विदेह - प्रथम मैथिली पाक्षिक ई पत्रिका/ भालसरिक गाछ

भालसरिक गाछ जे सन २००० सँ याहूसिटीजपर छल अखनो ५ जुलाई २००४ क पोस्ट'भालसरिक गाछ'- केर रूपमे इंटरनेटपर मैथिलीक प्राचीनतम उपस्थितिक रूपमे विद्यमान अछि जे विदेह- प्रथम मैथिली पाक्षिक ई पत्रिका धरि पहुँचल अछि,आ http://www.videha.co.in/ पर ई प्रकाशित होइत अछि।

भालसरिक गाछ/ विदेह- इन्टरनेट (अंतर्जाल) पर मैथिलीक पहिल उपस्थिति

(c)२०००-२०२३. सर्वाधिकार लेखकाधीन आ जतऽ लेखकक नाम नै अछि ततऽ संपादकाधीन। विदेह- प्रथम मैथिली पाक्षिक ई-पत्रिका ISSN 2229-547X VIDEHA सम्पादक: गजेन्द्र ठाकुर। Editor: Gajendra Thakur

रचनाकार अपन मौलिक आ अप्रकाशित रचना (जकर मौलिकताक संपूर्ण उत्तरदायित्व लेखक गणक मध्य छन्हि) editorial.staff.videha@gmail.com केँ मेल अटैचमेण्टक रूपमेँ .doc, .docx, .rtf वा .txt फॉर्मेटमे पठा सकै छथि। एतऽ प्रकाशित रचना सभक कॉपीराइट लेखक/संग्रहकर्त्ता लोकनिक लगमे रहतन्हि। सम्पादक 'विदेह' प्रथम मैथिली पाक्षिक ई पत्रिका ऐ ई-पत्रिकामे ई-प्रकाशित/ प्रथम प्रकाशित रचनाक प्रिंट-वेब आर्काइवक/ आर्काइवक अनुवादक आ मूल आ अनूदित आर्काइवक ई-प्रकाशन/ प्रिंट-प्रकाशनक अधिकार रखैत छथि। (The Editor, Videha holds the right for print-web archive/ right to translate those archives and/ or e-publish/ print-publish the original/ translated archive).

ऐ ई-पत्रिकामे कोनो रॊयल्टीक/ पारिश्रमिकक प्रावधान नै छै। तेँ रॉयल्टीक/ पारिश्रमिकक इच्छुक विदेहसँ नै जुड़थि, से आग्रह। रचनाक संग रचनाकार अपन संक्षिप्त परिचय आ अपन स्कैन कएल गेल फोटो पठेताह, से आशा करैत छी। रचनाक अंतमे टाइप रहय, जे ई रचना मौलिक अछि, आ पहिल प्रकाशनक हेतु विदेह (पाक्षिक) ई पत्रिकाकेँ देल जा रहल अछि। मेल प्राप्त होयबाक बाद यथासंभव शीघ्र ( सात दिनक भीतर) एकर प्रकाशनक अंकक सूचना देल जायत। एहि ई पत्रिकाकेँ मासक ०१ आ १५ तिथिकेँ ई प्रकाशित कएल जाइत अछि।

(c) २०००-२०२२ सर्वाधिकार सुरक्षित। विदेहमे प्रकाशित सभटा रचना आ आर्काइवक सर्वाधिकार रचनाकार आ संग्रहकर्त्ताक लगमे छन्हि। भालसरिक गाछ जे सन २००० सँ याहूसिटीजपर छल http://www.geocities.com/.../bhalsarik_gachh.html, http://www.geocities.com/ggajendra आदि लिंकपर आ अखनो ५ जुलाइ २००४ क पोस्ट http://gajendrathakur.blogspot.com/2004/07/bhalsarik-gachh.html (किछु दिन लेल http://videha.com/2004/07/bhalsarik-gachh.html लिंकपर, स्रोत wayback machine of https://web.archive.org/web/*/videha 258 capture(s) from 2004 to 2016- http://videha.com/ भालसरिक गाछ-प्रथम मैथिली ब्लॉग / मैथिली ब्लॉगक एग्रीगेटर) केर रूपमे इन्टरनेटपर मैथिलीक प्राचीनतम उपस्थितक रूपमे विद्यमान अछि। ई मैथिलीक पहिल इंटरनेट पत्रिका थिक जकर नाम बादमे १ जनवरी २००८ सँ "विदेह" पड़लै।इंटरनेटपर मैथिलीक प्रथम उपस्थितिक यात्रा विदेह- प्रथम मैथिली पाक्षिक ई पत्रिका धरि पहुँचल अछि,जे http://www.videha.co.in/ पर ई प्रकाशित होइत अछि। आब “भालसरिक गाछ” जालवृत्त 'विदेह' ई-पत्रिकाक प्रवक्ताक संग मैथिली भाषाक जालवृत्तक एग्रीगेटरक रूपमे प्रयुक्त भऽ रहल अछि। विदेह ई-पत्रिका ISSN 2229-547X VIDEHA

Friday, October 21, 2022

गजेन्द्र ठाकुर- कविता-संग्रह- सहस्राब्‍दीक चौपड़पर

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒏𑒫𑒱𑒞𑒰-𑒮𑓀𑒑𑓂𑒩𑒯- 𑒮𑒯𑒮𑓂𑒩𑒰𑒥𑓂𑒠𑒲𑒏 𑒔𑒾𑒣𑒛𑓃𑒣𑒩

𑒮𑒯𑒮𑓂𑒩𑒰𑒥𑓂𑒠𑒲𑒏 𑒔𑒾𑒣𑒛𑓃𑒣𑒩

𑒬𑒰𑒧𑒱𑒪 𑒥𑒰𑒖𑒰𑒏 𑒠𑒳𑒢𑓂𑒠𑒦𑒲 𑒫𑒰𑒠𑒏 𑓓.𑓓
𑒧𑒼𑒢𑒏 𑒩𑓀𑒑𑒏 𑒁𑒠𑒵𑒬𑓂𑒨 𑒠𑒹𑒥𑒰𑒪 𑓓.𑓕
𑒧𑒢𑓂𑒠𑒰𑒏𑒱𑒢𑒲 𑒖𑒹 𑒂𑒏𑒰𑒬 𑒧𑒡𑓂𑒨 𑒠𑒹𑒐𑒪 𑒂𑒃 𑒣𑒵𑒟𑓂𑒫𑒲𑒏 𑒆𑒣𑒩 𑓓.𑓖
𑒣𑒏𑓂𑒏𑒰𑒏 𑒖𑒰𑒚𑒱 𑓓.𑓗
𑒢𑒱𑒢𑓂𑒢𑒏 𑒖𑒲𑒫𑒢 𑒫𑒱𑒔𑒱𑒞𑓂𑒩 𑓓.𑓘
𑒥𑓀𑒬𑒲 𑒣𑒰𑒟𑒱 𑒣𑒏𑒛𑓃𑒥𑒰𑒏 𑒣𑓂𑒩𑒨𑒰𑒮 ! 𑓓.𑓑𑓐
𑒁𑒑𑒱𑒪𑒯𑒲 𑓓.𑓑𑓑
𑒁𑒦𑒱𑒢𑒫 𑒦𑒰𑒞𑒐𑒝𑓂𑒛𑒹 𑓓.𑓑𑓓
𑒬𑒱𑒪𑓂𑒣𑒲 𑓓.𑓑𑓕
𑒧𑒼𑒢𑒏 𑒞𑒙𑒣𑒩 𑓓.𑓑𑓗
𑒮𑒴𑒩𑓂𑒨-𑒔𑒢𑓂𑒠𑓂𑒩 𑒑𑒥𑒰𑒯 𑓓.𑓑𑓘
𑒫𑒮𑓂𑒮𑒰𑒫𑒮 𑓓.𑓑𑓙
𑒮𑓂𑒟𑒱𑒞𑒣𑓂𑒩𑒖𑓂𑒘𑒞𑒰𑒧𑒹 𑒪𑒱𑒥𑒻𑒞 𑒮𑒞𑓂𑒨𑒏
𑒣𑓂𑒩𑒞𑒱 𑓓.𑓒𑓑
𑒣𑒳𑒩𑒰𑒢 𑒦𑒹𑒪 𑒑𑒣 𑓓.𑓒𑓒
𑒨𑒾 𑒬𑒞𑒰𑒢𑒢𑓂𑒠 𑒣𑒳𑒩𑒯𑒱𑒞 𑓓.𑓒𑓓
𑒢𑒱𑒑𑒠𑒞𑒱 𑒏𑒳𑒮𑒳𑒧𑒣𑒳𑒩𑒹𑓄𑒦𑓂𑒨𑒩𑓂𑒔𑒱𑒞𑓀 𑒖𑓂𑒘𑒰𑒢𑒧𑓂 𑓓.𑓒𑓕
𑒯𑒧𑒩 𑒥𑒰𑒩𑒯 𑒙𑒰 𑒯𑒻𑒏𑒴 𑓓.𑓒𑓖
𑒣𑒳𑒩𑒯𑒱𑒞 𑓓.𑓒𑓙
𑒃𑒔𑓂𑒕𑒰-𑒧𑒵𑒞𑓂𑒨𑒳 𑓓.𑓓𑓒
𑒫𑒰𑒩𑓂𑒛 𑒢𑓀 𑓒𑓙 𑒥𑒹𑒛 𑒢𑓀. 𑓓𑓒 𑒮𑒿 𑓓.𑓓𑓓
𑒙𑓂𑒩𑒹𑒢 𑒕𑒪 𑒪𑒹𑒙 𑓓.𑓓𑓔

𑒮𑒴𑒩𑓂𑒨-𑒢𑒧𑒮𑓂𑒏𑒰𑒩𑒏 𑒥𑒯𑒢𑓂𑒢𑒹 𑓓.𑓓𑓕
𑒮𑒢 𑒮𑒞𑓂𑒞𑒰𑒮𑒲𑒏 𑒥𑒰𑒜𑓃𑒱𑒏 𑒥𑒯𑒢𑓂𑒢𑒹 𑓓.𑓓𑓙
𑒧𑒯𑒰𑒥𑒪𑒲𑒣𑒳𑒩𑒧 𑒮𑒧𑒳𑒠𑓂𑒩 𑒞𑒙𑒣𑒩 𑓓.𑓔𑓓
𑒮𑓂𑒧𑒵𑒞𑒱-𑒦𑒨 𑓓.𑓔𑓕
𑒑𑒰𑒨 𑓓.𑓕𑓕
𑒬𑓂𑒩𑒰𑒠𑓂𑒡 𑒢𑒹 𑒧𑒩𑒰 𑒖𑒰𑒨 𑓓.𑓕𑓖
𑒖𑒰𑒞𑒱 𑓓.𑓕𑓗
𑒣𑒳𑒞𑓂𑒩𑒣𑓂𑒩𑒰𑒣𑓂𑒞𑒱 𑓓.𑓕𑓘
𑒑𑒳𑒛-𑒫𑒹𑒩𑒲 𑒑𑒳𑒛 𑓓.𑓕𑓙
𑒯𑒩 𑒂 𑒥𑒛𑓃𑒠 𑓓.𑓖𑓐
𑒑𑓀𑒑𑒰 𑒥𑓂𑒩𑒱𑒖 𑓓.𑓖𑓑
𑒧𑒳𑒿𑒯 𑒔𑒼𑒏𑒙𑒪 𑒢𑒰𑒧 𑒯𑒿𑒮𑒧𑒳𑒐 𑒦𑒰𑒃 𑓓.𑓖𑓒
𑒮𑒣𑒢𑒰 𑓓.𑓖𑓓
𑒔𑒱𑒞𑓂𑒩𑒣𑒞𑒓𑓂𑒑 𑓓.𑓖𑓕
𑒥𑒱𑒮𑒩𑒪𑒯𑒳𑒿 𑒤𑒹𑒩 𑒏𑒩𑓂𑒝𑒏 𑒧𑒵𑒞𑓂𑒨𑒳𑒏
𑒕𑒼𑒙- 𑒕𑒲𑒢 𑒩𑒴𑒣 𑓓.𑓖𑓖
𑒬𑒪𑒰𑒞𑒳𑒩 𑒑𑒰𑒧 𑓓.𑓖𑓗
𑒏𑒰𑒪𑓂𑒯𑒱 𑓓.𑓖𑓙
𑒧𑒼𑒢 𑒣𑒰𑒛𑓃𑒻𑒞 𑓓.𑓗𑓐
𑒣𑒟𑒏 𑒣𑒟 𑓓.𑓗𑓓
𑒧𑒱𑒟𑒱𑒪𑒰𑒏 𑒡𑓂𑒫𑒖 𑒑𑒲𑒞 𑓓.𑓗𑓔
𑒥𑒛𑓃𑒏𑒰 𑒮𑒛𑓃𑒏 𑒕𑒯 𑒪𑒹𑒢 𑒥𑒪𑒰 𑓓.𑓗𑓕
𑒣𑒞𑒰 𑒢𑒯𑒱 𑒒𑒳𑒩𑒱 𑒏𑒋 𑒖𑒰𑒋𑒥 𑒂𑒏𑒱 𑓓.𑓗𑓙

𑒬𑒰𑒧𑒱𑒪 𑒥𑒰𑒖𑒰𑒏 𑒠𑒳𑒢𑓂𑒠𑒦𑒲 𑒫𑒰𑒠𑒏
𑒠𑒹𑒐𑒻𑒞 𑒠𑒳𑒢𑓂𑒠𑒦𑒲𑒏 𑒞𑒰𑒢
𑒥𑒱𑒔𑓂𑒔𑒯𑒱 𑒬𑒰𑒧𑒱𑒪 𑒥𑒰𑒖𑒰𑒏

𑒮𑒳𑒢𑒻𑒞 𑒬𑒴𑒢𑓂𑒨𑒏 𑒠𑒵𑒬𑓂𑒨
𑒣𑓂𑒩𑒏𑒵𑒞𑒱𑒏 𑒏𑒻𑒢𑒫𑒰𑒮𑒏
𑒯𑒯𑒰𑒃𑒞 𑒮𑒧𑒳𑒠𑓂𑒩𑒏 𑒔𑒱𑒞𑓂𑒩

𑒁𑒢𑓂𑒯𑒰𑒩 𑒐𑒼𑒯𑒏 𑒔𑒱𑒞𑓂𑒩𑒏𑒪𑒰𑒏 𑒣𑒰𑒞𑓂𑒩𑒏 𑒬𑒥𑓂𑒠
𑒏𑓂𑒨𑒼 𑒠𑒹𑒐𑒞 𑒢𑒯𑒱 𑒯𑒧𑒩 𑒔𑒱𑒞𑓂𑒩 𑒋𑒯𑒱 𑒁𑒢𑓂𑒯𑒰𑒩𑒧𑒹
𑒞𑒿 𑒮𑒳𑒢𑒥𑒼 𑒞𑒿 𑒏𑒩𑒞 𑒣𑒰𑒞𑓂𑒩𑒏 𑒂𑒏𑒰𑓀𑒏𑓂𑒭𑒰𑒏 𑒮𑓂𑒫𑒩

𑒮𑒰𑒑𑒩𑒏 𑒯𑒱𑒪𑒏𑒼𑒩𑒧𑒹 𑒖𑒰𑒃𑒞 𑒢𑒰𑒯𑒏 𑒐𑒹𑒥𑒰𑒯
𑒯𑒱𑒪𑒏𑒼𑒩 𑒮𑒳𑒢𑒥𑒰𑒏 𑒢𑒯𑒱 𑒁𑒫𑒏𑒰𑒬

𑒠𑒹𑒐𑒻𑒞 𑒁𑒕𑒱 𑒮𑓂𑒫𑒩𑒏 𑒂𑒩𑒼𑒯 𑒁𑒫𑒩𑒼𑒯
𑒯𑒯𑒰𑒃𑒞 𑒪𑒯𑒩𑒱𑒏 𑒢𑒯𑒱 𑒍𑒩-𑒕𑒼𑒩

𑒂𑒏𑒰𑒬𑒏 𑒁𑒮𑒲𑒧𑒞𑒰𑒏 𑒧𑒳𑒠𑒰 𑒢𑒯𑒱 𑒏𑒼𑒢𑒼 𑒁𑒢𑓂𑒞
𑒮𑒰𑒑𑒩 𑒞𑒿 𑒋𑒏 𑒠𑒼𑒮𑒩𑒰𑒮𑒿 𑒧𑒱𑒪𑒱 𑒏𑒩𑒻𑒞 𑒁𑒕𑒱
𑒁𑒮𑒲𑒧𑒞𑒰𑒏 𑒧𑒰𑒞𑓂𑒩 𑒕𑒠𑓂𑒧
𑒒𑒳𑒧𑒻𑒞 𑒑𑒼𑒪 𑒣𑒵𑒟𑓂𑒫𑒲𑒣𑒩
𑒔𑒏𑓂𑒩𑒣𑒩 𑒒𑒳𑒧𑒻𑒞 𑒁𑒢𑒢𑓂𑒞𑒏 𑒕𑒠𑓂𑒧

𑒧𑒳𑒠𑒰 𑒧𑒢𑒳𑒏𑓂𑒐 𑒞𑒰𑒏𑒱 𑒁𑒕𑒱 𑒪𑒹𑒢𑒹
𑒋𑒯𑒱 𑒁𑒢𑒢𑓂𑒞𑒏 𑒣𑒩𑒱𑒡𑒱
𑒣𑒩𑒱𑒡𑒱𑒏𑒹𑒿 𑒢𑒰𑒣𑒱 𑒁𑒕𑒱 𑒪𑒹𑒢𑒹 𑒧𑒢𑒳𑒏𑓂𑒐

𑒄 𑒂𑒏𑒰𑒬 𑒕𑒠𑓂𑒧𑒏 𑒞𑒿 𑒢𑒯𑒱 𑒁𑒕𑒱 𑒫𑒱𑒮𑓂𑒞𑒰𑒩
𑒋𑒯𑒱 𑒁𑒢𑒢𑓂𑒞𑒏 𑒮𑒹𑒯𑒼 𑒞𑒿 𑒢𑒹 𑒁𑒕𑒱 𑒏𑒼𑒢𑒼 𑒁𑒢𑓂𑒞?
𑒞𑒰𑒫𑒞 𑒋𑒏𑒩 𑒁𑒮𑒲𑒧𑒞𑒰𑒣𑒩 𑒞𑒿 𑒏𑒩𑒯𑒱 𑒣𑒛𑓃𑒞 𑒫𑒱𑒬𑓂𑒫𑒰𑒮!

𑒮𑓂𑒫𑒩𑒏𑒹𑒿 𑒠𑒹𑒐𑒥𑒰𑒏
𑒔𑒱𑒞𑓂𑒩𑒏𑒹𑒿 𑒮𑒳𑒢𑒥𑒰𑒏
𑒮𑒰𑒑𑒩𑒏𑒹𑒿 𑒢𑒰𑒿𑒒𑒥𑒰𑒏
𑒮𑒧𑒨-𑒏𑒰𑒪-𑒠𑒹𑒬𑒏 𑒑𑒝𑒢𑒰𑒏

𑒮𑒼𑒯𑒧𑒹 𑒕𑒼𑒛𑓃𑒱 𑒠𑒹𑒪 𑒠𑒹𑒐𑒥
𑒁𑒢𑓂𑒯𑒰𑒩 𑒐𑒼𑒯𑒏 𑒔𑒱𑒞𑓂𑒩
𑒮𑒼𑒯𑒧𑒹 𑒕𑒼𑒛𑓃𑒪 𑒮𑒳𑒢𑒥
𑒯𑒯𑒰𑒃𑒞 𑒮𑒰𑒑𑒩𑒏 𑒡𑓂𑒫𑒢𑒱

𑒠𑒹𑒐𑒻𑒞 𑒕𑒲 𑒮𑓂𑒫𑒩 𑒮𑒳𑒢𑒻𑒞 𑒕𑒲 𑒔𑒱𑒞𑓂𑒩
𑒏𑒹𑒯𑒢 𑒄 𑒮𑒰𑒡𑒏
𑒥𑒢𑒱 𑒑𑒹𑒪 𑒕𑒲 𑒬𑒰𑒧𑒱𑒪 𑒥𑒰𑒖𑒰𑒏
𑒠𑒳𑒢𑓂𑒠𑒦𑒲 𑒫𑒰𑒠𑒏

*𑒩𑒰𑒖𑒮𑓂𑒟𑒰𑒢𑒧𑒹 𑒑𑒰𑒖𑒰-𑒥𑒰𑒖𑒰𑒫𑒪𑒰𑒏 𑒮𑓀𑒑 𑒏𑒱𑒕𑒳 𑒞𑒿 𑒋𑒯𑒹𑒢 𑒩𑒯𑒻𑒞 𑒕𑒟𑒱 𑒖𑒹 𑒪𑒋-𑒞𑒰𑒪𑒧𑒹 𑒥𑒖𑒥𑒻𑒞 𑒕𑒟𑒱 𑒧𑒳𑒠𑒰 𑒥𑒹𑒬𑒲 𑒋𑒯𑒢 𑒩𑒯𑒻𑒞 𑒕𑒟𑒱 𑒖𑒹 𑒥𑒰𑒖𑒰 𑒧𑒳𑒿𑒯 𑒪𑒑 𑒂𑒢𑒱 𑒧𑒰𑒞𑓂𑒩 𑒥𑒖𑒹𑒥𑒰𑒏 𑒁𑒦𑒱𑒢𑒨 𑒏𑒩𑒻𑒞 𑒕𑒟𑒱 । 𑒯𑒳𑒢𑒏𑒰 𑒄 𑒢𑒱𑒩𑓂𑒠𑒹𑒬 𑒩𑒯𑒻𑒞 𑒕𑒢𑓂𑒯𑒱 𑒖𑒹 𑒑𑒪𑒞𑒲𑒨𑒼𑒮𑒿 𑒥𑒰𑒖𑒰𑒧𑒹 𑒤𑒴𑒏 𑒢𑒯𑒱 𑒧𑒰𑒩𑒟𑒱, 𑒨𑒻𑒯 𑒕𑒟𑒱 𑒬𑒰𑒧𑒱𑒪 𑒥𑒰𑒖𑒰 ।

𑒧𑒼𑒢𑒏 𑒩𑓀𑒑𑒏 𑒁𑒠𑒵𑒬𑓂𑒨 𑒠𑒹𑒥𑒰𑒪
𑒜𑒯𑒻𑒞 𑒦𑒰𑒫𑒢𑒰𑒏 𑒠𑒹𑒥𑒰𑒪
𑒐𑒰𑒧𑓂𑒯 𑒁𑒠𑒵𑒜𑓃𑒞𑒰𑒏 𑒚𑒰𑒜𑓃

𑒂𑒏𑒰𑓀𑒏𑓂𑒭𑒰𑒏 𑒥𑒐𑒰𑒩𑒲 𑒁𑒕𑒱 𑒦𑒩𑒪
𑒣𑓂𑒩𑒞𑒲𑒏 𑒥𑒢𑒱 𑒚𑒰𑒜𑓃
𑒒𑒩𑒧𑒹 𑒩𑒰𑒐𑒪 𑒯𑒱𑒧𑒰𑒪-𑒪𑒏𑒛𑓃𑒲𑒏 𑒧𑒢𑓂𑒠𑒱𑒩 𑒂𑒏𑒱
𑒍𑒮𑒰𑒩𑒰𑒣𑒩 𑒩𑒰𑒐𑒪 𑒞𑒳𑒪𑒮𑒲𑒏 𑒑𑒰𑒕
𑒣𑓂𑒩𑒞𑒲𑒏 𑒮𑒯𑒵𑒠𑒨𑒞𑒰𑒏 𑒧𑒰𑒞𑓂𑒩

𑒧𑒼𑒢 𑒣𑒰𑒛𑓃𑒻𑒞 𑒁𑒕𑒱 𑒃𑒢𑒰𑒩-𑒣𑒼𑒐𑒩𑒱𑒏 𑒧𑒯𑒰𑒩
𑒮𑓂𑒫𑒱𑒧𑒱𑓀𑒑𑒣𑒴𑒪𑒏 𑒢𑒲𑒪 𑒠𑒹𑒥𑒰𑒪 𑒥𑒢𑒥𑒻𑒞 𑒣𑒰𑒢𑒱𑒏𑒹𑒿 𑒢𑒲𑒪 𑒩𑓀𑒑𑒏
𑒧𑒼𑒢𑒏 𑒩𑓀𑒑𑒏 𑒁𑒠𑒵𑒬𑓂𑒨 𑒠𑒹𑒥𑒰𑒪
𑒜𑒯𑒻𑒞

𑒐𑒰𑒧𑓂𑒯 𑒁𑒠𑒵𑒜𑓃𑒞𑒰𑒏 𑒚𑒰𑒜𑓃
𑒥𑒯𑒻𑒞

𑒧𑒢𑓂𑒠𑒰𑒏𑒱𑒢𑒲 𑒖𑒹 𑒂𑒏𑒰𑒬 𑒧𑒡𑓂𑒨
𑒠𑒹𑒐𑒪 𑒂𑒃 𑒣𑒵𑒟𑓂𑒫𑒲𑒏 𑒆𑒣𑒩
𑒥𑒠𑓂𑒩𑒲 𑒫𑒱𑒬𑒰𑒪 𑒏𑒹𑒠𑒰𑒩𑒢𑒰𑒟
𑒁𑒪𑒏𑒢𑒢𑓂𑒠𑒰 𑒧𑒢𑓂𑒠𑒰𑒏𑒱𑒢𑒲𑒏 𑒧𑒹𑒪
𑒯𑒩𑒯𑒛𑓃𑒰𑒃𑒞 𑒡𑒰𑒩 𑒠𑒳𑒢𑒴 𑒧𑒱𑒪𑒻𑒞
𑒧𑒹𑒒𑒮𑒿 𑒕𑒰𑒛𑓃𑒪 𑒄 𑒏𑒏𑒩 𑒢𑒱𑒫𑒰𑒮 !

𑒥𑒠𑒩𑒲 𑒑𑒹𑒪𑒰𑒯 𑒖𑒹
𑒢𑒯𑒱 𑒒𑒳𑒩𑒪𑒢𑓂𑒯𑒱 𑒍𑒠𑒩𑒲 𑒯𑒳𑒢𑒏 𑒞𑒰𑒯𑒱
𑒂𑒃 𑒥𑒰𑒙𑒹-𑒥𑒰𑒙 𑒂𑒋𑒪
𑒬𑒲𑒞𑒪 𑒣𑒫𑒢𑒏 𑒗𑒼𑓀𑒏 𑒐𑒮𑒱 𑒩𑒯𑒪 𑒦𑒴𑒧𑒱
𑒮𑓂𑒐𑒪𑒢 𑒦𑒹𑒪 𑒖𑒢𑓂𑒞𑒳 𑒮𑒥𑒯𑒱𑒏
𑒯𑒱𑒧 𑒕𑒰𑒛𑓃𑒪 𑒄 𑒏𑒏𑒩 𑒫𑒰𑒮 !

𑒯𑒵𑒠𑒨 𑒮𑓂𑒞𑓀𑒦𑒱𑒞 𑒠𑒹𑒐𑒱 𑒡𑒰𑒩
𑒣𑒩𑓂𑒫𑒞 𑒬𑓂𑒩𑒹𑒝𑒲𑒏 𑒢𑒯𑒱 𑒁𑒢𑓂𑒞 𑒋𑒞𑒋
𑒏𑒙𑒱 𑒋𑒏𑒩 𑒞𑒲𑒫𑓂𑒩 𑒢𑒲𑒔𑒰𑒿 𑒁𑒕𑒱 𑒡𑒰𑒩
𑒠𑒳𑒯𑒴 𑒏𑒰𑒞 𑒕𑒰𑒛𑓃𑒪 𑒣𑒩𑓂𑒫𑒞𑒮𑒿 𑒄
𑒁𑒪𑒏𑒢𑒢𑓂𑒠𑒹 𑒄 𑒮𑒾𑒢𑓂𑒠𑒩𑓂𑒨 𑒁𑒯𑒲𑓀𑒏
𑒧𑒢𑓂𑒠𑒰𑒏𑒱𑒢𑒲 𑒖𑒹 𑒂𑒏𑒰𑒬 𑒧𑒡𑓂𑒨
𑒠𑒹𑒐𑒪 𑒂𑒃 𑒣𑒵𑒟𑓂𑒫𑒲𑒏 𑒆𑒣𑒩
𑒯𑒩𑒯𑒛𑓃𑒰𑒃𑒞 𑒄 𑒏𑒹𑒯𑒢 𑒤𑒹𑒢𑒱𑒪
𑒮𑓂𑒫𑒔𑓂𑒕 𑒢𑒱𑒩𑓂𑒧𑒪 𑒧𑒢𑒳𑒏𑓂𑒐 𑒢𑒱𑒫𑒮𑒱𑒞
𑒢𑒫 𑒠𑒵𑒭𑓂𑒙𑒱 𑒠𑒹𑒪𑒏 𑒠𑒹𑒐𑒥𑒰𑒏 𑒂𑒃
𑒬𑒲𑒞𑒪 𑒣𑒫𑒢𑒏 𑒕𑒰𑒛𑓃𑒪 𑒄 𑒮𑒵𑒭𑓂𑒙𑒱

𑒣𑒏𑓂𑒏𑒰𑒏 𑒖𑒰𑒚𑒱
𑒞𑒥𑒻𑒞 𑒣𑒼𑒐𑒩𑒱𑒏 𑒧𑒯𑒰𑒩 𑒠𑒳𑒣𑒯𑒩𑒱𑒨𑒰𑒏 𑒦𑒲𑒞
𑒣𑒮𑓂𑒞 𑒑𑒰𑒕-𑒥𑒵𑒔𑓂𑒕-𑒏𑒹𑒔𑒪𑒲 𑒮𑒳𑒭𑒳𑒧 𑒣𑒰𑒢𑒱 𑒬𑒱𑒏𑓂𑒞

𑒖𑒰𑒚𑒱 𑒪𑒏𑒛𑓃𑒲𑒏 𑒞𑒿 𑒮𑒦 𑒠𑒻𑒕
𑒣𑒏𑓂𑒏𑒰𑒏 𑒖𑒰𑒚𑒱 𑒄 𑒣𑒯𑒱𑒪
𑒏𑒖𑒩𑒲 𑒖𑒹 𑒪𑒰𑒑𑒪 𑒮𑒹 𑒣𑒳𑒩𑒰𑒞𑒢𑒞𑒰𑒏 𑒣𑓂𑒩𑒞𑒲𑒏

𑒠𑒼𑒮𑒩 𑒙𑒼𑒪𑒏 𑒣𑒼𑒐𑒩𑒱 𑒢𑒯𑒱
𑒁𑒕𑒱 𑒛𑒥𑒩𑒰 𑒫𑒻𑒯
𑒥𑒱𑒢 𑒖𑒰𑒚𑒱𑒏 𑒍𑒏𑒩 𑒨𑒖𑓂𑒘𑒼𑒣𑒫𑒲𑒞 𑒢𑒯𑒱 𑒦𑒹𑒪
𑒏𑒰𑒩𑒝 𑒮𑒋𑒯

𑒮𑒳𑒢𑒻𑒞 𑒕𑒱𑒌𑒏 𑒧𑒰𑒪𑒱𑒏 𑒍𑒏𑒩 𑒁𑒠𑓂𑒫𑒱𑒖 𑒕𑒪
𑒣𑒼𑒐𑒩𑒱𑒏 𑒨𑒖𑓂𑒘𑒼𑒣𑒫𑒲𑒞𑒮𑒿 𑒣𑒴𑒩𑓂𑒫𑒯𑒱 𑒣𑓂𑒩𑒨𑒰𑒝 𑒏𑒋𑒪

𑒣𑒰𑒃-𑒦𑒹𑒢𑒹 𑒮𑒐 𑒦𑒹𑒪𑒢𑓂𑒯𑒱 𑒣𑒼𑒐𑒩𑒱 𑒐𑒳𑒢𑒰𑒥𑒲
𑒛𑒥𑒩𑒰 𑒔𑒦𑒔𑓂𑒔𑒰 𑒐𑒳𑒢𑒹𑒢𑒹 𑒏𑒞𑒋 𑒨𑒬 𑒣𑒰𑒥𑒲 !

𑒠𑒹𑒐𑒴 𑒁𑒣𑒢 𑒙𑒼𑒪𑒏 𑒣𑒏𑓂𑒏𑒰𑒏 𑒖𑒰𑒚𑒱 𑒄
𑒏𑓀𑒏𑓂𑒩𑒲𑒙 𑒞𑒿 𑒮𑒳𑒢𑒻𑒞 𑒕𑒲 𑒣𑒰𑒢𑒱𑒨𑒹𑒧𑒹 𑒩𑒯𑒢𑒹 𑒯𑒼𑒃𑒕 𑒏𑒚𑒼𑒩
𑒪𑒏𑒛𑓃𑒲𑒏 𑒖𑒰𑒚𑒱 𑒢𑒯𑒱
𑒖𑒏𑒩 𑒖𑒲𑒫𑒢 𑒯𑒼𑒃𑒕 𑒟𑒼𑒛𑓃

𑒢𑒱𑒢𑓂𑒢𑒏 𑒖𑒲𑒫𑒢 𑒫𑒱𑒔𑒱𑒞𑓂𑒩
𑒛𑒻𑒢𑒱𑒨𑒰𑒯𑒲 𑒠𑒳𑒣𑒯𑒩𑒱𑒨𑒰𑒏 𑒒𑒰𑒧𑒏 𑒥𑒲𑒔
𑒮𑒣𑒢𑒰𑒃𑒞 𑒮𑒯𑒮𑓂𑒩𑒥𑒰𑒜𑓃𑒢𑒱𑒏 𑒠𑒰𑒢𑒫𑒰𑒏𑒰𑒩 𑒂𑒏𑒵𑒞𑒱

𑒣𑓂𑒩𑒹𑒨𑒮𑒲𑒣𑒩 𑒗𑒣𑒙𑒻𑒞 𑒍𑒏𑒩 𑒏𑓀𑒚 𑒧𑒔𑒼𑒛𑓃𑒻𑒞
𑒣𑓂𑒩𑒹𑒧𑒲 𑒣𑒏𑒛𑓃𑒻𑒞 𑒁𑒕𑒱 𑒮𑒯𑒮𑓂𑒩𑒥𑒰𑒜𑓃𑒢𑒱𑒏 𑒗𑒼𑓀𑒙
𑒣𑒼𑒐𑒩𑒱𑒧𑒹 𑒁𑒕𑒱 𑒐𑒮𑒥𑒻𑒞 𑒣𑓂𑒩𑒹𑒧𑒲𑒏𑒹𑒿 𑒣𑒋𑒩 𑒥𑒰𑒢𑓂𑒯𑒱 𑒪𑒹𑒪𑒏 𑒗𑒼𑓀𑒙𑒰𑒮𑒿
𑒛𑒻𑒢𑒱𑒨𑒰𑒯𑒲 𑒠𑒳𑒣𑒯𑒩𑒱𑒨𑒰𑒧𑒹 𑒣𑒼𑒐𑒩𑒱𑒏 𑒗𑒼𑓀𑒙𑒰𑒥𑒪𑒰 𑒣𑒢𑒱𑒛𑒳𑒥𑓂𑒥𑒲

𑒞𑒰𑓀𑒞𑓂𑒩𑒱𑒏-𑒮𑒯𑒮𑓂𑒩𑒥𑒰𑒜𑓃𑒢𑒱𑒏 𑒗𑒼𑒿𑒗𑒮𑒿 𑒢𑒱𑒏𑒪𑒱
𑒁𑒣𑒢 𑒣𑓂𑒩𑒰𑒝𑒰𑒢𑓂𑒞 𑒏𑒩𑒻𑒞 𑒣𑓂𑒩𑒹𑒨𑒮𑒲𑒏𑒹𑒿 𑒥𑒔𑒥𑒻𑒞
𑒣𑓂𑒩𑒹𑒧𑒲𑒏 𑒢𑒱𑒢𑓂𑒢 𑒁𑒕𑒱 𑒐𑒳𑒖𑒻𑒞 𑒩𑒾𑒠𑒮𑒿 𑒒𑒧𑒻𑒞 𑒒𑒰𑒧𑒮𑒿 𑒢𑒯𑒰𑒋𑒪
𑒒𑒼𑒩 𑒢𑒱𑒠𑓂𑒩𑒰𑒏 𑒞𑒵𑒣𑓂𑒞𑒱 𑒩𑒯𑒻𑒕 𑒧𑒳𑒠𑒰 𑒯𑒹𑒩𑒰𑒋𑒪

𑒠𑒹𑒐𑒻𑒞 𑒠𑒹𑒬𑒫𑒰𑒮𑒲𑒏𑒹𑒿 𑒣𑒕𑒰𑒛𑓃𑒻𑒞
𑒧𑓀𑒞𑓂𑒩-𑒞𑓀𑒞𑓂𑒩𑒨𑒳𑒏𑓂𑒞 𑒠𑒳𑒣𑒯𑒩𑒱𑒨𑒰𑒧𑒹 𑒖𑒰𑒑𑒪
𑒑𑒳𑒢𑒡𑒳𑒢𑒲 𑒥𑒪𑒰 𑒮𑓂𑒫𑒣𑓂𑒢
𑒥𑒢𑒻𑒞 𑒁𑒕𑒱 𑒮𑒦𑒮𑒿 𑒞𑒲𑒫𑓂𑒩 𑒡𑒰𑒫𑒏
𑒁𑒐𑒩𑒯𑒰𑒏 𑒮𑒦𑒮𑒿 𑒤𑒳𑒩𑓂𑒞𑒱𑒑𑒩 𑒣𑒯𑒪𑒧𑒰𑒢
𑒠𑒧𑒮𑒰𑒃𑒞 𑒧𑒰𑒪𑒱𑒏𑒏 𑒮𑓂𑒫𑒩 𑒞𑒼𑒛𑓃𑒻𑒞 𑒕𑒻𑒏 𑒍𑒏𑒩 𑒋𑒏𑒰𑒢𑓂𑒞

𑒏𑒰𑒩𑒱𑒐 𑒔𑒱𑒞𑓂𑒩𑒱𑒞 𑒩𑒰𑒞𑒱𑒏 𑒢𑒱𑒢𑓂𑒢
𑒙𑒳𑒙𑒻𑒞-𑒁𑒥𑒻𑒞-𑒙𑒳𑒙𑒻𑒞 𑒢𑒱𑒢𑓂𑒢 𑒂 𑒮𑓂𑒫𑒣𑓂𑒢𑒏 𑒞𑒰𑒩𑒞𑒧𑓂𑒨
𑒥𑒢𑒱 𑒩𑒰𑒖𑒢𑒹𑒞𑒰 𑒏𑒩𑒻𑒞 𑒠𑒹𑒬𑒏 𑒮𑒧𑒮𑓂𑒨𑒰𑒏 𑒁𑒢𑓂𑒞
𑒥𑒛𑓂𑒛 𑒟𑒼𑒣𑒛𑓃𑒲 𑒁𑒕𑒱 𑒥𑒖𑒻𑒞 𑒢𑓂𑒨𑒰𑒨𑒏 𑒛𑓀𑒏𑒰 𑒑𑒳𑓀𑒖𑒻𑒞
𑒡𑒩𑓂𑒧-𑒖𑒰𑒞𑒱-𑒂𑒞𑓀𑒏𑒫𑒰𑒠 𑒮𑒧𑒮𑓂𑒨𑒰-𑒮𑒧𑒗𑒾𑒞𑒰 𑒏𑒩𑒻𑒞
𑒣𑓂𑒩𑒰𑒝𑒒𑒰𑒞𑒏 𑒣𑓂𑒩𑒯𑒰𑒩𑒏𑒹𑒿 𑒕𑒰𑒞𑒲𑒣𑒩 𑒮𑒯𑒻𑒞- 𑒖𑒱𑒞𑒃𑒞
𑒢𑒱𑒢𑓂𑒢 𑒁𑒕𑒱 𑒙𑒳𑒙𑒻𑒞 𑒧𑒳𑒠𑒰 𑒞𑒏𑒩 𑒁𑒕𑒻𑒞
𑒒𑒼𑒩-𑒢𑒱𑒠𑓂𑒩𑒰 𑒞𑒵𑒣𑓂𑒞𑒱𑒏 𑒁𑒢𑒳𑒦𑒴𑒞𑒱 𑒁𑒕𑒱 𑒕𑒳𑒙𑒻𑒞

𑒢𑒱𑒢𑓂𑒢𑒏𑒹𑒿 𑒂𑒮𑓂𑒞𑒹-𑒂𑒮𑓂𑒞𑒹 𑒠𑒹𑒪𑒏 𑒧𑒰𑒯𑒳𑒩𑓂 𑒧𑒱𑒪𑒱 𑒏𑒋 𑒮𑒦
𑒧𑒱𑒞𑓂𑒩
𑒏𑒋𑒪𑒏 𑒢𑒱𑒢𑓂𑒢𑒏 𑒖𑒲𑒫𑒢 𑒫𑒱𑒔𑒱𑒞𑓂𑒩

𑒥𑓀𑒬𑒲 𑒣𑒰𑒟𑒱 𑒣𑒏𑒛𑓃𑒥𑒰𑒏 𑒣𑓂𑒩𑒨𑒰𑒮 !
𑒥𑓀𑒬𑒲 𑒣𑒰𑒟𑒱 𑒣𑒏𑒛𑓃𑒥𑒰𑒏 𑒣𑓂𑒩𑒨𑒰𑒮 !
𑒂𑒏𑒰𑓀𑒏𑓂𑒭𑒰𑒏 𑒣𑓀𑒐𑒨𑒳𑒏𑓂𑒞 𑒁𑒬𑓂𑒫𑒏𑒹𑒿
𑒥𑒼𑒩 𑒠𑒹𑒢𑒹 𑒮𑒤𑒪𑒞𑒰𑒏 𑒮𑒴𑒞𑓂𑒩𑒏
𑒁𑒢𑒢𑓂𑒞 𑒣𑓂𑒩𑒞𑒲𑒏𑓂𑒭𑒰 𑒢𑒱𑒮𑓂𑒥𑒠𑓂𑒡 𑒔𑒳𑒣𑓂𑒣𑒲𑒏

𑒣𑒰𑒢𑒱𑒏 𑒞𑒪 𑒮𑓂𑒟𑒱𑒩 𑒢𑒱𑒨𑒢𑓂𑒞𑒰𑒏 𑒩𑒴𑒣
𑒕𑒼𑒙 𑒏𑒲𑒛𑓃𑒲𑒏 𑒑𑒧𑒢 𑒅𑒚𑒥𑒻𑒞 𑒁𑒕𑒱 𑒮𑒴𑒏𑓂𑒭𑓂𑒧 𑒯𑒱𑒪𑒏𑒼𑒩
𑒂𑒬𑒰𑒏 𑒫𑒱𑒬𑓂𑒫𑒰𑒮𑒏 𑒣𑓂𑒩𑒞𑒱𑒩𑒴𑒣

𑒥𑓀𑒬𑒲 𑒣𑒟𑒢𑒹 𑒚𑒰𑒜𑓃 𑒣𑒰𑒟𑒱 𑒣𑒏𑒛𑓃𑒥𑒰𑒏 𑒣𑓂𑒩𑒨𑒰𑒮
𑒁𑓀𑒡𑒫𑒱𑒬𑓂𑒫𑒰𑒮𑒏 𑒕𑒼𑒩 𑒫𑒱𑒖𑓂𑒘𑒰𑒢𑒏 𑒍𑒩
𑒥𑒼𑒩 𑒠𑒹𑒢𑒹 𑒖𑓂𑒘𑒰𑒢𑒏 𑒣𑒱𑒝𑓂𑒛
𑒣𑓂𑒩𑒞𑒲𑒏𑓂𑒭𑒰𑒏 𑒁𑒢𑓂𑒞 ! 𑒣𑓂𑒩𑒬𑒰𑒢𑓂𑒞 𑒬𑒰𑒢𑓂𑒞𑒱
𑒮𑒼𑓀𑒮 𑒏𑒰𑒕𑒳 𑒯𑒩𑒏𑒰𑒕𑒳𑒮𑒿 𑒩𑒱𑒏𑓂𑒞 𑒣𑒰𑒢𑒱
𑒢𑒱𑒩𑓂𑒧𑒰𑒞𑒰𑒏 𑒢𑒱𑒩𑓂𑒧𑒱𑒞𑒱𑒏 𑒁𑓀𑒞 𑒏𑒋𑒪 𑒫𑓂𑒨𑒰𑒡𑒱

𑒥𑒲𑒨𑒰-𑒖𑒲𑒩𑒰 𑒧𑒰𑒕𑒏 𑒩𑒼𑒣𑒱
𑒥𑓀𑒬𑒲 𑒣𑒰𑒟𑒱 𑒣𑒏𑒛𑓃𑒥𑒰𑒏 𑒏𑒋𑒪 𑒯𑒱𑒨𑒰𑒅
𑒂𑒏𑒰𑓀𑒏𑓂𑒭𑒰𑒏 𑒁𑒬𑓂𑒫 𑒮𑒤𑒪𑒞𑒰𑒏 𑒮𑒴𑒞𑓂𑒩
𑒖𑓂𑒘𑒰𑒢𑒏 𑒣𑒱𑒝𑓂𑒛 𑒢𑒱𑒩𑓂𑒧𑒰𑒞𑒰𑒏 𑒢𑒱𑒩𑓂𑒧𑒱𑒞𑒱𑒏 𑒮𑒰𑒡𑒰𑓀𑒬
𑒚𑒰𑒜 𑒥𑒱𑒔𑓂𑒔𑒯𑒱 𑒁𑒢𑒢𑓂𑒞 𑒁𑒏𑒰𑒮
𑒨𑓀𑒞𑓂𑒩𑒫𑒞 𑒥𑒱𑒔𑓂𑒔𑒯𑒱 𑒁𑒢𑒢𑓂𑒞 𑒫𑒱𑒮𑓂𑒞𑒰𑒩
𑒬𑒰𑒢𑓂𑒞-𑒣𑓂𑒩𑒬𑒰𑒢𑓂𑒞-𑒫𑒰𑒏𑒯𑒲𑒢 𑒧𑒢𑒳𑒏𑓂𑒐

𑒮𑒴𑒏𑓂𑒭𑓂𑒧𑒞𑒩 𑒦𑒰𑒫𑒢𑒰𑒏 𑒖𑒐𑒢 𑒂𑒥𑒋 𑒯𑒱𑒪𑒏𑒼𑒩
𑒫𑒱𑒯𑓂𑒫𑒪 𑒏𑒩𑒻𑒞 𑒧𑒢𑒳𑒏𑓂𑒐𑒏𑒹𑒿 𑒕𑒪 𑒖𑒹 𑒕𑒳𑒔𑓂𑒕-𑒩𑒳𑒏𑓂𑒐

𑒁𑒑𑒱𑒪𑒯𑒲
𑒮𑒳𑒩𑒮𑒩𑒰𑒃𑒞 𑒑𑓂𑒫𑒰𑒪𑒏 𑒗𑒳𑒝𑓂𑒛

𑒏𑒧𑒪𑒰𑒏 𑒡𑒰𑒩𑒧𑒹 𑒣𑒱𑒕𑒛𑓃𑒱 𑒯𑒹𑒪𑒥𑒰𑒏 𑒠𑓂𑒫𑓀𑒠
𑒡𑒰𑒩𑒏 𑒫𑒱𑒩𑒳𑒠𑓂𑒡 𑒔𑒪𑒥𑒰𑒏 𑒏𑓂𑒩𑒧
𑒜𑒹𑒏𑒩𑒻𑒞 𑒧𑒰𑒪-𑒖𑒰𑒪𑒏 𑒁𑒥𑒻𑒋 𑒬𑒥𑓂𑒠
𑒒𑒳𑒩𑒱 𑒖𑒰𑒃𑒕 𑒑𑒰𑒧 𑒠𑒱𑒮 𑒗𑒳𑒝𑓂𑒛𑒏-𑒗𑒳𑒝𑓂𑒛

𑒒𑒩𑒏 𑒫𑒰𑒞𑒰𑒫𑒩𑒝 𑒑𑒰𑒩𑒱-𑒧𑒰𑒩𑒱𑒏
𑒥𑒏𑒩𑒲𑒏 𑒢𑒹𑒛𑓃𑒲𑒏 𑒥𑒲𑒔 𑒖𑒲𑒫𑒢 𑒮𑒰𑒃𑒞
𑒣𑒪𑒰𑒨𑒢 𑒢𑒑𑒩 𑒠𑒱𑒮 𑒦𑒹𑒪 𑒂𑒥 𑒄 𑒠𑒻𑒫
𑒒𑒵𑒝𑒰 𑒫𑒱𑒩𑒏𑓂𑒞𑒱 𑒣𑓂𑒩𑒠𑒴𑒭𑒝 𑒂 𑒄 𑒋𑒛𑓂𑒮

𑒏𑒻𑒏 𑒮𑓀𑒑𑒲 𑒧𑒵𑒞 𑒋𑒛𑓂𑒮𑒏 𑒦𑒹𑒿𑒙
𑒢𑒑𑒩𑒏 𑒔𑒧𑒏 𑒧𑒼𑒢 𑒣𑒰𑒛𑓃𑒻𑒕 𑒑𑒰𑒧𑒏 𑒠𑓂𑒫𑒻𑒡
𑒁𑒑𑒱𑒪𑒯𑒲 𑒣𑒯𑒱𑒢𑒹 𑒂𑒥 𑒮𑒳𑒢𑓂𑒢 𑒁𑒕𑒱 𑒒𑒩-𑒠𑓂𑒫𑒰𑒩
𑒏𑒼𑒚𑒰-𑒏𑒼𑒚𑒰𑒧𑒹 𑒦𑒹𑒪 𑒧𑒳𑒠𑒰 𑒏𑒲 𑒮𑒳𑒐𑒯𑒰𑒪?

𑒑𑒰𑒧𑒏 𑒑𑒰𑒧 𑒮𑒳𑒛𑓂𑒛𑒰𑒯 𑒣𑒪𑒰𑒨𑒢𑒏 𑒁𑒑𑒱𑒪𑒯𑒲𑒧𑒹
𑒢𑒯𑒱 𑒖𑒰𑒢𑒱 𑒏𑒲 𑒭𑒛𑒨𑓀𑒞𑓂𑒩 𑒁𑒕𑒱 𑒄 𑒧𑒯𑒲𑒧𑒹?
𑒑𑒰𑒧𑒧𑒹 𑒥𑒹𑒔𑒢𑒹 𑒞𑒩𑒏𑒰𑒩𑒲 𑒪𑒼𑒏 𑒏𑒲 𑒏𑒯𑒞
𑒢𑒑𑒩𑒧𑒹 𑒏𑒹 𑒄 𑒖𑒰𑒋 𑒠𑒹𑒐𑒞?

𑒂𑒯 𑒦𑒹𑒪 𑒢𑒖𑒩𑒱𑒏 𑒦𑒹𑒠 𑒪𑒼𑒏𑒏 𑒋𑒞𑒯𑒳
𑒔𑒰𑒩𑒴 𑒏𑒰𑒞 𑒞𑒰𑒏𑒲 𑒁𑒣𑒢 𑒖𑒹 𑒦𑒹𑒙𑒞 𑒏𑒞𑒯𑒳

𑒁𑒣𑒢 𑒪𑒼𑒏 𑒮𑒹𑒯𑒼 𑒁𑒕𑒱 𑒠𑒻𑒞 𑒁𑒯𑒧𑓂
𑒁𑒯𑒧𑒏 𑒧𑒰𑒩𑒱 𑒧𑒩𑒻𑒞 𑒣𑒳𑒮𑓂𑒞𑒏-𑒣𑒳𑒮𑓂𑒞 𑒂𑒑𑒰𑒿𑒏

𑒂𑒯 𑒄 𑒐𑒴𑒢-𑒐𑒳𑒢𑒰𑒯𑒢𑒱 𑒁𑒮𑒰𑒧𑒏
𑒄 𑒯𑒰𑒪 𑒏𑒲 𑒢𑒱𑒔𑒳𑒪𑒏𑒰 𑒣𑒲𑒜𑓃𑒲𑒏 𑒯𑒼𑒋𑒞 𑒦𑒩𑒱 𑒦𑒰𑒩𑒞

𑒞𑒐𑒢 𑒏𑒼𑒢 𑒦𑒨𑒹𑒿 𑒕𑒼𑒛𑓃𑒪 𑒁𑒣𑒢 𑒠𑒹𑒮
𑒏𑒹𑒏𑒩 𑒭𑒛𑒨𑒢𑓂𑒞𑓂𑒩 𑒏𑒱𑒋 𑒢𑒯𑒱 𑒥𑒳𑒗𑒱 𑒣𑒰𑒍𑒪 𑒏𑒱𑒨𑒼 ?
𑒕𑒼𑒛𑓃𑒪 𑒡𑒩𑒞𑒲 𑒖𑒛𑓃𑒱 𑒢𑒯𑒱 𑒞𑒰𑒏𑒱 𑒣𑒰𑒍𑒪 𑒏𑒱𑒋𑒏

𑒞𑒯𑒱𑒨𑒰 𑒧𑒼𑒢 𑒐𑒩𑒰𑒣 𑒦𑒹𑒢𑒹 𑒢𑒯𑒱 𑒛𑒰𑒏𑓂𑒙𑒩 𑒕𑒪
𑒥𑒰𑒜𑓃𑒱 𑒁𑒏𑒰𑒪𑒧𑒹 𑒏𑒹 𑒏𑒏𑒩 𑒂𑒮𑒩𑒰 𑒥𑒢𑒞
𑒖𑒰𑒞𑒱-𑒣𑒰𑒞𑒱-𑒡𑒩𑓂𑒧𑒏 𑒠𑒹𑒥𑒰𑒪 𑒥𑒱𑒔𑓂𑒔𑒯𑒱
𑒣𑒱𑒔𑒰𑒋𑒪 𑒖𑒰𑒃𑒞 𑒧𑒢𑒳𑒏𑓂𑒐𑒏 𑒣𑒪𑒰𑒨𑒢 𑒥𑒰𑒙 𑒕𑒪

𑒠𑒹𑒮-𑒏𑒼𑒮 𑒒𑒩-𑒠𑓂𑒫𑒰𑒩 𑒂𑒥 𑒯𑒧𑒩 𑒄𑒋𑒯
𑒫𑒹𑒠𑒢𑒰 𑒯𑒧𑒩𑒰𑒧𑒹 𑒁𑒕𑒱
𑒁𑒑𑒳𑒪𑒏𑒰 𑒣𑒲𑒜𑓃𑒲𑒏
𑒞𑒿 𑒄 𑒮𑒧𑓂𑒥𑒪𑒼 𑒢𑒹 𑒯𑒋𑒞

𑒁𑒦𑒱𑒢𑒫 𑒦𑒰𑒞𑒐𑒝𑓂𑒛𑒹
𑒦𑒰𑒞𑒐𑒝𑓂𑒛𑒹𑒏 𑒁𑒧𑒩𑒞𑓂𑒫𑒏
𑒣𑒰𑒬𑓂𑒔𑒰𑒞𑓂𑒨 𑒮𑓀𑒑𑒲𑒞𑒏 𑒖𑒹 𑒩𑒯𑒋 𑒭𑒛𑒨𑒢𑓂𑒞𑓂𑒩
𑒦𑒰𑒩𑒞𑒲𑒨𑒞𑒰𑒏 𑒦𑒰𑒩𑒞𑒏 𑒮𑓀𑒑𑒲𑒞𑒏 𑒮𑓂𑒫𑒰𑒡𑒲𑒢𑒞𑒰𑒏 𑒁𑒣𑒯𑒩𑒝
𑒠𑒵𑒭𑓂𑒙𑒱𑒠𑒼𑒭𑒏 𑒏𑒰𑒩𑒝 𑒖𑒞𑒋
𑒩𑒰𑒖𑒢𑒻𑒞𑒱𑒏 𑒢𑒹𑒞𑒵𑒞𑓂𑒫 𑒦𑒹𑒪 𑒣𑒩𑒰𑒖𑒱𑒞
𑒮𑓂𑒫𑒰𑒡𑒲𑒢𑒞𑒰 𑒦𑒹𑒪 𑒁𑒣𑒯𑒵𑒞
𑒧𑒳𑒠𑒰 𑒦𑒰𑒞𑒐𑒝𑓂𑒛𑒹𑒏 𑒔𑒩𑒱𑒞𑓂𑒩
𑒩𑒼𑒏𑒱 𑒠𑒹𑒪𑒏 𑒮𑓀𑒑𑒲𑒞𑒏 𑒣𑒩𑒰𑒡𑒲𑒢𑒞𑒰

𑒯𑒹 𑒩𑒰𑒧𑒩𑓀𑒑 𑒁𑒯𑒰𑒿𑒏 𑒁𑒦𑒱𑒢𑒫 𑒑𑒲𑒞𑒰𑒘𑓂𑒖𑒪𑒱
𑒣𑒜𑓃𑒪𑒯𑒳𑒿 𑒯𑒧 𑒮𑒧𑓂𑒣𑒴𑒩𑓂𑒝 𑒂
𑒚𑒲𑒏𑒹 𑒕𑒲 𑒁𑒯𑒰𑒿 𑒁𑒦𑒱𑒢𑒫 𑒦𑒰𑒞𑒐𑒝𑓂𑒛𑒹
𑒧𑒱𑒟𑒱𑒪𑒰𑒏 𑒡𑒩𑒞𑒲𑒏 𑒩𑒞𑓂𑒢

𑒏𑒼𑒢𑒼 𑒧𑒰𑒞𑒫𑒩𑒏 𑒢𑒰𑒧𑒫𑒩𑒏 𑒢𑒯𑒱 𑒁𑒡𑒲𑒢
𑒁𑒯𑒰𑒿𑒏 𑒣𑒔𑒰𑒮𑒼 𑒥𑒩𑒐𑒏 𑒮𑒰𑒡𑒢𑒰
𑒏𑓀𑒚𑒏 𑒬𑒰𑒮𑓂𑒞𑓂𑒩𑒮𑒿 𑒮𑓂𑒫𑒰𑒡𑒲𑒢𑒞𑒰𑒏 𑒣𑒩𑒱𑒦𑒰𑒭𑒰
𑒯𑒢𑒳𑒧𑒰𑒢-𑒦𑒏𑓂𑒞 𑒩𑒰𑒧𑒩𑓀𑒑 𑒁𑒯𑒰𑒿𑒏
𑒮𑒧𑓂𑒣𑒴𑒩𑓂𑒝 𑒮𑓀𑒑𑒲𑒞-𑒩𑒰𑒧𑒰𑒨𑒝𑒏 𑒂𑒮𑓂𑒫𑒰𑒠 𑒪𑒹𑒢𑒹
𑒧𑒼𑒢 𑒣𑒛𑓃𑒪𑒟𑒱 𑒞𑒳𑒪𑒮𑒲𑒠𑒰𑒮

𑒯𑒳𑒢𑒏 𑒮𑓂𑒞𑓂𑒩𑒲-𑒬𑒴𑒠𑓂𑒩𑒏 𑒣𑓂𑒩𑒞𑒱 𑒠𑒳𑒩𑓂𑒦𑒰𑒫𑒣𑒩
𑒁𑒯𑒰𑒿𑒏 𑒮𑓀𑒑𑒲𑒞 𑒩𑒰𑒧𑒰𑒨𑒝𑒏 𑒫𑒱𑒖𑒨
𑒮𑓂𑒫𑒰𑒡𑒲𑒢𑒞𑒰𑒏 𑒢𑒫-𑒢𑒫 𑒁𑒩𑓂𑒟 𑒠𑒻𑒕

𑒩𑒰𑒑 𑒫𑒻𑒠𑒹𑒯𑒲 𑒦𑒻𑒩𑒫 𑒩𑒰𑒑
𑒞𑒲𑒩 𑒦𑒳𑒏𑓂𑒞𑒱
𑒩𑒰𑒑 𑒫𑒱𑒠𑓂𑒨𑒰𑒣𑒞𑒱 𑒏𑒪𑓂𑒨𑒰𑒝 𑒧𑒱𑒟𑒱𑒪𑒰𑒏𑒹𑒿 𑒠𑒹𑒪
𑒩𑒰𑒑 𑒦𑒴𑒣𑒰𑒪𑒲 𑒂 𑒩𑒰𑒑 𑒥𑒱𑒪𑒰𑒫𑒪𑒧𑒹 𑒧𑒻𑒟𑒱𑒪𑒲 𑒦𑒰𑒭𑒰𑒏 𑒩𑒔𑒢𑒰 𑒏𑒋𑒪
𑒩𑒰𑒑 𑒫𑒱𑒠𑓂𑒨𑒰𑒣𑒞𑒱 𑒏𑒪𑓂𑒨𑒰𑒝𑒏 𑒠𑓂𑒩𑒳𑒞 𑒂 𑒫𑒱𑒪𑒧𑓂𑒥𑒱𑒞 𑒐𑒨𑒰𑒪
𑒁𑒯𑒰𑒿𑒏 𑒠𑒹𑒪 𑒮𑓀𑒑𑒲𑒞 𑒧𑒱𑒟𑒱𑒪𑒰 𑒡𑓂𑒫𑒖 𑒑𑒲𑒞𑒏𑒹𑒿 𑒠𑒹𑒪𑒏 𑒢𑒫 𑒁𑒩𑓂𑒟
𑒢𑒫 𑒁𑒢𑒳𑒦𑒴𑒞𑒱

𑒡𑓂𑒫𑒖𑒏 𑒤𑒯𑒩𑒋𑒥𑒰𑒏 𑒁𑒩𑓂𑒟 𑒁𑒕𑒱 𑒮𑓂𑒫𑒰𑒡𑒲𑒢𑒞𑒰
𑒮𑓂𑒫𑒰𑒡𑒲𑒢𑒞𑒰 𑒧𑒢𑒮𑒱𑒏
𑒢𑒰𑒧 𑒁𑒕𑒱 𑒐𑒮𑒱 𑒏𑒋 𑒚𑒰𑒜𑓃 𑒯𑒼𑒋𑒥𑒰𑒏
𑒂 𑒥𑒻𑒬𑒰𑒐𑒲 𑒕𑒼𑒛𑓃𑒱 𑒠𑒾𑒑𑒥𑒰𑒏

𑒒𑒵𑒝𑒰𑒏 𑒂𑒮𑓂𑒫𑒰𑒠 𑒏𑒋𑒢𑒱𑒯𑒰𑒩𑒏 𑒧𑒮𑓂𑒞𑒱𑒭𑓂𑒏𑒏
𑒣𑓂𑒩𑒏𑓂𑒭𑒰𑒪𑒢 𑒏𑒩𑒻𑒞 𑒮𑓀𑒑𑒲𑒞 𑒪𑒯𑒩𑒲𑒮𑒿

𑒯𑒹 𑒮𑒳𑒐𑒠𑒹𑒫 𑒗𑒰𑒏 𑒣𑒳𑒞𑓂𑒩
𑒐𑒖𑒳𑒩𑒰 𑒑𑒰𑒧𑒏 𑒪𑒼𑒏 𑒦𑒹𑒙𑒞𑒰𑒯 𑒞𑒿 𑒏𑒯𑒥𑒢𑓂𑒯𑒱
𑒩𑒰𑒧𑒩𑓀𑒑𑒏 𑒧𑒴𑒩𑓂𑒞𑒱 𑒑𑒰𑒧𑒧𑒹 𑒪𑒑𑒥𑒰𑒋
𑒢𑒯𑒱 𑒯𑒼𑒧𑒋 𑒖𑒰𑒋𑒥 𑒅𑒇𑒝 𑒯𑒹 𑒥𑒯𑒱𑒢-𑒦𑒰𑒋
𑒮𑓂𑒫𑒰𑒡𑒲𑒢𑒞𑒰𑒏 𑒬𑒰𑒐𑒰𑒏 𑒏𑒩𑒋 𑒖𑒰𑒆 𑒫𑒱𑒮𑓂𑒞𑒰𑒩

𑒩𑒰𑒧𑒩𑓀𑒑 𑒩𑒯𑒱 𑒫𑒰𑒩𑒰𑒝𑒮𑒲-𑒣𑓂𑒩𑒨𑒰𑒑𑒏 𑒑𑓀𑒑𑒰 𑒞𑒙𑒣𑒩
𑒏𑒋𑒪 𑒮𑓂𑒫𑒰𑒡𑒲𑒢 𑒮𑓀𑒑𑒲𑒞𑒏𑒹𑒿 𑒍 𑒇𑒭𑒱
𑒮𑓂𑒫 𑒁𑒡𑒲𑒢 𑒫𑒱𑒔𑒰𑒩-𑒥𑒰𑒞 𑒯𑒼𑒋𑒞
𑒞𑒐𑒢𑒹 𑒯𑒼𑒋𑒞 𑒬𑓂𑒩𑒠𑓂𑒡𑒰𑓀𑒖𑒪𑒱 𑒩𑒰𑒧𑒩𑓀𑒑𑒏 𑒯𑒹 𑒐𑒖𑒳𑒩𑒰𑒫𑒰𑒮𑒲

𑒨𑒳𑒑𑒏 𑒁𑒢𑓂𑒞 𑒦𑒹𑒪 𑒂𑒃 𑒧𑒰𑒿𑒑𑒢𑒏 𑒮𑓂𑒫𑒩𑒧𑒹 𑒑𑒰𑒥𑒋 𑒕𑒲
𑒧𑒰𑒿𑒑𑒢𑒏-𑒩𑒰𑒧𑒩𑓀𑒑𑒏 𑒢𑒰𑒧 𑒪𑒱𑒁 𑒢𑒯𑒱 𑒪𑒱𑒁
𑒧𑒳𑒠𑒰 𑒧𑒼𑒢 𑒩𑒰𑒐𑒴 𑒮𑓂𑒫𑒰𑒡𑒲𑒢𑒞𑒰𑒏𑒹𑒿

𑒣𑒋𑒩 𑒦𑒢𑒹 𑒥𑒻𑒬𑒰𑒐𑒲𑒣𑒩 𑒩𑒯𑒋 𑒧𑒰𑒟 𑒧𑒳𑒠𑒰 𑒮𑓂𑒫𑒰𑒡𑒲𑒢 𑒩𑒯𑒋
𑒫𑒱𑒬𑓂𑒫𑒰𑒮𑒮𑒿 𑒢𑒱𑒏𑒪𑒻𑒞 𑒂𑒞𑓂𑒧𑒫𑒱𑒬𑓂𑒫𑒰𑒮𑒏𑒹𑒿 𑒩𑒰𑒐𑒴 𑒂𑒑𑒰𑒿
𑒢𑒯𑒱 𑒥𑒰𑒢𑓂𑒯𑒱 𑒩𑒰𑒐𑒴 𑒧𑒮𑓂𑒞𑒱𑒭𑓂𑒏𑒏𑒹𑒿 𑒮𑒱𑒏𑓂𑒏𑒛𑓃𑒱𑒧𑒹

(𑒬𑒰𑒮𑓂𑒞𑓂𑒩𑒲𑒨 𑒮𑓀𑒑𑒲𑒞𑒏 𑒬𑒰𑒮𑓂𑒞𑓂𑒩𑒏𑒰𑒩 𑒂 𑒑𑒰𑒨𑒏 𑒬𑓂𑒩𑒲 𑒩𑒰𑒧𑒰𑒬𑓂𑒩𑒨 𑒗𑒰 “𑒩𑒰𑒧𑒩𑓀𑒑” 𑒖𑒲𑒏 𑒧𑒵𑒞𑓂𑒨𑒳 𑓑 𑒖𑒢𑒫𑒩𑒲 𑓒𑓐𑓐𑓙 𑒏𑒹𑒿 𑒦𑓄 𑒑𑒹𑒪𑒢𑓂𑒯𑒱 𑒯𑒧𑒩 𑒩𑒔𑒱𑒞 “𑒧𑒱𑒟𑒱𑒪𑒰𑒏 𑒡𑓂𑒫𑒖 𑒑𑒲𑒞”𑒏 𑒮𑓀𑒑𑒲𑒞 𑒯𑒳𑒢𑒏𑒹 𑒠𑒹𑒪 𑒕𑒢𑓂𑒯𑒱, 𑒯𑒳𑒢𑒏𑒩 𑒮𑓂𑒢𑒹𑒯𑒧𑒹 ।)

𑒬𑒱𑒪𑓂𑒣𑒲
𑒬𑒱𑒪𑓂𑒣𑒲 𑒥𑒪𑒱𑒩𑒰𑒖𑒑𑒜𑓃𑒏
𑒯𑒛𑓃𑒰𑒯𑒲 𑒣𑒼𑒐𑒩𑒱𑒏
𑒣𑒮𑓂𑒙𑒢𑒏 𑒁𑒏𑒾𑒩𑒏 𑒂 𑒢𑒰𑒯𑒩-𑒦𑒑𑒫𑒞𑒲𑒣𑒳𑒩𑒏 𑒥𑒾𑒠𑓂𑒡 𑒐𑒼𑒯

𑒁𑒫𑒪𑒼𑒏𑒱𑒞𑒹𑒬𑓂𑒫𑒩 𑒞𑒰𑒩𑒰𑒏 𑒣𑓂𑒩𑒞𑒱𑒩𑒴𑒣 𑒅𑒔𑓂𑒔𑒻𑒚𑒏 𑒧𑒴𑒩𑓂𑒞𑒱
𑒮𑓂𑒞𑓂𑒩𑒲𑒑𑒝𑒏 𑒑𑒲𑒞 𑒮𑒯𑒮𑓂𑒩𑒰𑒥𑓂𑒠𑒱 𑒦𑒩𑒱 𑒮𑒳𑒢𑒱-𑒮𑒳𑒢𑒱 𑒥𑒢𑒪𑒲𑒯 𑒏𑒰𑒪𑒲-𑒦𑒑𑒫𑒞𑒲

𑒫𑒻𑒖𑒨𑒢𑓂𑒞𑒲𑒣𑒳𑒩-𑒖𑒢𑒏𑒣𑒳𑒩 𑒂 𑒧𑒱𑒟𑒱𑒪𑒰𑒢𑒑𑒩𑒲𑒏 𑒅𑒞𑓂𑒟𑒰𑒢
𑒁𑒩𑒱 𑒧𑒩𑓂𑒠𑒢𑒏 𑒦𑒴𑒧𑒱
𑒧𑒟𑒪 𑒖𑒰𑒃𑒞 𑒕𑒪 𑒖𑒞𑒋 𑒬𑒞𑓂𑒩𑒳𑒏𑒹𑒿
𑒖𑒢 𑒂 𑒫𑒱𑒬 𑒏𑒹𑒩 𑒮𑒰𑒧𑓂𑒩𑒰𑒖𑓂𑒘 𑒖𑒢𑒏 𑒏𑒹𑒩 𑒦𑒴𑒧𑒱
𑒠𑒪𑒱𑒞 𑒬𑒱𑒪𑓂𑒣𑒲𑒏 𑒮𑒦𑒙𑒰 𑒄 𑒏𑒵𑒞𑒱

𑒧𑒳𑒠𑒰 𑒂𑒥 𑒏𑒹 𑒠𑒹𑒞 𑒍𑒏𑒩 𑒧𑒯𑒞𑓂𑒫
𑒔𑒩𑒝 𑒩𑒖 𑒡𑒼𑒥𑒱 𑒣𑒲𑒥𑒴 𑒯𑒱𑒢𑒏 𑒣𑒋𑒩
𑒋𑒞𑒹𑒏 𑒦𑒹𑒪𑒼𑒣𑒩 𑒢𑒱𑒭𑓂𑒏𑒣𑒙 𑒏𑒋𑒪𑒢𑓂𑒯𑒱 𑒧𑒰𑒞𑒳𑒏 𑒮𑒹𑒫𑒰
𑒏𑒧𑒪𑒰𑒏 𑒦𑒑𑒞𑒰 𑒥𑒢𑒱 𑒖𑒢𑒏𑒣𑒳𑒩𑒏 𑒣𑓂𑒩𑒠𑒱𑒏𑓂𑒭𑒝𑒰
𑒧𑒱𑒟𑒱𑒪𑒰𑒏 𑒫𑒵𑒯𑒞 𑒣𑒩𑒱𑒏𑓂𑒩𑒧𑒰

𑒑𑒯𑒥𑒩 𑒮𑒦𑒏𑒹𑒿 𑒑𑒼𑒯𑒰𑒩𑒱𑒏𑒹𑒿
𑒧𑒳𑒠𑒰 𑒥𑒢𑒪𑒰𑒯 𑒁𑒕𑒴𑒞
𑒑𑒰𑒧𑒮𑒿 𑒥𑒰𑒯𑒩 𑒏𑒹 𑒣𑒚𑒹𑒪𑒏𑒢𑓂𑒯𑒱 𑒯𑒳𑒖𑒴𑒩

𑒞𑒻𑒨𑒼 𑒮𑓀𑒮𑓂𑒏𑒵𑒞𑒱𑒏 𑒄 𑒬𑒱𑒪𑓂𑒣𑒲
𑒥𑒢𑒰𑒍𑒪 𑒥𑒳𑒠𑓂𑒡𑒰𑒨𑒢
𑒁𑒯𑒰𑓀𑒏 𑒥𑒳𑒠𑓂𑒡 𑒁𑒯𑒲𑓀𑒏 𑒬𑒱𑒫 𑒩𑒰𑒧 𑒏𑒵𑒭𑓂𑒝
𑒧𑒢𑓂𑒠𑒱𑒩𑒧𑒹 𑒣𑓂𑒩𑒫𑒹𑒬 𑒢𑒱𑒭𑒹𑒡𑒏 𑒁𑒕𑒻𑒞
𑒢𑒯𑒱 𑒏𑒋𑒪𑒢𑓂𑒯𑒱 𑒣𑒪𑒰𑒨𑒢
𑒡𑒩𑓂𑒧-𑒖𑒰𑒞𑒱𑒏 𑒥𑒼𑒗 𑒧𑒰𑒟𑒣𑒩 𑒪𑒹𑒢𑒹 𑒩𑒯𑒪𑒰𑒯
𑒣𑒴𑒖𑒢 𑒏𑒩𑒴 𑒣𑒋𑒩 𑒩𑒖 𑒣𑒐𑒰𑒩𑒱 𑒏𑓄
𑒥𑒾𑒠𑓂𑒡 𑒧𑒴𑒩𑓂𑒞𑒱𑒏 𑒬𑒱𑒪𑓂𑒣𑒲 𑒥𑓂𑒩𑒯𑓂𑒧𑒰 𑒫𑒱𑒭𑓂𑒝𑒳𑒏 𑒧𑒴𑒩𑓂𑒞𑒱𑒏 𑒂𑒡𑒰𑒩
𑒏𑒪𑒰𑒏𑒵𑒞𑒱 𑒦𑒰𑒿𑒮𑒱 𑒑𑒹𑒪 𑒯𑒹𑒩𑒰𑒋𑒪
𑒏𑒹𑒪𑒯𑒳𑒿 𑒮𑒦 𑒧𑒱𑒪𑒱 𑒑𑒰𑒧𑒏 𑒥𑒰𑒯𑒩 𑒯𑒱𑒢𑒏𑒰 𑒚𑒰𑒜𑓃

𑒞𑒐𑒢 𑒫𑒱𑒢𑒞𑒲
𑒠𑒲𑒢 𑒦𑒠𑒩𑒲 𑒕𑒹𑒕𑒢 𑒧𑒯𑒰𑒩𑒰𑒖 𑒑𑒩𑒲𑒥𑒢 𑒥𑒰𑒥𑒰 𑒪𑒰𑒪𑒧𑒃𑒢 𑒥𑒰𑒥𑒰
𑒁𑒧𑒩 𑒥𑒰𑒥𑒰 𑒧𑒼𑒞𑒲 𑒠𑒰𑒃 𑒑𑒰𑓀𑒑𑒼 𑒠𑒹𑒫𑒲 𑒏𑒵𑒭𑓂𑒝𑒰𑒩𑒰𑒧 𑒮𑒪𑒯𑒹𑒮𑒏 𑒧𑒴𑒩𑓂𑒞𑒱 𑒥𑒢𑒰𑒆
𑒔𑒩𑒝 𑒩𑒖 𑒣𑒴𑒖𑒱 𑒧𑒳𑒠𑒰

𑒧𑒼𑒢𑒏 𑒞𑒙𑒣𑒩
𑒯𑒿𑒮𑒲𑒧𑒹 𑒥𑒱𑒮𑒩𑒻𑒞 𑒕𑒲
𑒤𑒹𑒏𑒻𑒞 𑒕𑒲 𑒁𑒣𑒢 𑒮𑒦𑒙𑒰 𑒠𑒳𑓁𑒐
𑒠𑒳𑓁𑒐𑒏 𑒮𑓀𑒑𑒹 𑒁𑒣𑒢 𑒮𑒦𑒙𑒰 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰
𑒣𑓂𑒩𑒹𑒩𑒝𑒰 𑒠𑒻𑒞 𑒁𑒕𑒱 𑒮𑒧𑓂𑒦𑒰𑒫𑒢𑒰
𑒂𑒞𑓂𑒧𑒫𑒱𑒬𑓂𑒫𑒰𑒮 𑒁𑒥𑒻𑒞 𑒁𑒕𑒱 𑒤𑒳𑒩𑓂𑒞𑒱𑒏 𑒮𑓀𑒑
𑒁𑒦𑒱𑒪𑒰𑒭𑒰𑒏 𑒣𑒴𑒩𑓂𑒞𑒱𑒏 𑒥𑒜𑓃𑒥𑒻𑒞 𑒂𑒏𑒰𑓀𑒏𑓂𑒭𑒰

𑒂𑒿𑒐𑒱𑒏 𑒧𑒱𑒪𑒢 𑒦𑒹𑒢𑒹
𑒠𑒴𑒩 𑒍𑒯𑒱𑒢𑒰 𑒯𑒼𑒃𑒞 𑒁𑒕𑒱 𑒔𑒱𑒢𑓂𑒞𑒰
𑒮𑒰𑒑𑒩 𑒞𑒙𑒣𑒩 𑒖𑒹𑒢𑒰 𑒪𑒯𑒩𑒱 𑒪𑓄 𑒖𑒰𑒃𑒞 𑒁𑒕𑒱
𑒮𑒦𑒙𑒰 𑒣𑒰𑒞-𑒐𑒰𑒠𑓂𑒨 𑒫𑒮𑓂𑒞𑒳𑒏𑒹𑒿 𑒏𑒩𑒻𑒞 𑒮𑓂𑒫𑒔𑓂𑒕
𑒮𑒦𑒙𑒰 𑒤𑒱𑒏𑒱𑒩 𑒞𑒯𑒱𑒢𑒰 𑒥𑒯𑒻𑒕
𑒬𑒰𑒢𑓂𑒞 𑒮𑓂𑒫𑒔𑓂𑒕 𑒥𑒢𑒻𑒕 𑒧𑒼𑒢𑒏 𑒞𑒙

𑒥𑒱𑒮𑒩𑒻𑒞 𑒁𑒣𑒢𑒰𑒏𑒹𑒿 𑒂𑒿𑒐𑒱𑒧𑒹
𑒮𑓂𑒢𑒹𑒯𑒮𑒿 𑒑𑒣 𑒏𑒩𑒥
𑒧𑒰𑒞𑓂𑒩 𑒋𑒞𑒥𑒹
𑒁𑒢𑒻𑒞 𑒁𑒕𑒱 𑒏𑒞𑒹𑒏 𑒮𑒧𑓂𑒦𑒰𑒫𑒢𑒰 𑒂 𑒣𑒩𑒱𑒝𑒰𑒧

𑒧𑒳𑒠𑒰 𑒋𑒏𑒩 𑒫𑒱𑒣𑒩𑒲𑒞...

𑒮𑒴𑒩𑓂𑒨-𑒔𑒢𑓂𑒠𑓂𑒩 𑒑𑒥𑒰𑒯
𑒂𑒩𑓂𑒨𑒦𑒙𑓂𑒙𑒏 𑒣𑒰𑒙𑒪𑒱𑒣𑒳𑒞𑓂𑒩𑒧𑒹 𑒅𑒠𑓂𑒒𑒼𑒭
𑒂𑒢 𑒫𑒱𑒠𑓂𑒨𑒰𑒏 𑒞𑒿 𑒯𑒼𑒃𑒞 𑒁𑒕𑒱 𑒦𑒹𑒠-𑒫𑒱𑒦𑒹𑒠-𑒣𑓂𑒩𑒞𑒱𑒫𑒰𑒠
𑒧𑒳𑒠𑒰 𑒫𑒱𑒖𑓂𑒘𑒰𑒢𑒏 𑒞𑒿 𑒁𑒕𑒱 𑒄 𑒮𑒴𑒩𑓂𑒨-𑒔𑒢𑓂𑒠𑓂𑒩 𑒑𑒥𑒰𑒯

𑒔𑒢𑓂𑒠𑓂𑒩𑒰𑒨𑒝𑒏 𑒮𑓂𑒫𑒣𑓂𑒢 𑒣𑒴𑒩𑓂𑒝 𑒏𑒹𑒪𑒢𑓂𑒯𑒱 𑒫𑒰𑒯
𑒪𑒲𑒪𑒰𑒫𑒞𑒲 𑒣𑒜𑓃𑒱 𑒮𑒴𑒩𑓂𑒨-𑒔𑒢𑓂𑒠𑓂𑒩-𑒞𑒩𑒹𑒑𑒝𑒏 𑒠𑒴𑒩𑒲 𑒢𑒰𑒣𑒥𑒰𑒏 𑒏𑒪𑒰

𑒂𑒃 𑒣𑒴𑒩𑓂𑒝 𑒮𑒤𑒪 𑒦𑒹𑒪 𑒣𑒩𑒱𑒬𑓂𑒩𑒧 𑒖𑒰𑒋
𑒁𑒑𑓂𑒢𑒱-𑒥𑓂𑒩𑒯𑓂𑒧𑒼𑒮 𑒣𑒴𑒩𑓂𑒝 𑒏𑒋𑒪 𑒄 𑒁𑒩𑓂𑒟
𑒥𑓂𑒩𑒯𑓂𑒧𑒰𑒮𑓂𑒞𑓂𑒩-𑒣𑒰𑒬𑒳𑒣𑒞𑒰𑒮𑓂𑒞𑓂𑒩 𑒏𑒹𑒩 𑒁𑒩𑓂𑒟 𑒥𑒳𑒗𑒪𑒢𑒱 𑒖𑒰𑒋 𑒂𑒃

𑒫𑒮𑓂𑒮𑒰𑒫𑒮
𑒖𑒢𑒏 𑒨𑒰𑒖𑓂𑒘𑒫𑒪𑒏𑓂𑒨 𑒫𑒱𑒠𑒟 𑒧𑒰𑒟𑒫
𑒧𑒪𑓂𑒪 𑒖𑒑𑒞𑓂𑒣𑓂𑒩𑒏𑒰𑒬-𑒖𑒑𑒞𑒖𑓂𑒨𑒼𑒞𑒱𑒩𑓂𑒩
𑒧𑒰𑒿𑒑𑒢 𑒐𑒥𑒰𑒮 𑒩𑒰𑒧𑒩𑓀𑒑 𑒨𑒰𑒞𑓂𑒩𑒲 𑒯𑒩𑒱𑒧𑒼𑒯𑒢
𑒮𑒳𑒢𑓂𑒠𑒩 𑒗𑒰 𑒬𑒰𑒮𑓂𑒞𑓂𑒩𑒲𑒏 𑒣𑒋𑒩𑒧𑒹 𑒮𑒱𑒏𑒛𑓃𑒱 𑒥𑒰𑒢𑓂𑒯𑒪 𑒖𑒹𑒪𑒏 𑒔𑒱𑒞𑓂𑒩
𑒮𑒲𑒩𑒡𑓂𑒫𑒖 𑒫𑒹𑒠𑒫𑒞𑒲 𑒧𑒻𑒟𑒱𑒪𑒲 𑒧𑒻𑒞𑓂𑒩𑒹𑒨𑒲

𑒖𑒨𑒧𑓀𑒑𑒪𑒰-𑒁𑒮𑒳𑒩-𑒁𑒪𑒾𑒪𑒲-𑒏𑒲𑒔𑒏-𑒫𑒩𑒱𑒖𑒢-𑒥𑒹𑒢𑒴 𑒢𑒾𑒪𑒰 𑒑𑒜𑓃 𑒮𑒦
𑒂 𑒑𑒜𑓃 𑒥𑒪𑒱𑒩𑒰𑒖𑒣𑒳𑒩𑒏

𑒥𑒳𑒠𑓂𑒡-𑒧𑒯𑒰𑒫𑒲𑒩𑒏 𑒫𑒮𑓂𑒮𑒰𑒫𑒮𑒏 𑒦𑒴𑒧𑒱
𑒬𑒱𑒪𑓂𑒣𑒲 𑒏𑒵𑒭𑒏𑒏 𑒏𑓂𑒭𑒹𑒞𑓂𑒩
𑒐𑒱𑒐𑒲𑒩 𑒬𑒰𑒯𑒲 𑒢𑒲𑒪𑒑𑒰𑒋𑒏 𑒦𑓂𑒩𑒧𑒝
𑒂𑒿𑒐𑒱 𑒪𑒰𑒑𑒪 𑒮𑒦𑒙𑒰𑒧𑒹 !

𑒯𑒖𑒰𑒩𑒏-𑒯𑒖𑒰𑒩 𑒮𑒰𑒪 𑒖𑒹 𑒦𑒴𑒧𑒱 𑒏𑒋𑒪𑒏 𑒢𑒱𑒩𑓂𑒫𑒯𑒝
𑒮𑒹 𑒁𑒕𑒱 𑒣𑒪𑒰𑒨𑒢𑒏 𑒦𑒴𑒧𑒱 𑒂𑒥
𑒣𑒔𑒰𑒮 𑒮𑒰𑒪𑒧𑒹 𑒏𑒲 𑒦𑒹𑒪 𑒖𑒹
𑒯𑒖𑒰𑒩 𑒮𑒰𑒪𑒧𑒹 𑒢𑒯𑒱 𑒕𑒪 𑒣𑓂𑒩𑒰𑒣𑓂𑒞
𑒪𑒼𑒔𑒢𑒏 𑒩𑒰𑒑𑒞𑒩𑓀𑒑𑒱𑒝𑒲𑒏 𑒔𑒩𑓂𑒔 𑒦𑒰𑒞𑒐𑒝𑓂𑒛𑒹𑒧𑒹
𑒦𑒰𑒞𑒐𑒝𑓂𑒛𑒹𑒏 𑒔𑒩𑓂𑒔 𑒩𑒰𑒧𑒩𑓀𑒑𑒧𑒹
𑒑𑓀𑒑𑒹𑒬 𑒫𑒰𑒔𑒮𑓂𑒣𑒞𑒱𑒏 𑒞𑒩𑓂𑒏𑒏 𑒥𑒲𑒔
𑒏𑒳𑒞𑒩𑓂𑒏𑒲 𑒏𑒯𑒱𑒨𑒰𑒮𑒿 𑒦𑒹𑒪𑒯𑒳𑒿 𑒖𑒰𑒋

𑒨𑒰𑒖𑓂𑒘𑒫𑒪𑓂𑒏𑓂𑒨 𑒠𑓂𑒫𑒰𑒩𑒰 𑒑𑒳𑒩𑒳𑒏 𑒬𑒱𑒏𑓂𑒭𑒰𑒏 𑒞𑓂𑒨𑒰𑒑
𑒬𑒳𑒏𑓂𑒪 𑒨𑒖𑒳𑒩𑓂𑒫𑒹𑒠𑒏 𑒢𑒱𑒩𑓂𑒧𑒰𑒝𑒏 𑒢𑒫 𑒁𑒡𑓂𑒨𑒰𑒨
𑒧𑒳𑒠𑒰 𑒣𑒕𑒰𑒞𑒱𑒏 𑒖𑒰𑒞𑒱-𑒧𑓀𑒛𑒱𑒞 𑒬𑒰𑒮𑓂𑒞𑓂𑒩
𑒃𑒞𑒱𑒯𑒰𑒮𑒮𑒿 𑒞𑒻𑒨𑒼 𑒏𑓂𑒭𑒧𑒰𑒏 𑒏𑒩𑒻𑒞 𑒂𑒬 !
𑒞𑒿 𑒬𑒳𑒩𑒳 𑒏𑒱𑒋𑒏 𑒢𑒯𑒱 𑒏𑒩𑒻𑒞 𑒕𑒲
𑒂𑒥𑒯𑒳 𑒖𑒰𑒋
𑒃𑒞𑒱𑒯𑒰𑒮𑒏 𑒢𑒫 𑒁𑒡𑓂𑒨𑒰𑒨 !

𑒮𑓂𑒟𑒱𑒞𑒣𑓂𑒩𑒖𑓂𑒘𑒞𑒰𑒧𑒹 𑒪𑒱𑒥𑒻𑒞 𑒮𑒞𑓂𑒨𑒏 𑒣𑓂𑒩𑒞𑒱
𑒣𑒱𑒞𑒰𑒏 𑒕𑒪 𑒂𑒬 𑒁𑒮𑒞𑓂𑒨𑒏 𑒮𑒩𑓂𑒫𑒠𑒰 𑒞𑓂𑒨𑒰𑒑
𑒮𑒦 𑒯𑒼𑒁𑒋 𑒮𑒧𑒵𑒠𑓂𑒡 𑒅𑒞𑓂𑒞𑒧 𑒫𑒱𑒔𑒰𑒩𑒏 𑒥𑒲𑒔
𑒠𑒹𑒬𑒏 𑒪𑒹𑒪 𑒖𑒹 𑒖𑒰𑒋 𑒣𑓂𑒩𑒰𑒝 𑒁𑒢𑓂𑒞𑒱𑒧 𑒃𑒔𑓂𑒕𑒰 𑒯𑒼𑒁𑒋 𑒮𑒋𑒯

𑒏𑒩𑒻𑒞 𑒣𑒰𑒪𑒢 𑒠𑒹𑒐𑒪 𑒖𑒹
𑒢𑒯𑒱 𑒥𑒳𑒗𑒻𑒞 𑒁𑒕𑒱 𑒪𑒼𑒏
𑒢𑒯𑒱 𑒥𑒳𑒗𑒻𑒞 𑒁𑒕𑒱 𑒮𑒞𑓂𑒨𑒏 𑒧𑒼𑒪 𑒂 𑒮𑒧𑒵𑒠𑓂𑒡𑒱𑒏 𑒁𑒩𑓂𑒟
𑒮𑓂𑒫𑒞𑓀𑒞𑓂𑒩𑒞𑒰 𑒂 𑒠𑒹𑒬 𑒢𑒯𑒱 𑒏𑒼𑒢𑒼 𑒧𑒼𑒪 𑒕𑒻𑒏 𑒪𑒹𑒢𑒹 𑒮𑓂𑒫𑒰𑒩𑓂𑒟𑒏 𑒂𑒑𑒰𑒿
𑒞𑒿 𑒏𑒲 𑒥𑒠𑒪𑒲 ? 𑒁𑒣𑒢 𑒬𑒱𑒏𑓂𑒭𑒰𑒏 𑒁𑒩𑓂𑒟 !

𑒞𑓂𑒨𑒰𑒑𑒱 𑒩𑒮𑓂𑒞𑒰 𑒧𑒳𑒠𑒰 𑒫𑒻𑒯 𑒪𑒏𑓂𑒭𑓂𑒨
𑒂 𑒩𑒮𑓂𑒞𑒰 𑒖𑒱𑒠𑒱𑒨𑒰𑒯𑒫𑒪𑒰 !

𑒧𑒳𑒠𑒰 𑒥𑒖𑒢𑒹 𑒏𑒲 ? 𑒧𑒰𑒞𑓂𑒩 𑒏𑒩𑒻𑒞 𑒩𑒯𑒴
𑒮𑒼𑒗𑒰𑒿𑒫𑒪𑒰𑒏𑒹𑒿 𑒥𑒳𑒗𑒋 𑒠𑒱𑒨𑒾𑒏
𑒖𑒹 𑒁𑒕𑒱 𑒥𑒳𑒗𑒻𑒞
𑒥𑒳𑒗𑒋 𑒠𑒱𑒨𑒾𑒏 𑒂 𑒏𑒩𑒋 𑒠𑒱𑒨𑒾𑒏 𑒐𑒪𑒢𑒰𑒨𑒏𑒏𑒹𑒿 𑒧𑒯𑒱𑒧𑒰𑒧𑒝𑓂𑒛𑒱𑒞
𑒧𑒯𑒱𑒧𑒰𑒧𑒝𑓂𑒛𑒱𑒞 𑒂 𑒬𑒏𑓂𑒞𑒱𑒬𑒰𑒪𑒲 𑒥𑒳𑒗𑒋 𑒠𑒱𑒨𑒾𑒏 𑒠𑒳𑒩𑒰𑒔𑒰𑒩𑒲𑒏𑒹𑒿
𑒖𑒰𑒫𑒞 𑒥𑒳𑒗𑒞 𑒦𑓄 𑒖𑒋𑒞𑒻𑒏 𑒯𑒰𑒩𑒱 !

𑒣𑒱𑒞𑒰𑒏 𑒮𑒞𑓂𑒨𑒏𑒹𑒿 𑒪𑒱𑒥𑒻𑒞 𑒠𑒹𑒐𑒢𑒹 𑒩𑒯𑒲 𑒮𑓂𑒟𑒱𑒞𑒣𑓂𑒩𑒖𑓂𑒘𑒞𑒰𑒧𑒹
𑒞𑒯𑒱𑒨𑒹 𑒥𑒳𑒗𑒢𑒹 𑒩𑒯𑒲 𑒖𑒹
𑒞𑓂𑒨𑒰𑒑 𑒢𑒯𑒱 𑒏𑒋𑒪 𑒯𑒼𑒋𑒞
𑒩𑒮𑓂𑒞𑒰 𑒄 𑒁𑒕𑒱 𑒖𑒹 𑒖𑒱𑒠𑒱𑒨𑒰𑒯𑒫𑒪𑒰

𑒣𑒳𑒩𑒰𑒢 𑒦𑒹𑒪 𑒑𑒣
𑒮𑒩𑒼𑒖𑒱𑒢𑒲 𑒢𑒑𑒩 𑒧𑒰𑒩𑓂𑒏𑒹𑒙𑒏 𑒥𑒧 𑒫𑒱𑒮𑓂𑒤𑒼𑒙

𑒛𑒮𑓂𑒙𑒥𑒱𑒢𑒧𑒹 𑒩𑒰𑒐𑒪 𑒥𑒧𑒏 𑒫𑒱𑒮𑓂𑒤𑒼𑒙
𑒅𑒛𑓃𑒻𑒞 𑒪𑒼𑒏 𑒏𑒰𑒩 𑒫𑒮𑓂𑒞𑒳-𑒖𑒰𑒞
𑒐𑒴𑒢𑒏 𑒡𑒰𑒩 𑒙𑒙𑒏𑒰 𑒢𑒱𑒏𑒪𑒪 𑒪𑒰𑒪

𑒣𑒳𑒩𑒢𑒰𑒋𑒪 𑒑𑒣 𑒐𑒴𑒢 𑒐𑒩𑒏𑒙𑒱 𑒑𑒹𑒪
𑒏𑒰𑒩𑒲 𑒮𑓂𑒨𑒰𑒯 𑒥𑒢𑒪
𑒂 𑒋𑒧𑓂𑒯𑒩 𑒥𑓂𑒩𑒹𑒏𑒱𑓀𑒑 𑒢𑓂𑒨𑒴𑒖 - 𑒠𑒱𑒪𑓂𑒪𑒲 𑒢𑒑𑒩 𑒤𑒹𑒩 𑒂𑒥𑒱 𑒑𑒹𑒪 𑒣𑒙𑒩𑒲𑒣𑒩 !

𑒠𑒱𑒪𑒫𑒪𑒰𑒏 𑒕𑒲 𑒄 𑒢𑒑𑒩 𑒞𑒹𑒿 !

𑒧𑒳𑒠𑒰 𑒖𑒱𑒢𑒏𑒰 𑒒𑒩𑒧𑒹 𑒩𑒼𑒙𑒲 𑒏𑒧𑒰𑒋𑒫𑒪𑒰𑒏 𑒧𑒵𑒞𑓂𑒨𑒳 𑒁𑒕𑒱 𑒦𑒹𑒪
𑒯𑒳𑒢𑒏 𑒖𑒲𑒫𑒢𑒏 𑒩𑒹𑒪
𑒋𑒏 𑒠𑒴 𑒠𑒱𑒢 𑒏𑒲
𑒦𑒩𑒱 𑒖𑒱𑒢𑒑𑒲𑒨𑒼
𑒏𑒲 𑒂𑒥𑒱 𑒮𑒏𑒞 𑒣𑒙𑒩𑒲𑒣𑒩 !

𑒨𑒾 𑒬𑒞𑒰𑒢𑒢𑓂𑒠 𑒣𑒳𑒩𑒯𑒱𑒞
𑒨𑒾 𑒬𑒞𑒰𑒢𑒢𑓂𑒠 𑒣𑒳𑒩𑒯𑒱𑒞

𑒁𑒑𑒯𑒢 𑒬𑒳𑒏𑓂𑒪 𑒫𑒱𑒫𑒰𑒯 𑒣𑓀𑒔𑒧𑒲
𑒫𑒱𑒫𑒰𑒯𑒏 𑒮𑒦𑒮𑒿 𑒢𑒲𑒏 𑒠𑒱𑒢
𑒣𑒳𑒩𑒯𑒱𑒞 𑒬𑒞𑒰𑒢𑒢𑓂𑒠
𑒩𑒰𑒧 𑒮𑒲𑒞𑒰𑒏 𑒫𑒱𑒫𑒰𑒯 𑒏𑒋𑒪 𑒮𑒧𑓂𑒣𑒢𑓂𑒢

𑒐𑒩𑒛𑓃𑒐 𑒫𑒰𑒪𑒲 𑒏𑒰𑒏𑒲𑒏 𑒫𑒱𑒫𑒰𑒯
𑒮𑒹𑒯𑒼 𑒫𑒱𑒫𑒰𑒯 𑒣𑓀𑒔𑒧𑒲𑒋𑒏𑒹𑒿 𑒦𑒹𑒪
𑒣𑒳𑒩𑒯𑒱𑒞 𑒮𑒹𑒯𑒼 𑒏𑒼𑒢𑒼 𑒣𑒻𑒒𑒹 𑒣𑒝𑓂𑒛𑒱𑒞 𑒩𑒯𑒟𑒱

𑒮𑒲𑒞𑒰 𑒠𑒰𑒃 𑒏𑒞𑒹𑒏 𑒏𑒭𑓂𑒙 𑒏𑒙𑒢𑒹 𑒩𑒯𑒟𑒱 !

𑒧𑒛𑓃𑒥𑒰𑒣𑒩 𑒔𑒱𑒞𑓂𑒩𑒏𑒪𑒰 𑒪𑒱𑒐𑒪 𑒩𑒯𑒋 𑒧𑒱𑒟𑒱𑒪𑒰𑒏
𑒣𑒩𑒱𑒕𑒢 𑒢𑒻𑒢𑒰-𑒖𑒼𑒑𑒱𑒢 𑒮𑒦𑒙𑒰 𑒦𑒹𑒪 𑒕𑒪
𑒍𑒯𑒱𑒢𑒰 𑒖𑒹𑒢𑒰 𑒦𑒹𑒪 𑒩𑒯𑒋 𑒮𑒲𑒞𑒰 𑒠𑒰𑒃𑒏 𑒫𑒱𑒫𑒰𑒯𑒧𑒹

𑒥𑒰𑒪-𑒫𑒱𑒫𑒰𑒯 𑒞𑒿 𑒦𑒹𑒪𑒹 𑒩𑒯𑒢𑓂𑒯𑒱 𑒐𑒩𑒛𑓃𑒐 𑒫𑒰𑒪𑒲 𑒏𑒰𑒏𑒲𑒏
𑒫𑒱𑒫𑒰𑒯𑒼𑒏 𑒠𑒱𑒢 𑒮𑒦𑒮𑒿 𑒢𑒲𑒏
𑒢𑒻𑒢𑒰 𑒖𑒼𑒑𑒱𑒢 𑒖𑒼𑒑𑒏 𑒑𑒲𑒞
𑒏𑒱𑒕𑒳𑒍 𑒏𑒯𑒰𑒿 𑒥𑒔𑒰 𑒮𑒏𑒪
𑒦𑓄 𑒑𑒹𑒪𑒲𑒯 𑒫𑒱𑒡𑒫𑒰

𑒏𑒯𑒻𑒞 𑒕𑒟𑒱 𑒯𑒧𑒩 𑒮𑓀𑒑𑒲
𑒖𑒯𑒱𑒨𑒰 𑒪𑓄 𑒖𑒰𑒃𑒞 𑒕𑒟𑒱 𑒍 𑒁𑒣𑒢 𑒦𑒾𑒖𑒲𑒏𑒹𑒿
𑒣𑒹𑓀𑒬𑒢𑒏 𑒪𑒹𑒪 𑒠𑒰𑒢𑒰𑒣𑒳𑒩 𑒏𑒻𑒝𑓂𑒙
𑒫𑒱𑒡𑒫𑒰 𑒦𑒾𑒖𑒲𑒏𑒹𑒿 𑒠𑒹𑒐𑒱
𑒦𑒲𑒞𑒩𑒹-𑒦𑒲𑒞𑒩𑒹 𑒏𑒢𑒻𑒞 𑒩𑒯𑒻𑒞 𑒕𑒟𑒱
𑒥𑒰𑒥𑒴𑒏𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒫𑒱𑒡𑒫𑒰 𑒫𑒱𑒫𑒰𑒯 𑒯𑒹𑒥𑒰𑒏 𑒔𑒰𑒯𑒲
𑒞𑒿 𑒧𑒰𑒩𑒱-𑒧𑒰𑒩𑒱𑒏𑒹𑒿 𑒍 𑒅𑒚𑒪𑒐𑒱𑒢𑓂𑒯
𑒢𑒹𑒆𑒩𑒰𑒏 𑒩𑒰𑒖𑒣𑒴𑒞 𑒥𑒰𑒥𑒴𑒮𑒰𑒯𑒹𑒥𑒏 𑒄 𑒐𑒰𑒢𑒠𑒰𑒢
𑒥𑒛𑓃 𑒏𑒰𑒥𑒱𑒪 𑒦𑒹𑒪𑒰𑒯 𑒄 !

“𑒧𑒳𑒠𑒰 𑒁𑒕𑒱 𑒥𑒳𑒗𑒪 𑒯𑒧𑒩𑒼
𑒏𑒳𑒯𑒩𑒻𑒞 𑒩𑒯𑒻𑒞 𑒕𑒟𑒱 𑒥𑒰𑒣𑒼

𑒧𑒳𑒠𑒰 𑒥𑒼𑒗 𑒅𑒚𑒹𑒢𑒹 𑒕𑒟𑒱 𑒏𑒳𑒩𑒲𑒞𑒱 𑒮𑒧𑒰𑒖𑒏
𑒅𑒣𑒰𑒨 𑒏𑒞𑒋 𑒕𑒢𑒱 𑒏𑒼𑒢 𑒠𑒼𑒮𑒩”?

𑒨𑒾 𑒬𑒞𑒰𑒢𑒢𑓂𑒠 𑒣𑒳𑒩𑒯𑒱𑒞
𑒁𑒑𑒯𑒢 𑒬𑒳𑒏𑓂𑒪 𑒫𑒱𑒫𑒰𑒯 𑒣𑓀𑒔𑒧𑒲𑒏
𑒠𑒱𑒢𑒏 𑒧𑒯𑒞𑓂𑒫 𑒠𑒱𑒁 𑒢𑒹 𑒥𑒳𑒗𑒰𑒋

𑒢𑒱𑒑𑒠𑒞𑒱 𑒏𑒳𑒮𑒳𑒧𑒣𑒳𑒩𑒹𑓄𑒦𑓂𑒨𑒩𑓂𑒔𑒱𑒞𑓀 𑒖𑓂𑒘𑒰𑒢𑒧𑓂
𑒔𑒢𑓂𑒠𑓂𑒩𑒨𑒰𑒝𑒏 𑒣𑒴𑒩𑓂𑒫𑒰𑒣𑒩
𑒂𑒩𑓂𑒨𑒦𑒙𑒏 𑒅𑒠𑓂𑒒𑒼𑒭 𑒣𑒛𑓃𑒻𑒞 𑒁𑒕𑒱 𑒧𑒼𑒢

𑒋𑒯𑒱 𑒏𑒳𑒮𑒳𑒧𑒣𑒳𑒩𑒧𑒹 𑒏𑒩𑒻𑒞 𑒕𑒲 𑒖𑓂𑒘𑒰𑒢𑒏 𑒫𑒩𑓂𑒝𑒢
𑒢𑒰𑒣𑒪 𑒣𑒵𑒟𑓂𑒫𑒲 𑒮𑒴𑒩𑓂𑒨 𑒂 𑒔𑒢𑓂𑒠𑓂𑒩𑒏 𑒫𑓂𑒨𑒰𑒮
𑒣𑒵𑒟𑓂𑒫𑒲 𑒁𑒔𑒪𑒰 𑒢𑒯𑒱
𑒁𑒕𑒱 𑒑𑒞𑒱𑒧𑒰𑒢 𑒄 𑒦𑒴
𑒦𑓀 𑒁𑒕𑒱 𑒞𑒩𑒹𑒑𑒝 𑒖𑒹 𑒁𑒕𑒱 𑒁𑒔𑒪
𑒑𑓂𑒩𑒯𑒝 𑒢𑒯𑒱 𑒩𑒰𑒯𑒳𑒏 𑒑𑓂𑒩𑒰𑒮 𑒫𑒩𑒝 𑒁𑒕𑒱 𑒧𑒰𑒞𑓂𑒩 𑒕𑒰𑒯

𑒔𑒪𑒴 𑒔𑒢𑓂𑒠𑓂𑒩𑒨𑒰𑒝𑒏 𑒪𑒹𑒪 𑒥𑒡𑒰𑒄
𑒃𑒮𑒩𑒼𑒏 𑒫𑒻𑒖𑓂𑒘𑒰𑒢𑒱𑒏 𑒪𑒼𑒏𑒢𑒱𑒏𑒹𑒿 𑒂 𑒧𑒰𑒡𑒫𑒢 𑒢𑒰𑒨𑒩𑒏𑒹𑒿
𑒂𑒋𑒪 𑒂𑒩𑓂𑒨𑒦𑒙𑓂𑒙𑒏 𑒣𑓀𑒠𑓂𑒩𑒯 𑒮𑒋 𑒮𑒰𑒪 𑒥𑒰𑒠𑒼 𑒞𑒿 𑒏𑒲 !
𑒍𑒯𑒱 𑒠𑒹𑒬𑒫𑒰𑒮𑒲 𑒪𑒋 𑒢𑒯𑒱 𑒫𑒱𑒪𑒧𑓂𑒥𑒱𑒞
𑒪𑒲𑒪𑒰𑒫𑒞𑒲 𑒣𑒜𑓃𑒱𑒨𑒼 𑒏𑒋 𑒖𑒹 𑒢𑒯𑒱 𑒑𑒰𑒢𑒱 𑒮𑒏𑒪𑒰𑒯 𑒞𑒩𑒹𑒑𑒝
𑒏𑒳𑒮𑒳𑒧𑒣𑒳𑒩 𑒢𑒯𑒱 𑒞𑒿 𑒬𑓂𑒩𑒲𑒯𑒩𑒱𑒏𑒼𑒙𑒰𑒧𑒹 𑒮𑒻𑒯 𑒄 𑒠𑒱𑒢

𑒏𑒳𑒮𑒳𑒧𑒣𑒳𑒩𑒧𑒹 𑒖𑓂𑒘𑒰𑒢𑒏 𑒫𑒩𑓂𑒝𑒢 𑒢𑒯𑒱 𑒞𑒿
𑒏𑒧𑒮𑒿 𑒏𑒧 𑒏𑒮𑒳𑒧𑒣𑒳𑒩𑒮𑒿 𑒠𑒋 𑒞𑒿 𑒠𑒱𑒨𑒾𑒏 𑒥𑒡𑒰𑒃
𑒔𑒢𑓂𑒠𑓂𑒩𑒧𑒰𑒏𑒹𑒿 𑒕𑒴𑒥𑒰𑒏 𑒪𑒹𑒪 𑒟𑒰𑒛𑓃𑒲𑒧𑒹 𑒣𑒰𑒢𑒱 𑒢𑒯𑒱 𑒩𑒰𑒐𑒥 𑒂𑒥
𑒂𑒩𑓂𑒨𑒦𑒙𑒮𑓂𑒞𑓂𑒫𑒱𑒯 𑒢𑒱𑒑𑒠𑒞𑒱 𑒏𑒳𑒮𑒳𑒧𑒣𑒳𑒩𑒹𑓄𑒦𑓂𑒨𑒩𑓂𑒔𑒱𑒞𑓀 𑒖𑓂𑒘𑒰𑒢𑒧𑓂
𑒏𑒧𑒮𑒿 𑒏𑒧 𑒏𑒮𑒳𑒧𑒣𑒳𑒩𑒮𑒿 𑒠𑒋 𑒞𑒿 𑒠𑒱𑒨𑒾𑒏 𑒥𑒡𑒰𑒃

𑒯𑒧𑒩 𑒥𑒰𑒩𑒯 𑒙𑒰 𑒯𑒻𑒏𑒴
𑒁.𑒫𑒰𑒮 𑒧𑒾𑒮𑒧𑒲,

𑒧𑒼𑒖𑒩 𑒪𑒳𑒥𑒡𑒪

𑒣𑒪𑓂𑒪𑒫 𑒪𑒳𑒣𑓂𑒞𑒰

𑒂.𑒒𑒼𑒛𑓃𑒢 𑒕𑒞𑓂𑒞𑒰,

𑒩𑒹𑒞𑒪 𑒐𑒳𑒩𑒔𑒢

𑒧𑒼𑒿𑒕𑒏 𑒗𑒏𑓂𑒏𑒰

𑒃. 𑒏𑒼𑒃𑒪𑒲 𑒣𑒱𑒏𑓂𑒏𑒲,

𑒑𑒱𑒠𑒩𑒏 𑒢𑒱𑒩𑒻𑒚

𑒩𑒰𑒏𑒬 𑒟𑒰𑒢

𑒄.𑒠𑒳𑒣𑒯𑒩𑒱𑒨𑒰

𑒦𑒳𑒞𑒯𑒲 𑒑𑒰𑒕𑒲𑒏

𑒮𑒡𑒢𑒹 𑒬𑓂𑒫𑒰𑒮

𑒅.𑒮𑒩𑒯𑒲 𑒤𑒪

𑒏𑒪𑒧𑒲 𑒂𑒧-𑒑𑒰𑒕𑒲,

𑒍𑒑𑒩𑒥𑒰𑒯𑒲

𑒆.𑒏𑒼𑒪𑒣𑒞𑒱 𑒂

𑒔𑒼𑒏𑒩𑒏 𑒙𑒰𑒪,

𑒑𑒕𑒣𑒏𑓂𑒏𑒴 𑒙𑒰

𑒇.𑒪𑒑𑓂𑒑𑒰 𑒞𑒼𑒛𑓃𑒪

𑒑𑒼𑒩𑒪 𑒅𑒮𑒩𑒑𑒱

𑒥𑒰𑒥𑒰𑒏 𑒮𑒰𑒩𑒰

𑒪𑒵.𑒞𑒲𑒞𑒲𑒏 𑒐𑒹𑒪

𑒮𑒞𑒒𑒩𑒱𑒨𑒰 𑒔𑒰𑒪𑒱

𑒁𑒬𑒼𑒏-𑒥𑒲𑒨𑒰

𑒋.𑒏𑒢𑒮𑒳𑒣𑒞𑒲,

𑒍𑒃𑒡𑒏 𑒑𑒹𑒢𑓂𑒠 𑒂

𑒖𑒴𑒛𑓃𑒱𑒬𑒲𑒞𑒪

𑒌.𑒧𑒰𑒩𑒰 𑒁𑒥𑒰𑒛𑓃

𑒛𑒏𑒯𑒲𑒏 𑒧𑒕𑒻𑒛𑓃

𑒍𑒛𑓃𑒯𑒰 𑒖𑒰𑒩𑒱

𑒍.𑒏𑒥𑒃 𑒮𑒢𑓂𑒢𑒰

𑒔𑒰𑒪𑒲 𑒥𑒼𑒏𑒩𑒱 𑒧𑒰𑒙𑒱,

𑒏𑒚𑒤𑒼𑒛𑓃𑒥𑒰

𑒎.𑒬𑒰𑒯𑒲𑒏-𑒧𑒾𑒮,

𑒏𑒰𑒿𑒙𑒼 𑒍𑒏𑒩 𑒢𑒯𑒱

𑒥𑒱𑒡𑒏 𑒪𑒹𑒪

𑒣𑒳𑒩𑒯𑒱𑒞
𑒁𑒩𑓂𑒟𑒬𑒰𑒮𑓂𑒞𑓂𑒩 𑒥𑒢𑒥𑒻𑒞 𑒁𑒕𑒱 𑒏𑒧𑓂𑒣𑒢𑒲𑒏𑒹𑒿 𑒧𑒢𑒳𑒏𑓂𑒐
𑒂 𑒧𑒢𑒳𑒏𑓂𑒐 𑒥𑒢𑒻𑒕 𑒏𑒢𑒧𑒳𑒿𑒯

𑒒𑒵𑒝𑒰𑒏 𑒂𑒮𑓂𑒫𑒰𑒠 𑒂 𑒒𑒵𑒝𑒰𑒧𑒹 𑒪𑒹𑒢𑒹 𑒂𑒮𑓂𑒫𑒰𑒠
𑒫𑒹𑒬𑓂𑒨𑒰𑒫𑒵𑒞𑓂𑒞𑒱𑒏 𑒮𑓀𑒮𑒰𑒩-
𑒂𑒥 𑒢𑒩𑓂𑒞𑒏𑒲𑒏 𑒒𑒩 𑒢𑒯𑒱
𑒑𑒹𑒪 𑒁𑒕𑒱 𑒣𑒻𑒮𑒱
𑒩𑒰𑒖𑒢𑒲𑒞𑒱 𑒡𑒢𑒢𑒲𑒞𑒱
𑒋𑒯𑒱 𑒣𑒩𑓂𑒨𑒙𑒢𑒢𑒲𑒞𑒱𑒧𑒹 !

𑒂𑒧𑓂𑒩𑒣𑒰𑒪𑒲 𑒣𑒯𑒱𑒩𑒱 𑒔𑒬𑓂𑒧𑒰 𑒏𑒩𑒻𑒞 𑒕𑒟𑒱 𑒔𑒰𑒪𑒢 𑒫𑒰𑒯𑒢𑒏
𑒢𑒰𑒨𑒏 𑒧𑒵𑒔𑓂𑒕𑒏𑒙𑒱𑒏 𑒦𑓄 𑒑𑒹𑒪 𑒕𑒟𑒱 𑒯𑒼𑒙𑒪 𑒫𑓂𑒨𑒫𑒮𑒰𑒨𑒲
𑒢𑒫 𑒖𑒰𑒞𑒱 𑒫𑓂𑒨𑒫𑒮𑓂𑒟𑒰𑒏 𑒣𑒳𑒩𑒼𑒯𑒱𑒞
𑒂𑒧𑓂𑒩𑒣𑒰𑒪𑒲 𑒥𑒢𑒪𑒱 𑒁𑒢𑒳𑒪𑒼𑒧 𑒫𑓂𑒨𑒫𑒮𑓂𑒟𑒰𑒏 𑒬𑒏𑒳𑒢𑓂𑒞𑒪𑒰

𑒮𑓀𑒫𑒰𑒠𑒏 𑒁𑒢𑓂𑒞 𑒧𑒞𑒫𑒻𑒦𑒢𑓂𑒨𑒏 𑒣𑓂𑒩𑒰𑒩𑒧𑓂𑒦 !
𑒂 𑒞𑒹𑒿 𑒑𑒰𑒧 𑒋𑒐𑒢𑒼 𑒫𑒻𑒯
𑒫𑒱𑒡𑒫𑒰 𑒠𑒪𑒱𑒞 𑒑𑒩𑒲𑒥𑒲𑒏 𑒐𑒹𑒩𑒯𑒰 𑒮𑒻𑒯

𑒣𑒲𑒨𑒩 𑒂 𑒪𑒰𑒪 𑒯𑒼𑒃𑒞
𑒔𑒾𑒥𑒙𑒱𑒨𑒰𑒏 𑒥𑒞𑓂𑒞𑒲 𑒮𑒦
𑒪𑒳𑒡𑒏𑒻𑒞 𑒑𑒰𑒛𑓃𑒲𑒏 𑒬𑒲𑒮𑒰 𑒣𑒼𑒕𑒻𑒞
𑒁𑒐𑒥𑒰𑒩 𑒣𑒞𑓂𑒩𑒱𑒏𑒰 𑒥𑒹𑒔𑒻𑒞
𑒢𑒫 𑒖𑒰𑒞𑒱-𑒫𑓂𑒨𑒫𑒮𑓂𑒟𑒰𑒏 𑒠𑒪𑒱𑒞
𑒥𑒔𑒱𑒨𑒰-𑒥𑒔𑓂𑒔𑒰 𑒮𑒦𑒏 𑒣𑒰𑒿𑒞𑒲

𑒏𑒼𑒩𑒰𑒧𑒹 𑒥𑒔𑓂𑒔𑒰 𑒪𑒹𑒢𑒹 𑒨𑒳𑒫𑒰 𑒦𑒱𑒐𑒧𑓀𑒑𑒢𑒲
𑒢𑒱𑒩𑒲𑒯 𑒂𑒿𑒐𑒱 𑒣𑒻𑒩 𑒐𑒘𑓂𑒖𑒱𑒞
𑒐𑒘𑓂𑒖𑒱𑒞 𑒣𑒋𑒩𑒹 𑒥𑒜𑓃𑒻𑒞 𑒂𑒑𑒰𑒿
𑒧𑒳𑒠𑒰 𑒦𑒢𑒹 𑒍𑒯𑒱 𑒔𑒾𑒥𑒙𑒱𑒨𑒰𑒣𑒩
𑒬𑒰𑒢𑒮𑒿 𑒦𑒲𑒐 𑒧𑒿𑒑𑒻𑒞 𑒁𑒕𑒱 𑒥𑒰𑒪𑒑𑒼𑒫𑒱𑒢𑒏 𑒗𑒳𑒝𑓂𑒛
𑒦𑒲𑒐 𑒢𑒯𑒱 𑒂𑒬𑒱𑒩𑒫𑒰𑒠𑒲
𑒣𑒰𑒃 𑒠𑒹𑒪𑒯𑒳𑒿 𑒞𑒿 𑒚𑒲𑒏 𑒢𑒯𑒱 𑒞𑒿
𑒑𑒰𑒩𑒱𑒏 𑒣𑓂𑒩𑒮𑒰𑒠𑒲

𑒎𑒠𑓂𑒨𑒼𑒑𑒱𑒏 𑒏𑓂𑒭𑒹𑒞𑓂𑒩𑒧𑒹 𑒮𑒹𑒯𑒼
𑒏𑒼𑒨𑒪𑒰𑒏 𑒦𑒙𑓂𑒚𑒲𑒏 𑒡𑒳𑒿𑒂𑒮𑒿
𑒏𑒰𑒩𑒲 𑒦𑒴𑒞 𑒦𑒹𑒪 𑒬𑓂𑒩𑒧𑒱𑒏
𑒄𑒯𑒼 𑒕𑒟𑒱 𑒢𑒫 𑒖𑒰𑒞𑒱 𑒫𑓂𑒨𑒫𑒮𑓂𑒟𑒰𑒏 𑒠𑒪𑒱𑒞

𑒪𑒒𑒳 𑒅𑒠𑓂𑒨𑒼𑒑𑒏 𑒣𑒳𑒩𑒼𑒯𑒱𑒞𑒏
𑒒𑒩 𑒖𑒹𑒢𑒰 𑒩𑒰𑒖𑒰 𑒮𑒦𑒏
𑒠𑒰𑒩𑒴 𑒣𑒲𑒥𑒱 𑒧𑒿𑒞𑒪
𑒧𑒳𑒠𑒰 𑒮𑒩𑒏𑒰𑒩𑒏 𑒕𑒢𑓂𑒯𑒱 𑒖𑒱𑒠𑓂𑒠
𑒪𑒒𑒳 𑒅𑒠𑓂𑒨𑒼𑒑𑒏𑒹𑒿 𑒏𑒩𑒞𑒰𑒯 𑒮𑒧𑒵𑒠𑓂𑒡
𑒪𑒒𑒳 𑒅𑒠𑓂𑒨𑒼𑒑𑒏𑒹𑒿 𑒫𑒰 𑒪𑒒𑒳 𑒅𑒠𑓂𑒨𑒼𑒑𑒏 𑒣𑒳𑒩𑒼𑒯𑒱𑒞𑒏𑒹𑒿

𑒥𑒢𑒰 𑒏𑒨 𑒏𑒧𑓂𑒣𑒢𑒲 𑒪𑒋 𑒮𑒩𑒏𑒰𑒩𑒲 𑒇𑒝
𑒥𑒢𑓂𑒠 𑒏𑒩𑒟𑒱 𑒏𑒧𑓂𑒣𑒢𑒲
𑒏𑒧𑓂𑒣𑒢𑒲𑒏 𑒧𑒰𑒪𑒱𑒏 𑒢𑒯𑒱 𑒢𑒱𑒠𑒹𑒬𑒏 𑒕𑒲 𑒯𑒧
𑒏𑒧𑓂𑒣𑒢𑒲𑒏𑒹𑒿 𑒯𑒼𑒃𑒕 𑒒𑒰𑒙𑒰 𑒞𑒿
𑒬𑓂𑒩𑒧𑒱𑒏 𑒕𑒟𑒱 𑒧𑒩𑒻𑒞
𑒢𑒯𑒱 𑒏𑒱𑒕𑒳 𑒯𑒼𑒃𑒕 𑒢𑒱𑒠𑒹𑒬𑒏𑒏
𑒏𑒧𑓂𑒣𑒢𑒲 𑒁𑒕𑒱 𑒧𑒩𑒻𑒞

𑒁𑒩𑓂𑒟𑒬𑒰𑒮𑓂𑒞𑓂𑒩 𑒥𑒢𑒥𑒻𑒞 𑒁𑒕𑒱 𑒏𑒧𑓂𑒣𑒢𑒲𑒏𑒹𑒿 𑒧𑒢𑒳𑒏𑓂𑒐
𑒂 𑒧𑒢𑒳𑒏𑓂𑒐 𑒥𑒢𑒻𑒕 𑒏𑒢𑒧𑒳𑒿𑒯

𑒠𑒱𑒪𑓂𑒪𑒲-𑒧𑒳𑒧𑓂𑒥𑒃𑒏 𑒯𑒰𑒙
𑒞𑒩𑒏𑒰𑒩𑒲 𑒧𑒰𑒿𑒕𑒏 𑒥𑒖𑒰𑒩
𑒯𑒼𑒙𑒪𑒏 𑒥𑒢𑒟𑒱 𑒦𑒢𑒮𑒱𑒨𑒰
𑒣𑒳𑒞𑓂𑒩-𑒣𑒳𑒞𑓂𑒩𑒲𑒏 𑒫𑒱𑒫𑒰𑒯 𑒠𑒳𑒢𑒴𑒧𑒹 𑒖𑒰𑒞𑒱 𑒑𑒾𑒝
𑒫𑒱𑒡𑒫𑒰-𑒫𑒱𑒫𑒰𑒯 𑒏𑓂𑒭𑒧𑓂𑒨
𑒧𑒳𑒠𑒰 𑒖𑒐𑒢 𑒨𑒻𑒯 𑒮𑒦 𑒒𑒳𑒩𑒻𑒞 𑒕𑒟𑒱 𑒑𑒰𑒧
𑒢𑒲𑒪-𑒙𑒲𑒢𑒼𑒣𑒰𑒪 𑒠𑒋 𑒢𑒫 𑒫𑓂𑒨𑒫𑒮𑓂𑒟𑒰𑒏 𑒠𑒪𑒱𑒞
𑒥𑒢𑒱 𑒖𑒰𑒃𑒞 𑒕𑒟𑒱 𑒣𑒳𑒩𑒰𑒞𑒢 𑒫𑓂𑒨𑒫𑒮𑓂𑒟𑒰𑒏 𑒣𑒟𑒱𑒏
𑒞𑒩𑒏𑒰𑒩𑒲 𑒥𑒹𑒔𑒢𑒱𑒯𑒰𑒩 𑒥𑒢𑒟𑒱 𑒖𑒨𑒥𑒰𑒩
𑒎𑒠𑓂𑒨𑒼𑒑𑒱𑒏 𑒏𑓂𑒭𑒹𑒞𑓂𑒩𑒏 𑒏𑒰𑒩𑒲 𑒧𑒳𑒩𑒳𑒞
𑒮𑒰𑒥𑒳𑒢𑒮𑒿 𑒩𑒑𑒛𑓃𑒱 𑒔𑒰𑒧
𑒦𑒋 𑒖𑒰𑒟𑒱 𑒑𑒰𑒧𑒏 𑒦𑒪𑒧𑒰𑒢𑒳𑒭 !

𑒯𑒼𑒙𑒪𑒏 𑒦𑒢𑒮𑒱𑒨𑒰 𑒦𑓄 𑒖𑒰𑒃𑒞 𑒕𑒟𑒱 𑒮𑒼𑒃𑒞
𑒮𑒩𑒠𑒰𑒩𑒖𑒲𑒏 𑒧𑒼𑒯𑒩𑓂𑒩𑒱𑒩 𑒥𑒢𑒻𑒞 𑒕𑒟𑒱 𑒏𑒰𑒨𑒮𑓂𑒟
𑒣𑒰𑒮𑒫𑒰𑒢𑒖𑒲 𑒦𑓄 𑒖𑒰𑒃𑒞 𑒕𑒟𑒱 𑒠𑒪𑒱𑒞
𑒒𑒳𑒩𑒻𑒞 𑒏𑒰𑒪 𑒙𑓂𑒩𑒹𑒢𑒯𑒱𑒧𑒹 𑒤𑒹𑒩 𑒮𑒦 𑒧𑒱𑒪𑒱
𑒢𑒫 𑒫𑓂𑒨𑒫𑒮𑓂𑒟𑒰𑒏 𑒂 𑒣𑒳𑒩𑒰𑒞𑒢𑒏 𑒏𑒩𑒟𑒱 𑒧𑒹𑒪

𑒙𑓂𑒩𑒹𑒢 𑒁𑒕𑒱 𑒮𑒰𑒏𑓂𑒭𑒲 𑒋𑒯𑒱 𑒧𑒢𑒮𑒱 𑒠𑓂𑒫𑒻𑒡𑒏
𑒁𑒧𑒴𑒩𑓂𑒞 𑒫𑓂𑒨𑒫𑒮𑓂𑒟𑒰𑒏 𑒡𑒿𑒮𑒪 𑒂𑒿𑒐𑒱𑒏
𑒅𑒖𑒛𑓃𑒰 𑒢𑒴𑒂𑒏 𑒫𑓂𑒨𑒟𑒰𑒏 𑒨𑒳𑒫𑒰 𑒫𑒱𑒡𑒫𑒰𑒏
𑒂𑒧𑓂𑒩𑒣𑒰𑒪𑒲𑒏 𑒂
𑒧𑒵𑒔𑓂𑒕𑒏𑒙𑒱𑒏 𑒢𑒰𑒨𑒏 𑒔𑒰𑒩𑒳𑒠𑒞𑓂𑒞𑒏
𑒂 𑒥𑒮𑒢𑓂𑒞𑒮𑒹𑒢𑒰𑒏
𑒒𑒵𑒝𑒰𑒏 𑒂𑒮𑓂𑒫𑒰𑒠 𑒂 𑒒𑒵𑒝𑒰𑒧𑒹 𑒪𑒹𑒢𑒹 𑒂𑒮𑓂𑒫𑒰𑒠
𑒫𑒹𑒬𑓂𑒨𑒰𑒫𑒵𑒞𑓂𑒞𑒱𑒏 𑒮𑓀𑒮𑒰𑒩-𑒂𑒥 𑒢𑒩𑓂𑒞𑒏𑒲𑒏 𑒒𑒩𑒧𑒹
𑒑𑒹𑒪 𑒁𑒕𑒱 𑒣𑒻𑒮𑒱 𑒩𑒰𑒖𑒢𑒲𑒞𑒱 𑒡𑒢𑒢𑒲𑒞𑒱
𑒋𑒯𑒱 𑒣𑒩𑓂𑒨𑒙𑒢𑒢𑒲𑒞𑒱𑒧𑒹 !

𑒃𑒔𑓂𑒕𑒰-𑒧𑒵𑒞𑓂𑒨𑒳
𑒯𑒹 𑒦𑒲𑒭𑓂𑒧 𑒁𑒯𑒰𑒿𑒏 𑒏𑒭𑓂𑒙𑒏 𑒥𑒐𑒰𑒢 𑒮𑒳𑒢𑒪 𑒕𑒪 𑒐𑒰𑒃𑒞 𑒣𑒰𑒢-𑒧𑒐𑒰𑒢
𑒧𑒳𑒠𑒰 𑒥𑒳𑒗𑒪𑒯𑒳𑒿 𑒢𑒯𑒱 𑒄 𑒥𑒰𑒞 𑒃𑒔𑓂𑒕𑒰-𑒧𑒵𑒞𑓂𑒨𑒳 𑒏𑒱𑒋 𑒏𑒻 𑒞𑒰𑒞 !
𑒦𑒲𑒭𑒝𑒞𑒰𑒏 𑒏𑒟𑒰 𑒢𑒯𑒱 𑒟𑒼𑒛𑓃 , 𑒦𑒴𑒐 𑒁𑒞𑓂𑒨𑒰𑒔𑒰𑒩 𑒑𑒩𑒲𑒥𑒣𑒩 𑒖𑒼𑒛𑓃
𑒏𑒹𑒪𑒢𑓂𑒯𑒱 𑒁𑒯𑒰𑒿𑒏 𑒏𑓂𑒭𑒞𑓂𑒩𑒱𑒨 𑒦𑒨𑒰𑒫𑒯 𑒬𑒏𑓂𑒞𑒱 𑒂 𑒡𑒢𑒏 𑒠𑓂𑒫𑒢𑓂𑒠𑒏 𑒣𑒩𑒱𑒡𑒱
𑒒𑒼𑒭𑒢𑒱-𑒥𑓂𑒩𑒰𑒯𑓂𑒧𑒝 𑒮𑒦 𑒮𑒋𑒯 , 𑒩𑒙𑒱 𑒩𑒙𑒢𑓂𑒞𑒰 𑒫𑒱𑒠𑓂𑒨𑒰 𑒤𑒹𑒩 𑒫𑒋𑒯 !
𑒞𑒐𑒢..𑒋𑒏 𑒨𑒳𑒡𑒱𑒭𑓂𑒚𑒱𑒩𑒣𑒩 𑒕𑒼𑒛𑓃𑒱 𑒏𑒋 𑒩𑒰𑒖 , 𑒦𑒲𑒭𑓂𑒧 𑒕𑒼𑒛𑓃𑒪 𑒁𑒯𑒰𑒿 𑒢𑒱𑒮𑒰𑒮 !

𑒯𑒧𑒩 𑒨𑒳𑒡𑒱𑒭𑓂𑒚𑒱𑒩 𑒣𑒰𑒿𑒔 𑒮𑒋 𑒔𑒰𑒪𑒲𑒮 𑒣𑒯𑒱𑒩𑒟𑒱 𑒐𑒰𑒠𑒲-𑒩𑒹𑒬𑒧𑒲 𑒐𑒰𑒪𑒱𑒮
𑒂 𑒮𑒧𑒮𑓂𑒨𑒰 𑒫𑒻𑒯 𑒠𑓂𑒫𑒢𑓂𑒠𑒏 𑒣𑒩𑒱𑒡𑒱 𑒙𑒰 𑒙𑒴𑒙𑒪 𑒣𑒩𑒱𑒦𑒰𑒭𑒰 𑒥𑒠𑒪𑒱
𑒍𑒯𑒱𑒢𑒰 𑒠𑒹𑒬𑒫𑒰𑒮𑒲 𑒠𑒋 𑒃𑒔𑓂𑒕𑒰-𑒧𑒵𑒞𑓂𑒨𑒳 𑒁𑒣𑒢 𑒦𑒰𑒫𑒢𑒰 𑒂 𑒃𑒔𑓂𑒕𑒰𑒏𑒹𑒿
𑒕𑒼𑒛𑓃𑒪 𑒁𑒕𑒱 𑒮𑒦𑒙𑒰 𑒏𑒩𑓂𑒞𑒫𑓂𑒨 𑒁𑒣𑒢 𑒑𑒝𑒞𑒰𑓀𑒞𑓂𑒩𑒱𑒏 𑒨𑒳𑒡𑒱𑒭𑓂𑒚𑒱𑒩 𑒮𑒦𑒣𑒩 𑒯𑒼𑒃𑒞 𑒏𑒰𑒞
𑒥𑒳𑒗𑒪 𑒦𑒲𑒭𑓂𑒧 𑒯𑒧 𑒂𑒥 𑒄 𑒥𑒰𑒞 , 𑒣𑒹𑒪𑒯𑒳𑒿 𑒃𑒔𑓂𑒕𑒰-𑒧𑒵𑒞𑓂𑒨𑒳𑒋𑒿 𑒁𑒯𑒰𑒿 𑒢𑒱𑒖𑒰𑒞

𑒫𑒰𑒩𑓂𑒛 𑒢𑓀 𑓒𑓙 𑒥𑒹𑒛 𑒢𑓀. 𑓓𑓒 𑒮𑒿
𑒮𑒤𑒠𑒩𑒖𑓀𑒑 𑒯𑒰𑒮𑓂𑒣𑒲𑒙𑒪𑒮𑒿
𑒂𑒃 𑒠𑒹𑒐𑒪 𑒯𑒧 𑒧𑒲𑒞
𑒛𑒰𑒏𑓂𑒙𑒩
𑒣𑒹𑒬𑒹𑓀𑒙 𑒤𑓂𑒩𑒲 𑒃𑒪𑒰𑒖𑒏
𑒠𑓀𑒦 𑒦𑒩𑒃 𑒕𑒟𑒱 𑒯𑒰 𑒃𑒭𑓂𑒙
𑒮𑒰𑒥𑒳𑒢-𑒞𑒹𑒪 𑒮𑒦𑒣𑒩 𑒙𑒻𑒏𑓂𑒮
𑒦𑒩𑒃 𑒕𑒟𑒱 𑒮𑒦 𑒫𑒰𑒮𑒲
𑒯𑒰𑒮𑓂𑒣𑒲𑒙𑒪𑒏 𑒪𑒻𑒙𑒩𑒲𑒢 𑒑𑓀𑒠𑒰 𑒁𑒕𑒱 𑒣𑒳𑒕𑒢𑒹
𑒢𑒩𑓂𑒮 𑒥𑒱𑒑𑒛𑓃𑒱 𑒠𑒹𑒐𑒥𑒃 𑒕𑒟𑒱
𑒁𑒣𑒼𑒪𑒼𑒏 𑒣𑒑𑒣𑒰𑒞𑒲
𑒖𑒰𑒆 𑒁𑒣𑒼𑒪𑒼
𑒑𑓀𑒠𑒑𑒲 𑒖𑓂𑒨𑒼𑒿 𑒪𑒰𑒑𑒨
𑒙𑒻𑒏𑓂𑒮𑒏 𑒥𑒰𑒞
𑒤𑒱𑒢𑒰𑒢𑓂𑒮 𑒧𑒱𑒢𑒱𑒮𑓂𑒙𑒩𑒹𑒏𑒹𑒿 𑒖𑒰𑒆 𑒥𑒳𑒗𑒰𑒥𑒨

𑒙𑓂𑒩𑒹𑒢 𑒕𑒪 𑒪𑒹𑒙
𑒖𑒰𑒨𑒥 𑒠𑒱𑒪𑓂𑒪𑒲 𑒏𑒼𑒢𑒰
𑒁𑒮𑓂𑒣𑒞𑒰𑒪𑒏 𑒦𑒩𑓂𑒞𑒲 𑒏𑒏𑓂𑒭𑒧𑒹 𑒦𑒩𑒞𑒲 𑒯𑒼𑒋𑒥𑒰𑒏 𑒪𑒹𑒪
𑒙𑓂𑒩𑒹𑒢 𑒁𑒕𑒱 𑒪𑒹𑒙
𑒣𑒯𑒳𑒿𑒔𑒪𑒯𑒳𑒿 𑒠𑒱𑒪𑓂𑒪𑒲 𑒏𑒼𑒢𑒯𑒳𑒢𑒰
𑒧𑒳𑒠𑒰 𑒋𑒞𑒋 𑒛𑒰𑒏𑓂𑒙𑒩 𑒁𑒕𑒱 𑒫𑓂𑒨𑒮𑓂𑒞
𑒠𑒱𑒪𑓂𑒪𑒲𑒏 𑒮𑒩𑒏𑒰𑒩𑒲 𑒛𑒰𑒏𑓂𑒙𑒩
𑒂𑒅 𑒂𑒃 𑒏𑒰𑒪𑓂𑒯𑒱 𑒣𑒩𑒮𑒴
𑒦𑒹𑒪𑒯𑒳𑒿 𑒣𑒮𑓂𑒞
𑒠𑒱𑒪𑓂𑒪𑒲 𑒠𑒴𑒩 𑒁𑒮𑓂𑒞
𑒨𑒳𑒑 𑒥𑒠𑒪𑒪 𑒑𑒝𑒞𑓀𑒞𑓂𑒩 𑒂𑒨𑒪
𑒧𑒳𑒠𑒰 𑒙𑓂𑒩𑒹𑒢 𑒠𑒱𑒪𑓂𑒪𑒲 𑒖𑒰𑒨𑒥𑒪𑒰 𑒪𑒹𑒙
𑒂 𑒛𑒰𑒏𑓂𑒙𑒩 𑒤𑒳𑒩𑓂𑒩

𑒠𑒱𑒪𑓂𑒪𑒲 𑒁𑒐𑒢𑒯𑒳𑒿 𑒁𑒕𑒱 𑒠𑒴𑒩

𑒮𑒴𑒩𑓂𑒨-𑒢𑒧𑒮𑓂𑒏𑒰𑒩𑒏 𑒥𑒯𑒢𑓂𑒢𑒹
𑓇 𑒧𑒱𑒞𑓂𑒩𑒰𑒨 𑒢𑒧𑓁
𑒂𑒿𑒐𑒱 𑒏𑒩𑒞 𑒚𑒲𑒏 𑒯𑒱𑒢𑒏𑒩 𑒪𑒰𑒪𑒲
𑒖𑒹 𑒁𑒕𑒱 𑒮𑒴𑒩𑓂𑒨-𑒑𑓂𑒩𑒯𑒝𑒏 𑒋𑒏𑒙𑒰 𑒫𑒩𑓂𑒝 𑒅𑒑𑒻𑒞-𑒛𑒳𑒧𑒻𑒞 𑒏𑒰𑒪𑒏 𑒦𑓂𑒩𑒧
𑒑𑓂𑒩𑒯𑒝 𑒢𑒯𑒱 𑒁𑒕𑒱 𑒩𑒰𑒯𑒳𑒏 𑒑𑓂𑒩𑒰𑒮
𑒯𑒢𑒳𑒧𑒰𑒢𑒏 𑒮𑒴𑒩𑓂𑒨𑒏 𑒑𑓂𑒩𑒯𑒝 𑒏𑒩𑒥 𑒣𑒛𑓃𑒪 𑒧𑒼𑒢 𑒍 𑒠𑒼𑒮𑒩 𑒑𑓂𑒩𑒯𑒝
𑒧𑒳𑒠𑒰 𑒏𑒼𑒢𑒼 𑒑𑓂𑒩𑒯𑒝𑒏 𑒪𑒹𑒪 𑒩𑒰𑒯𑒳𑒏 𑒢𑒯𑒱 𑒏𑒰𑒖
𑒔𑒢𑓂𑒠𑓂𑒩𑒧𑒰 𑒥𑒲𑒔𑒧𑒹 𑒏𑒱𑒩𑒝𑒏 𑒏𑒩𑒻 𑒕𑒟𑒱 𑒑𑓂𑒩𑒰𑒮
𑒫𑒱𑒖𑓂𑒘𑒰𑒢𑒏 𑒕𑒻𑒏 𑒮𑒦 𑒥𑒰𑒞
𑒏𑒯𑒪𑒢𑓂𑒯𑒱 𑒏𑒳𑒪𑒠𑒲𑒣 𑒏𑒰𑒏
𑒮𑒦 𑒑𑒝𑒢𑒰 𑒏𑒨 𑒚𑒰𑒧𑒹 𑒠𑒹𑒪
𑒥𑒴𑒛𑓃𑒱 𑒣𑓀𑒛𑒱𑒞 𑒏𑒹𑒪𑒏 𑒁𑒣𑒫𑒱𑒞𑓂𑒩𑒏 𑒐𑒹𑒪

𑒑𑓀𑒑𑒰𑒧𑒹 𑒑𑒼𑒠𑒰𑒫𑒩𑒲 𑒂 𑒞𑒲𑒩𑒟𑒧𑒹 𑒣𑓂𑒩𑒨𑒰𑒑
𑒡𑒢𑓂𑒨𑒦𑒰𑒑 𑒏𑒾𑒬𑒪𑓂𑒨𑒰𑒧𑒰𑒨𑒏𑒹𑒿
𑒩𑒰𑒧 𑒪𑒹𑒪 𑒁𑒫𑒞𑒰𑒩
𑒮𑓂𑒢𑒰𑒢𑒏 𑒥𑒰𑒠𑒏 𑒧𑓀𑒞𑓂𑒩𑒏 𑒄 𑒦𑒰𑒑
𑒏𑒲 𑒐𑒼𑒪𑒞 𑒦𑒩𑒞 𑒣𑓂𑒩𑒑𑒞𑒱-𑒋𑒏𑒞𑒰𑒏 𑒠𑓂𑒫𑒰𑒩 ?
𑒐𑒹𑒪-𑒐𑒹𑒪𑒧𑒹 𑒠𑒹𑒬 𑒑𑒹𑒪 𑒣𑒰𑒕𑒴
𑒂𑒥𑒯𑒳 𑒞𑒿 𑒮𑒦 𑒂𑒑𑒴 𑒞𑒰𑒏𑒴
𑒬𑒏𑓂𑒞𑒱 𑒠𑒹𑒯𑒳 𑒯𑒹 𑒦𑒰𑒢𑒳 𑒧𑒰𑒧𑒯𑓁
𑓇 𑒩𑒫𑒨𑒹 𑒢𑒧𑓁

𑒧𑒹𑒩𑒳𑒠𑒝𑓂𑒛-𑒣𑒑 𑒯𑒼𑒨𑒞 𑒮𑒥𑒪
𑒮𑒴𑒩𑓂𑒨-𑒢𑒧𑒮𑓂𑒏𑒰𑒩𑒏 𑒣𑒩𑒘𑓂𑒔 𑒣𑒰𑒚 𑒣𑓂𑒩𑒥𑒪
𑒮𑒴𑒩𑓂𑒨𑒫𑓀𑒬𑒲𑒨𑒼𑒏 𑒁𑒯𑒯 𑒁𑒦𑒰𑒑
𑒏𑒩𑓂𑒝-𑒞𑒩𑓂𑒣𑒝𑒏 𑒢𑒯𑒱 𑒏𑒩𑒴 𑒥𑒰𑒞
𑒖𑒰𑒞𑒱-𑒏𑒩𑓂𑒧𑒏 𑒖𑓂𑒘𑒰𑒢𑒏 𑒍𑒩 𑒕𑒪 𑒍𑒞𑒨
𑒢𑒯𑒱 𑒏𑒱𑒋𑒏 𑒣𑒏𑒛𑓃𑒪 𑒩𑒰𑒯𑒴-𑒑𑓂𑒩𑒰𑒮𑒏 𑒥𑒰𑒞𑒏 𑒧𑒩𑓂𑒧 𑒁𑒯𑒯
𑓇 𑒮𑒴𑒩𑓂𑒨𑒰𑒨 𑒢𑒧𑓁

𑒮𑒰𑒞 𑒁𑒬𑓂𑒫-𑒩𑒟𑒏 𑒅𑒧𑓀𑒑 𑒣𑒢𑒱𑒮𑒼𑒐𑒰𑒏 𑒮𑒰𑒞 𑒩𑓀𑒑 𑒣𑓂𑒩𑒏𑒰𑒬𑒏 𑒩𑒟𑒧𑒴𑒮𑒪 𑒁𑒖𑒰𑒞𑒬𑒞𑓂𑒩𑒳𑒏 𑒮𑓀𑒑 𑒧𑒯𑒰𑒬𑒱𑒪𑒰𑒏𑓀𑒙𑒏𑒏 𑒖𑒼𑒛𑓃 𑒏𑒹𑒪𑒏 𑒧𑒑𑒡 𑒏𑒰𑒖 𑒢𑒯𑒱 𑒟𑒼𑒛𑓃 𑒖𑒩𑓂𑒧𑒢𑒲-𑒃𑒙𑒪𑒲𑒏 𑒋𑒏𑒞𑒰𑒏 𑒣𑓂𑒩𑒨𑒰𑒮 𑒠𑒳𑒃 𑒮𑒯𑒮𑓂𑒞𑓂𑒩𑒰𑒥𑓂𑒠𑒲 𑒣𑒯𑒱𑒢𑒯𑒱 𑒏𑒰𑒬 𑒩𑒬𑓂𑒧𑒱𑒏 𑒮𑒰𑒞-𑒁𑒬𑓂𑒫𑒏 𑒩𑒯𑒮𑓂𑒨 𑒥𑒴𑒗𑒪 𑒧𑒑𑒡 𑒞𑒰𑒯𑒱𑒨𑒹 𑒣𑒯𑒩 𑒕𑒼𑒛𑓃𑒪 𑒦𑒰𑒫 𑒣𑒏𑒛𑓃𑒪𑒯𑒳𑒿 𑒁𑒩𑓂𑒟 𑒯𑒰 𑒦𑒩𑒞𑒣𑒳𑒞𑓂𑒩 𑒏𑒹𑒪𑒯𑒳𑒿 𑒁𑒢𑒩𑓂𑒟 𑒦𑒩𑒳 𑒬𑒏𑓂𑒞𑒱 𑒯𑒹 𑒮𑒴𑒩𑓂𑒨 𑒁𑒯𑒰𑒿
𑓇 𑒦𑒰𑒢𑒫𑒹 𑒢𑒧𑓁

𑒬𑓂𑒫𑒰𑒮𑒏-𑒏𑒳𑓀𑒦𑒏 𑒏𑒹𑒪𑒯𑒳𑒿 𑒁𑒦𑓂𑒨𑒰𑒮 𑒧𑒼𑒢 𑒣𑒛𑓃𑒪 𑒏𑒳𑒢𑓂𑒞𑒲𑒏 𑒁𑒢𑒰𑒨𑒰𑒮 𑒮𑒴𑒩𑓂𑒨𑒧𑒹𑒪 𑒮𑒳𑒤𑒪 𑒦𑓄 𑒑𑒹𑒪 𑒏𑒫𑒔-𑒏𑒳𑒝𑓂𑒛𑒪 𑒦𑒹𑒙𑒪 𑒮𑒹𑒯𑒼 𑒃𑒢𑓂𑒠𑓂𑒩𑒯𑒱 𑒮𑓀𑒑𑒹 𑒑𑒹𑒪 𑒋𑒏𑒪𑒫𑓂𑒨𑒏𑒹𑒿 𑒣𑒯𑒱𑒢𑒯𑒱 𑒠𑓂𑒩𑒼𑒝 𑒏𑒹𑒪𑒢𑓂𑒯𑒱 𑒤𑒹𑒪
𑒁𑒩𑓂𑒖𑒳𑒢𑒏 𑒏𑒩𑓂𑒝𑒣𑒩 𑒫𑒱𑒖𑒨 ? 𑒏𑓂𑒭𑒨 𑒣𑓂𑒩𑒞𑒱𑒦𑒰𑒏 𑒩𑒴𑒣 𑒫𑒱𑒏𑒵𑒞 𑒏𑒻𑒪 𑒁𑒐𑒢𑒯𑒳𑒿 𑒡𑒩𑒱 𑒏𑒲 𑒞𑒴 𑒄 𑒮𑒯𑒥𑒯 𑓇 𑒐𑒑𑒰𑒨 𑒢𑒧𑓁
𑒮𑒴𑒩𑓂𑒨𑒰 𑒂𑒬𑓂𑒫𑒱𑒢 𑒑𑒧𑒢𑒧𑒹 𑒤𑒹𑒩 𑒁𑒕𑒱 𑒣𑒩𑒮𑓂𑒣𑒩 𑒠𑓂𑒫𑓀𑒠𑒏 𑒠𑒹𑒩𑒱 𑒑𑒳𑒩𑒳 𑒥𑒵𑒯𑒮𑓂𑒣𑒞𑒱 𑒚𑒰𑒜𑓃𑒹-𑒚𑒰𑒜𑓃 𑒏𑒩𑒞𑒟𑒱 𑒄 𑒮𑒦𑒏 𑒅𑒠𑓂𑒡𑒰𑒩
𑒁𑒐𑒢𑒯𑒳𑒿 𑒑𑒳𑒩𑒳 𑒕𑒟𑒱 𑒑𑒴𑒛𑓃
𑒖𑒼𑒩 𑒠𑒻𑒞 𑒖𑒼𑒛𑓃 𑒣𑒩 𑒯𑒧 𑒇𑒝𑒲
𑒥𑒢𑒍𑒞𑒰𑒯 𑒯𑒧𑒩𑒰 𑒣𑓂𑒩𑒥𑒪 𑒩𑒯𑒱 𑒮𑓂𑒫𑒨𑓀 𑒁𑒥𑓂𑒥𑒪
𑒑𑒳𑒩𑒳𑒏-𑒑𑒳𑒩𑒳𑒞𑓂𑒫 𑒅𑒭𑓂𑒝-𑒮𑒳𑒛𑓂𑒛𑒰𑒯 𑒯𑒯
𑓇 𑒣𑒴𑒭𑓂𑒝𑒹 𑒢𑒧𑓁

𑒖𑒏𑒩 𑒁𑓀𑒏𑒮𑒿 𑒢𑒱𑒏𑒪𑒪 𑒫𑒱𑒬𑓂𑒫
𑒫𑒱𑒬𑓂𑒫𑒏 𑒣𑓂𑒩𑒰𑒝 𑒂 𑒞𑒏𑒩 𑒬𑓂𑒫𑒰𑒮𑒼𑒔𑓂𑒕𑒫𑒰𑒮
𑒑𑒳𑒩𑒳𑒞𑓂𑒫𑒏 𑒐𑒹𑒪𑒏𑒹𑒿 𑒥𑒢𑒹𑒪𑒯𑒳𑒿 𑒁𑒯𑒰𑒿
𑒏𑒰𑒕𑒳𑒏
𑒮𑒯𑒮𑓂𑒞𑓂𑒩𑒢𑒰𑒑𑒏 𑒤𑒢𑒱
𑒖𑒰𑒢𑒱 𑒏𑒱-𑒏𑒲 ?
𑒩𑒯𑒮𑓂𑒨 𑒂𑒩 𑒑𑒯𑒱𑓀𑒩𑒰𑒨𑒪 𑒦𑒩𑒞-𑒣𑒳𑒞𑓂𑒩 𑒑𑒹𑒪 𑒯𑒹𑒩𑒰𑒨𑒪
𑒞𑒏𑒩 𑒡𑓂𑒨𑒰𑒢 𑒯𑒹𑒨𑒰𑒮𑓂𑒞𑒠𑒫𑒵𑒞𑓂𑒞𑒨𑓁;
𑓇 𑒯𑒱𑒩𑒝𑓂𑒨𑒑𑒩𑓂𑒦𑒰𑒨 𑒢𑒧𑓁
𑒮𑒴𑒩𑓂𑒨𑒏𑒱𑒩𑒝 𑒣𑒮𑒩𑒱 𑒕𑒪 𑒑𑒹𑒪 𑒏𑒞𑒹𑒏 𑒩𑒯𑒮𑓂𑒨 𑒥𑒱𑒪𑒰𑒋𑒪 𑒞𑒱𑒧𑒱𑒩𑒏 𑒡𑒳𑒿𑒡 𑒦𑒹𑒪 𑒁𑒕𑒱 𑒏𑒰𑒞𑒩 𑒧𑒳𑒠𑒰 𑒄 𑒏𑒲 𑒁𑒠𑓂𑒦𑒳𑒞 ? 𑒩𑒰𑒞𑓂𑒩𑒱-𑒣𑓂𑒩𑒯𑒩 𑒠𑒹𑒐𑒪𑒯𑒳𑒿 𑒮𑒣𑓂𑒞-𑒇𑒭𑒱𑒑𑒝 𑒠𑒱𑒢𑒧𑒹 𑒮𑒦-𑒏𑒱𑒕𑒳 𑒮𑓂𑒫𑒔𑓂𑒕 𑒧𑒳𑒠𑒰 𑒢𑒯𑒱 𑒞𑒩𑒹𑒑𑒝𑒏 𑒪𑒹𑒪 𑒮𑒞𑓂𑒨𑒏 𑒞𑒯 𑒞𑒯𑒱𑒨𑒰𑒨𑒪 𑒥𑒢𑒪 𑒐𑒹𑒪 𑒯𑒰 𑒫𑒱𑒬𑓂𑒫𑒫𑒰𑒮𑒲 𑒬𑒥𑓂𑒠𑒏 𑒄 𑒧𑒹𑒪 𑒁𑒯𑒰𑒿𑒏 𑒠𑒩𑓂𑒬𑒢𑒏 𑒮𑓂𑒞𑓀𑒦 𑒏𑒱𑒋 𑒞𑒹 𑒫𑓂𑒨𑒏𑓂𑒞𑒮𑒴𑒏𑓂𑒭𑓂𑒧𑒰 𑒑𑒳𑒝𑒰𑒞𑓂𑒧𑒰𑒢𑓁 𑓇 𑒧𑒩𑒲𑒔𑓂𑒨𑒹 𑒢𑒧𑓁
𑒁𑒯𑒿𑒏 𑒞𑒹𑒖𑒧𑒹 𑒯𑒹 𑒣𑒞𑓀𑒑 𑒣𑓂𑒩𑒦𑒰𑒏𑒩 𑒮𑒰𑒑𑒩𑒰𑒧𑓂𑒥𑒩𑒰 𑒁𑒕𑒱 𑒖𑒹 𑒢𑒯𑒰𑒨𑒪 𑒮𑒾𑒩 𑒆𑒩𑓂𑒖𑒰𑒏 𑒢𑒫-𑒮𑒱𑒠𑓂𑒡𑒰𑓀𑒞 𑒢𑒯𑒱 𑒏𑒲 𑒠𑒹𑒪𑒏 𑒏𑒢𑒱𑒨𑒼𑒙𑒰 𑒂𑒮

𑒧𑒹𑒒𑒰-𑒧𑒰𑒮 𑒢𑒯𑒱 𑒁𑒯𑒰𑒿𑒏 𑒁𑒕𑒱 𑒖𑒼𑒛𑓃 𑒞𑒐𑒢 𑒧𑒢𑒳𑒏𑓂𑒐𑒏 𑒥𑒰𑒞 𑒏𑒲 𑒕𑒼𑒛𑓃 𑒣𑒜𑓃𑒪 𑒑𑓂𑒩𑓀𑒟 𑒥𑓂𑒩𑒯𑓂𑒧𑒰𑓀𑒛𑒏 𑒥𑒰𑒞 𑒞𑒩𑒝𑒱 𑒮𑒯𑒮𑓂𑒞𑓂𑒩 𑒋𑒏𑒩𑒰 𑒣𑒰𑒩 𑒁𑓀𑒬𑒳𑒧𑒰𑒪𑒲 𑒞𑒣𑒢𑒮𑒿 𑒣𑒻𑒒𑒑𑒩 𑒑𑒰𑒪 𑒞𑒏𑒩 𑒆𑒭𑓂𑒝𑒞𑒰 𑒏𑒲 𑒯𑒧 𑒮𑒯𑒥 ? 𑓇 𑒂𑒠𑒱𑒞𑓂𑒨𑒰𑒨 𑒢𑒧𑓁

𑒣𑒱𑒞𑒰𑒏 𑒥𑒰𑒞 𑒁𑒕𑒱 𑒂𑒨𑒪 𑒧𑒼𑒢 𑒥𑒱𑒢𑒰 𑒮𑒰𑒫𑒱𑒞𑓂𑒩𑒲𑒏 𑒑𑒰𑒨𑒞𑓂𑒩𑒲𑒏 𑒏𑒲 𑒧𑒼𑒪 ? 𑒠𑒳𑒃 𑒫𑒮𑓂𑒞𑒳𑒏 𑒧𑒹𑒪 𑒏𑒐𑒢𑒯𑒳𑒿 𑒢𑒲𑒏 𑒏𑒯𑒳𑒐𑒢 𑒣𑒩𑒱𑒝𑒰𑒧 𑒦𑒹𑒪 𑒫𑒱𑒣𑒩𑒲𑒞 𑒏𑒙𑒯𑒩-𑒏𑒼𑒂 𑒐𑒹𑒪𑒰𑒯 𑒞𑒰𑒞 𑒠𑒹𑒪𑒢𑓂𑒯𑒱 𑒆𑒣𑒩 𑒣𑒰𑒢𑒏 𑒣𑒰𑒞 𑒣𑒹𑒙 𑒤𑒴𑒪𑒪 𑒦𑒹𑒪 𑒦𑒱𑒮𑒱𑒝𑓂𑒛 𑒣𑒩𑒪 𑒧𑒼𑒢 𑒩𑒮𑒰𑒨𑒢-𑒬𑒰𑒮𑓂𑒞𑓂𑒩 𑒞𑒲𑒫𑓂𑒩𑒮𑓀𑒫𑒹𑒑𑒰𑒢𑒰𑒧𑒰𑒮𑒢𑓂𑒢𑓁; 𑓇 𑒮𑒫𑒱𑒞𑓂𑒩𑒹 𑒢𑒧𑓁

𑒣𑒵𑒟𑓂𑒫𑒲 𑒒𑒳𑒧𑒻𑒕 𑒣𑒬𑓂𑒔𑒱𑒧 𑒮𑒿 𑒣𑒴𑒩𑓂𑒫 𑒂
𑒮𑒴𑒩𑓂𑒨 𑒏𑒹𑒿 𑒒𑒴𑒧𑒥𑒻𑒞 𑒁𑒕𑒱 𑒣𑒴𑒩𑓂𑒫 𑒮𑒿 𑒣𑒬𑓂𑒔𑒱𑒧
𑒧𑒳𑒠𑒰 𑒏𑒯𑒴 𑒖𑒹 𑒑𑒩𑓂𑒧𑒲𑒧𑒹 𑒅𑒞𑓂𑒞𑒩-𑒣𑒴𑒩𑓂𑒫 𑒂
𑒖𑒰𑒛𑓃𑒧𑒹 𑒅𑒞𑓂𑒞𑒩-𑒣𑒬𑓂𑒔𑒱𑒧 𑒏𑒱𑒨𑒻 𑒕𑒟𑒱 𑒮𑒴𑒩𑓂𑒨?
𑒏𑒲 𑒢𑒯𑒱 𑒔𑒪𑒻𑒞 𑒕𑒟𑒱 𑒁𑒣𑒢 𑒁𑒏𑓂𑒭 ?

𑒮𑒴𑒩𑓂𑒨 𑒑𑓂𑒩𑒯𑒝𑒏 𑒕𑒰𑒯 𑒖𑒨𑒠𑓂𑒩𑒟𑒏 𑒐𑒱𑒮𑓂𑒮𑒰𑒧𑒹 𑒮𑒹𑒯𑒼
𑒠𑒱𑒢𑒧𑒹 𑒩𑒰𑒞𑒳𑒏 𑒂𑒯𑒙𑒱 𑒫𑒋𑒯 𑒮𑒴𑒩𑓂𑒨-𑒑𑓂𑒩𑒯𑒝 𑒕𑒪 𑒯𑒼𑒋𑒞
𑒩𑒰𑒯𑒴-𑒏𑒹𑒞𑒳 𑒮𑒦𑒏 𑒠𑒱𑒢 𑒂𑒥𑒼 𑒑𑒹𑒪 ?

𑒣𑒳𑒢𑒱-𑒣𑒳𑒢𑒱 𑒏𑒩𑒱 𑒠𑒝𑓂𑒛 𑒯𑒧 𑒠𑒹𑒪
𑒮𑓂𑒟𑒱𑒩𑒔𑒱𑒞𑓂𑒞 𑒢𑒹𑒞𑓂𑒩 𑒪𑒹𑒪
𑒡𑓂𑒨𑒰𑒢 𑒡𑒩𑒯 𑒂 𑒄 𑒏𑒯𑒯
𑓇 𑒁𑒩𑓂𑒏𑒰𑒨 𑒢𑒧𑓁
𑒣𑒼𑒟𑒲𑒏 𑒦𑒰𑒭𑓂𑒨 𑒂 𑒦𑒰𑒭𑓂𑒨𑒏 𑒦𑒰𑒭𑓂𑒨
𑒁𑒪𑓀𑒏𑒰𑒩𑒏 𑒖𑒰𑒪-𑒖𑓀𑒖𑒰𑒪 𑒂 𑒋𑒯𑒱 𑒥𑒱𑒔𑓂𑒔𑒯𑒱
𑒮𑒴𑒩𑓂𑒨𑒢𑒧𑒮𑓂𑒏𑒰𑒩𑒏 𑒮𑒹𑒯𑒼 𑒄 𑒥𑒱𑒡-𑒥𑒰𑒡
𑒏𑒩𑒳 𑒮𑓂𑒫𑒲𑒏𑒰𑒩 𑒯𑒹 𑒯𑒹 𑒮𑒫𑒱𑒞𑒰
𑒠𑒳𑓁𑒐𑒧𑒼𑒔𑒢 𑒠𑒴𑒩 𑒏𑒩𑒴 𑒫𑒱𑒏𑒰𑒩 𑒮𑓀𑒣𑒴𑒩𑓂𑒝
𑒏𑒹𑒪𑒯𑒳𑒿 𑒮𑒴𑒩𑓂𑒨-𑒢𑒧𑒮𑓂𑒏𑒰𑒩 𑒯𑒧 𑒣𑒴𑒩𑓂𑒝

𑒫𑒱𑒖𑓂𑒘𑒰𑒢𑒏 𑒣𑒰𑒐𑓀𑒛 𑒇𑒞𑒧𑓂𑒦𑒩𑒰 𑒥𑒳𑒠𑓂𑒡𑒱 𑒏𑒞𑓂𑒞𑓄
𑒨𑒼𑒑𑒬𑓂𑒔𑒱𑒞𑓂𑒞𑒫𑒵𑒞𑓂𑒞𑒱𑒢𑒱𑒩𑒼𑒡𑓁
𑓇 𑒦𑒰𑒮𑓂𑒏𑒩𑒰𑒨 𑒢𑒧𑓁

𑒮𑒢 𑒮𑒞𑓂𑒞𑒰𑒮𑒲𑒏 𑒥𑒰𑒜𑓃𑒱𑒏 𑒥𑒯𑒢𑓂𑒢𑒹
𑒏𑒧𑒪𑒰𑒧𑒯𑒰𑒩𑒰𑒢𑒲𑒏𑒹𑒿 𑒣𑒰𑒩 𑒏𑒋𑒪 𑒣𑒻𑒩𑒹 𑒥𑒪𑒰𑒢𑒏𑒹𑒿 𑒧𑒳𑒠𑒰 𑒢𑒰𑒯𑒮𑒿 𑒧𑒳𑒠𑒰 𑒂𑒃 𑒄 𑒏𑒲 𑒦𑒹𑒪 𑒥𑒰𑒞 𑒠𑒳𑒢𑒴 𑒕𑒯𑒩𑒏 𑒥𑒲𑒔 𑒄 𑒣𑒰𑒢𑒱 𑒗𑒗𑒰 𑒠𑒹𑒞 𑒏𑒱𑒕𑒳 𑒏𑒰𑒪𑒧𑒹 𑒪𑒱𑒁 𑒧𑒰𑒢𑒱

𑒔𑒩𑒱𑒞𑓂𑒩𑒏 𑒄 𑒣𑒩𑒱𑒫𑒩𑓂𑒞𑒢 𑒠𑒹𑒪𑒏 𑒛𑒩𑒰𑒨
𑒢𑒫 𑒫𑒱𑒖𑓂𑒘𑒰𑒢𑒏 𑒥𑒰𑒞 𑒮𑒳𑒢𑒰𑒨
𑒥𑒰𑒿𑒡-𑒥𑒰𑒢𑓂𑒯𑒱 𑒮𑒏𑒞 𑒣𑓂𑒩𑒏𑒵𑒞𑒱 𑒏𑒲 ? 𑒦𑒲𑒭𑒝 𑒦𑒹𑒪 𑒂𑒩 𑒁𑒕𑒱 𑒄
𑒯𑒵𑒠𑒨𑒧𑒹 𑒠𑒹𑒪𑒏 𑒦𑒨𑒏 𑒁𑒫𑒞𑒰𑒩 𑒠𑒹𑒐𑒪 𑒕𑒪 𑒯𑒧 𑒑𑒰𑒧𑒏 𑒥𑒰𑒞 𑒥𑒛𑓃𑒏𑒰 𑒏𑒪𑒧 𑒂 𑒤𑒳𑒪𑒫𑒰𑒩𑒲𑒧𑒹 𑒥𑒛𑓃𑒏𑒰 𑒥𑒰𑒯𑒰 𑒠𑒹𑒪 𑒕𑒪 𑒑𑒹𑒪 𑒣𑒰𑒢𑒱𑒏 𑒢𑒱𑒏𑒰𑒮𑒲 𑒯𑒼𑒃𑒞 𑒕𑒪 𑒐𑒹𑒪
𑒢𑒫 𑒫𑒱𑒖𑓂𑒘𑒰𑒢𑒲 𑒏𑒹𑒪𑒟𑒱 𑒥𑒰𑒯𑒰 𑒥𑒢𑓂𑒢 𑒮𑒦𑒙𑒰
𑒤𑒰𑒙𑒏 𑒪𑒰𑒑𑒪 𑒕𑒯𑒩𑒏 𑒦𑒲𑒞𑒩 𑒥𑒰𑒪𑒳 𑒏𑒋𑒪 𑒥𑒢𑓂𑒢 𑒧𑒴𑒿𑒯𑒏𑒹𑒿 𑒋𑒏 𑒣𑒹𑒩𑒱𑒨𑒰 𑒣𑒩 𑒕𑒪𑒯𑒳𑒿 𑒔𑒪𑒪 𑒯𑒧 𑒂𑒩𑒱𑒨𑒹-𑒂𑒩𑒱𑒨𑒹 𑒠𑒹𑒐𑒪 𑒩𑒳𑒏𑓂𑒭 𑒣𑒯𑒱𑒢𑒹 𑒕𑒪 𑒁𑒩𑒱𑒨𑒰 𑒠𑒳𑒩𑓂𑒦𑒱𑒏𑓂𑒭 𑒂𑒥 𑒠𑒳𑒩𑓂𑒦𑒱𑒏𑓂𑒭 𑒁𑒕𑒱 𑒕𑒳𑒔𑓂𑒕
𑒮𑒱𑒪𑓂𑒪𑒲 𑒢𑒲𑒪𑒑𑒰𑒨 𑒮𑒦𑒙𑒰 𑒮𑒳𑒢𑓂𑒢 𑒫𑒱𑒡𑒧𑒹 𑒬𑒰𑒯𑒲 𑒏𑒰𑒿𑒙 𑒁𑒢𑒳𑒣𑒪𑒥𑓂𑒡 𑒖𑒴𑒛𑓃𑒱𑒬𑒲𑒞𑒪𑒏 𑒦𑒼𑒑𑒏 𑒕𑒪 𑒩𑒰𑒐𑒪 𑒑𑒰𑒕𑒏 𑒢𑒲𑒔𑒰𑒿 𑒮𑒣𑓂𑒞𑒰𑒯 𑒥𑒲𑒞𑒪 𑒢𑒯𑒱 𑒏𑓂𑒨𑒼 𑒫𑒢𑓂𑒨𑒣𑓂𑒩𑒰𑒝𑒲 𑒂𑒨𑒪 𑒐𑒰𑒨 𑒔𑒳𑒙𑓂𑒙𑒲𑒏 𑒣𑒰𑒿𑒞 𑒙𑒰 𑒣𑒮𑒩𑒰𑒋𑒪
𑒕𑒯𑒩𑒣𑒩 𑒚𑒰𑒜𑓃 𑒁𑒦𑒱𑒨𑒢𑓂𑒞𑒰𑒏 𑒑𑒣 𑒕𑒪𑒯𑒳𑒿 𑒮𑒳𑒢𑒻𑒞 𑒯𑒧 𑒢𑒱𑒩𑓂𑒪𑒱𑒣𑓂𑒞 𑒧𑒳𑒠𑒰 𑒖𑒰𑒯𑒱 𑒡𑒰𑒩𑒏𑒹𑒿 𑒏𑒋𑒪 𑒣𑒋𑒩𑒹 𑒣𑒰𑒩 𑒞𑒏𑒩 𑒩𑒴𑒣 𑒁𑒕𑒱 𑒄 𑒫𑒱𑒮𑓂𑒞𑒰𑒩 !

𑒢𑒫𑒫𑒱𑒖𑓂𑒘𑒰𑒢𑒏 𑒔𑒩𑒱𑒞𑓂𑒩𑒰𑒢𑒳𑒫𑒰𑒠 𑒯𑒼𑒨𑒞 𑒋𑒯𑒢 𑒢𑒯𑒱 𑒕𑒪 𑒯𑒧 𑒖𑒰𑒢𑒪 𑒧𑒳𑒠𑒰 𑒠𑒹𑒢𑒹 𑒕𑒪 𑒍𑒏𑒩𑒰 𑒠𑒳𑒞𑓂𑒏𑒰𑒩 𑒏𑒳𑒮𑒱𑒨𑒰𑒩𑒏 𑒏𑒱𑒕𑒳 𑒑𑒰𑒕 𑒥𑒰𑒜𑓃𑒱𑒏 𑒣𑒰𑒢𑒱𑒏 𑒥𑒲𑒔𑒧𑒹 𑒚𑒰𑒜𑓃 𑒧𑒰𑒙𑒱𑒏 𑒩𑓀𑒑𑒏 𑒣𑒰𑒢𑒱 𑒂 𑒯𑒩𑒱𑒨𑒩 𑒏𑒔𑒼𑒛𑓃 𑒑𑒰𑒕 𑒕𑒯𑒩𑒏 𑒆𑒣𑒩𑒮𑒿 𑒗𑒗𑒰𑒨𑒪 𑒣𑒰𑒢𑒱 𑒪𑒰𑒑𑒪 𑒏𑒰𑒙𑒨 𑒕𑒯𑒩𑒏𑒹𑒿 𑒡𑒰𑒩𑒏 𑒡𑒰𑒩
𑒚𑒰𑒧-𑒚𑒰𑒧 𑒏𑓃𑒙𑒪 𑒕𑒪 𑒕𑒯𑒩 𑒆𑒣𑒩𑒮𑒿 𑒥𑒳𑒢𑓂𑒢𑒲 𑒣𑒛𑓃𑒱 𑒩𑒯𑒪 𑒮𑒦𑒙𑒰 𑒡𑒰𑒢 𑒔𑒰𑒅𑒩 𑒦𑒲𑒞𑒏 𑒏𑒼𑒚𑒲 𑒙𑒴𑒙𑒱 𑒐𑒮𑒪 𑒣𑒰𑒢𑒱𑒏 𑒦𑒹𑒪 𑒑𑓂𑒩𑒰𑒮
𑒯𑒹𑒪𑒱𑒏𑒰𑒣𑓂𑒙𑒩𑒮𑒿 𑒐𑒮𑒪 𑒔𑒴𑒛𑓃𑒰-𑒑𑒴𑒛𑓃 𑒖𑒞𑒨 𑒢𑒯𑒱 𑒂𑒨𑒪 𑒕𑒪 𑒥𑒰𑒜𑓃𑒱 𑒏𑒱𑒋𑒏 𑒞𑒿 𑒣𑒰𑒢𑒱𑒧𑒹 𑒐𑒮𑒱𑒏𑒨 𑒯𑒼𑒋𑒞 𑒥𑒩𑓂𑒥𑒰𑒠 𑒯𑒹𑒪𑒲𑒏𑒰𑒣𑓂𑒙𑒩𑒏 𑒢𑒲𑒔𑒰𑒿 𑒠𑒾𑒑𑒻𑒞 𑒕𑒪 𑒦𑒲𑒛𑓃 𑒦𑒴𑒐𑒪 𑒣𑒹𑒙 𑒨𑒳𑒫𑒰 𑒂 𑒫𑒵𑒠𑓂𑒡

𑒍 𑒥𑒴𑒜𑓃 𑒐𑒰 𑒩𑒯𑒪 𑒕𑒟𑒱 𑒑𑒴𑒛𑓃-𑒔𑒴𑒛𑓃𑒰 𑒥𑒹𑒙𑒰-𑒣𑒳𑒞𑒼𑒯𑒳𑒏 𑒬𑒼𑒏 𑒏𑒲 𑒏𑒩𑒱 𑒮𑒏𑒞 𑒠𑒴𑒩 𑒣𑒹𑒙𑒏 𑒏𑓂𑒭𑒳𑒡𑒰?

𑒋𑒏𑒙𑒰 𑒥𑒲.𑒛𑒲.𑒍.𑒏 𑒥𑒹𑒙𑒰 𑒕𑒪 𑒧𑒱𑒞𑓂𑒩 𑒏𑒯𑒪𑒏 𑒄 𑒮𑒩𑒏𑒰𑒩 𑒁𑒕𑒱 𑒏𑓂𑒭𑒳𑒠𑓂𑒩 𑒍𑒏𑒩𑒰 𑒣𑒱𑒞𑒰𑒏𑒹𑒿 𑒬𑓀𑒙𑒱𑓀𑒑 𑒏𑒹𑒪𑒏 𑒣𑒼𑒮𑓂𑒙𑒱𑓀𑒑 𑒑𑒱𑒩𑒲𑒛𑒲𑒯 𑒮𑒿 𑒗𑓀𑒗𑒰𑒩𑒣𑒳𑒩𑒏 𑒛𑒱𑒧𑒼𑒬𑒢 𑒏𑒢𑒱𑓀𑒑
𑒧𑒳𑒠𑒰 𑒦𑒰𑒑𑓂𑒨𑒏 𑒣𑓂𑒩𑒰𑒩𑒥𑓂𑒡 𑒁𑒕𑒱 𑒖𑒼𑒛𑓃 𑒂𑒨𑒪 𑒥𑒰𑒜𑓃𑒱 𑒣𑒼𑒮𑓂𑒙𑒱𑓀𑒑 𑒦𑒹𑒪 𑒤𑒱𑒙
𑒮𑒼𑒔𑒪𑒯𑒳𑒿 𑒖𑒹 𑒯𑒧𑒩𑒹𑒙𑒰 𑒣𑓂𑒩𑒰𑒩𑒥𑓂𑒡 𑒁𑒕𑒱 𑒢𑒲𑒔 𑒬𑒢𑒱𑒨𑒼 𑒢𑒲𑒔 𑒮𑒩𑒮𑓂𑒫𑒞𑒲 𑒧𑒿𑒑𑒹𑒞𑒟𑒱 𑒏𑒲 𑒦𑒲𑒐? 𑒣𑒯𑒳𑒿𑒔𑒪𑒯𑒳𑒿 𑒑𑒰𑒧 𑒣𑒣𑓂𑒣𑒴 𑒦𑒰𑒃𑒏 𑒧𑒼𑒢 𑒕𑒼𑒙 𑒫𑒱𑒏𑒰𑒮𑒏 𑒩𑒴𑒣𑒩𑒹𑒐𑒰 𑒖𑒪-𑒕𑒰𑒖𑒢 𑒢𑒱𑒏𑒰𑒮𑒲.....

𑒥𑒰𑒞 𑒣𑒩 𑒥𑒰𑒞 𑒤𑒹𑒩 𑒮𑒩𑒏𑒰𑒩𑒏 𑒒𑒼𑒭𑒝𑒰 𑒥𑒰𑒜𑓃𑒱 𑒩𑒰𑒯𑒞 𑒋𑒏-𑒋𑒏 𑒥𑒼𑒩𑒰 𑒁𑒢𑒰𑒖 𑒮𑒦 𑒥𑒼𑒩𑒰𑒧𑒹 𑒣𑓀𑒠𑓂𑒩𑒯 𑒏𑒱𑒪𑒼 𑒢𑒱𑒏𑒰𑒪𑒪𑒟𑒱 𑒥𑓂𑒪𑒰𑒏𑒏 𑒏𑒩𑓂𑒧𑒔𑒰𑒩𑒲 𑒥𑒴𑒩𑒱 𑒕𑒲 𑒣𑒣𑓂𑒣𑒴 𑒦𑒰𑒄 𑒁𑒯𑒳𑒿 𑒧𑒿𑒑𑒢𑒲𑒏 𑒥𑒛𑓃𑒠𑒏 𑒑𑒢𑒻𑒞 𑒕𑒲 𑒠𑒰𑒿𑒞 𑒣𑒱𑒕𑒪𑒰 𑒥𑒹𑒩 𑒄𑒯𑒼 𑒢𑒯𑒱 𑒣𑓂𑒩𑒰𑒣𑓂𑒞
𑒯𑒣𑓂𑒞𑒰 𑒠𑒮 𑒠𑒱𑒢𑒏 𑒥𑒰𑒠𑒏 𑒥𑒰𑒞
𑒏𑓂𑒨𑒼 𑒑𑒹𑒪 𑒥𑓀𑒥𑒄 𑒏𑓂𑒨𑒼 𑒡𑒹𑒪𑒏 𑒠𑒱𑒪𑓂𑒪𑒲𑒏 𑒥𑒰𑒙 𑒑𑒰𑒧𑒧𑒹 𑒮𑓂𑒞𑓂𑒩𑒲 𑒫𑒵𑒠𑓂𑒡 𑒂 𑒥𑒔𑓂𑒔𑒰 𑒥𑓀𑒥𑒃𑒧𑒹 𑒞𑒿 𑒞𑒩𑒏𑒰𑒩𑒲 𑒥𑒹𑒔𑒥 𑒥𑒼𑒗𑒼 𑒅𑒚𑒰𑒨𑒥 𑒮𑒦 𑒏𑓂𑒨𑒼 𑒏𑒹𑒪𑒏 𑒄 𑒣𑓂𑒩𑒝 𑒧𑒰𑒨𑒏 𑒮𑓂𑒫𑒣𑓂𑒢 𑒁𑒕𑒱 𑒏𑒼𑒚𑒰𑒏 𑒯𑒼𑒁𑒋 𑒒𑒩 𑒁𑒑𑒱𑒪𑒯𑒲𑒏 𑒥𑒰𑒠 𑒤𑒴𑒮 𑒂 𑒐𑒣𑒛𑓃𑒰 𑒣𑒳𑒢𑓁 𑒥𑒢𑒰𑒨𑒪 𑒥𑒐𑒰𑒩𑒲 𑒖𑒐𑒢 𑒦𑒹𑒪 𑒥𑒐𑒛𑓃𑒰
𑒦𑒢𑒹 𑒦𑒮𑒪 𑒥𑒰𑒜𑓃𑒱𑒧𑒹 𑒦𑒲𑒞 𑒥𑒢𑒰𑒨𑒥 𑒏𑒼𑒚𑒰𑒏 𑒒𑒩 𑒯𑒹 𑒧𑒲𑒞
𑒐𑒮𑒋 𑒪𑒰𑒑𑒪 𑒄𑓀𑒙𑒰 𑒑𑒰𑒧𑒧𑒹 𑒏𑒼𑒚𑒰-𑒏𑒼𑒚𑒰𑒧𑒹 𑒦𑒹𑒪 𑒚𑒰𑒧-𑒚𑒰𑒧𑒧𑒹 𑒣𑒳𑒩𑒢𑒏𑒰 𑒏𑒼𑒢𑒙𑒰 𑒮𑒦 𑒑𑒹𑒪 𑒯𑒹𑒩𑒰𑒨 𑒖𑒞𑒨 𑒯𑒹𑒩𑒨𑒥𑒰𑒏 𑒢𑒳𑒏𑓂𑒏𑒰-𑒕𑒱𑒣𑓂𑒣𑒲 𑒐𑒹𑒪𑒰𑒨𑒪 𑒯𑒧 𑒦𑒰𑒋

𑒂𑒥 𑒮𑒳𑒢𑒳 𑒮𑒩𑒏𑒰𑒩𑒏 𑒐𑒙𑒩𑒰𑒮 𑒂𑒩𑓂𑒟𑒱𑒏 𑒮𑓂𑒟𑒱𑒞𑒱 𑒮𑒳𑒡𑒰𑒩𑒪 𑒯𑒧 𑒧𑒹𑒯𑒟𑒧𑒹 𑒏𑓄 𑒐𑒰𑒮 𑒂𑒠𑒩𑓂𑒬 𑒑𑓂𑒩𑒰𑒧 𑒣𑓂𑒩𑒐𑓀𑒛𑒏 𑒋𑒏𑒩𑒰 𑒥𑒢𑒰𑒍𑒪 𑒏𑒯𑒻𑒞 𑒕𑒲 𑒖𑒹 𑒯𑒧 𑒥𑓀𑒥𑒄-𑒠𑒱𑒪𑓂𑒪𑒲𑒧𑒹 𑒏𑒧𑒰𑒍𑒪 !
𑒮𑒳𑒢𑒳 𑒞𑒐𑒢 𑒄 𑒥𑒰𑒞 𑒖𑓂𑒨𑒼𑒿 𑒩𑒯𑒻𑒞 𑒁𑒮𑓂𑒟𑒱𑒩 𑒮𑒩𑒏𑒰𑒩 𑒞𑒿 𑒩𑒯𑒻𑒞 𑒢𑒯𑒱 𑒠𑒱𑒪𑓂𑒪𑒲 𑒢𑒯𑒱 𑒥𑒧𑓂𑒧𑒄 𑒫𑒱𑒖𑒨𑒢𑒑𑒩𑒧𑓂 𑒮𑒰𑒧𑓂𑒩𑒰𑒖𑓂𑒨𑒏 𑒯𑒰𑒪 𑒣𑒳𑒩𑒰𑒞𑒰𑒞𑓂𑒫𑒱𑒏𑒏𑒹𑒿 𑒁𑒕𑒱 𑒥𑒴𑒗𑒪 𑒄 𑒥𑒰𑒞
𑒡𑒢𑓂𑒨𑒦𑒰𑒑 𑒄 𑒧𑒢𑒰𑒆 𑒯𑒧𑒩𑒰 𑒖𑒱𑒞𑒥𑒱𑒞𑒹 𑒩𑒯𑒴 𑒯𑒹 𑒠𑒰𑒆 𑒣𑓂𑒩𑒑𑒞𑒱-𑒣𑒩𑒱𑒬𑓂𑒩𑒧 𑒁𑒯𑒰𑒿 𑒏𑒩𑒴 𑒯𑒧𑒩 𑒮𑒧𑒮𑓂𑒨𑒰𑒮𑒿 𑒠𑒴𑒩 𑒩𑒯𑒴
𑒥𑒰𑒜𑓃𑒱 𑒂𑒋𑒪 𑒮𑒞𑓂𑒞𑒰𑒮𑒲𑒧𑒹 𑒞𑒥𑒰𑒯𑒲 𑒠𑒹𑒐𑒪𑒯𑒳𑒿 𑒧𑒳𑒠𑒰 𑒏𑒯𑒻𑒞 𑒕𑒲 𑒯𑒧 𑒠𑒹𑒐𑒴 𑒂𑒥𑒰𑒖𑒰𑒯𑒲𑒏𑒹𑒿

𑒡𑒢𑓂𑒨𑒦𑒰𑒑 𑒁𑒯𑒲𑒮𑒿 𑒞𑒿 𑒧𑒢𑒼𑒩𑓀𑒖𑒢 𑒧𑒹𑒪𑒰-𑒚𑒹𑒪𑒰 𑒐𑒞𑒧 𑒦𑒹𑒪 𑒯𑒳𑒏𑓂𑒏𑒰𑒪𑒼𑒪𑒲 𑒦𑒹𑒪 𑒠𑒱𑒫𑒰𑒪𑒲 𑒂 𑒖𑒴𑒛𑓃𑒱𑒬𑒲𑒞𑒪𑒏 𑒟𑒰𑒪-𑒏𑒰𑒠𑒼-𑒑𑒩𑓂𑒠𑒰 𑒦𑒹𑒪 𑒯𑒼𑒪𑒲 𑒞𑒐𑒢 𑒁𑒯𑒳𑒿𑒏 𑒥𑒰𑒞 𑒮𑒳𑒢𑒢𑒹 𑒠𑒼𑒭 𑒢𑒯𑒱
𑒏𑒧𑒰𑒨 𑒪𑒹𑒪 𑒯𑒧𑒯𑒳𑒿 𑒞𑒿 𑒠𑒱𑒪𑓂𑒪𑒲-𑒥𑓀𑒥𑒄𑒧𑒹 𑒕𑒲 𑒏𑒧𑒮𑒿 𑒏𑒧 𑒁𑒯𑒰𑒿𑒏 𑒄 𑒥𑒛𑓃𑒏𑒣𑒢 𑒖𑒹 𑒑𑒰𑒧𑒏𑒹𑒿 𑒢𑒯𑒱 𑒕𑒼𑒛𑓃𑒪 𑒧𑒢𑒼𑒩𑓀𑒖𑒢𑒼 𑒏𑒩𑒻𑒞 𑒕𑒲 𑒏𑒧𑒰𑒃𑒞𑒼 𑒕𑒲 𑒐𑒰𑒃𑒞𑒼 𑒕𑒲 𑒂 𑒠𑒱𑒪𑓂𑒪𑒲 𑒥𑓀𑒥𑒃 𑒮𑒹𑒯𑒼 𑒒𑒳𑒧𑒻𑒞 𑒕𑒲

𑒧𑒯𑒰𑒥𑒪𑒲𑒣𑒳𑒩𑒧 𑒮𑒧𑒳𑒠𑓂𑒩 𑒞𑒙𑒣𑒩
𑒁𑒮𑒲𑒧 𑒮𑒧𑒳𑒠𑓂𑒩𑒏 𑒏𑒰𑒞𑒏 𑒠𑒵𑒬𑓂𑒨 𑒯𑒵𑒠𑒨 𑒦𑒹𑒪 𑒅𑒧𑓀𑒑𑒮𑒿 𑒣𑒴𑒩𑒱𑒞
𑒮𑒴𑒩𑓂𑒨-𑒧𑓀𑒠𑒱𑒩 𑒣𑒰𑓀𑒛𑒫-𑒩𑒟 𑒮𑓀𑒑 𑒂𑒏𑒰𑒬-𑒠𑓂𑒫𑒲𑒣𑒏 𑒠𑒩𑓂𑒬𑒢 𑒏𑒨𑒪 𑒯𑒧
𑒢𑒳𑒢𑒑𑒩 𑒣𑒰𑒢𑒱 𑒖𑒐𑒢 𑒧𑒳𑒿𑒯 𑒑𑒹𑒪 𑒦𑒹𑒪𑒯𑒳𑒿 𑒂𑒬𑓂𑒔𑒩𑓂𑒨𑒱𑒞 𑒑𑒹𑒪𑒯𑒳𑒿 𑒯𑒧 𑒯𑒹𑒪
𑒪𑒯𑒩𑒱𑒏 𑒠𑒲𑒫𑒰𑒩𑒱𑒮𑒿 𑒯𑒧 𑒙𑒏𑒩𑒰𑒨 𑒁𑓀𑒑-𑒁𑓀𑒑 𑒮𑒱𑒯𑒩𑒱-𑒮𑒱𑒯𑒩𑒰𑒨
𑒠𑒹𑒐𑒪 𑒮𑒳𑒢𑒪 𑒮𑒧𑒳𑒠𑓂𑒩𑒏 𑒥𑒰𑒞 𑒥𑒱𑒮𑒩𑒪 𑒧𑒢-𑒞𑒢 𑒪𑒹𑒪𑒯𑒳𑒿 𑒢𑒱𑒮𑒰𑒮
𑒮𑒳𑒢𑒹𑒪𑒏 𑒧𑒝𑒱 𑒑𑒰𑒃𑒛 𑒄 𑒥𑒰𑒞 𑒁𑒋𑒪𑒟𑒱 𑒫𑒱𑒠𑒹𑒬𑒲 𑒐𑒼𑒪𑒪𑒟𑒱 𑒄 𑒮𑒞𑓂𑒨 𑒣𑒪𑓂𑒪𑒫 𑒫𑓀𑒬𑒏 𑒄 𑒕𑒪 𑒠𑒹𑒢 𑒦𑒰𑒩𑒞𑒫𑒮𑒲 𑒥𑒱𑒮𑒩𑒪 𑒞𑒢𑒱 𑒦𑒹𑒩
𑒧𑒼𑒢 𑒣𑒛𑓃𑒪 𑒁𑓀𑒏𑒼𑒩𑒫𑒰𑒙𑒏 𑒧𑓀𑒠𑒱𑒩 𑒩𑒰𑒖𑒰 𑒐𑒞𑒧 𑒦𑒹𑒪 𑒥𑒱𑒮𑒩𑒪 𑒖𑒢 𑒯𑒩𑒱-𑒯𑒩𑒱
𑒙𑒴𑒙𑒪 𑒃𑒞𑒱𑒯𑒰𑒮𑒏 𑒞𑒰𑒩 𑒖𑒐𑒢 𑒮𑓂𑒫𑒰𑒞𑒱 𑒦𑒹𑒪 𑒯𑓂𑒩𑒰𑒮 𑒁𑒐𑒢
𑒏𑒰𑒮𑓂𑒣𑒱𑒨𑒢 𑒮𑒰𑒑𑒩𑒏 𑒣𑒰𑒢𑒱𑒏 𑒦𑒲𑒞𑒩𑒏 𑒧𑓀𑒠𑒱𑒩 𑒦𑒰𑒩𑒞𑒲𑒨 𑒫𑓂𑒨𑒰𑒣𑒰𑒩𑒲𑒏 𑒠𑓂𑒫𑒰𑒩𑒰 𑒢𑒱𑒩𑓂𑒧𑒱𑒞

𑒂𑒥 𑒋𑒐𑒢 𑒁𑒕𑒱 𑒯𑒧𑓂𑒧𑒩 𑒄 𑒯𑒰𑒪 𑒑𑒰𑒧𑒏 𑒥𑒼𑒩𑒱𑓀𑒑 𑒣𑒧𑓂𑒣𑒮𑒹𑒙 𑒁𑒧𑒹𑒩𑒱𑒏𑒢 𑒃𑓀𑒖𑒲𑒢𑒱𑒨𑒩𑒏 𑒐𑒻𑒩𑒰𑒞 𑒕𑒼𑒛𑒴 𑒦𑒮𑒱𑒨𑒹𑒪𑒯𑒳𑒿 𑒏𑒞𑒨 𑒁𑒯𑒰𑒿 𑒤𑒹𑒩 𑒣𑓂𑒩𑒲𑒞𑒱-𑒣𑒞𑓂𑒢𑒲 𑒯𑒿𑒮𑒱-𑒯𑒿𑒮𑒱 𑒦𑒹𑒪𑒟𑒱 𑒦𑒹𑒩

𑒮𑓂𑒧𑒵𑒞𑒱-𑒦𑒨
𑒢𑒑𑒩𑒏 𑒢𑒰𑒑𑒩𑒱𑒏 𑒏𑒼𑒪𑒰𑒯𑒪𑒧𑒹 𑒥𑒱𑒮𑒩𑒱 𑒑𑒹𑒪𑒯𑒳𑒿 𑒏𑒞𑒹𑒏 𑒩𑒰𑒮 𑒮𑓂𑒧𑒵𑒞𑒱 𑒂 𑒋𑒏𑒩𑒰 𑒮𑓀𑒑 𑒪𑒰𑒑𑒪 𑒦𑒨 𑒦𑒨𑒰𑒏𑓂𑒩𑒰𑓀𑒞
𑒬𑒱𑒭𑓂𑒨𑒞𑓂𑒫-𑒮𑒧𑒰𑒖𑒲𑒏𑒩𑒝𑒏
𑒮𑒧𑒨𑒰𑒦𑒰𑒫 𑒂𑒏𑒱 𑒤𑒴𑒮𑒱𑒨𑒰𑒯𑒱𑓀𑒏 𑒫𑓂𑒨𑒮𑓂𑒞𑒞𑒰 𑒮𑓂𑒧𑒵𑒞𑒱 𑒦𑒨 𑒂𑒏𑒱 𑒯𑒰𑒩𑒱 𑒧𑒰𑒢𑒥 𑒮𑒧𑒮𑓂𑒨𑒰𑒮𑒿
𑒂 𑒦𑓄 𑒖𑒰𑒨𑒥 𑒮𑓂𑒧𑒵𑒞𑒱𑒮𑒿 𑒠𑒴𑒩 𑒦𑒨𑒮𑒿 𑒏𑒰𑒞 𑒮𑒰𑒧𑒰𑒖𑒱𑒏𑒩𑒝𑒮𑒿 𑒤𑒩𑒰𑒏
𑒐𑒰𑒿𑒙𑒲 𑒣𑒰𑒩𑒱𑒫𑒰𑒩𑒱𑒏
𑒧𑒳𑒠𑒰 𑒤𑒹𑒩 𑒦𑒹𑒙𑒪 𑒁𑒕𑒱 𑒮𑒧𑒨 𑒨𑒳𑒑𑒏 𑒥𑒰𑒠 𑒥𑒔𑓂𑒔𑒰 𑒢𑒯𑒱 𑒦𑓄 𑒑𑒹𑒪𑒯𑒳𑒿 𑒣𑒻𑒒
𑒤𑒹𑒩𑒮𑒿 𑒅𑒚𑒹𑒪𑒯𑒳𑒿 𑒏𑒩𑒔𑒲𑒏 𑒏𑒪𑒧 𑒪𑒱𑒐𑒥𑒰𑒏 𑒯𑒹𑒞𑒳 𑒪𑒱𑒐𑒢𑒰 𑒧𑒳𑒠𑒰 𑒠𑒫𑒰𑒞𑒧𑒹 𑒮𑒳𑒐𑒰𑒨𑒪 𑒁𑒕𑒱 𑒩𑒼𑒬𑒢𑒰𑒃 𑒨𑒳𑒑 𑒥𑒲𑒞𑒪 𑒮𑓂𑒧𑒵𑒞𑒱 𑒥𑒱𑒮𑒩𑒪
𑒦𑒹𑒪𑒯𑒳𑒿 𑒋𑒏𑒰𑒏𑒲

𑒮𑒯𑒮𑓂𑒞𑓂𑒩𑒥𑒰𑒜𑓃𑒢𑒱 𑒖𑒹𑒏𑒰𑒿 𑒠𑒰𑒢𑒫𑒰𑒏𑒰𑒩 𑒒𑒙𑒢𑒰𑒏𑓂𑒩𑒧𑒏 𑒖𑓀𑒖𑒰𑒪
𑒤𑒴𑒪𑒱 𑒑𑒹𑒪 𑒮𑒰𑒿𑒮
𑒯𑒛𑓃𑒥𑒛𑓃𑒰𑒏𑓄 𑒅𑒚𑒪𑒯𑒳𑒿 𑒯𑒧
𑒂𑒥𑒱 𑒑𑒹𑒪 𑒯𑒿𑒮𑒲 𑒮𑓂𑒫𑒣𑓂𑒢𑒰𑒢𑒳𑒬𑒰𑒮𑒢
𑒪𑒙𑒣𑒙𑒰𑒏𑒹𑒿 𑒐𑒮𑒪𑒯𑒳𑒿 𑒢𑒯𑒱
𑒡𑒣𑒰𑒏 𑒦𑓄 𑒑𑒹𑒪𑒯𑒳𑒿 𑒁𑒕𑒱 𑒣𑒻𑒒
𑒥𑒔𑓂𑒔𑒰𑒧𑒹 𑒏𑒯𑒰𑒿 𑒕𑒪 𑒮𑓂𑒫𑒣𑓂𑒢𑒰𑒢𑒳𑒬𑒰𑒮𑒢 𑒐𑒮𑒻𑒞 𑒕𑒪𑒯𑒳𑒿 𑒂 𑒅𑒚𑒻𑒞 𑒕𑒪𑒯𑒳𑒿 𑒬𑒼𑒢𑒱𑒞𑒮𑒿 𑒬𑒼𑒢𑒱𑒞𑒰𑒧𑒹 𑒦𑒹𑒪 𑒅𑒚𑒱𑒏𑒨
𑒯𑒼𑒃𑒞 𑒒𑒰𑒧𑒹-𑒣𑒮𑒲𑒢𑒹
𑒢𑒯𑒰𑒨𑒪
𑒮𑓂𑒧𑒵𑒞𑒱-𑒦𑒨𑒏 𑒕𑒼𑒛𑓃 𑒢𑒯𑒱 𑒦𑒹𑒙𑒪 𑒥𑓂𑒩𑒯𑓂𑒧𑒰𑓀𑒛𑒏 𑒏𑒼𑒪𑒰𑒯𑒪
𑒑𑒳𑒩𑒳𑒞𑓂𑒫𑒮𑒿 𑒥𑒰𑒢𑓂𑒯𑒪 𑒔𑒏𑓂𑒏𑒩 𑒏𑒙𑒻𑒞
𑒏𑒩𑒼𑒛𑓃𑒏-𑒏𑒩𑒼𑒛𑓃 𑒧𑒲𑒪 𑒠𑒴𑒩 𑒮𑒴𑒩𑓂𑒨 𑒂 𑒞𑒏𑒩 𑒣𑒰𑒩 𑒏𑒻𑒏𑒙𑒰 𑒮𑒴𑒩𑓂𑒨
𑒏𑒹 𑒕𑒲 𑒮𑒦𑒏 𑒏𑒩𑓂𑒞𑒰-𑒡𑒩𑓂𑒞𑒰 𑒂 𑒖𑓂𑒨𑒼𑒿 𑒁𑒕𑒱 𑒏𑓂𑒨𑒼 𑒞𑒿 𑒍𑒏𑒩
𑒢𑒱𑒩𑓂𑒧𑒰𑒞𑒰 𑒁𑒕𑒱 𑒏𑒹 ?
𑒍𑒯 ! 𑒢𑒯𑒱 𑒦𑒹𑒙𑒪 𑒕𑒼𑒩
𑒪𑒹𑒪𑒯𑒳𑒿 𑒢𑒱𑒩𑓂𑒝𑒨
𑒣𑒜𑓃𑒱𑒏𑒹𑒿 𑒠𑒩𑓂𑒬𑒢 𑒢𑒯𑒱 𑒏𑒩𑒥 𑒔𑒱𑒢𑓂𑒞𑒢
𑒞𑒼𑒩𑒪 𑒏𑒩𑒔𑒲-𑒏𑒪𑒧 𑒂 𑒠𑒫𑒰𑒞
𑒏𑒹 𑒕𑒲 𑒄 𑒮𑒯𑒮𑓂𑒞𑓂𑒩𑒥𑒰𑒜𑓃𑒢𑒱 𑒒𑒴𑒧𑒱 𑒩𑒯𑒪 𑒁𑒕𑒱 𑒋𑒏𑒙𑒰 𑒣𑒩𑒱𑒡𑒱𑒧𑒹
𑒬𑒰𑒣𑒱𑒞 𑒠𑒰𑒢𑒫 𑒂𑒏𑒱 𑒏𑒼𑒢𑒼 𑒇𑒭𑒱 𑒞𑒰𑒏𑒻𑒞 𑒕𑒼𑒩 𑒮𑒧𑒮𑓂𑒨𑒰𑒏 𑒂 𑒮𑒧𑒮𑓂𑒨𑒰 𑒞𑒿 𑒫𑒻𑒯 𑒏𑒹 𑒏𑒏𑒩 𑒢𑒱𑒩𑓂𑒧𑒰𑒞𑒰
𑒂 𑒞𑒏𑒩 𑒏𑒞𑒨 𑒁𑓀𑒞𑒱𑒧 𑒕𑒼𑒩 𑒏𑒹 𑒏𑒏𑒩 𑒮𑓂𑒫𑒰𑒧𑒲
𑒂 𑒮𑒦𑒏 𑒮𑓂𑒫𑒰𑒧𑒲 𑒏𑒹 ? 𑒂 𑒞𑒏𑒩𑒼 𑒏𑒹 𑒁𑒕𑒱 𑒮𑓂𑒫𑒰𑒧𑒲 !

𑒦𑒹𑒙𑒪 𑒮𑓂𑒫𑒣𑓂𑒢𑒰𑒢𑒳𑒬𑒰𑒮𑒢 𑒙𑒴𑒙𑒪 𑒬𑒥𑓂𑒠𑒰𑒢𑒳𑒬𑒰𑒮𑒢 𑒞𑒏𑒥𑒰𑒏 𑒁𑒕𑒱 𑒮𑒧𑒰𑒡𑒰𑒢 𑒤𑒹𑒩 𑒑𑒹𑒪𑒯𑒳𑒿 𑒮𑓂𑒫𑒣𑓂𑒢𑒧𑒹 𑒪𑒙𑒣𑒙𑒰𑒨 𑒐𑒮𑒥 𑒢𑒯𑒱 𑒡𑒣𑒰𑒏 𑒞𑒏𑒥𑒰𑒏 𑒁𑒕𑒱 𑒕𑒼𑒩

𑒬𑓀𑒏𑒰-𑒮𑒧𑒰𑒡𑒰𑒢 𑒪𑒑
𑒛𑒑𑒧𑒑 𑒯𑒼𑒧𑒨 𑒪𑒰𑒑𑒪
𑒁𑒣𑒢𑒰 𑒣𑒩 𑒫𑒱𑒬𑓂𑒫𑒰𑒮
𑒖𑒹𑒢𑒰 𑒏𑒼𑒢𑒼 𑒦𑒨 𑒏𑒼𑒢𑒼 𑒁𑒢𑒱𑒭𑓂𑒙 𑒥𑒜𑓃𑒰 𑒠𑒹𑒪𑒏 𑒕𑒰𑒞𑒲𑒏 𑒡𑒩𑒡𑒛𑓃𑒲 𑒂 𑒏𑒱 𑒢𑒹𑒢𑒞𑓂𑒫𑒏 𑒣𑒳𑒢𑒩𑒰𑒫𑒵𑒞𑓂𑒞𑒱 !
𑒖𑒢𑓂𑒧-𑒖𑒢𑓂𑒧𑒰𑓀𑒞𑒩𑒏 𑒩𑒯𑒮𑓂𑒨 𑒂𑒞𑓂𑒧𑒰𑒏 𑒛𑒼𑒩𑒲 ? 𑒂 𑒏𑒱 𑒏𑒱𑒝𑓂𑒫𑒢
𑒂 𑒫𑒱𑒖𑓂𑒘𑒰𑒢 𑒏𑒹𑒪𑒏
𑒮𑒵𑒭𑓂𑒙𑒱𑒏 𑒢𑒱𑒩𑓂𑒧𑒰𑒝!
𑒣𑒲𑒨𑒴𑒭 𑒂 𑒫𑒱𑒭𑒏 𑒮𑓀𑒏𑒪𑓂𑒣𑒢𑒰 𑒮𑓂𑒫𑒰𑒠 𑒞𑒲𑒞 𑒏𑒭𑒰𑒨 𑒏𑓂𑒭𑒰𑒩 𑒁𑒧𑓂𑒪 𑒏𑒙𑒳 𑒏𑒲 𑒧𑒡𑒳𑒩 ! 𑒮𑒳𑒢𑓂𑒢 𑒥𑒼𑒢𑒧𑒹 𑒅𑒚𑒻𑒞 𑒮𑓂𑒫𑒩 𑒭𑒛𑒖 𑒇𑒭𑒦 𑒑𑒰𑒢𑓂𑒡𑒰𑒩 𑒧𑒡𑓂𑒨𑒧 𑒣𑓀𑒔𑒧 𑒡𑒻𑒫𑒞 𑒢𑒱𑒭𑒰𑒠 ! 𑒐𑒼𑒖𑒧𑒹 𑒢𑒱𑒏𑒪𑒱 𑒑𑒹𑒪𑒟𑒱 𑒁𑒞𑓂𑒩𑒱 𑒁𑓀𑒑𑒱𑒩𑒰 𑒧𑒩𑒲𑒔𑒱 𑒮𑓀𑒑 𑒪𑒹𑒢𑒹 𑒣𑒳𑒪𑒇𑒞𑒳 𑒣𑒳𑒪𑒮𑓂𑒞𑓂𑒨 𑒂 𑒫𑒬𑒱𑒭𑓂𑒚 𑒣𑓂𑒩𑒰𑒣𑓂𑒞 𑒏𑒩𑒥𑒰𑒪𑒹𑒪 𑒁𑒭𑓂𑒙𑒮𑒱𑒠𑓂𑒡𑒱 𑒁𑒝𑓂𑒧𑒱𑒏 𑒧𑒯𑒱𑒧𑒰𑒏 𑒑𑒩𑒱𑒧𑒰𑒏 𑒪𑒒𑒱𑒧𑒰𑒏 𑒣𑓂𑒩𑒰𑒣𑓂𑒞𑒱𑒏 𑒣𑓂𑒩𑒰𑒏𑒰𑒧𑓂𑒨𑒏 𑒄𑒬𑒱𑒞𑓂𑒫 𑒂𑒏𑒱 𑒫𑒬𑒱𑒞𑓂𑒫 𑒮𑒣𑓂𑒞𑒇𑒭𑒱𑒏 𑒁𑒭𑓂𑒙𑒮𑒱𑒠𑓂𑒡𑒱
𑒢𑒾 𑒢𑒱𑒡𑒱𑒏 𑒐𑒼𑒖
𑒣𑒠𑓂𑒧 𑒧𑒯𑒰𑒣𑒠𑓂𑒧 𑒬𑓀𑒐 𑒧𑒏𑒩 𑒏𑒔𑓂𑒕𑒣 𑒧𑒳𑒏𑒳𑒢𑓂𑒠 𑒏𑒳𑒢𑓂𑒠 𑒢𑒲𑒪 𑒂 𑒐𑒩𑓂𑒫 𑒥𑒢𑒪 𑒂𑒡𑒰𑒩 𑒠𑒬𑒰𑒫𑒞𑒰𑒩𑒏
𑒧𑒞𑓂𑒮𑓂𑒨𑒰𑒫𑒞𑒰𑒩 𑒥𑒔𑒹𑒪𑒢𑓂𑒯𑒱 𑒫𑒹𑒠 𑒮𑒣𑓂𑒞𑒩𑓂𑒭𑒱𑒏𑒹𑒿 𑒂 𑒮𑓀𑒑𑒹 𑒧𑒢𑒳𑒏 𑒣𑒩𑒱𑒫𑒰𑒩 𑒏𑒴𑒩𑓂𑒧𑒰𑒫𑒞𑒰𑒩 𑒮𑓀𑒑 𑒧𑓀𑒠𑒰𑒩-𑒧𑒹𑒩𑒳
𑒂 𑒫𑒰𑒮𑒳𑒏 𑒫𑓂𑒨𑒰𑒪 𑒂𑒢𑒪 𑒮𑒳𑒡𑒰-𑒦𑓀𑒛𑒰𑒩 𑒫𑒰𑒩𑒰𑒯𑒰𑒫𑒞𑒰𑒩 𑒂𑒢𑒪 𑒣𑒵𑒟𑓂𑒫𑒲𑒏𑒹𑒿 𑒥𑒰𑒯𑒩 𑒔𑒰𑒩𑒱 𑒁𑓀𑒥𑒳𑒢𑒱𑒡𑒱𑒏 𑒏𑒚𑒼𑒩 𑒕𑒪 𑒖𑒹 𑒣𑒰𑒬 𑒧𑒰𑒩𑒪 𑒯𑒱𑒩𑒝𑓂𑒨𑒰𑒏𑓂𑒭

𑒢𑒩𑒮𑒱𑓀𑒯 𑒦𑒑𑒫𑒰𑒢 𑒥𑒔𑒰𑒍𑒪 𑒣𑓂𑒩𑒯𑓂𑒪𑒰𑒠 𑒧𑒰𑒩𑒱𑒏𑒨 𑒯𑒱𑒩𑒝𑓂𑒨𑒏𑒬𑓂𑒨𑒣
𑒫𑒰𑒧𑒢 𑒧𑒰𑒩𑒪 𑒥𑒰𑒪𑒱 𑒢𑒰𑒣𑒪 𑒠𑒴 𑒣𑒑𑒧𑒹 𑒣𑒵𑒟𑓂𑒫𑒲
𑒂 𑒞𑒹𑒮𑒩𑒧𑒹 𑒠𑒻𑒞𑓂𑒨𑒩𑒰𑒖
𑒣𑒩𑒬𑒳𑒩𑒰𑒧 𑒩𑒰𑒧 𑒂 𑒏𑒵𑒭𑓂𑒝
𑒏𑒹𑒪𑒢𑓂𑒯𑒱 𑒁𑒮𑒳𑒩𑒏 𑒮𑓀𑒯𑒰𑒩 𑒂 𑒥𑒳𑒠𑓂𑒡 𑒥𑒠𑒪𑒪𑒢𑓂𑒯𑒱 𑒞𑒏𑒩 𑒫𑒱𑒔𑒰𑒩
𑒞𑒻𑓀 𑒏𑒲 𑒖𑒹 𑒯𑒳𑒢𑒏 𑒣𑓂𑒩𑒞𑒱𑒧𑒰 𑒐𑒮𑒾𑒪𑒏 𑒠𑒹𑒫𑒠𑒞𑓂𑒞𑒏 𑒮𑓀𑒞𑒰𑒢 𑒕𑒱𑓁 𑒏𑓂𑒨𑒼 𑒩𑒼𑒏𑒱 𑒢𑒯𑒱 𑒮𑒏𑒪 𑒥𑒰𑒧𑒱𑒨𑒰𑒢
𑒢𑒯𑒱 𑒏𑒪𑓂𑒏𑒱 𑒢𑒯𑒱 𑒧𑒻𑒞𑓂𑒩𑒹𑒨 𑒖𑒪𑓂𑒠𑒲𑒮𑒿 𑒂𑒆 𑒬𑓂𑒫𑒹𑒞-𑒮𑒻𑓀𑒡𑒫 𑒮𑒫𑒰𑒩𑒱 𑒔𑒾𑒠𑒯 𑒦𑒳𑒫𑒢 𑒂 𑒞𑒹𑒩𑒯 𑒫𑒱𑒬𑓂𑒫𑒏 𑒁𑒢𑒥𑒰 𑒪𑒹𑒪 𑒨𑒳𑒑-𑒏𑒪𑒡𑒾𑒞 𑒁𑒩𑓂𑒝𑒫𑒏 𑒏𑒼𑒪𑒰𑒯𑒪𑒧𑒹 𑒖𑒰𑒨 𑒕𑒪 𑒢𑒹𑒢𑒞𑓂𑒫 𑒛𑒩𑒰𑒨
𑒧𑒳𑒠𑒰 𑒁𑒐𑒢 𑒫𑒱𑒖𑓂𑒘𑒰𑒢 𑒙𑒼𑒏𑒪𑒏 𑒧𑒼𑒢 𑒄 𑒞𑒿 𑒁𑒕𑒱 𑒏𑒱𑒝𑓂𑒫𑒢𑒏 𑒮𑒱𑒠𑓂𑒡𑒰𑓀𑒞 𑒠𑒬𑒰𑒫𑒞𑒰𑒩𑒹 𑒞𑒿 𑒕𑒟𑒱 𑒅𑒞𑓂𑒣𑒞𑓂𑒞𑒱𑒏 𑒂𑒡𑒳𑒢𑒱𑒏 𑒮𑒱𑒠𑓂𑒡𑒰𑓀𑒞
𑒧𑒞𑓂𑒮𑓂𑒨 𑒏𑒴𑒩𑓂𑒧 𑒞𑒐𑒢 𑒫𑒰𑒩𑒰𑒯 𑒤𑒹𑒩 𑒢𑒩𑒮𑒱𑓀𑒯 𑒞𑒐𑒢 𑒫𑒰𑒧𑒢 𑒋𑒏𑒮𑒿 𑒠𑒼𑒮𑒩 𑒏𑒛𑓃𑒲 𑒧𑒢𑒳𑒭𑓂𑒨𑒏 𑒩𑓀𑒑-𑒩𑒴𑒣𑒏 𑒞𑒰𑒏𑒨 𑒪𑒹𑒪 𑒕𑒪 𑒢𑒱𑒏𑒪𑒪
𑒠𑓄 𑒠𑒹𑒪𑒢𑓂𑒯𑒱 𑒁𑒫𑒞𑒰𑒩𑒏 𑒢𑒰𑒧 𑒦𑒩𑒞-𑒞𑒢𑒨 𑒩𑒼𑒏𑒪𑒢𑓂𑒯𑒱 𑒫𑒻𑒖𑓂𑒘𑒰𑒢𑒱𑒏 𑒮𑒼𑒔 𑒏𑒛𑓃𑒲 𑒑𑒹𑒪 𑒙𑒴𑒙𑒱 𑒞𑒰𑒏𑒨𑒧𑒹 𑒏𑒪𑓂𑒏𑒱 𑒍 𑒞𑒰𑒯𑒱 𑒠𑓂𑒫𑒰𑒩𑒹 𑒞𑒿 𑒢𑒯𑒱 𑒋𑒪𑒰𑒯 𑒧𑒻𑒞𑓂𑒩𑒹𑒨
𑒪𑒰𑒑𑒱 𑒩𑒯𑒪 𑒁𑒕𑒱 𑒦𑒹𑒙𑒪 𑒮𑒴𑒞𑓂𑒩𑒏 𑒍𑒩
𑒂𑒩 𑒤𑒴𑒮𑒱𑒨𑒹 𑒕𑒪𑒯𑒳𑒿 𑒛𑒩𑒰𑒨𑒪 𑒏𑒩𑒥 𑒭𑒼𑒛𑒭𑒼𑒣𑒔𑒰𑒩
𑒫𑒹𑒠 𑒣𑒳𑒩𑒰𑒝 𑒧𑒯𑒰𑒦𑒰𑒩𑒞 𑒩𑒰𑒧𑒰𑒨𑒝 𑒁𑒩𑓂𑒟𑒬𑒰𑒮𑓂𑒞𑓂𑒩
𑒍 𑒂𑒩𑓂𑒨𑒦𑒙𑓂𑒙𑒲𑒨 𑒪𑒲𑒪𑒰𑒫𑒞𑒲 𑒦𑒰𑒧𑒞𑒲
𑒩𑒰𑒖𑒢𑒲𑒞𑒱 𑒑𑒝𑒱𑒞 𑒦𑒾𑒞𑒱𑒏𑒲 𑒏𑒹𑒩 𑒮𑒧𑒑𑓂𑒩 𑒔𑒩𑒱𑒞𑓂𑒩 𑒏𑒩𑓂𑒧𑒏 𑒬𑒱𑒏𑓂𑒭𑒰 𑒑𑒹𑒪 𑒆𑒡𑒱𑒨𑒰𑒨
𑒥𑒱𑒯𑒰𑒩𑒱𑒧𑒹 𑒁𑓀𑒡𑒫𑒱𑒬𑓂𑒫𑒰𑒮𑒏
𑒠𑒩𑓂𑒬𑒢 𑒦𑒹𑒪 𑒖𑒞𑒨 𑒁𑒢𑒳𑒞𑓂𑒞𑒩𑒱𑒞 𑒂 𑒫𑒱𑒖𑓂𑒘𑒰𑒢 𑒠𑒹𑒪𑒏 𑒏𑒱𑒕𑒳 𑒮𑒧𑒰𑒡𑒰𑒢 𑒞𑒿 𑒣𑒏𑒩𑒥 𑒕𑒼𑒩 𑒋𑒏𑒩 𑒑𑒳𑒩𑒳𑒫𑒩 𑒖𑒹 𑒏𑒹𑒪𑒏 𑒮𑒧𑒮𑓂𑒨𑒰 𑒠𑒴𑒩 𑒢𑒯𑒱 𑒠𑒴𑒩𑒱
𑒋𑒏𑒩 𑒣𑒩𑒱𑒡𑒱 𑒦𑒢𑒹 𑒁𑒕𑒱 𑒕𑒼𑒙 𑒧𑒳𑒠𑒰 𑒣𑒩𑒱𑒡𑒱 𑒏𑒩𑒥 𑒣𑒻𑒒 𑒞𑒿 𑒤𑒹𑒩 𑒥𑒠𑒪𑒞𑒰𑒯 𑒠𑒩𑓂𑒬𑒢𑒏 𑒏𑒰𑓀𑒙𑓂𑒩𑒹𑒏𑓂𑒙𑒩 𑒠𑒩𑓂𑒬𑒢𑒏𑒹𑒿 𑒡𑒩𑓂𑒧𑒧𑒹 𑒂 𑒡𑒩𑓂𑒧𑒏𑒹𑒿 𑒢𑒩𑒏-𑒮𑓂𑒫𑒩𑓂𑒑𑒏 𑒣𑓂𑒩𑒏𑒰𑒩-𑒣𑓂𑒩𑒏𑒰𑒩𑒰𑒢𑓂𑒞𑒩𑒧𑒹

𑒦𑒾𑒞𑒱𑒏𑒲 𑒂 𑒋𑒮𑓂𑒙𑓂𑒩𑒼𑒢𑒼𑒧𑒲𑒏𑒹𑒿 𑒥𑒢𑒹𑒪𑒟𑒱 𑒋𑒮𑓂𑒙𑓂𑒩𑒰𑒪𑒼𑒖𑒲
𑒫𑒱𑒖𑓂𑒘𑒰𑒢 𑒥𑒢𑒪 𑒁𑓀𑒡𑒫𑒱𑒬𑓂𑒫𑒰𑒮
𑒖𑒐𑒢 𑒢𑒹𑒞𑒱-𑒢𑒹𑒞𑒱 𑒥𑒢𑒞 𑒅𑒞𑓂𑒞𑒩
𑒞𑒐𑒢 𑒦𑒢𑒹 𑒩𑒯𑒨 𑒠𑒱𑒨𑒾𑒏 𑒣𑓂𑒩𑒬𑓂𑒢𑒹 𑒁𑒢𑒳𑒞𑓂𑒞𑒩𑒱𑒞

𑒮𑒦 𑒑𑒹𑒪𑒟𑒱 𑒂𑒑𑒴 𑒧𑒳𑒠𑒰 𑒦𑒩𑒞-𑒞𑒢𑒨 𑒕𑒟𑒱 𑒣𑒰𑒕𑒴 𑒪𑒲𑒪𑒰𑒫𑒞𑒲𑒨𑒼𑒧𑒹 𑒦𑒰𑒢𑒳𑒧𑒞𑒲𑒨𑒼𑒧𑒹
𑒏𑒼𑒢𑒰 𑒏𑒋 𑒞𑒏𑒞𑒰𑒯 𑒖𑒰𑒞𑒱𑒑𑒞 𑒦𑒹𑒠 𑒋𑒏𑒪𑒫𑓂𑒨𑒏 𑒣𑓂𑒩𑒬𑓀𑒮𑒰𑒧𑒹 𑒫𑓂𑒨𑒰𑒮𑒖𑒲𑒏 𑒪𑒹𑒐
𑒧𑒳𑒠𑒰 𑒏𑒰𑒩𑓂𑒨 𑒢𑒯𑒱 𑒏𑓂𑒨𑒼 𑒥𑒜𑓃𑒹𑒪𑒏 𑒂𑒑𑒴
𑒮𑒯𑒮𑓂𑒩𑒰𑒥𑓂𑒠𑒲𑒏 𑒁𑓀𑒞𑒩𑒰𑒪 𑒠𑒹𑒪𑒏 𑒖𑒰𑒞𑒱𑒑𑒞 𑒏𑒩𑒞𑒰𑒪 𑒫𑒱𑒖𑓂𑒘𑒰𑒢 𑒂 𑒏𑒪𑒰
𑒦𑒴𑒐 𑒂 𑒁𑒢𑓂𑒢
𑒦𑒹𑒪𑒰𑒯 𑒖𑒰𑒞𑒱𑒑𑒞 𑒕𑒼𑒛𑓃𑒞𑒰𑒯 𑒏𑒲 𑒮𑓂𑒫𑒰𑒕𑒢𑓂𑒢
𑒧𑒼𑒢 𑒣𑒛𑓃𑒪 𑒑𑒰𑒧𑒏 𑒦𑒼𑒖𑒏 𑒤𑒩𑒰𑒏 𑒣𑒰𑒿𑒞𑒱 𑒣𑒯𑒱𑒪 𑒣𑒰𑒿𑒞𑒱𑒧𑒹 𑒐𑒰𑒖𑒰-𑒪𑒛𑓂𑒛𑒴 𑒣𑒩𑒮𑒢 𑒣𑒩 𑒣𑒩𑒮𑒢 𑒠𑒼𑒮𑒩 𑒣𑒰𑒿𑒞𑒱𑒧𑒹 𑒋𑒏𑓂𑒏𑒹 𑒥𑒹𑒩 𑒩𑒼𑒏𑒪 𑒏𑒪𑒰-𑒫𑒱𑒖𑓂𑒘𑒰𑒢𑒏 𑒦𑒰𑒑𑒲𑒩𑒟𑒲𑒏 𑒡𑒰𑒩 𑒦𑒹𑒙𑒪 𑒩𑒰𑒯𑒴𑒏 𑒑𑓂𑒩𑒰𑒮
𑒧𑒼𑒢 𑒣𑒛𑓃𑒻𑒕 𑒣𑒱𑒞𑒰𑒏 𑒬𑓂𑒩𑒰𑒠𑓂𑒡𑒏𑒩𑓂𑒧
𑒦𑒩𑒱 𑒠𑒱𑒢 𑒏𑓀𑒙𑒰𑒯𑒰 𑒥𑓂𑒩𑒰𑒯𑓂𑒧𑒝𑒏 𑒁𑒞𑓂𑒨𑒰𑒔𑒰𑒩 𑒂 𑒮𑒰𑒿𑒗𑒧𑒹 𑒑𑒩𑒳𑒛𑓃 𑒣𑒳𑒩𑒰𑒝𑒏 𑒧𑒰𑒩𑒱
𑒮𑒾𑒩-𑒫𑒱𑒖𑓂𑒘𑒰𑒢𑒏 𑒩𑒴𑒣𑒰𑓀𑒞𑒩
𑒂 𑒑𑓂𑒩𑒯𑒝𑒏 𑒏𑒪𑒢 𑒠𑒏𑓂𑒭𑒱𑒝𑒰𑒏 𑒯𑒹𑒞𑒳 𑒦𑒹𑒪 𑒏𑒪𑒳𑒭𑒱𑒞
𑒩𑒏𑓂𑒭𑒰-𑒫𑒱𑒖𑓂𑒘𑒰𑒢𑒏 𑒩𑒰𑒧𑒰𑒨𑒝𑒏 𑒣𑒰𑒚 𑒏𑒐𑒢 𑒮𑒱𑒐𑒹𑒪𑒏 𑒦𑒲𑒩𑒳𑒞𑒰𑒏 𑒁𑒡𑓂𑒨𑒰𑒞𑓂𑒧?
𑒥𑓂𑒨𑒰𑒮𑒖𑒲𑒏 𑒏𑒩𑓂𑒝-𑒋𑒏𑒪𑒫𑓂𑒨-𑒏𑒵𑒭𑓂𑒝𑒏 𑒣𑒰𑒚
𑒮𑒰𑒧𑒰𑒖𑒱𑒏 𑒮𑒧𑒩𑒮𑒞𑒰𑒏 𑒁𑒐𑒢𑒯𑒳 𑒡𑒩𑒱 𑒁𑒕𑒱 𑒖𑒲𑒫𑓀𑒞
𑒢𑒯𑒱 𑒦𑒹𑒪 𑒐𑒞𑒧 𑒠𑒴-𑒮𑒯𑒮𑓂𑒩𑒰𑒥𑓂𑒠𑒲 𑒣𑒯𑒱𑒢𑒹𑒏 𑒅𑒠𑒰𑒩𑒫𑒰𑒠𑒲 𑒮𑒼𑒔 𑒮𑒳𑒐𑒰𑒨𑒪 𑒏𑒱𑒋𑒏 𑒫𑒱𑒠𑓂𑒨𑒰
𑒮𑒩𑒮𑓂𑒫𑒞𑒲-𑒡𑒰𑒩 𑒖𑒹𑒏𑒰𑒿 𑒦𑒹𑒪 𑒁𑒠𑒱𑒢

𑒞𑒐𑒢𑒯𑒱 𑒖𑒐𑒢 𑒫𑒱𑒠𑓂𑒨𑒰-𑒠𑒹𑒫𑒲 𑒕𑒼𑒛𑓃𑒪𑒢𑓂𑒯𑒱 𑒮𑒳𑒐𑒰 𑒑𑒹𑒪𑒲𑒯 𑒥𑒱𑒢 𑒣𑒰𑒢𑒱𑒏 𑒥𑒱𑒢 𑒥𑒳𑒠𑓂𑒡𑒱𑒏 𑒤𑒹𑒩 𑒁𑒍𑒞𑒲𑒯 𑒏𑒱 𑒒𑒳𑒩𑒱 𑒏𑒋 𑒥𑒠𑒪𑒱 𑒦𑒹𑒭 𑒋𑒞𑒨 𑒯𑒧𑓂𑒧𑒩 𑒦𑒰𑒩𑒞 𑒠𑒹𑒬?
𑒯𑒖𑒰𑒩 𑒥𑒩𑓂𑒭𑒏 𑒒𑒼𑒿𑒒𑒰𑒅𑒖 𑒏𑒱 𑒯𑒼𑒋𑒞 𑒥𑓀𑒠 ? 𑒂𑒏𑒱 𑒋𑒏𑒪𑒫𑓂𑒨-𑒏𑒩𑓂𑒝-𑒏𑒵𑒭𑓂𑒝𑒏 𑒣𑒰𑒚 𑒕𑒼𑒛𑓃𑒱 𑒨𑒳𑒡𑒱𑒭𑓂𑒚𑒱𑒩-𑒬𑒏𑒳𑒢𑒱𑒏 𑒋𑒏𑓂𑒏𑒰-𑒠𑒳𑒏𑓂𑒏𑒰-𑒣𑓀𑒖𑒰-𑒕𑒏𑓂𑒏𑒰𑒏 𑒣𑒜𑓃𑒥 𑒣𑒰𑒚 𑒏𑒔𑓂𑒔𑒰 𑒥𑒰𑒩𑒯𑒏𑒹𑒿 𑒬𑒏𑒳𑒢𑒱 𑒥𑒠𑒪𑒞𑒰𑒯 𑒣𑒏𑓂𑒏𑒰 𑒥𑒰𑒩𑒯𑒧𑒹 𑒂 𑒏𑒩𑒞𑒰𑒯 𑒁𑒣𑒢 𑒣𑒾-𑒥𑒰𑒩𑒯
𑒞𑒲𑒢𑒙𑒰 𑒣𑒰𑒮𑒰 𑒂 𑒔𑒰𑒩𑒱 𑒩𑓀𑒑𑒏 𑒮𑒼𑒩𑒹-𑒦𑒩𑒱 𑒑𑒼𑒙𑒲 𑒏𑒩𑒞 𑒦𑒰𑒑𑓂𑒨𑒏 𑒢𑒱𑒩𑓂𑒧𑒰𑒝? 𑒔𑒾𑒣𑒛𑓃𑒏 𑒔𑒰𑒩𑒱 𑒤𑒛𑓃 𑒂 𑒋𑒏 𑒤𑒛𑓃𑒧𑒹 𑒔𑒾𑒥𑒲𑒮 𑒒𑒩 𑒏𑒲 𑒄 𑒤𑒼𑒛𑓃𑒞 𑒦𑒰𑒩𑒞𑒏 𑒒𑒩?
𑒨𑒳𑒡𑒱𑒭𑓂𑒚𑒱𑒩 𑒖𑓂𑒨𑒼𑒿 𑒦𑒹𑒙𑒞𑒰𑒯 𑒞𑒿 𑒏𑒯𑒱𑒞𑒱𑒨𑒢𑓂𑒯𑒱 𑒖𑒹 𑒔𑒰𑒩𑒱 𑒪𑒼𑒏𑒏 𑒮𑒼𑒗 𑒏𑒪𑒰 𑒣𑒰𑒮𑒰𑒏 𑒐𑒹𑒪𑒨𑒞𑒯𑒳𑒿 𑒖𑒏𑒩 𑒢𑒱𑒨𑒧 𑒯𑒼𑒃𑒕 𑒯𑒪𑓂𑒪𑒳𑒏
𑒠𑒴 𑒫𑓂𑒨𑒏𑓂𑒞𑒱𑒏 𑒩𑓀𑒑𑒥𑒰𑒖𑒲 𑒐𑒹𑒪𑒏𑒹𑒿 𑒁𑒯𑒰𑒿 𑒍𑒗𑒩𑒹𑒪𑒯𑒳𑒿 𑒐𑒹𑒪𑒰 𑒐𑒹𑒪𑒏 𑒮𑓀𑒑 𑒢𑒯𑒱 𑒫𑒩𑒢𑓂 𑒐𑒹𑒪𑒹𑒪𑒯𑒳𑒿 𑒠𑒹𑒬 𑒂 𑒮𑓂𑒞𑓂𑒩𑒲𑒏 𑒮𑓀𑒑 𑒞𑒻𑓀 𑒄 𑒅𑒣𑒩𑒰𑒑 𑒬𑒏𑒳𑒢𑒱𑒨𑒼𑒮𑒿 𑒣𑒻𑒒 𑒏𑒻𑒪 𑒁𑒯𑒿 𑒁𑒣𑒩𑒰𑒡
𑒖𑒏𑒩𑒹 𑒢𑒰𑒧 𑒪𑒰𑒪𑒕𑒛𑓃𑒲 𑒮𑒻𑒯
𑒮𑒞𑒒𑒩𑒱𑒨𑒰; 𑒞𑒲-𑒞𑒲 –
𑒥𑒔𑓂𑒔𑒰𑒧𑒹 𑒐𑒹𑒪𑒰𑒨 𑒕𑒪𑒯𑒳𑒿 𑒂𑒧𑒏 𑒧𑒰𑒮𑒧𑒹 𑒄 𑒐𑒹𑒪𑒰
𑒣𑒰𑒮𑒰𑒏 𑒐𑒹𑒪 𑒮𑒹𑒯𑒼 𑒐𑒹𑒪𑒹𑒪𑒯𑒳𑒿
𑒠𑓂𑒫𑒱𑒩𑒰𑒑𑒧𑒢𑒏 𑒥𑒰𑒠 𑒦𑒩𑒤𑒼𑒛𑓃𑒲 𑒡𑒩𑒱 𑒏𑒢𑒱𑒨𑒰𑒏 𑒮𑓀𑒑 𑒫𑒰𑒮𑒩-𑒩𑒻𑒢 𑒯𑒹 𑒨𑒳𑒡𑒱𑒭𑓂𑒚𑒱𑒩-𑒩𑒴𑒣𑒲
𑒦𑒩𑒞-𑒞𑒢𑒨
𑒢𑒯𑒱 𑒐𑒹𑒪𑒰𑒆 𑒄 𑒐𑒹𑒪 𑒮𑒦𑒏𑒹𑒿 𑒠𑒱𑒁 𑒄 𑒬𑒱𑒏𑓂𑒭𑒰
𑒂 𑒮𑓀𑒑𑒲𑒞𑒏 𑒧𑒹𑒪 𑒮𑓂𑒧𑒵𑒞𑒱 𑒦𑒨 𑒞𑒼𑒛𑓃𑒪 𑒮𑒳𑒩
𑒠𑒱𑒨𑒯 𑒮𑒳𑒧𑒞𑒱 𑒫𑒩 𑒖𑒹
𑒑𑒼𑒮𑒰𑒘𑒳𑒢𑒱 𑒑𑒰𑒥𑒱 𑒮𑒏𑒲
𑒏𑒖𑓂𑒖𑒪 𑒩𑒴𑒣 𑒞𑒳𑒁 𑒏𑒰𑒪𑒲 𑒧𑒰𑒞𑓂𑒩 𑒄𑒋𑒯 𑒢𑒯𑒱 𑒮𑒞𑓂𑒨 𑒅𑒖𑓂𑒖𑒪 𑒩𑒴𑒣 𑒞𑒳𑒁 𑒫𑒰𑒝𑒲; 𑒮𑒋𑒯 𑒯𑒼𑒋𑒞 𑒣𑒩𑒱𑒝𑒲𑒞
𑒗𑒧𑓂𑒣𑒱 𑒥𑒰𑒠𑒩 𑒠𑒴𑒩 𑒦𑒹𑒪 𑒦𑒨 𑒑𑒑𑒢 𑒑𑒩𑒖𑒱 𑒅𑒚𑒹𑒪𑒏
𑒯𑒳𑒞𑒰𑒮𑒢 𑒯𑒵𑒠𑒨 𑒧𑒡𑓂𑒨 𑒥𑒰𑒅𑒑 𑒏𑒋 𑒧𑒾𑒪𑒱-𑒧𑒅𑒪 𑒕𑒰𑒅𑒩 𑒠𑒋 𑒬𑓀𑒐-𑒤𑒴𑒏𑒥 𑒫𑒲𑒩 𑒩𑒮 𑒦𑒨-𑒦𑓀𑒖𑒢 𑒮𑓂𑒧𑒵𑒞𑒱-𑒮𑓂𑒫𑒣𑓂𑒢𑒏 𑒠𑓀𑒛𑒮𑒿 𑒞𑒼𑒛𑓃𑒥 𑒐𑒢-𑒐𑒢
𑒏𑒩𑒥 𑒧𑓀𑒟𑒢

𑒮𑒑𑒩-𑒠𑓂𑒫𑒰𑒩𑒱 𑒣𑒩 𑒦𑒳𑒖𑒠𑓀𑒛𑒮𑒿 𑒑𑒰𑒧𑒏 𑒠𑒴𑒙𑒰 𑒣𑒰𑒿𑒞𑒱𑒏 𑒦𑒼𑒖𑒢𑒏 𑒂𑒮𑓂𑒫𑒰𑒠𑒢
𑒐𑒼𑒪𑒥 𑒥𑓀𑒠 𑒥𑒳𑒠𑓂𑒡𑒱-𑒫𑒱𑒫𑒹𑒏
𑒩𑒳𑒝𑓂𑒛𑒧𑒰𑒪𑒧𑒮𑒰𑒢𑒲 𑒞𑒼𑒛𑓃𑒥 𑒣𑒰𑒿𑒞𑒱 𑒢𑒯𑒱 𑒞𑒿
𑒢𑒑𑒩𑒏𑒹𑒿 𑒣𑒪𑒰𑒨𑒢 𑒑𑒰𑒧 𑒑𑒰𑒧 𑒩𑒯𑒞 𑒢𑒯𑒱 𑒞𑒿 𑒛𑒳𑒧𑒞 𑒦𑒰𑒑𑒲𑒩𑒟𑒲𑒏 𑒡𑒰𑒩𑒮𑒿
𑒖𑒹 𑒩𑒼𑒏𑒪𑒟𑒱 𑒋𑒏𑒩 𑒡𑒰𑒩 𑒣𑓂𑒩𑒪𑒨-𑒮𑒢 𑒛𑒴𑒥𑒞𑒰𑒯-𑒛𑒴𑒥𑒹𑒞𑒰𑒯 𑒠𑒴 𑒣𑒰𑒿𑒞𑒱𑒥𑒪𑒰 𑒑𑒰𑒧𑒏𑒹𑒿
𑒁𑒣𑒢 𑒏𑒳𑒏𑒩𑓂𑒧𑒮𑒿
𑒦𑒴𑒧𑒱 𑒫𑒱𑒪𑒰𑒮 𑒏𑒰𑒢𑒢 𑒢𑒱𑒫𑒱𑒪 𑒥𑒼𑒢 𑒫𑒱𑒯𑒮𑒱 𑒏𑒝𑓂𑒙𑒏 𑒧𑒡𑓂𑒨 𑒏𑒳𑒮𑒳𑒧 𑒫𑒱𑒏𑒪 𑒠𑒩𑓂𑒬𑒢 𑒒𑒼𑒭𑒢𑒱-𑒥𑓂𑒩𑒰𑒯𑓂𑒧𑒝𑒧𑒹 𑒍𑒗𑒩𑒪
𑒡𑒩𑒝𑒱 𑒫𑒱𑒐𑒱𑒢
𑒑𑓀𑒑𑒰-𑒞𑒢𑒳 𑒗𑒰𑒧𑒩
𑒢𑒯𑒱 𑒏𑒪-𑒏𑒪
𑒫𑒱𑒖𑓂𑒘𑒰𑒢 𑒑𑒝𑒱𑒞𑒏 𑒏𑒼𑒧𑒪-𑒑𑒪 𑒁𑒦𑒰𑒑𑓂𑒨 𑒞𑒰𑒣𑒱𑒢𑒱𑒏 𑒕𑒪
𑒥𑒳𑒠𑓂𑒡𑒏 𑒢𑒑𑒩 𑒥𑒮𑒞 𑒠𑒹𑒫 𑒮𑓂𑒫𑒩𑓂𑒑 𑒏𑒩𑒱-𑒏𑒹𑒪𑒱 𑒑𑒰𑒧𑒏 𑒪𑒼𑒏 𑒚𑒰𑒧 𑒮𑒼𑓀𑒣𑒪𑒱 𑒑𑒰𑒧 𑒣𑒰𑒿𑒞𑒱 𑒠𑒩𑓂𑒬𑒢-𑒁𑒠𑓂𑒫𑒻𑒞 𑒑𑒰𑒧𑒹𑒧𑒹 𑒢𑒫-𑒠𑒩𑓂𑒬𑒢𑒏 𑒑𑒲𑒞
𑒁𑒣𑒢 𑒠𑒩𑓂𑒬𑒢𑒏 𑒪𑒹𑒪 𑒖𑒹 𑒠𑒹𑒪𑒏 𑒑𑒰𑒧𑒏 𑒫𑒢𑒫𑒰𑒮 𑒞𑒏𑒩 𑒥𑒠𑒪𑒰 𑒠𑒹𑒥 𑒁𑒯𑒰𑒿𑒏𑒹𑒿 𑒢𑒱𑒮𑒰𑒮
𑒁𑒣𑒢 𑒠𑒩𑓂𑒬𑒢𑒏 𑒪𑒹𑒪
𑒠𑒳𑒃 𑒮𑒯𑒮𑓂𑒩𑒰𑒥𑓂𑒠𑒱𑒏 𑒐𑒹𑒪 𑒐𑒹𑒪𑒹𑒪𑒢𑓂𑒯𑒱 𑒖𑒹 𑒞𑒢𑒱𑒏𑒩 𑒑𑒰𑒧𑒏 𑒮𑓂𑒫𑒩𑒴𑒣 𑒏𑒰𑒢𑒢 𑒥𑒳𑒠𑓂𑒡𑒏 𑒢𑒑𑒩 𑒥𑒢𑒹𑒪𑒢𑓂𑒯𑒱 𑒖𑒹 𑒏𑒝𑓂𑒙𑒏 𑒏𑒳𑒮𑒳𑒧 𑒞𑒞𑒨 𑒂𑒍𑒞
𑒮𑒨𑒧𑒹 𑒠𑒴
𑒠𑒩𑓂𑒬𑒢 𑒪𑒹𑒪
𑒤𑒰𑒖𑒱𑒪 𑒣𑒰𑒮𑒰 𑒤𑒹𑒏𑒥
𑒮𑒯𑒮𑓂𑒞𑓂𑒩𑒰𑒥𑓂𑒠𑒲𑒏 𑒔𑒾𑒣𑒛𑓃 𑒔𑒰𑒩𑒱 𑒨𑒳𑒑 𑒣𑒩
𑒖𑒹 𑒁𑒖𑓂𑒘𑒰𑒞 𑒞𑒏𑒩𑒼 𑒞𑒰𑒏𑒥 𑒯𑒧 𑒞𑒰𑒞 𑒣𑒩𑒘𑓂𑒔 𑒖𑒹 𑒖𑓂𑒘𑒰𑒞
𑒞𑒏𑒩 𑒞𑒿 𑒏𑒩𑒋 𑒠𑒱𑒁 𑒯𑒱𑒮𑒰𑒥-𑒏𑒱𑒞𑒰𑒥

𑒦𑒑𑒫𑒰𑒢𑒏 𑒮𑒵𑒭𑓂𑒙𑒱 𑒥𑒱𑒢𑒰 𑒏𑒼𑒢𑒼 𑒮𑒲𑒧𑒰 𑒂 𑒥𑒢𑓂𑒡𑒢𑒏 ?
𑒞𑒐𑒢 𑒏𑒼𑒢 𑒂𑒡𑒰𑒩 𑒣𑒩 𑒥𑒢𑒍𑒪𑒢𑓂𑒯𑒱 𑒍 𑒒𑒩
𑒂 𑒖𑒹 𑒂𑒡𑒰𑒩 𑒔𑒳𑒢𑒥𑒰𑒏 𑒢𑒯𑒱 𑒕𑒪 𑒮𑓂𑒫𑒰𑒞𑓀𑒞𑓂𑒩𑓂𑒨 𑒯𑒳𑒢𑒏𑒰
𑒞𑒿 𑒏𑒼𑒢 𑒢𑒱𑒁𑒧 𑒥𑒢𑒹𑒪𑒢𑓂𑒯𑒱 𑒋𑒯𑒱 𑒥𑓂𑒩𑒯𑓂𑒧𑒰𑒝𑓂𑒛𑒏 𑒪𑒹𑒪 ?
𑒞𑒐𑒢 𑒖𑒹 𑒮𑒴𑒩𑓂𑒨 𑒔𑒢𑓂𑒠𑓂𑒩 𑒂 𑒞𑒩𑒹𑒑𑒝𑒏 𑒧𑒵𑒞𑓂𑒨𑒳𑒏 𑒮𑓀𑒑𑒹
𑒍𑒯𑒱 𑒢𑒱𑒩𑓂𑒧𑒰𑒞𑒰 𑒦𑒑𑒫𑒰𑒢𑒏 𑒧𑒵𑒞𑓂𑒨𑒳 𑒮𑒹𑒯𑒼 𑒯𑒼𑒋𑒞 𑒍𑒯𑒱 𑒢𑒱𑒁𑒧𑒏 𑒁𑒢𑓂𑒞𑒩𑓂𑒑𑒞

𑒂 𑒖𑒹 𑒮𑒹𑒯𑒼 𑒢𑒯𑒱 𑒞𑒿 𑒥𑓂𑒩𑒯𑓂𑒧𑒰𑒝𑓂𑒛 𑒢𑒱𑒩𑓂𑒧𑒰𑒝𑒏 𑒪𑒹𑒪 𑒦𑒑𑒫𑒰𑒢𑒏 𑒏𑒼𑒢 𑒣𑓂𑒩𑒨𑒼𑒖𑒢
𑒮𑓂𑒫𑒨𑓀 𑒢𑒱𑒩𑓂𑒧𑒱𑒞 𑒄 𑒮𑒵𑒭𑓂𑒙𑒱
𑒫𑒱𑒬𑓂𑒫𑒠𑒹𑒫𑒰𑓁
𑒂 𑒍𑒏𑒩 𑒦𑒑𑒫𑒰𑒢𑒏 𑒧𑒮𑓂𑒞𑒱𑒭𑓂𑒏
𑒏𑒲 𑒮𑒼𑒔𑒢𑒲 𑒣𑒻𑒮𑒪 𑒁𑒕𑒱 𑒍𑒯𑒱 𑒧𑒮𑓂𑒞𑒱𑒭𑓂𑒏𑒧𑒹
𑒢𑒲𑒪-𑒣𑒠𑓂𑒧 𑒮𑒴𑒩𑓂𑒨𑒮𑒿 𑒦𑒩𑒪 𑒄 𑒥𑓂𑒩𑒯𑓂𑒧𑒰𑒝𑓂𑒛 𑒂 𑒍𑒏𑒩 𑒧𑒡𑓂𑒨
𑒄 𑒋𑒏𑒙𑒰 𑒮𑒰𑒡𑒰𑒩𑒝 𑒞𑒩𑒹𑒑𑒝 𑒯𑒧𑒩 𑒮𑒴𑒩𑓂𑒨
𑒍𑒏𑒩 𑒮𑒵𑒭𑓂𑒙𑒱𑒧𑒹 𑒯𑒧 𑒋𑒏𑒙𑒰 𑒏𑓂𑒭𑒳𑒠𑓂𑒩 𑒅𑒣𑒑𑓂𑒩𑒯𑒏 𑒣𑓂𑒩𑒰𑒝𑒲
𑒮𑒼𑒔𑒻𑒞 𑒕𑒲 𑒖𑒹 𑒏𑒋 𑒠𑒹𑒥 𑒢𑒭𑓂𑒙 𑒁𑒮𑓂𑒞𑓂𑒩𑒮𑒿 𑒄 𑒮𑒵𑒭𑓂𑒙𑒱 ?

𑒑𑒰𑒨
𑒪𑒰𑒚𑒲 𑒧𑒰𑒩𑒥𑒰𑒧𑒹 𑒏𑒼𑒢𑒼 𑒠𑒹𑒩𑒲 𑒢𑒯𑒱 𑒥𑒰𑒕𑒲 𑒦𑒹𑒪𑒰 𑒣𑒩 𑒬𑒼𑒏𑒼 𑒟𑒼𑒛𑓃 𑒢𑒯𑒱 𑒣𑒩𑒢𑓂𑒞𑒳 𑒕𑒲 𑒣𑒴𑒖𑒢𑒲𑒨𑒰 𑒁𑒯𑒰𑒿 𑒢𑒱𑒥𑓀𑒡 𑒪𑒱𑒐𑒻𑒞 𑒕𑒲 𑒁𑒯𑒰𑒿𑒣𑒩
𑒏𑓂𑒭𑒧𑒰 !

𑒬𑓂𑒩𑒰𑒠𑓂𑒡 𑒢𑒹 𑒧𑒩𑒰 𑒖𑒰𑒨
𑒋𑒏 𑒧𑒵𑒞𑓂𑒨𑒳 𑒤𑒹𑒩 𑒠𑒼𑒮𑒩 𑒧𑒵𑒞𑓂𑒨𑒳 𑒢𑒹𑒢𑒰𑒏 𑒣𑒱𑒞𑒰𑒏 𑒂 𑒏𑒰𑒏𑒰𑒏
𑒏𑒏𑓂𑒏𑒰𑒏 𑒪𑒼𑒏𑒫𑒹𑒠 𑒕𑒪𑒢𑓂𑒯𑒱 𑒠𑒥𑓀𑒑𑒩 𑒮𑒹 𑒔𑒱𑒢𑓂𑒞𑒱𑒞 𑒕𑒪 𑒕𑒼𑒙𑒏𑒰 𑒦𑒰𑒋
𑒬𑓂𑒩𑒰𑒠𑓂𑒡𑒰𑒫𑒡𑒱𑒧𑒹 𑒠𑒼𑒮𑒩 𑒧𑒵𑒞𑓂𑒨𑒳 𑒦𑒹𑒢𑒹 𑒋𑒏𑓂𑒏𑒹 𑒬𑓂𑒩𑒰𑒠𑓂𑒡𑒮𑒿 𑒯𑒼𑒃𑒕 𑒠𑒼𑒮𑒩𑒰𑒏 𑒬𑓂𑒩𑒰𑒠𑓂𑒡 𑒋𑒏𑒏 𑒬𑓂𑒩𑒰𑒠𑓂𑒡 𑒖𑒰𑒨𑒞 𑒧𑒩𑒰𑒨 𑒕𑒪 𑒔𑒱𑓀𑒞𑒱𑒞 𑒠𑒳𑒢𑒴 𑒦𑒰𑒨
𑒏𑒧𑒖𑒼𑒩𑒯𑒰𑒏 𑒮𑓀𑒑 𑒣𑒝𑓂𑒛𑒱𑒞𑒼 𑒠𑒹𑒞 𑒢𑒯𑒱 𑒬𑒰𑒮𑓂𑒞𑓂𑒩 𑒡𑒩𑒱 𑒏𑒱𑒕𑒳𑒍 𑒏𑒯𑒨
𑒧𑒰𑒧𑒰𑒑𑒰𑒧 𑒐𑒥𑒩𑒱 𑒠𑒱𑒨𑒾𑒏 𑒣𑒱𑒞𑒰𑒏 𑒬𑓂𑒩𑒰𑒠𑓂𑒡 𑒢𑒹 𑒧𑒩𑒰 𑒖𑒰𑒨

𑒖𑒰𑒞𑒱
𑒂𑒤𑒱𑒮𑒧𑒹 𑒕𑒪 𑒏𑒰𑒖 𑒥𑒰𑒿𑒗𑒪 𑒏𑒱𑒩𑒰𑒢𑒲 𑒣𑒩 𑒋𑒏𑒑𑒼𑒙 𑒞𑒧𑒮𑒰𑒨𑒪 𑒏𑒼𑒢 𑒖𑒰𑒞𑒱𑒏 𑒕𑒲 𑒁𑒯𑒰𑒿 𑒡𑒻𑒩𑓂𑒨 𑒂𑒥 𑒢𑒯𑒱 𑒥𑒰𑒿𑒔𑒪 𑒠𑒬𑒼 𑒪𑒼𑒏𑒏𑒹𑒿 𑒏𑒻𑒏 𑒠𑒱𑒢𑒮𑒿 𑒕𑒲 𑒗𑒳𑒙𑓂𑒚𑒼 𑒒𑒳𑒧𑒰𑒍𑒪

𑒕𑒰𑒞𑒲 𑒚𑒼𑒏𑒱𑒏𑒨 𑒖𑒰𑒞𑒱𑒏 𑒢𑒰𑒧 𑒕𑒪 𑒍 𑒥𑒰𑒖𑒪 𑒠𑒮𑒼 𑒪𑒼𑒏𑒏 𑒠𑒱𑒬𑒱 𑒢𑒱𑒢𑓂𑒑𑒯𑒰𑒩𑒱 𑒞𑒰𑒏𑒪 𑒞𑒰𑒯𑒱𑒧𑒹𑒮𑒿 𑒋𑒏 𑒮𑒖𑒰𑒞𑒱 𑒅𑒚𑒪 𑒥𑒰𑒖𑒪 -

𑒒𑒼𑒪-𑒂𑒮𑒧𑒩𑓂𑒠𑓂𑒠𑒏 𑒥𑒲𑒔 𑒏𑒯𑒪𑒏 “𑒢𑒯𑒱 𑒥𑒰𑒖𑒴 𑒖𑒰𑒞𑒱𑒏 𑒢𑒰𑒧 𑒡𑒨 𑒏𑒨 𑒄 𑒨𑒰𑒠𑒱 𑒩𑒰𑒐𑒴
𑒏𑒰𑒖 𑒁𑒕𑒱 𑒯𑒧𑒩𑒼 𑒥𑒰𑒿𑒗𑒪 𑒧𑒳𑒠𑒰 𑒖𑒰𑒞𑒱𑒏 𑒁𑒕𑒱 𑒥𑒰𑒞 𑒖𑓂𑒨𑒼𑒿 𑒁𑒕𑒱 𑒏𑒪𑒹𑒖𑒰𑒫𑒪𑒰 𑒖𑒰𑒞𑒱 𑒄 𑒮𑒹 𑒏𑒰𑒖 𑒏𑒞𑒥𑒼 𑒪𑒹𑒙 𑒯𑒼”

𑒣𑒳𑒞𑓂𑒩𑒣𑓂𑒩𑒰𑒣𑓂𑒞𑒱
𑒪𑒳𑒡𑒱𑒨𑒰𑒢𑒰𑒏 𑒧𑒢𑓂𑒠𑒱𑒩 𑒣𑒩 𑒩𑒯𑒻𑒞 𑒕𑒲 𑒣𑒴𑒖𑒰 𑒣𑒰𑒚 𑒏𑒩𑒻𑒞 𑒕𑒲 𑒏𑒩𑒥𑒻𑒞 𑒕𑒲
𑒏𑒯𑒻𑒞 𑒕𑒲 𑒁𑒯𑒰𑒿 𑒚𑒏𑒱 𑒏𑒨 𑒯𑒧 𑒐𑒰𑒃𑒞 𑒕𑒲 𑒑𑒰𑒧𑒧𑒹 𑒞𑒿 𑒋𑒏 𑒮𑒰𑒿𑒗 𑒦𑒳𑒐𑒪𑒹 𑒩𑒯𑒻𑒞 𑒖𑒰𑒃𑒞 𑒕𑒲
𑒠𑒮 𑒑𑒼𑒙𑒹𑒏𑒹𑒿 𑒣𑒳𑒞𑓂𑒩 𑒣𑓂𑒩𑒰𑒣𑓂𑒞𑒱𑒏 𑒂𑒬𑒲𑒩𑓂𑒫𑒰𑒠 𑒠𑒹𑒪 𑒣𑒰𑒿𑒔𑒙𑒰 𑒏𑒹𑒿 𑒤𑒪𑒲𑒦𑒴𑒞 𑒦𑒹𑒪
𑒣𑒳𑒞𑓂𑒩𑒲 𑒖𑒏𑒩𑒰 𑒦𑒹𑒪𑒻𑒏 𑒮𑒹 𑒯𑒧𑒩𑒰 𑒥𑒱𑒮𑒩𑒱 𑒑𑒹𑒪 𑒧𑒳𑒠𑒰 𑒣𑒳𑒞𑓂𑒩𑒥𑒪𑒰 𑒏𑒋𑒪𑒏 𑒯𑒧𑒩 𑒣𑓂𑒩𑒔𑒰𑒩 𑒧𑒱𑒟𑒱𑒪𑒰𑒥𑒰𑒥𑒰𑒏𑒹𑒿 𑒚𑒏 𑒏𑒯𑒻𑒞 𑒕𑒯 𑒑𑒰𑒧𑒏 𑒯𑒧𑒩 𑒎 𑒠𑒱𑒨𑒰𑒠𑒲 𑒛𑒰𑒯

𑒑𑒳𑒛-𑒫𑒹𑒩𑒲 𑒑𑒳𑒛
𑒦𑒰𑒩𑒞𑒲𑒨 𑒫𑒰𑒓𑒧𑒨 𑒏𑒹𑒩 𑒫𑓂𑒨𑒰𑒐𑓂𑒨𑒰 𑒋𑒯𑒱 𑒞𑒩𑒯𑒹𑒿 𑒦𑒹𑒪 𑒖𑓂𑒨𑒼𑒿 𑒏𑒱𑒕𑒳 𑒢𑒲𑒏 𑒦𑒹𑒪 𑒞𑒿 𑒢𑒲𑒏 𑒂 𑒖𑓂𑒨𑒼𑒿 𑒅𑒪𑒙𑒰 𑒞𑒿 𑒮𑒹𑒯𑒼 𑒚𑒲𑒏
𑒣𑓂𑒩𑒰𑒩𑒥𑓂𑒡𑒏 𑒦𑒹𑒪 𑒧𑒹𑒪 𑒂 𑒪𑒱𑒐𑒪𑒯𑒰𑒏 𑒦𑒹𑒙𑒥𑒰𑒏 𑒥𑒰𑒞 𑒢𑒲𑒏 𑒦𑒹𑒪 𑒞𑒿 𑒑𑒳𑒛 𑒂
𑒫𑒹𑒩𑒲 𑒑𑒳𑒛 𑒖𑓂𑒨𑒼𑒿 𑒦𑒹𑒪 𑒁𑒡𑒪𑒰𑒯

𑒯𑒩 𑒂 𑒥𑒛𑓃𑒠
𑒧𑒼𑒢 𑒑𑒹𑒪 𑒦𑒼𑒟𑒱𑒨𑒰𑒨𑒪 𑒖𑒼𑒞𑒱 𑒥𑒛𑓃𑒠 𑒮𑒼𑒔𑒱𑒧𑒹 𑒣𑒛𑓃𑒪𑒯𑒳𑒿
𑒋𑒞𑒨-𑒍𑒞𑒨 𑒏𑒹𑒩 𑒥𑒰𑒞 𑒯𑒩 𑒖𑒼𑒞𑒢𑒹 𑒦𑒹𑒪 𑒮𑒰𑒿𑒗 𑒯𑒩𑒰𑒨𑒪 𑒥𑒛𑓃𑒠 𑒞𑒰𑒏𑒲 𑒔𑒰𑒩𑒴 𑒏𑒰𑒞
𑒏𑒯𑒥𑒨 𑒏𑒏𑒩𑒰 𑒄 𑒑𑒣𑓂𑒣 𑒮𑒳𑒢𑒱 𑒯𑒿𑒮𑒞 𑒯𑒧𑒩𑒰 𑒣𑒩 𑒂𑒃 𑒧𑒼𑒢𑒹 𑒁𑒕𑒱 𑒦𑒼𑒟𑒱𑒨𑒰𑒨𑒪 𑒁𑒣𑓂𑒣𑒢 𑒮𑒣𑓂𑒣𑒞 𑒏𑒯𑒨 𑒕𑒲 𑒦𑒰𑒨

𑒑𑓀𑒑𑒰 𑒥𑓂𑒩𑒱𑒖
𑒧𑒼𑒢 𑒣𑒛𑓃𑒻𑒞 𑒁𑒕𑒱 𑒧𑒖𑒴𑒩 𑒮𑒦𑒏 𑒧𑒵𑒞𑓂𑒨𑒳 𑒔𑒏𑓂𑒏𑒩𑒱 𑒐𑒰𑒃𑒞 𑒐𑒮𑒻𑒞 𑒢𑒲𑒔𑒰𑒿 𑒣𑒰𑒢𑒱𑒧𑒹 𑒣𑒔𑒰𑒮 𑒙𑒰 𑒧𑒵𑒞𑓂𑒨𑒳𑒧𑒹 𑒮𑒿 𑒠𑒮 𑒙𑒰𑒏 𑒦𑒹𑒪 𑒩𑒱𑒣𑒼𑒩𑓂𑒙 𑒔𑒰𑒪𑒲𑒮 𑒑𑒼𑒙𑒹𑒏 𑒏𑒧𑒣𑒹𑒢𑒮𑒹𑒮𑒢 𑒑𑒹𑒪 𑒐𑒰𑒨 𑒢𑒹𑒞𑒰 𑒚𑒲𑒏𑒹𑒠𑒰𑒩 𑒂 𑒁𑒤𑒮𑒩
𑒋𑒯𑒱 𑒐𑒳𑒢𑒲𑒧𑒰 𑒥𑓂𑒩𑒱𑒖𑒏 𑒯𑒧 𑒃𑓀𑒖𑒲𑒢𑒱𑒨𑒩 𑒏𑒯𑒻𑒞 𑒕𑒲 𑒯𑒧𑒩𑒰 𑒄𑒧𑒰𑒢𑒠𑒰𑒩 𑒒𑒴𑒮 𑒏𑒼𑒢𑒰 𑒪𑒹𑒪 𑒯𑒼𑒋𑒞
𑒠𑒹𑒐𑒻𑒞 𑒑𑒳𑒢𑒻𑒞 𑒄 𑒮𑒦 𑒨𑒾 𑒮𑒩𑒏𑒰𑒩

𑒧𑒳𑒿𑒯 𑒔𑒼𑒏𑒙𑒪 𑒢𑒰𑒧 𑒯𑒿𑒮𑒧𑒳𑒐 𑒦𑒰𑒃
𑒧𑒳𑒿𑒯 𑒔𑒼𑒏𑒙𑒪 𑒢𑒰𑒧 𑒕𑒢𑓂𑒯𑒱 𑒯𑒿𑒮𑒧𑒳𑒐 𑒦𑒰𑒃 𑒥𑒯𑒳𑒞 𑒠𑒱𑒢𑒮𑒿 𑒕𑒲 𑒂𑒨𑒪 𑒏𑒩𑒴 𑒏𑒼𑒢𑒼 𑒅𑒣𑒰𑒨 𑒧𑒰𑒩𑒱 𑒞𑒩𑒯𑒏 𑒛𑒰𑒏𑓂𑒨𑒳𑒧𑒹𑓀𑒙 𑒠𑒹𑒪𑒢𑓂𑒯𑒱 𑒠𑒹𑒐𑒰𑒨 𑒣𑒳𑒢𑓁-𑒣𑓂𑒩𑒰𑒞 𑒦𑓄 𑒖𑒰𑒨𑒞 𑒠𑒹𑒪 𑒢𑒲𑒏 𑒖𑒹𑒏𑒰𑒿 𑒥𑒳𑒗𑒰𑒨 𑒬𑒰𑒩𑓂𑒙-𑒏𑒙 𑒩𑒮𑓂𑒞𑒰 𑒮𑒳𑒗𑒰𑒨 𑒠𑒹𑒪𑒢𑓂𑒯𑒱 𑒧𑒳𑒮𑓂𑒏𑒰𑒨 𑒧𑒳𑒿𑒯 𑒔𑒼𑒏𑒙𑒪 𑒢𑒰𑒧 𑒯𑒿𑒮𑒧𑒳𑒐 𑒦𑒰𑒨

𑒮𑒣𑒢𑒰
𑒮𑒣𑒢𑒰 𑒮𑒳𑒢𑓂𑒠𑒩 𑒮𑒳𑒢𑓂𑒠𑒩?

𑒢𑒘𑒱 𑒢𑒘𑒱 𑒕𑒪 𑒍𑒞𑒹𑒏 𑒮𑒳𑒢𑓂𑒠𑒩
𑒥𑒔𑓂𑒔𑒰𑒧𑒹 𑒄 𑒐𑒴𑒥 𑒛𑒩𑒍𑒪𑒏 𑒞𑒼𑒛𑓃𑒻𑒞
𑒂𑒿𑒐𑒱𑒮𑒿 𑒕𑒱𑒢𑒻𑒞 𑒮𑒳𑒞𑒥𑒰𑒏 𑒅𑒞𑓂𑒮𑒳𑒏𑒞𑒰
𑒖𑒐𑒢 𑒧𑒼𑒢 𑒅𑒐𑒛𑓃𑒻𑒞 𑒕𑒪 𑒒𑒥𑒛𑓃𑒰𑒃𑒞

𑒠𑒹𑒬 𑒏𑒰𑒪𑒏 𑒮𑒲𑒧𑒰 𑒥𑒢𑓂𑒯𑒪𑒯𑒳𑒿
𑒣𑒳𑒩𑒐𑒰𑒏 𑒦𑓂𑒩𑒧𑒏𑒹𑒿 𑒁𑒣𑒢𑒍𑒢𑒹
𑒧𑒳𑒠𑒰 𑒣𑓂𑒩𑒟𑒧 𑒥𑒲𑒖𑒲-𑒣𑒳𑒩𑒳𑒭𑒏 𑒕𑒠𑓂𑒧
𑒢𑒯𑒱 𑒕𑒪 𑒖𑒰𑒃𑒞 𑒧𑒼𑒢𑒏 𑒦𑓂𑒩𑒧

𑒥𑒔𑒯𑒢𑒏 𑒧𑒼𑒢𑒏-𑒕𑒰𑒞𑒲 𑒡𑒏-𑒡𑒏
𑒏𑒩𑒻𑒞 𑒕𑒪 𑒐𑒼𑒖 𑒖𑒑𑒏 𑒖𑒢𑓂𑒧𑒏
𑒢𑒯𑒱 𑒣𑒍𑒢𑒹 𑒏𑒼𑒢𑒼 𑒣𑓂𑒩𑒬𑓂𑒢𑒼𑒞𑓂𑒞𑒩
𑒕𑒼𑒛𑓃𑒻𑒞 𑒄𑒬𑓂𑒫𑒩 𑒣𑒩 𑒄 𑒬𑒰𑒬𑓂𑒫𑒞

𑒧𑒳𑒠𑒰 𑒄𑒬𑓂𑒫𑒩𑒏 𑒧𑒼𑒢 𑒂 𑒬𑒰𑒬𑓂𑒫𑒞 𑒮𑓂𑒫𑒩𑒴𑒣𑒏
𑒢𑒯𑒱 𑒮𑒼𑒗 𑒦𑒹𑒪 𑒮𑒮𑒩𑒤𑒰𑒢𑒲 𑒣𑒛𑓃𑒪 𑒑𑒱𑒩𑒯
𑒕𑒰𑒞𑒲-𑒧𑒼𑒢𑒏 𑒏𑒩𑒻𑒕 𑒥𑒜𑓃𑒪 𑒖𑒹 𑒡𑒏𑒡𑒏𑒲
𑒮𑒣𑒢𑒰 𑒮𑒹𑒯𑒼 𑒢𑒘𑒱 𑒖𑓂𑒨𑒼𑒿 𑒁𑒥𑒻𑒕 𑒢𑒱𑒢𑓂𑒢 𑒥𑒹𑒬𑒲

𑒮𑓀𑒮𑒰𑒩𑒏𑒹𑒿 𑒮𑒯𑒥𑒰𑒏 𑒄𑒯𑒼 𑒁𑒕𑒱 𑒣𑓂𑒩𑒯𑒹𑒪𑒱𑒏𑒰
𑒥𑒱𑒢𑒳 𑒮𑒧𑒮𑓂𑒨𑒰 𑒮𑒧𑒰𑒡𑒰𑒢𑒏 𑒏𑒩𑒻𑒞 𑒕𑒲
𑒯𑒿𑒮𑒻𑒞 𑒥𑒱𑒯𑒳𑒿𑒮𑒻𑒞 𑒥𑒢𑒥𑒻𑒞 𑒮𑒩𑓂𑒫𑒼𑒣𑒩𑒱 𑒦𑒰𑒑𑓂𑒨𑒩𑒰𑒖𑒏𑒹𑒿
𑒏𑒩𑒻𑒞 𑒕𑒲 𑒮𑒦𑒙𑒰 𑒁𑒣𑒢𑒹 𑒂 𑒄 𑒕𑒲 𑒏𑒯𑒻𑒞
𑒏𑒯𑒻𑒞 𑒖𑒹 𑒯𑒧 𑒕𑒲 𑒦𑒰𑒑𑓂𑒨𑒩𑒰𑒖𑒏 𑒏𑒚𑒣𑒳𑒞𑒪𑒲

𑒄𑒬𑓂𑒫𑒩𑒏 𑒄 𑒪𑒲𑒪𑒰 ? 𑒁𑒕𑒱 𑒧𑒼𑒢𑒏 𑒕𑒰𑒞𑒲𑒏 𑒮𑓀𑒑
𑒦𑒾𑒞𑒱𑒏 𑒕𑒰𑒞𑒲𑒏𑒹𑒿 𑒮𑒹𑒯𑒼 𑒖𑒹 𑒡𑒏𑒡𑒏𑒲 𑒄 𑒥𑒜𑓃𑒥𑒻𑒞

𑒮𑒣𑒢𑒰 𑒮𑒳𑒢𑓂𑒠𑒩 𑒂𑒏𑒱 𑒛𑒩𑒍𑒢 𑒢𑒯𑒱 𑒏𑒼𑒢𑒼
𑒁𑒕𑒱 𑒂𑒥 𑒁𑒥𑒻𑒞

𑒔𑒱𑒞𑓂𑒩𑒣𑒞𑒓𑓂𑒑
𑒅𑒛𑓃𑒻𑒞 𑒄 𑒑𑒳𑒛𑓂𑒛𑒲 𑒯𑒧𑒩 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰 𑒖𑒹𑒏𑒰𑒿 𑒪𑒰𑒑𑒪 𑒧𑓀𑒗𑒰 𑒥𑒴𑒏𑒪 𑒬𑒲𑒮𑒰𑒏 𑒖𑒹𑒢𑒰 𑒣𑓂𑒩𑒞𑒱𑒨𑒼𑒑𑒲𑒏 𑒏𑒰𑒑𑒖-𑒏𑒪𑒧
𑒏𑒙𑒪 𑒔𑒱𑒞𑓂𑒩𑒣𑒞𑒓𑓂𑒑 𑒠𑒹𑒐𑒥𑒻𑒞 𑒁𑒕𑒱 𑒫𑒰𑒮𑓂𑒞𑒫𑒱𑒏𑒞𑒰𑒏 𑒡𑒩𑒰 𑒖𑒞𑒨𑒮𑒿 𑒬𑒳𑒩𑒴 𑒍𑒞𑒯𑒱 𑒐𑒞𑓂𑒧
𑒧𑒳𑒠𑒰 𑒥𑒲𑒔 𑒅𑒛𑓃𑒰𑒢𑒏 𑒮𑓂𑒧𑒵𑒞𑒱 𑒅𑒚𑒻𑒞 𑒏𑒰𑒪 𑒮𑓂𑒫𑒩𑓂𑒑𑒏 𑒂 𑒐𑒮𑒻𑒞 𑒏𑒰𑒪 ...

𑒥𑒱𑒮𑒩𑒪𑒯𑒳𑒿 𑒤𑒹𑒩 𑒏𑒩𑓂𑒝𑒏 𑒧𑒵𑒞𑓂𑒨𑒳𑒏 𑒕𑒼𑒙- 𑒕𑒲𑒢 𑒩𑒴𑒣
𑒐𑒴𑒥 𑒚𑒹𑒏𑒢𑒹𑒢𑒹 𑒖𑒰𑒃𑒞 𑒖𑒹 𑒢𑒯𑒱 𑒥𑒱𑒮𑒩𑒥 𑒂𑒃 𑒧𑒳𑒠𑒰 𑒑𑒣𑓂𑒣 𑒣𑒩 𑒑𑒣𑓂𑒣 𑒔𑒪𑒪 𑒏𑒵𑒞𑓂𑒩𑒱𑒧𑒞𑒰 𑒑𑒹𑒪 𑒜𑓃𑒯𑒰𑒃𑒞
𑒤𑒹𑒩 𑒏𑒰𑒖𑒏 𑒥𑒹𑒩 𑒧𑒼𑒢 𑒢𑒯𑒱 𑒣𑒛𑓃𑒪 𑒣𑒛𑓃𑒻𑒞-𑒣𑒛𑓃𑒻𑒞 𑒧𑒼𑒢 𑒏𑒩𑓂𑒝𑒏 𑒧𑒵𑒞𑓂𑒨𑒳𑒏 𑒕𑒼𑒙- 𑒕𑒲𑒢 𑒩𑒴𑒣 𑒂 𑒞𑒏𑒩𑒰 𑒥𑒰𑒠 𑒧𑒮𑒼𑒮𑒱 𑒏𑒨
𑒩𑒯𑒱 𑒖𑒰𑒃𑒞 𑒕𑒲 𑒑𑒳𑒧𑓂𑒧

𑒬𑒪𑒰𑒞𑒳𑒩 𑒑𑒰𑒧
𑒞𑒏𑓂𑒭𑒬𑒱𑒪𑒰 𑒁𑒕𑒱 𑒣𑒰𑒏𑒱𑒮𑓂𑒞𑒰𑒢𑒧𑒹 𑒃𑒞𑒱𑒯𑒰𑒮𑒏 𑒅𑒢𑒙𑒥𑒻𑒞 𑒣𑒢𑓂𑒢𑒰
𑒔𑒏𑓂𑒩 𑒒𑒴𑒧𑒪 𑒙𑒴𑒙𑒪 𑒯𑒧𑒩 𑒠𑒹𑒬 𑒁𑒩𑒰𑒛𑓃𑒱 𑒚𑒰𑒜𑓃 𑒏𑒋𑒪𑒏 𑒠𑒱𑒨𑒰𑒠
𑒨𑒳𑒂𑒢 𑒔𑓂𑒫𑒰𑓀𑒑𑒏 𑒫𑒱𑒫𑒩𑒝
𑒫𑓂𑒨𑒰𑒏𑒩𑒝𑒏 𑒂𑒔𑒰𑒩𑓂𑒨 𑒮𑒦 𑒬𑒪𑒰𑒞𑒳𑒩 𑒑𑒰𑒧𑒧𑒹
𑒏𑒰𑒥𑒳𑒪 𑒂 𑒮𑒱𑒢𑓂𑒡𑒳 𑒡𑒰𑒩𑒏 𑒧𑒱𑒪𑒢 𑒣𑒩 𑒮𑓂𑒟𑒱𑒞
𑒣𑒰𑒝𑒱𑒢𑒲𑒏 𑒖𑒹 𑒕𑒪 𑒑𑒰𑒧 𑒂 𑒧𑒰𑒧𑒰𑒑𑒰𑒧 𑒂𑒖𑒳𑒏 𑒪𑒯𑒳𑒩 𑒑𑒰𑒧
𑒂𑒥 𑒞𑒿 𑒞𑒼𑒛𑓃𑒱 𑒩𑒯𑒪 𑒕𑒟𑒱 𑒥𑒰𑒧𑒱𑒨𑒰𑒢𑒧𑒹 𑒥𑒳𑒠𑓂𑒡𑒏 𑒧𑒴𑒩𑓂𑒞𑒱
𑒣𑒰𑒝𑒱𑒢𑒲𑒏 𑒫𑓀𑒬𑒖 𑒨𑒳𑒮𑒳𑒤𑒖𑒰𑒃 𑒣𑒚𑒰𑒢
𑒃𑒞𑒱𑒯𑒰𑒮𑒏 𑒂 𑒠𑒏𑓂𑒭 𑒠𑒹𑒬𑒏 𑒄 𑒣𑓂𑒩𑒨𑒰𑒝

𑒃𑒞𑒱𑒯𑒰𑒮𑒏 𑒒𑒳𑒧𑒻𑒞𑒔𑒏𑓂𑒩𑒮𑒿 𑒂𑒋𑒪 𑒁𑒕𑒱 𑒄 𑒫𑒱𑒔𑒰𑒩
𑒧𑒳𑒠𑒰 𑒮𑒼𑒔𑒻𑒞 𑒕𑒲 𑒔𑒏𑓂𑒩 𑒒𑒴𑒧𑒪 𑒙𑒴𑒙𑒪 𑒯𑒧𑒩 𑒠𑒹𑒬 𑒁𑒩𑒰𑒛𑓃𑒱 𑒚𑒰𑒜𑓃 𑒏𑒋𑒪𑒏 𑒠𑒱𑒨𑒰𑒠 𑒖𑒹 𑒦𑒢𑒹 𑒠𑒱𑒨𑒰𑒠 𑒁𑒕𑒱 𑒪𑒑 𑒂 𑒏𑒋𑒢𑒹 𑒁𑒕𑒱 𑒁𑒩𑒰𑒛𑓃𑒱 𑒞𑒰𑒯𑒱 𑒥𑒯𑒢𑓂𑒢𑒹 𑒕𑒲 𑒯𑒧 𑒮𑒖𑒑
𑒏𑒩𑒻𑒞 𑒩𑒯𑒻𑒞 𑒕𑒲 𑒞𑒻𑒨𑒰𑒩𑒲

𑓑𑓙𑓖𑓒 𑒡𑒩𑒱 𑒯𑒱𑒧𑒰𑒪𑒨𑒏𑒹𑒿 𑒥𑒳𑒗𑒪 𑒥𑒹𑒜𑓃 𑒖𑒹𑒢𑒰 𑓑𑓔𑓙𑓘 𑒡𑒩𑒱 𑒕𑒪 𑒮𑒧𑒳𑒠𑓂𑒩 𑒠𑓂𑒫𑒰𑒩 𑒐𑒼𑒪𑒻𑒞 𑒕𑒪 𑒐𑒻𑒥𑒩 𑒠𑒩𑓂𑒩𑒰 𑒧𑒰𑒞𑓂𑒩
𑒣𑒛𑓃𑒼𑒮𑒲𑒨𑒼 𑒣𑒩 𑒂𑒏𑓂𑒩𑒧𑒝 𑒯𑒼𑒃𑒞 𑒕𑒪 𑒠𑒴𑒩-𑒠𑒴𑒩𑒮𑒿 𑒁𑒥𑒻𑒞 𑒕𑒪 𑒁𑒞𑓂𑒨𑒰𑒔𑒰𑒩𑒲 𑒔𑒏𑓂𑒩 𑒒𑒴𑒧𑒪 𑒙𑒴𑒙𑒪 𑒯𑒧𑒩 𑒠𑒹𑒬 𑒁𑒩𑒰𑒛𑓃𑒱 𑒚𑒰𑒜𑓃 𑒏𑒋𑒪𑒏 𑒠𑒱𑒨𑒰𑒠 𑒦𑒢𑒹 𑒠𑒱𑒨𑒰𑒠 𑒁𑒕𑒱 𑒏𑒋𑒢𑒹 𑒁𑒩𑒰𑒛𑓃𑒱 𑒖𑒹 𑒏𑒩𑒻𑒞 𑒩𑒯𑒻𑒞 𑒕𑒲 𑒞𑒻𑒨𑒰𑒩𑒲

𑒏𑒰𑒪𑓂𑒯𑒱
𑒦𑒼𑒩𑒹 𑒅𑒚𑒱 𑒂𑒤𑒱𑒮 𑒖𑒰𑒃𑒞 𑒕𑒲 𑒂 𑒮𑒰𑒿𑒗 𑒒𑒳𑒩𑒱 𑒐𑒰𑒨 𑒮𑒳𑒞𑒻𑒞 𑒕𑒲 𑒏𑒞𑒹𑒏 𑒩𑒰𑒮 𑒏𑒰𑒖 𑒁𑒕𑒱 𑒕𑒳𑒙𑒻𑒞 𑒁𑒢𑒚𑒰𑒥𑒻𑒞 𑒁𑒮𑒏𑒞𑒰𑒃𑒞 𑒧𑒼𑒢 𑒧𑒮𑒼𑒮𑒻𑒞
𑒖𑒐𑒢 𑒖𑒰𑒃𑒞 𑒕𑒲 𑒕𑒳𑒙𑓂𑒙𑒲𑒧𑒹 𑒑𑒰𑒧 𑒂𑒞𑓂𑒧𑒧𑓀𑒟𑒢𑒏 𑒦𑒹𑒙𑒻𑒞 𑒁𑒕𑒱 𑒫𑒱𑒩𑒰𑒧 𑒣𑒥𑒻𑒞 𑒕𑒲 𑒜𑓃𑒹𑒩 𑒩𑒰𑒮 𑒅𑒣𑒩𑒰𑒑 𑒞𑒐𑒢 𑒥𑒢𑒥𑒻𑒞 𑒕𑒲 𑒋𑒏𑒙𑒰 𑒣𑓂𑒩𑒼𑒑𑓂𑒩𑒰𑒧
𑒏𑒰𑒑𑒖𑒏 𑒣𑒢𑓂𑒢𑒰 𑒣𑒩 𑒢𑒫 𑒩𑒰𑒑 𑒫𑒱𑒪𑒧𑓂𑒥𑒏 𑒥𑒰𑒠𑒏 𑒯𑒵𑒠𑒨𑒏 𑒮𑓀𑒑𑓂𑒩𑒰𑒧 𑒔𑒪𑒻𑒞 𑒕𑒪 𑒥𑒱𑒢𑒰 𑒞𑒰𑒩𑒞𑒧𑓂𑒨𑒏 𑒥𑒱𑒢𑒰 𑒅𑒠𑓂𑒠𑒹𑒬𑓂𑒨𑒏-𑒫𑒱𑒡𑒹𑒨𑒏 𑒏𑒢𑒹𑒏 𑒮𑒼𑒔𑒱 𑒪𑒹𑒪 𑒕𑒳𑒙𑓂𑒙𑒲𑒧𑒹 𑒖𑒰𑒨 𑒑𑒰𑒧
𑒫𑒱𑒪𑒧𑓂𑒥𑒏 𑒁𑒕𑒱 𑒢𑒯𑒱 𑒏𑒼𑒢𑒼 𑒮𑓂𑒟𑒰𑒢 𑒤𑒳𑒩𑓂𑒞𑒱𑒑𑒩 𑒮𑒰𑒏𑒰𑓀𑒏𑓂𑒭 𑒦𑒹𑒪𑒯𑒳𑒿 𑒂𑒃 𑒖𑒹 𑒮𑒼𑒔𑒪 𑒏𑒋𑒪 𑒢𑒱𑒞 𑒔𑒪𑒪 𑒖𑒲𑒫𑒢𑒏 𑒮𑒳𑒩 𑒦𑒹𑒙𑒪 𑒂𑒥 𑒖𑒰𑒋

𑒧𑒼𑒢 𑒣𑒰𑒛𑓃𑒻𑒞
𑒧𑒼𑒢 𑒁𑒕𑒱 𑒢𑒯𑒱 𑒣𑒛𑓃𑒱 𑒩𑒯𑒪 𑒣𑒰𑒛𑓃𑒱 𑒩𑒯𑒪 𑒕𑒲 𑒧𑒼𑒢
𑒪𑒱𑒐𑒢𑒰 𑒏𑒩𑒔𑒲 𑒏𑒪𑒧𑒮𑒿 𑒪𑒱𑒐𑒻𑒞 𑒤𑒹𑒩 𑒤𑒰𑒅𑒢𑓂𑒙𑒹𑒢 𑒣𑒹𑒢𑒏 𑒢𑒱𑒥𑒧𑒹 𑒥𑒰𑒢𑓂𑒯𑒱 𑒞𑒰𑒑 𑒕𑒪𑒯𑒳𑒿 𑒪𑒱𑒐𑒰𑒃𑒏𑒹𑒿 𑒧𑒼𑒙 𑒏𑒩𑒻𑒞
𑒧𑒰𑒮𑓂𑒙𑒩 𑒮𑒰𑒯𑒥 𑒦𑓄 𑒖𑒰𑒃𑒟 𑒏𑒢𑒤𑓂𑒨𑒴𑒖

𑒏𑒹𑒪𑒯𑒳𑒿 𑒁𑒣𑒢𑒹 𑒁𑒣𑒏𑒰𑒩 𑒚𑒰𑒜𑓃𑒹-𑒚𑒰𑒜𑓃 𑒁𑒏𑓂𑒭𑒩 𑒁𑒐𑒢𑒼 𑒯𑒧𑒩 𑒢𑒯𑒱 𑒮𑒳𑒑𑒜𑓃

𑒤𑒹𑒩 𑒧𑒼𑒢 𑒣𑒰𑒛𑓃𑒻𑒞 𑒕𑒲 𑒠𑒱𑒢𑒧𑒹 𑒥𑒾𑒂𑒃𑒞 𑒩𑒯𑒲 𑒏𑒪𑒧𑒧𑒹 𑒥𑒰𑒿𑒗𑒲 𑒞𑒏𑒻𑒞 𑒠𑒼𑒮𑒩 𑒚𑒰𑒜𑓃𑒱 𑒞𑒼𑒛𑓃𑒢𑒹 𑒣𑒛𑓃𑒻𑒞 𑒕𑒪 𑒥𑒳𑒩𑒥𑒏 𑒯𑒼𑒨𑒥𑒰𑒏 𑒮𑓀𑒖𑓂𑒘𑒰 𑒄𑒯𑒼 𑒕𑒲 𑒢𑒯𑒱 𑒥𑒳𑒗𑒻𑒞 𑒧𑒼𑒖𑒩 𑒯𑒼𑒃𑒞 𑒞𑒿 𑒐𑒻𑒞𑒯𑒳𑒿 𑒂𑒧 𑒁𑒑𑒱𑒪𑒰 𑒮𑒰𑒪
𑒥𑒰𑒿𑒗𑒲𑒧𑒹 𑒢𑒯𑒱 𑒏𑒼𑒢𑒼 𑒂𑒮 𑒒𑒴𑒩𑒧𑒹 𑒯𑒼𑒃𑒕 𑒧𑒰𑒞𑓂𑒩 𑒏𑒰𑒖
𑒤𑒹𑒩 𑒕𑒲 𑒣𑒰𑒛𑓃𑒻𑒞 𑒁𑓀𑒛𑒲𑒏 𑒥𑒲𑒨𑒰 𑒥𑒲𑒕𑒥 𑒣𑒹𑒩𑒰𑒨 𑒁𑒢𑒻𑒞 𑒕𑒪𑒯𑒳𑒿 𑒞𑒹𑒪 𑒥𑒢𑒥𑒰𑒨 𑒍𑒯𑒱𑒧𑒹 𑒕𑒰𑒢𑒪 𑒞𑒱𑒪𑒏𑒼𑒛𑓃𑒏 𑒮𑓂𑒫𑒰𑒠 𑒩𑒰𑒖𑒡𑒰𑒢𑒲𑒏 𑒬𑒹𑒤𑒏𑒹𑒿 𑒏𑒩𑒻𑒕 𑒧𑒰𑒞
𑒞𑒹𑒪𑒏 𑒏𑒧𑒲𑒮𑒿 𑒦𑒦𑒏𑒻𑒞 𑒏𑒥𑒃𑒏 𑒮𑓂𑒫𑒰𑒠 𑒏𑒲 𑒢𑒲𑒏 𑒥𑒢𑒪 ! 𑒏𑒹𑒩 𑒧𑒱𑒟𑓂𑒨𑒰𑒫𑒰𑒠 𑒧𑒯𑒱𑒢𑒰𑒧𑒹 𑒂𑒡 𑒏𑒱𑒪𑒼 𑒏𑒩𑒴 𑒞𑒹𑒪𑒏 𑒐𑒩𑓂𑒔 𑒦𑓄 𑒖𑒰𑒃𑒞 𑒋𑒏 𑒏𑒱𑒪𑒼 𑒧𑒰𑒬𑓂𑒔𑒩𑓂𑒖
𑒏𑓀𑒖𑒴𑒮𑒲 𑒢𑒯𑒱 ...
𑒧𑒼𑒢 𑒣𑒰𑒛𑓃𑒻𑒞 𑒕𑒲 𑒡𑒰𑒢𑒏 𑒐𑒹𑒞
𑒗𑒱𑒪𑓂𑒪𑒲 𑒏𑒔𑒾𑒛𑓃𑒲 𑒪𑒼𑒜𑓃𑒻𑒞 𑒏𑒰𑒙𑒪 𑒡𑒰𑒢𑒏 𑒗𑒙𑓂𑒚𑒰 𑒍𑒯𑒱 𑒥𑒲𑒕𑒪 𑒬𑒲𑒮𑒏 𑒣𑒰𑒃𑒮𑒿 𑒏𑒲𑒢𑒪 𑒪𑒰𑒪𑒕𑒛𑓃𑒲 ‘𑒖𑒏𑒩𑒹 𑒢𑒰𑒧 𑒪𑒰𑒪 𑒕𑒛𑓃𑒲’ 𑒂 𑒮𑒞𑒒𑒩𑒱𑒨𑒰𑒏 𑒐𑒹𑒪

𑒂𑒧𑒏 𑒖𑒰𑒥𑒲
𑒥𑓀𑒬𑒲𑒮𑒿 𑒧𑒰𑒩𑒻𑒞 𑒧𑒰𑒕 𑒐𑒳𑒩𑒔𑒢𑒮𑒿 𑒮𑒼𑒯𑒻𑒞 𑒂𑒧 𑒏𑒰𑒿𑒔 𑒔𑒴𑒢𑒏 𑒮𑓀𑒑 𑒏𑒰𑒿𑒔 𑒂𑒧𑒏 𑒧𑒲𑒚 𑒮𑓂𑒫𑒰𑒠 𑒥𑒛𑓃𑒏𑒰 𑒠𑒪𑒰𑒢
𑒠𑒰𑒅𑒢 𑒥𑒰𑒜𑓃𑒱𑒏 𑒣𑒰𑒢𑒱 𑒮𑒿 𑒛𑒴𑒥𑒪 𑒬𑒲𑒮
𑒯𑒼𑒃𑒞 𑒐𑒐𑒛𑓃𑒲
𑒡𑒰𑒢𑒧𑒹 𑒧𑒱𑒪𑒰 𑒠𑒹𑒪𑒰 𑒣𑒩 𑒣𑒏𑒛𑓃𑒻𑒞 𑒕𑒪 𑒏𑒳𑒘𑓂𑒖𑒛𑓃𑒢𑒲

𑒦𑒻𑒩𑒫 𑒮𑓂𑒟𑒰𑒢𑒏 𑒏𑒰𑒿𑒔 𑒥𑒻𑒩𑒏 𑒮𑓂𑒫𑒰𑒠 𑒥𑒱𑒠𑒹𑒮𑒩𑒏 𑒩𑒫𑒱 𑒠𑒱𑒢𑒏 𑒥𑒴𑒗𑒪 ? 𑒤𑒴𑒪-𑒪𑒼𑒙𑒏𑒲𑒮𑒿 𑒥𑒱𑒠𑒹𑒮𑒩 𑒣𑒴𑒖𑒪 𑒔𑒴𑒛𑓃𑒰 𑒪𑒨 𑒖𑒰𑒃𑒞 𑒩𑒯𑒲 𑒑𑒰𑒧𑒮𑒿 𑒠𑒯𑒲-𑒖𑒱𑒪𑒹𑒥𑒲 𑒏𑒲𑒢𑒱 𑒒𑒳𑒩𑒻𑒞 𑒦𑒼𑒖𑒢 𑒏𑒨
𑒖𑒧𑒥𑒼𑒢𑒲𑒏 𑒥𑒢𑒮𑒳𑒣𑒰𑒩𑒲𑒏 𑒣𑒳𑒩𑒢𑒰𑒯𑒰𑒏 𑒡𑒰𑒞𑒩𑒲𑒧𑒏 𑒑𑒰𑒕 𑒮𑒰𑒯𑒩 𑒠𑒰𑒞𑒧𑒢𑒱𑒏 𑒮𑒼𑒗 𑒢𑒲𑒏 𑒕𑒛𑓃 𑒖𑒹 𑒁𑒢𑒻𑒕
𑒕𑒲 𑒥𑒳𑒡𑒱𑒨𑒰𑒩𑒲 𑒞𑒏𑒩

𑒞𑒱𑒞𑓂𑒞𑒲 𑒐𑒹𑒪𑒰𑒃𑒞 𑒥𑒰𑒪 𑒑𑒳𑒪𑓂𑒪𑒲 𑒛𑓀𑒙𑒰 𑒑𑒼𑒪𑒲𑒏 𑒐𑒹𑒪 𑒁𑒐𑒩𑒰𑒯𑒰𑒏 𑒗𑒧𑒹𑒪 𑒯𑒳𑒏𑓂𑒏𑒰 𑒪𑒼𑒪𑒲𑒏 𑒥𑒰𑒿𑒮𑒏 𑒏𑒢𑒮𑒳𑒣𑒞𑒲 𑒤𑒹𑒩 𑒏𑒣𑒛𑓃𑒰𑒏 𑒑𑒹𑒢𑒲 𑒧𑒙𑒱𑒨𑒰 𑒞𑒹𑒪𑒧𑒹 𑒛𑒳𑒥𑒰𑒨
𑒕𑒪𑒯𑒳𑒿 𑒩𑒯𑒪 𑒖𑒩𑒰𑒨
𑒕𑒚𑒱𑒏 𑒦𑒼𑒩𑒧𑒹 𑒤𑒙𑒏𑓂𑒏𑒰 𑒤𑒼𑒛𑓃𑒪 𑒖𑒴𑒛𑓃𑒱𑒬𑒲𑒞𑒪𑒏 𑒡𑒳𑒩𑒐𑒹𑒪 𑒐𑒹𑒪𑒋𑒪

𑒂𑒨𑒪 𑒥𑒰𑒜𑓃𑒱 𑒠𑒳𑒩𑓂𑒦𑒱𑒏𑓂𑒭 𑒕𑒼𑒛𑓃𑒪 𑒑𑒰𑒧 𑒨𑒾 𑒧𑒱𑒞𑓂𑒩 𑒧𑒼𑒢 𑒢𑒯𑒱 𑒣𑒛𑓃𑒻𑒕
𑒕𑒲 𑒣𑒰𑒛𑓃𑒻𑒞 𑒥𑒻𑒮𑒱 𑒥𑒻𑒮𑒱 𑒥𑒻𑒮𑒱

𑒣𑒟𑒏 𑒣𑒟
𑒮𑓂𑒧𑒵𑒞𑒱𑒏 𑒥𑒢𑓂𑒡𑒢𑒧𑒹
𑒞𑒩𑒹𑒑𑒝𑒏 𑒣𑒰𑒕𑒰𑒿𑒮𑒿
𑒁𑒢𑓂𑒯𑒰𑒩 𑒑𑒯𑓂𑒫𑒩𑒏 𑒮𑒼𑒗𑒰𑒿𑒧𑒹
𑒣𑒟 𑒫𑒱𑒏𑒙 𑒂𑒬𑒰𑒮𑒿 !

𑒣𑒟𑒏 𑒣𑒟 𑒞𑒰𑒏𑒥 𑒯𑒧
𑒣𑓂𑒩𑒨𑒰𑒝 𑒠𑒲𑒩𑓂𑒒 𑒦𑒹𑒪 𑒂𑒥

𑒫𑒱𑒬𑓂𑒫𑒏 𑒣𑓂𑒩𑒯𑒹𑒪𑒱𑒏𑒰𑒏
𑒞𑒼𑒛𑓃 𑒦𑒹𑒙𑒱 𑒖𑒰𑒨𑒞 𑒖𑓂𑒨𑒼𑒿
𑒃𑒞𑒱𑒯𑒰𑒮𑒏 𑒢𑒱𑒩𑓂𑒧𑒰𑒝𑒏
𑒏𑒴𑒙 𑒬𑒥𑓂𑒠 𑒞𑒰𑒏𑒥 𑒚𑒰𑒿

𑒣𑒟𑒏 𑒣𑒟 𑒞𑒰𑒏𑒥 𑒯𑒧
𑒣𑓂𑒩𑒨𑒰𑒝 𑒠𑒲𑒩𑓂𑒒 𑒦𑒹𑒪 𑒂𑒥

𑒫𑒱𑒬𑓂𑒫𑒏 𑒧𑓀𑒟𑒢𑒧𑒹
𑒯𑒼𑒋𑒞 𑒏𑒱𑒕𑒳 𑒥𑒯𑒰𑒩 𑒂𑒥
𑒮𑒧𑒳𑒠𑓂𑒩𑒏 𑒧𑓀𑒟𑒢𑒧𑒹
𑒁𑒢𑒩𑓂𑒑𑒪 𑒕𑒪 𑒫𑒮𑓂𑒞𑒳-𑒖𑒰𑒞

𑒣𑒟𑒏 𑒣𑒟 𑒞𑒰𑒏𑒥 𑒯𑒧
𑒣𑓂𑒩𑒨𑒰𑒝 𑒠𑒲𑒩𑓂𑒒 𑒦𑒹𑒪 𑒂𑒥

𑒧𑒱𑒟𑒱𑒪𑒰𑒏 𑒡𑓂𑒫𑒖 𑒑𑒲𑒞
𑒧𑒱𑒟𑒱𑒪𑒰𑒏 𑒡𑓂𑒫𑒖 𑒤𑒯𑒩𑒰𑒨𑒞 𑒖𑒑𑒞𑒧𑒹
𑒧𑒰𑒿 𑒩𑒴𑒭𑒪𑒱 𑒦𑒴𑒭𑒪𑒱 𑒠𑒴𑒭𑒪𑒱 𑒠𑒹𑒐𑒪 𑒯𑒧
𑒁𑒏𑒳𑒪𑒰𑒃𑒞 𑒕𑒲 𑒦𑒿𑒮𑒱𑒨𑒰𑒃𑒞 𑒁𑒕𑒱 𑒧𑒢

𑒕𑒲 𑒫𑒱𑒠𑓂𑒨𑒰𑒏 𑒅𑒠𑓂𑒨𑒼𑒑𑒏 𑒏𑒩𑓂𑒧𑒦𑒴𑒧𑒱 𑒮𑒿
𑒣𑒕𑒰𑒛𑓃𑒱 𑒂𑒨𑒞 𑒮𑒢𑓂𑒞𑒞𑒱 𑒁𑒯𑒰𑒿𑒏 𑒣𑒳𑒢𑒱
𑒥𑒳𑒠𑓂𑒡𑒱 𑒔𑒰𑒞𑒳𑒩𑓂𑒨𑒏 𑒂 𑒬𑒾𑒩𑓂𑒨𑒏 𑒏𑒩𑒮𑒿
𑒫𑒱𑒖𑒨𑒏 𑒣𑓂𑒩𑒞𑒱 𑒏𑒩𑒴 𑒁𑒯𑒿 𑒬𑓀𑒏𑒰 𑒖𑒳𑒢𑒱

𑒧𑒻𑒟𑒱𑒪𑒲 𑒕𑒟𑒱 𑒁𑒪𑓂𑒣𑒣𑓂𑒩𑒰𑒝 𑒦𑒹𑒪 𑒖𑓂𑒨𑒼𑒿
𑒮𑒢𑓂𑒡𑓂𑒨𑒏𑓂𑒭𑒩 𑒥𑒰𑒖𑒱 𑒏𑒩𑒥 𑒯𑒧 𑒢𑓂𑒨𑒼𑒩𑒰
𑒫𑒩𑓂𑒝 𑒮𑓂𑒤𑒼𑒙𑒏 𑒥𑒢𑒞 𑒮𑓂𑒣𑒩𑓂𑒬𑒮𑒿 𑒯𑒧𑒩
𑒡𑓂𑒫𑒖 𑒐𑒮𑒞 𑒢𑒯𑒱 𑒯𑒹 𑒧𑒰𑒞𑒳 𑒧𑒱𑒟𑒱𑒪𑒰

𑒥𑒛𑓃𑒏𑒰 𑒮𑒛𑓃𑒏 𑒕𑒯 𑒪𑒹𑒢 𑒥𑒪𑒰
𑒧𑒰𑒋 !
𑒧𑒰𑒋 𑒡𑒰𑒢𑒏 𑒐𑒹𑒞 𑒪𑒑
𑒖𑒹 𑒥𑒛𑓃𑒏𑒰 𑒮𑒛𑓃𑒏 𑒥𑒢𑒪 𑒁𑒕𑒱
𑒕𑒯 𑒪𑒹𑒢𑒏
𑒞𑒲𑒢 𑒙𑒰 𑒂𑒥𑒋𑒥𑒪𑒰 𑒂 𑒞𑒲𑒢𑒙𑒰 𑒖𑒰𑒃𑒥𑒪𑒰

𑒍𑒞𑒋 𑒂𑒃
𑒏𑒞𑒹𑒏 𑒢𑒲𑒏 𑒪𑒰𑒪 𑒩𑓀𑒑𑒏 𑒏𑒰𑒩
𑒮𑒲𑒮𑒰 𑒐𑒳𑒖𑒪 𑒢𑒯𑒱 𑒩𑒯𑒋 𑒖𑒏𑒩
𑒩𑒯𑒋 𑒥𑒢𑓂𑒢
𑒠𑒹𑒐𑒪𑒯𑒳𑒿 𑒂𑒃
𑒖𑒐𑒢 𑒥𑒹𑒔𑒻𑒞 𑒩𑒯𑒲 𑒯𑒧 𑒔𑒱𑒛𑓃𑒻

𑒋𑒏𑒙𑒰 𑒥𑒔𑓂𑒔𑒰 𑒖𑒱𑒠𑒱𑒨𑒰 𑒑𑒹𑒪
𑒐𑒼𑒪𑒥𑒹𑒪𑒏 𑒏𑒰𑒩𑒏 𑒬𑒲𑒮𑒰 𑒂
𑒏𑒲𑒢𑒱 𑒪𑒹𑒪𑒏 𑒯𑒧𑒩 𑒮𑒦𑒙𑒰 𑒔𑒱𑒛𑓃𑒻
𑒣𑒰𑒢𑒱 𑒩𑒯𑒋 𑒍𑒯𑒱 𑒥𑒔𑓂𑒔𑒰𑒏 𑒧𑒴𑒯𑒣𑒩
𑒮𑒲𑒮𑒰 𑒐𑒳𑒖𑒱𑒞𑒹 𑒥𑒯𑒰𑒩 𑒦𑒹𑒪 𑒚𑓀𑒜𑓃𑒰 𑒯𑒥𑒰
𑒏𑒰𑒩 𑒋.𑒮𑒲. 𑒥𑒪𑒰𑒮𑒿
𑒏𑒰𑒩 𑒖𑒹 𑒩𑒯𑒋 𑒪𑒰𑒪 𑒩𑓀𑒑𑒏

𑒧𑒰𑒋 !
𑒧𑒰𑒋 𑒄 𑒖𑒹 𑒡𑒰𑒢𑒏 𑒐𑒹𑒞 𑒪𑒑
𑒖𑒹 𑒥𑒛𑓃𑒏𑒰 𑒮𑒛𑓃𑒏 𑒥𑒢𑒪 𑒁𑒕𑒱
𑒕𑒯 𑒪𑒹𑒢𑒏 𑒩𑓀𑒑-𑒥𑒱𑒩𑓀𑒑𑒏 𑒑𑒰𑒛𑓃𑒲 𑒮𑒦𑒏 𑒪𑒹𑒪
𑒞𑒲𑒢𑒙𑒰 𑒂𑒥𑒋𑒥𑒪𑒰 𑒂 𑒞𑒲𑒢𑒙𑒰 𑒖𑒰𑒃𑒥𑒪𑒰 𑒍𑒞𑒯𑒱
𑒧𑒰𑒋 !
𑒄 𑒞𑒿 𑒁𑒣𑒢𑒹 𑒑𑒰𑒧𑒏 𑒮𑒛𑓃𑒏 𑒦𑒹𑒪 𑒢𑒹
𑒧𑒳𑒠𑒰 𑒁𑒣𑒢 𑒑𑒰𑒧𑒏 𑒞𑒿 𑒮𑒦 𑒑𑒼𑒙𑒹 𑒑𑒹𑒪𑒰𑒯
𑒖𑒰𑒃 𑒑𑒹𑒪𑒰𑒯 𑒏𑒧𑒋𑒥𑒰𑒏 𑒪𑒹𑒪 𑒠𑒱𑒪𑓂𑒪𑒲 𑒂 𑒣𑒻𑓀𑒖𑒰𑒥

𑒑𑒰𑒧𑒧𑒹 𑒧𑒰𑒙𑒱𑒏 𑒒𑒩
𑒤𑒴𑒮 𑒂 𑒐𑒣𑒛𑓃𑒰𑒏 𑒔𑒰𑒩
𑒧𑒳𑒠𑒰 𑒡𑒰𑒢𑒏 𑒐𑒹𑒞 𑒪𑒑
𑒖𑒹 𑒥𑒛𑓃𑒏𑒰 𑒮𑒛𑓃𑒏 𑒥𑒢𑒪 𑒁𑒕𑒱
𑒣𑒏𑓂𑒏𑒰𑒏
𑒔𑒱𑒏𑓂𑒏𑒢 𑒂 𑒒𑒩𑒼𑒮𑒿 𑒥𑒹𑒬𑒲 𑒮𑒳𑒢𑓂𑒢𑒩 𑒄 𑒮𑒛𑓃𑒏
𑒍𑒞𑒯𑒱 𑒠𑒹𑒐𑒪𑒯𑒳𑒿 𑒄 𑒂𑒃

𑒧𑒰𑒋 !
𑒮𑒳𑒢𑒻 𑒕𑒱𑒌 𑒥𑒢𑒪 𑒁𑒕𑒱 𑒏𑒼𑒢𑒼
𑒫𑒩𑓂𑒪𑓂𑒛 𑒥𑒻𑓀𑒏𑒏 𑒤𑓀𑒛𑒮𑒿
𑒣𑒏𑒱𑒨𑒰 𑒔𑒱𑒏𑓂𑒏𑒢-𑒔𑒳𑒢𑒧𑒳𑒢 𑒄 𑒮𑒛𑓃𑒏
𑒕𑒯 𑒙𑒰 𑒪𑒹𑒢𑒥𑒪𑒰
𑒮𑒲𑒮𑒰 𑒮𑒢 𑒁𑒕𑒱 𑒄 𑒔𑒧𑒏𑒻𑒞 !

𑒧𑒰𑒋 !
𑒖𑒹 𑒣𑒩𑒳𑒏𑒰𑒿 𑒮𑒰𑒪 𑒏𑒰𑒏𑒰𑒏
𑒒𑒩 𑒖𑒹 𑒏𑒰𑒏𑒰𑒏 𑒥𑒢𑒪 𑒩𑒯𑒋 𑒣𑒏𑓂𑒏𑒰𑒏
𑒑𑒱𑒪𑒹𑒥𑒰 𑒥𑒪𑒰
𑒖𑒹 𑒏𑒢𑒱𑒨𑒹 𑒠𑒱𑒢𑒧𑒹 𑒐𑒮𑒱 𑒑𑒹𑒪 𑒩𑒯𑒋
𑒍𑒯𑒼 𑒏𑒼𑒢𑒼 𑒮𑒩𑒏𑒰𑒩𑒲 𑒤𑒢𑓂𑒛𑒮𑒿 𑒥𑒢𑒪 𑒩𑒯𑒋 !

𑒏𑒯𑒰𑒿 𑒕𑒪 𑒔𑒧𑒏𑒻𑒞 𑒍 𑒬𑒲𑒮𑒰 𑒮𑒢
𑒍𑒯𑒱𑒧𑒹 𑒩𑒯𑒱𑒞𑒼 𑒪𑒼𑒏 𑒕𑒪 𑒛𑒩𑒰𑒃𑒞
𑒦𑒢𑒹 𑒐𑒮𑒱 𑒣𑒛𑓃𑒪

𑒧𑒳𑒠𑒰 𑒯𑒼𑒋𑒞 𑒍 𑒏𑒼𑒢𑒼 𑒢𑒏𑒪𑒲 𑒤𑒢𑓂𑒛𑒮𑒿 𑒥𑒢𑒪
𑒂𑒃 𑒞𑒿 𑒍𑒯𑒱 𑒏𑒰𑒩𑒏 𑒬𑒰𑒢 𑒠𑒹𑒐𑒪𑒯𑒳𑒿
𑒫𑒩𑓂𑒪𑓂𑒛 𑒥𑒻𑓀𑒏𑒏 𑒤𑒢𑓂𑒛𑒮𑒿 𑒥𑒢𑒪
𑒁𑒣𑓂𑒣𑒢 𑒑𑒰𑒧𑒏 𑒋𑒯𑒱 𑒕𑒯 𑒪𑒹𑒢𑒥𑒪𑒰 𑒮𑒛𑓃𑒏𑒣𑒩 !

𑒧𑒰𑒋 !
𑒄 𑒫𑒩𑓂𑒪𑓂𑒛 𑒥𑒻𑓀𑒏 𑒥𑒪𑒰 𑒤𑒢𑓂𑒛 𑒏𑒼𑒢𑒼 𑒢𑒲𑒏 𑒤𑒢𑓂𑒛 𑒁𑒕𑒱 !
𑒋𑒯𑒱 𑒢𑒱𑒏𑒯𑒰 𑒤𑒢𑓂𑒛𑒮𑒿 𑒒𑒩 𑒢𑒯𑒱 𑒥𑒢𑒻𑒞 𑒕𑒻𑒏 𑒏𑒲 ?
𑒐𑒹𑒢𑒰𑒃 𑒦𑒼𑒖𑒢 𑒂 𑒩𑒼𑒖𑒑𑒰𑒩 𑒖𑒹 𑒠𑒻𑒞𑒻𑒏 𑒄 𑒢𑒱𑒏𑒯𑒰 𑒤𑒢𑓂𑒛 𑒞𑒿
𑒞𑒿 𑒏𑒱𑒋𑒏 𑒪𑒼𑒏 𑒣𑒛𑓃𑒰𑒃𑒞 𑒠𑒱𑒪𑓂𑒪𑒲 𑒂 𑒣𑒻𑓀𑒖𑒰𑒥

𑒏𑒱𑒋𑒏 𑒮𑒳𑒢𑒱𑒞𑒋 𑒩𑒰𑒖 𑒚𑒰𑒏𑒩𑒹𑒏 𑒑𑒰𑒩𑒱
𑒏𑒱𑒋𑒏 𑒖𑒰𑒃𑒞 𑒑𑒋 𑒐𑒳𑒢𑒰𑒯𑒢𑒱 𑒯𑒼𑒃 𑒪𑒹𑒪 𑒁𑒮𑒰𑒧
𑒮𑒳𑒢𑒻 𑒕𑒱𑒌𑒏 𑒣𑒜𑓃𑒻 𑒖𑒰𑒃 𑒕𑒻 𑒥𑒱𑒯𑒰𑒩𑒲 𑒏𑒯𑒱 𑒑𑒰𑒩𑒱

𑒧𑒰𑒋 !
𑒋𑒯𑒱 𑒫𑒩𑓂𑒪𑓂𑒛 𑒥𑒻𑓀𑒏 𑒥𑒪𑒰 𑒢𑒱𑒏𑒯𑒰 𑒤𑒢𑓂𑒛𑒮𑒿
𑒖𑒹 𑒥𑒢𑒱 𑒖𑒃𑒞𑒻𑒏 𑒁𑒣𑒢 𑒑𑒰𑒧𑒏 𑒒𑒩 𑒂𑒿𑒑𑒢
𑒞𑒿 𑒍 𑒟𑒼𑒛𑓃𑒥𑒹𑒏 𑒩𑒯𑒱𑒞𑒻𑒏 𑒑𑒱𑒪𑒹𑒥𑒰 𑒥𑒪𑒰 𑒣𑒏𑓂𑒏𑒰𑒏 𑒏𑒼𑒚𑒰 𑒮𑒢 !
𑒍 𑒞𑒿 𑒩𑒯𑒱𑒞𑒻𑒏 𑒍𑒯𑒢𑒹 𑒮𑒳𑒢𑓂𑒢𑒩 𑒮𑒲𑒮𑒰 𑒮𑒢 𑒔𑒱𑒏𑓂𑒏𑒢 𑒂 𑒚𑒼𑒮
𑒕𑒯 𑒪𑒹𑒢𑒏 𑒡𑒰𑒢𑒏 𑒐𑒹𑒞𑒏 𑒏𑒰𑒞 𑒥𑒪𑒰 𑒋𑒯𑒱 𑒮𑒛𑓃𑒏 𑒮𑒢

𑒂 𑒖𑒹 𑒩𑒼𑒖𑒑𑒰𑒩𑒼 𑒍𑒯𑒱 𑒤𑒢𑓂𑒛 𑒮𑒿 𑒦𑒹𑒙𑒱𑒞𑒻𑒏
𑒞𑒿 𑒪𑒼𑒏𑒼 𑒮𑒦 𑒩𑒯𑒱𑒞𑒻𑒏 𑒒𑒩𑒧𑒹
𑒑𑒰𑒧𑒏 𑒒𑒩 𑒮𑒦 𑒋𑒐𑒢 𑒖𑒹𑒏𑒰𑒿 𑒦𑒏𑒼𑒦𑒢𑓂𑒢 𑒟𑒼𑒛𑓃𑒥𑒹 𑒩𑒯𑒱𑒞𑒻𑒏
𑒔𑒳𑒯𑒔𑒳𑒯𑒲 𑒩𑒯𑒱𑒞𑒻𑒏 𑒁𑒣𑒢𑒼 𑒑𑒰𑒧𑒧𑒹

𑒂 𑒞𑒐𑒢 𑒖𑒹 𑒠𑒹𑒐𑒥𑒰 𑒖𑒼𑒑 𑒩𑒯𑒱𑒞𑒻𑒏 𑒬𑒰𑒢 𑒁𑒣𑒢 𑒑𑒰𑒧𑒏 !
𑒂 𑒠𑒹𑒐𑒥𑒰 𑒖𑒼𑒑 𑒩𑒯𑒱𑒞𑒻𑒏 𑒬𑒰𑒢 𑒋𑒯𑒱 𑒕𑒯 𑒪𑒹𑒢 𑒥𑒪𑒰 𑒮𑒛𑓃𑒏𑒏 𑒮𑒹𑒯𑒼 !
𑒯𑒧𑒩𑒼 𑒮𑒦𑒏 𑒁𑓀𑒑𑒣𑒩 𑒩𑒯𑒱𑒞𑒋 𑒖𑒹 𑒫𑒮𑓂𑒞𑓂𑒩
𑒍𑒯𑒢𑒹 𑒫𑒮𑓂𑒞𑓂𑒩
𑒖𑒹𑒯𑒢 𑒍𑒯𑒱 𑒪𑒰𑒪 𑒏𑒰𑒩𑒧𑒹 𑒥𑒻𑒮𑒪 𑒥𑒔𑓂𑒔𑒰𑒏 𑒩𑒯𑒋 !

𑒧𑒰𑒋!
𑒯𑒧𑒩𑒰 𑒞𑒿 𑒪𑒑𑒻𑒞 𑒩𑒯𑒻𑒋 𑒖𑒹
𑒁𑒣𑒢 𑒑𑒰𑒧𑒏 𑒄 𑒮𑒛𑓃𑒏
𑒍𑒯𑒱 𑒪𑒰𑒪 𑒣𑒩𑒠𑒹𑒬𑒲𑒏 𑒍𑒯𑒱 𑒪𑒰𑒪 𑒏𑒰𑒩𑒮𑒿 𑒥𑒹𑒬𑒲 𑒁𑒕𑒱 𑒪𑒑
𑒠𑒳𑒢𑒴 𑒙𑒰 𑒪𑒑𑒻𑒋 𑒥𑒱𑒠𑒹𑒬𑒲 𑒮𑒢

𑒪𑒰𑒑𑒪 𑒂𑒃 𑒖𑒹
𑒖𑒹 𑒍𑒯𑒱 𑒪𑒰𑒪 𑒏𑒰𑒩𑒏 𑒯𑒥𑒰 𑒮𑒹𑒯𑒼 𑒁𑒣𑒢 𑒯𑒥𑒰 𑒢𑒯𑒱
𑒪𑒰𑒑𑒪 𑒖𑒹𑒢𑒰 𑒍 𑒯𑒥𑒰 𑒂 𑒍 𑒏𑒰𑒩 𑒯𑒧𑒩𑒰𑒮𑒿 𑒕𑒳𑒞𑒰 𑒑𑒹𑒪 𑒯𑒼𑒁𑒋
𑒕𑒳𑒞𑒰 𑒑𑒹𑒪 𑒯𑒼𑒁𑒋 𑒯𑒧𑒩 𑒮𑓂𑒣𑒩𑓂𑒬𑒮𑒿

𑒁𑒣𑒢 𑒑𑒰𑒧 𑒁𑒕𑒱 𑒧𑒨𑒴𑒩
𑒂 𑒍 𑒕𑒯 𑒪𑒹𑒢 𑒥𑒪𑒰 𑒮𑒛𑓃𑒏 𑒁𑒕𑒱 𑒋𑒏𑒩 𑒣𑒰𑒿𑒐𑒱
𑒂 𑒯𑒧 𑒮𑒦 𑒕𑒲 𑒣𑒋𑒩 𑒍𑒯𑒱 𑒧𑒨𑒴𑒩𑒏
𑒄 𑒮𑒛𑓃𑒏 𑒁𑒣𑓂𑒣𑒢 𑒑𑒰𑒧𑒏 𑒩𑒯𑒱𑒞𑒼 𑒪𑒰𑒑𑒻𑒋 𑒤𑒰𑒩𑒹𑒢𑒩

𑒧𑒰𑒋 !
𑒮𑒦 𑒠𑒱𑒢 𑒥𑒏𑒛𑓃𑒲 𑒔𑒩𑒥𑒻𑒞
𑒠𑒹𑒐𑒻𑒞 𑒩𑒯𑒻𑒞 𑒕𑒲 𑒯𑒧 𑒬𑒰𑒢 𑒁𑒣𑓂𑒣𑒢 𑒑𑒰𑒧𑒏 𑒍𑒯𑒱 𑒮𑒛𑓃𑒏𑒏
𑒖𑒹 𑒁𑒕𑒱 𑒕𑒯 𑒪𑒹𑒢 𑒥𑒪𑒰 !

𑒣𑒞𑒰 𑒢𑒯𑒱 𑒒𑒳𑒩𑒱 𑒏𑒋 𑒖𑒰𑒋𑒥 𑒂𑒏𑒱
“𑒣𑒞𑒰 𑒢𑒯𑒱 𑒒𑒳𑒩𑒱 𑒏𑒋 𑒖𑒰𑒋𑒥
𑒂𑒏𑒱 𑒋𑒞𑒯𑒱 𑒧𑒩𑒱-𑒐𑒣𑒱
𑒥𑒱𑒪𑒰𑒨𑒥

𑒒𑒩 𑒂𑒿𑒑𑒢 𑒥𑒯𑒰𑒩𑒱
𑒑𑒰𑒧𑒧𑒹
𑒂𑒥𑒲 𑒠𑒳𑒂𑒩𑒱
𑒠𑒋 𑒠𑒴𑒦𑒱 𑒑𑒰𑒋𑒏𑒹𑒿
𑒧𑒰𑒪𑒏 𑒒𑒩𑒧𑒹 𑒒𑒴𑒩 𑒪𑒑𑒰𑒨

𑒤𑒹𑒩 𑒣𑒻𑓀𑒖𑒰𑒥𑒧𑒹
𑒔𑒰𑒯𑒏 𑒮𑓂𑒫𑒰𑒠 𑒏𑒞𑒹𑒏 𑒢𑒲𑒏
𑒠𑒱𑒢 𑒦𑒩𑒱 𑒐𑒙𑒢𑒲𑒏 𑒥𑒰𑒠𑒼
𑒢𑒯𑒱 𑒟𑒰𑒏𑒋 𑒕𑒪𑒯𑒳𑒿 𑒧𑒲𑒞
𑒂𑒥 𑒮𑒳𑒢𑒻𑒞 𑒕𑒱𑒨𑒻𑒏 𑒖𑒹 𑒔𑒰𑒯𑒧𑒹 𑒯𑒤𑒲𑒧 𑒩𑒯𑒻𑒞 𑒕𑒪 𑒧𑒱𑒪𑒰𑒍𑒪”

𑒞𑒐𑒢𑒹 𑒍𑒯𑒱 𑒥𑒔𑓂𑒔𑒰𑒏 𑒮𑒼𑒗𑒰𑒿
𑒒𑒼𑒩𑒢𑒏 𑒕𑒞𑓂𑒞𑒰 𑒐𑒮𑒪
𑒧𑒼𑒢 𑒣𑒛𑓃𑒪𑒋 𑒑𑒰𑒧

𑒒𑒳𑒩𑒱 𑒔𑒪𑒴 𑒠𑒹𑒬 𑒥𑒖𑒰𑒍𑒪
𑒧𑒱𑒟𑒱𑒪𑒰𑒏 𑒧𑒰𑒙𑒱𑒏 𑒫𑒰𑒮
𑒂𑒧𑒏 𑒂𑒋𑒪 𑒁𑒕𑒱 𑒧𑒰𑒮

𑒑𑒰𑒕𑒏 𑒣𑒰𑒞 𑒐𑒮𑒱 𑒩𑒯𑒪
𑒪𑒖𑒥𑒱𑒖𑓂𑒖𑒲 𑒮𑒦 𑒣𑒮𑒩𑒪 𑒯𑒼𑒋𑒞
𑒑𑒰𑒕𑒏 𑒖𑒛𑓃𑒱𑒏 𑒔𑒰𑒩𑒴𑒏𑒰𑒞

𑒢𑒯𑒱𑒋 𑒑𑒰𑒕𑒏 𑒖𑒛𑓃𑒱 𑒥𑒢𑒹𑒪𑒯𑒳𑒿
𑒢𑒯𑒱𑒋 𑒣𑒼𑒐𑒩𑒱𑒏 𑒒𑒰𑒙
𑒋𑒏 𑒣𑒹𑒩𑒱𑒨𑒼𑒣𑒩 𑒖𑒢𑒧𑒪 𑒯𑒼𑒋𑒞
𑒁𑒏𑓂𑒐𑒖 𑒠𑒴𑒦𑒱 𑒂 𑒏𑒰𑒿𑒙

𑒞𑒩𑒹𑒑𑒝𑒏 𑒞𑒿 𑒠𑒩𑓂𑒬𑒢𑒼 𑒢𑒯𑒱 𑒯𑒼𑒃𑒋
𑒣𑓂𑒩𑒠𑒴𑒭𑒝 𑒏𑒱𑒠𑒢𑒱 𑒋𑒞𑒋
𑒩𑒼𑒏𑒪𑒏 𑒔𑒢𑓂𑒠𑒧𑒰𑒧𑒰𑒏𑒹𑒿
𑒟𑒰𑒩𑒲𑒨𑒼𑒧𑒹 𑒂𑒥𑒋𑒮𑒿

𑒯𑒧𑒩𑒰 𑒄 𑒮𑒦 𑒏𑒱𑒠𑒢 𑒥𑒱𑒯𑒰𑒩𑒲 𑒏𑒯𑒻𑒋
𑒏𑓂𑒨𑒼 𑒪𑒋 𑒔𑒪𑒴 𑒠𑒹𑒬 𑒒𑒳𑒩𑒰 𑒏𑒋
𑒧𑒼𑒢 𑒢𑒯𑒱 𑒋𑒞𑒋 𑒪𑒑𑒻𑒋

𑒧𑒰𑒋𑒏 𑒥𑒩𑒞𑒢 𑒙𑒱𑒢𑒯𑒲 𑒖𑒯𑒱𑒨𑒰 𑒏𑒱𑒢𑒰𑒋𑒪
𑒏𑒞𑒹𑒏 𑒯𑒿𑒮𑒪 𑒩𑒯𑒲 𑒣𑓂𑒩𑒮𑒢𑓂𑒢 𑒦𑒋 𑒮𑒦 𑒦𑒰𑒋
𑒥𑒹𑒩𑒰-𑒥𑒹𑒩𑒲 𑒐𑒰𑒃𑒞 𑒍𑒯𑒱 𑒟𑒰𑒩𑒲𑒧𑒹

𑒋𑒯𑒱 𑒠𑒱𑒪𑓂𑒪𑒲 𑒢𑒑𑒩𑒱𑒨𑒰𑒧𑒹
𑒮𑓂𑒙𑒲𑒪𑒏 𑒥𑒩𑒞𑒢 𑒥𑒰𑒮𑒢
𑒧𑒳𑒠𑒰 𑒮𑓂𑒫𑒰𑒠 𑒍𑒯𑒱 𑒙𑒱𑒢𑒯𑒲 𑒟𑒰𑒩𑒲𑒏
𑒖𑒹 𑒮𑓂𑒫𑒰𑒠𑒱-𑒮𑓂𑒫𑒰𑒠𑒱 𑒐𑒨𑒢𑒹 𑒩𑒯𑒲
𑒣𑒞𑒰 𑒢𑒯𑒱 𑒒𑒳𑒩𑒱 𑒏𑒋 𑒖𑒰𑒋𑒥
𑒂𑒏𑒱 𑒋𑒞𑒯𑒱 𑒧𑒩𑒱-𑒐𑒣𑒱
𑒥𑒱𑒪𑒰𑒨𑒥

𑒥𑒏𑒛𑓃𑒲𑒏 𑒦𑒹𑒩𑒰𑒛𑓃𑒲
𑒐𑒩𑒛𑓃𑒃𑒞 𑒮𑒳𑒐𑒰𑒋𑒪 𑒣𑒰𑒞
𑒣𑒼𑒐𑒩𑒱𑒏 𑒧𑒯𑒰𑒩𑒣𑒩
𑒥𑒥𑒴𑒩𑒏 𑒏𑒰𑒿𑒙
𑒅𑒖𑓂𑒖𑒩 𑒮𑒣𑒹𑒞 𑒥𑒱𑒐𑒰𑒯

𑒧𑒳𑒠𑒰 𑒋𑒯𑒱 𑒠𑒱𑒪𑓂𑒪𑒲 𑒢𑒑𑒩𑒱𑒨𑒰𑒏
𑒅𑒖𑓂𑒖𑒩 𑒮𑒣𑒹𑒞 𑒪𑒼𑒏𑒮𑒿 𑒥𑒹𑒬𑒲 𑒥𑒱𑒐𑒰𑒯 𑒢𑒯𑒱
𑒖𑒞𑒹𑒏 𑒥𑒱𑒐𑒰𑒯 𑒥𑒼𑒪
𑒍𑒯𑒴𑒮𑒿 𑒥𑒹𑒬𑒲 𑒧𑒰𑒩𑒴𑒐 𑒒𑒵𑒝𑒰𑒨𑒳𑒏𑓂𑒞 𑒠𑒵𑒭𑓂𑒙𑒱

𑒥𑒱𑒯𑒰𑒩𑒲 ! 𑒥𑒱𑒯𑒰𑒩𑒲 ! 𑒮𑓂𑒫𑒩𑒏 𑒥𑒲𑒔 !
𑒥𑒹𑒔𑒻𑒞 𑒕𑒲 𑒏𑒏𑒥𑒰 𑒣𑒰𑒣𑒛𑓃 𑒧𑒮𑒰𑒖𑒩

𑒖𑒰𑒛𑓃𑒏 𑒩𑒰𑒞𑒱
𑒚𑒱𑒚𑒳𑒩𑒻𑒞 𑒄 𑒑𑒰𑒕
𑒥𑒮𑒰𑒞 𑒮𑒹𑒯𑒼 𑒍𑒯𑒢𑒹 𑒔𑒝𑓂𑒛𑒰𑒪

𑒮𑒼𑒗𑒰𑒿𑒧𑒹 𑒋𑒏𑒙𑒰 𑒑𑒰𑒕𑒧𑒹 𑒁𑒕𑒱 𑒕𑒯 𑒧𑒰𑒩𑒪
𑒢𑒱𑒏𑒪𑒻𑒞 𑒁𑒕𑒱 𑒍𑒏𑒩𑒰𑒮𑒿 𑒐𑒴𑒢
𑒅𑒖𑓂𑒖𑒩-𑒪𑒪𑒾𑒢
𑒧𑒳𑒠𑒰 𑒤𑒹𑒩 𑒥𑒢𑒻𑒋 𑒟𑒪𑒟𑒪 𑒚𑒼𑒮 𑒪𑒮𑓂𑒮𑒰

𑒖𑒰𑒛𑓃𑒧𑒹 𑒮𑒳𑒐𑒰𑒋𑒪 𑒮𑒢
𑒑𑒩𑒧𑒲𑒧𑒹 𑒗𑒩𑒏𑒪 𑒮𑒢
𑒄 𑒑𑒰𑒕-𑒣𑒰𑒞
𑒮𑒱𑒐𑒥𑒻𑒋 𑒩𑒯𑒢𑒰𑒃 𑒁𑒮𑒑𑒩 𑒂 𑒋𑒏𑒹𑒚𑒰𑒧
𑒥𑒱𑒢𑒳 𑒦𑒹𑒢𑒹 𑒁𑒏𑒔𑓂𑒕
𑒮𑒰𑒪𑒏 𑒮𑒰𑒪

𑒠𑒠𑒱𑒨𑒰 𑒖𑒹 𑒠𑒻𑒞 𑒩𑒯𑒋 𑒁𑒩𑓂𑒒𑓂𑒨 𑒠𑒱𑒫𑒰𑒏𑒩𑒏𑒹𑒿
𑒣𑒰𑒕𑒴𑒧𑒹 𑒐𑒮𑒥𑒻𑒞 𑒩𑒯𑒟𑒱 𑒣𑒰𑒢𑒱 𑒞𑒛𑓃𑒰𑒏
𑒥𑒾𑒂 𑒧𑒰𑒢𑒹 𑒯𑒧
𑒣𑒋𑒩 𑒣𑒙𑒏𑒱 𑒏𑒴𑒠𑒋 𑒕𑒪𑒯𑒳𑒿 𑒕𑒣𑒰𑒏 𑒕𑒣𑒰𑒏

𑒣𑒞𑒰 𑒢𑒯𑒱 𑒒𑒳𑒩𑒱 𑒏𑒋 𑒖𑒰𑒋𑒥
𑒂𑒏𑒱 𑒋𑒞𑒯𑒱 𑒧𑒩𑒱-𑒐𑒣𑒱
𑒥𑒱𑒪𑒰𑒨𑒥

विदेह - प्रथम मैथिली पाक्षिक ई पत्रिका/ भालसरिक गाछ

भालसरिक गाछ/ विदेह- इन्टरनेट (अंतर्जाल) पर मैथिलीक पहिल उपस्थिति

Friday, October 21, 2022

गजेन्द्र ठाकुर- कविता-संग्रह- सहस्राब्‍दीक चौपड़पर

No comments:

Post a Comment

विदेह ४०६ म अंक १५ नवम्बर २०२४ (वर्ष १७ मास २०३ अंक ४०६)