गजेन्द्र ठाकुर- जगदीश प्रसाद मण्डल- एकटा बायोग्राफी

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪- 𑒋𑒏𑒙𑒰 𑒥𑒰𑒨𑒼𑒑𑓂𑒩𑒰𑒤𑒲







𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩










𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢

𑒌 𑒣𑒼𑒟𑒲𑒏 𑒮𑒩𑓂𑒫𑒰𑒡𑒱𑒏𑒰𑒩 𑒮𑒳𑒩𑒏𑓂𑒭𑒱𑒞 𑒁𑒕𑒱। 𑒏𑒰𑒹𑒣𑒲𑒩𑒰𑒃𑒙 (©) 𑒡𑒰𑒩𑒏𑒏 𑒪𑒱𑒐𑒱𑒞 𑒁𑒢𑒳𑒧𑒞𑒱𑒏 𑒥𑒱𑒢𑒰 𑒣𑒼𑒟𑒲𑒏 𑒏𑒼𑒢𑒼 𑒁𑓀𑒬𑒏 𑒕𑒰𑒨𑒰 𑒣𑓂𑒩𑒞𑒱𑒋𑒫𑓀 𑒩𑒱𑒏𑒰𑒛𑒱𑓀𑒑 𑒮𑒯𑒱𑒞 𑒃𑒪𑒹𑒏𑓂𑒙𑓂𑒩𑒰𑒢𑒱𑒏 𑒁𑒟𑒫𑒰 𑒨𑒰𑓀𑒞𑓂𑒩𑒱𑒏, 𑒏𑒼𑒢𑒼 𑒧𑒰𑒡𑓂𑒨𑒧𑒮𑒿, 𑒁𑒟𑒫𑒰 𑒖𑓂𑒘𑒰𑒢𑒏 𑒮𑓀𑒑𑓂𑒩𑒯𑒝 𑒫𑒰 𑒣𑒳𑒢𑒩𑓂𑒣𑓂𑒩𑒨𑒼𑒑𑒏 𑒣𑓂𑒩𑒝𑒰𑒪𑒲 𑒠𑓂𑒫𑒰𑒩𑒰 𑒏𑒼𑒢𑒼 𑒩𑒴𑒣𑒧𑒹 𑒣𑒳𑒢𑒩𑒳𑒞𑓂𑒣𑒰𑒠𑒱𑒞 𑒁𑒟𑒫𑒰 𑒮𑓀𑒔𑒰𑒩𑒱𑒞-𑒣𑓂𑒩𑒮𑒰𑒩𑒱𑒞 𑒢𑒯𑒱𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱।


ISBN : 978-93-80538-68-6

𑒧𑒴𑒪𑓂𑒨 : 𑒦𑒰. 𑒩𑒴. 𑓑𑓐𑓐/-
𑒮𑓀𑒮𑓂𑒏𑒩𑒝 : 𑓒𑓐𑓑𑓒
© 𑒣𑓂𑒩𑒲𑒞𑒱 𑒚𑒰𑒏𑒳𑒩
𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢
𑒩𑒖𑒱𑒮𑓂𑒙𑒩𑓂𑒛 𑒂𑒹𑒤𑒱𑒮 : 𑓘/𑓒𑓑, 𑒦𑒴𑒞𑒪, 𑒢𑓂𑒨𑒴 𑒩𑒰𑒖𑒹𑒢𑓂𑒠𑓂𑒩 𑒢𑒑𑒩, 𑒢𑒄 𑒠𑒱𑒪𑓂𑒪𑒲- 𑓑𑓑𑓐𑓐𑓐𑓘.
𑒠𑒴𑒩𑒦𑒰𑒭- (𑓐𑓑𑓑) 𑓒𑓕𑓘𑓘𑓙𑓖𑓕𑓖-𑓕𑓘
𑒤𑒻𑒏𑓂𑒮- (𑓐𑓑𑓑) 𑓒𑓕𑓘𑓘𑓙𑓖𑓕𑓗

Website : http://www.shruti-publication.com
e-mail : shruti.publication@shruti-publication.com

Printed at : Ajay Arts, Delhi-110002

Distributor :
Pallavi Distributors, Ward no-6, Nirmali (Supaul).
𑒧𑒼.- 𑓙𑓕𑓗𑓒𑓔𑓕𑓐𑓔𑓐𑓕, 𑓙𑓙𑓓𑓑𑓖𑓕𑓔𑓗𑓔𑓒
Author’s Acknowledgement: This biography is based on discussions held with Sh. Jagdish Prasad Mandal, with his son Sh. Umesh Mandal and with people of Berma and other adjacent villages. It was corroborated with contemporary records. I belong to Mehath Village, which is in vicinity of Berma, that gave me added advantage so far as veracity of facts are concerned.

“Jagdish Prasad Mandal- A Biography” by Gajendra Thakur (in Maithili).
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪- 𑒋𑒏𑒙𑒰 𑒥𑒰𑒨𑒼𑒑𑓂𑒩𑒰𑒤𑒲

𑓐
𑒮𑒢𑓂 𑒮𑒻𑓀𑒞𑒰𑒪𑒲𑒮...
𑒦𑒰𑒩𑒞𑒏 𑒮𑓂𑒫𑒞𑓀𑒞𑓂𑒩 𑒞𑓂𑒩𑒱𑒫𑒰𑒩𑓂𑒝𑒱𑒏 𑒗𑒝𑓂𑒛𑒰 𑒤𑒯𑒩𑒰 𑒩𑒯𑒪 𑒕𑒪।
𑒧𑒳𑒠𑒰 𑒏𑒧𑓂𑒨𑒴𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒧𑒰𑒢𑒢𑒰𑒃 𑒕𑒪 𑒖𑒹 𑒦𑒰𑒩𑒞 𑒮𑓂𑒫𑒞𑓀𑒞𑓂𑒩 𑒢𑒻 𑒦𑒹𑒪 𑒁𑒕𑒱।
𑒁𑒮𑒪𑒲 𑒮𑓂𑒫𑒞𑓀𑒞𑓂𑒩𑒞𑒰 𑒦𑒹𑒙𑒥 𑒥𑒰𑒿𑒏𑒲 𑒕𑒻...
𑒧𑒱𑒟𑒱𑒪𑒰𑒏 𑒋𑒏𑒙𑒰 𑒑𑒰𑒧…
𑒖𑒢𑓂𑒧 𑒦𑒹𑒪 𑒩𑒯𑒋 𑒋𑒏𑒙𑒰 𑒥𑒔𑓂𑒔𑒰𑒏.. 𑒍𑒯𑒲 𑒥𑒩𑓂𑒐 ...
𑒍𑒃 𑒮𑓂𑒫𑒞𑓀𑒞𑓂𑒩 𑒫𑒰 𑒮𑓂𑒫𑒞𑓀𑒞𑓂𑒩 𑒢𑒻 𑒦𑒰𑒩𑒞𑒧𑒹...
𑒣𑒱𑒞𑒰𑒏 𑒧𑒵𑒞𑓂𑒨𑒳...𑒑𑒩𑒲𑒥𑒲.. 𑒏𑒹𑒮 𑒧𑒼𑒏𑒠𑒧𑒰...
𑒫𑓀𑒔𑒱𑒞𑒏 𑒪𑒹𑒪 𑒮𑓀𑒒𑒩𑓂𑒭𑒧𑒹 𑒦𑒹𑒙𑒪𑒻 𑒮𑓂𑒫𑒞𑓀𑒞𑓂𑒩 𑒦𑒰𑒩𑒞𑒏 𑒫𑒰 𑒮𑓂𑒫𑒞𑓀𑒞𑓂𑒩 𑒢𑒻 𑒦𑒹𑒪 𑒦𑒰𑒩𑒞𑒏 𑒖𑒹𑒪....
𑒂𑒃 𑒥𑒹𑒩𑒧𑒰𑒧𑒹 𑒣𑒰𑒿𑒔-𑒠𑒮 𑒥𑒲𑒒𑒰𑒮𑒿 𑒣𑒻𑒒 𑒖𑒼𑒞 𑒏𑒏𑒩𑒼 𑒢𑒻..
𑒍𑒃 𑒑𑒰𑒧𑒧𑒹 𑒖𑒲𑒫𑒱𑒞 𑒁𑒕𑒱 𑒂𑒃𑒨𑒼 𑒏𑒱𑒮𑒰𑒢𑒲 𑒂𑒞𑓂𑒧𑒢𑒱𑒩𑓂𑒦𑒩 𑒮𑓀𑒮𑓂𑒏𑒵𑒞𑒱...
𑒣𑒳𑒩𑒼𑒯𑒱𑒞𑒫𑒰𑒠𑒣𑒩 𑒥𑓂𑒩𑒰𑒯𑓂𑒧𑒝𑒫𑒰𑒠𑒏 𑒋𑒏𑒕𑒞𑓂𑒩 𑒩𑒰𑒖𑓂𑒨𑒏 𑒖𑒞𑓄 𑒦𑒹𑒪 𑒮𑒧𑒰𑒣𑓂𑒞𑒱..
𑒮𑓀𑒒𑒩𑓂𑒭𑒏 𑒮𑒧𑒰𑒣𑓂𑒞𑒱𑒏 𑒥𑒰𑒠 𑒖𑒱𑒢𑒏𑒩 𑒪𑒹𑒐𑒢 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨𑒧𑒹 𑒂𑒢𑒱 𑒠𑒹𑒪𑒏 𑒣𑒳𑒢𑒩𑓂𑒖𑒰𑒑𑒩𑒝...

𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪- 𑒋𑒏𑒙𑒰 𑒥𑒰𑒨𑒼𑒑𑓂𑒩𑒰𑒤𑒲... 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩 𑒠𑓂𑒫𑒰𑒩𑒰


𑓑
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒖𑒢𑓂𑒧 𑓕 𑒖𑒳𑒪𑒰𑒃 𑓑𑓙𑓔𑓗 𑒄. 𑒏𑒹𑒿 𑒦𑒹𑒪𑒢𑓂𑒯𑒱। 𑒦𑒰𑒩𑒞𑒏 𑒮𑓂𑒫𑒞𑓀𑒞𑓂𑒩𑒞𑒰𑒏 𑒞𑒱𑒟𑒱 𑒞𑒋 𑒦𑓄 𑒑𑒹𑒪 𑒩𑒯𑒻। 𑒁𑓀𑒑𑓂𑒩𑒹𑒖 𑒖𑒰𑒃𑒨𑒹 𑒥𑒪𑒰 𑒕𑒪।
“𑒠𑒱𑒢𑒰𑓀𑒏 𑓕-𑓗-𑓑𑓙𑓔𑓗 𑒄.𑒏𑒹𑒿 𑒖𑒢𑓂𑒧 𑒦𑒹𑒪। 𑒦𑒩𑒪-𑒣𑒳𑒩𑒪 𑒣𑒩𑒱𑒫𑒰𑒩। 𑒞𑒲𑒢 𑒣𑒲𑒜𑓃𑒲𑒮𑒿 𑒋𑒏 𑒣𑒳𑒩𑒳𑒐𑒱𑒨𑒰𑒯 𑒣𑒩𑒱𑒫𑒰𑒩 𑒔𑒪𑒱 𑒁𑒥𑒻 𑒕𑒪। 𑒖𑒯𑒱𑒢𑒰 𑒥𑒰𑒥𑒰 𑒞𑒯𑒱𑒢𑒰 𑒣𑒱𑒞𑒰 𑒕𑒪𑒰𑒯। 𑒒𑒩 𑒪𑒑 𑒣𑒼𑒐𑒩𑒱-𑒃𑒢𑒰𑒩 𑒩𑒯𑒢𑒹 𑒣𑒰𑒢𑒱𑒏 𑒮𑒳𑒫𑒱𑒡𑒰 𑒩𑒯𑒪।”
𑒧𑒰𑒞𑒰-𑒣𑒱𑒞𑒰𑒏 𑒮𑓀𑒑 𑒠𑒲𑒠𑒲𑒨𑒼𑒏 𑒣𑒩𑒱𑒫𑒰𑒩𑒏 𑒮𑓀𑒑 𑒧𑒱𑒪𑒪-𑒖𑒳𑒪𑒪 𑒣𑒩𑒱𑒫𑒰𑒩। 𑒞𑒃 𑒮𑓀𑒑 𑒁𑒣𑒢𑒼 𑒏𑒱𑒕𑒳 𑒖𑒧𑒲𑒢; 𑒂 𑒑𑒰𑒧𑒏 𑒖𑒹 𑒥𑒯𑒩𑒥𑒻𑒨𑒰 𑒧𑒰𑒪𑒱𑒏 𑒩𑒯𑒟𑒱 𑒯𑒳𑒢𑒏𑒩 𑒐𑒹𑒞𑒼 𑒥𑒙𑒰𑒃 𑒏𑒩𑒻 𑒖𑒰𑒃 𑒕𑒪𑒰𑒯 𑒖𑒃𑒮𑒿 𑒐𑒹𑒥𑒰-𑒣𑒲𑒥𑒰𑒏 𑒁𑒦𑒰𑒫 𑒮𑒹𑒯𑒼 𑒢𑒻। 𑒋𑒏 𑒞𑒿 𑒫𑓀𑒬𑒑𑒞𑒼 𑒂𑒡𑒰𑒩 𑒠𑒼𑒮𑒩 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒣𑒱𑒞𑒼𑒏 𑒆𑒣𑒩 𑒣𑒰𑒩𑒱𑒫𑒰𑒩𑒱𑒏-𑒮𑒧𑒰𑒖𑒱𑒏 𑒣𑓂𑒩𑒦𑒰𑒫 𑒣𑒛𑓃𑒪 𑒕𑒪𑒢𑒱 𑒖𑒃𑒮𑒿 𑒏𑒱𑒕𑒳 𑒁𑒑𑒳𑒂𑒋𑒪 𑒫𑒱𑒔𑒰𑒩 𑒩𑒯𑒢𑒱।
𑒖𑒯𑒱𑒢𑒰 𑒦𑒞𑒦𑒼𑒖𑒧𑒹 𑒥𑒩𑒲 𑒣𑒛𑓃𑒱𑒞𑒹 𑒣𑓀𑒔 𑒥𑒴𑒗𑒱 𑒖𑒰𑒃𑒞 𑒖𑒹 𑒦𑒼𑒖 𑒁𑓀𑒞𑒱𑒧 𑒠𑒾𑒛𑓃𑒧𑒹 𑒂𑒥𑒱 𑒑𑒹𑒪 𑒞𑒿𑒋 𑒂𑒥 𑒃𑒢𑓂𑒞𑒖𑒰𑒩 𑒢𑒻 𑒏𑒩𑒥𑒰𑒏 𑒔𑒰𑒯𑒲, 𑒖𑒿 𑒃𑒢𑓂𑒞𑒖𑒰𑒩 𑒏𑒩𑒥 𑒞𑒿 𑒦𑒳𑒐𑒪𑒹 𑒅𑒚𑒥। 𑒞𑒃𑒮𑒿 𑒢𑒲𑒏 𑒖𑒹 𑒧𑒰𑒩𑒱-𑒡𑒴𑒮𑒱 𑒗𑒥 𑒠𑓄 𑒏𑒮𑒱 𑒪𑒲 𑒢𑒻 𑒞𑒿 𑒠𑒼𑒐 𑒏𑒹𑒏𑒩 𑒯𑒹𑒞𑒻। 𑒞𑒯𑒱𑒢𑒰 𑒁𑓀𑒑𑓂𑒩𑒹𑒖𑒲 𑒬𑒰𑒮𑒢 𑒁𑒣𑒢 𑒮𑒦 𑒏𑒱𑒕𑒳 𑒮𑒧𑒹𑒙𑒱 𑒩𑒯𑒪 𑒕𑒪। 𑓑𑓙𑓔𑓒𑒄𑓀. 𑒧𑒹 𑒖𑒹 𑒞𑒴𑒤𑒰𑒢𑒲 𑒂𑒢𑓂𑒠𑒼𑒪𑒢 𑒅𑒚𑒪 𑒍 𑒏𑒧𑒪 𑒢𑒻, 𑒅𑒑𑓂𑒩𑒮𑒿 𑒅𑒑𑓂𑒩𑒞𑒩𑒹 𑒦𑒹𑒪 𑒖𑒰𑒃𑒞 𑒕𑒪, 𑒖𑒹𑒏𑒩 𑒣𑒩𑒱𑒝𑒰𑒧 𑓑𑓕 𑒁𑒑𑒮𑓂𑒞 𑓑𑓙𑓔𑓗𑒄𑓀. 𑒕𑒲।
𑒧𑒳𑒠𑒰 𑒠𑒹𑒬𑒼𑒏 𑒠𑒬𑒰 𑒋𑒏𑒧𑒳𑒛𑓃𑒱𑒨𑒰 𑒢𑒻, 𑒁𑒣𑒢𑒼𑒧𑒹 𑒐𑒙𑒣𑒙 𑒯𑒼𑒃𑒞𑒹 𑒕𑒪। 𑒏𑒞𑒾 𑒖𑒰𑒞𑒲𑒨 𑒅𑒢𑓂𑒧𑒰𑒠 𑒞𑒿 𑒏𑒞𑒾 𑒮𑒰𑒧𑓂𑒣𑓂𑒩𑒰𑒠𑒰𑒨𑒱𑒏 𑒅𑒢𑓂𑒧𑒰𑒠। 𑒏𑒞𑒾 𑒡𑒢-𑒮𑒧𑓂𑒣𑒞𑒱𑒏 𑒞𑒿 𑒏𑒞𑒾 𑒃𑒖𑓂𑒖𑒞-𑒂𑒥𑒩𑒴𑒏। 𑒖𑒯𑒱𑒢𑒰 𑒮𑓂𑒫𑒞𑓀𑒞𑓂𑒩𑒞𑒰 𑒮𑓀𑒑𑓂𑒩𑒰𑒧 𑒖𑒼𑒩 𑒣𑒏𑒛𑓃𑒢𑒹 𑒞𑒯𑒱𑒢𑒰 𑒥𑓀𑒑𑒰𑒪𑒏 𑒁𑒏𑒰𑒪 𑒂 𑒥𑒱𑒯𑒰𑒩𑒏 𑒦𑒴𑒧𑒏𑒧 (𑓑𑓙𑓓𑓔)𑒏 𑒣𑓂𑒩𑒦𑒰𑒫𑒮𑒿 𑒮𑒹𑒯𑒼 𑒂𑒩𑓂𑒟𑒱𑒏 𑒮𑓂𑒟𑒱𑒞𑒱 𑒣𑓂𑒩𑒦𑒰𑒫𑒱𑒞 𑒕𑒪। 𑒮𑓂𑒫𑒞𑓀𑒞𑓂𑒩𑒞𑒰𑒏 𑒪𑒛𑓃𑒰𑒃𑒧𑒹 𑒧𑒱𑒟𑒱𑒪𑒰𑓀𑒔𑒪𑒏 𑒨𑒼𑒑𑒠𑒰𑒢 𑒠𑒹𑒬𑒏 𑒏𑒼𑒢𑒼 𑒦𑒰𑒑𑒮𑒿 𑒏𑒧 𑒢𑒻 𑒩𑒯𑒪। 𑒋𑒏 𑒠𑒱𑒮 𑒣𑒳𑒮𑓂𑒞𑒻𑒢𑒲 𑒮𑒼𑒔𑒏 𑒧𑒳𑒿𑒯𑒣𑒳𑒩𑒳𑒐 𑒩𑒯𑒟𑒱 𑒞𑒿 𑒠𑒼𑒮𑒩 𑒠𑒱𑒮 𑓑𑓙𑓔𑓐𑒄𑓀.𑒏 𑒥𑒰𑒠 𑒮𑒼𑒬𑒪𑒱𑒮𑓂𑒙 𑒣𑒰𑒩𑓂𑒙𑒲 𑒂 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒩𑒰𑒖𑒢𑒲𑒞𑒱𑒏 𑒮𑒼𑒔 𑒣𑒻𑒠𑒰 𑒏𑒩𑒻𑒞 𑒩𑒯𑒪 𑒕𑒪। 𑒮𑒧𑒰𑒖𑒼𑒏 𑒥𑒲𑒔 𑒖𑒰𑒑𑒩𑒴𑒏𑒞𑒰𑒏 𑒪𑒯𑒩𑒱 𑒔𑒪𑒻𑒞 𑒩𑒯𑒪। 𑒖𑒯𑒱𑒢𑒰 𑒮𑒼𑒬𑒪𑒱𑒮𑓂𑒙 𑒣𑒰𑒩𑓂𑒙𑒲 𑒁𑒣𑒢 𑒏𑒱𑒕𑒳 𑒏𑒰𑒩𑓂𑒨𑒏𑓂𑒩𑒧 𑒪𑓄 𑒚𑒰𑒜𑓃 𑒕𑒪 𑒞𑒯𑒱𑒢𑒰 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒮𑒹𑒯𑒼, 𑒠𑒩𑒦𑓀𑒑𑒰 𑒖𑒱𑒪𑒰𑒏 𑒣𑒯𑒱𑒪 𑒙𑒲𑒧 𑓑𑓙𑓓𑓙-𑓔𑓐 𑒧𑒹 𑒣𑒰𑒩𑓂𑒙𑒲𑒏 𑒮𑒠𑒮𑓂𑒨𑒞𑒰 𑒑𑓂𑒩𑒯𑒝 𑒏𑓄 𑒔𑒳𑒏𑒪 𑒕𑒪𑒰𑒯, 𑒫𑒤𑒰𑒠𑒰𑒩 𑒏𑒰𑒩𑓂𑒨𑒏𑒩𑓂𑒞𑒰 𑒥𑒢𑒱 𑒅𑒞𑒩𑒱 𑒔𑒳𑒏𑒪 𑒕𑒪𑒰𑒯। 𑒞𑒯𑒱𑒢𑒰 𑒮𑒼𑒬𑒪𑒱𑒮𑓂𑒙𑒼 𑒣𑒰𑒩𑓂𑒙𑒲, 𑒑𑒰𑒧-𑒑𑒰𑒧 𑒣𑒯𑒳𑒿𑒔𑒱 𑒔𑒳𑒏𑒪 𑒕𑒪। 𑓑𑓙𑓔𑓒 𑒄𑓀.𑒏 𑒖𑒢-𑒂𑒢𑓂𑒠𑒼𑒪𑒢 𑒣𑒳𑒮𑓂𑒞𑒻𑒢𑒲 𑒮𑒼𑒔𑒧𑒹 𑒡𑒏𑓂𑒏𑒰 𑒧𑒰𑒩𑒪𑒏, 𑒡𑒏𑓂𑒏𑒰𑒮𑒿 𑒫𑒱𑒔𑒰𑒩𑒧𑒹 𑒙𑒴𑒙-𑒤𑒰𑒙 𑒦𑒹𑒪, 𑒡𑒏𑓂𑒏𑒰𑒮𑒿 𑒙𑒴𑒙𑒱 𑒪𑒼𑒏 𑒢𑒫 𑒮𑒼𑒔𑒏 𑒮𑓀𑒑 𑒮𑒹𑒯𑒼 𑒋𑒪𑒰𑒯। 𑒮𑒰𑒧𑒰𑒖𑒱𑒏 𑒣𑒩𑒱𑒫𑒹𑒬 𑒄 𑒮𑒼𑒔 𑒣𑒻𑒠𑒰 𑒏𑓄 𑒔𑒳𑒏𑒪 𑒕𑒪 𑒖𑒹 𑒖𑒧𑒲𑒢𑓂𑒠𑒰𑒩𑒲 𑒮𑒧𑒰𑒣𑓂𑒞 𑒯𑒹𑒥𑒹 𑒏𑒩𑒞𑒻, 𑒩𑒰𑒖𑒰-𑒩𑒖𑒥𑒰𑒩 𑒜𑒯𑒥𑒹 𑒏𑒩𑒞𑒻, 𑒂𑒃 𑒡𑒩𑒱𑒏 𑒖𑒹 𑒖𑒧𑒲𑒢 𑒢𑒱𑒪𑒰𑒧𑒲𑒏 𑒣𑓂𑒩𑒟𑒰 𑒕𑒪 𑒂 𑒧𑒰𑒪𑒑𑒳𑒖𑒰𑒩𑒲 𑒁𑒮𑒳𑒪𑒏 𑒖𑒳𑒪𑓂𑒧 𑒕𑒪 𑒍 𑒧𑒹𑒙𑒹𑒥𑒹 𑒏𑒩𑒞𑒻। 𑒢𑒫 𑒫𑒱𑒔𑒰𑒩 𑒖𑒢-𑒑𑒝𑒏 𑒥𑒲𑒔 𑒣𑒻𑒠𑒰 𑒪𑓄 𑒔𑒳𑒏𑒪 𑒕𑒪। 𑒧𑒱𑒟𑒱𑒪𑒰𑓀𑒔𑒏 𑒥𑒲𑒔 𑒗𑓀𑒗𑒰𑒩𑒣𑒳𑒩 𑒃𑒪𑒰𑒏𑒰𑒏 𑒁𑒣𑓂𑒣𑒢 𑒣𑓂𑒩𑒞𑒱𑒭𑓂𑒚𑒰 𑒩𑒯𑒪 𑒁𑒕𑒱। 𑒖𑒯𑒱𑒢𑒰 𑒬𑒱𑒏𑓂𑒭𑒰𑒏 𑒏𑓂𑒭𑒹𑒞𑓂𑒩𑒧𑒹 𑒞𑒯𑒱𑒢𑒰 𑒂𑒩𑓂𑒟𑒱𑒏 𑒏𑓂𑒭𑒹𑒞𑓂𑒩𑒧𑒹। 𑒠𑒹𑒬𑒏 𑒣𑒻𑒧𑒰𑒢𑒰𑒧𑒹 𑒃𑒪𑒰𑒏𑒰 𑒣𑒕𑒳𑒂𑒋𑒪 𑒢𑒻 𑒕𑒪, 𑒁𑒑𑒳𑒂𑒋𑒪 𑒕𑒪। 𑒋𑒏𑒮𑒿 𑒋𑒏 𑒧𑒯𑒰𑒢 𑒣𑒳𑒩𑒳𑒭 𑒣𑒻𑒠𑒰 𑒪𑓄 𑒔𑒳𑒏𑒪 𑒕𑒟𑒱। 𑒄 𑒂𑒖𑒰𑒠𑒲𑒏 𑒪𑒛𑓃𑒰𑒃𑒧𑒹 𑒐𑒴𑒢 𑒥𑒯𑒾𑒢𑒱𑒯𑒰𑒩 𑒏𑓂𑒭𑒹𑒞𑓂𑒩 𑒕𑒲। 𑒗𑓀𑒗𑒰𑒩𑒣𑒳𑒩 𑒁𑓀𑒑𑓂𑒩𑒹𑒖𑒏 𑒧𑒳𑒐𑓂𑒨 𑒁𑒛𑓂𑒛𑒰𑒧𑒹 𑒕𑒪। 𑒠𑒧𑒢 𑒢𑒲𑒞𑒱 𑒏𑒞𑒾 𑒔𑒪𑒪 𑒞𑒿 𑒁𑒯𑒴 𑒏𑓂𑒭𑒹𑒞𑓂𑒩𑒧𑒹 𑒔𑒪𑒪। 𑒧𑒱𑒟𑒱𑒪𑒰𑓀𑒔𑒪𑒏 𑒥𑒲𑒔 𑒗𑓀𑒗𑒰𑒩𑒣𑒳𑒩 𑒃𑒪𑒰𑒏𑒰 𑒍 𑒏𑓂𑒭𑒹𑒞𑓂𑒩 𑒕𑒲, 𑒖𑒃𑒧𑒹 𑒧𑒱𑒟𑒱𑒪𑒰𑒏 𑒃𑒞𑒱𑒯𑒰𑒮-𑒠𑒩𑓂𑒬𑒢, 𑒁𑒐𑒢𑒼 𑒗𑒪𑒏𑒱 𑒩𑒯𑒪 𑒁𑒕𑒱। 𑒁𑒐𑒢𑒼 𑒣𑒰𑒟𑒩𑒧𑒹 𑒤𑒴𑒪, 𑒧𑒰𑒙𑒱-𑒣𑒰𑒢𑒱𑒧𑒹 𑒮𑒳𑒑𑓀𑒡 𑒖𑒲𑒫𑒱𑒞 𑒁𑒕𑒱। 𑒏𑓂𑒭𑒹𑒞𑓂𑒩𑒏 𑒑𑒰𑒧-𑒮𑒧𑒰𑒖𑒧𑒹 𑒠𑒩𑓂𑒖𑒢𑒼 𑒖𑒰𑒞𑒱, 𑒠𑒩𑓂𑒖𑒢𑒼 𑒮𑒧𑓂𑒣𑓂𑒩𑒠𑒰𑒨 𑒁𑒠𑒾𑒮𑒿 𑒁𑒐𑒢 𑒡𑒩𑒱 𑒧𑒱𑒪𑒱-𑒖𑒳𑒪𑒱 𑒋𑒏𑒚𑒰𑒧 𑒥𑒰𑒮 𑒏𑒩𑒻𑒞 𑒋𑒪𑒰𑒯 𑒁𑒕𑒱। 𑒦𑒴𑒧𑒱𑒨𑒼𑒏 𑒬𑒏𑓂𑒞𑒱 𑒍𑒯𑒢𑒹 𑒅𑒩𑓂𑒫𑒩 𑒁𑒕𑒱, 𑒄 𑒠𑒹𑒬𑒏 𑒋𑒏 𑒢𑒧𑓂𑒥𑒩 𑒏𑓂𑒭𑒹𑒝𑒲𑒏 𑒮𑒒𑒢 𑒂𑒥𑒰𑒠𑒲𑒥𑒪𑒰 𑒏𑓂𑒭𑒹𑒞𑓂𑒩 𑒁𑒕𑒱।
𑒥𑒲𑒮𑒧 𑒮𑒞𑒰𑒥𑓂𑒠𑒲𑒏 𑒣𑒰𑒿𑒔𑒧 𑒠𑒬𑒏 𑒠𑒹𑒬𑒏𑒹𑒿 𑒌 𑒩𑒴𑒣𑒹𑒿 𑒂𑒢𑓂𑒠𑒼𑒪𑒱𑒞 𑒏𑓄 𑒠𑒹𑒪𑒏 𑒖𑒹 𑒖𑒢-𑒑𑒝 𑒒𑒩-𑒣𑒩𑒱𑒫𑒰𑒩𑒮𑒿 𑒂𑒑𑒴 𑒥𑒜𑓃𑒱 𑒠𑒹𑒬𑒏 𑒪𑒹𑒪 𑒁𑒣𑒢𑒰𑒏𑒹𑒿 𑒁𑒩𑓂𑒣𑒱𑒞 𑒏𑓄 𑒠𑒹𑒪𑒏। 𑒖𑒯𑒱𑒢𑒰 𑒠𑒬𑒏𑒏 𑒣𑒴𑒩𑓂𑒫𑒰𑒩𑓂𑒠𑓂𑒡 𑒂𑒢𑓂𑒠𑒼𑒪𑒱𑒞 𑒏𑒹𑒪𑒏, 𑒞𑒯𑒱𑒢𑒰 𑒋𑒏 𑒮𑓀𑒑 𑒁𑒢𑒹𑒏𑒼 𑒣𑓂𑒩𑒬𑓂𑒢 𑒅𑒚𑒱 𑒏𑓄 𑒚𑒰𑒜𑓃 𑒦𑒹𑒪। 𑒍𑒢𑒰 𑒋𑒏𑒮𑓀𑒑 𑒐𑒳𑒬𑒲 𑒂𑒃 𑒡𑒩𑒱𑒏 𑒠𑒹𑒬𑒏 𑒃𑒞𑒱𑒯𑒰𑒮𑒧𑒹 𑒏𑒯𑒱𑒨𑒼 𑒢𑒻 𑒦𑒹𑒪 𑒕𑒪 𑒖𑒞𑒹 𑒦𑒹𑒪। 𑒖𑒹𑒢𑒰-𑒖𑒹𑒢𑒰 𑒂𑒖𑒰𑒠𑒲𑒏 𑒗𑓀𑒛𑒰 𑒤𑒯𑒩𑒥𑒻𑒏 𑒠𑒱𑒢 𑒪𑒑𑒱𑒔𑒰𑒃𑒞 𑒑𑒹𑒪 𑒞𑒹𑒢𑒰-𑒞𑒹𑒢𑒰 𑒐𑒳𑒬𑒲𑒧𑒹 𑒥𑒜𑓃𑒼𑒞𑒩𑒲 𑒯𑒼𑒃𑒞 𑒑𑒹𑒪। 𑒁𑒰𑒡𑒰 𑒠𑒬𑒏 𑒖𑒯𑒱𑒢𑒰 𑒖𑒑𑒻𑒧𑒹 𑒪𑒰𑒑𑒪, 𑒞𑒯𑒱𑒢𑒰 𑒁𑒰𑒡𑒰 𑒠𑒬𑒏 𑒩𑓀𑒑-𑒩𑓀𑒑𑒏 𑒮𑒣𑒢𑒰 𑒠𑒹𑒐𑒻𑒧𑒹 𑒐𑒳𑒬𑒲𑒮𑒿 𑒥𑒲𑒞𑒪। 𑒮𑒧𑒰𑒖𑒏 𑒥𑒲𑒔 𑒞𑒿 𑒢𑒻 𑒧𑒳𑒠𑒰 𑒠𑒹𑒬𑒏 𑒩𑒰𑒖𑒢𑒲𑒞𑒱𑒧𑒹 𑒂𑒩𑓂𑒟𑒱𑒏 𑒧𑒳𑒠𑓂𑒠𑒰 𑒮𑓂𑒣𑒭𑓂𑒙 𑒫𑒱𑒦𑒰𑒖𑒱𑒞 𑒏𑓄 𑒠𑒹𑒢𑒹 𑒕𑒪। 𑒏𑒱𑒨𑒼 𑒠𑒹𑒬𑒏 𑒣𑒴𑒩𑓂𑒝 𑒂𑒖𑒰𑒠𑒲 𑒠𑒹𑒐𑒻𑒞 𑒕𑒪𑒰𑒯 𑒞𑒿 𑒏𑒱𑒨𑒼 𑒋𑒏𑒩𑒰 𑒢𑒹𑒓𑒩𑒰 𑒂𑒖𑒰𑒠𑒲 𑒥𑒳𑒗𑒻𑒞 𑒕𑒪𑒰𑒯। 𑒍𑒢𑒰 𑒠𑒹𑒬𑒏 𑒦𑒲𑒞𑒩 𑒩𑒾𑒠𑒲, 𑒦𑒳𑒧𑒏𑒧, 𑒖𑒰𑒞𑒱-𑒮𑒧𑓂𑒣𑓂𑒩𑒠𑒰𑒨𑒏 𑒅𑒢𑓂𑒧𑒰𑒠 𑒋𑒞𑒹 𑒖𑒼𑒩 𑒣𑒏𑒛𑓃𑒱 𑒪𑒹𑒢𑒹 𑒕𑒪 𑒖𑒹 𑒦𑒲𑒞𑒩-𑒥𑒰𑒯𑒩𑒏 𑒪𑒛𑓃𑒰𑒃𑒧𑒹 𑒩𑒰𑒖𑒢𑒲𑒞𑒱𑒏 𑒠𑒪 𑒍𑒗𑒩𑒰𑒋𑒪 𑒕𑒪। 𑒍𑒢𑒰 𑒞𑒹𑒪𑒰𑓀𑒑𑒢𑒰 𑒪𑒛𑓃𑒰𑒃 𑒠𑒹𑒬𑒏 𑒮𑓀𑒒𑒩𑓂𑒭𑒏 𑒢𑒏𑓂𑒬𑒰𑒧𑒹 𑒂𑒥𑒱 𑒔𑒳𑒏𑒪 𑒕𑒪। 𑒦𑒰𑒩𑒞-𑒣𑒰𑒏𑒱𑒮𑓂𑒞𑒰𑒢 𑒫𑒱𑒦𑒰𑒖𑒢𑒏 𑒋𑒏-𑒋𑒏 𑒫𑒱𑒦𑒰𑒖𑒏 𑒞𑒞𑓂𑒞𑓂𑒫 𑒖𑒢𑒧𑒰𑒢𑒮𑒏𑒹𑒿 𑒗𑒏𑒗𑒼𑒩𑒱 𑒩𑒯𑒪 𑒕𑒪। 𑒠𑒮𑒼 𑒥𑒩𑓂𑒐𑒏 𑒖𑒹𑒪𑒏 𑒖𑒳𑒛𑓃𑒪 𑒯𑒵𑒠𑒋 𑒮𑓀𑒑𑒲 𑒮𑒦𑒏 𑒥𑒲𑒔 𑒙𑒳𑒙𑒱 𑒩𑒯𑒪 𑒕𑒪𑒢𑒱। 𑒏𑒰𑒪𑒰-𑒣𑒰𑒢𑒲 𑒖𑒯𑒪𑒧𑒹 𑒍 𑒮𑒦 𑒮𑓀𑒑𑒹 𑒕𑒪𑒰𑒯 𑒧𑒳𑒠𑒰 𑒑𑒰𑒧-𑒮𑒧𑒰𑒖 𑒫𑒱𑒦𑒰𑒖𑒱𑒞 𑒦𑓄 𑒑𑒹𑒪𑒢𑒱। 𑓑𑓕 𑒁𑒑𑒮𑓂𑒞 (𑓑𑓔 𑒁𑒑𑒮𑓂𑒞𑒏 𑒥𑒰𑒩𑒯 𑒥𑒖𑒹 𑒩𑒰𑒞𑒱𑒏 𑒥𑒰𑒠)𑒏𑒹𑒿 𑒱𑒞𑒩𑓀𑒑𑒰 𑒗𑓀𑒛𑒰 𑒤𑒯𑒩𑒰𑒋𑒪। 𑒁𑓀𑒑𑓂𑒩𑒹𑒖𑒲 𑒬𑒰𑒮𑒢𑒏 𑒁𑒢𑓂𑒞 𑒦𑒹𑒪।
𑒖𑒢-𑒧𑒰𑒢𑒮𑒏 𑒯𑒵𑒠𑒻𑒧𑒹 𑒐𑒳𑒬𑒲𑒏 𑒪𑒯𑒩𑒱 𑒁𑒮𑒟𑒱𑒩𑒼 𑒢𑒻 𑒦𑒹𑒪 𑒕𑒪 𑒂𑒏𑒱 𑒑𑒰𑒿𑒡𑒲𑒖𑒲𑒏𑒹𑒿 𑒩𑒰𑒖𑒡𑒰𑒢𑒲𑒧𑒹 𑒠𑒱𑒢-𑒠𑒯𑒰𑒛𑓃 𑒑𑒼𑒪𑒲 𑒪𑒑𑒪𑒢𑒱, 𑒖𑒹 𑒬𑒰𑒮𑒢𑒏 𑒮𑓂𑒣𑒭𑓂𑒙 𑒔𑒱𑒞𑓂𑒩 𑒣𑓂𑒩𑒮𑓂𑒞𑒳𑒞 𑒏𑒩𑒻𑒞 𑒁𑒕𑒱। 𑒮𑓀𑒫𑒱𑒡𑒰𑒢 𑒮𑒦𑒰𑒧𑒹 𑒮𑓀𑒫𑒱𑒡𑒰𑒢 𑒥𑒢𑒥 𑒬𑒳𑒩𑒴 𑒦𑒹𑒪। 𑒮𑓀𑒫𑒱𑒡𑒰𑒢 𑒥𑒢𑒪 𑒂 𑓑𑓙𑓕𑓒 𑒄.𑒮𑒿 𑒂𑒧 𑒔𑒳𑒢𑒰𑒁𑒼 𑒣𑓂𑒩𑒏𑓂𑒩𑒱𑒨𑒰 𑒬𑒳𑒩𑒴 𑒦𑒹𑒪। 𑒩𑒰𑒖𑓂𑒨 𑒂 𑒏𑒹𑒢𑓂𑒠𑓂𑒩 𑒮𑒩𑒏𑒰𑒩 𑒥𑒢𑒻𑒏 𑒪𑒹𑒪 𑒔𑒳𑒢𑒰𑒫 𑒦𑒹𑒪 𑒂 𑒢𑒫 𑒮𑒩𑒏𑒰𑒩𑒏 𑒑𑒚𑒢 𑒦𑒹𑒪। 𑒍𑒢𑒰 𑒠𑒹𑒬𑒏 𑒫𑒱𑒮𑓂𑒞𑒰𑒩𑒼 𑒁𑓀𑒑𑓂𑒩𑒹𑒖𑒲 𑒬𑒰𑒮𑒢𑒮𑒿 𑒦𑒹𑒪, 𑒧𑒳𑒠𑒰 𑒄 𑒠𑒹𑒬𑒏𑒹𑒿 𑒯𑒖𑒰𑒩𑒼 𑒮𑒧𑒮𑓂𑒨𑒰𑒏 𑒥𑒲𑒔 𑒣𑒙𑒏𑒱 𑒮𑒹𑒯𑒼 𑒠𑒹𑒪𑒏। 𑒢𑒫 𑒮𑒩𑒏𑒰𑒩𑒏 𑒥𑒲𑒔 𑒯𑒖𑒰𑒩𑒼 𑒮𑒧𑒮𑓂𑒨𑒰 𑒅𑒣𑒮𑓂𑒟𑒱𑒞𑒱 𑒦𑓄 𑒑𑒹𑒪। 𑒑𑒰𑒧-𑒑𑒰𑒧𑒧𑒹 𑒥𑒏𑒰𑒮𑓂𑒞 𑒖𑒧𑒲𑒢𑒏 𑒪𑒛𑓃𑒰𑒃 𑒣𑒮𑒩𑒱 𑒑𑒹𑒪 𑒕𑒪। 𑒩𑒰𑒖𑒢𑒲𑒞𑒱𑒏 𑒮𑒦 𑒣𑒰𑒩𑓂𑒙𑒲𑒏 𑒋𑒏𑒧𑒳𑒿𑒯𑒩𑒲 𑒮𑒧𑒩𑓂𑒟𑒢 𑒩𑒯𑒢𑒹 𑒪𑒛𑓃𑒰𑒃 𑒮𑒤𑒪𑒼 𑒦𑒹𑒪।
𑓑𑓙𑓕𑓐𑒄𑓀.𑒧𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒣𑒱𑒞𑒰𑒏 𑒢𑒱𑒡𑒢 𑒦𑓄 𑒦𑒹𑒪𑒢𑒱।
“𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒏𑒱𑒕𑒳𑒍 𑒢𑒻 𑒨𑒰𑒠𑒱 𑒁𑒕𑒱, 𑒱𑒮𑒩𑓂𑒤 𑒑𑒰𑒕𑒲𑒧𑒹 𑒖𑒩𑒻𑒞 𑒁𑒕𑒱𑒨𑒰 𑒙𑒰...। 𑒖𑒐𑒢 𑒞𑒲𑒢 𑒥𑒩𑓂𑒐𑒏 𑒩𑒯𑒲। 𑒠𑒴 𑒦𑒰𑒿𑒃𑒏 𑒦𑒻𑒨𑒰𑒩𑒲𑒧𑒹 𑒕𑒯 𑒥𑒩𑓂𑒐𑒏 𑒦𑒰𑒨 (𑒦𑒻𑒨𑒰) 𑒩𑒯𑒟𑒱। 𑒣𑒱𑒞𑒰𑒖𑒲 𑒏𑒩𑒲𑒥 𑒋𑒏 𑒧𑒰𑒮 𑒥𑒹𑒧𑒰𑒩 𑒩𑒯𑒪𑒰𑒯। 𑒃𑒪𑒰𑒖𑒼𑒏 𑒢𑒲𑒏 𑒥𑒹𑒫𑒮𑓂𑒟𑒰 𑒢𑒻, 𑒞𑒰𑒥𑒞 𑒠𑒩𑒦𑓀𑒑𑒰 𑒁𑒮𑓂𑒣𑒞𑒰𑒪 𑒢𑒻 𑒥𑒢𑒪 𑒕𑒪𑒻। 𑒗𑒰𑒛𑓃-𑒤𑒴𑒏𑒮𑒿 𑒪𑓄 𑒏𑓄 𑒖𑒛𑓃𑒲-𑒥𑒳𑒙𑒲𑒏 𑒃𑒪𑒰𑒖 𑒮𑒧𑒰𑒖𑒧𑒹 𑒔𑒪𑒻𑒞 𑒕𑒪।” 𑒧𑒳𑒠𑒰 𑒣𑒱𑒞𑒰𑒏 𑒧𑒵𑒞𑓂𑒨𑒳 𑒦𑒹𑒢𑒹 𑒥𑒔𑓂𑒔𑒰𑒏 𑒪𑒰𑒪𑒢-𑒣𑒰𑒪𑒢𑒧𑒹 𑒏𑒼𑒢𑒼 𑒏𑒧𑒲 𑒢𑒻 𑒯𑒼𑒃 𑒕𑒪𑒻, 𑒮𑓀𑒨𑒳𑒏𑓂𑒞 𑒣𑒩𑒱𑒫𑒰𑒩𑒏 𑒫𑓂𑒨𑒫𑒮𑓂𑒟𑒰 𑒮𑒳𑒠𑒵𑒜𑓃 𑒕𑒪।
“𑒂𑒖𑒳𑒏 𑒣𑒩𑒱𑒫𑒰𑒩 𑒖𑒏𑒰𑒿 𑒢𑒻 𑒖𑒹 𑒢𑒹 𑒥𑒹𑒙𑒰 𑒥𑒰𑒣-𑒧𑒰𑒋𑒏𑒹𑒿 𑒠𑒹𑒐𑒻𑒞, 𑒂 𑒢𑒹 𑒧𑒰𑒋-𑒥𑒰𑒣 𑒥𑒹𑒙𑒰-𑒣𑒳𑒞𑒼𑒯𑒳𑒏𑒹𑒿। 𑒏𑒰𑒩𑒝 𑒁𑒢𑒹𑒏 𑒁𑒕𑒱 𑒧𑒳𑒠𑒰 𑒁𑒣𑒢𑒼 𑒣𑒩𑒱𑒫𑒰𑒩𑒏 𑒖𑒿 𑒖𑒱𑒧𑓂𑒧𑒰 𑒢𑒻 𑒪𑓄 𑒔𑒪𑒥 𑒞𑒿 𑒁𑒢𑒹𑒩𑒹 𑒯𑒧 𑒮𑒦 𑒧𑒰𑒞𑒵𑒦𑒴𑒧𑒱 𑒂 𑒠𑒹𑒬𑒏𑒹𑒿 𑒧𑒯𑒰𑒢 𑒏𑒯𑒻 𑒕𑒱𑒌। 𑒃𑒧𑒰𑒢𑒠𑒰𑒩𑒲 𑒣𑒴𑒩𑓂𑒫𑒏 𑒯𑒵𑒠𑒻𑒣𑒩 𑒯𑒰𑒟 𑒩𑒐𑒱 𑒏𑓄 𑒏𑒯𑒻 𑒣𑒛𑓃𑒞 𑒖𑒹 𑒠𑒹𑒪𑒱𑒌 𑒏𑒲 𑒂 𑒪𑒹𑒪𑒱𑒌 𑒏𑒲। 𑒯𑒧𑒩𑒰 𑒢𑒻 𑒦𑒹𑒪 𑒞𑒹𑒏𑒩 𑒠𑒼𑒐𑒲 𑒯𑒧 𑒢𑒻। 𑒋𑒏 𑒞𑒿 𑒁𑒣𑒢𑒼 𑒣𑒩𑒱𑒫𑒰𑒩𑒧𑒹 𑒮𑒧𑒰𑓀𑒑, 𑒠𑒼𑒮𑒩 𑒑𑒰𑒧𑒏 𑒏𑒼𑒢𑒼 𑒖𑒰𑒞𑒱 𑒋𑒯𑒢 𑒢𑒻 𑒖𑒃 𑒖𑒰𑒞𑒱𑒮𑒿 𑒣𑒰𑒩𑒱𑒫𑒰𑒩𑒱𑒏 𑒮𑓀𑒥𑓀𑒡 𑒢𑒻 𑒕𑒪। 𑒞𑒃 𑒮𑓀𑒑 𑒖𑒰𑒞𑒱𑒨𑒼𑒏 𑒢𑒧𑒯𑒩 𑒙𑒼𑒪। 𑒑𑒰𑒧𑒏 𑒔𑒰𑒩𑒴 𑒏𑒰𑒞𑒏 𑒑𑒰𑒧𑒧𑒹 𑒏𑒳𑒙𑒳𑒧𑒻𑒞𑒲 𑒮𑒹𑒯𑒼 𑒕𑒪𑒼 𑒂 𑒁𑒕𑒱𑒨𑒼। 𑒍𑒯𑒼 𑒮𑒦 𑒁𑒣𑒢𑒰𑒧𑒹 𑒮𑒧𑒋 𑒱𑒢𑒩𑓂𑒡𑒰𑒩𑒱𑒞 𑒏𑓄 𑒁𑒥𑒻𑒞-𑒖𑒰𑒃𑒞 𑒩𑒯𑒻𑒞 𑒕𑒪𑒰𑒯। 𑒏𑒰𑒢𑓂𑒯𑒲 𑒮𑒹𑒯𑒼 𑒢𑒲𑒏 𑒥𑒢𑒾𑒪𑒢𑒱। 𑒋𑒏𑒮𑒿 𑒋𑒏 𑒐𑒱𑒮𑓂𑒮𑒏𑒩 𑒂 𑒋𑒏𑒮𑒿 𑒋𑒏 𑒑𑒣 𑒏𑒹𑒢𑒱𑒯𑒰𑒩। 𑒞𑒿𑒋 𑒠𑒱𑒢-𑒩𑒰𑒞𑒱𑒧𑒹 𑒏𑒼𑒢𑒼 𑒁𑓀𑒞𑒩 𑒢𑒻। 𑒁𑒦𑒰𑒫 𑒣𑒩𑒱𑒫𑒰𑒩𑒧𑒹 𑒢𑒯𑒱𑒨𑒹 𑒕𑒪 𑒞𑒿𑒋 𑒁𑒢𑒳𑒏𑒴𑒪 𑒣𑒩𑒱𑒮𑓂𑒟𑒱𑒞𑒱 𑒥𑒢𑒪 𑒕𑒪।”
𑒁𑒢𑒳𑒏𑒴𑒪 𑒣𑒩𑒱𑒮𑓂𑒟𑒱𑒞𑒱 𑒥𑒢𑒢𑒹 𑒣𑒩𑒱𑒫𑒰𑒩𑒏 𑒦𑒫𑒱𑒭𑓂𑒨 𑒠𑒱𑒮𑒱 𑒮𑒹𑒯𑒼 𑒢𑒖𑒩𑒱 𑒣𑒛𑓃𑒪𑒢𑒱। 𑒦𑒻𑒨𑒰𑒏 𑒥𑒱𑒂𑒯 𑒦𑓄 𑒑𑒹𑒪 𑒩𑒯𑒢𑒱। 𑒔𑒰𑒩𑒱-𑒣𑒰𑒿𑒔 𑒥𑒩𑓂𑒐𑒧𑒹 𑒥𑒱𑒂𑒯 𑒯𑒼𑒃𑒞 𑒕𑒪।
“𑒞𑒯𑒴𑒧𑒹 𑒯𑒧𑒩 𑒧𑒾𑒮𑒲 (𑒮𑒰𑒞-𑒦𑒰𑒋 𑒥𑒯𑒱𑒢𑒧𑒹 𑒮𑒦𑒮𑒿 𑒖𑒹𑒚 𑒧𑒾𑒮𑒲 𑒂 𑒮𑒦𑒮𑒿 𑒕𑒼𑒙 𑒧𑒰𑒋) 𑒫𑒱𑒡𑒫𑒰 𑒦𑓄 𑒑𑒹𑒪𑒲𑒯। 𑒧𑒾𑒮𑒲𑒏𑒹𑒿 𑒧𑒰𑒞𑓂𑒩 𑒠𑒳𑒃𑒨𑒹𑒙𑒰 𑒥𑒹𑒙𑒲, 𑒣𑒩𑒱𑒫𑒰𑒩 𑒁𑒢𑓂𑒞 𑒦𑓄 𑒑𑒹𑒪𑒢𑒱। 𑒧𑒾𑒮𑒲𑒏 𑒣𑓂𑒩𑒦𑒰𑒫 𑒧𑒰𑒃𑒏 𑒆𑒣𑒩, 𑒞𑒿𑒋 𑒖𑒹𑒚-𑒦𑒰𑒨𑒏 𑒥𑒱𑒂𑒯 𑒣𑒰𑒿𑒔𑒹 𑒥𑒩𑓂𑒐𑒧𑒹 𑒦𑓄 𑒑𑒹𑒪𑒢𑒱। 𑒦𑒫𑒱𑒭𑓂𑒨 𑒠𑒱𑒮𑒱 𑒠𑒵𑒭𑓂𑒙𑒱 𑒣𑒛𑓃𑒱𑒞𑒹 𑒯𑒧𑒩𑒰𑒣𑒩 𑒢𑒖𑒩𑒱 𑒣𑒛𑓃𑒪𑒢𑒱। 𑒍𑒕𑒰𑒃𑒢 𑒣𑒏𑒛𑓃𑒪 𑒩𑒼𑒑𑒱𑒏 𑒁𑒫𑒮𑓂𑒟𑒰 𑒍𑒯𑒢 𑒯𑒼𑒃𑒞 𑒖𑒹𑒏𑒩 𑒏𑒼𑒢𑒼 𑒢𑒱𑒬𑓂𑒞𑒳𑒏𑒲 𑒢𑒻। 𑒖𑒲𑒫𑒱𑒨𑒼 𑒮𑒏𑒻 𑒕𑒟𑒱, 𑒧𑒩𑒱𑒨𑒼 𑒮𑒏𑒻 𑒕𑒟𑒱। 𑒞𑒿𑒋 𑒋𑒯𑒹𑒢 𑒁𑒫𑒮𑓂𑒟𑒰𑒧𑒹 𑒫𑒱𑒔𑒰𑒩𑒼𑒧𑒹 𑒃𑒧𑒰𑒢𑒠𑒰𑒩𑒲 𑒁𑒥𑒻 𑒕𑒻।”
𑒧𑒕𑒡𑒲𑒧𑒹𑒠𑒠𑒱𑒨𑒰 𑒮𑒮𑒳𑒩𑒏 𑒣𑒩𑒱𑒫𑒰𑒩 𑒮𑒳𑒦𑓂𑒨𑒮𑓂𑒞, 𑒠𑒠𑒱𑒨𑒰 𑒮𑒮𑒳𑒩𑒏 𑒏𑒳𑒙𑒳𑒧𑒻𑒞𑒲 𑒑𑒼𑒡𑒢𑒣𑒳𑒩 𑒧𑒾𑒮𑒲𑒏 𑒣𑒩𑒱𑒫𑒰𑒩𑒧𑒹 𑒮𑒹 𑒧𑒾𑒮𑒲𑒏 𑒂𑒫𑒰𑒖𑒰𑒯𑒲 𑒥𑒹𑒩𑒧𑒰 𑒥𑒯𑒱𑒢 𑒌𑒚𑒰𑒧।
“𑒠𑒠𑒱𑒨𑒰 𑒮𑒮𑒳𑒩 𑒮𑒳𑒩𑒰𑒑 𑒦𑒱𑒛𑓃𑒰 𑒏𑓄 𑒑𑒼𑒡𑒢𑒣𑒳𑒩𑒏 𑒧𑒾𑒮𑒰𑒏 𑒕𑒼𑒙 𑒦𑒰𑒋 𑒥𑒔𑒰𑒃 𑒧𑒝𑓂𑒛𑒪 𑒮𑓀𑒑 𑒁𑒰𑒥𑒋 𑒪𑒑𑒪𑒰𑒯, 𑒕𑒪-𑒣𑓂𑒩𑒣𑓀𑒔 𑒫𑒱𑒯𑒲𑒢 𑒧𑒾𑒮𑒲 𑒧𑒰𑒋𑒏𑒹𑒿 𑒏𑒯𑒱 𑒠𑒹𑒪𑒐𑒱𑒢। 𑒖𑒹𑒚-𑒕𑒼𑒙𑒏 𑒫𑒱𑒔𑒰𑒩 𑒩𑒐𑒻𑒞 𑒧𑒰𑒋 𑒂𑒬𑓂𑒫𑒰𑒮𑒢 𑒠𑓄 𑒠𑒹𑒪𑒐𑒱𑒢 𑒖𑒹 𑒁𑒐𑒢 𑒞𑒿 𑒁𑒣𑒢𑒹 𑒁𑒕𑒼𑒃𑒢 𑒡𑒹𑒢𑒹 𑒕𑒟𑒱, 𑒩𑒰𑒖𑒰-𑒠𑒻𑒫𑒲𑒏 𑒏𑒼𑒢𑒼 𑒚𑒹𑒏𑒰𑒢 𑒢𑒻 𑒕𑒻, 𑒞𑒿𑒋 𑒁𑒐𑒢 𑒏𑒱𑒕𑒳 𑒢𑒻, 𑒥𑒰𑒠𑒧𑒹 𑒥𑒳𑒗𑒪 𑒖𑒹𑒞𑒻।”
𑒧𑒕𑒡𑒲𑒏 𑒣𑒩𑒱𑒫𑒰𑒩 𑒥𑒹𑒫𑒯𑒰𑒩𑒱𑒏 𑒠𑒵𑒭𑓂𑒙𑒱𑒨𑒹 𑒠𑒥। 𑒞𑒰𑒛𑓃-𑒐𑒖𑒳𑒩𑒏 𑒑𑒰𑒕 𑒥𑒹𑒮𑒲 𑒮𑒹 𑒞𑒰𑒛𑓃𑒲𑒏 𑒣𑒲𑒥𑒰𑒏 𑒔𑒪𑒢𑒱 𑒍𑒃 𑒑𑒰𑒧𑒧𑒹 𑒕𑒪। 𑒋𑒏-𑒪𑒑𑒰𑒃𑒞 𑒥𑒳𑒜𑓃𑒰 (𑒠𑒠𑒱𑒨𑒰 𑒮𑒮𑒳𑒩) 𑒁𑒣𑒢 𑒣𑒪𑓂𑒪𑒼 𑒦𑒩𑒱 𑒡𑒼𑒞𑒲 𑒂 𑒔𑒠𑓂𑒠𑒻𑒩 𑒢𑒹𑒢𑒯𑒱 𑒣𑒯𑒳𑒿𑒔𑒱 𑒧𑒵𑒞𑓂𑒨𑒳𑒏 𑒂𑒐𑒱𑒩𑒲 𑒮𑒧𑒋 𑒞𑒏 𑒥𑒹𑒩𑒧𑒰𑒧𑒹 𑒩𑒯𑒱 𑒑𑒹𑒪𑒰। 𑒧𑒵𑒞𑓂𑒨𑒳𑒏 𑒁𑓀𑒞𑒱𑒧 𑒩𑒰𑒞𑒱, 𑒛𑒱𑒥𑒱𑒨𑒰 𑒖𑒩𑒱𑒞𑒹 𑒮𑒦𑒏𑒹𑒿 𑒁𑒢𑓂𑒯𑒰𑒩 𑒥𑒴𑒗𑒱 𑒣𑒛𑓃𑒋 𑒪𑒑𑒪𑒢𑒱।
“𑒖𑒹 𑒥𑒼𑒪 𑒖𑒲𑒫𑒱𑒞 𑒕𑒪, 𑒥𑒢𑓂𑒢 𑒦𑓄 𑒑𑒹𑒪। 𑒯𑒰𑒟-𑒣𑒋𑒩𑒏 𑒛𑒼𑒪𑒥 𑒥𑒢𑓂𑒢 𑒦𑓄 𑒑𑒹𑒪।” , 𑒧𑒰𑒋𑒏𑒹𑒿 𑒪𑒑𑒧𑒹 𑒥𑒖𑒰 𑒥𑒳𑒜𑓃𑒰 (𑒠𑒠𑒱𑒨𑒰 𑒮𑒮𑒳𑒩) 𑒑𑒼𑒡𑒢𑒣𑒳𑒩𑒥𑒪𑒰 𑒧𑒾𑒮𑒰𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞 𑒏𑒯𑒪𑒐𑒱𑒢- “𑒮𑒧𑒡𑒱, 𑒄 𑒥𑒔𑓂𑒔𑒰 𑒯𑒧𑒩𑒰 𑒠𑓄 𑒠𑒱𑒁। 𑒑𑒼𑒥𑒩 𑒣𑒰𑒟𑒻𑒪𑒹 𑒣𑒼𑒞𑒲 𑒠𑒹𑒥𑒢𑒱।”
𑒧𑒱𑒙𑒱𑓀𑒑𑒏 𑒣𑓂𑒩𑒮𑓂𑒞𑒰𑒫 𑒖𑒏𑒰𑒿 𑒑𑒼𑒡𑒢𑒣𑒳𑒩𑒥𑒪𑒰 𑒧𑒾𑒮𑒰 𑒮𑒧𑒩𑓂𑒟𑒢 𑒏𑒩𑒻𑒞 𑒏𑒯𑒪𑒐𑒱𑒢- “𑒄 𑒞𑒿 𑒒𑒩-𑒏𑒟𑒰 𑒦𑒹𑒪, 𑒌𑒧𑒹 𑒏𑒱 𑒯𑒿-𑒯𑒴𑒿 𑒏𑒯𑒪 𑒖𑒰𑒋𑒞।”
𑒞𑒯𑒲 𑒥𑒲𑒔 𑒧𑒾𑒮𑒲 𑒙𑒣𑒏𑒱 𑒑𑒹𑒪𑒲𑒯- “𑒥𑒯𑒱𑒢, 𑒁𑒐𑒢 𑒥𑒰𑒪-𑒥𑒼𑒡 𑒁𑒕𑒱 𑒯𑒱𑒢𑒏𑒰 𑒥𑒔𑓂𑒔𑒰 𑒠𑒹𑒪𑒱𑒨𑒢𑒱। 𑒞𑒲𑒢𑒱𑒨𑒹 𑒥𑒩𑓂𑒐𑒧𑒹 𑒥𑒱𑒂𑒯𑒏 𑒥𑒰𑒞 𑒣𑒏𑓂𑒏𑒰 𑒦𑓄 𑒑𑒹𑒪।”
“𑒁𑒐𑒢 𑒡𑒩𑒱 𑒣𑒩𑒱𑒫𑒰𑒩𑒧𑒹 𑒁𑒣𑒢𑒰𑒮𑒿 𑒑𑒰𑒋 𑒠𑒳𑒯𑒻𑒏, 𑒯𑒩 𑒖𑒼𑒞𑒻𑒏 𑒂 𑒐𑒳𑒙𑓂𑒙𑒰𑒣𑒩 𑒥𑒔𑓂𑒕𑒰 𑒥𑒡𑒱𑒨𑒰 𑒏𑒩𑒹𑒥𑒰𑒏 𑒔𑒪𑒢𑒱 𑒢𑒻 𑒩𑒯𑒋। 𑒣𑒱𑒞𑒰𑒏 𑒣𑒩𑒼𑒕 𑒦𑒹𑒢𑒯𑒳𑒿 𑒮𑒧𑒻𑒣𑒩 𑒮𑓂𑒏𑒴𑒪 𑒣𑒯𑒳𑒿𑒔𑒪𑒾𑓀। 𑒑𑒰𑒧𑒧𑒹 𑒪𑒼𑒁𑒩 𑒣𑓂𑒩𑒰𑒃𑒧𑒩𑒲 𑒮𑓂𑒏𑒴𑒪 𑒕𑒪। 𑒦𑒲𑒞𑒒𑒩 𑒩𑒯𑒢𑒹 𑒦𑒳𑒧𑒏𑒧 𑓑𑓙𑓓𑓔𑒄. 𑒧𑒹 𑒐𑒮𑒱 𑒣𑒛𑓃𑒪। 𑒩𑒰𑒖𑒰-𑒠𑒻𑒫 𑒦𑒹𑒢𑒹 𑒖𑒯𑒱𑒢𑒰 𑒪𑒼𑒏 𑒒𑒩𑒰𑒛𑓃𑒲 𑒥𑒠𑒪𑒱 𑒪𑒃𑒋 𑒞𑒯𑒱𑒢𑒰 𑒮𑓂𑒏𑒴𑒪𑒏 𑒒𑒩𑒰𑒛𑓃𑒲 𑒥𑒠𑒪𑒪। 𑒍𑒃 𑒮𑒧𑒻𑒧𑒹 𑒞𑒲𑒢𑒙𑒰 𑒏𑒔𑒯𑒩𑒲 𑒥𑒹𑒩𑒧𑒰𑒧𑒹 𑒕𑒪। 𑒠𑒕𑒱𑒢𑒥𑒩𑒱𑒨𑒰 𑒏𑒔𑒯𑒩𑒲𑒏 𑒒𑒩𑒧𑒹 𑒮𑓂𑒏𑒴𑒪 𑒔𑒪𑒋 𑒪𑒑𑒪। 𑒣𑒕𑒰𑒞𑒱 𑒍𑒯𑒼 𑒥𑒠𑒪𑒱 𑒁𑒐𑒳𑒢𑒏𑒰 𑒖𑒑𑒯𑒣𑒩 𑒣𑒯𑒳𑒿𑒔𑒪। ”

𑒥𑒹𑒩𑒧𑒰 𑒣𑓀𑒛𑒱𑒞𑒏 𑒑𑒰𑒧𑒏 𑒬𑓂𑒩𑒹𑒝𑒲𑒧𑒹 𑒑𑒢𑒪 𑒖𑒰𑒃𑒞 𑒁𑒕𑒱। 𑒣𑒩𑒼𑒣𑒙𑓂𑒙𑒰𑒏 𑒪𑒼𑒏 𑒑𑒹𑒚𑒩𑒲 𑒗𑒰𑒏𑒹𑒿 𑒖𑒢𑒻𑒞 𑒕𑒢𑓂𑒯𑒱, 𑒖𑒱𑒢𑒏𑒰 𑒮𑒰𑒞 𑒮𑒋 𑒥𑒲𑒒𑒰 𑒖𑒧𑒲𑒢 𑒩𑒰𑒖-𑒠𑒩𑒦𑓀𑒑𑒰𑒮𑒿 𑒦𑒹𑒙𑒪 𑒕𑒪𑒢𑒱। 𑒍𑒢𑒰 𑒍 𑒖𑒧𑒲𑒢 𑒥𑒹𑒩𑒧𑒰 𑒮𑒲𑒧𑒰𑒧𑒹 𑒢𑒻 𑒣𑒛𑓃𑒻𑒞 𑒁𑒕𑒱 𑒧𑒳𑒠𑒰 𑒠𑒴 𑒏𑒼𑒮 𑒯𑒙𑒱 𑒏𑓄 𑒕𑒪; 𑒂𑒥 𑒢𑒻 𑒕𑒢𑓂𑒯𑒱।
𑒠𑒕𑒱𑒢𑒥𑒩𑒱𑒨𑒰 𑒏𑒔𑒯𑒩𑒲𑒏 𑒒𑒩𑒧𑒹 𑒮𑓂𑒏𑒴𑒪 𑒂𑒋𑒪। 𑒍𑒞𑒾𑒮𑒿 𑒍𑒃 𑒮𑓂𑒏𑒴𑒪𑒏 𑒠𑒼𑒮𑒩 𑒥𑒻𑒔𑒧𑒹 𑒔𑒰𑒩𑒱 𑒑𑒼𑒙𑒹, 𑒫𑒹𑒠, 𑒫𑓂𑒨𑒰𑒏𑒩𑒝 𑒮𑒰𑒯𑒱𑒞𑓂𑒨𑒮𑒿 𑒂𑒔𑒰𑒩𑓂𑒨 𑒏𑒹𑒪𑒢𑒱। 𑒠𑒴 𑒑𑒼𑒙𑒹𑒏𑒹𑒿 𑒧𑒹𑒛𑒪 𑒦𑒹𑒙𑒪𑒢𑒱। 𑒍𑒢𑒰 𑒞𑒲𑒢 𑒑𑒼𑒙𑒹 𑒑𑒰𑒧𑒮𑒿 𑒥𑒰𑒯𑒩 𑒫𑒱𑒠𑓂𑒨𑒰𑒪𑒨 𑒣𑒏𑒛𑓃𑒱 𑒪𑒹𑒪𑒢𑒱, 𑒧𑒳𑒠𑒰 𑒋𑒏 𑒑𑒼𑒙𑒹 (𑒧𑒹𑒛𑒪𑒡𑒰𑒩𑒲) 𑒑𑒰𑒧𑒧𑒹 𑒢𑒴𑒢-𑒞𑒹𑒪𑒏 𑒠𑒼𑒏𑒰𑒢 𑒏𑓄 𑒪𑒹𑒪𑒢𑒱। ‘𑒣𑒜𑓃𑒹 𑒤𑒰𑒩𑒮𑒲 𑒥𑒹𑒔𑒋 𑒞𑒹𑒪’ 𑒔𑒩𑒱𑒞𑒰𑒩𑓂𑒟 𑒦𑓄 𑒑𑒹𑒪। 𑒧𑒳𑒠𑒰 𑒁𑒣𑒢 𑒪𑒑𑒢 𑒂 𑒧𑒹𑒯𑒢𑒞𑒱𑒮𑒿 𑒍 𑒞𑒲𑒢𑒴 𑒑𑒼𑒙𑒹𑒏𑒹𑒿 𑒂𑒩𑓂𑒟𑒱𑒏 𑒏𑓂𑒭𑒹𑒞𑓂𑒩𑒧𑒹 𑒣𑒕𑒳𑒂 𑒠𑒹𑒪𑒢𑒱, 𑒮𑒧𑒰𑒖𑒣𑒩 𑒥𑒯𑒳𑒞 𑒁𑒡𑒱𑒏 𑒣𑓂𑒩𑒦𑒰𑒫 𑒣𑒛𑓃𑒪। 𑒧𑒹𑒯𑒢𑒞𑒲 𑒑𑒰𑒧 𑒞𑒯𑒱𑒨𑒼 𑒕𑒪 𑒁𑒐𑒢𑒼 𑒁𑒕𑒱। 𑒂𑒢 𑒑𑒰𑒧𑒧𑒹 𑒏𑒧 𑒣𑒜𑓃𑒪-𑒪𑒱𑒐𑒪 𑒪𑒼𑒏𑒏𑒹𑒿 𑒪𑒼𑒏 𑒔𑒳𑒙𑒏𑒲 𑒪𑒻𑒞 𑒁𑒕𑒱, 𑒮𑒹 𑒥𑒹𑒩𑒧𑒰𑒧𑒹 𑒢𑒻 𑒁𑒕𑒱। 𑒗𑓀𑒗𑒰𑒩𑒣𑒳𑒩 𑒥𑒰𑒖𑒰𑒩𑒮𑒿 𑒧𑒰𑒟𑒣𑒩 𑒠𑒼𑒏𑒰𑒢𑒏 𑒫𑒮𑓂𑒞𑒳-𑒖𑒰𑒞𑒏 𑒧𑒼𑒙𑒩𑒲 𑒥𑒻𑒬𑒰𑒐𑒏 𑒩𑒾𑒠𑒧𑒹 𑒁𑒢𑒻𑒞 𑒕𑒪𑒰𑒯, 𑒖𑒹 𑒮𑒦 𑒠𑒹𑒐𑒻𑒞 𑒕𑒪। 𑒑𑒰𑒧𑒧𑒹 𑒋𑒏𑓂𑒏𑒹𑒙𑒰 𑒠𑒼𑒏𑒰𑒢। 𑒮𑒥𑒯𑒏 𑒪𑒰𑒙 𑒠𑒼𑒏𑒰𑒢𑒮𑒿। 𑒍𑒢𑒰 𑒋𑒏𑒙𑒰 𑒗𑓀𑒗𑒰𑒩𑒣𑒳𑒩𑒏 𑒥𑒢𑒱𑒨𑒰 𑒮𑒹𑒯𑒼 𑒂𑒥𑒱 𑒥𑒹𑒩𑒧𑒰𑒧𑒹 𑒠𑒼𑒏𑒰𑒢 𑒐𑒼𑒪𑒢𑒹 𑒩𑒯𑒟𑒱। 𑒗𑓀𑒗𑒰𑒩𑒣𑒳𑒩𑒏 𑒥𑒢𑒱𑒨𑒰𑒏 𑒣𑒩𑒱𑒫𑒰𑒩 𑒦𑒳𑒧𑒏𑒧𑒧𑒹 𑒢𑒭𑓂𑒙 𑒦𑓄 𑒑𑒹𑒪𑒢𑒱। 𑒄𑓀𑒙𑒰𑒏 𑒒𑒩 𑒩𑒯𑒢𑒹 𑒮𑒦 𑒠𑒥𑒱 𑒏𑓄 𑒧𑒩𑒱 𑒑𑒹𑒪𑒢𑒱। 𑒫𑒋𑒯 𑒂𑒥 𑒥𑒹𑒩𑒧𑒰𑒧𑒹 𑒂𑒥𑒱 𑒥𑒮𑒱 𑒑𑒹𑒪𑒰𑒯। 𑒖𑒯𑒱𑒢𑒰 𑒩𑒰𑒖𑒢𑒲𑒞𑒱𑒏 𑒠𑒵𑒭𑓂𑒙𑒱𑒮𑒿 𑒥𑒹𑒩𑒧𑒰 𑒑𑒰𑒧 𑒖𑒰𑒑𑒪 𑒞𑒯𑒱𑒢𑒰 𑒬𑒻𑒏𑓂𑒭𑒝𑒱𑒏 𑒠𑒵𑒭𑓂𑒙𑒱𑒮𑒿 𑒮𑒹𑒯𑒼 𑒄 𑒑𑒰𑒧 𑒁𑒑𑒳𑒂𑒋𑒪 𑒩𑒯𑒪 𑒁𑒕𑒱।
𑒍𑒢𑒰 𑒁𑓀𑒑𑓂𑒩𑒹𑒖𑒲 𑒬𑒱𑒏𑓂𑒭𑒰 𑒮𑒹𑒯𑒼 𑒑𑒰𑒧𑒧𑒹 𑒏𑒧 𑒣𑓂𑒩𑒞𑒱𑒬𑒞𑒧𑒹 𑒣𑒯𑒳𑒿𑒔𑒱 𑒔𑒳𑒏𑒪 𑒕𑒪। 𑒑𑒰𑒧𑒏 𑒅𑒞𑓂𑒞𑒩 𑒢𑒫𑒰𑒢𑒲 𑒫𑒱𑒠𑓂𑒨𑒰𑒪𑒨 𑒂 𑒠𑒕𑒱𑒢 𑒠𑒲𑒣 𑒫𑒱𑒠𑓂𑒨𑒰𑒪𑒨 𑒔𑒪𑒱 𑒩𑒯𑒪 𑒕𑒪। 𑒞𑒧𑒳𑒩𑒱𑒨𑒰 𑒯𑒰𑒄 𑒮𑓂𑒏𑒴𑒪 𑒂 𑒗𑓀𑒗𑒰𑒩𑒣𑒳𑒩 𑒯𑒰𑒄 𑒮𑓂𑒏𑒴𑒪 𑒮𑒹𑒯𑒼 𑒥𑒢𑒱 𑒑𑒹𑒪 𑒕𑒪। 𑒑𑒰𑒧𑒏 𑒖𑒹 𑒞𑒲𑒢𑒴 𑒣𑓀𑒛𑒱𑒞 𑒥𑒰𑒯𑒩 𑒩𑒯𑒻𑒞 𑒕𑒪𑒰𑒯 𑒯𑒳𑒢𑒏𑒼 𑒮𑒥𑒯𑒏 𑒣𑒩𑒱𑒫𑒰𑒩 𑒑𑒰𑒧𑒹𑒧𑒹 𑒩𑒯𑒻𑒞 𑒕𑒪𑒢𑒱। 𑒁𑒣𑒢𑒼 𑒕𑒳𑒙𑓂𑒙𑒲 𑒑𑒰𑒧𑒧𑒹 𑒥𑒱𑒞𑒥𑒻𑒞 𑒕𑒪𑒰𑒯।
𑒑𑒰𑒧𑒧𑒹 𑒮𑓂𑒏𑒴𑒪 𑒏𑒯𑒱𑒨𑒰 𑒥𑒢𑒪, 𑒋𑒏𑒩 𑒢𑒱𑒬𑓂𑒔𑒱𑒞 𑒞𑒱𑒟𑒱𑒏 𑒖𑒰𑒢𑒏𑒰𑒩𑒲 𑒞𑒿 𑒢𑒻 𑒧𑒳𑒠𑒰 𑓑𑓙𑓓𑓔 𑒄. 𑒏 𑒦𑒴𑒧𑒏𑒧𑒧𑒹 𑒫𑒱𑒠𑓂𑒨𑒰𑒪𑒨𑒏 𑒦𑒲𑒞 𑒐𑒮𑒪, 𑒄 𑒖𑒰𑒢𑒏𑒰𑒩𑒲𑒧𑒹 𑒁𑒕𑒱। 𑒧𑒳𑒠𑒰 𑒫𑒱𑒠𑓂𑒨𑒰𑒪𑒨𑒏 𑒖𑒑𑒯 𑒥𑒠𑒪𑒱 𑒑𑒹𑒪। 𑒏𑒱𑒋𑒏 𑒞𑒿 𑒍𑒃 𑒖𑒑𑒯𑒏𑒹𑒿 𑒖𑒢𑒧𑒰𑒢𑒮 𑒁𑒬𑒳𑒦 𑒥𑒳𑒗𑒋 𑒪𑒰𑒑𑒪। 𑒍𑒢𑒰 𑒍 𑒮𑓂𑒟𑒰𑒢 𑒑𑒰𑒧𑒏 𑒥𑓂𑒩𑒯𑓂𑒧 𑒮𑓂𑒟𑒰𑒢 𑒕𑒲, 𑒬𑒏𑓂𑒞𑒱𑒬𑒰𑒪𑒲 𑒖𑒑𑒯। 𑒁𑒐𑒢 𑒍𑒃 𑒮𑓂𑒟𑒰𑒢𑒧𑒹 𑒥𑒰𑒪-𑒥𑒼𑒡𑒏 𑒁𑒰𑓀𑒑𑒢𑒥𑒰𑒩𑒲 𑒔𑒪𑒱 𑒩𑒯𑒪 𑒁𑒕𑒱। 𑒍𑒃𑒚𑒰𑒧𑒮𑒿 𑒫𑒱𑒠𑓂𑒨𑒰𑒪𑒨 𑒅𑒚𑒱 𑒪𑒕𑒧𑒲𑒏𑒰𑒢𑓂𑒞-𑒩𑒧𑒰𑒏𑒰𑒢𑓂𑒞 𑒮𑒰𑒯𑒳𑒏 𑒏𑒔𑒯𑒩𑒲𑒧𑒹 𑒔𑒪𑒱 𑒂𑒋𑒪। 𑒬𑒳𑒩𑒴𑒧𑒹 𑒪𑒏𑒛𑓃𑒲𑒏 𑒐𑒳𑒙𑓂𑒙𑒰𑒣𑒩 𑒥𑒰𑒿𑒮𑒹𑒏 𑒒𑒩 𑒩𑒯𑒻, 𑒧𑒳𑒠𑒰 𑒣𑒕𑒰𑒞𑒱 𑒏𑒔𑒯𑒩𑒲𑒧𑒹 𑒢𑒱𑒔𑓂𑒔𑒰𑒿 𑒮𑒱𑒧𑒙𑒲 𑒄𑓀𑒙𑒰 𑒂 𑒆𑒣𑒩 𑒐𑒜𑓃𑒏 𑒒𑒩 𑒑𑒾𑒿𑒂 𑒥𑒢𑒾𑒪𑒢𑒱। 𑒍𑒃 𑒏𑒔𑒯𑒩𑒲𑒧𑒹 𑓑𑓙𑓕𑓒 𑒄.𑒏 𑒣𑒯𑒱𑒪 𑒔𑒳𑒢𑒰𑒫𑒏 𑒏𑒹𑒢𑓂𑒠𑓂𑒩 𑒮𑒹𑒯𑒼 𑒥𑒢𑒪। 𑒁𑒐𑒢 𑒫𑒱𑒠𑓂𑒨𑒰𑒪𑒨 𑒞𑒹𑒮𑒩 𑒮𑓂𑒟𑒰𑒢𑒣𑒩 𑒁𑒕𑒱। 𑒖𑒹 𑒖𑒑𑒯 𑒮𑒩𑒱𑒮𑒫-𑒣𑒰𑒯𑒲𑒏 𑒣𑓂𑒩𑒼. 𑒯𑒹𑒞𑒳𑒏𑒩 𑒗𑒰𑒏 𑒕𑒱𑒨𑒢𑒱। 𑒍𑒢𑒰 𑒍 𑒩𑒖𑒱𑒮𑓂𑒙𑓂𑒩𑒲 𑒏𑒩𑒻𑒪𑒹 𑒞𑒻𑒨𑒰𑒩 𑒦𑒹𑒪 𑒕𑒟𑒱, 𑒧𑒳𑒠𑒰 𑒄 𑒖𑒧𑒲𑒢𑓂𑒠𑒰𑒩𑒲𑒏 𑒞𑒹𑒯𑒹𑒢 𑒍𑒗𑒩𑒾𑒚𑒧𑒹 𑒣𑒛𑓃𑒪 𑒁𑒕𑒱 𑒖𑒹 𑒯𑒳𑒢𑒏𑒰 𑒪𑒱𑒐𑒪𑒹 𑒢𑒹 𑒯𑒼𑒃 𑒕𑒢𑓂𑒯𑒱! 𑒥𑒳𑒜𑓃𑒱𑒨𑒰 𑒑𑒰𑒕𑒲𑒏 𑒢𑒰𑒍𑓀 𑒌 𑒖𑒧𑒲𑒢𑒏 𑒣𑒛𑓃𑒱 𑒑𑒹𑒪 𑒁𑒕𑒱। 𑒮𑒧𑓂𑒣𑓂𑒩𑒞𑒱 𑒣𑓀𑒔𑒰𑒨𑒞 𑒦𑒫𑒢, 𑒂𑒚𑒧𑒰 𑒡𑒩𑒱𑒏 𑒮𑓂𑒏𑒴𑒪, 𑒐𑓀𑒛𑒯𑒩 𑒩𑒴𑒣𑒧𑒹 𑒁𑒮𑓂𑒣𑒞𑒰𑒪𑒏 𑒒𑒩 𑒂 𑒦𑒫𑓂𑒨 𑒠𑒳𑒩𑓂𑒑𑒰𑒮𑓂𑒟𑒰𑒢 𑒮𑒹𑒯𑒼 𑒁𑒕𑒱।
𑒋𑒏𑒛𑒼𑒩𑒱𑒧𑒹 𑒞𑒲𑒢𑒴 𑒑𑒰𑒧, 𑒢𑒫𑒰𑒢𑒲, 𑒥𑒹𑒩𑒧𑒰 𑒂 𑒠𑒲𑒣, 𑒩𑒯𑒱𑒞𑒼 𑒮𑒰𑒧𑒰𑒖𑒱𑒏 𑒫𑒰𑒞𑒰𑒫𑒩𑒝𑒧𑒹 𑒞𑒲𑒢𑒴𑒧𑒹 𑒥𑒯𑒳𑒞 𑒁𑒡𑒱𑒏 𑒦𑒱𑒢𑓂𑒢𑒢𑒞𑒰 𑒁𑒕𑒱। 𑒋𑒏 𑒞𑒿 𑒣𑒩𑒑𑒢𑓂𑒢𑒰𑒏 𑒣𑓂𑒩𑒦𑒰𑒫 𑒠𑒼𑒮𑒩 𑒮𑒰𑒧𑒰𑒖𑒱𑒏 𑒥𑒢𑒰𑒥𑒙। 𑒖𑒃 𑒢𑒫𑒰𑒢𑒲 𑒂 𑒠𑒲𑒣𑒧𑒹 𑒞𑒰𑒛𑓃-𑒐𑒖𑒴𑒩𑒏 𑒑𑒰𑒕 𑒮𑒹𑒯𑒼 𑒦𑒩𑒣𑒳𑒩 𑒁𑒕𑒱, 𑒧𑒰𑒢𑒹 𑒞𑒰𑒛𑓃𑒲 𑒣𑒱𑒢𑒯𑒰𑒩𑒏 𑒢𑒲𑒏 𑒮𑓀𑒐𑓂𑒨𑒰 𑒁𑒕𑒱, 𑒞𑒃𑒚𑒰𑒧 𑒥𑒹𑒩𑒧𑒰𑒧𑒹 𑒋𑒏𑓂𑒏𑒼𑒙𑒰 𑒞𑒰𑒛𑓃-𑒐𑒖𑒴𑒩𑒏 𑒑𑒰𑒕 𑒢𑒻 𑒁𑒕𑒱। 𑒠𑒼𑒮𑒩 𑒦𑒱𑒢𑓂𑒢𑒞𑒰 𑒄 𑒁𑒕𑒱 𑒖𑒹 𑒧𑒡𑓂𑒨 𑒫𑒩𑓂𑒑𑒲𑒨 𑒖𑒰𑒞𑒱 𑒥𑒹𑒩𑒧𑒰𑒧𑒹 𑒥𑒯𑒳𑒮𑓀𑒐𑓂𑒨𑒏 𑒁𑒕𑒱, 𑒢𑒫𑒰𑒢𑒲 𑒂 𑒠𑒲𑒣𑒧𑒹 𑒐𑒴𑒥 𑒡𑒢𑒱𑒏𑒹 𑒂𑒏𑒱 𑒐𑒴𑒥 𑒑𑒩𑒲𑒥𑒹। 𑒐𑒰𑒮 𑒏𑓄 𑒠𑒲𑒣𑒧𑒹 𑒄 𑒮𑓂𑒟𑒱𑒞𑒱 𑒦𑒨𑒰𑒫𑒯 𑒁𑒕𑒱, 𑒖𑒃 𑒑𑒰𑒧𑒧𑒹 𑒋𑒏𑓂𑒏𑒹𑒙𑒰 𑒐𑒴𑒥 𑒡𑒢𑒱𑒏 𑒣𑒩𑒱𑒫𑒰𑒩 𑒩𑒯𑒻𑒋 𑒍𑒃 𑒑𑒰𑒧𑒏 𑒬𑒹𑒭 𑒪𑒼𑒏 𑒣𑒰𑒞 𑒐𑒩𑒛𑓃𑒻𑒋, 𑒮𑒋𑒯 𑒮𑓂𑒟𑒱𑒞𑒱 𑒠𑒲𑒣 𑒑𑒰𑒧𑒏 𑒁𑒕𑒱।

𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒣𑒰𑒿𑒔-𑒕𑒯 𑒥𑒩𑓂𑒐𑒏 𑒩𑒯𑒟𑒱 𑒞𑒐𑒢𑒹𑒮𑒿 𑒦𑒰𑒃𑒏 𑒮𑓀𑒑 𑒮𑓂𑒏𑒴𑒪 𑒖𑒰𑒋 𑒪𑒑𑒪𑒰। 𑒑𑒰𑒧𑒹𑒧𑒹 𑒪𑒼𑒁𑒩 𑒣𑓂𑒩𑒰𑒃𑒧𑒩𑒲 𑒮𑓂𑒏𑒴𑒪 𑒕𑒪 𑒖𑒹 𑒠𑒳𑒢𑒴 𑒣𑒰𑒪𑒲𑒧𑒹 𑒔𑒪𑒻𑒞 𑒕𑒪। 𑒁𑒐𑒢 𑒞𑒿 𑒂𑒚𑒧 𑒡𑒩𑒱𑒏 𑒣𑒜𑓃𑒰𑒃 𑒯𑒳𑒁𑒋 𑒪𑒰𑒑𑒪 𑒁𑒕𑒱। 𑒞𑒯𑒱𑒢𑒰 𑒂𑒥 𑒋𑒏 𑒬𑒱𑒏𑓂𑒭𑒏𑒮𑒿 𑒔𑒪𑒻𑒞 𑒄 𑒮𑓂𑒏𑒴𑒪 𑒮𑒹𑒯𑒼 𑒮𑒞𑒩𑒯 𑒬𑒱𑒏𑓂𑒭𑒏 𑒡𑒩𑒱 𑒣𑒯𑒳𑒿𑒔𑒱 𑒑𑒹𑒪 𑒁𑒕𑒱।
𑒞𑒿𑒋 𑒏𑒱 𑒬𑒱𑒏𑓂𑒭𑒰 𑒁𑒑𑒳𑒂 𑒑𑒹𑒪? 𑒖𑒱𑒢𑒑𑒲𑒏 𑒪𑒹𑒪 𑒮𑒩𑓂𑒫𑒰𑓀𑒑𑒲𑒢 𑒫𑒱𑒏𑒰𑒮 𑒁𑒢𑒱𑒫𑒰𑒩𑓂𑒨 𑒁𑒕𑒱, 𑒖𑒿 𑒮𑒹 𑒢𑒻 𑒞𑒿 𑒍 𑒁𑒏𑒪𑒰𑓀𑒑-𑒫𑒱𑒏𑒪𑒰𑓀𑒑 𑒦𑒹𑒪 𑒣𑒛𑓃𑒪 𑒩𑒯𑒞। 𑒮𑒰𑒧𑒰𑒢𑓂𑒨 𑒮𑓂𑒏𑒴𑒪-𑒏𑒁𑒼𑒪𑒹𑒖 𑒞𑒿 𑒚𑒰𑒧-𑒚𑒲𑒧 𑒥𑒢𑒪 𑒧𑒳𑒠𑒰 𑒞𑒏𑒢𑒲𑒏𑒲 𑒬𑒱𑒏𑓂𑒭𑒰𑒏 𑒫𑒱𑒏𑒰𑒮 𑒢𑒻 𑒦𑒹𑒪। 𑒣𑒩𑒱𑒝𑒰𑒧 𑒥𑒢𑒱 𑒑𑒹𑒪 𑒁𑒕𑒱 𑒖𑒹 𑒏𑒰𑒖𑒏 𑒠𑒱𑒬𑒹 𑒥𑒠𑒪𑒱 𑒑𑒹𑒪 𑒁𑒕𑒱। 𑒐𑒋𑒩 𑒖𑒹 𑒯𑒼𑒅, 𑒧𑒳𑒠𑒰 𑒂𑒖𑒰𑒠𑒲𑒏 𑒣𑒯𑒱𑒢𑒾𑓀 𑒂 𑒣𑒕𑒰𑒞𑒱𑒨𑒼 𑒥𑒹𑒩𑒧𑒰 𑒩𑒰𑒖𑒢𑒲𑒞𑒱𑒏 𑒂 𑒬𑒻𑒏𑓂𑒭𑒝𑒱𑒏 𑒠𑒵𑒭𑓂𑒙𑒱𑒮𑒿 𑒁𑒑𑒳𑒂𑒋𑒪 𑒩𑒯𑒪।
𑒂𑒖𑒰𑒠𑒲𑒏 𑒂𑒢𑓂𑒠𑒼𑒪𑒢𑒧𑒹 𑒥𑒔𑒢𑒴 𑒧𑒱𑒬𑓂𑒩 𑒅𑒦𑒛𑓃𑒪𑒰। 𑒢𑒫𑒰𑒢𑒲 𑒫𑒱𑒠𑓂𑒨𑒰𑒪𑒨𑒧𑒹 𑒦𑒢𑒮𑒱𑒨𑒰𑒏 𑒏𑒰𑒖 𑒏𑒩𑒻𑒞 𑒩𑒯𑒟𑒱। 𑒪𑒱𑒐𑒢𑒰𑒃 𑒞𑒿 𑒢𑒻 𑒮𑒲𑒐𑒱 𑒦𑒹𑒪𑒢𑒱 𑒧𑒳𑒠𑒰 𑒫𑒏𑓂𑒞𑒰 𑒦𑓄 𑒑𑒹𑒪𑒰𑒯। 𑒠𑒹𑒬𑒏 𑒣𑓂𑒩𑒞𑒱 𑒍𑒯𑒢 𑒮𑒧𑒩𑓂𑒣𑒱𑒞 𑒖𑒹 𑒂𑒖𑒰𑒠𑒲𑒏 𑒠𑒾𑒛𑓃𑒧𑒹 𑒞𑒲𑒢 𑒧𑒰𑒮 𑒡𑒩𑒱 𑒥𑒱𑒢𑒰 𑒢𑒴𑒢𑒏 𑒦𑒙𑓂𑒙𑒹-𑒥𑒻𑒑𑒢 𑒅𑒮𑒢𑒱-𑒅𑒮𑒢𑒱 𑒐𑒰 𑒠𑒱𑒢-𑒩𑒰𑒞𑒱 𑒏𑒰𑒖 𑒏𑒩𑒻𑒞 𑒩𑒯𑒪𑒰𑒯, 𑒂𑒢𑓂𑒠𑒼𑒪𑒢 𑒑𑒰𑒧-𑒑𑒰𑒧 𑒣𑒏𑒛𑓃𑒢𑒯𑒱 𑒩𑒯𑒋। 𑒏𑒰𑒖𑒹𑒮𑒿 𑒃𑒧𑒰𑒢𑒠𑒰𑒩𑒲 𑒮𑒹𑒯𑒼 𑒁𑒥𑒻 𑒕𑒻। 𑓑𑓙𑓓𑓔 𑒄𑓀.𑒏 𑒦𑒴𑒧𑒏𑒧𑒏 𑒣𑒕𑒰𑒞𑒱 𑒩𑒰𑒬𑒢𑒏 𑒖𑒹 𑒥𑒿𑒙𑒫𑒰𑒩𑒰 𑒯𑒳𑒁𑒋 𑒪𑒰𑒑𑒪, 𑒞𑒃𑒧𑒹 𑒋𑒞𑒹𑒏 𑒃𑒧𑒰𑒢𑒠𑒰𑒩𑒲𑒏 𑒣𑒩𑒱𑒔𑒨 𑒍 𑒧𑒡𑒹𑒣𑒳𑒩 𑒟𑒰𑒢𑒰𑒧𑒹 𑒠𑒹𑒪𑒢𑒱 𑒖𑒹 𑒮𑒧𑒰𑒖𑒏 𑒮𑒦 𑒯𑒳𑒢𑒏𑒰 𑒑𑒰𑒿𑒡𑒲𑒖𑒲 𑒏𑒯𑒋 𑒪𑒑𑒪𑒢𑒱। 𑒞𑒃 𑒮𑓀𑒑 𑒂𑒩𑒼-𑒂𑒩𑒼 𑒪𑒼𑒏 𑒩𑒯𑒟𑒱। 𑒥𑒹𑒩𑒧𑒰 𑒣𑓀𑒔𑒰𑒨𑒞 𑒥𑒢𑒥𑒻𑒧𑒹 𑒯𑒳𑒢𑒏𑒩 𑒨𑒼𑒑𑒠𑒰𑒢 𑒥𑒯𑒳𑒞 𑒩𑒯𑒪𑒢𑒱। 𑒖𑒢𑒮𑓀𑒐𑓂𑒨𑒰𑒏 𑒯𑒱𑒮𑒰𑒥𑒮𑒿 𑒍𑒃 𑒮𑒧𑒨𑒏 𑒣𑓀𑒔𑒰𑒨𑒞𑒏 𑒯𑒱𑒮𑒰𑒥𑒮𑒿, 𑒥𑒹𑒩𑒧𑒰 𑒕𑒼𑒙 𑒣𑒛𑓃𑒻𑒞 𑒩𑒯𑒋। 𑒮𑒰𑒧𑒰𑒖𑒱𑒏 𑒥𑒳𑒢𑒰𑒥𑒙𑒱 𑒋𑒯𑒹𑒢 𑒖𑒹 𑒑𑒰𑒧-𑒑𑒰𑒧𑒏 𑒥𑒲𑒔 𑒁𑒣𑒢-𑒁𑒣𑒢 𑒮𑓀𑒥𑓀𑒡, 𑒞𑒿𑒋 𑒏𑒹 𑒏𑒹𑒏𑒩𑒰 𑒮𑓀𑒑 𑒩𑒯𑒞, 𑒄 𑒖𑒥𑒩𑒠𑒮𑓂𑒞 𑒮𑒧𑒮𑓂𑒨𑒰। 𑒧𑒳𑒠𑒰 𑒠𑒲𑒣 𑒑𑒰𑒧𑒏 𑒢𑒹𑒞𑒵𑒞𑓂𑒫𑒏 𑒮𑒯𑒨𑒼𑒑𑒮𑒿, 𑒖𑒹 𑒁𑒣𑒢 𑒣𑓀𑒔𑒰𑒨𑒞 𑒏𑒰𑒙𑒱 𑒣𑓀𑒔𑒰𑒨𑒞 𑒥𑒢𑒥𑒻𑒧𑒹 𑒮𑒯𑒨𑒼𑒑 𑒏𑒹𑒪𑒟𑒱, 𑒣𑓀𑒔𑒰𑒨𑒞 𑒥𑒢𑒪।
𑒣𑒕𑒰𑒞𑒱 𑒥𑒔𑒢𑒴 𑒧𑒱𑒬𑓂𑒩𑒏 𑒠𑒱𑒧𑒰𑒑 𑒑𑒛𑓃𑒥𑒛𑓃𑒰 𑒑𑒹𑒪𑒢𑒱। 𑒍𑒢𑒰 𑒁𑒮𑓂𑒮𑒲𑒮𑒿 𑒆𑒣𑒩 𑒥𑒩𑓂𑒐𑒏 𑒅𑒧𑒹𑒩𑒧𑒹 𑒧𑒳𑒃𑒪𑒰𑒯 𑒧𑒳𑒠𑒰 𑒣𑓂𑒩𑒦𑒰𑒫 𑒏𑒧𑒱 𑒑𑒹𑒪𑒢𑒱। 𑒥𑓂𑒩𑒹𑒢 𑒣𑓂𑒩𑒦𑒰𑒫𑒱𑒞 𑒯𑒼𑒃𑒏 𑒏𑒰𑒩𑒝 𑒠𑒴𑒙𑒰 𑒦𑒹𑒪𑒢𑒱, 𑒣𑒯𑒱𑒪 𑒣𑒰𑒩𑒱𑒫𑒰𑒩𑒱𑒏 𑒂𑒩𑓂𑒟𑒱𑒏 𑒮𑓂𑒟𑒱𑒞𑒱 𑒂 𑒠𑒼𑒮𑒩 𑒩𑒰𑒖𑒢𑒲𑒞𑒱𑒏 𑒏𑓂𑒭𑒹𑒞𑓂𑒩𑒧𑒹 𑒃𑒧𑒰𑒢𑒠𑒰𑒩𑒲𑒏 𑒁𑒦𑒰𑒫। 𑒧𑒳𑒠𑒰 𑒁𑓀𑒞-𑒁𑓀𑒞 𑒡𑒩𑒱 𑒮𑒧𑒰𑒖𑒏𑒹𑒿 𑒖𑒑𑒥𑒻𑒞 𑒩𑒯𑒪𑒰𑒯। 𑒁𑒚𑒰𑒩𑒯𑒧 𑒬𑒞𑒰𑒥𑓂𑒠𑒲𑒏 𑒣𑒴𑒩𑓂𑒫𑒰𑒩𑓂𑒠𑓂𑒡𑒧𑒹 𑒋𑒏𑒯𑒩𑒹 𑒐𑒛𑓃𑒏𑒰 𑒧𑒴𑒪𑒏 𑒣𑒩𑒱𑒫𑒰𑒩𑒧𑒹 𑒣𑓀. 𑒏𑓀𑒔𑒢 𑒗𑒰 𑒂 𑒣𑓀. 𑒥𑒥𑒳𑒋 𑒗𑒰 𑒫𑒻𑒠𑒱𑒏 𑒦𑒹𑒪𑒰𑒯। 𑒍𑒢𑒰 𑒍𑒃 𑒮𑒧𑒻𑒧𑒹 𑒁𑓀𑒑𑓂𑒩𑒹𑒖𑒲 𑒬𑒱𑒏𑓂𑒭𑒰𑒏 𑒣𑓂𑒩𑒔𑒰𑒩-𑒣𑓂𑒩𑒮𑒰𑒩 𑒢𑒻 𑒦𑒹𑒪 𑒕𑒪, 𑒧𑒳𑒠𑒰 𑒮𑓀𑒮𑓂𑒏𑒵𑒞 𑒬𑒱𑒏𑓂𑒭𑒰𑒏 𑒮𑓂𑒫𑒰𑒩𑓂𑒝𑒱𑒧 𑒨𑒳𑒑 𑒁𑒫𑒮𑓂𑒮 𑒕𑒪। 𑒮𑓂𑒫𑒩𑓂𑒝𑒱𑒧 𑒌 𑒪𑒹𑒪 𑒖𑒹 𑒮𑒰𑒧𑒰𑒖𑒱𑒏 𑒜𑒰𑒿𑒹𑒔𑒰, 𑒏𑒱𑒕𑒳 𑒫𑒱𑒔𑓂𑒕𑒵𑓀𑒐𑒪𑒰 𑒕𑒼𑒛𑓃𑒱, 𑒫𑒻𑒠𑒱𑒏 𑒣𑒠𑓂𑒡𑒞𑒱𑒮𑒿 𑒔𑒪𑒻𑒞 𑒕𑒪। 𑒂𑒮𑓂𑒞𑒹-𑒂𑒮𑓂𑒞𑒹 𑒥𑒱𑒔𑓂𑒕𑒵𑓀𑒐𑒪𑒰 𑒥𑒜𑓃𑒱𑒞𑒹 𑒑𑒹𑒪। 𑒣𑒕𑒰𑒞𑒱 𑒁𑓀𑒑𑓂𑒩𑒹𑒖𑒲 𑒬𑒱𑒏𑓂𑒭𑒰𑒏 𑒣𑓂𑒩𑒦𑒰𑒫 𑒮𑒹𑒯𑒼 𑒐𑒴𑒥 𑒣𑒛𑓃𑒪। 𑒣𑓀. 𑒏𑓀𑒔𑒢 𑒗𑒰𑒏 𑒥𑒰𑒪𑒏 𑒣𑓀. 𑒦𑒳𑒙𑒰𑒃 𑒗𑒰 𑒣𑓂𑒩𑒮𑒱𑒠𑓂𑒡 𑒑𑒹𑒚𑒩𑒲 𑒗𑒰 𑒐𑓂𑒨𑒰𑒞𑒱 𑒣𑓂𑒩𑒰𑒣𑓂𑒞 𑒫𑒻𑒠𑒱𑒏 𑒦𑒹𑒪𑒰𑒯, 𑒯𑒳𑒢𑒏𑒰 𑒠𑒩𑒦𑓀𑒑𑒰 𑒩𑒰𑒖𑒮𑒿 𑒮𑒰𑒞 𑒮𑒋 𑒥𑒲𑒒𑒰 𑒖𑒧𑒲𑒢 𑒪𑒰𑒐𑒹𑒩𑒰𑒖 𑒥𑓂𑒩𑒯𑓂𑒧𑒼𑒞𑓂𑒞𑒩 𑒩𑒴𑒣𑒧𑒹 𑒦𑒹𑒙𑒪 𑒕𑒪𑒢𑒱। 𑒍𑒃 𑒮𑒧𑒻𑒧𑒹 𑒏𑒱𑒢𑒏𑒼 𑒞𑒰𑒡𑒩𑒱 𑒣𑓀𑒛𑒱𑒞𑒏 𑒥𑒲𑒔 𑒮𑓂𑒟𑒰𑒢 𑒢𑒻 𑒦𑒹𑒙𑒢𑒱 𑒖𑒰𑒡𑒩𑒱 𑒍 𑒏𑒰𑒬𑒲𑒮𑒿 𑒣𑒜𑓃𑒱 𑒢𑒻 𑒁𑒥𑒻𑒞 𑒕𑒪𑒰𑒯।
𑒣𑓀. 𑒔𑒱𑒞𑓂𑒩𑒡𑒩 𑒚𑒰𑒏𑒳𑒩 𑒯𑒳𑒢𑒏𑒹 𑒒𑒩𑒏 𑒦𑒑𑒱𑒢𑒧𑒰𑒢 𑒣𑒩𑒱𑒫𑒰𑒩। 𑒣𑓀𑒛𑒱𑒞 𑒔𑒱𑒞𑓂𑒩𑒡𑒩 𑒚𑒰𑒏𑒳𑒩𑒏𑒹𑒿 𑒞𑒲𑒢 𑒥𑒰𑒪𑒏, 𑒣𑓀. 𑒖𑒨𑒢𑒰𑒟 𑒚𑒰𑒏𑒳𑒩, 𑒣𑓀. 𑒞𑒹𑒖𑒢𑒰𑒟 𑒚𑒰𑒏𑒳𑒩 𑒂 𑒣𑓀. 𑒐𑒩𑓂𑒑𑒢𑒰𑒟 𑒚𑒰𑒏𑒳𑒩। 𑒞𑒲𑒢𑒴 𑒣𑓀𑒛𑒱𑒞 𑒧𑒳𑒠𑒰 𑒖𑒹𑒚𑒏𑒰 𑒦𑒰𑒨 𑒐𑒹𑒞𑒲 𑒏𑒩𑒻𑒞 𑒏𑒱𑒮𑒰𑒢 𑒥𑒢𑒱 𑒑𑒹𑒪𑒰𑒯 𑒂 𑒥𑒰𑒏𑒲 𑒠𑒳𑒢𑒴 𑒦𑒰𑒿𑒃 𑒣𑓀. 𑒞𑒹𑒖𑒢𑒰𑒟 𑒚𑒰𑒏𑒳𑒩 𑒂 𑒣𑓀. 𑒐𑒩𑓂𑒑𑒢𑒰𑒟 𑒚𑒰𑒏𑒳𑒩 𑒏𑒰𑒬𑒲𑒮𑒿 𑒣𑒜𑓃𑒱 𑒋𑒪𑒰𑒯। 𑒅𑒔𑓂𑒔𑒏𑒼𑒙𑒱𑒏 𑒬𑓂𑒩𑒹𑒝𑒲𑒧𑒹 𑒑𑒱𑒢𑒞𑒲 𑒕𑒪𑒢𑒱। 𑒣𑓀𑒛𑒱𑒞 𑒞𑒹𑒖𑒢𑒰𑒟 𑒚𑒰𑒏𑒳𑒩 𑒖𑒲𑒫𑒢-𑒣𑒩𑓂𑒨𑒢𑓂𑒞 𑒪𑒼𑒯𑒢𑒰 𑒮𑓀𑒮𑓂𑒏𑒵𑒞 𑒫𑒱𑒠𑓂𑒨𑒰𑒪𑒨𑒧𑒹 𑒮𑒹𑒫𑒰 𑒠𑒹𑒪𑒢𑒱। 𑒞𑒹𑒏𑒩 𑒣𑒕𑒰𑒞𑒱 𑒣𑒩𑒱𑒫𑒰𑒩𑒧𑒹 𑒣𑓀. 𑒑𑒾𑒩𑒲𑒢𑒰𑒟 𑒚𑒰𑒏𑒳𑒩, 𑒁𑒢𑒱𑒩𑒴𑒠𑓂𑒡 𑒚𑒰𑒏𑒳𑒩 𑒂 𑒮𑒳𑒢𑓂𑒠𑒩 𑒚𑒰𑒏𑒳𑒩 𑒦𑒹𑒪𑒰। 𑒬𑒩𑒲𑒩𑒮𑒿 𑒁𑒥𑒰𑒯 𑒩𑒯𑒢𑒹 𑒣𑓀. 𑒮𑒳𑒢𑓂𑒠𑒩 𑒚𑒰𑒏𑒳𑒩 𑒫𑒻𑒠𑓂𑒨𑒏 𑒩𑒴𑒣𑒧𑒹 𑒑𑒰𑒧𑒹𑒧𑒹 𑒫𑒻𑒠𑓂𑒨𑒑𑒱𑒩𑒲 𑒏𑒩𑒻𑒞 𑒩𑒯𑒪𑒰𑒯। 𑒣𑓀. 𑒁𑒢𑒱𑒩𑒴𑒠𑓂𑒡 𑒚𑒰𑒏𑒳𑒩 𑒫𑓂𑒨𑒰𑒏𑒩𑒝𑒏 𑒣𑓀𑒛𑒱𑒞, 𑒍 𑒮𑒲𑒞𑒰𑒧𑒜𑓃𑒲 𑒖𑒱𑒪𑒰𑒏 𑒋𑒏𑒙𑒰 𑒫𑒱𑒠𑓂𑒨𑒰𑒪𑒨𑒧𑒹 𑒖𑒱𑒢𑒑𑒲 𑒦𑒩𑒱 𑒮𑒹𑒫𑒰 𑒠𑒹𑒪𑒢𑒱।
𑒁𑒐𑒢 𑒡𑒩𑒱 𑒠𑒳𑒃𑒨𑒹 𑒣𑒩𑒱𑒫𑒰𑒩𑒏 𑒔𑒩𑓂𑒔 𑒦𑒹𑒪 𑒁𑒕𑒱 𑒧𑒳𑒠𑒰 𑒋𑒞𑒥𑒹 𑒢𑒻 𑒁𑒕𑒱। 𑒣𑓀. 𑒏𑒰𑒧𑒹𑒬𑓂𑒫𑒩 𑒗𑒰, 𑒖𑒹 𑒐𑒑𑒛𑓃𑒱𑒨𑒰 𑒫𑒱𑒠𑓂𑒨𑒰𑒪𑒨𑒏 𑒮𑓀𑒑 𑒠𑒲𑒣 𑒧𑒯𑒰𑒫𑒱𑒠𑓂𑒨𑒰𑒪𑒨𑒧𑒹 𑒮𑒹𑒯𑒼 𑒮𑒹𑒫𑒰 𑒠𑒹𑒪𑒢𑒱। 𑒍 𑒫𑒹𑒠-𑒫𑓂𑒨𑒰𑒏𑒩𑒝𑒏 𑒣𑓂𑒩𑒏𑒰𑒝𑓂𑒛 𑒣𑓀𑒛𑒱𑒞 𑒕𑒪𑒰𑒯। 𑒣𑓀𑒛𑒱𑒞 𑒔𑒝𑓂𑒛𑒹𑒬𑓂𑒫𑒩 𑒗𑒰 𑒁𑒩𑒛𑓃𑒱𑒨𑒰 𑒧𑒡𑓂𑒨 𑒫𑒱𑒠𑓂𑒨𑒰𑒪𑒨𑒏 𑒮𑓀𑒮𑓂𑒟𑒰𑒣𑒱𑒞 𑒬𑒱𑒏𑓂𑒭𑒏 𑒥𑒢𑒱 𑒁𑒡𑒫𑒨𑒮𑒹𑒧𑒹 𑒧𑒩𑒱 𑒑𑒹𑒪𑒰𑒯।
𑒣𑓀𑒛𑒱𑒞 𑒅𑒣𑒹𑒢𑓂𑒠𑓂𑒩 𑒧𑒱𑒬𑓂𑒩 𑒮𑒦𑒮𑒿 𑒦𑒱𑒢𑓂𑒢 𑒕𑒪𑒰𑒯। 𑒍 𑒋𑒏 𑒮𑓀𑒑 𑒖𑓂𑒨𑒼𑒞𑒱𑒭, 𑒫𑒹𑒠, 𑒫𑓂𑒨𑒰𑒏𑒩𑒝 𑒂 𑒮𑒰𑒯𑒱𑒞𑓂𑒨𑒏 𑒫𑒱𑒬𑒹𑒭 𑒖𑓂𑒘𑒰𑒞𑒰 𑒕𑒪𑒰𑒯। 𑒏𑒞𑒹𑒏𑒼 𑒧𑒯𑒰𑒫𑒱𑒠𑓂𑒨𑒰𑒪𑒨𑒧𑒹 𑒮𑒹𑒫𑒰 𑒠𑒻𑒞 𑒬𑒩𑒲𑒩 𑒞𑒱𑒨𑒰𑒑 𑒏𑒹𑒪𑒢𑒱। 𑒮𑒦𑒮𑒿 𑒦𑒱𑒢𑓂𑒢 𑒍 𑒌 𑒁𑒩𑓂𑒟𑒧𑒹 𑒕𑒪𑒰𑒯 𑒖𑒹 𑒏𑒼𑒢𑒼 𑒧𑒯𑒰𑒫𑒱𑒠𑓂𑒨𑒰𑒪𑒨𑒧𑒹 𑒁𑒡𑒱𑒏 𑒠𑒱𑒢 𑒢𑒻 𑒙𑒱𑒏 𑒣𑒥𑒻𑒞 𑒕𑒪𑒰𑒯। 𑒮𑒰𑒪𑒏 𑒦𑒲𑒞𑒩𑒹 𑒏𑒱𑒕𑒳 𑒢𑒹 𑒏𑒱𑒕𑒳 𑒐𑒙𑒣𑒙 𑒦𑒃𑒨𑒹 𑒖𑒰𑒃𑒞 𑒕𑒪𑒢𑒱। 𑒖𑒐𑒢𑒹 𑒐𑒙𑒣𑒙 𑒯𑒼𑒃𑒞 𑒕𑒪𑒢𑒱, 𑒮𑒼𑒗𑒹 𑒒𑒩𑒧𑒳𑒿𑒯 𑒫𑒱𑒠𑒰 𑒦𑓄 𑒖𑒰𑒃𑒞 𑒕𑒪𑒰𑒯। 𑒧𑒳𑒠𑒰 𑒑𑒰𑒧𑒼 𑒋𑒪𑒰𑒣𑒩 𑒏𑒹𑒏𑒩𑒼 𑒏𑒱𑒕𑒳 𑒏𑒯𑒻𑒞 𑒢𑒻 𑒕𑒪𑒐𑒱𑒢। 𑒏𑒱𑒨𑒼 𑒣𑒳𑒕𑒥𑒼 𑒢𑒹 𑒏𑒩𑒢𑒱 𑒖𑒹 𑒍𑒯𑒱𑒢𑒰 𑒋𑒪𑒾𑓀 𑒂𑒏𑒱 𑒗𑒑𑒛𑓃𑒰-𑒠𑒰𑒢 𑒏𑓄 𑒏𑒋 𑒋𑒪𑒾𑓀। 𑒁𑒠𑓂𑒦𑒳𑒞 𑒑𑒳𑒝 𑒕𑒪𑒢𑒱 𑒖𑒹 𑒁𑒣𑒢𑒹-𑒂𑒣 𑒫𑒱𑒧𑒩𑓂𑒬 𑒏𑒩𑒻𑒞, 𑒮𑒧𑒋 𑒮𑓀𑒑 𑒁𑒣𑒢 𑒏𑒩𑓂𑒞𑓂𑒞𑒫𑓂𑒨𑒏𑒹𑒿 𑒕𑒳𑒙𑒻𑒞 𑒠𑒹𑒐𑒱 𑒠𑒼𑒮𑒩 𑒧𑒯𑒰𑒫𑒱𑒠𑓂𑒨𑒰𑒪𑒨 𑒠𑒱𑒮𑒱 𑒫𑒱𑒠𑒰 𑒯𑒼𑒃𑒞 𑒕𑒪𑒰𑒯। 𑒐𑒩𑒰𑒧 𑒕𑒼𑒛𑓃𑒱 𑒣𑒋𑒩𑒧𑒹 𑒏𑒯𑒱𑒨𑒼 𑒖𑒴𑒞𑓂𑒞𑒰-𑒣𑒣𑓂𑒣𑒪 𑒢𑒻 𑒣𑒯𑒱𑒩𑒪𑒢𑒱। 𑒣𑒩𑒼𑒣𑒙𑓂𑒙𑒰𑒏 𑒫𑒱𑒠𑓂𑒫𑒰𑒢𑒏 𑒥𑒲𑒔 𑒁𑒣𑒢 𑒣𑒯𑒱𑒔𑒰𑒢 𑒕𑒪𑒢𑒱, 𑒖𑒃𑒮𑒿 𑒏𑒼𑒢𑒼 𑒫𑒱𑒠𑓂𑒨𑒰𑒪𑒨, 𑒧𑒯𑒰𑒫𑒱𑒠𑓂𑒨𑒰𑒪𑒨𑒧𑒹 𑒮𑓂𑒫𑒰𑒑𑒞 𑒩𑒯𑒻𑒞 𑒕𑒪𑒢𑒱।
𑒣𑓀𑒛𑒱𑒞 𑒅𑒠𑒱𑒞 𑒢𑒰𑒩𑒰𑒨𑒝 𑒗𑒰, 𑒖𑒹 𑒑𑒼𑒪𑓂𑒛 𑒧𑒹𑒛𑒪𑒮𑒿 𑒮𑒧𑓂𑒧𑒰𑒢𑒱𑒞 𑒕𑒪𑒰𑒯, 𑒬𑒱𑒏𑓂𑒭𑒝 𑒏𑒰𑒩𑓂𑒨 𑒕𑒼𑒛𑓃𑒱 𑒠𑒼𑒏𑒰𑒢𑒠𑒰𑒩𑒲 𑒫𑓂𑒨𑒫𑒮𑒰𑒨𑒏𑒹𑒿 𑒁𑒣𑒢 𑒖𑒲𑒫𑒱𑒏𑒰 𑒥𑒢𑒾𑒪𑒢𑒱। 𑒣𑒩𑒱𑒫𑒰𑒩𑒏 𑒮𑓂𑒟𑒱𑒞𑒱 𑒐𑒩𑒰𑒣 𑒕𑒪𑒢𑒱। 𑒥𑒱𑒢𑒳 𑒅𑒣𑒰𑒩𑒖𑒢𑒹 𑒔𑒪𑒻𑒥𑒪𑒰 𑒢𑒻 𑒕𑒪𑒢𑒱। 𑒧𑒳𑒠𑒰 𑒏𑒱𑒕𑒳𑒋 𑒠𑒱𑒢𑒏 𑒧𑒹𑒯𑒢𑒞𑒱𑒏 𑒤𑒪 𑒢𑒲𑒏 𑒦𑒹𑒙𑒱𑒪𑒢𑒱। 𑒖𑒲𑒫𑒢-𑒨𑒰𑒣𑒢 𑒏𑒩𑒻𑒞 𑒥𑒲𑒮 𑒥𑒲𑒒𑒰 𑒖𑒧𑒲𑒢 𑒣𑒩𑒱𑒫𑒰𑒩𑒧𑒹 𑒥𑒢𑒾𑒪𑒢𑒱। 𑒣𑓀. 𑒩𑒰𑒧𑒢𑒰𑒩𑒰𑒨𑒝 𑒗𑒰 𑒫𑓂𑒨𑒰𑒏𑒩𑒝𑒏 𑒖𑓂𑒘𑒰𑒞𑒰 𑒕𑒪𑒰𑒯। 𑒬𑒩𑒲𑒩𑒮𑒿 𑒣𑒳𑒭𑓂𑒙 𑒩𑒯𑒢𑒹 𑒬𑒳𑒩𑒴𑒧𑒹 𑒣𑒳𑒪𑒱𑒮𑒏 𑒢𑒼𑒏𑒩𑒲 𑒬𑒳𑒩𑒴 𑒏𑒹𑒪𑒢𑒱, 𑒧𑒳𑒠𑒰 𑒫𑒱𑒠𑒹𑒬𑒲 𑒬𑒰𑒮𑒢𑒏 𑒅𑒚𑒻𑒞 𑒫𑒱𑒩𑒼𑒡𑒧𑒹 𑒢𑒼𑒏𑒩𑒲 𑒕𑒼𑒛𑓃𑒱 𑒬𑒱𑒏𑓂𑒭𑒝 𑒏𑒰𑒩𑓂𑒨𑒧𑒹 𑒔𑒪𑒱 𑒋𑒪𑒰𑒯, 𑒥𑒹𑒮𑒱𑒏 𑒮𑓂𑒏𑒴𑒪 𑒒𑒼𑒒𑒛𑓃𑒛𑒱𑒯𑒰𑒧𑒹 𑒣𑓂𑒩𑒫𑒰𑒮𑒲 𑒖𑒲𑒏 𑒮𑓀𑒑 𑒩𑒯𑒱 𑒮𑒹𑒫𑒰 𑒠𑒹𑒪𑒢𑒱।

𑒑𑒰𑒧𑒏 𑒮𑓂𑒏𑒴𑒪𑒮𑒿 𑓑𑓙𑓕𑓖 𑒄.𑒧𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒢𑒱𑒏𑒪𑒪𑒰। 𑒑𑒰𑒧𑒮𑒿 𑒮𑒙𑒪𑒹 𑒣𑒴𑒥 𑒏𑒕𑒳𑒥𑒲𑒧𑒹 𑒧𑒱𑒛𑓂𑒪 𑒮𑓂𑒏𑒴𑒪 𑒥𑒢𑒱 𑒑𑒹𑒪 𑒕𑒪। 𑒞𑒃𑒮𑒿 𑒣𑒯𑒱𑒢𑒹 𑒄 𑒣𑒿𑒔𑒧𑒰 𑒡𑒩𑒱𑒏 𑒮𑓂𑒏𑒴𑒪 𑒕𑒪। 𑒧𑒱𑒛𑓂𑒪 𑒮𑓂𑒏𑒴𑒪 𑒁𑒪𑒑 𑒥𑒢𑒪। 𑒍𑒢𑒰 𑒁𑒐𑒢 𑒠𑒳𑒢𑒴 𑒧𑒱𑒪𑒱 𑒋𑒏 𑒦𑓄 𑒑𑒹𑒪 𑒁𑒕𑒱 𑒧𑒳𑒠𑒰 𑒣𑒯𑒱𑒢𑒹 𑒠𑒳𑒢𑒴 𑒁𑒪𑒑-𑒁𑒪𑒑 𑒕𑒪। 𑒍𑒃 𑒮𑒧𑒋𑒧𑒹 𑒣𑒿𑒔𑒧𑒰 𑒡𑒩𑒱 𑒤𑒲𑒮 𑒢𑒻 𑒪𑒑𑒻𑒞 𑒕𑒪, 𑒧𑒳𑒠𑒰 𑒕𑒚𑒰-𑒮𑒰𑒞𑒧𑒰𑒧𑒹 𑒁𑒜𑒰𑒃 𑒩𑒴𑒣𑒻𑒂 𑒧𑒯𑒲𑒢𑒰 𑒤𑒲𑒮 𑒪𑒑𑒻𑒞 𑒕𑒪। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑓑𑓙𑓖𑓐 𑒄𑓀.𑒧𑒹 𑒧𑒱𑒛𑓂𑒪 𑒮𑓂𑒏𑒴𑒪𑒮𑒿 𑒢𑒱𑒏𑒪𑒱 𑒏𑒹𑒖𑒩𑒲𑒥𑒰𑒪 𑒯𑒰𑒃𑒮𑓂𑒏𑒴𑒪 𑒗𑓀𑒗𑒰𑒩𑒣𑒳𑒩𑒧𑒹 𑒢𑒰𑒍𑓀 𑒪𑒱𑒐𑒹𑒪𑒢𑒱। 𑒥𑒹𑒩𑒧𑒰𑒏 𑒫𑒱𑒠𑓂𑒨𑒰𑒩𑓂𑒟𑒲 𑒞𑒧𑒳𑒩𑒱𑒨𑒰𑒧𑒹 𑒯𑒰𑒃 𑒮𑓂𑒏𑒴𑒪 𑒂 𑒗𑓀𑒗𑒰𑒩𑒣𑒳𑒩 𑒯𑒰𑒃 𑒮𑓂𑒏𑒴𑒪𑒧𑒹 𑒌 𑒠𑒳𑒢𑒴 𑒚𑒰𑒧 𑒮𑒰𑒪𑒹-𑒮𑒰𑒪 𑒫𑒱𑒦𑒰𑒱𑒖𑒞 𑒯𑒼𑒃𑒞 𑒩𑒯𑒻𑒞 𑒕𑒪। 𑒏𑒰𑒩𑒝𑒼 𑒩𑒯𑒻। 𑒖𑒃 𑒩𑒴𑒣𑒏 𑒬𑒱𑒏𑓂𑒭𑒏𑒏 𑒙𑒲𑒧 𑒗𑓀𑒗𑒰𑒩𑒣𑒳𑒩𑒧𑒹 𑒕𑒪 𑒍𑒃 𑒞𑒩𑒯𑒏 𑒙𑒲𑒧 𑒞𑒧𑒳𑒩𑒱𑒨𑒰𑒧𑒹 𑒢𑒻 𑒕𑒪। 𑒞𑒧𑒳𑒩𑒱𑒨𑒰 𑒯𑒰𑒃 𑒮𑓂𑒏𑒴𑒪𑒧𑒹 𑒋𑒏-𑒂𑒡 𑒬𑒱𑒏𑓂𑒭𑒏 𑒮𑒰𑒪𑒹-𑒮𑒰𑒪 𑒖𑒰𑒃𑒞-𑒁𑒥𑒻𑒞 𑒕𑒪𑒰𑒯 𑒖𑒐𑒢 𑒏𑒱 𑒗𑓀𑒗𑒰𑒩𑒣𑒳𑒩𑒧𑒹 𑒮𑒹 𑒢𑒻 𑒕𑒪, 𑒖𑒃𑒮𑒿 𑒗𑓀𑒗𑒰𑒩𑒣𑒳𑒩𑒏𑒹𑒿 𑒢𑒲𑒏 𑒧𑒰𑒢𑒪 𑒖𑒰𑒃𑒞 𑒕𑒪। 𑒖𑒯𑒱𑒢𑒰 𑒑𑒰𑒧𑒏 𑒂𑒢-𑒂𑒢 𑒫𑒱𑒠𑓂𑒨𑒰𑒩𑓂𑒟𑒲 𑒣𑒋𑒩𑒹 𑒖𑒰𑒃𑒞-𑒁𑒥𑒻𑒞 𑒕𑒪𑒰𑒯 𑒞𑒯𑒱𑒢𑒰 𑒄𑒯𑒼 𑒖𑒰𑒃𑒞-𑒁𑒥𑒻𑒞 𑒕𑒪𑒰। 𑒏𑒱𑒕𑒳 𑒑𑒼𑒙𑒹 𑒯𑒼𑒮𑓂𑒙𑒪𑒼𑒧𑒹 𑒩𑒯𑒻𑒞 𑒕𑒪𑒰। 𑒮𑒰𑒪𑒼 𑒦𑒩𑒱 𑒏𑒱𑒕𑒳 𑒢𑒻 𑒏𑒱𑒕𑒳 𑒁𑒮𑒳𑒫𑒱𑒡𑒰 𑒩𑒯𑒱𑒞𑒹 𑒕𑒪𑒢𑒱, 𑒍𑒢𑒰 𑒁𑒐𑒢𑒼 𑒏𑒱𑒕𑒳-𑒏𑒱𑒕𑒳 𑒕𑒢𑓂𑒯𑒱𑒨𑒹। 𑒮𑒰𑒪𑒼 𑒦𑒩𑒱 𑒌 𑒞𑒩𑒯𑒹𑒿 𑒩𑒯𑒻 𑒕𑒪।
𑒁𑒑𑒯𑒢𑒮𑒿 𑒧𑒰𑒒 𑒡𑒩𑒱 𑒠𑒱𑒢𑒼 𑒕𑒼𑒙 𑒯𑒼𑒃𑒋, 𑒧𑒳𑒠𑒰 𑒫𑒱𑒠𑓂𑒨𑒰𑒪𑒨𑒏 𑒮𑒧𑒋 𑒕𑒼𑒙 𑒢𑒻 𑒯𑒼𑒃𑒞 𑒕𑒪। 𑒏𑒰𑒖𑒏 𑒁𑒢𑒳𑒏𑒴𑒪 𑒮𑒧𑒋 𑒦𑒹𑒙𑒢𑒹 𑒠𑒱𑒢-𑒩𑒰𑒞𑒱𑒧𑒹 𑒁𑒢𑓂𑒞𑒩 𑒦𑒪𑒯𑒱𑓀 𑒢𑒻 𑒥𑒴𑒗𑒱 𑒣𑒛𑓃𑒻𑒞 𑒕𑒻, 𑒧𑒳𑒠𑒰 𑒑𑒰𑒧-𑒒𑒩𑒏 𑒪𑒹𑒪 𑒞𑒿 𑒄 𑒏𑒚𑒱𑒢 𑒁𑒕𑒱𑒨𑒹। 𑒧𑒾𑒮𑒧𑒲 𑒕𑒳𑒙𑓂𑒙𑒲𑒏 𑒢𑒰𑒍𑓀𑒣𑒩 𑒠𑒱𑒮𑒧𑓂𑒥𑒩𑒧𑒹 𑒂𑒚-𑒠𑒮 𑒠𑒱𑒢 𑒥𑒛𑓃𑒰 𑒠𑒱𑒢𑒏 𑒕𑒳𑒙𑓂𑒙𑒲 𑒯𑒼𑒃𑒞 𑒕𑒪, 𑒖𑒹 𑒣𑒩𑒲𑒏𑓂𑒭𑒰𑒹𑒣𑒩𑒰𑒢𑓂𑒞 𑒂 𑒩𑒱𑒖𑒪𑓂𑒙𑒮𑒿 𑒣𑒴𑒩𑓂𑒫 𑒯𑒼𑒃𑒞 𑒕𑒪।
𑒑𑒩𑒧𑒱𑒨𑒼 𑒧𑒰𑒮𑒧𑒹 𑒁𑒮𑒳𑒫𑒱𑒡𑒰 𑒞𑒿 𑒞𑒯𑒱𑒢𑒰 𑒧𑒳𑒠𑒰 𑒍 𑒁𑒮𑒳𑒫𑒱𑒡𑒰 𑒠𑒼𑒮𑒩 𑒞𑒩𑒯𑒏 𑒯𑒼𑒃𑒞 𑒕𑒪। 𑒍𑒢𑒰 𑒋𑒏𑒩𑒰 𑒂𑒧 𑒐𑒰𑒃𑒏 𑒕𑒳𑒙𑓂𑒙𑒲 𑒮𑒹𑒯𑒼 𑒏𑒯𑒪 𑒖𑒰𑒃 𑒕𑒻 𑒧𑒳𑒠𑒰 𑒑𑓂𑒩𑒲𑒭𑓂𑒧𑒰𑒫𑒏𑒰𑒮𑒏 𑒢𑒰𑒁𑒼𑓀 𑒮𑒹𑒯𑒼 𑒕𑒻, 𑒄 𑒢𑒧𑒑𑒩 𑒕𑒳𑒙𑓂𑒙𑒲, 𑒧𑒰𑒮 𑒠𑒱𑒢𑒏 𑒯𑒼𑒃𑒞 𑒕𑒪। 𑒢𑒲𑒏 𑒣𑒩𑒱𑒫𑒰𑒩𑒏 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒁𑒢𑒳𑒏𑒴𑒪 𑒫𑒰𑒞𑒰𑒫𑒩𑒝 𑒩𑒯𑒢𑒹 𑒠𑒼𑒯𑒩𑒲 𑒪𑒰𑒦 𑒯𑒼𑒃𑒞 𑒕𑒪𑒢𑒱, 𑒮𑒰𑒡𑒰𑒩𑒝 𑒣𑒩𑒱𑒫𑒰𑒩𑒏 𑒫𑒱𑒠𑓂𑒨𑒰𑒩𑓂𑒟𑒲 𑒂𑒧 𑒐𑒰𑒃𑒞-𑒐𑒰𑒃𑒞 𑒂𑒡𑒰-𑒕𑒱𑒡𑒰 𑒥𑒱𑒮𑒩𑒱 𑒖𑒰𑒃𑒞 𑒕𑒪𑒰। 𑒬𑒻𑒏𑓂𑒭𑒝𑒱𑒏 𑒫𑒰𑒞𑒰𑒫𑒩𑒝 𑒮𑓂𑒣𑒭𑓂𑒙 𑒩𑒴𑒣𑒧𑒹 𑒫𑒱𑒦𑒰𑒖𑒱𑒞 𑒦𑓄 𑒖𑒰𑒃𑒞 𑒕𑒪। 𑒖𑒯𑒱𑒢𑒰 𑒖𑒰𑒛𑓃𑒏 𑒧𑒰𑒮 𑒥𑒩𑒹𑒛𑓃𑒲 𑒕𑒳𑒥𑒻𑒞 𑒁𑒕𑒱 𑒞𑒯𑒱𑒢𑒰 𑒑𑒩𑒧𑒱𑒨𑒼 𑒑𑒰𑒕𑒏 𑒤𑒳𑒢𑒑𑒲 𑒕𑒳𑒥𑒻𑒞 𑒁𑒕𑒱। 𑒖𑒃𑒮𑒿 𑒁𑒣𑓂𑒩𑒲𑒪 𑒧𑒰𑒢𑒹 𑒔𑒻𑒞 𑒮𑒿 𑒞𑒰𑒡𑒩𑒱 𑒫𑒱𑒠𑓂𑒨𑒰𑒪𑒨 𑒦𑒱𑒢𑒮𑒳𑒩𑒏𑒰 𑒯𑒼𑒃𑒞 𑒕𑒪, 𑒖𑒰𑒡𑒩𑒱 𑒑𑒩𑓂𑒧𑒲 𑒕𑒳𑒙𑓂𑒙𑒲 𑒢𑒻 𑒦𑓄 𑒖𑒰𑒃𑒞 𑒕𑒪।
𑒞𑒧𑒳𑒩𑒱𑒨𑒰 𑒯𑒰𑒃 𑒮𑓂𑒏𑒴𑒪 𑒂 𑒗𑓀𑒗𑒰𑒩𑒣𑒳𑒩 𑒯𑒰𑒃 𑒮𑓂𑒏𑒴𑒪𑒧𑒹 𑒃𑒯𑒼 𑒁𑓀𑒞𑒩 𑒕𑒪 𑒖𑒹 𑒂𑒡𑒰 𑒒𑓀𑒙𑒰 𑒂𑒑𑒴-𑒣𑒰𑒕𑒴 𑒐𑒳𑒖𑒥𑒼 𑒏𑒩𑒻𑒞 𑒕𑒪 𑒂 𑒥𑒢𑓂𑒢𑒼 𑒯𑒼𑒃𑒞 𑒕𑒪। 𑒏𑒰𑒩𑒝𑒼 𑒕𑒪𑒻, 𑒏𑒧𑒪𑒰 𑒣𑒕𑒱𑒧𑒏 𑒑𑒰𑒧 𑒧𑒹𑓀𑒯𑒟, 𑒢𑒩𑒴𑒂𑒩 𑒂𑒠𑒱𑒮𑒿 𑒪𑓄 𑒏𑓄 𑒣𑒴𑒥𑒧𑒹 𑒥𑒹𑒩𑒧𑒰 𑒡𑒩𑒱 𑒂 𑒑𑓀𑒑𑒰𑒣𑒳𑒩 𑒐𑒩𑒥𑒰𑒃𑒩𑒮𑒿 𑒪𑓄 𑒏𑓄 𑒁𑒪𑒣𑒳𑒩𑒰-𑒁𑒩𑒛𑓃𑒱𑒨𑒰 𑒡𑒩𑒱𑒏 𑒫𑒱𑒠𑓂𑒨𑒰𑒩𑓂𑒟𑒲 𑒗𑓀𑒗𑒰𑒩𑒣𑒳𑒩𑒧𑒹 𑒣𑒜𑓃𑒻𑒞 𑒕𑒪𑒰𑒯। 𑒋𑒞𑓂𑒞𑒹 𑒢𑒧𑒯𑒩 𑒏𑓂𑒭𑒹𑒞𑓂𑒩, 𑒞𑒿𑒋 𑒫𑒱𑒪𑒧𑓂𑒥𑒮𑒿 𑒮𑓂𑒏𑒴𑒪 𑒐𑒳𑒪𑒻𑒞 𑒕𑒪। 𑒍𑒃 𑒮𑒧𑒋 𑒮𑒰𑒜𑓃𑒹 𑒋𑒑𑒰𑒩𑒯 𑒥𑒖𑒹 𑒫𑒱𑒠𑓂𑒨𑒰𑒪𑒨𑒧𑒹 𑒕𑒳𑒙𑓂𑒙𑒲 𑒯𑒼𑒃𑒞 𑒩𑒯𑒋। 𑒞𑒐𑒢 𑒣𑒰𑒢-𑒮𑒰𑒞 𑒧𑒲𑒪 𑒣𑒋𑒩𑒹 𑒔𑒪𑒥 𑒏𑒚𑒱𑒢 𑒕𑒪। 𑒍𑒢𑒰 𑒄 𑒥𑒛𑓃 𑒏𑒚𑒱𑒢 𑒢𑒻 𑒏𑒱𑒋𑒏 𑒞𑒿 𑒥𑒹𑒩𑒧𑒰𑒏 𑒫𑒱𑒠𑓂𑒨𑒰𑒩𑓂𑒟𑒲 𑒣𑒋𑒩𑒹 𑒔𑒪𑒱 𑒪𑒼𑒯𑒢𑒼 𑒫𑒱𑒠𑓂𑒨𑒰𑒪𑒨𑒮𑒿 𑒣𑒜𑓃𑒢𑒹 𑒕𑒪𑒰𑒯। 𑒞𑒯𑒱𑒢𑒰 𑒥𑒩𑓂𑒐𑒰 𑒧𑒰𑒮𑒧𑒹 𑒮𑒹𑒯𑒼 𑒯𑒼𑒃𑒞 𑒕𑒪। 𑒏𑒐𑒢 𑒣𑒰𑒢𑒱-𑒫𑒱𑒯𑒰𑒛𑓃𑒱 𑒂𑒥𑒱 𑒖𑒰𑒋, 𑒞𑒹𑒏𑒩 𑒏𑒼𑒢𑒼 𑒚𑒲𑒏 𑒢𑒻। 𑒞𑒯𑒴𑒧𑒹 𑒏𑒞𑒹𑒏𑒰𑒪 𑒥𑒩𑒱𑒮𑒞 𑒞𑒹𑒏𑒩𑒼 𑒚𑒹𑒏𑒰𑒢 𑒢𑒻। 𑒐𑒻𑒩 𑒖𑒹 𑒯𑒼.....। 𑒏𑒹𑒖𑒩𑒲𑒫𑒰𑒪 𑒯𑒰𑒃 𑒮𑓂𑒏𑒴𑒪 𑒗𑓀𑒗𑒰𑒩𑒣𑒳𑒩𑒧𑒹 𑓑𑓙𑓖𑓓 𑒄.𑒧𑒹 𑒯𑒰𑒨𑒩 𑒮𑒹𑒏𑒹𑒝𑓂𑒛𑓂𑒩𑒲𑒏 𑒣𑒜𑓃𑒰𑒃 𑒬𑒳𑒩𑒴 𑒦𑒹𑒪। 𑒧𑒳𑒠𑒰 𑒟𑒼𑒛𑓃𑒹 𑒣𑒹𑓀𑒔 𑒪𑒰𑒑𑒱 𑒑𑒹𑒪𑒻। 𑒏𑒪𑒰-𑒫𑒱𑒖𑓂𑒘𑒰𑒢 𑒂 𑒫𑒰𑒝𑒱𑒖𑓂𑒨 𑒞𑒲𑒢𑒴𑒏 𑒣𑒜𑓃𑒰𑒃 𑒯𑒼𑒃 𑒕𑒪𑒻। 𑒏𑒪𑒰-𑒫𑒱𑒖𑓂𑒘𑒰𑒢𑒏 𑒧𑓀𑒖𑒴𑒩𑒲 𑒦𑒹𑒙𑒱 𑒑𑒹𑒪, 𑒫𑒰𑒱𑒝𑒖𑓂𑒨𑒏 𑒦𑒹𑒙𑒥𑒹 𑒢𑒹 𑒏𑒋𑒪। 𑒏𑒞𑒹 𑒩𑓀𑒑𑒏 𑒯𑒫𑒰 𑒥𑒯𑒋 𑒪𑒰𑒑𑒪। 𑒍𑒢𑒰 𑒬𑒱𑒏𑓂𑒭𑒏𑒧𑒹 𑒥𑒜𑓃𑒼𑒞𑓂𑒞𑒩𑒲 𑒣𑒕𑒰𑒞𑒱 𑒦𑒹𑒪, 𑒧𑒳𑒠𑒰 𑒬𑒳𑒩𑒴𑒧𑒹 𑒁𑒮𑒳𑒫𑒱𑒡𑒰 𑒩𑒯𑒪। 𑓑𑓙𑓕𑓘 𑒄.𑒧𑒹 𑒖𑒢𑒞𑒰 𑒏𑒍𑒪𑒹𑒖 𑒐𑒳𑒖𑒪। 𑒖𑒢-𑒮𑒯𑒨𑒼𑒑𑒮𑒿 𑒏𑒍𑒪𑒹𑒖 𑒐𑒳𑒖𑒪। 𑒧𑒳𑒠𑒰 𑒏𑒍𑒪𑒹𑒖𑒏 𑒖𑒹 𑒢𑒧𑒑𑒩-𑒔𑒾𑒛𑓃𑒑𑒩 𑒒𑒩 𑒔𑒰𑒯𑒲, 𑒖𑒹 𑒡𑒛𑓃𑒤𑒛𑓃𑒧𑒹 𑒢𑒻 𑒦𑒹𑒪𑒻 𑒞𑒿𑒋 𑒯𑒰𑒃𑒨𑒹 𑒮𑓂𑒏𑒴𑒪𑒧𑒹 𑒮𑒰𑒡𑒰𑒩𑒝 𑒩𑒴𑒣𑒹𑒿 𑒣𑒜𑓃𑒰𑒃 𑒬𑒳𑒩𑒴 𑒦𑒹𑒪। 𑒏𑒱𑒕𑒳 𑒑𑒢𑒪 𑒔𑒳𑒢𑒪 𑒫𑒱𑒭𑒨𑒏 𑒣𑒜𑓃𑒰𑒃 𑒬𑒳𑒩𑒴 𑒦𑒹𑒪। 𑒐𑒋𑒩 𑒖𑒹 𑒦𑒹𑒪, 𑒧𑒳𑒠𑒰 𑒬𑒱𑒏𑓂𑒭𑒰𑒧𑒹 𑒢𑒫 𑒖𑒰𑒑𑒩𑒝 𑒏𑓂𑒭𑒹𑒞𑓂𑒩𑒧𑒹 𑒂𑒋𑒪। 𑒥𑒯𑒳𑒞𑒼𑒏 𑒧𑒢𑒏 𑒧𑒳𑒩𑒰𑒠 𑒣𑒴𑒩𑒰 𑒯𑒼𑒃𑒏 𑒮𑓀𑒦𑒰𑒫𑒢𑒰 𑒥𑒜𑓃𑒪। 𑒥𑒲.𑒋. 𑒞𑒏𑒏 𑒣𑒜𑓃𑒰𑒃 𑒪𑒑𑒧𑒹 𑒯𑒋𑒞, 𑒞𑒐𑒢 𑒣𑒜𑓃𑒻𑒥𑒪𑒰 𑒥𑒔𑓂𑒔𑒰 𑒂 𑒣𑒜𑓃𑒥𑒻𑒥𑒪𑒰 𑒑𑒰𑒩𑒖𑒢𑒏 𑒧𑒢𑒧𑒹 𑒏𑒱𑒁𑒋 𑒢𑒹 𑒅𑒞𑓂𑒮𑒰𑒯 𑒖𑒑𑒞𑒢𑒱। 𑒏𑒱𑒕𑒳 𑒠𑒱𑒢𑒏 𑒣𑒕𑒰𑒞𑒱 𑒏𑒍𑒪𑒹𑒖𑒏 𑒁𑒣𑒢 𑒏𑒿𑒔𑒏𑒰 𑒄𑓀𑒙𑒰 𑒂 𑒐𑒣𑒛𑓃𑒰𑒏 𑒧𑒏𑒰𑒢 𑒥𑒢𑒪𑒻।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑓑𑓙𑓖𑓕 𑒄.𑒧𑒹 𑒯𑒰𑒨𑒩 𑒮𑒹𑒏𑒹𑒝𑓂𑒛𑓂𑒩𑒲 𑒣𑒰𑒮 𑒏𑒹𑒪𑒰𑒣𑒩 𑒥𑒲.𑒋. 𑒣𑒰𑒩𑓂𑒙 𑒫𑒢𑒧𑒹 𑒢𑒰𑒍𑓀 𑒪𑒱𑒐𑒹𑒪𑒢𑒱। 𑒣𑒯𑒱𑒢𑒹 𑒠𑒴 𑒥𑒩𑓂𑒐𑒏 𑒂𑒃.𑒋. 𑒂 𑒠𑒴 𑒥𑒩𑓂𑒐𑒏 𑒥𑒲.𑒋. 𑒣𑓂𑒩𑒲 𑒯𑒳𑒁𑒋 𑒪𑒑𑒪𑒻 𑒂 𑒠𑒳𑒢𑒴 𑒠𑒱𑒮𑒮𑒿 𑒫𑒱𑒠𑓂𑒨𑒰𑒩𑓂𑒟𑒲𑒏 𑒣𑓂𑒩𑒫𑒹𑒬 𑒯𑒳𑒁𑒋 𑒪𑒰𑒑𑒪। 𑒥𑒲.𑒋. 𑒣𑒰𑒩𑓂𑒙 𑒫𑒢 𑒏𑒹𑒪𑒰𑒣𑒩 𑒂𑒢𑒩𑓂𑒮 𑒣𑒜𑓃𑒻𑒏 𑒫𑒱𑒔𑒰𑒩 𑒦𑒹𑒪𑒢𑒱। 𑒂 𑒂𑒢 𑒏𑒍𑒪𑒹𑒖𑒧𑒹 𑒂𑒢𑒩𑓂𑒮𑒏 𑒣𑒜𑓃𑒰𑒃 𑒯𑒼𑒃𑒞 𑒕𑒪, 𑒖𑒢𑒞𑒰 𑒏𑒍𑒪𑒹𑒖𑒧𑒹 𑒢𑒻 𑒯𑒼𑒃𑒞 𑒕𑒪। 𑒋𑒏-𑒠𑒴-𑒞𑒲𑒢 𑒬𑒱𑒏𑓂𑒭𑒏𑒮𑒿 𑒁𑒡𑒱𑒏 𑒏𑒼𑒢𑒼 𑒫𑒱𑒭𑒨𑒧𑒹 𑒬𑒱𑒏𑓂𑒭𑒏 𑒢𑒻 𑒕𑒪। 𑒯𑒱𑒢𑓂𑒠𑒲 𑒫𑒱𑒦𑒰𑒑𑒧𑒹 𑒮𑒹𑒯𑒼 𑒠𑒳𑒃𑒨𑒹 𑒑𑒼𑒙𑒹 𑒕𑒪𑒰𑒯। 𑒍 𑒣𑓂𑒩𑒰𑒃𑒫𑒹𑒙 𑒩𑒴𑒣𑒧𑒹 𑒞𑒻𑒨𑒰𑒩𑒲 𑒏𑒩𑒋 𑒪𑒑𑒪𑒰। 𑒮𑒲.𑒋𑒧. 𑒏𑒍𑒪𑒹𑒖𑒏 𑒢𑒰𑒍𑓀𑒮𑒿 𑒤𑒰𑒩𑓂𑒧 𑒦𑒩𑒰𑒋𑒪 𑒂 𑒣𑒩𑒲𑒏𑓂𑒭𑒼 𑒦𑒹𑒪। 𑓑𑓙𑓕𑓒 𑒄𑓀.𑒏 𑒔𑒳𑒢𑒰𑒫𑒏 𑒥𑒰𑒠 𑒠𑒹𑒬𑒏 𑒁𑒣𑒢 𑒫𑒱𑒡𑒱𑒫𑒞 𑒮𑒩𑒏𑒰𑒩 𑒥𑒢𑒪। 𑒧𑒳𑒠𑒰 𑒋𑒏 𑒮𑓀𑒑 𑒏𑒞𑒹𑒏𑒼 𑒣𑓂𑒩𑒬𑓂𑒢 𑒅𑒚𑒱 𑒏𑓄 𑒚𑒰𑒜𑓃 𑒦𑓄 𑒑𑒹𑒪। 𑒮𑒩𑒏𑒰𑒩𑒲 𑒏𑒰𑒩𑓂𑒨𑒰𑒪𑒨𑒧𑒹 𑒏𑒩𑓂𑒧𑒔𑒰𑒩𑒲𑒏 𑒖𑒩𑒴𑒩𑒞𑒱 𑒦𑒹𑒪। 𑒖𑒹𑒏𑒩 𑒥𑒯𑒰𑒪𑒲𑒧𑒹 𑒖𑒰𑒞𑒱𑒫𑒰𑒠 𑒂 𑒣𑒻𑒩𑒫𑒲-𑒣𑒻𑒑𑒰𑒧 𑒬𑒳𑒩𑒴 𑒦𑒹𑒪। 𑒂𑒧 𑒖𑒢𑒞𑒰𑒏 𑒖𑒑𑒰𑒋𑒪 𑒮𑒩𑒏𑒰𑒩 𑒖𑒢𑒞𑒰𑒮𑒿 𑒥𑒯𑒳𑒞 𑒠𑒴𑒩 𑒯𑒙𑒱 𑒑𑒹𑒪।
𑒍𑒢𑒰 𑒖𑒹 𑒏𑒼𑒢𑒼 𑒢𑒫-𑒮𑓂𑒫𑒞𑓀𑒞𑓂𑒩 𑒠𑒹𑒬𑒏 𑒮𑓂𑒟𑒱𑒞𑒱 𑒯𑒼𑒃𑒋 𑒞𑒯𑒱𑒢𑒰 𑒁𑒣𑒢𑒼 𑒌𑒚𑒰𑒧 𑒩𑒯𑒋। 𑒧𑒳𑒠𑒰 𑒍𑒃 𑒪𑒹𑒪 𑒖𑒞𑓂𑒞𑒹 𑒮𑒏𑒰𑒩𑒰𑒞𑓂𑒧𑒏 𑒮𑒼𑒔 𑒂 𑒏𑒰𑒖𑒏 𑒎𑒮𑒞 𑒯𑒹𑒥𑒰𑒏 𑒔𑒰𑒯𑒱𑒨𑒹 𑒮𑒹 𑒢𑒻 𑒦𑒹𑒪।
𑒮𑒰𑒧𑓀𑒞𑒲 𑒮𑒼𑒔; 𑒂 𑒮𑒰𑒧𑓀𑒞 𑒧𑒖𑒑𑒴𑒞 𑒕𑒪, 𑒖𑒃𑒮𑒿 𑒂𑒧-𑒁𑒫𑒰𑒧𑒏 𑒥𑒲𑒔 𑒂𑒏𑓂𑒩𑒼𑒬 𑒣𑒢𑒣𑒋 𑒪𑒑𑒪𑒻। 𑒩𑒰𑒖𑒰-𑒩𑒖𑒥𑒰𑒛𑓃𑒹 𑒖𑒏𑒰𑒿 𑒬𑒰𑒮𑒢 𑒣𑒠𑓂𑒡𑒞𑒱 𑒔𑒪𑒋 𑒪𑒰𑒑𑒪। 𑒞𑒯𑒲 𑒥𑒲𑒔 𑒦𑒴𑒠𑒰𑒢 𑒂𑒢𑓂𑒠𑒼𑒪𑒢𑒏 𑒅𑒠𑒨 𑒮𑒹𑒯𑒼 𑒦𑒹𑒪। 𑒍𑒢𑒰 𑒞𑒹𑒪𑒰𑓀𑒑𑒢𑒰𑒮𑒿 𑒬𑒳𑒩𑒴 𑒦𑒹𑒪 𑒦𑒴𑒧𑒱 𑒂𑒢𑓂𑒠𑒼𑒪𑒢 𑒠𑒹𑒬𑒏𑒹𑒿 𑒛𑒼𑒪𑒰 𑒠𑒹𑒢𑒹 𑒕𑒪। 𑒞𑒃 𑒮𑓀𑒑 𑒏𑒹𑒩𑒪, 𑒥𑓀𑒑𑒰𑒪𑒏 𑒮𑓀𑒑 𑒕𑒱𑒙𑒤𑒳𑒙 𑒁𑒢𑒹𑒏𑒼 𑒩𑒰𑒖𑓂𑒨𑒧𑒹 𑒦𑒴𑒧𑒱 𑒂𑒢𑓂𑒠𑒼𑒪𑒢 𑒣𑒏𑒛𑓃𑒱 𑒩𑒯𑒪 𑒕𑒪। 𑒠𑒩𑒦𑓀𑒑𑒰 𑒖𑒱𑒪𑒰𑒧𑒹 𑒮𑒹𑒯𑒼 𑒦𑒴𑒧𑒱 𑒂𑒢𑓂𑒠𑒼𑒪𑒢 𑒬𑒳𑒩𑒴 𑒦𑒹𑒪।
𑓑𑓙𑓕𑓗 𑒄.𑒏 𑒔𑒳𑒢𑒰𑒫𑒧𑒹 𑒏𑒰𑒿𑒑𑓂𑒩𑒹𑒮 𑒮𑒩𑒏𑒰𑒩𑒏 𑒮𑓂𑒟𑒱𑒞𑒱 𑒏𑒧𑒖𑒼𑒩 𑒦𑒹𑒪। 𑒏𑒹𑒩𑒪𑒧𑒹 𑒫𑒰𑒧𑒣𑓀𑒟𑒲 𑒮𑒩𑒏𑒰𑒩 𑒥𑒢𑒱 𑒑𑒹𑒪। 𑒂𑒖𑒰𑒠𑒲𑒏 𑒠𑒾𑒛𑓃𑒏 𑒖𑒹 𑒖𑒰𑒑𑒩𑒝 𑒕𑒪 𑒂𑒹 𑒞𑒰𑒖𑒰 𑒕𑒪, 𑒖𑒃𑒮𑒿 𑒁𑒐𑒳𑒢𑒏𑒰 𑒖𑒏𑒰𑒿 𑒢𑒻 𑒕𑒪। 𑒌 𑒥𑒲𑒔 𑒑𑒼𑒙𑒱-𑒣𑒓𑒩𑒰 𑒯𑒰𑒃 𑒮𑓂𑒏𑒴𑒪, 𑒏𑒍𑒪𑒹𑒖, 𑒣𑓂𑒩𑒰𑒃𑒫𑒹𑒙 𑒩𑒴𑒣𑒧𑒹 𑒥𑒢𑒋 𑒪𑒰𑒑𑒪 𑒕𑒪। 𑒧𑒳𑒠𑒰 𑒎𑒮𑒞 𑒏𑒧 𑒩𑒯𑒪। 𑒐𑒰𑒠𑒲 𑒦𑓀𑒛𑒰𑒩 𑒅𑒠𑓂𑒨𑒼𑒑𑒏 𑒯𑓂𑒩𑒰𑒮 𑒯𑒼𑒃𑒞 𑒑𑒹𑒪 𑒂 𑒯𑒼𑒃𑒞-𑒯𑒼𑒃𑒞 𑒄 𑒧𑒹𑒙𑒰 𑒖𑒏𑒰𑒿 𑒑𑒹𑒪। 𑒞𑒯𑒱𑒢𑒰 𑒢𑒑𑒠𑒲 𑒣𑒻𑒠𑒰𑒫𑒰𑒩𑒧𑒹 𑒏𑒳𑒬𑒱𑒨𑒰𑒩 𑒮𑒹𑒯𑒼 𑒕𑒪, 𑒖𑒹 𑒅𑒠𑓂𑒨𑒼𑒑𑒣𑒞𑒱𑒏 𑒔𑒪𑒻𑒞 𑒮𑒹𑒯𑒼 𑒧𑒩𑒋 𑒪𑒰𑒑𑒪।
𑒧𑒱𑒟𑒱𑒪𑒰𑓀𑒔𑒪𑒧𑒹 𑒧𑒴𑒪𑒞: 𑒖𑒲𑒫𑒱𑒏𑒰𑒏 𑒮𑒰𑒡𑒢 𑒏𑒵𑒭𑒱 𑒕𑒪। 𑒍𑒢𑒰 𑒮𑒒𑒢 𑒩𑒴𑒣𑒧𑒹 𑒏𑒵𑒭𑒱 𑒖𑒲𑒫𑒱𑒏𑒰𑒏 𑒣𑒻𑒒 𑒮𑒰𑒡𑒢 𑒕𑒲, 𑒧𑒳𑒠𑒰 𑒮𑒹 𑒢𑒻 𑒕𑒪। 𑒖𑒹𑒯𑒼 𑒕𑒪 𑒞𑒯𑒴𑒧𑒹 𑒩𑓀𑒑-𑒥𑒱𑒩𑓀𑒑𑒏 𑒕𑒪-𑒣𑓂𑒩𑒣𑓀𑒔 𑒔𑒪𑒱 𑒩𑒯𑒪 𑒕𑒪। 𑒥𑒙𑒰𑒃 𑒐𑒹𑒞𑒲𑒧𑒹 𑒁𑒡𑒱𑒨𑒰 𑒅𑒣𑒖 𑒅𑒣𑒖𑒾𑒢𑒱𑒯𑒰𑒩𑒏𑒹𑒿 𑒦𑒹𑒙𑒻 𑒕𑒪𑒻। 𑒖𑒐𑒢 𑒏𑒱 𑒅𑒣𑒖𑒥𑒻𑒧𑒹, 𑒐𑒹𑒞𑒲 𑒏𑒩𑒻𑒧𑒹 𑒏𑒱𑒕𑒳𑒋 𑒁𑒢𑓂𑒢𑒏 𑒐𑒹𑒞𑒲 𑒪𑒰𑒦𑒣𑓂𑒩𑒠 𑒕𑒪। 𑒅𑒣𑒖𑒰𑒏 𑒁𑒢𑒳𑒣𑒰𑒞𑒧𑒹 𑒪𑒰𑒑𑒞 𑒐𑒩𑓂𑒔 𑒏𑒱𑒕𑒳𑒧𑒹 𑒏𑒧 𑒕𑒪 𑒂 𑒏𑒱𑒕𑒳𑒧𑒹 𑒁𑒡𑒱𑒏। 𑒖𑒃𑒧𑒹 𑒁𑒡𑒱𑒏 𑒕𑒪 𑒍𑒃𑒧𑒹 𑒥𑒙𑒹𑒠𑒰𑒩𑒏𑒹𑒿 𑒒𑒰𑒙𑒰 𑒪𑒑𑒻𑒞 𑒕𑒪𑒻। 𑒞𑒃 𑒮𑓀𑒑 𑒩𑒾𑒠𑒲-𑒠𑒰𑒯𑒲𑒏 𑒣𑓂𑒩𑒦𑒰𑒫 𑒍𑒯𑒢 𑒏𑒱𑒮𑒰𑒢𑒣𑒩 𑒮𑒹𑒯𑒼 𑒣𑒛𑓃𑒻𑒞 𑒕𑒪 𑒖𑒹 𑒐𑒹𑒞𑒲 𑒏𑒩𑒻𑒞 𑒕𑒪𑒰𑒯। 𑒖𑒹 𑒥𑒹𑒮𑒲 𑒐𑒹𑒞𑒥𑒪𑒰 𑒕𑒪𑒰𑒯 𑒯𑒳𑒢𑒏𑒩 𑒐𑒹𑒞𑒲 𑒁𑒡𑒱𑒏𑒞𑒩 𑒥𑒙𑒰𑒃𑒏 𑒧𑒰𑒡𑓂𑒨𑒧𑒮𑒿 𑒔𑒪𑒻𑒞 𑒕𑒪। 𑒞𑒃 𑒮𑓀𑒑 𑒁𑒡𑒱𑒏 𑒁𑒢𑓂𑒢 𑒩𑒯𑒢𑒹 𑒁𑒢𑓂𑒢𑒏 𑒧𑒯𑒰𑒖𑒢𑒱𑒨𑒼 𑒔𑒪𑒻𑒞 𑒕𑒪𑒢𑒱। 𑒧𑒯𑒰𑒖𑒢𑒱𑒨𑒼𑒏 𑒣𑓂𑒩𑒟𑒰 𑒑𑒰𑒧-𑒑𑒰𑒧𑒏 𑒤𑒳𑒙-𑒤𑒳𑒙 𑒕𑒪। 𑒏𑒼𑒢𑒼 𑒑𑒰𑒧𑒧𑒹 𑒮𑒫𑒰𑒃 (𑒋𑒏 𑒧𑒼𑒢𑒏 𑒮𑒫𑒰 𑒧𑒼𑒢, 𑒋𑒏 𑒮𑒲𑒖𑒱𑒢𑒏), 𑒞𑒿 𑒏𑒼𑒢𑒼 𑒑𑒰𑒧𑒧𑒹 𑒋𑒑𑒰𑒩𑒯𑒲 (𑒂𑒚 𑒣𑒮𑒹𑒩𑒲𑒏 𑒧𑒼𑒢, 𑒋𑒏 𑒧𑒼𑒢𑒏 𑒋𑒑𑒰𑒩𑒯 𑒣𑒮𑒹𑒩𑒲), 𑒞𑒿 𑒏𑒼𑒢𑒼 𑒑𑒰𑒧𑒧𑒹 𑒛𑒹𑒜𑓃𑒱𑒨𑒰 (𑒋𑒏 𑒧𑒼𑒢𑒏 𑒥𑒰𑒩𑒯 𑒣𑒮𑒹𑒩𑒲) 𑒕𑒪। 𑒖𑒹𑒏𑒩 𑒧𑒞𑒪𑒥 𑒦𑒹𑒪 𑒖𑒹 𑒋𑒏 𑒧𑒼𑒢𑒏 𑒂𑒡𑒰 𑒧𑒼𑒢 𑒮𑒴𑒠𑒱𑒨𑒹 𑒦𑒹𑒪। 𑒞𑒃 𑒮𑓀𑒑 𑒄𑒯𑒼 𑒯𑒼𑒃𑒞 𑒕𑒪 𑒖𑒹 𑒮𑒰𑒪𑒏 𑒏𑒩𑓂𑒖 𑒮𑒰𑒪𑒧𑒹 𑒔𑒳𑒏𑒰𑒋𑒪 𑒖𑒰𑒃𑒞 𑒕𑒪 𑒂 𑒖𑒿 𑒮𑒹 𑒢𑒻 𑒞𑒿 𑒮𑒴𑒠𑒼 𑒧𑒴𑒛𑓃𑒹 𑒥𑒢𑒱 𑒖𑒰𑒃𑒞 𑒕𑒪𑒻 𑒖𑒃𑒮𑒿 𑒠𑒴 𑒮𑒰𑒪 𑒥𑒱𑒞𑒻𑒞-𑒥𑒱𑒞𑒻𑒞 𑒏𑒩𑓂𑒖 𑒠𑒼𑒥𑒩𑒰 𑒖𑒰𑒃 𑒕𑒪𑒻।
𑒁𑒐𑒳𑒢𑒏𑒰 𑒖𑒏𑒰𑒿 𑒥𑒱𑒂𑒯 𑒞𑒿 𑒞𑒞𑒹 𑒦𑒰𑒩𑒲 𑒢𑒻 𑒕𑒪 𑒧𑒳𑒠𑒰 𑒧𑒰𑒋-𑒥𑒰𑒣𑒏 𑒮𑒩𑒰𑒡𑒧𑒹 𑒮𑒰𑒧𑒰𑒖𑒱𑒏 𑒂 𑒖𑒰𑒞𑒲𑒨 𑒋𑒯𑒹𑒢 𑒔𑒰𑒣 𑒕𑒪 𑒖𑒹 𑒐𑒹𑒞-𑒣𑒟𑒰𑒩 𑒥𑒹𑒔𑒱 𑒏𑒰𑒖 𑒔𑒪𑒻𑒞 𑒕𑒪। 𑒐𑒹𑒞𑒏 𑒯𑒱𑒮𑒰𑒥𑒮𑒿 𑒔𑒰𑒩𑒱-𑒣𑒰𑒿𑒔 𑒧𑒹𑒪𑒏 𑒏𑒱𑒮𑒰𑒢 𑒕𑒪𑒰𑒯। 𑒑𑒰𑒧𑒏-𑒑𑒰𑒧 𑒋𑒏-𑒋𑒏 𑒑𑒼𑒙𑒹𑒏 𑒕𑒪𑒢𑒱, 𑒖𑒐𑒢𑒹 𑒋𑒏𑒚𑒰𑒧 𑒖𑒧𑒲𑒢 𑒮𑒧𑒙𑒰𑒋𑒪 𑒩𑒯𑒞 𑒞𑒐𑒢 𑒠𑒼𑒮𑒩-𑒞𑒹𑒮𑒩𑒏 𑒏𑒲 𑒂 𑒏𑒞𑒹 𑒯𑒹𑒞𑒢𑒱?
𑒐𑒹𑒞𑒧𑒹 𑒏𑒰𑒖 𑒏𑒩𑒻𑒥𑒪𑒰 𑒥𑒼𑒢𑒱𑒯𑒰𑒩𑒼𑒏 𑒮𑓂𑒟𑒱𑒞𑒱 𑒥𑒠𑒮𑒿 𑒥𑒠𑒞𑒩 𑒕𑒪। 𑒋𑒏 𑒞𑒿 𑒠𑒱𑒢 𑒦𑒩𑒱𑒏 𑒥𑒼𑒢𑒱 𑒏𑒧, 𑒞𑒯𑒴𑒧𑒹 𑒮𑒰𑒪𑒏 𑒑𑒢𑒪 𑒠𑒱𑒢 𑒏𑒰𑒖 𑒯𑒼𑒃𑒞। 𑒏𑒱𑒮𑒰𑒢𑒼𑒏 𑒥𑒲𑒔 𑒐𑒹𑒞𑒲𑒏 𑒢𑒫 𑒫𑒻𑒖𑓂𑒘𑒰𑒢𑒱𑒏 𑒐𑒹𑒞𑒲𑒏 𑒣𑒠𑓂𑒡𑒞𑒱𑒏 𑒁𑒦𑒰𑒫 𑒕𑒪𑒢𑒱। 𑒁𑒦𑒰𑒫𑒼𑒏 𑒏𑒰𑒩𑒝 𑒕𑒪 𑒖𑒹 𑒢𑒹 𑒮𑒩𑒏𑒰𑒩𑒏 𑒡𑒱𑒨𑒰𑒢 𑒐𑒹𑒞𑒲 𑒠𑒱𑒮 𑒕𑒪 𑒂 𑒢𑒹 𑒐𑒹𑒞𑒲𑒏 𑒮𑒰𑒡𑒢 𑒅𑒣𑒪𑒥𑓂𑒡 𑒕𑒪।
𑒞𑓂𑒩𑒹𑒞𑒰 𑒨𑒳𑒑𑒏 𑒖𑒢𑒏𑒏 𑒯𑒩 𑒖𑒏𑒰𑒿 𑒐𑒹𑒞 𑒖𑒼𑒞𑒻𑒏 𑒯𑒩 𑒯𑒼𑒃𑒞 𑒕𑒪! 𑒖𑒯𑒱𑒢𑒰 𑒧𑒩𑒱𑒂𑒋𑒪 𑒥𑒛𑓃𑒠 𑒞𑒯𑒱𑒢𑒰 𑒖𑒼𑒞𑒱𑒢𑒱𑒯𑒰𑒩। 𑒞𑒃 𑒮𑓀𑒑 𑒐𑒹𑒞 𑒣𑒙𑒥𑒻𑒏 𑒣𑒰𑒢𑒱𑒏 𑒏𑒼𑒢𑒼 𑒠𑒼𑒮𑒩 𑒥𑒹𑒫𑒮𑓂𑒟𑒰 𑒢𑒻। 𑒖𑒯𑒱𑒨𑒰 𑒣𑒰𑒢𑒱 𑒯𑒋𑒞 𑒞𑒯𑒱𑒨𑒰 𑒐𑒹𑒞𑒲 𑒬𑒳𑒩𑒴 𑒯𑒋𑒞। 𑒖𑒃𑒮𑒿 𑒥𑒹𑒮𑒧𑒋 𑒐𑒹𑒞𑒲 𑒯𑒼𑒃𑒞 𑒕𑒪। 𑒣𑒼𑒐𑒩𑒱-𑒗𑒰𑒿𑒐𑒛𑓃𑒱𑒧𑒹 𑒁𑒢𑒹𑒩𑒴𑒂 𑒧𑒰𑒕 𑒖𑒹 𑒯𑒼𑒃, 𑒮𑒋𑒯 𑒧𑒰𑒕 𑒣𑒼𑒮𑒥 𑒏𑒯𑒰𑒃𑒞 𑒕𑒪। 𑒞𑒯𑒱𑒢𑒰 𑒞𑒲𑒧𑒢𑒼-𑒞𑒩𑒏𑒰𑒩𑒲 𑒂 𑒤𑒪𑒼-𑒤𑒪𑒯𑒩𑒲𑒏 𑒯𑒰𑒪 𑒕𑒪। 𑒧𑒼𑒙𑒰-𑒧𑒼𑒙𑒲 𑒏𑒵𑒭𑒱𑒏 𑒍𑒯𑒢 𑒠𑒬𑒰 𑒥𑒢𑒱 𑒑𑒹𑒪 𑒕𑒪 𑒖𑒃𑒣𑒩 𑒖𑒲𑒫𑒢 𑒨𑒰𑒣𑒢 𑒏𑒩𑒥 𑒏𑒚𑒱𑒢 𑒦𑓄 𑒑𑒹𑒪 𑒕𑒪।
𑒣𑒬𑒳𑒣𑒰𑒪𑒢𑒏 𑒩𑒴𑒣𑒧𑒹 𑒑𑒰𑒋-𑒧𑒯𑒲𑓀𑒮 𑒂 𑒥𑒏𑒩𑒲 𑒣𑒼𑒮𑒥 𑒧𑒰𑒞𑓂𑒩 𑒔𑒪𑒻𑒞 𑒕𑒪। 𑒑𑒰𑒋-𑒧𑒯𑒲𑓀𑒮 𑒣𑒼𑒮𑒻𑒏 𑒥𑒲𑒔 𑒧𑒯𑒰𑒖𑒢𑒲𑒏 𑒋𑒯𑒹𑒢 𑒮𑒴𑒞𑓂𑒩 𑒪𑒰𑒑𑒪 𑒕𑒪 𑒖𑒹 𑒣𑒼𑒮𑒱𑒢𑒱𑒯𑒰𑒩 𑒱𑒮𑒩𑓂𑒤 𑒣𑒼𑒮𑒻𑒞 𑒕𑒪𑒰𑒯। 𑒋𑒏 𑒞𑒿 𑒢𑒮𑓂𑒪 𑒣𑒕𑒳𑒂𑒋𑒪 𑒩𑒯𑒢𑒹 𑒣𑒕𑒳𑒂𑒋𑒪 𑒏𑒰𑒩𑒼𑒥𑒰𑒩, 𑒠𑒼𑒮𑒩 𑒋𑒯𑒹𑒢 𑒖𑒰𑒪𑒧𑒹 𑒍𑒗𑒩𑒰𑒋𑒪 𑒖𑒹 𑒡𑒲𑒩𑒹-𑒡𑒲𑒩𑒹 𑒄 𑒞𑒹𑒢𑒰 𑒏𑒧𑒱𑒞𑒹 𑒑𑒹𑒪 𑒖𑒹 𑒥𑒜𑓃𑒻𑒏 𑒏𑒼𑒢𑒼 𑒮𑓀𑒦𑒰𑒫𑒢𑒰 𑒢𑒻 𑒩𑒯𑒪।
𑒢𑒑𑒠𑒲 𑒤𑒮𑒱𑒪𑒏 𑒩𑒴𑒣𑒧𑒹 𑒏𑒳𑒬𑒱𑒨𑒰𑒩 𑒂 𑒣𑒙𑒳𑒂𑒏 𑒐𑒹𑒞𑒲 𑒕𑒪। 𑒧𑒳𑒠𑒰 𑒅𑒠𑓂𑒨𑒼𑒑𑒣𑒞𑒱𑒏 𑒏𑒰𑒩𑒰𑒧𑒰𑒞𑒮𑒿 𑒍𑒯𑒼 𑒠𑒳𑒢𑒴 𑒏𑒧𑒖𑒼𑒩𑒹 𑒯𑒼𑒃𑒞 𑒑𑒹𑒪। 𑒧𑒳𑒠𑒰 𑒮𑒩𑒏𑒰𑒩𑒏 𑒣𑓂𑒩𑒞𑒱 𑒖𑒢-𑒂𑒏𑓂𑒩𑒼𑒬 𑒥𑒜𑓃𑒪। 𑒑𑒰𑒧-𑒒𑒩𑒏 𑒪𑒼𑒏 𑒮𑒩𑒏𑒰𑒩𑒲 𑒪𑒰𑒦𑒏 𑒧𑒰𑒢𑒹 𑒥𑒳𑒗𑒻𑒞 𑒕𑒪 𑒧𑒰𑒞𑓂𑒩 𑒏𑒼𑒙𑒰𑒏 𑒫𑒮𑓂𑒞𑒳 𑒡𑒩𑒱। 𑒮𑒹𑒯𑒼 𑒩𑒮𑓂𑒞𑒹-𑒣𑒹𑒩𑒹 𑒪𑒳𑒙𑒰𑒃𑒞 𑒕𑒪।
𑓑𑓙𑓖𑓗 𑒄.𑒏 𑒔𑒳𑒢𑒰𑒫 𑒂𑒋𑒪। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒥𑒲.𑒋.𑒏 𑒫𑒱𑒠𑓂𑒨𑒰𑒩𑓂𑒟𑒲 𑒩𑒯𑒟𑒱। 𑒂𑒖𑒰𑒠𑒲𑒏 𑒣𑒕𑒰𑒞𑒱 𑒄 𑒣𑒯𑒱𑒪 𑒖𑒢-𑒖𑒰𑒑𑒩𑒝 𑒕𑒪। 𑒣𑒜𑓃𑒪𑒼-𑒪𑒱𑒐𑒪 𑒂 𑒫𑒱𑒠𑓂𑒨𑒰𑒩𑓂𑒟𑒱𑒨𑒼 𑒌𑒧𑒹 𑒣𑓂𑒩𑒞𑓂𑒨𑒏𑓂𑒭-𑒁𑒣𑓂𑒩𑒞𑓂𑒨𑒏𑓂𑒭 𑒩𑒴𑒣𑒹𑒿 𑒧𑒻𑒠𑒰𑒢𑒧𑒹 𑒅𑒞𑒩𑒪।

𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒥𑒲.𑒋. 𑒣𑒰𑒩𑓂𑒙-𑓑 𑒏𑒹𑒪𑒢𑒱 𑒂 𑒏𑒩𑒱𑒞𑒹 𑓑𑓙𑓖𑓗 𑒄𑒮𑓂𑒫𑒲𑒏 𑒂𑒧 𑒔𑒳𑒢𑒰𑒫 𑒂𑒋𑒪। 𑒖𑒯𑒱𑒢𑒰 𑒏𑒰𑓀𑒑𑓂𑒩𑒹𑒮 𑒣𑒰𑒩𑓂𑒙𑒲 𑒖𑒢-𑒮𑒧𑒴𑒯𑒮𑒿 𑒯𑒙𑒱 𑒏𑒱𑒕𑒳 𑒐𑒰𑒮 𑒖𑒰𑒞𑒱𑒏 𑒣𑒰𑒩𑓂𑒙𑒲 𑒥𑒢𑒱 𑒩𑒯𑒪 𑒕𑒪 𑒞𑒯𑒱𑒢𑒰 𑒂𑒢𑒼-𑒂𑒢 𑒣𑒰𑒩𑓂𑒙𑒲𑒏 𑒮𑓂𑒟𑒱𑒞𑒱 𑒕𑒪𑒻। 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒱𑒏𑒕𑒳 𑒏𑓂𑒭𑒹𑒞𑓂𑒩𑒧𑒹 𑒧𑒖𑒑𑒴𑒞 𑒕𑒪 𑒧𑒳𑒠𑒰 𑒗𑓀𑒗𑒰𑒩𑒣𑒳𑒩 𑒃𑒪𑒰𑒏𑒰𑒧𑒹 𑒏𑒧𑒖𑒼𑒩 𑒕𑒪, 𑒧𑒳𑒠𑒰 𑒞𑒻𑒨𑒼 𑒄 𑒋𑒞𑓄 𑒖𑒼𑒩-𑒮𑒼𑒩𑒮𑒿 𑒣𑒏𑒛𑓃𑒱 𑒩𑒯𑒪 𑒕𑒪। 𑒏𑒰𑓀𑒑𑓂𑒩𑒹𑒮𑒏 𑒣𑓂𑒩𑒞𑒱 𑒪𑒼𑒏𑒏 𑒂𑒏𑓂𑒩𑒼𑒬 𑒥𑒜𑓃𑒱 𑒩𑒯𑒪 𑒕𑒪। 𑒮𑒩𑒏𑒰𑒩 𑒫𑒱𑒩𑒼𑒡𑒲 (𑒏𑒰𑓀𑒑𑓂𑒩𑒹𑒮 𑒮𑒩𑒏𑒰𑒩) 𑒯𑒫𑒰 𑒥𑒢𑒱 𑒩𑒯𑒪 𑒕𑒪। 𑒏𑒰𑒩𑒝𑒼 𑒕𑒪𑒻, 𑒮𑓂𑒫𑒞𑓀𑒞𑓂𑒩𑒞𑒰 𑒂𑒢𑓂𑒠𑒼𑒪𑒢𑒧𑒹 𑒮𑓂𑒫𑒞𑓀𑒞𑓂𑒩 𑒠𑒹𑒬𑒏 𑒖𑒹 𑒂𑒏𑒰𑓀𑒏𑓂𑒭𑒰 𑒯𑒼𑒃𑒞 𑒍 𑒞𑒿 𑒕𑒪𑒻𑒯𑒹 𑒧𑒳𑒠𑒰 𑒍𑒏𑒩 𑒣𑒴𑒩𑓂𑒞𑒱𑒏 𑒏𑒼𑒢𑒼 𑒅𑒣𑒰𑒋 𑒢𑒻 𑒦𑒹𑒪। 𑒮𑓀𑒑𑒹-𑒮𑓀𑒑 𑒏𑒰𑓀𑒑𑓂𑒩𑒹𑒮 𑒣𑒰𑒩𑓂𑒙𑒲 𑒖𑒢𑒮𑒧𑒴𑒯𑒏 𑒮𑓀𑒑 𑒕𑒼𑒛𑓃𑒱 𑒣𑒩𑒱𑒫𑒰𑒩 𑒫𑒱𑒬𑒹𑒭 𑒫𑒰 𑒖𑒰𑒞𑒱-𑒫𑒱𑒬𑒹𑒭𑒧𑒹 𑒮𑒧𑒙𑒰 𑒔𑒳𑒏𑒪 𑒕𑒪। 𑒑𑓂𑒩𑒰𑒧𑒲𑒝 𑒮𑒧𑒰𑒖𑒧𑒹 𑒮𑓂𑒫𑒞𑓀𑒞𑓂𑒩𑒞𑒰𑒏 𑒏𑒼𑒢𑒼 𑒪𑒰𑒦 𑒮𑓂𑒣𑒭𑓂𑒙 𑒩𑒴𑒣𑒹𑒿 𑒮𑒼𑒗𑒰 𑒢𑒻 𑒂𑒋𑒪। 𑒏𑒱𑒮𑒰𑒢 𑒣𑓂𑒩𑒡𑒰𑒢 𑒧𑒱𑒟𑒱𑒪𑒰𑓀𑒔𑒪𑒏 𑒮𑓂𑒟𑒱𑒞𑒱 𑒂𑒖𑒰𑒠𑒲 𑒣𑒴𑒩𑓂𑒫𑒹𑒏 𑒥𑒢𑒪 𑒩𑒯𑒪। 𑒍𑒢𑒰 𑒠𑒹𑒬𑒹𑒧𑒹 𑒣𑓀𑒖𑒰𑒥𑒏 𑒏𑒱𑒮𑒰𑒢𑒏 𑒮𑓂𑒟𑒱𑒞𑒱 𑒮𑒳𑒡𑒩𑒱 𑒑𑒹𑒪। 𑒏𑒰𑒩𑒝 𑒍𑒃𑒚𑒰𑒧𑒏 𑒮𑒩𑒏𑒰𑒩 𑒏𑒵𑒭𑒱𑒏𑒹𑒿 𑒣𑓂𑒩𑒧𑒳𑒐𑒞𑒰𑒮𑒿 𑒣𑒏𑒛𑓃𑒱 𑒣𑒰𑒢𑒱-𑒥𑒱𑒖𑒪𑒲𑒏 𑒥𑒹𑒫𑒮𑓂𑒟𑒰 𑒏𑓄 𑒪𑒹𑒪𑒏। 𑒣𑒰𑒢𑒱 𑒂 𑒥𑒱𑒖𑒪𑒲, 𑒏𑒵𑒭𑒱 𑒪𑒹𑒪 𑒄 𑒠𑒳𑒢𑒴 𑒮𑒰𑒡𑒢 𑒣𑓂𑒩𑒧𑒳𑒐 𑒁𑒕𑒱। 𑒮𑒹 𑒥𑒱𑒯𑒰𑒩 (𑒧𑒱𑒟𑒱𑒪𑒰𑓀𑒔𑒪)𑒧𑒹 𑒢𑒻 𑒦𑒹𑒪। 𑒬𑒱𑒏𑓂𑒭𑒰-𑒥𑒹𑒫𑒮𑓂𑒟𑒰𑒧𑒹 𑒮𑒹𑒯𑒼 𑒖𑒹𑒯𑒹𑒢 𑒯𑒹𑒥𑒰𑒏 𑒔𑒰𑒯𑒲 𑒮𑒹 𑒢𑒻 𑒦𑒹𑒪। 𑒮𑓀𑒑-𑒮𑓀𑒑 𑒂𑒩𑒼 𑒥𑒯𑒳𑒞 𑒏𑒰𑒩𑒝 𑒦𑒹𑒪, 𑒖𑒃𑒮𑒿 𑒫𑒱𑒠𑓂𑒨𑒰𑒩𑓂𑒟𑒲𑒏 𑒥𑒲𑒔 𑒂𑒏𑓂𑒩𑒼𑒬 𑒮𑒹𑒯𑒼 𑒥𑒜𑓃𑒪। 𑒩𑒰𑒖𑒢𑒲𑒞𑒱𑒏 𑒔𑒹𑒞𑒢𑒰 𑒥𑒜𑓃𑒢𑒹 𑒖𑒑𑒾𑒢𑒱𑒯𑒰𑒩𑒼𑒏 𑒮𑓀𑒐𑓂𑒨𑒰 𑒥𑒜𑓃𑒪। 𑒧𑒳𑒠𑒰 𑒁𑒣𑒢𑒹𑒧𑒹 𑒪𑒛𑓃𑒢𑒹-𑒗𑒑𑒛𑓃𑒢𑒹 𑒮𑒦 𑒫𑒱𑒩𑒼𑒡𑒲 𑒣𑒰𑒩𑓂𑒙𑒲𑒏 𑒮𑓂𑒟𑒱𑒞𑒱 𑒮𑒹𑒯𑒼 𑒐𑒩𑒰𑒣𑒹। 𑒢𑒫 𑒔𑒹𑒞𑒢𑒰𑒏 𑒮𑓀𑒑 𑒫𑒱𑒩𑒼𑒡𑒲 (𑒏𑒰𑓀𑒑𑓂𑒩𑒹𑒮 𑒫𑒱𑒩𑒼𑒡𑒲) 𑒮𑒦 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲 𑒋𑒏 𑒧𑓀𑒔𑒣𑒩 𑒂𑒋𑒪। 𑒁𑓀𑒑𑓂𑒩𑒹𑒖𑒱𑒨𑒹 𑒬𑒰𑒮𑒢 𑒖𑒏𑒰𑒿 𑒏𑒰𑓀𑒑𑓂𑒩𑒹𑒮𑒼 𑒬𑒰𑒮𑒢𑒏 𑒫𑒱𑒩𑒴𑒠𑓂𑒡 𑒪𑒼𑒏 𑒅𑒚𑒱 𑒏𑓄 𑒚𑒰𑒜𑓃 𑒦𑒹𑒪। 𑒍𑒢𑒰 𑒠𑒹𑒬𑒹𑒏, 𑒧𑒳𑒠𑒰 𑒥𑒱𑒯𑒰𑒩𑒏 𑒞𑒿 𑒏𑒯𑒪𑒹 𑒖𑒹𑒞𑒃 𑒖𑒹 𑒮𑓂𑒫𑒞𑓀𑒞𑓂𑒩𑒞𑒰𑒏 𑒅𑒣𑒩𑒰𑒢𑓂𑒞 𑒄 𑒣𑒯𑒱𑒪 𑒖𑒢-𑒖𑒰𑒑𑒩𑒝 𑒕𑒪।
𑒮𑒦 𑒣𑒰𑒩𑓂𑒙𑒲𑒏𑒹𑒿 𑒋𑒏 𑒧𑓀𑒔𑒣𑒩 𑒋𑒢𑒹 𑒏𑒼𑒢𑒼 𑒢𑒱𑒬𑓂𑒔𑒱𑒞 𑒏𑒰𑒩𑓂𑒨𑒏𑓂𑒩𑒧 𑒥𑒢𑒥 𑒁𑒮𑓀𑒦𑒫 𑒕𑒪, 𑒏𑒰𑒩𑒝 𑒋𑒞𑒹 𑒖𑒪𑓂𑒠𑒱𑒥𑒰𑒖𑒲𑒧𑒹 𑒦𑒃𑒨𑒹 𑒏𑒱 𑒮𑒏𑒻𑒋। 𑒞𑒐𑒢 𑒞𑒿 𑒂𑒧-𑒔𑒳𑒢𑒰𑒫 𑒣𑒲𑒚𑒣𑒩 𑒁𑒕𑒱 𑒞𑒿𑒋 𑒮𑒩𑒏𑒰𑒩 𑒥𑒠𑒪𑒻𑒏 𑒏𑒰𑒩𑓂𑒨𑒏𑓂𑒩𑒧 𑒥𑒢𑒪।
𑒏𑒱𑒮𑒰𑒢-𑒥𑒼𑒢𑒱𑒯𑒰𑒩𑒏 𑒮𑓀𑒑 𑒥𑒳𑒠𑓂𑒡𑒱𑒖𑒲𑒫𑒱𑒨𑒼 𑒧𑒻𑒠𑒰𑒢𑒧𑒹 𑒅𑒞𑒩𑒪𑒰𑒯। 𑒏𑒰𑓀𑒑𑓂𑒩𑒹𑒮 𑒫𑒱𑒩𑒼𑒡𑒲𑒏 𑒢𑒲𑒏 𑒯𑒫𑒰 𑒥𑒢𑒪। 𑒁𑒣𑒢 𑒧𑒡𑒳𑒥𑒢𑒲 𑒖𑒱𑒪𑒰𑒧𑒹 𑒁𑒐𑒢 𑒠𑒴𑒙𑒰 𑒣𑒰𑒩𑓂𑒪𑒱𑒨𑒰𑒧𑒹𑓀𑒙 𑒏𑓂𑒭𑒹𑒞𑓂𑒩 𑒁𑒕𑒱, 𑒞𑒃 𑒠𑒱𑒢 𑒠𑒩𑒦𑓀𑒑𑒹 𑒖𑒱𑒪𑒰 𑒕𑒪। 𑒠𑒳𑒢𑒴 𑒏𑓂𑒭𑒹𑒞𑓂𑒩𑒧𑒹 𑒏𑒰𑓀𑒑𑓂𑒩𑒹𑒮 𑒯𑒰𑒩𑒪। 𑒯𑒰𑒩𑒥𑒹 𑒢𑒻 𑒏𑒋𑒪, 𑒫𑒼𑒙𑒼𑒏 𑒣𑓂𑒩𑒞𑒱𑒬𑒞 𑒥𑒯𑒳𑒞 𑒢𑒱𑒔𑓂𑒔𑒰𑒿 𑒅𑒞𑒩𑒪। 𑒋𑒏𑒮𑒴𑒞𑓂𑒩𑒲 𑒏𑒰𑒩𑓂𑒨𑒏𑓂𑒩𑒧, 𑒏𑒰𑓀𑒑𑓂𑒩𑒹𑒮 𑒯𑒙𑒰𑒅, 𑒩𑒯𑒢𑒹 𑒏𑒰𑒹𑒢𑒼 𑒩𑒰𑒖𑓂𑒨𑒧𑒹 𑒋𑒏 𑒣𑒰𑒩𑓂𑒙𑒲𑒏 𑒮𑒩𑒏𑒰𑒩 𑒢𑒻 𑒥𑒢𑒪। 𑒐𑒱𑒔𑒛𑓃𑒱𑒨𑒹 𑒮𑒩𑒏𑒰𑒩 𑒥𑒱𑒯𑒰𑒩𑒼, 𑒥𑓀𑒑𑒰𑒪𑒼, 𑒅𑒞𑓂𑒞𑒩𑒼 𑒣𑓂𑒩𑒠𑒹𑒬 𑒂 𑒂𑒢𑒼-𑒂𑒢 𑒩𑒰𑒖𑓂𑒨𑒧𑒹 𑒥𑒢𑒪। 𑒮𑒧𑒮𑓂𑒨𑒰𑒮𑒿 𑒑𑓂𑒩𑒮𑒱𑒞 𑒩𑒰𑒖𑓂𑒨 𑒮𑒦 𑒕𑒪𑒻𑒯𑒹, 𑒏𑒱𑒧𑒯𑒩𑒮𑒿 𑒮𑒧𑒮𑓂𑒨𑒰 𑒣𑒏𑒛𑓃𑒪 𑒖𑒰𑒋, 𑒄 𑒧𑒳𑒐𑓂𑒨 𑒮𑒧𑒮𑓂𑒨𑒰 𑒕𑒪। 𑒞𑒃 𑒥𑒲𑒔 𑒔𑒞𑒩𑒪-𑒑𑒕𑒑𑒩 𑒦𑒴𑒠𑒰𑒢𑒼 𑒂𑒢𑓂𑒠𑒼𑒪𑒢 𑒅𑒡𑒱𑒂𑒋 𑒪𑒰𑒑𑒪। 𑒧𑒳𑒠𑒰 𑒞𑒻𑒨𑒼 𑒏𑒱𑒕𑒳 𑒑𑒼𑒙𑒹 𑒦𑒴𑒠𑒰𑒢𑒮𑒿 𑒩𑒰𑒖𑒢𑒲𑒞𑒱𑒏 𑒧𑓀𑒔𑒣𑒩 𑒋𑒪𑒰𑒯।
𑒦𑒴𑒠𑒰𑒢𑒏𑒹𑒿 𑒂𑒢𑓂𑒠𑒼𑒪𑒢𑒏 𑒩𑒴𑒣𑒧𑒹 𑒚𑒰𑒜𑓃 𑒏𑒋𑒪 𑒑𑒹𑒪। 𑒍𑒢𑒰 𑒞𑒹𑒪𑒰𑓀𑒑𑒢𑒰𑒏 𑒦𑒴𑒧𑒱 𑒂𑒢𑓂𑒠𑒼𑒪𑒢 𑒔𑒩𑒧𑒣𑒩 𑒕𑒪। 𑒖𑒧𑒲𑒢𑒏 𑒕𑒁𑒧 𑒦𑒰𑒑𑒏 (𑒕𑒁𑒧 𑒯𑒱𑒮𑓂𑒮𑒰 𑒠𑒰𑒢 𑒠𑒱𑒁) 𑒯𑒱𑒮𑓂𑒮𑒰 𑒧𑓀𑒑𑒻𑒏 𑒁𑒦𑒱𑒨𑒰𑒢 𑒬𑒳𑒩𑒴 𑒦𑒹𑒪। 𑒪𑒼𑒏 𑒪𑒰𑒐𑒏-𑒪𑒰𑒐 𑒥𑒲𑒒𑒰 𑒠𑒰𑒢 𑒠𑒹𑒪𑒢𑒱। 𑒮𑒥𑒯𑒏 𑒁𑒢𑒳𑒧𑒰𑒢 𑒦𑒹𑒪𑒢𑒱 𑒖𑒹 𑒠𑒹𑒬𑒏 𑒕𑒁𑒧 𑒯𑒱𑒮𑓂𑒮𑒰 𑒑𑒩𑒲𑒥𑒼𑒏 𑒥𑒲𑒔 𑒂𑒍𑒞। 𑒏𑒼𑒢𑒼 𑒑𑒰𑒧𑒏 𑒠𑒴 𑒣𑓂𑒩𑒞𑒱𑒬𑒞𑒮𑒿 𑒪𑓄 𑒏𑓄 𑒣𑒢𑒩𑒯 𑒥𑒲𑒮 𑒣𑓂𑒩𑒞𑒱𑒬𑒞 𑒞𑒏𑒏 𑒖𑒧𑒲𑒢 𑒒𑒩-𑒒𑒩𑒰𑒛𑓃𑒲𑒧𑒹 𑒪𑒑𑒻 𑒕𑒻। 𑒞𑒃𑒚𑒰𑒧 𑒕𑒁𑒧 𑒯𑒱𑒮𑓂𑒮𑒰 𑒮𑒼𑒪𑒯 𑒣𑓂𑒩𑒞𑒱𑒬𑒞𑒮𑒿 𑒆𑒣𑒩, 𑒖𑒧𑒲𑒢𑒏 𑒂𑒧𑒠-𑒐𑒩𑓂𑒔 𑒠𑒳𑒢𑒴 𑒦𑓄 𑒑𑒹𑒪। 𑒦𑒪𑒯𑒱𑓀 𑒂𑒃𑒨𑒼, 𑓒𑓐𑓑𑓒 𑒄.𑒧𑒹 𑒜𑒹𑒩𑒼 𑒣𑒩𑒱𑒫𑒰𑒩 𑒋𑒯𑒢 𑒁𑒕𑒱 𑒖𑒹𑒏𑒩𑒰 𑒔𑒰𑒩𑒱 𑒛𑒱𑒮𑒧𑒱𑒪 𑒖𑒧𑒲𑒢 𑒢𑒻 𑒕𑒻 𑒖𑒹 𑒒𑒩𑒼 𑒥𑒢𑒰 𑒮𑒏𑒞।
𑒖𑒯𑒱𑒢𑒰 𑒯𑒫𑒰𑒧𑒹 𑒅𑒡𑒱𑒂𑒃𑒞 𑒦𑒴𑒠𑒰𑒢 𑒂𑒢𑓂𑒠𑒼𑒪𑒢 𑒂𑒋𑒪 𑒂 𑒑𑒹𑒪 𑒞𑒹𑒏𑒩 𑒍𑒞𑓂𑒞𑒹 𑒣𑓂𑒩𑒦𑒰𑒫 𑒢𑒻 𑒣𑒛𑓃𑒪 𑒖𑒞𑓂𑒞𑒹 𑒑𑒰𑒧𑒏 𑒋𑒏𑒙𑒰 𑒑𑒵𑒯-𑒅𑒠𑓂𑒨𑒼𑒑 𑒮𑒧𑒰𑒣𑓂𑒞 𑒦𑒹𑒢𑒹 𑒦𑓄 𑒑𑒹𑒪। 𑒐𑒰𑒠𑒲-𑒦𑓀𑒛𑒰𑒩𑒏 𑒧𑒰𑒡𑓂𑒨𑒧𑒮𑒿 𑒏𑒰𑒩𑒼𑒥𑒰𑒩 𑒔𑒪𑒻𑒞 𑒕𑒪, 𑒞𑒃𑒧𑒹 𑒞𑒹𑒢𑒰 𑒏𑓄 𑒧𑒳𑒮𑒯𑒢𑒱 𑒪𑒰𑒑𑒪 𑒖𑒹 𑒁𑒢𑓂𑒢-𑒧𑒰𑒙𑒱 𑒠𑒳𑒢𑒴 𑒋𑒏𑒥𑒙𑓂𑒙 𑒦𑓄 𑒑𑒹𑒪। 𑒖𑒹𑒯𑒢𑒹 𑒠𑒰𑒢𑒰 𑒁𑒢𑓂𑒢 𑒞𑒹𑒯𑒢𑒹 𑒧𑒳𑒮𑒯𑒢𑒱𑒏 𑒧𑒰𑒙𑒱, 𑒏𑒹𑒢𑒰 𑒥𑒹𑒩𑒰𑒍𑒪 𑒖𑒰𑒋𑒞। 𑒍𑒢𑒰 𑒁𑒐𑒢𑒼 𑒏𑒱𑒕𑒳 𑒑𑒼𑒙𑒹 𑒦𑒴𑒠𑒰𑒢𑒲 𑒖𑒧𑒲𑒢 𑒣𑒰𑒥𑒱 𑒐𑒳𑒬𑒯𑒰𑒪𑒲𑒏 𑒖𑒱𑒢𑒑𑒲 𑒥𑒢𑒾𑒢𑒹 𑒕𑒟𑒱, 𑒞𑒯𑒱𑒢𑒰 𑒏𑒣𑒛𑓃𑒼𑒏 (𑒐𑒰𑒠𑒲) 𑒏𑒰𑒩𑒼𑒥𑒰𑒩 𑒔𑒪𑒻𑒋, 𑒧𑒳𑒠𑒰 𑒢𑒑𑒝𑓂𑒨 𑒩𑒴𑒣𑒧𑒹। 𑒖𑒯𑒱𑒢𑒰 𑒪𑒴𑒙𑒧𑒹 𑒔𑒩𑒐𑒰 𑒢𑒤𑒰 𑒏𑒯𑒪 𑒖𑒰𑒃 𑒕𑒻 𑒞𑒯𑒱𑒢𑒰 𑒔𑒩𑒐𑒼𑒏 𑒢𑒤𑒰 𑒮𑒚𑒱 𑒩𑒯𑒪 𑒕𑒪, 𑒧𑒳𑒠𑒰 𑒁𑒐𑒢𑒼 𑒥𑒳𑒢𑒱𑒨𑒰𑒠𑒲 𑒮𑒧𑒮𑓂𑒨𑒰𑒏 𑒦𑒲𑒛𑓃 𑒏𑒱𑒨𑒼 𑒖𑒰𑒋 𑒢𑒻 𑒔𑒰𑒯𑒻𑒞 𑒁𑒕𑒱। 𑒍𑒯𑒢 𑒮𑒧𑒰𑒖𑒼 𑒢𑒻 𑒥𑒢𑒱 𑒮𑒏𑒪 𑒁𑒕𑒱। 𑒍𑒢𑒰 𑒮𑒧𑒰𑒖𑒼 𑒏𑒹𑒢𑒰 𑒥𑒢𑒞, 𑒠𑒳𑒩𑒴𑒮𑓂𑒞 𑒏𑒹𑒢𑒱𑒯𑒰𑒩𑒮𑒿 𑒥𑒹𑒮𑒲 𑒦𑒓𑒚𑒹𑒢𑒱𑒯𑒰𑒩𑒹 𑒁𑒕𑒱। 𑒥𑒹𑒩𑒼𑒖𑒑𑒰𑒩𑒼𑒏 𑒮𑓀𑒐𑓂𑒨𑒰 𑒏𑒧 𑒢𑒻 𑒕𑒻 𑒧𑒳𑒠𑒰 𑒍𑒯𑒢𑒼 𑒥𑒹𑒩𑒼𑒖𑒑𑒰𑒩 𑒞𑒿 𑒁𑒕𑒱𑒨𑒹 𑒖𑒹𑒏𑒩𑒰 𑒧𑒼𑒙𑒩 𑒮𑒰𑒃𑒏𑒱𑒪, 𑒯𑒼𑒙𑒪, 𑒧𑒼𑒥𑒰𑒃𑒪 𑒯𑒼𑒃𑒞 𑒏𑒣𑒛𑓃𑒰-𑒪𑒞𑓂𑒞𑒰, 𑒦𑒼𑒖𑒢-𑒕𑒰𑒖𑒢 𑒮𑒯𑒱𑒞 𑒥𑒲𑒮 𑒯𑒖𑒰𑒩 𑒩𑒴𑒣𑒻𑒂 𑒧𑒯𑒲𑒢𑒰𑒏 𑒖𑒱𑒢𑒑𑒲 𑒥𑒢𑒱 𑒑𑒹𑒪 𑒁𑒕𑒱।
𑒞𑒻𑓀𑒞𑒲𑒮 𑒮𑒴𑒞𑓂𑒩𑒲 𑒏𑒰𑒩𑓂𑒨𑒏𑓂𑒩𑒧 𑒪𑓄 𑒏𑓄 𑒧𑒱𑒪𑒪-𑒖𑒳𑒪𑒪 𑒮𑒩𑒏𑒰𑒩 𑒥𑒢𑒪। 𑒧𑒻𑒙𑓂𑒩𑒱𑒏𑒏 𑒣𑒩𑒲𑒏𑓂𑒭𑒰𑒧𑒹 𑒁𑓀𑒑𑓂𑒩𑒹𑒖𑒲 𑒦𑒰𑒭𑒰𑒏𑒹𑒿 𑒏𑒧𑒖𑒼𑒩 𑒏𑒋𑒪 𑒑𑒹𑒪, 𑒮𑓀𑒑-𑒮𑓀𑒑 𑒯𑒰𑒃 𑒮𑓂𑒏𑒴𑒪 𑒞𑒏𑒏 𑒬𑒱𑒏𑓂𑒭𑒰 𑒤𑓂𑒩𑒲 𑒏𑒩𑒻𑒏 𑒁𑒰𑒫𑒰𑒖 𑒅𑒚𑒪। 𑓑𑓙𑓕𑓗 𑒄.𑒏 𑒥𑒰𑒠 𑒁𑓀𑒑𑓂𑒩𑒹𑒖𑒲 𑒬𑒱𑒏𑓂𑒭𑒰 𑒂𑒑𑒴 𑒥𑒜𑓃𑒪। 𑒖𑒃 𑒁𑓀𑒑𑓂𑒩𑒹𑒖𑒲𑒏 𑒣𑒜𑓃𑒰𑒃 𑒂𑒚𑒧𑒰 (𑒯𑒰𑒃 𑒮𑓂𑒏𑒴𑒪) 𑒮𑒿 𑒬𑒳𑒩𑒴 𑒯𑒼𑒃𑒞 𑒕𑒪 𑒍 𑒧𑒱𑒛𑓂𑒪 𑒮𑓂𑒏𑒴𑒪𑒧𑒹 𑒣𑓂𑒩𑒫𑒹𑒬 𑒏𑓄 𑒑𑒹𑒪। 𑒕𑒚𑒰𑒮𑒿 𑒣𑒜𑓃𑒰𑒃 𑒬𑒳𑒩𑒴 𑒦𑓄 𑒑𑒹𑒪। 𑒒𑒲𑒔-𑒞𑒲𑒛𑓃 𑒏𑓄 𑒁𑒚𑒰𑒩𑒯 𑒧𑒯𑒲𑒢𑒰 𑒮𑒩𑒏𑒰𑒩 𑒔𑒪𑒪। 𑒤𑒹𑒩 𑒧𑒡𑓂𑒨𑒰𑒫𑒡𑒱 𑒔𑒳𑒢𑒰𑒫 𑒦𑒹𑒪। 𑒧𑒳𑒠𑒰 𑒣𑒯𑒱𑒪𑒳𑒏𑒰 𑒐𑒱𑒔𑒛𑓃𑒲, 𑒖𑒹 𑒮𑒼𑒪𑒯𑒢𑓂𑒢𑒲 𑒒𑒲𑒮𑒿 𑒁𑒪𑒑 𑒕𑒪, 𑒌𑒥𑒹𑒩 𑒒𑒲-𑒐𑒱𑒔𑒛𑓃𑒲 𑒮𑒩𑒏𑒰𑒩 𑒥𑒢𑒪। 𑒮𑒧𑒮𑓂𑒨𑒰-𑒮𑒧𑒰𑒡𑒰𑒢𑒏 𑒣𑓂𑒩𑒞𑒱 𑒍𑒞𑒹 𑒢𑒻 𑒦𑒹𑒪𑒻 𑒧𑒳𑒠𑒰 𑒖𑒢-𑒖𑒰𑒑𑒩𑒝 𑒖𑒩𑒴𑒩 𑒦𑒹𑒪𑒻। 𑒞𑒃 𑒥𑒲𑒔 𑒯𑒩𑒱𑒞 𑒏𑓂𑒩𑒰𑒢𑓂𑒞𑒱 𑒏𑒵𑒭𑒱𑒧𑒹 𑒮𑒹𑒯𑒼 𑒦𑒹𑒪। 𑒏𑒞𑒾-𑒏𑒞𑒾 𑒞𑒿 𑒋𑒯𑒹𑒢 𑒦𑒹𑒪 𑒖𑒹 𑒖𑒃 𑒐𑒹𑒞𑒧𑒹 𑒣𑒰𑒿𑒔 𑒮𑒹𑒩 𑒏𑒙𑓂𑒚𑒰 𑒯𑒼𑒃𑒞 𑒕𑒪 𑒍 𑒏𑓂𑒫𑒱𑒢𑓂𑒙𑒪 𑒏𑒙𑓂𑒚𑒰 𑒅𑒣𑒖𑒋 𑒪𑒰𑒑𑒪। 𑒧𑒳𑒠𑒰 𑒁𑒣𑒢𑒰 𑒌𑒚𑒰𑒧𑒏 𑒖𑒧𑒲𑒢𑒏 𑒄𑒯𑒼 𑒠𑒳𑒩𑓂𑒦𑒰𑒑𑓂𑒨 𑒩𑒯𑒪 𑒖𑒹 𑒐𑒹𑒞𑒥𑒪𑒰 𑒢𑒼𑒏𑒩𑒲-𑒔𑒰𑒏𑒩𑒲 𑒏𑒩𑒋 𑒬𑒯𑒩𑒮𑒿 𑒫𑒱𑒠𑒹𑒬 𑒡𑒩𑒱 𑒣𑒯𑒳𑒿𑒔𑒱 𑒑𑒹𑒪𑒰𑒯, 𑒧𑒳𑒠𑒰 𑒐𑒹𑒞 𑒞𑒿 𑒑𑒰𑒧𑒹𑒧𑒹 𑒩𑒯𑒱 𑒑𑒹𑒪𑒢𑒱। 𑒥𑒙𑒰𑒃𑒏 𑒋𑒯𑒹𑒢 𑒥𑒹𑒫𑒯𑒰𑒩 𑒖𑒹 𑒥𑒙𑒹𑒠𑒰𑒩𑒏𑒹𑒿 𑒪𑒰𑒦 𑒢𑒻 𑒯𑒼𑒃𑒞, 𑒣𑒰𑒃-𑒏𑒾𑒛𑓃𑒲 𑒏𑒧𑒹𑒢𑒹 𑒮𑓀𑒮𑓂𑒏𑒰𑒩𑒼 𑒞𑒹𑒖 𑒦𑒹𑒪𑒢𑒱। 𑒁𑒦𑒰𑒫𑒧𑒹 𑒪𑒼𑒏 𑒐𑒹𑒞 𑒥𑒹𑒔𑒻𑒋 𑒂𑒏𑒱 𑒣𑒰𑒃𑒨𑒼-𑒏𑒾𑒛𑓃𑒲 𑒩𑒯𑒢𑒹 𑒪𑒼𑒏 𑒥𑒹𑒔𑒞। 𑒮𑒹 𑒣𑒛𑓃𑒪𑒹 𑒩𑒯𑒞। 𑒧𑒳𑒠𑒰 𑒥𑒹𑒔𑒱 𑒏𑓄 𑒥𑒰𑒣-𑒠𑒰𑒠𑒰𑒏 𑒢𑒰𑒏 𑒏𑒹𑒢𑒰 𑒏𑒙𑒰𑒋𑒥!
𑒞𑒃 𑒮𑓀𑒑 𑒮𑒩𑒏𑒰𑒩𑒲 𑒏𑒰𑒩𑓂𑒨𑒰𑒪𑒨 𑒏𑒰𑒑𑒖𑒲 𑒗𑓀𑒗𑒙𑒱𑒏 𑒁𑒛𑓂𑒛𑒰 𑒥𑒢𑒪 𑒁𑒕𑒱। 𑒧𑒱𑒟𑒱𑒪𑒰𑓀𑒔𑒪𑒏 𑒋𑒏-𑒋𑒏 𑒮𑒧𑒮𑓂𑒨𑒰 𑒧𑒱𑒟𑒱𑒪𑒰𑒫𑒰𑒮𑒲𑒏 𑒕𑒱𑒨𑒢𑒱। 𑒁𑒐𑒢𑒼 𑒥𑒔𑓂𑒔𑒰 𑒮𑒥𑒯𑒏 𑒮𑓂𑒏𑒴𑒪𑒧𑒹 𑒌 𑒜𑓀𑒑𑒮𑒿 𑒥𑒔𑓂𑒔𑒰𑒏𑒹𑒿 𑒧𑒰𑒩𑒪-𑒣𑒲𑒙𑒪 𑒖𑒰𑒃 𑒕𑒻 𑒖𑒹 𑒍 𑒮𑓂𑒏𑒴𑒪 𑒕𑒼𑒛𑓃𑒱 𑒠𑒻𑒞 𑒁𑒕𑒱। 𑒋𑒏𑓂𑒏𑒻𑒮𑒧 𑒬𑒞𑒰𑒥𑓂𑒠𑒲𑒧𑒹 𑒖𑒿 𑒁𑒚𑒰𑒩𑒯𑒧 𑒮𑒠𑒲𑒏 𑒥𑒹𑒫𑒯𑒰𑒩 𑒔𑒪𑒞 𑒞𑒿 𑒍𑒃𑒮𑒿 𑒮𑒧𑒳𑒔𑒱𑒞 𑒪𑒰𑒦𑒏 𑒂𑒬𑒰 𑒢𑒻 𑒏𑒋𑒪 𑒖𑒰 𑒮𑒏𑒻𑒋।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑓑𑓙𑓖𑓗 𑒄.𑒏 𑒔𑒳𑒢𑒰𑒫𑒲 𑒠𑒾𑒛𑓃𑒧𑒹 𑒖𑒢𑒫𑒩𑒲 𑓑𑓙𑓖𑓗 𑒄.𑒧𑒹 𑒦𑒰𑒩𑒞𑒲𑒨 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒮𑒠𑒮𑓂𑒨 𑒥𑒢𑒪𑒰। 𑒔𑒳𑒢𑒰𑒫𑒼 𑒣𑒲𑒚𑒹𑒣𑒩 𑒩𑒯𑒻, 𑒧𑒡𑒹𑒣𑒳𑒩𑒼𑒮𑒿 𑒏𑒰𑓀𑒑𑓂𑒩𑒹𑒮 𑒣𑒰𑒩𑓂𑒙𑒲 𑒯𑒰𑒩𑒪।
𑒑𑒰𑒧-𑒮𑒧𑒰𑒖𑒮𑒿 𑒪𑓄 𑒏𑓄 𑒠𑒹𑒬𑒏 𑒩𑒰𑒖𑒢𑒲𑒞𑒱 𑒞𑒏𑒧𑒹 𑒁𑒩𑒰𑒖𑒏 𑒮𑓂𑒟𑒱𑒞𑒱 𑒥𑒢𑒋 𑒪𑒑𑒪𑒻। 𑓑𑓙𑓕𑓗 𑒄.𑒏 𑒏𑒹𑒩𑒪𑒏 𑒫𑒰𑒧𑒣𑓀𑒟𑒲 𑒮𑒩𑒏𑒰𑒩 𑒞𑒼𑒛𑓃𑒻𑒧𑒹 𑒮𑒩𑒏𑒰𑒩𑒏 (𑒏𑒰𑓀𑒑𑓂𑒩𑒹𑒮 𑒮𑒩𑒏𑒰𑒩) 𑒮𑒰𑒐 𑒐𑒮𑒪। 𑒮𑓂𑒫𑒞𑓀𑒞𑓂𑒩𑒞𑒰 𑒮𑒹𑒢𑒰𑒢𑒱𑒨𑒼𑒏 (𑒂𑒖𑒰𑒠𑒲𑒏 𑒪𑒛𑓃𑒰𑒃 𑒪𑒛𑓃𑒢𑒱𑒯𑒰𑒩𑒼𑒏)𑒏 𑒮𑓀𑒐𑓂𑒨𑒰𑒧𑒹 𑒥𑒯𑒳𑒞 𑒏𑒧𑒲 𑒢𑒯𑒱𑒨𑒹 𑒦𑒹𑒪 𑒕𑒪। 𑒏𑒱𑒕𑒳 𑒣𑓂𑒩𑒐𑒩 𑒢𑒹𑒞𑒰 𑒖𑒩𑒴𑒩 𑒧𑒩𑒱 𑒑𑒹𑒪 𑒕𑒪𑒰𑒯। 𑒩𑒰𑒖𑒢𑒲𑒞𑒱𑒏 𑒏𑓂𑒭𑒹𑒞𑓂𑒩𑒧𑒹 𑒦𑒰𑒃-𑒦𑒰𑒞𑒱𑒖 𑒂 𑒖𑒰𑒞𑒱𑒫𑒰𑒠, 𑒮𑒧𑓂𑒣𑓂𑒩𑒠𑒰𑒨𑒫𑒰𑒠, 𑒠𑒪-𑒥𑒠𑒪 𑒃𑒞𑓂𑒨𑒰𑒠𑒱 𑒖𑒼𑒩 𑒧𑒰𑒩𑒪𑒏। 𑒢𑒹𑒞𑒵𑒞𑓂𑒫𑒏 𑒮𑒰𑒐 𑒮𑒹𑒯𑒼 𑒒𑒙𑒪। 𑒖𑒰𑒞𑒱𑒫𑒰𑒠 𑒩𑒴𑒣𑒧𑒹 𑒖𑒞𑓄 𑒖𑒢𑒞𑒰𑒏 𑒮𑒰𑒐 𑒢𑒹𑒞𑒵𑒞𑓂𑒫𑒏 𑒢𑒖𑒩𑒱𑒧𑒹 𑒑𑒱𑒩𑒪 𑒞𑒞𑓄 𑒏𑒼𑒢𑒼 𑒣𑒰𑒩𑓂𑒙𑒲𑒏 𑒫𑒱𑒡𑒰𑒨𑒏 𑒮𑒰𑓀𑒮𑒠 𑒏𑒳𑒩𑒞𑒰-𑒡𑒼𑒞𑒲 𑒣𑒯𑒲𑒩𑒱-𑒣𑒯𑒲𑒩𑒱 𑒪𑒼𑒏𑒏 𑒥𑒲𑒔 𑒁𑒥𑒋 𑒪𑒑𑒪𑒰𑒯। 𑒥𑒛𑓃𑒏𑒰 𑒢𑒹𑒞𑒰𑒏 𑒮𑓀𑒑 𑒕𑒼𑒙𑒏𑒰𑒏 𑒥𑒪𑒱 𑒔𑒜𑓃𑒋 𑒪𑒰𑒑𑒪 𑒏𑒱𑒋𑒏 𑒞𑒿 𑒖𑒰𑒞𑒱, 𑒏𑒳𑒙𑒳𑒧𑓂𑒥, 𑒑𑒾𑒂𑒿, 𑒣𑒛𑓃𑒼𑒮𑒲 𑒂 𑒪𑒹𑒢-𑒠𑒹𑒢 𑒍𑒏𑒩 𑒂𑒡𑒰𑒩 𑒥𑒢𑒪। 𑒥𑒱𑒯𑒰𑒩𑒼𑒏 𑒩𑒰𑒖𑒢𑒲𑒞𑒱 𑒖𑒙𑒰-𑒖𑒙𑒱𑒢𑒏 𑒢𑒰𑒔 𑒖𑒏𑒰𑒿 𑒗𑒱𑒪𑒯𑒼𑒩𑒱 𑒐𑒹𑒪𑒋 𑒪𑒰𑒑𑒪। 𑒣𑓂𑒩𑒬𑒰𑒮𑒢𑒼 𑒪𑒰𑒦 𑒅𑒚𑒾𑒪𑒏। 𑒫𑒼𑒙𑒏 𑒣𑒰𑒩𑓂𑒙𑒲𑒏𑒹𑒿 𑒥𑒱𑒢𑒳 𑒫𑒼𑒙𑒏 𑒣𑒰𑒩𑓂𑒙𑒲 𑒠𑒥𑒰-𑒠𑒥𑒰 𑒬𑒰𑒮𑒢 𑒣𑒏𑒛𑓃𑒋 𑒪𑒰𑒑𑒪। 𑒋𑒏 𑒞𑒿 𑒑𑓂𑒩𑒰𑒧-𑒣𑓀𑒔𑒰𑒨𑒞 𑒮𑒱𑒢𑒹𑒧𑒰 𑒣𑒼𑒮𑓂𑒙𑒩 𑒖𑒏𑒰𑒿 𑒧𑒰𑒞𑓂𑒩 𑒢𑒰𑒧 𑒑𑒰𑒧 𑒕𑒪, 𑒖𑒹𑒏𑒩𑒰 𑒧𑒖𑒑𑒴𑒞 𑒏𑒩𑒥 𑒮𑒦𑒮𑒿 𑒁𑒯𑒧, 𑒧𑒳𑒠𑒰 𑒠𑒹𑒬𑒏 𑒄 𑒋𑒯𑒹𑒢 𑒮𑓀𑒮𑓂𑒟𑒰 𑒕𑒪 𑒖𑒹𑒏𑒩𑒰 𑒂𑒩𑒼 𑒏𑒧𑒖𑒼𑒩 𑒥𑒢𑒰 𑒮𑒩𑒏𑒰𑒩𑒲 𑒞𑓀𑒞𑓂𑒩𑒏 𑒯𑒰𑒟𑒧𑒹 𑒮𑒧𑒹𑒙𑒱 𑒏𑓄 𑒩𑒰𑒐𑒱 𑒠𑒹𑒪 𑒑𑒹𑒪 𑒕𑒪। 𑒏𑒼𑒙-𑒏𑒔𑒯𑒩𑒲𑒏 𑒔𑒪𑒞𑒲 𑒂𑒥𑒱 𑒑𑒹𑒪, 𑒏𑒼𑒢𑒰 𑒢𑒻 𑒁𑒥𑒻𑒞? 𑒋𑒏 𑒠𑒱𑒮 𑒯𑒰𑒩𑒪 𑒧𑒳𑒐𑒱𑒨𑒰 𑒂 𑒂𑒩𑒼-𑒂𑒩𑒼 𑒮𑒞𑓂𑒞𑒰𑒮𑒲𑒢 𑒯𑒳𑒁𑒋 𑒪𑒑𑒪 𑒂 𑒖𑒢𑒞𑒰𑒏 𑒣𑓂𑒩𑒞𑒱𑒢𑒱𑒡𑒱 𑒮𑒛𑓃𑒏𑒣𑒩 𑒩𑒯𑒱 𑒑𑒹𑒪। 𑒖𑒧𑒲𑒢𑒠𑒰𑒩-𑒮𑒰𑒧𑓀𑒞 𑒒𑒮𑒰𑒃𑒞-𑒒𑒮𑒰𑒃𑒞 𑒒𑒮𑒰 𑒑𑒹𑒪, 𑒑𑒰𑒧-𑒑𑒰𑒧𑒏 𑒍𑒏𑒩 𑒖𑒧𑒲𑒢 𑒑𑒾𑒂𑒿𑒏 𑒁𑒐𑒛𑓃𑒰𑒯𑒰 𑒥𑒢𑒱 𑒑𑒹𑒪। 𑒖𑒹𑒏𑒩 𑒪𑒰𑒚𑒲, 𑒞𑒹𑒏𑒩 𑒦𑒻𑓀𑒮𑒏 𑒮𑓂𑒟𑒱𑒞𑒱 𑒥𑒢𑒱 𑒑𑒹𑒪।
𑒫𑒱𑒔𑒰𑒩𑒡𑒰𑒩𑒰𑒏 𑒥𑒲𑒔 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲𑒏 𑒥𑒲𑒔 𑒮𑒹𑒯𑒼 𑒅𑒚𑒰-𑒣𑒙𑒏 𑒯𑒳𑒁𑒋 𑒪𑒰𑒑𑒪। 𑒧𑒼𑒙𑒰-𑒧𑒼𑒙𑒲 𑒮𑒰𑒧𑒰𑒖𑒱𑒏, 𑒂𑒩𑓂𑒟𑒱𑒏, 𑒥𑒾𑒠𑓂𑒡𑒱𑒏, 𑒩𑒰𑒖𑒢𑒲𑒞𑒱𑒏 𑒮𑒦 𑒧𑓀𑒔𑒣𑒩 𑒫𑒻𑒔𑒰𑒩𑒱𑒏 𑒮𑓀𑒒𑒩𑓂𑒭𑒏 𑒮𑓀𑒑 𑒮𑒰𑒧𑒰𑒖𑒱𑒏-𑒂𑒩𑓂𑒟𑒱𑒏 𑒫𑒱𑒬𑓂𑒪𑒹𑒭𑒝 𑒮𑒹𑒯𑒼 𑒯𑒳𑒁𑒋 𑒪𑒰𑒑𑒪, 𑒖𑒹𑒏𑒩 𑒣𑒩𑒱𑒝𑒰𑒧 𑒃𑒢𑓂𑒠𑒱𑒩𑒰 𑒖𑒲𑒏 𑒢𑒹𑒞𑒵𑒞𑓂𑒫𑒏𑒰𑒪𑒧𑒹 𑒮𑓂𑒣𑒭𑓂𑒙 𑒦𑓄 𑒑𑒹𑒪। 𑒂𑒖𑒰𑒠𑒲𑒏 𑒥𑒰𑒠 𑒄 𑒏𑒰𑓀𑒑𑓂𑒩𑒹𑒮𑒏 𑒥𑒲𑒔 𑒣𑒯𑒱𑒪 𑒫𑒻𑒔𑒰𑒩𑒱𑒏 𑒪𑒛𑓃𑒰𑒃 𑒕𑒪।
𑒑𑒰𑒧-𑒑𑒰𑒧𑒧𑒹 𑒮𑒹𑒯𑒼 𑒣𑒳𑒩𑒼𑒯𑒱𑒞𑒫𑒰𑒠𑒏𑒹𑒿 𑒡𑒏𑓂𑒏𑒰 𑒪𑒰𑒑𑒪। 𑒖𑒞𑒱𑒨𑒰 𑒂𑒑𑒴 𑒣𑒞𑒱𑒨𑒰 𑒢𑒻 𑒪𑒑𑒻 𑒕𑒻, 𑒄 𑒱𑒢𑒩𑓂𑒝𑒰𑒨𑒏 𑒦𑒹𑒪। 𑒧𑒳𑒠𑒰 𑒖𑒃 𑒩𑒴𑒣𑒧𑒹 𑒂𑒩𑓂𑒟𑒱𑒏 𑒬𑒼𑒭𑒝 𑒯𑒼𑒃𑒞 𑒕𑒪 𑒞𑒃𑒧𑒹 𑒏𑒧𑒲 𑒢𑒻 𑒦𑒹𑒪। 𑒖𑒰𑒞𑒱𑒧𑒹 𑒏𑒱𑒕𑒳 𑒥𑒠𑒪𑒰𑒫 𑒂𑒋𑒪 𑒧𑒳𑒠𑒰 𑒥𑒹𑒫𑒯𑒰𑒩𑒱𑒏 𑒣𑒏𑓂𑒭 𑒚𑒰𑒧𑒏 𑒚𑒰𑒧𑒯𑒱 𑒩𑒯𑒱 𑒑𑒹𑒪। 𑒏𑒞𑒥𑒼 𑒚𑒰𑒧𑒏-𑒚𑒰𑒧𑒹 𑒩𑒯𑒪 𑒞𑒻𑒨𑒼 𑒥𑒹𑒫𑒮𑓂𑒟𑒰𑒏 𑒫𑒱𑒩𑒼𑒡𑒧𑒹 𑒏𑒱𑒕𑒳 𑒢𑒹 𑒏𑒱𑒕𑒳 𑒪𑒰𑒦 𑒦𑒹𑒥𑒹 𑒏𑒋𑒪। 𑒏𑒰𑒩𑒝𑒼 𑒦𑒹𑒪, 𑒯𑒼-𑒯𑒰𑒧𑒹 𑒏𑒰𑒖 𑒞𑒿 𑒬𑒳𑒩𑒴 𑒦𑒹𑒪 𑒧𑒳𑒠𑒰 𑒣𑒼𑒟𑒲-𑒣𑒞𑓂𑒩𑒰𑒏 𑒦𑒰𑒭𑒰 𑒞𑒿 𑒮𑓀𑒮𑓂𑒏𑒵𑒞𑒹 𑒩𑒯𑒋। 𑒣𑒜𑓃𑒢𑒱𑒯𑒰𑒩𑒼𑒏 𑒮𑓀𑒐𑓂𑒨𑒰 𑒏𑒧 𑒂 𑒥𑒳𑒗𑒱𑒢𑒱𑒯𑒰𑒩𑒏 𑒞𑒿 𑒮𑒯𑒖𑒯𑒱 𑒢𑒻। 𑒧𑒳𑒠𑒰 𑒞𑒻𑒨𑒼 𑒏𑒱𑒕𑒳 𑒢𑒹 𑒏𑒱𑒕𑒳 𑒔𑒏-𑒔𑒴𑒏 𑒔𑒪𑒱𑒞𑒹 𑒩𑒯𑒪। 𑒏𑒞𑒾 “𑓇” 𑒪𑓄 𑒏𑓄 𑒧𑒰𑒩𑒱-𑒣𑒲𑒙𑒱 𑒞𑒿 𑒏𑒞𑒾 𑒏𑒱𑒕𑒳। 𑒖𑒯𑒱𑒢𑒰 𑒣𑒼𑒟𑒲-𑒣𑒞𑒩𑒰𑒏 𑒠𑒬𑒰 𑒦𑒹𑒪 𑒞𑒯𑒱𑒢𑒰 𑒩𑒰𑒖𑒢𑒲𑒞𑒱𑒏 𑒧𑓀𑒔𑒣𑒩 𑒑𑒰𑒿𑒡𑒲𑒫𑒰𑒠𑒏 𑒠𑒬𑒰 𑒦𑒹𑒪। 𑒋𑒏𑓂𑒏𑒹 𑒥𑒰𑒞 𑒋𑒏𑓂𑒏𑒹 𑒣𑒰𑒿𑒞𑒱𑒏 𑒫𑓂𑒨𑒰𑒐𑓂𑒨𑒰, 𑒖𑒞𑒹-𑒧𑒳𑒿𑒯 𑒞𑒞𑒹 𑒩𑓀𑒑𑒏 𑒫𑓂𑒨𑒰𑒐𑓂𑒨𑒰 𑒯𑒳𑒁𑒋 𑒪𑒰𑒑𑒪। 𑒖𑒩𑒴𑒩𑒞 𑒁𑒕𑒱 𑒖𑒹 𑒌 𑒮𑒧𑒮𑓂𑒨𑒰𑒏 𑒮𑒧𑒰𑒡𑒰𑒢 𑒧𑒖𑒑𑒴𑒞𑒲𑒮𑒿 𑒏𑒋𑒪 𑒖𑒰𑒋। 𑒢𑒻 𑒞𑒿 𑒧𑒴𑒛𑓃𑒢 𑒂 𑒮𑒩𑒰𑒡𑒏 𑒦𑒼𑒖𑒧𑒹 𑒏𑒼𑒢𑒼 𑒦𑒹𑒠 𑒢𑒻 𑒩𑒯𑒞।
𑒬𑒱𑒏𑓂𑒭𑒰-𑒮𑓀𑒮𑓂𑒟𑒰𑒢 𑒂𑒩𑒼 𑒋𑒏𑒙𑒰 𑒁𑒛𑓂𑒛𑒰 𑒥𑒢𑒱 𑒑𑒹𑒪। 𑒏𑒼𑒢𑒼 𑒞𑒩𑒯𑒏 𑒣𑓂𑒩𑒞𑒱𑒥𑓀𑒡 𑒢𑒻। 𑒫𑒋𑒯 𑒏𑒍𑒪𑒹𑒖𑒧𑒹 𑒑𑒰𑒿𑒡𑒲𑒫𑒰𑒠𑒲 𑒮𑒱𑒠𑓂𑒡𑒰𑒢𑓂𑒞𑒼 𑒣𑒜𑓃𑒾𑒞𑒰 𑒂 𑒤𑒲𑒪𑓂𑒛𑒧𑒹 𑒂𑒥𑒱 𑒐𑒱𑒪𑓂𑒪𑒱𑒨𑒼 𑒅𑒛𑓃𑒾𑒞𑒰𑒯, 𑒂 𑒫𑒱𑒡𑒰𑒢𑒮𑒦𑒰 𑒮𑓀𑒮𑒠𑒧𑒹 𑒍 𑒮𑒦 𑒥𑒱𑒏𑒹𑒥𑒼 𑒏𑒩𑒞𑒰𑒯। 𑒋𑒯𑒹𑒢 𑒐𑒹𑒪 𑒡𑒛𑓃𑒪𑓂𑒪𑒹𑒮𑒿 𑒦𑒹𑒪। 𑒧𑒳𑒠𑒰 𑒋𑒏𑒙𑒰 𑒖𑒩𑒴𑒩 𑒦𑒹𑒪 𑒖𑒹 𑒖𑒯𑒱𑒢𑒰 𑓑𑓙𑓔𑓒𑒄.𑒏 𑒁𑓀𑒑𑒹𑒖 𑒫𑒱𑒩𑒼𑒡𑒲 𑒯𑒫𑒰 𑒣𑒻𑒠𑒰 𑒏𑒹𑒪𑒏, 𑒞𑒯𑒱𑒢𑒰 𑓑𑓙𑓖𑓗 𑒄.𑒏 𑒯𑒫𑒰 𑒮𑒹𑒯𑒼 𑒏𑒹𑒪𑒏। 𑒋𑒏 𑒠𑒱𑒮 𑒩𑒾𑒠𑒲𑒏 𑒧𑒰𑒩𑒪 𑒏𑒱𑒮𑒰𑒢, 𑒮𑒰𑒧𑓀𑒞-𑒣𑒴𑒿𑒖𑒲𑒣𑒞𑒱𑒏 𑒥𑒲𑒔 𑒫𑒱𑒫𑒰𑒠, 𑒖𑒰𑒞𑒱-𑒖𑒰𑒞𑒱𑒏 𑒂 𑒫𑒩𑓂𑒑-𑒖𑒰𑒞𑒱𑒏 𑒥𑒲𑒔𑒏 𑒠𑒴𑒩𑒲, 𑒖𑒼𑒞𑒪 𑒐𑒹𑒞 𑒖𑒏𑒰𑒿 𑒔𑒾𑒏𑒱𑒨𑒰 𑒏𑓄 𑒋𑒏𑒥𑒙𑓂𑒙 𑒦𑓄 𑒑𑒹𑒪, 𑒧𑒳𑒠𑒰 𑒮𑒹 𑒮𑒼𑒪𑒯𑒢𑓂𑒢𑒲 𑒢𑒻 𑒦𑒹𑒪।
𑒍𑒢𑒰 𑒏𑒼𑒮𑒲𑒏 𑒣𑒳𑒪-𑒥𑒰𑒢𑓂𑒯 (𑒢𑒹𑒣𑒰𑒪 𑒤𑒰𑒙𑒏 𑒮𑒯𑒱𑒞) 𑒥𑒢𑒪, 𑒏𑒼𑒮𑒲 𑒢𑒯𑒩𑒱𑒧𑒹 𑒯𑒰𑒟 𑒪𑒰𑒑𑒪 𑒧𑒳𑒠𑒰 𑒏𑒲 𑒪𑒰𑒦 𑒦𑒹𑒪? 𑒠𑒹𑒐𑒱𑒞𑒹 𑒕𑒱𑒌। 𑒖𑒃 𑒞𑒩𑒯𑒏 𑒯𑒪𑒔𑒪 𑒏𑒍𑒪𑒹𑒖 𑒂 𑒯𑒰𑒨𑒩 𑒬𑒱𑒏𑓂𑒭𑒝 𑒮𑓀𑒮𑓂𑒟𑒰𑒢𑒧𑒹 𑒦𑒹𑒪 𑒞𑒃 𑒞𑒩𑒯𑒏 𑒯𑒪𑒔𑒪 𑒯𑒰𑒃 𑒮𑓂𑒏𑒴𑒪𑒧𑒹 𑒢𑒻 𑒦𑒹𑒪। 𑒧𑒱𑒛𑓂𑒪 𑒮𑓂𑒏𑒴𑒪𑒏 𑒞𑒿 𑒔𑒩𑓂𑒔𑒹 𑒢𑒻। 𑒖𑒹 𑒨𑒳𑒢𑒱𑒫𑒩𑓂𑒮𑒱𑒙𑒲𑒏 𑒮𑒩𑓂𑒫𑒼𑒔𑓂𑒔 𑒣𑒠 (𑒦𑒲.𑒮𑒲) 𑒫𑒱𑒠𑓂𑒫𑒞 𑒧𑓀𑒛𑒪𑒲𑒏 𑒥𑒲𑒔 𑒕𑒪 𑒍 𑒣𑓂𑒩𑒬𑒰𑒮𑒢𑒱𑒏 𑒁𑒤𑒮𑒩𑒏 𑒯𑒰𑒟 𑒖𑒰𑒋 𑒪𑒑𑒪। 𑒏𑒹𑒢𑒰 𑒢𑒹 𑒖𑒰𑒃𑒞, 𑒫𑒱𑒠𑓂𑒫𑒞𑒰 𑒂 𑒣𑓂𑒩𑒬𑒰𑒮𑒢𑒧𑒹 𑒞𑒿 𑒏𑒱𑒕𑒳 𑒥𑒹𑒫𑒯𑒰𑒩𑒱𑒏 𑒁𑓀𑒞𑒩 𑒁𑒕𑒱𑒨𑒹। 𑒏𑒼𑒢𑒼 𑒏𑒰𑒩𑒑𑒩 𑒢𑒱𑒁𑒧𑒼 𑒢𑒻 𑒪𑒑𑒾𑒪 𑒖𑒰 𑒮𑒏𑒻𑒋। 𑒏𑒱𑒕𑒳 𑒮𑒩𑒏𑒰𑒩𑒲 𑒏𑒍𑒪𑒹𑒖 𑒞𑒿 𑒏𑒱𑒕𑒳 𑒑𑒻𑒩 𑒮𑒩𑒏𑒰𑒩𑒲। 𑒏𑒱𑒕𑒳 𑒥𑒢𑒱𑒞𑒹 𑒞𑒿 𑒏𑒱𑒕𑒳 𑒥𑒢𑒻𑒏 𑒫𑒱𑒔𑒰𑒩𑒹 𑒏𑒩𑒻𑒞। 𑒋𑒯𑒢𑒰 𑒮𑓂𑒟𑒱𑒞𑒱𑒧𑒹 𑒢𑒱𑒁𑒧𑒧𑒹 𑒧𑒖𑒑𑒴𑒞𑒲 𑒏𑒹𑒢𑒰 𑒂𑒍𑒞। 𑒅𑒣𑒩𑒏𑒰 𑒡𑒰𑒩 𑒢𑒱𑒔𑓂𑒔𑒰 𑒠𑒱𑒮 𑒥𑒯𑒪। 𑒫𑒱𑒠𑓂𑒨𑒰𑒩𑓂𑒟𑒱𑒨𑒼 𑒖𑒹 𑒮𑒰𑒪 𑒦𑒩𑒱 𑒢𑒹𑒞𑒰𑒑𑒱𑒩𑒲 𑒏𑒹𑒪𑒢𑒱 𑒍 𑒣𑒩𑒲𑒏𑓂𑒭𑒰 𑒏𑒹𑒢𑒰 𑒣𑒰𑒮 𑒏𑒩𑒞𑒰𑒯। 𑒞𑒯𑒴𑒪𑒹 𑒞𑒿 𑒏𑒰𑒢𑒴𑒢𑒹𑒏 𑒖𑒩𑒴𑒩𑒞𑒱। 𑒯𑒴𑒛𑓃 𑒅𑒚𑒪 𑒂 𑒋𑒏𑓂𑒏𑒹-𑒠𑒳𑒃𑒨𑒹 𑒏𑒱𑒕𑒳 𑒏𑒍𑒪𑒹𑒖 𑒕𑒼𑒛𑓃𑒱 𑒣𑒩𑒲𑒏𑓂𑒭𑒰𑒧𑒹 𑒔𑒰𑒹𑒩𑒲 𑒬𑒳𑒩𑒴 𑒦𑒹𑒪। 𑒏𑒰𑒹𑒣𑒲 𑒖𑒿𑒔𑒢𑒱𑒯𑒰𑒩𑒼𑒏𑒹𑒿 𑒁𑒑𑒯𑒢 𑒯𑒰𑒟 𑒪𑒑𑒪𑒢𑒱। 𑒏𑒞𑒹𑒏 𑒏𑓀𑒚𑒲 𑒬𑒱𑒏𑓂𑒭𑒏𑒏 𑒥𑒲𑒔 𑒙𑒳𑒙𑒪। 𑒣𑒰𑒃 𑒯𑒰𑒟 𑒪𑒑𑒢𑒹 𑒪𑒼𑒏 𑒬𑒯𑒩 𑒠𑒱𑒮 𑒮𑒹𑒯𑒼 𑒥𑒜𑓃𑒪𑒰𑒯। 𑒧𑒳𑒠𑒰 𑒏𑒱𑒕𑒳 𑒯𑒼𑒅, 𑒏𑒱𑒕𑒳 𑒏𑒧𑒖𑒼𑒩 𑒪𑒼𑒏𑒏 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒖𑒩𑒴𑒩 𑒪𑒰𑒦 𑒦𑒹𑒪𑒢𑒱, 𑒍𑒢𑒰 𑒖𑒞𑒹 𑒯𑒹𑒥𑒰𑒏 𑒔𑒰𑒯𑒲 𑒮𑒹 𑒢𑒻 𑒦𑒹𑒪𑒢𑒱। 𑒩𑓀𑒑-𑒥𑒱𑒩𑓀𑒑𑒏 𑒣𑓂𑒩𑒰𑒃𑒫𑒹𑒙 𑒏𑒍𑒪𑒹𑒖 𑒏𑒰𑒑𑒖𑒹𑒣𑒩 𑒅𑒚𑒱 𑒏𑓄 𑒚𑒰𑒜𑓃 𑒦𑒹𑒪। 𑒏𑒰𑒑𑒖𑒹𑒣𑒩 𑒣𑒜𑓃𑒰𑒃, 𑒏𑒰𑒑𑒖𑒹𑒣𑒩 𑒣𑒩𑒲𑒏𑓂𑒭𑒰 𑒂 𑒏𑒰𑒑𑒖𑒹𑒏 𑒛𑒱𑒑𑓂𑒩𑒲 𑒥𑒱𑒏𑒰𑒋 𑒪𑒰𑒑𑒪, 𑒖𑒃𑒮𑒿 𑒥𑒳𑒢𑒱𑒨𑒰𑒠𑒲 𑒮𑒧𑒮𑓂𑒨𑒰 𑒕𑒳𑒙𑒱 𑒑𑒹𑒪। 𑒢𑒹 𑒧𑒹𑒛𑒱𑒏𑒪 𑒏𑒍𑒪𑒹𑒖 𑒥𑒜𑓃𑒪 𑒂 𑒢𑒹 𑒃𑓀𑒖𑒲𑒢𑒱𑒨𑒩𑒱𑓀𑒑, 𑒢𑒹 𑒃𑓀𑒖𑒲𑒢𑒱𑒨𑒩 𑒢𑒹 𑒏𑒰𑒩𑒐𑒰𑒢𑒰, 𑒢𑒹 𑒙𑒹𑒏𑒢𑒲𑒏𑒪 𑒏𑒍𑒪𑒹𑒖 𑒥𑒜𑓃𑒪 𑒂 𑒢𑒹 𑒏𑒳𑒬𑒪 𑒏𑒰𑒩𑒲𑒑𑒩𑒏 𑒱𑒢𑒩𑓂𑒧𑒰𑒝 𑒦𑒹𑒪। 𑒢𑒹 𑒋𑒑𑓂𑒩𑒲𑒏𑒪𑓂𑒔𑒩 𑒏𑒍𑒪𑒹𑒖 𑒥𑒜𑓃𑒪 𑒂 𑒢𑒹 𑒏𑒳𑒬𑒪 𑒏𑒱𑒮𑒰𑒢 𑒥𑒜𑓃𑒪। 𑒅𑒞𑓂𑒞𑒩-𑒠𑒕𑒱𑒢 𑒥𑒱𑒯𑒰𑒩𑒏 𑒮𑓀𑒥𑓀𑒡𑒮𑒿 𑒌𑒚𑒰𑒧𑒏 (𑒧𑒱𑒟𑒱𑒪𑒰𑓀𑒔𑒪) 𑒣𑒜𑓃𑒪-𑒪𑒱𑒐𑒪𑒏𑒹𑒿 𑒠𑒕𑒱𑒢 𑒥𑒱𑒯𑒰𑒩𑒧𑒹 𑒢𑒼𑒏𑒩𑒲 𑒦𑒹𑒙𑒪𑒢𑒱। 𑒥𑒯𑒳𑒞 𑒑𑒼𑒙𑒹 𑒒𑒩𑒼-𑒁𑓀𑒑𑒢𑒰 𑒥𑒢𑒰 𑒪𑒹𑒪𑒢𑒱, 𑒧𑒳𑒠𑒰 𑒠𑒳𑒢𑒴 𑒩𑒰𑒖𑓂𑒨𑒏𑒹𑒿 𑒫𑒱𑒦𑒰𑒖𑒱𑒞 𑒦𑒹𑒢𑒹 𑒦𑒰𑒭𑒰𑒏 𑒮𑒲𑒧𑒰𑒥𑓀𑒠𑒲 𑒦𑒹𑒪। 𑒍𑒢𑒰 𑒖𑒹𑒯𑒢 𑒋𑒏𑒩𑓀𑒑𑒰𑒯 𑒦𑒰𑒭𑒰 𑒧𑒱𑒟𑒱𑒪𑒰𑓀𑒔𑒪𑒏 𑒁𑒕𑒱 𑒍𑒯𑒢 𑒠𑒕𑒱𑒢 𑒥𑒱𑒯𑒰𑒩𑒏 𑒢𑒻 𑒁𑒕𑒱। 𑒏𑒰𑒩𑒝𑒼 𑒁𑒕𑒱 𑒖𑒹 𑒖𑒐𑒢 𑒏𑒪-𑒏𑒰𑒩𑒐𑒰𑒢𑒰 𑒁𑒕𑒱𑒨𑒹 𑒢𑒻 𑒞𑒐𑒢 𑒏𑒼𑒢 𑒢𑒼𑒏𑒩𑒲 𑒣𑒰𑒥𑒋 𑒂𑒢 𑒩𑒰𑒖𑒏 𑒪𑒼𑒏 𑒎𑒞𑒰𑒯। 𑒞𑒿𑒋 𑒦𑒰𑒭𑒰𑒧𑒹 𑒏𑒼𑒢𑒼 𑒡𑒏𑓂𑒏𑒰 𑒢𑒻 𑒪𑒰𑒑𑒪 𑒁𑒕𑒱। 𑒯𑒱𑒢𑓂𑒠𑒲 𑒂𑒢𑒩𑓂𑒮𑒏 𑒮𑓀𑒑 𑒥𑒲.𑒋. 𑒣𑒰𑒮 𑒏𑒹𑒪𑒢𑓂𑒯𑒱 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪, 𑓑𑓙𑓖𑓙-𑓗𑓑 𑒄.𑒏 𑒥𑒻𑒔𑒧𑒹 𑒮𑒲.𑒋𑒧. 𑒏𑒍𑒪𑒹𑒖𑒧𑒹 𑒢𑒰𑒍𑓀 𑒪𑒱𑒐𑒹𑒪𑒢𑓂𑒯𑒱। 𑒣𑒜𑓃𑒰𑒃𑒏 𑒮𑓂𑒞𑒩 𑒮𑒹𑒯𑒼 𑒏𑒧𑒱 𑒔𑒳𑒏𑒪 𑒕𑒪। 𑒣𑓂𑒩𑒼𑒤𑒹𑒮𑒩 𑒂 𑒫𑒱𑒠𑓂𑒨𑒰𑒩𑓂𑒟𑒲𑒏 𑒥𑒲𑒔𑒏 𑒮𑓀𑒥𑓀𑒡𑒧𑒹 𑒖𑒥𑒩𑒠𑒮𑓂𑒞 𑒡𑒏𑓂𑒏𑒰 𑒪𑒰𑒑𑒪। 𑒖𑒃𑒮𑒿 𑒬𑒱𑒏𑓂𑒭𑒏𑒏 𑒣𑓂𑒩𑒞𑒱𑒭𑓂𑒚𑒰𑒧𑒹 𑒏𑒧𑒲 𑒂𑒥𑒱 𑒩𑒯𑒪 𑒕𑒪। 𑒢𑒲𑒏 𑒬𑒱𑒏𑓂𑒭𑒏 𑒁𑒣𑒢 𑒧𑒳𑒿𑒯 𑒥𑒢𑓂𑒢 𑒏𑓄 𑒁𑒣𑒢 𑒣𑓂𑒩𑒞𑒱𑒭𑓂𑒚𑒰 𑒥𑒔𑒥𑒻𑒧𑒹 𑒪𑒑𑒱 𑒑𑒹𑒪𑒰𑒯। 𑒂𑒏𑓂𑒩𑒼𑒬 𑒬𑒱𑒏𑓂𑒭𑒏𑒼𑒏 𑒥𑒲𑒔 𑒥𑒜𑓃𑒥𑒹 𑒏𑒋𑒪। 𑒣𑒰𑒃-𑒏𑒾𑒛𑓃𑒲𑒏 𑒪𑒹𑒢-𑒠𑒹𑒢 𑒂 𑒣𑒻𑒩𑒥𑒲-𑒣𑒻𑒑𑒰𑒧 𑒐𑒴𑒥 𑒥𑒜𑓃𑒪। 𑒖𑒰𑒞𑒱 𑒂𑒡𑒰𑒩𑒱𑒞 𑒕𑒰𑒞𑓂𑒩-𑒬𑒱𑒏𑓂𑒭𑒏𑒏 𑒥𑒲𑒔 𑒮𑓀𑒥𑓀𑒡 𑒥𑒜𑓃𑒪 𑒞𑒿 𑒠𑒼𑒮𑒩 𑒠𑒱𑒮 (𑒂𑒢-𑒖𑒰𑒞𑒱𑒏) 𑒮𑓀𑒥𑓀𑒡𑒧𑒹 𑒏𑒧𑒱𑒨𑒼 𑒦𑒹𑒪। 𑒍𑒢𑒰 𑒞𑒿 𑒮𑒦 𑒏𑓂𑒪𑒰𑒮𑒏 𑒧𑒳𑒠𑒰 𑒋𑒧.𑒋.𑒏 𑒣𑒩𑒲𑒏𑓂𑒭𑒰 𑒞𑒲𑒢 𑒮𑒰𑒪 𑒣𑒕𑒳𑒂𑒋𑒪 𑒩𑒯𑒋। 𑒏𑓂𑒪𑒰𑒮 𑒮𑒧𑓂𑒣𑒢𑓂𑒢 𑒏𑒹𑒪𑒰𑒏 𑒥𑒰𑒠 𑒑𑒰𑒧 𑒂𑒥𑒱 𑒣𑒩𑒲𑒏𑓂𑒭𑒰𑒏 𑒣𑓂𑒩𑒞𑒲𑒏𑓂𑒭𑒰 𑒏𑒩𑒋 𑒪𑒑𑒪𑒰। 𑒞𑒃 𑒥𑒲𑒔 𑒑𑒰𑒧𑒧𑒹 (𑒥𑒹𑒩𑒧𑒰) 𑒠𑒳𑒩𑓂𑒑𑒰𑒣𑒴𑒖𑒰𑒏 𑒫𑒱𑒔𑒰𑒩 𑒅𑒚𑒪। 𑒖𑒞𑓄-𑒞𑒞𑓄 𑒔𑒩𑓂𑒔𑒰 𑒯𑒳𑒁𑒋 𑒪𑒰𑒑𑒪। 𑒁𑒡𑒱𑒏𑒰𑓀𑒬 𑒪𑒼𑒏 𑒣𑒴𑒖𑒰𑒏 𑒣𑒏𑓂𑒭𑒧𑒹 𑒩𑒯𑒟𑒱। 𑒧𑒳𑒠𑒰 𑒠𑒳𑒩𑓂𑒑𑒰𑒣𑒴𑒖𑒰 𑒞𑒿 𑒂𑒢 𑒣𑒴𑒖𑒰 𑒢𑒻 𑒖𑒹 𑒏𑒧𑒼 𑒖𑒑𑒯𑒧𑒹 𑒏𑒋𑒪 𑒖𑒰 𑒮𑒏𑒻𑒋। 𑒌 𑒪𑒹𑒪 𑒁𑒡𑒱𑒏 𑒖𑒑𑒯𑒏 𑒖𑒩𑒴𑒩𑒞𑒱 𑒯𑒼𑒃𑒞 𑒁𑒕𑒱। 𑒏𑒰𑒩𑒝 𑒖𑒹 𑒋𑒏 𑒞𑒿 𑒠𑒮 𑒠𑒱𑒢𑒏 𑒣𑒴𑒖𑒰, 𑒞𑒃𑒣𑒩 𑒠𑒼𑒏𑒰𑒢-𑒠𑒾𑒩𑒲, 𑒧𑒹𑒪𑒰, 𑒢𑒰𑒔-𑒞𑒧𑒰𑒬𑒰 𑒮𑒹𑒯𑒼 𑒯𑒼𑒃𑒋।
𑒑𑒾𑒂𑒿𑒏 𑒮𑒯𑒧𑒞𑒱 𑒥𑒢𑒪𑒹 𑒩𑒯𑒻, 𑒮𑓂𑒏𑒴𑒪𑒏 𑒣𑓂𑒩𑒰𑓀𑒑𑒢𑒧𑒹 𑒥𑒻𑒮𑒰𑒩 𑒦𑒹𑒪𑒻, 𑒍𑒢𑒰 𑒞𑒃𑒮𑒿 𑒣𑒯𑒱𑒢𑒾𑓀 𑒑𑒾𑒂𑒏 𑒥𑒻𑒮𑒰𑒩 𑒏𑒞𑒹 𑒥𑒩𑒹 𑒦𑒹𑒪 𑒧𑒳𑒠𑒰 𑒖𑒞𑒹 𑒪𑒼𑒏 𑒌 𑒥𑒻𑒮𑒰𑒩𑒧𑒹 𑒅𑒣𑒮𑓂𑒟𑒱𑒞 𑒦𑒹𑒪 𑒍𑒞𑒹 𑒏𑒯𑒱𑒨𑒼 𑒢𑒻 𑒦𑒹𑒪 𑒕𑒪। 𑒞𑒯𑒱𑒢𑒰 𑒥𑒻𑒮𑒰𑒩𑒧𑒹 𑒥𑒖𑒢𑒱𑒯𑒰𑒩𑒼𑒏 𑒮𑓀𑒐𑓂𑒨𑒰 𑒥𑒜𑓃𑒪। 𑒢𑒫 𑒣𑒲𑒜𑓃𑒲 𑒏𑒰𑒢𑓂𑒯 𑒅𑒚𑒾𑒪𑒢𑒱।
𑒥𑒻𑒮𑒰𑒩𑒧𑒹 𑒣𑒴𑒖𑒰 𑒮𑓂𑒟𑒪𑒏 𑒔𑒳𑒢𑒰𑒫 𑒯𑒳𑒁𑒋 𑒪𑒑𑒪। 𑒠𑒴-𑒞𑒲𑒢𑒙𑒰 𑒖𑒑𑒯 𑒍𑒯𑒢 𑒦𑒹𑒙𑒪 𑒖𑒃𑒧𑒹 𑒠𑒳𑒩𑓂𑒑𑒰𑒣𑒴𑒖𑒰 𑒮𑒧𑓂𑒯𑒩𑒱 𑒮𑒏𑒻𑒋। 𑒧𑒳𑒠𑒰 𑒐𑒰𑒪𑒲 𑒖𑒑𑒯𑒹𑒙𑒰 𑒮𑒿 𑒢𑒻 𑒯𑒳𑒁𑒋, 𑒠𑒱𑒢-𑒩𑒰𑒞𑒱𑒏 𑒧𑒹𑒪𑒰, 𑒞𑒿𑒋 𑒮𑒳𑒩𑒏𑓂𑒭𑒼 𑒁𑒢𑒱𑒫𑒰𑒩𑓂𑒨 𑒁𑒕𑒱। 𑒞𑒿𑒋 𑒮𑒳𑒩𑒏𑓂𑒭𑒱𑒞 𑒖𑒑𑒯𑒏 𑒧𑒯𑒞 𑒥𑒜𑓃𑒪। 𑒮𑓂𑒏𑒴𑒪𑒹𑒏 𑒣𑓂𑒩𑒰𑓀𑒑𑒢𑒏 𑒮𑒯𑒧𑒞𑒱 𑒥𑒢𑒪। 𑒠𑒼𑒮𑒩 𑒣𑓂𑒩𑒬𑓂𑒢 𑒅𑒚𑒪 𑒥𑒪𑒱 𑒣𑓂𑒩𑒠𑒰𑒢𑒏। 𑒣𑒩𑒼𑒣𑒙𑓂𑒙𑒰𑒏 𑒠𑒳𑒩𑓂𑒑𑒰𑒣𑒴𑒖𑒰 𑒠𑒳𑒢𑒴 𑒜𑓀𑒑𑒏 𑒔𑒪𑒻𑒞, 𑒫𑒻𑒭𑓂𑒝 𑒠𑒳𑒩𑓂𑒑𑒰 𑒮𑒹𑒯𑒼 𑒖𑒞𑒋 𑒥𑒪𑒱 𑒣𑓂𑒩𑒠𑒰𑒢 𑒢𑒻 𑒯𑒼𑒃𑒞। 𑒏𑒱𑒕𑒳 𑒚𑒰𑒧 𑒥𑒪𑒱 𑒣𑓂𑒩𑒠𑒰𑒢𑒼 𑒯𑒼𑒃𑒞 𑒂 𑒏𑒱𑒕𑒳 𑒚𑒰𑒧 𑒢𑒯𑒱𑒨𑒼 𑒯𑒼𑒃𑒞। 𑒧𑒳𑒠𑒰 𑒑𑒣 𑒂𑒹𑒗𑒩𑒰 𑒑𑒹𑒪। 𑒋𑒏 𑒧𑒞𑒏 𑒑𑒰𑒧𑒧𑒹 𑒠𑒳𑒢𑒴 𑒧𑒞 𑒣𑒢𑒣𑒪। 𑒖𑒯𑒱𑒢𑒰 𑒥𑒻𑒮𑒰𑒩 𑒋𑒏 𑒧𑒞𑒮𑒿 𑒬𑒳𑒩𑒴 𑒦𑒹𑒪 𑒞𑒯𑒱𑒢𑒰 𑒠𑒴 𑒧𑒞𑒧𑒹 𑒫𑒱𑒦𑒰𑒖𑒱𑒞 𑒦𑓄 𑒑𑒹𑒪। 𑒥𑒪𑒱 𑒣𑓂𑒩𑒠𑒰𑒢𑒏 𑒣𑒏𑓂𑒭𑒮𑒿 𑒁𑒡𑒱𑒏 𑒫𑒱𑒣𑒏𑓂𑒭𑒏। 𑒠𑒼𑒮𑒩 𑒠𑒱𑒮 𑒣𑒴𑒖𑒰 𑒏𑒩𑒲𑒥 𑒂𑒥𑒱 𑒑𑒹𑒪 𑒩𑒯𑒻। 𑒖𑒿 𑒯𑒴𑒮𑒱 𑒖𑒰𑒋𑒞 𑒞𑒿 𑒮𑒰𑒪𑒹 𑒯𑒴𑒮𑒱 𑒖𑒰𑒋𑒞, 𑒄𑒯𑒼 𑒥𑒰𑒞 𑒮𑒥𑒯𑒏 𑒧𑒢𑒧𑒹 𑒩𑒯𑒢𑒱। 𑒒𑒧𑒩𑓂𑒟𑒢 𑒯𑒼𑒃𑒞-𑒯𑒼𑒃𑒞 𑒥𑒪𑒱 𑒣𑓂𑒩𑒠𑒰𑒢 𑒩𑒴𑒏𑒪। 𑒧𑒳𑒠𑒰 𑒫𑒱𑒫𑒰𑒠 𑒥𑒜𑓃𑒱𑒨𑒹 𑒑𑒹𑒪। 𑒫𑒱𑒫𑒰𑒠 𑒥𑒜𑓃𑒻𑒏 𑒏𑒰𑒩𑒝 𑒦𑒹𑒪 𑒖𑒹 𑒣𑓀𑒔𑒰𑒨𑒞𑒏 𑒖𑒹 𑒧𑒳𑒐𑒱𑒨𑒰 𑒩𑒯𑒟𑒱, 𑒯𑒳𑒢𑒏𑒩 𑒣𑓂𑒩𑒦𑒰𑒫 𑒁𑒡𑒱𑒏 𑒩𑒯𑒢𑒱। 𑒧𑒳𑒠𑒰 𑒮𑒧𑒰𑒖𑒼𑒧𑒹 𑒢𑒫 𑒔𑒹𑒞𑒢𑒰 𑒖𑒰𑒑𑒱 𑒔𑒳𑒏𑒪 𑒕𑒪। 𑒬𑒳𑒩𑒴𑒧𑒹 (𑓑𑓙𑓕𑓒 𑒄.) 𑒖𑒐𑒢 𑒣𑓀𑒔𑒰𑒨𑒞 𑒥𑒢𑒪 𑒞𑒐𑒢 𑒖𑒹 𑒧𑒳𑒐𑒱𑒨𑒰 𑒥𑒢𑒪𑒰𑒯 𑒍 𑓑𑓙𑓖𑓒 𑒄.𑒏 𑒔𑒳𑒢𑒰𑒫𑒧𑒹 𑒯𑒰𑒩𑒱 𑒔𑒳𑒏𑒪 𑒕𑒪𑒰𑒯। 𑒍𑒯𑒼 𑒧𑒞𑒦𑒹𑒠 𑒩𑒯𑒥𑒹 𑒏𑒩𑒢𑒱। 𑒣𑒴𑒖𑒰𑒏 𑒠𑒮-𑒥𑒰𑒩𑒯 𑒠𑒱𑒢 𑒣𑒯𑒱𑒢𑒹 𑒋𑒏𑒙𑒰 𑒖𑒥𑒩𑓂𑒠𑒮 𑒒𑒙𑒢𑒰 𑒒𑒙𑒪। 𑒍 𑒒𑒙𑒢𑒰 𑒄 𑒖𑒹 𑒧𑒾𑒖𑒳𑒠𑒰 𑒧𑒳𑒐𑒱𑒨𑒰 𑒏𑒱𑒕𑒳 𑒑𑒢𑒢-𑒔𑒳𑒢𑒪 𑒪𑒼𑒏𑒏 𑒫𑒱𑒔𑒰𑒩𑒮𑒿 𑒠𑒼𑒮𑒩 𑒮𑓂𑒟𑒰𑒢𑒣𑒩, 𑒧𑒰𑒢𑒹 𑒮𑓂𑒏𑒴𑒪𑒏 𑒣𑓂𑒩𑒰𑓀𑒑𑒢𑒮𑒿 𑒁𑒪𑒑 𑒮𑓂𑒟𑒰𑒢𑒣𑒩 𑒣𑒴𑒖𑒰𑒏 𑒢𑓂𑒨𑒼𑓀 𑒪𑓄 𑒪𑒹𑒪𑒢𑒱। 𑒮𑒧𑒰𑒖𑒏 𑒥𑒲𑒔 𑒂𑒏𑓂𑒩𑒼𑒬 𑒥𑒜𑓃𑒪। 𑒧𑒳𑒠𑒰 𑒂𑒑𑒴 𑒥𑒜𑓃𑒻𑒏 𑒯𑒱𑒧𑓂𑒧𑒞𑒱 𑒢𑒻। 𑒧𑒢𑒧𑒹 𑒅𑒞𑓂𑒮𑒰𑒯 𑒖𑒩𑒴𑒩 𑒧𑒳𑒠𑒰 𑒛𑒩𑒼। 𑒏𑒰𑒩𑒝𑒼 𑒮𑓂𑒣𑒭𑓂𑒙 𑒕𑒪 𑒖𑒹 𑒃𑒪𑒰𑒏𑒰𑒏 𑒧𑒳𑒛𑓃𑒯𑒢 𑒪𑒼𑒏𑒏 𑒮𑒧𑒩𑓂𑒟𑒢 𑒍𑒯𑒲 𑒮𑓂𑒟𑒰𑒢𑒏𑒹𑒿 𑒦𑒹𑒙 𑒑𑒹𑒪। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲 𑒂 𑒂𑒩 𑒪𑒼𑒏 𑒮𑒦 𑒠𑒼𑒯𑒩𑒰 𑒏𑓄 𑒥𑒻𑒮𑒰𑒩 𑒏𑒹𑒪𑒢𑓂𑒯𑒱। 𑒮𑒼𑒗𑒰-𑒮𑒼𑒗𑒲 𑒏𑒱𑒨𑒼 𑒫𑒱𑒩𑒼𑒡 𑒢𑒻 𑒏𑒹𑒪𑒐𑒱𑒢𑓂𑒯, 𑒐𑒳𑒪𑒱 𑒏𑓄 𑒁𑒥𑒻𑒨𑒼𑒪𑒹 𑒏𑒱𑒨𑒼 𑒞𑒻𑒨𑒰𑒩 𑒢𑒻। 𑒖𑒥𑒩𑓂𑒠𑒮 𑒮𑒧𑒮𑓂𑒨𑒰 𑒅𑒚𑒱 𑒏𑓄 𑒚𑒰𑒜𑓃 𑒦𑓄 𑒑𑒹𑒪। 𑒄 𑒥𑒰𑒞 𑒮𑒦 𑒥𑒳𑒗𑒻𑒞 𑒖𑒹 𑒖𑒯𑒱𑒢𑒰 𑒐𑒙𑒣𑒙 𑒦𑒹𑒪𑒼𑒣𑒩 𑒥𑒱𑒂𑒯𑒏 𑒥𑒰𑒠 𑒮𑒧𑒗𑒾𑒞𑒰 𑒦𑒃𑒨𑒹 𑒖𑒰𑒃𑒞 𑒁𑒕𑒱 𑒞𑒯𑒱𑒢𑒰 𑒌𑒥𑒹𑒩𑒏 𑒯𑒳𑒮𑒪𑒰𑒣𑒩 𑒣𑒴𑒖𑒼𑒧𑒹 𑒯𑒹𑒥𑒹 𑒏𑒩𑒞। 𑒞𑒿𑒋 𑒧𑒾𑒏𑒰 𑒯𑒰𑒟𑒮𑒿 𑒢𑒱𑒏𑒪𑒢𑒹 𑒣𑒴𑒖𑒹 𑒢𑒱𑒏𑒪𑒱 𑒖𑒰𑒋𑒞। 𑒥𑒻𑒮𑒰𑒩𑒧𑒹 𑒞𑒿𑒃 𑒦𑒹𑒪 𑒖𑒹 𑒠𑒼𑒮𑒩𑒼 𑒣𑒴𑒖𑒰 𑒯𑒳𑒁𑒋। 𑒮𑒋𑒯 𑒦𑒹𑒪। 𑒮𑓀𑒑-𑒮𑓀𑒑 𑒄𑒯𑒼 𑒞𑒿𑒃 𑒦𑒹𑒪 𑒖𑒹 𑒮𑒧𑒰𑒖𑒮𑒿 𑒥𑒰𑒯𑒩 𑒔𑓀𑒠𑒰 𑒏𑒩𑒋 𑒢𑒻 𑒖𑒰𑒋𑒪 𑒖𑒰𑒋, 𑒦𑒪𑒯𑒱𑓀 𑒖𑒞𑒥𑒹 𑒔𑓀𑒠𑒰 𑒯𑒋𑒞 𑒞𑒞𑒥𑒹 𑒪𑓄 𑒏𑓄 𑒣𑒴𑒖𑒰 𑒏𑒋𑒪 𑒖𑒰𑒋। 𑒢𑒻 𑒣𑒰𑒢 𑒞𑒿 𑒣𑒰𑒢𑒏 𑒛𑓀𑒙𑒱𑒨𑒹𑒮𑒿 𑒏𑒰𑒖 𑒔𑒪𑒰𑒋𑒪 𑒖𑒰𑒋। 𑒧𑒳𑒠𑒰 𑒠𑒼𑒮𑒩 𑒠𑒱𑒮 (𑒖𑒃 𑒠𑒱𑒮 𑒧𑒳𑒐𑒱𑒨𑒰 𑒩𑒯𑒟𑒱) 𑒔𑓀𑒠𑒰𑒏 𑒦𑒩𑒧𑒰𑒩 𑒦𑒹𑒪। 𑒮𑒩𑒏𑒰𑒩𑒲𑒮𑒿 𑒪𑓄 𑒏𑓄 𑒂𑒢𑒼-𑒂𑒢 𑒣𑓀𑒔𑒰𑒨𑒞𑒏 𑒔𑓀𑒠𑒰 𑒦𑒹𑒪। 𑒮𑓀𑒑-𑒮𑓀𑒑 𑒄𑒯𑒼 𑒦𑒹𑒪 𑒖𑒹 𑒑𑒰𑒧𑒧𑒹 𑒥𑒢𑓂𑒯𑒳𑒂 𑒔𑓀𑒠𑒰 𑒮𑒹𑒯𑒼 𑒦𑒹𑒪, 𑒔𑓀𑒠𑒰 𑒠𑒹𑒢𑒱𑒯𑒰𑒩𑒏 𑒫𑒱𑒔𑒰𑒩𑒮𑒿 𑒯𑒼𑒃𑒞 𑒁𑒕𑒱 𑒢𑒻 𑒏𑒱 𑒖𑒥𑒩𑓂𑒠𑒮𑓂𑒞𑒲, 𑒧𑒳𑒠𑒰 𑒮𑒹𑒯𑒼 𑒦𑒹𑒪। 𑒔𑓀𑒠𑒰𑒏 𑒢𑒰𑒍𑓀𑒣𑒩 𑒄 𑒖𑒳𑒩𑒱𑒧𑒰𑒢𑒰𑒏 𑒩𑒴𑒣 𑒣𑒏𑒛𑓃𑒪𑒏, 𑒐𑒳𑒪𑒱 𑒏𑓄 𑒢𑒻, 𑒔𑒳𑒣𑒹-𑒔𑒰𑒣। 𑒣𑒩𑒱𑒮𑓂𑒟𑒱𑒞𑒱𑒨𑒼 𑒁𑒢𑒳𑒏𑒴𑒪𑒹 𑒣𑒏𑒛𑓃𑒰𑒋𑒪। 𑒖𑒹 𑒂𑒠𑒧𑒲 𑒗𑒑𑒛𑓃𑒰-𑒗𑓀𑒗𑒙𑒱𑒧𑒹 𑒍𑒗𑒩𑒰 𑒑𑒹𑒪 𑒁𑒕𑒱 𑒍 𑒏𑒞𑓄 𑒖𑒰𑒋𑒞। 𑒧𑒳𑒠𑒰 𑒮𑒧𑒰𑒖 (𑒑𑒰𑒧)𑒧𑒹 𑒞𑒿 𑒏𑒼𑒢𑒼 𑒥𑒰𑒞 𑒕𑒣𑒱𑒞 𑒢𑒯𑒱𑒨𑒹 𑒩𑒯𑒻 𑒕𑒻। 𑒞𑒲𑒢-𑒣𑒰𑒩𑓂𑒙𑒲𑒧𑒹 𑒮𑒧𑒰𑒖 𑒥𑒿𑒙𑒱 𑒑𑒹𑒪। 𑒠𑒳𑒢𑒴 𑒠𑒳𑒩𑓂𑒑𑒰𑒮𑓂𑒟𑒰𑒢𑒏 𑒠𑒴 𑒣𑒰𑒩𑓂𑒙𑒲 𑒂 𑒠𑒳𑒠𑒱𑒮𑒱𑒨𑒰। 𑒠𑒳𑒠𑒱𑒮𑒱𑒨𑒰𑒥𑒪𑒰 𑒮𑒦 𑒥𑒢𑓂𑒯𑒳𑒂 𑒔𑓀𑒠𑒰𑒧𑒹 𑒤𑒿𑒮𑒪𑒰𑒯।
𑒣𑒴𑒖𑒰𑒏 𑒂𑒩𑓀𑒦 𑒦𑒹𑒪। 𑒠𑒳𑒢𑒴 𑒮𑓂𑒟𑒰𑒢𑒏 𑒥𑒲𑒔 𑒏𑒱𑒕𑒳 𑒐𑒰𑒮-𑒐𑒰𑒮 𑒁𑓀𑒞𑒩 𑒦𑒹𑒪। 𑒍 𑒄 𑒦𑒹𑒪 𑒖𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒂 𑒂𑒩 𑒪𑒼𑒏 𑒮𑒦 𑒑𑒰𑒧𑒏 𑒪𑒼𑒏𑒏𑒹𑒿 𑒢𑒫 𑒠𑒼𑒏𑒰𑒢𑒠𑒰𑒩𑒏 𑒩𑒴𑒣𑒧𑒹 𑒚𑒰𑒜𑓃 𑒏𑒹𑒪𑒢𑓂𑒯𑒱। 𑒏𑒱𑒨𑒼 𑒧𑒱𑒚𑒰𑒃 𑒞𑒿 𑒏𑒱𑒨𑒼 𑒠𑒼𑒮𑒩 𑒔𑒲𑒖𑒏 𑒠𑒼𑒏𑒰𑒢 𑒏𑒹𑒪𑒢𑒱। 𑒮𑒧𑒰𑒖𑒏 𑒔𑓀𑒠𑒰𑒮𑒿 𑒣𑒴𑒖𑒰 𑒯𑒋𑒞, 𑒮𑒧𑒰𑒖𑒹𑒏 𑒪𑒼𑒏 𑒠𑒼𑒏𑒰𑒢 𑒏𑒩𑒞𑒰𑒯, 𑒞𑒿𑒋 𑒧𑒹𑒪𑒰𑒧𑒹 𑒥𑒙𑓂𑒙𑒲 (𑒙𑒹𑒏𑓂𑒮)𑒏 𑒣𑓂𑒩𑒰𑒫𑒡𑒰𑒢 𑒮𑒧𑒰𑒣𑓂𑒞 𑒏𑓄 𑒠𑒹𑒪 𑒑𑒹𑒪। 𑒏𑒱𑒕𑒳 𑒑𑒼𑒙𑒹 𑒞𑒰𑒪 𑒚𑒼𑒏𑒱 𑒚𑒰𑒜𑓃 𑒦𑓄 𑒑𑒹𑒪𑒰𑒯 𑒖𑒹 𑒯𑒧𑒯𑒴𑒿 𑒮𑒦 𑒍𑒯𑒱𑒢𑒰 𑒣𑒴𑒖𑒰𑒏 𑒂𑒨𑒼𑒖𑒢 𑒏𑒩𑒥 𑒖𑒯𑒱𑒢𑒰 𑒍 𑒮𑒦 𑒏𑒩𑒞𑒰𑒯। 𑒦𑒪𑒯𑒱𑓀 𑒔𑓀𑒠𑒰 𑒢𑒻 𑒣𑒴𑒩𑒞 𑒞𑒿 𑒫𑓂𑒨𑒏𑓂𑒞𑒱𑒑𑒞 𑒩𑒴𑒣𑒧𑒹 𑒠𑒹𑒥। 𑒋𑒯𑒹𑒢 𑒏𑒩𑒲𑒥 𑒣𑒰𑒢-𑒮𑒰𑒞 𑒑𑒼𑒙𑒹 𑒦𑒹𑒪𑒰𑒯। 𑒞𑒃 𑒮𑓀𑒑 𑒄𑒯𑒼 𑒦𑒹𑒪 𑒖𑒹 𑒮𑒦 𑒍𑒃 𑒮𑓂𑒟𑒰𑒢 (𑒠𑒼𑒮𑒩 𑒮𑓂𑒟𑒰𑒢) 𑒣𑒩 𑒢𑒻 𑒖𑒹𑒞𑒰। 𑒤𑒹𑒩 𑒠𑒳𑒠𑒱𑒮𑒱𑒨𑒰 𑒮𑒦 𑒤𑒿𑒮𑒪𑒰𑒯। 𑒤𑒿𑒮𑒥𑒹 𑒢𑒻 𑒏𑒹𑒪𑒰𑒯 𑒖𑒱𑒧𑒯𑒩 𑒖𑒰𑒟𑒱 𑒞𑒱𑒧𑒯𑒩 𑒪𑒼𑒏 𑒪𑒴-𑒪𑒴, 𑒟𑒴-𑒟𑒴 𑒏𑒩𑒢𑒱। 𑒋𑒧𑒯𑒩 𑒂𑒥𑒟𑒱 𑒞𑒿 𑒍𑒧𑒯𑒳𑒩𑒏𑒰 𑒂 𑒍𑒧𑒯𑒩 𑒖𑒰𑒟𑒱 𑒞𑒿 𑒋𑒧𑒯𑒳𑒩𑒏𑒰 𑒧𑒳𑒿𑒯𑒹𑒿-𑒏𑒰𑒢𑒹 𑒥𑒼𑒏𑒱𑒁𑒥𑒋 𑒪𑒑𑒪𑒢𑒱। 𑒣𑒳𑒩𑒰𑒢 𑒣𑒲𑒜𑓃𑒲𑒏 𑒫𑒱𑒔𑒰𑒩𑒏𑒹𑒿 𑒡𑒏𑓂𑒏𑒰 𑒪𑒰𑒑𑒪। 𑒢𑒫 𑒣𑒲𑒜𑓃𑒲𑒏 𑒯𑒰𑒟𑒧𑒹 𑒮𑒧𑒰𑒖 𑒂𑒋𑒪। 𑒞𑒃 𑒮𑓀𑒑 𑒄𑒯𑒼 𑒦𑒹𑒪 𑒖𑒹 𑒥𑒹𑒩𑒧𑒰𑒏 𑒥𑒑𑒪𑒏 𑒑𑒰𑒧 𑒖𑒑𑒠𑒩𑒼 𑒂 𑒏𑒕𑒳𑒥𑒱𑒨𑒼 𑒥𑒿𑒙𑒰 𑒑𑒹𑒪, 𑒖𑒃𑒮𑒿 𑒠𑒳𑒢𑒴 𑒑𑒰𑒧𑒏 𑒮𑒧𑒩𑓂𑒟𑒢 𑒠𑒳𑒢𑒴 𑒮𑓂𑒟𑒰𑒢𑒏𑒹𑒿 𑒦𑒹𑒙𑒪। 𑒧𑒱𑒪𑒱-𑒖𑒳𑒪𑒱 𑒮𑒩𑒏𑒰𑒩 𑒥𑒢𑒢𑒹 𑒯𑒰𑒃𑒨𑒼 𑒮𑓂𑒏𑒴𑒪 𑒣𑓂𑒩𑒦𑒰𑒫𑒱𑒞 𑒦𑒹𑒪। 𑒏𑒱𑒋𑒏 𑒞𑒿 𑒏𑒱𑒕𑒳 𑒮𑓂𑒏𑒴𑒪 𑒮𑒩𑒏𑒰𑒩𑒏 𑒢𑒱𑒨𑓀𑒞𑓂𑒩𑒝𑒧𑒹 𑒂𑒋𑒪। 𑒧𑒳𑒠𑒰 𑒮𑒦 𑒢𑒻 𑒂𑒋𑒪। 𑒖𑒹 𑒂𑒋𑒪 𑒍𑒏𑒩 𑒯𑒰𑒪𑒞𑒼 𑒮𑒳𑒡𑒩𑒪𑒻 𑒂 𑒬𑒱𑒏𑓂𑒭𑒏𑒏𑒹𑒿 𑒫𑒹𑒞𑒢𑒼 𑒥𑒜𑓃𑒪𑒢𑒱। 𑒧𑒳𑒠𑒰 𑒖𑒹 𑒢𑒻 𑒂𑒋𑒪 𑒍 𑒚𑒰𑒧𑒏 𑒚𑒰𑒧𑒯𑒱 𑒩𑒯𑒱 𑒑𑒹𑒪। 𑒖𑒃𑒮𑒿 𑒋𑒏 𑒢𑒫 𑒪𑒛𑓃𑒰𑒃 𑒬𑒱𑒏𑓂𑒭𑒼 𑒫𑒱𑒦𑒰𑒑𑒧𑒹 𑒬𑒳𑒩𑒴 𑒦𑒹𑒪।









𑓒
𑒅𑒢𑓂𑒢𑒻𑒮 𑒮𑒋 𑒮𑒰𑒚𑒱𑒏 𑒣𑒕𑒰𑒞𑒱 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒏𑒹𑒖𑒩𑒲𑒥𑒰𑒪 𑒯𑒰𑒃 𑒮𑓂𑒏𑒴𑒪𑒧𑒹 𑒢𑒰𑒍𑓀 𑒪𑒱𑒐𑒰 𑒪𑒹𑒢𑒹 𑒩𑒯𑒟𑒱। 𑒮𑓂𑒏𑒴𑒪 𑒁𑒥𑒻-𑒖𑒰𑒃𑒏 𑒣𑒩𑒹𑒬𑒰𑒢𑒲𑒮𑒿 𑒮𑒰𑒃𑒏𑒱𑒪 𑒏𑒲𑒢𑒻𑒏 𑒫𑒱𑒔𑒰𑒩 𑒣𑒩𑒱𑒫𑒰𑒩𑒧𑒹 𑒦𑓄 𑒑𑒹𑒪। 𑒍𑒢𑒰 𑒖𑒐𑒢 𑒙𑒹𑒢𑓂𑒟 (𑒮𑓂𑒣𑒹𑒬𑒪 𑒢𑒰𑒃𑒢𑓂𑒟) 𑒧𑒹 𑒩𑒯𑒟𑒱 𑒞𑒐𑒢 𑒠𑒴 𑒮𑒋 𑒥𑒰𑒮𑒚𑒱 𑒩𑒴𑒣𑒻𑒨𑒰𑒧𑒹 𑒮𑒻𑒥𑓂𑒩𑒼 𑒮𑒰𑒃𑒏𑒱𑒪 𑒏𑒲𑒢𑒱 𑒪𑒹𑒪𑒢𑒱। 𑒧𑒳𑒠𑒰 𑒖𑒯𑒱𑒢𑒰 𑒮𑒲𑒧𑒰 𑒣𑒩𑒏 𑒮𑒱𑒣𑒰𑒯𑒲𑒏𑒹𑒿 𑒠𑒳𑒬𑓂𑒧𑒢 𑒮𑒱𑒣𑒰𑒯𑒲𑒏 𑒯𑒰𑒟 𑒣𑒏𑒛𑓃𑒹𑒪𑒰𑒮𑒿 𑒯𑒼𑒃𑒋 𑒞𑒯𑒱𑒢𑒰 𑒮𑒧𑒮𑓂𑒨𑒰𑒏 𑒮𑒱𑒣𑒰𑒯𑒲 𑒔𑒰𑒩𑒴 𑒠𑒱𑒮𑒮𑒿 𑒣𑒩𑒱𑒫𑒰𑒩𑒏𑒹𑒿 𑒒𑒹𑒩 𑒪𑒹𑒪𑒏𑒢𑓂𑒯𑒱। 𑒠𑒳𑒢𑒴 𑒣𑒱𑒮𑒱𑒨𑒾𑒞 𑒦𑒰𑒨 (𑒖𑒹𑒚 𑒑𑒼𑒢𑒩 𑒧𑒝𑓂𑒛𑒪 𑒂 𑒞𑒃𑒮𑒿 𑒕𑒼𑒙 𑒏𑒰𑒩𑒲 𑒧𑒝𑓂𑒛𑒪) 𑒏𑒹𑒿 𑒁𑒣𑒢 𑒥𑒰𑒣-𑒠𑒰𑒠𑒰𑒏 𑒛𑒲𑒯-𑒛𑒰𑒥𑒩 𑒖𑒑𑒪𑒢𑒱। 𑒏𑒼𑒮𑒲 𑒡𑒰𑒩𑒏 𑒧𑒳𑒿𑒯 𑒖𑒹 𑒣𑒕𑒱𑒧 𑒠𑒱𑒮 𑒖𑒼𑒩 𑒏𑒹𑒢𑒹 𑒕𑒪𑒻 𑒍 𑒂𑒥 𑒣𑒴𑒥 𑒠𑒱𑒮 𑒖𑒼𑒩 𑒏𑒹𑒪𑒏, 𑒖𑒃𑒮𑒿 𑒏𑒱𑒕𑒳 𑒑𑒰𑒧 𑒖𑒹𑒢𑒰 𑒯𑒩𑒱𑒢𑒰𑒯𑒲, 𑒧𑒻𑒢𑒯𑒲 𑒁𑒧𑒯𑒲 𑒯𑒩𑒛𑓃𑒲 𑒃𑒞𑓂𑒨𑒰𑒠𑒱𑒏 𑒑𑒰𑒧𑒏 𑒖𑒧𑒲𑒢𑒏 𑒏𑒱𑒕𑒳 𑒦𑒰𑒑 𑒖𑒰𑒑𑒪𑒻। 𑒦𑒰𑒑𑒪-𑒣𑒛𑓃𑒰𑒋𑒪 𑒑𑒰𑒧𑒏 𑒪𑒼𑒏, 𑒁𑒣𑒢 𑒥𑒰𑒣-𑒠𑒰𑒠𑒰𑒏 𑒛𑒴𑒧𑒪 𑒮𑒧𑓂𑒣𑒞𑒱𑒏 𑒂𑒬𑒰𑒧𑒹 𑒏𑒰𑒢 𑒚𑒰𑒜𑓃 𑒏𑒹𑒢𑒯𑒱 𑒩𑒯𑒟𑒱, 𑒑𑒰𑒧 (𑒯𑒩𑒱𑒢𑒰𑒯𑒲) 𑒒𑒳𑒧𑒥𑒰𑒏 𑒫𑒱𑒔𑒰𑒩 𑒏𑒹𑒪𑒢𑒱। 𑒥𑒢𑒪-𑒥𑒢𑒰𑒋𑒪 𑒑𑒰𑒧𑒧𑒹 𑒪𑒼𑒏𑒏 𑒋𑒯𑒹𑒢 𑒏𑒢𑒹 𑒮𑓂𑒫𑒰𑒩𑓂𑒟𑒲 𑒣𑓂𑒩𑒫𑒵𑒞𑓂𑒞𑒱 𑒥𑒢𑒱𑒋 𑒖𑒰𑒃𑒋 𑒖𑒹 𑒮𑒾𑓀𑒮𑒹 𑒑𑒰𑒧𑒏 𑒮𑒦 𑒏𑒱𑒕𑒳 𑒯𑒧𑒩𑒹 𑒦𑓄 𑒖𑒰𑒋। 𑒣𑓂𑒩𑒫𑒵𑒞𑓂𑒞𑒱 𑒥𑒹𑒖𑒰𑒋 𑒢𑒻, 𑒧𑒳𑒠𑒰 𑒐𑒰𑒪𑒲 𑒮𑒧𑓂𑒣𑒞𑓂𑒞𑒱𑒨𑒹 𑒢𑒻 𑒧𑒢𑒳𑒏𑓂𑒐𑒼𑒏 𑒦𑒰𑒩 𑒖𑒿 𑒅𑒚𑒰 𑒪𑒹𑒟𑒱। 𑒯𑒩𑒱𑒢𑒰𑒯𑒲𑒏 𑒏𑒱𑒨𑒼 𑒏𑒞𑒾, 𑒏𑒱𑒨𑒼 𑒏𑒞𑒾, 𑒏𑒞𑒾-𑒏𑒞𑒾 𑒋𑒯𑒢𑒼 𑒖𑒹 𑒣𑒰𑒢-𑒮𑒰𑒞 𑒣𑒩𑒱𑒫𑒰𑒩 𑒋𑒏𑒼𑒚𑒰𑒧 𑒕𑒪𑒰𑒯। 𑒁𑒣𑒢 𑒏𑒳𑒙𑒳𑒧𑒻𑒞𑒲𑒏 𑒮𑓀𑒑-𑒮𑓀𑒑 𑒢𑒹𑒣𑒰𑒪 𑒡𑒩𑒱 𑒣𑒮𑒩𑒱 𑒑𑒹𑒪 𑒕𑒪𑒰𑒯। 𑒮𑒦𑒮𑒿 𑒠𑒳𑒐𑒠 𑒮𑓂𑒟𑒱𑒞𑒱 𑒑𑒰𑒧𑒏 𑒞𑒐𑒢 𑒦𑒹𑒪 𑒖𑒐𑒢 𑒮𑒳𑒦𑓂𑒨𑒮𑓂𑒞 𑒣𑒩𑒱𑒫𑒰𑒩 𑒮𑒥𑒯𑒏, 𑒖𑒃 𑒣𑒩𑒱𑒫𑒰𑒩𑒏 𑒪𑒼𑒏 𑒁𑒣𑒢 𑒒𑒩-𑒁𑓀𑒑𑒢𑒰𑒏 𑒏𑒰𑒖𑒮𑒿 𑒥𑒰𑒯𑒩 𑒢𑒻 𑒦𑒹𑒪 𑒕𑒪𑒱, 𑒍 𑒮𑒦 𑒖𑒐𑒢 𑒥𑒼𑒢𑒱𑒯𑒰𑒩𑒱𑒢 𑒥𑒢𑒱 𑒦𑒩𑒱-𑒦𑒩𑒱 𑒠𑒱𑒢 𑒁𑒢𑒏𑒰 𑒐𑒹𑒞𑒧𑒹 𑒖𑒱𑒢𑒏𑒰 𑒒𑒩𑒧𑒹 𑒣𑒔𑒮𑒧𑒢𑒲 𑒏𑒼𑒚𑒲-𑒥𑒐𑒰𑒩𑒲 𑒮𑒦 𑒕𑒪𑒢𑒱, 𑒋𑒏 𑒣𑒮𑒹𑒩𑒲 (𑒏𑒔𑓂𑒔𑒲) 𑒁𑒢𑓂𑒢𑒣𑒩 𑒁𑒣𑒢 𑒬𑓂𑒩𑒧 𑒥𑒹𑒔𑒻𑒪𑒹 𑒧𑒖𑒥𑒴𑒩 𑒦𑒹𑒪𑒲। 𑒧𑒳𑒠𑒰 𑒅𑒣𑒰𑒨𑒹 𑒏𑒲? 𑒄 𑒥𑒰𑒞 𑒮𑒞𑓂𑒨 𑒕𑒲 𑒖𑒹 𑒮𑒧𑒨𑒰𑒢𑒳𑒮𑒰𑒩 𑒯𑒰𑒟𑒏𑒹𑒿 𑒯𑒟𑒱𑒨𑒰𑒩 𑒢𑒻 𑒦𑒹𑒙𑒞 𑒞𑒿 𑒍 𑒣𑒰𑒕𑒴 𑒦𑒑𑒥𑒹 𑒏𑒩𑒞, 𑒯𑒩𑒯𑒩𑒰-𑒯𑒩𑒯𑒩𑒰 𑒏𑓄 𑒣𑒰𑒏𑒪 𑒖𑒰𑒧𑒳𑒢 𑒖𑒏𑒰𑒿 𑒯𑒳𑒢𑒏𑒰 𑒮𑒥𑒯𑒏 𑒖𑒱𑒢𑒑𑒲 𑒅𑒞𑒩𑒱 𑒑𑒹𑒪𑒢𑒱। 𑒖𑒱𑒢𑒑𑒲𑒏 𑒮𑒦 𑒏𑒱𑒕𑒳 𑒯𑒩𑒰𑒋 𑒪𑒑𑒪𑒢𑒱। 𑒯𑒩𑒰𑒃𑒨𑒹 𑒑𑒹𑒪𑒢𑒱। 𑒦𑒰𑒑𑒪-𑒣𑒛𑓃𑒰𑒋𑒪 𑒪𑒼𑒏𑒏 𑒂𑒢 𑒠𑒹𑒬 𑒂 𑒂𑒢 𑒑𑒰𑒧𑒧𑒹 𑒮𑒩𑒏𑒰𑒩𑒲 𑒮𑒯𑒰𑒨𑒞𑒰𑒏 𑒏𑒞𑒹 𑒂𑒬𑒰 𑒯𑒼𑒃𑒞 𑒍 𑒞𑒿 𑒮𑒥𑒯𑒏 𑒮𑒼𑒗𑒯𑒹𑒧𑒹 𑒁𑒕𑒱। 𑒖𑒹 𑒁𑒐𑒢𑒼 𑒑𑒰𑒧𑒧𑒹 𑒍𑒯𑒢 𑒑𑒩𑒲𑒥 𑒪𑒼𑒏𑒏𑒹𑒿 𑒃𑒢𑓂𑒠𑒱𑒩𑒰 𑒂𑒫𑒰𑒮 𑒢𑒻 𑒦𑒹𑒙 𑒩𑒯𑒪 𑒕𑒢𑓂𑒯𑒱 𑒖𑒱𑒢𑒏𑒰 𑒁𑒣𑒢𑒰 𑒢𑒰𑒧𑒹 𑒖𑒧𑒲𑒢𑒏 𑒏𑒰𑒑𑒖 𑒢𑒻 𑒕𑒢𑓂𑒯𑒱।

𑒮𑒰𑒚𑒱 𑒃𑒮𑒫𑒲𑒏 𑒏𑒰𑒞𑒱𑒏। 𑒁𑒣𑒢 𑒑𑒰𑒧 𑒠𑒹𑒐𑒻𑒪𑒹 𑒣𑒱𑒮𑒱𑒨𑒾𑒞 𑒦𑒰𑒨 𑒑𑒼𑒢𑒩 𑒧𑒝𑓂𑒛𑒪 𑒯𑒩𑒱𑒢𑒰𑒯𑒲 𑒑𑒹𑒪𑒰𑒯। 𑒒𑒼𑒒𑒩𑒛𑒲𑒯𑒰𑒧𑒹 𑒙𑓂𑒩𑒹𑒢𑒮𑒿 𑒅𑒞𑒩𑒱 𑒦𑒰𑒿𑒖 𑒪𑒑𑒾𑒪𑒢𑒱 𑒞𑒿 𑒣𑒞𑒰 𑒪𑒑𑒪𑒢𑒱 𑒖𑒹 𑒣𑒯𑒱𑒢𑒹 𑒯𑒙𑒢𑒲, 𑒯𑒙𑒢𑒲𑒮𑒿 𑒢𑒾𑒂-𑒥𑒰𑒐𑒩𑒱, 𑒢𑒾𑒂 𑒥𑒰𑒐𑒩𑒱𑒮𑒿 𑒁𑒧𑒯𑒲 𑒞𑒹𑒏𑒩 𑒥𑒰𑒠 𑒯𑒩𑒱𑒢𑒰𑒯𑒲। 𑒏𑒞𑒹 𑒠𑒴𑒩 𑒯𑒋𑒞 𑒞𑒿 𑒠𑒴 𑒏𑒼𑒮। 𑒠𑒴 𑒏𑒼𑒮 𑒥𑒴𑒗𑒱 𑒧𑒢𑒧𑒹 𑒅𑒞𑓂𑒮𑒰𑒯 𑒖𑒑𑒪𑒢𑒱 𑒖𑒹 𑒠𑒴 𑒏𑒼𑒮 𑒖𑒰𑒃𑒧𑒹 𑒥𑒹𑒮𑒲-𑒮𑒿-𑒥𑒹𑒮𑒲 𑒠𑒴 𑒒𑓀𑒙𑒰 𑒪𑒰𑒑𑒞𑒢𑓂𑒯𑒱। 𑒧𑒳𑒠𑒰 𑒄 𑒢𑒻 𑒥𑒴𑒗𑒱 𑒣𑒾𑒪𑒢𑒱 𑒖𑒹 𑒒𑒼𑒒𑒩𑒛𑒲𑒯𑒰 𑒯𑒙𑒢𑒲𑒨𑒹𑒏 𑒥𑒲𑒔 𑒞𑒲𑒢𑒙𑒰 𑒡𑒰𑒩 𑒣𑒰𑒩 𑒏𑒩𑒋 𑒣𑒛𑓃𑒞𑒢𑓂𑒯𑒱। 𑒞𑒯𑒴𑒧𑒹 𑒑𑒧𑒻𑒨𑒰 𑒮𑒫𑒰𑒩𑒲 𑒕𑒱𑒌 𑒏𑒱𑒢𑒹, 𑒪𑒼𑒏𑒹𑒏 𑒫𑒱𑒔𑒰𑒩𑒹 𑒢𑒹 𑒔𑒪𑒻𑒞 𑒁𑒕𑒱। 𑒔𑒰𑒩𑒱 𑒒𑓀𑒙𑒰𑒧𑒹 𑒯𑒙𑒢𑒲 𑒣𑒯𑒳𑒿𑒔𑒪𑒰𑒯। 𑒯𑒙𑒢𑒲 𑒢𑒾𑒂-𑒥𑒰𑒐𑒩𑒱𑒏 𑒥𑒲𑒔𑒏 𑒮𑒲𑒧𑒰𑒧𑒹 𑒋𑒏𑒙𑒰 𑒮𑒹𑒯𑒼 𑒢𑒲𑒏 𑒡𑒰𑒩 𑒧𑒰𑒢𑒹 𑒢𑒧𑓂𑒯𑒩 𑒡𑒰𑒩। 𑒮𑒴𑒩𑓂𑒨𑒰𑒮𑓂𑒞 𑒦𑒹𑒪𑒰𑒣𑒩 𑒯𑒩𑒱𑒢𑒰𑒯𑒲 𑒣𑒯𑒳𑒿𑒔𑒪𑒰𑒯। 𑒑𑒼𑒢𑒩 𑒧𑒝𑓂𑒛𑒪𑒏 𑒋𑒏𑒙𑒰 𑒠𑒱𑒨𑒰𑒠 𑒣𑒯𑒱𑒢𑒯𑒱 𑒂𑒥𑒱 𑒑𑒹𑒪 𑒕𑒪𑒰𑒯 𑒖𑒃𑒮𑒿 𑒍 𑒥𑒲𑒒𑒰 𑒛𑒹𑒜𑓃𑒹𑒏 𑒖𑒧𑒲𑒢𑒏 𑒧𑒰𑒪𑒱𑒏 𑒥𑒢𑒱 𑒩𑒮𑒰𑒋𑒪 𑒐𑒹𑒞𑒏 𑒅𑒣𑒖𑒰 𑒣𑒰𑒥𑒱 𑒏𑒳𑒙𑒳𑒧-𑒣𑒩𑒱𑒫𑒰𑒩 𑒠𑒱𑒮 𑒮𑒹𑒯𑒼 𑒞𑒰𑒏𑒋 𑒪𑒑𑒪𑒰𑒯। 𑒯𑒩𑒱𑒢𑒰𑒯𑒲 𑒣𑒯𑒳𑒿𑒔𑒞𑒹 𑒠𑒱𑒨𑒰𑒠𑒲 𑒦𑒰𑒨 𑒔𑒳𑒪𑓂𑒯𑒰𑒃 𑒧𑒝𑓂𑒛𑒪𑒏 𑒣𑒰𑒯𑒳𑒢 𑒥𑒢𑒱 𑒑𑒹𑒪𑒰𑒯। 𑒑𑒩𑒴𑒑𑒩 𑒩𑒰𑒮𑓂𑒞𑒰 𑒠𑒹𑒐𑒱 𑒠𑒴 𑒠𑒱𑒢 𑒩𑒯𑒻𑒏 𑒂𑒑𑓂𑒩𑒯 𑒔𑒳𑒪𑓂𑒯𑒰𑒃 𑒧𑒝𑓂𑒛𑒪 𑒏𑒹𑒪𑒐𑒱𑒢।

𑒑𑒰𑒧𑒏 𑒖𑒹 𑒣𑒯𑒱𑒪𑒳𑒏𑒰 𑒥𑒰𑒮-𑒦𑒴𑒧𑒱 𑒕𑒪𑒢𑓂𑒯𑒱 𑒍 𑒑𑒯𑒲𑓀𑒩 𑒦𑓄 𑒑𑒹𑒪 𑒩𑒯𑒻 𑒂 𑒥𑒰𑒡 𑒆𑒿𑒔 𑒥𑒢𑒱 𑒑𑒹𑒪 𑒕𑒪𑒻। 𑒧𑒳𑒠𑒰 𑒍 𑒁𑒐𑒢 𑒮𑒳𑒣𑒾𑒪 𑒖𑒱𑒪𑒰𑒏 𑒮𑒲𑒧𑒰 𑒏𑒰𑒞। 𑒒𑒩 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒯𑒩𑒱𑒢𑒰𑒯𑒲 𑒑𑒰𑒧𑒧𑒹 𑒂 𑒮𑒦 𑒁𑒑𑒫𑒰𑒮 𑒮𑒳𑒣𑒾𑒪 𑒖𑒱𑒪𑒰𑒏 𑒯𑒩𑒛𑓃𑒲 𑒑𑒰𑒧𑒧𑒹। 𑒖𑒃𑒚𑒰𑒧𑒏 𑒯𑒹𑒧𑒪𑒞𑒰𑒖𑒲 𑒕𑒟𑒱 𑒖𑒹 𑒤𑒳𑒪𑒣𑒩𑒰𑒮𑒮𑒿 𑒫𑒱𑒡𑒰𑒨𑒏 𑒩𑒯𑒱 𑒔𑒳𑒏𑒪 𑒕𑒟𑒱। 𑒏𑒩𑒲𑒥 𑒣𑒢𑒩𑒯 𑒣𑒩𑒱𑒫𑒰𑒩 𑒂𑒥𑒱 𑒑𑒰𑒧𑒧𑒹 𑒥𑒮𑒱 𑒑𑒹𑒪। 𑒞𑒃𑒧𑒹 𑒠𑒴 𑒣𑒩𑒱𑒫𑒰𑒩𑒏 𑒐𑒴𑒿𑒙𑒰𑒣𑒩 𑒥𑒛𑓃𑒠𑒼 𑒂𑒥𑒱 𑒑𑒹𑒪। 𑒥𑒰𑒏𑒲 𑒮𑒦 𑒏𑒼𑒠𑒰𑒩𑒱𑒏 𑒖𑒱𑒢𑒑𑒲𑒧𑒹। 𑒁𑒣𑒢 𑒖𑒰𑒑𑒪 𑒒𑒩𑒰𑒛𑓃𑒲 𑒂 𑒣𑒼𑒐𑒩𑒱 𑒠𑒹𑒐𑒱 𑒑𑒼𑒢𑒩 𑒧𑒝𑓂𑒛𑒪 𑒂𑒏𑒩𑓂𑒭𑒱𑒞 𑒦𑓄 𑒑𑒹𑒪𑒰𑒯। 𑒥𑒰𑒮 𑒖𑒼𑒑 𑒞𑒿 𑒢𑒻 𑒧𑒳𑒠𑒰 𑒔𑒰𑒮 𑒖𑒼𑒑 𑒖𑒧𑒲𑒢 𑒠𑒹𑒐𑒱 𑒔𑒳𑒪𑓂𑒯𑒰𑒄 𑒧𑒝𑓂𑒛𑒪𑒏𑒹𑒿 𑒏𑒯𑒪𑒐𑒱𑒢-
“𑒦𑒻𑒨𑒰 𑒁𑒑𑒱𑒪𑒰 𑒂𑒚𑒧 𑒋𑒞𑒻 𑒕𑒲।”
𑒔𑒰𑒩𑒱𑒧 𑒠𑒱𑒢 𑒥𑒹𑒩𑒧𑒰 𑒂𑒥𑒱 𑒧𑒰𑒧𑒲𑒏𑒹𑒿 𑒏𑒯𑒪𑒐𑒢𑒱-
“𑒧𑒰𑒧𑒲, 𑒯𑒧 𑒁𑒣𑒢 𑒑𑒰𑒧 𑒯𑒩𑒱𑒢𑒰𑒯𑒲 𑒖𑒰𑒋𑒥।”
𑒧𑒰𑒧𑒲- “𑒏𑒹𑒢𑒰 𑒖𑒹𑒥𑒯𑒏?”
𑒑𑒼𑒢𑒩- “𑒥𑒰𑒿𑒮 𑒁𑒣𑒢𑒰 𑒁𑒕𑒱𑒨𑒹। 𑒋𑒏𑒙𑒰 𑒪𑓄 𑒖𑒰 𑒏𑓄 𑒣𑒯𑒱𑒢𑒹 𑒒𑒩 𑒥𑒢𑒰𑒋𑒥 𑒞𑒐𑒢 𑒥𑒴𑒗𑒪 𑒖𑒹𑒞𑒻𑒏।”

𑒖𑒯𑒱𑒢𑒰 𑒏𑒼𑒢𑒼 𑒥𑓂𑒩𑒯𑓂𑒧𑒔𑒰𑒩𑒲 𑒥𑓂𑒩𑒯𑓂𑒧𑒰𑒬𑓂𑒩𑒧𑒮𑒿 𑒢𑒱𑒏𑒪𑒱 𑒠𑒳𑒢𑒱𑒨𑒰𑒿 𑒠𑒱𑒮 𑒠𑒹𑒐𑒱𑒞𑒹 𑒮𑒞𑒩𑓀𑒑𑒲 𑒠𑒳𑒢𑒱𑒨𑒰𑒿 𑒠𑒹𑒐𑒋 𑒪𑒑𑒻𑒞 𑒞𑒯𑒱𑒢𑒰 𑒍𑒯𑒼 (𑒑𑒼𑒢𑒩 𑒧𑒝𑓂𑒛𑒪) 𑒠𑒹𑒐𑒪𑒢𑒱। 𑒏𑒹𑒢𑒰 𑒢𑒻 𑒠𑒹𑒐𑒱𑒞𑒟𑒱। 𑒣𑒴𑒩𑓂𑒥𑒏 𑒯𑒩𑒰𑒋𑒪 𑒑𑒰𑒧-𑒒𑒩, 𑒠𑒱𑒨𑒰𑒠-𑒫𑒰𑒠, 𑒮𑒩-𑒮𑒧𑒰𑒖 𑒖𑒹 𑒃𑒞𑒱𑒯𑒰𑒮 𑒥𑒢𑒱 𑒔𑒳𑒏𑒪 𑒕𑒪𑒢𑒱, 𑒮𑒹 𑒖𑒹 𑒮𑒼𑒗𑒰𑒧𑒹 𑒂𑒥𑒋 𑒪𑒑𑒪𑒢𑒱। 𑒍𑒢𑒰 𑒯𑒳𑒢𑒏𑒰 (𑒑𑒼𑒢𑒩 𑒧𑒝𑓂𑒛𑒪) 𑒋𑒏 𑒥𑒲𑒒𑒰 𑒡𑒢𑒯𑒩 𑒂 𑒁𑒜𑓃𑒰𑒃 𑒏𑒙𑓂𑒚𑒰 𑒥𑒰𑒮𑒏 𑒦𑒴𑒧𑒱 𑒧𑒰𑒧 (𑒖𑒑𑒠𑒲𑒬 𑒣𑓂𑒩𑒮 𑒧𑒝𑓂𑒛𑒪 𑒖𑒲𑒏 𑒣𑒱𑒞𑒰𑒖𑒲) 𑒏𑒲𑒢𑒱 𑒠𑒹𑒢𑒹 𑒕𑒪𑒐𑒱𑒢। 𑒍𑒯𑒼 𑒠𑒳𑒢𑒴 𑒦𑒰𑒿𑒃 (𑒑𑒼𑒢𑒩 𑒧𑒝𑓂𑒛𑒪 𑒂 𑒏𑒰𑒩𑒲 𑒧𑒝𑓂𑒛𑒪) 𑒯𑒩𑒱𑒢𑒰𑒯𑒲 𑒥𑒱𑒮𑒩𑒱 𑒑𑒹𑒪 𑒕𑒪𑒰𑒯। 𑒏𑒹𑒢𑒰 𑒢𑒻 𑒥𑒱𑒮𑒩𑒱𑒞𑒟𑒱 𑒯𑒩𑒰𑒋𑒪𑒼 𑒖𑒧𑒲𑒢𑒏 𑒠𑒮𑓂𑒞𑒰𑒥𑒹𑒖, 𑒐𑒞𑒱𑒨𑒰𑒢 𑒖𑒿 𑒯𑒰𑒟𑒧𑒹 𑒕𑒻 𑒞𑒿 𑒂𑒬𑒰 𑒥𑒢𑒪 𑒩𑒯𑒻𑒞 𑒕𑒻। 𑒖𑒃𑒚𑒰𑒧 𑒍𑒯𑒼 (𑒠𑒮𑓂𑒞𑒰𑒥𑒹𑒖, 𑒐𑒞𑒱𑒨𑒰𑒢) 𑒢𑒻 𑒩𑒯𑒪 𑒍 𑒞𑒿 𑒣𑒰𑒢𑒱𑒏 𑒣𑒰𑒟𑒩 𑒖𑒏𑒰𑒿 𑒏𑒞𑒋 𑒛𑒳𑒧𑒪 𑒁𑒕𑒱 𑒞𑒹𑒏𑒩 𑒏𑒼𑒢 𑒚𑒹𑒏𑒰𑒢। 𑒂 𑒖𑒿 𑒯𑒹𑒪𑒥𑒻𑒨𑒰 (𑒣𑒰𑒢𑒱𑒏 𑒦𑒰𑒿𑒖 𑒥𑒳𑒗𑒱𑒢𑒱𑒯𑒰𑒩) 𑒩𑒯𑒪 𑒞𑒿 𑒦𑒰𑒿𑒖𑒼-𑒦𑒳𑒖 𑒪𑒑𑒰 𑒮𑒏𑒻𑒋 𑒧𑒳𑒠𑒰 𑒁𑒢𑒰𑒛𑓃𑒲 𑒞𑒿 𑒁𑒢𑒰𑒛𑓃𑒱𑒨𑒹 𑒕𑒲।
𑒮𑒰𑒞𑒧 𑒠𑒱𑒢 𑒋𑒏𑒙𑒰 𑒥𑒰𑒿𑒮 𑒏𑒰𑒙𑒱 𑒣𑒰𑒿𑒓𑒱-𑒣𑒳𑒓𑒱 𑒏𑓄 𑒑𑒼𑒢𑒩 𑒧𑒝𑓂𑒛𑒪 𑒞𑒻𑒨𑒰𑒩 𑒏𑒹𑒪𑒢𑒱 𑒖𑒹 𑒏𑒰𑒪𑓂𑒯𑒱 𑒑𑒰𑒧 𑒖𑒰𑒋𑒥। 𑒥𑒹𑒩𑒧𑒰𑒮𑒿 𑒯𑒩𑒱𑒢𑒰𑒯𑒲 𑒖𑒰𑒋𑒥। 𑒔𑒰𑒩𑒱 𑒠𑒱𑒢 𑒩𑒯𑒱, 𑒣𑒯𑒱𑒢𑒹 𑒩𑒯𑒻 𑒖𑒼𑒏𑒩 𑒒𑒩 𑒥𑒢𑒰 𑒪𑒹𑒥, 𑒞𑒐𑒢 𑒂𑒑𑒴 𑒥𑒴𑒗𑒪 𑒖𑒹𑒞𑒻𑒏। 𑒧𑒰𑒧𑒲𑒏𑒹𑒿 𑒑𑒼𑒢𑒩 𑒧𑒝𑓂𑒛𑒪 𑒏𑒯𑒪𑒐𑒱𑒢- “𑒧𑒰𑒧𑒲, 𑒔𑒰𑒩𑒱 𑒠𑒱𑒢 𑒩𑒯𑒱 𑒣𑒯𑒱𑒢𑒹 𑒒𑒩 𑒥𑒢𑒰 𑒪𑒹𑒥। 𑒣𑒰𑒿𑒔𑒧 𑒠𑒱𑒢 𑒤𑒹𑒩𑒱 𑒋𑒞𑒻 𑒕𑒲।”
𑒧𑒰𑒧𑒲- “𑒥𑒛𑓃𑒥𑒜𑓃𑒱𑒨𑒰, 𑒋𑒏 𑒁𑒜𑓃𑒻𑒨𑒰 𑒔𑒰𑒅𑒩 𑒂 𑒋𑒏 𑒁𑒜𑓃𑒻𑒨𑒰 𑒔𑒴𑒛𑓃𑒰𑒮𑒿 𑒞𑒿 𑒏𑒰𑒖 𑒔𑒪𑒱 𑒖𑒹𑒞𑒯?”

𑒁𑒮𑒧𑓀𑒖𑒮𑒧𑒹 𑒑𑒼𑒢𑒩 𑒣𑒛𑓃𑒱 𑒑𑒹𑒪𑒰𑒯। 𑒖𑒞𑒹 𑒁𑒡𑒱𑒏 𑒥𑒹𑒮𑒲 𑒐𑒰𑒃𑒏 𑒍𑒩𑒱𑒨𑒰𑒢 𑒏𑒩𑒥 𑒍𑒞𑒹 𑒩𑒮𑓂𑒞𑒰𑒧𑒹 𑒦𑒰𑒩𑒱𑒨𑒼 𑒯𑒋𑒞। 𑒋𑒏 𑒞𑒿 𑒮𑒰𑒞-𑒂𑒚 𑒏𑒼𑒮 𑒡𑒰𑒩-𑒡𑒳𑒩𑒏 𑒩𑒰𑒮𑓂𑒞𑒰, 𑒞𑒃𑒣𑒩 𑒥𑒰𑒿𑒮 𑒂 𑒐𑒹𑒥𑒰𑒏 𑒮𑒧𑒰𑒢। 𑒥𑒯𑒳𑒞 𑒦𑒰𑒩𑒲 𑒯𑒋𑒞। 𑒑𑒰𑒧𑒧𑒹 𑒧𑒰𑒢𑒹 𑒥𑒹𑒩𑒧𑒰𑒧𑒹 𑒦𑒩𑒱 𑒣𑒹𑒙 𑒖𑒪𑒐𑒻 𑒏𑓄 𑒪𑒹𑒪𑒟𑒱 𑒂 𑒩𑒰𑒮𑓂𑒞𑒼𑒪𑒹 𑒥𑒰𑒢𑓂𑒯𑒱 𑒪𑒹𑒪𑒟𑒱। 𑒁𑒣𑒢 𑒪𑒼𑒙𑒰-𑒟𑒰𑒩𑒲, 𑒂 𑒪𑒞𑓂𑒞𑒰-𑒏𑒣𑒛𑓃𑒰 𑒢𑒻 𑒪𑒹𑒥, 𑒮𑒹𑒯𑒼 𑒢𑒻 𑒥𑒢𑒞। 𑒁𑓀𑒞𑒧𑒹 𑒋𑒏𑒙𑒰 𑒕𑒱𑒣𑒪𑒲, 𑒋𑒏𑒙𑒰 𑒪𑒼𑒙𑒰, 𑒥𑒱𑒕𑒥𑒻𑒪𑒹 𑒠𑒴𑒙𑒰 𑒥𑒼𑒩𑒰, 𑒋𑒏 𑒁𑒜𑓃𑒻𑒨𑒰-𑒔𑒴𑒛𑓃𑒰 𑒂 𑒋𑒏 𑒁𑒜𑓃𑒻𑒨𑒰 𑒔𑒰𑒅𑒩 𑒪𑓄 𑒏𑓄 𑒠𑒼𑒮𑒩 𑒠𑒱𑒢 𑒥𑒱𑒠𑒰 𑒦𑒹𑒪𑒰𑒯। 𑒋𑒏 𑒞𑒿 𑒍𑒯𑒢 𑒦𑒰𑒩𑒲 𑒏𑒰𑒖 𑒖𑒱𑒢𑒑𑒲𑒧𑒹 𑒏𑒯𑒱𑒨𑒼 𑒢𑒻 𑒏𑒹𑒢𑒹 𑒩𑒯𑒟𑒱। 𑒯𑒿 𑒋𑒞𑒹 𑒖𑒩𑒴𑒩 𑒕𑒪𑒢𑒱 𑒖𑒹 𑒥𑒿𑒮𑒥𑒰𑒩𑒱𑒮𑒿 𑒥𑒰𑒿𑒮 𑒏𑒰𑒙𑒱 𑒂 𑒥𑒰𑒡𑒮𑒿 𑒡𑒰𑒢𑒏 𑒥𑒼𑒗 𑒅𑒒𑒱 𑒏𑓄 𑒁𑒢𑒻𑒞 𑒕𑒪𑒰𑒯 𑒞𑒯𑒱𑒢𑒰 𑒥𑒰𑒡𑒮𑒿 𑒯𑒩 𑒖𑒼𑒞𑒰 𑒠𑒴𑒑𑒼𑒩𑒰 𑒔𑒾𑒏𑒲 𑒁𑒢𑒻-𑒪𑓄 𑒖𑒰𑒃 𑒕𑒪𑒰𑒯, 𑒧𑒳𑒠𑒰 𑒋𑒞𑒹 𑒦𑒰𑒩𑒲 𑒏𑒰𑒖𑒮𑒿 𑒣𑒯𑒱𑒪 𑒠𑒱𑒢 𑒦𑒹𑒿𑒙 𑒦𑒹𑒪𑒢𑒱।
𑒥𑒹𑒩𑒧𑒰𑒮𑒿 𑒢𑒱𑒏𑒪𑒱 𑒏𑒕𑒳𑒥𑒲-𑒞𑒧𑒳𑒩𑒱𑒨𑒰 𑒯𑒼𑒃𑒞 𑒮𑒳𑒢𑓂𑒠𑒩-𑒥𑒱𑒩𑒰𑒖𑒲𑒞 𑒖𑒰𑒃𑒞-𑒖𑒰𑒃𑒞 𑒥𑒹𑒠𑒧 𑒦𑓄 𑒑𑒹𑒪𑒰𑒯। 𑒣𑒰𑒕𑒴 𑒯𑒱𑒁𑒥𑒻𑒞 𑒞𑒿 𑒠𑒳𑒃𑒨𑒹 𑒏𑒼𑒮 𑒙𑒣𑒪𑒰, 𑒂𑒑𑒴 𑒯𑒱𑒁𑒥𑒻𑒞, 𑒞𑒿 𑒁𑒐𑒢 𑒣𑒾𑒢𑒲-𑒔𑒣𑒩𑒰𑒧, 𑒏𑒪𑒱𑒏𑒰𑒣𑒳𑒩, 𑒧𑒹𑒙𑒩𑒮 𑒞𑒿 𑒏𑒼𑒮𑒲 𑒥𑒰𑒢𑓂𑒯𑒏 𑒥𑒰𑒯𑒩𑒹 𑒦𑒹𑒪। 𑒧𑒹𑒙𑒩𑒮𑒧𑒹 𑒢𑒹 𑒏𑒼𑒮𑒲 𑒥𑒰𑒢𑓂𑒯 𑒙𑒣𑒱 𑒦𑒲𑒞𑒩 𑒯𑒹𑒞𑒰। 𑒞𑒻𑒨𑒼 𑒞𑒿 𑒧𑒹𑒙𑒩𑒮 𑒙𑒣𑒱 𑒠𑒴 𑒏𑒼𑒮 𑒦𑒲𑒞𑒩𑒼 𑒖𑒰𑒃𑒨𑒹 𑒣𑒛𑓃𑒞𑒢𑓂𑒯𑒱। 𑒁𑒥𑒴𑒯 𑒪𑒰𑒑𑒱 𑒑𑒹𑒪𑒢𑒱। 𑒖𑒱𑒢𑒑𑒲𑒏 𑒥𑒰𑒙𑒧𑒹 𑒥𑒔𑓂𑒔𑒰 𑒖𑒏𑒰𑒿 𑒥𑒳𑒏𑒾𑒩 𑒪𑒰𑒑𑒱 𑒑𑒹𑒪𑒢𑒱। 𑒮𑒳𑒮𑒞𑒹𑒪𑒰𑒏 𑒏𑒱𑒕𑒳 𑒏𑒰𑒪 𑒥𑒰𑒠 𑒤𑒹𑒩 𑒯𑒴𑒥𑒰 𑒏𑒹𑒪𑒢𑒱। 𑒣𑒰𑒢𑒱 𑒣𑒲𑒥 𑒥𑒰𑒿𑒮 𑒅𑒚𑒰 𑒫𑒱𑒠𑒰 𑒦𑒹𑒪𑒰। 𑒧𑒹𑒙𑒩𑒮 𑒥𑒰𑒢𑓂𑒯𑒣𑒩 𑒣𑒯𑒳𑒿𑒔𑒻𑒞-𑒣𑒯𑒳𑒿𑒔𑒻𑒞 𑒡𑒰𑒯-𑒖𑒰𑒛𑓃 𑒂𑒥𑒱 𑒑𑒹𑒪𑒢𑒱। 𑒋𑒯𑒹𑒢 𑒖𑒑𑒯𑒧𑒹 𑒏𑒹 𑒦𑒹𑒿𑒙 𑒯𑒋𑒞? 𑒏𑓂𑒨𑒼 𑒔𑒱𑒢𑓂𑒯𑒰𑒩𑒹 𑒢𑒻। 𑒑𑒰𑒧-𑒒𑒩𑒧𑒹 𑒢𑒹 𑒧𑒰𑒋-𑒥𑒰𑒣 𑒩𑒯𑒢𑒹 𑒥𑒔𑓂𑒔𑒰 𑒤𑒼𑒮𑒩𑒱𑒨𑒼𑒏𑒹𑒿 𑒑𑒳𑒛𑓃-𑒒𑒰𑒫 𑒏𑒯𑒻 𑒕𑒻 𑒧𑒳𑒠𑒰 𑒢𑒻 𑒩𑒯𑒢𑒹 𑒞𑒿 𑒑𑒳𑒛𑓃𑒼-𑒒𑒰𑒫 𑒤𑒼𑒮𑒩𑒱𑒨𑒹 𑒦𑓄 𑒖𑒰𑒃 𑒕𑒻।

𑒥𑒹𑒩𑒧𑒰𑒏 𑒣𑒔𑓂𑒔𑒲𑒮𑒼𑒮𑒿 𑒥𑒹𑒮𑒲 𑒏𑒳𑒙𑒳𑒧𑒻𑒞𑒲 𑒧𑒹𑒙𑒩𑒮𑒧𑒹 𑒞𑒯𑒱𑒨𑒼 𑒕𑒪 𑒂 𑒁𑒐𑒢𑒼 𑒁𑒕𑒱। 𑒏𑒼𑒮𑒲 𑒥𑒰𑒢𑓂𑒯𑒣𑒩 𑒥𑒰𑒿𑒮 𑒩𑒰𑒐𑒪 𑒂 𑒯𑒱𑒢𑒏𑒰 (𑒑𑒼𑒢𑒩 𑒧𑒝𑓂𑒛𑒪𑒏𑒹𑒿) 𑒣𑒛𑓃𑒪 𑒠𑒹𑒐𑒱 𑒋𑒏 𑒑𑒼𑒙𑒹 𑒪𑒑𑒧𑒹 𑒋𑒪𑒢𑒱। 𑒍 𑒥𑒰𑒡𑒮𑒿 𑒑𑒰𑒧 𑒣𑒩 𑒖𑒰𑒃𑒞 𑒩𑒯𑒟𑒱। 𑒪𑒑𑒧𑒹 𑒂𑒥𑒱 𑒣𑒳𑒕𑒪𑒐𑒱𑒢- “𑒏𑒞𑒋 𑒩𑒯𑒻 𑒕𑒲?”
𑒡𑒰𑒯-𑒖𑒰𑒛𑓃𑒮𑒿 𑒏𑒿𑒣𑒻𑒞 𑒑𑒼𑒢𑒩 𑒧𑒝𑓂𑒛𑒪 𑒏𑒯𑒪𑒐𑒱𑒢- “𑒥𑒹𑒩𑒧𑒰।”
“𑒏𑒞𑒋 𑒖𑒰𑒋𑒥?”
“𑒯𑒹𑒩𑒢𑒰𑒯𑒲।”
“𑒋𑒯𑒹𑒢 𑒁𑒫𑒮𑓂𑒟𑒰𑒧𑒹 𑒏𑒹𑒢𑒰 𑒖𑒰𑒋𑒥?”
“𑒮𑒋𑒯 𑒢𑒹 𑒏𑒱𑒕𑒳 𑒤𑒳𑒛𑓃𑒻𑒋।”
“𑒋𑒏𑒙𑒰 𑒏𑒰𑒖 𑒏𑒩𑒴। 𑒯𑒧𑒯𑒴𑒿 𑒏𑒱𑒨𑒼 𑒂𑒢 𑒢𑒻 𑒕𑒲। 𑒯𑒧𑒩𑒼 𑒥𑒯𑒱𑒢 𑒁𑒯𑒲𑓀 𑒑𑒰𑒧𑒧𑒹 𑒥𑒮𑒻𑒋। 𑒏𑒳𑒙𑒳𑒧𑒹 𑒦𑒹𑒪𑒾𑓀।”
𑒏𑒳𑒙𑒳𑒧𑒏 𑒢𑒰𑒍𑓀 𑒮𑒳𑒢𑒱𑒞𑒯𑒱 𑒖𑒹𑒢𑒰 𑒋𑒏𑒰𑒋𑒏 𑒏𑒞𑒾𑒮𑒿 𑒯𑒼𑒬 𑒋𑒪𑒢𑒱। 𑒏𑒯𑒪𑒐𑒱𑒢- “𑒏𑒳𑒙𑒳𑒧 𑒢𑒰𑒩𑒰𑒨𑒝, 𑒏𑒯𑒳𑒢𑒰-𑒏𑒯𑒳𑒢𑒰 𑒖𑒿 𑒑𑒰𑒧 (𑒥𑒹𑒩𑒧𑒰) 𑒒𑒴𑒧𑒱 𑒖𑒰𑒋𑒥 𑒞𑒿 𑒖𑒰𑒢 𑒥𑒔𑒱 𑒖𑒰𑒋𑒞, 𑒢𑒻 𑒞𑒿 𑒢𑒻 𑒥𑒔𑒥।”
“𑒌𑒚𑒰𑒧𑒮𑒿 𑒒𑒼𑒒𑒩𑒛𑒲𑒯𑒰 𑒑𑒹𑒪 𑒯𑒋𑒞?”
“𑒐𑒰𑒪𑒲 𑒠𑒹𑒯𑒹 𑒔𑒪𑒱 𑒖𑒰𑒋𑒥।”
“𑒮𑒦 𑒮𑒧𑒰𑒢 𑒯𑒧𑒩𑒰 𑒌𑒚𑒲𑒧 𑒩𑒰𑒐𑒱 𑒠𑒱𑒎 𑒂 𑒁𑒯𑒰𑒿 𑒔𑒪𑒱 𑒖𑒰𑒅। 𑒨𑒋𑒯 (𑒥𑒰𑒢𑓂𑒯𑒮𑒿 𑒮𑒙𑒪𑒹 𑒣𑒴𑒥) 𑒯𑒧𑒩 𑒒𑒩 𑒕𑒲।”
𑒂𑒬𑒰 𑒣𑒰𑒥𑒱 𑒑𑒼𑒢𑒩 𑒥𑒖𑒪𑒰𑒯- “𑒁𑒣𑒢𑒰 𑒮𑓀𑒑𑒧𑒹 𑒔𑒴𑒛𑓃𑒼 𑒁𑒕𑒱। 𑒔𑒪𑒴 𑒏𑒢𑒱𑒨𑒹 𑒐𑒰𑒃𑒨𑒼 𑒪𑒹𑒥 𑒂 𑒩𑒐𑒱 𑒏𑓄 𑒔𑒪𑒱𑒨𑒼 𑒖𑒰𑒋𑒥।”

𑒖𑒼𑒬𑒣𑒩 𑒞𑒿 𑒒𑒼𑒒𑒩𑒛𑒲𑒯𑒰 𑒮𑓂𑒙𑒹𑒬𑒢 𑒫𑒱𑒠𑒰𑒯 𑒦𑒹𑒪𑒰 𑒧𑒳𑒠𑒰 𑒩𑒰𑒮𑓂𑒞𑒰𑒧𑒹 𑒋𑒯𑒹𑒢 𑒮𑓂𑒟𑒱𑒞𑒱 𑒦𑓄 𑒑𑒹𑒪𑒢𑒱। 𑒖𑒹 𑒢𑒹 𑒥𑒰𑒙 𑒮𑒳𑒗𑒢𑓂𑒯𑒱 𑒂 𑒢𑒹 𑒛𑒹𑒑𑒹 𑒅𑒚𑒢𑒱। 𑒍𑒃 𑒮𑒧𑒋 𑒔𑒰𑒩𑒱 𑒥𑒖𑒹 𑒑𑒰𑒛𑓃𑒲 𑒢𑒱𑒩𑒧𑒪𑒲𑒮𑒿 𑒁𑒥𑒻𑒞 𑒩𑒯𑒻। 𑒮𑓀𑒖𑒼𑒑 𑒢𑒲𑒏 𑒥𑒻𑒮𑒪𑒢𑒱। 𑒑𑒰𑒛𑓃𑒲 𑒣𑒏𑒛𑓃𑒰 𑒑𑒹𑒪𑒢𑒱। 𑒮𑒰𑒞 𑒥𑒖𑒹 𑒮𑒰𑒿𑒗𑒧𑒹 𑒑𑒰𑒧 (𑒥𑒹𑒩𑒧𑒰) 𑒣𑒯𑒳𑒿𑒔𑒪𑒰𑒯। 𑒋𑒏 𑒞𑒿 𑒦𑒩𑒱 𑒠𑒱𑒢𑒏 𑒟𑒰𑒏𑒪 𑒞𑒃𑒣𑒩 𑒥𑒼𑒐𑒰𑒩, 𑒑𑒰𑒧 𑒁𑒥𑒱𑒞𑒹 𑒥𑒼𑒧 𑒤𑒰𑒛𑓃𑒱 𑒍𑒯𑒱𑒢𑒰 𑒏𑒰𑒢𑒋 𑒪𑒑𑒪𑒰𑒯 𑒖𑒹𑒢𑒰 𑒧𑒰𑒋-𑒥𑒰𑒣𑒏 𑒮𑒼𑒖𑒯𑒰𑒿𑒧𑒹 𑒥𑒹𑒙𑒰-𑒥𑒹𑒙𑒲 𑒏𑒢𑒻𑒋। 𑒁𑒣𑒢 𑒣𑒼𑒮𑒪𑒏 𑒠𑒬𑒰 𑒠𑒹𑒐𑒱 𑒧𑒰𑒧𑒲 (𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒧𑒰𑒋) 𑒌 𑒩𑒴𑒣𑒹 𑒏𑒰𑒢𑒋 𑒪𑒑𑒪𑒲𑒯 (𑒛𑒰𑒏 𑒮𑓂𑒫𑒩𑒧𑒹) 𑒖𑒢𑒰 𑒦𑒰𑒑𑒱𑒢 𑒢𑒻 𑒥𑒿𑒔𑒞𑒢𑒱। 𑒞𑒰𑒡𑒩𑒱 𑒠𑒳𑒢𑒴 𑒦𑒰𑒿𑒃𑒏 𑒥𑒱𑒂𑒯-𑒠𑒳𑒩𑒰𑒑𑒧𑒢 𑒦𑓄 𑒑𑒹𑒪 𑒩𑒯𑒢𑒱। 𑒠𑒳𑒢𑒴 𑒠𑒱𑒨𑒰𑒠𑒱𑒢𑒲𑒨𑒼 𑒥𑒹𑒩𑒧𑒹𑒧𑒹। 𑒪𑒹 𑒥𑒪𑒻𑒨𑒰 𑒖𑒯𑒱𑒢𑒰 𑒮𑒰𑒿𑒗𑒴 𑒣𑒯𑒩 𑒋𑒏𑒙𑒰 𑒢𑒜𑓃𑒱𑒨𑒰 𑒏𑒼𑒢𑒼 𑒗𑒰𑒩𑒲𑒮𑒿 𑒢𑒱𑒏𑒪𑒱 𑒣𑒴-𑒣𑒯𑒻𑒞 𑒂𑒏𑒱 𑒖𑒯𑒰𑒿-𑒞𑒯𑒰𑒿𑒮𑒿 𑒢𑒜𑓃𑒱𑒨𑒰 𑒦𑒴𑒏𑒋 𑒪𑒑𑒻𑒞। 𑒞𑒞𑒥𑒹 𑒢𑒻, 𑒣𑒰𑒮-𑒣𑒛𑓃𑒼𑒮𑒏 𑒢𑒜𑓃𑒱𑒨𑒰 𑒮𑒦 𑒮𑒧𑒙𑒰-𑒮𑒧𑒙𑒰 𑒋𑒏𑒚𑒰𑒧 𑒦𑓄 𑒮𑒧𑒫𑒻𑒞 𑒮𑓂𑒫𑒩𑒧𑒹 𑒦𑒳𑒏𑒋 𑒪𑒑𑒻𑒋। 𑒏𑒱𑒁𑒋 𑒢𑒹 𑒦𑒴𑒏𑒞? 𑒛𑒩𑒹 𑒖𑒹 𑒦𑒩𑒱 𑒠𑒱𑒢 𑒗𑒰𑒛𑓃𑒲 𑒡𑒹𑒢𑒹 𑒩𑒯𑒻𑒋, 𑒍𑒏𑒩𑒰 𑒞𑒿 𑒁𑒢𑓂𑒯𑒰𑒩𑒹 𑒢𑒹 𑒮𑓀𑒑𑒲 𑒯𑒹𑒞𑒃। 𑒖𑒯𑒱𑒢𑒰 𑒔𑒼𑒩 𑒠𑒳𑒢𑒴 𑒩𑓀𑒑𑒏 𑒯𑒼𑒃𑒋 𑒠𑒱𑒢𑒳𑒏𑒼 𑒂 𑒩𑒾𑒞𑒳𑒏𑒼, 𑒞𑒯𑒱𑒢𑒰 𑒢𑒹 𑒢𑒜𑓃𑒱𑒨𑒼𑒏𑒹𑒿 𑒔𑒩𑒾𑒩 𑒏𑒩𑒻𑒏 𑒮𑒧𑒋 𑒦𑒹𑒙𑒻 𑒕𑒻। 𑒞𑒯𑒱𑒢𑒰 𑒧𑒰𑒧𑒲𑒏𑒹𑒿 𑒏𑒢𑒱𑒞𑒹 𑒠𑒳𑒢𑒴 𑒠𑒱𑒨𑒰𑒠𑒱𑒢𑒲 𑒮𑒹𑒯𑒼 𑒗𑒾𑒯𑒩𑒱 𑒏𑒩𑒋 𑒪𑒑𑒪𑒲। 𑒗𑒾𑒯𑒩𑒱 𑒮𑒳𑒢𑒱 𑒋𑒏𑒹-𑒠𑒳𑒃𑒨𑒹 𑒙𑒼𑒪𑒏 𑒪𑒼𑒏 𑒮𑒮𑒩𑒱-𑒮𑒮𑒩𑒱 𑒂𑒥𑒋 𑒪𑒑𑒪𑒲। 𑒑𑒼𑒢𑒩 𑒦𑒻𑒨𑒰𑒏𑒹𑒿 𑒥𑒱𑒢𑒳 𑒠𑒹𑒐𑒢𑒾𑓀 𑒪𑒼𑒏 𑒂𑒿𑒐𑒱 𑒧𑒲𑒛𑓃𑒱-𑒧𑒲𑒛𑓃𑒱 𑒏𑒱𑒨𑒼 𑒚𑒳𑒢𑒏𑒋 𑒪𑒑𑒪𑒲 𑒞𑒿 𑒏𑒱𑒨𑒼 𑒣𑒼𑒟𑒲-𑒣𑒞𑒩𑒰 𑒅𑒢𑒙𑒰𑒥𑒋 𑒪𑒑𑒪𑒲𑒯। 𑒣𑒰𑒿𑒔 𑒠𑒱𑒢 𑒣𑒯𑒱𑒢𑒹 𑒦𑒠𑒥𑒰 𑒥𑒲𑒞 𑒔𑒳𑒏𑒪 𑒕𑒪 𑒧𑒳𑒠𑒰 𑒋𑒏𑒙𑒰 𑒥𑒳𑒜𑓃𑒲𑒏𑒹𑒿, 𑒁𑓀𑒞𑒱𑒧 𑒠𑒱𑒢 𑒦𑒠𑒥𑒰𑒏 𑒣𑒞𑒰 𑒪𑒑𑒪𑒢𑒱। 𑒍 𑒍𑒯𑒲 𑒠𑒱𑒢𑒮𑒿 𑒖𑒼𑒛𑓃𑒻𑒞 𑒖𑒹 𑒂𑒃 𑒕𑒚𑒧 𑒠𑒱𑒢𑒏 𑒦𑒠𑒥𑒰 𑒕𑒲। 𑒥𑒖𑒪𑒲- “𑒏𑒹𑒢𑒰 𑒣𑒯𑒱𑒪𑒹-𑒣𑒯𑒱𑒪 𑒛𑒹𑒑 𑒦𑒠𑒥𑒰𑒧𑒹 𑒅𑒚𑒾𑒪𑒏। 𑒖𑒰𑒢𑒱 𑒏𑓄 𑒂𑒑𑒱𑒧𑒹 𑒣𑒰𑒏𑒋 𑒖𑒰𑒋𑒥 𑒞𑒿 𑒖𑒩𑒥 𑒢𑒻।”
𑒖𑒃𑒚𑒰𑒧 𑒮𑒦 𑒏𑒢𑒢𑒱𑒯𑒰𑒩𑒹 𑒖𑒧𑒰 𑒦𑓄 𑒖𑒰𑒋𑒞 𑒞𑒃𑒚𑒰𑒧 𑒔𑒳𑒣 𑒏𑒹 𑒏𑒩𑒞। 𑒐𑒻𑒩 𑒖𑒹 𑒯𑒾....।

𑒧𑒰𑒮 𑒠𑒱𑒢𑒏 𑒣𑒕𑒰𑒞𑒱 𑒍 (𑒑𑒼𑒢𑒩) 𑒏𑒰𑒖-𑒅𑒠𑒹𑒧 𑒏𑒩𑒻𑒥𑒪𑒰 𑒦𑒹𑒪𑒰𑒯। 𑒁𑒑𑒯𑒢𑒏 𑒏𑒙𑒢𑒲 𑒥𑒖𑒩𑒱 𑒑𑒹𑒪 𑒩𑒯𑒻। 𑒞𑒯𑒴𑒧𑒹 𑓑𑓙𑓕𑓗 𑒄.𑒧𑒹 𑒮𑒹𑒯𑒼 𑒢𑒧𑒯𑒩 𑒥𑒰𑒜𑓃𑒱 𑒂𑒋𑒪 𑒩𑒯𑒻। 𑒏𑒯𑒻𑒪𑒹 𑒞𑒿 𑒥𑒰𑒜𑓃𑒱 𑒠𑒯𑒰𑒩𑒏 𑒏𑒰𑒩𑒝 𑒕𑒲 𑒧𑒳𑒠𑒰 𑒅𑒣𑒖𑒼𑒏 𑒏𑒰𑒩𑒝 𑒕𑒲। 𑒄 𑒱𑒢𑒩𑓂𑒦𑒩 𑒏𑒩𑒻𑒞 𑒑𑒰𑒧-𑒑𑒰𑒧𑒏 𑒖𑒧𑒲𑒢𑒏 𑒥𑒳𑒢𑒰𑒥𑒙𑒱𑒣𑒩। 𑒏𑒼𑒢𑒼 𑒑𑒰𑒧𑒧𑒹 𑒑𑒯𑒲𑓀𑒩 𑒐𑒹𑒞 𑒥𑒹𑒮𑒲 𑒁𑒕𑒱 𑒖𑒃𑒧𑒹 𑒖𑒿 𑒬𑒳𑒩𑒴𑒯𑒼𑒧𑒹 𑒠𑒴𑒙𑒰 𑒢𑒧𑒯𑒩 𑒥𑒩𑒐𑒰 𑒦𑓄 𑒖𑒰𑒋𑒞 𑒞𑒿 𑒣𑒰𑒢𑒱 𑒣𑒏𑒛𑓃𑒱 𑒪𑒻𑒞 𑒂 𑒋𑒯𑒢𑒼 𑒆𑒿𑒔𑒑𑒩 𑒑𑒰𑒧 𑒮𑒦 𑒁𑒕𑒱 (𑒥𑒯𑒳𑒂𑒯𑒰 𑒑𑒰𑒧) 𑒖𑒃𑒧𑒹 𑒖𑒞𑒥𑒹 𑒏𑒰𑒪 𑒥𑒩𑒐𑒰 𑒦𑒹𑒪 𑒞𑒞𑒥𑒹 𑒏𑒰𑒪 𑒣𑒰𑒢𑒱 𑒩𑒯𑒪, 𑒥𑒰𑒏𑒲 𑒥𑒩𑒐𑒼 𑒑𑒹𑒪 𑒣𑒰𑒢𑒱𑒨𑒼 𑒑𑒹𑒪। 𑒑𑒰𑒧 𑒮𑒳𑒐𑒪 𑒏𑓄 𑒮𑒳𑒐𑒪𑒹 𑒩𑒯𑒱 𑒑𑒹𑒪। 𑒍𑒯𑒢 𑒑𑒰𑒧𑒏 𑒪𑒹𑒪 𑒥𑒰𑒜𑓃𑒱 𑒐𑒹𑒪𑒾𑒢𑒰 𑒕𑒲, 𑒞𑒿𑒋 𑒖𑒿 𑒕𑒯𑒩𑒼-𑒥𑒰𑒢𑓂𑒯 𑒏𑒰𑒙𑒱 𑒏𑓄 𑒐𑒹𑒪-𑒐𑒹𑒪𑒪 𑒖𑒰𑒋 𑒞𑒿 𑒏𑒲 𑒯𑒩𑓂𑒖 𑒖𑒹 𑒋𑒯𑒹𑒢 𑒐𑒹𑒪 𑒢𑒻 𑒯𑒳𑒁𑒋।
𑒠𑒳𑒬𑓂𑒧𑒢 𑒮𑒱𑒣𑒰𑒯𑒲 𑒯𑒰𑒟𑒹 𑒒𑒹𑒩𑒰𑒋𑒪 𑒮𑒱𑒣𑒰𑒯𑒲 𑒖𑒏𑒰𑒿 𑒣𑒩𑒱𑒫𑒰𑒩 𑒒𑒹𑒩𑒰 𑒑𑒹𑒪 𑒩𑒯𑒋। 𑒋𑒏 𑒞𑒿 𑓑𑓙𑓕𑓘 𑒄.𑒏 𑒥𑒰𑒜𑓃𑒱𑒮𑒿 𑒣𑒩𑒱𑒫𑒰𑒩 𑒡𑒿𑒮𑒱 𑒑𑒹𑒪 𑒩𑒯𑒋। 𑒏𑒱𑒁𑒋 𑒢𑒹 𑒡𑒿𑒮𑒻𑒞। 𑒋𑒏 𑒥𑒰𑒜𑓃𑒱 𑒫𑒰 𑒩𑒾𑒠𑒲, 𑒏𑒵𑒭𑒱 𑒂𑒡𑒰𑒩𑒱𑒞 𑒣𑒩𑒱𑒫𑒰𑒩𑒏𑒹𑒿 𑒣𑒰𑒿𑒔 𑒮𑒰𑒪 𑒡𑒏𑓂𑒏𑒰 𑒧𑒰𑒩𑒻𑒞 𑒁𑒕𑒱। 𑒬𑒳𑒩𑒴𑒯𑒹 𑒤𑒰𑒑𑒳𑒢𑒧𑒹 𑒠𑒳𑒢𑒴 𑒦𑒰𑒿𑒃 (𑒣𑒱𑒮𑒱𑒨𑒾𑒞) 𑒋𑒏𑒙𑒰 𑒥𑒰𑒿𑒮, 𑒐𑒹𑒥𑒰-𑒐𑒩𑒔𑒰𑒏 𑒮𑓀𑒑 𑒯𑒩𑒱𑒢𑒰𑒯𑒲 𑒑𑒹𑒪𑒰। 𑒥𑒰𑒿𑒮𑒏 𑒐𑒳𑒙𑓂𑒙𑒰𑒣𑒩 𑒧𑒢𑒹𑒖𑒩𑒏 𑒏𑒼𑒩𑒼-𑒥𑒰𑒞𑒲𑒏 𑒒𑒩 𑒚𑒰𑒜𑓃 𑒏𑓄 𑒏𑒰𑒬𑒮𑒿 𑒕𑒰𑒛𑓃𑒱 𑒪𑒹𑒪𑒢𑒱। 𑒩𑒯𑒻𑒏 𑒚𑒾𑒩 𑒯𑒼𑒃𑒞𑒹 𑒁𑒣𑒢 𑒣𑒼𑒐𑒩𑒱𑒥𑒪𑒰 𑒖𑒧𑒲𑒢𑒏𑒹𑒿 𑒮𑒰𑒤 𑒏𑓄 𑒞𑒰𑒧-𑒏𑒼𑒩 𑒏𑒩𑒋 𑒪𑒑𑒪𑒰𑒯। 𑒐𑒙𑓂𑒚𑒰 𑒣𑒙𑒹𑒩-𑒗𑒾𑒂𑒏 𑒥𑒼𑒢। 𑒖𑒯𑒱𑒢𑒰 𑒥𑒰𑒠𑒧𑒹 𑒫𑒱𑒨𑒞𑒢𑒰𑒧𑒏 𑒪𑒼𑒏 𑒋𑒏-𑒋𑒏 𑒃𑓀𑒔 𑒦𑒴𑒧𑒱, 𑒖𑒹 𑒥𑒧-𑒥𑒰𑒩𑒴𑒠𑒧𑒹 𑒢𑒭𑓂𑒙 𑒦𑓄 𑒔𑒳𑒏𑒪 𑒕𑒪, 𑒐𑒹𑒞𑒲 𑒨𑒼𑒑𑓂𑒨 𑒥𑒢𑒾𑒪𑒢𑒱। 𑒞𑒯𑒱𑒢𑒰 𑒯𑒩𑒱𑒢𑒰𑒯𑒲𑒏 𑒪𑒼𑒏 𑒑𑒰𑒧𑒏 𑒥𑒼𑒢 𑒅𑒖𑒰𑒛𑓃𑒋 𑒪𑒑𑒪𑒰𑒯। 𑒥𑒼𑒢 𑒋𑒯𑒹𑒢 𑒖𑒹 𑒠𑒮 𑒡𑒳𑒩 𑒞𑒧𑒢𑒱𑒯𑒰𑒩 𑒁𑒣𑒢𑒰𑒏𑒹𑒿 𑒧𑒹𑒯𑒢𑒞𑒲 𑒥𑒳𑒗𑒻𑒞। 𑒠𑒳𑒢𑒴 𑒦𑒰𑒿𑒃 𑒥𑒼𑒢𑒼 𑒞𑒼𑒛𑓃𑒟𑒱 𑒂 𑒑𑒰𑒧 (𑒥𑒹𑒩𑒧𑒰) 𑒂𑒥𑒱-𑒂𑒥𑒱 𑒐𑒩𑒔𑒼 𑒪𑓄 𑒖𑒰𑒟𑒱। 𑒕𑒯 𑒧𑒰𑒮𑒏 𑒥𑒰𑒠 𑒣𑒯𑒱𑒪 𑒅𑒣𑒖𑒰 𑒯𑒰𑒟 𑒪𑒑𑒪𑒢𑒱। 𑒜𑒹𑒢𑒳𑒂𑒩 𑒑𑒰𑒋 𑒖𑒏𑒰𑒿 𑒋𑒏 𑒮𑓀𑒑 𑒖𑒪𑒲 (𑒡𑒰𑒢), 𑒧𑒏𑒃, 𑒏𑒰𑒅𑒢 𑒃𑒞𑓂𑒨𑒰𑒠𑒱 𑒯𑒰𑒟 𑒪𑒑𑒪𑒢𑒱। 𑒣𑒩𑒱𑒫𑒰𑒩𑒏 𑒏𑒰𑒖 𑒥𑒜𑓃𑒪𑒢𑒱। 𑒐𑒹𑒞𑒲𑒏 𑒪𑒹𑒪 𑒋𑒏𑒙𑒰 𑒥𑒛𑓃𑒠 𑒮𑒹𑒯𑒼 𑒏𑒲𑒢𑒱 𑒏𑓄 𑒪𑓄 𑒑𑒹𑒪𑒰𑒯। 𑒣𑒩𑒱𑒫𑒰𑒩𑒏 𑒋𑒏𑒙𑒰 𑒩𑒴𑒣 𑒩𑒹𑒐𑒰 𑒞𑒻𑒨𑒰𑒩 𑒦𑓄 𑒑𑒹𑒪𑒢𑒱।

𑒁𑒐𑒢 𑒡𑒩𑒱 𑒯𑒩𑒱𑒢𑒰𑒯𑒲 𑒑𑒰𑒧𑒧𑒹 𑒥𑒲𑒮 𑒣𑒩𑒱𑒫𑒰𑒩 𑒥𑒮𑒱 𑒔𑒳𑒏𑒪 𑒕𑒪𑒰𑒯। 𑒞𑒲𑒢𑒙𑒰 𑒔𑒰𑒣𑒰𑒏𑒪 𑒮𑒹𑒯𑒼 𑒑𑒩𑒱 𑒔𑒳𑒏𑒪 𑒕𑒪। 𑒣𑒰𑒢𑒱𑒏 𑒮𑒳𑒫𑒱𑒡𑒰 𑒮𑒹 𑒦𑓄 𑒑𑒹𑒪 𑒕𑒪𑒻। 𑒥𑒲𑒮 𑒤𑒲𑒙 𑒣𑒰𑒃𑒣, 𑒕𑒯 𑒤𑒲𑒙 𑒤𑒲𑒪𑓂𑒙𑒩𑒧𑒹 𑒦𑓄 𑒖𑒰𑒃। 𑒢𑒑𑒠𑒲 𑒤𑒮𑒪 𑒣𑒙𑒳𑒂𑒏 𑒐𑒹𑒞𑒲 𑒬𑒳𑒩𑒴 𑒦𑒹𑒪। 𑒞𑒲𑒮-𑒣𑒹𑓀𑒞𑒲𑒮 𑒥𑒲𑒡𑒰 𑒖𑒧𑒲𑒢 𑒅𑒣𑒖𑒰𑒅𑒏 𑒯𑒩𑒱𑒢𑒰𑒯𑒲 𑒑𑒰𑒧 𑒥𑒢𑒱 𑒑𑒹𑒪।

𑓑𑓙𑓖𑓒 𑒄.𑒧𑒹 𑒏𑒰𑒩𑒲 𑒧𑒝𑓂𑒛𑒪 (𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒕𑒼𑒙 𑒣𑒱𑒮𑒱𑒨𑒾𑒞 𑒦𑒰𑒋) 𑒥𑒲𑒧𑒰𑒩 𑒣𑒛𑓃𑒪𑒰𑒯। 𑒢𑒲𑒏 𑒥𑒲𑒧𑒰𑒩। 𑒃𑒪𑒰𑒖𑒏 𑒏𑒼𑒢𑒼 𑒮𑒳𑒫𑒱𑒡𑒰 𑒯𑒩𑒱𑒢𑒰𑒯𑒲𑒧𑒹 𑒢𑒻। 𑒞𑒃 𑒮𑒧𑒻𑒧𑒹 𑒠𑒩𑒦𑓀𑒑𑒰 𑒖𑒱𑒪𑒰𑒏 𑒗𑒑𑒛𑒳𑒂 𑒑𑒰𑒧𑒏 𑒋𑒏 𑒑𑒼𑒙𑒹 𑒥𑒹𑒩𑒧𑒹𑒧𑒹 𑒛𑒰𑒏𑓂𑒙𑒩𑒲 𑒏𑒩𑒻𑒞 𑒕𑒪𑒰𑒯। 𑒧𑒳𑒮𑒪𑒧𑒰𑒢 𑒕𑒪𑒰𑒯। 𑒧𑒢𑒮𑒰𑒩𑒰 𑒧𑒰𑒞𑓂𑒩𑒱𑒏। 𑒧𑒢𑒮𑒰𑒩𑒰-𑒗𑒑𑒛𑓃𑒳𑒂 𑒮𑒙𑒪𑒹 𑒠𑒳𑒢𑒴 𑒑𑒰𑒧। 𑒖𑒃𑒮𑒿 𑒯𑒱𑒢𑒏𑒰 𑒮𑒦𑒏 𑒧𑒰𑒧𑒰-𑒦𑒑𑒱𑒢𑒰𑒏 𑒮𑓀𑒥𑓀𑒡 𑒍𑒃 𑒛𑒰𑒹𑒏𑓂𑒙𑒩 𑒮𑒯𑒰𑒋𑒥𑒏 𑒮𑓀𑒑 𑒥𑒢𑒪 𑒕𑒪𑒢𑓂𑒯𑒱। 𑒍𑒢𑒰 𑒍 𑒩𑒯𑒻 𑒕𑒪𑒰 𑒧𑒳𑒮𑒪𑒧𑒰𑒢 𑒙𑒼𑒪𑒧𑒹, 𑒧𑒳𑒠𑒰 𑒧𑒰𑒞𑓂𑒩𑒱𑒏𑒏 𑒁𑒢𑒹𑒮𑒿 𑒥𑒹𑒮𑒲 𑒏𑒰𑒪 𑒁𑒯𑒲𑒚𑒰𑒧 𑒩𑒯𑒻 𑒕𑒪𑒰𑒯। 𑒯𑒳𑒢𑒏𑒰 𑒧𑒰𑒋 𑒏𑒯𑒪𑒏𑒢𑒱 𑒖𑒹 𑒦𑒻𑒨𑒰, 𑒦𑒰𑒑𑒱𑒢 𑒥𑒛𑓃 𑒠𑒳𑒐𑒱𑒞 𑒁𑒕𑒱।
𑒍 𑒖𑒰𑒃𑒪𑒹 𑒞𑒻𑒨𑒰𑒩 𑒦𑓄 𑒑𑒹𑒪𑒰𑒯।
𑒍𑒃 𑒮𑒧𑒋 𑒥𑒹𑒩𑒧𑒰𑒧𑒹 𑒠𑒴𑒙𑒰 𑒫𑒻𑒠𑓂𑒨 𑒕𑒪𑒰𑒯। 𑒣𑒯𑒱𑒪 𑒮𑒳𑒢𑓂𑒠𑒩 𑒚𑒰𑒏𑒳𑒩 𑒂 𑒠𑒼𑒮𑒩 𑒕𑒪𑒰𑒯 𑒢𑒲𑒩𑒮 𑒧𑒯𑒞𑒼। 𑒮𑒳𑒢𑓂𑒠𑒩 𑒚𑒰𑒏𑒳𑒩 𑒣𑓀𑒛𑒱𑒞 𑒕𑒪𑒰𑒯। 𑒂𑒔𑒰𑒩𑓂𑒨 𑒕𑒪𑒰𑒯। 𑒧𑒳𑒠𑒰 𑒬𑒩𑒲𑒩𑒮𑒿 𑒁𑒥𑒰𑒯 (𑒢𑒰𑓀𑒑𑒩) 𑒕𑒪𑒰𑒯 𑒂 𑒟𑒼𑒛𑓃𑒹𑒏 𑒥𑒼𑒪𑒲 𑒞𑒼𑒞𑒩𑒰𑒃 𑒕𑒪𑒢𑒱। 𑒧𑒳𑒠𑒰 𑒍 𑒖𑒱𑒢𑒑𑒲𑒏𑒹𑒿 𑒋𑒞𑒹 𑒪𑒑𑒮𑒿 𑒠𑒹𑒐𑒻 𑒕𑒹𑒪𑒐𑒱𑒢 𑒖𑒹 𑒣𑒩𑒱𑒫𑒰𑒩𑒮𑒿 𑒏𑒱𑒕𑒳 𑒯𑒙𑒱 𑒁𑒣𑒢 𑒂𑒬𑓂𑒩𑒧 𑒥𑒢𑒾𑒢𑒹 𑒕𑒪𑒰𑒯। 𑒎𑒭𑒡𑒰𑒪𑒨 𑒢𑒰𑒧 𑒕𑒪𑒻𑒏। 𑒐𑒹𑒞-𑒣𑒟𑒰𑒩𑒥𑒪𑒰 𑒣𑒩𑒱𑒫𑒰𑒩 𑒩𑒯𑒢𑒹 𑒎𑒭𑒡𑒰𑒪𑒨 𑒁𑒃𑒪-𑒤𑒃𑒪𑒮𑒿 𑒥𑒢𑒾𑒢𑒹 𑒕𑒪𑒰𑒯। 𑒎𑒭𑒡𑒰𑒪𑒨𑒏 𑒂𑓀𑒑𑒢𑒧𑒹 𑒮𑒃𑒨𑒼 𑒩𑓀𑒑𑒏 𑒖𑒛𑓃𑒲-𑒥𑒴𑒙𑒲 𑒮𑒦 𑒪𑒑𑒾𑒢𑒹 𑒕𑒪𑒰𑒯। 𑒢𑒱𑒁𑒧𑒥𑒠𑓂𑒡 𑒖𑒱𑒢𑒑𑒲 𑒕𑒪𑒢𑒱। 𑒍𑒢𑒰 𑒢𑒱𑒁𑒧 𑒦𑓀𑒑 𑒮𑒹𑒯𑒼 𑒯𑒼𑒃𑒞 𑒕𑒪𑒢𑒱। 𑒢𑒱𑒁𑒧 𑒦𑓀𑒑𑒏 𑒏𑒰𑒩𑒝 𑒩𑒯𑒢𑒱 𑒫𑒻𑒠𑒰𑒑𑒩𑒲 𑒏𑒩𑒥। 𑒫𑒻𑒠𑒰𑒑𑒩𑒲 (𑒛𑒰𑒏𑓂𑒙𑒩𑒲) 𑒍𑒯𑒢 𑒣𑒹𑒬𑒰 𑒕𑒲 𑒖𑒹 𑒖𑒱𑒢𑒑𑒲𑒏 𑒁𑓀𑒞𑒱𑒧 𑒒𑒰𑒙 𑒡𑒩𑒱 𑒥𑒮𑒻𑒞 𑒁𑒕𑒱। 𑒞𑒿𑒋 𑒏𑒐𑒢 𑒏𑒼𑒢 𑒒𑒰𑒙𑒏 𑒨𑒰𑒞𑓂𑒩𑒲 𑒔𑒪𑒱 𑒂𑒍𑒞 𑒞𑒹𑒏𑒩 𑒚𑒹𑒏𑒰𑒢 𑒢𑒻। 𑒧𑒳𑒠𑒰 𑒫𑒻𑒠𑓂𑒨𑒖𑒲 𑒧𑒹 𑒏𑒱𑒕𑒳 𑒏𑒩𑓂𑒧𑒏 𑒣𑓂𑒩𑒞𑒱 𑒧𑒖𑒑𑒳𑒞𑒱𑒨𑒼 𑒩𑒯𑒢𑒱। 𑒧𑒖𑒑𑒴𑒞𑒲 𑒄 𑒩𑒯𑒢𑒱 𑒖𑒐𑒢 𑒍 𑒣𑒴𑒖𑒰 𑒏𑒩𑒋 𑒪𑒑𑒟𑒱 𑒞𑒐𑒢 𑒏𑒱𑒨𑒼 𑒯𑒳𑒢𑒏𑒰 𑒙𑒼𑒏𑒱 𑒢𑒻 𑒣𑒥𑒻𑒞। 𑒞𑒃𑒪𑒹 𑒍 𑒋𑒏𑒙𑒰 𑒍𑒑𑒩𑒥𑒰𑒯 𑒩𑒐𑒻 𑒕𑒪𑒰𑒯। 𑒧𑒳𑒠𑒰 𑒧𑒢𑒧𑒹 𑒄 𑒏𑒔𑒼𑒙 𑒩𑒯𑒥𑒹 𑒏𑒩𑒢𑒱 𑒖𑒹 𑒖𑒃𑒪𑒹 𑒣𑒴𑒖𑒰 𑒏𑒩𑒻 𑒕𑒲 𑒖𑒿 𑒍 𑒠𑒹𑒫𑒞𑒰 𑒂𑒑𑒴𑒧𑒹 𑒔𑒪𑒱 𑒂𑒥𑒟𑒱 𑒞𑒐𑒢 𑒏𑒲 𑒏𑒩𑒥? 𑒧𑒳𑒠𑒰 𑒏𑒱𑒕𑒳𑒋 𑒠𑒱𑒢𑒏 𑒣𑒕𑒰𑒞𑒱 𑒩𑒴𑒙𑒱𑓀𑒑 𑒥𑒠𑒪𑒱 𑒪𑒹𑒪𑒢𑒱। 𑒔𑒾𑒥𑒲𑒮 𑒒𑓀𑒙𑒰𑒏 𑒑𑒰𑒛𑓃𑒲𑒧𑒹 𑒪𑒼𑒏 𑒁𑒣𑒢𑒰-𑒁𑒣𑒢𑒰 𑒜𑓀𑒑𑒮𑒿 𑒩𑒴𑒙𑒱𑓀𑒑 (𑒏𑒰𑒖𑒏 𑒯𑒱𑒮𑒰𑒥𑒹) 𑒥𑒢𑒰 𑒪𑒻𑒞 𑒁𑒕𑒱। 𑒞𑒯𑒱𑒢𑒰 𑒍𑒯𑒼 𑒠𑒱𑒢𑒏 𑒣𑒴𑒖𑒰 𑒏𑒩𑒥 𑒕𑒼𑒛𑓃𑒱 𑒩𑒰𑒞𑒱𑒧𑒹 𑒏𑒩𑒋 𑒪𑒑𑒪𑒰𑒯। 𑒖𑒃𑒮𑒿 𑒮𑒦𑒏𑒹𑒿 𑒥𑒩𑒰𑒥𑒩𑒹 𑒪𑒰𑒦 𑒯𑒳𑒁𑒋 𑒪𑒑𑒪𑒢𑒱। 𑒖𑒱𑒢𑒑𑒱𑒨𑒼 𑒢𑒧𑒯𑒩 𑒥𑒢𑒾𑒢𑒹 𑒕𑒪𑒰𑒯, 𑒁𑒚𑒥𑒰𑒩𑒹 𑒒𑒼𑒛𑓃𑒰𑒣𑒩 𑒔𑒜𑓃𑒱 𑒂𑒢-𑒂𑒢 𑒑𑒰𑒧𑒏 𑒫𑒻𑒠𑓂𑒨 𑒮𑒦 𑒌𑒚𑒰𑒧 𑒖𑒰𑒃 𑒕𑒪𑒰𑒯, 𑒯𑒱𑒢𑒏𑒼 𑒌𑒚𑒰𑒧 𑒁𑒥𑒻 𑒕𑒪𑒢𑒱। 𑒖𑒃𑒮𑒿 𑒫𑒻𑒔𑒰𑒩𑒱𑒏 𑒮𑓀𑒥𑓀𑒡𑒮𑒿 𑒪𑓄 𑒏𑓄 𑒥𑒹𑒫𑒯𑒰𑒩𑒱𑒏 (𑒖𑒛𑓃𑒲-𑒥𑒴𑒙𑒲𑒏 𑒑𑒰𑒕 𑒪𑒑𑒥𑒻𑒏 𑒮𑓀𑒥𑓀𑒡𑒮𑒿 𑒪𑓄 𑒏𑓄 𑒠𑒫𑒰𑒃 𑒥𑒢𑒥𑒻𑒏 𑒜𑓀𑒑 𑒡𑒩𑒱) 𑒮𑓀𑒥𑓀𑒡 𑒧𑒖𑒑𑒴𑒞 𑒕𑒪𑒢𑒱।
𑒠𑒼𑒮𑒩 𑒫𑒻𑒠𑓂𑒨 𑒕𑒪𑒰𑒯 𑒢𑒲𑒩𑒮 𑒧𑒯𑒞𑒼। 𑒣𑓀. 𑒮𑒳𑒢𑓂𑒠𑒩 𑒚𑒰𑒏𑒳𑒩 𑒖𑒏𑒰𑒿 𑒣𑒜𑓃𑒪-𑒪𑒱𑒐𑒪 𑒢𑒻 𑒧𑒳𑒠𑒰 𑒧𑒢𑒳𑒏𑓂𑒐𑒼𑒏 𑒞𑒿 𑒁𑒖𑒲𑒫 𑒥𑒳𑒢𑒰𑒥𑒙𑒱 𑒁𑒕𑒱। 𑒏𑒱𑒨𑒼 𑒏𑒍𑒪𑒹𑒖𑒮𑒿 𑒣𑒜𑓃𑒱 𑒛𑒰𑒹𑒏𑓂𑒙𑒩-𑒃𑓀𑒖𑒲𑒢𑒱𑒨𑒩 𑒥𑒢𑒻𑒞 𑒕𑒟𑒱 𑒞𑒿 𑒏𑒱𑒨𑒼 𑒑𑒰𑒧𑒹-𑒒𑒩𑒧𑒹 𑒒𑒴𑒧𑒱-𑒤𑒱𑒩𑒱 𑒥𑒢𑒱 𑒖𑒰𑒃𑒞 𑒕𑒟𑒱। 𑒞𑒯𑒱𑒢𑒰 𑒍𑒯𑒢 𑒩𑒰𑒧𑒰𑒨𑒝 𑒂 𑒧𑒯𑒰𑒦𑒰𑒩𑒞 𑒣𑒜𑓃𑒢𑒱𑒯𑒰𑒩 (𑒑𑒰𑒥𑒱 𑒏𑓄 𑒣𑒜𑓃𑒢𑒱𑒯𑒰𑒩) 𑒏𑒞𑒹𑒏𑒼 𑒕𑒟𑒱 𑒖𑒱𑒢𑒏𑒰 𑒁𑒣𑒢 𑒢𑒰𑒍𑓀-𑒑𑒰𑒍𑓀 𑒪𑒱𑒐𑒋 𑒢𑒻 𑒁𑒥𑒻𑒞 𑒕𑒢𑓂𑒯𑒱। 𑒧𑒰𑒙𑒱𑒮𑒿 𑒅𑒣𑒖𑒪 𑒫𑒻𑒠𑓂𑒨 𑒢𑒲𑒩𑒮 𑒧𑒯𑒞𑒼 𑒕𑒪𑒰𑒯। 𑒑𑒰𑒧𑒧𑒹 𑒠𑒳𑒢𑒴 𑒑𑒼𑒙𑒹𑒏 𑒃𑒪𑒰𑒖 𑒔𑒪𑒻𑒞 𑒕𑒪𑒢𑒱। 𑒧𑒳𑒠𑒰 𑒋𑒪𑒼𑒣𑒻𑒟𑒲 𑒠𑒫𑒰𑒃𑒏 𑒂𑒑𑒧𑒢 𑒑𑒰𑒧𑒧𑒹 𑒮𑒹𑒯𑒼 𑒦𑓄 𑒔𑒳𑒏𑒪 𑒕𑒪। 𑒖𑒃𑒮𑒿 𑒥𑒹𑒩𑒧𑒰𑒏 𑒥𑒑𑒪𑒏 𑒑𑒰𑒧𑒏 𑒙𑒴𑒢𑒲𑒥𑒰𑒥𑒴 𑒂 𑒥𑒳𑒔𑒏𑒳𑒢 𑒥𑒰𑒥𑒴𑒏 𑒂𑒥𑒰-𑒖𑒰𑒯𑒲 𑒮𑒹𑒯𑒼 𑒦𑓄 𑒑𑒹𑒪 𑒕𑒪𑒢𑒱। 𑒗𑒑𑒛𑓃𑒳𑒂𑒥𑒪𑒰 𑒛𑒰𑒹𑒏𑓂𑒙𑒩 𑒏𑒩𑒲𑒥 𑒣𑒢𑒩𑒯 𑒥𑒩𑓂𑒐 𑒥𑒹𑒩𑒧𑒰𑒧𑒹 𑒩𑒯𑒪𑒰𑒯। 𑒍𑒢𑒰 𑒯𑒳𑒢𑒏𑒩 𑒢𑒰𑒍𑓀 𑒁𑒐𑒢𑒼 𑒢𑒻 𑒏𑒏𑒩𑒼 𑒥𑒴𑒗𑒪 𑒕𑒻। 𑒞𑒹𑒏𑒩 𑒏𑒰𑒩𑒝 𑒕𑒻 𑒖𑒹 𑒮𑒦 𑒧𑒧𑒹 𑒏𑒯𑒻 𑒕𑒪𑒢𑓂𑒯𑒱 𑒂 𑒍𑒯𑒼 𑒦𑒑𑒱𑒢𑒹 𑒏𑒯𑒻 𑒕𑒪𑒐𑒱𑒢𑓂𑒯। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒧𑒰𑒃𑒨𑒼, 𑒦𑒃𑒨𑒹 𑒏𑒯𑒢𑒱 𑒂 𑒍𑒯𑒼 𑒥𑒯𑒲𑒢𑒱𑒨𑒹 𑒏𑒯𑒟𑒱𑒢। 𑒙𑒼𑒪𑒏 (𑒧𑒳𑒮𑒪𑒧𑒰𑒢) 𑒪𑒼𑒏 𑒛𑒰𑒹𑒏𑓂𑒙𑒩 𑒮𑒯𑒰𑒋𑒥 𑒏𑒯𑒢𑒱 𑒞𑒿 𑒏𑒱𑒕𑒳 𑒙𑒼𑒪𑒏 𑒪𑒼𑒏 𑒧𑒼𑒪𑒥𑒲 𑒮𑒯𑒰𑒋𑒥 𑒏𑒯𑒢𑒱। 𑒍𑒢𑒰 𑒍 𑒢𑒫𑒰𑒖𑒲 𑒮𑒹𑒯𑒼 𑒕𑒪𑒰𑒯। 𑒏𑒱𑒕𑒳 𑒙𑒼𑒪𑒏 𑒪𑒼𑒏 𑒧𑒼𑒪𑒥𑒲 𑒮𑒯𑒰𑒋𑒥 𑒛𑒰𑒹𑒏𑓂𑒙𑒩 𑒏𑒯𑒢𑒱 𑒞𑒿𑒋 𑒯𑒳𑒢𑒏𑒩 𑒁𑒮𑒪 𑒢𑒰𑒅𑒿𑒋 𑒯𑒩𑒰 𑒑𑒹𑒪 𑒩𑒯𑒢𑒱।

𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒖𑒹𑒚 𑒦𑒰𑒨 (𑒏𑒳𑒪𑒏𑒳𑒪 𑒧𑒝𑓂𑒛𑒪) 𑒧𑒰𑒋 𑒂 𑒧𑒰𑒧𑒰 (𑒛𑒰𑒏𑓂𑒙𑒩) 𑒞𑒲𑒢𑒴 𑒑𑒼𑒙𑒹 𑒞𑒧𑒳𑒩𑒱𑒨𑒰𑒧𑒹 𑒑𑒰𑒛𑓃𑒲 𑒣𑒏𑒛𑓃𑒱 𑒒𑒼𑒒𑒛𑒲𑒯𑒰 𑒥𑒰𑒢𑓂𑒯 (𑒏𑒼𑒮𑒲) 𑒞𑒏 𑒞𑒿 𑒅𑒞𑓂𑒮𑒰𑒯𑒮𑒿 𑒑𑒹𑒪𑒰, 𑒧𑒳𑒠𑒰 𑒥𑒰𑒢𑓂𑒯𑒣𑒩𑒮𑒿 𑒖𑒹 𑒠𑒹𑒐𑒪𑒢𑒱 𑒞𑒿 𑒧𑒰𑒃𑒨𑒼 𑒂 𑒦𑒻𑒨𑒼𑒏 𑒧𑒢 𑒛𑒩𑒱 𑒑𑒹𑒪𑒢𑒱। 𑒂𑒑𑒴 𑒛𑒹𑒑 𑒥𑒜𑓃𑒥𑒻𑒏 𑒯𑒱𑒂𑒅𑒋 𑒢𑒹 𑒯𑒼𑒢𑓂𑒯𑒱। 𑒥𑒰𑒢𑓂𑒯𑒏 𑒥𑒑𑒪𑒹𑒧𑒹 𑒢𑒧𑒯𑒩 𑒡𑒰𑒩। 𑒖𑒹𑒏𑒩 𑒣𑒰𑒢𑒱 𑒏𑒰𑒤𑒲 𑒞𑒹𑒖 𑒑𑒞𑒱𑒧𑒹 𑒔𑒪𑒻𑒞। 𑒧𑒰𑒧𑒰 𑒥𑒴𑒗𑒱 𑒑𑒹𑒪𑒐𑒱𑒢। 𑒍 𑒡𑒻𑒩𑓂𑒨 𑒥𑒜𑓃𑒥𑒻𑒞 𑒏𑒯𑒪𑒐𑒱𑒢- “𑒥𑒯𑒱𑒢, 𑒄 𑒏𑒼𑒢 𑒡𑒰𑒩 𑒕𑒱𑒌, 𑒌𑒮𑒿 𑒢𑒧𑒯𑒩-𑒢𑒧𑒯𑒩 𑒡𑒰𑒩𑒧𑒹 𑒢𑒰𑒫 𑒔𑒪𑒥𑒻 𑒕𑒲 𑒂 𑒯𑒹𑒪𑒥𑒼 𑒏𑒩𑒻 𑒕𑒲। 𑒏𑒹𑒯𑒢 𑒥𑒜𑓃𑒱𑒨𑒰 𑒢𑒰𑒫 𑒕𑒻। 𑒖𑒯𑒱𑒢𑒰 𑒮𑒦 𑒣𑒰𑒩 𑒏𑒩𑒞 𑒞𑒯𑒱𑒢𑒰 𑒯𑒧𑒯𑒴𑒿 𑒮𑒦 𑒣𑒰𑒩 𑒏𑒩𑒥।”
𑒞𑒃 𑒥𑒲𑒔 𑒋𑒏 𑒑𑒼𑒙𑒹 𑒯𑒩𑒱𑒢𑒰𑒯𑒱𑒨𑒹𑒏 𑒦𑒹𑒙 𑒑𑒹𑒪𑒢𑒱। 𑒥𑒰𑒢𑓂𑒯𑒹𑒣𑒩 𑒣𑒴𑒕-𑒂𑒕𑒮𑒿 𑒦𑒰𑒿𑒖 𑒪𑒰𑒑𑒱 𑒑𑒹𑒪𑒢𑒱। 𑒬𑒯𑒩-𑒥𑒰𑒖𑒰𑒩𑒧𑒹 𑒥𑒱𑒢𑒰 𑒧𑒞𑒪𑒥𑒹 𑒏𑒱𑒕𑒳 𑒣𑒴𑒕𑒥 𑒢𑒲𑒏 𑒢𑒻 𑒯𑒼𑒃 𑒕𑒻 𑒧𑒳𑒠𑒰 𑒡𑒰𑒩𑒏 𑒃𑒪𑒰𑒏𑒰, 𑒥𑒼𑒢𑒏 𑒃𑒪𑒰𑒏𑒰, 𑒧𑒩𑒴𑒦𑒴𑒧𑒱𑒏 𑒃𑒪𑒰𑒏𑒰𑒧𑒹 𑒍𑒯𑒢 𑒢𑒲𑒏 𑒯𑒼𑒃 𑒕𑒻 𑒖𑒹 𑒮𑓀𑒑𑒲 𑒦𑒹𑒙 𑒖𑒰𑒃 𑒕𑒻।

𑒞𑒲𑒢𑒴 𑒑𑒼𑒙𑒹 𑒯𑒩𑒱𑒢𑒰𑒯𑒲 𑒣𑒯𑒳𑒿𑒔𑒪𑒰𑒯। 𑒛𑒰𑒏𑓂𑒙𑒩𑒏 𑒢𑒰𑒍𑓀 𑒮𑒳𑒢𑒱𑒞𑒹 𑒂𑒢𑒼-𑒂𑒢 𑒣𑒩𑒱𑒫𑒰𑒩𑒏 𑒪𑒼𑒏 𑒖𑒧𑒰 𑒦𑓄 𑒑𑒹𑒪। 𑒣𑒯𑒳𑒿𑒔𑒞𑒹 𑒮𑒴𑒃𑒨𑒰-𑒠𑒫𑒰𑒃 𑒔𑒰𑒪𑒴 𑒏𑒹𑒪𑒢𑒱। 𑒏𑒰𑒩𑒲 𑒧𑒝𑓂𑒛𑒪𑒏 𑒃𑒪𑒰𑒖 𑒬𑒳𑒩𑒴 𑒦𑒹𑒪।
𑒔𑒰𑒯𑒏 𑒢𑒲𑒏 𑒁𑒦𑓂𑒨𑒰𑒮𑒲 𑒛𑒰𑒏𑓂𑒙𑒩 𑒮𑒯𑒰𑒋𑒥। 𑒍𑒢𑒰 𑒔𑒰𑒯𑒹 𑒙𑒰 𑒁𑒧𑒪𑒼 𑒩𑒯𑒢𑒱। 𑒑𑒰𑒧𑒧𑒹 𑒔𑒰𑒯𑒏 𑒠𑒼𑒏𑒰𑒢𑒏 𑒏𑒼𑒢 𑒥𑒰𑒞 𑒖𑒹 𑒔𑒰𑒯𑒣𑒞𑓂𑒞𑒲 𑒔𑒱𑒢𑒱𑒨𑒼𑒏 𑒠𑒼𑒏𑒰𑒢 𑒢𑒻। 𑒥𑒹𑒩𑒧𑒰𑒮𑒿 𑒖𑒐𑒢 𑒫𑒱𑒠𑒰 𑒦𑒹𑒪𑒰 𑒫𑒰 𑒒𑒼𑒒𑒛𑒲𑒯𑒰𑒧𑒹 𑒖𑒐𑒢 𑒑𑒰𑒛𑓃𑒲𑒮𑒿 𑒅𑒞𑒩𑒪𑒰𑒯 𑒞𑒻𑒨𑒼 𑒢𑒻 𑒧𑒢 𑒣𑒛𑓃𑒪𑒢𑒱। 𑒧𑒢𑒼 𑒏𑒹𑒢𑒰 𑒣𑒛𑓃𑒱𑒞𑒢𑒱? 𑒥𑒱𑒢𑒳 𑒠𑒹𑒐𑒪 𑒖𑒑𑒯 𑒏𑒹𑒯𑒹𑒢 𑒁𑒕𑒱 𑒏𑒹𑒯𑒹𑒢 𑒢𑒻 𑒞𑒃 𑒠𑒱𑒮 𑒢𑒖𑒩𑒱 𑒏𑒱𑒁𑒋 𑒣𑒛𑓃𑒱𑒞𑒢𑒱। 𑒣𑒯𑒱𑒪 𑒠𑒱𑒢 𑒞𑒿 𑒏𑒯𑒳𑒢𑒰 𑒐𑒹𑒣𑒱 𑒑𑒹𑒪𑒰𑒯 𑒧𑒳𑒠𑒰 𑒠𑒼𑒮𑒩 𑒠𑒱𑒢 𑒞𑒥𑒰𑒯𑒲 𑒯𑒳𑒁𑒋 𑒪𑒑𑒪𑒢𑒱। 𑒥𑒱𑒢𑒳 𑒔𑒰𑒯 𑒣𑒲𑒢𑒹 𑒧𑒢𑒹 𑒦𑒓𑒚𑒱 𑒑𑒹𑒪𑒢𑒱। 𑒃𑒧𑒯𑒩 𑒧𑒰𑒃𑒨𑒼 𑒂 𑒦𑒻𑒨𑒼𑒏𑒹𑒿 𑒥𑒴𑒗𑒱 𑒣𑒛𑓃𑒢𑒱 𑒖𑒹 𑒏𑒞𑒋 𑒂𑒥𑒱 𑒑𑒹𑒪𑒾𑓀।

𑒣𑒯𑒱𑒪 𑒠𑒱𑒢𑒏 𑒃𑒪𑒰𑒖𑒮𑒿 𑒯𑒳𑒢𑒏𑒰 (𑒏𑒰𑒩𑒲 𑒧𑒝𑓂𑒛𑒪) 𑒧𑒹 𑒏𑒱𑒕𑒳 𑒮𑒳𑒡𑒰𑒩 𑒦𑒹𑒪𑒢𑒱। 𑒧𑒰𑒧𑒰𑒏𑒹𑒿 (𑒛𑒰𑒏𑓂𑒙𑒩 𑒮𑒯𑒰𑒋𑒥) 𑒋𑒏 𑒠𑒱𑒮 𑒔𑒰𑒯𑒏 𑒗𑒣𑒢𑒲 𑒡𑒹𑒢𑒹 𑒩𑒯𑒢𑒱 𑒞𑒿 𑒠𑒼𑒮𑒩 𑒠𑒱𑒮 𑒩𑒼𑒑𑒏 𑒃𑒪𑒰𑒖𑒮𑒿 𑒧𑒢𑒧𑒹 𑒐𑒳𑒬𑒱𑒨𑒼 𑒅𑒣𑒏𑒻𑒞 𑒩𑒯𑒢𑒱।
𑒁𑒐𑒢 𑒡𑒩𑒱 𑒑𑒰𑒧𑒧𑒹 𑒑𑒼𑒩 𑒠𑒮𑒹𑒏 𑒧𑒯𑒱𑒮𑒼-𑒑𑒰𑒋 𑒦𑓄 𑒑𑒹𑒪 𑒕𑒪𑒻। 𑒮𑒯𑒩𑒮𑒰 𑒖𑒱𑒪𑒰 (𑒁𑒐𑒢 𑒮𑒳𑒣𑒾𑒪) 𑒂 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒮𑒲𑒧𑒰𑒏 𑒏𑒰𑒞𑒧𑒹 𑒯𑒩𑒱𑒢𑒰𑒯𑒱𑒨𑒼 𑒂 𑒯𑒩𑒛𑓃𑒱𑒨𑒼 𑒥𑒮𑒪 𑒁𑒕𑒱। 𑒥𑒲𑒔𑒧𑒹 𑒋𑒏𑒙𑒰 𑒧𑒩𑒢𑒹 𑒡𑒰𑒩, 𑒖𑒹 𑒯𑒩𑒱𑒢𑒰𑒯𑒱𑒨𑒼 𑒂 𑒖𑒋𑒯 𑒡𑒰𑒩 𑒠𑒳𑒢𑒴 𑒑𑒰𑒧𑒏𑒹𑒿 𑒅𑒣𑒙𑒾𑒢𑒹 𑒕𑒪। 𑒦𑒻𑒨𑒰𑒏 𑒒𑒩 (𑒑𑒼𑒢𑒩 𑒧𑒝𑓂𑒛𑒪𑒏) 𑒑𑒰𑒧𑒧𑒹 𑒮𑒦𑒮𑒿 𑒣𑒕𑒱𑒧। 𑒏𑒱𑒋𑒏 𑒞𑒿 𑒖𑒯𑒱𑒢𑒰 𑒥𑒖𑒰𑒩 𑒂𑒑𑒴 𑒧𑒳𑒿𑒯𑒹 𑒏𑓄𑒏𑓄 𑒒𑒳𑒮𑒏𑒻𑒞 𑒔𑒪𑒻𑒋 𑒞𑒯𑒱𑒢𑒰 𑒢𑒹 𑒢𑒫 𑒑𑒰𑒧𑒼 𑒔𑒪𑒻𑒋। 𑒣𑒴𑒫𑒹-𑒣𑒔𑓂𑒕𑒱𑒧𑒹 𑒑𑒰𑒧, 𑒍𑒢𑒰 𑒍 𑒮𑒴𑒩𑓂𑒨𑒧𑓀𑒛𑒪 𑒑𑒰𑒧 𑒦𑒹𑒪। 𑒖𑒹 𑒥𑒰𑒮𑒏 𑒯𑒱𑒮𑒰𑒥𑒮𑒿 (𑒣𑒯𑒱𑒪𑒳𑒏𑒰) 𑒢𑒲𑒏 𑒢𑒻 𑒦𑒹𑒪, 𑒏𑒱𑒋𑒏 𑒞𑒿 𑒂𑒑𑒱-𑒕𑒰𑒨 𑒂 𑒯𑒫𑒰-𑒥𑒱𑒯𑒰𑒩𑒱𑒏 𑒠𑒵𑒭𑓂𑒙𑒱𑒮𑒿 𑒅𑒖𑒰𑒩 𑒥𑒹𑒮𑒲 𑒯𑒋𑒞। 𑒡𑒰𑒩𑒏 𑒦𑒲𑒞𑒰-𑒏𑒰𑒞𑒹-𑒏𑒰𑒞𑒹 𑒖𑒯𑒱𑒢𑒰 𑒣𑒔𑓂𑒕𑒱𑒧 𑒞𑒯𑒱𑒢𑒰 𑒣𑒴𑒥। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒁𑒣𑒢 𑒠𑒱𑒨𑒰𑒠 𑒔𑒳𑒪𑓂𑒯𑒰𑒃 𑒧𑒝𑓂𑒛𑒪 𑒏𑒯𑒪𑒐𑒱𑒢 𑒖𑒹 𑒮𑒦 𑒠𑒱𑒨𑒰𑒠 𑒪𑒑𑒰𑒃𑒨𑒹 𑒏𑓄 𑒒𑒩 𑒥𑒰𑒢𑓂𑒯𑒥। 𑒣𑒕𑒥𑒰𑒩𑒱 𑒦𑒰𑒑 𑒯𑒳𑒢𑒏𑒩 𑒒𑒩 𑒞𑒿𑒋 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒦𑒻𑒨𑒼 𑒣𑒔𑓂𑒕𑒱𑒧𑒹 𑒠𑒱𑒮 𑒒𑒩 𑒥𑒢𑓂𑒯𑒪𑒢𑒱। 𑒍𑒃 𑒮𑒧𑒋 𑒮𑒦𑒮𑒿 𑒣𑒔𑓂𑒕𑒱𑒧 𑒒𑒩 𑒩𑒯𑒢𑒱 𑒧𑒳𑒠𑒰 𑒁𑒐𑒢 𑒍𑒃𑒮𑒿 𑒥𑒯𑒳𑒞 𑒣𑒔𑓂𑒕𑒱𑒧 𑒞𑒏 𑒑𑒰𑒧 𑒥𑒜𑓃𑒱 𑒑𑒹𑒪 𑒁𑒕𑒱।
𑒠𑒱𑒢𑒏 𑒏𑒩𑒲𑒥 𑒞𑒲𑒢 𑒥𑒖𑒹, 𑒯𑒩𑒱𑒢𑒰𑒯𑒱𑒨𑒼𑒏 𑒧𑒯𑒲𑓀𑒮 𑒂 𑒯𑒩𑒛𑓃𑒱𑒨𑒼𑒏 𑒣𑒕𑒥𑒰𑒩𑒱 𑒙𑒼𑒪 (𑒖𑒃 𑒙𑒼𑒪 𑒣𑒩𑒏 𑒯𑒹𑒧𑒪𑒞𑒰𑒖𑒲 𑒕𑒟𑒱।) 𑒖𑒹 𑒤𑒳𑒪𑒣𑒩𑒰𑒮𑒏 𑒣𑒴𑒩𑓂𑒫 𑒫𑒱𑒡𑒰𑒨𑒏 𑒩𑒯𑒱 𑒔𑒳𑒏𑒪 𑒕𑒟𑒱।) 𑒯𑒩𑒱𑒢𑒰𑒯𑒲 𑒥𑒲𑒮-𑒣𑒔𑓂𑒔𑒲𑒮 𑒒𑒩𑒏 𑒑𑒰𑒧 𑒂 𑒯𑒩𑒛𑓃𑒲 𑒞𑒲𑒢 𑒙𑒼𑒪𑒧𑒹 𑒥𑒿𑒙𑒪। 𑒖𑒹 𑒟𑒼𑒛𑓃𑒹 𑒯𑒙𑒱-𑒯𑒙𑒱 𑒏𑓄 𑒥𑒮𑒪। 𑒡𑒰𑒩𑒹𑒏 𑒣𑒹𑒙 𑒂 𑒏𑒱𑒢𑒕𑒩𑒱𑒧𑒹 𑒠𑒳𑒢𑒴 𑒑𑒰𑒧𑒏 𑒧𑒯𑒲𑓀𑒮 𑒮𑒦 𑒔𑒩𑒻𑒞 𑒩𑒯𑒻, 𑒏𑒱 𑒢𑒻 𑒂𑒏𑒱 𑒔𑒩𑒥𑒰𑒯𑒰 𑒮𑒦𑒧𑒹 𑒗𑒑𑒛𑓃𑒰 𑒬𑒳𑒩𑒴 𑒦𑒹𑒪𑒻। 𑒠𑒳𑒢𑒴 𑒑𑒰𑒧 𑒪𑒑𑒹-𑒪𑒑𑒹। 𑒯𑒿𑒮𑒹𑒩𑒰-𑒯𑒿𑒮𑒹𑒩𑒲 𑒦𑓄 𑒑𑒹𑒪। 𑒐𑒴𑒥 𑒢𑒧𑒯𑒩 𑒧𑒰𑒩𑒱 (𑒪𑒰𑒚𑒲-𑒪𑒚𑒾𑒥𑒪𑒱) 𑒦𑒹𑒪। 𑒏𑒞𑒹 𑒑𑒼𑒙𑒹𑒏𑒹𑒿 𑒏𑒣𑒰𑒩 𑒤𑒳𑒙𑒪, 𑒯𑒰𑒟-𑒣𑒋𑒩 𑒙𑒳𑒙𑒪। 𑒠𑒴 𑒖𑒰𑒞𑒱𑒏 𑒠𑒳𑒢𑒴 𑒙𑒼𑒪, 𑒐𑒴𑒥 𑒧𑒢𑒮𑒿 𑒧𑒰𑒩𑒱 𑒦𑒹𑒪। 𑒏𑒧 𑒒𑒩 𑒩𑒯𑒱𑒞𑒼 𑒯𑒩𑒱𑒢𑒰𑒯𑒲𑒏 𑒏𑒱𑒕𑒳 𑒣𑒩𑒱𑒫𑒰𑒩 𑒮𑒱𑓀𑒯𑒹𑒬𑓂𑒫𑒩 𑒮𑓂𑒟𑒰𑒢 𑒠𑒱𑒮𑒮𑒿 𑒂𑒥𑒱 𑒥𑒮𑒪 𑒩𑒯𑒋, 𑒞𑒲𑒢𑒙𑒰 𑒮𑒹𑒮𑒩 𑒐𑒪𑒲𑒤𑒰 𑒩𑒯𑒋, 𑒞𑒿𑒋 𑒧𑒰𑒩𑒱 𑒥𑒹𑒮𑒲 𑒯𑒩𑒛𑓃𑒲𑒥𑒪𑒰 𑒐𑒹𑒪𑒏। 𑒧𑒳𑒠𑒰 𑒏𑒹𑒬-𑒤𑒾𑒠𑒰𑒩𑒲 𑒢𑒻 𑒦𑒹𑒪। 𑒞𑒹𑒏𑒩 𑒏𑒰𑒩𑒝𑒼 𑒩𑒯𑒻 𑒖𑒹 𑒋𑒧𑓂𑒯𑒩 𑒤𑒳𑒪𑒣𑒩𑒰𑒮𑒏𑒹𑒿 𑒟𑒰𑒢𑒰 𑒔𑒰𑒩𑒱 𑒡𑒰𑒩 𑒙𑒣𑒱 𑒂𑒥𑒋 𑒣𑒛𑓃𑒻𑒞 𑒞𑒿 𑒍𑒧𑓂𑒯𑒩 𑒮𑒳𑒣𑒾𑒪 𑒮𑒢𑓂𑒧𑒳𑒐 𑒏𑒼𑒮𑒲𑒏 𑒏𑒞𑒹 𑒕𑒰𑒿𑒙-𑒕𑒳𑒿𑒙 𑒣𑒰𑒩 𑒏𑒩𑒋 𑒣𑒛𑓃𑒻𑒞।
𑒑𑒼𑒢𑒩 𑒧𑒝𑓂𑒛𑒪𑒏 𑒒𑒩𑒮𑒿 𑒏𑒩𑒲𑒥 𑒣𑒰𑒿𑒔 𑒥𑒲𑒒𑒰 𑒣𑒔𑓂𑒕𑒱𑒧 𑒧𑒰𑒩𑒱 𑒦𑒹𑒪। 𑒧𑒩𑒠𑒰-𑒧𑒩𑒠𑒲 𑒞𑒿 𑒧𑒰𑒩𑒱 𑒏𑒩𑒋 𑒑𑒹𑒪 𑒩𑒯𑒟𑒱 𑒧𑒳𑒠𑒰 𑒮𑓂𑒞𑓂𑒩𑒲𑒑𑒝 𑒂 𑒥𑒔𑓂𑒔𑒰 𑒮𑒦 𑒞𑒧𑒰𑒬𑒰 𑒠𑒹𑒐𑒪𑒏। 𑒥𑒹𑒩𑒧𑒼𑒏 𑒞𑒲𑒢𑒴 𑒑𑒼𑒙𑒹- 𑒛𑒰𑒿𑒏𑓂𑒙𑒩𑒼 𑒮𑒯𑒩𑒰𑒋𑒥 𑒧𑒰𑒃𑒨𑒼 𑒂 𑒦𑒻𑒨𑒼 𑒧𑒰𑒩𑒱 𑒠𑒹𑒐𑒪𑒢𑒱। 𑒧𑒰𑒩𑒱 𑒠𑒹𑒐𑒱 𑒞𑒲𑒢𑒴 𑒦𑒨𑒦𑒲𑒞 𑒦𑓄 𑒖𑒰𑒃 𑒑𑒹𑒪𑒰𑒯। 𑒞𑒲𑒢𑒴𑒏 𑒣𑒰𑒕𑒴 𑒁𑒣𑒢-𑒁𑒣𑒢 𑒏𑒰𑒩𑒝 𑒩𑒯𑒢𑒱। 𑒛𑒰𑒹𑒏𑓂𑒙𑒩 𑒮𑒯𑒰𑒋𑒥 𑒟𑒰𑒢𑒰-𑒏𑒔𑒯𑒩𑒲 𑒖𑒢𑒻𑒞 𑒩𑒯𑒟𑒱 𑒞𑒿𑒋 𑒦𑒨𑒦𑒲𑒞 𑒩𑒯𑒟𑒱। 𑒁𑓀𑒠𑒰𑒖 𑒩𑒯𑒢𑒱 𑒖𑒹 𑒖𑒐𑒢𑒹 𑒟𑒰𑒢𑒰 𑒎𑒞 𑒞𑒐𑒢𑒹 𑒧𑒰𑒩𑒱 𑒏𑒹𑒢𑒱𑒯𑒰𑒩 𑒑𑒰𑒧 𑒕𑒼𑒛𑓃𑒱 𑒠𑒹𑒞। 𑒧𑒳𑒠𑒰 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏.....।
𑒞𑒯𑒱𑒢𑒰 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒧𑒰𑒋 𑒂 𑒦𑒰𑒨𑒏𑒹𑒿 𑒮𑒹𑒯𑒼 𑒥𑒹𑒩𑒧𑒰𑒏 𑓑𑓙𑓕𑓖-𑓕𑓗 𑒄.𑒏 𑒣𑒳𑒪𑒱𑒮𑒏 𑒠𑒾𑒛𑓃 𑒠𑒹𑒐𑒪 𑒩𑒯𑒢𑒱। 𑒮𑒰𑒿𑒗𑒴 𑒣𑒯𑒩 𑒮𑒦 𑒫𑒱𑒔𑒰𑒩 𑒏𑒹𑒪𑒢𑒱 𑒖𑒹 𑒏𑒰𑒪𑓂𑒯𑒱 𑒦𑒰𑒩𑒹 𑒌𑒚𑒰𑒧𑒮𑒿 𑒧𑒩𑒲𑒖 (𑒏𑒰𑒩𑒲 𑒧𑒝𑓂𑒛𑒪) 𑒏𑒹𑒿 𑒪𑒹𑒢𑒹 𑒑𑒰𑒧 (𑒥𑒹𑒩𑒧𑒰) 𑒔𑒪𑒱 𑒖𑒰𑒋𑒥। 𑒮𑒯𑒋 𑒏𑒹𑒪𑒢𑒱।
𑒁𑒣𑒢𑒰 𑒌𑒚𑒰𑒧 (𑒥𑒹𑒩𑒧𑒰𑒧𑒹) 𑒞𑒲𑒢𑒙𑒰 𑒧𑒯𑒲𑓀𑒮 𑒂 𑒠𑒴𑒙𑒰 𑒥𑒛𑓃𑒠 𑒐𑒴𑒿𑒙𑒰𑒣𑒩 𑒩𑒯𑒻𑒞 𑒕𑒪𑒢𑓂𑒯𑒱। 𑒮𑒧𑒰𑓀𑒑 𑒒𑒙𑒢𑒹 𑒧𑒯𑒲𑓀𑒮 𑒞𑒲𑒢𑒮𑒿 𑒋𑒏 𑒦𑓄 𑒑𑒹𑒪। 𑒥𑒛𑓃𑒠 𑒥𑒱𑒢𑒰 𑒥𑒢𑒻𑒥𑒪𑒰 𑒢𑒻। 𑒔𑒰𑒩𑒱-𑒣𑒰𑒢 𑒮𑒰𑒪 𑒣𑒯𑒱𑒢𑒯𑒱 𑓑𑓙𑓕𑓖-𑓕𑓗 𑒄.𑒧𑒹 𑒦𑒰𑒨 𑒧𑒱𑒛𑓂𑒪 𑒮𑓂𑒏𑒴𑒪 𑒕𑒼𑒛𑓃𑒱 𑒁𑒧𑒰𑒢𑒞 (𑒁𑒧𑒲𑒢𑒲) 𑒧𑒹 𑒢𑒰𑒍𑓀 𑒪𑒱𑒐𑒰 𑒪𑒹𑒪𑒢𑒱 𑒕𑒥𑒹 𑒧𑒰𑒮𑒏 𑒣𑒜𑓃𑒰𑒃। 𑒧𑒳𑒖𑒤𑓂𑒤𑒩𑒣𑒳𑒩𑒮𑒿 𑒋𑒏𑒙𑒰 𑒬𑒱𑒏𑓂𑒭𑒏 (𑒁𑒧𑒲𑒢) 𑒂𑒥𑒱 𑒑𑒰𑒧𑒧𑒹 𑒮𑓂𑒏𑒴𑒪 𑒔𑒪𑒾𑒢𑒹 𑒩𑒯𑒟𑒱। 𑒖𑒃𑒧𑒹 𑒣𑒯𑒱𑒢𑒹 𑒠𑒮 𑒑𑒼𑒙𑒹 𑒢𑒰𑒍𑓀 𑒪𑒱𑒐𑒾𑒪𑒢𑒱। 𑒧𑒳𑒠𑒰 𑒏𑒱𑒕𑒳 𑒠𑒱𑒢 𑒣𑒕𑒰𑒞𑒱 𑒂𑒥𑒱 𑒕𑒯 𑒑𑒼𑒙𑒹 𑒕𑒼𑒛𑓃𑒱 𑒠𑒹𑒪𑒢𑒱। 𑒔𑒰𑒩𑒱 𑒑𑒼𑒙𑒹 𑒁𑒢𑓂𑒞𑒼-𑒁𑒢𑓂𑒞 𑒣𑒜𑓃𑒱 𑒁𑒧𑒲𑒢 𑒥𑒢𑒪𑒰𑒯।
𑒁𑒐𑒢 𑒡𑒩𑒱 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒧𑒯𑒲𑓀𑒮 𑒣𑒰𑒕𑒴 𑒞𑒿 𑒢𑒲𑒏 𑒖𑒏𑒰𑒿 𑒢𑒻 𑒣𑒛𑓃𑒪 𑒩𑒯𑒟𑒱 𑒧𑒳𑒠𑒰 𑒦𑒰𑒨 𑒮𑒥𑒯𑒏 𑒮𑓀𑒑𑒹 𑒔𑒩𑒥𑒋 𑒖𑒰𑒃𑒞 𑒩𑒯𑓂𑒟𑒱। 𑒮𑒧𑒰𑓀𑒑 𑒒𑒙𑒢𑒹 𑒦𑒰𑒩𑒹 𑒣𑒛𑓃𑓃𑒱 𑒑𑒹𑒪𑒢𑓂𑒯𑒱। 𑒣𑒩𑒱𑒫𑒰𑒩𑒏 𑒂𑒧𑒠𑒢𑒲 𑒩𑒯𑒢𑓂𑒯𑒱। 𑒣𑒱𑒮𑒱𑒎𑒞 𑒦𑒰𑒃𑒏 𑒣𑒩𑒱𑒫𑒰𑒩 𑒑𑒹𑒢𑒹 (𑒯𑒩𑒱𑒢𑒰𑒯𑒲 𑒑𑒹𑒢𑒹) 𑒣𑒩𑒱𑒫𑒰𑒩 𑒏𑒧𑒪𑒢𑓂𑒯𑒱। 𑒖𑒃𑒮𑒿 𑒣𑒩𑒱𑒫𑒰𑒩𑒏 𑒏𑒰𑒖𑒼 𑒒𑒙𑒪𑒢𑓂𑒯𑒱। 𑒁𑒐𑒢 𑒞𑒏 𑒧𑒰𑒋 𑒒𑒩𑒮𑒿 𑒢𑒱𑒏𑒪𑒱 𑒐𑒹𑒞-𑒣𑒟𑒰𑒩 𑒢𑒻 𑒖𑒰𑒃𑒞 𑒕𑒪𑒢𑓂𑒯𑒱, 𑒮𑒹𑒯𑒼 𑒖𑒰𑒋 𑒪𑒑𑒪𑒲𑒯। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒦𑒻𑒨𑒰𑒏𑒹𑒿 (𑒑𑒼𑒢𑒩 𑒧𑒝𑓂𑒛𑒪) 𑒖𑒹 𑒖𑒧𑒲𑒢 𑒠𑒹𑒪 𑒑𑒹𑒪 𑒩𑒯𑒢𑒱 𑒍 𑒥𑒹𑒔𑒱 𑒏𑓄 𑒪𑓄 𑒑𑒹𑒪𑒰। 𑒖𑒃𑒮𑒿 𑒐𑒹𑒞𑒼 𑒏𑒧𑒪𑒢𑓂𑒯𑒱। 𑒅𑒣𑒖𑒼 𑒏𑒧𑒪𑒢𑓂𑒯𑒱। 𑒧𑒳𑒠𑒰 𑒔𑒰𑒩𑒱𑒧 𑒣𑒲𑒜𑓃𑒲𑒧𑒹 𑒂𑒃𑒨𑒼 𑒍𑒃 𑒣𑒩𑒱𑒫𑒰𑒩𑒏 𑒮𑓀𑒑 𑒍𑒯𑒢𑒹 𑒮𑓀𑒥𑓀𑒡 𑒥𑒢𑒪 𑒕𑒢𑓂𑒯𑒱 𑒖𑒯𑒱𑒢𑒰 𑒣𑒯𑒱𑒢𑒹 𑒕𑒪𑒢𑓂𑒯𑒱। 𑒁𑒐𑒢𑒼 𑒅𑒧𑒹𑒬 𑒧𑒝𑓂𑒛𑒪 (𑒣𑒳𑒞𑓂𑒩) 𑒮𑓀𑒑 𑒖𑒹 𑒮𑓀𑒖𑒨 𑒩𑒯𑒻𑒋 𑒍 𑒣𑒱𑒮𑒱𑒎𑒞𑒹 𑒦𑒰𑒃𑒏 𑒣𑒼𑒞𑒰 𑒕𑒱𑒨𑒢𑒱।

𑒯𑒰𑒃𑒨𑒹 𑒮𑓂𑒏𑒴𑒪𑒧𑒹 𑒩𑒯𑒟𑒱 𑒞𑒐𑒢 𑒠𑒳𑒩𑒰𑒑𑒧𑒢 𑒦𑒹𑒪𑒢𑓂𑒯𑒱। 𑒥𑒱𑒂𑒯 𑒣𑒯𑒱𑒢𑒯𑒱 𑒦𑓄 𑒔𑒴𑒏𑒪 𑒕𑒪𑒢𑓂𑒯𑒱। 𑒣𑒱𑒮𑒱𑒎𑒞 𑒦𑒰𑒨𑒏𑒹𑒿 𑒑𑒹𑒪𑒰𑒮𑒿 𑒣𑒩𑒱𑒫𑒰𑒩𑒹 𑒢𑒻 𑒏𑒧𑒪𑒢𑓂𑒯𑒱, 𑒒𑒩𑒏 𑒏𑒰𑒩𑒼𑒥𑒰𑒩 𑒏𑒧𑒱 𑒑𑒹𑒪𑒢𑓂𑒯𑒱। 𑒣𑒩𑒱𑒫𑒰𑒩𑒏 𑒦𑒲𑒞𑒩 𑒁𑒢𑓂𑒠𑒩𑒴𑒢𑒲 𑒫𑒱𑒫𑒰𑒠𑒏 𑒖𑒢𑓂𑒧 𑒮𑒹𑒯𑒼 𑒦𑒹𑒪। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒣𑒜𑓃𑒥 𑒫𑒱𑒫𑒰𑒠𑒏 𑒏𑒰𑒩𑒝 𑒧𑒴𑒪𑒧𑒹 𑒕𑒪। 𑒖𑒹𑒏𑒩 𑒠𑒴𑒙𑒰 𑒮𑒱𑒩 (𑒮𑓂𑒩𑒼𑒞) 𑒕𑒪𑒻। 𑒣𑒯𑒱𑒪 𑒦𑒰𑒨 𑒮𑒯𑒰𑒋𑒥𑒏 𑒂 𑒠𑒼𑒮𑒩 𑒮𑒧𑒰𑒖𑒏 𑒯𑒱𑒞-𑒁𑒣𑒹𑒕𑒱𑒞𑒏। 𑒐𑒳𑒪𑓂𑒪𑒧-𑒐𑒳𑒪𑓂𑒪𑒰 𑒞𑒿 𑒣𑒩𑒱𑒫𑒰𑒩𑒧𑒹 𑒢𑒻 𑒕𑒪 𑒧𑒳𑒠𑒰 𑒦𑒰𑒨 𑒮𑒯𑒰𑒋𑒥𑒏 𑒏𑓂𑒩𑒱𑒨𑒰-𑒏𑒪𑒰𑒣 𑒥𑒠𑒪𑒋 𑒪𑒑𑒪𑒢𑒱। 𑒖𑒃𑒮𑒿 𑒒𑒩𑒏 𑒏𑒰𑒖 𑒕𑒼𑒛𑓃𑒱 𑒦𑒩𑒱 𑒠𑒱𑒢 𑒢𑒰𑒔𑒏 𑒣𑒰𑒕𑒴 𑒣𑒛𑓃𑒱 𑒑𑒹𑒪𑒰। 𑒮𑒰𑒮𑒳𑒩𑒼𑒧𑒹 𑒢𑒰𑒔 𑒣𑒰𑒩𑓂𑒙𑒲 𑒔𑒪𑒢𑒱।
𑓑𑓙𑓖𑓗 𑒄.𑒏 𑒔𑒳𑒢𑒰𑒫 𑒂𑒋𑒪। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒼 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒮𑒠𑒮𑓂𑒨 𑒥𑒢𑒱 𑒑𑒹𑒪 𑒩𑒯𑒟𑒱। 𑒔𑒳𑒢𑒰𑒫𑒧𑒹 𑒖𑒱𑒪𑒰 𑒦𑒩𑒱𑒏 𑒥𑒴𑒟𑒣𑒩 𑒐𑒴𑒥 𑒡𑒰𑒿𑒡𑒪𑒲 𑒦𑒹𑒪। 𑒍𑒢𑒰 𑒖𑒯𑒱𑒢𑒰 𑒐𑒴𑒥 𑒡𑒰𑒿𑒡𑒪𑒲 𑒦𑒹𑒪 𑒞𑒯𑒱𑒢𑒰 𑒑𑒰𑒧𑒹-𑒑𑒰𑒧 𑒧𑒰𑒩𑒱𑒨𑒼-𑒣𑒲𑒙 𑒐𑒴𑒥 𑒦𑒹𑒪। 𑒏𑒹𑒬-𑒧𑒼𑒏𑒠𑒧𑒰 𑒐𑒴𑒥 𑒥𑒜𑓃𑒪। 𑒖𑒯𑒪𑒏 𑒂𑒥𑒰-𑒖𑒰𑒯𑒲 𑒮𑒹𑒯𑒼 𑒥𑒜𑓃𑒪। 𑒏𑒹𑒬-𑒧𑒼𑒏𑒠𑒧𑒰 𑒦𑒹𑒢𑒹 𑒏𑒼𑒙-𑒏𑒔𑒯𑒩𑒲𑒏 𑒏𑒰𑒖 𑒥𑒜𑓃𑒪। 𑒩𑒰𑒖𑓂𑒨𑒧𑒹 (𑒥𑒱𑒯𑒰𑒩) 𑒮𑒞𑓂𑒞𑒩𑒯𑒹 𑒙𑒰 𑒖𑒱𑒪𑒰 𑒕𑒪𑒻। 𑒍𑒃𑒧𑒹 𑒥𑒜𑓃𑒼𑒞𑓂𑒞𑒩𑒲𑒏 𑒮𑓀𑒦𑒰𑒫𑒢𑒰 𑒥𑒜𑓃𑒪। 𑒮𑒫𑒛𑒱𑒫𑒲𑒖𑒢, 𑒥𑓂𑒪𑒾𑒏 𑒃𑒞𑓂𑒨𑒰𑒠𑒱 𑒮𑒦𑒧𑒹 𑒥𑒜𑓃𑒼𑒞𑓂𑒞𑒩𑒲𑒏 𑒮𑓀𑒦𑒰𑒫𑒢𑒰 𑒥𑒜𑓃𑒪।
𑓑𑓙𑓖𑓗 𑒄.𑒏 𑒔𑒳𑒢𑒰𑒫𑒧𑒹 (𑒁𑒐𑒳𑒢𑒏𑒰 𑒧𑒡𑒳𑒥𑒢𑒲 𑒖𑒱𑒪𑒰, 𑒞𑒃 𑒮𑒧𑒋 𑒁𑒢𑒳𑒧𑓀𑒛𑒪𑒹 𑒕𑒪) 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒋𑒧.𑒣𑒲. 𑒦𑒼𑒑𑒹𑒢𑓂𑒠𑓂𑒩 𑒖𑒲 (𑒦𑒼𑒑𑒹𑒢𑓂𑒠𑓂𑒩 𑒗𑒰) 𑒦𑒹𑒪𑒰𑒯। 𑒠𑒴𑒙𑒰 𑒣𑒰𑒩𑓂𑒪𑒱𑒨𑒰𑒧𑒹𑓀𑒙 𑒮𑒲𑒙𑒧𑒹 𑒋𑒏𑒙𑒰 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏𑒹𑒿 𑒂 𑒋𑒏𑒙𑒰 𑒮𑒼𑒬𑒪𑒱𑒮𑓂𑒙 𑒣𑒰𑒩𑓂𑒙𑒲 (𑒬𑒱𑒫𑒔𑒢𑓂𑒠𑓂𑒩 𑒗𑒰) 𑒏𑒹𑒿 𑒦𑒹𑒪। 𑒍𑒢𑒰 𑒖𑒱𑒪𑒰𑒮𑒿 𑒏𑒰𑒿𑒑𑓂𑒩𑒹𑒮 𑒖𑒯𑒱𑒢𑒰 𑒣𑒰𑒩𑓂𑒪𑒱𑒨𑒰𑒧𑒹𑓀𑒙𑒮𑒿 𑒯𑒰𑒩𑒪 𑒞𑒯𑒱𑒢𑒰 𑒫𑒱𑒡𑒰𑒢 𑒮𑒦𑒰𑒧𑒹 𑒮𑒹𑒯𑒼 𑒯𑒰𑒩𑒪। 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒙𑒲𑒏𑒹𑒿 𑒔𑒰𑒩𑒱𑒙𑒰 𑒋𑒧.𑒋𑒪.𑒋. 𑒂 𑒋𑒏𑒙𑒰 𑒋𑒧.𑒣𑒲𑒏 𑒮𑒲𑒙 𑒦𑒹𑒙𑒪। 𑒩𑒰𑒖𑓂𑒨𑒏 𑒮𑒩𑒏𑒰𑒩 𑒥𑒠𑒪𑒱 𑒑𑒹𑒪 𑒧𑒳𑒠𑒰 𑒠𑒹𑒬𑒏 (𑒠𑒱𑒪𑓂𑒪𑒲𑒏) 𑒮𑒩𑒏𑒰𑒩 𑒢𑒻 𑒥𑒠𑒪𑒪। 𑒧𑒳𑒠𑒰 𑒫𑒱𑒩𑒼𑒡𑒲 𑒠𑒪𑒏 𑒮𑒠𑒮𑓂𑒨 𑒥𑒜𑓃𑒪। 𑒖𑒃-𑒖𑒃 𑒩𑒰𑒖𑓂𑒨𑒧𑒹 𑒏𑒰𑒿𑒑𑓂𑒩𑒹𑒮𑒲 𑒮𑒩𑒏𑒰𑒩 𑒙𑒳𑒙𑒪 𑒍𑒃-𑒍𑒃 𑒩𑒰𑒖𑓂𑒨𑒧𑒹 𑒫𑒱𑒩𑒼𑒡𑒲𑒏 𑒮𑒩𑒏𑒰𑒩 𑒥𑒢𑒪। 𑒧𑒳𑒠𑒰 𑒋𑒏𑒕𑒰𑒯𑒰 𑒏𑒞𑒾 𑒢𑒹 𑒥𑒢𑒪। 𑒐𑒱𑒔𑒛𑓃𑒲 𑒮𑒩𑒏𑒰𑒩 𑒥𑒢𑒪। 𑒏𑒰𑒿𑒑𑓂𑒩𑒹𑒮 𑒣𑒰𑒩𑓂𑒙𑒲𑒮𑒿 𑒋𑒏 𑒑𑓂𑒩𑒳𑒣 𑒙𑒴𑒙𑒱 𑒖𑒢𑒏𑓂𑒩𑒰𑒢𑓂𑒞𑒱 𑒠𑒪 𑒥𑒱𑒯𑒰𑒩𑒧𑒹 𑒥𑒢𑒾𑒢𑒹 𑒕𑒪। 𑒖𑒹𑒏𑒩 𑒢𑒹𑒞𑒵𑒞𑓂𑒫 𑒧𑒰𑒯𑒰𑒧𑒰𑒨𑒰 𑒥𑒰𑒥𑒴 𑒏𑒩𑒻𑒞 𑒕𑒪𑒰𑒯। 𑒧𑒳𑒐𑓂𑒨𑒧𑓀𑒞𑓂𑒩𑒲 𑒥𑒢𑒪𑒰𑒯। 𑒁𑒐𑒢 𑒦𑓂𑒩𑒭𑓂𑒙𑒰𑒔𑒰𑒩 𑒧𑒳𑒐𑓂𑒨 𑒮𑒧𑒮𑓂𑒨𑒰 𑒥𑒢𑒱 𑒑𑒹𑒪 𑒁𑒕𑒱। 𑒧𑒳𑒠𑒰 𑒍𑒯𑒴 𑒮𑒧𑒻𑒧𑒹 𑒔𑒼𑒩𑒢𑒳𑒏𑒥𑒰 𑒐𑒴𑒥 𑒩𑒯𑒋। 𑒔𑒰𑒯𑒹 𑒖𑒹 𑒏𑒼𑒢𑒼 𑒫𑒱𑒦𑒰𑒑 𑒩𑒯𑒻 𑒦𑓂𑒩𑒭𑓂𑒙𑒰𑒔𑒰𑒩𑒮𑒿 𑒂𑒏𑓂𑒩𑒰𑒢𑓂𑒞 𑒕𑒪। 𑒧𑒰𑒯𑒰𑒧𑒰𑒨𑒰 𑒥𑒰𑒥𑒴𑒏 𑒮𑒩𑒏𑒰𑒩 𑒣𑒕𑒱𑒪𑒰 𑒏𑒰𑒿𑒑𑓂𑒩𑒹𑒮𑒲 𑒧𑓀𑒞𑓂𑒩𑒲𑒏 𑒫𑒱𑒩𑒼𑒡𑒧𑒹 𑒮𑒳𑒣𑓂𑒩𑒲𑒧 𑒏𑒼𑒩𑓂𑒙𑒏 𑒖𑒖𑒏 𑒢𑒹𑒞𑒵𑒞𑓂𑒫𑒧𑒹 𑒖𑒰𑒿𑒔 𑒂𑒨𑒼𑒑 𑒥𑒢𑒾𑒪𑒏। 𑒁𑒨𑓂𑒨𑒩 𑒂𑒨𑒼𑒑 𑒢𑒰𑒍𑓀 𑒣𑒛𑓃𑒪।
𑒥𑒻𑒠𑓂𑒨𑒢𑒰𑒟 𑒩𑒰𑒧 𑒁𑒨𑓂𑒨𑒩 𑒮𑒳𑒣𑓂𑒩𑒲𑒧 𑒏𑒼𑒩𑓂𑒙𑒏 𑒖𑒖 𑒕𑒪𑒰𑒯। 𑒠𑒏𑓂𑒭𑒱𑒝𑒏 𑒕𑒟𑒱। 𑒏𑒩𑒲𑒥 𑒣𑒢𑒔𑒰𑒢𑒥𑒹-𑒕𑒱𑒨𑒰𑒢𑒥𑒹 𑒥𑒩𑓂𑒐𑒏 𑒕𑒟𑒱। 𑒖𑒲𑒫𑒱𑒞𑒹 𑒕𑒟𑒱। 𑒣𑒴𑒩𑓂𑒫 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒕𑒯𑒙𑒰 𑒧𑓀𑒞𑓂𑒩𑒲𑒏 𑒫𑒱𑒩𑒴𑒠𑓂𑒡 𑒁𑒣𑒢 𑒖𑒰𑒿𑒔 𑒩𑒱𑒣𑒼𑒩𑓂𑒙 𑒠𑓄 𑒠𑒹𑒪𑒐𑒱𑒢। 𑒏𑒩𑒼𑒛𑓃𑒼𑒏 𑒪𑒴𑒙 𑒮𑒰𑒫𑒱𑒞 𑒏𑓄 𑒠𑒹𑒢𑒹 𑒩𑒯𑒟𑒱𑒢।
𑓑𑓙𑓖𑓖 𑒄.𑒧𑒹 𑒥𑒱𑒯𑒰𑒩 𑒩𑒾𑒠𑒲𑒏 𑒔𑒣𑒹𑒙𑒱𑒧𑒹 𑒂𑒥𑒱 𑒑𑒹𑒪। 𑒍𑒢𑒰 𑒣𑒯𑒱𑒪 𑒥𑒩𑓂𑒐 𑒩𑒯𑒢𑒹 𑒍𑒞𑒹 𑒥𑒳𑒗𑒱𑒨𑒼 𑒢𑒻 𑒣𑒛𑓃𑒪𑒻। 𑒖𑒿 𑒥𑒴𑒗𑒱 𑒣𑒛𑓃𑒱𑒞𑒻 𑒞𑒿 𑓑𑓙𑓖𑓗 𑒄.𑒏 𑒔𑒳𑒢𑒰𑒫𑒲 𑒧𑒳𑒠𑓂𑒠𑒰 𑒥𑒢𑒻𑒞 𑒮𑒹 𑒢𑒻 𑒥𑒢𑒪। 𑒧𑒳𑒠𑒰 𑒮𑒩𑒏𑒰𑒩 𑒥𑒢𑒪𑒰 𑒅𑒞𑓂𑒞𑒩 𑒠𑒼𑒮𑒩 𑒥𑒩𑓂𑒐 𑒐𑒴𑒥 𑒥𑒴𑒗𑒱 𑒣𑒛𑓃𑒋 𑒪𑒑𑒪𑒻। 𑒦𑒳𑒐𑒧𑒩𑒲 𑒯𑒳𑒁𑒋 𑒪𑒑𑒪। 𑒮𑒩𑒏𑒰𑒩𑒏 𑒮𑒼𑒗𑒰 𑒖𑒥𑒩𑓂𑒠𑒮𑓂𑒞 𑒮𑒥𑒰𑒪 𑒅𑒚𑒱 𑒏𑓄 𑒚𑒰𑒜𑓃 𑒦𑒹𑒪। 𑒖𑒧𑒰𑒐𑒼𑒩 𑒮𑒥𑒯𑒏 𑒫𑒱𑒩𑒼𑒡𑒧𑒹 𑒁𑒦𑒱𑒨𑒰𑒢 𑒔𑒪𑒥𑒻𑒏 𑒱𑒢𑒩𑓂𑒝𑒋 𑒦𑒹𑒪। 𑒧𑒳𑒠𑒰 𑒞𑒹𑒯𑒹𑒢 𑒢𑒰𑒙𑒏 𑒚𑒰𑒜𑓃 𑒦𑓄 𑒑𑒹𑒪 𑒖𑒹 𑒁𑒦𑒱𑒨𑒰𑒢 𑒧𑒖𑒰𑒏 𑒥𑒢𑒱 𑒑𑒹𑒪। 𑒢𑒰𑒙𑒏 𑒄 𑒦𑒹𑒪 𑒖𑒹 𑒠𑒮 𑒥𑒲𑒮𑒙𑒰 𑒍𑒯𑒢 𑒮𑒦 𑒣𑒏𑒛𑒰𑒋 𑒪𑒑𑒪 𑒖𑒹𑒏𑒩 𑒏𑒰𑒩𑒼𑒥𑒰𑒩 (𑒁𑒢𑓂𑒢𑒏 𑒏𑒰𑒩𑒼𑒥𑒰𑒩) 𑒒𑒼𑒛𑓃𑒰-𑒒𑒼𑒛𑓃𑒲𑒣𑒩 𑒔𑒪𑒻𑒞 𑒩𑒯𑒋। 𑒧𑒳𑒠𑒰 𑒮𑒼𑒪𑒯𑒢𑓂𑒢𑒲 𑒮𑒋𑒯 𑒢𑒻 𑒦𑒹𑒪, 𑒏𑒱𑒕𑒳 𑒋𑒯𑒢𑒼 𑒖𑒧𑒰𑒐𑒼𑒩 𑒣𑒏𑒛𑓃𑒰𑒋𑒪 𑒖𑒹𑒏𑒩𑒰 𑒑𑒼𑒠𑒰𑒧𑒧𑒹 𑒪𑒰𑒐𑒼 𑒏𑓂𑒫𑒲𑒢𑓂𑒙𑒪 𑒁𑒢𑒰𑒖 𑒩𑒯𑒋।
𑒣𑒰𑒩𑓂𑒪𑒱𑒨𑒰𑒧𑒹𑓀𑒙𑒏 𑒬𑒣𑒟 𑒑𑓂𑒩𑒯𑒝 𑒏𑒹𑒪𑒰 𑒣𑒕𑒰𑒞𑒱 𑒦𑒼𑒑𑒹𑒢𑓂𑒠𑓂𑒩 𑒖𑒲 𑒖𑒐𑒢 𑒧𑒡𑒳𑒥𑒢𑒲 𑒒𑒳𑒧𑒪𑒰𑒯 𑒞𑒿 𑒮𑒏𑒩𑒲𑒧𑒹 𑒣𑒯𑒱𑒪 𑒂𑒧 𑒮𑒦𑒰 𑒏𑒹𑒪𑒢𑒱। 𑒋𑒏 𑒞𑒿 𑒢𑒫 𑒮𑒠𑒮𑓂𑒨 𑒩𑒯𑒢𑒹 𑒠𑒼𑒮𑒩 𑒁𑒣𑒢 𑒣𑒰𑒩𑓂𑒙𑒲𑒏 𑒩𑒯𑒢𑒹 𑒏𑒩𑒲𑒥 𑒣𑒢𑒩𑒯-𑒥𑒲𑒮 𑒑𑒰𑒧 (𑒥𑒹𑒩𑒧𑒰) 𑒮𑒿 𑒮𑒦𑒰𑒧𑒹 𑒦𑒰𑒑 𑒪𑒱𑒁 𑒑𑒹𑒪𑒟𑒱। 𑒑𑒰𑒛𑓃𑒲𑒏 𑒮𑒳𑒫𑒱𑒡𑒰 𑒩𑒯𑒥𑒹 𑒏𑒩𑒢𑓂𑒯𑒱। 𑒞𑒯𑒴𑒧𑒹 𑒪𑒰𑒪 𑒗𑓀𑒛𑒰𑒥𑒪𑒰 𑒮𑒦 𑒠𑒱𑒪𑓂𑒪𑒲 𑒞𑒏 𑒣𑓂𑒩𑒠𑒩𑓂𑒬𑒢 𑒏𑒩𑒱𑒞𑒹 𑒕𑒪। 𑒍𑒢𑒰 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏 𑒦𑒰𑒭𑒝𑒏 𑒑𑒳𑒝 𑒩𑒯𑒪𑒢𑒱 𑒖𑒹 𑒍 𑒣𑒯𑒱𑒢𑒹 𑒥𑒰𑒖𑒱 𑒠𑒃 𑒕𑒪𑒐𑒱𑒢 𑒖𑒹 𑒖𑒱𑒢𑒏𑒰 𑒖𑒹 𑒣𑓂𑒩𑒬𑓂𑒢 𑒣𑒳𑒕𑒻𑒏 𑒯𑒳𑒁𑒋 𑒍 𑒣𑒴𑒕𑒱 𑒠𑒱𑒁। 𑒖𑒥𑒰𑒥 𑒠𑒹𑒥 𑒯𑒳𑒢𑒏𑒰 𑒦𑒰𑒭𑒝𑒏 𑒧𑒴𑒪 𑒥𑒱𑒢𑓂𑒠𑒳 𑒕𑒪𑒢𑒱। 𑒦𑒰𑒭𑒝𑒼 𑒢𑒧𑒯𑒩 𑒏𑒩𑒻𑒞 𑒕𑒪𑒰𑒯। 𑒮𑒧𑒋 𑒦𑒹𑒙𑒪𑒰𑒣𑒩 𑒞𑒲𑒢-𑒞𑒲𑒢, 𑒔𑒩𑒱-𑒔𑒩𑒱 𑒒𑓀𑒙𑒰 𑒥𑒖𑒱𑒞𑒹 𑒩𑒯𑒱 𑒖𑒰𑒃𑒞 𑒕𑒪𑒰𑒯।
𑒍𑒃 𑒮𑒧𑒋 𑒱𑒢𑒩𑓂𑒧𑒪𑒲𑒮𑒿 𑒮𑒧𑒮𑓂𑒞𑒲𑒣𑒳𑒩 𑒋𑒏𑒙𑒰 𑒑𑒰𑒛𑓃𑒲 𑒔𑒪𑒻𑒞 𑒩𑒯𑒋। 𑒥𑒛𑓃𑒲 𑒪𑒰𑒃𑒢𑒏 𑒏𑒞𑒾 𑒣𑒞𑒰 𑒢𑒻। 𑒧𑒳𑒠𑒰 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒪𑒛𑓃𑒰𑒃𑒏 𑒋𑒏𑒙𑒰 𑒧𑒳𑒠𑓂𑒠𑒰 𑒄𑒯𑒼 𑒩𑒯𑒋। 𑒏𑒐𑒢𑒼 𑒅𑒑𑓂𑒩 𑒞𑒿 𑒏𑒐𑒢𑒼 𑒡𑒲𑒧𑒲 𑒑𑒞𑒱𑒮𑒿 𑒔𑒪𑒱𑒞𑒹 𑒩𑒯𑒋। 𑒍𑒢𑒰 𑒣𑒴𑒥𑒼𑒮𑒿 𑒂 𑒣𑒔𑓂𑒕𑒱𑒧𑒼𑒮𑒿 𑒁𑒥𑒻𑒥𑒪𑒰 𑒑𑒰𑒛𑓃𑒲𑒏 𑒧𑒹𑒪 𑒮𑒏𑒩𑒱𑒨𑒹𑒧𑒹 𑒩𑒯𑒻 𑒧𑒳𑒠𑒰 𑒮𑒹 𑒢𑒻 𑒦𑒹𑒪𑒻। 𑒏𑒏𑒩𑒒𑒙𑒲𑒧𑒹 𑒧𑒹𑒪 𑒦𑒹𑒢𑒹 𑒣𑒕𑒥𑒩𑒱𑒨𑒰 𑒑𑒰𑒛𑓃𑒲 𑒣𑒕𑒳𑒂 𑒑𑒹𑒪। 𑒮𑓂𑒙𑒹𑒬𑒢𑒮𑒿 𑒟𑒼𑒛𑓃𑒥𑒹 𑒯𑒙𑒱 𑒏𑓄 𑒠𑒕𑒱𑒢𑒥𑒰𑒩𑒱 𑒦𑒰𑒑 𑒮𑒦𑒰𑒏 𑒂𑒨𑒼𑒖𑒢 𑒦𑒹𑒪।


𑒍𑒃 𑒮𑒧𑒋 𑒱𑒢𑒩𑓂𑒧𑒪𑒲𑒮𑒿 𑒮𑒧𑒮𑓂𑒞𑒲𑒣𑒳𑒩 𑒋𑒏𑒙𑒰 𑒑𑒰𑒛𑓃𑒲 𑒔𑒪𑒻𑒞 𑒩𑒯𑒻। 𑒥𑒛𑓃𑒲 𑒪𑒰𑒃𑒢𑒏 𑒏𑒞𑒾 𑒣𑒞𑒰 𑒢𑒻। 𑒧𑒳𑒠𑒰 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒪𑒛𑓃𑒰𑒃𑒏 𑒋𑒏𑒙𑒰 𑒧𑒳𑒠𑓂𑒠𑒰 𑒄𑒯𑒼 𑒩𑒯𑒻। 𑒏𑒐𑒢𑒼 𑒅𑒑𑓂𑒩 𑒞𑒿 𑒏𑒐𑒢𑒼 𑒡𑒲𑒧𑒲 𑒑𑒞𑒱𑒮𑒿 𑒔𑒪𑒱𑒞𑒹 𑒩𑒯𑒋। 𑒍𑒢𑒰 𑒣𑒴𑒥𑒼𑒮𑒿 𑒂 𑒣𑒔𑓂𑒕𑒱𑒧𑒼𑒮𑒿 𑒁𑒥𑒻𑒥𑒪𑒰 𑒑𑒰𑒛𑓃𑒲𑒏 𑒧𑒹𑒪 𑒮𑒏𑒩𑒱𑒨𑒹𑒧𑒹 𑒩𑒯𑒻 𑒧𑒳𑒠𑒰 𑒮𑒹 𑒢𑒻 𑒦𑒹𑒪𑒻। 𑒏𑒏𑒩𑒒𑒙𑒲𑒧𑒹 𑒧𑒹𑒪 𑒦𑒹𑒢𑒹 𑒣𑒕𑒥𑒩𑒱𑒨𑒰 𑒑𑒰𑒛𑓃𑒲 𑒣𑒕𑒳𑒂 𑒑𑒹𑒪𑒢𑒱। 𑒖𑒃 𑒏𑒰𑒩𑒝𑒹 𑒮𑒦𑒰𑒏 𑒂𑒨𑒼𑒖𑒢 𑒏𑒱𑒕𑒳 𑒥𑒱𑒪𑒧𑒱 𑒏𑓄 𑒦𑒹𑒪। 𑒮𑒏𑒩𑒲 𑒮𑓂𑒙𑒹𑒬𑒢𑒮𑒿 𑒟𑒼𑒛𑓃𑒥𑒹 𑒯𑒙𑒱 𑒏𑓄 𑒠𑒕𑒱𑒢𑒥𑒰𑒩𑒱 𑒦𑒰𑒑 𑒮𑒦𑒰𑒏 𑒂𑒨𑒼𑒖𑒢 𑒦𑒹𑒪। 𑒑𑒰𑒛𑓃𑒲𑒮𑒿 𑒅𑒞𑒩𑒱 𑒗𑓀𑒛𑒰 𑒤𑒯𑒩𑒥𑒻𑒞 𑒂 𑒢𑒰𑒩𑒰 𑒪𑒑𑒥𑒻𑒞 𑒖𑒴𑒪𑒴𑒮 𑒥𑒢𑒱 𑒮𑒦𑒰 𑒮𑓂𑒟𑒪 𑒣𑒯𑒳𑒿𑒔𑒪𑒰। 𑒞𑒃 𑒮𑓀𑒑 𑒗𑓀𑒗𑒰𑒩𑒣𑒳𑒩𑒏 𑒃𑒩𑓂𑒠-𑒱𑒑𑒩𑓂𑒠𑒏 𑒮𑒹𑒯𑒼 𑒥𑒯𑒳𑒞 𑒑𑒼𑒙𑒹 𑒮𑓀𑒑 𑒦𑓄 𑒑𑒹𑒪 𑒩𑒯𑒟𑒱𑒢𑓂𑒯। 𑒂𑒨𑒼𑒖𑒏 𑒩𑒯𑒟𑒱𑒢𑓂𑒯 𑒔𑒲𑒢𑒲 𑒧𑒱𑒪𑒏 𑒬𑓂𑒩𑒧𑒱𑒏-𑒮𑓀𑒑𑒲। 𑒍𑒃 𑒮𑒧𑒋 𑒕𑒥𑒹 𑒧𑒰𑒮 𑒧𑒱𑒪 𑒔𑒪𑒻। 𑒮𑒰𑒪𑒧𑒹 𑒕𑒯 𑒧𑒰𑒮 𑒏𑒰𑒖 𑒦𑒹𑒢𑒹 𑒕𑒯 𑒧𑒰𑒮 𑒥𑒻𑒮𑒰𑒩𑒲𑒏 𑒮𑒧𑒮𑓂𑒨𑒰 𑒩𑒯𑒥𑒹 𑒏𑒩𑒻। 𑒞𑒃 𑒮𑓀𑒑 𑒏𑒱𑒮𑒰𑒢𑒏𑒹𑒿 𑒢𑒯𑒱𑒨𑒹 𑒏𑒳𑒬𑒱𑒨𑒰𑒩𑒏 𑒏𑒙𑒢𑒲 𑒯𑒼𑒃 𑒂 𑒢𑒯𑒱𑒨𑒹 𑒮𑒧𑒻𑒣𑒩 𑒠𑒰𑒧 𑒦𑒹𑒙𑒻। 𑒮𑒹𑒯𑒼 𑒮𑒦 𑒮𑒧𑒮𑓂𑒨𑒰 𑒩𑒯𑒥𑒹 𑒏𑒩𑒻। 𑒏𑒳𑒬𑒱𑒨𑒰𑒩𑒏 𑒋𑒏𑒹 𑒏𑒱𑒮𑓂𑒧𑒏 𑒐𑒹𑒞𑒲 𑒯𑒼𑒃 𑒖𑒹 𑒁𑒑𑒯𑒢𑒧𑒹 𑒞𑒻𑒨𑒰𑒩 𑒦𑓄 𑒖𑒰𑒃। 𑒧𑒳𑒠𑒰 𑒢𑒧𑒯𑒩 𑒃𑒪𑒰𑒏𑒰𑒧𑒹 𑒐𑒹𑒞𑒲 𑒦𑒹𑒢𑒹, 𑒮𑒧𑒻𑒣𑒩 𑒏𑒙𑒢𑒲 𑒢𑒻 𑒦𑓄 𑒣𑒥𑒻। 𑒧𑒱𑒪𑒹 𑒏𑒧। 𑒖𑒞𑒥𑒹 𑒍 𑒣𑒹𑒛𑓃𑒱 𑒮𑒏𑒞 𑒞𑒞𑒥𑒹 𑒢𑒹 𑒪𑒹𑒞। 𑒞𑒯𑒴𑒧𑒹 𑒔𑒪𑒰𑒏𑒲 𑒍𑒏𑒩 𑒄 𑒩𑒯𑒻 𑒖𑒹 𑒬𑒳𑒩𑒴𑒧𑒹 𑒞𑒻𑒨𑒰𑒩 𑒦𑒹𑒢𑒹 𑒬𑒳𑒩𑒴𑒯𑒹𑒮𑒿 𑒢𑒲𑒏 𑒅𑒞𑓂𑒣𑒰𑒠𑒢 (𑒔𑒲𑒢𑒲𑒏 𑒧𑒰𑒞𑓂𑒩𑒰) 𑒯𑒳𑒁𑒋 𑒪𑒑𑒻 𑒂 𑒖𑒞𑒹 𑒣𑒕𑒳𑒂𑒃𑒞 𑒞𑒞𑒹 𑒩𑒮 𑒑𑒰𑒜𑓃 𑒦𑒹𑒢𑒹 𑒔𑒲𑒢𑒲𑒏 𑒧𑒰𑒞𑓂𑒩𑒰 𑒥𑒜𑓃𑒱 𑒖𑒰𑒃।
𑒣𑒔𑓂𑒕𑒱𑒧𑒮𑒿 𑒑𑒰𑒛𑓃𑒲 𑒁𑒥𑒱𑒞𑒹 𑒠𑒩𑒦𑓀𑒑𑒰-𑒖𑒰𑒪𑒹𑒏 𑒫𑒱𑒡𑒰𑒨𑒏 𑒐𑒰𑒠𑒱𑒧 𑒯𑒳𑒮𑒹𑒢 𑒮𑓀𑒑𑒹 𑒦𑒼𑒑𑒹𑒢𑓂𑒠𑓂𑒩 𑒖𑒲 𑒯𑒰𑒟𑒧𑒹 𑒔𑒧𑒛𑓃𑒰𑒏 𑒥𑒻𑒑 𑒪𑒙𑒏𑒾𑒢𑒹 𑒂𑒑𑒴-𑒂𑒑𑒴 𑒂 𑒠𑒮 𑒣𑒢𑒩𑒯 𑒑𑒼𑒙𑒹 𑒣𑒰𑒕𑒴-𑒣𑒰𑒕𑒴 𑒮𑓂𑒙𑒹𑒬𑒢𑒮𑒿 𑒮𑒦𑒰 𑒮𑓂𑒟𑒪 𑒣𑒯𑒳𑒿𑒔𑒪𑒰। 𑒯𑒰𑒤 𑒬𑒩𑓂𑒙 𑒡𑒼𑒞𑒲 𑒣𑒯𑒱𑒩𑒢𑒹। 𑒣𑒋𑒩𑒧𑒹 𑒔𑒧𑒛𑓃𑒰𑒏 𑒖𑒴𑒞𑒰। 𑒧𑓀𑒔𑒣𑒩 𑒮𑒿 𑒢𑒰𑒩𑒰 𑒯𑒳𑒁𑒋 𑒪𑒰𑒑𑒪। 𑒂𑒡𑒰𑒮𑒿 𑒥𑒹𑒮𑒲 𑒧𑓀𑒔 𑒦𑒩𑒪। 𑒖𑒹 𑒫𑒏𑓂𑒞𑒰 𑒥𑒖𑒻𑒞 𑒩𑒯𑒟𑒱 𑒍 𑒁𑒣𑒢 𑒫𑒱𑒔𑒰𑒩 𑒮𑒧𑓂𑒣𑒢𑓂𑒢 𑒏𑒹𑒪𑒢𑒱। 𑒔𑒲𑒢𑒲 𑒧𑒱𑒪𑒏 𑒙𑓂𑒩𑒹𑒛-𑒨𑒳𑒢𑒱𑒨𑒢𑒏 𑒖𑒹 𑒢𑒹𑒞𑒰 𑒩𑒯𑒟𑒱 𑒍 𑒫𑒱𑒮𑓂𑒞𑒰𑒩𑒮𑒿 𑒁𑒣𑒢 𑒮𑒧𑒮𑓂𑒨𑒰 𑒩𑒐𑒪𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒂𑒑𑒴𑒮𑒿 𑒢𑒱𑒔𑓂𑒔𑒰𑒧𑒹 𑒥𑒻𑒮𑒪 𑒩𑒯𑒟𑒱। 𑒦𑒼𑒑𑒹𑒢𑓂𑒠𑓂𑒩𑒖𑒲 𑒠𑒱𑒮𑒮𑒿 𑒥𑒖𑒻𑒮𑒿 𑒣𑒯𑒱𑒢𑒹 𑒂𑒢𑒹 𑒮𑒦𑒰 𑒖𑒏𑒰𑒿 𑒣𑓂𑒩𑒬𑓂𑒢𑒏 𑒂𑒑𑓂𑒩𑒯 𑒦𑒹𑒪। 𑒏𑒱𑒕𑒳 𑒣𑓂𑒩𑒬𑓂𑒢 𑒋𑒥𑒼 𑒏𑒋𑒪।
𑒁𑒜𑓃𑒰𑒃-𑒞𑒲𑒢 𑒒𑓀𑒙𑒰𑒏 𑒣𑒕𑒰𑒞𑒱 𑒮𑒦𑒰 𑒫𑒱𑒮𑒩𑓂𑒖𑒢 𑒦𑒹𑒪। 𑒮𑒦𑒰𑒧𑒹 𑒦𑒰𑒑 𑒪𑒹𑒢𑒱𑒯𑒰𑒩 𑒔𑒰𑒩𑒴 𑒏𑒰𑒞𑒏 𑒪𑒼𑒏 𑒔𑒪𑒱 𑒑𑒹𑒪𑒰𑒯, 𑒧𑒳𑒠𑒰 𑒑𑒰𑒛𑓃𑒲𑒥𑒪𑒰 𑒮𑒦 𑒮𑓂𑒙𑒹𑒬𑒢𑒣𑒩 𑒂𑒥𑒱 𑒑𑒹𑒪𑒰। 𑒠𑒳𑒢𑒴 𑒑𑒰𑒛𑓃𑒲 (𑒢𑒱𑒩𑒧𑒪𑒲 𑒂 𑒖𑒨𑒢𑒑𑒩𑒫𑒰𑒪𑒲) 𑒧𑒹 𑒋𑒏-𑒛𑒹𑒜𑓃 𑒒𑓀𑒙𑒰 𑒠𑒹𑒩𑒲 𑒩𑒯𑒻। 𑒮𑓂𑒙𑒹𑒬𑒢𑒹𑒣𑒩 𑒦𑒼𑒑𑒹𑒢𑓂𑒠𑓂𑒩𑒖𑒲𑒮𑒿 𑒣𑒯𑒱𑒪 𑒦𑒹𑒿𑒙 𑒂 𑒮𑒼𑒗𑒰-𑒮𑒼𑒗𑒲 𑒣𑒩𑒱𑒔𑒋 𑒦𑒹𑒪𑒢𑓂𑒯𑒱।
𑒣𑒯𑒱𑒪𑒹-𑒣𑒯𑒱𑒪 𑒦𑒼𑒑𑒹𑒢𑓂𑒠𑓂𑒩𑒖𑒲 𑒣𑒰𑒩𑓂𑒪𑒱𑒨𑒰𑒧𑒹𑓀𑒙𑒏 𑒮𑒠𑒮𑓂𑒨 𑒦𑒹𑒪 𑒩𑒯𑒟𑒱। 𑒖𑒯𑒱𑒢𑒰 𑓑𑓙𑓔𑓒𑒄.𑒧𑒹 𑒁𑓀𑒑𑓂𑒩𑒹𑒖𑒏 𑒐𑒱𑒪𑒰𑒤 𑒠𑒹𑒬𑒏 𑒖𑒢-𑒖𑒢𑒧𑒹 𑒩𑒰𑒖𑒢𑒲𑒞𑒱𑒏 𑒢𑒫 𑒔𑒹𑒞𑒢𑒰 𑒖𑒰𑒑𑒪 𑒩𑒯𑒻 𑒞𑒯𑒱𑒢𑒰 𑓑𑓙𑓖𑓗 𑒄.𑒏 𑒔𑒳𑒢𑒰𑒫𑒏 𑒣𑒕𑒰𑒞𑒱 𑒮𑒹𑒯𑒼 𑒦𑒹𑒪। 𑒥𑒱𑒯𑒰𑒩𑒼𑒧𑒹 𑒍𑒯𑒢-𑒍𑒯𑒢 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲 𑒥𑒯𑒳𑒧𑒞𑒧𑒹 𑒂𑒋𑒪 𑒖𑒹 𑒁𑒐𑒢 𑒡𑒩𑒱 (𑓑𑓙𑓖𑓗) 𑒫𑒱𑒡𑒰𑒢 𑒮𑒦𑒰𑒧𑒹 𑒢𑒻 𑒣𑒯𑒳𑒿𑒔𑒪 𑒕𑒪। 𑒖𑒹 𑒣𑒰𑒩𑓂𑒙𑒲 (𑒏𑒰𑒿𑒑𑓂𑒩𑒹𑒮) 𑒁𑒐𑒢 𑒡𑒩𑒱 𑒥𑒱𑒯𑒰𑒩𑒼𑒧𑒹 𑒮𑒞𑓂𑒞𑒰-𑒮𑒲𑒢 𑒩𑒯𑒪 𑒍 𑒢𑒲𑒏 𑒯𑒰𑒩𑒱𑒏 𑒧𑒳𑒿𑒯 𑒠𑒹𑒐𑒪𑒏। 𑒍𑒢𑒰 𑒥𑒱𑒯𑒰𑒩𑒹 𑒧𑒰𑒞𑓂𑒩𑒧𑒹 𑒢𑒻 𑒂𑒢𑒼-𑒂𑒢𑒼 𑒩𑒰𑒖𑓂𑒨𑒧𑒹 𑒦𑒹𑒪। 𑒏𑒰𑒿𑒑𑓂𑒩𑒹𑒮𑒼 𑒋𑒏 𑒑𑓂𑒩𑒳𑒣 𑒙𑒴𑒙𑒱 𑒏𑓄 𑒖𑒢𑒏𑓂𑒩𑒰𑓀𑒞𑒱 𑒠𑒪 𑒏𑓄 𑒏𑓄 𑒣𑒰𑒩𑓂𑒙𑒲𑒧𑒹 𑒅𑒞𑒩𑒪 𑒕𑒪। 𑒏𑒰𑒿𑒑𑓂𑒩𑒹𑒮 𑒫𑒱𑒩𑒼𑒡𑒲 𑒠𑒪𑒏 𑒮𑓂𑒣𑒭𑓂𑒙 𑒥𑒯𑒳𑒧𑒞 𑒦𑒹𑒪 𑒕𑒪। 𑒧𑒳𑒐𑓂𑒨 𑒣𑒰𑒩𑓂𑒙𑒲𑒏 𑒩𑒴𑒣𑒧𑒹 𑒮𑒼𑒬𑒪𑒱𑒮𑓂𑒙 𑒣𑒰𑒩𑓂𑒙𑒲 𑒂 𑒏𑒧𑒼-𑒥𑒹𑒬𑒲 𑒂𑒢𑒼-𑒂𑒢𑒼 𑒣𑒰𑒩𑓂𑒙𑒲 𑒖𑒲𑒞𑒪। 𑒱𑒮𑒩𑓂𑒤 𑒫𑒱𑒡𑒰𑒢 𑒮𑒦𑒰𑒧𑒹 𑒋𑒯𑒹𑒢 𑒣𑒩𑒱𑒫𑒩𑓂𑒞𑓂𑒞𑒢 𑒦𑒹𑒪 𑒮𑒹 𑒥𑒰𑒞 𑒢𑒻, 𑒑𑒰𑒧-𑒑𑒰𑒧𑒏 𑒖𑒢-𑒑𑒝𑒧𑒹 𑒁𑒣𑒢 𑒯𑒰𑒩-𑒖𑒲𑒞 𑒮𑒹𑒯𑒼 𑒧𑒯𑒮𑒴𑒮 𑒦𑒹𑒪। 𑒥𑒹𑒫𑒯𑒰𑒩𑒱𑒏 𑒠𑒾𑒛𑓃𑒧𑒹 𑒖𑒹 𑒏𑒱𑒕𑒳 𑒧𑒳𑒠𑒰 𑒦𑒰𑒭𑒝𑒏 𑒏𑓂𑒩𑒧 (𑒮𑒱𑒠𑓂𑒡𑒰𑒢𑓂𑒞𑒱𑒏) 𑒧𑒹 𑒞𑒿 𑒖𑒢𑒞𑒰𑒏 𑒮𑒦 𑒮𑒧𑒮𑓂𑒨𑒰 𑒮𑒰𑒧𑒢𑒹 𑒌𑒥𑒹 𑒏𑒋𑒪। 𑒏𑒰𑒩𑒝 𑒖𑒹 𑒮𑒦 𑒣𑒰𑒩𑓂𑒙𑒲𑒏 𑒁𑒣𑒢-𑒁𑒣𑒢 𑒫𑒱𑒔𑒰𑒩 𑒞𑒿 𑒪𑒼𑒏𑒏 𑒥𑒲𑒔 𑒣𑒯𑒱𑒢𑒹𑒮𑒿 𑒂𑒥𑒱 𑒩𑒯𑒪 𑒕𑒪। 𑓓𑓔 𑒙𑒰 𑒮𑒲𑒙 𑒧𑒰𑒢𑒹 𑓓𑓔 𑒙𑒰 𑒫𑒱𑒡𑒰𑒨𑒏 𑒫𑒱𑒡𑒰𑒢 𑒮𑒦𑒰𑒧𑒹 𑒂 𑒣𑒰𑒢-𑒮𑒰𑒞𑒙𑒰 𑒣𑒰𑒩𑓂𑒪𑒱𑒨𑒰𑒧𑒹𑓀𑒙𑒼𑒧𑒹 𑒣𑒯𑒳𑒿𑒔𑒪𑒰𑒯। 𑒂𑒖𑒰𑒠𑒲𑒏 𑒣𑒕𑒰𑒞𑒱 𑒣𑒯𑒱𑒪 𑒥𑒹𑒩 𑒂𑒧 𑒖𑒢 𑒮𑒞𑓂𑒞𑒰 (𑒬𑒰𑒮𑒢) 𑒠𑒱𑒮 𑒞𑒏𑒪𑒏। 𑒍𑒢𑒰 𑒁𑒐𑒢 𑒡𑒩𑒱 𑒮𑒩𑒏𑒰𑒩𑒏 𑒁𑒩𑓂𑒟 𑒂𑒧 𑒖𑒢-𑒑𑒝 𑒏𑒼𑒙𑒰𑒏 𑒬𑒰𑒮𑒢𑒏 𑒧𑒙𑒱𑒨𑒰 𑒞𑒹𑒪 𑒂 𑒖𑒹 𑒧𑒳𑒐𑓂𑒨 𑒫𑒱𑒢𑓂𑒠𑒳 𑒏𑒼𑒙𑒰𑒏 𑒫𑒮𑓂𑒞𑒳 𑒥𑒢𑒪 𑒕𑒪। 𑒛𑒲𑒪𑒩𑒏 𑒏𑒰𑒖𑒏 𑒪𑒹𑒐𑒰-𑒖𑒼𑒐𑒰 𑒦𑒩𑒱 𑒬𑒰𑒮𑒢 𑒔𑒪𑒻 𑒕𑒪। 𑒂𑒢-𑒂𑒢 𑒮𑒧𑒮𑓂𑒨𑒰 𑒞𑒿 𑒦𑒰𑒭𑒝𑒹𑒏 𑒏𑓂𑒩𑒧𑒧𑒹 𑒕𑒪। 𑒏𑒱𑒕𑒳-𑒢𑒹-𑒏𑒱𑒕𑒳 𑒥𑒰𑒜𑓃𑒱-𑒩𑒾𑒠𑒲 𑒔𑒪𑒱𑒞𑒹 𑒕𑒪 𑒍𑒏𑒩𑒹 𑒥𑒔𑒥𑒻𑒏 𑒅𑒣𑒰𑒋 𑒮𑒩𑒏𑒰𑒩𑒏 𑒏𑒯𑒥 𑒩𑒯𑒻 𑒕𑒪𑒻। 𑒢𑒫𑒏𑒰 𑒞𑒴𑒩 (𑒂𑒖𑒰𑒠𑒲𑒏 𑒏𑒩𑒲𑒥 𑒂 𑒣𑒕𑒰𑒞𑒱𑒏) 𑒮𑒹𑒯𑒼 𑒖𑒳𑒂𑒢 𑒦𑒹𑒪। 𑒖𑒃𑒮𑒿 𑒂𑒢𑒼-𑒂𑒢𑒼 𑒏𑒰𑒖 (𑒮𑒩𑒏𑒰𑒩𑒏) 𑒮𑒼𑒗𑒰𑒧𑒹 𑒂𑒋𑒪। 𑒁𑒐𑒳𑒢𑒏𑒰 𑒧𑒡𑒳𑒥𑒢𑒲 𑒖𑒱𑒪𑒰 𑒖𑒹 𑒍𑒃 𑒠𑒱𑒢𑒧𑒹 𑒁𑒢𑒳𑒧𑓀𑒛𑒪 𑒕𑒪। 𑒋𑒑𑒰𑒩𑒯𑒙𑒰 𑒋𑒧.𑒋𑒪.𑒋. 𑒂 𑒠𑒴𑒙𑒰 𑒋𑒧.𑒣𑒲.𑒧𑒹 𑒥𑒿𑒙𑒰𑒋𑒪 𑒕𑒪। 𑒕𑒯-𑒕𑒯𑒙𑒰 𑒋𑒧.𑒋𑒪.𑒋. 𑒣𑒩 𑒋𑒧.𑒣𑒲. 𑒞𑒿 𑒠𑒩𑒦𑓀𑒑𑒰𑒏 𑒖𑒰𑒪𑒹 𑒏𑓂𑒭𑒹𑒞𑓂𑒩 𑒮𑒹𑒯𑒼 𑒧𑒡𑒳𑒥𑒢𑒱𑒨𑒹𑒧𑒹।
𑒍𑒢𑒰 𑒁𑒐𑒳𑒢𑒏𑒰 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒣𑒕𑒱𑒧𑒲 𑒦𑒰𑒑𑒧𑒹 𑒖𑒧𑒲𑒢𑒏 𑒪𑒛𑓃𑒰𑒄 𑒮𑒹𑒯𑒼 𑒢𑒲𑒏 𑒖𑒏𑒰𑒿 𑒔𑒪𑒱 𑒩𑒯𑒪 𑒕𑒪, 𑒧𑒳𑒠𑒰 𑒧𑒳𑒐𑓂𑒨 𑒕𑒪 𑒣𑒕𑒱𑒧𑒲 𑒏𑒼𑒮𑒲 𑒢𑒯𑒩। 𑒧𑒱𑒟𑒱𑒪𑒰𑓀𑒔𑒪𑒧𑒹 𑒏𑒼𑒮𑒲, 𑒏𑒧𑒪𑒰, 𑒥𑒰𑒑𑒧𑒞𑒲𑒏 𑒖𑒹 𑒅𑒣𑒠𑓂𑒩𑒫 𑒮𑒰𑒪𑒹-𑒮𑒰𑒪 𑒔𑒪𑒱 𑒩𑒯𑒪 𑒕𑒻 𑒂 𑒏𑓂𑒭𑒞𑒱 𑒣𑒯𑒳𑒿𑒔𑒥𑒻 𑒕𑒻, 𑒦𑒩𑒱𑒮𑒏 𑒞𑒞𑒹𑒙𑒰 𑒥𑒖𑒙𑒼 𑒢𑒹 𑒏𑒞𑒹 𑒮𑒩𑒏𑒰𑒩𑒏𑒹𑒿 𑒯𑒼𑒃 𑒕𑒻। 𑒐𑒻𑒩 𑒖𑒹 𑒯𑒼𑒅! 𑒅𑒢𑒻𑒮 𑒮𑒋 𑒮𑒰𑒚𑒱𑒏 𑒠𑒬𑒏𑒏 𑒮𑒫𑒰𑒪, 𑒮𑒧𑒮𑓂𑒨𑒰 𑒂 𑒪𑒛𑓃𑒰𑒄 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒧𑒳𑒐𑓂𑒨 𑒪𑒛𑓃𑒰𑒄 𑒩𑒯𑒪 𑒖𑒹𑒏𑒩 𑒠𑒬𑒰, 𑒧𑒢𑒳𑒭𑓂𑒨𑒏 𑒋𑒏 𑒖𑒱𑒢𑒑𑒲𑒏 (𑓖𑓕-𑓖𑓖 𑒥𑒩𑓂𑒐) 𑒅𑒣𑒩𑒰𑒢𑓂𑒞𑒼 𑒏𑒱 𑒁𑒕𑒱, 𑒮𑒥𑒯𑒏 𑒮𑒼𑒗𑒹𑒧𑒹 𑒁𑒕𑒱। 𑒖𑒾𑓀 𑒨𑒼𑒖𑒢𑒰 𑒯𑒱𑒮𑒰𑒥𑒮𑒿 𑒏𑒰𑒖 𑒯𑒼𑒃𑒞 𑒞𑒿 𑒂𑒖𑒳𑒏 𑒧𑒱𑒟𑒱𑒪𑒰 𑒄 𑒧𑒱𑒟𑒱𑒪𑒰 𑒢𑒻, 𑒍 𑒧𑒱𑒟𑒱𑒪𑒰 𑒥𑒢𑒱 𑒑𑒹𑒪 𑒩𑒯𑒻𑒞 𑒖𑒃 𑒧𑒱𑒟𑒱𑒪𑒰𑒧𑒹 𑒇𑒵𑒭𑒱-𑒧𑒳𑒢𑒱 𑒃𑒔𑓂𑒕𑒰𑒢𑒳𑒮𑒰𑒩 𑒥𑒩𑓂𑒐𑒰 𑒥𑒩𑒱𑒮𑒥𑒻𑒞 𑒕𑒪𑒰𑒯। 𑒋𑒞𑒹 𑒣𑒢𑒱𑒥𑒱𑒖𑒪𑒲𑒏 𑒅𑒞𑓂𑒣𑒰𑒠𑒢 𑒯𑒼𑒃𑒞 𑒖𑒹 𑒒𑒩-𑒒𑒩𑒧𑒹 𑒣𑒯𑒳𑒿𑒔𑒪 𑒩𑒯𑒻𑒞। 𑒖𑒃𑒮𑒿 𑒖𑒰𑒣𑒰𑒢 𑒖𑒏𑒰𑒿 𑒪𑒒𑒳-𑒅𑒠𑓂𑒨𑒼𑒑𑒏 𑒮𑓀𑒑-𑒮𑓀𑒑 𑒦𑒰𑒩𑒱𑒨𑒼 𑒅𑒠𑓂𑒨𑒼𑒑 𑒪𑒰𑒑𑒱 𑒑𑒹𑒪 𑒩𑒯𑒻𑒞। 𑒧𑒳𑒠𑒰 𑒂𑒃 𑒏𑒱 𑒠𑒹𑒐𑒻 𑒕𑒲। 𑒔𑒳𑒢𑒰𑒫 𑒯𑒼𑒃𑒞 𑒩𑒯𑒪, 𑒋𑒧𑒹𑒪𑒹-𑒋𑒧𑒣𑒲 𑒥𑒠𑒪𑒻𑒞 𑒩𑒯𑒪𑒰𑒯। 𑒧𑒳𑒠𑒰 𑒮𑒧𑒮𑓂𑒨𑒰 𑒂𑒃 𑒍𑒯𑒢 𑒫𑒱𑒏𑒩𑒰𑒪 𑒩𑒴𑒣 𑒪𑓄 𑒪𑒹𑒪𑒏 𑒁𑒕𑒱 𑒖𑒹 𑒂𑒩𑓂𑒟𑒱𑒏 𑒞𑓀𑒑𑒲𑒏 𑒔𑒪𑒻𑒞 𑒠𑒱𑒢-𑒠𑒯𑒰𑒩 𑒪𑒴𑒙-𑒣𑒰𑒙 𑒦𑓄 𑒩𑒯𑒪 𑒁𑒕𑒱। 𑒖𑒿 𑒖𑒰𑒣𑒰𑒢, 𑒖𑒩𑓂𑒧𑒢𑒲 𑒂 𑒣𑒛𑓃𑒼𑒮𑒲 𑒠𑒹𑒬 𑒔𑒲𑒢𑒏 𑒖𑒧𑒲𑒢𑒏 𑒣𑓂𑒩𑒞𑒱 𑒋𑒏𑒛𑓃 𑒅𑒣𑒖𑒰𑒏 𑒞𑒳𑒪𑒢𑒰 𑒁𑒣𑒢 𑒧𑒱𑒟𑒱𑒪𑒰𑓀𑒔𑒪𑒏 𑒦𑒴𑒧𑒱𑒮𑒿 𑒏𑒩𑒥 𑒞𑒿 𑒂𑒬𑓂𑒔𑒨𑒹 𑒢𑒻 𑒥𑒱𑒮𑒫𑒰𑒮𑒼 𑒢𑒻 𑒯𑒋𑒞। 𑒏𑒱 𑒧𑒱𑒟𑒱𑒪𑒰𑒧𑒹 𑒱𑒮𑒩𑓂𑒤 𑒮𑒰𑒜𑓃𑒹 𑒞𑒲𑒢 𑒯𑒰𑒟𑒏 𑒧𑒢𑒳𑒐𑒹𑒙𑒰 𑒁𑒕𑒱 𑒖𑒹𑒏𑒩𑒰 𑒧𑒰𑒞𑓂𑒩 𑒣𑒹𑒙𑒹𑒙𑒰 𑒕𑒻 𑒂𑒏𑒱 𑒍𑒏𑒩𑒰 𑒠𑒴𑒙𑒰 𑒯𑒰𑒟𑒼-𑒣𑒋𑒩 𑒕𑒻 𑒂 𑒧𑒰𑒞𑒵𑒦𑒴𑒧𑒱𑒨𑒼 𑒕𑒻। 𑒧𑒱𑒟𑒱𑒪𑒰𑓀𑒔𑒪𑒏 𑒍 𑒦𑒴𑒧𑒱 𑒂 𑒖𑒪𑒫𑒰𑒨𑒳 𑒁𑒕𑒱 𑒖𑒹 𑒠𑒳𑒢𑒱𑒨𑒰𑒿𑒧𑒹 𑒏𑒞𑒾 𑒢𑒻 𑒁𑒕𑒱। 𑒢𑒹 𑒋𑒞𑒹 𑒮𑒳𑒢𑓂𑒠𑒩 𑒧𑒳𑒪𑒰𑒃𑒧 𑒧𑒰𑒙𑒱 𑒁𑒕𑒱 𑒂 𑒢𑒹 𑒋𑒯𑒹𑒢 𑒢𑒲𑒏 𑒣𑒰𑒢𑒱 𑒁𑒕𑒱 𑒂 𑒢𑒹 𑒋𑒞𑒹 𑒩𑓀𑒑𑒏 𑒧𑒾𑒮𑒧 𑒁𑒕𑒱। 𑒧𑒳𑒠𑒰 𑒂𑒃 𑒏𑒱 𑒠𑒹𑒐𑒻 𑒕𑒲? 𑒢𑒹 𑒁𑒐𑒢 𑒡𑒩𑒱 𑒢𑒹𑒣𑒰𑒪 𑒮𑒩𑒏𑒰𑒩𑒮𑒿 𑒢𑒲𑒏 𑒖𑒏𑒰𑒿 𑒮𑒧𑒗𑒾𑒞𑒰 𑒦𑒹𑒪 𑒁𑒕𑒱 𑒂 𑒢𑒹 𑒏𑒼𑒮𑒲𑒏 𑒣𑒕𑒱𑒧𑒲-𑒣𑒴𑒩𑓂𑒥𑒲 𑒢𑒯𑒩𑒱𑒏 𑒮𑒧𑒳𑒔𑒱𑒞 𑒫𑒱𑒏𑒰𑒮। 𑒋𑒏 𑒞𑒿 𑒨𑒼𑒖𑒢𑒰𑒏 𑒏𑒰𑒖 𑒣𑒕𑒳𑒂𑒋𑒪 𑒞𑒃𑒣𑒩 𑒏𑒰𑒖𑒏 𑒋𑒯𑒹𑒢 𑒣𑒹𑓀𑒔-𑒣𑒰𑒿𑒔 𑒁𑒕𑒱 𑒖𑒹 𑒋𑒏 𑒢𑒯𑒩 𑒥𑒢𑒥 𑒏𑒚𑒱𑒢 𑒁𑒕𑒱, 𑒠𑒼𑒮𑒩 𑒥𑒢𑒪𑒰𑒣𑒩 𑒍 𑒮𑒧𑒳𑒔𑒱𑒞 𑒏𑒰𑒖 𑒏𑒚𑒱𑒢 𑒁𑒕𑒱। 𑒣𑒰𑒢𑒱 𑒆𑒣𑒩𑒮𑒿 𑒢𑒱𑒔𑓂𑒔𑒰𑒿 𑒁𑒮𑒰𑒢𑒲𑒮𑒿 𑒁𑒥𑒻𑒞 𑒁𑒕𑒱। 𑒧𑒳𑒠𑒰 𑒢𑒱𑒔𑓂𑒔𑒰𑒮𑒿 𑒆𑒣𑒩 𑒁𑒮𑒰𑒢𑒲𑒮𑒿 𑒖𑒰𑒋𑒞? 𑒢𑒻 𑒖𑒰𑒋𑒞। 𑒖𑒿 𑒑𑒯𑒲𑓀𑒩𑒧𑒹 𑒢𑒯𑒩 𑒐𑒳𑒢𑒱 𑒠𑒹𑒪 𑒖𑒰𑒋 𑒞𑒿 𑒍𑒏𑒩 𑒣𑒰𑒢𑒱 𑒆𑒣𑒩 𑒏𑒹𑒢𑒰 𑒖𑒹𑒞𑒃। 𑒯𑒿 𑒧𑒬𑒲𑒢𑒏 𑒧𑒰𑒡𑓂𑒨𑒧𑒮𑒿 𑒖𑒰 𑒮𑒏𑒻𑒋, 𑒧𑒳𑒠𑒰 𑒒𑒩𑒧𑒹 𑒤𑒳𑒮𑒱-𑒤𑒰𑒮𑒱, 𑒮𑒼𑒧 𑒠𑒱𑒢 𑒥𑒱𑒂𑒯। 𑒖𑒃𑒚𑒰𑒧 𑒞𑓂𑒩𑒹𑒞𑒰 𑒨𑒳𑒑𑒏 𑒞𑒲𑒢 𑒱𑒫𑒞𑓂𑒞𑒰 𑒯𑒩, 𑒂 𑒮𑒞𑒨𑒳𑒑𑒏 𑒥𑒮𑒯𑒰 𑒥𑒛𑓃𑒠𑒮𑒿 𑒋𑒐𑒢𑒼 𑒐𑒹𑒞𑒲 𑒯𑒼𑒃𑒋 𑒞𑒃𑒚𑒰𑒧 𑒏𑒹𑒢𑒰 𑒧𑒰𑒢𑒪 𑒖𑒰𑒋𑒞।
𑒮𑓂𑒙𑒹𑒬𑒢𑒣𑒩 𑒣𑓂𑒪𑒹𑒙𑒤𑒰𑒩𑓂𑒧 𑒂𑒥𑒱 𑒮𑒦 𑒑𑒼𑒪𑒱𑒨𑒰 𑒏𑓄 𑒥𑒻𑒮𑒪𑒰। 𑒣𑒪𑓂𑒟𑒰 𑒧𑒰𑒩𑒱 𑒦𑒼𑒑𑒹𑒢𑓂𑒠𑓂𑒩𑒖𑒲 𑒮𑒦𑒏𑒹𑒿 𑒮𑒹𑒯𑒼 𑒞𑒯𑒱𑒢𑒰 𑒥𑒻𑒮𑒋 𑒏𑒯𑒪𑒐𑒱𑒢। 𑒑𑒰𑒛𑓃𑒲 𑒣𑒏𑒛𑓃𑒻𑒪𑒹 𑒮𑒥𑒯𑒏 𑒧𑒢 𑒕𑒢𑒑𑒪। 𑒣𑒪𑓂𑒟𑒰 𑒧𑒰𑒱𑒩 𑒥𑒻𑒮𑒻𑒏 𑒁𑒩𑓂𑒟 𑒢𑒱𑒬𑓂𑒔𑒱𑒢𑓂𑒞𑒲। 𑒣𑒯𑒱𑒢𑒹 𑒍 𑒮𑒦𑒏𑒹𑒿 𑒢𑒰𑒍𑓀-𑒚𑒹𑒏𑒰𑒢 𑒣𑒳𑒕𑒪𑒐𑒱𑒢। 𑒢𑒰𑒍𑓀-𑒚𑒹𑒏𑒰𑒢 𑒣𑒳𑒕𑒪𑒰 𑒅𑒞𑓂𑒞𑒩 𑒏𑒯𑒪𑒐𑒱𑒢, 𑒏𑒧𑓂𑒨𑒳𑒢𑒱𑒮𑓂𑒙 𑒁𑒣𑒢 𑒣𑒰𑒩𑓂𑒙𑒲 𑒕𑒲, 𑒁𑒣𑒢 𑒣𑒰𑒩𑓂𑒙𑒲𑒏 𑒄 𑒁𑒩𑓂𑒟 𑒢𑒻 𑒖𑒹 𑒏𑒼𑒢𑒼 𑒖𑒰𑒞𑒱-𑒧𑒖𑒯𑒥𑒏 𑒯𑒼𑒃, 𑒧𑒢𑒳𑒐-𑒧𑒰𑒞𑓂𑒩𑒏 𑒣𑒰𑒩𑓂𑒙𑒲 𑒕𑒲। 𑒯𑒧𑒩𑒰 𑒮𑒦𑒏𑒹𑒿 𑒍𑒯𑒢 𑒮𑒧𑒰𑒖 𑒥𑒢𑒰𑒋𑒥𑒰𑒏 𑒁𑒕𑒱 𑒖𑒃𑒧𑒹 𑒢𑒹 𑒏𑒱𑒨𑒼 𑒦𑒴𑒐𑒪 𑒩𑒯𑒞 𑒂 𑒢𑒹 𑒢𑒰𑓀𑒑𑒙। 𑒮𑒥𑒯𑒏 𑒥𑒰𑒪-𑒥𑒔𑓂𑒔𑒰 𑒣𑒜𑓃𑒞𑒻, 𑒮𑒦𑒏𑒹𑒿 𑒩𑒼𑒑-𑒫𑓂𑒨𑒰𑒡𑒱𑒏 𑒃𑒪𑒰𑒖 𑒯𑒹𑒞𑒃 𑒞𑒐𑒢 𑒢𑒹 𑒮𑒦 𑒂𑒑𑒴 𑒧𑒳𑒿𑒯𑒹𑒿 𑒥𑒜𑓃𑒻𑒏 𑒏𑒼𑒬𑒱𑒬 𑒏𑒩𑒞𑒰। 𑒁𑒣𑒢𑒰 𑒌𑒚𑒰𑒧 𑒖𑒹 𑒇𑒵𑒭𑒱-𑒧𑒳𑒢𑒱 𑒦𑒹𑒪𑒰𑒯, 𑒍 𑒏𑒲 𑒏𑒹𑒪𑒢𑒱? 𑒯𑒳𑒢𑒏𑒰 𑒢𑒻 𑒁𑒣𑒢 𑒮𑒳𑒐𑒏 𑒔𑒱𑒢𑓂𑒞𑒰 𑒕𑒪𑒢𑒱। 𑒏𑒱𑒁𑒋 𑒍 𑒮𑒦 𑒁𑒣𑒢 𑒖𑒱𑒢𑒑𑒲 𑒑𑒪𑒰 𑒪𑒹𑒪𑒢𑒱। 𑒍 𑒮𑒦 𑒥𑒯𑒳𑒞 𑒏𑒹𑒪𑒢𑒱। 𑒖𑒿 𑒮𑒹 𑒢𑒻 𑒏𑒹𑒪𑒢𑒱 𑒞𑒿 𑒋𑒏 𑒏𑒙𑓂𑒚𑒰 𑒖𑒧𑒲𑒢𑒧𑒹 𑒖𑒲𑒫𑒢 𑒥𑒮𑒩 𑒏𑒩𑒻𑒞 𑒏𑒹𑒢𑒰 𑒕𑒪𑒰। 𑒧𑒳𑒠𑒰 𑒁𑒣𑒢 𑒡𑒩𑒼𑒯𑒩𑒱𑒏𑒹𑒿 𑒖𑒿 𑒞𑒰𑒪𑒰 𑒪𑒑𑒰 𑒩𑒐𑒥𑒻 𑒞𑒿 𑒏𑒹 𑒥𑒴𑒗𑒞? 𑒪𑒐𑒢𑒖𑒲 (𑒛𑒰. 𑒪𑒏𑓂𑒭𑓂𑒧𑒝 𑒗𑒰) 𑒧𑒱𑒟𑒱𑒪𑒰𑓀𑒔𑒪𑒏 𑒪𑒹𑒪 𑒖𑒹 𑒖𑒱𑒢𑒑𑒲 𑒮𑒧𑒩𑓂𑒣𑒱𑒞 𑒏𑒹𑒪𑒢𑒱 𑒮𑒹 𑒏𑒱 𑒏𑒹𑒪𑒢𑒱। 𑒏𑒹 𑒥𑒴𑒗𑒞?

𑒞𑒲𑒢 𑒠𑒱𑒢𑒏 𑒫𑓂𑒨𑒮𑓂𑒞 𑒏𑒰𑒩𑓂𑒨𑒏𑓂𑒩𑒧𑒧𑒹 𑒯𑒳𑒢𑒏𑒩 𑒣𑒰𑒿𑒔𑒚𑒰𑒧𑒏 𑒣𑓂𑒩𑒼𑒑𑓂𑒩𑒰𑒧 𑒩𑒯𑒢𑒱, 𑒍𑒃 𑒮𑒧𑒰𑒣𑓂𑒞𑒱𑒏 𑒞𑒰𑒩𑒲𑒐 𑒥𑒱𑒞𑒰 𑒞𑒹𑒮𑒩 𑒠𑒱𑒢𑒏 𑒣𑓂𑒩𑒼𑒑𑓂𑒩𑒰𑒧 𑒍 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒖𑒲 𑒏𑒹𑒿 𑒠𑓄 𑒠𑒹𑒪𑒢𑒱।

𑒠𑒱𑒪𑓂𑒪𑒲 𑒖𑒰𑒃𑒮𑒿 𑒣𑒯𑒱𑒢𑒹 𑒦𑒼𑒑𑒹𑒢𑓂𑒠𑓂𑒩𑒖𑒲 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒖𑒱𑒪𑒰-𑒏𑒰𑒩𑓂𑒨𑒰𑒪𑒨𑒧𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲 𑒏𑒹𑒿 𑒏𑒯𑒱 𑒠𑒹𑒪𑒐𑒱𑒢 𑒖𑒹 𑒂𑒥 𑒖𑒹 𑒂𑒋𑒥 𑒞𑒿 𑒥𑒹𑒩𑒧𑒼 𑒖𑒹𑒥𑒹 𑒏𑒩𑒥, 𑒞𑒿𑒋 𑒍𑒃𑒣𑒩 𑒢𑒖𑒩𑒱 𑒩𑒰𑒐𑒥। 𑒖𑒯𑒱𑒢𑒰 𑒯𑒰𑒙𑒼-𑒥𑒖𑒰𑒩𑒧𑒹 𑒂 𑒑𑒰𑒧𑒼-𑒒𑒩𑒧𑒹 𑒫𑒮𑓂𑒞𑒳𑒏 𑒪𑒹𑒢-𑒠𑒹𑒢 𑒞𑒲𑒢 𑒞𑒩𑒯𑒏 𑒪𑒼𑒏𑒏 𑒥𑒲𑒔 𑒯𑒼𑒃𑒞 𑒁𑒕𑒱, 𑒋𑒏 𑒫𑒮𑓂𑒞𑒳𑒥𑒪𑒰, 𑒠𑒼𑒮𑒩 𑒪𑒹𑒥𑒰𑒪 (𑒏𑒲𑒢𑒻𑒥𑒪𑒰)𑒏 𑒥𑒲𑒔 𑒧𑒳𑒠𑒰 𑒌 𑒥𑒲𑒔 𑒞𑒹𑒮𑒩𑒼 𑒤𑒛𑓃𑒱 𑒖𑒰𑒃𑒋, 𑒍 𑒤𑒛𑓃𑒥𑒻𑒋 𑒑𑒩𑓂𑒖। 𑒖𑒐𑒢 𑒫𑒮𑓂𑒞𑒳 𑒥𑒹𑒔𑒱𑒢𑒱𑒯𑒰𑒩𑒼 𑒂 𑒪𑒹𑒢𑒱𑒯𑒰𑒩𑒼𑒏𑒹𑒿 𑒮𑒧𑒰𑒢𑒏 𑒑𑒩𑓂𑒖 𑒩𑒯𑒻𑒋 𑒞𑒐𑒳𑒢𑒏𑒰 𑒥𑒹𑒫𑒯𑒰𑒩 𑒮𑒳𑒪𑒦 𑒯𑒼𑒃𑒋। 𑒏𑒰𑒩𑒝𑒼 𑒯𑒼𑒃 𑒕𑒻 𑒖𑒹 𑒫𑒮𑓂𑒞𑒳 𑒥𑒹𑒔𑒱 𑒫𑒰 𑒏𑒲𑒢𑒱 𑒏𑓄 𑒁𑒧𑒳𑒐 𑒏𑒰𑒖 𑒏𑒩𑒥, 𑒖𑒹 𑒖𑒩𑒴𑒩𑒲 𑒁𑒕𑒱। 𑒠𑒼𑒮𑒩 𑒞𑒩𑒯𑒏 𑒯𑒼𑒃𑒋 𑒖𑒹 𑒥𑒹𑒔𑒱𑒢𑒱𑒯𑒰𑒩𑒏𑒹𑒿 𑒏𑒰𑒖𑒏 𑒠𑒳𑒂𑒩𑒹 𑒁𑒡𑒱𑒏 𑒑𑒩𑓂𑒖 𑒩𑒯𑒪 𑒂 𑒏𑒲𑒢𑒱𑒢𑒱𑒯𑒰𑒩 𑒁𑒑𑒡𑒰𑒋𑒪 𑒩𑒯𑒪। 𑒞𑒃𑒚𑒰𑒧 𑒥𑒹𑒔𑒱𑒢𑒱𑒯𑒰𑒩 𑒏𑒙𑒰𑒃𑒋 𑒂 𑒏𑒲𑒢𑒱𑒢𑒱𑒯𑒰𑒩 𑒢𑒤𑒑𑒩 𑒩𑒯𑒻𑒋। 𑒞𑒯𑒱𑒢𑒰 𑒏𑒞𑒾 𑒪𑒹𑒥𑒰𑒪 (𑒏𑒲𑒢𑒱𑒢𑒱𑒯𑒰𑒩) 𑒑𑒩𑒖𑒴 𑒩𑒯𑒪 𑒂 𑒥𑒹𑒔𑒱𑒢𑒱𑒯𑒰𑒩 𑒢𑒰-𑒑𑒩𑒖𑒴। 𑒞𑒃𑒚𑒰𑒧 𑒏𑒲𑒢𑒱𑒢𑒱𑒯𑒰𑒩 𑒏𑒙𑒰𑒃𑒋 𑒂 𑒥𑒹𑒔𑒱𑒢𑒱𑒯𑒰𑒩 𑒢𑒤𑒰𑒧𑒹 𑒩𑒯𑒻𑒋। 𑒏𑒱𑒋𑒏 𑒞𑒿 𑒧𑒢𑒹-𑒧𑒢 𑒁𑒑𑒡𑒰𑒃𑒞 𑒩𑒯𑒪 𑒖𑒹 𑒣𑒰𑒢𑒱𑒧𑒹 𑒣𑒰𑒟𑒩 𑒮𑒛𑓃𑒻𑒋। 𑒞𑒯𑒱𑒢𑒰 𑒪𑒹𑒥𑒰𑒪𑒼𑒏 𑒥𑒲𑒔 𑒯𑒼𑒃𑒞 𑒩𑒯𑒻 𑒕𑒻 𑒖𑒹 𑒣𑒰𑒃 𑒏𑒱 𑒏𑒼𑒢𑒼 𑒏𑒳𑒙-𑒏𑒳𑒙 𑒏𑒙𑒻𑒋 𑒖𑒹 𑒁𑒢𑒹𑒩𑒹 𑒏𑒞𑒾 𑒤𑒹𑒏𑒱 𑒠𑒹𑒥। 𑒨𑒋𑒯 𑒥𑒱𑒔𑒪𑒰 𑒠𑒳𑒢𑒱𑒨𑒰𑒿𑒏 𑒏𑒪𑒰𑒏𑒰𑒩 𑒕𑒲, 𑒖𑒹 𑒁𑒣𑒢𑒹 𑒮𑓀𑒑 𑒠𑒳𑒢𑒱𑒨𑒼𑒏𑒹𑒿 𑒢𑒔𑒥𑒻𑒋।
𑒁𑒠𑒾𑒮𑒿 𑒋𑒏 𑒠𑒱𑒮𑒏 𑒪𑒼𑒏 𑒠𑒼𑒮𑒩 𑒠𑒱𑒮𑒏 𑒠𑒳𑒢𑒱𑒨𑒰𑒿 𑒪𑒹𑒪 𑒫𑒱𑒏𑒙 𑒣𑒩𑒱𑒮𑓂𑒟𑒱𑒞𑒱 𑒣𑒻𑒠𑒰 𑒏𑒩𑒻𑒞 𑒩𑒯𑒪 𑒁𑒕𑒱 𑒂 𑒏𑓀𑒚 𑒠𑒥𑒻𑒞 𑒩𑒯𑒪 𑒁𑒕𑒱। 𑒧𑒳𑒠𑒰 𑒮𑒹 𑒢𑒻 𑒦𑒹𑒪। 𑒖𑒯𑒱𑒢𑒰 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏 𑒏𑒰𑒩𑓂𑒨𑒏𑓂𑒩𑒧𑒏 𑒖𑒱𑒖𑓂𑒘𑒰𑒮𑒰 𑒥𑒹𑒩𑒧𑒰 𑒪𑒼𑒏𑒏𑒹𑒿 𑒕𑒪 𑒞𑒯𑒱𑒢𑒰 𑒦𑒼𑒑𑒹𑒢𑓂𑒠𑓂𑒩𑒼𑒖𑒲 𑒂 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒱𑒨𑒼𑒏𑒹𑒿 𑒕𑒪𑒻। 𑒮𑒏𑒩𑒲 𑒮𑒦𑒰𑒏 𑒥𑒰𑒞 𑒥𑒹𑒩𑒧𑒰 𑒑𑒰𑒧𑒧𑒹 𑒖𑒼𑒩-𑒬𑒼𑒩𑒮𑒿 𑒔𑒪𑒋 𑒪𑒰𑒑𑒪। 𑒢𑒲𑒏𑒮𑒿 𑒢𑒲𑒏 𑒏𑒰𑒩𑓂𑒨𑒏𑓂𑒩𑒧 𑒯𑒳𑒁𑒋, 𑒞𑒃 𑒣𑒰𑒕𑒴 𑒮𑒦 𑒪𑒰𑒑𑒪, 𑒞𑒿 𑒠𑒼𑒮𑒩 𑒠𑒱𑒮 𑒢𑒫 𑒏𑓂𑒭𑒹𑒞𑓂𑒩 𑒦𑒹𑒙𑒢𑒹 𑒦𑒼𑒑𑒹𑒢𑓂𑒠𑓂𑒩𑒼𑒖𑒲 𑒂 𑒣𑒰𑒩𑓂𑒙𑒱𑒨𑒼 𑒏𑒰𑒩𑓂𑒨𑒏𑓂𑒩𑒧𑒏𑒹𑒿 𑒢𑒲𑒏𑒮𑒿 𑒢𑒲𑒏 𑒥𑒢𑒥𑒻𑒏 𑒤𑒱𑒩𑒰𑒏𑒧𑒹 𑒪𑒰𑒑𑒪। 𑒍𑒢𑒰 𑒂𑒃𑒮𑒿 𑓑𑓙𑓖𑓗 𑒄.𑒮𑒿 𑒣𑒴𑒩𑓂𑒫 𑒋𑒏𑒥𑒹𑒩 𑒏𑒧𑓂𑒨𑒳𑒢𑒮𑓂𑒙 𑒣𑒰𑒩𑓂𑒙𑒲 𑒥𑒹𑒩𑒧𑒰𑒧𑒹 𑒮𑒹𑒯𑒼 𑒥𑒢𑒪 𑒕𑒪 𑒧𑒳𑒠𑒰 𑒥𑒹𑒥𑒯𑒰𑒩𑒱𑒏 𑒣𑒏𑓂𑒭 𑒏𑒧𑒖𑒼𑒩 𑒩𑒯𑒢𑒹 𑒙𑒱𑒏 𑒢𑒻 𑒣𑒰𑒋𑒪 𑒩𑒯𑒋। 𑒢𑒫-𑒨𑒳𑒫𑒏 𑒥𑒲𑒔 𑒣𑒰𑒩𑓂𑒙𑒲 𑒥𑒢𑒪, 𑒏𑒧𑒼𑒥𑒹𑒬 𑒁𑒡𑒱𑒏𑒞𑒩 𑒨𑒳𑒫𑒏 𑒣𑒜𑓃𑒪-𑒪𑒱𑒐𑒪। 𑒮𑒥𑒯𑒏 𑒥𑒲𑒔 𑒣𑒰𑒩𑓂𑒙𑒲𑒏 𑒏𑒼𑒢𑒼 𑒞𑒾𑒩-𑒞𑒩𑒲𑒏𑒰 𑒢𑒻 𑒥𑒴𑒗𑒪 𑒞𑒿𑒋 𑒟𑒰𑒯𑒱-𑒟𑒰𑒯𑒱 𑒏𑒱𑒕𑒳-𑒏𑒱𑒕𑒳 𑒮𑒱𑒐𑒻𑒞, 𑒁𑒏𑒰𑒮𑒮𑒿 𑒣𑒞𑒰𑒪 𑒡𑒩𑒱𑒏 𑒥𑒰𑒞 𑒅𑒛𑓃𑒱-𑒅𑒛𑓃𑒱 𑒮𑒦𑒏 𑒏𑒰𑒢𑒧𑒹 𑒂𑒥𑒻 𑒖𑒃𑒮𑒿 𑒏𑒱𑒕𑒳-𑒢𑒹-𑒏𑒱𑒕𑒳 𑒅𑒞𑓂𑒮𑒰𑒯 𑒞𑒿 𑒖𑒑𑒱𑒞𑒹 𑒩𑒯𑒻। 𑒖𑒿 𑒮𑒹 𑒢𑒻 𑒯𑒼𑒃𑒞𑒻 𑒞𑒿 𑒂𑒢 𑒣𑒰𑒩𑓂𑒙𑒲𑒏 (𑒣𑒿𑒴𑒖𑒲𑒫𑒰𑒠𑒲) 𑒁𑒣𑒹𑒏𑓂𑒭𑒰 𑒔𑒩𑒱𑒞𑓂𑒩 𑒱𑒢𑒩𑓂𑒧𑒰𑒝 𑒏𑒹𑒢𑒰 𑒋𑒞𑓄 𑒯𑒼𑒃 𑒕𑒻? 𑒮𑓀𑒒𑒩𑓂𑒭𑒹 𑒔𑒩𑒱𑒞𑓂𑒩 𑒐𑒩𑒰𑒠𑒻 𑒕𑒻।
𑒮𑓀𑒮𑒠 𑒥𑒻𑒮𑒰𑒩 𑒮𑒧𑒰𑒣𑓂𑒞𑒱𑒏 𑒞𑒹𑒮𑒩 𑒠𑒱𑒢 𑒦𑒼𑒑𑒹𑒢𑓂𑒠𑓂𑒩𑒖𑒲 𑒧𑒡𑒳𑒥𑒢𑒲 𑒣𑒯𑒳𑒿𑒔 𑒑𑒹𑒪𑒰। 𑒁𑒐𑒢 𑒡𑒩𑒱 𑒦𑒼𑒑𑒹𑒢𑓂𑒠𑓂𑒩𑒖𑒲 𑒏𑒹𑒿 𑒞𑒹𑒢𑒰 𑒦𑓄 𑒏𑓄 𑒪𑒼𑒏 𑒢𑒻 𑒔𑒱𑒢𑓂𑒯𑒻𑒞 𑒩𑒯𑒢𑒱 𑒞𑒿𑒋 𑒎𑒞𑒰 𑒏𑒱 𑒢𑒻 𑒎𑒞𑒰𑒯 𑒮𑒹 𑒁𑒮𑒧𑓀𑒖𑒮 𑒥𑒢𑒪 𑒩𑒯𑒻, 𑒥𑒢𑒥𑒼 𑒮𑓂𑒫𑒰𑒦𑒰𑒫𑒱𑒏𑒹 𑒩𑒯𑒻 𑒏𑒱𑒋𑒏 𑒞𑒿 𑒂𑒢-𑒂𑒢 𑒏𑒞𑒹𑒏 𑒏𑒰𑒩𑓂𑒨𑒏𑓂𑒩𑒧 𑒋𑒯𑒹𑒢 𑒦𑓄 𑒔𑒳𑒏𑒪 𑒩𑒯𑒻 𑒖𑒃𑒧𑒹 𑒢𑒹𑒞𑒰 𑒢𑒻 𑒣𑒯𑒳𑒿𑒔𑒪 𑒩𑒯𑒟𑒱। 𑒮𑓀𑒮𑒠 𑒮𑒧𑒰𑒣𑓂𑒞𑒱𑒏 𑒣𑒩𑒰𑒞𑒹 𑒦𑒹𑒢𑒹 𑒦𑒼𑒑𑒹𑒢𑓂𑒠𑓂𑒩𑒖𑒲 𑒣𑒙𑒢𑒰 𑒣𑒯𑒳𑒿𑒔 𑒑𑒹𑒪 𑒩𑒯𑒟𑒱। 𑒣𑒯𑒱𑒪 𑒥𑒹𑒩 𑒥𑒱𑒯𑒰𑒩𑒮𑒿 𑒏𑒰𑓀𑒑𑓂𑒩𑒹𑒮𑒏 𑒫𑒱𑒩𑒼𑒡𑒲 𑒠𑒪𑒏 𑒮𑒰𑓀𑒮𑒠 𑒥𑒯𑒳𑒧𑒞𑒧𑒹 𑒠𑒱𑒪𑓂𑒪𑒲 𑒣𑒯𑒳𑒿𑒔𑒪 𑒩𑒯𑒟𑒱। 𑒥𑒱𑒯𑒰𑒩𑒼𑒧𑒹 𑒫𑒱𑒩𑒼𑒡𑒱𑒨𑒹 𑒠𑒪𑒏 𑒮𑒩𑒏𑒰𑒩 𑒧𑒯𑒰𑒧𑒰𑒨𑒰 𑒣𑓂𑒩𑒮𑒰𑒠 𑒮𑒱𑓀𑒯𑒏 𑒢𑒹𑒞𑒵𑒞𑓂𑒫𑒧𑒹 𑒥𑒢𑒪 𑒩𑒯𑒋। 𑒏𑒩𑓂𑒣𑒴𑒩𑒲 𑒚𑒰𑒏𑒳𑒩 𑒅𑒣𑒧𑒳𑒐𑓂𑒨𑒧𑓀𑒞𑓂𑒩𑒲 𑒥𑒢𑒪𑒰𑒯। 𑒍𑒢𑒰 𑒧𑒯𑒰𑒧𑒰𑒨𑒰 𑒥𑒰𑒥𑒴 𑒏𑒰𑓀𑒑𑓂𑒩𑒹𑒮𑒮𑒿 𑒙𑒴𑒙𑒱 𑒏𑓄 𑒂𑒥𑒱 𑒖𑒢𑒏𑓂𑒩𑒰𑒢𑓂𑒞𑒱 𑒠𑒪 𑒥𑒢𑒾𑒢𑒹 𑒩𑒯𑒟𑒱। 𑒥𑒱𑒯𑒰𑒩 𑒮𑒩𑒏𑒰𑒩𑒧𑒹 𑒮𑒦𑒮𑒿 𑒥𑒹𑒮𑒲 𑒮𑒼𑒬𑒪𑒱𑒮𑓂𑒙 𑒣𑒰𑒩𑓂𑒙𑒲𑒏 𑒫𑒱𑒡𑒰𑒨𑒏 𑒩𑒯𑒟𑒱 𑒖𑒃𑒮𑒿 𑒮𑒩𑒏𑒰𑒩𑒼𑒧𑒹 𑒁𑒡𑒱𑒏 𑒦𑒰𑒑𑒲𑒠𑒰𑒩𑒲 𑒦𑒹𑒪𑒢𑒱। 𑒣𑒯𑒱𑒪 𑒥𑒹𑒩 𑒡𑒢𑒱𑒏𑒪𑒰𑒪 𑒧𑒝𑓂𑒛𑒪 𑒖𑒲𑒞 𑒏𑓄 𑒑𑒹𑒪 𑒩𑒯𑒟𑒱, 𑒧𑒳𑒠𑒰 𑒞𑒻𑒨𑒼 𑒫𑒱𑒡𑒰𑒢 𑒮𑒦𑒰 𑒁𑒡𑓂𑒨𑒏𑓂𑒭 𑒥𑒢𑒪𑒰𑒯। 𑒦𑒰𑒩𑒞𑒲𑒨 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒏𑒼𑒙𑒰𑒧𑒹 𑒠𑒴𑒙𑒰 𑒏𑒹𑒥𑒱𑒢𑒹𑒙 𑒂 𑒠𑒴𑒙𑒰 𑒩𑒰𑒖𑓂𑒨 𑒧𑓀𑒞𑓂𑒩𑒲 𑒥𑒢𑒪𑒰𑒯। 𑒠𑒩𑒦𑓀𑒑𑒰 𑒖𑒱𑒪𑒰𑒏 𑒏𑒼𑒙𑒰𑒧𑒹 𑒞𑒹𑒖𑒢𑒰𑒩𑒰𑒨𑒝 𑒖𑒲 (𑒬𑓂𑒩𑒲 𑒞𑒹𑒖 𑒢𑒰𑒩𑒰𑒨𑒝 𑒗𑒰) 𑒩𑒰𑒖𑓂𑒨 𑒧𑓀𑒞𑓂𑒩𑒲 𑒥𑒢𑒪𑒰𑒯। 𑒍𑒢𑒰 𑒔𑒰𑒩𑒴 𑒑𑒼𑒙𑒹 𑒁𑒣𑒢𑒰-𑒁𑒣𑒢𑒰 𑒏𑓂𑒭𑒹𑒞𑓂𑒩𑒧𑒹 𑒏𑒩𑓂𑒧𑒚 𑒩𑒯𑒟𑒱। 𑒖𑒯𑒱𑒢𑒰 𑒃𑒢𑓂𑒠𑓂𑒩𑒠𑒲𑒣 𑒦𑒰𑒨 (𑒬𑓂𑒩𑒲 𑒃𑒢𑓂𑒠𑓂𑒩𑒠𑒲𑒣 𑒮𑒱𑓀𑒯) 𑒫𑒱𑒠𑓂𑒫𑒰𑒢 (𑒁𑒩𑓂𑒟𑒬𑒰𑒮𑓂𑒞𑓂𑒩𑒲) 𑒩𑒯𑒟𑒱 𑒞𑒯𑒱𑒢𑒰 𑒔𑒢𑓂𑒠𑓂𑒩𑒬𑒹𑒐𑒩 𑒦𑒰𑒨 (𑒬𑓂𑒩𑒲 𑒔𑒢𑓂𑒠𑓂𑒩 𑒬𑒹𑒐𑒩 𑒮𑒱𑓀𑒯) 𑒮𑒹𑒯𑒼 𑒏𑓂𑒩𑒰𑒢𑓂𑒞𑒱𑒏𑒰𑒩𑒲 𑒩𑒯𑒟𑒱। 𑒬𑓂𑒩𑒲 𑒬𑒞𑓂𑒩𑒳𑒡𑓂𑒢 𑒥𑒹𑒮𑒩𑒰 𑒂𑒠𑒱𑒫𑒰𑒮𑒲𑒏 𑒢𑒹𑒞𑒰 𑒩𑒯𑒟𑒱 𑒞𑒿 𑒞𑒹𑒖𑒢𑒰𑒩𑒰𑒨𑒝 𑒖𑒲 𑒏𑒱𑒮𑒰𑒢 𑒢𑒹𑒞𑒰। 𑒋𑒏 𑒞𑒿 𑒍𑒯𑒱𑒢𑒰 𑒮𑒩𑒏𑒰𑒩 𑒠𑒪-𑒠𑒪𑒧𑒹 𑒛𑒼𑒪𑒻𑒞 𑒩𑒯𑒋 𑒞𑒃𑒣𑒩 𑒩𑒾𑒠𑒲 𑒂𑒩𑒼 𑒛𑒼𑒪𑒥𑒻𑒞 𑒩𑒯𑒻।
𑒏𑒱𑒮𑒰𑒢 𑒢𑒹𑒞𑒰𑒏 𑒮𑓀𑒑-𑒮𑓀𑒑 𑒦𑒼𑒑𑒹𑒢𑓂𑒠𑓂𑒩 𑒖𑒲 𑒥𑒱𑒯𑒰𑒩𑒏 𑒢𑒹𑒞𑒰 𑒮𑒹𑒯𑒼 𑒩𑒯𑒟𑒱 𑒞𑒿𑒋 𑒏𑒰𑒖𑒏 𑒦𑒰𑒩 𑒥𑒯𑒳𑒞 𑒁𑒡𑒱𑒏 𑒣𑒛𑓃𑒱 𑒑𑒹𑒪 𑒩𑒯𑒢𑒱। 𑒣𑒙𑒢𑒰 𑒂𑒥𑒱 𑒩𑒰𑒖𑓂𑒨𑒏 𑒮𑓂𑒟𑒱𑒞𑒱𑒏 𑒫𑒱𑒔𑒰𑒩-𑒫𑒱𑒧𑒩𑓂𑒬 𑒏𑒩𑒻𑒞-𑒏𑒩𑒻𑒞 𑒣𑒯𑒱𑒪 𑒠𑒱𑒢 𑒥𑒲𑒞𑒱 𑒑𑒹𑒪𑒢𑒱। 𑒧𑒳𑒠𑒰 𑒣𑒩𑒰𑒞𑒹 𑒦𑒢𑒹𑒮𑒿 𑒏𑓂𑒭𑒹𑒞𑓂𑒩𑒏 𑒮𑒧𑒋 𑒥𑒢𑒰 𑒪𑒹𑒢𑒹 𑒩𑒯𑒟𑒱। 𑒩𑒰𑒞𑒰-𑒩𑒰𑒞𑒲 𑒧𑒡𑒳𑒥𑒢𑒲 𑒂𑒥𑒱 𑒑𑒹𑒪𑒰𑒯। 𑒧𑒡𑒳𑒥𑒢𑒲 𑒁𑒥𑒱𑒞𑒹 𑒮𑒦𑒏𑒹𑒿 𑒐𑒥𑒛𑓃𑒱 𑒦𑓄 𑒑𑒹𑒪 𑒖𑒹 𑒏𑒰𑒪𑓂𑒯𑒱 𑒦𑒼𑒑𑒹𑒢𑓂𑒠𑓂𑒩 𑒖𑒲 𑒥𑒹𑒩𑒧𑒰𑒏 𑒏𑒰𑒩𑓂𑒨-𑒏𑓂𑒩𑒧𑒧𑒹 𑒩𑒯𑒞𑒰𑒯। 𑒍𑒢𑒰 𑒮𑒦 𑒣𑓂𑒩𑒔𑒰𑒩 𑒏𑒩𑒱𑒞𑒹 𑒩𑒯𑒟𑒱, 𑒣𑒩𑓂𑒔𑒼 𑒕𑒣𑒥𑒰𑒃𑒨𑒹 𑒢𑒹𑒢𑒹 𑒩𑒯𑒟𑒱, 𑒠𑒱𑒢𑒧𑒹 𑒂𑒧 𑒮𑒦𑒰 𑒏𑒩𑒞𑒰𑒯 𑒂 𑒩𑒰𑒞𑒱𑒧𑒹 𑒏𑒰𑒩𑓂𑒨𑒏𑒩𑓂𑒞𑒰-𑒧𑒲𑒙𑒱𑓀𑒑। 𑒐𑒰𑒃𑒨𑒼-𑒣𑒲𑒥𑒻𑒏 𑒍𑒩𑒱𑒨𑒰𑒢 𑒦𑒹𑒪 𑒩𑒯𑒻। 𑒂𑒧 𑒮𑒦𑒰𑒏 𑒁𑓀𑒞𑒱𑒧 𑒮𑒧𑒋 𑒣𑒰𑒿𑒔 𑒥𑒖𑒹𑒏 𑒥𑒰𑒠 𑒦𑒼𑒑𑒹𑒢𑓂𑒠𑓂𑒩𑒖𑒲 𑒖𑒲𑒣𑒮𑒿 𑒥𑒹𑒩𑒧𑒰 𑒣𑒯𑒳𑒿𑒔𑒪𑒰𑒯। 𑒂𑒧 𑒮𑒦𑒰𑒧𑒹 𑒅𑒣𑒮𑓂𑒟𑒱𑒞 𑒮𑒥𑒯𑒏 𑒧𑒢𑒧𑒹 𑒦𑓄 𑒑𑒹𑒪𑒻 𑒖𑒹 𑒂𑒥 𑒍 𑒢𑒻 𑒎𑒞𑒰𑒯। 𑒤𑒾𑒢𑒼-𑒤𑒰𑒢 𑒁𑒐𑒳𑒢𑒏𑒰 𑒖𑒏𑒰𑒿 𑒢𑒯𑒱𑒨𑒹 𑒩𑒯𑒻, 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏𑒹𑒿 𑒁𑒥𑒻𑒮𑒿 𑒣𑒯𑒱𑒢𑒹, 𑒂𑒧 𑒮𑒦𑒰 𑒧𑒩𑒯𑒢𑓂𑒢𑒹 𑒖𑒏𑒰𑒿 𑒩𑒯𑒪 𑒧𑒳𑒠𑒰 𑒯𑒳𑒢𑒏𑒰 𑒁𑒥𑒱𑒞𑒹 𑒖𑒢𑒰 𑒩𑓀𑒑𑒹-𑒩𑒴𑒣 𑒥𑒠𑒪𑒱 𑒑𑒹𑒪। 𑒏𑒞𑒹 𑒑𑒼𑒙𑒹 𑒖𑒹 𑒅𑒚𑒱-𑒅𑒚𑒱 𑒏𑓄 𑒩𑒮𑓂𑒞𑒰 𑒣𑒏𑒛𑓃𑒱 𑒢𑒹𑒢𑒹 𑒩𑒯𑒟𑒱, 𑒍𑒯𑒼 𑒮𑒦 𑒒𑒳𑒧𑒪𑒰𑒯। 𑒮𑓀𑒑-𑒮𑓀𑒑 𑒏𑒱𑒕𑒳 𑒢𑒫𑒼 𑒪𑒼𑒏 𑒣𑒯𑒳𑒿𑒔𑒪𑒰𑒯। 𑒖𑒲𑒣𑒮𑒿 𑒅𑒞𑒩𑒱 𑒦𑒼𑒑𑒹𑒢𑓂𑒠𑓂𑒩 𑒖𑒲 𑒥𑒖𑒪𑒰𑒯-
“𑒋𑒏 𑒑𑒱𑒪𑒰𑒮 𑒣𑒰𑒢𑒱 𑒂 𑒔𑒰𑒯 𑒣𑒱𑒂𑒅। 𑒞𑒰𑒥𑒹 𑒧𑓀𑒔𑒣𑒩 𑒥𑒻𑒮𑒻 𑒕𑒲।”
𑒪𑒼𑒏 𑒡𑒛𑓃𑒤𑒛𑓃𑒰𑒋𑒪 𑒖𑒹 𑒖𑒐𑒢 𑒦𑒼𑒑𑒹𑒢𑓂𑒠𑓂𑒩𑒖𑒲 𑒣𑒯𑒳𑒿𑒔 𑒑𑒹𑒪𑒰 𑒞𑒐𑒢 𑒯𑒳𑒢𑒏 𑒮𑒧𑒻𑒏𑒹𑒿 𑒁𑒢𑒹𑒩𑒹 𑒠𑒳𑒃𑒩 𑒏𑒩𑒻 𑒕𑒱𑒨𑒢𑒱। 𑒧𑓀𑒔𑒣𑒩 𑒦𑒼𑒑𑒹𑒢𑓂𑒠𑓂𑒩𑒖𑒲 𑒔𑒳𑒣𑒔𑒰𑒣 𑒥𑒻𑒮 𑒠𑒹𑒐𑒻𑒞-𑒮𑒳𑒢𑒻𑒞 𑒩𑒯𑒟𑒱। 𑒣𑒰𑒢𑒱 𑒣𑒲𑒥 𑒔𑒰𑒯 𑒣𑒲𑒪𑒢𑒱। 𑒔𑒰𑒯 𑒣𑒲𑒥𑒻𑒞𑒹 𑒥𑒖𑒻𑒏 𑒂𑒑𑓂𑒩𑒯 𑒦𑒹𑒪𑒢𑒱। 𑒂𑒑𑓂𑒩𑒯 𑒯𑒼𑒃𑒞𑒹 𑒍 𑒏𑒯𑒪𑒐𑒱𑒢 𑒖𑒹 𑒮𑒦𑒏𑒹𑒿 𑒣𑒴𑒕𑒱 𑒪𑒱𑒁𑒢𑒳 𑒖𑒹 𑒏𑒱𑒢𑒏𑒼 𑒏𑒱𑒕𑒳 𑒣𑒳𑒕𑒥𑒰𑒏 𑒕𑒢𑓂𑒯𑒱। 𑒧𑒳𑒠𑒰 𑒮𑒦 𑒞𑒿 𑒮𑒳𑒢𑒻𑒪𑒹 𑒅𑒞𑓂𑒮𑒳𑒏 𑒞𑒿𑒋 𑒋𑒏𑒼𑒙𑒰 𑒣𑓂𑒩𑒬𑓂𑒢 𑒢𑒻 𑒂𑒋𑒪 𑒩𑒯𑒋। 𑒅𑒚𑒱𑒞𑒹 𑒠𑒱𑒪𑓂𑒪𑒲𑒏 𑒏𑒰𑓀𑒑𑓂𑒩𑒹𑒮𑒲 𑒮𑒩𑒏𑒰𑒩𑒏 𑒐𑒹𑒩𑒯𑒰 𑒮𑓀𑒏𑓂𑒭𑒹𑒣𑒧𑒹 𑒍 𑒏𑒯𑒪𑒐𑒱𑒢 𑒖𑒹 𑒏𑒹𑒢𑒰 𑒁𑒐𑒢 𑒣𑒴𑒿𑒖𑒲𑒣𑒞𑒱, 𑒏𑒰𑒩𑒐𑒰𑒢𑒰𑒠𑒰𑒩 𑒂 𑒮𑒰𑒧𑓀𑒞 (𑒩𑒰𑒖𑒰-𑒧𑒯𑒩𑒰𑒖𑒰𑒏) 𑒏 𑒥𑒲𑒔 𑒫𑒱𑒫𑒰𑒠 𑒤𑒿𑒮𑒪 𑒁𑒕𑒱। 𑒫𑒱𑒫𑒰𑒠𑒏 𑒔𑒩𑓂𑒔 𑒏𑒩𑒻𑒞 𑒏𑒯𑒪𑒐𑒱𑒢 𑒖𑒹 𑒠𑒹𑒬𑒏 𑒫𑒱𑒏𑒰𑒮 𑒁𑒫𑒩𑒴𑒠𑓂𑒡 𑒦𑓄 𑒑𑒹𑒪 𑒁𑒕𑒱। 𑒧𑒳𑒠𑒰 𑒮𑒹 𑒥𑒰𑒞 𑒏𑒧𑒹 𑒪𑒼𑒏 𑒥𑒳𑒗𑒪𑒏। 𑒏𑒱𑒋𑒏 𑒞𑒿 𑒑𑒰𑒧𑒏 𑒪𑒼𑒏 𑒮𑒩𑒏𑒰𑒩𑒏 𑒧𑒰𑒢𑒹 𑒏𑒼𑒙𑒰𑒏 𑒑𑒯𑒳𑒧 𑒂 𑒟𑒰𑒢𑒰 𑒧𑒰𑒞𑓂𑒩 𑒥𑒳𑒗𑒻𑒞 𑒕𑒪, 𑒑𑒼𑒙𑒱-𑒣𑓀𑒑𑒩𑒰 𑒔𑒰𑒣𑒰-𑒏𑒪𑒼 𑒑𑒛𑓃𑒰 𑒖𑒰𑒃 𑒕𑒪𑒻। 𑒞𑒰𑒥𑒞 𑒔𑒲𑒢𑒲-𑒧𑒙𑒱𑒨𑒰 𑒞𑒹𑒪𑒏 𑒏𑒼𑒙𑒰𑒹 𑒦𑒹𑒪 𑒩𑒯𑒻 𑒍𑒢𑒰 𑒑𑒯𑒳𑒧𑒼 𑒏𑒼𑒙𑒹𑒏 𑒯𑒱𑒮𑒰𑒥𑒮𑒿 𑒦𑒹𑒙𑒻 𑒧𑒳𑒠𑒰 𑒪𑒹𑒥𑒰𑒪𑒏 𑒁𑒦𑒰𑒫 (𑒣𑒰𑒃𑒏 𑒠𑒳𑒂𑒩𑒹) 𑒩𑒯𑒢𑒹 𑒮𑒹 𑒢𑒻 𑒥𑒴𑒗𑒱 𑒣𑒛𑓃𑒻। 𑒠𑒱𑒪𑓂𑒪𑒲 𑒮𑒩𑒏𑒰𑒩𑒏 𑒪𑒑𑒪𑒹 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒔𑒩𑓂𑒔 𑒏𑒹𑒪𑒐𑒱𑒢। 𑒩𑒾𑒠𑒲𑒏 𑒮𑓂𑒟𑒱𑒞𑒱 𑒦𑒨𑒰𑒫𑒯𑒞𑒰 𑒂 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒂𑒿𑒙-𑒣𑒹𑒙 𑒐𑒼𑒪𑒱 𑒏𑓄 𑒩𑒰𑒐𑒱 𑒠𑒹𑒪𑒐𑒱𑒢। 𑒏𑒼𑒮𑒲-𑒢𑒯𑒩𑒱𑒏 𑒔𑒩𑓂𑒔 𑒫𑒱𑒮𑓂𑒞𑒰𑒩𑒮𑒿 𑒏𑒹𑒹𑒪𑒐𑒱𑒢 𑒖𑒹 𑒄 𑒨𑒼𑒖𑒢𑒰 𑒧𑒱𑒟𑒱𑒪𑒰𑓀𑒔𑒪𑒏 𑒪𑒹𑒪 𑒏𑒲 𑒁𑒕𑒱? 𑒧𑒱𑒟𑒱𑒪𑒰𑓀𑒔𑒪 𑒔𑒩𑓂𑒔𑒏 𑒏𑓂𑒩𑒧𑒧𑒹 𑒌𑒚𑒰𑒧𑒏 𑒮𑒰𑒧𑒰𑒖𑒱𑒏 𑒬𑒼𑒭𑒝, 𑒖𑒹 𑒋𑒏-𑒠𑒼𑒮𑒩𑒏𑒹𑒿 𑒂𑒑𑒴 𑒥𑒜𑓃𑒻𑒮𑒿 𑒩𑒼𑒏𑒻𑒞 𑒁𑒕𑒱, 𑒏 𑒫𑒱𑒮𑓂𑒞𑒰𑒩𑒮𑒿 𑒔𑒩𑓂𑒔 𑒏𑒹𑒪𑒐𑒱𑒢।
𑒍𑒢𑒰 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏 𑒦𑒰𑒭𑒝 𑒠𑒴 𑒒𑓀𑒙𑒰𑒮𑒿 𑒔𑒰𑒩𑒱 𑒒𑓀𑒙𑒰 𑒯𑒼𑒃𑒞 𑒕𑒪, 𑒧𑒳𑒠𑒰 𑒮𑒹 𑒢𑒻 𑒦𑒹𑒪। 𑒒𑓀𑒙𑒰 𑒣𑒳𑒩𑒻𑒞-𑒣𑒳𑒩𑒻𑒞 𑒮𑒧𑒋 𑒮𑒧𑒰𑒣𑓂𑒞 𑒦𑓄 𑒑𑒹𑒪। 𑒮𑒦𑒰 𑒮𑒧𑒰𑒣𑓂𑒞𑒱 𑒯𑒼𑒃𑒞𑒹 𑒍 𑒏𑒯𑒪𑒐𑒱𑒢 𑒖𑒹 𑒍𑒢𑒰 𑒏𑒰𑒩𑓂𑒨𑒏𑒩𑓂𑒞𑒰-𑒥𑒻𑒮𑒰𑒩 𑒏𑒩𑒻𑒏 𑒏𑒰𑒩𑓂𑒨𑒏𑓂𑒩𑒧 𑒮𑒹𑒯𑒼 𑒁𑒕𑒱 𑒧𑒳𑒠𑒰 𑒮𑒹 𑒢𑒲𑒏 𑒖𑒏𑒰𑒿 𑒢𑒻 𑒦𑓄 𑒮𑒏𑒞। 𑒧𑒳𑒠𑒰 𑒞𑒻𑒨𑒼 𑒁𑒯𑒰𑒿 𑒮𑒦 𑒞𑒻𑒨𑒰𑒩𑒲 𑒏𑒩𑒥 𑒖𑒞𑒹 𑒏𑒰𑒪 𑒕𑒲 𑒞𑒯𑒲𑒧𑒹 𑒍𑒯𑒼 𑒦𑒃𑒨𑒹 𑒖𑒹𑒞𑒻। 𑒞𑒃 𑒥𑒲𑒔 𑒔𑒰𑒯 𑒋𑒪𑒻, 𑒍 𑒖𑒪𑒐𑒻 𑒢𑒻 𑒏𑒹𑒪𑒢𑒱। 𑒔𑒰𑒯𑒹 𑒣𑒱𑒥𑒻𑒞 𑒏𑒰𑒪 𑒁𑒨𑓂𑒨𑒩-𑒂𑒨𑒼𑒑𑒏 𑒔𑒩𑓂𑒔 𑒮𑒹𑒯𑒼 𑒏𑒹𑒪𑒐𑒱𑒢। 𑒏𑒱𑒕𑒳 𑒏𑒰𑓀𑒑𑓂𑒩𑒹𑒮𑒲 𑒢𑒹𑒞𑒰, 𑒖𑒹 𑒮𑒦 𑒮𑒩𑒏𑒰𑒩𑒧𑒹 𑒩𑒯𑒪𑒰𑒯, 𑒑𑒼𑒪-𑒧𑒰𑒪𑒏 𑒖𑒰𑒿𑒔 𑒏𑒩𑒞𑒰𑒯।
𑒍𑒢𑒰 𑒖𑒃 𑒯𑒱𑒮𑒰𑒥𑒮𑒿 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒣𑒯𑒱𑒪 𑒂𑒧 𑒮𑒦𑒰 𑒕𑒪 𑒞𑒃 𑒯𑒱𑒮𑒰𑒥𑒮𑒿 𑒥𑒯𑒳𑒞 𑒢𑒲𑒏 𑒦𑒹𑒪 𑒕𑒪𑒻, 𑒖𑒹 𑒦𑒼𑒑𑒹𑒢𑓂𑒠𑓂𑒩𑒖𑒲 𑒁𑒣𑒢𑒼 𑒥𑒖𑒪𑒰𑒯।
𑒏𑒰𑒩𑓂𑒨𑒏𑒩𑓂𑒞𑒰 𑒧𑒲𑒙𑒱𑓀𑒑 𑒬𑒳𑒩𑒴 𑒯𑒼𑒃𑒞𑒹 𑒖𑒢𑒰 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏 𑒩𑒴𑒣 𑒥𑒠𑒪𑒱 𑒑𑒹𑒪𑒢𑒱। 𑒥𑒖𑒪𑒰𑒯-
“𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲 𑒕𑒱𑒌, 𑒁𑒯𑒰𑒿 𑒮𑒦 𑒣𑒰𑒩𑓂𑒙𑒲𑒏 𑒮𑒠𑒮𑓂𑒨 𑒥𑒢𑒱 𑒣𑒰𑒩𑓂𑒙𑒲 𑒥𑒢𑒹𑒪𑒾𑓀, 𑒋𑒏𑒩𑒰 𑒮𑒧𑓂𑒯𑒰𑒩𑒥𑒼𑒏 𑒦𑒰𑒩 𑒁𑒯𑒲𑓀 𑒮𑒥𑒯𑒏 𑒆𑒣𑒩 𑒩𑒯𑒞। 𑒁𑒯𑒰𑒿 𑒮𑒦 𑒁𑒣𑒢𑒰𑒏𑒹𑒿 𑒏𑓂𑒩𑒰𑒢𑓂𑒞𑒱𑒏𑒰𑒩𑒲 𑒣𑒰𑒩𑓂𑒙𑒲𑒏 𑒮𑒠𑒮𑓂𑒨 𑒥𑒴𑒗𑒱 𑒮𑒰𑒧𑒰𑒖𑒱𑒏 𑒥𑒹𑒫𑒮𑓂𑒟𑒰𑒏𑒹𑒿 𑒥𑒠𑒪𑒱 𑒮𑒳𑒡𑒰𑒩𑒴, 𑒖𑒰𑒡𑒩𑒱 𑒮𑒰𑒧𑒰𑒖𑒱𑒏 𑒥𑒹𑒫𑒮𑓂𑒟𑒰 𑒢𑒻 𑒥𑒠𑒪𑒞 𑒞𑒰𑒡𑒩𑒱 𑒮𑒩𑓂𑒫-𑒏𑒪𑓂𑒨𑒰𑒝𑒏𑒰𑒩𑒲 𑒮𑒧𑒰𑒖 𑒢𑒻 𑒥𑒢𑒞। 𑒖𑒰𑒡𑒩𑒱 𑒮𑒩𑓂𑒫-𑒏𑒪𑓂𑒨𑒰𑒝𑒏𑒰𑒩𑒲 𑒮𑒧𑒰𑒖 𑒢𑒻 𑒥𑒢𑒞 𑒞𑒰𑒡𑒩𑒱 𑒏𑒱𑒕𑒳 𑒑𑒼𑒙𑒹 𑒪𑒳𑒙𑒥𑒹 𑒏𑒩𑒞 𑒂 𑒏𑒱𑒕𑒳 𑒑𑒼𑒙𑒹 𑒪𑒳𑒙𑒹𑒥𑒹 𑒏𑒩𑒞। 𑒏𑒧𑒰𑒋𑒥 𑒁𑒯𑒰𑒿, 𑒐𑒰 𑒖𑒰𑒋𑒞 𑒠𑒼𑒮𑒩। 𑒧𑒳𑒠𑒰 𑒣𑒰𑒩𑓂𑒙𑒲 𑒞𑒿 𑒑𑒰𑒧𑒮𑒿 𑒪𑓄 𑒏𑓄 𑒠𑒳𑒢𑒱𑒨𑒰𑒿 𑒦𑒩𑒱𑒧𑒹 𑒣𑒮𑒩𑒪 𑒁𑒕𑒱। 𑒞𑒿𑒋 𑒋𑒏-𑒠𑒼𑒮𑒩𑒧𑒹 𑒖𑒳𑒙𑒱 𑒏𑓄 𑒏𑒹𑒢𑒰 𑒩𑒯𑒥, 𑒄 𑒞𑒾𑒩-𑒞𑒩𑒲𑒏𑒰 𑒮𑒲𑒐𑒋 𑒣𑒛𑓃𑒞। 𑒑𑒰𑒧𑒮𑒿 𑒪𑓄 𑒏𑓄 𑒠𑒳𑒢𑒱𑒨𑒰𑒿 𑒦𑒩𑒱𑒧𑒹 𑒪𑒴𑒙-𑒐𑒮𑒼𑒙 𑒔𑒪𑒱 𑒩𑒯𑒪 𑒁𑒕𑒱, 𑒖𑒹 𑒮𑒰𑒡𑒰𑒩𑒝 𑒢𑒻 𑒁𑒕𑒱, 𑒮𑒦 𑒞𑒩𑒯𑒏 𑒬𑒏𑓂𑒞𑒱 𑒍𑒏𑒩𑒰 𑒕𑒻। 𑒍𑒃 𑒬𑒏𑓂𑒞𑒱𑒏 𑒧𑒳𑒏𑒰𑒥𑒪𑒰 𑒏𑒩𑒻𑒏 𑒖𑒹 𑒬𑒏𑓂𑒞𑒱 𑒕𑒻𑒏 𑒍 𑒥𑒢𑒥𑒋 𑒣𑒛𑓃𑒞। 𑒁𑒐𑒢 𑒞𑒿 𑒯𑒧𑒯𑒴𑒿 𑒎𑒑𑒞𑒰𑒋𑒪𑒹 𑒕𑒲 𑒞𑒿𑒋 𑒢𑒲𑒏 𑒖𑒏𑒰𑒿 𑒢𑒻 𑒥𑒳𑒗𑒰 𑒣𑒰𑒋𑒥। 𑒏𑒢𑒲 𑒢𑒱𑒔𑒹𑒢 𑒯𑒼𑒃 𑒕𑒲 𑒞𑒐𑒢 𑒤𑒹𑒩 𑒂𑒋𑒥। 𑒁𑒐𑒢 𑒏𑒱𑒕𑒳 𑒧𑒴𑒪 𑒥𑒰𑒞 𑒖𑒹 𑒕𑒻 𑒮𑒹 𑒏𑒯𑒱 𑒠𑒃 𑒕𑒲। 𑒁𑒯𑒰𑒿 𑒑𑒰𑒧𑒧𑒹 𑒣𑒰𑒩𑓂𑒙𑒲 𑒥𑒢𑒹𑒪𑒾𑓀, 𑒑𑒰𑒧𑒏 𑒖𑒹 𑒮𑒧𑒮𑓂𑒨𑒰 𑒁𑒕𑒱 𑒍𑒏𑒩𑒰 𑒣𑒏𑒛𑓃𑒴। 𑒣𑒰𑒩𑓂𑒙𑒲𑒏 𑒮𑒦 𑒮𑒠𑒮𑓂𑒨 𑒋𑒏𑒚𑒰𑒧 𑒥𑒻𑒮 𑒍𑒃 𑒮𑒧𑒮𑓂𑒨𑒰𑒣𑒩 𑒫𑒱𑒔𑒰𑒩 𑒏𑒩𑒴। 𑒪𑒼𑒏𑒹 𑒪𑓄 𑒏𑓄 𑒮𑒧𑒰𑒖 𑒥𑒢𑒻 𑒕𑒻𑒏। 𑒖𑒞𑒹 𑒑𑒼𑒙𑒹 𑒁𑒯𑒰𑒿 𑒮𑒦 𑒕𑒲 𑒖𑒿 𑒍𑒞𑒥𑒼 𑒑𑒼𑒙𑒹 𑒋𑒏𑒖𑒳𑒙 𑒦𑓄 𑒮𑒧𑒰𑒡𑒰𑒢 𑒏𑒩𑒥 𑒞𑒿 𑒁𑒮𑒰𑒢𑒲𑒮𑒿 𑒮𑒧𑒰𑒡𑒰𑒢 𑒯𑒼𑒃𑒞 𑒖𑒰𑒋𑒞। 𑒍𑒢𑒰 𑒖𑒞𑒹 𑒁𑒮𑒰𑒢 𑒥𑒳𑒗𑒻 𑒕𑒱𑒌 𑒥𑒹𑒫𑒮𑓂𑒟𑒰 𑒞𑒼𑒛𑓃𑒥 𑒍𑒞𑒹 𑒁𑒮𑒰𑒢 𑒢𑒻 𑒕𑒻। 𑒫𑒱𑒩𑒼𑒡𑒲𑒏 𑒂𑒏𑓂𑒩𑒧𑒝𑒏 𑒮𑓀𑒑 𑒁𑒣𑒢𑒰 𑒣𑒰𑒩𑓂𑒙𑒱𑒨𑒼𑒧𑒹 𑒧𑒞𑒦𑒹𑒠 𑒯𑒋𑒞, 𑒞𑒃 𑒮𑓀𑒑 𑒣𑒩𑒱𑒫𑒰𑒩𑒼𑒧𑒹 𑒯𑒋𑒞। 𑒥𑒛𑓃-𑒥𑒜𑓃𑒱𑒨𑒰 𑒐𑒰𑒃-𑒣𑒲𑒥𑒻𑒏 𑒖𑒼𑒑𑒰𑒩 𑒮𑒹𑒯𑒼 𑒏𑒹𑒢𑒹 𑒕𑒲। 𑒮𑒦 𑒋𑒏𑒚𑒰𑒧 𑒥𑒻𑒮 𑒐𑒰𑒋𑒥-𑒣𑒲𑒥 𑒞𑒐𑒢 𑒢𑒹 𑒐𑒰𑒃-𑒣𑒲𑒥𑒻𑒏 𑒕𑒳𑒂𑒕𑒳𑒞𑒏 𑒩𑒼𑒑 𑒖𑒹 𑒁𑒕𑒱, 𑒮𑒹 𑒙𑒳𑒙𑒞। 𑒖𑒰𑒥𑒹 𑒮𑒹 𑒢𑒻 𑒙𑒳𑒙𑒞 𑒞𑒰𑒥𑒹 𑒧𑒢-𑒦𑒹𑒠 𑒯𑒼𑒃𑒞𑒹 𑒩𑒯𑒞। 𑒢𑒱𑒨𑒧𑒱𑒞 𑒥𑒻𑒮𑒰𑒩 𑒏𑒩𑒴। 𑒖𑒰𑒥𑒹 𑒁𑒣𑒢𑒰 𑒣𑒰𑒩𑓂𑒙𑒲 𑒏𑒰𑒩𑓂𑒨𑒰𑒪𑒨 𑒢𑒻 𑒦𑒹𑒪 𑒁𑒕𑒱 𑒞𑒰𑒥𑒹 𑒙𑒼𑒪𑒹-𑒙𑒼𑒪 𑒥𑒻𑒮𑒰𑒩 𑒏𑒩𑒴। 𑒍𑒃 𑒙𑒼𑒪𑒏 𑒏𑒲 𑒮𑒧𑒮𑓂𑒨𑒰 𑒕𑒻 𑒂 𑒍𑒏𑒩 𑒮𑒧𑒰𑒡𑒰𑒢 𑒏𑒹𑒢𑒰 𑒯𑒹𑒞𑒻, 𑒥𑒻𑒮𑒰𑒩𑒏 𑒧𑒳𑒐𑓂𑒨 𑒏𑒰𑒖 𑒦𑒹𑒪। 𑒄 𑒞𑒿 𑒮𑒰𑒧𑒰𑒖𑒱𑒏 𑒮𑓂𑒞𑒩𑒣𑒩 𑒦𑒹𑒪 𑒧𑒳𑒠𑒰 𑒌 𑒮𑓀𑒑 𑒂𑒩𑒼 𑒏𑓂𑒭𑒹𑒞𑓂𑒩 𑒁𑒕𑒱। 𑒏𑒼𑒢𑒼 𑒮𑒧𑒮𑓂𑒨𑒰 𑒪𑓄 𑒏𑓄 𑒥𑓂𑒪𑒾𑒏𑒧𑒹 𑒣𑓂𑒩𑒠𑒩𑓂𑒬𑒢 𑒏𑒩𑒥, 𑒥𑓂𑒪𑒾𑒏 𑒦𑒩𑒱𑒏 𑒣𑒰𑒩𑓂𑒙𑒲𑒏 𑒣𑓂𑒩𑒠𑒩𑓂𑒬𑒢 𑒯𑒋𑒞। 𑒍𑒯𑒲𑒧𑒹 𑒥𑒹𑒩𑒧𑒰𑒏 𑒖𑒹 𑒮𑒧𑒮𑓂𑒨𑒰 𑒁𑒕𑒱 𑒍𑒏𑒩𑒼 𑒧𑒳𑒠𑓂𑒠𑒰 𑒥𑒢𑒰𑒋𑒥। 𑒁𑒯𑒱𑒢𑒰 𑒖𑒱𑒪𑒼𑒧𑒹 𑒯𑒼𑒃 𑒕𑒻। 𑒩𑒰𑒖𑓂𑒨𑒏 𑒩𑒰𑒖𑒡𑒰𑒢𑒱𑒨𑒼𑒧𑒹 𑒯𑒼𑒃 𑒕𑒻, 𑒠𑒱𑒪𑓂𑒪𑒱𑒨𑒼𑒧𑒹 𑒯𑒼𑒃 𑒕𑒻। 𑒮𑒦𑒧𑒹 𑒦𑒰𑒑 𑒪𑒹𑒥। 𑒠𑒳𑒢𑒴 𑒠𑒱𑒮𑒏 𑒮𑒧𑒮𑓂𑒨𑒰 𑒩𑒯𑒞, 𑒞𑒿𑒋 𑒆𑒣𑒩𑒏𑒰 𑒮𑒧𑒮𑓂𑒨𑒰 𑒣𑓂𑒩𑒧𑒳𑒐 𑒦𑒹𑒪।”
𑒍 𑒡𑒛𑓃𑒤𑒛𑓃𑒰𑒋𑒪 𑒩𑒯𑒥𑒹 𑒏𑒩𑒟𑒱, 𑒢𑒁 𑒥𑒖𑒹 𑒏𑒩𑒲𑒥 𑒫𑒱𑒠𑒰 𑒦𑓄 𑒑𑒹𑒪𑒰। 𑒯𑒳𑒢𑒏𑒰 𑒑𑒹𑒪𑒰 𑒣𑒕𑒰𑒞𑒱 𑒐𑒹𑒢𑒰𑒃-𑒣𑒱𑒢𑒰𑒃 𑒦𑒹𑒪। 𑒏𑒰𑒩𑓂𑒨𑒏𑓂𑒩𑒧 𑒮𑒧𑒰𑒣𑓂𑒞 𑒦𑒹𑒪।
𑒑𑒰𑒧𑒧𑒹 𑒋𑒏𑒙𑒰 𑒢𑒫 𑒢𑒖𑒩𑒱𑒏 𑒖𑒢𑓂𑒧 𑒦𑒹𑒪। 𑒖𑒹𑒢𑒰 𑒣𑒯𑒱𑒢𑒹 𑒑𑒰𑒧𑒏𑒹𑒿 𑒪𑒼𑒏 𑒥𑒳𑒗𑒻𑒞 𑒕𑒪 𑒞𑒃𑒮𑒿 𑒦𑒱𑒢𑓂𑒢 𑒥𑒳𑒗𑒻𑒏 𑒣𑓂𑒩𑒏𑓂𑒩𑒱𑒨𑒰 𑒬𑒳𑒩𑒴 𑒦𑒹𑒪। 𑒍𑒯𑒳𑒢𑒰 𑒔𑒰𑒩𑒱 𑒑𑒼𑒙𑒹 𑒋𑒏𑒚𑒰𑒧 𑒦𑓄 𑒏𑒼𑒢𑒼 𑒏𑒰𑒖 𑒬𑒳𑒩𑒴 𑒏𑒹𑒪𑒏। 𑒍𑒢𑒰 𑒣𑒯𑒱𑒢𑒾𑓀 𑒏𑒱𑒕𑒳 𑒪𑒼𑒏 𑒮𑒰𑒧𑒰𑒖𑒱𑒏 𑒏𑒰𑒖𑒧𑒹 𑒮𑒧𑒰𑒖 𑒮𑒯𑒨𑒼𑒑𑒲 𑒥𑒢𑒻𑒞 𑒕𑒪𑒰𑒯, 𑒧𑒳𑒠𑒰 𑒍 𑒠𑒰𑒨𑒩𑒰 𑒏𑒧𑒱 𑒑𑒹𑒪। 𑒏𑒱𑒕𑒳 𑒣𑒩𑒱𑒫𑒰𑒩 𑒡𑒩𑒱 𑒮𑒧𑒙𑒰 𑒑𑒹𑒪 𑒕𑒪। 𑒁𑒣𑒢 𑒏𑒰𑒖, 𑒁𑒣𑒢 𑒥𑒰𑒞𑒏𑒹𑒿 𑒕𑒱𑒣𑒰 𑒏𑓄 𑒩𑒰𑒐𑒥 𑒮𑓂𑒫𑒦𑒰𑒫 𑒥𑒢𑒱 𑒑𑒹𑒪 𑒕𑒪, 𑒁𑒐𑒢𑒼 𑒁𑒕𑒱।
𑒁𑓀𑒞𑒧𑒹, 𑒔𑒰𑒩𑒱 𑒑𑒼𑒙𑒹𑒏 𑒥𑒲𑒔 𑒩𑒯𑒪𑒰 𑒂 𑒥𑒖𑒪𑒰𑒮𑒿 𑒥𑒖𑒥𑒰𑒏 𑒁𑒦𑓂𑒨𑒰𑒮 𑒯𑒳𑒁𑒋 𑒪𑒑𑒻 𑒕𑒻। 𑒞𑒃 𑒮𑓀𑒑 𑒄𑒯𑒼 𑒯𑒼𑒃 𑒕𑒻 𑒖𑒹 𑒠𑒼𑒯𑒩𑒰-𑒞𑒹𑒯𑒩𑒰 𑒏𑓄 𑒋𑒏𑒹 𑒥𑒰𑒞 𑒥𑒰𑒖𑒲 𑒫𑒰 𑒏𑒱𑒕𑒳 𑒢𑒫 𑒑𑒣 𑒥𑒰𑒖𑒲। 𑒣𑒰𑒩𑓂𑒙𑒲𑒧𑒹 𑒖𑒳𑒙𑒪𑒰𑒮𑒿 𑒠𑒱𑒪𑓂𑒪𑒲𑒏 𑒩𑒻𑒪𑒲 𑒞𑒏 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒦𑒰𑒑 𑒪𑒱𑒁𑒋 𑒪𑒑𑒪𑒰। 𑒢𑒫-𑒢𑒫 𑒪𑒼𑒏𑒮𑒿 𑒦𑒹𑒿𑒙-𑒒𑒰𑒿𑒙, 𑒏𑓂𑒭𑒹𑒞𑓂𑒩𑒏 𑒯𑒱𑒮𑒰𑒥𑒮𑒿 𑒢𑒫-𑒢𑒫 𑒏𑒪𑒰-𑒮𑓀𑒮𑓂𑒏𑒵𑒞𑒱 𑒠𑒹𑒐𑒻𑒏 𑒁𑒫𑒮𑒩 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒦𑒹𑒙𑒋 𑒪𑒑𑒪𑒢𑓂𑒯𑒱। 𑒞𑒃 𑒮𑓀𑒑 𑒄𑒯𑒼 𑒦𑒹𑒪𑒢𑓂𑒯𑒱 𑒖𑒹 𑒠𑒴-𑒂𑒢𑒰, 𑒔𑒰𑒩𑒱 𑒂𑒢𑒰𑒧𑒹 𑒢𑒲𑒏 𑒏𑒱𑒞𑒰𑒥 𑒦𑒹𑒙𑒋 𑒪𑒑𑒪𑒢𑓂𑒯𑒱 𑒖𑒃𑒮𑒿 𑒢𑒫-𑒢𑒫 𑒖𑒰𑒢𑒏𑒰𑒩𑒲 𑒯𑒳𑒁𑒋 𑒪𑒑𑒪𑒢𑓂𑒯𑒱।














𑒮𑒩𑒮𑒚𑒱𑒏 𑒣𑒕𑒰𑒞𑒱 𑒑𑒰𑒧𑒮𑒿 𑒪𑓄 𑒏𑓄 𑒠𑒹𑒬 𑒦𑒩𑒱𑒧𑒹 𑒠𑒼𑒩𑒮 𑒯𑒫𑒰 𑒅𑒚𑒪। 𑒧𑒳𑒠𑒰 𑒯𑒫𑒼𑒏 𑒩𑒴𑒐𑒱𑒏 𑒮𑒲𑒧𑒰 𑒞𑒿 𑒦𑒱𑒢𑓂𑒢-𑒦𑒱𑒢𑓂𑒢 𑒁𑒕𑒱, 𑒏𑒞𑒾 𑒩𑒹𑒞 𑒥𑒪𑒰 𑒦𑒴𑒧𑒱𑒧𑒹 𑒁𑒣𑒢𑒼 𑒩𑒮 𑒔𑒙𑒥𑒻𑒞 𑒁𑒕𑒱, 𑒞𑒿 𑒏𑒞𑒾 𑒮𑒧𑒳𑒠𑓂𑒩𑒧𑒹 𑒖𑓂𑒫𑒰𑒩 𑒅𑒚𑒥𑒻𑒞 𑒁𑒕𑒱, 𑒏𑒞𑒾 𑒣𑒯𑒰𑒛𑓃𑒮𑒿 𑒙𑒏𑒩𑒰 𑒨𑒰 𑒞𑒿 𑒧𑒹𑒒𑒹 𑒠𑒱𑒮 𑒅𑒛𑓃𑒱 𑒖𑒰𑒃𑒞 𑒁𑒕𑒱 𑒫𑒰 𑒣𑒖𑒩𑒥𑒰𑒯𑒱 𑒞𑒰𑒏𑒱-𑒞𑒰𑒏𑒱 𑒣𑒛𑓃𑒰𑒃𑒞 𑒁𑒕𑒱। 𑒏𑒞𑒾 𑒮𑒧𑒞𑒪 𑒦𑒴𑒧𑒱𑒧𑒹 𑒑𑒰𑒕-𑒫𑒱𑒩𑒲𑒕 𑒅𑒐𑒰𑒛𑓃𑒻𑒞 𑒞𑒿 𑒏𑒞𑒾 𑒮𑒩𑒼𑒫𑒩𑒏 𑒯𑒪𑓂𑒤𑒲, 𑒞𑒿 𑒏𑒞𑒾 𑒧𑒢𑓂𑒠 𑒑𑒞𑒱𑒏 𑒮𑒳𑒯𑒰𑒫𑒢 𑒯𑒫𑒰 𑒮𑒹𑒯𑒼 𑒠𑒻𑒞 𑒁𑒕𑒱। 𑒁𑒫𑒮𑒩𑒏 𑒪𑒰𑒦 𑒖𑒹𑒏𑒩𑒰 𑒖𑒞𑒹 𑒦𑒹𑒙𑒻𑒏 𑒔𑒰𑒯𑒱𑒨𑒹 𑒮𑒹 𑒢𑒻 𑒦𑒹𑒙𑒱 𑒣𑒹𑒪𑒻। 𑒖𑒿 𑒮𑒹 𑒢𑒻 𑒣𑒹𑒪𑒏 𑒞𑒿 𑒎𑒠𑓂𑒨𑒼𑒑𑒱𑒏 𑒏𑓂𑒭𑒹𑒞𑓂𑒩𑒏 𑒁𑒣𑒹𑒏𑓂𑒭𑒰 𑒏𑒵𑒭𑒱 𑒏𑓂𑒭𑒹𑒞𑓂𑒩 𑒏𑒱𑒁𑒋 𑒣𑒕𑒳𑒂 𑒑𑒹𑒪। 𑒦𑒪𑒯𑒱𑓀 𑒞𑒧𑒮𑒰𑒋𑒪𑒣𑒩 𑒥𑒰𑒖𑒱 𑒠𑒱𑒁𑒋 𑒖𑒹 𑒧𑒯𑒰𑒩𑒰𑒭𑓂𑒙𑓂𑒩 𑒏𑒩𑓂𑒢𑒰𑒙𑒏 𑒎𑒠𑓂𑒨𑒼𑒑𑒱𑒏 𑒏𑓂𑒭𑒹𑒞𑓂𑒩𑒧𑒹 𑒁𑒑𑒳𑒂 𑒑𑒹𑒪 𑒂 𑒥𑒱𑒯𑒰𑒩 𑒣𑒕𑒳𑒂 𑒑𑒹𑒪, 𑒄 𑒞𑒰𑒧𑒮𑒣𑒩 𑒥𑒰𑒖𑒪 𑒦𑒹𑒪। 𑒧𑒳𑒠𑒰 𑒧𑒯𑒰𑒩𑒰𑒭𑓂𑒙𑓂𑒩 𑒫𑒰 𑒏𑒩𑓂𑒢𑒰𑒙𑒏𑒏 𑒅𑒠𑓂𑒨𑒼𑒑𑒏𑒹𑒿 𑒠𑒹𑒐𑒻 𑒕𑒱𑒌 𑒞𑒿 𑒄𑒯𑒼 𑒠𑒹𑒐𑒋 𑒣𑒛𑓃𑒞 𑒖𑒹 𑒍𑒃𑒚𑒰𑒧 𑒖𑒧𑒲𑒢𑒣𑒩 𑒖𑒲𑒢𑒱𑒯𑒰𑒩𑒏 𑒠𑒬𑒰 𑒏𑒲 𑒕𑒻। 𑒏𑒲 𑒄 𑒥𑒰𑒞 𑒗𑒴𑒚 𑒖𑒹 𑒥𑒱𑒯𑒰𑒩𑒏 𑒁𑒣𑒹𑒏𑓂𑒭𑒰 𑒍𑒃𑒚𑒰𑒧𑒏 𑒏𑒱𑒮𑒰𑒢𑒏𑒹𑒿 𑒂𑒞𑓂𑒧𑒯𑒞𑓂𑒨𑒰𑒏 𑒢𑒾𑒫𑒞 𑒕𑒢𑓂𑒯𑒱। 𑒞𑒿𑒋 𑒠𑒹𑒬𑒏 𑒮𑒦 𑒩𑒰𑒖𑓂𑒨𑒏 𑒁𑒣𑒢-𑒁𑒣𑒢 𑒮𑒧𑒮𑓂𑒨𑒰 𑒕𑒻। 𑒁𑒣𑒢𑒰-𑒁𑒣𑒢𑒰 𑒜𑓀𑒑𑒮𑒿 𑒠𑒹𑒐𑒋 𑒣𑒛𑓃𑒞𑒻। 𑒧𑒳𑒠𑒰 𑒏𑒲 𑒄 𑒅𑒔𑒱𑒞 𑒢𑒻 𑒖𑒹 𑒥𑒱𑒯𑒰𑒩𑒼 𑒮𑓂𑒫𑒞𑓀𑒞𑓂𑒩 𑒦𑒰𑒩𑒞𑒏 𑒁𑓀𑒑 𑒕𑒲, 𑒋𑒏𑒩𑒴𑒣𑒞𑒰 𑒯𑒹𑒥𑒰𑒏 𑒔𑒰𑒯𑒱𑒌। 𑒂𑒃 𑒥𑒱𑒯𑒰𑒩𑒹 𑒢𑒻, 𑒂𑒢𑒼-𑒂𑒢𑒼 𑒩𑒰𑒖𑓂𑒨𑒏𑒹𑒿 𑒥𑒱𑒯𑒰𑒩𑒼𑒮𑒿 𑒥𑒹𑒮𑒲 𑒮𑒧𑒮𑓂𑒨𑒰 𑒕𑒻 𑒖𑒹𑒏𑒩 𑒮𑒧𑒰𑒡𑒰𑒢 𑒖𑒩𑒴𑒩𑒲 𑒁𑒕𑒱। 𑒦𑒪𑒯𑒱𑓀 𑒥𑓀𑒑𑒰𑒪, 𑒏𑒹𑒩𑒪 𑒖𑒏𑒰𑒿 𑒢𑒻, 𑒧𑒳𑒠𑒰 𑒂𑒢𑒼-𑒂𑒢 𑒩𑒰𑒖𑓂𑒨𑒧𑒹 𑒠𑒹𑒐𑒾𑓀𑒮 𑒞𑒿 𑒪𑒑𑒥𑒹 𑒏𑒋𑒪। 𑒧𑒱𑒟𑒱𑒪𑒰𑓀𑒔𑒪𑒼 𑒌 𑒠𑒼𑒩𑒮 𑒯𑒫𑒰𑒮𑒿 𑒁𑒪𑒑 𑒢𑒻 𑒩𑒯𑒪। 𑒣𑒳𑒩𑒢𑒰 𑒠𑒩𑒦𑓀𑒑𑒰 𑒖𑒱𑒪𑒰𑒏 𑒧𑒡𑒳𑒥𑒢𑒲 𑒮𑒫𑒛𑒱𑒫𑒲𑒖𑒢𑒧𑒹, 𑒖𑒹 𑒁𑒐𑒢 𑒖𑒱𑒪𑒰 𑒁𑒕𑒱, 𑒖𑒧𑒲𑒢𑒏 𑒦𑒩𑒣𑒴𑒩 𑒋𑒏𑒩𑒴𑒣𑒞𑒰 𑒂𑒋𑒪, 𑒧𑒳𑒠𑒰 𑒐𑒹𑒞 𑒞𑒿 𑒞𑒐𑒢 𑒐𑒹𑒞 𑒖𑒐𑒢 𑒍𑒏𑒩𑒰 𑒦𑒩𑒣𑒴𑒩 𑒣𑒰𑒢𑒱 𑒦𑒹𑒙𑒻। 𑒅𑒔𑒱𑒞 𑒥𑒲𑒂, 𑒅𑒔𑒱𑒞 𑒐𑒰𑒠𑒏 𑒮𑓀𑒑 𑒧𑒬𑒲𑒢 𑒢𑒹𑒢𑒹 𑒏𑒳𑒬𑒪 𑒏𑒱𑒮𑒰𑒢 𑒮𑒹𑒯𑒼 𑒦𑒹𑒙𑒻। 𑒠𑒮 𑒥𑒩𑓂𑒐 𑒣𑒴𑒩𑓂𑒫𑒯𑒱𑒮𑒿 𑒏𑒼𑒮𑒲 𑒢𑒯𑒩 𑒨𑒼𑒖𑒢𑒰𑒏 𑒣𑒰𑒕𑒴 𑒣𑓂𑒩𑒑𑒞𑒱𑒬𑒲𑒪 𑒏𑒱𑒮𑒰𑒢𑒼 𑒂 𑒫𑒳𑒠𑓂𑒡𑒱𑒖𑒲𑒫𑒱𑒨𑒼 𑒅𑒚𑒱 𑒏𑓄 𑒚𑒰𑒜𑓃 𑒩𑒯𑒪𑒰𑒯, 𑒧𑒳𑒠𑒰 𑒏𑒱𑒨𑒼 𑒮𑒳𑒢𑒱𑒢𑒱𑒯𑒰𑒩 𑒢𑒻। 𑒖𑒿 𑒮𑒳𑒢𑒾𑒪𑒼 𑒑𑒹𑒪 𑒞𑒿 𑒏𑒰𑒖𑒏 𑒞𑒹𑒯𑒹𑒢 𑒩𑒴𑒣 𑒡𑒹𑒪𑒏 𑒖𑒹 𑒣𑒔𑒰𑒮 𑒥𑒩𑓂𑒐𑒼𑒧𑒹 𑒨𑒼𑒖𑒢𑒰 𑒢𑒻 𑒣𑒴𑒩𑓂𑒞𑒱 𑒦𑓄 𑒮𑒏𑒪 𑒁𑒕𑒱। 𑒡𑒰𑒩-𑒡𑒳𑒩𑒏 𑒮𑓀𑒑 𑒋𑒯𑒹𑒢 𑒪𑒰𑒣𑒩𑒫𑒰𑒯𑒲 𑒦𑒹𑒪 𑒖𑒹 𑒧𑒱𑒟𑒱𑒪𑒰𑓀𑒔𑒪𑒏 𑒁𑒡𑒰𑒮𑒿 𑒥𑒹𑒮𑒲 𑒖𑒧𑒲𑒢 𑒧𑒰𑒙𑒱𑒮𑒿 𑒥𑒰𑒪𑒳 𑒥𑒢𑒱 𑒑𑒹𑒪 𑒁𑒕𑒱। 𑒍𑒢𑒰 𑒡𑒰𑒩 𑒥𑒯𑒳𑒞𑒼 𑒁𑒕𑒱, 𑒖𑒃𑒧𑒹 𑒏𑒱𑒕𑒳 𑒋𑒯𑒢𑒼 𑒁𑒕𑒱 𑒖𑒹 𑒯𑒖𑒰𑒩𑒼 𑒥𑒩𑓂𑒐𑒮𑒿 𑒁𑒣𑒢 𑒠𑒱𑒬𑒰 𑒢𑒻 𑒥𑒠𑒪𑒪𑒏, 𑒧𑒳𑒠𑒰 𑒏𑒼𑒮𑒲-𑒏𑒧𑒪𑒰-𑒥𑒪𑒰𑒢𑒏𑒹𑒿 𑒞𑒿 𑒦𑒑𑒻𑒞𑒼 𑒐𑒹𑒪𑒰-𑒐𑒹𑒪𑒰, 𑒂 𑒑𑒲𑒞𑒼 𑒑𑒰𑒥𑒱-𑒑𑒰𑒥𑒱 𑒞𑒞𑒹 𑒮𑒳𑒂𑒑𑒞 𑒯𑒼𑒃𑒞 𑒩𑒯𑒪 𑒁𑒕𑒱 𑒖𑒹 𑒁𑒡𑒰𑒮𑒿 𑒥𑒹𑒮𑒲 𑒖𑒧𑒲𑒢𑒏𑒹𑒿 𑒏𑒧𑒖𑒼𑒩 𑒧𑒰𑒢𑒹 𑒬𑒏𑓂𑒞𑒱𑒯𑒲𑒢 𑒥𑒢𑒰 𑒠𑒹𑒪𑒏 𑒁𑒕𑒱। 𑒥𑒰𑒪𑒳 𑒏𑒹𑒢𑒰 𑒅𑒣𑒖𑒰𑒅 𑒦𑒴𑒧𑒱 𑒥𑒢𑒞, 𑒕𑒼𑒙 𑒮𑒫𑒰𑒪 𑒢𑒻 𑒁𑒕𑒱। 𑒩𑒰𑒖𑒢𑒲𑒞𑒱𑒏 𑒠𑒬𑒰 𑒋𑒯𑒹𑒢 𑒖𑒹 𑒧𑒳𑒿𑒯𑒣𑒳𑒩𑒳𑒐𑒱𑒂𑒃𑒨𑒹𑒏 𑒣𑒰𑒕𑒴 𑒣𑒛𑓃𑒱 𑒮𑒦 𑒁𑒣𑒢𑒹𑒧𑒹 𑒍𑒗𑒩𑒰𑒋𑒪 𑒁𑒕𑒱। 𑒧𑒱𑒟𑒱𑒪𑒰𑓀𑒔𑒪𑒏 𑒏𑒼𑒢𑒼 𑒮𑒧𑒮𑓂𑒨𑒰 𑒧𑒱𑒟𑒱𑒪𑒹𑒏 𑒢𑒻 𑒁𑒣𑒱𑒞𑒳 𑒠𑒹𑒬𑒏 𑒕𑒲। 𑒮𑒧𑒮𑓂𑒨𑒰𑒏 𑒮𑒧𑒰𑒡𑒰𑒢 𑒏𑒹𑒢𑒰 𑒯𑒋𑒞 𑒞𑒹𑒯𑒲𑒧𑒹 𑒮𑒦 𑒍𑒗𑒩𑒰-𑒍𑒗𑒩𑒰 𑒩𑒰𑒖𑒢𑒲𑒞𑒱 𑒏𑓄 𑒩𑒯𑒪𑒰 𑒁𑒕𑒱। 𑒂𑒚 𑒥𑒖𑒹 𑒩𑒰𑒞𑒱𑒏𑒹𑒿 𑒮𑒱𑒞𑒰𑒩𑒣𑒩 𑒮𑒳𑒢𑒞𑒰𑒯 𑒖𑒹 “𑒣𑒫𑒢 𑒣𑓂𑒩𑒱𑒨 𑒣𑒰𑒫𑒢 𑒧𑒱𑒟𑒱𑒪𑒰 𑒠𑒹𑒬!”
𑒖𑒯𑒱𑒢𑒰 𑒥𑒹𑒩𑒧𑒰 𑒠𑒹𑒬𑒏 𑒁𑓀𑒑 𑒕𑒲 𑒞𑒯𑒱𑒢𑒰 𑒞𑒿 𑒠𑒹𑒬𑒼 𑒥𑒹𑒩𑒧𑒰𑒏 𑒁𑓀𑒑 𑒕𑒱𑒌। 𑒞𑒿𑒋 𑒠𑒹𑒬𑒏 𑒠𑒰𑒹𑒩𑒮 𑒯𑒫𑒰 𑒥𑒹𑒩𑒧𑒼𑒧𑒹 𑒥𑒯𑒪। 𑒮𑒰𑒃𑒏𑒱𑒪𑒏 𑒍𑒦𑒩-𑒫𑒰𑒃𑒪𑒱𑓀𑒑 𑒖𑒏𑒰𑒿 𑒑𑒰𑒧𑒏 𑒫𑒰𑒃𑒪𑒱𑓀𑒑 𑒬𑒳𑒩𑒴 𑒦𑒹𑒪। 𑒋𑒏 𑒮𑓀𑒑 𑒩𑓀𑒑-𑒥𑒱𑒩𑓀𑒑𑒏 𑒯𑒫𑒰𑒏 𑒣𑓂𑒩𑒫𑒹𑒬 𑒦𑒹𑒪। 𑒁𑒛𑓂𑒛𑒰 𑒥𑒢𑓂𑒠𑒲 𑒯𑒳𑒁𑒋 𑒪𑒰𑒑𑒪। 𑒏𑒱𑒕𑒳 𑒪𑒳𑒞𑓂𑒞𑒲 𑒑𑒰𑒧𑒼𑒮𑒿 𑒅𑒚𑒻𑒋 𑒞𑒿 𑒏𑒱𑒕𑒳 𑒥𑒰𑒯𑒩𑒼𑒮𑒿 𑒣𑒮𑒯𑒱-𑒣𑒮𑒯𑒱 𑒂𑒥𑒋 𑒪𑒰𑒑𑒪। 𑒁𑒐𑒢 𑒡𑒩𑒱 𑒑𑒰𑒧𑒧𑒹 𑒖𑒰𑒞𑒱-𑒮𑒧𑓂𑒣𑓂𑒩𑒠𑒰𑒨𑒏 𑒯𑒫𑒰 𑒢𑒻 𑒂𑒋𑒪 𑒕𑒪। 𑒖𑒯𑒱𑒨𑒰 𑒏𑒯𑒱𑒨𑒼 𑒧𑒰𑒩𑒱-𑒠𑓀𑒑𑒰 𑒯𑒳𑒁𑒋 𑒍 𑒨𑒰 𑒞𑒿 𑒂𑒢 𑒑𑒰𑒧𑒮𑒿 𑒯𑒳𑒁𑒋, 𑒫𑒰 𑒋𑒏-𑒙𑒼𑒪 𑒠𑒼𑒮𑒩 𑒙𑒼𑒪𑒏 𑒥𑒲𑒔। 𑒥𑒲𑒮𑒼 𑒖𑒰𑒞𑒱𑒮𑒿 𑒆𑒣𑒩𑒥𑒪𑒰 𑒑𑒰𑒧 𑒥𑒹𑒩𑒧𑒰। 𑒣𑒰𑒫𑒢𑒱-𑒞𑒱𑒯𑒰𑒩𑒧𑒹 𑒑𑒖𑒣𑒙 𑒯𑒼𑒃𑒞𑒹 𑒂𑒋𑒪 𑒁𑒕𑒱। 𑒧𑒳𑒠𑒰 𑒞𑒻𑒨𑒼 𑒞𑒿 𑒔𑒪𑒱𑒞𑒹 𑒩𑒯𑒪𑒻। 𑒑𑒖𑒣𑒙𑒼 𑒏𑒹𑒢𑒰 𑒢𑒹 𑒯𑒼𑒅, 𑒁𑒡𑒰𑒮𑒿 𑒥𑒹𑒮𑒲 𑒮𑓂𑒞𑓂𑒩𑒲𑒑𑒝 𑒦𑒰𑒠𑒫𑒏 𑒩𑒫𑒱 𑒏𑒩𑒱𑒞𑒹 𑒕𑒟𑒱। 𑒧𑒳𑒠𑒰 𑒣𑒰𑒫𑒢𑒱𑒏 𑒫𑒱𑒡𑒰𑒢𑒼 𑒦𑒱𑒢𑓂𑒢-𑒦𑒱𑒢𑓂𑒢। 𑒏𑒱𑒨𑒼 𑒠𑒳𑒢𑒴 𑒮𑒰𑒿𑒗 𑒢𑒱𑒐𑓀𑒛 𑒏𑒩𑒻 𑒕𑒟𑒱, 𑒞𑒿 𑒏𑒱𑒨𑒼 𑒋𑒏 𑒮𑓀𑒗𑒴। 𑒏𑒱𑒨𑒼 𑒢𑒼𑒢𑒹𑒙𑒰 𑒣𑒩𑒯𑒹𑒖 𑒏𑒩𑒻 𑒕𑒟𑒱, 𑒞𑒿 𑒏𑒱𑒨𑒼 𑒁𑒢𑓂𑒢 𑒕𑒼𑒛𑓃𑒱 𑒤𑒪𑒹𑒙𑒰 𑒮𑒹𑒫𑒢 𑒏𑒩𑒻 𑒕𑒟𑒱। 𑒞𑒯𑒱𑒢𑒰 𑒒𑒛𑓃𑒲 𑒣𑒰𑒫𑒢𑒱। 𑒋𑒏 𑒞𑒿 𑒮𑒰𑒪𑒏 𑒠𑒴-𑒞𑒲𑒢 𑒧𑒰𑒮, 𑒮𑒰𑒍𑒢, 𑒂𑒮𑒲𑒢 𑒔𑒻𑒞𑒧𑒹 𑒯𑒼𑒃𑒋 𑒞𑒿 𑒠𑒼𑒮𑒩 𑒥𑒳𑒡𑒫𑒰𑒩𑒱, 𑒮𑒼𑒧𑒫𑒰𑒩𑒱 𑒂 𑒬𑒳𑒏𑓂𑒩𑒫𑒰𑒩𑒱 𑒮𑒹𑒯𑒼 𑒯𑒼𑒃𑒋।
𑒏𑒥𑒲𑒩 𑒣𑓀𑒟𑒏 𑒣𑓂𑒩𑒫𑒔𑒢𑒏𑒩𑓂𑒞𑒰 𑒂𑒥𑒱-𑒂𑒥𑒱 𑒧𑒰𑒨𑒰-𑒖𑒰𑒪𑒏 𑒢𑒱𑒢𑓂𑒠𑒰 𑒏𑒩𑒻𑒞 𑒂 𑒮𑒹𑒫𑒏 𑒮𑒦𑒏𑒹𑒿 𑒔𑒹𑒞𑒹𑒥𑒼 𑒏𑒩𑒻𑒞 𑒕𑒟𑒱। 𑒮𑒹𑒫𑒏𑒼 𑒩𑓀𑒑-𑒥𑒱𑒩𑓀𑒑𑒏। 𑒞𑒯𑒴𑒧𑒹 𑒥𑒹𑒩𑒧𑒰𑒧𑒹 𑒂𑒩𑒼 𑒑𑒖𑒣𑒙। 𑒋𑒏 𑒠𑒱𑒮 𑒮𑒋 𑒒𑒩𑒏 𑒥𑓂𑒩𑒯𑓂𑒧𑒝 𑒥𑒮𑓂𑒞𑒲 𑒙𑒼𑒪, 𑒙𑒼𑒪 𑒌 𑒠𑒳𑒂𑒩𑒹 𑒢𑒻 𑒖𑒹 𑒑𑒼𑒚𑒱𑒨𑒰 𑒢𑒻 𑒤𑒳𑒙𑒗𑒰𑒛𑓃𑒰 𑒁𑒕𑒱, 𑒧𑒹 𑒋𑒏𑒼𑒙𑒰 𑒥𑒻𑒭𑓂𑒝𑒫 𑒢𑒻। 𑒍𑒢𑒰 𑒮𑒧𑒰𑒖𑒏 𑒣𑓀𑒟𑒢𑒱𑒩𑒣𑒹𑒏𑓂𑒭𑒏 𑒐𑒱𑒨𑒰𑒪𑒮𑒿 𑒢𑒲𑒏𑒹 𑒁𑒕𑒱। 𑒞𑒯𑒱𑒢𑒰 𑒠𑒼𑒮𑒩 𑒠𑒱𑒮 𑒠𑒪𑒱𑒞𑒼𑒏 𑒙𑒼𑒪 𑒁𑒕𑒱। 𑒟𑒰𑒪-𑒣𑒰𑒢𑒱𑒮𑒿 𑒪𑓄 𑒏𑓄 𑒁𑒏𑒰𑒮 𑒡𑒩𑒱𑒏 𑒬𑒱𑒏𑒰𑒩𑒲। 𑒥𑒲𑒔𑒏 𑒖𑒹 𑒖𑒰𑒞𑒱 𑒁𑒕𑒱 𑒍 𑒡𑒰𑒩𑓂𑒧𑒱𑒏 𑒣𑓀𑒟 (𑒮𑒰𑒧𑓂𑒣𑓂𑒩𑒠𑒰𑒨𑒱𑒏) 𑒮𑒿 𑒖𑒳𑒛𑓃𑒪 𑒁𑒕𑒱। 𑒖𑒰𑒞𑒱𑒏 𑒦𑒲𑒞𑒩 𑒫𑒻𑒭𑓂𑒝𑒫-𑒮𑒰𑒏𑒚 𑒏𑒹𑒩 𑒥𑒲𑒔 𑒥𑒱𑒫𑒰𑒠 𑒔𑒪𑒻𑒞 𑒁𑒕𑒱 𑒞𑒿 𑒋𑒏 𑒖𑒰𑒞𑒱𑒏 𑒠𑒼𑒮𑒩𑒰𑒏 𑒥𑒲𑒔। 𑒏𑒥𑒲𑒩 𑒣𑓀𑒟𑒏 𑒥𑒲𑒔 𑒮𑒧𑒗𑒾𑒞𑒰 𑒦𑒹𑒪। 𑒮𑒧𑒗𑒾𑒞𑒰 𑒦𑒹𑒪 𑒖𑒹 𑒬𑓂𑒩𑒰𑒠𑓂𑒡-𑒏𑒩𑓂𑒧𑒏 𑒣𑒕𑒰𑒞𑒱, 𑒮𑒞𑓂𑒨𑒢𑒰𑒩𑒰𑒨𑒝 𑒣𑒴𑒖𑒰𑒏 𑒣𑒕𑒰𑒞𑒱 𑒏𑒥𑒲𑒩 𑒣𑓀𑒟𑒲 𑒦𑒢𑒛𑒰𑒩𑒰 𑒮𑒹𑒯𑒼 𑒯𑒳𑒁𑒋, 𑒮𑒹 𑒯𑒳𑒁𑒋 𑒪𑒰𑒑𑒪। 𑒋𑒏 𑒠𑒱𑒮 𑒠𑒼𑒮𑒩 𑒮𑒧𑓂𑒣𑓂𑒩𑒠𑒰𑒨𑒏 𑒫𑒱𑒩𑒼𑒡𑒧𑒹 𑒥𑒖𑒥𑒼 𑒏𑒩𑒻𑒞 𑒂 𑒠𑒼𑒮𑒩 𑒠𑒱𑒮 𑒮𑓀𑒑 𑒧𑒱𑒪𑒱 𑒩𑒯𑒥𑒼 𑒏𑒩𑒻𑒞 𑒁𑒕𑒱। 𑒞𑒯𑒱𑒨𑒼 𑒏𑒥𑒲𑒩 𑒣𑓀𑒟 𑒧𑒖𑒑𑒴𑒖 𑒕𑒪, 𑒁𑒡𑒱𑒏 𑒮𑒧𑒩𑓂𑒟𑒏 𑒁𑒕𑒱, 𑒂𑒃𑒨𑒼 𑒁𑒕𑒱। 𑒞𑒃 𑒥𑒲𑒔 𑒋𑒏𑒙𑒰 𑒒𑒙𑒢𑒰 𑒧𑓀𑒛𑒪 (𑒡𑒰𑒢𑒳𑒏) 𑒖𑒰𑒞𑒱𑒧𑒹 𑒤𑒿𑒮𑒪। 𑒠𑓂𑒫𑒰𑒪𑒐 𑒮𑒳𑒥𑒹 𑒠𑒰𑒮𑒏 𑒣𑓂𑒩𑒦𑒰𑒫, 𑒧𑓀𑒛𑒪𑒼-𑒧𑒳𑒐𑒱𑒨𑒼 (𑒡𑒰𑒢𑒳𑒏-𑒧𑒪𑒰𑒯) 𑒂 𑒥𑒩𑒻𑒃𑒨𑒼𑒧𑒹 𑒩𑒯𑒢𑒱। 𑒩𑒧𑒾𑒞𑒏 𑒔𑒪𑒰-𑒔𑒪𑒞𑒲 𑒑𑒰𑒧𑒧𑒹 𑒏𑒧। 𑒢𑒢𑒾𑒩𑒧𑒹 𑒥𑒳𑒠𑓂𑒠𑒲 𑒠𑒰𑒮 𑒩𑒧𑒾𑒞𑒏 𑒧𑒯𑓀𑒟 𑒥𑒢𑒱 𑒑𑒹𑒪𑒰𑒯। 𑒠𑒱𑒨𑒰𑒠𑒱𑒏 𑒪𑒰𑒙𑒮𑒿 𑒥𑒹𑒩𑒧𑒰 𑒂𑒥𑒱 𑒁𑒣𑒢𑒹 𑒠𑒱𑒨𑒰𑒠𑒧𑒹 𑒋𑒏 𑒑𑒼𑒙𑒹𑒏𑒹𑒿 𑒏𑓀𑒚𑒲 𑒠𑓄 𑒮𑒹𑒫𑒏 𑒥𑒢𑒰 𑒪𑒹𑒪𑒢𑒱। 𑒠𑒱𑒨𑒰𑒠 𑒮𑒹𑒫𑒏 𑒥𑒢𑒱 𑒑𑒹𑒪𑒢𑒱। 𑒍𑒢𑒰 𑒮𑒰𑒪𑒧𑒹 𑒋𑒏 𑒥𑒹𑒩 𑒮𑒳𑒥𑒹𑒠𑒰𑒮 𑒧𑒰𑒮 𑒠𑒱𑒢𑒏 𑒪𑒹𑒪 𑒋𑒥𑒼 𑒏𑒩𑒻𑒞 𑒕𑒪𑒰𑒯 𑒧𑒳𑒠𑒰 𑒥𑒲𑒔𑒧𑒹 𑒖𑒿 𑒏𑒞𑒾 𑒦𑒢𑒛𑒰𑒩𑒰 𑒦𑒹𑒪 𑒞𑒿 𑒠𑒪 𑒠𑓄 𑒥𑒖𑒰𑒃𑒨𑒼 𑒪𑒹𑒪 𑒖𑒰𑒃𑒞 𑒕𑒪𑒢𑒱।
𑒢𑒢𑒾𑒩𑒥𑒪𑒰𑒏 𑒔𑒹𑒪𑒰𑒏𑒹𑒿 𑒁𑒣𑒢 𑒔𑒹𑒪𑒰 (𑒩𑒧𑒾𑒞𑒮𑒿 𑒏𑒥𑒲𑒩 𑒣𑓀𑒟𑒲) 𑒥𑒢𑒰 𑒪𑒹𑒪𑒢𑒱। 𑒋𑒏 𑒠𑒱𑒮 𑒥𑒱𑒢𑒳 𑒫𑒻𑒭𑓂𑒝𑒫 (𑒮𑒰𑒏𑒚) 𑒏𑒹𑒿 𑒔𑒹𑒞𑒻𑒥𑒞𑒼 𑒞𑒿 𑒠𑒼𑒮𑒩 𑒠𑒱𑒮 𑒪𑒳𑒙𑒼-𑒣𑒰𑒙 𑒔𑒪𑒻𑒞। 𑒮𑒹𑒫𑒏 𑒪𑒳𑒙𑒹𑒪𑒰𑒮𑒿 𑒢𑒢𑒾𑒩𑒥𑒪𑒰 𑒫𑒳𑒠𑓂𑒠𑒲 𑒠𑒰𑒮 𑒤𑒩𑒧𑒰𑒢 𑒖𑒰𑒩𑒲 𑒏𑒹𑒪𑒢𑒱- “𑒖𑒯𑒱𑒢𑒰 𑒍𑒏𑒩 (𑒒𑒳𑒩𑒝 𑒠𑒰𑒮𑒏 𑒮𑒹𑒫𑒏) 𑒏𑒰𑒢𑒧𑒹 𑒧𑓀𑒞𑓂𑒩 𑒠𑒹𑒪𑒱𑒌 𑒂 𑒍 𑒠𑒼𑒮𑒩 𑒧𑓀𑒞𑓂𑒩 𑒪𑓄 𑒪𑒹𑒪𑒏 𑒞𑒯𑒱𑒢𑒰 𑒏𑒛𑓃𑒴𑒞𑒹𑒪 𑒙𑒯𑒏𑒰 𑒏𑓄 𑒍𑒏𑒩𑒰 𑒏𑒰𑒢𑒧𑒹 𑒠𑒹𑒥𑒻 𑒂 𑒍𑒃 𑒮𑓀𑒑 𑒪𑒰𑒑𑒪 𑒧𑓀𑒞𑓂𑒩𑒼 𑒢𑒱𑒏𑒰𑒪𑒱 𑒠𑒹𑒥𑒻।”
𑒛𑓀𑒏𑒰𑒣𑒩 𑒔𑒼𑒙 𑒣𑒛𑓃𑒪। 𑒠𑓂𑒫𑒰𑒪𑒐𑒥𑒪𑒰 𑒖𑒥𑒰𑒥 𑒠𑒹𑒪𑒐𑒱𑒢 𑒖𑒹 𑒯𑒳𑒢𑒏𑒩 (𑒫𑒳𑒠𑓂𑒠𑒲 𑒠𑒰𑒮𑒏) 𑒣𑓀𑒟𑒹 𑒏𑒧𑒖𑒼𑒩 𑒕𑒢𑓂𑒯𑒱। 𑒍𑒃𑒮𑒿 𑒖𑒲𑒫𑒏𑒹𑒿 𑒟𑒼𑒛𑓃𑒹 𑒑𑒞𑒱-𑒧𑒳𑒏𑓂𑒞𑒱 𑒯𑒹𑒞𑒻। 𑒣𑒯𑒱𑒢𑒹 𑒫𑒩𑒠𑒰𑒢 𑒏𑓄 𑒪𑒾𑒟𑒳। 𑒖𑒿 𑒮𑒹 𑒢𑒻 𑒏𑒩𑒞𑒰𑒯 𑒞𑒿 𑒮𑒹𑒫𑒏𑒏 𑒏𑒰𑒢𑒧𑒹 𑒞𑒹𑒪 𑒜𑒰𑒩𑒱 𑒠𑒹𑒞𑒰𑒯, 𑒮𑒹 𑒢𑒻 𑒔𑒪𑒞𑒢𑒱। 𑒏𑒮𑒧-𑒏𑒮 𑒯𑒳𑒁𑒋 𑒪𑒰𑒑𑒪। 𑒑𑒰𑒧𑒏 𑒠𑒳𑒂𑒩-𑒠𑒩𑒥𑒖𑓂𑒖𑒰𑒏 𑒧𑒳𑒐𑓂𑒨 𑒧𑒳𑒠𑓂𑒠𑒰 𑒨𑒋𑒯 𑒥𑒢𑒱 𑒑𑒹𑒪। 𑒮𑒧𑒰𑒖𑒏 𑒏𑒱𑒕𑒳 𑒪𑒼𑒏 𑒐𑒳𑒬𑒲 𑒖𑒹 𑒦𑒢𑒹 𑒡𑒰𑒢𑒳𑒏-𑒡𑒰𑒢𑒳𑒏𑒏 𑒥𑒲𑒔 𑒪𑒛𑓃𑒰𑒃 𑒁𑒕𑒱 𑒞𑒿 𑒠𑒼𑒮𑒩 𑒠𑒱𑒮 𑒖𑒰𑒞𑒱-𑒣𑒰𑒞𑒱𑒣𑒩 𑒔𑒼𑒙 𑒣𑒛𑓃𑒱 𑒑𑒹𑒪 𑒕𑒪। 𑒏𑒰𑒩𑒝 𑒖𑒹 𑒖𑒯𑒱𑒢𑒰 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒩𑒻𑒪𑒲, 𑒡𑒰𑒏 𑒕𑒼𑒛𑓃 𑒮𑒛𑓃𑒏𑒣𑒩 𑒁𑒢𑒻𑒞 𑒁𑒕𑒱, 𑒞𑒯𑒱𑒢𑒰 𑒮𑒧𑒰𑒖𑒏 𑒥𑒲𑒔 𑒖𑒹 𑒏𑒥𑒲𑒩 𑒣𑓀𑒟 𑒧𑒰𑒢𑒢𑒱𑒯𑒰𑒩 𑒕𑒪𑒰𑒯, 𑒯𑒳𑒢𑒏𑒰 𑒮𑒥𑒯𑒏 𑒥𑒲𑒔 𑒐𑒹𑒢𑒰𑒃-𑒣𑒲𑒢𑒰𑒃𑒧𑒹 𑒋𑒏𑒩𑒴𑒣𑒞𑒰 𑒂𑒥𑒱 𑒑𑒹𑒪 𑒕𑒪𑒻। 𑒏𑒥𑒲𑒩 𑒣𑓀𑒟𑒲𑒧𑒹 𑒦𑒢𑒛𑒰𑒩𑒰𑒏 𑒧𑒯𑒞𑓂𑒫𑒣𑒴𑒩𑓂𑒝 𑒂𑒡𑒰𑒩 𑒕𑒻। 𑒖𑒯𑒱𑒢𑒰 𑒖𑒑𑒢𑓂𑒢𑒰𑒟𑒧𑒹 𑒁𑒿𑒙𑒏𑒰 𑒣𑒩𑒮𑒰𑒠 𑒯𑒼𑒃 𑒕𑒻 𑒞𑒃 𑒮𑒠𑒵𑒬 𑒏𑒥𑒲𑒩 𑒣𑓀𑒟𑒏 𑒥𑒲𑒔 𑒋𑒏-𑒠𑒼𑒮𑒩𑒰𑒏 𑒥𑒲𑒔 𑒣𑒩𑒮𑒰𑒠𑒲𑒏 𑒔𑒪𑒢𑒱 𑒁𑒕𑒱। 𑒏𑒥𑒲𑒩 𑒣𑓀𑒟-𑒩𑒧𑒾𑒞 𑒠𑒳𑒢𑒴 𑒣𑓀𑒟𑒏 𑒞𑒢𑒰-𑒞𑒢𑒲𑒧𑒹 𑒑𑒰𑒧 𑒥𑒙𑒰𑒋 𑒪𑒰𑒑𑒪। 𑒞𑒲𑒢-𑒔𑒰𑒩𑒱 𑒙𑒳𑒏𑒛𑓃𑒲𑒧𑒹 𑒑𑒰𑒧 𑒥𑒿𑒙𑒱 𑒑𑒹𑒪। 𑒏𑒥𑒲𑒩 𑒣𑓀𑒟 (𑒮𑒧𑓂𑒣𑓂𑒩𑒠𑒰𑒨) 𑒮𑒿 𑒏𑒧𑒖𑒼𑒩 𑒮𑓀𑒑𑒚𑒢 𑒩𑒧𑒾𑒞 𑒮𑒧𑓂𑒣𑓂𑒩𑒠𑒰𑒨𑒏 𑒕𑒪। 𑒋𑒏 𑒑𑒰𑒧 𑒠𑒴 𑒑𑒰𑒧 𑒏𑒞𑒹𑒏𑒼 𑒑𑒰𑒧𑒏 𑒏𑒥𑒲𑒩 𑒣𑓀𑒟𑒥𑒪𑒰 𑒮𑒦 𑒧𑒻𑒠𑒰𑒢𑒧𑒹 𑒅𑒞𑒩𑒻𑒏 𑒞𑒻𑒨𑒰𑒩𑒲 𑒏𑒩𑒋 𑒪𑒑𑒪𑒰𑒯। 𑒥𑒹𑒩𑒧𑒰𑒏 𑒥𑒑𑒪𑒹𑒏 𑒑𑒰𑒧 𑒖𑒑𑒠𑒩 𑒁𑒕𑒱। 𑒍𑒢𑒰 𑒣𑒩𑒼𑒣𑒙𑓂𑒙𑒰𑒧𑒹 𑒖𑒑𑒠𑒩-𑒥𑒹𑒩𑒧𑒰𑒏 𑒢𑒰𑒍𑓀𑒮𑒿 𑒖𑒰𑒢𑒪 𑒖𑒰𑒃𑒞 𑒁𑒕𑒱। 𑒖𑒑𑒠𑒩 𑒕𑒼𑒙𑒹𑒙𑒰 𑒑𑒰𑒧 𑒁𑒕𑒱। 𑒦𑒴𑒧𑒱𑒯𑒰𑒩 𑒥𑓂𑒩𑒯𑓂𑒧𑒝 𑒂 𑒩𑒰𑒖𑒣𑒴𑒞 𑒥𑒯𑒳𑒮𑓀𑒐𑓂𑒨𑒏 𑒁𑒕𑒱। 𑒍𑒢𑒰 𑒥𑒩𑒯𑒲, 𑒨𑒰𑒠𑒫, 𑒞𑒹𑒪𑒲, 𑒠𑒳𑒮𑒰𑒡, 𑒡𑒳𑒢𑒱𑒨𑒰, 𑒮𑒼𑒢𑒰𑒩, 𑒧𑒪𑓂𑒪𑒰𑒯 𑒮𑒹𑒯𑒼 𑒁𑒕𑒱 𑒧𑒳𑒠𑒰 𑒁𑒪𑓂𑒣𑒮𑓀𑒐𑓂𑒨𑒏। 𑒖𑒑𑒠𑒩𑒧𑒹 𑒢𑒟𑒳𑒢𑒲 𑒮𑒱𑓀𑒯𑒏 𑒮𑒩𑒠𑒰𑒩𑒲 𑒕𑒪𑒢𑒱, 𑒂 𑒁𑒮𑓂𑒮𑒲 𑒣𑓂𑒩𑒞𑒱𑒬𑒞 𑒦𑒴𑒧𑒱𑒯𑒰𑒩 𑒯𑒳𑒢𑒏𑒩 𑒪𑒚𑒻𑒞 𑒕𑒪𑒢𑒱। 𑒖𑒃𑒮𑒿 𑒣𑒔𑒏𑒼𑒮𑒲𑒧𑒹 𑒗𑒑𑒛𑓃𑒰-𑒗𑓀𑒗𑒙𑒱𑒏 𑒏𑒰𑒩𑒼𑒥𑒰𑒩 𑒔𑒪𑒻𑒞 𑒕𑒪𑒢𑒱। 𑒖𑒑𑒠𑒩𑒏 𑒢𑒟𑒳𑒢𑒲 𑒮𑒱𑓀𑒯 𑒮𑒹𑒯𑒼 𑒏𑒥𑒲𑒩 𑒣𑓀𑒟𑒲। 𑒍 𑒪𑒼𑒯𑒱𑒨𑒰 𑒣𑒙𑓂𑒙𑒲𑒏 𑒩𑒰𑒖𑒣𑒴𑒞𑒹 𑒧𑒯𑒰𑒞𑓂𑒧𑒰𑒏 𑒮𑒹𑒫𑒏। 𑒍 𑒮𑓀𑒐𑓂𑒨𑒰𑒧𑒹 𑒏𑒧 𑒧𑒳𑒠𑒰 𑒬𑒏𑓂𑒞𑒱𑒬𑒰𑒪𑒲 𑒩𑒯𑒟𑒱। 𑒮𑒧𑓂𑒣𑓂𑒩𑒠𑒰𑒨𑒏 𑒩𑒴𑒣𑒧𑒹 𑒖𑒑𑒠𑒩 𑒏𑒞𑒹𑒏𑒼 𑒙𑒳𑒏𑒛𑓃𑒲𑒧𑒹 𑒥𑒿𑒙𑒪। 𑒩𑒰𑒖𑒣𑒴𑒞 𑒏𑒥𑒲𑒩 𑒣𑓀𑒟𑒲 𑒠𑒱𑒮 𑒞𑒿 𑒦𑒴𑒧𑒱𑒯𑒰𑒩 𑒩𑒰𑒡𑒰-𑒏𑒵𑒭𑓂𑒝 𑒮𑒧𑓂𑒣𑓂𑒩𑒠𑒰𑒨 𑒠𑒱𑒮, 𑒨𑒰𑒠𑒫-𑒥𑒩𑒯𑒲, 𑒠𑒳𑒮𑒰𑒡 𑒏𑒥𑒲𑒩 𑒣𑓀𑒟 𑒠𑒱𑒮। 𑒞𑒿 𑒡𑒳𑒢𑒱𑒨𑒰𑒿 𑒃𑒮𑓂𑒪𑒰𑒧 𑒠𑒱𑒮। 𑒧𑒪𑓂𑒪𑒰𑒯 𑒞𑒿 𑒮𑒯𑒖𑒯𑒱 𑒟𑒰𑒪-𑒣𑒰𑒢𑒱𑒧𑒹 𑒩𑒯𑒢𑒱𑒯𑒰𑒩 𑒕𑒲 𑒞𑒿𑒋 𑒫𑒻𑒭𑓂𑒝𑒫 𑒮𑒧𑓂𑒣𑓂𑒩𑒠𑒰𑒨𑒧𑒹 𑒏𑒱𑒁𑒋 𑒖𑒰𑒋𑒞। 𑒏𑒥𑒲𑒩 𑒣𑓀𑒟𑒲𑒏 𑒗𑓀𑒗𑒙𑒏 𑒯𑒪𑓂𑒪𑒰 𑒮𑒴𑒢𑒱 𑒪𑒼𑒯𑒱𑒨𑒰𑒣𑒙𑓂𑒙𑒲𑒥𑒪𑒰 𑒧𑒯𑒰𑒞𑓂𑒧𑒰 𑒖𑒑𑒠𑒩𑒧𑒹 𑒂𑒥𑒱 𑒏𑓄 𑒂𑒮𑒢 𑒪𑒑𑒰 𑒠𑒹𑒪𑒢𑒱 𑒂 𑒂𑒢-𑒂𑒢 𑒮𑒹𑒫𑒏𑒰𑒢 𑒮𑒦𑒏𑒹𑒿 𑒁𑒥𑒻𑒪𑒹 𑒮𑒹𑒯𑒼 𑒏𑒯𑒱 𑒠𑒹𑒪𑒐𑒱𑒢। 𑒧𑒯𑒰𑒦𑒰𑒩𑒞 𑒪𑒛𑓃𑒰𑒃 𑒖𑒏𑒰𑒿 𑒥𑒹𑒩𑒧𑒰𑒏 𑒡𑒩𑒞𑒲 𑒮𑒢-𑒮𑒢 𑒏𑒩𑒋 𑒪𑒰𑒑𑒪। 𑒬𑒰𑒮𑓂𑒞𑓂𑒩𑒰𑒩𑓂𑒟𑒏 𑒮𑒧𑒋 𑒱𑒢𑒩𑓂𑒡𑒰𑒩𑒱𑒞 𑒦𑒹𑒪। 𑒧𑒹𑒪𑒰 𑒖𑒏𑒰𑒿 𑒑𑒰𑒧 𑒦𑓄 𑒑𑒹𑒪। 𑒣𑒩𑒼𑒣𑒙𑓂𑒙𑒰𑒏 𑒂𑒿𑒐𑒱 𑒥𑒹𑒩𑒧𑒰 𑒠𑒱𑒮 𑒙𑒏𑒙𑒏𑒲 𑒪𑒑𑒾𑒢𑒹, 𑒧𑒳𑒠𑒰 𑒅𑒔𑒱𑒞 𑒦𑒹𑒪, 𑒮𑒯𑒲 𑒦𑒹𑒪 𑒢𑒢𑒾𑒩𑒥𑒪𑒰 𑒫𑒳𑒠𑓂𑒠𑒲 𑒠𑒰𑒮 𑒏𑒢𑒲 𑒣𑒰𑒕𑒴 𑒯𑒙𑒱 𑒧𑒰𑒩𑒱-𑒠𑓀𑒑𑒰𑒮𑒿 𑒑𑒰𑒧𑒏𑒹𑒿 𑒥𑒔𑒰 𑒪𑒹𑒪𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒣𑒩𑒱𑒫𑒰𑒩 𑒂𑒩𑒼 𑒮𑒞𑒩𑓀𑒑𑒲। 𑒋𑒏 𑒠𑒱𑒮 𑒮𑒧𑒰𑒖𑒏 𑒮𑒦 𑒣𑒰𑒫𑒢𑒱, 𑒠𑒹𑒫𑒮𑓂𑒟𑒰𑒢𑒮𑒿 𑒖𑒳𑒛𑓃𑒪 𑒞𑒿 𑒣𑒱𑒞𑒰𑒖𑒲 𑒮𑒳𑒥𑒹 𑒠𑒰𑒮𑒏 𑒣𑒱𑒞𑒰𑒏 𑒮𑒹𑒫𑒏 (𑒏𑒥𑒲𑒩 𑒣𑓀𑒟𑒧𑒹 𑒖𑒹𑒏𑒩𑒰 𑒮𑒹𑒫𑒏 𑒏𑒯𑒪 𑒖𑒰 𑒕𑒻 𑒍𑒏𑒩𑒹 𑒠𑒼𑒮𑒩 𑒚𑒰𑒧 𑒔𑒹𑒪𑒰𑒹 𑒏𑒯𑒪 𑒖𑒰𑒃 𑒕𑒻।) 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒣𑒱𑒞𑒰𑒖𑒲𑒣𑒩 𑒏𑒥𑒲𑒩 𑒣𑓀𑒟𑒲 𑒫𑒱𑒔𑒰𑒩𑒡𑒰𑒩𑒰𑒏 𑒣𑓂𑒩𑒦𑒰𑒫। 𑒧𑒰𑒮-𑒧𑒰𑒮 𑒠𑒱𑒢 𑒠𑒩𑒥𑒖𑓂𑒖𑒰𑒣𑒩 𑒮𑒞𑒮𑓀𑒑-𑒦𑒖𑒢 𑒔𑒪𑒱𑒞𑒹 𑒩𑒯𑒻𑒞 𑒕𑒪𑒢𑓂𑒯𑒱। 𑒞𑒹𑒮𑒩 𑒠𑒱𑒮 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏 𑒧𑒰𑒋, 𑒮𑒧𑒮𑓂𑒞𑒲𑒣𑒳𑒩 𑒖𑒱𑒪𑒰𑒏 𑒮𑒰𑒯𑒼-𑒣𑒙𑒢𑒱𑒨𑒰 𑒥𑒪𑒰𑒏 𑒮𑒹𑒫𑒏। 𑒢𑒯𑒱𑒩𑒹𑒮𑒿 𑒮𑒲𑒐 𑒦𑓄 𑒂𑒋𑒪 𑒩𑒯𑒟𑒱, 𑒯𑒳𑒢𑒏𑒩 𑒞𑒹𑒮𑒩𑒹 𑒮𑒧𑓂𑒣𑓂𑒩𑒠𑒰𑒨, 𑒑𑒳𑒩𑒳 𑒫𑒻𑒭𑓂𑒝𑒫𑒼 𑒥𑒢𑒥𑒻𑒞 𑒂 𑒮𑒰𑒏𑒚𑒼 𑒔𑒹𑒪𑒰 𑒧𑓀𑒞𑓂𑒩 𑒠𑓄 𑒥𑒢𑒥𑒻𑒞, 𑒮𑒰𑒪𑒧𑒹 𑒋𑒏 𑒥𑒹𑒩 𑒒𑒳𑒧𑒻𑒞-𑒒𑒰𑒧𑒻𑒞 𑒆𑒯𑒼 𑒂𑒥𑒱 𑒏𑓄 𑒣𑒰𑒢-𑒮𑒰𑒞 𑒠𑒱𑒢 𑒩𑒯𑒻𑒞 𑒕𑒪𑒰𑒯। 𑒥𑓂𑒩𑒰𑒯𑓂𑒧𑒝 𑒕𑒪𑒰𑒯, 𑒁𑒣𑒢𑒹 𑒯𑒰𑒟𑒹 𑒦𑒼𑒖𑒢 𑒥𑒢𑒥𑒻 𑒕𑒪𑒰𑒯। 𑒥𑒹𑒩𑒧𑒰 𑒠𑒳𑒩𑓂𑒑𑒰𑒮𑓂𑒟𑒰𑒢𑒧𑒹 𑒥𑒪𑒱-𑒣𑓂𑒩𑒠𑒰𑒢 𑒢𑒻 𑒯𑒹𑒥𑒰𑒏 𑒨𑒋𑒯 𑒏𑒰𑒩𑒝 𑒕𑒪 𑒖𑒹 𑒋𑒏 𑒮𑓂𑒟𑒰𑒢𑒏 𑒮𑒧𑒰𑒖 𑒫𑒻𑒭𑓂𑒝𑒫 𑒮𑒧𑓂𑒣𑓂𑒩𑒠𑒰𑒨𑒮𑒿 𑒖𑒳𑒛𑓃𑒪 𑒞𑒿 𑒠𑒼𑒮𑒩 𑒮𑓂𑒟𑒰𑒢𑒧𑒹 𑒢𑒟𑒳𑒢𑒲 𑒮𑒱𑓀𑒯𑒏 𑒫𑒩𑓂𑒔𑒮𑓂𑒫 𑒩𑒯𑒢𑒱 𑒞𑒿𑒋 𑒮𑒹 𑒢𑒻 𑒦𑒹𑒪।
𑒖𑒯𑒱𑒢𑒰 𑒔𑒳𑒪𑓂𑒯𑒱𑒣𑒩 𑒔𑒜𑓃𑒪 𑒥𑒩𑓂𑒞𑒢𑒧𑒹 𑒔𑒰𑒅𑒩-𑒣𑒰𑒢𑒱 𑒠𑒹𑒪𑒰 𑒣𑒕𑒰𑒞𑒱 𑒧𑒛𑓃𑒮𑒙𑒏𑒼, 𑒧𑒛𑓃𑒥𑒗𑒳𑒍, 𑒑𑒳𑒛𑓃-𑒐𑒲𑒩𑒼 𑒐𑒱𑒔𑒛𑓃𑒱𑒨𑒼 𑒂 𑒮𑒳𑒢𑓂𑒠𑒩 𑒦𑒰𑒞 𑒮𑒹𑒯𑒼 𑒥𑒢𑒻𑒞 𑒁𑒕𑒱 𑒞𑒯𑒱𑒢𑒰 𑒥𑒩𑒞𑒢 𑒠𑒹𑒪 𑒔𑒰𑒅𑒩-𑒣𑒰𑒢𑒱 𑒖𑒏𑒰𑒿 𑒥𑒹𑒩𑒧𑒰𑒏 𑒠𑒳𑒩𑓂𑒑𑒰-𑒣𑒴𑒖𑒰 𑒋𑒏 𑒮𑓀𑒑 𑒏𑒞𑒹𑒏𑒼 𑒫𑒮𑓂𑒞𑒳 𑒥𑒢𑒾𑒪𑒏। 𑒁𑒐𑒢 𑒡𑒩𑒱 𑒃𑒪𑒰𑒏𑒰𑒧𑒹 𑒠𑒳𑒩𑓂𑒑𑒰-𑒣𑒴𑒖𑒰 𑒋𑒏 𑒖𑒰𑒞𑒱𑒏 𑒫𑒰 𑒧𑒯𑒢𑒟𑒰𑒢𑒰𑒏 𑒣𑒴𑒖𑒰 𑒕𑒪 𑒍𑒃𑒣𑒩 𑒔𑒼𑒙 𑒣𑒛𑓃𑒪। 𑒮𑓀𑒑 𑒄𑒯𑒼 𑒔𑒼𑒙 𑒣𑒛𑓃𑒪 𑒖𑒹 𑒮𑒦 𑒖𑒰𑒞𑒱𑒏 𑒏𑒳𑒧𑒰𑒩𑒱𑒏 𑒣𑒯𑒳𑒿𑒔𑒏 𑒮𑓀𑒑 𑒮𑒰𑒿𑒗 𑒮𑒹𑒯𑒼 𑒣𑒯𑒳𑒿𑒔𑒾𑒪 (𑒠𑒲𑒣 𑒪𑒹𑒮𑒱 𑒮𑒰𑒿𑒗 𑒠𑒹𑒥) 𑒑𑒹𑒪। 𑒖𑒹𑒏𑒩 𑒣𑓂𑒩𑒔𑒰𑒩 𑒂𑒢𑒼-𑒂𑒢 𑒑𑒰𑒧𑒧𑒹 𑒦𑒹𑒪। 𑒠𑒼𑒮𑒩 𑒠𑒱𑒮 𑒥𑒪𑒱 𑒣𑓂𑒩𑒠𑒰𑒢 𑒢𑒻 𑒯𑒋𑒥 𑒮𑒹𑒯𑒼 𑒋𑒏𑒙𑒰 𑒩𑓀𑒑 𑒣𑒏𑒛𑓃𑒪𑒏। 𑒨𑒋𑒯 𑒣𑒩𑒱𑒮𑓂𑒟𑒱𑒞𑒱 𑒥𑒹𑒩𑒧𑒰 𑒠𑒳𑒩𑓂𑒑𑒰𑒣𑒴𑒖𑒰𑒏𑒹𑒿 𑒩𑒰𑒖𑒢𑒲𑒞𑒱𑒏 𑒩𑒴𑒣 𑒣𑒏𑒛𑓃𑒾𑒪𑒏। 𑒠𑒳𑒢𑒴 𑒮𑓂𑒟𑒰𑒢𑒏 𑒥𑒲𑒔 𑒋𑒏𑒙𑒰 𑒖𑒥𑒩𑒠𑒮𑓂𑒞 𑒐𑒰𑒡𑒱 𑒥𑒢𑒾𑒪𑒏। 𑒋𑒏 𑒮𑓂𑒟𑒰𑒢 𑒕𑒹𑒯𑒰 𑒮𑒧𑒰𑒖𑒏 𑒥𑒢𑒪 𑒩𑒯𑒪 𑒞𑒿 𑒠𑒼𑒮𑒩 𑒮𑒞𑓂𑒞𑒰𑒮𑒿 𑒖𑒳𑒛𑓃𑒱 𑒑𑒹𑒪। 𑒮𑒞𑓂𑒞𑒰𑒮𑒿 𑒖𑒳𑒛𑓃𑒻𑒏 𑒏𑒰𑒩𑒝 𑒦𑒹𑒪 𑒖𑒹 𑒧𑒡𑒹𑒣𑒳𑒩𑒏 𑒧𑒡𑒹𑒣𑒳𑒩 𑒥𑓂𑒪𑒾𑒏 𑒣𑓂𑒩𑒧𑒳𑒐। 𑒁𑒙𑓂𑒚𑒰𑒃𑒮 𑒣𑓀𑒔𑒰𑒨𑒞𑒏 𑒥𑓂𑒪𑒾𑒏 𑒧𑒡𑒹𑒣𑒳𑒩। 𑒍𑒢𑒰 𑒧𑒱𑒪𑒰-𑒖𑒳𑒪𑒰 𑒏𑓄 𑒖𑒰𑒞𑒱𑒏 𑒂𑒡𑒰𑒩 𑒢𑒻 𑒩𑒰𑒖𑒢𑒲𑒞𑒱𑒏 𑒂𑒡𑒰𑒩 𑒚𑒰𑒜𑓃 𑒦𑒹𑒪। 𑒮𑒰𑒻𑓀𑒮𑒹 𑒧𑒡𑒹𑒣𑒳𑒩𑒧𑒹 𑒏𑒞𑒹 𑒖𑒰𑒞𑒱𑒏 𑒧𑒳𑒐𑒱𑒨𑒰 𑒕𑒪। 𑒱𑒮𑒩𑓂𑒤 𑒧𑒳𑒮𑒪𑒧𑒰𑒢 𑒧𑒳𑒐𑒱𑒨𑒰 𑒯𑒙𑒪 𑒩𑒯𑒪। 𑒢𑒻 𑒞𑒿 𑒮𑒥𑒯𑒏 𑒮𑒧𑒩𑓂𑒟𑒢 𑒩𑒯𑒢𑒱। 𑒏𑒰𑒩𑒝𑒼 𑒕𑒪 𑒖𑒹 𑒖𑒰𑒞𑒱 𑒏𑒼𑒢𑒼 𑒏𑒱𑒋𑒏 𑒢𑒹 𑒯𑒳𑒁𑒋 𑒧𑒳𑒠𑒰 𑒧𑒳𑒐𑒱𑒨𑒰𑒏 𑒧𑒰𑒢𑒹 𑒏𑒰𑓀𑒑𑓂𑒩𑒹𑒮𑒲 𑒕𑒪। 𑒞𑒃𑒮𑒿 𑒂𑒹𑒤𑒱𑒮𑒼 𑒋𑒏𑒕𑒰𑒯𑒰 𑒕𑒪। 𑒠𑒳𑒢𑒴 𑒯𑒟𑒱𑒨𑒰𑒩𑒏 𑒣𑓂𑒩𑒨𑒼𑒑 𑒍 𑒮𑒦 𑒏𑒹𑒪𑒢𑒱। 𑒖𑒞𑒋 𑒖𑒰𑒞𑒱𑒏 𑒑𑒩 𑒪𑒯𑒢𑒱 𑒞𑒞𑒋 𑒖𑒰𑒞𑒱𑒏 𑒂 𑒖𑒞𑒋 𑒮𑒹 𑒢𑒻 𑒞𑒞𑒋 𑒩𑒰𑒖𑒢𑒲𑒞𑒱𑒏 𑒩𑓀𑒑 𑒔𑒜𑓃𑒥𑒟𑒱। 𑒖𑒃𑒮𑒿 𑒔𑒢𑓂𑒠𑒰𑒏 𑒩𑒴𑒣 𑒩𑒼𑒖𑒑𑒰𑒩 𑒠𑒱𑒮 𑒥𑒜𑓃𑒪। 𑒥𑓂𑒪𑒾𑒏 𑒂𑒤𑒱𑒮 𑒅𑒚𑒱 𑒏𑓄 𑒮𑒹𑒯𑒼 𑒠𑒳𑒩𑓂𑒑𑒰 𑒮𑓂𑒟𑒰𑒢 𑒣𑒯𑒳𑒿𑒔𑒋 𑒪𑒰𑒑𑒪। 𑒖𑒃 𑒠𑒱𑒢 𑒧𑒹𑒪𑒰 𑒯𑒼𑒃 𑒞𑒃 𑒠𑒱𑒢 𑒨𑒰 𑒞𑒿 𑒏𑒼𑒢𑒼 𑒢𑒫 𑒨𑒼𑒖𑒢𑒰𑒏 𑒂𑒫𑒹𑒠𑒢 𑒪𑒱𑒁𑒋 𑒣𑒯𑒳𑒿𑒔 𑒖𑒰𑒃𑒞 𑒫𑒰 𑒏𑒼𑒢𑒼 𑒥𑒿𑒙𑒫𑒰𑒩𑒰 𑒏𑒩𑒋। 𑒍𑒢𑒰 𑒠𑒳𑒩𑓂𑒑𑒰𑒣𑒴𑒖𑒰𑒏 𑒣𑒯𑒱𑒪 𑒪𑒰𑒦 𑒑𑒾𑓀𑒂𑒿𑒏𑒹𑒿 𑒄 𑒦𑒹𑒪 𑒖𑒹 𑒏𑒱𑒕𑒳 𑒑𑒼𑒙𑒹 𑒕𑒼𑒛𑓃𑒱 𑒁𑒡𑒱𑒏𑒰𑓀𑒬 𑒣𑒩𑒱𑒫𑒰𑒩𑒧𑒹 𑒫𑒵𑒠𑓂𑒡𑒰𑒫𑒮𑓂𑒟𑒰 𑒣𑒹𑓀𑒬𑒢 𑒦𑒹𑒙𑒱 𑒑𑒹𑒪। 𑒥𑓂𑒪𑒾𑒏𑒏 𑒮𑒦𑒮𑒿 𑒕𑒼𑒙 𑒣𑓀𑒔𑒰𑒨𑒞 𑒥𑒹𑒩𑒧𑒰 𑒂 𑒮𑒦𑒮𑒿 𑒥𑒹𑒮𑒲 𑒑𑒼𑒙𑒹𑒏𑒹𑒿 𑒣𑒯𑒱𑒪 𑒥𑒹𑒩 𑒫𑒵𑒠𑓂𑒡𑒰 𑒣𑒹𑓀𑒬𑒢 𑒦𑒹𑒙𑒪। 𑒧𑒳𑒠𑒰 𑒦𑒲𑒞𑒩𑒹-𑒦𑒲𑒞𑒩 𑒖𑒥𑒩𑒠𑒮𑓂𑒞 𑒣𑓂𑒩𑒞𑒱𑒏𑓂𑒩𑒱𑒨𑒰 𑒦𑒹𑒪। 𑒏𑒱𑒕𑒳 𑒑𑒼𑒙𑒹 𑒥𑒪𑒱𑒏 𑒣𑓂𑒩𑒮𑒰𑒠 𑒠𑒳𑒂𑒩𑒹 𑒩𑒴𑒮𑒱 𑒩𑒯𑒪𑒰𑒯 𑒞𑒿 𑒏𑒱𑒕𑒳 𑒑𑒼𑒙𑒹 𑒤𑒖𑓂𑒗𑒞𑒱 𑒮𑒳𑒢𑒱 𑒑𑒰𑒧-𑒑𑒰𑒧 𑒔𑒩𑓂𑒔𑒏 𑒧𑒳𑒠𑓂𑒠𑒰 𑒥𑒢𑒪। 𑒑𑒰𑒧𑒏 𑒩𑒰𑒖𑒢𑒲𑒞𑒱𑒧𑒹 𑒮𑒹𑒯𑒼 𑒧𑒼𑒛𑓃 𑒂𑒋𑒪। 𑒧𑒼𑒛𑓃 𑒁𑒥𑒻𑒏 𑒏𑒰𑒩𑒝 𑒦𑒹𑒪 𑒖𑒹 𑒑𑒰𑒧𑒏 𑒦𑒲𑒞𑒩 𑒖𑒹 𑒖𑒰𑒞𑒱𑒏 𑒥𑒢𑒰𑒥𑒙𑒱 𑒁𑒕𑒱 𑒍𑒯𑒼 𑒏𑒞𑒹 𑒩𑓀𑒑𑒏 𑒁𑒕𑒱। 𑒍𑒢𑒰 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒥𑒰𑒯𑓂𑒧𑒝 𑒥𑒿𑒙𑒰 𑒑𑒹𑒪 𑒩𑒯𑒟𑒱। 𑒠𑒳𑒢𑒴 𑒮𑓂𑒟𑒰𑒢𑒏𑒹𑒿 𑒯𑒳𑒢𑒏𑒩 𑒮𑒧𑒩𑓂𑒟𑒢 𑒩𑒯𑒢𑒱। 𑒋𑒏 𑒠𑒱𑒮 𑒣𑓀𑒛𑒱𑒞 𑒫𑓂𑒨𑒰𑒏𑒩𑒝𑒰𑒔𑒰𑒩𑓂𑒨 𑒅𑒠𑒱𑒞 𑒢𑒰𑒩𑒰𑒨𑒝 𑒗𑒰 𑒣𑓀𑒛𑒱𑒞 𑒦𑒹𑒪𑒰𑒯 𑒞𑒿 𑒠𑒼𑒮𑒩 𑒠𑒱𑒮 𑒫𑒻𑒠𑒱𑒏, 𑒫𑓂𑒨𑒰𑒏𑒩𑒝𑒰𑒔𑒰𑒩𑓂𑒨 𑒣𑓀𑒛𑒱𑒞 𑒏𑒰𑒧𑒹𑒬𑓂𑒫𑒩 𑒗𑒰 𑒦𑒹𑒪𑒰𑒯। 𑓑𑓙𑓖𑓒 𑒄.𑒏 𑒧𑒳𑒐𑒱𑒨𑒰 (𑒣𑓀𑒔𑒰𑒨𑒞 𑒧𑒳𑒐𑒱𑒨𑒰) 𑒔𑒳𑒢𑒰𑒫𑒧𑒹 𑒥𑓂𑒩𑒰𑒯𑓂𑒧𑒝𑒹 𑒧𑒳𑒐𑒱𑒨𑒰 𑒯𑒰𑒩𑒥𑒼 𑒏𑒹𑒪𑒰𑒯 𑒂 𑒖𑒲𑒞𑒥𑒼 𑒏𑒹𑒪𑒰𑒯। 𑒥𑒔𑒢𑒴 𑒧𑒱𑒬𑓂𑒩, 𑒖𑒱𑒢𑒏𑒰 𑒁𑒏𑓂𑒭𑒩𑒏 𑒥𑒼𑒡 𑒢𑒻 𑒩𑒯𑒢𑒱 𑒧𑒳𑒠𑒰 𑒃𑒧𑒰𑒢𑒠𑒰𑒩𑒲𑒮𑒿 𑒏𑒰𑒖 𑒏𑒩𑒻𑒏 𑒔𑒪𑒻𑒞 𑒑𑒰𑒧𑒹 𑒢𑒻 𑒁𑓀𑒔𑒪𑒏 𑒢𑒹𑒞𑒰𑒏 𑒬𑓂𑒩𑒹𑒝𑒲𑒧𑒹 𑒕𑒪𑒰𑒯। 𑒁𑒣𑒢𑒹 𑒞𑒿 𑒧𑒳𑒐𑒱𑒨𑒰 𑒢𑒻 𑒥𑒢𑒪𑒰𑒯 𑒧𑒳𑒠𑒰 𑒁𑒣𑒢 𑒮𑒧𑒩𑓂𑒟𑒏 𑒧𑒳𑒐𑒱𑒨𑒰 𑒩𑒯𑒢𑒱। 𑒯𑒰𑒩𑒪𑒰 𑒅𑒞𑓂𑒞𑒩 𑒩𑒰𑒖𑒢𑒲𑒞𑒱𑒧𑒹 𑒣𑒕𑒰𑒩 𑒐𑒹𑒪𑒢𑒱। 𑒮𑒩𑒮𑒚𑒱𑒏 𑒔𑒳𑒢𑒰𑒫𑒧𑒹 𑒏𑒰𑒿𑒑𑓂𑒩𑒹𑒮𑒏𑒹𑒿 𑒖𑒥𑒩𑒠𑒮𑓂𑒞 𑒡𑒏𑓂𑒏𑒰 𑒪𑒑𑒪 𑒩𑒯𑒋। 𑒧𑒡𑒹𑒣𑒳𑒩 𑒥𑓂𑒪𑒾𑒏𑒏 𑒢𑒹𑒞𑒰 𑒖𑒰𑒢𑒏𑒲 𑒥𑒰𑒥𑒴 (𑒬𑓂𑒩𑒲 𑒖𑒰𑒢𑒏𑒲𑒢𑒢𑓂𑒠𑒢 𑒮𑒱𑓀𑒯) 𑒕𑒪𑒰𑒯, 𑒖𑒹 𑒫𑒱𑒡𑒰𑒨𑒏 𑒩𑒯𑒱 𑒣𑓂𑒩𑒞𑒱𑒢𑒱𑒡𑒱𑒞𑓂𑒫 𑒏𑓄 𑒔𑒳𑒏𑒪 𑒕𑒪𑒰𑒯। 𑒍 𑒙𑒴𑒙𑒱 𑒏𑓄 𑒧𑒯𑒰𑒧𑒰𑒨𑒰 𑒥𑒰𑒥𑒴𑒏 𑒮𑓀𑒑 𑒖𑒢𑒏𑓂𑒩𑒰𑒢𑓂𑒞𑒱 𑒠𑒪𑒧𑒹 𑒂𑒥𑒱 𑒔𑒳𑒏𑒪 𑒕𑒪𑒰𑒯। 𑒖𑒹 𑒪𑒰𑒦 𑒮𑒼𑒬𑒪𑒱𑒮𑓂𑒙 𑒣𑒰𑒩𑓂𑒙𑒲𑒏𑒹𑒿 𑒦𑒹𑒙𑒪 𑒂 𑒫𑒰𑒮𑒳𑒠𑒹𑒫 𑒥𑒰𑒥𑒴 (𑒬𑓂𑒩𑒲 𑒫𑒰𑒮𑒳𑒠𑒹𑒫 𑒣𑓂𑒩𑒮𑒰𑒠 𑒧𑒯𑒞𑒼) 𑒋𑒧.𑒋𑒪.𑒋. 𑒦𑒹𑒪𑒰𑒯। 𑒖𑒰𑒱𑒞𑒏 𑒥𑒢𑒰𑒥𑒙𑒱- 𑒥𑒹𑒩𑒧𑒰𑒏 𑒥𑓂𑒩𑒰𑒯𑓂𑒧𑒝 𑒣𑒰𑒿𑒔 𑒐𑒝𑓂𑒛𑒧𑒹 𑒫𑒱𑒦𑒰𑒖𑒱𑒞 𑒁𑒕𑒱। 𑒍𑒢𑒰 𑒔𑒳𑒢𑒰𑒫𑒏 𑒢𑒰𑒍𑓀𑒣𑒩 𑒋𑒏 𑒩𑒯𑒻 𑒕𑒪 𑒧𑒳𑒠𑒰 𑒮𑒰𑒧𑒰𑒖𑒱𑒏 𑒫𑓂𑒨𑒫𑒯𑒰𑒩𑒧𑒹 𑒠𑒴𑒩𑒲 𑒥𑒢𑒪 𑒕𑒪𑒢𑒱। 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒖𑒹 𑓑𑓙𑓖𑓒 𑒄.𑒧𑒹 𑒣𑒯𑒱𑒢𑒹 𑒥𑒢𑒪 𑒕𑒪 𑒍𑒃𑒧𑒹 𑒥𑓂𑒩𑒰𑒯𑓂𑒧𑒝 𑒮𑒦 𑒙𑒴𑒙𑒱 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒥𑒢𑒹𑒢𑒹 𑒩𑒯𑒟𑒱। 𑒣𑒰𑒿𑒔𑒼 𑒐𑒝𑓂𑒛𑒏 𑒁𑒪𑒑-𑒁𑒪𑒑 𑒮𑒰𑒧𑒰𑒖𑒱𑒏𑒞𑒰 𑒕𑒪𑒢𑒱। 𑒏𑒟𑒼-𑒏𑒳𑒙𑒳𑒧𑒻𑒞𑒲 𑒂 𑒐𑒰𑒢𑒼-𑒣𑒲𑒢𑒧𑒹 𑒠𑒴𑒩𑒲 𑒕𑒪𑒢𑒱। 𑒥𑒩𑒃, 𑒏𑒼𑒃𑒩, 𑒏𑒱𑒨𑒼𑒙𑒧𑒹 𑒋𑒏𑒩𑒴𑒣𑒞𑒰 𑒕𑒪। 𑒋𑒏𑒩𑒴𑒣𑒞𑒰 𑒄 𑒖𑒹 𑒐𑒹𑒢𑒰𑒃-𑒣𑒲𑒢𑒰𑒃, 𑒣𑒰𑒫𑒢𑒱-𑒞𑒱𑒯𑒰𑒩 𑒋𑒏𑒩𑓀𑒑𑒰𑒯 𑒕𑒪𑒢𑒱। 𑒡𑒰𑒢𑒳𑒏 𑒠𑒴 𑒐𑒝𑓂𑒛𑒧𑒹 𑒫𑒱𑒦𑒰𑒖𑒱𑒞 𑒕𑒪, 𑒁𑒐𑒢𑒼 𑒁𑒕𑒱। 𑒠𑒳𑒢𑒴𑒏 𑒥𑒲𑒔𑒏 𑒠𑒴𑒩𑒲 𑒁𑒡𑒱𑒏 𑒁𑒕𑒱। 𑒞𑒹𑒏𑒩 𑒏𑒰𑒩𑒝 𑒁𑒕𑒱 𑒖𑒹 𑒥𑒯𑒳𑒞 𑒣𑒯𑒱𑒢𑒹𑒮𑒿 𑒡𑒰𑒢𑒳𑒏 𑒐𑒥𑒰𑒮𑒱𑒨𑒼 𑒏𑒩𑒻𑒞 𑒂𑒋𑒪 𑒁𑒕𑒱 𑒂 𑒏𑒱𑒮𑒰𑒢𑒱𑒨𑒼 𑒖𑒱𑒢𑒑𑒲 𑒥𑒢𑒰 𑒖𑒲𑒥𑒻𑒞 𑒂𑒋𑒪 𑒁𑒕𑒱। 𑒞𑒯𑒱𑒢𑒰 𑒧𑒪𑓂𑒪𑒰𑒯𑒼 𑒫𑒱𑒦𑒰𑒖𑒱𑒞 𑒁𑒕𑒱। 𑒧𑒳𑒮𑒯𑒩 𑒣𑒩𑒱𑒫𑒰𑒩 𑒖𑒹𑒩𑒑𑒩 𑒁𑒕𑒱 𑒧𑒳𑒠𑒰 𑒍𑒏𑒩𑒰𑒧𑒹 𑒮𑒹𑒯𑒼 𑒤𑒳𑒙𑒤𑒰𑒙 𑒯𑒼𑒃𑒞𑒹 𑒩𑒯𑒻 𑒕𑒻। 𑒞𑒹𑒏𑒩 𑒏𑒰𑒩𑒝 𑒯𑒼𑒃 𑒕𑒻 𑒖𑒹 𑒏𑒼𑒢𑒼 𑒦𑒼𑒖-𑒏𑒰𑒖𑒧𑒹 𑒮𑒦𑒏𑒹𑓀 𑒮𑒦 𑒢𑒻 𑒐𑒳𑒂 𑒣𑒥𑒻𑒞 𑒁𑒕𑒱 𑒖𑒃𑒮𑒿 𑒁𑒣𑒢𑒰𑒧𑒹 𑒫𑒱𑒦𑒰𑒖𑒱𑒞 𑒩𑒯𑒻𑒋। 𑒧𑒡𑒹𑒣𑒳𑒩 𑒥𑓂𑒪𑒾𑒏𑒮𑒿 𑒪𑓄 𑒏𑓄 𑒑𑒰𑒧 𑒡𑒩𑒱𑒏 𑒔𑒼𑒙𑒮𑒿 𑒥𑒔𑒢𑒴 𑒧𑒱𑒬𑓂𑒩 𑒔𑒼𑒙𑒰 𑒑𑒹𑒪𑒰𑒯। 𑒣𑒳𑒩𑒢𑒰 𑒮𑓀𑒑𑒲 𑒮𑒦 𑒖𑒹 𑒩𑒯𑒢𑒱 𑒍 𑒮𑒦 𑒮𑒢𑓂𑒨𑒰𑒮 𑒪𑓄 𑒪𑒹𑒪𑒢𑒱। 𑒮𑒱𑒠𑓂𑒡𑒰𑒢𑓂𑒞𑒏 𑒢𑒰𑒍𑓀𑒣𑒩 𑒁𑒣𑒢 𑒫𑒼𑒙 𑒁𑒩𑓂𑒣𑒱𑒞 𑒏𑒹𑒢𑒹 𑒩𑒯𑒪𑒰𑒯। 𑒥𑒔𑒢𑒴 𑒧𑒱𑒬𑓂𑒩𑒏 𑒥𑓂𑒩𑒹𑒢 𑒣𑓂𑒩𑒦𑒰𑒫𑒱𑒞 𑒦𑓄 𑒑𑒹𑒪𑒢𑒱। 𑒖𑒃𑒮𑒿 𑒨𑒞𑓂𑒩-𑒏𑒳𑒞𑓂𑒩 𑒥𑒰𑒖𑒋 𑒪𑒑𑒪𑒰𑒯। 𑒢𑒞𑒲𑒖𑒰 𑒦𑒹𑒪𑒢𑒱 𑒖𑒹 𑒣𑒼𑒐𑒩𑒱𑒧𑒹 𑒛𑒳𑒥𑒰-𑒛𑒳𑒥𑒰 𑒋𑒞𑓂𑒞𑒹 𑒧𑒳𑒏𑒱𑒨𑒾𑒪𑒏𑒢𑒱 𑒖𑒹 𑒣𑒲𑒚𑒲𑒧𑒹 𑒖𑒥𑒩𑒠𑒮𑓂𑒞 𑒒𑒰 𑒦𑓄 𑒑𑒹𑒪𑒢𑒱। 𑒠𑒩𑒦𑓀𑒑𑒰𑒧𑒹 𑒂𑒣𑒩𑒹𑒬𑒢 𑒦𑒹𑒪𑒢𑒱 𑒞𑒐𑒢 𑒒𑒰 𑒚𑒲𑒏 𑒦𑒹𑒪𑒢𑓂𑒯𑒱।
….
𑒠𑒳𑒩𑓂𑒑𑒰𑒮𑓂𑒟𑒰𑒢 𑒥𑒢𑒻𑒮𑒿 𑒣𑒴𑒩𑓂𑒫 𑒕𑒼𑒙-𑒣𑒻𑒒 𑒁𑒢𑒹𑒏𑒼 𑒮𑓂𑒟𑒰𑒢 𑒕𑒪, 𑒏𑒼𑒢𑒼 𑒢𑒻 𑒏𑒼𑒢𑒼 𑒩𑒴𑒣𑒧𑒹 𑒁𑒐𑒢𑒼 𑒁𑒕𑒱। 𑒥𑒪𑒠𑒹𑒫 𑒥𑒰𑒥𑒴 (𑒮𑒩𑒱𑒮𑒥 𑒣𑒰𑒯𑒲) 𑒥𑒹𑒙𑒰𑒏 𑒅𑒣𑒪𑒹𑒐𑒢𑒰𑒧𑒹 𑒋𑒏𑒙𑒰 𑒬𑒱𑒫𑒰𑒪𑒨 𑒥𑒛𑓃𑒏𑒲 𑒣𑒼𑒐𑒩𑒱𑒏 𑒅𑒞𑓂𑒞𑒩𑒫𑒩𑒱𑒨𑒰 𑒧𑒯𑒰𑒩𑒣𑒩 𑒥𑒢𑒾𑒪𑒢𑒱। 𑒁𑒐𑒳𑒢𑒏𑒰 𑒯𑒱𑒮𑒰𑒥𑒮𑒿 𑒧𑓀𑒠𑒱𑒩 𑒕𑒼𑒙𑒹 𑒧𑒳𑒠𑒰 𑒖𑒃 𑒠𑒱𑒢 𑒥𑒢𑒾𑒪 𑒑𑒹𑒪 𑒥𑒯𑒳𑒞 𑒮𑒳𑒢𑓂𑒠𑒩 𑒧𑓀𑒠𑒱𑒩 𑒩𑒯𑒻। 𑒍𑒢𑒰 𑒁𑒚𑒰𑒮𑒲𑒏 𑒦𑒳𑒧𑒏𑒧𑒧𑒹 𑒐𑒮𑒱 𑒣𑒛𑓃𑒪 𑒧𑒳𑒠𑒰 𑒮𑓂𑒟𑒰𑒢 𑒂𑒩𑒼 𑒔𑒧𑒏𑒱 𑒑𑒹𑒪। 𑒍𑒯𑒲 𑒧𑒻𑒠𑒰𑒢𑒧𑒹 𑒠𑒳𑒩𑓂𑒑𑒼𑒣𑒴𑒖𑒰 𑒯𑒼𑒃𑒋 𑒂 𑒧𑒳𑒮𑒪𑒧𑒰𑒢𑒏 𑒠𑒰𑒯𑒰𑒏 𑒧𑒹𑒪𑒰 𑒮𑒹𑒯𑒼 𑒪𑒑𑒻𑒋। 𑒧𑒹𑒪𑒰𑒧𑒹 𑒁𑒏𑒮𑒩𑒯𑒰𑒿 𑒥𑒹𑒣𑒰𑒩𑒱𑒨𑒼 𑒂 𑒠𑒹𑒐𑒱𑒢𑒱𑒯𑒰𑒩𑒼 𑒯𑒱𑒢𑓂𑒠𑒳𑒋𑒏 𑒣𑒩𑒱𑒫𑒰𑒩 𑒩𑒯𑒻𑒞 𑒁𑒕𑒱। 𑒠𑒼𑒮𑒩 𑒮𑓂𑒟𑒰𑒢 𑒩𑒰𑒡𑒰-𑒏𑒵𑒭𑓂𑒝, 𑒩𑒰𑒧-𑒖𑒰𑒢𑒏𑒲, 𑒯𑒢𑒳𑒧𑒰𑒢-𑒧𑒯𑒰𑒠𑒹𑒫 𑒮𑒥𑒯𑒏 𑒮𑒧𑓂𑒧𑒱𑒪𑒱𑒞 𑒮𑓂𑒟𑒰𑒢 𑒁𑒕𑒱। 𑒋𑒏𑒹 𑒮𑓂𑒟𑒰𑒢𑒣𑒩 𑒩𑒰𑒧𑒼-𑒖𑒰𑒢𑒏𑒲 𑒂 𑒩𑒰𑒡𑒼-𑒏𑒵𑒭𑓂𑒝 𑒕𑒟𑒱। 𑒮𑓂𑒟𑒰𑒢 𑒥𑒯𑒳𑒞 𑒣𑒳𑒩𑒰𑒢 𑒁𑒕𑒱। 𑒥𑒾𑒡𑒴 𑒠𑒰𑒮 𑒮𑓂𑒟𑒰𑒢 𑒥𑒢𑒾𑒪𑒢𑒱। 𑒬𑒳𑒠𑓂𑒡 𑒫𑒻𑒩𑒰𑒑𑒲 𑒕𑒪𑒰𑒯। 𑒣𑒩𑒱𑒫𑒰𑒩 𑒢𑒻 𑒕𑒪𑒢𑒱, 𑒧𑒳𑒠𑒰 𑒮𑓂𑒟𑒰𑒢𑒏𑒹𑒿 𑒮𑓂𑒟𑒰𑒢 𑒥𑒢𑒾𑒢𑒹 𑒩𑒯𑒟𑒱। 𑒏𑒧𑒮𑒿-𑒏𑒧 𑒋𑒏 𑒥𑒹𑒩 𑒁𑒣𑒢𑒼 𑒮𑒾𑓀𑒮𑒹 𑒑𑒰𑒧 𑒒𑒳𑒧𑒻𑒞 𑒕𑒪𑒰𑒯 𑒂 𑒮𑒦𑒮𑒿 𑒯𑒥-𑒑𑒥 𑒏𑒩𑒻 𑒕𑒪𑒰𑒯। 𑒪𑒼𑒏𑒼 𑒅𑒣𑒏𑒻𑒛𑓃-𑒅𑒣𑒏𑒻𑒛𑓃 𑒏𑒯𑒻 𑒕𑒪𑒢𑒱 𑒖𑒹 𑒥𑒰𑒥𑒰 𑒎𑒗𑒳𑒏𑒰 𑒮𑒱𑒠𑒯𑒰 𑒯𑒧𑒩𑒹 𑒠𑒱𑒮𑒮𑒿 𑒩𑒯𑒞𑒻। 𑒁𑒮𑒏𑒩𑒹 𑒒𑒳𑒧𑒻𑒞 𑒕𑒪𑒰𑒯। 𑒍𑒢𑒰 𑒍 𑒚𑒏𑒳𑒩𑒥𑒰𑒛𑓃𑒲 𑒥𑒢𑒾𑒢𑒹 𑒕𑒪𑒰𑒯, 𑒧𑒳𑒠𑒰 𑒥𑒱𑒢𑒳 𑒧𑒳𑒩𑓂𑒞𑒱𑒋𑒏। 𑒪𑒼𑒏𑒏 𑒠𑒳𑒐-𑒠𑒩𑓂𑒠𑒏𑒹𑒿 𑒯𑒵𑒠𑒋𑒮𑒿 𑒣𑒏𑒛𑓃𑒻𑒞 𑒕𑒪𑒰𑒯। 𑒦𑒐𑒩𑒾𑒪𑒲 (𑒮𑒳𑒐𑒹𑒞) 𑒢𑒲𑒪 𑒏𑒼𑒚𑒲𑒏 𑒮𑒹𑒯𑒥𑒰𑒏 (𑒁𑓀𑒑𑓂𑒩𑒹𑒖 𑒥𑒹𑒣𑒰𑒩𑒲) 𑒁𑒢𑓂𑒨𑒰𑒨 𑒢𑒻 𑒥𑒩𑒠𑒰𑒮 𑒏𑓄 𑒮𑒾𑓀𑒮𑒹 𑒥𑒹𑒩𑒧𑒰 𑒪𑒼𑒏𑒏𑒹𑒿 𑒏𑒯𑒪𑒐𑒱𑒢 𑒖𑒹 𑒋𑒏𑒩𑒰 𑒦𑒑𑒥𑒻𑒏 𑒁𑒕𑒱। 𑒞𑒹𑒣𑒙𑒰 𑒖𑒧𑒲𑒢 𑒪𑓄 𑒪𑓄 𑒮𑒦𑒙𑒰 𑒐𑒹𑒞 𑒧𑒰𑒩𑒢𑒹 𑒖𑒰𑒃𑒋। 𑒛𑒹𑒜𑓃-𑒯𑒟𑓂𑒟𑒲 𑒪𑓄 𑒏𑓄 𑒁𑒣𑒢𑒼 𑒒𑒳𑒧𑒻 𑒕𑒪𑒰𑒯 𑒂 𑒫𑒋𑒯 𑒢𑒹𑒢𑒹 𑒂𑒑𑒴 𑒦𑒹𑒪𑒰𑒯। 𑒦𑒹𑒥𑒹 𑒢𑒻 𑒏𑒹𑒪𑒰𑒯, 𑒏𑓄 𑒏𑓄 𑒠𑒹𑒐𑒰 𑒠𑒹𑒪𑒐𑒱𑒢। 𑒍𑒯𑒲 𑒮𑓂𑒟𑒰𑒢𑒣𑒩 𑒧𑒯𑒰𑒫𑒲𑒩 𑒠𑒰𑒮 𑒦𑒹𑒪𑒰𑒯। 𑒑𑒩𑒲𑒥 𑒣𑒩𑒱𑒫𑒰𑒩𑒏 𑒧𑒯𑒰𑒫𑒲𑒩 𑒠𑒰𑒮 𑒏𑒥𑒲𑒩 𑒣𑓀𑒟𑒏 𑒮𑒲𑒐, 𑒮𑓂𑒟𑒰𑒢𑒣𑒩 𑒂𑒥𑒱 𑒑𑒹𑒪𑒰𑒯। 𑒥𑒾𑒡𑒴𑒍 𑒠𑒰𑒮𑒏 𑒅𑒧𑒩 𑒢𑒱𑒔𑓂𑒔𑒰 𑒧𑒳𑒿𑒯𑒹𑒿 𑒦𑒹𑒪𑒢𑒱। 𑒧𑒯𑒰𑒫𑒲𑒩 𑒠𑒰𑒮𑒏𑒹𑒿 𑒩𑒰𑒐𑒱 𑒪𑒹𑒪𑒢𑒱। 𑒫𑒻𑒭𑓂𑒝𑒫 𑒩𑒯𑒥𑒹 𑒏𑒩𑒟𑒱। 𑒧𑒳𑒠𑒰 𑒥𑒾𑒡𑒴 𑒠𑒰𑒮𑒏 𑒣𑓂𑒩𑒦𑒰𑒫 𑒩𑒯𑒥𑒹 𑒏𑒩𑒢𑒱, 𑒖𑒃𑒮𑒿 𑒥𑒯𑒳𑒞 𑒅𑒧𑒹𑒩𑒏 𑒣𑒕𑒰𑒞𑒱 𑒥𑒱𑒂𑒯 𑒏𑒹𑒪𑒢𑒱। 𑒮𑒰𑒡𑒰𑒩𑒝 𑒣𑒩𑒱𑒫𑒰𑒩𑒮𑒿 𑒂𑒋𑒪 𑒧𑒯𑒰𑒫𑒲𑒩 𑒠𑒰𑒮𑒏 𑒫𑒱𑒔𑒰𑒩 𑒥𑒯𑒳𑒞 𑒅𑒠𑒰𑒩 𑒕𑒪𑒢𑒱। 𑒦𑒴𑒧𑒱𑒯𑒰𑒩 𑒩𑒯𑒱𑒞𑒼 𑒮𑒥𑒯𑒏 𑒣𑒩𑒱𑒫𑒰𑒩𑒧𑒹 𑒏𑒥𑒲𑒩 𑒣𑓀𑒟𑒲 𑒣𑒩𑒱𑒫𑒰𑒩 𑒥𑒴𑒗𑒱 𑒦𑒰𑒞-𑒩𑒼𑒙𑒲 𑒮𑒦 𑒐𑒰𑒃 𑒕𑒪𑒰𑒯। 𑒫𑒻𑒠𑒰𑒑𑒱𑒩𑒲𑒏 𑒖𑓂𑒘𑒰𑒢 𑒦𑒹𑒪𑒢𑒱। 𑒫𑒻𑒠𑒰𑒑𑒱𑒩𑒲 𑒐𑒴𑒥 𑒥𑒜𑓃𑒪𑒢𑒱। 𑒫𑒋𑒯 𑒂𑒧𑒠𑒢𑒲 𑒠𑒹𑒐𑒱 𑒥𑒱𑒂𑒯𑒼 𑒏𑒩𑒾𑒪 𑒑𑒹𑒪𑒢𑒱 𑒂 𑒏𑒹𑒥𑒼 𑒏𑒹𑒪𑒢𑒱। 𑒞𑒰𑒡𑒩𑒱 𑒮𑓂𑒟𑒰𑒢𑒧𑒹 𑒥𑒲𑒒𑒰 𑒣𑒰𑒿𑒔𑒹𑒏, 𑒮𑒧𑒰𑒖𑒏 𑒠𑒰𑒢 𑒏𑒋𑒪, 𑒖𑒧𑒲𑒢𑒼 𑒦𑓄 𑒑𑒹𑒪 𑒕𑒪𑒢𑒱। 𑒯𑒤𑒲𑒧 𑒐𑒰𑒃 𑒕𑒪𑒰𑒯। 𑒧𑒳𑒠𑒰 𑒮𑓂𑒫𑒰𑒦𑒫𑒮𑒿 𑒥𑒯𑒳𑒞 𑒅𑒠𑒰𑒩 𑒕𑒪𑒰𑒯। 𑒣𑒩𑒼𑒣𑒙𑓂𑒙𑒰𑒧𑒹 𑒢𑒰𑒧 𑒏𑒧𑒹𑒢𑒹 𑒕𑒪𑒰𑒯। 𑒦𑒑𑒫𑒰𑒢𑒏 𑒠𑒩𑒫𑒰𑒩 (𑒚𑒏𑒳𑒩𑒫𑒰𑒛𑓃𑒲) 𑒧𑒹 𑒣𑒻𑒒𑒮𑒿 𑒣𑒻𑒒 𑒂 𑒕𑒼𑒙𑒮𑒿 𑒕𑒼𑒙 𑒖𑒹 𑒏𑒱𑒨𑒼 𑒮𑓀𑒑𑒲𑒞𑒖𑓂𑒘 𑒎𑒞𑒰𑒯 𑒖𑒯𑒰𑒿 𑒡𑒩𑒱 𑒥𑒢𑒱 𑒣𑒛𑓃𑒞 𑒐𑒳𑒬𑒲𑒮𑒿 𑒫𑒱𑒠𑒰 𑒏𑒩𑒥𑒢𑒱। 𑒮𑒹 𑒦𑒹𑒥𑒼 𑒏𑒋𑒪। 𑒣𑒩𑒼𑒣𑒙𑓂𑒙𑒰𑒏 𑒠𑒩𑒫𑒰𑒩𑒲 𑒠𑒰𑒮 𑒯𑒼𑒟𑒱 𑒂𑒏𑒱 𑒕𑒚𑒴 𑒠𑒰𑒮, 𑒯𑒱𑒞𑒰𑒃 𑒠𑒰𑒮 𑒯𑒼𑒟𑒱 𑒏𑒱 𑒪𑒐𑒢 𑒠𑒰𑒮, 𑒖𑒱𑒢𑒏𑒹 𑒜𑒼𑒪𑒏𑒱𑒨𑒰 𑒥𑒧𑓂𑒥𑒃𑒧𑒹 𑒢𑒰𑒧𑒲 𑒕𑒟𑒱, 𑒞𑒯𑒱𑒢𑒰 𑒢𑒰𑒙𑒏-𑒢𑒾𑒙𑓀𑒏𑒲 𑒃𑒞𑓂𑒨𑒰𑒠𑒱-𑒃𑒞𑓂𑒨𑒰𑒠𑒱। 𑒁𑒣𑒢 𑒮𑓂𑒫𑒦𑒰𑒫 𑒫𑒋𑒯 𑒩𑒯𑒢𑒱 𑒖𑒹 𑒖𑒐𑒢 𑒯𑒤𑒲𑒧𑒏 𑒢𑒬𑒰 𑒮𑒱𑒩𑒔𑒜𑓃 𑒩𑒯𑒢𑒱 𑒞𑒐𑒢 𑒫𑒱𑒠𑒰 𑒏𑒩𑒟𑒱। 𑒞𑒹𑒮𑒩 𑒮𑓂𑒟𑒰𑒢 𑒕𑒲 𑒥𑓂𑒩𑒯𑓂𑒧 𑒮𑓂𑒟𑒰𑒢। 𑒁𑒐𑒢𑒼 𑒥𑒲𑒒𑒰𑒮𑒿 𑒆𑒣𑒩 𑒖𑒧𑒲𑒢 𑒮𑓂𑒟𑒰𑒢𑒧𑒹 𑒁𑒕𑒱। 𑒣𑒏𑓂𑒏𑒰 𑒧𑒰𑒏𑒢। 𑒁𑒰𑓀𑒑𑒢 𑒥𑒰𑒛𑓃𑒲 𑒏𑒹𑒢𑓂𑒠𑓂𑒩, 𑒡𑒩𑓂𑒧𑒩𑒰𑒖 𑒮𑓂𑒟𑒰𑒢 𑒮𑒦 𑒮𑒙𑒪𑒹-𑒮𑒙𑒪। 𑒖𑒰𑒡𑒩𑒱 𑒣𑓀𑒛𑒱𑒞 𑒅𑒣𑒹𑒢𑓂𑒠𑓂𑒩 𑒧𑒱𑒬𑓂𑒩, 𑒖𑒹 𑒫𑒹𑒠, 𑒫𑓂𑒨𑒰𑒏𑒩𑒝, 𑒮𑒰𑒯𑒱𑒞𑓂𑒨 𑒂 𑒖𑓂𑒨𑒼𑒞𑒱𑒭𑒏 𑒂𑒔𑒰𑒩𑓂𑒨 𑒕𑒪𑒰𑒯, 𑒮𑒰𑒪𑒹-𑒮𑒰𑒪 𑒏𑒰𑒞𑒱𑒏 𑒧𑒰𑒮𑒧𑒹 𑒣𑒢𑒩𑒯 𑒠𑒱𑒢 𑒦𑒰𑒑𑒫𑒞 𑒏𑒩𑒻 𑒕𑒪𑒰𑒯। 𑒍𑒢𑒰 𑒍 𑒞𑒞𑒹 𑒑𑓀𑒦𑒲𑒩 𑒂 𑒮𑓀𑒨𑒧𑒲 𑒕𑒪𑒰𑒯 𑒖𑒹 𑒋𑒏 𑒬𑒥𑓂𑒠 𑒤𑒰𑒖𑒱𑒪 𑒢𑒻 𑒥𑒖𑒻𑒞 𑒕𑒪𑒰𑒯 𑒖𑒃𑒮𑒿 𑒥𑒢𑒾𑒂 𑒣𑓀𑒛𑒱𑒞𑒏 𑒥𑒲𑒔 𑒅𑒣𑒯𑒰𑒮𑒏 𑒣𑒰𑒞𑓂𑒩 𑒥𑒢𑒪 𑒕𑒪𑒰𑒯 𑒖𑒹 𑒯𑒳𑒢𑒏𑒰 𑒟𑒼𑒱𑒟𑒨𑒹 𑒢𑒹 𑒕𑒢𑓂𑒯𑒱। 𑒁𑒣𑒢 𑒮𑓂𑒟𑒰𑒢 𑒥𑒴𑒗𑒱 𑒑𑒰𑒧𑒹𑒣𑒩 𑒮𑒿 𑒔𑒾𑒏𑒲 𑒢𑒹𑒢𑒹 𑒁𑒥𑒻𑒞 𑒕𑒪𑒰𑒯 𑒂 𑒂𑒮𑒢𑒏 𑒖𑒹 𑒣𑓂𑒩𑒏𑓂𑒩𑒱𑒨𑒰 𑒕𑒻 𑒮𑒹 𑒏𑒩𑒻𑒞 𑒥𑒻𑒮𑒱 𑒖𑒰𑒃 𑒕𑒪𑒰𑒯। 𑒣𑒯𑒱𑒢𑒹 𑒠𑒴-𑒞𑒲𑒢 𑒠𑒱𑒢 𑒣𑒩𑒔𑒰𑒩𑒹 𑒯𑒼𑒃𑒧𑒹 𑒪𑒰𑒑𑒱 𑒖𑒰𑒃 𑒕𑒪 𑒧𑒳𑒠𑒰 𑒖𑒹𑒢𑒰-𑒖𑒹𑒢𑒰 𑒣𑒩𑒔𑒰𑒩 𑒯𑒼𑒃𑒞 𑒖𑒰𑒃𑒞 𑒕𑒪𑒻 𑒞𑒹𑒢𑒰-𑒞𑒹𑒢𑒰 𑒮𑒳𑒢𑒢𑒱𑒯𑒰𑒩𑒼𑒏 𑒂 𑒦𑒰𑒑𑒫𑒞𑒏𑒹𑒿 𑒂𑒑𑒴 𑒥𑒜𑓃𑒥𑒻𑒏 𑒍𑒩𑒱𑒨𑒰𑒢𑒼 𑒏𑒩𑒻𑒞 𑒖𑒰𑒃𑒞 𑒕𑒪𑒰𑒯।
𑒋𑒏𑒙𑒰 𑒧𑒯𑒰𑒫𑒲𑒩 𑒖𑒲 𑒮𑓂𑒟𑒰𑒢, 𑒣𑒼𑒐𑒩𑒱𑒏 𑒧𑒰𑒯𑒩𑒣𑒩 𑒁𑒡𑒮𑒳𑒐𑒴 𑒏𑒙𑒯𑒩𑒏 𑒑𑒰𑒕 𑒪𑒑 𑒡𑒴𑒖𑒰 𑒑𑒰𑒛𑓃𑒱 𑒮𑓂𑒟𑒰𑒢 𑒮𑓂𑒟𑒰𑒣𑒱𑒞 𑒦𑒹𑒪। 𑒣𑒴𑒖𑒰 𑒬𑒳𑒩𑒴 𑒦𑒹𑒪। 𑒋𑒏𑒙𑒰 𑒁𑒠𑓂𑒦𑒳𑒞 𑒦𑒹𑒪। 𑒁𑒠𑓂𑒦𑒳𑒞 𑒄 𑒦𑒹𑒪 𑒖𑒹 𑒁𑒡𑒮𑒳𑒐𑒴 𑒏𑒙𑒯𑒩𑒏 𑒑𑒰𑒕 𑒣𑒰𑒢𑒱 𑒣𑒲𑒥 𑒖𑒼𑒩 𑒏𑒹𑒪𑒏। 𑒑𑒰𑒕 𑒪𑒯𑒪𑒯𑒰 𑒅𑒚𑒪। 𑒧𑒗𑒼𑒪𑒏𑒹 𑒑𑒰𑒕, 𑒖𑒹𑒢𑒰 𑒛𑒰𑒩𑒱-𑒣𑒰𑒞 𑒮𑒦𑒧𑒹 𑒤𑒛𑓃𑒻𑒏 𑒬𑒏𑓂𑒞𑒱 𑒂𑒥𑒱 𑒑𑒹𑒪𑒻। 𑒛𑒹𑒜𑓃 𑒮𑒋𑒮𑒿 𑒁𑒜𑓃𑒰𑒃 𑒮𑒋 𑒞𑒏 𑒤𑒛𑓃 𑒯𑒳𑒁𑒋 𑒪𑒑𑒪𑒻। 𑒦𑒪𑒯𑒱𑓀 𑒞𑒲𑒢-𑒔𑒾𑒟𑒰𑒃𑒧𑒹 𑒏𑒼𑒯 𑒢𑒯𑒱𑒨𑒹 𑒯𑒼𑒃, 𑒏𑒧𑒩𑒱𑒨𑒹 𑒙𑒰 𑒯𑒼𑒃। 𑒫𑒋𑒯 𑒏𑒙𑒯𑒩𑒏 𑒑𑒰𑒕 𑒮𑓂𑒟𑒰𑒢𑒏 𑒣𑓂𑒩𑒦𑒰𑒫𑒏𑒹𑒿 𑒞𑒹𑒖 𑒏𑒹𑒪𑒏। 𑒃𑒪𑒰𑒏𑒰𑒧𑒹 𑒮𑒧𑒰𑒔𑒰𑒩 𑒣𑒮𑒩𑒱 𑒑𑒹𑒪। 𑒁𑒭𑓂𑒙𑒨𑒰𑒧 𑒏𑒲𑒩𑓂𑒞𑒢 (𑒩𑒰𑒧𑒢𑒫𑒧𑒲, 𑒔𑒻𑒞) 𑒬𑒳𑒩𑒴 𑒦𑒹𑒪 𑒖𑒃𑒧𑒹 𑒞𑒲𑒢 𑒧𑒢𑒮𑒿 𑒣𑒰𑒿𑒔 𑒧𑒢𑒏 𑒥𑒲𑒔 𑒑𑒯𑒳𑒧-𑒔𑒰𑒅𑒩𑒏 𑒣𑒩𑒮𑒰𑒠 𑒥𑒢𑒻𑒞 𑒂 𑒐𑒩𑓂𑒔 𑒯𑒼𑒃𑒞 𑒕𑒪। 𑒖𑒹 𑒋𑒏-𑒋𑒏 𑒧𑒳𑒙𑓂𑒚𑒲 𑒏𑓄 𑒥𑒰𑒿𑒙𑒪 𑒖𑒰𑒃𑒞 𑒕𑒪। 𑒪𑒏𑒛𑓃𑒲𑒏 𑒧𑓀𑒛𑒣 𑒥𑒢𑒪 𑒩𑒯𑒻𑒞 𑒕𑒪 𑒖𑒞𑓂𑒞𑓄 𑒫𑒱𑒮𑒩𑓂𑒖𑒢𑒏 𑒣𑒕𑒰𑒞𑒱 𑒢𑒑𑒩 𑒏𑒲𑒩𑓂𑒞𑒢 𑒯𑒼𑒃𑒞 𑒕𑒪। 𑒢𑒑𑒩 𑒏𑒲𑒩𑓂𑒞𑒢𑒏 𑒁𑒩𑓂𑒟 𑒦𑒹𑒪 𑒔𑒰𑒩𑒱 𑒑𑒼𑒙𑒹 𑒧𑓀𑒛𑒣𑒏𑒹𑒿 𑒅𑒚𑒰 𑒂𑒑𑒴-𑒂𑒑𑒴 𑒮𑒾𑓀𑒮𑒹 𑒑𑒰𑒧 𑒒𑒳𑒧𑒻𑒞 𑒕𑒪𑒰𑒯 𑒂 𑒣𑒰𑒕𑒴-𑒣𑒰𑒕𑒴 𑒏𑒲𑒩𑓂𑒞𑒢-𑒦𑒖𑒢 𑒯𑒼𑒃𑒞 𑒮𑒧𑒰𑒖𑒼 𑒒𑒳𑒧𑒻𑒞 𑒕𑒪𑒰𑒯। 𑒖𑒱𑒢𑒏𑒰 𑒖𑒹 𑒖𑒳𑒛𑓃𑒻𑒞 𑒕𑒪𑒢𑒱 𑒮𑒹 𑒔𑒜𑓃𑒹𑒥𑒰 𑒔𑒜𑓃𑒥𑒻 𑒕𑒪𑒰𑒯। 𑒖𑒃𑒮𑒿 𑒮𑒰𑒖-𑒥𑒰𑒖 𑒏𑒲𑒢𑒪 𑒖𑒰𑒃𑒞 𑒕𑒪। 𑒞𑒯𑒱𑒢𑒰 𑒧𑒳𑒮𑒯𑒩 𑒮𑒦 𑒮𑒹𑒯𑒼 𑒂𑒮𑒲𑒢 𑒧𑒰𑒮𑒧𑒹 𑒣𑒴𑒖𑒰 𑒏𑒩𑒻𑒞 𑒕𑒪𑒰𑒯 𑒂 𑒁𑒐𑒢𑒼 𑒏𑒩𑒻𑒞 𑒕𑒟𑒱, 𑒧𑒱𑒩𑒠𑓀𑒑-𑒗𑒰𑒪𑒱 𑒪𑓄 𑒠𑒮 𑒑𑒼𑒙𑒹 𑒮𑒾𑓀𑒮𑒹 𑒑𑒰𑒧 𑒒𑒴𑒧𑒱 𑒔𑓀𑒠𑒰 𑒏𑒩𑒻 𑒕𑒪𑒟𑒱/ 𑒕𑒟𑒱 𑒖𑒃𑒮𑒿 𑒣𑒴𑒖𑒰𑒏 𑒐𑒩𑓂𑒔 𑒔𑒪𑒻/ 𑒔𑒪𑒻𑒋। 𑒞𑒯𑒱𑒢𑒰 𑒧𑒳𑒮𑒪𑒧𑒰𑒢𑒼 𑒮𑒦 𑒠𑒰𑒯𑒰 𑒥𑒢𑒥𑒻 𑒕𑒟𑒱 𑒂 𑒮𑒾𑓀𑒮𑒹 𑒑𑒰𑒧 𑒒𑒳𑒧𑒻 𑒕𑒟𑒱। 𑒋𑒯𑒹𑒢 𑒦𑒰𑒨𑒔𑒰𑒩𑒰 𑒔𑒪𑒱 𑒂𑒥𑒱 𑒩𑒯𑒪 𑒁𑒕𑒱। 𑒞𑒯𑒱𑒢𑒰 𑒮𑒰𑒪𑒧𑒹 𑒠𑒴 𑒮𑓂𑒟𑒰𑒢𑒣𑒩 𑒠𑒳𑒩𑓂𑒑𑒰 𑒣𑒴𑒖𑒰, 𑒧𑒯𑒰𑒫𑒲𑒩 𑒖𑒲 𑒮𑓂𑒟𑒰𑒢𑒧𑒹 𑒠𑒩𑓂𑒖𑒢𑒼 𑒁𑒭𑓂𑒙𑒨𑒰𑒧, 𑒢𑒫𑒰𑒯, 𑒞𑒲𑒢 𑒠𑒱𑒢𑒏 𑒏𑒥𑒲𑒩 𑒣𑓀𑒟𑒏 𑒮𑓀𑒞 𑒮𑒧𑓂𑒧𑒹𑒪𑒢 𑒠𑒩𑓂𑒖𑒢𑒼 𑒮𑒰𑒯𑒱𑒞𑓂𑒨𑒱𑒏 𑒑𑒼𑒭𑓂𑒚𑒲, 𑒠𑒳𑒂𑒩-𑒠𑒩𑒥𑒖𑓂𑒖𑒰𑒣𑒩 𑒏𑒲𑒩𑓂𑒞𑒢-𑒦𑒖𑒢 𑒃𑒞𑓂𑒨𑒰𑒠𑒱-𑒃𑒞𑓂𑒨𑒰𑒠𑒱 𑒔𑒪𑒱𑒞𑒹 𑒩𑒯𑒻𑒋। 𑒞𑒞𑒥𑒹 𑒢𑒻 𑒞𑒲𑒢-𑒞𑒲𑒢𑒙𑒰 𑒧𑒯𑓀𑒟𑒼, 𑒞𑒲𑒢 𑒮𑒧𑓂𑒣𑓂𑒩𑒠𑒰𑒨𑒏, 𑒂𑒡𑒰 𑒠𑒩𑓂𑒖𑒢 𑒏𑒲𑒩𑓂𑒞𑒢𑒼 𑒧𑓀𑒛𑒪𑒲, 𑒖𑒹 𑒩𑒼𑒖𑒑𑒰𑒩 𑒥𑒢𑒾𑒢𑒹 𑒕𑒟𑒱, 𑒮𑒦 𑒔𑒪𑒱 𑒩𑒯𑒪 𑒁𑒕𑒱। 𑒂𑒐𑒱𑒩 𑒧𑒱𑒟𑒱𑒪𑒰𑒏 𑒮𑒧𑒰𑒖 𑒕𑒱𑒌 𑒏𑒱𑒢𑒹।
𑒋𑒏 𑒞𑒿 𑒍𑒯𑒱𑒢𑒰 𑒮𑒩𑒮𑒚𑒱𑒏 𑒔𑒳𑒢𑒰𑒫 𑒯𑒫𑒰 𑒥𑒯𑒾𑒪𑒏, 𑒞𑒃𑒣𑒩 𑒥𑒹𑒩𑒧𑒰𑒏 𑒦𑒑𑒫𑒞𑒲 (𑓑𑓙𑓖𑓙 𑒮𑓂𑒟𑒰𑒣𑒱𑒞) 𑒮𑒹𑒯𑒼 𑒁𑒣𑒢 𑒠𑒳𑒂𑒩𑒱 𑒐𑒼𑒪𑒱 𑒠𑒹𑒪𑒢𑒱। 𑒑𑒰𑒧𑒏 𑒂𑒨𑒰𑒞 𑒱𑒢𑒩𑓂𑒨𑒰𑒞 𑒂𑒢-𑒂𑒢 𑒮𑒧𑒰𑒖𑒮𑒿 𑒥𑒜𑓃𑒪। 𑒠𑒳𑒢𑒴 𑒯𑒫𑒰 𑒔𑒪𑒪, 𑒋𑒏 𑒠𑒱𑒮 𑒮𑒦 𑒖𑒰𑒞𑒱𑒏 𑒥𑒲𑒔 𑒠𑒳𑒩𑓂𑒑𑒰𑒣𑒴𑒖𑒰 𑒋𑒪𑒲 𑒞𑒿 𑒠𑒼𑒮𑒩-𑒠𑒱𑒮 𑒢𑒫 𑒖𑒫𑒰𑒢𑒏 𑒯𑒵𑒠𑒻𑒧𑒹 𑒏𑒱𑒕𑒳 𑒏𑒩𑒻𑒏 𑒅𑒞𑓂𑒮𑒰𑒯 𑒮𑒹𑒯𑒼 𑒦𑒩𑒪। 𑒍𑒢𑒰 𑒮𑒧𑒰𑒖 𑒮𑒧𑒳𑒠𑓂𑒩𑒼𑒮𑒿 𑒢𑒧𑒯𑒩 𑒁𑒕𑒱। 𑒞𑒿𑒋 𑒮𑒧𑒰𑒖𑒏 𑒦𑒲𑒞𑒩 𑒏𑒲 𑒮𑒦 𑒯𑒼𑒃 𑒕𑒻, 𑒏𑒯𑒥 𑒏𑒚𑒱𑒢 𑒁𑒕𑒱। 𑒧𑒳𑒠𑒰 𑒏𑒱𑒕𑒳 𑒖𑒹 𑒠𑒹𑒐𑒥𑒰𑒧𑒹 𑒁𑒥𑒻𑒋 𑒍 𑒕𑒲 𑒮𑓂𑒞𑓂𑒩𑒲𑒑𑒝𑒏 𑒧𑒰𑒡𑓂𑒨𑒧𑒮𑒿 𑒢𑒻𑒯𑒩-𑒮𑒰𑒮𑒳𑒩𑒏 𑒥𑒲𑒔 𑒣𑒰𑒃-𑒏𑒾𑒛𑓃𑒲, 𑒑𑒯𑒢𑒰-𑒖𑒹𑒥𑒩𑒏 𑒥𑒢𑓂𑒯𑒏𑒲-𑒕𑒢𑒏𑒲। 𑒏𑒼𑒢 𑒑𑒰𑒧𑒏 𑒑𑒯𑒢𑒰 𑒏𑒼𑒢 𑒑𑒰𑒧 𑒑𑒹𑒪 𑒏𑒯𑒥 𑒏𑒚𑒱𑒢। 𑒠𑒼𑒮𑒩 𑒑𑒰𑒧𑒼𑒏 𑒥𑒲𑒔 𑒧𑒯𑒰𑒖𑒢𑒲 𑒂 𑒂𑒢𑒼-𑒂𑒢𑒼 𑒑𑒰𑒧𑒏 𑒥𑒲𑒔। 𑒖𑒧𑒲𑒢𑓂𑒠𑒰𑒩𑒲𑒏 𑒩𑒴𑒂𑒥 𑒞𑒿 𑒐𑒢𑒠𑒰𑒢𑒲 𑒩𑒴𑒂𑒥 𑒥𑒢𑒻𑒋, 𑒖𑒿 𑒮𑒹 𑒢𑒻 𑒥𑒢𑒻𑒋 𑒞𑒿 𑒁𑓀𑒑𑓂𑒩𑒹𑒖 𑒮𑒹𑒯𑒥𑒰 𑒔𑒪𑒱 𑒑𑒹𑒪 𑒂 𑒮𑒯𑒰𑒋𑒥𑒏 𑒥𑒲𑒂 𑒕𑒱𑒙𑒰 𑒑𑒹𑒪। 𑒧𑒻𑒢𑒖𑒢, 𑒧𑒯𑒰𑒖𑒢, 𑒖𑒧𑒲𑒢𑓂𑒠𑒰𑒩𑒏 𑒮𑓀𑒑 𑒖𑒰𑒞𑒱 𑒮𑒰𑒧𑓂𑒣𑓂𑒩𑒠𑒰𑒨𑒱𑒏 𑒏𑒞𑒹 𑒮𑒴𑒞𑓂𑒩 𑒪𑒰𑒑𑒱 𑒑𑒹𑒪 𑒁𑒕𑒱, 𑒥𑒹𑒩𑒧𑒰𑒫𑒰𑒮𑒲𑒏𑒹𑒿 𑒇𑒵𑒝 𑒠𑒻𑒧𑒹 𑒁𑒑𑒳𑒂𑒋𑒪 𑒖𑒰𑒞𑒱𑒏। 𑒐𑒰𑒪𑒲 𑒋𑒏𑒙𑒰 𑒣𑒕𑒳𑒂𑒋𑒪 𑒠𑒰𑒞𑒰, 𑒧𑒳𑒠𑒰 𑒏𑒰𑒩𑒼𑒥𑒰𑒩 𑒕𑒼𑒙। 𑒥𑒹𑒣𑒰𑒩𑒲𑒏 𑒬𑒰𑒮𑒢𑒼 𑒖𑒧𑒲𑒢𑓂𑒠𑒰𑒩𑒮𑒿 𑒦𑒱𑒢𑓂𑒢 𑒯𑒼𑒃𑒞। 𑒐𑒻𑒩 𑒖𑒹 𑒯𑒼𑒅? 𑒬𑓂𑒩𑒰𑒠𑓂𑒡-𑒏𑒩𑓂𑒧 𑒂 𑒥𑒱𑒂𑒯 𑒏𑒩𑓂𑒧 𑒩𑒼𑒏𑒥 𑒣𑒳𑒩𑒼𑒯𑒱𑒞 𑒮𑒦 𑒒𑒼𑒭𑒝𑒰 𑒏𑓄 𑒠𑒹𑒪𑒢𑒱। 𑒑𑒰𑒧𑒏 𑒪𑒼𑒏𑒏 𑒥𑒲𑒔 𑒮𑒧𑒮𑓂𑒨𑒰 𑒚𑒰𑒜𑓃 𑒦𑒹𑒪 𑒖𑒹 𑒂𑒥 𑒏𑒲 𑒯𑒋𑒞? 𑒏𑒥𑒲𑒩 𑒣𑓀𑒟𑒲 𑒧𑒯𑒰𑒞𑓂𑒧𑒰 𑒮𑒦𑒏𑒹𑒿 𑒩𑒰𑒮𑓂𑒞𑒰 𑒦𑒹𑒙𑒪𑒢𑒱, 𑒒𑒼𑒛𑓃-𑒠𑒾𑒛𑓃 𑒬𑒳𑒩𑒴 𑒏𑒹𑒪𑒢𑒱। 𑒮𑒧𑒰𑒖𑒧𑒹 𑒅𑒚𑒻𑒞 𑒂𑒑𑒱 𑒚𑒧𑒏𑒪 𑒩𑒯𑒪। 𑒏𑒥𑒲𑒩 𑒣𑓀𑒟𑒲 𑒮𑒦 𑒞𑒹𑒯𑒹𑒢 𑒖𑒹 𑒖𑒋𑒯 𑒒𑒩 𑒥𑒮𑒥𑒋 𑒔𑒰𑒯𑒻 𑒕𑒟𑒱 𑒞𑒹𑒯𑒲𑒧𑒹 𑒂𑒑𑒱 𑒪𑒑𑒥𑒻 𑒕𑒟𑒱। 𑒑𑒞𑒱-𑒧𑒳𑒏𑓂𑒞𑒱𑒏 𑒫𑒱𑒔𑒰𑒩 𑒞𑒿 𑒮𑒧𑒰𑒖𑒧𑒹 𑒠𑒃 𑒕𑒟𑒱𑒢 𑒧𑒳𑒠𑒰 𑒎𑒗𑒳𑒏𑒰 𑒥𑒰𑒞 𑒏𑒯𑒥𑒹 𑒢𑒹 𑒏𑒩𑒻 𑒕𑒟𑒱𑒢। 𑒂𑒃 𑒯𑒧 𑒏𑒲 𑒕𑒲, 𑒮𑒥𑒯𑒏 𑒣𑓂𑒩𑒬𑓂𑒢 𑒕𑒲। 𑒏𑒥𑒲𑒩𑒏 𑒣𑒰𑒿𑒞𑒱 𑒕𑒢𑓂𑒯𑒱 𑒖𑒹 “𑒮𑒰𑒃 𑒃𑒞𑒢𑒰 𑒠𑒲𑒖𑒱𑒋....।” 𑒧𑒳𑒠𑒰 𑒏𑓄 𑒏𑒞𑒋𑒮𑒿 𑒠𑒻𑒟𑒱 𑒞𑒃𑒚𑒰𑒧 𑒏𑒢𑒹 𑒗𑒪 𑒦𑓄 𑒖𑒰𑒃 𑒕𑒻। 𑒞𑒯𑒱𑒢𑒰 𑒧𑒰𑒨𑒰𑒏 𑒥𑒳𑒢𑒱𑒨𑒰𑒠𑒮𑒿 𑒆𑒣𑒩 𑒅𑒚𑒱 𑒫𑒱𑒔𑒰𑒩 𑒩𑒐𑒻 𑒕𑒟𑒱 𑒖𑒃𑒮𑒿 𑒗𑒪 𑒁𑒢𑓂𑒯𑒰𑒩 𑒦𑓄 𑒖𑒰𑒃 𑒕𑒻। 𑒁𑒡𑓂𑒨𑒰𑒞𑓂𑒧 𑒍𑒯𑒢 𑒣𑒠𑓂𑒡𑒞𑒱 𑒕𑒱𑒌 𑒖𑒹 𑒧𑒢𑒳𑒭𑓂𑒨𑒏𑒹𑒿 𑒧𑒢𑒳𑒭𑓂𑒨 𑒥𑒢𑒻𑒏 𑒪𑒴𑒩𑒱 𑒠𑒃 𑒕𑒻। 𑒐𑒰𑒪𑒲 𑒪𑒳𑒩𑒱𑒨𑒹 𑒢𑒻 𑒍𑒯𑒢 𑒥𑒳𑒡𑒱𑒨𑒼 𑒠𑒃 𑒕𑒻 𑒖𑒹𑒏𑒩𑒰 𑒮𑒳𑒣𑒩 𑒧𑒻𑒢 𑒏𑒯𑒻 𑒕𑒱𑒌। 𑒏𑒱𑒢𑒏𑒰 𑒄 𑒁𑒦𑒱𑒪𑒰𑒭𑒰 𑒢𑒻 𑒕𑒢𑓂𑒯𑒱 𑒖𑒹 𑒮𑒳𑒣𑒩𑒧𑒻𑒢 𑒥𑒢𑒲। 𑒧𑒳𑒠𑒰, 𑒮𑒹 𑒏𑒱𑒁𑒋 𑒢𑒹 𑒦𑓄 𑒣𑒥𑒻𑒋। 𑒖𑓀𑒑𑒪𑒧𑒹 𑒪𑒰𑒐𑒼 𑒑𑒰𑒕 𑒋𑒏 𑒮𑓀𑒑 𑒖𑒲𑒫𑒢-𑒨𑒰𑒣𑒢 𑒏𑒩𑒻𑒞 𑒯𑒫𑒼-𑒫𑒱𑒯𑒰𑒛𑓃𑒱𑒏 𑒗𑒼𑓀𑒏 𑒮𑒯𑒻𑒋। 𑒋𑒏𑒻𑒮𑒧 𑒬𑒞𑒰𑒥𑓂𑒠𑒲𑒏 𑒧𑒰𑓀𑒑 𑒁𑒕𑒱 𑒖𑒹 𑒮𑓂𑒫𑒞𑓀𑒞𑓂𑒩 𑒧𑒢𑒳𑒐 𑒥𑒢𑒱 𑒮𑓂𑒫𑒞𑓀𑒞𑓂𑒩 𑒫𑒱𑒔𑒩𑒝 𑒏𑓄 𑒮𑒏𑒲। 𑒖𑒃𑒚𑒰𑒧 𑒥𑒰𑒙-𑒒𑒰𑒙 𑒮𑒦 𑒁𑒮𑒳𑒩𑒏𑓂𑒭𑒱𑒞 𑒁𑒕𑒱 𑒞𑒃𑒚𑒰𑒧 𑒠𑒱𑒪𑓂𑒪𑒲 𑒠𑒴𑒩 𑒢𑒻 𑒞𑒿 𑒪𑒑 𑒁𑒕𑒱। 𑒞𑒐𑒢 𑒖𑒰𑒋 𑒠𑒱𑒎 𑒖𑒹𑒯𑒼 𑒐𑒹𑒪𑒏 𑒮𑒹𑒯𑒼 𑒣𑒔𑒞𑒰𑒋𑒪 𑒖𑒹 𑒢𑒻 𑒐𑒹𑒪𑒏 𑒮𑒹𑒯𑒼 𑒣𑒔𑒞𑒰𑒃𑒋।
𑒍𑒢𑒰 𑓑𑓙𑓖𑓐 𑒄.𑒮𑒿 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒐𑒹𑒞𑒲𑒮𑒿 𑒟𑒼𑒛𑓃 𑒥𑒯𑒳𑒞 𑒖𑒳𑒛𑓃𑒱 𑒑𑒹𑒪 𑒩𑒯𑒟𑒱। 𑒧𑒱𑒩𑒔𑒰𑒃, 𑒦𑒙𑓂𑒙𑒰, 𑒏𑒼𑒥𑒲, 𑒁𑒪𑓂𑒪𑒴 𑒃𑒞𑓂𑒨𑒰𑒠𑒱𑒏 𑒪𑒑𑒮𑒿 𑒐𑒹𑒞𑒲 𑒬𑒳𑒩𑒴 𑒏𑒹𑒪𑒢𑒱। 𑒡𑒰𑒢, 𑒧𑒩𑒴𑒂, 𑒩𑒥𑓂𑒥𑒲-𑒩𑒰𑒃𑒏 𑒐𑒹𑒞𑒲 𑒖𑒢𑒹 𑒯𑒰𑒟𑒹 𑒯𑒳𑒁𑒋 𑒪𑒑𑒪𑒢𑒱। 𑒦𑒰𑒨𑒏𑒹𑒿 𑒐𑒹𑒞𑒲𑒮𑒿 𑒏𑒧 𑒮𑒩𑒼𑒏𑒰𑒩। 𑒞𑒯𑒴𑒧𑒹 𑒁𑒧𑒰𑒢𑒞 𑒣𑒜𑓃𑒱 𑒪𑒹𑒢𑒹 𑒩𑒯𑒟𑒱𑒢𑓂𑒯। 𑒖𑒧𑒲𑒢𑒏 𑒐𑒱𑒮𑓂𑒮𑒰-𑒣𑒱𑒯𑒰𑒢𑒲 𑒍𑒯𑒢 𑒖𑒹 𑒧𑒯𑒱𑒢𑒼 𑒦𑒩𑒱𑒧𑒹 𑒁𑒢𑓂𑒞 𑒢𑒻 𑒪𑒻𑒞 𑒩𑒯𑒋। 𑒧𑒳𑒠𑒰 𑒁𑒣𑒢𑒼 𑒖𑒱𑒢𑒑𑒲𑒪𑒹 𑒞𑒿 𑒪𑒼𑒏 𑒏𑒱𑒕𑒳 𑒮𑒼𑒔𑒱𑒞𑒹 𑒁𑒕𑒱। 𑒢𑒰𑒔 𑒠𑒱𑒮 𑒗𑒳𑒏𑒱 𑒑𑒹𑒪𑒰𑒯। 𑒧𑒳𑒠𑒰 𑒑𑒩𑒲𑒥𑒏 𑒏𑒪𑒰𑒏𑒹𑒿 𑒅𑒦𑒰𑒛𑓃𑒥 𑒡𑒲𑒨𑒰-𑒣𑒳𑒞𑒰𑒏 𑒐𑒹𑒪 𑒢𑒻। 𑒐𑒻𑒩 𑒖𑒹 𑒯𑒼𑒅।
𑒦𑒼𑒑𑒹𑒢𑓂𑒠𑓂𑒩 𑒖𑒲 𑒮𑒧𑓂𑒣𑒩𑓂𑒏𑒧𑒹 𑒋𑒪𑒰 𑒣𑒕𑒰𑒞𑒱 𑒐𑒹𑒞𑒲𑒏 𑒣𑓂𑒩𑒞𑒱 𑒂𑒩𑒼 𑒖𑒱𑒖𑓂𑒘𑒮𑒰 𑒞𑒹𑒖 𑒦𑒹𑒪𑒢𑒱। 𑒞𑒹𑒖 𑒌 𑒠𑒳𑒂𑒩𑒹 𑒦𑒹𑒪𑒢𑒱 𑒖𑒹 𑒖𑒩𑓂𑒧𑒢𑒲, 𑒖𑒰𑒣𑒰𑒢𑒏 𑒐𑒹𑒞𑒲𑒏 𑒥𑒰𑒞 𑒍 𑒧𑒢𑒧𑒹 𑒥𑒻𑒮𑒰 𑒠𑒹𑒪𑒐𑒱𑒢𑓂𑒯। 𑒯𑒱𑒮𑒰𑒥 𑒖𑒼𑒛𑓃𑒟𑒱 𑒞𑒿 𑒠𑒮 𑒏𑒙𑓂𑒚𑒰 𑒐𑒹𑒞 𑒋𑒏 𑒣𑒩𑒱𑒫𑒰𑒩𑒏 (𑒣𑒰𑒿𑒔 𑒑𑒼𑒙𑒹) 𑒪𑒹𑒪 𑒥𑒹𑒬𑒱𑒨𑒹 𑒥𑒴𑒗𑒱 𑒣𑒛𑓃𑒢𑒱। 𑒞𑒯𑒴𑒧𑒹 𑒮𑒰𑒃𑒥𑒹𑒩𑒱𑒨𑒰𑒏 𑒍𑒯𑒢 𑒏𑒱𑒮𑒰𑒢 𑒁𑒕𑒱 𑒖𑒹 𑒮𑒰𑒪𑒏 𑒕𑒯 𑒧𑒰𑒮, 𑒂𑒚 𑒧𑒰𑒮 𑒜𑒏𑒪 𑒥𑒩𑓂𑒤 𑒯𑒙𑒱𑒞𑒹 𑒡𑒛𑓃-𑒤𑒛𑓃𑒧𑒹 𑒞𑒹𑒢𑒰 𑒏𑓄 𑒐𑒹𑒞𑒲 𑒏𑓄 𑒪𑒃𑒋 𑒖𑒹 𑒥𑒜𑓃𑒱𑒨𑒰 𑒅𑒣𑒖𑒰 𑒅𑒣𑒖𑒰 𑒪𑒃𑒋। 𑒂𑒃 𑒦𑒪𑒯𑒱𑓀 𑒧𑒱𑒟𑒱𑒪𑒰𑓀𑒔𑒪𑒏 𑒁𑒠𑒯𑒰𑒮𑒿 𑒥𑒹𑒮𑒲 𑒦𑒰𑒑 𑒥𑒪𑒳𑒂 𑒑𑒹𑒪 𑒁𑒕𑒱, 𑒧𑒰𑒙𑒱 𑒆𑒣𑒩 𑒥𑒰𑒪𑒳 𑒦𑒩𑒱 𑒑𑒹𑒪 𑒁𑒕𑒱। 𑒮𑒧𑒮𑓂𑒨𑒰 𑒍𑒞𑒹 𑒦𑒰𑒩𑒲 𑒁𑒕𑒱 𑒖𑒹 𑒖𑒯𑒱𑒢𑒰 𑒥𑒰𑒪𑒳 𑒞𑒩𑒮𑒿 𑒆𑒣𑒩 𑒂𑒥𑒱 𑒦𑒴𑒧𑒱𑒏𑒹𑒿 𑒧𑒰𑒩𑒱 𑒠𑒹𑒪𑒏 𑒞𑒯𑒱𑒢𑒰 𑒍𑒏𑒩𑒼 𑒁𑒙𑒰𑒫𑒹𑒬 𑒏𑒩𑒻𑒞 𑒏𑒱𑒮𑒰𑒢𑒏 𑒯𑒰𑒟𑒧𑒹 𑒐𑒹𑒞 𑒂𑒥𑒋। 𑒥𑒱𑒯𑒰𑒩𑒏 𑒧𑒴𑒪 𑒣𑒴𑒿𑒖𑒲 𑒐𑒹𑒞 𑒕𑒲, 𑒖𑒞𑒹 𑒐𑒹𑒞𑒲 𑒮𑒧𑒵𑒠𑓂𑒡 𑒯𑒋𑒞 𑒞𑒞𑒹 𑒩𑒰𑒖𑓂𑒨𑒼 𑒮𑒧𑒵𑒠𑓂𑒡 𑒯𑒋𑒞।
𑒋𑒏 𑒞𑒿 𑒁𑒣𑒢 𑒯𑒰𑒟𑒏 𑒣𑒴𑒿𑒖𑒲, 𑒐𑒹𑒞, 𑒠𑒼𑒮𑒩 𑒖𑒐𑒢 𑒩𑒰𑒖𑒢𑒲𑒞𑒱𑒮𑒿 𑒖𑒳𑒛𑓃𑒱 𑒑𑒹𑒪𑒟𑒱 𑒞𑒐𑒢 𑒞𑒿 𑒏𑒰𑒖𑒼 𑒥𑒜𑓃𑒱 𑒑𑒹𑒪𑒢𑒱। 𑒐𑒹𑒞𑒲 𑒱𑒠𑒮 𑒜𑓀𑒑𑒮𑒿 𑒥𑒜𑓃𑒻𑒏 𑒏𑒼𑒬𑒱𑒬 𑒏𑒹𑒪𑒢𑒱। 𑒣𑒴𑒮𑒰 𑒧𑒹𑒪𑒰𑒮𑒿 𑒐𑒹𑒞𑒲𑒏 𑒏𑒱𑒞𑒰𑒥 𑒏𑒲𑒢𑒱-𑒏𑒲𑒢𑒱 𑒁𑒢𑒋 𑒪𑒑𑒪𑒰। 𑒏𑒱𑒮𑒰𑒢𑒏 𑒖𑒹 𑒏𑒰𑒩𑓂𑒨𑒏𑓂𑒩𑒧 𑒯𑒼𑒃 𑒞𑒃𑒧𑒹 𑒖𑒰𑒋 𑒪𑒑𑒪𑒰। 𑒩𑒰𑒖𑒢𑒲𑒞𑒱𑒮𑒿 𑒖𑒳𑒛𑓃𑒢𑒹 𑒏𑒼𑒙-𑒏𑒔𑒯𑒩𑒲 𑒮𑒹𑒯𑒼 𑒒𑒳𑒧𑒋 𑒪𑒑𑒪𑒰। 𑒧𑒡𑒹𑒣𑒳𑒩 𑒥𑓂𑒪𑒾𑒏𑒧𑒹 𑒖𑒳𑒥𑒹𑒩 𑒮𑒯𑒰𑒋𑒥 𑒣𑒲.𑒍. 𑒩𑒯𑒟𑒱𑒢𑓂𑒯। 𑒥𑒯𑒳𑒞 𑒬𑒩𑒲𑒤 𑒪𑒼𑒏। 𑒁𑒣𑒢𑒰𑒣𑒢 𑒥𑒯𑒳𑒞 𑒁𑒡𑒱𑒏 𑒩𑒯𑒢𑒱। 𑒯𑒳𑒢𑒏𑒰𑒮𑒿 𑒮𑒧𑓂𑒣𑒩𑓂𑒏 𑒦𑒹𑒪𑒢𑒱। 𑒍 𑒋𑒑𑓂𑒩𑒲𑒏𑒪𑓂𑒔𑒩 𑒑𑓂𑒩𑒹𑒖𑒳𑒋𑒙। 𑒮𑓂𑒏𑒴𑒪-𑒏𑒰𑒍𑒪𑒹𑒖 𑒖𑒏𑒰𑒿 𑒒𑓀𑒙𑒼-𑒒𑓀𑒙𑒼 𑒐𑒹𑒞𑒲𑒏 𑒥𑒰𑒞 𑒪𑒼𑒏𑒏𑒹𑒿 𑒥𑒳𑒗𑒥𑒻𑒞 𑒩𑒯𑒟𑒱𑒢। 𑒯𑒳𑒢𑒏𑒰 𑒮𑒧𑓂𑒣𑒩𑓂𑒏𑒮𑒿 𑒄 𑒦𑒹𑒪𑒢𑒱 𑒖𑒹 𑒖𑒞𑒋 𑒯𑒳𑒢𑒏𑒩 𑒏𑒰𑒩𑓂𑒨𑒏𑓂𑒩𑒧 𑒯𑒼𑒢𑓂𑒯𑒱 𑒖𑒰𑒢𑒏𑒰𑒩𑒲 𑒠𑒹𑒟𑒱𑒢। 𑒋𑒑𑓂𑒩𑒲𑒏𑒪𑓂𑒔𑒩 𑒧𑒯𑒰𑒫𑒱𑒠𑓂𑒨𑒰𑒪𑒨- 𑒣𑒴𑒮𑒼-𑒜𑒼𑒪𑒲𑒧𑒹 𑒮𑒰𑒪𑒧𑒹 𑒋𑒏 𑒥𑒹𑒩 𑒢𑒧𑒯𑒩 𑒂 𑒕𑒼𑒙-𑒧𑒼𑒙 𑒏𑒰𑒩𑓂𑒨𑒏𑓂𑒩𑒧 𑒔𑒪𑒱𑒞𑒹 𑒩𑒯𑒻𑒞 𑒕𑒪।
𑓑𑓙𑓖𑓐 𑒄.𑒮𑒿 𑒣𑒴𑒩𑓂𑒫 𑒥𑒹𑒩𑒧𑒰 𑒑𑒰𑒧𑒧𑒹 𑒢𑒹 𑒋𑒏𑒼𑒙𑒰 𑒥𑒼𑒩𑒱𑓀𑒑 𑒩𑒯𑒋 𑒂 𑒢𑒹 𑒠𑒧𑒏𑒪। 𑒮𑒦𑒮𑒿 𑒣𑒯𑒱𑒢𑒹 (𑓑𑓙𑓗𑓑-𑓗𑓒) 𑒮𑓂𑒫. 𑒮𑒞𑓂𑒨 𑒠𑒹𑒫 𑒗𑒰, 𑒖𑒹 𑒣𑒜𑓃𑒪-𑒪𑒱𑒐𑒪 𑒞𑒿 𑒢𑒯𑒱𑒨𑒹 𑒕𑒪𑒰𑒯 𑒧𑒳𑒠𑒰 𑒋𑒫𑒩𑒹𑒛𑒲 𑒥𑒻𑒙𑓂𑒩𑒲𑒏 𑒏𑒧𑓂𑒣𑒢𑒲 𑒏𑒪𑒏𑒞𑓂𑒞𑒰𑒧𑒹 𑒢𑒼𑒏𑒩𑒲 𑒦𑓄 𑒑𑒹𑒪 𑒩𑒯𑒢𑒱, 𑒮𑒹𑒫𑒰 𑒱𑒢𑒫𑒵𑒞𑓂𑒞 𑒦𑒹𑒪 𑒩𑒯𑒟𑒱। 𑒥𑓀𑒑𑒰𑒪𑒏 𑒐𑒹𑒞𑒲𑒏 𑒖𑒰𑒢𑒏𑒰𑒩𑒲 𑒦𑒃𑒨𑒹 𑒑𑒹𑒪 𑒩𑒯𑒢𑒱। 𑒮𑒼𑒔𑒪𑒢𑒱 𑒖𑒹 𑒣𑒰𑒿𑒔 𑒥𑒲𑒒𑒰 𑒐𑒹𑒞 𑒏𑒲𑒢𑒱 𑒖𑒿 𑒥𑒼𑒩𑒱𑓀𑒑 𑒏𑒩𑒰 𑒪𑒹𑒥 𑒞𑒿 𑒣𑒩𑒥𑒩𑒱𑒮 𑒔𑒪𑒱 𑒖𑒰𑒋𑒞। 𑒮𑒹 𑒏𑒩𑒥𑒼 𑒏𑒹𑒪𑒢𑒱। 𑒫𑒋𑒯 𑒥𑒼𑒩𑒱𑓀𑒑 𑒣𑒯𑒱𑒪 𑒕𑒲। 𑒐𑒹𑒞𑒲𑒏 𑒖𑒰𑒢𑒏𑒰𑒩𑒲 𑒦𑒹𑒢𑒹 𑒣𑒰𑒢𑒱𑒏 𑒧𑒯𑒞 𑒪𑒼𑒏 𑒥𑒳𑒗𑒋 𑒪𑒑𑒻 𑒕𑒻। 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲 𑒥𑒢𑒱𑒨𑒹 𑒑𑒹𑒪 𑒩𑒯𑒋। 𑒮𑒩𑒮𑒚𑒱𑒏 𑒩𑒾𑒠𑒲𑒏 𑒣𑒕𑒰𑒞𑒱 𑒥𑒼𑒩𑒱𑓀𑒑-𑒠𑒧𑒏𑒪𑒏 𑒨𑒼𑒖𑒢𑒰 𑒮𑒹𑒯𑒼 𑒖𑒢𑒧𑒪, 𑒧𑒳𑒠𑒰 𑒮𑒞𑒧𑒮𑒳𑒂। 𑒥𑒹𑒩𑒧𑒰 𑒑𑒰𑒧𑒧𑒹 𑒥𑒲.𑒛𑒲.𑒮𑒲.𑒏 𑒥𑒻𑒮𑒰𑒩 𑒦𑒹𑒪। 𑒛𑒲.𑒋𑒧. 𑒮𑒹𑒯𑒼 𑒂𑒋𑒪 𑒩𑒯𑒟𑒱। 𑒥𑓂𑒪𑒾𑒏𑒏 𑒮𑒦 𑒩𑒯𑒥𑒹 𑒏𑒩𑒟𑒱। 𑒞𑒼𑒯𑒤𑒰𑒏 𑒩𑒴𑒣𑒧𑒹 𑒛𑒲.𑒋𑒧. 𑒮𑒯𑒰𑒋𑒥, 𑒞𑒱𑒯𑒰𑒃 𑒮𑒫𑒮𑒱𑒛𑒲𑒏 𑒩𑒴𑒣𑒧𑒹 𑒥𑒼𑒩𑒱𑓀𑒑-𑒠𑒧𑒏𑒪𑒏 𑒔𑒩𑓂𑒔𑒏 𑒮𑓀𑒑 𑒏𑒱𑒮𑒰𑒢𑒏 𑒠𑒬𑒰-𑒠𑒱𑒬𑒰𑒏 𑒔𑒩𑓂𑒔 𑒮𑒹𑒯𑒼 𑒏𑒹𑒪𑒢𑒱। 𑒔𑒰𑒩𑒱 𑒬𑓂𑒩𑒹𑒝𑒲𑒧𑒹 𑒏𑒱𑒮𑒰𑒢𑒏 𑒥𑒿𑒙𑒥𑒰𑒩𑒰𑒏 𑒔𑒩𑓂𑒔 𑒏𑒩𑒻𑒞 𑒮𑒥𑒯𑒏 𑒪𑒰𑒦𑒏 𑒔𑒩𑓂𑒔 𑒏𑒹𑒪𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒂 𑒔𑒰𑒩𑒱 𑒑𑒼𑒙𑒹 𑒧𑒰𑒢𑒹 𑒣𑒰𑒿𑒔𑒙𑒰 𑒏𑒱𑒮𑒰𑒢 𑒫𑒱𑒔𑒰𑒩 𑒏𑒹𑒪𑒢𑒱 𑒖𑒹 𑒁𑒫𑒮𑒩𑒏 𑒅𑒣𑒨𑒼𑒑 𑒏𑒩𑒞𑒰। 𑒣𑒴𑒮𑒰-𑒜𑒼𑒪𑒲𑒮𑒿 𑒪𑓄 𑒏𑓄 𑒖𑒱𑒪𑒰-𑒥𑓂𑒪𑒾𑒏𑒏 𑒥𑒲𑒔 𑒖𑒹 𑒏𑒱𑒮𑒰𑒢 𑒧𑒹𑒪𑒰 𑒫𑒰 𑒑𑒼𑒭𑓂𑒚𑒲 𑒯𑒼𑒃 𑒞𑒃 𑒮𑒦𑒧𑒹 𑒖𑒰𑒃𑒞-𑒁𑒥𑒻𑒞 𑒩𑒯𑒟𑒱, 𑒍𑒢𑒰 𑒣𑒰𑒿𑒔𑒼 𑒑𑒼𑒙𑒹 𑒥𑒼𑒩𑒱𑓀𑒑 𑒑𑒛𑓃𑒥𑒻𑒏 𑒫𑒱𑒔𑒰𑒩 𑒏𑒹𑒪𑒢𑒱 𑒧𑒳𑒠𑒰 𑒠𑒴 𑒑𑒼𑒙𑒹 𑒢𑒻 𑒑𑒛𑓃𑒾𑒪𑒢𑒱। 𑒥𑒼𑒩𑒱𑓀𑒑 𑒑𑒩𑒾𑒪𑒰 𑒣𑒕𑒰𑒞𑒱 𑒢𑒫-𑒢𑒫 𑒡𑒰𑒢, 𑒑𑒯𑒳𑒧 𑒃𑒞𑓂𑒨𑒰𑒠𑒱𑒏 𑒥𑒲𑒂 𑒮𑒹𑒯𑒼 𑒂𑒢𑒋 𑒪𑒑𑒪𑒰। 𑒁𑒐𑒢 (𑓒𑓐𑓑𑓒 𑒄.𑒧𑒹) 𑒖𑒞𑒹 𑒡𑒰𑒢𑒏 𑒅𑒣𑒖 𑒢𑒻 𑒦𑓄 𑒩𑒯𑒪 𑒁𑒕𑒱 𑒞𑒃𑒮𑒿 𑒥𑒹𑒮𑒲 𑒂𑒚𑒧 𑒠𑒬𑒏𑒧𑒹 𑒯𑒳𑒁𑒋 𑒪𑒰𑒑𑒪 𑒕𑒪। 𑒮𑒲𑒞𑒰 𑒡𑒰𑒢, 𑒖𑒹 𑒧𑒹𑒯𑒱𑒨𑒼 𑒯𑒼𑒃𑒞 𑒁𑒕𑒱 𑒂 𑒐𑒰𑒃𑒨𑒼𑒧𑒹 𑒢𑒲𑒏 𑒯𑒼𑒃𑒞 𑒁𑒕𑒱, 𑒮𑒫𑒰 𑒏𑓂𑒫𑒲𑒢𑓂𑒙𑒪 𑒏𑒙𑓂𑒚𑒰 𑒅𑒣𑒖𑒋 𑒪𑒰𑒑𑒪। 𑒱𑒮𑒩𑓂𑒤 𑒡𑒰𑒢𑒹 𑒑𑒯𑒳𑒧 𑒢𑒻, 𑒂𑒪𑒴-𑒏𑒼𑒥𑒲, 𑒙𑒧𑒰𑒙𑒩 𑒃𑒞𑓂𑒨𑒰𑒠𑒱𑒏 𑒐𑒹𑒞𑒲 𑒮𑒹𑒯𑒼 𑒖𑒼𑒛𑓃 𑒣𑒏𑒛𑓃𑒪𑒏। 𑒖𑒹 𑒑𑒰𑒧 𑒏𑒩𑓂𑒖𑒏 𑒞𑒩𑒧𑒹 𑒠𑒥𑒪 𑒕𑒪 𑒍 𑒁𑒣𑒢𑒰 𑒣𑒋𑒩𑒣𑒩 𑒚𑒰𑒜𑓃 𑒯𑒳𑒁𑒋 𑒪𑒰𑒑𑒪। 𑒑𑒰𑒧𑒮𑒿 𑒖𑒧𑒲𑒢𑓂𑒠𑒰𑒩𑒼 𑒮𑒦 𑒔𑒪𑒱 𑒑𑒹𑒪 𑒩𑒯𑒟𑒱। 𑒋𑒏 𑒑𑒼𑒙𑒹 𑒧𑒰𑒞𑓂𑒩 𑒥𑒿𑒔𑒪 𑒩𑒯𑒪𑒰, 𑒖𑒱𑒢𑒏𑒰 𑒦𑒰𑒿𑒖𑒧𑒹 𑒋𑒏 𑒮𑒨 𑒠𑒮 𑒥𑒲𑒒𑒰 𑒖𑒧𑒲𑒢। 𑒖𑒃𑒣𑒩 𑒣𑒕𑒰𑒞𑒱 𑒖𑒥𑒩𑒠𑒮 𑒪𑒛𑓃𑒰𑒃 𑒦𑒹𑒪। 𑒥𑒲.𑒛𑒲.𑒮𑒲.𑒏 𑒥𑒻𑒮𑒰𑒩𑒧𑒹 𑒛𑒲.𑒋𑒧. 𑒮𑒯𑒰𑒋𑒥 𑒮𑒴𑒠𑒐𑒼𑒩 𑒧𑒯𑒰𑒖𑒢𑒏 𑒔𑒩𑓂𑒔 𑒫𑒱𑒮𑓂𑒞𑒰𑒩𑒮𑒿 𑒏𑒹𑒢𑒹 𑒩𑒯𑒟𑒱। 𑒮𑓀𑒑-𑒮𑓀𑒑 𑒄𑒯𑒼 𑒏𑒯𑒱 𑒠𑒹𑒪𑒐𑒱𑒢 𑒖𑒹 𑒠𑒼𑒥𑒩𑒮𑒿 𑒤𑒰𑒖𑒱𑒪 𑒖𑒹 𑒧𑒯𑒰𑒖𑒢 𑒪𑒹𑒞𑒰𑒯 𑒯𑒳𑒢𑒏𑒰𑒣𑒩 𑒏𑒰𑒢𑒴𑒢𑒲 𑒏𑒰𑒩𑒫𑒰𑒃 𑒯𑒹𑒞𑒢𑒱। 𑒏𑒩𑓂𑒖𑒠𑒰𑒩 𑒮𑒦 𑒢𑒱𑒔𑒹𑒢 𑒦𑓄 𑒑𑒹𑒪𑒰𑒯 𑒖𑒹 𑒖𑒯𑒱𑒨𑒰 𑒯𑒋𑒞 𑒞𑒯𑒱𑒨𑒰 𑒢𑒹 𑒠𑒹𑒥𑒻। 𑒢𑒻 𑒩𑒯𑒢𑒹 𑒏𑒞𑒋 𑒮𑒿 𑒠𑒹𑒥𑒻। 𑒧𑒳𑒠𑒰 𑒧𑒯𑒰𑒖𑒢𑒏 𑒂𑒏𑓂𑒩𑒧𑒝 𑒦𑒹𑒪। 𑒣𑒏𑒛𑓃𑒰-𑒣𑒏𑒛𑓃𑒲 𑒬𑒳𑒩𑒴 𑒦𑒹𑒪।
𑒐𑒹𑒞𑒲𑒏 𑒮𑓀𑒑-𑒮𑓀𑒑 𑒑𑒰𑒧𑒧𑒹 𑒂𑒩𑒼-𑒂𑒩𑒼 𑒏𑒰𑒖 𑒮𑒦 𑒯𑒳𑒁𑒋 𑒪𑒰𑒑𑒪। 𑒑𑒰𑒧𑒏 𑒖𑒞𑒹 𑒥𑒰𑒢𑓂𑒯–𑒮𑒛𑓃𑒏 𑒁𑒕𑒱 𑒍𑒏𑒩𑒰 𑒢𑒏𑓂𑒬𑒰𑒮𑒿 𑒁𑒢𑒳𑒧𑒴𑒪 𑒥𑒢𑒾𑒪 𑒑𑒹𑒪। 𑒖𑒃𑒮𑒿 𑒑𑒰𑒧𑒏 𑒩𑒴𑒣𑒹-𑒩𑒹𑒐𑒰 𑒥𑒠𑒪𑒱 𑒑𑒹𑒪। 𑒄 𑒦𑒹𑒪 𑒖𑒢-𑒮𑒯𑒨𑒼𑒑𑒮𑒿। 𑒣𑒕𑒰𑒞𑒱 𑒮𑒩𑒏𑒰𑒩𑒱𑒨𑒼 𑒨𑒼𑒖𑒢𑒰 𑒮𑒦𑒮𑒿 𑒧𑒰𑒙𑒱𑒏 𑒏𑒰𑒖, 𑒐𑒩𑓀𑒖𑒰 𑒃𑒞𑓂𑒨𑒰𑒠𑒱 𑒯𑒼𑒃𑒞 𑒩𑒯𑒪। 𑒁𑒐𑒢 𑒞𑒿 𑒮𑒯𑒖𑒯𑒱 𑒑𑒰𑒧𑒏 𑒍𑒯𑒢 𑒩𑒴𑒣 𑒥𑒢𑒱 𑒑𑒹𑒪 𑒁𑒕𑒱 𑒖𑒹 𑒋𑒏𑒼𑒙𑒰 𑒣𑒩𑒱𑒫𑒰𑒩 𑒢𑒻 𑒁𑒕𑒱, 𑒖𑒹𑒏𑒩𑒰 𑒒𑒩𑒏 𑒂𑒑𑒴 𑒔𑒩𑒱𑒣𑒯𑒱𑒨𑒰 𑒮𑒫𑒰𑒩𑒲 𑒢𑒻 𑒖𑒰 𑒮𑒏𑒻𑒋। 𑒞𑒯𑒱𑒢𑒰 𑒣𑓂𑒩𑒞𑒱 𑒠𑒴 𑒣𑒩𑒱𑒫𑒰𑒩𑒣𑒩 𑒣𑒰𑒢𑒱 𑒣𑒲𑒥𑒻𑒏 𑒮𑒰𑒡𑒢 𑒥𑒢𑒱 𑒑𑒹𑒪 𑒁𑒕𑒱। 𑒞𑒯𑒱𑒢𑒰 𑒣𑓂𑒩𑒞𑒱 𑒂𑒚 𑒥𑒲𑒒𑒰𑒣𑒩 𑒥𑒼𑒩𑒱𑓀𑒑 (𑒣𑓂𑒩𑒰𑒃𑒫𑒹𑒙) 𑒁𑒕𑒱। 𑒍𑒢𑒰 𑒣𑒕𑒱𑒧𑒲 𑒏𑒼𑒮𑒲𑒏 𑒢𑒯𑒩𑒱𑒏 𑒠𑒴𑒙𑒰 𑒬𑒰𑒐𑒰 𑒮𑒹𑒯𑒼 𑒅𑒞𑓂𑒞𑒩𑒹-𑒠𑒕𑒱𑒢𑒹, 𑒣𑒴𑒥𑒼 𑒂 𑒣𑒕𑒱𑒧𑒼 𑒥𑒢𑒱 𑒩𑒯𑒪 𑒁𑒕𑒱। 𑒞𑒃 𑒮𑓀𑒑 𑒮𑓂𑒙𑒹𑒙 𑒥𑒼𑒩𑒱𑓀𑒑 𑒮𑒹𑒯𑒼 𑒑𑒩𑒰𑒋𑒪 𑒁𑒕𑒱। 𑒧𑒳𑒠𑒰 𑒔𑒰𑒪𑒴 𑒢𑒻 𑒦𑒹𑒪 𑒁𑒕𑒱। 𑒞𑒯𑒱𑒢𑒰 𑒂𑒥𑒰𑒑𑒧𑒢𑒏 𑒮𑒳𑒫𑒱𑒡𑒰 𑒮𑒹𑒯𑒼 𑒁𑒕𑒱𑒨𑒹। 𑒋𑒏 𑒠𑒱𑒮 𑒩𑒹𑒪𑒥𑒹 𑒮𑓂𑒙𑒹𑒬𑒢 𑒞𑒲𑒢 𑒏𑒱𑒪𑒼𑒧𑒲𑒙𑒩𑒣𑒩 𑒁𑒕𑒱 𑒞𑒿 𑒠𑒰𑒹𑒮𑒩 𑒠𑒱𑒮 𑒋𑒢.𑒋𑒔. 𑒠𑒴 𑒏𑒱𑒪𑒼𑒧𑒲𑒙𑒩𑒣𑒩 𑒁𑒕𑒱। 𑒖𑒯𑒱𑒢𑒰 𑒫𑒮𑓀𑒞 𑒇𑒵𑒞𑒳 𑒁𑒥𑒱𑒞𑒹 𑒧𑒹𑒒𑒧𑒹 𑒚𑒹𑒏𑒪 𑒑𑒰𑒕𑒮𑒿 𑒪𑓄 𑒏𑓄 𑒧𑒰𑒙𑒱𑒧𑒹 𑒍𑓀𑒒𑒩𑒰𑒋𑒪 𑒡𑒩𑒞𑒲𑒧𑒹 𑒢𑒫 𑒣𑒰𑒞, 𑒢𑒫 𑒏𑒪𑒬, 𑒢𑒫 𑒏𑒼𑒜𑓃𑒲𑒏 𑒮𑓀𑒑 𑒢𑒫 𑒤𑒴𑒪 𑒠𑒻𑒞 𑒞𑒯𑒱𑒢𑒰 𑒮𑒧𑒰𑒖𑒏 𑒤𑒳𑒪𑒫𑒰𑒛𑓃𑒲𑒧𑒹 𑒤𑒴𑒪𑒏 𑒁𑓀𑒏𑒳𑒩 𑒠𑒱𑒁𑒋 𑒪𑒰𑒑𑒪। 𑒩𑓀𑒑-𑒥𑒱𑒩𑓀𑒑𑒏 𑒮𑒧𑒮𑓂𑒨𑒰 (𑒣𑒼𑒖𑒲𑒙𑒱𑒫-𑒢𑒱𑒑𑒹𑒙𑒱𑒫 𑒠𑒳𑒢𑒴) 𑒅𑒚𑒱-𑒅𑒚𑒱 𑒚𑒰𑒜𑓃 𑒯𑒳𑒁𑒋 𑒪𑒰𑒑𑒪। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒮𑒹𑒯𑒼 𑒫𑒱𑒔𑒰𑒩 𑒏𑒹𑒪𑒢𑒱 𑒖𑒹 𑒮𑒧𑒰𑒖𑒏 𑒅𑒞𑓂𑒟𑒰𑒢𑒧𑒹 𑒖𑒰𑒞𑒱𑒏 𑒏𑒙𑓂𑒙𑒩𑒣𑒢 𑒥𑒰𑒡𑒰 𑒕𑒲। 𑒍𑒢𑒰 𑒖𑒿 𑒖𑒰𑒞𑒱𑒏 𑒥𑒲𑒔 𑒏𑒟𑒰-𑒏𑒳𑒙𑒳𑒧𑒻𑒞𑒲 𑒯𑒼𑒃𑒞 𑒁𑒕𑒱 𑒞𑒿 𑒍 𑒠𑒴 𑒮𑒧𑒰𑒖𑒏 𑒥𑒲𑒔𑒏 𑒣𑓂𑒩𑒬𑓂𑒢 𑒥𑒢𑒱 𑒖𑒰𑒃𑒞 𑒁𑒕𑒱। 𑒧𑒳𑒠𑒰 𑒮𑒧𑒰𑒖𑒏 𑒥𑒲𑒔 𑒖𑒰𑒞𑒱𑒏 𑒕𑒳𑒂-𑒕𑒳𑒞 𑒥𑒯𑒳𑒞 𑒢𑒧𑒯𑒩 𑒐𑒰𑒡𑒱 𑒥𑒢𑒥𑒻𑒋। 𑒞𑒿𑒋 𑒧𑒯𑒱𑒢𑒰𑒧𑒹 𑒋𑒏𑒥𑒹𑒩 𑒥𑒻𑒮𑒰𑒩 𑒏𑒩𑒥 𑒂 𑒍 𑒏𑒩𑒥 𑒙𑒼𑒪𑒹-𑒙𑒼𑒪 𑒒𑒴𑒧𑒱-𑒒𑒴𑒧𑒱, 𑒄 𑒮𑒥𑒯𑒏 𑒫𑒱𑒔𑒰𑒩 𑒦𑒹𑒪𑒢𑒱। 𑒥𑒻𑒮𑒰𑒩𑒧𑒹 𑒏𑒼𑒢𑒼 𑒥𑒹𑒮𑒲 𑒖𑒼𑒑𑒰𑒩𑒏 𑒣𑓂𑒩𑒬𑓂𑒢 𑒢𑒻, 𑒧𑒳𑒠𑒰 𑒙𑒼𑒪𑒥𑒻𑒨𑒰𑒏 𑒫𑒱𑒔𑒰𑒩𑒮𑒿, 𑒖𑒿 𑒍 𑒮𑒦 𑒐𑒰𑒃-𑒣𑒲𑒥𑒻𑒏 𑒥𑒹𑒫𑒮𑓂𑒟𑒰 𑒏𑒩𑒟𑒱 𑒞𑒿 𑒮𑒹𑒯𑒼 𑒥𑒜𑓃𑒱𑒨𑒰𑒿, 𑒮𑒦 𑒐𑒰𑒋𑒥, 𑒄 𑒮𑒥𑒯𑒏 𑒫𑒱𑒔𑒰𑒩 𑒦𑒹𑒪𑒢𑒱। 𑒁𑒐𑒢𑒼 𑒡𑒩𑒱 𑒐𑒰𑒃𑒞𑒹 𑒕𑒟𑒱। 𑒮𑒦 𑒖𑒰𑒞𑒱𑒏 𑒥𑒩𑒱𑒂𑒞𑒱𑒨𑒼 𑒂 𑒦𑒼𑒖𑒼-𑒏𑒰𑒖𑒧𑒹 𑒐𑒰𑒃𑒞𑒹 𑒕𑒟𑒱। 𑒯𑒿 𑒄 𑒥𑒰𑒞 𑒖𑒩𑒴𑒩 𑒁𑒕𑒱 𑒖𑒹 𑒁𑒐𑒢𑒼 𑒞𑒱𑒞𑒧𑓂𑒯𑒰 𑒔𑒪𑒱𑒞𑒹 𑒩𑒯𑒪 𑒁𑒕𑒱, 𑒧𑒳𑒠𑒰 𑒮𑒦 𑒖𑒰𑒞𑒱𑒏 𑒮𑒯𑒨𑒼𑒑 𑒩𑒯𑒢𑒹 𑒏𑒧 𑒣𑒛𑓃𑒱 𑒖𑒰𑒃𑒋। 𑒄 𑒥𑒯𑒳𑒞 𑒢𑒲𑒏 𑒏𑒠𑒧 𑒦𑒹𑒪। 𑒣𑒩𑒼𑒣𑒙𑓂𑒙𑒰𑒧𑒹 𑒖𑒹𑒢𑒰 𑒣𑒮𑒰𑒯𑒲 𑒪𑒰𑒑𑒱 𑒑𑒹𑒪। 𑒍𑒢𑒰 𑒗𑓀𑒗𑒰𑒩𑒣𑒳𑒩 𑒥𑓂𑒪𑒾𑒏𑒧𑒹 𑒏𑒧𑒪𑒰𑒮𑒿 𑒣𑒕𑒱𑒧 𑒢𑒰𑒑𑒹𑒢𑓂𑒠𑓂𑒩𑒖𑒲 (𑒛𑒰𑒹. 𑒢𑒰𑒑𑒹𑒢𑓂𑒠𑓂𑒩 𑒏𑒳𑒧𑒰𑒩 𑒗𑒰 𑒛𑒰𑒹. 𑒡𑒲𑒩𑒹𑒢𑓂𑒠𑓂𑒩𑒏 𑒧𑒰𑒱𑒗𑒪 𑒦𑒰𑒋), 𑒣𑒴𑒥 𑒤𑒳𑒪𑒣𑒩𑒰𑒮 𑒥𑓂𑒪𑒾𑒏𑒧𑒹 𑒏𑒰𑒧𑒹𑒮𑒩 𑒖𑒲 (𑒬𑓂𑒩𑒲 𑒏𑒰𑒧𑒹𑒬𑓂𑒫𑒩 𑒩𑒰𑒧) 𑒮𑒹𑒯𑒼 𑒏𑓂𑒩𑒰𑒢𑓂𑒞𑒱𑒏 𑒮𑒴𑒞𑓂𑒩𑒣𑒰𑒞 𑒏𑒹𑒪𑒢𑒱। 𑒖𑒧𑒱 𑒏𑓄 𑒞𑒲𑒢𑒴 𑒥𑓂𑒪𑒾𑒏𑒧𑒹 𑒣𑒰𑒩𑓂𑒙𑒲𑒏 𑒣𑓂𑒩𑒦𑒰𑒫 𑒥𑒜𑓃𑒪। 𑒞𑒃 𑒥𑒲𑒔 𑒢𑒰𑒑𑒹𑒢𑓂𑒠𑓂𑒩𑒖𑒲 𑒣𑒰𑒩𑓂𑒙𑒲 𑒮𑓂𑒏𑒴𑒪 𑒔𑒪𑒾𑒪𑒢𑒱। 𑒪𑒑 𑒩𑒯𑒢𑒹 𑒞𑒲𑒢𑒴 𑒠𑒱𑒢 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒦𑒰𑒑 𑒪𑒹𑒪𑒢𑒱। 𑒏𑒹𑒢𑓂𑒠𑓂𑒩𑒏 𑒢𑒹𑒞𑒰 𑒮𑒥𑒯𑒏 𑒮𑓀𑒑 𑒩𑒯𑒻𑒏 𑒧𑒾𑒏𑒰 𑒦𑒹𑒙𑒪𑒢𑒱। 𑒯𑒳𑒢𑒏𑒼 𑒮𑒥𑒯𑒏 𑒃𑒔𑓂𑒕𑒰 𑒦𑒹𑒪𑒢𑒱 𑒖𑒹 𑒥𑒹𑒩𑒧𑒼𑒧𑒹 𑒋𑒯𑒱𑒢𑒰 𑒯𑒳𑒁𑒋। 𑒮𑒹 𑒦𑒹𑒥𑒼 𑒏𑒋𑒪।
𑒙𑒼𑒪𑒹-𑒙𑒼𑒪𑒏 𑒧𑒲𑒙𑒱𑓀𑒑𑒧𑒹 𑒙𑒼𑒪𑒏 𑒮𑒧𑒮𑓂𑒨𑒰 𑒧𑒳𑒐𑓂𑒨 𑒧𑒳𑒠𑓂𑒠𑒰 𑒥𑒢𑒪 𑒩𑒯𑒻𑒞 𑒕𑒪 𑒖𑒃𑒮𑒿 𑒑𑒰𑒧𑒏 𑒁𑒡𑓂𑒨𑒨𑒢 𑒁𑒡𑒱𑒏𑒮𑒿 𑒁𑒡𑒱𑒏 𑒑𑒼𑒙𑒹𑒏𑒹𑒿 𑒯𑒳𑒁𑒋 𑒪𑒑𑒪𑒢𑒱। 𑒔𑒾𑒏-𑒔𑒾𑒩𑒰𑒯𑒰𑒣𑒩 𑒮𑒱𑒢𑒹𑒧𑒰-𑒮𑒩𑓂𑒏𑒬𑒏 𑒑𑒣-𑒮𑒣 𑒢𑒻 𑒦𑓄 𑒑𑒰𑒧𑒏 𑒮𑒧𑒮𑓂𑒨𑒰𑒏 𑒑𑒣 𑒬𑒳𑒩𑒴 𑒦𑒹𑒪। 𑒧𑒳𑒠𑒰 𑒔𑒰𑒪𑒻𑒢 𑒖𑒏𑒰𑒿 𑒩𑒼𑒑𑒰𑒋𑒪 𑒮𑒧𑒰𑒖।
𑒍𑒢𑒰 𑒂𑒢 𑒑𑒰𑒧𑒮𑒿 𑒦𑒱𑒢𑓂𑒢 𑒥𑒹𑒩𑒧𑒰𑒏 𑒥𑒢𑒰𑒥𑒙𑒼 𑒁𑒕𑒱। 𑒞𑒹𑒏𑒩 𑒧𑒳𑒐𑓂𑒨 𑒏𑒰𑒩𑒝𑒧𑒹 𑒋𑒏𑒙𑒰 𑒄𑒯𑒼 𑒏𑒰𑒩𑒝 𑒁𑒕𑒱 𑒖𑒹 𑒂𑒃 𑒡𑒩𑒱 𑒑𑒧𑒏𑒙𑓂𑒙𑒰 (𑒡𑒰𑒩)𑒏 𑒣𑒪𑓂𑒪𑒰 𑒢𑒻 𑒣𑒛𑓃𑒪। 𑒏𑒯𑒻𑒪𑒹 𑒥𑒯𑒳𑒞 𑒣𑒯𑒱𑒢𑒹𑒮𑒿 𑒋𑒏𑒙𑒰 𑒮𑒳𑒣𑒻𑒢 (𑒣𑓂𑒩𑒰𑒔𑒲𑒢 𑒢𑒰𑒧 𑒮𑒳𑒣𑒩𑓂𑒝𑒰) 𑒡𑒰𑒩 𑒁𑒕𑒱 𑒧𑒳𑒠𑒰 𑒁𑒖𑒹𑒑𑒩 𑒮𑒰𑒿𑒣 𑒖𑒏𑒰𑒿 𑒄 𑒋𑒏𑒹𑒚𑒰𑒧 𑒥𑒻𑒮𑒪 𑒩𑒯𑒪। 𑒞𑒯𑒴𑒧𑒹 𑒞𑒲𑒢𑒱𑒨𑒹 𑒧𑒰𑒮 𑒡𑒰𑒩 𑒩𑒯𑒻𑒋 𑒥𑒰𑒏𑒲 𑒧𑒰𑒮 𑒧𑒳𑒩𑓂𑒠𑒒𑒙𑓂𑒙𑒲𑒮𑒿 𑒪𑓄 𑒏𑓄 𑒔𑒰𑒩𑒰𑒑𑒰𑒯 𑒥𑒢𑒪 𑒩𑒯𑒻𑒋। 𑒑𑒰𑒧𑒧𑒹 𑒁𑒡𑒱𑒏 𑒥𑒰𑒮𑒦𑒴𑒧𑒱 𑒩𑒯𑒢𑒹 𑒆𑒿𑒔𑒑𑒩 𑒖𑒧𑒲𑒢 𑒣𑒩𑓂𑒨𑒰𑒣𑓂𑒞 𑒁𑒕𑒱। 𑒧𑒗𑒼𑒪𑒏𑒰 𑒏𑒱𑒮𑒰𑒢 𑒥𑒹𑒮𑒲 𑒩𑒯𑒢𑒹 𑒖𑒧𑒲𑒢𑒏 𑒕𑒼𑒙 𑒮𑒲𑒧𑒰𑓀𑒏𑒢। 𑒧𑒳𑒠𑒰 𑒣𑒙𑒥𑒻𑒏 𑒥𑒹𑒫𑒮𑓂𑒟𑒰 𑒢𑒻 𑒩𑒯𑒢𑒹 𑒥𑒰𑒛𑓃𑒱𑒍-𑒗𑒰𑒛𑓃𑒲𑒧𑒹 𑒧𑒛𑓃𑒴𑒋-𑒑𑒧𑓂𑒯𑒩𑒱𑒏 𑒐𑒹𑒞𑒲 𑒯𑒼𑒃𑒞 𑒕𑒪। 𑒞𑒩𑒏𑒰𑒩𑒲𑒏 𑒐𑒹𑒞𑒲𑒪𑒹 𑒆𑒿𑒔𑒑𑒩 𑒖𑒧𑒲𑒢 𑒧𑒰𑒢𑒹 𑒔𑒾𑒧𑒰𑒮 𑒐𑒰𑒪𑒲 𑒥𑒩𑒱𑒨𑒰𑒞𑒱𑒌𑒏 𑒪𑒹𑒪 𑒯𑒼𑒃𑒋, 𑒥𑒰𑒏𑒲 𑒧𑒡𑓂𑒨𑒧𑒼 𑒖𑒧𑒲𑒢 (𑒔𑒾𑒩 𑒕𑒼𑒛𑓃𑒱), 𑒠𑒴 𑒥𑒹𑒩 (𑒠𑒴 𑒤𑒮𑒪) 𑒅𑒣𑒖𑒻𑒞 𑒁𑒕𑒱। 𑒏𑒱𑒕𑒳 𑒥𑒼𑒩𑒱𑓀𑒑 𑒦𑒃𑒨𑒹 𑒑𑒹𑒪, 𑒔𑒰𑒣𑒰𑒏𑒪 𑒮𑒹𑒯𑒼 𑒪𑒼𑒏 𑒪𑒑𑒾𑒪𑒏। 𑒞𑒩𑒏𑒰𑒩𑒲 𑒐𑒹𑒞𑒲 𑒖𑒼𑒩 𑒣𑒏𑒛𑓃𑒪𑒏। 𑒏𑒞𑒹𑒏 𑒣𑒩𑒱𑒫𑒰𑒩 𑒅𑒚𑒱 𑒏𑓄 𑒚𑒰𑒜𑓃 𑒦𑓄 𑒑𑒹𑒪। 𑒧𑒯𑒰𑒖𑒢𑒲 𑒮𑒹𑒯𑒼 𑒥𑒢𑓂𑒢 𑒦𑒃𑒨𑒹 𑒑𑒹𑒪 𑒩𑒯𑒋। 𑒖𑒃𑒮𑒿 𑒮𑒧𑒮𑓂𑒨𑒰 𑒮𑒹𑒯𑒼 𑒅𑒚𑒪 𑒩𑒯𑒋।
𑒦𑒳𑒧𑒯𑒳𑒩 𑒂𑒑𑒱 𑒖𑒏𑒰𑒿 𑒑𑒰𑒧𑒏 𑒩𑒰𑒖𑒢𑒲𑒞𑒱 𑒞𑒩𑒹𑒞𑒩 𑒖𑒼𑒛𑓃 𑒣𑒏𑒛𑓃𑒋 𑒪𑒰𑒑𑒪। 𑒦𑒑𑒫𑒞𑒲 𑒮𑓂𑒟𑒰𑒢 𑒁𑒑𑒳𑒂𑒋𑒪। 𑒞𑒃 𑒮𑓀𑒑 𑒋𑒏𑒙𑒰 𑒂𑒩𑒼 𑒦𑒹𑒪। 𑒂𑒩𑒼 𑒄 𑒦𑒹𑒪 𑒖𑒹 𑒐𑒳𑒠𑒩𑒰-𑒐𑒳𑒠𑒩𑒲 𑒮𑒦 𑒏𑒱𑒨𑒼 𑒮𑒦-𑒮𑓂𑒟𑒰𑒢 (𑒠𑒹𑒫 𑒮𑓂𑒟𑒰𑒢) 𑒁𑒥𑒻-𑒖𑒰𑒃 𑒕𑒪𑒰𑒯 𑒧𑒳𑒠𑒰 𑒧𑒢𑒹-𑒧𑒢 𑒥𑒿𑒙𑒰𑒋𑒪 𑒕𑒪𑒰𑒯। 𑒐𑒰𑒪𑒲 𑒛𑒱𑒯𑒫𑒰𑒩𑒹 𑒮𑓂𑒟𑒰𑒢 𑒮𑒰𑒩𑓂𑒫𑒖𑒢𑒱𑒏 𑒥𑒴𑒗𑒪 𑒖𑒰𑒃 𑒕𑒪। 𑒖𑒹𑒏𑒩 𑒮𑓂𑒣𑒭𑓂𑒙 𑒩𑒴𑒣 𑒥𑒱𑒂𑒯, 𑒧𑒴𑒛𑓃𑒢, 𑒅𑒣𑒢𑒻𑒢 𑒃𑒞𑓂𑒨𑒰𑒠𑒱𑒧𑒹 𑒠𑒹𑒐𑒪 𑒖𑒰𑒃𑒞 𑒁𑒕𑒱। 𑒛𑒱𑒯𑒫𑒰𑒩 𑒮𑓂𑒟𑒰𑒢 𑒋𑒏𑒯𑒩𑒹 𑒫𑓀𑒬𑒏 𑒮𑓂𑒟𑒰𑒣𑒱𑒞 𑒏𑒋𑒪 𑒁𑒕𑒱। 𑒠𑒳𑒩𑓂𑒑𑒰𑒣𑒴𑒖𑒰 𑒋𑒏𑒯𑒩𑒹 𑒠𑒱𑒨𑒰𑒠𑒏𑒹𑒿 𑒞𑒼𑒛𑓃𑒪𑒏। 𑒦𑒹𑒪 𑒄 𑒖𑒹 𑒋𑒏𑒯𑒩𑒹 𑒣𑒩𑒱𑒫𑒰𑒩 (𑒠𑒱𑒨𑒰𑒠𑒲) 𑒑𑒰𑒧𑒏 𑒥𑓂𑒩𑒰𑒯𑓂𑒧𑒝𑒧𑒹 𑒮𑒦𑒮𑒿 𑒢𑒧𑒯𑒩 𑒠𑒱𑒨𑒰𑒠𑒲 𑒁𑒕𑒱 𑒖𑒹 𑒠𑒴 𑒙𑒼𑒪𑒧𑒹 𑒫𑒱𑒦𑒰𑒖𑒱𑒞 𑒕𑒟𑒱। 𑒅𑒞𑓂𑒞𑒩𑒫𑒰𑒩𑒱 𑒙𑒼𑒪 𑒂 𑒠𑒕𑒱𑒢𑒫𑒰𑒩𑒱 𑒙𑒼𑒪। 𑒥𑒛𑓃𑒏𑒲 𑒣𑒼𑒐𑒩𑒱𑒏 𑒅𑒞𑓂𑒞𑒩𑒫𑒩𑒱𑒨𑒼 𑒂 𑒠𑒕𑒱𑒢𑒫𑒩𑒱𑒨𑒼 𑒧𑒯𑒰𑒩𑒣𑒩 𑒠𑒳𑒩𑓂𑒑𑒰𑒣𑒴𑒖𑒰 𑒯𑒼𑒃𑒞 𑒁𑒕𑒱। 𑒣𑒼𑒐𑒩𑒱 𑒥𑒲𑒔𑒧𑒹 𑒮𑒲𑒧𑒰 𑒁𑒕𑒱। 𑒑𑒰𑒧𑒏 𑒮𑒲𑒧𑒰 (𑒙𑒼𑒪-𑒙𑒼𑒪𑒏) 𑒑𑒖𑒣𑒙𑒹 𑒩𑒯𑒱 𑒑𑒹𑒪। 𑒖𑒢𑒰 𑒂𑒢-𑒂𑒢 𑒑𑒰𑒧𑒧𑒹 𑒏𑒞𑒾 𑒮𑒛𑓃𑒏 𑒮𑒲𑒧𑒰 𑒯𑒼𑒃𑒋 𑒞𑒿 𑒏𑒞𑒾 𑒮𑓂𑒏𑒴𑒪, 𑒮𑒹 𑒢𑒻 𑒦𑒹𑒪। 𑒣𑒰𑒢𑒱𑒨𑒹𑒧𑒹 𑒮𑒲𑒧𑒰 𑒑𑒛𑓃𑒰 𑒑𑒹𑒪। 𑒅𑒞𑓂𑒞𑒩𑒫𑒰𑒩𑒱 𑒠𑒳𑒩𑓂𑒑𑒰-𑒮𑓂𑒟𑒰𑒢𑒏 𑒁𑒑𑒳𑒂𑒃 𑒥𑒹𑒩𑒧𑒰 𑒢𑒱𑒫𑒰𑒮𑒲 𑒧𑒡𑒹𑒣𑒳𑒩 𑒥𑓂𑒪𑒾𑒏𑒏 𑒣𑓂𑒩𑒧𑒳𑒐 𑒂 𑒖𑒑𑒠𑒩𑒏 𑒢𑒟𑒳𑒢𑒲 𑒮𑒱𑓀𑒯 𑒏𑒹𑒪𑒢𑒱। 𑒣𑓂𑒩𑒧𑒳𑒐 𑒑𑒰𑒧𑒏 𑒦𑒑𑒱𑒢𑒧𑒰𑒢, 𑒞𑒿𑒋 𑒋𑒏𑒯𑒩𑒹 𑒣𑒩𑒱𑒫𑒰𑒩𑒧𑒹 𑒑𑒳𑒢-𑒑𑒳𑒢𑒲 𑒅𑒚𑒪। 𑒧𑒳𑒠𑒰 𑒠𑒳𑒢𑒴 𑒑𑒼𑒙𑒹 𑒧𑒰𑒢𑒹 𑒣𑓂𑒩𑒧𑒳𑒐𑒼 𑒂 𑒢𑒟𑒳𑒢𑒱𑒨𑒼 𑒮𑒱𑓀𑒯 𑒋𑒏𑒯𑒩𑒹 𑒣𑒩𑒱𑒫𑒰𑒩𑒮𑒿 𑒠𑒳𑒩𑓂𑒑𑒰𑒏 𑒧𑒰𑒙𑒱 𑒪𑒹𑒪𑒢𑒱। 𑒠𑒕𑒱𑒢𑒫𑒰𑒩𑒱 𑒙𑒼𑒪𑒏 𑒋𑒏𑒯𑒩𑒹 𑒁𑒣𑒢 𑒮𑓂𑒟𑒰𑒢 𑒥𑒴𑒗𑒱 𑒠𑒮-𑒂𑒢𑒰 𑒕-𑒂𑒢𑒰 𑒯𑒳𑒁𑒋 𑒪𑒑𑒪𑒰𑒯। 𑒂𑒥𑒰𑒖𑒰𑒯𑒲𑒧𑒹 𑒥𑒜𑓃𑒼𑒞𑒩𑒲 𑒦𑒹𑒪। 𑒦𑒼𑒖-𑒦𑒰𑒞 𑒮𑒹𑒯𑒼 𑒥𑒜𑓃𑒪। 𑒍𑒃 𑒮𑒧𑒋 𑒥𑒔𑒢𑒴 𑒧𑒱𑒬𑓂𑒩 𑒖𑒹 𑒩𑒰𑒖𑒢𑒲𑒞𑒱𑒏 𑒠𑒵𑒭𑓂𑒙𑒱𑒮𑒿 𑒧𑒰𑒙𑒱 𑒡𑓄 𑒢𑒹𑒢𑒹 𑒕𑒪𑒰𑒯। 𑒂𑒩𑓂𑒟𑒱𑒏 𑒫𑒱𑒭𑒧𑒞𑒰 𑒩𑒯𑒥𑒹 𑒏𑒩𑒢𑒱। 𑒍𑒢𑒰 𑒔𑒰𑒩𑒱 𑒦𑒰𑒿𑒃𑒏 𑒦𑒻𑒨𑒰𑒩𑒲 𑒕𑒪𑒢𑒱। 𑒔𑒰𑒩𑒴 𑒦𑒰𑒿𑒃 𑒑𑒰𑒧𑒏 𑒮𑒹𑒮𑒩 𑒠𑒹𑒯𑒥𑒪𑒰 𑒧𑒰𑒢𑒹 𑒯𑒰𑒛𑓃-𑒏𑒰𑒚𑒏। 𑒧𑒳𑒠𑒰 𑒧𑒳𑒏𑒠𑒧𑒰𑒧𑒹 𑒍𑒗𑒩𑒰 𑒑𑒹𑒪 𑒩𑒯𑒟𑒱। 𑒠𑒕𑒱𑒢𑒫𑒰𑒩𑒱 𑒙𑒼𑒪𑒏 𑒋𑒏𑒯𑒩𑒹 𑒣𑒩𑒱𑒫𑒰𑒩𑒧𑒹 𑒥𑒔𑒢𑒴 𑒧𑒱𑒬𑓂𑒩𑒏 𑒢𑒲𑒏 𑒣𑒃𑒚 𑒩𑒯𑒢𑒱। 𑒍 𑒠𑒱𑒢-𑒩𑒰𑒞𑒱 𑒋𑒏𑒥𑒙𑓂𑒙 𑒏𑓄 𑒠𑒕𑒱𑒢𑒫𑒩𑒱𑒨𑒰 𑒠𑒳𑒩𑓂𑒑𑒰𑒏 𑒧𑒰𑒙𑒱 𑒮𑒹𑒯𑒼 𑒋𑒏𑒯𑒩𑒹 𑒣𑒩𑒱𑒫𑒰𑒩𑒮𑒿 𑒪𑒱𑒎𑒪𑒢𑒱। 𑒋𑒏𑒯𑒩𑒹 𑒣𑒩𑒱𑒫𑒰𑒩 𑒫𑒱𑒦𑒰𑒖𑒱𑒞 𑒦𑓄 𑒑𑒹𑒪। 𑒥𑓂𑒩𑒰𑒯𑓂𑒧𑒝 𑒥𑒿𑒙𑒰 𑒑𑒹𑒪𑒰, 𑒖𑒃𑒮𑒿 𑒣𑒴𑒖𑒰-𑒣𑒰𑒚𑒏 𑒏𑒼𑒢𑒼 𑒁𑒦𑒰𑒫 𑒏𑒯𑒱𑒨𑒼 𑒢𑒻 𑒦𑒹𑒪 𑒁𑒕𑒱। 𑒁𑒯𑒲 𑒥𑒲𑒔 𑒏𑒣𑒱𑒪𑒹𑒬𑓂𑒫𑒩 𑒩𑒰𑒅𑒞𑒏 𑒥𑒰𑒥𑒰 𑒧𑒩𑒪𑒢𑒱। 𑒣𑒳𑒩𑒼𑒯𑒱𑒞 𑒁𑒣𑒢 𑒪𑒪𑒏𑒰𑒩𑒰 𑒦𑒩𑒪𑒢𑒱। 𑒪𑒛𑓃𑒰𑒃 𑒤𑒿𑒮𑒱 𑒑𑒹𑒪। 𑒪𑒛𑓃𑒰𑒃 𑒄 𑒤𑒿𑒮𑒪 𑒖𑒹 𑒋𑒏 𑒠𑒱𑒮 𑒣𑒳𑒩𑒼𑒯𑒱𑒞 𑒁𑒣𑒢 𑒬𑒏𑓂𑒞𑒱 𑒠𑒹𑒐𑒥𑒋 𑒪𑒑𑒪𑒰𑒯 𑒞𑒿 𑒠𑒼𑒮𑒩 𑒠𑒱𑒮 𑒏𑒣𑒱𑒪𑒹𑒬𑓂𑒫𑒩 𑒁𑒛𑓃𑒱 𑒏𑓄 𑒚𑒰𑒜𑓃 𑒦𑓄 𑒑𑒹𑒪। 𑒧𑒳𑒠𑒰 𑒣𑒰𑒿𑒔𑒹-𑒮𑒰𑒞 𑒠𑒱𑒢𑒏 𑒥𑒲𑒔 (𑒮𑒩𑒰𑒡-𑒧𑒵𑒞𑓂𑒨𑒳𑒏 𑒥𑒲𑒔) 𑒃𑒪𑒰𑒏𑒰 𑒑𑒢𑒑𑒢𑒰 𑒑𑒹𑒪। 𑒧𑒵𑒞𑓂𑒨𑒳 𑒠𑒱𑒢 𑒫𑒱𑒫𑒰𑒠 𑒞𑒿 𑒢𑒻 𑒅𑒚𑒪 𑒧𑒳𑒠𑒰 𑒢𑒫 𑒔𑒹𑒞𑒢𑒰 𑒖𑒩𑒴𑒩 𑒖𑒰𑒑𑒪। 𑒢𑒫 𑒔𑒹𑒞𑒢𑒰 𑒄 𑒖𑒹 𑒣𑒰𑒩𑓂𑒙𑒲𑒏 𑒦𑒲𑒞𑒩 𑒥𑓀𑒡𑒢𑒏 𑒩𑒴𑒣𑒧𑒹 𑒖𑒱𑒢𑒑𑒲𑒏𑒹𑒿 𑒣𑒏𑒛𑓃𑒪𑒏, 𑒧𑒵𑒞𑓂𑒨𑒳𑒏 𑒮𑒧𑒰𑒔𑒰𑒩 𑒮𑒳𑒢𑒱𑒞𑒹 𑒪𑒼𑒏𑒏 𑒜𑒥𑒰𑒯𑒱 𑒪𑒰𑒑𑒱 𑒑𑒹𑒪, 𑒖𑒢𑒰 𑒮𑒧𑒮𑓂𑒨𑒹 𑒯𑒩𑒰 𑒑𑒹𑒪। 𑒏𑒱𑒨𑒼 𑒏𑒣𑒛𑓃𑒰 𑒏𑒱𑒢𑒋 𑒑𑒹𑒪, 𑒏𑒱𑒨𑒼 𑒥𑒰𑒿𑒮 𑒏𑒰𑒙𑒱 𑒔𑒔𑒩𑒲 𑒥𑒢𑒥𑒋 𑒪𑒰𑒑𑒪, 𑒏𑒱𑒨𑒼 𑒁𑒕𑒱𑒨𑒰 𑒐𑒳𑒢𑒋 𑒑𑒹𑒪। 𑒥𑒖𑒩𑒴𑒂 𑒏𑒩𑒐𑒰𑒢𑒰 𑒖𑒏𑒰𑒿 𑒏𑒰𑒩𑒼𑒥𑒰𑒩 𑒔𑒪𑒪। 𑒧𑒳𑒠𑒰 𑒖𑒯𑒱𑒢𑒰 𑒋𑒏 𑒏𑒧𑓂𑒣𑒢𑒲𑒏 𑒃𑓀𑒖𑒢𑒏 𑒣𑒰𑒩𑓂𑒙 𑒠𑒼𑒮𑒩 𑒏𑒧𑓂𑒣𑒢𑒲𑒏 𑒪𑒑𑒾𑒢𑒹 𑒁𑒢𑒹𑒩𑒼 𑒐𑒛𑓃𑒐𑒛𑓃𑒰𑒃𑒞-𑒗𑒛𑓃𑒗𑒛𑓃𑒰𑒞 𑒩𑒯𑒻𑒞 𑒁𑒕𑒱 𑒞𑒯𑒱𑒢𑒰 𑒬𑒳𑒩𑒴𑒯𑒹𑒮𑒿 𑒯𑒳𑒁𑒋 𑒪𑒰𑒑𑒪। 𑒔𑒔𑒩𑒲 𑒥𑒢𑒥𑒻𑒮𑒿 𑒣𑒯𑒱𑒢𑒹 𑒥𑒰𑒿𑒮 𑒏𑒙𑒻𑒧𑒹 𑒩𑒏𑓂𑒏𑒰-𑒙𑒼𑒏𑒲 𑒬𑒳𑒩𑒴 𑒦𑒹𑒪। 𑒩𑒏𑓂𑒏𑒰-𑒙𑒼𑒏𑒲𑒏 𑒧𑒴𑒪 𑒏𑒰𑒩𑒝 𑒦𑒱𑒢𑓂𑒢-𑒦𑒱𑒢 𑒖𑒰𑒞𑒱𑒏 𑒦𑒱𑒢𑓂𑒢-𑒦𑒱𑒢𑓂𑒢 𑒫𑒱𑒡𑒱-𑒫𑒱𑒡𑒰𑒢। 𑒧𑒳𑒠𑒰 𑒮𑓀𑒨𑒼𑒑 𑒞𑒿 𑒋𑒯𑒹𑒢 𑒦𑒹𑒪 𑒖𑒹 𑒮𑒦 𑒙𑒼𑒪𑒏 𑒪𑒼𑒏 𑒋𑒏𑒚𑒰𑒧 𑒣𑒯𑒳𑒿𑒔 𑒑𑒹𑒪𑒰𑒯। 𑒖𑒯𑒱𑒢𑒰 𑒑𑒖𑒹𑒩𑒲 𑒡𑒳𑒂𑒿𑒏 𑒑𑓀𑒡 𑒪𑒑𑒱𑒞𑒹 𑒣𑓂𑒩𑒹𑒧𑒲 𑒠𑒱𑒮 𑒂𑒿𑒐𑒱 𑒅𑒚𑒰-𑒅𑒚𑒰 𑒠𑒹𑒐𑒋 𑒪𑒑𑒻𑒋 𑒞𑒯𑒱𑒢𑒰 𑒖𑒃 𑒏𑒰𑒖𑒏 𑒖𑒹 𑒣𑓂𑒩𑒹𑒧𑒲 𑒍 𑒁𑒣𑒢-𑒁𑒣𑒢 𑒣𑓂𑒩𑒹𑒧𑒲 𑒠𑒱𑒮 𑒞𑒰𑒏𑒋 𑒪𑒑𑒪𑒰𑒯। 𑒧𑒳𑒠𑒰 𑒌 𑒥𑒰𑒞𑒣𑒩 𑒮𑒦 𑒮𑒯𑒧𑒞 𑒖𑒹 𑒖𑒃 𑒖𑒰𑒞𑒱𑒏 𑒏𑒰𑒖 𑒕𑒲 𑒯𑒳𑒢𑒏𑒩 𑒧𑒯𑒞 𑒥𑒹𑒮𑒲 𑒯𑒼𑒃। 𑒒𑒩𑒥𑒻𑒨𑒰 (𑒏𑒣𑒱𑒪𑒹𑒬𑓂𑒫𑒩 𑒞𑒲𑒢𑒴 𑒦𑒰𑒿𑒃) 𑒏𑒳𑒥𑒹𑒩𑒏 𑒐𑒖𑒰𑒢𑒰 𑒐𑒼𑒪𑒢𑒹। 𑒖𑒃 𑒏𑒰𑒖𑒧𑒹 𑒖𑒹 𑒖𑒩𑒴𑒩𑒞𑒱 𑒯𑒼𑒃, 𑒣𑒳𑒕𑒻𑒏 𑒏𑒼𑒢𑒼 𑒐𑒑𑒞𑒰 𑒢𑒻। 𑒁𑒣𑒢 𑒑𑒰𑒕𑒲-𑒏𑒪𑒧 𑒁𑒕𑒱, 𑒥𑒿𑒮𑒥𑒰𑒩𑒱 𑒁𑒕𑒱। 𑒞𑒲𑒢𑒙𑒰 𑒥𑒰𑒿𑒮 𑒔𑒔𑒩𑒲 𑒪𑒹 𑒏𑒙𑒪। 𑒔𑒔𑒩𑒲 𑒥𑒢𑒥𑒻 𑒏𑒰𑒪 𑒏𑒹𑒯𑒹𑒢 𑒥𑒪𑓂𑒪𑒰 𑒂 𑒤𑒙𑓂𑒚𑒰 𑒯𑒼𑒃, 𑒞𑒃𑒪𑒹 𑒤𑒹𑒩 𑒩𑒏𑓂𑒏𑒰-𑒙𑒼𑒏𑒲 𑒅𑒚𑒪। 𑒧𑒳𑒠𑒰 𑒣𑒰𑒩𑓂𑒙𑒲𑒏 𑒦𑒲𑒞𑒩 𑒋𑒯𑒹𑒢-𑒋𑒯𑒹𑒢 𑒢𑒹𑒞𑒰 𑒩𑒯𑒟𑒱 𑒖𑒹 𑒒𑒩𑒯𑒙𑒱𑒨𑒼 𑒩𑒯𑒟𑒱। 𑒞𑒿𑒋 𑒯𑒳𑒢𑒏𑒹 𑒖𑒳𑒞𑒱𑒮𑒿 𑒔𑒔𑒩𑒲 𑒥𑒢𑒪। 𑒤𑒹𑒩 𑒪𑒏𑒛𑓃𑒲 𑒏𑒙𑒻𑒧𑒹 𑒗𑓀𑒗𑒙 𑒅𑒚𑒪। 𑒋𑒏𑒙𑒰 𑒬𑒲𑒬𑒼𑒏 (𑒖𑒃𑒧𑒹 𑒮𑒰𑒩𑒲 𑒢𑒻 𑒦𑒹𑒪 𑒩𑒯𑒻) 𑒮𑒴𑒐𑒪 𑒑𑒰𑒕। 𑒖𑒃𑒮𑒿 𑒏𑒰𑒖 𑒔𑒪𑒱 𑒮𑒏𑒻 𑒕𑒪। 𑒧𑒳𑒠𑒰 𑒦𑒹𑒪 𑒄 𑒖𑒹 𑒥𑒱𑒢𑒰 𑒥𑒳𑒗𑒢𑒹-𑒮𑒳𑒗𑒢𑒹 𑒁𑒣𑒢𑒹 𑒤𑒳𑒩𑒢𑒹 𑒠𑒴 𑒑𑒼𑒙𑒹 𑒤𑒛𑓃𑒻𑒥𑒪𑒰 𑒂𑒧𑒹𑒏 𑒑𑒰𑒕 𑒏𑒰𑒙𑒱 𑒏𑓄 𑒐𑒮𑒰 𑒠𑒹𑒪𑒏। 𑒧𑒳𑒠𑒰 𑒏𑒋𑒪𑒹 𑒏𑒱 𑒖𑒰 𑒮𑒏𑒻𑒋। 𑒮𑒴𑒐𑒪 𑒖𑒩𑒢𑒰𑒏 𑒮𑒹𑒯𑒼 𑒖𑒩𑒴𑒩𑒞 𑒁𑒕𑒱𑒨𑒹, 𑒍𑒯𑒼 𑒬𑒲𑒬𑒼 𑒏𑒙𑒰𑒋𑒪। 𑒞𑒲𑒢-𑒔𑒰𑒩𑒱 𑒠𑒱𑒢 𑒞𑒏 𑒛𑒼𑒧 𑒪𑒏𑒛𑓃𑒲 𑒅𑒒𑒱𑒞𑒹 𑒩𑒯𑒱 𑒑𑒹𑒪। 𑒐𑒻𑒩 𑒖𑒹 𑒯𑒼𑒅..। 𑒧𑒳𑒠𑒰 𑒮𑒻𑒏𑒛𑓃𑒼 𑒂𑒠𑒧𑒲 𑒋𑒏𑒚𑒰𑒧 𑒥𑒻𑒮𑒱 𑒁𑒮𑒧𑒮𑒰𑒢 𑒠𑒹𑒐𑒪𑒏। 𑒣𑒮𑒰𑒯𑒲 𑒖𑒏𑒰𑒿 𑒏𑒼𑒢 𑒪𑒳𑒞𑓂𑒞𑒲 𑒏𑒱𑒧𑒯𑒩 𑒅𑒑𑒱 𑒏𑓄 𑒣𑒏𑒛𑓃𑒱 𑒪𑒃𑒞, 𑒞𑒹𑒏𑒩 𑒚𑒹𑒏𑒰𑒢𑒹 𑒢𑒹 𑒩𑒯𑒪। 𑒋𑒏 𑒑𑒼𑒙𑒹 𑒁𑒮𑒧𑒮𑒰𑒢𑒮𑒿 𑒂𑒋𑒪। 𑒂𑒢 𑒑𑒰𑒧 𑒖𑒰𑒃𑒏 𑒩𑒯𑒻, 𑒠𑒰𑒜𑓃𑒲-𑒏𑒹𑒬 𑒏𑒙𑒰 𑒏𑓄 𑒔𑒪𑒱 𑒑𑒹𑒪। 𑒠𑒰𑒜𑓃𑒲 𑒏𑒹𑒬 𑒞𑒹𑒮𑒩 𑒠𑒱𑒢 𑒏𑒙𑒰𑒃 𑒕𑒻, 𑒞𑒯𑒱𑒢𑒰 𑒮𑒲𑒧𑒰 𑒙𑒣𑒻𑒏 𑒥𑒰𑒞 𑒮𑒹𑒯𑒼 𑒅𑒚𑒪। 𑒖𑒢𑒰 𑒮𑒾𑓀𑒮𑒹 𑒑𑒰𑒧 𑒩𑓀𑒑-𑒥𑒱𑒩𑓀𑒑𑒏 𑒣𑒮𑒰𑒯𑒲 𑒪𑒰𑒑𑒱 𑒑𑒹𑒪। 𑒏𑒼𑒢𑒼 𑒋𑒏 𑒧𑒳𑒿𑒯𑒩𑒲 𑒑𑒣 𑒢𑒻, 𑒮𑒦 𑒑𑒛𑓃𑒱𑒧𑒳𑒛𑓃𑒰𑒯। 𑒏𑒹𑒏𑒩𑒼 𑒧𑒳𑒿𑒯 𑒏𑒱𑒧𑓂𑒯𑒩𑒼 𑒞𑒿 𑒏𑒹𑒏𑒩𑒼 𑒢𑒰𑓀𑒑𑒛𑓃𑒱 𑒏𑒱𑒧𑓂𑒯𑒩𑒼। 𑒧𑒳𑒠𑒰 𑒪𑒪𑒏𑒰𑒩𑒰𑒏 𑒧𑒻𑒠𑒰𑒢𑒧𑒹 𑒞𑒿 𑒪𑒪𑒏𑒩𑒹 𑒖𑒼𑒩 𑒣𑒏𑒛𑓃𑒻 𑒕𑒻। 𑒞𑒿𑒋 𑒏𑒱𑒨𑒼 𑒁𑒣𑒢𑒰 𑒞𑒩𑓂𑒏𑒏𑒹𑒿 𑒫𑒱𑒞𑒩𑓂𑒏-𑒏𑒳𑒞𑒩𑓂𑒏 𑒧𑒰𑒢𑒻𑒪𑒹 𑒞𑒻𑒨𑒰𑒩𑒹 𑒢𑒻। 𑒧𑒳𑒠𑒰 𑒖𑒯𑒱𑒢𑒰 𑒏𑒪𑒏𑒞𑓂𑒞𑒰 𑒮𑒛𑓃𑒏𑒣𑒩 𑒑𑒰𑒛𑓃𑒲𑒣𑒩 𑒑𑒰𑒛𑓃𑒲, 𑒪𑒑𑒪𑒹 𑒩𑒯𑒻 𑒕𑒻 𑒞𑒯𑒱𑒢𑒰 𑒞𑒞𑒹 𑒮𑒧𑒮𑓂𑒨𑒰 (𑒑𑒣-𑒮𑒣𑒏 𑒏𑓂𑒩𑒧𑒧𑒹) 𑒅𑒚𑒋 𑒪𑒰𑒑𑒪 𑒖𑒹 𑒑𑒣𑓂𑒣𑒹-𑒑𑒣𑒧𑒹 𑒍𑒗𑒩𑒰 𑒖𑒰𑒃 𑒕𑒪। 𑒏𑒼𑒢𑒼 𑒒𑒙𑒢𑒰𑒏 𑒑𑒣 𑒏𑒼𑒢𑒼 𑒒𑒙𑒢𑒰𑒧𑒹 𑒧𑒱𑒪𑒱 𑒖𑒰𑒋। 𑒖𑒯𑒱𑒢𑒰 𑒠𑒴 𑒠𑒹𑒬𑒏 𑒥𑒲𑒔 𑒪𑒛𑓃𑒰𑒃𑒧𑒹 𑒮𑒲𑒧𑒰 𑒏𑒰𑒞𑒏 𑒪𑒼𑒏𑒏𑒹𑒿 𑒢𑒲𑒢 𑒯𑒩𑒰𑒧 𑒦𑓄 𑒖𑒰𑒃 𑒕𑒻 𑒞𑒯𑒱𑒢𑒰 𑒑𑒰𑒧𑒏 𑒪𑒼𑒏𑒏 𑒥𑒲𑒔 𑒦𑓄 𑒑𑒹𑒪। 𑒣𑒯𑒱𑒪 𑒠𑒱𑒢 𑒥𑒯𑒳𑒞𑒼 𑒑𑒼𑒙𑒹 𑒢𑒻 𑒥𑒴𑒗𑒱 𑒣𑒹𑒪𑒰, 𑒠𑒼𑒮𑒩 𑒠𑒱𑒢 𑒣𑒞𑒰 𑒔𑒪𑒪𑒢𑒱 𑒖𑒹 𑒏𑒱𑒕𑒳 𑒑𑒼𑒙𑒹 𑒖𑒯𑒱𑒢𑒰 𑒁𑒣𑒢 𑒏𑒳𑒩𑒯𑒛𑓃𑒱-𑒙𑒹𑓀𑒑𑒰𑒩𑒲 𑒪𑓄 𑒏𑓄 𑒑𑒹𑒪 𑒩𑒯𑒟𑒱 𑒍 𑒮𑓀𑒑𑒹 𑒢𑒹𑒢𑒹 𑒔𑒪𑒱𑒨𑒼 𑒋𑒪𑒰, 𑒔𑒪𑒢𑒱 𑒁𑒕𑒱 𑒖𑒹 𑒞𑒹𑒩𑒰𑒃𑒞 𑒞𑒏 𑒮𑒦𑒏𑒹𑒿 𑒕𑒳𑒞𑒏𑒰 𑒪𑒰𑒑𑒱 𑒖𑒰𑒃 𑒕𑒻, 𑒞𑒿𑒋 𑒞𑒲𑒢 𑒠𑒱𑒢 𑒍𑒯𑒼 𑒮𑒦 𑒏𑒱𑒕𑒳 𑒢𑒹 𑒏𑒩𑒞। 𑒖𑒹 𑒮𑒦 𑒏𑒳𑒩𑒯𑒛𑓃𑒱-𑒙𑒹𑓀𑒑𑒰𑒩𑒲 𑒪𑓄 𑒏𑓄 𑒂𑒋𑒪 𑒩𑒯𑒟𑒱 𑒯𑒳𑒢𑒏𑒰 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒣𑒳𑒕𑒪𑒐𑒱𑒢 𑒖𑒹 𑒏𑒱𑒁𑒋 𑒁𑒢𑒪𑒱𑒌? 𑒍 𑒮𑒦 𑒖𑒥𑒰𑒥 𑒠𑒹𑒪𑒐𑒱𑒢 𑒖𑒹 𑒗𑓀𑒗𑒰𑒩𑒣𑒳𑒩𑒥𑒪𑒰 𑒣𑒰𑒩𑓂𑒙𑒲𑒏 (𑒪𑒏𑒛𑓃𑒲 𑒏𑒰𑒩𑒼𑒥𑒰𑒩 𑒏𑒹𑒢𑒱𑒯𑒰𑒩) 𑒏𑒳𑒩𑒯𑒛𑓃𑒱 𑒕𑒱𑒌, 𑒂𑒃 𑒮𑒧𑒰𑒖 𑒠𑒳𑒂𑒩𑒹 𑒏𑒰𑒖 𑒏𑒰𑒧𑒻 𑒏𑒹𑒪𑒾𑓀, 𑒖𑒿 𑒏𑒳𑒩𑒯𑒛𑓃𑒱 𑒥𑒩𑒠𑒰 𑒖𑒰𑒃𑒞 𑒞𑒐𑒢 𑒞𑒿 𑒏𑒰𑒖𑒹 𑒥𑒢𑓂𑒢 𑒦𑓄 𑒖𑒃𑒞𑒋। 𑒞𑒯𑒲 𑒥𑒲𑒔 𑒋𑒏 𑒑𑒼𑒙𑒰 𑒥𑒰𑒖𑒱 𑒅𑒚𑒪𑒰𑒯 𑒖𑒹 𑒂𑒢 𑒑𑒰𑒧𑒏 𑒏𑒳𑒩𑒯𑒛𑓃𑒱 𑒦𑒹𑒪 𑒏𑒱𑒢𑒹, 𑒑𑒰𑒧𑒏 𑒏𑒳𑒩𑒯𑒛𑓃𑒱𑒏𑒹𑒿 𑒢𑒹 𑒕𑒳𑒞𑒏𑒰 𑒪𑒑𑒞𑒻 𑒂𑒏𑒱 𑒂𑒢𑒼 𑒑𑒰𑒧𑒏 𑒍𑒖𑒰𑒩𑒏𑒹𑒿 𑒕𑒳𑒞𑒏𑒰 𑒪𑒰𑒑𑒞। 𑒧𑒳𑒠𑒰 𑒏𑒳𑒩𑒯𑒛𑓃𑒱𑒥𑒪𑒰 𑒑𑒣 𑒍𑒞𑒹 𑒢𑒻 𑒣𑒏𑒛𑓃𑒪𑒏 𑒖𑒞𑒹 𑒏𑒹𑒬𑒥𑒪𑒰 𑒣𑒏𑒛𑓃𑒪𑒏। 𑒩𑓀𑒑-𑒩𑓀𑒑𑒏 𑒑𑒣 𑒔𑒪𑒋 𑒪𑒰𑒑𑒪। 𑒞𑒹𑒩𑒯𑒰 𑒮𑒩𑒰𑒡 𑒯𑒼𑒃𑒞 𑒞𑒿 𑒠𑒱𑒨𑒰𑒠-𑒫𑒰𑒠 𑒮𑒯𑒱𑒞 𑒢𑒯-𑒏𑒹𑒬 𑒠𑒱𑒢 𑒏𑒹𑒬 𑒏𑒙𑒾𑒞𑒰𑒯, 𑒞𑒿𑒋 𑒒𑒩𑒫𑒰𑒪𑒲𑒏𑒹𑒿 𑒏𑒼𑒢𑒼 𑒧𑒞𑒪𑒥𑒹 𑒢𑒻। 𑒮𑒧𑒰𑒖𑒧𑒹 𑒋𑒏 𑒖𑒰𑒞𑒱𑒏 𑒮𑓀𑒑 𑒂𑒢𑒼 𑒖𑒰𑒞𑒱 𑒂 𑒋𑒏 𑒙𑒼𑒪𑒏 𑒮𑓀𑒑 𑒂𑒢𑒼 𑒙𑒼𑒪𑒏 𑒪𑒼𑒏 𑒩𑒯𑒟𑒱 𑒧𑒳𑒠𑒰 𑒫𑒻𑒔𑒰𑒩𑒱𑒏 𑒙𑒏𑒩𑒰𑒫 𑒙𑒼𑒪𑒹-𑒙𑒼𑒪, 𑒒𑒩𑒹-𑒒𑒩 𑒯𑒳𑒁𑒋 𑒪𑒰𑒑𑒪। 𑒫𑒱𑒔𑒱𑒞𑓂𑒩 𑒮𑓂𑒟𑒱𑒞𑒱 𑒥𑒢𑒱 𑒑𑒹𑒪। 𑒖𑒯𑒱𑒢𑒰 𑒑𑒰𑒧𑒧𑒹 𑒗𑓀𑒗𑒙 𑒥𑒜𑓃𑒪 𑒞𑒯𑒱𑒢𑒰 𑒣𑓀𑒔𑒻𑒞𑒱𑒨𑒼 𑒥𑒜𑓃𑒪। 𑒁𑒡𑒱𑒏 𑒣𑓀𑒔𑒻𑒞𑒱𑒨𑒼 𑒥𑒜𑓃𑒢𑒹 𑒗𑓀𑒗𑒙 𑒏𑒧𑒥𑒼 𑒏𑒋𑒪 𑒂 𑒥𑒜𑓃𑒥𑒼 𑒏𑒋𑒪। 𑒏𑒱𑒨𑒼 𑒥𑒖𑒻 𑒕𑒪 𑒖𑒹 𑒖𑒐𑒢 𑒧𑒳𑒩𑒠𑒰 𑒖𑒩𑒾𑒪𑒰 𑒥𑒰𑒠 𑒣𑒼𑒐𑒩𑒱𑒧𑒹 𑒢𑒯𑒹𑒪𑒾𑓀, 𑒂𑓀𑒑𑒢 𑒂𑒥𑒱 𑒪𑒼𑒯-𑒣𑒰𑒟𑒩 𑒕𑒴𑒪𑒾𑓀, 𑒁𑒣𑒢𑒰 𑒌𑒚𑒰𑒧 𑒂𑒥𑒱 𑒮𑒼𑒯𑒩𑒰𑒃 𑒫𑒰 𑒧𑒱𑒩𑒔𑒰𑒃 𑒐𑒰 𑒢𑒯𑒰 𑒏𑓄 𑒏𑒣𑒛𑓃𑒰 𑒥𑒠𑒪𑒱 𑒪𑒹𑒪𑒾𑓀 𑒞𑒐𑒢 𑒕𑒳𑒞𑒏𑒰 𑒏𑒞𑒹𑒙𑒰 𑒁𑒕𑒱 𑒖𑒹 𑒞𑒻𑒨𑒼 𑒪𑒑𑒪𑒹 𑒩𑒯𑒱 𑒑𑒹𑒪। 𑒞𑒿 𑒏𑒱𑒨𑒼 𑒥𑒖𑒻 𑒕𑒪 𑒖𑒹 𑒏𑒹𑒬-𑒏𑒙𑓂𑒙𑒰 𑒠𑒱𑒨𑒰𑒠 𑒯𑒼𑒃 𑒕𑒻 𑒏𑒱 𑒂𑒢𑒼 𑒯𑒹𑒞𑒃। 𑒞𑒿 𑒏𑒱𑒨𑒼 𑒥𑒖𑒻 𑒕𑒪 𑒖𑒹 𑒏𑒰𑒪𑓂𑒯𑒱𑒨𑒹 𑒠𑒮 𑒩𑒴𑒣𑒻𑒨𑒰 𑒠𑓄 𑒏𑓄 𑒏𑒹𑒬 𑒥𑒢𑒾𑒢𑒹 𑒕𑒪𑒾𑓀, 𑒏𑒹𑒢𑒰 𑒏𑒙𑒰 𑒪𑒹𑒥। 𑒑𑒰𑒧𑒧𑒹 𑒑𑒣𑒼 𑒔𑒪𑒻𑒞 𑒂 𑒣𑒩𑒰𑒞𑒹 𑒦𑒢𑒹 𑒏𑒱𑒕𑒳 𑒑𑒼𑒙𑒹 𑒏𑒹𑒬 𑒏𑒙𑒰 𑒪𑒹𑒪𑒢𑒱। 𑒥𑒱𑒢𑒰 𑒣𑒢𑒔𑒻𑒞𑒱𑒨𑒹𑒏 𑒣𑒢𑒔𑒻𑒞𑒲 𑒦𑓄 𑒑𑒹𑒪 𑒖𑒹 𑒏𑒹𑒬𑒧𑒹 𑒏𑒱𑒕𑒳 𑒪𑒰𑒑𑒪 𑒩𑒯𑒻 𑒕𑒻 𑒖𑒱𑒢𑒏𑒩 𑒧𑒢 𑒧𑒰𑒢𑒋 𑒏𑒙𑒰𑒥𑒋, 𑒢𑒻 𑒧𑒢 𑒧𑒰𑒢𑒋 𑒢𑒻 𑒏𑒙𑒰𑒥𑒋। 𑒠𑒴 𑒠𑒱𑒢 𑒋𑒯𑒱𑒢𑒰 𑒔𑒪𑒪। 𑒞𑒹𑒮𑒩 𑒠𑒱𑒢 𑒕𑒰𑒅𑒩-𑒗𑒣𑓂𑒣𑒲 𑒯𑒋𑒞। 𑒁𑒐𑒢 𑒡𑒩𑒱 𑒮𑒦 (𑒮𑒧𑒰𑒖) 𑒏𑒼𑒢𑒼 𑒱𑒢𑒩𑓂𑒝𑒋 𑒢𑒻 𑒏𑒹𑒢𑒹 𑒕𑒪 𑒖𑒹 𑒏𑒲 𑒏𑒋𑒪 𑒖𑒰𑒋, 𑒧𑒳𑒠𑒰 𑒣𑒩𑒱𑒮𑓂𑒟𑒱𑒞𑒱𑒏 𑒮𑒰𑒧𑒢𑒰 𑒖𑒩𑒴𑒩 𑒏𑒋𑒪 𑒖𑒰𑒋𑒞 𑒮𑒹 𑒞𑒨 𑒕𑒪, 𑒄 𑒮𑒥𑒯𑒏 𑒧𑒢𑒧𑒹 𑒩𑒯𑒥𑒹 𑒏𑒩𑒢𑒱। 𑒖𑒐𑒢 𑒖𑒹 𑒮𑒧𑒮𑓂𑒨𑒰 𑒅𑒚𑒞 𑒞𑒹𑒏𑒩 𑒮𑒧𑒰𑒡𑒰𑒢 𑒞𑒐𑒢𑒹 𑒏𑒩𑒥। 𑒖𑒃 𑒠𑒱𑒢 𑒕𑒰𑒅𑒩-𑒗𑒣𑓂𑒣𑒲 𑒕𑒪 𑒍𑒃 𑒠𑒱𑒢 𑒒𑒩𑒫𑒰𑒩𑒲 (𑒏𑒣𑒱𑒪𑒹𑒬𑓂𑒫𑒩 𑒩𑒰𑒅𑒞) 𑒋𑒏𑒙𑒰 𑒮𑒧𑒰𑓀𑒑𑒏𑒹𑒿 𑒧𑒯𑒰𑒣𑒰𑒞𑓂𑒩 𑒌𑒚𑒰𑒧 𑒣𑒚𑒾𑒪𑒢𑒱। 𑒥𑒹𑒩𑒧𑒰𑒧𑒹 𑒧𑒯𑒰𑒣𑒰𑒞𑓂𑒩 𑒢𑒻 𑒁𑒕𑒱, 𑒏𑒕𑒳𑒥𑒲𑒏 𑒣𑒳𑒖𑒥𑒻 𑒕𑒟𑒱। 𑒖𑒹𑒯𑒼 𑒮𑒦 𑒢𑒻 𑒥𑒰𑒖𑒏 𑒔𑒰𑒯𑒲 𑒮𑒹𑒯𑒼 𑒮𑒦 𑒧𑒯𑒰𑒣𑒰𑒞𑓂𑒩 𑒏𑒯𑒱 𑒱𑒢𑒩𑓂𑒝𑒋 𑒮𑒳𑒢𑒰 𑒠𑒹𑒪𑒐𑒱𑒢 𑒖𑒹 𑒢𑒻 𑒖𑒰𑒋𑒥, 𑒏𑒕𑒳𑒥𑒲𑒮𑒿 𑒂𑒥𑒱 𑒍 𑒮𑒧𑒰𑓀𑒑 𑒥𑒰𑒖𑒪। 𑒕𑒰𑒅𑒩-𑒗𑒣𑓂𑒣𑒲𑒏 𑒮𑒧𑒋 𑒦𑒹𑒪 𑒖𑒰𑒃𑒞 𑒩𑒯𑒋। 𑒏𑒲 𑒏𑒋𑒪 𑒖𑒰𑒋? 𑒥𑒱𑒠𑒹𑒬𑓂𑒫𑒩 𑒚𑒰𑒏𑒳𑒩 (𑒢𑒾𑒂) 𑒥𑒰𑒖𑒪 𑒖𑒹 𑒕𑒰𑒅𑒩-𑒗𑒣𑓂𑒣𑒲𑒏 𑒮𑒦 𑒪𑒴𑒩𑒱 𑒯𑒧𑒩𑒰 𑒁𑒕𑒱। 𑒯𑒧 𑒗𑒿𑒣𑒥𑒰 𑒠𑒹𑒥𑒻। 𑒮𑒋𑒯 𑒦𑒹𑒪। 𑒩𑒰𑒞𑒱𑒧𑒹 𑒮𑒩𑒰𑒡 𑒏𑒩𑓂𑒧𑒧𑒹 𑒣𑒳𑒩𑒼𑒯𑒱𑒞𑒏 (𑒥𑓂𑒩𑒰𑒯𑓂𑒧𑒝) 𑒍𑒞𑒹 𑒧𑒯𑒞 𑒢𑒻 𑒯𑒼𑒃𑒞 𑒁𑒕𑒱 𑒖𑒞𑒹 𑒧𑒯𑒰𑒣𑒰𑒞𑓂𑒩𑒏। 𑒱𑒢𑒩𑓂𑒝𑒋 𑒏𑒱𑒕𑒳 𑒢𑒻 𑒦𑒹𑒪, 𑒦𑒹𑒪 𑒋𑒞𑒥𑒹 𑒖𑒹 𑒖𑒯𑒱𑒢𑒰 𑒧𑒯𑒰𑒣𑒰𑒞𑓂𑒩𑒏𑒹𑒿 𑒏𑒯𑒪𑒱𑒨𑒢𑒱 𑒞𑒯𑒱𑒢𑒰 𑒣𑒳𑒩𑒼𑒯𑒱𑒞𑒼𑒏𑒹𑒿 𑒣𑒳𑒕𑒱 𑒪𑒱𑒁𑒢𑒳। 𑒮𑒋𑒯 𑒦𑒹𑒪। 𑒠𑒼𑒮𑒩 𑒠𑒱𑒢 𑒖𑒐𑒢 𑒣𑒳𑒩𑒼𑒯𑒱𑒞𑒏𑒹𑒿 𑒣𑒳𑒕𑒪 𑒑𑒹𑒪𑒢𑒱 𑒞𑒐𑒢 𑒍𑒯𑒼 𑒍𑒯𑒢𑒹 𑒖𑒥𑒰𑒥 𑒠𑒹𑒪𑒐𑒱𑒢 𑒖𑒹 𑒢𑒻 𑒖𑒰𑒋𑒥। 𑒮𑒦 𑒫𑒱𑒔𑒰𑒩𑒱𑒨𑒹 𑒢𑒹𑒢𑒹 𑒩𑒯𑒟𑒱। 𑒠𑒱𑒢𑒹𑒧𑒹 𑒥𑒹𑒩𑒴𑒣𑒯𑒩 𑒁𑒣𑒢𑒰𑒧𑒹 𑒥𑒻𑒮𑒰𑒩 𑒦𑒹𑒪। 𑒮𑒩𑓂𑒫𑒮𑒧𑓂𑒧𑒞𑒱 𑒱𑒢𑒩𑓂𑒝𑒋 𑒦𑒹𑒪 𑒖𑒹 𑒣𑒳𑒩𑒼𑒯𑒱𑒞-𑒣𑒰𑒞𑓂𑒩 𑒕𑒼𑒛𑓃𑒱 𑒠𑒹𑒪 𑒖𑒰𑒋। 𑒮𑒩𑒰𑒡𑒧𑒹 𑒠𑒴 𑒏𑒰𑒖 𑒯𑒼𑒃 𑒕𑒻। 𑒏𑓂𑒩𑒱𑒨𑒰-𑒏𑒩𑓂𑒧 𑒂 𑒦𑒼𑒖। 𑒖𑒹 𑒐𑒩𑓂𑒔 𑒏𑓂𑒩𑒱𑒨𑒰-𑒏𑒩𑓂𑒧𑒧𑒹 𑒯𑒋𑒞 𑒍 𑒦𑒼𑒖𑒹𑒧𑒹 𑒪𑒑𑒰 𑒠𑒱𑒎। 𑒍𑒢𑒰 𑒥𑒩𑒃 𑒮𑒦 𑒑𑒰𑒧𑒧𑒹 𑒢𑒻 𑒕𑒟𑒱, 𑒏𑒱𑒕𑒳 𑒑𑒢𑒪-𑒑𑒴𑒟𑒪 𑒑𑒰𑒧𑒧𑒹 𑒕𑒟𑒱, 𑒮𑒦 𑒏𑒳𑒙𑒳𑒧𑒻𑒞𑒲𑒧𑒹 𑒮𑒒𑒢 𑒑𑒴𑒟𑒪 𑒕𑒟𑒱। 𑒖𑒯𑒱𑒢𑒰 𑒬𑓀𑒐 𑒤𑒴𑒏𑒱 𑒧𑒯𑒰𑒦𑒰𑒩𑒞 𑒬𑒳𑒩𑒴 𑒦𑒹𑒪 𑒞𑒯𑒱𑒢𑒰 𑒬𑓀𑒐 𑒤𑒳𑒏𑒰 𑒑𑒹𑒪। 𑒔𑒾𑒥𑒑𑒪𑒲 𑒑𑒰𑒧𑒧𑒹 𑒮𑒧𑒰𑒔𑒰𑒩 𑒣𑒮𑒩𑒱 𑒑𑒹𑒪। 𑒂𑒢-𑒂𑒢 𑒑𑒰𑒧𑒧𑒹 𑒮𑒹𑒯𑒼 𑒩𑓀𑒑-𑒥𑒱𑒩𑓀𑒑𑒏 𑒮𑒫𑒰𑒪 𑒅𑒚𑒋 𑒪𑒰𑒑𑒪। 𑒏𑒞𑒾 𑒅𑒚𑒪 𑒖𑒹 𑒖𑒿 𑒏𑓂𑒩𑒱𑒨𑒰-𑒏𑒩𑓂𑒧 𑒢𑒻 𑒯𑒋𑒞, 𑒞𑒿 𑒦𑒼𑒖 𑒢𑒻 𑒐𑒰𑒋𑒥। 𑒏𑒞𑒾 𑒅𑒚𑒪 𑒖𑒹 𑒏𑒱𑒨𑒼 𑒁𑒣𑒢 𑒥𑒰𑒣-𑒠𑒰𑒠𑒰𑒏 𑒏𑒩𑒻𑒋 𑒞𑒃𑒮𑒿 𑒏𑒱 𑒣𑓀𑒔𑒏 (𑒦𑒼𑒖 𑒐𑒹𑒢𑒱𑒯𑒰𑒩𑒏) 𑒧𑒳𑒿𑒯 𑒕𑒳𑒥𑒰 𑒖𑒰𑒋𑒞। 𑒏𑒳𑒙𑒳𑒧 𑒮𑒦 𑒖𑒱𑒖𑓂𑒘𑒰𑒮𑒰 𑒏𑒩𑒋 𑒁𑒰𑒥𑒋 𑒪𑒑𑒪𑒢𑒱। 𑒖𑒹 𑒂𑒥𑒟𑒱 𑒯𑒳𑒢𑒏𑒩 𑒖𑒥𑒰𑒥 𑒯𑒼𑒢𑓂𑒯𑒱 𑒖𑒹 𑒮𑒰𑒧𑒰𑒖𑒱𑒏𑒞𑒰 𑒙𑒳𑒙𑒢𑒹 𑒏𑒳𑒙𑒳𑒧𑒻𑒞𑒲 𑒟𑒼𑒛𑓃𑒹 𑒙𑒴𑒙𑒱 𑒖𑒰𑒋𑒞। 𑒮𑒧𑒰𑒖 𑒥𑒢𑒱 𑒏𑓄 𑒢𑒻 𑒏𑒳𑒙𑒳𑒧 𑒥𑒢𑒱 𑒏𑓄 𑒞𑒿 𑒐𑒹𑒥𑒹 𑒏𑒩𑒥। 𑒑𑒰𑒧𑒼𑒧𑒹 𑒖𑒰𑒞𑒱𑒏 𑒥𑒲𑒔 𑒫𑒱𑒫𑒰𑒠 𑒅𑒚𑒪। 𑒧𑒵𑒞𑓂𑒨𑒳𑒏 𑒠𑒮𑒧 𑒠𑒱𑒢, 𑒖𑒃 𑒠𑒱𑒢 𑒢𑒯-𑒏𑒹𑒬 𑒏𑒙𑓂𑒙𑒲 𑒯𑒋𑒞। 𑒦𑒱𑒢𑒮𑒳𑒩𑒏𑒹 𑒣𑒯𑒩 𑒏𑒩𑒲𑒥 𑒂𑒚 𑒥𑒖𑒹 𑒥𑒻𑒮𑒰𑒩 𑒦𑒹𑒪। 𑒥𑒻𑒮𑒰𑒩 𑒁𑒃𑒪𑒹 𑒦𑒹𑒪 𑒖𑒹 𑒁𑒐𑒢 𑒡𑒩𑒱𑒏 𑒦𑒼𑒖-𑒦𑒰𑒞 𑒐𑒰𑒖𑒰-𑒧𑒴𑓀𑒑𑒥𑒰𑒣𑒩 𑒁𑒿𑒙𑒏𑒪 𑒕𑒪। 𑒪𑒼𑒏𑒏 𑒖𑒲𑒫𑒢 𑒮𑓂𑒞𑒩 𑒋𑒞𑓂𑒞𑒹 𑒢𑒱𑒔𑓂𑒔𑒰𑒿 𑒕𑒪। 𑒌𑒚𑒰𑒧 𑒐𑒰𑒖𑒰-𑒧𑒴𑓀𑒑𑒥𑒰 𑒫𑒰 𑒪𑒛𑓂𑒛𑒴 𑒞𑒏 𑒣𑒯𑒳𑒿𑒔𑒪 𑒕𑒪 𑒞𑒿𑒋 𑒐𑒰𑒢-𑒣𑒰𑒢𑒧𑒹 𑒡𑒏𑓂𑒏𑒰 𑒧𑒰𑒩𑒪 𑒖𑒰𑒋। 𑒞𑒿𑒋 𑒩𑒮𑒑𑒳𑒪𑓂𑒪𑒰-𑒪𑒰𑒪𑒧𑒼𑒯𑒢𑒏 𑒮𑓀𑒑 𑒣𑒩𑓂𑒨𑒰𑒣𑓂𑒞 𑒠𑒯𑒲𑒏 𑒥𑒹𑒫𑒮𑓂𑒟𑒰 𑒯𑒳𑒁𑒋। 𑒦𑒼𑒖-𑒦𑒰𑒞𑒏 𑒄 𑒮𑓂𑒟𑒱𑒞𑒱 𑒁𑒐𑒢𑒼 𑒟𑒼𑒛𑓃-𑒟𑒰𑒛𑓃 𑒁𑒕𑒱𑒨𑒹 𑒧𑒳𑒠𑒰 𑒣𑒯𑒱𑒢𑒹 𑒏𑒱𑒕𑒳 𑒖𑒰𑒞𑒱 𑒦𑒼𑒖𑒏 𑒧𑒰𑒧𑒪𑒰𑒧𑒹 𑒥𑒠𑒢𑒰𑒧 𑒕𑒪। 𑒋𑒏 𑒥𑒩𑒞𑒢 𑒔𑒰𑒯 𑒥𑒢𑒪, 𑒖𑒱𑒢𑒏𑒰 𑒖𑒞𑒹 𑒧𑒢 𑒤𑒳𑒩𑒪𑒢𑒱 𑒮𑒹 𑒞𑒞𑒹 𑒣𑒲𑒪𑒢𑒱। 𑒣𑒰𑒢 𑒔𑒪𑒪, 𑒍𑒢𑒰 𑒣𑒰𑒢 𑒥𑒩𑓂𑒖𑒱𑒞 𑒁𑒕𑒱 𑒞𑒻𑒨𑒼। 𑒁𑒐𑒢 𑒡𑒩𑒱 𑒖𑒰𑒞𑒱𑒏 𑒍𑒗𑒩𑒲 𑒕𑒳𑒙𑒱 𑒔𑒳𑒏𑒪 𑒕𑒪। 𑒋𑒑𑒰𑒩𑒯𑒼 𑒑𑒰𑒧𑒏 𑒖𑒰𑒞𑒱 𑒮𑒯𑒧𑒞 𑒦𑓄 𑒑𑒹𑒪𑒰𑒯 𑒖𑒹 𑒦𑒼𑒖 𑒐𑒰𑒋𑒥। 𑒫𑒰𑒞𑒰𑒫𑒩𑒝𑒧𑒹 𑒅𑒚𑒪 𑒖𑒹 𑒏𑒱𑒨𑒼 𑒁𑒣𑒢 𑒧𑒰𑒋-𑒥𑒰𑒣𑒏 𑒏𑒱𑒩𑒱𑒨𑒰-𑒏𑒩𑓂𑒧 𑒏𑒩𑒞 𑒂𑒏𑒱 𑒁𑒢𑒏𑒩। 𑒞𑒃𑒮𑒿 𑒁𑒢𑒏𑒰 𑒏𑒱 𑒖𑒹 𑒁𑒢𑒹𑒩𑒹 𑒏𑒳𑒙𑒳𑒧-𑒣𑒩𑒱𑒫𑒰𑒩𑒮𑒿 𑒧𑒳𑒿𑒯 𑒤𑒴𑒪𑓂𑒪𑒲 𑒏𑓄 𑒪𑒹𑒥। 𑒁𑒐𑒢 𑒡𑒩𑒱𑒏 𑒮𑒼𑒗𑒩𑒰𑒋𑒪 𑒏𑒰𑒖 𑒠𑒹𑒐𑒱 𑒮𑒥𑒯𑒏 𑒧𑒢 𑒯𑒩𑒱𑒁𑒩। 𑒞𑒃𑒣𑒩 𑒔𑒰𑒯𑒏 𑒗𑒼𑓀𑒏 𑒮𑒹𑒯𑒼 𑒩𑒯𑒋। 𑒞𑒃𑒧𑒹 𑒩𑒮𑒑𑒳𑒪𑓂𑒪𑒰-𑒪𑒰𑒪𑒧𑒼𑒯𑒢 𑒂𑒑𑒴𑒋𑒧𑒹 𑒁𑒕𑒱, 𑒮𑒦𑒏𑒹𑒿 𑒥𑒳𑒗𑒪𑒹 𑒖𑒹 𑒑𑒾𑒂𑒿𑒮𑒿 𑒁𑒢𑒑𑒾𑒂𑒿 𑒡𑒩𑒱𑒏 𑒯𑒱𑒮𑓂𑒮𑒰 𑒥𑒩𑒰𑒥𑒩𑒹 𑒁𑒕𑒱। 𑒑𑒣 𑒬𑒳𑒩𑒴 𑒯𑒼𑒃𑒞𑒹 𑒞𑒲𑒢𑒴 𑒥𑒯𑒱𑒢 (𑒥𑒹𑒙𑒲) 𑒂𑒥𑒱 𑒣𑓂𑒩𑒬𑓂𑒢 𑒚𑒰𑒜𑓃 𑒏𑒹𑒪𑒏 𑒖𑒹 𑒢𑒯-𑒏𑒹𑒬𑒏 𑒦𑒼𑒖 𑒯𑒧 𑒏𑒩𑒥, 𑒣𑓂𑒩𑒬𑓂𑒢 𑒖𑒙𑒱𑒪 𑒦𑓄 𑒑𑒹𑒪, 𑒞𑒲𑒢𑒴 𑒏𑒯𑒻 𑒕𑒻 𑒯𑒧 𑒏𑒩𑒥। 𑒁𑒔𑓂𑒕𑒰 𑒏𑒯𑒱 𑒞𑒲𑒢𑒴 𑒥𑒯𑒱𑒢𑒏𑒹𑒿 𑒫𑒱𑒠𑒰 𑒏𑒋𑒪 𑒑𑒹𑒪। 𑒧𑒳𑒠𑒰 𑒍𑒗𑒩𑒲 𑒪𑒑𑒱𑒞𑒹 𑒑𑒹𑒪। 𑒖𑒐𑒢 𑒢𑒧𑒯𑒩 𑒦𑒼𑒖𑒏 𑒨𑒼𑒖𑒢𑒰 𑒥𑒢𑒱 𑒑𑒹𑒪 𑒞𑒐𑒢 𑒕𑒼𑒙𑒏𑒰-𑒕𑒼𑒙𑒏𑒰𑒏𑒹𑒿 𑒞𑒿 𑒩𑒼𑒏𑒋 𑒣𑒛𑓃𑒞। 𑒏𑒳𑒥𑒹𑒩𑒏 𑒦𑓀𑒛𑒰𑒩 𑒞𑒿 𑒢𑒻 𑒕𑒱𑒌 𑒖𑒹 𑒖𑒞𑒹 𑒢𑒱𑒏𑒰𑒪𑒥 𑒞𑒞𑒹 𑒥𑒜𑓃𑒞𑒻। 𑒢𑒯-𑒏𑒹𑒬 𑒦𑒼𑒖𑒧𑒹 𑒐𑒰𑒃𑒪𑒹 𑒏𑒹𑒏𑒩𑒰 𑒠𑒹𑒪 𑒖𑒰𑒃 𑒕𑒻 𑒍𑒏𑒩𑒹 𑒢𑒹 𑒖𑒹 𑒏𑒚𑒱𑒨𑒰𑒩𑒲 𑒑𑒹𑒪 𑒩𑒯𑒪। 𑒦𑒼𑒖 𑒏𑒟𑒲𑒏 𑒯𑒼𑒃 𑒕𑒻, 𑒞𑒿 𑒦𑒞𑒦𑒼𑒖। 𑒮𑒦 𑒖𑒰𑒞𑒱𑒏 𑒥𑒲𑒔 𑒞𑒿 𑒦𑒰𑒞𑒏 𑒔𑒪𑒢𑒱 𑒢𑒻 𑒕𑒻। 𑒞𑒐𑒢? 𑒋𑒏𑓂𑒏𑒹 𑒏𑒰𑒖 𑒏𑒹𑒢𑒱𑒯𑒰𑒩𑒧𑒹 𑒠𑒴 𑒩𑒲𑒞𑒱 𑒢𑒲𑒏 𑒯𑒋𑒞। 𑒯𑒼𑒃𑒞-𑒯𑒥𑒰𑒃𑒞 𑒢𑒯-𑒏𑒹𑒬 𑒠𑒱𑒢𑒏 𑒦𑒼𑒖𑒹 𑒅𑒚𑒰𑒫 𑒦𑓄 𑒑𑒹𑒪। 𑒞𑒲𑒢𑒴 𑒥𑒯𑒱𑒢𑒏𑒹𑒿 𑒏𑒯𑒪 𑒑𑒹𑒪 𑒖𑒹 𑒦𑒼𑒖 𑒢𑒧𑒯𑒩 𑒦𑒃𑒨𑒹 𑒩𑒯𑒪 𑒁𑒕𑒱 𑒞𑒹𑒯𑒲𑒧𑒹 𑒁𑒯𑒴𑒿 𑒮𑒦 𑒖𑒹 𑒱𑒠𑒁 𑒔𑒰𑒯𑒻 𑒕𑒲 𑒮𑒹 𑒧𑒱𑒪𑒰 𑒠𑒱𑒎। 𑒍𑒞𑒹 𑒒𑒩𑒫𑒰𑒩𑒲𑒏𑒹𑒿 𑒁𑒮𑒰𑒢 𑒯𑒹𑒞𑒃। 𑒞𑒲𑒢𑒴 𑒥𑒯𑒱𑒢 𑒩𑒰𑒖𑒲 𑒦𑓄 𑒑𑒹𑒪𑒲𑒯। 𑒠𑒼𑒮𑒩 𑒣𑓂𑒩𑒬𑓂𑒢 𑒅𑒚𑒪 𑒖𑒹 𑒣𑒳𑒩𑒼𑒯𑒱𑒞-𑒧𑒯𑒰𑒣𑒰𑒞𑓂𑒩 𑒢𑒻 𑒎𑒞𑒰𑒯 𑒞𑒹𑒏𑒩 𑒏𑒲 𑒏𑒩𑒥। 𑒏𑒱𑒨𑒼 𑒖𑒰𑒞𑒱𑒏 𑒣𑒳𑒩𑒼𑒯𑒱𑒞 𑒞𑒰𑒏𑒋 𑒪𑒑𑒪𑒰𑒯 𑒞𑒿 𑒏𑒱𑒨𑒼 𑒏𑒱𑒕𑒳। 𑒧𑒳𑒠𑒰 𑒏𑒱𑒕𑒳 𑒂𑒢 𑒖𑒰𑒞𑒱𑒧𑒹 𑒬𑒳𑒩𑒴 𑒦𑓄 𑒑𑒹𑒪 𑒧𑒳𑒠𑒰 𑒮𑒹 𑒢𑒻 𑒦𑒹𑒪। 𑒞𑒿𑒋 𑒖𑒰𑒞𑒱𑒧𑒹 𑒦𑒹𑒙𑒥𑒹 𑒢𑒹 𑒏𑒋𑒪। 𑒏𑒱𑒕𑒳 𑒑𑒼𑒙𑒹𑒏 𑒫𑒱𑒔𑒰𑒩 𑒖𑒹 𑒖𑒐𑒢 𑒍 𑒮𑒦 (𑒣𑒳𑒩𑒼𑒯𑒱𑒞-𑒣𑒰𑒞𑓂𑒩) 𑒋𑒥𑒹 𑒢𑒻 𑒏𑒩𑒞𑒰𑒯 𑒞𑒐𑒢 𑒮𑒼𑒪𑒯𑒼 𑒂𑒢𑒰 𑒕𑒼𑒛𑓃𑒱 𑒠𑒱𑒎। 𑒏𑒱𑒕𑒳 𑒑𑒼𑒙𑒹𑒏 𑒫𑒱𑒔𑒰𑒩 𑒖𑒹 𑒖𑒐𑒢 𑒑𑒰𑒧𑒹𑒧𑒹 𑒠𑒹𑒐𑒻 𑒕𑒱𑒌 𑒩𑒰𑒧, 𑒮𑒠𑒰𑒨, 𑒣𑒰𑒮𑒫𑒰𑒢 𑒃𑒞𑓂𑒨𑒰𑒠𑒱𑒏𑒹𑒿 𑒁𑒣𑒢 𑒮𑒦 𑒏𑒱𑒕𑒳 𑒕𑒻 𑒞𑒐𑒢 𑒯𑒧𑒯𑒴𑒿 𑒮𑒦 𑒏𑒱𑒁𑒋 𑒢𑒹 𑒥𑒢𑒰 𑒪𑒲। 𑒞𑒐𑒢 𑒏𑒱 𑒯𑒳𑒁𑒋? 𑒩𑒰𑒧𑒁𑒫𑒞𑒰𑒩 𑒩𑒰𑒅𑒞𑒏𑒹𑒿 𑒣𑒳𑒖𑒥𑒻𑒏 𑒦𑒰𑒩 𑒠𑒹𑒪 𑒑𑒹𑒪𑒢𑒱 𑒂 𑒥𑒱𑒠𑒹𑒬𑓂𑒫𑒩 𑒚𑒰𑒏𑒳𑒩 𑒮𑒯𑒨𑒼𑒑𑒲 𑒥𑒢𑒱 𑒣𑒳𑒖𑒰 𑒠𑒹𑒟𑒱𑒢। 𑒣𑒳𑒖𑒾𑒪 𑒏𑒹𑒢𑒰 𑒖𑒰𑒋? 𑒏𑒼𑒢 𑒖𑒩𑒴𑒩𑒲 𑒏𑒼𑒢𑒼 𑒔𑒲𑒖𑒏 𑒁𑒕𑒱, 𑒮𑒹 𑒢𑒻 𑒞𑒿 𑒏𑒹𑒩𑒹 𑒣𑒰𑒞𑒣𑒩 𑒣𑒳𑒖𑒾𑒞𑒰𑒯 𑒂 𑒠𑒕𑒱𑒢𑒰𑒧𑒹 𑒠𑒳𑒢𑒴 𑒑𑒼𑒩𑒹𑒏𑒹𑒿 𑒋𑒏-𑒋𑒏 𑒖𑒼𑒛𑓃 𑒡𑒼𑒞𑒲 𑒠𑒹𑒪 𑒖𑒹𑒞𑒢𑒱। 𑒮𑒋𑒯 𑒦𑒹𑒪। 𑒮𑒩𑒰𑒡𑒹 𑒠𑒱𑒢 (𑒋𑒏𑒰𑒠𑒬𑒰) 𑒦𑒼𑒖 𑒏𑒩𑒻𑒏 𑒫𑒱𑒔𑒰𑒩 𑒦𑒹𑒪। 𑒦𑒼𑒖 𑒦𑒪𑒻। 𑒏𑒰𑒤𑒲 𑒖𑒮 𑒦𑒼𑒖𑒧𑒹 𑒦𑒹𑒪। 𑒧𑒳𑒠𑒰 𑒖𑒰𑒞𑒱𑒏 𑒥𑒲𑒔 𑒖𑒹 𑒩𑒱𑒋𑒏𑒬𑒢 𑒦𑒹𑒪 𑒍...।
𑒁𑒐𑒢 𑒡𑒩𑒱 𑒠𑒮𑒼 𑒠𑒱𑒢 𑒩𑓀𑒑-𑒩𑓀𑒑𑒏 𑒥𑒻𑒮𑒰𑒩 𑒑𑒰𑒧𑒮𑒿 𑒂𑒢 𑒑𑒰𑒧 𑒡𑒩𑒱 𑒯𑒼𑒃𑒞𑒹 𑒩𑒯𑒪। 𑒁𑓀𑒞𑒧𑒹 𑒩𑒞𑒲𑒬 𑒥𑒰𑒥𑒴𑒏 (𑒢𑒫𑒰𑒢𑒲) 𑒱𑒢𑒩𑓂𑒝𑒋 𑒦𑒹𑒪, 𑒖𑒹 𑒖𑒞𑒱𑒨𑒰 𑒂𑒑𑒴 𑒣𑒞𑒱𑒨𑒰 𑒢𑒻 𑒪𑒑𑒻 𑒕𑒻।
𑒏𑒣𑒱𑒪𑒹𑒬𑓂𑒫𑒩 𑒩𑒰𑒅𑒞𑒏 𑒌𑒚𑒰𑒧𑒏 𑒒𑒙𑒢𑒰 (𑒥𑒰𑒥𑒰𑒏 𑒮𑒩𑒰𑒡) 𑒑𑒰𑒧𑒮𑒿 𑒥𑒰𑒯𑒩 𑒡𑒩𑒱 𑒖𑒢𑒰 𑒂𑒑𑒱𑒏 𑒪𑒳𑒞𑓂𑒞𑒲 𑒦𑓄 𑒑𑒹𑒪। 𑒌 𑒒𑒙𑒢𑒰𑒮𑒿 𑒕𑒼𑒙-𑒣𑒻𑒒 𑒁𑒢𑒹𑒏𑒼 𑒒𑒙𑒢𑒰 𑒖𑒢𑓂𑒧 𑒪𑒹𑒪𑒏 𑒠𑒴𑒙𑒰 𑒒𑒙𑒢𑒰 𑒍𑒃𑒧𑒹 𑒧𑒯𑒞𑓂𑒫𑒣𑒴𑒩𑓂𑒝 𑒩𑒯𑒪, 𑒣𑒯𑒱𑒪 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞𑒏 𑒮𑓀𑒑 𑒖𑒹 𑒦𑒹𑒪 𑒂 𑒠𑒼𑒮𑒩 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏 𑒮𑓀𑒑 𑒖𑒹 𑒦𑒹𑒪। 𑒠𑒳𑒢𑒴 𑒑𑒼𑒙𑒹𑒏 𑒨𑒼𑒑𑒠𑒰𑒢𑒼 𑒢𑒲𑒏 𑒩𑒯𑒪𑒢𑒱।
𑒧𑒡𑒹𑒣𑒳𑒩 𑒥𑓂𑒪𑒾𑒏 𑒟𑒰𑒢𑒰𑒏 𑒮𑓀𑒑-𑒮𑓀𑒑 𑒫𑒱𑒡𑒰𑒢 𑒮𑒦𑒰 𑒏𑓂𑒭𑒹𑒞𑓂𑒩 𑒮𑒹𑒯𑒼 𑒕𑒪। 𑒂𑒥 𑒢𑒻 𑒁𑒕𑒱। 𑒍𑒃 𑒮𑒧𑒋 𑒁𑒙𑓂𑒚𑒰𑒃𑒮 𑒣𑓀𑒔𑒰𑒨𑒞𑒏 𑒥𑓂𑒪𑒾𑒏𑒼 𑒂 𑒟𑒰𑒢𑒼 𑒕𑒪, 𑒞𑒿𑒋 𑒩𑒰𑒖𑒢𑒲𑒞𑒱𑒏 𑒁𑒛𑓂𑒛𑒰 𑒮𑒹𑒯𑒼 𑒩𑒯𑒪। 𑒏𑒼𑒮𑒲-𑒏𑒧𑒪𑒰𑒏 𑒥𑒲𑒔 𑒥𑒮𑒪 𑒥𑓂𑒪𑒾𑒏 𑒁𑒕𑒱। 𑒞𑒿𑒋 𑒠𑒳𑒢𑒴𑒏 (𑒣𑒴𑒥𑒧𑒹 𑒏𑒼𑒮𑒲, 𑒣𑒕𑒱𑒧𑒧𑒹 𑒏𑒧𑒪𑒰) 𑒥𑒲𑒔 𑒖𑒞𑒹 𑒕𑒼𑒙𑒏𑒰 𑒥𑒛𑓃𑒏𑒰, 𑒧𑒳𑒃𑒪𑒯𑒰-𑒖𑒲𑒞𑒯𑒰 𑒡𑒰𑒩 𑒁𑒕𑒱 𑒮𑒦 𑒧𑒡𑒹𑒣𑒳𑒩 𑒥𑓂𑒪𑒾𑒏 𑒯𑒼𑒃𑒞 𑒑𑒳𑒖𑒩𑒱𑒞𑒹 𑒁𑒕𑒱। 𑒋𑒏 𑒠𑒱𑒮 𑒏𑒰𑒹𑒮𑒲 𑒏𑒙𑒢𑒱𑒨𑒰 𑒏𑓄 𑒥𑒰𑒪𑒳𑒮𑒿 𑒥𑒪𑒳𑒎𑒢𑒹 𑒁𑒕𑒱 𑒞𑒿 𑒠𑒼𑒮𑒩 𑒠𑒱𑒮 𑒏𑒧𑒪𑒼। 𑒏𑒱𑒧𑓂𑒯𑒩𑒼 𑒥𑒰𑒪𑒳 𑒁𑒕𑒱 𑒞𑒿 𑒏𑒱𑒧𑓂𑒯𑒩𑒼 𑒧𑒼𑒢𑒱-𑒧𑒰𑒢 𑒮𑒹𑒯𑒼 𑒁𑒕𑒱। 𑒠𑒹𑒬𑒏 𑒂𑒖𑒰𑒠𑒲𑒏 𑒪𑒛𑓃𑒰𑒃𑒧𑒹 𑒧𑒡𑒹𑒣𑒳𑒩 𑒥𑓂𑒪𑒾𑒏𑒏 𑒨𑒼𑒑𑒠𑒰𑒢 𑒥𑒱𑒯𑒰𑒩𑒏 𑒏𑒼𑒢𑒼 𑒥𑓂𑒪𑒾𑒏𑒮𑒿 𑒏𑒧 𑒢𑒻 𑒩𑒯𑒪 𑒁𑒕𑒱। 𑒖𑒨 𑒣𑓂𑒩𑒏𑒰𑒬 𑒥𑒰𑒥𑒴, 𑒮𑒳𑒩𑒖 𑒥𑒰𑒥𑒴 𑒂 𑒪𑒐𑒢 𑒖𑒲𑒏 (𑒛𑒰𑒹𑒏𑓂𑒙𑒩 𑒪𑒏𑓂𑒭𑓂𑒧𑒝 𑒗𑒰) 𑒂𑒫𑒰𑒖𑒰𑒯𑒲 𑒥𑒹𑒮𑒲 𑒩𑒯𑒪𑒢𑒱, 𑒖𑒃𑒮𑒿 𑒁𑒡𑒱𑒏𑒰𑓀𑒬 𑒑𑒰𑒧𑒧𑒹 𑒮𑓂𑒟𑒰𑒢𑒲𑒨 𑒢𑒹𑒞𑒵𑒞𑓂𑒫 𑒮𑒹𑒯𑒼 𑒅𑒦𑒩𑒪, 𑒁𑓀𑒔𑒪 𑒮𑓂𑒞𑒩𑒣𑒩 𑒮𑒹𑒯𑒼 𑒅𑒦𑒩𑒪। 𑒧𑒡𑒹𑒣𑒳𑒩 𑒥𑓂𑒪𑒾𑒏𑒏 𑒅𑒞𑓂𑒞𑒩𑒲 𑒕𑒼𑒩𑒣𑒩 𑒥𑒹𑒩𑒧𑒰 𑒣𑓀𑒔𑒰𑒨𑒞 𑒁𑒕𑒱 𑒖𑒹 𑒗𑓀𑒗𑒰𑒩𑒣𑒳𑒩 𑒂 𑒤𑒳𑒪𑒣𑒩𑒰𑒮𑒮𑒿 𑒪𑒰𑒑𑒪 𑒁𑒕𑒱। 𑒖𑒯𑒱𑒢𑒰 𑒅𑒞𑓂𑒞𑒩𑒲 𑒕𑒼𑒩𑒣𑒩 𑒥𑒹𑒩𑒧𑒰 𑒣𑓀𑒔𑒰𑒨𑒞 𑒁𑒕𑒱 𑒞𑒯𑒱𑒢𑒰 𑒣𑒴𑒩𑓂𑒥𑒲 𑒕𑒼𑒩𑒣𑒩 𑒧𑒻𑒙𑒩𑒮 𑒣𑓀𑒔𑒰𑒨𑒞 𑒁𑒕𑒱। 𑒧𑒻𑒙𑒩𑒮 𑒣𑓀𑒔𑒰𑒨𑒞𑒏 𑒖𑒰𑒢𑒪-𑒧𑒰𑒢𑒪 𑒣𑒩𑒱𑒫𑒰𑒩 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞𑒏 𑒕𑒪𑒢𑒱। 𑒮𑒧𑓂𑒣𑒞𑒱𑒬𑒰𑒪𑒲 𑒩𑒯𑒟𑒱 𑒧𑒳𑒠𑒰 𑒏𑒼𑒮𑒲𑒧𑒹 𑒑𑒰𑒧𑒹 𑒞𑒯𑒮-𑒢𑒯𑒮 𑒦𑓄 𑒑𑒹𑒪। 𑒏𑒼𑒮𑒲𑒏 𑒣𑒕𑒥𑒩𑒱𑒨𑒰 𑒥𑒰𑒢𑓂𑒯𑒏 𑒦𑒲𑒞𑒩 𑒣𑓀𑒔𑒰𑒨𑒞 𑒣𑒛𑓃𑒻𑒞 𑒁𑒕𑒱। 𑒑𑒰𑒧𑒹 𑒯𑒼𑒃𑒞 𑒡𑒰𑒩 𑒮𑒹𑒯𑒼 𑒥𑒯𑒻 𑒕𑒻। 𑓑𑓙𑓔𑓗 𑒄.𑒏 𑒂𑒖𑒰𑒠𑒲𑒏 𑒣𑒕𑒰𑒞𑒱 𑒏𑓂𑒭𑒹𑒞𑓂𑒩𑒏 𑒖𑒹 𑒮𑒧𑓂𑒣𑒞𑒱𑒬𑒰𑒪𑒲 𑒪𑒼𑒏 𑒮𑒦 𑒕𑒪𑒰𑒯 𑒫𑒋𑒯 𑒮𑒦 𑒑𑒰𑒧𑒏 𑒧𑒳𑒐𑒱𑒨𑒼 𑒂 𑒧𑒳𑒿𑒯-𑒣𑒳𑒩𑒳𑒐𑒼 𑒕𑒪𑒰𑒯। 𑒫𑒩𑓂𑒑𑒲𑒨 𑒂𑒡𑒰𑒩𑒣𑒩 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲 (𑒏𑒰𑓀𑒑𑓂𑒩𑒹𑒮) 𑒚𑒰𑒜𑓃 𑒕𑒪। 𑒞𑒿𑒋 𑒖𑒞𑓂𑒞𑒹 𑒑𑒳𑒠𑒑𑒩 𑒪𑒼𑒏 𑒕𑒪𑒰𑒯, 𑒮𑒥𑒯𑒏 𑒦𑒱𑒞𑒩𑒱𑒨𑒰 𑒮𑓀𑒥𑓀𑒡 𑒮𑒹𑒯𑒼 𑒕𑒪𑒢𑒱। 𑒦𑒱𑒞𑒩𑒱𑒨𑒰 𑒮𑓀𑒥𑓀𑒡𑒏 𑒧𑒰𑒢𑒹 𑒄 𑒖𑒹 𑒯𑒳𑒢𑒏𑒰 𑒮𑒥𑒯𑒏 𑒥𑒲𑒔 𑒖𑒰𑒞𑒲𑒨 𑒥𑓀𑒡𑒢 𑒏𑒧𑒖𑒼𑒩 𑒕𑒪𑒢𑒱। 𑒌𑒚𑒰𑒧 𑒋𑒏𑒙𑒰 𑒫𑒱𑒔𑒰𑒩𑒝𑒲𑒨 𑒣𑓂𑒩𑒬𑓂𑒢 𑒁𑒕𑒱 𑒖𑒹 𑒯𑒳𑒢𑒏𑒰 𑒮𑒦𑒏𑒹𑒿 𑒁𑒣𑒢𑒰𑒧𑒹 𑒧𑒰𑒢𑒹 𑒋𑒏-𑒠𑒼𑒮𑒩 𑒣𑒩𑒱𑒫𑒰𑒩𑒏 𑒥𑒲𑒔 𑒪𑒹𑒢-𑒠𑒹𑒢, 𑒐𑒰𑒢-𑒣𑒲𑒢, 𑒧𑒠𑒞𑒱-𑒮𑒯𑒰𑒨𑒞𑒰 𑒮𑒦 𑒏𑒱𑒕𑒳 𑒕𑒪𑒢𑒱 𑒧𑒳𑒠𑒰 𑒖𑒰𑒞𑒱𑒏 𑒥𑒲𑒔 𑒩𑒰𑒖𑒢𑒲𑒞𑒱𑒏 𑒫𑒱𑒦𑒰𑒖𑒢 𑒮𑒹𑒯𑒼 𑒣𑒢𑒣𑒱 𑒑𑒹𑒪 𑒕𑒪, 𑒖𑒹𑒏𑒩 𑒥𑒪 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲 𑒮𑒦𑒏𑒹𑒿 𑒦𑒹𑒙𑒻𑒞 𑒕𑒪। 𑒪𑒞𑓂𑒞𑒲 𑒖𑒏𑒰𑒿 𑒍 𑒣𑒩𑒱𑒫𑒰𑒩 𑒧𑒰𑒢𑒹 𑒮𑒳𑒦𑓂𑒨𑒮𑓂𑒞 𑒣𑒩𑒱𑒫𑒰𑒩 𑒮𑒦 𑒮𑒖𑒪 𑒕𑒪𑒰𑒯। 𑒥𑒹𑒩𑒧𑒰𑒏 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞 𑒖𑒹 𑒞𑒯𑒱𑒨𑒰 𑒧𑒻𑒙𑓂𑒩𑒲𑒏 𑒣𑒰𑒮 𑒢𑒫 𑒨𑒳𑒫𑒏 𑒕𑒪𑒰𑒯, 𑒦𑒰𑒩𑒞𑒲𑒨 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒫𑒤𑒰𑒠𑒰𑒩 𑒏𑒰𑒩𑓂𑒨𑒏𑒩𑓂𑒞𑓂𑒞𑒰 𑒩𑒯𑒟𑒱। 𑒦𑒰.𑒏.𑒣𑒰.𑒧𑒹 𑒋𑒏 𑒙𑒩𑓂𑒧 (𑒞𑒲𑒢 𑒫𑒩𑓂𑒭) 𑒖𑒱𑒪𑒰 𑒣𑒩𑒱𑒭𑒠 𑒮𑒹𑒯𑒼 𑒩𑒯𑒪𑒰𑒯। 𑒖𑒯𑒱𑒢𑒰 𑒏𑒣𑒱𑒪𑒹𑒬𑓂𑒫𑒩 𑒩𑒰𑒅𑒞 𑒞𑒲𑒢 𑒦𑒰𑒿𑒃, 𑒏𑒣𑒱𑒪𑒹𑒬𑓂𑒫𑒩, 𑒖𑒰𑒑𑒹𑒬𑓂𑒫𑒩 𑒂 𑒪𑒐𑒢 𑒩𑒰𑒅𑒞 𑒞𑒯𑒱𑒢𑒰 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞 𑒮𑒹𑒯𑒼 𑒞𑒲𑒢 𑒦𑒰𑒿𑒃, 𑒮𑒲𑒞𑒰𑒩𑒰𑒧, 𑒩𑒰𑒧𑒰𑒫𑒞𑒰𑒩 𑒂 𑒩𑒰𑒧 𑒣𑓂𑒩𑒮𑒰𑒠 𑒩𑒰𑒅𑒞। 𑒠𑒴 𑒦𑒰𑒿𑒃 𑒩𑒰𑒧𑒰𑒫𑒞𑒰𑒩𑒏 𑒥𑒱𑒂𑒯 𑒧𑒻𑒙𑒩𑒮𑒹 𑒦𑒹𑒪। 𑒍𑒢𑒰 𑒥𑒩𑒃 𑒖𑒰𑒞𑒱 𑒮𑒦 𑒑𑒰𑒧𑒧𑒹 𑒢𑒯𑒱𑒨𑒹 𑒁𑒕𑒱 𑒧𑒳𑒠𑒰 𑒏𑒱𑒕𑒳 𑒑𑒰𑒧 𑒮𑒒𑒢 𑒂𑒥𑒰𑒠𑒲𑒥𑒪𑒰 𑒞𑒿 𑒁𑒕𑒱𑒨𑒹। 𑒖𑒹𑒯𑒢𑒹 𑒮𑒒𑒢 𑒂𑒥𑒰𑒠𑒲𑒥𑒪𑒰 𑒑𑒰𑒧 𑒧𑒻𑒙𑒩𑒮 𑒞𑒹𑒯𑒢𑒹 𑒥𑒹𑒩𑒧𑒰𑒹 𑒁𑒕𑒱, 𑒮𑒋 𑒒𑒩𑒏 𑒪𑒑𑒦𑒑 𑒁𑒐𑒢𑒼 𑒁𑒕𑒱। 𑒧𑒳𑒠𑒰 𑒠𑒳𑒢𑒴 𑒑𑒰𑒧𑒏 𑒥𑒲𑒔 𑒋𑒏𑒙𑒰 𑒠𑒴𑒩𑒲 𑒮𑒹𑒯𑒼 𑒁𑒕𑒱। 𑒖𑒯𑒱𑒢𑒰 𑒧𑒻𑒙𑒩𑒮𑒧𑒹 𑒋𑒏 𑒣𑒩𑒱𑒫𑒰𑒩𑒏 𑒫𑒩𑓂𑒔𑒮𑓂𑒫, 𑒖𑒃𑒮𑒿 𑒮𑒰𑒧𑓀𑒞𑒲 𑒮𑒴𑒞𑓂𑒩 𑒁𑒡𑒱𑒏 𑒧𑒖𑒑𑒴𑒞, 𑒧𑒳𑒠𑒰 𑒥𑒹𑒩𑒧𑒰𑒧𑒹 𑒮𑒹 𑒢𑒻 𑒁𑒕𑒱। 𑒏𑒧 𑒂𑒿𑒙-𑒣𑒹𑒙𑒏 (𑒢𑒱𑒧𑓂𑒢-𑒧𑒡𑓂𑒨𑒧) 𑒣𑒩𑒱𑒫𑒰𑒩 𑒮𑒦, 𑒞𑒿𑒋 𑒫𑒱𑒔𑒰𑒩𑒼𑒧𑒹 𑒠𑒴𑒩𑒲 𑒁𑒕𑒱𑒨𑒹। 𑒞𑒯𑒴𑒧𑒹 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒏𑒼𑒢𑒼-𑒢𑒹-𑒏𑒼𑒢𑒼 𑒩𑒴𑒣𑒧𑒹 𑓑𑓙𑓖𑓒 𑒄.𑒮𑒿 𑒩𑒯𑒪। 𑒍𑒢𑒰 𑒍𑒃𑒮𑒿 𑒣𑒴𑒩𑓂𑒫𑒹𑒮𑒿 𑒏𑒹𑒮-𑒤𑒾𑒠𑒰𑒩𑒲 𑒑𑒰𑒧𑒧𑒹 𑒣𑒏𑒛𑓃𑒱 𑒪𑒹𑒢𑒹 𑒕𑒪। 𑒧𑒰𑒪𑒱𑒏 𑒮𑒦 (𑒖𑒧𑒲𑒢𑓂𑒠𑒰𑒩) 𑒮𑒿 𑒪𑒛𑓃𑒰𑒃 𑒔𑒪𑒱 𑒩𑒯𑒪 𑒕𑒪। 𑒔𑒰𑒯𑒹 𑒍 𑒥𑒪𑒠𑒹𑒫 𑒥𑒰𑒥𑒴 (𑒥𑒪𑒠𑒹𑒫 𑒗𑒰, 𑒮𑒩𑒱𑒮𑒫 𑒣𑒰𑒯𑒲) 𑒯𑒼𑒟𑒱 𑒂𑒏𑒱 𑒪𑒏𑓂𑒭𑓂𑒧𑒲𑒏𑒰𑒢𑓂𑒞, 𑒩𑒧𑒰𑒏𑒰𑒢𑓂𑒞 𑒮𑒰𑒯𑒳, 𑒗𑓀𑒗𑒰𑒩𑒣𑒳𑒩 𑒯𑒼𑒟𑒱। 𑒂𑒢𑓂𑒠𑒼𑒪𑒢𑒏 𑒩𑒴𑒣𑒧𑒹 𑒞𑒿 𑒢𑒻 𑒧𑒳𑒠𑒰 𑒫𑓂𑒨𑒏𑓂𑒞𑒱𑒑𑒞 𑒩𑒴𑒣𑒧𑒹 𑒞𑒿 𑒕𑒪𑒻𑒯𑒹, 𑒖𑒃𑒮𑒿 𑒏𑒱𑒕𑒳 𑒥𑒖𑒢𑒱𑒯𑒰𑒩 𑒞𑒿 𑒕𑒪𑒰𑒯𑒹। 𑒩𑒰𑒖𑒢𑒲𑒞𑒱𑒏 𑒂𑒡𑒰𑒩𑒣𑒩 𑓑𑓙𑓖𑓒 𑒄.𑒮𑒿 𑒧𑒳𑒏𑒠𑒧𑒰 𑒅𑒚𑒪 𑒖𑒹 𑒏𑒱𑒕𑒳𑒋 𑒠𑒱𑒢𑒏 𑒣𑒕𑒰𑒞𑒱 𑒧𑒩𑒱 𑒑𑒹𑒪। 𑒮𑒦𑒏𑒹𑒿 (𑒣𑒰𑒩𑓂𑒙𑒲𑒥𑒪𑒰) 𑒁𑒑𑒱𑒪𑒑𑒲 𑒏𑒹𑒮𑒧𑒹 𑒤𑒿𑒮𑒰 𑒮𑒖𑒰 𑒏𑒩𑒥𑒰 𑒠𑒹𑒪𑒏𑒢𑒱। 𑒧𑒻𑒙𑒩𑒮𑒏 𑒧𑒳𑒐𑒱𑒨𑒰 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞 𑒥𑒹𑒩𑒧𑒰𑒏 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞𑒣𑒩 𑒂𑒏𑓂𑒩𑒧𑒝 𑒏𑒹𑒪𑒏। 𑒂𑒏𑓂𑒩𑒧𑒝 𑒄 𑒦𑒹𑒪 𑒖𑒹 𑒠𑒳𑒢𑒴 𑒦𑒰𑒿𑒃 𑒮𑒲𑒞𑒰𑒩𑒰𑒧 𑒩𑒰𑒅𑒞 𑒂 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞𑒏 𑒥𑒱𑒂𑒯 𑒧𑒻𑒙𑒩𑒮𑒹 𑒦𑒹𑒪। 𑒮𑒲𑒞𑒰𑒩𑒰𑒧 𑒩𑒰𑒅𑒞𑒏 𑒮𑒮𑒳𑒩 𑒮𑒰𑒡𑒰𑒩𑒝𑒹 𑒣𑒩𑒱𑒫𑒰𑒩𑒏 𑒂 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞𑒏 𑒮𑒮𑒳𑒩 (𑒥𑒹𑒙𑒰𑒏 𑒁𑒦𑒰𑒫𑒧𑒹) 𑒥𑒥𑒰𑒖𑒱𑒨𑒹। 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒧𑒻𑒙𑒩𑒮𑒏 𑒩𑒰𑒧𑒰𑒫𑒞𑒰𑒩 𑒮𑒰𑒧𑓀𑒞𑒲 𑒔𑒰𑒣 𑒠𑓄 𑒏𑓄 𑒠𑒳𑒢𑒴𑒏𑒹𑒿 𑒥𑒹𑒙𑒲 𑒂𑒣𑒮 𑒁𑒢𑒻𑒪𑒹 𑒏𑒯𑒪𑒐𑒱𑒢। 𑒠𑒳𑒢𑒴 𑒧𑒖𑒥𑒴𑒩 𑒦𑓄 𑒑𑒹𑒪𑒰𑒯। 𑒩𑒰𑒧𑒰𑒫𑒞𑒰𑒩𑒏 𑒮𑒮𑒳𑒩 𑒞𑒿 𑒏𑒯𑒱 𑒠𑒹𑒪𑒐𑒱𑒢 𑒖𑒹 𑒞𑒼𑒩𑒰 𑒮𑒥𑒯𑒏 𑒑𑒰𑒧 𑒕𑒱𑒁𑒯, 𑒖𑒹 𑒧𑒢-𑒤𑒳𑒩𑒯 𑒮𑒹 𑒏𑒩𑒯, 𑒯𑒧 𑒖𑒰𑒃 𑒕𑒱𑒁। 𑒒𑒳𑒧𑒢𑓂𑒞𑒴 𑒥𑒥𑒰𑒖𑒲 𑒦𑓄 𑒑𑒹𑒪𑒰𑒯। 𑒁𑒣𑒢 𑒠𑒪-𑒥𑒪𑒏 𑒮𑓀𑒑 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞 𑒥𑒹𑒩𑒧𑒰 𑒋𑒪𑒰𑒯। 𑒥𑒹𑒩𑒧𑒰𑒏 𑒣𑓂𑒩𑒧𑒳𑒐 𑒁𑒣𑒢 𑒠𑒪-𑒥𑒪𑒏 𑒮𑓀𑒑 𑒞𑒻𑒨𑒰𑒩𑒹 𑒩𑒯𑒟𑒱𑒢। 𑒖𑒰𑒞𑒱𑒏 𑒥𑒲𑒔 𑒫𑒱𑒦𑒰𑒖𑒢𑒏 𑒧𑒖𑒑𑒴𑒞 𑒥𑒰𑒢𑓂𑒯 (𑒐𑒹𑒢𑒰𑒃-𑒣𑒱𑒢𑒰𑒃 𑒥𑒢𑓂𑒢) 𑒣𑒛𑓃𑒱𑒨𑒹 𑒑𑒹𑒪 𑒩𑒯𑒻। 𑒫𑒱𑒭𑒧 𑒮𑓂𑒟𑒱𑒞𑒱 𑒥𑒢𑒱 𑒑𑒹𑒪। 𑒫𑒱𑒭𑒧 𑒄 𑒖𑒹 𑒖𑒰𑒞𑒱-𑒮𑒧𑓂𑒣𑓂𑒩𑒠𑒰𑒨 𑒋𑒞𑒹 𑒮𑒏𑓂𑒏𑒞 𑒥𑒢𑒪 𑒕𑒪 𑒖𑒹𑒏𑒩𑒰 𑒞𑒼𑒛𑓃𑒥 𑒡𑒱𑒨𑒰-𑒣𑒳𑒞𑒰𑒏 𑒐𑒹𑒪 𑒢𑒻। 𑒖𑒿 𑒩𑒼𑒏𑒪 𑒖𑒰𑒋 𑒞𑒿 𑒏𑒹𑒢𑒰? 𑒖𑒐𑒢𑒹 𑒪𑒛𑓃𑒰𑒃 𑒅𑒚𑒞 𑒂𑒏𑒱 𑒖𑒰𑒞𑒱𑒏 𑒧𑒳𑒠𑓂𑒠𑒰 𑒥𑒢𑒱 𑒖𑒰𑒋𑒞। 𑒒𑒙𑒢𑒰𑒏 𑒮𑒧𑒋 𑒏𑒩𑒲𑒥 𑒥𑒰𑒩𑒯 𑒥𑒖𑒹 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞 𑒥𑒹𑒩𑒧𑒰 𑒣𑒯𑒳𑒿𑒔𑒪। 𑒫𑒱𑒢𑓂𑒒𑓂𑒨𑒢𑒰𑒟 𑒚𑒰𑒏𑒳𑒩 𑒣𑒯𑒱𑒢𑒹𑒮𑒿 𑒧𑒳𑒮𑒞𑒰𑒃𑒖। 𑒙𑒼𑒪𑒥𑒻𑒨𑒹 (𑒑𑒰𑒧𑒏 𑒥𑒛𑓃𑒻 𑒙𑒼𑒪) 𑒁𑒑𑒱𑒪𑒰 𑒫𑒰𑒯𑒢, 𑒥𑒹𑒩𑒧𑒰𑒏 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞𑒏 𑒒𑒩𑒏 𑒔𑒰𑒩𑒴𑒏𑒰𑒞 𑒧𑒩𑓂𑒠-𑒎𑒩𑒞 𑒟𑒯𑒰𑒟𑒯𑒲 𑒏𑒩𑒻𑒞। 𑒩𑒰𑒧𑒰𑒫𑒞𑒰𑒩𑒏 𑒣𑒱𑒞𑒰 𑒮𑒳𑒥𑒡 𑒩𑒰𑒅𑒞 𑒠𑒳𑒢𑒴 𑒣𑒩𑒰𑒢𑒲𑒏 𑒮𑓀𑒑 𑒞𑒲𑒢𑒴 𑒥𑒹𑒙𑒰𑒏 𑒥𑒲𑒔 𑒠𑒩𑒥𑒖𑓂𑒖𑒰𑒣𑒩 𑒥𑒻𑒮𑒱 𑒢𑒾𑒞𑒰𑒋𑒪 𑒕𑒰𑒑𑒩 𑒖𑒏𑒰𑒿 𑒧𑒩𑒻𑒪𑒹 𑒣𑒳𑒮𑓂𑒞𑒻𑒢𑒲 𑒒𑒩𑒰𑒛𑓃𑒲𑒣𑒩 𑒣𑒲𑒚 𑒁𑒼𑒩𑒱 𑒠𑒹𑒢𑒹 𑒩𑒯𑒟𑒱। 𑒋𑒏-𑒠𑒼𑒮𑒩𑒏 𑒮𑒦 𑒧𑒳𑒿𑒯 𑒞𑒏𑒻𑒞, 𑒧𑒢 𑒏𑒯𑒻𑒞 𑒧𑒰𑒋 𑒞𑒴𑒿 𑒏𑒞𑒹 𑒏𑒰𑒪, 𑒥𑒰𑒥𑒴 𑒞𑒴𑒿 𑒏𑒞𑒹 𑒏𑒰𑒪, 𑒥𑒹𑒙𑒰 𑒞𑒴𑒿 𑒏𑒞𑒹 𑒏𑒰𑒪, 𑒥𑒾𑒂 𑒞𑒿𑒴 𑒏𑒞𑒹 𑒏𑒰𑒪। 𑒠𑒳𑒢𑒴 𑒠𑒱𑒨𑒰𑒠𑒱𑒢𑒲 (𑒩𑒰𑒧𑒰𑒫𑒞𑒰𑒩𑒏 𑒣𑒞𑓂𑒢𑒲𑒨𑒼 𑒂 𑒦𑒾𑒖𑒰𑒃𑒨𑒼) 𑒦𑒢𑒮𑒰 𑒒𑒩𑒏 𑒍𑒮𑒰𑒩𑒏 𑒐𑒴𑒙𑒰 𑒪𑒑𑒰 𑒥𑒻𑒮𑒱 𑒏𑒢𑒻𑒞 𑒩𑒯𑒟𑒱। 𑒠𑒳𑒢𑒴 𑒠𑒱𑒨𑒰𑒠𑒱𑒢𑒲𑒏𑒹𑒿 𑒏𑒯𑒪 𑒑𑒹𑒪𑒢𑒱- “𑒁𑒣𑒢𑒰 𑒑𑒯𑒢𑒰-𑒑𑒳𑒩𑒱𑒨𑒰 𑒖𑒹 𑒁𑒕𑒱 𑒮𑒹 𑒪𑓄 𑒪𑒱𑒁।”
𑒧𑒳𑒠𑒰 𑒠𑒳𑒢𑒴 𑒠𑒱𑒨𑒰𑒠𑒱𑒢𑒲 𑒏𑒱𑒕𑒳 𑒢𑒻 𑒥𑒖𑒪𑒲𑒯। 𑒠𑒳𑒢𑒴𑒏 𑒥𑒰𑒿𑒯𑒱 𑒣𑒏𑒛𑓃𑒱 𑒙𑒼𑒪𑒏 𑒮𑓂𑒞𑓂𑒩𑒲𑒑𑒝 𑒂𑓀𑒑𑒢𑒮𑒿 𑒢𑒱𑒏𑒰𑒪𑒱 𑒁𑒩𑒱𑒨𑒰𑒃𑒞 𑒏𑓄 𑒮𑒲𑒧𑒰 𑒙𑒣𑒰 𑒠𑒹𑒪𑒢𑒱। 𑒌 𑒮𑓀𑒑 𑒠𑒼𑒮𑒩 𑒒𑒙𑒢𑒰-𑒩𑒰𑒧𑒰𑒫𑒞𑒰𑒩𑒏𑒹𑒿 𑒏𑒩𑒲𑒥 𑒔𑒰𑒩𑒱 𑒥𑒲𑒒𑒰 𑒖𑒧𑒲𑒢 𑒕𑒪𑒢𑒱, 𑒖𑒃𑒧𑒹 𑒖𑒧𑒲𑒢𑓂𑒠𑒰𑒩𑒲𑒏 𑒒𑒳𑒩𑒕𑒲𑒏 𑒔𑒪𑒻𑒞 𑒁𑒮𑓂𑒮𑒲 𑒣𑓂𑒩𑒞𑒱𑒬𑒞 𑒖𑒧𑒲𑒢𑒣𑒩 𑒧𑒳𑒏𑒠𑒧𑒰 𑒚𑒰𑒜𑓃 𑒏𑒋𑒪 𑒑𑒹𑒪। 𑒏𑒼𑒩𑓂𑒙𑒏 𑒮𑒦 𑒥𑒹𑒫𑒮𑓂𑒟𑒰𑒏 𑒦𑒰𑒩 𑒂𑒢𑒹-𑒂𑒢 𑒪𑓄 𑒪𑒹𑒪𑒐𑒱𑒢। 𑒧𑒳𑒠𑒰 𑒖𑒧𑒲𑒢𑒏 𑒮𑒥𑒴𑒞𑒼 𑒯𑒼𑒃 𑒕𑒻 𑒂 𑒠𑒐𑒪𑒼 𑒯𑒼𑒃 𑒕𑒻। 𑒠𑒐𑒪𑒥𑒪𑒰𑒏𑒹𑒿 𑒋𑒞𑒹 𑒪𑒰𑒦 𑒯𑒼𑒃 𑒕𑒻 𑒖𑒹 𑒅𑒣𑒖𑒥𑒻𑒏 𑒧𑒾𑒏𑒰 𑒦𑒹𑒙𑒻 𑒕𑒻। 𑒮𑒥𑒴𑒞𑒏 𑒫𑒱𑒫𑒰𑒠 𑒏𑒼𑒩𑓂𑒙𑒧𑒹 𑒅𑒚𑒪। 𑒧𑒳𑒠𑒰 𑒮𑒧𑒰𑒖𑒏 𑒞𑒰𑒑𑒞 𑒧𑒖𑒑𑒴𑒞। 𑒞𑒿𑒋 𑒠𑒐𑒪 𑒩𑒰𑒧𑒰𑒫𑒞𑒰𑒩𑒹𑒏 𑒩𑒯𑒪। 𑒣𑒕𑒰𑒞𑒱 𑒮𑒥𑒴𑒞𑒼 𑒏𑒼𑒩𑓂𑒙𑒮𑒿 𑒦𑒃𑒨𑒹 𑒑𑒹𑒪। 𑒏𑒩𑒲𑒥 𑒠𑒹𑒜𑓃-𑒠𑒴 𑒥𑒩𑓂𑒐𑒏 𑒣𑒕𑒰𑒞𑒱 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞 (𑒧𑒻𑒙𑒩𑒮𑒥𑒪𑒰) 𑒮𑒧𑒗𑒾𑒞𑒰 𑒏𑒹𑒪𑒢𑒱। 𑒮𑒧𑒗𑒾𑒞𑒰𑒏 𑒧𑒳𑒐𑓂𑒨 𑒏𑒰𑒩𑒏 𑒦𑒹𑒪 𑒖𑒹 𑒮𑒳𑒥𑒡 𑒩𑒰𑒅𑒞 𑒛𑒙𑒱 𑒑𑒹𑒪𑒰𑒯 𑒖𑒹 𑒣𑒯𑒱𑒢𑒹 𑒍 𑒁𑒣𑒢𑒰 𑒥𑒹𑒙𑒲𑒏 𑒥𑒱𑒂𑒯 𑒏𑒩𑒋 𑒞𑒐𑒢 𑒠𑒹𑒐𑒰 𑒠𑒹𑒥𑒻, 𑒠𑒹𑒐𑒰 𑒠𑒹𑒥𑒻𑒏 𑒁𑒩𑓂𑒟 𑒦𑒹𑒪 𑒖𑒹 𑒖𑒰𑒞𑒱 𑒞𑒼𑒛𑓃𑒱 𑒂𑒢 𑒖𑒰𑒞𑒱𑒧𑒹 𑒏𑒳𑒙𑒳𑒧𑒻𑒞𑒲 𑒬𑒳𑒩𑒴 𑒏𑓄 𑒠𑒹𑒥। 𑒯𑒼𑒞𑒮𑒿 𑒯𑒼𑒞𑒰𑓀𑒑 𑒯𑒼𑒃𑒞 𑒠𑒹𑒐𑒱 𑒮𑒦 𑒮𑒯𑒧𑒪𑒰𑒯। 𑒞𑒹𑒏𑒩 𑒋𑒏𑒙𑒰 𑒏𑒰𑒩𑒝 𑒄𑒯𑒼 𑒦𑒹𑒪 𑒖𑒹 𑒏𑒞𑒹 𑒠𑒱𑒢 𑒪𑒰𑒚𑒲 𑒅𑒚𑒱 𑒔𑒳𑒏𑒪 𑒕𑒪। 𑒬𑒏𑓂𑒞𑒱 𑒣𑒩𑒲𑒏𑓂𑒭𑒝 𑒦𑓄 𑒔𑒳𑒏𑒪 𑒕𑒪। 𑒧𑒳𑒠𑒰 𑒁𑒮𑒪 𑒣𑒩𑒲𑒏𑓂𑒭𑒝 𑒦𑒹𑒪 𑒖𑒃 𑒠𑒱𑒢 𑒃𑒢𑓂𑒠𑒱𑒩𑒰 𑒑𑒰𑒿𑒡𑒲 𑒬𑒯𑒲𑒠 𑒦𑒹𑒪𑒲𑒯 𑒌 𑒒𑒙𑒢𑒰𑒏 𑒣𑒕𑒰𑒞𑒱। 𑒮𑒧𑒗𑒾𑒞𑒰𑒏 𑒣𑒕𑒰𑒞𑒱 𑒠𑒳𑒢𑒴 𑒪𑒛𑓃𑒏𑒲 𑒂𑒣𑒮 𑒞𑒿 𑒋𑒪𑒲𑒯 𑒧𑒳𑒠𑒰 𑒧𑒰𑒢𑒮𑒱𑒏 𑒩𑒼𑒑𑒮𑒿 𑒣𑒲𑒛𑓃𑒱𑒞 𑒦𑓄 𑒑𑒹𑒪𑒲𑒯। 𑒋𑒏 𑒮𑒢𑓂𑒞𑒰𑒢𑒏 𑒣𑒕𑒰𑒞𑒱 𑒖𑒹𑒚𑒏𑒲, 𑒮𑒲𑒞𑒰𑒩𑒰𑒧𑒏 𑒣𑒞𑓂𑒢𑒲 𑒂 𑒠𑒴 𑒮𑒢𑓂𑒞𑒰𑒢𑒏 𑒣𑒕𑒰𑒞𑒱 𑒧𑒗𑒱𑒪𑒲 (𑒩𑒰𑒧𑒰𑒫𑒞𑒰𑒩𑒏 𑒣𑒞𑓂𑒢𑒲), 𑒧𑒩𑒱 𑒑𑒹𑒪𑒐𑒱𑒢। 𑒠𑒳𑒢𑒴 𑒥𑒯𑒱𑒢𑒱𑒨𑒹𑒿। 𑒣𑒕𑒰𑒞𑒱 𑒠𑒳𑒢𑒴 𑒦𑒰𑒿𑒃𑒏 𑒥𑒱𑒂𑒯 𑒦𑒹𑒪 𑒖𑒹 𑒣𑒩𑒱𑒫𑒰𑒩 𑒁𑒐𑒢 𑒔𑒪𑒱 𑒩𑒯𑒪 𑒁𑒕𑒱। 𑒠𑒳𑒩𑓂𑒑𑒰 𑒣𑒴𑒖𑒰𑒮𑒿 𑒯𑒼𑒃𑒞 𑒏𑒣𑒱𑒪𑒹𑒬𑓂𑒫𑒩𑒏 𑒒𑒙𑒢𑒰𑒧𑒹 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏 𑒢𑒲𑒏 𑒨𑒼𑒑𑒠𑒰𑒢 𑒩𑒯𑒪। 𑒥𑒼𑒢𑒱𑒯𑒰𑒩 𑒣𑒩𑒱𑒫𑒰𑒩 𑒩𑒯𑒱𑒞𑒼 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏𑒹𑒿 𑒥𑒰𑒞 𑒣𑒏𑒛𑓃𑒻𑒏 𑒜𑓀𑒑 𑒂 𑒠𑒼𑒮𑒩𑒏𑒹𑒿 𑒥𑒳𑒗𑒻-𑒥𑒳𑒗𑒥𑒻𑒏 𑒜𑓀𑒑 𑒢𑒲𑒏 𑒕𑒪𑒻। 𑒣𑒩𑒱𑒫𑒰𑒩 𑒥𑒛𑓃 𑒢𑒧𑒯𑒩 𑒢𑒻 𑒧𑒳𑒠𑒰 𑒕𑒼𑒙𑒼 𑒢𑒻। 𑒮𑓀𑒨𑒳𑒏𑓂𑒞 𑒣𑒩𑒱𑒫𑒰𑒩 𑒙𑒳𑒙𑒻𑒏 𑒣𑒻𑒒 𑒏𑒰𑒩𑒝 𑒑𑒩𑒲𑒥𑒲 𑒮𑒹𑒯𑒼 𑒯𑒼𑒃𑒞 𑒁𑒕𑒱। 𑒮𑒧𑒰𑒖𑒧𑒹 𑒋𑒯𑒹𑒢 𑒣𑒩𑒱𑒫𑒰𑒩𑒏 𑒏𑒧𑒲 𑒢𑒻 𑒖𑒹 𑒏𑒯𑒞𑒰- “𑒄 𑒮𑒋𑒍 𑒒𑒩𑒏 𑒙𑒼𑒪 𑒤𑒪𑓂𑒪𑒹𑒿𑒏 𑒫𑓀𑒬 𑒕𑒱𑒁𑒢𑒱।” 𑒧𑒳𑒠𑒰 𑒁𑒐𑒢 𑒞𑒞𑒹 𑒏𑒹𑒮𑒰-𑒏𑒹𑒮𑒲 𑒦𑓄 𑒑𑒹𑒪 𑒁𑒕𑒱 𑒖𑒹 𑒮𑒧𑓂𑒣𑒞𑒱 𑒞𑒿 𑒑𑒹𑒥𑒹 𑒏𑒹𑒪𑒢𑒱 𑒖𑒹 𑒋𑒏𑓂𑒏𑒼𑒙𑒰-𑒮𑒧𑒰𑓀𑒑𑒼 𑒋𑒯𑒹𑒢 𑒢𑒻 𑒥𑒿𑒔𑒪𑒰𑒯 𑒖𑒹 𑒖𑒯𑒪 𑒖𑒰 𑒐𑒢𑒠𑒰𑒢𑒏 𑒧𑒩𑓂𑒨𑒰𑒠𑒰 𑒢𑒻 𑒞𑒼𑒛𑓃𑒪𑒢𑒱। 𑒞𑒲𑒢 𑒣𑒲𑒜𑓃𑒲 𑒆𑒣𑒩𑒮𑒿 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏 𑒋𑒏 𑒣𑒳𑒩𑒐𑒱𑒨𑒰𑒯 𑒣𑒩𑒱𑒫𑒰𑒩 𑒞𑒿𑒋 𑒣𑒳𑒮𑓂𑒞𑒻𑒢𑒲 𑒐𑒹𑒞𑒼 𑒂 𑒖𑒖𑒧𑒢𑒱𑒏𑒼𑒧𑒹 𑒏𑒰𑒙-𑒐𑒼𑓀𑒙 𑒢𑒻 𑒦𑒹𑒪, 𑒣𑒼𑒞𑒰 𑒡𑒩𑒱 𑒮𑒹𑒯𑒼 𑒮𑒋𑒯 𑒦𑒹𑒪 𑒁𑒕𑒱। 𑒋𑒏𑒙𑒰 𑒥𑒹𑒙𑒰 𑒂 𑒔𑒰𑒩𑒱𑒙𑒰 𑒥𑒹𑒙𑒲 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏𑒹𑒿। 𑒁𑒣𑒢 𑒂𑒚 𑒏𑒙𑓂𑒚𑒰 𑒐𑒹𑒞, 𑒖𑒃𑒧𑒹 𑒞𑒲𑒢 𑒏𑒙𑓂𑒚𑒰 𑒡𑒢𑒯𑒩, 𑒛𑒹𑒜𑓃-𑒠𑒴 𑒏𑒙𑓂𑒚𑒰 𑒒𑒩𑒰𑒛𑓃𑒲-𑒧𑒯𑒰𑒩 𑒥𑒛𑓃𑒏𑒲 𑒣𑒼𑒐𑒩𑒱𑒏 𑒜𑒱𑒧𑒏𑒰, 𑒥𑒰𑒏𑒲 𑒑𑒰𑒕𑒲-𑒫𑒱𑒩𑒕𑒲। 𑒠𑒮 𑒏𑒙𑓂𑒚𑒰 𑒥𑒙𑒰𑒃𑒨𑒼 𑒡𑒢𑒯𑒩 𑒏𑒩𑒻𑒞। 𑒑𑒰𑒧𑒏 𑒖𑒖𑒧𑒢𑒱𑒏𑒰𑒧𑒹 𑒏𑒩𑒲𑒥 𑒔𑒾𑒟𑒰𑒃 𑒑𑒰𑒧। 𑒖𑒹𑒏𑒩 𑒏𑒧𑒰𑒃𑒪𑒏 (𑒮𑒰𑒪𑒲) 𑒞𑒩𑒲𑒏𑒰 𑒮𑒹𑒯𑒼 𑒩𑓀𑒑-𑒩𑓀𑒑𑒏। 𑒧𑒳𑒠𑒰 𑒍𑒯𑒢 𑒑𑒱𑒩𑒯𑒮𑓂𑒞 (𑒠𑒰𑒜𑓃𑒲-𑒏𑒹𑒬 𑒏𑒙𑒥𑒻𑒥𑒪𑒰) 𑒥𑒹𑒮𑒲 𑒖𑒹 𑒮𑒧𑒻𑒣𑒩 𑒁𑒑𑒯𑒢𑒧𑒹 𑒏𑒧𑒰𑒃𑒪 𑒠𑓄 𑒠𑒃 𑒕𑒟𑒱𑒢। 𑒠𑒰𑒜𑓃𑒲-𑒏𑒹𑒬 𑒧𑒱𑒪𑒰 𑒏𑓄 𑒋𑒏 𑒣𑒴𑒩𑓂𑒝 𑒂𑒠𑒧𑒲𑒏 𑒏𑒧𑒰𑒃𑒪 𑒋𑒏 𑒡𑒰𑒩𑒰 𑒧𑒰𑒢𑒹 𑓑𑓒 𑒮𑒹𑒩 𑒏𑒔𑓂𑒔𑒲, 𑒖𑒹 𑒏𑒩𑒲𑒥 𑒮𑒰𑒞 𑒏𑒱𑒪𑒼𑒏 𑒪𑒑𑒦𑒑 𑒯𑒼𑒃𑒋 𑒂 𑒂𑒡𑒰 𑒏𑒧𑒰𑒃𑒪 𑒋𑒏𑒙𑒰 𑒏𑒹𑒬𑒏 𑒯𑒼𑒃𑒋। 𑒁𑒯𑒲 𑒖𑒱𑒢𑒑𑒲𑒧𑒹 𑒔𑒰𑒩𑒴 𑒥𑒹𑒙𑒱𑒨𑒼-𑒖𑒧𑒰𑒋, 𑒢𑒰𑒃𑒞𑒼-𑒢𑒰𑒞𑒱𑒢 𑒠𑒹𑒐𑒪𑒢𑒱, 𑒞𑒯𑒱𑒢𑒰 𑒥𑒹𑒙𑒼-𑒣𑒳𑒞𑒼𑒯𑒳 𑒂 𑒣𑒼𑒞𑒼-𑒣𑒼𑒞𑒲 𑒠𑒹𑒐𑒪𑒢𑒱।
𑒥𑒱𑒠𑒹𑒮𑒩 𑒚𑒰𑒏𑒳𑒩 𑒮𑓀𑒑 𑒋𑒏 𑒥𑒹𑒩 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒧𑒡𑒳𑒥𑒢𑒲𑒏 𑒔𑒏𑒱𑒨𑒰 𑒖𑒯𑒪𑒧𑒹 𑒩𑒯𑒟𑒱 𑒂𑒩𑒼 𑒏𑒩𑒲𑒥 𑒠𑒮 𑒂𑒠𑒧𑒲। 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒏𑒰𑒞𑒧𑒹 𑒖𑒰 𑒏𑓄 𑒑𑒰𑒿𑒖𑒰 𑒣𑒲𑒥𑒻𑒞 𑒩𑒯𑒟𑒱। 𑒟𑒰𑒢𑒰𑒏 𑒖𑒧𑒹𑒠𑒰𑒩 𑒠𑒹𑒐 𑒪𑒹𑒪𑒏। 𑒣𑒏𑒛𑓃𑒢𑒹 𑒂𑒥𑒱 𑒛𑓀𑒛𑒰-𑒥𑒹𑒛𑓃𑒲 𑒏𑓄 𑒠𑒹𑒪𑒏𑒢𑒱। 𑒋𑒯𑒹𑒢 𑒣𑒩𑒱𑒮𑓂𑒟𑒱𑒞𑒱𑒧𑒹 𑒏𑒲 𑒏𑒋𑒪 𑒖𑒰𑒋। 𑒐𑒋𑒩 𑒖𑒹 𑒯𑒼𑒅, 𑒣𑒕𑒱𑒧𑒲 𑒧𑒡𑒳𑒥𑒢𑒲𑒏 𑒋𑒏𑒙𑒰 𑒮𑒰𑒟𑒲 𑒮𑒹𑒯𑒼 𑒩𑒯𑒟𑒱𑒢, 𑒧𑒳𑒿𑒯𑒑𑒩-𑒏𑒢𑓂𑒯𑒑𑒩। 𑒩𑒰𑒞𑒱𑒧𑒹 𑒐𑒹𑒪𑒰-𑒣𑒲𑒪𑒰 𑒣𑒕𑒰𑒞𑒱 𑒮𑒰𑓀𑒮𑓂𑒏𑒵𑒞𑒱𑒏 𑒏𑒰𑒩𑓂𑒨𑒏𑓂𑒩𑒧 𑒋𑒏-𑒛𑒹𑒜𑓃 𑒒𑓀𑒙𑒰 𑒏𑒩𑒻 𑒕𑒪𑒰। 𑒛𑓀𑒛𑒰-𑒥𑒹𑒛𑓃𑒲 𑒢𑒹𑒢𑒹 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒮𑒹𑒯𑒼 𑒁𑒣𑒢𑒹 𑒥𑒢𑒰𑒍𑒪 𑒑𑒲𑒞- “𑒯𑒧𑒩𑒰 𑒮𑒢 𑒏𑒹 𑒁𑒕𑒱 𑒥𑒳𑒩𑒱𑒥𑒪𑒹𑒪/ 𑒥𑒰𑒪𑒹-𑒥𑒔𑓂𑒔𑒹 𑒧𑒯𑒲𑓀𑒮 𑒣𑒼𑒮𑒪𑒾𑓀/ 𑒣𑓂𑒩𑒧𑒳𑒐-𑒢𑒟𑒳𑒢𑒲 𑒮𑒱𑓀𑒯 𑒠𑒩𑒼𑒑𑒰 𑒐𑒳𑒙𑒰𑒣𑒩 𑒂𑒥𑒱 𑒐𑒼𑒪𑒱 𑒪𑒹𑒪। 𑒯𑒧𑒩𑒰 𑒮𑒢...? 𑒖𑒐𑒢𑒹 𑒖𑒹𑒪𑒏 𑒁𑒢𑓂𑒠𑒩 𑒋𑒪𑒾𑓀/ 𑒣𑒲𑒣𑒩𑒏 𑒑𑒰𑒕 𑒞𑒩 𑒑𑒰𑓀𑒖𑒰 𑒪𑒙𑒹𑒪𑒾𑓀/ 𑒖𑒹𑒪𑒩 𑒂𑒥𑒱 𑒛𑓀𑒛𑒰-𑒥𑒹𑒩𑒲 𑒚𑒼𑒏𑒱 𑒠𑒹𑒪/ 𑒯𑒧𑒩𑒰 𑒮𑒢...? 𑒒𑒰𑒧𑒹-𑒣𑒮𑒱𑒢𑒹 𑒐𑒹𑒞𑒲 𑒏𑒹𑒪𑒾𑓀/ 𑒞𑒳𑒪𑒮𑒲-𑒤𑒴𑒪 𑒍 𑒏𑒢𑒏𑒖𑒲𑒩/ 𑒐𑒼𑒯𑒹 𑒞𑒩𑒮𑒿 𑒮𑒩𑒳𑒣 𑒮𑒱𑓀𑒯 𑒛𑒹𑒜𑓃𑒱𑒨𑒰𑒧𑒹 𑒞𑒼𑒪 𑒪𑒹𑒪/ 𑒯𑒧𑒩𑒰 𑒮𑒢...?, 𑒫𑒱𑒠𑓂𑒨𑒰𑒣𑒞𑒱𑒏𑒹𑒿 𑒣𑒯𑒱𑒢𑒯𑒱𑒨𑒹 𑒕𑒲𑒢𑒱 𑒪𑒹𑒪/ 𑒯𑒧𑒩𑒰 𑒮𑒢...?” 𑒑𑒰𑒥𑒱 𑒁𑒣𑒢 𑒫𑒵𑒞𑒰𑒢𑓂𑒞 𑒮𑒳𑒢𑒾𑒪𑒢𑒱। 𑒣𑒕𑒧𑒲 𑒧𑒡𑒳𑒥𑒢𑒲𑒥𑒪𑒰 𑒮𑒰𑒟𑒲 𑒏𑒰𑒤𑒲 𑒣𑓂𑒩𑒦𑒰𑒫𑒱𑒞 𑒦𑒹𑒪𑒰। 𑒁𑒣𑒢𑒰 𑒪𑒑 𑒥𑒖𑒰 𑒁𑒣𑒢𑒼 𑒖𑒱𑒢𑒑𑒲𑒏 𑒥𑒰𑒞 𑒂 𑒥𑒱𑒠𑒹𑒬𑓂𑒫𑒩𑒼 𑒚𑒰𑒏𑒳𑒩𑒏 𑒥𑒰𑒞 𑒮𑒳𑒢𑒾𑒪𑒏𑒢𑒱/𑒮𑒳𑒢𑒪𑒢𑒱। 𑒦𑒱𑒢𑒮𑒩𑒹 𑒖𑒧𑒹𑒠𑒰𑒩𑒏𑒹𑒿 𑒏𑒯𑒱 𑒛𑓀𑒛𑒰-𑒥𑒹𑒛𑓃𑒲 𑒯𑒙𑒥𑒻𑒞 𑒏𑒫𑒱 𑒒𑒼𑒭𑒱𑒞 𑒏𑓄 𑒠𑒹𑒪𑒏𑒢𑒱। 𑒖𑒹𑒪𑒏 𑒮𑓂𑒙𑒰𑒤 𑒮𑒦 𑒏𑒫𑒱 𑒖𑒲 𑒏𑒯𑒋 𑒪𑒑𑒪𑒢𑒱। 𑒧𑒳𑒠𑒰 𑒖𑒯𑒪𑒏 𑒦𑒲𑒞𑒩𑒹𑒧𑒹, 𑒥𑒰𑒯𑒩 𑒢𑒻। 𑒧𑒢𑒔𑒼𑒦𑒱𑒨𑒰 𑒢𑒰𑒔𑒏 𑒢𑒲𑒏 𑒏𑒪𑒰𑒏𑒰𑒩𑒧𑒹 𑒥𑒱𑒠𑒹𑒮𑒩 𑒚𑒰𑒏𑒳𑒩। 𑒁𑒣𑒢 𑒋𑒯𑒹𑒢 𑒑𑒳𑒝 𑒖𑒹 𑒤𑒱𑒪𑓂𑒧𑒼 𑒑𑒲𑒞 𑒂 𑒮𑒰𑒧𑒰𑒖𑒱𑒏 𑒑𑒲𑒞𑒧𑒹 𑒠𑒴-𑒔𑒰𑒩𑒱-𑒣𑒰𑒿𑒞𑒱 𑒍𑒯𑒲 𑒞𑒩𑓂𑒖𑒣𑒩 𑒑𑒰𑒥𑒱 𑒪𑒻 𑒕𑒪𑒰𑒯। 𑒧𑒵𑒞𑓂𑒨𑒳 𑒠𑒳𑒐𑒠 𑒦𑒹𑒪𑒢𑒱। 𑒂𑒧 𑒞𑒼𑒛𑓃𑒻 𑒏𑒰𑒪 𑒑𑒰𑒕𑒣𑒩𑒮𑒿 𑒐𑒮𑒱 𑒣𑒛𑓃𑒪𑒰𑒯 𑒖𑒃𑒧𑒹 𑒛𑒰𑒿𑒛𑓃𑒏 𑒯𑒛𑓂𑒛𑒲 𑒟𑒏𑒳𑒔𑒰 𑒑𑒹𑒪𑒢𑒱। 𑒍𑒢𑒰 𑒃𑒪𑒰𑒖-𑒥𑒰𑒞 𑒖𑒩𑒴𑒩 𑒦𑒹𑒪𑒢𑒱 𑒧𑒳𑒠𑒰 𑒏𑒼𑒢𑒼 𑒏𑒱 𑒑𑒙𑓂𑒙𑒰 𑒙𑒳𑒙𑒥 𑒂𑒏𑒱 𑒒𑒳𑒙𑓂𑒚𑒲 𑒙𑒳𑒙𑒥 𑒕𑒲 𑒖𑒹 𑒥𑒛𑓃𑒥𑒜𑓃𑒱𑒨𑒰-𑒥𑒛𑓃 𑒥𑒹𑒬? 𑒧𑒳𑒠𑒰 𑒮𑒰𑒪 𑒦𑒩𑒱 𑒍𑒕𑒰𑒃𑒢 𑒡𑒹𑒪𑒰 𑒣𑒕𑒰𑒞𑒱 𑒅𑒚𑒱 𑒏𑓄 𑒚𑒰𑒜𑓃 𑒦𑒹𑒪𑒰𑒯। 𑒔𑒾𑒏𑒣𑒩 𑒮𑒻𑒪𑒴𑒢 𑒬𑒳𑒩𑒴 𑒏𑒹𑒪𑒢𑒱। 𑒖𑒃𑒮𑒿 𑒣𑒢𑒩𑒯-𑒥𑒲𑒮𑒏 𑒢𑒑𑒠𑒼 𑒂 𑒖𑒖𑒧𑒢𑒱𑒏𑒼 𑒏𑒰𑒖 𑒮𑒧𑓂𑒯𑒰𑒩𑒋 𑒪𑒑𑒪𑒰𑒯। 𑒮𑒳𑒞𑒱 𑒏𑓄 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒅𑒚𑒪𑒹 𑒩𑒯𑒟𑒱 𑒏𑒱 𑒮𑒳𑒢𑒪𑒢𑒱, 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒧𑒩𑒱 𑒑𑒹𑒪𑒰। 𑒮𑒰𑒿𑒗𑒧𑒹 𑒑𑒣-𑒮𑒣 𑒦𑒹𑒪𑒹 𑒩𑒯𑒢𑒱। 𑒞𑒿𑒋 𑒥𑒱𑒮𑒫𑒰𑒮𑒹 𑒢𑒹 𑒯𑒼𑒢𑒱, 𑒧𑒳𑒠𑒰 𑒋𑒯𑒹𑒢 𑒑𑒣 𑒗𑒴𑒚𑒼 𑒞𑒿 𑒢𑒯𑒱𑒨𑒹 𑒯𑒼𑒃𑒞 𑒁𑒕𑒱। 𑒏𑒱𑒁𑒋 𑒞𑒿 𑒑𑒰𑒩𑒱𑒍𑒏 𑒮𑒲𑒧𑒰 𑒖𑒲𑒫𑒱𑒞𑒹 𑒡𑒩𑒱𑒏 𑒁𑒕𑒱, 𑒧𑒵𑒞𑓂𑒨𑒳 𑒞𑒿 𑒮𑒩𑒰𑒣 𑒕𑒲। 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏 𑒒𑒙𑒢𑒰 𑒠𑒹𑒐𑒱 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒮𑒖𑒪-𑒡𑒖𑒪 𑒮𑒰𑒧𑓀𑒞 𑒂𑒿𑒐𑒱𑒏 𑒣𑒩𑒠𑒰𑒣𑒩 𑒢𑒰𑒔𑒋 𑒪𑒑𑒻 𑒕𑒢𑒱। 𑒏𑒱𑒕𑒳 𑒣𑒩𑒱𑒫𑒰𑒩 (𑒖𑒰𑒞𑒱-𑒫𑒱𑒬𑒹𑒭 𑒢𑒻 𑒮𑒧𑓂𑒣𑒠𑒰 𑒫𑒱𑒬𑒹𑒭) 𑒏𑒹𑒿 𑒕𑒼𑒛𑓃𑒱 𑒁𑒡𑒱𑒏𑒰𑓀𑒬 𑒣𑒩𑒱𑒫𑒰𑒩 𑒁𑒣𑒢 𑒖𑒱𑒢𑒑𑒲𑒏 𑒁𑒢𑒳𑒮𑒰𑒩 𑒏𑒰𑒖-𑒅𑒠𑒹𑒧 𑒏𑒩𑒱𑒞𑒹 𑒕𑒢𑒱, 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏 𑒣𑒞𑓂𑒢𑒲 𑒧𑒯𑒲𑓀𑒮𑒱𑒏 𑒣𑒩𑓂𑒛𑓃𑒴 𑒏𑒲𑒢𑒱 𑒥𑒯𑒢𑒞𑒴 𑒧𑒯𑒲𑓀𑒮 𑒥𑒢𑒾𑒪𑒢𑒱। 𑒢𑒲𑒏 𑒣𑒼𑒮 𑒋𑒏𑒙𑒰 𑒥𑒛𑓃𑒠 𑒮𑒹𑒯𑒼। 𑒟𑒰𑒢𑒰𑒏 𑒠𑒰𑒩𑒼𑒑𑒰 𑒮𑒱𑒣𑒰𑒯𑒲-𑒔𑒾𑒏𑒲𑒠𑒰𑒩𑒏 𑒮𑓀𑒑, 𑒢𑒟𑒳𑒢𑒲 𑒮𑒱𑓀𑒯 𑒁𑒣𑒢 𑒪𑒚𑒻𑒞𑒏 𑒮𑓀𑒑 𑒂 𑒫𑒱𑒢𑓂𑒡𑓂𑒨𑒢𑒰𑒟 𑒚𑒰𑒏𑒳𑒩 𑒁𑒣𑒢 𑒠𑒴𑒞-𑒦𑒴𑒞𑒏 𑒮𑓀𑒑 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒌𑒚𑒰𑒧 𑒣𑒯𑒳𑒿𑒔𑒪। 𑒩𑒮𑓂𑒞𑒰 𑒏𑒰𑒞𑒧𑒹 𑒒𑒩, 𑒟𑒯𑒰𑒟𑒯𑒲 𑒪𑒼𑒏 𑒏𑒩𑒻𑒞। 𑒞𑒲𑒢𑒴 𑒑𑒼𑒙𑒹 𑒢𑒟𑒳𑒢𑒲 𑒮𑒱𑓀𑒯, 𑒫𑒱𑒢𑓂𑒡𑓂𑒨𑒢𑒰𑒟 𑒚𑒰𑒏𑒳𑒩 𑒂 𑒠𑒩𑒼𑒑𑒰 𑒏𑒢𑒤𑒳𑒮𑒏𑒲 𑒏𑓄 𑒧𑒯𑒲𑓀𑒮 𑒐𑒼𑒪𑒱 𑒪𑒹𑒪𑒏𑒢𑒱! 𑒐𑒼𑒪𑒪𑒰 𑒣𑒕𑒰𑒞𑒱 𑒏𑒲 𑒯𑒳𑒁𑒋। 𑒏𑒼𑒢𑒼 𑒏𑒱 𑒒𑒳𑒧𑒰 𑒏𑓄 𑒠𑒹𑒥 𑒁𑒕𑒱 𑒂𑒏𑒱 𑒁𑒣𑒢 𑒥𑒢𑒰𑒋𑒥 𑒁𑒕𑒱। 𑒠𑒩𑒼𑒑𑒰𑒖𑒲 𑒏𑒱 𑒏𑒯𑒱 𑒪𑓄 𑒖𑒹𑒞𑒰𑒯? 𑒏𑒹𑒞𑒥𑒼 𑒜𑒲𑒪 𑒏𑒰𑒢𑒴𑒢 𑒕𑒻 𑒞𑒻𑒨𑒼 𑒞𑒿 𑒏𑒼𑒩𑓂𑒙𑒏𑒹𑒿 𑒏𑒰𑒑𑒖 𑒔𑒰𑒯𑒥𑒹 𑒏𑒩𑒲। 𑒫𑒱𑒢𑓂𑒒𑓂𑒨𑒢𑒰𑒟 𑒚𑒰𑒏𑒳𑒩𑒏𑒹𑒿 𑒠𑒧𑒹 𑒢𑒻 𑒁𑒿𑒙𑒪𑒢𑒱। 𑒠𑒳𑒞-𑒦𑒴𑒞 𑒧𑒳𑒛𑓃𑒲 𑒛𑒼𑒪𑒰 𑒠𑒹𑒪𑒏𑒢𑒱। 𑒪𑓀𑒚𑒼𑒏 𑒬𑒏𑓂𑒞𑒱𑒧𑒹 𑒖𑒰𑒞𑒱𑒏 𑒫𑒱𑒦𑒰𑒖𑒢 𑒩𑒯𑒪 𑒁𑒕𑒱। 𑒯𑒼𑒃𑒞-𑒯𑒥𑒰𑒃𑒞 𑒧𑒯𑒲𑓀𑒮 𑒢𑒟𑒳𑒢𑒲 𑒮𑒱𑓀𑒯 𑒁𑒣𑒢𑒰 𑒌𑒚𑒰𑒧 𑒪𑓄 𑒑𑒹𑒪𑒰𑒯। 𑒮𑒦𑒞𑒴𑒩 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒑𑒰𑒧𑒧𑒹 𑒒𑒴𑒧𑒱-𑒒𑒴𑒧𑒱 𑒑𑒾𑒂𑒿𑒏𑒹𑒿 𑒏𑒯𑒪𑒏𑒢𑒱। 𑒧𑒳𑒠𑒰 𑒋𑒏 𑒪𑒼𑒩 𑒏𑒰𑒢𑒻𑒏 𑒮𑒱𑒥𑒰 𑒠𑒼𑒮𑒩 𑒅𑒣𑒰𑒃𑒨𑒹 𑒏𑒲 𑒁𑒕𑒱। 𑒖𑒐𑒢 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒮𑒥𑒯𑒏 (𑒏𑒩𑒲𑒥 𑒠𑒮-𑒥𑒰𑒩𑒯 𑒂𑒠𑒧𑒲) 𑒥𑒲𑒔 𑒣𑒯𑒳𑒿𑒔𑒪𑒰𑒯 𑒞𑒐𑒢 𑒖𑒰𑒢 𑒠𑒃𑒪𑒹 𑒞𑒻𑒨𑒰𑒩। 𑒪𑒛𑓃𑒰𑒃𑒨𑒼𑒏 𑒅𑒞𑓂𑒮𑒰𑒯 𑒯𑒼𑒃 𑒕𑒻, 𑒖𑒿 𑒮𑒹 𑒢𑒻 𑒞𑒿 𑒧𑒢𑒼𑒩𑓀𑒖𑒢𑒏 𑒪𑒹𑒪 𑒪𑒼𑒏 𑒏𑒱𑒁𑒋 𑒖𑒰𑒢 𑒑𑒧𑒥𑒻𑒋। 𑒏𑒱𑒕𑒳 𑒑𑒼𑒙𑒹 𑒋𑒯𑒢𑒹, 𑒞𑒿𑒋 𑒋𑒏 𑒩𑓀𑒑𑒏 𑒫𑒱𑒔𑒰𑒩 𑒅𑒚𑒪। 𑒋𑒏 𑒣𑓀𑒔𑒰𑒨𑒞𑒏 𑒮𑒧𑒮𑓂𑒨𑒰 𑒠𑒼𑒮𑒩 𑒣𑓀𑒔𑒰𑒨𑒞 𑒣𑒯𑒳𑒿𑒔𑒱 𑒑𑒹𑒪 𑒞𑒿𑒋 𑒋𑒏 𑒣𑓀𑒔𑒰𑒨𑒞𑒏 𑒢𑒻 𑒠𑒴 𑒣𑓀𑒔𑒰𑒨𑒞𑒏 𑒮𑒧𑒮𑓂𑒨𑒰 𑒥𑒢𑒱 𑒑𑒹𑒪। 𑒧𑒳𑒠𑒰 𑒧𑒴𑒪 𑒞𑒿 𑒍𑒞𑒋 𑒁𑒕𑒱 𑒖𑒹 𑒋𑒏𑒙𑒰 𑒧𑒯𑒲𑓀𑒮𑒏 𑒐𑒰𑒞𑒱𑒩 𑒧𑒢𑒳𑒭𑓂𑒨𑒏 𑒖𑒱𑒢𑒑𑒲 𑒖𑒰𑒋। 𑒧𑒯𑒲𑓀𑒮𑒏 𑒞𑒿 𑒥𑒼𑒢 𑒪𑒑𑒰 𑒮𑒏𑒻𑒋 𑒧𑒢𑒳𑒭𑓂𑒨, 𑒧𑒳𑒠𑒰 𑒯𑒖𑒰𑒩𑒼 𑒧𑒯𑒲𑓀𑒮𑒱𑒏 𑒥𑒼𑒢 𑒥𑒳𑒞𑒹 𑒋𑒏𑒙𑒰 𑒧𑒢𑒳𑒐 𑒚𑒰𑒜𑓃 𑒏𑒋𑒪 𑒯𑒋𑒞? 𑒞𑒞𑓂-𑒏𑒰𑒪 𑒫𑒰𑒞𑒰𑒫𑒩𑒝𑒧𑒹 𑒢𑒩𑒧𑒲 𑒂𑒋𑒪। 𑒧𑒳𑒠𑒰 𑒖𑒯𑒱𑒢𑒰 𑒯𑒩𑒠𑒲 𑒖𑒛𑓃𑒱𑒧𑒹 𑒖𑒯𑒩 𑒮𑒹𑒯𑒼 𑒤𑒛𑓃𑒻𑒋, 𑒏𑒱𑒋𑒏 𑒞𑒿 𑒯𑒩𑒠𑒲 𑒏𑒯𑒻 𑒕𑒻 𑒯𑒧 𑒥𑒱𑒐𑒏𑒙𑓂𑒙𑒰 𑒕𑒱𑒎। 𑒞𑒯𑒱𑒢𑒰 𑒏𑒱𑒕𑒳 𑒠𑒱𑒢𑒏 𑒣𑒕𑒰𑒞𑒱 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒮𑒦𑒏𑒹𑒿 𑒥𑒻𑒮𑒰 𑒥𑒰𑒖𑒪- “𑒖𑒞𑒹 𑒪𑒼𑒏 𑒧𑒯𑒲𑓀𑒮 𑒐𑒼𑒪𑒪𑒏 𑒍𑒃𑒧𑒹 𑒥𑒹𑒮𑒲 𑒯𑒧𑒩𑒹 𑒖𑒖𑒧𑒰𑒢 𑒁𑒕𑒱, 𑒍𑒏𑒩𑒰 𑒮𑒦𑒏𑒹𑒿 𑒏𑒹𑒬-𑒠𑒰𑒜𑓃𑒲 𑒏𑒰𑒙𑒥 𑒕𑒼𑒛𑓃𑒱 𑒠𑒹𑒥𑒻। 𑒯𑒧𑒩 𑒏𑒧𑒰𑒃 𑒖𑒰𑒋𑒞, 𑒍𑒏𑒩𑒰 𑒥𑒞𑓂𑒞𑒴 𑒥𑒢𑒰 𑒙𑒯𑒪𑒹𑒥𑒻। 𑒧𑒳𑒠𑒰 𑒏𑒧𑒰𑒃𑒨𑒼 𑒏𑒹𑒢𑒰 𑒖𑒰𑒋𑒞? 𑒏𑒧𑒹𑒥𑒹 𑒢𑒹 𑒏𑒩𑒥𑒻 𑒞𑒿 𑒏𑒧𑒰𑒃 𑒏𑒟𑒲𑒏 𑒪𑒹𑒥𑒻।” 𑒣𑓂𑒩𑒬𑓂𑒢 𑒅𑒚𑒻𑒞 𑒁𑒕𑒱 𑒖𑒠𑒲 𑒏𑒱𑒨𑒼 𑒁𑒣𑒢 𑒮𑒧𑒮𑓂𑒨𑒰𑒏 𑒮𑒧𑒰𑒡𑒰𑒢𑒏 𑒪𑒹𑒪 𑒚𑒰𑒜𑓃 𑒯𑒳𑒁𑒋 𑒞𑒿 𑒏𑒱 𑒏𑒋𑒪 𑒖𑒰𑒋? 𑒮𑒥𑒯𑒏 𑒥𑒲𑒔𑒹𑒧𑒹 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒮𑓀𑒏𑒪𑓂𑒣 𑒪𑓄 𑒪𑒹𑒪𑒢𑒱 𑒖𑒹 𑒏𑒹𑒬 𑒢𑒻 𑒏𑒙𑒥𑒻। 𑒏𑒹𑒬 𑒢𑒻 𑒏𑒙𑒻𑒏 𑒥𑒰𑒞 𑒖𑒢𑒰 𑒁𑒏𑒰𑒮𑒧𑒹 𑒅𑒛𑓃𑒱𑒨𑒰 𑒑𑒹𑒪𑒻; 𑒥𑒪𑒖𑒼𑒩𑒲 𑒏𑒩𑒻𑒏 𑒠𑒧 𑒏𑒱𑒢𑒏𑒼 𑒢𑒻 𑒁𑒿𑒙𑒪𑒢𑒱। 𑒃𑒪𑒰𑒏𑒰𑒏 𑒮𑓂𑒟𑒱𑒞𑒱 𑒦𑒱𑒢𑓂𑒢-𑒦𑒱𑒢𑓂𑒢 𑒞𑒩𑒯𑒏, 𑒞𑒿𑒋 𑒦𑒱𑒢𑓂𑒢-𑒦𑒱𑒢𑓂𑒢 𑒞𑒩𑒯𑒏 𑒪𑒛𑓃𑒰𑒃𑒨𑒼। 𑒖𑒧𑒲𑒢𑒏 𑒪𑒛𑓃𑒰𑒃𑒧𑒹 𑒢𑒰𑒑𑒹𑒢𑓂𑒠𑓂𑒩𑒖𑒲 (𑒛𑒰. 𑒢𑒰𑒑𑒹𑒢𑓂𑒠𑓂𑒩 𑒗𑒰, 𑒣𑒻𑒙𑒒𑒰𑒙) 𑒏𑒹𑒿 𑒟𑒰𑒢𑒰𑒧𑒹 𑒙𑒰𑓀𑒑𑒱 𑒮𑒻𑒨𑒼 𑒪𑒰𑒚𑒲𑒮𑒿 𑒠𑒹𑒯 𑒔𑒴𑒩𑒱 𑒠𑒹𑒢𑒹 𑒩𑒯𑒢𑒱, 𑒖𑒃𑒮𑒿 𑒖𑒱𑒢𑒑𑒲 𑒦𑒩𑒱 𑒯𑒰𑒟-𑒣𑒋𑒩 𑒙𑒹𑒜𑓃𑒹 𑒩𑒯𑒪𑒢𑒱। 𑒏𑒰𑒧𑒹𑒮𑒩 𑒩𑒰𑒧 (𑒤𑒳𑒪𑒣𑒩𑒰𑒮) 𑒣𑒔𑓂𑒔𑒲𑒮-𑒞𑒲𑒮 𑒑𑒼𑒙𑒹𑒏 𑒮𑓀𑒑 𑒞𑒲𑒢 𑒮𑒰𑒪𑒮𑒿 𑒖𑒯𑒪𑒧𑒹, 𑒖𑒹 𑒮𑒦 𑒧𑒛𑒩 𑒏𑒹𑒮𑒧𑒹 𑒤𑒿𑒮𑒪। 𑒞𑒯𑒱𑒢𑒰 𑒩𑒰𑒧 𑒣𑓂𑒩𑒮𑒰𑒠 𑒮𑒯𑒢𑒲 (𑒣𑒔𑒯𑒲) 𑒏𑒹𑒿 𑒙𑓂𑒩𑒏𑒧𑒹 𑒅𑒢𑒙𑒰 𑒥𑒰𑒢𑓂𑒯𑒱 𑒩𑒼𑒛𑒣𑒩 𑒒𑒱𑒮𑒱𑒎𑒢𑒹 𑒩𑒯𑒢𑒱। 𑒁𑒐𑒢 𑒡𑒩𑒱 𑒖𑒹 𑒏𑒼𑒢𑒼 𑒧𑒳𑒏𑒠𑒧𑒰 𑒦𑒹𑒪 𑒕𑒪 𑒍𑒏𑒩 𑒏𑒼𑒢𑒼 𑒖𑒥𑒰𑒥 𑒧𑒳𑒏𑒠𑒧𑒰𑒮𑒿 𑒢𑒻 𑒠𑒹𑒪 𑒑𑒹𑒪 𑒕𑒪, 𑒖𑒹 𑒧𑒯𑒲𑓀𑒮𑒏 𑒒𑒙𑒢𑒰𑒮𑒿 𑒬𑒳𑒩𑒴 𑒦𑒹𑒪। 𑒞𑒲𑒢𑒴 𑒑𑒼𑒩𑒹 𑒠𑒩𑒼𑒑𑒰, 𑒢𑒟𑒳𑒢𑒲 𑒮𑒱𑓀𑒯 𑒂 𑒫𑒱𑒢𑓂𑒡𑓂𑒨𑒢𑒰𑒟 𑒚𑒰𑒏𑒳𑒩𑒣𑒩 𑒧𑒳𑒏𑒠𑒧𑒰 𑒏𑒋𑒪 𑒑𑒹𑒪। 𑒍𑒢𑒰 𑒠𑒩𑓂𑒖𑒢𑒼 𑒏𑒹𑒬 𑒦𑓄 𑒔𑒳𑒏𑒪 𑒕𑒪। 𑒟𑒰𑒢𑒰𑒏 𑒋𑒏 𑒣𑒏𑓂𑒭𑒲𑒨 𑒥𑒹𑒫𑒯𑒰𑒩 𑒠𑒹𑒐𑒱 𑒮𑒦 𑒱𑒢𑒩𑓂𑒝𑒋 𑒏𑓄 𑒪𑒹𑒪𑒢𑒱 𑒖𑒹 𑒢𑒹 𑒟𑒰𑒢𑒰 𑒏𑒹𑒮 𑒏𑒩𑒋 𑒖𑒹𑒞𑒰 𑒂 𑒢𑒹 𑒏𑒼𑒢𑒼 𑒏𑒹𑒮𑒏 𑒮𑓀𑒥𑓀𑒡𑒧𑒹 𑒏𑒯𑒋 𑒖𑒹𑒞𑒰। 𑒖𑒹 𑒯𑒹𑒞𑒻 𑒮𑒹 𑒏𑒼𑒩𑓂𑒙𑒹𑒮𑒿 𑒯𑒹𑒞𑒻। 𑒧𑒯𑒲𑓀𑒮𑒏 𑒥𑒩𑒰𑒧𑒠𑒑𑒲 𑒯𑒰𑒄 𑒏𑒼𑒩𑓂𑒙𑒮𑒿 𑒦𑒹𑒪। 𑒫𑒲𑒩𑒹𑒢𑓂𑒠𑓂𑒩 𑒖𑒲 (𑒧𑒰𑒢𑒢𑒲𑒨 𑒢𑓂𑒨𑒰𑒨𑒧𑒴𑒩𑓂𑒞𑒱, 𑒅𑒔𑓂𑒔 𑒢𑓂𑒨𑒰𑒨𑒰𑒪𑒨-𑒣𑒙𑒢𑒰) 𑒏𑒰𑒖 𑒏𑒹𑒢𑒹 𑒩𑒯𑒟𑒱𑒢। 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏 𑒏𑒹𑒬𑒏𑒙𑓂𑒙𑒲 𑒗𑓀𑒗𑒙𑒏 𑒣𑓀𑒔𑒻𑒞𑒲𑒧𑒹 𑒣𑓂𑒩𑒧𑒳𑒐 𑒖𑒲𑒏 𑒣𑓀𑒔 𑒥𑒾𑒏𑒴 𑒚𑒰𑒏𑒳𑒩 (𑒢𑒾𑒋) 𑒦𑒹𑒪𑒰। 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒁𑒣𑒢 𑒣𑓀𑒔 𑒁𑒣𑒢𑒹 𑒯𑒹𑒞𑒰𑒯, 𑒠𑒮𑒙𑒰 𑒮𑒧𑒰𑒖 𑒮𑒳𑒢𑒱𑒢𑒱𑒯𑒰𑒩 𑒯𑒹𑒞𑒰𑒯, 𑒣𑓂𑒩𑒧𑒳𑒐𑒼𑒖𑒲 𑒁𑒣𑒢 𑒮𑒳𑒢𑒱𑒢𑒱𑒯𑒰𑒩 𑒩𑒐𑒟𑒱, 𑒧𑒳𑒠𑒰 𑒥𑒖𑒞𑒰 𑒠𑒳𑒢𑒴 𑒣𑓀𑒔𑒹𑒙𑒰, 𑒢𑒱𑒩𑓂𑒝𑒨 𑒦𑒹𑒪। 𑒣𑒢𑒔𑒻𑒞𑒲𑒏 𑒁𑒖𑒲𑒫 𑒂𑒏𑒩𑓂𑒭𑒝, 𑒂𑒏𑒩𑓂𑒭𑒝𑒏 𑒏𑒰𑒩𑒝 𑒦𑒹𑒪 𑒖𑒹 𑒏𑒞𑒹-𑒥𑒹𑒩 𑒥𑒱𑒠𑒹𑒮𑒩 𑒚𑒰𑒏𑒳𑒩 𑒁𑒮𑒑𑒩𑒼𑒧𑒹 𑒣𑒙𑒏𑒰-𑒣𑒙𑒏𑒲 𑒏𑓄 𑒪𑒻 𑒕𑒪𑒰। 𑒞𑒃𑒧𑒹 𑒥𑒱𑒠𑒹𑒮𑒩 𑒥𑒠𑒢𑒰𑒧 𑒦𑓄 𑒑𑒹𑒪 𑒕𑒪𑒰। 𑒣𑒢𑒔𑒻𑒞𑒲𑒏 𑒠𑒼𑒮𑒩 𑒂𑒏𑒩𑓂𑒭𑒝 𑒕𑒪 𑒥𑒾𑒏𑒴 𑒚𑒰𑒏𑒳𑒩𑒏 𑒦𑒰𑒭𑒰।
“𑒖𑒱𑒢𑒑𑒲𑒏 𑒣𑒯𑒱𑒪 𑒠𑒱𑒢 𑒋𑒯𑒹𑒢 𑒦𑒰𑒭𑒰𑒮𑒿 𑒦𑒹𑒿𑒙 𑒦𑒹𑒪।“, 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒧𑒼𑒢 𑒣𑒰𑒛𑓃𑒻 𑒕𑒟𑒱।
𑒋𑒏 𑒞𑒿 𑒂𑒪𑓀𑒏𑒰𑒩𑒱𑒏 𑒬𑒻𑒪𑒲, 𑒞𑒃 𑒥𑒲𑒔 𑒋𑒏 𑒣𑒰𑒿𑒞𑒱 𑒣𑓂𑒩𑒧𑒳𑒐 𑒖𑒲𑒏 𑒣𑒏𑓂𑒭 𑒂 𑒥𑒱𑒠𑒹𑒮𑒩 𑒚𑒰𑒏𑒳𑒩𑒏 𑒫𑒱𑒣𑒏𑓂𑒭𑒧𑒹 𑒥𑒰𑒖𑒱 𑒖𑒰𑒟𑒱 𑒞𑒿 𑒠𑒼𑒮𑒩 𑒣𑒰𑒿𑒞𑒱 𑒥𑒱𑒠𑒹𑒮𑒩𑒏 𑒣𑒏𑓂𑒭𑒧𑒹 𑒣𑓂𑒩𑒧𑒳𑒐 𑒖𑒲𑒏 𑒫𑒱𑒣𑒏𑓂𑒭 𑒥𑒰𑒖𑒱 𑒖𑒰𑒟𑒱। 𑒮𑒳𑒢𑒱𑒢𑒱𑒯𑒰𑒩 𑒮𑒦 𑒦𑒰𑒭𑒹𑒏 (𑒬𑒥𑓂𑒠-𑒖𑒰𑒪) 𑒖𑒰𑒪𑒧𑒹 𑒍𑒗𑒩𑒰 𑒖𑒰𑒟𑒱। 𑒥𑒱𑒠𑒹𑒮𑒩𑒼 𑒚𑒰𑒏𑒳𑒩𑒏 𑒮𑒧𑒰𑒖 𑒂 𑒣𑓂𑒩𑒧𑒳𑒐𑒼 𑒖𑒲𑒏 𑒮𑒧𑒰𑒖 𑒥𑒾𑒏𑒴 𑒚𑒰𑒏𑒳𑒩𑒏 𑒦𑒰𑒭𑒹𑒧𑒹 𑒍𑒗𑒩𑒰 𑒖𑒰𑒟𑒱। 𑒣𑒢𑒔𑒻𑒞𑒲 𑒏𑒱 𑒯𑒋𑒞 𑒖𑒹 𑒒𑒾𑓀𑒒𑒰𑒅𑒖𑒹 𑒦𑓄 𑒖𑒰𑒋। 𑒣𑒏𑓂𑒭-𑒫𑒱𑒣𑒏𑓂𑒭𑒏 𑒥𑒲𑒔 𑒖𑒰𑒡𑒩𑒱 𑒮𑒧𑒠𑒩𑓂𑒬𑒲 𑒥𑒢𑒱 𑒮𑒼𑒪𑒯 (𑒮𑒼𑒩𑒯) 𑒂𑒢𑒰𑒣𑒩 𑒏𑒲𑒪 𑒢𑒻 𑒑𑒛𑓃𑒞 𑒞𑒰𑒡𑒩𑒱 𑒍𑒏𑒩 𑒮𑒼𑒩 𑒣𑒞𑒰𑒪 𑒠𑒱𑒮 𑒏𑒹𑒢𑒰 𑒖𑒰𑒋𑒞? 𑒖𑒰𑒡𑒩𑒱 𑒮𑒼𑒩𑒮𑒿 𑒮𑒱𑒩 𑒥𑒢𑒱 𑒡𑒩𑒞𑒲𑒮𑒿 𑒁𑒏𑒰𑒮 𑒠𑒱𑒮 𑒢𑒻 𑒅𑒚𑒞 𑒞𑒰𑒡𑒩𑒱 𑒮𑒼𑒩 𑒣𑒰𑒥𑒱-𑒣𑒰𑒥𑒱 𑒮𑒼𑒩𑒯𑒰 𑒏𑒹𑒢𑒰 𑒯𑒋𑒞। 𑒏𑒞𑒹 𑒥𑒹𑒩 𑒣𑒩-𑒣𑒢𑒔𑒻𑒞𑒲 𑒥𑒻𑒮𑒪 𑒧𑒳𑒠𑒰 𑒢𑒹 𑒮𑒧𑒗𑒾𑒞𑒰 𑒙𑒳𑒙𑒪 𑒂 𑒢𑒹 𑒗𑓀𑒗𑒙 𑒤𑒛𑓃𑒱𑒂𑒋𑒪। 𑒞𑒃 𑒥𑒲𑒔 𑒋𑒯𑒹𑒢 𑒦𑒹𑒪 𑒖𑒹 𑒮𑒦 𑒠𑒱𑒨𑒰𑒠 𑒥𑒱𑒠𑒹𑒮𑒩𑒼 𑒚𑒰𑒏𑒳𑒩 𑒁𑒣𑒢𑒰 𑒮𑒧𑒰𑒖 (𑒢𑒾𑒂 𑒮𑒧𑒰𑒖) 𑒧𑒹 𑒥𑒻𑒮𑒱 𑒤𑒹𑒩𑒮𑒿 𑒑𑒱𑒩𑒯𑒮𑓂𑒞𑒏 𑒥𑒿𑒙𑒥𑒰𑒩𑒰 𑒏𑓄 𑒪𑒹𑒪𑒢𑒱। 𑒧𑒳𑒠𑒰 𑒣𑒢𑒔𑒻𑒞𑒲 𑒣𑒕𑒳𑒂𑒋𑒪𑒹 𑒩𑒯𑒪।
𑒥𑒱𑒢𑒳 𑒛𑒰𑒨𑒩𑒲𑒏 𑒖𑒱𑒢𑒑𑒲𑒧𑒹 𑒞𑒰𑒩𑒲𑒏-𑒧𑒛𑓃𑒏𑒳𑒧𑒰 𑒒𑒙𑒢𑒰 𑒯𑒼𑒃𑒞 𑒁𑒕𑒱 𑒠𑒱𑒢-𑒧𑒯𑒲𑒢𑒰 𑒢𑒻। 𑒞𑒃 𑒥𑒲𑒔 𑒪𑒾𑒏𑒯𑒲𑒧𑒹 𑒖𑒱𑒪𑒰-𑒮𑒧𑓂𑒧𑒹𑒪𑒢 𑒦𑒹𑒪। 𑒪𑒾𑒏𑒯𑒲 𑒯𑒰𑒃 𑒮𑓂𑒏𑒴𑒪𑒣𑒩 𑒮𑒧𑓂𑒧𑒹𑒪𑒢𑒏 𑒂𑒨𑒼𑒖𑒢 𑒦𑒹𑒪 𑒩𑒯𑒻, 𑒪𑒾𑒏𑒯𑒰 𑒮𑓂𑒙𑒹𑒬𑒢𑒮𑒿 𑒮𑒫𑒰𑒩𑒲𑒏 𑒁𑒦𑒰𑒫𑒧𑒹 𑒏𑒱𑒕𑒳 𑒑𑒼𑒙𑒹 𑒕𑒼𑒛𑓃𑒱 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒣𑒋𑒩𑒹 𑒑𑒹𑒪 𑒩𑒯𑒟𑒱। 𑒮𑒫𑒰𑒩𑒲 𑒁𑒦𑒰𑒫𑒏 𑒏𑒰𑒩𑒝 𑒮𑒛𑓃𑒏 𑒩𑒯𑒢𑒱। 𑒋𑒏𑒙𑒰 𑒖𑒲𑒣, 𑒞𑒃𑒧𑒹 𑒏𑒹 𑒮𑒦 𑒖𑒹𑒞𑒰𑒯। 𑒂𑒤𑒱𑒮𑒏 𑒏𑒰𑒑𑒖𑒰𑒞𑒏 𑒮𑓀𑒑 𑒖𑒱𑒪𑒰 𑒏𑒰𑒩𑓂𑒨𑒰𑒪𑒨। 𑒞𑒃 𑒮𑓀𑒑 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏 𑒔𑒰𑒩𑒱 𑒠𑒱𑒢𑒏 𑒮𑒧𑓂𑒧𑒹𑒪𑒢 𑒦𑒹𑒪𑒢𑒱। 𑒢𑒲𑒏 𑒖𑒳𑒙𑒰𑒢 𑒦𑒹𑒪 𑒕𑒪। 𑒖𑒱𑒪𑒰 𑒦𑒩𑒱𑒏 𑒮𑓀𑒑𑒲, 𑒖𑒱𑒪𑒰 𑒦𑒩𑒱𑒏 𑒔𑒰𑒪𑒱-𑒜𑒰𑒪𑒱𑒏 𑒮𑓀𑒑 𑒖𑒳𑒙𑒰𑒢। 𑒮𑒧𑓂𑒧𑒹𑒪𑒢𑒏 𑒠𑒼𑒮𑒩 𑒠𑒱𑒢 𑒠𑒳𑒢𑒴 𑒑𑒼𑒙𑒹 𑒣𑓂𑒩𑒞𑒱𑒢𑒱𑒡𑒱, 𑒧𑒰𑒢𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒂 𑒩𑒰𑒧𑒰𑒫𑒞𑒰𑒩 𑒮𑓀𑒑𑒹 𑒦𑒼𑒑𑒹𑒢𑓂𑒠𑓂𑒩𑒖𑒲 𑒮𑒿 𑒦𑒹𑒿𑒙 𑒏𑒹𑒪𑒢𑒱, 𑒍 𑒋𑒏𑒙𑒰 𑒕𑒼𑒙𑒹 𑒏𑒼𑒚𑒩𑒲𑒧𑒹 𑒁𑒮𑒑𑒩𑒹 𑒮𑒱𑒧𑒙𑒱𑒨𑒹𑒣𑒩 𑒥𑒱𑒕𑒰𑒢 𑒥𑒱𑒕𑒰 𑒔𑒩𑒱𑒯𑒞𑓂𑒟𑒲 𑒑𑒧𑒕𑒰 𑒍𑒜𑓃𑒢𑒹 𑒖𑒑𑒪𑒹 𑒣𑒛𑓃𑒪 𑒩𑒯𑒟𑒱। 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒣𑒯𑒳𑒿𑒔𑒱𑒞𑒹 𑒅𑒚𑒱 𑒏𑓄 𑒥𑒻𑒮𑒱 𑒣𑒳𑒕𑒱 𑒠𑒹𑒪𑒐𑒱𑒢- “𑒏𑒲 𑒯𑒰𑒪-𑒔𑒰𑒪 𑒑𑒰𑒧𑒒𑒩𑒏 𑒁𑒕𑒱?” 𑒦𑒼𑒑𑒹𑒢𑓂𑒠𑓂𑒩𑒖𑒲𑒧𑒹 𑒖𑒥𑒩𑒠𑒮 𑒑𑒳𑒝 𑒩𑒯𑒢𑒱 𑒖𑒹 𑒏𑒼𑒢𑒼 𑒥𑒰𑒞𑒏𑒹𑒿 𑒖𑒛𑓃𑒱𑒮𑒿 𑒣𑒏𑒛𑓃𑒻𑒞 𑒕𑒪𑒐𑒱𑒢। 𑒏𑒣𑒱𑒪𑒹𑒬𑓂𑒫𑒩 𑒌𑒚𑒰𑒧𑒏 𑒮𑒩𑒰𑒡𑒥𑒪𑒰 𑒒𑒙𑒢𑒰 𑒦𑓄 𑒔𑒳𑒏𑒪 𑒕𑒪, 𑒋𑒏-𑒯𑒩𑒤𑒲𑒧𑒹 𑒩𑒰𑒧𑒰𑒫𑒞𑒰𑒩 𑒮𑒳𑒢𑒰 𑒠𑒹𑒪𑒏𑒢𑒱। 𑒧𑒳𑒠𑒰 𑒯𑒰𑒪𑒹𑒧𑒹 𑒁𑒣𑒢𑒼 𑒍𑒯𑒲 𑒏𑒰𑒖𑒮𑒿 𑒑𑒳𑒖𑒩𑒪 𑒩𑒯𑒟𑒱, 𑒏𑒹𑒮 𑒏𑒙𑒾𑒪𑒹 𑒩𑒯𑒢𑒱। 𑒏𑒰𑒹𑒢𑒼 𑒞𑒩𑒯𑒹𑒿 𑒮𑒧𑒰𑒖 𑒕𑒰𑒢𑒱-𑒥𑒰𑒢𑓂𑒯𑒱 𑒏𑓄 𑒣𑒰𑒩 𑒪𑒑𑒰𑒻𑒪𑒏𑒢𑒱, 𑒞𑒃𑒮𑒿 𑒑𑒳𑒖𑒩𑒪𑒹 𑒩𑒯𑒟𑒱। 𑒥𑒱𑒙𑒱𑒨𑒰-𑒥𑒱𑒙𑒱𑒨𑒰 𑒮𑒦 𑒮𑒫𑒰𑒪 𑒅𑒚𑒾𑒪𑒐𑒱𑒢। 𑒮𑒫𑒱𑒮𑓂𑒞𑒰𑒩 𑒒𑒙𑒢𑒰𑒏 𑒔𑒩𑓂𑒔 𑒩𑒰𑒧𑒰𑒫𑒞𑒰𑒩 𑒏𑓄 𑒠𑒹𑒪𑒐𑒱𑒢, 𑒑𑒳𑒧 𑒦𑓄 𑒑𑒹𑒪𑒰𑒯। 𑒏𑒱𑒕𑒳 𑒮𑒧𑒋 𑒣𑒕𑒰𑒞𑒱 𑒑𑒳𑒧𑓂𑒧𑒲 𑒞𑒼𑒛𑓃𑒱 𑒁𑒣𑒢𑒼 𑒒𑒙𑒢𑒰𑒏 𑒔𑒩𑓂𑒔 𑒏𑒹𑒪𑒢𑒱। 𑒩𑒰𑒧𑒰𑒫𑒞𑒰𑒩 𑒢𑒫𑒏𑒰 𑒣𑒳𑒩𑒯𑒱𑒞 𑒦𑒹𑒪𑒹 𑒩𑒯𑒟𑒱, 𑒞𑒿𑒋 𑒦𑒼𑒑𑒹𑒢𑓂𑒠𑓂𑒩𑒖𑒲 𑒧𑒰𑒢𑒱 𑒖𑒰𑒟𑒱𑒢। 𑒣𑒳𑒢: 𑒠𑒼𑒯𑒩𑒥𑒻𑒞 𑒩𑒰𑒧𑒰𑒫𑒞𑒰𑒩 𑒣𑒳𑒕𑒪𑒐𑒱𑒢- “𑒏𑒰𑒧𑒩𑒹𑒛, 𑒯𑒧𑒩𑒰 𑒌𑒚𑒰𑒧𑒏 𑒏𑒹𑒯𑒹𑒢 𑒦𑒹𑒪?” 𑒦𑒼𑒑𑒹𑒢𑓂𑒠𑓂𑒩𑒖𑒲 𑒖𑒥𑒰𑒥 𑒠𑒹𑒪𑒐𑒱𑒢- “𑒖𑒯𑒱𑒢𑒰 𑒮𑒼𑒗𑒹 𑒢𑒰𑒏 𑒕𑒳𑒁𑒥 𑒯𑒼𑒃𑒋 𑒂 𑒒𑒳𑒧𑒰 𑒏𑓄 𑒕𑒳𑒁𑒥 𑒮𑒹𑒯𑒼 𑒯𑒼𑒃𑒋, 𑒞𑒯𑒱𑒢𑒰 𑒮𑒴𑒠𑒐𑒼𑒩𑒲, 𑒧𑒯𑒰𑒖𑒢𑒲 𑒮𑒼𑒗𑒹 𑒕𑒳𑒁𑒥 𑒦𑒹𑒪 𑒥𑒰𑒿𑒏𑒲 𑒖𑒹 𑒦𑒹𑒪 𑒮𑒹 𑒒𑒳𑒧𑒰 𑒏𑓄 𑒕𑒳𑒁𑒥 𑒦𑒹𑒪। 𑒞𑒿𑒋 𑒋𑒏𑒩𑒰 𑒮𑒰𑒧𑒰𑒖𑒱𑒏 𑒂𑒩𑓂𑒟𑒱𑒏 𑒩𑒴𑒣𑒧𑒹 𑒠𑒹𑒐𑒱𑒨𑒾। 𑒮𑒧𑒰𑒖𑒏 𑒦𑒲𑒞𑒩 𑒂𑒩𑓂𑒟𑒱𑒏 𑒜𑒰𑒿𑒔𑒰 𑒋𑒯𑒹𑒢 𑒚𑒰𑒜𑓃 𑒁𑒕𑒱 𑒖𑒹𑒏𑒩 𑒮𑒧𑒲𑒏𑒩𑒝 𑒖𑒩𑒴𑒩𑒲 𑒦𑓄 𑒑𑒹𑒪 𑒁𑒕𑒱। 𑒧𑒳𑒠𑒰 𑒮𑒹 𑒏𑒹 𑒏𑒩𑒞?” 𑒏𑒯𑒱 𑒔𑒳𑒣 𑒦𑓄 𑒑𑒹𑒪𑒰𑒯। 𑒞𑒯𑒲 𑒥𑒲𑒔 𑒣𑒴𑒩𑓂𑒫 𑒫𑒱𑒡𑒰𑒨𑒏 𑒪𑒰𑒪 𑒥𑒱𑒯𑒰𑒩𑒲 𑒂𑒥𑒱 𑒑𑒹𑒪𑒰𑒯। 𑒮𑒧𑓂𑒧𑒹𑒪𑒢𑒏 𑒏𑒰𑒖 𑒥𑒴𑒗𑒱 𑒠𑒳𑒢𑒴 𑒑𑒼𑒙𑒹 𑒥𑒯𑒩𑒰 𑒑𑒹𑒪𑒰। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒧𑒡𑒹𑒣𑒳𑒩 𑒖𑒱𑒪𑒰 𑒮𑒧𑓂𑒧𑒹𑒪𑒢𑒏 𑒣𑒕𑒰𑒞𑒱 𑒖𑒱𑒪𑒰 𑒢𑒹𑒞𑒵𑒞𑓂𑒫𑒧𑒹 𑒋𑒪𑒰 𑒂 𑒏𑓂𑒭𑒹𑒞𑓂𑒩𑒧𑒹 𑒮𑒧𑒋 𑒠𑒹𑒥 𑒬𑒳𑒩𑒴 𑒏𑒹𑒪𑒢𑒱। 𑒑𑒰𑒧𑒹-𑒑𑒰𑒧 𑒍𑒗𑒩𑒰𑒋𑒪, 𑒁𑒣𑒢-𑒁𑒣𑒢 𑒧𑒳𑒠𑓂𑒠𑒰 𑒁𑒣𑒢-𑒁𑒣𑒢 𑒪𑒛𑓃𑒰𑒃। 𑒏𑒞𑒾 𑒧𑒰𑒕𑒏 𑒏𑒰𑒩𑒼𑒥𑒰𑒩 𑒞𑒿 𑒏𑒞𑒾 𑒧𑒳𑒿𑒯-𑒣𑒳𑒩𑒐𑒲𑒏। 𑒖𑒧𑒲𑒢𑒏 𑒕𑒳𑒞𑒱𑒨𑒼 𑒢𑒹 𑒏𑒞𑒾, 𑒞𑒯𑒱𑒢𑒰 𑒧𑒯𑒰𑒖𑒢𑒱𑒨𑒼𑒏। 𑒖𑒱𑒪𑒰 𑒮𑒧𑓂𑒧𑒹𑒪𑒢𑒏 𑒏𑒰𑒩𑓂𑒨𑒏𑓂𑒩𑒧𑒧𑒹 𑒖𑒹 𑒧𑒳𑒠𑓂𑒠𑒰 𑒕𑒻 𑒞𑒃𑒮𑒿 𑒦𑒱𑒢𑓂𑒢 𑒪𑒛𑓃𑒰𑒃 𑒕𑒻। 𑒪𑒏𑓂𑒭𑓂𑒧𑒲𑒏𑒰𑒢𑓂𑒞-𑒩𑒧𑒰𑒏𑒰𑒢𑓂𑒞 𑒮𑒰𑒯𑒳𑒏 𑒖𑒧𑒲𑒢𑒣𑒩 𑒥𑒙𑒰𑒃𑒠𑒰𑒩𑒲 𑒬𑒳𑒩𑒴 𑒦𑒹𑒪। 𑒁𑒣𑒢𑒼 𑒥𑒳𑒗𑒻 𑒕𑒟𑒱 𑒂 𑒥𑒹𑒩𑒧𑒰𑒏 𑒪𑒼𑒏 𑒮𑒹𑒯𑒼 𑒥𑒳𑒗𑒻𑒞 𑒁𑒕𑒱 𑒖𑒹 𑒁𑒣𑒢𑒹 𑒐𑒹𑒞𑒲 𑒏𑒩𑒻 𑒕𑒪𑒰𑒯 𑒂𑒏𑒱 𑒥𑒙𑒹𑒠𑒰𑒩 𑒏𑒩𑒻𑒞 𑒕𑒪। 𑒥𑒙𑒰𑒃𑒠𑒰𑒩𑒲 𑒬𑒳𑒩𑒴 𑒯𑒼𑒃𑒞𑒹 𑒋𑒏𑒙𑒰 𑒧𑒳𑒩𑓂𑒠𑒒𑒙𑓂𑒙𑒲 𑒣𑒩𑒞𑒲𑒣𑒩 𑒂𑒚-𑒠𑒮𑒙𑒰 𑒮𑒩𑒡𑒳𑒂 𑒣𑒼𑒐𑒩𑒱𑒏 𑒒𑒩 𑒖𑒏𑒰𑒿 𑒒𑒩 𑒚𑒰𑒜𑓃 𑒏𑓄 𑒖𑒐𑒢 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒐𑒹𑒞 𑒠𑒱𑒮 𑒥𑒜𑓃𑒪𑒰 𑒂𑒏𑒱 𑒁𑒣𑒢𑒰-𑒁𑒣𑒢𑒰 𑒒𑒩𑒧𑒹 𑒂𑒑𑒱 𑒪𑒑𑒰, 𑒁𑒙𑓂𑒚𑒰𑒃𑒮 𑒑𑒼𑒙𑒹𑒏𑒹𑒿 𑒁𑒑𑒱𑒪𑒑𑓂𑒑𑒲 𑒏𑒹𑒮𑒧𑒹 𑒤𑒿𑒮𑒰 𑒠𑒹𑒪𑒏𑒢𑒱। 𑒂𑒚-𑒠𑒮𑒙𑒰 𑒒𑒩 𑒥𑒢𑒥𑒻𑒏 𑒏𑒰𑒩𑒝 𑒕𑒪𑒻 𑒏𑒹𑒮𑒏𑒹𑒿 𑒮𑒲𑒩𑒱𑒨𑒮 𑒥𑒢𑒥𑒻𑒪𑒹, 𑒧𑒳𑒠𑓂𑒠𑒻-𑒑𑒥𑒰𑒯 𑒯𑒋𑒞। 𑒞𑒃 𑒥𑒲𑒔 𑒋𑒏𑒙𑒰 𑒒𑒙𑒢𑒰 𑒒𑒙𑒪। 𑒏𑒱𑒮𑒳𑒢 𑒠𑒹𑒫 𑒧𑒝𑓂𑒛𑒪 𑒔𑒰𑒯𑒏 𑒠𑒼𑒏𑒰𑒢 𑒏𑒩𑒻𑒞 𑒕𑒪𑒰𑒯। 𑒍𑒯𑒼 𑒣𑒰𑒩𑓂𑒙𑒲𑒏 𑒖𑒳𑒗𑒰𑒩𑒴 𑒏𑒰𑒩𑓂𑒨𑒏𑒩𑓂𑒞𑓂𑒞𑒰। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒥𑒯𑒏 𑒥𑒻𑒮𑒰𑒩𑒏 𑒁𑒛𑓂𑒛𑒰 𑒮𑒹𑒯𑒼 𑒕𑒪𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒔𑒰𑒩𑒱-𑒣𑒰𑒿𑒔 𑒑𑒼𑒙𑒹 𑒩𑒯𑒟𑒱। 𑒣𑒔𑒰𑒮𑒮𑒿 𑒆𑒣𑒩 𑒮𑒠𑒰𑒋 (𑒧𑒳𑒮𑒯𑒩) 𑒮𑒦 𑒏𑒼𑒠𑒰𑒩𑒱-𑒮𑒯𑒞 𑒪𑒹𑒢𑒹 𑒂𑒥𑒱 𑒔𑒰𑒯𑒏 𑒠𑒼𑒏𑒰𑒢𑒏 𑒂𑒑𑒴𑒧𑒹 𑒨𑒞𑓂𑒩-𑒏𑒳𑒞𑓂𑒩 𑒥𑒰𑒖𑒋 𑒪𑒑𑒪𑒰। 𑒚𑒰𑒜𑓃 𑒦𑓄 𑒏𑓄 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒖𑒥𑒰𑒥 𑒠𑒱𑒁𑒋 𑒪𑒑𑒪𑒐𑒱𑒢। 𑒮𑒠𑒰𑒨 𑒮𑒥𑒯𑒏 𑒯𑒰𑒟𑒧𑒹 𑒯𑒟𑒱𑒨𑒰𑒩, 𑒞𑒃𑒣𑒩 𑒞𑒰𑒛𑓃𑒲-𑒠𑒰𑒩𑒴 𑒣𑒲𑒢𑒹, 𑒠𑒼𑒮𑒩𑒰𑒏 𑒏𑒯𑒪𑒧𑒹। 𑒞𑒃 𑒥𑒲𑒔 𑒑𑒰𑒧 𑒠𑒱𑒮 𑒯𑒪𑓂𑒪𑒰 𑒦𑓄 𑒑𑒹𑒪𑒻 𑒖𑒹 𑒏𑒱𑒮𑒳𑒢𑒠𑒹𑒫 𑒌𑒚𑒰𑒧 𑒯𑒮𑒹𑒩𑒰-𑒯𑒮𑒹𑒩𑒲 𑒦𑓄 𑒑𑒹𑒪𑒻। 𑒖𑒹 𑒖𑒞𑓂𑒞𑒻 𑒩𑒯𑒋 𑒮𑒹 𑒞𑒞𑓂𑒞𑒻𑒮𑒿 𑒪𑒰𑒚𑒲 𑒢𑒹𑒢𑒹 𑒠𑒾𑒑𑒪। 𑒙𑒼𑒪 𑒂 𑒠𑒼𑒏𑒰𑒢𑒏 𑒥𑒲𑒔𑒹𑒧𑒹 𑒧𑒰𑒩𑒱 𑒤𑒿𑒮𑒱 𑒑𑒹𑒪। 𑒖𑒥𑒩𑒠𑒮 𑒧𑒰𑒩𑒱 𑒦𑒹𑒪। 𑒏𑒞𑒹 𑒑𑒼𑒙𑒹𑒏𑒹𑒿 𑒏𑒰𑒢-𑒏𑒣𑒰𑒩 𑒤𑒳𑒙𑒪। 𑒏𑒹𑒮-𑒤𑒾𑒠𑒰𑒩𑒲 𑒂 𑒖𑒯𑒪𑒏 𑒦𑒨 𑒮𑒧𑒰𑒣𑓂𑒞 𑒦𑓄 𑒑𑒹𑒪 𑒕𑒪𑒻। 𑒋𑒏𑒞𑒲𑒮 𑒠𑒱𑒢𑒏 𑒦𑒲𑒞𑒩 𑒁𑒙𑓂𑒚𑒰𑒃𑒮𑒼 𑒧𑒳𑒠𑒰𑒪𑒯𑒏 𑒖𑒧𑒰𑒢𑒞 𑒦𑓄 𑒑𑒹𑒪𑒻। 𑒖𑒧𑒰𑒢𑒞𑒏 𑒣𑒕𑒰𑒞𑒱 𑒖𑒧𑒲𑒢𑒏 𑒠𑒐𑒪 𑒠𑒱𑒯𑒰𑒢𑒲 𑒬𑒳𑒩𑒴 𑒦𑒹𑒪𑒻। 𑒑𑒛𑓃𑒥𑒛𑓃 𑒦𑓄 𑒑𑒹𑒪 𑒩𑒯𑒻 𑒖𑒹, 𑒖𑒹 𑒁𑒮𑒪 𑒥𑒙𑒹𑒠𑒰𑒩 𑒩𑒯𑒻 𑒍 𑒏𑒹𑒮 𑒢𑒻 𑒏𑒹𑒪𑒏 𑒂 𑒖𑒹 𑒥𑒙𑒹𑒠𑒰𑒩 𑒢𑒻 𑒩𑒯𑒻 𑒍 𑒏𑒹𑒮 𑒏𑒹𑒪𑒏। 𑒮𑓂𑒣𑒭𑓂𑒙 𑒩𑒴𑒣𑒧𑒹 𑒑𑒰𑒧 𑒠𑒴 𑒦𑒰𑒑𑒧𑒹 𑒥𑒿𑒙𑒰 𑒑𑒹𑒪 𑒩𑒯𑒻। 𑒍𑒢𑒰 𑒆𑒣𑒩𑒮𑒿 𑒠𑒳𑒃𑒨𑒹 𑒣𑒰𑒩𑓂𑒙𑒲 𑒥𑒴𑒗𑒱 𑒣𑒛𑓃𑒻 𑒧𑒳𑒠𑒰 𑒔𑒼𑒩𑒢𑒳𑒏𑒥𑒰 𑒧𑒰𑒢𑒹 𑒦𑒲𑒞𑒩𑒹-𑒦𑒲𑒞𑒩 𑒞𑒹𑒮𑒩𑒼 𑒣𑒰𑒩𑓂𑒙𑒲 𑒥𑒢𑒱 𑒑𑒹𑒪 𑒩𑒯𑒻। 𑒞𑒹𑒮𑒩 𑒄 𑒩𑒯𑒻 𑒖𑒹 𑒐𑒴𑒪𑒱 𑒏𑓄 𑒮𑒼𑒗𑒰𑒧𑒹 𑒢𑒻 𑒂𑒥𑒻 𑒧𑒳𑒠𑒰 𑒠𑒱𑒢-𑒩𑒰𑒞𑒱 𑒏𑒢𑒤𑒳𑒮𑒏𑒲 𑒣𑒰𑒕𑒴 𑒪𑒰𑒑𑒪 𑒩𑒯𑒻। 𑒣𑒯𑒱𑒪𑒳𑒏𑒹 𑒡𑒏𑓂𑒏𑒰𑒧𑒹 𑒖𑒧𑒲𑒢𑒠𑒰𑒩 𑒥𑒴𑒗𑒱 𑒑𑒹𑒪 𑒖𑒹 𑒖𑒧𑒲𑒢 𑒖𑒹𑒥𑒹 𑒏𑒩𑒞, 𑒥𑒢𑒱𑒨𑒰𑒿 𑒩𑒯𑒥𑒹 𑒏𑒩𑒋, 𑒞𑒩𑒹-𑒞𑒩 𑒖𑒧𑒲𑒢 𑒥𑒹𑒔𑒥 𑒬𑒳𑒩𑒴 𑒏𑒹𑒪𑒏। 𑒍𑒢𑒰 𑒖𑒧𑒲𑒢𑒮𑒿 𑒮𑒧𑓂𑒥𑒢𑓂𑒡𑒱𑒞 𑒏𑒱𑒕𑒳 𑒣𑒳𑒩𑒢𑒼 𑒏𑒰𑒢𑒴𑒢 𑒕𑒪𑒻, 𑒏𑒱𑒕𑒳 𑒢𑒫𑒏𑒼 𑒥𑒢𑒪 𑒖𑒹𑒢𑒰 𑒯𑒠𑒥𑓀𑒠𑒲, 𑒂 𑒏𑒱𑒕𑒳 𑒢𑒯𑒱𑒨𑒼 𑒕𑒪𑒻। 𑒞𑒲𑒮-𑒔𑒰𑒪𑒲𑒮 𑒥𑒩𑓂𑒐 𑒣𑒯𑒱𑒢𑒹 𑒥𑒏𑒰𑒮𑓂𑒞𑒏 𑒪𑒛𑓃𑒰𑒃 𑒦𑓄 𑒔𑒳𑒏𑒪 𑒕𑒪। 𑒍𑒢𑒰 𑒥𑒏𑒰𑒮𑓂𑒞𑒏 𑒪𑒛𑓃𑒰𑒃 𑒁𑒮𑒰𑒢𑒲𑒮𑒿 𑒮𑒧𑓂𑒣𑒢𑓂𑒢 𑒦𑒹𑒪 𑒩𑒯𑒻। 𑒪𑒼𑒏𑒼𑒏 𑒥𑒲𑒔 𑒁𑒡𑒱𑒏𑒰𑒩𑒏 𑒧𑒯𑒞 𑒕𑒪। 𑒏𑒱𑒕𑒳 𑒑𑒼𑒙𑒹 𑒫𑓂𑒨𑒏𑓂𑒞𑒱𑒑𑒞 𑒩𑒴𑒣𑒧𑒹 𑒏𑒹𑒮 𑒪𑒛𑓃𑒱 𑒥𑒱𑒢𑒳 𑒁𑒡𑒱𑒏𑒰𑒩𑒏 𑒮𑒹𑒯𑒼 𑒖𑒧𑒲𑒢 𑒠𑒐𑒪 𑒏𑓄 𑒪𑒹𑒢𑒹 𑒕𑒪𑒰। 𑒖𑒧𑒲𑒢𑒏 𑒥𑒲𑒔 𑒏𑒰𑒢𑒴𑒢𑒲 𑒍𑒗𑒩𑒲 𑒢𑒲𑒏 𑒖𑒏𑒰𑒿 𑒢𑒻 𑒧𑒳𑒠𑒰 𑒪𑒰𑒑𑒱 𑒖𑒩𑒴𑒩 𑒑𑒹𑒪 𑒕𑒪। 𑓑𑓙𑓓𑓕 𑒄.𑒮𑒿 𑒣𑒴𑒩𑓂𑒫 𑒖𑒹 𑒁𑓀𑒑𑓂𑒩𑒹𑒖 𑒫𑒱𑒩𑒼𑒡𑒲 𑒂𑒖𑒰𑒠𑒲𑒏 𑒠𑒱𑒬𑒰 𑒕𑒪 𑒍𑒃𑒧𑒹 𑒡𑒏𑓂𑒏𑒰 𑒪𑒰𑒑𑒪। 𑒫𑒰𑒧𑒣𑓀𑒟𑒲 𑒫𑒱𑒔𑒰𑒩 𑒁𑒣𑒢 𑒣𑒯𑒔𑒰𑒢 𑒥𑒢𑒰 𑒢𑒹𑒢𑒹 𑒕𑒪। 𑓑𑓙𑓒𑓕 𑒄.𑒧𑒹 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒮𑒹𑒯𑒼 𑒥𑒢𑒱 𑒑𑒹𑒪 𑒕𑒪। 𑒮𑒳𑒦𑒰𑒭 𑒥𑒰𑒥𑒴 𑒮𑒹𑒯𑒼 𑒁𑒣𑒢 𑒠𑒵𑒭𑓂𑒙𑒱𑒏𑒼𑒝 𑒩𑒐𑒪𑒢𑒱। 𑒖𑒧𑒲𑒢𑒏 𑒍𑒗𑒩𑒲 𑒄 𑒦𑒹𑒪 𑒖𑒹 𑒥𑒙𑒰𑒃𑒠𑒰𑒩𑒲 𑒏𑒰𑒢𑒴𑒢 𑒣𑒕𑒳𑒪𑒏𑒰 𑒮𑒩𑓂𑒫𑒹𑒧𑒹 𑒮𑒱𑒏𑒧𑒲 𑒥𑒙𑒰𑒃 𑒏𑓄 𑒏𑓄 𑒐𑒞𑒱𑒨𑒰𑒢 𑒥𑒢𑒱 𑒔𑒳𑒏𑒪 𑒕𑒪। 𑒦𑒴𑒠𑒰𑒢𑒲 𑒂𑒢𑓂𑒠𑒼𑒪𑒢 𑒮𑒹𑒯𑒼 𑒅𑒚𑒱𑒨𑒹 𑒔𑒳𑒏𑒪 𑒕𑒪। 𑒥𑒙𑒰𑒃𑒠𑒰𑒩𑒲𑒏 𑒮𑓀𑒑 𑒯𑒠𑒥𑓀𑒠𑒲 (𑒁𑒩𑓂𑒟𑒰𑒞𑓂 𑒥𑒲𑒮 𑒥𑒲𑒒𑒰𑒮𑒿 𑒆𑒣𑒩 𑒥𑒪𑒰𑒏 𑒖𑒧𑒲𑒢 𑒪𑓄 𑒪𑒹𑒪 𑒖𑒹𑒞𑒻।) 𑒏𑒰𑒢𑒴𑒢 𑒮𑒹𑒯𑒼 𑒥𑒢𑒱 𑒔𑒳𑒏𑒪 𑒕𑒪। 𑒞𑒯𑒴𑒧𑒹 𑒣𑒕𑒱𑒧𑒲 𑒧𑒡𑒳𑒥𑒢𑒲 𑒖𑒱𑒪𑒰𑒧𑒹 𑒥𑒙𑒰𑒃𑒠𑒰𑒩𑒲 𑒪𑒛𑓃𑒰𑒃 𑒡𑒳𑒩-𑒗𑒰𑒛𑓃 𑒔𑒪𑒻𑒞 𑒩𑒯𑒋। 𑒍𑒢𑒰 𑒱𑒮𑒩𑓂𑒤 𑒖𑒧𑒲𑒢𑒠𑒰𑒩𑒹 𑒢𑒻, 𑒥𑒹𑒮𑒱𑒨𑒼 𑒖𑒧𑒲𑒢𑒥𑒪𑒰 𑒂 𑒍𑒏𑒩 𑒖𑒹 𑒪𑒑𑒳𑒂-𑒦𑒑𑒳𑒂 𑒩𑒯𑒻 𑒍𑒯𑒼 𑒂 𑒏𑒱𑒕𑒳 𑒩𑒰𑒖𑒢𑒲𑒞𑒱𑒏 𑒠𑒪 𑒮𑒹𑒯𑒼 𑒖𑒰𑒞𑒱-𑒮𑒧𑓂𑒣𑓂𑒩𑒠𑒰𑒨𑒏 𑒢𑒰𑒧𑒣𑒩 𑒩𑒰𑒖𑒢𑒲𑒞𑒱𑒏 𑒣𑒰𑒩𑓂𑒙𑒲 𑒚𑒰𑒜𑓃 𑒏𑓄 𑒢𑒹𑒢𑒹 𑒕𑒪। 𑒋𑒏 𑒞𑒿 𑒑𑒩𑒲𑒥𑒏 𑒥𑒲𑒔 𑒮𑒰𑒧𑓀𑒞𑒲 𑒮𑓀𑒮𑓂𑒏𑒰𑒩 𑒡𑒏𑒹𑒪 𑒏𑓄 𑒢𑒱𑒔𑓂𑒔𑒰 𑒐𑒮𑒾𑒢𑒹 𑒩𑒯𑒻, 𑒠𑒼𑒮𑒩 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏𑒹𑒿 𑒮𑒧𑒰𑒖𑒏 𑒦𑒲𑒞𑒩 𑒖𑒰𑒞𑒱-𑒡𑒩𑓂𑒧 𑒫𑒱𑒩𑒼𑒡𑒲 𑒏𑒯𑒱 𑒒𑒵𑒝𑒰𑒏 𑒣𑒰𑒞𑓂𑒩 𑒥𑒢𑒾𑒢𑒹 𑒩𑒯𑒻, 𑒖𑒃𑒮𑒿 𑒠𑒩𑒥𑒖𑓂𑒖𑒰𑒣𑒩 𑒣𑒯𑒳𑒿𑒔𑒪𑒰𑒣𑒩 𑒫𑒱𑒔𑒱𑒞𑓂𑒩 𑒮𑓂𑒟𑒞𑒱 𑒣𑒻𑒠𑒰 𑒯𑒼𑒃𑒞 𑒕𑒪। 𑒧𑒡𑒳𑒥𑒢𑒲-𑒠𑒩𑒦𑓀𑒑𑒰 𑒖𑒱𑒪𑒰𑒏 𑒮𑒾𑒦𑒰𑒑𑓂𑒨 𑒩𑒯𑒪 𑒖𑒹, 𑒖𑒹 𑒖𑒰𑒞𑒱 𑒮𑒧𑒰𑒖𑒏 𑒢𑒱𑒨𑒰𑒧𑒏 𑒩𑒯𑒪𑒰𑒯 𑒍𑒯𑒲 𑒖𑒰𑒞𑒱𑒏 𑒢𑒹𑒞𑒵𑒞𑓂𑒫𑒧𑒹 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒥𑒢𑒪 𑒩𑒯𑒋, 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒦𑒲𑒞𑒩 𑒥𑓂𑒩𑒰𑒯𑓂𑒧𑒝 𑒢𑒹𑒞𑒵𑒞𑓂𑒫 𑒁𑒡𑒱𑒏 𑒕𑒪। 𑒍𑒢𑒰 𑒮𑒦 𑒖𑒰𑒞𑒱𑒏 𑒥𑒲𑒔 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒣𑒯𑒳𑒿𑒔 𑒩𑒯𑒪। 𑒐𑒰𑒮 𑒏𑒋 𑒏𑓄 𑒐𑒖𑒾𑒪𑒲 𑒂𑒩𑒏𑓂𑒭𑒱𑒞 𑒦𑒹𑒢𑒹 𑒁𑒢𑒱𑒫𑒰𑒩𑓂𑒨𑒼 𑒦𑓄 𑒑𑒹𑒪 𑒩𑒯𑒻। 𑓑𑓙𑓕𑓕 𑒄.𑒏 𑒣𑒴𑒩𑓂𑒫 𑒥𑒱𑒯𑒰𑒩𑒏 𑒩𑒰𑒖𑒢𑒲𑒞𑒱𑒧𑒹 𑒖𑒰𑒞𑒱𑒏 𑒣𑓂𑒩𑒦𑒰𑒫 𑒢𑒑𑒝𑓂𑒨 𑒕𑒪 𑒧𑒳𑒠𑒰 𑒖𑒼𑒩 𑒣𑒏𑒛𑓃𑒋 𑒪𑒰𑒑𑒪। 𑒖𑒃𑒮𑒿 𑒫𑒩𑓂𑒑𑒲𑒨 𑒮𑓂𑒫𑒩𑒴𑒣 𑒢𑒻 𑒣𑒢𑒣𑒱 𑒖𑒰𑒞𑒲𑒨 𑒮𑓂𑒫𑒩𑒴𑒣 𑒣𑒢𑒣𑒱 𑒑𑒹𑒪। 𑒖𑒰𑒞𑒱-𑒖𑒰𑒞𑒱𑒏 𑒫𑒱𑒦𑒰𑒖𑒢 𑒦𑓄 𑒑𑒹𑒪। 𑒧𑒳𑒠𑒰 𑒂𑒖𑒰𑒠𑒲𑒏 𑒤𑒪 𑒋𑒞𑒹 𑒞𑒿 𑒦𑒃𑒨𑒹 𑒑𑒹𑒪 𑒕𑒪 𑒖𑒹 𑒮𑒦𑒏𑒹𑒿 𑒦𑒼𑒙𑒏 𑒁𑒡𑒱𑒏𑒰𑒩 𑒦𑒹𑒙 𑒑𑒹𑒪 𑒕𑒪𑒻। 𑒮𑒩𑒏𑒰𑒩𑒏 𑒥𑒲𑒔 𑒏𑒳𑒩𑓂𑒮𑒲 𑒣𑒙𑒏𑒰-𑒣𑒙𑒏𑒲 𑓑𑓙𑓖𑓒 𑒄.𑒮𑒿 𑒬𑒳𑒩𑒴 𑒦𑓄 𑒑𑒹𑒪 𑒕𑒪। 𑒋𑒧.𑒋𑒪.𑒋, 𑒋𑒧.𑒣𑒲.𑒏 𑒥𑒠𑒪𑒰-𑒥𑒠𑒪𑒲 𑒯𑒳𑒁𑒋 𑒪𑒰𑒑𑒪। 𑒂𑒧𑒖𑒢 𑒚𑒏𑒰𑒃𑒞 𑒩𑒯𑒪𑒰𑒯। 𑒚𑒏𑒰𑒃𑒞-𑒚𑒏𑒰𑒃𑒞 𑒋𑒞𑒹 𑒚𑒏𑒰 𑒑𑒹𑒪𑒰𑒯 𑒖𑒹 𑒑𑒰𑒧𑒏 𑒥𑒲𑒮 𑒥𑒲𑒒𑒰 𑒖𑒧𑒲𑒢𑒥𑒪𑒰𑒏𑒹𑒿 𑒥𑒹𑒙𑒲 𑒥𑒱𑒂𑒯𑒧𑒹 𑒖𑒧𑒲𑒢 𑒥𑒹𑒔𑒋 𑒣𑒛𑓃𑒋 𑒪𑒑𑒪𑒢𑒱! 𑒏𑓂𑒭𑒹𑒞𑓂𑒩𑒏 𑒫𑒱𑒏𑒰𑒮 𑒧𑒰𑒞𑓂𑒩 𑒩𑒴𑒏𑒥𑒹 𑒢𑒹 𑒏𑒋𑒪 𑒁𑒣𑒱𑒞𑒳 𑒣𑒰𑒕𑒴 𑒧𑒳𑒿𑒯𑒹𑒿 𑒮𑒮𑒩𑒋 𑒪𑒰𑒑𑒪। 𑒣𑒕𑒱𑒧𑒲 𑒏𑒼𑒮𑒲 𑒢𑒯𑒩, 𑒧𑒻𑒟𑒱𑒪𑒲 𑒦𑒰𑒭𑒰, 𑒖𑒧𑒲𑒢𑒏 𑒮𑒫𑒰𑒪 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒧𑒳𑒐𑓂𑒨 𑒧𑒳𑒠𑓂𑒠𑒰 𑒮𑒦 𑒠𑒱𑒢 𑒩𑒯𑒪। 𑒋𑒏 𑒠𑒱𑒮 𑒏𑒼𑒮𑒲 𑒢𑒯𑒩 𑒯𑒳𑒁𑒋 𑒞𑒹𑒏𑒩 𑒂𑒢𑓂𑒠𑒼𑒪𑒢! 𑒞𑒿 𑒠𑒼𑒮𑒩 𑒠𑒱𑒮 𑒢𑒻 𑒯𑒳𑒁𑒋 𑒞𑒹𑒏𑒩 𑒂𑒢𑓂𑒠𑒼𑒪𑒢! 𑒦𑒴𑒠𑒰𑒢𑒲 𑒂𑒢𑓂𑒠𑒼𑒪𑒢 𑒁𑒣𑒢 𑒮𑓂𑒫𑒩𑒴𑒣 𑒥𑒱𑒑𑒰𑒛𑓃𑒱 𑒣𑒰𑒃𑒏 𑒁𑒛𑓂𑒛𑒰 𑒥𑒢𑒱 𑒑𑒹𑒪, 𑒖𑒃𑒮𑒿 𑒧𑒰𑒧𑒱𑒪𑒰 𑒂𑒩𑒼 𑒍𑒗𑒩𑒰 𑒑𑒹𑒪। 𑒍𑒗𑒩𑒰 𑒄 𑒑𑒹𑒪 𑒖𑒹 𑒋𑒏-𑒋𑒏 𑒖𑒧𑒲𑒢𑒏𑒹𑒿 𑒞𑒲𑒢-𑒞𑒲𑒢 𑒑𑒼𑒙𑒹𑒏𑒹𑒿 𑒣𑒩𑓂𑒔𑒰 𑒦𑒹𑒙𑒪। 𑒖𑒃𑒮𑒿 𑒖𑒧𑒲𑒢𑒥𑒪𑒰𑒏 𑒗𑒑𑒛𑓃𑒰 𑒖𑒧𑒲𑒢 𑒪𑒹𑒢𑒱𑒯𑒰𑒩𑒼𑒏 𑒥𑒲𑒔 𑒤𑒿𑒮𑒱 𑒑𑒹𑒪। 𑒣𑓂𑒩𑒬𑒰𑒮𑒢𑒏 𑒮𑓂𑒟𑒱𑒞𑒱 𑒍𑒯𑒢𑒹 𑒕𑒪 𑒖𑒹 𑒋𑒏𑒕𑒰𑒯𑒰 𑒥𑒴𑒗𑒱 𑒣𑒛𑓃𑒻। 𑒥𑒹𑒩𑒧𑒰𑒏 𑒖𑒹 𑒏𑒧𑓂𑒨𑒳𑒢𑒱𑒮𑓂𑒙 𑒫𑒱𑒩𑒼𑒡𑒲 𑒩𑒯𑒟𑒱, 𑒢𑒧𑒯𑒩 𑒮𑒰𑒿𑒮 𑒕𑒼𑒛𑓃𑒪𑒢𑒱। 𑒖𑒯𑒱𑒢𑒰 𑒁𑒛𑓃𑒢𑒰 𑒣𑒰𑒛𑓃𑒰 𑒧𑒳𑒃𑒢𑒹 𑒢𑒜𑓃𑒱𑒨𑒰 𑒮𑒦 𑒮𑒰𑒿𑒗𑒴 𑒣𑒯𑒩𑒏𑒹𑒿 𑒜𑒼𑒪 𑒥𑒖𑒰-𑒥𑒖𑒰 𑒢𑒔𑒻𑒋 𑒞𑒯𑒱𑒢𑒰 𑒮𑒰𑒿𑒮 𑒕𑒼𑒛𑓃𑒱 𑒢𑒰𑒔𑒋 𑒪𑒑𑒪𑒰𑒯। 𑒪𑒴𑒙𑒰-𑒪𑒳𑒙𑒲 𑒖𑒼𑒩 𑒣𑒏𑒛𑓃𑒪𑒏। 𑒑𑒰𑒧𑒧𑒹 𑒐𑒹𑒞𑒏 𑒖𑒖𑒰𑒞𑒏 (𑒞𑒩𑒏𑒰𑒩𑒲, 𑒁𑒢𑓂𑒢, 𑒤𑒪) 𑒔𑒼𑒩𑒱 𑒥𑒜𑓃𑒪। 𑒍𑒢𑒰 𑒞𑒃𑒮𑒿 𑒣𑒴𑒩𑓂𑒫 𑒔𑒼𑒩𑒱𑒮𑒿 𑒑𑒰𑒧 𑒋𑒞𑒹 𑒂𑒏𑓂𑒩𑒰𑒢𑓂𑒞 𑒩𑒯𑒻𑒞 𑒕𑒪 𑒖𑒹 𑒖𑒥𑒩𑒠𑒮 𑒮𑒧𑒮𑓂𑒨𑒰 𑒩𑒯𑒻, 𑒧𑒳𑒠𑒰 𑒮𑓀𑒏𑓂𑒭𑒹𑒣𑒧𑒹 𑒋𑒏 𑒑𑒼𑒙𑒹𑒏𑒹𑒿 𑒑𑒰𑒕𑒧𑒹 𑒙𑒰𑒿𑒑𑒱 𑒂 𑒠𑒼𑒮𑒩 𑒑𑒼𑒙𑒹𑒏𑒹𑒿 𑒮𑒰𑒧𑒴𑒯𑒱𑒏 𑒧𑒰𑒩𑒱 𑒖𑒐𑒢 𑒣𑒛𑓃𑒪 𑒞𑒯𑒱𑒨𑒹𑒮𑒿 𑒔𑒼𑒩𑒱𑒧𑒹 𑒏𑒧𑒲 𑒂𑒋𑒪। 𑒍𑒢𑒰 𑒔𑒼𑒩𑒱𑒏 𑒩𑓀𑒑-𑒩𑒴𑒣 𑒥𑒠𑒪𑒢𑒹 𑒔𑒼𑒩𑒏 𑒏𑒧𑒲 𑒢𑒻 𑒦𑒹𑒪 𑒧𑒳𑒠𑒰 𑒩𑓀𑒑-𑒩𑒴𑒣 𑒥𑒠𑒪𑒢𑒹 𑒪𑒼𑒏 𑒚𑒏𑒹𑒥𑒹 𑒏𑒩𑒞। 𑒔𑒰𑒯𑒹 𑒣𑒱𑒞𑒩𑒱𑒨𑒰 𑒮𑒼𑒢𑒰 𑒯𑒼𑒃 𑒂𑒏𑒱 𑒋𑒏𑒏 𑒞𑒲𑒢। 𑒖𑒧𑒲𑒢𑒏 𑒪𑒛𑓃𑒰𑒃 𑒅𑒚𑒢𑒹 𑒖𑒹 𑒖𑒞𑓂𑒞𑒻 𑒩𑒯𑒋 𑒮𑒹 𑒞𑒞𑒻𑒮𑒿 𑒥𑒢𑓂𑒮𑒲 𑒣𑒰𑒟𑒱 𑒠𑒹𑒪𑒏। 𑒗𑓀𑒗𑒰𑒩𑒣𑒳𑒩𑒏 𑒪𑒏𑓂𑒭𑓂𑒧𑒲𑒏𑒰𑒢𑓂𑒞 𑒩𑒰𑒧𑒰𑒏𑒢𑓂𑒞 𑒠𑒳𑒢𑒴 𑒦𑒰𑒿𑒃 𑒕𑒟𑒱। 𑒋𑒏 𑒦𑒰𑒿𑒃𑒏 𑒯𑒱𑒮𑓂𑒮𑒰 𑒏𑒵𑒭𑓂𑒝 𑒔𑒢𑓂𑒠𑓂𑒩 𑒗𑒰 (𑒏𑒻𑒪𑒴 𑒧𑒰𑒮𑓂𑒙𑒩) 𑒪𑒹𑒪𑒢𑒱 𑒠𑒼𑒮𑒩 𑒯𑒱𑒮𑓂𑒮𑒰 𑒥𑒻𑒖𑒢𑒰𑒟 𑒧𑒝𑓂𑒛𑒪 𑒪𑒹𑒪𑒢𑒱। 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒧𑒯𑒰𑒠𑒹𑒫𑒮𑒿 𑒥𑒙𑒰𑒃𑒠𑒰𑒩𑒲 𑒏𑒹𑒮 𑒏𑒩𑒥𑒾𑒢𑒹 𑒕𑒪। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒁𑒙𑓂𑒚𑒰𑒃𑒮𑒼 𑒧𑒳𑒠𑒰𑒪𑒯𑒏 𑒮𑓀𑒑 𑒁𑒙𑓂𑒚𑒰𑒃𑒮𑒙𑒰 𑒑𑒥𑒰𑒯 𑒪𑓄 𑒏𑓄 𑒖𑒧𑒰𑒢𑒞 𑒏𑒩𑒥𑒋 𑒋𑒏 𑒠𑒱𑒢 𑒣𑒯𑒱𑒢𑒹 𑒑𑒹𑒪𑒰। 𑒏𑒱𑒨𑒼-𑒏𑒱𑒨𑒼 𑒮𑒰𑒃𑒏𑒱𑒪𑒮𑒿 𑒖𑒰𑒃 𑒕𑒪, 𑒮𑒹𑒯𑒼 𑒩𑒰𑒐𑒱 𑒠𑒹𑒪𑒏 𑒖𑒹 𑒖𑒿 𑒦𑒲𑒞𑒩 𑒖𑒰𑒋 𑒣𑒛𑓃𑒞 𑒞𑒿 𑒮𑒰𑒃𑒏𑒱𑒪 𑒖𑒣𑒰𑒪 𑒦𑓄 𑒖𑒰𑒋𑒞। 𑒖𑒿 𑒟𑒰𑒢𑒰 𑒑𑒹𑒪 𑒞𑒿 𑒣𑒹𑒬𑒹𑒫𑒩 𑒧𑒢𑒳𑒏𑓂𑒐𑒏 𑒑𑒞𑒱 𑒯𑒹𑒥𑒹 𑒏𑒩𑒞𑒻। 𑒣𑒯𑒱𑒪𑒹 𑒠𑒱𑒢, 𑒑𑒰𑒧𑒮𑒿 𑒢𑒱𑒏𑒪𑒪𑒰 𑒣𑒕𑒰𑒞𑒱 𑒥𑒻𑒖𑒢𑒰𑒟 𑒧𑒝𑓂𑒛𑒪 𑒯𑒪𑓂𑒪𑒰 𑒅𑒚𑒾𑒪𑒏, 𑒋𑒏𑒙𑒰 𑒪𑒱𑒤𑒰𑒤 𑒢𑒹𑒢𑒹 𑒔𑒱𑒙𑓂𑒚𑒲 𑒑𑒰𑒧𑒧𑒹 𑒠𑒹𑒐𑒾𑒪𑒏 𑒖𑒹 𑒏𑒻𑒪𑒴 𑒧𑒰𑒮𑓂𑒙𑒩𑒏 𑒥𑒹𑒙𑒰 𑒯𑒧𑒩𑒰 𑒧𑒰𑒋-𑒥𑒯𑒱𑒢𑒏𑒹𑒿 𑒑𑒰𑒱𑒩 𑒪𑒱𑒐 𑒏𑓄 𑒣𑒚𑒰 𑒠𑒹𑒪𑒏 𑒯𑒹𑒿। 𑒍𑒢𑒰 𑒁𑒐𑒢𑒼 𑒡𑒩𑒱 𑒔𑒱𑒙𑓂𑒚𑒲 𑒠𑒹𑒐𑒻𑒏 𑒧𑒾𑒏𑒰 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒏𑒹𑒿 𑒢𑒻 𑒦𑒹𑒙𑒪𑒢𑒱। 𑒍𑒢𑒰 𑒠𑒳𑒢𑒴 𑒑𑒼𑒙𑒹𑒏 𑒦𑒲𑒞𑒩𑒱𑒨𑒰 𑒃𑒔𑓂𑒕𑒰 𑒖𑒹 𑒮𑒼𑒪𑒯𑒼 𑒂𑒢𑒰 𑒯𑒳𑒁𑒋। 𑒋𑒏 𑒑𑒼𑒙𑒹 𑒖𑒥𑒳𑒩𑒱𑒨𑒰 𑒏𑒩𑒥𑒻𑒏 𑒤𑒱𑒩𑒰𑒏𑒧𑒹 𑒠𑒼𑒮𑒩 𑒑𑒼𑒙𑒹 𑒥𑒪𑒖𑒼𑒩𑒲 𑒏𑒥𑓂𑒖𑒰 𑒏𑒩𑒻𑒏 𑒤𑒹𑒩𑒧𑒹। 𑒧𑒯𑒰𑒠𑒹𑒫 𑒧𑒝𑓂𑒛𑒪𑒏 𑒥𑒙𑒰𑒃𑒏𑒹𑒿 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒩𑒼𑒏𑒱 𑒠𑒹𑒪𑒢𑒱। 𑒩𑒼𑒏𑒻𑒏 𑒏𑒰𑒩𑒝 𑒥𑒻𑒖𑒢𑒰𑒟 𑒧𑒝𑓂𑒛𑒪𑒏 𑒖𑒹𑒚 𑒦𑒰𑒨 𑒧𑒯𑒰𑒠𑒹𑒫 𑒧𑒝𑓂𑒛𑒪। 𑒍𑒯𑒲 𑒣𑒩𑒱𑒫𑒰𑒩𑒏 𑒪𑒹𑒪 𑒢𑒹 𑒖𑒹 𑒏𑒲𑒢𑒱𑒨𑒹 𑒪𑒹𑒪𑒏। 𑒁𑒑𑒱𑒪𑒑𑓂𑒑𑒲 𑒏𑒹𑒮𑒏 𑒖𑒧𑒰𑒢𑒞 𑒏𑒩𑒰 𑒑𑒰𑒧 𑒣𑒯𑒳𑒿𑒔𑒱𑒞𑒹 𑒏𑒱𑒕𑒳 𑒑𑒼𑒙𑒹 𑒥𑒰𑒖𑒪 𑒖𑒹 𑒏𑒻𑒪𑒴 𑒧𑒰𑒮𑓂𑒙𑒩𑒏 𑒥𑒹𑒙𑒰𑒏𑒹𑒿 𑒥𑒻𑒖𑒢𑒰𑒟 𑒧𑒰𑒩𑒥𑒼 𑒏𑒹𑒪𑒏 𑒂 𑒣𑒏𑒛𑓃𑒱 𑒏𑓄 𑒠𑒩𑒥𑒖𑓂𑒖𑒰𑒣𑒩 𑒩𑒐𑒢𑒾𑓀 𑒁𑒕𑒱। 𑒏𑒱𑒕𑒳𑒋 𑒏𑒰𑒪 𑒣𑒕𑒰𑒞𑒱 𑒏𑒻𑒪𑒴 𑒧𑒰𑒮𑓂𑒙𑒩 𑒮𑒯𑒰𑒋𑒥𑒏 𑒥𑒯𑒱𑒢 𑒖𑒹 𑒖𑒲𑒫𑒱𑒞𑒹 𑒕𑒟𑒱, 𑒛𑒰𑒿𑒛𑓃𑒏 𑒂𑒣𑒩𑒹𑒬𑒢 𑒦𑒹𑒪 𑒕𑒢𑓂𑒯𑒱, 𑒞𑒃𑒮𑒿 𑒖𑒿 𑒥𑓂𑒩𑒹𑒢 𑒣𑓂𑒩𑒦𑒰𑒫𑒱𑒞 𑒦𑓄 𑒑𑒹𑒪 𑒞𑒹𑒏𑒩 𑒞𑒿 𑒢𑒻 𑒧𑒳𑒠𑒰 𑒖𑒿 𑒢𑒲𑒏 𑒯𑒼𑒢𑓂𑒯𑒱 𑒞𑒿 𑒧𑒳𑒐𑒾𑒞𑒩𑒲 𑒦𑓄 𑒖𑒰𑒋, 𑒂𑒥𑒱 𑒏𑒯𑒪𑒢𑒱 𑒖𑒹 𑒥𑒻𑒖𑒢𑒰𑒟 𑒯𑒧𑒩𑒰 𑒦𑒰𑒞𑒱𑒖𑒏𑒹𑒿 𑒧𑒰𑒩𑒥𑒼 𑒏𑒹𑒪𑒏 𑒂 𑒣𑒏𑒛𑓃𑒱 𑒏𑓄 𑒩𑒐𑒢𑒹 𑒁𑒕𑒱 𑒮𑒹 𑒏𑒯𑒏 𑒕𑒼𑒛𑓃𑒱 𑒠𑒃𑒪𑒹। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒑𑒹𑒪𑒰, 𑒏𑒯𑒪𑒢𑒱, 𑒍 𑒕𑒼𑒛𑓃𑒱 𑒠𑒹𑒪𑒏𑒻। 𑒍 𑒒𑒙𑒢𑒰 𑓓𑓐𑓗 𑒏 𑒩𑒴𑒣𑒧𑒹 𑒅𑒚𑒪। 𑒏𑒻𑒪𑒴 𑒧𑒰𑒮𑓂𑒙𑒩 𑒞𑒲𑒢𑒴 𑒦𑒰𑒿𑒃 𑒧𑒯𑒰𑒠𑒹𑒫𑒏𑒹𑒿 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪, 𑒩𑒰𑒧𑒰𑒫𑒞𑒰𑒩 𑒩𑒰𑒅𑒞 𑒂 𑒮𑒞 𑒢𑒰𑒩𑒰𑒨𑒝 𑒩𑒰𑒅𑒞𑒏𑒹𑒿 𑒧𑒳𑒠𑒰𑒪𑒯 𑒏𑓄 𑒠𑒹𑒪𑒢𑒱, 𑒍𑒃 𑒏𑒹𑒮𑒧𑒹 𑒮𑒖𑒰 𑒦𑒹𑒪𑒢𑒱 𑒖𑒹 𑒯𑒰𑒃𑒏𑒼𑒙𑒮𑒿 𑒤𑒛𑓃𑒱𑒂𑒋𑒪। 𑒫𑒲𑒩𑒹𑒢𑓂𑒠𑓂𑒩𑒹 𑒖𑒲 (𑒧𑒰𑒢𑒢𑒲𑒨 𑒢𑓂𑒨𑒰𑒨𑒧𑒴𑒩𑓂𑒞𑒱, 𑒣𑒙𑒢𑒰 𑒯𑒰𑒄 𑒏𑒼𑒩𑓂𑒙𑒧𑒹 𑒕𑒟𑒱।) 𑒏𑒰𑒖 𑒏𑒹𑒢𑒹 𑒩𑒯𑒟𑒱। 𑒏𑒻𑒪𑒴 𑒧𑒰𑒮𑓂𑒙𑒩 𑒮𑒯𑒰𑒋𑒥𑒏 𑒒𑒙𑒢𑒰𑒏 𑒣𑓂𑒩𑒦𑒰𑒫 𑒮𑒦𑒮𑒿 𑒥𑒹𑒮𑒲 𑒠𑒳𑒩𑓂𑒑𑒰 𑒮𑓂𑒟𑒰𑒢𑒣𑒩 𑒣𑒛𑓃𑒪𑒢𑒱। 𑒬𑒳𑒩𑒴𑒏 𑒥𑒻𑒔𑒧𑒹 𑒏𑒻𑒪𑒴𑒍 𑒧𑒰𑒮𑓂𑒙𑒩 𑒮𑒯𑒰𑒋𑒥, 𑒩𑒰𑒧𑒰𑒫𑒞𑒰𑒩𑒼 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑓀𑒑𑒹-𑒮𑓀𑒑𑒹 𑒔𑓀𑒠𑒰 𑒏𑒩𑒋 𑒖𑒰𑒟𑒱; 𑒠𑒳𑒩𑓂𑒑𑒰 𑒮𑓂𑒟𑒰𑒢𑒏 𑒥𑒹𑒫𑒮𑓂𑒟𑒰 𑒏𑒩𑒟𑒱। 𑒦𑒪𑒯𑒱𑓀 𑒍 𑒁𑒣𑒢𑒰 𑒦𑒑𑒫𑒞𑒲𑒏𑒹𑒿 𑒏𑒯𑒟𑒱𑒢 𑒖𑒹 𑒠𑒳𑒬𑓂𑒧𑒢𑒏𑒹𑒿 𑒮𑒰𑓀𑒑𑒱 𑒏𑒩𑒱𑒨𑒯 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒁𑒣𑒢𑒰 𑒦𑒑𑒫𑒞𑒲𑒏𑒹𑒿 𑒫𑒋𑒯 𑒥𑒰𑒞 𑒏𑒯𑒟𑒱𑒢। 𑒣𑒢𑒩𑒯 𑒥𑒩𑓂𑒐𑒏 𑒣𑒕𑒰𑒞𑒱 𑒍𑒯𑒼 (𑒏𑒻𑒪𑒴 𑒧𑒰𑒮𑓂𑒙𑒩 𑒮𑒯𑒰𑒋𑒥) 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒂 𑒩𑒰𑒧𑒰𑒫𑒞𑒰𑒩 𑒁𑒑𑒱𑒪𑒰 𑒣𑒲𑒜𑓃𑒲𑒏𑒹𑒿 𑒮𑒳𑒧𑒗𑒰 𑒠𑒹𑒪𑒐𑒱𑒢। 𑒪𑒏𑓂𑒭𑓂𑒧𑒲𑒏𑒰𑒢𑓂𑒞𑒥𑒪𑒰 𑒖𑒧𑒲𑒢𑒏 𑒔𑒾𑒟𑒰𑒃𑒮𑒿 𑒁𑒡𑒱𑒨𑒰 𑒠𑒰𑒧𑒧𑒹 𑒢𑒱𑒏𑒪𑒱 𑒑𑒹𑒪𑒢𑒱, 𑒏𑒱𑒕𑒳 𑒃𑒧𑓂𑒯𑒩𑒼-𑒂𑒧𑓂𑒯𑒩𑒼 𑒦𑒹𑒪, 𑒪𑒴𑒙𑒧𑒹 𑒔𑒩𑒐𑒰 𑒢𑒤𑒰। 𑒋𑒏 𑒑𑒼𑒙𑒹 𑒩𑒖𑒱𑒮𑓂𑒙𑓂𑒩𑒲 𑒂𑒹𑒤𑒱𑒮𑒧𑒹 𑒧𑒳𑓀𑒬𑒲𑒨𑒰𑒑𑒩𑒲 𑒏𑒩𑒻 𑒕𑒪𑒰, 𑒯𑒠𑒫𑓀𑒠𑒲𑒏 𑒢𑒏𑒪 𑒪𑓄 𑒢𑒹𑒢𑒹 𑒩𑒯𑒟𑒱। 𑒥𑒱𑒏𑓂𑒩𑒲𑒏 𑒮𑒳𑒢𑒱-𑒑𑒳𑒢𑒱 𑒣𑒥𑒱𑒞𑒹 𑒱𑒫𑒩𑒼𑒡 𑒏𑓄 𑒠𑒻𑒟𑒱 𑒂 𑒞𑒩𑒹𑒞𑒩 𑒗𑒰𑒛𑓃𑒱 𑒪𑒻𑒟𑒱। 𑒑𑒰𑒧𑒏 𑒖𑒧𑒲𑒢 𑒑𑒾𑒂𑒿𑒏 𑒯𑒰𑒟 𑒂𑒋𑒪। 𑒏𑒹𑒮-𑒧𑒳𑒏𑒠𑒧𑒰 𑒮𑒼𑒪𑒯 𑒏𑓄 𑒮𑒧𑒰𑒣𑓂𑒞 𑒦𑒹𑒪। 𑒪𑒏𑓂𑒭𑓂𑒧𑒲𑒏𑒰𑒢𑓂𑒞 𑒮𑒰𑒯𑒳𑒏 𑒖𑒧𑒲𑒢𑒏 𑒪𑒛𑓃𑒰𑒃𑒏 𑒣𑒬𑓂𑒔𑒰𑒞 𑒂𑒢𑓂𑒠𑒼𑒪𑒢𑒏 𑒩𑒴𑒣𑒧𑒹 𑒢𑒹 𑒖𑒧𑒲𑒢𑓂𑒠𑒰𑒩 𑒕𑒪𑒰𑒯 𑒂 𑒢𑒹 𑒪𑒛𑓃𑒰𑒃 𑒅𑒚𑒪। 𑒂𑒢-𑒂𑒢 𑒖𑒧𑒲𑒢𑓂𑒠𑒰𑒩 𑒖𑒧𑒲𑒢 𑒥𑒹𑒔𑒱 𑒏𑓄 𑒣𑒯𑒱𑒢𑒯𑒱𑒨𑒹𑒿 𑒔𑒪𑒱 𑒑𑒹𑒪 𑒕𑒪𑒰, 𑒐𑒰𑒪𑒲 𑒪𑒏𑓂𑒭𑓂𑒧𑒱𑒨𑒹𑒏𑒰𑒢𑓂𑒞-𑒩𑒧𑒰𑒏𑒰𑒢𑓂𑒞 𑒥𑒿𑒔𑒪 𑒩𑒯𑒱 𑒑𑒹𑒪 𑒕𑒪𑒰। 𑒮𑒹𑒯𑒼 𑒦𑒃𑒨𑒹 𑒑𑒹𑒪।
𑒦𑒴𑒠𑒰𑒢𑒲 𑒂𑒢𑓂𑒠𑒼𑒪𑒢- 𑒥𑒹𑒩𑒧𑒰𑒧𑒹 𑒦𑒴𑒠𑒰𑒢𑒲 𑒂𑒢𑓂𑒠𑒼𑒪𑒢 𑒞𑒹𑒢𑒰𑒯𑒹 𑒖𑒏𑒰𑒿 𑒦𑒹𑒪। 𑒏𑒰𑒩𑒝 𑒖𑒹 𑒖𑒃 𑒮𑒧𑒋 𑒦𑒴𑒠𑒰𑒢𑒏 𑒖𑒧𑒲𑒢 𑒠𑒹𑒪 𑒑𑒹𑒪 𑒍𑒃 𑒮𑒧𑒋 𑒥𑒹𑒩𑒧𑒰𑒧𑒹 𑒞𑒹𑒯𑒹𑒢 𑒖𑒧𑒲𑒢𑒥𑒪𑒰 𑒢𑒯𑒱𑒨𑒹 𑒕𑒪𑒰। 𑒋𑒏𑒙𑒰 𑒣𑒩𑒱𑒫𑒰𑒩 𑒕𑒪, 𑒍 𑒕𑒪 𑒑𑒚𑒩𑒲 𑒗𑒰𑒏 𑒣𑒩𑒱𑒫𑒰𑒩। 𑒑𑒚𑒩𑒲 𑒗𑒰𑒏𑒹𑒿 𑒣𑒝𑓂𑒛𑒱𑒞𑒰𑒃𑒧𑒹 𑒪𑒰𑒐𑒹 𑒩𑒰𑒖-𑒥𑓂𑒩𑒯𑓂𑒧𑒼𑒞𑓂𑒞𑒩 𑒏𑓄 𑒏𑓄 𑒖𑒧𑒲𑒢 𑒦𑒹𑒙𑒪 𑒩𑒯𑒢𑒱 𑒧𑒳𑒠𑒰 𑒍 𑒖𑒧𑒲𑒢 𑒥𑒹𑒩𑒧𑒰 𑒑𑒰𑒧𑒧𑒹 𑒢𑒻 𑒑𑒰𑒧𑒮𑒿 𑒥𑒰𑒯𑒩 𑒕𑒪𑒢𑒱। 𑒧𑒰𑒪𑒱𑒏-𑒧𑒪𑒱𑒏𑒰𑒢𑒏 𑒑𑒰𑒧 𑒥𑒹𑒩𑒧𑒰, 𑒖𑒃𑒮𑒿 𑒦𑒴𑒠𑒰𑒢𑒧𑒹 𑒏𑒧 𑒖𑒧𑒲𑒢 𑒠𑒹𑒪 𑒑𑒹𑒪। 𑒞𑒯𑒴𑒧𑒹 𑒥𑒿𑒙𑒥𑒰𑒩𑒰 𑒯𑒼𑒃𑒮𑒿 𑒣𑒴𑒩𑓂𑒫𑒹 𑒍 𑒮𑒦 𑒥𑒹𑒔𑒱-𑒥𑒱𑒏𑒲𑒢 𑒢𑒹𑒢𑒹 𑒕𑒪𑒰𑒯। 𑒞𑒃 𑒮𑓀𑒑 𑒄𑒯𑒼 𑒦𑒹𑒪 𑒖𑒹 𑒞𑒹𑒯𑒹𑒢-𑒞𑒹𑒯𑒹𑒢 𑒏𑒰𑒩𑓂𑒨𑒏𑒩𑓂𑒞𑓂𑒞𑒰𑒏𑒹𑒿 𑒖𑒧𑒲𑒢𑒏 𑒮𑒥𑒴𑒞 𑒂 𑒥𑒿𑒙𑒻𑒏 𑒦𑒰𑒩 𑒠𑒹𑒪 𑒑𑒹𑒪𑒢𑒱 𑒖𑒹 𑒍 𑒮𑒦 𑒂𑒩𑒼 𑒛𑒳𑒥𑒰 𑒠𑒹𑒪𑒢𑒱। 𑒋𑒏-𑒋𑒏 𑒖𑒧𑒲𑒢𑒏 𑒮𑒥𑒴𑒞 𑒞𑒲𑒢-𑒞𑒲𑒢 𑒑𑒼𑒙𑒹𑒏𑒹𑒿 𑒖𑒱𑒪𑒰 𑒏𑒰𑒩𑓂𑒨𑒰𑒪𑒨𑒧𑒹 𑒦𑒹𑒙 𑒑𑒹𑒪। 𑒋𑒏 𑒞𑒿 𑒍𑒯𑒱𑒢𑒰 𑒏𑒧𑒖𑒼𑒩 𑒂𑒠𑒧𑒲𑒏𑒹𑒿 𑒅𑒚𑒥𑒻𑒏 𑒂𑒢𑓂𑒠𑒼𑒪𑒢 𑒕𑒪, 𑒧𑒳𑒠𑒰 𑒮𑒥𑒴𑒞𑒏 𑒍𑒗𑒩𑒲 𑒞𑒹𑒯𑒹𑒢 𑒍𑒗𑒩𑒲 𑒪𑒑𑒰 𑒠𑒹𑒪𑒏 𑒖𑒹 𑒏𑒼𑒢𑒼 𑒪𑒰𑒦 𑒏𑒱𑒢𑒏𑒼 𑒢𑒻 𑒦𑒹𑒪𑒢𑒱। 𑒖𑒿 𑒟𑒼𑒛𑓃-𑒟𑒰𑒛𑓃 𑒏𑒱𑒕𑒳 𑒦𑒹𑒥𑒹 𑒏𑒹𑒪𑒢𑒱 𑒞𑒿 𑒍𑒃𑒮𑒿 𑒮𑒧𑒮𑓂𑒨𑒰𑒏 𑒮𑒧𑒰𑒡𑒰𑒢 𑒟𑒼𑒛𑓃𑒹 𑒦𑓄 𑒣𑒥𑒻𑒞, 𑒦𑒴𑒠𑒰𑒢𑒲 𑒂𑒢𑓂𑒠𑒼𑒪𑒢𑒮𑒿 𑒞𑒿 𑒞𑒹𑒯𑒹𑒢 𑒪𑒰𑒦 𑒢𑒯𑒱𑒨𑒹 𑒦𑒹𑒪 𑒧𑒳𑒠𑒰 𑒥𑒮𑒻𑒥𑒪𑒰 𑒒𑒩𑒰𑒛𑓃𑒲𑒏 𑒖𑒧𑒲𑒢𑒏 𑒮𑒧𑒮𑓂𑒨𑒰 𑒖𑒩𑒴𑒩 𑒯𑒪 𑒦𑓄 𑒑𑒹𑒪। 𑒞𑒹𑒏𑒩 𑒏𑒰𑒩𑒝 𑒦𑒹𑒪 𑒖𑒹 𑒋𑒏 𑒠𑒱𑒮 𑒂𑒧 𑒖𑒧𑒲𑒢, 𑒠𑒼𑒮𑒩 𑒪𑒏𑓂𑒭𑓂𑒧𑒲𑒏𑒰𑒢𑓂𑒞 𑒥𑒪𑒰, 𑒞𑒹𑒮𑒩 𑒋𑒏 𑒑𑒼𑒙𑒹 (𑒑𑓀𑒑𑒰𑒩𑒰𑒧/𑒦𑒼𑒪𑒰 𑒩𑒰𑒧 𑒧𑒝𑓂𑒛𑒪) 𑒑𑓀𑒖 𑒣𑒩𑒏 𑒕𑒪𑒰𑒯 𑒯𑒳𑒢𑒏𑒼 𑒕𑒱𑒢𑒰 𑒑𑒹𑒪। 𑒞𑒃 𑒮𑓀𑒑 𑒁𑒣𑒢𑒼 𑒕𑒪𑒢𑒱 𑒂 𑒏𑒱𑒕𑒳 𑒑𑒼𑒙𑒹 𑒏𑒱𑒢𑒥𑒼 𑒏𑒹𑒪𑒢𑒱। 𑒪𑒏𑓂𑒭𑓂𑒧𑒲𑒏𑒰𑒢𑓂𑒞, 𑒩𑒧𑒰𑒏𑒰𑒢𑓂𑒞𑒏 𑒪𑒛𑓃𑒰𑒃𑒏 𑒥𑒲𑒔𑒹𑒧𑒹 𑒋𑒏𑒙𑒰 𑒠𑒼𑒮𑒩 𑒗𑓀𑒗𑒙 𑒚𑒰𑒜𑓃 𑒦𑓄 𑒑𑒹𑒪। 𑒕𑒼𑒙-𑒕𑒲𑒢 𑒧𑒳𑒠𑓂𑒠𑒰 𑒢𑒧𑒯𑒩 𑒥𑒢𑒱 𑒑𑒹𑒪। 𑒍 𑒋𑒢𑒰 𑒦𑒹𑒪-𑒮𑒞𑒠𑒹𑒫 𑒗𑒰 𑒢𑒰𑒧𑒏 𑒋𑒏 𑒑𑒼𑒙𑒹 𑒥𑒹𑒩𑒧𑒰𑒧𑒹। 𑒬𑒳𑒩𑒴𑒧𑒹 𑒧𑒰𑒢𑒹 𑒖𑒳𑒂𑒢𑒲 𑒁𑒫𑒮𑓂𑒟𑒰𑒧𑒹 𑒁𑒣𑒩𑒰𑒡𑒱𑒏 𑒣𑓂𑒩𑒫𑒵𑒞𑓂𑒞𑒱𑒏 𑒕𑒪𑒰𑒯, 𑒖𑒹 𑒔𑒰𑒪𑒲𑒮 𑒥𑒩𑓂𑒐𑒮𑒿 𑒆𑒣𑒩𑒏 𑒦𑒹𑒪𑒰 𑒞𑒐𑒢 𑒑𑒰𑒧 𑒕𑒼𑒛𑓃𑒱 𑒏𑒪𑒏𑒞𑓂𑒞𑒰 𑒑𑒹𑒪𑒰𑒯। 𑒬𑒳𑒩𑒴𑒧𑒹 𑒧𑒼𑒙𑒱𑒨𑒰 𑒮𑒦 𑒮𑓀𑒑 𑒧𑒼𑒙𑒱𑒨𑒰𑒑𑒱𑒩𑒲 𑒏𑒹𑒪𑒢𑒱। 𑒏𑒱𑒕𑒳 𑒮𑒰𑒪 𑒣𑒕𑒰𑒞𑒱 𑒥𑒻𑒙𑓂𑒩𑒲 (𑒁𑒧𑒹𑒩𑒱𑒏𑒢 𑒏𑒧𑓂𑒣𑒢𑒲, 𑒋𑒫𑒩𑒹𑒛𑒲) 𑒤𑒻𑒏𑓂𑒙𑒩𑒲𑒏 𑒔𑒱𑒧𑒢𑒲𑒏 𑒏𑒰𑒖 𑒦𑒹𑒪𑒢𑒱। 𑒫𑒱𑒠𑒹𑒬𑒲 𑒏𑒧𑓂𑒣𑒢𑒲 𑒩𑒯𑒢𑒹 𑒢𑒲𑒏 𑒠𑒩𑒧𑒰𑒯𑒰 𑒦𑒹𑒙𑒪𑒢𑒱। 𑒫𑒋𑒯 𑒖𑒐𑒢 𑒩𑒱𑒙𑒰𑒨𑒩 𑒏𑓄 𑒑𑒰𑒧 𑒋𑒪𑒰𑒯 𑒞𑒿 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒮𑓀𑒑 𑒅𑒪𑒗𑒱 𑒢𑒧𑒯𑒩 𑒫𑒱𑒫𑒰𑒠 𑒚𑒰𑒜𑓃 𑒏𑓄 𑒠𑒹𑒪𑒢𑒱। 𑒦𑒹𑒪 𑒄 𑒖𑒹 𑒮𑒞𑒠𑒹𑒫 𑒗𑒰𑒏𑒹𑒿 𑒥𑒹𑒙𑒰 𑒢𑒻 𑒦𑒹𑒪𑒢𑒱। 𑒱𑒮𑒩𑓂𑒤 𑒋𑒏𑒙𑒰 𑒥𑒹𑒙𑒱𑒨𑒹 𑒙𑒰 𑒦𑒹𑒪 𑒕𑒪𑒢𑒱। 𑒑𑒩𑒲𑒥𑒲𑒏 𑒔𑒪𑒻𑒞 𑒥𑒹𑒙𑒲𑒏 𑒫𑒱𑒂𑒯 𑒥𑒹𑒮𑒾𑒯 𑒪𑒛𑓃𑒏𑒰𑒏 𑒮𑓀𑒑 𑒏𑒹𑒪𑒢𑒱। 𑒠𑒴 𑒮𑒢𑓂𑒞𑒰𑒢𑒏 𑒣𑒕𑒰𑒞𑒱 𑒖𑒧𑒰𑒋 𑒧𑒩𑒱 𑒑𑒹𑒪𑒐𑒱𑒢। 𑒁𑒣𑒢𑒼 𑒣𑒩𑒱𑒫𑒰𑒩 𑒕𑒼𑒙𑒹 𑒩𑒯𑒢𑒱। 𑒠𑒳𑒢𑒴 𑒢𑒰𑒞𑒱𑒨𑒼 𑒂 𑒥𑒹𑒙𑒱𑒨𑒼𑒏𑒹𑒿 𑒁𑒣𑒢𑒰 𑒌𑒚𑒰𑒧-𑒥𑒹𑒩𑒧𑒰 𑒪𑓄 𑒁𑒢𑒪𑒢𑒱। 𑒁𑒣𑒢𑒼 𑒮𑒹𑒫𑒰 𑒱𑒢𑒫𑒵𑒞𑓂𑒞𑒱 𑒦𑒹𑒪𑒰 𑒣𑒕𑒰𑒞𑒱 𑒠𑒳𑒢𑒴 𑒣𑒩𑒰𑒢𑒲 𑒏𑒪𑒏𑒞𑓂𑒞𑒰𑒮𑒿 𑒑𑒰𑒧 𑒂𑒥𑒱 𑒑𑒹𑒪𑒰𑒯। 𑒑𑒰𑒧 𑒂𑒥𑒱 𑒣𑒰𑒿𑒔 𑒥𑒲𑒒𑒰 𑒐𑒹𑒞 𑒏𑒲𑒢𑒪𑒢𑒱। 𑒋𑒏𑒙𑒰 𑒥𑒼𑒩𑒱𑓀𑒑 𑒑𑒩𑒾𑒪𑒢𑒱, 𑒋𑒏𑒙𑒰 𑒠𑒧𑒏𑒪 𑒪𑒹𑒪𑒢𑒱। 𑒥𑒹𑒫𑒮𑓂𑒟𑒰 𑒌 𑒜𑓀𑒑𑒮𑒿 𑒬𑒳𑒩𑒴 𑒏𑒹𑒪𑒢𑒱 𑒖𑒹, 𑒖𑒿 𑒮𑒧𑒳𑒔𑒱𑒞 𑒜𑓀𑒑𑒮𑒿 𑒔𑒪𑒰𑒍𑒪 𑒖𑒰𑒃𑒞 𑒞𑒿, 𑒢𑒲𑒏 𑒏𑒱𑒮𑒰𑒢 𑒣𑒩𑒱𑒫𑒰𑒩 𑒚𑒰𑒜𑓃 𑒯𑒼𑒃𑒞, 𑒮𑒹 𑒢𑒻 𑒦𑒹𑒪𑒢𑒱। 𑒐𑒹𑒞𑒏 𑒥𑒹𑒫𑒮𑓂𑒟𑒰𑒏 𑒮𑓀𑒑 𑒖𑒼𑒛𑓃𑒰 𑒥𑒩𑒠 𑒪𑒹𑒪𑒢𑒱, 𑒒𑒩 𑒥𑒢𑒾𑒪𑒢𑒱। 𑒥𑒯𑒳𑒞 𑒢𑒲𑒏 𑒞𑒿 𑒢𑒻 𑒧𑒳𑒠𑒰 𑒧𑒖𑒑𑒴𑒞 𑒒𑒩 𑒖𑒩𑒴𑒩 𑒥𑒢𑒾𑒪𑒢𑒱। 𑒑𑒾𑒂𑒿𑒏 𑒧𑒞𑒦𑒹𑒠𑒏 𑒋𑒏𑒙𑒰 𑒏𑒰𑒩𑒝 𑒄𑒯𑒼 𑒦𑒹𑒪 𑒖𑒹 𑒁𑒣𑒢 𑒒𑒩𑒰𑒛𑓃𑒲 𑒕𑒼𑒛𑓃𑒱 𑒠𑒼𑒮𑒩 𑒒𑒩𑒰𑒛𑓃𑒲 𑒏𑒲𑒢 𑒠𑒼𑒮𑒩 𑒚𑒰𑒧 𑒒𑒩 𑒥𑒢𑒾𑒪𑒢𑒱। 𑒖𑒹 𑒖𑒧𑒲𑒢 𑒏𑒲𑒢𑒱 𑒒𑒩 𑒥𑒢𑒾𑒪𑒢𑒱 𑒍 𑒖𑒧𑒲𑒢 𑒥𑒱𑒏𑒰 𑒑𑒹𑒪 𑒕𑒪। 𑒠𑒼𑒮𑒩 𑒑𑒼𑒙𑒹 𑒏𑒲𑒢𑒢𑒹 𑒩𑒯𑒟𑒱 𑒧𑒳𑒠𑒰 𑒩𑒖𑒱𑒮𑓂𑒙𑓂𑒩𑒲 𑒢𑒻 𑒦𑒹𑒪 𑒩𑒯𑒋। 𑒮𑒞𑒠𑒹𑒫 𑒗𑒰𑒏𑒹𑒿 𑒩𑒖𑒱𑒮𑓂𑒙𑓂𑒩𑒲 𑒦𑒹𑒪𑒢𑒱, 𑒖𑒧𑒲𑒢 𑒏𑒥𑓂𑒖𑒰 𑒦𑒹𑒪𑒢𑒱, 𑒒𑒩 𑒥𑒢𑒾𑒪𑒢𑒱। 𑒧𑒳𑒠𑒰 𑒮𑒧𑒰𑒖𑒏 𑒧𑒢𑒧𑒹 𑒁𑒰𑒥𑒱𑒨𑒹 𑒑𑒹𑒪𑒢𑒱 𑒖𑒹 𑒄 𑒁𑒢𑒳𑒔𑒱𑒞 𑒦𑒹𑒪। 𑒣𑒯𑒱𑒪𑒳𑒏𑒰 𑒏𑒲𑒢𑒱𑒱𑒢𑒯𑒰𑒩 𑒣𑒰𑒕𑒴 𑒯𑒙𑒱 𑒑𑒹𑒪𑒰𑒯। 𑒏𑒪𑒏𑒞𑓂𑒞𑒰 𑒮𑒢 𑒬𑒯𑒩𑒧𑒹 𑒖𑒱𑒢𑒑𑒲 𑒥𑒱𑒞𑒾𑒢𑒱𑒯𑒰𑒩 𑒮𑒞𑒠𑒹𑒫 𑒗𑒰 𑒐𑒹𑒞𑒲 𑒢𑒻 𑒏𑓄 𑒣𑒰𑒥𑒱 𑒮𑒏𑒪𑒰𑒯। 𑒠𑒳𑒢𑒴 𑒢𑒰𑒞𑒱𑒨𑒼 𑒥𑒔𑒯𑒢𑒹 𑒩𑒯𑒢𑒱। 𑒣𑒻𑒕𑒪𑒰 (𑒏𑒪𑒏𑒞𑓂𑒞𑒰𑒏) 𑒏𑒧𑒰𑒃 𑒮𑒚𑒱 𑒑𑒹𑒪𑒢𑒱। 𑒧𑒳𑒠𑒰 𑒐𑒰𑒃-𑒣𑒲𑒥𑒻𑒏 𑒔𑒮𑒏𑒲𑒏 𑒮𑓀𑒑 𑒖𑒲𑒫𑒢-𑒬𑒻𑒪𑒲 𑒮𑒹𑒯𑒼 𑒐𑒩𑓂𑒔𑒲𑒪𑒰 𑒥𑒢𑒱𑒨𑒹 𑒑𑒹𑒪 𑒩𑒯𑒢𑒱। 𑒐𑒹𑒞 𑒥𑒹𑒔𑒥 𑒬𑒳𑒩𑒴 𑒏𑒹𑒪𑒢𑒱। 𑒖𑒹𑒚𑒏𑒰 𑒢𑒰𑒞𑒱𑒏 𑒥𑒱𑒂𑒯 𑒮𑒹𑒯𑒼 𑒏𑒩𑒰 𑒪𑒹𑒪𑒢𑒱। 𑒂𑒡𑒰𑒮𑒿 𑒥𑒹𑒮𑒲 𑒐𑒹𑒞 𑒖𑒐𑒢 𑒥𑒱𑒏𑒰 𑒑𑒹𑒪𑒢𑒱, 𑒞𑒐𑒢 𑒥𑒹𑒙𑒱𑒨𑒼 𑒂 𑒠𑒳𑒢𑒴 𑒢𑒰𑒞𑒱𑒨𑒼 𑒗𑒑𑒛𑓃𑒰 𑒏𑒩𑒥 𑒬𑒳𑒩𑒴 𑒏𑒹𑒪𑒏𑒢𑒱। 𑒮𑒞𑒠𑒹𑒫 𑒗𑒰𑒏𑒹𑒿 𑒥𑒹𑒙𑒱𑒨𑒼 𑒂 𑒢𑒰𑒞𑒱𑒨𑒼𑒮𑒿 𑒗𑒑𑒛𑓃𑒰 𑒌 𑒪𑒹𑒪 𑒬𑒳𑒩𑒴 𑒦𑒹𑒪𑒢𑒱 𑒖𑒹 𑒖𑒐𑒢 𑒁𑒣𑒢𑒰 𑒌𑒚𑒰𑒧 (𑒥𑒹𑒙𑒲𑒏 𑒮𑒰𑒮𑒳𑒩 𑒂 𑒢𑒰𑒞𑒱𑒏 𑒑𑒰𑒧) 𑒮𑒿 𑒔𑒪𑒱 𑒋𑒪𑒾𑓀 𑒂 𑒋𑒞𑒳𑒏𑒼 𑒮𑒦𑒙𑒰 𑒥𑒹𑒔𑒱𑒢𑒯𑒱𑒨𑒹 𑒖𑒰𑒃 𑒕𑒟𑒱 𑒞𑒐𑒢 𑒯𑒧𑒩𑒰 𑒮𑒦𑒏𑒹𑒿 𑒏𑒲 𑒯𑒋𑒞। 𑒁𑒣𑒢𑒹 𑒠𑒳𑒢𑒴 𑒣𑒩𑒰𑒢𑒲 𑒥𑒴𑒜𑓃 𑒕𑒟𑒱, 𑒠𑒴-𑒔𑒰𑒩𑒱 𑒮𑒰𑒪𑒧𑒹 𑒧𑒩𑒱 𑒖𑒹𑒞𑒰𑒯 𑒧𑒳𑒠𑒰 𑒯𑒧 𑒮𑒦 𑒏𑒞𑒋 𑒖𑒰𑒋𑒥? 𑒅𑒔𑒱𑒞 𑒫𑒱𑒔𑒰𑒩 𑒩𑒯𑒱𑒞𑒼 𑒣𑒰𑒩𑒱𑒫𑒰𑒩𑒱𑒏 𑒕𑒪 𑒞𑒿𑒋 𑒠𑒼𑒮𑒩 𑒯𑒰𑒟 𑒢𑒻 𑒥𑒜𑓃𑒥𑒋 𑒔𑒰𑒯𑒻𑒞। 𑒧𑒳𑒠𑒰 𑒥𑒹𑒙𑒲𑒏-𑒢𑒰𑒞𑒱𑒏 𑒗𑒑𑒛𑓃𑒰𑒮𑒿 𑒮𑒞𑒠𑒹𑒫 𑒗𑒰𑒏𑒹𑒿 𑒠𑒴𑒩𑒲 𑒥𑒢𑒪𑒢𑒱 𑒂 𑒫𑒱𑒩𑒼𑒡𑒲 (𑒏𑒧𑓂𑒨𑒳𑒢𑒱𑒮𑓂𑒙 𑒫𑒱𑒩𑒼𑒡𑒲) 𑒮𑒿 𑒢𑒖𑒠𑒲𑒏𑒲 𑒥𑒢𑒪𑒢𑒱। 𑒢𑒰𑒞𑒱 (𑒣𑓂𑒩𑒧𑒼𑒠 𑒗𑒰) 𑒮𑒰𑒮𑒳𑒩 𑒑𑒹𑒪। 𑒮𑒰𑒮𑒳𑒩 𑒩𑒯𑒱𑒏𑒰 𑒥𑓂𑒪𑒾𑒏𑒏 𑒦𑒼𑒖-𑒣𑒩𑒼𑒩। 𑒍𑒃 𑒃𑒪𑒰𑒏𑒰𑒧𑒹 𑒖𑒧𑒲𑒢𑒏 𑒪𑒛𑓃𑒰𑒃 𑒡𑒳𑒩-𑒗𑒰𑒛𑓃 𑒔𑒪𑒻𑒞। 𑒮𑒰𑒮𑒳𑒩 𑒣𑒯𑒳𑒿𑒔 𑒣𑓂𑒩𑒧𑒼𑒠 𑒮𑒮𑒳𑒩𑒏𑒹𑒿 𑒮𑒦 𑒥𑒰𑒞 𑒏𑒯𑒪𑒐𑒱𑒢। 𑒮𑓀𑒑𑒹 𑒪𑒰𑒑𑒪 𑒮𑒮𑒳𑒩 𑒥𑒹𑒩𑒧𑒰 𑒋𑒪𑒢𑒱। 𑒣𑓂𑒩𑒧𑒼𑒠𑒏 𑒮𑒮𑒳𑒩 𑒑𑒰𑓀𑒖𑒰 𑒣𑒲𑒥𑒻 𑒕𑒪𑒟𑒱, 𑒁𑒐𑒢𑒼 𑒕𑒟𑒱𑒨𑒹। 𑒥𑒹𑒩𑒧𑒰 𑒂𑒥𑒱 𑒞𑒲𑒢𑒱-𑒔𑒰𑒩𑒱 𑒠𑒱𑒢 𑒩𑒯𑒪𑒰𑒯। 𑒑𑒖𑒹𑒩𑒲𑒏 𑒣𑒰𑒩𑓂𑒙𑒲 𑒥𑒢𑒰 𑒪𑒹𑒪𑒢𑒱। 𑒞𑒃𑒧𑒹 𑒏𑒱𑒕𑒳 𑒏𑒧𑓂𑒨𑒳𑒢𑒱𑒮𑓂𑒙𑒼 𑒣𑒰𑒩𑓂𑒙𑒲𑒏। 𑒐𑒴𑒥 𑒢𑒲𑒏 𑒖𑒏𑒰𑒿 𑒐𑒰-𑒣𑒲𑒥 𑒦𑒼𑒖𑒢𑒼 𑒥𑒢𑒾𑒪𑒢𑒱 𑒖𑒹 𑒂𑒃 𑒮𑒞𑒠𑒹𑒫 𑒗𑒰 𑒖𑒞𑒋 𑒦𑒹𑒙𑒞𑒰𑒯 𑒞𑒞𑒋 𑒣𑒏𑒛𑓃𑒱 𑒎𑓀𑒚𑒰 𑒢𑒱𑒬𑒰𑒢 𑒪𑓄 𑒪𑒹𑒥। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒥𑒯𑒏 𑒖𑒰𑒢𑒏𑒰𑒩𑒲𑒧𑒹 𑒢𑒻 𑒩𑒯𑒢𑒱। 𑒣𑒰𑒢-𑒮𑒰𑒞 𑒑𑒼𑒙𑒹𑒏 𑒥𑒲𑒔𑒏 𑒨𑒼𑒖𑒢𑒰 𑒩𑒯𑒻, 𑒮𑒻𑒯 𑒦𑒹𑒪। 𑒥𑒰𑒡𑒧𑒹 𑒣𑒏𑒛𑓃𑒱 𑒣𑒰𑒿𑒔𑒼 𑒑𑒼𑒙𑒹 𑒣𑒙𑒏𑒱 𑒏𑓄 𑒮𑓂𑒙𑒰𑒧𑓂𑒣𑒣𑒩 𑒢𑒱𑒬𑒰𑒢 𑒪𑓄 𑒪𑒹𑒪𑒏𑒢𑒱। 𑒫𑒱𑒩𑒼𑒡𑒲 (𑒏𑒧𑓂𑒨𑒳𑒢𑒱𑒮𑓂𑒙 𑒫𑒱𑒩𑒰𑒡𑒲) 𑒏𑒹𑒿 𑒧𑒾𑒏𑒰 𑒯𑒰𑒟 𑒪𑒑𑒪𑒢𑒱। 𑒁𑒣𑒢-𑒁𑒣𑒢 𑒔𑒰𑒪𑒱 𑒮𑒦 𑒔𑒰𑒪𑒱 𑒠𑒹𑒪𑒏𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦𑒏𑒹𑒿 𑒧𑒳𑒠𑒰𑒪𑒯 𑒥𑒢𑒰 𑒏𑒹𑒮 𑒏𑓄 𑒠𑒹𑒪𑒏𑒢𑒱। 𑒟𑒰𑒢𑒰𑒮𑒿 𑒏𑒯𑒱𑒨𑒼 𑒪𑒰𑒙-𑒒𑒰𑒙 𑒢𑒻 𑒩𑒯𑒪𑒢𑒱, 𑒟𑒰𑒢𑒰 𑒐𑒳𑒪𑒱 𑒏𑓄 𑒫𑒱𑒩𑒼𑒡𑒲𑒏 𑒮𑓀𑒑 𑒕𑒪। 𑒖𑒐𑒢𑒹 𑒏𑒹𑒮 𑒯𑒼𑒃 𑒕𑒪 𑒞𑒐𑒢𑒹 𑒏𑒼𑒩𑓂𑒙𑒧𑒹 𑒯𑒰𑒖𑒱𑒩 𑒦𑓄 𑒖𑒧𑒰𑒢𑒞 𑒏𑒩𑒰 𑒪𑒃 𑒕𑒪𑒰। 𑒱𑒮𑒩𑓂𑒤 (𑓓𑓐𑓗 𑒠𑒤𑒰) 𑒋𑒏𑒙𑒰 𑒏𑒹𑒮𑒧𑒹 𑒋𑒯𑒹𑒢 𑒦𑒹𑒪 𑒖𑒹 𑒖𑒰𑒥𑒹 𑒋𑒏𑒙𑒰 𑒧𑒳𑒠𑒰𑒪𑒯 𑒯𑒰𑒖𑒱𑒩𑒰 𑒏𑒩𑒰 𑒖𑒧𑒰 𑒏𑒩𑒰𑒥𑒟𑒱 𑒞𑒃 𑒥𑒲𑒔 𑒖𑒣𑓂𑒞𑒲-𑒏𑒳𑒩𑓂𑒏𑒲𑒏 𑒂𑒠𑒹𑒬 𑒏𑒩𑒰 𑒟𑒰𑒢𑒰 𑒒𑒩𑒧𑒹 𑒖𑒥𑓂𑒞𑒲-𑒏𑒳𑒩𑓂𑒏𑒲 𑒏𑓄 𑒪𑒹𑒪𑒏𑒢𑒱। 𑒒𑒩𑒏 𑒏𑒹𑒥𑒰𑒛𑓃 𑒐𑒼𑒪𑒱 𑒪𑒹𑒪𑒏𑒢𑒱, 𑒠𑒧𑒏𑒪 𑒮𑒲𑒖 𑒏𑓄 𑒪𑒹𑒪𑒏𑒢𑒱। 𑒏𑒹𑒮 𑒦𑒹𑒪𑒢𑒱, 𑒖𑒧𑒰𑒢𑒞 𑒏𑒩𑒹𑒪𑒢𑒱। 𑒣𑒰𑒩𑓂𑒙𑒲𑒏 𑒂𑒢𑓂𑒠𑒼𑒪𑒢𑒮𑒿 𑒯𑒙𑒱 𑒠𑒼𑒮𑒩 𑒠𑒱𑒮 𑒧𑒼𑒛𑓃𑒰 𑒑𑒹𑒪𑒰। 𑒮𑒞𑒠𑒹𑒫 𑒗𑒰𑒏 𑒋𑒑𑒰𑒩𑒯 𑒏𑒙𑓂𑒚𑒰 𑒖𑒧𑒲𑒢 𑒖𑒑𑒠𑒩𑒏 𑒦𑒲𑒛𑓃𑒧𑒹। 𑒢𑒟𑒳𑒢𑒲 𑒮𑒱𑓀𑒯𑒏 𑒫𑒱𑒔𑒰𑒩𑒮𑒿 𑒍 𑒖𑒧𑒲𑒢 𑒋𑒏𑒙𑒰 𑒖𑒑𑒠𑒩𑒹𑒥𑒪𑒰 𑒯𑒰𑒟𑒮𑒿 𑒥𑒱𑒏𑒩𑒲 𑒦𑓄 𑒑𑒹𑒪। 𑒐𑒹𑒞𑒧𑒹 𑒡𑒰𑒢 𑒩𑒯𑒻, 𑒡𑒰𑒢 𑒏𑒰𑒙𑒻𑒏 𑒗𑓀𑒗𑒙 𑒅𑒚𑒪। 𑒥𑒹𑒩𑒧𑒰-𑒖𑒑𑒠𑒩𑒏 𑒦𑒲𑒛𑓃𑒰𑒢𑒲 𑒦𑒹𑒪। 𑒍𑒯𑒲 𑒠𑒱𑒢 𑒢𑒟𑒳𑒢𑒲 𑒮𑒱𑓀𑒯 𑒁𑒣𑒢 𑒠𑒪-𑒥𑒪𑒏 𑒮𑓀𑒑 𑒣𑒰𑒕𑒴 𑒯𑒙𑒪𑒰𑒯। 𑒧𑒳𑒠𑒰 𑒦𑒲𑒞𑒩𑒹-𑒦𑒲𑒞𑒩 𑒑𑒩𑒧𑒰𑒯𑒙𑒱 𑒥𑒜𑓃𑒪। 𑒖𑒑𑒠𑒩𑒏 𑒮𑓀𑒑 𑒠𑒴𑒩𑒲𑒏 𑒂𑒢𑒼 𑒏𑒰𑒩𑒝 𑒕𑒪, 𑒍 𑒏𑒰𑒩𑒝 𑒕𑒪 𑒣𑒰𑒿𑒔𑒏 𑒠𑒬𑒏𑒧𑒹 𑒋𑒏 𑒑𑒼𑒙𑒹 (𑒖𑒑𑒠𑒩𑒹𑒏) 𑒥𑒹𑒩𑒧𑒰 𑒋𑒪𑒰𑒯। 𑒮𑓀𑒑𑒧𑒹 𑒣𑒰𑒕𑒴-𑒣𑒰𑒕𑒴 𑒏𑒳𑒞𑓂𑒞𑒼 𑒩𑒯𑒢𑒱। 𑒏𑒳𑒞𑓂𑒞𑒰-𑒏𑒳𑒞𑓂𑒞𑒰𑒧𑒹 𑒣𑒙𑒏𑒰-𑒣𑒙𑒏𑒲 𑒦𑓄 𑒑𑒹𑒪। 𑒨𑒞𑓂𑒩-𑒏𑒳𑒞𑓂𑒩 𑒑𑒰𑒩𑒱 𑒏𑒳𑒞𑓂𑒞𑒰𑒥𑒪𑒰𑒏𑒹𑒿 𑒣𑒜𑓃𑒪𑒐𑒱𑒢। 𑒥𑒰𑒞𑒰-𑒥𑒰𑒞𑒲 𑒥𑒜𑓃𑒱 𑒑𑒹𑒪। 𑒍𑒃 𑒮𑒧𑒋 𑒑𑒩𑒲𑒥𑒲𑒏 𑒔𑒪𑒻𑒞 𑒥𑒹𑒩𑒧𑒰𑒏 𑒥𑒼𑒢𑒱𑒯𑒰𑒩 𑒖𑒑𑒠𑒩𑒧𑒹 𑒏𑒰𑒖𑒼 𑒏𑒩𑒻𑒞 𑒕𑒪𑒰𑒯 𑒂 𑒩𑒲𑒢𑒼-𑒣𑒻𑓀𑒃𑒔 𑒏𑒩𑒻𑒞 𑒕𑒪𑒰𑒯। 𑒥𑒰𑒞𑒰-𑒥𑒰𑒞𑒲 𑒯𑒼𑒃𑒞𑒹 𑒖𑒑𑒠𑒩𑒏 𑒯𑒿𑒮𑒹𑒩𑒲 𑒥𑒹𑒩𑒧𑒰 𑒣𑒯𑒳𑒿𑒔𑒱 𑒑𑒹𑒪। 𑒢𑒱𑒂𑒩𑒪 𑒪𑒛𑓃𑒰𑒃𑒏 𑒨𑒼𑒖𑒢𑒰 𑒯𑒼𑒃 𑒕𑒻 𑒥𑒱𑒢𑒳 𑒢𑒱𑒂𑒩𑒪 𑒪𑒛𑓃𑒰𑒃 𑒞𑒿 𑒢𑒰𑒩𑒹𑒣𑒩 𑒯𑒼𑒃 𑒕𑒻। 𑒥𑒹𑒩𑒧𑒰-𑒖𑒑𑒠𑒩𑒏 𑒢𑒰𑒩𑒰 𑒅𑒚𑒪, 𑒖𑒑𑒠𑒩𑒏 𑒮𑒦 𑒧𑒰𑒩𑒱 𑒐𑒰 𑒑𑒰𑒧 𑒋𑒪𑒰𑒯। 𑒧𑒳𑒠𑒰 𑒣𑓂𑒩𑒬𑓂𑒢 𑒞𑒿 𑒧𑒰𑒪𑒱𑒏-𑒥𑒼𑒢𑒱𑒯𑒰𑒩𑒏 𑒅𑒚𑒪। 𑒖𑒹𑒏𑒩𑒰 𑒌𑒚𑒰𑒧 𑒩𑒴𑒣𑒻𑒍 𑒂 𑒡𑒰𑒢𑒼 𑒏𑒩𑓂𑒖𑒰𑒏 𑒁𑒕𑒱 𑒍 𑒮𑒼𑒯𑒰𑒃 𑒪𑒰𑒚𑒲 𑒏𑒣𑒰𑒩𑒣𑒩 𑒧𑒰𑒩𑒪𑒏, 𑒏𑒹𑒢𑒰 𑒥𑒩𑒠𑒰𑒮 𑒏𑒱𑒨𑒼 𑒏𑒩𑒞। 𑒐𑒴𑒥 𑒖𑒧𑒑𑒩 𑒂𑒑𑒱 𑒅𑒚𑒋 𑒪𑒰𑒑𑒪 𑒧𑒳𑒠𑒰 𑒚𑓀𑒜𑒰𑒋𑒪। 𑒞𑒃 𑒥𑒲𑒔 𑒋𑒏𑒙𑒰 𑒂𑒩𑒼 𑒒𑒙𑒢𑒰 𑒦𑒹𑒪। 𑒒𑒙𑒢𑒰 𑒦𑒹𑒪 𑒖𑒹 𑒔𑒢𑒾𑒩𑒰 𑒧𑒯𑓀𑒟𑒏𑒹𑒿 𑒠𑒩𑒦𑓀𑒑𑒰 𑒧𑒯𑓀𑒟𑒰𑒢𑒰𑒧𑒹 𑒪𑒛𑓃𑒰𑒃 𑒅𑒚𑒪। 𑒔𑒢𑒾𑒩𑒰 𑒧𑒯𑓀𑒟𑒏 𑒠𑒯𑒱𑒢 𑒑𑒥𑒻𑒨𑒰 𑒖𑒑𑒠𑒩𑒏 𑒢𑒟𑒳𑒢𑒲 𑒮𑒱𑓀𑒯। 𑒩𑒰𑒨-𑒫𑒱𑒔𑒰𑒩 𑒏𑓄 𑒠𑒩𑒦𑓀𑒑𑒰𑒧𑒹 𑒧𑒰𑒩𑒱 𑒏𑒩𑒻𑒏 𑒨𑒼𑒖𑒢𑒰 𑒥𑒢𑒾𑒪𑒢𑒱। 𑒑𑒹𑒥𑒼 𑒏𑒹𑒪𑒰𑒯। 𑒏𑒰𑒢𑒴𑒢𑒏 𑒠𑒰𑒨𑒩𑒰𑒧𑒹 𑒗𑓀𑒗𑒙 𑒩𑒯𑒥𑒹 𑒏𑒩𑒻; 𑒧𑒯𑓀𑒟𑒏 𑒮𑓀𑒑 𑒢𑒟𑒳𑒢𑒲 𑒮𑒱𑓀𑒯 𑒂 𑒢𑒟𑒳𑒢𑒲 𑒮𑒱𑓀𑒯𑒏 𑒮𑓀𑒑 𑒖𑒞𑒹 𑒖𑒑𑒠𑒩-𑒥𑒹𑒩𑒧𑒰𑒏 𑒪𑓀𑒚 𑒮𑒦 𑒩𑒯𑒋 𑒍 𑒮𑒦, 𑒦𑒩𑒱 𑒣𑒹𑒙 𑒧𑒰𑒩𑒱𑒨𑒼 𑒐𑒹𑒪𑒏, 𑒖𑒯𑒪𑒼 𑒑𑒹𑒪। 𑒧𑒳𑒠𑒰 𑒮𑒹 𑒞𑒞𑒥𑒹 𑒢𑒻 𑒦𑒹𑒪? 𑒦𑒹𑒪 𑒄𑒯𑒼 𑒖𑒹 𑒖𑒯𑒪𑒼𑒏 𑒦𑒲𑒞𑒩 𑒍𑒯𑒱𑒢𑒰 𑒏𑒳𑒙𑒢𑒲 𑒦𑒹𑒪𑒢𑒱।

1978 𑒄.𑒧𑒹 𑒣𑓀𑒔𑒰𑒨𑒞 𑒔𑒳𑒢𑒰𑒫 𑒦𑒹𑒪। 𑒮𑒲𑒡𑒰 𑒧𑒳𑒏𑒰𑒥𑒪𑒰 (𑒠𑒳𑒃𑒨𑒹 𑒅𑒧𑓂𑒧𑒲𑒠𑒫𑒰𑒩𑒏) 𑒦𑒹𑒪। 𑒥𑒯𑒳𑒧𑒞-𑒁𑒪𑓂𑒣𑒧𑒞𑒏 𑒣𑒩𑒱𑒔𑒨 𑒑𑒰𑒧𑒏 𑒮𑒦 𑒥𑒳𑒗𑒻𑒞 𑒕𑒪। 𑒋𑒏𑒙𑒰 𑒏𑒢𑒲𑒙𑒰 𑒅𑒠𑒰𑒯𑒩𑒝- 𑒖𑒐𑒢 𑒫𑒱𑒩𑒼𑒡𑒲 𑒢𑒲𑒏 𑒖𑒏𑒰𑒿 𑒍𑒗𑒩𑒰 𑒑𑒹𑒪𑒰, 𑒞𑒃 𑒥𑒲𑒔 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏 𑒧𑒡𑓂𑒨𑒮𑓂𑒟𑒞𑒰𑒧𑒹 𑒣𑒢𑒔𑒻𑒞𑒱𑒨𑒼 𑒧𑒰𑒢𑒱 𑒪𑒹𑒪 𑒑𑒹𑒪। 𑒧𑒳𑒠𑒰 𑒣𑓀𑒔𑒹𑒏 𑒥𑒲𑒔 𑒫𑒱𑒫𑒰𑒠 𑒤𑒿𑒮𑒱 𑒖𑒰𑒋। 𑒁𑓀𑒞𑒧𑒹 𑒄 𑒦𑒹𑒪 𑒖𑒹 𑒢𑒹 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒥𑒯𑒩𑒥𑒻𑒨𑒰 𑒣𑓀𑒔 𑒎𑒞𑒰 𑒂 𑒢𑒹 𑒣𑓂𑒩𑒧𑒳𑒐𑒖𑒲 (𑒫𑒱𑒢𑓂𑒡𑓂𑒨𑒢𑒰𑒟 𑒚𑒰𑒏𑒳𑒩) 𑒏 𑒥𑒯𑒩𑒥𑒻𑒨𑒰 𑒣𑓀𑒔 𑒁𑒥𑒻𑒪𑒹 𑒞𑒻𑒨𑒰𑒩 𑒩𑒯𑒪𑒐𑒱𑒢। 𑒧𑒳𑒠𑒰 𑒣𑒢𑒔𑒻𑒞𑒲 𑒞𑒿 𑒣𑒕𑒳𑒂𑒋𑒪𑒹 𑒁𑒕𑒱। 𑒖𑒐𑒢 𑒮𑒦 𑒕𑒼𑒛𑓃𑒱 𑒠𑒹𑒪𑒢𑒱 𑒞𑒐𑒢 𑒑𑒰𑒧𑒹𑒏 𑒣𑓀𑒔 𑒥𑒢𑒟𑒱। 𑒖𑒃𑒧𑒹 𑒋𑒏𑒙𑒰 𑒬𑒩𑓂𑒞𑓂𑒞 𑒪𑒰𑒑𑒪 𑒖𑒹 𑒠𑒳𑒢𑒴 𑒣𑒏𑓂𑒭𑒏 𑒥𑒲𑒔 𑒖𑒹 𑒢𑒻 𑒮𑒧𑓂𑒥𑒢𑓂𑒡𑒱𑒞 𑒯𑒼𑒟𑒱 𑒍 𑒣𑓀𑒔 𑒯𑒹𑒞𑒰। 𑒞𑒏𑒞𑒱𑒨𑒰𑒢 𑒦𑒹𑒪 𑒞𑒿 𑒋𑒏𑒼 𑒑𑒼𑒙𑒹 𑒬𑒹𑒭 𑒢𑒻 𑒥𑒿𑒔𑒪𑒰𑒯। 𑒍𑒯𑒢𑒹 𑒬𑒹𑒭 𑒥𑒿𑒔𑒪𑒰 𑒖𑒹 𑒦𑒲𑒧 𑒖𑒏𑒰𑒿 𑒁𑒦𑒱𑒧𑒢𑓂𑒨𑒳𑒏 𑒮𑓀𑒑 𑒩𑒯𑒟𑒱𑒢।
𑒣𑓀𑒔𑒰𑒨𑒞 𑒔𑒳𑒢𑒰𑒫𑒮𑒿 𑒣𑒴𑒩𑓂𑒫 1977 𑒄.𑒧𑒹 𑒠𑒱𑒪𑓂𑒪𑒲𑒨𑒼 𑒮𑒩𑒏𑒰𑒩 𑒂 𑒣𑒙𑒢𑒼 𑒮𑒩𑒏𑒰𑒩 𑒥𑒠𑒪𑒱 𑒑𑒹𑒪। 𑒋𑒏 𑒢𑒫 𑒣𑒩𑒱𑒮𑓂𑒟𑒱𑒞𑒱 𑒣𑒻𑒠𑒰 𑒪𑒹𑒪𑒏। 𑒑𑒰𑒧𑒼𑒏 𑒣𑒰𑒩𑓂𑒙𑒲 (𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲) 𑒁𑒢𑒹𑒏𑒼 𑒪𑒛𑓃𑒰𑒃 𑒪𑒛𑓃𑒱 𑒔𑒳𑒏𑒪 𑒕𑒪। 𑒖𑒃𑒮𑒿 𑒑𑒳𑒝-𑒁𑒫𑒑𑒳𑒝 𑒥𑒴𑒗𑒱 𑒔𑒳𑒏𑒪 𑒕𑒪। 𑒞𑒿𑒋 𑒔𑒾𑒑𑒳𑒝𑒰 𑒅𑒞𑓂𑒮𑒰𑒯 𑒩𑒯𑒥𑒹 𑒏𑒩𑒻। 𑒙𑒳𑒙𑒻𑒞 𑒮𑒰𑒧𑓀𑒞𑒲 𑒥𑒹𑒫𑒮𑓂𑒟𑒰𑒏 𑒋𑒏𑒼𑒙𑒰 𑒒𑒵𑒝𑒱𑒞 𑒏𑒰𑒖 𑒣𑓀𑒔𑒰𑒨𑒞 𑒔𑒳𑒢𑒰𑒫𑒧𑒹 𑒬𑒹𑒭 𑒢𑒻 𑒩𑒯𑒪। 𑒋𑒏𑒙𑒰 𑒅𑒠𑒰𑒯𑒩𑒝- 𑒥𑒯𑒳𑒧𑒞 𑒁𑒪𑓂𑒣𑒧𑒞𑒧𑒹 𑒢𑒰𑒧𑒼 𑒥𑒠𑒪𑒱 𑒠𑒹𑒪 𑒖𑒰𑒃𑒞 𑒕𑒪। 𑒖𑒯𑒱𑒢𑒰 𑒏𑒞𑒾 𑒩𑒰𑒏𑓂𑒭𑒮𑒏 𑒁𑒩𑓂𑒟 𑒩𑒏𑓂𑒭𑒰 𑒏𑒹𑒢𑒱𑒯𑒰𑒩 𑒕𑒪, 𑒮𑒳𑒩𑒏 𑒁𑒩𑓂𑒟 𑒮𑒳𑒩𑒰𑒣𑒰𑒢 𑒏𑒩𑒻𑒥𑒪𑒰। 𑒏𑒰𑒖 𑒏𑒩𑒻𑒧𑒹 𑒤𑒪𑓂𑒪𑒰𑒿 𑒩𑒰𑒏𑓂𑒭𑒮𑒹 𑒕𑒲। 𑒁𑒮𑒑𑒩𑒹 𑒪𑒯𑒰𑒮𑒏𑒹𑒿 𑒣𑒲𑒚𑒣𑒩 𑒪𑒰𑒠𑒱 𑒁𑒮𑒧𑒮𑒰𑒢 𑒪𑓄 𑒑𑒹𑒪।
𑒔𑒳𑒢𑒰𑒫 𑒒𑒼𑒭𑒝𑒰𑒏 𑒫𑒱𑒩𑒼𑒡𑒧𑒹 𑒧𑒳𑒐𑒱𑒨𑒼 𑒂 𑒮𑒩𑒣𑓀𑒔𑒼𑒏 𑒧𑒰𑒧𑒪𑒰 𑒏𑒼𑒩𑓂𑒙 𑒣𑒯𑒳𑒿𑒔𑒪। 𑒮𑒩𑒣𑓀𑒔𑒏 𑒧𑒰𑒧𑒪𑒰 𑒢𑒱𑒔𑒪𑒹 𑒏𑒼𑒩𑓂𑒙𑒮𑒿 𑒤𑒛𑓃𑒱𑒨𑒰 𑒑𑒹𑒪। 𑒧𑒳𑒐𑒱𑒨𑒰 𑒔𑒳𑒢𑒰𑒫𑒏 𑒧𑒰𑒧𑒪𑒰 𑒯𑒰𑒃-𑒏𑒼𑒩𑓂𑒙 𑒣𑒯𑒳𑒿𑒔𑒪। 𑒔𑒳𑒢𑒰𑒫 𑒁𑒫𑒻𑒡 𑒦𑒹𑒪। 𑒖𑒯𑒱𑒢𑒰 𑒚𑒰𑒏𑒳𑒩𑒏 𑒥𑒩𑒱𑒂𑒞𑒲 𑒚𑒰𑒏𑒳𑒩𑒹-𑒚𑒰𑒏𑒳𑒩 𑒞𑒯𑒱𑒢𑒰 𑒥𑒱𑒢𑒳 𑒣𑓀𑒔𑒰𑒨𑒞𑒲𑒏 𑒧𑒳𑒐𑒱𑒨𑒰 𑒥𑒱𑒢𑒰 𑒮𑒦 𑒧𑒳𑒐𑒱𑒨𑒹 𑒧𑒳𑒐𑒱𑒨𑒰। 𑒧𑒳𑒐𑒱𑒨𑒰-𑒮𑒩𑒣𑓀𑒔𑒏 𑒏𑒰𑒖𑒼 𑒞𑒯𑒱𑒢𑒰। 𑒧𑒰𑒞𑓂𑒩 𑒑𑒰𑒧𑒏 𑒣𑒢𑒔𑒻𑒞𑒲। 𑒮𑒩𑒣𑓀𑒔 𑒦𑒹𑒢𑒹 𑒮𑒹𑒯𑒼 𑒥𑒠𑒪𑒱 𑒑𑒹𑒪। 𑒍𑒢𑒰 𑒣𑒰𑒩𑓂𑒙𑒲𑒏 𑒦𑒲𑒞𑒩 𑒏𑒱𑒕𑒳 𑒠𑒩𑒰𑒩𑒱 𑒥𑒢𑒱 𑒑𑒹𑒪। 𑒠𑒩𑒰𑒩𑒱 𑒄 𑒖𑒹 𑒖𑒱𑒢𑒏𑒰 𑒮𑒩𑒣𑓀𑒔𑒏 𑒅𑒧𑓂𑒧𑒲𑒠𑒫𑒰𑒩 𑒥𑒢𑒾𑒪 𑒑𑒹𑒪𑒢𑒱 𑒍𑒏𑒩𑒹 𑒐𑒱𑒪𑒰𑒤 𑒠𑒼𑒮𑒩 𑒢𑒼𑒧𑒲𑒢𑒹𑒬𑒢 𑒏𑓄 𑒠𑒹𑒪𑒢𑒱। 𑒣𑒰𑒩𑓂𑒙𑒲 𑒁𑒣𑒢 𑒱𑒢𑒩𑓂𑒝𑒋 𑒂𑒣𑒮 𑒏𑒩𑒻𑒞 𑒔𑒳𑒢𑒰𑒫 𑒪𑒛𑓃𑒪।
𑒑𑒰𑒧𑒏 𑒫𑒰𑒞𑒰𑒫𑒩𑒝𑒧𑒹 𑒑𑒳𑒧𑒩𑒰𑒯𑒙 𑒩𑒯𑒋। 𑒢𑒲𑒏-𑒢𑒲𑒏 𑒁𑒣𑒩𑒰𑒡𑒲𑒏 𑒑𑒰𑒍𑓀 𑒥𑒹𑒩𑒧𑒰। 𑒋𑒏 𑒑𑓂𑒩𑒳𑒣 𑒕𑒯-𑒕𑒯 𑒥𑒩𑓂𑒐 𑒖𑒹𑒪 𑒏𑒰𑒙𑒱 𑒔𑒳𑒏𑒪 𑒕𑒪𑒰𑒯। 𑒍𑒯𑒼 𑒮𑒦 𑒖𑒲𑒫𑒱𑒞𑒹। 𑒖𑒹 𑒔𑒳𑒢𑒰𑒫 (𑒣𑓀𑒔𑒰𑒨𑒞 𑒔𑒳𑒢𑒰𑒫) 𑒧𑒹 𑒥𑒴𑒟𑒣𑒩 𑒪𑒰𑒚𑒲 𑒯𑒰𑒟𑒹 𑒏𑒱𑒕𑒳 𑒑𑒼𑒙𑒹 𑒥𑒻𑒮𑒪𑒼 𑒂 𑒏𑒱𑒕𑒳 𑒑𑒰𑒧𑒼𑒧𑒹 𑒒𑒳𑒧𑒻𑒞। 𑒏𑒮𑒧𑒏𑒮 𑒩𑒯𑒢𑒹 𑒔𑒳𑒢𑒰𑒫 𑒬𑒰𑒢𑓂𑒞𑒱𑒮𑒿 𑒦𑒹𑒪। 𑒧𑒳𑒠𑒰 𑒑𑒱𑒢𑒞𑒲 𑒏𑒰𑒪 𑒋𑒏 𑒑𑒼𑒙𑒹 (𑒣𑓂𑒩𑒧𑒳𑒐𑒏 𑒑𑒱𑒢𑒞𑒲 𑒋𑒖𑒹𑓀𑒙) 𑒠𑒮-𑒥𑒰𑒩𑒯𑒙𑒰 𑒧𑒼𑒯𑒩 𑒠𑒹𑒪 𑒥𑒰𑒃𑒪𑒹𑒙 𑒯𑒰𑒿𑒃-𑒯𑒰𑒿𑒃 𑒏𑓄 𑒐𑒰 𑒑𑒹𑒪। 𑒞𑒯𑒲 𑒥𑒲𑒔 𑒣𑒰𑒩𑓂𑒙𑒲𑒏 𑒋𑒖𑒹𑓀𑒙 𑒠𑒹𑒐𑒪𑒏 𑒏𑒱 𑒯𑒰𑒿𑒃-𑒯𑒰𑒿𑒃 𑒏𑓄 𑒣𑒰𑒢-𑒮𑒰𑒞 𑒟𑒰𑒣𑒩 𑒧𑒳𑒿𑒯𑒧𑒹 𑒪𑒑𑒰 𑒠𑒹𑒪𑒏𑒢𑒱। 𑒟𑒰𑒣𑒩 𑒪𑒑𑒱𑒞𑒹 𑒧𑒳𑒿𑒯𑒮𑒿 𑒅𑒑𑒪𑒪𑒏।
𑒕𑒯 𑒥𑒩𑓂𑒐 𑒖𑒯𑒪 𑒏𑒙𑒪𑒰𑒯𑒰 𑒋𑒏 𑒑𑒼𑒙𑒹 𑒋𑒏𑒙𑒰 𑒐𑒮𑓂𑒮𑒲𑒏 𑒔𑒼𑒩𑒱𑒧𑒹 𑒣𑒏𑒛𑓃𑒰 𑒑𑒹𑒪। 𑒐𑒮𑓂𑒮𑒲 𑒬𑒱𑒫𑒪𑒰𑒪 𑒧𑒯𑒞𑒼𑒏। 𑒔𑒼𑒩-𑒧𑒼𑒙 𑒣𑒏𑒛𑓃𑒰𑒋𑒪। 𑒧𑒰𑒩𑒱-𑒣𑒲𑒙 𑒬𑒳𑒩𑒴 𑒦𑓄 𑒑𑒹𑒪। 𑒂𑒠𑒞𑒱 𑒕𑒼𑒛𑓃𑒥𑒻 𑒖𑒼𑒏𑒩 𑒧𑒰𑒩𑒱 𑒪𑒑𑒪𑒢𑒱। 𑒮𑓀𑒑-𑒮𑓀𑒑 𑒄𑒯𑒼 𑒦𑒹𑒪 𑒖𑒹 𑒣𑒏𑒛𑓃𑒱 𑒏𑓄 𑒟𑒰𑒢𑒰 𑒣𑒯𑒳𑒿𑒔𑒰 𑒠𑒹𑒪 𑒑𑒹𑒪। 𑒞𑒯𑒱𑒢𑒰 𑒠𑒼𑒮𑒩𑒰𑒏 𑒮𑓀𑒑 (𑒠𑒼𑒮𑒩 𑒁𑒣𑒩𑒰𑒡𑒲𑒏) 𑒮𑒹𑒯𑒼 𑒦𑒹𑒪। 𑒍𑒢𑒰 𑒐𑒳𑒠𑒩𑒰-𑒐𑒳𑒠𑒩𑒲 𑒗𑓀𑒗𑒙 𑒯𑒼𑒃𑒞𑒹 𑒩𑒯𑒻𑒞 𑒕𑒪, 𑒧𑒳𑒠𑒰 𑒮𑒹 𑒮𑒦 𑒏𑒧𑒪।
𑒣𑓀𑒔𑒰𑒨𑒞𑒏 𑒫𑒱𑒡𑒱-𑒫𑒱𑒡𑒰𑒢𑒏 𑒖𑒹 𑒏𑒱𑒞𑒰𑒥 𑒕𑒪 𑒮𑒹𑒯𑒼 𑒞𑒹𑒯𑒢𑒹 𑒕𑒪। 𑒪𑒼𑒏-𑒮𑒦𑒰𑒧𑒹 𑒦𑒼𑒑𑒹𑒢𑓂𑒠𑓂𑒩 𑒖𑒲𑒏 𑒣𑓂𑒩𑒮𑓂𑒞𑒰𑒫𑒏𑒹𑒿 𑒮𑓂𑒫𑒲𑒏𑒵𑒞𑒱 𑒦𑒹𑒙𑒪। 𑒑𑒰𑒿𑒡𑒲 𑒖𑒲𑒏 𑒏𑒪𑓂𑒣𑒢𑒰 𑒂 𑒧𑒑𑒡 𑒖𑒢𑒞𑓀𑒞𑓂𑒩 𑒫𑒻𑒔𑒰𑒩𑒱𑒏𑒹 𑒠𑒳𑒢𑒱𑒨𑒰𑒿𑒧𑒹 𑒕𑒪 𑒥𑒹𑒫𑒯𑒰𑒩𑒱𑒏 𑒖𑒧𑒲𑒢𑒣𑒩 𑒢𑒻 𑒕𑒪।
𑒁𑒯𑒲 𑒥𑒲𑒔 (1977 𑒄.𑒧𑒹) 𑒋𑒏𑒙𑒰 𑒧𑒱𑒞𑓂𑒩 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒦𑒹𑒙𑒪𑒢𑓂𑒯𑒱। 𑒍 𑒩𑒯𑒟𑒱 𑒮𑓂𑒫. 𑒏𑒰𑒪𑒲 𑒏𑒰𑒢𑓂𑒞 𑒗𑒰, 𑒂𑒃.𑒣𑒲.𑒋𑒮।
𑒥𑒹𑒩𑒧𑒰𑒏 𑒥𑒑𑒪𑒹 𑒣𑒴𑒥 𑒏𑒕𑒳𑒥𑒲 𑒑𑒰𑒧 𑒕𑒻। 𑒏𑒰𑒪𑒲 𑒥𑒰𑒥𑒴 𑒏𑒕𑒳𑒥𑒲𑒨𑒹𑒏। 1969 𑒄.𑒏 𑒥𑒻𑒔𑒏 𑒂𑒃.𑒣𑒲.𑒋𑒮। 𑒍 𑒑𑒰𑒧 𑒂𑒋𑒪 𑒩𑒯𑒟𑒱। 𑒗𑓀𑒗𑒰𑒩𑒣𑒳𑒩 𑒥𑒖𑒰𑒩𑒏 𑒏𑒼𑒢𑒼 𑒏𑒰𑒖 𑒩𑒯𑒢𑒱। 𑒥𑒹𑒩𑒧𑒰 𑒏𑒕𑒳𑒥𑒲𑒏 𑒥𑒲𑒔 𑒥𑒰𑒡𑒏 𑒁𑒛𑓃𑒱𑒣𑒹𑒩𑒱𑒨𑒰𑒮𑒿 𑒪𑓄 𑒏𑓄 𑒣𑒏𑓂𑒏𑒲 𑒮𑒛𑓃𑒏 𑒡𑒩𑒱 𑒏𑒞𑒹𑒏𑒼 𑒩𑒰𑒮𑓂𑒞𑒰 𑒁𑒕𑒱। 𑒁𑒣𑒢𑒰 𑒒𑒩𑒮𑒿 𑒮𑒲𑒡𑒰 𑒣𑒴𑒥 𑒯𑒳𑒢𑒏𑒩 𑒒𑒩 𑒕𑒢𑓂𑒯𑒱। 𑒁𑒮𑒏𑒩𑒹 𑒣𑒋𑒩𑒹 𑒗𑓀𑒗𑒰𑒩𑒣𑒳𑒩 𑒖𑒰𑒃𑒞 𑒩𑒯𑒟𑒱 𑒞𑒿𑒋 𑒮𑒼𑒗-𑒮𑒰𑒗 𑒩𑒮𑓂𑒞𑒰 𑒯𑒱𑒨𑒰-𑒯𑒱𑒨𑒰 𑒥𑒜𑓃𑒻𑒞 𑒩𑒯𑒟𑒱। 𑒖𑒐𑒢 𑒥𑒹𑒩𑒧𑒰 𑒧𑒳𑒮𑒯𑒩𑒲 𑒪𑒑 𑒋𑒪𑒰 𑒞𑒿 𑒩𑒮𑓂𑒞𑒰 𑒠𑒴 𑒠𑒱𑒬𑒱𑒨𑒰 𑒥𑒴𑒗𑒱 𑒣𑒛𑓃𑒪𑒢𑒱। 𑒠𑒳𑒢𑒴 𑒒𑒴𑒧𑒱 𑒏𑓄 𑒂𑒑𑒴 𑒧𑒱𑒪𑒻𑒞 𑒁𑒕𑒱 𑒖𑒃𑒚𑒰𑒧 𑒮𑒿 𑒗𑓀𑒗𑒰𑒩𑒣𑒳𑒩𑒏 𑒩𑒰𑒮𑓂𑒞𑒰 𑒮𑒼𑒗 𑒦𑓄 𑒖𑒰𑒃 𑒕𑒻। 𑒧𑒳𑒮𑒯𑒩𑒲 𑒥𑒑𑒪𑒹 𑒑𑒰𑒧𑒏 𑒛𑒱𑒯𑒫𑒰𑒩𑒏 𑒮𑓂𑒟𑒰𑒢। 𑒮𑓂𑒟𑒰𑒢 𑒩𑒯𑒢𑒹 𑒔𑒰𑒩𑒴 𑒠𑒱𑒮𑒮𑒿 𑒪𑒼𑒏𑒏 𑒂𑒫𑒰𑒖𑒰𑒯𑒲 𑒞𑒿𑒋 𑒔𑒰𑒩𑒴 𑒏𑒰𑒞 𑒩𑒰𑒮𑓂𑒞𑒰 𑒁𑒕𑒱। 𑒍𑒃𑒚𑒰𑒧 𑒂𑒥𑒱 𑒖𑒐𑒢 𑒂𑒑𑒴 𑒯𑒱𑒨𑒾𑒪𑒢𑒱 𑒞𑒿 𑒮𑒼𑒗𑒏𑒰 𑒣𑒕𑒱𑒧 𑒧𑒳𑒿𑒯𑒹𑒿 𑒥𑒴𑒗𑒱 𑒣𑒛𑓃𑒪𑒢𑒱। 𑒛𑒱𑒯𑒫𑒰𑒩 𑒮𑓂𑒟𑒰𑒢 𑒒𑒩𑒏 𑒥𑒑𑒪𑒹𑒧𑒹 𑒣𑒴𑒥𑒰𑒩𑒱 𑒦𑒰𑒑 𑒁𑒕𑒱। 𑒍𑒯𑒲 𑒩𑒮𑓂𑒞𑒰𑒮𑒿 𑒂𑒑𑒴 𑒥𑒜𑓃𑒪𑒰𑒯। 𑒞𑒿 𑒠𑒩𑒥𑒖𑓂𑒖𑒹𑒣𑒩 𑒔𑒪𑒱 𑒋𑒪𑒰। 𑒍𑒢𑒰 𑒔𑒹𑒯𑒩𑒰𑒮𑒿 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒱𑒔𑒢𑓂𑒯𑒻𑒞 𑒩𑒯𑒟𑒱𑒢। 𑒧𑒳𑒠𑒰 𑒋𑒏 𑒮𑓂𑒏𑒴𑒪𑒧𑒹 𑒣𑒜𑓃𑒻𑒏 𑒏𑒯𑒱𑒨𑒼 𑒁𑒫𑒮𑒩 𑒢𑒻 𑒦𑒹𑒙𑒪𑒢𑒱। 𑒞𑒹𑒏𑒩 𑒏𑒰𑒩𑒝 𑒕𑒪, 𑒬𑒳𑒩𑒴𑒧𑒹 𑒍 𑒑𑒰𑒧𑒧𑒹 𑒏𑒱𑒕𑒳 𑒠𑒱𑒢 𑒣𑒜𑓃𑒱 𑒢𑒫𑒰𑒢𑒲 𑒫𑒱𑒠𑓂𑒨𑒰𑒪𑒨𑒧𑒹 𑒢𑒰𑒍𑓀 𑒪𑒱𑒐𑒰𑒻𑒪𑒢𑒱 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒑𑒰𑒧𑒏 𑒮𑓂𑒏𑒴𑒪𑒮𑒿 𑒙𑒣𑒱 𑒏𑒕𑒳𑒫𑒱𑒨𑒹 𑒁𑒣𑒢 𑒣𑓂𑒩𑒰𑒃𑒧𑒩𑒲𑒧𑒹 𑒢𑒰𑒍𑓀 𑒪𑒱𑒐𑒹𑒪𑒢𑒱। 𑒁𑒐𑒢 𑒞𑒿 𑒧𑒱𑒛𑓂𑒪 𑒮𑓂𑒏𑒴𑒪 𑒡𑒩𑒱 𑒧𑒱𑒪𑒱 𑒑𑒹𑒪 𑒁𑒕𑒱 𑒧𑒳𑒠𑒰 𑒍𑒃 𑒮𑒧𑒋 𑒧𑒱𑒛𑓂𑒪 𑒮𑓂𑒏𑒴𑒪 𑒁𑒪𑒑 𑒕𑒪। 𑒮𑒦 𑒥𑒹𑒫𑒮𑓂𑒟𑒰 𑒁𑒪𑒑 𑒕𑒪𑒻।
𑒧𑒡𑓂𑒨𑒧𑒰 𑒣𑒰𑒮 𑒏𑓄 𑒖𑒐𑒢 𑒡𑒳𑒛𑓃𑒗𑒰𑒛𑓃 𑒮𑓀𑒮𑓂𑒏𑒵𑒞 𑒣𑒜𑓃𑒋-𑒪𑒱𑒐𑒋 𑒂𑒥𑒱 𑒑𑒹𑒪𑒢𑒱, 𑒣𑒱𑒞𑒰𑒏𑒹𑒿 𑒮𑓀𑒞𑒼𑒭 𑒦𑓄 𑒑𑒹𑒪𑒢𑒱। 𑒞𑒐𑒢 𑒍 (𑒏𑒰𑒪𑒲 𑒥𑒰𑒥𑒴) 𑒞𑒧𑒳𑒩𑒱𑒨𑒰 𑒯𑒰𑒃 𑒮𑓂𑒏𑒴𑒪𑒧𑒹 𑒠𑒮𑒧𑒰𑒧𑒹 𑒢𑒰𑒍𑓀 𑒪𑒱𑒐𑒾𑒪𑒢𑒱। 𑒍𑒃 𑒮𑒧𑒋 𑒥𑒱𑒢𑒳 𑒮𑒩𑓂𑒙𑒱𑒨𑒼 𑒤𑒱𑒏𑒹𑒙𑒏 𑒠𑒮𑒧𑒰 𑒡𑒩𑒱 𑒋𑒛𑒧𑒲𑒬𑒢 𑒯𑒼𑒃 𑒕𑒪। 𑒠𑒮𑒧𑒰-𑒋𑒑𑒩𑒯𑒧𑒰𑒏 𑒧𑒱𑒬𑓂𑒩𑒱𑒞 𑒮𑒱𑒪𑒹𑒫𑒮 𑒕𑒪। 𑒮𑒰𑒪 𑒦𑒩𑒱𑒏 𑒣𑒕𑒰𑒞𑒱 𑒠𑒮𑒧𑒰𑒏 𑒣𑒩𑒲𑒏𑓂𑒭𑒰 𑒯𑒼𑒃𑒞 𑒕𑒪 𑒖𑒹 𑒮𑓂𑒏𑒴𑒪𑒹𑒧𑒹 𑒯𑒼𑒃𑒞 𑒕𑒪। 𑒢𑒯𑒱𑒨𑒹 𑒖𑒏𑒰𑒿 𑒫𑒱𑒠𑓂𑒨𑒰𑒩𑓂𑒟𑒲 𑒤𑒹𑒪 𑒏𑒩𑒻𑒞 𑒕𑒪𑒰𑒯। 𑒖𑒹𑒢𑒰 𑒂𑒢-𑒂𑒢 𑒥𑒯𑒳𑒞 𑒠𑒹𑒬𑒧𑒹 𑒁𑒐𑒢𑒼 𑒁𑒕𑒱। 𑒠𑒮𑒧𑒰-𑒋𑒑𑒩𑒯𑒧𑒰𑒏 𑒥𑒲𑒔 𑒋𑒮𑒹𑒮𑒧𑒹𑓀𑒙 𑒣𑓂𑒩𑒟𑒰 𑒮𑒹𑒯𑒼 𑒕𑒪। 𑒠𑒴 𑒮𑒋 𑒢𑒧𑓂𑒥𑒩𑒏 𑒯𑒼𑒃𑒞 𑒕𑒪। 𑒖𑒃𑒮𑒿 𑒧𑒻𑒙𑓂𑒩𑒱𑒏𑒏 𑒥𑒼𑒩𑓂𑒛 𑒣𑒩𑒲𑒏𑓂𑒭𑒰𑒧𑒹 𑒁𑒮𑓂𑒮𑒱𑒨𑒹-𑒁𑒮𑓂𑒮𑒱𑒨𑒹 𑒢𑒧𑓂𑒥𑒩𑒏 𑒫𑒱𑒭𑒨 𑒯𑒼𑒃𑒞 𑒕𑒪। 𑒁𑒮𑒱𑒮𑒧𑒹𑓀𑒙𑒏 𑒢𑒧𑓂𑒥𑒩 𑒫𑒱𑒠𑓂𑒨𑒰𑒪𑒨𑒹 (𑒮𑓂𑒏𑒴𑒪𑒹) 𑒮𑒿 𑒣𑒚𑒰𑒍𑒪 𑒖𑒰𑒃 𑒕𑒪𑒻 𑒖𑒹 𑒥𑒼𑒩𑓂𑒛𑒏 (𑒧𑒻𑒙𑓂𑒩𑒱𑒏𑒏) 𑒩𑒱𑒖𑒪𑓂𑒙𑒧𑒹 𑒖𑒼𑒛𑓃𑒱 𑒯𑒼𑒃 𑒕𑒪। 𑒧𑒳𑒠𑒰 𑒋𑒏𑒙𑒰 𑒥𑒰𑒞 𑒥𑒲𑒔𑒧𑒹 𑒖𑒩𑒴𑒩 𑒕𑒪𑒻 𑒖𑒹 𑒥𑒰𑒃𑒮-𑒥𑒰𑒃𑒮 𑒢𑒧𑓂𑒥𑒩 𑒋𑒪𑒰𑒣𑒩 𑒣𑒰𑒮 𑒯𑒼𑒃𑒞 𑒕𑒪। 𑒧𑒳𑒠𑒰 𑒞𑒯𑒴 𑒦𑒲𑒞𑒩 𑒋𑒏𑒙𑒰 𑒂𑒩𑒼 𑒕𑒪𑒻 𑒖𑒹 𑒮𑒧𑒰𑒖 𑒁𑒡𑓂𑒨𑒨𑒢 𑒠𑒮𑒹 𑒢𑒧𑓂𑒥𑒩𑒧𑒹 𑒣𑒰𑒮 𑒯𑒼𑒃𑒞 𑒕𑒪। 𑒋𑒏𑒩 𑒧𑒰𑒢𑒹 𑒄 𑒢𑒻 𑒖𑒹 𑒠𑒮 𑒢𑒧𑓂𑒥𑒩 𑒁𑒮𑒰𑒢 𑒦𑒹𑒪। 𑒁𑒡𑒱𑒏𑒰𑓀𑒬 𑒫𑒱𑒠𑓂𑒨𑒰𑒩𑓂𑒟𑒲 𑒥𑒲𑒮 𑒢𑒧𑓂𑒥𑒩𑒏 𑒦𑒲𑒞𑒩𑒹 𑒩𑒯𑒻𑒞 𑒕𑒪𑒰𑒯, 𑒑𑒼𑒙𑒱-𑒣𑒓𑒩𑒰 𑒂𑒑𑒴 𑒥𑒜𑓃𑒻𑒞 𑒕𑒪𑒰𑒯। 𑒂𑒩𑓂𑒙 𑒫𑒱𑒭𑒨 (𑒤𑒻𑒏𑓂𑒪𑒙𑒲) 𑒪𑓄 𑒏𑓄 𑒢𑒰𑒍𑓀 𑒪𑒱𑒐𑒾𑒪𑒢𑒱। 𑒧𑒳𑒠𑒰 𑒮𑒰𑒪𑒹 𑒦𑒩𑒱𑒏 𑒣𑒕𑒰𑒞𑒱 (𑒠𑒮𑒧𑒰𑒏 𑒣𑒩𑒲𑒏𑓂𑒭𑒰) 𑒮𑓂𑒏𑒴𑒪𑒹 𑒢𑒻 𑒂𑒢𑒼-𑒂𑒢 𑒮𑓂𑒏𑒴𑒪𑒧𑒹 𑒔𑒩𑓂𑒔𑒰𑒏 𑒣𑒰𑒞𑓂𑒩 𑒏𑒰𑒪𑒲𑒥𑒰𑒥𑒴 𑒥𑒢𑒱 𑒑𑒹𑒪𑒰। 𑒏𑒰𑒩𑒝 𑒦𑒹𑒪 𑒖𑒹 𑒁𑒐𑒢 𑒡𑒩𑒱 𑒯𑒰𑒃 𑒮𑓂𑒏𑒴𑒪𑒧𑒹 𑒁𑒚𑒧𑒰𑒮𑒿 𑒪𑓄 𑒏𑓄 𑒥𑒼𑒩𑓂𑒛 𑒡𑒩𑒱𑒏 𑒣𑒩𑒲𑒏𑓂𑒭𑒰𑒧𑒹 𑒮𑒰𑒃𑓀𑒮𑒏 𑒫𑒱𑒠𑓂𑒨𑒰𑒟𑒲𑒏 𑒩𑒱𑒖𑒪𑓂𑒙 𑒁𑒑𑒳𑒂𑒋𑒪 𑒩𑒯𑒻𑒞 𑒕𑒪। 𑒠𑒮𑒧𑒰𑒧𑒹 𑒤𑒮𑓂𑒙 (𑒣𑒯𑒱𑒪 𑒮𑓂𑒟𑒰𑒢) 𑒦𑒹𑒪𑒢𑒱। 𑒂𑒩𑓂𑒙 𑒫𑒱𑒭𑒨𑒧𑒹 𑒋𑒏𑒙𑒰 𑒡𑒏𑓂𑒏𑒰 𑒪𑒰𑒑𑒪। 𑒡𑒏𑓂𑒏𑒰 𑒄 𑒪𑒰𑒑𑒪 𑒖𑒹 𑒁𑒐𑒢 𑒡𑒩𑒱 𑒣𑒩𑒲𑒏𑓂𑒭𑒰𑒏 𑒢𑒧𑓂𑒥𑒩 𑒠𑒃𑒏 𑒥𑒹𑒫𑒯𑒰𑒩 𑒕𑒪 𑒍 𑒠𑒼𑒮𑒩 𑒩𑓀𑒑𑒏 𑒕𑒪। 𑒒𑒳𑒮𑒳𑒏𑒳𑒢𑒱𑒨𑒰𑒿 𑒏𑒙𑒻𑒞 𑒂𑒩𑓂𑒙𑒏 𑒢𑒧𑓂𑒥𑒩 𑒒𑒳𑒮𑒳𑒏𑒻𑒞 𑒕𑒪, 𑒖𑒐𑒢 𑒏𑒱 𑒮𑒰𑒃𑓀𑒮𑒏 𑒫𑒱𑒭𑒨𑒧𑒹 𑒮𑒋-𑒧𑒹-𑒮𑒋 𑒕𑒪। 𑒏𑒢𑒲𑒙𑒰 𑒅𑒠𑒰𑒩𑒯𑒝- 𑒖𑒐𑒢 𑒯𑒰𑒃 𑒮𑓂𑒏𑒴𑒪𑒏 𑒮𑒧𑓂𑒥𑒢𑓂𑒡𑒧𑒹 𑒔𑒩𑓂𑒔 𑒦𑒹𑒪 𑒞𑒐𑒢 𑒍 𑒏𑒯𑒪𑒢𑒱- “𑒐𑒰 𑒏𑓄 𑒮𑓂𑒏𑒴𑒪 𑒫𑒱𑒠𑒰 𑒯𑒼𑒃 𑒏𑒰𑒪 𑒯𑒰𑒟𑒏 𑒞𑒩𑒯𑒞𑓂𑒟𑒲𑒣𑒩 𑒣𑒰𑒿𑒔𑒙𑒰 𑒁𑓀𑒑𑓂𑒩𑒹𑒖𑒲 𑒬𑒥𑓂𑒠 𑒫𑒰 𑒋𑒏𑒙𑒰 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒪𑒱𑒐𑒱 𑒪𑒃 𑒕𑒪𑒾𑓀 𑒂 𑒮𑓂𑒏𑒴𑒪 𑒣𑒯𑒳𑒿𑒔𑒻𑒞-𑒣𑒯𑒳𑒿𑒔𑒻𑒞 𑒩𑒙𑒱 𑒪𑒃 𑒕𑒪𑒾𑓀। 𑒖𑒰𑒃𑒨𑒼 𑒏𑒰𑒪 𑒂 𑒁𑒥𑒻𑒨𑒼 𑒏𑒰𑒪 𑒏𑒩𑒻 𑒕𑒪𑒾𑓀। 𑒮𑓂𑒏𑒴𑒪 𑒣𑒯𑒳𑒿𑒔𑒞𑒹 𑒣𑒯𑒱𑒢𑒹 𑒏𑒪𑒣𑒩 𑒖𑒰 𑒥𑒜𑓃𑒱𑒨𑒰 𑒖𑒏𑒰𑒿 𑒯𑒰𑒟 𑒡𑒼𑒃 𑒪𑒃 𑒕𑒪𑒾𑓀, 𑒞𑒐𑒢 𑒥𑒻𑒮𑒻 𑒕𑒪𑒾𑓀। 𑒍𑒢𑒰 𑒬𑒱𑒏𑓂𑒭𑒰 𑒣𑒠𑓂𑒡𑒞𑒱𑒧𑒹 𑒮𑒹𑒯𑒼 𑒏𑒱𑒕𑒳 𑒁𑒢𑓂𑒞𑒩 𑒁𑒕𑒱। 𑒩𑒙𑒻𑒏 𑒔𑒪𑒢𑒱 𑒮𑒦 𑒩𑓀𑒑 𑒁𑒕𑒱।” 𑒣𑓂𑒩𑒟𑒧 𑒬𑓂𑒩𑒹𑒝𑒲𑒮𑒿 𑒧𑒻𑒙𑓂𑒩𑒲𑒏 𑒣𑒰𑒮 𑒏𑒹𑒪𑒢𑒱। 𑒧𑒳𑒠𑒰 𑒒𑒩𑒏 𑒮𑓂𑒟𑒱𑒞𑒱 𑒍𑒞𑒹 𑒢𑒲𑒏 𑒢𑒻 𑒞𑒿 𑒐𑒩𑒰𑒥𑒼 𑒢𑒻। 𑒏𑒰𑒩𑒝 𑒖𑒹 𑒍 𑒧𑒯𑒰𑒣𑒰𑒞𑓂𑒩 𑒣𑒩𑒱𑒫𑒰𑒩𑒏 𑒕𑒪𑒰𑒯। 𑒮𑒹 𑒖𑒧𑒲𑒢𑒠𑒰𑒩𑒱𑒨𑒹 𑒖𑒏𑒰𑒿 𑒣𑒮𑒩𑒪 𑒁𑒕𑒱। 𑒞𑒯𑒴𑒧𑒹 𑒧𑒯𑒰𑒣𑒰𑒞𑓂𑒩𑒏 𑒏𑒧 𑒖𑒢-𑒮𑓀𑒐𑓂𑒨𑒰 𑒩𑒯𑒢𑒹 𑒁𑒐𑒢𑒼 𑒡𑒩𑒱 𑒁𑒥𑒰𑒠𑒹 𑒕𑒢𑓂𑒯𑒱। 𑒍𑒃 𑒮𑒧𑒋 𑒮𑒲.𑒋𑒧 𑒏𑒍𑒪𑒹𑒖 𑒥𑒯𑒳𑒞 𑒢𑒲𑒏 𑒏𑒍𑒪𑒹𑒖 𑒥𑒴𑒗𑒪 𑒖𑒰𑒃𑒞 𑒕𑒪। 𑒢𑒲𑒏 𑒫𑒱𑒠𑓂𑒨𑒰𑒢𑒲𑒏 𑒋𑒛𑒧𑒱𑒬𑒢𑒼 𑒯𑒼𑒃𑒞 𑒕𑒪। 1959 𑒄.𑒧𑒹 𑒔𑒰𑒩𑒱𑒙𑒰 𑒏𑒍𑒪𑒹𑒖 𑒐𑒳𑒖𑒪 𑒖𑒃𑒧𑒹 𑒖𑒢𑒞𑒰 𑒏𑒍𑒪𑒹𑒖 𑒗𑓀𑒗𑒰𑒩𑒣𑒳𑒩𑒼 𑒂 𑒮𑒩𑒱𑒮𑒼 𑒏𑒍𑒪𑒹𑒖 𑒮𑒹𑒯𑒼 𑒐𑒳𑒖𑒪। 𑒧𑒻𑒙𑓂𑒩𑒲𑒏 𑒏𑒹𑒪𑒰 𑒣𑒕𑒰𑒞𑒱 𑒮𑒲.𑒋𑒧. 𑒏𑒍𑒪𑒹𑒖 𑒢𑒻 𑒖𑒰, 𑒍𑒢𑒰 𑒂𑒩.𑒏𑒹. 𑒏𑒍𑒪𑒹𑒖 𑒮𑒹𑒯𑒼 𑒢𑒲𑒏 𑒕𑒪, 𑒧𑒳𑒠𑒰 𑒠𑒳𑒢𑒴𑒏 𑒥𑒹𑒫𑒯𑒰𑒩𑒱𑒏 𑒣𑒠𑓂𑒡𑒞𑒱𑒧𑒹 𑒏𑒱𑒕𑒳 𑒁𑒢𑓂𑒞𑒩 𑒕𑒪। 𑒖𑒃𑒚𑒰𑒧 𑒂𑒩. 𑒏𑒹. 𑒏𑒍𑒪𑒹𑒖𑒧𑒹 𑒮𑒥𑒯𑒏 𑒑𑒳𑒢𑒖𑒰𑒃𑒬 𑒕𑒪 𑒞𑒃𑒚𑒰𑒧 𑒮𑒲.𑒋𑒧. 𑒏𑒍𑒪𑒹𑒖𑒧𑒹 𑒢𑒻 𑒕𑒪। 𑒠𑒼𑒮𑒩𑒼 𑒏𑒰𑒩𑒝 𑒕𑒪 𑒮𑒲.𑒋𑒧. 𑒏𑒍𑒪𑒹𑒖 𑒮𑒩𑒏𑒰𑒩𑒲 𑒥𑒢𑒱 𑒔𑒳𑒏𑒪 𑒕𑒪। 𑒕𑒰𑒞𑓂𑒩 𑒣𑓂𑒩𑒫𑒹𑒬𑒏 𑒮𑒲𑒧𑒰 𑒱𑒢𑒩𑓂𑒡𑒰𑒩𑒱𑒞 𑒕𑒪। 𑒮𑒲.𑒋𑒧. 𑒏𑒍𑒪𑒹𑒖𑒏 𑒃𑒔𑓂𑒕𑒰 𑒩𑒯𑒱𑒞𑒼 𑒏𑒰𑒪𑒲 𑒥𑒰𑒥𑒴 𑒮𑒩𑒱𑒮𑒼 𑒏𑒍𑒪𑒹𑒖𑒧𑒹 𑒢𑒰𑒍𑓀 𑒪𑒱𑒐𑒾𑒪𑒢𑒱। 𑒏𑒰𑒩𑒝 𑒦𑒹𑒪𑒢𑒱 𑒖𑒹 𑒋𑒏𑒚𑒰𑒧 𑒠𑒴𑒙𑒰 𑒫𑒱𑒠𑓂𑒨𑒰𑒩𑓂𑒟𑒲 𑒣𑒜𑓃𑒥𑒻𑒏 𑒥𑒠𑒪𑒰𑒧𑒹 𑒩𑒯𑒻-𑒐𑒰𑒃𑒏 𑒖𑒼𑒑𑒰𑒩 𑒪𑒑𑒱 𑒑𑒹𑒪𑒢𑒱। 𑒣𑒩𑒱𑒫𑒰𑒩𑒏 𑒂𑒧𑒠𑒢𑒲 𑒍𑒞𑒹 𑒐𑒩𑒰𑒥 𑒢𑒻 𑒖𑒃𑒮𑒿 𑒮𑒲.𑒋𑒧.𑒏𑒍𑒪𑒹𑒖 𑒢𑒻 𑒖𑒰 𑒮𑒏𑒻 𑒕𑒪𑒰𑒯 𑒧𑒳𑒠𑒰 𑒮𑒯𑒨𑒼𑒑𑒏 𑒁𑒦𑒰𑒫 𑒩𑒯𑒪𑒢𑒱। 𑒪𑒱𑒙𑒩𑒹𑒔𑒩 𑒃𑓀𑒑𑓂𑒪𑒲𑒬𑒏 𑒮𑓀𑒑 𑒣𑓂𑒩𑒟𑒧 𑒬𑓂𑒩𑒹𑒝𑒲𑒧𑒹 𑒂𑒃.𑒋. 𑒣𑒰𑒮 𑒏𑒹𑒪𑒢𑒱। 𑒠𑒩𑒦𑓀𑒑𑒰𑒧𑒹 𑒩𑒯𑒻𑒏 𑒑𑒩 𑒪𑒰𑒑𑒱 𑒑𑒹𑒪𑒢𑒱। 𑒁𑓀𑒑𑓂𑒩𑒹𑒖𑒲 𑒂𑒢𑒩𑓂𑒮𑒏 𑒮𑓀𑒑 𑒮𑒲.𑒋𑒧. 𑒏𑒍𑒪𑒹𑒖𑒧𑒹 𑒢𑒰𑒍𑓀 𑒪𑒱𑒐𑒾𑒪𑒢𑒱। 𑒂𑒢𑒩𑓂𑒮 𑒑𑓂𑒩𑒹𑒖𑒳𑒋𑒙 𑒦𑓄 𑒢𑒱𑒏𑒪𑒪𑒰𑒯। 𑒋𑒏𑒙𑒰 𑒏𑒢𑒲𑒙𑒰 𑒥𑒰𑒞- 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒃 𑒮𑒧𑒋𑒧𑒹 𑒖𑒢𑒞𑒰 𑒏𑒍𑒪𑒹𑒖𑒧𑒹 𑒣𑒜𑓃𑒻𑒞 𑒩𑒯𑒟𑒱 𑒞𑒃 𑒮𑒧𑒋 𑒂𑒢𑒩𑓂𑒮𑒏 𑒣𑒜𑓃𑒰𑒃 𑒢𑒻 𑒯𑒼𑒃𑒞 𑒩𑒯𑒻। 𑒐𑒰𑒪𑒲 𑒧𑒻𑒟𑒱𑒪𑒲𑒧𑒹 𑒞𑒲𑒢 𑒬𑒱𑒏𑓂𑒭𑒏 𑒩𑒯𑒟𑒱, 𑒖𑒃𑒮𑒿 𑒧𑒻𑒟𑒱𑒪𑒲𑒧𑒹 𑒯𑒼𑒃𑒞 𑒩𑒯𑒻। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒯𑒱𑒢𑓂𑒠𑒲, 𑒩𑒰𑒖𑒢𑒲𑒞𑒱 𑒬𑒰𑒮𑓂𑒞𑓂𑒩𑒏 𑒫𑒱𑒠𑓂𑒨𑒰𑒩𑓂𑒟𑒲 𑒩𑒯𑒟𑒱। 𑒣𑓂𑒩𑒰𑒃𑒫𑒹𑒙𑒹 𑒮𑒿 𑒯𑒱𑒢𑓂𑒠𑒲 𑒂𑒢𑒩𑓂𑒮𑒏 𑒞𑒻𑒨𑒰𑒩𑒲 𑒏𑒹𑒪𑒢𑒱। 𑒍𑒢𑒰 𑒠𑒴 𑒑𑒼𑒙𑒹 (𑒠𑒴𑒙𑒰 𑒬𑒱𑒏𑓂𑒭𑒏) 𑒏𑒍𑒪𑒹𑒖𑒧𑒹 𑒩𑒯𑒟𑒱 𑒧𑒳𑒠𑒰 𑒣𑒜𑓃𑒰𑒃 𑒢𑒻 𑒯𑒼𑒃𑒞 𑒩𑒯𑒻। 𑒥𑒲.𑒋.𑒏 𑒤𑒰𑒩𑓂𑒧 𑒡𑒩𑒱 𑒖𑒢𑒞𑒹 𑒏𑒍𑒪𑒹𑒖𑒮𑒿 𑒦𑒩𑒪𑒢𑒱, 𑒣𑒩𑒲𑒏𑓂𑒭𑒰 𑒮𑒲.𑒋𑒧. 𑒏𑒍𑒪𑒹𑒖𑒧𑒹 𑒦𑒹𑒪।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒛𑒱𑒯𑒫𑒰𑒩 𑒮𑓂𑒟𑒰𑒢𑒏 𑒣𑒕𑒫𑒩𑒱𑒨𑒰 𑒩𑒮𑓂𑒞𑒰 𑒣𑒏𑒛𑓃𑒢𑒹 𑒠𑒩𑒫𑒖𑓂𑒖𑒰𑒣𑒩 𑒂𑒥𑒱 𑒑𑒹𑒪𑒰। 𑒂𑒃.𑒣𑒲.𑒋𑒮. 𑒁𑒤𑒮𑒩𑒏 𑒂𑒋𑒥 𑒁𑒣𑒢𑒰𑒏𑒹𑒿 𑒮𑒾𑒦𑒰𑒑𑓂𑒨𑒬𑒰𑒪𑒲 𑒥𑒳𑒗𑒪𑒢𑒱। 𑒣𑒏𑒛𑓃𑒱 𑒏𑓄 𑒠𑒩𑒫𑒖𑓂𑒖𑒰𑒣𑒩 𑒥𑒻𑒮𑒾𑒪𑒢𑒱। 𑒣𑒳𑒕𑒪𑒢𑒱 𑒞𑒿 𑒏𑒯𑒪𑒢𑒱 𑒖𑒹 𑒗𑓀𑒗𑒰𑒩𑒣𑒳𑒩 𑒖𑒰𑒃 𑒕𑒲, 𑒏𑒰𑒖 𑒁𑒕𑒱। 𑒏𑒯𑒪𑒐𑒱𑒢 𑒖𑒹 𑒁𑒯𑒰𑒿 𑒁𑒮𑒏𑒩𑒹 𑒕𑒲, 𑒞𑒯𑒴𑒧𑒹 𑒣𑒰𑒋𑒩𑒹 𑒕𑒲 𑒠𑒱𑒏𑓂𑒏𑒞 𑒯𑒋𑒞। 𑒏𑒯𑒪𑒢𑒱 𑒖𑒹 𑒏𑒼𑒢𑒼 𑒠𑒱𑒏𑓂𑒏𑒞 𑒢𑒻 𑒯𑒋𑒞। 𑒤𑒹𑒩 𑒏𑒯𑒪𑒢𑒱 𑒖𑒹 𑒯𑒧𑒯𑒴𑒿 𑒮𑓀𑒑 𑒦𑓄 𑒖𑒰𑒃 𑒕𑒲। 𑒏𑒱𑒕𑒳 𑒑𑒣-𑒮𑒣 𑒏𑒩𑒻𑒏 𑒧𑒾𑒏𑒰 𑒮𑒹𑒯𑒼 𑒦𑒹𑒙𑒞। 𑒧𑒳𑒠𑒰 𑒍 𑒣𑒳𑒪𑒱𑒮 𑒢𑒖𑒩𑒱𑒥𑒪𑒰। 𑒏𑒯𑒪𑒢𑒱 𑒖𑒹 𑒮𑒰𑒃𑒏𑒱𑒪 𑒠𑒱𑒁 𑒒𑒳𑒧𑒻𑒏𑒰𑒪𑒧𑒹 𑒠𑓄 𑒠𑒹𑒥।
𑒮𑒰𑒃𑒏𑒱𑒪𑒮𑒿 𑒗𑓀𑒗𑒰𑒩𑒣𑒳𑒩 𑒑𑒹𑒪𑒰। 𑒖𑒱𑒢𑒑𑒲𑒏 𑒞𑒹𑒢𑒰 𑒏𑓄 𑒣𑒯𑒱𑒪 𑒦𑒹𑒿𑒙 𑒠𑒳𑒢𑒴 𑒑𑒼𑒙𑒹𑒏 𑒥𑒲𑒔 𑒦𑒹𑒪 𑒕𑒪। 𑒍𑒃 𑒠𑒱𑒢 𑒄 𑒁𑓀𑒠𑒰𑒖𑒧𑒹 𑒢𑒻 𑒂𑒋𑒪 𑒕𑒪𑒢𑒱 𑒖𑒹 𑒮𑒧𑓂𑒥𑒢𑓂𑒡 𑒋𑒞𑒹 𑒑𑒰𑒜𑓃 𑒂 𑒖𑒱𑒢𑒑𑒲 𑒦𑒩𑒱 𑒢𑒱𑒧𑒯𑒞𑒢𑒱। 𑒁𑓀𑒠𑒰𑒖𑒧𑒹 𑒢𑒻 𑒁𑒥𑒻𑒏 𑒏𑒰𑒩𑒝 𑒕𑒪𑒢𑒱 𑒖𑒹 𑒏𑒞𑒹𑒏𑒼 𑒣𑒳𑒩𑒰𑒢 𑒯𑒱𑒞-𑒁𑒣𑒹𑒕𑒱𑒞 𑒙𑒴𑒙𑒱 𑒑𑒹𑒪 𑒕𑒪𑒢𑒱। 𑒍𑒢𑒰 𑒢𑒫𑒏𑒼 𑒥𑒜𑓃𑒥𑒼 𑒏𑒋𑒪𑒢𑒱। 𑒋𑒏𑒙𑒰 𑒅𑒠𑒰𑒯𑒩𑒝- 𑒋𑒏𑒙𑒰 𑒑𑒰𑒧𑒹𑒏 𑒮𑓀𑒑𑒲 𑒕𑒪𑒐𑒱𑒢, 𑒏𑒍𑒪𑒹𑒖𑒧𑒹 𑒮𑓀𑒑𑒹 𑒣𑒜𑓃𑒢𑒹 𑒩𑒯𑒟𑒱। 𑒧𑒳𑒠𑒰 𑒖𑒰𑒃𑒞𑒏 𑒮𑒲𑒧𑒰 𑒒𑒹𑒩𑒢𑒹 𑒕𑒪𑒢𑒱। 𑒮𑓂𑒙𑒹𑒙 𑒥𑒻𑓀𑒏𑒧𑒹 𑒯𑒳𑒢𑒏𑒰 𑒢𑒼𑒏𑒩𑒲 𑒦𑒹𑒪𑒢𑒱। 𑒢𑒲𑒏 𑒠𑒩𑒧𑒰𑒯𑒰। 𑒁𑒢𑒡𑒳𑒢 𑒂𑒧𑒠𑒢𑒲। 𑒫𑒱𑒔𑒰𑒩 𑒋𑒞𑒹 𑒥𑒠𑒪𑒱 𑒑𑒹𑒪𑒢𑒱 𑒖𑒹 𑒑𑒰𑒧 𑒋𑒪𑒰𑒣𑒩 𑒦𑒹𑒿𑒙-𑒒𑒰𑒿𑒙 𑒢𑒻 𑒯𑒼𑒃 𑒕𑒪𑒢𑒱। 𑒏𑒳𑒮𑓀𑒨𑒼𑒑 𑒋𑒯𑒹𑒢 𑒦𑒹𑒪𑒢𑒱 𑒖𑒹 𑒠𑒮𑒹-𑒥𑒰𑒩𑒯 𑒥𑒩𑓂𑒐 𑒣𑒕𑒰𑒞𑒱 𑒮𑓂𑒏𑒴𑒙𑒩 𑒋𑒏𑓂𑒮𑒲𑒛𑒹𑓀𑒙𑒧𑒹 𑒖𑒐𑒧𑒲 𑒦𑒹𑒪𑒰 𑒂 𑒑𑒰𑒧 𑒂𑒥𑒱 𑒏𑒱𑒕𑒳 𑒠𑒱𑒢𑒏 𑒣𑒕𑒰𑒞𑒱 𑒧𑒩𑒱 𑒑𑒹𑒪𑒰। 𑒁𑒐𑒢𑒼 𑒠𑒳𑒐 𑒯𑒼𑒃 𑒕𑒢𑒱 𑒖𑒹 𑒧𑒳𑒃𑒪𑒰 𑒣𑒕𑒰𑒞𑒱 𑒠𑒹𑒐𑒋 (𑒖𑒱𑒖𑓂𑒘𑒰𑒮𑒰) 𑒢𑒻 𑒑𑒹𑒪𑒐𑒱𑒢। 𑒧𑒳𑒠𑒰 𑒫𑒱𑒔𑒰𑒩 𑒋𑒯𑒹𑒢 𑒥𑒢𑒱 𑒑𑒹𑒪 𑒕𑒪𑒢𑒱, 𑒖𑒱𑒢𑒑𑒲𑒏 𑒁𑒢𑒳𑒦𑒫𑒮𑒿, 𑒖𑒹 𑒠𑒼𑒮𑓂𑒞-𑒠𑒳𑒬𑓂𑒧𑒢𑒏 𑒥𑒲𑒔𑒏 𑒠𑒴𑒩𑒲𑒏 𑒤𑒪𑒰𑒤𑒪 𑒏𑒱 𑒯𑒼𑒃 𑒕𑒻 𑒮𑒹 𑒥𑒴𑒗𑒱 𑒑𑒹𑒪 𑒕𑒪𑒰। 𑒏𑒢𑒲𑒙𑒰 𑒅𑒠𑒰𑒯𑒩𑒝- 𑒋𑒏 𑒑𑒼𑒙𑒹 𑒢𑒖𑒠𑒲𑒏𑒲 𑒩𑒯𑒟𑒱𑒢। 𑒯𑒳𑒢𑒏𑒰 𑒌𑒚𑒰𑒧 𑒥𑒱𑒂𑒯 𑒩𑒯𑒢𑒱। 𑒠𑒱𑒢-𑒩𑒰𑒞𑒱 𑒩𑒯𑒪𑒰। 𑒧𑒳𑒠𑒰 𑒯𑒳𑒢𑒏𑒰 (𑒖𑒱𑒢𑒏𑒩 𑒏𑒰𑒖 𑒩𑒯𑒢𑒱) 𑒠𑒼𑒮𑓂𑒞-𑒠𑒳𑒬𑓂𑒧𑒢𑒏 𑒥𑒳𑒗𑒻𑒏 𑒢𑒻 𑒩𑒯𑒢𑒱। 𑒮𑒦 𑒩𑓀𑒑𑒏 𑒪𑒼𑒏 𑒏𑒰𑒖𑒧𑒹 𑒪𑒰𑒑𑒪 𑒕𑒪। 𑒋𑒏 𑒑𑒼𑒙𑒹 𑒖𑒱𑒢𑒏𑒰 𑒥𑒠𑒢𑒰𑒧 𑒏𑒩𑒻𑒏 𑒫𑒱𑒔𑒰𑒩 𑒧𑒢𑒧𑒹 𑒩𑒯𑒢𑒱, 𑒔𑒰𑒯𑒹 𑒖𑒹 𑒣𑒕𑒱𑒪𑒰 𑒏𑒼𑒢𑒼 𑒏𑒰𑒩𑒝 𑒯𑒼𑒅, 𑒠𑒰𑒪𑒱𑒧𑒹 𑒠𑒼𑒯𑒩𑒰 𑒏𑓄 𑒢𑒴𑒢 𑒠𑓄 𑒠𑒹𑒪𑒐𑒱𑒢। 𑒣𑒕𑒰𑒞𑒱 𑒖𑒐𑒢 𑒠𑒰𑒪𑒱 𑒢𑒳𑒢𑒑𑒩 𑒦𑓄 𑒑𑒹𑒪𑒻 𑒞𑒐𑒢 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒢𑒰𑒍𑓀 𑒪𑒑𑒰 𑒠𑒹𑒪𑒐𑒱𑒢। 𑒋𑒯𑒱𑒢𑒰 𑒠𑒼𑒮𑒩𑒚𑒰𑒧 𑒦𑒹𑒪। 𑒥𑒱𑒢𑒳 𑒁𑒠𑒯𑒢 𑒠𑒹𑒢𑒹 𑒥𑒩𑒞𑒢𑒧𑒹 𑒮𑒳𑒐𑒪𑒹 𑒠𑒰𑒱𑒪 𑒠𑓄 𑒢𑒰𑒍𑓀 𑒪𑒑𑒰 𑒠𑒹𑒪𑒏𑒢𑒱। 𑒞𑒯𑒴𑒮𑒿 𑒋𑒏𑒥𑒹𑒩 𑒦𑒹𑒪 𑒖𑒹 𑒑𑒰𑒧𑒏 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒏𑒰𑒩𑓂𑒨𑒏𑒩𑓂𑒞𑒰 𑒕𑒪𑒰, 𑒢𑒰𑒔𑒏 𑒦𑒰𑒩 𑒦𑒹𑒙𑒪𑒢𑒱 𑒖𑒹 𑒢𑒲𑒏 𑒢𑒰𑒔 𑒯𑒳𑒁𑒋। 𑒞𑒃 𑒮𑒧𑒋 𑒑𑒰𑒧-𑒒𑒩𑒧𑒹 𑒢𑒰𑒙𑒏-𑒢𑒾𑒙𑓀𑒏𑒲 𑒏𑒧 𑒕𑒪 𑒂 𑒢𑒰𑒔 𑒥𑒹𑒮𑒲 𑒁𑒢𑒹𑒏𑒼 𑒞𑒩𑒯𑒏 𑒕𑒪। 𑒋𑒏 𑒑𑒼𑒙𑒹 𑒢𑒰𑒔 𑒁𑒢𑒻𑒏 𑒦𑒰𑒩 𑒪𑓄 𑒪𑒹𑒪𑒢𑒱। 𑒥𑒜𑓃𑒱𑒨𑒰𑒿 𑒢𑒰𑒔𑒏 𑒐𑒴𑒥 𑒣𑓂𑒩𑒔𑒰𑒩 𑒦𑒹𑒪। 𑒖𑒐𑒢 𑒢𑒰𑒔 𑒂𑒋𑒪 𑒞𑒿 𑒖𑒹𑒯𑒢𑒹 𑒢𑒲𑒏𑒏 𑒣𑓂𑒩𑒔𑒰𑒩 𑒦𑒹𑒪 𑒩𑒯𑒋 𑒞𑒹𑒯𑒢𑒹 𑒯𑒯𑒰𑒮𑒼 𑒦𑒹𑒪। 𑒧𑒳𑒠𑒰 𑒖𑒐𑒢𑒹 𑒏𑒱𑒨𑒼 𑒣𑒩𑒱𑒫𑒰𑒩𑒮𑒿 𑒢𑒱𑒏𑒪𑒱 𑒮𑒧𑒰𑒖𑒧𑒹 𑒛𑒹𑒑 𑒅𑒚𑒥𑒻𑒋 𑒞𑒿 𑒍 𑒄 𑒧𑒰𑒢𑒱 𑒔𑒪𑒻𑒋 𑒖𑒹 𑒢𑒧𑒯𑒩 𑒏𑒰𑒖𑒧𑒹 𑒥𑒹𑒬𑒱𑒨𑒼 𑒂 𑒦𑒰𑒩𑒱𑒨𑒼, 𑒠𑒳𑒢𑒴 𑒏𑒰𑒖 𑒯𑒼𑒃 𑒕𑒻 𑒁𑒣𑒢𑒰 𑒦𑒩𑒱 𑒪𑒼𑒏 𑒣𑒩𑒱𑒨𑒰𑒮𑒹 𑒏𑒩𑒻𑒋, 𑒧𑒳𑒠𑒰 𑒏𑒱𑒕𑒳 𑒞𑓂𑒩𑒳𑒙𑒱 𑒩𑒯𑒱 𑒖𑒰𑒃 𑒕𑒻, 𑒞𑒐𑒢 𑒏𑒱 𑒏𑒋𑒪 𑒖𑒰𑒋𑒞। 𑒯𑒿 𑒋𑒞𑒹 𑒖𑒩𑒴𑒩 𑒖𑒹 𑒁𑒡𑒱𑒏-𑒮𑒿-𑒁𑒡𑒱𑒏 𑒏𑒰𑒖𑒏 𑒮𑒦 𑒣𑒯𑒪𑒴𑒣𑒩 𑒢𑒖𑒩𑒱 𑒩𑒰𑒐𑒏 𑒔𑒰𑒯𑒲। 𑒋𑒯𑒱𑒢𑒰 𑒏𑒼𑒢𑒼 𑒒𑒙𑒢𑒼𑒏 𑒯𑒼𑒃 𑒕𑒻। 𑒏𑒱𑒨𑒼 𑒥𑒹𑒧𑒰𑒩 𑒕𑒟𑒱 𑒫𑒰 𑒏𑒼𑒢𑒼 𑒠𑒼𑒮𑒩𑒹 𑒏𑒰𑒩𑒝 𑒕𑒢𑓂𑒯𑒱, 𑒩𑓀𑒑-𑒥𑒱𑒩𑓀𑒑𑒏 𑒮𑒳𑒗𑒰𑒫 𑒪𑒼𑒏 𑒠𑒻𑒞 𑒁𑒕𑒱। 𑒢𑒲𑒏𑒼 𑒩𑒯𑒻 𑒕𑒻 𑒁𑒡𑒪𑒼 𑒩𑒯𑒻 𑒕𑒻, 𑒞𑒃𑒚𑒰𑒧 𑒋𑒯𑒢𑒹 𑒮𑒧𑒮𑓂𑒨𑒰 𑒅𑒚𑒥𑒰𑒏 𑒮𑓀𑒦𑒰𑒫𑒢𑒰 𑒩𑒯𑒻 𑒕𑒻।
𑒮𑓂𑒫𑒩𑓂𑒑𑒲𑒨 𑒏𑒰𑒪𑒲 𑒥𑒰𑒥𑒴𑒏 𑒣𑒯𑒱𑒪 𑒥𑒯𑒰𑒪𑒲 𑒛𑒲.𑒋𑒮.𑒣𑒲.𑒏 𑒩𑒴𑒣𑒧𑒹 𑒁𑒑𑒩𑒞𑒪𑒰 (𑒞𑓂𑒩𑒱𑒣𑒳𑒩𑒰)𑒧𑒹 𑒦𑒹𑒪 𑒩𑒯𑒢𑒱। 𑒔𑒰𑒩𑒱 𑒮𑒋 𑒩𑒴𑒣𑒻𑒨𑒰 𑒧𑒯𑒲𑒢𑒰 𑒠𑒩𑒧𑒰𑒯𑒰। 𑒮𑒧𑒻𑒨𑒼 𑒮𑒮𑓂𑒞 𑒩𑒯𑒋। 𑒁𑒢𑓂𑒞 𑒞𑒏 𑒄 𑒥𑒰𑒞 𑒥𑒖𑒻𑒞 𑒩𑒯𑒪𑒰𑒯 𑒖𑒹 𑒮𑒱𑒑𑒩𑒹𑒙 𑒂 𑒠𑒰𑒩𑒴 𑒣𑒲𑒥𑒻𑒞 𑒕𑒪𑒾𑓀। 𑒏𑒩𑒲𑒥 𑒣𑒰𑒿𑒔 𑒥𑒩𑓂𑒐 𑒣𑒲𑒪𑒾𑓀। 𑒣𑒩𑒱𑒫𑒰𑒩𑒧𑒹 𑒧𑒞𑒦𑒹𑒠𑒏 𑒅𑒦𑒩𑒱 𑒑𑒹𑒪 𑒩𑒯𑒢𑒱। 𑒅𑒦𑒩𑒻𑒏 𑒏𑒰𑒩𑒝 𑒮𑓂𑒣𑒭𑓂𑒙𑒹 𑒕𑒪। 𑒋𑒏 𑒮𑒰𑒡𑒰𑒩𑒝 𑒟𑒰𑒢𑒰 𑒮𑒱𑒣𑒰𑒯𑒲 𑒠𑒮 𑒥𑒲𑒒𑒰𑒏 𑒣𑓂𑒪𑒰𑒙 𑒏𑒲𑒢𑒱, 𑒞𑒲𑒢𑒱 𑒧𑓀𑒖𑒱𑒪𑒰 𑒧𑒏𑒰𑒢 𑒥𑒢𑒰, 𑒣𑒰𑒿𑒔 𑒪𑒰𑒐𑒏 𑒥𑒹𑒙𑒱𑒨𑒼 𑒥𑒱𑒂𑒯 𑒏𑓄 𑒪𑒃𑒋 𑒞𑒃 𑒮𑓀𑒑 𑒮𑒧𑒰𑓀𑒑𑒼 𑒮𑒦𑒏𑒹𑒿 𑒢𑒼𑒏𑒩𑒲 𑒪𑒑𑒰 𑒪𑒃𑒋 𑒞𑒃𑒚𑒰𑒧 𑒄 (𑒏𑒰𑒪𑒲 𑒥𑒰𑒥𑒴) 𑒕𑒳𑒔𑓂𑒕𑒹 𑒯𑒰𑒏𑒱𑒧 𑒕𑒟𑒱। 𑒧𑒳𑒠𑒰 𑒍 𑒣𑒩𑒱𑒫𑒰𑒩𑒏𑒹𑒿 𑒥𑒳𑒢𑒱𑒨𑒰𑒠𑒲 𑒜𑓀𑒑𑒮𑒿 𑒥𑒠𑒪𑒋 𑒔𑒰𑒯𑒻 𑒕𑒪𑒰। 𑒁𑒣𑒢 𑒐𑒢𑒠𑒰𑒢𑒲 𑒫𑒵𑒞𑓂𑒞𑒱𑒏𑒹𑒿 𑒁𑒡𑒪𑒰 𑒫𑒵𑒞𑓂𑒞𑒱 𑒏𑒯𑒻 𑒕𑒪𑒰𑒯। 𑒣𑒩𑒱𑒫𑒰𑒩 𑒏𑒩𑓂𑒖𑒧𑒹 𑒛𑒳𑒧𑒪 𑒕𑒪। 𑒠𑒱𑒨𑒰𑒠𑒲𑒏 𑒗𑒑𑒛𑓃𑒰 𑒏𑒼𑒩𑓂𑒙𑒧𑒹 𑒔𑒪𑒻𑒞 𑒕𑒪𑒢𑒱। 𑒍𑒃 𑒫𑒱𑒫𑒰𑒠𑒏𑒹𑒿 𑒖𑒹𑒢𑒰-𑒞𑒹𑒢𑒰 𑒏𑒰𑒪𑒲 𑒥𑒰𑒥𑒴 𑒱𑒢𑒣𑒙𑒾𑒪𑒢𑒱। 𑒏𑒩𑓂𑒖𑒮𑒿 𑒣𑒩𑒱𑒫𑒰𑒩𑒏𑒹𑒿 𑒧𑒳𑒏𑓂𑒞 𑒏𑒹𑒪𑒢𑒱। 𑒣𑒕𑒰𑒞𑒱 𑒒𑒩 𑒥𑒢𑒥𑒻𑒏 𑒫𑒱𑒔𑒰𑒩 𑒏𑒹𑒪𑒢𑒱। 𑒦𑒙𑓂𑒚𑒰 𑒪𑒑𑒰 𑒥𑒢𑒾𑒪𑒢𑒱। 𑒁𑒣𑒢𑒰𑒮𑒿 𑒕𑒼𑒙 𑒦𑒰𑒋 𑒧𑒰𑒗𑒱𑒪 𑒦𑒰𑒋𑒏𑒹𑒿 𑒁𑒑𑒩𑒞𑒪𑒹𑒏 𑒯𑒰𑒃-𑒮𑓂𑒏𑒴𑒪𑒧𑒹 𑒏𑒰𑒖 𑒡𑒛𑓃𑒾𑒪𑒢𑒱।
𑒮𑒰𑒪𑒧𑒹 𑒋𑒏 𑒥𑒹𑒩 𑒢𑒱𑒬𑓂𑒔𑒱𑒞 𑒩𑒴𑒣𑒹 𑒁𑒥𑒱𑒞𑒹 𑒕𑒪𑒰𑒯। 𑒧𑒰𑒮 𑒠𑒱𑒢 𑒑𑒰𑒧𑒧𑒹 𑒩𑒯𑒻𑒞 𑒕𑒪𑒰𑒯। 𑒞𑒃-𑒥𑒲𑒔 𑒞𑒲𑒢-𑒔𑒰𑒩𑒱 𑒦𑒹𑒿𑒙 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒮𑒿 𑒦𑓄 𑒖𑒰𑒃 𑒕𑒪𑒢𑒱। 𑒧𑒳𑒠𑒰 𑒧𑒰𑒞𑓂𑒩 𑒞𑒲𑒢-𑒔𑒰𑒩𑒱 𑒦𑒹𑒿𑒙𑒧𑒹 𑒮𑒰𑒪 𑒦𑒩𑒱𑒏 𑒏𑒱𑒩𑒱𑒨𑒰-𑒏𑒪𑒰𑒣𑒏 𑒏𑒱 𑒯𑒋𑒞। 𑒯𑒳𑒢𑒏 𑒁𑒣𑒢 𑒩𑒴𑒙𑒱𑓀𑒑 𑒕𑒪𑒢𑒱। 𑒏𑒰𑒖𑒼-𑒅𑒠𑒹𑒧 𑒚𑒹𑒏𑒢𑒰 𑒏𑓄 𑒁𑒥𑒻𑒞 𑒕𑒪𑒰𑒯। 𑒂𑒚 𑒠𑒱𑒢 𑒯𑒼𑒃𑒞-𑒯𑒼𑒃𑒞 𑒏𑒰𑒖 𑒢𑒱𑒥𑒙𑒥𑒻 𑒕𑒪𑒰𑒯। 𑒣𑒕𑒰𑒞𑒱 𑒏𑒳𑒙𑒳𑒧𑒰𑒩𑒹 (𑒮𑒰𑒮𑒳𑒩-𑒧𑒰𑒞𑓂𑒩𑒱𑒏-𑒥𑒯𑒱𑒢 𑒃𑒞𑓂𑒨𑒰𑒠𑒱) 𑒏𑒩𑒻 𑒕𑒪𑒰𑒯। 𑒧𑒰𑒮 𑒠𑒱𑒢 𑒣𑒳𑒩𑒻𑒞-𑒣𑒳𑒩𑒻𑒞 𑒏𑒰𑒖𑒼 𑒢𑒱𑒥𑒙𑒱 𑒖𑒰𑒃 𑒕𑒪𑒢𑒱। 𑒂 𑒕𑒳𑒙𑓂𑒙𑒱𑒨𑒼 𑒥𑒲𑒞 𑒖𑒰𑒃 𑒕𑒪𑒢𑒱। 𑒏𑒰𑒖𑒏 𑒠𑒾𑒛𑓃𑒧𑒹 𑒏𑒰𑒖𑒹 𑒑𑒣-𑒮𑒣 𑒏𑒩𑒻𑒏 𑒧𑒾𑒏𑒼 𑒠𑒻𑒞 𑒕𑒻। 𑒋𑒏𑒙𑒰 𑒏𑒰𑒖𑒏 𑒦𑒰𑒩 𑒁𑒣𑒢𑒼 𑒆𑒣𑒩 𑒩𑒐𑒻 𑒕𑒪𑒰𑒯 𑒂 𑒮𑒧𑒰𑓀𑒑𑒼 𑒮𑒦𑒏𑒹𑒿 𑒪𑒑𑒥𑒻𑒞 𑒕𑒪𑒰𑒯। 𑒮𑒧𑓂𑒥𑒢𑓂𑒡 𑒥𑒜𑓃𑒪𑒢𑒱। 𑒋𑒢𑒰𑒃-𑒑𑒹𑒢𑒰𑒃𑒏 𑒮𑓀𑒑 𑒐𑒹𑒢𑒰𑒃-𑒣𑒲𑒢𑒰𑒃 𑒮𑒹𑒯𑒼 𑒥𑒜𑓃𑒱 𑒑𑒹𑒪𑒢𑒱।
𑒯𑒰𑒃 𑒮𑓂𑒏𑒴𑒪𑒧𑒹 𑒤𑒮𑓂𑒙 𑒏𑒩𑒻𑒧𑒹 𑒦𑒴𑒑𑒼𑒪𑒏 𑒨𑒼𑒑𑒠𑒰𑒢 𑒥𑒹𑒮𑒲 𑒕𑒪𑒢𑒱। 𑒋𑒏 𑒠𑒴 𑒢𑒧𑓂𑒥𑒩 𑒏𑒧 𑒯𑒼𑒃 𑒕𑒪𑒢𑒱। 𑒣𑒴𑒩𑓂𑒫𑒰𑒔𑒪𑒏 𑒱𑒞𑓂𑒩𑒣𑒳𑒩𑒰, 𑒧𑒝𑒲𑒣𑒳𑒩, 𑒧𑒱𑒖𑒼𑒩𑒧, 𑒁𑒩𑒴𑒝𑒰𑒔𑒪, 𑒢𑒰𑒑𑒼𑒪𑒻𑓀𑒛 𑒃𑒞𑓂𑒨𑒰𑒠𑒱𑒏 𑒢𑒲𑒏 𑒁𑒡𑓂𑒨𑒨𑒢 𑒕𑒪𑒢𑒱। 𑒍𑒢𑒰 𑒡𑒰𑒩𑓂𑒧𑒱𑒏 𑒣𑓂𑒩𑒫𑒵𑒞𑓂𑒞𑒱 𑒠𑒱𑒮 𑒥𑒜𑓃𑒪𑒰𑒯। 𑒣𑒴𑒖𑒰-𑒣𑒰𑒚 𑒠𑒱𑒮 𑒥𑒜𑓃𑒱 𑒑𑒹𑒪𑒰। 𑒛𑒲.𑒋𑒮.𑒣𑒲. 𑒮𑒿 𑒋𑒮.𑒣𑒲. 𑒦𑒹𑒪𑒰 𑒣𑒕𑒰𑒞𑒱 𑒁𑒣𑒢 𑒥𑒠𑒪𑒲 𑒙𑓂𑒩𑒹𑓀𑒢𑒱𑒑 𑒏𑒍𑒖𑒹𑒪𑒧𑒹 𑒏𑒩𑒰 𑒪𑒹𑒪𑒢𑒱। 𑒞𑒰 𑒋𑒮.𑒣𑒲. 𑒍𑒯𑒲𑒧𑒹 𑒩𑒯𑒪𑒰𑒯। 𑒞𑒲𑒢-𑒔𑒰𑒩𑒱 𑒮𑒰𑒪 𑒣𑒕𑒰𑒞𑒱 (𑒁𑒣𑒹𑒕𑒰 𑒦𑒹𑒪𑒰𑒣𑒩) 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒞𑓂𑒩𑒱𑒣𑒳𑒩𑒰 𑒁𑒥𑒻𑒪𑒹 𑒏𑒯𑒋 𑒪𑒑𑒪𑒰𑒯। 𑒧𑒳𑒠𑒰 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒠𑒼𑒯𑒩𑒲 𑒍𑒗𑒩𑒲 𑒪𑒰𑒑𑒪 𑒩𑒯𑒢𑒱। 𑒣𑒩𑒱𑒫𑒰𑒩𑒮𑒿 𑒪𑓄 𑒏𑓄 𑒧𑒳𑒏𑒠𑒧𑒰𑒏 𑒐𑒩𑓂𑒔 𑒡𑒩𑒱𑒏। 𑒢𑒹 𑒏𑒼𑒙-𑒏𑒔𑒯𑒩𑒲 𑒁𑒥𑒻-𑒖𑒰𑒃𑒮𑒿 𑒕𑒳𑒙𑓂𑒙𑒲 𑒂 𑒢𑒹 𑒠𑒼𑒮𑒩 𑒠𑒱𑒮 𑒖𑒰𑒃-𑒁𑒥𑒻𑒏 𑒕𑒳𑒙𑓂𑒙𑒲।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑓑𑓙𑓙𑓘 𑒄. 𑒡𑒩𑒱 𑒁𑒥𑒻𑒞-𑒁𑒥𑒻𑒞 𑒣𑒴𑒩𑓂𑒫𑒰𑓀𑒔𑒪 𑒠𑒹𑒐𑒻𑒏 𑒋𑒞𑒹 𑒖𑒱𑒖𑓂𑒘𑒰𑒮𑒰 𑒥𑒜𑓃𑒱 𑒑𑒹𑒪𑒢𑓂𑒯𑒱 𑒖𑒹 𑒁𑒣𑒢𑒰𑒏𑒹𑒿 𑒍 𑒢𑒻 𑒮𑒧𑓂𑒯𑒰𑒩𑒱 𑒣𑒹𑒪𑒢𑓂𑒯𑒱। 𑒍𑒢𑒰 𑒮𑒧𑒻𑒏 𑒣𑒪𑒐𑒞𑒱 𑒦𑒹𑒙 𑒑𑒹𑒪𑒢𑒱 𑒂 𑒮𑒹 𑒦𑒹𑒙𑒪𑒢𑒱 𑒠𑒳𑒩𑓂𑒑𑒰𑒣𑒴𑒖𑒰𑒏 𑒖𑒱𑒧𑓂𑒧𑒰𑒮𑒿 𑒁𑒪𑒑 𑒦𑒹𑒪𑒰𑒣𑒩। 𑒠𑒼𑒮𑒩 𑒏𑒰𑒩𑒝 𑒄𑒯𑒼 𑒦𑒹𑒪𑒢𑒱 𑒖𑒹 𑒣𑒔𑒰𑒮𑒼 𑒮𑒿 𑒆𑒣𑒩 𑒧𑒳𑒏𑒠𑒧𑒰 𑒢𑒱𑒫𑒙𑒱 𑒑𑒹𑒪 𑒕𑒪𑒢𑒱 𑒖𑒃𑒮𑒿 𑒏𑒰𑒹𑒙-𑒏𑒔𑒯𑒩𑒲𑒏 𑒂𑒫𑒰𑒖𑒰𑒯𑒲 𑒮𑒹𑒯𑒼 𑒏𑒧𑒱 𑒑𑒹𑒪𑒢𑒱। 𑒠𑒴𑒙𑒰 𑒮𑒹𑒬𑒢 𑒏𑒹𑒬 (𑓓𑓐𑓗 𑒂 𑓔𑓓𑓖 𑒁𑒩𑓂𑒟𑒰𑒞𑓂 𑒧𑒵𑒞𑓂𑒨𑒳𑒏 𑒣𑓂𑒩𑒨𑒰𑒮 𑒂 𑒁𑒑𑒱𑒪𑒑𑓂𑒑𑒲।) 𑒧𑒰𑒞𑓂𑒩 𑒥𑒔𑒱 𑒑𑒹𑒪 𑒕𑒪𑒢𑒱। 𑒞𑒯𑒴𑒧𑒹 𑓔𑓓𑓖 (𑒁𑒑𑒱𑒪𑒑𑓂𑒑𑒲) 𑒏𑒹𑒬 𑒯𑒩𑒰𑒃𑒨𑒹 𑒑𑒹𑒪𑒻। 𑒯𑒩𑒰 𑒄 𑒑𑒹𑒪𑒻 𑒖𑒹 𑒗𑓀𑒗𑒰𑒩𑒣𑒳𑒩-𑒧𑒡𑒳𑒥𑒢𑒲𑒏 𑒥𑒲𑒔 𑒖𑒹 𑒏𑒼𑒩𑓂𑒙𑒏 𑒥𑒠𑒪𑒰-𑒥𑒠𑒪𑒲 𑒦𑒹𑒪𑒻 𑒍𑒃𑒧𑒹 𑒄 𑒏𑒹𑒮 𑒯𑒩𑒰 𑒑𑒹𑒪𑒻। 𑒍𑒢𑒰 𑒏𑒞𑒹 𑒑𑒼𑒙𑒹 𑒧𑒳𑒿𑒯𑒹𑒿 𑒮𑒳𑒢𑒢𑒹 𑒩𑒯𑒟𑒱 𑒖𑒹 𑒏𑒼𑒙𑒮𑒿 𑒏𑒹𑒬𑒏 𑒤𑒰𑒃𑒪𑒼 𑒑𑒰𑒃𑒥 𑒯𑒼𑒃 𑒕𑒻। 𑒂 𑒄𑒯𑒼 𑒮𑒳𑒢𑒢𑒹 𑒩𑒯𑒟𑒱 𑒖𑒹 𑒏𑒹𑒬𑒼 𑒯𑒩𑒰 𑒖𑒰𑒃 𑒕𑒻। 𑒍𑒢𑒰 𑒠𑒳𑒫𑒱𑒡𑒰 𑒩𑒯𑒥𑒹 𑒏𑒩𑒢𑓂𑒯𑒱। 𑒖𑒃𑒮𑒿 𑒐𑒳𑒬𑒱𑒨𑒼 𑒯𑒼𑒃𑒢𑓂𑒯𑒱 𑒂 𑒔𑒱𑒢𑓂𑒞𑒼। 𑒠𑒼𑒮𑒩 𑓓𑓐𑓗 (𑒋𑒙𑒹𑒧𑓂𑒣 𑒙𑒴 𑒧𑒩𑓂𑒛𑒩) 𑒩𑒯𑒢𑓂𑒯𑒱 𑒍𑒃𑒧𑒹 𑒞𑒿 𑒮𑒖𑒰 𑒦𑓄 𑒑𑒹𑒪 𑒩𑒯𑒢𑒱 𑒧𑒳𑒠𑒰 𑒐𑒳𑒬𑒲 𑒄 𑒩𑒯𑒢𑓂𑒯𑒱 𑒖𑒹 𑒖𑒞𑒹 𑒮𑒖𑒰𑒋 𑒏𑒰𑒢𑒴𑒢𑒲 𑒠𑒾𑒛𑓃𑒧𑒹 𑒯𑒹𑒥𑒰𑒏 𑒔𑒰𑒯𑒲 𑒩𑒯𑒻 𑒮𑒹 𑒢𑒻 𑒦𑒹𑒪 𑒩𑒯𑒻, 𑒞𑒿𑒋 𑒧𑒖𑒑𑒴𑒞𑒼 𑒛𑒼𑒩𑒲 𑒦𑒞𑓂𑒞𑒰 𑒞𑒼𑒛𑓃𑒱-𑒞𑒼𑒛𑓃𑒱 𑒙𑒴𑒙𑒱 𑒖𑒰𑒃 𑒕𑒻, 𑒪𑒰𑒦-𑒯𑒰𑒢𑒱 𑒧𑒳𑒏𑒠𑒧𑒰𑒮𑒿 (𑓓𑓐𑓗𑒮𑒿) 𑒖𑒹 𑒦𑒹𑒪 𑒯𑒼𑒃𑒢𑓂𑒯𑒱 𑒧𑒳𑒠𑒰 𑒋𑒏𑒙𑒰 𑒁𑒢𑒳𑒦𑒫 𑒖𑒩𑒴𑒩 𑒦𑒹𑒪𑒢𑓂𑒯𑒱 𑒖𑒹 𑒦𑓂𑒩𑒭𑓂𑒙 𑒢𑓂𑒨𑒰𑒨𑒰𑒪𑒨𑒏 𑒏𑒳𑒩𑒮𑒲 𑒏𑒹𑒢𑒰 𑒛𑒼𑒪𑒻𑒞 𑒩𑒯𑒻 𑒕𑒻। 𑒍𑒢𑒰 𑒏𑒼𑒙-𑒏𑒔𑒯𑒩𑒲𑒮𑒿 𑒢𑒱𑒮𑒔𑒱𑒢𑒞𑒲 𑒖𑒏𑒰𑒿 𑒖𑒩𑒴𑒩 𑒦𑒹𑒪𑒰। 𑒧𑒳𑒠𑒰 𑒔𑒱𑒢𑓂𑒞𑒰 𑒞𑒿 𑒩𑒯𑒥𑒹 𑒏𑒩𑒢𑓂𑒯𑒱। 𑒯𑒖𑒰𑒩 𑒠𑒹𑒫𑒲-𑒠𑒹𑒫𑒞𑒰𑒮𑒿 𑒖𑒯𑒱𑒢𑒰 𑒋𑒏 𑒖𑒑𑒠𑒧𑓂𑒥𑒰 𑒞𑒑𑒞𑒑𑒩, 𑒞𑒯𑒱𑒢𑒰 𑒠𑒳𑒢𑒴 𑒏𑒹𑒬 𑒩𑒯𑒢𑓂𑒯𑒱। 𑒋𑒏 𑒠𑒱𑒢 𑒖𑒐𑒢 𑒮𑒦 𑒏𑒹𑒬𑒏𑒹𑒿 𑒧𑒢 𑒣𑒰𑒛𑓃𑒱 𑒂𑒃.𑒣𑒲.𑒮𑒲.𑒮𑒿 𑒧𑒱𑒪𑒹𑒪𑒢𑓂𑒯𑒱 𑒞𑒿 𑒥𑒴𑒗𑒱 𑒣𑒛𑓃𑒪𑒢𑓂𑒯𑒱 𑒖𑒹 𑒖𑒿 𑒬𑒳𑒩𑒴𑒯𑒹 𑒮𑒿 𑒮𑒖𑒰𑒋 𑒯𑒼𑒃𑒞 𑒁𑒥𑒻𑒞 𑒩𑒯𑒱𑒞𑒢𑓂𑒯𑒱 𑒞𑒿 𑒦𑒩𑒱𑒮𑒏 𑒮𑒦 𑒠𑒱𑒢 𑒖𑒯𑒪𑒹𑒧𑒹 𑒁𑒑𑒱𑒪𑒰 𑒏𑒹𑒬𑒏 𑒤𑒻𑒮𑒪𑒰 𑒮𑒳𑒢𑒱𑒞𑒟𑒱। 𑒧𑒳𑒠𑒰 𑒏𑒹𑒯𑒹𑒢𑒼 𑒤𑒛𑓃𑒪 𑒂𑒧𑒏 𑒑𑒰𑒕 𑒏𑒱𑒁𑒋 𑒢𑒹 𑒯𑒳𑒁𑒋 𑒧𑒳𑒠𑒰 𑒣𑒏𑒪𑒰𑒣𑒩 𑒥𑒰 𑒥𑒱𑒯𑒰𑒛𑓃𑒱𑒧𑒹 𑒯𑒯𑒩𑒱 𑒋𑒏𑓂𑒏𑒲-𑒠𑒳𑒏𑓂𑒏𑒲 𑒑𑒱𑒢𑒞𑒲𑒧𑒹 𑒔𑒪𑒱 𑒁𑒥𑒻𑒋 𑒞𑒯𑒱𑒢𑒰 𑒦𑒹𑒪 𑒩𑒯𑒢𑓂𑒯𑒱। 𑒦𑒲𑒧 𑒖𑒐𑒢 𑒁𑒦𑒱𑒧𑒢𑓂𑒨𑒳𑒏𑒹𑒿 𑒮𑒰𑒞𑒏 𑒤𑒰𑒙𑒏 𑒞𑒼𑒛𑓃𑒻𑒏 𑒦𑒰𑒩 𑒪𑓄 𑒪𑒹𑒪𑒢𑒱 𑒞𑒹𑒯𑒢𑒹 𑒧𑒢𑒧𑒹 𑒅𑒚𑒪𑒢𑒱। 𑒤𑒹𑒩 𑒚𑒧𑒏𑒪 𑒮𑒦 𑒏𑒹𑒬𑒏 𑒮𑒖𑒰𑒋 𑒖𑒼𑒛𑓃𑒪𑒢𑓂𑒯𑒱 𑒞𑒿 𑓑𑓐𑓗 𑒥𑒩𑓂𑒐 𑒣𑒳𑒩𑒻𑒞 𑒩𑒯𑒢𑓂𑒯𑒱। 𑒖𑒱𑒢𑒑𑒲 𑒠𑒱𑒮 𑒞𑒏𑒪𑒢𑒱 𑒞𑒿 𑒥𑒴𑒗𑒱 𑒣𑒛𑓃𑒪𑒢𑓂𑒯𑒱 𑒖𑒹 𑒮𑒋 𑒥𑒩𑓂𑒐𑒏 𑒏𑒰𑒖 𑒞𑒿 𑒣𑒳𑒩𑒱𑒨𑒹 𑒑𑒹𑒪𑒢𑓂𑒯𑒱। 𑒖𑒿 𑒢𑒻 𑒏𑒹𑒢𑒹 𑒩𑒯𑒱𑒞𑒟𑒱 𑒞𑒿 𑒠𑒼𑒐𑒲 𑒏𑒹𑒢𑒰 𑒦𑒹𑒪𑒰? 𑒮𑒰𑒅𑒢𑒏 𑒮𑒰𑒿𑒣 𑒖𑒏𑒰𑒿 𑒏𑒹𑒔𑒳𑒂 𑒕𑒼𑒛𑓃𑒻𑒏 𑒧𑒾𑒮𑒧 𑒠𑒹𑒐𑒱 𑒖𑒱𑒢𑒑𑒲 𑒥𑒠𑒪𑒻𑒏 𑒫𑒱𑒔𑒰𑒩 𑒏𑒹𑒪𑒢𑒱। 𑒣𑒻𑒕𑒪𑒰 𑒖𑒱𑒢𑒑𑒲 𑒞𑒿 𑒁𑒑𑒱𑒪𑒰 𑒖𑒱𑒢𑒑𑒲𑒏 𑒮𑒼𑓀𑒑𑒩 𑒥𑒢𑒱 𑒑𑒹𑒪 𑒕𑒪𑒢𑒱। 𑒮𑒰𑒯𑒱𑒞𑓂𑒨-𑒠𑒱𑒬𑒰𑒧𑒹 𑒥𑒜𑓃𑒻𑒏 𑒫𑒱𑒔𑒰𑒩 𑒅𑒚𑒪𑒢𑒱। 𑒧𑒳𑒠𑒰 𑒮𑒰𑒯𑒱𑒞𑓂𑒨𑒏 𑒫𑒱𑒠𑓂𑒨𑒰𑒩𑓂𑒟𑒲 𑒞𑒿 𑒩𑒯𑒱 𑒔𑒳𑒏𑒪 𑒕𑒪𑒰, 𑒮𑒴𑒩-𑒣𑒞𑒰 𑒞𑒿 𑒥𑒴𑒱𑒗 𑒔𑒳𑒏𑒪 𑒕𑒪𑒰। 𑒙𑒹𑒥𑒱𑒨𑒰-𑒙𑒹𑒥𑒱𑒨𑒰 𑒏𑒱𑒕𑒳 𑒮𑒰𑒯𑒱𑒞𑓂𑒨𑒏𑒰𑒩𑒏 𑒮𑒰𑒯𑒱𑒞𑓂𑒨 𑒣𑒜𑓃𑒋 𑒪𑒑𑒪𑒰, 𑒧𑒳𑒠𑒰 𑒧𑒢 𑒤𑒹𑒩 𑒚𑒧𑒏𑒱 𑒑𑒹𑒪𑒢𑒱। 𑒧𑒢 𑒚𑒧𑒏𑒱 𑒑𑒹𑒪𑒢𑒱 𑒄 𑒖𑒹 𑒏𑒱𑒞𑒰𑒥 𑒥𑒰𑒞 𑒖𑒿 𑒂𑒿𑒐𑒱𑒏 𑒠𑒹𑒐𑒪 𑒯𑒳𑒁𑒋 𑒍 𑒥𑒹𑒮𑒲 𑒢𑒲𑒏 𑒯𑒼𑒃𑒋। 𑒏𑒱𑒞𑒰𑒥 𑒏𑒱𑒢𑒻𑒏 𑒐𑒩𑓂𑒔𑒏 𑒏𑒙𑒾𑒞𑒲 𑒏𑓄 𑒒𑒴𑒧𑒻𑒏 𑒫𑒱𑒔𑒰𑒩 𑒏𑒹𑒪𑒢𑒱। 𑒠𑒹𑒬𑒏 𑒏𑒹𑒩𑒪, 𑒏𑒩𑓂𑒢𑒰𑒙𑒏, 𑒏𑒬𑓂𑒧𑒲𑒩 𑒕𑒼𑒛𑓃𑒱 𑒮𑒦 𑒩𑒰𑒖𑓂𑒨 𑒠𑒹𑒐𑒪𑒢𑒱। 𑒧𑒳𑒠𑒰 𑒖𑒴𑒢 𑓒𑓐𑓑𑓒 𑒄.𑒧𑒹 𑒏𑒹𑒩𑒪𑒏 𑒡𑒩𑒞𑒲𑒣𑒩 𑒏𑒼𑒔𑓂𑒔𑒱𑒧𑒹 𑒖𑒐𑒢 “𑒑𑒰𑒧𑒏 𑒖𑒱𑒢𑒏𑒲” 𑒪𑒒𑒳𑒏𑒟𑒰 𑒮𑓀𑒑𑓂𑒩𑒯 𑒪𑒹𑒪 𑒙𑒻𑒑𑒼𑒩 𑒮𑒰𑒯𑒱𑒞𑓂𑒨 𑒣𑒳𑒩𑒮𑓂𑒏𑒰𑒩 𑒣𑓂𑒩𑒰𑒣𑓂𑒞 𑒦𑒹𑒪𑒢𑒱 𑒞𑒿 𑒏𑒹𑒩𑒪 𑒮𑒹𑒯𑒼 𑒒𑒳𑒧𑒱 𑒪𑒹𑒪𑒢𑒱। 𑓑𑓙𑓕𑓗 𑒄.𑒧𑒹 𑒏𑒹𑒩𑒪𑒧𑒹 𑒫𑒰𑒧𑒣𑓀𑒟𑒲 𑒮𑒩𑒏𑒰𑒩 𑒥𑒢𑒪 𑒕𑒪। 𑒠𑒹𑒬𑒏 𑒍 𑒩𑒰𑒖𑓂𑒨 𑒖𑒃𑒚𑒰𑒧 𑒬𑒞-𑒣𑓂𑒩𑒞𑒱𑒬𑒞 𑒣𑒜𑓃𑒪-𑒪𑒱𑒐𑒪 𑒕𑒟𑒱। 𑒐𑒳𑒬𑒲 𑒦𑒹𑒪𑒢𑒱।
𑒁𑒐𑒢 𑒡𑒩𑒱 𑒦𑒴𑒑𑒼𑒪 𑒋𑒞𑒥𑒹 𑒥𑒳𑒗𑒻 𑒕𑒪𑒰 𑒖𑒹 𑒠𑒹𑒬𑒏 𑒣𑒴𑒩𑓂𑒫𑒲 𑒦𑒰𑒑 𑒁𑒮𑒰𑒧 𑒕𑒲। 𑒂𑒢-𑒂𑒢 𑒩𑒰𑒖𑓂𑒨 𑒖𑒹 𑒥𑒢𑒪 𑒍 𑒣𑒕𑒰𑒞𑒱𑒨𑒼 𑒥𑒢𑒪 𑒂 𑒔𑒩𑓂𑒔𑒼 𑒮𑓀𑒏𑓂𑒭𑒹𑒣𑒹 𑒕𑒪। 𑒯𑒰𑒨𑒩 𑒮𑒹𑒏𑒹𑒝𑓂𑒛𑓂𑒩𑒲 𑒡𑒩𑒱 𑒦𑒴𑒑𑒼𑒪 𑒣𑒜𑓃𑒢𑒹 𑒕𑒪𑒰। 𑒣𑒕𑒰𑒞𑒱 𑒢𑒯𑒱𑒨𑒹 𑒣𑒜𑓃𑒪𑒢𑒱। 𑒞𑒯𑒴𑒧𑒹 𑒏𑒱𑒕𑒳 𑒒𑒙𑒥𑒱𑒨𑒹 𑒦𑓄 𑒑𑒹𑒪𑒢𑒱, 𑒒𑒙𑒫𑒱𑒨𑒼 𑒮𑓂𑒫𑒰𑒦𑒰𑒫𑒱𑒏𑒹 𑒦𑒹𑒪𑒢𑒱। 𑒮𑓂𑒫𑒰𑒦𑒰𑒫𑒱𑒏 𑒄 𑒖𑒹 𑒖𑒯𑒱𑒢𑒰 𑒋𑒧.𑒋. 𑒣𑒰𑒮, 𑒯𑒰𑒃 𑒮𑓂𑒏𑒴𑒪𑒏 𑒬𑒱𑒏𑓂𑒭𑒏 𑒥𑒢𑒱, 𑒯𑒰𑒃 𑒮𑓂𑒏𑒴𑒪 𑒣𑒰𑒮 𑒧𑒱𑒛𑓂𑒪 𑒮𑓂𑒏𑒴𑒪 𑒦𑒹𑒪𑒼𑒣𑒩 𑒥𑒩𑒠𑒰𑒮 𑒏𑒃𑒨𑒹 𑒪𑒃 𑒕𑒟𑒱 𑒞𑒯𑒱𑒢𑒰 𑒄𑒯𑒼 𑒏𑒹𑒪𑒢𑒱।
𑒂𑒮𑒲𑒢 𑒧𑒰𑒮, 𑒠𑒳𑒩𑓂𑒑𑒰𑒣𑒴𑒖𑒰𑒏 𑒮𑒧𑒋। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒋𑒙𑒪𑒮 𑒢𑒱𑒏𑒰𑒪𑒱 𑒁𑒖𑒧𑒥𑒋 𑒪𑒑𑒪𑒰। 𑒒𑒩𑒮𑒿 𑒥𑒱𑒩𑒰𑒙𑒢𑒑𑒩 𑒣𑒯𑒳𑒿𑒔𑒱 𑒖𑒹𑒞𑒰, 𑒥𑒱𑒩𑒰𑒙 𑒢𑒑𑒩𑒮𑒿 𑒮𑒱𑒪𑒲𑒑𑒳𑒛𑓃𑒲। 𑒍𑒞𑒾 𑒩𑒯𑒻𑒏 𑒚𑒾𑒩 𑒕𑒢𑓂𑒯𑒱, 𑒍𑒞𑒋 𑒮𑒿 𑒁𑒮𑒰𑒧 𑒂 𑒑𑒾𑒯𑒰𑒙𑒲𑒮𑒿 𑒞𑓂𑒩𑒱𑒣𑒳𑒩𑒰। 𑒧𑒳𑒠𑒰 𑒠𑒳𑒢𑒴𑒧𑒹 𑒥𑒯𑒳𑒞 𑒁𑓀𑒞𑒩 𑒦𑒹𑒪। 𑒑𑒾𑒯𑒰𑒙𑒲𑒮𑒿 𑒁𑒑𑒩𑒞𑒪𑒰𑒏 𑒥𑒮 𑒔𑒰𑒩𑒱 𑒥𑒖𑒹 𑒁𑒣𑒩𑒰𑒯𑒢𑒧𑒹 𑒖𑒹 𑒐𑒳𑒖𑒪𑒢𑒱 𑒍 𑒠𑒼𑒮𑒩 𑒠𑒱𑒢 𑒛𑒹𑒜𑓃 𑒥𑒖𑒹 𑒁𑒑𑒩𑒞𑒪𑒰 𑒣𑒯𑒳𑒿𑒔𑒪। 𑒖𑒯𑒱𑒢𑒰 𑒦𑒹𑒛𑓃𑒲 𑒖𑒹𑒩𑒧𑒹 𑒯𑒴𑒛𑓃𑒰𑒩 𑒔𑒪𑒱 𑒁𑒥𑒻𑒋 𑒞𑒯𑒱𑒢𑒰 𑒥𑒮𑒮𑒿 𑒅𑒞𑒩𑒪𑒰𑒣𑒩 𑒥𑒴𑒗𑒱 𑒣𑒛𑓃𑒪𑒢𑒱। 𑒦𑒰𑒭𑒰𑒏 𑒠𑒴𑒩𑒲, 𑒖𑒯𑒱𑒢𑒰 𑒯𑒱𑒢𑓂𑒠𑒲 𑒖𑒢𑒢𑒱𑒯𑒰𑒩 𑒞𑒯𑒱𑒢𑒰 𑒁𑓀𑒑𑓂𑒩𑒹𑒖𑒲। 𑒥𑒮 𑒡𑒩𑒱 𑒞𑒿 𑒯𑒱𑒢𑓂𑒠𑒲𑒮𑒿 𑒏𑒰𑒖 𑒔𑒪𑒱 𑒔𑒳𑒏𑒪 𑒕𑒪𑒢𑒱, 𑒥𑒮𑒮𑒿 𑒅𑒞𑒩𑒱𑒞𑒹, 𑒦𑒳𑒐𑒰𑒋𑒪 𑒩𑒯𑒥𑒹 𑒏𑒩𑒟𑒱, 𑒣𑒯𑒱𑒢𑒹 𑒯𑒰𑒹𑒙𑒪𑒧𑒹 𑒖𑒰 𑒐𑒹𑒪𑒢𑒱। 𑒧𑒳𑒠𑒰 𑒋𑒏𑒙𑒰 𑒮𑓂𑒣𑒭𑓂𑒙 𑒁𑓀𑒞𑒩 𑒄 𑒥𑒴𑒗𑒱 𑒣𑒛𑓃𑒪𑒢𑒱 𑒖𑒹 𑒖𑒹 𑒮𑒮𑓂𑒞 𑒐𑒹𑒢𑒰𑒃 𑒮𑒱𑒪𑒲𑒑𑒳𑒛𑓃𑒲𑒧𑒹 𑒦𑒹𑒙𑒪𑒢𑒱 𑒍 𑒂𑒑𑒴 𑒏𑒞𑒾 𑒢𑒹 𑒦𑒹𑒙𑒪𑒢𑒱। 𑒏𑒢𑒲𑒙𑒰 𑒅𑒠𑒰𑒯𑒩𑒝- 𑒥𑒩𑒣𑒹𑒙𑒰 𑒁𑒮𑒰𑒧 𑒩𑒰𑒞𑒱𑒏 𑒋𑒏 𑒥𑒖𑒹 𑒥𑒮 𑒋𑒏𑒙𑒰 𑒯𑒼𑒙𑒪𑒏 𑒂𑒑𑒴𑒧𑒹 𑒪𑒰𑒑𑒱 𑒑𑒹𑒪, 𑒁𑒏𑒛𑓃𑒪 𑒨𑒰𑒞𑓂𑒩𑒲 𑒮𑒦 𑒅𑒞𑒩𑒱 𑒯𑒼𑒙𑒪 𑒣𑒯𑒳𑒿𑒔𑒪। 𑒯𑒰𑒪 𑒖𑒏𑒰𑒿 𑒯𑒼𑒙𑒪 𑒖𑒃𑒧𑒹 𑒞𑒲𑒢 𑒥𑒮𑒏 𑒨𑒰𑒞𑓂𑒩𑒲𑒏 𑒥𑒹𑒫𑒮𑓂𑒟𑒰। 𑒔𑒰𑒩𑒱 𑒩𑒼𑒙𑒲-𑒞𑒩𑒏𑒰𑒩𑒲𑒏 𑒠𑒰𑒧 𑒥𑒲𑒮 𑒩𑒴𑒣𑒻𑒨𑒰 𑒪𑒹𑒪𑒏𑒢𑒱। 𑒧𑒳𑒠𑒰 𑒠𑒹𑒐𑒪𑒢𑒱 𑒖𑒹 𑒋𑒏 𑒣𑓂𑒪𑒹𑒙 𑒧𑒰𑒕 𑒫𑒰 𑒧𑒰𑓀𑒮𑒥𑒪𑒰 𑒩𑒯𑒻 𑒞𑒿 𑒍𑒏𑒩𑒰 𑒮𑒦𑒮𑒿 𑒋𑒏-𑒋𑒏 𑒮𑒋 𑒩𑒴𑒣𑒻𑒨𑒰 𑒪𑒹𑒪𑒏𑒻 𑒖𑒹 𑒮𑒱𑒪𑒲𑒑𑒳𑒛𑓃𑒲𑒧𑒹 𑒠𑒴 𑒩𑒴𑒣𑒻𑒨𑒰 𑒣𑒔𑒰𑒮 𑒣𑒰𑒃𑒧𑒹 𑒐𑒳𑒁𑒥𑒻𑒞 𑒩𑒯𑒻। 𑒯𑒼𑒙𑒪𑒮𑒿 𑒢𑒱𑒏𑒪𑒱 𑒟𑒰𑒢𑒰𑒣𑒩 𑒑𑒹𑒪𑒰। 𑒏𑒱𑒨𑒼 𑒯𑒱𑒢𑓂𑒠𑒲 𑒥𑒳𑒗𑒢𑒱𑒯𑒰𑒩 𑒢𑒻। 𑒏𑒰𑒪𑒲 𑒥𑒰𑒥𑒴𑒏 𑒢𑒰𑒂𑒹𑓀 𑒏𑒯𑒱𑒞𑒹 𑒋𑒏𑒙𑒰 𑒮𑒱𑒣𑒰𑒯𑒲 𑒛𑒹𑒩𑒰𑒣𑒩 𑒣𑒯𑒳𑒿𑒔𑒰 𑒠𑒹𑒪𑒏𑒢𑒱।
𑒏𑒩𑒲𑒥 𑒁𑒜𑓃𑒰𑒃 𑒥𑒖𑒹 𑒏𑒰𑒪𑒲 𑒥𑒰𑒥𑒴𑒏 𑒌𑒚𑒰𑒧 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒣𑒯𑒳𑒿𑒔𑒪𑒰। 𑒢𑒲𑒏 𑒤𑒳𑒪𑒫𑒰𑒛𑓃𑒲, 𑒂𑒚 𑒏𑒼𑒚𑒩𑒲𑒏 𑒢𑒲𑒏 𑒛𑒹𑒩𑒰, 𑒯𑒼𑒧 𑒑𑒰𑒩𑓂𑒛𑒏 𑒛𑓂𑒨𑒴𑒙𑒲। 𑒣𑒯𑒱𑒢𑒹 𑒯𑒳𑒢𑒏𑒩 𑒣𑒞𑓂𑒢𑒲 𑒠𑒹𑒐𑒪𑒐𑒱𑒢 𑒏𑒰𑒩𑒝𑒼 𑒕𑒪𑒻 𑒖𑒹 𑒍 𑒩𑒼𑒛𑒹 𑒠𑒱𑒮𑒏 𑒏𑒼𑒚𑒩𑒲𑒧𑒹 𑒩𑒯𑒟𑒱, 𑒐𑒱𑒛𑓃𑒏𑒲 𑒐𑒼𑒪𑒱 𑒥𑒰𑒯𑒩 𑒂𑒥𑒱 𑒑𑒹𑒙 𑒐𑒼𑒪𑒱 𑒂𑒑𑒴 𑒥𑒜𑓃𑒱 𑒏𑒰𑒪𑒲 𑒥𑒰𑒥𑒴𑒏𑒹𑒿 𑒏𑒯𑒪𑒐𑒱𑒢, 𑒍 𑒛𑒹𑒩𑒰𑒏 𑒮𑒦𑒮𑒿 𑒠𑒕𑒱𑒢𑒫𑒩𑒱𑒨𑒰 𑒏𑒼𑒚𑒩𑒲𑒧𑒹 𑒦𑒳𑒿𑒃𑒨𑒹𑒿𑒣𑒩 𑒬𑒞𑒩𑓀𑒖𑒲 𑒥𑒱𑒕𑒰 𑒣𑒛𑓃𑒪 𑒩𑒯𑒟𑒱। 𑒡𑒛𑓃𑒤𑒛𑓃𑒰𑒋𑒪𑒹 𑒅𑒚𑒱 𑒂𑒥𑒱 𑒏𑓄 𑒋𑒏𑒙𑒰 𑒏𑒼𑒚𑒩𑒲 𑒠𑒹𑒐𑒰 𑒏𑒯𑒪𑒐𑒱𑒢, 𑒗𑒼𑒛𑓃𑒰 𑒩𑒰𑒐𑒱 𑒠𑒱𑒎। 𑒥𑒰𑒟 𑒩𑒴𑒧 𑒠𑒹𑒐𑒥𑒻𑒞 𑒏𑒯𑒪𑒐𑒱𑒢, 𑒑𑒰𑒛𑓃𑒲𑒏 𑒗𑒧𑒰𑒛𑓃𑒪 𑒕𑒲 𑒣𑒯𑒱𑒢𑒹 𑒢𑒯𑒰 𑒪𑒱𑒁। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒁𑒣𑒢𑒼 𑒮𑒋𑒯 𑒧𑒢 𑒩𑒯𑒢𑒱। 𑒮𑒋𑒯 𑒏𑒹𑒪𑒢𑒱। 𑒢𑒯𑒰 𑒏𑓄 𑒏𑒼𑒚𑒩𑒲𑒧𑒹 𑒁𑒥𑒱𑒞𑒹 𑒏𑒯𑒪𑒐𑒱𑒢, 𑒐𑒹𑒪𑒰 𑒥𑒰𑒠 𑒁𑒩𑒰𑒧 𑒏𑒩𑒥। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒏𑒯𑒪𑒐𑒱𑒢- “𑒦𑒴𑒐 𑒪𑒰𑒑𑒪 𑒕𑒪𑒋, 𑒥𑒮𑒹 𑒮𑓂𑒙𑒹𑒝𑓂𑒛𑒧𑒹 𑒐𑒰 𑒪𑒹𑒪𑒾𑓀।”
𑒮𑒰𑒿𑒗𑒴 𑒣𑒯𑒩 𑒔𑒰𑒯-𑒞𑒰𑒯 𑒣𑒲𑒥 𑒠𑒳𑒢𑒴 𑒑𑒼𑒙𑒹 𑒠𑒼𑒥𑒩𑒰 𑒏𑓄 𑒪𑒳𑓀𑒑𑒲 𑒖𑒏𑒰𑒿 𑒡𑒼𑒞𑒲 𑒂 𑒥𑒱𑒢𑒰 𑒑𑓀𑒖𑒱𑒨𑒹𑒏 𑒏𑒳𑒩𑓂𑒞𑒰 𑒣𑒯𑒱𑒩𑒢𑒹 𑒩𑒯𑒟𑒱। 𑒏𑒰𑒩𑒝𑒼 𑒕𑒪𑒻, 𑒧𑒾𑒮𑒧। 𑒛𑒹𑒩𑒰𑒮𑒿 𑒥𑒑𑒪𑒱𑒞𑒹 𑒣𑒕𑒫𑒩𑒱𑒨𑒰 𑒛𑒹𑒩𑒰𑒏 𑒮𑒧𑓂𑒥𑒢𑓂𑒡𑒧𑒹 𑒏𑒯𑒋 𑒪𑒑𑒪𑒐𑒱𑒢𑓂𑒯। 𑒍 𑒛𑒹𑒩𑒰 𑒛𑒲.𑒋𑒧.𑒏 𑒕𑒪 𑒖𑒹 𑒧𑒝𑒲𑒣𑒳𑒩𑒲 𑒕𑒪𑒰𑒯। 𑓑𑓙𑓘𑓔 𑒥𑒻𑒔𑒏 𑒂𑒃.𑒋.𑒋𑒮। 𑒛𑒹𑒩𑒰𑒏 𑒂𑒑𑒴𑒧𑒹 𑒚𑒰𑒜𑓃 𑒠𑒹𑒐𑒱 𑒍 𑒢𑒱𑒏𑒪𑒱 𑒏𑓄 𑒋𑒪𑒰। 𑒁𑒥𑒱𑒞𑒹 𑒏𑒰𑒪𑒲 𑒥𑒰𑒥𑒴 𑒥𑓀𑒑𑒪𑒰𑒧𑒹 𑒏𑒯𑒪𑒐𑒱𑒢 𑒖𑒹 𑒥𑓀𑒡𑒳 𑒕𑒟𑒱। 𑒞𑒐𑒢 𑒍 𑒯𑒱𑒢𑓂𑒠𑒲𑒧𑒹 𑒑𑒣-𑒮𑒣 𑒏𑒹𑒪𑒐𑒱𑒢। 𑒂𑒑𑒴 𑒥𑒜𑓃𑒱𑒞𑒹 𑒂𑒃.𑒖𑒲.𑒏 𑒛𑒹𑒩𑒰। 𑒂𑒃.𑒖𑒲.𑒏 𑒥𑒹𑒙𑒰 𑒮𑓀𑒑 𑒏𑒰𑒪𑒲𑒥𑒰𑒥𑒴𑒏 𑒥𑒹𑒙𑒰𑒏𑒹𑒿 𑒠𑒼𑒮𑓂𑒞𑒲। 𑒛𑒹𑒩𑒰 𑒪𑒑 𑒣𑒯𑒳𑒿𑒔𑒞𑒹 𑒠𑒳𑒢𑒴 𑒑𑒼𑒙𑒹 𑒯𑒴𑒪 𑒠𑓄 𑒛𑒹𑒩𑒰𑒮𑒿 𑒢𑒱𑒏𑒪𑒪। 𑒍 𑒥𑓀𑒑𑒰𑒪𑒲 𑒕𑒪𑒰𑒯। 𑒁𑒑𑒩𑒞𑒪𑒰𑒏 𑒥𑓀𑒑𑒪𑒰 𑒦𑒰𑒭𑒲। 𑒣𑒯𑒱𑒪 𑒠𑒱𑒢 𑓑𑓙𑓖𑓐 𑒄. 𑒡𑒩𑒱𑒏 𑒁𑒣𑒢 𑒔𑒩𑒱𑒏𑒼𑒮𑒲𑒏 𑒫𑒱𑒠𑓂𑒨𑒰𑒩𑓂𑒟𑒲𑒏 𑒍𑒞𑓄 𑒔𑒩𑓂𑒔 𑒦𑒹𑒪 𑒕𑒪। 𑒠𑒼𑒮𑒩 𑒠𑒱𑒢 𑒮𑒥𑒹𑒩𑒹 𑒔𑒰𑒯𑒹 𑒣𑒲𑒥𑒻𑒞 𑒏𑒰𑒪 𑒍 𑒏𑒯𑒪𑒐𑒱𑒢 𑒖𑒹 𑒂𑒃 𑒂𑒤𑒱𑒮 𑒯𑒼𑒃𑒞 𑒠𑒕𑒱𑒢𑒧𑒹 𑒥𑒴𑒜𑓃𑒲 𑒏𑒰𑒪𑒲 𑒧𑓀𑒠𑒱𑒩 𑒁𑒕𑒱 𑒞𑒃𑒚𑒰𑒧 𑒞𑒏 𑒔𑒪𑒥। 𑒮𑒥𑒹𑒩𑒹 𑒠𑒮 𑒥𑒖𑒹 𑒮𑓀𑒑𑒹 𑒠𑒳𑒢𑒴 𑒑𑒼𑒙𑒹 𑒂𑒤𑒱𑒮 𑒑𑒹𑒪𑒰। 𑒂𑒤𑒱𑒮 𑒮𑒦 𑒢𑒧𑒯𑒩-𑒢𑒧𑒯𑒩 𑒩𑒯𑒻 𑒧𑒳𑒠𑒰 𑒁𑒣𑒢 𑒂𑒹𑒤𑒱𑒮 𑒕𑒼𑒙𑒹𑒙𑒰 𑒕𑒪𑒢𑒱। 𑒋𑒏𑒙𑒰 𑒁𑒪𑒧𑒰𑒩𑒲, 𑒠𑒴𑒙𑒰 𑒏𑒳𑒩𑓂𑒮𑒲, 𑒋𑒏𑒙𑒰 𑒙𑒹𑒥𑒳𑒪। 𑒮𑒼𑒗𑒹 𑒁𑒣𑒢𑒰 𑒏𑒼𑒚𑒩𑒲𑒧𑒹 𑒣𑒯𑒳𑒿𑒔𑒪𑒰𑒯। 𑒣𑒯𑒳𑒿𑒔𑒞𑒹 𑒋𑒏𑒙𑒰 𑒥𑓀𑒑𑒰𑒪𑒲 𑒣𑓂𑒨𑒴𑒢 (𑒥𑒲.𑒋. 𑒣𑒰𑒮 𑒡𑒳𑒛𑓃𑒗𑒰𑒛𑓃 𑒥𑒖𑒻𑒥𑒪𑒰) 𑒣𑒯𑒳𑒿𑒔𑒪𑒢𑒱। 𑒂𑒤𑒱𑒮𑒏 𑒮𑒧𑓂𑒥𑒢𑓂𑒡𑒧𑒹 𑒣𑒳𑒕𑒪𑒐𑒱𑒢। 𑒮𑒦 𑒥𑒰𑒞 𑒮𑒳𑒢𑒱 𑒏𑒯𑒪𑒐𑒱𑒢- 𑒔𑒰𑒯 𑒣𑒱𑒂𑒅। 𑒔𑒰𑒯 𑒣𑒲𑒥 𑒠𑒳𑒢𑒴 𑒑𑒼𑒙𑒹 𑒫𑒱𑒠𑒰 𑒦𑒹𑒪𑒰। 𑒥𑒰𑒖𑒰𑒩𑒮𑒿 𑒢𑒱𑒏𑒪𑒱𑒞𑒹 𑒔𑒰𑒯𑒏 𑒐𑒹𑒞𑒲 𑒠𑒱𑒮 𑒥𑒜𑓃𑒪𑒰। 𑒮𑒛𑓃𑒏𑒏 𑒠𑒳𑒢𑒴 𑒏𑒰𑒞 𑒣𑒯𑒰𑒛𑓃𑒲 𑒖𑒧𑒲𑒢 𑒕𑒻। 𑒖𑒯𑒱𑒢𑒰 𑒁𑒣𑒢𑒰 𑒌𑒚𑒰𑒧 𑒣𑒯𑒱𑒢𑒹 𑒪𑒼𑒏 𑒣𑒞𑒱𑒂𑒢𑒲 𑒪𑒑𑒰 𑒥𑒹𑒜𑓃𑒲𑒏 𑒏𑒰𑒖 𑒏𑒩𑒻𑒞 𑒕𑒪𑒰𑒯 𑒞𑒯𑒱𑒢𑒰 𑒣𑒰𑒢𑒏 𑒥𑒛𑓃𑒻𑒥 𑒖𑒏𑒰𑒿 𑒜𑒪𑒳𑒂 𑒥𑒢𑒰𑒍𑒪 𑒕𑒪। 𑒦𑒩𑒱-𑒦𑒩𑒱 𑒕𑒰𑒞𑒲𑒏 𑒑𑒰𑒕। 𑒍𑒃𑒧𑒹 𑒁𑒡𑒱𑒏 𑒧𑒯𑒱𑒪𑒰 𑒣𑒲𑒚𑒣𑒩 𑒥𑒼𑒏𑒼 𑒪𑒠𑒢𑒹 𑒔𑒰𑒯-𑒣𑒞𑓂𑒞𑒲 𑒞𑒼𑒛𑓃𑒻𑒞 𑒕𑒪𑒲𑒯। 𑒔𑒰𑒯𑒏 𑒑𑒣-𑒮𑒣 𑒔𑒪𑒥𑒻𑒞 𑒏𑒯𑒪𑒐𑒱𑒢 𑒖𑒹 𑒯𑒰𑒪𑒹𑒧𑒹 𑒑𑓂𑒩𑒲𑒢 𑒙𑒲 𑒏𑓄 𑒏𑓄 𑒢𑒫 𑒱𑒏𑒮𑓂𑒧 𑒂𑒋𑒪 𑒁𑒕𑒱, 𑒍𑒢𑒰 𑒐𑒹𑒞𑒲 𑒥𑒯𑒳𑒞 𑒁𑒡𑒱𑒏 𑒢𑒻 𑒦𑒹𑒪 𑒁𑒕𑒱 𑒧𑒳𑒠𑒰 𑒠𑒳𑒢𑒱𑒨𑒰𑒿𑒏 𑒥𑒖𑒰𑒩𑒧𑒹 𑒮𑒦𑒮𑒿 𑒥𑒹𑒮𑒲 𑒧𑒰𑓀𑒑 𑒁𑒕𑒱। 𑒏𑒲𑒧𑒞𑒼 𑒮𑒦𑒮𑒿 𑒆𑒣𑒩 𑒕𑒻। 𑒏𑒢𑒱𑒨𑒹 𑒂𑒑𑒴 𑒥𑒜𑓃𑒪𑒰𑒣𑒩 𑒩𑒥𑒛𑓃𑒏 𑒑𑒰𑒕 𑒠𑒹𑒐𑒪𑒢𑒱। 𑒣𑒞𑒱𑒂𑒢𑒲 𑒪𑒑𑒰 𑒩𑒼𑒣𑒪। 𑒑𑒰𑒕𑒏 𑒂𑒏𑒰𑒩𑒮𑒿 𑒥𑒴𑒗𑒱 𑒣𑒛𑓃𑒪𑒢𑒱 𑒖𑒹 𑒣𑒢𑒩𑒯-𑒥𑒲𑒮 𑒥𑒩𑓂𑒐𑒏 𑒯𑒋𑒞। 𑒥𑒯𑒳𑒞 𑒦𑒰𑒩𑒲 𑒢𑒻 𑒠𑒹𑒐𑒪𑒢𑒱। 𑒕𑒰𑒞𑒲 𑒦𑒩𑒱 𑒆𑒣𑒩𑒧𑒹 𑒐𑒼𑒡𑒪, 𑒖𑒃𑒧𑒹 𑒮𑒿 𑒪𑒮𑓂𑒮𑒰 (𑒠𑒴𑒡) 𑒢𑒱𑒏𑒪𑒻𑒞। 𑒮𑒦 𑒠𑒱𑒢 𑒦𑒱𑒢𑒮𑒩𑒴 𑒣𑒯𑒩 𑒍𑒃 𑒠𑒴𑒡𑒏𑒹𑒿 𑒮𑒧𑒹𑒙𑒱-𑒮𑒧𑒹𑒙𑒱 𑒪𑓄 𑒏𑓄 𑒩𑒥𑒛𑓃 𑒥𑒢𑒥𑒻𑒞।
𑒏𑒩𑒲𑒥 𑒥𑒰𑒩𑒯 𑒥𑒖𑒹 𑒥𑒴𑒜𑓃𑒲 𑒏𑒰𑒪𑒲 𑒮𑓂𑒟𑒰𑒢 𑒣𑒯𑒳𑒿𑒔𑒪𑒰। 𑒕𑒼𑒙-𑒕𑒲𑒢 𑒖𑒑𑒯। 𑒏𑒧𑒹 𑒠𑒼𑒏𑒰𑒢-𑒠𑒾𑒩𑒲। 𑒮𑒋 𑒥𑒩𑓂𑒐𑒮𑒿 𑒆𑒣𑒩𑒏 𑒥𑒴𑒗𑒱 𑒣𑒛𑓃𑒪𑒢𑒱। 𑒮𑒳𑒩𑓂𑒐𑒲𑒣𑒩 𑒖𑒼𑒛𑓃𑒪 𑒧𑒏𑒰𑒢 𑒤𑒰𑒙𑒱-𑒤𑒳𑒙𑒱, 𑒗𑒛𑓃𑒱-𑒗𑒴𑒛𑓃𑒱 𑒑𑒹𑒪 𑒕𑒪𑒻। 𑒧𑒴𑒩𑓂𑒞𑒱 𑒠𑒹𑒐𑒱 𑒢𑒱𑒏𑒪𑒱 𑒑𑒹𑒪𑒰। 𑒣𑒳𑒩𑒰𑒢 𑒏𑒪𑒰𑒏 𑒧𑒴𑒩𑓂𑒞𑒱। 𑒧𑒳𑒠𑒰 𑒯𑒳𑒢𑒏𑒰 𑒥𑒯𑒳𑒞 𑒩𑒰𑒮 𑒧𑓀𑒞𑓂𑒩 𑒮𑒦 𑒣𑒜𑓃𑒥𑒰𑒏 𑒕𑒪𑒢𑒱 𑒞𑒿𑒋 𑒍 𑒧𑓀𑒠𑒱𑒩𑒧𑒹 𑒩𑒯𑒪𑒰𑒯। 𑒥𑒰𑒯𑒩 𑒢𑒱𑒏𑒪𑒱 𑒑𑒰𑒕 𑒮𑒦 𑒱𑒯𑒨𑒹𑒪𑒢𑒱 𑒞𑒿 𑒏𑒻𑒧𑓂𑒣𑒮𑒹𑒧𑒹 𑒋𑒏𑒚𑒰𑒧 𑒂𑒧, 𑒏𑒙𑒯𑒩, 𑒑𑒧𑒯𑒰𑒩𑒱, 𑒬𑒲𑒬𑒼-𑒖𑒰𑒧𑒳𑒢𑒏 𑒑𑒰𑒕 𑒠𑒹𑒐𑒱𑒪𑒢𑒱। 𑒁𑒐𑒢 𑒡𑒩𑒱 𑒑𑒾𑒯𑒰𑒙𑒲𑒏 𑒅𑒣𑒩𑒰𑒢𑓂𑒞 𑒋𑒯𑒹𑒢 𑒣𑒔𑒧𑒹𑒪 𑒑𑒰𑒕 𑒏𑒞𑒾 𑒢𑒹 𑒠𑒹𑒐𑒢𑒹 𑒕𑒪𑒰। 𑒞𑒿𑒋 𑒏𑒱𑒕𑒳 𑒥𑒰𑒞 𑒧𑒢𑒧𑒹 𑒅𑒚𑒪𑒢𑒱। 𑒁𑓀𑒞𑒧𑒹 𑒧𑒢-𑒧𑒰𑒢𑒱 𑒑𑒹𑒪𑒢𑒱 𑒖𑒹 𑒧𑒱𑒟𑒱𑒪𑒰𑒏 𑒏𑒱𑒨𑒼 𑒣𑒳𑒖𑒹𑒑𑒩𑒲 𑒩𑒯𑒪 𑒯𑒹𑒞𑒰𑒯। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒣𑒳𑒖𑒹𑒑𑒩𑒲𑒮𑒿 𑒏𑒱𑒕𑒳 𑒏𑒰𑒪 𑒑𑒣-𑒮𑒣 𑒏𑒩𑒱𑒞𑒹 𑒩𑒯𑒟𑒱 𑒂𑒏𑒱 𑒞𑒰𑒥𑒹 𑒍𑒯𑒼 𑒢𑒱𑒏𑒪𑒪𑒰𑒯। 𑒢𑒱𑒏𑒪𑒱𑒞𑒹 𑒏𑒯𑒪𑒐𑒱𑒢 𑒖𑒹 𑒏𑒯𑒢𑒹 𑒖𑒹 𑒕𑒪𑒾𑓀 𑒏𑒧𑒪 𑒮𑒰𑒑𑒩 𑒠𑒹𑒐𑒥, 𑒮𑒹 𑒨𑒋𑒯 𑒕𑒲। 𑒯𑒱𑒨𑒰 𑒏𑓄 𑒠𑒹𑒐𑒪𑒢𑒱 𑒞𑒿 𑒥𑒴𑒗𑒱 𑒣𑒛𑓃𑒪𑒢𑒱 𑒖𑒹 𑒥𑒹𑒩𑒧𑒰𑒏 𑒥𑒛𑓃𑒏𑒲 𑒣𑒼𑒐𑒩𑒱𑒮𑒿 𑒕𑒼𑒙𑒹 𑒕𑒻। 𑒣𑓀𑒔𑒼 𑒚𑒲𑒏𑒹-𑒚𑒰𑒏 𑒥𑒴𑒗𑒱 𑒣𑒛𑓃𑒪𑒢𑒱। 𑒏𑒱𑒋𑒏 𑒞𑒿 𑒥𑒹𑒩𑒧𑒰 𑒥𑒛𑓃𑒏𑒲 𑒣𑒼𑒐𑒩𑒱𑒮𑒿 𑒍𑒯𑒼 𑒣𑒩𑒱𑒔𑒱𑒞𑒹। 𑒞𑒯𑒴𑒧𑒹 𑒥𑒹𑒩𑒧𑒰 𑒥𑒛𑓃𑒏𑒲 𑒣𑒼𑒐𑒩𑒱 𑒂 𑒏𑒕𑒳𑒥𑒲 𑒥𑒛𑓃𑒏𑒲 𑒣𑒼𑒐𑒩𑒱𑒏 𑒞𑒳𑒪𑒢𑒰 𑒞𑒿 𑒠𑒳𑒢𑒴 𑒑𑒰𑒧𑒏 𑒪𑒼𑒏 𑒏𑒩𑒥𑒹 𑒏𑒩𑒻𑒞 𑒩𑒯𑒻𑒋। 𑒞𑒃𑒧𑒹 𑒥𑒹𑒩𑒧𑒰 𑒥𑒲𑒮, 𑒞𑒿 𑒥𑒛𑓃𑒏𑒱𑒨𑒼 𑒣𑒼𑒐𑒩𑒱 𑒥𑒲𑒮। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒏𑒯𑒪𑒐𑒱𑒢- “𑒋𑒏𑒩 𑒢𑒰𑒍𑓀 𑒏𑒱𑒁𑒋 𑒮𑒰𑒑𑒩 𑒣𑒛𑓃𑒪?” 𑒦𑒴𑒑𑒼𑒪𑒏 𑒫𑒱𑒠𑓂𑒨𑒰𑒩𑓂𑒟𑒲 𑒚𑒧𑒏𑒱 𑒑𑒹𑒪𑒰𑒯। 𑒚𑒧𑒏𑒱𑒞𑒹 𑒠𑒼𑒯𑒩𑒰 𑒠𑒹𑒪𑒐𑒱𑒢 𑒖𑒹 𑒥𑒹𑒩𑒧𑒰 𑒥𑒛𑓃𑒏𑒲 𑒣𑒼𑒐𑒩𑒱𑒧𑒹 𑒋𑒏 𑒧𑒯𑒰𑒩𑒏 𑒪𑒼𑒏 𑒠𑒼𑒮𑒩 𑒧𑒯𑒰𑒩𑒥𑒪𑒰𑒏𑒹𑒿 𑒢𑒻 𑒔𑒱𑒢𑓂𑒯𑒻 𑒕𑒻, 𑒮𑒹 𑒞𑒿 𑒠𑒹𑒐𑒻 𑒕𑒱𑒌 𑒠𑒮 𑒏𑒙𑓂𑒚𑒰 𑒣𑒹𑒙 𑒯𑒹𑒞𑒻। 𑒣𑒼𑒐𑒩𑒱𑒏 𑒣𑒕𑒥𑒩𑒱𑒨𑒰 𑒧𑒯𑒰𑒩𑒣𑒩 𑒥𑓀𑒑𑒪𑒰 𑒠𑒹𑒮𑒏 𑒮𑒲𑒧𑒰 𑒑𑒰𑒛𑓃𑒪। 𑒥𑒰𑒿𑒮𑒏 𑒐𑒳𑒙𑓂𑒙𑒰। 𑒞𑒐𑒢𑒹 𑒟𑒼𑒛𑓃𑒹 𑒯𑒙𑒱 𑒔𑒙𑒑𑒰𑒧 𑒥𑒪𑒰 𑒩𑒹𑒪 𑒣𑒰𑒮 𑒏𑒹𑒪𑒏𑒻। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒫𑒱𑒠𑒰 𑒯𑒼𑒃𑒮𑒿 𑒣𑒯𑒱𑒢𑒹 𑒧𑒱𑒚𑒰𑒃 𑒐𑒰 𑒣𑒰𑒢𑒱 𑒣𑒲𑒥 𑒔𑒰𑒯 𑒣𑒲𑒪𑒢𑒱। 𑒍𑒢𑒰 𑒍 𑒔𑒲𑒢𑒱𑒨𑒰 𑒥𑒹𑒧𑒰𑒩𑒲𑒮𑒿 𑒑𑓂𑒩𑒮𑒱𑒞, 𑒧𑒳𑒠𑒰 𑒞𑒻𑒨𑒼 𑒣𑒩𑒮𑒰𑒠 𑒖𑒏𑒰𑒿 𑒐𑒹𑒪𑒢𑒱। 𑒠𑒱𑒢𑒑𑒩𑒹 𑒛𑒹𑒩𑒰𑒣𑒩 𑒣𑒯𑒳𑒿𑒔𑒻 𑒑𑒹𑒪𑒰।
𑒁𑒐𑒢 𑒡𑒩𑒱 𑒏𑒰𑒪𑒲 𑒥𑒰𑒥𑒴𑒏 𑒣𑒩𑒱𑒫𑒰𑒩 𑒫𑒻𑒭𑓂𑒝𑒫 𑒥𑒢𑒱 𑒑𑒹𑒪 𑒕𑒪𑒢𑒱। 𑒬𑒳𑒠𑓂𑒡 𑒬𑒏𑒰𑒯𑒰𑒩𑒲 𑒣𑒩𑒱𑒫𑒰𑒩। 𑒔𑒰𑒩𑒱 𑒥𑒖𑒹 𑒦𑒼𑒩𑒹𑒮𑒿 𑒢𑒰𑒔𑒱-𑒢𑒰𑒔𑒱 𑒦𑒖𑒢 𑒏𑒩𑒋 𑒪𑒑𑒻𑒞 𑒕𑒪𑒰𑒯 𑒖𑒹 𑒣𑒛𑓃𑒼𑒮𑒱𑒨𑒰, 𑒧𑒝𑒲𑒣𑒳𑒩𑒥𑒪𑒰 𑒏𑒯𑒥𑒼 𑒏𑒩𑒻𑒞 𑒕𑒪𑒢𑒱। 𑒄𑒙𑒰 𑒮𑒱𑒧𑒙𑒲𑒏 𑒕𑒯𑒩𑒠𑒹𑒫𑒰𑒪𑒲 𑒢𑒻 𑒩𑒯𑒢𑒹 𑒗𑒪𑒤𑒪𑒹 𑒗𑒰𑒗𑒢𑒏 𑒙𑒰𑒙। 𑒯𑒳𑒢𑒏𑒰 𑒠𑒹𑒐𑒟𑒱 𑒖𑒹 𑒫𑓂𑒨𑒰𑒨𑒰𑒧 𑒥𑒯𑒳𑒞 𑒏𑒩𑒻𑒞 𑒕𑒪𑒰𑒯। 𑒧𑒰𑓀𑒮𑒏 𑒣𑓂𑒩𑒱𑒨। 𑒁𑒣𑒢𑒹 𑒍 𑒧𑒱𑒟𑒱𑒪𑒰𑓀𑒔𑒪𑒹𑒏 𑒪𑒼𑒏 𑒖𑒏𑒰𑒿 (𑒬𑒩𑒲𑒩𑒮𑒿) 𑒩𑒯𑒟𑒱 𑒧𑒳𑒠𑒰 𑒣𑒞𑓂𑒢𑒲 𑒣𑒯𑒰𑒛𑓃𑒢𑒲 𑒖𑒏𑒰𑒿 𑒕𑒼𑒙𑒹 𑒏𑒠𑒏। 𑒠𑒳𑒩𑓂𑒑𑒰𑒣𑒴𑒖𑒰𑒏 𑒮𑒧𑒋 𑒩𑒯𑒥𑒹 𑒏𑒩𑒻, 𑒥𑒑𑒪𑒹 𑒣𑒴𑒫𑒰𑒩𑒱 𑒏𑒰𑒞, 𑒏𑒩𑒲𑒥 𑒠𑒴 𑒥𑒲𑒒𑒰 𑒣𑒴𑒥 𑒣𑒴𑒖𑒰 𑒯𑒼𑒃𑒞 𑒕𑒪। 𑒁𑒣𑒢-𑒁𑒣𑒢 𑒣𑒩𑒱𑒫𑒰𑒩𑒏 𑒮𑓀𑒑 𑒁𑒤𑒮𑒩 𑒮𑒦 𑒠𑒹𑒐𑒻𑒞 𑒕𑒪𑒰𑒯। 𑒁𑒣𑒢𑒰 𑒮𑒦 𑒌𑒚𑒰𑒧 𑒖𑒏𑒰𑒿 𑒠𑒮 𑒠𑒱𑒢𑒏 𑒣𑒴𑒖𑒰 𑒢𑒻। 𑒣𑒩𑒲𑒥𑒮𑒿 𑒬𑒳𑒩𑒴 𑒢𑒻 𑒦𑓄 𑒕𑒚𑒧 𑒠𑒱𑒢𑒮𑒿 𑒬𑒳𑒩𑒴 𑒯𑒼𑒃𑒞 𑒁𑒕𑒱। 𑒧𑒳𑒠𑒰 𑒧𑒱𑒟𑒱𑒪𑒰𑓀𑒔𑒪𑒮𑒿 𑒥𑒯𑒳𑒞 𑒥𑒹𑒮𑒲 𑒯𑒼𑒃𑒞 𑒁𑒕𑒱। 𑒏𑒰𑒪𑒲 𑒥𑒰𑒥𑒴 𑒏𑒯𑒪𑒐𑒱𑒢 𑒖𑒹 𑒌𑒚𑒰𑒧 𑒞𑓂𑒩𑒱𑒣𑒳𑒩𑒼 𑒂 𑒥𑓀𑒑𑒪𑒼 𑒠𑒹𑒬𑒧𑒹 𑒏𑒰𑒪𑒲 𑒣𑒴𑒖𑒰 𑒮𑒦 𑒏𑒩𑒻𑒞 𑒁𑒕𑒱। 𑒁𑒮𑒰𑒧𑒮𑒿 𑒅𑒞𑓂𑒞𑒩-𑒣𑒴𑒥 𑒪𑓄 𑒏𑓄 𑒠𑒕𑒱𑒢 𑒡𑒩𑒱 𑒧𑒹𑒒𑒰𑒪𑒨, 𑒞𑓂𑒩𑒱𑒣𑒳𑒩𑒰, 𑒧𑒱𑒖𑒼𑒩𑒧, 𑒧𑒝𑒱𑒣𑒳𑒩, 𑒁𑒩𑒴𑒝𑒰𑒔𑒪, 𑒢𑒰𑒑𑒰𑒪𑒻𑓀𑒛 𑒩𑒰𑒖𑓂𑒨 𑒁𑒕𑒱। 𑒙𑓂𑒩𑒹𑒢𑒏 𑒩𑒰𑒮𑓂𑒞𑒰 𑒟𑒼𑒛𑓃𑒹𑒏 𑒂𑒑𑒴 𑒡𑒩𑒱। 𑒧𑒳𑒐𑓂𑒨 𑒮𑒫𑒰𑒩𑒲 𑒥𑒮-𑒙𑓂𑒩𑒏 𑒕𑒲। 𑒖𑓀𑒑𑒪-𑒣𑒯𑒰𑒛𑓃𑒮𑒿 𑒦𑒩𑒪। 𑒯𑒖𑒰𑒩𑒼 𑒏𑒱𑒮𑒱𑒧𑒏 𑒑𑒰𑒕-𑒱𑒫𑒩𑒲𑒕। 𑒅𑒣𑒖𑒰𑒆 𑒖𑒧𑒲𑒢 𑒏𑒧। 𑒍𑒢𑒰 𑒖𑒃𑒚𑒰𑒧 𑒩𑓀𑒑-𑒩𑓀𑒑𑒏 𑒑𑒰𑒕-𑒫𑒱𑒩𑒲𑒕 𑒁𑒕𑒱 𑒞𑒃𑒚𑒰𑒧 𑒐𑒰𑒃𑒥𑒪𑒰 𑒤𑒪 𑒮𑒹𑒯𑒼 𑒯𑒹𑒥𑒹 𑒏𑒩𑒞𑒻। 𑒜𑒏𑒱𑒨𑒰 𑒮𑒰𑒑 𑒥𑒰𑒡-𑒥𑒼𑒢𑒏 𑒒𑒰𑒮 𑒖𑒏𑒰𑒿 𑒅𑒣𑒖𑒪। 𑒍𑒢𑒰 𑒑𑒹𑒪𑒰𑒣𑒩 𑒏𑒯𑒱 𑒠𑒹𑒪𑒐𑒱𑒢 𑒖𑒹 𑒁𑒣𑒢𑒰 𑒌𑒚𑒰𑒧𑒮𑒿 𑒖𑒹 𑒦𑒱𑒢𑓂𑒢 𑒁𑒕𑒱 𑒍 𑒠𑒹𑒐𑒥𑒼 𑒏𑒩𑒥 𑒂 𑒐𑒹𑒥𑒼 𑒏𑒩𑒥। 𑒋𑒏 𑒞𑒿 𑒍𑒯𑒱𑒢𑒰 𑒍 (𑒏𑒰𑒪𑒲𑒥𑒰𑒥𑒴) 𑒞𑒞𑒹 𑒦𑒿𑒖𑒱𑒂𑒯 𑒁𑒣𑒢𑒹 𑒖𑒹 𑒮𑒦 𑒚𑒹𑒏𑒢𑒾𑒢𑒹 𑒩𑒯𑒟𑒱𑒢। 𑒞𑒳𑒪𑒢𑒰𑒞𑓂𑒧𑒏 𑒠𑒵𑒭𑓂𑒙𑒱𑒮𑒿 𑒍𑒃 𑒃𑒪𑒰𑒏𑒰 (𑒞𑓂𑒩𑒱𑒣𑒳𑒩𑒰 𑒂𑒠𑒱) 𑒧𑒹 𑒁𑒣𑒢𑒰 𑒮𑒦𑒮𑒿 𑒥𑒹𑒮𑒲 𑒥𑒩𑒐𑒰 𑒯𑒼𑒃 𑒕𑒻 𑒖𑒃𑒮𑒿 𑒁𑒣𑒢𑒹 𑒮𑒥𑒯𑒏 𑒔𑒾𑒩𑒲 𑒐𑒹𑒞 𑒖𑒏𑒰𑒿 𑒁𑒡𑒱𑒏𑒰𑓀𑒮 𑒡𑒰𑒢𑒏 𑒏𑒙𑒢𑒲 𑒣𑒰𑒢𑒱𑒨𑒹𑒧𑒹 𑒯𑒼𑒃𑒞 𑒁𑒕𑒱। 𑒖𑒃𑒮𑒿 𑒁𑒣𑒢𑒰 𑒮𑒦 𑒖𑒏𑒰𑒿 𑒏𑒞𑒱𑒏𑒰 𑒐𑒹𑒞𑒲 𑒏𑒧 𑒪𑒑𑒻 𑒕𑒻। 𑒁𑒣𑒢𑒰 𑒌𑒚𑒰𑒧 𑒏𑒰𑒞𑒱𑒏 𑒢𑒲𑒏 𑒧𑒰𑒮 𑒌 𑒪𑒹𑒪 𑒥𑒴𑒗𑒪 𑒖𑒰𑒃𑒞 𑒁𑒕𑒱 𑒖𑒹 𑒁𑒢𑓂𑒢𑒏 𑒋𑒏 𑒧𑒾𑒮𑒧 𑒥𑒢𑒻𑒞 𑒁𑒕𑒱। 𑒞𑒃 𑒮𑓀𑒑 𑒞𑒲𑒧𑒢-𑒞𑒩𑒏𑒰𑒩𑒲, 𑒤𑒪-𑒤𑒪𑒯𑒩𑒲𑒏 𑒮𑒹𑒯𑒼 𑒥𑒢𑒻𑒞 𑒁𑒕𑒱। 𑒧𑒼𑒙𑒰𑒧𑒼𑒙𑒲 𑒨𑒋𑒯 𑒖𑒞𑒹 𑒏𑒱𑒮𑒱𑒧𑒏 𑒐𑒹𑒞𑒲 𑒏𑒰𑒞𑒱𑒏𑒧𑒹 𑒯𑒼𑒃𑒞 𑒁𑒕𑒱, 𑒍𑒞𑒹 𑒢𑒹 𑒂𑒢 𑒏𑒼𑒢𑒼 𑒧𑒾𑒮𑒧𑒧𑒹। 𑒥𑒱𑒪𑓀𑒥𑒮𑒿 𑒐𑒹𑒞𑒏 𑒣𑒰𑒢𑒱 𑒮𑒴𑒐𑒢𑒹 𑒏𑒱𑒕𑒳 𑒞𑒹𑒪𑒯𑒢, 𑒣𑒙𑒳𑒂 𑒂 𑒡𑒰𑒢𑒏 𑒐𑒹𑒞𑒲 𑒯𑒼𑒃𑒞 𑒁𑒕𑒱। 𑒞𑓂𑒩𑒱𑒣𑒳𑒩𑒰𑒏 𑒏𑒩𑒲𑒥 𑒮𑒰𑒚𑒱-𑒮𑒞𑓂𑒞𑒩𑒱 𑒣𑓂𑒩𑒞𑒱𑒬𑒞 𑒖𑓀𑒑𑒪-𑒗𑒰𑒛𑓃, 𑒣𑒯𑒰𑒛𑓃𑒮𑒿 𑒒𑒹𑒩𑒪 𑒁𑒕𑒱। 𑒞𑒲𑒮-𑒔𑒰𑒪𑒱𑒮 𑒣𑓂𑒩𑒞𑒱𑒬𑒞𑒏 𑒖𑒧𑒲𑒢 𑒅𑒣𑒖𑒰𑒅। 𑒡𑒰𑒢 𑒧𑒳𑒐𑓂𑒨 𑒤𑒮𑒱𑒪 𑒕𑒲। 𑒖𑒃 𑒞𑒩𑒯𑒏 𑒮𑒧𑓂𑒣𑒠𑒰 𑒃𑒪𑒰𑒏𑒰𑒧𑒹 𑒕𑒻, 𑒱𑒫𑒏𑒰𑒮 𑒢𑒻 𑒦𑒹𑒪 𑒁𑒕𑒱। 𑒖𑒢𑒧𑒰𑒢𑒮𑒿 𑒡𑒼𑒐𑒰 𑒁𑒐𑒢𑒼 𑒏𑒋𑒪 𑒖𑒰 𑒩𑒯𑒪 𑒁𑒕𑒱। 𑒞𑓂𑒩𑒱𑒣𑒳𑒩𑒰𑒏 𑒂𑒠𑒱𑒫𑒰𑒮𑒲 𑒮𑒧𑒳𑒠𑒰𑒨𑒏𑒹𑒿 𑒋𑒞𑒹 𑒧𑒯𑒑𑒰𑒃𑒏 𑒮𑒰𑒧𑒢𑒰 𑒏𑒩𑒋 𑒣𑒛𑓃𑒱 𑒩𑒯𑒪 𑒕𑒻, 𑒖𑒹 𑒥𑒱𑒮𑒫𑒰𑒮 𑒢𑒻 𑒏𑒋𑒪 𑒖𑒰 𑒮𑒏𑒻𑒋। 𑒍𑒢𑒰 𑒫𑒱𑒠𑒹𑒬𑒲 𑒮𑓀𑒮𑓂𑒟𑒰 𑒮𑒦 𑒬𑒱𑒏𑓂𑒭𑒰𑒏 𑒋𑒯𑒹𑒢 𑒜𑒩𑓂𑒩𑒰 𑒡𑒛𑓃𑒰 𑒠𑒹𑒢𑒹 𑒁𑒕𑒱 𑒖𑒹 𑒩𑒹𑒪𑒏 𑒫𑒱𑒏𑒰𑒮 𑒢𑒻 𑒯𑒼𑒅। 𑒯𑒿 𑒄 𑒥𑒰𑒞 𑒖𑒩𑒴𑒩 𑒁𑒕𑒱 𑒖𑒹 𑒁𑒣𑒢𑒰 𑒮𑒦 𑒖𑒏𑒰𑒿 𑒩𑒹𑒪𑒫𑒹 𑒪𑒰𑒃𑒢 𑒥𑒻𑒮𑒥𑒻𑒧𑒹 𑒁𑒮𑒰𑒢 𑒢𑒻 𑒕𑒻, 𑒣𑒯𑒰𑒛𑓃𑒲 𑒏𑓂𑒭𑒹𑒞𑓂𑒩 𑒩𑒯𑒢𑒹 𑒧𑒯𑒑 𑒁𑒕𑒱। 𑒁𑒼𑒢𑒰 𑒁𑒣𑒢𑒼 𑒌𑒚𑒰𑒧 𑒏𑒱𑒕𑒳 𑒩𑒰𑒖𑒢𑒲𑒞𑒱𑒏 𑒠𑒪 𑒍𑒯𑒢𑒼 𑒕𑒟𑒱 𑒖𑒹 𑒮𑒛𑓃𑒏-𑒣𑒳𑒪 𑒱𑒢𑒩𑓂𑒧𑒰𑒝, 𑒢𑒯𑒩-𑒕𑒯𑒩 𑒱𑒢𑒩𑓂𑒧𑒰𑒝𑒧𑒹 𑒧𑒬𑒲𑒢𑒏 𑒣𑓂𑒩𑒨𑒼𑒑 𑒢𑒻 𑒯𑒼𑒅। 𑒙𑓂𑒩𑒹𑒏𑓂𑒙𑒩 𑒧𑒰𑒙𑒱 𑒢𑒻 𑒅𑒒𑒋। 𑒪𑒼𑒏𑒹 𑒅𑒒𑒞 𑒂 𑒥𑒢𑒰𑒍𑒞। 𑒯𑒳𑒢𑒏𑒰 𑒮𑒦𑒏𑒹𑒿 𑒠𑒹𑒐𑒋 𑒣𑒛𑓃𑒞𑒢𑒱 𑒖𑒹 𑒑𑒰𑒧𑒧𑒹 𑒱𑒮𑒩𑓂𑒤 𑒑𑒱𑒩𑒯𑒮𑓂𑒞𑒲𑒏𑒹𑒿 𑒮𑒧𑒳𑒔𑒱𑒞 𑒥𑒢𑒰𑒍𑒪 𑒖𑒰𑒋 𑒞𑒃 𑒪𑒹𑒪 𑒏𑒹𑒢𑒱𑒯𑒰𑒩 (𑒬𑓂𑒩𑒧𑒱𑒏) 𑒢𑒻 𑒦𑒹𑒙𑒞𑒢𑒱। 𑒞𑒃𑒚𑒰𑒧 𑒢𑒯𑒩-𑒕𑒯𑒩, 𑒥𑒰𑒢𑓂𑒯–𑒮𑒛𑓃𑒏 𑒥𑒰𑒡𑒱𑒞 𑒏𑒋𑒪 𑒖𑒰𑒋, 𑒄 𑒏𑒞𑒹 𑒅𑒔𑒱𑒞 𑒦𑒹𑒪। 𑒣𑒬𑒳𑒣𑒰𑒪𑒢 𑒢𑒯𑒱𑒨𑒹 𑒖𑒏𑒰𑒿 𑒍𑒃 𑒃𑒪𑒰𑒏𑒰𑒧𑒹 𑒕𑒻𑒏, 𑒞𑒹𑒏𑒩 𑒁𑒩𑓂𑒟 𑒄 𑒢𑒻 𑒖𑒹 𑒮𑒹 𑒏𑒹𑒢𑒯𑒱 𑒁𑒕𑒱 𑒂𑒏𑒱 𑒣𑒬𑒳 𑒕𑒃𑒯𑒹 𑒢𑒻। 𑒖𑓀𑒑𑒪𑒧𑒹 𑒍𑒯𑒢-𑒍𑒯𑒢 𑒣𑒬𑒳𑒏 𑒦𑒩𑒧𑒰𑒩 𑒁𑒕𑒱 𑒖𑒹𑒏𑒩𑒰 𑒂𑒑𑒴 𑒁𑒣𑒢𑒰 𑒮𑒥𑒯𑒏 𑒑𑒰𑒋-𑒧𑒯𑒲𑒮𑒱𑒏 𑒧𑒴𑒪𑓂𑒨 𑒤𑒲𑒏𑒰 𑒣𑒛𑓃𑒱 𑒖𑒰𑒋𑒞। 𑒞𑒯𑒱𑒢𑒰 𑒑𑒰𑒕𑒼-𑒫𑒱𑒩𑒲𑒕𑒏 𑒯𑒰𑒪 𑒁𑒕𑒱। 𑒮𑒳𑒢𑓂𑒠𑒩𑒫𑒢 𑒃𑒪𑒰𑒏𑒰𑒧𑒹 𑒯𑒖𑒰𑒩𑒏 𑒏𑒼𑒢 𑒥𑒰𑒞, 𑒪𑒰𑒐𑒏 𑒏𑒼𑒢 𑒥𑒰𑒞 𑒖𑒹 𑒏𑒩𑒼𑒛𑓃-𑒏𑒩𑒼𑒛𑓃 𑒩𑒴𑒣𑒻𑒨𑒰 𑒧𑒴𑒪𑓂𑒨𑒏 𑒑𑒰𑒕 𑒮𑒦 𑒁𑒕𑒱। 𑒥𑒰𑒿𑒮𑒏 𑒞𑒿 𑒔𑒩𑓂𑒔𑒹 𑒢𑒻। 𑒐𑒱𑒮𑓂𑒮𑒰 𑒖𑒹 𑒤𑒪𑓂𑒪𑒰𑒿 𑒐𑒪𑒲𑒤𑒰 𑒥𑒰𑒿𑒮𑒹 𑒅𑒐𑒰𑒛𑓃𑒱 𑒏𑓄 𑒠𑒞𑒧𑒢𑒱 𑒏𑒩𑒻𑒞 𑒕𑒪𑒰𑒯, 𑒮𑒹 𑒣𑓂𑒩𑒞𑓂𑒨𑒏𑓂𑒭 𑒦𑒹𑒪𑒢𑒱। 𑒍𑒯𑒢𑒼 𑒥𑒰𑒿𑒮𑒏 𑒥𑒼𑒢 𑒮𑒦 𑒁𑒕𑒱 𑒖𑒹 𑒖𑒹𑒯𑒹𑒢 𑒥𑒰𑒿𑒮𑒏 𑒏𑒛𑓃𑒔𑒲 𑒯𑒼𑒃𑒋। 𑒋𑒏𑒙𑒰𑒏𑒹𑒿 𑒏𑒰𑒙𑒱 𑒏𑓄 𑒠𑒞𑒧𑒢𑒱 𑒏𑒹𑒪𑒢𑒱। 𑒋𑒏𑒩 𑒧𑒰𑒢𑒹 𑒄 𑒢𑒻 𑒦𑒹𑒪 𑒖𑒹 𑒋𑒯𑒹𑒢𑒹 𑒥𑒰𑒿𑒮 𑒍𑒃 𑒃𑒪𑒰𑒏𑒰𑒧𑒹 𑒯𑒼𑒃 𑒕𑒻। 𑒥𑒰𑒿𑒮𑒏 𑒠𑒩𑓂𑒖𑒢𑒼 𑒏𑒱𑒮𑓂𑒧। 𑒏𑒛𑓃𑒔𑒲𑒮𑒿 𑒪𑓄 𑒏𑓄 𑒍𑒯𑒢𑒼-𑒍𑒯𑒢𑒼 𑒥𑒰𑒿𑒮 𑒮𑒦 𑒁𑒕𑒱 𑒖𑒹 𑒁𑒣𑒢𑒰 𑒌𑒚𑒰𑒧𑒏 𑒮𑒿 𑒛𑒹𑒜𑓃𑒱𑒨𑒰-𑒠𑒼𑒥𑒩 𑒧𑒼𑒙 𑒁𑒕𑒱।
𑒥𑒱𑒢𑒳 𑒧𑒰𑒙𑒱𑒏 𑒐𑒹𑒞𑒲 𑒣𑒯𑒰𑒛𑓃𑒣𑒩 𑒯𑒼𑒃 𑒕𑒻। 𑒗𑒴𑒧 𑒮𑒱𑒮𑓂𑒙𑒧 𑒏𑒯𑒪 𑒖𑒰𑒃 𑒕𑒻। 𑒕𑒼𑒙-𑒕𑒼𑒙 𑒏𑒱𑒂𑒩𑒲 𑒥𑒢𑒰 𑒍𑒃𑒧𑒹 𑒅𑒑𑒪 𑒒𑒰𑒮-𑒤𑒴𑒮, 𑒥𑒼𑒢-𑒗𑒰𑒛𑓃 𑒏𑒰𑒙𑒱 𑒂𑒑𑒱 𑒪𑒑𑒰 𑒖𑒩𑒰 𑒠𑒹𑒪𑒏 𑒂 𑒐𑒹𑒞𑒲 𑒏𑒹𑒪𑒏। 𑒄 𑒞𑒲𑒢 𑒮𑒰𑒪 𑒣𑒕𑒰𑒞𑒱 𑒕𑒼𑒛𑓃𑒱 𑒠𑒼𑒮𑒩 𑒐𑒹𑒞 𑒥𑒢𑒾𑒪𑒏। 𑒥𑓀𑒑𑒪𑒰 𑒠𑒹𑒬𑒏 𑒪𑒼𑒏 𑒥𑒯𑒳𑒞 𑒑𑒩𑒲𑒥 𑒕𑒟𑒱। 𑒞𑒹𑒏𑒩 𑒏𑒰𑒩𑒝𑒼 𑒁𑒕𑒱 𑒋𑒏 𑒞𑒿 𑒁𑒣𑒢𑒹 𑒮𑒦 𑒖𑒏𑒰𑒿 𑓑𑓙𑓔𑓗 𑒄.𑒮𑒿 𑒣𑒴𑒩𑓂𑒫 𑒕𑒪𑒰। 𑒂𑒖𑒰𑒠𑒲𑒏 𑒮𑓀𑒑 𑒥𑒿𑒙𑒰 𑒏𑓄 𑒣𑒰𑒏𑒱𑒮𑓂𑒞𑒰𑒢𑒏 𑒯𑒰𑒟 𑒣𑒛𑓃𑒱 𑒑𑒹𑒪। 𑒠𑒳𑒢𑒴𑒏 𑒥𑒲𑒔 𑒁𑒢𑒹𑒏𑒼 𑒩𑓀𑒑𑒏 𑒫𑒱𑒭𑒧𑒞𑒰 𑒁𑒕𑒱; 𑒦𑒰𑒭𑒰, 𑒥𑒹𑒫𑒯𑒰𑒩, 𑒐𑒹𑒞𑒲 𑒃𑒞𑓂𑒨𑒰𑒠𑒱𑒏। 𑒮𑒞𑓂𑒞𑒰 𑒣𑒰𑒏𑒱𑒮𑓂𑒞𑒰𑒢𑒏 𑒯𑒰𑒟 𑒣𑒛𑓃𑒪, 𑒣𑒴𑒩𑓂𑒫𑒲 𑒥𑓀𑒑𑒰𑒪 𑒣𑒕𑒳𑒂 𑒑𑒹𑒪। 𑒋𑒏 𑒞𑒿 𑒁𑒯𑒳𑒢𑒰 𑒮𑒧𑒳𑒠𑓂𑒩𑒲 𑒃𑒪𑒰𑒏𑒰𑒏 𑒠𑒹𑒬, 𑒮𑒧𑒳𑒠𑓂𑒩𑒲-𑒞𑒴𑒤𑒰𑒢𑒮𑒿 𑒥𑒹𑒮𑒲 𑒥𑒩𑓂𑒥𑒰𑒠𑒲 𑒯𑒼𑒃𑒞 𑒁𑒕𑒱 𑒞𑒃𑒣𑒩 𑒬𑒰𑒮𑒢𑒏 𑒫𑒱𑒣𑒩𑒲𑒞𑒞𑒰, 𑒂𑒩𑒼 𑒡𑒏𑒱𑒨𑒰 𑒠𑒹𑒪𑒏। 𑒋𑒏 𑒞𑒿 𑒞𑓂𑒩𑒱𑒣𑒳𑒩𑒼𑒏 𑒂𑒩𑓂𑒟𑒱𑒏-𑒮𑓂𑒟𑒱𑒞𑒱 𑒍𑒞𑒹 𑒮𑒳𑒠𑒵𑒜𑓃 𑒢𑒯𑒱𑒨𑒹 𑒁𑒕𑒱, 𑒧𑒳𑒠𑒰 𑒮𑒩𑒏𑒰𑒩𑒲 𑒁𑒢𑒳𑒠𑒰𑒢 𑒦𑒩𑒣𑒴𑒩 𑒦𑒹𑒙𑒻 𑒕𑒻। 𑒍𑒢𑒰 𑒮𑒩𑒏𑒰𑒩𑒲 𑒁𑒢𑒳𑒠𑒰𑒢𑒏 𑒮𑒯𑒲 𑒅𑒣𑒨𑒼𑒑 𑒢𑒻 𑒦𑓄 𑒥𑒹𑒮𑒲 𑒪𑒳𑒙𑒰𑒃𑒞𑒹 𑒕𑒻। 𑒧𑒳𑒠𑒰 𑒞𑒻𑒨𑒼 𑒏𑒱𑒕𑒳 𑒅𑒠𑓂𑒨𑒼𑒑-𑒡𑓀𑒡𑒰 𑒕𑒼𑒙 𑒣𑒻𑒧𑒰𑒢𑒰𑒣𑒩 𑒔𑒪𑒱𑒞𑒹 𑒁𑒕𑒱। 𑒖𑒴𑒙𑒏 𑒋𑒏𑒙𑒰 𑒏𑒰𑒩𑒐𑒰𑒢𑒰𑒏 𑒮𑓀𑒑 𑒪𑒒𑒳 𑒅𑒠𑓂𑒨𑒼𑒑𑒏 𑒩𑒴𑒣𑒧𑒹 𑒥𑒰𑒿𑒮𑒏 𑒕𑒞𑓂𑒞𑒰𑒏 𑒥𑒹𑓀𑒙 (𑒛𑓀𑒙𑒰), 𑒥𑒰𑒿𑒮𑒏 𑒥𑒢𑒪 𑒂𑒩𑒼-𑒂𑒩𑒼 𑒫𑒮𑓂𑒞𑒳 𑒥𑒢𑒻𑒞 𑒁𑒕𑒱। 𑒁𑒑𑒩𑒞𑒪𑓂𑒪𑒰𑒏 𑒥𑒖𑒰𑒩𑒼 𑒞𑒞𑒹 𑒢𑒧𑒯𑒩 𑒞𑒿 𑒢𑒯𑒱𑒨𑒹 𑒁𑒕𑒱। 𑒁𑒪𑓂𑒧𑒳𑒢𑒱𑒨𑒰 𑒥𑒩𑓂𑒞𑒢 𑒮𑒹𑒯𑒼 𑒥𑒢𑒻𑒞 𑒁𑒕𑒱। 𑒥𑓀𑒑𑒪𑒰 𑒠𑒹𑒬𑒏 𑒯𑒖𑒰𑒩𑒼 𑒬𑓂𑒩𑒧𑒱𑒏 𑒁𑒑𑒩𑒞𑒪𑒰𑒧𑒹 𑒩𑒱𑒏𑓂𑒬𑒼 𑒔𑒪𑒥𑒻𑒞 𑒁𑒕𑒱 𑒂 𑒧𑒖𑒠𑒴𑒩𑒱𑒨𑒼 𑒏𑒩𑒻𑒞 𑒁𑒕𑒱। 𑒠𑒳𑒢𑒴𑒏 𑒥𑒲𑒔 𑒥𑒲𑒖𑒰𑒏 (𑒣𑒰𑒮𑒣𑒼𑒩𑓂𑒙𑒏) 𑒥𑒹𑒫𑒮𑓂𑒟𑒰 𑒣𑓂𑒩𑒰𑒨𑒼𑒑𑒱𑒏 𑒮𑓂𑒞𑒩𑒣𑒩 𑒢𑒻 𑒕𑒻। 𑒮𑒦𑒠𑒱𑒢 𑒥𑓀𑒑𑒪𑒰 𑒠𑒹𑒬𑒏 𑒬𑓂𑒩𑒧𑒱𑒏 𑒦𑒱𑒢𑒮𑒩𑒹 𑒁𑒑𑒩𑒞𑒪𑒰𑒧𑒹 𑒣𑓂𑒩𑒫𑒹𑒬 𑒏𑒩𑒻𑒞 𑒁𑒕𑒱 𑒂 𑒮𑒰𑒿𑒗𑒴 𑒣𑒯𑒩 𑒒𑒴𑒧𑒱 𑒖𑒰𑒃𑒞 𑒁𑒕𑒱। 𑒮𑒲𑒧𑒰𑒣𑒩 𑒁𑒥𑒱𑒞𑒼 𑒏𑒰𑒪 𑒂 𑒖𑒰𑒃𑒞𑒼 𑒏𑒰𑒪 𑒑𑒱𑒢𑒞𑒲 𑒏𑓄 𑒪𑒹𑒪 𑒖𑒰𑒃 𑒕𑒻 𑒫𑒰 𑒢𑒻 𑒮𑒹 𑒢𑒻 𑒖𑒰𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒐𑒢 𑒮𑒲𑒧𑒰𑒏 𑒔𑒾𑒏𑒲 𑒠𑒹𑒐𑒋 𑒑𑒹𑒪𑒰, 𑒞𑒐𑒢 𑒧𑒡𑓂𑒨 𑒣𑓂𑒩𑒠𑒹𑒬𑒏 𑒮𑒱𑒣𑒰𑒯𑒲 𑒛𑓂𑒨𑒴𑒙𑒲𑒧𑒹 𑒕𑒪𑒰𑒯। 𑒯𑒱𑒢𑓂𑒠𑒲 𑒦𑒰𑒭𑒲, 𑒞𑒿𑒋 𑒏𑒱𑒕𑒳 𑒑𑒣-𑒮𑒣 𑒦𑒹𑒪𑒢𑒱। 𑒣𑒳𑒕𑒪𑒐𑒱𑒢 𑒞𑒿 𑒏𑒯𑒪𑒏𑒢𑒱 𑒖𑒹 𑒮𑒦 𑒠𑒱𑒢 𑒦𑒱𑒢𑒮𑒩 𑓖 𑒥𑒖𑒹𑒮𑒿 𑒂𑒚 𑒥𑒖𑒹 𑒞𑒏 𑒄 𑒮𑒦 (𑒥𑓀𑒑𑒪𑒰𑒠𑒹𑒬𑒲) 𑒣𑓂𑒩𑒫𑒹𑒬 𑒏𑒩𑒻𑒋, 𑒮𑒦𑒏𑒹𑒿 𑒑𑒢𑒱 𑒏𑓄 𑒪𑒃 𑒕𑒱𑒌 𑒂 𑒫𑒰𑒣𑒮𑒲 𑒏𑒰𑒪 𑓕 𑒥𑒖𑒹𑒮𑒿 𑒮𑒰𑒞 𑒥𑒖𑒹 𑒮𑒹𑒯𑒼 𑒑𑒢𑒱 𑒪𑒃 𑒕𑒱𑒌!
𑒦𑒰𑒭𑒰𑒏 𑒠𑒵𑒭𑓂𑒙𑒱𑒮𑒿 𑒞𑓂𑒩𑒱𑒣𑒳𑒩𑒰𑒧𑒹 𑒁𑓀𑒑𑓂𑒩𑒹𑒖𑒲, 𑒏𑒏𑒫𑒰𑒩𑓂𑒏, 𑒥𑓀𑒑𑒪𑒰 𑒂 𑒧𑒝𑒱𑒣𑒳𑒩𑒲 𑒔𑒪𑒻𑒞 𑒁𑒕𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒃 𑒮𑒧𑒋 𑒑𑒹𑒪 𑒩𑒯𑒟𑒱 (𑓑𑓙𑓙𑓘) 𑒍𑒃 𑒮𑒧𑒋 𑒏𑒰𑒪𑒲 𑒥𑒰𑒥𑒴 𑒛𑒲.𑒂𑒃.𑒖𑒲. (𑒯𑒼𑒧𑒑𑒰𑒩𑓂𑒛) 𑒩𑒯𑒟𑒱। 𑒏𑒰𑒖𑒼 𑒯𑒪𑓂𑒪𑒳𑒏𑒹 𑒩𑒯𑒢𑒱। 𑒁𑒣𑒢𑒼 𑒖𑒯𑒱𑒢𑒰 𑒗𑒛𑓃-𑒗𑓀𑒗𑒙𑒮𑒿 𑒏𑒰𑒞 𑒩𑒯𑒋 𑒔𑒰𑒯𑒻 𑒕𑒪𑒰 𑒞𑒯𑒱𑒢𑒰 𑒕𑒪𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒔𑒰𑒩𑒱 𑒠𑒱𑒢 𑒖𑒐𑒢 𑒣𑒯𑒳𑒿𑒔𑒢𑒰 𑒦𑒹𑒪𑒢𑒱 𑒂𑒏𑒱 𑒥𑒠𑒪𑒲 𑒦𑓄 𑒑𑒹𑒪𑒢𑒱। 𑒛𑒲.𑒂𑒃.𑒖𑒲. (𑒣𑓂𑒩𑒬𑒰𑒮𑒢) 𑒥𑒢𑒰 𑒅𑒞𑓂𑒞𑒩𑒲 𑒞𑓂𑒩𑒱𑒣𑒳𑒩𑒰 𑒥𑒠𑒪𑒲 𑒏𑓄 𑒠𑒹𑒪𑒏𑒢𑒱। 𑒣𑒰𑒿𑒔𑒧 𑒠𑒱𑒢 𑒁𑒣𑒢𑒼 𑒮𑒦 𑒣𑒩𑒱𑒫𑒰𑒩 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒏𑒻𑒪𑒰 𑒬𑒯𑒩𑒏 𑒪𑒹𑒪 𑒫𑒱𑒠𑒰 𑒦𑒹𑒪𑒰। 𑒠𑒮 𑒥𑒖𑒹 𑒕𑒯𑒙𑒰 𑒤𑒼𑒩𑓂𑒮𑒏 𑒮𑓀𑒑 𑒫𑒱𑒠𑒰 𑒦𑒹𑒪𑒰। 𑒁𑒑𑒩𑒞𑒪𑒰 𑒣𑒔𑓂𑒕𑒱𑒧𑒲 𑒞𑓂𑒩𑒱𑒣𑒳𑒩𑒰𑒧𑒹 𑒣𑒛𑓃𑒻𑒞 𑒁𑒕𑒱। 𑒥𑓀𑒑𑒪𑒰𑒠𑒹𑒬𑒮𑒿 𑒮𑒙𑒪𑒹। 𑒠𑒕𑒱𑒢𑒲 𑒞𑓂𑒩𑒱𑒣𑒳𑒩𑒰𑒧𑒹 𑒅𑒑𑓂𑒩𑒫𑒰𑒠𑒲 𑒅𑒣𑒠𑓂𑒩𑒫 𑒁𑒡𑒱𑒏 𑒕𑒪 𑒞𑒿𑒋 𑒢𑒻 𑒒𑒴𑒧𑒱 𑒣𑒹𑒪𑒰। 𑒍𑒢𑒰 𑒖𑒰𑒃 𑒏𑒰𑒪 𑒥𑒹𑒮𑒲 𑒩𑒰𑒞𑒱𑒨𑒹𑒏𑒹𑒿 𑒣𑒰𑒮 𑒏𑒹𑒢𑒹 𑒩𑒯𑒟𑒱 𑒞𑒿𑒋 𑒥𑒹𑒮𑒲 𑒢𑒻 𑒠𑒹𑒐𑒱 𑒣𑒹𑒪𑒰 𑒧𑒳𑒠𑒰 𑒁𑒑𑒩𑒞𑒪𑒰𑒮𑒿 𑒏𑒻𑒪𑒰 𑒬𑒯𑒩 𑒁𑒥𑒻𑒧𑒹 𑒠𑒹𑒐𑒻𑒏 𑒥𑒹𑒮𑒲 𑒮𑒧𑒋 𑒦𑒹𑒙𑒪𑒢𑒱। 𑒠𑒮 𑒥𑒖𑒹𑒧𑒹 𑒖𑒹 𑒫𑒱𑒠𑒰 𑒦𑒹𑒪𑒰 𑒁𑒑𑒩𑒞𑒪𑒰𑒮𑒿 𑒮𑒹 𑒮𑒰𑒜𑓃𑒹 𑒔𑒰𑒩𑒱 𑒥𑒖𑒹 𑒏𑒻𑒪𑒰 𑒬𑒯𑒩 𑒣𑒯𑒳𑒿𑒔𑒪𑒰। 𑒥𑒲𑒔𑒧𑒹 𑒞𑒲𑒢 𑒚𑒰𑒧, 𑒣𑒢𑒩𑒯-𑒥𑒲𑒮 𑒧𑒱𑒢𑒙 𑒏𑓄 𑒏𑓄 𑒩𑒴𑒏𑒥𑒼 𑒏𑒹𑒪𑒰। 𑒢𑒫 𑒖𑒑𑒯𑒣𑒩 𑒮𑒦 𑒢𑒥𑒹 𑒩𑒯𑒟𑒱 𑒞𑒿𑒋 𑒠𑒴 𑒠𑒱𑒢 𑒒𑒳𑒧𑒻-𑒤𑒱𑒩𑒻𑒏 𑒏𑒼𑒢𑒼 𑒏𑒰𑒩𑓂𑒨𑒏𑓂𑒩𑒧 𑒢𑒻 𑒥𑒢𑒪𑒢𑒱। 𑒞𑒹𑒮𑒩 𑒠𑒱𑒢𑒮𑒿 𑒒𑒳𑒧𑒥-𑒤𑒱𑒩𑒥 𑒤𑒹𑒩 𑒬𑒳𑒩𑒴 𑒦𑒹𑒪𑒢𑒱। 𑒂𑒮𑒲𑒢 𑒧𑒰𑒮 𑒩𑒯𑒢𑒹 𑒥𑒰𑒡𑒧𑒹 𑒡𑒰𑒢𑒼𑒏 𑒤𑒮𑒪 𑒩𑒯𑒻। 𑒍𑒢𑒰 𑒆𑒿𑒔𑒑𑒩 𑒖𑒧𑒲𑒢 𑒮𑒹𑒯𑒼 𑒞𑒹𑒪𑒯𑒢 𑒂 𑒁𑒪𑓂𑒪𑒴 𑒪𑒹𑒪 𑒞𑒻𑒨𑒰𑒩𑒲 𑒔𑒪𑒻𑒞 𑒩𑒯𑒻। 𑒖𑓀𑒑𑒪-𑒣𑒯𑒰𑒛𑓃𑒏 𑒏𑓂𑒭𑒹𑒞𑓂𑒩 𑒕𑒲𑒯𑒹 𑒁𑒣𑒢𑒰 𑒌𑒚𑒰𑒧𑒮𑒿 𑒦𑒱𑒢𑓂𑒢 𑒑𑒰𑒕-𑒫𑒱𑒩𑒲𑒕 𑒠𑒹𑒐𑒟𑒱। 𑒍𑒢𑒰 𑒂𑒧𑒏 𑒑𑒰𑒕 𑒮𑒹𑒯𑒼 𑒁𑒕𑒱। 𑒧𑒳𑒠𑒰 𑒁𑒣𑒢𑒰 𑒮𑒥𑒯𑒏 𑒂𑒧𑒮𑒿 𑒦𑒱𑒢𑓂𑒢 𑒁𑒕𑒱। 𑒍𑒃𑒚𑒰𑒧𑒏 𑒂𑒧 𑒁𑒣𑒢𑒰 𑒮𑒦 𑒖𑒏𑒰𑒿 𑒣𑒏𑒪𑒰𑒣𑒩 𑒢𑒻 𑒐𑒰𑒋𑒪 𑒖𑒰𑒃𑒞 𑒁𑒕𑒱। 𑒖𑒐𑒢𑒹 𑒂𑒧 𑒣𑒏𑒻𑒣𑒩 𑒯𑒼𑒃𑒞 𑒏𑒱 𑒍𑒃𑒧𑒹 𑒏𑒲𑒛𑓃𑒰 𑒤𑒛𑓃𑒱 𑒖𑒰𑒃𑒞 𑒁𑒕𑒱 𑒖𑒹 𑒑𑒳𑒠𑓂𑒠𑒰𑒏𑒹𑒿 𑒦𑒳𑒩-𑒦𑒴𑒩𑒰 𑒥𑒢𑒰 𑒠𑒃𑒞, 𑒖𑒹 𑒐𑒰𑒃 𑒖𑒼𑒏𑒩 𑒢𑒻 𑒩𑒯𑒱 𑒣𑒥𑒻𑒞 𑒁𑒕𑒱। 𑒞𑓂𑒩𑒱𑒣𑒳𑒩𑒰𑒏 𑒣𑓂𑒩𑒧𑒳𑒐 𑒮𑓂𑒟𑒰𑒢𑒧𑒹 𑒅𑒢𑒲𑒏𑒳𑒙𑒲 𑒮𑒹𑒯𑒼 𑒁𑒕𑒱। 𑒅𑒢𑒲𑒏𑒳𑒙𑒲𑒏 𑒏𑒰𑒩𑓂𑒨𑒏𑓂𑒩𑒧 𑒥𑒢𑒪𑒢𑒱। 𑒅𑒢𑒲𑒏𑒳𑒙𑒲𑒏 𑒮𑒧𑓂𑒥𑒢𑓂𑒡𑒧𑒹 𑒏𑒯𑒪 𑒖𑒰𑒃𑒞 𑒁𑒕𑒱 𑒖𑒹 𑒖𑒐𑒢 𑒠𑓂𑒫𑒰𑒣𑒩 𑒖𑒳𑒑𑒏 𑒁𑒢𑓂𑒞 𑒯𑒳𑒁𑒋 𑒪𑒰𑒑𑒪 𑒂 𑒏𑒪𑒨𑒳𑒑𑒏 𑒂𑒫𑒰𑒯𑒢 𑒯𑒳𑒁𑒋 𑒪𑒰𑒑𑒪 𑒞𑒐𑒢 𑒠𑒹𑒫𑒞𑒰 𑒮𑒦 𑒮𑒼𑒔𑒪𑒢𑒱 𑒖𑒹 𑒏𑒪𑒨𑒳𑒑 𑒥𑒯𑒳𑒞 𑒐𑒩𑒰𑒥 𑒖𑒳𑒑 𑒂𑒥𑒱 𑒩𑒯𑒪 𑒁𑒕𑒱। 𑒧𑒰𑒢-𑒧𑒩𑓂𑒨𑒰𑒠𑒰, 𑒃𑒖𑓂𑒖𑒞-𑒂𑒫𑒩𑒴 𑒥𑒿𑒔𑒥 𑒏𑒚𑒱𑒢 𑒁𑒕𑒱। 𑒮𑒹 𑒢𑒻 𑒞𑒿 𑒡𑒩𑒞𑒲 𑒕𑒼𑒛𑓃𑒱 𑒮𑒧𑒳𑒠𑓂𑒩𑒹 𑒥𑒰𑒮 𑒏𑒩𑒥 𑒢𑒲𑒏 𑒯𑒋𑒞। 𑒅𑒢𑒏 𑒁𑒩𑓂𑒟 𑒋𑒏 𑒯𑒼𑒃𑒞 𑒁𑒕𑒱। 𑒖𑒯𑒱𑒢𑒰 𑒁𑒣𑒢𑒰 𑒮𑒦 𑒅𑒢𑒔𑒰𑒪𑒲𑒮, 𑒅𑒢𑓂𑒢𑒻𑒮, 𑒅𑒢𑒞𑒲𑒮, 𑒅𑒢𑒯𑒞𑒩𑒱 𑒃𑒞𑓂𑒨𑒰𑒠𑒱 𑒏𑒯𑒻 𑒕𑒱𑒌, 𑒖𑒹𑒏𑒩 𑒁𑒩𑓂𑒟 𑒯𑒼𑒃𑒞 𑒔𑒰𑒪𑒲𑒮𑒧𑒹 𑒋𑒏 𑒏𑒧, 𑒥𑒲𑒮𑒧𑒹 𑒋𑒏 𑒏𑒧 𑒃𑒞𑓂𑒨𑒰𑒠𑒱 𑒞𑒯𑒱𑒢𑒰 𑒅𑒢𑒏𑒳𑒙𑒱𑒏 𑒏𑒩𑒼𑒛𑓃𑒧𑒹 𑒋𑒏 𑒏𑒧। 𑒮𑓂𑒟𑒰𑒢𑒏 𑒢𑒰𑒁𑒼𑓀 𑒮𑒳𑒢𑒱 𑒧𑒢 𑒐𑒴𑒥 𑒐𑒳𑒬𑒲 𑒦𑒹𑒪𑒢𑒱। 𑒐𑒳𑒬𑒲𑒏 𑒏𑒰𑒩𑒝 𑒄𑒯𑒼 𑒩𑒯𑒻 𑒖𑒹 𑒏𑒰𑒪𑒲 𑒥𑒰𑒥𑒴 𑒞𑒹𑒯𑒢 𑒜𑓀𑒑𑒮𑒿 𑒢𑒰𑒔𑒱-𑒢𑒰𑒔𑒱 𑒏𑒟𑒰 𑒮𑒳𑒢𑒾𑒪𑒐𑒱𑒢 𑒖𑒹 𑒂𑒩𑒼 𑒖𑒱𑒖𑓂𑒘𑒰𑒮𑒰 𑒥𑒜𑓃𑒱 𑒑𑒹𑒪 𑒩𑒯𑒢𑒱। 𑒞𑒃𑒣𑒩𑒮𑒿 𑒁𑒐𑒢 𑒡𑒩𑒱 𑒔𑒾𑒩𑒰𑒮𑒱𑒨𑒹 𑒪𑒰𑒐𑒏 𑒢𑒰𑒂𑒹𑓀 𑒮𑒳𑒢𑒢𑒹 𑒕𑒪𑒰, 𑒂𑒃 𑒞𑒿 𑒏𑒩𑒼𑒛𑓃 𑒠𑒹𑒐𑒻𑒏 𑒧𑒾𑒏𑒰। 𑒪𑒰𑒦 𑒄𑒯𑒼 𑒖𑒹 𑒠𑒼𑒮𑒩 𑒮𑓂𑒟𑒰𑒢 𑒢𑒯𑒱𑒨𑒼 𑒖𑒹𑒞𑒰 𑒞𑒻𑒨𑒼 𑒞𑒿 𑒤𑒪 𑒦𑒹𑒙𑒥𑒹 𑒏𑒩𑒞𑒢𑒱। 𑒩𑒰𑒞𑒰-𑒩𑒰𑒞𑒲 𑒮𑒦 𑒠𑒹𑒫𑒞𑒰 𑒣𑒛𑓃𑒰 𑒏𑓄 𑒮𑒧𑒳𑒠𑓂𑒩 𑒠𑒱𑒮𑒏 𑒩𑒮𑓂𑒞𑒰 𑒡𑒹𑒪𑒢𑒱। 𑒣𑒋𑒩𑒹 𑒩𑒯𑒟𑒱। 𑒖𑒰𑒃𑒞-𑒖𑒰𑒃𑒞 𑒞𑓂𑒩𑒱𑒣𑒳𑒩𑒰 (𑒅𑒢𑒲𑒏𑒳𑒙𑒱-𑒧𑒰𑒞𑒰𑒯𑒰𑒩𑒲) 𑒣𑒯𑒳𑒿𑒔𑒻𑒞-𑒣𑒯𑒳𑒿𑒔𑒻𑒞 𑒦𑒼𑒩 𑒦𑓄 𑒖𑒰𑒃 𑒑𑒹𑒪𑒢𑒱। 𑒧𑒯𑒱𑓀𑒮𑒥𑒰𑒩 𑒮𑒦 𑒧𑒯𑒲𑓀𑒮 𑒐𑒼𑒪𑒱-𑒐𑒼𑒪𑒱 𑒔𑒩𑒥𑒋 𑒫𑒱𑒠𑒰 𑒦𑒹𑒪 𑒩𑒯𑒋। 𑒮𑒦 𑒠𑒹𑒫𑒞𑒰 𑒮𑒼𑒔𑒪𑒢𑒱 𑒖𑒹 𑒠𑒱𑒢-𑒠𑒹𑒐𑒰𑒩 𑒣𑒛𑓃𑒰𑒋𑒥 𑒢𑒲𑒏 𑒯𑒋𑒞, 𑒮𑒦 𑒏𑒱𑒨𑒼 𑒋𑒏𑒹𑒚𑒰𑒧 𑒛𑒹𑒩𑒰 𑒐𑒮𑒾𑒪𑒢𑒱। 𑒍𑒯𑒋 𑒮𑓂𑒟𑒰𑒢 𑒅𑒢𑒲𑒏𑒳𑒙𑒲 𑒕𑒲। 𑒢𑒧𑒯𑒩 𑒏𑓂𑒭𑒹𑒞𑓂𑒩𑒧𑒹 𑒮𑓂𑒟𑒰𑒢 𑒣𑒮𑒩𑒪 𑒁𑒕𑒱। 𑒢𑒧𑒯𑒩-𑒢𑒧𑒯𑒩 𑒣𑒯𑒰𑒛𑓃, 𑒑𑒰𑒕-𑒫𑒱𑒩𑒲𑒕, 𑒥𑒼𑒢-𑒗𑒰𑒛𑓃𑒮𑒿 𑒦𑒩𑒪। 𑒣𑒯𑒰𑒛𑓃𑒣𑒩 𑒮𑒿 𑒗𑒩𑒢𑒰 𑒗𑒯𑒩𑒻𑒞। 𑒧𑒢𑒳𑒭𑓂𑒨𑒮𑒿 𑒣𑒴𑒩𑓂𑒫𑒏 𑒖𑒹 𑒖𑒲𑒫-𑒖𑒢𑓂𑒞𑒳 𑒁𑒕𑒱 𑒫𑒋𑒯 𑒮𑒦 𑒠𑒹𑒫𑒲-𑒠𑒹𑒫𑒞𑒰। 𑒣𑒯𑒰𑒛𑓃𑒲 𑒦𑒴𑒧𑒱 𑒧𑒳𑒠𑒰 𑒩𑓀𑒑-𑒩𑓀𑒑𑒏 𑒣𑒰𑒟𑒩 𑒮𑒦𑒏 𑒁𑒕𑒱। 𑒥𑒰𑒪-𑒣𑒰𑒟𑒩 𑒏𑒰𑒿𑒔 𑒣𑒞𑓂𑒟𑒩𑒮𑒿 𑒮𑒏𑓂𑒏𑒞 𑒖𑒳𑒂𑒋𑒪 𑒣𑒞𑓂𑒟𑒩 𑒡𑒩𑒱𑒏 𑒮𑓂𑒟𑒰𑒢। 𑒍𑒯𑒢𑒼 𑒣𑒞𑓂𑒟𑒩 𑒖𑒹 𑒯𑒰𑒟𑒮𑒿 𑒙𑒴𑒙𑒱 𑒖𑒰𑒃𑒞 𑒁𑒕𑒱। 𑒂 𑒍𑒯𑒢𑒼 𑒣𑒞𑓂𑒟𑒩 𑒖𑒹 𑒐𑒴𑒥 𑒮𑒏𑓂𑒏𑒞 𑒁𑒕𑒱। 𑒐𑒰𑒃𑒨𑒼𑒥𑒪𑒰 𑒤𑒪𑒏 𑒂 𑒏𑒹𑒩𑒼𑒏 𑒥𑒼𑒢 𑒁𑒕𑒱। 𑒥𑒲𑒔𑒧𑒹 𑒠𑒼𑒏𑒰𑒢-𑒠𑒾𑒛𑓃𑒲। 𑒍 𑒥𑒰𑒯𑒩𑒹 𑒁𑒕𑒱। 𑒖𑒃𑒚𑒰𑒧 𑒣𑒯𑒰𑒛𑓃𑒣𑒩 𑒮𑒿 𑒗𑒩𑒢𑒰𑒏 𑒣𑒰𑒢𑒱 𑒗𑒯𑒩𑒻𑒞 𑒁𑒕𑒱 𑒞𑒃𑒚𑒰𑒧 𑒠𑓂𑒫𑒰𑒣𑒩 𑒨𑒳𑒑𑒏 𑒁𑒩𑓂𑒖𑒳𑒢-𑒏𑒵𑒭𑓂𑒝𑒏 𑒩𑒟𑒏 𑒔𑒱𑒞𑓂𑒩 𑒥𑒢𑒰𑒍𑒪 𑒁𑒕𑒱 𑒖𑒹 𑒮𑓂𑒟𑒰𑒢𑒏 𑒧𑒳𑒐𑓂𑒨 𑒥𑒱𑒢𑓂𑒠𑒳 𑒕𑒲। 𑒣𑒴𑒩𑓂𑒫𑒰𑓀𑒔𑒪 (𑒁𑒮𑒰𑒧, 𑒧𑒹𑒒𑒰𑒪𑒨, 𑒧𑒝𑒱𑒣𑒳𑒩, 𑒧𑒱𑒖𑒼𑒩𑒧, 𑒞𑓂𑒩𑒱𑒣𑒳𑒩𑒰, 𑒁𑒩𑒴𑒝𑒰𑒔𑒪, 𑒢𑒰𑒑𑒰𑒪𑒻𑓀𑒛 𑒂 𑒮𑒱𑒏𑓂𑒏𑒱𑒧) 𑒧𑒱𑒪𑒰 𑒁𑒣𑒢𑒹-𑒂𑒣𑒧𑒹 𑒋𑒏 𑒠𑒹𑒬 𑒕𑒲। 𑒖𑓀𑒑𑒪, 𑒣𑒯𑒰𑒛𑓃, 𑒗𑒲𑒪, 𑒢𑒠𑒲 𑒒𑒰𑒙𑒲𑒏 𑒮𑒧𑒴𑒯। 𑒦𑒰𑒭𑒰𑒏 𑒠𑒵𑒭𑓂𑒙𑒱𑒮𑒿 𑒮𑒹𑒯𑒼 𑒥𑒯𑒳𑒦𑒰𑒭𑒲 𑒁𑒕𑒱। 𑒁𑒣𑒢-𑒁𑒣𑒢 𑒏𑓂𑒭𑒹𑒞𑓂𑒩𑒏 𑒦𑒰𑒭𑒰 𑒮𑒹𑒯𑒼 𑒕𑒻। 𑒧𑒼𑒙𑒰-𑒧𑒼𑒙𑒲 𑒥𑓀𑒑𑒪𑒰, 𑒁𑓀𑒑𑓂𑒩𑒹𑒖𑒲, 𑒯𑒱𑒢𑓂𑒠𑒲, 𑒐𑒰𑒮𑒲, 𑒑𑒰𑒩𑒼, 𑒏𑒏𑒫𑒰𑒩𑓂𑒏, 𑒧𑒝𑒱𑒣𑒳𑒩𑒲, 𑒧𑒱𑒖𑒼, 𑒂𑒍, 𑒏𑒼𑓀𑒨𑒏, 𑒁𑓀𑒑𑒰𑒧𑒲, 𑒮𑒹𑒧𑒰, 𑒪𑒼𑒟𑒰, 𑒧𑒼𑓀𑒣𑒰, 𑒁𑒏𑒰 𑒧𑒱𑒖𑒴, 𑒬𑒩𑓂𑒠𑒳𑒏𑒧𑒹𑒢, 𑒢𑒱𑒬𑒱, 𑒁𑒣𑒞𑒢𑒲, 𑒯𑒱𑒪𑒧𑒱𑒠𑒱, 𑒞𑒑𑒱𑒢, 𑒁𑒠𑒲, 𑒃𑒠𑒳, 𑒠𑒱𑒑𑒰𑒩𑒴, 𑒧𑒱𑒖𑒱𑒐𑒧𑓂𑒩𑒲, 𑒮𑒱𑓀𑒑𑒤𑒴, 𑒞𑓀𑒑𑒪𑒰, 𑒢𑒼𑒏𑓂𑒙𑒹, 𑒫𑒰𑓀𑒔𑒴, 𑒪𑒼𑒣𑒔𑒰, 𑒦𑒼𑒙𑒱𑒨𑒰, 𑒢𑒹𑒣𑒰𑒪𑒲 𑒪𑒱𑓀𑒥𑒴 𑒃𑒞𑓂𑒨𑒰𑒠𑒱।𑒁𑒑𑒩𑒞𑒪𑒰𑒏 𑒩𑒰𑒖𑒰 (𑒮𑒰𑒧𑓀𑒞𑒲 𑒨𑒳𑒑𑒧𑒹) 𑒥𑒩𑓂𑒧𑓂𑒧𑒢-𑒣𑒩𑒱𑒫𑒰𑒩𑒏 𑒕𑒪𑒰𑒯। 𑒁𑒐𑒢 𑒖𑒹 𑒤𑒱𑒪𑓂𑒧𑒲𑒮𑓂𑒞𑒰𑒢𑒧𑒹 𑒑𑒲𑒞𑒏𑒰𑒩-𑒮𑓀𑒑𑒲𑒞𑒏𑒰𑒩 𑒫𑒩𑓂𑒧𑓂𑒧𑒢 𑒮𑒦 𑒕𑒟𑒱 𑒍 𑒍𑒞𑒳𑒏𑒹 𑒕𑒟𑒱। 𑒯𑒳𑒢𑒏𑒹 𑒠𑒹𑒪 𑒧𑒏𑒰𑒢𑒧𑒹 𑒞𑓂𑒩𑒱𑒣𑒳𑒩𑒰𑒏 𑒮𑒦𑒰 𑒦𑒫𑒢 (𑒮𑒠𑒢) 𑒁𑒕𑒱। 𑒂𑒠𑒱𑒫𑒰𑒮𑒲𑒏 𑒥𑒲𑒔 𑒁𑒣𑒢𑒰 𑒮𑒦𑒮𑒿 𑒦𑒱𑒢𑓂𑒢 𑒦𑒼𑒖𑒢𑒏 𑒔𑒪𑒢𑒱 𑒁𑒕𑒱। 𑒐𑒰𑒃-𑒣𑒲𑒥𑒻𑒏 𑒫𑒮𑓂𑒞𑒳𑒧𑒹 𑒮𑒹𑒯𑒼 𑒁𑒢𑓂𑒞𑒩 𑒁𑒕𑒱। 𑒯𑒳𑒢𑒏𑒰 𑒮𑒥𑒯𑒏 𑒦𑒼𑒖𑒧𑒹 𑒁𑒣𑒢𑒰 𑒮𑒦 𑒖𑒏𑒰𑒿 𑒢𑒻 𑒖𑒹 𑒦𑒰𑒞-𑒠𑒰𑒪𑒱-𑒞𑒩𑒏𑒰𑒩𑒲𑒮𑒿 𑒬𑒳𑒩𑒴 𑒏𑒹𑒪𑒾𑓀 𑒂 𑒖𑒢𑒰-𑒖𑒢𑒰 𑒂𑒑𑒴 𑒥𑒜𑓃𑒻𑒞 𑒖𑒰𑒋𑒞 𑒞𑒹𑒢𑒰-𑒞𑒹𑒢𑒰 𑒢𑒲𑒏-𑒢𑒲𑒏 𑒫𑒱𑒢𑓂𑒨𑒰𑒮 𑒂𑒍𑒞। 𑒍𑒃𑒚𑒰𑒧 𑒮𑒹 𑒢𑒻 𑒕𑒻। 𑒢𑒲𑒏-𑒢𑒲𑒏 𑒫𑒮𑓂𑒞𑒳 𑒣𑒯𑒱𑒢𑒹 𑒥𑒿𑒙𑒰𑒃𑒞 𑒁𑒕𑒱 𑒂 𑒖𑒹𑒢𑒰-𑒖𑒹𑒢𑒰 𑒂𑒑𑒴 𑒥𑒜𑓃𑒻𑒞 𑒁𑒕𑒱 𑒞𑒹𑒢𑒰-𑒞𑒹𑒢𑒰 𑒣𑒕𑒳𑒂𑒃𑒞 𑒖𑒰𑒃𑒞 𑒁𑒕𑒱।
𑒠𑒴 𑒯𑒖𑒰𑒩 𑒄𑒮𑓂𑒫𑒲𑒏 𑒣𑒕𑒰𑒞𑒱 𑒏𑒰𑒪𑒲-𑒥𑒰𑒥𑒴 𑒩𑒼𑒑𑒰𑒋 𑒪𑒑𑒪𑒰𑒯। 𑒣𑒯𑒱𑒢𑒹 𑒂𑒿𑒐𑒱 𑒐𑒩𑒰𑒥 𑒦𑒹𑒪𑒢𑒱। 𑒏𑒪𑒏𑒞𑓂𑒞𑒰𑒧𑒹 𑒂𑒣𑒩𑒹𑒬𑒢 𑒏𑒩𑒾𑒪𑒢𑒱। 𑒏𑒥𑓂𑒖𑒱𑒨𑒞𑒏 𑒬𑒱𑒏𑒰𑒃𑒞 𑒬𑒳𑒩𑒴𑒯𑒹𑒮𑒿 𑒦𑓄 𑒑𑒹𑒪 𑒩𑒯𑒢𑒱। 𑒧𑒡𑒳𑒧𑒹𑒯 𑒮𑒹𑒯𑒼 𑒦𑓄 𑒑𑒹𑒪𑒢𑒱। 𑒂𑒃.𑒖𑒲. 𑒥𑒢𑒪𑒰 𑒅𑒞𑓂𑒞𑒩 𑒏𑒱𑒕𑒳 𑒠𑒱𑒢 𑒢𑒲𑒏 𑒩𑒯𑒪𑒰𑒯। 𑒍𑒢𑒰 𑒥𑒲𑒔𑒧𑒹 𑒛𑒲.𑒖𑒲.𑒣𑒲. 𑒥𑒢𑒱 𑒧𑒹𑒒𑒰𑒪𑒨 (𑒬𑒱𑒪𑒰𑒿𑒑) 𑒮𑒹𑒯𑒼 𑒋𑒪𑒰𑒯। 𑒧𑒳𑒠𑒰 𑒍𑒃𑒚𑒰𑒧 𑒧𑒢 𑒢𑒻 𑒪𑒑𑒪𑒢𑒱। 𑒕𑒯 𑒧𑒰𑒮 𑒣𑒕𑒰𑒞𑒱 𑒣𑒳𑒢: 𑒒𑒴𑒧𑒱 𑒏𑓄 𑒁𑒑𑒩𑒞𑒪𑒹 𑒂𑒃.𑒖𑒲. 𑒥𑒢𑒱 𑒔𑒪𑒱 𑒑𑒹𑒪𑒰𑒯। 𑒩𑒱𑒙𑒰𑒨𑒩 𑒯𑒼𑒃𑒮𑒿 𑒔𑒰𑒩𑒱 𑒥𑒩𑓂𑒐 𑒣𑒴𑒩𑓂𑒫 𑒍𑒕𑒰𑒃𑒢 𑒣𑒏𑒛𑓃𑒱 𑒪𑒹𑒪𑒢𑒱। 𑒢𑒼𑒏𑒩𑒲𑒠𑒰𑒩 𑒩𑒯𑒢𑒹 𑒑𑒰𑒧 𑒢𑒻 𑒋𑒪𑒰𑒯। 𑒍𑒞𑒻 𑒃𑒪𑒰𑒖 𑒏𑒩𑒥𑒻𑒞 𑒩𑒯𑒪𑒰𑒯। 𑒠𑒱𑒪𑓂𑒪𑒲, 𑒏𑒪𑒏𑒞𑓂𑒞𑒰 𑒮𑒦 𑒚𑒰𑒧 𑒑𑒹𑒪𑒰 𑒧𑒳𑒠𑒰 𑒮𑓂𑒫𑒮𑓂𑒟 𑒢𑒻 𑒦𑓄 𑒮𑒏𑒪𑒰𑒯। 𑒠𑒹𑒯𑒏 𑒏𑒼𑒢𑒼 𑒑𑓀𑒖𑒢 𑒢𑒻 𑒩𑒯𑒪𑒢𑒱। 𑒞𑒲𑒢 𑒨𑒰 𑒔𑒰𑒩𑒱 𑒥𑒹𑒩 𑒣𑒹𑒙𑒏 𑒂𑒣𑒩𑒹𑒬𑒢 𑒦𑒹𑒪 𑒕𑒪𑒢𑒱। 𑒏𑒭𑓂𑒙𑒮𑒿 𑒧𑒢𑒼 𑒔𑒱𑒛𑓃𑒔𑒱𑒛𑓃𑒰 𑒑𑒹𑒪𑒢𑒱। 𑒠𑒴 𑒥𑒩𑓂𑒐 𑒣𑒕𑒰𑒞𑒱 (𑒮𑒹𑒫𑒰-𑒢𑒱𑒫𑒵𑒞𑓂𑒞 𑒯𑒼𑒃𑒮𑒿 𑒣𑒯𑒱𑒢𑒹) 𑒑𑒰𑒧 𑒂𑒥𑒱 𑒑𑒹𑒪𑒰𑒯। 𑒠𑒳𑒢𑒴 𑒞𑒩𑒯𑒏 𑒩𑒼𑒑 -𑒬𑒰𑒩𑒲𑒩𑒱𑒏-𑒧𑒰𑒢𑒮𑒱𑒏- 𑒮𑒿 𑒦𑒲𑒞𑒩𑒹-𑒦𑒲𑒞𑒩 𑒑𑓂𑒩𑒮𑒱𑒞 𑒦𑓄 𑒑𑒹𑒪𑒰𑒯। 𑒧𑒰𑒢𑒮𑒱𑒏 𑒩𑒼𑒑𑒏 𑒏𑒰𑒩𑒝 𑒦𑒹𑒪𑒢𑒱- 𑒖𑒐𑒢 𑒂𑒃.𑒖𑒲. 𑒥𑒢𑒪𑒰𑒯, 𑒑𑒵𑒯 𑒫𑒱𑒦𑒰𑒑 𑓓𑓒 𑒏𑒩𑒼𑒛𑓃 𑒩𑒴𑒣𑒻𑒂 𑒥𑒱𑒢𑒰 𑒨𑒼𑒖𑒢𑒰𑒏 𑒣𑒚𑒰 𑒠𑒹𑒪𑒏𑒢𑒱। 𑒧𑓀𑒬𑒰 𑒖𑒹 𑒯𑒼𑒅 𑒧𑒳𑒠𑒰 𑒏𑒰𑒪𑒱𑒨𑒼 𑒥𑒰𑒥𑒴 𑒁𑒣𑒢𑒰𑒏𑒹𑒿 𑒮𑒻𑒠𑓂𑒡𑒰𑒢𑓂𑒞𑒱𑒏 𑒥𑒳𑒗𑒻𑒞 𑒕𑒪𑒰𑒯। 𑒥𑒱𑒢𑒳 𑒨𑒼𑒖𑒢𑒰𑒏 𑒩𑒴𑒣𑒻𑒂 𑒏𑒞𑒋 𑒐𑒩𑓂𑒔 𑒏𑒋𑒪 𑒖𑒰𑒋 𑒮𑒹 𑒤𑒳𑒛𑓃𑒥𑒹 𑒢𑒹 𑒏𑒹𑒪𑒢𑒱। 𑒋𑒏𑒙𑒰 𑒣𑒞𑓂𑒩 𑒑𑒵𑒯-𑒫𑒱𑒦𑒰𑒑𑒏𑒹𑒿 𑒪𑒱𑒐𑒪𑒢𑒱 𑒖𑒹 𑒩𑒴𑒣𑒻𑒂 𑒣𑓂𑒩𑒰𑒣𑓂𑒞 𑒦𑒹𑒪 𑒧𑒳𑒠𑒰 𑒨𑒼𑒖𑒢𑒰 𑒞𑒿 𑒏𑒱𑒕𑒳 𑒁𑒕𑒱𑒨𑒹 𑒢𑒻, 𑒮𑒹 𑒨𑒼𑒖𑒢𑒰 𑒣𑒚𑒰𑒅। 𑒞𑒹𑒏𑒩 𑒏𑒼𑒢𑒼 𑒅𑒞𑓂𑒞𑒩 𑒢𑒻 𑒦𑒹𑒙𑒪𑒢𑒱। 𑒍 𑒖𑒰𑒪 𑒕𑒪𑒻। 𑒩𑒴𑒣𑒻𑒨𑒰 𑒂𑒣𑒮 𑒏𑓄 𑒠𑒹𑒪𑒐𑒱𑒢। 𑒂𑒣𑒮 𑒏𑒩𑒥 𑒋𑒯𑒹𑒢 𑒒𑒰𑒞𑒏 𑒦𑒹𑒪𑒢𑒱। 𑒍𑒗𑒩𑒰 𑒑𑒹𑒪𑒰𑒯। 𑒖𑒥𑒰𑒥-𑒞𑒪𑒥 𑒦𑒹𑒪𑒢𑒱। 𑒪𑒱𑒐𑒱𑒞𑒧𑒹 𑒖𑒥𑒰𑒥 𑒞𑒿 𑒠𑓄 𑒠𑒹𑒪𑒐𑒱𑒢 𑒧𑒳𑒠𑒰 𑒥𑒱𑒧𑒰𑒩𑒱𑒨𑒰𑒯 𑒬𑒩𑒲𑒩 𑒦𑒹𑒢𑒹 𑒠𑒾𑒛𑓃-𑒡𑒴𑒣 𑒞𑒿 𑒏𑓄 𑒢𑒻 𑒮𑒏𑒪𑒰𑒯। 𑒛𑓂𑒨𑒴𑒙𑒲𑒮𑒿 𑒮𑒹𑒯𑒼 𑒁𑒪𑒑 𑒦𑓄 𑒑𑒹𑒪 𑒩𑒯𑒟𑒱। 𑒋𑒏 𑒠𑒱𑒬 𑒑𑒵𑒯-𑒫𑒱𑒦𑒰𑒑𑒏 𑒔𑒰𑒣, 𑒠𑒼𑒮𑒩 𑒠𑒱𑒮 𑒛𑓂𑒨𑒴𑒙𑒲𑒮𑒿 𑒁𑒪𑒑 𑒯𑒋𑒥, 𑒂𑒩𑓂𑒟𑒱𑒏 𑒮𑒧𑒮𑓂𑒨𑒰 𑒅𑒣𑒮𑓂𑒟𑒱𑒞 𑒦𑓄 𑒑𑒹𑒪𑒢𑒱। 𑒞𑒃𑒣𑒩 𑒣𑒟𑓂𑒨-𑒣𑒰𑒢𑒱, 𑒠𑒫𑒰𑒃-𑒠𑒰𑒩𑒴𑒏 𑒐𑒩𑓂𑒔 𑒏𑒰𑒤𑒲 𑒥𑒜𑓃𑒱 𑒑𑒹𑒪 𑒩𑒯𑒢𑒱। 𑒥𑒹𑒫𑒮 𑒦𑓄 𑒑𑒹𑒪𑒰𑒯। 𑒏𑒰𑒪𑒲 𑒥𑒰𑒥𑒴𑒏𑒹𑒿 𑒣𑓀𑒛𑒱𑒞 𑒏𑒯𑒻𑒏 𑒏𑒰𑒩𑒝 𑒁𑒕𑒱 𑒖𑒹 𑒑𑒲𑒞𑒰 (𑒬𑓂𑒩𑒲𑒧𑒠𑓂𑒦𑒑𑒫𑒠𑒑𑒲𑒞𑒰) 𑒣𑒩 𑒁𑒣𑒢 𑒠𑒵𑒭𑓂𑒙𑒱𑒏𑒼𑒝 𑒕𑒪𑒢𑒱। 𑒂𑒔𑒰𑒩𑓂𑒨 𑒩𑒖𑒢𑒲𑒬𑒏 𑒂𑒚𑒼 𑒐𑓀𑒛𑒏 (𑒂𑒚 𑒐𑓀𑒛𑒧𑒹 𑒮𑓀𑒑𑒵𑒯𑒱𑒞, 𑒖𑒹𑒏𑒩 𑒍𑒃 𑒮𑒧𑒻𑒧𑒹 𑒁𑒚𑒰𑒩𑒯 𑒮𑒋 𑒠𑒰𑒧 𑒕𑒪𑒻) 𑒢𑒲𑒏 𑒁𑒡𑓂𑒨𑒨𑒢 𑒕𑒪𑒢𑒱, 𑒖𑒹 𑒠𑒵𑒭𑓂𑒙𑒱𑒏𑒼𑒝𑒏𑒹𑒿 𑒥𑒠𑒪𑒢𑒹 𑒕𑒪𑒢𑒱। 𑒖𑒱𑒢𑒑𑒲𑒏 𑒂𑒬𑒰 𑒙𑒴𑒙𑒱 𑒑𑒹𑒪𑒢𑒱। 𑒁𑓀𑒞𑒱𑒧 𑒠𑒾𑒛𑓃𑒏 𑒦𑒹𑒿𑒙𑒧𑒹 𑒫𑒱𑒦𑒰𑒑𑒲𑒨 𑒥𑒯𑒳𑒞 𑒥𑒰𑒞 𑒏𑒯𑒪𑒐𑒱𑒢 𑒖𑒹 𑒠𑒹𑒐𑒻𑒂 𑒏𑒱 𑒁𑒕𑒱 𑒂 𑒔𑒼𑒩𑒾𑒂 𑒏𑒱 𑒁𑒕𑒱। 𑒢𑒼𑒏𑒩𑒲𑒏 𑒬𑒳𑒩𑒴𑒏 𑒖𑒱𑒢𑒑𑒲𑒮𑒿 𑒪𑓄 𑒏𑓄 𑒁𑒐𑒢 𑒡𑒩𑒱𑒏 𑒥𑒯𑒳𑒞 𑒥𑒰𑒞 𑒮𑓀𑒑𑒲 𑒯𑒼𑒃𑒏 𑒢𑒰𑒞𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒍 𑒏𑒯𑒪𑒐𑒱𑒢। 𑒁𑒑𑒩𑒞𑒪𑒰 𑒣𑒯𑒳𑒿𑒔𑒞𑒹 (𑒛𑒲.𑒋𑒮.𑒣𑒲.) 𑒁𑒣𑒢 𑒣𑒯𑒱𑒔𑒰𑒢 𑒕𑒥𑒹 𑒧𑒰𑒮𑒧𑒹 𑒥𑒢𑒰 𑒪𑒹𑒪𑒢𑒱। 𑒃𑒧𑒰𑒢𑒠𑒰𑒩 𑒁𑒤𑒮𑒩𑒏 𑒩𑒴𑒣𑒧𑒹 𑒣𑓂𑒩𑒬𑒰𑒮𑒢𑒮𑒿 𑒖𑒢𑒧𑒰𑒢𑒮𑒏 𑒥𑒲𑒔 𑒂𑒥𑒱 𑒑𑒹𑒪𑒰𑒯। 𑒢𑒑𑒠 𑒩𑒴𑒣𑒻𑒂, 𑒑𑒯𑒢𑒰-𑒖𑒹𑒥𑒩 𑒫𑒰 𑒪𑒞𑓂𑒞𑒰-𑒏𑒣𑒛𑓃𑒰 𑒏𑒯𑒱𑒨𑒼 𑒏𑒹𑒏𑒩𑒼𑒮𑒿 𑒢𑒻 𑒕𑒳𑒪𑒢𑒱, 𑒧𑒳𑒠𑒰 𑒐𑒰𑒃-𑒣𑒲𑒥𑒻𑒏 𑒫𑒮𑓂𑒞𑒳 𑒢𑒻 𑒒𑒳𑒧𑒥𑒻𑒞 𑒕𑒪𑒰𑒯। 𑒬𑒳𑒩𑒴𑒏 𑒣𑒰𑒿𑒔 𑒥𑒩𑓂𑒐𑒏 𑒖𑒱𑒢𑒑𑒲 𑒋𑒏 𑒏𑒰𑒪𑒐𑓀𑒛𑒏 𑒖𑒱𑒢𑒑𑒲 𑒥𑒢𑒱 𑒑𑒹𑒪 𑒕𑒪𑒢𑒱। 𑒬𑒩𑒰𑒥 𑒣𑒱𑒥𑒻𑒞 𑒕𑒪𑒰𑒯, 𑒮𑒱𑒑𑒩𑒹𑒙 𑒣𑒲𑒥𑒻𑒞 𑒕𑒪𑒰𑒯, 𑒧𑒳𑒩𑓂𑒑𑒲-𑒁𑓀𑒛𑒰 𑒐𑒰𑒃𑒞 𑒕𑒪𑒰𑒯। 𑒍𑒯𑒲 𑒠𑒾𑒛𑓃𑒧𑒹 (𑓑𑓙𑓗𑓒 𑒄.) 𑒥𑓀𑒑𑒪𑒰 𑒠𑒹𑒬𑒏 𑒪𑒛𑓃𑒰𑒃-𑒣𑒰𑒏𑒱𑒮𑓂𑒞𑒰𑒢𑒏 𑒮𑓀𑒑 𑒦𑒹𑒪 𑒩𑒯𑒋। 𑒧𑒱𑒟𑒱𑒪𑒰𑓀𑒔𑒪𑒏 𑒦𑒰𑒨 𑒪𑒼𑒏𑒢𑒱𑒏𑒹𑒿 𑒧𑒢 𑒯𑒹𑒞𑒢𑒱 𑒖𑒹 𑒮𑒰𑒪𑒼 𑒦𑒩𑒱 𑒥𑒩𑒐𑒰 𑒮𑒹𑒯𑒼 𑒦𑒹𑒪 𑒩𑒯𑒋। 𑒮𑒰𑒪𑒹 𑒥𑒩𑒮𑒰𑒞𑒏 𑒦𑓄 𑒑𑒹𑒪। 𑒒𑒩 𑒕𑒰𑒛𑓃𑒻𑒪𑒹 𑒖𑒹 𑒏𑒱𑒨𑒼 𑒐𑒜𑓃-𑒣𑒰𑒞 𑒩𑒐𑒪𑒢𑒱 𑒮𑒥𑒯𑒏 𑒮𑒛𑓃𑒱 𑒑𑒹𑒪𑒢𑒱। 𑒋𑒏 𑒞𑒿 𑒍𑒯𑒱𑒢𑒰 𑒪𑒞𑓂𑒞𑒲-𑒤𑒞𑓂𑒞𑒲 𑒧𑒰𑒢𑒹 𑒔𑒰𑒩 𑒣𑒩𑒏 𑒮𑒖𑒧𑒢𑒱 𑒏𑒠𑒲𑒧𑒰 𑒩𑒯𑒢𑒹 𑒐𑒜𑓃𑒏 𑒒𑒩𑒏𑒹𑒿 𑒏𑒼𑒢𑒼 𑒠𑒬𑒰 𑒢𑒻 𑒩𑒯𑒻𑒞 𑒕𑒻𑒏, 𑒞𑒿𑒋 𑒢𑒻 𑒕𑒛𑓃𑒰𑒋𑒥 𑒞𑒿 𑒣𑒙𑒼𑒙𑒢𑒼 𑒠𑒹𑒥𑒏 𑒂𑒫𑒬𑓂𑒨𑒏𑒞𑒰 𑒦𑒃𑒨𑒹 𑒖𑒰𑒃𑒞 𑒕𑒪𑒻। 𑒍𑒢𑒰 𑒥𑒼𑒢𑒱𑒯𑒰𑒩 𑒬𑓂𑒩𑒹𑒝𑒲𑒏 𑒁𑒡𑒱𑒏𑒞𑒩 𑒡𑒢𑒐𑒹𑒞𑒲 (𑒡𑒰𑒢𑒮𑒿 𑒣𑒯𑒱𑒢𑒹 𑒖𑒹 𑒧𑒛𑓃𑒴𑒂 𑒯𑒼𑒃𑒞 𑒕𑒪) 𑒍𑒏𑒩 𑒮𑒮𑓂𑒞𑒲 𑒕𑒪𑒻। 𑒮𑒮𑓂𑒞𑒲 𑒄 𑒖𑒹 𑒖𑒐𑒢 𑒧𑒛𑓃𑒴𑒂 𑒣𑒰𑒏𑒱 𑒖𑒰𑒃 𑒕𑒪𑒻 𑒞𑒐𑒢 𑒑𑒱𑒩𑒯𑒞 𑒐𑒹𑒞𑒧𑒹 𑒩𑒯𑒻𑒞 𑒕𑒪𑒰𑒯, 𑒢𑒰𑒩 𑒏𑒙𑒢𑒱𑒯𑒰𑒩 𑒮𑒦 𑒧𑒛𑓃𑒴𑒂 𑒑𑒱𑒩𑒯𑒞𑒏𑒹𑒿 𑒠𑓄 𑒠𑒻𑒞 𑒕𑒹𑒪𑒐𑒱𑒢 𑒂 𑒢𑒰𑒩 𑒪𑓄 𑒏𑓄 𑒁𑒣𑒢 𑒒𑒩 𑒕𑒰𑒛𑓃𑒻𑒞 𑒕𑒪𑒰𑒯। 𑒥𑓀𑒑𑒪𑒰 𑒠𑒹𑒬𑒏 (𑓑𑓙𑓗𑓑 𑒄.) 𑒪𑒛𑓃𑒰𑒃𑒧𑒹 𑒥𑓀𑒑𑒪𑒰 𑒠𑒹𑒬𑒏𑒹𑒿 𑒦𑒰𑒩𑒞 𑒮𑓀𑒑 𑒠𑒹𑒪𑒏। 𑒃𑒢𑓂𑒠𑒱𑒩𑒰𑒖𑒲 𑒣𑓂𑒩𑒡𑒰𑒢 𑒧𑓀𑒞𑓂𑒩𑒲 𑒩𑒯𑒟𑒱। 𑒩𑒴𑒮𑒏 (𑒮𑒼𑒫𑒱𑒨𑒞 𑒮𑓀𑒒𑒏) 𑒦𑒩𑒣𑒴𑒩 𑒮𑒯𑒨𑒼𑒑 𑒦𑒹𑒙𑒪𑒢𑒱। 𑒍𑒯𑒲 𑒮𑒧𑒋 𑒮𑒼𑒫𑒱𑒨𑒞 𑒮𑓀𑒒 𑒥𑒯𑒳𑒞 𑒬𑒏𑓂𑒞𑒱𑒬𑒰𑒪𑒲 𑒕𑒪। 𑒍𑒢𑒰 𑒁𑒐𑒢𑒼 𑒁𑒕𑒱 𑒧𑒳𑒠𑒰....? 𑒥𑒲𑒮 𑒥𑒩𑓂𑒐𑒏 𑒠𑒼𑒮𑓂𑒞𑒲𑒏 𑒮𑒧𑒗𑒾𑒞𑒰 𑒦𑒰𑒩𑒞-𑒮𑒼𑒫𑒱𑒨𑒞 𑒮𑓀𑒒𑒏 𑒦𑒹𑒪। 𑒢𑒲𑒏 𑒖𑒥𑒰𑒥 𑒣𑒰𑒏𑒱𑒮𑓂𑒞𑒰𑒢𑒏 𑒮𑓀𑒑 𑒠𑒹𑒢𑒱𑒯𑒰𑒩 𑒁𑒧𑒹𑒩𑒱𑒏𑒰𑒏𑒹𑒿 𑒦𑒹𑒙𑒪। 𑒠𑒳𑒢𑒱𑒨𑒰𑒿𑒏 𑒃𑒞𑒱𑒯𑒰𑒮𑒧𑒹 𑓓𑓑 𑒯𑒖𑒰𑒩 𑒮𑒹𑒢𑒰 𑒥𑓀𑒑𑒪𑒹𑒠𑒹𑒬𑒧𑒹 𑒯𑒰𑒟 𑒅𑒚𑒾𑒪𑒏। 𑒮𑒩𑒹𑒝𑓂𑒛𑒩 𑒏𑒹𑒪𑒏। 𑒥𑓀𑒑𑒪𑒰 𑒠𑒹𑒬𑒏 𑒍𑒃 𑒪𑒛𑓃𑒰𑒃𑒧𑒹 𑒬𑒲𑒩𑓂𑒭 𑒢𑒹𑒞𑒰 𑒮𑒦 𑒞𑓂𑒩𑒱𑒣𑒳𑒩𑒹𑒏 𑒁𑒑𑒩𑒞𑒪𑒰𑒧𑒹 𑒩𑒯𑒟𑒱। 𑒃𑒢𑓂𑒠𑒱𑒩𑒰𑒖𑒲 𑒮𑒹𑒯𑒼 𑒔𑒳𑒣-𑒔𑒰𑒣 (𑒥𑒱𑒢𑒰 𑒏𑒱𑒕𑒳 𑒖𑒰𑒢𑒏𑒰𑒩𑒲𑒏) 𑒖𑒰𑒱𑒟। 𑒞𑓂𑒩𑒱𑒣𑒳𑒩𑒰 𑒧𑒪𑒹𑒙𑓂𑒩𑒲𑒏 𑒕𑒰𑒥𑒢𑒲 𑒥𑒢𑒪 𑒩𑒯𑒋। 𑒍𑒃 𑒮𑒧𑒋 𑒦𑒼𑒪𑒹𑓀𑒙𑓂𑒩𑒲𑒏 𑒯𑒰𑒟𑒧𑒹 𑒪𑒛𑓃𑒰𑒃 𑒏𑒧𑒰𑒢 𑒩𑒯𑒻, 𑒮𑒳𑒩𑒏𑓂𑒭𑒰𑒏 𑒏𑒧𑒰𑒢 𑒞𑒿 𑒣𑓂𑒩𑒬𑒰𑒮𑒢𑒹𑒣𑒩 𑒩𑒯𑒋। 𑒍𑒃 𑒑𑒹𑒮𑓂𑒙 𑒯𑒰𑒅𑒮𑒏 𑒖𑒱𑒧𑓂𑒧𑒰 𑒯𑒱𑒢𑒏𑒹 (𑒏𑒰𑒪𑒲 𑒥𑒰𑒥𑒴𑒏) 𑒩𑒯𑒢𑒱। 𑒖𑒃𑒧𑒹 𑒥𑓀𑒑𑒪𑒰 𑒠𑒹𑒬𑒏 𑒏𑒩𑓂𑒝𑒡𑒰𑒩 𑒮𑒦 𑒩𑒯𑒟𑒱। 𑒍𑒃 𑒥𑒲𑒔 (𑒥𑓀𑒑𑒪𑒰 𑒠𑒹𑒬𑒏 𑒪𑒛𑓃𑒰𑒃𑒮𑒿 𑒣𑒴𑒩𑓂𑒫) 𑒋𑒏𑒙𑒰 𑒖𑒱𑒧𑓂𑒧𑒹𑒠𑒰𑒩 𑒁𑒡𑓂𑒨𑒏𑓂𑒭 𑒏𑒹𑒿 𑒑𑒰𑒩𑒱𑒨𑒼 𑒣𑒜𑓃𑒪𑒐𑒱𑒢 𑒂 𑒧𑒰𑒩𑒥𑒼 𑒏𑒹𑒪𑒐𑒱𑒢, 𑒦𑒹𑒪 𑒄 𑒖𑒹 𑒯𑒱𑒢𑒏𑒰 𑒢𑒰𑒍𑓀𑒣𑒩 𑒋𑒏𑒙𑒰 𑒧𑒰𑒕𑒏 𑒥𑒹𑒣𑒰𑒩𑒲𑒮𑒿 𑒍 𑒐𑒴𑒥 𑒧𑒰𑒕 𑒐𑒰𑒋। 𑒥𑓀𑒑𑒰𑒪𑒲 𑒦𑒰𑒨, 𑒞𑒯𑒴𑒧𑒹 𑒞𑓂𑒩𑒱𑒣𑒳𑒩𑒰𑒏 𑒣𑒰𑒢𑒱 𑒂𑒩𑒼 𑒧𑒢𑓂𑒠 𑒕𑒻, 𑒋𑒏 𑒠𑒱𑒢 𑒛𑓂𑒨𑒴𑒙𑒲𑒧𑒹 𑒖𑒰𑒃𑒞 𑒩𑒯𑒟𑒱 𑒏𑒱 𑒮𑒪𑒰𑒧 𑒚𑒼𑒏𑒱 𑒍 𑒥𑒹𑒣𑒰𑒩𑒲 𑒯𑒿𑒮𑒻𑒞 𑒏𑒯𑒱 𑒠𑒹𑒪𑒏𑒢𑒱। 𑒍𑒃 𑒥𑒰𑒞𑒏𑒹𑒿 𑒣𑒲𑒚𑒱𑒨𑒰 𑒚𑒼𑒏 𑒏𑒹𑒪𑒢𑒱, 𑒫𑒋𑒯 (𑒁𑒡𑓂𑒨𑒏𑓂𑒭) 𑒣𑒏𑒛𑓃𑒰 𑒑𑒹𑒪𑒰। 𑒧𑒳𑒠𑒰 𑒪𑒴𑒙𑒧𑒹 𑒔𑒩𑒐𑒰 𑒢𑒤𑒰। 𑒞𑓂𑒩𑒱𑒣𑒳𑒩𑒰𑒧𑒹 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲 𑒂 𑒏𑒰𑓀𑒑𑓂𑒩𑒹𑒮 𑒣𑒰𑒩𑓂𑒙𑒲𑒏 𑒥𑒲𑒔 𑒏𑒬𑒧𑒏𑒮 𑒩𑒰𑒖𑒢𑒲𑒞𑒱 𑒩𑒯𑒋। 𑒞𑒲𑒢 𑒑𑒼𑒙𑒹𑒏 𑒏𑒧𑒱𑒙𑒲 𑒢𑒵𑒣𑒹𑒢 𑒥𑒰𑒥𑒴𑒏 (𑒢𑒵𑒣𑒹𑒢 𑒔𑒏𑓂𑒩𑒫𑒩𑓂𑒞𑒲, 𑒖𑒹 𑒂𑒖𑒢𑓂𑒧 𑒁𑒫𑒱𑒫𑒰𑒯𑒱𑒞 𑒩𑒯𑒪𑒰𑒯, 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒢𑒹𑒞𑒵𑒞𑓂𑒫 𑒏𑒩𑒻𑒞 𑒩𑒯𑒟𑒱 𑒙𑓂𑒩𑒱𑒣𑒳𑒪 𑒋𑒧.𑒋. 𑒩𑒯𑒟𑒱, 𑒠𑒴 𑒥𑒹𑒩 𑒧𑒳𑒐𑓂𑒨 𑒧𑓀𑒞𑓂𑒩𑒲 𑒮𑒹𑒯𑒰𑒹 𑒥𑒢𑒪𑒰𑒯) 𑒁𑒡𑓂𑒨𑒏𑓂𑒭𑒞𑒰𑒧𑒹 𑒥𑒢𑒪। 𑒖𑒱𑒢𑒑𑒲𑒏 𑒮𑓀𑒒𑒩𑓂𑒭𑒏 𑒁𑒢𑒳𑒦𑒫 𑒏𑒰𑒪𑒲 𑒥𑒰𑒥𑒴𑒏𑒹𑒿 𑒫𑒱𑒠𑓂𑒨𑒰𑒩𑓂𑒟𑒲𑒨𑒹 𑒖𑒱𑒢𑒑𑒲𑒏 𑒩𑒯𑒢𑒱। 𑒮𑓀𑒑𑒲-𑒮𑒰𑒟𑒲 𑒣𑓂𑒩𑒬𑒰𑒮𑒢𑒱𑒏 𑒁𑒤𑒮𑒩 𑒮𑒦 𑒏𑒯𑒢𑒱 𑒖𑒹 𑒧𑒼𑒙𑒩𑒲 𑒥𑒰𑒢𑓂𑒯𑒱 𑒏𑓄 𑒩𑒐𑒢𑒹 𑒩𑒯𑒴। 𑒞𑒹𑒏𑒩 𑒖𑒥𑒰𑒥 𑒠𑒹𑒟𑒱𑒢- 𑒥𑒢𑓂𑒯𑒪𑒹 𑒁𑒕𑒱। 𑒢𑒵𑒣𑒹𑒢 𑒥𑒰𑒥𑒴 𑒒𑒙𑒢𑒰𑒏 𑒖𑒛𑓃𑒱 𑒞𑒏 𑒣𑒯𑒳𑒿𑒔𑒪𑒰𑒯। 𑒃𑒢𑒏𑓂𑒫𑒰𑒃𑒩𑒲 𑒠𑒾𑒛𑓃𑒧𑒹 𑒑𑒣-𑒮𑒣 𑒏𑒩𑒻𑒏 𑒥𑒯𑒰𑒢𑒹 𑒖𑓀𑒑𑒪𑒏 𑒋𑒏𑒙𑒰 𑒑𑒹𑒮𑓂𑒙 𑒯𑒰𑒅𑒮𑒧𑒹 𑒪𑓄 𑒑𑒹𑒪𑒢𑒱। 𑒏𑒼𑒢𑒼 𑒖𑒰𑒢𑒏𑒰𑒩𑒲 𑒏𑒹𑒏𑒩𑒼 𑒢𑒻 𑒠𑒹𑒪𑒐𑒱𑒢। 𑒧𑒳𑒠𑒰 𑒠𑒹𑒐𑒱𑒢𑒱𑒯𑒰𑒩𑒼 𑒞𑒿 𑒠𑒹𑒐𑒱𑒞𑒹 𑒩𑒯𑒻। 𑒦𑒩𑒱 𑒩𑒰𑒞𑒱 𑒍𑒞𑒻 𑒩𑒯𑒪𑒰𑒯। 𑒖𑒃𑒮𑒿 𑒂𑒩𑒼 𑒣𑓂𑒩𑒞𑒱𑒭𑓂𑒚𑒰 𑒥𑒢𑒱 𑒑𑒹𑒪 𑒩𑒯𑒢𑒱। 𑒧𑒳𑒠𑒰 𑒣𑓂𑒩𑒞𑒱𑒭𑓂𑒚𑒼 𑒞𑒿 𑒖𑒢𑒧𑒰𑒩𑒰 𑒯𑒼𑒃 𑒕𑒻। 𑒏𑒰𑒪𑒲 𑒥𑒰𑒥𑒴 𑒁𑒣𑒢𑒹 𑒣𑒰𑒿𑒔 𑒦𑒰𑒃𑒏 𑒦𑒻𑒨𑒰𑒩𑒲 𑒂 𑒔𑒰𑒩𑒱 𑒮𑓀𑒞𑒰𑒢 𑒁𑒣𑒢𑒹 𑒕𑒢𑓂𑒯𑒱। 𑒞𑒲𑒢 𑒏𑒢𑓂𑒨𑒰 𑒋𑒏 𑒪𑒛𑓃𑒏𑒰। 𑒞𑒲𑒢𑒴 𑒏𑒢𑓂𑒨𑒰𑒏 𑒥𑒱𑒂𑒯 𑒏𑓄 𑒪𑒹𑒢𑒹 𑒕𑒪𑒰𑒯। 𑒦𑒰𑒋 𑒂 𑒣𑒱𑒞𑒰 𑒖𑒲𑒫𑒱𑒞𑒹 𑒕𑒪𑒐𑒱𑒢। 𑒟𑒹𑒯𑒑𑒩 𑒠𑒳𑒢𑒴, 𑒁𑒣𑒢𑒰𑒮𑒿 𑒋𑒏 𑒥𑒩𑓂𑒐 𑒣𑒯𑒱𑒢𑒹 𑒣𑒱𑒞𑒰 𑒧𑒳𑒃𑒪𑒐𑒱𑒢। 𑒦𑒰𑒋 𑒕𑒢𑓂𑒯𑒱𑒨𑒹। 𑒥𑒹𑒙𑒰𑒏 𑒥𑒱𑒂𑒯 𑒣𑒕𑒳𑒂𑒋𑒪 𑒕𑒪𑒢𑒱। 𑒍𑒢𑒰 𑒑𑒣-𑒮𑒣 (𑒥𑒱𑒂𑒯𑒏) 𑒮𑒳𑒣𑒾𑒪 𑒖𑒱𑒪𑒰𑒧𑒹 𑒔𑒪𑒻𑒞 𑒩𑒯𑒢𑒱। 𑒍𑒯𑒼 (𑒏𑒢𑓂𑒨𑒰𑒑𑒞) 𑒩𑒹𑒪𑒥𑒹𑒏 𑒋𑒮.𑒣𑒲., 𑒖𑒐𑒢 𑒧𑒢 𑒧𑒰𑒢𑒱 𑒑𑒹𑒪𑒢𑒱 𑒖𑒹 𑒂𑒥 𑒢𑒻 𑒖𑒲𑒥, 𑒞𑒐𑒢 𑒯𑒳𑒢𑒏𑒰 𑒞𑒞𑓂𑒏𑒰𑒪 𑒥𑒖𑒰 𑒧𑓀𑒠𑒱𑒩𑒧𑒹 𑒥𑒱𑒂𑒯 𑒮𑒧𑓂𑒣𑒢𑓂𑒢 𑒏𑒹𑒪𑒢𑒱। 𑒢𑒼𑒏𑒩𑒲 𑒮𑒧𑒰𑒣𑓂𑒞 𑒦𑒹𑒪𑒰 𑒣𑒢𑒩𑒯𑒹-𑒥𑒲𑒮 𑒠𑒱𑒢𑒏 𑒣𑒕𑒰𑒞𑒱 𑒧𑒩𑒱 𑒑𑒹𑒪𑒰। 𑒧𑒳𑒠𑒰 𑒣𑒹𑓀𑒬𑒢𑒏 𑒮𑒧𑒮𑓂𑒨𑒰 𑒞𑒿 𑒅𑒚𑒱𑒨𑒹 𑒑𑒹𑒪𑒢𑒱।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒞𑓂𑒩𑒱𑒣𑒳𑒩𑒰 𑒖𑒰𑒃𑒮𑒿 𑒣𑒯𑒱𑒢𑒹 𑒯𑒻𑒠𑒩𑒰𑒥𑒰𑒠 𑒑𑒹𑒪 𑒩𑒯𑒟𑒱। 𑒯𑒻𑒠𑒩𑒰𑒥𑒰𑒠𑒧𑒹 𑒩𑒰𑒭𑓂𑒙𑓂𑒩𑒲𑒨 𑒮𑓂𑒞𑒩𑒏 𑒮𑒰𑒯𑒱𑒞𑓂𑒨𑒱𑒏, 𑒩𑒰𑒖𑒢𑒲𑒞𑒱𑒏 𑒏𑒰𑒩𑓂𑒨𑒏𑓂𑒩𑒧 𑒕𑒪। 𑒑𑓂𑒩𑒳𑒣𑒧𑒹 𑒧𑒡𑒳𑒥𑒢𑒲 𑒖𑒱𑒪𑒰𑒮𑒿 𑒑𑒹𑒪 𑒕𑒪𑒰। 𑒩𑒹𑒪𑒏 𑒋𑒏 𑒧𑒰𑒮𑒏 𑒣𑒰𑒮 𑒮𑒦 𑒏𑒱𑒨𑒼 𑒥𑒢𑒥𑒾𑒢𑒹 𑒩𑒯𑒟𑒱। 𑒧𑒳𑒠𑒰 𑒩𑒴𑒙𑒏 𑒯𑒱𑒮𑒰𑒥𑒮𑒿 𑒥𑒢𑒪 𑒩𑒯𑒢𑒱। 𑒍𑒯𑒲 𑒮𑒧𑒋 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒣𑒰𑒩𑓂𑒙𑒲 𑒁𑒢𑓂𑒞𑒩𑓂𑒑𑒞 𑒮𑓂𑒫. 𑒁𑒢𑒢𑓂𑒞 𑒦𑒑𑒞 𑒮𑒰𑒯𑒱𑒞𑓂𑒨𑒱𑒏 𑒧𑒼𑒩𑓂𑒔𑒰𑒣𑒩 𑒖𑒱𑒧𑓂𑒧𑒰𑒧𑒹 𑒩𑒯𑒟𑒱। 𑒮𑒰𑒡𑒰𑒩𑒝 𑒣𑒩𑒱𑒫𑒰𑒩𑒮𑒿 𑒂𑒋𑒪 𑒁𑒢𑒢𑓂𑒞 𑒦𑒑𑒞, 𑒖𑒹𑒯𑒢𑒹 𑒣𑒱𑒞𑒧𑒩𑒴 𑒩𑒯𑒟𑒱 𑒞𑒹𑒯𑒢𑒹 𑒫𑒤𑒰𑒠𑒰𑒩। 𑒂𑒩𑓂𑒟𑒱𑒏 𑒮𑓂𑒟𑒱𑒞𑒱 𑒢𑒲𑒏 𑒢𑒻 𑒩𑒯𑒪𑒼𑒣𑒩 𑒣𑒰𑒩𑓂𑒙𑒲𑒏 𑒯𑒼𑒪𑒙𑒰𑒃𑒧𑒩 𑒢𑒹𑒞𑒰 𑒩𑒯𑒟𑒱। 𑒍𑒃 𑒮𑒧𑒋 𑒧𑒡𑒹𑒣𑒳𑒩𑒏 𑒦𑒰𑒩 𑒯𑒳𑒢𑒏𑒹 𑒦𑒹𑒙𑒪 𑒩𑒯𑒢𑒱। 𑒔𑒰𑒩𑒱 𑒠𑒱𑒢𑒏 𑒏𑒰𑒩𑓂𑒨𑒏𑓂𑒩𑒧 𑒯𑒻𑒠𑒩𑒰𑒥𑒰𑒠𑒧𑒹 𑒕𑒪। 𑒮𑒰𑒱𑒯𑒞𑓂𑒨𑒱𑒏 𑒧𑓀𑒔𑒣𑒩 𑒣𑓂𑒩𑒹𑒧 𑒔𑒢𑓂𑒠 𑒮𑒰𑒯𑒱𑒞𑓂𑒨 𑒕𑒪 𑒂 𑒩𑒰𑒖𑒢𑒲𑒞𑒱𑒏 𑒧𑓀𑒔𑒣𑒩 𑒠𑒹𑒬𑒧𑒹 𑒏𑒰𑒢𑒴𑒢 𑒥𑒢𑒻𑒏, 𑒍𑒏𑒩 𑒫𑓂𑒨𑒰𑒐𑓂𑒨𑒰 𑒂 𑒱𑒢𑒩𑓂𑒝𑒋 𑒪𑒃𑒧𑒹 𑒏𑒱 𑒮𑒧𑒮𑓂𑒨𑒰 𑒁𑒥𑒻𑒞 𑒁𑒕𑒱, 𑒞𑒃𑒣𑒩 𑒫𑒱𑒬𑒠 𑒔𑒩𑓂𑒔𑒼 𑒂 𑒂𑒑𑒴𑒏 𑒪𑒹𑒪 𑒏𑒰𑒩𑓂𑒨𑒏𑓂𑒩𑒧𑒼𑒏 𑒱𑒢𑒩𑓂𑒝𑒋 𑒦𑒹𑒪 𑒕𑒪𑒻। 𑒣𑓂𑒩𑒹𑒧𑒔𑒢𑓂𑒠 𑒮𑒰𑒯𑒱𑒞𑓂𑒨𑒣𑒩 𑒫𑒱𑒬𑒠 𑒫𑓂𑒨𑒰𑒐𑓂𑒨𑒰 𑒩𑒧𑒹𑒬 𑒔𑒢𑓂𑒠 𑒅𑒠𑓂𑒒𑒰𑒙𑒢 𑒦𑒰𑒭𑒝𑒧𑒹 𑒠𑒹𑒪𑒢𑒱। 𑒍𑒢𑒰 𑒍 𑒣𑓀𑒖𑒰𑒥𑒏 𑒕𑒪𑒰𑒯 𑒧𑒳𑒠𑒰 𑒁𑓀𑒑𑓂𑒩𑒹𑒖𑒲𑒧𑒹 𑒥𑒰𑒖𑒪 𑒩𑒯𑒟𑒱। 𑒏𑒰𑒩𑒝 𑒕𑒪 𑒖𑒹 𑒋𑒏 𑒞𑒿 𑒠𑒕𑒱𑒢𑒲 𑒦𑒰𑒩𑒞𑒧𑒹 𑒏𑒰𑒩𑓂𑒨𑒏𑓂𑒩𑒧 𑒕𑒪, 𑒞𑒯𑒴𑒧𑒹 𑒖𑒃𑒚𑒰𑒧 𑒯𑒱𑒢𑓂𑒠𑒲𑒮𑒿 𑒁𑒡𑒱𑒏 𑒁𑓀𑒑𑓂𑒩𑒹𑒖𑒲𑒏 𑒥𑒼𑒪𑒫𑒰𑒪𑒰 𑒁𑒕𑒱। 𑒥𑒯𑒳𑒞 𑒣𑒻𑒒 𑒏𑒰𑒩𑓂𑒨𑒏𑓂𑒩𑒧 𑒕𑒪। 𑒋𑒏𑒧𑒞𑒮𑒿 𑒣𑓂𑒩𑒹𑒧𑒔𑒢𑓂𑒠 𑒣𑓂𑒩𑒑𑒞𑒱𑒬𑒲𑒪 𑒫𑒱𑒔𑒰𑒩𑒏 𑒮𑒰𑒯𑒱𑒞𑓂𑒨𑒏𑒰𑒩 𑒧𑒰𑒢𑒪 𑒑𑒹𑒪𑒰𑒯। 𑒩𑒰𑒖𑒢𑒲𑒞𑒱𑒏 𑒧𑓀𑒔𑒣𑒩 𑒧𑒳𑒐𑓂𑒨 𑒫𑒏𑓂𑒞𑒰 𑒕𑒪𑒰𑒯-𑒦𑒴𑒣𑒹𑒬 𑒑𑒳𑒣𑓂𑒞𑒰 𑒖𑒹 𑒩𑒰𑒖𑓂𑒨 𑒮𑒦𑒰𑒧𑒹 𑒪𑒑𑒰𑒞𑒰𑒩 𑒋𑒏 𑒮𑒋𑒮𑒿 𑒆𑒣𑒩 𑒥𑒻𑒮𑒰𑒩𑒧𑒹 𑒮𑒧𑓂𑒧𑒱𑒪𑒱𑒞 𑒕𑒪𑒰𑒯। 𑒏𑒰𑒢𑒴𑒢 𑒥𑒢𑒥𑒻𑒏 𑒣𑓂𑒩𑒏𑓂𑒩𑒱𑒨𑒰𑒧𑒹 𑒏𑒱 𑒥𑒰𑒡𑒰 𑒅𑒣𑒮𑓂𑒟𑒱𑒞 𑒯𑒼𑒃𑒞 𑒁𑒕𑒱, 𑒞𑒹𑒏𑒩 𑒫𑒱𑒬𑒠 𑒫𑓂𑒨𑒰𑒐𑓂𑒨𑒰 𑒏𑒩𑒻𑒞 𑒏𑒼𑒢 𑒩𑒴𑒣𑒧𑒹 𑒏𑒰𑒖 𑒏𑒋𑒪 𑒖𑒰𑒃𑒞 𑒁𑒕𑒱, 𑒏𑒯𑒪𑒢𑒱। 𑒦𑒴𑒣𑒹𑒬 𑒑𑒳𑒣𑓂𑒞 𑒥𑓀𑒑𑒰𑒪𑒏 𑒕𑒪𑒰𑒯। 𑒂𑒖𑒢𑓂𑒧 𑒁𑒫𑒱𑒫𑒰𑒯𑒱𑒞 𑒩𑒯𑒪𑒰𑒯। 𑒋𑒏 𑒮𑓀𑒑 𑒮𑓂𑒫. 𑒃𑒢𑓂𑒠𑒱𑒩𑒰𑒖𑒲 (𑒣𑓂𑒩𑒡𑒰𑒢𑒧𑓀𑒞𑓂𑒩𑒲 𑒃𑒢𑓂𑒠𑒱𑒩𑒰 𑒑𑒰𑒿𑒡𑒲) 𑒮𑓂𑒫. 𑒖𑓂𑒨𑒼𑒞𑒱 𑒥𑒰𑒥𑒴 (𑒖𑓂𑒨𑒼𑒞𑒱 𑒥𑒮𑒳, 𑒧𑒳𑒐𑓂𑒨𑒧𑓀𑒞𑓂𑒩𑒲 𑒥𑓀𑒑𑒰𑒪) 𑒂 𑒦𑒴𑒣𑒹𑒬 𑒑𑒳𑒣𑓂𑒞 𑒃𑓀𑒑𑓂𑒪𑒻𑒛𑒧𑒹 𑒏𑒰𑒢𑒴𑒢𑒏 𑒬𑒱𑒏𑓂𑒭𑒰 𑒪𑒹𑒢𑒹 𑒩𑒯𑒟𑒱। 𑒠𑒼𑒮𑒩 𑒧𑒳𑒐𑓂𑒨 𑒫𑒏𑓂𑒞𑒰 𑒩𑒯𑒟𑒱 𑒢𑓂𑒨𑒰𑒨𑒧𑒴𑒩𑓂𑒞𑒱 𑒥𑒲. 𑒂𑒩. 𑒁𑒨𑓂𑒨𑒩। 𑒥𑒲. 𑒂𑒩. 𑒁𑒨𑓂𑒨𑒩 𑒮𑒯𑒰𑒋𑒥 𑒮𑒳𑒣𑓂𑒩𑒲𑒧 𑒏𑒼𑒩𑓂𑒙𑒮𑒿 𑒮𑒹𑒫𑒰 𑒢𑒱𑒫𑒵𑒞𑒱 𑒦𑒹𑒪 𑒕𑒟𑒱। 𑒮𑒧𑒮𑓂𑒨𑒰𑒏 𑒱𑒢𑒩𑓂𑒝𑒋 𑒏𑒩𑒥 𑒏𑒞𑒹 𑒏𑒚𑒱𑒢 𑒁𑒕𑒱 𑒞𑒃𑒣𑒩 𑒫𑒱𑒬𑒠 𑒦𑒰𑒭𑒝 𑒠𑒹𑒪𑒢𑒱। 𑒫𑒋𑒯 𑒥𑒲. 𑒂𑒩. 𑒁𑒨𑓂𑒨𑒩 𑒮𑒯𑒰𑒋𑒥 𑒖𑒹 𑓑𑓙𑓖𑓗 𑒄. 𑒧𑒹 𑒥𑒱𑒯𑒰𑒩𑒧𑒹 𑒧𑒯𑒰𑒧𑒰𑒨𑒰 𑒥𑒰𑒥𑒴𑒏 𑒮𑒩𑒏𑒰𑒩𑒏 𑒦𑓂𑒩𑒭𑓂𑒙 𑒣𑒴𑒩𑓂𑒫𑒧𑓀𑒞𑓂𑒩𑒲 𑒮𑒦𑒣𑒩 𑒖𑒹 𑒂𑒨𑒼𑒑 𑒥𑒻𑒮𑒾𑒢𑒹 𑒩𑒯𑒟𑒱। 𑒋𑒏𑒙𑒰 𑒖𑒰𑒢𑒪-𑒧𑒰𑒢𑒪 𑒢𑓂𑒨𑒰𑒨𑒰𑒡𑒲𑒬। 𑒞𑒹𑒮𑒩 𑒧𑒳𑒐𑓂𑒨 𑒫𑒏𑓂𑒞𑒰 𑒕𑒪𑒰𑒯, 𑒧𑒡𑓂𑒨𑒣𑓂𑒩𑒠𑒹𑒬 𑒯𑒰𑒃𑒏𑒼𑒩𑓂𑒙𑒏 𑒋𑒏𑒙𑒰 𑒮𑒲𑒢𑒱𑒨𑒩 𑒁𑒡𑒱𑒫𑒏𑓂𑒞𑒰। 𑒢𑓂𑒨𑒰𑒨𑒰𑒪𑒨𑒧𑒹 𑒥𑒯𑒮 𑒏𑒩𑒻𑒧𑒹 𑒏𑒱 𑒮𑒧𑒮𑓂𑒨𑒰 𑒅𑒣𑒮𑓂𑒟𑒱𑒞 𑒯𑒼𑒃𑒞 𑒁𑒕𑒱 𑒞𑒃𑒣𑒩 𑒫𑒱𑒭𑒠 𑒔𑒩𑓂𑒔 𑒏𑒹𑒢𑒹 𑒩𑒯𑒟𑒱।
𑒮𑓂𑒫𑒦𑒰𑒫𑒼 𑒂 𑒧𑒹𑒯𑒢𑒞𑒼𑒧𑒹 𑒍 𑒮𑒦 𑒠𑒕𑒱𑒢 𑒦𑒰𑒩𑒞𑒏 𑒪𑒼𑒏 𑒦𑒱𑒢𑓂𑒢 𑒕𑒟𑒱। 𑒍 𑒮𑒦 𑒖𑒲 𑒐𑒼𑒪𑒱 𑒏𑓄 𑒏𑒰𑒖 𑒏𑒩𑒻𑒧𑒹 𑒫𑒱𑒬𑓂𑒫𑒰𑒮 𑒩𑒐𑒻 𑒕𑒟𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒁𑒣𑒢 𑒃𑒔𑓂𑒕𑒰 𑒕𑒪𑒢𑒱 𑒖𑒹 𑒏𑒱𑒕𑒳 𑒑𑓂𑒩𑒰𑒧𑒲𑒝 𑒏𑓂𑒭𑒹𑒞𑓂𑒩 𑒠𑒹𑒐𑒟𑒱, 𑒧𑒳𑒠𑒰 𑒮𑒹 𑒢𑒻 𑒦𑒹𑒪। 𑒑𑒰𑒛𑓃𑒲𑒮𑒿 (𑒙𑓂𑒩𑒹𑒢) 𑒖𑒹 𑒠𑒹𑒐𑒥𑒼 𑒏𑒹𑒪𑒢𑒱 𑒍 𑒮𑒹 𑒢𑒻 𑒦𑒹𑒪 𑒖𑒹 𑒠𑒹𑒐𑒋 𑒔𑒰𑒯𑒻 𑒕𑒪𑒰। 𑒔𑒰𑒩𑒱𑒨𑒹 𑒠𑒱𑒢 𑒯𑒻𑒠𑒩𑒰𑒥𑒰𑒠𑒧𑒹 𑒩𑒯𑒥𑒰𑒏 𑒕𑒪𑒢𑒱, 𑒞𑒯𑒴𑒧𑒹 𑒖𑒃 𑒏𑒰𑒩𑓂𑒨𑒏𑓂𑒩𑒧𑒧𑒹 𑒂𑒋𑒪 𑒕𑒪𑒰 𑒍 𑒕𑒼𑒛𑓃𑒱 𑒏𑒹𑒢𑒰 𑒮𑒏𑒻 𑒕𑒪𑒰। 𑒯𑒻𑒠𑒩𑒰𑒥𑒰𑒠 𑒬𑒯𑒩𑒼 𑒢𑒧𑒯𑒩। 𑒞𑒻𑒨𑒼 𑒧𑒳𑒐𑓂𑒨-𑒧𑒳𑒐𑓂𑒨 𑒖𑒹 𑒠𑒩𑓂𑒬𑒢𑒲𑒨 𑒁𑒕𑒱 𑒮𑒹 𑒞𑒿 𑒠𑒹𑒐𑒥𑒹 𑒏𑒹𑒪𑒢𑒱। 𑒆𑒭𑒰 𑒏𑒧𑓂𑒣𑒢𑒲, 𑒮𑓀𑒑𑒧𑒩𑒧𑒩𑒏 𑒣𑒯𑒰𑒛𑓃, 𑒔𑒰𑒩𑒧𑒲𑒢𑒰𑒩, 𑒢𑒱𑒖𑒰𑒧𑒏 𑒩𑒰𑒖𑒬𑒰𑒯𑒲 𑒧𑒏𑒰𑒢, 𑒗𑒲𑒪 𑒃𑒞𑓂𑒨𑒰𑒠𑒱 𑒠𑒹𑒐𑒪𑒢𑒱। 𑒏𑒰𑒤𑒲 𑒫𑓂𑒨𑒮𑓂𑒞 𑒬𑒯𑒩 𑒯𑒻𑒠𑒩𑒰𑒥𑒰𑒠 𑒁𑒕𑒱। 𑒍𑒞𑒋 𑒑𑒰𑒛𑓃𑒲-𑒮𑒫𑒰𑒩𑒲𑒏 𑒣𑒩𑓂𑒨𑒰𑒣𑓂𑒞 𑒥𑒹𑒫𑒮𑓂𑒟𑒰 𑒁𑒕𑒱, 𑒧𑒳𑒠𑒰 𑒞𑒻𑒨𑒼 𑒏𑒰𑒤𑒲 𑒦𑒲𑒛𑓃-𑒦𑒰𑒩𑒥𑒪𑒰 𑒬𑒯𑒩 𑒯𑒻𑒠𑒩𑒰𑒥𑒰𑒠 𑒁𑒕𑒱। 𑒐𑒰𑒃-𑒣𑒲𑒥𑒻𑒏 𑒱𑒫𑒢𑓂𑒨𑒰𑒮 𑒁𑒣𑒢𑒰 𑒮𑒦𑒮𑒿 𑒏𑒱𑒕𑒳 𑒦𑒱𑒢𑓂𑒢 𑒁𑒕𑒱। 𑒧𑒳𑒠𑒰 𑒠𑒹𑒬 𑒮𑓂𑒞𑒩𑒏 𑒏𑒰𑒩𑓂𑒨𑒏𑓂𑒩𑒧 𑒞𑒿𑒋 𑒠𑒹𑒬 𑒦𑒩𑒱𑒏 𑒐𑒰𑒢-𑒣𑒰𑒢𑒏 𑒥𑒹𑒫𑒮𑓂𑒟𑒰 𑒩𑒯𑒥𑒹 𑒏𑒩𑒻। 𑒍𑒢𑒰 𑒏𑒙𑒯𑒩𑒏 𑒖𑒹 𑒫𑒱𑒢𑓂𑒨𑒰𑒮 𑒕𑒪𑒻 𑒍 𑒁𑒣𑒢𑒰 𑒌𑒚𑒰𑒧 𑒮𑒿 𑒦𑒱𑒢𑓂𑒢𑒹 𑒢𑒻 𑒢𑒲𑒏𑒼 𑒁𑒕𑒱। 𑒫𑒱𑒠𑒰 𑒯𑒼𑒃 𑒏𑒰𑒪, 𑒫𑒰𑒣𑒮𑒲𑒧𑒹 𑒏𑒱𑒕𑒳 𑒡𑒛𑓃𑒤𑒛𑓃𑒲 𑒦𑓄 𑒑𑒹𑒪𑒢𑒱। 𑒍𑒢𑒰 𑒙𑒱𑒏𑒙 𑒂𑒩𑒏𑓂𑒭𑒱𑒞 𑒩𑒯𑒢𑒱 𑒧𑒳𑒠𑒰 𑒣𑓂𑒪𑒹𑒙𑒤𑒰𑒩𑓂𑒧𑒣𑒩 𑒣𑒯𑒳𑒿𑒔𑒻𑒞-𑒣𑒯𑒳𑒿𑒔𑒻𑒞 𑒑𑒰𑒛𑓃𑒲 𑒐𑒳𑒖𑒱 𑒑𑒹𑒪𑒢𑒱। 𑒮𑒦 𑒏𑒱𑒨𑒼 (𑒧𑒡𑒳𑒥𑒢𑒲𑒏) 𑒮𑒦 𑒠𑒱𑒮 𑒦𑓄 𑒑𑒹𑒪𑒰। 𑒁𑒑𑒱𑒪𑒰 𑒮𑓂𑒙𑒹𑒬𑒢𑒣𑒩 𑒋𑒏𑒚𑒰𑒧 𑒯𑒹𑒞𑒰, 𑒪𑒹𑒛𑒲 𑒏𑒧𑓂𑒣𑒰𑒩𑓂𑒙𑒧𑒹𑓀𑒙 (𑒧𑒯𑒱𑒪𑒰 𑒥𑒼𑒑𑒲) 𑒧𑒹 𑒔𑒜𑓃𑒱 𑒑𑒹𑒪𑒰। 𑒁𑒐𑒢 𑒡𑒩𑒱 𑒧𑒯𑒱𑒪𑒰 𑒥𑒼𑒑𑒲 𑒢𑒻 𑒠𑒹𑒐𑒢𑒹 𑒕𑒪𑒰। 𑒔𑒜𑓃𑒱 𑒏𑓄 𑒥𑒃𑒮𑒾𑒏 𑒖𑒹 𑒫𑒱𑒔𑒰𑒩 𑒞𑒿 𑒮𑒾𑓀𑒮𑒹 𑒥𑒼𑒑𑒲 𑒧𑒯𑒱𑒪𑒹 𑒥𑒻𑒮𑒪 𑒠𑒹𑒐𑒪𑒢𑒱। 𑒙𑒲.𑒙𑒲 𑒮𑒹𑒯𑒼 𑒧𑒯𑒱𑒪𑒰। 𑒧𑒳𑒠𑒰 𑒁𑒣𑒢𑒰 𑒌𑒚𑒰𑒧 𑒖𑒏𑒰𑒿 𑒨𑒰𑒞𑓂𑒩𑒲 𑒗𑒾𑓀-𑒗𑒾𑓀 𑒏𑓄 𑒢𑒻 𑒕𑒳𑒙𑒪𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒍𑒏𑒩𑒰 𑒮𑒦 𑒠𑒱𑒮 𑒠𑒹𑒐𑒻𑒞 𑒖𑒹 𑒏𑒱𑒕𑒳 𑒣𑒴𑒕𑒞𑒢𑒱 𑒞𑒐𑒢 𑒢𑒹 𑒏𑒯𑒟𑒱𑒢। 𑒍𑒯𑒼 𑒮𑒦 𑒔𑒳𑒣𑒔𑒰𑒣 𑒠𑒹𑒐𑒥𑒼 𑒏𑒩𑒻𑒞 𑒂 𑒧𑒳𑒮𑓂𑒏𑒱𑒨𑒼 𑒠𑒻𑒞। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒏𑒼𑒢𑒼 𑒔𑒱𑒢𑓂𑒞𑒹 𑒢𑒹 𑒩𑒯𑒢𑒱। 𑒋𑒏𑓂𑒏𑒹 𑒠𑒹𑒬𑒏 𑒩𑒹𑒪𑒑𑒰𑒛𑓃𑒲𑒧𑒹 𑒠𑒴 𑒩𑒲𑒞𑒱 𑒁𑒕𑒱, 𑒞𑒐𑒢 𑒏𑒱 𑒯𑒹𑒞𑒻? 𑒏𑒱𑒕𑒳 𑒏𑒰𑒪 𑒣𑒕𑒰𑒞𑒱 𑒙𑒲.𑒙𑒲. 𑒪𑒑𑒧𑒹 𑒋𑒪𑒐𑒱𑒢। 𑒍 𑒥𑒴𑒗𑒱 𑒑𑒹𑒪 𑒩𑒯𑒟𑒱𑒢 𑒖𑒹 𑒄 𑒅𑒞𑓂𑒞𑒩 𑒦𑒰𑒩𑒞𑒏 𑒧𑒹𑒪 𑒑𑒰𑒛𑓃𑒲 𑒕𑒲। 𑒏𑒯𑒪𑒏𑒢𑒱 𑒖𑒹 𑒄 𑒪𑒹𑒛𑒲 𑒏𑒧𑓂𑒣𑒰𑒩𑓂𑒙𑒧𑒹𑓀𑒙 𑒕𑒱𑒌। 𑒍𑒢𑒰 𑒍 𑒯𑒱𑒢𑓂𑒠𑒱𑒨𑒹𑒧𑒹 𑒏𑒯𑒪𑒏𑒢𑒱 𑒧𑒳𑒠𑒰 𑒖𑒯𑒱𑒢𑒰 𑒁𑒣𑒢𑒰 𑒌𑒚𑒰𑒧𑒏 𑒧𑒱𑒛𑓂𑒪 𑒮𑓂𑒏𑒴𑒪𑒏 𑒥𑒔𑓂𑒔𑒰 𑒯𑒱𑒢𑓂𑒠𑒲 𑒥𑒖𑒻𑒞 𑒁𑒕𑒱 𑒞𑒯𑒱𑒢𑒰। 𑒣𑒩𑒱𑒔𑒨𑒏 𑒖𑒩𑒴𑒩𑒲 𑒥𑒴𑒗𑒱 𑒣𑒛𑓃𑒪𑒢𑒱। 𑒁𑒣𑒢𑒰 𑒨𑒰𑒞𑓂𑒩𑒰𑒏 𑒔𑒩𑓂𑒔 𑒏𑒩𑒻𑒞 𑒏𑒯𑒪𑒐𑒱𑒢 𑒖𑒹 𑒡𑒛𑓃𑒤𑒛𑓃𑒰 𑒏𑓄 𑒔𑒜𑓃𑒱 𑒑𑒹𑒪𑒰 𑒞𑒿𑒋 𑒌 𑒏𑒼𑒚𑒩𑒲𑒧𑒹 𑒔𑒪𑒱 𑒋𑒪𑒰। 𑒢𑒹 𑒞𑒿 𑒏𑒱𑒁𑒋 𑒁𑒥𑒱𑒞𑒟𑒱। 𑒏𑒯𑒪𑒐𑒱𑒢 𑒖𑒹 𑒂𑒑𑒴 𑒥𑒠𑒪𑒱 𑒪𑒹𑒥, 𑒮𑓀𑒑𑒱𑒨𑒼 𑒮𑒦 𑒕𑒟𑒱𑒢, 𑒍𑒯𑒼 𑒮𑒦 𑒦𑒹𑒙 𑒖𑒹𑒞𑒢𑒱।

𑒩𑒰𑒧𑒣𑒙𑓂𑒙𑒲𑒏 𑒖𑒯𑒪 𑒥𑒢𑒱 𑒑𑒹𑒪 𑒕𑒪। 𑒧𑒳𑒠𑒰 𑒅𑒠𑓂𑒒𑒰𑒙𑒢 𑒢𑒻 𑒦𑒹𑒢𑒹 𑒍𑒯𑒱𑒢𑒰 𑒣𑒛𑓃𑒪 𑒕𑒪। 𑒢𑒩𑒏𑒼𑒧𑒹 𑒏𑒱 𑒏𑒧 𑒚𑒹𑒪𑒧-𑒚𑒹𑒪 𑒯𑒼𑒃 𑒕𑒻। 𑒧𑒡𑒳𑒥𑒢𑒲 𑒔𑒏𑓂𑒏𑒲 𑒫𑒰𑒩𑓂𑒛𑒧𑒹 𑒖𑒹 𑒠𑒮𑒼-𑒥𑒲𑒮 𑒠𑒱𑒢 𑒩𑒯𑒪 𑒯𑒹𑒞𑒰𑒯, 𑒯𑒳𑒢𑒏𑒰 𑒧𑒼𑒢𑒹 𑒯𑒹𑒞𑒢𑒱। 𑒞𑒃𑒚𑒰𑒧 𑒮𑒰𑒪 𑒏𑒹 𑒏𑒯𑒋 𑒖𑒹 𑒏𑒞𑒹𑒏𑒼 𑒮𑒰𑒪𑒮𑒿 𑒏𑒞𑒹𑒏𑒼 𑒑𑒼𑒙𑒹 𑒕𑒪𑒰𑒯। 𑒂𑒖𑒰𑒠𑒲𑒮𑒿 𑒣𑒯𑒱𑒢𑒾𑓀 𑒂 𑒣𑒕𑒼𑒿 𑒧𑒡𑒳𑒥𑒢𑒲 𑒖𑒹𑒪𑒏 𑒔𑒪𑒞𑒲 𑒩𑒯𑒥𑒹 𑒏𑒋𑒪। 𑒞𑒃𑒧𑒹 𑒧𑒳𑒠𑒰 𑒋𑒏𑒙𑒰 𑒖𑒩𑒴𑒩 𑒦𑒹𑒪 𑒩𑒯𑒻 𑒖𑒹 𑒖𑒹𑒪𑒏 𑒦𑒲𑒞𑒩𑒼 𑒫𑒱𑒦𑒰𑒖𑒱𑒞 𑒩𑒯𑒋, 𑒫𑒰𑒩𑓂𑒛 𑒢. 𑓐𑓒 𑒩𑒰𑒖𑒢𑒲𑒞𑒱 𑒣𑒰𑒩𑓂𑒙𑒲𑒥𑒪𑒰 𑒮𑒦𑒏𑒹𑒿 𑒩𑒯𑒻, 𑒥𑒰𑒿𑒏𑒲 𑒮𑒯𑒩𑒑𑓀𑒖𑒰।
𑒮𑒯𑒩𑒑𑓀𑒖𑒰 𑒌 𑒪𑒹𑒪 𑒖𑒹 𑒢𑒹 𑒁𑒣𑒩𑒰𑒡 𑒋𑒏 𑒩𑓀𑒑𑒏 𑒕𑒻 𑒂 𑒢𑒹 𑒁𑒣𑒩𑒰𑒡𑒲। 𑒧𑒳𑒠𑒰 𑒖𑒹𑒪 𑒞𑒿 𑒖𑒹𑒪 𑒕𑒲 𑒧𑒚𑒰𑒡𑒲𑒬𑒮𑒿 𑒪𑓄 𑒏𑓄 𑒤𑒳𑒪𑒞𑒼𑒛𑓃𑒰 𑒡𑒩𑒱 𑒋𑒏𑒹𑒚𑒰𑒧 𑒩𑒯𑒞𑒰। 𑒧𑒳𑒠𑒰 𑒖𑒯𑒪𑒼𑒏 𑒏𑒰𑒩𑒼𑒥𑒰𑒩𑒧𑒹 𑒔𑒼𑒩𑒲-𑒔𑒣𑒰𑒙𑒲 𑒩𑒯𑒥𑒹 𑒏𑒩𑒻, 𑒏𑒱𑒨𑒼 𑒖𑒪𑒐𑒻𑒏 𑒥𑒠𑒰𑒧 𑒔𑒼𑒩𑒰 𑒪𑒻 𑒞𑒿 𑒏𑒱𑒨𑒼 𑒑𑒳𑒛𑓃। 𑒏𑒱𑒨𑒼 𑒏𑒩𑒴 𑒞𑒹𑒪 𑒯𑒹𑒩 𑒤𑒹𑒩 𑒏𑓄 𑒠𑒻, 𑒏𑒱𑒨𑒼 𑒏𑒱𑒕𑒳। 𑒂𑒖𑒰𑒠𑒲𑒏 𑒮𑒧𑒋 𑒧𑒡𑒳𑒥𑒢𑒲 𑒖𑒱𑒪𑒰 (𑒞𑒃 𑒠𑒱𑒢𑒏 𑒮𑒫𑒛𑒱𑒫𑒲𑒖𑒢) 𑒖𑒐𑒢 𑒂𑒖𑒰𑒠𑒲𑒏 𑒮𑒲𑒧𑒰𑒣𑒩 𑒂𑒥𑒱 𑒑𑒹𑒪 𑒞𑒐𑒢 𑒏𑒢𑒹 𑒦𑒰𑒭𑒰-𑒣𑓂𑒩𑒹𑒧𑒲-𑒁𑓀𑒑𑓂𑒩𑒹𑒖𑒏 𑒠𑒹𑒐𑒱𑒨𑒹 𑒪𑒲।
𑒋𑒏𑒙𑒰 𑒋𑒮.𑒛𑒲.𑒍. 𑒦𑒹𑒪𑒰 𑒑𑓂𑒩𑒱𑒨𑒩𑓂𑒮𑒢। 𑒖𑒹 𑒑𑒰𑒧-𑒑𑒰𑒧 𑒒𑒴𑒧𑒱 𑒦𑒰𑒭𑒰𑒏 𑒧𑒩𑓂𑒧𑒏𑒹𑒿 𑒥𑒳𑒗𑒻𑒏 𑒏𑒼𑒬𑒱𑒬 𑒏𑒹𑒪𑒢𑒱। 𑒏𑒼𑒬𑒱𑒬𑒹 𑒢𑒻 𑒏𑒹𑒪𑒢𑒱 𑒦𑒼𑒪𑒴𑒧𑒏-𑒦𑒼𑒪𑒴𑒧 𑒣𑒼𑒟𑒱𑒨𑒼 𑒪𑒱𑒐𑒢𑒹 𑒕𑒟𑒱। 𑒣𑒻𑒒-𑒣𑒻𑒒 𑒣𑒳𑒮𑓂𑒞𑒏𑒰𑒪𑒨𑒏 𑒮𑒱𑓀𑒑𑒰𑒩𑒏 𑒫𑒮𑓂𑒞𑒳 𑒥𑒢𑒱 𑒖𑒹𑒫𑒩-𑒖𑒹𑒫𑒩𑒰𑒞 𑒖𑒏𑒰𑒿 𑒂𑒪𑒧𑒰𑒩𑒲 𑒡𑒹𑒢𑒹 𑒁𑒕𑒱। 𑒦𑒰𑒭𑒰-𑒮𑒰𑒯𑒱𑒞𑓂𑒨𑒏 𑒪𑒹𑒪 𑒮𑒩𑒏𑒰𑒩𑒱𑒨𑒼-𑒑𑒻𑒩-𑒮𑒩𑒏𑒰𑒩𑒱𑒨𑒼 𑒮𑓀𑒮𑓂𑒟𑒰 𑒮𑒦 𑒐𑒴𑒥 𑒏𑒰𑒖 𑒏𑒹𑒪𑒏, 𑒧𑒳𑒠𑒰 𑒑𑓂𑒩𑒱𑒨𑒩𑓂𑒮𑒢𑒏 𑒏𑒋𑒪 𑒧𑒻𑒟𑒱𑒪𑒲 𑒮𑒹𑒫𑒰 𑒂𑒪𑒧𑒰𑒩𑒲𑒏 𑒠𑒩𑒰𑒖𑒧𑒹 𑒤𑒿𑒮𑒱 𑒑𑒹𑒪 𑒁𑒕𑒱! 𑒖𑒯𑒱𑒢𑒰 𑒮𑒰𑒯𑒱𑒞𑓂𑒨 𑒮𑒵𑒖𑒢 𑒁𑒢𑒳𑒦𑒰𑒫𑒰𑒞𑓂𑒧𑒏 𑒂 𑒥𑒾𑒡𑒰𑒞𑓂𑒧𑒏 𑒯𑒼𑒃𑒞 𑒁𑒕𑒱 𑒞𑒯𑒱𑒢𑒰 𑒦𑒰𑒭𑒰𑒏 𑒮𑒹𑒯𑒼 𑒁𑒕𑒱। 𑒧𑒻𑒟𑒱𑒪𑒲 𑒬𑒥𑓂𑒠𑒏𑒹𑒿 𑒱𑒮𑒩𑓂𑒤 𑒮𑓀𑒮𑓂𑒏𑒵𑒞𑒮𑒿 𑒂𑒋𑒪 𑒬𑒥𑓂𑒠 𑒥𑒳𑒗𑒻 𑒕𑒲 𑒞𑒿 𑒧𑒻𑒟𑒱𑒪𑒲 𑒮𑓀𑒑 𑒁𑒢𑓂𑒨𑒰𑒨 𑒯𑒼𑒃 𑒕𑒻। 𑒢𑓂𑒨𑒰𑒨 𑒞𑒐𑒢 𑒯𑒹𑒞𑒻 𑒖𑒐𑒢 𑒧𑒻𑒟𑒱𑒪𑒲 𑒬𑒥𑓂𑒠𑒏𑒹𑒿 𑒫𑒻𑒠𑒱𑒏 𑒖𑒲𑒫𑒢-𑒣𑒠𑓂𑒡𑒞𑒱𑒏 𑒬𑒥𑓂𑒠 𑒩𑒴𑒣𑒧𑒹 𑒠𑒹𑒐𑒪 𑒖𑒹𑒞𑒃। 𑒋𑒏-𑒋𑒏 𑒬𑒥𑓂𑒠 𑒋𑒏-𑒋𑒏 𑒖𑒲𑒫𑒢𑒏 𑒏𑒰𑒖𑒏 𑒢𑒏𑓂𑒬𑒰 𑒞𑒻𑒨𑒰𑒩 𑒏𑒩𑒻𑒏 𑒬𑒏𑓂𑒞𑒱 𑒩𑒐𑒻𑒋। 𑒮𑓀𑒮𑓂𑒏𑒵𑒞𑒏 𑒣𑓂𑒩𑒦𑒰𑒫 𑒌 𑒪𑒹𑒪 𑒧𑒰𑒢𑒪 𑒖𑒰𑒋𑒞 𑒖𑒹 𑒫𑒻𑒠𑒱𑒏 𑒦𑒰𑒭𑒰 𑒮𑓀𑒮𑓂𑒏𑒵𑒞 𑒩𑒯𑒪। 𑒍𑒢𑒰 𑒦𑒰𑒭𑒰𑒏 𑒠𑒾𑒛𑓃𑒧𑒹 𑒂𑒑𑒴 𑒢𑒻 𑒥𑒜𑓃𑒥 𑒧𑒳𑒠𑒰 𑒋𑒏𑒙𑒰 𑒥𑒰𑒞 𑒂𑒫𑒬𑓂𑒨𑒏 𑒥𑒴𑒗𑒱 𑒣𑒛𑓃𑒻𑒋 𑒞𑒿𑒋 𑒫𑒻𑒠𑒱𑒏 𑒮𑓀𑒮𑓂𑒏𑒵𑒞𑒏 𑒬𑒻𑒪𑒲 𑒁𑒢𑒳𑒦𑒫𑒰𑒞𑓂𑒧𑒏 𑒁𑒕𑒱 𑒖𑒐𑒢 𑒏𑒱 𑒪𑒾𑒏𑒱𑒏 𑒮𑓀𑒮𑓂𑒏𑒵𑒞𑒏 𑒦𑒰𑒫𑒰𑒞𑓂𑒧𑒏 𑒥𑒹𑒮𑒲। 𑒦𑒰𑒫𑒰𑒞𑓂𑒧𑒏 𑒠𑒱𑒬𑒰 𑒏𑒪𑓂𑒣𑒢𑒰𑒬𑒲𑒪 𑒥𑒢𑒻𑒞 𑒑𑒹𑒪। 𑒖𑒹𑒢𑒰-𑒖𑒹𑒢𑒰 𑒦𑒰𑒫𑒰𑒞𑓂𑒧𑒏 𑒠𑒱𑒬𑒰 𑒧𑒖𑒥𑒴𑒞 𑒯𑒼𑒃𑒞 𑒑𑒹𑒪 𑒞𑒹𑒢𑒰-𑒞𑒹𑒢𑒰 𑒮𑒰𑒯𑒱𑒞𑓂𑒨 𑒖𑒱𑒢𑒑𑒲𑒮𑒿 (𑒖𑒲𑒫𑒢 𑒣𑒠𑓂𑒡𑒞𑒱) 𑒠𑒴𑒩 𑒯𑒙𑒻𑒞 𑒑𑒹𑒪।
𑒩𑒰𑒧𑒣𑒙𑓂𑒙𑒲 𑒖𑒹𑒪𑒏 𑒅𑒠𑓂𑒒𑒰𑒙𑒢 𑒢𑒻 𑒯𑒼𑒃𑒏 𑒏𑒰𑒩𑒝 𑒩𑒯𑒻 𑒖𑒹 𑒣𑓂𑒩𑒬𑒰𑒮𑒢𑒮𑒿 𑒚𑒲𑒏𑒹𑒠𑒰𑒩 𑒡𑒩𑒱 𑒏𑒱𑒨𑒼 𑒤𑒰𑒃𑒢𑒪 𑒏𑒩𑒻𑒪𑒹 𑒞𑒻𑒨𑒰𑒩𑒹 𑒢𑒻। 𑒏𑒱𑒕𑒳 𑒏𑒰𑒖 𑒣𑒕𑒳𑒂𑒋𑒪 𑒞𑒿 𑒏𑒱𑒕𑒳 𑒥𑒱𑒪-𑒦𑒳𑒑𑒞𑒰𑒢 𑒣𑒕𑒳𑒂𑒋𑒪। 𑒧𑒳𑒠𑒰 𑒢𑒖𑒩𑒱 𑒮𑒥𑒯𑒏 𑒨𑒼𑒖𑒢𑒰 𑒐𑒰𑒃𑒏 𑒣𑒰𑒕𑒴।
𑒩𑒰𑒖𑓂𑒨 𑒫𑒰𑒧𑒣𑓀𑒟𑒲 (𑒦𑒰𑒏𑒣𑒰-𑒧𑒰𑒏𑒣𑒰) 𑒣𑒰𑒩𑓂𑒙𑒲 𑒁𑒣𑒢 𑒖𑓂𑒫𑒪𑓀𑒞 𑒮𑒧𑒮𑓂𑒨𑒰 𑒮𑒦 𑒪𑓄 𑒏𑓄 𑒖𑒹𑒪𑒦𑒩𑒼 𑒂𑒢𑓂𑒠𑒼𑒪𑒢 𑒏𑒹𑒪𑒏। 𑒍𑒢𑒰 𑒮𑒾𑓀𑒮𑒹 𑒩𑒰𑒖𑓂𑒨𑒏 𑒖𑓂𑒫𑒪𑓀𑒞 𑒮𑒧𑒮𑓂𑒨𑒰 𑒮𑒦 𑒧𑒳𑒠𑓂𑒠𑒰 𑒩𑒯𑒋 𑒧𑒳𑒠𑒰 𑒧𑒱𑒟𑒱𑒪𑒰𑓀𑒔𑒪𑒏 𑒪𑒹𑒪 𑒠𑒴𑒙𑒰 𑒣𑓂𑒩𑒧𑒳𑒐 𑒧𑒳𑒠𑓂𑒠𑒰 𑒕𑒪। 𑒣𑒯𑒱𑒪 𑒏𑒼𑒮𑒲 𑒢𑒯𑒩𑒱𑒏 𑒮𑓀𑒑 𑒢𑒴𑒢𑒟𑒩, 𑒬𑒲𑒬𑒰𑒣𑒰𑒢𑒲 𑒂 𑒥𑒩𑒰𑒯𑒏𑓂𑒭𑒹𑒞𑓂𑒩𑒧𑒹 𑒛𑒻𑒧 𑒥𑒢𑒰 𑒣𑒢𑒱𑒥𑒱𑒖𑒪𑒲 𑒅𑒞𑓂𑒣𑒰𑒠𑒢 𑒏𑒋𑒪 𑒖𑒰𑒋 𑒖𑒃𑒮𑒿 𑒏𑒵𑒭𑒱𑒏 𑒮𑓀𑒑 𑒅𑒠𑓂𑒨𑒼𑒑𑒼 𑒡𑓀𑒡𑒰 𑒥𑒜𑓃𑒞𑒻। 𑒏𑒱𑒕𑒳 𑒑𑒼𑒙𑒹𑒏 𑒋𑒯𑒹𑒢 𑒡𑒰𑒩𑒝𑒰 𑒁𑒐𑒢𑒼 𑒕𑒢𑓂𑒯𑒱 𑒖𑒹 𑒏𑒰𑒩𑒐𑒰𑒢𑒰𑒏 𑒖𑒩𑒴𑒩𑒞𑒱 𑒐𑒰𑒢𑒹 𑒏𑓂𑒭𑒹𑒞𑓂𑒩𑒙𑒰 𑒧𑒹 𑒯𑒼𑒃 𑒕𑒻। 𑒧𑒳𑒠𑒰 𑒮𑒹 𑒢𑒻, 𑒄𑒯𑒼 𑒯𑒼𑒃 𑒕𑒻 𑒖𑒹 𑒖𑒞𑒹-𑒩𑓀𑒑𑒏 𑒏𑒰𑒩𑒐𑒰𑒢𑒰 𑒁𑒕𑒱 𑒞𑒃𑒧𑒹 𑓕𑓕 𑒣𑓂𑒩𑒞𑒱𑒬𑒞 𑒖𑒿 𑒐𑒰𑒢 𑒏𑓂𑒭𑒹𑒞𑓂𑒩𑒏 𑒧𑒰𑒪𑒮𑒿 𑒔𑒪𑒻𑒞 𑒞𑒿 𑓔𑓕 𑒣𑓂𑒩𑒞𑒱𑒬𑒞 𑒏𑒵𑒭𑒱 𑒅𑒞𑓂𑒣𑒰𑒠𑒱𑒞 𑒫𑒮𑓂𑒞𑒳𑒮𑒿 𑒮𑒹𑒯𑒼 𑒔𑒪𑒻𑒞। 𑒠𑒼𑒮𑒩 𑒧𑒳𑒠𑓂𑒠𑒰 𑒕𑒪 𑒧𑒻𑒟𑒱𑒪𑒲 𑒦𑒰𑒭𑒰𑒏𑒹𑒿 𑒮𑒩𑒏𑒰𑒩𑒲 𑒧𑒰𑒢𑓂𑒨𑒞𑒰 𑒦𑒹𑒙𑒾 𑒁𑒩𑓂𑒟𑒰𑒞𑓂 𑒁𑒭𑓂𑒙𑒧 𑒁𑒢𑒳𑒮𑒴𑒔𑒲𑒧𑒹 𑒬𑒰𑒧𑒱𑒪 𑒯𑒰𑒹𑒅। 𑒖𑒃𑒮𑒿 𑒧𑒱𑒟𑒱𑒪𑒰𑒏 𑒫𑒱𑒏𑒰𑒮𑒧𑒹 𑒋𑒏 𑒏𑒛𑓃𑒲 𑒖𑒳𑒛𑓃𑒞।
𑒧𑒡𑒳𑒥𑒢𑒲 𑒖𑒱𑒪𑒰 𑒥𑒜𑓃𑒱-𑒔𑒜𑓃𑒱 𑒏𑓄 𑒍𑒃 𑒂𑒢𑓂𑒠𑒼𑒪𑒢𑒧𑒹 𑒯𑒱𑒮𑓂𑒮𑒹𑒠𑒰𑒩𑒲 𑒠𑒩𑓂𑒖 𑒏𑒩𑒾𑒪𑒏। 𑒠𑒩𑓂𑒖𑒢𑒼 𑒫𑒏𑒲𑒪 𑒮𑒹𑒯𑒼 𑒩𑒯𑒟𑒱। 𑒯𑒖𑒰𑒩𑒮𑒿 𑒆𑒣𑒩 𑒏𑒰𑒩𑓂𑒨𑒏𑒩𑓂𑒞𑓂𑒞𑒰 𑒖𑒹𑒪𑒧𑒹 𑒩𑒯𑒟𑒱। 𑒖𑒃 𑒠𑒱𑒢 𑒧𑒡𑒹𑒣𑒳𑒩-𑒪𑒐𑒢𑒾𑒩 𑒥𑓂𑒪𑒾𑒏𑒏 𑒮𑒧𑒋 (𑒣𑓂𑒩𑒠𑒩𑓂𑒬𑒢𑒏 𑒮𑓀𑒑 𑒖𑒹𑒪) 𑒩𑒯𑒻 𑒞𑒃 𑒠𑒱𑒢 𑒫𑒱𑒮𑓂𑒤𑒲𑒏 𑒮𑒹𑒯𑒼 𑒩𑒯𑒋। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒖𑒱𑒪𑒰-𑒏𑒰𑒩𑓂𑒨𑒰𑒪𑒨 (𑒛𑒲.𑒋𑒧. 𑒂𑒤𑒱𑒮)𑒏 𑒑𑒹𑒙𑒏 𑒥𑒰𑒯𑒩 𑒩𑒯𑒟𑒱। 𑒣𑒴𑒩𑓂𑒫𑒹𑒖𑒲 (𑒮𑓂𑒫. 𑒩𑒰𑒖𑒏𑒳𑒧𑒰𑒩 𑒣𑒴𑒩𑓂𑒫𑒹) 𑒏𑒰𑒩𑓂𑒨𑒰𑒪𑒨𑒏 𑒣𑒻𑒕𑒪𑒰 𑒑𑒹𑒙 𑒠𑒹𑒢𑒹 𑒂𑒥𑒱, 𑒣𑒰𑒕𑒴𑒧𑒹 𑒚𑒰𑒜𑓃 𑒦𑒹𑒪 𑒋𑒮.𑒣𑒲.𑒏𑒹𑒿 𑒏𑒰𑒪𑒩 𑒣𑒏𑒛𑓃𑒱 𑒪𑒹𑒪𑒐𑒱𑒢। 𑒦𑒲𑒞𑒩-𑒥𑒰𑒯𑒩 𑒯𑒴𑒛𑓃-𑒥𑒛𑓃𑒹𑒩𑒰 𑒦𑓄 𑒑𑒹𑒪। 𑒪𑒰𑒚𑒲 𑒔𑒰𑒩𑓂𑒔 𑒦𑓄 𑒑𑒹𑒪𑒻। 𑒧𑒳𑒠𑒰 𑒥𑒯𑒳𑒞 𑒢𑒻 𑒦𑒹𑒪𑒃।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒩𑒰𑒧𑒣𑒙𑓂𑒙𑒲 𑒖𑒹𑒪 𑒣𑒯𑒳𑒿𑒔𑒪𑒰। 𑒥𑒹𑒩𑒧𑒰𑒏 𑒁𑒙𑓂𑒚𑒰𑒩𑒯 𑒑𑒼𑒙𑒹 𑒩𑒯𑒟𑒱। 𑒢𑒰𑒑𑒹𑒢𑓂𑒠𑓂𑒩𑒖𑒲 (𑒛𑒰. 𑒢𑒰𑒑𑒹𑒢𑓂𑒠𑓂𑒩 𑒏𑒳𑒧𑒰𑒩 𑒗𑒰, 𑒣𑒻𑒙𑒒𑒰𑒙) 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒪𑒹𑒛𑒲 𑒫𑒰𑒩𑓂𑒛𑒏 𑒍𑒮𑒰𑒩𑒰 𑒣𑒏𑒛𑓃𑒢𑒹 𑒩𑒯𑒟𑒱। 𑒖𑒱𑒪𑒰𑒏 𑒮𑒦 𑒫𑒱𑒡𑒰𑒨𑒏𑒼 𑒂 𑒫𑒱𑒡𑒰𑒢 𑒣𑒰𑒩𑓂𑒭𑒠𑒼 𑒩𑒯𑒟𑒱। 𑒫𑒱𑒡𑒰𑒨𑒏 𑒩𑒯𑒟𑒱 𑒣𑒴𑒩𑓂𑒫𑒹𑒖𑒲 (𑒮𑓂𑒫. 𑒩𑒰𑒖 𑒏𑒳𑒧𑒰𑒩 𑒣𑒳𑒩𑓂𑒫𑒹) 𑒞𑒹𑒖𑒢𑒰𑒩𑒰𑒨𑒝 𑒖𑒲 (𑒬𑓂𑒩𑒲 𑒞𑒹𑒖 𑒢𑒰𑒩𑒰𑒨𑒝 𑒗𑒰) 𑒪𑒰𑒪 𑒥𑒱𑒯𑒰𑒩𑒲𑒖𑒲 (𑒬𑓂𑒩𑒲 𑒪𑒰𑒪 𑒥𑒱𑒯𑒰𑒩𑒲 𑒨𑒰𑒠𑒫) 𑒩𑒧𑒝𑒖𑒲 (𑒩𑒰𑒧 𑒪𑒐𑒢 ‘𑒩𑒧𑒝’ 𑒦𑒰𑒏𑒣𑒰.𑒏 𑒫𑒱𑒡𑒰𑒨𑒏) 𑒣𑒴𑒩𑓂𑒫 𑒫𑒱𑒡𑒰𑒨𑒏 𑒥𑒻𑒖𑒢𑒰𑒟𑒖𑒲 (𑒬𑓂𑒩𑒲 𑒫𑒻𑒠𑓂𑒨𑒢𑒰𑒟 𑒨𑒰𑒠𑒫) 𑒔𑒾𑒡𑒩𑒲𑒖𑒲 (𑒬𑓂𑒩𑒲 𑒏𑒵𑒭𑓂𑒝 𑒔𑒢𑓂𑒠𑓂𑒩 𑒔𑒾𑒡𑒩𑒲)।
𑒖𑒹𑒪𑒏 𑒦𑒲𑒞𑒩 𑒠𑒴 𑒥𑒹𑒩 𑒦𑒰𑒭𑒝-𑒦𑒴𑒭𑒝 𑒔𑒪𑒻। 𑒧𑒳𑒐𑓂𑒨 𑒫𑒏𑓂𑒞𑒰 𑒩𑒯𑒟𑒱 𑒔𑒾𑒡𑒩𑒲𑒖𑒲। 𑒧𑒰𑒿𑒖𑒪 𑒫𑒱𑒠𑓂𑒫𑒰𑒢। 𑒦𑒰𑒭𑒰𑒣𑒩 𑒋𑒞𑒹 𑒣𑒏𑒛𑓃 𑒩𑒯𑒢𑒱 𑒖𑒹 𑒋𑒏𑒰𑒹 𑒬𑒥𑓂𑒠 𑒏𑒧-𑒥𑒹𑒮𑒲 𑒢𑒻 𑒯𑒼𑒢𑓂𑒯𑒱। 𑒏𑒼𑒢𑒼 𑒫𑒱𑒭𑒨𑒏𑒹𑒿 𑒨𑒟𑒰𑒮𑓂𑒟𑒱𑒞 𑒫𑓂𑒨𑒰𑒐𑓂𑒨𑒰 𑒏𑒩𑒻𑒏 𑒁𑒠𑓂𑒦𑒳𑒞 𑒏𑓂𑒭𑒧𑒞𑒰 𑒩𑒯𑒢𑒱। 𑒍𑒃 𑒮𑒧𑒋 𑒣𑒰𑒩𑓂𑒙𑒲𑒏 𑒖𑒢𑒬𑒏𑓂𑒞𑒱 𑒠𑒻𑒢𑒱𑒏 𑒣𑒞𑓂𑒩𑒱𑒏𑒰 𑒢𑒱𑒏𑒪𑒻𑒞 𑒕𑒪। 𑒮𑒧𑓂𑒣𑒰𑒠𑒏 𑒩𑒯𑒟𑒱 𑒔𑒾𑒡𑒩𑒲𑒖𑒲। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒢𑒬𑒏𑓂𑒞𑒱 𑒣𑒞𑓂𑒩𑒱𑒏𑒰𑒏 𑒮𑓀𑒫𑒰𑒠𑒠𑒰𑒞𑒰 𑒩𑒯𑒟𑒱।
𑒮𑓂𑒫. 𑒏𑒵𑒭𑓂𑒝𑒔𑒢𑓂𑒠𑓂𑒩 𑒔𑒾𑒡𑒩𑒲 𑒢𑒲𑒏 𑒫𑒏𑓂𑒞𑒰 𑒕𑒪𑒰𑒯। 𑒪𑒱𑒐𑒥𑒼 𑒢𑒲𑒏 𑒏𑒩𑒻𑒞 𑒕𑒪𑒰𑒯। 𑒧𑒻𑒟𑒱𑒪𑒲𑒧𑒹 𑒞𑒿 𑒦𑒩𑒱𑒮𑒏 𑒢𑒻 𑒧𑒳𑒠𑒰 𑒯𑒱𑒢𑓂𑒠𑒲-𑒁𑓀𑒑𑓂𑒩𑒹𑒖𑒲𑒧𑒹 𑒏𑒞𑒹𑒏𑒼 𑒣𑒼𑒟𑒲 𑒪𑒱𑒐𑒢𑒹 𑒕𑒟𑒱। 𑒖𑒹𑒯𑒢𑒹 𑒫𑒱𑒠𑓂𑒫𑒰𑒢 𑒞𑒹𑒯𑒢𑒹 𑒮𑒳𑒦𑓂𑒨𑒮𑓂𑒞 𑒣𑒩𑒱𑒫𑒰𑒩𑒏 𑒮𑒹𑒯𑒼 𑒕𑒪𑒰𑒯। 𑒣𑒰𑒢𑒼 𑒐𑒴𑒥 𑒐𑒰𑒃 𑒕𑒪𑒰𑒯 𑒂 𑒮𑒱𑒑𑒩𑒹𑒙𑒼 𑒣𑒲𑒥𑒻𑒞 𑒕𑒪𑒰𑒯। 𑒖𑒹𑒪 𑒞𑒿 𑒕𑒳𑒔𑓂𑒕𑒹 𑒠𑒹𑒯𑒹 𑒂𑒥𑒱 𑒑𑒹𑒪𑒰𑒯 𑒧𑒳𑒠𑒰 𑒦𑒱𑒢𑒮𑒩𑒴 𑒣𑒯𑒩 𑒔𑒰𑒯 𑒣𑒲𑒪𑒰 𑒣𑒕𑒰𑒞𑒱 𑒣𑒰𑒢 𑒐𑒰𑒃𑒪𑒹 𑒧𑒢 𑒕𑒙𑒣𑒙𑒰𑒋 𑒪𑒑𑒪𑒢𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒣𑒰𑒢𑒏 𑒍𑒩𑒱𑒨𑒰𑒢 𑒏𑓄 𑒏𑓄 𑒩𑒐𑒢𑒹 𑒩𑒯𑒟𑒱। 𑒖𑒯𑒪𑒼 𑒏𑒼𑒢𑒼 𑒖𑒯𑒪 𑒖𑒏𑒰𑒿 𑒢𑒯𑒱𑒨𑒹𑒿 𑒩𑒯𑒻। 𑒢𑒹 𑒮𑒩𑒏𑒰𑒩𑒲 𑒣𑒩𑓂𑒨𑒰𑒣𑓂𑒞 𑒮𑓂𑒙𑒰𑒤 𑒩𑒯𑒻 𑒂 𑒢𑒹 𑒮𑒩𑒏𑒰𑒩𑒲 𑒥𑒹𑒫𑒮𑓂𑒟𑒰। 𑒁𑒣𑒢𑒹 𑒮𑒦 𑒮𑒦 𑒏𑒱𑒕𑒳। 𑒑𑒹𑒙𑒼 𑒐𑒳𑒖𑒪𑒹 𑒩𑒯𑒻। 𑒦𑒲𑒞𑒩 𑒥𑒰𑒯𑒩 𑒣𑓂𑒩𑒠𑒩𑓂𑒬𑒢𑒏𑒰𑒩𑒲 𑒪𑒼𑒏 𑒮𑒾𑓀𑒮𑒹 𑒙𑒯𑒪𑒻𑒞। 𑒥𑒹𑒩𑒴 𑒣𑒯𑒩 𑒜𑒼𑒪𑒏𑒣𑒩 𑒁𑒪𑓂𑒯𑒰 𑒯𑒼𑒃। 𑒔𑒾𑒡𑒩𑒲𑒖𑒲𑒏𑒹𑒿 𑒔𑒰𑒯𑒼𑒏 𑒯𑒱𑒮𑒰𑒥 𑒢𑒯𑒱𑒨𑒹𑒿 𑒩𑒯𑒢𑒱। 𑒂𑒥𑒟𑒱 𑒞𑒿 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒔𑒰𑒯 𑒣𑒱𑒂 𑒣𑒰𑒢 𑒐𑒳𑒁𑒥𑒟𑒱𑒢। 𑒞𑒹𑒏𑒩 𑒥𑒰𑒠 𑒑𑒣-𑒮𑒣 𑒬𑒳𑒩𑒴 𑒯𑒼𑒃।
𑒍𑒢𑒰 𑒥𑒱𑒯𑒰𑒩𑒏 𑒏𑒞𑒹𑒏𑒼 𑒖𑒱𑒪𑒰𑒏 𑒣𑓂𑒩𑒠𑒩𑓂𑒬𑒢𑒏𑒰𑒩𑒲 𑒠𑒳𑒃𑒨𑒹 𑒠𑒱𑒢𑒏 𑒣𑒕𑒰𑒞𑒱𑒮𑒿 𑒢𑒱𑒏𑒪𑒋 𑒪𑒑𑒪𑒰𑒯। 𑒧𑒳𑒠𑒰 𑒧𑒡𑒳𑒥𑒢𑒲𑒏 𑒧𑒰𑒩𑒱-𑒣𑒲𑒙 𑒏𑒹𑒮 𑒦𑒩𑒱𑒨𑒰 𑒠𑒹𑒪𑒏𑒻। 𑒠𑒴 𑒠𑒱𑒢𑒏 𑒣𑒕𑒰𑒞𑒱 𑒦𑒼𑒑𑒹𑒢𑓂𑒠𑓂𑒩𑒖𑒲 𑒮𑒹𑒯𑒼 𑒠𑒩𑒦𑓀𑒑𑒰 𑒖𑒹𑒪𑒮𑒿 𑒢𑒱𑒏𑒪𑒱 𑒧𑒡𑒳𑒥𑒢𑒲 𑒖𑒹𑒪 𑒔𑒪𑒱 𑒋𑒪𑒰𑒯। 𑒞𑒹𑒩𑒯 𑒠𑒱𑒢𑒏 𑒣𑒕𑒰𑒞𑒱 𑒢𑒱𑒏𑒪𑒻𑒏 𑒂𑒠𑒹𑒬 𑒂𑒋𑒪 𑒩𑒯𑒻। 𑒧𑒳𑒠𑒰 𑒮𑒦𑒏 𑒢𑒻। 𑓓𑓕 𑒑𑒼𑒙𑒹𑒏𑒹𑒿 𑒧𑒳𑒖𑒤𑓂𑒤𑒩𑒣𑒳𑒩 𑒖𑒹𑒪 𑒣𑒚𑒥𑒻𑒏 𑒂𑒠𑒹𑒬 𑒮𑒹𑒯𑒼 𑒂𑒋𑒪 𑒩𑒯𑒻। 𑒞𑒹𑒩𑒯𑒧 𑒠𑒱𑒢 𑒢𑒱𑒏𑒪𑒻 𑒥𑒹𑒩 𑒏𑒱𑒨𑒼 𑒢𑒱𑒏𑒪𑒻𑒪𑒹 𑒞𑒻𑒨𑒰𑒩𑒹 𑒢𑒻 𑒦𑒹𑒪𑒰𑒯। 𑒏𑒱𑒕𑒳 𑒫𑒱𑒠𑒰𑒃 𑒦𑒹𑒢𑒹 𑒥𑒱𑒢𑒰 𑒏𑒹𑒢𑒰 𑒢𑒱𑒏𑒪𑒞𑒰𑒯। 𑒑𑒣 𑒅𑒚𑒪 𑒡𑒼𑒞𑒲-𑒏𑒳𑒩𑓂𑒞𑒰, 𑒑𑓀𑒖𑒲-𑒑𑒧𑒕𑒰 𑒂 𑒔𑒠𑓂𑒠𑒩𑒱𑒏 𑒧𑒳𑒠𑒰 𑒮𑒹 𑒢𑒻 𑒦𑒹𑒪𑒻। 𑒯𑒼𑒃𑒞-𑒯𑒥𑒰𑒃𑒞 𑒋𑒏𑒙𑒰 𑒪𑒴𑓀𑒑𑒲 𑒂 𑒋𑒏𑒙𑒰 𑒑𑒧𑒕𑒰 𑒮𑒦𑒏𑒹𑒿 𑒦𑒹𑒙𑒪𑒢𑒱। 𑒣𑒰𑒩𑓂𑒙𑒲 𑒂𑒢𑓂𑒠𑒼𑒪𑒢𑒏 𑒁𑓀𑒞𑒱𑒧 𑒖𑒹𑒪 𑒨𑒰𑒞𑓂𑒩𑒰 𑒕𑒪𑒻। 𑒞𑒹𑒏𑒩 𑒥𑒰𑒠 𑒖𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒑𑒹𑒥𑒼 𑒏𑒹𑒪𑒰 𑒞𑒿 𑒋𑒏-𑒠𑒱𑒢𑒰-𑒠𑒳-𑒠𑒱𑒢𑒰𑒧𑒹। 𑒖𑒹 𑒏𑒋𑒏 𑒥𑒹𑒩 𑒟𑒰𑒢𑒹𑒮𑒿 𑒔𑒪𑒱 𑒂𑒥𑒟𑒱।
𑒍𑒢𑒰 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒠𑒼𑒯𑒩𑒲 𑒖𑒹𑒪𑒏 𑒨𑒰𑒞𑓂𑒩𑒲 𑒩𑒯𑒟𑒱। 𑒁𑒣𑒢𑒼 𑒑𑒰𑒧𑒧𑒹 𑒞𑒞𑒹 𑒧𑒳𑒏𑒠𑒧𑒰 𑒦𑓄 𑒑𑒹𑒪 𑒩𑒯𑒢𑒱 𑒖𑒹 𑒋𑒏 𑒢𑒹 𑒋𑒏𑒙𑒰 𑒫𑒰𑒩𑓀𑒙 𑒮𑒦 𑒠𑒱𑒢 𑒩𑒯𑒥𑒹 𑒏𑒩𑒢𑒱। 𑒠𑒴 𑒯𑒖𑒰𑒩 𑒄𑒮𑓂𑒫𑒲 𑒁𑒥𑒻𑒞-𑒁𑒥𑒻𑒞 𑒮𑒦 𑒏𑒹𑒬 𑒮𑒧𑒰𑒣𑓂𑒞 𑒦𑓄 𑒑𑒹𑒪𑒢𑒱, 𑒐𑒰𑒪𑒲 𑒠𑒴𑒙𑒰 𑒬𑒹𑒭 𑒥𑒿𑒔𑒪 𑒩𑒯𑒪𑒢𑒱। 𑒋𑒏𑒙𑒰 𑓓𑓐𑓗 (𑒯𑒞𑓂𑒨𑒰𑒏 𑒣𑓂𑒩𑒨𑒰𑒮) 𑒖𑒹 𑒯𑒰𑒄 𑒏𑒼𑒩𑓂𑒙𑒧𑒹 𑒕𑒪𑒢𑒱, 𑒠𑒼𑒮𑒩 𑓔𑓓𑓖 (𑒁𑒑𑒱𑒪𑒑𑓂𑒑𑒲) 𑒖𑒹 𑒛𑒱𑒮𑓂𑒙𑒱𑒏 𑒖𑒖𑒏 𑒏𑒼𑒩𑓂𑒙𑒧𑒹 𑒕𑒪𑒢𑒱। 𑒖𑒯𑒱𑒢𑒰 𑒥𑒰𑒜𑓃𑒱𑒏 𑒣𑒰𑒢𑒱 𑒣𑒼𑒐𑒩𑒱𑒧𑒹 𑒣𑓂𑒩𑒫𑒹𑒬 𑒏𑒩𑒻𑒏𑒰𑒪 𑒮𑒾𑓀𑒮𑒹 𑒣𑒼𑒐𑒩𑒱𑒏 𑒣𑒰𑒢𑒱 𑒑𑒞𑒱𑒬𑒲𑒪 𑒦𑓄 𑒖𑒰𑒃𑒋 𑒂 𑒒𑒳𑒧𑒞𑒲 𑒥𑒹𑒩 (𑒥𑒰𑒜𑓃𑒱 𑒮𑒙𑒏𑒻𑒏 𑒮𑒧𑒋) 𑒡𑒲𑒩𑒹-𑒡𑒲𑒩𑒹 𑒑𑒞𑒱𑒯𑒲𑒢 𑒯𑒳𑒁𑒋 𑒪𑒑𑒻𑒋 𑒞𑒯𑒱𑒢𑒰 𑒧𑒳𑒏𑒠𑒧𑒰𑒏 𑒠𑒾𑒛𑓃𑒧𑒹 𑒦𑓄 𑒑𑒹𑒪𑒢𑒱। 𑒧𑒳𑒠𑒰 𑒁𑒮𑓂𑒟𑒱𑒩 𑒢𑒻 𑒦𑒹𑒪 𑒕𑒪𑒻। 𑒏𑒰𑒩𑒝 𑒠𑒳𑒢𑒴 𑒏𑒹𑒬 𑒬𑒹𑒮𑒢 𑒕𑒪𑒻। 𑒁𑒮𑒟𑒱𑒩 𑒄 𑒦𑒹𑒪𑒻 𑒖𑒹 𑒖𑒱𑒪𑒰𑒏 𑒏𑒹𑒬 (𑒁𑒑𑒱𑒪𑒑𑓂𑒑𑒲𑒏) 𑒏 𑒤𑒰𑒃𑒪𑒹 𑒞𑒩𑒧𑒹 𑒣𑒛𑓃𑒱 𑒑𑒹𑒪 𑒂 𑒯𑒰𑒄𑒏𑒼𑒩𑓂𑒙𑒧𑒹 𑒠𑒾𑒛𑓃-𑒥𑒩𑒯𑒰 𑒏𑒧 𑒯𑒼𑒃 𑒕𑒪𑒻।
𑒁𑒐𑒢 𑒡𑒩𑒱 𑒧𑒰𑒢𑒹 𑓒𑓐𑓐𑓐𑒄.𑒮𑒿 𑒣𑒴𑒩𑓂𑒫 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒠𑒹𑒬𑒏 𑒂𑒡𑒰𑒮𑒿 𑒥𑒹𑒮𑒲 𑒦𑓂𑒩𑒧𑒝 𑒏𑓄 𑒢𑒹𑒢𑒹 𑒕𑒪𑒟𑒱। 𑒋𑒏 𑒠𑒱𑒮 𑒠𑒹𑒬𑒏 𑒂𑒩𑓂𑒟𑒱𑒏 𑒩𑒰𑒖𑒡𑒰𑒢𑒲 𑒧𑒳𑒧𑓂𑒫𑒄 𑒠𑒹𑒐 𑒢𑒹𑒢𑒹 𑒕𑒪𑒟𑒱 𑒞𑒿 𑒠𑒼𑒮𑒩 𑒠𑒱𑒮 𑒢𑒰𑒑𑒰𑒪𑒻𑓀𑒛-𑒁𑒩𑒴𑒝𑒰𑒔𑒪 𑒮𑒹𑒯𑒼 𑒠𑒹𑒐𑒢𑒹 𑒕𑒪𑒟𑒱। 𑒩𑒫𑒱𑒢𑓂𑒠𑓂𑒩 𑒥𑒰𑒥𑒴𑒏 (𑒧𑒯𑒩𑓂𑒭𑒱 𑒩𑒫𑒱𑒢𑓂𑒠𑓂𑒩 𑒢𑒰𑒟 𑒙𑒻𑒑𑒾𑒩) 𑒬𑒰𑒢𑓂𑒞𑒱 𑒢𑒱𑒏𑒹𑒞𑒢𑒏 𑒮𑓀𑒑 𑒮𑒳𑒢𑓂𑒠𑒩 𑒫𑒢, 𑒑𑓀𑒑𑒰𑒮𑒰𑒑𑒩, 𑒏𑒥𑒲𑒩 𑒠𑒰𑒮𑒏 𑒑𑒰𑒛𑓃𑒪 𑒐𑒢𑓂𑒞𑒲 𑒮𑒧𑒳𑒠𑓂𑒩𑒏 𑒏𑒰𑒞, 𑒞𑒿 𑒮𑒴𑒩𑓂𑒨 𑒧𑓀𑒠𑒱𑒩 𑒮𑒹𑒯𑒼 𑒠𑒹𑒐𑒢𑒹 𑒕𑒪𑒰। 𑒩𑓀𑒑-𑒩𑓀𑒑𑒏 𑒠𑓂𑒫𑒻𑒞 (𑒠𑓂𑒫𑒢𑓂𑒠𑓂𑒫) 𑒋𑒏 𑒠𑒱𑒮 𑒖𑒿 𑒯𑒖𑒰𑒩𑒲 𑒥𑒰𑒥𑒴𑒏 (𑒂𑒔𑒰𑒩𑓂𑒨 𑒯𑒖𑒰𑒩𑒲 𑒣𑓂𑒩𑒮𑒰𑒠 𑒠𑓂𑒫𑒱𑒫𑒹𑒠𑒲) 𑒖𑒹 𑒬𑒰𑒢𑓂𑒞𑒱 𑒢𑒱𑒏𑒹𑒞𑒢𑒧𑒹 𑓑𑓙𑓓𑓐 𑒄.𑒮𑒿 𑓑𑓙𑓕𑓐 𑒄. 𑒡𑒩𑒱 𑒯𑒱𑒢𑓂𑒠𑒲𑒏 𑒁𑒡𑓂𑒨𑒰𑒣𑒏 𑒩𑒯𑒪𑒰𑒯। 𑒮𑒱𑒩𑒲𑒮𑒏 𑒤𑒴𑒪𑒏 𑒧𑒯𑒧𑒯𑒲𑒮𑒿 𑒧𑒳𑒑𑓂𑒡 𑒯𑒼𑒃𑒞 𑒩𑒯𑒟𑒱 𑒞𑒿 𑒠𑒼𑒮𑒩 𑒠𑒱𑒮 𑒧𑒱𑒟𑒱𑒪𑒰𑓀𑒔𑒪𑒧𑒹 𑒄 𑒮𑒱𑒩𑒲𑒮 𑒥𑒩𑓂𑒖𑒱𑒞 𑒁𑒕𑒱! 𑒢𑒹 𑒒𑒩𑒏 𑒏𑒰𑒖𑒧𑒹 𑒂𑒎𑒞 𑒂 𑒢𑒹 𑒔𑒾𑒏𑒲, 𑒏𑒳𑒩𑒮𑒲𑒏 𑒏𑒰𑒖𑒧𑒹! 𑒞𑒞𑒥𑒹 𑒢𑒻, 𑒤𑒪𑒏 𑒑𑒞𑒱 𑒮𑒹𑒯𑒼 𑒮𑒋𑒯। 𑒑𑒰𑒕 𑒞𑒿 𑒥𑒛𑓃𑒏𑒰-𑒥𑒛𑓃𑒏𑒰 𑒯𑒼𑒃 𑒕𑒻 𑒖𑒯𑒱𑒢𑒰 𑒏𑒯𑒥𑒲 𑒕𑒻 “𑒧𑒢𑒳𑒐 𑒞𑒿 𑒥𑒪𑒫𑒲𑒩 𑒧𑒳𑒠𑒰 𑒧𑒼𑒕 𑒢𑒹 𑒞𑒿 𑒏𑒱𑒕𑒳 𑒢𑒹।” 𑒞𑒯𑒱𑒢𑒰। 𑒧𑒢 𑒧𑒰𑒢𑒱 𑒑𑒹𑒪𑒢𑒱 𑒖𑒹 𑒣𑒳𑒩𑒥𑒰-𑒣𑒕𑒱𑒨𑒰𑒏 𑒪𑒯𑒛𑓃𑒱 𑒕𑒲। 𑒤𑒴𑒪𑒏 𑒪𑒹𑒪 𑒏𑒹𑒯𑒹𑒢 𑒑𑒰𑒕 𑒪𑒑𑒰𑒍𑒪 𑒖𑒰𑒋, 𑒤𑒴𑒪𑒏 𑒮𑓀𑒑 𑒤𑒪𑒏 𑒪𑒹𑒪 𑒏𑒹𑒯𑒹𑒢 𑒑𑒰𑒕 𑒪𑒑𑒰𑒍𑒪 𑒖𑒰𑒋 𑒂 𑒥𑒱𑒢𑒳 𑒤𑒴𑒪-𑒤𑒪𑒏 𑒑𑒰𑒕 𑒏𑒞𑒋 𑒪𑒑𑒰𑒍𑒪 𑒖𑒰𑒋, 𑒄 𑒞𑒿 𑒣𑓂𑒩𑒬𑓂𑒢 𑒦𑒹𑒪𑒢𑒱। 𑒧𑒳𑒠𑒰 𑒣𑒕𑒱𑒨𑒰𑒏𑒹𑒿 𑒣𑒴𑒩𑓂𑒫𑒰𑒏 𑒪𑒣𑒹𑒙 𑒞𑒩 𑒏𑓄 𑒠𑒃 𑒕𑒻। 𑒖𑒿 𑒮𑒹 𑒢𑒻 𑒏𑒩𑒻 𑒕𑒻 𑒞𑒿 𑒧𑒱𑒟𑒱𑒪𑒰𑓀𑒔𑒪𑒏 𑒦𑒴𑒧𑒱𑒧𑒹 𑒏𑒞𑒋 𑒏𑒯𑒰𑒿𑒮𑒿 𑒂𑒥𑒱 𑒥𑒼𑒢-𑒗𑒰𑒛𑓃 𑒪𑒰𑒑𑒱 𑒑𑒹𑒪 𑒕𑒻, 𑒖𑒃𑒚𑒰𑒧 𑒋𑒏-𑒮𑒿-𑒋𑒏 𑒤𑒪, 𑒋𑒏-𑒮𑒿-𑒋𑒏 𑒤𑒴𑒪 𑒂 𑒋𑒏-𑒮𑒿-𑒋𑒏 𑒮𑒳𑒏𑒰𑒚 𑒪𑒏𑒛𑓃𑒲𑒏 𑒥𑒰𑒮 𑒦𑒴𑒧𑒱 𑒕𑒲। 𑒧𑒱𑒟𑒱𑒪𑒰𑓀𑒔𑒪𑒏 𑒫𑒱𑒏𑒰𑒮 𑒞𑒐𑒢 𑒯𑒋𑒞 𑒖𑒐𑒢 𑒧𑒱𑒟𑒱𑒪𑒰𑓀𑒔𑒪𑒏𑒹𑒿 𑒑𑒯𑒩𑒰𑒃𑒮𑒿 𑒁𑒡𑓂𑒨𑒨𑒢 𑒏𑓄 𑒁𑒢𑒳𑒏𑒴𑒪 𑒣𑒩𑒱𑒮𑓂𑒟𑒱𑒞𑒱 𑒥𑒢𑒰 𑒅𑒣𑒨𑒼𑒑 𑒯𑒋𑒞।
𑒨𑒰𑒞𑓂𑒩𑒰𑒏 𑒠𑒾𑒛𑓃𑒧𑒹 𑒩𑒰𑒖𑒮𑓂𑒟𑒰𑒢 𑒮𑒢 𑒠𑒩𑓂𑒬𑒢𑒲𑒨 𑒖𑒑𑒯 𑒮𑒹𑒯𑒼 𑒕𑒳𑒙𑒪𑒹 𑒕𑒪𑒢𑒱। 𑒨𑒰𑒞𑓂𑒩𑒰 𑒞𑒿 𑒑𑒩𑒣𑒩 𑒕𑒪𑒢𑒱 𑒧𑒳𑒠𑒰 𑒮𑒧𑒻𑒍 𑒂 𑒣𑒰𑒃𑒍𑒏 𑒞𑓀𑒑𑒲 𑒕𑒪𑒢𑒱। 𑒧𑒧𑒱𑒨𑒾𑒞 𑒦𑒰𑒞𑒱𑒖 𑒩𑒰𑒖𑒮𑓂𑒟𑒰𑒢𑒏 𑒣𑒰𑒪𑒲 𑒖𑒱𑒪𑒰 𑒁𑒢𑓂𑒞𑒩𑓂𑒑𑒞 𑒛𑒲.𑒋𑒪.𑒋𑒤. 𑒮𑒱𑒧𑒹𑓀𑒙 𑒏𑒰𑒩𑒐𑒰𑒢𑒰𑒧𑒹 𑒮𑒳𑒣𑒩-𑒫𑒰𑒃𑒖𑒩 𑒕𑒪𑒐𑒱𑒢 𑒖𑒹 𑒥𑒹𑒩-𑒥𑒹𑒩 𑒁𑒥𑒻𑒏 𑒥𑒰𑒞 𑒏𑒩𑒻𑒞 𑒩𑒯𑒟𑒱𑒢। 𑒍𑒢𑒰 𑒍 (𑒞𑒹𑒖 𑒢𑒰𑒩𑒰𑒨𑒝 𑒧𑒝𑓂𑒛𑒪) 𑒣𑒜𑓃𑒪-𑒪𑒱𑒐𑒪 𑒢𑒻। 𑒏𑒼𑒮𑒱𑒏𑒢𑓂𑒯𑒰 𑒦𑒹𑒢𑒹 𑒑𑒰𑒧𑒏 𑒮𑓂𑒏𑒴𑒪𑒼 𑒢𑒭𑓂𑒙 𑒦𑓄 𑒑𑒹𑒪𑒢𑒱 𑒂 𑒑𑒰𑒧𑒼। 𑒖𑒧𑒲𑒢-𑒖𑒞𑓂𑒟𑒰 𑒑𑒳𑒖𑒩 𑒏𑒩𑒻𑒥𑒪𑒰 𑒖𑒩𑒴𑒩 𑒕𑒻 𑒧𑒳𑒠𑒰 𑒏𑒼𑒮𑒲-𑒏𑒧𑒪𑒰𑒏 𑒥𑒲𑒔 𑒣𑒛𑓃𑒱 𑒑𑒹𑒪 𑒕𑒻। 𑒦𑒰𑒑𑒱 𑒏𑓄 𑒍 𑒩𑒰𑒖𑒮𑓂𑒟𑒰𑒢 𑒔𑒪𑒱 𑒑𑒹𑒪𑒰। 𑒛𑒲.𑒋𑒪.𑒋𑒤. 𑒮𑒱𑒧𑒹𑓀𑒙 𑒏𑒰𑒩𑒐𑒰𑒢𑒰𑒧𑒹 𑒅𑒙𑓂𑒚𑒰 𑒧𑒖𑒠𑒴𑒩𑒏 𑒩𑒴𑒣𑒧𑒹 𑒢𑒼𑒏𑒩𑒲 𑒦𑓄 𑒑𑒹𑒪𑒢𑒱। 𑒋𑒢.𑒏𑒹. 𑒣𑒰𑒩𑒲𑒐 𑒢𑒰𑒍𑓀𑒏 𑒋𑒏 𑒑𑒼𑒙𑒹 𑒖𑒹 𑒔𑒰𑒩𑒱 𑒏𑒼𑒚𑒩𑒲 𑒧𑒏𑒰𑒢𑒼 𑒥𑒢𑒾𑒢𑒹 𑒕𑒪𑒰𑒯 𑒂 𑒍𑒯𑒲 𑒮𑒱𑒧𑒹𑓀𑒙 𑒏𑒰𑒩𑒐𑒰𑒢𑒰𑒧𑒹 𑒢𑒲𑒏 𑒣𑒠𑒣𑒩 𑒮𑒹𑒯𑒼 𑒕𑒪𑒰𑒯, 𑒯𑒳𑒢𑒏𑒹 𑒧𑒏𑒰𑒢𑒧𑒹 𑒋𑒏𑒙𑒰 𑒏𑒼𑒚𑒩𑒲 𑒦𑒰𑒛𑓃𑒰 𑒪𑓄 𑒞𑒹𑒖 𑒢𑒰𑒩𑒰𑒨𑒝 𑒩𑒯𑒋 𑒪𑒑𑒪𑒰। 𑒡𑒲𑒩𑒹-𑒡𑒲𑒩𑒹 𑒠𑒳𑒢𑒴 𑒑𑒼𑒙𑒹𑒏 𑒥𑒲𑒔 𑒮𑓀𑒥𑓀𑒡 𑒥𑒜𑓃𑒻𑒞 𑒑𑒹𑒪𑒢𑒱। 𑒯𑒳𑒢𑒏𑒩 (𑒋𑒢.𑒏𑒹. 𑒣𑒰𑒩𑒲𑒐𑒏) 𑒮𑒰𑒮𑒳𑒩 𑒢𑒹𑒣𑒰𑒪𑒏 𑒏𑒰𑒏𑒩𑒦𑒱𑒙𑓂𑒙𑒰 𑒞𑒿𑒋 𑒣𑒞𑓂𑒢𑒲 𑒧𑒱𑒟𑒱𑒪𑒰𑓀𑒔𑒪𑒮𑒿 𑒣𑒩𑒱𑒔𑒱𑒞, 𑒮𑒧𑓂𑒥𑒢𑓂𑒡𑒏 𑒧𑒖𑒥𑒴𑒞𑒲𑒏 𑒏𑒰𑒩𑒝 𑒫𑒋𑒯 𑒦𑒹𑒪। 𑒦𑒰𑒋-𑒥𑒯𑒱𑒢 𑒖𑒏𑒰𑒿 𑒠𑒳𑒢𑒴𑒏 𑒮𑒧𑓂𑒥𑒢𑓂𑒡 𑒥𑒢𑒱 𑒑𑒹𑒪𑒢𑒱। 𑒋𑒏-𑒠𑒼𑒮𑒩𑒏 𑒣𑒰𑒩𑒱𑒫𑒰𑒩𑒱𑒏 𑒖𑒱𑒢𑒑𑒲𑒏 𑒮𑒧𑓂𑒥𑒢𑓂𑒡 𑒥𑒜𑓃𑒪𑒢𑒱। 𑒋𑒢.𑒏𑒹. 𑒣𑒰𑒩𑒲𑒐 𑒞𑒹𑒖𑒢𑒰𑒩𑒰𑒨𑒝𑒏𑒹𑒿 𑒏𑒯𑒪𑒐𑒱𑒢 𑒖𑒹 𑒥𑒻𑒮𑒰𑒩𑒲𑒧𑒹 𑒣𑒜𑓃𑒰 𑒠𑒹𑒥। 𑒮𑒔𑒧𑒳𑒔 𑒣𑒜𑓃𑒰 𑒏𑓄 𑒏𑒰𑒩𑒐𑒰𑒢𑒰𑒏 𑒮𑒳𑒣𑒩-𑒥𑒰𑒃𑒖𑒩 𑒥𑒢𑒰 𑒠𑒹𑒪𑒐𑒱𑒢।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒧𑒢𑒧𑒹 𑒁𑒿𑒙𑒏𑒰𑒩𑒱 𑒪𑒹𑒪𑒢𑒱 𑒖𑒹 𑒧𑒰𑒞𑓂𑒩 𑒖𑒰𑒃 𑒡𑒩𑒱𑒏 𑒮𑒧𑒮𑓂𑒨𑒰 𑒕𑒢𑒱। 𑒖𑒐𑒢 𑒖𑒹𑒞𑒰 𑒞𑒿 𑒋𑒞𑒥𑒼 𑒍 𑒢𑒻 𑒏𑒩𑒞? 𑒠𑒹𑒐𑒻𑒥𑒪𑒰 𑒖𑒑𑒯𑒼 𑒠𑒹𑒐 𑒪𑒹𑒞𑒰 𑒂 𑒍𑒃𑒚𑒰𑒧𑒏 𑒧𑒰𑒙𑒱-𑒣𑒰𑒢𑒱-𑒯𑒫𑒰𑒏 𑒏𑓂𑒭𑒹𑒞𑓂𑒩𑒼 𑒠𑒹𑒐 𑒪𑒹𑒞𑒰। 𑒋𑒏 𑒠𑒱𑒢 𑒋𑒯𑒱𑒢𑒰 𑒏𑒱𑒕𑒳 𑒣𑒰𑒩𑒱𑒫𑒰𑒩𑒱𑒏 𑒂𑒧𑒠𑒢𑒲 𑒦𑒹𑒪𑒢𑒱, 𑒅𑒚𑒱 𑒏𑓄 𑒫𑒱𑒠𑒰 𑒦𑒹𑒪𑒰। 𑒁𑒮𑒑𑒩𑒹 𑒒𑒳𑒧𑒻𑒏 𑒮𑓂𑒫𑒦𑒰𑒫𑒼 𑒕𑒪𑒢𑓂𑒯𑒱𑒨𑒹। 𑒠𑒱𑒪𑓂𑒪𑒲 𑒯𑒼𑒃𑒞 𑒩𑒰𑒖𑒮𑓂𑒟𑒰𑒢 𑒣𑒯𑒳𑒿𑒔𑒪𑒰। 𑒮𑒳𑒣𑒩-𑒫𑒰𑒃𑒖𑒩 𑒦𑒹𑒪𑒰 𑒣𑒕𑒰𑒞𑒱 𑒞𑒹𑒖𑒢𑒰𑒩𑒰𑒨𑒝 𑒁𑒣𑒢𑒰 𑒣𑒩𑒱𑒫𑒰𑒩𑒼 (𑒣𑒞𑓂𑒢𑒲) 𑒂 𑒋𑒏𑒙𑒰 𑒦𑒰𑒃𑒨𑒼𑒏𑒹𑒿 𑒑𑒰𑒧𑒮𑒿 𑒪𑓄 𑒑𑒹𑒪𑒰। 𑒦𑒰𑒋𑒏𑒹𑒿 𑒍𑒃 𑒏𑒰𑒩𑒐𑒰𑒢𑒰𑒧𑒹 𑒢𑒼𑒏𑒩𑒲 𑒡𑒛𑓃𑒰 𑒠𑒹𑒪𑒐𑒱𑒢। 𑒋𑒢.𑒏𑒹. 𑒣𑒰𑒩𑒲𑒐𑒏 𑒧𑒏𑒰𑒢𑒮𑒿 𑒯𑒙𑒱 𑒞𑒲𑒢 𑒏𑒼𑒚𑒩𑒲𑒏 𑒧𑒏𑒰𑒢 𑒦𑒰𑒛𑓃𑒰 𑒪𑓄 𑒩𑒯𑒋 𑒪𑒑𑒪𑒰। 𑒣𑒻𑒐𑒰𑒢𑒰 𑒏𑒼𑒚𑒩𑒲𑒏 𑒍𑒞𑒹𑒏 𑒖𑒩𑒴𑒩𑒲 𑒢𑒻, 𑒋𑒏 𑒞𑒿 𑒏𑓂𑒭𑒹𑒞𑓂𑒩𑒏 𑒯𑒱𑒮𑒰𑒥𑒮𑒿 𑒣𑒰𑒞𑒩 𑒖𑒢𑒮𑓀𑒐𑓂𑒨𑒰 𑒠𑒼𑒮𑒩 𑒗𑒰𑒛𑓃𑒠𑒰𑒩 𑒮𑒰𑓀𑒑𑒩𑒲𑒏 (𑒥𑒑𑒴𑒩 𑒖𑒏𑒰𑒿 𑒣𑒰𑒞𑒼 𑒂 𑒏𑒰𑒿𑒙𑒼 𑒯𑒼𑒃 𑒕𑒻) 𑒕𑒱𑒙𑒤𑒳𑒙 𑒑𑒰𑒕𑒏 𑒣𑒩𑒠𑒰। 𑒥𑒮𑒮𑒿 𑒅𑒞𑒩𑒱 𑒮𑒼𑒗𑒹 𑒏𑒰𑒩𑒐𑒰𑒢𑒰 𑒑𑒹𑒪𑒰 𑒂 𑒂𑒤𑒱𑒮𑒧𑒹 𑒦𑒰𑒞𑒲𑒖𑒏 𑒮𑒧𑓂𑒥𑒢𑓂𑒡𑒧𑒹 𑒣𑒳𑒕𑒪𑒐𑒱𑒢। 𑒞𑒹𑒖𑒢𑒰𑒩𑒰𑒨𑒝 𑒛𑓂𑒨𑒴𑒙𑒲𑒧𑒹 𑒢𑒻 𑒩𑒯𑒟𑒱। 𑒋𑒏 𑒑𑒼𑒙𑒹 𑒣𑒙𑒢𑒰𑒏 𑒮𑓀𑒑 𑒦𑒹𑒪𑒐𑒱𑒢 𑒂 𑒞𑒹𑒖𑒢𑒰𑒩𑒰𑒨𑒝𑒏 𑒛𑒹𑒩𑒰𑒣𑒩 𑒠𑒼𑒮𑒩𑒱 𑒮𑒰𑒿𑒗 𑒯𑒼𑒃𑒞 𑒣𑒯𑒳𑒿𑒔𑒰 𑒠𑒹𑒪𑒐𑒱𑒢। 𑒥𑒱𑒖𑒪𑒲𑒏 𑒃𑒖𑒼𑒞। 𑒥𑒑𑒪𑒧𑒹 𑒞𑒲𑒮-𑒔𑒰𑒪𑒲𑒮 𑒠𑒼𑒏𑒰𑒢𑒏 𑒕𑒼𑒙-𑒕𑒲𑒢 𑒥𑒰𑒖𑒰𑒩। 𑒖𑒃 𑒥𑒲𑒔 𑒯𑒼𑒃𑒞 𑒥𑒮𑒏 𑒩𑒰𑒮𑓂𑒞𑒰। 𑒁𑒢𑓂𑒯𑒰𑒩 𑒩𑒯𑒢𑒹 𑒥𑒹𑒮𑒲 𑒢𑒻 𑒠𑒹𑒐𑒱 𑒣𑒹𑒪𑒰।
𑒔𑒻𑒞 𑒧𑒰𑒮 𑒩𑒯𑒢𑒹 𑒑𑒩𑒧𑒲 𑒐𑒴𑒥 𑒣𑒛𑓃𑒻, 𑒠𑒮 𑒥𑒖𑒹𑒏 𑒥𑒰𑒠 𑒒𑒩𑒮𑒿 𑒱𑒢𑒏𑒪𑒻𑒏 𑒧𑒢 𑒢𑒻 𑒯𑒼𑒃। 𑒧𑒳𑒠𑒰 𑒥𑒰𑒩𑒯 𑒥𑒖𑒹 𑒩𑒰𑒞𑒱𑒏 𑒣𑒕𑒰𑒞𑒱 (𑒖𑒹𑒢𑒰-𑒖𑒹𑒢𑒰 𑒩𑒰𑒞𑒱 𑒜𑒪𑒻) 𑒧𑒼𑒙𑒑𑒩 𑒔𑒠𑒩𑒱𑒏 𑒖𑒩𑒴𑒩𑒞𑒱 𑒦𑓄 𑒖𑒰𑒃 𑒕𑒪𑒻। 𑒩𑒯𑒻𑒪𑒹 𑒋𑒏𑒙𑒰 𑒐𑒰𑒙, 𑒮𑒱𑒩𑒏𑒏 𑒮𑓀𑒑 𑒦𑒹𑒙𑒪 𑒕𑒪𑒢𑒱। 𑒦𑒱𑒢𑒮𑒩 𑒯𑒼𑒃𑒞 𑒠𑒹𑒐𑒻𑒏 𑒁𑒫𑒮𑒩 𑒦𑒹𑒙𑒪𑒢𑒱। 𑒛𑒹𑒩𑒰𑒏 𑒂𑒑𑒴𑒧𑒹 𑒔𑒰𑒩𑒱-𑒣𑒰𑒿𑒔𑒙𑒰 𑒁𑒬𑒼𑒏𑒏 𑒑𑒰𑒕 𑒪𑒰𑒑𑒪, 𑒧𑒗𑒼𑒪𑒏𑒹 𑒑𑒰𑒕। 𑒧𑒏𑒰𑒢 𑒧𑒰𑒪𑒱𑒏𑒏 𑒒𑒩 𑒁𑒡𑒰 𑒏𑒱𑒪𑒼𑒧𑒲𑒙𑒩 𑒯𑒙𑒱 𑒏𑓄 𑒩𑒯𑒻। 𑒧𑒳𑒠𑒰 𑒧𑒰𑒪𑒏 𑒒𑒩 𑒥𑒑𑒪𑒹𑒧𑒹 𑒥𑒢𑒾𑒢𑒹 𑒩𑒯𑒋। 𑒧𑒰𑒪𑒼 𑒏𑒱 𑒥𑒱𑒢𑒳 𑒥𑒔𑓂𑒔𑒰 𑒠𑒴𑒙𑒰 𑒞𑒾𑒛𑓃𑒱𑒨𑒰 𑒧𑒯𑒲𑓀𑒮। 𑒞𑒲𑒢 𑒥𑒰𑒣𑒴𑒞 𑒧𑒏𑒰𑒢 𑒧𑒰𑒪𑒱𑒏। 𑒣𑒱𑒞𑒰 𑒥𑒳𑒜𑓃𑒹 𑒖𑒹 𑒥𑒹𑒮𑒲𑒏𑒰𑒪 𑒧𑒯𑒲𑓀𑒮𑒏 𑒞𑒰𑒏-𑒯𑒹𑒩𑒱 𑒏𑒩𑒻𑒞 𑒕𑒪। 𑒋𑒏 𑒦𑒰𑒿𑒃 𑒍𑒯𑒲 𑒮𑒱𑒧𑓀𑒹𑒙 𑒏𑒰𑒩𑒐𑒰𑒢𑒰𑒧𑒹 𑒢𑒼𑒏𑒩𑒲 𑒏𑒩𑒻𑒞 𑒕𑒪𑒰𑒯। 𑒂 𑒠𑒼𑒮𑒩 𑒐𑒹𑒞𑒲-𑒑𑒱𑒩𑒯𑒮𑓂𑒞𑒲𑒮𑒿 𑒪𑓄 𑒏𑓄 𑒧𑒯𑒲𑓀𑒮 𑒠𑒳𑒯𑒢𑒰𑒃 𑒂 𑒧𑒼𑒙𑒩 𑒮𑒰𑒃𑒏𑒱𑒪𑒣𑒩 𑒠𑒴𑒡 𑒥𑒹𑒔𑒢𑒰𑒃 𑒡𑒩𑒱। 𑒞𑒲𑒢-𑒏𑒱𑒪𑒼 𑒧𑒲𑒙𑒩𑒣𑒩 𑒋𑒏𑒙𑒰 𑒠𑒼𑒏𑒰𑒢𑒠𑒰𑒩𑒏𑒹𑒿 𑒣𑓂𑒩𑒞𑒱𑒠𑒱𑒢 𑒠𑒴𑒡 𑒠𑒃𑒞। 𑒮𑒰𑒃𑒚 𑒥𑒲𑒒𑒰 𑒖𑒧𑒲𑒢𑒼 𑒩𑒯𑒢𑒱 𑒂 𑒋𑒏𑒙𑒰 𑒥𑒼𑒩𑒱𑓀𑒑 𑒮𑒹𑒯𑒼। 𑒬𑒳𑒠𑓂𑒡 𑒠𑒼𑒐𑒩𑒰 𑒥𑒰𑒪𑒳𑒏 𑒐𑒹𑒞। 𑒣𑒯𑒰𑒛𑓃-𑒥𑒰𑒪𑒳𑒏 𑒏𑓂𑒭𑒹𑒞𑓂𑒩। 𑒑𑒰𑒕𑒏 𑒩𑒴𑒣𑒧𑒹 𑒧𑒰𑒞𑓂𑒩 𑒮𑒰𑓀𑒑𑒩𑒲। 𑒣𑒯𑒰𑒛𑓃𑒏 𑒁𑒞𑒱𑒩𑒱𑒏𑓂𑒞 𑒐𑒹𑒞 𑒮𑒦𑒧𑒹 𑒣𑒰𑒟𑒩𑒏 𑒕𑒼𑒙-𑒣𑒻𑒒 𑒙𑒳𑒏𑒛𑓃𑒰 𑒍𑓀𑒒𑒩𑒰𑒋𑒪। 𑒣𑒩𑒰𑒞𑒹 𑒦𑒢𑒹 𑒧𑒏𑒰𑒢 𑒧𑒰𑒪𑒱𑒏𑒮𑒿 𑒔𑒱𑒢𑓂𑒯𑒰-𑒣𑒩𑒱𑒔𑒨 𑒦𑓄 𑒑𑒹𑒪𑒢𑒱। 𑒣𑒿𑒃𑒮𑒚𑒱-𑒮𑒞𑓂𑒞𑒩𑒱𑒏 𑒅𑒧𑒹𑒩, 𑒠𑒹𑒯𑒧𑒹 𑒧𑒰𑒞𑓂𑒩 𑒋𑒏𑒙𑒰 𑒡𑒼𑒞𑒲। 𑒣𑒩𑒰𑒞 𑒦𑒢𑒹 𑒖𑒐𑒢 𑒥𑒹𑒙𑒰 𑒧𑒯𑒲𑓀𑒮 𑒠𑒳𑒯𑒋 𑒪𑒑𑒪𑒢𑒱 𑒞𑒿 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒠𑒹𑒐𑒪𑒢𑒱 𑒖𑒹 𑒠𑒴𑒡 𑒞𑒿 𑒏𑒧𑒹 𑒦𑒹𑒪𑒻 𑒧𑒳𑒠𑒰 𑒍𑒃𑒧𑒹 𑒣𑒰𑒢𑒱 𑒜𑒰𑒩𑒱 𑒠𑒹𑒪𑒏𑒻। 𑒣𑒳𑒪𑒐𑒱𑒢 𑒖𑒹 𑒣𑒰𑒢𑒱 𑒏𑒱𑒁𑒋 𑒠𑒹𑒪𑒱𑒌? 𑒖𑒥𑒰𑒫 𑒠𑒹𑒪𑒏𑒢𑒱 𑒖𑒹 𑒖𑒿 𑒠𑒴𑒡𑒧𑒹 𑒣𑒰𑒢𑒱 𑒢𑒻 𑒠𑒹𑒥𑒻 𑒞𑒿 𑒧𑒯𑒲𑓀𑒮𑒏 𑒟𑒢 𑒖𑒩𑒱 𑒖𑒰𑒋𑒞! 𑒖𑒥𑒰𑒫 𑒮𑒳𑒢𑒱 𑒏𑒱𑒕𑒳 𑒤𑒳𑒛𑓃𑒥𑒹 𑒢𑒹 𑒏𑒋𑒪𑒢𑒱। 𑒂𑒹𑒯𑒼 𑒔𑒪𑒱 𑒑𑒹𑒪𑒰𑒯।
𑒞𑒹𑒮𑒩 𑒠𑒱𑒢 𑒁𑒖𑒧𑒹𑒩 𑒠𑒩𑒑𑒰 𑒠𑒹𑒐𑒻𑒏 𑒏𑒰𑒩𑓂𑒨𑒏𑓂𑒩𑒧 𑒥𑒢𑒪𑒢𑒱। 𑒥𑒯𑒳𑒞 𑒮𑒳𑒢𑓂𑒠𑒩 𑒮𑓂𑒟𑒰𑒢। 𑒣𑒯𑒰𑒛𑓃𑒲 𑒃𑒪𑒰𑒏𑒰 𑒞𑒿𑒋 𑒥𑒹𑒮𑒲 𑒔𑒱𑒏𑓂𑒏𑒢𑒼-𑒔𑒳𑒢𑒧𑒳𑒢। 𑒮𑓂𑒟𑒰𑒢𑒏 𑒣𑒴𑒥𑒰𑒩𑒱 𑒦𑒰𑒑 𑒆𑒿𑒔𑒑𑒩 𑒣𑒯𑒰𑒛𑓃। 𑒣𑒯𑒱𑒢𑒹 𑒞𑒿 𑒧𑒢𑒧𑒹 𑒦𑒹𑒪𑒢𑒱 𑒖𑒹 𑒯𑒱𑒢𑓂𑒠𑒴𑒏𑒹𑒿 𑒩𑒼𑒏 𑒯𑒹𑒞𑒻 𑒧𑒳𑒠𑒰 𑒮𑒹 𑒢𑒻। 𑒠𑒹𑒐𑒱𑒢𑒱𑒯𑒰𑒩𑒧𑒹 𑒥𑒹𑒮𑒲 𑒯𑒱𑒢𑓂𑒠𑒴। 𑒏𑒥𑒴𑒪𑒼-𑒣𑒰𑒞𑒲 𑒥𑒹𑒮𑒲। 𑒮𑓂𑒟𑒰𑒢𑒏 𑒦𑒲𑒞𑒩𑒹 𑒩𑒯𑒟𑒱 𑒏𑒱 𑒑𑒰𑓀𑒖𑒰-𑒥𑒰𑒖𑒰𑒏 𑒮𑓀𑒑 𑒋𑒏𑒙𑒰 𑒖𑒳𑒪𑒳𑒮 𑒠𑒹𑒐𑒪𑒢𑒱। 𑒯𑒰𑒟𑒲, 𑒆𑒿𑒙𑒏 𑒮𑓀𑒑 𑒧𑒢𑒳𑒐𑒏𑒹𑒿 𑒔𑒪𑒥𑒻𑒞 𑒔𑒩𑒱𑒣𑒯𑒱𑒨𑒰 𑒑𑒰𑒛𑓃𑒲 (𑒥𑒱𑒢𑒳 𑒃𑓀𑒖𑒱𑒢𑒏, 𑒂𑒑𑒴-𑒣𑒰𑒕𑒴 𑒂𑒠𑒧𑒲 𑒚𑒹𑒪𑒻𑒞) 𑒧𑒩𑓂𑒠-𑒎𑒩𑒞𑒮𑒿 𑒮𑒖𑒪 𑒖𑒳𑒪𑒳𑒮। 𑒩𑓀𑒑-𑒩𑓀𑒑𑒏 𑒥𑒥𑒰𑒖𑒱𑒨𑒼𑒏 𑒮𑒧𑒴𑒯। 𑒢𑓀𑒑𑒰𑒮𑒿 𑒪𑓄 𑒏𑓄 𑒩𑒃𑒮 𑒡𑒩𑒱।
𑒠𑒩𑒑𑒰 𑒠𑒹𑒐𑒪𑒰𑒏 𑒣𑒕𑒰𑒞𑒱 𑒣𑒳𑒭𑓂𑒏𑒩 𑒑𑒹𑒪𑒰। 𑒁𑒖𑒧𑒹𑒩𑒧𑒹 𑒂𑒧, 𑒖𑒰𑒧𑒳𑒢, 𑒪𑒞𑒰𑒧 𑒃𑒞𑓂𑒨𑒰𑒠𑒱𑒏 𑒑𑒰𑒕 𑒮𑒹𑒯𑒼 𑒠𑒹𑒐𑒪𑒢𑒱। 𑒑𑒳𑒪𑒰𑒥 𑒤𑒴𑒪𑒏 𑒐𑒹𑒞𑒲 𑒥𑒯𑒳𑒞 𑒥𑒹𑒮𑒲। 𑒣𑒳𑒭𑓂𑒏𑒩 𑒋𑒏𑒙𑒰 𑒢𑒧𑒯𑒩 𑒣𑒼𑒐𑒩𑒱𑒢𑒳𑒧𑒰 𑒁𑒕𑒱। 𑒖𑒃𑒣𑒩 𑒥𑓂𑒩𑒯𑓂𑒧𑒰𑒏 𑒧𑓀𑒠𑒱𑒩 𑒁𑒕𑒱। 𑒁𑒢𑒹𑒏𑒼 𑒡𑒩𑓂𑒧𑒬𑒰𑒪𑒰 𑒂 𑒁𑒢𑒹𑒏𑒼 𑒒𑒰𑒙 𑒥𑒢𑒪 𑒁𑒕𑒱। 𑒖𑒯𑒱𑒢𑒰 𑒠𑒩𑒑𑒰𑒧𑒹 𑒦𑒲𑒛𑓃 𑒞𑒯𑒱𑒢𑒰 𑒣𑒳𑒭𑓂𑒏𑒩𑒼𑒧𑒹 𑒩𑒯𑒋।
𑒍𑒢𑒰 𑒖𑒹𑒥𑒰𑒏𑒰𑒪 𑒖𑒨𑒣𑒳𑒩𑒹𑒧𑒹 𑒥𑒮𑒮𑒿 𑒅𑒞𑒩𑒪𑒰। 𑒧𑒳𑒠𑒰 𑒩𑒰𑒞𑒱𑒧𑒹 𑒑𑒹𑒪𑒰। 𑒦𑒼𑒩𑒹 𑒁𑒢𑓂𑒯𑒩𑒑𑒩𑒹 𑒠𑒼𑒮𑒩 𑒥𑒮 𑒣𑒏𑒛𑓃𑒱 𑒪𑒹𑒪𑒢𑒱 𑒞𑒿𑒋 𑒠𑒹𑒐𑒻𑒏 𑒁𑒫𑒮𑒩 𑒍𑒃 𑒠𑒱𑒢 𑒏𑒱𑒕𑒳 𑒢𑒻 𑒦𑒹𑒙𑒪𑒢𑒱। 𑒁𑒖𑒧𑒹𑒩𑒏 𑒞𑒹𑒮𑒩𑒰 𑒠𑒱𑒢 𑒣𑒕𑒰𑒞𑒱 𑒖𑒨𑒣𑒳𑒩 𑒣𑒯𑒳𑒿𑒔𑒪𑒰। 𑒮𑒔𑒧𑒳𑒔 𑒏𑒪𑒰-𑒏𑒵𑒞𑓂𑒞𑒱 𑒬𑓂𑒩𑒹𑒭𑓂𑒚 𑒕𑒻 𑒐𑒰𑒮 𑒏𑓄 𑒣𑓂𑒩𑒰𑒔𑒲𑒢𑒏। 𑒧𑒲𑒩𑒰𑒏 𑒮𑓂𑒟𑒰𑒢 (𑒧𑒻𑒩𑒞𑒰) 𑒮𑒹𑒯𑒼 𑒑𑒹𑒪𑒰। 𑒥𑒮𑒢𑒳𑒧𑒰 𑒩𑒹𑒪𑒏 𑒑𑒰𑒛𑓃𑒲 𑒔𑒪𑒻 𑒕𑒻।
𑒋𑒏𑒙𑒰 𑒧𑓀𑒠𑒱𑒩 𑒁𑒕𑒱 𑒖𑒃𑒧𑒹 𑒁𑒢𑒹𑒏𑒼 𑒧𑒴𑒩𑓂𑒞𑒱 𑒁𑒕𑒱। 𑒧𑓀𑒠𑒱𑒩 𑒥𑒯𑒳𑒞 𑒢𑒧𑒯𑒩 𑒢𑒻 𑒧𑒳𑒠𑒰 𑒕𑒱𑒣𑒑𑒩𑒼 𑒢𑒻। 𑒜𑒼𑒪𑒣𑒹𑒙𑒰 𑒖𑒏𑒰𑒿 𑒁𑒕𑒱। 𑒁𑒼𑒢𑒰 𑒦𑒲𑒞𑒩 𑒋𑒥𑒰-𑒖𑒹𑒥𑒰 𑒪𑒹𑒪 𑒪𑒼𑒯𑒰𑒏 𑒏𑒹𑒥𑒰𑒛𑓃𑒲 𑒪𑒰𑒑𑒪। 𑒧𑒳𑒠𑒰 𑒮𑒠𑒱𑒐𑒢 𑒪𑒑𑒪𑒹 𑒩𑒯𑒻 𑒕𑒻। 𑒕𑒰𑒞𑒲 𑒦𑒩𑒱 𑒆𑒣𑒩 𑒔𑒰𑒩𑒴 𑒏𑒰𑒞 𑒢𑒧𑒑𑒩-𑒔𑒾𑒛𑓃𑒑𑒩 𑒐𑒱𑒛𑓃𑒏𑒲𑒢𑒳𑒧𑒰 𑒧𑒼𑒙𑒑𑒩 𑒪𑒼𑒯𑒰𑒏 𑒮𑒩𑒲 𑒪𑒰𑒑𑒪 𑒕𑒻। 𑒖𑒃 𑒯𑒼𑒃𑒞 𑒔𑒰𑒩𑒴 𑒏𑒰𑒞 𑒒𑒴𑒧𑒱 𑒏𑓄 𑒠𑒹𑒐𑒪 𑒖𑒰𑒃𑒞 𑒁𑒕𑒱। 𑒦𑒲𑒞𑒩𑒧𑒹 𑒩𑒰𑒖𑒠𑒩𑒥𑒰𑒩𑒏 𑒠𑒵𑒬𑓂𑒨 𑒥𑒢𑒪 𑒕𑒻। 𑒖𑒯𑒱𑒢𑒰 𑒩𑒰𑒖𑒠𑒩𑒥𑒰𑒩𑒧𑒹 𑒮𑒦 𑒏𑒱𑒕𑒳 𑒮𑒖𑒪 𑒩𑒯𑒻 𑒕𑒻 𑒞𑒯𑒱𑒢𑒰 𑒮𑒦 𑒏𑒱𑒕𑒳 𑒮𑒼𑒢𑒰𑒏 𑒥𑒢𑒪 𑒕𑒻। 𑒍𑒢𑒰 𑒠𑒹𑒬𑒧𑒹 𑒋𑒏-𑒣𑒩-𑒋𑒏 𑒮𑓂𑒟𑒰𑒢𑒼 𑒁𑒕𑒱 𑒂 𑒧𑓀𑒠𑒱𑒩𑒼 𑒁𑒕𑒱। 𑒖𑒯𑒱𑒢𑒰 𑒏𑒪𑒰𑒏 𑒏𑓂𑒭𑒹𑒞𑓂𑒩𑒧𑒹 𑒁𑒕𑒱 𑒞𑒯𑒱𑒢𑒰 𑒂𑒩𑓂𑒟𑒱𑒏 𑒏𑓂𑒭𑒹𑒞𑓂𑒩𑒧𑒹। 𑒧𑒳𑒠𑒰 𑒧𑒴𑒪 𑒫𑒮𑓂𑒞𑒳 𑒁𑒡𑒱𑒏𑒰𑓀𑒬 𑒮𑓂𑒟𑒰𑒢𑒏 𑒑𑒰𑒃𑒥 𑒁𑒕𑒱। 𑒍 𑒕𑒲 𑒍𑒏𑒩 𑒧𑒯𑒰𑒞𑓂𑒧𑓂𑒨। 𑒅𑒠𑒰𑒯𑒩𑒝𑒏 𑒩𑒴𑒣𑒧𑒹 “𑒏𑒰𑒧𑒩𑒴𑒣 𑒏𑒰𑒧𑒰𑒐𑓂𑒨𑒰” 𑒏𑒰𑒧𑒩𑒴𑒣 𑒏𑒰𑒧𑒰𑒐𑓂𑒨𑒰𑒧𑒹 𑒮𑒦 𑒏𑒟𑒴𑒏 𑒥𑒪𑒱 𑒣𑓂𑒩𑒠𑒰𑒢 𑒯𑒼𑒃𑒞 𑒕𑒻, 𑒧𑒳𑒠𑒰 𑒠𑒼𑒮𑒩-𑒞𑒹𑒮𑒩𑒧𑒹 𑒁𑓀𑒞𑒩 𑒕𑒻। 𑒏𑒱𑒕𑒳 𑒮𑓂𑒟𑒰𑒢𑒧𑒹 𑒐𑒰𑒮 𑒔𑒲𑒖𑒏 𑒥𑒪𑒱 𑒣𑒛𑓃𑒻 𑒕𑒻। 𑒞𑒯𑒱𑒢𑒰 𑒣𑒩𑒮𑒰𑒠𑒼 𑒁𑒕𑒱। 𑒖𑒑𑒢𑓂𑒢𑒰𑒟𑒏 𑒣𑒩𑒮𑒰𑒠𑒏 𑒁𑒪𑒑 𑒩𑒴𑒣-𑒑𑒳𑒝 𑒁𑒕𑒱।
𑒍𑒢𑒰 𑒏𑒼𑒢𑒼 𑒮𑓂𑒟𑒰𑒢𑒏 𑒧𑒯𑒑𑒰𑒃𑒏 𑒣𑒩𑒱𑒔𑒨 𑒥𑒰𑒩𑒯𑒼 𑒧𑒰𑒮 𑒩𑒯𑒪𑒰𑒣𑒩 𑒯𑒼𑒃 𑒕𑒻, 𑒮𑒹 𑒞𑒿 𑒩𑒰𑒖𑒮𑓂𑒟𑒰𑒢𑒧𑒹 𑒢𑒻 𑒩𑒯𑒪𑒰, 𑒧𑒳𑒠𑒰 𑒖𑒞𑒥𑒹 𑒠𑒱𑒢 𑒩𑒯𑒪𑒰 𑒞𑒃𑒧𑒹 𑒠𑒹𑒐𑒪𑒢𑒱 𑒖𑒹 𑒥𑒲𑒞𑒦𑒩𑒱𑒏 𑒮𑒖𑒧𑒢𑒱𑒏 𑒠𑒰𑒧, 𑒖𑒹𑒏𑒩 𑒠𑒰𑒧 𑒁𑒣𑒢𑒰 𑒌𑒚𑒰𑒧 𑒂𑒚𑒼 𑒂𑒢𑒰 𑒢𑒻 𑒯𑒹𑒞𑒃 𑒍 𑒠𑒮 𑒩𑒴𑒣𑒻𑒨𑒰𑒧𑒹 𑒥𑒱𑒏𑒰𑒃𑒞। 𑓑𑓙𑓙𑓙 𑒄.𑒧𑒹 𑒑𑒹𑒪 𑒩𑒯𑒟𑒱। 𑒞𑒲𑒢 𑒩𑒴𑒣𑒻𑒨𑒹 𑒔𑒰𑒯 𑒥𑒱𑒏𑒰𑒃𑒞 𑒕𑒪। 𑒞𑒯𑒱𑒨𑒰 𑒁𑒣𑒢𑒰 𑒌𑒚𑒰𑒧 𑒋𑒏 𑒩𑒴𑒣𑒻𑒨𑒹 𑒏𑒣 𑒥𑒱𑒏𑒰𑒃𑒞 𑒕𑒪𑒻। 𑒞𑒲𑒢 𑒩𑒴𑒣𑒻𑒨𑒹 𑒣𑒰𑒢 𑒥𑒱𑒏𑒰𑒃𑒞 𑒕𑒪 𑒁𑒣𑒢𑒰 𑒌𑒚𑒰𑒧 𑒥𑒰𑒩𑒯 𑒂𑒢𑒰 𑒩𑒯𑒻। 𑒋𑒏 𑒞𑒿 𑒁𑒣𑒢𑒰 𑒮𑒦 𑒖𑒏𑒰𑒿𑒞𑒱 𑒮𑒻𑒏𑒛𑓃𑒼 𑒁𑒢𑓂𑒢 𑒠𑒼𑒏𑒰𑒢𑒧𑒹 𑒢𑒻 𑒠𑒹𑒐𑒪𑒢𑒱 𑒧𑒳𑒠𑒰 𑒁𑒢𑓂𑒢𑒏 𑒦𑒰𑒅𑒧𑒹 𑒁𑒣𑒢𑒰 𑒮𑒦𑒮𑒿 𑒏𑒧 𑒁𑒢𑓂𑒞𑒩 𑒕𑒪𑒻। 𑒏𑒱𑒕𑒳 𑒮𑒮𑓂𑒞𑒼 𑒕𑒪𑒻। 𑒖𑒢𑒰 𑒔𑒲𑒢𑒱𑒨𑒰 𑒥𑒠𑒰𑒧। 𑒔𑒲𑒢𑒱𑒨𑒰 𑒥𑒠𑒰𑒧𑒏 𑒐𑒹𑒞𑒲 𑒯𑒼𑒃 𑒕𑒻। 𑒐𑒋𑒥-𑒣𑒲𑒁𑒥 𑒁𑒣𑒢𑒰 𑒮𑒦 𑒖𑒏𑒰𑒿 𑒢𑒻, 𑒮𑒲𑒧𑒱𑒞 𑒖𑒱𑒢𑒑𑒲 𑒮𑒲𑒧𑒱𑒞 𑒦𑒼𑒖𑒢। 𑒑𑒩𑒲𑒥𑒲 𑒮𑒹𑒯𑒼 𑒕𑒻। 𑒧𑒳𑒠𑒰 𑒁𑒣𑒢𑒰 𑒌𑒚𑒰𑒧𑒏 𑒏𑒰𑒩𑒝 𑒦𑒱𑒢𑓂𑒢 𑒁𑒕𑒱 𑒍𑒃𑒚𑒰𑒧𑒏 𑒏𑒰𑒩𑒝 𑒦𑒱𑒢𑓂𑒢 𑒕𑒻। 𑒖𑒯𑒱𑒢𑒰 𑒢𑒰𑒍𑓀 𑒧𑒩𑒴𑒦𑒴𑒧𑒱 𑒞𑒯𑒱𑒢𑒰 𑒮𑒔𑒧𑒳𑒔 𑒧𑒩𑒪𑒼 𑒁𑒕𑒱। 𑒢𑒹 𑒁𑒣𑒢𑒰 𑒮𑒦 𑒮𑒢 𑒧𑒾𑒮𑒧 𑒮𑒳𑒯𑒰𑒫𑒢𑒰 𑒂 𑒢𑒹 𑒑𑒰𑒕-𑒥𑒱𑒩𑒲𑒕𑒏 𑒂𑒢𑒢𑓂𑒠। 𑒧𑒳𑒠𑒰 𑒩𑒰𑒖𑒰𑒒𑒩𑒰𑒢𑒰 𑒂 𑒎𑒠𑓂𑒨𑒼𑒑𑒱𑒏 𑒒𑒩𑒰𑒢𑒰𑒏 𑒥𑒮𑒢𑒹 𑒏𑒪𑒼-𑒏𑒰𑒩𑒐𑒰𑒢𑒰 𑒂 𑒂𑒩𑒰𑒧𑒠𑒹𑒯 𑒑𑒰𑒛𑓃𑒱𑒨𑒼-𑒮𑒫𑒰𑒩𑒲।
𑒍𑒢𑒰 𑒚𑒲𑒏-𑒚𑒲𑒏 𑒢𑒻 𑒥𑒴𑒗𑒪 𑒕𑒪𑒢𑒱 𑒧𑒳𑒠𑒰 𑒔𑒰𑒩𑒴 𑒏𑒰𑒞 𑒖𑒹 𑒕𑒯𑒩𑒠𑒹𑒫𑒰𑒪𑒲 𑒠𑒹𑒢𑒹 𑒩𑒯𑒻 𑒍 𑒠𑒮 𑒏𑒱𑒪𑒼 𑒧𑒲𑒙𑒩𑒮𑒿 𑒥𑒹𑒮𑒱𑒨𑒹𑒧𑒹 𑒥𑒴𑒗𑒱 𑒣𑒛𑓃𑒪𑒢𑒱। 𑒥𑒲𑒔𑒧𑒹 𑒮𑒱𑒧𑒹𑓀𑒙𑒏 𑒏𑒰𑒩𑒐𑒰𑒢𑒰 𑒥𑒢𑒪। 𑒣𑒰𑒢𑒱, 𑒥𑒱𑒖𑒪𑒲𑒏 𑒥𑒹𑒫𑒮𑓂𑒟𑒰𑒏 𑒐𑒰𑒮 𑒥𑒹𑒫𑒮𑓂𑒟𑒰 𑒮𑒹𑒯𑒼। 𑒏𑒰𑒩𑒐𑒰𑒢𑒰𑒮𑒿 𑒠𑒕𑒱𑒢 𑒢𑒧𑒑𑒩 𑒔𑒾𑒛𑓃𑒑𑒩 𑒣𑒯𑒰𑒛𑓃 𑒕𑒻। 𑒖𑒃𑒧𑒹 𑒮𑒿 𑒛𑒰𑒨𑒢𑒰𑒧𑒰𑒙𑒱𑒮𑒿 𑒞𑒼𑒛𑓃𑒱 𑒣𑒰𑒟𑒩 𑒁𑒥𑒻 𑒕𑒻। 𑒍𑒢𑒰 𑒞𑒲𑒢 𑒯𑒖𑒰𑒩𑒮𑒿 𑒆𑒣𑒩 𑒬𑓂𑒩𑒧𑒱𑒏 𑒏𑒰𑒩𑓂𑒨𑒩𑒞 𑒧𑒳𑒠𑒰 𑒥𑒱𑒢𑒰 𑒚𑒾𑒩-𑒚𑒹𑒏𑒰𑒢𑒏। 𑒏𑒱𑒕𑒳 𑒑𑒼𑒙𑒹 𑒕𑒟𑒱 𑒖𑒱𑒢𑒏𑒰 𑒠𑒩𑒧𑒯𑒼 𑒢𑒲𑒏 𑒕𑒢𑓂𑒯𑒱 𑒂 𑒂𑒢𑒼 𑒂𑒢 𑒮𑒳𑒫𑒱𑒡𑒰 𑒕𑒢𑓂𑒯𑒱 𑒧𑒳𑒠𑒰 𑒁𑒡𑒱𑒏𑒰𑓀𑒬 𑒬𑓂𑒩𑒧𑒱𑒏𑒏 𑒖𑒱𑒢𑒑𑒲𑒏 𑒏𑒼𑒢𑒼 𑒚𑒾𑒩-𑒚𑒹𑒏𑒰𑒢 𑒢𑒻 𑒕𑒢𑓂𑒯𑒱। 𑒢𑒹 𑒏𑒩𑓂𑒧𑒔𑒰𑒩𑒲𑒏𑒹𑒿 𑒩𑒯𑒻𑒪𑒹 𑒂𑒫𑒰𑒮𑒏 𑒥𑒹𑒫𑒮𑓂𑒟𑒰 𑒕𑒻 𑒂 𑒢𑒹 𑒢𑒲𑒏 𑒧𑒖𑒴𑒩𑒲𑒏।
𑒏𑒰𑒩𑒐𑒰𑒢𑒰𑒏 𑒖𑒹 𑒧𑒳𑒐𑓂𑒨 𑒣𑓂𑒩𑒥𑓀𑒡𑒏 𑒕𑒪𑒰𑒯 𑒍 𑒮𑒹𑒫𑒰-𑒱𑒢𑒫𑒵𑒞𑓂𑒞𑒱 𑒂𑒃.𑒋.𑒋𑒮 𑒕𑒪𑒰𑒯। 𑒏𑒰𑒩𑒐𑒰𑒢𑒰𑒏 𑒦𑒲𑒞𑒩𑒹 𑒢𑒲𑒏 𑒂𑒫𑒰𑒮𑒏 𑒥𑒹𑒫𑒮𑓂𑒟𑒰 𑒕𑒪𑒢𑒱। 𑒠𑒩𑒧𑒯𑒼 𑒢𑒲𑒏। 𑒧𑒱𑒟𑒱𑒪𑒰𑓀𑒔𑒪𑒏 𑒠𑒳𑒩𑓂𑒦𑒰𑒑𑓂𑒨 𑒄𑒯𑒼 𑒁𑒕𑒱 𑒖𑒹 𑒮𑒹𑒫𑒰-𑒢𑒱𑒫𑒵𑒞𑓂𑒞𑒱 𑒢𑒲𑒏-𑒢𑒲𑒏 𑒣𑒠𑒰𑒡𑒱𑒏𑒰𑒩𑒱𑒨𑒼 𑒂 𑒁𑒡𑓂𑒨𑒰𑒣𑒏𑒼 𑒠𑒼𑒯𑒩𑒰-𑒠𑒼𑒯𑒩𑒰 𑒢𑒼𑒏𑒩𑒲 𑒏𑒩𑒋 𑒪𑒑𑒪𑒰𑒯 𑒁𑒕𑒱। 𑒂𑒿𑒃 𑒨𑒾, 𑒁𑒯𑒰𑒿𑒪𑒹 𑒫𑒰𑒢𑒣𑓂𑒩𑒮𑓂𑒟 𑒂𑒬𑓂𑒩𑒧/ 𑒮𑒢𑓂𑒨𑒰𑒮 𑒁𑒫𑒮𑓂𑒟𑒰 𑒏𑒯𑒱𑒨𑒰 𑒂𑒍𑒞 𑒂𑒏𑒱 𑒁𑒥𑒻-𑒢𑒹 𑒠𑒹𑒥𑒃! 𑒖𑒃𑒚𑒰𑒧 𑒧𑒱𑒟𑒱-𑒧𑒰𑒪𑒱𑒢𑒏 𑒋𑒯𑒹𑒢 𑒮𑓂𑒟𑒱𑒞𑒱 𑒩𑒯𑒞 𑒞𑒃𑒚𑒰𑒧 𑒦𑒑𑒫𑒰𑒢 𑒧𑒰𑒪𑒱𑒏 𑒕𑒼𑒛𑓃𑒱 𑒏𑒹 𑒯𑒹𑒞𑒰𑒯? 𑒏𑒰𑒿𑒔 𑒧𑒰𑒙𑒱𑒏 𑒋𑒏𑒙𑒰 𑒠𑒱𑒂𑒩𑒲 𑒥𑒢𑒰 𑒪𑒱𑒁। 𑒤𑒰𑒙𑒪-𑒣𑒳𑒩𑒰𑒢 𑒮𑒰𑒛𑓃𑒲 𑒤𑒰𑒛𑓃𑒱 𑒙𑒹𑒧𑒲 𑒥𑒢𑒰 𑒪𑒱𑒁। 𑒏𑒛𑓃𑒴 𑒞𑒹𑒪𑒏 𑒧𑒰𑒪𑒲𑒧𑒹 𑒧𑒐𑒰 𑒠𑒱𑒎 𑒂 𑒮𑒰𑒿𑒗𑒴 𑒣𑒯𑒩 𑒛𑒱𑒯𑒫𑒰𑒩 𑒮𑓂𑒟𑒰𑒢𑒧𑒹 𑒪𑒹𑒮𑒱 𑒠𑒱𑒎 𑒂 𑒋𑒏𑒙𑓀𑒑𑒰 𑒠𑓄 𑒠𑒳𑒢𑒴 𑒯𑒰𑒟 𑒖𑒼𑒛𑓃𑒱 𑒧𑒰𑓀𑒑𑒱 𑒪𑒱𑒁 𑒖𑒹 𑒫𑒱𑒠𑓂𑒨𑒰 𑒠𑒱𑒁, 𑒡𑒢 𑒠𑒱𑒁, 𑒮𑒧𑒰𑓀𑒑 𑒠𑒱𑒁!!
𑒧𑒳𑒐𑓂𑒨 𑒣𑓂𑒩𑒥𑓀𑒡𑒏𑒏𑒹𑒿 𑒠𑒹𑒐𑒱 𑒧𑒢𑒧𑒹 𑒅𑒚𑒪𑒢𑒱 𑒖𑒹 𑒏𑒱 𑒮𑒹𑒫𑒰-𑒱𑒢𑒫𑒵𑒞𑓂𑒞𑒱𑒏 𑒣𑒕𑒰𑒞𑒱 𑒖𑒹 𑒢𑒼𑒏𑒩𑒲 𑒏𑒹𑒢𑒱𑒯𑒰𑒩 𑒕𑒟𑒱 𑒍𑒃𑒮𑒿 𑒦𑓂𑒩𑒭𑓂𑒙𑒰𑒔𑒰𑒩𑒏𑒹𑒿 𑒥𑒪 𑒦𑒹𑒙𑒻 𑒕𑒻।
𑒔𑒾𑒟𑒰𑒃𑒨𑒼𑒮𑒿 𑒏𑒧 𑒏𑒩𑓂𑒧𑒔𑒰𑒩𑒲𑒏𑒹𑒿 𑒮𑓂𑒟𑒰𑒨𑒲 𑒢𑒼𑒏𑒩𑒲 𑒦𑒹𑒙𑒪 𑒕𑒪𑒢𑒱। 𑒖𑒱𑒢𑒏𑒰 𑒏𑒱𑒕𑒳-𑒏𑒱𑒕𑒳 𑒮𑒳𑒫𑒱𑒡𑒼 𑒕𑒪𑒢𑒱। 𑒥𑒰𑒏𑒲 𑒞𑒲𑒢-𑒔𑒾𑒟𑒰𑒃 𑒚𑒲𑒏𑒹𑒠𑒰𑒩𑒏 𑒁𑒢𑓂𑒞𑒩𑓂𑒑𑒞 𑒏𑒰𑒖 𑒏𑒩𑒻𑒞। 𑒍𑒢𑒰 𑒠𑒩𑒧𑒰𑒯𑒰 𑒏𑒧 𑒖𑒩𑒴𑒩 𑒕𑒪𑒢𑒱 𑒧𑒳𑒠𑒰 𑒑𑒰𑒧𑒏 𑒥𑒼𑒢𑒱𑒨𑒰𑒞𑒮𑒿 𑒥𑒹𑒮𑒲 𑒕𑒪𑒢𑒱𑒯𑒹𑒿। 𑒏𑒰𑒖𑒏 𑒜𑓀𑒑𑒼 𑒥𑒹𑒫𑒯𑒰𑒩𑒱𑒏। 𑒖𑒢𑒰 𑒠𑒴𑒙𑒰 𑒮𑒳𑒣𑒩-𑒥𑒰𑒃𑒖𑒩 𑒕𑒪𑒰𑒯। 𑒠𑒳𑒢𑒴𑒏 𑒥𑒲𑒔 𑒋𑒏𑒙𑒰 𑒧𑒼𑒙𑒩 𑒮𑒰𑒃𑒏𑒱𑒪। 𑒔𑒾𑒥𑒲𑒮𑒼 𑒒𑓀𑒙𑒰 𑒏𑒰𑒩𑒐𑒰𑒢𑒰 𑒔𑒪𑒻𑒞 𑒁𑒕𑒱। 𑒖𑒃 𑒮𑒳𑒣𑒰𑒩-𑒥𑒰𑒃𑒖𑒩𑒏 𑒛𑓂𑒨𑒴𑒙𑒲 𑒮𑒧𑒰𑒣𑓂𑒞 𑒦𑒹𑒪𑒢𑒱 𑒍 𑒧𑒼𑒙𑒩 𑒮𑒰𑒃𑒏𑒱𑒪𑒮𑒿 𑒛𑒹𑒩𑒰 𑒖𑒹𑒞𑒰, 𑒍𑒯𑒲 𑒑𑒰𑒛𑓃𑒲𑒮𑒿 𑒖𑒃 𑒑𑒰𑒛𑓃𑒲𑒮𑒿 𑒛𑓂𑒨𑒴𑒙𑒲 𑒏𑒩𑒻𑒥𑒪𑒰 𑒮𑒳𑒣𑒩-𑒥𑒰𑒃𑒖𑒩 𑒂𑒋𑒪 𑒕𑒪𑒰𑒯। 𑒞𑒿𑒋 𑒛𑓂𑒨𑒴𑒙𑒲𑒏 𑒯𑒱𑒮𑒰𑒫 𑒪𑒹𑒢𑒱𑒯𑒰𑒩 𑒮𑓀𑒑𑒲 𑒦𑓄 𑒖𑒰𑒃 𑒕𑒪𑒢𑒱। 𑒞𑒿𑒋 𑒮𑒦 𑒁𑒣𑒢 𑒛𑓂𑒨𑒴𑒙𑒲𑒏 𑒣𑒏𑓂𑒏𑒰 𑒕𑒪𑒰𑒯।
𑒠𑒼𑒐𑒩𑒰 𑒥𑒰𑒪𑒳 𑒮𑒦𑒚𑒰𑒧 𑒋𑒏𑒹 𑒩𑓀𑒑 𑒢𑒻। 𑒏𑒞𑒾-𑒏𑒞𑒾 𑒧𑒹𑒯𑒲 𑒥𑒰𑒪𑒳 𑒮𑒹𑒯𑒼 𑒕𑒻 𑒖𑒹𑒏𑒩𑒰 𑒐𑒹𑒞𑒲𑒏 𑒅𑒣𑒨𑒼𑒑𑒧𑒹 𑒂𑒢𑒪 𑒑𑒹𑒪 𑒕𑒻। 𑒥𑒯𑒳𑒞 𑒞𑒩𑒧𑒹 𑒣𑒰𑒢𑒱 (𑒪𑒹𑒁𑒩) 𑒞𑒿𑒋 𑒥𑒼𑒩𑒱𑓀𑒑𑒼 𑒧𑒯𑒑। 𑒑𑒯𑒳𑒧, 𑒥𑒠𑒰𑒧, 𑒔𑒲𑒢𑒱𑒨𑒰 𑒥𑒠𑒰𑒧, 𑒥𑒰𑒖𑒩𑒰, 𑒞𑒰𑒹𑒩𑒏 𑒐𑒹𑒞𑒲 𑒚𑒰𑒧-𑒚𑒲𑒧 𑒩𑒯𑒻।
𑒁𑒣𑒢𑒰 𑒮𑒦 𑒖𑒏𑒰𑒿 𑒢𑒹 𑒩𑓀𑒑-𑒩𑓀𑒑𑒏 𑒣𑒬𑒳 𑒂 𑒢𑒹 𑒣𑒏𑓂𑒭𑒲। 𑒑𑒼𑒙𑒱 𑒣𑓀𑒑𑒩𑒰-𑒧𑒼𑒩। 𑒁𑒣𑒢𑒰 𑒌𑒚𑒰𑒧 𑒖𑒹𑒩𑒏-𑒖𑒹𑒩 𑒏𑒾𑒂, 𑒧𑒹𑒢𑒰, 𑒥𑒑𑒩𑒰-𑒥𑒳𑒑𑒩𑒲 𑒁𑒕𑒱 𑒮𑒹 𑒢𑒻। 𑒫𑒰𑒞𑒰𑒫𑒩𑒝𑒼 𑒁𑒢𑒳𑒏𑒴𑒪 𑒢𑒻। 𑒢𑒹 𑒩𑒯𑒻𑒪𑒹 𑒑𑒰𑒕-𑒥𑒱𑒩𑒲𑒕 𑒂 𑒐𑒰𑒃𑒏 𑒩𑓀𑒑-𑒩𑓀𑒑𑒏 𑒫𑒮𑓂𑒞𑒳 𑒂 𑒢𑒹 𑒣𑒲𑒫𑒻𑒏 𑒣𑒰𑒢𑒱𑒏 𑒥𑒹𑒫𑒮𑓂𑒟𑒰। 𑒑𑒼𑒙𑒱-𑒣𑓀𑒑𑒩𑒰 𑒑𑒰𑒃𑒨𑒼 𑒧𑒳𑒠𑒰 𑒐𑒜𑓃-𑒣𑒰𑒢𑒱𑒏 𑒁𑒦𑒰𑒫 𑒖𑒹𑒩 𑒥𑒢𑒾𑒢𑒹। 𑒦𑒱𑒢𑒮𑒩𑒴 𑒣𑒯𑒩𑒏𑒹𑒿 𑒙𑓂𑒩𑒻𑒏𑓂𑒙𑒩𑒣𑒩 𑒯𑒩𑒱𑒁𑒩𑒼 𑒂 𑒮𑒳𑒐𑒪𑒼 𑒚𑒚𑒹𑒩 𑒢𑒹𑒢𑒹 𑒁𑒥𑒻 𑒂 𑒕𑒲𑒙𑒱 𑒠𑒃। 𑒑𑒰𑒋-𑒮𑒦 𑒁𑒣𑒢-𑒁𑒣𑒢 𑒐𑒰𑒋। 𑒣𑒩𑒥𑒰 𑒮𑒹𑒯𑒼 𑒕𑒻 𑒧𑒳𑒠𑒰 𑒐𑒰𑒋𑒥 𑒫𑒩𑓂𑒖𑒱𑒞। 𑒖𑒿 𑒐𑒹𑒥𑒻 𑒂 𑒣𑒏𑒛𑓃𑒰 𑒖𑒰𑒋𑒥 𑒞𑒿 𑒖𑒳𑒩𑓂𑒧𑒰𑒢𑒰 𑒪𑒰𑒑𑒞।
𑒩𑒰𑒖𑒮𑓂𑒟𑒰𑒢 𑒖𑒰𑒃𑒮𑒿 𑒛𑒹𑒜𑓃 𑒥𑒩𑓂𑒐 𑒣𑒴𑒩𑓂𑒫 𑒣𑒢𑒔𑒰𑒢𑒥𑒹 𑒥𑒩𑓂𑒐𑒏 𑒁𑒫𑒮𑓂𑒟𑒰𑒧𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒧𑒰𑒋 𑒧𑒩𑒱 𑒑𑒹𑒪𑒲। 𑒧𑒰𑒃𑒏 𑒁𑓀𑒞𑒱𑒧 𑒠𑒩𑓂𑒬𑒢। 𑒠𑒱𑒢𑒏 𑒥𑒰𑒩𑒯 𑒥𑒖𑒻𑒞। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒣𑒞𑓂𑒢𑒲𑒏𑒹𑒿 𑒍 𑒏𑒯𑒪𑒐𑒱𑒢-
“𑒞𑒴𑒿 𑒮𑒦 𑒐𑒰𑒃-𑒣𑒲𑒥𑒻 𑒑𑒹𑒪𑒯?”
𑒣𑒳𑒞𑒼𑒯𑒳- “𑒯𑒿।”
“𑒥𑒔𑓂𑒔𑒰, 𑒑𑒰𑒧𑒧𑒹 𑒁𑒕𑒱 𑒏𑒱𑒢𑒹?”
𑒐𑒰𑒃 𑒏𑒰𑒪𑒧𑒹 𑒠𑒹𑒐𑒱𑒢𑒹𑒯𑒱 𑒩𑒯𑒟𑒱𑒢, 𑒧𑒳𑒠𑒰 𑒪𑒑𑒪𑒹 𑒫𑒱𑒮𑒩𑒱 𑒑𑒹𑒪𑒲। 𑒧𑒢𑒧𑒹 𑒬𑓀𑒏𑒰 𑒦𑒹𑒪𑒢𑒱।
“𑒯𑒧𑒩𑒼 𑒏𑒢𑒹 𑒥𑒱𑒕𑒰𑒢 𑒏𑓄 𑒠𑒰𑒋।”
𑒣𑒳𑒞𑒼𑒯𑒳 𑒍𑒮𑒰𑒩𑒹𑒣𑒩 𑒥𑒑𑒪𑒹𑒧𑒹 𑒥𑒱𑒕𑒰𑒢 𑒏𑓄 𑒠𑒹𑒪𑒏𑒢𑒱। 𑒥𑒻𑒮𑒪𑒹-𑒥𑒻𑒮𑒪 𑒒𑒳𑒮𑒳𑒏𑒱 𑒏𑓄 𑒥𑒱𑒕𑒰𑒢𑒣𑒩 𑒣𑒯𑒳𑒿𑒔𑒱𑒞𑒹 𑒣𑒛𑓃𑒱 𑒩𑒯𑒪𑒲 𑒮𑒹 𑒣𑒛𑓃𑒪𑒹 𑒩𑒯𑒱 𑒑𑒹𑒪𑒲𑒯! 𑒋𑒏𑒰𑒠𑒬𑒲𑒏 𑒠𑒱𑒢।
𑒁𑓀𑒞𑒱𑒧 𑒮𑒧𑒋 𑒡𑒩𑒱 𑒧𑒰𑒋𑒏𑒹𑒿 𑒂𑒬𑒰 𑒢𑒻 𑒙𑒳𑒙𑒪𑒢𑒱। 𑒖𑒱𑒢𑒑𑒲𑒧𑒹 𑒢𑒧𑒯𑒩-𑒢𑒧𑒯𑒩 𑒠𑒳𑒩𑓂𑒠𑒱𑒢 𑒮𑒹𑒯𑒼 𑒋𑒪𑒢𑒱, 𑒞𑒿 𑒮𑒹𑒫𑒼 𑒋𑒞𑒹 𑒧𑒖𑒑𑒴𑒞 𑒩𑒯𑒪𑒢𑒱 𑒖𑒹 𑒂𑒬𑒰𑒏 𑒥𑒰𑒙 𑒣𑒏𑒛𑓃𑒢𑒯𑒱 𑒩𑒯𑒪𑒢𑒱।
𑒮𑒳𑒦𑓂𑒨𑒮𑓂𑒞 𑒣𑒩𑒱𑒫𑒰𑒩𑒧𑒹 𑒧𑒰𑒃𑒏 𑒖𑒢𑓂𑒧 𑒦𑒹𑒪 𑒕𑒪𑒢𑒱। 𑒠𑒴 𑒦𑒰𑒋-𑒥𑒯𑒲𑒢𑒱𑒏 𑒥𑒲𑒔 𑒣𑒱𑒞𑒰𑒏 𑒣𑒩𑒱𑒫𑒰𑒩 𑒕𑒪𑒢𑒱। 𑒥𑒯𑒲𑒢𑒱𑒏 𑒥𑒹𑒙𑒰 𑒢𑒩𑓂𑒮𑒱𑒑 𑒧𑒝𑓂𑒛𑒪 𑒠𑒲𑒣 𑒑𑒰𑒧𑒏 𑒕𑒪𑒐𑒱𑒢। 𑒖𑒱𑒢𑒏𑒰 𑓑𑓙𑓔𑓒 𑒄.𑒧𑒹 𑒗𑓀𑒗𑒰𑒩𑒣𑒳𑒩 𑒮𑒩𑓂𑒏𑒪𑒏 𑒂𑒢𑓂𑒠𑒼𑒪𑒢𑒧𑒹 𑒑𑒼𑒪𑒲 𑒪𑒰𑒑𑒪 𑒕𑒪𑒢𑒱। 𑒠𑒳𑒢𑒴 𑒑𑒼𑒙𑒹𑒏 (𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒂 𑒯𑒳𑒢𑒏𑒼) 𑒧𑒰𑒞𑓂𑒩𑒱𑒏 𑒧𑒢𑒮𑒰𑒩𑒰 (𑒠𑒩𑒦𑓀𑒑𑒰 𑒖𑒱𑒪𑒰, 𑒒𑒢𑒬𑓂𑒨𑒰𑒧𑒣𑒳𑒩 𑒥𑓂𑒪𑒾𑒏) 𑒋𑒏𑒹 𑒣𑒩𑒱𑒫𑒰𑒩। 𑒥𑒹𑒩𑒧𑒰𑒧𑒹 𑒧𑒰𑒃𑒏 𑒮𑒰𑒮𑒳𑒩, 𑒠𑒲𑒣𑒧𑒹 𑒣𑒲𑒮𑒏 (𑒠𑒲𑒠𑒲𑒏, 𑒖𑒱𑒢𑒏𑒩 𑒥𑒹𑒙𑒰 𑒢𑒩𑒮𑒱𑓀𑒑 𑒧𑒝𑓂𑒛𑒪) 𑒮𑒰𑒮𑒳𑒩, 𑒑𑒼𑒡𑒢𑒣𑒳𑒩𑒧𑒹 𑒖𑒹𑒚 𑒥𑒯𑒱𑒢 𑒖𑒹 𑒮𑒰𑒞 𑒦𑒰𑒋-𑒥𑒯𑒱𑒢𑒧𑒹 𑒮𑒦𑒮𑒿 𑒖𑒹𑒚। 𑒧𑒢𑒮𑒰𑒩𑒰 𑒣𑒩𑒱𑒫𑒰𑒩 𑒮𑒧𑓂𑒣𑒞𑓂𑒞𑒱𑒨𑒹𑒧𑒹 𑒁𑒑𑒳𑒂𑒋𑒪 𑒢𑒻 𑒮𑒧𑒰𑓀𑒑𑒼𑒧𑒹 𑒁𑒑𑒳𑒂𑒋𑒪। 𑒧𑒰𑒃𑒏 𑒧𑒾𑒮𑒲𑒏 𑒮𑒰𑒮𑒳𑒩 𑒥𑒹𑒩𑒧𑒹। 𑒯𑒳𑒢𑒏𑒹 𑒣𑒩𑒱𑒫𑒰𑒩𑒏 𑒣𑒼𑒐𑒩𑒱 𑒁𑒡𑒱𑒏𑒰𑒩𑒲 𑒣𑒼𑒐𑒩𑒱𑒏 𑒢𑒰𑒍𑓀𑒮𑒿 𑒖𑒰𑒢𑒪 𑒖𑒰𑒃𑒞 𑒁𑒕𑒱, 𑒖𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒒𑒩𑒏 𑒥𑒑𑒪𑒹𑒧𑒹 𑒁𑒐𑒢𑒼 𑒏𑒰𑒩𑒑𑒩 𑒁𑒕𑒱। 𑒒𑒩𑒹-𑒒𑒩𑒹 𑒏𑒪 𑒦𑒹𑒢𑒹 𑒢𑒯𑒰𑒋𑒥 𑒞𑒿 𑒏𑒧𑒱 𑒑𑒹𑒪 𑒕𑒻 𑒧𑒳𑒠𑒰 𑒧𑒰𑒕-𑒧𑒐𑒰𑒢𑒏 𑒥𑒐𑒰𑒩𑒲 𑒕𑒻। 𑒞𑒯𑒱𑒢𑒰 𑒋𑒏 𑒪𑒏𑒲𑒩𑒧𑒹 𑒞𑒲𑒢𑒙𑒰 𑒃𑒢𑒰𑒩 𑒮𑒹𑒯𑒼 𑒕𑒪𑒢𑒱, 𑒖𑒹 𑒦𑒑𑓂𑒢𑒰𑒫𑒬𑒹𑒭 𑒧𑒰𑒞𑓂𑒩 𑒩𑒯𑒱 𑒑𑒹𑒪 𑒕𑒻। 𑒞𑒲𑒢 𑒦𑒰𑒿𑒃𑒏 𑒦𑒻𑒨𑒰𑒩𑒲𑒏 𑒥𑒙𑒥𑒰𑒩𑒰𑒧𑒹 𑒔𑒰𑒢𑒲𑒏 𑒩𑒴𑒣𑒻𑒨𑒰 𑒑𑒢𑒱 𑒏𑓄 𑒢𑒻 𑒞𑒩𑒰𑒖𑒴𑒣𑒩 𑒞𑒾𑒪 𑒏𑓄 𑒥𑒰𑒩𑒯-𑒥𑒰𑒩𑒯 𑒣𑒮𑒹𑒩𑒲𑒏 𑒥𑒙𑒥𑒰𑒩𑒰 𑒦𑒹𑒪𑒢𑒱। 𑒂𑒹𑒃 𑒣𑒩𑒱𑒫𑒰𑒩𑒏 𑒪𑒰𑒑𑒱𑒧𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏 𑒣𑒱𑒞𑒰𑒏 𑒥𑒱𑒂𑒯 𑒯𑒹𑒥𑒰𑒏 𑒏𑒰𑒩𑒝 𑒕𑒪 𑒣𑒻𑒕𑒪𑒰 𑒃𑒞𑒱𑒯𑒰𑒮। 𑒖𑒃𑒧𑒹 𑒏𑒴𑒪-𑒧𑒴𑒪𑒮𑒿 𑒪𑓄 𑒏𑓄 𑒣𑒰𑒩𑒱𑒫𑒰𑒩𑒱𑒏 𑒥𑒹𑒫𑒯𑒰𑒩 𑒡𑒩𑒱 𑒁𑒥𑒻𑒞 𑒁𑒕𑒱। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒿 𑒆𑒣𑒩 𑒮𑒲𑒜𑓃𑒲 𑒡𑒩𑒱 𑒣𑒩𑒱𑒫𑒰𑒩𑒧𑒹 𑒯𑒩 𑒖𑒼𑒞𑒥 𑒂 𑒑𑒰𑒋 𑒠𑒴𑒯𑒥 𑒫𑒩𑓂𑒖𑒱𑒞 𑒕𑒪। 𑒧𑒳𑒠𑒰 𑒂𑒥 𑒢𑒻। 𑒧𑒾𑒮𑒲𑒏 (𑒧𑒰𑒃𑒏 𑒧𑒾𑒮𑒲) 𑒁𑒢𑒳𑒬𑓀𑒮𑒰𑒮𑒿 𑒧𑒰𑒃𑒏 𑒥𑒱𑒂𑒯 𑒋𑒏 𑒮𑒰𑒡𑒰𑒩𑒝 𑒣𑒩𑒱𑒫𑒰𑒩𑒧𑒹 𑒦𑒹𑒪𑒢𑒱। 𑒒𑒩𑒠𑒹𑒐𑒲𑒧𑒹 𑒣𑒰𑒿𑒔 𑒑𑒼𑒙𑒹 𑒖𑒹 𑒋𑒪𑒐𑒱𑒢 𑒮𑒹 𑒣𑒰𑒿𑒔𑒼 𑒣𑒰𑒿𑒔 𑒩𑓀𑒑𑒏। 𑒁𑒣𑒢-𑒁𑒣𑒢 𑒢𑒖𑒩𑒱𑒨𑒹 𑒮𑒦 𑒣𑒩𑒱𑒫𑒰𑒩 𑒠𑒹𑒐𑒪𑒢𑒱। 𑒋𑒏𑒙𑒰 𑒢𑒧𑒑𑒩-𑒕𑒛𑓃𑒑𑒩 𑒐𑒪𑒲𑒤𑒰 𑒮𑒹𑒯𑒼 𑒩𑒯𑒟𑒱𑒢। 𑒐𑒹𑒪𑒰 𑒣𑒕𑒰𑒞𑒱 𑒒𑒩𑒮𑒿 𑒖𑒐𑒢 𑒢𑒱𑒏𑒪𑒋 𑒪𑒑𑒪𑒰𑒯 𑒞𑒿 𑒔𑒾𑒏𑒚𑒱𑒧𑒹 𑒏𑒮𑒱 𑒏𑓄 𑒔𑒼𑒙 𑒪𑒑𑒪𑒢𑒱। 𑒍𑒃 𑒞𑒰𑒧𑒮𑒣𑒩 𑒥𑒰𑒖𑒱 𑒑𑒹𑒪𑒰𑒯 𑒖𑒹 𑒋𑒯𑒢𑒼 𑒚𑒰𑒧 𑒏𑒳𑒙𑒳𑒧𑒻𑒞𑒲 𑒏𑒩𑒥। 𑒖𑒹𑒏𑒩𑒰 𑒒𑒩 𑒢𑒹 𑒠𑒳𑒂𑒩 𑒕𑒻। 𑒧𑒳𑒠𑒰 𑒮𑒦 𑒔𑒳𑒣𑒔𑒰𑒣 𑒮𑒳𑒢𑒱 𑒪𑒹𑒪𑒢𑒱। 𑒧𑒾𑒮𑒲𑒏 (𑒧𑒰𑒃𑒏 𑒧𑒾𑒮𑒲) 𑒖𑒱𑒖𑓂𑒘𑒰𑒮𑒰 𑒩𑒯𑒢𑒱 𑒖𑒹 𑒁𑒣𑒢𑒰 𑒮𑒧𑓂𑒣𑒞𑒱 𑒢𑒯𑒱𑒨𑒹𑒿 𑒕𑒻 𑒞𑒿 𑒏𑒱 𑒯𑒹𑒞𑒻। 𑒁𑒣𑒢𑒰 𑒐𑒹𑒞-𑒣𑒟𑒰𑒩, 𑒣𑒼𑒐𑒩𑒱-𑒃𑒢𑒰𑒩 𑒞𑒐𑒢 𑒠𑒳𑒐 𑒏𑒟𑒲𑒏 𑒯𑒹𑒞𑒃। 𑒏𑒰𑒩𑒝𑒼 𑒕𑒪𑒢𑒱 𑒖𑒹 𑒮𑒰𑒮𑒳𑒩 𑒏𑒱𑒕𑒳𑒋 𑒠𑒱𑒢 𑒥𑒮𑒪𑒰 𑒣𑒕𑒰𑒞𑒱 𑒫𑒱𑒡𑒫𑒰 𑒦𑓄 𑒑𑒹𑒪 𑒩𑒯𑒟𑒱।
𑒠𑒼𑒮𑒩 𑒮𑒱𑒤𑒰𑒩𑒱𑒬 (𑒧𑒰𑒋𑒏 𑒥𑒱𑒂𑒯𑒏) 𑒧𑒾𑒮𑒲𑒏 𑒩𑒯𑒢𑒱। 𑒧𑒰𑒃𑒏 𑒖𑒹𑒚 𑒥𑒯𑒱𑒢 𑒑𑒼𑒡𑒢𑒣𑒳𑒩𑒧𑒹। 𑒑𑒼𑒡𑒢𑒣𑒳𑒩 𑒥𑒹𑒩𑒧𑒰 𑒮𑒙𑒪𑒹 𑒁𑒕𑒱। 𑒮𑒰𑒞 𑒦𑒰𑒋-𑒥𑒯𑒱𑒢𑒧𑒹 𑒧𑒾𑒮𑒲 𑒮𑒦𑒮𑒿 𑒖𑒹𑒚 𑒂 𑒧𑒰𑒋 𑒮𑒦𑒮𑒿 𑒕𑒼𑒙। 𑒏𑒩𑒲𑒥 𑒞𑒲𑒮 𑒥𑒩𑓂𑒐𑒏 𑒠𑒴𑒩𑒲। 𑒍𑒢𑒰 𑒍𑒯𑒼 𑒣𑒳𑒞𑓂𑒩 𑒫𑒱𑒯𑒲𑒢 𑒫𑒱𑒡𑒫𑒰 𑒦𑓄 𑒑𑒹𑒪 𑒕𑒪𑒐𑒱𑒢। 𑒧𑒳𑒠𑒰 𑒠𑒴𑒙𑒰 𑒮𑒢𑓂𑒞𑒰𑒢 𑒞𑒿 𑒕𑒪𑒢𑒱𑒯𑒹𑒿। 𑒯𑒳𑒢𑒏𑒼 𑒮𑒱𑒤𑒰𑒩𑒱𑒬 𑒦𑒹𑒪𑒢𑒱। 𑒞𑒹𑒮𑒩 𑒮𑒱𑒤𑒩𑒱𑒬 𑒠𑒲𑒣𑒏 (𑒢𑒩𑒮𑒱𑓀𑒯 𑒦𑒰𑒃𑒏) 𑒠𑒲𑒠𑒲𑒏 𑒦𑒹𑒪𑒢𑒱। 𑒣𑒩𑒱𑒫𑒰𑒩𑒧𑒹 𑒧𑒯𑒱𑒪𑒰 𑒮𑒧𑒴𑒯𑒏 𑒫𑒱𑒔𑒰𑒩 𑒏𑒰𑒙𑒥 𑒏𑒚𑒱𑒢 𑒦𑓄 𑒑𑒹𑒪𑒻। 𑒧𑒰𑒋𑒏 𑒥𑒱𑒂𑒯 𑒦𑓄 𑒑𑒹𑒪𑒢𑒱।
𑓓𑓕 𑒥𑒩𑓂𑒐𑒏 𑒂𑒨𑒳𑒮𑒿 𑒣𑒯𑒱𑒢𑒹 𑒫𑒱𑒡𑒥𑒰 𑒦𑓄 𑒑𑒹𑒪𑒲𑒯। 𑒣𑒱𑒞𑒰 𑒧𑒵𑒞𑓂𑒨𑒳𑒏 𑒣𑒕𑒰𑒞𑒱 𑒏𑒩𑒲𑒥 𑒮𑒰𑒚𑒱 𑒥𑒩𑓂𑒐 𑒖𑒲𑒫𑒱𑒞 𑒩𑒯𑒪𑒲। 𑒌 𑒮𑒰𑒚𑒱 𑒥𑒩𑓂𑒐𑒧𑒹 𑒋𑒏𑒙𑒰 (𑒢𑒻𑒯𑒩𑒏) 𑒮𑒳𑒦𑓂𑒨𑒮𑓂𑒞 𑒣𑒩𑒱𑒫𑒰𑒩𑒏𑒹𑒿 𑒅𑒖𑒛𑓃𑒪-𑒅𑒣𑒙𑒪 𑒠𑒹𑒐𑒪𑒐𑒱𑒢। 𑒏𑒼𑒮𑒲-𑒏𑒧𑒪𑒰𑒏 𑒔𑒣𑒹𑒙𑒧𑒹 𑒧𑒢𑒮𑒰𑒩𑒰 𑒑𑒰𑒧 𑒅𑒖𑒛𑓃𑒱 𑒑𑒹𑒪। 𑒥𑒲𑒔 𑒥𑒮𑓂𑒞𑒲 (𑒣𑒳𑒩𑒢𑒰 𑒥𑒮𑓂𑒞𑒲) 𑒠𑒹𑒢𑒹 𑒏𑒧𑒪𑒰 𑒥𑒯𑒱 𑒩𑒯𑒪 𑒁𑒕𑒱। 𑒞𑒲𑒢𑒴 𑒦𑒰𑒞𑒱𑒖 𑒂 𑒠𑒳𑒢𑒴 𑒣𑒼𑒞𑒰𑒏𑒹𑒿 𑒋𑒏-𑒋𑒏 𑒮𑒰𑒪 𑒖𑒯𑒪𑒧𑒹 𑒥𑒢𑓂𑒢 𑒠𑒹𑒐𑒪𑒢𑒱। 𑒫𑒱𑒡𑒫𑒰 𑒧𑒾𑒮𑒲 𑒠𑒹𑒐𑒪𑒢𑒱, 𑒫𑒱𑒡𑒫𑒰 𑒠𑒲𑒠𑒲 𑒂 𑒥𑒯𑒱𑒢 𑒠𑒹𑒐 𑒁𑒣𑒢𑒼 𑒫𑒻𑒡𑒫𑓂𑒨 𑒮𑓂𑒫𑒲𑒏𑒰𑒩 𑒏𑒹𑒪𑒢𑒱। 𑒢𑒩𑒮𑒱𑓀𑒯 𑒦𑒰𑒨𑒏𑒹𑒿 𑒑𑒼𑒪𑒲 𑒪𑒰𑒑𑒪 𑒠𑒹𑒐𑒪𑒢𑒱। 𑒞𑒞𑒥𑒹 𑒢𑒻 𑒠𑒹𑒐𑒪𑒢𑒱, 𑒣𑒩𑒱𑒫𑒰𑒩𑒏 𑒦𑒰𑒑𑒱𑒢𑒏 𑒅𑒖𑒛𑓃𑒪 𑒣𑒩𑒱𑒫𑒰𑒩 (𑒯𑒩𑒱𑒢𑒰𑒯𑒲) 𑒮𑒹𑒯𑒼 𑒠𑒹𑒐𑒪𑒢𑒱। 𑒖𑒱𑒢𑒑𑒲𑒏 𑒡𑒏𑓂𑒏𑒹 𑒢𑒹 𑒣𑓀𑒖𑒰 𑒧𑒖𑒑𑒴𑒞 𑒏𑒩𑒻 𑒕𑒻!
𑒧𑒢𑒮𑒰𑒩𑒰 𑒅𑒖𑒛𑓃𑒪𑒰𑒮𑒿 𑒠𑒲𑒣, 𑒑𑒼𑒡𑒢𑒣𑒳𑒩 𑒂 𑒥𑒹𑒩𑒧𑒰𑒏 𑒋𑒏 𑒣𑒩𑒱𑒫𑒰𑒩𑒮𑒿 𑒮𑒧𑓂𑒥𑒢𑓂𑒡𑒱𑒞 𑒩𑒯𑒢𑒹 𑒮𑒧𑓂𑒥𑒢𑓂𑒡 𑒧𑒖𑒑𑒴𑒞 𑒦𑓄 𑒑𑒹𑒪। 𑒣𑒩𑒱𑒫𑒰𑒩𑒏 𑒠𑒴 𑒮𑒴𑒞𑓂𑒩 𑒁𑒕𑒱। 𑒋𑒏 𑒫𑓀𑒬𑒑𑒞 𑒠𑒼𑒮𑒩 𑒥𑒹𑒫𑒯𑒰𑒩𑒑𑒞। 𑒋𑒏𑒚𑒰𑒧 𑒩𑒯𑒢𑒹 𑒂 𑒋𑒏𑒚𑒰𑒧 𑒢𑒻 𑒩𑒯𑒢𑒹 (𑒯𑒙𑒱 𑒏𑓄 𑒩𑒯𑒢𑒹) 𑒮𑒧𑓂𑒥𑒢𑓂𑒡 𑒣𑓂𑒩𑒦𑒰𑒫𑒱𑒞 𑒯𑒼𑒃𑒞𑒹 𑒁𑒕𑒱। 𑒢𑒩𑒮𑒱𑓀𑒯 𑒧𑒝𑓂𑒛𑒪𑒏 𑒣𑒩𑒱𑒫𑒰𑒩 𑒂 𑒥𑒹𑒩𑒧𑒰𑒏 𑒣𑒩𑒱𑒫𑒰𑒩𑒧𑒹 𑒧𑒰𑒞𑓂𑒩𑒱𑒏𑒏 𑒮𑒧𑓂𑒥𑒢𑓂𑒡 𑒥𑒢𑒱 𑒑𑒹𑒪 𑒁𑒕𑒱। 𑒖𑒐𑒢 𑒢𑒩𑒮𑒱𑓀𑒯 𑒧𑒝𑓂𑒛𑒪𑒏𑒹𑒿 𑒑𑒼𑒪𑒲 𑒪𑒑𑒪𑒢𑒱, 𑒃𑒪𑒰𑒖𑒏 𑒠𑒩𑒧𑒱𑒨𑒰𑒢 𑒥𑒯𑒳𑒞 𑒠𑒱𑒢 𑒡𑒩𑒱 𑒥𑒹𑒩𑒧𑒹𑒧𑒹 𑒩𑒯𑒪𑒰𑒯।
𑒧𑒰𑒋𑒏 𑒧𑒳𑒃𑒪𑒰 𑒣𑒕𑒰𑒞𑒱 𑒮𑒩𑒰𑒡𑒏 𑒮𑒫𑒰𑒪 𑒅𑒚𑒪𑒢𑒱। 𑒮𑓂𑒟𑒱𑒞𑒱 𑒢𑒲𑒏 𑒢𑒻 𑒕𑒪𑒢𑒱, 𑒧𑒳𑒠𑒰 𑒮𑒧𑒰𑒖𑒼 𑒞𑒿 𑒌 𑒮𑒧𑒮𑓂𑒨𑒰𑒏𑒹𑒿 𑒧𑒹𑒙𑒰 𑒔𑒳𑒏𑒪 𑒁𑒕𑒱 𑒞𑒿𑒋 𑒞𑒹𑒯𑒹𑒢 𑒮𑒧𑒮𑓂𑒨𑒰 𑒢𑒯𑒱𑒨𑒹𑒿 𑒥𑒴𑒗𑒱 𑒣𑒛𑓃𑒪𑒢𑒱। 𑒧𑒳𑒠𑒰 𑒧𑒢𑒧𑒹 𑒠𑒴𑒙𑒰 𑒮𑒫𑒰𑒪 𑒁𑒣𑒢𑒼 𑒅𑒚𑒪 𑒩𑒯𑒢𑒱, 𑒥𑒰𑒖𑒟𑒱 𑒢𑒻। 𑒏𑒰𑒩𑒝 𑒮𑓂𑒣𑒭𑓂𑒙, 𑒥𑒩𑒱𑒂𑒞𑒲𑒏 𑒧𑒩𑒖𑒰𑒠𑒲 𑒦𑒼𑒖𑒏 𑒚𑒯𑒰𑒏𑒰 𑒞𑒿 𑒢𑒻, 𑒞𑒲𑒮-𑒔𑒰𑒪𑒲𑒮 𑒯𑒖𑒰𑒩𑒏 𑒏𑒰𑒖। 𑒣𑓂𑒩𑒬𑓂𑒢 𑒩𑒯𑒻 𑒖𑒹 𑒋𑒏 𑒥𑒹𑒩 𑒐𑒹𑒪𑒯𑒼-𑒥𑒱𑒢𑒳-𑒐𑒹𑒪𑒯𑒼𑒏𑒹𑒿 𑒐𑒳𑒂 𑒮𑒧𑓂𑒥𑒢𑓂𑒡 𑒞𑒼𑒛𑓃𑒱 𑒪𑒹𑒞𑒰। 𑒦𑒹𑒩𑒱 𑒣𑒹𑒙 𑒦𑒼𑒖 𑒐𑒰𑒃 𑒠𑒳𑒂𑒩𑒹 𑒠𑒱𑒢-𑒩𑒰𑒞𑒱𑒏 𑒮𑒧𑒋 𑒪𑒳𑒙𑒰 𑒠𑒹𑒪 𑒖𑒰𑒋, 𑒄 𑒢𑒲𑒏 𑒢𑒻 𑒦𑒹𑒪। 𑒧𑒳𑒠𑒰 𑒛𑒩 𑒄𑒯𑒼 𑒩𑒯𑒢𑒱, 𑒋𑒯𑒢𑒼 𑒪𑒼𑒏𑒏 𑒞𑒿 𑒏𑒧𑒲 𑒢𑒻 𑒖𑒹 𑒁𑒢𑒏𑒰 𑒌𑒚𑒰𑒧 𑒣𑒪𑓂𑒟𑒰 𑒧𑒰𑒩𑒱 𑒠𑒃 𑒕𑒟𑒱𑒢 𑒂 𑒁𑒣𑒢𑒰 𑒥𑒹𑒩𑒧𑒹...। 𑒠𑒼𑒮𑒩 𑒏𑒰𑒩𑒝 𑒧𑒢𑒧𑒹 𑒢𑒔𑒻𑒞 𑒩𑒯𑒢𑒱 𑒖𑒹 𑒏𑒩𑓂𑒧𑒏𑒰𑓀𑒛𑒏𑒹𑒿 𑒞𑒿 𑒯𑒙𑒹𑒪𑒢𑒱, 𑒧𑒳𑒠𑒰 𑒦𑒼𑒖 𑒞𑒿 𑒪𑒡𑒪𑒹 𑒩𑒯𑒱 𑒑𑒹𑒪𑒢𑒱। 𑒋𑒏 𑒠𑒱𑒮 𑒠𑒱𑒮 𑒯𑒼𑒃𑒢𑒱 𑒖𑒹 𑒋𑒏 𑒥𑒹𑒩 𑒦𑒼𑒖 𑒐𑒳𑒂 𑒯𑒩𑒠𑒰 𑒥𑒖𑒰 𑒠𑒻𑒟𑒱, 𑒏𑒧-𑒮𑒿-𑒏𑒧 𑒋𑒞𑒥𑒼 𑒞𑒿 𑒯𑒋𑒞 𑒖𑒹 𑒣𑒰𑒿𑒔 𑒑𑒰𑒧𑒏 𑒣𑓀𑒔𑒼 𑒂 𑒮𑒧𑒰𑒖𑒼 𑒂𑒿𑒐𑒱𑒏 𑒮𑒼𑒗𑒧𑒹 𑒠𑒹𑒐 𑒪𑒹𑒟𑒱𑒢। 𑒧𑒳𑒠𑒰 𑒏𑒱𑒕𑒳 𑒥𑒰𑒖𑒟𑒱 𑒢𑒻। 𑒧𑒳𑒠𑒰 𑒁𑒐𑒜𑓃𑒳𑒂 𑒧𑒹𑒒 𑒞𑒛𑓃𑒞𑒛𑓃𑒰𑒋𑒪। 𑒞𑒹𑒩𑒰𑒞𑒱 (𑒮𑒰𑒩𑒰 𑒥𑒢𑒾𑒪𑒰 𑒣𑒕𑒰𑒞𑒱) 𑒱𑒠𑒢 𑒮𑒩𑒰𑒡𑒏 𑒑𑒣-𑒮𑒣 𑒅𑒚𑒪, 𑒣𑒱𑒮𑒱𑒎𑒞 𑒦𑒰𑒨 (𑒑𑒼𑒢𑒩 𑒧𑒝𑓂𑒛𑒪) 𑒂𑒥𑒱 𑒏𑓄 (𑒯𑒩𑒱𑒢𑒰𑒯𑒲𑒮𑒿 𑒥𑒹𑒩𑒧𑒰) 𑒔𑒰𑒪𑒱 𑒠𑒹𑒪𑒐𑒱𑒢 𑒖𑒹 𑒧𑒰𑒧𑒲 𑒞𑒿 𑒥𑒹𑒙𑒹 𑒖𑒏𑒰𑒿 𑒣𑒼𑒮𑒪𑒢𑒱 𑒞𑒿𑒋 𑒯𑒧 𑒦𑒼𑒖 𑒏𑒩𑒥𑒻। 𑒂𑒚 𑒥𑒩𑓂𑒐 𑒣𑒯𑒱𑒢𑒹 𑒑𑒰𑒨𑒰 𑒮𑒹𑒯𑒼 𑒪𑓄 𑒑𑒹𑒪 𑒩𑒯𑒟𑒱𑒢। 𑒁𑒣𑒢 𑒮𑓂𑒟𑒱𑒞𑒱 (𑒑𑒼𑒢𑒩 𑒧𑒝𑓂𑒛𑒪𑒏) 𑒍𑒞𑒹 𑒢𑒲𑒏 𑒢𑒻, 𑒧𑒳𑒠𑒰 𑒕𑒼𑒙 𑒦𑒰𑒋𑒏 𑒥𑒹𑒙𑒰 𑒮𑒦 (𑒣𑒰𑒿𑒔𑒼 𑒦𑒰𑒿𑒃) 𑒏𑒧𑒰𑒮𑒳𑒞 𑒞𑒹𑒏𑒩 𑒯𑒴𑒥𑒰 𑒩𑒯𑒥𑒹 𑒏𑒩𑒢𑒱। 𑒦𑒰𑒞𑒱𑒖𑒏𑒹𑒿 𑒣𑒱𑒞𑒰𑒏 𑒥𑒱𑒧𑒰𑒩𑒲𑒏 𑒐𑒱𑒮𑓂𑒮𑒰 𑒥𑒹𑒩-𑒥𑒹𑒩 𑒮𑒳𑒢𑒰 𑒞𑒻𑒨𑒰𑒩 (𑒦𑒼𑒖 𑒏𑒩𑒻𑒪𑒹) 𑒏𑓄 𑒢𑒹𑒢𑒹 𑒩𑒯𑒟𑒱। 𑒍 𑒮𑒦 (𑒦𑒰𑒞𑒱𑒖) 𑒑𑒕𑒱 𑒪𑒹𑒪𑒏𑒢𑒱। 𑒖𑒯𑒱𑒢𑒰 𑒣𑒼𑒐𑒩𑒱𑒧𑒹 𑒧𑒰𑒕 𑒔𑒰𑒪 𑒠𑒻𑒞 𑒞𑒯𑒱𑒢𑒰 𑒦𑒻𑒨𑒰𑒏 𑒔𑒰𑒪 𑒠𑒹𑒐𑒱 (𑒖𑒹𑒚 𑒦𑒰𑒨, 𑒖𑒹 𑒣𑒯𑒱𑒢𑒯𑒱 𑒧𑒩𑒱 𑒑𑒹𑒪 𑒕𑒪𑒰𑒯) 𑒦𑒾𑒖𑒲 𑒣𑒩𑒱𑒫𑒰𑒩𑒮𑒿 𑒔𑒰𑒪 𑒠𑒹𑒪𑒐𑒱𑒢 𑒖𑒹 𑒖𑒞𑒹 𑒍 (𑒣𑒱𑒮𑒱𑒎𑒞 𑒦𑒰𑒨 𑒑𑒼𑒢𑒩 𑒧𑒝𑓂𑒛𑒪) 𑒏𑒩𑒟𑒱𑒢 𑒞𑒞𑒹 𑒯𑒧𑒯𑒴𑒿 𑒏𑒩𑒥𑒻। 𑒏𑒰𑒩𑒝 𑒕𑒪𑒢𑒱 𑒖𑒹 𑒠𑒴𑒙𑒰 𑒥𑒹𑒙𑒰 𑒠𑒱𑒪𑓂𑒪𑒲𑒧𑒹 𑒢𑒾𑒏𑒩𑒲 𑒏𑒩𑒋 𑒪𑒰𑒑𑒪 𑒩𑒯𑒢𑒱।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒯𑒱𑒮𑒰𑒥 𑒖𑒼𑒛𑓃𑒟𑒱 𑒞𑒿 𑒠𑒹𑒐𑒟𑒱 𑒖𑒹 𑒠𑒴𑒙𑒰 𑒦𑒼𑒖 𑒣𑒔𑒑𑒰𑒧𑒰𑒧𑒹 𑒦𑒹𑒪 𑒖𑒃𑒧𑒹 𑒞𑒲𑒮-𑒣𑒃𑒞𑒲𑒮 𑒯𑒖𑒰𑒩 𑒐𑒰𑒃-𑒣𑒲𑒥𑒻𑒧𑒹 𑒂 𑒞𑒲𑒮-𑒣𑒃𑒞𑒲𑒮 𑒯𑒖𑒰𑒩 𑒏𑓂𑒩𑒱𑒨𑒰-𑒏𑒩𑓂𑒧𑒧𑒹 𑒯𑒼𑒃 𑒕𑒻। 𑒁𑒣𑒢 𑒯𑒱𑒮𑒰𑒥 𑒂𑒡𑒰𑒧𑒹 𑒖𑒼𑒛𑓃𑒟𑒱। 𑒋𑒏𑒙𑒰 𑒢𑒫 𑒥𑒲𑒧𑒰𑒩𑒲 𑒑𑒰𑒧𑒏 𑒦𑒼𑒖𑒧𑒹 𑒮𑒹𑒯𑒼 𑒣𑒏𑒛𑓃𑒱 𑒪𑒹𑒢𑒹 𑒩𑒯𑒻 𑒖𑒹 𑒧𑒱𑒚𑒰𑒃𑒏 𑒦𑒼𑒖 𑒩𑒮𑒑𑒳𑒪𑓂𑒪𑒰𑒏 𑒦𑒼𑒖 𑒦𑓄 𑒑𑒹𑒪 𑒩𑒯𑒋। 𑒦𑒼𑒖𑒣𑒩 𑒢𑒖𑒩𑒱 𑒖𑒰𑒃𑒢𑒱 𑒞𑒿 𑒧𑒢 𑒦𑒙𑒏𑒱 𑒖𑒰𑒃𑒢𑒱। 𑒯𑒼𑒃𑒢𑒱 𑒖𑒹 𑒁𑒢𑒹𑒩𑒹 𑒤𑒹𑒩𑒰𑒧𑒹 𑒣𑒛𑓃𑒞𑒰। 𑒏𑒩𑓂𑒧𑒏𑒰𑓀𑒛 𑒁𑒖𑒮𑒏 𑒏𑒰𑓀𑒛 𑒕𑒲। 𑒦𑒢𑒮𑒱𑒨𑒰𑒏 𑒑𑒪𑒞𑒲 𑒫𑒰 𑒥𑒰𑒩𑒱𑒏𑒏 𑒑𑒪𑒞𑒲 𑒦𑒼𑒖𑒻𑒞𑒏𑒹𑒿 𑒔𑒙𑒻𑒞 𑒁𑒕𑒱। 𑒞𑒃 𑒮𑓀𑒑 𑒧𑒢𑒧𑒹 𑒋𑒏𑒙𑒰 𑒄𑒯𑒼 𑒅𑒚𑒻𑒞 𑒩𑒯𑒢𑒱 𑒖𑒹 𑒁𑒐𑒳𑒢𑒏𑒰 𑒖𑒹 𑒣𑒔𑒑𑒰𑒧𑒰 𑒥𑒢𑒪 𑒁𑒕𑒱, 𑒄 𑒞𑒿 𑒯𑒰𑒪𑒧𑒹 𑒥𑒢𑒪 𑒁𑒕𑒱। 𑒋𑒏𑒩 𑒐𑒹𑒥𑒹 𑒏𑒞𑒹 𑒏𑒹𑒪𑒱𑒢𑒱। 𑒦𑒼𑒖 𑒐𑒹𑒢𑒹 𑒕𑒟𑒱 𑒢𑒢𑒾𑒩, 𑒦𑒼𑒖 𑒐𑒹𑒢𑒹 𑒕𑒟𑒱 𑒪𑒏𑒮𑒹𑒢𑒰, 𑒣𑒩𑒮𑒰 𑒃𑒞𑓂𑒨𑒰𑒠𑒱𑒧𑒹। 𑒮𑒹 𑒞𑒿 𑒂𑒥 𑒤𑒳𑒙𑒱 𑒏𑓄 𑒍𑒯𑒼 𑒠𑒼𑒮𑒩 𑒠𑒱𑒮 𑒔𑒪𑒱 𑒑𑒹𑒪𑒻 𑒂 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒮𑒦 𑒠𑒼𑒮𑒩 𑒠𑒱𑒮 𑒦𑓄 𑒑𑒹𑒪𑒰। 𑒁𑒣𑒢 𑒂𑒿𑒙-𑒣𑒹𑒙 𑒠𑒹𑒐𑒟𑒱 𑒞𑒿 𑒔𑒾𑒟𑒰𑒃𑒣𑒩 𑒥𑒴𑒗𑒱 𑒣𑒛𑓃𑒢𑒱। 𑒦𑒰𑒞-𑒠𑒰𑒪𑒱𑒏 𑒦𑒼𑒖 𑒏𑒹𑒪𑒢𑒱। 𑒖𑒯𑒱𑒢𑒰 𑒏𑒟𑒰 𑒑𑒼𑒭𑓂𑒚𑒲 “𑒮𑒑𑒩 𑒩𑒰𑒞𑒱 𑒠𑒲𑒣 𑒖𑒩𑒨”𑒧𑒹 𑒦𑒰𑒨-𑒥𑓀𑒡𑒳𑒏𑒹𑒿 𑒏𑒩𑒾𑒢𑒹 𑒩𑒯𑒟𑒱, 𑒞𑒹𑒯𑒢𑒹 𑒦𑒼𑒖 𑒏𑒹𑒪𑒢𑒱, 𑒢𑒲𑒏 𑒖𑒮 𑒦𑒹𑒪𑒢𑒱। 𑒦𑒼𑒖 𑒐𑒳𑒂 𑒦𑒼𑒖 𑒐𑒰𑒋𑒥 𑒕𑒼𑒛𑓃𑒱 𑒠𑒹𑒪𑒢𑒱।
𑒧𑒰𑒃𑒏 𑒧𑒳𑒃𑒪𑒰 𑒣𑒕𑒰𑒞𑒱, 𑒖𑒢𑒰 𑒏𑒳𑒧𑓂𑒯𑒰𑒩𑒏 𑒂𑒥𑒰𑒧𑒹 𑒜𑒥𑒰𑒱𑒯 𑒪𑒑𑒻 𑒕𑒻 𑒞𑒯𑒱𑒢𑒰 𑒜𑒥𑒰𑒯𑒱 𑒪𑒑𑒱 𑒑𑒹𑒪𑒢𑒱। 𑒏𑒱𑒕𑒳𑒋 𑒠𑒱𑒢𑒏 𑒣𑒕𑒰𑒞𑒱 𑒮𑒰𑒮𑒳 𑒧𑒩𑒱 𑒑𑒹𑒪𑒢𑒱। 𑒯𑒳𑒢𑒏𑒼 𑒅𑒧𑒹𑒩 𑒏𑒩𑒲𑒥 𑒢𑒥𑓂𑒥𑒹 𑒥𑒩𑓂𑒐 𑒕𑒪𑒢𑒱। 𑒍𑒯𑒴 𑒦𑒼𑒖𑒏𑒹𑒿 𑒕𑒼𑒙 𑒏𑒹𑒪𑒢𑒱। 𑒕𑒼𑒙 𑒋𑒢𑒰 𑒖𑒹 𑒞𑒲𑒢-𑒦𑒰𑒋 𑒋𑒏 𑒥𑒯𑒱𑒢𑒏 𑒥𑒲𑒔 𑒮𑒰𑒮𑒳𑒏 𑒮𑒩𑒰𑒡। 𑒖𑒹𑒚 𑒦𑒰𑒨 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒏𑒩𑒻𑒞 𑒞𑒿𑒋 𑒮𑒩𑒏𑒰𑒩𑒲 𑒡𑒰𑒯𑒲। 𑒣𑒞𑓂𑒢𑒲𑒮𑒿 𑒞𑒏𑒩𑒰𑒩 𑒯𑒹𑒥𑒹 𑒏𑒩𑒞𑒢𑒱। 𑒧𑒳𑒠𑒰 𑒮𑒳𑒞𑒩𑒪𑒢𑒱। 𑒢𑒻𑒯𑒩 𑒪𑒑 𑒩𑒯𑒢𑒹 𑒣𑒞𑓂𑒢𑒲 𑒧𑒰𑒋𑒏 𑒖𑒲𑒫𑒱𑒞 𑒧𑒳𑒿𑒯 𑒠𑒹𑒐𑒋 𑒑𑒹𑒪𑒲𑒯 𑒮𑒹 𑒦𑒩𑒱 𑒮𑒩𑒰𑒡 𑒩𑒯𑒱𑒨𑒹 𑒑𑒹𑒪𑒲𑒯। 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒁𑒢𑒚𑒰 𑒠𑒹𑒪𑒢𑒱। 𑒧𑒳𑒠𑒰 𑒮𑒰𑒮𑒳𑒩𑒹𑒮𑒿 𑒮𑒧𑒰𑒠 𑒣𑒯𑒳𑒿𑒔𑒪𑒢𑒱 𑒖𑒹 𑒋𑒏-𑒮𑒫𑒰 𑒮𑒋 𑒏𑒚𑒱𑒂𑒩𑒲 𑒑𑒹𑒪 𑒩𑒯𑒻, 𑒞𑒹𑒏𑒩 𑒐𑒩𑓂𑒔 𑒁𑒣𑒢𑒹 𑒪𑒰𑒑𑒞 𑒏𑒱𑒢𑒹। 𑒮𑒳𑒢𑒱 𑒏𑓄 𑒁𑒢𑒚𑒰 𑒠𑒹𑒪𑒢𑒱। 𑒖𑒐𑒢 𑒂𑒚 𑒠𑒱𑒢 𑒥𑒱𑒞𑒪𑒻, 𑒣𑒩𑒮𑒳𑒋 𑒢𑒯-𑒏𑒹𑒬 𑒯𑒋𑒞 𑒞𑒿 𑒮𑒧𑒰𑒠 𑒣𑒚𑒰 𑒠𑒹𑒪𑒢𑒱 𑒖𑒹 𑒁𑒯𑒰𑒿 𑒮𑒦 𑒁𑒬𑒾𑒔𑒏 𑒦𑒼𑒖 𑒢𑒯-𑒏𑒹𑒬 𑒠𑒱𑒢 𑒏𑒩𑒻 𑒕𑒲। 𑒯𑒧 𑒮𑒦 (𑒥𑒹𑒩𑒧𑒰) 𑒕𑒼𑒛𑓃𑒱 𑒠𑒹𑒢𑒹 𑒕𑒱𑒌 𑒞𑒐𑒢 𑒁𑒯𑒲𑓀 𑒏𑒯𑒴 𑒖𑒹 𑒯𑒧𑒩 𑒂𑒋𑒥 𑒅𑒔𑒱𑒞 𑒯𑒋𑒞। 𑒧𑒳𑒠𑒰 𑒐𑒴𑒥 𑒒𑒾𑒔𑒰𑒪 𑒦𑒹𑒪𑒻। 𑒠𑒳𑒃𑒨𑒹 𑒠𑒱𑒢𑒧𑒹 𑒏𑒞𑒹 𑒒𑒾𑒔𑒰𑒪𑒹 𑒯𑒋𑒞, 𑒁𑒢𑒚𑒰 𑒠𑒹𑒪𑒢𑒱।
𑒮𑒰𑒮𑒳𑒩 𑒥𑒱𑒮𑒩𑒪𑒼 𑒢𑒹 𑒩𑒯𑒟𑒱 𑒂𑒏𑒱 𑒢𑒩𑒮𑒱𑓀𑒯 𑒧𑒰𑒧𑒰 (𑒏𑒩𑒲𑒥 𑓘𑓐-𑓘𑓕 𑒥𑒩𑓂𑒐𑒏 𑒩𑒯𑒟𑒱𑒢) 𑒧𑒩𑒱 𑒑𑒹𑒪𑒐𑒱𑒢। 𑒧𑒳𑒠𑒰 𑒠𑒲𑒣𑒏 𑒦𑒼𑒖 𑒢𑒧𑒯𑒩 𑒯𑒼𑒃𑒞𑒼 𑒕𑒼𑒙 𑒯𑒼𑒃 𑒕𑒻। 𑒑𑒰𑒧 𑒢𑒧𑒯𑒩 𑒞𑒿𑒋 𑒮𑒾𑓀𑒮𑒹 𑒑𑒰𑒧𑒏 𑒦𑒼𑒖 𑒏𑒩𑒻𑒞-𑒏𑒩𑒻𑒞 𑒦𑒼𑒖𑒻𑒞𑒏 𑒠𑒧 𑒐𑒛𑓃𑒰 𑒖𑒰𑒃 𑒕𑒻। 𑒧𑒳𑒠𑒰 𑒂𑒢 𑒑𑒰𑒧 𑒞𑒿 𑒋𑒏𑒼 𑒒𑒩𑒏 𑒏𑒱𑒁𑒋 𑒢𑒹 𑒯𑒳𑒁𑒋 𑒍 𑒞𑒿 𑒑𑒰𑒧𑒹 𑒏𑒯𑒰𑒋𑒞। 𑒮𑓀𑒨𑒼𑒑 𑒟𑒼𑒛𑓃𑒹𑒏 𑒢𑒲𑒏 𑒦𑒹𑒪𑒢𑒱 𑒖𑒹 𑒧𑒵𑒞𑓂𑒨𑒳𑒮𑒿 𑒏𑒩𑒲𑒥 𑒂𑒚 𑒥𑒩𑓂𑒐 𑒣𑒴𑒩𑓂𑒫 𑒮𑓂𑒫𑒞𑓀𑒞𑓂𑒩𑒰 𑒮𑒹𑒢𑒰𑒢𑒲 𑒦𑒹𑒙 𑒑𑒹𑒪 𑒩𑒯𑒢𑒱। 𑒖𑒃𑒮𑒿 𑒠𑒴-𑒁𑒜𑓃𑒰𑒃 𑒥𑒲𑒒𑒰 𑒐𑒹𑒞 𑒏𑒲𑒢𑒱 𑒪𑒹𑒪𑒢𑒱। 𑒮𑓂𑒫𑒞𑓀𑒞𑓂𑒩𑒞𑒰 𑒮𑒹𑒢𑒰𑒢𑒲 𑒦𑒹𑒙𑒻𑒮𑒿 𑒣𑒴𑒩𑓂𑒫 𑒑𑒰𑒧𑒹𑒧𑒹 𑒋𑒏 𑒑𑒼𑒙𑒹 𑒌𑒚𑒰𑒧 𑒢𑒾𑒏𑒩𑒲 𑒏𑒩𑒋 𑒪𑒰𑒑𑒪 𑒩𑒯𑒟𑒱। 𑒖𑒹 𑒣𑒹𑓀𑒬𑒢 𑒦𑒹𑒙𑒪𑒰𑒣𑒩 𑒕𑒼𑒛𑓃𑒪𑒢𑒱।
𑒔𑒰𑒩𑒱𑒧 𑒦𑒹𑒪𑒢𑒱 𑒖𑒹 𑒣𑒞𑓂𑒢𑒲𑒏 𑒧𑒰𑒧𑒰 (𑒧𑒧𑒱𑒎𑒞 𑒮𑒮𑒳𑒩) 𑒮𑒹𑒯𑒼 𑒍𑒯𑒲 𑒣𑒞𑒱𑒂𑒢𑒲𑒧𑒹 𑒔𑒪𑒱 𑒑𑒹𑒪𑒢𑒱। 𑒍𑒢𑒰 𑒯𑒳𑒢𑒏𑒼 𑒅𑒧𑒹𑒩 𑒁𑒮𑓂𑒮𑒲 𑒣𑒰𑒩 𑒏𑓄 𑒑𑒹𑒪 𑒩𑒯𑒢𑒱। 𑒧𑒳𑒠𑒰 𑒍𑒃𑒚𑒰𑒧𑒮𑒿 𑒂𑒥𑒰-𑒖𑒰𑒯𑒲 𑒢𑒻 𑒩𑒯𑒢𑒹 𑒏𑒼𑒢𑒼 𑒦𑒰𑒩𑒹 𑒢𑒹 𑒣𑒛𑓃𑒪𑒢𑒱।
𑒋𑒏 𑒣𑒲𑒜𑓃𑒲𑒏 (𑒣𑒳𑒩𑒰𑒢 𑒣𑒲𑒜𑓃𑒲𑒏) 𑒁𑒢𑓂𑒞 𑒦𑓄 𑒑𑒹𑒪𑒻।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒪𑒹𑒪 𑓑𑓙𑓙𑓙 𑒄. 𑒁𑒥𑒻𑒞-𑒁𑒥𑒻𑒞 𑒂𑒬𑒰-𑒱𑒢𑒩𑒰𑒬𑒰𑒏 𑒥𑒲𑒔 𑒮𑓀𑒏𑓂𑒩𑒧𑒝𑒏 𑒮𑓂𑒟𑒱𑒞𑒱 𑒥𑒢𑒋 𑒪𑒑𑒪 𑒩𑒯𑒢𑒱। 𑓑𑓙𑓙𑓘 𑒄.𑒧𑒹 𑒠𑒤𑒰 𑓓𑓐𑓗𑒏 𑒏𑒹𑒮𑒧𑒹 𑒮𑒖𑒰𑒋 𑒦𑓄 𑒑𑒹𑒪 𑒩𑒯𑒢𑒱। 𑒯𑒰𑒃 𑒏𑒼𑒩𑓂𑒙 𑒁𑒣𑒲𑒪 𑒯𑒼𑒃𑒧𑒹 𑓒𑓐-𑓒𑓕 𑒠𑒱𑒢 𑒪𑒰𑒑𑒱 𑒑𑒹𑒪𑒢𑒱। 𑒞𑒃 𑒮𑒧𑒻𑒧𑒹 𑒩𑒰𑒧𑒣𑒙𑓂𑒙𑒲 𑒖𑒹𑒪𑒧𑒹 𑒩𑒯𑒟𑒱। 𑒧𑒢𑒹-𑒧𑒢 𑒂𑒬𑓂𑒔𑒩𑓂𑒨 𑒯𑒼𑒢𑓂𑒯𑒱 𑒖𑒹 𑒥𑒱𑒢𑒰 𑒏𑒱𑒕𑒳 𑒏𑒹𑒢𑒾𑓀 𑒖𑒯𑒪𑒧𑒹 𑒕𑒟𑒱। 𑒞𑒯𑒱𑒨𑒼 𑒂 𑒁𑒐𑒢𑒼 𑒧𑒢 𑒢𑒻 𑒧𑒰𑒢𑒱 𑒩𑒯𑒪 𑒕𑒪𑒢𑒱 𑒖𑒹 𑒏𑒼𑒢𑒼 𑒑𑒪𑒞𑒲 𑒯𑒳𑒢𑒏𑒰𑒮𑒿 𑒦𑒹𑒪 𑒯𑒳𑒁𑒋। 𑒐𑒋𑒩, 𑒁𑒣𑒲𑒪 𑒦𑒹𑒪, 𑒖𑒧𑒰𑒢𑒞 𑒦𑒹𑒪𑒢𑒱। 𑒫𑒩𑓂𑒧𑒰𑒖𑒲 (𑒧𑒰𑒢𑒢𑒲𑒨 𑒢𑓂𑒨𑒰𑒨𑒧𑒴𑒩𑓂𑒞𑒱 𑒫𑒲𑒩𑒹𑒢𑓂𑒠𑓂𑒩 𑒣𑓂𑒩𑒮𑒰𑒠 𑒫𑒩𑓂𑒧𑒰, 𑒣𑒙𑒢𑒰 𑒯𑒰𑒃𑒏𑒼𑒩𑓂𑒙) 𑒏𑒹𑒿 𑒤𑒼𑒢 𑒏𑒹𑒪𑒐𑒱𑒢 𑒞𑒿 𑒏𑒯𑒪𑒏𑒢𑒱 𑒖𑒹 𑒏𑒱𑒕𑒳 𑒢𑒹 𑒯𑒋𑒞, 𑒢𑒱𑒔𑒹𑒢𑒮𑒿 𑒁𑒣𑒢 𑒏𑒰𑒖 𑒏𑒩𑒴। 𑒮𑒋𑒯 𑒦𑒹𑒪। 𑒏𑒹𑒮 𑒮𑒧𑒰𑒣𑓂𑒞 𑒦𑒹𑒪 𑒑𑒹𑒪𑒢𑒱 𑒮𑒹 𑒔𑒰𑒩𑒱 𑒧𑒰𑒮𑒏 𑒣𑒕𑒰𑒞𑒱 𑒥𑒳𑒗𑒪𑒐𑒱𑒢। 𑒞𑒹𑒏𑒩 𑒏𑒰𑒩𑒝 𑒩𑒯𑒋 𑒖𑒹 𑒏𑒹𑒮 𑒣𑒻𑒩𑒫𑒲 𑒏𑒩𑒻𑒏 𑒖𑒱𑒧𑓂𑒧𑒰 𑒢𑒻 𑒩𑒯𑒢𑒱। 𑒖𑒐𑒢 𑒥𑒯𑒳𑒞 𑒁𑒡𑒱𑒏 𑒏𑒹𑒮 𑒦𑓄 𑒑𑒹𑒪 𑒩𑒯𑒢𑒱 𑒞𑒐𑒢 𑒁𑒣𑒢𑒰𑒧𑒹 𑒫𑒱𑒔𑒰𑒩𑒱 𑒪𑒹𑒪𑒐𑒱𑒢 𑒖𑒹 𑒋𑒏-𑒋𑒏 𑒏𑒹𑒮𑒏 𑒦𑒰𑒩 𑒮𑒦 𑒏𑒼𑒃 𑒂𑒣𑒮𑒧𑒹 𑒪𑓄 𑒪𑒱𑒁। 𑒖𑒐𑒢 𑒏𑒹𑒮 𑒐𑒳𑒖𑒞 𑒂 𑒐𑒩𑓂𑒔 𑒥𑒜𑓃𑒞 𑒞𑒐𑒢 𑒔𑒢𑓂𑒠𑒰 𑒏𑓄 𑒪𑒹𑒥 𑒞𑒃 𑒥𑒲𑒔 𑒋𑒏 𑒂𑒠𑒧𑒲𑒏 𑒖𑒱𑒧𑓂𑒧𑒰𑒧𑒹 𑒩𑒯𑒞। 𑒯𑒰𑒃 𑒏𑒼𑒩𑓂𑒙𑒥𑒪𑒰 𑓓𑓐𑓗-𑒏𑒹𑒮 𑒣𑒯𑒱𑒢𑒯𑒱 𑒖𑒖𑒧𑒹𑓀𑒙 𑒞𑒏𑒏 𑒐𑒩𑓂𑒔 𑒖𑒧𑒰 𑒦𑓄 𑒑𑒹𑒪 𑒩𑒯𑒻। 𑒞𑒿𑒋 𑒢𑒻 𑒥𑒴𑒗𑒱 𑒮𑒏𑒪𑒰𑒯। 𑒠𑒼𑒮𑒩 𑒏𑒹𑒮 𑒖𑒹 𑒥𑒔𑒪 𑒩𑒯𑒻 𑒞𑒃𑒧𑒹 𑒮𑒧𑒗𑒾𑒞𑒰𑒏 𑒥𑒰𑒞 𑒦𑓄 𑒑𑒹𑒪 𑒩𑒯𑒢𑒱। 𑒍𑒢𑒰 𑒞𑒻𑒨𑒼 𑒏𑒱𑒕𑒳 𑒑𑒼𑒙𑒹 𑒕𑒯-𑒣𑒰𑒿𑒔 𑒏𑓄 𑒠𑒹𑒥𑒹 𑒏𑒹𑒪𑒏𑒢𑒱। 𑒞𑒿𑒋 𑒏𑒹𑒮𑒏 𑒔𑒱𑒢𑓂𑒞𑒰 𑒧𑒢𑒮𑒿 𑒯𑒙𑒱 𑒑𑒹𑒪 𑒩𑒯𑒢𑒱। 𑒍𑒢𑒰 𑒞𑒲𑒢 𑒥𑒩𑓂𑒐𑒏 𑒫𑒰𑒩𑓀𑒙𑒏 𑒣𑒕𑒰𑒞𑒱 𑒏𑒹𑒮𑒏 𑒦𑒰𑒿𑒖 𑒞𑒐𑒢 𑒪𑒑𑒪𑒢𑒱 𑒖𑒐𑒢 𑒟𑒰𑒢𑒰𑒮𑒿 𑒮𑒴𑒔𑒢𑒰 𑒦𑒹𑒙𑒪𑒢𑒱। 𑒗𑓀𑒗𑒰𑒩𑒣𑒳𑒩-𑒧𑒡𑒳𑒥𑒢𑒲𑒏 𑒥𑒲𑒔 𑒖𑒹 𑒏𑒼𑒩𑓂𑒙𑒏 𑒯𑒹𑒩𑒰-𑒤𑒹𑒩𑒲 𑒦𑒹𑒪 𑒞𑒃𑒧𑒹 𑒏𑒹𑒮 𑒯𑒩𑒰 𑒑𑒹𑒪 𑒕𑒪𑒻। 𑒤𑒰𑒮𑓂𑒙-𑒙𑓂𑒩𑒹𑒏 𑒏𑒼𑒩𑓂𑒙 𑒐𑒳𑒖𑒪𑒰 𑒣𑒕𑒰𑒞𑒱 𑒖𑒐𑒢 𑒞𑒰𑒏-𑒯𑒹𑒩 𑒦𑒹𑒪 𑒞𑒐𑒢 𑒦𑒹𑒙𑒪𑒻। 𑒏𑒱𑒕𑒳 𑒑𑒼𑒙𑒹 (𑓒𑓘𑒑𑒼𑒙𑒹𑒧𑒹) 𑒧𑒩𑒱 𑒑𑒹𑒪 𑒩𑒯𑒟𑒱, 𑒖𑒃𑒧𑒹 𑒞𑒲𑒢𑒙𑒰 𑒧𑒳𑒠𑓂𑒠𑒰𑒪𑒯 𑒂 𑒠𑒴𑒙𑒰 𑒑𑒫𑒰𑒯 𑒮𑒹𑒯𑒼। 𑒮𑓀𑒑𑒚𑒢𑒏 𑒩𑒴𑒣 𑒮𑒹𑒯𑒼 𑒕𑒱𑒛𑓃𑒱𑒨𑒰 𑒖𑒏𑒰𑒿 𑒑𑒹𑒪 𑒩𑒯𑒢𑒱। 𑒞𑒹𑒏𑒩 𑒥𑒯𑒳𑒞 𑒩𑒰𑒮 𑒏𑒰𑒩𑒝 𑒕𑒪𑒻। 𑒮𑒰𑒧𑒰𑒖𑒱𑒏, 𑒂𑒩𑓂𑒟𑒱𑒏, 𑒮𑒰𑒧𑓂𑒣𑓂𑒩𑒠𑒰𑒨𑒱𑒏 𑒃𑒞𑓂𑒨𑒰𑒠𑒱। 𑒖𑒯𑒱𑒢𑒰 𑒁𑓀𑒞𑒱𑒧 𑒏𑒹𑒮 𑒕𑒪𑒻 𑒞𑒯𑒱𑒢𑒰 𑒮𑒧𑒰𑒖𑒏 𑒁𑓀𑒞𑒱𑒧 𑒁𑒮𑓂𑒞𑓂𑒩𑒏 𑒣𑓂𑒩𑒨𑒼𑒑 𑒢𑒲𑒏 𑒖𑒏𑒰𑒿 𑒦𑒹𑒪𑒻। 𑒧𑒳𑒠𑒰 𑒖𑒹 𑒦𑒹𑒪𑒢𑒱, 𑒠𑒱𑒢𑒰𑓀𑒏 𑓕-𑓕-𑓒𑓐𑓐𑓕 𑒄.𑒏𑒹𑒿 𑒮𑒧𑒰𑒣𑓂𑒞 𑒦𑓄 𑒑𑒹𑒪𑒢𑒱। 𑒞𑒃 𑒥𑒲𑒔 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒠𑒼𑒮𑒩 𑒠𑒱𑒮 𑒥𑒜𑓃𑒥 𑒅𑒔𑒱𑒞 𑒢𑒻 𑒥𑒴𑒗𑒱 𑒣𑒛𑓃𑒢𑒱। 𑒅𑒣𑒠𑒹𑒬𑒏 𑒮𑒦 𑒞𑒿 𑒏𑒯𑒥𑒹 𑒏𑒩𑒢𑒱 𑒖𑒹 𑒁𑒢𑒹𑒩𑒹 𑒣𑒩𑒹𑒬𑒰𑒢 𑒯𑒼𑒃 𑒕𑒲। 𑒧𑒳𑒠𑒰 𑒮𑒱𑒧𑒩𑒱𑒨𑒰 𑒣𑓀𑒛𑒰𑒏 𑒅𑒣𑒠𑒹𑒬𑒹 𑒏𑒲। 𑒡𑒰𑒩 𑒑𑓀𑒑𑒰 𑒂 𑒫𑒱𑒔𑒰𑒩𑒡𑒰𑒩𑒰𑒏 𑒒𑒰𑒙 𑒮𑒱𑒧𑒩𑒱𑒨𑒰 𑒕𑒲 𑒂𑒏𑒱 𑒏𑒲 𑒕𑒲 𑒮𑒹 𑒞𑒿 𑒋𑒏𑒹 𑒡𑒰𑒩𑒧𑒹 𑒠𑒹𑒐𑒰𑒃 𑒕𑒻। 𑒋𑒏 𑒒𑒰𑒙 (𑒅𑒞𑓂𑒞𑒩) 𑒠𑒼𑒮𑒩 (𑒠𑒕𑒱𑒢) 𑒧𑒑𑓂𑒑𑒯।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒏𑒹𑒿 𑒢𑒫 𑒏𑒰𑒪𑓂𑒯𑒱 𑒠𑒹𑒐𑒻𑒏 𑒃𑒔𑓂𑒕𑒰 𑒬𑒳𑒩𑒴𑒯𑒹𑒮𑒿 𑒩𑒯𑒪𑒢𑒱। 𑒍𑒯𑒱𑒢𑒰 𑒢𑒻 𑒏𑒹𑒪𑒰𑒏 𑒣𑒕𑒰𑒞𑒱 𑒂𑒩𑒼 𑒧𑒖𑒑𑒴𑒞 𑒦𑒹𑒪𑒢𑒱। 𑒅𑒠𑒰𑒯𑒩𑒝, 𑒣𑒩𑒱𑒫𑒰𑒩𑒧𑒹 𑒮𑒰𑒡𑒰𑒩𑒝 𑒬𑒱𑒏𑓂𑒭𑒰𑒏 𑒂𑒑𑒧𑒢 𑒦𑒹𑒪 𑒕𑒪𑒢𑒱। 𑒞𑒃𑒚𑒰𑒧 𑒋𑒧.𑒋. 𑒞𑒏 𑒣𑒜𑓃𑒪𑒢𑒱। 𑒣𑒩𑒱𑒫𑒰𑒩𑒹 𑒢𑒻 𑒑𑒰𑒧𑒹𑒧𑒹 𑒣𑒯𑒱𑒪 𑒋𑒧.𑒋. 𑒦𑒹𑒪𑒰𑒯। 𑒍𑒢𑒰 𑒣𑒕𑒱𑒪𑒰 𑒣𑒲𑒜𑓃𑒲𑒧𑒹 𑒮𑓀𑒮𑓂𑒏𑒵𑒞𑒏 𑒧𑒰𑒡𑓂𑒨𑒧𑒮𑒿 𑒋𑒏-𑒣𑒩-𑒋𑒏 𑒫𑒱𑒠𑓂𑒫𑒰𑒢 𑒥𑒹𑒩𑒧𑒰 𑒦𑒹𑒪𑒰𑒯 𑒧𑒳𑒠𑒰 𑒖𑒹𑒢𑒩𑒪𑒧𑒹 𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪𑒹𑒙𑒰 𑒩𑒯𑒟𑒱। 𑒠𑒼𑒮𑒩, 𑒥𑒼𑒩𑒱𑓀𑒑-𑒏𑒩𑒾𑒢𑒹 𑒐𑒹𑒞𑒱𑒍𑒧𑒹 𑒏𑒱𑒕𑒳 𑒢𑒫𑒞𑒰 𑒂𑒥𑒱 𑒑𑒹𑒪 𑒕𑒪𑒻 𑒑𑒰𑒧𑒧𑒹। 𑒠𑒳𑒢𑒴 𑒩𑓀𑒑𑒏 𑒐𑒹𑒞𑒲 𑒏𑒩𑒻 𑒕𑒪𑒰𑒯 𑒧𑒝𑓂𑒛𑒪𑒖𑒲। 𑒠𑒳𑒢𑒴 𑒩𑓀𑒑𑒏𑒮𑒿 𑒧𑒞𑒪𑒥- 𑒁𑒢𑓂𑒢𑒼 𑒂 𑒢𑒑𑒠𑒱𑒨𑒼𑒏। 𑒢𑒑𑒠𑒲 𑒐𑒹𑒞𑒲𑒧𑒹 𑒞𑒩𑒏𑒰𑒩𑒲 𑒂 𑒤𑒪𑒏 𑒐𑒹𑒞𑒲 𑒮𑒹𑒯𑒼 𑒏𑒩𑒋 𑒪𑒑𑒪𑒰𑒯। 𑒍𑒢𑒰 𑒖𑒃 𑒩𑒴𑒣𑒹 𑒏𑒩𑒋 𑒔𑒰𑒯𑒻𑒞 𑒕𑒪𑒰𑒯 𑒍𑒃 𑒩𑒴𑒣𑒹 𑒢𑒻 𑒯𑒼𑒃𑒏 𑒏𑒰𑒩𑒝 𑒕𑒪, 𑒏𑒱𑒕𑒳 𑒮𑒧𑒻𑒍𑒏 𑒁𑒦𑒰𑒫 𑒂 𑒏𑒱𑒕𑒳 𑒅𑒣𑒠𑓂𑒩𑒫𑒼। 𑒐𑒹𑒞𑒲𑒏 𑒋𑒯𑒹𑒢 𑒅𑒖𑒰𑒛𑓃𑒱 𑒯𑒼𑒃𑒞 𑒩𑒯𑒢𑒱 𑒖𑒹 𑒖𑒿 𑒧𑒰𑒩𑒱-𑒗𑒑𑒛𑓃𑒰 𑒏𑒩𑒋 𑒪𑒑𑒱𑒞𑒟𑒱 𑒞𑒿 𑒠𑒱𑒢𑒧𑒹 𑒞𑒲𑒢 𑒥𑒹𑒩 𑒯𑒼𑒃𑒞𑒢𑒱। 𑒣𑒻𑒒 𑒮𑒧𑒮𑓂𑒨𑒰𑒏 𑒂𑒑𑒴 𑒕𑒼𑒙 𑒑𑒾𑒝 𑒣𑒛𑓃𑒱 𑒖𑒰𑒃 𑒕𑒻। 𑒧𑒳𑒠𑒰 𑒧𑒢 𑒞𑒼𑒛𑓃𑒻𑒏 𑒞𑒿 𑒁𑒮𑓂𑒞𑓂𑒩 𑒦𑒹𑒥𑒹 𑒏𑒋𑒪। 𑒅𑒣𑒠𑓂𑒩𑒫𑒼 𑒔𑒰𑒯𑒹 𑒖𑒞𑒋 𑒯𑒼𑒅 𑒧𑒳𑒠𑒰 𑒧𑒢𑒏𑒹𑒿 𑒣𑓂𑒩𑒦𑒰𑒫𑒱𑒞 𑒞𑒿 𑒏𑒩𑒱𑒞𑒹 𑒁𑒕𑒱। 𑒞𑒯𑒴𑒧𑒹 𑒐𑒹𑒞𑒲𑒏 𑒅𑒖𑒰𑒛𑓃𑒱 𑒧𑒹𑒯𑒢𑒞, 𑒣𑒴𑒿𑒖𑒲, 𑒮𑒧𑒋 𑒮𑒥𑒯𑒏 𑒏𑓂𑒭𑒞𑒱। 𑒖𑒃 𑒠𑒱𑒢 𑒧𑒡𑒳𑒥𑒢𑒲 𑒏𑒼𑒩𑓂𑒙𑒧𑒹 𑓓𑓐𑓗 𑒏𑒹𑒮𑒏 𑒖𑒖𑒧𑒹𑓀𑒙𑒧𑒹 𑒮𑒖𑒰 𑒦𑒹𑒪𑒢𑒱 𑒍𑒃 𑒠𑒱𑒢𑒏 𑒒𑒙𑒢𑒰- 𑒑𑒰𑒧𑒏 𑒖𑒞𑒹 𑒠𑒹𑒐𑒰𑒩 𑒫𑒱𑒩𑒼𑒡𑒲 𑒩𑒯𑒢𑒱 𑒍𑒏𑒩𑒰 𑒮𑒦𑒏𑒹𑒿 𑒄 𑒥𑒴𑒗𑒪 𑒩𑒯𑒻 𑒖𑒹 𑒮𑒖𑒰 𑒯𑒹𑒞𑒢𑒱, 𑒖𑒯𑒪 𑒖𑒹𑒞𑒰𑒯। 𑒖𑒐𑒢𑒹 𑒖𑒹𑒞𑒰𑒯 𑒞𑒐𑒢𑒹 𑒠𑒮 𑒥𑒩𑓂𑒐𑒮𑒿 𑒣𑒯𑒱𑒢𑒹 𑒟𑒼𑒛𑓃𑒹 𑒢𑒱𑒏𑒪𑒞𑒰। 𑒮𑒖𑒰𑒋 𑒦𑒹𑒪𑒢𑒱 𑒖𑒯𑒪 𑒑𑒹𑒪𑒰𑒯। 𑒞𑒲𑒢 𑒏𑒙𑓂𑒚𑒰 𑒥𑓀𑒡𑒰 𑒏𑒼𑒥𑒲 𑒥𑒼𑒩𑒱𑓀𑒑𑒥𑒪𑒰 𑒔𑒾𑒧𑒰𑒮𑒧𑒹 𑒏𑒹𑒢𑒹 𑒩𑒯𑒟𑒱। 𑒯𑒰𑒿 𑒋𑒏𑒙𑒰 𑒥𑒰𑒞 𑒂𑒩𑒼 𑒥𑒲𑒔𑒧𑒹 𑒏𑒯𑒱 𑒠𑒱𑒁𑒋 𑒔𑒰𑒯𑒻 𑒕𑒲 𑒖𑒹 𑓑𑓙𑓗𑓐-𑓗𑓑𑒮𑒿 𑓑𑓙𑓘𑓖-𑓘𑓗 𑒡𑒩𑒱 𑒥𑒹𑒩𑒧𑒰𑒏 𑒐𑒹𑒞𑒲 𑒂𑒑𑒴 𑒮𑒮𑒩𑒻𑒞 𑒩𑒯𑒪। 𑒁𑒢𑒹𑒏𑒼 𑒠𑒧𑒏𑒪, 𑒥𑒼𑒩𑒱𑓀𑒑 𑒦𑓄 𑒑𑒹𑒪। 𑒯𑒰𑒪𑒩 𑒔𑒏𑓂𑒏𑒲, 𑒟𑓂𑒩𑒹𑒬𑒩 𑒃𑒞𑓂𑒨𑒰𑒠𑒱 𑒮𑒹𑒯𑒼 𑒮𑒦 𑒦𑓄 𑒑𑒹𑒪। 𑒧𑒳𑒠𑒰 𑓑𑓙𑓘𑓖-𑓘𑓗𑒏 𑒥𑒰𑒜𑓃𑒱-𑒦𑒳𑒧𑒏𑒧 𑒐𑒹𑒞𑒲𑒏𑒹𑒿 𑒣𑒰𑒕𑒴 𑒡𑒏𑓂𑒏𑒰 𑒧𑒰𑒩𑒱 𑒠𑒹𑒪𑒏। 𑒋𑒏 𑒞𑒿 𑒮𑒩𑒏𑒰𑒩𑒲 𑒩𑒰𑒬𑒢𑒏 𑒔𑒯𑒙𑒱 𑒥𑒰𑒜𑓃𑒱-𑒦𑒳𑒧𑒏𑒧𑒏 𑒣𑒕𑒰𑒞𑒱 𑒪𑒰𑒑𑒱 𑒑𑒹𑒪 𑒠𑒼𑒮𑒩 𑒁𑒢𑒹𑒏𑒼 𑒥𑒼𑒩𑒱𑓀𑒑 𑒧𑒰𑒙𑒱𑒏 𑒞𑒩𑒧𑒹 𑒙𑒴𑒙𑒱-𑒤𑒴𑒙𑒱 𑒑𑒹𑒪। 𑒑𑒰𑒧𑒏 𑒐𑒹𑒞𑒲 𑒣𑒰𑒕𑒴 𑒮𑒮𑒩𑒱 𑒑𑒹𑒪। 𑒧𑒳𑒠𑒰 𑒯𑒱𑒢𑒏𑒩 𑒞𑒿 𑒖𑒲𑒫𑒱𑒏𑒰 𑒦𑒹𑒪𑒢𑒱, 𑒕𑒼𑒛𑓃𑒢𑒹 𑒏𑒹𑒢𑒰 𑒯𑒹𑒞𑒢𑒱? 𑒖𑒃 𑒠𑒱𑒢 𑓓𑓐𑓗𑒏 𑒖𑒖𑒧𑒹𑓀𑒙 𑒦𑒹𑒪𑒢𑒱 𑒍𑒃 𑒮𑒧𑒋 𑒖𑒹 𑒏𑒼𑒥𑒲 𑒕𑒪𑒢𑒱 𑒍 𑓒 𑒏𑒱𑒪𑒼𑒮𑒿 𑒪𑓄 𑒏𑓄 𑒔𑒰𑒩𑒱 𑒏𑒱𑒪𑒼 𑒡𑒩𑒱𑒏 𑒤𑒴𑒪 𑓑𑓘 𑒮𑒋 𑒑𑒰𑒕 𑒩𑒯𑒢𑒱। 𑒥𑓀𑒡𑒰 𑒏𑒼𑒥𑒲𑒏 𑒦𑒰𑒫 𑓒-𑓕 𑒩𑒴𑒣𑒻𑒨𑒹 𑒏𑒱𑒪𑒼 𑒩𑒯𑒻। 𑒁𑒢𑓂𑒠𑒰𑒖𑒱 𑒪𑒱𑒎 𑒖𑒹 𑒏𑒹𑒯𑒹𑒢 𑒢𑒼𑒏𑒮𑒰𑒢 𑒦𑒹𑒪𑒢𑒱। 𑒁𑒙𑓂𑒚𑒰𑒩𑒯𑒼 𑒮𑒋 𑒑𑒰𑒕 𑒠𑒱𑒢-𑒠𑒹𑒐𑒰𑒩 𑒅𑒐𑒰𑒛𑓃𑒱 𑒏𑓄 𑒪𑓄 𑒑𑒹𑒪𑒢𑒱। 𑒠𑒰𑒹𑒮𑒩, 𑒖𑒯𑒪 𑒢𑒱𑒏𑒪𑒪𑒰𑒏 𑒞𑒲𑒢 𑒧𑒰𑒮 𑒣𑒕𑒰𑒞𑒱 𑒏𑒕𑒳𑒥𑒲 𑒑𑒹𑒪𑒰𑒯। 𑒏𑒕𑒳𑒥𑒲 𑒅𑒞𑓂𑒞𑒩𑒫𑒰𑒩𑒱 𑒙𑒼𑒪𑒧𑒹 𑒋𑒏𑒙𑒰 𑒔𑒰𑒯𑒏 𑒠𑒼𑒏𑒰𑒢𑒠𑒰𑒩, 𑒖𑒹 𑒥𑒱𑒬𑒾𑒪𑒮𑒿 𑒏𑒕𑒳𑒥𑒲 𑒂𑒥𑒱 𑒥𑒮𑒱 𑒑𑒹𑒪 𑒁𑒕𑒱, 𑒔𑒰𑒯𑒹𑒏 𑒠𑒼𑒏𑒰𑒢𑒣𑒩 𑒖𑒢𑒰 𑒏𑒞𑒹 𑒦𑒰𑒩𑒲 𑒁𑒣𑒩𑒰𑒡 𑒏𑓄 𑒖𑒯𑒪𑒮𑒿 𑒂𑒋𑒪 𑒯𑒼𑒟𑒱 𑒞𑒯𑒲 𑒜𑓀𑒑𑒏 𑒥𑒹𑒫𑒯𑒰𑒩 𑒯𑒱𑒢𑒏𑒰 𑒮𑓀𑒑 𑒏𑒹𑒪𑒏𑒢𑒱। 𑒂 𑒮𑒹 𑒍 𑒖𑒹𑒏𑒩𑒰 𑒁𑒣𑒢𑒹 𑒚𑒹𑒏𑒰𑒢 𑒢𑒻 𑒕𑒻, 𑒧𑒳𑒠𑒰 𑒏𑒱 𑒏𑒩𑒱𑒞𑒟𑒱। 𑒏𑒕𑒳𑒥𑒲𑒏 𑒩𑒞𑓂𑒢 𑒏𑒰𑒪𑒲 𑒥𑒰𑒥𑒴𑒏 (𑒏𑒰𑒪𑒲 𑒏𑒰𑒢𑓂𑒞 𑒗𑒰, 𑒂𑒃.𑒣𑒲.𑒋𑒮.) 𑒣𑒩𑒱𑒫𑒰𑒩 𑒮𑓀𑒑 𑒐𑒹𑒢𑒰𑒃-𑒣𑒲𑒢𑒰𑒃 𑒂𑒥𑒰-𑒖𑒰𑒯𑒲 𑒕𑒢𑓂𑒯𑒱। 𑒍𑒢𑒰 𑒁𑒐𑒢 𑒡𑒩𑒱 𑒏𑒕𑒳𑒥𑒲𑒧𑒹 𑒠𑒳𑒃𑒨𑒹 𑒑𑒼𑒙𑒹 𑒂𑒃.𑒣𑒲.𑒋𑒮 𑒏𑒹𑒪𑒢𑒱 𑒁𑒕𑒱, 𑒞𑒃𑒧𑒹 𑒏𑒰𑒪𑒲 𑒥𑒰𑒥𑒴 𑒣𑒯𑒱𑒪। 𑒞𑒯𑒴𑒧𑒹 𑒫𑒱𑒠𑓂𑒨𑒰𑒩𑓂𑒟𑒱𑒨𑒹 𑒖𑒲𑒫𑒢𑒮𑒿 𑒧𑓀𑒔𑒏 𑒫𑒏𑓂𑒞𑒰 𑒥𑒢𑒱 𑒑𑒹𑒪 𑒩𑒯𑒟𑒱, 𑒑𑒲𑒞𑒰𑒏 𑒧𑓀𑒔 (𑒑𑒲𑒞𑒰 𑒣𑓂𑒩𑒫𑒔𑒢) 𑒣𑒩 𑒁𑒡𑒱𑒏 𑒥𑒻𑒮𑒻𑒞 𑒕𑒪𑒰𑒯।
𑒩𑒰𑒖𑒢𑒲𑒞𑒱 𑒮𑒹𑒯𑒼 𑒚𑒧𑒏𑒱 𑒑𑒹𑒪𑒻। 𑓑𑓙𑓖𑓐 𑒄.𑒏 𑒣𑒕𑒰𑒞𑒱 𑒧𑒡𑒳𑒥𑒢𑒲 𑒖𑒱𑒪𑒰 𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲𑒏 𑒧𑒳𑒐𑓂𑒨 𑒂𑒢𑓂𑒠𑒼𑒪𑒢 𑒏𑒼𑒬𑒲 𑒢𑒯𑒩𑒱, 𑒢𑒴𑒢𑒟𑒩, 𑒬𑒲𑒬𑒰 𑒣𑒰𑒢𑒲, 𑒥𑒩𑒰𑒯 𑒏𑓂𑒭𑒹𑒞𑓂𑒩𑒏 𑒛𑒻𑒧𑒣𑒩 𑒏𑒹𑒢𑓂𑒠𑓂𑒩𑒱𑒞 𑒦𑓄 𑒑𑒹𑒪। 𑒍𑒢𑒰 𑒂𑒢𑒼 𑒧𑒳𑒠𑓂𑒠𑒰 𑒩𑒯𑒥𑒹 𑒏𑒩𑒻। 𑒥𑒙𑒰𑒃𑒠𑒰𑒩𑒲 𑒖𑒧𑒲𑒢𑒏 𑒪𑒛𑓃𑒰𑒃 𑒖𑒼𑒩 𑒣𑒏𑒛𑓃𑒢𑒯𑒱 𑒩𑒯𑒻। 𑒢𑒯𑒩𑒱𑒏 𑒣𑒰𑒢𑒱 𑒂 𑒣𑒢𑒱𑒥𑒱𑒖𑒪𑒲 𑒖𑒢𑒰 𑒏𑒧𑓂𑒨𑒳𑒢𑒱𑒮𑓂𑒙𑒹 𑒣𑒰𑒩𑓂𑒙𑒲𑒏 𑒯𑒼𑒃 𑒞𑒯𑒱𑒢𑒰 𑒪𑒼𑒏𑒏 𑒡𑒰𑒩𑒝𑒰 𑒥𑒢𑒱 𑒑𑒹𑒪 𑒕𑒪𑒻। 𑒖𑒹𑒏𑒩𑒰 𑒮𑒧𑒰𑒡𑒰𑒢 𑒦𑒹𑒢𑒹 𑒧𑒱𑒟𑒱𑒪𑒰𑓀𑒔𑒪𑒏 𑒅𑒠𑓂𑒡𑒰𑒩 𑒦𑓄 𑒖𑒰𑒃𑒞। 𑒐𑒹𑒞𑒲𑒮𑒿 𑒅𑒠𑓂𑒨𑒼𑒑 𑒡𑒩𑒱 𑒥𑒜𑓃𑒱 𑒖𑒰𑒃𑒞, 𑒮𑒹 𑒢𑒻 𑒦𑒹𑒪। 𑒖𑒞𑒹 𑒫𑒱𑒩𑒼𑒡𑒲 (𑒏𑒧𑓂𑒨𑒳𑒢𑒱𑒮𑓂𑒙 𑒫𑒱𑒩𑒼𑒡𑒲) 𑒞𑒰𑒏𑒞 𑒕𑒪 𑒩𑓀𑒑-𑒩𑓀𑒑𑒏 𑒂𑒢𑓂𑒠𑒰𑒹𑒪𑒢, 𑒭𑒛𑓂𑒨𑓀𑒞𑓂𑒩 𑒏𑓄 𑒨𑒼𑒖𑒢𑒰𑒏𑒹𑒿 𑒁𑒐𑒢 𑒡𑒩𑒱 𑒮𑒤𑒪 𑒢𑒻 𑒯𑒳𑒁𑒋 𑒠𑒹𑒪𑒏। 𑒣𑒰𑒩𑓂𑒙𑒱𑒨𑒼𑒏 𑒩𑒰𑒖𑒢𑒲𑒞𑒱𑒧𑒹 𑒚𑒯𑒩𑒰𑒫 𑒂𑒥𑒱 𑒑𑒹𑒪। 𑒋𑒞𑒥𑒹 𑒢𑒻 𑒖𑒹𑒏𑒩𑒰 𑒮𑒦𑒏𑒹𑒿 𑒥𑒙𑒰𑒃-𑒖𑒧𑒲𑒢 𑒦𑒹𑒪 𑒍𑒯𑒼 𑒮𑒦 𑒍𑒏𑒩𑒰 (𑒍𑒃 𑒐𑒹𑒞𑒏𑒹𑒿) 𑒦𑒩𑒢𑒰 𑒪𑒑𑒰 𑒣𑓀𑒖𑒰𑒥-𑒠𑒱𑒪𑓂𑒪𑒲 𑒖𑒰𑒋 𑒪𑒰𑒑𑒪। 𑒣𑒩𑒱𑒝𑒰𑒧 𑒍𑒯𑒢 𑒂𑒥𑒋 𑒪𑒑𑒪𑒢𑒱 𑒖𑒹 𑒏𑒱 𑒏𑒹𑒪𑒰𑒯 𑒞𑒿 𑒏𑒱𑒕𑒳 𑒢𑒻। 𑒱𑒮𑒩𑓂𑒤 𑒖𑒱𑒪𑒹𑒏 𑒩𑒰𑒖𑒢𑒲𑒞𑒱 𑒢𑒻। 𑒑𑒰𑒧𑒼𑒧𑒹 𑒮𑒋𑒯 𑒦𑒹𑒪𑒢𑒱। 𑒧𑒢𑒧𑒹 𑒅𑒚𑒪𑒢𑒱 𑒖𑒹 𑒯𑒖𑒰𑒩𑒼 𑒥𑒩𑓂𑒐𑒏 𑒑𑒰𑒕 𑒏𑒱𑒕𑒳 𑒢𑒹 𑒏𑒱𑒕𑒳 𑒁𑒣𑒢𑒰𑒧𑒹 𑒢𑒫𑒲𑒢𑒞𑒰 𑒁𑒢𑒱𑒞𑒹 𑒩𑒯𑒻𑒋। 𑒔𑒰𑒯𑒹 𑒢𑒫 𑒙𑒳𑒮𑒰 𑒯𑒼𑒅 𑒂𑒏𑒱 𑒢𑒫 𑒧𑒳𑒛𑓃𑒲 𑒂𑒏𑒱 𑒢𑒫 𑒣𑒰𑒞 𑒂𑒏𑒱 𑒢𑒫 𑒏𑒪𑒬। 𑒫𑒱𑒔𑒰𑒩 𑒞𑒿 𑒅𑒚𑒪 𑒧𑒳𑒠𑒰 𑒧𑒢𑒧𑒹 𑒠𑒳𑒢𑒴 𑒏𑒹𑒮 𑒞𑒿 𑒩𑒯𑒥𑒹 𑒏𑒩𑒢𑒱। 𑒖𑒰𑒃-𑒁𑒥𑒻𑒏 𑒣𑒩𑒹𑒬𑒰𑒢𑒲 𑒢𑒻, 𑒏𑒹𑒮𑒏 𑒮𑒖𑒰𑒋𑒏 𑒣𑒩𑒹𑒬𑒰𑒢𑒲। 𑒠𑒳𑒢𑒴 𑒮𑒹𑒬𑒢 𑒏𑒹𑒮। 𑒠𑒴-𑒠𑒱𑒢𑒰-𑒔𑒰𑒩𑒱-𑒠𑒱𑒢𑒰 𑒞𑒿 𑒕𑒲 𑒢𑒻 𑒖𑒹 𑒥𑒳𑒗𑒥𑒻 𑒣𑒯𑒳𑒢𑒰𑒃 𑒏𑒩𑒋 𑒖𑒯𑒪 𑒑𑒹𑒪 𑒕𑒪𑒰𑒯। 𑒮𑒰𑒪𑒏-𑒮𑒰𑒪 𑒠𑒮 𑒮𑒰𑒪, 𑒥𑒰𑒩𑒯 𑒮𑒰𑒪। 𑒠𑒳𑒢𑒴 𑒧𑒱𑒪𑒰 𑒥𑒲𑒮 𑒮𑒰𑒪𑒮𑒿 𑒥𑒹𑒮𑒲। 𑒞𑒃 𑒥𑒲𑒔 𑒏𑒱 𑒏𑒋𑒪 𑒖𑒰𑒋। 𑒖𑒰𑒡𑒩𑒱 𑒏𑒹𑒮𑒮𑒿 𑒕𑒳𑒙𑒏𑒰𑒩𑒰 𑒢𑒻 𑒣𑒰𑒥𑒱 𑒪𑒹𑒞𑒰 𑒞𑒰𑒡𑒩𑒱 𑒠𑒼𑒮𑒩 𑒠𑒱𑒮 𑒥𑒜𑓃𑒥 𑒢𑒲𑒏 𑒢𑒻 𑒯𑒹𑒞𑒢𑒱।
𑒏𑒹𑒮𑒏 𑒕𑒳𑒙𑒏𑒰𑒩𑒰 𑒣𑒕𑒰𑒞𑒱 𑒏𑒩𑒥𑒹 𑒏𑒱 𑒏𑒩𑒱𑒞𑒟𑒱। 𑒑𑒳𑒖𑒩 𑒪𑒹𑒪 𑒐𑒹𑒞𑒲 𑒏𑒩𑒱𑒞𑒹 𑒕𑒪𑒰𑒯। 𑒢𑒼𑒏𑒩𑒲 𑒠𑒱𑒮 𑒏𑒯𑒱𑒨𑒼 𑒧𑒢𑒮𑒿 𑒞𑒏𑒥𑒹 𑒢𑒹 𑒏𑒹𑒪𑒰𑒯, 𑒥𑒹𑒣𑒰𑒩 𑒏𑒋𑒪𑒹 𑒢𑒹 𑒯𑒹𑒞𑒢𑒱। 𑒧𑒳𑒠𑒰 𑒖𑒱𑒢𑒑𑒱𑒨𑒼 𑒞𑒿 𑒕𑒼𑒙 𑒢𑒻 𑒁𑒕𑒱। 𑒏𑒚𑒯𑒲 𑒮𑒰𑒃𑒏𑒱𑒪 (𑒏𑒰𑒚𑒏 𑒣𑒰𑒃𑒛𑒱𑒪 𑒪𑒑𑒰𑒍𑒪 𑒮𑒰𑒃𑒏𑒱𑒪) 𑒞𑒿 𑒢𑒻 𑒖𑒹 𑒟𑒰𑒪𑒼-𑒏𑒰𑒠𑒼 𑒂𑒏𑒱 𑒩𑒮𑓂𑒞𑒰𑒏 𑒏𑒙𑒰𑒩𑒱𑒨𑒼𑒧𑒹 𑒏𑒢𑓂𑒯𑒰𑒣𑒩 𑒅𑒚𑒰 𑒪𑒹𑒞𑒰 𑒂 𑒙𑒣𑒱 𑒖𑒹𑒞𑒰। 𑒖𑒱𑒢𑒑𑒲𑒏 𑒑𑒰𑒛𑓃𑒲 𑒕𑒲। 𑒋𑒏 𑒣𑒙𑒩𑒲𑒣𑒩 𑒮𑒿 𑒠𑒼𑒮𑒩 𑒣𑒙𑒩𑒲𑒣𑒩 𑒂𑒢𑒥। 𑒋𑒏𑒩 𑒁𑒩𑓂𑒟 𑒄 𑒢𑒻 𑒖𑒹 𑒖𑒃𑒚𑒰𑒧 𑒣𑒰𑒯𑒱 𑒏𑒙𑒻𑒏 𑒖𑒼𑒑𑒰𑒩 𑒕𑒻 𑒞𑒃𑒚𑒰𑒧 𑒑𑒰𑒛𑓃𑒲𑒏𑒹𑒿 𑒪𑓄 𑒖𑒰 𑒏𑓄 𑒠𑒼𑒮𑒩 𑒣𑒙𑒩𑒲𑒣𑒩 𑒔𑒜𑓃𑒰 𑒠𑒱𑒨𑒾। 𑒠𑒼𑒮𑒩 𑒣𑒙𑒩𑒲𑒣𑒩 𑒂𑒢𑒻𑒏 𑒁𑒩𑓂𑒟 𑒄 𑒖𑒹 𑒕𑒼𑒙𑒲 𑒪𑒰𑒃𑒢 (𑒧𑒲𑒙𑒩 𑒑𑒹𑒖 𑒪𑒰𑒃𑒢) 𑒮𑒿 𑒥𑒛𑓃𑒲 𑒪𑒰𑒃𑒢𑒣𑒩 𑒔𑒜𑓃𑒋𑒥𑒰𑒏 𑒁𑒕𑒱। 𑒍𑒏𑒩 𑒂𑒿𑒙-𑒣𑒹𑒙 𑒕𑒼𑒙 𑒕𑒻 𑒧𑒳𑒠𑒰 𑒏𑒱𑒕𑒳 𑒣𑒰𑒩𑓂𑒙- 𑒡𑒳𑒩𑒲-𑒔𑒏𑓂𑒏𑒰 𑒥𑒠𑒪𑒢𑒹 𑒞𑒿 𑒛𑒱𑒥𑓂𑒥𑒰 𑒂 𑒂𑒢𑒼-𑒂𑒢𑒼 𑒫𑒮𑓂𑒞𑒳 𑒅𑒣𑒨𑒼𑒑𑒲 𑒥𑒢𑒱 𑒖𑒰𑒃 𑒕𑒻। 𑒣𑓂𑒩𑒬𑓂𑒢 𑒋𑒞𑒥𑒹 𑒢𑒻 𑒁𑒕𑒱, 𑒌𑒮𑒿 𑒂𑒑𑒴𑒍 𑒁𑒕𑒱। 𑒍 𑒄 𑒁𑒕𑒱 𑒖𑒹 𑒁𑒠𑒾𑒮𑒿 𑒁𑒥𑒻𑒞 𑒄 𑒖𑒱𑒢𑒑𑒲𑒏 𑒑𑒰𑒛𑓃𑒲 𑒕𑒲। 𑒖𑒞𑒹 𑒩𑓀𑒑𑒏 𑒣𑒙𑒩𑒲 𑒞𑒞𑒹 𑒩𑓀𑒑𑒏 𑒣𑒙𑒩𑒲𑒏 𑒑𑒞𑒱। 𑒞𑒃𑒚𑒰𑒧 𑒑𑒰𑒛𑓃𑒲𑒏𑒹𑒿 𑒠𑒼𑒮𑒩 𑒣𑒙𑒩𑒲𑒣𑒩 𑒪𑓄 𑒖𑒰𑒋𑒥, 𑒁𑒮𑒰𑒢 𑒢𑒻। 𑒮𑒰𑒯𑒱𑒞𑓂𑒨𑒼 𑒖𑒑𑒞𑒏 𑒖𑒹 𑒠𑒬𑒰-𑒠𑒱𑒬𑒰 𑒁𑒕𑒱 𑒍 𑒕𑒣𑒱𑒞 𑒢𑒯𑒱𑒨𑒹𑒿 𑒁𑒕𑒱। 𑒞𑒯𑒴𑒧𑒹 𑒪𑒰𑒚𑒲 𑒮𑒥𑒯𑒏 𑒯𑒰𑒟 𑒣𑒛𑓃𑒪 𑒁𑒕𑒱। 𑒏𑒼𑒢𑒼 𑒫𑒮𑓂𑒞𑒳 𑒧𑓀𑒑𑒪𑒰𑒣𑒩 𑒢𑒻 𑒠𑓄 𑒕𑒱𑒣𑒰 𑒪𑒹𑒥, 𑒪𑒰𑒟 𑒏𑒯𑒥𑒻𑒞 𑒁𑒕𑒱। 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨 𑒖𑒑𑒞 𑒮𑒧𑒰𑒖𑒮𑒿 𑒋𑒞𑒹 𑒠𑒴𑒩 𑒯𑒙𑒱 𑒑𑒹𑒪 𑒁𑒕𑒱 𑒖𑒹 𑒖𑒯𑒱𑒢𑒰 𑒧𑒢𑒳𑒭𑓂𑒨-𑒠𑒹𑒫𑒞𑒰𑒏 𑒥𑒼𑒙 𑒥𑒱𑒪𑒰 𑒑𑒹𑒪 𑒕𑒻। 𑒄 𑒱𑒮𑒩𑓂𑒤 𑒧𑒻𑒟𑒱𑒪𑒱𑒨𑒹𑒧𑒹 𑒢𑒻 𑒁𑒕𑒱 𑒂𑒢𑒼-𑒂𑒢 𑒮𑒰𑒯𑒱𑒞𑓂𑒨𑒧𑒹 𑒦𑒩𑒣𑒴𑒩 𑒁𑒕𑒱। 𑒖𑒢𑒰- 𑒏𑒥𑒲𑒩 𑒠𑒰𑒮𑒏 𑒔𑒩𑓂𑒔 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨𑒧𑒹 𑒏𑒧 𑒁𑒕𑒱 𑒧𑒳𑒠𑒰 𑒏𑒥𑒲𑒩 𑒠𑒰𑒮𑒏 𑒖𑒹 𑒖𑒱𑒢𑒑𑒲𑒏 (𑒖𑒲𑒫𑒢 𑒣𑒠𑓂𑒡𑒞𑒱) 𑒃𑒞𑒱𑒯𑒰𑒮 𑒣𑓂𑒩𑒮𑓂𑒞𑒳𑒞 𑒏𑒋𑒪 𑒑𑒹𑒪 𑒁𑒕𑒱 𑒍 𑒫𑒱𑒫𑒹𑒏𑒣𑒴𑒩𑓂𑒝 𑒖𑒏𑒰𑒿 𑒢𑒻 𑒁𑒕𑒱। 𑒫𑒱𑒫𑒹𑒏𑒣𑒴𑒩𑓂𑒝 𑒢𑒻 𑒯𑒹𑒥𑒰𑒏 𑒏𑒰𑒩𑒝𑒹 𑒏𑒥𑒲𑒩 𑒠𑒩𑓂𑒬𑒢 𑒮𑒧𑒰𑒖𑒮𑒿 𑒯𑒙𑒱 𑒑𑒹𑒪 𑒁𑒕𑒱। 𑒖𑒹𑒯𑒼 𑒮𑒦 𑒠𑒩𑓂𑒬𑒢𑒏 𑒣𑓂𑒩𑒔𑒰𑒩-𑒣𑓂𑒩𑒮𑒰𑒩 𑒏𑓄 𑒩𑒯𑒪 𑒕𑒟𑒱 𑒍𑒯𑒼 𑒮𑒦 𑒨𑒰 𑒞𑒿 𑒁𑒣𑒢𑒼 𑒑𑒳𑒧𑒩𑒰𑒯𑒹 𑒕𑒟𑒱 𑒢𑒻 𑒞𑒿 𑒪𑒰𑒟𑒲 𑒕𑒟𑒱 𑒖𑒹 𑒑𑒳𑒧𑒩𑒰𑒯 𑒏𑒹𑒢𑒹 𑒕𑒟𑒱। 𑒞𑒯𑒱𑒢𑒰 𑒞𑒳𑒪𑒮𑒲 𑒠𑒰𑒮 𑒑𑒼𑒮𑓂𑒫𑒰𑒧𑒲 𑒏𑒯𑒥𑒻𑒞 𑒕𑒟𑒱, 𑒧𑒳𑒠𑒰 𑒏𑒞𑒹𑒏 𑒑𑒰𑒋 𑒣𑒼𑒮𑒢𑒹 𑒕𑒪𑒰𑒯? 𑒖𑒩𑒴𑒩𑒞𑒱 𑒁𑒕𑒱 𑒨𑒳𑒑𑒰𑒢𑒳𑒮𑒰𑒩 𑒮𑒰𑒯𑒱𑒞𑓂𑒨𑒏 𑒱𑒢𑒩𑓂𑒧𑒰𑒝 𑒏𑒩𑒥।
𑒞𑒯𑒱𑒢𑒰 𑒖𑒰𑒡𑒩𑒱 𑒧𑒻𑒟𑒱𑒪𑒱𑒨𑒼 𑒮𑒰𑒯𑒱𑒞𑓂𑒨 𑒮𑒧𑒰𑒖𑒏 𑒫𑒮𑓂𑒞𑒳 (𑒮𑒧𑒰𑒖𑒏 𑒮𑒰𑒯𑒱𑒞𑓂𑒨) 𑒢𑒻 𑒥𑒢𑒞 𑒞𑒰𑒡𑒩𑒱 𑒏𑒹 𑒏𑒹𑒏𑒩𑒰 𑒏𑒱 𑒏𑒯𑒻 𑒕𑒱𑒌 𑒮𑒹 𑒦𑒰𑒿𑒖 𑒟𑒼𑒛𑓃𑒹 𑒪𑒰𑒑𑒞? 𑒞𑒿𑒋 𑒬𑒳𑒦𑒹𑒏𑓂𑒭𑒳 𑒮𑒰𑒯𑒱𑒞𑓂𑒨𑒏𑒰𑒩𑒏 𑒠𑒰𑒨𑒱𑒞𑓂𑒫 𑒥𑒢𑒻𑒋 𑒖𑒹 𑒋𑒏 𑒂𑒿𑒐𑒱 𑒮𑒧𑒰𑒖𑒣𑒩 𑒩𑒰𑒐𑒱 𑒠𑒼𑒮𑒩 𑒂𑒿𑒐𑒱 𑒏𑒰𑒑𑒖 𑒏𑒪𑒧𑒣𑒩 𑒩𑒐𑒞𑒰𑒯 𑒞𑒐𑒢𑒹 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨𑒹 𑒢𑒻 𑒧𑒱𑒟𑒱𑒪𑒰𑒏 𑒏𑒪𑓂𑒨𑒰𑒝 𑒯𑒋𑒞। 𑒩𑒰𑒖𑓂𑒨𑒏 𑒁𑒩𑓂𑒟 𑒖𑒿 𑒩𑒰𑒖𑒡𑒰𑒢𑒲𑒏 𑒋𑒏𑒙𑒰 𑒏𑒰𑒩𑓂𑒨𑒰𑒪𑒨𑒮𑒿 𑒪𑒻𑒞 𑒕𑒲 𑒞𑒿𑒋 𑒧𑒱𑒟𑒱𑒪𑒰𑒏 𑒮𑒧𑒰𑒖 𑒕𑒴𑒙𑒱 𑒖𑒰𑒃𑒋। 𑒧𑒱𑒟𑒱𑒪𑒰𑒏 𑒮𑒧𑒰𑒖𑒱𑒏 𑒣𑒠𑓂𑒡𑒞𑒱 𑒫𑒻𑒠𑒱𑒏 𑒣𑒠𑓂𑒡𑒞𑒱𑒮𑒿 𑒂𑒑𑒴 𑒥𑒜𑓃𑒞 𑒞𑒐𑒢𑒹 𑒮𑒩𑓂𑒫𑒰𑓀𑒑𑒲𑒢 𑒫𑒱𑒏𑒰𑒮 𑒯𑒋𑒞।
𑒖𑒑𑒠𑒲𑒬 𑒣𑓂𑒩𑒮𑒰𑒠 𑒧𑒝𑓂𑒛𑒪 𑒖𑒲𑒏, 𑒯𑒰𑒃 𑒮𑓂𑒏𑒴𑒪𑒏 𑒋𑒏𑒙𑒰 𑒮𑓂𑒧𑒵𑒱𑒞, 𑒏𑒹𑒖𑒩𑒲𑒫𑒰𑒪 𑒯𑒰𑒄 𑒮𑓂𑒏𑒴𑒪𑒧𑒹 𑒢𑒰𑒂𑒹𑓀 𑒪𑒱𑒐𑒹𑒢𑒹 𑒕𑒪𑒰𑒯। 𑒮𑓂𑒣𑒹𑒬𑒪 𑒢𑒰𑒃𑒢𑒏 (𑒯𑒰𑒨𑒩 𑒮𑒹𑒏𑒹𑒝𑓂𑒛𑓂𑒩𑒲) 𑒮𑒱𑒪𑒹𑒥𑒮𑒏 𑒫𑒱𑒮𑓂𑒞𑒰𑒩 𑒦𑒹𑒪। 𑒧𑒳𑒠𑒰 𑒞𑒻𑒨𑒼 𑒂𑒢𑒩𑓂𑒮 𑒖𑒏𑒰𑒿 𑒫𑒱𑒭𑒨 𑒢𑒻 𑒦𑒹𑒪𑒢𑒱, 𑒮𑒧𑒙𑒰𑒋𑒪𑒹 𑒩𑒯𑒪𑒢𑒱। 𑒣𑒳𑒩𑒢𑒹 𑒮𑒹𑒏𑒹𑒝𑓂𑒛𑓂𑒩𑒲 𑒣𑒠𑓂𑒡𑒞𑒱𑒏 𑒩𑒯𑒪𑒢𑒱। 𑒧𑒳𑒠𑒰 𑒫𑒱𑒭𑒨𑒏 𑒫𑒱𑒮𑓂𑒞𑒰𑒩 𑒞𑒿 𑒦𑒹𑒥𑒹 𑒏𑒋𑒪। 𑒁𑒩𑓂𑒟𑒼𑒬𑒰𑒮𑓂𑒞𑓂𑒩𑒏 𑒣𑒜𑓃𑒰𑒃 𑒯𑒼𑒃𑒞 𑒕𑒪𑒢𑒱। 𑒬𑒳𑒩𑒴𑒯𑒏 𑒕𑒯-𑒧𑒰𑒮 𑒣𑒕𑒰𑒞𑒱 (𑒯𑒰𑒨𑒩 𑒮𑒹𑒏𑒹𑒝𑓂𑒛𑓂𑒩𑒲 𑒏𑒼𑒩𑓂𑒮𑒏) 𑒁𑒩𑓂𑒠𑓂𑒡𑒫𑒰𑒩𑓂𑒭𑒱𑒏 𑒣𑒩𑒲𑒏𑓂𑒭𑒰 𑒦𑒹𑒪𑒢𑒱। 𑒏𑒹𑒖𑒩𑒲𑒫𑒰𑒪 𑒮𑓂𑒏𑒴𑒪𑒏 𑒥𑒹𑒫𑒯𑒰𑒩 𑒕𑒪 𑒖𑒹 𑒁𑒩𑓂𑒠𑓂𑒡𑒰𑒫𑒰𑒩𑓂𑒭𑒱𑒏 𑒣𑒩𑒲𑒏𑓂𑒭𑒰𑒏 𑒏𑒰𑒿𑒣𑒱𑒨𑒹 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒠𑓄 𑒠𑒹𑒪 𑒖𑒰𑒃 𑒕𑒪। 𑒏𑒱𑒕𑒳 𑒫𑒱𑒠𑓂𑒨𑒰𑒩𑓂𑒟𑒲 𑒖𑒹 𑒣𑒩𑒲𑒏𑓂𑒭𑒰 𑒣𑒕𑒰𑒞𑒱 𑒠𑒼𑒯𑒩𑒰 𑒏𑓄 𑒖𑒹 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒣𑒜𑓃𑒪𑒢𑒱 𑒞𑒿 𑒍 𑒞𑒿 𑒣𑒜𑓃𑒱𑒨𑒹 𑒏𑓄 𑒧𑒳𑒠𑒰 𑒖𑒹 𑒮𑒹 𑒢𑒻 𑒏𑒹𑒪𑒢𑒱 𑒞𑒿 𑒒𑒩𑒣𑒩 𑒣𑒼𑒟𑒲𑒮𑒿 𑒧𑒱𑒪𑒰 𑒠𑒹𑒐 𑒪𑒻𑒞 𑒕𑒪𑒰𑒯। 𑒢𑒹 𑒬𑒱𑒏𑓂𑒭𑒏𑒏 𑒥𑒲𑒔 𑒏𑒼𑒢𑒼 𑒧𑒪𑒰𑒢𑒞𑒰 𑒕𑒪𑒢𑒱 𑒂 𑒢𑒹 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒯𑒼𑒢𑓂𑒯𑒱 𑒖𑒹 𑒧𑒰𑒮𑓂𑒙𑒩 𑒮𑒯𑒰𑒋𑒥 𑒖𑒞𑒱𑒂𑒩𑒋 𑒏𑒹𑒪𑒢𑒱। 𑒞𑒞𑒥𑒹 𑒢𑒻 𑒪𑒞𑓂𑒞𑒲 𑒥𑒰𑒥𑒴𑒏 (𑒮𑓂𑒫. 𑒨𑒠𑒳𑒢𑒢𑓂𑒠𑒢 𑒮𑒰𑒯𑒳) 𑒁𑒪𑒑 𑒮𑒼𑒔 𑒩𑒯𑒢𑒱। 𑒯𑒳𑒢𑒏𑒩 𑒢𑒧𑓂𑒥𑒩 𑒠𑒃𑒏 𑒁𑒪𑒑 𑒏𑒮𑒾𑒙𑒲 𑒩𑒯𑒢𑒱। 𑒯𑒳𑒢𑒏𑒩 𑒮𑒧𑒗 𑒩𑒯𑒢𑒱 𑒏𑒧 𑒢𑒧𑓂𑒥𑒩 𑒠𑒹𑒢𑒹 𑒫𑒱𑒠𑓂𑒨𑒰𑒩𑓂𑒟𑒲 𑒂𑒩𑒼 𑒧𑒹𑒯𑒢𑒞𑒱 𑒏𑒩𑒞। 𑒏𑒱𑒋𑒏 𑒞𑒿 𑒮𑒦 𑒫𑒱𑒠𑓂𑒨𑒰𑒩𑓂𑒟𑒲 𑒣𑒰𑒮 𑒏𑒩𑒻𑒏 𑒖𑒱𑒖𑓂𑒘𑒰𑒮𑒰𑒮𑒿 𑒣𑒜𑓃𑒻𑒞 𑒁𑒕𑒱। 𑒤𑒹𑒪𑒏 𑒛𑒩 𑒯𑒹𑒞𑒻। 𑒞𑒃 𑒮𑓀𑒑 𑒄𑒯𑒼 𑒬𑒱𑒏𑓂𑒭𑒏𑒮𑒿 𑒫𑒱𑒠𑓂𑒨𑒰𑒩𑓂𑒟𑒲 𑒡𑒩𑒱-𑒮𑒦 𑒥𑒳𑒗𑒻𑒞 𑒖𑒹 𑒪𑒞𑓂𑒞𑒲 𑒥𑒰𑒥𑒴 𑒯𑒰𑒟𑒮𑒿 𑒖𑒿 𑒥𑒲𑒮𑒼 𑒣𑓂𑒩𑒞𑒱𑒬𑒞 𑒢𑒧𑓂𑒥𑒩 𑒂𑒥𑒱 𑒖𑒰𑒋𑒞 𑒞𑒿 𑒥𑒼𑒩𑓂𑒛𑒧𑒹 𑒣𑒰𑒮 𑒯𑒹𑒥𑒹 𑒏𑒩𑒥।
𑒯𑒿, 𑒁𑒩𑓂𑒟𑒬𑒰𑒮𑓂𑒞𑓂𑒩𑒏 𑒔𑒩𑓂𑒔 𑒏𑒹𑒢𑒹 𑒕𑒪𑒾𑓀। 𑒮𑓂𑒣𑒹𑒬𑒪 𑒢𑒰𑒃𑒢𑓂𑒟𑒧𑒹 𑒣𑒔𑒰𑒮 𑒣𑓂𑒩𑒞𑒱𑒬𑒞𑒮𑒿 𑒁𑒡𑒱𑒏 𑒢𑒧𑓂𑒥𑒩 𑒋𑒪𑒢𑒱। 𑒮𑒦 𑒫𑒱𑒭𑒨𑒮𑒿 𑒥𑒹𑒮𑒲। 𑒏𑓂𑒪𑒰𑒮𑒧𑒹 𑒖𑒐𑒢 𑒬𑓂𑒨𑒰𑒧 𑒥𑒰𑒥𑒴 (𑒮𑓂𑒫. 𑒬𑓂𑒨𑒰𑒧𑒰 𑒢𑒢𑓂𑒠 𑒗𑒰) 𑒖𑒼𑒩 𑒮𑒿 𑒣𑒜𑓃𑒱 𑒏𑒰𑒣𑒲 𑒠𑒹𑒪𑒏𑒢𑒱 𑒞𑒐𑒢 𑒖𑒢𑒰 𑒁𑒩𑓂𑒟𑒬𑒰𑒮𑓂𑒞𑓂𑒩 𑒧𑒢𑒏𑒹𑒿 𑒋𑒢𑒰 𑒣𑒏𑒛𑓃𑒱 𑒪𑒹𑒪𑒏𑒢𑒱 𑒖𑒹 𑒠𑒰𑒮 𑒏𑒻𑒣𑒱𑒙𑒪𑒮𑒿 𑒪𑓄 𑒏𑓄 𑒥𑒰𑒠𑒧𑒹 𑒁𑒧𑒩𑓂𑒞𑓂𑒨 𑒮𑒹𑒢 𑒡𑒩𑒱𑒏 𑒣𑒩𑒱𑒔𑒨 𑒏𑒩𑒰 𑒠𑒹𑒪𑒏𑒢𑒱। 𑒁𑒼𑒢𑒰 𑒯𑒰𑒨𑒩 𑒮𑒹𑒏𑒹𑒝𑓂𑒛𑓂𑒩𑒲 𑒙𑒣𑒪𑒰 𑒣𑒕𑒰𑒞𑒱 𑒧𑒢𑒏 𑒠𑒴𑒙𑒰 𑒫𑒱𑒭𑒨- 𑒁𑒩𑓂𑒟𑒬𑒰𑒮𑓂𑒞𑓂𑒩 𑒂 𑒦𑒴𑒑𑒼𑒪 𑒞𑒿 𑒯𑒙𑒱 𑒑𑒹𑒪𑒢𑒱 𑒧𑒳𑒠𑒰 𑒧𑒢𑒮𑒿 𑒢𑒻 𑒯𑒙𑒪𑒢𑒱। 𑒫𑒱𑒭𑒨 𑒮𑒧𑒙𑒰 𑒏𑓄 𑒁𑓀𑒑𑓂𑒩𑒹𑒖𑒲, 𑒯𑒱𑒢𑓂𑒠𑒲 𑒂 𑒩𑒰𑒖𑒢𑒲𑒞𑒱 𑒬𑒰𑒮𑓂𑒞𑓂𑒩 𑒡𑒩𑒱 𑒩𑒯𑒱 𑒑𑒹𑒪𑒢𑒱। 𑒍𑒯𑒼 𑒋𑒧.𑒋.𑒧𑒹 𑒒𑒙𑒱 𑒑𑒹𑒪𑒢𑒱। 𑒣𑓂𑒩𑒬𑓂𑒢 𑒅𑒚𑒻𑒋 𑒏𑒱𑒨𑒼 𑒋𑒏 𑒫𑒱𑒭𑒨𑒮𑒿 𑒫𑒱𑒬𑒹𑒭𑒖𑓂𑒘 𑒕𑒟𑒱 𑒂 𑒏𑒱𑒨𑒼 𑒥𑒯𑒳 𑒫𑒱𑒭𑒨𑒲 𑒕𑒟𑒱, 𑒠𑒳𑒢𑒴𑒧𑒹 𑒖𑒱𑒢𑒑𑒲𑒏 𑒑𑒰𑒛𑓃𑒲 𑒏𑒱𑒢𑒏𑒩 𑒮𑒧𑒙𑒪 𑒔𑒪𑒞𑒢𑒱?
𑒥𑒲𑒮𑒧 𑒬𑒞𑒰𑒥𑓂𑒠𑒲𑒏 𑒧𑒵𑒞𑓂𑒨𑒳 𑒂 𑒋𑒏𑒻𑒮𑒧 𑒬𑒞𑒰𑒥𑓂𑒠𑒲𑒏 𑒖𑒢𑓂𑒧 𑒥𑒳𑒗𑒥𑒹 𑒢𑒹 𑒏𑒹𑒪𑒰𑒯। 𑒑𑒳𑒢𑒡𑒳𑒢𑒹𑒧𑒹 𑒩𑒯𑒱 𑒑𑒹𑒪𑒰𑒯 𑒖𑒹 𑒏𑒱 𑒏𑒩𑒲 𑒏𑒲 𑒢𑒻 𑒏𑒩𑒲। 𑒢𑒹 𑒥𑒲𑒮𑒧 𑒮𑒠𑒲𑒏 𑒮𑒩𑒰𑒡 𑒏𑓄 𑒣𑒹𑒪𑒰𑒯 𑒂 𑒢𑒹 𑒋𑒏𑒻𑒮𑒧 𑒮𑒠𑒲𑒏 𑒖𑒢𑓂𑒧𑒼𑒞𑓂𑒮𑒫। 𑒧𑒳𑒠𑒰 𑒋𑒏𑒙𑒰 𑒪𑒰𑒦 𑒞𑒿 𑒖𑒩𑒴𑒩 𑒦𑒹𑒪𑒢𑒱 𑒖𑒹 𑒮𑒩𑒰𑒡𑒼𑒏 𑒐𑒩𑓂𑒔 𑒥𑒿𑒔𑒪𑒢𑒱 𑒂 𑒖𑒢𑒧 𑒠𑒱𑒢𑒼𑒏।
𑒣𑓀𑒔𑒫𑒩𑓂𑒭𑒲𑒨 𑒔𑒳𑒢𑒰𑒫 𑒣𑒠𑓂𑒡𑒞𑒱𑒏 𑒂𑒑𑒧𑒢 𑒦𑒹𑒪। 𑒧𑒢𑓂𑒯𑒳𑒂𑒋𑒪 𑒧𑒢 𑒬𑒱𑒬𑒱𑒩𑒏 𑒮𑒱𑒞𑒰𑒋𑒪 𑒦𑒾𑒧𑓂𑒯𑒩𑒰 𑒐𑒳𑒖𑒪। 𑒣𑓀𑒔𑒰𑒨𑒞𑒮𑒿 𑒖𑒱𑒪𑒰-𑒣𑒩𑒱𑒭𑒠 𑒡𑒩𑒱𑒏 𑒨𑒼𑒖𑒢𑒰 𑒥𑒢𑒰 𑒮𑒧𑒰𑒖𑒏𑒹𑒿 𑒚𑒰𑒜𑓃 𑒏𑒩𑒋 𑒔𑒰𑒯𑒪𑒢𑒱। 𑒂𑒚 𑒣𑓀𑒔𑒰𑒨𑒞𑒏 𑒔𑒳𑒢𑒰𑒫 𑒖𑒱𑒪𑒰 𑒣𑒩𑒱𑒭𑒠𑒏। 𑒂𑒢 𑒮𑒧𑒰𑒖𑒧𑒹 𑒖𑒰𑒃𑒮𑒿 𑒣𑒯𑒱𑒢𑒹 𑒁𑒣𑒢 𑒮𑒧𑒰𑒖 𑒧𑒖𑒑𑒴𑒞 𑒥𑒢𑒰𑒋𑒥 𑒂𑒫𑒬𑓂𑒨𑒏 𑒥𑒳𑒗𑒪𑒢𑒱। 𑒁𑓀𑒔𑒪 𑒮𑒧𑓂𑒧𑒹𑒪𑒢 𑒑𑓀𑒑𑒰𑒣𑒳𑒩𑒏 𑒮𑓂𑒏𑒴𑒪𑒧𑒹 𑒦𑒹𑒪। 𑒣𑓀𑒔𑒰𑒨𑒞 𑒔𑒳𑒢𑒰𑒫𑒏 𑒏𑒰𑒩𑓂𑒨𑒏𑓂𑒩𑒧 𑒥𑒢𑒪। 𑒥𑒹𑒩𑒧𑒰𑒏 𑒨𑒼𑒖𑒢𑒰 𑒩𑒐𑒪𑒐𑒱𑒢। 𑒮𑒩𑓂𑒫𑒧𑒰𑒢𑓂𑒨 𑒦𑓄 𑒑𑒹𑒪𑒢𑒱। 𑒧𑒳𑒠𑒰 𑒋𑒏 𑒢𑒻 𑒁𑒢𑒹𑒏𑒼 𑒮𑒴𑒞𑓂𑒩 𑒩𑒰𑒖𑒢𑒲𑒞𑒱𑒏 𑒪𑒰𑒑𑒱 𑒑𑒹𑒪𑒢𑒱। 𑒖𑒃𑒮𑒿 𑒔𑒰𑒩𑒱𑒙𑒰 𑒖𑒱𑒪𑒼 𑒣𑒩𑒱𑒭𑒠𑒧𑒹 𑒣𑒰𑒩𑓂𑒙𑒲𑒏 𑒂 𑒔𑒰𑒩𑒱𑒙𑒰 𑒣𑓀𑒔𑒰𑒨𑒞𑒼 𑒧𑒳𑒐𑒱𑒨𑒰𑒏 𑒪𑒹𑒪 𑒣𑒰𑒩𑓂𑒙𑒲𑒏 (𑒏𑒧𑓂𑒨𑒳𑒢𑒱𑒮𑓂𑒙 𑒣𑒰𑒩𑓂𑒙𑒲) 𑒅𑒧𑓂𑒧𑒲𑒠𑒫𑒰𑒩 𑒥𑒢𑒱 𑒏𑓄 𑒚𑒰𑒜𑓃 𑒦𑓄 𑒑𑒹𑒪𑒢𑒱। 𑒐𑒋𑒩 𑒖𑒹 𑒦𑒹𑒪।
𑒣𑓀𑒔𑒰𑒨𑒞 𑒔𑒳𑒢𑒰𑒫 (𑒧𑒳𑒐𑒱𑒨𑒰𑒏 𑒪𑒹𑒪) 𑒯𑒰𑒩𑒪𑒟𑒱। 𑒔𑒳𑒢𑒰𑒫 𑒦𑒩𑒱 𑒞𑒿 𑒅𑒞𑓂𑒮𑒰𑒯 𑒩𑒯𑒪𑒢𑒱 𑒧𑒳𑒠𑒰 𑒮𑒧𑒰𑒖𑒮𑒿 𑒖𑒱𑒪𑒰 𑒣𑒰𑒩𑓂𑒙𑒲𑒏 𑒥𑒯𑒳𑒞 𑒥𑒰𑒞 𑒥𑒳𑒗𑒻𑒧𑒹 𑒂𑒥𑒱 𑒑𑒹𑒪𑒢𑒱। 𑒋𑒏 𑒠𑒱𑒮 𑒮𑒩𑒏𑒰𑒩𑒲 𑒨𑒼𑒖𑒢𑒰 (𑒔𑒳𑒢𑒰𑒫𑒧𑒹 𑒂𑒩𑒏𑓂𑒭𑒝) 𑒠𑒹𑒐𑒟𑒱 𑒞𑒿 𑒥𑒴𑒗𑒱 𑒣𑒛𑓃𑒢𑒱 𑒖𑒹 𑒁𑒢𑒹𑒩𑒹 𑒌 𑒔𑒳𑒢𑒰𑒫𑒏 𑒦𑒰𑒿𑒖𑒧𑒹 𑒣𑒛𑓃𑒪𑒰𑒯। 𑒂𑒩𑒏𑓂𑒭𑒝𑒏 𑒋𑒯𑒹𑒢 𑒞𑒩𑒲𑒏𑒰 𑒁𑒕𑒱 𑒖𑒹 𑒋𑒏 𑒔𑒳𑒢𑒰𑒫𑒮𑒿 𑒠𑒼𑒮𑒩 𑒔𑒳𑒢𑒰𑒫𑒏 𑒩𑒮𑓂𑒞𑒹 𑒥𑒢𑓂𑒢 𑒦𑓄 𑒖𑒹𑒞𑒻। 𑒣𑒔𑒰𑒮 𑒣𑓂𑒩𑒞𑒱𑒬𑒞 𑒧𑒯𑒱𑒪𑒰 𑒂𑒩𑒏𑓂𑒭𑒝𑒧𑒹 𑒋𑒏-𑒋𑒏 𑒙𑒩𑓂𑒧 𑒯𑒹𑒥𑒰𑒏 𑒔𑒰𑒯𑒻 𑒕𑒪𑒻। 𑒧𑒳𑒠𑒰 𑒮𑒹 𑒢𑒻 𑒦𑒹𑒪। 𑒖𑒿 𑒠𑒴-𑒠𑒴 𑒙𑒩𑓂𑒧𑒣𑒩 𑒔𑒳𑒢𑒰𑒫 𑒯𑒼𑒃𑒋 𑒞𑒿 𑒣𑒴𑒩𑓂𑒝 𑒩𑒰𑒅𑒝𑓂𑒛 𑒏𑒞𑒹 𑒠𑒱𑒢𑒧𑒹 𑒯𑒋𑒞। 𑒐𑒋𑒩 𑒖𑒹 𑒯𑒼𑒅, 𑒧𑒳𑒠𑒰 𑒮𑒩𑒏𑒰𑒩𑒲 𑒪𑒴𑒙 𑒞𑒿 𑒥𑒜𑓃𑒱𑒨𑒹 𑒑𑒹𑒪। 𑒖𑒃 𑒑𑒞𑒱𑒨𑒹 𑒮𑒧𑒰𑒖𑒏𑒹𑒿 𑒚𑒰𑒜𑓃 𑒦𑓄 𑒔𑒪𑒻𑒏 𑒑𑒞𑒱 𑒯𑒹𑒥𑒰𑒏 𑒔𑒰𑒯𑒲 𑒮𑒹 𑒁𑒐𑒢𑒼 𑒡𑒩𑒱 𑒢𑒻 𑒂𑒥𑒱 𑒮𑒏𑒪 𑒁𑒕𑒱। 𑒁𑒢𑒹𑒏𑒼 𑒏𑒰𑒩𑒝𑒧𑒹 𑒧𑒳𑒐𑓂𑒨 𑒦𑓂𑒩𑒭𑓂𑒙𑒰𑒔𑒰𑒩 𑒥𑒢𑒱 𑒑𑒹𑒪 𑒁𑒕𑒱। 𑒦𑓂𑒩𑒭𑓂𑒙𑒰𑒔𑒰𑒩𑒲 𑒍𑒯𑒢-𑒍𑒯𑒢 𑒁𑒕𑒱 𑒖𑒹𑒏𑒩 𑒮𑒩𑒏𑒰𑒩 𑒕𑒱𑒌। 𑒏𑒹 𑒏𑒹𑒏𑒩𑒰 𑒠𑒹𑒐𑒰𑒩 𑒏𑒩𑒞। 𑒖𑒿 𑒠𑒹𑒐𑒰𑒩𑒹 𑒏𑒩𑒞 𑒞𑒿 𑒏𑒰𑒢𑒴𑒢𑒹 𑒏𑒱 𑒏𑒩𑒞𑒻। 𑒫𑒱𑒔𑒱𑒞𑓂𑒩 𑒧𑒯𑒖𑒰𑒪𑒧𑒹 𑒮𑒧𑒰𑒖 𑒤𑒿𑒮𑒱 𑒑𑒹𑒪 𑒁𑒕𑒱। 𑒂𑒧 𑒂𑒠𑒧𑒲𑒏𑒹𑒿 𑒂𑒩𑓂𑒟𑒱𑒏 𑒞𑓀𑒑𑒲 𑒕𑒻। 𑒍 𑒏𑒹𑒢𑒰 𑒣𑒴𑒩𑓂𑒞𑒱 𑒯𑒋𑒞? 𑒣𑒴𑒩𑓂𑒞𑒱𑒏 𑒖𑒹 𑒣𑒠𑓂𑒡𑒞𑒱 𑒁𑒕𑒱 𑒍 𑒋𑒯𑒹𑒢 𑒥𑒢𑒪 𑒁𑒕𑒱 𑒖𑒹 𑒔𑒩𑒫𑒰𑒯𑒱𑒨𑒹𑒧𑒹 𑒑𑒰𑒃𑒨𑒼 𑒥𑒱𑒏𑒰 𑒖𑒰𑒃𑒋! 𑒞𑒃𑒣𑒩 𑒮𑒿 𑒠𑒹𑒐𑒾𑒂-𑒔𑒼𑒩𑒾𑒂 𑒤𑒳𑒙𑓂𑒙𑒹!!
𑒖𑒹𑒏𑒩𑒰 𑒪𑒹𑒪 𑒁𑒙𑓂𑒚𑒰𑒩𑒯 𑒠𑒱𑒢 𑒖𑒯𑒪𑒧𑒹 𑒩𑒯𑒪𑒰 𑒍 𑒂𑒑𑒴 𑒂𑒥𑒱 𑒚𑒰𑒜𑓃 𑒦𑓄 𑒑𑒹𑒪𑒢𑒱। 𑒧𑒢 𑒣𑒛𑓃𑒪𑒢𑒱 𑒧𑒯𑒰𑒦𑒰𑒩𑒞𑒏 𑒍 𑒏𑒟𑒰 𑒖𑒹 𑒧𑒯𑒰𑒦𑒰𑒩𑒞𑒏 𑒅𑒣𑒩𑒰𑒢𑓂𑒞 𑒦𑒹𑒪। 𑒧𑒢𑒧𑒹 𑒧𑒱𑒮𑒱𑒨𑒼 𑒦𑒩𑒱 𑒬𑓀𑒏𑒰𑒏 𑒖𑒢𑓂𑒧 𑒢𑒻 𑒦𑒹𑒪𑒢𑒱। 𑒫𑒱𑒣𑒩𑒲𑒞 𑒦𑒹𑒪𑒢𑒱। 𑒣𑒰𑒕𑒴 𑒅𑒢𑒙𑒱 𑒠𑒹𑒐𑒪𑒢𑒱 𑒞𑒿 𑒥𑒴𑒗𑒱 𑒣𑒛𑓃𑒪𑒢𑒱 𑒖𑒹 𑒁𑒐𑒢 𑒡𑒩𑒱𑒏 𑒖𑒹 𑒧𑒼𑒙𑒰 𑒏𑒣𑒰𑒩 𑒪𑒰𑒠𑒪 𑒕𑒢𑓂𑒯𑒱 𑒍𑒏𑒩𑒰 𑒯𑒹𑒙 𑒏𑒩𑒻𑒏 𑒌𑒮𑒿 𑒢𑒲𑒏 𑒁𑒫𑒮𑒩 𑒢𑒻 𑒦𑒹𑒙𑒱𑒞𑒢𑒱। 𑒮𑒋𑒯 𑒏𑒹𑒪𑒢𑓂𑒯𑒱।
𑒧𑒳𑒠𑒰 𑒋𑒏𑒙𑒰 𑒣𑓂𑒩𑒬𑓂𑒢 𑒞𑒻𑒨𑒼 𑒩𑒯𑒥𑒹 𑒏𑒹𑒪𑒢𑒱 𑒖𑒹 𑒂𑒑𑒴𑒮𑒿 𑒅𑒮𑒰𑒩𑒲 𑒂𑒏𑒱 𑒣𑒰𑒕𑒴𑒮𑒿 𑒂 𑒠𑒳𑒢𑒴 𑒠𑒱𑒮𑒮𑒿 𑒂𑒏𑒱 𑒋𑒏𑓂𑒏𑒹 𑒥𑒹𑒩। 𑒂𑒑𑒴𑒮𑒿 𑒅𑒮𑒰𑒩𑒻𑒏 𑒫𑒱𑒔𑒰𑒩 𑒦𑒹𑒪𑒢𑒱। 𑒮𑓀𑒨𑒼𑒑𑒼 𑒢𑒲𑒏 𑒩𑒯𑒪𑒢𑒱। 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒫𑒰𑒮𑒼𑒣𑒙𑓂𑒙𑒲𑒧𑒹 𑒣𑒰𑒩𑓂𑒙𑒲𑒏 (𑒦𑒰𑒏𑒣𑒰) 𑒩𑒰𑒖𑓂𑒨 𑒮𑒧𑓂𑒧𑒹𑒪𑒢 𑒦𑒹𑒪𑒻। 𑒣𑒰𑒩𑓂𑒙𑒲𑒏 𑒧𑒯𑒰𑒮𑒔𑒱𑒫 𑒫𑒩𑓂𑒠𑓂𑒡𑒢 (𑒋.𑒥𑒲. 𑒫𑒩𑓂𑒠𑓂𑒡𑒢) 𑒮𑒯𑒰𑒋𑒥𑒏 𑒮𑓀𑒑-𑒮𑓀𑒑 𑒥𑓀𑒑𑒰𑒪𑒼𑒏 𑒏𑒰𑒧𑒩𑒹𑒛 𑒮𑒦 𑒩𑒯𑒟𑒱। 𑒱𑒥𑒯𑒰𑒩𑒏 𑒮𑒦 𑒖𑒱𑒪𑒰𑒏 𑒩𑒯𑒥𑒹 𑒏𑒩𑒟𑒱। 𑒢𑒲𑒏 𑒮𑒧𑓂𑒧𑒹𑒪𑒢 𑒦𑒹𑒪। 𑒖𑒱𑒪𑒰𑒏 𑒋𑒏𑒙𑒰 𑒏𑒰𑒩𑓂𑒨𑒏𑒩𑓂𑒞𑓂𑒞𑒰 𑒯𑒼𑒃𑒏 𑒢𑒰𑒞𑒹 𑒩𑒯𑒥𑒹 𑒏𑒩𑒟𑒱। 𑒩𑒰𑒖𑓂𑒨𑒏 (𑒣𑒰𑒩𑓂𑒙𑒲𑒏) 𑒖𑒹 𑒮𑒰𑒯𑒱𑒞𑓂𑒨 𑒣𑓂𑒩𑒹𑒧𑒲 𑒕𑒟𑒱 𑒯𑒳𑒢𑒏𑒰 𑒮𑒦𑒏𑒹𑒿 𑒏𑒯𑒱 𑒠𑒹𑒪𑒐𑒱𑒢- “𑒖𑒹 𑒂𑒥 𑒁𑒯𑒲𑓀 𑒮𑒥𑒯𑒏 𑒮𑓀𑒑 𑒂𑒥𑒱 𑒩𑒯𑒪 𑒕𑒲।”