गजेन्द्र ठाकुर- जलोदीप

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒖𑒪𑒼𑒠𑒲𑒣























𑒢𑒰𑒙𑒏𑒏𑒰𑒩 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩𑒏 𑒖𑒢𑓂𑒧 𑒦𑒰𑒑𑒪𑒣𑒳𑒩𑒧𑒹 𑒮𑒢𑓂 𑓑𑓙𑓗𑓑 𑒧𑒹 𑒦𑒹𑒪𑒢𑓂𑒯𑒱 𑒂 𑒂𑒃 𑒏𑒰𑒪𑓂𑒯𑒱 𑒍 𑒠𑒱𑒪𑓂𑒪𑒲𑒧𑒹 𑒩𑒯𑒻 𑒕𑒟𑒱।



















𑒖𑒪𑒼𑒠𑒲𑒣






𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩



𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢, 𑒢𑒄 𑒠𑒱𑒪𑓂𑒪𑒲










Jalodeep: A collection of Children Maithili Dramas by Gajendra Thakur first published in 2012 by M/s Shruti Publications, India
Price: Rs.100
𑒮𑒩𑓂𑒫𑒰𑒡𑒱𑒏𑒰𑒩 © 𑒣𑓂𑒩𑒲𑒞𑒱 𑒚𑒰𑒏𑒳𑒩 2012
𑒣𑒯𑒱𑒪 𑒮𑓀𑒮𑓂𑒏𑒩𑒝 : 2012
ISBN : 978-93-80538-53-2
This drama is entirely a work of fiction. The names, characters and incidents portrayed in it are the work of the author’s imagination. Any resemblance to actual persons, living or dead, events or localities, is entirely coincidental.
Gajendra Thakur asserts the moral right to be identified as the author of this work.
Every effort has been made to trace or contact all copyright holders. The publishers will be pleased to make good any omissions or rectify any mistakes brought to their attention at the earliest opportunity.
All rights reserved. This book is sold subject to the condition that it shall not, by way of trade or otherwise, be lent, resold, hired out, or otherwise circulated without the publisher’s prior written consent in any form of binding or cover other than that in which it is published and without a similar condition including this condition being imposed on the subsequent purchaser and without limiting the rights under copyright reserved above; no part of this publication may be reproduced, stored in or introduced into a retrieval system, or transmitted, in any form or by any means- photographic, electronic, mechanical, photocopying, recording, taping, information storage- or otherwise, without the prior written permission of both the copyright owner and the aforementioned publisher of this book or as expressly permitted by law.
𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢 :𑒩𑒖𑒱𑒮𑓂𑒙𑒩𑓂𑒛 𑒂𑒤𑒱𑒮: 𑓘/𑓒𑓑, 𑒦𑒴𑒞𑒪, 𑒢𑓂𑒨𑒴 𑒩𑒰𑒖𑒹𑒢𑓂𑒠𑓂𑒩 𑒢𑒑𑒩, 𑒢𑒄 𑒠𑒱𑒪𑓂𑒪𑒲-𑓑𑓑𑓐𑓐𑓐𑓘.𑒠𑒴𑒩𑒦𑒰𑒭-(𑓐𑓑𑓑) 𑓒𑓕𑓘𑓘𑓙𑓖𑓕𑓖-𑓕𑓘 𑒤𑒻𑒏𑓂𑒮- (𑓐𑓑𑓑)𑓒𑓕𑓘𑓘𑓙𑓖𑓕𑓗
Website:http://www.shruti-publication.com
e-mail: shruti.publication@shruti-publication.com
Printed at: Ajay Arts, Delhi-110002
Distributor : Pallavi Distributors, Ward no- 6, Nirmali (Supaul), 𑒧𑒼.- 957245.4.5, 9931654742
Jalodeep: A collection of Children Maithili Dramas by Gajendra Thakur





𑒁𑒢𑒳𑒏𑓂𑒩𑒧
𑒦𑓄 𑒖𑒰𑒋𑒥 𑒕𑒴
𑒏𑒧𑒪𑒰𑒏 𑒦𑒑𑒞𑒰
𑒖𑒪𑒼𑒠𑒲𑒣























𑒦𑓄 𑒖𑒰𑒋𑒥 𑒕𑒴
(𑒥𑒰𑒪 𑒔𑒾𑒥𑒙𑒱𑒨𑒰-𑒮𑒛𑓃𑒏 𑒢𑒰𑒙𑒏)


𑒮𑒴𑒞𑓂𑒩𑒡𑒰𑒩: 𑒂𑒅, 𑒂𑒅। 𑒌 𑒔𑒾𑒥𑒙𑒱𑒨𑒰 𑒢𑒰𑒙𑒏, 𑒮𑒛𑓃𑒏 𑒢𑒰𑒙𑒏 𑒠𑒹𑒐𑒥𑒰𑒪𑒹 𑒂𑒅।
(𑒮𑒴𑒞𑓂𑒩𑒡𑒰𑒩 𑒪𑒼𑒏 𑒮𑒦 𑒠𑒱𑒮 𑒞𑒏𑒻 𑒕𑒟𑒱।| 𑒯𑒧𑒩 𑒏𑒪𑒰𑒏𑒰𑒩 𑒮𑒦 𑒑𑒣-𑒬𑒣 𑒏𑒩𑒻𑒞 𑒯𑒪𑓂𑒪𑒰 𑒖𑒹𑒏𑒰𑒿 𑒏𑒩𑒻𑒞 𑒕𑒟𑒱।)
𑒦𑒲𑒛𑓃𑒮𑒿 𑒂𑒋𑒪 𑒣𑒳𑒩𑒳𑒭 𑒏𑒪𑒰𑒏𑒰𑒩: (𑒏𑒪𑒰𑒏𑒰𑒩 𑒮𑒦𑒏 𑒑𑒼𑒪𑒮𑒿 𑒥𑒯𑒰𑒩 𑒦𑓄 𑒢𑒱𑒏𑒪𑒻𑒞)- 𑒏𑒲 𑒯𑒾। 𑒏𑒲 𑒮𑒦 𑒥𑒰𑒖𑒱 𑒩𑒯𑒪 𑒕𑒯 𑒯𑒾। 𑒏𑒲 𑒕𑒱𑒌 ?
𑒮𑒴𑒞𑓂𑒩𑒡𑒰𑒩: 𑒮𑒦 𑒖𑒳𑒧𑒱 𑒏𑓄 𑒂𑒅। 𑒒𑒹𑒩𑒰𑒥𑒰 𑒥𑒢𑒰 𑒪𑒱𑒁। 𑒧𑒻𑒟𑒱𑒪𑒲 𑒔𑒾𑒥𑒙𑒱𑒨𑒰 𑒢𑒰𑒙𑒏𑒪𑒹 𑒒𑒹𑒩𑒰 𑒥𑒢𑒰 𑒏𑓄 𑒚𑒰𑒜𑓃 𑒦𑓄 𑒖𑒰𑒆। 𑒔𑒼𑒙𑒑𑒩 𑒢𑒰𑒙𑒏 𑒯𑒋𑒞।
𑒦𑒲𑒛𑓃𑒮𑒿 𑒢𑒱𑒏𑒪𑒱 𑒏𑓄 𑒂𑒋𑒪 𑒠𑒼𑒮𑒩 𑒧𑒯𑒱𑒪𑒰 𑒏𑒪𑒰𑒏𑒰𑒩: 𑒔𑒪 𑒩𑒹 𑒔𑒪। 𑒋𑒏𑒩𑒰 𑒮𑒦𑒏 𑒧𑒻𑒟𑒱𑒪𑒲 𑒢𑒰𑒙𑒏 𑒯𑒹𑒥𑓄 𑒠𑒯𑒲। 𑒢𑒰𑒙𑒏 𑒠𑒹𑒐𑒪𑒰𑒮𑒿 𑒦𑒼𑒖𑒢 𑒔𑒪𑒞𑒾 𑒩𑒾।
𑒮𑒴𑒞𑓂𑒩𑒡𑒰𑒩: 𑒢𑒻 𑒨𑒻 𑒠𑒰𑒃। 𑒦𑒳𑒐𑒪𑒹𑒥𑒪𑒰 𑒪𑒹𑒪 𑒄 𑒢𑒰𑒙𑒏 𑒕𑒻। 𑒣𑒹𑒙𑒏 𑒦𑒴𑒐, 𑒧𑒼𑒢𑒏 𑒦𑒴𑒐 𑒂 𑒥𑒼𑒪𑒲𑒏 𑒦𑒴𑒐।
𑒧𑒯𑒱𑒪𑒰 𑒏𑒪𑒰𑒏𑒰𑒩: 𑒮𑒹 𑒕𑒻। 𑒞𑒐𑒢 𑒂𑒥𑒻 𑒖𑒰𑒃 𑒖𑒼।
𑒮𑒴𑒞𑓂𑒩𑒡𑒰𑒩: 𑒂𑒥𑒻 𑒖𑒰𑒅, 𑒂𑒥𑒻 𑒖𑒰𑒅। 𑒂𑒃 𑒯𑒋𑒞 𑒥𑒔𑓂𑒔𑒰, 𑒏𑒱𑒬𑒼𑒩, 𑒨𑒳𑒫𑒰, 𑒣𑓂𑒩𑒾𑒜𑓃 𑒂 𑒥𑒴𑒜𑓃𑒏 𑒪𑒹𑒪 𑒢𑒰𑒙𑒏। 𑒮𑓂𑒞𑓂𑒩𑒲-𑒣𑒳𑒩𑒳𑒭𑒏 𑒪𑒹𑒪 𑒢𑒰𑒙𑒏। 𑒔𑒱𑒛𑓃𑒻-𑒔𑒳𑒢𑒧𑒳𑒢𑒲 𑒪𑒹𑒪 𑒢𑒰𑒙𑒏, 𑒑𑒰𑒕-𑒥𑒵𑒔𑓂𑒕 𑒪𑒹𑒪 𑒢𑒰𑒙𑒏, 𑒯𑒥𑒰-𑒥𑒮𑒰𑒞 𑒪𑒹𑒪 𑒢𑒰𑒙𑒏। 𑒮𑒴𑒩𑓂𑒨-𑒔𑒢𑓂𑒠𑓂𑒩-𑒞𑒩𑒹𑒑𑒝 𑒪𑒹𑒪 𑒢𑒰𑒙𑒏। 𑒧𑒴𑒩𑓂𑒞-𑒁𑒧𑒴𑒩𑓂𑒞 𑒪𑒹𑒪 𑒢𑒰𑒙𑒏। 𑒠𑒹𑒬 𑒪𑒹𑒪 𑒢𑒰𑒙𑒏। 𑒢𑒱𑒢𑓂𑒢 𑒂 𑒮𑒣𑒢𑒰 𑒪𑒹𑒪 𑒢𑒰𑒙𑒏।
(𑒧𑒯𑒱𑒪𑒰 𑒮𑒴𑒞𑓂𑒩𑒡𑒰𑒩 𑒥𑒱𑒔𑓂𑒔𑒯𑒱𑒧𑒹 𑒂𑒥𑒱 𑒖𑒰𑒃 𑒕𑒟𑒱। 𑒦𑒲𑒛𑓃𑒮𑒿 𑒂𑒋𑒪 𑒫𑒋𑒯 𑒧𑒯𑒱𑒪𑒰 𑒏𑒪𑒰𑒏𑒰𑒩 𑒧𑒯𑒱𑒪𑒰 𑒮𑒴𑒞𑓂𑒩𑒡𑒰𑒩 𑒥𑒢𑒱 𑒮𑒏𑒻 𑒕𑒟𑒱।)
𑒧𑒯𑒱𑒪𑒰 𑒮𑒴𑒞𑓂𑒩𑒡𑒰𑒩: 𑒯𑒹। 𑒮𑒼𑒗𑒹 𑒏𑒯𑒴 𑒢𑒹 𑒖𑒹 𑒏𑒏𑒩𑒰 𑒪𑒹𑒪 𑒄 𑒢𑒰𑒙𑒏 𑒢𑒻 𑒕𑒻। 𑒋𑒢𑒰 𑒣𑒻𑒒-𑒣𑒻𑒒 𑒑𑒣 𑒏𑒱𑒋 𑒠𑓄 𑒩𑒯𑒪 𑒕𑒲।
𑒮𑒴𑒞𑓂𑒩𑒡𑒰𑒩: 𑒏𑒼𑒢𑒼 𑒢𑒰𑒧 𑒕𑒳𑒙𑒱 𑒑𑒹𑒪𑒻 𑒏𑒲 ?
𑒧𑒯𑒱𑒪𑒰 𑒮𑒴𑒞𑓂𑒩𑒡𑒰𑒩: 𑒨𑒋𑒯 𑒪𑒱𑒁। 𑒮𑒹𑒯𑒼 𑒯𑒧𑒯𑒲𑓀 𑒏𑒯𑒴। 𑒂𑒥 𑒞𑒰𑒧-𑒗𑒰𑒧 𑒬𑒳𑒩𑒴 𑒏𑒩𑒴 𑒂 𑒠𑒹𑒐𑒰𑒅 𑒖𑒹 𑒏𑒲 𑒫𑒱𑒮𑓂𑒞𑒰𑒩 𑒪𑒹𑒢𑒹 𑒁𑒕𑒱 𑒄 𑒢𑒰𑒙𑒏।
𑒮𑒴𑒞𑓂𑒩𑒡𑒰𑒩: 𑒥𑒹𑒮 𑒞𑒿 𑒬𑒳𑒩𑒴 𑒏𑒩𑒴।

(𑒏𑒪𑒰𑒏𑒰𑒩 𑒮𑒦 𑒋𑒏 𑒠𑒼𑒮𑒩𑒰𑒧𑒹 𑒧𑒱𑒖𑓂𑒗𑒛𑓃 𑒦𑓄 𑒋𑒏-𑒋𑒏𑒙𑒰 𑒤𑒩𑒰𑒏 𑒣𑒰𑒿𑒞𑒲 𑒥𑒢𑒥𑒻𑒞 𑒕𑒟𑒱। 𑒕𑒼𑒙, 𑒏𑒱𑒬𑒼𑒩, 𑒨𑒳𑒫𑒰 𑒂 𑒥𑒴𑒜𑓃𑒏 𑒣𑒰𑒿𑒞𑒲। 𑒮𑓂𑒞𑓂𑒩𑒲-𑒣𑒳𑒩𑒳𑒭𑒏 𑒣𑒰𑒿𑒞𑒲। 𑒔𑒱𑒛𑓃𑒻-𑒔𑒳𑒢𑒧𑒳𑒢𑒲 𑒖𑒹𑒏𑒰𑒿 𑒕𑒼𑒙 𑒥𑒾𑒂 𑒂 𑒕𑒼𑒙 𑒥𑒳𑒔𑓂𑒔𑒲 𑒥𑒖𑒻𑒞 𑒁𑒕𑒱। 𑒏𑒱𑒬𑒼𑒩 𑒮𑒦 𑒯𑒰𑒟𑒧𑒹 𑒑𑒰𑒕-𑒥𑒵𑒔𑓂𑒕𑒏 𑒯𑒥𑒰-𑒥𑒮𑒰𑒞𑒧𑒹 𑒯𑒱𑒪𑒻𑒞 𑒣𑒰𑒞𑒏 𑒤𑒼𑒙𑒼 𑒪𑓄 𑒪𑒻𑒞 𑒕𑒟𑒱। 𑒨𑒳𑒫𑒰 𑒣𑒳𑒩𑒳𑒭 𑒮𑒴𑒩𑓂𑒨-𑒞𑒩𑒹𑒑𑒝𑒏 𑒤𑒼𑒙𑒼 𑒂 𑒨𑒳𑒫𑒰 𑒮𑓂𑒞𑓂𑒩𑒲-𑒔𑒢𑓂𑒠𑓂𑒩𑒏 𑒤𑒼𑒙𑒼 𑒪𑒹𑒢𑒹 𑒁𑒥𑒻𑒞 𑒁𑒕𑒱 𑒪𑒹𑒢𑒹 𑒁𑒕𑒱 𑒞𑒿 𑒥𑒴𑒜𑓃 𑒂 𑒥𑒴𑒜𑓃𑒲 𑒦𑒴𑒞-𑒣𑓂𑒩𑒹𑒞, 𑒦𑒑𑒫𑒰𑒢 𑒂 𑒮𑓂𑒫𑒣𑓂𑒢𑒏 𑒤𑒼𑒙𑒼 𑒯𑒰𑒟𑒧𑒹 𑒪𑓄 𑒪𑒻𑒞 𑒕𑒟𑒱।)

𑓑 𑒕𑒼𑒙 𑒥𑒾𑒂: 𑒯𑒧 𑒍𑒧। 𑒯𑒧 𑒔𑒱𑒛𑓃𑒻। 𑒢𑒻 𑒦𑒑𑒖𑒼𑒑𑒢𑒲।
𑓒 𑒕𑒼𑒙 𑒥𑒳𑒔𑓂𑒔𑒲: 𑒯𑒧 𑒂𑒮𑓂𑒟𑒰। 𑒯𑒧 𑒔𑒳𑒢𑒧𑒳𑒢𑒲। 𑒯𑒰 𑒯𑒰 (𑒯𑒿𑒮𑒻𑒞)। 𑒦𑒑𑒖𑒼𑒑𑒢𑒲।
𑓓 𑒏𑒱𑒬𑒼𑒩 𑒥𑒾𑒂: 𑒯𑒧 𑒖𑒨𑒢𑓂𑒞। 𑒯𑒧 𑒑𑒰𑒕।
𑓔 𑒏𑒱𑒬𑒼𑒩 𑒥𑒳𑒔𑓂𑒔𑒲: 𑒯𑒧 𑒁𑒣𑒰𑒪𑒰। 𑒯𑒧 𑒥𑒵𑒔𑓂𑒕। 𑒯𑒹𑒿 𑒯𑒹𑒿 (𑒯𑒿𑒮𑒻𑒞)।
𑓕 𑒨𑒳𑒫𑒰: 𑒯𑒧 𑒫𑒱𑒖𑒨। 𑒯𑒧 𑒮𑒴𑒩𑓂𑒨 𑒞𑒩𑒹𑒑𑒝।
𑓖 𑒨𑒳𑒫𑒞𑒲: 𑒯𑒧 𑒫𑒱𑒖𑒨𑒰। 𑒯𑒧 𑒔𑒢𑓂𑒠𑓂𑒩 𑒧𑒰𑒢𑒹 𑒔𑒢𑓂𑒠𑒰। 𑒐𑒲-𑒐𑒲 (𑒯𑒿𑒮𑒻𑒞)।
𑓗 𑒫𑒵𑒠𑓂𑒡: (𑒟𑒛𑓃𑒟𑒛𑓃𑒰𑒃𑒞) 𑒯𑒧 𑒢𑒹𑒏𑒪𑒰𑒪। 𑒯𑒧 𑒦𑒴𑒞-𑒣𑓂𑒩𑒹𑒞-𑒩𑒰𑒏𑒬...।
𑓘 𑒫𑒵𑒠𑓂𑒡𑒰: 𑒯𑒧 𑒩𑒰𑒧𑒫𑒞𑒲। 𑒯𑒧 𑒮𑓂𑒫𑒣𑓂𑒢 𑒧𑒰𑒢𑒹 𑒏𑒪𑓂𑒣𑒢𑒰। 𑒯𑒧...𑒯𑒧...𑒯𑒧...।
(𑒏𑒪𑓂𑒣𑒢𑒰𑒏 𑒦𑒰𑒫-𑒦𑓀𑒑𑒱𑒧𑒰 𑒞𑒲𑒢 𑒥𑒹𑒩 𑒏𑒩𑒻𑒞 𑒕𑒟𑒱।)
𑒮𑒴𑒞𑓂𑒩𑒡𑒰𑒩: 𑒁𑒯𑒰𑒿 𑒮𑒦𑒏 𑒏𑒰𑒖 𑒏𑒲 ?
𑒧𑒯𑒱𑒪𑒰 𑒮𑒴𑒞𑓂𑒩𑒡𑒰𑒩: 𑒁𑒯𑒰𑒿 𑒮𑒦𑒏 𑒏𑒰𑒖 𑒏𑒲 ?
(𑒂𑒥 𑒕𑒼𑒙 𑒥𑒾𑒂𑒏𑒹𑒿 –𑒍𑒧𑒏𑒹𑒿- 𑓑 𑒕𑒼𑒙 𑒥𑒳𑒔𑓂𑒔𑒲- 𑒂𑒮𑓂𑒟𑒰𑒏𑒹𑒿- 𑓒 𑒋𑒢𑒰 𑓘 𑒡𑒩𑒱 𑒏𑒯𑒥।)

𑓑 𑒮𑒿 𑓘 (𑒮𑓀𑒑𑒹-𑒮𑓀𑒑): 𑒯𑒧 𑒮𑒦 𑒏𑒼𑒢𑒼 𑒏𑒰𑒖𑒏𑒹𑒿 𑒜𑓀𑒑𑒮𑒿 𑒏𑓄 𑒠𑒹𑒥, 𑒏𑒯𑒱 𑒏𑓄 𑒞𑒿 𑒠𑒹𑒐𑒴।

𑒧𑒯𑒱𑒪𑒰 𑒮𑒴𑒞𑓂𑒩𑒡𑒰𑒩: 𑒔𑒱𑒛𑓃𑒻-𑒔𑒳𑒢𑒧𑒳𑒢𑒲, 𑒠𑒳𑒢𑒴 𑒑𑒼𑒙𑒹 𑒂𑒅 𑒂 𑒦𑒑𑒖𑒼𑒑𑒢𑒲 𑒥𑒢𑒱 𑒖𑒰𑒅।
(𑓑 𑒮𑒿 𑓘 𑒮𑓀𑒑𑒹-𑒮𑓀𑒑 𑒔𑒱𑒏𑒛𑓃𑓄 𑒪𑒑𑒻𑒞 𑒁𑒕𑒱। 𑒞𑒐𑒢𑒹 𑓑 𑒂 𑓒 𑒗𑒼𑓀𑒗𑒮𑒿 𑒢𑒱𑒏𑒪𑒱 𑒏𑓄 𑒥𑒑𑒪𑒧𑒹 𑒩𑒰𑒐𑒪 𑒗𑒼𑒩𑒰𑒮𑒿 𑒦𑒑𑒖𑒼𑒑𑒢𑒲𑒏 𑒤𑒼𑒙𑒼 𑒂 𑒠𑒴𑒙𑒰 𑒪𑒹𑒖𑒩 𑒪𑒰𑒃𑒙 𑒪𑓄 𑒁𑒢𑒻 𑒕𑒟𑒱 𑒂 𑒬𑒹𑒭 𑒕𑒯 𑒑𑒼𑒙𑒹 𑒋𑒏𑒙𑒰 𑒔𑒠𑓂𑒠𑒩𑒱𑒮𑒿 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒁𑒜𑓃 𑒏𑓄 𑒠𑒻 𑒕𑒟𑒱।)

𑓑 : (𑒪𑒹𑒖𑒩 𑒪𑒰𑒃𑒙 𑒥𑒛𑓃𑒥𑒻 𑒕𑒟𑒱): 𑒏𑒞𑓄 𑒕𑒲 𑒂𑒮𑓂𑒟𑒴।
𑓒 : (𑒔𑒠𑓂𑒠𑒩𑒱𑒮𑒿 𑒥𑒯𑒰𑒩 𑒦𑓄 𑒪𑒹𑒖𑒩 𑒪𑒰𑒃𑒙 𑒥𑒛𑓃𑒥𑒻𑒞) 𑒯𑒧𑒠𑒹𑒐 𑒪𑒹𑒪𑒾𑓀 𑒄 𑒮𑓀𑒏𑒹𑒞। 𑒯𑒧 𑒍𑒞𑓄 𑒕𑒪𑒾𑓀 𑒗𑒼𑒿𑒗𑒧𑒹।
𑓑 𑒂 𑓒 (𑒮𑓀𑒑𑒹 𑒮𑓀𑒑 𑒥𑒖𑒻𑒞): 𑒯𑒿 𑒦𑓄 𑒑𑒹𑒪।
𑓗 𑒂 𑓘 (𑒮𑓀𑒑𑒹 𑒥𑒖𑒻𑒞): 𑒏𑒲 𑒦𑓄 𑒑𑒹𑒪?
𑓑: 𑒠𑒹𑒐𑒪𑒾𑓀 𑒢𑒻 𑒖𑒹 𑒏𑒼𑒢𑒰 𑒣𑓂𑒩𑒏𑒰𑒬𑒮𑒿 𑒯𑒧𑒮𑒦 𑒋𑒏 𑒠𑒼𑒮𑒩𑒰𑒏𑒹𑒿 𑒞𑒰𑒏𑒱 𑒪𑒹𑒪𑒾𑓀।
𑓗: 𑒄 𑒞𑒿 𑒖𑒐𑒢 𑒯𑒧 𑒧𑒢𑒳𑒏𑓂𑒐 𑒩𑒯𑒲, 𑒧𑒰𑒢𑒹 𑒧𑒳𑒃𑒪𑒰𑒏 𑒣𑒯𑒱𑒢𑒹, 𑒞𑒐𑒢 𑒐𑒴𑒥 𑒣𑓂𑒩𑒨𑒼𑒑 𑒏𑒩𑒻𑒞 𑒩𑒯𑒲। 𑒏𑒲 𑒨𑒻 𑒩𑒰𑒧𑒫𑒞𑒲।
𑓘: 𑒏𑒩𑒻𑒞 𑒞𑒿 𑒩𑒯𑒲, 𑒧𑒳𑒠𑒰 𑒣𑓂𑒩𑒏𑒰𑒬 𑒮𑓀𑒑 𑒏𑒞𑒹𑒏 𑒑𑒩𑓂𑒧𑒲 𑒂𑒥𑒱 𑒖𑒰𑒃 𑒕𑒪𑒻। 𑒑𑒳𑒧𑒰𑒩𑒮𑒿 𑒖𑒰𑒢 𑒔𑒪𑒱 𑒖𑒰𑒃 𑒕𑒪।
𑓗: 𑒯𑒹, 𑒣𑓂𑒩𑒏𑒰𑒬 𑒯𑒹𑒞𑒻 𑒞𑒿 𑒑𑒩𑓂𑒧𑒲 𑒞𑒿 𑒥𑒯𑒰𑒩 𑒯𑒹𑒥𑒹 𑒏𑒩𑒞𑒻।
𑓘: 𑒢𑒹𑒏𑒪𑒰𑒪𑒖𑒲। 𑒮𑒼𑒪𑒯 𑒂𑒢𑒰 𑒆𑒩𑓂𑒖𑒰𑒧𑒹 𑒮𑒿 𑒣𑒢𑓂𑒠𑓂𑒩𑒯 𑒂𑒢𑒰 𑒑𑒩𑓂𑒧𑒲 𑒂 𑒋𑒏 𑒂𑒢𑒰 𑒧𑒰𑒞𑓂𑒩 𑒣𑓂𑒩𑒏𑒰𑒬 𑒂𑒢𑒻 𑒕𑒪𑒾𑓀 𑒁𑒯𑒰𑒿। 𑒥𑒛𑓃𑒏𑒰 𑒫𑒻𑒖𑓂𑒘𑒰𑒢𑒱𑒏 𑒥𑒢𑒻 𑒕𑒪𑒾𑓀। 𑒣𑓂𑒩𑒏𑒰𑒬 𑒞𑒿 𑒂𑒥𑒻 𑒕𑒪 𑒧𑒳𑒠𑒰 𑒑𑒳𑒧𑒰𑒩𑒮𑒿 𑒖𑒰𑒢 𑒔𑒪𑒱 𑒖𑒰𑒃 𑒕𑒪।
𑓗: 𑒁𑒯𑒰𑒿 𑒞𑒿 𑒕𑒲𑒯𑒹 𑒏𑒪𑓂𑒣𑒢𑒰। 𑒧𑒳𑒃𑒪𑒰𑒏 𑒥𑒰𑒠 𑒞𑒹𑒿 𑒢𑒹 𑒥𑒢𑒱 𑒑𑒹𑒪𑒾𑓀 𑒏𑒪𑓂𑒣𑒢𑒰।
𑓘: 𑒂 𑒞𑒹𑒿 𑒢𑒹 𑒁𑒯𑒰𑒿 𑒥𑒢𑒱 𑒑𑒹𑒪𑒾𑓀 𑒦𑒴𑓄𑓄𑓄𑓄𑓄𑒞, 𑒣𑓂𑒩𑒹𑓄𑓄𑓄𑓄𑓄𑒞, 𑒩𑒰𑒏𑒬।
𑓗: (𑒏𑒢𑒹 𑒞𑒧𑒮𑒰𑒃𑒞) 𑒯𑒹 𑒞𑒿 𑒁𑒯𑒲𑓀 𑒏𑒯𑒴 𑒖𑒹 𑒣𑓂𑒩𑒏𑒰𑒬 𑒥𑒱𑒢 𑒑𑒩𑓂𑒧𑒲𑒏 𑒦𑒹𑒙 𑒮𑒏𑒻𑒋। (𑒪𑒼𑒏𑒮𑒦 𑒠𑒱𑒮 𑒯𑒰𑒟 𑒣𑒮𑒰𑒩𑒱 𑒏𑓄 𑒞𑒏𑒻𑒞 𑒁𑒕𑒱)
𑓕: (𑒮𑒼𑒗𑒰𑒿 𑒁𑒥𑒻𑒞): 𑒢𑒻, 𑒄 𑒮𑒧𑓂𑒦𑒫 𑒢𑒻 𑒁𑒕𑒱।
𑓖: 𑒄 𑒮𑒧𑓂𑒦𑒫 𑒁𑒕𑒱 𑒫𑒱𑒖𑒨।
𑓕: 𑒂𑒥𑒱 𑒑𑒹𑒪𑒲 𑒫𑒱𑒖𑒨𑒰!!! (𑒂𑒬𑓂𑒔𑒩𑓂𑒨𑒮𑒿 𑒯𑒰𑒟 𑒣𑒮𑒰𑒩𑒻𑒞 𑒁𑒕𑒱।) 𑒯𑒱𑒢𑒏𑒰𑒮𑒿 𑒏𑒢𑒹 𑒣𑒴𑒕𑒴 𑒖𑒹 𑒯𑒱𑒢𑒏𑒰 𑒪𑒑 𑒁𑒣𑒢 𑒣𑓂𑒩𑒏𑒰𑒬 𑒕𑒢𑓂𑒯𑒱 𑒏𑒲?
𑓘: 𑒢𑒻 𑒕𑒢𑓂𑒯𑒱 𑒧𑒳𑒠𑒰 𑒞𑒻𑒨𑒼 𑒩𑒰𑒞𑒱𑒧𑒹 𑒖𑒹 𑒯𑒱𑒢𑒏𑒰𑒮𑒿 𑒃𑒖𑒼𑒩𑒱𑒨𑒰 𑒕𑒱𑒙𑒏𑒻𑒋 𑒮𑒹 𑒚𑓀𑒜𑒰 𑒞𑒿 𑒪𑒑𑒱𑒞𑒹 𑒁𑒕𑒱।
𑓗: 𑒯𑒰!!! 𑒏𑒪𑓂𑒣𑒢𑒰!!! 𑒁𑒣𑒢𑒹 𑒤𑒳𑒩𑒹𑒢𑒹 𑒥𑒖𑒻𑒞 𑒖𑒰𑒅…𑒥𑒖𑒻𑒞 𑒖𑒰𑒅…!!!
𑓘: 𑒁𑒯𑒰𑒿 𑒖𑒿 𑒖𑒱𑒥𑒻𑒞𑒹𑒧𑒹 𑒯𑒧𑒩 𑒑𑒣 𑒮𑒳𑒃𑒞𑒾𑓀, 𑒏𑒪𑓂𑒣𑒢𑒰 𑒏𑒩𑒱𑒞𑒾𑓀 𑒞𑒿 𑒥𑒢𑒰 𑒮𑒏𑒱𑒞𑒾𑓀 𑒥𑒱𑒢 𑒑𑒳𑒧𑒰𑒩𑒥𑒪𑒰 𑒣𑓂𑒩𑒏𑒰𑒬। 𑒚𑓀𑒜𑓃𑒰 𑒣𑓂𑒩𑒏𑒰𑒬।
𑓗: 𑒮𑒳𑒢𑓄 𑒯𑒾 𑒍𑒧-𑒂𑒮𑓂𑒟𑒰, 𑒥𑒱𑒢 𑒑𑒳𑒧𑒰𑒩𑒥𑒪𑒰 𑒣𑓂𑒩𑒏𑒰𑒬 !! (𑒂𑒬𑓂𑒔𑒩𑓂𑒨 𑒣𑓂𑒩𑒏𑒙 𑒏𑒩𑒻𑒞 𑒯𑒰𑒟 𑒣𑒮𑒰𑒩𑒻𑒞 𑒁𑒕𑒱।) 𑒂𑒥 𑒞𑒼𑒿𑒯𑒲𑓀 𑒮𑒦 𑒥𑒞𑒰𑒥𑒯 𑒖𑒹 𑒥𑒱𑒢 𑒑𑒳𑒧𑒰𑒩𑒥𑒪𑒰 𑒣𑓂𑒩𑒏𑒰𑒬 𑒮𑒧𑓂𑒦𑒫 𑒢𑒻 𑒕𑒻।
𑓑 𑒂 𑓒 : (𑒂𑒬𑒔𑒩𑓂𑒨𑒮𑒿 𑒯𑒰𑒟 𑒣𑒮𑒰𑒩𑒻𑒞) 𑒣𑓂𑒩𑒏𑒰𑒬𑒮𑒿 𑒑𑒩𑓂𑒧𑒲 𑒢𑒱𑒏𑒪𑒞𑒻 𑒞𑒿 𑒦𑒑𑒖𑒼𑒑𑒢𑒲 𑒞𑒿 𑒧𑒩𑒱𑒨𑒹 𑒖𑒹𑒞𑒻।
𑓘: 𑒞𑒐𑒢 𑒞𑒼𑓀 𑒮𑒦 𑒏𑒼𑒢𑒰 𑒖𑒲𑒫𑒱𑒞 𑒕𑒯।
𑓑: 𑒧𑒰𑒢𑒹?
𑓒: 𑒣𑓂𑒩𑒏𑒰𑒬 𑒞𑒿 𑒚𑓀𑒜𑓃𑒰 𑒯𑒼𑒃 𑒕𑒻।
𑓑: 𑒯𑒧𑒩 𑒣𑒳𑒕𑒩𑒲𑒮𑒿 𑒥𑒯𑒩𑒰𑒃𑒋 𑒣𑓂𑒩𑒏𑒰𑒬, 𑒬𑒲𑒞𑒪 𑒣𑓂𑒩𑒏𑒰𑒬।
𑓒: 𑒏𑒩𑒻𑒋 𑒧𑒼𑒢 𑒚𑓀𑒜𑓃𑒰। 𑒠𑒻𑒋 𑒮𑓀𑒏𑒹𑒞 𑒂 𑒞𑒰𑒏𑒱 𑒪𑒻 𑒕𑒲 𑒯𑒧 𑒮𑒦 𑒋𑒏-𑒠𑒼𑒮𑒩𑒰𑒏𑒹𑒿।
𑓘: 𑒍𑒯, 𑒯𑒧 𑒞𑒏𑒻𑒞 𑒩𑒯𑒱 𑒑𑒹𑒪𑒾𑓀 𑒩𑒰𑒞𑒱𑒧𑒹 𑒠𑒴𑒩 𑒠𑒹𑒬𑒏 𑒔𑒢𑓂𑒠𑓂𑒩𑒧𑒰 𑒂 𑒏𑒩𑒻𑒞 𑒩𑒯𑒱 𑒑𑒹𑒪𑒾𑓀 𑒏𑒪𑓂𑒣𑒢𑒰। 𑒧𑒳𑒠𑒰 𑒁𑒯𑒰𑒿 𑒢𑒹𑒏𑒪𑒰𑒪, 𑒏𑒱𑒋 𑒢𑒻 𑒠𑒹𑒐 𑒮𑒏𑒪𑒾𑓀 𑒩𑒰𑒞𑒱𑒧𑒹 𑒒𑒳𑒧𑒻𑒞 𑒦𑒑 𑒖𑒼𑒑𑒢𑒲 𑒮𑒦𑒏𑒹𑒿।
𑓗: 𑒁𑒮𑒤𑒪 𑒫𑒻𑒖𑓂𑒘𑒰𑒢𑒱𑒏 𑒕𑒲 𑒯𑒧। 𑒩𑒰𑒏𑒬 𑒥𑒢𑒱 𑒒𑒳𑒧𑒻 𑒕𑒲, 𑒣𑓂𑒩𑒏𑒰𑒬𑒏 𑒆𑒩𑓂𑒖𑒰𑒮𑒿 𑒖𑒛𑓃𑒻 𑒕𑒲। 𑒏𑒪𑓂𑒣𑒢𑒹, 𑒯𑒧 𑒢𑒻 𑒏𑓄 𑒮𑒏𑒪𑒾𑓀 𑒏𑒪𑓂𑒣𑒢𑒰, 𑒢𑒻 𑒞𑒿 𑒥𑒢𑒱 𑒖𑒃𑒞𑒾𑓀 𑒦𑒑𑒖𑒼𑒑𑒢𑒲।
𑓘. 𑒖𑒹 𑒣𑒴𑒩𑒰 𑒏𑓄 𑒠𑒻𑒞𑒾𑓀 𑒁𑒯𑒰𑒿 𑒯𑒧𑒩 𑒍 𑒏𑒪𑓂𑒣𑒢𑒰 𑒞𑒿 𑒯𑒧𑒯𑒴𑒿 𑒥𑒢𑒱 𑒖𑒃𑒞𑒾𑓀 𑒦𑒑𑒖𑒼𑒑𑒢𑒲, । 𑒢𑒻 𑒏𑒙𑒱𑒞𑒻 𑒋𑒞𑒹𑒏 𑒩𑒰𑒮 𑒑𑒰𑒕-𑒥𑒵𑒔𑓂𑒕, 𑒥𑒼𑒢 𑒠𑒹𑒐𑒴 𑒏𑒞𑒹𑒏 𑒠𑒴𑒩 𑒦𑒹𑒪 𑒠𑒹𑒐𑒰𑒃𑒋 (𑒠𑒴𑒩 𑒥𑒰𑒡 𑒠𑒱𑒮 𑒂𑓀𑒑𑒳𑒩 𑒠𑒹𑒐𑒥𑒻𑒞 𑒁𑒕𑒱।)

𑓓 𑒂 𑓔 (𑒮𑒧𑒫𑒹𑒞 𑒮𑓂𑒫𑒩𑒧𑒹) 𑒁𑒮𑒑𑒩 𑒦𑓄 𑒑𑒹𑒪 𑒕𑒲 𑒯𑒧 𑒮𑒦। 𑒮𑒴𑒩𑓂𑒨 𑒞𑒩𑒹𑒑𑒢 𑒔𑒢𑓂𑒠𑓂𑒩𑒧𑒰 𑒮𑒢 𑒁𑒮𑒑𑒩।

(𑒌 𑒠𑒳𑒢𑒴𑒏𑒹𑒿 𑒕𑒼𑒛𑓃𑒱 𑒏𑓄 𑒮𑒦 𑒏𑒪𑒰𑒏𑒰𑒩 𑒦𑒲𑒛𑓃𑒧𑒹 𑒧𑒱𑒖𑓂𑒗𑒩 𑒦𑓄 𑒖𑒰𑒃 𑒕𑒟𑒱।)
𑓔: 𑒁𑒮𑒑𑒩𑒹 𑒩𑒯𑒱 𑒑𑒹𑒪 𑒕𑒲 𑒯𑒧 𑒮𑒦। 𑒏𑒱𑒕𑒳 𑒠𑒱𑒢𑒧𑒹 𑒐𑒞𑒧 𑒦𑓄 𑒖𑒰𑒃 𑒖𑒰𑒋𑒥।
𑓓: 𑒪𑒑𑒻𑒋 𑒮𑒋𑒯। 𑒥𑒢𑒱 𑒖𑒰𑒋𑒥 𑒦𑒴𑒞, 𑒣𑓂𑒩𑒹𑒞, 𑒩𑒰𑒏𑒬।
(𑒞𑒐𑒢𑒹 𑒦𑒴𑒞-𑒣𑓂𑒩𑒹𑒞 𑒥𑒢𑒪 𑒫𑒵𑒠𑓂𑒡 𑒁𑒥𑒻𑒋।)
𑓗: 𑒮𑒹 𑒏𑒱𑒋, 𑒁𑒯𑒰𑒿 𑒮𑒦𑒏 𑒄 𑒮𑓂𑒟𑒱𑒞𑒱 𑒏𑒼𑒢𑒰 𑒦𑒹𑒪।
𑓓: 𑒁𑒯𑒰𑒿 𑒠𑓂𑒫𑒰𑒩𑒹।
𑓔: 𑒁𑒯𑒲𑓀 𑒠𑒳𑒂𑒩𑒹।
𑓗: 𑒂𑒥 𑒯𑒧 𑒏𑒲 𑒏𑓄 𑒠𑒹𑒪𑒾𑓀।
𑓓: 𑒏𑒰𑒑𑒔 𑒥𑒢𑒥𑒻𑒪𑒹 𑒯𑒧𑒩𑒰 𑒏𑒰𑒙𑒪𑒾𑓀।
𑓔: 𑒧𑒏𑒰𑒢 𑒥𑒢𑒥𑒻𑒪𑒹 𑒯𑒧𑒩𑒰 𑒏𑒰𑒙𑒪𑒾𑓀।
𑓗: 𑒧𑒳𑒠𑒰 𑒮𑒹 𑒞𑒿 𑒖𑒩𑒴𑒩𑒲 𑒕𑒪। 𑒮𑒹 𑒞𑒿 𑒏𑒩𑒻𑒋 𑒣𑒛𑓃𑒱𑒞𑒻 𑒏𑒱𑒢𑒹।
𑓓: 𑒞𑒿 𑒯𑒧𑒩𑒰 𑒩𑒼𑒣𑒪𑒾𑓀 𑒏𑒱𑒋 𑒢𑒻। 𑒏𑒪𑓂𑒣𑒢𑒰 𑒏𑒱𑒋 𑒢𑒻 𑒏𑒹𑒪𑒾𑓀।
(𑒞𑒐𑒢𑒹 𑒫𑒵𑒠𑓂𑒡𑒰𑒏 𑒣𑓂𑒩𑒫𑒹𑒬 𑒯𑒼𑒃𑒋।)
𑓘: 𑒏𑒯𑒴। 𑒏𑒪𑓂𑒣𑒢𑒰 𑒏𑒱𑒋 𑒢𑒻 𑒏𑒹𑒪𑒾𑓀?
𑓗: 𑒏𑒼𑒢 𑒏𑒪𑓂𑒣𑒢𑒰।
𑓘: 𑒏𑒪𑓂𑒣𑒢𑒰 𑒖𑒹 𑒏𑒞𑒹𑒏 𑒏𑒰𑒙𑒲 𑒂 𑒞𑒏𑒩 𑒏𑒞𑒹𑒏 𑒑𑒳𑒢𑒰 𑒩𑒼𑒣𑒲।
𑓗: 𑒧𑒳𑒠𑒰 𑒯𑒧 𑒞𑒿 𑒩𑒼𑒣𑒪𑒾𑓀।
𑓓: 𑒁𑒯𑒰𑒿 𑒩𑒼𑒣𑒪𑒾𑓀 𑒨𑒴𑒏𑒹𑒪𑒱𑒣𑓂𑒙𑒮।
𑓔: 𑒁𑒯𑒰𑒿 𑒩𑒼𑒣𑒪𑒾𑓀 𑒫𑒱𑒠𑒹𑒬𑒲 𑒑𑒰𑒕।
𑓓: 𑒐𑒴𑒢..𑒢𑒻 𑒢𑒻..𑒣𑒰𑒢𑒱 𑒣𑒲𑒥 𑒑𑒹𑒪 𑒮𑒦𑒙𑒰 𑒌 𑒖𑒧𑒲𑒢𑒏।
𑓗: 𑒯𑒹 𑒮𑒦𑒙𑒰 𑒯𑒧𑒩𑒹 𑒠𑒼𑒐 𑒢𑒻 𑒠𑒻 𑒖𑒰𑒅। 𑒏𑒲 𑒁𑒯𑒰𑒿 𑒮𑒦 𑒆𑒩𑓂𑒖𑒰 𑒢𑒻 𑒐𑒩𑓂𑒔 𑒏𑒩𑒻 𑒕𑒲? 𑒯𑒧 𑒫𑒻𑒖𑓂𑒘𑒰𑒢𑒱𑒏 𑒕𑒲। 𑒮𑒦𑒙𑒰 𑒥𑒳𑒗𑒪 𑒁𑒃 𑒯𑒧𑒩𑒰।
(𑓓 𑒂 𑓔 𑒮𑒧𑒫𑒹𑒞 𑒮𑓂𑒫𑒩𑒧𑒹 𑒑𑒲𑒞 𑒑𑒰𑒥𑒻 𑒕𑒟𑒱।)

𑒂𑒏𑓂𑒮𑒲𑒖𑒢 𑒖𑒩𑒰 𑒦𑒼𑒖𑒢 𑒥𑒢𑒥𑒻 𑒕𑒲
𑒏𑒰𑒖 𑒧𑒼𑒞𑒰𑒥𑒱𑒏 𑒮𑒹𑒯𑒼 𑒖𑒩𑒥𑒻 𑒕𑒲
𑒖𑒰𑒛𑓃𑒏 𑒧𑒰𑒮𑒧𑒹 𑒑𑒩𑒧 𑒩𑒯𑒻 𑒕𑒲
𑒢𑒻 𑒯𑒼𑒃 𑒕𑒻 𑒮𑒑𑒩𑒼 𑒑𑒩𑒧𑒲 𑒞𑒿𑒋
(𑒢𑒰𑒔𑓄 𑒪𑒑𑒻 𑒖𑒰𑒃𑒋।)
𑓗: 𑒥𑒳𑒗𑒪 𑒁𑒕𑒱 𑒯𑒧𑒩𑒰 𑒄 𑒮𑒦। 𑒧𑒳𑒠𑒰 𑒑𑒩𑓂𑒧𑒲 𑒏𑒧𑓂𑒧𑒹 𑒮𑒯𑒲 𑒂𑒢𑒻 𑒞𑒿 𑒕𑒲।
𑓓: 𑒧𑒳𑒠𑒰 𑒮𑒹𑒯𑒼 𑒁𑒯𑒲𑓀 𑒮𑒦 𑒪𑒹𑒪।
𑓗: 𑒯𑒧𑒩𑒰 𑒮𑒦 𑒪𑒹𑒪। 𑒏𑒼𑒢𑒰..𑒏𑒼𑒢𑒰?
𑓔: 𑒖𑒰𑒛𑓃𑒧𑒹 𑒤𑒴𑒪 𑒞𑒼𑒛𑓃𑒻𑒏𑒰𑒪 𑒯𑒰𑒟 𑒢𑒻 𑒚𑒱𑒚𑒳𑒩𑒋 𑒁𑒯𑒰𑒿 𑒮𑒦𑒏 𑒞𑒹𑒿 𑒏𑒧𑒪𑒏 𑒤𑒴𑒪𑒏𑒹𑒿 𑒑𑒩𑒧 𑒩𑒰𑒐𑒻 𑒕𑒲।
𑓗: 𑒯𑒹 𑒞𑒿 𑒏𑒱𑒨𑒼 𑒁𑒯𑒰𑒿𑒏𑒹𑒿 𑒏𑒰𑒙𑒻𑒋 𑒞𑒿 𑒁𑒣𑒢 𑒮𑒳𑒩𑒏𑓂𑒭𑒰 𑒁𑒣𑒢𑒹 𑒏𑒱𑒋 𑒢𑒻 𑒏𑒩𑒻 𑒕𑒲।
𑓘: 𑒏𑒪𑓂𑒣𑒢𑒰..𑒮𑒼𑒔𑒴 𑒮𑒼𑒔𑒴।
𑓓: 𑒏𑒩𑒻 𑒕𑒲।
𑓔: 𑒖𑒞𑒹𑒏 𑒮𑒏 𑒥𑒢𑒱 𑒣𑒛𑓃𑒻𑒋, 𑒞𑒞𑒹𑒏 𑒏𑒩𑒻 𑒕𑒲।
(𑓓 𑒂 𑓔 𑒮𑒧𑒫𑒹𑒞 𑒮𑓂𑒫𑒩𑒧𑒹 𑒑𑒲𑒞 𑒑𑒰𑒥𑒻 𑒕𑒟𑒱।)
𑒏𑒰𑒿𑒙 𑒠𑒹𑒐𑒰 𑒏𑓄 𑒠𑒴𑒩 𑒦𑒑𑒰𑒥𑒲
𑒤𑒪 𑒐𑒳𑒂 𑒏𑓄 𑒦𑒴𑒐 𑒦𑒑𑒰𑒥𑒲
𑒤𑒴𑒪 𑒞𑒼𑒛𑓃𑒱 𑒏𑓄, 𑒪𑓄 𑒖𑒰𑒅
𑒠𑒹𑒫𑒞𑒰 𑒣𑒱𑒞𑒩𑒣𑒩 𑒁𑒯𑒰𑒿 𑒔𑒜𑓃𑒰𑒅
(𑒢𑒰𑒔𑓄 𑒪𑒑𑒻 𑒖𑒰𑒃𑒋।)
𑓓: 𑒤𑒪-𑒤𑒴𑒪𑒏 𑒪𑒰𑒪𑒔𑒼 𑒠𑒻 𑒕𑒱𑒌।
𑓔:𑒏𑒰𑒿𑒙 𑒠𑒹𑒐𑒰 𑒏𑓄 𑒛𑒩𑒰𑒥𑒱𑒞𑒼 𑒕𑒱𑒌
𑓓: 𑒧𑒳𑒠𑒰 𑒞𑒻𑒨𑒼 𑒢𑒻 𑒧𑒰𑒢𑒻 𑒖𑒰𑒃𑒋।
𑓘: 𑒏𑒪𑓂𑒣𑒢𑒰..𑒮𑒼𑒔𑒴, 𑒮𑒼𑒔𑒴।
𑓗: (𑒫𑒵𑒠𑓂𑒡𑒰 𑒩𑒰𑒧𑒫𑒞𑒲 𑒠𑒱𑒮 𑒞𑒏𑒻𑒞।) 𑒯𑒹 𑒏𑒪𑓂𑒣𑒢𑒹। 𑒯𑒧𑒩𑒰 𑒖𑒹 𑒁𑒯𑒰𑒿 𑒏𑒯𑒻 𑒕𑒪𑒾𑓀 𑒖𑒹 𑒏𑒞𑒹𑒏 𑒏𑒰𑒙𑒲, 𑒞𑒏𑒩 𑒏𑒞𑒹𑒏 𑒑𑒳𑒢𑒰 𑒩𑒼𑒣𑒲, 𑒮𑒹 𑒯𑒱𑒢𑒏𑒼 𑒮𑒦𑒏𑒹𑒿 𑒏𑒯𑒱𑒨𑒾𑒢𑓂𑒯 𑒢𑒹।
𑓘: 𑒯𑒱𑒢𑒏𑒩 𑒮𑒦𑒏 𑒣𑒋𑒩 𑒞𑒿 𑒧𑒰𑒙𑒱𑒧𑒹 𑒩𑒼𑒣𑒪 𑒕𑒢𑓂𑒯𑒱, 𑒄 𑒮𑒦 𑒏𑒼𑒢𑒰 𑒏𑓄 𑒮𑒹 𑒏𑒩𑒞𑒰𑒯।
𑓗: (𑒧𑒳𑒿𑒯 𑒠𑒳𑒮𑒻𑒞) 𑒏𑒪𑓂𑒣𑒢𑒰..𑒮𑒼𑒔𑒴..𑒮𑒼𑒔𑒴।
(𑓓 𑒂 𑓔 𑒮𑒧𑒫𑒹𑒞 𑒑𑒰𑒥𑓄 𑒪𑒑𑒻𑒋 𑒂 𑒫𑒵𑒠𑓂𑒡𑒏 𑒧𑒳𑒿𑒯 𑒑𑒲𑒞 𑒮𑒳𑒢𑒥𑒰𑒏 𑒏𑓂𑒩𑒧𑒧𑒹 𑒗𑒴𑒮 𑒯𑒹𑒥𑓄 𑒪𑒑𑒻 𑒕𑒻; 𑒧𑒳𑒠𑒰 𑒑𑒲𑒞 𑒮𑒳𑒢𑒻𑒞-𑒮𑒳𑒢𑒻𑒞 𑒫𑒵𑒠𑓂𑒡𑒰 𑒧𑒳𑒠𑒱𑒞 𑒦𑓄 𑒖𑒰𑒃𑒋। )
𑒥𑒲𑒨𑒰 𑒤𑒿𑒮𑒻𑒋 𑒧𑒯𑒲𑒮𑒏 𑒏𑒹𑒮𑒧𑒹
𑒪𑓄 𑒖𑒰𑒃𑒋 𑒍 𑒠𑒴𑒩𑒠𑒹𑒬𑒧𑒹
𑒗𑒰𑒛𑓃𑒻𑒋 𑒠𑒹𑒯 𑒣𑒯𑒳𑒿𑒔𑒰𑒥𑒻𑒋 𑒍𑒞𑒋
𑒩𑒼𑒣𑒢𑒹 𑒣𑒋𑒩, 𑒔𑒪𑒱 𑒖𑒰𑒃 𑒍𑒞𑒋!!!!
(𑒥𑒱𑒢 𑒯𑒱𑒪𑒢𑒹 𑒠𑒳𑒢𑒴 𑒑𑒼𑒙𑒹 𑒯𑒰𑒟𑒮𑒿 𑒠𑒴𑒩 𑒃𑒬𑒰𑒩𑒰 𑒏𑒩𑒻𑒞 𑒁𑒕𑒱।)

𑓓: 𑒥𑒲𑒨𑒰𑒧𑒹 𑒞𑒹𑒢𑒰 𑒏𑓄 𑒢𑒼𑒏𑒮𑒲 𑒮𑒢 𑒤𑒰𑒿𑒮 𑒥𑒢𑒥𑒻 𑒕𑒱𑒌 𑒖𑒹 𑒍 𑒧𑒰𑒪𑒏 𑒠𑒹𑒯𑒧𑒹 𑒥𑒰𑒗𑒱 𑒏𑓄 𑒠𑒴𑒩 𑒔𑒪𑒱 𑒖𑒰𑒋 ।
𑓔: 𑒂 𑒠𑒴𑒩 𑒖𑒰 𑒏𑓄 𑒥𑒲𑒨𑒰 𑒍𑒞𑓄 𑒢𑒫 𑒑𑒰𑒕 𑒖𑒢𑒧𑒰𑒥𑒋।
𑓓: 𑒣𑒩𑒰𑒑 𑒪𑓄 𑒏𑓄 𑒙𑒱𑒏𑒪𑒲 𑒠𑒴𑒩 𑒖𑒰𑒃𑒋।
𑓔: 𑒠𑒼𑒮𑒩 𑒑𑒰𑒕𑒏𑒹𑒿 𑒍𑒃 𑒣𑒩𑒰𑒑𑒮𑒿 𑒣𑒳𑒭𑓂𑒙 𑒏𑒩𑒻𑒋..𑒠𑒴𑒩 𑒠𑒹𑒬𑒧𑒹।
𑓘: 𑒏𑒪𑓂𑒣𑒢𑒰..𑓄𑓄𑓄𑓄𑓄।
(𑒫𑒵𑒠𑓂𑒡 𑒧𑒰𑒟𑒣𑒩 𑒯𑒰𑒟 𑒡𑓄 𑒥𑒻𑒮 𑒖𑒰𑒃𑒋, 𑒧𑒳𑒠𑒰 𑒫𑒵𑒠𑓂𑒡𑒰 𑒮𑒹𑒯𑒼 𑒍𑒏𑒩 𑒥𑒑𑒪𑒧𑒹 𑒥𑒻𑒮 𑒖𑒰𑒃𑒋, 𑒂𑒏𑒰𑒬 𑒠𑒱𑒮 𑒔𑒱𑒢𑓂𑒞𑒱𑒞 𑒦𑓄 𑒞𑒏𑒻𑒞।)
𑓔: 𑒖𑒨𑒢𑓂𑒞 𑒂𑒥 𑒪𑒑𑒻𑒋 𑒯𑒧𑒮𑒦 𑒐𑒞𑒧 𑒦𑓄 𑒖𑒰𑒋𑒥। 𑒖𑒃 𑒠𑒹𑒬𑒏 𑒫𑒻𑒖𑓂𑒘𑒰𑒢𑒱𑒏 𑒏𑒪𑓂𑒣𑒢𑒰 𑒢𑒻 𑒏𑒩𑒻𑒞 𑒯𑒼𑒟𑒱 𑒍𑒞𑓄 𑒏𑒲 𑒯𑒋𑒞? (𑒯𑒰𑒟 𑒒𑒳𑒧𑒰 𑒏𑓄 𑒣𑒳𑒕𑒻 𑒕𑒟𑒱।)
𑓓: 𑒁𑒣𑒰𑒪𑒹। 𑒍𑒞𑓄 𑒦𑒫𑒱𑒭𑓂𑒨𑒏 𑒑𑒰𑒕-𑒥𑒵𑒔𑓂𑒕 𑒫𑒱𑒯𑒲𑒢 𑒏𑒪𑓂𑒣𑒢𑒰 𑒮𑒞𑓂𑒨 𑒦𑓄 𑒖𑒰𑒃𑒋।
𑓔: 𑒖𑒹𑒢𑒰 𑒋𑒞𑓄 𑒦𑒹𑒪 𑒁𑒕𑒱।
(𑓓 𑒂 𑓔 𑒏𑒰𑒢𑒱 𑒏𑓄 𑒑𑒰𑒥𑒻𑒋।)
𑒖𑒛𑓃𑒱 𑒏𑒙𑒢𑒹 𑒦𑓄 𑒖𑒰𑒋𑒥 𑒕𑒴
𑒤𑒴𑒪 𑒣𑒰𑒞 𑒮𑒦, 𑒪𑓄 𑒪𑒴
𑒧𑒩𑒱 𑒑𑒹𑒪 𑒮𑒦𑒙𑒰 𑒥𑒳𑒞𑒩𑒴
(𑒠𑒳𑒢𑒴 𑒐𑒼𑓀𑒐𑒲 𑒏𑒩𑓄 𑒪𑒑𑒻𑒋।)

(𑓑 𑒮𑒿 𑓘 𑒮𑒦 𑒥𑒻𑒮𑒱 𑒖𑒰𑒃𑒋 𑒂 𑒑𑒰𑒥𑒻𑒋।)
𑒖𑒛𑓃𑒱 𑒏𑒙𑒢𑒹 𑒦𑓄 𑒖𑒰𑒋𑒥 𑒕𑒴।

𑒖𑒛𑓃𑒱 𑒏𑒙𑒢𑒹 𑒦𑓄 𑒖𑒰𑒋𑒥 𑒕𑒴
𑒤𑒴𑒪 𑒣𑒰𑒞 𑒮𑒦, 𑒪𑓄 𑒪𑒴
𑒧𑒩𑒱 𑒑𑒹𑒪 𑒮𑒦𑒙𑒰 𑒥𑒳𑒞𑒩𑒴
(𑒮𑒦 𑒐𑒼𑓀𑒐𑒲 𑒏𑒩𑓄 𑒪𑒑𑒻𑒋।)












𑒏𑒧𑒪𑒰𑒏 𑒦𑒑𑒞𑒰
(𑒥𑒰𑒪 𑒢𑒰𑒙𑒏)

𑒮𑒴𑒞𑓂𑒩𑒡𑒰𑒩: 𑒂𑒃 𑒋𑒏𑒙𑒰 𑒮𑓀𑒮𑓂𑒏𑒵𑒞 𑒮𑒰𑒯𑒱𑒞𑓂𑒨𑒏 𑒣𑓂𑒩𑒮𑒱𑒠𑓂𑒡 𑒏𑒟𑒰𑒣𑒩 𑒂𑒡𑒰𑒩𑒱𑒞 𑒢𑒰𑒙𑒏 𑒠𑒹𑒐𑒰 𑒩𑒯𑒪 𑒕𑒲। 𑒔𑒼𑒙𑒑𑒩 𑒏𑒟𑒰 𑒁𑒕𑒱। 𑒥𑒔𑓂𑒔𑒰 𑒂 𑒣𑒻𑒒 𑒮𑒦𑒏 𑒪𑒹𑒪। 𑒠𑒹𑒐𑒴 𑒄 𑒦𑒱𑒐𑒧𑓀𑒑𑒰 𑒏𑒞𑓄 𑒮𑒿 𑒂𑒥𑒱 𑒩𑒯𑒪 𑒁𑒕𑒱।

𑒠𑒵𑒬𑓂𑒨 𑓑
(𑒑𑒰𑒧𑒧𑒹 𑒒𑒳𑒧𑒻𑒞)
𑒦𑒱𑒐𑒧𑓀𑒑𑒰: 𑒑𑒩𑒲𑒥𑒏𑒹𑒿 𑒏𑒱𑒕𑒳 𑒠𑒱𑒁। 𑒣𑒳𑒩𑒰𑒢 𑒏𑒣𑒛𑓃𑒰, 𑒩𑒳𑒣𑒻𑒂, 𑒣𑒻𑒮𑒰। 𑒏𑒱𑒕𑒳𑒍 𑒠𑒱𑒁।
𑒥𑒴𑒜𑓃𑒲: 𑒪𑒱𑒁 𑒄 𑒏𑒣𑒛𑓃𑒰। 𑒣𑒳𑒩𑒰𑒢 𑒕𑒻 𑒧𑒳𑒠𑒰 𑒖𑒰𑒛𑓃𑒧𑒹 𑒥𑒛𑓂𑒛 𑒑𑒩𑒧 𑒩𑒯𑒻 𑒕𑒻। 𑒄 𑒁𑒢𑓂𑒢 𑒮𑒹𑒯𑒼।
𑒢𑒥𑒏𑒰 𑒏𑒧𑒾𑒂: 𑒪𑒱𑒁 𑒄 𑒣𑒻𑒮𑒰। 𑒏𑒱𑒕𑒳 𑒏𑒲𑒢𑒱 𑒪𑒹𑒥।
(𑒦𑒱𑒐𑒧𑓀𑒑𑒰 𑒮𑒴𑒞𑓂𑒩𑒡𑒰𑒩𑒏 𑒥𑒑𑒪𑒮𑒿 𑒯𑒼𑒃𑒞 𑒏𑒣𑒛𑓃𑒰𑒏 𑒡𑒼𑒡𑒩𑒱𑒧𑒹 𑒁𑒢𑓂𑒢 𑒩𑒐𑒻𑒞 𑒁𑒕𑒱। 𑒣𑒰𑒃 𑒑𑒢𑒻𑒞 𑒁𑒕𑒱। 𑒤𑒹𑒩 𑒠𑒼𑒮𑒩 𑒠𑒱𑒮 𑒁𑒣𑒢 𑒒𑒩𑒏 𑒐𑒰𑒙𑒣𑒩 𑒥𑒻𑒮𑒻𑒞 𑒁𑒕𑒱। 𑒋𑒏𑒙𑒰 𑒔𑒳𑒏𑒛𑓃𑒲𑒧𑒹 𑒣𑒰𑒃 𑒩𑒐𑒻𑒞 𑒁𑒕𑒱, 𑒤𑒹𑒩 𑒑𑒢𑒻𑒞 𑒁𑒕𑒱।)
𑒦𑒱𑒐𑒧𑓀𑒑𑒰: (𑒧𑒼𑒢𑒹-𑒧𑒼𑒢) 𑒂𑒥 𑒞𑒿 𑒜𑒹𑒩 𑒩𑒰𑒮 𑒣𑒰𑒃 𑒦𑓄 𑒑𑒹𑒪। 𑒧𑒼𑒢 𑒁𑒕𑒱 𑒖𑒹 𑒏𑒧𑒪𑒰𑒏 𑒦𑒑𑒞𑒰 𑒥𑒢𑒱 𑒖𑒢𑒏𑒣𑒳𑒩 𑒖𑒰𑒃। 𑒦𑒑𑒫𑒰𑒢 𑒮𑒹 𑒠𑒱𑒢 𑒠𑒹𑒐𑒹𑒪𑒢𑓂𑒯𑒱।

𑒠𑒵𑒬𑓂𑒨 𑓒

𑒦𑒱𑒐𑒧𑓀𑒑𑒰: (𑒥𑒼𑒑𑒪𑒲𑒧𑒹 𑒣𑒰𑒃𑒏 𑒔𑒳𑒏𑒛𑓃𑒲 𑒪𑒹𑒢𑒹 𑒂𑒑𑒰𑒿 𑒖𑒰𑒃𑒞- 𑒦𑒼𑒩𑒳𑒏𑒰 𑒮𑒧𑒋)

𑒔𑒪𑒴 𑒔𑒪𑒴 𑒨𑒾
𑒖𑒢𑒏𑒣𑒳𑒩𑒧𑒹 𑒏𑒧𑒪𑒰𑒏 𑒦𑒑𑒞𑒰
𑒏𑒩𑒴 𑒏𑒩𑒴 𑒨𑒻
𑒏𑒧𑒪𑒰 𑒧𑒰𑒃 𑒏𑒩𑒴 𑒯𑒧𑒩 𑒅𑒠𑓂𑒡𑒰𑒩
𑒔𑒪𑒴 𑒔𑒪𑒴 𑒨𑒾 𑒖𑒢𑒏𑒣𑒳𑒩
𑒦𑒑𑒞𑒰 𑒥𑒢𑒱 𑒏𑒧𑒪𑒰𑒏

(𑒮𑒼𑒗𑒰𑒿 𑒥𑒰𑒪𑒳𑒮𑒿𑒦𑒩𑒪 𑒏𑒧𑒪𑒰𑒏 𑒞𑒙। 𑒦𑒱𑒐𑒧𑓀𑒑𑒰 𑒮𑒼𑒔𑒻𑒞 𑒁𑒕𑒱।)
-𑒁𑒯𑒰। 𑒏𑒲 𑒫𑒱𑒮𑓂𑒞𑒰𑒩 𑒁𑒕𑒱 𑒏𑒧𑒪𑒰𑒏। 𑒧𑒳𑒠𑒰 𑒋𑒞𑒹𑒏 𑒦𑒼𑒩𑒧𑒹 𑒏𑒱𑒨𑒼 𑒋𑒞𑒋 𑒢𑒯𑒱 𑒁𑒕𑒱। 𑒔𑒪𑒴 𑒣𑒰𑒃𑒏 𑒔𑒳𑒏𑒛𑓃𑒲 𑒏𑒰𑒞𑒧𑒹 𑒩𑒰𑒐𑒱 𑒛𑒴𑒧 𑒠𑓄 𑒂𑒥𑒲।
(𑒣𑒰𑒃𑒏 𑒔𑒳𑒏𑒛𑓃𑒲 𑒢𑒲𑒔𑒰𑒿 𑒩𑒐𑒻𑒞 𑒁𑒕𑒱 𑒂 𑒢𑒯𑒰𑒃 𑒪𑒹𑒪 𑒥𑒱𑒠𑒰 𑒯𑒼𑒃𑒞 𑒁𑒕𑒱।)
(𑒧𑒼𑒢𑒹-𑒧𑒼𑒢 𑒮𑒼𑒔𑒻𑒞)- 𑒧𑒳𑒠𑒰 𑒏𑒱𑒨𑒼 𑒖𑒹 𑒠𑒹𑒐𑒱 𑒖𑒰𑒋𑒞 𑒂 𑒄 𑒣𑒰𑒃 𑒪𑓄 𑒪𑒹𑒞 𑒞𑒐𑒢? 𑒋𑒏𑒩𑒰 𑒥𑒰𑒪𑒳𑒧𑒹 𑒢𑒳𑒏𑒰 𑒠𑒻𑒞 𑒕𑒱𑒌𑒏।
(𑒥𑒰𑒪𑒳 𑒏𑒼𑒛𑓃𑒱 𑒏𑓄 𑒔𑒳𑒏𑒛𑓃𑒲 𑒢𑒳𑒏𑒥𑒻𑒞 𑒁𑒕𑒱।)
(𑒤𑒹𑒩 𑒧𑒼𑒢𑒹-𑒧𑒼𑒢 𑒮𑒼𑒔𑒻𑒞) 𑒧𑒳𑒠𑒰 𑒖𑒹 𑒏𑒱𑒨𑒼 𑒄 𑒠𑒹𑒐𑒱 𑒖𑒰𑒋𑒞 𑒞𑒐𑒢? 𑒧𑒳𑒠𑒰 𑒠𑒹𑒐𑒞 𑒏𑒼𑒢𑒰 𑒂𑒥। 𑒞𑒹𑒢𑒰 𑒏𑓄 𑒢𑒳𑒏𑒰 𑒠𑒹𑒢𑒹 𑒕𑒱𑒌𑒏 𑒖𑒹 𑒂𑒥 𑒯𑒧𑒩𑒼 𑒢𑒻 𑒦𑒹𑒙𑒞।

(𑒤𑒹𑒩 𑒮𑒼𑒔𑒻𑒞 𑒒𑒳𑒩𑒱 𑒁𑒥𑒻𑒞 𑒁𑒕𑒱।)
𑒧𑒳𑒠𑒰 𑒯𑒧 𑒖𑒹 𑒢𑒯𑒰 𑒏𑓄 𑒂𑒋𑒥 𑒞𑒿 𑒏𑒞𑓄 𑒄 𑒣𑒰𑒃 𑒑𑒰𑒛𑓃𑒪 𑒁𑒕𑒱 𑒮𑒹 𑒯𑒧𑒩𑒼 𑒏𑒼𑒢𑒰 𑒥𑒴𑒗𑓄 𑒧𑒹 𑒂𑒋𑒞। 𑒚𑒲𑒏 𑒕𑒻।
(𑒏𑒼𑒛𑓃𑒪𑒰𑒯𑒰 𑒮𑓂𑒟𑒰𑒢𑒣𑒩 𑒁𑒥𑒻𑒞 𑒁𑒕𑒱।)
𑒋𑒞𑓄 𑒬𑒱𑒫𑒪𑒱𑓀𑒑 𑒥𑒢𑒰 𑒠𑒻 𑒕𑒱𑒌। ( 𑒏𑒼𑒛𑓃𑒪𑒰𑒯𑒰 𑒮𑓂𑒟𑒪𑒣𑒩 𑒣𑒋𑒩 𑒩𑒐𑒻𑒞 𑒁𑒕𑒱 𑒂 𑒣𑒋𑒩𑒏 𑒔𑒰𑒩𑒴 𑒏𑒰𑒞 𑒥𑒰𑒪𑒳 𑒩𑒰𑒐𑒋 𑒪𑒑𑒻𑒞 𑒁𑒕𑒱। 𑒔𑒰𑒩𑒴 𑒏𑒰𑒞𑒮𑒿 𑒥𑒰𑒪𑒳 𑒦𑒩𑒱 𑒑𑒹𑒪𑒰𑒏 𑒥𑒰𑒠 𑒂𑒮𑓂𑒞𑒹𑒮𑒿 𑒣𑒋𑒩 𑒯𑒙𑒰 𑒪𑒻𑒞 𑒁𑒕𑒱 𑒂 𑒢𑒲𑒏-𑒢𑒯𑒰𑒿𑒞𑒱 𑒬𑒱𑒫𑒪𑒱𑓀𑒑 𑒥𑒢𑒰 𑒠𑒻𑒞 𑒁𑒕𑒱। 𑒤𑒹𑒩 𑒢𑒱𑒬𑓂𑒔𑒱𑒢𑓂𑒞 𑒧𑒼𑒢𑒮𑒿 𑒏𑒧𑒪𑒰-𑒮𑓂𑒢𑒰𑒢𑒏 𑒪𑒹𑒪 𑒥𑒱𑒠𑒰 𑒦𑓄 𑒖𑒰𑒃𑒞 𑒁𑒕𑒱। 𑒋𑒧𑓂𑒯𑒩 𑒍 𑒡𑒰𑒩 𑒠𑒱𑒮 𑒥𑒱𑒠𑒰 𑒯𑒼𑒃𑒞 𑒕𑒟𑒱 𑒂 𑒍𑒧𑓂𑒯𑒩 𑒠𑒴𑒩𑒮𑒿 𑒏𑒱𑒕𑒳 𑒂𑒩 𑒮𑓂𑒢𑒰𑒢𑒰𑒩𑓂𑒟𑒲, 𑒣𑒳𑒩𑒳𑒭 𑒯𑒰𑒟𑒧𑒹 𑒡𑒼𑒞𑒲 𑒂 𑒧𑒯𑒱𑒪𑒰 𑒯𑒰𑒟𑒧𑒹 𑒢𑒳𑒂 𑒪𑒹𑒢𑒹, 𑒁𑒥𑒻𑒞 𑒠𑒵𑒭𑓂𑒙𑒱𑒑𑒼𑒔𑒩 𑒯𑒼𑒃𑒞 𑒕𑒟𑒱।)
(𑒧𑒼𑒢𑒹-𑒧𑒼𑒢 𑒮𑒼𑒔𑒻𑒞) 𑒢𑒲𑒏𑒹 𑒦𑒹𑒪 𑒖𑒹 𑒤𑒳𑒩𑒰 𑒑𑒹𑒪। 𑒏𑒋𑒏 𑒮𑒰𑒪𑒏 𑒏𑒧𑒰𑒃𑒏 𑒕𑒲 𑒄 𑒣𑒻𑒮𑒰। 𑒄 𑒪𑒼𑒏 𑒮𑒦 𑒂𑒥 𑒮𑓂𑒢𑒰𑒢 𑒏𑒩𑒥𑒰 𑒪𑒹𑒪 𑒂𑒥𑒱 𑒩𑒯𑒪 𑒁𑒕𑒱। 𑒢𑒹 𑒖𑒰𑒢𑒱 𑒏𑒏𑒩 𑒧𑒼𑒢𑒧𑒹 𑒐𑒼𑒙 𑒯𑒹𑒞𑒻 𑒂 𑒏𑒏𑒩 𑒧𑒼𑒢𑒧𑒹 𑒢𑒻।

(𑒢𑒯𑒰𑒃 𑒪𑒹𑒪 𑒧𑓀𑒔𑒮𑒿 𑒢𑒲𑒔𑒰𑒿 𑒡𑒰𑒩𑒧𑒹 𑒤𑒰𑒿𑒑𑒱 𑒖𑒰𑒃𑒞 𑒁𑒕𑒱।)
𑒣𑒳𑒩𑒳𑒭 𑒮𑓂𑒢𑒰𑒢𑒰𑒩𑓂𑒟𑒲 - (𑒁𑒣𑒢 𑒏𑒣𑒛𑓃𑒰 𑒪𑒞𑓂𑒞𑒰 𑒩𑒰𑒐𑒻 𑒁𑒋) 𑒔𑒪𑒲 𑒏𑒧𑒪𑒰𑒧𑒹 𑒛𑒴𑒧 𑒠𑓄 𑒂𑒥𑒲।
𑒮𑓂𑒞𑓂𑒩𑒲 𑒮𑓂𑒢𑒰𑒢𑒰𑒩𑓂𑒟𑒲- (𑒦𑒱𑒐𑒧𑓀𑒑𑒰 𑒠𑓂𑒫𑒰𑒩𑒰 𑒥𑒢𑒰𑒍𑒪 𑒬𑒱𑒫𑒪𑒱𑓀𑒑 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞) 𑒯𑒹 𑒠𑒹𑒐𑒱𑒨𑒾 𑒍 𑒬𑒱𑒫𑒪𑒱𑓀𑒑। 𑒪𑒰𑒑𑒻𑒋 𑒋𑒞𑓄 𑒮𑓂𑒢𑒰𑒢 𑒏𑒩𑒥𑒰𑒏 𑒣𑒯𑒱𑒢𑒹 𑒬𑒱𑒫𑒪𑒱𑓀𑒑 𑒥𑒢𑒹𑒥𑒰𑒏 𑒫𑒱𑒡𑒰𑒢 𑒕𑒻।
𑒣𑒳𑒩𑒳𑒭 𑒮𑓂𑒢𑒰𑒢𑒰𑒩𑓂𑒟𑒲- 𑒁𑒣𑒢𑒰 𑒮𑒦 𑒠𑒱𑒮, 𑒑𑓀𑒑𑒰 𑒏𑒰𑒞𑒧𑒹 𑒞𑒿 𑒋𑒯𑒹𑒢 𑒏𑒼𑒢𑒼 𑒣𑒩𑒧𑓂𑒣𑒩𑒰 𑒢𑒻 𑒕𑒻।
𑒮𑓂𑒞𑓂𑒩𑒲 𑒮𑓂𑒢𑒰𑒢𑒰𑒩𑓂𑒟𑒲- 𑒋𑒞𑓂𑒞𑓄 𑒧𑒳𑒠𑒰 𑒕𑒻। 𑒂 𑒦𑒼𑒪𑒰𑒥𑒰𑒥𑒰𑒏 𑒮𑓂𑒟𑒰𑒣𑒢𑒰 𑒏𑓄 𑒛𑒴𑒧 𑒪𑒻 𑒧𑒹 𑒯𑒩𑓂𑒖𑒹 𑒏𑒲।
𑒣𑒳𑒩𑒳𑒭 𑒮𑓂𑒢𑒰𑒢𑒰𑒩𑓂𑒟𑒲- 𑒯𑒿 𑒮𑒹 𑒞𑒿 𑒚𑒲𑒏𑒹।
( 𑒠𑒳𑒢𑒴 𑒑𑒼𑒙𑒹 𑒋𑒏-𑒋𑒏𑒙𑒰 𑒬𑒱𑒫𑒪𑒱𑓀𑒑𑒏 𑒮𑓂𑒟𑒰𑒣𑒢𑒰𑒧𑒹 𑒪𑒰𑒑𑒱 𑒖𑒰𑒃𑒞 𑒕𑒟𑒱। 𑒣𑒋𑒩𑒏 𑒔𑒰𑒩𑒴𑒏𑒰𑒞 𑒥𑒰𑒪𑒳 𑒔𑒜𑓃𑒥𑓄 𑒪𑒑𑒻 𑒕𑒟𑒱। 𑒞𑒰𑒫𑒞𑓂 𑒂𑒢𑒼 𑒪𑒼𑒏 𑒮𑒦 𑒂𑒥𑒱 𑒏𑓄 𑒏𑒱𑒕𑒳 𑒣𑒴𑒕𑓄 𑒪𑒑𑒻 𑒕𑒟𑒱 𑒂 𑒁𑒔𑓂𑒕𑒰-𑒁𑒔𑓂𑒕𑒰 𑒏𑒯𑒱 𑒍𑒯𑒼 𑒮𑒦 𑒋𑒏-𑒋𑒏𑒙𑒰 𑒬𑒱𑒫 𑒪𑒱𑓀𑒑𑒏 𑒮𑓂𑒟𑒰𑒣𑒢𑒰𑒧𑒹 𑒁𑒣𑒢-𑒁𑒣𑒢 𑒣𑒋𑒩𑒏 𑒔𑒰𑒩𑒴 𑒏𑒰𑒞 𑒥𑒰𑒪𑒳 𑒔𑒜𑓃𑒥𑒋 𑒪𑒑𑒻 𑒕𑒟𑒱। 𑒏𑒢𑒱𑒨𑒹 𑒏𑒰𑒪𑒧𑒹 𑒧𑓀𑒔𑒣𑒩 𑒬𑒱𑒫𑒪𑒱𑓀𑒑𑒹-𑒬𑒱𑒫𑒪𑒱𑓀𑒑𑒹 𑒦𑒩𑒱 𑒖𑒰𑒃𑒞 𑒁𑒕𑒱। 𑒧𑓀𑒔𑒣𑒩 𑒯𑒩-𑒯𑒩 𑒧𑒯𑒰𑒠𑒹𑒫𑒏 𑒮𑓂𑒫𑒩𑒮𑒿 𑒁𑒢𑒒𑒼𑒪 𑒦𑓄 𑒖𑒰𑒃𑒋। )
𑒦𑒱𑒐𑒧𑓀𑒑𑒰: (𑒢𑒯𑒰 𑒏𑓄 𑒢𑒱𑒏𑒪𑒻𑒞) 𑒠𑒹𑒐𑒴, 𑒖𑒐𑒢 𑒂𑒋𑒪 𑒩𑒯𑒲 𑒞𑒿 𑒋𑒏𑒼𑒙𑒰 𑒪𑒼𑒏 𑒢𑒯𑒱 𑒕𑒪 𑒂 𑒂𑒥 𑒠𑒹𑒐𑒴 𑒏𑒞𑒹𑒏 𑒦𑒲𑒛𑓃 𑒦𑓄 𑒑𑒹𑒪। 𑒯𑒧𑒩𑒰 𑒏𑒲। 𑒖𑒼𑒑𑒲 𑒕𑒲, 𑒥𑒯𑒻𑒞 𑒣𑒰𑒢𑒱 𑒮𑒢। 𑒄 𑒁𑓀𑒑𑒫𑒮𑓂𑒞𑓂𑒩 𑒩𑒮𑓂𑒞𑒹𑒧𑒹 𑒮𑒳𑒐𑒰 𑒖𑒰𑒋𑒞। 𑒖𑒋 𑒧𑒰𑒿 𑒏𑒧𑒪𑒹𑒬𑓂𑒫𑒩𑒲। 𑒏𑒧𑒪𑒰𑒏 𑒦𑒑𑒞𑒰 𑒥𑒢𑒱 𑒔𑒪𑒲 𑒂𑒥 𑒖𑒢𑒏𑒣𑒳𑒩। 𑒧𑒳𑒠𑒰 𑒍 𑒔𑒳𑒏𑒛𑓃𑒲 𑒞𑒿 𑒪𑓄 𑒪𑒲।
(𑒁𑒣𑒢 𑒥𑒢𑒰𑒍𑒪 𑒬𑒱𑒫𑒪𑒱𑓀𑒑 𑒞𑒰𑒏𑓄 𑒪𑒑𑒻𑒞 𑒁𑒕𑒱। 𑒧𑒳𑒠𑒰 𑒔𑒰𑒩𑒴 𑒏𑒰𑒞 𑒬𑒱𑒫𑒪𑒱𑓀𑒑𑒹-𑒬𑒱𑒫𑒪𑒱𑓀𑒑। 𑒋𑒏 𑒠𑒴𑒙𑒰 𑒬𑒱𑒫𑒪𑒱𑓀𑒑𑒏𑒹𑒿 𑒦𑒐𑒩𑒰𑒥𑒻𑒞 𑒁𑒕𑒱 𑒧𑒳𑒠𑒰 𑒍𑒯𑒱 𑒢𑒲𑒔𑒰𑒿𑒮𑒿 𑒏𑒱𑒕𑒳 𑒢𑒯𑒱 𑒥𑒯𑒩𑒰𑒃𑒞 𑒁𑒕𑒱।)
(𑒦𑒱𑒐𑒧𑓀𑒑𑒰 𑒧𑒰𑒟𑒣𑒩 𑒯𑒰𑒟 𑒩𑒰𑒐𑒱 𑒧𑓀𑒔𑒣𑒩 𑒥𑒻𑒮𑒱 𑒖𑒰𑒃𑒞 𑒁𑒕𑒱 𑒂 𑒂𑒮𑓂𑒞𑒹-𑒂𑒮𑓂𑒞𑒹 𑒧𑓀𑒔𑒣𑒩𑒮𑒿 𑒣𑓂𑒩𑒏𑒰𑒬 𑒫𑒱𑒪𑒲𑒢 𑒦𑓄 𑒖𑒰𑒃𑒞 𑒁𑒕𑒱।)
(𑒣𑒙𑒰𑒏𑓂𑒭𑒹𑒣)
























𑒖𑒪𑒼𑒠𑒲𑒣
𑒣𑒰𑒞𑓂𑒩
𑒔𑒰𑒩𑒱𑒙𑒰 𑒥𑒔𑓂𑒔𑒰। 𑒥𑒔𑓂𑒔𑒰 𑒧𑒢𑒹 𑒥𑒔𑓂𑒔𑒰, 𑒥𑒾𑒂 𑒂𑒏𑒱 𑒥𑒳𑒔𑓂𑒔𑒲।
𑒞𑒲𑒢𑒙𑒰 𑒪𑒼𑒏। 𑒪𑒼𑒏 𑒧𑒰𑒢𑒹 𑒪𑒼𑒏, 𑒣𑒳𑒩𑒳𑒭 𑒂𑒏𑒱 𑒮𑓂𑒞𑓂𑒩𑒲।
𑒦𑒲𑒛𑓃। 𑒦𑒲𑒛𑓃 𑒧𑒰𑒢𑒹 𑒦𑒲𑒛𑓃, 𑒧𑒯𑒱𑒪𑒰 𑒫𑒰 𑒣𑒳𑒩𑒳𑒐।

𑒣𑒴𑒩𑓂𑒫𑒠𑒵𑒬𑓂𑒨
(𑒔𑒰𑒩𑒴 𑒏𑒰𑒞 𑒖𑒪𑒰𑒧𑒨। 𑒪𑒼𑒏 𑒮𑒦 𑒧𑓀𑒔𑒣𑒩 𑒟𑒯𑒰𑒟𑒯𑒲 𑒏𑓄 𑒩𑒯𑒪 𑒕𑒟𑒱, 𑒣𑒰𑒢𑒱..𑒥𑒰𑒜𑓃𑒱..𑒂𑒠𑒱 𑒬𑒥𑓂𑒠𑒮𑒿 𑒔𑒰𑒩𑒴𑒏𑒰𑒞 𑒖𑒪𑒰𑒧𑒨 𑒯𑒹𑒥𑒰𑒏 𑒁𑒢𑒳𑒦𑒫 𑒮𑒦 𑒏𑓄 𑒩𑒯𑒪 𑒕𑒟𑒱। 𑒋𑒏𑒙𑒰 𑒥𑒔𑓂𑒔𑒰 𑒏𑒼𑒯𑒳𑒢𑒰 𑒏𑓄 𑒥𑒰𑒜𑓃𑒱𑒮𑒿 𑒥𑒰𑒯𑒩 𑒢𑒱𑒏𑒪𑒻𑒞 𑒧𑓀𑒔 𑒠𑒱𑒮 𑒢𑒲𑒔𑒰𑒿𑒮𑒿 𑒯𑒰𑒟 𑒥𑒜𑓃𑒥𑒻𑒞 𑒁𑒕𑒱। 𑒪𑒼𑒏 𑒮𑒦 𑒍𑒏𑒩𑒰 𑒠𑒱𑒮 𑒠𑒾𑒑𑒪 𑒁𑒥𑒻𑒞 𑒁𑒕𑒱।
𑒥𑒔𑓂𑒔𑒰: 𑒢। 𑒯𑒧 𑒞𑒿 𑒚𑒲𑒏𑒹 𑒕𑒲। 𑒧𑒳𑒠𑒰 𑒯𑒧𑓂𑒧𑒩...
(𑒧𑓀𑒔𑒣𑒩 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)

𑒠𑒵𑒬𑓂𑒨 𑓑

(𑒕𑒯𑒩 𑒠𑒱𑒮𑒮𑒿 𑒪𑒼𑒏 𑒮𑒦 𑒂𑒥𑒱 𑒩𑒯𑒪 𑒁𑒕𑒱। 𑒧𑓀𑒔𑒏 𑒣𑒰𑒕𑒰𑒿𑒏 𑒦𑒰𑒑𑒧𑒹 𑒆𑒿𑒔 𑒮𑓂𑒟𑒪 𑒥𑒢𑒰 𑒏𑓄 𑒄 𑒣𑓂𑒩𑒦𑒰𑒫 𑒅𑒞𑓂𑒣𑒢𑓂𑒢 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱। 𑒁𑒢𑒒𑒼𑒪 𑒦𑒹𑒪 𑒁𑒕𑒱।)

𑒣𑒯𑒱𑒪 𑒪𑒼𑒏: 𑒯𑒹 𑒥𑒰𑒃𑒮 𑒤𑒲𑒙 𑒣𑒰𑒢𑒱 𑒂𑒥𑒱 𑒩𑒯𑒪 𑒁𑒕𑒱। 𑒒𑒝𑓂𑒙𑒰 𑒦𑒩𑒱𑒧𑒹 𑒮𑒦𑒙𑒰 𑒛𑒴𑒧𑒱 𑒖𑒰𑒋𑒞। 𑒔𑒾𑒏𑒲𑒣𑒩 𑒔𑒾𑒏𑒲 𑒑𑒹𑒙𑒯। 𑒥𑒛𑓃𑒏𑒰-𑒥𑒔𑓂𑒔𑒰𑒏 𑒕𑒞𑒣𑒩 𑒥𑒔𑓂𑒔𑒰 𑒮𑒦𑒏𑒹𑒿 𑒠𑓄 𑒂𑒥𑒯।
𑒠𑒼𑒮𑒩 𑒪𑒼𑒏: 𑒥𑒰𑒃𑒮 𑒤𑒲𑒙 𑒞𑒿 𑒢𑒻 𑒧𑒳𑒠𑒰 𑒯𑒱𑒪𑒏𑒼𑒩𑒏 𑒁𑒥𑒰𑒖 𑒁𑒥𑒻𑒞 𑒮𑒳𑒢𑒢𑒹 𑒂 𑒠𑒹𑒐𑒢𑒹 𑒩𑒯𑒱𑒌। 𑒗𑒗𑒰 𑒠𑒹𑒪𑒏𑒻, 𑒕𑒯𑒩𑒏 𑒆𑒣𑒩𑒮𑒿 𑒣𑒰𑒢𑒱 𑒐𑒮𑒪𑒻। 𑒗𑓀𑒗𑒰𑒩𑒣𑒳𑒩 𑒠𑒱𑒮𑒳𑒏𑒰 𑒥𑒰𑒢𑓂𑒯𑒣𑒩 𑒖𑒼𑒩 𑒩𑒯𑒻। 𑒧𑒳𑒠𑒰 𑒧𑒰𑒩𑒫𑒰𑒛𑓃𑒲 𑒮𑒦 𑒗𑓀𑒗𑒰𑒩𑒣𑒳𑒩 𑒠𑒱𑒮𑒳𑒏𑒰 𑒣𑒳𑒥𑒩𑒱𑒨𑒰 𑒥𑒰𑒢𑓂𑒯 𑒥𑒔𑒹𑒥𑒰𑒏 𑒪𑒹𑒪 𑒮𑒳𑒢𑒻 𑒕𑒱𑒌 𑒖𑒹 𑒁𑒣𑓂𑒣𑒢 𑒮𑒦𑒏 𑒠𑒱𑒮𑒳𑒏𑒰 𑒣𑒕𑒥𑒩𑒱𑒨𑒰 𑒥𑒰𑒢𑓂𑒯 𑒞𑒼𑒛𑓃𑒥𑒰 𑒠𑒹𑒪𑒏𑒻।
𑒣𑒯𑒱𑒪 𑒪𑒼𑒏: 𑒮𑒳𑒢𑒻 𑒕𑒱𑒌 𑒮𑒹 𑒮𑒞𑓂𑒨 𑒢𑒯𑒱𑒨𑒼 𑒦𑓄 𑒮𑒏𑒻 𑒕𑒻। 𑒂 𑒋𑒞𑒹𑒏 𑒙𑒰 𑒥𑒰𑒢𑓂𑒯 𑒏𑒼𑒢𑒰 𑒞𑒼𑒛𑓃𑒪 𑒯𑒹𑒞𑒻।
𑒞𑒹𑒮𑒩 𑒪𑒼𑒏: 𑒮𑒹 𑒏𑒲 𑒏𑒯𑒻 𑒕𑒲। 𑒑𑒼𑒣𑒪𑒐𑒰𑒏 𑒮𑒼𑒗𑒰𑒿𑒧𑒹 𑒠𑒴 𑒕𑒯 𑒧𑒰𑒞𑓂𑒩 𑒧𑒰𑒩𑒥𑒰𑒏 𑒠𑒹𑒩𑒲 𑒩𑒯𑒻।𑒣𑒰𑒢𑒱𑒏 𑒖𑒼𑒩 𑒞𑒿 𑒁𑒯𑒴 𑒠𑒱𑒮 𑒩𑒯𑒻। 𑒦𑒢𑒹 𑒍𑒞𑒃 𑒙𑒳𑒙𑒪𑒻। 𑒁𑒣𑒢𑒰 𑒑𑒰𑒧𑒏 𑒮𑒼𑒗𑒰𑒿 𑒖𑒹 𑒙𑒳𑒙𑒱𑒞𑒻 𑒞𑒿 𑒑𑒰𑒧𑒹 𑒦𑒿𑒮𑒱 𑒖𑒃𑒞𑒻।
𑒠𑒼𑒮𑒩 𑒪𑒼𑒏: 𑒂𑒥 𑒮𑒹 𑒥𑒯𑒮 𑒏𑒩𑒥𑒰𑒏 𑒮𑒧𑒋 𑒢𑒻 𑒁𑒕𑒱। 𑒁𑒣𑒢-𑒁𑒣𑒢 𑒯𑒼𑒮 𑒡𑒩𑒻 𑒖𑒰𑒅। 𑒣𑒯𑒱𑒢𑒹 𑒥𑒔𑓂𑒔𑒰 𑒮𑒦𑒏𑒹𑒿 𑒥𑒔𑒰𑒅।

(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒋।)

𑒠𑒵𑒬𑓂𑒨 𑓒

(𑒔𑒾𑒏𑒲𑒣𑒩 𑒔𑒾𑒏𑒲 𑒑𑒹𑒙𑒪 𑒁𑒕𑒱। 𑒍𑒃𑒣𑒩 𑒔𑒰𑒩𑒱𑒙𑒰 𑒥𑒔𑓂𑒔𑒰 𑒥𑒻𑒮𑒪 𑒁𑒕𑒱। 𑒞𑒲𑒢𑒙𑒰 𑒥𑒔𑓂𑒔𑒰 𑒐𑒹𑒪𑒰 𑒩𑒯𑒪 𑒁𑒕𑒱, 𑒋𑒏 𑒠𑒼𑒮𑒩𑒰𑒏 𑒯𑒰𑒟𑒣𑒩 𑒟𑒼𑒣𑒛𑓃𑒲 𑒣𑒰𑒛𑓃𑒱 𑒩𑒯𑒪 𑒁𑒕𑒱 𑒧𑒳𑒠𑒰 𑒔𑒰𑒩𑒱𑒧 𑒥𑒔𑓂𑒔𑒰, 𑒖𑒹 𑒢𑒰𑒙𑒏𑒏 𑒣𑓂𑒩𑒰𑒩𑒧𑓂𑒦𑒧𑒹 𑒂𑒋𑒪 𑒕𑒪, 𑒑𑒳𑒧𑒏𑒲 𑒪𑒰𑒡𑒢𑒹 𑒔𑒾𑒏𑒲𑒏 𑒋𑒏 𑒏𑒼𑒢𑒧𑒹 𑒥𑒻𑒮𑒪 𑒁𑒕𑒱। 𑒁𑒔𑒰𑒢𑒏𑒹 𑒍𑒯𑒼 𑒞𑒲𑒢𑒴 𑒥𑒔𑓂𑒔𑒰 𑒐𑒹𑒪 𑒥𑒢𑓂𑒢 𑒏𑓄 𑒠𑒻𑒞 𑒁𑒕𑒱 𑒂 𑒔𑒰𑒩𑒱𑒧 𑒥𑒔𑓂𑒔𑒰 𑒠𑒱𑒮 𑒮𑒰𑒏𑒰𑓀𑒏𑓂𑒭 𑒯𑒼𑒃𑒞 𑒁𑒕𑒱।)
𑒣𑒯𑒱𑒪 𑒥𑒔𑓂𑒔𑒰: (𑒔𑒰𑒩𑒱𑒧 𑒥𑒔𑓂𑒔𑒰𑒮𑒿) 𑒋𑒢𑒰 𑒏𑒱𑒋 𑒧𑒳𑒿𑒯 𑒥𑒱𑒡𑒳𑒎𑒢𑒹 𑒕𑒿𑒯। 𑒂, 𑒐𑒹𑒪𑒰𑒃 𑒕𑒲 𑒮𑒦।
𑒠𑒼𑒮𑒩 𑒥𑒔𑓂𑒔𑒰: 𑒯𑒃, 𑒢𑒻 𑒏𑒯𑒲𑓀 𑒏𑒱𑒕𑒳। 𑒥𑒹𑒔𑒰𑒩𑒼𑒏 𑒒𑒩𑒧𑒹 𑒮𑒦 𑒥𑒰𑒜𑓃𑒱𑒧𑒹 𑒠𑒯𑒰 𑒑𑒹𑒪 𑒕𑒻।
𑒞𑒹𑒮𑒩 𑒥𑒔𑓂𑒔𑒰: 𑒧𑒳𑒠𑒰 𑒒𑒩 𑒞𑒿 𑒚𑒲𑒏𑒹 𑒕𑒻।
𑒠𑒼𑒮𑒩 𑒥𑒔𑓂𑒔𑒰: 𑒏𑒼𑒚𑒰𑒏 𑒒𑒩 𑒕𑒻, 𑒞𑒻𑒿 𑒢𑒻 𑒙𑒳𑒙𑒪𑒻।
𑒣𑒯𑒱𑒪 𑒥𑒔𑓂𑒔𑒰: 𑒂𑒥 𑒖𑒹 𑒦𑒹𑒪𑒻 𑒮𑒹 𑒦𑒹𑒪𑒻, 𑒂𑒥𑒱 𑒖𑒼। (𑒍 𑒅𑒚𑒱 𑒏𑓄 𑒖𑒰𑒃𑒋 𑒂 𑒍𑒏𑒩𑒰 𑒯𑒰𑒟 𑒣𑒏𑒛𑓃𑒱 𑒏𑓄 𑒂𑒢𑒻𑒋। 𑒣𑒯𑒱𑒪, 𑒠𑒼𑒮𑒩 𑒂 𑒞𑒹𑒮𑒩 𑒥𑒔𑓂𑒔𑒰 𑒍𑒏𑒩𑒰 𑒒𑒹𑒩 𑒏𑓄 𑒥𑒻𑒮 𑒖𑒰𑒃𑒋।)
𑒣𑒯𑒱𑒪, 𑒠𑒼𑒮𑒩 𑒂 𑒞𑒹𑒮𑒩 𑒥𑒔𑓂𑒔𑒰 (𑒮𑒧𑒫𑒹𑒞 𑒮𑓂𑒫𑒩𑒧𑒹): 𑒠𑒳𑒐 𑒥𑒱𑒮𑒩𑒥𑒰 𑒪𑒹𑒪 𑒐𑒹𑒪 𑒐𑒹𑒪𑒹𑒢𑒰𑒃 𑒥𑒛𑓂𑒛 𑒖𑒩𑒴𑒩𑒲 𑒕𑒻। 𑒂𑒃 𑒞𑒼𑒩𑒹 𑒧𑒼𑒢𑒮𑒿 𑒯𑒹𑒞𑒻 𑒐𑒹𑒪। 𑒏𑒯 𑒏𑒼𑒢 𑒐𑒹𑒪 𑒐𑒹𑒪𑒰𑒃। 𑒖𑒹 𑒦𑒹𑒪𑒻 𑒮𑒹 𑒦𑒑𑒫𑒰𑒢𑒏 𑒪𑒱𑒐𑒪।
𑒔𑒰𑒩𑒱𑒧 𑒥𑒔𑓂𑒔𑒰: 𑒢𑒻, 𑒦𑒑𑒫𑒰𑒢𑒏 𑒪𑒱𑒐𑒪 𑒢𑒻। 𑒪𑒼𑒏𑒏 𑒪𑒱𑒐𑒪। 𑒯𑒧𑒩 𑒥𑒰𑒥𑒴 𑒏𑒯𑒻𑒞 𑒩𑒯𑒟𑒱, 𑒮𑒦𑒙𑒰 𑒕𑒱𑒌 𑒧𑒢𑒳𑒏𑓂𑒐𑒏 𑒐𑒹𑒪। 𑒐𑒹𑒪𑒹𑒧𑒹 𑒍 𑒐𑒹𑒪 𑒖𑒹 𑒯𑒧 𑒐𑒹𑒪𑒰𑒋 𑒔𑒰𑒯𑒻 𑒕𑒲।
𑒣𑒯𑒱𑒪, 𑒠𑒼𑒮𑒩 𑒂 𑒞𑒹𑒮𑒩 𑒥𑒔𑓂𑒔𑒰: 𑒯𑒿, 𑒮𑒹 𑒞𑒿 𑒚𑒲𑒏𑒹। 𑒖𑒹 𑒐𑒹𑒪 𑒐𑒹𑒪𑒰𑒋 𑒔𑒰𑒯𑒧𑒹 𑒮𑒹 𑒯𑒧 𑒮𑒦 𑒐𑒹𑒪𑒰𑒋𑒥।
𑒔𑒰𑒩𑒱𑒧 𑒥𑒔𑓂𑒔𑒰: 𑒚𑒲𑒏 𑒕𑒻, 𑒞𑒿 𑒐𑒹𑒪 𑒐𑒹𑒪𑒰𑒃 𑒕𑒲 𑒣𑒯𑒰𑒛𑓃𑒏।
𑒞𑒹𑒮𑒩 𑒥𑒔𑓂𑒔𑒰: 𑒧𑒳𑒠𑒰 𑒣𑒯𑒰𑒛𑓃 𑒞𑒿 𑒌 𑒃𑒪𑒰𑒏𑒰𑒧𑒹 𑒕𑒻𑒯𑒹 𑒢𑒻।
𑒔𑒰𑒩𑒱𑒧 𑒥𑒔𑓂𑒔𑒰: 𑒏𑒼𑒢𑒰 𑒢𑒻 𑒕𑒻। 𑒍 𑒥𑒰𑒢𑓂𑒯 𑒮𑒦 𑒖𑒹 𑒥𑒰𑒢𑓂𑒯𑒪 𑒕𑒻 𑒮𑒹 𑒏𑒲 𑒕𑒱𑒌।