑒨𑒰𑒮 𑒏𑒋𑒪𑒯𑒳𑒿 𑒖𑒹 𑒧𑒻𑒙𑓂𑒩𑒱𑒏 𑒣𑒰𑒮 𑒦𑒋 𑒖𑒰𑒟𑒱 𑒧𑒳𑒠𑒰 𑒧𑒡𑓂𑒨𑒧𑒼𑒮𑒿 𑒣𑒰𑒮 𑒢𑒯𑒱 𑒏𑒋 𑒮𑒏𑒪𑒰𑒯”।
𑒩𑒏𑒙𑒪 𑒕𑒪𑒯𑒳𑒿 𑒏𑒼𑒯𑒥𑒩 𑒪𑒨
“𑒯𑒧 𑒨𑒰𑒠𑒫𑒖𑒲𑒏 𑒣𑒞𑓂𑒢𑒲 𑒥𑒰𑒖𑒱 𑒩𑒯𑒪 𑒕𑒲, 𑒍 𑒕𑒟𑒱 𑒏𑒲?” – 𑒤𑒼𑒢𑒣𑒩 𑒋𑒏𑒙𑒰 𑒑𑒧𑓂𑒦𑒲𑒩 𑒮𑓂𑒫𑒩 𑒂𑒋𑒪।
𑒨𑒰𑒠𑒫 𑒖𑒲 𑒋𑒐𑒢𑒹 𑒁𑒣𑒢 𑒣𑓂𑒩𑒹𑒧𑒱𑒏𑒰𑒏 𑒮𑓀𑒑 𑒥𑒰𑒯𑒩 𑒢𑒱𑒏𑒪𑒪 𑒩𑒯𑒟𑒱 ।
𑒁𑒩𑒱𑒢𑓂𑒠𑒧 𑒥𑒰𑒖𑒪- “𑒏𑒼𑒢𑒼 𑒏𑒰𑒖𑒮𑒿 𑒥𑒰𑒯𑒩 𑒑𑒹𑒪 𑒕𑒟𑒱, 𑒋𑒐𑒢𑒹 𑒠𑒴 𑒧𑒱𑒢𑒙 𑒣𑒯𑒱𑒢𑒹। 𑒯𑒳𑒢𑒏𑒩 𑒧𑒼𑒥𑒰𑒃𑒪𑒣𑒩 𑒤𑒼𑒢 𑒏𑓄 𑒪𑒱𑒁”।
“𑒧𑒼𑒥𑒰𑒃𑒪 𑒢𑒰𑒢-𑒩𑒲𑒔𑒹𑒥𑒪 𑒕𑒢𑓂𑒯𑒱, 𑒏𑒼𑒢𑒼 𑒂𑒤𑒱𑒮𑒏 𑒏𑒰𑒖𑒮𑒿 𑒑𑒹𑒪 𑒕𑒟𑒱 𑒏𑒲?”
𑒁𑒩𑒱𑒢𑓂𑒠𑒧𑒏𑒹𑒿 𑒂𑒥 𑒏𑒱𑒕𑒳 𑒢𑒯𑒱 𑒤𑒳𑒩𑒋𑒪𑒻𑒏-
“𑒢𑒯𑒱, 𑒮𑒹 𑒞𑒿 𑒪𑒰𑒑𑒻𑒋 𑒖𑒹 𑒏𑒼𑒢𑒼 𑒫𑓂𑒨𑒏𑓂𑒞𑒱𑒑𑒞𑒹 𑒏𑒰𑒖 𑒕𑒢𑓂𑒯𑒱, 𑒏𑒰𑒩𑒝 𑒂𑒤𑒱𑒮𑒏 𑒏𑒰𑒖 𑒩𑒯𑒱𑒞𑒋 𑒞𑒿 𑒯𑒧𑒩𑒰 𑒥𑒳𑒗𑒪 𑒩𑒯𑒱𑒞𑒋”।
𑒍𑒧𑓂𑒯𑒩𑒮𑒿 𑒤𑒼𑒢 𑒩𑒰𑒐𑒱 𑒠𑒹𑒪 𑒑𑒹𑒪। 𑒁𑒩𑒱𑒢𑓂𑒠𑒧𑒏𑒹𑒿 𑒧𑒼𑒢 𑒣𑒛𑓃𑒪𑒻𑒏 𑒖𑒹 𑒨𑒰𑒠𑒫𑒖𑒲 𑒖𑒰𑒃𑒮𑒿 𑒣𑒯𑒱𑒢𑒹 𑒧𑒼𑒥𑒰𑒃𑒪 𑒥𑒱𑒢𑒰 𑒂𑒤 𑒏𑒋𑒢𑒹 𑒥𑒻𑒙𑒩𑒲 𑒢𑒱𑒏𑒰𑒪𑒱 𑒂 𑒪𑒑𑒰 𑒏𑓄 𑒧𑒼𑒥𑒰𑒃𑒪 𑒥𑒢𑓂𑒠 𑒏𑒋𑒢𑒹 𑒕𑒪𑒰𑒯। 𑒮𑓂𑒫𑒰𑒃𑒞 𑒢𑒰𑒢-𑒩𑒲𑒔𑒹𑒥𑒪 𑒂𑒥𑒱 𑒩𑒯𑒪 𑒁𑒕𑒱।
𑒁𑒩𑒱𑒢𑓂𑒠𑒧 𑒪𑒻𑒣𑒙𑒰𑒣𑒣𑒩 𑒋𑒏𑓂𑒮𑒹𑒪 𑒛𑒰𑒏𑓂𑒨𑒳𑒧𑒹𑒢𑓂𑒙𑒧𑒹 𑒍𑒗𑒩𑒰𑒋𑒪 𑒯𑒱𑒮𑒰𑒥-𑒏𑒱𑒞𑒰𑒥 𑒚𑒲𑒏-𑒚𑒰𑒏 𑒏𑒩𑒋 𑒪𑒑𑒪𑒰𑒯।
𑒏𑒱𑒕𑒳 𑒠𑒱𑒢 𑒣𑒯𑒱𑒢𑒹 𑒋𑒯𑒱𑒢𑒰 𑒋𑒏𑒙𑒰 𑒮𑓂𑒫𑒩 𑒤𑒼𑒢𑒣𑒩 𑒂𑒋𑒪 𑒩𑒯𑒻𑒏- “𑒨𑒰𑒠𑒫𑒖𑒲 𑒕𑒟𑒱 𑒏𑒲?”
“𑒁𑒯𑒰𑒿 𑒏𑒹”?
“𑒯𑒧 𑒯𑒳𑒢𑒏𑒩 𑒣𑒞𑓂𑒢𑒲”। 𑒁𑒩𑒱𑒢𑓂𑒠𑒧 𑒤𑒼𑒢 𑒨𑒰𑒠𑒫𑒖𑒲𑒏𑒹𑒿 𑒠𑒹𑒢𑒹 𑒩𑒯𑒋 𑒂 𑒨𑒰𑒠𑒫𑒖𑒲 𑒐𑒴𑒥 𑒂𑒯𑓂𑒪𑒰𑒠𑒮𑒿 𑒣𑒞𑓂𑒢𑒲𑒮𑒿 𑒑𑒣 𑒏𑒋𑒢𑒹 𑒕𑒪𑒰𑒯। 𑒍𑒯𑒱 𑒠𑒱𑒢 𑒥𑒰𑒮𑒏 𑒣𑒞𑓂𑒢𑒲𑒏 𑒁𑒥𑒰𑒖 𑒍𑒞𑒹𑒏 𑒑𑒧𑓂𑒦𑒲𑒩 𑒢𑒯𑒱 𑒪𑒰𑒑𑒪 𑒩𑒯𑒻𑒏 𑒁𑒩𑒱𑒢𑓂𑒠𑒧𑒏𑒹𑒿। 𑒔𑒳𑒪𑒥𑒳𑒪𑒱𑒨𑒰 𑒮𑒢 𑒁𑒥𑒰𑒖 𑒩𑒯𑒻𑒏। 𑒯𑒼𑒃𑒞 𑒕𑒻𑒏। 𑒪𑒼𑒏𑒏 𑒧𑒼𑒢 𑒏𑓂𑒭𑒝𑒹-𑒏𑓂𑒭𑒝𑒹 𑒞𑒿 𑒥𑒠𑒪𑒻𑒞 𑒩𑒯𑒻𑒞 𑒕𑒻𑒏।
𑒁𑒩𑒱𑒢𑓂𑒠𑒧 𑒁𑒣𑒢 𑒒𑒩𑒏 𑒬𑒰𑒢𑓂𑒞-𑒣𑓂𑒩𑒬𑒰𑒢𑓂𑒞 𑒖𑒲𑒫𑒢 𑒧𑒹 𑒩𑒯𑒻𑒞 𑒁𑒕𑒱।
𑒏𑒰𑒩𑒮𑒿 𑒢𑒱𑒞𑓂𑒨 𑒁𑒥𑒻𑒞 𑒏𑒰𑒪 𑒩𑒹𑒛𑒪𑒰𑒃𑒙𑒣𑒩 𑒯𑒱𑒖𑒛𑓃𑒰-𑒮𑒦 𑒮𑒦 𑒠𑒱𑒢𑒹 𑒦𑒹𑒿𑒙 𑒯𑒼𑒃𑒞 𑒕𑒻𑒏। 𑒣𑒳𑒩𑒢𑒏𑒰 𑒏𑒰𑒩𑒧𑒹 𑒋.𑒮𑒲. 𑒢𑒯𑒱 𑒩𑒯𑒻𑒏, 𑒮𑒹 𑒬𑒲𑒮𑒰 𑒐𑒮𑒹𑒢𑒹 𑒩𑒯𑒻𑒞 𑒕𑒪। 𑒜𑒹𑒩 𑒑𑒣-𑒬𑒣 𑒥𑒖𑒻𑒞 𑒍 𑒮𑒦 𑒯𑒰𑒟-𑒧𑒳𑒿𑒯 𑒔𑒧𑒏𑒰 𑒏𑓄 𑒏𑒲-𑒏𑒲 𑒮𑒦 𑒮𑒳𑒢𑒰 𑒠𑒻𑒞 𑒩𑒯𑒋।
𑒧𑒳𑒠𑒰 𑒂𑒥 𑒍 𑒋𑒯𑒱𑒮𑒿 𑒥𑒔𑒥𑒰𑒏 𑒪𑒹𑒪 𑒬𑒲𑒮𑒰 𑒐𑒮𑒥𑒱𑒞𑒹 𑒢𑒯𑒱 𑒁𑒕𑒱। 𑒍 𑒮𑒦 𑒬𑒲𑒮𑒰𑒏 𑒥𑒰𑒯𑒩𑒮𑒿 𑒧𑒳𑒿𑒯 𑒣𑒙𑒣𑒙𑒥𑒻𑒞 𑒏𑒱𑒕𑒳 𑒏𑒰𑒪𑒧𑒹 𑒠𑒼𑒮𑒩 𑒑𑒰𑒛𑓃𑒲 𑒠𑒱𑒮 𑒥𑒜𑓃𑒱 𑒖𑒰𑒃𑒞 𑒁𑒕𑒱। 𑒣𑒩𑒮𑒴 𑒋𑒏𑒙𑒰 𑒥𑒰𑒪𑒑𑒼𑒫𑒱𑒢𑒰 𑒞𑒧𑒮𑒰 𑒏𑓄 𑒯𑒰𑒟𑒏 𑒗𑒳𑒙𑒏𑒰𑒮𑒿 𑒍𑒏𑒩 𑒏𑒰𑒩𑒧𑒹 𑒮𑓂𑒏𑓂𑒩𑒻𑒔 𑒪𑒑𑒰 𑒠𑒹𑒪𑒏𑒻𑒏। 𑒣𑒰𑒿𑒔 𑒙𑒏𑒰𑒏 𑒪𑒹𑒥𑒰𑒏 𑒥𑒠𑒪𑒰𑒧𑒹 𑒜𑒹𑒩 𑒢𑒳𑒏𑒮𑒰𑒢 𑒏𑓄 𑒠𑒹𑒪𑒏𑒻𑒏। 𑒡𑒳𑒩। 𑒏𑒹 𑒏𑒩𑒥𑒻𑒞 𑒑𑓄 𑒛𑒹𑓀𑒙𑒱𑓀𑒑-𑒣𑒹𑓀𑒙𑒱𑓀𑒑, 𑒮𑓂𑒏𑓂𑒩𑒻𑒔 𑒦𑒢𑒹 𑒩𑒯𑒞 𑒏𑒱𑒕𑒳 𑒠𑒱𑒢। 𑒠𑒱𑒪𑓂𑒪𑒲𑒧𑒹 𑒖𑒹 𑒋𑒯𑒢 𑒔𑒹𑓀𑒕𑒧𑒹 𑒛𑒹𑓀𑒙𑒱𑒑-𑒣𑒹𑓀𑒙𑒱𑓀𑒑 𑒏𑒩𑒰𑒥𑒋 𑒪𑒰𑒑𑒲 𑒞𑒿 𑒮𑒦 𑒠𑒱𑒢𑒹 𑒏𑒩𑒥𑒋 𑒣𑒛𑓃𑒞।
𑒧𑒳𑒠𑒰 𑒄 𑒢𑒫𑒏𑒰 𑒥𑒰𑒮 𑒖𑒹 𑒂𑒋𑒪 𑒕𑒻𑒏 𑒮𑒹 𑒁𑒩𑒱𑒢𑓂𑒠𑒧𑒏 𑒧𑒮𑓂𑒞𑒱𑒭𑓂𑒏𑒧𑒹 𑒋𑒏𑒙𑒰 𑒦𑒴𑒏𑒧𑓂𑒣 𑒂𑒢𑒱 𑒠𑒹𑒢𑒹 𑒕𑒻𑒏। 𑒩𑒮𑓂𑒞𑒼𑒧𑒹 𑒏𑒲 𑒮𑒦 𑒢𑒹 𑒮𑒼𑒔𑒰𑒃𑒞 𑒩𑒯𑒻𑒞 𑒕𑒻𑒏।
“𑒏𑒰𑒪𑓂𑒯𑒱 𑒁𑒯𑒰𑒿𑒏 𑒣𑒞𑓂𑒢𑒲𑒏 𑒤𑒼𑒢 𑒂𑒋𑒪 𑒩𑒯𑒢𑓂𑒯𑒱”।
“𑒁𑒔𑓂𑒕𑒰, 𑒏𑒐𑒢?”- 𑒨𑒰𑒠𑒫𑒖𑒲 𑒥𑒖𑒪𑒰𑒯।
“𑒁𑒯𑒰𑒿𑒏 𑒑𑒹𑒪𑒰𑒏 𑒏𑒱𑒕𑒳𑒋 𑒏𑒰𑒪𑒏 𑒥𑒰𑒠”।
𑒏𑒼𑒢𑒼 𑒖𑒫𑒰𑒥 𑒥𑒱𑒢𑒳 𑒠𑒹𑒢𑒹 𑒨𑒰𑒠𑒫𑒖𑒲 𑒤𑒼𑒢 𑒧𑒱𑒪𑒹𑒪𑒢𑓂𑒯𑒱-
“𑒂𑒤𑒱𑒮𑒧𑒹 𑒏𑒱𑒋𑒏 𑒤𑒼𑒢 𑒏𑒹𑒪𑒯𑒳𑒿......𑒧𑒼𑒥𑒰𑒃𑒪 𑒥𑒹𑒮𑒧𑒹𑒢𑓂𑒙𑒧𑒹 𑒢𑒰𑒢-𑒩𑒲𑒔𑒹𑒥𑒪 𑒩𑒯𑒻𑒞 𑒕𑒻𑒏 𑒞𑒿 𑒏𑒱𑒕𑒳 𑒏𑒰𑒪 𑒣𑓂𑒩𑒞𑒲𑒏𑓂𑒭𑒰 𑒏𑒋𑒪 𑒢𑒯𑒱 𑒦𑒹𑒪...”। 𑒐𑒙𑒰𑒏𑒮𑒿 𑒤𑒼𑒢 𑒩𑒱𑒮𑒲𑒫𑒩𑒣𑒩 𑒥𑒖𑒛𑓃𑒪।
𑒁𑒩𑒱𑒢𑓂𑒠𑒧 𑒪𑒻𑒣𑒙𑒰𑒣𑒮𑒿 𑒧𑒳𑒿𑒯 𑒅𑒚𑒰 𑒏𑓄 𑒠𑒹𑒐𑒪𑒏। 𑒏𑒹𑒯𑒢 𑒣𑒩𑒱𑒫𑒰𑒩 𑒕𑒻𑒏? 𑒮𑒰𑒿𑒗𑒧𑒹 𑒑𑒰𑒧𑒣𑒩 𑒣𑒯𑒳𑒿𑒔𑒪 𑒯𑒼𑒋𑒞 𑒞𑒿 𑒣𑒞𑓂𑒢𑒲𑒮𑒿 𑒑𑒣𑒼 𑒢𑒯𑒱 𑒦𑒹𑒪𑒻𑒏 𑒏𑒲 ? 𑒑𑒣𑒏 𑒤𑒩𑒱𑒕𑒰𑒯𑒙𑒱 𑒂𑒤𑒱𑒮𑒹𑒮𑒿 𑒤𑒼𑒢 𑒏𑒋 𑒏𑓄 𑒩𑒯𑒪 𑒁𑒕𑒱।
𑒁𑒩𑒱𑒢𑓂𑒠𑒧 𑒛𑒹𑒮𑓂𑒏𑒙𑒰𑒣 𑒂 𑒫𑒰𑒬𑒱𑓀𑒑 𑒧𑒬𑒲𑒢 𑒠𑒳𑒢𑒳𑒏 𑒯𑒹𑒪𑓂𑒣𑒪𑒰𑒃𑒢𑒏 𑒢𑒧𑓂𑒥𑒩𑒣𑒩 𑒤𑒼𑒢 𑒧𑒱𑒪𑒹𑒪𑒏, 𑒑𑒰𑒧𑒣𑒩 𑒤𑒳𑒩𑒮𑒞𑒱 𑒏𑒯𑒰𑒿 𑒦𑒹𑒙𑒻𑒞 𑒕𑒻𑒏। 𑒑𑒰𑒧𑒣𑒩 𑒠𑒳𑒢𑒴 𑒔𑒲𑒖 𑒋𑒏𑒹 𑒥𑒹𑒩 𑒐𑒩𑒰𑒣 𑒦𑓄 𑒑𑒹𑒪𑒻𑒏। 𑒒𑒩𑒮𑒿 𑒂𑒤𑒱𑒮 𑒢𑒱𑒏𑒪𑒻𑒞 𑒏𑒰𑒪 𑒏𑒢𑒱𑒨𑒰𑒿 𑒫𑒰𑒬𑒱𑓀𑒑 𑒧𑒬𑒲𑒢𑒏 𑒐𑒩𑒰𑒥 𑒯𑒹𑒥𑒰𑒏 𑒞𑒿 𑒥𑒹𑒙𑒰 𑒁𑒣𑒢 𑒏𑒧𑓂𑒣𑓂𑒨𑒳𑒙𑒩𑒣𑒩 𑒑𑒹𑒧 𑒏𑒻𑒏 𑒠𑒱𑒢𑒮𑒿 𑒐𑒩𑒰𑒣𑒲𑒏 𑒔𑒪𑒞𑒹 𑒥𑒢𑓂𑒠 𑒩𑒯𑒥𑒰𑒏 𑒫𑒱𑒭𑒨𑒧𑒹 𑒏𑒯𑒢𑒹 𑒩𑒯𑒻𑒏।
𑒖𑒐𑒢𑒹 𑒠𑒳𑒢𑒴 𑒚𑒰𑒧 𑒏𑒧𑓂𑒣𑓂𑒪𑒹𑒢 𑒏𑓄 𑒏𑒋 𑒤𑒼𑒢 𑒩𑒰𑒐𑒪𑒏 𑒂𑒏𑒱 𑒤𑒼𑒢𑒏 𑒒𑓀𑒙𑒲 𑒥𑒖𑒪𑒻𑒏-
“𑒏𑒞𑒹𑒏 𑒏𑒰𑒪𑒮𑒿 𑒤𑒼𑒢 𑒃𑒢𑒑𑒹𑒖 𑒩𑒐𑒢𑒹 𑒕𑒲। 𑒑𑒣 𑒮𑒳𑒢𑒴। 𑒏𑒏𑒩𑒼 𑒤𑒼𑒢 𑒂𑒥𑒋 𑒞𑒿 𑒏𑒯𑒥𑒻𑒏 𑒖𑒹 𑒨𑒰𑒠𑒫𑒖𑒲𑒏 𑒮𑓂𑒟𑒰𑒢𑒰𑒢𑓂𑒞𑒩𑒝 𑒦𑓄 𑒑𑒹𑒪𑒢𑓂𑒯𑒱”। 𑒥𑒰𑒮 𑒥𑒰𑒯𑒩 𑒏𑒞𑒯𑒳𑒮𑒿 𑒤𑒼𑒢 𑒏𑒋𑒢𑒹 𑒩𑒯𑒟𑒱𑒢𑓂𑒯 𑒂 𑒋𑒏𑒹 𑒮𑒳𑒩𑒧𑒹 𑒮𑒦𑒙𑒰 𑒥𑒰𑒖𑒱 𑒑𑒹𑒪 𑒕𑒪𑒰𑒯।
𑒏𑒰𑒪𑓂𑒯𑒱 𑒮𑒰𑒿𑒗𑒧𑒹 𑒣𑒞𑓂𑒢𑒲𑒏𑒹𑒿 𑒕𑒼𑒛𑓃𑒋 𑒪𑒹𑒪 𑒨𑒰𑒠𑒫𑒖𑒲 𑒑𑒹𑒪 𑒩𑒯𑒟𑒱 𑒂 𑒋𑒧𑓂𑒯𑒩 𑒯𑒳𑒢𑒏𑒩 𑒣𑓂𑒩𑒹𑒧𑒱𑒏𑒰𑒏 𑒤𑒼𑒢 𑒂𑒋𑒪 𑒩𑒯𑒢𑓂𑒯𑒱 𑒂𑒤𑒱𑒮𑒧𑒹। 𑒍 𑒏𑒼𑒢𑒼 𑒯𑒼𑒙𑒪𑒏 𑒢𑒰𑒧 𑒥𑒰𑒖𑒪 𑒩𑒯𑒋 𑒂 𑒏𑒯𑒢𑒹 𑒩𑒯𑒋 𑒖𑒹 𑒨𑒰𑒠𑒫𑒖𑒲𑒏𑒹𑒿 𑒯𑒼𑒙𑒪𑒏 𑒢𑒰𑒧 𑒥𑒞𑒰 𑒠𑒹𑒥𑒢𑓂𑒯𑒱 𑒍 𑒥𑒳𑒗𑒱 𑒖𑒋𑒞𑒰𑒯। 𑒁𑒩𑒱𑒢𑓂𑒠𑒧 𑒄 𑒧𑒻𑒮𑒹𑒖 𑒨𑒰𑒠𑒫𑒖𑒲𑒏𑒹𑒿 𑒞𑒐𑒢𑒹 𑒠𑓄 𑒠𑒹𑒢𑒹 𑒩𑒯𑒟𑒱। 𑒂𑒥 𑒂𑒃 𑒨𑒰𑒠𑒫𑒖𑒲 𑒢𑒯𑒱 𑒖𑒰𑒢𑒱 𑒏𑒼𑒢 𑒏𑒰𑒩𑒝𑒮𑒿 𑒋𑒐𑒢 𑒡𑒩𑒱 𑒂𑒤𑒱𑒮 𑒢𑒯𑒱 𑒂𑒋𑒪 𑒁𑒕𑒱। 𑒏𑒢𑒱𑒨𑒰𑒿 𑒞𑒿 𑒑𑒹𑒪𑒻𑒏 𑒢𑒻𑒯𑒩 𑒂 𑒞𑒐𑒢 𑒂𑒥 𑒏𑒏𑒩 𑒤𑒼𑒢 𑒁𑒋𑒞𑒻𑒏 𑒖𑒏𑒩𑒰 𑒏𑒯𑒥𑒻𑒏 𑒖𑒹 𑒋𑒏𑒩 𑒮𑓂𑒟𑒰𑒢𑒰𑒢𑓂𑒞𑒩𑒝 𑒦𑓄 𑒑𑒹𑒪𑒻𑒏।
𑒤𑒼𑒢 𑒞𑒿 𑒢𑒯𑒱 𑒂𑒋𑒪 𑒧𑒳𑒠𑒰 𑒍 𑒂𑒨𑒪𑒱 𑒩𑒯𑒋, 𑒥𑒰𑒮𑒏 𑒣𑓂𑒩𑒹𑒧𑒱𑒏𑒰। 𑒂𑒃 𑒍 𑒁𑒣𑒢 𑒢𑒰𑒧𑒼 𑒥𑒞𑒹𑒪𑒏, 𑒥𑒛𑓂𑒛 𑒢𑒲𑒏 𑒢𑒰𑒧 𑒩𑒯𑒻𑒏 𑒍𑒏𑒩- 𑒣𑒰𑒩𑒳𑒪।
“𑒨𑒰𑒠𑒫𑒖𑒲 𑒏𑒞𑒋 𑒑𑒹𑒪𑒟𑒱”।
“𑒯𑒳𑒢𑒏𑒩 𑒮𑓂𑒟𑒰𑒢𑒰𑒢𑓂𑒞𑒩𑒝 𑒦𑓄 𑒑𑒹𑒪𑒢𑓂𑒯𑒱”। 𑒁𑒩𑒱𑒢𑓂𑒠𑒧 𑒥𑒰𑒖𑒪।
“𑒁𑒔𑓂𑒕𑒰”। 𑒄 𑒏𑒯𑒱 𑒍 𑒔𑒪𑒱 𑒑𑒹𑒪𑒱।
“𑒁𑒯𑒰𑒿𑒏𑒹𑒿 𑒤𑒼𑒢𑒣𑒩 𑒂𑒋𑒪 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩𑒧𑒹 𑒄 𑒏𑒯𑒥𑒰𑒏 𑒩𑒯𑒋, 𑒮𑒼𑒗𑒰𑒿 𑒂𑒋𑒪 𑒪𑒼𑒏𑒏𑒹𑒿 𑒢𑒯𑒱”। 𑒁𑒩𑒱𑒢𑓂𑒠𑒧𑒏 𑒮𑒯𑒏𑒩𑓂𑒧𑒲 𑒩𑒼𑒯𑒱𑒝𑒲 𑒯𑒿𑒮𑒻𑒞 𑒥𑒰𑒖𑒪𑒱।
“𑒯𑒧 𑒏𑒢𑒹𑒏 𑒦𑒰𑒿𑒮𑒱 𑒑𑒹𑒪 𑒕𑒲। 𑒂𑒥 𑒂𑒃𑒮𑒿 𑒂𑒤𑒱𑒮𑒏 𑒤𑒼𑒢 𑒩𑒱𑒮𑒲𑒫 𑒏𑒩𑒥𑒰𑒏 𑒦𑒰𑒩 𑒁𑒯𑒰𑒿𑒣𑒩”। 𑒁𑒩𑒱𑒢𑓂𑒠𑒧𑒏 𑒋𑒏𑒙𑒰 𑒦𑒰𑒩 𑒩𑒼𑒯𑒱𑒝𑒲𑒣𑒩 𑒠𑒻𑒞 𑒥𑒰𑒖𑒪।
𑒩𑒼𑒯𑒱𑒝𑒲 𑒋𑒯𑒱 𑒑𑒣𑒏𑒹𑒿 𑒯𑒿𑒮𑒲𑒧𑒹 𑒪𑒹𑒢𑒹 𑒩𑒯𑒋 𑒧𑒳𑒠𑒰 𑒁𑒩𑒱𑒢𑓂𑒠𑒧 𑒞𑒐𑒢𑒹𑒮𑒿 𑒮𑒦𑒙𑒰 𑒤𑒼𑒢 𑒩𑒱𑒮𑒲𑒫 𑒏𑒹𑒢𑒰𑒃 𑒕𑒼𑒛𑓃𑒱 𑒠𑒹𑒪𑒏।
𑒋𑒯𑒢 𑒢𑒯𑒱 𑒩𑒯𑒋 𑒖𑒹 𑒥𑒰𑒮 𑒏𑒰𑒩𑓂𑒨𑒰𑒪𑒨 𑒢𑒯𑒱 𑒁𑒥𑒻𑒞 𑒕𑒪। 𑒖𑒐𑒢 𑒡𑒩𑒱 𑒍 𑒏𑒰𑒩𑓂𑒨𑒰𑒪𑒨𑒧𑒹 𑒩𑒯𑒻𑒞 𑒕𑒪 𑒥𑒹𑒬𑒲 𑒏𑒰𑒪 𑒁𑒣𑒢𑒹 𑒤𑒼𑒢 𑒩𑒱𑒮𑒲𑒫 𑒏𑒩𑒻𑒞 𑒩𑒯𑒋, 𑒏𑒰𑒖𑒧𑒹 𑒮𑒹𑒯𑒼 𑒤𑒳𑒩𑓂𑒞𑒱𑒑𑒩 𑒩𑒯𑒋।
“𑒋𑒏𑒙𑒰 𑒑𑒣 𑒥𑒳𑒗𑒪𑒱𑒌। 𑒁𑒖𑒨 𑒑𑒝𑒹𑒬𑒢 𑒂𑒃 𑒦𑒼𑒩𑒮𑒿 𑒧𑒳𑒿𑒯 𑒪𑒙𑒏𑒾𑒢𑒹 𑒁𑒕𑒱”।
“𑒏𑒱𑒋𑒏”। 𑒩𑒼𑒯𑒱𑒝𑒲𑒏 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒠𑒻𑒞 𑒁𑒩𑒱𑒢𑓂𑒠𑒧 𑒥𑒰𑒖𑒪।
“𑒃𑒢𑓂𑒙𑒩𑒢𑒹𑒙𑒣𑒩 𑒏𑒼𑒢𑒼 𑒣𑓂𑒩𑒹𑒧𑒱𑒏𑒰 𑒮𑓀𑒑𑒹 𑒏𑒞𑒹𑒏 𑒧𑒯𑒱𑒢𑒰𑒮𑒿 𑒔𑒻𑒙𑒱𑓀𑒑 𑒠𑓂𑒫𑒰𑒩𑒰 𑒣𑓂𑒩𑒹𑒧𑒰𑒪𑒰𑒣 𑒏𑒩𑒻𑒞 𑒩𑒯𑒋। 𑒂𑒃 𑒣𑒞𑒰 𑒪𑒑𑒪𑒻𑒏 𑒖𑒹 𑒍𑒏𑒩𑒰 𑒮𑓀𑒑𑒹 𑒏𑓂𑒨𑒼 𑒠𑒼𑒮𑒩 𑒪𑒛𑓃𑒏𑒰 𑒯𑒿𑒮𑒲 𑒏𑓄 𑒩𑒯𑒪 𑒕𑒪𑒻𑒏। 𑒣𑓂𑒩𑒹𑒧 𑒫𑒱𑒨𑒼𑒑𑒧𑒹 𑒁𑒠𑒯𑒰 𑒥𑒞𑒰𑒯 𑒥𑒢𑒪 𑒁𑒕𑒱”- 𑒩𑒼𑒯𑒱𑒝𑒲 𑒤𑒩𑒱𑒕𑒹𑒪𑒏।
𑒨𑒰𑒠𑒫 𑒖𑒲 𑒏𑒼𑒢𑒼 𑒔𑒲𑒖 𑒥𑒱𑒮𑒩𑒱 𑒑𑒹𑒪 𑒕𑒪𑒰𑒯 𑒮𑒹 𑒪𑒱𑒤𑓂𑒙𑒮𑒿 𑒞𑒐𑒢𑒹 𑒏𑒏𑓂𑒭𑒧𑒹 𑒂𑒋𑒪 𑒩𑒯𑒟𑒱, 𑒩𑒼𑒯𑒱𑒝𑒲𑒏 𑒑𑒣 𑒮𑒳𑒢𑒱 𑒪𑒹𑒢𑒹 𑒕𑒪𑒰𑒯।
“𑒯𑒧𑒩𑒰 𑒞𑒿 𑒃𑒢𑓂𑒙𑒩𑒢𑒹𑒙𑒏 𑒄 𑒧𑒰𑒡𑓂𑒨𑒧𑒹 𑒂𑒏𑒰𑒬𑒲𑒨 𑒪𑒑𑒻𑒞 𑒁𑒕𑒱”- 𑒏𑒯𑒻𑒞 𑒍 𑒁𑒣𑒢 𑒔𑒬𑓂𑒧𑒰 𑒪𑒹𑒪𑒢𑓂𑒯𑒱 𑒂 𑒔𑒪𑒱 𑒑𑒹𑒪𑒰𑒯।
𑒩𑒼𑒯𑒱𑒝𑒲𑒏𑒹𑒿 𑒤𑒼𑒢 𑒩𑒱𑒮𑒲𑒫 𑒏𑒩𑒥𑒰𑒏 𑒛𑓂𑒨𑒳𑒙𑒲 𑒪𑒑𑒪𑒢𑓂𑒯𑒱 𑒞𑒿 𑒁𑒩𑒱𑒢𑓂𑒠𑒧 𑒢𑒱𑒬𑓂𑒔𑒱𑒢𑓂𑒞 𑒦𑓄 𑒑𑒹𑒪𑒰𑒯।
“𑒮𑒳𑒢𑒻𑒞 𑒕𑒲। 𑒋𑒏 𑒥𑒹𑒩 𑒤𑒼𑒢𑒣𑒩 𑒖𑒹 𑒁𑒥𑒰𑒖 𑒁𑒥𑒻𑒞 𑒕𑒻𑒏 𑒖𑒹 𑒯𑒧 𑒨𑒰𑒠𑒫𑒖𑒲𑒏 𑒣𑒞𑓂𑒢𑒲 𑒕𑒲 𑒞𑒿 𑒍𑒯𑒱𑒧𑒹 𑒏𑒔𑒥𑒔𑒱𑒨𑒰𑒏 𑒁𑒥𑒰𑒖 𑒑𑒳𑒿𑒖𑒻𑒞 𑒕𑒻𑒏। 𑒠𑒼𑒮𑒩 𑒥𑒹𑒩 𑒖𑒹 𑒤𑒼𑒢 𑒁𑒥𑒻𑒞 𑒁𑒕𑒱 𑒖𑒹 𑒯𑒧 𑒨𑒰𑒠𑒫 𑒖𑒲𑒏 𑒣𑒞𑓂𑒢𑓂𑒢𑒲 𑒕𑒲 𑒞𑒿 𑒍𑒯𑒱𑒧𑒹 𑒑𑓀𑒦𑒲𑒩𑒞𑒰 𑒩𑒯𑒻𑒞 𑒕𑒻𑒏। 𑒏𑒲 𑒩𑒯𑒮𑓂𑒨 𑒁𑒕𑒱, 𑒏𑒱𑒕𑒳 𑒢𑒹 𑒥𑒳𑒗𑒰𑒃𑒋”।
“𑒪𑒼𑒏𑒏 𑒧𑒴𑒛 𑒯𑒼𑒃𑒞 𑒕𑒻𑒏”।
“𑒋𑒯𑒢 𑒏𑒼𑒢 𑒧𑒴𑒛 𑒯𑒼𑒃𑒞 𑒕𑒻𑒏 𑒖𑒹 𑒒𑒝𑓂𑒙𑒹-𑒒𑒝𑓂𑒙𑒰𑒧𑒹 𑒥𑒠𑒪𑒻𑒞 𑒩𑒯𑒻𑒞 𑒕𑒻𑒏। 𑒂 𑒠𑒹𑒐𑒴 𑒋𑒯𑒱 𑒥𑒰𑒮𑒏𑒹𑒿। 𑒖𑒐𑒢 𑒔𑒳𑒪𑒥𑒳𑒪𑒱𑒨𑒰 𑒧𑒴𑒛𑒧𑒹 𑒤𑒼𑒢 𑒁𑒥𑒻𑒞 𑒕𑒻𑒏 𑒞𑒿 𑒄 𑒯𑒿-𑒯𑒿 𑒯𑒧𑒩 𑒮𑒩𑒏𑒰𑒩 𑒏𑒯𑒱 𑒏𑓄 𑒑𑒣 𑒏𑒩𑒻𑒞 𑒁𑒕𑒱 𑒂 𑒖𑒐𑒢 𑒑𑒧𑓂𑒦𑒲𑒩 𑒮𑓂𑒫𑒩𑒧𑒹 𑒣𑒞𑓂𑒢𑒲𑒏 𑒤𑒼𑒢 𑒁𑒥𑒻𑒞 𑒕𑒻𑒏 𑒞𑒿 𑒗𑒱𑒩𑒏𑒱𑒏𑒿 𑒥𑒖𑒻𑒞 𑒁𑒕𑒱 𑒖𑒹 𑒂𑒤𑒱𑒮𑒏 𑒤𑒼𑒢𑒣𑒩 𑒤𑒼𑒢 𑒏𑒱𑒋𑒏 𑒏𑒹𑒪𑒯𑒳𑒿 ? 𑒥𑒳𑒗𑒴”।
“𑒄 𑒁𑒣𑒢𑒰 𑒩𑒯𑒪𑒰𑒣𑒩 𑒤𑒼𑒢 𑒁𑒣𑒢𑒹 𑒅𑒚𑒥𑒻𑒏 𑒣𑓂𑒩𑒨𑒰𑒮 𑒏𑒩𑒻𑒞 𑒁𑒕𑒱”।
“𑒏𑒼𑒢𑒼 𑒛𑒩 𑒕𑒻𑒏 𑒞𑒰𑒯𑒱 𑒠𑓂𑒫𑒰𑒩𑒹”।
“𑒁𑒯𑒰𑒿𑒏𑒹𑒿 𑒞𑒿 𑒍𑒯𑒱𑒢𑒰 𑒪𑒑𑒻𑒞 𑒩𑒯𑒻𑒋, 𑒏𑒟𑒲𑒏 𑒛𑒩 𑒩𑒯𑒞𑒻𑒏 𑒋𑒏𑒩𑒰”। 𑒁𑒩𑒱𑒢𑓂𑒠𑒧 𑒥𑒰𑒖𑒪 ।
𑒂𑒥 𑒁𑒩𑒱𑒢𑓂𑒠𑒧𑒏𑒹𑒿 𑒪𑒑𑒪𑒻𑒏 𑒖𑒹 𑒩𑒼𑒯𑒱𑒝𑒲 𑒏𑒼𑒢𑒼 𑒔𑒲𑒖𑒏 𑒁𑒢𑓂𑒫𑒹𑒭𑒝𑒧𑒹 𑒪𑒰𑒑𑒱 𑒑𑒹𑒪 𑒁𑒕𑒱।
“𑒠𑒴 𑒠𑒱𑒢𑒮𑒿 𑒠𑒹𑒫𑒑𑒢 𑒞𑓀𑒑 𑒏𑒋𑒢𑒹 𑒁𑒕𑒱 𑒠𑒳𑒩𑓂𑒒𑒙𑒢𑒰 𑒥𑒲𑒧𑒰 𑒏𑒩𑒹𑒥𑒰𑒏 𑒪𑒹𑒪”- 𑒩𑒼𑒯𑒱𑒝𑒲 𑒥𑒖𑒪𑒲𑒯।
“𑒋𑒖𑒹𑒢𑓂𑒮𑒲 𑒪𑓄 𑒪𑒹𑒪𑒏 𑒁𑒕𑒱 𑒏𑒲?”- 𑒁𑒩𑒱𑒢𑓂𑒠𑒧 𑒅𑒞𑓂𑒞𑒩𑒧𑒹 𑒣𑓂𑒩𑒬𑓂𑒢 𑒣𑒳𑒕𑒪𑒢𑓂𑒯𑒱।
𑒠𑒹𑒫𑒑𑒢 𑒍𑒯𑒱 𑒂𑒤𑒱𑒮𑒧𑒹 𑒔𑒣𑒩𑒰𑒮𑒲 𑒕𑒪।
“𑒯𑒿, 𑒋𑒯𑒱 𑒢𑒑𑒩𑒧𑒹 𑒖𑒞𑒹𑒏 𑒣𑒰𑒃 𑒦𑒹𑒙𑒻𑒞 𑒕𑒻𑒏 𑒞𑒰𑒯𑒱𑒮𑒿 𑒏𑒲 𑒯𑒼𑒋𑒞𑒻𑒏 ? 𑒮𑒹 𑒣𑒞𑓂𑒢𑒲𑒏 𑒢𑒰𑒧𑒮𑒿 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒁𑒕𑒱। 𑒯𑒧𑒩𑒼 𑒏𑒯𑒻𑒞 𑒩𑒯𑒋 𑒣𑒢𑓂𑒠𑓂𑒩𑒯 𑒮𑒰𑒪𑒏 𑒠𑒳𑒩𑓂𑒒𑒙𑒢𑒰 𑒥𑒲𑒧𑒰 𑒪𑒹𑒥𑒰𑒏 𑒪𑒹𑒪”।
“𑒍, 𑒞𑒐𑒢 𑒄 𑒋𑒪.𑒂𑒃.𑒮𑒲. 𑒢𑒯𑒱 𑒖𑒲.𑒂𑒃.𑒮𑒲.𑒏 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒁𑒕𑒱”।
“𑒏𑒧𑓂𑒧𑒹 𑒣𑓂𑒩𑒲𑒧𑒱𑒨𑒧 𑒕𑒻𑒏 𑒪𑓄 𑒪𑒱𑒨𑒾𑒏, 𑒯𑒧𑒯𑒴 𑒪𑓄 𑒩𑒯𑒪 𑒕𑒲”।
𑒠𑒹𑒫𑒑𑒢 𑒐𑒳𑒬𑒲 𑒐𑒳𑒬𑒲 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒤𑒰𑒩𑓂𑒧 𑒦𑒩𑒥𑒰𑒏 𑒪𑒹𑒪 𑒠𑒹𑒪𑒏 𑒂 𑒔𑒰𑒯 𑒥𑒢𑒹𑒥𑒰𑒏 𑒪𑒹𑒪 𑒔𑒪𑒱 𑒑𑒹𑒪। 𑒞𑒐𑒢𑒹 𑒨𑒰𑒠𑒫𑒖𑒲 𑒡𑒩𑒡𑒩𑒰𑒃𑒞 𑒁𑒋𑒪𑒰𑒯।
“𑒏𑒼𑒢 𑒤𑒰𑒩𑓂𑒧 𑒮𑒦 𑒑𑒼𑒙𑒹 𑒦𑒩𑒱 𑒩𑒯𑒪 𑒕𑒲?”
“𑒠𑒹𑒫𑒑𑒢 𑒏𑒢𑒱𑒨𑒰𑒿𑒏 𑒢𑒰𑒧𑒮𑒿 𑒃𑒢𑓂𑒮𑓂𑒨𑒼𑒩𑒹𑒢𑓂𑒮𑒏 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒁𑒕𑒱, 𑒫𑒻𑒯 𑒠𑒳𑒩𑓂𑒒𑒙𑒢𑒰 𑒥𑒲𑒧𑒰 𑒏𑒩𑒥𑒰 𑒩𑒯𑒪 𑒁𑒕𑒱 𑒮𑒦𑒏”। 𑒩𑒼𑒯𑒱𑒝𑒲 𑒂 𑒁𑒩𑒱𑒢𑓂𑒠𑒧 𑒖𑒹𑒢𑒰 𑒮𑓀𑒑𑒹 𑒥𑒰𑒖𑒱 𑒅𑒚𑒪𑒰𑒯।
𑒞𑒐𑒢𑒹 𑒠𑒹𑒫𑒑𑒢 𑒔𑒰𑒯𑒏 𑒙𑓂𑒩𑒹 𑒪𑒹𑒢𑒹 𑒂𑒋𑒪। 𑒨𑒰𑒠𑒫𑒖𑒲𑒏𑒹𑒿 𑒤𑒰𑒩𑓂𑒧𑒏 𑒞𑒯𑒏𑒲𑒏𑒰𑒞 𑒏𑒩𑒻𑒞 𑒠𑒹𑒐𑒱 𑒍𑒏𑒩 𑒠𑒹𑒯 𑒮𑒩𑓂𑒠 𑒦𑓄 𑒑𑒹𑒪𑒻𑒏।
“𑒠𑒴 𑒙𑒰 𑒤𑒰𑒩𑓂𑒧 𑒯𑒧𑒩𑒼𑒮𑒿 𑒦𑒩𑒥𑒰 𑒪𑒱𑒁”- 𑒨𑒰𑒠𑒫𑒖𑒲 𑒠𑒹𑒫𑒑𑒢𑒏𑒹𑒿 𑒏𑒯𑒪𑒐𑒱𑒢𑓂𑒯।
𑒠𑒹𑒫𑒑𑒢𑒏𑒹𑒿 𑒞𑒿 𑒏𑒰𑒢𑒣𑒩 𑒫𑒱𑒬𑓂𑒫𑒰𑒮𑒹 𑒢𑒯𑒱 𑒦𑒹𑒪𑒻𑒏। 𑒠𑒾𑒑𑒱 𑒏𑓄 𑒠𑒴 𑒙𑒰 𑒤𑒰𑒩𑓂𑒧 𑒁𑒢𑒪𑒏।
“𑒋𑒏𑒙𑒰 𑒯𑒧𑒩𑒰 𑒢𑒰𑒧𑒮𑒿 𑒦𑒩𑒴 𑒂 𑒋𑒏𑒙𑒰 𑒮𑒥𑒲𑒢𑒰 𑒨𑒰𑒠𑒫𑒏 𑒢𑒰𑒧𑒮𑒿”।
“𑒧𑒹𑒧 𑒮𑒰𑒯𑒥𑒏 𑒢𑒰𑒧 𑒮𑒥𑒲𑒢𑒰 𑒨𑒰𑒠𑒫 𑒕𑒢𑓂𑒯𑒱?”
“𑒯𑒿”।
𑒤𑒰𑒩𑓂𑒧 𑒖𑒐𑒢 𑒦𑒩𑒰𑒋 𑒪𑒰𑒑𑒪 𑒞𑒿 𑒢𑒰𑒧𑒱𑒢𑒹𑒬𑒢𑒏 𑒏𑒰𑒪𑒧 𑒧𑒹 𑒠𑒹𑒫𑒑𑒢 𑒨𑒰𑒠𑒫𑒖𑒲 𑒥𑒪𑒰 𑒤𑒰𑒩𑓂𑒧𑒧𑒹 𑒮𑒥𑒲𑒢𑒰 𑒨𑒰𑒠𑒫 𑒂 𑒮𑒥𑒲𑒢𑒰 𑒨𑒰𑒠𑒫 𑒥𑒪𑒰 𑒤𑒰𑒩𑓂𑒧𑒧𑒹 𑒨𑒰𑒠𑒫 𑒖𑒲𑒏 𑒢𑒰𑒧 𑒦𑒩𑒱 𑒠𑒹𑒪𑒏।
“𑒄 𑒏𑒲 𑒏𑒹𑒪𑒯𑒳𑒿, 𑒠𑒳𑒢𑒴 𑒤𑒰𑒩𑓂𑒧 𑒔𑒹𑒢𑓂𑒖 𑒏𑒩𑒴। 𑒢𑒰𑒧𑒱𑒢𑒹𑒬𑒢𑒏 𑒏𑒲 𑒖𑒩𑒴𑒩𑒞𑒱 𑒁𑒕𑒱। 𑒯𑒧𑒩𑒰 𑒣𑒞𑓂𑒢𑒲𑒏 𑒣𑒰𑒃𑒏 𑒏𑒼𑒢𑒼 𑒐𑒑𑒞𑒰 𑒢𑒯𑒱 𑒁𑒕𑒱”।
𑒠𑒹𑒫𑒑𑒢 𑒠𑒳𑒢𑒴 𑒤𑒰𑒩𑓂𑒧 𑒤𑒰𑒛𑓃𑒱 𑒠𑒴 𑒙𑒰 𑒢𑒫 𑒤𑒰𑒩𑓂𑒧 𑒦𑒩𑒪𑒏। 𑒁𑒣𑒢 𑒤𑒰𑒩𑓂𑒧𑒧𑒹 𑒨𑒰𑒠𑒫𑒖𑒲 𑒯𑒮𑓂𑒞𑒰𑒏𑓂𑒭𑒩 𑒏𑒋𑒪𑒢𑓂𑒯𑒱 𑒂 𑒠𑒼𑒮𑒩 𑒤𑒰𑒩𑓂𑒧 𑒮𑒰𑒃𑒢 𑒏𑒩𑒹𑒥𑒰𑒏 𑒪𑒹𑒪 𑒠𑒹𑒫𑒑𑒢𑒏𑒹𑒿 𑒣𑒞𑒰 𑒪𑒱𑒐𑒱 𑒏𑓄 𑒠𑒹𑒥𑓄 𑒪𑒑𑒪𑒰𑒯।
“𑒯𑒧𑒩𑒰 𑒁𑒯𑒰𑒿𑒏 𑒛𑒹𑒩𑒰 𑒠𑒹𑒐𑒪 𑒁𑒕𑒱 𑒮𑒰𑒯𑒥”।
“𑒄 𑒠𑒼𑒮𑒩 𑒣𑒞𑒰 𑒕𑒲, 𑒩𑒰𑒐𑒴”।
𑒩𑒼𑒯𑒱𑒝𑒲𑒏 𑒏𑒰𑒢 𑒚𑒰𑒜𑓃 𑒦𑓄 𑒑𑒹𑒪𑒢𑓂𑒯𑒱। 𑒍 𑒨𑒰𑒠𑒫𑒖𑒲𑒏 𑒥𑒰𑒯𑒩 𑒑𑒹𑒪𑒰𑒏 𑒥𑒰𑒠 𑒠𑒹𑒫𑒑𑒢𑒏 𑒏𑒰𑒢𑒧𑒹 𑒏𑒱𑒕𑒳 𑒏𑒯𑒪𑒢𑓂𑒯𑒱। 𑒁𑒩𑒱𑒢𑓂𑒠𑒧 𑒁𑒣𑒢 𑒏𑒰𑒖𑒧𑒹 𑒪𑒰𑒑𑒪 𑒩𑒯𑒪।
“𑒨𑒰𑒠𑒫𑒖𑒲 𑒕𑒟𑒱?” 𑒤𑒼𑒢𑒣𑒩 𑒣𑒰𑒩𑒳𑒪 𑒩𑒯𑒟𑒱।
“𑒨𑒰𑒠𑒫𑒖𑒲𑒏 𑒙𑓂𑒩𑒰𑒢𑓂𑒮𑒤𑒩 𑒦𑓄 𑒑𑒹𑒪𑒢𑓂𑒯𑒱”।
“𑒗𑒴𑒚 𑒢𑒯𑒱 𑒥𑒰𑒖𑒴, 𑒯𑒳𑒢𑒏𑒰 𑒤𑒼𑒢 𑒠𑒱𑒨𑒢𑓂𑒯𑒳”।
“𑒯𑒹, 𑒢𑒯𑒱 𑒞𑒿 𑒯𑒧 𑒁𑒯𑒰𑒿𑒏 𑒢𑒼𑒏𑒩 𑒕𑒲 𑒂 𑒢𑒯𑒱𑒨𑒹 𑒁𑒯𑒰𑒿𑒏 𑒨𑒰𑒠𑒫 𑒖𑒲𑒏” -𑒄 𑒏𑒯𑒻𑒞 𑒁𑒩𑒱𑒢𑓂𑒠𑒧 𑒤𑒼𑒢 𑒣𑒙𑒏𑒱 𑒠𑒹𑒪𑒏। 𑒥𑒲𑒔𑒧𑒹 𑒏𑒞𑒹𑒏 𑒠𑒱𑒢𑒮𑒿 𑒩𑒼𑒯𑒱𑒝𑒲 𑒤𑒼𑒢 𑒅𑒚𑒥𑒻𑒞 𑒕𑒪𑒲𑒯। 𑒂𑒃 𑒍 𑒏𑒞𑒯𑒳 𑒋𑒧𑓂𑒯𑒩-𑒍𑒧𑓂𑒯𑒩 𑒕𑒪𑒲𑒯 𑒮𑒹 𑒁𑒩𑒱𑒢𑓂𑒠𑒧𑒏𑒹𑒿 𑒤𑒼𑒢 𑒅𑒚𑒰𑒥𑒋 𑒣𑒛𑓃𑒪 𑒩𑒯𑒻𑒏।
𑒩𑒼𑒯𑒱𑒝𑒲 𑒞𑒐𑒢𑒹 𑒣𑒯𑒳𑒿𑒔𑒱 𑒑𑒹𑒪 𑒕𑒪𑒲𑒯- “𑒁𑒦𑓂𑒨𑒰𑒮 𑒐𑒞𑒧 𑒦𑓄 𑒑𑒹𑒢𑒹 𑒞𑒰𑒧𑒮 𑒅𑒚𑒱 𑒑𑒹𑒪 𑒁𑒯𑒰𑒿𑒏𑒹𑒿”। 𑒁𑒩𑒱𑒢𑓂𑒠𑒧 𑒮𑓂𑒫𑒲𑒏𑒵𑒞𑒱𑒧𑒹 𑒧𑒴𑒛𑓃𑒲 𑒛𑒼𑒪𑒹𑒪𑒏।
𑒂𑒃 𑒂𑒤𑒱𑒮 𑒁𑒥𑒻𑒞 𑒏𑒰𑒪 𑒏𑒰𑒩𑒏 𑒋𑒤.𑒋𑒧.𑒣𑒩 𑒩𑒹𑒛𑒱𑒨𑒼 𑒧𑒱𑒩𑓂𑒔𑒲 𑒣𑒩 𑒔𑒪𑒱 𑒩𑒯𑒪 𑒁𑒝𑓂𑒙-𑒬𑒝𑓂𑒙 𑒑𑒣 𑒢𑒲𑒏 𑒪𑒰𑒑𑒱 𑒩𑒯𑒪 𑒕𑒪𑒻𑒏 𑒁𑒩𑒱𑒢𑓂𑒠𑒧𑒏𑒹𑒿।
“𑒯𑒧𑒩 𑒥𑒛𑓃𑒏𑒰 𑒥𑒹𑒙𑒰 𑒮𑒳𑒧𑒢𑓂𑒞 𑒞𑒹𑒪𑒳𑒑𑒳 𑒐𑒴𑒥 𑒢𑒲𑒏 𑒖𑒏𑒰𑒿 𑒥𑒖𑒻𑒞 𑒁𑒕𑒱 𑒧𑒳𑒠𑒰 𑒕𑒼𑒙𑒏𑒰 𑒯𑒱𑒢𑓂𑒠𑒲 𑒥𑒰𑒖𑒋 𑒪𑒰𑒑𑒪 𑒁𑒕𑒱। 𑒯𑒻𑒠𑒩𑒰𑒥𑒰𑒠𑒮𑒿 𑒠𑒰𑒠𑒰𑒏 𑒤𑒼𑒢 𑒁𑒥𑒻𑒞 𑒕𑒻𑒏 𑒞𑒿 𑒯𑒳𑒢𑒏𑒼 𑒯𑒱𑒢𑓂𑒠𑒲𑒨𑒹𑒧𑒹 𑒖𑒫𑒰𑒥 𑒠𑒻𑒞 𑒁𑒕𑒱। 𑒯𑒳𑒢𑒏𑒰 𑒯𑒱𑒢𑓂𑒠𑒲 𑒁𑒥𑒱𑒞𑒹 𑒢𑒯𑒱 𑒕𑒢𑓂𑒯𑒱। 𑒒𑒩𑒧𑒹 𑒣𑒞𑒱 𑒞𑒹𑒪𑒳𑒑𑒳 𑒥𑒖𑒥𑒰𑒏 𑒁𑒦𑒱𑒨𑒰𑒢 𑒬𑒳𑒩𑒳 𑒏𑒋𑒢𑒹 𑒕𑒟𑒱”- 𑒩𑒼𑒯𑒱𑒝𑒲 𑒥𑒰𑒖𑒱 𑒩𑒯𑒪 𑒕𑒪𑒲𑒯।
“𑒁𑒔𑓂𑒕𑒰”।
“𑒥𑒳𑒗𑒪𑒯𑒳𑒿, 𑒣𑒰𑒩𑒳𑒪𑒏 𑒤𑒼𑒢 𑒂𑒋𑒪 𑒩𑒯𑒋। 𑒏𑒯𑒻𑒞 𑒩𑒯𑒋 𑒖𑒹 𑒁𑒩𑒱𑒢𑓂𑒠𑒧 𑒖𑒲𑒏 𑒯𑒧 𑒏𑒼𑒢𑒼 𑒥𑒏𑒛𑓃𑒲 𑒞𑒿 𑒢𑒯𑒱 𑒐𑒼𑒪𑒱 𑒪𑒹𑒢𑒹 𑒕𑒪𑒱𑒨𑒢𑓂𑒯𑒱 𑒖𑒹 𑒍𑒢𑒰 𑒏𑓄 𑒤𑒼𑒢𑒣𑒩 𑒗𑒗𑒏𑒰𑒩𑒱 𑒅𑒚𑒪 𑒩𑒯𑒟𑒱”।
“𑒯𑒴𑒿”।
“𑒂 𑒄 𑒮𑒹𑒯𑒼 𑒥𑒰𑒖𑒱 𑒩𑒯𑒪 𑒕𑒪𑒱 𑒖𑒹 𑒍 𑒨𑒰𑒠𑒫𑒖𑒲 𑒣𑒩 𑒫𑒱𑒬𑓂𑒫𑒰𑒮 𑒏𑒋 𑒡𑒼𑒐𑒰 𑒐𑒋𑒪𑒏”।
“𑒍”।
“𑒂 𑒠𑒹𑒫𑒑𑒢 𑒑𑒹𑒪 𑒩𑒯𑒋 𑒨𑒰𑒠𑒫𑒖𑒲𑒏 𑒢𑒫𑒏𑒰 𑒒𑒩”।
“𑒢𑒫𑒏𑒰 𑒒𑒩? 𑒣𑒳𑒩𑒢𑒏𑒰 𑒒𑒩 𑒥𑒹𑒔𑒱 𑒠𑒹𑒪𑒢𑓂𑒯𑒱 𑒏𑒲?”
“𑒢𑒯𑒱। 𑒠𑒹𑒫𑒑𑒢𑒹𑒏 𑒏𑒯𑒪 𑒏𑒯𑒻𑒞 𑒕𑒲। 𑒣𑒳𑒩𑒢𑒏𑒰 𑒒𑒩𑒧𑒹 𑒨𑒰𑒠𑒫 𑒖𑒲𑒏 𑒣𑒯𑒱𑒪 𑒣𑒞𑓂𑒢𑒲 𑒩𑒯𑒻𑒞 𑒕𑒟𑒱𑒢𑓂𑒯, 𑒫𑒻𑒯 𑒁𑒯𑒰𑒿𑒏 𑒑𑒧𑓂𑒦𑒲𑒩 𑒮𑓂𑒫𑒩𑒫𑒰𑒪𑒲। 𑒂 𑒢𑒫𑒏𑒰 𑒒𑒩𑒧𑒹 𑒢𑒫𑒏𑒲 𑒔𑒳𑒪𑒥𑒳𑒪𑒲 𑒏𑒢𑒱𑒨𑒰𑒿 𑒩𑒯𑒻𑒞 𑒕𑒢𑓂𑒯𑒱। 𑒋𑒏𑒙𑒰 𑒏𑒼𑒜𑓃𑒔𑒱𑒪𑓂𑒏𑒼 𑒠𑒹𑒐𑒪𑒏 𑒠𑒹𑒫𑒑𑒢। 𑒨𑒰𑒠𑒫𑒖𑒲𑒏 𑒥𑒹𑒙𑒰 𑒩𑒯𑒢𑓂𑒯𑒱 𑒣𑓂𑒩𑒰𑒨𑓁”।
𑒧𑒵𑒞𑓂𑒨𑒳𑒠𑒝𑓂𑒛
𑒫𑒱𑒫𑒰𑒯𑒏 𑒅𑒣𑒩𑒰𑒢𑓂𑒞 𑒜𑓃𑒹𑒩𑒲-𑒜𑓃𑒰𑒏𑒲 𑒪𑒼𑒏 𑒯𑒧𑒩𑒰𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳 𑒮𑒰𑒮𑒳𑒩𑒧𑒹 𑒂𑒥𑒱 𑒩𑒯𑒪 𑒕𑒪𑒰𑒯। 𑒞𑒰𑒯𑒱𑒧𑒹 𑒕𑒪𑒱 𑒋𑒏𑒙𑒰 𑒢𑒫𑒧𑓂 𑒏𑒏𑓂𑒭𑒰𑒏 𑒕𑒰𑒞𑓂𑒩𑒰 𑒂𑒩𑓂𑒨𑒰 𑒂 𑒍𑒏𑒩 𑒣𑒱𑒞𑒰𑒧𑒯𑒲 𑒂 𑒧𑒰𑒋।
𑒍 𑒧𑒰𑒋𑒏 𑒮𑓀𑒑 𑒢𑒯𑒱 𑒂𑒥𑒱 𑒁𑒮𑒑𑒩𑒹 𑒂𑒋𑒪 𑒕𑒪𑒲𑒯। 𑒐𑒴𑒥 𑒏𑒰𑒩𑒲, 𑒠𑒳𑒥𑒩-𑒣𑒰𑒞𑒩, 𑒂𑒫𑒬𑓂𑒨𑒏𑒞𑒰𑒮𑒿 𑒥𑒹𑒬𑒲 𑒁𑒢𑒳𑒬𑒰𑒮𑒱𑒞 𑒂 𑒬𑒱𑒭𑓂𑒙 𑒂 𑒢𑒰𑒣𑒱-𑒖𑒼𑒐𑒱 𑒏𑒋 𑒥𑒖𑒢𑒱𑒯𑒰𑒩𑒱। 𑒯𑒧𑒩𑒰𑒮𑒿 𑒮𑒦 𑒑𑒣𑒧𑒹 𑒅𑒪𑒙𑒰।
𑒯𑒧𑒩 𑒏𑒢𑒱𑒨𑒰𑒿 𑒯𑒳𑒢𑒏𑒰𑒮𑒿 𑒯𑒧𑒩 𑒣𑒩𑒱𑒔𑒨 𑒏𑒩𑒍𑒪𑒢𑓂𑒯𑒱 𑒂 𑒍𑒏𑒩 𑒣𑓂𑒩𑒬𑓀𑒮𑒰 𑒮𑒹𑒯𑒼 𑒏𑒋𑒪𑒢𑓂𑒯𑒱। 𑒏𑒱𑒕𑒳 𑒏𑒰𑒪𑒏 𑒥𑒰𑒠 𑒍𑒏𑒩 𑒣𑒱𑒞𑒰𑒧𑒯𑒲 𑒂 𑒧𑒰𑒋 𑒯𑒧𑒩𑒰𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳 𑒁𑒋𑒪𑒲𑒯 ।
𑒯𑒧𑒩𑒰 𑒁𑒢𑒳𑒦𑒫 𑒦𑒹𑒪 𑒖𑒹 𑒯𑒳𑒢𑒏𑒩 𑒣𑒱𑒞𑒰𑒧𑒯𑒲𑒏 𑒞𑒿 𑒪𑒹𑒯𑒰𑒖 𑒩𑒰𑒐𑒪 𑒑𑒹𑒪 𑒕𑒪 𑒧𑒳𑒠𑒰 𑒯𑒳𑒢𑒏𑒩 𑒧𑒰𑒋𑒏 𑒁𑒫𑒯𑒹𑒪𑒢𑒰 𑒮𑒢 𑒯𑒧𑒩 𑒏𑒢𑒱𑒨𑒰𑒿 𑒂 𑒮𑒰𑒮𑒳 𑒏𑒹𑒢𑒹 𑒕𑒪𑒐𑒱𑒢𑓂𑒯। 𑒑𑒣𑓂𑒣 𑒏𑒩𑒥𑒰𑒧𑒹 𑒍 𑒢𑒲𑒏 𑒕𑒪𑒲𑒯 𑒂 𑒖𑒰𑒃𑒞-𑒖𑒰𑒃𑒞 𑒏𑒯𑒱 𑒑𑒹𑒪𑒲𑒯 𑒖𑒹 𑒯𑒧𑒩𑒰 𑒮𑒦 𑒁𑒯𑒰𑒿𑒏 𑒮𑒮𑒳𑒩𑒏 𑒏𑒱𑒩𑒰𑒨𑒰𑒠𑒰𑒩 𑒕𑒲 𑒂 𑒅𑒣𑒩𑒏𑒰 𑒧𑒯𑒪𑒰 𑒣𑒩 𑒩𑒯𑒻𑒞 𑒕𑒲। 𑒮𑒹 𑒦𑒲𑒛𑓃-𑒦𑒰𑒛𑓃 𑒏𑒧 𑒦𑒹𑒪𑒰 𑒣𑒩 𑒁𑒫𑒬𑓂𑒨 𑒂𑒆।
𑒄 𑒑𑒣𑓂𑒣 𑒖𑒰𑒃𑒞-𑒖𑒰𑒃𑒞 𑒯𑒧𑒩 𑒮𑒰𑒮𑒳 𑒣𑓂𑒩𑒰𑒨𑓁 𑒮𑒳𑒢𑒱 𑒪𑒹𑒪𑒢𑓂𑒯𑒱 𑒮𑒹 𑒯𑒧𑒩 𑒣𑒞𑓂𑒢𑒲𑒏𑒹𑒿 𑒮𑓂𑒟𑒱𑒩𑒹𑒮𑒿 𑒧𑒳𑒠𑒰 𑒂𑒖𑓂𑒘𑒰𑒩𑓂𑒟𑒏 𑒩𑒴𑒣𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒆𑒣𑒩 𑒖𑒋𑒥𑒰𑒏 𑒏𑒼𑒢𑒼 𑒖𑒩𑒴𑒩𑒲 𑒢𑒯𑒱 𑒕𑒻𑒏। 𑒯𑒧 𑒣𑒞𑓂𑒢𑒲𑒮𑒿 𑒣𑒳𑒕𑒪𑒱𑒨𑒢𑓂𑒯𑒱 𑒖𑒹 𑒥𑒹𑒔𑒰𑒩𑒲 𑒋𑒞𑒹𑒏 𑒂𑒑𑓂𑒩𑒯𑒮𑒿 𑒥𑒖𑒍𑒪𑒢𑓂𑒯𑒱 𑒁𑒕𑒱। 𑒣𑒞𑓂𑒢𑒲 𑒏𑒯𑒪𑒟𑒱 𑒖𑒹 𑒮𑒳𑒢𑒪𑒱𑒨𑒻𑒏 𑒢𑒯𑒱, 𑒧𑒰𑒿 𑒧𑒢𑒰 𑒏𑒋𑒪𑒢𑓂𑒯𑒱 𑒁𑒕𑒱। 𑒏𑒰𑒩𑒝 𑒣𑒳𑒕𑒪𑒰 𑒣𑒩 𑒑𑒣 𑒁𑒢𑓂𑒚𑒰 𑒠𑒹𑒪𑒢𑓂𑒯𑒱।
𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠𑒏 𑒒𑒙𑒢𑒰 𑒕𑒲, 𑒁𑒢𑓂𑒯𑒩𑒼𑒐𑒹𑒧𑒹 𑒑𑒹𑒙𑒏 𑒗𑒧𑒰𑒛𑓃𑒱 𑒏𑒋 𑒐𑒳𑒖𑒥𑒰𑒏 𑒁𑒥𑒰𑒖 𑒦𑒹𑒪। 𑒪𑒰𑒑𑒪 𑒖𑒹 𑒏𑓂𑒨𑒼 𑒣𑒲𑒥𑒱 𑒏𑒋 𑒥𑒛𑓃𑒥𑒛𑓃𑒰 𑒩𑒯𑒪 𑒁𑒕𑒱। 𑒯𑒧𑒩 𑒁𑒞𑒱𑒩𑒱𑒏𑓂𑒞 𑒏𑓂𑒨𑒼 𑒍𑒯𑒱 𑒁𑒥𑒰𑒖 𑒣𑒩 𑒡𑓂𑒨𑒰𑒢 𑒢𑒯𑒱 𑒠𑒹𑒪𑒢𑓂𑒯𑒱 𑒂 𑒁𑒢𑓂𑒚𑒨𑒥𑒰𑒏 𑒮𑓂𑒫𑒰𑓀𑒑 𑒏𑒋𑒪𑒢𑓂𑒯𑒱। 𑒯𑒧 𑒥𑒰𑒯𑒩 𑒁𑒋𑒪𑒯𑒳𑒿 𑒞𑒿 𑒋𑒏𑒙𑒰 𑒁𑒡𑒫𑒨𑒮𑒳 𑒗𑒳𑒧𑒻𑒞 𑒁𑒥𑒻𑒞 𑒠𑒵𑒭𑓂𑒙𑒱𑒑𑒼𑒔𑒩 𑒦𑒹𑒪𑒰𑒯। 𑒯𑒧𑒩𑒰 𑒠𑒹𑒐𑒱 𑒛𑒼𑒪𑒻𑒞 𑒯𑒰𑒟𑒮𑒿 𑒖𑒧𑒰𑒨𑒥𑒰𑒥𑒴 𑒏𑒯𑒱 𑒢𑒧𑒮𑓂𑒏𑒰𑒩 𑒏𑒋𑒪𑒢𑓂𑒯𑒱। 𑒍 𑒁𑒐𑒢 𑒡𑒩𑒱 𑒯𑒧𑒩𑒰𑒮𑒿 𑒦𑒹𑒿𑒙 𑒢𑒯𑒱 𑒯𑒼𑒋𑒥𑒰𑒏 𑒏𑒰𑒩𑒝 𑒯𑒧𑒩 𑒣𑒞𑓂𑒢𑒲𑒏𑒹𑒿 𑒤𑒛𑓃𑒱𑒕𑒍𑒪𑒢𑓂𑒯𑒱 𑒂 𑒛𑒼𑒪𑒻𑒞 𑒆𑒣𑒩 𑒮𑒲𑒜𑓃𑒲𑒏 𑒠𑒱𑒬𑒮𑒿 𑒔𑒪𑒱 𑒑𑒹𑒪𑒰𑒯। 𑒯𑒧𑒩 𑒣𑒞𑓂𑒢𑒲 𑒯𑒰𑒟 𑒣𑒏𑒛𑓃𑒱 𑒏𑒋 𑒯𑒧𑒩𑒰 𑒦𑒲𑒞𑒩 𑒂𑒢𑒱 𑒪𑒹𑒪𑒢𑓂𑒯𑒱 𑒂 𑒄𑒯𑒼 𑒮𑒴𑒔𑒢𑒰 𑒠𑒹𑒪𑒢𑓂𑒯𑒱 𑒖𑒹 𑒄𑒋𑒯 𑒂𑒩𑓂𑒨𑒰𑒏 𑒣𑒱𑒞𑒰 𑒟𑒲𑒏। 𑒁𑒢𑒰𑒨𑒰𑒮𑒯𑒱 𑒯𑒧𑒩𑒰 𑒧𑒰𑒟𑒧𑒹 𑒂𑒋𑒪 𑒖𑒹 𑒩𑓀𑒑 𑒖𑒹 𑒂𑒩𑓂𑒨𑒰𑒏 𑒕𑒻𑒏 𑒮𑒹 𑒥𑒰𑒣𑒹 𑒣𑒩 𑒑𑒹𑒪 𑒕𑒻𑒏।
𑒥𑒰𑒠𑒧𑒹 𑒯𑒧𑒩 𑒮𑒰𑒮𑒳 𑒆𑒣𑒩 𑒖𑒰 𑒏𑒋 𑒦𑒰𑒭𑒝 𑒠𑒋 𑒁𑒋𑒪𑒲𑒯 𑒂 𑒋𑒏 𑒧𑒯𑒱𑒢𑒰𑒏 𑒦𑒲𑒞𑒩 𑒒𑒩 𑒕𑒼𑒛𑓃𑒥𑒰𑒏 𑒁𑒪𑓂𑒙𑒲𑒧𑒹𑒙𑒧 𑒮𑒹𑒯𑒼 𑒂𑒩𑓂𑒨𑒰𑒏 𑒣𑒩𑒱𑒫𑒰𑒩𑒏𑒹𑒿 𑒠𑒋 𑒠𑒹𑒪𑒢𑓂𑒯𑒱। 𑒯𑒧𑒩 𑒮𑒰𑒩 𑒏𑒯𑒪𑒟𑒱 𑒖𑒹 𑒄 𑒠𑒮𑒧 𑒁𑒪𑓂𑒙𑒲𑒧𑒹𑒙𑒧 𑒕𑒻𑒏 𑒧𑒳𑒠𑒰 𑒯𑒧𑒩 𑒮𑒰𑒮𑒳 𑒁𑒛𑒱𑒑 𑒕𑒪𑒲𑒯 𑒖𑒹 𑒏𑒱𑒕𑒳 𑒦𑒋 𑒖𑒰𑒋 𑒋𑒯𑒱 𑒥𑒹𑒩 𑒍 𑒢𑒯𑒱 𑒧𑒰𑒢𑒞𑒲𑒯। 𑒖𑒧𑒰𑒨 𑒏𑒲 𑒥𑒳𑒗𑒞𑒰𑒯 𑒖𑒹 𑒏𑒹𑒯𑒢 𑒦𑒰𑒛𑓃𑒰𑒠𑒰𑒩 𑒩𑒐𑒢𑒹 𑒕𑒲 𑒯𑒧 𑒮𑒦। 𑒣𑒯𑒱𑒢𑒹 𑒚𑒏𑒱𑒨𑒰-𑒤𑒳𑒮𑒱𑒨𑒰 𑒏𑒋 𑒥𑒯𑒙𑒰𑒩𑒱 𑒪𑒻𑒞 𑒕𑒪।
𑒣𑒳𑒕𑒪𑒰 𑒣𑒩 𑒣𑒞𑒰 𑒔𑒪𑒪 𑒖𑒹 𑒂𑒩𑓂𑒨𑒰𑒏 𑒣𑒱𑒞𑒰 𑒛𑒰𑒏𑓂𑒙𑒩 𑒕𑒻𑒏 𑒂 𑒮𑒹𑒯𑒼 𑒯𑒼𑒧𑒱𑒨𑒼𑒣𑒻𑒟𑒱𑒏, 𑒂𑒨𑒳𑒩𑓂𑒫𑒹𑒠𑒱𑒏 𑒏𑒱𑓀𑒫𑒰 𑒦𑒹𑒙𑒢𑒩𑒲 𑒢𑒯𑒱 𑒫𑒩𑒢𑓂 𑒋𑒧.𑒥𑒲.𑒥𑒲.𑒋𑒮.। 𑒧𑒳𑒠𑒰 𑒪𑒏𑓂𑒭𑒝 𑒠𑒹𑒐𑒱𑒨𑒾𑒏। 𑒍𑒢𑒰 𑒮𑒰𑒮𑒳 𑒄𑒯𑒼 𑒑𑒣 𑒏𑒯𑒪𑒢𑓂𑒯𑒱 𑒖𑒹 𑒄 𑒣𑒲𑒢𑒹 𑒩𑒯𑒥𑒰𑒏 𑒅𑒣𑒩𑒰𑒢𑓂𑒞𑒼 𑒑𑒣𑓂𑒣 𑒋𑒏𑒼𑒙𑒰 𑒁𑒦𑒠𑓂𑒩 𑒢𑒯𑒱 𑒥𑒖𑒻𑒞 𑒁𑒕𑒱, 𑒖𑒹𑒢𑒰 𑒂𑒢 𑒣𑒲𑒢𑒯𑒰𑒩 𑒮𑒦𑒏 𑒮𑓀𑒑 𑒯𑒼𑒃𑒞 𑒕𑒻𑒏। 𑒧𑒢𑒳𑒏𑓂𑒐𑒼 𑒚𑒲𑒏𑒹 𑒁𑒕𑒱 𑒧𑒳𑒠𑒰 𑒨𑒻𑒯 𑒖𑒹 𑒋𑒏𑒙𑒰 𑒑𑒛𑓃𑒥𑒛𑓃𑒲 𑒕𑒻𑒏 𑒮𑒹 𑒥𑒛𑓂𑒛 𑒦𑒰𑒩𑒲।
𑒁𑒑𑒪𑒰 𑒠𑒱𑒢 𑒢𑒬𑒰 𑒅𑒞𑒩𑒪𑒰𑒏 𑒥𑒰𑒠 𑒣𑒞𑒱-𑒣𑒞𑓂𑒢𑒲 𑒠𑒳𑒢𑒴 𑒑𑒼𑒙𑒹 𑒢𑒲𑒔𑒰𑒿 𑒁𑒋𑒪𑒰𑒯 𑒂 𑒮𑒰𑒮𑒳𑒏𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒂𑒩𑓂𑒨𑒰𑒏 𑒥𑒼𑒩𑓂𑒛𑒏 𑒥𑒰𑒠 𑒍 𑒮𑒦 𑒣𑒙𑒢𑒰 𑒔𑒪𑒱 𑒖𑒋𑒞𑒲𑒯 𑒮𑒹 𑒯𑒳𑒢𑒏𑒰 𑒮𑒦𑒏 𑒐𑒰𑒞𑒱𑒩 𑒢𑒯𑒱 𑒧𑒳𑒠𑒰 𑒂𑒩𑓂𑒨𑒰𑒏 𑒐𑒰𑒞𑒱𑒩 𑒞𑒰𑒫𑒞 𑒡𑒩𑒱 𑒩𑒯𑒋 𑒠𑒱𑒁। 𑒒𑒼𑒿𑒒𑒰𑒅𑒖𑒏 𑒥𑒰𑒠 𑒮𑒹 𑒧𑒼𑒯𑒪𑒞𑒱 𑒦𑒹𑒙𑒱 𑒖𑒰𑒋 𑒑𑒹𑒪𑒢𑓂𑒯𑒱। 𑒞𑒏𑒩𑒰 𑒥𑒰𑒠 𑒯𑒳𑒢𑒏𑒩 𑒣𑒞𑓂𑒢𑒲𑒏 𑒢𑒖𑒩𑒱 𑒯𑒧𑒩𑒰𑒮𑒿 𑒧𑒱𑒪𑒪 𑒞𑒿 𑒍 𑒏𑒯𑒪𑒢𑓂𑒯𑒱 𑒖𑒹 𑒁𑒯𑒰𑒿 𑒞𑒿 𑒆𑒣𑒩 𑒢𑒯𑒱𑒨𑒹 𑒂𑒋𑒥। 𑒂 𑒋𑒯𑒱 𑒥𑒹𑒩 𑒆𑒣𑒩 𑒁𑒋𑒥𑒰𑒏 𑒂𑒑𑓂𑒩𑒯𑒼 𑒢𑒯𑒱 𑒏𑒋𑒪𑒟𑒱।
𑒏𑒱𑒕𑒳 𑒠𑒱𑒢 𑒥𑒲𑒞𑒪 𑒂 𑒤𑒹𑒩 𑒮𑒰𑒮𑒳𑒩 𑒖𑒨𑒥𑒰𑒏 𑒁𑒫𑒮𑒩 𑒦𑒹𑒙𑒪। 𑒏𑒱𑒕𑒳 𑒠𑒱𑒢𑒧𑒹 𑒣𑒞𑒰 𑒔𑒪𑒪 𑒖𑒹 𑒏𑒱𑒩𑒰𑒨𑒰𑒠𑒰𑒩 𑒥𑒠𑒪𑒱 𑒑𑒹𑒪 𑒕𑒟𑒱। 𑒒𑒩𑒏 𑒪𑒼𑒏 𑒧𑒰𑒞𑓂𑒩 𑒋𑒞𑒥𑒹 𑒏𑒯𑒪𑒟𑒱 𑒖𑒹 𑒂𑒩𑓂𑒨𑒰𑒏 𑒣𑒱𑒞𑒰𑒏 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒢𑓂𑒯𑒱 𑒂 𑒁𑒢𑒳𑒏𑒧𑓂𑒣𑒰𑒏 𑒂𑒡𑒰𑒩 𑒣𑒩 𑒍𑒏𑒩 𑒧𑒰𑒋𑒏𑒹𑒿 𑒢𑒾𑒏𑒩𑒲 𑒦𑒹𑒙𑒱 𑒑𑒹𑒪𑒻𑒏। 𑒂𑒥 𑒍 𑒮𑒦 𑒏𑓂𑒨𑒼 𑒣𑒙𑒢𑒰𑒧𑒹 𑒩𑒯𑒻𑒞 𑒕𑒟𑒱।
𑒒𑒩𑒏 𑒪𑒼𑒏 𑒂𑒑𑒰𑒿 𑒏𑒱𑒕𑒳 𑒢𑒯𑒱 𑒏𑒯𑒪𑒢𑓂𑒯𑒱 𑒧𑒳𑒠𑒰 𑒏𑒢𑒱𑒨𑒰𑒿𑒏 𑒋𑒏𑒙𑒰 𑒣𑒱𑒞𑒨𑒾𑒞 𑒦𑒰𑒋 𑒂𑒋𑒪 𑒩𑒯𑒟𑒱, 𑒮𑒹 𑒏𑒯𑒪𑒟𑒱 𑒖𑒹 𑒛𑒰𑒏𑓂𑒙𑒩𑒲 𑒩𑒱𑒣𑒼𑒩𑓂𑒙𑒧𑒹 𑒫𑒱𑒭 𑒐𑒰 𑒏𑒋 𑒂𑒞𑓂𑒧𑒯𑒞𑓂𑒨𑒰𑒏 𑒫𑒩𑓂𑒝𑒢 𑒩𑒯𑒋। 𑒤𑒹𑒩 𑒂𑒑𑒰𑒿 𑒣𑒞𑒱-𑒣𑒞𑓂𑒢𑒲𑒏 𑒧𑒡𑓂𑒨 𑒧𑒔𑒪 𑒞𑒳𑒧𑒳𑒪𑒏 𑒔𑒩𑓂𑒔 𑒦𑒹𑒪। 𑒛𑒰𑒏𑓂𑒙𑒩𑒏 𑒏𑒢𑒱𑒨𑒰𑒿 𑒏𑒯𑒻𑒞 𑒩𑒯𑒟𑒱𑒢𑓂𑒯 𑒖𑒹 𑒄 𑒛𑒰𑒏𑓂𑒙𑒩 𑒥𑒛𑓂𑒛 𑒣𑒱𑒥𑒻𑒞 𑒕𑒟𑒱 𑒞𑒰𑒯𑒱 𑒪𑒹𑒪 𑒗𑒑𑒛𑓃𑒰 𑒯𑒼𑒃𑒞 𑒁𑒕𑒱 𑒞𑒿 𑒛𑒰𑒏𑓂𑒙𑒩 𑒮𑒰𑒯𑒥 𑒏𑒯𑒟𑒱 𑒖𑒹 𑒗𑒑𑒛𑓃𑒰𑒏 𑒠𑓂𑒫𑒰𑒩𑒹 𑒣𑒱𑒥𑒻𑒞 𑒕𑒲। 𑒁𑒮𑓂𑒞𑒳 𑒧𑒵𑒞𑓂𑒨𑒳𑒏 𑒥𑒰𑒠 𑒯𑒳𑒢𑒏𑒩 𑒏𑒢𑒱𑒨𑒰𑒿𑒏 𑒦𑒰𑒫 𑒋𑒯𑒢 𑒮𑒢 𑒕𑒪 𑒖𑒹𑒢𑒰 𑒧𑒳𑒏𑓂𑒞𑒱 𑒦𑒹𑒙𑒱 𑒑𑒹𑒪 𑒯𑒼𑒃𑒢𑓂𑒯𑒱 𑒂 𑒋𑒯𑒱 𑒥𑒰𑒞𑒧𑒹 𑒮𑒦 𑒏𑓂𑒨𑒼 𑒋𑒏 𑒧𑒞 𑒩𑒯𑒟𑒱।
𑒋𑒏𑒙𑒰 𑒮𑒰𑒩𑒱 𑒩𑒯𑒟𑒱, 𑒯𑒳𑒢𑒏𑒩 𑒑𑒣 𑒮𑒹𑒯𑒼 𑒧𑒼𑒢 𑒣𑒛𑓃𑒪। 𑒋𑒏 𑒑𑒼𑒙 𑒨𑒳𑒫𑒏𑒏 𑒫𑒱𑒭𑒨𑒧𑒹 𑒂𑒩𑓂𑒨𑒰 𑒏𑒯𑒻𑒞 𑒕𑒪𑒱 । 𑒍𑒏𑒩𑒰 𑒮𑓀𑒑𑒲𑒏𑒹𑒿 𑒯𑒼𑒃𑒞 𑒕𑒻𑒏 𑒖𑒹 𑒍 𑒨𑒳𑒫𑒏 𑒍𑒏𑒩𑒰𑒮𑒿 𑒣𑓂𑒩𑒹𑒧 𑒏𑒩𑒻𑒞 𑒁𑒕𑒱। 𑒧𑒳𑒠𑒰 𑒂𑒩𑓂𑒨𑒰𑒏 𑒧𑒞 𑒕𑒪 𑒖𑒹 𑒍 𑒨𑒳𑒫𑒏 𑒍𑒏𑒩 𑒮𑓀𑒑𑒲𑒮𑒿 𑒢𑒯𑒱 𑒫𑒩𑒢𑓂 𑒂𑒩𑓂𑒨𑒰𑒮𑒿 𑒣𑓂𑒩𑒹𑒧 𑒏𑒩𑒻𑒞 𑒕𑒪। 𑒯𑒧 𑒮𑒰𑒩𑒱𑒏𑒹𑒿 𑒏𑒯𑒢𑒹 𑒩𑒯𑒱𑒨𑒢𑓂𑒯𑒱 𑒖𑒹 𑒂𑒩𑓂𑒨𑒰 𑒥𑒔𑓂𑒔𑒰 𑒁𑒕𑒱, 𑒍𑒯𑒱𑒢𑒰 𑒯𑒿𑒮𑒲 𑒏𑒋𑒢𑒹 𑒯𑒼𑒋𑒞। 𑒧𑒳𑒠𑒰 𑒍 𑒏𑒯𑒪𑒢𑓂𑒯𑒱, 𑒖𑒹 𑒢𑒯𑒱 𑒨𑒾। 𑒥𑒛𑓂𑒛 𑒦𑒰𑒫𑒳𑒏 𑒁𑒕𑒱 𑒂𑒩𑓂𑒨𑒰। 𑒏𑒯𑒻𑒞 𑒁𑒕𑒱 𑒖𑒹 𑒍𑒯𑒱 𑒨𑒳𑒫𑒏𑒏𑒹 𑒣𑓂𑒩𑒰𑒣𑓂𑒞 𑒏𑒩𑒥𑒰𑒏 𑒯𑒹𑒞𑒳 𑒏𑒱𑒕𑒳𑒍 𑒏𑒩𑒞। 𑒣𑒞𑒰 𑒪𑒰𑒑𑒪 𑒖𑒹 𑒍 𑒨𑒳𑒫𑒏 𑒏𑒼𑒢𑒼 𑒣𑒳𑒩𑒰𑒢 𑒧𑒯𑒰𑒩𑒰𑒢𑒲𑒏 𑒥𑒹𑒙𑒲𑒏 𑒥𑒹𑒙𑒰 𑒕𑒲। 𑒍𑒏𑒩 𑒧𑒰𑒞𑒰 𑒬𑒱𑒏𑓂𑒭𑒱𑒏𑒰 𑒁𑒕𑒱 𑒂 𑒥𑒰𑒣 𑒧𑒹𑒩𑒲𑒢𑒧𑒹 𑒏𑒰𑒖 𑒏𑒩𑒻𑒞 𑒁𑒕𑒱। 𑒮𑒰𑒪-𑒕𑒯 𑒧𑒰𑒮 𑒣𑒩 𑒁𑒥𑒻𑒞 𑒕𑒪 𑒂 𑒖𑒐𑒢 𑒁𑒥𑒻𑒞 𑒕𑒪 𑒞𑒿 𑒖𑒹 𑒧𑒰𑒮-𑒣𑓀𑒠𑓂𑒩𑒯 𑒠𑒱𑒢 𑒩𑒯𑒻𑒞 𑒕𑒪 𑒮𑒹 𑒧𑒰𑒩𑒱-𑒣𑒲𑒙𑒧𑒹 𑒥𑒱𑒞𑒰 𑒠𑒻𑒞 𑒕𑒪। 𑒣𑒴𑒩𑒰 𑒧𑒼𑒯𑒪𑓂𑒪𑒰𑒧𑒹 𑒥𑒠𑒢𑒰𑒧𑒲 𑒕𑒻𑒏। 𑒧𑒰𑒋𑒏 𑒬𑒲𑒪-𑒮𑓂𑒫𑒦𑒰𑒫 𑒥𑒛𑓂𑒛 𑒢𑒲𑒏, 𑒥𑒼𑒪𑒲𑒮𑒿 𑒤𑒴𑒪-𑒗𑒛𑓃𑒻𑒞 𑒕𑒻𑒏। 𑒥𑒰𑒣𑒏𑒹𑒿 𑒞𑒿 𑒪𑒼𑒏 𑒔𑒱𑒢𑓂𑒯𑒱𑒞𑒼 𑒢𑒯𑒱 𑒕𑒻𑒏। 𑒐𑒰𑒪𑒲 𑒗𑒑𑒛𑓃𑒰𑒏 𑒁𑒥𑒰𑒖𑒹 𑒮𑒳𑒢𑒻𑒞 𑒁𑒕𑒱 𑒪𑒼𑒏। 𑒋𑒏 𑒥𑒹𑒩 𑒂𑒩𑓂𑒨𑒰𑒏 𑒮𑓀𑒑𑒲𑒏𑒹𑒿 𑒮𑓂𑒏𑒴𑒪 𑒥𑒮𑒮𑒿 𑒅𑒞𑒩𑒥𑒰 𑒏𑒰𑒪 𑒏𑓂𑒨𑒼 𑒞𑓀𑒑 𑒏𑒋𑒢𑒹 𑒕𑒪 𑒞𑒿 𑒍 𑒨𑒳𑒫𑒏 𑒮𑒦𑒏𑒹𑒿 𑒧𑒰𑒩𑒱-𑒣𑒲𑒙𑒱 𑒏𑒋 𑒦𑒑𑒰 𑒠𑒹𑒢𑒹 𑒕𑒪 । 𑒋𑒯𑒱 𑒥𑒰𑒞 𑒣𑒩 𑒯𑒧 𑒞𑒐𑒢 𑒏𑒼𑒢𑒼 𑒥𑒹𑒬𑒲 𑒡𑓂𑒨𑒰𑒢 𑒢𑒯𑒱 𑒠𑒹𑒢𑒹 𑒩𑒯𑒱𑒨𑒻𑒏।
𑒂 𑒞𑒏𑒩 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒂𑒩𑓂𑒨𑒰𑒏 𑒣𑒱𑒞𑒰𑒏 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒻𑒏 𑒂 𑒍 𑒋𑒯𑒱 𑒬𑒯𑒩𑒮𑒿 𑒠𑒴𑒩 𑒔𑒪𑒱 𑒑𑒹𑒪𑒱। 𑒍 𑒧𑒰𑒋𑒏𑒹𑒿 𑒏𑒯𑒻𑒞 𑒩𑒯𑒪𑒱 𑒖𑒹 𑒣𑒩𑒲𑒏𑓂𑒭𑒰 𑒡𑒩𑒱 𑒩𑒯𑒋 𑒠𑒱𑒁, 𑒧𑒳𑒠𑒰 𑒧𑒰𑒋 𑒫𑒱𑒧𑒳𑒏𑓂𑒞 𑒦𑒹𑒪𑒰𑒏 𑒥𑒰𑒠 𑒋𑒏𑒼 𑒣𑒪 𑒣𑒳𑒩𑒰𑒢 𑒏𑒙𑒳-𑒮𑓂𑒧𑒵𑒞𑒱𑒏𑒹𑒿 𑒠𑒹𑒐𑒋 𑒢𑒯𑒱 𑒔𑒰𑒯𑒻𑒞 𑒕𑒪𑒲𑒯।
𑒤𑒹𑒩 𑒠𑒱𑒢 𑒥𑒱𑒞𑒻𑒞 𑒩𑒯𑒪।
𑒂 𑒥𑒰𑒠𑒧𑒹 𑒤𑒼𑒢 𑒣𑒩 𑒮𑒧𑒰𑒔𑒰𑒩 𑒦𑒹𑒙𑒪 𑒖𑒹 𑒂𑒩𑓂𑒨𑒰 𑒂𑒞𑓂𑒧 𑒯𑒞𑓂𑒨𑒰 𑒏𑒋 𑒪𑒹𑒪𑒏।
𑒥𑒯𑒳𑒞 𑒩𑒰𑒮 𑒥𑒰𑒞 𑒧𑒼𑒢𑒧𑒹 𑒒𑒴𑒧𑒱 𑒑𑒹𑒪। 𑒂𑒩𑓂𑒨𑒰 𑒦𑒰𑒫𑒳𑒏 𑒕𑒪𑒱, 𑒏𑒱𑒕𑒳 𑒥𑒹𑒬𑒲 𑒞𑒢𑒰𑒫𑒧𑒹 𑒩𑒯𑒱𑒞𑒹 𑒕𑒪𑒱। 𑒑𑒣𑒏𑒹𑒿 𑒑𑓀𑒦𑒲𑒩𑒞𑒰𑒮𑒿 𑒪𑒻𑒞 𑒕𑒪𑒱। 𑒮𑒰𑒩𑒱𑒏 𑒍𑒯𑒱 𑒨𑒳𑒫𑒏𑒏 𑒮𑒧𑓂𑒥𑒢𑓂𑒡𑒧𑒹 𑒏𑒯𑒪 𑒑𑒣 𑒮𑒹𑒯𑒼 𑒧𑒼𑒢 𑒣𑒛𑓃𑒪 ।
𑒯𑒧 𑒤𑒼𑒢 𑒠𑒼𑒥𑒰𑒩𑒰 𑒪𑒑𑒹𑒪𑒯𑒳𑒿।
𑒯𑒧 𑒤𑒼𑒢 𑒣𑒩 𑒁𑒙𑒏𑒰𑒩𑒲 𑒧𑒰𑒩𑒻𑒞 𑒣𑒳𑒕𑒪𑒯𑒳𑒿 𑒖𑒹 𑒍𑒯𑒱 𑒨𑒳𑒫𑒏𑒏 𑒫𑒱𑒫𑒰𑒯 𑒂𑒩𑓂𑒨𑒰𑒏 𑒧𑒵𑒞𑓂𑒨𑒳𑒮𑒿 𑒣𑒯𑒱𑒢𑒹 𑒦𑓄 𑒑𑒹𑒪 𑒕𑒪 𑒮𑒹 𑒏𑒞𑒋 𑒦𑒹𑒪 𑒕𑒪 ? 𑒞𑒿 𑒮𑒰𑒮𑒳𑒩𑒏 𑒪𑒼𑒏 𑒁𑒔𑓀𑒦𑒱𑒞 𑒦𑓄 𑒣𑒳𑒕𑒪𑒢𑓂𑒯𑒱, 𑒖𑒹 𑒏𑒹 𑒍? 𑒁𑒔𑓂𑒕𑒰 𑒍!
-𑒍𑒏𑒩 𑒫𑒱𑒫𑒰𑒯 𑒞𑒿 𑒦𑒹𑒪 𑒧𑒳𑒠𑒰 𑒁𑒯𑒰𑒿 𑒏𑒼𑒢𑒰 𑒥𑒳𑒗𑒪𑒯𑒳𑒿।
𑒣𑒞𑒰 𑒪𑒰𑒑𑒪 𑒖𑒹 𑒮𑒱𑒪𑒲𑒑𑒳𑒛𑓃𑒲-𑒠𑒱𑒬𑒏 𑒏𑒼𑒢𑒼 𑒏𑒢𑓂𑒨𑒰𑒑𑒞 𑒩𑒯𑒟𑒱 ।
𑒂 𑒍 𑒨𑒳𑒫𑒏 𑒁𑒣𑒢 𑒥𑒰𑒣 𑒖𑒹𑒏𑒰𑒿 𑒒𑒩-𑒖𑒧𑒰𑒋 𑒥𑒢𑒱 𑒩𑒯𑒥𑒰𑒏 𑒢𑒱𑒨𑒰𑒩 𑒏𑒋𑒢𑒹 𑒁𑒕𑒱। 𑒋𑒯𑒱 𑒬𑒯𑒩𑒏 𑒪𑒼𑒏𑒏𑒹𑒿 𑒞𑒿 𑒫𑒱𑒫𑒰𑒯𑒏 𑒯𑒏𑒰𑒩𑒼 𑒢𑒯𑒱 𑒦𑒹𑒙𑒪।
𑒂 𑒍𑒏𑒩 𑒂𑒞𑓂𑒧𑒯𑒞𑓂𑒨𑒰𑒏 𑒠𑒼𑒭 𑒏𑒏𑒩𑒰 𑒣𑒩 𑒁𑒕𑒱। 𑒍 𑒖𑒹 𑒠𑒰𑒩𑒴 𑒣𑒱𑒥𑒻𑒞 𑒩𑒯𑒋 𑒮𑒹 𑒥𑒰𑒣। 𑒂𑒏𑒱 𑒍 𑒧𑒰𑒋 𑒖𑒹 𑒥𑒰𑒣𑒏 𑒮𑓀𑒑 𑒞𑓀𑒑 𑒂𑒥𑒱 𑒑𑒹𑒪 𑒩𑒯𑒋। 𑒂𑒏𑒱 𑒍 𑒣𑓂𑒩𑒹𑒧𑒲 ?
𑒯𑒧𑒩𑒰 𑒖𑒢𑒻𑒞 𑒋𑒏𑒩 𑒮𑒦𑒏 𑒏𑒰𑒩𑒝 𑒁𑒕𑒱 𑒂𑒩𑓂𑒨𑒰𑒏 𑒣𑒩𑒱𑒫𑒰𑒩𑒏 𑒮𑒧𑓂𑒥𑒢𑓂𑒡𑒲 𑒂 𑒣𑒩𑒱𑒫𑒰𑒩𑒱𑒏 𑒠𑒼𑒮-𑒧𑒯𑒲𑒧 𑒮𑒦 𑒖𑒹 𑒋𑒏 𑒞𑒩𑒯𑒹𑒿 𑒂𑒩𑓂𑒨𑒰 𑒮𑒦𑒏𑒹𑒿 𑒥𑒰𑒩𑒱 𑒠𑒹𑒢𑒹 𑒩𑒯𑒋। 𑒍 𑒮𑒧𑒰𑒖 𑒖𑒹 𑒍𑒏𑒩 𑒣𑒩𑒱𑒫𑒰𑒩𑒏 𑒒𑒙𑒢𑒰𑒏 𑒔𑒙𑒐𑒰𑒩𑒰 𑒪𑓄 𑒏𑒋 𑒔𑒩𑓂𑒔 𑒏𑒩𑒻𑒞 𑒕𑒪 ।
𑒍 𑒒𑒙𑒢𑒰 𑒮𑒦 𑒖𑒹 𑒍𑒏𑒩 𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒩𑒯𑒋 ।
𑒍𑒏𑒩 𑒣𑒱𑒞𑒰 𑒠𑓂𑒫𑒰𑒩𑒰 𑒑𑒹𑒙 𑒣𑒱𑒙𑒥𑒰𑒏 𑒒𑒙𑒢𑒰𑒏 𑒔𑒩𑒔𑒰 𑒂𑒏𑒱 𑒂𑒩 𑒏𑒼𑒢𑒼 𑒑𑒣।𑒥𑒰𑒪𑒱𑒏𑒰 𑒦𑒰𑒫𑒳𑒏 𑒩𑒯𑒋 𑒏𑒼𑒢𑒰 𑒮𑒯𑒱 𑒮𑒏𑒻𑒞 𑒕𑒪𑒲𑒯। 𑒂𑒞𑓂𑒧𑒯𑒞𑓂𑒨𑒰𑒏 𑒢𑒰𑒧 𑒠𑒋 𑒍𑒏𑒩𑒰 𑒧𑒵𑒞𑓂𑒨𑒳𑒠𑒝𑓂𑒛 𑒠𑒹𑒪𑒏 𑒮𑒧𑒰𑒖।
𑒯𑒧 𑒂𑒩𑓂𑒨𑒰𑒏𑒹𑒿 𑒋𑒏𑒙𑒰 𑒠𑒵𑒜𑓃 𑒥𑒰𑒪𑒱𑒏𑒰 𑒥𑒳𑒗𑒻𑒞 𑒩𑒯𑒲। 𑒧𑒳𑒠𑒰 𑒍𑒏𑒩 ‘𑒏𑒱𑒕𑒳𑒍 𑒏𑒩𑒨 𑒣𑒛𑓃𑒞 𑒮𑒹 𑒏𑒩𑒥’ 𑒏𑒹𑒩 𑒁𑒩𑓂𑒟 𑒂𑒥 𑒖𑒰 𑒏𑒋 𑒥𑒳𑒗𑒪𑒯𑒳𑒿। 𑒍𑒯𑒱 𑒨𑒳𑒫𑒏𑒏 𑒥𑒱𑒂𑒯 𑒦𑓄 𑒑𑒹𑒪 𑒯𑒼𑒋𑒞𑒻𑒏 𑒮𑒹 𑒯𑒧𑒩 𑒁𑒢𑓂𑒠𑒰𑒖 𑒧𑒰𑒞𑓂𑒩 𑒩𑒯𑒋 𑒂 𑒮𑒹 𑒂𑒩𑓂𑒨𑒰𑒏 𑒂𑒞𑓂𑒧𑒯𑒞𑓂𑒨𑒰𑒏 𑒒𑒙𑒢𑒰𑒏 𑒖𑒰𑒢𑒏𑒰𑒩𑒲 𑒦𑒹𑒪𑒰𑒏 𑒥𑒰𑒠 ।
𑒥𑒰𑒝𑒫𑒲𑒩
𑒮𑒰𑒜𑓃𑒹 𑒞𑒲𑒢𑒮𑒿 𑒔𑒰𑒩𑒱 𑒤𑒲𑒙𑒏 𑒥𑒲𑒔 𑒪𑒹𑒙𑒩𑒰𑒏 𑒪𑒧𑓂𑒥𑒰𑒃 𑒕𑒪। 𑒮𑒦 𑒏𑒯𑒻𑒞 𑒕𑒻𑒏 𑒖𑒹 𑒍𑒏𑒩 𑒧𑒰𑒋-𑒥𑒰𑒣 𑒠𑒼𑒮𑒩𑒰𑒏 𑒥𑒔𑓂𑒔𑒰𑒏𑒹𑒿 𑒠𑒹𑒐𑒱 𑒏𑒋 𑒦𑒳𑒙𑓂𑒙𑒰-𑒦𑒳𑒙𑓂𑒙𑒰 𑒏𑒯𑒻𑒞 𑒩𑒯𑒻𑒞 𑒕𑒪𑒟𑒱।𑒮𑒹 𑒣𑒞𑒰 𑒢𑒯𑒱 𑒏𑒲 𑒦𑒹𑒪𑒻𑒏 𑒪𑒹𑒙𑒩𑒰 𑒞𑒏𑒩𑒰 𑒥𑒰𑒠𑒮𑒿 𑒥𑒜𑓃𑒱𑒞𑒹 𑒢𑒹 𑒁𑒕𑒱, 𑒍𑒏𑒩 𑒪𑒧𑓂𑒥𑒰𑒃 𑒋𑒏𑒠𑒧𑓂𑒧𑒹𑒮𑒿 𑒥𑒜𑓃𑒥 𑒩𑒳𑒏𑒱 𑒑𑒹𑒪𑒻𑒏।
“𑒡𑒳𑒩! 𑒧𑒰𑒋-𑒥𑒰𑒣𑒏 𑒏𑒞𑒯𑒳 𑒢𑒖𑒩𑒱 𑒪𑒑𑒻𑒞 𑒕𑒻𑒏 𑒥𑒔𑓂𑒔𑒰𑒏𑒹𑒿”।
“𑒢𑒘𑒱 𑒨𑒾, 𑒧𑒰𑒋𑒏 𑒞𑒿 𑒪𑒑𑒱𑒞𑒹 𑒕𑒻𑒏, 𑒠𑒹𑒐𑒱𑒨𑒾 𑒢𑒹 𑒪𑒹𑒙𑒩𑒰𑒏𑒹𑒿”।
𑒑𑒾𑒂𑒿 𑒮𑒦 𑒂𑒣𑒮𑒧𑒹 𑒑𑒣 𑒏𑒩𑒟𑒱। 𑒖𑒹 𑒮𑒹, 𑒮𑒦 𑒥𑒔𑓂𑒔𑒰 𑒣𑒻𑒒 𑒦𑒹𑒪। 𑒥𑒜𑓃𑒋 𑒪𑒰𑒑𑒪 । 𑒧𑒳𑒠𑒰 𑒪𑒹𑒙𑒩𑒰 𑒒𑒳𑒙𑒧𑒳𑒙𑒰𑒋𑒪𑒹 𑒩𑒯𑒪। 𑒮𑒦 𑒏𑓂𑒨𑒼 𑒍𑒏𑒩𑒰 𑒣𑒩𑒼𑒏𑓂𑒭𑒧𑒹 𑒪𑒹𑒙𑒩𑒰 𑒂 𑒧𑒳𑒿𑒯𑒣𑒩 𑒪𑒹𑒙𑒩𑒥𑒧 𑒏𑒯𑒋 𑒪𑒑𑒪𑒰𑒯।
𑒪𑒹𑒙𑒩𑒥𑒧𑒏 𑒧𑒰𑒋-𑒥𑒰𑒣𑒏𑒹𑒿 𑒖𑒧𑒲𑒢-𑒖𑒰𑒪 𑒞𑒞𑒹𑒏 𑒢𑒯𑒱। 𑒮𑒹 𑒧𑒯𑒲𑒮𑒹𑒣𑒩 𑒢𑒱𑒩𑓂𑒦𑒩 𑒕𑒪𑒢𑓂𑒯𑒱 𑒯𑒳𑒢𑒏𑒩 𑒮𑒦𑒏 𑒖𑒲𑒫𑒢। 𑒪𑒹𑒙𑒩𑒰 𑒧𑒯𑒲𑒮𑒏 𑒮𑒹𑒫𑒰𑒧𑒹 𑒦𑒼𑒩𑒹𑒮𑒿 𑒪𑒰𑒑𑒪 𑒩𑒯𑒻𑒞 𑒕𑒪। 𑒦𑒼𑒩𑒧𑒹 𑒦𑒼𑒩𑒯𑒰 𑒏𑒰𑒞𑒧𑒹 𑒩𑒑𑒛𑓃𑒱-𑒩𑒑𑒛𑓃𑒱 𑒏𑓄 𑒔𑒱𑒏𑓂𑒏𑒢 𑒥𑒢𑒰 𑒠𑒻𑒞 𑒕𑒪 𑒧𑒯𑒲𑒮𑒏𑒹𑒿। 𑒣𑒳𑒂𑒩𑒏 𑒢𑒴𑒩𑒲𑒮𑒿 𑒮𑒰𑒤 𑒏𑒩𑒻𑒞 𑒏𑒰𑒪 𑒑𑒼𑒙-𑒑𑒼𑒙 𑒁𑒚𑒾𑒩𑒲 𑒢𑒱𑒏𑒰𑒪𑒱 𑒠𑒻𑒞 𑒕𑒪। 𑒥𑒹𑒩𑒴 𑒣𑒯𑒩 𑒥𑒾𑒂-𑒔𑒾𑒛𑓃𑒲𑒧𑒹 𑒧𑒯𑒲𑒮 𑒔𑒩𑒥𑒻𑒞 𑒏𑒰𑒪 𑒢𑒱𑒮𑒦𑒹𑒩 𑒦𑓄 𑒮𑒴𑒞𑒱 𑒩𑒯𑒻𑒞 𑒕𑒪 𑒧𑒯𑒲𑒮𑒏 𑒣𑒲𑒚𑒣𑒩।
𑒪𑒼𑒏 𑒮𑒦 𑒯𑒿𑒮𑒲𑒧𑒹 𑒏𑒯𑒱𑒞𑒼 𑒩𑒯𑒋 𑒖𑒹 𑒪𑒹𑒙𑒩𑒥𑒧 𑒥𑒾𑒂-𑒔𑒾𑒛𑓃𑒲 𑒯𑒰𑒃 𑒮𑓂𑒏𑒴𑒪𑒮𑒿 𑒧𑒻𑒙𑓂𑒩𑒱𑒏 𑒣𑒰𑒮 𑒏𑒋𑒢𑒹 𑒁𑒕𑒱। 𑒧𑒯𑒲𑒮𑒼 𑒪𑒏𑓂𑒭𑓂𑒧𑒲 𑒩𑒯𑒋 𑒍𑒏𑒩। 𑒂𑒢 𑒧𑒰𑒪-𑒖𑒰𑒪 𑒮𑒱𑓀𑒯 𑒪𑒛𑓃𑒰𑒥𑒋 𑒞𑒿 𑒪𑒹𑒙𑒩𑒥𑒧𑒏 𑒧𑒯𑒲𑒮 𑒒𑒰𑒮 𑒔𑒩𑒥𑒰𑒧𑒹 𑒪𑒰𑒑𑒪 𑒩𑒯𑒋। 𑒮𑒹 𑒮𑒰𑒿𑒗𑒧𑒹 𑒒𑒩-𑒒𑒳𑒩𑒻𑒞 𑒏𑒰𑒪 𑒖𑒐𑒢 𑒂𑒢 𑒮𑒦 𑒑𑒼𑒙𑒹𑒏 𑒧𑒯𑒲𑒮𑒏 𑒣𑒹𑒙 𑒣𑒰𑒿𑒖𑒩𑒧𑒹 𑒡𑒮𑒪 𑒩𑒯𑒻𑒞 𑒕𑒪, 𑒪𑒹𑒙𑒩𑒰𑒏 𑒧𑒯𑒲𑒮𑒏 𑒠𑒳𑒢𑒴 𑒣𑒹𑒙 𑒠𑒳𑒢𑒴 𑒠𑒱𑒮𑒢 𑒤𑒴𑒪𑒱 𑒏𑒋 𑒪𑒙𑒏𑒱 𑒖𑒰𑒃𑒞 𑒕𑒪। 𑒥𑒱𑒢𑒰 𑒣𑒩𑒱𑒬𑓂𑒩𑒧 𑒣𑒢𑓂𑒯𑒰𑒃𑒞 𑒕𑒪𑒻𑒏 𑒧𑒯𑒲𑒮।
𑒪𑒹𑒙𑒩𑒰 𑒁𑒣𑒢 𑒧𑒰𑒋-𑒥𑒰𑒣𑒏𑒹𑒿 𑒞𑒻𑒨𑒼 𑒣𑓂𑒩𑒮𑒢𑓂𑒢 𑒏𑒋 𑒮𑒏𑒪 𑒏𑒲? 𑒍 𑒠𑒳𑒢𑒴 𑒑𑒼𑒙𑒹 𑒪𑒹𑒙𑒩𑒰𑒏 𑒑𑒳𑒖𑒩 𑒏𑒼𑒢𑒰 𑒔𑒪𑒞𑒻𑒏, 𑒍𑒏𑒩𑒰𑒮𑒿 𑒥𑒱𑒨𑒰𑒯 𑒏𑒹 𑒏𑒩𑒞𑒻𑒏- 𑒋𑒯𑒱 𑒥𑒰𑒞 𑒮𑒦𑒏𑒹𑒿 𑒪𑓄 𑒮𑒼𑒔𑒱𑒞𑒹 𑒩𑒯𑒻𑒞 𑒕𑒪𑒰𑒯।
𑒑𑒰𑒧𑒧𑒹 𑒥𑒻𑒞𑒩𑒝𑒲 𑒢𑒰𑒙𑒏 𑒂𑒋𑒪 𑒩𑒯𑒻𑒏। 𑒏𑒚𑒣𑒳𑒞𑒪𑒲 𑒮𑒦, 𑒧𑒢𑒳𑒏𑓂𑒐𑒏 𑒧𑒩𑒪𑒰𑒏 𑒥𑒰𑒠 𑒥𑒻𑒞𑒩𑒝𑒲 𑒡𑒰𑒩 𑒣𑒰𑒩 𑒏𑒩𑒥𑒰𑒏 𑒠𑒵𑒬𑓂𑒨, 𑒖𑒹 𑒦𑒨𑒰𑒫𑒯𑒹-𑒦𑒨𑒰𑒫𑒯 𑒕𑒪, 𑒐𑒴𑒥 𑒢𑒲𑒖 𑒖𑒹𑒏𑒰𑒿 𑒣𑓂𑒩𑒠𑒩𑓂𑒬𑒱𑒞 𑒏𑒩𑒻𑒞 𑒕𑒪𑒰𑒯।
𑒪𑒹𑒙𑒩𑒥𑒧 𑒮𑒹𑒯𑒼 𑒧𑒰𑒋-𑒥𑒰𑒣𑒏 𑒮𑓀𑒑 𑒢𑒰𑒙𑒏 𑒠𑒹𑒐𑒱 𑒁𑒋𑒪𑒰𑒯। 𑒂 𑒋𑒞𑒯𑒱𑒮𑒿 𑒪𑒹𑒙𑒩𑒰𑒏 𑒖𑒲𑒫𑒢 𑒋𑒏𑒙𑒰 𑒠𑒱𑒬𑒰 𑒪𑒋 𑒪𑒹𑒪𑒏। 𑒪𑒹𑒙𑒩𑒰𑒏 𑒥𑒰𑒥𑒴𑒏 𑒣𑒰𑒕𑒰𑒿 𑒥𑒻𑒞𑒩𑒝𑒲 𑒢𑒰𑒙𑒏 𑒏𑒧𑓂𑒣𑒢𑒲𑒏 𑒧𑒰𑒪𑒱𑒏 𑒪𑒰𑒑𑒱 𑒑𑒹𑒪। 𑒡𑒩𑒼𑒯𑒱 𑒠𑓄 𑒠𑒹𑒪𑒏, 𑒮𑒰𑒿𑒗-𑒦𑒼𑒩 𑒍𑒏𑒩 𑒒𑒩𑒣𑒩 𑒣𑒯𑒳𑒿𑒔𑒋 𑒪𑒰𑒑𑒪।
𑒪𑒹𑒙𑒩𑒰 𑒁𑒣𑒢 𑒧𑒯𑒱𑒮𑒥𑒰𑒩𑒲𑒧𑒹 𑒧𑒑𑒢 𑒩𑒯𑒻𑒞 𑒕𑒪। 𑒧𑒳𑒠𑒰 𑒍 𑒁𑒢𑒳𑒦𑒫 𑒏𑒩𑒋 𑒪𑒰𑒑𑒪 𑒖𑒹 𑒂𑒃-𑒏𑒰𑒪𑓂𑒯𑒱 𑒧𑒰𑒋-𑒥𑒰𑒣 𑒍𑒏𑒩𑒰𑒣𑒩 𑒏𑒱𑒕𑒳 𑒥𑒹𑒬𑒲𑒋 𑒧𑒧𑒞𑒰 𑒩𑒰𑒐𑒋 𑒪𑒰𑒑𑒪 𑒕𑒟𑒱। 𑒮𑒦 𑒏𑒯𑒻𑒞 𑒩𑒯𑒍 𑒖𑒹 𑒪𑒹𑒙𑒩𑒰𑒏 𑒖𑒲𑒫𑒢 𑒏𑒼𑒢𑒰 𑒏𑒹 𑒔𑒪𑒞𑒋, 𑒮𑒹 𑒏𑒲 𑒍𑒏𑒩 𑒧𑒰𑒋-𑒥𑒰𑒥𑒴𑒣𑒩 𑒂𑒥 𑒏𑒼𑒢𑒼 𑒁𑒮𑒩𑒱 𑒟𑒼𑒛𑓃𑒥𑒹𑒏 𑒣𑒛𑓃𑒞𑒋।
𑒧𑒳𑒠𑒰 𑒥𑒻𑒞𑒩𑒝𑒲 𑒢𑒰𑒙𑒏 𑒏𑒧𑓂𑒣𑒢𑒲𑒏 𑒧𑒰𑒪𑒱𑒏 𑒪𑒹𑒙𑒩𑒰𑒏 𑒥𑒰𑒣𑒏 𑒣𑒰𑒕𑒰𑒿 𑒣𑒛𑓃𑒱 𑒑𑒹𑒪। 𑒏𑒯𑒋 𑒪𑒰𑒑𑒪 𑒖𑒹 𑒍 𑒞𑒿 𑒪𑒹𑒙𑒩𑒰𑒏𑒹𑒿 𑒢𑒲𑒏 𑒢𑒼𑒏𑒩𑒲 𑒠𑒱𑒨𑒥𑒰 𑒩𑒯𑒪 𑒁𑒕𑒱। 𑒪𑒹𑒙𑒩𑒥𑒧𑒏 𑒥𑒰𑒥𑒴 𑒮𑒦𑒮𑒿 𑒣𑒳𑒕𑒟𑒱 𑒖𑒹 𑒏𑒲 𑒏𑒩𑒲? 𑒮𑒦 𑒨𑒻𑒯 𑒏𑒯𑒻𑒞 𑒩𑒯𑒢𑓂𑒯𑒱 𑒖𑒹 𑒍 𑒪𑒹𑒙𑒩𑒰𑒏𑒹𑒿 𑒏𑒲𑒢𑒱 𑒩𑒯𑒪 𑒁𑒕𑒱, 𑒢𑒼𑒏𑒩𑒲 𑒢𑒯𑒱 𑒠𑓄 𑒩𑒯𑒪 𑒁𑒕𑒱। 𑒄 𑒢𑒰𑒙𑒏 𑒏𑒧𑓂𑒣𑒢𑒲 𑒮𑒦 𑒥𑒝𑒫𑒲𑒩 𑒮𑒦𑒏𑒹𑒿 𑒑𑒰𑒧𑒹-𑒑𑒰𑒧 𑒞𑒏𑒢𑒹 𑒤𑒱𑒩𑒻𑒞 𑒁𑒕𑒱 𑒂 𑒬𑒯𑒩𑒲 𑒮𑒩𑓂𑒏𑒮 𑒏𑒧𑓂𑒣𑒢𑒲 𑒮𑒦𑒏𑒹𑒿 𑒥𑒹𑒔𑒱 𑒠𑒻𑒞 𑒁𑒕𑒱। 𑒤𑒹𑒩 𑒋𑒏 𑒥𑒹𑒩 𑒖𑒹 𑒥𑒹𑒙𑒰 𑒖𑒋𑒞 𑒞𑒿 𑒏𑒲 𑒒𑒳𑒩𑒱𑒏𑓄 𑒁𑒋𑒞? 𑒥𑒹𑒙𑒰 𑒡𑒢 𑒕𑒲, 𑒥𑒰𑒝𑒫𑒲𑒩𑒹 𑒮𑒯𑒲!
𑒁𑒏𑒬-𑒞𑒱𑒏𑒬 𑒏𑒩𑒻𑒞 𑒋𑒏 𑒠𑒱𑒢 𑒧𑒰𑒋-𑒥𑒰𑒣 𑒪𑒹𑒙𑒩𑒮𑒿 𑒣𑒳𑒕𑒪𑒢𑓂𑒯𑒱- “𑒦𑒑𑒫𑒰𑒢𑒏 𑒃𑒔𑓂𑒕𑒰 𑒮𑒩𑓂𑒫𑒼𑒣𑒩𑒱। 𑒦𑒑𑒫𑒰𑒢 𑒣𑒹𑒙 𑒠𑒃 𑒕𑒟𑒱𑒢𑓂𑒯 𑒞𑒿 𑒍𑒏𑒩𑒰 𑒣𑒼𑒮𑒥𑒰𑒏 𑒖𑒼𑒑𑒰𑒩 𑒮𑒹𑒯𑒼 𑒏𑒩𑒻𑒞 𑒕𑒟𑒱𑒢𑓂𑒯। 𑒪𑒼𑒏 𑒮𑒦 𑒏𑒯𑒻𑒞 𑒩𑒯𑒪 𑒖𑒹 𑒪𑒹𑒙𑒩𑒰𑒏 𑒑𑒳𑒖𑒩 𑒏𑒼𑒢𑒰 𑒔𑒪𑒞𑒋 𑒞𑒿 𑒏𑒏𑒩𑒼 𑒑𑒣𑒏 𑒯𑒧 𑒧𑒼𑒖𑒩 𑒢𑒯𑒱 𑒠𑒻𑒞 𑒕𑒪𑒱𑒨𑒻𑒏। 𑒧𑒳𑒠𑒰 𑒄 𑒥𑒻𑒞𑒩𑒝𑒲 𑒢𑒰𑒙𑒏 𑒏𑒧𑓂𑒣𑒢𑒲 𑒥𑒪𑒰 𑒞𑒿 𑒣𑒰𑒕𑒴𑒋 𑒣𑒛𑓃𑒱 𑒑𑒹𑒪 𑒁𑒕𑒱। 𑒪𑒼𑒏𑒮𑒦 𑒏𑒯𑒋-𑒋 𑒖𑒹 𑒄 𑒮𑒦 𑒬𑒯𑒩𑒲 𑒮𑒩𑓂𑒏𑒮 𑒏𑒧𑓂𑒣𑒢𑒲𑒏 𑒪𑒹𑒪 𑒥𑒰𑒝𑒫𑒲𑒩 𑒮𑒦𑒏 𑒞𑒰𑒏𑒱𑒧𑒹 𑒑𑒰𑒧𑒹-𑒑𑒰𑒧 𑒤𑒱𑒩𑒻𑒞 𑒁𑒕𑒱 𑒂 𑒍𑒯𑒱 𑒏𑒧𑓂𑒣𑒢𑒲 𑒮𑒦𑒧𑒹 𑒍𑒏𑒩𑒰 𑒮𑒦𑒏𑒹𑒿 𑒥𑒹𑒔𑒱 𑒠𑒻𑒞 𑒁𑒕𑒱। 𑒧𑒳𑒠𑒰 𑒄 𑒏𑒯𑒋-𑒋 𑒖𑒹 𑒮𑒹 𑒢𑒯𑒱 𑒕𑒻𑒏। 𑒮𑒦 𑒠𑒱𑒢𑒳𑒏𑒰 𑒠𑒱𑒢𑒔𑒩𑓂𑒖𑒰 𑒕𑒻𑒏। 𑒬𑒯𑒩𑒹-𑒬𑒯𑒩𑒹 𑒒𑒳𑒧𑒻𑒞 𑒁𑒕𑒱 𑒄 𑒮𑒦। 𑒖𑒐𑒢 𑒏𑒞𑒯𑒳 𑒮𑒩𑓂𑒏𑒮 𑒢𑒯𑒱 𑒪𑒑𑒻𑒞 𑒕𑒻𑒏 𑒞𑒿 𑒕𑒳𑒙𑓂𑒙𑒱𑒍 𑒦𑒹𑒙𑒱𑒞𑒹 𑒕𑒻𑒏। 𑒂𑒩 𑒏𑒹 𑒢𑒼𑒏𑒩𑒲 𑒠𑒹𑒞 𑒋𑒞𑒹𑒏 𑒏𑒧 𑒪𑒧𑓂𑒥𑒰𑒃 𑒥𑒪𑒰𑒏𑒹𑒿? 𑒮𑒹 𑒯𑒧 𑒁𑒯𑒲𑓀𑒮𑒿 𑒣𑒳𑒕𑒻𑒞 𑒕𑒲 𑒖𑒹 𑒏𑒲 𑒏𑒋𑒪 𑒖𑒰𑒋”।
𑒪𑒹𑒙𑒩𑒰𑒏 𑒞𑒿 𑒂𑒿𑒐𑒱𑒮𑒿 𑒠𑒯𑒼-𑒥𑒯𑒼 𑒢𑒼𑒩 𑒐𑒮𑒋 𑒪𑒑𑒪𑒻𑒏। 𑒑𑒾𑒂𑒿 𑒮𑒦 𑒚𑒲𑒏𑒹 𑒏𑒯𑒻𑒞 𑒩𑒯𑒋। 𑒧𑒰𑒋-𑒥𑒰𑒣 𑒞𑒿 𑒪𑒰𑒑𑒻𑒋 𑒢𑒱𑒩𑓂𑒝𑒨 𑒏𑓄 𑒪𑒹𑒢𑒹 𑒕𑒟𑒱।
“𑒧𑒰𑒋-𑒥𑒰𑒥𑒴। 𑒯𑒧𑒩𑒰 𑒥𑒳𑒗𑒪 𑒁𑒕𑒱 𑒖𑒹 𑒯𑒧𑒩 𑒥𑒱𑒨𑒰𑒯-𑒠𑒰𑒢 𑒢𑒯𑒱 𑒯𑒼𑒋𑒞। 𑒧𑒳𑒠𑒰 𑒁𑒣𑒢 𑒣𑒹𑒙 𑒞𑒿 𑒏𑒼𑒯𑒳𑒢𑒰 𑒯𑒧 𑒑𑒰𑒧𑒧𑒹 𑒦𑒩𑒱𑒨𑒹 𑒪𑒻𑒞 𑒕𑒲। 𑒑𑒳𑒖𑒩 𑒞𑒿 𑒏𑒃𑒋 𑒪𑒻𑒞 𑒕𑒲। 𑒪𑒼𑒏 𑒮𑒦 𑒏𑒯𑒻𑒞 𑒩𑒯𑒋 𑒖𑒹 𑒞𑒼𑒯𑒩 𑒧𑒰𑒋-𑒥𑒰𑒣 𑒞𑒼𑒩𑒰 𑒥𑒹𑒔𑒱 𑒠𑒹𑒪𑒏𑒅, 𑒮𑒹 𑒚𑒲𑒏𑒹 𑒁𑒕𑒱 𑒏𑒲”?
𑒂𑒥 𑒞𑒿 𑒏𑒢𑓂𑒢𑒰𑒩𑒼𑒯𑒙 𑒅𑒚𑒱 𑒑𑒹𑒪। 𑒧𑒰𑒋-𑒥𑒰𑒣𑒏 𑒮𑓀𑒑 𑒪𑒹𑒙𑒩𑒰𑒏 𑒏𑒰𑒢𑒥𑒮𑒿 𑒁𑒿𑒑𑒢𑒰𑒧𑒹 𑒁𑒢𑒒𑒼𑒪 𑒧𑒔𑒱 𑒑𑒹𑒪।
𑒖𑒹𑒢𑒰 𑒮𑒳𑒞𑒱 𑒏𑓄 𑒅𑒚𑒪𑒰𑒏 𑒥𑒰𑒠 𑒜𑒹𑒩-𑒩𑒰𑒮 𑒑𑒣 𑒧𑒯𑒞𑓂𑒞𑓂𑒫𑒣𑒴𑒩𑓂𑒝 𑒏𑒼𑒙𑒱𑒮𑒿 𑒅𑒞𑒩𑒱 𑒏𑓄 𑒁𑒧𑒯𑒞𑓂𑒫𑒣𑒴𑒩𑓂𑒝 𑒫𑒰 𑒞𑒞𑒹𑒏 𑒧𑒯𑒞𑓂𑒫𑒣𑒴𑒩𑓂𑒝 𑒢𑒯𑒱 𑒩𑒯𑒱 𑒖𑒰𑒃𑒞 𑒁𑒕𑒱, 𑒞𑒯𑒱𑒢𑒰 𑒠𑒱𑒢 𑒥𑒱𑒞𑒻𑒞 𑒪𑒹𑒙𑒩𑒰 𑒮𑒹𑒯𑒼 𑒁𑒣𑒢 𑒧𑒼𑒢 𑒧𑒢𑒰 𑒪𑒹𑒪𑒏। 𑒏𑒢𑒲 𑒠𑒹𑒐𑒱𑒨𑒻𑒏 𑒥𑒰𑒯𑒩𑒏 𑒠𑒳𑒢𑒱𑒨𑒰𑒿 𑒏𑒹𑒯𑒢 𑒯𑒼𑒃𑒞 𑒕𑒻𑒏। 𑒧𑒰𑒋-𑒥𑒰𑒣 𑒞𑒿 𑒥𑒹𑒔𑒱𑒋 𑒪𑒹𑒢𑒹 𑒕𑒟𑒱, 𑒍𑒞𑒹𑒏 𑒮𑒱𑒢𑒹𑒯 𑒩𑒯𑒱𑒞𑒢𑓂𑒯𑒱 𑒞𑒿 𑒥𑒹𑒔𑒥𑒹 𑒏𑒩𑒱𑒞𑒟𑒱? 𑒞𑒿 𑒯𑒧𑒯𑒲𑓀 𑒏𑒱𑒋𑒏 𑒁𑒡𑒦𑒑𑒱𑒨𑒰 𑒮𑒱𑒢𑒹𑒯 𑒩𑒰𑒐𑒲?
𑒥𑒻𑒞𑒩𑒝𑒲 𑒏𑒧𑓂𑒣𑒢𑒲𑒥𑒪𑒰 𑒪𑒹𑒙𑒩𑒰𑒏𑒹𑒿 𑒋𑒏𑒙𑒰 𑒮𑒩𑓂𑒏𑒮 𑒥𑒪𑒰 𑒪𑒑 𑒪𑓄 𑒑𑒹𑒪।
𑒍𑒞𑒋 𑒄 𑒪𑒑𑒻𑒞 𑒩𑒯𑒋 𑒖𑒹 𑒖𑒹𑒢𑒰 𑒮𑒦 𑒥𑒰𑒝𑒫𑒲𑒩𑒏 𑒢𑒼𑒏𑒩𑒲𑒏 𑒍𑒞𑒋 𑒖𑒼𑒑𑒰𑒩 𑒯𑒼𑒁𑒋। 𑒠𑒳𑒢𑒱𑒨𑒰𑒿𑒏 𑒮𑒦 𑒥𑒰𑒝𑒫𑒲𑒩𑒏 𑒢𑒼𑒏𑒩𑒲 𑒍𑒏𑒩𑒰 𑒪𑒑 𑒣𑒏𑓂𑒏𑒰 𑒩𑒯𑒋। 𑒪𑒹𑒙𑒩𑒰 𑒖𑒹𑒢𑒰 𑒥𑒰𑒝𑒫𑒲𑒩𑒏 𑒠𑒹𑒬𑒧𑒹 𑒣𑒯𑒳𑒿𑒔𑒱 𑒑𑒹𑒪 𑒕𑒪। 𑒧𑒼𑒿𑒕𑒥𑒪𑒰, 𑒢𑒱𑒧𑒼𑒕𑒲, 𑒣𑒰𑒞𑒩-𑒧𑒼𑒙, 𑒢𑒫-𑒥𑒴𑒜𑓃- 𑒧𑒳𑒠𑒰 𑒮𑒦 𑒡𑒩𑒱 𑒥𑒰𑒝𑒫𑒲𑒩।
𑒪𑒹𑒙𑒩𑒰 𑒍𑒏𑒩𑒰 𑒮𑒦𑒏 𑒥𑒲𑒔 𑒩𑒯𑒋 𑒪𑒰𑒑𑒪। 𑒏𑒱𑒕𑒳 𑒠𑒱𑒢 𑒡𑒩𑒱 𑒞𑒿 𑒍𑒏𑒩𑒰 𑒪𑒑𑒻𑒞 𑒩𑒯𑒋 𑒖𑒹 𑒍 𑒏𑒼𑒢𑒼 𑒫𑒱𑒬𑒱𑒭𑓂𑒙 𑒫𑓂𑒨𑒏𑓂𑒞𑒱 𑒁𑒕𑒱 𑒂 𑒞𑒹𑒿 𑒥𑒹𑒬𑒲 𑒠𑒳𑒐𑒲 𑒁𑒕𑒱 𑒂 𑒠𑒼𑒮𑒩 𑒥𑒰𑒝𑒫𑒲𑒩 𑒮𑒦 𑒞𑒿 𑒁𑒯𑒲 𑒨𑒼𑒑𑓂𑒨 𑒁𑒕𑒱। 𑒧𑒳𑒠𑒰 𑒂𑒮𑓂𑒞𑒹-𑒂𑒮𑓂𑒞𑒹 𑒖𑒐𑒢 𑒮𑓀𑒑𑒲-𑒮𑒰𑒟𑒲 𑒮𑒦𑒮𑒿 𑒍𑒏𑒩𑒰 𑒑𑒣 𑒯𑒼𑒧𑒋 𑒪𑒑𑒪𑒻𑒏, 𑒞𑒐𑒢 𑒍𑒏𑒩𑒰 𑒥𑒳𑒗𑒥𑒰𑒧𑒹 𑒁𑒋𑒪𑒻𑒏 𑒖𑒹 𑒮𑒦𑒏 𑒋𑒏𑓂𑒏𑒹 𑒐𑒹𑒩𑒯𑒰 𑒕𑒻𑒏।
𑒤𑒹𑒩 𑒍𑒯𑒱 𑒖𑒹𑒪𑒩𑒴𑒣𑒲 𑒒𑒩𑒧𑒹 𑒯𑒿𑒮𑒲-𑒐𑒳𑒬𑒲𑒮𑒿, 𑒕𑒼𑒙-𑒕𑒲𑒢 𑒗𑒑𑒛𑓃𑒰-𑒗𑒰𑒿𑒙𑒲 𑒂 𑒧𑒰𑒢-𑒧𑒢𑒾𑒁𑒪𑒏 𑒮𑓀𑒑 𑒍 𑒂𑒑𑒰𑒿 𑒥𑒜𑓃𑒋 𑒪𑒰𑒑𑒪। 𑒁𑒣𑒢 𑒖𑒱𑒢𑒑𑒲𑒏 𑒄 𑒩𑒴𑒣 𑒍𑒏𑒩𑒰 𑒋𑒯𑒢 𑒮𑒢 𑒪𑒑𑒻𑒞 𑒕𑒪𑒻𑒏 𑒖𑒹𑒢𑒰 𑒍 𑒢𑒼𑒏𑒩𑒱𑒯𑒰𑒩𑒰 𑒯𑒼𑒁𑒋। 𑒍𑒯𑒼 𑒒𑒳𑒩𑒱 𑒖𑒋𑒞 𑒑𑒰𑒧 𑒂 𑒤𑒹𑒩 𑒂𑒣𑒮 𑒁𑒋𑒞 𑒢𑒼𑒏𑒩𑒲𑒣𑒩। 𑒑𑒰𑒧𑒏 𑒠𑒼𑒮𑒩 𑒢𑒼𑒏𑒩𑒱𑒯𑒰𑒩𑒰 𑒮𑒦𑒏𑒹𑒿 𑒍 𑒠𑒹𑒐𑒻𑒞 𑒕𑒪। 𑒑𑒰𑒧 𑒁𑒥𑒻𑒞 𑒏𑒰𑒪 𑒖𑒞𑒥𑒹 𑒅𑒪𑓂𑒪𑒮𑒱𑒞 𑒩𑒯𑒻𑒞 𑒕𑒪𑒰𑒯, 𑒢𑒼𑒏𑒩𑒲𑒣𑒩 𑒒𑒳𑒩𑒻𑒞 𑒏𑒰𑒪 𑒮𑒦𑒏 𑒒𑒳𑒒𑒢𑒰 𑒪𑒙𑒏𑒱 𑒖𑒰𑒃𑒞 𑒕𑒪𑒢𑓂𑒯𑒱।
𑒡𑒳𑒩, 𑒧𑒰𑒋-𑒥𑒰𑒣 𑒯𑒧𑒩𑒰 𑒥𑒹𑒔𑒪𑒏 𑒟𑒼𑒛𑓃𑒥𑒹𑒏 𑒁𑒕𑒱। 𑒯𑒧𑒩𑒰 𑒮𑒢 𑒥𑒰𑒝𑒫𑒲𑒩𑒏𑒹𑒿 𑒋𑒯𑒱𑒮𑒿 𑒢𑒲𑒏 𑒂𑒩 𑒏𑒼𑒢 𑒢𑒼𑒏𑒩𑒲 𑒦𑒹𑒙𑒞𑒻𑒏। 𑒮𑒩𑓂𑒏𑒮𑒧𑒹 𑒖𑒐𑒢 𑒯𑒧 𑒏𑒪𑒰 𑒠𑒹𑒐𑒥𑒻𑒞 𑒕𑒲 𑒞𑒿 𑒥𑒔𑓂𑒔𑒰 𑒮𑒦 𑒏𑒼𑒢𑒰 𑒣𑒹𑒙 𑒣𑒏𑒛𑓃𑒱 𑒯𑒿𑒮𑒻𑒞 𑒁𑒕𑒱, 𑒏𑒞𑒹𑒏 𑒟𑒼𑒣𑒛𑓃𑒲 𑒣𑒛𑓃𑒻𑒞 𑒁𑒕𑒱। 𑒟𑒼𑒣𑒛𑓃𑒲𑒏 𑒁𑒥𑒰𑒖 𑒞𑒿 𑒢𑒱𑒮𑒰𑒿 𑒂𑒢𑒱 𑒠𑒻𑒞 𑒁𑒕𑒱। 𑒏𑒰𑒪𑓂𑒯𑒱 𑒍 𑒠𑒳 𑒖𑒳𑒙𑓂𑒙𑒲 𑒥𑒪𑒰 𑒥𑒔𑒱𑒨𑒰, 𑒏𑒹𑒯𑒢 𑒪𑒑𑒻𑒞 𑒩𑒯𑒋 𑒖𑒹𑒢𑒰 𑒁𑒣𑒢𑒹 𑒪𑒼𑒏 𑒩𑒯𑒋। 𑒑𑒰𑒧𑒧𑒹 𑒥𑒛𑓃𑒏𑒰 𑒏𑒏𑓂𑒏𑒰𑒏 𑒥𑒹𑒙𑒲𑒏 𑒥𑒱𑒨𑒰𑒯 𑒢𑒾𑒑𑒕𑒱𑒨𑒰 𑒦𑒹𑒪𑒢𑓂𑒯𑒱 𑒞𑒿 𑒯𑒳𑒢𑒏𑒼 𑒠𑒱𑒂 𑒞𑒿 𑒪𑒼𑒏 𑒮𑒦 𑒅𑒩𑒢𑓂𑒞𑒲 𑒅𑒛𑓃𑒹𑒢𑒹 𑒕𑒪 𑒖𑒹 𑒥𑒹𑒙𑒲 𑒥𑒹𑒔𑒱 𑒪𑒹𑒪𑒢𑓂𑒯𑒱। 𑒏𑒞𑒹𑒏 𑒠𑒳𑒩𑒑𑒩 𑒥𑒱𑒨𑒰𑒯 𑒏𑒩𑒰 𑒠𑒹𑒪𑒢𑓂𑒯𑒱!
𑒄 𑒪𑒼𑒏𑒼 𑒮𑒦, 𑒥𑒳𑒗𑒳 𑒃𑒢𑒰𑒩𑒏 𑒥𑒹𑒓 𑒮𑒦 𑒕𑒲। 𑒠𑒱𑒪𑓂𑒪𑒲-𑒧𑒳𑒧𑓂𑒥𑒃 𑒒𑒳𑒧𑒞 𑒑𑓄 𑒞𑒐𑒢 𑒢𑒹 𑒥𑒳𑒗𑒥𑒰𑒧𑒹 𑒁𑒍𑒞𑒻𑒏 𑒖𑒹 𑒦𑒰𑒑𑒪𑒣𑒳𑒩-𑒢𑒾𑒑𑒕𑒱𑒨𑒰 𑒏𑒼𑒢𑒼 𑒞𑒞𑒹𑒏 𑒠𑒳𑒩𑒑𑒩 𑒢𑒯𑒱 𑒕𑒻𑒏। 𑒧𑒰𑒋-𑒥𑒰𑒣 𑒯𑒧𑒩𑒰 𑒥𑒹𑒔𑒱 𑒪𑒹𑒞?....𑒂 𑒄 𑒮𑒼𑒔𑒱𑒞𑒹 𑒪𑒹𑒙𑒩𑒰𑒏 𑒏𑓀𑒚 𑒮𑒳𑒐𑒰 𑒑𑒹𑒪𑒻𑒏 𑒂 𑒂𑒿𑒐𑒱 𑒣𑒢𑒱𑒨𑒰 𑒑𑒹𑒪𑒻𑒏।
“𑒩𑒹 𑒦𑒰𑒃, 𑒔𑒪 । 𑒞𑒻𑒨𑒰𑒩𑒲 𑒏𑒩𑒥𑒰 𑒪𑒹𑒪 𑒒𑒝𑓂𑒙𑒲 𑒥𑒰𑒖𑒋 𑒥𑒪𑒰 𑒕𑒻𑒏। 𑒍𑒯𑒱𑒮𑒿 𑒣𑒯𑒱𑒢𑒹 𑒏𑒱𑒕𑒳 𑒐𑒰-𑒣𑒲𑒥𑒱 𑒪𑒲”।
𑒣𑓂𑒩𑒫𑒰𑒮
“𑒯𑒪𑓂𑒠𑒱𑒨𑒰 𑒦𑒼𑒩𑒹-𑒦𑒼𑒩𑒹 𑒣𑒯𑒳𑒿𑒔𑒪𑒯𑒳𑒿 । 𑒢𑒯𑒰-𑒡𑒼𑒂 𑒏𑓄 𑒂𑒤𑒱𑒮 𑒑𑒹𑒪𑒯𑒳𑒿। 𑒮𑒦 𑒣𑒳𑒕𑒪𑒏 𑒖𑒹 𑒏𑒞𑒋𑒮𑒿 𑒂𑒋𑒪 𑒕𑒲, 𑒮𑒹 𑒯𑒧𑒩𑒰 𑒍𑒏𑒩𑒰 𑒮𑒦𑒏 𑒯𑒰𑒫-𑒦𑒰𑒫𑒮𑒿 𑒣𑒞𑒰 𑒪𑒰𑒑𑒪, 𑒏𑒰𑒩𑒝 𑒯𑒧𑒩𑒰 𑒥𑓀𑒑𑒪𑒰 𑒣𑒴𑒩𑒰-𑒣𑒴𑒩𑒲 𑒢𑒯𑒱 𑒁𑒥𑒻𑒞 𑒁𑒕𑒱। 𑒯𑒧 𑒮𑒦 𑒑𑒼𑒙𑒹𑒏𑒹𑒿 𑒏𑒯𑒪𑒱𑒨𑒻𑒏 𑒖𑒹 𑒯𑒧𑒩𑒰𑒮𑒿 𑒁𑒯𑒰𑒿 𑒮𑒦 𑒯𑒱𑒢𑓂𑒠𑒲𑒧𑒹 𑒑𑒣 𑒏𑒩𑒋 𑒖𑒰𑒆, 𑒏𑒰𑒩𑒝 𑒯𑒧𑒩𑒰 𑒥𑓀𑒑𑒪𑒰 𑒢𑒯𑒱 𑒁𑒥𑒻𑒋। 𑒮𑒦 𑒑𑒼𑒙𑒹 𑒯𑒧𑒩𑒰 𑒠𑒱𑒮 𑒏𑒢𑒕𑒱𑒨𑒰𑒏𑒹𑒿 𑒞𑒏𑒪𑒏।
“𑒂𑒤𑒱𑒮𑒧𑒹 𑒏𑒰𑒖 𑒥𑒹𑒬𑒲 𑒩𑒯𑒻𑒞 𑒕𑒪 𑒮𑒹 𑒮𑒦 𑒑𑒼𑒙𑒹 𑒁𑒣𑒢-𑒁𑒣𑒢 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮, 𑒏𑒱𑒨𑒼 𑒁𑒣𑒢𑒰 𑒒𑒩𑒹𑒧𑒹 𑒞𑒿 𑒏𑒱𑒨𑒼 𑒂𑒢 𑒚𑒰𑒧, 𑒥𑒢𑒹𑒢𑒹 𑒩𑒯𑒟𑒱। 𑒮𑒹 𑒯𑒧𑒯𑒴𑒿 𑒠𑒴-𑒔𑒰𑒩𑒱 𑒠𑒱𑒢 𑒯𑒼𑒙𑒪𑒧𑒹 𑒩𑒯𑒥𑒰𑒏 𑒥𑒰𑒠 𑒋𑒏𑒙𑒰 𑒒𑒩 𑒞𑒰𑒏𑒪𑒯𑒳𑒿 𑒂 𑒍𑒏𑒩 𑒋𑒏𑒙𑒰 𑒏𑒼𑒚𑒪𑒲𑒏𑒹𑒿 𑒁𑒣𑒢 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮 𑒥𑒢𑒹𑒪𑒯𑒳𑒿।
“𑒏𑒱𑒕𑒳 𑒠𑒱𑒢 𑒡𑒩𑒱 𑒞𑒿 𑒯𑒼𑒃𑒞 𑒕𑒪 𑒖𑒹 𑒏𑒼𑒢𑒰 𑒏𑓄 𑒋𑒞𑒋 𑒏𑒰𑒖 𑒏𑒩𑒥। 𑒦𑒻𑒨𑒰 𑒧𑒻𑒢𑒹𑒖𑒱𑓀𑒑 𑒛𑒰𑒃𑒩𑒹𑒏𑓂𑒙𑒩 𑒕𑒟𑒱। 𑒯𑒳𑒢𑒏𑒰 𑒤𑒼𑒢 𑒏𑒹𑒪𑒱𑒨𑒢𑓂𑒯𑒱 𑒖𑒹 𑒐𑒛𑓃𑒑𑒣𑒳𑒩 𑒙𑓂𑒩𑒰𑓀𑒮𑒤𑒩 𑒏𑒩𑒥𑒰 𑒠𑒱𑒁। 𑒅𑒢𑒙𑒹 𑒍 𑒩𑒹𑒖𑒢𑒪 𑒧𑒻𑒢𑒹𑒖𑒩𑒏𑒹𑒿 𑒤𑒼𑒢 𑒏𑓄 𑒠𑒹𑒪𑒐𑒱𑒢𑓂𑒯 𑒖𑒹 𑒋𑒏𑒩𑒰 𑒏𑒼𑒢𑒼 𑒯𑒰𑒪𑒞𑒧𑒹 𑒯𑒪𑓂𑒠𑒱𑒨𑒰𑒮𑒿 𑒐𑒛𑓃𑒑𑒣𑒳𑒩 𑒙𑓂𑒩𑒰𑓀𑒮𑒤𑒩 𑒢𑒯𑒱 𑒏𑒩𑒴। 𑒙𑓂𑒩𑒹𑒢𑒏 𑒩𑒴𑒙𑒣𑒩 𑒐𑒛𑓃𑒑𑒣𑒳𑒩 𑒕𑒻𑒏, 𑒥𑒹𑒩-𑒥𑒹𑒩 𑒣𑒙𑒢𑒰 𑒒𑒳𑒩𑒱-𑒤𑒱𑒩𑒱 𑒏𑓄 𑒔𑒪𑒱 𑒖𑒋𑒞, 𑒧𑒼𑒢 𑒪𑒑𑒰 𑒏𑒋 𑒏𑒰𑒖 𑒢𑒯𑒱 𑒏𑒩𑒞। 𑒯𑒳𑒢𑒏𑒰 𑒛𑒩 𑒕𑒪𑒢𑓂𑒯𑒱 𑒖𑒹 𑒯𑒳𑒢𑒏𑒩 𑒢𑒰𑒧 𑒡𑓄 𑒏𑓄 𑒯𑒧 𑒩𑒹𑒖𑒢𑒪 𑒧𑒻𑒢𑒹𑒖𑒩𑒮𑒿 𑒙𑓂𑒩𑒰𑓀𑒮𑒤𑒩 𑒢𑒹 𑒏𑒩𑒥𑒰 𑒪𑒲।
“𑒏𑒱𑒕𑒳 𑒠𑒱𑒢 𑒡𑒩𑒱 𑒞𑒿 𑒧𑒼𑒢𑒹 𑒢𑒯𑒱 𑒪𑒰𑒑𑒋। 𑒂𑒤𑒱𑒮𑒧𑒹 𑒮𑒦 𑒥𑒱𑒯𑒰𑒩𑒲 𑒥𑓀𑒑𑒰𑒪𑒲𑒏 𑒁𑒩𑒰𑒛𑓃𑒱 𑒚𑒰𑒜𑓃 𑒏𑓄 𑒠𑒹𑒪𑒏। 𑒢𑒹 𑒯𑒧𑒩𑒰𑒮𑒿 𑒏𑒱𑒨𑒼 𑒑𑒣 𑒏𑒩𑒋 𑒂 𑒢𑒯𑒱𑒨𑒹 𑒙𑒼𑒏𑒋।
“𑒞𑒯𑒱𑒢𑒰 𑒠𑒱𑒢 𑒥𑒲𑒞𑒋 𑒪𑒰𑒑𑒪। 𑒋𑒏 𑒠𑒱𑒢 𑒞𑒰𑒣𑒮 𑒏𑓄 𑒏𑒋 𑒋𑒏𑒙𑒰 𑒨𑒳𑒫𑒏 𑒂𑒋𑒪 𑒩𑒯𑒋 𑒂𑒤𑒱𑒮। 𑒍 𑒋𑒏𑒙𑒰 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒠𑒹𑒫𑒠𑒞𑓂𑒞 𑒥𑒼𑒮𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒪𑒹𑒪 𑒂𑒋𑒪 𑒩𑒯𑒋, 𑒖𑒹 𑒋𑒐𑒢 𑒡𑒩𑒱 𑒂𑒤𑒱𑒮 𑒢𑒯𑒱 𑒣𑒯𑒳𑒿𑒔𑒪 𑒩𑒯𑒋। 𑒯𑒧𑒩𑒰 𑒪𑒑 𑒏𑒱𑒨𑒼 𑒢𑒯𑒱 𑒩𑒯𑒋, 𑒮𑒹 𑒍 𑒮𑒼𑒗𑒰𑒿 𑒂𑒥𑒱 𑒥𑒻𑒮𑒱 𑒑𑒹𑒪।
“𑒯𑒧 𑒍𑒏𑒩𑒰𑒮𑒿 𑒣𑒳𑒕𑒪𑒱𑒨𑒻𑒏 𑒖𑒹 𑒍 𑒏𑒼𑒢 𑒏𑒰𑒖𑒮𑒿 𑒂𑒋𑒪 𑒁𑒕𑒱 ? 𑒍 𑒏𑒯𑒪𑒏 𑒖𑒹 𑒠𑒹𑒫𑒠𑒞𑓂𑒞 𑒥𑒼𑒮 𑒪𑒹𑒪 𑒍 𑒏𑒰𑒖 𑒏𑒩𑒻𑒞 𑒁𑒕𑒱। 𑒪𑒼𑒏 𑒮𑒦𑒏 𑒥𑒲𑒧𑒰 𑒍 𑒏𑒩𑒥𑒻𑒞 𑒕𑒪 𑒂 𑒠𑒹𑒫𑒠𑒞𑓂𑒞𑒏𑒹𑒿 𑒠𑒻𑒞 𑒕𑒪 । 𑒠𑒹𑒫𑒠𑒞𑓂𑒞 𑒍𑒏𑒩𑒰 𑒞𑒏𑒩 𑒥𑒠𑒪𑒰𑒧𑒹 𑒣𑓂𑒩𑒲𑒧𑒱𑒨𑒧𑒏 𑒩𑒰𑒬𑒱𑒏 𑒯𑒱𑒮𑒰𑒥𑒮𑒿 𑒏𑒧𑒲𑒬𑒢 𑒠𑒻𑒞 𑒕𑒪𑒐𑒱𑒢𑓂𑒯।
“𑒞𑒐𑒢 𑒯𑒧 𑒍𑒏𑒩𑒰 𑒣𑒳𑒕𑒪𑒱𑒨𑒻𑒏 𑒖𑒹 𑒁𑒯𑒰𑒿𑒏𑒹𑒿 𑒍 𑒋𑒖𑒹𑒢𑓂𑒮𑒲 𑒠𑒹𑒢𑒹 𑒕𑒟𑒱 ? 𑒞𑒿 𑒣𑒞𑒰 𑒪𑒰𑒑𑒪 𑒖𑒹 𑒍 𑒞𑒲𑒢 𑒮𑒰𑒪𑒮𑒿 𑒂𑒬𑓂𑒫𑒰𑒮𑒢𑒣𑒩 𑒋𑒯𑒱𑒢𑒰 𑒐𑒙𑒱 𑒩𑒯𑒪 𑒁𑒕𑒱।
“𑒞𑒰𑒣𑒮 𑒯𑒧𑒩𑒰 𑒮𑒼𑒗 𑒪𑒼𑒏 𑒥𑒳𑒗𑒰𑒋𑒪 । 𑒮𑒹 𑒍𑒏𑒩𑒰 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒏𑒰𑒖 𑒏𑒩𑒋। 𑒍𑒏𑒩𑒰 𑒯𑒧 𑒋𑒖𑒹𑒢𑓂𑒮𑒲 𑒠𑒱𑒁𑒋𑒥𑒰𑒏 𑒪𑒹𑒪 𑒞𑒐𑒢𑒹 𑒤𑒰𑒩𑓂𑒧 𑒦𑒩𑒥𑒰 𑒪𑒹𑒪𑒱𑒨𑒻𑒏। 𑒍𑒏𑒩𑒰 𑒯𑒧 𑒣𑒰𑒿𑒔-𑒮𑒰𑒞 𑒂𑒩 𑒑𑒼𑒙𑒹𑒏𑒹𑒿 𑒮𑒹𑒯𑒼 𑒁𑒢𑒥𑒰𑒏 𑒪𑒹𑒪 𑒏𑒯𑒱𑒪𑒱𑒨𑒻𑒏, 𑒖𑒏𑒩𑒰 𑒯𑒧 𑒋𑒖𑒹𑒢𑓂𑒮𑒲 𑒠𑒋 𑒮𑒏𑒲। 𑒍 𑒏𑒯𑒪𑒏 𑒖𑒹 𑒥𑓀𑒑𑒰𑒪𑒲 𑒮𑒦 𑒢𑒼𑒏𑒩𑒲 𑒏𑒩𑒥𑒰𑒧𑒹 𑒥𑒹𑒬𑒲 𑒩𑒳𑒔𑒱 𑒩𑒐𑒻𑒞 𑒁𑒕𑒱, 𑒮𑒹 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒢𑒼𑒏𑒩𑒲𑒨𑒹𑒣𑒩 𑒏𑒱𑒕𑒳 𑒑𑒼𑒙𑒹𑒏𑒹𑒿 𑒞𑒐𑒢 𑒩𑒰𑒐𑒱 𑒪𑒱𑒁।
“𑒞𑒰𑒣𑒮𑒏𑒹𑒿 𑒋𑒖𑒹𑒢𑓂𑒮𑒲 𑒦𑒹𑒙𑒱 𑒑𑒹𑒪𑒻𑒏 𑒂 𑒍𑒏𑒩𑒰 𑒖𑒐𑒢 𑒔𑒹𑒏𑒮𑒿 𑒣𑒔𑒰𑒮-𑒣𑒔𑒰𑒮 𑒯𑒖𑒰𑒩 𑒏𑒧𑒲𑒬𑒢 𑒦𑒹𑒙𑒋 𑒪𑒑𑒪𑒻𑒏 𑒞𑒐𑒢 𑒍𑒏𑒩𑒰 𑒋𑒯𑒱 𑒑𑒣𑒏 𑒁𑒢𑒳𑒦𑒫 𑒦𑒹𑒪𑒻𑒏 𑒖𑒹 𑒠𑒹𑒫𑒠𑒞𑓂𑒞 𑒏𑒼𑒢𑒰 𑒍𑒏𑒩𑒰𑒮𑒿 𑒧𑒖𑒠𑒴𑒩𑒲 𑒏𑒩𑒥𑒰 𑒩𑒯𑒪 𑒕𑒪𑒋 𑒂 𑒬𑒼𑒭𑒝 𑒏𑓄 𑒩𑒯𑒪 𑒕𑒪𑒋।
“𑒠𑒹𑒫𑒠𑒞𑓂𑒞 𑒖𑒯𑒰𑒿-𑒞𑒯𑒰𑒿 𑒄 𑒑𑒣 𑒥𑒰𑒖𑒋 𑒪𑒰𑒑𑒪 𑒕𑒪 𑒖𑒹 𑒯𑒧 𑒍𑒏𑒩 𑒋𑒖𑒹𑒢𑓂𑒙𑒏𑒹𑒿 𑒞𑒼𑒛𑓃𑒱 𑒪𑒹𑒪𑒱𑒨𑒻𑒏। 𑒖𑒱𑒢𑒏𑒰𑒮𑒿 𑒯𑒧 𑒄 𑒑𑒣-𑒬𑒣 𑒮𑒳𑒢𑒻𑒞 𑒩𑒯𑒲 𑒞𑒱𑒢𑒏𑒰 𑒯𑒧 𑒅𑒞𑓂𑒞𑒩 𑒠𑒻𑒞 𑒕𑒪𑒱𑒨𑒢𑓂𑒯𑒱 𑒖𑒹 𑒠𑒹𑒫𑒠𑒞𑓂𑒞 𑒞𑒿 𑒞𑒰𑒣𑒮𑒏𑒹𑒿 𑒋𑒖𑒹𑒢𑓂𑒮𑒲 𑒠𑒹𑒢𑒯𑒱𑒨𑒹 𑒢𑒯𑒱 𑒩𑒯𑒋, 𑒞𑒐𑒢 𑒋𑒖𑒹𑒢𑓂𑒙 𑒞𑒼𑒛𑓃𑒥𑒰𑒏 𑒑𑒣 𑒏𑒞𑒋𑒮𑒿 𑒂𑒋𑒪 ?
“𑒋𑒏 𑒠𑒱𑒢 𑒠𑒹𑒫𑒠𑒞𑓂𑒞 𑒏𑒼𑒢𑒼 𑒑𑒳𑒣𑓂𑒞 𑒧𑒲𑒙𑒱𑓀𑒑 𑒏𑒋, 𑒖𑒏𑒩 𑒖𑒰𑒢𑒏𑒰𑒩𑒲 𑒯𑒧𑒩𑒰 𑒥𑒰𑒠𑒧𑒹 𑒦𑒹𑒙𑒪, 𑒂𑒢 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒮𑒦𑒏 𑒮𑓀𑒑𑒹 𑒯𑒧𑒩 𑒙𑒹𑒥𑒳𑒪 𑒪𑒑 𑒂𑒋𑒪 𑒂 𑒁𑒝𑓂𑒙-𑒬𑒝𑓂𑒙 𑒥𑒰𑒖𑒋 𑒪𑒰𑒑𑒪। 𑒍 𑒮𑒦 𑒥𑓀𑒑𑒪𑒰𑒧𑒹 𑒣𑓂𑒩𑒪𑒰𑒣 𑒏𑒋 𑒩𑒯𑒪 𑒕𑒪, 𑒮𑒹 𑒯𑒧 𑒏𑒱𑒕𑒳 𑒢𑒯𑒱 𑒥𑒳𑒗𑒪𑒱𑒨𑒻𑒏। 𑒧𑒳𑒠𑒰 𑒞𑒐𑒢𑒹 𑒍 𑒋𑒏𑒙𑒰 𑒑𑒪𑒞𑒲 𑒏𑒋𑒪𑒏 𑒖𑒹 𑒯𑒧𑒩 𑒙𑒹𑒥𑒳𑒪𑒣𑒩 𑒧𑒳𑒏𑓂𑒏𑒰 𑒧𑒰𑒩𑒪𑒏।
“𑒯𑒳𑒝𑓂𑒛 𑒞𑒿 𑒯𑒧 𑒕𑒲𑒯𑒹। 𑒢𑒼𑒏𑒩𑒲 𑒖𑒹 𑒄 𑒋𑒪.𑒂𑒃.𑒮𑒲.𑒥𑒪𑒰 𑒦𑒹𑒙𑒪 𑒁𑒕𑒱, 𑒮𑒹 𑒡𑒩𑒱 𑒁𑒕𑒱 𑒮𑒖𑓂𑒖𑒢𑒥𑒪𑒰। 𑒮𑒹 𑒯𑒧 𑒋𑒞𑒹𑒏 𑒏𑒰𑒪 𑒡𑒩𑒱 𑒥𑒩𑒠𑒰𑒮𑓂𑒞 𑒏𑒋𑒢𑒹 𑒩𑒯𑒱𑒨𑒢𑓂𑒯𑒱। 𑒧𑒳𑒠𑒰 𑒄 𑒞𑒿 𑒁𑒞𑒞𑓂𑒞𑒯𑒹 𑒏𑒋 𑒠𑒹𑒢𑒹 𑒩𑒯𑒋। 𑒋𑒯𑒱 𑒢𑒼𑒏𑒩𑒲𑒧𑒹 𑒮𑒦 𑒠𑒱𑒢 𑒯𑒧𑒩𑒰 𑒖𑒹 𑒕𑒠𑓂𑒧 𑒦𑒹𑒭𑒧𑒹 𑒂𑒤𑒱𑒮 𑒖𑒰𑒋 𑒣𑒛𑓃𑒻𑒞 𑒩𑒯𑒋, 𑒮𑒹 𑒍𑒯𑒱 𑒠𑒱𑒢 𑒄 𑒦𑒹𑒭 𑒯𑒧𑒩𑒰 𑒅𑒞𑒰𑒩𑒥𑒰𑒏 𑒧𑒼𑒢 𑒦𑒹𑒪। 𑒮𑒼𑒗𑒹 𑒯𑒧 𑒠𑒹𑒫𑒠𑒞𑓂𑒞𑒏 𑒏𑒰𑒪𑒩 𑒣𑒏𑒛𑓃𑒪𑒯𑒳𑒿 𑒂 𑒏𑒯𑒪𑒯𑒳𑒿, 𑒖𑒹 𑒄 𑒮𑒧𑓂𑒣𑒴𑒩𑓂𑒝 𑒦𑒰𑒩𑒞 𑒋𑒏 𑒁𑒕𑒱। 𑒋𑒞𑒋 𑒦𑒰𑒩𑒞𑒹𑒏 𑒢𑒯𑒱 𑒫𑒩𑒢𑓂 𑒢𑒹𑒣𑒰𑒪 𑒂 𑒦𑒴𑒙𑒰𑒢𑒏 𑒪𑒼𑒏𑒏𑒹𑒿 𑒮𑒹𑒯𑒼 𑒏𑒼𑒢𑒼 𑒮𑓂𑒟𑒰𑒢𑒣𑒩 𑒖𑒰 𑒏𑒋 𑒏𑒰𑒖 𑒏𑒩𑒥𑒰𑒏 𑒮𑓂𑒫𑒞𑓀𑒞𑓂𑒩𑒞𑒰 𑒮𑓀𑒫𑒱𑒡𑒰𑒢 𑒠𑓂𑒫𑒰𑒩𑒰 𑒠𑒹𑒪 𑒑𑒹𑒪 𑒁𑒕𑒱।
“𑒯𑒧𑒩 𑒄 𑒩𑒴𑒣 𑒠𑒹𑒐𑒱 𑒍𑒏𑒩 𑒮𑒦 𑒮𑒯𑒏𑒩𑓂𑒧𑒲 𑒁𑒣𑒢-𑒁𑒣𑒢 𑒏𑒹𑒥𑒱𑒢 𑒔𑒪𑒱 𑒑𑒹𑒪 𑒂 𑒥𑓂𑒩𑒰𑓀𑒔 𑒧𑒻𑒢𑒹𑒖𑒩 𑒂𑒥𑒱 𑒏𑒋 𑒯𑒧𑒩𑒰 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒬𑒰𑒢𑓂𑒞 𑒏𑒋𑒪𑒢𑓂𑒯𑒱।
“𑒞𑒏𑒩 𑒥𑒰𑒠 𑒋𑒏𑒙𑒰 𑒂𑒩 𑒗𑒧𑒹𑒪𑒰 𑒦𑒹𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒞𑒰𑒣𑒮 𑒖𑒰𑒯𑒱 𑒠𑒴-𑒞𑒲𑒢 𑒑𑒼𑒙𑒹𑒏𑒹𑒿 𑒋𑒖𑒹𑒢𑓂𑒮𑒲𑒏 𑒪𑒹𑒪 𑒁𑒢𑒢𑒹 𑒕𑒪, 𑒮𑒹 𑒣𑒯𑒱𑒢𑒹 𑒞𑒿 𑒢𑒼𑒏𑒩𑒲 𑒏𑒩𑒥𑒰𑒏 𑒪𑒹𑒪 𑒥𑒹𑒬𑒲 𑒅𑒞𑓂𑒮𑒳𑒏 𑒕𑒪𑒰𑒯। 𑒧𑒳𑒠𑒰 𑒖𑒐𑒢 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒞𑒰𑒣𑒮𑒏 𑒂𑒥𑒰𑒖𑒰𑒯𑒲 𑒂 𑒏𑒧𑒲𑒬𑒢𑒏 𑒔𑒹𑒏 𑒮𑒦𑒏 𑒔𑒩𑒔𑒰 𑒮𑒳𑒢𑒪𑒢𑓂𑒯𑒱, 𑒞𑒐𑒢 𑒍 𑒯𑒧𑒩 𑒂𑒤𑒱𑒮𑒧𑒹 𑒏𑒰𑒖 𑒏𑒩𑒱𑒞𑒟𑒱 𑒂𑒏𑒱 𑒧𑒰𑒩𑓂𑒏𑒹𑒙𑒧𑒹 𑒥𑒲𑒧𑒰𑒏 𑒪𑒹𑒪 𑒦𑒰𑒑𑒰-𑒦𑒰𑒑𑒲 𑒏𑒩𑒱𑒞𑒟𑒱 ? 𑒁𑒣𑒢 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒯𑒧 𑒍𑒏𑒩𑒰 𑒮𑒦𑒏𑒹𑒿 𑒞𑒲𑒢-𑒞𑒲𑒢 𑒯𑒖𑒰𑒩 𑒙𑒰𑒏𑒰 𑒠𑒻𑒞 𑒩𑒯𑒱𑒨𑒻𑒏 । 𑒂 𑒞𑒰𑒣𑒮𑒏𑒹𑒿 𑒞𑒲𑒮-𑒞𑒲𑒮 𑒯𑒖𑒰𑒩 𑒙𑒰𑒏𑒰 𑒧𑒰𑒮 𑒣𑓂𑒩𑒲𑒧𑒱𑒨𑒧𑒏 𑒏𑒧𑒲𑒬𑒢 𑒦𑒹𑒙𑒻𑒞 𑒩𑒯𑒻𑒏। 𑒄 𑒠𑒹𑒐𑒱 𑒍𑒯𑒼 𑒮𑒦 𑒦𑒰𑒑𑒱-𑒦𑒰𑒑𑒱 𑒏𑒰𑒖 𑒏𑒩𑒋 𑒪𑒰𑒑𑒪। 𑒮𑒹 𑒖𑒹 𑒮𑒦 𑒢𑒼𑒏𑒩𑒲 𑒪𑒹𑒪 𑒂𑒋𑒪, 𑒮𑒦 𑒯𑒧𑒩 𑒋𑒖𑒹𑒢𑓂𑒙 𑒥𑒢𑒱 𑒑𑒹𑒪। 𑒯𑒧𑒩𑒰 𑒣𑓂𑒩𑒼𑒥𑒹𑒬𑒢 𑒣𑒲𑒩𑒱𑒋𑒛𑒧𑒹 𑒠𑒹𑒪 𑒙𑒰𑒩𑒑𑒹𑒙 𑒣𑒴𑒩𑒰 𑒏𑒩𑒥𑒰𑒧𑒹 𑒏𑒼𑒢𑒼 𑒠𑒱𑒏 𑒢𑒯𑒱 𑒦𑒹𑒪। 𑒧𑒲𑒙𑒱𑓀𑒑𑒧𑒹 𑒖𑒐𑒢 𑒂𑒢 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒮𑒦 𑒏𑒯𑒟𑒱 𑒖𑒹 𑒧𑒰𑒩𑓂𑒏𑒹𑒙 𑒛𑒰𑒅𑒢 𑒔𑒪𑒱 𑒩𑒯𑒪 𑒁𑒕𑒱, 𑒞𑒿 𑒁𑒡𑒱𑒏𑒰𑒩𑒲 𑒯𑒧𑒩 𑒅𑒠𑒰𑒯𑒩𑒝 𑒠𑒻𑒞 𑒩𑒯𑒟𑒱𑒢𑓂𑒯 𑒖𑒹 𑒍 𑒏𑒼𑒢𑒰 𑒁𑒣𑒢 𑒙𑒰𑒩𑒑𑒹𑒙 𑒣𑒴𑒩𑓂𑒝 𑒏𑒋 𑒩𑒯𑒪 𑒕𑒟𑒱 ?
“𑒧𑒳𑒠𑒰 𑒯𑒧𑒩 𑒄 𑒣𑓂𑒩𑒑𑒞𑒱 𑒠𑒹𑒫𑒠𑒞𑓂𑒞𑒏𑒹𑒿 𑒠𑒹𑒐𑒪 𑒢𑒯𑒱 𑒑𑒹𑒪𑒻𑒏। 𑒍 𑒯𑒧𑒩 𑒋𑒖𑒹𑒢𑓂𑒙 𑒮𑒦𑒮𑒿 𑒋𑒏𑒙𑒰 𑒑𑒳𑒣𑓂𑒞 𑒧𑒲𑒙𑒱𑓀𑒑 𑒏𑒋𑒪𑒏, 𑒖𑒏𑒩 𑒖𑒰𑒢𑒏𑒰𑒩𑒲 𑒯𑒧𑒩𑒰 𑒥𑒰𑒠𑒧𑒹 𑒦𑒹𑒪।
“𑒋𑒏 𑒠𑒱𑒢 𑒞𑒰𑒣𑒮 𑒮𑒦𑒙𑒰 𑒋𑒖𑒹𑒢𑓂𑒙𑒏𑒹𑒿 𑒪𑒹𑒢𑒹 𑒯𑒧𑒩𑒰 𑒪𑒑 𑒂𑒋𑒪 𑒂 𑒏𑒯𑒪𑒏 𑒖𑒹 𑒍 𑒮𑒦 𑒯𑒧𑒩𑒰 𑒮𑓀𑒑 𑒂𑒥 𑒏𑒰𑒖 𑒢𑒯𑒱 𑒏𑒩𑒞 । 𑒏𑒰𑒩𑒝, 𑒠𑒹𑒫𑒠𑒞𑓂𑒞 𑒋𑒏𑒙𑒰 𑒧𑒲𑒙𑒱𑓀𑒑 𑒏𑒋 𑒥𑒱𑒯𑒰𑒩𑒲𑒏 𑒢𑒲𑒔𑒰𑒿 𑒏𑒰𑒖 𑒏𑒹𑒪𑒰𑒣𑒩 𑒋𑒏𑒩𑒰 𑒮𑒦𑒏𑒹𑒿 𑒮𑒧𑒰𑒖𑒮𑒿 𑒥𑒯𑒱𑒭𑓂𑒏𑒵𑒞 𑒏𑒩𑒥𑒰𑒏 𑒑𑒣 𑒏𑒯𑒢𑒹 𑒩𑒯𑒋।
“𑒞𑒰𑒫𑒞 𑒯𑒧𑒩 𑒦𑒹𑒿𑒙 𑒮𑓂𑒟𑒰𑒢𑒲𑒨 𑒋𑒧.𑒋𑒪.𑒋. 𑒮𑒳𑒧𑒱𑒞 𑒣𑒰𑒪𑒮𑒿 𑒦𑓄 𑒑𑒹𑒪 𑒩𑒯𑒋 𑒂 𑒯𑒧 𑒯𑒳𑒢𑒏𑒩 𑒥𑒹𑒙𑒲𑒏𑒹𑒿 𑒮𑒹𑒯𑒼 𑒋𑒖𑒹𑒢𑓂𑒮𑒲 𑒠𑓄 𑒠𑒹𑒢𑒹 𑒕𑒪𑒱𑒨𑒢𑓂𑒯𑒱। 𑒠𑒹𑒫𑒠𑒞𑓂𑒞𑒏𑒹𑒿 𑒮𑒰𑒯𑒮 𑒢𑒯𑒱 𑒩𑒯𑒋 𑒖𑒹 𑒋𑒧.𑒋𑒪.𑒋. 𑒪𑒑 𑒖𑒃𑒞𑒋, 𑒮𑒹 𑒍 𑒞𑒰𑒣𑒮 𑒮𑒦𑒣𑒩 𑒁𑒣𑒢 𑒩𑒼𑒥-𑒠𑒰𑒥 𑒠𑒹𑒐𑒰 𑒩𑒯𑒪 𑒕𑒪।
“𑒯𑒧𑒩𑒰𑒮𑒿 𑒑𑒣 𑒏𑒩𑒻𑒞-𑒏𑒩𑒻𑒞 𑒋𑒖𑒹𑒢𑓂𑒙 𑒮𑒦 𑒯𑒱𑒢𑓂𑒠𑒲 𑒮𑒲𑒐𑒱 𑒑𑒹𑒪 𑒩𑒯𑒟𑒱। 𑒯𑒧 𑒯𑒳𑒢𑒏𑒰 𑒮𑒦𑒏𑒹𑒿 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒠𑒹𑒐𑒴 । 𑒋𑒏 𑒞𑒿 𑒄 𑒑𑒣, 𑒖𑒹 𑒁𑒯𑒰𑒿 𑒮𑒦𑒏 𑒖𑒢-𑒣𑓂𑒩𑒞𑒱𑒢𑒱𑒡𑒱𑒏 𑒥𑒹𑒙𑒲 𑒯𑒧𑒩𑒰𑒮𑒿 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒕𑒟𑒱। 𑒞𑒿 𑒠𑒹𑒫𑒠𑒞𑓂𑒞 𑒏𑒲 𑒯𑒳𑒢𑒏𑒰 𑒥𑒰𑒩𑒱 𑒠𑒹𑒞 ?
“𑒯𑒧 𑒂 𑒁𑒯𑒰𑒿 𑒠𑒳𑒢𑒴 𑒑𑒼𑒙𑒹 𑒦𑒰𑒩𑒞𑒏 𑒢𑒱𑒫𑒰𑒮𑒲 𑒕𑒲। 𑒋𑒞𑒋 𑒯𑒪𑓂𑒠𑒱𑒨𑒰𑒧𑒹 𑒥𑒰𑒩𑒯 𑒙𑒰 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒕𑒟𑒱, 𑒖𑒰𑒯𑒱𑒧𑒹 𑒋𑒑𑒰𑒩𑒯 𑒙𑒰 𑒥𑓀𑒑𑒰𑒪𑒲 𑒕𑒟𑒱 𑒂 𑒧𑒰𑒞𑓂𑒩 𑒯𑒧 𑒋𑒏𑒙𑒰 𑒥𑒱𑒯𑒰𑒩𑒲 𑒕𑒲। 𑒯𑒪𑓂𑒠𑒱𑒨𑒰𑒧𑒹 𑒖𑒹 𑒤𑒻𑒏𑓂𑒙𑓂𑒩𑒲 𑒁𑒕𑒱, 𑒞𑒰𑒯𑒱 𑒮𑒦𑒧𑒹 𑒥𑒱𑒯𑒰𑒩 𑒂 𑒂𑒢 𑒣𑓂𑒩𑒠𑒹𑒬𑒏 𑒖𑒞𑒹𑒏 𑒪𑒼𑒏 𑒕𑒟𑒱, 𑒞𑒏𑒩 𑒥𑒲𑒧𑒰 𑒯𑒧 𑒁𑒯𑒰𑒿 𑒮𑒦𑒏𑒹𑒿 𑒠𑒹𑒥, 𑒠𑓄 𑒮𑒏𑒞 𑒄 𑒥𑒲𑒧𑒰 𑒠𑒹𑒫𑒠𑒞𑓂𑒞 𑒂𑒏𑒱 𑒏𑓂𑒨𑒼 𑒂𑒢𑒼 ? 𑒥𑓀𑒑𑒰𑒪𑒲 𑒮𑒦𑒏 𑒥𑒲𑒧𑒰 𑒞𑒿 𑒋𑒑𑒰𑒩𑒯 𑒙𑒰 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲𑒧𑒹 𑒥𑒿𑒙𑒞 𑒧𑒳𑒠𑒰 𑒥𑒱𑒯𑒰𑒩𑒲 𑒂 𑒂𑒢 𑒮𑒦𑒏 𑒥𑒲𑒧𑒰 𑒞𑒿 𑒧𑒰𑒞𑓂𑒩 𑒁𑒯𑒰𑒿 𑒮𑒦𑒏𑒹𑒿 𑒦𑒹𑒙𑒞। 𑒥𑓀𑒑𑒰𑒪𑒲 𑒮𑒦𑒏 𑒥𑒲𑒧𑒰 𑒞𑒿 𑒮𑒹𑒯𑒼 𑒁𑒯𑒰𑒿 𑒮𑒦 𑒁𑒣𑒢 𑒮𑒰𑒧𑒩𑓂𑒟𑓂𑒨𑒏 𑒁𑒢𑒳𑒮𑒰𑒩𑒹𑒿 𑒏𑒃𑒨𑒹 𑒩𑒯𑒪 𑒕𑒲।
“𑒯𑒧𑒩 𑒦𑒰𑒭𑒝 𑒫𑒰𑒞𑒰𑒫𑒩𑒝𑒏𑒹𑒿 𑒣𑒩𑒱𑒫𑒩𑓂𑒞𑒱𑒞 𑒏𑒋 𑒠𑒹𑒪𑒏𑒻𑒏। 𑒮𑒦 𑒋𑒖𑒹𑒢𑓂𑒙𑒏 𑒦𑒰𑒋-𑒥𑒰𑒣 𑒮𑒦 𑒯𑒧𑒩𑒰 𑒪𑒑 𑒂𑒋𑒪 𑒂 𑒏𑒯𑒪𑒏 𑒖𑒹 𑒁𑒯𑒰𑒿 𑒞𑒿 𑒠𑒹𑒫𑒞𑒰 𑒥𑒢𑒱 𑒂𑒋𑒪 𑒕𑒲 । 𑒯𑒧𑒩 𑒮𑒦𑒏 𑒦𑒰𑒋-𑒥𑒔𑓂𑒔𑒰 𑒥𑒾𑒂𑒃𑒞 𑒩𑒯𑒻𑒞 𑒕𑒪 𑒂 𑒥𑒠𑒧𑒮𑓂𑒞𑒲 𑒏𑒩𑒻𑒞 𑒩𑒯𑒻𑒞 𑒕𑒪। 𑒁𑒯𑒰𑒿𑒏 𑒁𑒋𑒪𑒰𑒮𑒿 𑒄 𑒮𑒦 𑒩𑒼𑒖𑒑𑒰𑒩𑒧𑒹 𑒪𑒰𑒑𑒱 𑒑𑒹𑒪 𑒁𑒕𑒱 𑒂 𑒖𑒞𑒹𑒏 𑒣𑒰𑒃 𑒏𑒧𑒰 𑒩𑒯𑒪 𑒁𑒕𑒱, 𑒮𑒹 𑒞𑒿 𑒯𑒧𑒩𑒰 𑒮𑒦 𑒮𑒣𑒢𑒼𑒧𑒹 𑒢𑒯𑒱 𑒮𑒼𑒔𑒢𑒹 𑒩𑒯𑒲।
“𑒤𑒻𑒏𑓂𑒙𑒩𑒲𑒧𑒹 𑒧𑒖𑒴𑒩 𑒮𑒦𑒏 𑒧𑒹𑒙 𑒩𑒯𑒋 𑒋𑒏𑒙𑒰 𑒗𑒰𑒖𑒲। 𑒯𑒪𑓂𑒠𑒱𑒨𑒰𑒏 𑒤𑒻𑒏𑓂𑒙𑒩𑒲 𑒮𑒦𑒧𑒹 𑒍𑒏𑒩𑒰 𑒧𑒰𑒡𑓂𑒨𑒧𑒮𑒿 𑒜𑒹𑒩 𑒩𑒰𑒮 𑒥𑒲𑒧𑒰 𑒦𑒹𑒙𑒪, 𑒮𑒦 𑒋𑒖𑒹𑒢𑓂𑒙𑒧𑒹 𑒥𑒩𑒰𑒥𑒩𑒱 𑒏𑓄 𑒥𑒰𑒿𑒙𑒱 𑒠𑒹𑒪𑒱𑒨𑒻𑒏। 𑒧𑒳𑒠𑒰 𑒣𑒞𑒰 𑒢𑒯𑒱 𑒄 𑒠𑒹𑒫𑒠𑒞𑓂𑒞 𑒍𑒏𑒩𑒰 𑒏𑒲 𑒏𑒰𑒢 𑒦𑒩𑒱 𑒠𑒹𑒪𑒏𑒻𑒏, 𑒖𑒹 𑒥𑒰𑒠𑒧𑒹 𑒍 𑒯𑒧𑒩 𑒋𑒖𑒹𑒢𑓂𑒙 𑒮𑒦𑒏𑒹𑒿 𑒦𑒛𑓃𑒏𑒰𑒥𑒋 𑒪𑒰𑒑𑒪।
“𑒄 𑒗𑒰𑒖𑒲 𑒋𑒏 𑒠𑒱𑒢 𑒠𑒰𑒩𑒴 𑒣𑒲𑒥𑒱 𑒏𑒋 𑒯𑒧𑒩𑒰 𑒮𑓀𑒑𑒹 𑒗𑒑𑒛𑓃𑒰 𑒏𑒩𑒋 𑒪𑒰𑒑𑒪 𑒞𑒿 𑒍𑒏𑒩𑒼 𑒯𑒧 𑒢𑒲𑒏 𑒖𑒹𑒏𑒰𑒿 𑒛𑒣𑒙𑒱 𑒠𑒹𑒪𑒱𑒨𑒻𑒏, 𑒖𑒹 𑒥𑒰𑒥𑒴 𑒢𑒲𑒏 𑒖𑒹𑒏𑒰𑒿 𑒏𑒰𑒖 𑒏𑒩 𑒢𑒯𑒱 𑒞𑒿 𑒒𑒩 𑒖𑒼 ।
“𑒒𑒩𑒧𑒹 𑒋𑒏𑒙𑒰 𑒠𑒰𑒃 𑒧𑒰𑒿 𑒐𑒹𑒢𑒰𑒃 𑒥𑒢𑒰 𑒖𑒰𑒃𑒞 𑒩𑒯𑒟𑒱। 𑒞𑒞𑒹𑒏 𑒪𑒼𑒏𑒮𑒿 𑒗𑒑𑒛𑓃𑒰 𑒬𑒳𑒩𑒴 𑒦𑓄 𑒑𑒹𑒪 𑒩𑒯𑒋 𑒖𑒹 𑒯𑒧𑒩𑒰 𑒪𑒰𑒑𑒪 𑒖𑒹 𑒍 𑒮𑒦 𑒠𑒰𑒃 𑒧𑒰𑒿𑒏 𑒧𑒰𑒡𑓂𑒨𑒧𑒮𑒿 𑒯𑒧𑒩 𑒐𑒹𑒢𑒰𑒃𑒧𑒹 𑒧𑒰𑒯𑒳𑒩 𑒢𑒹 𑒧𑒱𑒪𑒥𑒰 𑒠𑒋। 𑒮𑒹 𑒯𑒧 𑒠𑒰𑒃𑒧𑒰𑒿 𑒮𑒿 𑒐𑒴𑒥 𑒯𑒱𑒪𑒱-𑒧𑒱𑒪𑒱 𑒑𑒹𑒪𑒯𑒳𑒿 𑒂 𑒯𑒳𑒢𑒏𑒩 𑒒𑒩-𑒠𑓂𑒫𑒰𑒩𑒏 𑒮𑒧𑒰𑒔𑒰𑒩 𑒣𑒳𑒕𑒋 𑒪𑒑𑒪𑒱𑒨𑒢𑓂𑒯𑒱। 𑒯𑒳𑒢𑒏𑒰 𑒥𑒲𑒧𑒰 𑒏𑒩𑒥𑒰 𑒠𑒹𑒪𑒱𑒨𑒢𑓂𑒯𑒱 𑒂 𑒞𑒏𑒩 𑒣𑓂𑒩𑒲𑒧𑒱𑒨𑒧 𑒯𑒧𑒯𑒲𑓀 𑒠𑓄 𑒠𑒹𑒪𑒱𑒨𑒻𑒏। 𑒯𑒳𑒢𑒏𑒩 𑒥𑒹𑒙𑒰𑒏𑒹𑒿 𑒮𑒹𑒯𑒼 𑒥𑒲𑒧𑒰-𑒋𑒖𑒹𑒢𑓂𑒙 𑒥𑒢𑒥𑒰 𑒠𑒹𑒪𑒱𑒨𑒻𑒏 𑒂 𑒖𑒹 𑒥𑒲𑒧𑒰 𑒏𑒩𑒰𑒥𑒋 𑒥𑒪𑒰 𑒮𑒦 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒂𑒥𑒱 𑒖𑒰𑒃𑒞 𑒕𑒪, 𑒍𑒏𑒩 𑒥𑒲𑒧𑒰 𑒠𑒰𑒃 𑒧𑒰𑒿𑒏 𑒥𑒹𑒙𑒰𑒏 𑒋𑒖𑒹𑒢𑓂𑒙 𑒏𑒼𑒛𑒧𑒹 𑒏𑒩𑒥𑒰 𑒠𑒻𑒞 𑒕𑒪𑒱𑒨𑒻𑒏। 𑒥𑒹𑒔𑒰𑒩𑒲 𑒠𑒰𑒃-𑒧𑒰𑒿𑒏 𑒮𑓂𑒟𑒱𑒞𑒱𑒧𑒹 𑒮𑒳𑒡𑒰𑒩 𑒦𑓄 𑒑𑒹𑒪𑒻𑒏 𑒂 𑒍 𑒥𑒳𑒗𑒴 𑒞𑒿 𑒯𑒧𑒩𑒰 𑒁𑒣𑒢 𑒥𑒹𑒙𑒰 𑒖𑒹𑒏𑒰𑒿 𑒧𑒰𑒢𑒋 𑒪𑒰𑒑𑒪𑒱।
“𑒋𑒖𑒹𑒢𑓂𑒙 𑒮𑒦𑒏 𑒪𑒹𑒪 𑒠𑒴 𑒮𑒋 𑒣𑓂𑒩𑒬𑓂𑒢𑒏 𑒣𑓂𑒩𑒬𑓂𑒢𑒰𑒫𑒪𑒲 𑒥𑒢𑒰 𑒏𑒋 𑒮𑒦𑒏𑒹𑒿 𑒞𑒏𑒩 𑒅𑒞𑓂𑒞𑒩 𑒏𑓀𑒚𑒮𑓂𑒟 𑒏𑒩𑒥𑒰 𑒠𑒹𑒪𑒱𑒨𑒻𑒏। 𑒮𑒦 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲𑒏 𑒁𑒠𑒯𑒰 𑒋𑒖𑒹𑒢𑓂𑒙 𑒣𑒩𑒲𑒏𑓂𑒭𑒰𑒧𑒹 𑒣𑒰𑒮 𑒢𑒯𑒱 𑒏𑒹𑒪𑒏𑒻𑒏 𑒧𑒳𑒠𑒰 𑒯𑒧𑒩 𑒮𑒦 𑒋𑒖𑒹𑒢𑓂𑒙 𑒣𑒰𑒮 𑒏𑒋 𑒑𑒹𑒪।
“𑒤𑒹𑒩 𑒯𑒧𑒩𑒰 𑒠𑒱𑒧𑒰𑒑𑒧𑒹 𑒂𑒋𑒪 𑒖𑒹 𑒂𑒥 𑒠𑒹𑒫𑒠𑒞𑓂𑒞 𑒍𑒯𑒱 𑒋𑒧.𑒋𑒪.𑒋.𑒏𑒹𑒿 𑒦𑒛𑓃𑒏𑒰𑒍𑒞। 𑒞𑒐𑒢𑒹 𑒮𑒳𑒧𑒱𑒞 𑒣𑒰𑒪 𑒁𑒣𑒢 𑒥𑒹𑒙𑒲𑒏 𑒖𑒢𑓂𑒧-𑒠𑒱𑒫𑒮𑒧𑒹 𑒯𑒧𑒩𑒰 𑒥𑒖𑒹𑒪𑒏। 𑒯𑒧 𑒐𑒴𑒥 𑒢𑒲𑒏 𑒮𑒰𑒛𑓃𑒲 𑒂 𑒂𑒢-𑒂𑒢 𑒔𑒲𑒖 𑒣𑒻𑒏 𑒏𑒩𑒥𑒰 𑒏𑒋 𑒣𑒯𑒳𑒿𑒔𑒪𑒯𑒳𑒿। 𑒍 𑒣𑓂𑒩𑒹𑒧𑒮𑒿 𑒯𑒧𑒩𑒰𑒣𑒩 𑒞𑒧𑒮𑒰𑒋𑒪 𑒂 𑒏𑒯𑒪𑒏 𑒖𑒹 𑒄 𑒮𑒦 𑒂𑒣𑒮 𑒪𑒋 𑒖𑒰𑒆। 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒁𑒯𑒰𑒿 𑒦𑒰𑒋-𑒥𑒯𑒱𑒢𑒏 𑒥𑒲𑒔 𑒢𑒯𑒱 𑒣𑒛𑓃𑒴।
“𑒂𑒥 𑒠𑒹𑒫𑒠𑒞𑓂𑒞 𑒞𑒏𑒩𑒰 𑒥𑒰𑒠 𑒋𑒏 𑒠𑒱𑒢 𑒮𑒳𑒧𑒱𑒞 𑒣𑒰𑒪 𑒪𑒑 𑒑𑒹𑒪 𑒂 𑒏𑒯𑒪𑒏 𑒖𑒹 𑒏𑒼𑒢 𑒪𑒤𑒢𑓂𑒠𑒩𑒏 𑒮𑓀𑒑 𑒥𑒹𑒙𑒲𑒏𑒹𑒿 𑒋𑒖𑒹𑒢𑓂𑒮𑒲 𑒠𑒱𑒋𑒥𑒰 𑒏𑒋 𑒏𑒰𑒖 𑒏𑒩𑒥𑒰 𑒩𑒯𑒪 𑒕𑒲? 𑒞𑒰𑒯𑒱𑒣𑒩 𑒮𑒳𑒧𑒱𑒞 𑒠𑒰 𑒍𑒏𑒩𑒰𑒣𑒩 𑒧𑒰𑒩𑒱-𑒧𑒰𑒩𑒱 𑒏𑒋 𑒕𑒴𑒙𑒪 𑒖𑒹 𑒦𑒰𑒋-𑒥𑒯𑒱𑒢𑒏 𑒣𑒫𑒱𑒞𑓂𑒩 𑒮𑓀𑒥𑓀𑒡𑒣𑒩 𑒂𑓀𑒑𑒳𑒩 𑒅𑒚𑒰 𑒩𑒯𑒪 𑒕𑒲 ?
“𑒂𑒆 𑒢𑒹 𑒏𑒯𑒱𑒨𑒼। 𑒍𑒞𑒋 𑒮𑒦 𑒂𑒥 𑒁𑒣𑒢 𑒁𑒕𑒱। 𑒮𑒧𑒳𑒠𑓂𑒩 𑒠𑒹𑒐𑒥। 𑒧𑒼𑒢 𑒯𑒋𑒞 𑒞𑒿 𑒣𑒳𑒩𑒲 𑒮𑒹𑒯𑒼 𑒒𑒴𑒧𑒱 𑒂𑒋𑒥”।
“𑒂 𑒠𑒹𑒫𑒠𑒞𑓂𑒞”?
“𑒍𑒯, 𑒢𑒯𑒱 𑒣𑒳𑒕𑒴 𑒍𑒏𑒩। 𑒂𑒥 𑒞𑒿 𑒍 𑒯𑒧𑒩 𑒦𑒏𑓂𑒞 𑒦𑓄 𑒑𑒹𑒪 𑒁𑒕𑒱। 𑒋𑒏 𑒠𑒱𑒢 𑒂𑒥𑒱 𑒏𑒋 𑒯𑒰𑒟 𑒧𑒱𑒪𑒹𑒪𑒏 𑒂 𑒞𑒏𑒩 𑒥𑒰𑒠 𑒖𑒐𑒢 𑒦𑒹𑒙𑒻𑒞 𑒁𑒕𑒱 𑒯𑒰𑒟 𑒢𑒯𑒱 𑒧𑒱𑒪𑒥𑒻𑒞 𑒁𑒕𑒱 𑒫𑒩𑒢 𑒑𑒩𑒰 𑒪𑒑𑒻𑒞 𑒁𑒕𑒱। 𑒂 𑒏𑒯𑒻𑒞 𑒁𑒕𑒱 𑒖𑒹 𑒯𑒧 𑒮𑒦 𑒦𑒰𑒋-𑒦𑒰𑒋 𑒕𑒲”!
𑒑𑒪𑓂𑒣 𑒑𑒳𑒔𑓂𑒕
𑒮𑒩-𑒮𑒧𑒰𑒖 𑓓.𑓓
𑒯𑒧 𑒢𑒯𑒱 𑒖𑒰𑒨𑒥 𑒫𑒱𑒠𑒹𑒬 𑓓.𑓑𑓖
𑒩𑒰𑒑 𑒫𑒻𑒠𑒹𑒯𑒲 𑒦𑒻𑒩𑒫𑒲 𑓓.𑓒𑓐
𑒏𑒰𑒪-𑒮𑓂𑒟𑒰𑒢 𑒫𑒱𑒮𑓂𑒟𑒰𑒣𑒢 𑓓.𑓒𑓕
𑒥𑒻𑒮𑒰𑒐𑒲𑒣𑒩 𑒖𑒱𑒢𑒑𑒲 𑓓.𑓒𑓙
𑒮𑒩𑓂𑒫𑒬𑒱𑒏𑓂𑒭𑒰 𑒁𑒦𑒱𑒨𑒰𑒢 𑓓.𑓓𑓒
𑒖𑒰𑒞𑒱𑒫𑒰𑒠𑒲 𑒧𑒩𑒰𑒚𑒲 𑓓.𑓓𑓔
𑒟𑒹𑒟𑒩 𑒧𑒢𑒳𑒏𑓂𑒐 𑓓.𑓓𑓕
𑒥𑒯𑒳𑒣𑒞𑓂𑒢𑒲 𑒫𑒱𑒫𑒰𑒯 𑒂 𑒯𑒱𑒖𑒛𑓃𑒰 𑓔.𑓓𑓖
𑒮𑓂𑒞𑓂𑒩𑒲-𑒥𑒹𑒙𑒲 𑓔.𑓓𑓗
𑒥𑒱𑒂𑒯 𑒂 𑒑𑒼𑒩𑒪𑒑𑒰𑒃 𑓔.𑓓𑓘
𑒣𑓂𑒩𑒞𑒱𑒦𑒰 𑓔.𑓓𑓙
𑒖𑒰𑒞𑒱-𑒣𑒰𑒞𑒱 𑓔.𑓔𑓐
𑒁𑒢𑒳𑒏𑒧𑓂𑒣𑒰𑒏 𑒢𑒼𑒏𑒩𑒲 𑓔.𑓔𑓑
𑒢𑒴𑒞𑒢 𑒧𑒲𑒛𑒱𑒂 𑓔.𑓔𑓒
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑 𑓔.𑓔𑓓
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑-𑓒 𑓔.𑓔𑓕
𑒥𑒰𑒜𑓃𑒱, 𑒦𑒴𑒐 𑒂 𑒣𑓂𑒩𑒫𑒰𑒮 𑓔.𑓔𑓗
𑒢𑒫-𑒮𑒰𑒧𑒢𑓂𑒞 𑓔.𑓔𑓘
𑒩𑒏𑒙𑒪 𑒕𑒪𑒯𑒳𑒿 𑒏𑒼𑒯𑒥𑒩 𑒪𑒨 𑓔.𑓔𑓙
𑒧𑒵𑒞𑓂𑒨𑒳𑒠𑒝𑓂𑒛 𑓔.𑓕𑓕
𑒥𑒰𑒝𑒫𑒲𑒩 𑓔.𑓕𑓘
𑒣𑓂𑒩𑒫𑒰𑒮 𑓔.𑓖𑓑
𑒮𑒩-𑒮𑒧𑒰𑒖
“𑒋𑒏𑒙𑒰 𑒣𑓂𑒪𑒧𑓂𑒥𑒩, 𑒋𑒏𑒙𑒰 𑒣𑒹𑒢𑓂𑒙𑒩 𑒂 𑒞𑒲𑒢 𑒙𑒰 𑒖𑒼𑒢 𑒪𑒰𑒑𑒞। 𑒮𑒰𑒞 𑒠𑒱𑒢𑒧𑒹 𑒒𑒩 𑒔𑒧𑒏𑒰 𑒠𑒹𑒥। 𑒁𑒯𑒰𑒿𑒏 𑒏𑒰𑒖𑒧𑒹 𑒏𑒧𑒰𑒃 𑒢𑒯𑒱 𑒏𑒩𑒥𑒰𑒏 𑒁𑒕𑒱 𑒯𑒧𑒩𑒰। 𑒁𑒯𑒰𑒿𑒏 𑒁𑒯𑒱𑒚𑒰𑒧 𑒋𑒞𑒹𑒏 𑒩𑒰𑒮 𑒪𑒼𑒏 𑒁𑒥𑒻𑒞 𑒕𑒟𑒱, 𑒪𑒼𑒏 𑒠𑒹𑒐𑒞 𑒞𑒿 𑒣𑒴𑒕𑒞 𑒖𑒹 𑒄 𑒏𑒰𑒖 𑒏𑒹 𑒏𑒋𑒢𑒹 𑒁𑒕𑒱। 𑒞𑒯𑒲𑒮𑒿 𑒯𑒧𑒩𑒰 𑒔𑒰𑒩𑒱 𑒚𑒰𑒧 𑒏𑒰𑒖 𑒦𑒹𑒙𑒱 𑒖𑒋𑒞 𑒞𑒹𑒿। 𑒁𑒣𑒢 𑒋𑒩𑒱𑒨𑒰𑒏 𑒪𑒼𑒏 𑒠𑒱𑒪𑓂𑒪𑒲𑒧𑒹 𑒏𑒞𑒋 𑒣𑒰𑒥𑒲”- 𑒢𑒥𑒲 𑒥𑒏𑒮 𑒢𑒰𑒧 𑒩𑒯𑒋 𑒍𑒏𑒩।
“𑒁𑒣𑒢 𑒋𑒩𑒱𑒨𑒰𑒏 𑒪𑒼𑒏 𑒕𑒲, 𑒏𑒞𑒋 𑒒𑒩 𑒁𑒕𑒱”?
“𑒏𑒙𑒱𑒯𑒰𑒩। 𑒯𑒧 𑒞𑒿 𑒏𑒯𑒥 𑒖𑒹 𑒥𑒰𑒟𑒩𑒴𑒧 𑒂 𑒏𑒱𑒔𑒢𑒏 𑒏𑒰𑒖 𑒮𑒹𑒯𑒼 𑒏𑒩𑒥𑒰𑒃𑒋 𑒪𑒱𑒁”।
“𑒁𑒯𑒰𑒿 𑒞𑒿 𑒣𑒼𑒔𑒰𑒩𑒰 𑒂 𑒣𑒹𑒢𑓂𑒙 𑒏𑒩𑒻𑒞 𑒕𑒲, 𑒮𑓀𑒑𑒧𑒹 𑒩𑒰𑒖𑒧𑒱𑒮𑓂𑒞𑓂𑒩𑒲𑒏 𑒏𑒰𑒖 𑒮𑒹𑒯𑒼 𑒏𑒩𑒻𑒞 𑒕𑒲 𑒏𑒲”?
“𑒯𑒧 𑒢𑒯𑒱 𑒏𑒩𑒻𑒞 𑒕𑒲 𑒧𑒳𑒠𑒰 𑒯𑒧𑒩 𑒑𑒾𑒂𑒿 𑒄 𑒏𑒰𑒖 𑒏𑒩𑒻𑒞 𑒁𑒕𑒱। 𑒍 𑒏𑒯𑒻𑒞 𑒩𑒯𑒋 𑒖𑒹 𑒮𑒰𑒯𑒥𑒮𑒿 𑒣𑒳𑒕𑒴 𑒏𑒰𑒖𑒏 𑒪𑒹𑒪। 𑒍𑒢𑒰 𑒍𑒏𑒩 𑒏𑒰𑒖 𑒥𑒛𑓂𑒛 𑒚𑒼𑒮 𑒯𑒼𑒃𑒞 𑒕𑒻𑒏। 𑒯𑒧 𑒥𑒖𑒥𑒻𑒞 𑒕𑒲, 𑒧𑒰𑒞𑓂𑒩 𑒦𑒹𑒿𑒙 𑒏𑓄 𑒪𑒱𑒨𑒾𑒏। 𑒢𑒯𑒱 𑒞𑒿 𑒯𑒧𑒩𑒰 𑒏𑒯𑒞 𑒖𑒹 𑒞𑒴𑒿 𑒮𑒰𑒯𑒥𑒮𑒿 𑒣𑒳𑒕𑒢𑒯𑒱𑒨𑒹 𑒢𑒯𑒱 𑒯𑒹𑒥𑒯𑒳𑒢𑓂𑒯”।
𑒍 𑒧𑒼𑒥𑒰𑒃𑒪𑒣𑒩 𑒤𑒼𑒢 𑒧𑒱𑒪𑒹𑒪𑒏 𑒂 𑒏𑒼𑒢𑒼 𑒮𑒩𑓂𑒤𑒳𑒠𑓂𑒠𑒲𑒢𑒏𑒹𑒿 𑒥𑒖𑒹𑒪𑒏।
𑒮𑒩𑓂𑒤𑒳𑒠𑓂𑒠𑒲𑒢 𑒏𑒱𑒔𑒹𑒢 𑒥𑒰𑒟𑒩𑒴𑒧 𑒮𑒦𑒏 𑒧𑒳𑒂𑒋𑒢𑒰 𑒏𑒹𑒪𑒏 𑒂 𑒏𑒩𑒝𑒲𑒮𑒿 𑒠𑒹𑒥𑒰𑒪𑒣𑒩 𑒧𑒰𑒩𑒪𑒏 𑒞𑒿 𑒣𑓂𑒪𑒰𑒮𑓂𑒙𑒩 𑒗𑒯𑒩𑒱 𑒏𑓄 𑒐𑒮𑒱 𑒣𑒛𑓃𑒪𑒻𑒏। 𑒢𑒪𑒏 𑒙𑒼𑒙𑒲𑒏𑒹𑒿 𑒒𑒳𑒧𑒹𑒪𑒏 𑒞𑒿 𑒍 𑒙𑒴𑒙𑒱 𑒏𑓄 𑒐𑒮𑒱 𑒣𑒛𑓃𑒪𑒻𑒏। 𑒤𑒹𑒩 𑒍 𑒥𑒰𑒖𑒪-
“𑒮𑒩𑒏𑒰𑒩𑒲 𑒏𑒰𑒖 𑒕𑒱𑒨𑒻𑒏। 𑒢𑒲𑒫 𑒞𑒿 𑒧𑒖𑒑𑒴𑒞 𑒯𑒼𑒃𑒞 𑒕𑒻𑒏 𑒧𑒳𑒠𑒰 𑒤𑒱𑒢𑒱𑒮𑒱𑓀𑒑 𑒢𑒯𑒱 𑒯𑒼𑒃𑒞 𑒕𑒻𑒏। 𑒂 𑒦𑒃𑒨𑒼 𑒑𑒹𑒪𑒋 𑓒𑓐 𑒮𑒰𑒪 𑒣𑒳𑒩𑒰𑒢 𑒄 𑒮𑒦। 𑒠𑒹𑒐𑒴 𑒋𑒯𑒱 𑒠𑒹𑒥𑒰𑒪 𑒮𑒦𑒏 𑒯𑒰𑒪। 𑒮𑒦𑒙𑒰 𑒁𑒢𑓂𑒛𑒩𑒑𑓂𑒩𑒰𑒅𑒢𑓂𑒛 𑒣𑒰𑒃𑒣 𑒮𑒦 𑒮𑒩𑒱-𑒑𑒪𑒱 𑒑𑒹𑒪 𑒁𑒕𑒱। 𑒞𑒏𑒩𑒹 𑒪𑒲𑒏𑒹𑒖𑒮𑒿 𑒠𑒹𑒥𑒰𑒪 𑒮𑒦𑒏 𑒄 𑒯𑒰𑒪 𑒁𑒕𑒱। 𑒮𑒦𑒙𑒰 𑒣𑒰𑒃𑒣 𑒥𑒠𑒪𑒋 𑒣𑒛𑓃𑒞 𑒮𑒹 𑒮𑒲𑒧𑒹𑒢𑓂𑒙 𑒞𑒿 𑒗𑒰𑒛𑓃𑒃𑒨𑒹 𑒣𑒛𑓃𑒞। 𑒍𑒢𑒰 𑒮𑒲𑒧𑒹𑒢𑓂𑒙𑒧𑒹 𑒏𑒼𑒢𑒼 𑒖𑒰𑒢 𑒥𑒰𑒿𑒔𑒪𑒼 𑒢𑒯𑒱 𑒕𑒻𑒏। 𑒞𑒐𑒢 𑒠𑒹𑒥𑒰𑒪𑒧𑒹 𑒣𑒰𑒟𑒩 𑒮𑒹𑒯𑒼 𑒪𑒑𑒥𑒰𑒃𑒨𑒹 𑒪𑒱𑒁। 𑒄 𑒥𑒧𑓂𑒥𑒃𑒨𑒰-𑒧𑒱𑒮𑓂𑒞𑓂𑒩𑒲 𑒑𑒝𑒹𑒬𑒲𑒮𑒿 𑒖𑒹 𑒁𑒯𑒰𑒿 𑒥𑒩𑒢𑓂𑒛𑒰 𑒩𑒱𑒣𑒹𑒨𑒩 𑒏𑒩𑒹𑒢𑒹 𑒕𑒪𑒯𑒳𑒿 𑒞𑒏𑒩 𑒥𑒰𑒪𑒳 𑒠𑒹𑒐𑒱𑒨𑒾𑒏 𑒏𑒼𑒢𑒰 𑒗𑒛𑓃𑒱 𑒩𑒯𑒪 𑒁𑒕𑒱। 𑒙𑒹𑒮𑓂𑒙 𑒏𑒩𑒋 𑒪𑒹𑒪 𑒋𑒯𑒱 𑒮𑒲𑒧𑒹𑒢𑓂𑒙𑒏𑒹𑒿 𑒯𑒧 𑒗𑒰𑒛𑓃𑒱 𑒏𑓄 𑒢𑒫 𑒮𑒲𑒧𑒹𑒢𑓂𑒙 𑒪𑒑𑒥𑒻𑒞 𑒕𑒲, 𑒣𑒰𑒟𑒩 𑒢𑒯𑒱 𑒥𑒢𑒱 𑒖𑒰𑒋 𑒞𑒿 𑒏𑒯𑒥। 𑒞𑒐𑒢 𑒧𑒼𑒢 𑒯𑒳𑒁𑒋 𑒞𑒿 𑒏𑒰𑒖 𑒠𑒹𑒥 𑒂 𑒢𑒯𑒱 𑒞𑒿 𑒢𑒯𑒱 𑒠𑒹𑒥”- 𑒮𑒹 𑒏𑒯𑒱 𑒍 𑒥𑒩𑒢𑓂𑒛𑒰𑒏 𑒏𑒱𑒕𑒳 𑒯𑒱𑒮𑓂𑒮𑒰𑒏 𑒮𑒲𑒧𑒹𑒢𑓂𑒙 𑒗𑒰𑒛𑓃𑒱 𑒏𑓄 𑒏𑒩𑒱𑒨𑒰 𑒮𑒲𑒧𑒹𑒢𑓂𑒙 𑒪𑒑𑒰 𑒠𑒹𑒪𑒏 𑒂 𑒔𑒪𑒱 𑒑𑒹𑒪।
“𑒄 𑒢𑒥𑒲 𑒥𑒏𑒮𑒏 𑒕𑒼𑒙 𑒦𑒰𑒋 𑒕𑒱𑒨𑒻𑒏। 𑒥𑒛𑓂𑒛 𑒏𑒰𑒖𑒳𑒪। 𑒠𑒱𑒢 𑒦𑒩𑒱 𑒪𑒰𑒑𑒪𑒹 𑒩𑒯𑒻𑒞 𑒁𑒕𑒱, 𑒢𑒰𑒧 𑒕𑒱𑒨𑒻𑒏 𑒍𑒏𑒲𑒪। 𑒢𑒥𑒲 𑒥𑒏𑒮 𑒞𑒿 𑒂𑒥 𑒚𑒱𑒏𑒹𑒠𑒰𑒩 𑒦𑓄 𑒑𑒹𑒪 𑒁𑒕𑒱, 𑒏𑒩𑒝𑒲𑒏𑒹𑒿 𑒯𑒰𑒟𑒼 𑒏𑒯𑒰𑒿 𑒪𑒑𑒥𑒻𑒋। 𑒍𑒏𑒲𑒪 𑒥𑒳𑒗𑒳 𑒧𑒖𑒠𑒴𑒩𑒲 𑒏𑒩𑒻𑒋 𑒁𑒣𑒢 𑒦𑒰𑒋 𑒪𑒑। 𑒂 𑒚𑒲𑒏𑒹𑒠𑒰𑒩𑒏 𑒦𑒰𑒋𑒏 𑒍𑒯𑒠𑒰𑒮𑒿 𑒂𑒢 𑒧𑒖𑒠𑒴𑒩 𑒮𑒦𑒣𑒩 𑒢𑒖𑒩𑒱 𑒮𑒹𑒯𑒼 𑒩𑒐𑒻𑒋”- 𑒤𑒹𑒩 𑒏𑒢𑒹𑒏 𑒏𑒰𑒪 𑒡𑒩𑒱, 𑒄 𑒖𑒹 𑒣𑓂𑒪𑒧𑓂𑒥𑒩 𑒧𑒱𑒮𑓂𑒞𑓂𑒩𑒲 𑒩𑒯𑒋, 𑒐𑒪𑒲𑒪 𑒖𑒏𑒩 𑒢𑒰𑒧 𑒩𑒯𑒻𑒏, 𑒮𑒹 𑒔𑒳𑒣 𑒩𑒯𑒪।
𑒐𑒪𑒲𑒪 𑒯𑒩𑒱𑒨𑒰𑒝𑒰𑒏 𑒩𑒯𑒋 𑒂 𑒥𑒳𑒗𑒴 𑒖𑒹 𑒢𑒥𑒲 𑒥𑒏𑒮𑒏𑒹𑒿 𑒯𑒧𑒩𑒰𑒮𑒿 𑒦𑒹𑒿𑒙 𑒏𑒩𑒹𑒢𑒱𑒯𑒰𑒩 𑒄𑒋𑒯 𑒩𑒯𑒋। 𑒋𑒏𑒙𑒰 𑒕𑒼𑒙 𑒦𑒓𑓂𑒑𑒚𑒲 𑒏𑒩𑒹𑒥𑒰𑒏 𑒩𑒯𑒋 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒏𑒩𑒰 𑒥𑒖𑒹𑒢𑒹 𑒩𑒯𑒲। 𑒥𑒩𑓀𑒛𑒰𑒏 𑒋𑒏𑒙𑒰 𑒏𑒼𑒢𑒏 𑒧𑒩𑒧𑓂𑒧𑒞𑒱𑒏 𑒏𑒰𑒖 𑒩𑒯𑒋। 𑒐𑒪𑒲𑒪𑒏𑒹𑒿 𑒏𑒯𑒪𑒱𑒨𑒻𑒏 𑒞𑒿 𑒍 𑒋𑒏𑒙𑒰 𑒑𑒝𑒹𑒬𑒲 𑒧𑒱𑒮𑓂𑒞𑓂𑒩𑒲, 𑒖𑒏𑒩𑒰 𑒮𑒦 𑒥𑒧𑓂𑒥𑒃𑒨𑒰 𑒏𑒯𑒻𑒞 𑒩𑒯𑒋, 𑒏𑒹𑒿 𑒥𑒖𑒰 𑒏𑒋 𑒏𑒰𑒖 𑒏𑒩𑒰 𑒠𑒹𑒪𑒏। 𑒤𑒹𑒩 𑒣𑒼𑒔𑒰𑒩𑒰 𑒥𑒪𑒰 𑒂𑒏𑒱 𑒣𑒹𑓀𑒙𑒥𑒪𑒰 𑒢𑒥𑒲 𑒥𑒏𑒮𑒏𑒹𑒿 𑒄 𑒥𑒖𑒹𑒪𑒏। 𑒂𑒥 𑒄 𑒣𑒼𑒔𑒰𑒩𑒰-𑒣𑒹𑒢𑓂𑒙𑒥𑒪𑒰 𑒢𑒥𑒲 𑒥𑒏𑒮 𑒍𑒯𑒱 𑒮𑒩𑓂𑒤𑒳𑒠𑓂𑒠𑒲𑒢 𑒩𑒰𑒖-𑒧𑒱𑒮𑓂𑒞𑓂𑒩𑒲𑒏𑒹𑒿 𑒥𑒖𑒰 𑒪𑒹𑒢𑒹 𑒁𑒕𑒱। 𑒮𑒩𑓂𑒤𑒳𑒠𑓂𑒠𑒲𑒢 𑒣𑒰𑒃𑒣 𑒮𑒦𑒏 𑒏𑒰𑒖 𑒐𑒪𑒲𑒪 𑒣𑓂𑒪𑒧𑓂𑒥𑒩𑒏𑒹𑒿 𑒠𑒱𑒂 𑒠𑒹𑒪𑒏 𑒮𑒹 𑒐𑒪𑒲𑒪𑒏𑒹𑒿 𑒥𑒱𑒢 𑒧𑒿𑒑𑒢𑒹 𑒏𑒰𑒖 𑒦𑒹𑒙𑒱 𑒑𑒹𑒪𑒻𑒏। 𑒂 𑒋𑒏 𑒠𑒼𑒮𑒩𑒰𑒏𑒹𑒿 𑒣𑒩𑒱𑒔𑒨 𑒏𑒩𑒥𑒻𑒞 𑒂𑒥 𑒞𑒿 𑒪𑒏𑒛𑓃𑒲 𑒥𑒪𑒰 𑒂 𑒥𑒱𑒖𑒪𑒲 𑒧𑒱𑒮𑓂𑒞𑓂𑒩𑒲 𑒮𑒹𑒯𑒼 𑒒𑒩𑒧𑒹 𑒣𑒻𑒮𑒱 𑒑𑒹𑒪 𑒕𑒪।
“𑒠𑒳𑒢𑒴 𑒑𑒼𑒙𑒹 -𑒢𑒥𑒲 𑒥𑒏𑒮 𑒂 𑒮𑒩𑓂𑒤𑒳𑒠𑓂𑒠𑒲𑒢- 𑒮𑓀𑒑𑒹 𑒩𑒰𑒖-𑒧𑒱𑒮𑓂𑒞𑓂𑒩𑒲 𑒩𑒯𑒋। 𑒧𑒳𑒠𑒰 𑒢𑒥𑒲-𑒥𑒏𑒮 𑒪𑒰𑒃𑒢 𑒥𑒠𑒪𑒱 𑒪𑒹𑒪𑒏। 𑒂 𑒂𑒥 𑒋𑒏-𑒠𑒼𑒮𑒩𑒰𑒏𑒹𑒿 𑒏𑒰𑒖 𑒠𑒱𑒁𑒥𑒻𑒞 𑒩𑒯𑒻𑒞 𑒁𑒕𑒱”।
𑒤𑒹𑒩 𑒐𑒪𑒲𑒪 𑒯𑒧𑒩𑒰 𑒠𑒱𑒮 𑒞𑒰𑒏𑒱 𑒥𑒰𑒖𑒪-
“𑒁𑒯𑒰𑒿 𑒠𑒱𑒮𑒏𑒰 𑒪𑒼𑒏 𑒮𑒦𑒧𑒹 𑒥𑒛𑓂𑒛 𑒋𑒏𑒞𑒰 𑒯𑒼𑒃𑒞 𑒕𑒻𑒏”।
𑒍𑒏𑒲𑒪 𑒂 𑒐𑒪𑒲𑒪𑒧𑒹 𑒏𑒰𑒖𑒏 𑒥𑒱𑒔𑒧𑒹 𑒑𑒣-𑒬𑒣 𑒯𑒼𑒃𑒞 𑒩𑒯𑒻𑒞 𑒕𑒪𑒻𑒏।
“𑒯𑒧𑒩𑒰 𑒮𑒦𑒏 𑒣𑒳𑒩𑒐𑒰 𑒧𑒳𑒮𑒪𑒧𑒰𑒢 𑒥𑒢𑒥𑒰𑒮𑒿 𑒣𑒴𑒩𑓂𑒫 𑒩𑒰𑒖𑒣𑒴𑒞 𑒩𑒯𑒟𑒱 𑒧𑒳𑒠𑒰 𑒄 𑒮𑒦 𑒩𑒰𑒖𑒧𑒱𑒮𑓂𑒞𑓂𑒩𑒲 𑒩𑒯𑒋-𑒡𑒲𑒧𑒰𑒢, 𑒋𑒐𑒢𑒼 𑒯𑒩𑒱𑒨𑒰𑒝𑒰𑒧𑒹 𑒯𑒼𑒃𑒞 𑒁𑒕𑒱”- 𑒐𑒪𑒲𑒪 𑒃𑒬𑒰𑒩𑒰𑒮𑒿 𑒍𑒏𑒲𑒪 𑒠𑒱𑒮 𑒠𑒹𑒐𑒻𑒞 𑒯𑒧𑒩𑒰 𑒮𑒳𑒢𑒰 𑒏𑒋 𑒏𑒯𑒪𑒏।
“𑒯𑒧 𑒮𑒦 𑒞𑒿 𑒡𑒲𑒧𑒰𑒢 𑒕𑒪𑒯𑒳𑒿 𑒧𑒳𑒠𑒰 𑒞𑒼𑒩𑒰 𑒮𑒦 𑒏𑒹 𑒕𑒪𑒿𑒯 𑒮𑒹 𑒞𑒼𑒩𑒰 𑒋𑒞𑒹𑒏 𑒤𑒩𑒱𑒕𑒰 𑒏𑒋 𑒏𑒼𑒢𑒰 𑒥𑒳𑒗𑒪 𑒕𑒾𑒏”- 𑒥𑒯𑒳𑒞 𑒏𑒰𑒪𑒮𑒿 𑒍𑒏𑒲𑒪 𑒥𑒱𑒢 𑒥𑒖𑒢𑒹 𑒏𑒰𑒖 𑒏𑒋 𑒩𑒯𑒪 𑒕𑒪। 𑒧𑒳𑒠𑒰 𑒣𑒯𑒱𑒪 𑒥𑒹𑒩 𑒍𑒏𑒩𑒰 𑒅𑒞𑓂𑒞𑒩 𑒠𑒻𑒞 𑒮𑒳𑒢𑒪𑒱𑒨𑒻𑒏। 𑒍𑒏𑒩 𑒮𑒦𑒏 𑒥𑒲𑒔 𑒑𑒣 𑒂 𑒯𑒿𑒮𑒲 𑒚𑒙𑓂𑒚𑒰 𑒔𑒪𑒻𑒞 𑒩𑒯𑒻𑒞 𑒕𑒪𑒋।
𑒋𑒏 𑒠𑒱𑒢 𑒮𑒩𑓂𑒤𑒳𑒠𑓂𑒠𑒲𑒢 𑒧𑒳𑒿𑒯 𑒪𑒙𑒏𑒹𑒢𑒹 𑒂𑒋𑒪। 𑒏𑒯𑒪𑒏 𑒖𑒹 𑒑𑒝𑒹𑒬𑒲𑒮𑒿 𑒗𑒑𑒛𑓃𑒰 𑒦𑒋 𑒑𑒹𑒪।
“𑒮𑒹 𑒏𑒼𑒢𑒰”?
“𑒏𑒯𑒻𑒋 𑒖𑒹 𑒞𑒼𑒿 𑒮𑒰𑒯𑒹𑒥𑒏 𑒒𑒩𑒏 𑒏𑒰𑒖 𑒯𑒧𑒩𑒰𑒮𑒿 𑒕𑒲𑒢𑒱 𑒪𑒹𑒪𑒿𑒯, 𑒃𑒪𑒰𑒏𑒰𑒏 𑒪𑒼𑒏𑒏 𑒢𑒰𑒧 𑒣𑒩। 𑒥𑒳𑒗𑒴, 𑒁𑒯𑒰𑒿 𑒯𑒧𑒩 𑒏𑒰𑒖 𑒠𑒹𑒐𑒱 𑒏𑓄 𑒢𑒹 𑒯𑒧𑒩𑒰 𑒏𑒰𑒖 𑒠𑒹𑒢𑒹 𑒕𑒪𑒯𑒳𑒿। 𑒂 𑒄 𑒞𑒿 𑒕𑒼𑒛𑓃𑒴, 𑒄𑒯𑒼 𑒏𑒯𑒻𑒞 𑒩𑒯𑒋 𑒖𑒹...”।
“𑒏𑒲? 𑒏𑒯𑒴 𑒢𑒹”।
“𑒏𑒯𑒻𑒞 𑒩𑒯𑒋 𑒖𑒹 𑒧𑒳𑒮𑒪𑒧𑒰𑒢𑒣𑒩 𑒏𑒯𑒱𑒨𑒼 𑒫𑒱𑒬𑓂𑒫𑒰𑒮 𑒢𑒯𑒱 𑒏𑒩𑒥𑒰𑒏 𑒔𑒰𑒯𑒲”।
𑒯𑒧𑒩 𑒞𑒿 𑒞𑒰𑒧𑒮𑒹 𑒠𑒹𑒯 𑒪𑒯𑒩𑒱 𑒑𑒹𑒪। 𑒏𑒯𑒪𑒱𑒨𑒻𑒏 𑒖𑒹 𑒞𑒳𑒩𑒞 𑒍𑒏𑒩𑒰 𑒥𑒖𑒰 𑒏𑒋 𑒂𑒢𑒴 𑒑𑓄। 𑒧𑒳𑒠𑒰 𑒍 𑒟𑒼𑒧𑓂𑒯-𑒟𑒰𑒧𑓂𑒯 𑒪𑒑𑒰 𑒠𑒹𑒪𑒏। 𑒤𑒹𑒩 𑒥𑒰𑒠𑒧𑒹 𑒋𑒏 𑒠𑒱𑒢 𑒑𑒝𑒹𑒬𑒲𑒏𑒹𑒿 𑒥𑒖𑒰 𑒏𑒋 𑒯𑒧 𑒥𑒳𑒗𑒰 𑒠𑒹𑒪𑒱𑒨𑒻𑒏- “𑒋𑒯𑒱 𑒧𑒯𑒰𑒢𑒑𑒩𑒧𑒹 𑒯𑒧 𑒂 𑒮𑒩𑓂𑒤𑒳𑒠𑓂𑒠𑒲𑒢 𑒋𑒏𑒹 𑒦𑒰𑒭𑒰 𑒥𑒖𑒻𑒞 𑒕𑒲, 𑒄 𑒧𑒰𑒞𑓂𑒩 𑒋𑒏𑒙𑒰 𑒮𑓀𑒖𑒼𑒑 𑒁𑒕𑒱। 𑒋𑒏𑒩 𑒏𑒰𑒖 𑒠𑒹𑒐𑒱𑒨𑒾𑒏 𑒂 𑒁𑒣𑒢 𑒏𑒰𑒖 𑒠𑒹𑒐𑒴, 𑒤𑒹𑒩 𑒁𑒯𑒰𑒿𑒏𑒹𑒿 𑒥𑒳𑒗𑒰 𑒣𑒛𑓃𑒞 𑒖𑒹 𑒮𑒩𑓂𑒤𑒳𑒠𑓂𑒠𑒲𑒢𑒮𑒿 𑒁𑒯𑒰𑒿 𑒏𑒱𑒋𑒏 𑒣𑒰𑒕𑒰𑒿 𑒩𑒯𑒱 𑒖𑒰𑒃𑒞 𑒕𑒲”।
𑒍𑒧𑓂𑒯𑒩 𑒋𑒏 𑒑𑒼𑒙𑒹 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒏𑒹𑒩 𑒫𑒱𑒔𑒰𑒩 𑒠𑒹𑒪𑒏 𑒞𑒰𑒯𑒱𑒣𑒩 𑒮𑒩𑓂𑒤𑒳𑒠𑓂𑒠𑒲𑒢 𑒍𑒏𑒩𑒰𑒮𑒿 𑒪𑒛𑓃𑒱 𑒑𑒹𑒪 𑒖𑒹 𑒢𑒲𑒔𑒰𑒿 𑒧𑒹 𑒣𑒰𑒟𑒩𑒹 𑒢𑒲𑒏 𑒯𑒼𑒋𑒞 । 𑒥𑒰𑒟𑒩𑒴𑒧 𑒂 𑒏𑒱𑒔𑒢𑒧𑒹 𑒣𑒰𑒟𑒩 𑒁𑒕𑒱 𑒞𑒿 𑒮𑒦 𑒚𑒰𑒧 𑒄𑒋𑒯 𑒩𑒯𑒥𑒰𑒏 𑒔𑒰𑒯𑒲। 𑒩𑒴𑒧𑒧𑒹 𑒏𑒱𑒋𑒏 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒯𑒼𑒋𑒞? 𑒧𑒳𑒠𑒰 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒥𑒪𑒰 𑒏𑒯𑒪𑒏 𑒖𑒹 𑒋𑒏 𑒠𑒱𑒢𑒧𑒹 𑒪𑒑𑒰 𑒠𑒹𑒥 𑒂 𑒣𑒰𑒃𑒨𑒼 𑒮𑒮𑓂𑒞 𑒏𑒯𑒪𑒏 𑒮𑒹 𑒯𑒧 𑒍𑒏𑒩𑒹 𑒯𑒿 𑒏𑒯𑒱 𑒠𑒹𑒪𑒱𑒨𑒻𑒏।
𑒦𑒩𑒱 𑒠𑒱𑒢 𑒁𑒢𑒒𑒼𑒪 𑒯𑒼𑒃𑒞 𑒩𑒯𑒻𑒞 𑒕𑒪। 𑒢𑒲𑒔𑒰𑒿𑒏 𑒤𑓂𑒪𑒼𑒩 𑒥𑒪𑒰𑒏 𑒥𑒹𑒙𑒰𑒏 𑒥𑒰𑒩𑒯𑒧 𑒏𑒏𑓂𑒭𑒰𑒏 𑒣𑒩𑒲𑒏𑓂𑒭𑒰 𑒩𑒯𑒋 𑒮𑒹 𑒍 𑒖𑒹 𑒩𑒰𑒖𑒧𑒱𑒮𑓂𑒞𑓂𑒩𑒲 𑒮𑒦𑒏 𑒂𑒥𑒰𑒖𑒰𑒯𑒲 𑒠𑒹𑒐𑒪𑒏 𑒞𑒿 𑒏𑒯𑒋 𑒪𑒰𑒑𑒪, 𑒖𑒹 𑒩𑒴𑒧 𑒮𑒦𑒧𑒹 𑒞𑒿 𑒣𑒰𑒟𑒩 𑒢𑒯𑒱 𑒪𑒰𑒑𑒞 ? 𑒯𑒧 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒢𑒯𑒱 𑒫𑒴𑒛𑒹𑒢 𑒤𑓂𑒪𑒼𑒩𑒱𑓀𑒑 𑒏𑒰𑒪𑓂𑒯𑒱 𑒏𑒋 𑒖𑒋𑒞, 𑒞𑒿 𑒯𑒳𑒢𑒏𑒰 𑒮𑒰𑒿𑒮𑒧𑒹 𑒮𑒰𑒿𑒮 𑒁𑒋𑒪𑒢𑓂𑒯𑒱।
”𑒣𑒰𑒟𑒩 𑒪𑒑𑒰𑒥𑒋𑒧𑒹 𑒞𑒿 𑒧𑒰𑒮𑒮𑒿 𑒆𑒣𑒩 𑒄 𑒮𑒦 𑒪𑒑𑒥𑒱𑒞𑒋, 𑒯𑒧𑒩 𑒥𑒹𑒙𑒰𑒏 𑒣𑒩𑒲𑒏𑓂𑒭𑒰 𑒁𑒕𑒱, 𑒮𑒹 𑒯𑒧 𑒞𑒿 𑒣𑒰𑒟𑒩 𑒮𑒦 𑒣𑒮𑒩𑒪 𑒠𑒹𑒐𑒱 𑒏𑒋 𑒔𑒱𑒢𑓂𑒞𑒱𑒞 𑒦𑒋 𑒑𑒹𑒪 𑒩𑒯𑒲”।
“𑒢𑒯𑒱 𑒧𑒰𑒞𑓂𑒩 𑒥𑒰𑒟𑒩𑒴𑒧 𑒂 𑒏𑒱𑒔𑒹𑒢 𑒪𑒹𑒪 𑒄 𑒣𑒰𑒟𑒩 𑒮𑒦 𑒁𑒕𑒱”।
𑒮𑒩𑓂𑒤𑒳𑒠𑓂𑒠𑒲𑒢, 𑒐𑒪𑒲𑒪 𑒂 𑒢𑒥𑒲 𑒥𑒏𑒮𑒮𑒿 𑒁𑒥𑒻𑒞 𑒖𑒰𑒃𑒞 𑒏𑒰𑒖𑒏 𑒁𑒞𑒱𑒩𑒱𑒏𑓂𑒞 𑒒𑒩-𑒠𑓂𑒫𑒰𑒩𑒏 𑒑𑒣 𑒮𑒹𑒯𑒼 𑒯𑒼𑒧𑒋 𑒪𑒰𑒑𑒪। 𑒢𑒥𑒲 𑒥𑒏𑒮 𑒏𑒙𑒱𑒯𑒰𑒩𑒮𑒿 𑒠𑒱𑒪𑓂𑒪𑒲 𑒂𑒋𑒪, 𑒕𑒯 𑒦𑒻𑒨𑒰𑒩𑒲𑒧𑒹 𑒮𑒦𑒮𑒿 𑒣𑒻𑒒, 𑒋𑒏𑒙𑒰 𑒥𑒯𑒱𑒢 𑒮𑒹𑒯𑒼 𑒩𑒯𑒻𑒏। 𑒁𑒣𑒢 𑒯𑒧𑒬𑒲𑒩𑒰(𑒥𑒯𑒱𑒢)𑒏 𑒫𑒩 𑒂 𑒍𑒏𑒩 𑒮𑒰𑒮𑒳𑒩𑒏 𑒫𑒱𑒭𑒨𑒧𑒹 𑒢𑒥𑒲 𑒥𑒏𑒮 𑒣𑓂𑒩𑒹𑒧𑒣𑒴𑒩𑓂𑒫𑒏 𑒮𑒳𑒢𑒥𑒻𑒞 𑒩𑒯𑒻𑒞 𑒕𑒪। 𑒮𑒩𑓂𑒤𑒳𑒠𑓂𑒠𑒲𑒢𑒏 𑒬𑒰𑒑𑒱𑒩𑓂𑒠𑒲𑒧𑒹 𑒍 𑒩𑒰𑒖 𑒧𑒱𑒮𑓂𑒞𑓂𑒩𑒲𑒏 𑒏𑒰𑒖 𑒮𑒱𑒐𑒪𑒏। 𑒂𑒮𑓂𑒞𑒹-𑒂𑒮𑓂𑒞𑒹 𑒔𑒰𑒩𑒱 𑒦𑒰𑒿𑒋𑒏𑒹𑒿 𑒠𑒱𑒪𑓂𑒪𑒲 𑒥𑒖𑒰 𑒪𑒹𑒪𑒏। 𑒍𑒏𑒲𑒪 𑒞𑒿 𑒍𑒏𑒩𑒹 𑒮𑓀𑒑 𑒩𑒯𑒻𑒞 𑒕𑒻𑒏, 𑒂𑒢 𑒦𑒰𑒋 𑒮𑒦 𑒥𑒱𑒨𑒰𑒯 𑒏𑒩𑒻𑒞 𑒑𑒹𑒪 𑒂 𑒁𑒪𑒑 𑒯𑒼𑒃𑒞 𑒑𑒹𑒪। 𑒧𑒳𑒠𑒰 𑒍𑒯𑒼 𑒮𑒦 𑒂𑒮𑒹-𑒣𑒰𑒮𑒧𑒹 𑒩𑒯𑒋 𑒖𑒰𑒃𑒋। 𑒥𑒱𑒨𑒰𑒯 𑒞𑒿 𑒍𑒏𑒲𑒪𑒼𑒏 𑒦𑒹𑒪 𑒕𑒻𑒏, 𑒧𑒳𑒠𑒰 𑒁𑒕𑒱 𑒍 𑒮𑒳𑒡𑓀𑒑। 𑒮𑒹 𑒂𑒢 𑒦𑒰𑒋 𑒮𑒦 𑒏𑒯𑒻𑒞-𑒏𑒯𑒻𑒞 𑒩𑒯𑒱 𑒑𑒹𑒪𑒻𑒏 𑒖𑒹 𑒢𑒥𑒲 𑒥𑒏𑒮 𑒧𑒿𑒑𑒢𑒲𑒧𑒹 𑒐𑒙𑒥𑒻𑒞 𑒩𑒯𑒻𑒞 𑒕𑒾𑒏, 𑒁𑒪𑒑 𑒦𑒋 𑒖𑒼 𑒑𑓄, 𑒧𑒳𑒠𑒰 𑒍 𑒞𑒿 𑒦𑒰𑒋𑒏 𑒦𑒏𑓂𑒞 𑒁𑒕𑒱। 𑒦𑒰𑒋𑒏 𑒮𑒼𑒗𑒰𑒿𑒧𑒹 𑒋𑒏𑒼 𑒬𑒥𑓂𑒠 𑒏𑒲 𑒥𑒰𑒖𑒪 𑒯𑒼𑒃𑒞 𑒕𑒻𑒏?
𑒋𑒏 𑒠𑒱𑒢 𑒍𑒏𑒲𑒪𑒏𑒹𑒿 𑒥𑒼𑒐𑒰𑒩 𑒦𑒹𑒪 𑒩𑒯𑒋 𑒂 𑒠𑒼𑒮𑒩 𑒦𑒰𑒋 𑒮𑒦 𑒍𑒏𑒩𑒰 𑒏𑒰𑒖𑒣𑒩 𑒁𑒋𑒥𑒰𑒮𑒿 𑒧𑒢𑒰 𑒏𑒋𑒢𑒹 𑒩𑒯𑒻𑒏। 𑒧𑒳𑒠𑒰 𑒍 𑒢𑒯𑒱 𑒧𑒰𑒢𑒪। 𑒍𑒏𑒩 𑒮𑒳𑒡𑓀𑒑𑒣𑒢𑒰 𑒠𑒹𑒐𑒱 𑒯𑒧𑒩 𑒧𑒰𑒿, 𑒣𑒞𑓂𑒢𑒲, 𑒥𑒔𑓂𑒔𑒰 𑒮𑒦 𑒍𑒏𑒩𑒰 𑒐𑒴𑒥 𑒧𑒰𑒢𑒋 𑒪𑒰𑒑𑒪 𑒩𑒯𑒟𑒱। 𑒍𑒯𑒱 𑒠𑒱𑒢 𑒏𑒰𑒖𑒏 𑒥𑒲𑒔𑒧𑒹 𑒍 𑒐𑒋𑒥𑒰 𑒪𑒹𑒪 𑒧𑒰𑒿𑒑𑒪𑒏 𑒂 𑒥𑒰𑒪𑒏𑒼𑒢𑒲𑒧𑒹 𑒮𑒴𑒞𑒱 𑒩𑒯𑒪। 𑒤𑒹𑒩 𑒥𑒹𑒩𑒱𑒨𑒰 𑒣𑒯𑒩𑒮𑒿 𑒏𑒰𑒖 𑒬𑒳𑒩𑒴 𑒏𑒋𑒪𑒏। 𑒮𑒰𑒿𑒗𑒧𑒹 𑒒𑒩 𑒖𑒋𑒥𑒰𑒏 𑒥𑒹𑒩𑒧𑒹 𑒖𑒐𑒢 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒛𑒹𑒩𑒰 𑒖𑒋𑒥𑒰𑒏 𑒥𑒹𑒩 𑒦𑒋 𑒑𑒹𑒪 𑒞𑒿 𑒏𑒯𑒪𑒏 𑒖𑒹 𑒢𑒯𑒱, 𑒂𑒃 𑒏𑒰𑒖 𑒪𑒹𑒙𑒮𑒿 𑒬𑒳𑒩𑒴 𑒏𑒋𑒢𑒹 𑒩𑒯𑒲 𑒮𑒹 𑒐𑒞𑒧 𑒏𑒃𑒨𑒹 𑒏𑓄 𑒖𑒰𑒋𑒥। 𑒂 𑒂𑒮𑓂𑒞𑒹𑒮𑒿 𑒥𑒛𑓃𑒥𑒛𑓃𑒰𑒃𑒞 𑒥𑒰𑒖𑒪 𑒖𑒹 𑒠𑒹𑒐𑒻𑒞 𑒕𑒱𑒨𑒻𑒏 𑒖𑒹 𑒂𑒃 𑒏𑓂𑒨𑒼 𑒥𑒖𑒥𑒋 𑒪𑒹𑒪 𑒂𑒥𑒻𑒋 𑒂𑒏𑒱 𑒢𑒯𑒱।
𑒂𑒚 𑒥𑒖𑒹 𑒏𑒩𑒲𑒥 𑒧𑒼𑒙𑒩𑒮𑒰𑒃𑒏𑒱𑒪𑒣𑒩 𑒠𑒴 𑒑𑒼𑒙𑒹 𑒂𑒋𑒪। 𑒍𑒏𑒲𑒪 𑒏𑒯𑒪𑒏 𑒖𑒹 𑒄 𑒠𑒳𑒢𑒴 𑒍𑒏𑒩 𑒕𑒼𑒙𑒏𑒰 𑒦𑒰𑒋 𑒮𑒦 𑒕𑒻𑒏। 𑒠𑒳𑒢𑒴 𑒑𑒼𑒙𑒹 𑒞𑒹𑒮𑒩 𑒞𑒪𑓂𑒪𑒰 𑒮𑓂𑒟𑒱𑒞 𑒯𑒧𑒩 𑒤𑓂𑒪𑒻𑒙𑒣𑒩 𑒂𑒋𑒪 𑒂 𑒍𑒏𑒲𑒪𑒏𑒹𑓀 𑒑𑒣 𑒏𑒩𑒥𑒰 𑒪𑒹𑒪 𑒥𑒖𑒹𑒪𑒏। 𑒍𑒏𑒩 𑒮𑒦𑒏 𑒑𑒣𑒧𑒹 𑒂𑒣𑒏𑒞𑒰 𑒧𑒱𑒬𑓂𑒩𑒱𑒞 𑒏𑓂𑒩𑒼𑒡 𑒩𑒯𑒻𑒏। 𑒍𑒏𑒲𑒪 𑒍𑒏𑒩𑒰 𑒮𑒦𑒏𑒹𑒿 𑒏𑒯𑒻𑒞 𑒩𑒯𑒋 𑒖𑒹 𑒍𑒯𑒹𑒢 𑒏𑒼𑒢𑒼 𑒑𑒣 𑒢𑒯𑒱 𑒕𑒻𑒏, 𑒂𑒃 𑒂𑒡𑒰 𑒠𑒱𑒢 𑒮𑒳𑒞𑒪 𑒩𑒯𑒋 𑒞𑒹𑒿 𑒮𑒼𑒔𑒪𑒏 𑒖𑒹 𑒏𑒰𑒖 𑒣𑒴𑒩𑒰 𑒏𑒃𑒋 𑒏𑒋 𑒖𑒰𑒋। 𑒞𑒰𑒫𑒞 𑒢𑒥𑒲 𑒥𑒏𑒮 𑒮𑒹𑒯𑒼 𑒍𑒞𑒋 𑒣𑒯𑒳𑒿𑒔𑒱 𑒑𑒹𑒪 𑒂 𑒍𑒏𑒲𑒪𑒏𑒹𑒿 𑒪𑒋 𑒑𑒹𑒪।
𑒠𑒼𑒮𑒩 𑒠𑒱𑒢 𑒢𑒥𑒲 𑒥𑒏𑒮 𑒦𑒼𑒩𑒹-𑒦𑒼𑒩 𑒂𑒋𑒪।
“𑒠𑒹𑒐𑒱𑒨𑒾𑒏 𑒄 𑒦𑒰𑒋 𑒮𑒦।...
-“𑒥𑒹𑒙𑒰 𑒖𑒹𑒏𑒰𑒿 𑒥𑒳𑒗𑒪𑒱𑒨𑒻𑒏 𑒋𑒏𑒩𑒰 𑒮𑒦𑒏𑒹𑒿 𑒂 𑒯𑒧𑒩𑒰𑒣𑒩 𑒏𑒪𑓀𑒏 𑒪𑒑𑒥𑒻𑒞 𑒁𑒕𑒱 𑒖𑒹 𑒞𑒴𑒿 𑒠𑒴 𑒩𑓀𑒑 𑒏𑒩𑒻𑒞 𑒕𑒯। 𑒞𑒲𑒢𑒴 𑒦𑒰𑒿𑒋 𑒏𑒰𑒪𑓂𑒯𑒱 𑒯𑒧𑒩𑒰𑒮𑒿 𑒐𑒴𑒥 𑒗𑒑𑒛𑓃𑒰 𑒏𑒩𑒋 𑒑𑒹𑒪 𑒖𑒹 𑒞𑒴𑒿 𑒍𑒏𑒲𑒪𑒏𑒹𑒿 𑒢𑒼𑒏𑒩 𑒖𑒹𑒏𑒰𑒿 𑒩𑒐𑒻𑒞 𑒕𑒯𑒏। 𑒥𑒳𑒗𑒴 ! 𑒄 𑒍𑒏𑒲𑒪 𑒁𑒕𑒱 𑒮𑒳𑒡𑓀𑒑। 𑒏𑒞𑒥𑒼 𑒏𑒯𑒻𑒞 𑒕𑒱𑒨𑒻𑒏 𑒖𑒹 𑒢𑒲𑒏𑒮𑒿 𑒏𑒣𑒛𑓃𑒰 𑒪𑒞𑓂𑒞𑒰 𑒣𑒯𑒱𑒩, 𑒞𑒿 𑒍𑒯𑒼 𑒗𑒼𑒪𑓀𑒑𑒹 𑒖𑒹𑒏𑒰𑒿 𑒩𑒯𑒻𑒞 𑒁𑒕𑒱।
-“𑒏𑒰𑒪𑓂𑒯𑒱 𑒯𑒧𑒩𑒰 𑒞𑒿 𑒍𑒏𑒲𑒪𑒮𑒿 𑒦𑒹𑒿𑒙𑒼 𑒢𑒯𑒱 𑒁𑒕𑒱। 𑒮𑒩𑓂𑒤𑒳𑒏 𑒏𑒰𑒖 𑒠𑒼𑒮𑒩 𑒮𑒰𑒃𑒙𑒣𑒩 𑒔𑒪𑒱 𑒩𑒯𑒪 𑒕𑒻𑒏, 𑒍𑒞𑒯𑒱 𑒑𑒹𑒪 𑒕𑒪𑒯𑒳𑒿 𑒖𑒹 𑒏𑒼𑒢𑒼 𑒮𑓂𑒏𑒲𑒧𑒮𑒿 𑒏𑒰𑒖 𑒦𑒹𑒙𑒱 𑒖𑒃𑒞𑒋 𑒞𑒿 𑒁𑒯𑒰𑒿𑒏 𑒋𑒯𑒱𑒚𑒰𑒧 𑒏𑒰𑒖 𑒐𑒞𑒧 𑒦𑒹𑒪𑒰𑒣𑒩 𑒍𑒞𑒯𑒱 𑒪𑒰𑒑𑒱 𑒖𑒃𑒞𑒯𑒳𑒿। 𑒥𑒱𑒪𑓂𑒛𑒩 𑒁𑓀𑒮𑒪 𑒥𑒪𑒰𑒏 𑒂𑒤𑒩 𑒂𑒋𑒪 𑒩𑒯𑒋 𑒖𑒹 𑒯𑒧𑒩𑒰 𑒋𑒯𑒱𑒚𑒰𑒧 𑒂𑒥𑒱 𑒖𑒰𑒆 𑒧𑒳𑒠𑒰 𑒦𑒰𑒋 𑒮𑒦𑒏 𑒠𑓂𑒫𑒰𑒩𑒹 𑒯𑒧 𑒧𑒢𑒰 𑒏𑒋 𑒠𑒹𑒪𑒱𑒨𑒻𑒏। 𑒂 𑒄 𑒮𑒦.. 𑒍𑒢𑒰 𑒄 𑒮𑒦𑒙𑒰 𑒯𑒧𑒩 𑒣𑒙𑒢𑒰 𑒥𑒪𑒰 𑒦𑒰𑒋 𑒧𑓀𑒛𑒪𑒥𑒰𑒏 𑒏𑒩𑒞𑒴𑒞 𑒕𑒲”।
“𑒧𑓀𑒛𑒪!!”, 𑒯𑒧𑒩𑒰 𑒏𑒱𑒕𑒳 𑒣𑒳𑒩𑒰𑒢 𑒑𑒣 𑒧𑒼𑒢 𑒣𑒛𑓃𑒪, -“𑒁𑒯𑒰𑒿𑒏 𑒑𑒰𑒧𑒧𑒹 𑒋𑒏𑒙𑒰 𑒖𑒨𑒬𑓀𑒏𑒩 𑒮𑒹𑒯𑒼 𑒕𑒟𑒱 𑒏𑒲”?
“𑒯𑒿! 𑒯𑒿! 𑒁𑒯𑒰𑒿 𑒏𑒼𑒢𑒰 𑒔𑒱𑒢𑓂𑒯𑒻𑒞 𑒕𑒱𑒨𑒢𑓂𑒯𑒱 𑒯𑒱𑒢𑒏𑒰 𑒮𑒦𑒏𑒹𑒿। 𑒍𑒢𑒰 𑒁𑒮𑒪𑒲 𑒢𑒰𑒧 𑒞𑒿 𑒯𑒧𑒩 𑒦𑒰𑒋𑒏 𑒮𑒪𑒲𑒧 𑒕𑒱𑒨𑒻𑒏। 𑒂𑒤𑒱𑒮𑒏 𑒢𑒰𑒧 𑒧𑓀𑒛𑒪। 𑒒𑒩𑒏 𑒮𑒪𑒲𑒧। 𑒮𑒩𑒏𑒰𑒩𑒲 𑒛𑓂𑒩𑒰𑒃𑒫𑒩 𑒁𑒕𑒱। 𑒒𑒩𑒧𑒹 𑒮𑒪𑒲𑒧 𑒏𑒯𑒢𑒹 𑒍𑒏𑒩 𑒁𑒯𑒪𑒱𑒨𑒰 (𑒏𑒢𑒱𑒨𑒰𑒿) 𑒥𑒛𑓃 𑒒𑒥𑒛𑓃𑒰𑒃 𑒕𑒻𑒏”।
“𑒮𑒦𑒙𑒰 𑒥𑒳𑒗𑒪 𑒁𑒕𑒱 𑒯𑒧𑒩𑒰”।
𑒁𑒣𑒢 𑒫𑒱𑒠𑓂𑒨𑒰𑒩𑓂𑒟𑒲 𑒖𑒲𑒫𑒢𑒏 𑒋𑒏𑒙𑒰 𑒒𑒙𑒢𑒰 𑒧𑒼𑒢 𑒣𑒛𑓃𑒱 𑒑𑒹𑒪 𑒯𑒧𑒩𑒰।
𑒣𑒙𑒢𑒰𑒧𑒹 𑒣𑒜𑓃𑒻𑒞 𑒩𑒯𑒲। 𑒣𑒛𑓃𑒼𑒮𑒧𑒹 𑒋𑒏 𑒑𑒼𑒙𑒹 𑒖𑒨𑒬𑓀𑒏𑒩 𑒩𑒯𑒻𑒞 𑒕𑒪𑒰𑒯। 𑒦𑒰𑒃-𑒦𑒰𑒃 𑒏𑒯𑒻𑒞 𑒕𑒪𑒱𑒨𑒢𑓂𑒯𑒱। 𑒠𑒴 𑒥𑒱𑒨𑒰𑒯। 𑒣𑒯𑒱𑒪 𑒥𑒱𑒨𑒰𑒯𑒏 𑒯𑒳𑒢𑒏𑒩 𑒥𑒹𑒙𑒰 𑒦𑒰𑒑𑒱 𑒑𑒹𑒪 𑒕𑒪𑒢𑓂𑒯𑒱। 𑒍𑒢𑒰 𑒠𑒼𑒮𑒩 𑒥𑒱𑒨𑒰𑒯 𑒣𑒯𑒱𑒪 𑒣𑒞𑓂𑒢𑒲𑒏 𑒧𑒳𑒃𑒪𑒰𑒏 𑒁𑒢𑓀𑒞𑒩 𑒦𑒹𑒪 𑒕𑒪𑒢𑓂𑒯𑒱। 𑒏𑒱𑒕𑒳 𑒠𑒱𑒢 𑒠𑒱𑒪𑓂𑒪𑒲-𑒥𑒧𑓂𑒥𑒃 𑒒𑒳𑒧𑒱 𑒣𑒯𑒱𑒪 𑒥𑒱𑒨𑒰𑒯𑒏 𑒍 𑒥𑒹𑒙𑒰 𑒂𑒣𑒮 𑒁𑒋𑒪𑒢𑓂𑒯𑒱। 𑒮𑒦 𑒍𑒏𑒩𑒰 𑒣𑒳𑒕𑒪𑒏𑒻 𑒖𑒹 𑒏𑒲 𑒏𑒩𑒧𑒹? 𑒍 𑒏𑒯𑒪𑒏 𑒖𑒹 𑒮𑒦 𑒏𑒰𑒖 𑒯𑒧𑒩𑒰𑒮𑒿 𑒯𑒼𑒋𑒞 𑒧𑒳𑒠𑒰 𑒣𑒜𑓃𑒰𑒃 𑒕𑒼𑒛𑓃𑒱 𑒏𑒋। 𑒤𑒹𑒩 𑒮𑒦 𑒧𑒱𑒪𑒱 𑒏𑒋 𑒍𑒏𑒩𑒰 𑒛𑓂𑒩𑒰𑒃𑒫𑒩𑒲𑒏 𑒪𑒰𑒃𑒢𑒧𑒹 𑒖𑒋𑒥𑒰𑒏 𑒪𑒹𑒪 𑒏𑒯𑒪𑒏। 𑒍𑒏𑒩𑒼 𑒧𑒼𑒢 𑒩𑒯𑒻𑒏 𑒛𑓂𑒩𑒰𑒃𑒫𑒩𑒲 𑒮𑒱𑒐𑒥𑒰𑒏। 𑒦𑒼𑒩𑒹-𑒦𑒼𑒩 𑒋𑒏 𑒠𑒱𑒢 𑒖𑒨𑒬𑓀𑒏𑒩 𑒏𑒯𑒪𑒢𑓂𑒯𑒱 𑒖𑒹 𑒂𑒃 𑒋𑒏 𑒚𑒰𑒧 𑒔𑒪𑒥𑒰𑒏 𑒁𑒕𑒱।
“𑒥𑒹𑒙𑒰 𑒏𑒯𑒻𑒞 𑒁𑒕𑒱 𑒖𑒹 𑒛𑓂𑒩𑒰𑒃𑒫𑒩𑒲 𑒮𑒲𑒐𑒥। 𑒛𑓂𑒩𑒰𑒃𑒫𑒱𑓀𑒑 𑒮𑓂𑒏𑒴𑒪 𑒥𑒛𑓂𑒛 𑒧𑒯𑒑। 𑒋𑒏 𑒑𑒼𑒙𑒹 𑒑𑒾𑒂𑒿 𑒮𑒪𑒲𑒧 𑒁𑒕𑒱 𑒛𑓂𑒩𑒰𑒃𑒫𑒩, 𑒮𑒩𑒏𑒰𑒩𑒲 𑒂𑒤𑒱𑒮𑒧𑒹। 𑒑𑒰𑒧𑒧𑒹 𑒋𑒯𑒱 𑒥𑒹𑒩 𑒕𑒳𑒙𑓂𑒙𑒲𑒧𑒹 𑒦𑒹𑒙𑒪 𑒩𑒯𑒋। 𑒍𑒏𑒩𑒼 𑒮𑒦𑒏 𑒄𑒠 𑒣𑒰𑒥𑒢𑒱 𑒕𑒪𑒋, 𑒮𑒹 𑒂𑒋𑒪 𑒩𑒯𑒋 𑒑𑒰𑒧। 𑒏𑒯𑒪𑒏 𑒖𑒹 𑒩𑒫𑒱 𑒠𑒱𑒢 𑒏𑓄 𑒍𑒏𑒩𑒰 𑒕𑒳𑒙𑓂𑒙𑒲 𑒯𑒼𑒃𑒞 𑒕𑒻𑒏 𑒂𑒤𑒱𑒮𑒧𑒹 𑒂 𑒂𑒢 𑒠𑒱𑒢 𑒣𑒰𑒿𑒔 𑒥𑒖𑒹 𑒦𑒼𑒩𑒹𑒮𑒿 𑒮𑒱𑒐𑒰 𑒮𑒏𑒻𑒞 𑒁𑒕𑒱। 𑒠𑒴 𑒮𑒋 𑒙𑒰𑒏𑒰𑒧𑒹 𑒋𑒏𑒙𑒰 𑒮𑒹𑒏𑒹𑓀𑒛 𑒯𑒻𑓀𑒛 𑒮𑒰𑒃𑒏𑒱𑒪 𑒥𑒹𑒙𑒰𑒏𑒹𑒿 𑒏𑒲𑒢𑒱 𑒠𑒹𑒢𑒹 𑒕𑒱𑒨𑒻𑒏।
-“𑒍𑒏𑒩 𑒛𑒹𑒩𑒰 𑒂𑒤𑒱𑒮𑒹 𑒪𑒑 𑒕𑒻𑒏। 𑒂𑒤𑒱𑒮 𑒥𑒖𑒹𑒢𑒹 𑒁𑒕𑒱, 𑒍𑒞𑒯𑒱𑒮𑒿 𑒒𑒩 𑒠𑒹𑒐𑒰𑒍𑒞”।
“𑒂𑒤𑒱𑒮 𑒠𑒹𑒐𑒪 𑒁𑒕𑒱?”
“𑒯𑒿, 𑒏𑒞𑒰𑒏 𑒥𑒹𑒩 𑒑𑒹𑒪 𑒕𑒲”।
𑒂𑒤𑒱𑒮𑒏 𑒥𑒹𑒩𑒧𑒹 𑒯𑒧 𑒮𑒦 𑒑𑒰𑒿𑒡𑒲 𑒧𑒻𑒠𑒰𑒢𑒏 𑒥𑒑𑒪𑒏 𑒏𑒔𑒯𑒩𑒲 𑒮𑒢 𑒂𑒤𑒱𑒮 𑒣𑒯𑒳𑒿𑒔𑒻𑒞 𑒑𑒹𑒪𑒯𑒳𑒿।
“𑒧𑓀𑒛𑒪𑒖𑒲 𑒛𑓂𑒩𑒰𑒃𑒫𑒩 𑒮𑒰𑒯𑒹𑒥 𑒕𑒟𑒱?” - 𑒖𑒨𑒬𑓀𑒏𑒩 𑒋𑒏 𑒑𑒼𑒙 𑒯𑒰𑒏𑒱𑒧𑒏 𑒂𑒤𑒱𑒮𑒏 𑒥𑒰𑒯𑒩 𑒚𑒰𑒜𑓃 𑒔𑒣𑒩𑒰𑒮𑒲𑒮𑒿 𑒣𑒳𑒕𑒪𑒢𑓂𑒯𑒱।
“𑒯𑒿, 𑒍𑒧𑓂𑒯𑒩 𑒕𑒟𑒱”।
𑒯𑒧 𑒖𑒨𑒬𑓀𑒏𑒩𑒏𑒹𑒿 𑒣𑒳𑒕𑒪𑒱𑒨𑒢𑓂𑒯𑒱 𑒖𑒹 𑒯𑒧𑒩𑒰 𑒮𑒦 𑒞𑒿 𑒮𑒪𑒲𑒧𑒮𑒿 𑒦𑒹𑒿𑒙 𑒏𑒩𑒥𑒰 𑒪𑒹𑒪 𑒂𑒋𑒪 𑒕𑒲, 𑒄 𑒧𑓀𑒛𑒪 𑒏𑒹 𑒕𑒟𑒱?
𑒍 𑒃𑒬𑒰𑒩𑒰𑒧𑒹 𑒯𑒧𑒩𑒰 𑒔𑒳𑒣 𑒩𑒯𑒋 𑒪𑒹𑒪 𑒏𑒯𑒪𑒢𑓂𑒯𑒱 𑒂 𑒄𑒯𑒼 𑒧𑒳𑒐𑒩 𑒩𑒴𑒣𑒧𑒹 𑒏𑒯𑒪𑒢𑓂𑒯𑒱 𑒖𑒹 𑒋𑒯𑒱𑒧𑒹 𑒏𑒼𑒢𑒼 𑒥𑒰𑒞 𑒕𑒻𑒏, 𑒥𑒰𑒠𑒧𑒹 𑒏𑒯𑒞𑒰𑒯।
𑒂𑒥 𑒖𑒹 𑒧𑓀𑒛𑒪𑒖𑒲𑒮𑒿 𑒯𑒳𑒢𑒏𑒰 𑒑𑒣 𑒯𑒼𑒧𑒋 𑒪𑒑𑒪𑒢𑓂𑒯𑒱 𑒞𑒿 𑒥𑒲𑒔-𑒥𑒲𑒔𑒧𑒹 𑒍 𑒮𑒪𑒲𑒧 𑒦𑒰𑒃, 𑒮𑒪𑒲𑒧 𑒦𑒰𑒃 𑒏𑒯𑒱 𑒯𑒳𑒢𑒏𑒰 𑒮𑒧𑓂𑒥𑒼𑒡𑒢 𑒏𑒩𑒻𑒞 𑒩𑒯𑒪𑒰𑒯। 𑒤𑒹𑒩 𑒯𑒳𑒢𑒏𑒰 𑒮𑓀𑒑𑒹 𑒯𑒧 𑒮𑒦 𑒯𑒳𑒢𑒏𑒩 𑒛𑒹𑒩𑒰 𑒣𑒯𑒳𑒿𑒔𑒪𑒯𑒳𑒿। 𑒤𑒹𑒩 𑒥𑒱𑒠𑒰 𑒯𑒼𑒃𑒞 𑒏𑒰𑒪 𑒮𑒪𑒲𑒧 𑒦𑒰𑒃 𑒖𑒨𑒬𑓀𑒏𑒩𑒏𑒹𑒿 𑒯𑒧𑒩𑒰 𑒠𑒱𑒬 𑒃𑒬𑒰𑒩𑒰 𑒏𑒩𑒻𑒞 𑒏𑒯𑒪𑒢𑓂𑒯𑒱 𑒖𑒹 𑒯𑒱𑒢𑒏𑒰 𑒏𑒯𑒱 𑒠𑒹𑒪𑒱𑒨𑒢𑓂𑒯𑒱 𑒢𑒹। 𑒖𑒨𑒬𑓀𑒏𑒩 𑒏𑒯𑒪𑒐𑒱𑒢𑓂𑒯 𑒖𑒹 𑒏𑒯𑒱 𑒠𑒹𑒥𑒢𑓂𑒯𑒱।
𑒍𑒞𑒋 𑒮𑒿 𑒢𑒱𑒏𑒪𑒪𑒰𑒏 𑒥𑒰𑒠 𑒖𑒨𑒬𑓀𑒏𑒩 𑒏𑒯𑒪𑒢𑓂𑒯𑒱 𑒖𑒹 𑒏𑒙𑒱𑒯𑒰𑒩 𑒪𑒑 𑒖𑒨𑒬𑓀𑒏𑒩𑒏 𑒑𑒰𑒧 𑒕𑒢𑓂𑒯𑒱। 𑒧𑒰𑒩𑒞𑒹 𑒩𑒰𑒮 𑒦𑒰𑒃 𑒥𑒯𑒱𑒢 𑒕𑒻𑒏 𑒮𑒪𑒲𑒧𑒏। 𑒮𑒪𑒲𑒧 𑒯𑒳𑒢𑒏𑒩 𑒪𑓀𑒑𑒼𑒙𑒱𑒨𑒰 𑒨𑒰𑒩, 𑒮𑓀𑒑𑒹 𑒣𑒜𑓃𑒪𑒢𑓂𑒯𑒱। 𑒤𑒹𑒩 𑒩𑒼𑒖𑒑𑒰𑒩𑒏 𑒏𑓂𑒩𑒧𑒧𑒹 𑒠𑒳𑒢𑒴 𑒑𑒼𑒙𑒹 𑒠𑒴𑒩 𑒔𑒪𑒱 𑒑𑒹𑒪𑒰𑒯। 𑒮𑒪𑒲𑒧 𑒏𑒼𑒢𑒼 𑒯𑒰𑒏𑒱𑒧𑒏 𑒒𑒩𑒣𑒩 𑒏𑒰𑒖 𑒏𑒩𑒋 𑒪𑒰𑒑𑒪। 𑒛𑓂𑒩𑒰𑒃𑒫𑒩𑒲 𑒏𑒯𑒱𑒨𑒰 𑒏𑒞𑒋 𑒮𑒿 𑒍 𑒮𑒲𑒐𑒱 𑒪𑒹𑒢𑒹 𑒕𑒪, 𑒮𑒹 𑒯𑒳𑒢𑒩𑒥𑒪𑒰𑒏𑒹𑒿 𑒢𑒼𑒏𑒩𑒲𑒏 𑒞𑒿 𑒍𑒯𑒳𑒢𑒰 𑒠𑒱𑒏𑓂𑒏𑒞 𑒢𑒯𑒱 𑒯𑒼𑒃𑒞 𑒕𑒻𑒏। 𑒥𑒰𑒠𑒧𑒹 𑒋𑒏𑒩 𑒮𑓂𑒫𑒦𑒰𑒫 𑒠𑒹𑒐𑒱 𑒏𑒋 𑒍 𑒯𑒰𑒏𑒱𑒧 𑒋𑒏𑒩𑒰 𑒏𑒼𑒢𑒼 𑒠𑒼𑒮𑒩 𑒂𑒠𑒧𑒲 𑒖𑒏𑒩 𑒢𑒰𑒧 𑒧𑓀𑒛𑒪 𑒩𑒯𑒋, 𑒂 𑒏𑒞𑒯𑒳 𑒧𑒩𑒱-𑒐𑒣𑒱 𑒑𑒹𑒪 𑒩𑒯𑒋, 𑒏𑒹𑒩 𑒢𑒰𑒧𑒣𑒩 𑒙𑒹𑒧𑓂𑒣𑒩𑒼𑒩𑒲 𑒩𑒰𑒐𑒱 𑒪𑒹𑒪𑒏𑒻𑒏। 𑒤𑒹𑒩 𑒏𑒱𑒕𑒳 𑒠𑒱𑒢𑒧𑒹 𑒍 𑒣𑒩𑓂𑒧𑒰𑒢𑒹𑒢𑓂𑒙 𑒦𑒋 𑒑𑒹𑒪।
𑒖𑒨𑒬𑓀𑒏𑒩 𑒯𑒧𑒩𑒰𑒮𑒿 𑒏𑒯𑒪𑒢𑓂𑒯𑒱 - “𑒋𑒏𑒩 𑒂𑒤𑒱𑒮𑒧𑒹 𑒫𑒰 𑒋𑒏𑒩 𑒮𑓀𑒑𑒲 𑒮𑒰𑒟𑒲 𑒪𑒑- 𑒍𑒢𑒰 𑒁𑒯𑒰𑒿𑒮𑒿 𑒤𑒹𑒩 𑒏𑒯𑒱𑒨𑒰 𑒋𑒏𑒩 𑒦𑒹𑒿𑒙 𑒯𑒹𑒞𑒋- 𑒋𑒯𑒱 𑒑𑒣𑒏 𑒡𑒼𑒐𑒼𑒮𑒿 𑒔𑒩𑒔𑒰 𑒢𑒯𑒱 𑒏𑒩𑒥। 𑒍𑒢𑒰 𑒣𑒩𑓂𑒧𑒰𑒢𑒹𑒢𑓂𑒙 𑒦𑒋 𑒑𑒹𑒪 𑒕𑒻𑒏 𑒧𑒳𑒠𑒰 𑒪𑒼𑒏 𑒮𑒦 𑒏𑒹𑒯𑒢 𑒯𑒼𑒃 𑒕𑒻𑒏 𑒮𑒹 𑒢𑒯𑒱 𑒠𑒹𑒐𑒃 𑒕𑒱𑒨𑒻𑒏। 𑒏𑓂𑒨𑒼 𑒏𑒱𑒕𑒳 𑒪𑒱𑒐𑒱 𑒣𑒜𑓃𑒱 𑒠𑒹𑒞𑒻𑒏 𑒞𑒿 𑒧𑓀𑒑𑒢𑒲𑒧𑒹 𑒥𑒹𑒔𑒰𑒩𑒏𑒹𑒿 𑒤𑒹𑒩𑒰 𑒪𑒰𑒑𑒱 𑒖𑒋𑒞𑒻𑒏”।
𑒧𑒼𑒢𑒧𑒹 𑒒𑒳𑒧𑒩𑒪 𑒋𑒯𑒱 𑒑𑒣𑒏𑒹𑒿 𑒢𑒥𑒲 𑒥𑒏𑒮𑒏𑒹𑒿 𑒯𑒧 𑒏𑒯𑒪𑒱𑒨𑒻𑒏। 𑒞𑒰𑒯𑒱𑒣𑒩 𑒍 𑒥𑒰𑒖𑒪-
“𑒍𑒯𑒼 𑒮𑓂𑒏𑒲𑒧 𑒡𑒩𑒹𑒢𑒱𑒯𑒰𑒩 𑒯𑒧𑒯𑒲𑓀 𑒕𑒲। 𑒋𑒏𑒙𑒰 𑒏𑒧𑓂𑒣𑓂𑒪𑒹𑒢 𑒏𑓄 𑒠𑒹𑒥𑒻𑒏 𑒞𑒿 𑒖𑒰𑒯𑒱 𑒢𑒼𑒏𑒩𑒲𑒣𑒩 𑒋𑒞𑒹𑒏 𑒤𑒳𑒩𑒤𑒳𑒩𑒲 𑒕𑒻𑒏 𑒮𑒹 𑒒𑒼𑒮𑒩𑒱 𑒖𑒋𑒞𑒻𑒏। 𑒧𑒳𑒠𑒰 𑒮𑒼𑒔𑒻𑒞 𑒕𑒲 𑒖𑒹 𑒍𑒏𑒩 𑒢𑒼𑒏𑒩𑒲 𑒖𑒋𑒞𑒻𑒏 𑒞𑒿 𑒯𑒧𑒩𑒹 𑒧𑒰𑒟𑒣𑒩 𑒂𑒥𑒱 𑒐𑒮𑒞। 𑒞𑒹𑒿 𑒁𑒪𑓂𑒪𑒰 𑒣𑒩 𑒮𑒦𑒙𑒰 𑒕𑒼𑒛𑓃𑒱 𑒠𑒹𑒢𑒹 𑒕𑒱𑒨𑒻𑒏”।
𑒢𑒥𑒲 𑒥𑒏𑒮 𑒍𑒢𑒰 𑒞𑒿 𑒥𑒛𑓂𑒛 𑒫𑓂𑒨𑒮𑓂𑒞 𑒩𑒯𑒻𑒞 𑒕𑒪 𑒧𑒳𑒠𑒰 𑒍𑒯𑒱 𑒠𑒱𑒢 𑒪𑒰𑒑𑒻𑒋 𑒯𑒧𑒩𑒹 𑒮𑒿 𑒑𑒣 𑒏𑒩𑒥𑒰 𑒪𑒹𑒪 𑒮𑒧𑒨 𑒢𑒱𑒏𑒰𑒪𑒱 𑒏𑒋 𑒂𑒋𑒪 𑒩𑒯𑒋। 𑒖𑒐𑒢 𑒪𑒼𑒏 𑒧𑒰𑒢𑒮𑒱𑒏 𑒤𑒱𑒩𑒹𑒬𑒰𑒢𑒲𑒧𑒹 𑒩𑒯𑒻𑒞 𑒁𑒕𑒱 𑒞𑒿 𑒁𑒣𑒢 𑒠𑒳𑒐𑒢𑒰𑒧𑒰 𑒠𑒼𑒮𑒩𑒰𑒏𑒹𑒿 𑒮𑒳𑒢𑒥𑒋 𑒔𑒰𑒯𑒻𑒞 𑒁𑒕𑒱। 𑒧𑒳𑒠𑒰 𑒞𑒏𑒩 𑒬𑓂𑒩𑒼𑒞𑒰 𑒦𑒹𑒙𑒥 𑒧𑒼𑒬𑓂𑒏𑒱𑒪। 𑒧𑒳𑒠𑒰 𑒯𑒧 𑒁𑒣𑒢 𑒧𑒰𑒢𑒫𑒫𑒱𑒖𑓂𑒘𑒰𑒢𑒏 𑒏𑒰𑒪𑒹𑒖𑒱𑒨𑒰 𑒣𑒜𑓃𑒰𑒃𑒏 𑒣𑓂𑒩𑒦𑒰𑒫𑒏 𑒏𑒰𑒩𑒝 𑒮𑒦 𑒏𑒰𑒖 𑒕𑒼𑒛𑓃𑒱 𑒁𑒢𑒰𑒨𑒰𑒮 𑒬𑓂𑒩𑒼𑒞𑒰 𑒥𑒢𑒱 𑒖𑒰𑒃𑒞 𑒕𑒲 𑒮𑒹 𑒢𑒥𑒲𑒏𑒹𑒿 𑒥𑒳𑒗𑒪 𑒩𑒯𑒻𑒏। 𑒦𑒠𑒥𑒩𑒱𑒨𑒰 𑒪𑒡𑒢𑒹 𑒕𑒪 𑒮𑒹 𑒯𑒧𑒯𑒴𑒿 𑒏𑒞𑒯𑒳 𑒥𑒰𑒯𑒩 𑒖𑒋𑒥𑒰𑒏 𑒯𑒩𑒥𑒛𑓃𑒲𑒧𑒹 𑒢𑒯𑒱 𑒕𑒪𑒯𑒳𑒿। 𑒮𑒹 𑒍 𑒁𑒣𑒢 𑒐𑒱𑒮𑓂𑒮𑒰 𑒬𑒳𑒩𑒳 𑒏𑒋𑒪𑒏।
“𑒏𑒞𑒹𑒏 𑒏𑒭𑓂𑒙 𑒏𑒙𑒢𑒹 𑒕𑒲 𑒮𑒹 𑒏𑒲 𑒥𑒨𑒰𑒢 𑒏𑒩𑒴। 𑒂 𑒧𑒠𑒞𑒱 𑒏𑒹 𑒮𑒦 𑒏𑒋𑒪𑒏 ? 𑒋𑒏𑒙𑒰 𑒐𑒰𑒪𑒴-𑒐𑒰𑒪𑒰 (𑒧𑒾𑒮𑒰-𑒧𑒾𑒮𑒲) 𑒂 𑒐𑒪𑒹𑒩𑒰 𑒦𑒰𑒋 𑒂 𑒐𑒪𑒹𑒩𑒲 𑒥𑒯𑒱𑒢 𑒧𑒼𑒢 𑒣𑒛𑓃𑒻𑒋 𑒂𑒩 𑒏𑓂𑒨𑒼 𑒢𑒯𑒱। 𑒁𑒥𑓂𑒥𑒴𑒏 𑒧𑒩𑒪𑒰𑒏 𑒥𑒰𑒠 𑒥𑒛𑓃𑒰 𑒁𑒥𑓂𑒥𑒴 (𑒥𑒛𑓃𑒏𑒰 𑒏𑒰𑒏𑒰), 𑒕𑒼𑒙𑒰 𑒁𑒥𑓂𑒥𑒴 (𑒕𑒼𑒙𑒏𑒰 𑒏𑒰𑒏𑒰) 𑒮𑒦 𑒣𑒩𑒰𑒨𑒰 𑒦𑒋 𑒑𑒹𑒪। 𑒬𑒾𑒯𑒩𑒏 𑒧𑒩𑒪𑒰𑒏 𑒥𑒰𑒠 𑒁𑒧𑓂𑒧𑒲𑒏 𑒯𑒰𑒪𑒞 𑒏𑒲 𑒩𑒯𑒻𑒏 𑒮𑒹 𑒄 𑒦𑒰𑒋 𑒮𑒦 𑒏𑒲 𑒥𑒳𑒗𑒞-𑒑𑒧𑒞? -“𑒐𑒰𑒪𑒰 𑒠𑒱𑒪𑓂𑒪𑒲𑒧𑒹 𑒩𑒯𑒻𑒞 𑒩𑒯𑒟𑒱। 𑒁𑒧𑓂𑒧𑒲𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒯𑒧𑒩 𑒣𑒜𑓃𑒰𑒃 𑒕𑒳𑒙𑒱 𑒑𑒹𑒪। 𑒏𑒙𑒱𑒯𑒰𑒩𑒧𑒹 𑒣𑒜𑓃𑒻𑒞 𑒩𑒯𑒱𑒞𑒯𑒳𑒿, 𑒤𑒴𑒤𑒲𑒖𑒰𑒠 𑒦𑒰𑒋 (𑒣𑒱𑒮𑒱𑒨𑒾𑒞) 𑒏𑒯𑒢𑒯𑒱𑒨𑒼 𑒩𑒯𑒋 𑒖𑒹 𑒞𑒼𑒩𑒰 𑒖𑒞𑒹𑒏 𑒣𑒜𑓃𑒥𑒰𑒏 𑒕𑒾𑒏 𑒣𑒜𑓃, 𑒧𑒳𑒠𑒰 𑒄 𑒮𑒦 𑒞𑒐𑒢 𑒑𑒰𑒧𑒧𑒹 𑒄𑒿𑒙𑒰 𑒅𑒚𑒥𑒱𑒞𑒋 𑒮𑒹 𑒯𑒧𑒩𑒰 𑒠𑒹𑒐𑒪 𑒯𑒼𑒃𑒞𑒋? 𑒂 𑒄 𑒑𑒣 𑒋𑒏𑒩𑒰 𑒮𑒦𑒏𑒹𑒿 𑒯𑒧 𑒥𑒳𑒗𑒻𑒨𑒼 𑒢𑒯𑒱 𑒠𑒹𑒢𑒹 𑒕𑒱𑒨𑒻𑒏। -“𑒂 𑒄 𑒮𑒦 𑒏𑒲 𑒏𑒯𑒻𑒨𑒹 𑒖𑒹 𑒯𑒧 𑒁𑒣𑒢 𑒁𑒯𑒪𑒱𑒨𑒰 (𑒮𑓂𑒞𑓂𑒩𑒲) 𑒂 𑒮𑒰𑒩𑒱-𑒯𑒧𑒖𑒳𑒪𑓂𑒤(𑒮𑒰𑒩𑒱-𑒮𑒰𑒜𑓃𑒴)𑒏 𑒣𑒰𑒕𑒰𑒿 𑒋𑒏𑒩𑒰 𑒮𑒦𑒣𑒩 𑒡𑓂𑒨𑒰𑒢 𑒢𑒯𑒱 𑒠𑓄 𑒩𑒯𑒪 𑒕𑒱𑒨𑒻𑒏? 𑒠𑒴 𑒩𑓀𑒑 𑒏𑒩𑒻𑒞 𑒕𑒱𑒨𑒻𑒏?
-“𑒠𑒱𑒪𑓂𑒪𑒲𑒧𑒹 𑒂𑒋𑒪 𑒩𑒯𑒲 𑒑𑒰𑒧 𑒕𑒼𑒛𑓃𑒱 𑒏𑒋 𑒞𑒿 𑒣𑒯𑒱𑒢𑒹 𑒢𑒼𑒋𑒛𑒰𑒧𑒹 𑒣𑒱𑒞𑒩𑒱𑒨𑒰 𑒥𑒩𑓂𑒞𑓂𑒞𑒢𑒏 𑒠𑒼𑒏𑒰𑒢𑒧𑒹 𑒥𑓂𑒩𑒰𑒮𑒼𑒮𑒿 𑒥𑒩𑓂𑒞𑒢 𑒮𑒰𑒤 𑒏𑒩𑒻𑒞 𑒩𑒯𑒲। 𑒁𑒪𑓂𑒪𑒰𑒯𑒏 𑒏𑒩𑒧𑒮𑒿 𑒮𑒩𑓂𑒤𑒴 𑒦𑒹𑒙𑒱 𑒑𑒹𑒪। 𑒐𑒰𑒪𑒰𑒖𑒰𑒠 𑒦𑒰𑒋 (𑒧𑒾𑒮𑒹𑒩𑒰 𑒦𑒰𑒋) 𑒏𑒹𑒩 𑒮𑓀𑒑𑒲 𑒩𑒯𑒋 𑒮𑒩𑓂𑒤𑒴। 𑒍𑒏𑒩𑒹𑒮𑒿 𑒮𑒦 𑒄𑒪𑒧 𑒮𑒱𑒐𑒪𑒯𑒳𑒿। 𑒧𑒳𑒠𑒰 𑒄 𑒏𑒯𑒱 𑒠𑒱𑒁𑒋 𑒖𑒹 𑒯𑒧 𑒏𑒯𑒱𑒨𑒼 𑒍𑒏𑒩𑒰 𑒠𑒑𑒰 𑒠𑒹𑒢𑒹 𑒯𑒼𑒃𑒨𑒻𑒏। 𑒮𑒩𑓂𑒤𑒴𑒏 𑒮𑓂𑒫𑒦𑒰𑒫 𑒞𑒿 𑒁𑒯𑒰𑒿𑒏𑒹𑒿 𑒥𑒳𑒗𑒪𑒹 𑒁𑒕𑒱। 𑒏𑒢𑒱𑒨𑒼 𑒁𑒢𑓂𑒨𑒰𑒨 𑒂 𑒥𑒹𑒃𑒧𑒰𑒢𑒲 𑒍𑒏𑒩𑒰 𑒣𑒮𑒢𑓂𑒠 𑒢𑒯𑒱 𑒕𑒻𑒏, 𑒮𑒦𑒮𑒿 𑒥𑒞𑒏𑒯𑒲 𑒦𑒹𑒪 𑒕𑒻𑒏, 𑒧𑒳𑒠𑒰 𑒯𑒧𑒩𑒰𑒮𑒿 𑒂𑒃 𑒡𑒩𑒱 𑒏𑒼𑒢𑒼 𑒧𑒼𑒢 𑒧𑒳𑒙𑒫𑓂𑒫𑒪 𑒢𑒯𑒱 𑒦𑒹𑒪 𑒕𑒻𑒏। 𑒯𑒧𑒩 𑒮𑒹 𑒢𑒲𑒨𑒞 𑒩𑒯𑒱𑒞𑒋 𑒞𑒿 𑒍𑒏𑒩𑒼 𑒮𑓀𑒑 𑒢𑒹 𑒯𑒧𑒩 𑒮𑓀𑒥𑓀𑒡 𑒙𑒳𑒙𑒱𑒞𑒋। 𑒂 𑒋𑒯𑒱 𑒬𑒯𑒩𑒧𑒹 𑒍 𑒂𑒢 𑒦𑒋 𑒯𑒧𑒩𑒰 𑒁𑒣𑓂𑒣𑒢 𑒥𑒳𑒗𑒪𑒏 𑒂 𑒄 𑒮𑒦 ? 𑒍 𑒞𑒿 𑒑𑒾𑒂𑒿 𑒕𑒲, 𑒧𑒳𑒠𑒰 𑒐𑒪𑒲𑒪? 𑒍𑒏𑒩𑒼𑒮𑒿 𑒣𑒳𑒕𑒱𑒨𑒾𑒏।
-“𑒧𑒰𑒋𑒏 𑒧𑒼𑒢 𑒣𑒛𑓃𑒱 𑒖𑒰𑒃𑒋 𑒖𑒯𑒱𑒨𑒰 𑒄 𑒦𑒠𑒫𑒩𑒱𑒨𑒰 𑒪𑒰𑒡𑒻𑒋। 𑒧𑒼𑒢 𑒢𑒯𑒱 𑒣𑒰𑒛𑓃𑒋 𑒔𑒰𑒯𑒻𑒞 𑒕𑒲, 𑒂 𑒞𑒰𑒯𑒱 𑒪𑒹𑒪 𑒫𑓂𑒨𑒮𑓂𑒞 𑒩𑒯𑒻𑒞 𑒕𑒲। 𑒧𑒳𑒠𑒰 𑒂𑒃 𑒧𑒰𑒋𑒏 𑒍 𑒧𑒵𑒞𑓂𑒨𑒳 𑒩𑒯𑒱-𑒩𑒯𑒱 𑒏𑒼𑒜𑓃 𑒞𑒼𑒛𑓃𑒱 𑒩𑒯𑒪 𑒁𑒕𑒱।
𑒢𑒥𑒲 𑒥𑒏𑒮𑒏 𑒏𑓀𑒚 𑒏𑒯𑒻𑒞-𑒏𑒯𑒻𑒞 𑒦𑒩𑒱𑒨𑒰 𑒑𑒹𑒪𑒻𑒏। 𑒧𑒳𑒠𑒰 𑒏𑒢𑒹𑒏 𑒣𑒰𑒢𑒱 𑒣𑒲𑒥𑒱 𑒤𑒹𑒩 𑒍 𑒧𑒰𑒋𑒏 𑒮𑓂𑒧𑒩𑒝 𑒏𑒩𑒋 𑒪𑒰𑒑𑒪।
-“𑒢𑒥𑒲 𑒮𑒰𑒯𑒹𑒥𑒖𑒰𑒠𑒹, 𑒏𑒢𑒹𑒏 𑒍𑒯𑒱 𑒏𑒚𑒾𑒞𑒏𑒹𑒿 𑒐𑒳𑒙𑓂𑒙𑒰𑒏 𑒪𑒑 𑒏𑒋 𑒠𑒱𑒎𑒏। 𑒥𑒛𑓂𑒛 𑒣𑒰𑒢𑒱 𑒔𑒴𑒥𑒱 𑒩𑒯𑒪 𑒕𑒻𑒏 𑒍𑒞𑒋। 𑒄 𑒥𑒰𑒠𑒩𑒏𑒰𑒪 𑒮𑒦 𑒮𑒰𑒪 𑒠𑒳𑓁𑒐 𑒠𑒻𑒞 𑒁𑒕𑒱। 𑒮𑒼𑒔𑒱𑒞𑒹 𑒩𑒯𑒱 𑒑𑒹𑒪𑒯𑒳𑒿 𑒖𑒹 𑒒𑒩 𑒕𑒛𑓃𑒰𑒨𑒥। 𑒧𑒳𑒠𑒰 𑒢𑒯𑒱 𑒦𑒋 𑒮𑒏𑒪। 𑒒𑒩𑒼𑒏 𑒏𑒢𑒲 𑒧𑒩𑒼𑒧𑒞𑒱 𑒏𑒩𑒰𑒋𑒥 𑒂𑒫𑒬𑓂𑒨𑒏 𑒕𑒪, 𑒧𑒳𑒠𑒰 𑒮𑒹𑒯𑒼 𑒢𑒯𑒱 𑒦𑒋 𑒮𑒏𑒪। 𑒚𑒰𑒧-𑒚𑒰𑒧 𑒮𑒼𑓀𑒑𑒩 𑒪𑒰𑒑𑒪 𑒁𑒕𑒱। 𑒤𑒴𑒮𑒼𑒏 𑒒𑒩 𑒏𑒼𑒢𑒼 𑒒𑒩 𑒯𑒼𑒃𑒞 𑒕𑒻𑒏? 𑒚𑒰𑒧-𑒚𑒰𑒧 𑒔𑒳𑒥𑒱 𑒩𑒯𑒪 𑒁𑒕𑒱, 𑒍𑒞𑒹𑒏 𑒏𑒚𑒾𑒞𑒼 𑒢𑒯𑒱 𑒁𑒕𑒱 𑒒𑒩𑒧𑒹। 𑒐𑒹𑒢𑒰𑒃 𑒏𑒼𑒢𑒰 𑒥𑒢𑒞 𑒮𑒹 𑒢𑒯𑒱 𑒖𑒰𑒢𑒱। 𑒍𑒮𑒰𑒩𑒰𑒣𑒩𑒏 𑒔𑒴𑒪𑓂𑒯𑒱𑒣𑒩 𑒞𑒿 𑒣𑒰𑒢𑒱𑒏 𑒧𑒼𑒙 𑒙𑒒𑒰𑒩 𑒐𑒮𑒱 𑒩𑒯𑒪 𑒁𑒕𑒱। 𑒋𑒏𑒙𑒰 𑒂𑒩 𑒁𑒐𑒛𑓃𑒰 𑒔𑒴𑒪𑓂𑒯𑒱 𑒁𑒕𑒱, 𑒧𑒳𑒠𑒰 𑒖𑒹 𑒍 𑒙𑒴𑒙𑒱 𑒖𑒋𑒞, 𑒞𑒐𑒢 𑒞𑒿 𑒔𑒴𑒛𑓃𑒰-𑒑𑒳𑒛𑓃 𑒤𑒰𑒿𑒏𑒱 𑒏𑒋 𑒏𑒰𑒖 𑒔𑒪𑒥𑒋 𑒣𑒛𑓃𑒞। 𑒮𑒧𑒨-𑒮𑒰𑒪 𑒋𑒯𑒹𑒢 𑒕𑒻𑒏 𑒖𑒹 𑒔𑒴𑒪𑓂𑒯𑒱 𑒥𑒢𑒰𑒋𑒥 𑒞𑒿 𑒮𑒳𑒐𑒹𑒥𑒹 𑒢𑒯𑒱 𑒏𑒩𑒞। 𑒖𑒰𑒛𑓃𑒢𑒱 𑒮𑒹𑒯𑒼 𑒮𑒦𑒙𑒰 𑒦𑒲𑒖𑒱 𑒑𑒹𑒪 𑒁𑒕𑒱। 𑒦𑒳𑒮𑓂𑒮𑒲𑒣𑒩 𑒐𑒹𑒢𑒰𑒃 𑒥𑒢𑒰𑒥𑒋 𑒣𑒛𑓃𑒞”।
-“𑒣𑒃𑒜𑓃𑒱𑒨𑒰 𑒅𑒖𑒩𑒰 𑒢𑒳𑒂𑒏 𑒂𑒿𑒔𑒩 𑒍𑒜𑓃𑒢𑒹, 𑒟𑒩𑒟𑒩𑒰𑒃𑒞 𑒏𑒩𑒲𑒧𑒰 𑒥𑒹𑒑𑒧 𑒧𑒰𑒢𑒹 𑒯𑒧𑒩 𑒧𑒰𑒋, 𑒔𑒾𑒠𑒯 𑒥𑒩𑒐𑒏 𑒁𑒣𑒢 𑒥𑒹𑒙𑒰𑒏 𑒧𑒰𑒢𑒹 𑒯𑒧𑒩 𑒮𑓀𑒑, 𑒏𑒐𑒢𑒼 𑒮𑒼𑓀𑒑𑒩𑒏𑒹𑒿 𑒮𑒼𑒗 𑒏𑒩𑒟𑒱 𑒞𑒿 𑒏𑒐𑒢𑒼 𑒏𑒚𑒾𑒞𑒏𑒹𑒿 𑒋𑒞𑒋𑒮𑒿 𑒍𑒞𑒋 𑒒𑒳𑒮𑒏𑒰𑒥𑒟𑒱। 𑒖𑒞𑒋 𑒙𑒒𑒰𑒩 𑒏𑒧 𑒪𑒰𑒑𑒢𑓂𑒯𑒱 𑒍𑒞𑒋𑒮𑒿 𑒒𑒳𑒮𑒏𑒰𑒏𑒋, 𑒖𑒞𑒋 𑒥𑒹𑒬𑒲 𑒪𑒰𑒑𑒢𑓂𑒯𑒱 𑒍𑒞𑒋 𑒠𑒋 𑒠𑒻𑒞 𑒕𑒪𑒲𑒯। 𑒮𑒾𑒿𑒮𑒹 𑒒𑒩-𑒣𑒱𑒔𑓂𑒕𑒩 𑒦𑒋 𑒑𑒹𑒪 𑒕𑒪। 𑒏𑒼𑒢𑒙𑒰 𑒪𑒑 𑒋𑒏 𑒚𑒰𑒧 𑒣𑒰𑒢𑒱 𑒢𑒘𑒱 𑒔𑒴𑒥𑒱 𑒩𑒯𑒪 𑒕𑒪, 𑒞𑒞𑒋 𑒖𑒰𑒋 𑒚𑒰𑒜𑓃 𑒦𑒋 𑒑𑒹𑒪𑒲𑒯।
-“𑒏𑒞𑒹𑒏 𑒩𑒰𑒮 𑒐𑒜𑓃 𑒔𑒩𑒧𑒹 𑒁𑒢𑒹𑒩 𑒣𑒛𑓃𑒪 𑒕𑒪। 𑒣𑒜𑓃𑒳𑒂 𑒏𑒰𑒏𑒰𑒏𑒹𑒿 𑒏𑒯𑒪𑒱𑒨𑒢𑓂𑒯𑒱 𑒢𑒯𑒱। 𑒒𑒩 𑒕𑒛𑓃𑒥𑒰 𑒪𑒹𑒢𑒹 𑒩𑒯𑒱𑒞𑒯𑒳𑒿”।
-“𑒨𑒾 𑒥𑒰𑒥𑒴। 𑒒𑒩 𑒕𑒛𑓃𑒋𑒥𑒰𑒏 𑒪𑒹𑒪 𑒣𑒳𑒂𑒩 𑒞𑒿 𑒦𑒹𑒙𑒢𑒱𑒯𑒰𑒩 𑒢𑒯𑒱। 𑒂 𑒑𑒩𑒲𑒥-𑒧𑒮𑒼𑒧𑒰𑒞𑒏 𑒒𑒩 𑒐𑒜𑓃𑒮𑒿 𑒏𑒹 𑒕𑒛𑓃𑒰𑒥𑒋 𑒠𑒹𑒞”।
-“𑒯𑒧𑒩𑒰 𑒐𑒜𑓃𑒮𑒿 𑒂 𑒣𑒳𑒂𑒩𑒮𑒿 𑒒𑒩 𑒕𑒛𑓃𑒥𑒨𑒥𑒰𑒧𑒹 𑒯𑒼𑒧𑒨𑒥𑒪𑒰 𑒐𑒩𑒔𑒰𑒏 𑒁𑒢𑓂𑒞𑒩 𑒞𑒯𑒱𑒨𑒰 𑒢𑒯𑒱 𑒥𑒳𑒗𑒪 𑒕𑒪।
-“𑒮𑒹 𑒞𑒿 𑒁𑒧𑓂𑒧𑒲, 𑒐𑒜𑓃𑒮𑒿 𑒕𑒛𑓃𑒰𑒋𑒪 𑒒𑒩𑒏 𑒬𑒰𑒢 𑒞𑒿 𑒠𑒹𑒐𑒥𑒰 𑒖𑒼𑒑 𑒯𑒼𑒃𑒞 𑒕𑒻𑒏। 𑒣𑒜𑓃𑒳𑒂 𑒏𑒰𑒏𑒰𑒏 𑒒𑒩 𑒠𑒹𑒐𑒻𑒞 𑒕𑒱𑒨𑒢𑓂𑒯𑒱। 𑒠𑒹𑒐𑒋𑒧𑒹 𑒏𑒞𑒹𑒏 𑒮𑒳𑒢𑓂𑒠𑒩 𑒪𑒑𑒻𑒞 𑒁𑒕𑒱 𑒂 𑒏𑒹𑒯𑒢𑒼 𑒥𑒩𑒐𑒰 𑒯𑒼𑒁𑒋, 𑒋𑒏𑒼 𑒚𑒼𑒣 𑒣𑒰𑒢𑒱 𑒢𑒯𑒱 𑒔𑒳𑒥𑒻𑒞 𑒁𑒕𑒱”।
-“𑒮𑒹 𑒞𑒿 𑒮𑒦𑒮𑒿 𑒢𑒲𑒏 𑒒𑒩 𑒯𑒼𑒃𑒞 𑒁𑒕𑒱 𑒏𑒼𑒚𑒰𑒥𑒪𑒰”।
-“𑒋𑒯, 𑒏𑒲 𑒏𑒯𑒻𑒞 𑒕𑒲? 𑒑𑒱𑒪𑒹𑒥𑒰𑒮𑒿 𑒂 𑒮𑒳𑒩𑒐𑒲𑒮𑒿 𑒄𑒿𑒙𑒰 𑒖𑒼𑒛𑓃𑒹𑒢𑒹 𑒏𑒼𑒚𑒰𑒏 𑒒𑒩 𑒦𑒋 𑒖𑒰𑒃𑒞 𑒁𑒕𑒱? 𑒂 𑒢𑒹𑒓𑒩𑒰𑒏 𑒒𑒩 𑒞𑒿 𑒮𑒲𑒧𑒹𑒢𑓂𑒙𑒮𑒿 𑒖𑒼𑒛𑓃𑒪 𑒕𑒻𑒏, 𑒧𑒳𑒠𑒰 𑒣𑒩𑒳𑒏𑒰𑒿 𑒞𑒞𑒹𑒏 𑒔𑒳𑒥𑒻𑒞 𑒕𑒪 𑒮𑒹 𑒣𑒴𑒕𑒴 𑒢𑒯𑒱”।
-“𑒮𑒹?”
-“𑒯𑒿 𑒨𑒻 𑒁𑒧𑓂𑒧𑒲। 𑒮𑒦 𑒥𑒩𑒐 𑒖𑓂𑒨𑒼𑒿 𑒕𑒛𑓃𑒥𑒰 𑒠𑒲, 𑒞𑒿 𑒍𑒯𑒱𑒮𑒿 𑒢𑒲𑒏 𑒏𑒼𑒢𑒼 𑒒𑒩 𑒯𑒼𑒃𑒞 𑒕𑒻𑒏?”
-“𑒔𑒰𑒩𑒱𑒧 𑒥𑒩𑒐 𑒖𑒹 𑒕𑒛𑓃𑒥𑒹𑒢𑒹 𑒕𑒪𑒯𑒳𑒿 𑒞𑒏𑒩 𑒥𑒰𑒠𑒼 𑒣𑒯𑒱𑒪 𑒥𑒩𑒐𑒰𑒧𑒹 𑒐𑒴𑒥 𑒔𑒳𑒁𑒪 𑒕𑒪”।
-“𑒣𑒯𑒱𑒪𑒳𑒏𑒹 𑒥𑒩𑒐𑒰𑒧𑒹 𑒔𑒳𑒁𑒪 𑒕𑒪 𑒢𑒹 𑒂 𑒤𑒹𑒩 𑒮𑒦 𑒞𑒯 𑒁𑒣𑒢 𑒖𑒑𑒯 𑒡𑓄 𑒪𑒹𑒢𑒹 𑒯𑒼𑒋𑒞। 𑒞𑒐𑒢 𑒢𑒯𑒱 𑒔𑒳𑒁𑒪 𑒢𑒹 𑒥𑒰𑒠𑒧𑒹”।
-“𑒯𑒿, 𑒮𑒹 𑒞𑒿 𑒞𑒏𑒩𑒰 𑒥𑒰𑒠 𑒞𑒲𑒢 𑒥𑒩𑒐 𑒢𑒯𑒱 𑒔𑒳𑒁𑒪”।
-“𑒞𑒐𑒢𑒹 𑒏𑒰𑒏𑒲 𑒥𑒖𑒻𑒞 𑒁𑒋𑒪𑒲𑒯-
-“𑒖𑒢𑒧𑒱 𑒏𑒋 𑒚𑒰𑒜𑓃 𑒦𑒹𑒪 𑒁𑒕𑒱 𑒂 𑒏𑒲 𑒮𑒦 𑒁𑒯𑒰𑒿𑒏𑒹𑒿 𑒮𑒱𑒐𑒰 𑒩𑒯𑒪 𑒁𑒕𑒱। 𑒏𑒢𑒹𑒏 𑒅𑒥𑒹𑒛𑓃 𑒖𑒹𑒏𑒰𑒿 𑒦𑒹𑒪𑒻𑒏 𑒞𑒿 𑒮𑒼𑒔𑒪𑒯𑒳𑒿 𑒖𑒹 𑒥𑒯𑒱𑒢-𑒠𑒰𑒃𑒏 𑒐𑒼𑒖 𑒣𑒳𑒕𑒰𑒩𑒱 𑒏𑒋 𑒂𑒥𑒲”।
-“𑒥𑒳𑒢𑓂𑒢𑒲 𑒩𑒳𑒏𑒱 𑒑𑒹𑒪 𑒕𑒪। 𑒯𑒧 𑒏𑒰𑒏𑒰𑒏 𑒒𑒩 𑒠𑒱𑒮 𑒑𑒹𑒪𑒯𑒳𑒿 𑒂 𑒠𑒳𑒢𑒴 𑒠𑒱𑒨𑒰𑒠𑒢𑒲𑒧𑒹 𑒑𑒣-𑒬𑒣 𑒬𑒳𑒩𑒴 𑒦𑒋 𑒑𑒹𑒪𑒢𑓂𑒯𑒱।
-“𑒮𑒰𑒿𑒗𑒏 𑒗𑒪𑒤𑒪𑒲 𑒬𑒳𑒩𑒴 𑒦𑒹𑒪, 𑒦𑒠𑒥𑒩𑒱𑒨𑒰 𑒁𑒢𑓂𑒯𑒰𑒩𑒏, 𑒞𑒿 𑒏𑒰𑒏𑒲 𑒥𑒯𑒩𑒰𑒃𑒞 𑒏𑒯𑒻𑒞 𑒑𑒹𑒪𑒲𑒯-
-“𑒥𑒯𑒱𑒢 𑒠𑒰𑒃, 𑒂𑒑𑒱𑒏 𑒖𑒩𑒴𑒩𑒲 𑒣𑒛𑓃𑒨 𑒞𑒿 𑒯𑒧𑒩 𑒒𑒩𑒮𑒿 𑒪𑒋 𑒖𑒰𑒋𑒥”।
-“𑒢𑒘𑒱 𑒥𑒯𑒱𑒢𑒠𑒰𑒃। 𑒮𑒪𑒰𑒃𑒧𑒹 𑒠𑒴-𑒞𑒲𑒢 𑒙𑒰 𑒏𑒰𑒚𑒲 𑒕𑒻𑒏। 𑒧𑒳𑒠𑒰 𑒧𑒮𑒳𑒂 𑒑𑒹𑒪 𑒕𑒻𑒏। 𑒯𑒹, 𑒄 𑒛𑒱𑒥𑓂𑒥𑒲 𑒠𑒻𑒞 𑒕𑒱𑒨𑒢𑓂𑒯𑒱, 𑒏𑒢𑒹𑒏𑒏𑒰𑒪 𑒁𑒣𑒢 𑒔𑒳𑒪𑓂𑒯𑒰 𑒪𑒑 𑒩𑒰𑒐𑒱 𑒠𑒹𑒟𑒱𑒢𑓂𑒯 𑒞𑒿 𑒏𑒰𑒖𑒏 𑒖𑒼𑒑𑒩 𑒦𑒋 𑒖𑒋𑒞। 𑒢𑒥𑒲 𑒠𑒱𑒂 𑒣𑒚𑒰 𑒠𑒱𑒯𑒟𑒱”।
-“𑒠𑒹𑒐𑒱𑒯𑒟𑒱। 𑒅𑒣𑒰𑒮 𑒢𑒘𑒱 𑒏𑓄 𑒪𑒱𑒯𑒟𑒱 𑒮𑒹 𑒏𑒯𑒱 𑒠𑒻𑒞 𑒕𑒱𑒨𑒢𑓂𑒯𑒱, 𑒥𑒔𑓂𑒔𑒰 𑒮𑒦 𑒞𑒿 𑒯𑒧𑒩𑒰 𑒋𑒯𑒱𑒚𑒰𑒧 𑒐𑒰 𑒪𑒹𑒞”-𑒠𑒱𑒨𑒰𑒠𑒱𑒢𑒲 𑒏𑒯𑒻𑒞 𑒥𑒱𑒠𑒰 𑒦𑒹𑒪𑒲𑒯।
-“𑒏𑒩𑒲𑒧𑒰 𑒥𑒹𑒑𑒧 𑒧𑒰𑒢𑒹 𑒯𑒧𑒩 𑒧𑒰𑒋 𑒍𑒮𑒰𑒩𑒰𑒣𑒩 𑒐𑒳𑒙𑓂𑒙𑒰 𑒦𑒩𑒹 𑒣𑒲𑒚 𑒮𑒙𑒰 𑒥𑒻𑒮𑒱 𑒑𑒹𑒪𑒲𑒯।
-“𑒏𑒲 𑒮𑒼𑒔𑒱 𑒩𑒯𑒪 𑒕𑒲 𑒁𑒧𑓂𑒧𑒲। 𑒏𑒯𑒴 𑒢𑒹 ?”
-“𑒨𑒻𑒯 𑒤𑒳𑒮𑒱𑒨𑒰𑒯𑒲 𑒑𑒣 𑒮𑒦, 𑒁𑒯𑒰𑒿𑒏 𑒁𑒥𑓂𑒥𑒴𑒏 𑒣𑒯𑒪𑒧𑒰𑒢𑒲𑒏। 𑒏𑒰𑒏𑒰 𑒯𑒳𑒢𑒏𑒰 𑒖𑒹 𑒏𑒯𑒻𑒞 𑒩𑒯𑒟𑒱𑒢𑓂𑒯 𑒮𑒻𑒯।
-“𑒐𑒳𑒙𑓂𑒙𑒰 𑒣𑒯𑒪𑒧𑒰𑒢 𑒕𑒟𑒱 𑒄”।
-“𑒮𑒹 𑒢𑒯𑒱 𑒏𑒯𑒴 𑒏𑒰𑒏𑒰। 𑒖𑒥𑒩𑒠𑒮𑓂𑒞𑒲𑒏 𑒧𑒰𑒩𑒱-𑒣𑒲𑒙𑒱 𑒯𑒧 𑒢𑒯𑒱 𑒏𑒩𑒻𑒞 𑒕𑒲, 𑒞𑒰𑒯𑒱 𑒠𑓂𑒫𑒰𑒩𑒹 𑒢𑒹 𑒁𑒯𑒰𑒿 𑒄 𑒑𑒣 𑒏𑒯𑒱 𑒩𑒯𑒪 𑒕𑒲”।
-“𑒩𑒯𑒧𑒰𑒢 𑒏𑒰𑒏𑒰 𑒂 𑒯𑒳𑒧𑒰𑒨𑒴𑒿 𑒦𑒰𑒞𑒱𑒖। 𑒣𑒱𑒞𑓂𑒞𑒲-𑒦𑒰𑒞𑒱𑒖𑒧𑒹 𑒍𑒯𑒱𑒢𑒰 𑒑𑒣 𑒯𑒼𑒃𑒞 𑒕𑒪𑒢𑓂𑒯𑒱, 𑒖𑒹𑒢𑒰 𑒠𑒼𑒮𑓂𑒞𑒱𑒨𑒰𑒩𑒲𑒧𑒹 𑒑𑒣 𑒯𑒼𑒃𑒞 𑒕𑒻𑒏। 𑒁𑒐𑒩𑒰𑒯𑒰𑒧𑒹 𑒖𑒐𑒢 𑒯𑒳𑒧𑒰𑒨𑒴𑒿 𑒮𑒦𑒏𑒹𑒿 𑒥𑒖𑒰𑒛𑓃𑒱 𑒠𑒹𑒟𑒱 𑒞𑒐𑒢 𑒁𑒢𑓂𑒞𑒱𑒧𑒧𑒹 𑒩𑒯𑒧𑒰𑒢 𑒯𑒳𑒢𑒏𑒰𑒮𑒿 𑒪𑒛𑓃𑒨 𑒂𑒥𑒟𑒱। 𑒏𑒰𑒏𑒰 𑒏𑒯𑒱𑒨𑒼 𑒯𑒳𑒢𑒏𑒰 𑒢𑒯𑒱 𑒖𑒲𑒞𑒋 𑒠𑒹𑒪𑒐𑒱𑒢𑓂𑒯।
-“𑒯𑒳𑒧𑒰𑒨𑒴𑒿𑒏 𑒏𑒢𑒱𑒨𑒰𑒿 𑒧𑒰𑒢𑒹 𑒯𑒧 𑒢𑒫𑒹-𑒢𑒫 𑒒𑒩𑒧𑒹 𑒂𑒋𑒪 𑒕𑒪𑒯𑒳𑒿। 𑒏𑒼𑒯𑒥𑒩 𑒪𑒯𑒚𑒲 𑒮𑒦 𑒯𑒼𑒃𑒞 𑒕𑒪𑒻𑒏 𑒍𑒯𑒱 𑒮𑒧𑒨𑒧𑒹। 𑒂𑒥 𑒢𑒹 𑒖𑒰𑒢𑒱 𑒧𑒳𑒪𑓂𑒪𑒰 𑒮𑒦 𑒏𑒱𑒋𑒏 𑒋𑒏𑒩 𑒫𑒱𑒩𑒼𑒡𑒲 𑒦𑒋 𑒑𑒹𑒪 𑒁𑒕𑒱, 𑒞𑒻𑒨𑒼 𑒪𑒼𑒏 𑒏𑒩𑒱𑒞𑒹 𑒁𑒕𑒱 𑒏𑒲 ? 𑒧𑒳𑒪𑓂𑒪𑒰 𑒮𑒦𑒏 𑒑𑒣 𑒖𑒹 𑒧𑒰𑒢𑒋 𑒪𑒰𑒑𑒲 𑒮𑒦 𑒚𑒰𑒧 𑒞𑒐𑒢 𑒞𑒿 𑒦𑒹𑒪 !
-“𑒂 𑒋𑒯𑒱 𑒞𑒩𑒯𑒏 𑒫𑒰𑒞𑒰𑒫𑒩𑒝 𑒒𑒩𑒧𑒹 𑒠𑒹𑒐𑒪𑒯𑒳𑒿 𑒞𑒿 𑒧𑒼𑒢 𑒣𑓂𑒩𑒮𑒢𑓂𑒢 𑒦𑓄 𑒑𑒹𑒪। 𑒒𑒩𑒏 𑒠𑒳𑒪𑒰𑒩𑒱 𑒕𑒪𑒯𑒳𑒿 𑒂 𑒮𑒰𑒮𑒳𑒩𑒼 𑒞𑒹𑒯𑒢𑒹 𑒦𑒹𑒙𑒱 𑒑𑒹𑒪। 𑒮𑒧𑒨 𑒥𑒲𑒞𑒋 𑒪𑒰𑒑𑒪। 𑒧𑒳𑒠𑒰 𑒯𑒳𑒧𑒰𑒨𑒴𑒿𑒏 𑒫𑒱𑒡𑒫𑒰 𑒋𑒞𑒹𑒏 𑒖𑒪𑓂𑒠𑒲 𑒏𑒯𑒰𑒨 𑒪𑒰𑒑𑒥 𑒮𑒹 𑒢𑒯𑒱 𑒥𑒳𑒗𑒪 𑒕𑒪 𑒞𑒯𑒱𑒨𑒰। 𑒂𑒥 𑒞𑒿 𑒮𑒦 𑒣𑓂𑒩𑒏𑒰𑒩𑒏 𑒫𑒱𑒬𑒹𑒭𑒝𑒏 𑒁𑒦𑓂𑒨𑒰𑒮 𑒦𑓄 𑒑𑒹𑒪 𑒁𑒕𑒱। 𑒗𑒑𑒛𑓃𑒰-𑒗𑒰𑒿𑒙𑒱𑒏 𑒥𑒲𑒔 𑒏𑓂𑒨𑒼 𑒄𑒯𑒼 𑒏𑒯𑒱 𑒠𑒻𑒞 𑒁𑒕𑒱- 𑒫𑒩𑒐𑒾𑒏𑒲, 𑒫𑒩𑒏𑒹𑒿 𑒧𑒰𑒩𑒱 𑒛𑒰𑒃𑒢 𑒮𑒱𑒐𑒢𑒹 𑒁𑒕𑒱 !
-“𑒯𑒳𑒧𑒰𑒨𑒴𑒿𑒏 𑒖𑒱𑒫𑒻𑒞 𑒖𑒹 𑒮𑒦𑒏 𑒠𑒳𑒪𑒰𑒩𑒱 𑒕𑒪𑒯𑒳𑒿 𑒞𑒏𑒩 𑒥𑒰𑒠 𑒮𑒦𑒏 𑒂𑒿𑒐𑒱𑒏 𑒏𑒰𑒿𑒙 𑒦𑒋 𑒑𑒹𑒪𑒯𑒳𑒿। 𑒃𑒠𑓂𑒠𑒞𑒏 𑒥𑒰𑒠 𑒢𑒻𑒯𑒩𑒮𑒿 𑒠𑒼𑒮𑒩 𑒥𑒱𑒨𑒰𑒯 𑒏𑒩𑒋𑒥𑒰 𑒪𑒹𑒪 𑒮𑒹𑒯𑒼 𑒦𑒰𑒋 𑒮𑒦 𑒂𑒋𑒪 𑒧𑒳𑒠𑒰 𑒁𑒯𑒰𑒿 𑒮𑒦𑒏 𑒧𑒳𑒿𑒯 𑒠𑒹𑒐𑒻𑒞 𑒩𑒯𑒥𑒰𑒏 𑒃𑒔𑓂𑒕𑒰 𑒧𑒰𑒞𑓂𑒩 𑒩𑒯𑒪”।
𑒢𑒥𑒲 𑒥𑒏𑒮 𑒥𑒰𑒖𑒪-“𑒅𑒖𑒩𑒰 𑒢𑒴𑒂, 𑒥𑒱𑒢 𑒔𑒴𑒛𑓃𑒲-𑒮𑒱𑒢𑓂𑒠𑒴𑒩𑒏 𑒧𑒰𑒋𑒏 𑒫𑒻𑒡𑒫𑓂𑒨 𑒥𑒪𑒰 𑒔𑒹𑒯𑒩𑒰 𑒋𑒐𑒢𑒼 𑒯𑒧𑒩𑒰 𑒧𑒼𑒢𑒹 𑒁𑒕𑒱। 𑒤𑒹𑒩 𑒍𑒯𑒱 𑒦𑒠𑒥𑒩𑒱𑒨𑒰 𑒩𑒰𑒞𑒱𑒧𑒹 𑒧𑒰𑒋 𑒂𑒑𑒰𑒿 𑒏𑒯𑒋 𑒪𑒑𑒪𑒲𑒯।
-“𑒩𑒯𑒧𑒰𑒢 𑒏𑒰𑒏𑒰 𑒯𑒧𑒩 𑒣𑒏𑓂𑒭 𑒪𑒋 𑒏𑒱𑒕𑒳 𑒥𑒰𑒖𑒱 𑒠𑒹𑒪𑒐𑒱𑒢𑓂𑒯 𑒋𑒏 𑒥𑒹𑒩, 𑒞𑒿 𑒯𑒧𑒩 𑒮𑒰𑒮𑒳-𑒮𑒮𑒳𑒩 𑒏𑒯𑒋 𑒪𑒑𑒪𑒐𑒱𑒢𑓂𑒯 𑒖𑒹 𑒯𑒧𑒩 𑒣𑒳𑒞𑒼𑒯𑒳𑒏𑒹𑒿 𑒠𑒴𑒩𑒱 𑒏𑒋 𑒩𑒯𑒪 𑒕𑒲। 𑒂 𑒄𑒯𑒼 𑒖𑒹 𑒧𑒳𑒠𑓂𑒠𑒲𑒥𑒰 𑒮𑒦𑒏 𑒁𑒣𑒢𑒰 𑒒𑒩𑒧𑒹 𑒒𑒙𑒢𑒰 𑒯𑒹𑒞𑒻𑒏, 𑒞𑒐𑒢 𑒢𑒹 𑒥𑒳𑒗𑒋 𑒖𑒋𑒞।
-“𑒂𑒥 𑒞𑒿 𑒢𑒹 𑒩𑒯𑒧𑒰𑒢𑒹 𑒔𑒰𑒔𑒴 𑒕𑒟𑒱 𑒂 𑒢𑒹 𑒮𑒰𑒮𑒳 𑒮𑒮𑒳𑒩 𑒮𑒹 𑒧𑒩𑒪 𑒂𑒠𑒧𑒲𑒏 𑒏𑒲 𑒐𑒱𑒡𑒰𑓀𑒬 𑒏𑒩𑒴। 𑒧𑒳𑒠𑒰 𑒋𑒏𑒼𑒙𑒰 𑒗𑒴𑒚 𑒑𑒣 𑒄 𑒮𑒦 𑒢𑒯𑒱 𑒁𑒕𑒱।
-“𑒪𑒼𑒏 𑒏𑒯𑒻𑒞 𑒕𑒻𑒏 𑒖𑒹 𑒮𑒳𑒐𑒏 𑒠𑒱𑒢 𑒖𑒪𑓂𑒠𑒲 𑒥𑒲𑒞𑒱 𑒖𑒰𑒃𑒞 𑒁𑒕𑒱, 𑒧𑒳𑒠𑒰 𑒯𑒧𑒩 𑒠𑒳𑒐𑒏 𑒠𑒱𑒢 𑒖𑒪𑓂𑒠𑒲 𑒥𑒲𑒞𑒻𑒞 𑒑𑒹𑒪, 𑒮𑒳𑒐𑒏 𑒠𑒱𑒢 𑒞𑒿 𑒋𑒐𑒢𑒼 𑒋𑒏-𑒮𑓀𑒗𑒴 𑒅𑒣𑒰𑒮𑒧𑒹 𑒐𑒳𑒖𑒪 𑒂𑒿𑒐𑒱𑒮𑒿 𑒯𑒧 𑒠𑒹𑒐𑒻𑒞 𑒩𑒯𑒻𑒞 𑒕𑒲, 𑒐𑒞𑒧𑒹 𑒢𑒯𑒱 𑒯𑒼𑒃𑒞 𑒁𑒕𑒱।
-“𑒫𑒱𑒡𑒫𑒰 𑒦𑒹𑒪𑒰𑒏 𑒁𑒞𑒱𑒩𑒱𑒏𑓂𑒞 𑒂𑒢 𑒒𑒙𑒢𑒰𑒏𑓂𑒩𑒧 𑒁𑒣𑒢 𑒢𑒱𑒨𑒞 𑒮𑒧𑒨𑒮𑒿 𑒯𑒼𑒃𑒞 𑒩𑒯𑒪। 𑒯𑒧𑒩 𑒁𑒥𑓂𑒥𑒴-𑒁𑒧𑓂𑒧𑒲𑒏 𑒧𑒵𑒞𑓂𑒨𑒳 𑒦𑒹𑒪, 𑒮𑒰𑒮-𑒮𑒮𑒳𑒩 𑒂 𑒣𑒱𑒞𑒱𑒨𑒰 𑒮𑒮𑒳𑒩 𑒩𑒯𑒧𑒰𑒢 𑒏𑒏𑒰 𑒞𑒿 𑒣𑒯𑒱𑒢𑒯𑒱𑒨𑒹 𑒑𑒳𑒖𑒩𑒱 𑒑𑒹𑒪 𑒕𑒪𑒰𑒯।
-“𑒒𑒩𑒧𑒹 𑒖𑒐𑒢 𑒥𑒿𑒙𑒥𑒰𑒩𑒰 𑒯𑒼𑒧𑒨 𑒪𑒰𑒑𑒪 𑒞𑒐𑒢 𑒮𑒧𑓂𑒣𑒞𑓂𑒞𑒱𑒏 𑒂 𑒐𑒹𑒞-𑒣𑒟𑒰𑒩𑒏 𑒥𑒐𑒩𑒰, 𑒔𑒰𑒩𑒱 𑒦𑒻𑒨𑒰𑒩𑒲𑒧𑒹 𑒧𑒰𑒞𑓂𑒩 𑒞𑒲𑒢 𑒚𑒰𑒧 𑒯𑒼𑒧𑒨 𑒪𑒰𑒑𑒪। 𑒯𑒳𑒧𑒰𑒨𑒴𑒿𑒏 𑒯𑒱𑒮𑓂𑒮𑒰 𑒞𑒲𑒢𑒴 𑒑𑒼𑒙𑒹 (𑒖𑒱𑒥𑒻𑒞 𑒦𑒻𑒨𑒰𑒩𑒲 𑒮𑒦) 𑒥𑒰𑒿𑒙𑒱 𑒪𑒹𑒪𑒢𑓂𑒯𑒱। 𑒯𑒧 𑒏𑒱𑒕𑒳 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒯𑒧𑒩 𑒑𑒳𑒖𑒩 𑒏𑒼𑒢𑒰 𑒯𑒼𑒋𑒞, 𑒕𑒯 𑒙𑒰 𑒥𑒹𑒙𑒰 𑒂 𑒋𑒏 𑒙𑒰 𑒥𑒹𑒙𑒲 𑒁𑒕𑒱 𑒞𑒿 𑒯𑒳𑒧𑒰𑒨𑒴𑒿𑒏 𑒧𑒵𑒞𑓂𑒨𑒳𑒏 𑒠𑒼𑒭 𑒯𑒧𑒩𑒰 𑒧𑒰𑒟𑒣𑒩 𑒠𑒋 𑒯𑒧𑒩 𑒧𑒳𑒿𑒯 𑒥𑒢𑓂𑒢 𑒏𑒋 𑒠𑒹𑒪 𑒑𑒹𑒪।
-“𑒞𑒲𑒢𑒴 𑒦𑒰𑒿𑒋𑒏 𑒧𑒳𑒿𑒯 𑒯𑒳𑒧𑒰𑒨𑒴𑒿𑒏 𑒮𑒧𑒏𑓂𑒭 𑒐𑒳𑒖𑒻𑒞 𑒢𑒯𑒱 𑒕𑒪𑒢𑓂𑒯𑒱 𑒧𑒳𑒠𑒰 𑒯𑒳𑒢𑒏𑒩 𑒧𑒵𑒞𑓂𑒨𑒳𑒏 𑒥𑒰𑒠 𑒯𑒳𑒢𑒏𑒩 𑒫𑒱𑒡𑒫𑒰𑒏𑒹𑒿 𑒯𑒱𑒮𑓂𑒮𑒰 𑒢𑒯𑒱 𑒠𑒹𑒥𑓄 𑒪𑒹𑒪 𑒞𑒲𑒢𑒴 𑒦𑒰𑒿𑒨 𑒮𑒦 𑒞𑒩𑒯𑒏 𑒅𑒣𑒰𑒨 𑒏𑒹𑒪𑒢𑓂𑒯𑒱। 𑒯𑒧 𑒢𑒻𑒯𑒩 𑒖𑒰 𑒏𑒋 𑒁𑒣𑒢 𑒦𑒰𑒨𑒏𑒹𑒿 𑒥𑒖𑒰 𑒏𑒋 𑒁𑒢𑒪𑒯𑒳𑒿। 𑒣𑓀𑒔𑒻𑒞𑒲 𑒦𑒹𑒪 𑒂 𑒤𑒹𑒩 𑒁𑒿𑒑𑒢𑒰𑒏 𑒏𑒰𑒞𑒧𑒹 𑒋𑒏𑒙𑒰 𑒐𑒼𑒣𑒛𑓃𑒲 𑒁𑒪𑒑𑒮𑒿 𑒞𑒲𑒢𑒴 𑒦𑒰𑒿𑒨 𑒥𑒰𑒢𑓂𑒯𑒱 𑒠𑒹𑒪𑒢𑓂𑒯𑒱, 𑒯𑒧𑒩𑒰 𑒂 𑒯𑒧𑒩 𑒥𑒔𑓂𑒔𑒰 𑒮𑒦𑒏 𑒪𑒹𑒪। 𑒡𑒰𑒢, 𑒤𑒮𑒱𑒪 𑒮𑒦 𑒮𑒹𑒯𑒼 𑒖𑒲𑒫𑒢 𑒢𑒱𑒩𑓂𑒫𑒰𑒯𑒏 𑒪𑒹𑒪 𑒠𑒹𑒥𑒰𑒏 𑒢𑒱𑒩𑓂𑒝𑒨 𑒦𑒹𑒪। 𑒯𑒧 𑒔𑒩𑒐𑒰 𑒏𑒰𑒙𑒋 𑒪𑒑𑒪𑒯𑒳𑒿। 𑒮𑒹 𑒏𑒣𑒛𑓃𑒰-𑒪𑒞𑓂𑒞𑒰 𑒍𑒞𑒋𑒮𑒿 𑒞𑒹𑒢𑒰 𑒢𑒱𑒏𑒪𑒱 𑒖𑒰𑒋।
-“𑒪𑒱𑒁 𑒮𑒪𑒰𑒃”। 𑒠𑒱𑒨𑒰𑒠𑒱𑒢𑒲 𑒂𑒥𑒱 𑒏𑒯𑒪𑒢𑓂𑒯𑒱।
“𑒯𑒿”- 𑒦𑒏 𑒙𑒳𑒙𑒪𑒢𑓂𑒯𑒱 𑒏𑒩𑒲𑒧𑒰 𑒥𑒹𑒑𑒧𑒏 𑒧𑒰𑒢𑒹 𑒯𑒧𑒩 𑒧𑒰𑒋𑒏। 𑒠𑒱𑒨𑒰𑒠𑒱𑒢𑒲 𑒮𑒪𑒰𑒃 𑒣𑒏𑒛𑓃𑒰𑒋 𑒔𑒪𑒱 𑒑𑒹𑒪𑒲𑒯।
-“𑒋𑒯𑒱 𑒥𑒹𑒩 𑒥𑒰𑒜𑒱𑒏 𑒮𑒧𑒰𑒔𑒰𑒩 𑒩𑒯𑒱 𑒩𑒯𑒱 𑒏𑒋 𑒂𑒥𑒱 𑒩𑒯𑒪 𑒁𑒕𑒱। 𑒥𑒰𑒙 𑒒𑒰𑒙 𑒮𑒦 𑒖𑒞𑒋 𑒞𑒞𑒋 𑒛𑒴𑒧𑒱 𑒩𑒯𑒪 𑒕𑒪𑒋, 𑒐𑒹𑒞 𑒮𑒦 𑒞𑒿 𑒣𑒯𑒱𑒢𑒯𑒱 𑒛𑒴𑒧𑒱 𑒑𑒹𑒪 𑒕𑒪𑒋। 𑒁𑒯𑒰𑒿𑒏 𑒣𑒜𑓃𑒳𑒂 𑒏𑒰𑒏𑒲 𑒣𑒯𑒱𑒢𑒯𑒱𑒨𑒹 𑒮𑒳𑒢𑒰 𑒠𑒹𑒢𑒹 𑒕𑒟𑒱 𑒖𑒹 𑒋𑒯𑒱 𑒥𑒹𑒩 𑒫𑒰𑒩𑓂𑒭𑒱𑒏 𑒐𑒩𑓂𑒔𑒰𑒧𑒹 𑒏𑒙𑒾𑒞𑒲 𑒯𑒼𑒋𑒞। 𑒏𑒰𑒪𑓂𑒯𑒱 𑒏𑒯𑒻𑒞 𑒩𑒯𑒟𑒱 𑒖𑒹 𑒏𑒢𑒱𑒨𑒰𑒿 𑒮𑒦𑒙𑒰 𑒤𑒮𑒱𑒪 𑒛𑒴𑒧𑒱 𑒑𑒹𑒪, 𑒋𑒯𑒱 𑒥𑒹𑒩 𑒫𑒰𑒩𑓂𑒭𑒱𑒏 𑒐𑒩𑒔𑒰𑒧𑒹 𑒏𑒙𑒾𑒞𑒲 𑒯𑒹𑒞𑒢𑓂𑒯𑒱। 𑒯𑒧 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒋𑒿 𑒨𑒻 । 𑒖𑒯𑒱𑒨𑒰 𑒤𑒮𑒱𑒪 𑒢𑒲𑒏 𑒯𑒼𑒃𑒋 𑒞𑒿 𑒯𑒧𑒩 𑒐𑒩𑒔𑒰𑒧𑒹 𑒏𑒯𑒰𑒿 𑒏𑒯𑒱𑒨𑒼 𑒥𑒹𑒬𑒲 𑒡𑒰𑒢 𑒠𑒻𑒞 𑒕𑒲 ? 𑒄 𑒑𑒣 𑒁𑒯𑒰𑒿𑒏 𑒣𑒜𑓃𑒳𑒂 𑒏𑒰𑒏𑒰 𑒮𑒳𑒢𑒱 𑒩𑒯𑒪 𑒕𑒪𑒰𑒯। 𑒥𑒖𑒪𑒰𑒯-𑒩𑒰𑒿𑒛𑓃 𑒞𑒿 𑒮𑒰𑒿𑒜𑓃 𑒦𑒋 𑒑𑒹𑒪। 𑒁𑒯𑒰𑒿𑒏 𑒣𑒜𑓃𑒳𑒂 𑒏𑒰𑒏𑒲𑒏 𑒃𑒬𑒰𑒩𑒰 𑒏𑒹𑒪𑒰𑒣𑒩 𑒍 𑒮𑒮𑒩𑒱 𑒏𑒋 𑒠𑒪𑒰𑒢 𑒠𑒱𑒬𑒱 𑒥𑒯𑒩𑒰 𑒑𑒹𑒪𑒰𑒯 𑒂 𑒯𑒧 𑒢𑒼𑒩 𑒮𑒼𑓀𑒐𑒱 𑒑𑒹𑒪𑒯𑒳𑒿। 𑒂𑒃 𑒑𑒣 𑒢𑒱𑒏𑒪𑒪 𑒞𑒿.......”।
𑒧𑒰𑒋𑒏 𑒐𑒱𑒮𑓂𑒮𑒰 𑒏𑒯𑒻𑒞-𑒏𑒯𑒻𑒞 𑒢𑒥𑒲 𑒤𑒹𑒩 𑒩𑒳𑒏𑒱 𑒑𑒹𑒪। 𑒂𑒿𑒐𑒱 𑒂 𑒏𑓀𑒚 𑒠𑒳𑒢𑒴 𑒮𑓀𑒑 𑒕𑒼𑒛𑓃𑒱 𑒩𑒯𑒪 𑒕𑒪𑒻𑒏 𑒍𑒏𑒩। 𑒏𑒱𑒕𑒳 𑒏𑒰𑒪 𑒔𑒳𑒣 𑒩𑒯𑒱 𑒥𑒰𑒖𑒪।
“𑒄 𑒐𑒱𑒮𑓂𑒮𑒰 𑒦𑒰𑒋 𑒮𑒦𑒏𑒹𑒿 𑒯𑒧 𑒏𑒯𑒥𑒼 𑒢𑒯𑒱 𑒏𑒋𑒢𑒹 𑒕𑒱𑒨𑒻𑒏। 𑒮𑒼𑒔𑒪𑒯𑒳𑒿 𑒖𑒹 𑒏𑒯𑒥𑒻𑒏 𑒞𑒿 𑒧𑒿𑒑𑒢𑒲𑒧𑒹 𑒣𑓂𑒩𑒞𑒱𑒬𑒼𑒡 𑒖𑒑𑒞𑒻𑒏। 𑒖𑒹 𑒏𑒰𑒖 𑒏𑒩𑒥𑒰𑒏 𑒮𑒹 𑒢𑒯𑒱 𑒏𑒋𑒪 𑒯𑒼𑒋𑒞𑒻𑒏। 𑒂 𑒮𑒳𑒢𑒪𑒱𑒨𑒻𑒏 𑒁𑒕𑒱 𑒖𑒹 𑒯𑒧𑒩 𑒍 𑒧𑓀𑒛𑒪𑒥𑒰 𑒦𑒰𑒋 𑒍𑒯𑒱 𑒣𑒜𑓃𑒳𑒂 𑒏𑒰𑒏𑒰𑒏 𑒏𑒯𑒪𑒧𑒹 𑒂𑒥𑒱 𑒑𑒹𑒪 𑒁𑒕𑒱”।
𑒢𑒥𑒲 𑒥𑒏𑒮 𑒤𑒹𑒩 𑒔𑒳𑒣 𑒩𑒯𑒪। 𑒦𑒰𑒋 𑒮𑒦𑒏 𑒣𑓂𑒩𑒞𑒱 𑒍𑒏𑒩 𑒣𑓂𑒩𑒹𑒧 𑒍𑒏𑒩𑒰 𑒮𑒦𑒏 𑒫𑒱𑒭𑒨𑒧𑒹 𑒥𑒹𑒬𑒲 𑒥𑒖𑒥𑒰𑒮𑒿 𑒍𑒏𑒩𑒰 𑒩𑒼𑒏𑒻𑒞 𑒕𑒪𑒻𑒏। 𑒤𑒹𑒩 𑒍 𑒧𑒰𑒋𑒏 𑒐𑒱𑒮𑓂𑒮𑒰 𑒬𑒳𑒩𑒴 𑒏𑒋𑒪𑒏।
-“𑒧𑒰𑒋 𑒂𑒑𑒰𑒿 𑒥𑒖𑒻𑒞 𑒩𑒯𑒪𑒲𑒯।
-“𑒡𑒳𑒞𑓂𑒞 𑒠𑒱𑒢𑒧𑒹 𑒞𑒿 𑒐𑒹𑒢𑒯𑒱𑒨𑒹 𑒕𑒪𑒯𑒳𑒿, 𑒋𑒯𑒱 𑒁𑒏𑒪-𑒥𑒹𑒩𑒧𑒹 𑒏𑒹𑒢𑒰 𑒐𑒹𑒢𑒰𑒃 𑒥𑒢𑒰𑒋𑒥। 𑒏𑒢𑒱𑒨𑒰𑒿-𑒧𑒢𑒱𑒨𑒰𑒿 𑒕𑒪𑒯𑒳𑒿 𑒞𑒐𑒢𑒹 𑒫𑒱𑒡𑒫𑒰 𑒦𑓄 𑒑𑒹𑒪𑒯𑒳𑒿 𑒂 𑒁𑒯𑒴 𑒫𑒨𑒮𑒧𑒹 𑒞𑒻𑒿 𑒮𑒦 𑒏𑒢𑒱𑒨𑒰𑒿-𑒏𑒰𑒏𑒲 𑒏𑒯𑒻𑒞 𑒁𑒕𑒱। 𑒯𑒳𑒧𑒰𑒨𑒴𑒿 𑒏𑒞𑒹𑒏 𑒧𑒰𑒢𑒻𑒞 𑒕𑒪 𑒁𑒣𑒢 𑒦𑒰𑒋 𑒮𑒦𑒏𑒹𑒿। 𑒁𑒣𑒢 𑒣𑒹𑒙 𑒏𑒰𑒙𑒱 𑒦𑒰𑒑𑒪𑒣𑒳𑒩𑒧𑒹 𑒩𑒰𑒐𑒱 𑒣𑒜𑓃𑒍𑒪𑒢𑓂𑒯𑒱 𑒕𑒼𑒙𑒏𑒰 𑒦𑒰𑒃𑒏𑒹𑒿 𑒂 𑒂𑒥 𑒍 𑒣𑒜𑓃𑒳𑒂 𑒥𑒾𑒂 𑒋𑒯𑒹𑒢 𑒑𑒣 𑒏𑒯𑒻𑒞 𑒕𑒟𑒱।
-“ 𑒮𑒼𑒔𑒱𑒞𑒹-𑒮𑒼𑒔𑒱𑒞𑒹 𑒢𑒼𑒩 𑒦𑒩𑒱 𑒑𑒹𑒪𑒢𑓂𑒯𑒱 𑒧𑒰𑒋𑒏 𑒂𑒿𑒐𑒱𑒧𑒹।
-“𑒯𑒧𑒩𑒰 𑒮𑓀𑒑 𑒋𑒏𑒥𑒹𑒩 𑒯𑒖 𑒏𑒩𑒋 𑒪𑒹𑒪 𑒑𑒹𑒪 𑒩𑒯𑒟𑒱 𑒧𑒰𑒋। 𑒡𑒢𑓂𑒨 𑒦𑒰𑒩𑒞 𑒮𑒩𑒏𑒰𑒩 𑒖𑒹 𑒯𑒧𑒩𑒰 𑒮𑒢𑒏 𑒑𑒩𑒲𑒥-𑒑𑒳𑒩𑒥𑒰𑒏 𑒧𑒰𑒋 𑒮𑒹𑒯𑒼 𑒯𑒖 𑒏𑒋 𑒂𑒋𑒪। 𑒂 𑒁𑒣𑒢 𑒥𑒛𑓃𑒏𑒲 𑒠𑒱𑒨𑒰𑒠𑒱𑒢𑒲𑒏𑒹𑒿 𑒮𑒳𑒢𑒥𑒻𑒞 𑒩𑒯𑒟𑒱 𑒐𑒱𑒮𑓂𑒮𑒰 𑒖𑒹 𑒥𑒯𑒱𑒢𑒠𑒰𑒃, 𑒞𑒞𑒹𑒏 𑒦𑒲𑒛𑓃 𑒕𑒪𑒋 𑒙𑓂𑒩𑒹𑒢𑒧𑒹, 𑒑𑒳𑒧𑒰𑒩 𑒞𑒞𑒥𑒹। 𑒑𑒰𑒛𑓃𑒲𑒧𑒹 𑒥𑒹𑒬𑒲 𑒧𑒮𑒼𑒧𑒰𑒞𑒹 𑒮𑒦 𑒕𑒪𑒲𑒯। 𑒋𑒏 𑒑𑒼𑒙𑒹 𑒏𑒯𑒻𑒞 𑒕𑒪𑒲𑒯 𑒖𑒹 𑒖𑒞𑒹𑒏 𑒏𑒭𑓂𑒙 𑒂𑒃 𑒦𑒹𑒪 𑒞𑒞𑒹𑒏 𑒞𑒿 𑒖𑒯𑒱𑒨𑒰 𑒩𑒰𑒿𑒛𑓃 𑒦𑒹𑒪 𑒕𑒪𑒯𑒳𑒿 𑒞𑒯𑒱𑒨𑒼 𑒢𑒘𑒱 𑒦𑒹𑒪 𑒕𑒪𑒋। 𑒯𑒫𑒰𑒃 𑒖𑒯𑒰𑒖𑒏𑒹𑒿 𑒁𑒧𑓂𑒧𑒲 𑒑𑒰𑒛𑓃𑒲 𑒏𑒯𑒻𑒞 𑒕𑒪𑒲𑒯।
-“𑒤𑒹𑒩 𑒍𑒯𑒱 𑒦𑒠𑒥𑒩𑒱𑒨𑒰𑒏 𑒩𑒰𑒞𑒱𑒧𑒹 𑒯𑒧𑒩 𑒁𑒧𑓂𑒧𑒲 𑒏𑒩𑒲𑒧𑒰 𑒥𑒹𑒑𑒧𑒏 𑒧𑒳𑒿𑒯𑒣𑒩 𑒥𑒰𑒛𑓃𑒲𑒏 𑒯𑒯𑒰𑒃𑒞 𑒣𑒰𑒢𑒱 𑒂 𑒔𑒰𑒩𑒮𑒿 𑒙𑒣𑒙𑒣 𑒔𑒳𑒥𑒻𑒞 𑒣𑒰𑒢𑒱𑒏 𑒚𑒼𑒣𑒏 𑒂 𑒒𑒙𑒰𑒙𑒼𑒣 𑒁𑒢𑓂𑒯𑒰𑒩𑒏 𑒥𑒲𑒔 𑒏𑒢𑒹𑒏 𑒧𑒳𑒮𑓂𑒏𑒲 𑒂𑒥𑒱 𑒑𑒹𑒪𑒢𑓂𑒯𑒱। 𑒯𑒧𑒩𑒰 𑒏𑒰𑒏𑒰𑒏 𑒠𑒪𑒰𑒢𑒣𑒩 𑒖𑒰𑒋 𑒪𑒹𑒪 𑒏𑒯𑒪𑒢𑓂𑒯𑒱 𑒖𑒞𑒋 𑒂𑒩 𑒦𑒰𑒋 𑒥𑒯𑒱𑒢 𑒮𑒦 𑒕𑒪।
-“𑒤𑒹𑒩 𑒮𑒼𑒔𑒱𑒞𑒹-𑒮𑒼𑒔𑒱𑒞𑒹 𑒐𑒰𑒙𑒣𑒩 𑒙𑒒𑒩𑒱 𑒑𑒹𑒪𑒲𑒯 𑒏𑒩𑒲𑒧𑒰 𑒥𑒹𑒑𑒧, 𑒧𑒰𑒢𑒹 𑒯𑒧𑒩 𑒧𑒰𑒋 । 𑒦𑒼𑒩 𑒯𑒼𑒃𑒞-𑒯𑒼𑒃𑒞 𑒥𑒰𑒛𑓃𑒲𑒏 𑒣𑒰𑒢𑒱 𑒥𑒰𑒢𑓂𑒯𑒣𑒩𑒮𑒿 𑒁𑒿𑒑𑒢𑒰 𑒠𑒱𑒮 𑒂𑒥𑒱 𑒑𑒹𑒪।𑒞𑒲𑒢𑒴 𑒦𑒻𑒨𑒰𑒩𑒲 𑒁𑒣𑒢-𑒁𑒣𑒢 𑒯𑒱𑒮𑓂𑒮𑒰𑒏 𑒂𑓀𑒑𑒢 𑒦𑒩𑒰 𑒪𑒹𑒢𑒹 𑒕𑒪𑒰𑒯 𑒮𑒹 𑒮𑒦𑒙𑒰 𑒣𑒰𑒢𑒱 𑒮𑒯𑒙𑒱 𑒏𑓄 𑒯𑒧𑒩 𑒮𑒦𑒏 𑒡𑒮𑒪 𑒂𑒿𑒑𑒢𑒮𑒿 𑒐𑒼𑒣𑒛𑓃𑒲 𑒠𑒱𑒮 𑒥𑒜𑓃𑒱 𑒑𑒹𑒪। 𑒒𑒩𑒧𑒹 𑒔𑒰𑒩𑒱 𑒂𑒿𑒑𑒳𑒩 𑒣𑒰𑒢𑒱 𑒦𑒩𑒱 𑒑𑒹𑒪। 𑒦𑒼𑒩𑒧𑒹 𑒏𑒱𑒕𑒳 𑒁𑒥𑒰𑒖 𑒦𑒹𑒪 𑒂 𑒖𑒹 𑒅𑒚𑒻𑒞 𑒕𑒲 𑒞𑒿 𑒐𑒰𑒙𑒏 𑒢𑒲𑒔𑒰𑒿 𑒣𑒰𑒢𑒱 𑒦𑒩𑒪 𑒕𑒪, 𑒋𑒏-𑒏𑒼𑒚𑒲 𑒠𑒼𑒮𑒩 𑒏𑒼𑒚𑒲𑒣𑒩 𑒁𑒣𑒢 𑒁𑒢𑓂𑒢-𑒣𑒰𑒢𑒱𑒏 𑒮𑓀𑒑 𑒙𑒴𑒙𑒱 𑒏𑓄 𑒐𑒮𑒪 𑒕𑒪। 𑒂𑒥 𑒏𑒲 𑒯𑒼, 𑒥𑒛𑓃𑒏𑒲 𑒠𑒱𑒨𑒰𑒠𑒢𑒲𑒏 𑒥𑒹𑒙𑒰 𑒮𑒦𑒮𑒿 𑒣𑒯𑒱𑒢𑒹 𑒂𑒥𑒱 𑒏𑓄 𑒐𑒼𑒖 𑒣𑒳𑒕𑒰𑒛𑓃𑒱 𑒏𑒹𑒪𑒏𑒢𑓂𑒯𑒱, 𑒁𑒥𑒰𑒖 𑒠𑒴𑒩 𑒡𑒩𑒱 𑒑𑒹𑒪 𑒕𑒪𑒋। 𑒮𑒦𑒙𑒰 𑒁𑒢𑓂𑒢-𑒣𑒰𑒢𑒱 𑒢𑒰𑒬 𑒦𑓄 𑒑𑒹𑒪𑒢𑓂𑒯𑒱। 𑒁𑒢𑓂𑒢 𑒣𑒰𑒢𑒱 𑒕𑒪𑒻𑒢𑓂𑒯𑒹 𑒏𑒼𑒢? 𑒠𑒴-𑒙𑒰 𑒕𑒼𑒙-𑒕𑒼𑒙 𑒏𑒼𑒚𑒲, 𑒍𑒏𑒩𑒹 𑒐𑒐𑒩𑒲-𑒧𑒰𑒙𑒱 𑒧𑒱𑒪𑒰 𑒏𑓄 𑒠𑒜𑓃 𑒏𑒩𑒻𑒞 𑒩𑒯𑒻𑒞 𑒕𑒪𑒲𑒯 𑒯𑒧𑒩 𑒂𑒧𑓂𑒧𑒲।
-“𑒧𑒳𑒠𑒰 𑒦𑒼𑒩 𑒡𑒩𑒱 𑒍 𑒯𑒯𑒰 𑒏𑓄 𑒐𑒮𑒪 𑒂 𑒧𑒮𑒼𑒧𑒰𑒞𑒏 𑒖𑒹 𑒥𑒩𑒐 𑒦𑒩𑒱𑒏 𑒥𑒰𑒿𑒔𑒪 𑒧𑒰𑒮𑒏 𑒐𑒼𑒩𑒱𑒮 𑒕𑒪 𑒞𑒏𑒩𑒰 𑒩𑒰𑒃-𑒕𑒱𑒞𑓂𑒞𑒲 𑒏𑓄 𑒠𑒹𑒪𑒏। 𑒏𑒩𑒲𑒧𑒰 𑒥𑒹𑒑𑒧 𑒧𑒰𑒢𑒹 𑒯𑒧𑒩 𑒁𑒧𑓂𑒧𑒲 𑒮𑒴𑒣 𑒪𑓄 𑒏𑓄 𑒁𑒢𑓂𑒢𑒏𑒹𑒿 𑒮𑒧𑒙𑒋 𑒪𑒹𑒪 𑒥𑒜𑓃𑒪𑒲𑒯, 𑒯𑒧𑒩 𑒂𑒿𑒐𑒱𑒏 𑒠𑒹𑒐𑒪 𑒁𑒕𑒱।
-“𑒧𑒳𑒠𑒰 𑒥𑒰𑒜𑓃𑒱𑒏 𑒣𑒰𑒢𑒱𑒏 𑒮𑓀𑒑 𑒣𑒰𑒿𑒏𑒏 𑒋𑒏 𑒞𑒯 𑒂𑒥𑒱 𑒑𑒹𑒪 𑒕𑒪 𑒒𑒩𑒧𑒹। 𑒮𑒾𑒿𑒮𑒹 𑒙𑒼𑒪 𑒯𑒪𑓂𑒪𑒰 𑒦𑓄 𑒑𑒹𑒪 𑒖𑒹 𑒠𑒹𑒐𑒱𑒎 𑒏𑒹𑒯𑒢 𑒦𑒻𑓀𑒮𑒳𑒩 𑒠𑒱𑒁𑒩 𑒮𑒦 𑒕𑒻𑒏, 𑒁𑒣𑒢𑒰-𑒁𑒣𑒢𑒲𑒏𑒹𑒿 𑒁𑒣𑒢-𑒁𑒣𑒢 𑒁𑒿𑒑𑒢𑒰 𑒦𑒩𑒱 𑒪𑒋 𑒑𑒹𑒪 𑒁𑒕𑒱। 𑒧𑒮𑒼𑒧𑒰𑒞𑒏 𑒁𑒿𑒑𑒢𑒰 𑒞𑒿 𑒁𑒠𑒯𑒰𑒮𑒿 𑒥𑒹𑒬𑒲 𑒡𑒏𑒱𑒂 𑒪𑓄 𑒑𑒹𑒪 𑒕𑒪𑒻𑒯𑒹, 𑒖𑒹 𑒥𑒹𑒔𑒰𑒩𑒲𑒏 𑒥𑒔𑒪 𑒁𑒿𑒑𑒢𑒰 𑒁𑒕𑒱 𑒮𑒹 𑒐𑒡𑒰𑒃 𑒥𑒢𑒱 𑒑𑒹𑒪 𑒁𑒕𑒱। 𑒥𑒛𑓃𑒏𑒲 𑒠𑒱𑒨𑒰𑒠𑒱𑒢𑒲 𑒮𑒯𑒙𑒱 𑒏𑓄 𑒁𑒋𑒪𑒲𑒯 𑒏𑒰𑒩𑒝 𑒠𑒱𑒂𑒠 𑒙𑒼𑒪𑒏 𑒪𑒼𑒏 𑒮𑒦 𑒂𑒥𑒋 𑒪𑒰𑒑𑒪 𑒩𑒯𑒟𑒱। 𑒏𑒩𑒲𑒧𑒰 𑒥𑒹𑒑𑒧𑒏 𑒮𑒼𑓀𑒑𑒩𑒣𑒩 𑒚𑒰𑒜𑓃 𑒒𑒩𑒏 𑒠𑒳𑒩𑓂𑒠𑒬𑒰 𑒠𑒹𑒐𑒱 𑒮𑒦 𑒏𑒰𑒢𑒰-𑒤𑒴𑒮𑒲 𑒏𑒩𑒋 𑒪𑒰𑒑𑒪 𑒩𑒯𑒋। 𑒁𑒿𑒑𑒢𑒰𑒏 𑒋𑒏 𑒏𑒼𑒢𑒮𑒿 𑒠𑒼𑒮𑒩 𑒏𑒼𑒢, 𑒁𑒣𑒢 𑒒𑒩𑒮𑒿 𑒠𑒼𑒮𑒩𑒰𑒏 𑒒𑒩 !
-“𑒣𑒰𑒢𑒱 𑒣𑒻𑒮𑒥𑒰𑒏 𑒠𑒹𑒩𑒲 𑒩𑒯𑒻𑒏 𑒂 𑒂𑒮𑓂𑒞𑒹-𑒂𑒮𑓂𑒞𑒹 𑒯𑒧𑒩 𑒒𑒩𑒏 𑒋𑒏 𑒏𑒰𑒞𑒏 𑒦𑒲𑒞𑒏 𑒠𑒹𑒥𑒰𑒪 𑒜𑒯𑒱 𑒑𑒹𑒪। 𑒙𑒼𑒪𑒥𑒻𑒨𑒰 𑒮𑒦 𑒯𑒪𑓂𑒪𑒰 𑒏𑒩𑒋 𑒪𑒰𑒑𑒪 𑒖𑒹 𑒏𑒩𑒲𑒧𑒰 𑒥𑒹𑒑𑒧 𑒦𑒱𑒞𑒩𑒹 𑒞𑒿 𑒢𑒘𑒱 𑒩𑒯𑒱 𑒑𑒹𑒪𑒟𑒱। 𑒥𑒛𑓃𑒏𑒲 𑒠𑒱𑒂𑒠𑒱𑒢𑒲 𑒐𑒮𑒪 𑒒𑒩 𑒠𑒹𑒐𑒱 𑒯𑒠𑒮𑒱 𑒑𑒹𑒪𑒲𑒯। 𑒥𑒖𑒪𑒲𑒯 𑒖𑒹 𑒁𑒪𑓂𑒪𑒰 𑒩𑒏𑓂𑒭 𑒩𑒐𑒪𑒢𑓂𑒯𑒱 𑒖𑒹 𑒮𑒳𑒩𑒞𑒰 𑒦𑒹𑒪 𑒂 𑒢𑒥𑒲𑒏 𑒦𑒰𑒃-𑒥𑒯𑒱𑒢𑒏𑒹𑒿 𑒒𑒩 𑒪𑒋 𑒁𑒢𑒪𑒱𑒨𑒻𑒏 𑒢𑒯𑒱 𑒞𑒿 𑒠𑒱𑒨𑒰𑒠𑒲 𑒛𑒰𑒯 𑒢𑒯𑒱 𑒥𑒳𑒗𑒪 𑒁𑒕𑒱। 𑒮𑒦 𑒏𑒪𑓀𑒏 𑒪𑒑𑒥𑒱𑒞𑒋 𑒁𑒐𑒢𑒹।
-“𑒧𑒳𑒠𑒰 𑒠𑒱𑒨𑒰𑒠𑒱𑒢𑒲”!
-“𑒠𑒱𑒨𑒰𑒠 𑒮𑒦 𑒮𑒦 𑒑𑒣 𑒥𑒴𑒗𑒱 𑒁𑒣𑒢-𑒁𑒣𑒢 𑒒𑒩 𑒖𑒰𑒋 𑒑𑒹𑒪𑒰𑒯। 𑒯𑒧 𑒁𑒧𑓂𑒧𑒲 𑒪𑒑 𑒁𑒋𑒪𑒯𑒳𑒿। 𑒧𑒰𑒩𑓂𑒏𑓂𑒮𑒫𑒰𑒠𑒲 𑒫𑒱𑒔𑒰𑒩𑒏 𑒩𑒯𑒲, 𑒏𑒙𑒱𑒯𑒰𑒩𑒧𑒹 𑒣𑒜𑓃𑒻𑒞 𑒕𑒪𑒯𑒳𑒿। 𑒫𑒱𑒡𑒫𑒰-𑒫𑒱𑒫𑒰𑒯, 𑒖𑒰𑒞𑒱-𑒣𑓂𑒩𑒟𑒰 𑒮𑒦 𑒥𑒱𑒢𑓂𑒠𑒳𑒣𑒩 𑒣𑒜𑓃𑒳𑒂 𑒏𑒰𑒏𑒰𑒮𑒿 𑒦𑒱𑒢𑓂𑒢 𑒫𑒱𑒔𑒰𑒩 𑒩𑒐𑒻𑒞 𑒕𑒪𑒯𑒳𑒿। 𑒒𑒩𑒏 𑒢𑒰𑒧 𑒢𑒥𑒲 𑒕𑒪 𑒧𑒳𑒠𑒰 𑒮𑓂𑒏𑒴𑒪 𑒏𑒰𑒪𑒹𑒖𑒏 𑒢𑒰𑒧 𑒢𑒥𑒲 𑒥𑒏𑒮।𑒑𑒰𑒧𑒧𑒹 𑒦𑒼𑒖𑒧𑒹 𑒐𑒜𑓃𑒱𑒯𑒰𑒢𑒏 𑒣𑒰𑒿𑒞𑒱 𑒂 𑒥𑒰𑒢𑓂𑒯𑒣𑒩𑒏 𑒣𑒰𑒿𑒞𑒱 𑒠𑒹𑒐𑒱 𑒫𑒱𑒔𑒪𑒱𑒞 𑒯𑒼𑒃𑒞 𑒕𑒪𑒯𑒳𑒿। 𑒖𑒼𑒢-𑒥𑒼𑒢𑒱𑒯𑒰𑒩𑒏𑒹𑒿 𑒥𑒰𑒢𑓂𑒯𑒣𑒩 𑒥𑒻𑒮𑒰 𑒏𑓄 𑒐𑒳𑒂𑒥𑒻𑒞 𑒠𑒹𑒐𑒻𑒞 𑒕𑒪𑒯𑒳𑒿 𑒂 𑒥𑒰𑒥𑒴-𑒦𑒻𑒨𑒰𑒏𑒹𑒿 𑒐𑒜𑓃𑒱𑒯𑒰𑒢𑒧𑒹। 𑒐𑒜𑓃𑒱𑒯𑒰𑒢𑒧𑒹 𑒥𑒰𑒩𑒱𑒏 𑒪𑒼𑒏𑒢𑒱 𑒠𑓂𑒫𑒰𑒩𑒰 𑒐𑒰𑒖𑒰-𑒪𑒛𑓂𑒛𑒴 𑒏𑒻𑒏 𑒥𑒹𑒩 𑒂𑒢𑒪 𑒖𑒰𑒃𑒞 𑒕𑒪 । 𑒥𑒰𑒢𑓂𑒯𑒣𑒩𑒏 𑒣𑒰𑒿𑒞𑒲𑒧𑒹 𑒋𑒏 𑒥𑒹𑒩 𑒂 𑒢𑒯𑒱𑒨𑒼। 𑒧𑒳𑒠𑒰 𑒒𑒩𑒧𑒹 𑒏𑒼𑒢𑒼 𑒧𑒼𑒖𑒩 𑒢𑒯𑒱 𑒕𑒪, 𑒏𑒯𑒪 𑒖𑒰𑒃𑒞 𑒩𑒯𑒋 𑒖𑒹 𑒣𑒯𑒱𑒢𑒹 𑒣𑒜𑓃𑒱-𑒪𑒱𑒐𑒱 𑒏𑓄 𑒏𑒱𑒕𑒳 𑒏𑒩𑒴।
-“𑒁𑒧𑓂𑒧𑒲𑒮𑒿 𑒏𑒞𑒹𑒏 𑒑𑒧𑒕𑒰-𑒗𑒼𑒛𑓃𑒰 𑒦𑒹𑒙𑒻𑒞 𑒕𑒪, 𑒔𑒩𑒐𑒰𑒏 𑒮𑒴𑒞𑒏 𑒏𑒧𑒰𑒃𑒏। 𑒖𑒨 𑒑𑒰𑒿𑒡𑒲 𑒥𑒰𑒥𑒰, 𑒫𑒱𑒡𑒫𑒰 𑒪𑒼𑒏𑒢𑒱 𑒪𑒹𑒪 𑒄 𑒏𑒰𑒖 𑒡𑒩𑒱 𑒏𑓄 𑒑𑒹𑒪𑒰𑒯।
-“𑒧𑒳𑒠𑒰 𑒯𑒧𑒩 𑒁𑒧𑓂𑒧𑒲। 𑒏𑒲 𑒦𑒹𑒪𑒢𑓂𑒯𑒱 𑒯𑒳𑒢𑒏𑒰। 𑒦𑒰𑒋 𑒥𑒯𑒱𑒢 𑒮𑒦 𑒞𑒿 𑒍𑒧𑓂𑒯𑒩 𑒁𑒕𑒱!”
-“𑒁𑒧𑓂𑒧𑒲!!!!!!!!!!!!!!
-“𑒯𑒧𑒩 𑒔𑒱𑒞𑓂𑒏𑒰𑒩𑒮𑒿 𑒮𑒾𑒿𑒮𑒹 𑒙𑒼𑒪𑒧𑒹 𑒟𑒩𑒟𑒛𑓃𑒲 𑒣𑒻𑒮𑒱 𑒑𑒹𑒪 𑒩𑒯𑒋। 𑒢𑒥𑒲 𑒏𑒯𑒱𑒨𑒼 𑒏𑒢𑒻𑒞 𑒢𑒯𑒱 𑒁𑒕𑒱, 𑒏𑒰𑒢𑒪 𑒁𑒕𑒱 𑒞𑒿 𑒏𑒼𑒢𑒼 𑒑𑒣 𑒕𑒻𑒏।
-“𑒢𑒘𑒱 𑒁𑒧𑓂𑒧𑒲। 𑒄 𑒏𑒼𑒢𑒼 𑒑𑒣 𑒢𑒯𑒱 𑒦𑒹𑒪। 𑒏𑒱𑒋𑒏 𑒯𑒧𑒩𑒰𑒣𑒩 𑒁𑒯𑒰𑒿 𑒦𑒩𑒼𑒮 𑒕𑒼𑒛𑓃𑒱 𑒠𑒹𑒪𑒯𑒳𑒿। 𑒢𑒥𑒲 𑒥𑒏𑒮 𑒢𑒰𑒧 𑒕𑒲 𑒯𑒧𑒩। 𑒣𑒰𑒿𑒔𑒼 𑒦𑒰𑒋 𑒂 𑒕𑒼𑒙𑒏𑒲 𑒥𑒯𑒱𑒢𑒏 𑒦𑒰𑒋 𑒢𑒯𑒱 𑒥𑒰𑒣 𑒕𑒱𑒨𑒻𑒏 𑒯𑒧। 𑒧𑒳𑒠𑒰 𑒁𑒯𑒰𑒿 𑒯𑒧𑒩𑒰𑒣𑒩 𑒦𑒩𑒼𑒮 𑒕𑒼𑒛𑓃𑒱 𑒔𑒪𑒱 𑒑𑒹𑒪𑒯𑒳𑒿। 𑒨𑒰 𑒁𑒪𑓂𑒪𑒰!!!!!!!!!!!”
-“𑒙𑒼𑒪 𑒖𑒳𑒙𑒱 𑒑𑒹𑒪 𑒧𑒻𑒨𑒞𑒏 𑒔𑒰𑒩𑒴 𑒠𑒱𑒬। 𑒏𑒹 𑒏𑒲 𑒮𑒦 𑒏𑒋𑒪𑒏 𑒮𑒹 𑒢𑒯𑒱 𑒥𑒳𑒗𑒪𑒯𑒳𑒿। 𑒁𑒧𑓂𑒧𑒲𑒏𑒹𑒿 𑒑𑒳𑒮𑒳𑒪 (𑒢𑒯𑒰𑒍𑒪) 𑒏𑒩𑒰𑒍𑒪 𑒑𑒹𑒪। 𑒏𑒤𑒢 𑒣𑒯𑒱𑒩𑒰𑒍𑒪 𑒑𑒹𑒪। 𑒖𑒢𑒰𑒖𑒰𑒏 𑒐𑒰𑒙 𑒂𑒋𑒪। 𑒞𑒰𑒯𑒱𑒣𑒩𑒮𑒿 𑒧𑒰𑒋𑒏 𑒑𑒰𑒿𑒡𑒲 𑒔𑒩𑒐𑒰𑒮𑒿 𑒥𑒢𑒰𑒍𑒪 𑒔𑒰𑒠𑒩𑒱 𑒍𑒜𑓃𑒰𑒍𑒪 𑒑𑒹𑒪। 𑒞𑒲𑒢𑒴 𑒏𑒰𑒏𑒰 𑒂 𑒯𑒧 𑒖𑒢𑒰𑒖𑒰𑒏 𑒐𑒰𑒙𑒏𑒹𑒿 𑒏𑒰𑒢𑓂𑒯 𑒠𑒹𑒪𑒯𑒳𑒿। 𑒏𑒥𑓂𑒩𑒱𑒮𑓂𑒞𑒰𑒢 𑒪𑒑 𑒚𑒰𑒜𑓃 𑒦𑒋 𑒖𑒢𑒰𑒖𑒰𑒏 𑒢𑒧𑒰𑒖 𑒣𑒜𑓃𑒪𑒯𑒳𑒿 𑒂 𑒁𑒧𑓂𑒧𑒲𑒏𑒹𑒿 𑒠𑒤𑒢 𑒏𑒋𑒪𑒯𑒳𑒿।
𑒢𑒥𑒲 𑒥𑒏𑒮 𑒤𑒹𑒩 𑒔𑒳𑒣 𑒦𑒋 𑒑𑒹𑒪। 𑒯𑒧 𑒍𑒏𑒩𑒰 𑒙𑒼𑒏𑒋 𑒢𑒯𑒱 𑒔𑒰𑒯𑒻𑒞 𑒕𑒪𑒯𑒳𑒿। 𑒠𑒮 𑒧𑒱𑒢𑒙 𑒡𑒩𑒱 𑒍 𑒔𑒳𑒣𑓂𑒣𑒹 𑒩𑒯𑒪 𑒂 𑒯𑒧 𑒥𑒻𑒮𑒪 𑒩𑒯𑒪𑒯𑒳𑒿। 𑒤𑒹𑒩 𑒍 𑒥𑒰𑒖𑒪।
-“𑒁𑒧𑓂𑒧𑒲𑒏 𑒧𑒵𑒞𑓂𑒨𑒳𑒏 𑒔𑒰𑒪𑒲𑒮 𑒠𑒱𑒢 𑒡𑒩𑒱 𑒬𑒼𑒏 𑒧𑒢𑒍𑒪𑒯𑒳𑒿। 𑒂 𑒫𑒻𑒯 𑒔𑒰𑒪𑒲𑒮 𑒠𑒱𑒢𑒏 𑒂𑒩𑒰𑒧 𑒯𑒧𑒩𑒰 𑒋𑒯𑒱 𑒖𑒼𑒑 𑒥𑒢𑒹𑒪𑒏 𑒖𑒹 𑒤𑒹𑒩 𑒣𑒋𑒩𑒧𑒹 𑒒𑒱𑒩𑒝𑒲 𑒪𑒰𑒑𑒱 𑒑𑒹𑒪। 𑒁𑒧𑓂𑒧𑒲𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒣𑒜𑓃𑒰𑒃𑒏𑒹𑒿 𑒢𑒧𑒮𑓂𑒏𑒰𑒩 𑒏𑒋 𑒐𑒰𑒪𑒰 𑒪𑒑 𑒂𑒥𑒱 𑒑𑒹𑒪𑒯𑒳𑒿, 𑒠𑒱𑒪𑓂𑒪𑒲 𑒢𑒑𑒩𑒱𑒨𑒰𑒧𑒹 ।
𑒢𑒥𑒲 𑒥𑒏𑒮 𑒁𑒣𑒢 𑒂𑒿𑒐𑒱 𑒣𑒼𑒕𑒱 𑒩𑒯𑒪 𑒕𑒪। 𑒤𑒹𑒩 𑒠𑒮 𑒧𑒱𑒢𑒙 𑒍 𑒔𑒳𑒣 𑒩𑒯𑒪।
“𑒢𑒥𑒲 𑒥𑒏𑒮𑒏𑒹𑒿 𑒁𑒧𑓂𑒧𑒲𑒏 𑒃𑒢𑓂𑒞𑒏𑒰𑒪𑒏 𑒠𑒱𑒢 𑒪𑒼𑒏 𑒣𑒯𑒱𑒪 𑒂 𑒁𑒢𑓂𑒞𑒱𑒧 𑒥𑒹𑒩 𑒏𑒢𑒻𑒞 𑒠𑒹𑒐𑒢𑒹 𑒩𑒯𑒋। 𑒧𑒳𑒠𑒰 𑒄 𑒮𑒦 𑒂𑒃 𑒤𑒹𑒩 𑒯𑒧𑒩𑒰 𑒂𑒿𑒐𑒱𑒮𑒿 𑒢𑒼𑒩 𑒔𑒳𑒂 𑒠𑒹𑒪𑒏। 𑒍𑒏𑒲𑒪𑒏 𑒞𑒿 𑒥𑒱𑒨𑒰𑒯𑒼 𑒢𑒯𑒱 𑒯𑒼𑒃𑒞 𑒩𑒯𑒋। 𑒮𑒦 𑒏𑒯𑒻𑒞 𑒕𑒪 𑒖𑒹 𑒥𑒳𑒩𑒥𑒏 𑒕𑒻𑒏। 𑒧𑒳𑒠𑒰 𑒖𑒹𑒢𑒰 𑒦𑒲𑒭𑓂𑒧 𑒣𑒱𑒞𑒰𑒧𑒯 𑒡𑒵𑒞𑒩𑒰𑒭𑓂𑒙𑓂𑒩𑒏 𑒥𑒱𑒨𑒰𑒯 𑒏𑒩𑒹𑒪𑒢𑓂𑒯𑒱 𑒞𑒯𑒱𑒢𑒰 𑒯𑒧 𑒋𑒏𑒩 𑒥𑒱𑒨𑒰𑒯 𑒏𑒩𑒥𑒍𑒪𑒯𑒳𑒿 𑒂 𑒄 𑒮𑒦 𑒏𑒯𑒻𑒞 𑒁𑒕𑒱 𑒖𑒹 𑒯𑒧 𑒍𑒏𑒩𑒰 𑒢𑒼𑒏𑒩 𑒖𑒹𑒏𑒰𑒿 𑒩𑒐𑒻𑒞 𑒕𑒱𑒨𑒻𑒏”।
𑒞𑒰𑒫𑒞 𑒏𑒰𑒪𑒥𑒹𑒪𑒏 𑒒𑓀𑒙𑒲 𑒥𑒰𑒖𑒪 𑒩𑒯𑒋। 𑒍𑒏𑒲𑒪 𑒢𑒥𑒲 𑒥𑒏𑒮𑒏 𑒮𑒼𑒗𑒰𑒿𑒧𑒹 𑒂𑒥𑒱 𑒚𑒰𑒜𑓃 𑒦𑓄 𑒑𑒹𑒪।
“𑒦𑒻𑒨𑒰, 𑒮𑒦 𑒏𑒯𑒻𑒞 𑒁𑒕𑒱 𑒖𑒹 𑒯𑒧 𑒥𑒳𑒩𑒥𑒏 𑒕𑒲। 𑒏𑒰𑒪𑓂𑒯𑒱 𑒁𑒯𑒪𑒱𑒨𑒰 (𑒏𑒢𑒱𑒨𑒼𑒿) 𑒏𑒹𑒿 𑒄 𑒮𑒦 𑒨𑒻𑒯 𑒑𑒣 𑒏𑒯𑒱 𑒠𑒹𑒪𑒏𑒻𑒏। 𑒍 𑒏𑒯𑒪𑒏 𑒖𑒹 𑒞𑒼𑒯𑒩 𑒔𑒱𑒢𑓂𑒞𑒰 𑒏𑒏𑒩𑒼 𑒢𑒯𑒱 𑒩𑒯𑒋 𑒕𑒻𑒏, 𑒧𑒳𑒠𑒰 𑒯𑒧 𑒢𑒯𑒱 𑒧𑒰𑒢𑒪𑒯𑒳𑒿। 𑒮𑒹 𑒏𑒰𑒪𑓂𑒯𑒱 𑒯𑒧 𑒏𑒢𑒹𑒏 𑒪𑒹𑒙 𑒦𑒋 𑒑𑒹𑒪𑒯𑒳𑒿। 𑒮𑒩𑒏𑒹𑒿 𑒏𑒯𑒥𑒼 𑒏𑒹𑒪𑒱𑒨𑒢𑓂𑒯𑒱 𑒖𑒹 𑒠𑒹𑒐𑒻𑒞 𑒕𑒲 𑒖𑒹 𑒍 𑒮𑒦 𑒂𑒥𑒻𑒋 𑒂𑒏𑒱 𑒢𑒯𑒱। 𑒏𑒢𑒱𑒨𑒼 𑒞𑒿 𑒮𑒳𑒡𑓀𑒑𑒹 𑒢𑒹 𑒁𑒕𑒱। 𑒂𑒃 𑒍𑒯𑒼 𑒠𑒱𑒨𑒰𑒠𑒱𑒢𑒲𑒏 𑒑𑒩𑒰 𑒣𑒏𑒛𑓃𑒱 𑒏𑓄 𑒐𑒴𑒥 𑒏𑒰𑒢𑒪 𑒁𑒕𑒱। 𑒥𑒳𑒡𑒱𑒨𑒰𑒩 𑒮𑒦 𑒢𑒹 𑒁𑒯𑒰𑒿𑒏𑒹𑒿 𑒕𑒼𑒛𑓃𑒱 𑒔𑒪𑒱 𑒑𑒹𑒪, 𑒧𑒳𑒠𑒰 𑒄 𑒥𑒳𑒩𑒥𑒏𑒯𑒰 𑒁𑒯𑒰𑒿𑒏𑒹𑒿 𑒕𑒼𑒛𑓃𑒱 𑒏𑒯𑒱𑒨𑒼 𑒢𑒯𑒱 𑒖𑒋𑒞, 𑒦𑒰𑒋”।
𑒯𑒧 𑒢𑒯𑒱 𑒖𑒰𑒨𑒥 𑒫𑒱𑒠𑒹𑒬
“𑒨𑒾 𑒦𑒻𑒨𑓂𑒨𑒰। 𑒏𑒢𑒹𑒏 𑒏𑒰𑒏𑒰𑒮𑒿 𑒦𑒹𑒿𑒙 𑒢𑒯𑒱 𑒏𑒩𑒰 𑒠𑒹𑒥”।
“𑒏𑒰𑒏𑒰 𑒕𑒟𑒱 𑒁𑒯𑒰𑒿𑒏। 𑒂 𑒦𑒹𑒿𑒙 𑒏𑒩𑒰 𑒠𑒱𑒁 𑒯𑒧?”
“𑒨𑒾। 𑒍 𑒞𑒿 𑒯𑒧𑒩𑒰 𑒮𑒦𑒏𑒹𑒿 𑒔𑒱𑒢𑓂𑒯𑒱𑒞𑒼 𑒢𑒯𑒱 𑒕𑒟𑒱। 𑒥𑒔𑓂𑒔𑒹𑒧𑒹 𑒑𑒰𑒧𑒮𑒿 𑒥𑒯𑒩𑒰 𑒑𑒹𑒪𑒟𑒱, 𑒮𑒹 𑒒𑒳𑒩𑒱 𑒏𑒋 𑒏𑒯𑒰𑒿 𑒁𑒋𑒪𑒰𑒯”।
“𑒥𑒹𑒬। 𑒞𑒐𑒢 𑒔𑒪𑒴 𑒦𑒹𑒿𑒙 𑒏𑒩𑒥𑒰 𑒠𑒻𑒞 𑒕𑒲। 𑒧𑒳𑒠𑒰 𑒏𑒼𑒢𑒼 𑒣𑒻𑒩𑒫𑒲 𑒂𑒏𑒱 𑒏𑒰𑒖 𑒯𑒼𑒁𑒋 𑒞𑒿 𑒣𑒯𑒱𑒢𑒹 𑒏𑒯𑒱 𑒠𑒻𑒞 𑒕𑒲, 𑒮𑒹 𑒍 𑒢𑒯𑒱 𑒏𑒩𑒞𑒰𑒯”।
“𑒢𑒯𑒱। 𑒏𑒼𑒢𑒼 𑒏𑒰𑒖 𑒢𑒯𑒱 𑒁𑒕𑒱। 𑒧𑒰𑒞𑓂𑒩 𑒦𑒹𑒿𑒙 𑒏𑒩𑒥𑒰𑒏 𑒃𑒔𑓂𑒕𑒰 𑒁𑒕𑒱। 𑒦𑒰𑒩𑒞 𑒫𑒩𑓂𑒭𑒧𑒹 𑒋𑒞𑒹𑒏 𑒢𑒰𑒧 𑒕𑒢𑓂𑒯𑒱, 𑒮𑒦 𑒔𑒱𑒢𑓂𑒯𑒻𑒞 𑒕𑒢𑓂𑒯𑒱 𑒧𑒳𑒠𑒰 𑒢𑒯𑒱𑒨𑒹 𑒯𑒧𑒩𑒰 𑒮𑒦 𑒔𑒱𑒢𑓂𑒯𑒻𑒞 𑒕𑒱𑒨𑒢𑓂𑒯𑒱 𑒂 𑒢𑒯𑒱 𑒫𑒻𑒯 𑒔𑒱𑒢𑓂𑒯𑒻𑒞 𑒕𑒟𑒱”।
𑒪𑒰𑒪 𑒑𑒹𑒪 𑒕𑒪𑒰𑒯 𑒠𑒮 𑒠𑒱𑒢 𑒣𑒯𑒱𑒢𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒖𑒲𑒏 𑒒𑒩 𑒣𑒩। 𑒖𑒰𑒃𑒞𑒹 𑒠𑒹𑒩𑒲 𑒪𑒰𑒪𑒏 𑒏𑒙𑒰𑒏𑓂𑒭 𑒬𑒳𑒩𑒴 𑒦𑓄 𑒖𑒰𑒃𑒞 𑒕𑒢𑓂𑒯𑒱।
-𑒑𑒰𑒧𑒏𑒹𑒿 𑒥𑒱𑒮𑒩𑒱 𑒑𑒹𑒪𑒱𑒨𑒻𑒏। 𑒒𑒳𑒩𑒱 𑒏𑓄 𑒠𑒹𑒐𑒥𑒼 𑒢𑒯𑒱 𑒏𑒋𑒪𑒯𑒳𑒿। 𑒐𑒼𑒣𑒛𑓃𑒲𑒏𑒹𑒿 𑒒𑒩 𑒞𑓄 𑒥𑒢𑒰 𑒪𑒻𑒞𑒯𑒳𑒿।
𑒂 𑒖𑒥𑒰𑒥𑒼 𑒦𑒹𑒙𑒢𑓂𑒯𑒱 𑒍𑒯𑒱𑒢𑒰 𑒥𑒢𑒪 𑒥𑒢𑒰𑒍𑒪।
-𑒏𑒲 𑒯𑒋𑒞 ? 𑒖𑒰 𑒏𑒋 𑒏𑒲 𑒏𑒩𑒥। 𑒋𑒏 𑒏𑒙𑓂𑒚𑒰𑒏 𑒒𑒩𑒰𑒩𑒲 𑒂 𑒞𑒰𑒯𑒱 𑒣𑒩 𑒥𑒰𑒥𑒴𑒏 𑒏𑒞𑒹𑒏 𑒦𑒰𑒿𑒋। 𑒂 𑒤𑒹𑒩 𑒫𑒰𑒧𑒣𑓀𑒟𑒲 𑒫𑒱𑒔𑒰𑒩𑒡𑒰𑒩𑒰𑒏 𑒔𑒱𑒢𑓂𑒞𑒢 𑒬𑒳𑒩𑒴 𑒦𑓄 𑒖𑒰𑒃𑒞 𑒕𑒪𑒢𑓂𑒯𑒱।
-𑒑𑒰𑒧 𑒁𑒕𑒱 𑒡𑒢𑒱𑒏𑒏 𑒪𑒹𑒪। 𑒨𑒰𑒫𑒞 𑒑𑒰𑒧𑒏 𑒖𑒢𑒮𑓀𑒐𑓂𑒨𑒰 𑒏𑒧 𑒢𑒯𑒱 𑒯𑒼𑒋𑒞 𑒞𑒰𑒫𑒞 𑒡𑒩𑒱 𑒞𑒿 𑒁𑒫𑒬𑓂𑒨𑒹। 𑒑𑒩𑒲𑒥𑒲𑒧𑒹 𑒪𑒼𑒏𑒏𑒹𑒿 𑒪𑒼𑒏 𑒢𑒯𑒱 𑒥𑒳𑒗𑒻𑒞 𑒁𑒕𑒱 𑒏𑓂𑒨𑒼। 𑒧𑒳𑒠𑒰 𑒢𑒑𑒩 𑒧𑒰𑒞𑓂𑒩 𑒠𑒱𑒪𑓂𑒪𑒲, 𑒏𑒪𑒏𑒞𑓂𑒞𑒰 𑒢𑒯𑒱 𑒁𑒕𑒱। 𑒨𑒰𑒫𑒞 𑒧𑒡𑒹𑒣𑒳𑒩, 𑒧𑒡𑒹𑒣𑒳𑒩𑒰, 𑒧𑒯𑒼𑒞𑓂𑒞𑒩𑒲, 𑒖𑒢𑒏𑒣𑒳𑒩, 𑒥𑒢𑒻𑒪𑒲 𑒂 𑒗𑓀𑒗𑒰𑒩𑒣𑒳𑒩𑒏 𑒫𑒱𑒏𑒰𑒮 𑒢𑒯𑒱 𑒯𑒼𑒋𑒞, 𑒬𑒼𑒭𑒱𑒞 𑒫𑒩𑓂𑒑 𑒩𑒯𑒥𑒹 𑒏𑒩𑒞।
𑒞𑒰𑒫𑒞 𑒠𑓂𑒫𑒱𑒖𑒹𑒢𑓂𑒠𑓂𑒩 𑒖𑒲𑒏 𑒏𑒢𑒱𑒨𑒰𑒿 𑒔𑒰𑒯 𑒩𑒰𑒐𑒱 𑒑𑒹𑒪𑒐𑒱𑒢𑓂𑒯।
𑒠𑓂𑒫𑒱𑒖𑒹𑒢𑓂𑒠𑓂𑒩𑒖𑒲 𑒑𑒰𑒧𑒹𑒧𑒹 𑒣𑓂𑒩𑒰𑒟𑒧𑒱𑒏 𑒬𑒱𑒏𑓂𑒭𑒰 𑒣𑓂𑒩𑒰𑒣𑓂𑒞 𑒏𑒋𑒪𑒢𑓂𑒯𑒱। 𑒗𑓀𑒗𑒰𑒩𑒣𑒳𑒩𑒧𑒹 𑒧𑒱𑒛𑓂𑒪 𑒮𑓂𑒏𑒴𑒪 𑒂 𑒯𑒰𑒃 𑒮𑓂𑒏𑒴𑒪 𑒣𑒋𑒩𑒹 𑒖𑒰𑒟𑒱। 𑒣𑒱𑒞𑒰𑒖𑒲 𑒩𑒰𑒿𑒔𑒲𑒧𑒹 𑒚𑒱𑒏𑒹𑒠𑒰𑒩𑒲 𑒏𑒩𑒻𑒞 𑒕𑒪𑒐𑒱𑒢𑓂𑒯। 𑒧𑒰𑒋 𑒣𑒜𑓃𑒪-𑒪𑒱𑒐𑒪 𑒕𑒪𑒐𑒱𑒢𑓂𑒯।
𑒪𑒼𑒏 𑒏𑒯𑒻𑒞 𑒕𑒪 𑒖𑒹 𑒅𑒣𑒢𑓂𑒨𑒰𑒮 𑒮𑒹𑒯𑒼 𑒣𑒜𑓃𑒻𑒞 𑒕𑒪𑒲𑒯।
𑒠𑒩𑒦𑓀𑒑𑒰𑒮𑒿 𑒮𑒼𑒗𑒹 𑒣𑓂𑒩𑒨𑒰𑒑 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩। 𑒣𑒱𑒞𑒰 𑒕𑒪𑒰𑒯 𑒢𑒥𑒏𑒰 𑒥𑒮𑒰𑒞𑒏 𑒪𑒼𑒏। 𑒐𑒴𑒥 𑒏𑒧𑒰𑒟𑒱 𑒂 𑒐𑒴𑒥 𑒐𑒩𑓂𑒔 𑒏𑒩𑒟𑒱। 𑒑𑒰𑒧𑒮𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒢𑒯𑒱। 𑒏𑒢𑒱𑒨𑒰𑒿𑒏 𑒐𑒼𑒖𑒼-𑒐𑒥𑒩𑒱 𑒢𑒯𑒱 𑒪𑒻𑒞 𑒕𑒪𑒰𑒯। 𑒪𑒼𑒏 𑒏𑒯𑒻𑒞 𑒕𑒪 𑒖𑒹 𑒠𑒼𑒮𑒩 𑒥𑒱𑒂𑒯 𑒏𑓄 𑒪𑒹𑒢𑒹 𑒕𑒪𑒰𑒯 𑒩𑒰𑒿𑒔𑒲𑒧𑒹। 𑒪𑒼𑒏 𑒄𑒯𑒼 𑒏𑒯𑒻𑒞 𑒁𑒕𑒱 𑒖𑒹 𑒨𑒰𑒫𑒞 𑒍 𑒑𑒰𑒧𑒧𑒹 𑒕𑒪𑒰𑒯 𑒞𑒯𑒱𑒨𑒼 𑒫𑒻𑒯 𑒯𑒰𑒪 𑒕𑒪𑒢𑓂𑒯𑒱। 𑒥𑒹𑒩𑒴 𑒣𑒯𑒩 𑒞𑒲𑒢 𑒥𑒖𑒹𑒮𑒿 𑒏𑒢𑒱𑒨𑒰𑒿 𑒯𑒳𑒢𑒏𑒰 𑒪𑒹𑒪 𑒦𑒰𑒓 𑒣𑒲𑒮𑒥 𑒣𑓂𑒩𑒰𑒩𑒧𑓂𑒦 𑒏𑓄 𑒠𑒻𑒞 𑒕𑒪𑒐𑒱𑒢𑓂𑒯। 𑒧𑒳𑒠𑒰 𑒥𑒛𑓃𑒏𑒰 𑒥𑒹𑒙𑒰𑒏𑒹𑒿 𑒐𑒴𑒥 𑒧𑒰𑒢𑒻𑒞 𑒕𑒪𑒰𑒯। 𑒏𑒰𑒩𑒝 𑒕𑒼𑒙𑒏𑒰 𑒥𑒹𑒙𑒰 𑒥𑒰𑒣𑒹𑒣𑒩 𑒑𑒹𑒪 𑒕𑒪, 𑒖𑒏𑒩 𑒢𑒰𑒧 𑒩𑒯𑒋 𑒯𑒩𑒹𑒢𑓂𑒠𑓂𑒩।
𑒂 𑒪𑒼𑒏 𑒏𑒯𑒻𑒞 𑒁𑒕𑒱 𑒖𑒹 𑒯𑒩𑒹𑒢𑓂𑒠𑓂𑒩 𑒣𑒙𑒢𑒰𑒏 𑒏𑒼𑒢𑒼 𑒑𑒻𑒩𑒰𑒖𑒧𑒹 𑒏𑒰𑒖 𑒏𑒩𑒻𑒞 𑒩𑒯𑒟𑒱। 𑒠𑓂𑒫𑒱𑒖𑒹𑒢𑓂𑒠𑓂𑒩 𑒑𑒳𑒩𑒳-𑒑𑒧𑓂𑒦𑒲𑒩, 𑒣𑒜𑓃𑒥𑒰𑒧𑒹 𑒞𑒹𑒖, 𑒮𑒦 𑒫𑒱𑒭𑒨𑒧𑒹 𑒣𑒱𑒞𑒰𑒮𑒿 𑒫𑒱𑒣𑒩𑒲𑒞 𑒂 𑒞𑒹𑒿 𑒣𑒱𑒞𑒰 𑒧𑒰𑒢𑒥𑒼 𑒏𑒩𑒻𑒞 𑒕𑒪𑒐𑒱𑒢𑓂𑒯। 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒣𑒱𑒞𑒰 𑒯𑒳𑒢𑒏𑒩 𑒐𑒩𑓂𑒔 𑒣𑒚𑒹𑒥𑒰𑒧𑒹 𑒏𑒼𑒢𑒼 𑒫𑒱𑒪𑒧𑓂𑒥 𑒢𑒯𑒱 𑒏𑒩𑒻𑒞 𑒕𑒪𑒰𑒯। 𑒋𑒯𑒱 𑒣𑒚𑒰𑒍𑒪 𑒣𑒰𑒃𑒮𑒿 𑒠𑓂𑒫𑒱𑒖𑒹𑒢𑓂𑒠𑓂𑒩 𑒕𑒼𑒙 𑒦𑒰𑒃𑒏𑒹𑒿 𑒮𑒹𑒯𑒼 𑒢𑒳𑒏𑒰𑒏𑒹𑒿 𑒣𑒰𑒃 𑒣𑒚𑒰 𑒠𑒻𑒞 𑒕𑒪𑒰𑒯। 𑒂 𑒪𑒼𑒏 𑒏𑒯𑒻𑒞 𑒁𑒕𑒱 𑒖𑒹 𑒧𑒰𑒋𑒏 𑒮𑒳𑒡𑒱 𑒧𑒳𑒠𑒰 𑒯𑒳𑒢𑒏𑒼 𑒢𑒯𑒱 𑒩𑒯𑒻𑒞 𑒕𑒪𑒢𑓂𑒯𑒱 𑒂𑒏𑒱 𑒦𑓄 𑒮𑒏𑒻𑒞 𑒁𑒕𑒱 𑒖𑒹 𑒍𑒞𑒹𑒏 𑒣𑒰𑒃 𑒂 𑒮𑒧𑒨 𑒢𑒯𑒱 𑒩𑒯𑒻𑒞 𑒯𑒼𑒋𑒞𑒢𑓂𑒯𑒱।
𑒧𑒰𑒋 𑒥𑒹𑒔𑒰𑒩𑒲𑒏𑒹𑒿 𑒏𑓂𑒨𑒼 𑒏𑒯𑒱 𑒠𑒻𑒢𑓂𑒯𑒱 𑒖𑒹 𑒥𑒹𑒙𑒰𑒏𑒹𑒿 𑒤𑒹𑒩 𑒤𑒩𑓂𑒮𑓂𑒙 𑒛𑒱𑒫𑒲𑒖𑒢 𑒦𑒹𑒪 𑒁𑒕𑒱 𑒂𑒏𑒱 𑒣𑒞𑒱𑒏𑒹𑒿 𑒯𑒰𑒃𑒫𑒹 𑒏𑒹𑒩 𑒚𑒹𑒏𑒰 𑒦𑒹𑒙𑒱 𑒑𑒹𑒪 𑒕𑒢𑓂𑒯𑒱, 𑒞𑒿 𑒍 𑒞𑒱𑒩𑒣𑒱𑒞 𑒦𑓄 𑒖𑒰𑒃𑒞 𑒕𑒪𑒲𑒯। 𑒑𑒰𑒧𑒧𑒹 𑒥𑒙𑒰𑒃𑒠𑒰𑒩 𑒮𑒦 𑒖𑒹 𑒏𑒱𑒕𑒳 𑒠𑓄 𑒠𑒻𑒢𑓂𑒯𑒱 𑒞𑒰𑒯𑒱𑒮𑒿 𑒏𑒼𑒢𑒼 𑒞𑒩𑒯𑒹𑒿 𑒑𑒳𑒖𑒩 𑒔𑒪𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒢𑒲𑒪 𑒩𑓀𑒑𑒏 𑒢𑒴𑒂, 𑒩𑒳𑒥𑒱𑒨𑒰 𑒫𑒰𑒃𑒪 𑒏𑒯𑒻𑒞 𑒕𑒪 𑒏𑒼𑒙𑒰𑒏 𑒠𑒼𑒏𑒰𑒢 𑒥𑒪𑒰 𑒮𑒦 𑒍𑒯𑒱 𑒢𑒴𑒂𑒏𑒹𑒿, 𑒮𑒹𑒯𑒼 𑒮𑒮𑓂𑒞𑒧𑒹 𑒦𑒹𑒙𑒱 𑒖𑒰𑒃𑒞 𑒕𑒪𑒢𑓂𑒯𑒱, 𑒍𑒯𑒱 𑒏𑒼𑒙𑒰 𑒥𑒪𑒰 𑒠𑒼𑒏𑒰𑒢𑒮𑒿। 𑒩𑒢𑒹-𑒥𑒢𑒹 𑒑𑒰𑒕𑒲𑒧𑒹 𑒒𑒳𑒧𑒋 𑒣𑒛𑓃𑒻𑒞 𑒕𑒪𑒢𑓂𑒯𑒱 𑒖𑒰𑒩𑒢𑒱𑒏 𑒪𑒹𑒪। 𑒑𑒰𑒧𑒧𑒹 𑒮𑒦𑒏 𑒑𑒳𑒖𑒩 𑒏𑒼𑒯𑒳𑒢𑒰𑒏𑒹𑒿 𑒦𑓄 𑒖𑒰𑒃𑒞 𑒕𑒻𑒏 ।
𑒂 𑒋𑒧𑓂𑒯𑒩 𑒚𑒹𑒏𑒹𑒠𑒰𑒩 𑒮𑒰𑒯𑒹𑒥 𑒣𑒻𑒒 𑒥𑒹𑒙𑒰𑒏𑒹𑒿 𑒮𑒧𑒨 𑒣𑒩 𑒣𑒰𑒃 𑒣𑒚𑒹𑒥𑒰𑒏 𑒁𑒞𑒱𑒩𑒱𑒏𑓂𑒞𑓂𑒞 𑒁𑒣𑒢 𑒮𑒦 𑒏𑒩𑓂𑒞𑓂𑒞𑒫𑓂𑒨 𑒥𑒱𑒮𑒩𑒱 𑒑𑒹𑒪 𑒕𑒪𑒰𑒯। 𑒏𑒧𑒰𑒅 𑒂 𑒐𑒰𑒅 𑒕𑒪 𑒧𑒰𑒞𑓂𑒩 𑒯𑒳𑒢𑒏𑒩 𑒧𑓀𑒞𑓂𑒩। 𑒑𑒰𑒧-𑒒𑒩𑒮𑒿 𑒏𑒼𑒢𑒼 𑒧𑒞𑒪𑒥𑒹 𑒢𑒯𑒱।
𑒠𑓂𑒫𑒱𑒖𑒹𑒢𑓂𑒠𑓂𑒩 𑒃𑒪𑒰𑒯𑒰𑒥𑒰𑒠 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒮𑒦𑒏 𑒂𑒠𑒩𑓂𑒬 𑒥𑒢𑒱 𑒑𑒹𑒪 𑒕𑒪𑒰𑒯। 𑒃𑒞𑒱𑒯𑒰𑒮 𑒫𑒱𑒭𑒨𑒏 𑒞𑒱𑒟𑒱 𑒮𑒦 𑒯𑒳𑒢𑒏𑒩 𑒮𑓀𑒑𑒲 𑒥𑒢𑒱 𑒑𑒹𑒪 𑒕𑒪। 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒣𑓂𑒩𑒟𑒧 𑒞𑒿 𑒁𑒥𑒱𑒞𑒹 𑒩𑒯𑒟𑒱, 𑒮𑓀𑒑𑒯𑒱 𑒯𑒳𑒢𑒏𑒩 𑒔𑒰𑒪𑒱-𑒔𑒪𑒢, 𑒑𑒳𑒩𑒳-𑒑𑒧𑓂𑒦𑒲𑒩 𑒮𑓂𑒫𑒦𑒰𑒫, 𑒣𑒩𑒱𑒣𑒏𑓂𑒫 𑒧𑒰𑒢𑒮𑒱𑒏𑒞𑒰 𑒋𑒯𑒱 𑒮𑒦𑒮𑒿 𑒮𑒦 𑒏𑓂𑒨𑒼 𑒣𑓂𑒩𑒦𑒰𑒫𑒱𑒞 𑒩𑒯𑒻𑒞 𑒕𑒪। 𑒮𑓀𑒑𑒲-𑒮𑒰𑒟𑒲 𑒮𑒹𑒯𑒼 𑒏𑒧𑓂𑒧𑒹 𑒕𑒪𑒢𑓂𑒯𑒱। 𑒋𑒏𑒙𑒰 𑒮𑓀𑒑𑒲 𑒕𑒪𑒢𑓂𑒯𑒱 𑒅𑒣𑒹𑒢𑓂𑒠𑓂𑒩 𑒂 𑒋𑒏𑒙𑒰 𑒂𑒪𑒼𑒏। 𑒧𑒯𑒱𑒪𑒰 𑒮𑓀𑒑𑒲 𑒏𑒼𑒢𑒼𑒙𑒰 𑒢𑒯𑒱।
𑒂 𑒮𑒹 𑒍 𑒮𑒦 𑒏𑒯𑒱𑒞𑒼 𑒕𑒪𑒲𑒯 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒞𑒿 𑒒𑒳𑒩𑒱 𑒞𑒏𑒱𑒞𑒼 𑒢𑒯𑒱 𑒕𑒟𑒱। 𑒍𑒯𑒱𑒧𑒹 𑒋𑒏𑒙𑒰 𑒕𑒪𑒲𑒯 𑒁𑒩𑒳𑒢𑓂𑒡𑒞𑒲।𑒣𑒜𑓃𑒥𑒰𑒧𑒹 𑒞𑒹𑒖, 𑒩𑒰𑒖𑒢𑒲𑒞𑒱 𑒫𑒱𑒖𑓂𑒘𑒰𑒢𑒏 𑒫𑒱𑒠𑓂𑒨𑒰𑒩𑓂𑒟𑒲। 𑒣𑓂𑒩𑒞𑒱𑒨𑒼𑒑𑒲 𑒮𑓂𑒫𑒦𑒰𑒫𑒏 𑒕𑒪𑒲𑒯। 𑒥𑒰𑒣𑒏 𑒠𑒳𑒪𑒰𑒩𑒴 𑒂 𑒣𑒱𑒞𑒰𑒏𑒹𑒿 𑒯𑒳𑒢𑒏𑒰 𑒣𑒩 𑒮𑒹𑒯𑒼 𑒁𑒮𑒲𑒧 𑒫𑒱𑒬𑓂𑒫𑒰𑒮 𑒕𑒪𑒢𑓂𑒯𑒱।𑒋𑒛𑒫𑒰𑒢𑓂𑒮 𑒏𑒯𑒱 𑒮𑒏𑒻𑒞 𑒕𑒲। 𑒠𑓂𑒫𑒱𑒖𑒹𑒢𑓂𑒠𑓂𑒩𑒮𑒿 𑒥𑒯𑒳𑒞 𑒥𑒱𑒢𑓂𑒠𑒳 𑒣𑒩 𑒮𑒳𑒗𑒰𑒫𑒏 𑒂𑒏𑒰𑓀𑒏𑓂𑒭𑒲 𑒕𑒪𑒲𑒯। 𑒧𑒳𑒠𑒰 𑒠𑓂𑒫𑒱𑒖𑒹𑒢𑓂𑒠𑓂𑒩 𑒞𑒿 𑒠𑒼𑒮𑒩𑒹 𑒪𑒼𑒏 𑒕𑒪𑒰𑒯। 𑒯𑒳𑒢𑒏𑒩 𑒒𑒩𑒏 𑒏𑒼𑒢𑒼 𑒑𑒣 𑒞𑒿 𑒏𑒏𑒩𑒼 𑒥𑒳𑒗𑒪 𑒢𑒯𑒱 𑒩𑒯𑒻𑒏। 𑒧𑒳𑒠𑒰 𑒮𑒹 𑒏𑒰𑒩𑒝 𑒕𑒪 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒮𑒦𑒏 𑒣𑓂𑒩𑒞𑒱 𑒢𑒱𑒩𑒣𑒹𑒏𑓂𑒭 𑒩𑒯𑒻𑒞 𑒕𑒪𑒰𑒯।
“𑒨𑒾 𑒅𑒣𑒹𑒢𑓂𑒠𑓂𑒩। 𑒩𑒰𑒖𑒢𑒲𑒞𑒱 𑒫𑒱𑒖𑓂𑒘𑒰𑒢𑒧𑒹 𑒞𑒿 𑒯𑒧𑒩𑒰 𑒏𑒼𑒢𑒼 𑒠𑒱𑒏𑓂𑒏𑒞 𑒢𑒯𑒱 𑒁𑒕𑒱 𑒧𑒳𑒠𑒰 𑒃𑒞𑒱𑒯𑒰𑒮𑒧𑒹 𑒞𑒱𑒟𑒱 𑒂 𑒠𑒵𑒭𑓂𑒙𑒱𑒏𑒼𑒝𑒮𑒿 𑒥𑒛𑓂𑒛 𑒠𑒱𑒏𑓂𑒏𑒞𑒱𑒧𑒹 𑒣𑒛𑓃𑒱 𑒑𑒹𑒪 𑒕𑒲”।𑒁𑒩𑒳𑒢𑓂𑒡𑒞𑒲 𑒅𑒣𑒹𑒢𑓂𑒠𑓂𑒩𑒮𑒿 𑒣𑒳𑒕𑒪𑒢𑓂𑒯𑒱।
𑒂 𑒠𑒳𑒢𑒴 𑒑𑒼𑒙𑒹 𑒃𑒞𑒱𑒯𑒰𑒮 𑒣𑒩 𑒁𑒣𑒢-𑒁𑒣𑒢 𑒠𑒵𑒭𑓂𑒙𑒱𑒏𑒼𑒝 𑒋𑒏 𑒠𑒼𑒮𑒩𑒏𑒹𑒿 𑒠𑒹𑒥𑒋 𑒪𑒑𑒪𑒟𑒱।𑒩𑒰𑒮𑒥𑒱𑒯𑒰𑒩𑒲 𑒥𑒼𑒮 𑒂𑒖𑒰𑒠 𑒯𑒱𑒢𑓂𑒠 𑒤𑒾𑒖𑒏 𑒮𑓂𑒟𑒰𑒣𑒢𑒰 𑒏𑒋𑒪𑒢𑓂𑒯𑒱 𑒮𑒳𑒦𑒰𑒭 𑒔𑒢𑓂𑒠𑓂𑒩 𑒥𑒼𑒮 𑒢𑒯𑒱 𑒂 𑒢𑒲𑒪𑒏 𑒐𑒹𑒞𑒲𑒏 𑒯𑒹𑒞𑒳 𑒮𑒩𑒐𑒹𑒖 𑒖𑒹 𑒑𑒳𑒖𑒩𑒰𑒞𑒧𑒹 𑒕𑒪 𑒥𑒛𑓂𑒛 𑒣𑓂𑒩𑒮𑒱𑒠𑓂𑒡 𑒕𑒪, 𑒡𑒼𑒪𑒰𑒫𑒲𑒩 𑒮𑒦𑒮𑒿 𑒣𑒻𑒒 𑒮𑒱𑒢𑓂𑒡𑒳 𑒒𑒰𑒙𑒲 𑒂𑒏𑒱 𑒮𑒩𑒮𑓂𑒫𑒞𑒲 𑒢𑒠𑒲 𑒮𑒦𑓂𑒨𑒞𑒰𑒏 𑒮𑓂𑒟𑒪 𑒕𑒪 𑒂 𑒠𑒰𑒩𑒰 𑒬𑒱𑒏𑒼𑒯𑒏𑒹𑒿 𑒮𑒦𑒮𑒿 𑒣𑒻𑒒 𑒧𑒢𑒮𑒥 𑒠𑒹𑒪 𑒑𑒹𑒪 𑒕𑒪 । 𑒅𑒣𑒹𑒢𑓂𑒠𑓂𑒩 𑒄 𑒮𑒦 𑒑𑒣 𑒠𑓂𑒫𑒱𑒖𑒹𑒢𑓂𑒠𑓂𑒩𑒮𑒿 𑒣𑒴𑒕𑒱 𑒏𑒋 𑒂𑒥𑒟𑒱 𑒂 𑒤𑒹𑒩 𑒁𑒩𑒳𑒢𑓂𑒡𑒞𑒲𑒮𑒿 𑒫𑒰𑒩𑓂𑒞𑓂𑒞𑒰𑒪𑒰𑒣 𑒏𑒩𑒟𑒱। 𑒋𑒯𑒱𑒧𑒹 𑒮𑒧𑒨𑒏 𑒯𑒰𑒢𑒱 𑒯𑒼𑒃𑒞 𑒕𑒪𑒢𑓂𑒯𑒱, 𑒮𑒹 𑒅𑒣𑒹𑒢𑓂𑒠𑓂𑒩 𑒏𑒯𑒪𑒢𑓂𑒯𑒱 𑒖𑒹 𑒏𑒱𑒋𑒏 𑒢𑒯𑒱 𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒮𑒹𑒯𑒼 𑒁𑒣𑒢 𑒮𑒧𑒴𑒯𑒧𑒹 𑒬𑒰𑒧𑒱𑒪 𑒏𑒋 𑒪𑒹𑒪 𑒖𑒰𑒨।
“𑒧𑒰𑒞𑓂𑒩 𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒬𑒰𑒧𑒱𑒪 𑒏𑒩𑒴। 𑒥𑒹𑒬𑒲 𑒑𑒼𑒙𑒹𑒏𑒹𑒿 𑒂𑒢𑒥 𑒞𑒿 𑒣𑒜𑓃𑒰𑒃 𑒏𑒧 𑒂 𑒑𑒣 𑒮𑒩𑒏𑓂𑒏𑒰 𑒥𑒹𑒬𑒲 𑒯𑒼𑒋𑒞”। 𑒁𑒩𑒳𑒢𑓂𑒡𑒞𑒲𑒏 𑒄 𑒫𑒱𑒔𑒰𑒩 𑒥𑒢𑒪।
𑒅𑒣𑒹𑒢𑓂𑒠𑓂𑒩𑒏 𑒏𑒯𑒪𑒰𑒮𑒿 𑒠𑓂𑒫𑒱𑒖𑒹𑒢𑓂𑒠𑓂𑒩 𑒂𑒥𑒋 𑒪𑒑𑒪𑒰𑒯, 𑒍𑒯𑒱 𑒮𑒰𑒧𑒴𑒯𑒱𑒏 𑒁𑒡𑓂𑒨𑒨𑒢𑒧𑒹।
𑒞𑒰𑒫𑒞 𑒋𑒏 𑒠𑒱𑒢 𑒮𑒧𑒰𑒔𑒰𑒩 𑒂𑒋𑒪 𑒖𑒹 𑒣𑒱𑒞𑒰𑒏 𑒧𑒼𑒢 𑒥𑒛𑓂𑒛 𑒐𑒩𑒰𑒥 𑒕𑒢𑓂𑒯𑒱। 𑒣𑒯𑒳𑒿𑒔𑒪𑒰𑒯 𑒞𑒿 𑒪𑒲𑒫𑒩 𑒐𑒩𑒰𑒥 𑒯𑒼𑒋𑒥𑒰𑒏 𑒮𑒧𑒰𑒔𑒰𑒩 𑒦𑒹𑒙𑒪𑒢𑓂𑒯𑒱। 𑒮𑒞𑒧𑒰𑒋𑒮𑒿 𑒮𑒹𑒯𑒼 𑒦𑒹𑒿𑒙 𑒦𑒹𑒪𑒢𑓂𑒯𑒱।𑒑𑒰𑒧-𑒒𑒩 𑒣𑒩 𑒏𑒼𑒢𑒼 𑒐𑒥𑒩𑒱 𑒢𑒯𑒱। 𑒤𑒹𑒩 𑓑𑓕 𑒠𑒱𑒢𑒧𑒹 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒢𑓂𑒯𑒱 𑒣𑒱𑒞𑒰𑒏। 𑒑𑒰𑒧 𑒣𑒩 𑒞𑒐𑒢 𑒖𑒰 𑒏𑒋 𑒐𑒥𑒩𑒱 𑒦𑒹𑒪। 𑒢𑒯𑒱 𑒞𑒿 𑒏𑒼𑒢𑒼 𑒣𑒞𑒰, 𑒢𑒯𑒱𑒨𑒹 𑒏𑒼𑒢𑒼 𑒤𑒼𑒢। 𑒧𑒰𑒋 𑒥𑒹𑒔𑒰𑒩𑒲 𑒏𑒢𑒻𑒞 𑒩𑒯𑒱 𑒑𑒹𑒪𑒲𑒯। 𑒥𑒹𑒙𑒰 𑒠𑒰𑒯-𑒮𑓀𑒮𑓂𑒏𑒰𑒩𑒏 𑒥𑒰𑒠 𑒮𑒼𑒗𑒹 𑒣𑓂𑒩𑒨𑒰𑒑 𑒔𑒪𑒱 𑒑𑒹𑒪𑒰𑒯। 𑒑𑒰𑒧 𑒒𑒳𑒩𑒱𑒨𑒼 𑒏𑓄 𑒢𑒯𑒱 𑒑𑒹𑒪𑒰𑒯।
𑒧𑒰𑒋𑒏 𑒐𑒱𑒮𑓂𑒮𑒰 𑒨𑒻𑒯 𑒁𑒕𑒱 𑒖𑒹 𑒤𑒹𑒩 𑒍 𑒑𑒳𑒧-𑒬𑒳𑒧 𑒩𑒯𑒋 𑒪𑒑𑒪𑒲𑒯। 𑒏𑒼𑒢𑒼 𑒔𑒲𑒖𑒏 𑒚𑒹𑒏𑒰𑒢 𑒢𑒯𑒱 𑒩𑒯𑒢𑓂𑒯𑒱। 𑒋𑒏 𑒥𑒹𑒩 𑒞𑒿 𑒛𑒱𑒥𑒱𑒨𑒰 𑒮𑒿 𑒔𑒰𑒩𑒏 𑒒𑒩𑒧𑒹 𑒞𑒹𑒯𑒢 𑒂𑒑𑒱 𑒪𑒰𑒑𑒱 𑒑𑒹𑒪 𑒖𑒹 𑒮𑒾𑒿𑒮𑒹 𑒙𑒼𑒪 𑒖𑒩𑒱 𑒑𑒹𑒪। 𑒍𑒯𑒱 𑒮𑒧𑒨𑒧𑒹 𑒮𑒦𑒏𑒹𑒿 𑒔𑒰𑒩𑒏 𑒒𑒩 𑒩𑒯𑒻𑒏। 𑒮𑒦 𑒒𑒩 𑒋𑒏 𑒠𑒼𑒮𑒩𑒮𑒿 𑒮𑒙𑒪। 𑒮𑒹 𑒮𑒾𑓀𑒮𑒹 𑒙𑒼𑒪 𑒖𑒩𑒱 𑒑𑒹𑒪। 𑒮𑒦 𑒏𑒯𑒋 𑒂𑒏𑒱 𑒥𑒢𑒞𑒲 𑒥𑒢𑒰𑒥𑒋 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒧𑒰𑒋 𑒅𑒣𑒢𑓂𑒨𑒰𑒮 𑒣𑒜𑓃𑒻𑒞-𑒣𑒜𑓃𑒻𑒞 𑒮𑒳𑒞𑒱 𑒑𑒹𑒪𑒲𑒯 𑒂 𑒛𑒱𑒥𑒱𑒨𑒰𑒧𑒹 𑒯𑒰𑒟 𑒪𑒰𑒑𑒱 𑒑𑒹𑒪𑒢𑓂𑒯𑒱।𑒮𑒾𑒿𑒮𑒹 𑒙𑒼𑒪 𑒖𑒩𑒻𑒞 𑒩𑒯𑒋 𑒂 𑒍 𑒦𑒹𑒩 𑒡𑒩𑒱 𑒮𑒴𑒞𑒪 𑒩𑒯𑒪𑒲𑒯। 𑒏𑒏𑒩𑒼 𑒤𑒳𑒩𑒹𑒪𑒃 𑒞𑒿 𑒯𑒳𑒢𑒏𑒰 𑒅𑒚𑒰-𑒣𑒳𑒚𑒰 𑒏𑓄 𑒥𑒰𑒯𑒩 𑒏𑒋𑒪𑒏। 𑒥𑒰𑒠𑒧𑒹 𑒯𑒳𑒢𑒏𑒩 𑒂𑒩𑒼 𑒁𑒫𑒯𑒹𑒪𑒢𑒰 𑒯𑒼𑒧𑒋 𑒪𑒑𑒪𑒢𑓂𑒯𑒱। 𑒪𑒼𑒏 𑒑𑒰𑒩𑒱 𑒮𑒹𑒯𑒼 𑒣𑒜𑓃𑒱 𑒠𑒹𑒢𑒹 𑒕𑒪𑒢𑓂𑒯𑒱 𑒏𑒞𑒰𑒏 𑒥𑒹𑒩।
𑒍𑒯𑒱𑒢𑒰𑒧𑒹 𑒋𑒏 𑒥𑒹𑒩 𑒖𑒰𑒛𑓃𑒏 𑒗𑒣𑒮𑒲𑒧𑒹 𑒑𑒳𑒖𑒩𑒱 𑒑𑒹𑒪𑒲𑒯। 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒣𑒞𑒰 𑒮𑒹𑒯𑒼 𑒢𑒯𑒱 𑒕𑒪𑒢𑓂𑒯𑒱 𑒏𑒏𑒩𑒼 𑒪𑒑। 𑒒𑒩𑒰𑒩𑒲𑒏 𑒪𑒼𑒦𑒧𑒹 𑒋𑒏 𑒑𑒼𑒙 𑒮𑒧𑒰𑒓 𑒂𑒑𑒱 𑒠𑒹𑒪𑒏𑒢𑓂𑒯𑒱।
𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒢𑒱𑒏𑒙𑒞𑒰 𑒁𑒩𑒳𑒢𑓂𑒡𑒞𑒲𑒮𑒿 𑒥𑒜𑓃𑒋 𑒪𑒑𑒪𑒢𑓂𑒯𑒱। 𑒅𑒣𑒹𑒢𑓂𑒠𑓂𑒩𑒏𑒹𑒿 𑒁𑒩𑒳𑒢𑓂𑒡𑒞𑒲 𑒋𑒏 𑒥𑒹𑒩 𑒏𑒯𑒱𑒨𑒼 𑒠𑒹𑒪𑒐𑒱𑒢𑓂𑒯 𑒖𑒹 𑒁𑒯𑒰𑒿 𑒮𑒲𑒜𑓃𑒲 𑒕𑒪𑒯𑒳𑒿 𑒯𑒧𑒩 𑒂 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒥𑒲𑒔𑒧𑒹।
𑒁𑒩𑒳𑒢𑓂𑒡𑒞𑒲𑒏 𑒧𑒰𑒋 𑒮𑒹𑒯𑒼 𑒥𑒔𑓂𑒔𑒹𑒧𑒹 𑒑𑒳𑒖𑒩𑒱 𑒑𑒹𑒪 𑒕𑒪𑒲𑒯। 𑒣𑒱𑒞𑒰𑒏 𑒠𑒳𑒪𑒩𑒲 𑒕𑒪𑒲𑒯𑒹 𑒍। 𑒁𑒩𑒳𑒢𑓂𑒡𑒞𑒲𑒏 𑒏𑒯𑒪𑒰 𑒣𑒩 𑒠𑓂𑒫𑒱𑒖𑒹𑒢𑓂𑒠𑓂𑒩 𑒂𑒥𑒱 𑒑𑒹𑒪𑒰𑒯 𑒯𑒳𑒢𑒏𑒰 𑒒𑒩 𑒣𑒩 𑒩𑒯𑒥𑒰𑒏 𑒪𑒹𑒪। 𑒮𑓀𑒑𑒹 𑒣𑒜𑓃𑒪𑒢𑓂𑒯𑒱 𑒂 𑒤𑒹𑒩 𑒠𑒳𑒢𑒴 𑒑𑒼𑒙𑒹 𑒣𑓂𑒩𑒨𑒰𑒑 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒣𑓂𑒩𑒼𑒤𑒹𑒮𑒩 𑒥𑒢𑒱 𑒑𑒹𑒪𑒰𑒯।𑒫𑒱𑒫𑒰𑒯 𑒮𑒹𑒯𑒼 𑒦𑓄 𑒑𑒹𑒪𑒢𑓂𑒯𑒱। 𑒧𑒰𑒞𑓂𑒩 𑒧𑒡𑒳𑒥𑒢𑒲𑒏 𑒋𑒏 𑒑𑒼𑒙 𑒣𑒲𑒮𑒰𑒏𑒹𑒿 𑒥𑒳𑒗𑒪 𑒕𑒪𑒢𑓂𑒯𑒱 𑒯𑒱𑒢𑒏𑒩 𑒫𑒱𑒫𑒰𑒯𑒏 𑒫𑒱𑒭𑒨𑒧𑒹।𑒣𑒲𑒮𑒰 𑒕𑒪𑒰𑒯 𑒣𑒞𑓂𑒩𑒏𑒰𑒩 𑒂 𑒧𑒡𑒳𑒥𑒢𑒲𑒏 𑒏𑒼𑒢𑒼 𑒯𑒰𑒮𑓂𑒣𑒲𑒙𑒪𑒧𑒹 𑒏𑒰𑒖 𑒏𑒹𑒢𑒯𑒰𑒩𑒱 𑒏𑒹𑒩𑒪𑒏 𑒢𑒩𑓂𑒮 𑒮𑒿 𑒞𑒰𑒯𑒱 𑒖𑒧𑒰𑒢𑒰𑒧𑒹 𑒫𑒱𑒫𑒰𑒯 𑒏𑒋𑒢𑒹 𑒕𑒪𑒰𑒯।𑒒𑒩 𑒣𑒩𑒱𑒫𑒰𑒩 𑒯𑒳𑒢𑒏𑒰 𑒮𑒹𑒯𑒼 𑒥𑒰𑒩𑒱 𑒖𑒹𑒏𑒰𑒿 𑒠𑒹𑒢𑒹 𑒕𑒪𑒢𑓂𑒯𑒱। 𑒧𑒳𑒠𑒰 𑒕𑒪𑒰𑒯 𑒥𑒛𑓂𑒛 𑒢𑒲𑒏 𑒪𑒼𑒏।
𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒫𑒻𑒯 𑒥𑒹𑒩-𑒥𑒐𑒞 𑒣𑒩 𑒏𑒯𑒱𑒨𑒼 𑒏𑒰𑒪 𑒧𑒠𑒞𑒱 𑒏𑒩𑒻𑒞 𑒕𑒪𑒰𑒯।𑒧𑒳𑒠𑒰 𑒫𑒱𑒫𑒰𑒯𑒧𑒹 𑒍𑒯𑒼 𑒢𑒯𑒱 𑒁𑒋𑒪𑒰𑒯।𑒁𑒣𑒢 𑒮𑒪𑒰𑒯 𑒠𑒹𑒢𑒹 𑒕𑒪𑒰𑒯 𑒋𑒯𑒱 𑒫𑒱𑒫𑒰𑒯𑒏 𑒫𑒱𑒩𑒳𑒠𑓂𑒡। 𑒁𑒣𑒢 𑒅𑒠𑒰𑒯𑒩𑒝 𑒠𑒹𑒪𑒢𑓂𑒯𑒱 𑒖𑒹 𑒏𑒞𑒹𑒏 𑒠𑒱𑒏𑓂𑒏𑒞 𑒦𑒹𑒪𑒢𑓂𑒯𑒱। 𑒧𑒳𑒠𑒰 𑒮𑓀𑒑𑒧𑒹 𑒄𑒯𑒼 𑒏𑒯𑒪𑒢𑓂𑒯𑒱 𑒖𑒹 𑒁𑒯𑒰𑒿𑒏𑒹𑒿 𑒞𑒿 𑒥𑒰𑒯𑒩 𑒩𑒯𑒥𑒰𑒏 𑒁𑒕𑒱, 𑒮𑒹 𑒍𑒞𑒹𑒏 𑒠𑒱𑒏𑓂𑒏𑒞 𑒢𑒯𑒱 𑒯𑒼𑒋𑒞। 𑒯𑒧 𑒞𑒿 𑒧𑒡𑒳𑒥𑒢𑒲𑒧𑒹 𑒩𑒯𑒻𑒞 𑒕𑒪𑒯𑒳𑒿, 𑒏𑒯𑒱𑒨𑒼 𑒏𑒢𑒱𑒨𑒰𑒏𑒹𑒿 𑒑𑒰𑒧𑒼 𑒢𑒯𑒱 𑒪𑓄 𑒖𑒰 𑒮𑒏𑒪𑒯𑒳𑒿।
𑒠𑓂𑒫𑒱𑒖𑒹𑓀𑒢𑓂𑒠𑓂𑒩𑒏 𑒩𑒱𑒮𑒩𑓂𑒔 𑒣𑒩 𑒩𑒱𑒮𑒩𑓂𑒔 𑒣𑓂𑒩𑒏𑒰𑒬𑒱𑒞 𑒯𑒼𑒃𑒞 𑒑𑒹𑒪𑒢𑓂𑒯𑒱। 𑒠𑒹𑒬-𑒫𑒱𑒠𑒹𑒬𑒧𑒹 𑒮𑒹𑒧𑒲𑒢𑒰𑒩 𑒣𑒩 𑒖𑒰𑒟𑒱। 𑒁𑒩𑒳𑒢𑓂𑒡𑒞𑒲 𑒖𑒹𑒢𑒰 𑒥𑒹𑒩 𑒣𑒩 𑒧𑒠𑒞𑒱 𑒏𑒋𑒢𑒹 𑒕𑒪𑒲𑒯 𑒞𑒏𑒩𑒰 𑒥𑒰𑒠 𑒠𑓂𑒫𑒱𑒖𑒹𑒢𑓂𑒠𑓂𑒩 𑒁𑒣𑒢𑒰 𑒣𑒩 𑒦𑒩𑒼𑒮 𑒏𑒋𑒢𑒰𑒃 𑒕𑒼𑒛𑓃𑒱 𑒠𑒹𑒢𑒹 𑒕𑒪𑒰𑒯। 𑒫𑒰𑒧𑒣𑓀𑒟𑒲 𑒃𑒞𑒱𑒯𑒰𑒮𑒏𑒰𑒩𑒏 𑒩𑒴𑒣𑒧𑒹 𑒕𑒫𑒱 𑒥𑒢𑒰 𑒏𑒋 𑒧𑒰𑒞𑓂𑒩 𑒃𑒞𑒱𑒯𑒰𑒮 𑒂 𑒣𑒳𑒩𑒰𑒞𑒞𑓂𑒞𑓂𑒫 𑒮𑒿 𑒮𑒧𑓂𑒣𑒩𑓂𑒏 𑒥𑒢𑒍𑒢𑒹 𑒕𑒪𑒰𑒯। 𑒮𑒰𑒪𑒏-𑒮𑒰𑒪 𑒥𑒱𑒞𑒻𑒞 𑒑𑒹𑒪। 𑒑𑒰𑒧𑒏 𑒪𑒼𑒏𑒧𑒹 𑒧𑒰𑒞𑓂𑒩 𑒪𑒰𑒪 𑒕𑒪𑒰𑒯 𑒖𑒹 𑒍𑒯𑒱 𑒢𑒑𑒩𑒧𑒹 𑒩𑒯𑒻𑒞 𑒕𑒪𑒰𑒯 𑒂 𑒏𑒯𑒱𑒨𑒼 𑒏𑒰𑒪 𑒍 𑒦𑒹𑒿𑒙 𑒏𑓄 𑒁𑒥𑒻𑒞 𑒕𑒪𑒐𑒱𑒢𑓂𑒯।
𑒪𑒰𑒪𑒏 𑒑𑒣 𑒣𑒩 𑒁𑒢𑒳𑒞𑓂𑒞𑒩𑒱𑒞 𑒦𑓄 𑒖𑒰𑒃𑒞 𑒕𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩। 𑒧𑒰𑒋𑒏 𑒏𑒼𑒢𑒼 𑒔𑒩𑓂𑒔𑒰 𑒣𑒩 𑒢𑒼𑒩 𑒣𑒲𑒥𑒱 𑒖𑒰𑒃𑒞 𑒕𑒪𑒰𑒯। 𑒮𑒼𑒔𑒢𑒹 𑒩𑒯𑒟𑒱 𑒖𑒹 𑒏𑒱𑒕𑒳 𑒥𑒢𑒱 𑒖𑒋𑒞𑒰𑒯 𑒞𑒿 𑒧𑒰𑒋𑒏𑒹𑒿 𑒮𑓀𑒑 𑒂𑒢𑒱 𑒩𑒐𑒱𑒞𑒟𑒱 𑒂 𑒮𑒦 𑒣𑒰𑒣𑒏 𑒣𑒬𑓂𑒔𑒰𑒞𑒰𑒣 𑒏𑓄 𑒪𑒱𑒞𑒟𑒱। 𑒧𑒳𑒠𑒰 𑒨𑒰𑒫𑒞 𑒁𑒣𑒢 𑒐𑒩𑓂𑒔𑒰 𑒢𑒯𑒱 𑒖𑒳𑒧𑒢𑓂𑒯𑒱 𑒞𑒰𑒫𑒞 𑒞𑒿 𑒍 𑒖𑒲𑒫𑒱𑒞 𑒩𑒯𑒪𑒲𑒯 𑒂 𑒖𑒐𑒢 𑒏𑒱𑒕𑒳 𑒥𑒢𑒪𑒰𑒯 𑒞𑒿 𑒞𑒏𑒩 𑒣𑒯𑒱𑒢𑒯𑒱 𑒕𑒼𑒛𑓃𑒱 𑒑𑒹𑒪𑒲𑒯। 𑒏𑒼𑒢 𑒧𑒳𑒿𑒯 𑒏𑒏𑒩𑒰 𑒠𑒹𑒐𑒹𑒞𑒟𑒱।
𑒂 𑒖𑒐𑒢 𑒪𑒰𑒪 𑒣𑒯𑒳𑒿𑒔𑒪𑒰𑒯 𑒯𑒳𑒢𑒏𑒰 𑒪𑒑𑒧𑒹 𑒄 𑒥𑒖𑒻𑒞 𑒖𑒹 𑒪𑒱𑒨𑒯, 𑒦𑒰𑒞𑒱𑒖 𑒂𑒋𑒪 𑒕𑒟𑒱 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳, 𑒁𑒯𑒰𑒿 𑒞𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒏𑒏𑒩𑒼𑒮𑒿 𑒩𑒐𑒥𑒹 𑒢𑒯𑒱 𑒏𑒋𑒪𑒯𑒳𑒿, 𑒞𑒿 𑒣𑒯𑒱𑒪 𑒥𑒹𑒩 𑒥𑒖𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩-
“𑒏𑒼𑒢 𑒮𑒩𑒼𑒏𑒰𑒩 𑒧𑒰𑒋𑒮𑒿 𑒣𑒻𑒒 𑒕𑒪 𑒨𑒾 𑒪𑒰𑒪 । 𑒖𑒹 𑒁𑒯𑒰𑒿 𑒏𑒯𑒻𑒞 𑒕𑒲 𑒖𑒹 𑒯𑒧 𑒏𑒏𑒩𑒼𑒮𑒿 𑒮𑒩𑒼𑒏𑒰𑒩 𑒢𑒯𑒱 𑒩𑒐𑒢𑒹 𑒕𑒲”।
𑒩𑒰𑒑 𑒫𑒻𑒠𑒹𑒯𑒲 𑒦𑒻𑒩𑒫𑒲
“𑒑𑒥𑒻𑒨𑒰 𑒣𑒩𑒱𑒥𑒰𑒩 𑒕𑒻𑒏। 𑒞𑒰𑒢 𑒖𑒿 𑒔𑒜𑓃𑒻𑒞 𑒕𑒻𑒏 𑒞𑒿 𑒅𑒞𑒩𑒱𑒞𑒹 𑒢𑒘𑒱 𑒕𑒻𑒏”।
“𑒋𑒏𑒮𑒿 𑒋𑒏 𑒏𑒥𑒱𑒏𑒰𑒚𑒲 𑒮𑒦𑒙𑒰, 𑒣𑒩𑒱𑒥𑒰𑒩𑒧𑒹 𑒏𑓂𑒨𑒼 𑒑𑒣 𑒕𑒼𑒛𑓃𑒥𑒰𑒧𑒹 𑒏𑒏𑒩𑒼𑒮𑒿 𑒏𑒧 𑒢𑒯𑒱”।
“𑒮𑒹 𑒏𑒲 𑒏𑒯𑒻𑒞 𑒕𑒱𑒨𑒻𑒏। 𑒣𑒩𑒱𑒥𑒰𑒩𑒏 𑒏𑒼𑒢 𑒏𑒟𑒰, 𑒮𑒾𑒿𑒮𑒹 𑒙𑒼𑒪 𑒧𑒹 𑒮𑒦𑒙𑒰 𑒏𑒥𑒱𑒏𑒰𑒚𑒱𑒨𑒹 𑒦𑒹𑒙𑒞”।
𑒅𑒠𑒱𑒞𑒏 𑒯𑒰𑒩𑒧𑒼𑒢𑒱𑒨𑒧𑒏 𑒞𑒰𑒢𑒏 𑒫𑒱𑒫𑒹𑒔𑒢 𑒮𑒾𑒿𑒮𑒹 𑒑𑒰𑒧 𑒏𑒋 𑒩𑒯𑒪 𑒕𑒪।
𑒅𑒠𑒱𑒞𑒏 𑒥𑒰𑒥𑒴 𑒂 𑒏𑒰𑒏𑒰 𑒠𑒳𑒢𑒴 𑒑𑒼𑒙𑒹 𑒥𑒛𑓂𑒛 𑒣𑒻𑒒 𑒑𑒥𑒻𑒨𑓂𑒨𑒰। 𑒐𑒰𑒢𑒠𑒰𑒢𑒲 𑒑𑒰𑒨𑒢 𑒂 𑒫𑒰𑒠𑒢 𑒣𑓂𑒩𑒞𑒱𑒦𑒰 𑒯𑒳𑒢𑒏𑒰 𑒪𑒼𑒏𑒢𑒱𑒏 𑒩𑒏𑓂𑒞𑓂𑒞𑒧𑒹 𑒕𑒪𑒢𑓂𑒯𑒱। 𑒅𑒠𑒱𑒞 𑒣𑒰𑒿𑒔𑒹 𑒫𑒩𑓂𑒭𑒮𑒿 𑒮𑓀𑒑𑒲𑒞 𑒮𑒲𑒐𑒋 𑒪𑒰𑒑𑒪 𑒕𑒪𑒰𑒯, 𑒯𑒳𑒢𑒏𑒩 𑒮𑓂𑒫𑒩𑒏 𑒮𑓂𑒫𑒰𑒦𑒰𑒫𑒱𑒏 𑒅𑒠𑒰𑒞𑓂𑒞 𑒂 𑒁𑒢𑒳𑒠𑒰𑒞𑓂𑒞 𑒮𑓂𑒫𑒩𑒴𑒣𑒮𑒿 𑒣𑒱𑒞𑒰 𑒧𑒳𑒑𑓂𑒡 𑒦𑒋 𑒖𑒰𑒃𑒞 𑒕𑒪𑒰𑒯। 𑒧𑒳𑒠𑒰 𑒑𑒰𑒧𑒏 𑒪𑒼𑒏𑒏 𑒮𑓀𑒑𑒲𑒞𑒏 𑒖𑓂𑒘𑒰𑒢 𑒁𑒭𑓂𑒙𑒖𑒰𑒧𑒧𑒹 𑒧𑒵𑒠𑓀𑒑, 𑒗𑒰𑒃𑒪 𑒂 𑒯𑒰𑒩𑒧𑒼𑒢𑒱𑒨𑒧 𑒥𑒖𑒹𑒥𑒰 𑒡𑒩𑒱 𑒂 𑒢𑒱𑒩𑓂𑒠𑒱𑒭𑓂𑒙 𑒫𑒰𑒏𑓂𑒨𑒏𑒹𑒿 𑒑𑒋𑒥𑒰 𑒡𑒩𑒱 𑒮𑒲𑒧𑒱𑒞 𑒕𑒪 । 𑒂 𑒮𑒹 𑒣𑓂𑒩𑒰𑒨𑓁 𑒮𑒦 𑒑𑒼𑒙𑒹 𑒮𑒯𑒖 𑒩𑒴𑒣𑒹𑒿 𑒏𑒋 𑒪𑒻𑒞 𑒕𑒪𑒰𑒯।
“𑒂𑒓𑓂𑒪 𑒪𑒼𑒏𑒢𑒱𑒏 𑒩𑒰𑒖𑓂𑒨 𑒕𑒪, 𑒧𑒻𑒏𑒰𑒪𑒹 𑒧𑒯𑒼𑒠𑒨 𑒮𑓀𑒮𑓂𑒏𑒵𑒞 𑒬𑒱𑒏𑓂𑒭𑒰𑒏 𑒮𑓂𑒟𑒰𑒢 𑒣𑒩 𑒂𑒓𑓂𑒪 𑒦𑒰𑒭𑒰 𑒁𑒢𑒥𑒰 𑒣𑒩 𑒅𑒞𑒰𑒩𑒴 𑒕𑒪𑒰𑒯।
𑒅𑒠𑒱𑒞𑒏 𑒣𑒱𑒞𑒰𑒖𑒲 𑒋𑒯𑒱𑒮𑒿 𑒮𑓀𑒥𑓀𑒡𑒱𑒞 𑒋𑒏𑒙𑒰 𑒏𑒟𑒰 𑒏𑒯𑒻𑒞 𑒕𑒪𑒰𑒯।
“𑒧𑒻𑒏𑒰𑒪𑒹 𑒧𑒯𑒼𑒠𑒨 𑒖𑒐𑒢 𑒦𑒰𑒩𑒞 𑒁𑒋𑒪𑒰𑒯 𑒞𑒿 𑒋𑒏𑒙𑒰 𑒑𑒹𑒮𑓂𑒙 𑒯𑒰𑒅𑒮𑒧𑒹 𑒚𑒯𑒩𑒪 𑒕𑒪𑒰𑒯। 𑒐𑒱𑒛𑓃𑒏𑒲𑒮𑒿 𑒥𑒰𑒯𑒩 𑒠𑒹𑒐𑒱 𑒩𑒯𑒪 𑒕𑒪𑒰𑒯 𑒞𑒿 𑒠𑒹𑒐𑒪𑒢𑓂𑒯𑒱 𑒖𑒹 𑒑𑒹𑒮𑓂𑒙 𑒯𑒰𑒅𑒮𑒏 𑒧𑒻𑒢𑒹𑒖𑒩 𑒣𑒩𑒱𑒮𑒩𑒧𑒹 𑒣𑓂𑒩𑒫𑒹𑒬 𑒏𑒋 𑒩𑒯𑒪 𑒕𑒪𑒰𑒯। 𑒂 𑒍 𑒣𑓂𑒩𑒫𑒹𑒬 𑒏𑒋𑒪𑒰 𑒅𑒞𑓂𑒞𑒩 𑒑𑒹𑒮𑓂𑒙 𑒯𑒰𑒅𑒮𑒏 𑒠𑒩𑒥𑒰𑒢𑒏𑒹𑒿 𑒣𑒋𑒩 𑒕𑒳𑒥𑒱 𑒏𑒋 𑒣𑓂𑒩𑒝𑒰𑒧 𑒏𑒋𑒪𑒢𑓂𑒯𑒱। 𑒥𑒰𑒠𑒧𑒹 𑒖𑒐𑒢 𑒧𑒻𑒏𑒰𑒪𑒹 𑒯𑒳𑒢𑒏𑒰𑒮𑒿 𑒣𑒳𑒕𑒪𑒢𑓂𑒯𑒱, 𑒖𑒹 𑒁𑒯𑒰𑒿 𑒧𑒻𑒢𑒹𑒖𑒩 𑒕𑒲 𑒂 𑒞𑒐𑒢 𑒮𑒰𑒧𑒰𑒢𑓂𑒨 𑒠𑒩𑒥𑒰𑒢𑒏𑒹𑒿 𑒣𑒋𑒩 𑒕𑒳𑒥𑒱 𑒏𑒱𑒋𑒏 𑒣𑓂𑒩𑒝𑒰𑒧 𑒏𑒋 𑒩𑒯𑒪 𑒕𑒪𑒯𑒳𑒿 ? 𑒋𑒯𑒱 𑒣𑒩 𑒯𑒳𑒢𑒏𑒰 𑒣𑓂𑒩𑒞𑓂𑒨𑒳𑒞𑓂𑒞𑒩 𑒦𑒹𑒙𑒪𑒢𑓂𑒯𑒱 𑒖𑒹 𑒍 𑒮𑒰𑒧𑒰𑒢𑓂𑒨 𑒠𑒩𑒥𑒰𑒢 𑒢𑒘𑒱 𑒕𑒪 𑒫𑒩𑒢𑓂 𑒮𑓀𑒮𑓂𑒏𑒵𑒞𑒖𑓂𑒘 𑒮𑒹𑒯𑒼 𑒕𑒪। 𑒞𑒰𑒯𑒱 𑒠𑒱𑒢 𑒧𑒻𑒏𑒰𑒪𑒹 𑒮𑒼𑒔𑒱 𑒪𑒹𑒪𑒢𑓂𑒯𑒱 𑒖𑒹 𑒦𑒰𑒩𑒞𑒏𑒹𑒿 𑒣𑒩𑒰𑒖𑒱𑒞 𑒏𑒩𑒥𑒰𑒏 𑒪𑒹𑒪 𑒦𑒰𑒩𑒞𑒏 𑒮𑓀𑒮𑓂𑒏𑒵𑒞𑒱𑒏𑒹𑒿 𑒢𑒭𑓂𑒙 𑒏𑒩𑒋 𑒣𑒛𑓃𑒞। 𑒂 𑒋𑒯𑒱 𑒪𑒹𑒪 𑒮𑓀𑒮𑓂𑒏𑒵𑒞𑒏𑒹𑒿 𑒢𑒭𑓂𑒙 𑒏𑒩𑒥𑒰𑒏 𑒣𑓂𑒩𑒝 𑒪𑒹𑒪𑒢𑓂𑒯𑒱, 𑒖𑒏𑒩 𑒁𑒕𑒻𑒞 𑒦𑒰𑒩𑒞𑒲𑒨 𑒏𑒪𑒰 𑒮𑓀𑒑𑒲𑒞 𑒂 𑒮𑓀𑒮𑓂𑒏𑒵𑒞𑒱𑒮𑒿 𑒣𑒩𑒰𑒓𑒧𑒳𑒐 𑒦𑒋 𑒖𑒋𑒞𑒰𑒯”। 𑒅𑒠𑒱𑒞 𑒣𑒱𑒞𑒰𑒏 𑒧𑒳𑒿𑒯𑒹 𑒄 𑒐𑒱𑒮𑓂𑒮𑒰 𑒏𑒞𑒰𑒏 𑒥𑒹𑒩 𑒮𑒳𑒢𑒢𑒹 𑒕𑒪𑒰𑒯। 𑒁𑒮𑓂𑒞𑒳 𑒞𑒰𑒫𑒞, 𑒅𑒠𑒱𑒞 𑒋𑒯𑒱 𑒞𑒩𑒯𑒏 𑒫𑒰𑒞𑒰𑒫𑒩𑒝𑒧𑒹 𑒂𑒑𑒰𑒿 𑒥𑒜𑓃𑒋 𑒪𑒑𑒪𑒰𑒯।
𑒁𑒓𑒩𑒹𑒖 𑒪𑒼𑒏𑒢𑒱 𑒠𑓂𑒫𑒰𑒩𑒰 𑒣𑒰𑒬𑓂𑒔𑒰𑒞𑓂𑒨 𑒮𑒓𑓂𑒑𑒲𑒞𑒏𑒹𑒿 𑒁𑒢𑒥𑒰𑒏 𑒣𑓂𑒩𑒨𑒰𑒮𑒏 𑒣𑒪𑒳𑒮𑓂𑒏𑒩, 𑒦𑒰𑒞𑒐𑒝𑓂𑒛𑒹 𑒂 𑒩𑒰𑒧𑒰𑒧𑒰𑒞𑓂𑒨 𑒠𑓂𑒫𑒰𑒩𑒰 𑒠𑒹𑒪 𑒑𑒹𑒪 𑒮𑒧𑒲𑒔𑒲𑒢 𑒅𑒞𑓂𑒞𑒩, 𑒄 𑒬𑒱𑒏𑓂𑒭𑒰𑒏 𑒏𑓂𑒭𑒹𑒞𑓂𑒩𑒧𑒹 𑒏𑒱𑒋𑒏 𑒢𑒘𑒱 𑒦𑒋 𑒮𑒏𑒪, 𑒅𑒠𑒱𑒞𑒏 𑒥𑒰𑒪 𑒧𑒼𑒢 𑒁𑒏𑒳𑒪𑒰𑒃𑒞 𑒕𑒪। 𑒁𑒮𑓂𑒞𑒳 𑒞𑒰𑒫𑒞 𑒅𑒠𑒱𑒞 𑒮𑓀𑒑𑒲𑒞𑒼𑒠𑓂𑒡𑒰𑒩𑒏 𑒦𑒰𑒞𑒐𑒝𑓂𑒛𑒹𑒏𑒹𑒿 𑒂𑒠𑒩𑓂𑒬 𑒥𑒢𑒰𑒋 𑒂𑒑𑒰𑒿 𑒥𑒜𑓃𑒋 𑒪𑒑𑒪𑒰𑒯।
𑒪𑒼𑒏 𑒑𑒥𑒻𑒨𑓂𑒨𑒰 𑒏𑒯𑒋 𑒞𑒿 𑒏𑒼𑒢𑒼 𑒥𑒰𑒞 𑒢𑒯𑒱, 𑒋𑒏 𑒠𑒱𑒢 𑒁𑒋𑒞 𑒖𑒐𑒢 𑒋𑒯𑒱 𑒑𑒥𑒻𑒨𑓂𑒨𑒰𑒏 𑒮𑒼𑒗𑒰𑒿 𑒮𑒧𑒮𑓂𑒞 𑒁𑒐𑒝𑓂𑒛 𑒦𑒰𑒩𑒞𑒏 𑒧𑒢𑒮𑒱 𑒬𑓂𑒩𑒠𑓂𑒡𑒰𑒮𑒿 𑒠𑒹𑒐𑒞, 𑒁𑒮𑓂𑒞𑒳 𑒞𑒰𑒫𑒞।
𑒏𑒰𑒏𑒰 𑒂 𑒣𑒱𑒞𑒰𑒏 𑒮𑓀𑒩𑒏𑓂𑒭𑒝𑒧𑒹 𑒑𑒰𑒧𑒏 𑒩𑒰𑒧𑒪𑒲𑒪𑒰 𑒧𑓀𑒛𑒪𑒲 𑒠𑓂𑒫𑒰𑒩𑒰 𑒣𑓂𑒩𑒮𑓂𑒞𑒳𑒞 𑒏𑒋𑒪 𑒖𑒰𑒋𑒥𑒪𑒰 𑒢𑒰𑒙𑒏𑒧𑒹 𑒮𑒹𑒯𑒼 𑒅𑒠𑒱𑒞 𑒦𑒰𑒑 𑒪𑒻𑒞 𑒕𑒪𑒰𑒯, 𑒯𑒳𑒢𑒏𑒩 𑒑𑒰𑒍𑒪 𑒑𑒲𑒞 𑒑𑒰𑒧𑒧𑒹 𑒮𑒦𑒏 𑒚𑒼𑒩 𑒣𑒩 𑒂𑒥𑒱 𑒑𑒹𑒪 𑒕𑒪। 𑒧𑒳𑒠𑒰 𑒐𑒹𑒞𑒲 𑒥𑒰𑒩𑒲 𑒞𑒹𑒯𑒢 𑒮𑒢 𑒢𑒯𑒱 𑒕𑒪𑒢𑓂𑒯𑒱। 𑒋𑒏 𑒥𑒲𑒒𑒰 𑒥𑒙𑒰𑒃 𑒏𑒩𑒻𑒞 𑒖𑒰𑒃𑒞 𑒕𑒪𑒰𑒯, 𑒮𑒹𑒯𑒼 𑒮𑒳𑒢𑒋 𑒣𑒛𑓃𑒢𑓂𑒯𑒱 𑒖𑒹 𑒑𑒥𑒻𑒨𑓂𑒨𑒰𑒖𑒲 𑒥𑒳𑒞𑒹 𑒏𑒲 𑒐𑒹𑒞𑒲 𑒏𑒋𑒪 𑒯𑒼𑒋𑒞𑒢𑓂𑒯𑒱, 𑒧𑒳𑒿𑒯𑒮𑒿 𑒑𑒍𑒢𑒰𑒃 𑒂 𑒯𑒰𑒟𑒮𑒿 𑒏𑒰𑒖 𑒏𑒩𑒥𑒰𑒧𑒹 𑒥𑒛𑓂𑒛 𑒁𑓀𑒞𑒩 𑒕𑒻𑒏।
𑒖𑒲𑒫𑒢𑒏 𑒩𑒟 𑒂𑒑𑒰𑒿 𑒥𑒜𑓃𑒻𑒞 𑒩𑒯𑒻𑒞 𑒧𑒳𑒠𑒰 𑒫𑒱𑒠𑒹𑒬𑒲𑒏 𑒬𑒰𑒮𑒢𑒧𑒹 𑒮𑒹𑒯𑒼 𑒡𑒩𑒱 𑒮𑓀𑒦𑒫 𑒢𑒯𑒱 𑒯𑒼𑒃𑒞 𑒕𑒪। 𑒏𑒐𑒢𑒼 𑒯𑒻𑒖𑒰 𑒞𑒿 𑒏𑒐𑒢𑒼 𑒣𑓂𑒪𑒹𑒑 𑒞𑒿 𑒏𑒐𑒢𑒼 𑒧𑒪𑒹𑒩𑒱𑒂। 𑒁𑒯𑒱𑒢𑒰 𑒋𑒏 𑒥𑒹𑒩 𑒑𑒰𑒧𑒧𑒹 𑒣𑓂𑒪𑒹𑒑 𑒣𑒮𑒩𑒪। 𑒪𑒼𑒏 𑒋𑒏 𑒑𑒼𑒙𑒰𑒏𑒹𑒿 𑒛𑒰𑒯𑒱 𑒏𑒋 𑒂𑒥𑒨 𑒞𑒿 𑒑𑒰𑒧 𑒣𑒩 𑒠𑒼𑒮𑒩 𑒫𑓂𑒨𑒏𑓂𑒞𑒱 𑒧𑒵𑒞 𑒣𑒛𑓃𑒪 𑒩𑒯𑒻𑒞 𑒕𑒪। 𑒅𑒠𑒱𑒞𑒏 𑒧𑒰𑒋𑒏𑒹𑒿 𑒮𑒹𑒯𑒼 𑒣𑒹𑒙 𑒂 𑒢𑒰𑒏 𑒔𑒪𑒋 𑒪𑒑𑒪𑒢𑓂𑒯𑒱, 𑒠𑒹𑒯 𑒂𑒑𑒱 𑒖𑒹𑒏𑒰𑒿 𑒖𑒩𑒻𑒞 𑒩𑒯𑒢𑓂𑒯𑒱 𑒧𑒳𑒠𑒰 𑒥𑒹𑒙𑒰𑒏𑒹𑒿 𑒪𑒑 𑒢𑒯𑒱 𑒂𑒥𑒋 𑒠𑒹𑒟𑒱𑒢𑓂𑒯 𑒖𑒹 𑒏𑒞𑒯𑒳 𑒯𑒳𑒢𑒏𑒼 𑒣𑓂𑒪𑒹𑒑 𑒢𑒯𑒱 𑒦𑒋 𑒖𑒰𑒃𑒢𑓂𑒯। 𑒠𑒴 𑒠𑒱𑒢𑒳𑒏𑒰 𑒥𑒰𑒠 𑒥𑒹𑒔𑒰𑒩𑒲 𑒠𑒳𑒢𑒱𑒨𑒰𑒿 𑒕𑒼𑒛𑓃𑒱 𑒑𑒹𑒪𑒲𑒯। 𑒠𑒳𑒢𑒴 𑒥𑒰𑒣-𑒥𑒹𑒙𑒰 𑒠𑒰𑒯 𑒮𑓀𑒮𑓂𑒏𑒰𑒩 𑒏𑒋 𑒁𑒋𑒪𑒰𑒯। 𑒠𑒳𑒢𑒴 𑒑𑒼𑒙𑒹𑒏 𑒂𑒿𑒐𑒱𑒧𑒹 𑒢𑒼𑒩 𑒖𑒹𑒢𑒰 𑒮𑒳𑒐𑒰 𑒑𑒹𑒪 𑒕𑒪𑒢𑓂𑒯𑒱। 𑒣𑒱𑒞𑒰 𑒑𑒳𑒧-𑒮𑒳𑒧 𑒩𑒯𑒋 𑒪𑒑𑒪𑒰𑒯। 𑒏𑒝𑓂𑒚𑒮𑒿 𑒮𑓂𑒫𑒩 𑒢𑒯𑒱 𑒢𑒱𑒏𑒪𑒢𑓂𑒯𑒱 𑒧𑒳𑒠𑒰 𑒯𑒮𑓂𑒞 𑒣𑒩𑒱𑒔𑒰𑒪𑒢𑒮𑒿 𑒥𑒹𑒙𑒰𑒏𑒹𑒿 𑒁𑒦𑓂𑒨𑒰𑒮 𑒏𑒩𑒰𑒥𑒟𑒱। 𑒠𑒴-𑒞𑒲𑒢 𑒥𑒩𑓂𑒭 𑒥𑒲𑒞𑒪 𑒅𑒠𑒱𑒞𑒏 𑒥𑒨𑒮 𑒫𑒻𑒯 𑓑𑓐-𑓑𑓑 𑒮𑒰𑒪 𑒯𑒼𑒋𑒞𑒢𑓂𑒯𑒱 𑒂𑒏𑒱 𑒣𑒱𑒞𑒰𑒏𑒹𑒿 𑒧𑒪𑒹𑒩𑒱𑒂 𑒣𑒏𑒛𑓃𑒱 𑒪𑒹𑒪𑒏𑒢𑓂𑒯𑒱।
𑒩𑒰𑒞𑒱𑒧𑒹 𑒢𑒱𑒢𑓂𑒠 𑒢𑒯𑒱 𑒯𑒼𑒃𑒢𑓂𑒯। 𑒮𑒱𑒩𑒧𑒰𑒧𑒹 𑒦𑒰𑒞𑒐𑒝𑓂𑒛𑒹 𑒮𑓂𑒫𑒩𑒪𑒱𑒣𑒱 𑒩𑒯𑒻𑒞 𑒕𑒪𑒢𑓂𑒯𑒱 𑒞𑒰𑒯𑒱 𑒂𑒡𑒰𑒩 𑒣𑒩 𑒥𑒹𑒙𑒰𑒏𑒹𑒿 𑒏𑒱𑒕𑒳 𑒑𑒰𑒥𑒱 𑒮𑒳𑒢𑒰𑒥𑒋 𑒏𑒯𑒻𑒞 𑒕𑒪𑒐𑒱𑒢𑓂𑒯। 𑒅𑒠𑒱𑒞𑒏𑒹𑒿 𑒂𑒦𑒰𑒮 𑒦𑒋 𑒑𑒹𑒪𑒢𑓂𑒯𑒱 𑒖𑒹 𑒧𑒰𑒞𑒰𑒏 𑒮𑓀𑒑 𑒣𑒱𑒞𑒰 𑒮𑒹𑒯𑒼 𑒠𑒴𑒩 𑒦𑒋 𑒖𑒋𑒞𑒰𑒯। 𑒄 𑒮𑒼𑒔𑒱 𑒏𑒼𑒜𑓃 𑒤𑒰𑒙𑒱 𑒖𑒰𑒃𑒢𑓂𑒯। 𑒏𑒳𑒢𑒻𑒢𑒏 𑒣𑓂𑒩𑒦𑒰𑒫 𑒮𑒹𑒯𑒼 𑒂𑒥 𑒣𑒱𑒞𑒰 𑒣𑒩 𑒢𑒯𑒱 𑒯𑒼𑒃𑒞 𑒕𑒪𑒢𑓂𑒯𑒱। 𑒩𑒰𑒞𑒱𑒧𑒹 𑒟𑒩𑒟𑒩𑒲 𑒣𑒻𑒮𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒅𑒠𑒱𑒞 𑒮𑒦𑒙𑒰 𑒏𑒹𑒟𑒩𑒲-𑒍𑒜𑓃𑒢𑒰 𑒮𑒦 𑒍𑒜𑓃𑒰 𑒠𑒻𑒞 𑒕𑒪𑒐𑒱𑒢𑓂𑒯, 𑒧𑒳𑒠𑒰 𑒞𑒻𑒨𑒼 𑒟𑒩𑒟𑒩𑒲 𑒢𑒯𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒪𑒼𑒏 𑒮𑒦 𑒠𑒱𑒢𑒧𑒹 𑒂𑒥𑒱 𑒐𑒼𑒖-𑒣𑒳𑒕𑒰𑒛𑓃𑒲 𑒏𑒋 𑒖𑒰𑒃𑒞 𑒕𑒪𑒢𑓂𑒯𑒱। 𑒑𑒰𑒧𑒏 𑒢𑒰𑒙𑒏 𑒧𑒝𑓂𑒛𑒪𑒲 𑒮𑒹𑒯𑒼 𑒥𑒢𑓂𑒠𑒹 𑒕𑒪 𑒏𑒰𑒩𑒝 𑒧𑒳𑒐𑓂𑒨 𑒏𑒰𑒩𑓂𑒨𑒏𑒩𑓂𑒞𑓂𑒞𑒰 𑒯𑒩𑓂𑒭𑒱𑒞 𑒢𑒰𑒩𑒰𑒨𑒝 𑒕𑒪𑒰𑒯 𑒂 𑒍 𑒥𑒢𑒰𑒩𑒮 𑒔𑒪𑒱 𑒑𑒹𑒪 𑒕𑒪𑒰𑒯 𑒏𑒼𑒢𑒼 𑒢𑒰𑒙𑒏 𑒧𑒝𑓂𑒛𑒪𑒲𑒧𑒹। 𑒍 𑒑𑒰𑒧 𑒂𑒋𑒪 𑒕𑒪𑒰𑒯 𑒂 𑒖𑒐𑒢 𑒮𑒳𑒢𑒪𑒢𑓂𑒯𑒱 𑒖𑒹 𑒅𑒠𑒱𑒞𑒏 𑒣𑒱𑒞𑒰𑒏 𑒧𑒼𑒢 𑒐𑒩𑒰𑒣 𑒕𑒢𑓂𑒯𑒱 𑒞𑒿 𑒣𑒳𑒕𑒰𑒛𑓃𑒲 𑒏𑒩𑒋 𑒁𑒋𑒪𑒰𑒯।
“𑒯𑒩𑓂𑒭𑒱𑒞। 𑒯𑒧 𑒞𑒿 𑒂𑒥 𑒖𑒰 𑒩𑒯𑒪 𑒕𑒲। 𑒅𑒠𑒱𑒞 𑒢𑒹𑒢𑒰 𑒕𑒟𑒱। 𑒏𑒰𑒏𑒰 𑒣𑒩 𑒥𑒼𑒗 𑒥𑒢𑒞𑒰𑒯 𑒞𑒰𑒯𑒱𑒮𑒿 𑒢𑒲𑒏 𑒖𑒹 𑒁𑒣𑒢 𑒣𑒋𑒩 𑒣𑒩 𑒚𑒰𑒜𑓃 𑒦𑒋 𑒖𑒰𑒟𑒱, 𑒮𑓀𑒑𑒲𑒞 𑒮𑒰𑒡𑒢𑒰 𑒏𑒩𑒟𑒱। 𑒄 𑒠𑒹𑒫𑒏 𑒪𑒲𑒪𑒰 𑒁𑒕𑒱 𑒖𑒹 𑒋𑒯𑒱 𑒮𑒧𑒨 𑒣𑒩 𑒁𑒯𑒰𑒿 𑒑𑒰𑒧 𑒂𑒥𑒱 𑒑𑒹𑒪𑒯𑒳𑒿। 𑒑𑒰𑒧𑒏 𑒯𑒥𑒰𑒧𑒹 𑒖𑒹𑒢𑒰 𑒩𑒼𑒑𑒏 𑒏𑒲𑒙𑒰𑒝𑒳 𑒂𑒥𑒱 𑒑𑒹𑒪 𑒕𑒻𑒏। 𑒋𑒞𑒋 𑒧𑒞𑓂𑒨𑒳 𑒙𑒰 𑒢𑒱𑒬𑓂𑒔𑒱𑒞 𑒕𑒻𑒏 𑒂𑒩 𑒏𑒱𑒕𑒳 𑒢𑒯𑒱। 𑒋𑒯𑒢𑒰 𑒮𑓂𑒟𑒱𑒞𑒱𑒧𑒹 𑒮𑓀𑒑𑒲𑒞𑒏 𑒧𑒵𑒞𑓂𑒨𑒳 𑒦𑒋 𑒖𑒰𑒋 𑒞𑒰𑒯𑒱𑒮𑒿 𑒢𑒲𑒏 𑒖𑒹 𑒅𑒠𑒱𑒞 𑒁𑒯𑒰𑒿𑒏 𑒮𑓀𑒑 𑒥𑒢𑒰𑒩𑒮 𑒢𑒰𑒙𑒏 𑒧𑒝𑓂𑒛𑒪𑒲𑒧𑒹 𑒔𑒪𑒱 𑒖𑒰𑒟𑒱। 𑒁𑒯𑒰𑒿 𑒥𑒳𑒞𑒹 𑒄 𑒯𑒼𑒋𑒞 𑒯𑒩𑓂𑒭𑒱𑒞”?
“𑒏𑒲 𑒏𑒯𑒻𑒞 𑒕𑒲 𑒑𑒳𑒪𑒰𑒥 𑒦𑒰𑒃। 𑒅𑒠𑒱𑒞 𑒁𑒯𑒰𑒿𑒏 𑒣𑒳𑒞𑓂𑒩 𑒕𑒲 𑒂 𑒯𑒧𑒩 𑒏𑓂𑒨𑒼 𑒢𑒯𑒱? 𑒧𑒳𑒠𑒰 𑒮𑓀𑒑𑒲𑒞𑒏 𑒣𑒰𑒩𑒐𑒲𑒏 𑒣𑓂𑒩𑒞𑒱𑒦𑒰 𑒢𑒰𑒙𑒏 𑒧𑒝𑓂𑒛𑒪𑒲𑒧𑒹 𑒏𑒳𑒝𑓂𑒚𑒱𑒞 𑒢𑒯𑒱 𑒦𑒋 𑒖𑒋𑒞𑒻𑒏? 𑒢𑒰𑒙𑒏 𑒧𑒝𑓂𑒛𑒪𑒲 𑒞𑒿 𑒯𑒧𑒩𑒰 𑒮𑒢𑒏 𑒁𑒪𑓂𑒣 𑒖𑓂𑒘𑒰𑒢𑒲𑒏 𑒪𑒹𑒪 𑒕𑒻𑒏”।
“𑒢𑒯𑒱 𑒯𑒩𑓂𑒭𑒱𑒞। 𑒍𑒞𑒋 𑒅𑒠𑒱𑒞𑒏𑒹𑒿 𑒯𑒢𑒳𑒧𑒰𑒢𑒏 𑒂 𑒩𑒰𑒧𑒏 𑒂𑒬𑒲𑒩𑓂𑒫𑒰𑒠 𑒦𑒹𑒙𑒞𑒢𑓂𑒯𑒱। 𑒮𑓀𑒑𑒲𑒞𑒏 𑒏𑒞𑒹𑒏 𑒩𑒰𑒮 𑒣𑒏𑓂𑒭 𑒕𑒻𑒏। 𑒢𑒫-𑒢𑒫 𑒥𑒰𑒡𑒰 𑒣𑒰𑒩 𑒏𑒩𑒞𑒰𑒯 𑒂 𑒁𑒪𑓂𑒣 𑒮𑒧𑒨𑒧𑒹 𑒮𑓀𑒑𑒲𑒞 𑒤𑒳𑒩𑒹𑒞𑒢𑓂𑒯𑒱। 𑒍𑒞𑒋𑒮𑒿 𑒯𑒱𑒢𑒏𑒩 𑒮𑒰𑒡𑒢𑒰 𑒂𑒑𑒰𑒿 𑒥𑒜𑓃𑒞𑒢𑓂𑒯𑒱”।
𑒑𑒳𑒪𑒰𑒥 𑒖𑒹𑒢𑒰 𑒯𑒩𑓂𑒭𑒱𑒞𑒏 𑒥𑒰𑒙 𑒖𑒼𑒯𑒱 𑒩𑒯𑒪 𑒕𑒪𑒰𑒯। 𑒥𑒖𑒱𑒞𑒹-𑒥𑒖𑒱𑒞𑒹 𑒣𑓂𑒩𑒰𑒝 𑒖𑒹𑒢𑒰 𑒅𑒐𑒛𑓃𑒋 𑒪𑒑𑒪𑒢𑓂𑒯𑒱। 𑒥𑒹𑒙𑒰𑒏 𑒧𑒰𑒟 𑒣𑒩 𑒟𑒩𑒟𑒛𑓃𑒰𑒃𑒞 𑒯𑒰𑒟 𑒩𑒐𑒪𑒢𑓂𑒯𑒱 𑒞𑒿 𑒠𑒾𑒑𑒱 𑒏𑒋 𑒯𑒩𑓂𑒭𑒱𑒞 𑒑𑓀𑒑𑒰 𑒖𑒪 𑒂𑒢𑒱 𑒧𑒳𑒿𑒯𑒧𑒹 𑒋𑒏 𑒠𑒱𑒬𑒱𑒮𑒿 𑒠𑒹𑒪𑒢𑓂𑒯𑒱 𑒧𑒳𑒠𑒰 𑒖𑒪 𑒧𑒳𑒿𑒯𑒏 𑒠𑒼𑒮𑒩 𑒠𑒱𑒬𑒱𑒮𑒿 𑒙𑒒𑒩𑒱 𑒏𑒋 𑒥𑒰𑒯𑒩 𑒂𑒥𑒱 𑒑𑒹𑒪।
𑒏𑒰𑒬𑒲𑒏 𑒞𑒙 𑒣𑒩 𑒫𑒱𑒠𑓂𑒨𑒰𑒣𑒞𑒱𑒏 𑒥𑒛𑓃 𑒮𑒳𑒐 𑒮𑒰𑒩 𑒣𑒰𑒍𑒪 𑒞𑒳𑒁 𑒞𑒲𑒩𑒹 𑒮𑒿 𑒪𑓄 𑒏𑒋 𑒦𑒱𑒢𑓂𑒢-𑒦𑒱𑒢𑓂𑒢 𑒡𑒰𑒩𑓂𑒧𑒱𑒏 𑒂 𑒪𑒾𑒏𑒱𑒏 𑒑𑒲𑒞 𑒑𑒰𑒥𑒟𑒱 𑒍𑒏𑒩 𑒮𑒳𑒩 𑒥𑒢𑒰𑒥𑒟𑒱 𑒂 𑒞𑒰𑒯𑒱 𑒪𑒹𑒪 𑒅𑒠𑒱𑒞𑒏𑒹𑒿 𑒣𑓂𑒩𑒬𑓀𑒮𑒰 𑒮𑒹𑒯𑒼 𑒦𑒹𑒙𑒢𑓂𑒯𑒱। 𑒂𑒨𑒳𑒏 𑒢𑓂𑒨𑒴𑒢𑒞𑒰 𑒮𑒹𑒯𑒼 𑒏𑒯𑒱𑒨𑒼 𑒏𑒰𑒪 𑒅𑒣𑒪𑒥𑓂𑒡𑒱𑒏 𑒧𑒰𑒩𑓂𑒑𑒏𑒹𑒿 𑒩𑒼𑒏𑒱 𑒠𑒻𑒞 𑒕𑒻𑒏। 𑒅𑒠𑒱𑒞 𑒧𑒰𑒞𑓂𑒩 𑓑𑓑 𑒫𑒩𑓂𑒭𑒧𑒹 𑒏𑒰𑒬𑒲 𑒑𑒹𑒪𑒰𑒯 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒳𑒢𑒏𑒩 𑒮𑓂𑒫𑒩𑒏 𑒂 𑒮𑒳𑒩𑒏 𑒥𑒯𑒳𑒞 𑒑𑒼𑒙𑒹 𑒑𑓂𑒩𑒰𑒯𑒏 𑒥𑒢𑒱 𑒑𑒹𑒪𑒢𑓂𑒯𑒱, 𑒑𑓂𑒩𑒰𑒯𑒏 𑒢𑒘𑒱 𑒬𑒼𑒭𑒏 𑒏𑒯𑒴। 𑒮𑒦𑒙𑒰 𑒣𑒩𑒱𑒬𑓂𑒩𑒧 𑒯𑒱𑒢𑒏𑒰𑒮𑒿 𑒏𑒩𑒥𑒰𑒋 𑒪𑒻𑒞 𑒕𑒪𑒢𑓂𑒯𑒱 𑒂 𑒢𑒰𑒧 𑒁𑒣𑒢 𑒠𑓄 𑒠𑒋 𑒖𑒰𑒃𑒞 𑒕𑒪𑒰𑒯। 𑒧𑒳𑒠𑒰 𑒅𑒠𑒱𑒞 𑒮𑒧𑒨, 𑒂𑒨𑒳 𑒂 𑒑𑒳𑒩𑒳𑒏 𑒂𑒮𑒧𑒹 𑒠𑒱𑒢 𑒏𑒰𑒙𑒱 𑒩𑒯𑒪 𑒕𑒪𑒰𑒯। 𑒠𑒱𑒢 𑒥𑒛𑓃 𑒧𑒳𑒬𑒏𑒱𑒪𑒮𑒿 𑒏𑒙𑒻𑒞 𑒕𑒻𑒏 𑒧𑒳𑒠𑒰 𑒖𑓂𑒨𑒼𑒿 𑒋𑒏𑒯𑒱 𑒜𑒩𑓂𑒩𑒰 𑒣𑒩 𑒔𑒪𑒻𑒞 𑒖𑒰𑒃𑒞 𑒕𑒻𑒏 𑒞𑒿 𑒪𑒰𑒑𑒋 𑒪𑒑𑒻𑒞 𑒕𑒻𑒏 𑒖𑒹 𑒮𑒰𑒪𑒏 𑒮𑒰𑒪 𑒏𑒼𑒢𑒰 𑒥𑒲𑒞𑒱 𑒑𑒹𑒪। 𑒅𑒠𑒱𑒞 𑓑𑓑 𑒫𑒩𑓂𑒭𑒮𑒿 𑓒𑓖 𑒫𑒩𑓂𑒭𑒏 𑒅𑒧𑒩𑒱 𑒡𑒩𑒱 𑒢𑒰𑒙𑒏 𑒏𑒧𑓂𑒣𑒢𑒲𑒧𑒹 𑒏𑒰𑒖 𑒏𑒩𑒻𑒞 𑒩𑒯𑒪𑒰𑒯।
“𑒬𑒰𑒮𑓂𑒞𑓂𑒩𑒲 𑒖𑒲। 𑒄 𑒮𑒳𑒩 𑒞𑒿 𑒯𑒧𑒯𑒲 𑒥𑒢𑒍𑒢𑒹 𑒕𑒲 𑒧𑒳𑒠𑒰 𑒧𑒼𑒢 𑒏𑒢𑒹𑒏 𑒫𑒱𑒔𑒪𑒱𑒞 𑒁𑒕𑒱 𑒞𑒰𑒯𑒱 𑒠𑓂𑒫𑒰𑒩𑒹 𑒠𑒼𑒮𑒩 𑒮𑒳𑒩 𑒢𑒘𑒱 𑒥𑒢𑒱 𑒣𑒰𑒥𑒱 𑒩𑒯𑒪 𑒁𑒕𑒱। 𑒅𑒠𑒱𑒞𑒏𑒹𑒿 𑒥𑒖𑒰 𑒪𑒻𑒞 𑒕𑒲। 𑒍𑒯𑒼 𑒯𑒧𑒩𑒰𑒮𑒿 𑒏𑒱𑒕𑒳 𑒮𑒱𑒐𑒢𑒹 𑒁𑒕𑒱, 𑒏𑒱𑒕𑒳 𑒮𑒧𑒰𑒡𑒰𑒢 𑒢𑒱𑒏𑒰𑒪𑒱 𑒪𑒹𑒞”। 𑒧𑒯𑒰𑒢 𑒮𑓀𑒑𑒲𑒞 𑒅𑒣𑒰𑒮𑒏 𑒦𑒙𑓂𑒙 𑒖𑒲𑒏 𑒮𑒼𑒗𑒰𑒿 𑒯𑒩𑓂𑒭𑒱𑒞 𑒥𑒰𑒖𑒱 𑒩𑒯𑒪 𑒕𑒪𑒰𑒯।
“𑒯𑒿 𑒯𑒿। 𑒁𑒫𑒬𑓂𑒨 𑒥𑒖𑒰 𑒪𑒱𑒎𑒏”। 𑒦𑒙𑓂𑒙 𑒖𑒲 𑒥𑒖𑒪𑒰𑒯।
𑒧𑒳𑒠𑒰 𑒅𑒠𑒱𑒞 𑒖𑒐𑒢 𑒂𑒥𑒱 𑒏𑒋 𑒮𑓀𑒑𑒲𑒞𑒏𑒹𑒿 𑒮𑒩𑒪𑒞𑒰𑒮𑒿 𑒮𑒱𑒠𑓂𑒡 𑒏𑒋 𑒮𑒳𑒩 𑒑𑒰𑒥𑒱 𑒠𑒹𑒪𑒢𑓂𑒯𑒱, 𑒞𑒰𑒯𑒱𑒮𑒿 𑒦𑒙𑓂𑒙𑒖𑒲𑒏𑒹𑒿 𑒥𑒳𑒗𑒥𑒰𑒧𑒹 𑒦𑒰𑒿𑒑𑒚 𑒢𑒯𑒱 𑒩𑒯𑒪𑒢𑓂𑒯𑒱, 𑒖𑒹 𑒫𑒰𑒮𑓂𑒞𑒫𑒱𑒏 𑒏𑒪𑒰𑒏𑒰𑒩 𑒯𑒩𑓂𑒭𑒱𑒞 𑒢𑒯𑒱 𑒅𑒠𑒱𑒞 𑒕𑒟𑒱। 𑒦𑒙𑓂𑒙 𑒖𑒲 𑒋𑒏𑒙𑒰 𑒋𑒯𑒢 𑒬𑒱𑒭𑓂𑒨𑒏 𑒞𑒰𑒏𑒱𑒧𑒹 𑒕𑒪𑒰𑒯 𑒖𑒹 𑒣𑓂𑒩𑒞𑒱𑒦𑒰𑒫𑒰𑒢 𑒂 𑒮𑒰𑒡𑒏 𑒯𑒼𑒟𑒱, 𑒖𑒱𑒢𑒏𑒰 𑒦𑒙𑓂𑒙𑒖𑒲 𑒁𑒣𑒢 𑒮𑒦𑒙𑒰 𑒏𑒪𑒰 𑒢𑒱𑒬𑓂𑒔𑒱𑒢𑓂𑒞 𑒦𑒋 𑒠𑒋 𑒮𑒏𑒟𑒱। 𑒂𑒃 𑒮𑒹 𑒬𑒱𑒭𑓂𑒨 𑒦𑒹𑒙𑒱 𑒑𑒹𑒪𑒢𑓂𑒯𑒱 𑒯𑒳𑒢𑒏𑒰।
𑒅𑒠𑒱𑒞𑒏𑒹𑒿 𑒁𑒣𑒢𑒰 𑒂𑒬𑓂𑒩𑒧𑒧𑒹 𑒔𑒪𑒥𑒰𑒏 𑒖𑒐𑒢 𑒍 𑒑𑒳𑒩𑒳 𑒢𑒼𑒞 𑒠𑒹𑒪𑒢𑓂𑒯𑒱 𑒞𑒿 𑒅𑒠𑒱𑒞 𑒠𑒾𑒑𑒱 𑒏𑒋 𑒁𑒣𑒢 𑒣𑓂𑒩𑒏𑒼𑒭𑓂𑒚 𑒔𑒪𑒱 𑒑𑒹𑒪𑒰𑒯 𑒂 𑒣𑒱𑒞𑒰𑒏 𑒤𑒼𑒙𑒼 𑒢𑒱𑒏𑒰𑒪𑒱 𑒏𑒋 𑒖𑒹 𑒏𑒢𑒢𑒰𑒃 𑒬𑒳𑒩𑒴 𑒏𑒋𑒪𑒢𑓂𑒯𑒱 𑒞𑒿 𑓑𑓕 𑒮𑒰𑒪𑒮𑒿 𑒩𑒼𑒏𑒪 𑒡𑒰𑒩 𑒕𑒯𑒩 𑒞𑒼𑒛𑓃𑒱 𑒥𑒯𑒩𑒰𑒋 𑒪𑒰𑒑𑒪। 𑒁𑒮𑓂𑒞𑒳 𑒞𑒰𑒫𑒞।
𑒢𑒰𑒙𑒏 𑒏𑒧𑓂𑒣𑒢𑒲𑒧𑒹 𑒖𑒹𑒯𑒢 𑒋𑒏𑒩𑒴𑒣𑒞𑒰 𑒕𑒪, 𑒞𑒏𑒩 𑒫𑒱𑒣𑒩𑒲𑒞 𑒑𑒳𑒩𑒳𑒂𑒬𑓂𑒩𑒧𑒧𑒹 𑒫𑒻𑒫𑒱𑒡𑓂𑒨𑒞𑒰 𑒕𑒪। 𑒮𑒦 𑒠𑒱𑒢 𑒅𑒠𑒱𑒞 𑒮𑒴𑒩𑓂𑒨𑒼𑒠𑒨𑒮𑒿 𑒣𑒴𑒩𑓂𑒫 𑒅𑒚𑒻𑒞 𑒕𑒪𑒰𑒯 𑒂 𑒮𑓀𑒑𑒲𑒞 𑒮𑒰𑒡𑒢𑒰𑒧𑒹 𑒪𑒲𑒢 𑒦𑒋 𑒖𑒰𑒃𑒞 𑒕𑒪𑒰𑒯। 𑒬𑒱𑒭𑓂𑒨 𑒑𑒳𑒩𑒳𑒏𑒹𑒿 𑒣𑒰𑒥𑒱 𑒡𑒢𑓂𑒨 𑒕𑒪 𑒂 𑒑𑒳𑒩𑒳 𑒬𑒱𑒭𑓂𑒨𑒏𑒹𑒿 𑒣𑒰𑒥𑒱 𑒏𑒋। 𑒠𑒱𑒢 𑒥𑒲𑒞𑒋 𑒪𑒰𑒑𑒪 𑒧𑒳𑒠𑒰 𑒦𑒰𑒞𑒐𑒝𑓂𑒛𑒹 𑒂 𑒣𑒪𑒳𑒮𑓂𑒏𑒩 𑒧𑒯𑒰𑒩𑒰𑒖 𑒠𑓂𑒫𑒰𑒩𑒰 𑒮𑓀𑒮𑓂𑒏𑒵𑒞 𑒮𑒰𑒯𑒱𑒞𑓂𑒨𑒏 𑒂𑒡𑒰𑒩 𑒣𑒩 𑒮𑓀𑒑𑒲𑒞𑒏 𑒏𑒋𑒪 𑒑𑒹𑒪 𑒣𑒳𑒢𑒳𑒩𑒼𑒠𑓂𑒡𑒰𑒩 𑒞𑒿 𑒑𑒓𑓂𑒑𑒰𑒏 𑒡𑒰𑒩 𑒖𑒹𑒏𑒰𑒿 𑒢𑒱𑒩𑓂𑒧𑒪 𑒂 𑒔𑒱𑒩 𑒕𑒪। 𑒖𑒞𑒹𑒏 𑒑𑒯𑒲𑒿𑒩 𑒅𑒠𑒱𑒞 𑒍𑒯𑒱 𑒡𑒰𑒩𑒧𑒹 𑒅𑒞𑒩𑒟𑒱, 𑒧𑒼𑒢 𑒏𑒩𑒢𑓂𑒯𑒱 𑒖𑒹 𑒂𑒩 𑒑𑒯𑒲𑒿𑒩 𑒖𑒰𑒃। 𑓒𑓕 𑒮𑒰𑒪 𑒡𑒩𑒱 𑒑𑒳𑒩𑒳𑒏 𑒂𑒬𑓂𑒩𑒧𑒧𑒹 𑒅𑒠𑒱𑒞 𑒩𑒯𑒪𑒰𑒯। 𑓕𑓑 𑒫𑒩𑓂𑒭𑒏 𑒖𑒐𑒢 𑒦𑒹𑒪𑒰𑒯 𑒞𑒿 𑒑𑒳𑒩𑒳 𑒄 𑒏𑒯𑒱 𑒥𑒱𑒠𑒰 𑒏𑒋𑒪𑒢𑓂𑒯𑒱 𑒖𑒹 𑒅𑒠𑒱𑒞 𑒂𑒥 𑒁𑒯𑒰𑒿 𑒬𑒱𑒭𑓂𑒨 𑒢𑒯𑒱 𑒑𑒳𑒩𑒳𑒏 𑒦𑒴𑒧𑒱𑒏𑒰 𑒏𑒩𑒴। 𑒮𑓀𑒑𑒲𑒞𑒬𑒰𑒮𑓂𑒞𑓂𑒩𑒏 𑒣𑒳𑒢𑒩𑒼𑒠𑓂𑒡𑒰𑒩 𑒦𑒋 𑒔𑒳𑒏𑒪 𑒕𑒻𑒏, 𑒂𑒓𑓂𑒪 𑒪𑒼𑒏𑒢𑒱𑒏 𑒣𑒰𑒬𑓂𑒔𑒰𑒞𑓂𑒨 𑒮𑓀𑒑𑒲𑒞 𑒣𑒠𑓂𑒡𑒞𑒱 𑒁𑒢𑒥𑒰𑒏 𑒣𑓂𑒩𑒨𑒰𑒮 𑒫𑒱𑒤𑒪 𑒦𑒋 𑒔𑒳𑒏𑒪 𑒁𑒕𑒱, 𑒂 𑒂𑒥 𑒦𑒰𑒩𑒞 𑒮𑓂𑒫𑒞𑓀𑒞𑓂𑒩 𑒮𑒹𑒯𑒼 𑒦𑒋 𑒔𑒳𑒏𑒪 𑒁𑒕𑒱। 𑒖𑒰𑒆 𑒂 𑒬𑒰𑒮𑓂𑒞𑓂𑒩 𑒠𑓂𑒫𑒰𑒩𑒰 𑒣𑓂𑒩𑒠𑒞𑓂𑒞 𑒮𑓀𑒑𑒲𑒞𑒏 𑒠𑒼𑒮𑒩 𑒣𑒳𑒢𑒩𑓂𑒖𑒰𑒑𑒩𑒝𑒏 𑒨𑒼𑒠𑓂𑒡𑒰 𑒥𑒢𑒴।
𑓕𑓑 𑒫𑒩𑓂𑒭𑒏 𑒂𑒨𑒳𑒧𑒹 𑒮𑓂𑒫𑒞𑓀𑒞𑓂𑒩 𑒦𑒰𑒩𑒞𑒧𑒹 𑒅𑒠𑒱𑒞 𑒢𑒼𑒏𑒩𑒲 𑒞𑒏𑒢𑒰𑒃 𑒬𑒳𑒩𑒴 𑒏𑒋𑒪𑒢𑓂𑒯𑒱। 𑒏𑒰𑒬𑒲𑒏 𑒋𑒏𑒙𑒰 𑒮𑓀𑒑𑒲𑒞 𑒫𑒱𑒠𑓂𑒨𑒰𑒪𑒨 𑒮𑒯𑒩𑓂𑒭 𑒯𑒳𑒢𑒏𑒰 𑒮𑓂𑒫𑒲𑒏𑒰𑒩 𑒏𑒋 𑒪𑒹𑒪𑒏𑒢𑓂𑒯𑒱। 𑒧𑒳𑒠𑒰 𑓓𑓖 𑒫𑒩𑓂𑒭𑒏 𑒮𑓀𑒑𑒲𑒞 𑒮𑒰𑒡𑒢𑒰𑒏 𑒮𑒰𑒡𑒪 𑒮𑓂𑒫𑒩 𑒏𑒰𑒬𑒲 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒡𑒩𑒱 𑒣𑒯𑒳𑒿𑒔𑒱 𑒑𑒹𑒪𑒻𑒏। 𑒬𑒱𑒭𑓂𑒨𑒏 𑒣𑓀𑒏𑓂𑒞𑓂𑒞𑒱 𑒪𑒰𑒑𑒋 𑒪𑒑𑒪𑒢𑓂𑒯𑒱। 𑒦𑒰𑒩𑒞𑒏 𑒢𑒫 𑒮𑓂𑒫𑒩𑒴𑒣𑒧𑒹 𑒬𑓂𑒩𑒠𑓂𑒡𑒰𑒏 𑒣𑓂𑒩𑒞𑒲𑒏 𑒩𑒴𑒣𑒧𑓂 𑒏𑒞𑒹𑒏𑒼 𑒑𑒼𑒙𑒹 𑒬𑒰𑒮𑓂𑒞𑓂𑒩𑒲𑒨 𑒮𑓀𑒑𑒲𑒞𑒏 𑒫𑓂𑒨𑒰𑒣𑒰𑒩 𑒮𑒹𑒯𑒼 𑒬𑒳𑒩𑒳 𑒏𑒋𑒪𑒢𑓂𑒯𑒱। 𑒧𑒳𑒠𑒰 𑒣𑓂𑒩𑒔𑒰𑒩𑒮𑒿 𑒠𑒴𑒩 𑒧𑒰𑒞𑓂𑒩 𑒑𑒳𑒩𑒳 𑒬𑒱𑒭𑓂𑒨 𑒣𑒩𑒧𑓂𑒣𑒩𑒰𑒏𑒹𑒿 𑒂𑒡𑒰𑒩 𑒥𑒢𑒰 𑒏𑒋 𑒂𑒑𑒴 𑒥𑒜𑓃𑒥𑒻𑒞 𑒩𑒯𑒪𑒰𑒯 𑒅𑒠𑒱𑒞। 𑒯𑒳𑒢𑒏𑒩 𑒬𑒱𑒭𑓂𑒨 𑒮𑒦 𑒠𑒹𑒬 𑒫𑒱𑒠𑒹𑒮𑒧𑒹 𑒢𑒰𑒧 𑒏𑒩𑒋 𑒪𑒰𑒑𑒪। 𑒞𑒐𑒢 𑒏𑒰𑒬𑒲 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒬𑒱𑒏𑓂𑒭𑒏 𑒩𑒴𑒣𑒧𑒹 𑒯𑒱𑒢𑒏𑒰 𑒢𑒱𑒨𑒳𑒏𑓂𑒞𑓂𑒞 𑒏𑒋 𑒪𑒹𑒪𑒏𑒢𑓂𑒯𑒱। 𑒧𑒳𑒠𑒰 𑒍𑒞𑒋 𑒢𑒱𑒨𑒧 𑒕𑒪 𑒖𑒹 𑒥𑒱𑒢𑒰 𑒣𑒲.𑒋𑒔.𑒛𑒲. 𑒏𑒋𑒢𑒹 𑒏𑒏𑒩𑒼 𑒫𑒱𑒦𑒰𑒑𑒏 𑒁𑒡𑓂𑒨𑒏𑓂𑒭 𑒢𑒯𑒱 𑒥𑒢𑒰𑒍𑒪 𑒖𑒰 𑒮𑒏𑒻𑒞 𑒁𑒕𑒱। 𑒧𑒳𑒠𑒰 𑒫𑒱𑒦𑒰𑒑𑒧𑒹 𑒅𑒠𑒱𑒞𑒮𑒿 𑒥𑒹𑒬𑒲 𑒬𑓂𑒩𑒹𑒭𑓂𑒚 𑒞𑒿 𑒏𑓂𑒨𑒼 𑒕𑒪 𑒢𑒯𑒱। 𑒖𑒹𑒢𑒰 𑒂𑒓𑓂𑒪 𑒖𑒢 𑒏𑒋 𑒑𑒹𑒪 𑒕𑒪𑒰𑒯, 𑒑𑒳𑒩𑒳𑒏𑒳𑒪𑒮𑒿 𑒣𑒜𑓃𑒢𑒱𑒯𑒰𑒩𑒏𑒹𑒿 𑒏𑒼𑒢𑒼 𑒛𑒱𑒑𑓂𑒩𑒲 𑒢𑒯𑒱 𑒦𑒹𑒙𑒻𑒞 𑒕𑒪 𑒂 𑒍 𑒮𑒩𑒏𑒰𑒩𑒲 𑒢𑒼𑒏𑒩𑒲𑒏 𑒨𑒼𑒑𑓂𑒨 𑒢𑒯𑒱 𑒯𑒼𑒃𑒞 𑒕𑒪। 𑒅𑒠𑒱𑒞𑒏 𑒪𑒑𑒧𑒹 𑒮𑒹𑒯𑒼 𑒞𑒰𑒯𑒱 𑒣𑓂𑒩𑒏𑒰𑒩𑒏 𑒏𑒼𑒢𑒼 𑒎𑒣𑒔𑒰𑒩𑒱𑒏 𑒛𑒱𑒑𑓂𑒩𑒲 𑒢𑒯𑒱 𑒕𑒪𑒢𑓂𑒯𑒱। 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒏 𑒮𑒲𑒢𑒹𑒙𑒏 𑒥𑒻𑒮𑒏𑒲 𑒦𑒹𑒪 𑒂 𑒞𑒰𑒯𑒱𑒧𑒹 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒁𑒣𑒢 𑒢𑒱𑒨𑒧𑒏𑒹𑒿 𑒬𑒱𑒟𑒱𑒪 𑒏𑒋𑒪𑒏 𑒂 𑒅𑒠𑒱𑒞𑒏𑒹𑒿 𑒮𑓀𑒑𑒲𑒞𑒏 𑒫𑒱𑒦𑒰𑒑𑒰𑒡𑓂𑒨𑒏𑓂𑒭 𑒥𑒢𑒰𑒍𑒪 𑒑𑒹𑒪। 𑒍𑒞𑒋 𑒮𑒹𑒫𑒰𑒢𑒱𑒫𑒵𑒞𑓂𑒞𑒱 𑒡𑒩𑒱 𑒅𑒠𑒱𑒞 𑒁𑒣𑒢 𑒣𑓂𑒩𑒬𑒰𑒮𑒢𑒱𑒏 𑒏𑓂𑒭𑒧𑒞𑒰𑒏 𑒣𑒩𑒱𑒔𑒨 𑒠𑒹𑒪𑒢𑓂𑒯𑒱। 𑒦𑒰𑒞𑒐𑒝𑓂𑒛𑒹𑒏 𑒁𑒢𑒳𑒩𑒴𑒣 𑒏𑒞𑒹𑒏 𑒐𑒝𑓂𑒛𑒧𑒹 𑒮𑓀𑒑𑒲𑒞𑒏 𑒬𑒰𑒮𑓂𑒞𑓂𑒩𑒏 𑒣𑒩𑒱𑒔𑒨 𑒠𑒹𑒪𑒢𑓂𑒯𑒱 𑒅𑒠𑒱𑒞। 𑒅𑒠𑒱𑒞𑒏 𑒬𑒱𑒭𑓂𑒨 𑒮𑒦𑒏 𑒠𑒵𑒬𑓂𑒨-𑒬𑓂𑒩𑒫𑓂𑒨 𑒩𑒹𑒏𑒰𑒩𑓂𑒛 𑒥𑒯𑒩𑒰 𑒑𑒹𑒪 𑒕𑒪𑒢𑓂𑒯𑒱 𑒧𑒳𑒠𑒰 𑒅𑒠𑒱𑒞 𑒮𑓂𑒙𑒳𑒛𑒱𑒨𑒼 𑒂 𑒖𑒢𑒞𑒰𑒏 𑒮𑒧𑒏𑓂𑒭 𑒁𑒣𑒢 𑒏𑒰𑒩𑓂𑒨𑒏𑓂𑒩𑒧𑒮𑒿 𑒁𑒣𑒢 𑒮𑒰𑒡𑒢𑒰 𑒦𑓀𑒑 𑒢𑒯𑒱 𑒏𑒩𑒻𑒞 𑒕𑒪𑒰𑒯। 𑒦𑒼𑒩𑒏 𑒮𑒰𑒡𑒢𑒰𑒮𑒿 𑒮𑒰𑒿𑒗𑒏 𑒮𑒳𑒩 𑒦𑒹𑒙𑒢𑓂𑒯𑒱 𑒂 𑒮𑒰𑒿𑒗𑒏 𑒮𑒰𑒡𑒢𑒰𑒮𑒿 𑒦𑒼𑒩𑒏। 𑒁𑒮𑓂𑒞𑒳 𑒞𑒰𑒫𑒞।
𑒯𑒳𑒢𑒏𑒩 𑒬𑒱𑒭𑓂𑒨 𑒮𑒦 𑒅𑒠𑒱𑒞𑒏𑒹𑒿 𑒥𑒱𑒢𑒰 𑒏𑒯𑒢𑒹 𑒋𑒏𑒙𑒰 𑒁𑒦𑒱𑒢𑒢𑓂𑒠𑒢 𑒏𑒰𑒩𑓂𑒨𑒏𑓂𑒩𑒧 𑒩𑒐𑒪𑒢𑓂𑒯𑒱। 𑒍𑒞𑒋 𑒩𑒹𑒏𑒰𑒩𑓂𑒛𑒱𑒓𑓂𑒑 𑒏𑒹𑒩 𑒫𑓂𑒨𑒫𑒮𑓂𑒟𑒰 𑒕𑒪। 𑒅𑒠𑒱𑒞 𑒁𑒦𑒱𑒢𑒢𑓂𑒠𑒢 𑒏𑒰𑒩𑓂𑒨𑒏𑓂𑒩𑒧𑒧𑒹 𑒁𑒋𑒪𑒰𑒯। 𑒂𑒨𑒳 𑓗𑓕 𑒫𑒩𑓂𑒭𑒏 𑒕𑒪𑒢𑓂𑒯𑒱 𑒯𑒳𑒢𑒏𑒩। 𑒬𑓂𑒩𑒼𑒞𑒰 𑒩𑒯𑒟𑒱 𑒠𑒹𑒬𑒏 𑒮𑒩𑓂𑒫𑒬𑓂𑒩𑒹𑒭𑓂𑒚 𑒬𑒰𑒮𑓂𑒞𑓂𑒩𑒲𑒨 𑒮𑓀𑒑𑒲𑒞𑒏𑒰𑒩 𑒪𑒼𑒏𑒢𑒱 𑒂 𑒅𑒠𑒱𑒞𑒏 𑒬𑒱𑒭𑓂𑒨-𑒧𑒝𑓂𑒛𑒪𑒲।
𑒖𑒐𑒢 𑒅𑒠𑒱𑒞 𑒬𑒳𑒩𑒴 𑒦𑒹𑒪𑒰𑒯 𑒞𑒐𑒢 𑒯𑒳𑒢𑒏𑒩 𑒬𑒱𑒭𑓂𑒨 𑒪𑒼𑒏𑒢𑒱 𑒔𑒰𑒩𑒴 𑒠𑒱𑒬𑒱 𑒞𑒰𑒏𑒱 𑒩𑒯𑒪 𑒕𑒪𑒰𑒯। 𑒯𑒳𑒢𑒏𑒩 𑒪𑒼𑒏𑒢𑒱𑒏 𑒑𑒳𑒩𑒳𑒏 𑒮𑓂𑒫𑒩 𑒩𑒰𑒑 𑒫𑒻𑒠𑒹𑒯𑒲 𑒦𑒻𑒩𑒫𑒲 𑒯𑒳𑒢𑒏𑒰 𑒮𑒦𑒏𑒹𑒿 𑒕𑒼𑒛𑓃𑒱 𑒮𑒠𑓂𑒨𑓁 𑒂𑒩 𑒏𑓂𑒨𑒼 𑒢𑒯𑒱 𑒮𑒳𑒢𑒢𑒹 𑒕𑒪। 𑒧𑒳𑒠𑒰 𑒬𑒱𑒭𑓂𑒨 𑒪𑒼𑒏𑒢𑒱𑒏𑒹𑒿 𑒮𑒳𑒢𑒪𑒰 𑒅𑒞𑓂𑒞𑒩 𑒮𑒦𑒏𑒹𑒿 𑒁𑒦𑒱𑒪𑒰𑒭𑒰 𑒕𑒪𑒻𑒏 𑒖𑒹 𑒖𑒐𑒢 𑒬𑒱𑒭𑓂𑒨 𑒪𑒼𑒏𑒢𑒱 𑒋𑒯𑒢 𑒕𑒟𑒱 𑒞𑒐𑒢 𑒑𑒳𑒩𑒳 𑒏𑒹𑒯𑒢 𑒯𑒼𑒋𑒞𑒰𑒯। 𑓗𑓕 𑒫𑒩𑓂𑒭𑒏 𑒋𑒯𑒱 𑒨𑒼𑒠𑓂𑒡𑒰𑒏𑒹𑒿 𑒮𑒳𑒢𑒻𑒞 𑒮𑒳𑒢𑒻𑒞 𑒮𑒑𑒲𑒞𑒏 𑒧𑒯𑒰𑒩𑒟𑒲 𑒢𑒫 𑒩𑒮𑒏 𑒮𑓀𑒑 𑒯𑒿𑒮𑒟𑒱 𑒂 𑒣𑓂𑒩𑒮𑒢𑓂𑒢 𑒦𑒋 𑒩𑒯𑒪 𑒕𑒪𑒰𑒯 𑒧𑒳𑒠𑒰 𑒬𑒱𑒭𑓂𑒨 𑒪𑒼𑒏𑒢𑒱 𑒫𑒱𑒦𑒼𑒩 𑒦𑒋 𑒧𑒰𑒞𑓂𑒩 𑒏𑒰𑒢𑒱 𑒩𑒯𑒪 𑒕𑒪𑒰𑒯।
𑒏𑒰𑒪-𑒮𑓂𑒟𑒰𑒢 𑒫𑒱𑒮𑓂𑒟𑒰𑒣𑒢
“𑒮𑒳𑒢𑒴। 𑒣𑓂𑒩𑒨𑒼𑒑𑒬𑒰𑒪𑒰𑒏 𑒮𑓂𑒫𑒱𑒔 𑒂𑒤 𑒏𑒋 𑒠𑒱𑒨𑒾𑒏”।
𑒔𑒰𑒩𑒱 𑒛𑒰𑒃𑒧𑒹𑒢𑓂𑒬𑒢𑒏 𑒫𑒰𑒞𑒰𑒫𑒩𑒝𑒧𑒹 𑒁𑒣𑒢 𑒮𑒦𑒙𑒰 𑒠𑓂𑒫𑒱 𑒂 𑒞𑓂𑒩𑒱 𑒛𑒰𑒃𑒧𑒹𑒢𑓂𑒬𑒢𑒏 𑒫𑒮𑓂𑒞𑒳𑒏 𑒣𑓂𑒩𑒨𑒼𑒑 𑒏𑒩𑒥𑒰𑒏 𑒪𑒹𑒪 𑒡𑒾𑒧𑓂𑒨 𑒣𑓂𑒩𑒨𑒼𑒑𑒬𑒰𑒪𑒰𑒧𑒹 𑒣𑓂𑒩𑒨𑒼𑒑 𑒬𑒳𑒩𑒴 𑒏𑒩𑒋 𑒥𑒪𑒰 𑒕𑒟𑒱। 𑒯𑒳𑒢𑒏𑒩 𑒮𑓀𑒑𑒲-𑒮𑒰𑒟𑒲 𑒮𑒦 𑒅𑒞𑓂𑒮𑒳𑒏𑒞𑒰𑒮𑒿 𑒮𑒦𑒙𑒰 𑒠𑒹𑒐𑒱 𑒩𑒯𑒪 𑒕𑒟𑒱।
“𑒠𑒴 𑒛𑒰𑒃𑒧𑒹𑒢𑓂𑒬𑒢𑒧𑒹 𑒖𑒲𑒥𑒋 𑒥𑒪𑒰 𑒖𑒲𑒫 𑒞𑒲𑒢 𑒛𑒰𑒃𑒧𑒹𑒢𑓂𑒬𑒢𑒧𑒹 𑒖𑒲𑒥𑒋 𑒥𑒪𑒰 𑒧𑒢𑒳𑒏𑓂𑒐𑒏 𑒮𑒦 𑒏𑒰𑒩𑓂𑒨𑒏𑒹𑒿 𑒠𑒹𑒐𑒱 𑒞𑓄 𑒢𑒯𑒱 𑒮𑒏𑒻𑒞 𑒕𑒟𑒱 𑒧𑒳𑒠𑒰 𑒍𑒏𑒩 𑒮𑒦𑒙𑒰 𑒣𑒩𑒱𑒝𑒰𑒧𑒏 𑒁𑒢𑒳𑒦𑒫 𑒏𑒩𑒻𑒞 𑒕𑒟𑒱। 𑒁𑒣𑒢 𑒋𑒏𑒙𑒰 𑒖𑒲𑒫𑒢-𑒬𑒻𑒪𑒲𑒏 𑒍 𑒢𑒱𑒩𑓂𑒧𑒰𑒝 𑒏𑒋𑒢𑒹 𑒕𑒟𑒱। 𑒍𑒯𑒱 𑒣𑒩𑒱𑒝𑒰𑒧𑒮𑒿 𑒪𑒛𑓃𑒥𑒰𑒏 𑒫𑓂𑒨𑒫𑒮𑓂𑒟𑒰 𑒏𑒋𑒢𑒹 𑒕𑒟𑒱। 𑒞𑒯𑒱𑒢𑒰 𑒯𑒧𑒩𑒰 𑒪𑒼𑒏𑒢𑒱 𑒮𑒹𑒯𑒼 𑒔𑒰𑒩𑒱 𑒛𑒰𑒃𑒧𑒹𑒢𑓂𑒬𑒢𑒧𑒹 𑒩𑒯𑒋 𑒥𑒪𑒰 𑒏𑒼𑒢𑒼 𑒮𑒧𑓂𑒦𑒰𑒫𑒱𑒞 𑒖𑒲𑒫𑒏 𑒫𑒰 𑒄 𑒏𑒯𑒴 𑒖𑒹 𑒞𑒲𑒢𑒮𑒿 𑒥𑒹𑒬𑒲 𑒛𑒰𑒃𑒧𑒹𑒢𑓂𑒬𑒢𑒧𑒹 𑒖𑒱𑒢𑒯𑒰𑒩 𑒖𑒲𑒫𑒏 𑒯𑒮𑓂𑒞𑒏𑓂𑒭𑒹𑒣𑒏𑒹𑒿 𑒔𑒱𑒢𑓂𑒯𑒥𑒰𑒏 𑒣𑓂𑒩𑒨𑒰𑒮 𑒏𑒩𑒥”। 𑒡𑒾𑒧𑓂𑒨 𑒏𑒯𑒻𑒞 𑒩𑒯𑒪𑒰𑒯।
𑒋𑒏 𑒂 𑒠𑒴 𑒛𑒰𑒃𑒧𑒹𑒢𑓂𑒬𑒢𑒧𑒹 𑒩𑒯𑒢𑒱𑒯𑒰𑒩𑒏 𑒠𑒴 𑒑𑒼𑒙 𑒣𑓂𑒩𑒨𑒼𑒑𑒬𑒰𑒪𑒰𑒏 𑒮𑒤𑒪𑒞𑒰𑒏 𑒥𑒰𑒠 𑒡𑒾𑒧𑓂𑒨𑒏 𑒄 𑒞𑒹𑒮𑒩 𑒣𑓂𑒩𑒨𑒼𑒑 𑒕𑒪।
𑒋𑒏 𑒫𑒱𑒧𑒲𑒨 𑒖𑒲𑒫 𑒖𑒹𑒢𑒰 𑒋𑒏𑒙𑒰 𑒥𑒱𑒢𑓂𑒠𑒳। 𑒥𑒔𑓂𑒔𑒰𑒧𑒹 𑒍 𑒣𑒜𑓃𑒻𑒞 𑒕𑒪𑒰𑒯 𑒖𑒹 𑒩𑒹𑒐𑒰 𑒠𑒴 𑒙𑒰 𑒥𑒱𑒢𑓂𑒠𑒳𑒏𑒹𑒿 𑒖𑒼𑒛𑓃𑒻𑒞 𑒕𑒻𑒏। 𑒢𑒘𑒱 𑒞𑓄 𑒥𑒱𑒢𑓂𑒠𑒳𑒧𑒹 𑒏𑒼𑒢𑒼 𑒔𑒾𑒛𑓃𑒰𑒃 𑒠𑒹𑒐𑒢𑒰 𑒖𑒰𑒃𑒞 𑒁𑒕𑒱 𑒂 𑒢𑒯𑒱𑒨𑒹 𑒩𑒹𑒐𑒰𑒧𑒹। 𑒩𑒹𑒐𑒰 𑒢𑒧𑒑𑒩 𑒩𑒯𑒻𑒞 𑒁𑒕𑒱 𑒧𑒳𑒠𑒰 𑒥𑒱𑒢𑓂𑒠𑒳𑒧𑒹 𑒞𑒿 𑒔𑒾𑒛𑓃𑒰𑒃𑒏 𑒮𑓀𑒑 𑒪𑒧𑓂𑒥𑒰𑒃 𑒮𑒹𑒯𑒼 𑒢𑒯𑒱 𑒩𑒯𑒻𑒞 𑒕𑒻𑒏। 𑒋𑒏 𑒫𑒱𑒧𑒲𑒨 𑒫𑒱𑒬𑓂𑒫𑒧𑒹 𑒧𑒰𑒞𑓂𑒩 𑒂𑒑𑒰𑒿 𑒂 𑒣𑒰𑒕𑒰𑒿 𑒩𑒯𑒻𑒞 𑒁𑒕𑒱। 𑒢𑒘𑒱 𑒁𑒕𑒱 𑒫𑒰𑒧 𑒠𑒯𑒱𑒢𑒏 𑒥𑒼𑒡 𑒢𑒯𑒱𑒨𑒹 𑒆𑒣𑒩 𑒢𑒲𑒔𑒰𑒿𑒏। 𑒧𑒰𑒞𑓂𑒩 𑒮𑒩𑒪 𑒩𑒹𑒐𑒰, 𑒫𑒏𑓂𑒩𑒞𑒰 𑒏𑒢𑒱𑒨𑒼 𑒢𑒯𑒱। 𑒂𑒥 𑒄 𑒢𑒹 𑒥𑒳𑒗𑒱 𑒪𑒱𑒁 𑒖𑒹 𑒁𑒯𑒰𑒿 𑒖𑒞𑒋 𑒥𑒻𑒮𑒪 𑒕𑒲, 𑒍𑒞𑒋 𑒋𑒏𑒙𑒰 𑒩𑒹𑒐𑒰 𑒫𑒱𑒔𑒩𑒝 𑒏𑒩𑒋 𑒪𑒰𑒑𑒞। 𑒫𑒩𑒝 𑒄 𑒥𑒳𑒗𑒴 𑒖𑒹 𑒍 𑒩𑒹𑒐𑒰 𑒧𑒰𑒞𑓂𑒩 𑒁𑒕𑒱, 𑒢𑒯𑒱 𑒏𑒼𑒢𑒼 𑒂𑒢 𑒥𑒯𑒱𑓁।
“𑒠𑓂𑒫𑒱 𑒥𑒲𑒧𑒲𑒨 𑒥𑓂𑒩𑒯𑓂𑒧𑒰𑒝𑓂𑒛 𑒦𑒹𑒪 𑒖𑒞𑒋 𑒂𑒑𑒴 𑒣𑒰𑒕𑒴𑒏 𑒫𑒱𑒯𑒰𑒨 𑒫𑒰𑒧 𑒠𑒯𑒱𑒢 𑒮𑒹𑒯𑒼 𑒁𑒕𑒱 𑒧𑒳𑒠𑒰 𑒆𑒣𑒩 𑒂 𑒢𑒲𑒕𑒰𑒿 𑒋𑒞𑒋 𑒢𑒯𑒱 𑒁𑒕𑒱। 𑒥𑒳𑒗𑒴 𑒖𑒹 𑒁𑒯𑒰𑒿𑒏 𑒮𑒼𑒗𑒰𑒿 𑒩𑒰𑒐𑒪 𑒮𑒱𑒞𑒪𑒣𑒰𑒙𑒲𑒏 𑒮𑒠𑒵𑒬 𑒄 𑒯𑒼𑒋𑒞, 𑒖𑒰𑒯𑒱𑒧𑒹 𑒔𑒾𑒛𑓃𑒰𑒃 𑒫𑒱𑒠𑓂𑒨𑒧𑒰𑒢 𑒢𑒯𑒱 𑒁𑒕𑒱।”
“𑒧𑒳𑒠𑒰 𑒬𑓂𑒩𑒲𑒧𑒰𑒢𑓂 𑒄 𑒔𑒪𑒻𑒞 𑒁𑒕𑒱 𑒏𑒼𑒢𑒰। 𑒑𑒣 𑒏𑒼𑒢𑒰 𑒏𑒩𑒞, 𑒋𑒏 𑒠𑒼𑒮𑒩𑒏𑒹𑒿 𑒮𑓀𑒠𑒹𑒬 𑒏𑒼𑒢𑒰 𑒠𑒹𑒞”।
“𑒂𑒆। 𑒣𑒯𑒱𑒢𑒹 𑒋𑒏 𑒫𑒱𑒧𑒲𑒨 𑒥𑓂𑒩𑒯𑓂𑒧𑒰𑒝𑓂𑒛𑒏 𑒁𑒫𑒪𑒼𑒏𑒢 𑒏𑒩𑒻𑒞 𑒕𑒲”।
𑒡𑒾𑒧𑓂𑒨 𑒋𑒏 𑒫𑒱𑒧𑒲𑒨 𑒣𑓂𑒩𑒨𑒼𑒑𑒬𑒰𑒪𑒰𑒏 𑒪𑒑 𑒖𑒰𑒃𑒞 𑒕𑒟𑒱। 𑒍𑒞𑒋 𑒥𑒱𑒢𑓂𑒠𑒳 𑒂 𑒥𑒱𑒢𑓂𑒠𑒳𑒏 𑒮𑒧𑓂𑒧𑒱𑒪𑒢 𑒮𑓂𑒫𑒩𑒴𑒣 𑒥𑒢𑒪 𑒩𑒹𑒐𑒰 𑒮𑒦 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱। 𑒄 𑒖𑒲𑒫 𑒮𑒦 𑒁𑒕𑒱। 𑒋𑒏 𑒫𑒱𑒧𑒲𑒨 𑒥𑓂𑒩𑒯𑓂𑒧𑒰𑒝𑓂𑒛𑒏 𑒖𑒲𑒫 𑒖𑒹 𑒋𑒯𑒱 𑒞𑒟𑓂𑒨𑒮𑒿 𑒁𑒢𑒦𑒱𑒖𑓂𑒘 𑒁𑒕𑒱 𑒖𑒹 𑒞𑒲𑒢 𑒫𑒱𑒧𑒲𑒨 𑒏𑒼𑒢𑒼 𑒖𑒲𑒫 𑒍𑒏𑒩𑒰 𑒮𑒦𑒏𑒹𑒿 𑒠𑒹𑒐𑒱 𑒩𑒯𑒪 𑒕𑒻𑒏।
“𑒠𑒹𑒐𑒴। 𑒄 𑒮𑒦 𑒖𑒲𑒫 𑒋𑒏 𑒠𑒼𑒮𑒩𑒰𑒏𑒹𑒿 𑒣𑒰𑒩 𑒢𑒯𑒱 𑒏𑒋 𑒮𑒏𑒻𑒞 𑒁𑒕𑒱। 𑒂𑒑𑒴 𑒥𑒜𑓃𑒞 𑒞𑒿 𑒞𑒰𑒫𑒞 𑒡𑒩𑒱 𑒖𑒰 𑒡𑒩𑒱 𑒏𑒼𑒢𑒼 𑒥𑒱𑒢𑓂𑒠𑒳 𑒫𑒰 𑒩𑒹𑒐𑒰𑒮𑒿 𑒙𑒏𑓂𑒏𑒩 𑒢𑒯𑒱 𑒦𑒋 𑒖𑒋𑒞𑒻𑒏। 𑒂 𑒣𑒰𑒕𑒰𑒿 𑒯𑒙𑒞 𑒞𑒰𑒫𑒞 𑒡𑒩𑒱 𑒨𑒰𑒫𑒞 𑒤𑒹𑒩 𑒏𑒼𑒢𑒼 𑒖𑒲𑒫𑒮𑒿 𑒦𑒹𑒿𑒙 𑒢𑒯𑒱 𑒯𑒼𑒋𑒞𑒻𑒏। 𑒋𑒏 𑒠𑒼𑒮𑒩𑒰𑒏𑒹𑒿 𑒮𑓀𑒠𑒹𑒬 𑒮𑒹𑒯𑒼 𑒧𑒰𑒞𑓂𑒩 𑒋𑒏𑒯𑒱 𑒣𑒿𑒏𑓂𑒞𑓂𑒞𑒱𑒧𑒹 𑒠𑒋 𑒮𑒏𑒞 𑒏𑒰𑒩𑒝 𑒣𑓀𑒏𑓂𑒞𑓂𑒞𑒱𑒏 𑒥𑒰𑒯𑒩 𑒏𑒱𑒕𑒳 𑒢𑒯𑒱 𑒕𑒻𑒏। 𑒍𑒏𑒩 𑒥𑓂𑒩𑒯𑓂𑒧𑒰𑒝𑓂𑒛 𑒋𑒏𑒯𑒱 𑒣𑓀𑒏𑓂𑒞𑓂𑒞𑒱𑒧𑒹 𑒮𑒧𑒰𑒣𑓂𑒞 𑒦𑒋 𑒖𑒰𑒃𑒞 𑒁𑒕𑒱।
“𑒂𑒥 𑒔𑒪𑒴 𑒠𑓂𑒫𑒱 𑒥𑒲𑒧𑒲𑒨 𑒣𑓂𑒩𑒨𑒼𑒑𑒬𑒰𑒪𑒰𑒧𑒹”।
𑒮𑒦 𑒏𑓂𑒨𑒼 𑒣𑒰𑒕𑒰𑒿-𑒣𑒰𑒕𑒰𑒿 𑒖𑒰𑒃𑒞 𑒕𑒟𑒱।
“𑒋𑒞𑒨 𑒏𑒱𑒕𑒳 𑒩𑒧𑒝 𑒔𑒧𑒢 𑒁𑒕𑒱। 𑒣𑒯𑒱𑒪 𑒣𑓂𑒩𑒨𑒼𑒑𑒬𑒰𑒪𑒰 𑒞𑒿 𑒠𑒴 𑒞𑒯𑒮𑒿 𑒖𑒰𑒿𑒞𑒪 𑒕𑒪, 𑒠𑒳𑒢𑒴 𑒠𑒱𑒬𑒱𑒮𑒿 𑒂 𑒆𑒣𑒩𑒮𑒿 𑒮𑒹𑒯𑒼। 𑒧𑒰𑒞𑓂𑒩 𑒪𑒧𑓂𑒥𑒰𑒃 𑒁𑒢𑒢𑓂𑒞 𑒡𑒩𑒱 𑒖𑒰𑒃𑒞 𑒕𑒪। 𑒧𑒳𑒠𑒰 𑒋𑒞𑒨 𑒆𑒣𑒩 𑒂 𑒢𑒲𑒔𑒰𑒿𑒏 𑒮𑒞𑒯 𑒖𑒰𑒿𑒞𑒪 𑒁𑒕𑒱। 𑒄 𑒂𑒑𑒰𑒿 𑒣𑒰𑒕𑒰𑒿 𑒂 𑒫𑒰𑒧 𑒠𑒯𑒱𑒢 𑒠𑒳𑒢𑒴 𑒠𑒱𑒬𑒱 𑒁𑒢𑒢𑓂𑒞 𑒡𑒩𑒱 𑒖𑒰 𑒩𑒯𑒪 𑒁𑒕𑒱। 𑒞𑒰𑒯𑒱 𑒯𑒹𑒞𑒳 𑒯𑒧 𑒠𑒳𑒢𑒴 𑒣𑓂𑒩𑒨𑒼𑒬𑒰𑒪𑒰𑒏𑒹𑒿 𑒣𑒵𑒟𑓂𑒫𑒲𑒏 𑒆𑒣𑒩 𑒮𑓂𑒫𑒞𑓀𑒞𑓂𑒩 𑒢𑒦𑒧𑒹 𑒥𑒢𑒍𑒢𑒹 𑒕𑒲। 𑒋𑒞𑒳𑒏𑓂𑒏𑒰 𑒖𑒲𑒫𑒏𑒹𑒿 𑒠𑒹𑒐𑒴। 𑒮𑒲𑒞𑒪𑒣𑒰𑒙𑒲 𑒣𑒩 𑒏𑒱𑒕𑒳𑒍 𑒥𑒢𑒰 𑒠𑒱𑒨𑒾𑒏। 𑒖𑒹𑒢𑒰 𑒕𑒼𑒙 𑒥𑒔𑓂𑒔𑒰 𑒖𑒹 𑒂𑒡𑒳𑒢𑒱𑒏 𑒔𑒱𑒞𑓂𑒩 𑒥𑒢𑒥𑒻𑒞 𑒕𑒟𑒱। 𑒋𑒞𑒋 𑒍 𑒮𑒦 𑒣𑓂𑒩𑒏𑒰𑒩 𑒦𑒹𑒙𑒱 𑒖𑒋𑒞। 𑒧𑒳𑒠𑒰 𑒆𑒿𑒔𑒰𑒃𑒏 𑒖𑓂𑒘𑒰𑒢 𑒋𑒞𑒋 𑒢𑒯𑒱 𑒁𑒕𑒱। 𑒋𑒏 𑒠𑒼𑒮𑒩𑒏𑒹𑒿 𑒋𑒏 𑒥𑒹𑒩𑒧𑒹 𑒧𑒰𑒞𑓂𑒩 𑒩𑒹𑒐𑒰𑒏 𑒩𑒴𑒣𑒧𑒹 𑒠𑒹𑒐𑒻𑒞 𑒁𑒕𑒱 𑒄 𑒮𑒦। 𑒠𑒼𑒮𑒩 𑒏𑒼𑒝𑒮𑒿 𑒠𑒼𑒮𑒩 𑒩𑒹𑒐𑒰 𑒂 𑒞𑒐𑒢 𑒮𑓂𑒫𑒩𑒴𑒣𑒏 𑒖𑓂𑒘𑒰𑒢 𑒏𑒩𑒻𑒞 𑒖𑒰𑒃𑒞 𑒁𑒕𑒱। 𑒪𑒧𑓂𑒥𑒰𑒃 𑒂 𑒔𑒾𑒛𑓃𑒰𑒃 𑒮𑒦 𑒏𑒼𑒝𑒮𑒿 𑒥𑒠𑒪𑒞। 𑒧𑒳𑒠𑒰 𑒫𑒵𑒞𑓂𑒞𑒰𑒏𑒰𑒩 𑒖𑒲𑒫 𑒮𑒹𑒯𑒼 𑒯𑒼𑒃𑒞 𑒁𑒕𑒱। 𑒖𑒹𑒢𑒰 𑒠𑒹𑒐𑒴 𑒍 𑒖𑒲𑒫 𑒫𑒰𑒧 𑒏𑒰𑒞𑒧𑒹। 𑒋𑒏 𑒠𑒼𑒮𑒩𑒰𑒏𑒹𑒿 𑒮𑓀𑒠𑒹𑒬 𑒍𑒏𑒩𑒰 𑒪𑒑 𑒖𑒰 𑒏𑒋 𑒠𑒹𑒪 𑒖𑒰𑒃𑒞 𑒁𑒕𑒱। 𑒣𑒻𑒒 𑒮𑒧𑒴𑒯𑒧𑒹 𑒮𑓀𑒠𑒹𑒬 𑒣𑓂𑒩𑒮𑒰𑒩𑒱𑒞 𑒯𑒼𑒨𑒥𑒰𑒧𑒹 𑒜𑓃𑒹𑒩 𑒮𑒧𑒨 𑒪𑒰𑒑𑒱 𑒖𑒰𑒃𑒞 𑒁𑒕𑒱”।
“𑒬𑓂𑒩𑒲𑒧𑒰𑒢, 𑒏𑒲 𑒄 𑒮𑓀𑒦𑒫 𑒁𑒕𑒱, 𑒖𑒹𑒢𑒰 𑒯𑒧𑒩𑒰 𑒮𑒦𑒏 𑒮𑒼𑒗𑒰𑒿 𑒩𑒯𑒪𑒼 𑒅𑒞𑓂𑒞𑒩 𑒍 𑒮𑒦 𑒯𑒧𑒩𑒰 𑒪𑒼𑒏𑒢𑒱𑒏 𑒁𑒮𑓂𑒞𑒱𑒞𑓂𑒫𑒮𑒿 𑒁𑒢𑒦𑒱𑒖𑓂𑒘 𑒁𑒕𑒱 𑒞𑒯𑒱𑒢𑒰 𑒯𑒧𑒩𑒰 𑒮𑒦 𑒮𑒹𑒯𑒼 𑒏𑒼𑒢𑒼 𑒔𑒰𑒩𑒱 𑒂 𑒥𑒹𑒬𑒲 𑒫𑒱𑒧𑒲𑒨 𑒖𑒲𑒫𑒏 𑒁𑒮𑓂𑒞𑒱𑒞𑓂𑒫𑒮𑒿 𑒁𑒢𑒦𑒱𑒖𑓂𑒘 𑒯𑒼𑒃”।
“𑒯𑒿 𑒞𑒏𑒩𑒹 𑒔𑒩𑓂𑒔𑒰 𑒂 𑒣𑓂𑒩𑒨𑒼𑒑 𑒏𑒩𑒥𑒰𑒏 𑒯𑒹𑒞𑒳 𑒯𑒧𑒩𑒰 𑒮𑒦 𑒋𑒞𑒋 𑒋𑒏𑒞𑓂𑒩 𑒦𑒹𑒪 𑒕𑒲। 𑒁𑒯𑒰𑒿𑒧𑒹 𑒮𑒿 𑒔𑒰𑒩𑒱 𑒑𑒼𑒙𑒹 𑒯𑒧𑒩𑒰 𑒮𑓀𑒑 𑒋𑒯𑒱 𑒢𑒫 𑒏𑒰𑒩𑓂𑒨𑒏 𑒯𑒹𑒞𑒳 𑒂𑒥𑒱 𑒮𑒏𑒻𑒞 𑒕𑒲। 𑒄 𑒨𑒼𑒖𑒢𑒰 𑒏𑒢𑒹𑒏 𑒏𑒚𑒱𑒢𑒰𑒯 𑒁𑒕𑒱। 𑒏𑒞𑒹𑒏 𑒮𑒰𑒪 𑒡𑒩𑒱 𑒄 𑒨𑒼𑒖𑒢𑒰 𑒔𑒪𑒞 𑒂 𑒣𑒩𑒱𑒝𑒰𑒧 𑒏𑒯𑒱𑒨𑒰 𑒖𑒰 𑒏𑒋 𑒦𑒹𑒙𑒞, 𑒞𑒏𑒩 𑒏𑒼𑒢𑒼 𑒮𑒲𑒧𑒰 𑒢𑒱𑒩𑓂𑒡𑒰𑒩𑒝 𑒢𑒯𑒱 𑒁𑒕𑒱”।
𑒣𑒰𑒿𑒔 𑒙𑒰 𑒫𑒱𑒠𑓂𑒨𑒰𑒩𑓂𑒟𑒲 𑒬𑓂𑒫𑒹𑒞𑒏𑒹𑒞𑒳, 𑒁𑒣𑒰𑒪𑒰, 𑒮𑒞𑓂𑒨𑒏𑒰𑒧, 𑒩𑒻𑒏𑓂𑒫 𑒂 𑒒𑒼𑒭𑒰 𑒋𑒯𑒱 𑒏𑒰𑒩𑓂𑒨𑒏 𑒯𑒹𑒞𑒳 𑒮𑒯𑒩𑓂𑒭 𑒞𑒻𑒨𑒰𑒩 𑒦𑒹𑒪𑒰𑒯। 𑒡𑒾𑒧𑓂𑒨 𑒣𑒰𑒿𑒔𑒴 𑒑𑒼𑒙𑒹𑒏𑒹𑒿 𑒁𑒣𑒢 𑒨𑒼𑒖𑒢𑒰𑒧𑒹 𑒮𑒧𑓂𑒧𑒱𑒪𑒱𑒞 𑒏𑒋 𑒪𑒹𑒪𑒢𑓂𑒯𑒱।
“𑒔𑒰𑒩𑒱 𑒥𑒲𑒧𑒲𑒨 𑒫𑒱𑒬𑓂𑒫𑒧𑒹 𑒞𑒲𑒢 𑒥𑒲𑒧𑒲𑒨 𑒫𑒱𑒬𑓂𑒫𑒮𑒿 𑒏𑒱𑒕𑒳 𑒁𑒢𑓂𑒞𑒩 𑒁𑒕𑒱। 𑒞𑒲𑒢 𑒥𑒲𑒧𑒲𑒨 𑒫𑒱𑒬𑓂𑒫 𑒦𑒹𑒪 𑒞𑒲𑒢 𑒙𑒰 𑒪𑒧𑓂𑒥𑒰𑒃, 𑒔𑒾𑒛𑓃𑒰𑒃 𑒂 𑒑𑒯𑒩𑒰𑒃 𑒧𑒳𑒠𑒰 𑒋𑒯𑒱𑒧𑒹 𑒮𑒧𑒨𑒏 𑒋𑒏𑒙𑒰 𑒥𑒲𑒧 𑒮𑒹𑒯𑒼 𑒮𑒧𑓂𑒧𑒱𑒪𑒱𑒞 𑒁𑒕𑒱। 𑒞𑒿 𑒔𑒰𑒩𑒱 𑒥𑒲𑒧𑒲𑒨 𑒫𑒱𑒬𑓂𑒫𑒧𑒹 𑒂𑒏𑒱 𑒣𑒰𑒿𑒔 𑒥𑒲𑒧𑒲𑒨 𑒫𑒱𑒬𑓂𑒫𑒧𑒹 𑒮𑒧𑒨𑒏 𑒋𑒏𑒮𑒿 𑒥𑒹𑒬𑒲 𑒥𑒲𑒧𑒏 𑒮𑒧𑓂𑒦𑒰𑒫𑒢𑒰 𑒣𑒩 𑒮𑒹𑒯𑒼 𑒫𑒱𑒔𑒰𑒩 𑒏𑒋𑒪 𑒖𑒋𑒞। 𑒧𑒳𑒠𑒰 𑒣𑒯𑒱𑒢𑒹 𑒔𑒰𑒩𑒱 𑒥𑒲𑒧𑒲𑒨 𑒫𑒱𑒬𑓂𑒫 𑒣𑒩 𑒯𑒧𑒩𑒰 𑒮𑒦 𑒬𑒼𑒡 𑒂𑒑𑒰𑒿 𑒥𑒜𑓃𑒰𑒋𑒥। 𑒋𑒯𑒱𑒧𑒹 𑒧𑒴𑒪𑒞𑓁 𑒮𑒧𑒨𑒏 𑒋𑒏𑒙𑒰 𑒥𑒲𑒧 𑒮𑒹𑒯𑒼 𑒩𑒯𑒞 𑒂 𑒞𑒰𑒯𑒱𑒮𑒿 𑒥𑒲𑒧𑒏 𑒮𑓀𑒐𑓂𑒨𑒰 𑒣𑒰𑒿𑒔 𑒦𑒋 𑒖𑒰𑒨𑒞। 𑒮𑒧𑒨𑒏𑒹𑒿 𑒧𑒱𑒪𑒰𑒏𑒋 𑒔𑒰𑒩𑒱 𑒥𑒲𑒧𑒏 𑒫𑒱𑒬𑓂𑒫𑒧𑒹 𑒯𑒧𑒩𑒰 𑒮𑒦 𑒖𑒲𑒥𑒱 𑒩𑒯𑒪 𑒕𑒲। 𑒖𑒹𑒢𑒰 𑒫𑒩𑓂𑒝 𑒁𑒢𑓂𑒡𑒞𑒰𑒮𑒿 𑒑𑓂𑒩𑒮𑒱𑒞 𑒪𑒼𑒏𑒏𑒹𑒿 𑒪𑒰𑒪 𑒂 𑒯𑒩𑒱𑒁𑒩𑒏 𑒁𑒢𑓂𑒞𑒩 𑒢𑒯𑒱 𑒥𑒳𑒗𑒱 𑒣𑒛𑓃𑒻𑒞 𑒕𑒻𑒏 𑒞𑒰𑒯𑒱 𑒣𑓂𑒩𑒏𑒰𑒩𑒮𑒿 𑒯𑒧𑒩𑒰 𑒮𑒦 𑒋𑒏𑒙𑒰 𑒥𑒹𑒬𑒲 𑒥𑒲𑒧𑒏 𑒫𑒱𑒬𑓂𑒫𑒏 𑒏𑒪𑓂𑒣𑒢𑒰 𑒏𑒋 𑒮𑒏𑒻𑒞 𑒕𑒲, 𑒁𑒣𑓂𑒩𑒞𑓂𑒨𑒏𑓂𑒭 𑒁𑒢𑒳𑒦𑒫 𑒮𑒹𑒯𑒼 𑒏𑒋 𑒮𑒏𑒻𑒞 𑒕𑒲”। 𑒡𑒾𑒧𑓂𑒨 𑒥𑒖𑒪𑒰𑒯।
𑒫𑓂𑒨𑒰𑒐𑓂𑒨𑒰𑒢 𑒮𑒧𑒰𑒣𑓂𑒞 𑒦𑒹𑒪 𑒂 𑒮𑒦 𑒏𑓂𑒨𑒼 𑒁𑒣𑒢-𑒁𑒣𑒢 𑒣𑓂𑒩𑒏𑒼𑒭𑓂𑒚𑒧𑒹 𑒔𑒪𑒱 𑒑𑒹𑒪𑒰𑒯। 𑒮𑒻𑒠𑓂𑒡𑒰𑓀𑒞𑒱𑒏 𑒬𑒼𑒡 𑒂 𑒞𑒏𑒩 𑒥𑒰𑒠 𑒍𑒏𑒩 𑒣𑓂𑒩𑒰𑒨𑒼𑒑𑒱𑒏 𑒣𑓂𑒩𑒨𑒼𑒑𑒧𑒹 𑒮𑒦 𑒑𑒼𑒙𑒹 𑒪𑒰𑒑𑒱 𑒑𑒹𑒪𑒰𑒯।
𑒡𑒩𑒰𑒞𑒪 𑒣𑒩 𑒞𑓂𑒩𑒱𑒦𑒳𑒖 𑒐𑒹𑓀𑒔𑒱 𑒏𑒋 𑒋𑒏 𑒮𑒨 𑒁𑒮𑓂𑒮𑒲 𑒁𑓀𑒬𑒏 𑒏𑒼𑒝 𑒖𑒼𑒛𑓃𑒱 𑒏𑒋 𑒥𑒢𑒋𑒥𑒰𑒏 𑒁𑒞𑒱𑒩𑒱𑒏𑓂𑒞𑓂𑒞 𑒣𑒵𑒟𑓂𑒫𑒲𑒏𑒰𑒩 𑒂𑒏𑒵𑒞𑒱𑒧𑒹 𑒐𑒹𑓀𑒔𑒪 𑒑𑒹𑒪 𑒞𑓂𑒩𑒱𑒦𑒳𑒖 𑒖𑒰𑒯𑒱 𑒧𑒹 𑒣𑓂𑒩𑒞𑓂𑒨𑒹𑒏 𑒩𑒹𑒐𑒰 𑒋𑒏 𑒠𑒼𑒮𑒩𑒰𑒮𑒿 𑒢𑒥𑓂𑒥𑒹 𑒁𑓀𑒬𑒏 𑒏𑒼𑒝 𑒣𑒩 𑒩𑒯𑒻𑒞 𑒁𑒕𑒱 ।
𑒧𑒳𑒠𑒰 𑒋𑒞𑒋 𑒩𑒹𑒐𑒰 𑒮𑒼𑒗 𑒢𑒯𑒱 𑒙𑒹𑒜𑓃 𑒩𑒯𑒻𑒞 𑒁𑒕𑒱। 𑒍𑒯𑒱𑒢𑒰 𑒮𑒧𑒨 𑒂 𑒮𑓂𑒟𑒰𑒢𑒏𑒹𑒿 𑒙𑒹𑒜 𑒦𑒹𑒪𑒰 𑒣𑒩 𑒋𑒯𑒢 𑒮𑓀𑒦𑒫 𑒦𑒋 𑒮𑒏𑒻𑒞 𑒁𑒕𑒱 𑒖𑒹 𑒯𑒧𑒩𑒰 𑒮𑒦 𑒣𑓂𑒩𑒏𑒰𑒬𑒏 𑒑𑒞𑒱𑒮𑒿 𑒍𑒯𑒱 𑒧𑒰𑒩𑓂𑒑𑒹 𑒖𑒰𑒃 𑒂 𑒣𑒳𑒢𑓁 𑒒𑒳𑒩𑒱 𑒂𑒥𑒲। 𑒣𑓂𑒩𑒏𑒰𑒬 𑒮𑒴𑒩𑓂𑒨𑒏 𑒪𑒑𑒮𑒿 𑒖𑒰𑒃𑒞 𑒁𑒕𑒱 𑒞𑒿 𑒍𑒏𑒩 𑒩𑒮𑓂𑒞𑒰 𑒏𑒢𑒹𑒏 𑒥𑒠𑒪𑒱 𑒖𑒰𑒃𑒞 𑒕𑒻𑒏।
𑒬𑓂𑒫𑒹𑒞𑒏𑒹𑒞𑒳 𑒂 𑒩𑒻𑒏𑓂𑒫 𑒋𑒏𑒙𑒰 𑒮𑒱𑒠𑓂𑒡𑒰𑒢𑓂𑒞 𑒠𑒹𑒪𑒢𑓂𑒯𑒱 । 𑒖𑒹𑒢𑒰 𑒏𑒚𑒤𑒼𑒩𑒥𑒰 𑒏𑒰𑒚𑒧𑒹, 𑒫𑒵𑒏𑓂𑒭𑒧𑒹 𑒐𑒼𑒯 𑒥𑒢𑒥𑒻𑒞 𑒁𑒕𑒱, 𑒞𑒯𑒱𑒢𑒰 𑒋𑒏𑒙𑒰 𑒮𑒧𑒨 𑒂 𑒮𑓂𑒟𑒰𑒢𑒏𑒹𑒿 𑒖𑒼𑒛𑓃𑒋𑒥𑒪𑒰 𑒐𑒼𑒯𑒏 𑒢𑒱𑒩𑓂𑒧𑒰𑒝 𑒬𑒳𑒩𑒴 𑒦𑒋 𑒑𑒹𑒪। 𑒁𑒣𑒰𑒪𑒰 𑒋𑒏𑒙𑒰 𑒥𑓂𑒩𑒯𑓂𑒧𑒰𑒝𑓂𑒛𑒏 𑒛𑒼𑒩𑒲𑒏 𑒢𑒱𑒩𑓂𑒧𑒰𑒝 𑒏𑒋𑒪𑒢𑓂𑒯𑒱, 𑒖𑒏𑒩𑒰 𑒥𑒰𑒢𑓂𑒯𑒱 𑒏𑒋 𑒣𑓂𑒩𑒏𑒰𑒬 𑒫𑒰 𑒍𑒯𑒴𑒮𑒿 𑒥𑒹𑒬𑒲 𑒑𑒞𑒱𑒮𑒿 𑒅𑒛𑓃𑒥𑒰𑒏 𑒮𑒧𑓂𑒦𑒰𑒫𑒢𑒰 𑒕𑒪। 𑒮𑒞𑓂𑒨𑒏𑒰𑒧 𑒋𑒏𑒙𑒰 𑒋𑒯𑒢 𑒮𑒱𑒠𑓂𑒡𑒰𑒢𑓂𑒞𑒏 𑒮𑒧𑓂𑒦𑒰𑒫𑒢𑒰 𑒣𑒩 𑒏𑒰𑒩𑓂𑒨 𑒬𑒳𑒩𑒴 𑒏𑒋𑒢𑒹 𑒕𑒪𑒰𑒯, 𑒖𑒏𑒩 𑒧𑒰𑒡𑓂𑒨𑒧𑒮𑒿 𑒞𑒲𑒢 𑒙𑒰 𑒮𑓂𑒟𑒰𑒢𑒱𑒏 𑒂 𑒋𑒏𑒙𑒰 𑒮𑒧𑒨𑒏 𑒥𑒲𑒧𑒏 𑒁𑒞𑒱𑒩𑒱𑒏𑓂𑒞𑓂𑒞 𑒏𑒞𑒰𑒏 𑒂𑒩 𑒥𑒲𑒧 𑒕𑒪 𑒖𑒹 𑒥𑒛𑓃 𑒪𑒒𑒳 𑒕𑒪, 𑒙𑒹𑒜 𑒕𑒪 𑒂 𑒋𑒯𑒱 𑒞𑒩𑒯𑒹𑒿 𑒫𑒩𑓂𑒞𑓂𑒞𑒧𑒰𑒢 𑒫𑒱𑒬𑓂𑒫 𑒪𑒑𑒦𑒑 𑒠𑒮 𑒥𑒲𑒧𑒲𑒨 𑒕𑒪।
𑒒𑒼𑒭𑒰 𑒮𑓂𑒟𑒰𑒢 𑒮𑒧𑒨𑒏 𑒧𑒰𑒡𑓂𑒨𑒧𑒮𑒿 𑒦𑒴𑒞𑒏𑒰𑒪𑒧𑒹 𑒣𑒯𑒳𑒿𑒔𑒥𑒰𑒮𑒿 𑒣𑒴𑒩𑓂𑒫 𑒠𑒹𑒬𑒏 𑒏𑒰𑒢𑒴𑒢-𑒫𑒱𑒡𑒱𑒧𑒹 𑒄 𑒣𑒩𑒱𑒫𑒩𑓂𑒞𑓂𑒞𑒢 𑒏𑒩𑒥𑒰𑒏 𑒯𑒹𑒞𑒳 𑒏𑒯𑒪𑒢𑓂𑒯𑒱 𑒖𑒰𑒯𑒱𑒮𑒿 𑒏𑒼𑒢𑒼 𑒫𑒻𑒖𑓂𑒘𑒰𑒢𑒱𑒏 𑒦𑒴𑒞𑒏𑒰𑒪𑒧𑒹 𑒣𑒯𑒳𑒿𑒔𑒱 𑒏𑒋 𑒁𑒣𑒢 𑒫𑒰 𑒁𑒣𑒢 𑒬𑒞𑓂𑒩𑒳𑒏𑒹𑒿 𑒖𑒢𑓂𑒧𑒮𑒿 𑒣𑒴𑒩𑓂𑒫 𑒢𑒯𑒱 𑒧𑒰𑒩𑒱 𑒠𑒋। 𑒒𑒼𑒭𑒰 𑒫𑒱𑒬𑓂𑒫𑒏 𑒢𑒱𑒩𑓂𑒧𑒰𑒝𑒧𑒹 𑒦𑒑𑒫𑒰𑒢𑒏 𑒨𑒼𑒑𑒠𑒰𑒢𑒏 𑒔𑒩𑒔𑒰 𑒏𑒩𑒻𑒞 𑒩𑒯𑒻𑒞 𑒕𑒪𑒲𑒯। 𑒖𑓂𑒨𑒼𑒿 𑒫𑒱𑒬𑓂𑒫𑒏 𑒢𑒱𑒩𑓂𑒧𑒰𑒝 𑒦𑒑𑒫𑒰𑒢 𑒏𑒋𑒪𑒢𑓂𑒯𑒱, 𑒋𑒏𑒙𑒰 𑒫𑒱𑒮𑓂𑒤𑒼𑒙 𑒠𑓂𑒫𑒰𑒩𑒰 𑒂 𑒋𑒏𑒩𑒰 𑒮𑒰𑒣𑒹𑒏𑓂𑒭𑒞𑒰 𑒂 𑒁𑒢𑒱𑒬𑓂𑒔𑒱𑒞𑒞𑒰𑒏 𑒮𑒱𑒠𑓂𑒡𑒰𑓀𑒞𑒏 𑒁𑒢𑓂𑒞𑒩𑓂𑒑𑒞 𑒕𑒼𑒛𑓃𑒱 𑒠𑒹𑒪𑒢𑓂𑒯𑒱 𑒥𑒜𑓃𑒥𑒰𑒏 𑒪𑒹𑒪 𑒞𑒿 𑒤𑒹𑒩 𑒮𑒧𑒨𑒏 𑒔𑒰𑒦𑒲 𑒞𑒿 𑒯𑒳𑒢𑒏𑒹 𑒯𑒰𑒟𑒧𑒹 𑒕𑒢𑓂𑒯𑒱। 𑒖𑒐𑒢 𑒍 𑒔𑒰𑒯𑒞𑒰𑒯 𑒤𑒹𑒩𑒮𑒿 𑒮𑒦𑒙𑒰 𑒬𑒳𑒩𑒴 𑒦𑒋 𑒖𑒰𑒨𑒞। 𑒖𑓂𑒨𑒼𑒿 𑒮𑒹 𑒢𑒯𑒱 𑒁𑒕𑒱, 𑒞𑒐𑒢 𑒮𑒧𑒨 𑒮𑓂𑒟𑒰𑒢𑒏 𑒏𑒼𑒢𑒼 𑒮𑒲𑒧𑒰, 𑒏𑒼𑒢𑒼 𑒞𑒙-𑒏𑒱𑒢𑒰𑒩 𑒢𑒯𑒱 𑒁𑒕𑒱, 𑒞𑒐𑒢 𑒞𑒿 𑒄 𑒥𑓂𑒩𑒯𑓂𑒧𑒰𑒝𑓂𑒛 𑒁𑒣𑒢𑒹 𑒮𑒦 𑒏𑒱𑒕𑒳 𑒁𑒕𑒱, 𑒫𑒱𑒬𑓂𑒫𑒠𑒹𑒫 । 𑒞𑒐𑒢 𑒦𑒑𑒫𑒰𑒢𑒏 𑒏𑒼𑒢 𑒮𑓂𑒟𑒰𑒢? 𑒒𑒼𑒭𑒰 𑒮𑒼𑒔𑒻𑒞 𑒩𑒯𑒪𑒲𑒯।
𑒂𑒥 𑒡𑒾𑒧𑓂𑒨𑒏 𑒪𑒹𑒪 𑒮𑒧𑒨 𑒂𑒥𑒱 𑒑𑒹𑒪 𑒕𑒪। 𑒁𑒣𑒢 𑒣𑒰𑒿𑒔𑒴 𑒫𑒱𑒠𑓂𑒨𑒰𑒩𑓂𑒟𑒲𑒏 𑒮𑒦 𑒮𑒱𑒠𑓂𑒡𑒰𑓀𑒞𑒏𑒹𑒿 𑒍 𑒣𑓂𑒩𑒨𑒼𑒑𑒧𑒹 𑒥𑒠𑒪𑒱 𑒠𑒹𑒪𑒢𑓂𑒯𑒱। 𑒂 𑒂𑒥 𑒮𑒧𑒨 𑒂𑒥𑒱 𑒑𑒹𑒪। 𑒣𑒯𑒩𑒩𑒰𑒞𑒱।
𑒣𑒳𑒭𑓂𑒣𑒏 𑒫𑒱𑒧𑒰𑒢 𑒞𑒻𑒨𑒰𑒩 𑒦𑒹𑒪 𑒮𑓂𑒟𑒰𑒢-𑒮𑒧𑒨𑒏 𑒐𑒼𑒯𑒮𑒿 𑒔𑒪𑒥𑒰𑒏 𑒪𑒹𑒪। 𑒥𑓂𑒩𑒯𑓂𑒧𑒰𑒝𑓂𑒛𑒲𑒨 𑒛𑒼𑒩𑒲 𑒥𑒰𑒢𑓂𑒯𑒱 𑒠𑒹𑒪 𑒑𑒹𑒪 𑒣𑒳𑒭𑓂𑒣𑒏 𑒣𑒩। 𑒡𑒾𑒧𑓂𑒨 𑒮𑒦𑒮𑒿 𑒫𑒱𑒠𑒰 𑒪𑒹𑒪𑒢𑓂𑒯𑒱। 𑒣𑓂𑒩𑒏𑒰𑒬𑒏 𑒑𑒞𑒱𑒮𑒿 𑒔𑒪𑒪 𑒫𑒱𑒧𑒰𑒢 𑒂 𑒐𑒼𑒯𑒧𑒹 𑒮𑓂𑒟𑒰𑒢 𑒂 𑒮𑒧𑒨𑒏𑒹𑒿 𑒙𑒹𑒜𑓃 𑒏𑒩𑒻𑒞 𑒂𑒑𑒰𑒿 𑒥𑒜𑓃𑒱 𑒑𑒹𑒪। 𑒥𑓂𑒩𑒯𑓂𑒧𑒰𑒝𑓂𑒛𑒏 𑒏𑒹𑒢𑓂𑒠𑓂𑒩𑒧𑒹 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒡𑒾𑒧𑓂𑒨। 𑒣𑒯𑒩𑒩𑒰𑒞𑒱 𑒥𑒲𑒞𑒪 𑒕𑒪। 𑒂𑒑𑒰𑒿 𑒏𑒰𑒩𑒲 𑒑𑒯𑓂𑒫𑒩 𑒮𑒦 𑒋𑒯𑒱 𑒮𑒧𑒨 𑒂 𑒮𑓂𑒟𑒰𑒢𑒏𑒹𑒿 𑒙𑒹𑒜𑓃 𑒏𑒋𑒪 𑒐𑒼𑒯𑒧𑒹 𑒔𑒪𑒋 𑒥𑒪𑒰 𑒣𑒳𑒭𑓂𑒣𑒏𑒏 𑒮𑒼𑒗𑒰𑒿 𑒁𑒣𑒢 𑒮𑒦𑒙𑒰 𑒦𑒹𑒠 𑒩𑒰𑒐𑒱 𑒠𑒹𑒪𑒏।
𑒦𑒼𑒩𑒳𑒏𑒰 𑒣𑒯𑒩𑒏 𑒣𑒯𑒱𑒢𑒹 𑒡𑒾𑒧𑓂𑒨𑒏 𑒫𑒱𑒧𑒰𑒢 𑒣𑒳𑒢𑓁 𑒣𑒵𑒟𑓂𑒫𑒲 𑒣𑒩 𑒂𑒥𑒱 𑒑𑒹𑒪।
𑒧𑒳𑒠𑒰 𑒋𑒞𑒋 𑒂𑒥𑒱 𑒯𑒳𑒢𑒏𑒰 𑒄 𑒫𑒱𑒬𑓂𑒫 𑒏𑒱𑒕𑒳 𑒥𑒠𑒪𑒪 𑒮𑒢 𑒪𑒑𑒪𑒢𑓂𑒯𑒱। 𑒬𑓂𑒫𑒹𑒞𑒏𑒹𑒞𑒳, 𑒁𑒣𑒰𑒪𑒰, 𑒮𑒞𑓂𑒨𑒏𑒰𑒧, 𑒩𑒻𑒏𑓂𑒫 𑒂 𑒒𑒼𑒭𑒰 𑒏𑓂𑒨𑒼 𑒢𑒯𑒱 𑒕𑒪𑒰𑒯 𑒍𑒞𑒋। 𑒫𑒱𑒧𑒰𑒢𑒣𑒙𑓂𑒙𑒲 𑒮𑒹𑒯𑒼 𑒥𑒠𑒪𑒪 𑒮𑒢। 𑒫𑒱𑒬𑓂𑒫𑒧𑒹 𑒮𑒧𑒨-𑒮𑓂𑒟𑒰𑒢𑒏 𑒣𑒙𑓂𑒙𑒲 𑒮𑒦 𑒦𑒩𑒪 𑒣𑒛𑓃𑒪 𑒕𑒪।
“𑒨𑒾। 𑒮𑒧𑒨 𑒥𑒞𑒰𑒆 𑒏𑒞𑒹𑒏 𑒦𑒹𑒪 𑒁𑒕𑒱”।
“𑒏𑒼𑒢 𑒮𑒧𑒨। 𑒮𑒼𑒗 𑒥𑒪𑒰 𑒫𑒰 𑒮𑓂𑒟𑒰𑒢-𑒮𑒧𑒨 𑒫𑒱𑒮𑓂𑒟𑒰𑒣𑒢 𑒥𑒪𑒰। 𑒮𑒼𑒗 𑒥𑒪𑒰 𑒮𑒧𑒨 𑒁𑒕𑒱, 𑒮𑒢𑓂 𑓓𑓑𑓐𑓐 𑒧𑒰𑒮...”।
𑒍 𑒥𑒖𑒱𑒞𑒹 𑒩𑒯𑒱 𑒑𑒹𑒪 𑒕𑒪 𑒧𑒳𑒠𑒰 𑒡𑒾𑒧𑓂𑒨 𑒮𑒼𑒔𑒱 𑒩𑒯𑒪 𑒕𑒪𑒰𑒯 𑒖𑒹 𑒮𑓂𑒟𑒰𑒢-𑒮𑒧𑒨 𑒫𑒱𑒮𑓂𑒟𑒰𑒣𑒢𑒏 𑒣𑒯𑒩𑒩𑒰𑒞𑒱𑒧𑒹 𑒯𑒖𑒰𑒩 𑒮𑒰𑒪 𑒫𑓂𑒨𑒞𑒲𑒞 𑒦𑒋 𑒑𑒹𑒪। 𑒏𑒏𑒩𑒰 𑒥𑒞𑒍𑒞𑒰𑒯 𑒍 𑒁𑒣𑒢 𑒞𑒰𑒏𑒪 𑒩𑒯𑒮𑓂𑒨। 𑒂𑒏𑒱 𑒋𑒞𑒳𑒏𑓂𑒏𑒰 𑒪𑒼𑒏 𑒍 𑒩𑒯𑒮𑓂𑒨 𑒞𑒰𑒏𑒱 𑒏𑒋 𑒢𑒱𑒬𑓂𑒔𑒱𑒢𑓂𑒞 𑒞𑒿 𑒢𑒯𑒱 𑒦𑒋 𑒑𑒹𑒪 𑒁𑒕𑒱?
𑒥𑒻𑒮𑒰𑒐𑒲𑒣𑒩 𑒖𑒱𑒢𑒑𑒲
“𑒑𑒩𑒧𑒲 𑒞𑒰𑒞𑒱𑒪𑒏 𑒕𑒳𑒙𑓂𑒙𑒲𑒏 𑒥𑒰𑒠 𑒏𑒰𑒪𑒹𑒖 𑒏𑒯𑒱𑒨𑒰 𑒐𑒳𑒖𑒞𑒻𑒏”। 𑒋𑒏𑒙𑒰 𑒫𑒱𑒠𑓂𑒨𑒰𑒩𑓂𑒟𑒲 𑒏𑒰𑒪𑒹𑒖𑒏 𑒋𑒏𑒙𑒰 𑒏𑒩𑓂𑒧𑒔𑒰𑒩𑒲𑒏𑒹𑒿 𑒣𑒳𑒕𑒢𑒹 𑒕𑒪𑒰𑒯।
“𑒯𑒧𑒩𑒰 𑒏𑒣𑒰𑒩 𑒣𑒩 𑒪𑒱𑒐𑒪 𑒕𑒻𑒏 𑒂𑒏𑒱 𑒢𑒼𑒙𑒱𑒮 𑒥𑒼𑒩𑓂𑒛 𑒣𑒩 𑒖𑒰 𑒏𑒋 𑒠𑒹𑒐𑒥𑒻𑒏”। 𑒍𑒪 𑒮𑒢𑒏 𑒥𑒼𑒪 𑒥𑒰𑒖𑒪 𑒍 𑒏𑒩𑓂𑒧𑒔𑒰𑒩𑒲 𑒖𑒏𑒩 𑒢𑒰𑒧 𑒑𑒳𑒝𑒠𑒹𑒫 𑒕𑒪।
“𑒍𑒯𑒼 𑒑𑒳𑒝𑒠𑒹𑒥𑒰 𑒦𑒨𑒓𑓂𑒏𑒩𑒹 𑒕𑒪। 𑒋𑒛𑒧𑒱𑒬𑒢 𑒏𑓂𑒪𑒩𑓂𑒏 𑒕𑒪, 𑒞𑒰𑒯𑒱 𑒠𑓂𑒫𑒰𑒩𑒹 𑒔𑒪𑒞𑒲𑒧𑒹 𑒕𑒪”।
“𑒢𑒘𑒱 𑒨𑒾। 𑒔𑒣𑒩𑒰𑒮𑒲 𑒕𑒪। 𑒋𑒛𑒧𑒱𑒬𑒢 𑒏𑓂𑒪𑒩𑓂𑒏 𑒞𑒿 𑒧𑒳𑒿𑒯𑒠𑒳𑒥𑓂𑒥𑒩 𑒩𑒯𑒋 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒮𑒦 𑒍𑒏𑒩𑒹 𑒋𑒛𑒧𑒱𑒬𑒢 𑒏𑓂𑒪𑒩𑓂𑒏 𑒥𑒳𑒗𑒻𑒞 𑒕𑒪𑒰𑒯”।
𑒩𑒞𑒲𑒬 𑒂 𑒤𑒴𑒪𑒏 𑒥𑒲𑒔𑒧𑒹 𑒄 𑒫𑒰𑒩𑓂𑒞𑓂𑒞𑒰𑒪𑒰𑒣 𑒔𑒪𑒱 𑒩𑒯𑒪 𑒕𑒪। 𑒥𑒯𑒳𑒞 𑒠𑒱𑒢𑒏𑒰 𑒥𑒰𑒠 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒋𑒏 𑒠𑒼𑒮𑒩𑒰𑒮𑒿 𑒦𑒹𑒿𑒙 𑒦𑒹𑒪 𑒕𑒪𑒢𑓂𑒯𑒱। 𑒮𑓂𑒏𑒴𑒪 𑒂 𑒏𑒰𑒪𑒹𑒖𑒧𑒹 𑒮𑓀𑒑𑒹-𑒮𑓀𑒑 𑒠𑒳𑒢𑒴 𑒑𑒼𑒙𑒹 𑒣𑒜𑓃𑒢𑒹 𑒕𑒪𑒰𑒯। 𑒧𑒳𑒠𑒰 𑒞𑒏𑒩𑒰 𑒥𑒰𑒠 𑒮𑒰𑒪𑒏 𑒮𑒰𑒪 𑒥𑒲𑒞𑒱 𑒑𑒹𑒪 𑒕𑒪, 𑒂 𑒂𑒃 𑒋𑒯𑒱 𑒏𑒰𑒪𑒹𑒖𑒧𑒹 𑒁𑒣𑒢-𑒁𑒣𑒢 𑒥𑒹𑒙𑒰𑒏𑒹𑒿 𑒁𑒦𑒱𑒨𑒰𑒢𑓂𑒞𑓂𑒩𑒱𑒏𑒲𑒏 𑒣𑓂𑒩𑒫𑒹𑒬 𑒣𑒩𑒲𑒏𑓂𑒭𑒰 𑒠𑒱𑒁𑒋𑒥𑒰𑒏 𑒪𑒹𑒪 𑒠𑒳𑒢𑒴 𑒑𑒼𑒙𑒹 𑒂𑒋𑒪 𑒕𑒪𑒰𑒯 𑒂𑒏𑒱 𑒁𑒢𑒰𑒨𑒰𑒮𑒯𑒱 𑒋𑒏-𑒠𑒼𑒮𑒩𑒰𑒮𑒿 𑒦𑒹𑒿𑒙 𑒦𑒋 𑒑𑒹𑒪𑒢𑓂𑒯𑒱। 𑒠𑒳𑒢𑒴 𑒑𑒼𑒙𑒹𑒏 𑒥𑒰𑒪𑒏 𑒣𑒩𑒲𑒏𑓂𑒭𑒰 𑒯𑒰𑒪𑒧𑒹 𑒩𑒯𑒟𑒱 𑒮𑒹 𑒠𑒳𑒢𑒴 𑒑𑒼𑒙𑒹𑒏 𑒪𑒑 𑒑𑒣 𑒏𑒩𑒥𑒰𑒏 𑒪𑒹𑒪 𑒞𑒲𑒢 𑒒𑒝𑓂𑒙𑒰𑒏 𑒮𑒧𑒨 𑒕𑒪𑒢𑓂𑒯𑒱।
𑒏𑒩𑒔𑒲 𑒏𑒪𑒧𑒮𑒿 𑒪𑒱𑒐𑒢𑒰 𑒪𑒱𑒐𑒻𑒞-𑒪𑒱𑒐𑒻𑒞 𑒩𑒞𑒲𑒬 𑒂 𑒤𑒴𑒪 𑒠𑒳𑒢𑒴 𑒑𑒼𑒙𑒹𑒏 𑒁𑒏𑓂𑒭𑒩 𑒮𑒳𑒢𑓂𑒠𑒩 𑒦𑒋 𑒑𑒹𑒪 𑒕𑒪𑒢𑓂𑒯𑒱। 𑒩𑒼𑒬𑒢𑒰𑒃𑒏 𑒑𑒼𑒙𑒲𑒏𑒹𑒿 𑒑𑒩𑒧 𑒣𑒰𑒢𑒱𑒧𑒹 𑒠𑒋 𑒂 𑒞𑒐𑒢 𑒠𑒫𑒰𑒞𑒧𑒹 𑒠𑒋 𑒍𑒯𑒱𑒧𑒹 𑒏𑒩𑒔𑒲 𑒏𑒪𑒧 𑒛𑒳𑒥𑒰 𑒏𑒋 𑒪𑒱𑒐𑒢𑒰 𑒪𑒱𑒐𑒻𑒞 𑒕𑒪𑒰𑒯 𑒠𑒳𑒢𑒴 𑒑𑒼𑒙𑒹। 𑒁𑒣𑒢-𑒁𑒣𑒢 𑒑𑒰𑒧𑒮𑒿 𑒯𑒰𑒃 𑒮𑓂𑒏𑒴𑒪 𑒣𑒯𑒳𑒿𑒔𑒻𑒞 𑒖𑒰𑒃 𑒕𑒪𑒰𑒯 । 𑒫𑒱𑒖𑓂𑒘𑒰𑒢𑒏 𑒣𑓂𑒩𑒰𑒨𑒼𑒑𑒱𑒏 𑒏𑒏𑓂𑒭𑒰𑒏 𑒏𑒰𑒣𑒲 𑒍𑒢𑒰 𑒞𑒿 𑒩𑒞𑒲𑒬𑒏 𑒮𑒹𑒯𑒼 𑒮𑒰𑒤 𑒂 𑒮𑓂𑒣𑒭𑓂𑒙 𑒯𑒼𑒃𑒞 𑒕𑒪𑒢𑓂𑒯𑒱 𑒧𑒳𑒠𑒰 𑒤𑒴𑒪𑒏 𑒁𑒏𑓂𑒭𑒩 𑒤𑒴𑒪 𑒮𑒢 𑒮𑒳𑒢𑓂𑒠𑒩 𑒯𑒼𑒃𑒞 𑒕𑒪𑒢𑓂𑒯𑒱। 𑒧𑒻𑒙𑓂𑒩𑒱𑒏𑒧𑒹 𑒩𑒞𑒲𑒬𑒏𑒹𑒿 𑒣𑓂𑒩𑒟𑒧 𑒬𑓂𑒩𑒹𑒝𑒲 𑒂𑒋𑒪 𑒕𑒪𑒢𑓂𑒯𑒱 𑒧𑒳𑒠𑒰 𑒤𑒴𑒪𑒏𑒹𑒿 𑒠𑓂𑒫𑒱𑒞𑒲𑒨 𑒬𑓂𑒩𑒹𑒝𑒲 𑒁𑒋𑒪𑒢𑓂𑒯𑒱। 𑒂𑒃.𑒋𑒮.𑒮𑒲. 𑒏𑒹𑒩 𑒥𑒰𑒠 𑒩𑒞𑒲𑒬 𑒞𑒿 𑒃𑓀𑒖𑒲𑒢𑒱𑒨𑒩𑒱𑒓𑒧𑒹 𑒢𑒰𑒧 𑒪𑒱𑒐𑒰 𑒪𑒹𑒪𑒢𑓂𑒯𑒱 𑒧𑒳𑒠𑒰 𑒩𑒞𑒲𑒬 𑒣𑒼𑒮𑓂𑒙𑒂𑒤𑒱𑒮𑒧𑒹 𑒏𑒱𑒩𑒰𑒢𑒲𑒏 𑒢𑒼𑒏𑒩𑒲 𑒣𑒏𑒛𑓃𑒱 𑒪𑒹𑒢𑒹 𑒕𑒪𑒰𑒯। 𑒂 𑒞𑒏𑒩 𑒥𑒰𑒠 𑓑𑓘 𑒮𑒰𑒪 𑒡𑒩𑒱 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒋𑒏 𑒠𑒼𑒮𑒩𑒰𑒮𑒿 𑒦𑒹𑒿𑒙 𑒢𑒯𑒱 𑒦𑒹𑒪 𑒕𑒪𑒢𑓂𑒯𑒱। 𑒢𑒼𑒏𑒩𑒲 𑒪𑒑𑒪𑒰𑒏 𑒥𑒰𑒠 𑒤𑒴𑒪𑒏 𑒫𑒱𑒫𑒰𑒯 𑒦𑒋 𑒑𑒹𑒪𑒢𑓂𑒯𑒱।
“𑒫𑒱𑒫𑒰𑒯𑒏 𑒥𑒰𑒠 𑒏𑒲 𑒦𑒹𑒪। 𑒯𑒧 𑒞𑒿 𑒫𑒱𑒫𑒰𑒯𑒼𑒧𑒹 𑒢𑒯𑒱 𑒖𑒰 𑒮𑒏𑒪 𑒕𑒪𑒯𑒳𑒿। 𑒣𑒯𑒱𑒢𑒹 𑒍𑒞𑒹𑒏 𑒤𑒼𑒢-𑒤𑒰𑒢𑒏 𑒮𑒹𑒯𑒼 𑒣𑓂𑒩𑒔𑒪𑒢 𑒢𑒯𑒱 𑒕𑒪। 𑒞𑒰𑒯𑒱 𑒠𑓂𑒫𑒰𑒩𑒹 𑒮𑒧𑓂𑒣𑒩𑓂𑒏 𑒮𑒹𑒯𑒼 𑒢𑒯𑒱 𑒩𑒯𑒪”।
“𑒢𑒼𑒏𑒩𑒲𑒏 𑒥𑒰𑒠 𑒕𑒼𑒙 𑒦𑒰𑒋 𑒂 𑒏𑒢𑒱𑒨𑒰𑒿𑒏𑒹𑒿 𑒪𑒋 𑒢𑒼𑒏𑒩𑒲 𑒣𑒩 𑒏𑒼𑒯𑒱𑒧𑒰 𑒔𑒪 𑒑𑒹𑒪𑒯𑒳𑒿। 𑒕𑒼𑒙 𑒦𑒰𑒋 𑒋𑒏𑒙𑒰 𑒯𑒰𑒟𑒮𑒿 𑒪𑒳𑒪𑓂𑒯 𑒩𑒯𑒟𑒱। 𑒠𑒼𑒮𑒩 𑒯𑒰𑒟𑒹 𑒣𑓂𑒩𑒨𑒰𑒮𑒮𑒿 𑒪𑒱𑒐𑒻𑒞 𑒕𑒪𑒰𑒯। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒫𑒱𑒏𑒪𑒰𑓀𑒑𑒏 𑒪𑒹𑒪 𑒂𑒩𑒏𑓂𑒭𑒝𑒏 𑒁𑓀𑒞𑒩𑓂𑒑𑒞 𑒯𑒳𑒢𑒏𑒰 𑒮𑒹𑒯𑒼 𑒏𑒱𑒩𑒰𑒢𑒲𑒧𑒹 𑒏𑒹𑒢𑓂𑒠𑓂𑒩 𑒮𑒩𑒏𑒰𑒩𑒏 𑒁𑓀𑒞𑒩𑓂𑒑𑒞 𑒢𑒼𑒏𑒩𑒲 𑒪𑒰𑒑𑒱 𑒑𑒹𑒪𑒢𑓂𑒯𑒱 𑒂 𑒍 𑒣𑒙𑒢𑒰 𑒔𑒪𑒱 𑒑𑒹𑒪𑒰𑒯। 𑒯𑒧𑒩 𑒧𑒰𑒋𑒏𑒹𑒿 𑒯𑒳𑒢𑒏𑒩 𑒫𑒱𑒫𑒰𑒯𑒏 𑒥𑒛𑓃 𑒮𑒾𑒐 𑒕𑒪𑒢𑓂𑒯𑒱। 𑒧𑒳𑒠𑒰 𑒒𑒙𑒏𑒼 𑒂𑒥𑒋 𑒞𑒐𑒢 𑒢𑒹 ? 𑒮𑒹 𑒏𑒞𑒹𑒏 𑒠𑒱𑒢𑒳𑒏𑒰 𑒥𑒰𑒠 𑒖𑒐𑒢 𑒧𑒰𑒋 𑒯𑒧𑒩𑒰 𑒍𑒯𑒱𑒚𑒰𑒧 𑒂𑒋𑒪 𑒕𑒪𑒲𑒯 𑒞𑒿 𑒋𑒏 𑒑𑒼𑒙 𑒧𑒻𑒟𑒱𑒪 𑒣𑒩𑒱𑒫𑒰𑒩 𑒯𑒧𑒩𑒰 𑒍𑒯𑒱𑒚𑒰𑒧 𑒒𑒳𑒧𑒋 𑒪𑒹𑒪 𑒂𑒋𑒪 𑒩𑒯𑒟𑒱। 𑒯𑒧𑒩 𑒧𑒰𑒋𑒏 𑒫𑒨𑒮𑒏 𑒋𑒏 𑒑𑒼𑒙 𑒧𑒯𑒱𑒪𑒰 𑒕𑒪𑒲𑒯 𑒖𑒹 𑒁𑒣𑒢 𑒣𑒳𑒞𑒼𑒯𑒳𑒏 𑒮𑓀𑒑 𑒂𑒋𑒪 𑒕𑒪𑒲𑒯। 𑒑𑒣𑒹-𑒬𑒣𑒧𑒹 𑒯𑒳𑒢𑒏𑒰 𑒣𑒞𑒰 𑒔𑒪𑒱 𑒑𑒹𑒪𑒢𑓂𑒯𑒱 𑒖𑒹 𑒋𑒯𑒱 𑒒𑒩𑒧𑒹 𑒋𑒏𑒙𑒰 𑒫𑒱𑒏𑒪𑒰𑓀𑒑 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒥𑒪𑒰 𑒫𑒱𑒫𑒰𑒯𑒨𑒼𑒑𑓂𑒨 𑒥𑒰𑒪𑒏 𑒕𑒻𑒏। 𑒮𑒹 𑒍 𑒯𑒚𑒰𑒞𑓂 𑒁𑒣𑒢 𑒣𑒳𑒞𑓂𑒩𑒲𑒏 𑒫𑒱𑒫𑒰𑒯𑒏 𑒣𑓂𑒩𑒮𑓂𑒞𑒰𑒫 𑒮𑒼𑒗𑒰𑒿 𑒂𑒢𑒱 𑒩𑒐𑒪𑒢𑓂𑒯𑒱।
-𑒯𑒧𑒩 𑒧𑒰𑒨 𑒥𑒖𑒪𑒲𑒯, “𑒥𑒯𑒱𑒢𑒠𑒰𑒃। 𑒁𑒕𑒱 𑒞𑒿 𑒯𑒧𑒩 𑒥𑒹𑒙𑒰 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒏𑒩𑒻𑒞 𑒧𑒳𑒠𑒰 𑒄 𑒣𑒯𑒱𑒢𑒯𑒱𑒨𑒹 𑒏𑒯𑒱 𑒠𑒹𑒢𑒰𑒃 𑒚𑒲𑒏 𑒥𑒳𑒗𑒻𑒞 𑒕𑒲 𑒖𑒹 𑒥𑒰𑒠𑒧𑒹 𑒁𑒯𑒰𑒿 𑒮𑒹 𑒢𑒯𑒱 𑒏𑒯𑒲। 𑒬𑒲𑒪-𑒮𑓂𑒫𑒦𑒰𑒫 𑒮𑒦𑒧𑒹 𑒏𑒼𑒢𑒼 𑒏𑒧𑒲 𑒢𑒯𑒱 𑒕𑒻𑒏 𑒧𑒳𑒠𑒰 𑒢𑒯𑒱 𑒖𑒰𑒢𑒱 𑒏𑒱𑒋𑒏 𑒦𑒑𑒫𑒰𑒢 𑒋𑒏 𑒯𑒰𑒟𑒮𑒿 𑒪𑒳𑒪𑓂𑒯 𑒏𑒋 𑒠𑒹𑒪𑒐𑒱𑒢𑓂𑒯। 𑒑𑒰𑒧𑒧𑒹 𑒪𑒼𑒏 𑒮𑒦 𑒪𑒳𑒪𑓂𑒯𑒰-𑒪𑒳𑒪𑓂𑒯𑒰 𑒏𑒯𑒱 𑒏𑒋 𑒮𑒼𑒩 𑒏𑒩𑒻𑒞 𑒕𑒻𑒏। 𑒬𑒳𑒩𑒴𑒧𑒹 𑒞𑒿 𑒯𑒧𑒩𑒰 𑒥𑒩𑒠𑒰𑒮𑓂𑒞 𑒢𑒯𑒱 𑒯𑒼𑒃𑒞 𑒕𑒪, 𑒋𑒯𑒱 𑒑𑒣 𑒣𑒩 𑒗𑒑𑒛𑓃𑒰 𑒦𑒋 𑒖𑒰𑒃𑒞 𑒕𑒪। 𑒧𑒳𑒠𑒰 𑒥𑒰𑒠𑒧𑒹 𑒯𑒧𑒯𑒴 𑒄 𑒮𑒼𑒔𑒱 𑒡𑒻𑒩𑓂𑒨 𑒡𑒋 𑒪𑒹𑒪𑒯𑒳𑒿 𑒖𑒹 𑒖𑒐𑒢 𑒦𑒑𑒫𑒰𑒢𑒹 𑒢𑒖𑒩𑒱 𑒒𑒳𑒧𑒰 𑒪𑒹𑒪𑒢𑓂𑒯𑒱 𑒞𑒿 𑒏𑒏𑒩𑒰 𑒏𑒲 𑒏𑒯𑒥𑒻𑒏”।
“𑒮𑒹 𑒞𑒿 𑒯𑒧𑒩𑒰 𑒑𑒣-𑒬𑒣𑒧𑒹 𑒥𑒳𑒗𑒥𑒰𑒧𑒹 𑒂𑒥𑒱 𑒑𑒹𑒪 𑒕𑒪। 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒄 𑒏𑒟𑒰 𑒏𑒩𑒥𑒰𑒏 𑒮𑒰𑒯𑒮𑒼 𑒦𑒹𑒪। 𑒁𑒯𑒰𑒿 𑒮𑒿 𑒏𑒲 𑒏𑒯𑒴। 𑒯𑒧𑒩 𑒥𑒹𑒙𑒲 𑒣𑒹𑒠𑒰𑒩 𑒁𑒕𑒱। 𑒣𑒻𑒩 𑒕𑒼𑒙-𑒣𑒻𑒒 𑒕𑒻𑒏। 𑒮𑒹 𑒮𑒾𑒿𑒮𑒹 𑒞𑒹𑒯𑒪𑓂𑒪𑒰𑒏𑒹𑒿 𑒥𑒳𑒗𑒪 𑒕𑒻𑒏। 𑒃𑒪𑒰𑒏𑒰𑒧𑒹 𑒏𑒏𑒩𑒼 𑒪𑒑 𑒏𑒟𑒰𑒏 𑒪𑒹𑒪 𑒖𑒰𑒋𑒥 𑒮𑒹𑒯𑒼 𑒯𑒱𑒨𑒰𑒅 𑒢𑒯𑒱 𑒯𑒼𑒃𑒞 𑒁𑒕𑒱। 𑒦𑒑𑒫𑒰𑒢 𑒕𑒟𑒱𑒢𑓂𑒯, 𑒢𑒘𑒱 𑒢𑒻𑒯𑒩𑒹 𑒂 𑒢𑒯𑒱𑒨𑒹 𑒮𑒰𑒮𑒳𑒩𑒧𑒹 𑒏𑓂𑒨𑒼 𑒣𑒹𑒠𑒰𑒩 𑒦𑒹𑒪 𑒕𑒪। 𑒦𑒑𑒫𑒰𑒢 𑒦𑒪 𑒏𑒩𑒟𑒱𑒢𑓂𑒯, 𑒠𑒹𑒐𑒥𑒻𑒏 𑒯𑒧𑒩 𑒥𑒳𑒔𑒱𑒨𑒰𑒏 𑒥𑒔𑓂𑒔𑒰-𑒮𑒦 𑒮𑒩𑓂𑒫𑒑𑒳𑒝 𑒮𑒧𑓂𑒣𑒢𑓂𑒢 𑒯𑒼𑒋𑒞”।
-𑒄 𑒑𑒣 𑒮𑒳𑒢𑒱𑒞𑒹 𑒯𑒧𑒩 𑒧𑒰𑒋 𑒞𑒿 𑒮𑒢𑓂𑒢 𑒠𑒋 𑒩𑒯𑒱 𑒑𑒹𑒪𑒲𑒯। 𑒏𑒢𑒹𑒏 𑒏𑒰𑒪 𑒡𑒩𑒱 𑒑𑒳𑒧-𑒮𑒳𑒧 𑒩𑒯𑒪𑒰𑒏 𑒥𑒰𑒠 𑒏𑒯𑒪𑒢𑓂𑒯𑒱 𑒖𑒹 𑒮𑒼𑒔𑒱 𑒏𑒋 𑒐𑒥𑒩𑒱 𑒣𑒚𑒰𑒋𑒥। 𑒒𑒩𑒧𑒹 𑒏𑒱𑒕𑒳 𑒠𑒱𑒢 𑒡𑒩𑒱 𑒋𑒯𑒱 𑒑𑒣 𑒣𑒩 𑒔𑒩𑒔𑒰 𑒦𑒹𑒪 𑒂 𑒂𑒑𑒰𑒿 𑒖𑒰 𑒏𑒋 𑒧𑒰𑒋𑒏 𑒫𑒱𑒔𑒰𑒩 𑒦𑒹𑒪𑒢𑓂𑒯𑒱 𑒖𑒹 𑒫𑒱𑒫𑒰𑒯 𑒦𑒋 𑒖𑒋𑒥𑒰𑒏 𑒔𑒰𑒯𑒲।
-𑒫𑒱𑒫𑒰𑒯𑒏 𑒅𑒣𑒩𑒰𑒢𑓂𑒞 𑒏𑒞𑒰𑒏 𑒥𑒹𑒩 𑒥𑒔𑓂𑒔𑒰 𑒐𑒩𑒰𑒣 𑒦𑒋 𑒖𑒰𑒃𑒞 𑒕𑒪। 𑒞𑒲𑒢 𑒔𑒰𑒩𑒱 𑒥𑒹𑒩 𑒋𑒯𑒱𑒢𑒰 𑒦𑒹𑒪। 𑒯𑒧𑒩 𑒦𑒰𑒋 𑒞𑒿 𑒧𑒼𑒢𑒏𑒹𑒿 𑒥𑒳𑒗𑒰 𑒪𑒹𑒪𑒢𑓂𑒯𑒱 𑒧𑒳𑒠𑒰 𑒦𑒰𑒥𑒯𑒳 𑒫𑒱𑒏𑓂𑒭𑒱𑒣𑓂𑒞 𑒖𑒹𑒏𑒰𑒿 𑒦𑒋 𑒑𑒹𑒪𑒲𑒯। 𑒩𑒰𑒞𑒱-𑒠𑒱𑒢 𑒒𑒩𑒧𑒹 𑒅𑒚𑒰-𑒣𑒙𑒏𑒏 𑒁𑒥𑒰𑒖 𑒣𑒛𑓃𑒼𑒮𑒲 𑒮𑒦 𑒮𑒳𑒢𑒻𑒞 𑒕𑒪। 𑒧𑒳𑒠𑒰 𑒂𑒮𑓂𑒞𑒹-𑒂𑒮𑓂𑒞𑒹 𑒍𑒯𑒼 𑒧𑒼𑒢𑒏𑒹𑒿 𑒥𑒯𑒙𑒰𑒩𑒱 𑒪𑒹𑒪𑒢𑓂𑒯𑒱। 𑒧𑒳𑒠𑒰 𑒠𑒮 𑒥𑒩𑒐𑒏 𑒥𑒰𑒠 𑒦𑒑𑒫𑒰𑒢𑒏 𑒏𑒵𑒣𑒰 𑒖𑒹 𑒋𑒏𑒙𑒰 𑒥𑒔𑓂𑒔𑒰 𑒦𑒹𑒪𑒢𑓂𑒯𑒱, 𑒮𑒦 𑒁𑓀𑒑 𑒠𑒳𑒩𑒳𑒮𑓂𑒞। 𑒧𑒳𑒠𑒰 𑒋𑒏 𑒠𑒱𑒢 𑒥𑒔𑓂𑒔𑒰𑒏𑒹𑒿 𑒞𑒹𑒪-𑒏𑒴𑒛𑓃 𑒪𑒑𑒰 𑒏𑒋 𑒥𑒰𑒯𑒩 𑒯𑒥𑒰𑒧𑒹 𑒠𑒹𑒪𑒐𑒱𑒢𑓂𑒯 𑒦𑒰𑒥𑒯𑒳। 𑒦𑒰𑒋 𑒏𑒯𑒥𑒼 𑒏𑒋𑒪𑒢𑓂𑒯𑒱 𑒖𑒹 𑒥𑒔𑓂𑒔𑒰𑒏𑒹𑒿 𑒦𑒲𑒞𑒩 𑒏𑒋 𑒪𑒱𑒁 𑒧𑒳𑒠𑒰 𑒯𑒼𑒢𑒲 𑒖𑒹 𑒏𑒯𑒻𑒞 𑒕𑒻𑒏। 𑒮𑒰𑒿𑒗𑒮𑒿 𑒥𑒔𑓂𑒔𑒰𑒏𑒹𑒿 𑒯𑒳𑒏𑒯𑒳𑒏𑓂𑒏𑒲 𑒪𑒰𑒑𑒱 𑒑𑒹𑒪𑒻𑒏। 𑒁𑒑𑒱𑒪𑒰 𑒠𑒱𑒢 𑒦𑒼𑒩 𑒡𑒩𑒱 𑒍 𑒋𑒯𑒱 𑒖𑒑𑒏𑒹𑒿 𑒕𑒼𑒛𑓃𑒱 𑒔𑒪𑒱 𑒑𑒹𑒪। 𑒯𑒧𑒩𑒼 𑒣𑒠𑒮𑓂𑒟𑒰𑒣𑒢 𑒞𑒰𑒡𑒩𑒱 𑒣𑒙𑒢𑒹 𑒦𑒋 𑒑𑒹𑒪 𑒕𑒪 𑒂 𑒮𑒦 𑒑𑒼𑒙𑒹 𑒮𑓀𑒑𑒹 𑒩𑒯𑒻𑒞 𑒕𑒪𑒯𑒳𑒿।
-𑒧𑒳𑒠𑒰 𑒦𑒑𑒫𑒰𑒢𑒼𑒏 𑒪𑒲𑒪𑒰। 𑒖𑒐𑒢 𑒮𑒦 𑒂𑒮 𑒕𑒼𑒛𑓃𑒱 𑒠𑒹𑒢𑒹 𑒕𑒪, 𑒞𑒐𑒢 𑒤𑒹𑒩 𑒋𑒏𑒙𑒰 𑒥𑒰𑒪𑒏 𑒦𑒹𑒪𑒢𑓂𑒯𑒱 𑒕𑒼𑒙 𑒦𑒰𑒿𑒨𑒏𑒹𑒿। 𑒋𑒯𑒱 𑒥𑒹𑒩 𑒯𑒳𑒢𑒏𑒩 𑒮𑒰𑒮𑒳 𑒮𑒹𑒯𑒼 𑒥𑒔𑓂𑒔𑒰𑒏 𑒙𑒯𑒪-𑒙𑒱𑒏𑒼𑒩 𑒏𑒩𑒥𑒰𑒏 𑒪𑒹𑒪 𑒂𑒥𑒱 𑒑𑒹𑒪𑒐𑒱𑒢𑓂𑒯। 𑒂𑒥 𑒞𑒿 𑒥𑒹𑒬 𑒙𑒪𑓂𑒯𑒑𑒩 𑒦𑒋 𑒑𑒹𑒪 𑒁𑒕𑒱, 𑒯𑒵𑒭𑓂𑒙-𑒣𑒳𑒭𑓂𑒙 𑒏𑒼𑒢𑒼 𑒣𑒻𑒁 𑒢𑒯𑒱 𑒕𑒻𑒏”। 𑒤𑒴𑒪 𑒥𑒖𑒱𑒞𑒹 𑒩𑒯𑒪𑒰𑒯।
𑒩𑒞𑒲𑒬 𑒏𑒯𑒪𑒢𑓂𑒯𑒱-“𑒁𑒯𑒰𑒿 𑒋𑒞𑒹𑒏 𑒣𑒩𑒹𑒬𑒰𑒢𑒲𑒧𑒹 𑒩𑒯𑒪𑒯𑒳𑒿 𑒋𑒞𑒹𑒏 𑒠𑒱𑒢 𑒡𑒩𑒱। 𑒧𑒳𑒠𑒰 𑒁𑒯𑒰𑒿𑒏𑒹𑒿 𑒏𑒻𑒏𑒙𑒰 𑒥𑒔𑓂𑒔𑒰 𑒁𑒕𑒱, 𑒏𑒲 𑒏𑒩𑒋 𑒖𑒰𑒃𑒞 𑒕𑒟𑒱 𑒮𑒹 𑒢𑒯𑒱 𑒏𑒯𑒪𑒯𑒳𑒿”।
“𑒋𑒏𑒹𑒙𑒰 𑒕𑒟𑒱 𑒮𑒹 𑒣𑒩𑒲𑒏𑓂𑒭𑒰 𑒯𑒰𑒪𑒧𑒹 𑒕𑒟𑒱, 𑒏𑒢𑒹𑒏 𑒏𑒰𑒪𑒧𑒹 𑒠𑒹𑒐𑒱𑒋 𑒪𑒹𑒥𑒢𑓂𑒯𑒱। 𑒧𑒳𑒠𑒰 𑒁𑒯𑒰𑒿 𑒁𑒣𑒢 𑒥𑒔𑓂𑒔𑒰𑒏𑒹𑒿 𑒣𑒩𑒲𑒏𑓂𑒭𑒰 𑒠𑒱𑒂𑒥𑒋 𑒏𑒱𑒋𑒏 𑒂𑒨𑒪 𑒕𑒲। 𑒂𑒃.𑒋𑒮.𑒮𑒲. 𑒣𑒰𑒮 𑒏𑒋𑒢𑒹 𑒕𑒟𑒱, 𑒥𑒹𑒬 𑒔𑒹𑒞𑒢𑒑𑒩 𑒦𑒋 𑒑𑒹𑒪 𑒯𑒼𑒋𑒞𑒰𑒯”। 𑒤𑒴𑒪 𑒦𑒰𑒋 𑒏𑒯𑒪𑒢𑓂𑒯𑒱।
“𑒧𑒳𑒠𑒰 𑒁𑒯𑒴𑒿 𑒞𑒿 𑒂𑒋𑒪 𑒕𑒲...”।
𑒩𑒞𑒲𑒬 𑒥𑒖𑒻𑒞 𑒔𑒳𑒣 𑒦𑒋 𑒑𑒹𑒪𑒰𑒯। 𑒏𑒰𑒩𑒝 𑒋𑒏 𑒑𑒼𑒙 𑒥𑒰𑒪𑒏 𑒫𑒻𑒬𑒰𑒐𑒲 𑒣𑒩 𑒔𑒪𑒱 𑒤𑒴𑒪𑒏 𑒪𑒑 𑒂𑒥𑒱 𑒚𑒰𑒜𑓃 𑒦𑒋 𑒑𑒹𑒪 𑒕𑒪। 𑒣𑒩𑒲𑒏𑓂𑒭𑒰 𑒐𑒞𑒧 𑒦𑒋 𑒑𑒹𑒪 𑒕𑒪 𑒂 𑒩𑒞𑒲𑒬𑒏𑒹𑒿 𑒄 𑒥𑒳𑒗𑒥𑒰𑒧𑒹 𑒥𑒰𑒓𑒚 𑒢𑒯𑒱 𑒩𑒯𑒪𑒢𑓂𑒯𑒱 𑒖𑒹 𑒄 𑒥𑒰𑒪𑒏 𑒤𑒴𑒪𑒏 𑒕𑒟𑒱𑒢𑓂𑒯। 𑒏𑒰𑒪𑒏 𑒫𑒱𑒔𑒱𑒞𑓂𑒩 𑒑𑒞𑒱, 𑒦𑒰𑒋-𑒦𑒰𑒥𑒯𑒳 𑒫𑒱𑒏𑒪𑒰𑓀𑒑 𑒕𑒢𑓂𑒯𑒱 𑒧𑒳𑒠𑒰 𑒞𑒞𑓂𑒞𑒰-𑒮𑒱𑒯𑒩 𑒠𑒹𑒐𑒹𑒪𑒰𑒏 𑒥𑒰𑒠𑒼 𑒦𑒑𑒫𑒰𑒢 𑒯𑒵𑒭𑓂𑒙-𑒣𑒳𑒭𑓂𑒙 𑒢𑒹𑒢𑒰 𑒠𑒹𑒪𑒐𑒱𑒢𑓂𑒯, 𑒂 𑒤𑒴𑒪 𑒮𑒢 𑒪𑒱𑒐𑒢𑒯𑒰𑒩 𑒤𑒴𑒪 𑒦𑒰𑒃𑒏 𑒪𑒹𑒪 𑒫𑒱𑒡𑒢𑒰𑒏 𑒏𑒪𑒧 𑒢𑒯𑒱 𑒔𑒪𑒪𑒢𑓂𑒯𑒱। 𑒧𑒳𑒠𑒰 𑒤𑒴𑒪 𑒦𑒰𑒋 𑒬𑒰𑓀𑒞, 𑒡𑒻𑒩𑓂𑒨 𑒡𑒋 𑒥𑒹𑒙𑒰𑒮𑒿 𑒣𑒩𑒲𑒏𑓂𑒭𑒰𑒏 𑒫𑒱𑒭𑒨𑒧𑒹 𑒣𑒴𑒕𑒱 𑒩𑒯𑒪 𑒕𑒪𑒰𑒯।
𑒮𑒩𑓂𑒫𑒬𑒱𑒏𑓂𑒭𑒰 𑒁𑒦𑒱𑒨𑒰𑒢
“𑒯𑒹 𑒯𑒧 𑒛𑒼𑒧𑒰𑒏𑒹𑒿 𑒣𑒜𑓃𑒰 𑒪𑒱𑒐𑒰 𑒏𑒋 𑒏𑒱𑒕𑒳 𑒥𑒢𑒥𑒋 𑒔𑒰𑒯𑒻𑒞 𑒕𑒲” । 𑒥𑒳𑒡𑒢 𑒣𑒰𑒮𑒫𑒰𑒢 𑒥𑒰𑒖𑒪 । 𑒔𑒝𑓂𑒛𑒲𑒑𑒜𑓃𑒧𑒹 𑒍 𑒩𑒱𑒏𑓂𑒬𑒰 𑒔𑒪𑒥𑒻𑒞 𑒕𑒟𑒱 । 𑒂𑒥 𑒑𑒰𑒧𑒧𑒹 𑒐𑒹𑒞𑒲 𑒥𑒰𑒩𑒲𑒧𑒹 𑒏𑒱𑒕𑒳 𑒢𑒯𑒱 𑒥𑒔𑒪𑒻𑒏 ।
𑒕𑒼𑒙𑒏𑒰 𑒦𑒰𑒋 𑒮𑒦 𑒖𑒢𑒧𑒱𑒞𑒹 𑒧𑒩𑒱 𑒖𑒰𑒃𑒞 𑒩𑒯𑒋।
𑒮𑒹 𑒥𑒳𑒡𑒢𑒏 𑒋𑒏𑒙𑒰 𑒕𑒼𑒙𑒏𑒰 𑒦𑒰𑒋𑒏𑒹𑒿 𑒧𑒰𑒋-𑒥𑒰𑒣 𑒖𑒢𑒧𑒪𑒰𑒏 𑒥𑒰𑒠 𑒛𑒼𑒧𑒏 𑒯𑒰𑒟𑒮𑒿 𑒥𑒹𑒔𑒪𑒢𑓂𑒯𑒱 𑒂 𑒤𑒹𑒩 𑒣𑒰𑒃 𑒠𑓄 𑒏𑒋 𑒏𑒱𑒢𑒪𑒢𑓂𑒯𑒱 । 𑒄 𑒮𑒦𑒙𑒰 𑒏𑒰𑒖 𑒍𑒢𑒰 𑒞𑒿 𑒮𑒰𑓀𑒏𑒹𑒞𑒱𑒏 𑒩𑒴𑒣𑒹𑒿 𑒦𑒹𑒪 𑒧𑒳𑒠𑒰 𑒋𑒯𑒱𑒮𑒿 𑒑𑓂𑒩𑒯 𑒏𑒙𑒱𑒞 𑒦𑓄 𑒑𑒹𑒪𑒻𑒏। 𑒂 𑒕𑒼𑒙𑒏𑒰 𑒦𑒰𑒋 𑒖𑒹 𑒥𑒳𑒡𑒢 𑒣𑒰𑒮𑒫𑒰𑒢𑒮𑒿 𑓑𑓒 𑒥𑒩𑒱𑒐 𑒕𑒼𑒙 𑒩𑒯𑒢𑓂𑒯𑒱 𑒥𑒔𑒱 𑒑𑒹𑒪𑒰𑒯 ।
𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒍𑒏𑒩𑒰 𑒮𑒦 𑒛𑒼𑒧𑒰 𑒏𑒯𑒱 𑒮𑒼𑒩 𑒏𑒩𑒋 𑒪𑒰𑒑𑒪 ।
𑒥𑒳𑒡𑒢 𑒁𑒣𑒢 𑒥𑒰𑒣-𑒧𑒰𑒋𑒏 𑒮𑓀𑒑 𑒯𑒩𑒫𑒰𑒯𑒲 𑒏𑒩𑒟𑒱 𑒧𑒳𑒠𑒰 𑒦𑒰𑒋𑒏𑒹𑒿 𑒣𑒜𑓃𑒹𑒥𑒰𑒏 𑒥𑒛𑓂𑒛 𑒪𑒰𑒪𑒮𑒰 𑒩𑒯𑒢𑓂𑒯𑒱 ।
“𑒮𑒳𑒢𑒻𑒞 𑒕𑒱𑒁𑒋 𑒖𑒹 𑒯𑒧𑒩𑒰 𑒮𑒦𑒧𑒹 𑒏𑒢𑒱𑒍 𑒣𑒜𑓃𑒱-𑒪𑒱𑒐𑒱 𑒪𑒹𑒪𑒰𑒮𑒿 𑒢𑒼𑒏𑒩𑒲 𑒦𑒹𑒙𑒱 𑒖𑒰𑒃𑒞 𑒕𑒻𑒏। 𑒋𑒏𑒩𑒰 𑒖𑒩𑒴𑒩 𑒣𑒜𑓃𑒰𑒋𑒥, 𑒔𑒰𑒯𑒹 𑒞𑒰𑒯𑒱 𑒪𑒹𑒪 𑒣𑒹𑒙 𑒏𑒰𑒙𑒋 𑒣𑒛𑓃𑒋 𑒂𑒏𑒱 𑒦𑒲𑒐 𑒧𑒰𑒿𑒑𑒨 𑒣𑒛𑓃𑒋”।
𑒦𑒲𑒐 𑒞𑒿 𑒢𑒯𑒱 𑒧𑒰𑒿𑒑𑒪𑒢𑓂𑒯𑒱 𑒧𑒳𑒠𑒰 𑒔𑒝𑓂𑒛𑒲𑒑𑒜𑓃𑒏 𑒩𑒮𑓂𑒞𑒰 𑒡𑒹𑒪𑒢𑓂𑒯𑒱 𑒥𑒳𑒡𑒢।
𑒦𑒩𑒱 𑒠𑒱𑒢 𑒩𑒱𑒏𑓂𑒮𑒰 𑒔𑒪𑒰𑒥𑒟𑒱 𑒂 𑒮𑒰𑒿𑒗𑒧𑒹 𑒖𑒐𑒢 𑒠𑒼𑒮𑒩 𑒮𑓀𑒑𑒲-𑒮𑒰𑒟𑒲 𑒮𑒦 𑒠𑒹𑒮𑒲 𑒚𑒹𑒏𑒰𑒧𑒹 𑒁𑒣𑒢 𑒚𑒹𑒯𑒲 𑒠𑒴𑒩 𑒏𑒩𑒥𑒰𑒏 𑒪𑒹𑒪 𑒖𑒰𑒟𑒱 𑒞𑒐𑒢 𑒠𑒮 𑒞𑒩𑒯𑒏 𑒑𑒣 𑒮𑒳𑒢𑒰 𑒏𑒋 𑒥𑒯𑒢𑓂𑒢𑒰 𑒥𑒢𑒰 𑒏𑒋 𑒥𑒳𑒡𑒢 𑒁𑒣𑒢 𑒒𑒩 𑒠𑒱𑒮 𑒒𑒳𑒧𑒱 𑒖𑒰𑒟𑒱।
“𑒏𑒲 𑒩𑒹 𑒧𑒲𑒞𑒰। 𑒥𑒰𑒧𑒰-𑒠𑒯𑒱𑒢𑒰 𑒏𑒩𑒻 𑒕𑒹𑒿, 𑒢𑒱𑒢𑓂𑒠 𑒢𑒯𑒱 𑒯𑒼𑒃 𑒕𑒾”।
“𑒢𑒘𑒱 𑒩𑒾 𑒦𑒰𑒃। 𑒦𑒩𑒱 𑒠𑒱𑒢 𑒞𑒿 𑒥𑒰𑒃 𑒧𑒹 𑒩𑒱𑒏𑓂𑒮𑒰 𑒒𑒱𑒔𑒻𑒞 𑒩𑒯𑒻𑒞 𑒕𑒲 𑒧𑒳𑒠𑒰 𑒮𑒰𑒿𑒗 𑒯𑒼𑒃𑒞𑒹 𑒁𑓀𑒑𑒏 𑒣𑒼𑒩-𑒣𑒼𑒩 𑒠𑒳𑒐𑒰𑒋 𑒪𑒑𑒻-𑒋”।
“𑒩𑒾 𑒦𑒰𑒃। 𑒏𑒯𑒻𑒞 𑒕𑒱𑒨𑒾𑒏 𑒖𑒹 𑒚𑒹𑒏𑒰𑒣𑒩 𑒔𑒪 𑒞𑒿 𑒠𑒮 𑒥𑒯𑒢𑓂𑒢𑒰 𑒥𑒢𑒰 𑒏𑒋 𑒒𑒳𑒩𑒱 𑒖𑒰𑒃 𑒕𑒱𑒯𑒲𑒿। 𑒠𑒹𑒐 𑒯𑒧𑒩𑒰 𑒂𑒅𑒩 𑒏𑒹𑒿, 𑒣𑒲𑒥𑒱 𑒏𑒋 𑒤𑒼𑒿𑒤 𑒏𑒙𑒻𑒞 𑒩𑒯𑒻𑒞 𑒕𑒲। 𑒋𑒏𑓂𑒏𑒹 𑒢𑒱𑒢𑓂𑒢𑒧𑒹 𑒦𑒼𑒩 𑒂 𑒮𑒦 𑒚𑒹𑒯𑒲 𑒐𑒞𑒧”।
𑒏𑒼𑒩𑒃𑒪𑒰𑒏 𑒮𑒦 𑒑𑒣 𑒮𑒳𑒢𑒱 𑒏𑓄 𑒑𑒳𑒧𑒏𑒲 𑒪𑒰𑒡𑒱 𑒠𑒻𑒞 𑒕𑒟𑒱 𑒥𑒳𑒡𑒢। 𑒧𑒼𑒢𑒧𑒹 𑒄𑒯𑒼 𑒯𑒼𑒃𑒞 𑒕𑒢𑓂𑒯𑒱 𑒖𑒹 𑒏𑒱𑓀𑒮𑒰𑒃𑒞 𑒛𑒼𑒧𑒰 𑒣𑒜𑓃𑒋 𑒂𑒏𑒱 𑒢𑒯𑒱 𑒣𑒜𑓃𑒋।
𑒞𑒐𑒢 𑒖𑒹 𑒂𑒃 𑒮𑒦 𑒑𑒣 𑒣𑒹𑒙𑒮𑒿 𑒢𑒱𑒏𑒰𑒪𑒱 𑒠𑒹𑒞𑒟𑒱 𑒞𑒿 𑒨𑒻𑒯 𑒮𑒦 𑒮𑓀𑒑𑒲-𑒮𑒰𑒟𑒲 𑒮𑒦 𑒏𑒰𑒪𑓂𑒯𑒱 𑒦𑒹𑒢𑒹 𑒁𑒯𑒲 𑒑𑒣𑒏𑒹𑒿 𑒪𑓄 𑒏𑓄 𑒯𑒿𑒮𑒲 𑒏𑒩𑒞𑒢𑓂𑒯𑒱। 𑒠𑒴 𑒔𑒰𑒩𑒱-𑒙𑒰 𑒣𑒰𑒃 𑒖𑒹 𑒥𑒔𑒞 𑒞𑒏𑒩𑒰 𑒑𑒰𑒧𑒣𑒩 𑒣𑒚𑒰𑒋𑒥। 𑒂 𑒞𑒰𑒯𑒱𑒮𑒿 𑒛𑒼𑒧𑒰 𑒣𑒜𑓃𑒞।
𑒧𑒳𑒠𑒰 𑒑𑒰𑒧𑒧𑒹 𑒖𑒹 𑒮𑓂𑒏𑒴𑒪 𑒩𑒯𑒋 𑒍𑒞𑒨 𑒏𑒱𑒍 𑒙𑒰 𑒠𑒪𑒱𑒞 𑒂𑒏𑒱 𑒑𑒩𑒲𑒥𑒏 𑒥𑒔𑓂𑒔𑒰 𑒢𑒯𑒱 𑒣𑒜𑓃𑒻𑒞 𑒩𑒯𑒟𑒱।
𑒮𑒩𑒏𑒰𑒩 𑒋𑒏𑒙𑒰 𑒨𑒼𑒖𑒢𑒰 𑒔𑒪𑒹𑒪𑒏, 𑒠𑒪𑒱𑒞𑒏 𑒥𑒔𑓂𑒔𑒰 𑒮𑒦𑒏𑒹𑒿 𑒥𑒱𑒢𑒰 𑒣𑒰𑒃 𑒪𑒹𑒢𑒹 𑒏𑒱𑒞𑒰𑒥 𑒥𑒰𑒿𑒙𑒥𑒰𑒏 । 𑒏𑒱𑒞𑒰𑒥 𑒪𑒹𑒥𑒰𑒏 𑒪𑒹𑒪 𑒒𑒩-𑒒𑒩 𑒖𑒰 𑒏𑒋 𑒨𑒰𑒠𑒫 𑒖𑒲 𑒧𑒰𑒮𑓂𑒙𑒩 𑒮𑒰𑒯𑒹𑒥 𑒥𑒔𑓂𑒔𑒰 𑒮𑒦𑒏𑒹𑒿 𑒮𑓂𑒏𑒴𑒪 𑒥𑒖𑒹𑒪𑒢𑓂𑒯𑒱। 𑒢𑒰𑒧 𑒪𑒱𑒐𑒪𑒢𑓂𑒯𑒱, 𑒥𑒱𑒢𑒰 𑒤𑒲𑒮𑒏, 𑒧𑒰𑒮𑒴𑒪𑒏 । 𑒮𑒦 𑒯𑒤𑒞𑒰-𑒠𑒮 𑒠𑒱𑒢 𑒁𑒋𑒥𑒼 𑒏𑒋𑒪 𑒮𑓂𑒏𑒴𑒪। 𑒠𑒳𑒮𑒡𑒙𑒼𑒪𑒲𑒮𑒿, 𑒔𑒧𑒩𑒙𑒼𑒪𑒲𑒮𑒿, 𑒡𑒼𑒥𑒱𑒨𑒰 𑒙𑒼𑒪𑒲𑒮𑒿 𑒮𑒦। 𑒛𑒼𑒧𑒰 𑒮𑒹𑒯𑒼। 𑒮𑒦𑒏𑒹𑒿 𑒏𑒱𑒞𑒰𑒥 𑒦𑒹𑒙𑒪𑒻𑒏 𑒂 𑒮𑒦 𑒮𑒣𑓂𑒞𑒰𑒯-𑒠𑒮 𑒠𑒱𑒢𑒏 𑒥𑒰𑒠 𑒢𑒱𑒣𑒞𑓂𑒞𑒰 𑒦𑓄 𑒖𑒰𑒃 𑒑𑒹𑒪 । 𑒠𑒹𑒐𑒰 –𑒠𑒹𑒐𑒲 𑒏𑒧𑒩𑒙𑒼𑒪𑒲 𑒂 𑒯𑒖𑒰𑒧𑒙𑒼𑒪𑒲𑒏 𑒥𑒔𑓂𑒔𑒰 𑒮𑒦 𑒮𑒹𑒯𑒼 𑒁𑒋𑒪𑒰𑒯 𑒣𑒜𑓃𑒋, 𑒏𑒱𑒞𑒰𑒥 𑒧𑒿𑒑𑒢𑒲𑒧𑒹 𑒦𑒹𑒙𑒥𑒰𑒏 𑒪𑒼𑒦𑒹 । 𑒧𑒳𑒠𑒰 𑒍𑒞𑒋 𑒄 𑒏𑒯𑒪 𑒑𑒹𑒪 𑒖𑒹 𑒁𑒯𑒰𑒿 𑒮𑒦 𑒣𑒻𑒒 𑒖𑒰𑒞𑒱𑒏 𑒕𑒲, 𑒧𑒳𑒤𑓂𑒞 𑒏𑒱𑒞𑒰𑒥 𑒨𑒼𑒖𑒢𑒰 𑒁𑒯𑒰𑒿 𑒮𑒢 𑒡𑒢𑒱𑒏𑒏 𑒪𑒹𑒪 𑒢𑒯𑒱 𑒕𑒻𑒏 ।
“𑒥𑒰𑒥𑒴 𑒄 𑒏𑒰𑒙𑒋 𑒥𑒪𑒰 𑒑𑒣 𑒕𑒻𑒏 𑒏𑒲, 𑒕𑒼𑒙-𑒕𑒼𑒙𑒹 𑒯𑒼𑒃𑒞 𑒕𑒻𑒏 𑒂 𑒣𑒻𑒒-𑒣𑒻𑒒𑒹 । 𑒮𑓂𑒙𑒹𑒙𑒏 𑒂𑒃 𑒡𑒩𑒱𑒏 𑒮𑒦𑒮𑒿 𑒢𑒲𑒏 𑒔𑒲𑒤-𑒧𑒱𑒢𑒱𑒮𑓂𑒙𑒩 𑒏𑒩𑓂𑒣𑒴𑒩𑒲 𑒚𑒰𑒏𑒳𑒩 𑒦𑒹𑒪 𑒕𑒻𑒏, 𑒏𑒲 𑒢𑒘𑒱 𑒕𑒻 𑒯𑒾 𑒁𑒮𑒲𑒢 𑒗𑒰” । 𑒖𑒨𑒩𑒰𑒧 𑒚𑒰𑒏𑒳𑒩 𑒁𑒣𑒢 𑒐𑒼𑒣𑒛𑓃𑒲𑒏 𑒙𑒴𑒙𑒪 𑒔𑒰𑒩𑒮𑒿 𑒯𑒳𑒪𑒏𑒻𑒞 𑒮𑒴𑒩𑓂𑒨𑒏 𑒣𑓂𑒩𑒏𑒰𑒬𑒏 𑒂𑒮𑒢𑒲𑒣𑒩 𑒁𑒮𑒲𑒢 𑒖𑒲𑒏 𑒏𑒹𑒬 𑒏𑒙𑒻𑒞 𑒥𑒖𑒪𑒰𑒯।
“𑒮𑒹 𑒞𑒿 𑒥𑒰𑒥𑒴 𑒚𑒲𑒏𑒹”। 𑒁𑒮𑒲𑒢 𑒥𑒖𑒪𑒰𑒯 ।
𑒮𑒹 𑒑𑒰𑒧𑒧𑒹 𑒤𑒹𑒩 𑒥𑓂𑒩𑒰𑒯𑒰𑒝 𑒂 𑒦𑒴𑒧𑒱𑒯𑒰𑒩𑒏𑒹 𑒕𑒼𑒛𑓃𑒱 𑒂𑒩 𑒏𑓂𑒨𑒼 𑒮𑓂𑒏𑒴𑒪𑒧𑒹 𑒣𑒜𑓃𑒋𑒫𑒪𑒰 𑒢𑒯𑒱 𑒥𑒔𑒪 । 𑒁𑒠𑒯𑒩𑒧𑒹 𑒮𑒦𑒙𑒰 𑒏𑒱𑒞𑒰𑒥 𑒄 𑒪𑒼𑒏𑒢𑒱 𑒏𑒱𑒢𑒻𑒞 𑒑𑒹𑒪𑒰𑒯 ।
“𑒯𑒹 𑒁𑒠𑒯𑒩𑒮𑒿 𑒥𑒹𑒮𑒲𑒧𑒹 𑒢𑒯𑒱 𑒠𑒹𑒥, 𑒧𑒰𑒢𑒪𑒯𑒳𑒿 𑒏𑒱𑒞𑒰𑒥 𑒢𑒫 𑒁𑒕𑒱, 𑒧𑒳𑒠𑒰 𑒁𑒯𑒰𑒿 𑒮𑒦𑒏𑒹𑒿 𑒞𑒿 𑒧𑒿𑒑𑒢𑒲𑒨𑒹𑒧𑒹 𑒢𑒹 𑒦𑒹𑒙𑒪 𑒁𑒕𑒱”।
𑒂 𑒠𑒳𑒮𑒡 𑒙𑒼𑒪𑒲, 𑒔𑒧𑒩𑒙𑒼𑒪𑒲 𑒂 𑒡𑒼𑒥𑒱𑒨𑒰 𑒙𑒼𑒪𑒲𑒮𑒿 𑒮𑒦𑒙𑒰 𑒏𑒱𑒞𑒰𑒥 𑒮𑒯𑒙𑒱 𑒏𑓄 𑒢𑒱𑒏𑒪𑒱 𑒑𑒹𑒪 ।
𑒂 𑒣𑒞𑒰 𑒢𑒯𑒱 𑒛𑒼𑒧𑒰 𑒣𑒜𑓃𑒪𑒏 𑒂𑒏𑒱 𑒢𑒯𑒱।
𑒖𑒰𑒞𑒱𑒫𑒰𑒠𑒲 𑒧𑒩𑒰𑒚𑒲
“𑒌𑒿 𑒨𑒾 𑒄 𑒏𑒲 𑒠𑒹𑒐𑒻𑒞 𑒕𑒲, 𑒂𑒤𑒱𑒮𑒧𑒹 𑒁𑒤𑒮𑒩 𑒮𑒹𑒯𑒼 𑒧𑒱𑒟𑒱𑒪𑒰𑒏 𑒂 𑒥𑒱𑒯𑒰𑒩𑒏
𑒂 𑒩𑒱𑒏𑓂𑒬𑒰𑒥𑒪𑒰, 𑒐𑒹𑒢𑒰𑒃 𑒥𑒢𑒥𑒋 𑒥𑒪𑒰 𑒮𑒹𑒯𑒼 𑒮𑒦 𑒧𑒱𑒟𑒱𑒪𑒰𑒏 𑒂 𑒥𑒱𑒯𑒰𑒩𑒏 । 𑒮𑒹 𑒏𑒼𑒢 𑒑𑒣 𑒦𑒹𑒪”।
𑒣𑒳𑒝𑒹 𑒧𑒹 𑒮𑒱𑓀𑒯𑒖𑒲 𑒏𑒹𑒿 𑒋𑒏 𑒑𑒼𑒙 𑒧𑒩𑒰𑒚𑒲 𑒮𑒖𑓂𑒖𑒢 𑒣𑒳𑒕𑒪𑒐𑒱𑒢𑓂𑒯।
𑒥𑒰𑒞 𑒮𑒹𑒯𑒼 𑒚𑒲𑒏 𑒩𑒯𑒋 𑒧𑒳𑒠𑒰 𑒥𑒰𑒯𑒩𑒲 𑒪𑒼𑒏𑒏𑒹𑒿 𑒥𑒳𑒗𑒥𑒰𑒧𑒹 𑒢𑒯𑒱 𑒂𑒥𑒋 ।
𑒮𑒱𑓀𑒯 𑒮𑒰𑒯𑒹𑒥 𑒦𑒰𑒩𑒞𑒲𑒨 𑒣𑒳𑒪𑒱𑒮 𑒮𑒹𑒫𑒰 𑒧𑒹 𑒩𑒯𑒟𑒱 𑒂 𑒯𑒳𑒢𑒏𑒩 𑒮𑒯𑒼𑒠𑒩 𑒦𑒱𑒐𑒢𑒰-𑒣𑒯𑒰𑒛𑓃𑒲𑒧𑒹 𑒣𑓂𑒩𑒱𑓀𑒙𑒱𑓀𑒑 𑒣𑓂𑒩𑒹𑒮𑒧𑒹 𑒏-𑒙 𑒮𑒦 𑒖𑒼𑒛𑓃𑒻𑒞 𑒕𑒪𑒰𑒯, 𑒮𑒹 𑒯𑒳𑒢𑒏𑒰 𑒏𑒢𑒹𑒏𑒼 𑒁𑒢𑒮𑒼𑒯𑒰𑒿𑒞 𑒢𑒯𑒱 𑒪𑒰𑒑𑒪𑒢𑓂𑒯𑒱। 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨𑒧𑒹 𑒠𑒹𑒐𑒻𑒞 𑒂𑒋𑒪 𑒕𑒟𑒱 𑒧𑒰𑒞𑓂𑒩 𑒧𑒻𑒟𑒱𑒪 𑒥𑓂𑒩𑒰𑒯𑒰𑒝 𑒂 𑒏𑒩𑓂𑒝 𑒏𑒰𑒨𑒮𑓂𑒟𑒏 𑒪𑒹𑒐𑒢𑒲𑒏𑒹𑒿 𑒔𑒧𑒏𑒻𑒞।
𑒩𑒱𑒏𑓂𑒬𑒰𑒥𑒪𑒰 𑒞𑒿 𑒠𑒩𑒦𑓀𑒑𑒰𑒏 𑒯𑒼𑒋 𑒂𑒏𑒱 𑒏𑒙𑒱𑒯𑒰𑒩𑒏,
𑒐𑒹𑒢𑒰𑒃 𑒥𑒢𑒥𑒋𑒥𑒪𑒰 𑒗𑒾𑒂 𑒩𑒯𑒥𑒹 𑒙𑒰 𑒢𑒹 𑒏𑒩𑒻𑒞 𑒁𑒕𑒱।
𑒄 𑒧𑒩𑒰𑒚𑒲 𑒮𑒦𑒏𑒹𑒿 𑒣𑒞𑒰 𑒢𑒯𑒱 𑒏𑒱𑒋𑒏 𑒁𑒢𑒮𑒼𑒯𑒰𑒿𑒞 𑒪𑒑𑒻𑒞 𑒕𑒻𑒏।
𑒥𑒛𑓂𑒛 𑒖𑒰𑒞𑒱𑒫𑒰𑒠𑒲 𑒮𑒦 𑒁𑒕𑒱 𑒄 𑒧𑒩𑒰𑒚𑒲 𑒮𑒦।
𑒟𑒹𑒟𑒩 𑒧𑒢𑒳𑒏𑓂𑒐
𑒠𑒴 𑒠𑒱𑒢𑒮𑒿 𑒣𑒩𑒥𑒰 𑒁𑒮𑒑𑒩𑒹 𑒥𑒻𑒮𑒪 𑒩𑒯𑒋 । 𑒍𑒏𑒩 𑒏𑒢𑒱𑒨𑒰𑒿 𑒅𑒜𑓃𑒩𑒱 𑒏𑒋 𑒏𑒞𑒯𑒳 𑒔𑒪𑒱 𑒑𑒻𑒪𑒻𑒏 । 𑒥𑒔𑓂𑒔𑒰 𑒮𑒦 𑒏𑒞𑒹𑒏𑒼 𑒥𑒹𑒩 𑒍𑒏𑒩 𑒐𑒼𑒣𑒛𑓃𑒲𑒧𑒹 𑒣𑒰𑒢𑒱 𑒂 𑒠𑒰𑒢𑒰 𑒠𑓄 𑒂𑒋𑒪 𑒩𑒯𑒋। 𑒧𑒳𑒠𑒰 𑒂𑒃 𑒦𑒼𑒩𑒹 𑒍 𑒐𑒼𑒣𑒛𑓃𑒲 𑒅𑒖𑒰𑒩𑒱 𑒏𑒞𑒯𑒳 𑒔𑒪𑒱 𑒑𑒹𑒪”।
“𑒏𑒱𑒋 𑒨𑒻 𑒢𑒰𑒢𑒲 । 𑒍𑒯𑒼 𑒏𑒱𑒋𑒏 𑒢𑒯𑒱 𑒠𑒼𑒮𑒩 𑒥𑒱𑒨𑒰𑒯 𑒏𑓄 𑒪𑒹𑒪𑒏 । 𑒥𑒹𑒬𑒲 𑒣𑓂𑒩𑒹𑒧 𑒏𑒩𑒻𑒞 𑒩𑒯𑒋 𑒏𑒢𑒱𑒨𑒰𑒿𑒮𑒿”।
“𑒁𑒯𑒰𑒿 𑒢𑒹𑒢𑒰 𑒕𑒲 । 𑒄 𑒏𑒼𑒢𑒼 𑒟𑒹𑒟𑒩 𑒧𑒢𑒳𑒏𑓂𑒐 𑒟𑒼𑒛𑓃𑒹 𑒕𑒲 𑒖𑒹 𑒏𑒢𑒱𑒨𑒰𑒿 𑒧𑒩𑒋, 𑒧𑒰𑒨-𑒥𑒰𑒣 𑒧𑒩𑒋, 𑒥𑒹𑒙𑒰-𑒣𑒳𑒞𑒼𑒯𑒳 𑒧𑒩𑒋, 𑒮𑒩-𑒮𑒧𑒰𑒖 𑒧𑒩𑒋, 𑒔𑒰𑒩𑒱 𑒠𑒱𑒢 𑒧𑒳𑒿𑒯 𑒪𑒙𑒏𑒰𑒋𑒞 𑒂 𑒣𑒰𑒿𑒔𑒧 𑒠𑒱𑒢𑒮𑒿 𑒤𑒹𑒩 𑒟𑒹𑒟𑒩 𑒧𑓄 𑒖𑒋𑒞 “।
𑒥𑒯𑒳𑒣𑒞𑓂𑒢𑒲 𑒫𑒱𑒫𑒰𑒯 𑒂 𑒯𑒱𑒖𑒛𑓃𑒰
“𑒧𑒩𑒱 𑒑𑒹𑒪𑒱 𑒥𑒹𑒔𑒰𑒩𑒲 “। 𑒑𑒾𑒂𑒿 𑒮𑒦 𑒤𑒪𑒢𑒰 𑒥𑒰𑒥𑒴𑒏 𑒞𑒹𑒮𑒩 𑒏𑒢𑒱𑒂𑒿𑒏 𑒧𑒳𑒃𑒪𑒰𑒣𑒩 𑒏𑒯𑒪𑒢𑓂𑒯𑒱 ।
“𑒤𑒪𑒢𑒰 𑒥𑒰𑒥𑒴 𑒞𑒹𑒮𑒩 𑒏𑒢𑒱𑒨𑒰𑒿𑒏 𑒑𑒩𑒠𑒢𑒱 𑒏𑒰𑒙𑒱 𑒪𑒹𑒪𑒢𑓂𑒯𑒱”। 𑒋𑒏 𑒑𑒼𑒙𑒹 𑒏𑒯𑒪𑒰𑒢𑓂𑒯𑒱।
“𑒮𑒹 𑒚𑒲𑒏𑒹 𑒏𑒯𑒻𑒞 𑒕𑒲 । 𑒣𑒯𑒱𑒪 𑒏𑒢𑒱𑒨𑒰𑒿𑒧𑒹 𑒥𑒔𑓂𑒔𑒰 𑒢𑒯𑒱 𑒦𑒹𑒪𑒻𑒏 𑒞𑒿 𑒠𑒼𑒮𑒩 𑒥𑒱𑒨𑒰𑒯 𑒏𑒋𑒪𑒏 । 𑒧𑒳𑒠𑒰 𑒖𑒐𑒢 𑒠𑒼𑒮𑒩𑒼𑒧𑒹 𑒥𑒔𑓂𑒔𑒰 𑒢𑒯𑒱 𑒦𑒹𑒪𑒻𑒏 𑒞𑒿 𑒥𑒳𑒗𑒥𑒰𑒏 𑒔𑒰𑒯𑒲 𑒕𑒪𑒋 𑒢𑒹”।- 𑒠𑒼𑒮𑒩 𑒑𑒼𑒙𑒹 𑒏𑒯𑒪𑒢𑓂𑒯𑒱 ।
“𑒯𑒿 𑒂 𑒅𑒢𑒙𑒹 𑒞𑒹𑒮𑒩 𑒏𑒢𑒱𑒨𑒰𑒿𑒏𑒹𑒿 𑒏𑒯𑒻𑒞 𑒩𑒯𑒟𑒱 𑒖𑒹 𑒦𑒰𑒞𑒱𑒖 𑒮𑒦𑒏𑒹𑒿 𑒢𑒯𑒱 𑒧𑒰𑒢𑒻𑒞 𑒕𑒱𑒌𑒏 𑒞𑒹𑒿 𑒦𑒑𑒫𑒰𑒢 𑒥𑒔𑓂𑒔𑒰 𑒢𑒯𑒱 𑒠𑒹𑒪𑒢𑓂𑒯𑒱 । 𑒥𑒳𑒗𑒴”?-𑒞𑒹𑒮𑒩 𑒑𑒼𑒙𑒹 𑒏𑒯𑒪𑒢𑓂𑒯𑒱 ।
“𑒯𑒱𑒖𑒛𑓃𑒰 𑒮𑒰𑒩”।- 𑒔𑒰𑒩𑒱𑒧 𑒑𑒼𑒙𑒹 𑒮𑒦𑒰 𑒮𑒧𑒰𑒣𑓂𑒞 𑒏𑒩𑒻𑒞 𑒥𑒰𑒖𑒪 ।
𑒧𑒳𑒠𑒰 𑒔𑒰𑒩𑒱 𑒑𑒼𑒙𑒹𑒏 𑒄 𑒧𑒯𑒰-𑒮𑒧𑓂𑒧𑒹𑒪𑒢 𑒋𑒯𑒱 𑒑𑒣𑒣𑒩 𑒮𑒯𑒧𑒞𑒱 𑒧𑒹 𑒕𑒪 𑒖𑒹 𑒣𑒯𑒱𑒪 𑒠𑒴 𑒙𑒰 𑒥𑒱𑒨𑒰𑒯 𑒏𑒩𑒥 𑒅𑒔𑒱𑒞 𑒩𑒯𑒋।
𑒮𑓂𑒞𑓂𑒩𑒲-𑒥𑒹𑒙𑒲
“𑒥𑒰𑒥𑒴𑒏 𑒮𑓀𑒑𑒹 𑒐𑒰𑒋𑒥”।-𑒥𑒳𑒔𑒱𑒨𑒰 𑒥𑒰𑒖𑒪𑒱 ।
“𑒯𑒹 𑒂𑒥 𑒞𑒴𑒿 𑒕𑒼𑒙 𑒢𑒯𑒱 𑒕𑒹𑒿, 𑒋𑒧𑓂𑒯𑒩 𑒥𑒻𑒮”। 𑒧𑒰𑒋 𑒏𑒯𑒪𑒢𑓂𑒯𑒱 ।
𑒤𑒹𑒩 𑒦𑒰𑒋 𑒮𑒦 𑒐𑒹𑒢𑒰𑒃 𑒐𑒹𑒪𑒏 𑒂 𑒂𑒥 𑒥𑒳𑒔𑒱𑒨𑒰 𑒂 𑒥𑒳𑒔𑒱𑒨𑒰 𑒧𑒰𑒋𑒏 𑒥𑒹𑒩 𑒂𑒋𑒪 ।
𑒞𑒩𑒏𑒰𑒩𑒲 𑒮𑒚𑒱 𑒖𑒹𑒏𑒰𑒿 𑒑𑒹𑒪 𑒩𑒯𑒋, 𑒠𑒴𑒡 𑒞𑒿 𑒥𑒰𑒥𑒴 𑒂 𑒦𑒰𑒋𑒏𑒹𑒿 𑒧𑒰𑒞𑓂𑒩 𑒦𑒹𑒙𑒪𑒻𑒏 ।
𑒧𑒰𑒋 𑒥𑒳𑒔𑒱𑒨𑒰𑒏𑒹𑒿 𑒮𑒚𑒪 𑒖𑒹𑒏𑒰𑒿 𑒞𑒩𑒏𑒰𑒩𑒲 𑒪𑒼𑒯𑒱𑒨𑒰𑒧𑒹 𑒮𑒿 𑒕𑒼𑒪𑒢𑒲𑒮𑒿 𑒖𑒹𑒢𑒰 –𑒞𑒹𑒢𑒰 𑒢𑒱𑒏𑒰𑒪𑒱 𑒏𑒋 𑒠𑒹𑒪𑒢𑓂𑒯𑒱 𑒂 𑒁𑒣𑒢𑒹 𑒦𑒰𑒞 𑒂 𑒢𑒴𑒢 –𑒞𑒹𑒪 𑒪𑒋 𑒥𑒻𑒮𑒪𑒲𑒯। 𑒠𑒴𑒡𑒏 𑒥𑒩𑓂𑒞𑒢𑒮𑒿 𑒠𑒰𑒜𑓃𑒲 𑒐𑒐𑒼𑒛𑓃𑒱 𑒏𑒋 𑒥𑒰𑒠𑒧𑒹 𑒥𑒳𑒔𑒱𑒨𑒰 𑒐𑒹𑒪𑒏।
- 𑒄 𑒐𑒱𑒮𑓂𑒮𑒰 𑒮𑒳𑒢𑒥𑒻𑒞 𑒧𑒢𑒼𑒯𑒩 𑒥𑒖𑒪𑒰𑒯 𑒖𑒹 𑒯𑒧𑒩𑒰 𑒮𑒦 𑒂𑒥 𑒄 𑒏𑓄 𑒮𑒏𑒻𑒞 𑒕𑒲 𑒏𑒲 ?
𑒣𑒯𑒱𑒢𑒹 𑒐𑒹𑒢𑒰𑒃-𑒣𑒱𑒢𑒰𑒃𑒮𑒿 𑒪𑓄 𑒏𑓄 𑒣𑒜𑓃𑒢𑒰𑒃-𑒪𑒱𑒐𑒢𑒰𑒃 𑒡𑒩𑒱 𑒥𑒹𑒙𑒲𑒏 𑒮𑓀𑒑 𑒁𑒢𑓂𑒨𑒰𑒨 𑒯𑒼𑒃𑒞 𑒩𑒯𑒋। 𑒁𑒣𑒰𑒪𑒰-𑒑𑒰𑒩𑓂𑒑𑒲-𑒧𑒻𑒞𑓂𑒩𑒹𑒨𑒲𑒏 𑒮𑒧𑒨 𑒞𑒿 𑒂𑒥 𑒖𑒰 𑒏𑓄 𑒤𑒹𑒩𑒮𑒿 𑒂𑒋𑒪 𑒁𑒕𑒱 ।
𑒥𑒱𑒂𑒯 𑒂 𑒑𑒼𑒩𑒪𑒑𑒰𑒃
𑒖𑒧𑒰𑒨 𑒣𑒋𑒩 𑒕𑒴𑒥𑒱 𑒏𑒋 𑒣𑓂𑒩𑒝𑒰𑒧 𑒏𑒋𑒪𑒢𑓂𑒯𑒱 𑒞𑒿 𑒮𑒮𑒳𑒩 𑒮𑒋 𑒙𑒏𑒰 𑒢𑒱𑒏𑒰𑒪𑒱 𑒋𑒏 𑒙𑒰𑒏𑒰𑒏 𑒢𑒼𑒙𑒏 𑒮𑒱𑒏𑓂𑒏𑒰𑒏 𑒪𑒹𑒪 𑒏𑒢𑒱𑒨𑒰𑒿𑒏𑒹𑒿 𑒮𑒼𑒩 𑒏𑒹𑒪𑒢𑓂𑒯𑒱।
𑒐𑒴𑒥 𑒐𑒩𑓂𑒔-𑒥𑒩𑓂𑒔 𑒏𑒋𑒢𑒹 𑒕𑒪𑒰𑒯 𑒥𑒹𑒙𑒲𑒏 𑒥𑒱𑒨𑒰𑒯𑒧𑒹 𑒣𑒰𑒃 𑒁𑒪𑒑 𑒑𑒢𑒢𑒹 𑒕𑒪𑒰𑒯 𑒂 𑒢𑒑𑒩𑒏 𑒔𑒰𑒩𑒱 𑒏𑒚𑓂𑒙𑒰 𑒖𑒧𑒲𑒢 𑒮𑒹𑒯𑒼 𑒥𑒹𑒙𑒲𑒏 𑒢𑒰𑒧𑒹 𑒪𑒱𑒐𑒱 𑒠𑒹𑒢𑒹 𑒕𑒪𑒰𑒯।
“𑒢𑒘𑒱 𑒥𑒰𑒥𑒴𑒖𑒲। 𑒄 𑒑𑒼𑒩-𑒪𑒑𑒰𑒃𑒏 𑒏𑒼𑒢 𑒖𑒩𑒴𑒩𑒲 𑒕𑒻𑒏”?
𑒞𑒰𑒫𑒞 𑒏𑒢𑒱𑒨𑒰𑒿 𑒂𑒥𑒱 𑒑𑒹𑒪 𑒩𑒯𑒟𑒱𑒢𑓂𑒯, 𑒋𑒏 𑒙𑒏𑒰𑒏 𑒮𑒱𑒏𑓂𑒏𑒰 𑒪𑓄 𑒏𑒋।
𑒋𑒏 𑒮𑒋 𑒋𑒏 𑒙𑒰𑒏𑒰 𑒖𑒧𑒰𑒨𑒏 𑒯𑒰𑒟𑒧𑒹 𑒩𑒐𑒻𑒞 𑒮𑒮𑒳𑒩 𑒧𑒯𑒩𑒰𑒖 𑒥𑒖𑒪𑒰𑒯- –
“𑒩𑒰𑒐𑒴-𑒩𑒰𑒐𑒴 । 𑒄 𑒞𑒿 𑒣𑒯𑒱𑒢𑒯𑒱𑒨𑒼 𑒢𑒹 𑒮𑒼𑒔𑒱𑒞𑒱𑒨𑒻𑒏”।
𑒣𑓂𑒩𑒞𑒱𑒦𑒰
𑒧𑒮𑒴𑒩𑒲𑒧𑒹 𑒂𑒃.𑒋.𑒋𑒮. 𑒂 𑒂𑒃. 𑒣𑒲. 𑒋𑒮. 𑒣𑓂𑒩𑒼𑒥𑒹𑒬𑒢𑒩 𑒮𑒦𑒏 𑒠𑒰𑒩𑒳 𑒣𑒰𑒩𑓂𑒙𑒲 𑒔𑒪𑒱 𑒩𑒯𑒪 𑒕𑒪 ।
“𑒯𑒧 𑒮𑒦 𑒋𑒞𑒹𑒏 𑒞𑒹𑒖 𑒕𑒲 𑒋𑒏 𑒮𑒨 𑒣𑓂𑒩𑒬𑓂𑒢𑒏 𑒮𑒹𑒙 𑒥𑒢𑒰 𑒏𑓄 𑒞𑒻𑒨𑒰𑒩𑒲 𑒏𑒋𑒪𑒯𑒳𑒿 𑒞𑒐𑒢 𑒖𑒰 𑒏𑒋 𑒮𑒤𑒪 𑒦𑒹𑒪𑒯𑒳𑒿 । 𑒏𑒹 𑒁𑒕𑒱 𑒯𑒧𑒩𑒰𑒮𑒿 𑒥𑒹𑒬𑒲 𑒞𑒹𑒖?”।
“𑒩𑒾 𑒠𑒱𑒢𑒹𑒮𑒥𑒰 । 𑒮𑒞𑒧𑒰𑒧𑒹 𑒞𑒴𑒿 𑒣𑒰𑒮 𑒢𑒯𑒱 𑒦𑒹𑒪𑒿𑒯, 𑒁𑒚𑒧𑒰𑒧𑒹 𑒮𑒹𑒯𑒼 𑒋𑒏 𑒥𑒹𑒩𑒹 𑒣𑒰𑒮 𑒢𑒯𑒱 𑒦𑒹𑒪𑒿𑒯 । 𑒠𑒮𑒧𑒰𑒧𑒹 𑒠𑓂𑒫𑒱𑒞𑒲𑒨 𑒬𑓂𑒩𑒹𑒝𑒲 𑒦𑒹𑒪𑒰𑒣𑒩 𑒞𑒼𑒩𑒰 𑒮𑓂𑒏𑒴𑒪𑒮𑒿 𑒢𑒱𑒏𑒰𑒪𑒱 𑒠𑒹𑒪𑒏𑒆। 𑒣𑓂𑒩𑒬𑓂𑒢𑒏 𑒣𑒻𑒙𑒩𑓂𑒢𑒏 𑒯𑒧 𑒂 𑒞𑒴𑒿 𑒣𑓂𑒩𑒻𑒏𑓂𑒙𑒱𑒮 𑒏𑒹𑒪𑒯𑒳𑒿 𑒂 𑒮𑒤𑒪 𑒦𑒹𑒪𑒯𑒳𑒿 𑒞𑒿 𑒋𑒯𑒱𑒧𑒹 𑒞𑒹𑒖𑒲 𑒏𑒹𑒩 𑒏𑒼𑒢 𑒥𑒰𑒞 𑒂𑒋𑒪”।
𑒖𑒰𑒞𑒱-𑒣𑒰𑒞𑒱
𑒯𑒻𑒠𑒩𑒰𑒥𑒰𑒠 𑒣𑒳𑒪𑒱𑒮 𑒋𑒏𑒹𑒛𑒧𑒲𑒧𑒹 𑒠𑒰𑒩𑒴𑒏 𑒣𑒰𑒩𑓂𑒙𑒲 𑒔𑒪𑒱 𑒩𑒯𑒪 𑒕𑒪 ।
“𑒏𑓂𑒨𑒼 𑒏𑒱𑒕𑒳 𑒢𑒯𑒱 𑒥𑒰𑒖𑒞, 𑒥𑒮 𑒯𑒧𑒯𑒲 𑒙𑒰 𑒥𑒰𑒖𑒥”।
𑒕𑒰𑒞𑒲 𑒣𑒱𑒙𑒻𑒞- “𑒩𑒰𑒖𑒣𑒴𑒞𑒏 𑒕𑒰𑒞𑒲 𑒕𑒲 𑒄, 𑒏𑓂𑒨𑒼 𑒏𑒱𑒕𑒳 𑒢𑒯𑒱 𑒥𑒰𑒖 “।
“:𑒦𑒰𑒃 𑒨𑒻𑒯 𑒞𑒿 𑒁𑓀𑒞𑒩 𑒕𑒻𑒏, 𑒠𑒳𑒢𑒴 𑒑𑒼𑒙𑒹 𑒂𑒃.𑒣𑒲.𑒋𑒮. 𑒕𑒲, 𑒠𑒳𑒢𑒴 𑒑𑒼𑒙𑒹 𑒣𑒲𑒢𑒹 𑒕𑒲। 𑒧𑒳𑒠𑒰 𑒏𑒲 𑒯𑒧 𑒄 𑒏𑒯𑒱 𑒮𑒏𑒻𑒞 𑒕𑒲 𑒕𑒰𑒞𑒲 𑒣𑒲𑒙𑒱 𑒏𑒋- 𑒖𑒹 𑒯𑒧 𑒛𑒼𑒧 𑒕𑒲, 𑒏𑓂𑒨𑒼 𑒏𑒱𑒕𑒳 𑒢𑒯𑒱 𑒥𑒰𑒖”!:
𑒁𑒢𑒳𑒏𑒧𑓂𑒣𑒰𑒏 𑒢𑒼𑒏𑒩𑒲
“𑒥𑒛𑓂𑒛 𑒠𑒩𑓂𑒠 𑒦𑓄 𑒩𑒯𑒪 𑒁𑒕𑒱 𑒥𑒰𑒥𑒴, 𑒂𑒥 𑒥𑒩𑓂𑒠𑒰𑒮𑓂𑒞 𑒢𑒯𑒱 𑒦𑓄 𑒩𑒯𑒪 𑒁𑒕𑒱” ।
𑒣𑒞𑒰 𑒢𑒯𑒱 𑒏𑒼𑒢 𑒒𑒰𑒫 𑒩𑒯𑒻𑒏 । 𑒣𑒳𑒏𑒰𑒩 𑒏𑒳𑒯𑒩𑒱 𑒩𑒯𑒪 𑒕𑒟𑒱 । 𑒣𑒱𑒞𑒰 𑒮𑓂𑒫𑒞𑓀𑒞𑓂𑒩𑒞𑒰 𑒮𑒹𑒢𑒰𑒢𑒲 𑒩𑒯𑒟𑒱, 𑒖𑒐𑒢 𑒛𑒰𑒏𑓂𑒙𑒩 𑒂 𑒏𑒧𑓂𑒣𑒰𑒅𑒢𑓂𑒛𑒩 𑒧𑒢𑒰 𑒏𑓄 𑒠𑒹𑒪𑒏 𑒒𑒰𑒫 𑒕𑒳𑒥𑒋𑒮𑒿 𑒞𑒿 𑒁𑒣𑒢𑒹 𑒯𑒰𑒟𑒹 𑒮𑒹𑒫𑒰 𑒏𑓄 𑒩𑒯𑒪 𑒕𑒟𑒱 । 𑒅𑒖𑒩𑒰 𑒣𑒰𑒅𑒛𑒩𑒏𑒹𑒿 𑒢𑒰𑒩𑒱𑒏𑒹𑒩𑒏 𑒞𑒹𑒪𑒧𑒹 𑒧𑒱𑒪𑒰 𑒏𑓄 𑒒𑒰𑒫𑒏 𑒐𑒣𑒪𑒾𑒃𑒨𑒰 𑒯𑒙𑒰 𑒏𑓄 𑒍𑒯𑒱𑒧𑒹 𑒪𑒑𑒰𑒥𑒟𑒱। 𑒣𑒲𑒖𑒏𑒹𑒿 𑒣𑒼𑒕𑒟𑒱। 𑒥𑒰𑒣 𑒂 𑒕𑒼𑒙 𑒦𑒰𑒋 𑒠𑒳𑒢𑒴 𑒮𑒹𑒫𑒰𑒧𑒹 𑒪𑒰𑒑𑒪 𑒩𑒯𑒟𑒱 ।
𑒣𑒩𑒴𑒏𑒰𑒿 𑒣𑓂𑒩𑒟𑒧 𑒬𑓂𑒩𑒹𑒝𑒲𑒧𑒹 𑒅𑒞𑓂𑒞𑒲𑒩𑓂𑒝 𑒦𑒹𑒪 𑒕𑒪𑒐𑒱𑒢𑓂𑒯 𑒣𑒻𑒒 𑒥𑒹𑒙𑒰, 𑒮𑒞𑓂𑒨𑒢𑒰𑒩𑒰𑒨𑒝 𑒦𑒑𑒫𑒰𑒢𑒏 𑒣𑒴𑒖𑒰 𑒦𑒹𑒪 𑒩𑒯𑒋।
𑒥𑒴𑒜𑓃 𑒥𑒰𑒣𑒏 𑒣𑒻𑒒 𑒂𑒬 𑒩𑒯𑒟𑒱 𑒥𑒛𑓃𑒏𑒰 𑒥𑒹𑒙𑒰।
𑒕𑒼𑒙𑒏𑒰 𑒥𑒹𑒙𑒰 𑒏𑒼𑒢𑒼 𑒞𑒹𑒯𑒢 𑒞𑒹𑒖𑒑𑒩 𑒢𑒯𑒱 𑒩𑒯𑒟𑒱𑒢।
𑒧𑒳𑒠𑒰 𑒩𑒼𑒑 𑒋𑒯𑒢 𑒩𑒯𑒋 𑒖𑒹 𑒋𑒏 𑒠𑒱𑒢 𑒥𑒛𑓃𑒏𑒰 𑒥𑒹𑒙𑒰𑒏 𑒣𑓂𑒩𑒰𑒝 𑒪𑒋 𑒪𑒹𑒪𑒏।
𑒁𑓀𑒑𑓂𑒩𑒹𑒖𑒮𑒿 𑒪𑒛𑓃𑒻𑒞 𑒐𑒳𑒬𑒲-𑒐𑒳𑒬𑒲 𑒖𑒹𑒪 𑒑𑒹𑒪 𑒩𑒯𑒟𑒱 𑒧𑒳𑒠𑒰 𑒞𑒐𑒢 𑒨𑒳𑒫𑒰 𑒩𑒯𑒟𑒱। 𑒥𑒳𑒜𑓃𑒰𑒩𑒲𑒧𑒹 𑒄 𑒬𑒼𑒏 𑒯𑒳𑒢𑒏𑒰 𑒞𑒼𑒛𑓃𑒱 𑒠𑒹𑒪𑒏𑒢𑓂𑒯𑒱 । 𑒑𑒳𑒧𑒬𑒳𑒧 𑒂 𑒁𑒣𑒢𑒹𑒧𑒹 𑒧𑒑𑒢 𑒩𑒯𑒋 𑒪𑒑𑒪𑒰𑒯 । 𑒮𑓂𑒫𑒞𑒞𑓂𑒩𑒞𑒰 𑒮𑒹𑒢𑒰𑒢𑒲 𑒣𑒹𑓀𑒬𑒢𑒮𑒿 𑒒𑒩 𑒔𑒪𑒰𑒥𑒟𑒱 । 𑒯𑒿 𑒕𑒼𑒙𑒏𑒰 𑒥𑒹𑒙𑒰 𑒣𑒻𑒒 𑒦𑒰𑒋𑒏 𑒮𑒙𑒱𑒩𑓂𑒤𑒱𑒏𑒹𑒙 𑒪𑓄 𑒏𑒪𑒏𑒞𑒰 𑒑𑒹𑒪𑒰𑒯 𑒂 𑒍𑒯𑒱 𑒮𑒙𑒱𑒩𑓂𑒤𑒱𑒏𑒹𑒙𑒏 𑒂𑒡𑒰𑒩𑒣𑒩 𑒯𑒳𑒢𑒏𑒰 𑒋𑒏𑒙𑒰 𑒣𑓂𑒩𑒰𑒃𑒫𑒹𑒙 𑒏𑒧𑓂𑒣𑒢𑒲𑒧𑒹 𑒢𑒲𑒏 𑒢𑒼𑒏𑒩𑒲 𑒦𑒹𑒙𑒱 𑒑𑒹𑒪𑒢𑓂𑒯𑒱। 𑒧𑒰𑒢𑒹 𑒧𑒰𑒞𑓂𑒩 𑒢𑒰𑒧 𑒥𑒠𑒪𑒱 𑒑𑒹𑒪𑒢𑓂𑒯𑒱।
𑒪𑒼𑒏𑒏𑒹𑒿 𑒥𑒰𑒣 𑒧𑒩𑒪𑒰𑒣𑒩 𑒢𑒼𑒏𑒩𑒲 𑒦𑒹𑒙𑒻𑒞 𑒕𑒻𑒏, 𑒯𑒳𑒢𑒏𑒰 𑒦𑒰𑒋𑒏 𑒧𑒩𑒪𑒰𑒣𑒩 𑒦𑒹𑒙𑒪𑒢𑓂𑒯𑒱 ।
𑒢𑒴𑒞𑒢 𑒧𑒲𑒛𑒱𑒂
𑒢𑒑𑒩𑒧𑒹 𑒛𑒏𑒻𑒞𑒲𑒏 𑒒𑒙𑒢𑒰 𑒦𑒹𑒪 ।
𑒢𑒴𑒞𑒢 𑒧𑒲𑒛𑒱𑒨𑒰 𑒁𑒣𑒢-𑒁𑒣𑒢 𑒔𑒻𑒢𑒪𑒧𑒹 -𑒮𑒩𑓂𑒫𑒣𑓂𑒩𑒟𑒧 𑒍𑒏𑒩𑒹 𑒔𑒻𑒢𑒪𑒣𑒩 𑒋𑒏𑒩 𑒮𑒴𑒔𑒢𑒰 𑒠𑒹𑒪 𑒖𑒰 𑒩𑒯𑒪 𑒁𑒕𑒱- 𑒄 𑒥𑓂𑒨𑒾𑒩𑒰 𑒠𑒻𑒞, 𑒠𑒴-𑒠𑒱𑒢𑒧𑒹 𑒋𑒏𑒼𑒙𑒰 𑒑𑒱𑒩𑒤𑒞𑒰𑒩𑒲 𑒢𑒯𑒱 𑒯𑒼𑒋𑒥𑒰𑒏 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒣𑒳𑒪𑒱𑒮𑒏 𑒁𑒏𑓂𑒭𑒧𑒞𑒰𑒏 𑒔𑒩𑓂𑒔 𑒏𑒩𑒻𑒞 𑒑𑒹𑒪।
𑒣𑒳𑒪𑒱𑒮 𑒯𑒹𑒛𑒏𑓂𑒫𑒰𑒩𑓂𑒙𑒩𑒧𑒹 𑒥𑒻𑒚𑒏𑒲 𑒦𑒹𑒪 । 𑒮𑒦 𑒙𑒲.𑒫𑒲. 𑒔𑒻𑒢𑒪 𑒏𑒯𑒱 𑒩𑒯𑒪 𑒕𑒪 𑒖𑒹 𑒔𑒰𑒩𑒱 𑒑𑒼𑒙𑒹 𑒧𑒱𑒪𑒱 𑒏𑒋 𑒛𑒏𑒻𑒞𑒲 𑒏𑒹𑒪𑒢𑓂𑒯𑒱 𑒧𑒳𑒠𑒰 𑒋𑒐𑒢 𑒡𑒩𑒱 𑒋𑒏𑒼 𑒑𑒼𑒙𑒹𑒏 𑒑𑒱𑒩𑒤𑒞𑒰𑒩𑒲 𑒢𑒯𑒱 𑒦𑒹𑒪 𑒁𑒕𑒱। 𑒋𑒢𑒏𑒰𑒅𑒢𑓂𑒙𑒩 𑒮𑓂𑒣𑒹𑒬𑒪𑒱𑒮𑓂𑒙 𑒥𑒖𑒰𑒍𑒪 𑒑𑒹𑒪𑒰𑒯। 𑒖𑒹𑒢𑒰 𑒮𑒦 𑒥𑒹𑒩 𑒯𑒼𑒃𑒞 𑒩𑒯𑒋 𑒋𑒯𑒱 𑒥𑒹𑒩 𑒮𑒹𑒯𑒼 𑒍 𑒋𑒏 𑒑𑒼𑒙𑒹𑒿 𑒣𑒏𑒛𑓃𑒱 𑒏𑒋 𑒁𑒢𑒪𑒢𑓂𑒯𑒱। 𑒔𑒰𑒩𑒱 𑒛𑒰𑒿𑒑 𑒣𑒛𑓃𑒥𑒰𑒏 𑒠𑒹𑒩𑒲 𑒕𑒪 𑒂𑒏𑒱 𑒍 𑒁𑒣𑒢 𑒛𑒏𑒻𑒞 𑒯𑒼𑒋𑒥𑒰𑒏 𑒑𑒣 𑒮𑓂𑒫𑒲𑒏𑒰𑒩 𑒏𑒋 𑒪𑒹𑒪𑒏। 𑒤𑒹𑒩 𑒋𑒢𑒏𑒰𑒅𑒢𑓂𑒙𑒩 𑒮𑓂𑒣𑒹𑒬𑒪𑒱𑒮𑓂𑒙𑒏 𑒮𑓀𑒑 𑒂𑒤𑒱𑒮𑒩 𑒪𑒼𑒏𑒢𑒱 𑒏𑒻𑒧𑒩𑒰𑒏 𑒮𑒼𑒗𑒰𑒿 𑒤𑒼𑒙𑒼 𑒐𑒱𑒔𑒥𑒹𑒪𑒢𑓂𑒯𑒱। 𑒍 𑒛𑒏𑒻𑒞 𑒁𑒣𑒢 𑒛𑒏𑒻𑒞 𑒯𑒼𑒋𑒥𑒰𑒏 𑒑𑒣 𑒮𑒹𑒯𑒼 𑒮𑓂𑒫𑒲𑒏𑒰𑒩 𑒏𑒋𑒪𑒏।
𑒔𑒰𑒩𑒱 𑒠𑒱𑒢 𑒂𑒩 𑒥𑒲𑒞𑒪। 𑒮𑒦 𑒠𑒱𑒢 𑒞𑒩𑒯-𑒞𑒩𑒯 𑒮𑒿 𑒍𑒯𑒱 𑒏𑒟𑒱𑒞 𑒛𑒏𑒻𑒞𑒏𑒹𑒿 𑒣𑒲𑒙𑒪 𑒖𑒰𑒃𑒞 𑒩𑒯𑒪,
-“𑒥𑒞𑒰 𑒁𑒣𑒢 𑒞𑒲𑒢 𑒮𑓀𑒑𑒲𑒏 𑒢𑒰𑒧 𑒖𑒏𑒩𑒰 𑒮𑓀𑒑𑒹 𑒛𑒏𑒻𑒞𑒲 𑒏𑒋𑒢𑒹 𑒕𑒪𑒯”।
-“𑒮𑒩𑒏𑒰𑒩 𑒔𑒰𑒩𑒱𑒋 𑒛𑒰𑒿𑒑𑒧𑒹 𑒁𑒣𑒢 𑒛𑒏𑒻𑒞 𑒯𑒼𑒋𑒥𑒰𑒏 𑒑𑒣 𑒮𑓂𑒫𑒲𑒏𑒰𑒩 𑒏𑒋 𑒪𑒹𑒪𑒯𑒳𑒿, 𑒯𑒧 𑒛𑒏𑒻𑒞 𑒩𑒯𑒱𑒞𑒯𑒳𑒿 𑒞𑒿 𑒄 𑒏𑒩𑒱𑒞𑒯𑒳𑒿 ? 𑒧𑒳𑒠𑒰 𑒂𑒩 𑒞𑒲𑒢𑒙𑒰 𑒮𑓀𑒑𑒲𑒏 𑒢𑒰𑒧 𑒏𑒞𑒋 𑒮𑒿 𑒂𑒢𑒴 𑒂 𑒏𑒏𑒩𑒰 𑒤𑒳𑒮𑒱𑒨𑒰𑒯𑒲𑓀𑒏𑒹𑒿 𑒤𑒿𑒮𑒰𑒥𑒲”।
𑒮𑒣𑓂𑒞𑒰𑒯 𑒦𑒩𑒱𑒏 𑒥𑒰𑒠 𑒧𑒲𑒛𑒱𑒨𑒰 𑒋𑒏𑒙𑒰 𑒥𑒧 𑒫𑒱𑒮𑓂𑒤𑒼𑒙𑒏 𑒁𑒢𑓂𑒫𑒹𑒭𑒝𑒧𑒹 𑒥𑒰𑒿𑒗𑒱 𑒑𑒹𑒪 । 𑒧𑒳𑒐𑓂𑒨 𑒛𑒏𑒻𑒞 𑒞𑒿 𑒣𑒏𑒛𑓃𑒰𑒃𑒨𑒹 𑒢𑒹 𑒑𑒹𑒪 𑒮𑒹 𑒂𑒥 𑒛𑒏𑒻𑒞𑒲𑒏 𑒏𑒰𑒫𑒩𑒹𑒖 𑒠𑒩𑓂𑒬𑒏 𑒢𑒯𑒱 𑒢𑒹 𑒠𑒹𑒐𑒋 𑒔𑒰𑒯𑒻𑒞 𑒕𑒟𑒱!
𑒣𑒥𑓂𑒪𑒱𑒏 𑒛𑒱𑒧𑒰𑒢𑓂𑒛 𑒢𑒯𑒱 𑒕𑒻𑒏 𑒮𑒹 𑒍𑒯𑒱 𑒛𑒏𑒻𑒞𑒏𑒹𑒿 𑒥𑒹𑒪 𑒦𑒹𑒙𑒪𑒻𑒏 𑒂𑒏𑒱 𑒢𑒯𑒱 𑒮𑒹 𑒏𑒼𑒢𑒼 𑒮𑒧𑒰𑒔𑒰𑒩 𑒢𑒯𑒱 𑒂𑒋𑒪।
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑
𑒑𑒰𑒧𑒧𑒹 𑒔𑒾𑒡𑒩𑒲𑒖𑒲𑒏 𑒥𑒛𑓂𑒛 𑒩𑒴𑒞𑒥𑒰, 𑒛𑒩𑒹 𑒮𑒦 𑒮𑒩𑓂𑒠 𑒩𑒯𑒻𑒞 𑒕𑒪 । 𑒏𑒏𑒩 𑒠𑒲𑒢 𑒁𑒕𑒱 𑒖𑒹 𑒯𑒳𑒢𑒏𑒩 𑒑𑒧𑓂𑒯𑒩𑒰𑒨𑒪 𑒡𑒰𑒢 𑒏𑒰𑒙𑒱 𑒪𑒹𑒞 𑒂𑒏𑒱 ... ।
𑒍 𑒋𑒏𑒙𑒰 𑒥𑒮 𑒐𑒼𑒪𑒪𑒢𑓂𑒯𑒱-
“𑒠𑒩𑒦𑓀𑒑𑒰𑒮𑒿 𑒑𑒰𑒧 𑒡𑒩𑒱 𑒔𑒪𑒞 । 𑒮𑒹𑒏𑒹𑓀𑒛 𑒯𑒻𑓀𑒛𑒧𑒹 𑒦𑒹𑒙𑒪 𑒁𑒕𑒱 । 𑒣𑒳𑒩𑒢𑒏𑒰 𑒧𑒰𑒪𑒱𑒏𑒏 𑒪𑒰𑒃𑒮𑒹𑓀𑒮 𑒏𑒰𑒖 𑒠𑒹𑒞। 𑒮𑓀𑒑𑒧𑒹 𑒥𑒮𑒏 𑒣𑒳𑒩𑒢𑒏𑒰 𑒧𑒰𑒪𑒱𑒏 𑒞𑒲𑒢 𑒧𑒰𑒮𑒏 𑒪𑒹𑒪 𑒁𑒣𑒢 𑒛𑓂𑒩𑒰𑒃𑒫𑒩 𑒂 𑒐𑒪𑒰𑒮𑒲 𑒮𑒹𑒯𑒼 𑒠𑒹𑒪𑒏 𑒁𑒕𑒱, 𑒞𑒏𑒩 𑒥𑒰𑒠 𑒁𑒣𑒢 𑒞𑒰𑒏𑒱 𑒪𑒹𑒥”।
𑒔𑒾𑒡𑒩𑒲𑒖𑒲 𑒧𑒢𑓂𑒠𑒱𑒩𑒣𑒩 𑒥𑒮𑒏 𑒣𑒴𑒖𑒰 𑒏𑒩𑒻𑒞 𑒏𑒰𑒪 𑒑𑒾𑒂𑒿 𑒮𑒦𑓃𑒮𑒿 𑒥𑒖𑒪𑒰𑒯 ।
“𑒮𑒳𑒢𑒻𑒞 𑒕𑒱𑒌𑒏 𑒥𑒮-𑒮𑓂𑒙𑒻𑒝𑓂𑒛𑒧𑒹 𑒥𑒛𑓃 𑒥𑒠𑒧𑒮𑓂𑒞𑒲 𑒏𑒩𑒻𑒞 𑒖𑒰𑒃𑒞 𑒕𑒻𑒏”- 𑒋𑒏 𑒑𑒼𑒙𑒹 𑒑𑒾𑒂𑒿 𑒥𑒖𑒪𑒰𑒯
“𑒡𑒳𑒩, 𑒔𑒾𑒡𑒩𑒲𑒖𑒲𑒏 𑒥𑒮 𑒂 𑒂𑒠𑒧𑒲𑒏𑒹𑒿 𑒏𑒹 𑒕𑒳𑒥𑒰𑒏 𑒮𑒰𑒯𑒮 𑒏𑒩𑒞”? 𑒠𑒼𑒮𑒩 𑒑𑒼𑒙𑒹 𑒣𑓂𑒩𑒮𑒰𑒠 𑒪𑒻𑒞 𑒥𑒖𑒪𑒰𑒯।
𑒥𑒮𑒏 𑒩𑒴𑒙 𑒂𑒏𑒱 𑒩𑒮𑓂𑒞𑒰 𑒨𑒰𑒞𑓂𑒩𑒲𑒑𑒝𑒏 𑒪𑒹𑒪 𑒮𑒳𑒦𑒱𑒞𑒑𑒩 𑒩𑒯𑒻𑒏 𑒮𑒹 𑒍𑒯𑒱 𑒑𑒰𑒛𑓃𑒲𑒧𑒹 𑒣𑒻𑒮𑒹𑒢𑓂𑒖𑒩 𑒦𑒩𑒱 𑒖𑒰𑒃𑒞 𑒩𑒯𑒋। 𑒠𑒼𑒮𑒩 𑒥𑒮𑒥𑒪𑒰 𑒮𑒦 𑒠𑒥𑓀𑒑 𑒮𑒦।
𑒬𑒰𑒯𑒲𑒖𑒲 𑒂 𑒧𑒱𑒬𑓂𑒩𑒰𑒖𑒲𑒏 𑒮𑓂𑒙𑒰𑒤 𑒮𑒦 𑒥𑒛𑓃 𑒮𑒘𑓂𑒖𑒞! 𑒮𑒹 𑒔𑒾𑒡𑒩𑒲𑒖𑒲𑒏 𑒮𑓂𑒙𑒰𑒤𑒏𑒹𑒿 𑒑𑒩𑒑𑒼𑒙𑒱𑒨𑒰 𑒠𑓄 𑒥𑒮 𑒮𑓂𑒙𑒻𑒝𑓂𑒛 𑒮𑒿 𑒥𑒰𑒯𑒩 𑒢𑒱𑒏𑒰𑒪𑒱 𑒠𑒹𑒪𑒏𑒢𑓂𑒯𑒱।
𑒣𑒼𑒐𑒩𑒱𑒏 𑒧𑒯𑒰𑒩𑒣𑒩𑒮𑒿 𑒔𑒾𑒡𑒩𑒲𑒖𑒲𑒏 𑒥𑒮 𑒐𑒳𑒖𑒋 𑒪𑒰𑒑𑒪 𑒞𑒿 𑒍𑒞𑒯𑒳 𑒨𑒰𑒞𑓂𑒩𑒲 𑒣𑒯𑒳𑒿𑒔𑒋 𑒪𑒑𑒪𑒰𑒯।
𑒂𑒥 𑒞𑒿 𑒥𑒮-𑒮𑓂𑒙𑒻𑒝𑓂𑒛𑒏 𑒠𑒰𑒠𑒰 𑒮𑒦𑒏𑒹𑒿 𑒥𑒛𑓂𑒛 𑒞𑒰𑒧𑒮 𑒅𑒚𑒪𑒢𑓂𑒯𑒱 ।
𑒠𑒳𑒢𑒳 𑒛𑓂𑒩𑒰𑒃𑒫𑒩 𑒂 𑒐𑒪𑒰𑒮𑒲𑒏𑒹𑒿 𑒣𑒳𑒭𑓂𑒙 𑒣𑒲𑒙𑒪 𑒑𑒹𑒪 𑒂 𑒄𑒯𑒼 𑒏𑒯𑒪 𑒑𑒹𑒪 𑒖𑒹 𑒤𑒹𑒩 𑒋𑒯𑒱 𑒩𑒴𑒙𑒣𑒩 𑒔𑒪𑒞𑒰𑒯 𑒞𑒿 𑒥𑒮𑒏 𑒋𑒏𑓂𑒮𑒲𑒛𑒹𑒢𑓂𑒙 𑒏𑒩𑒥𑒰 𑒠𑒹𑒪 𑒖𑒋𑒞𑒢𑓂𑒯𑒱। 𑒬𑒰𑒯𑒲 𑒂 𑒧𑒱𑒬𑓂𑒩𑒰 𑒖𑒲𑒏 𑒞𑒿 𑒣𑒔𑒰𑒮𑒼 𑒙𑒰 𑒑𑒰𑒛𑓃𑒲 𑒕𑒢𑓂𑒯𑒱 𑒋𑒏𑒙𑒰 𑒟𑒰𑒢𑒰𑒧𑒹 𑒋𑒏𑓂𑒮𑒲𑒛𑒹𑒢𑓂𑒙𑒏 𑒥𑒰𑒠 𑒣𑒛𑓃𑒪𑒹 𑒩𑒯𑒞 𑒞𑒿 𑒏𑒲 ?
𑒑𑒰𑒧𑒏 𑒩𑒼𑒂𑒥 –𑒠𑒰𑒥 𑒥𑒪𑒰 𑒏𑒾𑒡𑒩𑒲𑒖𑒲 𑒥𑒮-𑒮𑓂𑒙𑒹𑒝𑓂𑒛𑒏 𑒠𑒰𑒠𑒰 𑒮𑒦𑒏 𑒮𑒼𑒗𑒰𑒿 𑒖𑒹𑒢𑒰 𑒥𑒏𑒛𑓃𑒲 𑒥𑒢𑒱 𑒑𑒹𑒪𑒰𑒯।
𑒑𑒰𑒧𑒧𑒹 𑒧𑒢𑓂𑒠𑒱𑒩𑒣𑒩 𑒑𑒰𑒛𑓃𑒲 𑒚𑒰𑒜𑓃 𑒕𑒢𑓂𑒯𑒱, 𑒍𑒯𑒱 𑒣𑒩 𑒏𑒠𑒲𑒧𑒰𑒏 𑒪𑒞𑓂𑒞𑒲 𑒔𑒜𑓃𑒱 𑒑𑒹𑒪 𑒁𑒕𑒱 𑒣𑒻𑒒-𑒣𑒻𑒒 𑒏𑒠𑒲𑒧𑒰𑒮𑒿 𑒥𑒮 𑒗𑒣𑒰 𑒑𑒹𑒪 𑒁𑒕𑒱। 𑒐𑒴𑒥 𑒤𑒛𑓃𑒪 𑒕𑒻𑒏।
𑒑𑒾𑒂𑒿𑒮𑒦 𑒯𑒿𑒮𑒲𑒧𑒹 𑒏𑒯𑒱 𑒩𑒯𑒪 𑒕𑒟𑒱-
“𑒔𑒾𑒡𑒩𑒲𑒖𑒲𑒏 𑒥𑒮𑒏 𑒣𑒰𑒃 𑒞𑒿 𑒋𑒯𑒱 𑒥𑒹𑒩 𑒏𑒠𑒲𑒧𑒰 𑒥𑒹𑒔𑒱𑒨𑒹 𑒏𑓄 𑒅𑒣𑓂𑒣𑒩 𑒦𑓄 𑒖𑒋𑒞𑒢𑓂𑒯𑒱”।
“𑒠𑒩𑒦𑓀𑒑𑒰𑒏 𑒃𑒢𑓂𑒛𑒮𑓂𑒙𑓂𑒩𑒲𑒨𑒪 𑒮𑓂𑒙𑒹𑒙𑒧𑒹 𑒮𑒹𑒯𑒼 𑒤𑒻𑒏𑓂𑒙𑓂𑒩𑒲 𑒮𑒦 𑒋𑒯𑒱𑒢𑒰 𑒥𑒢𑓂𑒠 𑒁𑒕𑒱 𑒂 𑒍𑒏𑒩 𑒠𑒹𑒥𑒰𑒪 𑒮𑒦𑒣𑒩 𑒋𑒯𑒱𑒢𑒰 𑒞𑒩-𑒞𑒲𑒧𑒢𑒏 𑒪𑒞𑓂𑒞𑒲 𑒮𑒦 𑒦𑒩𑒪 𑒕𑒻𑒏”- 𑒠𑒼𑒮𑒩 𑒑𑒾𑒂𑒿 𑒥𑒰𑒖𑒪।
𑒧𑒱𑒟𑒱𑒪𑒰𑒏 𑒅𑒠𑓂𑒨𑒼𑒑-𑓒
𑒧𑒱𑒟𑒱𑒪𑒰𑒏 𑒥𑒼𑒢𑒧𑒹 𑒩𑒯𑒢𑒱𑒯𑒰𑒩 𑒖𑒲𑒫-𑒖𑒢𑓂𑒞𑒳 𑒮𑒦 𑒂𑒣𑒮𑒧𑒹 𑒫𑒱𑒔𑒰𑒩 𑒏𑒋𑒪𑒏- –
“𑒁𑒣𑒢 𑒏𑓂𑒭𑒹𑒞𑓂𑒩𑒏 𑒠𑒰𑒠𑒰 𑒮𑒦 𑒅𑒠𑓂𑒨𑒼𑒑𑒏 𑒫𑒱𑒢𑒰𑒬 𑒏𑒋𑒢𑒹 𑒁𑒕𑒱, 𑒍𑒞𑒳𑒏𑓂𑒏𑒰 𑒦𑒲𑒩𑒴 𑒪𑒼𑒏 𑒮𑒦 𑒅𑒠𑓂𑒨𑒼𑒑 𑒪𑒑𑒹𑒥𑒰𑒮𑒿 𑒣𑒩𑒯𑒹𑒖 𑒏𑒩𑒻𑒞 𑒁𑒕𑒱”- 𑒑𑒲𑒠𑒛𑓃 𑒥𑒰𑒖𑒪।
“𑒞𑒐𑒢 𑒁𑒣𑒢𑒯𑒱 𑒮𑒦 𑒏𑒱𑒋𑒏 𑒢𑒯𑒱 𑒤𑒻𑒏𑓂𑒙𑒩𑒲 𑒐𑒼𑒪𑒻𑒞 𑒕𑒲, 𑒏𑒼𑒢 𑒠𑒰𑒠𑒰𑒏 𑒧𑒖𑒰𑒪 𑒖𑒹 𑒯𑒧𑒩𑒰 𑒮𑒦 𑒪𑒑 𑒂𑒍𑒞”।-𑒥𑒰𑒒 𑒏𑒛𑓃𑒏𑒪।
𑒣𑓂𑒩𑒮𑓂𑒞𑒰𑒫 𑒣𑒰𑒮 𑒦𑒹𑒪 𑒖𑒹 𑒂𑒥 𑒖𑓀𑒑𑒪𑒧𑒹 𑒤𑒻𑒏𑓂𑒙𑓂𑒩𑒲 𑒐𑒳𑒖𑒞 𑒂 𑒢𑒑𑒩 𑒖𑒰 𑒏𑒋 𑒅𑒠𑓂𑒨𑒼𑒑 𑒫𑒱𑒦𑒰𑒑𑒮𑒿 𑒋𑒏𑒩 𑒣𑓀𑒖𑒲𑒏𑒩𑒝 𑒏𑒩𑒥𑒰𑒍𑒪 𑒖𑒋𑒞। 𑒍𑒞𑒋 𑒦𑒲𑒩𑒴 𑒧𑒻𑒟𑒱𑒪 𑒥𑓂𑒩𑒰𑒯𑓂𑒧𑒝 𑒂 𑒏𑒩𑓂𑒝 𑒏𑒰𑒨𑒮𑓂𑒟 𑒮𑒦𑒏 𑒩𑒰𑒖 𑒁𑒕𑒱, 𑒍 𑒮𑒦 𑒥𑒛𑓂𑒛 𑒍𑒮𑓂𑒞𑒰𑒖 𑒯𑒼𑒃𑒞 𑒁𑒕𑒱।
𑒑𑒲𑒠𑒛𑓃, 𑒥𑒰𑒢𑒩, 𑒪𑒼𑒧𑒛𑓃𑒱, 𑒢𑒲𑒪𑒑𑒰𑒨 𑒮𑒦𑒏 𑒮𑓀𑒑 𑒑𑒠𑒯𑒰 𑒮𑒹𑒯𑒼 𑒣𑓀𑒖𑒲𑒏𑒩𑒝 𑒪𑒹𑒪 𑒁𑒣𑒢 𑒮𑒹𑒫𑒰 𑒠𑒹𑒥𑒰𑒏 𑒪𑒹𑒪 𑒁𑒑𑒴 𑒥𑒜𑓃𑒪𑒰𑒯। 𑒮𑒦𑒮𑒿 𑒣𑒯𑒱𑒢𑒹 𑒪𑒼𑒧𑒛𑓃𑒱𑒏𑒹𑒿 𑒧𑒾𑒏𑒰 𑒦𑒹𑒙𑒪 𑒏𑒰𑒩𑒝 𑒍 𑒮𑒹𑒯𑒼 𑒖𑓀𑒑𑒪𑒏 𑒍𑒮𑓂𑒞𑒰𑒖 𑒁𑒕𑒱।
𑒏𑒱𑒕𑒳 𑒠𑒳𑒢𑒳𑒏𑒰 𑒥𑒰𑒠 𑒠𑒾𑒑-𑒥𑒩𑒯𑒰 𑒏𑒹𑒪𑒰𑒏 𑒥𑒰𑒠 𑒍 𑒯𑒰𑒩𑒱 𑒧𑒰𑒢𑒱 𑒪𑒹𑒪𑒏।
“𑒨𑒾 𑒥𑒰𑒒 𑒧𑒯𑒰𑒩𑒰𑒖। 𑒥𑒛𑓂𑒛 𑒏𑒼𑒢-𑒏𑒼𑒢 𑒞𑒩𑒯𑒏 𑒠𑒮𑓂𑒞𑒰𑒫𑒹𑒖 𑒧𑒿𑒑𑒻𑒞 𑒁𑒕𑒱 𑒢𑒯𑒱 𑒦𑓄 𑒮𑒏𑒞 𑒯𑒧𑒩𑒰 𑒥𑒳𑒞𑒹”।
𑒤𑒹𑒩 𑒋𑒏 𑒋𑒏 𑒏𑒋 𑒮𑒦 𑒖𑒰𑒃𑒞 𑒑𑒹𑒪𑒰𑒯 𑒂 𑒒𑒳𑒩𑒱 𑒏𑒋 𑒁𑒥𑒻𑒞 𑒑𑒹𑒪𑒰𑒯 ।
𑒑𑒠𑒯𑒰 𑒏𑒯𑒻𑒞 𑒩𑒯𑒪 𑒖𑒹 𑒋𑒏 𑒧𑒾𑒏𑒰 𑒯𑒧𑒩𑒼 𑒠𑒹𑒪 𑒖𑒰𑒋 ।
𑒧𑒳𑒠𑒰 𑒮𑒦 𑒮𑒼𑒔𑒟𑒱 𑒖𑒹 𑒥𑒳𑒗𑒴, 𑒋𑒯𑒹𑒢 𑒣𑒹𑓀𑒔𑒲𑒪𑒰 𑒮𑒦 𑒫𑒱𑒤𑒪 𑒦𑓄 𑒂𑒥𑒱 𑒑𑒹𑒪𑒰𑒯 𑒧𑒳𑒠𑒰 𑒤𑒻𑒏𑓂𑒙𑒩𑒲𑒏 𑒣𑓀𑒖𑒲𑒏𑒩𑒝 𑒢𑒯𑒱 𑒏𑒩𑒥𑒰𑒋 𑒮𑒏𑒪𑒰𑒯 𑒂 𑒄 𑒑𑒠𑒯𑒰 𑒖𑒹 𑒧𑒴𑒩𑓂𑒐𑒞𑒰𑒏 𑒪𑒹𑒪 𑒂 𑒥𑒼𑒗 𑒥𑒯𑒥𑒰𑒏 𑒪𑒹𑒪 𑒣𑓂𑒩𑒮𑒱𑒠𑓂𑒡 𑒁𑒕𑒱, 𑒏𑒲 𑒏𑓄 𑒮𑒏𑒞 ?
“𑒚𑒲𑒏 𑒕𑒻𑒏”- 𑒁𑒢𑓂𑒞𑒧𑒹 𑒯𑒰𑒩𑒱 𑒏𑒋 𑒥𑒰𑒒 𑒏𑒯𑒪𑒢𑓂𑒯𑒱- –
“𑒖𑒰𑒅 𑒁𑒯𑒴𑒿 𑒠𑒹𑒐𑒱 𑒂𑒅 𑒋𑒏 𑒥𑒹𑒩”।
𑒧𑒳𑒠𑒰 𑒄 𑒏𑒲 ? 𑒮𑒰𑒿𑒗 𑒯𑒼𑒃𑒞 𑒠𑒹𑒩𑒲 𑒑𑒠𑒯𑒰 𑒧𑒯𑒰𑒩𑒰𑒖 𑒖𑒹 𑒕𑒪𑒰𑒯 𑒮𑒹 𑒤𑒻𑒏𑓂𑒙𑓂𑒩𑒲𑒏 𑒣𑓀𑒖𑒲𑒏𑒩𑒝 𑒣𑓂𑒩𑒧𑒰𑒝𑒣𑒞𑓂𑒩 𑒪𑓄 𑒮𑒼𑒗𑒰𑒿 𑒯𑒰𑒖𑒱𑒩 𑒦𑓄 𑒑𑒹𑒪𑒰𑒯।
𑒥𑒰𑒒 𑒣𑒳𑒕𑒪𑒢𑓂𑒯𑒱- –“𑒎 𑒖𑒲 𑒑𑒠𑒯𑒰 𑒧𑒯𑒰𑒩𑒰𑒖 ! 𑒋𑒞𑒹𑒏 𑒏𑒪𑒰𑒧𑒲 𑒖𑒢𑓂𑒞𑒳 𑒮𑒦 𑒖𑒞𑒋 𑒫𑒱𑒤𑒪 𑒦𑓄 𑒑𑒹𑒪𑒟𑒱 𑒍𑒞𑒋 𑒁𑒯𑒰𑒿𑒏 𑒮𑒤𑒪𑒞𑒰𑒏 𑒧𑓀𑒞𑓂𑒩 𑒏𑒲”?
𑒑𑒠𑒯𑒰 𑒧𑒯𑒰𑒩𑒰𑒖 𑒅𑒞𑓂𑒞𑒩 𑒠𑒹𑒪𑒢𑓂𑒯𑒱-
“𑒧𑒯𑒰𑒩𑒰𑒖 𑒋𑒏𑒩 𑒧𑓀𑒞𑓂𑒩 𑒁𑒕𑒱 𑒖𑒰𑒞𑒱𑒫𑒰𑒠 𑒂 𑒦𑒰𑒃-𑒦𑒞𑒲𑒖𑒰𑒫𑒰𑒠। 𑒅𑒠𑓂𑒨𑒼𑒑 𑒫𑒱𑒦𑒰𑒑𑒧𑒹 𑒯𑒧𑒩 𑒮𑒦 𑒮𑒩𑒹-𑒮𑒧𑓂𑒥𑒢𑓂𑒡𑒲 𑒪𑒼𑒏𑒢𑒱 𑒕𑒟𑒱 𑒢𑒹”!
𑒥𑒰𑒜𑓃𑒱, 𑒦𑒴𑒐 𑒂 𑒣𑓂𑒩𑒫𑒰𑒮
𑒋𑒯𑒱 𑒥𑒹𑒩𑒏 𑒥𑒰𑒜𑓃𑒱 𑒣𑒕𑒱𑒪𑒰 𑒖𑒹𑒏𑒰𑒿 𑒮𑒢 𑒢𑒯𑒱 । 𑒮𑒦𑒙𑒰 𑒮𑒳𑒛𑓂𑒛𑒰𑒯 𑒏𑓄 𑒠𑒹𑒪𑒏 𑒂𑒑𑒱𑒨𑒼𑒮𑒿 𑒖𑒪𑓂𑒠𑒲। 𑒐𑒹𑒞 𑒣𑒟𑒰𑒩𑒧𑒹 𑒩𑒹𑒞 𑒂 𑒥𑒰𑒪𑒳𑒧𑒹 𑒐𑒰𑒪𑒲 𑒁𑒪𑓂𑒯𑒳𑒂𑒏 𑒐𑒹𑒞𑒲। 𑒠𑒳𑒢𑒴 𑒮𑒰𑒿𑒗 𑒣𑒣𑓂𑒣𑒴 𑒦𑒰𑒃 𑒁𑒪𑓂𑒯𑒳𑒂 𑒐𑒰𑒃𑒞 𑒁𑒏𑒔𑓂𑒕 𑒦𑓄 𑒑𑒹𑒪 𑒕𑒟𑒱। 𑒫𑒻𑒠𑒱𑒏 𑒟𑒱𑒏𑒰𑒯, 𑒧𑒳𑒠𑒰 𑒋𑒯𑒱 𑒏𑒼𑒮𑒱𑒏𑒢𑓂𑒯𑒰𑒧𑒹 ...
𑒧𑒳𑒠𑒰 𑒠𑒹𑒐𑒴 𑒦𑒰𑒑𑓂𑒨!
𑒯𑒩𑒱𑒠𑓂𑒫𑒰𑒩 𑒮𑒿 𑒦𑒰𑒞𑒱𑒖𑒏 𑒔𑒱𑒚𑓂𑒙𑒲 𑒁𑒥𑒻𑒞 𑒁𑒕𑒱- “𑒂𑒥𑒱 𑒖𑒰𑒆 𑒏𑒰𑒏𑒰, 𑒋𑒞𑒋 𑒫𑒻𑒠𑒱𑒏 𑒪𑒼𑒏𑒢𑒱𑒏 𑒥𑒛𑓂𑒛 𑒣𑒴𑒕𑒱 𑒁𑒕𑒱। 𑒦𑒩𑒱 𑒠𑒱𑒢 𑒯𑒮𑓂𑒞-𑒮𑒢𑓂𑒔𑒰𑒪𑒢 𑒂 𑒅𑒠𑒰𑒞𑓂𑒞, 𑒁𑒢𑒳𑒠𑒰𑒞𑓂𑒞 𑒂 𑒮𑓂𑒫𑒩𑒱𑒞 𑒮𑓂𑒫𑒩𑒏 𑒧𑒹𑒪𑒮𑒿 𑒫𑒹𑒠𑒏 𑒣𑒰𑒚 𑒏𑒩𑒴 𑒂 𑒮𑒰𑒿𑒗𑒧𑒹 𑒢𑒲𑒏 – 𑒢𑒱𑒏𑒳𑒃𑒞 𑒧𑒱𑒭𑓂𑒙𑒰𑒢𑓂𑒢, 𑒐𑒲𑒩-𑒣𑒴𑒩𑒲 𑒐𑒰𑒆”।
𑒫𑒻𑒠𑒱𑒏 𑒖𑒲 𑒙𑓂𑒩𑒹𑒢 𑒡𑒹𑒪𑒢𑓂𑒯𑒱 𑒂 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒯𑒩𑒱𑒠𑓂𑒫𑒰𑒩 । 𑒍𑒞𑒋 𑒣𑒯𑒳𑒿𑒔𑒱 𑒮𑓂𑒢𑒰𑒢-𑒡𑓂𑒨𑒰𑒢 𑒏𑓄 𑒦𑒩𑒱 𑒠𑒱𑒢 𑒏𑓀𑒚 𑒤𑒰𑒛𑓃𑒱 𑒂 𑒯𑒰𑒟 𑒒𑒳𑒧𑒰𑒋 𑒫𑒻𑒠𑒱𑒏 𑒧𑓀𑒞𑓂𑒩𑒏 𑒣𑒰𑒚 𑒏𑒹𑒪𑒢𑓂𑒯𑒱 । 𑒮𑒰𑒿𑒗𑒧𑒹 𑒧𑒢𑒮𑒴𑒥𑒰 𑒥𑒰𑒢𑓂𑒯𑒱 𑒐𑒹𑒢𑒰𑒃𑒣𑒩 𑒥𑒻𑒮𑒪𑒰𑒯 𑒖𑒹 𑒂𑒥 𑒥𑒛𑓂𑒛 𑒠𑒱𑒢𑒳𑒏𑒰 𑒥𑒰𑒠 𑒐𑒲𑒩-𑒣𑒴𑒛𑓃𑒲 𑒐𑒋𑒥𑒰𑒏 𑒁𑒫𑒮𑒩 𑒦𑒹𑒙𑒞।
𑒧𑒳𑒠𑒰 𑒋𑒧𑓂𑒯𑒩 𑒯𑒱𑒢𑒏𑒰 𑒯𑒩𑒱𑒠𑓂𑒫𑒰𑒩 𑒣𑒯𑒳𑒿𑒔𑒥𑒰𑒮𑒿 𑒣𑒯𑒱𑒢𑒯𑒱 𑒠𑒼𑒮𑒩 𑒣𑓀𑒛𑒱𑒞 𑒪𑒼𑒏𑒢𑒱𑒧𑒹 𑒫𑒱𑒔𑒰𑒩-𑒫𑒱𑒧𑒩𑓂𑒬 𑒦𑒹𑒪 𑒏𑒰𑒩𑒝 𑒍 𑒪𑒼𑒏𑒢𑒱 𑒐𑒲𑒩- 𑒣𑒴𑒛𑓃𑒲 𑒐𑒰𑒃𑒞-𑒐𑒰𑒃𑒞 𑒁𑒏𑒔𑓂𑒕 𑒦𑓄 𑒑𑒹𑒪 𑒕𑒪𑒰𑒯। 𑒮𑒹 𑒮𑒩𑓂𑒫𑒮𑒧𑓂𑒧𑒞𑒱𑒮𑒿 𑒫𑒱𑒔𑒰𑒩 𑒏𑒋𑒪 𑒑𑒹𑒪 𑒖𑒹 𑒂𑒃𑒮𑒿 𑒏𑒱𑒕𑒳 𑒠𑒱𑒢𑒏 𑒪𑒹𑒪 𑒐𑒹𑒢𑒰𑒃𑒏 𑒧𑒹𑒢𑓂𑒨𑒴 𑒥𑒠𑒪𑒪 𑒖𑒰𑒋। 𑒫𑒱𑒔𑒰𑒩 𑒦𑒹𑒪 𑒖𑒹 𑒂𑒃𑒮𑒿 𑒫𑒹𑒠𑒣𑒰𑒚𑒏 𑒥𑒰𑒠 𑒁𑒪𑓂𑒯𑒳𑒂 𑒂 𑒠𑒴𑒡 𑒏𑒱𑒕𑒳 𑒠𑒱𑒢 𑒡𑒩𑒱 𑒠𑒹𑒪 𑒖𑒰𑒋।
𑒫𑒻𑒠𑒱𑒏 𑒖𑒲 𑒐𑒰𑒃 𑒪𑒹𑒪 𑒧𑒢𑒮𑒴𑒥𑒰 𑒥𑒢𑓂𑒯𑒢𑒹 𑒥𑒻𑒮𑒪 𑒕𑒪𑒰𑒯 𑒖𑒹 𑒂𑒃 𑒖𑒹 𑒐𑒹𑒢𑒰𑒃 𑒁𑒋𑒞 𑒞𑒿 𑒍𑒯𑒱 𑒐𑒹𑒢𑒰𑒃𑒏𑒹𑒿 𑒯𑒱𑒮𑓂𑒮𑒏 𑒕𑒼𑒛𑓃𑒰 𑒠𑒹𑒥𑒻𑒏।
𑒧𑒳𑒠𑒰 𑒞𑒐𑒢𑒹 𑒫𑒖𑓂𑒩𑒣𑒰𑒞 𑒦𑒹𑒪, –𑒮𑒼𑒗𑒰𑒿 𑒁𑒪𑓂𑒯𑒳𑒂 𑒧𑒯𑒰𑒩𑒰𑒖 𑒫𑒱𑒠𑓂𑒨𑒧𑒰𑒢 ।
𑒫𑒻𑒠𑒱𑒏 𑒖𑒲 𑒯𑒰𑒟 𑒖𑒼𑒛𑓃𑒻𑒞 𑒁𑒪𑓂𑒯𑒳𑒂 𑒧𑒯𑒩𑒰𑒖𑒮𑒿 𑒥𑒖𑒪𑒰𑒯-
“𑒮𑒩𑒏𑒰𑒩 𑒯𑒧 𑒞𑒿 𑒙𑓂𑒩𑒹𑒢𑒮𑒿 𑒂𑒋𑒪 𑒕𑒲 𑒧𑒳𑒠𑒰 𑒁𑒯𑒰𑒿 𑒏𑒼𑒢 𑒮𑒫𑒰𑒩𑒲𑒮𑒿 𑒁𑒋𑒪𑒯𑒳𑒿 𑒖𑒹 𑒯𑒧𑒩𑒰𑒮𑒿 𑒣𑒯𑒱𑒢𑒯𑒱𑒮𑒿 𑒫𑒱𑒩𑒰𑒖𑒧𑒰𑒢 𑒕𑒲 ।“
𑒢𑒫-𑒮𑒰𑒧𑒢𑓂𑒞
𑒮𑓀𑒑𑒲𑒏 𑒕𑒼𑒙 𑒦𑒰𑒋 𑒑𑒰𑒧𑒧𑒹 𑒩𑒯𑒟𑒱। 𑒑𑒰𑒧𑒧𑒹 𑒧𑒰𑒩𑒱-𑒣𑒲𑒙 𑒏𑒩𑒻𑒞 𑒕𑒪𑒰𑒯 𑒮𑒹 𑒯𑒳𑒢𑒏𑒰 𑒠𑒱𑒪𑓂𑒪𑒲 𑒥𑒖𑒰𑒍𑒪 𑒑𑒹𑒪 । 𑒋𑒞𑒯𑒳 𑒑𑒣-𑒑𑒣 𑒣𑒩 𑒗𑒑𑒛𑓃𑒰 𑒏𑒩𑒋 𑒪𑒰𑒑𑒟𑒱।
𑒯𑒧𑒩𑒰 𑒮𑒼𑒗𑒹𑒿𑒧𑒹 𑒋𑒏 𑒑𑒼𑒙𑒹𑒏𑒹𑒿 𑒡𑒧𑒏𑒲 𑒠𑓄 𑒩𑒯𑒪 𑒕𑒪𑒰𑒯-
“𑒠𑒮 𑒧𑒱𑒢𑒙𑒧𑒹 𑒣𑒯𑒳𑒿𑒔𑒱 𑒖𑒰𑒯 𑒢𑒯𑒱 𑒞𑒿 𑒑𑒼𑒪𑒲 𑒧𑒰𑒩𑒱 𑒠𑒹𑒥𑒯। 𑒥𑒲𑒮 𑒏𑒱𑒪𑒼𑒧𑒲𑒙𑒩 𑒠𑒴𑒩𑒧𑒹 𑒕𑒯 𑒂𑒏𑒱 𑒔𑒰𑒪𑒲𑒮 𑒏𑒱𑒪𑒼𑒧𑒲𑒙𑒩 𑒠𑒴𑒩 𑒯𑒧𑒩𑒰 𑒍𑒯𑒱𑒮𑒿 𑒏𑒼𑒢𑒼 𑒧𑒞𑒪𑒥 𑒢𑒯𑒱 𑒁𑒕𑒱”।
𑒯𑒧 𑒯𑒳𑒢𑒏𑒰 𑒫𑒱𑒭𑒨𑒧𑒹 𑒮𑒳𑒢𑒱𑒞𑒹 𑒩𑒯𑒲 𑒧𑒳𑒠𑒰 𑒂𑒃 𑒠𑒹𑒐𑒪𑒯𑒳𑒿 ।
𑒯𑒧𑒩 𑒮𑓀𑒑𑒲 𑒥𑒳𑒗𑒥𑒋 𑒪𑒑𑒪𑒐𑒱𑒢𑓂𑒯- “𑒚𑒲𑒏 𑒕𑒻𑒏, 𑒯𑒧 𑒢𑒯𑒱 𑒏𑒯𑒻𑒞 𑒕𑒲 𑒖𑒹 𑒢𑒯𑒱 𑒧𑒰𑒩𑒱𑒨𑒾𑒏। 𑒧𑒳𑒠𑒰 𑒋𑒏𑒙𑒰 𑒑𑒣 𑒏𑒯𑒴 𑒖𑒹 𑒠𑒱𑒪𑓂𑒪𑒲𑒧𑒹 𑒥𑒲𑒮 𑒏𑒱𑒪𑒼𑒧𑒲𑒙𑒩 𑒠𑒴𑒩𑒮𑒿 𑒂𑒥𑒋𑒧𑒹 𑒞𑒲𑒢 𑒧𑒱𑒢𑒙 𑒣𑓂𑒩𑒞𑒱 𑒏𑒱𑒪𑒼𑒧𑒲𑒙𑒩𑒏 𑒯𑒱𑒮𑒰𑒥𑒮𑒿 𑒮𑒰𑒚𑒱 𑒧𑒱𑒢𑒙 𑒪𑒑𑒞𑒻𑒏 𑒮𑒹 𑒍 𑒠𑒮 𑒧𑒱𑒢𑒙𑒧𑒹 𑒏𑒼𑒢𑒰 𑒂𑒍𑒞”?
𑒫𑒱𑒠𑓂𑒨𑒰𑒩𑓂𑒟𑒲 𑒦𑒲𑒞𑒩 𑒔𑒪𑒱 𑒑𑒹𑒪𑒰𑒯। 𑒯𑒧 𑒮𑓀𑒑𑒲𑒏𑒹𑒿 𑒣𑒳𑒕𑒪𑒱𑒨𑒢𑓂𑒯𑒱-
“𑒫𑒱𑒠𑓂𑒨𑒰𑒩𑓂𑒟𑒲 𑒞𑒿 𑒏𑒞𑒯𑒳 𑒑𑒳𑒛𑓃𑒑𑒰𑒿𑒫𑒧𑒹 𑒢𑒼𑒏𑒩𑒲 𑒢𑒹 𑒏𑒩𑒻𑒞 𑒩𑒯𑒟𑒱” ?
“𑒯𑒿 𑒋𑒏 𑒚𑒰𑒧 𑒠𑒮 𑒯𑒖𑒰𑒩𑒏 𑒢𑒼𑒏𑒩𑒲 𑒡𑒩𑒹𑒢𑒹 𑒩𑒯𑒱𑒨𑒢𑓂𑒯𑒱 𑒧𑒳𑒠𑒰 𑒕𑒼𑒛𑓃𑒱 𑒠𑒹𑒪𑒢𑓂𑒯𑒱। 𑒏𑒯𑒪𑒢𑓂𑒯𑒱 𑒖𑒹 𑒯𑒧𑒩 𑒪𑒹𑒥𑒪𑒏 𑒣𑒳𑒩𑒰𑒢 𑒮𑒰𑒧𑒢𑓂𑒞 𑒖𑒼𑒏𑒩 𑒄 𑒢𑒼𑒏𑒩𑒲 𑒢𑒯𑒱। 𑒂𑒥 𑒯𑒱𑒢𑒏𑒩 𑒪𑒹𑒥𑒪 𑒏𑒯𑒻𑒞 𑒕𑒲- 𑒏𑒞𑒰𑒏 𑒣𑓂𑒩𑒨𑒰𑒮 𑒏𑒋𑒪𑒯𑒳𑒿 𑒖𑒹 𑒧𑒻𑒙𑓂𑒩𑒱𑒏 𑒣𑒰𑒮 𑒦𑒋 𑒖𑒰𑒟𑒱 𑒧𑒳𑒠𑒰 𑒧𑒡𑓂𑒨𑒧𑒼𑒮𑒿 𑒣𑒰𑒮 𑒢𑒯𑒱 𑒏𑒋 𑒮𑒏𑒪𑒰𑒯”।
𑒩𑒏𑒙𑒪 𑒕𑒪𑒯𑒳𑒿 𑒏𑒼𑒯𑒥𑒩 𑒪𑒨
“𑒯𑒧 𑒨𑒰𑒠𑒫𑒖𑒲𑒏 𑒣𑒞𑓂𑒢𑒲 𑒥𑒰𑒖𑒱 𑒩𑒯𑒪 𑒕𑒲, 𑒍 𑒕𑒟𑒱 𑒏𑒲?” – 𑒤𑒼𑒢𑒣𑒩 𑒋𑒏𑒙𑒰 𑒑𑒧𑓂𑒦𑒲𑒩 𑒮𑓂𑒫𑒩 𑒂𑒋𑒪।
𑒨𑒰𑒠𑒫 𑒖𑒲 𑒋𑒐𑒢𑒹 𑒁𑒣𑒢 𑒣𑓂𑒩𑒹𑒧𑒱𑒏𑒰𑒏 𑒮𑓀𑒑 𑒥𑒰𑒯𑒩 𑒢𑒱𑒏𑒪𑒪 𑒩𑒯𑒟𑒱 ।
𑒁𑒩𑒱𑒢𑓂𑒠𑒧 𑒥𑒰𑒖𑒪- “𑒏𑒼𑒢𑒼 𑒏𑒰𑒖𑒮𑒿 𑒥𑒰𑒯𑒩 𑒑𑒹𑒪 𑒕𑒟𑒱, 𑒋𑒐𑒢𑒹 𑒠𑒴 𑒧𑒱𑒢𑒙 𑒣𑒯𑒱𑒢𑒹। 𑒯𑒳𑒢𑒏𑒩 𑒧𑒼𑒥𑒰𑒃𑒪𑒣𑒩 𑒤𑒼𑒢 𑒏𑓄 𑒪𑒱𑒁”।
“𑒧𑒼𑒥𑒰𑒃𑒪 𑒢𑒰𑒢-𑒩𑒲𑒔𑒹𑒥𑒪 𑒕𑒢𑓂𑒯𑒱, 𑒏𑒼𑒢𑒼 𑒂𑒤𑒱𑒮𑒏 𑒏𑒰𑒖𑒮𑒿 𑒑𑒹𑒪 𑒕𑒟𑒱 𑒏𑒲?”
𑒁𑒩𑒱𑒢𑓂𑒠𑒧𑒏𑒹𑒿 𑒂𑒥 𑒏𑒱𑒕𑒳 𑒢𑒯𑒱 𑒤𑒳𑒩𑒋𑒪𑒻𑒏-
“𑒢𑒯𑒱, 𑒮𑒹 𑒞𑒿 𑒪𑒰𑒑𑒻𑒋 𑒖𑒹 𑒏𑒼𑒢𑒼 𑒫𑓂𑒨𑒏𑓂𑒞𑒱𑒑𑒞𑒹 𑒏𑒰𑒖 𑒕𑒢𑓂𑒯𑒱, 𑒏𑒰𑒩𑒝 𑒂𑒤𑒱𑒮𑒏 𑒏𑒰𑒖 𑒩𑒯𑒱𑒞𑒋 𑒞𑒿 𑒯𑒧𑒩𑒰 𑒥𑒳𑒗𑒪 𑒩𑒯𑒱𑒞𑒋”।
𑒍𑒧𑓂𑒯𑒩𑒮𑒿 𑒤𑒼𑒢 𑒩𑒰𑒐𑒱 𑒠𑒹𑒪 𑒑𑒹𑒪। 𑒁𑒩𑒱𑒢𑓂𑒠𑒧𑒏𑒹𑒿 𑒧𑒼𑒢 𑒣𑒛𑓃𑒪𑒻𑒏 𑒖𑒹 𑒨𑒰𑒠𑒫𑒖𑒲 𑒖𑒰𑒃𑒮𑒿 𑒣𑒯𑒱𑒢𑒹 𑒧𑒼𑒥𑒰𑒃𑒪 𑒥𑒱𑒢𑒰 𑒂𑒤 𑒏𑒋𑒢𑒹 𑒥𑒻𑒙𑒩𑒲 𑒢𑒱𑒏𑒰𑒪𑒱 𑒂 𑒪𑒑𑒰 𑒏𑓄 𑒧𑒼𑒥𑒰𑒃𑒪 𑒥𑒢𑓂𑒠 𑒏𑒋𑒢𑒹 𑒕𑒪𑒰𑒯। 𑒮𑓂𑒫𑒰𑒃𑒞 𑒢𑒰𑒢-𑒩𑒲𑒔𑒹𑒥𑒪 𑒂𑒥𑒱 𑒩𑒯𑒪 𑒁𑒕𑒱।
𑒁𑒩𑒱𑒢𑓂𑒠𑒧 𑒪𑒻𑒣𑒙𑒰𑒣𑒣𑒩 𑒋𑒏𑓂𑒮𑒹𑒪 𑒛𑒰𑒏𑓂𑒨𑒳𑒧𑒹𑒢𑓂𑒙𑒧𑒹 𑒍𑒗𑒩𑒰𑒋𑒪 𑒯𑒱𑒮𑒰𑒥-𑒏𑒱𑒞𑒰𑒥 𑒚𑒲𑒏-𑒚𑒰𑒏 𑒏𑒩𑒋 𑒪𑒑𑒪𑒰𑒯।
𑒏𑒱𑒕𑒳 𑒠𑒱𑒢 𑒣𑒯𑒱𑒢𑒹 𑒋𑒯𑒱𑒢𑒰 𑒋𑒏𑒙𑒰 𑒮𑓂𑒫𑒩 𑒤𑒼𑒢𑒣𑒩 𑒂𑒋𑒪 𑒩𑒯𑒻𑒏- “𑒨𑒰𑒠𑒫𑒖𑒲 𑒕𑒟𑒱 𑒏𑒲?”
“𑒁𑒯𑒰𑒿 𑒏𑒹”?
“𑒯𑒧 𑒯𑒳𑒢𑒏𑒩 𑒣𑒞𑓂𑒢𑒲”। 𑒁𑒩𑒱𑒢𑓂𑒠𑒧 𑒤𑒼𑒢 𑒨𑒰𑒠𑒫𑒖𑒲𑒏𑒹𑒿 𑒠𑒹𑒢𑒹 𑒩𑒯𑒋 𑒂 𑒨𑒰𑒠𑒫𑒖𑒲 𑒐𑒴𑒥 𑒂𑒯𑓂𑒪𑒰𑒠𑒮𑒿 𑒣𑒞𑓂𑒢𑒲𑒮𑒿 𑒑𑒣 𑒏𑒋𑒢𑒹 𑒕𑒪𑒰𑒯। 𑒍𑒯𑒱 𑒠𑒱𑒢 𑒥𑒰𑒮𑒏 𑒣𑒞𑓂𑒢𑒲𑒏 𑒁𑒥𑒰𑒖 𑒍𑒞𑒹𑒏 𑒑𑒧𑓂𑒦𑒲𑒩 𑒢𑒯𑒱 𑒪𑒰𑒑𑒪 𑒩𑒯𑒻𑒏 𑒁𑒩𑒱𑒢𑓂𑒠𑒧𑒏𑒹𑒿। 𑒔𑒳𑒪𑒥𑒳𑒪𑒱𑒨𑒰 𑒮𑒢 𑒁𑒥𑒰𑒖 𑒩𑒯𑒻𑒏। 𑒯𑒼𑒃𑒞 𑒕𑒻𑒏। 𑒪𑒼𑒏𑒏 𑒧𑒼𑒢 𑒏𑓂𑒭𑒝𑒹-𑒏𑓂𑒭𑒝𑒹 𑒞𑒿 𑒥𑒠𑒪𑒻𑒞 𑒩𑒯𑒻𑒞 𑒕𑒻𑒏।
𑒁𑒩𑒱𑒢𑓂𑒠𑒧 𑒁𑒣𑒢 𑒒𑒩𑒏 𑒬𑒰𑒢𑓂𑒞-𑒣𑓂𑒩𑒬𑒰𑒢𑓂𑒞 𑒖𑒲𑒫𑒢 𑒧𑒹 𑒩𑒯𑒻𑒞 𑒁𑒕𑒱।
𑒏𑒰𑒩𑒮𑒿 𑒢𑒱𑒞𑓂𑒨 𑒁𑒥𑒻𑒞 𑒏𑒰𑒪 𑒩𑒹𑒛𑒪𑒰𑒃𑒙𑒣𑒩 𑒯𑒱𑒖𑒛𑓃𑒰-𑒮𑒦 𑒮𑒦 𑒠𑒱𑒢𑒹 𑒦𑒹𑒿𑒙 𑒯𑒼𑒃𑒞 𑒕𑒻𑒏। 𑒣𑒳𑒩𑒢𑒏𑒰 𑒏𑒰𑒩𑒧𑒹 𑒋.𑒮𑒲. 𑒢𑒯𑒱 𑒩𑒯𑒻𑒏, 𑒮𑒹 𑒬𑒲𑒮𑒰 𑒐𑒮𑒹𑒢𑒹 𑒩𑒯𑒻𑒞 𑒕𑒪। 𑒜𑒹𑒩 𑒑𑒣-𑒬𑒣 𑒥𑒖𑒻𑒞 𑒍 𑒮𑒦 𑒯𑒰𑒟-𑒧𑒳𑒿𑒯 𑒔𑒧𑒏𑒰 𑒏𑓄 𑒏𑒲-𑒏𑒲 𑒮𑒦 𑒮𑒳𑒢𑒰 𑒠𑒻𑒞 𑒩𑒯𑒋।
𑒧𑒳𑒠𑒰 𑒂𑒥 𑒍 𑒋𑒯𑒱𑒮𑒿 𑒥𑒔𑒥𑒰𑒏 𑒪𑒹𑒪 𑒬𑒲𑒮𑒰 𑒐𑒮𑒥𑒱𑒞𑒹 𑒢𑒯𑒱 𑒁𑒕𑒱। 𑒍 𑒮𑒦 𑒬𑒲𑒮𑒰𑒏 𑒥𑒰𑒯𑒩𑒮𑒿 𑒧𑒳𑒿𑒯 𑒣𑒙𑒣𑒙𑒥𑒻𑒞 𑒏𑒱𑒕𑒳 𑒏𑒰𑒪𑒧𑒹 𑒠𑒼𑒮𑒩 𑒑𑒰𑒛𑓃𑒲 𑒠𑒱𑒮 𑒥𑒜𑓃𑒱 𑒖𑒰𑒃𑒞 𑒁𑒕𑒱। 𑒣𑒩𑒮𑒴 𑒋𑒏𑒙𑒰 𑒥𑒰𑒪𑒑𑒼𑒫𑒱𑒢𑒰 𑒞𑒧𑒮𑒰 𑒏𑓄 𑒯𑒰𑒟𑒏 𑒗𑒳𑒙𑒏𑒰𑒮𑒿 𑒍𑒏𑒩 𑒏𑒰𑒩𑒧𑒹 𑒮𑓂𑒏𑓂𑒩𑒻𑒔 𑒪𑒑𑒰 𑒠𑒹𑒪𑒏𑒻𑒏। 𑒣𑒰𑒿𑒔 𑒙𑒏𑒰𑒏 𑒪𑒹𑒥𑒰𑒏 𑒥𑒠𑒪𑒰𑒧𑒹 𑒜𑒹𑒩 𑒢𑒳𑒏𑒮𑒰𑒢 𑒏𑓄 𑒠𑒹𑒪𑒏𑒻𑒏। 𑒡𑒳𑒩। 𑒏𑒹 𑒏𑒩𑒥𑒻𑒞 𑒑𑓄 𑒛𑒹𑓀𑒙𑒱𑓀𑒑-𑒣𑒹𑓀𑒙𑒱𑓀𑒑, 𑒮𑓂𑒏𑓂𑒩𑒻𑒔 𑒦𑒢𑒹 𑒩𑒯𑒞 𑒏𑒱𑒕𑒳 𑒠𑒱𑒢। 𑒠𑒱𑒪𑓂𑒪𑒲𑒧𑒹 𑒖𑒹 𑒋𑒯𑒢 𑒔𑒹𑓀𑒕𑒧𑒹 𑒛𑒹𑓀𑒙𑒱𑒑-𑒣𑒹𑓀𑒙𑒱𑓀𑒑 𑒏𑒩𑒰𑒥𑒋 𑒪𑒰𑒑𑒲 𑒞𑒿 𑒮𑒦 𑒠𑒱𑒢𑒹 𑒏𑒩𑒥𑒋 𑒣𑒛𑓃𑒞।
𑒧𑒳𑒠𑒰 𑒄 𑒢𑒫𑒏𑒰 𑒥𑒰𑒮 𑒖𑒹 𑒂𑒋𑒪 𑒕𑒻𑒏 𑒮𑒹 𑒁𑒩𑒱𑒢𑓂𑒠𑒧𑒏 𑒧𑒮𑓂𑒞𑒱𑒭𑓂𑒏𑒧𑒹 𑒋𑒏𑒙𑒰 𑒦𑒴𑒏𑒧𑓂𑒣 𑒂𑒢𑒱 𑒠𑒹𑒢𑒹 𑒕𑒻𑒏। 𑒩𑒮𑓂𑒞𑒼𑒧𑒹 𑒏𑒲 𑒮𑒦 𑒢𑒹 𑒮𑒼𑒔𑒰𑒃𑒞 𑒩𑒯𑒻𑒞 𑒕𑒻𑒏।
“𑒏𑒰𑒪𑓂𑒯𑒱 𑒁𑒯𑒰𑒿𑒏 𑒣𑒞𑓂𑒢𑒲𑒏 𑒤𑒼𑒢 𑒂𑒋𑒪 𑒩𑒯𑒢𑓂𑒯𑒱”।
“𑒁𑒔𑓂𑒕𑒰, 𑒏𑒐𑒢?”- 𑒨𑒰𑒠𑒫𑒖𑒲 𑒥𑒖𑒪𑒰𑒯।
“𑒁𑒯𑒰𑒿𑒏 𑒑𑒹𑒪𑒰𑒏 𑒏𑒱𑒕𑒳𑒋 𑒏𑒰𑒪𑒏 𑒥𑒰𑒠”।
𑒏𑒼𑒢𑒼 𑒖𑒫𑒰𑒥 𑒥𑒱𑒢𑒳 𑒠𑒹𑒢𑒹 𑒨𑒰𑒠𑒫𑒖𑒲 𑒤𑒼𑒢 𑒧𑒱𑒪𑒹𑒪𑒢𑓂𑒯𑒱-
“𑒂𑒤𑒱𑒮𑒧𑒹 𑒏𑒱𑒋𑒏 𑒤𑒼𑒢 𑒏𑒹𑒪𑒯𑒳𑒿......𑒧𑒼𑒥𑒰𑒃𑒪 𑒥𑒹𑒮𑒧𑒹𑒢𑓂𑒙𑒧𑒹 𑒢𑒰𑒢-𑒩𑒲𑒔𑒹𑒥𑒪 𑒩𑒯𑒻𑒞 𑒕𑒻𑒏 𑒞𑒿 𑒏𑒱𑒕𑒳 𑒏𑒰𑒪 𑒣𑓂𑒩𑒞𑒲𑒏𑓂𑒭𑒰 𑒏𑒋𑒪 𑒢𑒯𑒱 𑒦𑒹𑒪...”। 𑒐𑒙𑒰𑒏𑒮𑒿 𑒤𑒼𑒢 𑒩𑒱𑒮𑒲𑒫𑒩𑒣𑒩 𑒥𑒖𑒛𑓃𑒪।
𑒁𑒩𑒱𑒢𑓂𑒠𑒧 𑒪𑒻𑒣𑒙𑒰𑒣𑒮𑒿 𑒧𑒳𑒿𑒯 𑒅𑒚𑒰 𑒏𑓄 𑒠𑒹𑒐𑒪𑒏। 𑒏𑒹𑒯𑒢 𑒣𑒩𑒱𑒫𑒰𑒩 𑒕𑒻𑒏? 𑒮𑒰𑒿𑒗𑒧𑒹 𑒑𑒰𑒧𑒣𑒩 𑒣𑒯𑒳𑒿𑒔𑒪 𑒯𑒼𑒋𑒞 𑒞𑒿 𑒣𑒞𑓂𑒢𑒲𑒮𑒿 𑒑𑒣𑒼 𑒢𑒯𑒱 𑒦𑒹𑒪𑒻𑒏 𑒏𑒲 ? 𑒑𑒣𑒏 𑒤𑒩𑒱𑒕𑒰𑒯𑒙𑒱 𑒂𑒤𑒱𑒮𑒹𑒮𑒿 𑒤𑒼𑒢 𑒏𑒋 𑒏𑓄 𑒩𑒯𑒪 𑒁𑒕𑒱।
𑒁𑒩𑒱𑒢𑓂𑒠𑒧 𑒛𑒹𑒮𑓂𑒏𑒙𑒰𑒣 𑒂 𑒫𑒰𑒬𑒱𑓀𑒑 𑒧𑒬𑒲𑒢 𑒠𑒳𑒢𑒳𑒏 𑒯𑒹𑒪𑓂𑒣𑒪𑒰𑒃𑒢𑒏 𑒢𑒧𑓂𑒥𑒩𑒣𑒩 𑒤𑒼𑒢 𑒧𑒱𑒪𑒹𑒪𑒏, 𑒑𑒰𑒧𑒣𑒩 𑒤𑒳𑒩𑒮𑒞𑒱 𑒏𑒯𑒰𑒿 𑒦𑒹𑒙𑒻𑒞 𑒕𑒻𑒏। 𑒑𑒰𑒧𑒣𑒩 𑒠𑒳𑒢𑒴 𑒔𑒲𑒖 𑒋𑒏𑒹 𑒥𑒹𑒩 𑒐𑒩𑒰𑒣 𑒦𑓄 𑒑𑒹𑒪𑒻𑒏। 𑒒𑒩𑒮𑒿 𑒂𑒤𑒱𑒮 𑒢𑒱𑒏𑒪𑒻𑒞 𑒏𑒰𑒪 𑒏𑒢𑒱𑒨𑒰𑒿 𑒫𑒰𑒬𑒱𑓀𑒑 𑒧𑒬𑒲𑒢𑒏 𑒐𑒩𑒰𑒥 𑒯𑒹𑒥𑒰𑒏 𑒞𑒿 𑒥𑒹𑒙𑒰 𑒁𑒣𑒢 𑒏𑒧𑓂𑒣𑓂𑒨𑒳𑒙𑒩𑒣𑒩 𑒑𑒹𑒧 𑒏𑒻𑒏 𑒠𑒱𑒢𑒮𑒿 𑒐𑒩𑒰𑒣𑒲𑒏 𑒔𑒪𑒞𑒹 𑒥𑒢𑓂𑒠 𑒩𑒯𑒥𑒰𑒏 𑒫𑒱𑒭𑒨𑒧𑒹 𑒏𑒯𑒢𑒹 𑒩𑒯𑒻𑒏।
𑒖𑒐𑒢𑒹 𑒠𑒳𑒢𑒴 𑒚𑒰𑒧 𑒏𑒧𑓂𑒣𑓂𑒪𑒹𑒢 𑒏𑓄 𑒏𑒋 𑒤𑒼𑒢 𑒩𑒰𑒐𑒪𑒏 𑒂𑒏𑒱 𑒤𑒼𑒢𑒏 𑒒𑓀𑒙𑒲 𑒥𑒖𑒪𑒻𑒏-
“𑒏𑒞𑒹𑒏 𑒏𑒰𑒪𑒮𑒿 𑒤𑒼𑒢 𑒃𑒢𑒑𑒹𑒖 𑒩𑒐𑒢𑒹 𑒕𑒲। 𑒑𑒣 𑒮𑒳𑒢𑒴। 𑒏𑒏𑒩𑒼 𑒤𑒼𑒢 𑒂𑒥𑒋 𑒞𑒿 𑒏𑒯𑒥𑒻𑒏 𑒖𑒹 𑒨𑒰𑒠𑒫𑒖𑒲𑒏 𑒮𑓂𑒟𑒰𑒢𑒰𑒢𑓂𑒞𑒩𑒝 𑒦𑓄 𑒑𑒹𑒪𑒢𑓂𑒯𑒱”। 𑒥𑒰𑒮 𑒥𑒰𑒯𑒩 𑒏𑒞𑒯𑒳𑒮𑒿 𑒤𑒼𑒢 𑒏𑒋𑒢𑒹 𑒩𑒯𑒟𑒱𑒢𑓂𑒯 𑒂 𑒋𑒏𑒹 𑒮𑒳𑒩𑒧𑒹 𑒮𑒦𑒙𑒰 𑒥𑒰𑒖𑒱 𑒑𑒹𑒪 𑒕𑒪𑒰𑒯।
𑒏𑒰𑒪𑓂𑒯𑒱 𑒮𑒰𑒿𑒗𑒧𑒹 𑒣𑒞𑓂𑒢𑒲𑒏𑒹𑒿 𑒕𑒼𑒛𑓃𑒋 𑒪𑒹𑒪 𑒨𑒰𑒠𑒫𑒖𑒲 𑒑𑒹𑒪 𑒩𑒯𑒟𑒱 𑒂 𑒋𑒧𑓂𑒯𑒩 𑒯𑒳𑒢𑒏𑒩 𑒣𑓂𑒩𑒹𑒧𑒱𑒏𑒰𑒏 𑒤𑒼𑒢 𑒂𑒋𑒪 𑒩𑒯𑒢𑓂𑒯𑒱 𑒂𑒤𑒱𑒮𑒧𑒹। 𑒍 𑒏𑒼𑒢𑒼 𑒯𑒼𑒙𑒪𑒏 𑒢𑒰𑒧 𑒥𑒰𑒖𑒪 𑒩𑒯𑒋 𑒂 𑒏𑒯𑒢𑒹 𑒩𑒯𑒋 𑒖𑒹 𑒨𑒰𑒠𑒫𑒖𑒲𑒏𑒹𑒿 𑒯𑒼𑒙𑒪𑒏 𑒢𑒰𑒧 𑒥𑒞𑒰 𑒠𑒹𑒥𑒢𑓂𑒯𑒱 𑒍 𑒥𑒳𑒗𑒱 𑒖𑒋𑒞𑒰𑒯। 𑒁𑒩𑒱𑒢𑓂𑒠𑒧 𑒄 𑒧𑒻𑒮𑒹𑒖 𑒨𑒰𑒠𑒫𑒖𑒲𑒏𑒹𑒿 𑒞𑒐𑒢𑒹 𑒠𑓄 𑒠𑒹𑒢𑒹 𑒩𑒯𑒟𑒱। 𑒂𑒥 𑒂𑒃 𑒨𑒰𑒠𑒫𑒖𑒲 𑒢𑒯𑒱 𑒖𑒰𑒢𑒱 𑒏𑒼𑒢 𑒏𑒰𑒩𑒝𑒮𑒿 𑒋𑒐𑒢 𑒡𑒩𑒱 𑒂𑒤𑒱𑒮 𑒢𑒯𑒱 𑒂𑒋𑒪 𑒁𑒕𑒱। 𑒏𑒢𑒱𑒨𑒰𑒿 𑒞𑒿 𑒑𑒹𑒪𑒻𑒏 𑒢𑒻𑒯𑒩 𑒂 𑒞𑒐𑒢 𑒂𑒥 𑒏𑒏𑒩 𑒤𑒼𑒢 𑒁𑒋𑒞𑒻𑒏 𑒖𑒏𑒩𑒰 𑒏𑒯𑒥𑒻𑒏 𑒖𑒹 𑒋𑒏𑒩 𑒮𑓂𑒟𑒰𑒢𑒰𑒢𑓂𑒞𑒩𑒝 𑒦𑓄 𑒑𑒹𑒪𑒻𑒏।
𑒤𑒼𑒢 𑒞𑒿 𑒢𑒯𑒱 𑒂𑒋𑒪 𑒧𑒳𑒠𑒰 𑒍 𑒂𑒨𑒪𑒱 𑒩𑒯𑒋, 𑒥𑒰𑒮𑒏 𑒣𑓂𑒩𑒹𑒧𑒱𑒏𑒰। 𑒂𑒃 𑒍 𑒁𑒣𑒢 𑒢𑒰𑒧𑒼 𑒥𑒞𑒹𑒪𑒏, 𑒥𑒛𑓂𑒛 𑒢𑒲𑒏 𑒢𑒰𑒧 𑒩𑒯𑒻𑒏 𑒍𑒏𑒩- 𑒣𑒰𑒩𑒳𑒪।
“𑒨𑒰𑒠𑒫𑒖𑒲 𑒏𑒞𑒋 𑒑𑒹𑒪𑒟𑒱”।
“𑒯𑒳𑒢𑒏𑒩 𑒮𑓂𑒟𑒰𑒢𑒰𑒢𑓂𑒞𑒩𑒝 𑒦𑓄 𑒑𑒹𑒪𑒢𑓂𑒯𑒱”। 𑒁𑒩𑒱𑒢𑓂𑒠𑒧 𑒥𑒰𑒖𑒪।
“𑒁𑒔𑓂𑒕𑒰”। 𑒄 𑒏𑒯𑒱 𑒍 𑒔𑒪𑒱 𑒑𑒹𑒪𑒱।
“𑒁𑒯𑒰𑒿𑒏𑒹𑒿 𑒤𑒼𑒢𑒣𑒩 𑒂𑒋𑒪 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩𑒧𑒹 𑒄 𑒏𑒯𑒥𑒰𑒏 𑒩𑒯𑒋, 𑒮𑒼𑒗𑒰𑒿 𑒂𑒋𑒪 𑒪𑒼𑒏𑒏𑒹𑒿 𑒢𑒯𑒱”। 𑒁𑒩𑒱𑒢𑓂𑒠𑒧𑒏 𑒮𑒯𑒏𑒩𑓂𑒧𑒲 𑒩𑒼𑒯𑒱𑒝𑒲 𑒯𑒿𑒮𑒻𑒞 𑒥𑒰𑒖𑒪𑒱।
“𑒯𑒧 𑒏𑒢𑒹𑒏 𑒦𑒰𑒿𑒮𑒱 𑒑𑒹𑒪 𑒕𑒲। 𑒂𑒥 𑒂𑒃𑒮𑒿 𑒂𑒤𑒱𑒮𑒏 𑒤𑒼𑒢 𑒩𑒱𑒮𑒲𑒫 𑒏𑒩𑒥𑒰𑒏 𑒦𑒰𑒩 𑒁𑒯𑒰𑒿𑒣𑒩”। 𑒁𑒩𑒱𑒢𑓂𑒠𑒧𑒏 𑒋𑒏𑒙𑒰 𑒦𑒰𑒩 𑒩𑒼𑒯𑒱𑒝𑒲𑒣𑒩 𑒠𑒻𑒞 𑒥𑒰𑒖𑒪।
𑒩𑒼𑒯𑒱𑒝𑒲 𑒋𑒯𑒱 𑒑𑒣𑒏𑒹𑒿 𑒯𑒿𑒮𑒲𑒧𑒹 𑒪𑒹𑒢𑒹 𑒩𑒯𑒋 𑒧𑒳𑒠𑒰 𑒁𑒩𑒱𑒢𑓂𑒠𑒧 𑒞𑒐𑒢𑒹𑒮𑒿 𑒮𑒦𑒙𑒰 𑒤𑒼𑒢 𑒩𑒱𑒮𑒲𑒫 𑒏𑒹𑒢𑒰𑒃 𑒕𑒼𑒛𑓃𑒱 𑒠𑒹𑒪𑒏।
𑒋𑒯𑒢 𑒢𑒯𑒱 𑒩𑒯𑒋 𑒖𑒹 𑒥𑒰𑒮 𑒏𑒰𑒩𑓂𑒨𑒰𑒪𑒨 𑒢𑒯𑒱 𑒁𑒥𑒻𑒞 𑒕𑒪। 𑒖𑒐𑒢 𑒡𑒩𑒱 𑒍 𑒏𑒰𑒩𑓂𑒨𑒰𑒪𑒨𑒧𑒹 𑒩𑒯𑒻𑒞 𑒕𑒪 𑒥𑒹𑒬𑒲 𑒏𑒰𑒪 𑒁𑒣𑒢𑒹 𑒤𑒼𑒢 𑒩𑒱𑒮𑒲𑒫 𑒏𑒩𑒻𑒞 𑒩𑒯𑒋, 𑒏𑒰𑒖𑒧𑒹 𑒮𑒹𑒯𑒼 𑒤𑒳𑒩𑓂𑒞𑒱𑒑𑒩 𑒩𑒯𑒋।
“𑒋𑒏𑒙𑒰 𑒑𑒣 𑒥𑒳𑒗𑒪𑒱𑒌। 𑒁𑒖𑒨 𑒑𑒝𑒹𑒬𑒢 𑒂𑒃 𑒦𑒼𑒩𑒮𑒿 𑒧𑒳𑒿𑒯 𑒪𑒙𑒏𑒾𑒢𑒹 𑒁𑒕𑒱”।
“𑒏𑒱𑒋𑒏”। 𑒩𑒼𑒯𑒱𑒝𑒲𑒏 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒠𑒻𑒞 𑒁𑒩𑒱𑒢𑓂𑒠𑒧 𑒥𑒰𑒖𑒪।
“𑒃𑒢𑓂𑒙𑒩𑒢𑒹𑒙𑒣𑒩 𑒏𑒼𑒢𑒼 𑒣𑓂𑒩𑒹𑒧𑒱𑒏𑒰 𑒮𑓀𑒑𑒹 𑒏𑒞𑒹𑒏 𑒧𑒯𑒱𑒢𑒰𑒮𑒿 𑒔𑒻𑒙𑒱𑓀𑒑 𑒠𑓂𑒫𑒰𑒩𑒰 𑒣𑓂𑒩𑒹𑒧𑒰𑒪𑒰𑒣 𑒏𑒩𑒻𑒞 𑒩𑒯𑒋। 𑒂𑒃 𑒣𑒞𑒰 𑒪𑒑𑒪𑒻𑒏 𑒖𑒹 𑒍𑒏𑒩𑒰 𑒮𑓀𑒑𑒹 𑒏𑓂𑒨𑒼 𑒠𑒼𑒮𑒩 𑒪𑒛𑓃𑒏𑒰 𑒯𑒿𑒮𑒲 𑒏𑓄 𑒩𑒯𑒪 𑒕𑒪𑒻𑒏। 𑒣𑓂𑒩𑒹𑒧 𑒫𑒱𑒨𑒼𑒑𑒧𑒹 𑒁𑒠𑒯𑒰 𑒥𑒞𑒰𑒯 𑒥𑒢𑒪 𑒁𑒕𑒱”- 𑒩𑒼𑒯𑒱𑒝𑒲 𑒤𑒩𑒱𑒕𑒹𑒪𑒏।
𑒨𑒰𑒠𑒫 𑒖𑒲 𑒏𑒼𑒢𑒼 𑒔𑒲𑒖 𑒥𑒱𑒮𑒩𑒱 𑒑𑒹𑒪 𑒕𑒪𑒰𑒯 𑒮𑒹 𑒪𑒱𑒤𑓂𑒙𑒮𑒿 𑒞𑒐𑒢𑒹 𑒏𑒏𑓂𑒭𑒧𑒹 𑒂𑒋𑒪 𑒩𑒯𑒟𑒱, 𑒩𑒼𑒯𑒱𑒝𑒲𑒏 𑒑𑒣 𑒮𑒳𑒢𑒱 𑒪𑒹𑒢𑒹 𑒕𑒪𑒰𑒯।
“𑒯𑒧𑒩𑒰 𑒞𑒿 𑒃𑒢𑓂𑒙𑒩𑒢𑒹𑒙𑒏 𑒄 𑒧𑒰𑒡𑓂𑒨𑒧𑒹 𑒂𑒏𑒰𑒬𑒲𑒨 𑒪𑒑𑒻𑒞 𑒁𑒕𑒱”- 𑒏𑒯𑒻𑒞 𑒍 𑒁𑒣𑒢 𑒔𑒬𑓂𑒧𑒰 𑒪𑒹𑒪𑒢𑓂𑒯𑒱 𑒂 𑒔𑒪𑒱 𑒑𑒹𑒪𑒰𑒯।
𑒩𑒼𑒯𑒱𑒝𑒲𑒏𑒹𑒿 𑒤𑒼𑒢 𑒩𑒱𑒮𑒲𑒫 𑒏𑒩𑒥𑒰𑒏 𑒛𑓂𑒨𑒳𑒙𑒲 𑒪𑒑𑒪𑒢𑓂𑒯𑒱 𑒞𑒿 𑒁𑒩𑒱𑒢𑓂𑒠𑒧 𑒢𑒱𑒬𑓂𑒔𑒱𑒢𑓂𑒞 𑒦𑓄 𑒑𑒹𑒪𑒰𑒯।
“𑒮𑒳𑒢𑒻𑒞 𑒕𑒲। 𑒋𑒏 𑒥𑒹𑒩 𑒤𑒼𑒢𑒣𑒩 𑒖𑒹 𑒁𑒥𑒰𑒖 𑒁𑒥𑒻𑒞 𑒕𑒻𑒏 𑒖𑒹 𑒯𑒧 𑒨𑒰𑒠𑒫𑒖𑒲𑒏 𑒣𑒞𑓂𑒢𑒲 𑒕𑒲 𑒞𑒿 𑒍𑒯𑒱𑒧𑒹 𑒏𑒔𑒥𑒔𑒱𑒨𑒰𑒏 𑒁𑒥𑒰𑒖 𑒑𑒳𑒿𑒖𑒻𑒞 𑒕𑒻𑒏। 𑒠𑒼𑒮𑒩 𑒥𑒹𑒩 𑒖𑒹 𑒤𑒼𑒢 𑒁𑒥𑒻𑒞 𑒁𑒕𑒱 𑒖𑒹 𑒯𑒧 𑒨𑒰𑒠𑒫 𑒖𑒲𑒏 𑒣𑒞𑓂𑒢𑓂𑒢𑒲 𑒕𑒲 𑒞𑒿 𑒍𑒯𑒱𑒧𑒹 𑒑𑓀𑒦𑒲𑒩𑒞𑒰 𑒩𑒯𑒻𑒞 𑒕𑒻𑒏। 𑒏𑒲 𑒩𑒯𑒮𑓂𑒨 𑒁𑒕𑒱, 𑒏𑒱𑒕𑒳 𑒢𑒹 𑒥𑒳𑒗𑒰𑒃𑒋”।
“𑒪𑒼𑒏𑒏 𑒧𑒴𑒛 𑒯𑒼𑒃𑒞 𑒕𑒻𑒏”।
“𑒋𑒯𑒢 𑒏𑒼𑒢 𑒧𑒴𑒛 𑒯𑒼𑒃𑒞 𑒕𑒻𑒏 𑒖𑒹 𑒒𑒝𑓂𑒙𑒹-𑒒𑒝𑓂𑒙𑒰𑒧𑒹 𑒥𑒠𑒪𑒻𑒞 𑒩𑒯𑒻𑒞 𑒕𑒻𑒏। 𑒂 𑒠𑒹𑒐𑒴 𑒋𑒯𑒱 𑒥𑒰𑒮𑒏𑒹𑒿। 𑒖𑒐𑒢 𑒔𑒳𑒪𑒥𑒳𑒪𑒱𑒨𑒰 𑒧𑒴𑒛𑒧𑒹 𑒤𑒼𑒢 𑒁𑒥𑒻𑒞 𑒕𑒻𑒏 𑒞𑒿 𑒄 𑒯𑒿-𑒯𑒿 𑒯𑒧𑒩 𑒮𑒩𑒏𑒰𑒩 𑒏𑒯𑒱 𑒏𑓄 𑒑𑒣 𑒏𑒩𑒻𑒞 𑒁𑒕𑒱 𑒂 𑒖𑒐𑒢 𑒑𑒧𑓂𑒦𑒲𑒩 𑒮𑓂𑒫𑒩𑒧𑒹 𑒣𑒞𑓂𑒢𑒲𑒏 𑒤𑒼𑒢 𑒁𑒥𑒻𑒞 𑒕𑒻𑒏 𑒞𑒿 𑒗𑒱𑒩𑒏𑒱𑒏𑒿 𑒥𑒖𑒻𑒞 𑒁𑒕𑒱 𑒖𑒹 𑒂𑒤𑒱𑒮𑒏 𑒤𑒼𑒢𑒣𑒩 𑒤𑒼𑒢 𑒏𑒱𑒋𑒏 𑒏𑒹𑒪𑒯𑒳𑒿 ? 𑒥𑒳𑒗𑒴”।
“𑒄 𑒁𑒣𑒢𑒰 𑒩𑒯𑒪𑒰𑒣𑒩 𑒤𑒼𑒢 𑒁𑒣𑒢𑒹 𑒅𑒚𑒥𑒻𑒏 𑒣𑓂𑒩𑒨𑒰𑒮 𑒏𑒩𑒻𑒞 𑒁𑒕𑒱”।
“𑒏𑒼𑒢𑒼 𑒛𑒩 𑒕𑒻𑒏 𑒞𑒰𑒯𑒱 𑒠𑓂𑒫𑒰𑒩𑒹”।
“𑒁𑒯𑒰𑒿𑒏𑒹𑒿 𑒞𑒿 𑒍𑒯𑒱𑒢𑒰 𑒪𑒑𑒻𑒞 𑒩𑒯𑒻𑒋, 𑒏𑒟𑒲𑒏 𑒛𑒩 𑒩𑒯𑒞𑒻𑒏 𑒋𑒏𑒩𑒰”। 𑒁𑒩𑒱𑒢𑓂𑒠𑒧 𑒥𑒰𑒖𑒪 ।
𑒂𑒥 𑒁𑒩𑒱𑒢𑓂𑒠𑒧𑒏𑒹𑒿 𑒪𑒑𑒪𑒻𑒏 𑒖𑒹 𑒩𑒼𑒯𑒱𑒝𑒲 𑒏𑒼𑒢𑒼 𑒔𑒲𑒖𑒏 𑒁𑒢𑓂𑒫𑒹𑒭𑒝𑒧𑒹 𑒪𑒰𑒑𑒱 𑒑𑒹𑒪 𑒁𑒕𑒱।
“𑒠𑒴 𑒠𑒱𑒢𑒮𑒿 𑒠𑒹𑒫𑒑𑒢 𑒞𑓀𑒑 𑒏𑒋𑒢𑒹 𑒁𑒕𑒱 𑒠𑒳𑒩𑓂𑒒𑒙𑒢𑒰 𑒥𑒲𑒧𑒰 𑒏𑒩𑒹𑒥𑒰𑒏 𑒪𑒹𑒪”- 𑒩𑒼𑒯𑒱𑒝𑒲 𑒥𑒖𑒪𑒲𑒯।
“𑒋𑒖𑒹𑒢𑓂𑒮𑒲 𑒪𑓄 𑒪𑒹𑒪𑒏 𑒁𑒕𑒱 𑒏𑒲?”- 𑒁𑒩𑒱𑒢𑓂𑒠𑒧 𑒅𑒞𑓂𑒞𑒩𑒧𑒹 𑒣𑓂𑒩𑒬𑓂𑒢 𑒣𑒳𑒕𑒪𑒢𑓂𑒯𑒱।
𑒠𑒹𑒫𑒑𑒢 𑒍𑒯𑒱 𑒂𑒤𑒱𑒮𑒧𑒹 𑒔𑒣𑒩𑒰𑒮𑒲 𑒕𑒪।
“𑒯𑒿, 𑒋𑒯𑒱 𑒢𑒑𑒩𑒧𑒹 𑒖𑒞𑒹𑒏 𑒣𑒰𑒃 𑒦𑒹𑒙𑒻𑒞 𑒕𑒻𑒏 𑒞𑒰𑒯𑒱𑒮𑒿 𑒏𑒲 𑒯𑒼𑒋𑒞𑒻𑒏 ? 𑒮𑒹 𑒣𑒞𑓂𑒢𑒲𑒏 𑒢𑒰𑒧𑒮𑒿 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒁𑒕𑒱। 𑒯𑒧𑒩𑒼 𑒏𑒯𑒻𑒞 𑒩𑒯𑒋 𑒣𑒢𑓂𑒠𑓂𑒩𑒯 𑒮𑒰𑒪𑒏 𑒠𑒳𑒩𑓂𑒒𑒙𑒢𑒰 𑒥𑒲𑒧𑒰 𑒪𑒹𑒥𑒰𑒏 𑒪𑒹𑒪”।
“𑒍, 𑒞𑒐𑒢 𑒄 𑒋𑒪.𑒂𑒃.𑒮𑒲. 𑒢𑒯𑒱 𑒖𑒲.𑒂𑒃.𑒮𑒲.𑒏 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒁𑒕𑒱”।
“𑒏𑒧𑓂𑒧𑒹 𑒣𑓂𑒩𑒲𑒧𑒱𑒨𑒧 𑒕𑒻𑒏 𑒪𑓄 𑒪𑒱𑒨𑒾𑒏, 𑒯𑒧𑒯𑒴 𑒪𑓄 𑒩𑒯𑒪 𑒕𑒲”।
𑒠𑒹𑒫𑒑𑒢 𑒐𑒳𑒬𑒲 𑒐𑒳𑒬𑒲 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒤𑒰𑒩𑓂𑒧 𑒦𑒩𑒥𑒰𑒏 𑒪𑒹𑒪 𑒠𑒹𑒪𑒏 𑒂 𑒔𑒰𑒯 𑒥𑒢𑒹𑒥𑒰𑒏 𑒪𑒹𑒪 𑒔𑒪𑒱 𑒑𑒹𑒪। 𑒞𑒐𑒢𑒹 𑒨𑒰𑒠𑒫𑒖𑒲 𑒡𑒩𑒡𑒩𑒰𑒃𑒞 𑒁𑒋𑒪𑒰𑒯।
“𑒏𑒼𑒢 𑒤𑒰𑒩𑓂𑒧 𑒮𑒦 𑒑𑒼𑒙𑒹 𑒦𑒩𑒱 𑒩𑒯𑒪 𑒕𑒲?”
“𑒠𑒹𑒫𑒑𑒢 𑒏𑒢𑒱𑒨𑒰𑒿𑒏 𑒢𑒰𑒧𑒮𑒿 𑒃𑒢𑓂𑒮𑓂𑒨𑒼𑒩𑒹𑒢𑓂𑒮𑒏 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒁𑒕𑒱, 𑒫𑒻𑒯 𑒠𑒳𑒩𑓂𑒒𑒙𑒢𑒰 𑒥𑒲𑒧𑒰 𑒏𑒩𑒥𑒰 𑒩𑒯𑒪 𑒁𑒕𑒱 𑒮𑒦𑒏”। 𑒩𑒼𑒯𑒱𑒝𑒲 𑒂 𑒁𑒩𑒱𑒢𑓂𑒠𑒧 𑒖𑒹𑒢𑒰 𑒮𑓀𑒑𑒹 𑒥𑒰𑒖𑒱 𑒅𑒚𑒪𑒰𑒯।
𑒞𑒐𑒢𑒹 𑒠𑒹𑒫𑒑𑒢 𑒔𑒰𑒯𑒏 𑒙𑓂𑒩𑒹 𑒪𑒹𑒢𑒹 𑒂𑒋𑒪। 𑒨𑒰𑒠𑒫𑒖𑒲𑒏𑒹𑒿 𑒤𑒰𑒩𑓂𑒧𑒏 𑒞𑒯𑒏𑒲𑒏𑒰𑒞 𑒏𑒩𑒻𑒞 𑒠𑒹𑒐𑒱 𑒍𑒏𑒩 𑒠𑒹𑒯 𑒮𑒩𑓂𑒠 𑒦𑓄 𑒑𑒹𑒪𑒻𑒏।
“𑒠𑒴 𑒙𑒰 𑒤𑒰𑒩𑓂𑒧 𑒯𑒧𑒩𑒼𑒮𑒿 𑒦𑒩𑒥𑒰 𑒪𑒱𑒁”- 𑒨𑒰𑒠𑒫𑒖𑒲 𑒠𑒹𑒫𑒑𑒢𑒏𑒹𑒿 𑒏𑒯𑒪𑒐𑒱𑒢𑓂𑒯।
𑒠𑒹𑒫𑒑𑒢𑒏𑒹𑒿 𑒞𑒿 𑒏𑒰𑒢𑒣𑒩 𑒫𑒱𑒬𑓂𑒫𑒰𑒮𑒹 𑒢𑒯𑒱 𑒦𑒹𑒪𑒻𑒏। 𑒠𑒾𑒑𑒱 𑒏𑓄 𑒠𑒴 𑒙𑒰 𑒤𑒰𑒩𑓂𑒧 𑒁𑒢𑒪𑒏।
“𑒋𑒏𑒙𑒰 𑒯𑒧𑒩𑒰 𑒢𑒰𑒧𑒮𑒿 𑒦𑒩𑒴 𑒂 𑒋𑒏𑒙𑒰 𑒮𑒥𑒲𑒢𑒰 𑒨𑒰𑒠𑒫𑒏 𑒢𑒰𑒧𑒮𑒿”।
“𑒧𑒹𑒧 𑒮𑒰𑒯𑒥𑒏 𑒢𑒰𑒧 𑒮𑒥𑒲𑒢𑒰 𑒨𑒰𑒠𑒫 𑒕𑒢𑓂𑒯𑒱?”
“𑒯𑒿”।
𑒤𑒰𑒩𑓂𑒧 𑒖𑒐𑒢 𑒦𑒩𑒰𑒋 𑒪𑒰𑒑𑒪 𑒞𑒿 𑒢𑒰𑒧𑒱𑒢𑒹𑒬𑒢𑒏 𑒏𑒰𑒪𑒧 𑒧𑒹 𑒠𑒹𑒫𑒑𑒢 𑒨𑒰𑒠𑒫𑒖𑒲 𑒥𑒪𑒰 𑒤𑒰𑒩𑓂𑒧𑒧𑒹 𑒮𑒥𑒲𑒢𑒰 𑒨𑒰𑒠𑒫 𑒂 𑒮𑒥𑒲𑒢𑒰 𑒨𑒰𑒠𑒫 𑒥𑒪𑒰 𑒤𑒰𑒩𑓂𑒧𑒧𑒹 𑒨𑒰𑒠𑒫 𑒖𑒲𑒏 𑒢𑒰𑒧 𑒦𑒩𑒱 𑒠𑒹𑒪𑒏।
“𑒄 𑒏𑒲 𑒏𑒹𑒪𑒯𑒳𑒿, 𑒠𑒳𑒢𑒴 𑒤𑒰𑒩𑓂𑒧 𑒔𑒹𑒢𑓂𑒖 𑒏𑒩𑒴। 𑒢𑒰𑒧𑒱𑒢𑒹𑒬𑒢𑒏 𑒏𑒲 𑒖𑒩𑒴𑒩𑒞𑒱 𑒁𑒕𑒱। 𑒯𑒧𑒩𑒰 𑒣𑒞𑓂𑒢𑒲𑒏 𑒣𑒰𑒃𑒏 𑒏𑒼𑒢𑒼 𑒐𑒑𑒞𑒰 𑒢𑒯𑒱 𑒁𑒕𑒱”।
𑒠𑒹𑒫𑒑𑒢 𑒠𑒳𑒢𑒴 𑒤𑒰𑒩𑓂𑒧 𑒤𑒰𑒛𑓃𑒱 𑒠𑒴 𑒙𑒰 𑒢𑒫 𑒤𑒰𑒩𑓂𑒧 𑒦𑒩𑒪𑒏। 𑒁𑒣𑒢 𑒤𑒰𑒩𑓂𑒧𑒧𑒹 𑒨𑒰𑒠𑒫𑒖𑒲 𑒯𑒮𑓂𑒞𑒰𑒏𑓂𑒭𑒩 𑒏𑒋𑒪𑒢𑓂𑒯𑒱 𑒂 𑒠𑒼𑒮𑒩 𑒤𑒰𑒩𑓂𑒧 𑒮𑒰𑒃𑒢 𑒏𑒩𑒹𑒥𑒰𑒏 𑒪𑒹𑒪 𑒠𑒹𑒫𑒑𑒢𑒏𑒹𑒿 𑒣𑒞𑒰 𑒪𑒱𑒐𑒱 𑒏𑓄 𑒠𑒹𑒥𑓄 𑒪𑒑𑒪𑒰𑒯।
“𑒯𑒧𑒩𑒰 𑒁𑒯𑒰𑒿𑒏 𑒛𑒹𑒩𑒰 𑒠𑒹𑒐𑒪 𑒁𑒕𑒱 𑒮𑒰𑒯𑒥”।
“𑒄 𑒠𑒼𑒮𑒩 𑒣𑒞𑒰 𑒕𑒲, 𑒩𑒰𑒐𑒴”।
𑒩𑒼𑒯𑒱𑒝𑒲𑒏 𑒏𑒰𑒢 𑒚𑒰𑒜𑓃 𑒦𑓄 𑒑𑒹𑒪𑒢𑓂𑒯𑒱। 𑒍 𑒨𑒰𑒠𑒫𑒖𑒲𑒏 𑒥𑒰𑒯𑒩 𑒑𑒹𑒪𑒰𑒏 𑒥𑒰𑒠 𑒠𑒹𑒫𑒑𑒢𑒏 𑒏𑒰𑒢𑒧𑒹 𑒏𑒱𑒕𑒳 𑒏𑒯𑒪𑒢𑓂𑒯𑒱। 𑒁𑒩𑒱𑒢𑓂𑒠𑒧 𑒁𑒣𑒢 𑒏𑒰𑒖𑒧𑒹 𑒪𑒰𑒑𑒪 𑒩𑒯𑒪।
“𑒨𑒰𑒠𑒫𑒖𑒲 𑒕𑒟𑒱?” 𑒤𑒼𑒢𑒣𑒩 𑒣𑒰𑒩𑒳𑒪 𑒩𑒯𑒟𑒱।
“𑒨𑒰𑒠𑒫𑒖𑒲𑒏 𑒙𑓂𑒩𑒰𑒢𑓂𑒮𑒤𑒩 𑒦𑓄 𑒑𑒹𑒪𑒢𑓂𑒯𑒱”।
“𑒗𑒴𑒚 𑒢𑒯𑒱 𑒥𑒰𑒖𑒴, 𑒯𑒳𑒢𑒏𑒰 𑒤𑒼𑒢 𑒠𑒱𑒨𑒢𑓂𑒯𑒳”।
“𑒯𑒹, 𑒢𑒯𑒱 𑒞𑒿 𑒯𑒧 𑒁𑒯𑒰𑒿𑒏 𑒢𑒼𑒏𑒩 𑒕𑒲 𑒂 𑒢𑒯𑒱𑒨𑒹 𑒁𑒯𑒰𑒿𑒏 𑒨𑒰𑒠𑒫 𑒖𑒲𑒏” -𑒄 𑒏𑒯𑒻𑒞 𑒁𑒩𑒱𑒢𑓂𑒠𑒧 𑒤𑒼𑒢 𑒣𑒙𑒏𑒱 𑒠𑒹𑒪𑒏। 𑒥𑒲𑒔𑒧𑒹 𑒏𑒞𑒹𑒏 𑒠𑒱𑒢𑒮𑒿 𑒩𑒼𑒯𑒱𑒝𑒲 𑒤𑒼𑒢 𑒅𑒚𑒥𑒻𑒞 𑒕𑒪𑒲𑒯। 𑒂𑒃 𑒍 𑒏𑒞𑒯𑒳 𑒋𑒧𑓂𑒯𑒩-𑒍𑒧𑓂𑒯𑒩 𑒕𑒪𑒲𑒯 𑒮𑒹 𑒁𑒩𑒱𑒢𑓂𑒠𑒧𑒏𑒹𑒿 𑒤𑒼𑒢 𑒅𑒚𑒰𑒥𑒋 𑒣𑒛𑓃𑒪 𑒩𑒯𑒻𑒏।
𑒩𑒼𑒯𑒱𑒝𑒲 𑒞𑒐𑒢𑒹 𑒣𑒯𑒳𑒿𑒔𑒱 𑒑𑒹𑒪 𑒕𑒪𑒲𑒯- “𑒁𑒦𑓂𑒨𑒰𑒮 𑒐𑒞𑒧 𑒦𑓄 𑒑𑒹𑒢𑒹 𑒞𑒰𑒧𑒮 𑒅𑒚𑒱 𑒑𑒹𑒪 𑒁𑒯𑒰𑒿𑒏𑒹𑒿”। 𑒁𑒩𑒱𑒢𑓂𑒠𑒧 𑒮𑓂𑒫𑒲𑒏𑒵𑒞𑒱𑒧𑒹 𑒧𑒴𑒛𑓃𑒲 𑒛𑒼𑒪𑒹𑒪𑒏।
𑒂𑒃 𑒂𑒤𑒱𑒮 𑒁𑒥𑒻𑒞 𑒏𑒰𑒪 𑒏𑒰𑒩𑒏 𑒋𑒤.𑒋𑒧.𑒣𑒩 𑒩𑒹𑒛𑒱𑒨𑒼 𑒧𑒱𑒩𑓂𑒔𑒲 𑒣𑒩 𑒔𑒪𑒱 𑒩𑒯𑒪 𑒁𑒝𑓂𑒙-𑒬𑒝𑓂𑒙 𑒑𑒣 𑒢𑒲𑒏 𑒪𑒰𑒑𑒱 𑒩𑒯𑒪 𑒕𑒪𑒻𑒏 𑒁𑒩𑒱𑒢𑓂𑒠𑒧𑒏𑒹𑒿।
“𑒯𑒧𑒩 𑒥𑒛𑓃𑒏𑒰 𑒥𑒹𑒙𑒰 𑒮𑒳𑒧𑒢𑓂𑒞 𑒞𑒹𑒪𑒳𑒑𑒳 𑒐𑒴𑒥 𑒢𑒲𑒏 𑒖𑒏𑒰𑒿 𑒥𑒖𑒻𑒞 𑒁𑒕𑒱 𑒧𑒳𑒠𑒰 𑒕𑒼𑒙𑒏𑒰 𑒯𑒱𑒢𑓂𑒠𑒲 𑒥𑒰𑒖𑒋 𑒪𑒰𑒑𑒪 𑒁𑒕𑒱। 𑒯𑒻𑒠𑒩𑒰𑒥𑒰𑒠𑒮𑒿 𑒠𑒰𑒠𑒰𑒏 𑒤𑒼𑒢 𑒁𑒥𑒻𑒞 𑒕𑒻𑒏 𑒞𑒿 𑒯𑒳𑒢𑒏𑒼 𑒯𑒱𑒢𑓂𑒠𑒲𑒨𑒹𑒧𑒹 𑒖𑒫𑒰𑒥 𑒠𑒻𑒞 𑒁𑒕𑒱। 𑒯𑒳𑒢𑒏𑒰 𑒯𑒱𑒢𑓂𑒠𑒲 𑒁𑒥𑒱𑒞𑒹 𑒢𑒯𑒱 𑒕𑒢𑓂𑒯𑒱। 𑒒𑒩𑒧𑒹 𑒣𑒞𑒱 𑒞𑒹𑒪𑒳𑒑𑒳 𑒥𑒖𑒥𑒰𑒏 𑒁𑒦𑒱𑒨𑒰𑒢 𑒬𑒳𑒩𑒳 𑒏𑒋𑒢𑒹 𑒕𑒟𑒱”- 𑒩𑒼𑒯𑒱𑒝𑒲 𑒥𑒰𑒖𑒱 𑒩𑒯𑒪 𑒕𑒪𑒲𑒯।
“𑒁𑒔𑓂𑒕𑒰”।
“𑒥𑒳𑒗𑒪𑒯𑒳𑒿, 𑒣𑒰𑒩𑒳𑒪𑒏 𑒤𑒼𑒢 𑒂𑒋𑒪 𑒩𑒯𑒋। 𑒏𑒯𑒻𑒞 𑒩𑒯𑒋 𑒖𑒹 𑒁𑒩𑒱𑒢𑓂𑒠𑒧 𑒖𑒲𑒏 𑒯𑒧 𑒏𑒼𑒢𑒼 𑒥𑒏𑒛𑓃𑒲 𑒞𑒿 𑒢𑒯𑒱 𑒐𑒼𑒪𑒱 𑒪𑒹𑒢𑒹 𑒕𑒪𑒱𑒨𑒢𑓂𑒯𑒱 𑒖𑒹 𑒍𑒢𑒰 𑒏𑓄 𑒤𑒼𑒢𑒣𑒩 𑒗𑒗𑒏𑒰𑒩𑒱 𑒅𑒚𑒪 𑒩𑒯𑒟𑒱”।
“𑒯𑒴𑒿”।
“𑒂 𑒄 𑒮𑒹𑒯𑒼 𑒥𑒰𑒖𑒱 𑒩𑒯𑒪 𑒕𑒪𑒱 𑒖𑒹 𑒍 𑒨𑒰𑒠𑒫𑒖𑒲 𑒣𑒩 𑒫𑒱𑒬𑓂𑒫𑒰𑒮 𑒏𑒋 𑒡𑒼𑒐𑒰 𑒐𑒋𑒪𑒏”।
“𑒍”।
“𑒂 𑒠𑒹𑒫𑒑𑒢 𑒑𑒹𑒪 𑒩𑒯𑒋 𑒨𑒰𑒠𑒫𑒖𑒲𑒏 𑒢𑒫𑒏𑒰 𑒒𑒩”।
“𑒢𑒫𑒏𑒰 𑒒𑒩? 𑒣𑒳𑒩𑒢𑒏𑒰 𑒒𑒩 𑒥𑒹𑒔𑒱 𑒠𑒹𑒪𑒢𑓂𑒯𑒱 𑒏𑒲?”
“𑒢𑒯𑒱। 𑒠𑒹𑒫𑒑𑒢𑒹𑒏 𑒏𑒯𑒪 𑒏𑒯𑒻𑒞 𑒕𑒲। 𑒣𑒳𑒩𑒢𑒏𑒰 𑒒𑒩𑒧𑒹 𑒨𑒰𑒠𑒫 𑒖𑒲𑒏 𑒣𑒯𑒱𑒪 𑒣𑒞𑓂𑒢𑒲 𑒩𑒯𑒻𑒞 𑒕𑒟𑒱𑒢𑓂𑒯, 𑒫𑒻𑒯 𑒁𑒯𑒰𑒿𑒏 𑒑𑒧𑓂𑒦𑒲𑒩 𑒮𑓂𑒫𑒩𑒫𑒰𑒪𑒲। 𑒂 𑒢𑒫𑒏𑒰 𑒒𑒩𑒧𑒹 𑒢𑒫𑒏𑒲 𑒔𑒳𑒪𑒥𑒳𑒪𑒲 𑒏𑒢𑒱𑒨𑒰𑒿 𑒩𑒯𑒻𑒞 𑒕𑒢𑓂𑒯𑒱। 𑒋𑒏𑒙𑒰 𑒏𑒼𑒜𑓃𑒔𑒱𑒪𑓂𑒏𑒼 𑒠𑒹𑒐𑒪𑒏 𑒠𑒹𑒫𑒑𑒢। 𑒨𑒰𑒠𑒫𑒖𑒲𑒏 𑒥𑒹𑒙𑒰 𑒩𑒯𑒢𑓂𑒯𑒱 𑒣𑓂𑒩𑒰𑒨𑓁”।
𑒧𑒵𑒞𑓂𑒨𑒳𑒠𑒝𑓂𑒛
𑒫𑒱𑒫𑒰𑒯𑒏 𑒅𑒣𑒩𑒰𑒢𑓂𑒞 𑒜𑓃𑒹𑒩𑒲-𑒜𑓃𑒰𑒏𑒲 𑒪𑒼𑒏 𑒯𑒧𑒩𑒰𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳 𑒮𑒰𑒮𑒳𑒩𑒧𑒹 𑒂𑒥𑒱 𑒩𑒯𑒪 𑒕𑒪𑒰𑒯। 𑒞𑒰𑒯𑒱𑒧𑒹 𑒕𑒪𑒱 𑒋𑒏𑒙𑒰 𑒢𑒫𑒧𑓂 𑒏𑒏𑓂𑒭𑒰𑒏 𑒕𑒰𑒞𑓂𑒩𑒰 𑒂𑒩𑓂𑒨𑒰 𑒂 𑒍𑒏𑒩 𑒣𑒱𑒞𑒰𑒧𑒯𑒲 𑒂 𑒧𑒰𑒋।
𑒍 𑒧𑒰𑒋𑒏 𑒮𑓀𑒑 𑒢𑒯𑒱 𑒂𑒥𑒱 𑒁𑒮𑒑𑒩𑒹 𑒂𑒋𑒪 𑒕𑒪𑒲𑒯। 𑒐𑒴𑒥 𑒏𑒰𑒩𑒲, 𑒠𑒳𑒥𑒩-𑒣𑒰𑒞𑒩, 𑒂𑒫𑒬𑓂𑒨𑒏𑒞𑒰𑒮𑒿 𑒥𑒹𑒬𑒲 𑒁𑒢𑒳𑒬𑒰𑒮𑒱𑒞 𑒂 𑒬𑒱𑒭𑓂𑒙 𑒂 𑒢𑒰𑒣𑒱-𑒖𑒼𑒐𑒱 𑒏𑒋 𑒥𑒖𑒢𑒱𑒯𑒰𑒩𑒱। 𑒯𑒧𑒩𑒰𑒮𑒿 𑒮𑒦 𑒑𑒣𑒧𑒹 𑒅𑒪𑒙𑒰।
𑒯𑒧𑒩 𑒏𑒢𑒱𑒨𑒰𑒿 𑒯𑒳𑒢𑒏𑒰𑒮𑒿 𑒯𑒧𑒩 𑒣𑒩𑒱𑒔𑒨 𑒏𑒩𑒍𑒪𑒢𑓂𑒯𑒱 𑒂 𑒍𑒏𑒩 𑒣𑓂𑒩𑒬𑓀𑒮𑒰 𑒮𑒹𑒯𑒼 𑒏𑒋𑒪𑒢𑓂𑒯𑒱। 𑒏𑒱𑒕𑒳 𑒏𑒰𑒪𑒏 𑒥𑒰𑒠 𑒍𑒏𑒩 𑒣𑒱𑒞𑒰𑒧𑒯𑒲 𑒂 𑒧𑒰𑒋 𑒯𑒧𑒩𑒰𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳 𑒁𑒋𑒪𑒲𑒯 ।
𑒯𑒧𑒩𑒰 𑒁𑒢𑒳𑒦𑒫 𑒦𑒹𑒪 𑒖𑒹 𑒯𑒳𑒢𑒏𑒩 𑒣𑒱𑒞𑒰𑒧𑒯𑒲𑒏 𑒞𑒿 𑒪𑒹𑒯𑒰𑒖 𑒩𑒰𑒐𑒪 𑒑𑒹𑒪 𑒕𑒪 𑒧𑒳𑒠𑒰 𑒯𑒳𑒢𑒏𑒩 𑒧𑒰𑒋𑒏 𑒁𑒫𑒯𑒹𑒪𑒢𑒰 𑒮𑒢 𑒯𑒧𑒩 𑒏𑒢𑒱𑒨𑒰𑒿 𑒂 𑒮𑒰𑒮𑒳 𑒏𑒹𑒢𑒹 𑒕𑒪𑒐𑒱𑒢𑓂𑒯। 𑒑𑒣𑓂𑒣 𑒏𑒩𑒥𑒰𑒧𑒹 𑒍 𑒢𑒲𑒏 𑒕𑒪𑒲𑒯 𑒂 𑒖𑒰𑒃𑒞-𑒖𑒰𑒃𑒞 𑒏𑒯𑒱 𑒑𑒹𑒪𑒲𑒯 𑒖𑒹 𑒯𑒧𑒩𑒰 𑒮𑒦 𑒁𑒯𑒰𑒿𑒏 𑒮𑒮𑒳𑒩𑒏 𑒏𑒱𑒩𑒰𑒨𑒰𑒠𑒰𑒩 𑒕𑒲 𑒂 𑒅𑒣𑒩𑒏𑒰 𑒧𑒯𑒪𑒰 𑒣𑒩 𑒩𑒯𑒻𑒞 𑒕𑒲। 𑒮𑒹 𑒦𑒲𑒛𑓃-𑒦𑒰𑒛𑓃 𑒏𑒧 𑒦𑒹𑒪𑒰 𑒣𑒩 𑒁𑒫𑒬𑓂𑒨 𑒂𑒆।
𑒄 𑒑𑒣𑓂𑒣 𑒖𑒰𑒃𑒞-𑒖𑒰𑒃𑒞 𑒯𑒧𑒩 𑒮𑒰𑒮𑒳 𑒣𑓂𑒩𑒰𑒨𑓁 𑒮𑒳𑒢𑒱 𑒪𑒹𑒪𑒢𑓂𑒯𑒱 𑒮𑒹 𑒯𑒧𑒩 𑒣𑒞𑓂𑒢𑒲𑒏𑒹𑒿 𑒮𑓂𑒟𑒱𑒩𑒹𑒮𑒿 𑒧𑒳𑒠𑒰 𑒂𑒖𑓂𑒘𑒰𑒩𑓂𑒟𑒏 𑒩𑒴𑒣𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒆𑒣𑒩 𑒖𑒋𑒥𑒰𑒏 𑒏𑒼𑒢𑒼 𑒖𑒩𑒴𑒩𑒲 𑒢𑒯𑒱 𑒕𑒻𑒏। 𑒯𑒧 𑒣𑒞𑓂𑒢𑒲𑒮𑒿 𑒣𑒳𑒕𑒪𑒱𑒨𑒢𑓂𑒯𑒱 𑒖𑒹 𑒥𑒹𑒔𑒰𑒩𑒲 𑒋𑒞𑒹𑒏 𑒂𑒑𑓂𑒩𑒯𑒮𑒿 𑒥𑒖𑒍𑒪𑒢𑓂𑒯𑒱 𑒁𑒕𑒱। 𑒣𑒞𑓂𑒢𑒲 𑒏𑒯𑒪𑒟𑒱 𑒖𑒹 𑒮𑒳𑒢𑒪𑒱𑒨𑒻𑒏 𑒢𑒯𑒱, 𑒧𑒰𑒿 𑒧𑒢𑒰 𑒏𑒋𑒪𑒢𑓂𑒯𑒱 𑒁𑒕𑒱। 𑒏𑒰𑒩𑒝 𑒣𑒳𑒕𑒪𑒰 𑒣𑒩 𑒑𑒣 𑒁𑒢𑓂𑒚𑒰 𑒠𑒹𑒪𑒢𑓂𑒯𑒱।
𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠𑒏 𑒒𑒙𑒢𑒰 𑒕𑒲, 𑒁𑒢𑓂𑒯𑒩𑒼𑒐𑒹𑒧𑒹 𑒑𑒹𑒙𑒏 𑒗𑒧𑒰𑒛𑓃𑒱 𑒏𑒋 𑒐𑒳𑒖𑒥𑒰𑒏 𑒁𑒥𑒰𑒖 𑒦𑒹𑒪। 𑒪𑒰𑒑𑒪 𑒖𑒹 𑒏𑓂𑒨𑒼 𑒣𑒲𑒥𑒱 𑒏𑒋 𑒥𑒛𑓃𑒥𑒛𑓃𑒰 𑒩𑒯𑒪 𑒁𑒕𑒱। 𑒯𑒧𑒩 𑒁𑒞𑒱𑒩𑒱𑒏𑓂𑒞 𑒏𑓂𑒨𑒼 𑒍𑒯𑒱 𑒁𑒥𑒰𑒖 𑒣𑒩 𑒡𑓂𑒨𑒰𑒢 𑒢𑒯𑒱 𑒠𑒹𑒪𑒢𑓂𑒯𑒱 𑒂 𑒁𑒢𑓂𑒚𑒨𑒥𑒰𑒏 𑒮𑓂𑒫𑒰𑓀𑒑 𑒏𑒋𑒪𑒢𑓂𑒯𑒱। 𑒯𑒧 𑒥𑒰𑒯𑒩 𑒁𑒋𑒪𑒯𑒳𑒿 𑒞𑒿 𑒋𑒏𑒙𑒰 𑒁𑒡𑒫𑒨𑒮𑒳 𑒗𑒳𑒧𑒻𑒞 𑒁𑒥𑒻𑒞 𑒠𑒵𑒭𑓂𑒙𑒱𑒑𑒼𑒔𑒩 𑒦𑒹𑒪𑒰𑒯। 𑒯𑒧𑒩𑒰 𑒠𑒹𑒐𑒱 𑒛𑒼𑒪𑒻𑒞 𑒯𑒰𑒟𑒮𑒿 𑒖𑒧𑒰𑒨𑒥𑒰𑒥𑒴 𑒏𑒯𑒱 𑒢𑒧𑒮𑓂𑒏𑒰𑒩 𑒏𑒋𑒪𑒢𑓂𑒯𑒱। 𑒍 𑒁𑒐𑒢 𑒡𑒩𑒱 𑒯𑒧𑒩𑒰𑒮𑒿 𑒦𑒹𑒿𑒙 𑒢𑒯𑒱 𑒯𑒼𑒋𑒥𑒰𑒏 𑒏𑒰𑒩𑒝 𑒯𑒧𑒩 𑒣𑒞𑓂𑒢𑒲𑒏𑒹𑒿 𑒤𑒛𑓃𑒱𑒕𑒍𑒪𑒢𑓂𑒯𑒱 𑒂 𑒛𑒼𑒪𑒻𑒞 𑒆𑒣𑒩 𑒮𑒲𑒜𑓃𑒲𑒏 𑒠𑒱𑒬𑒮𑒿 𑒔𑒪𑒱 𑒑𑒹𑒪𑒰𑒯। 𑒯𑒧𑒩 𑒣𑒞𑓂𑒢𑒲 𑒯𑒰𑒟 𑒣𑒏𑒛𑓃𑒱 𑒏𑒋 𑒯𑒧𑒩𑒰 𑒦𑒲𑒞𑒩 𑒂𑒢𑒱 𑒪𑒹𑒪𑒢𑓂𑒯𑒱 𑒂 𑒄𑒯𑒼 𑒮𑒴𑒔𑒢𑒰 𑒠𑒹𑒪𑒢𑓂𑒯𑒱 𑒖𑒹 𑒄𑒋𑒯 𑒂𑒩𑓂𑒨𑒰𑒏 𑒣𑒱𑒞𑒰 𑒟𑒲𑒏। 𑒁𑒢𑒰𑒨𑒰𑒮𑒯𑒱 𑒯𑒧𑒩𑒰 𑒧𑒰𑒟𑒧𑒹 𑒂𑒋𑒪 𑒖𑒹 𑒩𑓀𑒑 𑒖𑒹 𑒂𑒩𑓂𑒨𑒰𑒏 𑒕𑒻𑒏 𑒮𑒹 𑒥𑒰𑒣𑒹 𑒣𑒩 𑒑𑒹𑒪 𑒕𑒻𑒏।
𑒥𑒰𑒠𑒧𑒹 𑒯𑒧𑒩 𑒮𑒰𑒮𑒳 𑒆𑒣𑒩 𑒖𑒰 𑒏𑒋 𑒦𑒰𑒭𑒝 𑒠𑒋 𑒁𑒋𑒪𑒲𑒯 𑒂 𑒋𑒏 𑒧𑒯𑒱𑒢𑒰𑒏 𑒦𑒲𑒞𑒩 𑒒𑒩 𑒕𑒼𑒛𑓃𑒥𑒰𑒏 𑒁𑒪𑓂𑒙𑒲𑒧𑒹𑒙𑒧 𑒮𑒹𑒯𑒼 𑒂𑒩𑓂𑒨𑒰𑒏 𑒣𑒩𑒱𑒫𑒰𑒩𑒏𑒹𑒿 𑒠𑒋 𑒠𑒹𑒪𑒢𑓂𑒯𑒱। 𑒯𑒧𑒩 𑒮𑒰𑒩 𑒏𑒯𑒪𑒟𑒱 𑒖𑒹 𑒄 𑒠𑒮𑒧 𑒁𑒪𑓂𑒙𑒲𑒧𑒹𑒙𑒧 𑒕𑒻𑒏 𑒧𑒳𑒠𑒰 𑒯𑒧𑒩 𑒮𑒰𑒮𑒳 𑒁𑒛𑒱𑒑 𑒕𑒪𑒲𑒯 𑒖𑒹 𑒏𑒱𑒕𑒳 𑒦𑒋 𑒖𑒰𑒋 𑒋𑒯𑒱 𑒥𑒹𑒩 𑒍 𑒢𑒯𑒱 𑒧𑒰𑒢𑒞𑒲𑒯। 𑒖𑒧𑒰𑒨 𑒏𑒲 𑒥𑒳𑒗𑒞𑒰𑒯 𑒖𑒹 𑒏𑒹𑒯𑒢 𑒦𑒰𑒛𑓃𑒰𑒠𑒰𑒩 𑒩𑒐𑒢𑒹 𑒕𑒲 𑒯𑒧 𑒮𑒦। 𑒣𑒯𑒱𑒢𑒹 𑒚𑒏𑒱𑒨𑒰-𑒤𑒳𑒮𑒱𑒨𑒰 𑒏𑒋 𑒥𑒯𑒙𑒰𑒩𑒱 𑒪𑒻𑒞 𑒕𑒪।
𑒣𑒳𑒕𑒪𑒰 𑒣𑒩 𑒣𑒞𑒰 𑒔𑒪𑒪 𑒖𑒹 𑒂𑒩𑓂𑒨𑒰𑒏 𑒣𑒱𑒞𑒰 𑒛𑒰𑒏𑓂𑒙𑒩 𑒕𑒻𑒏 𑒂 𑒮𑒹𑒯𑒼 𑒯𑒼𑒧𑒱𑒨𑒼𑒣𑒻𑒟𑒱𑒏, 𑒂𑒨𑒳𑒩𑓂𑒫𑒹𑒠𑒱𑒏 𑒏𑒱𑓀𑒫𑒰 𑒦𑒹𑒙𑒢𑒩𑒲 𑒢𑒯𑒱 𑒫𑒩𑒢𑓂 𑒋𑒧.𑒥𑒲.𑒥𑒲.𑒋𑒮.। 𑒧𑒳𑒠𑒰 𑒪𑒏𑓂𑒭𑒝 𑒠𑒹𑒐𑒱𑒨𑒾𑒏। 𑒍𑒢𑒰 𑒮𑒰𑒮𑒳 𑒄𑒯𑒼 𑒑𑒣 𑒏𑒯𑒪𑒢𑓂𑒯𑒱 𑒖𑒹 𑒄 𑒣𑒲𑒢𑒹 𑒩𑒯𑒥𑒰𑒏 𑒅𑒣𑒩𑒰𑒢𑓂𑒞𑒼 𑒑𑒣𑓂𑒣 𑒋𑒏𑒼𑒙𑒰 𑒁𑒦𑒠𑓂𑒩 𑒢𑒯𑒱 𑒥𑒖𑒻𑒞 𑒁𑒕𑒱, 𑒖𑒹𑒢𑒰 𑒂𑒢 𑒣𑒲𑒢𑒯𑒰𑒩 𑒮𑒦𑒏 𑒮𑓀𑒑 𑒯𑒼𑒃𑒞 𑒕𑒻𑒏। 𑒧𑒢𑒳𑒏𑓂𑒐𑒼 𑒚𑒲𑒏𑒹 𑒁𑒕𑒱 𑒧𑒳𑒠𑒰 𑒨𑒻𑒯 𑒖𑒹 𑒋𑒏𑒙𑒰 𑒑𑒛𑓃𑒥𑒛𑓃𑒲 𑒕𑒻𑒏 𑒮𑒹 𑒥𑒛𑓂𑒛 𑒦𑒰𑒩𑒲।
𑒁𑒑𑒪𑒰 𑒠𑒱𑒢 𑒢𑒬𑒰 𑒅𑒞𑒩𑒪𑒰𑒏 𑒥𑒰𑒠 𑒣𑒞𑒱-𑒣𑒞𑓂𑒢𑒲 𑒠𑒳𑒢𑒴 𑒑𑒼𑒙𑒹 𑒢𑒲𑒔𑒰𑒿 𑒁𑒋𑒪𑒰𑒯 𑒂 𑒮𑒰𑒮𑒳𑒏𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒂𑒩𑓂𑒨𑒰𑒏 𑒥𑒼𑒩𑓂𑒛𑒏 𑒥𑒰𑒠 𑒍 𑒮𑒦 𑒣𑒙𑒢𑒰 𑒔𑒪𑒱 𑒖𑒋𑒞𑒲𑒯 𑒮𑒹 𑒯𑒳𑒢𑒏𑒰 𑒮𑒦𑒏 𑒐𑒰𑒞𑒱𑒩 𑒢𑒯𑒱 𑒧𑒳𑒠𑒰 𑒂𑒩𑓂𑒨𑒰𑒏 𑒐𑒰𑒞𑒱𑒩 𑒞𑒰𑒫𑒞 𑒡𑒩𑒱 𑒩𑒯𑒋 𑒠𑒱𑒁। 𑒒𑒼𑒿𑒒𑒰𑒅𑒖𑒏 𑒥𑒰𑒠 𑒮𑒹 𑒧𑒼𑒯𑒪𑒞𑒱 𑒦𑒹𑒙𑒱 𑒖𑒰𑒋 𑒑𑒹𑒪𑒢𑓂𑒯𑒱। 𑒞𑒏𑒩𑒰 𑒥𑒰𑒠 𑒯𑒳𑒢𑒏𑒩 𑒣𑒞𑓂𑒢𑒲𑒏 𑒢𑒖𑒩𑒱 𑒯𑒧𑒩𑒰𑒮𑒿 𑒧𑒱𑒪𑒪 𑒞𑒿 𑒍 𑒏𑒯𑒪𑒢𑓂𑒯𑒱 𑒖𑒹 𑒁𑒯𑒰𑒿 𑒞𑒿 𑒆𑒣𑒩 𑒢𑒯𑒱𑒨𑒹 𑒂𑒋𑒥। 𑒂 𑒋𑒯𑒱 𑒥𑒹𑒩 𑒆𑒣𑒩 𑒁𑒋𑒥𑒰𑒏 𑒂𑒑𑓂𑒩𑒯𑒼 𑒢𑒯𑒱 𑒏𑒋𑒪𑒟𑒱।
𑒏𑒱𑒕𑒳 𑒠𑒱𑒢 𑒥𑒲𑒞𑒪 𑒂 𑒤𑒹𑒩 𑒮𑒰𑒮𑒳𑒩 𑒖𑒨𑒥𑒰𑒏 𑒁𑒫𑒮𑒩 𑒦𑒹𑒙𑒪। 𑒏𑒱𑒕𑒳 𑒠𑒱𑒢𑒧𑒹 𑒣𑒞𑒰 𑒔𑒪𑒪 𑒖𑒹 𑒏𑒱𑒩𑒰𑒨𑒰𑒠𑒰𑒩 𑒥𑒠𑒪𑒱 𑒑𑒹𑒪 𑒕𑒟𑒱। 𑒒𑒩𑒏 𑒪𑒼𑒏 𑒧𑒰𑒞𑓂𑒩 𑒋𑒞𑒥𑒹 𑒏𑒯𑒪𑒟𑒱 𑒖𑒹 𑒂𑒩𑓂𑒨𑒰𑒏 𑒣𑒱𑒞𑒰𑒏 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒢𑓂𑒯𑒱 𑒂 𑒁𑒢𑒳𑒏𑒧𑓂𑒣𑒰𑒏 𑒂𑒡𑒰𑒩 𑒣𑒩 𑒍𑒏𑒩 𑒧𑒰𑒋𑒏𑒹𑒿 𑒢𑒾𑒏𑒩𑒲 𑒦𑒹𑒙𑒱 𑒑𑒹𑒪𑒻𑒏। 𑒂𑒥 𑒍 𑒮𑒦 𑒏𑓂𑒨𑒼 𑒣𑒙𑒢𑒰𑒧𑒹 𑒩𑒯𑒻𑒞 𑒕𑒟𑒱।
𑒒𑒩𑒏 𑒪𑒼𑒏 𑒂𑒑𑒰𑒿 𑒏𑒱𑒕𑒳 𑒢𑒯𑒱 𑒏𑒯𑒪𑒢𑓂𑒯𑒱 𑒧𑒳𑒠𑒰 𑒏𑒢𑒱𑒨𑒰𑒿𑒏 𑒋𑒏𑒙𑒰 𑒣𑒱𑒞𑒨𑒾𑒞 𑒦𑒰𑒋 𑒂𑒋𑒪 𑒩𑒯𑒟𑒱, 𑒮𑒹 𑒏𑒯𑒪𑒟𑒱 𑒖𑒹 𑒛𑒰𑒏𑓂𑒙𑒩𑒲 𑒩𑒱𑒣𑒼𑒩𑓂𑒙𑒧𑒹 𑒫𑒱𑒭 𑒐𑒰 𑒏𑒋 𑒂𑒞𑓂𑒧𑒯𑒞𑓂𑒨𑒰𑒏 𑒫𑒩𑓂𑒝𑒢 𑒩𑒯𑒋। 𑒤𑒹𑒩 𑒂𑒑𑒰𑒿 𑒣𑒞𑒱-𑒣𑒞𑓂𑒢𑒲𑒏 𑒧𑒡𑓂𑒨 𑒧𑒔𑒪 𑒞𑒳𑒧𑒳𑒪𑒏 𑒔𑒩𑓂𑒔 𑒦𑒹𑒪। 𑒛𑒰𑒏𑓂𑒙𑒩𑒏 𑒏𑒢𑒱𑒨𑒰𑒿 𑒏𑒯𑒻𑒞 𑒩𑒯𑒟𑒱𑒢𑓂𑒯 𑒖𑒹 𑒄 𑒛𑒰𑒏𑓂𑒙𑒩 𑒥𑒛𑓂𑒛 𑒣𑒱𑒥𑒻𑒞 𑒕𑒟𑒱 𑒞𑒰𑒯𑒱 𑒪𑒹𑒪 𑒗𑒑𑒛𑓃𑒰 𑒯𑒼𑒃𑒞 𑒁𑒕𑒱 𑒞𑒿 𑒛𑒰𑒏𑓂𑒙𑒩 𑒮𑒰𑒯𑒥 𑒏𑒯𑒟𑒱 𑒖𑒹 𑒗𑒑𑒛𑓃𑒰𑒏 𑒠𑓂𑒫𑒰𑒩𑒹 𑒣𑒱𑒥𑒻𑒞 𑒕𑒲। 𑒁𑒮𑓂𑒞𑒳 𑒧𑒵𑒞𑓂𑒨𑒳𑒏 𑒥𑒰𑒠 𑒯𑒳𑒢𑒏𑒩 𑒏𑒢𑒱𑒨𑒰𑒿𑒏 𑒦𑒰𑒫 𑒋𑒯𑒢 𑒮𑒢 𑒕𑒪 𑒖𑒹𑒢𑒰 𑒧𑒳𑒏𑓂𑒞𑒱 𑒦𑒹𑒙𑒱 𑒑𑒹𑒪 𑒯𑒼𑒃𑒢𑓂𑒯𑒱 𑒂 𑒋𑒯𑒱 𑒥𑒰𑒞𑒧𑒹 𑒮𑒦 𑒏𑓂𑒨𑒼 𑒋𑒏 𑒧𑒞 𑒩𑒯𑒟𑒱।
𑒋𑒏𑒙𑒰 𑒮𑒰𑒩𑒱 𑒩𑒯𑒟𑒱, 𑒯𑒳𑒢𑒏𑒩 𑒑𑒣 𑒮𑒹𑒯𑒼 𑒧𑒼𑒢 𑒣𑒛𑓃𑒪। 𑒋𑒏 𑒑𑒼𑒙 𑒨𑒳𑒫𑒏𑒏 𑒫𑒱𑒭𑒨𑒧𑒹 𑒂𑒩𑓂𑒨𑒰 𑒏𑒯𑒻𑒞 𑒕𑒪𑒱 । 𑒍𑒏𑒩𑒰 𑒮𑓀𑒑𑒲𑒏𑒹𑒿 𑒯𑒼𑒃𑒞 𑒕𑒻𑒏 𑒖𑒹 𑒍 𑒨𑒳𑒫𑒏 𑒍𑒏𑒩𑒰𑒮𑒿 𑒣𑓂𑒩𑒹𑒧 𑒏𑒩𑒻𑒞 𑒁𑒕𑒱। 𑒧𑒳𑒠𑒰 𑒂𑒩𑓂𑒨𑒰𑒏 𑒧𑒞 𑒕𑒪 𑒖𑒹 𑒍 𑒨𑒳𑒫𑒏 𑒍𑒏𑒩 𑒮𑓀𑒑𑒲𑒮𑒿 𑒢𑒯𑒱 𑒫𑒩𑒢𑓂 𑒂𑒩𑓂𑒨𑒰𑒮𑒿 𑒣𑓂𑒩𑒹𑒧 𑒏𑒩𑒻𑒞 𑒕𑒪। 𑒯𑒧 𑒮𑒰𑒩𑒱𑒏𑒹𑒿 𑒏𑒯𑒢𑒹 𑒩𑒯𑒱𑒨𑒢𑓂𑒯𑒱 𑒖𑒹 𑒂𑒩𑓂𑒨𑒰 𑒥𑒔𑓂𑒔𑒰 𑒁𑒕𑒱, 𑒍𑒯𑒱𑒢𑒰 𑒯𑒿𑒮𑒲 𑒏𑒋𑒢𑒹 𑒯𑒼𑒋𑒞। 𑒧𑒳𑒠𑒰 𑒍 𑒏𑒯𑒪𑒢𑓂𑒯𑒱, 𑒖𑒹 𑒢𑒯𑒱 𑒨𑒾। 𑒥𑒛𑓂𑒛 𑒦𑒰𑒫𑒳𑒏 𑒁𑒕𑒱 𑒂𑒩𑓂𑒨𑒰। 𑒏𑒯𑒻𑒞 𑒁𑒕𑒱 𑒖𑒹 𑒍𑒯𑒱 𑒨𑒳𑒫𑒏𑒏𑒹 𑒣𑓂𑒩𑒰𑒣𑓂𑒞 𑒏𑒩𑒥𑒰𑒏 𑒯𑒹𑒞𑒳 𑒏𑒱𑒕𑒳𑒍 𑒏𑒩𑒞। 𑒣𑒞𑒰 𑒪𑒰𑒑𑒪 𑒖𑒹 𑒍 𑒨𑒳𑒫𑒏 𑒏𑒼𑒢𑒼 𑒣𑒳𑒩𑒰𑒢 𑒧𑒯𑒰𑒩𑒰𑒢𑒲𑒏 𑒥𑒹𑒙𑒲𑒏 𑒥𑒹𑒙𑒰 𑒕𑒲। 𑒍𑒏𑒩 𑒧𑒰𑒞𑒰 𑒬𑒱𑒏𑓂𑒭𑒱𑒏𑒰 𑒁𑒕𑒱 𑒂 𑒥𑒰𑒣 𑒧𑒹𑒩𑒲𑒢𑒧𑒹 𑒏𑒰𑒖 𑒏𑒩𑒻𑒞 𑒁𑒕𑒱। 𑒮𑒰𑒪-𑒕𑒯 𑒧𑒰𑒮 𑒣𑒩 𑒁𑒥𑒻𑒞 𑒕𑒪 𑒂 𑒖𑒐𑒢 𑒁𑒥𑒻𑒞 𑒕𑒪 𑒞𑒿 𑒖𑒹 𑒧𑒰𑒮-𑒣𑓀𑒠𑓂𑒩𑒯 𑒠𑒱𑒢 𑒩𑒯𑒻𑒞 𑒕𑒪 𑒮𑒹 𑒧𑒰𑒩𑒱-𑒣𑒲𑒙𑒧𑒹 𑒥𑒱𑒞𑒰 𑒠𑒻𑒞 𑒕𑒪। 𑒣𑒴𑒩𑒰 𑒧𑒼𑒯𑒪𑓂𑒪𑒰𑒧𑒹 𑒥𑒠𑒢𑒰𑒧𑒲 𑒕𑒻𑒏। 𑒧𑒰𑒋𑒏 𑒬𑒲𑒪-𑒮𑓂𑒫𑒦𑒰𑒫 𑒥𑒛𑓂𑒛 𑒢𑒲𑒏, 𑒥𑒼𑒪𑒲𑒮𑒿 𑒤𑒴𑒪-𑒗𑒛𑓃𑒻𑒞 𑒕𑒻𑒏। 𑒥𑒰𑒣𑒏𑒹𑒿 𑒞𑒿 𑒪𑒼𑒏 𑒔𑒱𑒢𑓂𑒯𑒱𑒞𑒼 𑒢𑒯𑒱 𑒕𑒻𑒏। 𑒐𑒰𑒪𑒲 𑒗𑒑𑒛𑓃𑒰𑒏 𑒁𑒥𑒰𑒖𑒹 𑒮𑒳𑒢𑒻𑒞 𑒁𑒕𑒱 𑒪𑒼𑒏। 𑒋𑒏 𑒥𑒹𑒩 𑒂𑒩𑓂𑒨𑒰𑒏 𑒮𑓀𑒑𑒲𑒏𑒹𑒿 𑒮𑓂𑒏𑒴𑒪 𑒥𑒮𑒮𑒿 𑒅𑒞𑒩𑒥𑒰 𑒏𑒰𑒪 𑒏𑓂𑒨𑒼 𑒞𑓀𑒑 𑒏𑒋𑒢𑒹 𑒕𑒪 𑒞𑒿 𑒍 𑒨𑒳𑒫𑒏 𑒮𑒦𑒏𑒹𑒿 𑒧𑒰𑒩𑒱-𑒣𑒲𑒙𑒱 𑒏𑒋 𑒦𑒑𑒰 𑒠𑒹𑒢𑒹 𑒕𑒪 । 𑒋𑒯𑒱 𑒥𑒰𑒞 𑒣𑒩 𑒯𑒧 𑒞𑒐𑒢 𑒏𑒼𑒢𑒼 𑒥𑒹𑒬𑒲 𑒡𑓂𑒨𑒰𑒢 𑒢𑒯𑒱 𑒠𑒹𑒢𑒹 𑒩𑒯𑒱𑒨𑒻𑒏।
𑒂 𑒞𑒏𑒩 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒂𑒩𑓂𑒨𑒰𑒏 𑒣𑒱𑒞𑒰𑒏 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒻𑒏 𑒂 𑒍 𑒋𑒯𑒱 𑒬𑒯𑒩𑒮𑒿 𑒠𑒴𑒩 𑒔𑒪𑒱 𑒑𑒹𑒪𑒱। 𑒍 𑒧𑒰𑒋𑒏𑒹𑒿 𑒏𑒯𑒻𑒞 𑒩𑒯𑒪𑒱 𑒖𑒹 𑒣𑒩𑒲𑒏𑓂𑒭𑒰 𑒡𑒩𑒱 𑒩𑒯𑒋 𑒠𑒱𑒁, 𑒧𑒳𑒠𑒰 𑒧𑒰𑒋 𑒫𑒱𑒧𑒳𑒏𑓂𑒞 𑒦𑒹𑒪𑒰𑒏 𑒥𑒰𑒠 𑒋𑒏𑒼 𑒣𑒪 𑒣𑒳𑒩𑒰𑒢 𑒏𑒙𑒳-𑒮𑓂𑒧𑒵𑒞𑒱𑒏𑒹𑒿 𑒠𑒹𑒐𑒋 𑒢𑒯𑒱 𑒔𑒰𑒯𑒻𑒞 𑒕𑒪𑒲𑒯।
𑒤𑒹𑒩 𑒠𑒱𑒢 𑒥𑒱𑒞𑒻𑒞 𑒩𑒯𑒪।
𑒂 𑒥𑒰𑒠𑒧𑒹 𑒤𑒼𑒢 𑒣𑒩 𑒮𑒧𑒰𑒔𑒰𑒩 𑒦𑒹𑒙𑒪 𑒖𑒹 𑒂𑒩𑓂𑒨𑒰 𑒂𑒞𑓂𑒧 𑒯𑒞𑓂𑒨𑒰 𑒏𑒋 𑒪𑒹𑒪𑒏।
𑒥𑒯𑒳𑒞 𑒩𑒰𑒮 𑒥𑒰𑒞 𑒧𑒼𑒢𑒧𑒹 𑒒𑒴𑒧𑒱 𑒑𑒹𑒪। 𑒂𑒩𑓂𑒨𑒰 𑒦𑒰𑒫𑒳𑒏 𑒕𑒪𑒱, 𑒏𑒱𑒕𑒳 𑒥𑒹𑒬𑒲 𑒞𑒢𑒰𑒫𑒧𑒹 𑒩𑒯𑒱𑒞𑒹 𑒕𑒪𑒱। 𑒑𑒣𑒏𑒹𑒿 𑒑𑓀𑒦𑒲𑒩𑒞𑒰𑒮𑒿 𑒪𑒻𑒞 𑒕𑒪𑒱। 𑒮𑒰𑒩𑒱𑒏 𑒍𑒯𑒱 𑒨𑒳𑒫𑒏𑒏 𑒮𑒧𑓂𑒥𑒢𑓂𑒡𑒧𑒹 𑒏𑒯𑒪 𑒑𑒣 𑒮𑒹𑒯𑒼 𑒧𑒼𑒢 𑒣𑒛𑓃𑒪 ।
𑒯𑒧 𑒤𑒼𑒢 𑒠𑒼𑒥𑒰𑒩𑒰 𑒪𑒑𑒹𑒪𑒯𑒳𑒿।
𑒯𑒧 𑒤𑒼𑒢 𑒣𑒩 𑒁𑒙𑒏𑒰𑒩𑒲 𑒧𑒰𑒩𑒻𑒞 𑒣𑒳𑒕𑒪𑒯𑒳𑒿 𑒖𑒹 𑒍𑒯𑒱 𑒨𑒳𑒫𑒏𑒏 𑒫𑒱𑒫𑒰𑒯 𑒂𑒩𑓂𑒨𑒰𑒏 𑒧𑒵𑒞𑓂𑒨𑒳𑒮𑒿 𑒣𑒯𑒱𑒢𑒹 𑒦𑓄 𑒑𑒹𑒪 𑒕𑒪 𑒮𑒹 𑒏𑒞𑒋 𑒦𑒹𑒪 𑒕𑒪 ? 𑒞𑒿 𑒮𑒰𑒮𑒳𑒩𑒏 𑒪𑒼𑒏 𑒁𑒔𑓀𑒦𑒱𑒞 𑒦𑓄 𑒣𑒳𑒕𑒪𑒢𑓂𑒯𑒱, 𑒖𑒹 𑒏𑒹 𑒍? 𑒁𑒔𑓂𑒕𑒰 𑒍!
-𑒍𑒏𑒩 𑒫𑒱𑒫𑒰𑒯 𑒞𑒿 𑒦𑒹𑒪 𑒧𑒳𑒠𑒰 𑒁𑒯𑒰𑒿 𑒏𑒼𑒢𑒰 𑒥𑒳𑒗𑒪𑒯𑒳𑒿।
𑒣𑒞𑒰 𑒪𑒰𑒑𑒪 𑒖𑒹 𑒮𑒱𑒪𑒲𑒑𑒳𑒛𑓃𑒲-𑒠𑒱𑒬𑒏 𑒏𑒼𑒢𑒼 𑒏𑒢𑓂𑒨𑒰𑒑𑒞 𑒩𑒯𑒟𑒱 ।
𑒂 𑒍 𑒨𑒳𑒫𑒏 𑒁𑒣𑒢 𑒥𑒰𑒣 𑒖𑒹𑒏𑒰𑒿 𑒒𑒩-𑒖𑒧𑒰𑒋 𑒥𑒢𑒱 𑒩𑒯𑒥𑒰𑒏 𑒢𑒱𑒨𑒰𑒩 𑒏𑒋𑒢𑒹 𑒁𑒕𑒱। 𑒋𑒯𑒱 𑒬𑒯𑒩𑒏 𑒪𑒼𑒏𑒏𑒹𑒿 𑒞𑒿 𑒫𑒱𑒫𑒰𑒯𑒏 𑒯𑒏𑒰𑒩𑒼 𑒢𑒯𑒱 𑒦𑒹𑒙𑒪।
𑒂 𑒍𑒏𑒩 𑒂𑒞𑓂𑒧𑒯𑒞𑓂𑒨𑒰𑒏 𑒠𑒼𑒭 𑒏𑒏𑒩𑒰 𑒣𑒩 𑒁𑒕𑒱। 𑒍 𑒖𑒹 𑒠𑒰𑒩𑒴 𑒣𑒱𑒥𑒻𑒞 𑒩𑒯𑒋 𑒮𑒹 𑒥𑒰𑒣। 𑒂𑒏𑒱 𑒍 𑒧𑒰𑒋 𑒖𑒹 𑒥𑒰𑒣𑒏 𑒮𑓀𑒑 𑒞𑓀𑒑 𑒂𑒥𑒱 𑒑𑒹𑒪 𑒩𑒯𑒋। 𑒂𑒏𑒱 𑒍 𑒣𑓂𑒩𑒹𑒧𑒲 ?
𑒯𑒧𑒩𑒰 𑒖𑒢𑒻𑒞 𑒋𑒏𑒩 𑒮𑒦𑒏 𑒏𑒰𑒩𑒝 𑒁𑒕𑒱 𑒂𑒩𑓂𑒨𑒰𑒏 𑒣𑒩𑒱𑒫𑒰𑒩𑒏 𑒮𑒧𑓂𑒥𑒢𑓂𑒡𑒲 𑒂 𑒣𑒩𑒱𑒫𑒰𑒩𑒱𑒏 𑒠𑒼𑒮-𑒧𑒯𑒲𑒧 𑒮𑒦 𑒖𑒹 𑒋𑒏 𑒞𑒩𑒯𑒹𑒿 𑒂𑒩𑓂𑒨𑒰 𑒮𑒦𑒏𑒹𑒿 𑒥𑒰𑒩𑒱 𑒠𑒹𑒢𑒹 𑒩𑒯𑒋। 𑒍 𑒮𑒧𑒰𑒖 𑒖𑒹 𑒍𑒏𑒩 𑒣𑒩𑒱𑒫𑒰𑒩𑒏 𑒒𑒙𑒢𑒰𑒏 𑒔𑒙𑒐𑒰𑒩𑒰 𑒪𑓄 𑒏𑒋 𑒔𑒩𑓂𑒔 𑒏𑒩𑒻𑒞 𑒕𑒪 ।
𑒍 𑒒𑒙𑒢𑒰 𑒮𑒦 𑒖𑒹 𑒍𑒏𑒩 𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒩𑒯𑒋 ।
𑒍𑒏𑒩 𑒣𑒱𑒞𑒰 𑒠𑓂𑒫𑒰𑒩𑒰 𑒑𑒹𑒙 𑒣𑒱𑒙𑒥𑒰𑒏 𑒒𑒙𑒢𑒰𑒏 𑒔𑒩𑒔𑒰 𑒂𑒏𑒱 𑒂𑒩 𑒏𑒼𑒢𑒼 𑒑𑒣।𑒥𑒰𑒪𑒱𑒏𑒰 𑒦𑒰𑒫𑒳𑒏 𑒩𑒯𑒋 𑒏𑒼𑒢𑒰 𑒮𑒯𑒱 𑒮𑒏𑒻𑒞 𑒕𑒪𑒲𑒯। 𑒂𑒞𑓂𑒧𑒯𑒞𑓂𑒨𑒰𑒏 𑒢𑒰𑒧 𑒠𑒋 𑒍𑒏𑒩𑒰 𑒧𑒵𑒞𑓂𑒨𑒳𑒠𑒝𑓂𑒛 𑒠𑒹𑒪𑒏 𑒮𑒧𑒰𑒖।
𑒯𑒧 𑒂𑒩𑓂𑒨𑒰𑒏𑒹𑒿 𑒋𑒏𑒙𑒰 𑒠𑒵𑒜𑓃 𑒥𑒰𑒪𑒱𑒏𑒰 𑒥𑒳𑒗𑒻𑒞 𑒩𑒯𑒲। 𑒧𑒳𑒠𑒰 𑒍𑒏𑒩 ‘𑒏𑒱𑒕𑒳𑒍 𑒏𑒩𑒨 𑒣𑒛𑓃𑒞 𑒮𑒹 𑒏𑒩𑒥’ 𑒏𑒹𑒩 𑒁𑒩𑓂𑒟 𑒂𑒥 𑒖𑒰 𑒏𑒋 𑒥𑒳𑒗𑒪𑒯𑒳𑒿। 𑒍𑒯𑒱 𑒨𑒳𑒫𑒏𑒏 𑒥𑒱𑒂𑒯 𑒦𑓄 𑒑𑒹𑒪 𑒯𑒼𑒋𑒞𑒻𑒏 𑒮𑒹 𑒯𑒧𑒩 𑒁𑒢𑓂𑒠𑒰𑒖 𑒧𑒰𑒞𑓂𑒩 𑒩𑒯𑒋 𑒂 𑒮𑒹 𑒂𑒩𑓂𑒨𑒰𑒏 𑒂𑒞𑓂𑒧𑒯𑒞𑓂𑒨𑒰𑒏 𑒒𑒙𑒢𑒰𑒏 𑒖𑒰𑒢𑒏𑒰𑒩𑒲 𑒦𑒹𑒪𑒰𑒏 𑒥𑒰𑒠 ।
𑒥𑒰𑒝𑒫𑒲𑒩
𑒮𑒰𑒜𑓃𑒹 𑒞𑒲𑒢𑒮𑒿 𑒔𑒰𑒩𑒱 𑒤𑒲𑒙𑒏 𑒥𑒲𑒔 𑒪𑒹𑒙𑒩𑒰𑒏 𑒪𑒧𑓂𑒥𑒰𑒃 𑒕𑒪। 𑒮𑒦 𑒏𑒯𑒻𑒞 𑒕𑒻𑒏 𑒖𑒹 𑒍𑒏𑒩 𑒧𑒰𑒋-𑒥𑒰𑒣 𑒠𑒼𑒮𑒩𑒰𑒏 𑒥𑒔𑓂𑒔𑒰𑒏𑒹𑒿 𑒠𑒹𑒐𑒱 𑒏𑒋 𑒦𑒳𑒙𑓂𑒙𑒰-𑒦𑒳𑒙𑓂𑒙𑒰 𑒏𑒯𑒻𑒞 𑒩𑒯𑒻𑒞 𑒕𑒪𑒟𑒱।𑒮𑒹 𑒣𑒞𑒰 𑒢𑒯𑒱 𑒏𑒲 𑒦𑒹𑒪𑒻𑒏 𑒪𑒹𑒙𑒩𑒰 𑒞𑒏𑒩𑒰 𑒥𑒰𑒠𑒮𑒿 𑒥𑒜𑓃𑒱𑒞𑒹 𑒢𑒹 𑒁𑒕𑒱, 𑒍𑒏𑒩 𑒪𑒧𑓂𑒥𑒰𑒃 𑒋𑒏𑒠𑒧𑓂𑒧𑒹𑒮𑒿 𑒥𑒜𑓃𑒥 𑒩𑒳𑒏𑒱 𑒑𑒹𑒪𑒻𑒏।
“𑒡𑒳𑒩! 𑒧𑒰𑒋-𑒥𑒰𑒣𑒏 𑒏𑒞𑒯𑒳 𑒢𑒖𑒩𑒱 𑒪𑒑𑒻𑒞 𑒕𑒻𑒏 𑒥𑒔𑓂𑒔𑒰𑒏𑒹𑒿”।
“𑒢𑒘𑒱 𑒨𑒾, 𑒧𑒰𑒋𑒏 𑒞𑒿 𑒪𑒑𑒱𑒞𑒹 𑒕𑒻𑒏, 𑒠𑒹𑒐𑒱𑒨𑒾 𑒢𑒹 𑒪𑒹𑒙𑒩𑒰𑒏𑒹𑒿”।
𑒑𑒾𑒂𑒿 𑒮𑒦 𑒂𑒣𑒮𑒧𑒹 𑒑𑒣 𑒏𑒩𑒟𑒱। 𑒖𑒹 𑒮𑒹, 𑒮𑒦 𑒥𑒔𑓂𑒔𑒰 𑒣𑒻𑒒 𑒦𑒹𑒪। 𑒥𑒜𑓃𑒋 𑒪𑒰𑒑𑒪 । 𑒧𑒳𑒠𑒰 𑒪𑒹𑒙𑒩𑒰 𑒒𑒳𑒙𑒧𑒳𑒙𑒰𑒋𑒪𑒹 𑒩𑒯𑒪। 𑒮𑒦 𑒏𑓂𑒨𑒼 𑒍𑒏𑒩𑒰 𑒣𑒩𑒼𑒏𑓂𑒭𑒧𑒹 𑒪𑒹𑒙𑒩𑒰 𑒂 𑒧𑒳𑒿𑒯𑒣𑒩 𑒪𑒹𑒙𑒩𑒥𑒧 𑒏𑒯𑒋 𑒪𑒑𑒪𑒰𑒯।
𑒪𑒹𑒙𑒩𑒥𑒧𑒏 𑒧𑒰𑒋-𑒥𑒰𑒣𑒏𑒹𑒿 𑒖𑒧𑒲𑒢-𑒖𑒰𑒪 𑒞𑒞𑒹𑒏 𑒢𑒯𑒱। 𑒮𑒹 𑒧𑒯𑒲𑒮𑒹𑒣𑒩 𑒢𑒱𑒩𑓂𑒦𑒩 𑒕𑒪𑒢𑓂𑒯𑒱 𑒯𑒳𑒢𑒏𑒩 𑒮𑒦𑒏 𑒖𑒲𑒫𑒢। 𑒪𑒹𑒙𑒩𑒰 𑒧𑒯𑒲𑒮𑒏 𑒮𑒹𑒫𑒰𑒧𑒹 𑒦𑒼𑒩𑒹𑒮𑒿 𑒪𑒰𑒑𑒪 𑒩𑒯𑒻𑒞 𑒕𑒪। 𑒦𑒼𑒩𑒧𑒹 𑒦𑒼𑒩𑒯𑒰 𑒏𑒰𑒞𑒧𑒹 𑒩𑒑𑒛𑓃𑒱-𑒩𑒑𑒛𑓃𑒱 𑒏𑓄 𑒔𑒱𑒏𑓂𑒏𑒢 𑒥𑒢𑒰 𑒠𑒻𑒞 𑒕𑒪 𑒧𑒯𑒲𑒮𑒏𑒹𑒿। 𑒣𑒳𑒂𑒩𑒏 𑒢𑒴𑒩𑒲𑒮𑒿 𑒮𑒰𑒤 𑒏𑒩𑒻𑒞 𑒏𑒰𑒪 𑒑𑒼𑒙-𑒑𑒼𑒙 𑒁𑒚𑒾𑒩𑒲 𑒢𑒱𑒏𑒰𑒪𑒱 𑒠𑒻𑒞 𑒕𑒪। 𑒥𑒹𑒩𑒴 𑒣𑒯𑒩 𑒥𑒾𑒂-𑒔𑒾𑒛𑓃𑒲𑒧𑒹 𑒧𑒯𑒲𑒮 𑒔𑒩𑒥𑒻𑒞 𑒏𑒰𑒪 𑒢𑒱𑒮𑒦𑒹𑒩 𑒦𑓄 𑒮𑒴𑒞𑒱 𑒩𑒯𑒻𑒞 𑒕𑒪 𑒧𑒯𑒲𑒮𑒏 𑒣𑒲𑒚𑒣𑒩।
𑒪𑒼𑒏 𑒮𑒦 𑒯𑒿𑒮𑒲𑒧𑒹 𑒏𑒯𑒱𑒞𑒼 𑒩𑒯𑒋 𑒖𑒹 𑒪𑒹𑒙𑒩𑒥𑒧 𑒥𑒾𑒂-𑒔𑒾𑒛𑓃𑒲 𑒯𑒰𑒃 𑒮𑓂𑒏𑒴𑒪𑒮𑒿 𑒧𑒻𑒙𑓂𑒩𑒱𑒏 𑒣𑒰𑒮 𑒏𑒋𑒢𑒹 𑒁𑒕𑒱। 𑒧𑒯𑒲𑒮𑒼 𑒪𑒏𑓂𑒭𑓂𑒧𑒲 𑒩𑒯𑒋 𑒍𑒏𑒩। 𑒂𑒢 𑒧𑒰𑒪-𑒖𑒰𑒪 𑒮𑒱𑓀𑒯 𑒪𑒛𑓃𑒰𑒥𑒋 𑒞𑒿 𑒪𑒹𑒙𑒩𑒥𑒧𑒏 𑒧𑒯𑒲𑒮 𑒒𑒰𑒮 𑒔𑒩𑒥𑒰𑒧𑒹 𑒪𑒰𑒑𑒪 𑒩𑒯𑒋। 𑒮𑒹 𑒮𑒰𑒿𑒗𑒧𑒹 𑒒𑒩-𑒒𑒳𑒩𑒻𑒞 𑒏𑒰𑒪 𑒖𑒐𑒢 𑒂𑒢 𑒮𑒦 𑒑𑒼𑒙𑒹𑒏 𑒧𑒯𑒲𑒮𑒏 𑒣𑒹𑒙 𑒣𑒰𑒿𑒖𑒩𑒧𑒹 𑒡𑒮𑒪 𑒩𑒯𑒻𑒞 𑒕𑒪, 𑒪𑒹𑒙𑒩𑒰𑒏 𑒧𑒯𑒲𑒮𑒏 𑒠𑒳𑒢𑒴 𑒣𑒹𑒙 𑒠𑒳𑒢𑒴 𑒠𑒱𑒮𑒢 𑒤𑒴𑒪𑒱 𑒏𑒋 𑒪𑒙𑒏𑒱 𑒖𑒰𑒃𑒞 𑒕𑒪। 𑒥𑒱𑒢𑒰 𑒣𑒩𑒱𑒬𑓂𑒩𑒧 𑒣𑒢𑓂𑒯𑒰𑒃𑒞 𑒕𑒪𑒻𑒏 𑒧𑒯𑒲𑒮।
𑒪𑒹𑒙𑒩𑒰 𑒁𑒣𑒢 𑒧𑒰𑒋-𑒥𑒰𑒣𑒏𑒹𑒿 𑒞𑒻𑒨𑒼 𑒣𑓂𑒩𑒮𑒢𑓂𑒢 𑒏𑒋 𑒮𑒏𑒪 𑒏𑒲? 𑒍 𑒠𑒳𑒢𑒴 𑒑𑒼𑒙𑒹 𑒪𑒹𑒙𑒩𑒰𑒏 𑒑𑒳𑒖𑒩 𑒏𑒼𑒢𑒰 𑒔𑒪𑒞𑒻𑒏, 𑒍𑒏𑒩𑒰𑒮𑒿 𑒥𑒱𑒨𑒰𑒯 𑒏𑒹 𑒏𑒩𑒞𑒻𑒏- 𑒋𑒯𑒱 𑒥𑒰𑒞 𑒮𑒦𑒏𑒹𑒿 𑒪𑓄 𑒮𑒼𑒔𑒱𑒞𑒹 𑒩𑒯𑒻𑒞 𑒕𑒪𑒰𑒯।
𑒑𑒰𑒧𑒧𑒹 𑒥𑒻𑒞𑒩𑒝𑒲 𑒢𑒰𑒙𑒏 𑒂𑒋𑒪 𑒩𑒯𑒻𑒏। 𑒏𑒚𑒣𑒳𑒞𑒪𑒲 𑒮𑒦, 𑒧𑒢𑒳𑒏𑓂𑒐𑒏 𑒧𑒩𑒪𑒰𑒏 𑒥𑒰𑒠 𑒥𑒻𑒞𑒩𑒝𑒲 𑒡𑒰𑒩 𑒣𑒰𑒩 𑒏𑒩𑒥𑒰𑒏 𑒠𑒵𑒬𑓂𑒨, 𑒖𑒹 𑒦𑒨𑒰𑒫𑒯𑒹-𑒦𑒨𑒰𑒫𑒯 𑒕𑒪, 𑒐𑒴𑒥 𑒢𑒲𑒖 𑒖𑒹𑒏𑒰𑒿 𑒣𑓂𑒩𑒠𑒩𑓂𑒬𑒱𑒞 𑒏𑒩𑒻𑒞 𑒕𑒪𑒰𑒯।
𑒪𑒹𑒙𑒩𑒥𑒧 𑒮𑒹𑒯𑒼 𑒧𑒰𑒋-𑒥𑒰𑒣𑒏 𑒮𑓀𑒑 𑒢𑒰𑒙𑒏 𑒠𑒹𑒐𑒱 𑒁𑒋𑒪𑒰𑒯। 𑒂 𑒋𑒞𑒯𑒱𑒮𑒿 𑒪𑒹𑒙𑒩𑒰𑒏 𑒖𑒲𑒫𑒢 𑒋𑒏𑒙𑒰 𑒠𑒱𑒬𑒰 𑒪𑒋 𑒪𑒹𑒪𑒏। 𑒪𑒹𑒙𑒩𑒰𑒏 𑒥𑒰𑒥𑒴𑒏 𑒣𑒰𑒕𑒰𑒿 𑒥𑒻𑒞𑒩𑒝𑒲 𑒢𑒰𑒙𑒏 𑒏𑒧𑓂𑒣𑒢𑒲𑒏 𑒧𑒰𑒪𑒱𑒏 𑒪𑒰𑒑𑒱 𑒑𑒹𑒪। 𑒡𑒩𑒼𑒯𑒱 𑒠𑓄 𑒠𑒹𑒪𑒏, 𑒮𑒰𑒿𑒗-𑒦𑒼𑒩 𑒍𑒏𑒩 𑒒𑒩𑒣𑒩 𑒣𑒯𑒳𑒿𑒔𑒋 𑒪𑒰𑒑𑒪।
𑒪𑒹𑒙𑒩𑒰 𑒁𑒣𑒢 𑒧𑒯𑒱𑒮𑒥𑒰𑒩𑒲𑒧𑒹 𑒧𑒑𑒢 𑒩𑒯𑒻𑒞 𑒕𑒪। 𑒧𑒳𑒠𑒰 𑒍 𑒁𑒢𑒳𑒦𑒫 𑒏𑒩𑒋 𑒪𑒰𑒑𑒪 𑒖𑒹 𑒂𑒃-𑒏𑒰𑒪𑓂𑒯𑒱 𑒧𑒰𑒋-𑒥𑒰𑒣 𑒍𑒏𑒩𑒰𑒣𑒩 𑒏𑒱𑒕𑒳 𑒥𑒹𑒬𑒲𑒋 𑒧𑒧𑒞𑒰 𑒩𑒰𑒐𑒋 𑒪𑒰𑒑𑒪 𑒕𑒟𑒱। 𑒮𑒦 𑒏𑒯𑒻𑒞 𑒩𑒯𑒍 𑒖𑒹 𑒪𑒹𑒙𑒩𑒰𑒏 𑒖𑒲𑒫𑒢 𑒏𑒼𑒢𑒰 𑒏𑒹 𑒔𑒪𑒞𑒋, 𑒮𑒹 𑒏𑒲 𑒍𑒏𑒩 𑒧𑒰𑒋-𑒥𑒰𑒥𑒴𑒣𑒩 𑒂𑒥 𑒏𑒼𑒢𑒼 𑒁𑒮𑒩𑒱 𑒟𑒼𑒛𑓃𑒥𑒹𑒏 𑒣𑒛𑓃𑒞𑒋।
𑒧𑒳𑒠𑒰 𑒥𑒻𑒞𑒩𑒝𑒲 𑒢𑒰𑒙𑒏 𑒏𑒧𑓂𑒣𑒢𑒲𑒏 𑒧𑒰𑒪𑒱𑒏 𑒪𑒹𑒙𑒩𑒰𑒏 𑒥𑒰𑒣𑒏 𑒣𑒰𑒕𑒰𑒿 𑒣𑒛𑓃𑒱 𑒑𑒹𑒪। 𑒏𑒯𑒋 𑒪𑒰𑒑𑒪 𑒖𑒹 𑒍 𑒞𑒿 𑒪𑒹𑒙𑒩𑒰𑒏𑒹𑒿 𑒢𑒲𑒏 𑒢𑒼𑒏𑒩𑒲 𑒠𑒱𑒨𑒥𑒰 𑒩𑒯𑒪 𑒁𑒕𑒱। 𑒪𑒹𑒙𑒩𑒥𑒧𑒏 𑒥𑒰𑒥𑒴 𑒮𑒦𑒮𑒿 𑒣𑒳𑒕𑒟𑒱 𑒖𑒹 𑒏𑒲 𑒏𑒩𑒲? 𑒮𑒦 𑒨𑒻𑒯 𑒏𑒯𑒻𑒞 𑒩𑒯𑒢𑓂𑒯𑒱 𑒖𑒹 𑒍 𑒪𑒹𑒙𑒩𑒰𑒏𑒹𑒿 𑒏𑒲𑒢𑒱 𑒩𑒯𑒪 𑒁𑒕𑒱, 𑒢𑒼𑒏𑒩𑒲 𑒢𑒯𑒱 𑒠𑓄 𑒩𑒯𑒪 𑒁𑒕𑒱। 𑒄 𑒢𑒰𑒙𑒏 𑒏𑒧𑓂𑒣𑒢𑒲 𑒮𑒦 𑒥𑒝𑒫𑒲𑒩 𑒮𑒦𑒏𑒹𑒿 𑒑𑒰𑒧𑒹-𑒑𑒰𑒧 𑒞𑒏𑒢𑒹 𑒤𑒱𑒩𑒻𑒞 𑒁𑒕𑒱 𑒂 𑒬𑒯𑒩𑒲 𑒮𑒩𑓂𑒏𑒮 𑒏𑒧𑓂𑒣𑒢𑒲 𑒮𑒦𑒏𑒹𑒿 𑒥𑒹𑒔𑒱 𑒠𑒻𑒞 𑒁𑒕𑒱। 𑒤𑒹𑒩 𑒋𑒏 𑒥𑒹𑒩 𑒖𑒹 𑒥𑒹𑒙𑒰 𑒖𑒋𑒞 𑒞𑒿 𑒏𑒲 𑒒𑒳𑒩𑒱𑒏𑓄 𑒁𑒋𑒞? 𑒥𑒹𑒙𑒰 𑒡𑒢 𑒕𑒲, 𑒥𑒰𑒝𑒫𑒲𑒩𑒹 𑒮𑒯𑒲!
𑒁𑒏𑒬-𑒞𑒱𑒏𑒬 𑒏𑒩𑒻𑒞 𑒋𑒏 𑒠𑒱𑒢 𑒧𑒰𑒋-𑒥𑒰𑒣 𑒪𑒹𑒙𑒩𑒮𑒿 𑒣𑒳𑒕𑒪𑒢𑓂𑒯𑒱- “𑒦𑒑𑒫𑒰𑒢𑒏 𑒃𑒔𑓂𑒕𑒰 𑒮𑒩𑓂𑒫𑒼𑒣𑒩𑒱। 𑒦𑒑𑒫𑒰𑒢 𑒣𑒹𑒙 𑒠𑒃 𑒕𑒟𑒱𑒢𑓂𑒯 𑒞𑒿 𑒍𑒏𑒩𑒰 𑒣𑒼𑒮𑒥𑒰𑒏 𑒖𑒼𑒑𑒰𑒩 𑒮𑒹𑒯𑒼 𑒏𑒩𑒻𑒞 𑒕𑒟𑒱𑒢𑓂𑒯। 𑒪𑒼𑒏 𑒮𑒦 𑒏𑒯𑒻𑒞 𑒩𑒯𑒪 𑒖𑒹 𑒪𑒹𑒙𑒩𑒰𑒏 𑒑𑒳𑒖𑒩 𑒏𑒼𑒢𑒰 𑒔𑒪𑒞𑒋 𑒞𑒿 𑒏𑒏𑒩𑒼 𑒑𑒣𑒏 𑒯𑒧 𑒧𑒼𑒖𑒩 𑒢𑒯𑒱 𑒠𑒻𑒞 𑒕𑒪𑒱𑒨𑒻𑒏। 𑒧𑒳𑒠𑒰 𑒄 𑒥𑒻𑒞𑒩𑒝𑒲 𑒢𑒰𑒙𑒏 𑒏𑒧𑓂𑒣𑒢𑒲 𑒥𑒪𑒰 𑒞𑒿 𑒣𑒰𑒕𑒴𑒋 𑒣𑒛𑓃𑒱 𑒑𑒹𑒪 𑒁𑒕𑒱। 𑒪𑒼𑒏𑒮𑒦 𑒏𑒯𑒋-𑒋 𑒖𑒹 𑒄 𑒮𑒦 𑒬𑒯𑒩𑒲 𑒮𑒩𑓂𑒏𑒮 𑒏𑒧𑓂𑒣𑒢𑒲𑒏 𑒪𑒹𑒪 𑒥𑒰𑒝𑒫𑒲𑒩 𑒮𑒦𑒏 𑒞𑒰𑒏𑒱𑒧𑒹 𑒑𑒰𑒧𑒹-𑒑𑒰𑒧 𑒤𑒱𑒩𑒻𑒞 𑒁𑒕𑒱 𑒂 𑒍𑒯𑒱 𑒏𑒧𑓂𑒣𑒢𑒲 𑒮𑒦𑒧𑒹 𑒍𑒏𑒩𑒰 𑒮𑒦𑒏𑒹𑒿 𑒥𑒹𑒔𑒱 𑒠𑒻𑒞 𑒁𑒕𑒱। 𑒧𑒳𑒠𑒰 𑒄 𑒏𑒯𑒋-𑒋 𑒖𑒹 𑒮𑒹 𑒢𑒯𑒱 𑒕𑒻𑒏। 𑒮𑒦 𑒠𑒱𑒢𑒳𑒏𑒰 𑒠𑒱𑒢𑒔𑒩𑓂𑒖𑒰 𑒕𑒻𑒏। 𑒬𑒯𑒩𑒹-𑒬𑒯𑒩𑒹 𑒒𑒳𑒧𑒻𑒞 𑒁𑒕𑒱 𑒄 𑒮𑒦। 𑒖𑒐𑒢 𑒏𑒞𑒯𑒳 𑒮𑒩𑓂𑒏𑒮 𑒢𑒯𑒱 𑒪𑒑𑒻𑒞 𑒕𑒻𑒏 𑒞𑒿 𑒕𑒳𑒙𑓂𑒙𑒱𑒍 𑒦𑒹𑒙𑒱𑒞𑒹 𑒕𑒻𑒏। 𑒂𑒩 𑒏𑒹 𑒢𑒼𑒏𑒩𑒲 𑒠𑒹𑒞 𑒋𑒞𑒹𑒏 𑒏𑒧 𑒪𑒧𑓂𑒥𑒰𑒃 𑒥𑒪𑒰𑒏𑒹𑒿? 𑒮𑒹 𑒯𑒧 𑒁𑒯𑒲𑓀𑒮𑒿 𑒣𑒳𑒕𑒻𑒞 𑒕𑒲 𑒖𑒹 𑒏𑒲 𑒏𑒋𑒪 𑒖𑒰𑒋”।
𑒪𑒹𑒙𑒩𑒰𑒏 𑒞𑒿 𑒂𑒿𑒐𑒱𑒮𑒿 𑒠𑒯𑒼-𑒥𑒯𑒼 𑒢𑒼𑒩 𑒐𑒮𑒋 𑒪𑒑𑒪𑒻𑒏। 𑒑𑒾𑒂𑒿 𑒮𑒦 𑒚𑒲𑒏𑒹 𑒏𑒯𑒻𑒞 𑒩𑒯𑒋। 𑒧𑒰𑒋-𑒥𑒰𑒣 𑒞𑒿 𑒪𑒰𑒑𑒻𑒋 𑒢𑒱𑒩𑓂𑒝𑒨 𑒏𑓄 𑒪𑒹𑒢𑒹 𑒕𑒟𑒱।
“𑒧𑒰𑒋-𑒥𑒰𑒥𑒴। 𑒯𑒧𑒩𑒰 𑒥𑒳𑒗𑒪 𑒁𑒕𑒱 𑒖𑒹 𑒯𑒧𑒩 𑒥𑒱𑒨𑒰𑒯-𑒠𑒰𑒢 𑒢𑒯𑒱 𑒯𑒼𑒋𑒞। 𑒧𑒳𑒠𑒰 𑒁𑒣𑒢 𑒣𑒹𑒙 𑒞𑒿 𑒏𑒼𑒯𑒳𑒢𑒰 𑒯𑒧 𑒑𑒰𑒧𑒧𑒹 𑒦𑒩𑒱𑒨𑒹 𑒪𑒻𑒞 𑒕𑒲। 𑒑𑒳𑒖𑒩 𑒞𑒿 𑒏𑒃𑒋 𑒪𑒻𑒞 𑒕𑒲। 𑒪𑒼𑒏 𑒮𑒦 𑒏𑒯𑒻𑒞 𑒩𑒯𑒋 𑒖𑒹 𑒞𑒼𑒯𑒩 𑒧𑒰𑒋-𑒥𑒰𑒣 𑒞𑒼𑒩𑒰 𑒥𑒹𑒔𑒱 𑒠𑒹𑒪𑒏𑒅, 𑒮𑒹 𑒚𑒲𑒏𑒹 𑒁𑒕𑒱 𑒏𑒲”?
𑒂𑒥 𑒞𑒿 𑒏𑒢𑓂𑒢𑒰𑒩𑒼𑒯𑒙 𑒅𑒚𑒱 𑒑𑒹𑒪। 𑒧𑒰𑒋-𑒥𑒰𑒣𑒏 𑒮𑓀𑒑 𑒪𑒹𑒙𑒩𑒰𑒏 𑒏𑒰𑒢𑒥𑒮𑒿 𑒁𑒿𑒑𑒢𑒰𑒧𑒹 𑒁𑒢𑒒𑒼𑒪 𑒧𑒔𑒱 𑒑𑒹𑒪।
𑒖𑒹𑒢𑒰 𑒮𑒳𑒞𑒱 𑒏𑓄 𑒅𑒚𑒪𑒰𑒏 𑒥𑒰𑒠 𑒜𑒹𑒩-𑒩𑒰𑒮 𑒑𑒣 𑒧𑒯𑒞𑓂𑒞𑓂𑒫𑒣𑒴𑒩𑓂𑒝 𑒏𑒼𑒙𑒱𑒮𑒿 𑒅𑒞𑒩𑒱 𑒏𑓄 𑒁𑒧𑒯𑒞𑓂𑒫𑒣𑒴𑒩𑓂𑒝 𑒫𑒰 𑒞𑒞𑒹𑒏 𑒧𑒯𑒞𑓂𑒫𑒣𑒴𑒩𑓂𑒝 𑒢𑒯𑒱 𑒩𑒯𑒱 𑒖𑒰𑒃𑒞 𑒁𑒕𑒱, 𑒞𑒯𑒱𑒢𑒰 𑒠𑒱𑒢 𑒥𑒱𑒞𑒻𑒞 𑒪𑒹𑒙𑒩𑒰 𑒮𑒹𑒯𑒼 𑒁𑒣𑒢 𑒧𑒼𑒢 𑒧𑒢𑒰 𑒪𑒹𑒪𑒏। 𑒏𑒢𑒲 𑒠𑒹𑒐𑒱𑒨𑒻𑒏 𑒥𑒰𑒯𑒩𑒏 𑒠𑒳𑒢𑒱𑒨𑒰𑒿 𑒏𑒹𑒯𑒢 𑒯𑒼𑒃𑒞 𑒕𑒻𑒏। 𑒧𑒰𑒋-𑒥𑒰𑒣 𑒞𑒿 𑒥𑒹𑒔𑒱𑒋 𑒪𑒹𑒢𑒹 𑒕𑒟𑒱, 𑒍𑒞𑒹𑒏 𑒮𑒱𑒢𑒹𑒯 𑒩𑒯𑒱𑒞𑒢𑓂𑒯𑒱 𑒞𑒿 𑒥𑒹𑒔𑒥𑒹 𑒏𑒩𑒱𑒞𑒟𑒱? 𑒞𑒿 𑒯𑒧𑒯𑒲𑓀 𑒏𑒱𑒋𑒏 𑒁𑒡𑒦𑒑𑒱𑒨𑒰 𑒮𑒱𑒢𑒹𑒯 𑒩𑒰𑒐𑒲?
𑒥𑒻𑒞𑒩𑒝𑒲 𑒏𑒧𑓂𑒣𑒢𑒲𑒥𑒪𑒰 𑒪𑒹𑒙𑒩𑒰𑒏𑒹𑒿 𑒋𑒏𑒙𑒰 𑒮𑒩𑓂𑒏𑒮 𑒥𑒪𑒰 𑒪𑒑 𑒪𑓄 𑒑𑒹𑒪।
𑒍𑒞𑒋 𑒄 𑒪𑒑𑒻𑒞 𑒩𑒯𑒋 𑒖𑒹 𑒖𑒹𑒢𑒰 𑒮𑒦 𑒥𑒰𑒝𑒫𑒲𑒩𑒏 𑒢𑒼𑒏𑒩𑒲𑒏 𑒍𑒞𑒋 𑒖𑒼𑒑𑒰𑒩 𑒯𑒼𑒁𑒋। 𑒠𑒳𑒢𑒱𑒨𑒰𑒿𑒏 𑒮𑒦 𑒥𑒰𑒝𑒫𑒲𑒩𑒏 𑒢𑒼𑒏𑒩𑒲 𑒍𑒏𑒩𑒰 𑒪𑒑 𑒣𑒏𑓂𑒏𑒰 𑒩𑒯𑒋। 𑒪𑒹𑒙𑒩𑒰 𑒖𑒹𑒢𑒰 𑒥𑒰𑒝𑒫𑒲𑒩𑒏 𑒠𑒹𑒬𑒧𑒹 𑒣𑒯𑒳𑒿𑒔𑒱 𑒑𑒹𑒪 𑒕𑒪। 𑒧𑒼𑒿𑒕𑒥𑒪𑒰, 𑒢𑒱𑒧𑒼𑒕𑒲, 𑒣𑒰𑒞𑒩-𑒧𑒼𑒙, 𑒢𑒫-𑒥𑒴𑒜𑓃- 𑒧𑒳𑒠𑒰 𑒮𑒦 𑒡𑒩𑒱 𑒥𑒰𑒝𑒫𑒲𑒩।
𑒪𑒹𑒙𑒩𑒰 𑒍𑒏𑒩𑒰 𑒮𑒦𑒏 𑒥𑒲𑒔 𑒩𑒯𑒋 𑒪𑒰𑒑𑒪। 𑒏𑒱𑒕𑒳 𑒠𑒱𑒢 𑒡𑒩𑒱 𑒞𑒿 𑒍𑒏𑒩𑒰 𑒪𑒑𑒻𑒞 𑒩𑒯𑒋 𑒖𑒹 𑒍 𑒏𑒼𑒢𑒼 𑒫𑒱𑒬𑒱𑒭𑓂𑒙 𑒫𑓂𑒨𑒏𑓂𑒞𑒱 𑒁𑒕𑒱 𑒂 𑒞𑒹𑒿 𑒥𑒹𑒬𑒲 𑒠𑒳𑒐𑒲 𑒁𑒕𑒱 𑒂 𑒠𑒼𑒮𑒩 𑒥𑒰𑒝𑒫𑒲𑒩 𑒮𑒦 𑒞𑒿 𑒁𑒯𑒲 𑒨𑒼𑒑𑓂𑒨 𑒁𑒕𑒱। 𑒧𑒳𑒠𑒰 𑒂𑒮𑓂𑒞𑒹-𑒂𑒮𑓂𑒞𑒹 𑒖𑒐𑒢 𑒮𑓀𑒑𑒲-𑒮𑒰𑒟𑒲 𑒮𑒦𑒮𑒿 𑒍𑒏𑒩𑒰 𑒑𑒣 𑒯𑒼𑒧𑒋 𑒪𑒑𑒪𑒻𑒏, 𑒞𑒐𑒢 𑒍𑒏𑒩𑒰 𑒥𑒳𑒗𑒥𑒰𑒧𑒹 𑒁𑒋𑒪𑒻𑒏 𑒖𑒹 𑒮𑒦𑒏 𑒋𑒏𑓂𑒏𑒹 𑒐𑒹𑒩𑒯𑒰 𑒕𑒻𑒏।
𑒤𑒹𑒩 𑒍𑒯𑒱 𑒖𑒹𑒪𑒩𑒴𑒣𑒲 𑒒𑒩𑒧𑒹 𑒯𑒿𑒮𑒲-𑒐𑒳𑒬𑒲𑒮𑒿, 𑒕𑒼𑒙-𑒕𑒲𑒢 𑒗𑒑𑒛𑓃𑒰-𑒗𑒰𑒿𑒙𑒲 𑒂 𑒧𑒰𑒢-𑒧𑒢𑒾𑒁𑒪𑒏 𑒮𑓀𑒑 𑒍 𑒂𑒑𑒰𑒿 𑒥𑒜𑓃𑒋 𑒪𑒰𑒑𑒪। 𑒁𑒣𑒢 𑒖𑒱𑒢𑒑𑒲𑒏 𑒄 𑒩𑒴𑒣 𑒍𑒏𑒩𑒰 𑒋𑒯𑒢 𑒮𑒢 𑒪𑒑𑒻𑒞 𑒕𑒪𑒻𑒏 𑒖𑒹𑒢𑒰 𑒍 𑒢𑒼𑒏𑒩𑒱𑒯𑒰𑒩𑒰 𑒯𑒼𑒁𑒋। 𑒍𑒯𑒼 𑒒𑒳𑒩𑒱 𑒖𑒋𑒞 𑒑𑒰𑒧 𑒂 𑒤𑒹𑒩 𑒂𑒣𑒮 𑒁𑒋𑒞 𑒢𑒼𑒏𑒩𑒲𑒣𑒩। 𑒑𑒰𑒧𑒏 𑒠𑒼𑒮𑒩 𑒢𑒼𑒏𑒩𑒱𑒯𑒰𑒩𑒰 𑒮𑒦𑒏𑒹𑒿 𑒍 𑒠𑒹𑒐𑒻𑒞 𑒕𑒪। 𑒑𑒰𑒧 𑒁𑒥𑒻𑒞 𑒏𑒰𑒪 𑒖𑒞𑒥𑒹 𑒅𑒪𑓂𑒪𑒮𑒱𑒞 𑒩𑒯𑒻𑒞 𑒕𑒪𑒰𑒯, 𑒢𑒼𑒏𑒩𑒲𑒣𑒩 𑒒𑒳𑒩𑒻𑒞 𑒏𑒰𑒪 𑒮𑒦𑒏 𑒒𑒳𑒒𑒢𑒰 𑒪𑒙𑒏𑒱 𑒖𑒰𑒃𑒞 𑒕𑒪𑒢𑓂𑒯𑒱।
𑒡𑒳𑒩, 𑒧𑒰𑒋-𑒥𑒰𑒣 𑒯𑒧𑒩𑒰 𑒥𑒹𑒔𑒪𑒏 𑒟𑒼𑒛𑓃𑒥𑒹𑒏 𑒁𑒕𑒱। 𑒯𑒧𑒩𑒰 𑒮𑒢 𑒥𑒰𑒝𑒫𑒲𑒩𑒏𑒹𑒿 𑒋𑒯𑒱𑒮𑒿 𑒢𑒲𑒏 𑒂𑒩 𑒏𑒼𑒢 𑒢𑒼𑒏𑒩𑒲 𑒦𑒹𑒙𑒞𑒻𑒏। 𑒮𑒩𑓂𑒏𑒮𑒧𑒹 𑒖𑒐𑒢 𑒯𑒧 𑒏𑒪𑒰 𑒠𑒹𑒐𑒥𑒻𑒞 𑒕𑒲 𑒞𑒿 𑒥𑒔𑓂𑒔𑒰 𑒮𑒦 𑒏𑒼𑒢𑒰 𑒣𑒹𑒙 𑒣𑒏𑒛𑓃𑒱 𑒯𑒿𑒮𑒻𑒞 𑒁𑒕𑒱, 𑒏𑒞𑒹𑒏 𑒟𑒼𑒣𑒛𑓃𑒲 𑒣𑒛𑓃𑒻𑒞 𑒁𑒕𑒱। 𑒟𑒼𑒣𑒛𑓃𑒲𑒏 𑒁𑒥𑒰𑒖 𑒞𑒿 𑒢𑒱𑒮𑒰𑒿 𑒂𑒢𑒱 𑒠𑒻𑒞 𑒁𑒕𑒱। 𑒏𑒰𑒪𑓂𑒯𑒱 𑒍 𑒠𑒳 𑒖𑒳𑒙𑓂𑒙𑒲 𑒥𑒪𑒰 𑒥𑒔𑒱𑒨𑒰, 𑒏𑒹𑒯𑒢 𑒪𑒑𑒻𑒞 𑒩𑒯𑒋 𑒖𑒹𑒢𑒰 𑒁𑒣𑒢𑒹 𑒪𑒼𑒏 𑒩𑒯𑒋। 𑒑𑒰𑒧𑒧𑒹 𑒥𑒛𑓃𑒏𑒰 𑒏𑒏𑓂𑒏𑒰𑒏 𑒥𑒹𑒙𑒲𑒏 𑒥𑒱𑒨𑒰𑒯 𑒢𑒾𑒑𑒕𑒱𑒨𑒰 𑒦𑒹𑒪𑒢𑓂𑒯𑒱 𑒞𑒿 𑒯𑒳𑒢𑒏𑒼 𑒠𑒱𑒂 𑒞𑒿 𑒪𑒼𑒏 𑒮𑒦 𑒅𑒩𑒢𑓂𑒞𑒲 𑒅𑒛𑓃𑒹𑒢𑒹 𑒕𑒪 𑒖𑒹 𑒥𑒹𑒙𑒲 𑒥𑒹𑒔𑒱 𑒪𑒹𑒪𑒢𑓂𑒯𑒱। 𑒏𑒞𑒹𑒏 𑒠𑒳𑒩𑒑𑒩 𑒥𑒱𑒨𑒰𑒯 𑒏𑒩𑒰 𑒠𑒹𑒪𑒢𑓂𑒯𑒱!
𑒄 𑒪𑒼𑒏𑒼 𑒮𑒦, 𑒥𑒳𑒗𑒳 𑒃𑒢𑒰𑒩𑒏 𑒥𑒹𑒓 𑒮𑒦 𑒕𑒲। 𑒠𑒱𑒪𑓂𑒪𑒲-𑒧𑒳𑒧𑓂𑒥𑒃 𑒒𑒳𑒧𑒞 𑒑𑓄 𑒞𑒐𑒢 𑒢𑒹 𑒥𑒳𑒗𑒥𑒰𑒧𑒹 𑒁𑒍𑒞𑒻𑒏 𑒖𑒹 𑒦𑒰𑒑𑒪𑒣𑒳𑒩-𑒢𑒾𑒑𑒕𑒱𑒨𑒰 𑒏𑒼𑒢𑒼 𑒞𑒞𑒹𑒏 𑒠𑒳𑒩𑒑𑒩 𑒢𑒯𑒱 𑒕𑒻𑒏। 𑒧𑒰𑒋-𑒥𑒰𑒣 𑒯𑒧𑒩𑒰 𑒥𑒹𑒔𑒱 𑒪𑒹𑒞?....𑒂 𑒄 𑒮𑒼𑒔𑒱𑒞𑒹 𑒪𑒹𑒙𑒩𑒰𑒏 𑒏𑓀𑒚 𑒮𑒳𑒐𑒰 𑒑𑒹𑒪𑒻𑒏 𑒂 𑒂𑒿𑒐𑒱 𑒣𑒢𑒱𑒨𑒰 𑒑𑒹𑒪𑒻𑒏।
“𑒩𑒹 𑒦𑒰𑒃, 𑒔𑒪 । 𑒞𑒻𑒨𑒰𑒩𑒲 𑒏𑒩𑒥𑒰 𑒪𑒹𑒪 𑒒𑒝𑓂𑒙𑒲 𑒥𑒰𑒖𑒋 𑒥𑒪𑒰 𑒕𑒻𑒏। 𑒍𑒯𑒱𑒮𑒿 𑒣𑒯𑒱𑒢𑒹 𑒏𑒱𑒕𑒳 𑒐𑒰-𑒣𑒲𑒥𑒱 𑒪𑒲”।
𑒣𑓂𑒩𑒫𑒰𑒮
“𑒯𑒪𑓂𑒠𑒱𑒨𑒰 𑒦𑒼𑒩𑒹-𑒦𑒼𑒩𑒹 𑒣𑒯𑒳𑒿𑒔𑒪𑒯𑒳𑒿 । 𑒢𑒯𑒰-𑒡𑒼𑒂 𑒏𑓄 𑒂𑒤𑒱𑒮 𑒑𑒹𑒪𑒯𑒳𑒿। 𑒮𑒦 𑒣𑒳𑒕𑒪𑒏 𑒖𑒹 𑒏𑒞𑒋𑒮𑒿 𑒂𑒋𑒪 𑒕𑒲, 𑒮𑒹 𑒯𑒧𑒩𑒰 𑒍𑒏𑒩𑒰 𑒮𑒦𑒏 𑒯𑒰𑒫-𑒦𑒰𑒫𑒮𑒿 𑒣𑒞𑒰 𑒪𑒰𑒑𑒪, 𑒏𑒰𑒩𑒝 𑒯𑒧𑒩𑒰 𑒥𑓀𑒑𑒪𑒰 𑒣𑒴𑒩𑒰-𑒣𑒴𑒩𑒲 𑒢𑒯𑒱 𑒁𑒥𑒻𑒞 𑒁𑒕𑒱। 𑒯𑒧 𑒮𑒦 𑒑𑒼𑒙𑒹𑒏𑒹𑒿 𑒏𑒯𑒪𑒱𑒨𑒻𑒏 𑒖𑒹 𑒯𑒧𑒩𑒰𑒮𑒿 𑒁𑒯𑒰𑒿 𑒮𑒦 𑒯𑒱𑒢𑓂𑒠𑒲𑒧𑒹 𑒑𑒣 𑒏𑒩𑒋 𑒖𑒰𑒆, 𑒏𑒰𑒩𑒝 𑒯𑒧𑒩𑒰 𑒥𑓀𑒑𑒪𑒰 𑒢𑒯𑒱 𑒁𑒥𑒻𑒋। 𑒮𑒦 𑒑𑒼𑒙𑒹 𑒯𑒧𑒩𑒰 𑒠𑒱𑒮 𑒏𑒢𑒕𑒱𑒨𑒰𑒏𑒹𑒿 𑒞𑒏𑒪𑒏।
“𑒂𑒤𑒱𑒮𑒧𑒹 𑒏𑒰𑒖 𑒥𑒹𑒬𑒲 𑒩𑒯𑒻𑒞 𑒕𑒪 𑒮𑒹 𑒮𑒦 𑒑𑒼𑒙𑒹 𑒁𑒣𑒢-𑒁𑒣𑒢 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮, 𑒏𑒱𑒨𑒼 𑒁𑒣𑒢𑒰 𑒒𑒩𑒹𑒧𑒹 𑒞𑒿 𑒏𑒱𑒨𑒼 𑒂𑒢 𑒚𑒰𑒧, 𑒥𑒢𑒹𑒢𑒹 𑒩𑒯𑒟𑒱। 𑒮𑒹 𑒯𑒧𑒯𑒴𑒿 𑒠𑒴-𑒔𑒰𑒩𑒱 𑒠𑒱𑒢 𑒯𑒼𑒙𑒪𑒧𑒹 𑒩𑒯𑒥𑒰𑒏 𑒥𑒰𑒠 𑒋𑒏𑒙𑒰 𑒒𑒩 𑒞𑒰𑒏𑒪𑒯𑒳𑒿 𑒂 𑒍𑒏𑒩 𑒋𑒏𑒙𑒰 𑒏𑒼𑒚𑒪𑒲𑒏𑒹𑒿 𑒁𑒣𑒢 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮 𑒥𑒢𑒹𑒪𑒯𑒳𑒿।
“𑒏𑒱𑒕𑒳 𑒠𑒱𑒢 𑒡𑒩𑒱 𑒞𑒿 𑒯𑒼𑒃𑒞 𑒕𑒪 𑒖𑒹 𑒏𑒼𑒢𑒰 𑒏𑓄 𑒋𑒞𑒋 𑒏𑒰𑒖 𑒏𑒩𑒥। 𑒦𑒻𑒨𑒰 𑒧𑒻𑒢𑒹𑒖𑒱𑓀𑒑 𑒛𑒰𑒃𑒩𑒹𑒏𑓂𑒙𑒩 𑒕𑒟𑒱। 𑒯𑒳𑒢𑒏𑒰 𑒤𑒼𑒢 𑒏𑒹𑒪𑒱𑒨𑒢𑓂𑒯𑒱 𑒖𑒹 𑒐𑒛𑓃𑒑𑒣𑒳𑒩 𑒙𑓂𑒩𑒰𑓀𑒮𑒤𑒩 𑒏𑒩𑒥𑒰 𑒠𑒱𑒁। 𑒅𑒢𑒙𑒹 𑒍 𑒩𑒹𑒖𑒢𑒪 𑒧𑒻𑒢𑒹𑒖𑒩𑒏𑒹𑒿 𑒤𑒼𑒢 𑒏𑓄 𑒠𑒹𑒪𑒐𑒱𑒢𑓂𑒯 𑒖𑒹 𑒋𑒏𑒩𑒰 𑒏𑒼𑒢𑒼 𑒯𑒰𑒪𑒞𑒧𑒹 𑒯𑒪𑓂𑒠𑒱𑒨𑒰𑒮𑒿 𑒐𑒛𑓃𑒑𑒣𑒳𑒩 𑒙𑓂𑒩𑒰𑓀𑒮𑒤𑒩 𑒢𑒯𑒱 𑒏𑒩𑒴। 𑒙𑓂𑒩𑒹𑒢𑒏 𑒩𑒴𑒙𑒣𑒩 𑒐𑒛𑓃𑒑𑒣𑒳𑒩 𑒕𑒻𑒏, 𑒥𑒹𑒩-𑒥𑒹𑒩 𑒣𑒙𑒢𑒰 𑒒𑒳𑒩𑒱-𑒤𑒱𑒩𑒱 𑒏𑓄 𑒔𑒪𑒱 𑒖𑒋𑒞, 𑒧𑒼𑒢 𑒪𑒑𑒰 𑒏𑒋 𑒏𑒰𑒖 𑒢𑒯𑒱 𑒏𑒩𑒞। 𑒯𑒳𑒢𑒏𑒰 𑒛𑒩 𑒕𑒪𑒢𑓂𑒯𑒱 𑒖𑒹 𑒯𑒳𑒢𑒏𑒩 𑒢𑒰𑒧 𑒡𑓄 𑒏𑓄 𑒯𑒧 𑒩𑒹𑒖𑒢𑒪 𑒧𑒻𑒢𑒹𑒖𑒩𑒮𑒿 𑒙𑓂𑒩𑒰𑓀𑒮𑒤𑒩 𑒢𑒹 𑒏𑒩𑒥𑒰 𑒪𑒲।
“𑒏𑒱𑒕𑒳 𑒠𑒱𑒢 𑒡𑒩𑒱 𑒞𑒿 𑒧𑒼𑒢𑒹 𑒢𑒯𑒱 𑒪𑒰𑒑𑒋। 𑒂𑒤𑒱𑒮𑒧𑒹 𑒮𑒦 𑒥𑒱𑒯𑒰𑒩𑒲 𑒥𑓀𑒑𑒰𑒪𑒲𑒏 𑒁𑒩𑒰𑒛𑓃𑒱 𑒚𑒰𑒜𑓃 𑒏𑓄 𑒠𑒹𑒪𑒏। 𑒢𑒹 𑒯𑒧𑒩𑒰𑒮𑒿 𑒏𑒱𑒨𑒼 𑒑𑒣 𑒏𑒩𑒋 𑒂 𑒢𑒯𑒱𑒨𑒹 𑒙𑒼𑒏𑒋।
“𑒞𑒯𑒱𑒢𑒰 𑒠𑒱𑒢 𑒥𑒲𑒞𑒋 𑒪𑒰𑒑𑒪। 𑒋𑒏 𑒠𑒱𑒢 𑒞𑒰𑒣𑒮 𑒏𑓄 𑒏𑒋 𑒋𑒏𑒙𑒰 𑒨𑒳𑒫𑒏 𑒂𑒋𑒪 𑒩𑒯𑒋 𑒂𑒤𑒱𑒮। 𑒍 𑒋𑒏𑒙𑒰 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒠𑒹𑒫𑒠𑒞𑓂𑒞 𑒥𑒼𑒮𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒪𑒹𑒪 𑒂𑒋𑒪 𑒩𑒯𑒋, 𑒖𑒹 𑒋𑒐𑒢 𑒡𑒩𑒱 𑒂𑒤𑒱𑒮 𑒢𑒯𑒱 𑒣𑒯𑒳𑒿𑒔𑒪 𑒩𑒯𑒋। 𑒯𑒧𑒩𑒰 𑒪𑒑 𑒏𑒱𑒨𑒼 𑒢𑒯𑒱 𑒩𑒯𑒋, 𑒮𑒹 𑒍 𑒮𑒼𑒗𑒰𑒿 𑒂𑒥𑒱 𑒥𑒻𑒮𑒱 𑒑𑒹𑒪।
“𑒯𑒧 𑒍𑒏𑒩𑒰𑒮𑒿 𑒣𑒳𑒕𑒪𑒱𑒨𑒻𑒏 𑒖𑒹 𑒍 𑒏𑒼𑒢 𑒏𑒰𑒖𑒮𑒿 𑒂𑒋𑒪 𑒁𑒕𑒱 ? 𑒍 𑒏𑒯𑒪𑒏 𑒖𑒹 𑒠𑒹𑒫𑒠𑒞𑓂𑒞 𑒥𑒼𑒮 𑒪𑒹𑒪 𑒍 𑒏𑒰𑒖 𑒏𑒩𑒻𑒞 𑒁𑒕𑒱। 𑒪𑒼𑒏 𑒮𑒦𑒏 𑒥𑒲𑒧𑒰 𑒍 𑒏𑒩𑒥𑒻𑒞 𑒕𑒪 𑒂 𑒠𑒹𑒫𑒠𑒞𑓂𑒞𑒏𑒹𑒿 𑒠𑒻𑒞 𑒕𑒪 । 𑒠𑒹𑒫𑒠𑒞𑓂𑒞 𑒍𑒏𑒩𑒰 𑒞𑒏𑒩 𑒥𑒠𑒪𑒰𑒧𑒹 𑒣𑓂𑒩𑒲𑒧𑒱𑒨𑒧𑒏 𑒩𑒰𑒬𑒱𑒏 𑒯𑒱𑒮𑒰𑒥𑒮𑒿 𑒏𑒧𑒲𑒬𑒢 𑒠𑒻𑒞 𑒕𑒪𑒐𑒱𑒢𑓂𑒯।
“𑒞𑒐𑒢 𑒯𑒧 𑒍𑒏𑒩𑒰 𑒣𑒳𑒕𑒪𑒱𑒨𑒻𑒏 𑒖𑒹 𑒁𑒯𑒰𑒿𑒏𑒹𑒿 𑒍 𑒋𑒖𑒹𑒢𑓂𑒮𑒲 𑒠𑒹𑒢𑒹 𑒕𑒟𑒱 ? 𑒞𑒿 𑒣𑒞𑒰 𑒪𑒰𑒑𑒪 𑒖𑒹 𑒍 𑒞𑒲𑒢 𑒮𑒰𑒪𑒮𑒿 𑒂𑒬𑓂𑒫𑒰𑒮𑒢𑒣𑒩 𑒋𑒯𑒱𑒢𑒰 𑒐𑒙𑒱 𑒩𑒯𑒪 𑒁𑒕𑒱।
“𑒞𑒰𑒣𑒮 𑒯𑒧𑒩𑒰 𑒮𑒼𑒗 𑒪𑒼𑒏 𑒥𑒳𑒗𑒰𑒋𑒪 । 𑒮𑒹 𑒍𑒏𑒩𑒰 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒏𑒰𑒖 𑒏𑒩𑒋। 𑒍𑒏𑒩𑒰 𑒯𑒧 𑒋𑒖𑒹𑒢𑓂𑒮𑒲 𑒠𑒱𑒁𑒋𑒥𑒰𑒏 𑒪𑒹𑒪 𑒞𑒐𑒢𑒹 𑒤𑒰𑒩𑓂𑒧 𑒦𑒩𑒥𑒰 𑒪𑒹𑒪𑒱𑒨𑒻𑒏। 𑒍𑒏𑒩𑒰 𑒯𑒧 𑒣𑒰𑒿𑒔-𑒮𑒰𑒞 𑒂𑒩 𑒑𑒼𑒙𑒹𑒏𑒹𑒿 𑒮𑒹𑒯𑒼 𑒁𑒢𑒥𑒰𑒏 𑒪𑒹𑒪 𑒏𑒯𑒱𑒪𑒱𑒨𑒻𑒏, 𑒖𑒏𑒩𑒰 𑒯𑒧 𑒋𑒖𑒹𑒢𑓂𑒮𑒲 𑒠𑒋 𑒮𑒏𑒲। 𑒍 𑒏𑒯𑒪𑒏 𑒖𑒹 𑒥𑓀𑒑𑒰𑒪𑒲 𑒮𑒦 𑒢𑒼𑒏𑒩𑒲 𑒏𑒩𑒥𑒰𑒧𑒹 𑒥𑒹𑒬𑒲 𑒩𑒳𑒔𑒱 𑒩𑒐𑒻𑒞 𑒁𑒕𑒱, 𑒮𑒹 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒢𑒼𑒏𑒩𑒲𑒨𑒹𑒣𑒩 𑒏𑒱𑒕𑒳 𑒑𑒼𑒙𑒹𑒏𑒹𑒿 𑒞𑒐𑒢 𑒩𑒰𑒐𑒱 𑒪𑒱𑒁।
“𑒞𑒰𑒣𑒮𑒏𑒹𑒿 𑒋𑒖𑒹𑒢𑓂𑒮𑒲 𑒦𑒹𑒙𑒱 𑒑𑒹𑒪𑒻𑒏 𑒂 𑒍𑒏𑒩𑒰 𑒖𑒐𑒢 𑒔𑒹𑒏𑒮𑒿 𑒣𑒔𑒰𑒮-𑒣𑒔𑒰𑒮 𑒯𑒖𑒰𑒩 𑒏𑒧𑒲𑒬𑒢 𑒦𑒹𑒙𑒋 𑒪𑒑𑒪𑒻𑒏 𑒞𑒐𑒢 𑒍𑒏𑒩𑒰 𑒋𑒯𑒱 𑒑𑒣𑒏 𑒁𑒢𑒳𑒦𑒫 𑒦𑒹𑒪𑒻𑒏 𑒖𑒹 𑒠𑒹𑒫𑒠𑒞𑓂𑒞 𑒏𑒼𑒢𑒰 𑒍𑒏𑒩𑒰𑒮𑒿 𑒧𑒖𑒠𑒴𑒩𑒲 𑒏𑒩𑒥𑒰 𑒩𑒯𑒪 𑒕𑒪𑒋 𑒂 𑒬𑒼𑒭𑒝 𑒏𑓄 𑒩𑒯𑒪 𑒕𑒪𑒋।
“𑒠𑒹𑒫𑒠𑒞𑓂𑒞 𑒖𑒯𑒰𑒿-𑒞𑒯𑒰𑒿 𑒄 𑒑𑒣 𑒥𑒰𑒖𑒋 𑒪𑒰𑒑𑒪 𑒕𑒪 𑒖𑒹 𑒯𑒧 𑒍𑒏𑒩 𑒋𑒖𑒹𑒢𑓂𑒙𑒏𑒹𑒿 𑒞𑒼𑒛𑓃𑒱 𑒪𑒹𑒪𑒱𑒨𑒻𑒏। 𑒖𑒱𑒢𑒏𑒰𑒮𑒿 𑒯𑒧 𑒄 𑒑𑒣-𑒬𑒣 𑒮𑒳𑒢𑒻𑒞 𑒩𑒯𑒲 𑒞𑒱𑒢𑒏𑒰 𑒯𑒧 𑒅𑒞𑓂𑒞𑒩 𑒠𑒻𑒞 𑒕𑒪𑒱𑒨𑒢𑓂𑒯𑒱 𑒖𑒹 𑒠𑒹𑒫𑒠𑒞𑓂𑒞 𑒞𑒿 𑒞𑒰𑒣𑒮𑒏𑒹𑒿 𑒋𑒖𑒹𑒢𑓂𑒮𑒲 𑒠𑒹𑒢𑒯𑒱𑒨𑒹 𑒢𑒯𑒱 𑒩𑒯𑒋, 𑒞𑒐𑒢 𑒋𑒖𑒹𑒢𑓂𑒙 𑒞𑒼𑒛𑓃𑒥𑒰𑒏 𑒑𑒣 𑒏𑒞𑒋𑒮𑒿 𑒂𑒋𑒪 ?
“𑒋𑒏 𑒠𑒱𑒢 𑒠𑒹𑒫𑒠𑒞𑓂𑒞 𑒏𑒼𑒢𑒼 𑒑𑒳𑒣𑓂𑒞 𑒧𑒲𑒙𑒱𑓀𑒑 𑒏𑒋, 𑒖𑒏𑒩 𑒖𑒰𑒢𑒏𑒰𑒩𑒲 𑒯𑒧𑒩𑒰 𑒥𑒰𑒠𑒧𑒹 𑒦𑒹𑒙𑒪, 𑒂𑒢 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒮𑒦𑒏 𑒮𑓀𑒑𑒹 𑒯𑒧𑒩 𑒙𑒹𑒥𑒳𑒪 𑒪𑒑 𑒂𑒋𑒪 𑒂 𑒁𑒝𑓂𑒙-𑒬𑒝𑓂𑒙 𑒥𑒰𑒖𑒋 𑒪𑒰𑒑𑒪। 𑒍 𑒮𑒦 𑒥𑓀𑒑𑒪𑒰𑒧𑒹 𑒣𑓂𑒩𑒪𑒰𑒣 𑒏𑒋 𑒩𑒯𑒪 𑒕𑒪, 𑒮𑒹 𑒯𑒧 𑒏𑒱𑒕𑒳 𑒢𑒯𑒱 𑒥𑒳𑒗𑒪𑒱𑒨𑒻𑒏। 𑒧𑒳𑒠𑒰 𑒞𑒐𑒢𑒹 𑒍 𑒋𑒏𑒙𑒰 𑒑𑒪𑒞𑒲 𑒏𑒋𑒪𑒏 𑒖𑒹 𑒯𑒧𑒩 𑒙𑒹𑒥𑒳𑒪𑒣𑒩 𑒧𑒳𑒏𑓂𑒏𑒰 𑒧𑒰𑒩𑒪𑒏।
“𑒯𑒳𑒝𑓂𑒛 𑒞𑒿 𑒯𑒧 𑒕𑒲𑒯𑒹। 𑒢𑒼𑒏𑒩𑒲 𑒖𑒹 𑒄 𑒋𑒪.𑒂𑒃.𑒮𑒲.𑒥𑒪𑒰 𑒦𑒹𑒙𑒪 𑒁𑒕𑒱, 𑒮𑒹 𑒡𑒩𑒱 𑒁𑒕𑒱 𑒮𑒖𑓂𑒖𑒢𑒥𑒪𑒰। 𑒮𑒹 𑒯𑒧 𑒋𑒞𑒹𑒏 𑒏𑒰𑒪 𑒡𑒩𑒱 𑒥𑒩𑒠𑒰𑒮𑓂𑒞 𑒏𑒋𑒢𑒹 𑒩𑒯𑒱𑒨𑒢𑓂𑒯𑒱। 𑒧𑒳𑒠𑒰 𑒄 𑒞𑒿 𑒁𑒞𑒞𑓂𑒞𑒯𑒹 𑒏𑒋 𑒠𑒹𑒢𑒹 𑒩𑒯𑒋। 𑒋𑒯𑒱 𑒢𑒼𑒏𑒩𑒲𑒧𑒹 𑒮𑒦 𑒠𑒱𑒢 𑒯𑒧𑒩𑒰 𑒖𑒹 𑒕𑒠𑓂𑒧 𑒦𑒹𑒭𑒧𑒹 𑒂𑒤𑒱𑒮 𑒖𑒰𑒋 𑒣𑒛𑓃𑒻𑒞 𑒩𑒯𑒋, 𑒮𑒹 𑒍𑒯𑒱 𑒠𑒱𑒢 𑒄 𑒦𑒹𑒭 𑒯𑒧𑒩𑒰 𑒅𑒞𑒰𑒩𑒥𑒰𑒏 𑒧𑒼𑒢 𑒦𑒹𑒪। 𑒮𑒼𑒗𑒹 𑒯𑒧 𑒠𑒹𑒫𑒠𑒞𑓂𑒞𑒏 𑒏𑒰𑒪𑒩 𑒣𑒏𑒛𑓃𑒪𑒯𑒳𑒿 𑒂 𑒏𑒯𑒪𑒯𑒳𑒿, 𑒖𑒹 𑒄 𑒮𑒧𑓂𑒣𑒴𑒩𑓂𑒝 𑒦𑒰𑒩𑒞 𑒋𑒏 𑒁𑒕𑒱। 𑒋𑒞𑒋 𑒦𑒰𑒩𑒞𑒹𑒏 𑒢𑒯𑒱 𑒫𑒩𑒢𑓂 𑒢𑒹𑒣𑒰𑒪 𑒂 𑒦𑒴𑒙𑒰𑒢𑒏 𑒪𑒼𑒏𑒏𑒹𑒿 𑒮𑒹𑒯𑒼 𑒏𑒼𑒢𑒼 𑒮𑓂𑒟𑒰𑒢𑒣𑒩 𑒖𑒰 𑒏𑒋 𑒏𑒰𑒖 𑒏𑒩𑒥𑒰𑒏 𑒮𑓂𑒫𑒞𑓀𑒞𑓂𑒩𑒞𑒰 𑒮𑓀𑒫𑒱𑒡𑒰𑒢 𑒠𑓂𑒫𑒰𑒩𑒰 𑒠𑒹𑒪 𑒑𑒹𑒪 𑒁𑒕𑒱।
“𑒯𑒧𑒩 𑒄 𑒩𑒴𑒣 𑒠𑒹𑒐𑒱 𑒍𑒏𑒩 𑒮𑒦 𑒮𑒯𑒏𑒩𑓂𑒧𑒲 𑒁𑒣𑒢-𑒁𑒣𑒢 𑒏𑒹𑒥𑒱𑒢 𑒔𑒪𑒱 𑒑𑒹𑒪 𑒂 𑒥𑓂𑒩𑒰𑓀𑒔 𑒧𑒻𑒢𑒹𑒖𑒩 𑒂𑒥𑒱 𑒏𑒋 𑒯𑒧𑒩𑒰 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒬𑒰𑒢𑓂𑒞 𑒏𑒋𑒪𑒢𑓂𑒯𑒱।
“𑒞𑒏𑒩 𑒥𑒰𑒠 𑒋𑒏𑒙𑒰 𑒂𑒩 𑒗𑒧𑒹𑒪𑒰 𑒦𑒹𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒞𑒰𑒣𑒮 𑒖𑒰𑒯𑒱 𑒠𑒴-𑒞𑒲𑒢 𑒑𑒼𑒙𑒹𑒏𑒹𑒿 𑒋𑒖𑒹𑒢𑓂𑒮𑒲𑒏 𑒪𑒹𑒪 𑒁𑒢𑒢𑒹 𑒕𑒪, 𑒮𑒹 𑒣𑒯𑒱𑒢𑒹 𑒞𑒿 𑒢𑒼𑒏𑒩𑒲 𑒏𑒩𑒥𑒰𑒏 𑒪𑒹𑒪 𑒥𑒹𑒬𑒲 𑒅𑒞𑓂𑒮𑒳𑒏 𑒕𑒪𑒰𑒯। 𑒧𑒳𑒠𑒰 𑒖𑒐𑒢 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒞𑒰𑒣𑒮𑒏 𑒂𑒥𑒰𑒖𑒰𑒯𑒲 𑒂 𑒏𑒧𑒲𑒬𑒢𑒏 𑒔𑒹𑒏 𑒮𑒦𑒏 𑒔𑒩𑒔𑒰 𑒮𑒳𑒢𑒪𑒢𑓂𑒯𑒱, 𑒞𑒐𑒢 𑒍 𑒯𑒧𑒩 𑒂𑒤𑒱𑒮𑒧𑒹 𑒏𑒰𑒖 𑒏𑒩𑒱𑒞𑒟𑒱 𑒂𑒏𑒱 𑒧𑒰𑒩𑓂𑒏𑒹𑒙𑒧𑒹 𑒥𑒲𑒧𑒰𑒏 𑒪𑒹𑒪 𑒦𑒰𑒑𑒰-𑒦𑒰𑒑𑒲 𑒏𑒩𑒱𑒞𑒟𑒱 ? 𑒁𑒣𑒢 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒯𑒧 𑒍𑒏𑒩𑒰 𑒮𑒦𑒏𑒹𑒿 𑒞𑒲𑒢-𑒞𑒲𑒢 𑒯𑒖𑒰𑒩 𑒙𑒰𑒏𑒰 𑒠𑒻𑒞 𑒩𑒯𑒱𑒨𑒻𑒏 । 𑒂 𑒞𑒰𑒣𑒮𑒏𑒹𑒿 𑒞𑒲𑒮-𑒞𑒲𑒮 𑒯𑒖𑒰𑒩 𑒙𑒰𑒏𑒰 𑒧𑒰𑒮 𑒣𑓂𑒩𑒲𑒧𑒱𑒨𑒧𑒏 𑒏𑒧𑒲𑒬𑒢 𑒦𑒹𑒙𑒻𑒞 𑒩𑒯𑒻𑒏। 𑒄 𑒠𑒹𑒐𑒱 𑒍𑒯𑒼 𑒮𑒦 𑒦𑒰𑒑𑒱-𑒦𑒰𑒑𑒱 𑒏𑒰𑒖 𑒏𑒩𑒋 𑒪𑒰𑒑𑒪। 𑒮𑒹 𑒖𑒹 𑒮𑒦 𑒢𑒼𑒏𑒩𑒲 𑒪𑒹𑒪 𑒂𑒋𑒪, 𑒮𑒦 𑒯𑒧𑒩 𑒋𑒖𑒹𑒢𑓂𑒙 𑒥𑒢𑒱 𑒑𑒹𑒪। 𑒯𑒧𑒩𑒰 𑒣𑓂𑒩𑒼𑒥𑒹𑒬𑒢 𑒣𑒲𑒩𑒱𑒋𑒛𑒧𑒹 𑒠𑒹𑒪 𑒙𑒰𑒩𑒑𑒹𑒙 𑒣𑒴𑒩𑒰 𑒏𑒩𑒥𑒰𑒧𑒹 𑒏𑒼𑒢𑒼 𑒠𑒱𑒏 𑒢𑒯𑒱 𑒦𑒹𑒪। 𑒧𑒲𑒙𑒱𑓀𑒑𑒧𑒹 𑒖𑒐𑒢 𑒂𑒢 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒮𑒦 𑒏𑒯𑒟𑒱 𑒖𑒹 𑒧𑒰𑒩𑓂𑒏𑒹𑒙 𑒛𑒰𑒅𑒢 𑒔𑒪𑒱 𑒩𑒯𑒪 𑒁𑒕𑒱, 𑒞𑒿 𑒁𑒡𑒱𑒏𑒰𑒩𑒲 𑒯𑒧𑒩 𑒅𑒠𑒰𑒯𑒩𑒝 𑒠𑒻𑒞 𑒩𑒯𑒟𑒱𑒢𑓂𑒯 𑒖𑒹 𑒍 𑒏𑒼𑒢𑒰 𑒁𑒣𑒢 𑒙𑒰𑒩𑒑𑒹𑒙 𑒣𑒴𑒩𑓂𑒝 𑒏𑒋 𑒩𑒯𑒪 𑒕𑒟𑒱 ?
“𑒧𑒳𑒠𑒰 𑒯𑒧𑒩 𑒄 𑒣𑓂𑒩𑒑𑒞𑒱 𑒠𑒹𑒫𑒠𑒞𑓂𑒞𑒏𑒹𑒿 𑒠𑒹𑒐𑒪 𑒢𑒯𑒱 𑒑𑒹𑒪𑒻𑒏। 𑒍 𑒯𑒧𑒩 𑒋𑒖𑒹𑒢𑓂𑒙 𑒮𑒦𑒮𑒿 𑒋𑒏𑒙𑒰 𑒑𑒳𑒣𑓂𑒞 𑒧𑒲𑒙𑒱𑓀𑒑 𑒏𑒋𑒪𑒏, 𑒖𑒏𑒩 𑒖𑒰𑒢𑒏𑒰𑒩𑒲 𑒯𑒧𑒩𑒰 𑒥𑒰𑒠𑒧𑒹 𑒦𑒹𑒪।
“𑒋𑒏 𑒠𑒱𑒢 𑒞𑒰𑒣𑒮 𑒮𑒦𑒙𑒰 𑒋𑒖𑒹𑒢𑓂𑒙𑒏𑒹𑒿 𑒪𑒹𑒢𑒹 𑒯𑒧𑒩𑒰 𑒪𑒑 𑒂𑒋𑒪 𑒂 𑒏𑒯𑒪𑒏 𑒖𑒹 𑒍 𑒮𑒦 𑒯𑒧𑒩𑒰 𑒮𑓀𑒑 𑒂𑒥 𑒏𑒰𑒖 𑒢𑒯𑒱 𑒏𑒩𑒞 । 𑒏𑒰𑒩𑒝, 𑒠𑒹𑒫𑒠𑒞𑓂𑒞 𑒋𑒏𑒙𑒰 𑒧𑒲𑒙𑒱𑓀𑒑 𑒏𑒋 𑒥𑒱𑒯𑒰𑒩𑒲𑒏 𑒢𑒲𑒔𑒰𑒿 𑒏𑒰𑒖 𑒏𑒹𑒪𑒰𑒣𑒩 𑒋𑒏𑒩𑒰 𑒮𑒦𑒏𑒹𑒿 𑒮𑒧𑒰𑒖𑒮𑒿 𑒥𑒯𑒱𑒭𑓂𑒏𑒵𑒞 𑒏𑒩𑒥𑒰𑒏 𑒑𑒣 𑒏𑒯𑒢𑒹 𑒩𑒯𑒋।
“𑒞𑒰𑒫𑒞 𑒯𑒧𑒩 𑒦𑒹𑒿𑒙 𑒮𑓂𑒟𑒰𑒢𑒲𑒨 𑒋𑒧.𑒋𑒪.𑒋. 𑒮𑒳𑒧𑒱𑒞 𑒣𑒰𑒪𑒮𑒿 𑒦𑓄 𑒑𑒹𑒪 𑒩𑒯𑒋 𑒂 𑒯𑒧 𑒯𑒳𑒢𑒏𑒩 𑒥𑒹𑒙𑒲𑒏𑒹𑒿 𑒮𑒹𑒯𑒼 𑒋𑒖𑒹𑒢𑓂𑒮𑒲 𑒠𑓄 𑒠𑒹𑒢𑒹 𑒕𑒪𑒱𑒨𑒢𑓂𑒯𑒱। 𑒠𑒹𑒫𑒠𑒞𑓂𑒞𑒏𑒹𑒿 𑒮𑒰𑒯𑒮 𑒢𑒯𑒱 𑒩𑒯𑒋 𑒖𑒹 𑒋𑒧.𑒋𑒪.𑒋. 𑒪𑒑 𑒖𑒃𑒞𑒋, 𑒮𑒹 𑒍 𑒞𑒰𑒣𑒮 𑒮𑒦𑒣𑒩 𑒁𑒣𑒢 𑒩𑒼𑒥-𑒠𑒰𑒥 𑒠𑒹𑒐𑒰 𑒩𑒯𑒪 𑒕𑒪।
“𑒯𑒧𑒩𑒰𑒮𑒿 𑒑𑒣 𑒏𑒩𑒻𑒞-𑒏𑒩𑒻𑒞 𑒋𑒖𑒹𑒢𑓂𑒙 𑒮𑒦 𑒯𑒱𑒢𑓂𑒠𑒲 𑒮𑒲𑒐𑒱 𑒑𑒹𑒪 𑒩𑒯𑒟𑒱। 𑒯𑒧 𑒯𑒳𑒢𑒏𑒰 𑒮𑒦𑒏𑒹𑒿 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒠𑒹𑒐𑒴 । 𑒋𑒏 𑒞𑒿 𑒄 𑒑𑒣, 𑒖𑒹 𑒁𑒯𑒰𑒿 𑒮𑒦𑒏 𑒖𑒢-𑒣𑓂𑒩𑒞𑒱𑒢𑒱𑒡𑒱𑒏 𑒥𑒹𑒙𑒲 𑒯𑒧𑒩𑒰𑒮𑒿 𑒋𑒖𑒹𑒢𑓂𑒮𑒲 𑒪𑒹𑒢𑒹 𑒕𑒟𑒱। 𑒞𑒿 𑒠𑒹𑒫𑒠𑒞𑓂𑒞 𑒏𑒲 𑒯𑒳𑒢𑒏𑒰 𑒥𑒰𑒩𑒱 𑒠𑒹𑒞 ?
“𑒯𑒧 𑒂 𑒁𑒯𑒰𑒿 𑒠𑒳𑒢𑒴 𑒑𑒼𑒙𑒹 𑒦𑒰𑒩𑒞𑒏 𑒢𑒱𑒫𑒰𑒮𑒲 𑒕𑒲। 𑒋𑒞𑒋 𑒯𑒪𑓂𑒠𑒱𑒨𑒰𑒧𑒹 𑒥𑒰𑒩𑒯 𑒙𑒰 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲 𑒕𑒟𑒱, 𑒖𑒰𑒯𑒱𑒧𑒹 𑒋𑒑𑒰𑒩𑒯 𑒙𑒰 𑒥𑓀𑒑𑒰𑒪𑒲 𑒕𑒟𑒱 𑒂 𑒧𑒰𑒞𑓂𑒩 𑒯𑒧 𑒋𑒏𑒙𑒰 𑒥𑒱𑒯𑒰𑒩𑒲 𑒕𑒲। 𑒯𑒪𑓂𑒠𑒱𑒨𑒰𑒧𑒹 𑒖𑒹 𑒤𑒻𑒏𑓂𑒙𑓂𑒩𑒲 𑒁𑒕𑒱, 𑒞𑒰𑒯𑒱 𑒮𑒦𑒧𑒹 𑒥𑒱𑒯𑒰𑒩 𑒂 𑒂𑒢 𑒣𑓂𑒩𑒠𑒹𑒬𑒏 𑒖𑒞𑒹𑒏 𑒪𑒼𑒏 𑒕𑒟𑒱, 𑒞𑒏𑒩 𑒥𑒲𑒧𑒰 𑒯𑒧 𑒁𑒯𑒰𑒿 𑒮𑒦𑒏𑒹𑒿 𑒠𑒹𑒥, 𑒠𑓄 𑒮𑒏𑒞 𑒄 𑒥𑒲𑒧𑒰 𑒠𑒹𑒫𑒠𑒞𑓂𑒞 𑒂𑒏𑒱 𑒏𑓂𑒨𑒼 𑒂𑒢𑒼 ? 𑒥𑓀𑒑𑒰𑒪𑒲 𑒮𑒦𑒏 𑒥𑒲𑒧𑒰 𑒞𑒿 𑒋𑒑𑒰𑒩𑒯 𑒙𑒰 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲𑒧𑒹 𑒥𑒿𑒙𑒞 𑒧𑒳𑒠𑒰 𑒥𑒱𑒯𑒰𑒩𑒲 𑒂 𑒂𑒢 𑒮𑒦𑒏 𑒥𑒲𑒧𑒰 𑒞𑒿 𑒧𑒰𑒞𑓂𑒩 𑒁𑒯𑒰𑒿 𑒮𑒦𑒏𑒹𑒿 𑒦𑒹𑒙𑒞। 𑒥𑓀𑒑𑒰𑒪𑒲 𑒮𑒦𑒏 𑒥𑒲𑒧𑒰 𑒞𑒿 𑒮𑒹𑒯𑒼 𑒁𑒯𑒰𑒿 𑒮𑒦 𑒁𑒣𑒢 𑒮𑒰𑒧𑒩𑓂𑒟𑓂𑒨𑒏 𑒁𑒢𑒳𑒮𑒰𑒩𑒹𑒿 𑒏𑒃𑒨𑒹 𑒩𑒯𑒪 𑒕𑒲।
“𑒯𑒧𑒩 𑒦𑒰𑒭𑒝 𑒫𑒰𑒞𑒰𑒫𑒩𑒝𑒏𑒹𑒿 𑒣𑒩𑒱𑒫𑒩𑓂𑒞𑒱𑒞 𑒏𑒋 𑒠𑒹𑒪𑒏𑒻𑒏। 𑒮𑒦 𑒋𑒖𑒹𑒢𑓂𑒙𑒏 𑒦𑒰𑒋-𑒥𑒰𑒣 𑒮𑒦 𑒯𑒧𑒩𑒰 𑒪𑒑 𑒂𑒋𑒪 𑒂 𑒏𑒯𑒪𑒏 𑒖𑒹 𑒁𑒯𑒰𑒿 𑒞𑒿 𑒠𑒹𑒫𑒞𑒰 𑒥𑒢𑒱 𑒂𑒋𑒪 𑒕𑒲 । 𑒯𑒧𑒩 𑒮𑒦𑒏 𑒦𑒰𑒋-𑒥𑒔𑓂𑒔𑒰 𑒥𑒾𑒂𑒃𑒞 𑒩𑒯𑒻𑒞 𑒕𑒪 𑒂 𑒥𑒠𑒧𑒮𑓂𑒞𑒲 𑒏𑒩𑒻𑒞 𑒩𑒯𑒻𑒞 𑒕𑒪। 𑒁𑒯𑒰𑒿𑒏 𑒁𑒋𑒪𑒰𑒮𑒿 𑒄 𑒮𑒦 𑒩𑒼𑒖𑒑𑒰𑒩𑒧𑒹 𑒪𑒰𑒑𑒱 𑒑𑒹𑒪 𑒁𑒕𑒱 𑒂 𑒖𑒞𑒹𑒏 𑒣𑒰𑒃 𑒏𑒧𑒰 𑒩𑒯𑒪 𑒁𑒕𑒱, 𑒮𑒹 𑒞𑒿 𑒯𑒧𑒩𑒰 𑒮𑒦 𑒮𑒣𑒢𑒼𑒧𑒹 𑒢𑒯𑒱 𑒮𑒼𑒔𑒢𑒹 𑒩𑒯𑒲।
“𑒤𑒻𑒏𑓂𑒙𑒩𑒲𑒧𑒹 𑒧𑒖𑒴𑒩 𑒮𑒦𑒏 𑒧𑒹𑒙 𑒩𑒯𑒋 𑒋𑒏𑒙𑒰 𑒗𑒰𑒖𑒲। 𑒯𑒪𑓂𑒠𑒱𑒨𑒰𑒏 𑒤𑒻𑒏𑓂𑒙𑒩𑒲 𑒮𑒦𑒧𑒹 𑒍𑒏𑒩𑒰 𑒧𑒰𑒡𑓂𑒨𑒧𑒮𑒿 𑒜𑒹𑒩 𑒩𑒰𑒮 𑒥𑒲𑒧𑒰 𑒦𑒹𑒙𑒪, 𑒮𑒦 𑒋𑒖𑒹𑒢𑓂𑒙𑒧𑒹 𑒥𑒩𑒰𑒥𑒩𑒱 𑒏𑓄 𑒥𑒰𑒿𑒙𑒱 𑒠𑒹𑒪𑒱𑒨𑒻𑒏। 𑒧𑒳𑒠𑒰 𑒣𑒞𑒰 𑒢𑒯𑒱 𑒄 𑒠𑒹𑒫𑒠𑒞𑓂𑒞 𑒍𑒏𑒩𑒰 𑒏𑒲 𑒏𑒰𑒢 𑒦𑒩𑒱 𑒠𑒹𑒪𑒏𑒻𑒏, 𑒖𑒹 𑒥𑒰𑒠𑒧𑒹 𑒍 𑒯𑒧𑒩 𑒋𑒖𑒹𑒢𑓂𑒙 𑒮𑒦𑒏𑒹𑒿 𑒦𑒛𑓃𑒏𑒰𑒥𑒋 𑒪𑒰𑒑𑒪।
“𑒄 𑒗𑒰𑒖𑒲 𑒋𑒏 𑒠𑒱𑒢 𑒠𑒰𑒩𑒴 𑒣𑒲𑒥𑒱 𑒏𑒋 𑒯𑒧𑒩𑒰 𑒮𑓀𑒑𑒹 𑒗𑒑𑒛𑓃𑒰 𑒏𑒩𑒋 𑒪𑒰𑒑𑒪 𑒞𑒿 𑒍𑒏𑒩𑒼 𑒯𑒧 𑒢𑒲𑒏 𑒖𑒹𑒏𑒰𑒿 𑒛𑒣𑒙𑒱 𑒠𑒹𑒪𑒱𑒨𑒻𑒏, 𑒖𑒹 𑒥𑒰𑒥𑒴 𑒢𑒲𑒏 𑒖𑒹𑒏𑒰𑒿 𑒏𑒰𑒖 𑒏𑒩 𑒢𑒯𑒱 𑒞𑒿 𑒒𑒩 𑒖𑒼 ।
“𑒒𑒩𑒧𑒹 𑒋𑒏𑒙𑒰 𑒠𑒰𑒃 𑒧𑒰𑒿 𑒐𑒹𑒢𑒰𑒃 𑒥𑒢𑒰 𑒖𑒰𑒃𑒞 𑒩𑒯𑒟𑒱। 𑒞𑒞𑒹𑒏 𑒪𑒼𑒏𑒮𑒿 𑒗𑒑𑒛𑓃𑒰 𑒬𑒳𑒩𑒴 𑒦𑓄 𑒑𑒹𑒪 𑒩𑒯𑒋 𑒖𑒹 𑒯𑒧𑒩𑒰 𑒪𑒰𑒑𑒪 𑒖𑒹 𑒍 𑒮𑒦 𑒠𑒰𑒃 𑒧𑒰𑒿𑒏 𑒧𑒰𑒡𑓂𑒨𑒧𑒮𑒿 𑒯𑒧𑒩 𑒐𑒹𑒢𑒰𑒃𑒧𑒹 𑒧𑒰𑒯𑒳𑒩 𑒢𑒹 𑒧𑒱𑒪𑒥𑒰 𑒠𑒋। 𑒮𑒹 𑒯𑒧 𑒠𑒰𑒃𑒧𑒰𑒿 𑒮𑒿 𑒐𑒴𑒥 𑒯𑒱𑒪𑒱-𑒧𑒱𑒪𑒱 𑒑𑒹𑒪𑒯𑒳𑒿 𑒂 𑒯𑒳𑒢𑒏𑒩 𑒒𑒩-𑒠𑓂𑒫𑒰𑒩𑒏 𑒮𑒧𑒰𑒔𑒰𑒩 𑒣𑒳𑒕𑒋 𑒪𑒑𑒪𑒱𑒨𑒢𑓂𑒯𑒱। 𑒯𑒳𑒢𑒏𑒰 𑒥𑒲𑒧𑒰 𑒏𑒩𑒥𑒰 𑒠𑒹𑒪𑒱𑒨𑒢𑓂𑒯𑒱 𑒂 𑒞𑒏𑒩 𑒣𑓂𑒩𑒲𑒧𑒱𑒨𑒧 𑒯𑒧𑒯𑒲𑓀 𑒠𑓄 𑒠𑒹𑒪𑒱𑒨𑒻𑒏। 𑒯𑒳𑒢𑒏𑒩 𑒥𑒹𑒙𑒰𑒏𑒹𑒿 𑒮𑒹𑒯𑒼 𑒥𑒲𑒧𑒰-𑒋𑒖𑒹𑒢𑓂𑒙 𑒥𑒢𑒥𑒰 𑒠𑒹𑒪𑒱𑒨𑒻𑒏 𑒂 𑒖𑒹 𑒥𑒲𑒧𑒰 𑒏𑒩𑒰𑒥𑒋 𑒥𑒪𑒰 𑒮𑒦 𑒯𑒧𑒩 𑒣𑓂𑒩𑒰𑒃𑒫𑒹𑒙 𑒂𑒤𑒱𑒮𑒧𑒹 𑒂𑒥𑒱 𑒖𑒰𑒃𑒞 𑒕𑒪, 𑒍𑒏𑒩 𑒥𑒲𑒧𑒰 𑒠𑒰𑒃 𑒧𑒰𑒿𑒏 𑒥𑒹𑒙𑒰𑒏 𑒋𑒖𑒹𑒢𑓂𑒙 𑒏𑒼𑒛𑒧𑒹 𑒏𑒩𑒥𑒰 𑒠𑒻𑒞 𑒕𑒪𑒱𑒨𑒻𑒏। 𑒥𑒹𑒔𑒰𑒩𑒲 𑒠𑒰𑒃-𑒧𑒰𑒿𑒏 𑒮𑓂𑒟𑒱𑒞𑒱𑒧𑒹 𑒮𑒳𑒡𑒰𑒩 𑒦𑓄 𑒑𑒹𑒪𑒻𑒏 𑒂 𑒍 𑒥𑒳𑒗𑒴 𑒞𑒿 𑒯𑒧𑒩𑒰 𑒁𑒣𑒢 𑒥𑒹𑒙𑒰 𑒖𑒹𑒏𑒰𑒿 𑒧𑒰𑒢𑒋 𑒪𑒰𑒑𑒪𑒱।
“𑒋𑒖𑒹𑒢𑓂𑒙 𑒮𑒦𑒏 𑒪𑒹𑒪 𑒠𑒴 𑒮𑒋 𑒣𑓂𑒩𑒬𑓂𑒢𑒏 𑒣𑓂𑒩𑒬𑓂𑒢𑒰𑒫𑒪𑒲 𑒥𑒢𑒰 𑒏𑒋 𑒮𑒦𑒏𑒹𑒿 𑒞𑒏𑒩 𑒅𑒞𑓂𑒞𑒩 𑒏𑓀𑒚𑒮𑓂𑒟 𑒏𑒩𑒥𑒰 𑒠𑒹𑒪𑒱𑒨𑒻𑒏। 𑒮𑒦 𑒫𑒱𑒏𑒰𑒮 𑒁𑒡𑒱𑒏𑒰𑒩𑒲𑒏 𑒁𑒠𑒯𑒰 𑒋𑒖𑒹𑒢𑓂𑒙 𑒣𑒩𑒲𑒏𑓂𑒭𑒰𑒧𑒹 𑒣𑒰𑒮 𑒢𑒯𑒱 𑒏𑒹𑒪𑒏𑒻𑒏 𑒧𑒳𑒠𑒰 𑒯𑒧𑒩 𑒮𑒦 𑒋𑒖𑒹𑒢𑓂𑒙 𑒣𑒰𑒮 𑒏𑒋 𑒑𑒹𑒪।
“𑒤𑒹𑒩 𑒯𑒧𑒩𑒰 𑒠𑒱𑒧𑒰𑒑𑒧𑒹 𑒂𑒋𑒪 𑒖𑒹 𑒂𑒥 𑒠𑒹𑒫𑒠𑒞𑓂𑒞 𑒍𑒯𑒱 𑒋𑒧.𑒋𑒪.𑒋.𑒏𑒹𑒿 𑒦𑒛𑓃𑒏𑒰𑒍𑒞। 𑒞𑒐𑒢𑒹 𑒮𑒳𑒧𑒱𑒞 𑒣𑒰𑒪 𑒁𑒣𑒢 𑒥𑒹𑒙𑒲𑒏 𑒖𑒢𑓂𑒧-𑒠𑒱𑒫𑒮𑒧𑒹 𑒯𑒧𑒩𑒰 𑒥𑒖𑒹𑒪𑒏। 𑒯𑒧 𑒐𑒴𑒥 𑒢𑒲𑒏 𑒮𑒰𑒛𑓃𑒲 𑒂 𑒂𑒢-𑒂𑒢 𑒔𑒲𑒖 𑒣𑒻𑒏 𑒏𑒩𑒥𑒰 𑒏𑒋 𑒣𑒯𑒳𑒿𑒔𑒪𑒯𑒳𑒿। 𑒍 𑒣𑓂𑒩𑒹𑒧𑒮𑒿 𑒯𑒧𑒩𑒰𑒣𑒩 𑒞𑒧𑒮𑒰𑒋𑒪 𑒂 𑒏𑒯𑒪𑒏 𑒖𑒹 𑒄 𑒮𑒦 𑒂𑒣𑒮 𑒪𑒋 𑒖𑒰𑒆। 𑒯𑒧 𑒏𑒯𑒪𑒱𑒨𑒻𑒏 𑒖𑒹 𑒁𑒯𑒰𑒿 𑒦𑒰𑒋-𑒥𑒯𑒱𑒢𑒏 𑒥𑒲𑒔 𑒢𑒯𑒱 𑒣𑒛𑓃𑒴।
“𑒂𑒥 𑒠𑒹𑒫𑒠𑒞𑓂𑒞 𑒞𑒏𑒩𑒰 𑒥𑒰𑒠 𑒋𑒏 𑒠𑒱𑒢 𑒮𑒳𑒧𑒱𑒞 𑒣𑒰𑒪 𑒪𑒑 𑒑𑒹𑒪 𑒂 𑒏𑒯𑒪𑒏 𑒖𑒹 𑒏𑒼𑒢 𑒪𑒤𑒢𑓂𑒠𑒩𑒏 𑒮𑓀𑒑 𑒥𑒹𑒙𑒲𑒏𑒹𑒿 𑒋𑒖𑒹𑒢𑓂𑒮𑒲 𑒠𑒱𑒋𑒥𑒰 𑒏𑒋 𑒏𑒰𑒖 𑒏𑒩𑒥𑒰 𑒩𑒯𑒪 𑒕𑒲? 𑒞𑒰𑒯𑒱𑒣𑒩 𑒮𑒳𑒧𑒱𑒞 𑒠𑒰 𑒍𑒏𑒩𑒰𑒣𑒩 𑒧𑒰𑒩𑒱-𑒧𑒰𑒩𑒱 𑒏𑒋 𑒕𑒴𑒙𑒪 𑒖𑒹 𑒦𑒰𑒋-𑒥𑒯𑒱𑒢𑒏 𑒣𑒫𑒱𑒞𑓂𑒩 𑒮𑓀𑒥𑓀𑒡𑒣𑒩 𑒂𑓀𑒑𑒳𑒩 𑒅𑒚𑒰 𑒩𑒯𑒪 𑒕𑒲 ?
“𑒂𑒆 𑒢𑒹 𑒏𑒯𑒱𑒨𑒼। 𑒍𑒞𑒋 𑒮𑒦 𑒂𑒥 𑒁𑒣𑒢 𑒁𑒕𑒱। 𑒮𑒧𑒳𑒠𑓂𑒩 𑒠𑒹𑒐𑒥। 𑒧𑒼𑒢 𑒯𑒋𑒞 𑒞𑒿 𑒣𑒳𑒩𑒲 𑒮𑒹𑒯𑒼 𑒒𑒴𑒧𑒱 𑒂𑒋𑒥”।
“𑒂 𑒠𑒹𑒫𑒠𑒞𑓂𑒞”?
“𑒍𑒯, 𑒢𑒯𑒱 𑒣𑒳𑒕𑒴 𑒍𑒏𑒩। 𑒂𑒥 𑒞𑒿 𑒍 𑒯𑒧𑒩 𑒦𑒏𑓂𑒞 𑒦𑓄 𑒑𑒹𑒪 𑒁𑒕𑒱। 𑒋𑒏 𑒠𑒱𑒢 𑒂𑒥𑒱 𑒏𑒋 𑒯𑒰𑒟 𑒧𑒱𑒪𑒹𑒪𑒏 𑒂 𑒞𑒏𑒩 𑒥𑒰𑒠 𑒖𑒐𑒢 𑒦𑒹𑒙𑒻𑒞 𑒁𑒕𑒱 𑒯𑒰𑒟 𑒢𑒯𑒱 𑒧𑒱𑒪𑒥𑒻𑒞 𑒁𑒕𑒱 𑒫𑒩𑒢 𑒑𑒩𑒰 𑒪𑒑𑒻𑒞 𑒁𑒕𑒱। 𑒂 𑒏𑒯𑒻𑒞 𑒁𑒕𑒱 𑒖𑒹 𑒯𑒧 𑒮𑒦 𑒦𑒰𑒋-𑒦𑒰𑒋 𑒕𑒲”!
No comments:
Post a Comment
"विदेह" प्रथम मैथिली पाक्षिक ई पत्रिका http://www.videha.co.in/:-
सम्पादक/ लेखककेँ अपन रचनात्मक सुझाव आ टीका-टिप्पणीसँ अवगत कराऊ, जेना:-
1. रचना/ प्रस्तुतिमे की तथ्यगत कमी अछि:- (स्पष्ट करैत लिखू)|
2. रचना/ प्रस्तुतिमे की कोनो सम्पादकीय परिमार्जन आवश्यक अछि: (सङ्केत दिअ)|
3. रचना/ प्रस्तुतिमे की कोनो भाषागत, तकनीकी वा टंकन सम्बन्धी अस्पष्टता अछि: (निर्दिष्ट करू कतए-कतए आ कोन पाँतीमे वा कोन ठाम)|
4. रचना/ प्रस्तुतिमे की कोनो आर त्रुटि भेटल ।
5. रचना/ प्रस्तुतिपर अहाँक कोनो आर सुझाव ।
6. रचना/ प्रस्तुतिक उज्जवल पक्ष/ विशेषता|
7. रचना प्रस्तुतिक शास्त्रीय समीक्षा।
अपन टीका-टिप्पणीमे रचना आ रचनाकार/ प्रस्तुतकर्ताक नाम अवश्य लिखी, से आग्रह, जाहिसँ हुनका लोकनिकेँ त्वरित संदेश प्रेषण कएल जा सकय। अहाँ अपन सुझाव ई-पत्र द्वारा editorial.staff.videha@gmail.com पर सेहो पठा सकैत छी।
"विदेह" मानुषिमिह संस्कृताम् :- मैथिली साहित्य आन्दोलनकेँ आगाँ बढ़ाऊ।- सम्पादक। http://www.videha.co.in/
पूर्वपीठिका : इंटरनेटपर मैथिलीक प्रारम्भ हम कएने रही 2000 ई. मे अपन भेल एक्सीडेंट केर बाद, याहू जियोसिटीजपर 2000-2001 मे ढेर रास साइट मैथिलीमे बनेलहुँ, मुदा ओ सभ फ्री साइट छल से किछु दिनमे अपने डिलीट भऽ जाइत छल। ५ जुलाई २००४ केँ बनाओल “भालसरिक गाछ” जे http://gajendrathakur.blogspot.com/ पर एखनो उपलब्ध अछि, मैथिलीक इंटरनेटपर प्रथम उपस्थितिक रूपमे अखनो विद्यमान अछि। फेर आएल “विदेह” प्रथम मैथिली पाक्षिक ई-पत्रिका http://www.videha.co.in/पर। “विदेह” देश-विदेशक मैथिलीभाषीक बीच विभिन्न कारणसँ लोकप्रिय भेल। “विदेह” मैथिलक लेल मैथिली साहित्यक नवीन आन्दोलनक प्रारम्भ कएने अछि। प्रिंट फॉर्ममे, ऑडियो-विजुअल आ सूचनाक सभटा नवीनतम तकनीक द्वारा साहित्यक आदान-प्रदानक लेखकसँ पाठक धरि करबामे हमरा सभ जुटल छी। नीक साहित्यकेँ सेहो सभ फॉरमपर प्रचार चाही, लोकसँ आ माटिसँ स्नेह चाही। “विदेह” एहि कुप्रचारकेँ तोड़ि देलक, जे मैथिलीमे लेखक आ पाठक एके छथि। कथा, महाकाव्य,नाटक, एकाङ्की आ उपन्यासक संग, कला-चित्रकला, संगीत, पाबनि-तिहार, मिथिलाक-तीर्थ,मिथिला-रत्न, मिथिलाक-खोज आ सामाजिक-आर्थिक-राजनैतिक समस्यापर सारगर्भित मनन। “विदेह” मे संस्कृत आ इंग्लिश कॉलम सेहो देल गेल, कारण ई ई-पत्रिका मैथिलक लेल अछि, मैथिली शिक्षाक प्रारम्भ कएल गेल संस्कृत शिक्षाक संग। रचना लेखन आ शोध-प्रबंधक संग पञ्जी आ मैथिली-इंग्लिश कोषक डेटाबेस देखिते-देखिते ठाढ़ भए गेल। इंटरनेट पर ई-प्रकाशित करबाक उद्देश्य छल एकटा एहन फॉरम केर स्थापना जाहिमे लेखक आ पाठकक बीच एकटा एहन माध्यम होए जे कतहुसँ चौबीसो घंटा आ सातो दिन उपलब्ध होअए। जाहिमे प्रकाशनक नियमितता होअए आ जाहिसँ वितरण केर समस्या आ भौगोलिक दूरीक अंत भऽ जाय। फेर सूचना-प्रौद्योगिकीक क्षेत्रमे क्रांतिक फलस्वरूप एकटा नव पाठक आ लेखक वर्गक हेतु, पुरान पाठक आ लेखकक संग, फॉरम प्रदान कएनाइ सेहो एकर उद्देश्य छ्ल। एहि हेतु दू टा काज भेल। नव अंकक संग पुरान अंक सेहो देल जा रहल अछि। विदेहक सभटा पुरान अंक pdf स्वरूपमे देवनागरी, मिथिलाक्षर आ ब्रेल, तीनू लिपिमे, डाउनलोड लेल उपलब्ध अछि आ जतए इंटरनेटक स्पीड कम छैक वा इंटरनेट महग छैक ओतहु ग्राहक बड्ड कम समयमे ‘विदेह’ केर पुरान अंकक फाइल डाउनलोड कए अपन कंप्युटरमे सुरक्षित राखि सकैत छथि आ अपना सुविधानुसारे एकरा पढ़ि सकैत छथि।
मुदा ई तँ मात्र प्रारम्भ अछि।
अपन टीका-टिप्पणी एतए पोस्ट करू वा अपन सुझाव ई-पत्र द्वारा editorial.staff.videha@gmail.com पर पठाऊ।