गजेन्द्र ठाकुर- गंगा ब्रिज

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒑𑓀𑒑𑒰 𑒥𑓂𑒩𑒱𑒖















































𑒢𑒰𑒙𑒏𑒏𑒰𑒩 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩𑒏 𑒖𑒢𑓂𑒧 𑒦𑒰𑒑𑒪𑒣𑒳𑒩𑒧𑒹 𑒮𑒢𑓂 𑓑𑓙𑓗𑓑 𑒧𑒹 𑒦𑒹𑒪𑒢𑓂𑒯𑒱 𑒂 𑒂𑒃 𑒏𑒰𑒪𑓂𑒯𑒱 𑒍 𑒠𑒱𑒪𑓂𑒪𑒲𑒧𑒹 𑒩𑒯𑒻 𑒕𑒟𑒱।







































𑒑𑓀𑒑𑒰 𑒥𑓂𑒩𑒱𑒖






𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩



𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢, 𑒢𑒄 𑒠𑒱𑒪𑓂𑒪𑒲

































Ganga Bridge: A Maithili Drama by Gajendra Thakur first published in 2012 by M/s Shruti Publications, India
Price: Rs.100
𑒮𑒩𑓂𑒫𑒰𑒡𑒱𑒏𑒰𑒩 © 𑒣𑓂𑒩𑒲𑒞𑒱 𑒚𑒰𑒏𑒳𑒩 2012
𑒣𑒯𑒱𑒪 𑒮𑓀𑒮𑓂𑒏𑒩𑒝 : 2012
ISBN : 978-93-80538-92-1
This drama is entirely a work of fiction. The names, characters and incidents portrayed in it are the work of the author’s imagination. Any resemblance to actual persons, living or dead, events or localities, is entirely coincidental.
Gajendra Thakur asserts the moral right to be identified as the author of this work.
Every effort has been made to trace or contact all copyright holders. The publishers will be pleased to make good any omissions or rectify any mistakes brought to their attention at the earliest opportunity.
All rights reserved. This book is sold subject to the condition that it shall not, by way of trade or otherwise, be lent, resold, hired out, or otherwise circulated without the publisher’s prior written consent in any form of binding or cover other than that in which it is published and without a similar condition including this condition being imposed on the subsequent purchaser and without limiting the rights under copyright reserved above; no part of this publication may be reproduced, stored in or introduced into a retrieval system, or transmitted, in any form or by any means- photographic, electronic, mechanical, photocopying, recording, taping, information storage- or otherwise, without the prior written permission of both the copyright owner and the aforementioned publisher of this book or as expressly permitted by law.
𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢 :𑒩𑒖𑒱𑒮𑓂𑒙𑒩𑓂𑒛 𑒂𑒤𑒱𑒮: 𑓘/𑓒𑓑, 𑒦𑒴𑒞𑒪, 𑒢𑓂𑒨𑒴 𑒩𑒰𑒖𑒹𑒢𑓂𑒠𑓂𑒩 𑒢𑒑𑒩, 𑒢𑒄 𑒠𑒱𑒪𑓂𑒪𑒲-𑓑𑓑𑓐𑓐𑓐𑓘.𑒠𑒴𑒩𑒦𑒰𑒭-(𑓐𑓑𑓑) 𑓒𑓕𑓘𑓘𑓙𑓖𑓕𑓖-𑓕𑓘 𑒤𑒻𑒏𑓂𑒮- (𑓐𑓑𑓑)𑓒𑓕𑓘𑓘𑓙𑓖𑓕𑓗
Website:http://www.shruti-publication.com
e-mail: shruti.publication@shruti-publication.com
Printed at: Ajay Arts, Delhi-110002
Distributor : Pallavi Distributors, Ward no- 6, Nirmali (Supaul), 𑒧𑒼.- 9572450405, 9931654742
Ganga Bridge: A Maithili Drama by Gajendra Thakur











𑒑𑓀𑒑𑒰 𑒥𑓂𑒩𑒱𑒖


𑒣𑒰𑒞𑓂𑒩:
𑒥𑒔𑓂𑒔𑒰 𑓑 𑒖𑒹 𑒁𑒦𑒱𑒨𑒢𑓂𑒞𑒰 𑒥𑒢𑒻𑒋
𑒥𑒔𑓂𑒔𑒰 𑓒 𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩 (𑒥𑒰𑒠𑒧𑒹 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒥𑒢𑒻𑒋)
𑒥𑒔𑓂𑒔𑒰 𑓓 (𑒖𑒹 𑒥𑒰𑒠𑒧𑒹 𑒧𑒖𑒠𑒴𑒩 𑒥𑒢𑒻𑒋)
𑒧𑒳𑒐𑓂𑒨𑒧𑓀𑒞𑓂𑒩𑒲
𑒧𑒲𑒞
𑒥𑒰𑒅
𑒪𑒰𑒪𑒰
𑒠𑒰𑒠𑒰
𑒥𑒱𑒪𑒙
𑒃𑒢𑓂𑒖𑒲𑒢𑒱𑒨𑒩𑒏 𑒣𑒞𑓂𑒢𑒲
𑒚𑒱𑒏𑒹𑒠𑒰𑒩
𑒧𑒖𑒠𑒴𑒩
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰)𑓑
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰)𑓒
𑒏𑒱𑒕𑒳 𑒕𑒰𑒞𑓂𑒩-𑒕𑒰𑒞𑓂𑒩𑒰
𑒜𑒼𑒪𑒯𑒼 𑒠𑒹𑒢𑒯𑒰𑒩
𑒛𑓀𑒏𑒰 𑒥𑒖𑒹𑒢𑒯𑒰𑒩 (𑒠𑒴𑒙𑒰 𑒪𑒼𑒏)
𑒥𑒞𑒯𑒲 𑒧𑒰𑒋
𑒣𑒻𑒒 𑒦𑒰𑒋











𑒣𑒪𑓂𑒪𑒫 𑒋𑒏
𑒮𑓂𑒙𑒹𑒖𑒏 𑒋𑒏 𑒏𑒰𑒞 𑒏𑒱𑒕𑒳 𑒧𑒖𑒠𑒴𑒩 𑒮𑒦 𑒐𑒙-𑒐𑒳𑒙 𑒏𑓄 𑒑𑒱𑒙𑓂𑒙𑒲 𑒣𑒖𑒹𑒥𑒰 𑒞𑒼𑒛𑓃𑒱 𑒩𑒯𑒪 𑒕𑒟𑒱 𑒪𑒑𑒻𑒋 𑒖𑒹 𑒑𑓀𑒑𑒰𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒦𑓄 𑒩𑒯𑒪 𑒁𑒕𑒱, 𑒏𑒰𑒩𑒝 𑒏𑒱𑒕𑒳 𑒧𑒖𑒠𑒴𑒩 𑒖𑒨 𑒧𑒰𑒿 𑒑𑓀𑒑𑒹 𑒏𑒯𑒱 𑒧𑓀𑒔𑒏 𑒢𑒲𑒔𑒰𑒿 𑒣𑓂𑒩𑒝𑒰𑒧 𑒮𑒹𑒯𑒼 𑒏𑓄 𑒩𑒯𑒪 𑒕𑒟𑒱। 𑒮𑓂𑒙𑒹𑒖𑒏 𑒠𑒼𑒮𑒩 𑒏𑒰𑒞 𑒠𑒴𑒙𑒰 𑒪𑒼𑒏 𑒢𑒲𑒔𑒰𑒿 𑒩𑒰𑒐𑒪 𑒢𑒑𑒰𑒛𑓃𑒰-𑒜𑒼𑒪𑒣𑒩 𑒔𑒼𑒙 𑒠𑓄 𑒩𑒯𑒪 𑒁𑒕𑒱। 𑒞𑒐𑒢𑒹 𑒋𑒏𑒙𑒰 𑒜𑒼𑒪𑒯𑒼 𑒠𑒹𑒢𑒯𑒰𑒩𑒏 𑒣𑓂𑒩𑒫𑒹𑒬।

𑒜𑒼𑒪𑒯𑒼 𑒠𑒹𑒢𑒯𑒰𑒩 : 𑒑𑓀𑒑𑒰 𑒥𑓂𑒩𑒱𑒖। 𑒣𑒫𑒱𑒞𑓂𑒩 𑒑𑓀𑒑𑒰𑒣𑒩 𑒥𑒢𑒪 𑒌 𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒪𑒹𑒪 𑒧𑒖𑒠𑒴𑒩 𑒔𑒰𑒯𑒲। 𑒮𑓂𑒞𑓂𑒩𑒲-𑒣𑒳𑒩𑒳𑒭, 𑒥𑒰𑒪-𑒫𑒵𑒠𑓂𑒡 𑒮𑒦 𑒏𑒱𑒨𑒼 𑒂𑒫𑒹𑒠𑒢 𑒠𑓄 𑒮𑒏𑒻 𑒕𑒟𑒱। (𑒜𑒼𑒪𑒯𑒼 𑒠𑒻𑒞) 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅।… 𑒑𑓀𑒑𑒰 𑒥𑓂𑒩𑒱𑒖। 𑒣𑒫𑒱𑒞𑓂𑒩 𑒑𑓀𑒑𑒰𑒣𑒩 𑒥𑒢𑒪 𑒌 𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒪𑒹𑒪 𑒧𑒖𑒠𑒴𑒩 𑒔𑒰𑒯𑒲। 𑒮𑓂𑒞𑓂𑒩𑒲-𑒣𑒳𑒩𑒳𑒭, 𑒥𑒰𑒪-𑒫𑒵𑒠𑓂𑒡 𑒮𑒦 𑒏𑒱𑒨𑒼 𑒂𑒫𑒹𑒠𑒢 𑒠𑓄 𑒮𑒏𑒻 𑒕𑒟𑒱।
𑒋𑒏𑒙𑒰 𑒪𑒼𑒏 (𑒛𑓀𑒏𑒰 𑒥𑒖𑒹𑒢𑒰𑒃 𑒕𑒼𑒛𑓃𑒱 𑒏𑒰𑒖 𑒏𑒩𑒻𑒞 𑒧𑒖𑒠𑒴𑒩 𑒮𑒦𑒏𑒹𑒿 𑒁𑒏𑒰𑒢𑒻𑒞 𑒜𑒼𑒪𑒯𑒼 𑒠𑒹𑒢𑒯𑒰𑒩 𑒪𑒑 𑒁𑒥𑒻𑒋 , 𑒧𑒳𑒠𑒰 𑒠𑒼𑒮𑒩 𑒪𑒼𑒏 𑒂𑒮𑓂𑒞𑒹 𑒂𑒮𑓂𑒞𑒹 𑒛𑓀𑒏𑒰 𑒥𑒖𑒥𑒱𑒞𑒹 𑒩𑒯𑒻𑒞 𑒁𑒕𑒱): 𑒠𑒹𑒐𑒻 𑒕𑒱𑒌 𑒖𑒹 𑒏𑒰𑒖 𑒞𑒿 𑒔𑒪𑒱𑒨𑒹 𑒩𑒯𑒪 𑒕𑒻, 𑒞𑒐𑒢 𑒤𑒹𑒩?
𑒜𑒼𑒪𑒯𑒼 𑒠𑒹𑒢𑒯𑒰𑒩: (𑒍𑒃 𑒪𑒼𑒏 𑒠𑒱𑒮 𑒡𑓂𑒨𑒰𑒢 𑒢𑒻 𑒠𑒻𑒞 𑒏𑒵𑒞𑓂𑒩𑒱𑒧 𑒩𑒴𑒣𑒮𑒿 𑒥𑒖𑒻𑒞) 𑒋𑒞𑒥𑒹 𑒧𑒖𑒠𑒴𑒩𑒮𑒿 𑒏𑒰𑒖 𑒢𑒻 𑒔𑒪𑒞𑒻। 𑒣𑒴𑒩𑒰 𑒣𑒳𑒪 𑒯𑒱𑒪 𑒩𑒯𑒪 𑒕𑒻। (𑒜𑒼𑒪𑒯𑒼 𑒠𑒻𑒞) 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅।… 𑒑𑓀𑒑𑒰 𑒥𑓂𑒩𑒱𑒖। 𑒣𑒫𑒱𑒞𑓂𑒩 𑒑𑓀𑒑𑒰𑒣𑒩 𑒥𑒢𑒪 𑒌 𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒪𑒹𑒪 𑒧𑒖𑒠𑒴𑒩 𑒔𑒰𑒯𑒲। 𑒮𑓂𑒞𑓂𑒩𑒲-𑒣𑒳𑒩𑒳𑒭, 𑒥𑒰𑒪-𑒫𑒵𑒠𑓂𑒡 𑒮𑒦 𑒏𑒱𑒨𑒼 𑒂𑒫𑒹𑒠𑒢 𑒠𑓄 𑒮𑒏𑒻 𑒕𑒟𑒱।
𑒠𑒼𑒮𑒩 𑒪𑒼𑒏 (𑒛𑓀𑒏𑒰 𑒥𑒖𑒹𑒢𑒰𑒃 𑒕𑒼𑒛𑓃𑒱 𑒏𑓄 𑒜𑒼𑒪𑒯𑒼 𑒠𑒹𑒢𑒯𑒰𑒩 𑒪𑒑 𑒁𑒥𑒻𑒋): 𑒋𑒞𑒥𑒹 𑒠𑒱𑒢𑒧𑒹 𑒏𑒼𑒢𑒰 𑒄 𑒯𑒰𑒪 𑒦𑓄 𑒑𑒹𑒪𑒻। 𑒮𑒳𑒢𑒻 𑒕𑒱𑒌 𑒖𑒞𑒹𑒏 𑒣𑒰𑒨𑒰 𑒌 𑒣𑒳𑒪𑒧𑒹 𑒕𑒻 𑒞𑒞𑒹𑒏 𑒏𑒞𑒰𑒏 𑒏𑒩𑒼𑒛𑓃 𑒙𑒰𑒏𑒰 𑒋𑒏𑒩𑒰 𑒥𑒢𑒥𑒻𑒧𑒹 𑒐𑒩𑓂𑒔 𑒦𑒹𑒪 𑒩𑒯𑒻।
𑒜𑒼𑒪𑒯𑒼 𑒠𑒹𑒢𑒯𑒰𑒩: (𑒁𑒯𑒴 𑒪𑒼𑒏 𑒠𑒱𑒮 𑒡𑓂𑒨𑒰𑒢 𑒢𑒻 𑒠𑒻𑒞 𑒏𑒵𑒞𑓂𑒩𑒱𑒧 𑒩𑒴𑒣𑒮𑒿 𑒥𑒖𑒻𑒞) 𑒏𑒰𑒖 𑒜𑓀𑒑𑒮𑒿 𑒢𑒻 𑒦𑒹𑒪 𑒩𑒯𑒻। 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅...। 𑒑𑓀𑒑𑒰𑒣𑒩 𑒥𑒢𑒪 𑒌 𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒪𑒹𑒪 𑒧𑒖𑒠𑒴𑒩 𑒔𑒰𑒯𑒲। 𑒮𑓂𑒞𑓂𑒩𑒲-𑒣𑒳𑒩𑒳𑒭, 𑒥𑒰𑒪-𑒫𑒵𑒠𑓂𑒡 𑒮𑒦 𑒏𑒱𑒨𑒼 𑒂𑒫𑒹𑒠𑒢 𑒠𑓄 𑒮𑒏𑒻 𑒕𑒟𑒱। 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅।
𑒋𑒏𑒙𑒰 𑒪𑒼𑒏: (𑒠𑒩𑓂𑒬𑒏 𑒠𑒱𑒮 𑒞𑒏𑒻𑒞) 𑒠𑒹𑒐𑒻 𑒕𑒱𑒌, 𑒖𑒯𑒱𑒨𑒰 𑒥𑒢𑒱𑒨𑒹 𑒩𑒯𑒪 𑒕𑒪𑒻, 𑒥𑒢𑒱 𑒏𑓄 𑒞𑒻𑒨𑒰𑒩𑒼 𑒢𑒻 𑒦𑒹𑒪 𑒩𑒯𑒻, 𑒞𑒯𑒱𑒨𑒹𑒮𑒿 𑒌 𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒬𑒳𑒩𑒴 𑒕𑒻।
𑒠𑒼𑒮𑒩 𑒪𑒼𑒏: (𑒍𑒃 𑒪𑒼𑒏𑒣𑒩 𑒡𑓂𑒨𑒰𑒢 𑒢𑒻 𑒠𑒻𑒞 𑒠𑒩𑓂𑒬𑒏 𑒠𑒱𑒮 𑒞𑒏𑒻𑒞) 𑒔𑒱𑒣𑓂𑒣𑒲𑒣𑒩 𑒔𑒱𑒣𑓂𑒣𑒲 𑒣𑒛𑓃𑒱 𑒩𑒯𑒪 𑒕𑒻। 𑒅𑒠𑓂𑒒𑒰𑒙𑒢𑒮𑒿 𑒣𑒯𑒱𑒢𑒯𑒱𑒨𑒹 𑒮𑒿 𑒔𑒱𑒣𑓂𑒣𑒲 𑒣𑒛𑓃𑒢𑒰𑒃 𑒬𑒳𑒩𑒴 𑒦𑓄 𑒑𑒹𑒪 𑒩𑒯𑒻।
𑒜𑒼𑒪𑒯𑒼 𑒠𑒹𑒢𑒯𑒰𑒩: (𑒠𑒳𑒢𑒴 𑒪𑒼𑒏𑒣𑒩 𑒡𑓂𑒨𑒰𑒢 𑒢𑒻 𑒠𑒻𑒞 𑒂𑒿𑒐𑒱 𑒧𑒳𑒢𑒻𑒞 𑒥𑒖𑒻𑒞) 𑒮𑒩𑒏𑒰𑒩𑒲 𑒣𑒳𑒪 𑒕𑒱𑒌, 𑒔𑒱𑒣𑓂𑒣𑒲 𑒢𑒻 𑒣𑒛𑓃𑒞𑒻 𑒞𑒿 𑒃𑒢𑓂𑒖𑒲𑒢𑒱𑒨𑒩 𑒂 𑒚𑒱𑒏𑒹𑒠𑒰𑒩𑒏 𑒒𑒩𑒣𑒩 𑒕𑒖𑓂𑒖𑒰 𑒏𑒼𑒢𑒰 𑒣𑒛𑓃𑒞𑒻। 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅...।
𑒋𑒏𑒙𑒰 𑒪𑒼𑒏: (𑒜𑒼𑒪𑒯𑒼 𑒥𑒪 𑒠𑒱𑒮 𑒂𑒥 𑒧𑒳𑒿𑒯 𑒏𑒩𑒻𑒞 𑒥𑒖𑒻𑒋) 𑒯𑒾 𑒜𑒼𑒪𑒯𑒼𑒥𑒪𑒰, 𑒮𑒹 𑒞𑒿 𑒥𑒳𑒗𑒪𑒱𑒌, 𑒧𑒳𑒠𑒰 𑒮𑒹 𑒢𑒹 𑒏𑒯𑓄 𑒖𑒹 𑒠𑒳𑒢𑒱𑒨𑒰𑒿 𑒧𑒹 𑒂𑒢𑒼 𑒚𑒰𑒧 𑒣𑒳𑒪 𑒥𑒢𑒻 𑒕𑒻, 𑒮𑒹 𑒍𑒞𑒳𑒏𑓂𑒏𑒰 𑒃𑒢𑓂𑒖𑒲𑒢𑒱𑒨𑒩 𑒂 𑒚𑒱𑒏𑒹𑒠𑒰𑒩𑒏 𑒒𑒩𑒣𑒩 𑒕𑒖𑓂𑒖𑒰 𑒣𑒛𑓃𑒻 𑒕𑒻 𑒂𑒏𑒱 𑒢𑒻 𑒯𑒾।
𑒜𑒼𑒪𑒯𑒼 𑒠𑒹𑒢𑒯𑒰𑒩: (𑒍𑒃 𑒪𑒼𑒏 𑒠𑒱𑒮 𑒁𑒔𑒏𑒔𑒰 𑒏𑓄 𑒞𑒏𑒻𑒞) 𑒏𑒱𑒖𑒰 𑒢𑒹 𑒑𑒹𑒪𑒱𑒌, 𑒧𑒳𑒠𑒰 𑒮𑒳𑒢𑒻 𑒕𑒱𑒌 𑒁𑓀𑒑𑓂𑒩𑒹𑒖𑒥𑒪𑒰 𑒣𑒳𑒪 𑒧𑒖𑒑𑒴𑒞 𑒯𑒼𑒃 𑒕𑒪𑒻। (𑒠𑒩𑓂𑒬𑒏 𑒠𑒱𑒮 𑒞𑒏𑒻𑒞) 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅...।
𑒠𑒼𑒮𑒩 𑒪𑒼𑒏: (𑒣𑒯𑒱𑒪 𑒪𑒼𑒏 𑒠𑒱𑒮 𑒂𑒥 𑒧𑒳𑒿𑒯 𑒏𑒩𑒻𑒞 𑒥𑒖𑒻𑒋) 𑒯𑒾, 𑒁𑒢𑒹𑒩𑒏 𑒣𑒰𑒃 𑒂𑒥𑒻 𑒕𑒪𑒻 𑒪𑒴𑒙𑒱𑒏 𑒞𑒿 𑒖𑒹 𑒋𑒏𑒰𑒡 𑒙𑒰 𑒣𑒳𑒪 𑒁𑓀𑒑𑓂𑒩𑒹𑒖 𑒥𑒢𑒹𑒪𑒏𑒻 𑒮𑒹 𑒧𑒖𑒑𑒴𑒞𑒹 𑒢𑒹 𑒯𑒹𑒞𑒻 𑒯𑒾।
𑒋𑒏𑒙𑒰 𑒪𑒼𑒏: (𑒠𑒼𑒮𑒩 𑒪𑒼𑒏 𑒠𑒱𑒮 𑒂𑒥 𑒧𑒳𑒿𑒯 𑒏𑒩𑒻𑒞 𑒥𑒖𑒻𑒋) 𑒄 𑒃𑒢𑓂𑒖𑒲𑒢𑒱𑒨𑒩 𑒂 𑒚𑒱𑒏𑒹𑒠𑒰𑒩 𑒮𑒦 𑒪𑒴𑒙𑒱𑒧𑒹 𑒁𑓀𑒑𑓂𑒩𑒹𑒖𑒮𑒿 𑒏𑒧 𑒢𑒻 𑒕𑒻, 𑒧𑒳𑒠𑒰 𑒣𑒳𑒪 𑒧𑒖𑒑𑒴𑒞 𑒏𑒱𑒋 𑒢𑒻 𑒥𑒢𑒥𑒻 𑒕𑒻 𑒯𑒾। 𑒍𑒃 𑒥𑒢𑒥𑒻𑒧𑒹 𑒁𑓀𑒑𑓂𑒩𑒹𑒖 𑒮𑒢 𑒏𑒱𑒋 𑒢𑒻 𑒕𑒻 𑒯𑒾।
𑒠𑒼𑒮𑒩 𑒪𑒼𑒏: (𑒣𑒯𑒱𑒪 𑒪𑒼𑒏 𑒠𑒱𑒮 𑒧𑒳𑒿𑒯 𑒏𑒩𑒻𑒞 𑒥𑒖𑒻𑒋) 𑒧𑒖𑒑𑒴𑒞 𑒥𑒢𑒰 𑒠𑒹𑒞𑒻 𑒞𑒿 𑒤𑒹𑒩 𑒧𑒩𑒼𑒧𑓂𑒧𑒞𑒱𑒏 𑒚𑒹𑒏𑒰 𑒏𑒼𑒢𑒰 𑒦𑒹𑒙𑒞𑒻 𑒯𑒾। (𑒜𑒼𑒪𑒯𑒼 𑒥𑒪 𑒠𑒱𑒮 𑒂𑒥 𑒧𑒳𑒿𑒯 𑒏𑒩𑒻𑒞 𑒥𑒖𑒻𑒋) 𑒏𑒲 𑒯𑒾 𑒜𑒼𑒪𑒯𑒼𑒥𑒪𑒰..
𑒜𑒼𑒪𑒯𑒼 𑒠𑒹𑒢𑒯𑒰𑒩: (𑒠𑒼𑒮𑒩 𑒪𑒼𑒏𑒏 𑒑𑒣𑒣𑒩 𑒡𑓂𑒨𑒰𑒢 𑒢𑒻 𑒠𑒻𑒞) 𑒏𑒱𑒖𑒰 𑒢𑒹 𑒑𑒹𑒪𑒱𑒌। 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅...। 𑒑𑓀𑒑𑒰𑒣𑒩 𑒥𑒢𑒪 𑒌 𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒪𑒹𑒪 𑒧𑒖𑒠𑒴𑒩 𑒔𑒰𑒯𑒲। 𑒮𑓂𑒞𑓂𑒩𑒲-𑒣𑒳𑒩𑒳𑒭, 𑒥𑒰𑒪-𑒫𑒵𑒠𑓂𑒡 𑒮𑒦 𑒏𑒱𑒨𑒼 𑒂𑒫𑒹𑒠𑒢 𑒠𑓄 𑒮𑒏𑒻 𑒕𑒟𑒱। 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅।

(𑒜𑒼𑒪𑒯𑒼 𑒥𑒪𑒰 𑒔𑒪𑒱 𑒖𑒰𑒃𑒋।)
𑒣𑒯𑒱𑒪 𑒪𑒼𑒏:𑒂𑒥 𑒮𑒩𑒏𑒰𑒩𑒼 𑒏𑒲 𑒏𑒩𑒞𑒻, 𑒪𑒼𑒏𑒹 𑒮𑒦 𑒑𑒛𑓃𑒥𑒛𑓃 𑒕𑒻।
𑒠𑒼𑒮𑒩 𑒪𑒼𑒏:𑒪𑒼𑒏 𑒏𑒏𑒩𑒰 𑒏𑒯𑒻 𑒕𑒱𑒯𑒲𑓀, 𑒯𑒧 𑒂 𑒞𑒴𑒿।
𑒣𑒯𑒱𑒪 𑒪𑒼𑒏: 𑒢𑒻 𑒩𑒾। 𑒃𑒢𑓂𑒖𑒲𑒢𑒱𑒨𑒩 𑒂 𑒚𑒱𑒏𑒹𑒠𑒰𑒩।
𑒠𑒼𑒮𑒩 𑒪𑒼𑒏:𑒡𑒳𑒩 𑒥𑒴𑒛𑓃𑒱, 𑒂𑒥 𑒁𑓀𑒑𑓂𑒩𑒹𑒖𑒏 𑒮𑒩𑒏𑒰𑒩 𑒟𑒼𑒛𑓃𑒥𑒹 𑒕𑒻।
𑒣𑒯𑒱𑒪 𑒪𑒼𑒏:𑒞𑒿 𑒏𑒲 𑒁𑒩𑓂𑒟 𑒥𑒠𑒪𑒱 𑒖𑒹𑒞𑒻।
𑒠𑒼𑒮𑒩 𑒪𑒼𑒏:𑒯𑒿 𑒩𑒾।
𑒣𑒯𑒱𑒪 𑒪𑒼𑒏:𑒞𑒿 𑒃𑒢𑓂𑒖𑒲𑒢𑒱𑒨𑒩 𑒂 𑒚𑒱𑒏𑒹𑒠𑒰𑒩 𑒪𑒼𑒏 𑒢𑒻 𑒦𑒹𑒪𑒻।
𑒠𑒼𑒮𑒩 𑒪𑒼𑒏:𑒢𑒻।
𑒣𑒯𑒱𑒪 𑒪𑒼𑒏:𑒞𑒿 𑒏𑒲 𑒦𑒹𑒪𑒻।
𑒠𑒼𑒮𑒩 𑒪𑒼𑒏:𑒍 𑒮𑒦 𑒦𑒹𑒪𑒻 𑒮𑒩𑒏𑒰𑒩।
𑒣𑒯𑒱𑒪 𑒪𑒼𑒏: 𑒡𑒳𑒞𑓂, 𑒮𑒩𑒏𑒰𑒩 𑒧𑒢𑒳𑒏𑓂𑒐 𑒟𑒼𑒛𑓃𑒹 𑒯𑒼𑒃 𑒕𑒻।
𑒠𑒼𑒮𑒩 𑒪𑒼𑒏:𑒧𑒢𑒳𑒏𑓂𑒐𑒹 𑒯𑒼𑒃 𑒕𑒻। 𑒩𑒰𑒖𑒼 𑒧𑒯𑒩𑒰𑒖𑒰 𑒮𑒦 𑒖𑒐𑒢 𑒧𑒢𑒳𑒏𑓂𑒐𑒹 𑒯𑒼𑒃 𑒕𑒪𑒻, 𑒁𑓀𑒑𑓂𑒩𑒹𑒖𑒼 𑒮𑒦 𑒖𑒐𑒢 𑒧𑒢𑒳𑒏𑓂𑒐𑒹 𑒯𑒼𑒃 𑒕𑒪𑒻 𑒞𑒐𑒢 𑒄 𑒞𑒿 𑒮𑓂𑒫𑒞𑓀𑒞𑓂𑒩 𑒦𑒰𑒩𑒞𑒏 𑒮𑒩𑒏𑒰𑒩 𑒕𑒱𑒌।
𑒣𑒯𑒱𑒪 𑒪𑒼𑒏:𑒁𑒔𑓂𑒕𑒰, 𑒞𑒐𑒢 𑒣𑒙𑒢𑒰 𑒂 𑒠𑒱𑒪𑓂𑒪𑒲 𑒧𑒹 𑒮𑒩𑒏𑒰𑒩 𑒕𑒻 𑒮𑒹 𑒏𑒲 𑒕𑒱𑒌 𑒩𑒾।
𑒠𑒼𑒮𑒩 𑒪𑒼𑒏:𑒍𑒯𑒼 𑒮𑒩𑒏𑒰𑒩𑒹 𑒕𑒱𑒌।
𑒣𑒯𑒱𑒪 𑒪𑒼𑒏:𑒡𑒳𑒩𑓂, 𑒄 𑒃𑒢𑓂𑒖𑒲𑒢𑒱𑒨𑒩 𑒞𑒿 𑒑𑒰𑒧𑒹𑒏 𑒪𑒼𑒏 𑒕𑒻। 𑒑𑒰𑒧𑒏 𑒪𑒼𑒏 𑒏𑒞𑒾 𑒮𑒩𑒏𑒰𑒩 𑒦𑒹𑒪𑒻 𑒯𑒿, 𑒑𑒰𑒧𑒧𑒹 𑒞𑒿 𑒖𑒧𑒲𑒢𑓂𑒠𑒰𑒩𑒏 𑒁𑒧𑒪𑒰 𑒙𑒰 𑒏𑒹𑒿 𑒪𑒼𑒏 𑒮𑒩𑒏𑒰𑒩 𑒏𑒯𑒻 𑒕𑒻।
𑒠𑒼𑒮𑒩 𑒪𑒼𑒏:𑒂𑒠𑒞𑒱 𑒕𑒻 𑒪𑒼𑒏𑒏𑒹𑒿 𑒞𑒹𑒿 𑒖𑒧𑒲𑒢𑓂𑒠𑒰𑒩𑒏 𑒁𑒧𑒪𑒰𑒏𑒹𑒿 𑒁𑒐𑒢𑒼 𑒮𑒩𑒏𑒰𑒩 𑒏𑒯𑒻 𑒖𑒰𑒃 𑒕𑒻। 𑒏𑒱𑒕𑒳 𑒠𑒱𑒢 𑒥𑒱𑒞𑒞𑒻, 𑒍𑒏𑒩𑒰 𑒮𑒦𑒏𑒹𑒿 𑒪𑒼𑒏 𑒮𑒩𑒏𑒰𑒩 𑒢𑒻 𑒏𑒯𑒞𑒻।
𑒣𑒯𑒱𑒪 𑒪𑒼𑒏:𑒞𑒴𑒿 𑒞𑒿 𑒁𑒢𑓂𑒞𑒩𑓂𑒨𑒰𑒧𑒲 𑒥𑒳𑒗𑒰𑒃 𑒕𑒹𑒿। 𑒂𑒩 𑒮𑒦 𑒏𑒲 𑒯𑒹𑒞𑒻 𑒩𑒾।
𑒠𑒼𑒮𑒩 𑒪𑒼𑒏:𑒮𑒩𑒏𑒰𑒩 𑒃𑒢𑓂𑒖𑒲𑒢𑒱𑒨𑒩𑒏𑒹𑒿 𑒥𑒯𑒰𑒪 𑒏𑒹𑒢𑒹 𑒕𑒻, 𑒚𑒱𑒏𑒹𑒠𑒰𑒩𑒮𑒿 𑒏𑒰𑒖 𑒏𑒩𑒥𑒻 𑒕𑒻, 𑒄 𑒮𑒦 𑒮𑒩𑒏𑒰𑒩 𑒕𑒱𑒌। 𑒄 𑒮𑒦 𑒖𑒹 𑒔𑒰𑒯𑒞𑒹 𑒮𑒋𑒯 𑒯𑒹𑒞𑒻।
𑒣𑒯𑒱𑒪 𑒪𑒼𑒏:𑒯𑒧𑒩𑒰 𑒂 𑒞𑒼𑒩𑒰𑒮𑒿 𑒏𑒱𑒕𑒳 𑒢𑒻 𑒯𑒹𑒞𑒻?
𑒠𑒼𑒮𑒩 𑒪𑒼𑒏:𑒯𑒧 𑒂 𑒞𑒴𑒿 𑒏𑒱𑒕𑒳 𑒪𑒼𑒏𑒏𑒹𑒿 𑒔𑒳𑒢𑒥𑒻। 𑒄 𑒮𑒦 𑒍𑒏𑒩𑒰 𑒮𑒦𑒏 𑒏𑒯𑒪𑒧𑒹 𑒩𑒯𑒞𑒻।
𑒣𑒯𑒱𑒪 𑒪𑒼𑒏:𑒩𑒾, 𑒮𑒩𑒏𑒰𑒩𑒲 𑒏𑒩𑓂𑒧𑒔𑒰𑒩𑒲𑒧𑒹 𑒞𑒿 𑒑𑒰𑒧𑒏 𑒔𑒾𑒏𑒲𑒠𑒰𑒩𑒼 𑒕𑒻, 𑒂𑒤𑒱𑒮𑒏 𑒔𑒣𑒩𑒰𑒮𑒲𑒨𑒼 𑒕𑒻। 𑒞𑒿 𑒍𑒯𑒼 𑒮𑒦 𑒮𑒩𑒏𑒰𑒩 𑒦𑓄 𑒑𑒹𑒪𑒻।
𑒠𑒼𑒮𑒩 𑒪𑒼𑒏:𑒯𑒿 𑒩𑒾।
𑒣𑒯𑒱𑒪 𑒪𑒼𑒏:𑒞𑒐𑒢 𑒁𑒣𑒢𑒹 𑒮𑒦 𑒐𑒰𑒪𑒲 𑒪𑒼𑒏 𑒦𑒹𑒪𑒱𑒌। 𑒖𑒹 𑒏𑒩𑒞𑒻 𑒨𑒋𑒯 𑒮𑒦 𑒏𑒩𑒞𑒻।
𑒠𑒼𑒮𑒩 𑒪𑒼𑒏:𑒁𑒣𑒢𑒹 𑒮𑒦 𑒔𑒳𑒢𑒥𑒻, 𑒂 𑒍𑒏𑒩𑒰 𑒮𑒦𑒏 𑒏𑒯𑒪𑒧𑒹 𑒄 𑒮𑒦 𑒩𑒯𑒞𑒻।
𑒣𑒯𑒱𑒪 𑒪𑒼𑒏:𑒧𑒰𑒢𑒹 𑒁𑒣𑒢𑒹 𑒮𑒦𑒏 𑒏𑒯𑒪 𑒧𑒹 𑒩𑒯𑒞𑒻 (𑒏𑒱𑒕𑒳 𑒍𑒏𑒩𑒰 𑒥𑒳𑒗𑒰𑒃 𑒢𑒻 𑒕𑒻, 𑒧𑒳𑒿𑒯𑒣𑒩 𑒦𑒰𑒫 𑒁𑒥𑒻-𑒕𑒻 𑒖𑒰𑒃 𑒕𑒻।)
𑒠𑒼𑒮𑒩 𑒪𑒼𑒏:𑒯𑒿, 𑒮𑒋𑒯 𑒢𑒹 𑒦𑒹𑒪𑒻।
𑒣𑒯𑒱𑒪 𑒪𑒼𑒏: (𑒏𑒱𑒕𑒳 𑒍𑒏𑒩𑒰 𑒥𑒳𑒗𑒰𑒃 𑒢𑒻 𑒕𑒻, 𑒧𑒳𑒿𑒯𑒣𑒩 𑒦𑒰𑒫 𑒁𑒥𑒻-𑒕𑒻 𑒖𑒰𑒃 𑒕𑒻।) 𑒠𑒹𑒐𑒰 𑒔𑒰𑒯𑒲 𑒮𑒩𑒏𑒰𑒩𑒏 𑒩𑒰𑒖….

𑒣𑒰𑒕𑒰𑒿𑒮𑒿 𑒠𑒴-𑒠𑒴𑒙𑒰 𑒞𑒱𑒩𑓀𑒑𑒰 𑒗𑒝𑓂𑒛𑒰 𑒪𑒹𑒢𑒹 𑒥𑒔𑓂𑒔𑒰 𑒮𑒦 𑒁𑒥𑒻𑒋। 𑒮𑓀𑒑𑒧𑒹 𑒠𑒴𑒙𑒰 𑒬𑒱𑒏𑓂𑒭𑒏 𑒕𑒻। 𑒋𑒏𑒙𑒰 𑒬𑒱𑒏𑓂𑒭𑒏 (𑒥𑒰 𑒬𑒱𑒏𑓂𑒭𑒱𑒏𑒰) 𑒂𑒑𑒰𑒿-𑒂𑒑𑒰𑒿 𑒂 𑒋𑒏𑒙𑒰 𑒬𑒱𑒏𑓂𑒭𑒏 (𑒥𑒰 𑒬𑒱𑒏𑓂𑒭𑒱𑒏𑒰) 𑒣𑒰𑒕𑒰𑒿-𑒣𑒰𑒕𑒰𑒿 𑒔𑒪𑒱 𑒩𑒯𑒪 𑒕𑒟𑒱। 𑒮𑒦 𑒧𑒖𑒠𑒴𑒩𑒏𑒹𑒿 𑒋𑒏-𑒋𑒏𑒙𑒰 𑒗𑒝𑓂𑒛𑒰 𑒠𑓄 𑒠𑒹𑒪 𑒖𑒰𑒃 𑒕𑒻। “𑒍𑒃 𑒠𑒳𑒢𑒴 𑒙𑒰 𑒪𑒼𑒏𑒏𑒹𑒿 𑒮𑒹𑒯𑒼 𑒋𑒏-𑒋𑒏𑒙𑒰 𑒗𑒝𑓂𑒛𑒰 𑒠𑒹𑒪 𑒖𑒰𑒋”- 𑒄 𑒑𑒣 𑒬𑒱𑒏𑓂𑒭𑒏 𑒃𑒬𑒰𑒩𑒰𑒧𑒹 𑒏𑒯𑒻 𑒕𑒟𑒱, 𑒧𑒳𑒠𑒰 𑒗𑒝𑓂𑒛𑒰 𑒒𑒙𑒱 𑒑𑒹𑒪𑒻, 𑒮𑒹 𑒍 𑒠𑒳𑒢𑒴 𑒐𑒰𑒪𑒲 𑒯𑒰𑒟 𑒩𑒯𑒱 𑒖𑒰𑒃 𑒕𑒟𑒱 𑒂 𑒮𑒦𑒏 𑒧𑒳𑒿𑒯 𑒞𑒰𑒏𑓄 𑒪𑒑𑒻 𑒕𑒟𑒱।
𑒧𑒖𑒠𑒴𑒩𑒏 𑒮𑒼𑒗𑒰𑒿 𑒍 𑒠𑒳𑒢𑒴 𑒪𑒼𑒏 𑒚𑒰𑒜𑓃 𑒦𑓄 𑒖𑒰𑒃𑒋 𑒂 𑒤𑒹𑒩 𑒛𑓀𑒏𑒹 𑒪𑒑 𑒂𑒥𑒱 𑒚𑒰𑒜𑓃 𑒦𑓄 𑒖𑒰𑒃𑒋 𑒂 𑒂𑒬𑓂𑒔𑒩𑓂𑒨𑒮𑒿 𑒠𑒹𑒐𑓄 𑒪𑒑𑒻𑒋।
𑒞𑓂𑒩𑒱𑒫𑒰𑒩𑓂𑒝𑒱𑒏 𑒗𑒝𑓂𑒛𑒰 𑒪𑓄 𑒏𑓄 𑒥𑒰𑒏𑒲 𑒮𑒦 𑒑𑒼𑒙𑒹 𑒧𑓀𑒔𑒣𑒩 𑒕𑒱𑒞𑒩𑒰 𑒖𑒰𑒃 𑒕𑒟𑒱 𑒂 𑒮𑓂𑒙𑒹𑒖𑒣𑒩 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱। 𑒅𑒪𑓂𑒪𑒰𑒮𑒏 𑒫𑒰𑒞𑒰𑒫𑒩𑒝 𑒮𑒑𑒩𑒹 𑒣𑒮𑒩𑒪 𑒁𑒕𑒱, 𑒠𑒳𑒢𑒴 𑒪𑒼𑒏𑒏𑒹𑒿 𑒕𑒼𑒛𑓃𑒱 𑒮𑒦𑒏 𑒧𑒳𑒿𑒯𑒣𑒩 (𑒧𑒖𑒠𑒴𑒩 𑒮𑒦𑒏 𑒮𑒹𑒯𑒼) 𑒯𑒿𑒮𑒲-𑒣𑓂𑒩𑒮𑒢𑓂𑒢𑒞𑒰 𑒂𑒥𑒱 𑒖𑒰𑒃 𑒕𑒻।
𑒖𑒐𑒢 𑒮𑒦 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱 𑒞𑒐𑒢 𑒠𑒳𑒢𑒴 𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑒥𑒔𑓂𑒔𑒰 𑒮𑒦𑒏 𑒂𑒑𑒰𑒿 𑒂 𑒠𑒩𑓂𑒬𑒏 𑒮𑒦𑒏 𑒮𑒼𑒗𑒰𑒿 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱।
“𑓑𑓕 𑒁𑒑𑒮𑓂𑒞” 𑒄 𑒢𑒰𑒩𑒰 𑒠𑒳𑒢𑒴 𑒬𑒱𑒏𑓂𑒭𑒏 𑒥𑒰𑒖𑒻 𑒕𑒟𑒱 𑒂 “𑒮𑓂𑒫𑒞𑓀𑒞𑓂𑒩𑒞𑒰 𑒠𑒱𑒫𑒮” 𑒄 𑒮𑒦 𑒧𑒱𑒪𑒱 𑒏𑓄 (𑒠𑒳𑒢𑒴 𑒪𑒼𑒏 𑒏𑒹𑒿 𑒕𑒼𑒛𑓃𑒱 𑒏𑓄) 𑒥𑒰𑒖𑒻 𑒕𑒟𑒱।

𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓑: 𑒥𑒾𑒂-𑒥𑒳𑒔𑓂𑒔𑒲। 𑒂𑒃 𑒄 𑒞𑓂𑒩𑒱𑒫𑒰𑒩𑓂𑒝𑒱𑒏 𑒗𑒝𑓂𑒛𑒰 𑒯𑒧𑒩𑒰 𑒮𑒦𑒏 𑒯𑒰𑒟𑒧𑒹 𑒤𑒯𑒩𑒰 𑒩𑒯𑒪 𑒁𑒕𑒱। 𑒣𑒯𑒱𑒢𑒹 𑒯𑒧 𑒮𑒦 𑒠𑒼𑒮𑒩𑒰𑒏 𑒁𑒡𑒲𑒢 𑒕𑒪𑒾𑓀, 𑒣𑒩𑒰𑒡𑒲𑒢 𑒕𑒪𑒾𑓀, 𑒄 𑒗𑒝𑓂𑒛𑒰 𑒗𑒳𑒏𑒪 𑒕𑒪, 𑒤𑒯𑒩𑒰 𑒢𑒻 𑒮𑒏𑒻 𑒕𑒪𑒾𑓀। 𑒗𑒝𑓂𑒛𑒰 𑒤𑒯𑒩𑒰𑒃𑒞 𑒩𑒯𑒋 𑒍𑒃 𑒪𑒹𑒪 𑒯𑒧𑒩𑒰 𑒮𑒦𑒏𑒹𑒿 𑒖𑒼𑒩 𑒪𑒑𑒰𑒥𑒻𑒞 𑒩𑒯𑓄 𑒣𑒛𑓃𑒞। (𑒔𑒰𑒩𑒴 𑒠𑒱𑒮 𑒯𑒰𑒟 𑒣𑒮𑒰𑒩𑒻𑒞) 𑒌 𑒃𑒪𑒰𑒏𑒰𑒧𑒹 𑒂𑒥 𑒐𑒳𑒬𑒲 𑒣𑒮𑒩𑒞। 𑒖𑒧𑒲𑒢𑓂𑒠𑒰𑒩𑒏 𑒩𑒰𑒖 𑒐𑒞𑒧 𑒦𑓄 𑒑𑒹𑒪। 𑒮𑒦 𑒏𑒱𑒨𑒼 𑒣𑒜𑓃𑒱 𑒮𑒏𑒻 𑒕𑒟𑒱। 𑒗𑒑𑒛𑓃𑒰-𑒗𑒰𑒿𑒙𑒲, 𑒨𑒳𑒠𑓂𑒡, 𑒂𑒥 𑒮𑒦 𑒐𑒞𑒧 𑒦𑓄 𑒑𑒹𑒪। 𑒯𑒧𑒩𑒰 𑒮𑒦𑒏 𑒖𑒲𑒫𑒢𑒧𑒹 𑒋𑒏𑒙𑒰 𑒢𑒫𑒏𑒰 𑒦𑒼𑒩 𑒂𑒋𑒪 𑒁𑒕𑒱। 𑒢𑒫𑒏𑒰 𑒬𑒱𑒏𑓂𑒭𑒰, 𑒢𑒫𑒏𑒰 𑒐𑒹𑒞𑒲𑒏 𑒔𑒪𑒢𑒱 𑒯𑒋𑒞।
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓒: 𑒥𑒛𑓃𑒏𑒰 𑒔𑒱𑒧𑒢𑒲𑒏 𑒡𑒳𑒿𑒂 𑒂 𑒥𑒛𑓃𑒏𑒰-𑒥𑒛𑓃𑒏𑒰 𑒥𑒰𑒢𑓂𑒯। 𑒥𑒱𑒪𑒻𑓀𑒞𑒮𑒿 𑒂𑒥𑒻𑒥𑒪𑒰 𑒮𑒦 𑒮𑒧𑒰𑒢 𑒔𑒱𑒧𑒢𑒲𑒥𑒪𑒰 𑒤𑒻𑒏𑓂𑒙𑓂𑒩𑒲𑒧𑒹 𑒞𑒻𑒨𑒰𑒩 𑒯𑒋𑒞। 𑒥𑒛𑓃𑒏𑒰-𑒥𑒛𑓃𑒏𑒰 𑒥𑒰𑒢𑓂𑒯 𑒍𑒃 𑒡𑒰𑒩𑒏𑒹𑒿 𑒥𑒰𑒢𑓂𑒯𑒱-𑒕𑒹𑒏 𑒏𑓄 𑒮𑒘𑓂𑒖𑒞 𑒏𑓄 𑒠𑒹𑒞। 𑒐𑒴𑒥 𑒅𑒣𑒖𑒞 𑒐𑒹𑒞, 𑒥𑒩𑓂𑒐𑒰 𑒥𑒩𑒐𑒞 𑒃𑒢𑓂𑒠𑓂𑒩𑒏 𑒢𑒻, 𑒯𑒧𑒩𑒰 𑒮𑒦𑒏 𑒣𑓂𑒩𑒞𑒰𑒣𑒮𑒿। 𑒐𑒹𑒞𑒹-𑒐𑒹𑒞 𑒥𑒯𑒞 𑒡𑒰𑒩, 𑒯𑒋𑒞 𑒣𑒙𑒾𑒢𑒲। 𑒕𑒼𑒙-𑒣𑒻𑒒𑒏 𑒦𑒹𑒠 𑒧𑒹𑒙𑒰 𑒖𑒰𑒋𑒞।
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓑: 𑒕𑒼𑒙-𑒣𑒻𑒒𑒏 𑒦𑒹𑒠 𑒧𑒹𑒙𑒰 𑒖𑒰𑒋𑒞? 𑒥𑒛𑓃𑒏𑒰 𑒔𑒱𑒧𑒢𑒲𑒏 𑒡𑒳𑒿𑒂 𑒂 𑒥𑒛𑓃𑒏𑒰-𑒥𑒛𑓃𑒏𑒰 𑒥𑒰𑒢𑓂𑒯 𑒕𑒼𑒙-𑒣𑒻𑒒𑒏 𑒦𑒹𑒠 𑒧𑒹𑒙𑒰𑒋𑒞?
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓒: 𑒯𑒿। 𑒣𑒙𑒾𑒢𑒲 𑒯𑒋𑒞 𑒐𑒹𑒞𑒹-𑒐𑒹𑒞। 𑒥𑒱𑒪𑒻𑓀𑒞𑒮𑒿 𑒂𑒥𑒻𑒥𑒪𑒰 𑒮𑒦 𑒮𑒧𑒰𑒢 𑒂𑒥 𑒋𑒞𑒻 𑒔𑒱𑒧𑒢𑒲𑒥𑒪𑒰 𑒤𑒻𑒏𑓂𑒙𑓂𑒩𑒲𑒧𑒹 𑒞𑒻𑒨𑒰𑒩 𑒯𑒋𑒞।
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓑: 𑒥𑒛𑓃𑒏𑒰 𑒥𑒰𑒢𑓂𑒯 𑒂 𑒥𑒛𑓃𑒏𑒰 𑒤𑒻𑒏𑓂𑒙𑓂𑒩𑒲𑒮𑒿 𑒜𑒹𑒩 𑒩𑒰𑒮 𑒮𑒧𑒮𑓂𑒨𑒰 𑒮𑒹𑒯𑒼 𑒂𑒥𑒻 𑒕𑒻। 𑒍𑒏𑒩 𑒢𑒱𑒠𑒰𑒢 𑒖𑒩𑒴𑒩𑒲 𑒕𑒻। 𑒫𑒱𑒏𑒰𑒮 𑒋𑒏𑒦𑒑𑓂𑒑𑒴 𑒦𑓄 𑒖𑒰𑒋𑒞।
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓒: 𑒫𑒱𑒏𑒰𑒮 𑒋𑒏𑒦𑒑𑓂𑒑𑒴 𑒏𑒼𑒢𑒰 𑒯𑒋𑒞?
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓑: 𑒥𑒛𑓃𑒏𑒰 𑒤𑒻𑒏𑓂𑒙𑓂𑒩𑒲 𑒮𑒦 𑒚𑒰𑒧 𑒢𑒻 𑒪𑒰𑒑𑒱 𑒮𑒏𑒞, 𑒏𑒞𑒾-𑒏𑒞𑒾 𑒪𑒰𑒑𑒞, 𑒍𑒞𑓄 𑒥𑒼𑒢𑒱𑒯𑒰𑒩𑒏 𑒣𑒛𑓃𑒻𑒢 𑒯𑒋𑒞। 𑒥𑒛𑓃𑒏𑒰 𑒥𑒰𑒢𑓂𑒯 𑒥𑒢𑒪𑒰𑒮𑒿 𑒍𑒏𑒩 𑒦𑒲𑒞𑒩𑒏 𑒑𑒰𑒧𑒮𑒿 𑒮𑒹𑒯𑒼 𑒪𑒼𑒏𑒏 𑒣𑒛𑓃𑒻𑒢 𑒯𑒋𑒞। 𑒥𑒛𑓃𑒏𑒰 𑒥𑒰𑒢𑓂𑒯 𑒖𑒿 𑒧𑒖𑒑𑒴𑒞 𑒢𑒻 𑒯𑒋𑒞 𑒞𑒿 𑒍 𑒙𑒴𑒙𑒞 𑒂 𑒣𑓂𑒩𑒪𑒨 𑒂𑒋𑒞। 𑒥𑒛𑓃𑒏𑒰 𑒤𑒻𑒏𑓂𑒙𑓂𑒩𑒲 𑒂 𑒥𑒛𑓃𑒏𑒰 𑒥𑒰𑒢𑓂𑒯 𑒪𑒼𑒏𑒏 𑒖𑒱𑒢𑒑𑒲𑒏𑒹𑒿 𑒕𑒯𑒼𑒕𑒱𑒞 𑒏𑓄 𑒠𑒹𑒞।
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓒:𑒋𑒏 𑒣𑒲𑒜𑓃𑒲𑒏𑒹𑒿 𑒞𑒿 𑒥𑒪𑒱𑒠𑒰𑒢 𑒠𑒹𑒥𑒻𑒋 𑒣𑒛𑓃𑒞। 𑒥𑒔𑓂𑒔𑒰 𑒮𑒦, 𑒥𑒰𑒖𑒻 𑒖𑒰𑒅। 𑒁𑒯𑒰𑒿 𑒮𑒦 𑒠𑒹𑒬 𑒪𑒹𑒪 𑒁𑒣𑒢𑒰𑒏𑒹𑒿 𑒮𑒧𑒩𑓂𑒣𑒝 𑒏𑒩𑒥 𑒂𑒏𑒱 𑒢𑒻।
𑒬𑒱𑒏𑓂𑒭𑒏 (𑒫𑒰 𑒬𑒱𑒏𑓂𑒭𑒱𑒏𑒰) 𑓑: 𑒥𑒔𑓂𑒔𑒰 𑒮𑒦, 𑒥𑒰𑒖𑒻 𑒖𑒰𑒅, 𑒁𑒯𑒰𑒿 𑒮𑒦 𑒏𑒲 𑒥𑒢𑓄 𑒔𑒰𑒯𑒻 𑒕𑒲। 𑒮𑒧𑒰𑒖𑒏𑒹𑒿 𑒏𑒲 𑒠𑒹𑒥𑓄 𑒔𑒰𑒯𑒻 𑒕𑒲।
𑒥𑒔𑓂𑒔𑒰 𑓑: 𑒯𑒧 𑒃𑒢𑓂𑒖𑒲𑒢𑒱𑒨𑒩 𑒥𑒢𑒥 𑒂 𑒮𑒛𑓃𑒏, 𑒣𑒳𑒪, 𑒢𑒯𑒩 𑒥𑒢𑒰𑒋𑒥। 𑒖𑒃𑒮𑒿 𑒪𑒼𑒏𑒏 𑒠𑒳𑓁𑒐 𑒠𑒴𑒩 𑒯𑒹𑒞𑒻।
𑒥𑒔𑓂𑒔𑒰 𑓒: 𑒯𑒧𑒯𑒴𑒿 𑒃𑒢𑓂𑒖𑒲𑒢𑒱𑒨𑒩 𑒥𑒢𑒥। 𑒥𑒛𑓃𑒏𑒰-𑒥𑒛𑓃𑒏𑒰 𑒥𑒰𑒢𑓂𑒯, 𑒥𑒛𑓃𑒏𑒰-𑒥𑒛𑓃𑒏𑒰 𑒔𑒱𑒧𑒢𑒲𑒏 𑒡𑒳𑒿𑒂। 𑒡𑒳𑒿𑒂 𑒮𑒳𑓀𑒒𑒻𑒧𑒹 𑒯𑒧𑒩𑒰 𑒥𑒛𑓂𑒛 𑒢𑒲𑒏 𑒪𑒰𑒑𑒻𑒋। 𑒏𑒞𑒹𑒏 𑒢𑒲𑒏 𑒠𑒱𑒢 𑒂𑒋𑒞, 𑒥𑒛𑓃𑒏𑒰-𑒥𑒛𑓃𑒏𑒰 𑒥𑒰𑒢𑓂𑒯, 𑒥𑒛𑓃𑒏𑒰-𑒥𑒛𑓃𑒏𑒰 𑒔𑒱𑒧𑒢𑒲 𑒠𑒹𑒬 𑒦𑒩𑒱𑒧𑒹 𑒣𑒮𑒩𑒱 𑒖𑒰𑒋𑒞।
𑒥𑒔𑓂𑒔𑒰 𑓑: 𑒧𑒳𑒠𑒰 𑒡𑒳𑒿𑒂𑒮𑒿 𑒐𑒼𑒿𑒐𑒲 𑒯𑒼𑒃 𑒕𑒻। 𑒯𑒧𑒩 𑒧𑒰𑒋 𑒐𑒼𑒿𑒐𑒲 𑒏𑒩𑒻𑒞 𑒩𑒯𑒻𑒋। 𑒯𑒧𑒩𑒰 𑒡𑒳𑒿𑒂𑒮𑒿 𑒣𑒩𑒯𑒹𑒖 𑒁𑒕𑒱।
𑒥𑒔𑓂𑒔𑒰 𑓒:𑒧𑒳𑒠𑒰 𑒯𑒧𑒩 𑒧𑒰𑒋 𑒞𑒿 𑒦𑒢𑒮𑒰𑒒𑒩 𑒖𑒰𑒃𑒞𑒼 𑒢𑒻 𑒁𑒕𑒱। 𑒧𑒳𑒠𑒰 𑒯𑒧 𑒖𑒰𑒃 𑒕𑒲, 𑒔𑒼𑒩𑒰-𑒢𑒳𑒏𑒰 𑒏𑓄, 𑒂 𑒡𑒳𑒿𑒂𑒏 𑒑𑓀𑒡, 𑒥𑒛𑓃𑒏𑒰 𑒠𑒹𑒫𑒰𑒩, 𑒄 𑒮𑒦 𑒯𑒧𑒩𑒰 𑒥𑒛𑓂𑒛 𑒢𑒲𑒏 𑒪𑒑𑒻𑒋।
(𑒋𑒏𑒙𑒰 𑒥𑒔𑓂𑒔𑒰𑒏 𑒡𑒩𑒤𑒛𑓃𑒰𑒃𑒞 𑒣𑓂𑒩𑒫𑒹𑒬)
𑒥𑒔𑓂𑒔𑒰-𑓓: 𑒯𑒧𑒩 𑒥𑒏𑒛𑓃𑒲 𑒠𑒹𑒐𑒪𑒱𑒌 𑒨𑒾।
(𑒮𑒦 𑒔𑒳𑒣𑓂𑒣 𑒦𑓄 𑒍𑒏𑒩𑒰 𑒠𑒱𑒮 𑒠𑒹𑒐𑓄 𑒪𑒰𑒑𑒻𑒋।)
𑒥𑒔𑓂𑒔𑒰 𑓓: (𑒧𑒳𑒿𑒯𑒣𑒩 𑒯𑒰𑒟 𑒩𑒐𑒻𑒞, 𑒏𑒢𑒹 𑒯𑒿𑒮𑒻𑒞) 𑒣𑒜𑓃𑒰𑒃 𑒯𑒼𑒃 𑒕𑒻 𑒋𑒞𑓄 𑒨𑒾। 𑒖𑒨 𑒦𑒰𑒩𑒞, 𑒖𑒨 𑒦𑒰𑒩𑒞, 𑒖𑒨 𑒦𑒰𑒩𑒞.. 𑒯𑒧𑒩 𑒥𑒏𑒛𑓃𑒲 (𑒣𑒰𑒕𑒰𑒿 𑒠𑒱𑒮 𑒞𑒏𑒻𑒞).. 𑒍𑒧𑓂𑒯𑒩 𑒠𑒹𑒐𑒻 𑒕𑒲।
(𑒥𑒔𑓂𑒔𑒰 𑓓 𑒏 𑒣𑓂𑒩𑒮𑓂𑒟𑒰𑒢)
𑒬𑒱𑒏𑓂𑒭𑒱𑒏𑒰 𑓒: 𑒢𑒲𑒏 𑒑𑒣। 𑒧𑒳𑒠𑒰 𑒫𑒱𑒏𑒰𑒮 𑒏𑒹𑒯𑒢 𑒯𑒳𑒁𑒋, 𑒄 𑒮𑒦 𑒯𑒧𑒩𑒰 𑒮𑒦𑒏 𑒯𑒰𑒟𑒧𑒹 𑒢𑒻 𑒁𑒕𑒱। 𑒣𑒙𑒢𑒰 𑒂 𑒠𑒱𑒪𑓂𑒪𑒲𑒧𑒹 𑒄 𑒢𑒱𑒩𑓂𑒝𑒨 𑒯𑒋𑒞 𑒖𑒹 𑒯𑒧𑒩𑒰 𑒮𑒦 𑒪𑒹𑒪 𑒏𑒹𑒯𑒢 𑒫𑒱𑒏𑒰𑒮 𑒯𑒹𑒥𑒰𑒏 𑒔𑒰𑒯𑒲।
𑒬𑒱𑒏𑓂𑒭𑒱𑒏𑒰 𑓑: 𑒢𑒲𑒏 𑒑𑒣। 𑒢𑒲𑒏 𑒑𑒣 𑒖𑒹 𑒯𑒧𑒩𑒰 𑒮𑒦𑒏 𑒫𑒱𑒏𑒰𑒮 𑒪𑒹𑒪 𑒣𑒙𑒢𑒰 𑒂 𑒠𑒱𑒪𑓂𑒪𑒲𑒧𑒹 𑒮𑒼𑒔𑒪 𑒖𑒰 𑒩𑒯𑒪 𑒁𑒕𑒱। 𑒧𑒳𑒠𑒰 𑒍𑒞𑓄 𑒥𑒻𑒮𑒱 𑒏𑓄 𑒫𑒰 𑒋𑒏𑒰𑒡 𑒠𑒱𑒢𑒏 𑒯𑒪𑒞𑒪𑒥𑒲𑒧𑒹 𑒏𑒋𑒪 𑒠𑒾𑒛𑓃𑒰𑒮𑒿 𑒍 𑒮𑒦 𑒅𑒔𑒱𑒞 𑒢𑒱𑒩𑓂𑒝𑒨 𑒪𑓄 𑒮𑒏𑒞𑒰? 𑒖𑒹 𑒮𑒹, 𑒧𑒳𑒠𑒰 𑒯𑒧 𑒮𑒦 𑒮𑒧𑒰𑒖 𑒪𑒹𑒪 𑒏𑒰𑒖 𑒏𑒩𑒲, 𑒮𑒹 𑒮𑒞𑒞 𑒡𑓂𑒨𑒰𑒢 𑒩𑒯𑒋। 𑒣𑒴𑒩𑒰 𑒃𑒧𑒰𑒢𑒠𑒰𑒩𑒲𑒮𑒿, 𑒖𑒰𑒢 𑒖𑒲 𑒪𑒑𑒰 𑒏𑓄 𑒌 𑒠𑒹𑒬𑒏 𑒃𑒞𑒱𑒯𑒰𑒮 𑒯𑒧𑒩𑒰 𑒮𑒦𑒏𑒹𑒿 𑒥𑒢𑒹𑒥𑒰𑒏 𑒁𑒕𑒱, 𑒮𑒹 𑒡𑓂𑒨𑒰𑒢 𑒩𑒯𑒋। 𑒂𑒃 𑓑𑓕 𑒁𑒑𑒮𑓂𑒞 𑓑𑓙𑓔𑓗 𑒏𑒹𑒿 𑒯𑒧 𑒄 𑒣𑓂𑒩𑒝 𑒪𑒲, 𑒫𑒔𑒢 𑒠𑒲।
𑒮𑒦 𑒥𑒔𑓂𑒔𑒰: 𑒯𑒧 𑒮𑒦 𑒫𑒔𑒢 𑒠𑒻 𑒕𑒲, 𑒯𑒧 𑒮𑒦 𑒣𑒴𑒩𑒰 𑒃𑒧𑒰𑒢𑒠𑒰𑒩𑒲𑒮𑒿 𑒖𑒰𑒢 𑒖𑒲 𑒪𑒑𑒰 𑒏𑓄 𑒌 𑒠𑒹𑒬𑒏 𑒢𑒫 𑒃𑒞𑒱𑒯𑒰𑒮 𑒪𑒱𑒐𑒥।
(“𑓑𑓕 𑒁𑒑𑒮𑓂𑒞” 𑒄 𑒢𑒰𑒩𑒰 𑒠𑒳𑒢𑒴 𑒬𑒱𑒏𑓂𑒭𑒏 𑒥𑒰𑒖𑒻 𑒕𑒟𑒱 𑒂 “𑒮𑓂𑒫𑒞𑓀𑒞𑓂𑒩𑒞𑒰 𑒠𑒱𑒫𑒮” 𑒄 𑒮𑒦 𑒧𑒱𑒪𑒱 𑒏𑓄 (𑒠𑒳𑒢𑒴 𑒪𑒼𑒏 𑒏𑒹𑒿 𑒕𑒼𑒛𑓃𑒱 𑒏𑓄) 𑒥𑒰𑒖𑒻 𑒕𑒟𑒱, 𑒠𑒳𑒢𑒴 𑒪𑒼𑒏 𑒧𑓀𑒔𑒏 𑒏𑒼𑒢𑒧𑒹 𑒏𑒞𑒱𑒂𑒋𑒪 𑒮𑒢 𑒚𑒰𑒜𑓃 𑒕𑒟𑒱। 𑒥𑒔𑓂𑒔𑒰 𑒂 𑒬𑒱𑒏𑓂𑒭𑒏 𑒮𑒦 𑒧𑒖𑒠𑒴𑒩 𑒮𑒦𑒮𑒿 𑒗𑒝𑓂𑒛𑒰 𑒂𑒣𑒮 𑒪𑓄 𑒪𑒻 𑒕𑒟𑒱। 𑒧𑒖𑒠𑒴𑒩 𑒮𑒦 𑒤𑒹𑒩 𑒥𑒻𑒮𑒱 𑒏𑓄 𑒚𑒏-𑒚𑒳𑒏 𑒏𑒩𑓄 𑒪𑒑𑒻𑒋। 𑒠𑒳𑒢𑒴 𑒪𑒼𑒏 𑒍𑒞𑒻 𑒯𑒞𑒣𑓂𑒩𑒦 𑒚𑒰𑒜𑓃 𑒩𑒯𑒻𑒋। 𑒤𑒹𑒩 𑒣𑒩𑓂𑒠𑒰𑒏 𑒣𑒰𑒕𑒰𑒿 𑒏𑒼𑒢𑒧𑒹 𑒠𑒹𑒐𑓄 𑒪𑒑𑒻𑒋 𑒖𑒹𑒢𑒰 𑒏𑒏𑒩𑒼 𑒋𑒥𑒰𑒏 𑒣𑓂𑒩𑒞𑒲𑒏𑓂𑒭𑒰 𑒏𑓄 𑒩𑒯𑒪 𑒯𑒳𑒁𑒋। 𑒞𑒐𑒢𑒹 𑒠𑒳𑒢𑒴 𑒯𑒩𑒥𑒛𑓃𑒰 𑒏𑓄 𑒖𑒰𑒃𑒋 𑒂 𑒋𑒏𑒙𑒰 𑒏𑒳𑒩𑓂𑒮𑒲 𑒂𑒢𑒱 𑒏𑓄 𑒩𑒰𑒐𑒻𑒋। 𑒋𑒏𑒙𑒰 𑓔𑓐-𑓔𑓕 𑒥𑒩𑓂𑒐𑒏 𑒁𑒦𑒱𑒨𑒢𑓂𑒞𑒰 𑒧𑓀𑒔𑒣𑒩 𑒁𑒥𑒻𑒋। 𑒁𑒦𑒱𑒨𑒢𑓂𑒞𑒰 𑒏𑒢𑒹𑒏 𑒯𑒰𑒿𑒤𑒱 𑒩𑒯𑒪 𑒁𑒕𑒱, 𑒏𑒳𑒩𑓂𑒮𑒲 𑒠𑒹𑒐𑒱𑒞𑒹 𑒍 𑒡𑒥𑒮𑒿 𑒍𑒃 𑒏𑒳𑒩𑓂𑒮𑒲𑒣𑒩 𑒥𑒻𑒮𑒱 𑒖𑒰𑒃𑒋। 𑒤𑒹𑒩 𑒮𑒰𑒿𑒮 𑒮𑓂𑒟𑒱𑒩 𑒏𑓄 𑒚𑒰𑒜𑓃 𑒯𑒼𑒃𑒋। 𑒚𑒏-𑒚𑒳𑒏 𑒥𑒢𑓂𑒠 𑒦𑓄 𑒖𑒰𑒃 𑒕𑒻 𑒂 𑒧𑒖𑒠𑒴𑒩 𑒮𑒦 𑒤𑓂𑒩𑒲𑒖 𑒦𑓄 𑒖𑒰𑒃𑒋, 𑒍 𑒠𑒳𑒢𑒴 𑒪𑒼𑒏 𑒏𑒼𑒢 𑒠𑒱𑒮 𑒛𑓀𑒏𑒰 𑒪𑒑 𑒔𑒪𑒱 𑒖𑒰𑒃𑒋 𑒂 𑒤𑓂𑒩𑒲𑒖 𑒦𑓄 𑒖𑒰𑒃𑒋। 𑒁𑒦𑒱𑒨𑒢𑓂𑒞𑒰 𑒥𑒰𑒖𑓄 𑒪𑒑𑒻𑒋।)

𑒁𑒦𑒱𑒨𑒢𑓂𑒞𑒰: (𑒏𑒳𑒩𑓂𑒮𑒲𑒏𑒹𑒿 𑒗𑒧𑒰𑒛𑓃𑒻𑒞) 𑒋𑒢𑒰। 𑒋𑒢𑒰 𑒯𑒱𑒪𑒱 𑒩𑒯𑒪 𑒁𑒕𑒱 𑒄, 𑒄 𑒑𑓀𑒑𑒰 𑒥𑓂𑒩𑒱𑒖। 𑒮𑒲𑒧𑒹𑒢𑓂𑒙, 𑒥𑒰𑒪𑒳, 𑒑𑒱𑒙𑓂𑒙𑒲𑒏 𑒏𑓀𑒏𑓂𑒩𑒲𑒙𑒮𑒿 𑒥𑒢𑒪 𑒄 𑒣𑒳𑒪 𑒏𑒚𑒣𑒳𑒪𑒰𑒮𑒿 𑒥𑒹𑒬𑒲 𑒯𑒱𑒪𑒻𑒋। 𑒖𑒯𑒱𑒨𑒰 𑒂𑒥𑒻 𑒕𑒲, 𑒧𑒩𑒼𑒧𑓂𑒧𑒞𑒱𑒨𑒹𑒏 𑒏𑒰𑒖 𑒔𑒪𑒻𑒞 𑒩𑒯𑒻 𑒕𑒻। 𑒫𑒢-𑒫𑒹, 𑒋𑒏 𑒠𑒱𑒮; 𑒋𑒏𑓂𑒏𑒹 𑒠𑒱𑒮𑒳𑒏𑒰 𑒧𑒰𑒞𑓂𑒩 𑒦𑓄 𑒏𑓄 𑒩𑒯𑒱 𑒑𑒹𑒪 𑒁𑒕𑒱 𑒄। 𑒋𑒏𑓂𑒏𑒹 𑒠𑒱𑒮 𑒣𑒳𑒪 𑒐𑒳𑒖𑒪 𑒕𑒻, 𑒠𑒼𑒮𑒩 𑒠𑒱𑒮 𑒏𑒼𑒢𑒰 𑒔𑒪𑒞, 𑒁𑒠𑒯𑒰 𑒣𑒳𑒪𑒣𑒩 𑒧𑒩𑒼𑒧𑓂𑒧𑒞𑒱𑒏 𑒏𑒰𑒖 𑒦𑓄 𑒩𑒯𑒪 𑒁𑒕𑒱। (𑒞𑒐𑒢𑒹 𑒍 𑒂𑒦𑒰𑒮𑒲 𑒩𑒴𑒣𑒧𑒹 𑒯𑒱𑒪𑓄 𑒪𑒑𑒻𑒋 𑒂 𑒍𑒏𑒩 𑒥𑒰𑒖𑒥 𑒟𑒩𑒟𑒩𑒰 𑒅𑒚𑒻 𑒕𑒻।) 𑒄 𑒣𑒳𑒪 𑒞𑒿 𑒋𑒞𑓂𑒞𑒹 𑒯𑒱𑒪𑒱 𑒩𑒯𑒪 𑒁𑒕𑒱 𑒖𑒞𑓂𑒞𑒹 𑒑𑒰𑒧𑒏 𑒏𑒚𑒣𑒳𑒪𑒼 𑒢𑒻 𑒯𑒱𑒪𑒻𑒋।
(𑒞𑒐𑒢𑒹 𑒋𑒏𑒙𑒰 𑒚𑒱𑒏𑒹𑒠𑒰𑒩 𑒁𑒥𑒻𑒋।)
𑒚𑒱𑒏𑒹𑒠𑒰𑒩 (𑒁𑒦𑒱𑒨𑒢𑓂𑒞𑒰𑒮𑒿): 𑒯𑒃 𑒃𑒢𑓂𑒖𑒲𑒢𑒱𑒨𑒩। 𑒞𑒼𑒯𑒴𑒿 𑒫𑒋𑒯 𑒏𑓄 𑒫𑒋𑒯 𑒩𑒯𑒱 𑒑𑒹𑒪𑒹𑒿। 𑒥𑒰𑒪𑒳𑒏𑒹𑒿 𑒋𑒢𑒰 𑒏𑓄 𑒔𑒰𑒪𑒢𑒱𑒮𑒿 𑒔𑒰𑒪𑒴, 𑒍𑒢𑒰 𑒏𑓄 𑒔𑒰𑒪𑒴, 𑒖𑒹𑒢𑒰 𑒍 𑒔𑒰𑒅𑒩 𑒠𑒰𑒪𑒱 𑒯𑒳𑒁𑒋 𑒧𑒳𑒠𑒰 𑒯𑒧 𑒮𑒹𑒯𑒼 𑒔𑒰𑒪𑒪𑒾𑓀। 𑒚𑒲𑒏 𑒕𑒻 𑒚𑒲𑒏 𑒕𑒻। 𑒞𑒴𑒿 𑒏𑒯𑒻 𑒕𑒪𑒹𑒿 𑒖𑒹 𑒩𑒼𑒙𑒲 𑒥𑒢𑒹𑒥𑒰 𑒪𑒹𑒪 𑒖𑒹𑒢𑒰 𑒔𑒰𑒪𑒻 𑒕𑒲 𑒞𑒯𑒱𑒢𑒰 𑒣𑒳𑒪 𑒥𑒢𑒹𑒥𑒰 𑒪𑒹𑒪 𑒔𑒰𑒪𑒴, 𑒞𑒐𑒢𑒹 𑒢𑒲𑒏 𑒩𑒼𑒙𑒲 𑒮𑒢 𑒢𑒲𑒏 𑒣𑒳𑒪 𑒥𑒢𑒞। 𑒚𑒲𑒏 𑒕𑒻 𑒚𑒲𑒏 𑒕𑒻। 𑒤𑒹𑒩 𑒋𑒞𑒹𑒏 𑒮𑒲𑒧𑒹𑒢𑓂𑒙, 𑒋𑒞𑒹𑒏 𑒥𑒰𑒪𑒳, 𑒋𑒞𑒹𑒏.. 𑒯𑒧 𑒏𑒯𑒢𑒹 𑒩𑒯𑒲 𑒖𑒹 𑒯𑒧 𑒞𑒼𑒯𑒩 𑒮𑒦 𑒑𑒣 𑒧𑒰𑒢𑒥, 𑒧𑒳𑒠𑒰 𑒞𑒐𑒢 𑒢𑒹𑒞𑒰, 𑒠𑒼𑒮𑒩 𑒃𑒢𑓂𑒖𑒲𑒢𑒱𑒨𑒩, 𑒑𑒳𑒝𑓂𑒛𑒰, 𑒋𑒏𑒩𑒰 𑒮𑒦𑒏𑒹𑒿 𑒏𑒧𑒲𑒬𑒢 𑒏𑒞𑓄 𑒮𑒿 𑒠𑒹𑒥𑒻? 𑒞𑒼𑒩𑒰 𑒏𑒯𑒪𑒰𑒮𑒿 𑒥𑒰𑒪𑒳 𑒔𑒰𑒪𑓄 𑒪𑒑𑒪𑒾𑓀 𑒂 𑒏𑒧𑒲𑒬𑒢 𑒥𑒢𑓂𑒠 𑒏𑓄 𑒠𑒹𑒪𑒱𑒌। 𑒯𑒧𑒩 𑒞𑒿 𑒏𑒱𑒕𑒳 𑒢𑒻 𑒦𑒹𑒪 𑒧𑒳𑒠𑒰 𑒞𑒼𑒯𑒩 𑒥𑒠𑒪𑒲 𑒦𑓄 𑒑𑒹𑒪𑒾, 𑒞𑒼𑒯𑒩 𑒠𑒩𑒧𑒰𑒯𑒰 𑒥𑒢𑓂𑒢 𑒦𑓄 𑒑𑒹𑒪𑒾। 𑒥𑒔𑓂𑒔𑒰 𑒮𑒦𑒏 𑒢𑒰𑒧 𑒮𑓂𑒏𑒴𑒪𑒮𑒿 𑒏𑒙𑒰𑒥𑓄 𑒣𑒛𑓃𑒪𑒾, 𑒑𑒰𑒧 𑒣𑒚𑒰𑒥𑓄 𑒣𑒛𑓃𑒪𑒾 𑒥𑒔𑓂𑒔𑒰 𑒮𑒦𑒏𑒹𑒿। 𑒯𑒧 𑒏𑒯𑒢𑒹 𑒩𑒯𑒱𑒨𑒾 𑒞𑒼𑒩𑒰, 𑒖𑒹 𑒥𑒰𑒪𑒳 𑒔𑒰𑒪𑒥, 𑒋𑒞𑒹𑒏 𑒮𑒲𑒧𑒹𑒢𑓂𑒙, 𑒋𑒞𑒹𑒏 𑒥𑒰𑒪𑒳, 𑒮𑒦 𑒢𑒱𑒁𑒧𑒮𑒿 𑒠𑒹𑒥𑒻। 𑒯𑒧𑒩𑒰 𑒏𑒲? 𑒃𑒪𑒰𑒏𑒰𑒏 𑒣𑒳𑒪, 𑒮𑒛𑓃𑒏… 𑒖𑒞𑒹𑒏 𑒧𑒖𑒑𑒴𑒞 𑒩𑒯𑒞𑒻 𑒞𑒞𑒹𑒏 𑒢𑒹 𑒢𑒲𑒏। 𑒯𑒧𑒩𑒼 𑒪𑒹𑒪 𑒢𑒲𑒏𑒹। 𑒧𑒳𑒠𑒰 𑒯𑒧𑒩𑒰 𑒥𑒴𑒗𑒪 𑒕𑒪 𑒖𑒹 𑒞𑒼𑒯𑒩 𑒥𑒠𑒪𑒲 𑒦𑓄 𑒖𑒹𑒞𑒾। 𑒔𑒲𑒤 𑒃𑒢𑓂𑒖𑒲𑒢𑒱𑒨𑒩, 𑒢𑒹𑒞𑒰𑒏 𑒠𑒯𑒱𑒢𑒰 𑒯𑒰𑒟.. 𑒣𑒯𑒱𑒢𑒹 𑒯𑒧𑒩𑒹 𑒏𑒯𑒢𑒹 𑒩𑒯𑒋 𑒞𑒼𑒩𑒰 𑒩𑒼𑒪𑒩𑒏 𑒢𑒲𑒔𑒰𑒿𑒧𑒹 𑒣𑒱𑒔𑒛𑓃𑒰 𑒏𑓄 𑒠𑒻𑒪𑒹.. 𑒥𑒃𑒧𑒰𑒢 𑒔𑒲𑒤 𑒃𑒢𑓂𑒖𑒲𑒢𑒱𑒨𑒩। 𑒠𑒹𑒐, 𑒣𑒯𑒱𑒢𑒹 𑒯𑒧𑒩𑒼 𑒯𑒼𑒃 𑒕𑒪 𑒖𑒹 𑒞𑒼𑒯𑒴𑒿 𑒍𑒏𑒩𑒹 𑒮𑒦 𑒖𑒹𑒏𑒰𑒿 𑒕𑒹𑒿, 𑒁𑒣𑒢 𑒩𑒹𑒙 𑒥𑒜𑓃𑒰𑒥𑒻𑒪𑒹 𑒄 𑒮𑒦 𑒏𑓄 𑒩𑒯𑒪 𑒕𑒹𑒿। 𑒧𑒳𑒠𑒰 𑒥𑒰𑒠𑒧𑒹 𑒯𑒧 𑒠𑒹𑒐𑒪𑒾𑓀 𑒖𑒹 𑒢𑒻, 𑒞𑒴𑒿 𑒁𑒪𑒑 𑒕𑒹𑒿। 𑒧𑒳𑒠𑒰 𑒯𑒧 𑒏𑒲 𑒏𑒩𑒴? 𑒯𑒧 𑒁𑒣𑒢 𑒥𑒔𑓂𑒔𑒰𑒏 𑒢𑒰𑒧 𑒮𑓂𑒏𑒴𑒪𑒮𑒿 𑒢𑒻 𑒏𑒙𑒥𑒰 𑒮𑒏𑒻 𑒕𑒲। 𑒧𑒳𑒠𑒰 𑒖𑒾𑒿 𑒞𑒼𑒩𑒰 𑒮𑒢 𑒔𑒲𑒤 𑒃𑒢𑓂𑒖𑒲𑒢𑒱𑒨𑒩 𑒂𑒥𑒱 𑒖𑒰𑒋.... 𑒏𑒯𑒱𑒨𑒼 𑒮𑒹 𑒠𑒱𑒢 𑒂𑒥𑒋... 𑒞𑒐𑒢 𑒯𑒧 𑒤𑒹𑒩𑒮𑒿 𑒥𑒰𑒪𑒳 𑒔𑒰𑒪𑒥 𑒬𑒳𑒩𑒴 𑒏𑒩𑒥 𑒂 𑒫𑒋𑒯 𑒔𑒰𑒪𑒪 𑒥𑒰𑒪𑒳, 𑒋𑒞𑓂𑒞𑒹 𑒥𑒰𑒪𑒳 𑒋𑒞𑓂𑒞𑒹 𑒮𑒲𑒧𑒹𑒢𑓂𑒙𑒧𑒹 𑒧𑒱𑒪𑒰𑒋𑒥। 𑒋𑒞𑓂𑒞𑒹 𑒥𑒰𑒪𑒳, 𑒋𑒞𑓂𑒞𑒹 𑒮𑒲𑒧𑒹𑒢𑓂𑒙, 𑒮𑒦𑒙𑒰 𑒍𑒯𑒱𑒢𑒰 𑒖𑒹𑒢𑒰 𑒁𑒯𑒰𑒿 𑒞𑒴𑒿 𑒏𑒯𑒻 𑒕𑒪𑒹𑒿। 𑒧𑒳𑒠𑒰 𑒖𑒐𑒢 𑒞𑒼𑒩𑒰 𑒮𑒢 𑒏𑒱𑒨𑒼 𑒂𑒥𑒋 𑒞𑒐𑒢𑒹 𑒏𑒱𑒢𑒹। 𑒞𑒰𑒡𑒩𑒱 𑒞𑒿...
(𑒁𑒦𑒱𑒨𑒢𑓂𑒞𑒰 𑒂 𑒚𑒱𑒏𑒹𑒠𑒰𑒩𑒏 𑒣𑓂𑒩𑒮𑓂𑒟𑒰𑒢। 𑒪𑒰𑒑𑒪 𑒖𑒹𑒢𑒰 𑒤𑓂𑒩𑒲𑒖 𑒪𑒼𑒏𑒏𑒹𑒿 𑒁𑒦𑒱𑒨𑒢𑓂𑒞𑒰 𑒂 𑒚𑒱𑒏𑒹𑒠𑒰𑒩𑒏 𑒑𑒣𑒏 𑒫𑒱𑒭𑒨𑒧𑒹 𑒥𑒳𑒗𑒪 𑒢𑒻 𑒦𑒹𑒪𑒻 𑒖𑒹𑒢𑒰 𑒄 𑒮𑒦 𑒂𑒦𑒰𑒭𑒲 𑒕𑒪। 𑒠𑒳𑒢𑒴𑒙𑒰 𑒪𑒼𑒏 𑒤𑓂𑒩𑒲𑒖 𑒮𑓂𑒟𑒱𑒞𑒱𑒮𑒿 𑒒𑒳𑒩𑒱 𑒁𑒮𑒟𑒱𑒩𑒮𑒿 𑒛𑓀𑒏𑒰 𑒥𑒖𑒥𑓄 𑒪𑒑𑒻𑒋 𑒂 𑒞𑒐𑒢 𑒧𑒖𑒠𑒴𑒩 𑒮𑒦 𑒮𑒹𑒯𑒼 𑒤𑓂𑒩𑒲𑒖 𑒮𑓂𑒟𑒱𑒞𑒱𑒮𑒿 𑒂𑒣𑒮 𑒂𑒥𑒱 𑒖𑒰𑒃𑒋 𑒂 𑒤𑒹𑒩𑒮𑒿 𑒚𑒏𑒚𑒳𑒏 𑒏𑒩𑓄 𑒪𑒑𑒻𑒋। 𑒠𑒳𑒢𑒴 𑒪𑒼𑒏 𑒛𑓀𑒏𑒰𑒏 𑒁𑒥𑒰𑒖 𑒂𑒮𑓂𑒞𑒹-𑒂𑒮𑓂𑒞𑒹 𑒞𑒹𑒖 𑒏𑒩𑓄 𑒪𑒑𑒻𑒋 𑒂 𑒤𑒹𑒩 𑒚𑒏-𑒚𑒳𑒏𑒏 𑒁𑒥𑒰𑒖 𑒧𑒠𑓂𑒡𑒱𑒧 𑒣𑒛𑓃𑒱 𑒖𑒰𑒃𑒋 𑒂 𑒛𑓀𑒏𑒰𑒏 𑒁𑒥𑒰𑒖𑒏 𑒮𑓀𑒑 𑒣𑒩𑓂𑒠𑒰 𑒐𑒮𑒻𑒋।)





























𑒣𑒪𑓂𑒪𑒫 𑒠𑒴
(𑒃𑒢𑓂𑒖𑒲𑒢𑒱𑒨𑒩𑒱𑓀𑒑 𑒏𑒰𑒪𑒹𑒖𑒏 𑒠𑒲𑒏𑓂𑒭𑒰𑒢𑓂𑒞 𑒮𑒧𑒰𑒩𑒼𑒯, 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦 𑒚𑒰𑒜𑓃 𑒁𑒕𑒱 𑒂 𑒬𑒱𑒏𑓂𑒭𑒏 (𑒥𑒰 𑒬𑒱𑒏𑓂𑒭𑒱𑒏𑒰) 𑒦𑒰𑒭𑒝 𑒠𑓄 𑒩𑒯𑒪 𑒕𑒟𑒱। 𑒁𑒦𑒱𑒨𑒢𑓂𑒞𑒰 𑒂 𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩 𑒮𑒹𑒯𑒼 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦 𑒧𑒡𑓂𑒨 𑒚𑒰𑒜𑓃 𑒁𑒕𑒱।𑒠𑒳𑒢𑒴 𑒪𑒼𑒏 𑒛𑓀𑒏𑒰𑒏 𑒮𑓀𑒑 𑒏𑒼𑒢𑒧𑒹 𑒥𑒻𑒮𑒪 𑒁𑒕𑒱।)
𑒬𑒱𑒏𑓂𑒭𑒏/ 𑒬𑒱𑒏𑓂𑒭𑒱𑒏𑒰 𑓑: 𑒁𑒯𑒰𑒿 𑒮𑒦𑒏 𑒂𑒃 𑒌 𑒃𑒢𑓂𑒖𑒲𑒢𑒱𑒨𑒩𑒱𑓀𑒑 𑒏𑒰𑒪𑒹𑒖𑒧𑒹 𑒁𑓀𑒞𑒱𑒧 𑒠𑒱𑒢 𑒁𑒕𑒱। 𑒋𑒞𑒳𑒏𑓂𑒏𑒰 𑒖𑒲𑒫𑒢 𑒂 𑒁𑒮𑒪 𑒖𑒲𑒫𑒢𑒧𑒹 𑒥𑒛𑓂𑒛 𑒁𑒢𑓂𑒞𑒩 𑒕𑒻। 𑒂𑒥 𑒁𑒯𑒰𑒿 𑒮𑒦𑒏𑒹𑒿 𑒡𑒴𑒩𑒰-𑒑𑒩𑓂𑒠𑒰𑒧𑒹 𑒖𑒹𑒥𑒰𑒏 𑒁𑒕𑒱। 𑒏𑒰𑒖 𑒏𑒩𑒥𑒰𑒏 𑒁𑒕𑒱। 𑒧𑒼𑒢 𑒪𑒑𑒰 𑒏𑓄 𑒏𑒰𑒖 𑒏𑒩𑒥𑒰𑒏 𑒁𑒕𑒱। 𑒋𑒞𑒹𑒏 𑒏𑒰𑒖 𑒏𑒩𑒥𑒰𑒏 𑒁𑒕𑒱 𑒖𑒹 𑒄 𑒐𑒹𑒞 𑒮𑒼𑒢𑒰 𑒅𑒣𑒖𑒰𑒥𑓄 𑒪𑒰𑒑𑒋। 𑒪𑒼𑒏𑒏 𑒖𑒲𑒫𑒢𑒧𑒹 𑒮𑒧𑒵𑒠𑓂𑒡𑒱 𑒂𑒥𑒱 𑒖𑒰𑒋। 𑒠𑒱𑒢-𑒩𑒰𑒞𑒱 𑒢𑒻 𑒠𑒹𑒐𑒥𑒰𑒏 𑒁𑒕𑒱। 𑒨𑒋𑒯 𑒯𑒧𑒩 𑒠𑒏𑓂𑒭𑒱𑒝𑒰 𑒯𑒋𑒞। 𑒌 𑒠𑒲𑒏𑓂𑒭𑒰𑒢𑓂𑒞 𑒮𑒧𑒰𑒩𑒼𑒯𑒧𑒹 𑒁𑒯𑒰𑒿 𑒮𑒦𑒮𑒿 𑒯𑒧 𑒨𑒋𑒯 𑒂𑒑𑓂𑒩𑒯 𑒏𑒩𑒻 𑒕𑒲।
𑒯𑒧𑒩 𑒠𑒹𑒬, 𑒯𑒧𑒩 𑒪𑒼𑒏 𑒥𑒛𑓂𑒛 𑒧𑒳𑒬𑓂𑒏𑒱𑒪𑒮𑒿 𑒮𑓂𑒫𑒞𑓀𑒞𑓂𑒩 𑒦𑒹𑒪 𑒁𑒕𑒱। 𑒧𑒳𑒠𑒰 𑒄 𑒮𑓂𑒫𑒞𑓀𑒞𑓂𑒩𑒞𑒰 𑒧𑒰𑒢𑒮𑒱𑒏 𑒩𑒴𑒣𑒮𑒿 𑒂𑒥𑒱 𑒖𑒰𑒋 𑒞𑒐𑒢 𑒢𑒹। 𑒂𑒩𑓂𑒟𑒱𑒏 𑒩𑒴𑒣𑒮𑒿 𑒯𑒧 𑒠𑒼𑒮𑒩𑒰𑒮𑒿 𑒮𑓂𑒫𑒞𑓀𑒞𑓂𑒩 𑒦𑓄 𑒖𑒰𑒃, 𑒏𑒏𑒩𑒼 𑒂𑒑𑒰𑒿 𑒯𑒰𑒟 𑒢𑒻 𑒣𑒮𑒰𑒩𑓄 𑒣𑒛𑓃𑒋, 𑒥𑒖𑒥𑒰𑒏 𑒮𑓂𑒫𑒞𑓀𑒞𑓂𑒩𑒞𑒰 𑒞𑒐𑒢𑒹 𑒂𑒥𑒱 𑒮𑒏𑒞। 𑒁𑒦𑒱𑒨𑒢𑓂𑒞𑒰 𑒧𑒰𑒢𑒹 𑒥𑒢𑒹𑒢𑒯𑒰𑒩, 𑒮𑒩𑓂𑒖𑒏। 𑒮𑒛𑓃𑒏 𑒥𑒢𑒹𑒢𑒯𑒰𑒩, 𑒢𑒯𑒩 𑒥𑒢𑒹𑒢𑒯𑒰𑒩, 𑒣𑒳𑒪𑒰 𑒥𑒢𑒹𑒢𑒯𑒰𑒩। 𑒁𑒦𑒱𑒨𑒢𑓂𑒞𑒰 𑒧𑒰𑒢𑒹 𑒖𑒼𑒛𑓃𑒻𑒥𑒪𑒰। 𑒄 𑒣𑒳𑒪 𑒪𑒼𑒏𑒏𑒹𑒿 𑒪𑒼𑒏𑒮𑒿 𑒖𑒼𑒛𑓃𑒞। 𑒮𑒛𑓃𑒏 𑒮𑒦 𑒥𑒢𑒞। 𑒪𑒼𑒏𑒏 𑒖𑒲𑒫𑒢𑒧𑒹 𑒑𑒞𑒱 𑒂𑒋𑒞, 𑒠𑒾𑒑𑒞 𑒖𑒱𑒢𑒑𑒲। 𑒢𑒯𑒩𑒱, 𑒣𑒼𑒐𑒩𑒱𑒮𑒿 𑒦𑒩𑒪 𑒃𑒪𑒰𑒏𑒰𑒧𑒹 𑒮𑒼𑒢𑒰 𑒅𑒣𑒖𑒞।
(𑒫𑒱𑒠𑓂𑒨𑒰𑒩𑓂𑒟𑒲 𑒮𑒦𑒏 𑒏𑒩𑒞𑒪 𑒡𑓂𑒫𑒢𑒱।)
𑒬𑒱𑒏𑓂𑒭𑒏/ 𑒬𑒱𑒏𑓂𑒭𑒱𑒏𑒰 𑓒:𑒁𑒯𑒰𑒿 𑒮𑒦𑒏𑒹𑒿 𑒥𑒛𑓃𑒏𑒰-𑒥𑒛𑓃𑒏𑒰 𑒏𑒰𑒖 𑒏𑒩𑒥𑒰𑒏 𑒁𑒕𑒱। 𑒥𑒛𑓃𑒏𑒰-𑒥𑒛𑓃𑒏𑒰 𑒥𑒰𑒢𑓂𑒯 𑒥𑒢𑒹𑒥𑒰𑒏 𑒁𑒕𑒱। 𑒍𑒯𑒲𑒮𑒿 𑒫𑒱𑒏𑒰𑒮 𑒯𑒹𑒞𑒻, 𑒍𑒯𑒲𑒮𑒿 𑒞𑒹𑒖𑒲𑒮𑒿 𑒫𑒱𑒏𑒰𑒮 𑒯𑒹𑒞𑒻। 𑒮𑒑𑒩𑒹 𑒫𑒱𑒬𑓂𑒫𑒧𑒹 𑒁𑒯𑒲 𑒞𑒩𑒯𑒹𑒿 𑒫𑒱𑒏𑒰𑒮 𑒦𑒹𑒪 𑒕𑒻। 𑒦𑒰𑒩𑒞𑒏𑒹𑒿 𑒮𑓂𑒫𑒞𑓀𑒞𑓂𑒩𑒞𑒰 𑒦𑒹𑒙𑒪 𑒕𑒻, 𑒂 𑒄 𑒮𑓂𑒫𑒞𑓀𑒞𑓂𑒩𑒞𑒰 𑒞𑒐𑒢𑒹 𑒏𑒰𑒋𑒧 𑒩𑒯𑒱 𑒮𑒏𑒞 𑒖𑒐𑒢 𑒞𑒹𑒖𑒲𑒮𑒿 𑒫𑒱𑒏𑒰𑒮 𑒯𑒋𑒞। 𑒂 𑒞𑒹𑒖𑒲𑒮𑒿 𑒫𑒱𑒏𑒰𑒮 𑒯𑒋𑒞 𑒥𑒛𑓃𑒏𑒰-𑒥𑒛𑓃𑒏𑒰 𑒤𑒻𑒏𑓂𑒙𑓂𑒩𑒲 𑒂 𑒥𑒛𑓃𑒏𑒰-𑒥𑒛𑓃𑒏𑒰 𑒥𑒰𑒢𑓂𑒯𑒮𑒿।
𑒬𑒱𑒏𑓂𑒭𑒏/ 𑒬𑒱𑒏𑓂𑒭𑒱𑒏𑒰 𑓑: 𑒍𑒢𑒰 𑒞𑒿 𑒯𑒧𑒩𑒰 𑒫𑒱𑒏𑒰𑒮𑒏 𑒍𑒃 𑒥𑒛𑓃𑒏𑒰 𑒣𑒟𑒮𑒿 𑒧𑒞𑒦𑒱𑒢𑓂𑒢𑒞𑒰 𑒁𑒕𑒱, 𑒏𑒰𑒩𑒝 𑒥𑒛𑓃𑒏𑒰 𑒤𑒻𑒏𑓂𑒙𑓂𑒩𑒲𑒧𑒹 𑒯𑒧𑒩 𑒪𑒼𑒏 𑒧𑒖𑒠𑒴𑒩𑒹 𑒥𑒢𑒱 𑒏𑓄 𑒢𑒹 𑒩𑒯𑒱 𑒖𑒰𑒋, 𑒥𑒛𑓃𑒏𑒰 𑒧𑒖𑒑𑒴𑒞 𑒣𑒏𑓂𑒏𑒰 𑒥𑒰𑒢𑓂𑒯 𑒥𑒢𑒥𑒻𑒧𑒹 𑒖𑒞𑒹𑒏 𑒣𑒰𑒃 𑒔𑒰𑒯𑒲 𑒞𑒞𑓂𑒞𑒹 𑒌 𑒠𑒹𑒬 𑒪𑒑 𑒕𑒻𑒯𑒼 𑒢𑒻, 𑒞𑒐𑒢 𑒥𑒛𑓃𑒏𑒰 𑒏𑒔𑓂𑒔𑒲 𑒥𑒰𑒢𑓂𑒯 𑒏𑒞𑒹𑒏 𑒑𑒰𑒧𑒏𑒹𑒿 𑒁𑒣𑒢 𑒣𑒹𑒙𑒧𑒹 𑒪𑒹𑒞𑒻, 𑒍𑒞𑒹𑒏 𑒧𑒖𑒑𑒴𑒞 𑒢𑒻 𑒩𑒯𑒞𑒻, 𑒙𑒳𑒙𑒻𑒞 𑒦𑓀𑒑𑒻𑒞 𑒩𑒯𑒞𑒻, 𑒮𑒠𑒱𑒐𑒢 𑒍𑒏𑒩 𑒧𑒩𑒼𑒧𑓂𑒧𑒞𑒱𑒨𑒹 𑒯𑒼𑒃𑒞 𑒩𑒯𑒞𑒻।
𑒬𑒱𑒏𑓂𑒭𑒏/ 𑒬𑒱𑒏𑓂𑒭𑒱𑒏𑒰 𑓒: 𑒧𑒳𑒠𑒰 𑒧𑒳𑒖𑒤𑓂𑒤𑒩𑒣𑒳𑒩𑒏 𑒌 𑒠𑒲𑒏𑓂𑒭𑒰𑒢𑓂𑒞 𑒮𑒧𑒰𑒩𑒼𑒯𑒧𑒹 𑒫𑒱𑒏𑒰𑒮𑒏 𑒣𑒟𑒏 𑒠𑒱𑒬𑒰 𑒢𑒻 𑒞𑒨 𑒏𑒋𑒪 𑒖𑒰 𑒮𑒏𑒻𑒋। 𑒍 𑒞𑒿 𑒠𑒱𑒪𑓂𑒪𑒲 𑒂 𑒣𑒙𑒢𑒹𑒧𑒹 𑒞𑒨 𑒯𑒋𑒞। 𑒂𑒥…(𑒖𑒼𑒩𑒮𑒿 𑒥𑒖𑒻𑒞) 𑒌 𑒠𑒲𑒏𑓂𑒭𑒰𑒢𑓂𑒞 𑒮𑒧𑒰𑒩𑒼𑒯𑒧𑒹 𑒮𑒦𑒮𑒿 𑒥𑒹𑒬𑒲 𑒢𑒧𑓂𑒥𑒩 𑒪𑓄 𑒏𑓄 𑒣𑒰𑒮 𑒏𑒹𑒢𑒱𑒯𑒰𑒩 𑒕𑒰𑒞𑓂𑒩𑒏𑒹𑒿 𑒯𑒧 𑒥𑒖𑒥𑓄 𑒔𑒰𑒯𑒻 𑒕𑒱𑒨𑒢𑓂𑒯𑒱।
(𑒁𑒦𑒱𑒨𑒢𑓂𑒞𑒰𑒏𑒹𑒿 𑒯𑒰𑒟𑒏 𑒃𑒬𑒰𑒩𑒰𑒮𑒿 𑒥𑒖𑒥𑒻𑒋 𑒂 𑒧𑒹𑒛𑒪 𑒣𑒯𑒱𑒩𑒰𑒥𑒻𑒋)।

(𑒫𑒱𑒠𑓂𑒨𑒰𑒩𑓂𑒟𑒲 𑒮𑒦𑒏 𑒏𑒩𑒞𑒪 𑒡𑓂𑒫𑒢𑒱। 𑒬𑒱𑒏𑓂𑒭𑒏/ 𑒬𑒱𑒏𑓂𑒭𑒱𑒏𑒰𑒏 𑒣𑓂𑒩𑒮𑓂𑒟𑒰𑒢।)
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒠𑒼𑒮। 𑒁𑒦𑒱𑒨𑓀𑒞𑓂𑒩𑒝𑒏 𑒣𑒜𑓃𑒰𑒃𑒧𑒹 𑒞𑒿 𑒞𑒴𑒿 𑒥𑒰𑒖𑒲 𑒧𑒰𑒩𑒱 𑒑𑒹𑒪 𑒕𑒹𑒿। 𑒂𑒥 𑒁𑒮𑒪 𑒖𑒱𑒢𑒑𑒲 𑒬𑒳𑒩𑒴 𑒯𑒋𑒞। 𑒠𑒹𑒐𑒲 𑒍𑒞𑓄 𑒏𑒹 𑒥𑒰𑒖𑒲 𑒧𑒰𑒩𑒻𑒋।
𑒁𑒦𑒱𑒨𑒢𑓂𑒞𑒰: 𑒁𑒦𑒱𑒨𑒢𑓂𑒞𑒰𑒏 𑒖𑒲𑒞 𑒕𑒻 𑒖𑒹 𑒍𑒏𑒩 𑒥𑒢𑒰𑒋𑒪 𑒣𑒳𑒪 𑒏𑒞𑒹𑒏 𑒧𑒖𑒑𑒴𑒞 𑒕𑒻, 𑒍𑒏𑒩 𑒥𑒢𑒰𑒋𑒪 𑒢𑒯𑒩𑒱 𑒂 𑒥𑒰𑒢𑓂𑒯 𑒣𑒰𑒢𑒱𑒏 𑒢𑒱𑒏𑒰𑒮𑒲𑒧𑒹 𑒥𑒰𑒡𑒰 𑒞𑒿 𑒢𑒻 𑒠𑒻 𑒕𑒻। 𑒍 𑒪𑒼𑒏𑒏 𑒖𑒱𑒢𑒑𑒲 𑒮𑒳𑒐𑒲 𑒥𑒢𑒰 𑒣𑒰𑒥𑒻𑒋 𑒂𑒏𑒱 𑒢𑒻। 𑒏𑒰𑒖 𑒮𑒧𑒨𑒮𑒿 𑒣𑒴𑒩𑓂𑒝 𑒯𑒼𑒃 𑒕𑒻 𑒂𑒏𑒱 𑒢𑒻। 𑒍𑒃 𑒣𑒩𑒲𑒏𑓂𑒭𑒰𑒧𑒹 𑒏𑒏𑒩𑒰 𑒏𑒞𑒹𑒏 𑒢𑒧𑓂𑒥𑒩 𑒁𑒥𑒻 𑒕𑒻 𑒞𑒯𑒲𑒮𑒿 𑒍𑒏𑒩 𑒖𑒲𑒞-𑒯𑒰𑒩𑒱 𑒢𑒱𑒩𑓂𑒡𑒰𑒩𑒱𑒞 𑒯𑒹𑒞𑒻।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒥𑒛𑓃𑒏𑒰 𑒏𑒰𑒖𑒧𑒹 𑒏𑒢𑒹-𑒧𑒢𑒹 𑒑𑒪𑒞𑒲 𑒞𑒿 𑒯𑒼𑒃𑒞𑒹 𑒩𑒯𑒻 𑒕𑒻, 𑒯𑒹𑒥𑒹 𑒏𑒩𑒞𑒻। 𑒖𑒹 𑒏𑒯𑒲𑓀 𑒦𑒰𑒃, 𑒯𑒧𑒩𑒰 𑒞𑒿 𑒥𑒛𑓃𑒏𑒰 𑒕𑒯𑒩, 𑒥𑒛𑓃𑒏𑒰 𑒤𑒻𑒏𑓂𑒙𑓂𑒩𑒲, 𑒥𑒛𑓃𑒏𑒰 𑒔𑒱𑒧𑒢𑒲 𑒥𑒛𑓂𑒛 𑒢𑒲𑒏 𑒪𑒑𑒻𑒋। 𑒡𑒳𑒿𑒂𑒏 𑒮𑒳𑒑𑒢𑓂𑒡 𑒞𑒿 𑒯𑒧𑒩𑒰 𑒥𑒔𑓂𑒔𑒹𑒮𑒿 𑒢𑒲𑒏 𑒪𑒑𑒻𑒋, 𑒞𑒼𑒩𑒰 𑒞𑒿 𑒥𑒳𑒗𑒪𑒹 𑒕𑒾।
𑒁𑒦𑒱𑒨𑒢𑓂𑒞𑒰:𑒂 𑒯𑒧𑒩 𑒧𑒰𑒋𑒏𑒹𑒿 𑒡𑒳𑒿𑒂𑒮𑒿 𑒐𑒼𑒿𑒐𑒲 𑒯𑒼𑒃 𑒕𑒻, 𑒯𑒧𑒩𑒰 𑒡𑒳𑒿𑒂 𑒢𑒲𑒏 𑒢𑒻 𑒪𑒑𑒻𑒋। 𑒞𑒼𑒩𑒰 𑒞𑒿 𑒥𑒳𑒗𑒪𑒹 𑒕𑒾।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩:𑒠𑒹𑒐 𑒦𑒰𑒃, 𑒯𑒧𑒩𑒰 𑒂 𑒞𑒼𑒩𑒰𑒧𑒹 𑒏𑒲 𑒁𑒢𑓂𑒞𑒩 𑒁𑒕𑒱। 𑒯𑒧 𑒞𑒿 𑒍𑒃 𑒣𑒟𑒣𑒩 𑒂𑒑𑒰𑒿 𑒥𑒜𑓃𑒱 𑒖𑒰𑒋𑒥 𑒖𑒹 𑒠𑒱𑒪𑓂𑒪𑒲 𑒥𑒰 𑒣𑒙𑒢𑒰 𑒯𑒧𑒩𑒰 𑒪𑒹𑒪 𑒢𑒱𑒩𑓂𑒡𑒰𑒩𑒱𑒞 𑒏𑒩𑒞। 𑒧𑒖𑒑𑒴𑒞 𑒥𑒛𑓃𑒏𑒰 𑒣𑒏𑓂𑒏𑒰 𑒥𑒰𑒢𑓂𑒯 𑒥𑒢𑒰𑒥𑒻𑒪𑒹 𑒏𑒯𑒞 𑒞𑒿 𑒮𑒹 𑒥𑒢𑒹𑒥𑒻, 𑒏𑒧𑒖𑒼𑒩 𑒥𑒛𑓃𑒏𑒰 𑒏𑒔𑓂𑒔𑒰 𑒥𑒰𑒢𑓂𑒯 𑒥𑒢𑒰𑒥𑒻𑒪𑒹 𑒏𑒯𑒞 𑒞𑒿 𑒮𑒹 𑒥𑒢𑒹𑒥𑒻। 𑒖𑒹 𑒅𑒣𑒩𑒏𑒰 𑒯𑒰𑒏𑒱𑒧 𑒏𑒯𑒞 𑒮𑒹 𑒏𑒩𑒥𑒻।
𑒁𑒦𑒱𑒨𑒢𑓂𑒞𑒰: 𑒔𑒰𑒯𑒹 𑒍 𑒢𑒲𑒏 𑒯𑒳𑒁𑒋 𑒥𑒰 𑒐𑒩𑒰𑒣।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒆𑒣𑒩𑒧𑒹 𑒥𑒻𑒮𑒪 𑒕𑒻 𑒞𑒿 𑒏𑒼𑒢𑒼 𑒑𑒳𑒝 𑒕𑒻 𑒞𑒹𑒿 𑒢𑒻 𑒥𑒻𑒮𑒪 𑒕𑒻। 𑒂 𑒑𑒳𑒝𑒲 𑒪𑒼𑒏 𑒁𑒡𑒪𑒰 𑒑𑒣 𑒏𑒱𑒋 𑒏𑒯𑒞𑒻?
𑒁𑒦𑒱𑒨𑒢𑓂𑒞𑒰:𑒞𑒐𑒢 𑒋𑒞𑓄 𑒣𑒜𑓃𑒱 𑒏𑓄, 𑒖𑓂𑒘𑒰𑒢 𑒁𑒩𑓂𑒖𑒱𑒞 𑒏𑓄 𑒏𑓄 𑒏𑒲 𑒤𑒰𑒋𑒠𑒰?
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩:𑒕𑒼𑒛𑓃 𑒦𑒰𑒃।
𑒁𑒦𑒱𑒨𑒢𑓂𑒞𑒰:𑒖𑒲𑒞 𑒂 𑒯𑒰𑒩𑒱𑒧𑒹 𑒥𑒛𑓂𑒛 𑒏𑒧 𑒁𑒢𑓂𑒞𑒩 𑒯𑒼𑒃 𑒕𑒻। 𑒖𑒲𑒞 𑒂 𑒯𑒰𑒩𑒱𑒏 𑒣𑒩𑒱𑒦𑒰𑒭𑒰𑒧𑒹 𑒮𑒹𑒯𑒼 𑒥𑒛𑓂𑒛 𑒁𑒢𑓂𑒞𑒩 𑒕𑒻। 𑒖𑒹 𑒏𑒰𑒖 𑒯𑒧 𑒑𑒪𑒞 𑒥𑒳𑒗𑒻 𑒕𑒱𑒌, 𑒖𑒹 𑒧𑒰𑒩𑓂𑒑 𑒯𑒧 𑒑𑒪𑒞 𑒥𑒳𑒗𑒻 𑒕𑒱𑒌 𑒍𑒃 𑒏𑒰𑒖𑒏𑒹𑒿 𑒯𑒧 𑒏𑒼𑒢𑒰 𑒏𑒩𑒥, 𑒍𑒃 𑒧𑒰𑒩𑓂𑒑𑒣𑒩 𑒯𑒧 𑒏𑒼𑒢𑒰 𑒥𑒜𑓃𑒥।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒦𑒰𑒃, 𑒖𑒹𑒢𑒰 𑒖𑒲𑒞 𑒂 𑒯𑒰𑒩𑒱𑒏 𑒣𑒩𑒱𑒦𑒰𑒭𑒰 𑒁𑒪𑒑 𑒯𑒼𑒃 𑒕𑒻 𑒞𑒯𑒱𑒢𑒰 𑒞𑒿 𑒮𑒯𑒲 𑒂 𑒑𑒪𑒞 𑒏𑒰𑒖, 𑒮𑒯𑒲 𑒂 𑒑𑒪𑒞 𑒧𑒰𑒩𑓂𑒑𑒏 𑒮𑒹𑒯𑒼 𑒁𑒪𑒑-𑒁𑒪𑒑 𑒣𑒩𑒱𑒦𑒰𑒭𑒰 𑒯𑒼𑒃𑒞 𑒯𑒹𑒞𑒻।
𑒁𑒦𑒱𑒨𑒢𑓂𑒞𑒰: 𑒯𑒼𑒃𑒞 𑒯𑒹𑒞𑒻 𑒏𑒏𑒩𑒼 𑒪𑒹𑒪, 𑒮𑒯𑒲 𑒞𑒿 𑒮𑒯𑒲 𑒩𑒯𑒞𑒻 𑒂 𑒑𑒪𑒞 𑒑𑒪𑒞𑒹 𑒩𑒯𑒞𑒻।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒠𑒹𑒐 𑒦𑒰𑒃। 𑒯𑒧 𑒞𑒿 𑒮𑒳𑒐𑒱𑒞𑒑𑒩 𑒣𑒩𑒱𑒫𑒰𑒩𑒮𑒿 𑒕𑒲, 𑒧𑒳𑒠𑒰 𑒞𑒴𑒿 𑒞𑒿 𑒮𑒰𑒡𑒰𑒩𑒝 𑒣𑒩𑒱𑒫𑒰𑒩𑒮𑒿 𑒕𑒹𑒿। 𑒯𑒧 𑒞𑒿 𑒏𑒧𑒰𑒃-𑒡𑒧𑒰𑒃 𑒢𑒻 𑒏𑒩𑒥, 𑒑𑒪𑒞-𑒮𑒪𑒞 𑒢𑒻 𑒏𑒩𑒥 𑒞𑒻𑒨𑒼 𑒯𑒧𑒩 𑒣𑒩𑒱𑒫𑒰𑒩𑒏𑒹𑒿 𑒤𑒩𑓂𑒏 𑒢𑒻 𑒣𑒛𑓃𑒞𑒻। 𑒧𑒳𑒠𑒰 𑒞𑒼𑒩𑒰𑒣𑒩 𑒞𑒿 𑒣𑒴𑒩𑒰 𑒣𑒩𑒱𑒫𑒰𑒩 𑒢𑒱𑒩𑓂𑒦𑒩 𑒕𑒻, 𑒂𑒮 𑒪𑒑𑒹𑒢𑒹 𑒕𑒾।
𑒁𑒦𑒱𑒨𑒢𑓂𑒞𑒰: 𑒦𑒰𑒃, 𑒄 𑒮𑓂𑒫𑒞𑓀𑒞𑓂𑒩𑒞𑒰 𑒞𑒿 𑒮𑒦 𑒪𑒹𑒪 𑒂𑒋𑒪 𑒕𑒻। 𑒞𑒼𑒩𑒰 𑒪𑒰𑒑𑒻 𑒕𑒾 𑒖𑒹 𑒯𑒧 𑒑𑒩𑒲𑒥 𑒕𑒲, 𑒂 𑒏𑒱𑒨𑒼 𑒞𑒹𑒯𑒢𑒼 𑒕𑒻 𑒖𑒹 𑒯𑒧𑒩𑒼𑒮𑒿 𑒥𑒹𑒬𑒲 𑒑𑒩𑒲𑒥 𑒂 𑒪𑒔𑒰𑒩 𑒁𑒕𑒱। 𑒏𑒱𑒕𑒳 𑒋𑒯𑒢𑒼 𑒕𑒻 𑒖𑒹 𑒞𑒼𑒩𑒰𑒮𑒿 𑒥𑒹𑒬𑒲 𑒡𑒢𑒲𑒏 𑒂 𑒮𑒰𑒧𑒩𑓂𑒟𑓂𑒨𑒫𑒰𑒢 𑒕𑒻।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒖𑒹𑒢𑒰..
𑒁𑒦𑒱𑒨𑒢𑓂𑒞𑒰: 𑒍 𑒮𑒦 𑒖𑒹 𑒮𑒦 𑒂𑒠𑒹𑒬 𑒠𑒹𑒞𑒻 𑒂 𑒞𑒴𑒿 𑒂𑒿𑒐𑒱 𑒧𑒴𑒢𑒱 𑒏𑓄 𑒞𑒏𑒩 𑒥𑒰𑒞 𑒧𑒰𑒢𑒥𑒹𑒿।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩:𑒠𑒹𑒐𑒯𑒲𑓀। 𑒂𑒥 𑒣𑒳𑒩𑒢𑒏𑒰 𑒖𑒧𑒲𑒢𑓂𑒠𑒰𑒩𑒲 𑒞𑒿 𑒑𑒹𑒪𑒻। 𑒂𑒥 𑒖𑒹 𑒢𑒥𑒏𑒰 𑒠𑒹𑒬 𑒮𑒦 𑒕𑒻 𑒍𑒃𑒧𑒹 𑒍𑒯𑒲 𑒪𑒼𑒏 𑒮𑒦𑒏 𑒔𑒪𑒞𑒲 𑒯𑒹𑒞𑒻 𑒖𑒹 𑒢𑒫𑒏𑒰 𑒫𑓂𑒨𑒫𑒮𑓂𑒟𑒰𑒧𑒹 𑒣𑒻𑒮𑒱 𑒣𑒹𑒞𑒻। 𑒖𑒹 𑒢𑒫𑒏𑒰 𑒖𑒧𑒲𑒢𑓂𑒠𑒰𑒩 𑒔𑒳𑒢𑒰𑒫𑒧𑒹 𑒖𑒲𑒞 𑒖𑒹𑒞𑒻, 𑒮𑒹 𑒥𑒔𑒞𑒻, 𑒥𑒰 𑒖𑒏𑒩 𑒥𑒔𑓂𑒔𑒰 𑒢𑒫𑒏𑒰 𑒮𑒩𑒏𑒰𑒩𑒧𑒹 𑒂𑒑𑒰𑒿 𑒖𑒹𑒞𑒻 𑒮𑒹 𑒥𑒔𑒞𑒻। 𑒞𑒏𑒩𑒹 𑒡𑒢 𑒥𑒔𑒞𑒹, 𑒞𑒏𑒩𑒹 𑒌𑒬𑓂𑒫𑒩𑓂𑒨 𑒏𑒰𑒋𑒧 𑒩𑒯𑒞𑒻।
𑒁𑒦𑒱𑒨𑒢𑓂𑒞𑒰: 𑒂 𑒂𑒑𑒰𑒿 𑒥𑒜𑓃𑒥 𑒧𑒰𑒢𑒹?
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒧𑒰𑒢𑒹 𑒮𑒞𑓂𑒞𑒰𑒏 𑒆𑒣𑒩, 𑒮𑒞𑓂𑒞𑒰𑒏 𑒮𑒲𑒜𑓃𑒲𑒏 𑒆𑒣𑒩, 𑒖𑒞𑒹𑒏 𑒆𑒣𑒩 𑒖𑒹 𑒔𑒜𑓃𑒞𑒻 𑒮𑒹 𑒞𑒞𑒹𑒏 𑒣𑒻𑒒 𑒮𑒞𑓂𑒞𑒰𑒥𑒪𑒰 𑒯𑒹𑒞𑒻। 𑒞𑒼𑒩𑒰 𑒪𑒑 𑒄 𑒧𑒾𑒏𑒰 𑒂𑒋𑒪 𑒕𑒾 𑒂 𑒯𑒧𑒩𑒼 𑒪𑒑 𑒂𑒋𑒪 𑒁𑒕𑒱। 𑒧𑒳𑒠𑒰 𑒠𑒳𑒢𑒴𑒧𑒹 𑒏𑒢𑒲 𑒁𑒢𑓂𑒞𑒩 𑒮𑒹𑒯𑒼 𑒕𑒻। 𑒞𑒼𑒩𑒰 𑒮𑒞𑓂𑒞𑒰 𑒣𑓂𑒩𑒰𑒣𑓂𑒞 𑒏𑒩𑒥𑒰𑒏 𑒕𑒾 𑒂 𑒯𑒧𑒩𑒰 𑒮𑒞𑓂𑒞𑒰 𑒥𑒔𑒹𑒥𑒰𑒏 𑒁𑒕𑒱।
𑒁𑒦𑒱𑒨𑒢𑓂𑒞𑒰:𑒏𑒲 𑒍𑒃𑒮𑒿 𑒞𑒴𑒿 𑒞𑒵𑒣𑓂𑒞 𑒦𑓄 𑒖𑒹𑒧𑒹।
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩:𑒮𑒹 𑒂𑒃 𑒏𑒼𑒢𑒰 𑒏𑒯𑒱𑒨𑒾? 𑒮𑒹 𑒞𑒿 𑒖𑒱𑒢𑒑𑒲𑒏 𑒁𑒢𑓂𑒞 𑒏𑒰𑒪𑒹𑒧𑒹 𑒏𑒯𑒪 𑒖𑒰 𑒮𑒏𑒻𑒋।
𑒁𑒦𑒱𑒨𑒢𑓂𑒞𑒰:𑒧𑒳𑒠𑒰 𑒖𑒱𑒢𑓂𑒑𑒲𑒏 𑒁𑒢𑓂𑒞𑒏𑒰𑒪𑒧𑒹 𑒖𑒿 𑒞𑒼𑒩𑒰 𑒥𑒳𑒗𑒰𑒅 𑒖𑒹 𑒄 𑒮𑒦 𑒮𑒞𑓂𑒞𑒰 𑒦𑓂𑒩𑒧 𑒩𑒯𑒋, 𑒖𑒹 𑒁𑒮𑒪 𑒞𑒵𑒣𑓂𑒞𑒱 𑒢𑒻 𑒦𑒹𑒙𑒪, 𑒞𑒐𑒢?
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒞𑒐𑒢 𑒞𑒐𑒢𑒹 𑒮𑒼𑒔𑒥𑒻? 𑒁𑒐𑒢 𑒞𑒿 𑒮𑒋𑒯 𑒮𑒼𑒔𑒰𑒋𑒪 𑒁𑒕𑒱 𑒖𑒹 𑒏𑒯𑒪𑒱𑒨𑒾।
𑒁𑒦𑒱𑒨𑒢𑓂𑒞𑒰: 𑒂 𑒞𑒯𑒱𑒨𑒰 𑒖𑒿 𑒒𑒳𑒩𑒥𑒰𑒏 𑒧𑒼𑒢 𑒯𑒹𑒞𑒾 𑒞𑒐𑒢 𑒏𑒼𑒢𑒰 𑒒𑒳𑒩𑒥𑒹𑒿?
𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩: 𑒔𑒪, 𑒣𑒬𑓂𑒔𑒰𑒞𑒰𑒣 𑒏𑓄 𑒪𑒹𑒥 𑒞𑒯𑒱𑒨𑒰। 𑒧𑒳𑒠𑒰 𑒖𑒿 𑒮𑒹 𑒞𑒼𑒩𑒰 𑒮𑓀𑒑 𑒯𑒾? 𑒞𑒐𑒢 𑒞𑒴𑒿 𑒏𑒼𑒢𑒰 𑒒𑒳𑒩𑒥𑒹𑒿?
𑒁𑒦𑒱𑒨𑒢𑓂𑒞𑒰:𑒮𑒯𑒲 𑒑𑒪𑒞 𑒏𑒹𑒢𑒰 𑒦𑓄 𑒖𑒹𑒞𑒻 𑒦𑒰𑒃।
𑒁𑒦𑒱𑒨𑒢𑓂𑒞𑒰𑒏 𑒫𑒩𑓂𑒑: 𑒨𑒋𑒯 𑒖𑒱𑒠 𑒢𑒹 𑒞𑒼𑒩𑒰 𑒐𑒰 𑒖𑒰𑒅। 𑒂𑒃 𑒐𑒳𑒬𑒲𑒏 𑒧𑒾𑒏𑒰 𑒕𑒻, 𑒂𑒃 𑒞𑒴𑒿 𑒖𑒲𑒞𑒪 𑒕𑒹𑒿 𑒞𑒹𑒿 𑒂𑒃 𑒞𑒼𑒩𑒹 𑒑𑒣 𑒮𑒯𑒲, 𑒧𑒳𑒠𑒰 𑒂𑒃𑒨𑒹 𑒡𑒩𑒱।
(𑒞𑒐𑒢𑒹 𑒠𑒳𑒢𑒴 𑒪𑒼𑒏 𑒛𑓀𑒏𑒰 𑒥𑒖𑒥𑓄 𑒪𑒑𑒻𑒋। 𑒁𑒦𑒱𑒢𑓂𑒞𑒰, 𑒁𑒦𑒱𑒨𑒢𑓂𑒞𑒰𑒏 𑒧𑒱𑒞𑓂𑒩 𑒮𑓀𑒑 𑒮𑒦 𑒫𑒱𑒠𑓂𑒨𑒰𑒩𑓂𑒟𑒲 𑒧𑓀𑒔𑒮𑒿 𑒥𑒯𑒩𑒰 𑒖𑒰𑒃𑒋।)
(𑒥𑒔𑓂𑒔𑒰 𑓓 𑒖𑒹 𑒂𑒥 𑒣𑒻𑒒 𑒦𑓄 𑒑𑒹𑒪 𑒁𑒕𑒱 𑒂 𑒚𑒹𑒪𑒰 𑒔𑒪𑒥𑒻𑒋, 𑒣𑓂𑒩𑒫𑒹𑒬 𑒏𑒩𑒻𑒋।)
𑒚𑒹𑒪𑒰𑒥𑒪𑒰: 𑒯𑒧𑒩 𑒚𑒹𑒪𑒰 𑒏𑒱𑒨𑒼 𑒑𑒳𑒩𑒏𑒰 𑒏𑓄 𑒪𑓄 𑒑𑒹𑒪। (𑒠𑒳𑒢𑒴 𑒪𑒼𑒏𑒮𑒿) 𑒄 𑒦𑒲𑒛𑓃 𑒏𑒞𑓄 𑒑𑒹𑒪𑒻 𑒯𑒾। 𑒣𑒻𑒒 𑒣𑒜𑓃𑒰𑒃 𑒥𑒪𑒰 𑒏𑒰𑒪𑒹𑒖 𑒕𑒱𑒌, 𑒏𑒲 𑒥𑒠𑒪𑒞𑒻 𑒣𑒜𑓃𑒱 𑒏𑓄, 𑒠𑒹𑒐𑒰 𑒔𑒰𑒯𑒲। (𑒠𑒳𑒢𑒴 𑒪𑒼𑒏𑒮𑒿) 𑒚𑒹𑒪𑒰 𑒠𑒹𑒐𑒪𑒯𑒏 𑒯𑒾 𑒯𑒧𑒩। 𑒏𑒱𑒨𑒼 𑒪𑓄 𑒑𑒹𑒪 𑒑𑒳𑒩𑒏𑒰 𑒏𑓄।
(𑒣𑓂𑒩𑒮𑓂𑒟𑒰𑒢)
𑒣𑒯𑒱𑒪 𑒪𑒼𑒏: (𑒠𑒼𑒮𑒩 𑒪𑒼𑒏𑒮𑒿) 𑒩𑒾, 𑒄 𑒏𑒼𑒢 𑒏𑒰𑒪𑒹𑒖 𑒕𑒻 𑒩𑒾।
𑒠𑒼𑒮𑒩 𑒪𑒼𑒏:𑒮𑒩𑒏𑒰𑒩 𑒥𑒢𑒥𑒻 𑒕𑒻 𑒄 𑒏𑒰𑒪𑒹𑒖।
𑒣𑒯𑒱𑒪 𑒪𑒼𑒏:𑒮𑒩𑒏𑒰𑒩 𑒥𑒢𑒥𑒻 𑒕𑒻?
𑒠𑒼𑒮𑒩 𑒪𑒼𑒏:𑒯𑒿 𑒩𑒾 𑒮𑒩𑒏𑒰𑒩 𑒥𑒢𑒥𑒻 𑒕𑒻।
𑒣𑒯𑒱𑒪 𑒪𑒼𑒏:𑒧𑒳𑒠𑒰 𑒍 𑒃𑒢𑓂𑒖𑒲𑒢𑒱𑒁𑒩 𑒞𑒿 𑒏𑒯𑒻 𑒕𑒪𑒻 𑒖𑒹 𑒍 𑒮𑒩𑒏𑒰𑒩 𑒢𑒻 𑒥𑒢𑒞। 𑒪𑒼𑒏𑒹 𑒩𑒯𑒞।
𑒠𑒼𑒮𑒩 𑒪𑒼𑒏:𑒧𑒳𑒠𑒰 𑒍𑒏𑒩 𑒮𑓀𑒑𑒲 𑒏𑒲 𑒏𑒯𑒻 𑒕𑒪𑒻 𑒮𑒹 𑒢𑒻 𑒮𑒳𑒢𑒪𑒯𑒲𑓀।
𑒣𑒯𑒱𑒪 𑒪𑒼𑒏:𑒮𑒳𑒢𑒪𑒱𑒌, 𑒍𑒏𑒩𑒰 𑒞𑒿 𑒏𑒢𑒲 𑒥𑒹𑒮𑒱𑒨𑒹 𑒯𑒩𑒥𑒛𑓃𑒲 𑒕𑒪𑒻।
𑒠𑒼𑒮𑒩 𑒪𑒼𑒏:𑒋𑒯𑒹𑒢 𑒂𑒢𑒼 𑒮𑓂𑒏𑒴𑒪 𑒏𑒰𑒪𑒹𑒖 𑒕𑒻 𑒩𑒾, 𑒮𑒩𑒏𑒰𑒩 𑒥𑒢𑒰𑒥𑒻𑒥𑒪𑒰।
𑒣𑒯𑒱𑒪 𑒪𑒼𑒏:𑒚𑒲𑒏𑒹 𑒩𑒾।
𑒠𑒼𑒮𑒩 𑒪𑒼𑒏:𑒯𑒿 𑒩𑒾 𑒚𑒲𑒏𑒹।
𑒣𑒯𑒱𑒪 𑒪𑒼𑒏:𑒍𑒞𑒾 𑒠𑒴 𑒞𑒩𑒯𑒏 𑒫𑒱𑒠𑓂𑒨𑒰𑒩𑓂𑒟𑒹 𑒞𑒿 𑒢𑒻 𑒯𑒹𑒞𑒻 𑒩𑒾?
𑒠𑒼𑒮𑒩 𑒪𑒼𑒏:𑒮𑒦 𑒚𑒰𑒧 𑒠𑒴 𑒞𑒩𑒯𑒏 𑒫𑒱𑒠𑓂𑒨𑒰𑒩𑓂𑒟𑒲 𑒩𑒯𑒻 𑒕𑒻। 𑒋𑒏𑒙𑒰 𑒖𑒹 𑒮𑒩𑒏𑒰𑒩 𑒥𑒢𑒱 𑒖𑒰𑒃 𑒕𑒻 𑒂 𑒠𑒼𑒮𑒩 𑒖𑒹 𑒪𑒼𑒏𑒹 𑒥𑒢𑒪 𑒩𑒯𑓄 𑒔𑒰𑒯𑒻 𑒕𑒻।
𑒣𑒯𑒱𑒪 𑒪𑒼𑒏:𑒂 𑒮𑒹 𑒮𑒩𑒏𑒰𑒩𑒼𑒧𑒹 𑒩𑒯𑒻 𑒕𑒻 𑒏𑒲? 𑒂 𑒪𑒼𑒏𑒧𑒹?
𑒠𑒼𑒮𑒩 𑒪𑒼𑒏:𑒮𑒩𑒏𑒰𑒩𑒼𑒧𑒹 𑒪𑒼𑒏 𑒩𑒯𑒻 𑒕𑒻 𑒂 𑒪𑒼𑒏𑒼𑒧𑒹 𑒮𑒩𑒏𑒰𑒩।
𑒣𑒯𑒱𑒪 𑒪𑒼𑒏: (𑒍𑒏𑒩𑒰 𑒏𑒱𑒕𑒳 𑒢𑒻 𑒤𑒳𑒩𑒰𑒃 𑒕𑒻) 𑒋𑒏𑓂𑒏𑒹 𑒏𑒰𑒪𑒹𑒖, 𑒋𑒏𑓂𑒏𑒹 𑒮𑓂𑒏𑒴𑒪 𑒂 𑒠𑒴 𑒞𑒩𑒯𑒏 𑒫𑒱𑒠𑓂𑒨𑒰𑒩𑓂𑒟𑒲?
𑒠𑒼𑒮𑒩 𑒪𑒼𑒏: 𑒮𑒦 𑒮𑓂𑒏𑒴𑒪 𑒂 𑒏𑒰𑒪𑒹𑒖𑒧𑒹 𑒠𑒴 𑒞𑒩𑒯𑒏 𑒧𑒰𑒮𑓂𑒙𑒩 𑒩𑒯𑒻 𑒕𑒾 𑒩𑒾 𑒥𑒴𑒛𑓃𑒱। 𑒠𑒴 𑒞𑒩𑒯𑒏 𑒫𑒱𑒔𑒰𑒩 𑒒𑒳𑒩𑒧𑒻𑒞 𑒩𑒯𑒻 𑒕𑒻 𑒍𑒃 𑒮𑓂𑒏𑒴𑒪 𑒏𑒰𑒪𑒹𑒖𑒧𑒹। 𑒞𑒩𑒰-𑒅𑒣𑒛𑓃𑒲..
𑒣𑒯𑒱𑒪 𑒪𑒼𑒏:𑒫𑒱𑒠𑓂𑒨𑒰𑒩𑓂𑒟𑒲 𑒮𑒦𑒏𑒹𑒿 𑒞𑒿 𑒒𑒳𑒩𑒧𑒰 𑒪𑒰𑒑𑒱 𑒖𑒰𑒃𑒞 𑒯𑒹𑒞𑒻 𑒩𑒾।
𑒠𑒼𑒮𑒩 𑒪𑒼𑒏:𑒒𑒩-𑒣𑒛𑓃𑒼𑒮𑒲, 𑒮𑒹𑒯𑒼 𑒞𑒿 𑒮𑓂𑒏𑒴𑒪𑒹 𑒕𑒱𑒌 𑒢𑒹 𑒩𑒾 𑒥𑒴𑒛𑓃𑒱। 𑒮𑒹𑒯𑒼 𑒁𑒮𑒩𑒱 𑒏𑒩𑒞𑒻 𑒏𑒲 𑒢𑒻।
𑒣𑒯𑒱𑒪 𑒪𑒼𑒏: (𑒛𑓀𑒏𑒰𑒣𑒩 𑒋𑒏𑒙𑒰 𑒔𑒼𑒙 𑒠𑒻𑒋 𑒂 𑒤𑒹𑒩 𑒮𑒼𑒔 𑒪𑒑𑒻𑒋) 𑒁𑒮𑒩𑒱 𑒏𑒩𑒞𑒻? (𑒤𑒹𑒩 𑒛𑓀𑒏𑒰𑒣𑒩 𑒋𑒏𑒙𑒰 𑒔𑒼𑒙 𑒠𑒻𑒋) 𑒁𑒮𑒩𑒱 𑒏𑒩𑒥𑒹 𑒏𑒩𑒞𑒻।(𑒮𑒼𑒔𑓄 𑒪𑒑𑒻𑒋) 𑒠𑒹𑒐𑒰 𑒔𑒰𑒯𑒲 𑒏𑒲 𑒯𑒼𑒃 𑒕𑒻।
(𑒠𑒼𑒮𑒩 𑒪𑒼𑒏 𑒛𑓀𑒏𑒰𑒣𑒩 𑒋𑒏𑒙𑒰 𑒔𑒼𑒙 𑒠𑒻𑒋। 𑒣𑒯𑒱𑒪 𑒪𑒼𑒏 𑒠𑒼𑒮𑒩 𑒠𑒱𑒮 𑒞𑒰𑒏𑓄 𑒪𑒑𑒻𑒋। 𑒤𑒹𑒩 𑒋𑒏𑒙𑒰 𑒔𑒼𑒙 𑒣𑒯𑒱𑒪 𑒪𑒼𑒏 𑒠𑒻𑒋, 𑒤𑒹𑒩 𑒠𑒼𑒮𑒩 𑒪𑒼𑒏 𑒛𑓀𑒏𑒰𑒣𑒩 𑒔𑒼𑒙 𑒠𑒻𑒋। 𑒂 𑒤𑒹𑒩 𑒠𑒳𑒢𑒴𑒏 𑒧𑒳𑒿𑒯𑒣𑒩 𑒯𑒿𑒮𑒲 𑒂 𑒥𑒹𑒩𑒰-𑒥𑒹𑒩𑒲 𑒛𑓀𑒏𑒰𑒣𑒩 𑒔𑒼𑒙 𑒠𑒻𑒞 𑒛𑓀𑒏𑒰𑒏 𑒑𑒞𑒱 𑒥𑒜𑓃𑓄 𑒪𑒑𑒻𑒋। 𑒣𑒩𑓂𑒠𑒰 𑒐𑒮𑒻𑒞 𑒁𑒕𑒱।)


























𑒣𑒪𑓂𑒪𑒫 𑒞𑒲𑒢
(𑒑𑒰𑒧𑒏 𑒠𑒵𑒬𑓂𑒨। 𑒁𑓀𑒑𑒢𑒰𑒧𑒹 𑒁𑒦𑒱𑒨𑒢𑓂𑒞𑒰𑒏 𑒥𑒞𑒯𑒲 𑒧𑒰𑒋 𑒂 𑒏𑒢𑒱𑒨𑒰𑒿 𑒏𑒰𑒏𑒲 𑒥𑒻𑒮𑒪 𑒕𑒟𑒱, 𑒂 𑒁𑒦𑒱𑒨𑒢𑓂𑒞𑒰 𑒚𑒰𑒜𑓃 𑒁𑒕𑒱।)
𑒏𑒢𑒱𑒨𑒰𑒿 𑒏𑒰𑒏𑒲: (𑒁𑒦𑒱𑒨𑒢𑓂𑒞𑒰𑒮𑒿) 𑒂𑒥𑓄 𑒥𑒰𑒅, 𑒋𑒞𑓄 𑒥𑒻𑒮𑓄।
𑒥𑒞𑒯𑒲 𑒧𑒰𑒋: 𑒂𑒃 𑒁𑒯𑒰𑒿 𑒌 𑒑𑒰𑒧𑒏 𑒣𑒯𑒱𑒪 𑒃𑒢𑓂𑒖𑒲𑒢𑒱𑒨𑒩 𑒥𑒢𑒱 𑒑𑒹𑒪𑒾𑓀। 𑒣𑒱𑒞𑒰 𑒩𑒯𑒱𑒞𑒟𑒱 𑒞𑒿 𑒏𑒞𑓂𑒞𑒹 𑒐𑒳𑒬𑒲 𑒯𑒼𑒃𑒞𑒟𑒱।
𑒏𑒢𑒱𑒨𑒰𑒿 𑒏𑒰𑒏𑒲:𑒏𑒲 𑒏𑒩𑒥𑒻 𑒏𑒢𑒱𑒨𑒰𑒿, 𑒧𑒳𑒠𑒰 𑒁𑒯𑒰𑒿𑒏 𑒥𑒹𑒙𑒰 𑒁𑒕𑒱 𑒡𑒩𑒱 𑒥𑒰𑒣𑒹 𑒮𑒢 𑒖𑒱𑒠𑒱𑒨𑒰𑒯।
𑒥𑒞𑒯𑒲 𑒧𑒰𑒋: 𑒮𑒹 𑒞𑒿 𑒁𑒕𑒱𑒨𑒹।
𑒏𑒢𑒱𑒨𑒰𑒿 𑒏𑒰𑒏𑒲:𑒏𑒱𑒨𑒼 𑒏𑒞𑒥𑒼 𑒦𑒰𑒓𑒚 𑒪𑒑𑒹𑒪𑒏𑒻 𑒧𑒳𑒠𑒰 𑒣𑒜𑓃𑒰𑒃 𑒣𑒴𑒩𑒰 𑒏𑒹𑒥𑒹 𑒏𑒹𑒪𑒏।
𑒥𑒞𑒯𑒲 𑒧𑒰𑒋: 𑒑𑒰𑒧𑒧𑒹 𑒋𑒏𑒙𑒰 𑒋𑒧.𑒋𑒪.𑒋. 𑒦𑒹𑒥𑒼 𑒏𑒋𑒪 𑒞𑒿 𑒮𑒹𑒯𑒼 𑒔𑒝𑓂𑒛𑒰𑒪 𑒦𑓄 𑒑𑒹𑒪। 𑒢𑒻 𑒖𑒰𑒢𑒱 𑒏𑒼𑒢 𑒁𑒩𑒰𑒛𑓃𑒱 𑒚𑒰𑒜𑓃 𑒏𑓄 𑒪𑒹𑒪𑒏। 𑒋𑒏𑒙𑒰 𑒠𑒮𑒐𑒞 𑒏𑓄 𑒠𑒱𑒞𑒋 𑒞𑒿 𑒋𑒞𑒹𑒏 𑒏𑒭𑓂𑒙 𑒖𑒹 𑒯𑒧𑒩 𑒥𑒰𑒥𑒴𑒏𑒹𑒿 𑒣𑒜𑓃𑒰𑒃𑒧𑒹 𑒦𑒹𑒪 𑒮𑒹 𑒢𑒻 𑒯𑒼𑒃𑒞𑒋।
𑒏𑒢𑒱𑒨𑒰𑒿 𑒏𑒰𑒏𑒲:𑒐𑒰𑒪𑒲 𑒦𑒼𑒙 𑒏𑒰𑒪𑒧𑒹 𑒧𑒼𑒢 𑒩𑒯𑒻 𑒕𑒻। 𑒞𑒐𑒢 𑒏𑒞𑒹𑒏 𑒧𑒲𑒚 𑒥𑒼𑒪 𑒦𑓄 𑒖𑒰𑒃 𑒕𑒻 𑒨𑒻।
𑒥𑒞𑒯𑒲 𑒧𑒰𑒋: 𑒂 𑒥𑒰𑒠𑒧𑒹 𑒪𑒼𑒏𑒏𑒹𑒿 𑒏𑒯𑒻 𑒕𑒻, 𑒏𑒲 𑒯𑒼𑒃 𑒕𑒯 𑒞𑒼𑒩𑒹 𑒦𑒼𑒙𑒮𑒿 𑒖𑒲𑒞𑒪 𑒕𑒲।
𑒏𑒢𑒱𑒨𑒰𑒿 𑒏𑒰𑒏𑒲: 𑒮𑒹 𑒋𑒧.𑒋𑒪.𑒋.𑒏𑒹𑒿 𑒯𑒧 𑒮𑒳𑒢𑒰 𑒋𑒪𑒱𑒨𑒢𑒱 𑒯𑒹𑒿।
𑒥𑒞𑒯𑒲 𑒧𑒰𑒋:𑒏𑒯𑒱𑒨𑒰 𑒨𑒻।
𑒏𑒢𑒱𑒨𑒰𑒿 𑒏𑒰𑒏𑒲: 𑒮𑒹 𑒢𑒻 𑒥𑒳𑒗𑒪𑒱𑒌। 𑒥𑒹𑒙𑒰𑒏 𑒠𑒳𑒩𑒰𑒑𑒧𑒢𑒧𑒹 𑒣𑒲𑒁𑒩 𑒥𑒔𑓂𑒔𑒰 𑒋𑒧.𑒋𑒪.𑒋.𑒏 𑒁𑓀𑒑𑒢𑒰𑒧𑒹 𑒍𑒪𑒥𑒰-𑒠𑒼𑒪𑒥𑒰 𑒅𑒚𑒰 𑒠𑒻 𑒑𑒹𑒪𑒻 𑒖𑒹 𑒏𑒢𑒱𑒨𑒰𑒿𑒏 𑒏𑒰𑒢𑒥𑒪𑒰 𑒯𑒩𑒰 𑒑𑒹𑒪𑒻। 𑒮𑒱𑒣𑒯𑒱𑒨𑒰 𑒑𑒹𑒙𑒹 𑒥𑒢𑓂𑒢 𑒏𑓄 𑒠𑒹𑒪𑒏𑒻 𑒖𑒹 𑒖𑒰𑒫𑒞 𑒏𑒰𑒢𑒥𑒪𑒰 𑒢𑒻 𑒦𑒹𑒙𑒞𑒻 𑒞𑒰𑒫𑒞 𑒏𑒱𑒨𑒼 𑒥𑒰𑒯𑒩 𑒢𑒻 𑒖𑒰 𑒮𑒏𑒻𑒋। 𑒧𑒰𑒩 𑒥𑒰𑒜𑓃𑒢𑒱।
𑒥𑒞𑒯𑒲 𑒧𑒰𑒋:𑒠𑒹𑒐𑒴 𑒞𑒿।
𑒏𑒢𑒱𑒨𑒰𑒿 𑒏𑒰𑒏𑒲: 𑒂 𑒮𑒳𑒢𑒴 𑒢𑒹। 𑒤𑒹𑒩 𑒏𑒰𑒢𑒥𑒪𑒰 𑒏𑒢𑒱𑒨𑒰𑒿𑒏 𑒏𑒹𑒬𑒧𑒹 𑒦𑒹𑒙𑒪𑒻, 𑒞𑒐𑒢 𑒑𑒹𑒙 𑒐𑒼𑒪𑒪𑒏𑒻। 𑒗𑒰𑒿𑒙 𑒥𑒰𑒜𑓃𑒢𑒱 𑒑𑒻 𑒠𑒩𑒥𑒰𑒩𑒏𑒹𑒿। 𑒧𑒳𑒠𑒰 𑒙𑒙𑒲𑒥𑒰𑒏𑒹𑒿 𑒐𑒴𑒥 𑒮𑒳𑒢𑒹𑒪𑒱𑒌 𑒂 𑒞𑒃 𑒪𑒰𑒟𑒹 𑒁𑒣𑒢 𑒥𑒰𑒅𑒏 𑒏𑒰𑒑𑒔𑒣𑒩 𑒖𑒹 𑒣𑒲𑒁𑒩 𑒥𑒔𑓂𑒔𑒰 𑒠𑒮𑒐𑒞 𑒢𑒻 𑒏𑒹𑒪𑒏 𑒮𑒹𑒯𑒼 𑒮𑒳𑒢𑒰 𑒠𑒹𑒪𑒱𑒌।
𑒥𑒞𑒯𑒲 𑒧𑒰𑒋: 𑒯𑒧𑒩𑒰 𑒥𑒞𑒯𑒱𑒨𑒰 𑒏𑒯𑓄 𑒖𑒰𑒃 𑒪𑒰𑒑𑒪 𑒁𑒕𑒱। 𑒂𑒥 𑒥𑒳𑒗𑒾, 𑒥𑒞𑒯𑒱𑒨𑒹𑒏 𑒥𑒹𑒙𑒰 𑒢𑒹 𑒃𑒢𑓂𑒖𑒲𑒢𑒱𑒨𑒩 𑒦𑒹𑒪𑒻।
𑒁𑒦𑒱𑒨𑒢𑓂𑒞𑒰: 𑒖𑒹 𑒦𑒹𑒪𑒻 𑒮𑒹 𑒂𑒥 𑒑𑒳𑒖𑒩𑒱 𑒑𑒹𑒪𑒻। 𑒑𑒰𑒧𑒏 𑒪𑒼𑒏 𑒣𑒜𑓃𑒱 𑒖𑒹𑒞𑒻 𑒮𑒹 𑒋𑒧.𑒋𑒪.𑒋. 𑒏𑒹𑒿 𑒢𑒻 𑒢𑒹 𑒮𑒼𑒯𑒹𑒞𑒻। 𑒏𑒹 𑒙𑒯𑒪 𑒙𑒱𑒏𑒼𑒩𑒰 𑒏𑒩𑒞𑒻? 𑒪𑒼𑒏 𑒂𑒑𑒰𑒿 𑒢𑒻 𑒥𑒜𑓃𑒋, 𑒏𑒲 𑒌 𑒪𑒹𑒪 𑒠𑒹𑒬 𑒮𑓂𑒫𑒞𑓀𑒞𑓂𑒩 𑒦𑒹𑒪 𑒕𑒻?
𑒥𑒞𑒯𑒲 𑒧𑒰𑒋: 𑒮𑒦 𑒁𑒣𑒢-𑒁𑒣𑒢 𑒏𑒰𑒖 𑒖𑒞𑒢𑒮𑒿 𑒏𑒩𑒋, 𑒖𑒰𑒢-𑒖𑒲 𑒪𑒑𑒰 𑒏𑓄 𑒏𑒩𑒋।
𑒏𑒢𑒱𑒨𑒰𑒿 𑒏𑒰𑒏𑒲: 𑒏𑒲 𑒄 𑒑𑒣 𑒋𑒧.𑒋𑒪.𑒋. 𑒪𑓄 𑒢𑒻 𑒕𑒻 𑒨𑒻? 𑒥𑒞𑒯𑒱𑒨𑒰 𑒏𑒯𑒞𑒻, 𑒠𑒹𑒐𑒴 𑒞𑒿..
𑒁𑒦𑒱𑒨𑒢𑓂𑒞𑒰: 𑒏𑒰𑒏𑒲, 𑒧𑒰𑒋𑒏𑒹𑒿 𑒪𑒼𑒏 𑒥𑒞𑒯𑒱𑒨𑒰 𑒏𑒯𑒻 𑒕𑒻 𑒞𑒿 𑒏𑒰𑒪𑓂𑒯𑒱 𑒯𑒧𑒩𑒼 𑒪𑒼𑒏 𑒥𑒞𑒯𑒰 𑒏𑒯𑓄 𑒪𑒰𑒑𑒞। 𑒞𑒻𑒿 𑒛𑒩𑒱 𑒏𑓄 𑒏𑒲 𑒯𑒧 𑒏𑒩𑓂𑒞𑒫𑓂𑒨𑒏 𑒣𑒰𑒪𑒢 𑒢𑒻 𑒏𑒩𑒲, 𑒥𑒹𑒃𑒧𑒰𑒢 𑒥𑒢𑒱 𑒖𑒰𑒃?
𑒏𑒢𑒱𑒨𑒰𑒿 𑒏𑒰𑒏𑒲: 𑒢𑒻 𑒥𑒔𑓂𑒔𑒰, 𑒮𑒹 𑒞𑒿 𑒂𑒥 𑒮𑒦 𑒥𑒳𑒗𑒱 𑒑𑒹𑒪 𑒕𑒻 𑒖𑒹 𑒏𑒞𑒹𑒏 𑒖𑒱𑒠𑒱𑒨𑒰𑒯 𑒕𑒯 𑒞𑒴𑒿। 𑒖𑒰𑒢-𑒖𑒲 𑒪𑒑𑒰 𑒏𑓄 𑒏𑒰𑒖 𑒏𑒩𑒞, 𑒮𑒹 𑒮𑒦𑒏𑒹𑒿 𑒥𑒳𑒗𑒪 𑒕𑒻।
(𑒢𑒹𑒣𑒟𑓂𑒨𑒮𑒿 𑒁𑒥𑒰𑒖- 𑒯𑒰𑒏𑒱𑒧 𑒂𑒋𑒪 𑒁𑒕𑒱 𑒏𑒱?)
(𑒣𑒻𑒒 𑒦𑒰𑒋 𑒣𑓂𑒩𑒫𑒹𑒬 𑒏𑒩𑒻𑒞 𑒁𑒕𑒱।)
𑒣𑒻𑒒 𑒦𑒰𑒋- 𑒥𑒾𑒂, 𑒠𑒪𑒰𑒢𑒣𑒩 𑒪𑒼𑒏 𑒮𑒦 𑒖𑒳𑒧𑒪 𑒁𑒕𑒱। 𑒏𑒢𑒲 𑒥𑒯𑒰𑒩 𑒠𑒱𑒮 𑒌𑒥।
𑒁𑒦𑒱𑒨𑒢𑓂𑒞𑒰- 𑒁𑒔𑓂𑒕𑒰 𑒦𑒰𑒃।
(𑒧𑒰𑒋 𑒂 𑒏𑒢𑒱𑒨𑒰𑒿 𑒏𑒰𑒏𑒲𑒏 𑒣𑓂𑒩𑒮𑓂𑒟𑒰𑒢 𑒂 𑒪𑒼𑒏 𑒮𑒦𑒏 𑒂𑒑𑒧𑒢।)
𑒠𑒰𑒠𑒰:(𑒁𑒦𑒱𑒨𑒢𑓂𑒞𑒰𑒮𑒿) 𑒯𑒰𑒏𑒱𑒧, 𑒂𑒃 𑒏𑒯𑓄 𑒞𑒼𑒩𑒰 𑒏𑒲 𑒔𑒰𑒯𑒲? 𑒙𑒼𑒪, 𑒑𑒰𑒧, 𑒃𑒪𑒰𑒏𑒰𑒧𑒹 𑒬𑒼𑒩 𑒦𑓄 𑒑𑒹𑒪𑒻। 𑒥𑒛𑓃𑒏𑒰-𑒥𑒛𑓃𑒏𑒰 𑒪𑒼𑒏 𑒧𑒳𑒿𑒯 𑒞𑒏𑒱𑒞𑒹 𑒩𑒯𑒱 𑒑𑒹𑒪। 𑒧𑒳𑒠𑒰 𑒑𑒰𑒧𑒏, 𑒃𑒪𑒰𑒏𑒰𑒏 𑒣𑒯𑒱𑒪 𑒃𑒢𑓂𑒖𑒲𑒢𑒱𑒨𑒩 𑒁𑒣𑒢 𑒑𑒰𑒧𑒹𑒏 𑒦𑒹𑒪। 𑒣𑒯𑒱𑒢𑒹 𑒯𑒰𑒏𑒱𑒧 𑒮𑒦 𑒤𑒱𑒩𑓀𑒑𑒲 𑒮𑒦 𑒯𑒼𑒃 𑒕𑒪𑒻, 𑒄 𑒣𑒲𑒁𑒩 𑒥𑒔𑓂𑒔𑒰, 𑒋𑒧.𑒋𑒪.𑒋., 𑒄 𑒮𑒦 𑒕𑒼𑒙𑒏𑒰 𑒖𑒧𑒲𑒢𑓂𑒠𑒰𑒩 𑒕𑒪, 𑒥𑒛𑓃𑒏𑒰 𑒖𑒧𑒲𑒢𑓂𑒠𑒰𑒩 𑒮𑒦 𑒋𑒏𑒩𑒰 𑒮𑒢-𑒮𑒢 𑒖𑒧𑒲𑒢𑓂𑒠𑒰𑒩𑒏𑒹𑒿 𑒖𑒐𑒢 𑒧𑒼𑒢 𑒖𑒼𑒏𑒯𑒲 𑒣𑒼𑒐𑒩𑒱𑒧𑒹 𑒦𑒩𑒱-𑒦𑒩𑒱 𑒩𑒰𑒞𑒱 𑒚𑒰𑒜𑓃 𑒏𑓄 𑒠𑒻 𑒕𑒪𑒻। 𑒄 𑒯𑒧𑒩 𑒯𑒰𑒏𑒱𑒧𑒏 𑒏𑒰𑒑𑒔𑒣𑒩 𑒠𑒮𑒐𑒞 𑒢𑒻 𑒏𑒹𑒪𑒏! 𑒦𑒼𑒙 𑒠𑓄 𑒏𑓄 𑒖𑒱𑒞𑒥𑒻 𑒖𑒰𑒃 𑒑𑒹𑒪𑒱𑒌, 𑒖𑒹 𑒑𑒰𑒧𑒏, 𑒃𑒪𑒰𑒏𑒰𑒏 𑒏𑒪𑓂𑒨𑒰𑒝 𑒏𑒩𑒞, 𑒧𑒳𑒠𑒰 𑒏𑒹𑒪𑒏 𑒏𑒱𑒕𑒳 𑒢𑒻। 𑒂𑒥 𑒞𑒿 𑒣𑒰𑒿𑒔 𑒮𑒰𑒪 𑒍𑒏𑒩𑒼 𑒣𑒳𑒩𑒱 𑒖𑒹𑒞𑒻, 𑒂𑒥 𑒠𑒹𑒐𑒥𑒻 𑒕𑒱𑒌। 𑒣𑒙𑒢𑒰 𑒫𑒱𑒡𑒰𑒢𑒮𑒦𑒰𑒧𑒹 𑒋𑒏𑓂𑒏𑒼 𑒥𑒹𑒩 𑒢𑒻 𑒥𑒰𑒖𑒪 𑒃𑒪𑒰𑒏𑒰𑒏 𑒏𑒪𑓂𑒨𑒰𑒝𑒏 𑒪𑒹𑒪।
𑒪𑒰𑒪𑒰: 𑒯𑒃 𑒠𑒰𑒠𑒰, 𑒮𑒹 𑒢𑒻 𑒏𑒯𑒏। 𑒋𑒏 𑒥𑒹𑒩 𑒥𑒰𑒖𑒪 𑒩𑒯𑒋 𑒣𑒙𑒢𑒰 𑒫𑒱𑒡𑒰𑒮𑒦𑒰𑒧𑒹 𑒍। (𑒫𑓂𑒨𑓀𑒑𑓂𑒨𑒮𑒿 𑒢𑒏𑒪 𑒏𑒩𑒻𑒞 𑒥𑒖𑒻𑒞) 𑒯𑒳𑒖𑒴𑒩, 𑒯𑒧𑒩 𑒐𑒹𑒞 𑒢𑒲𑒪 𑒑𑒰𑒨 𑒔𑒩𑒱 𑒖𑒰𑒃𑒋, 𑒮𑒹 𑒍𑒏𑒩𑒰 𑒧𑒰𑒩𑒻 𑒪𑒹𑒪, 𑒛𑒩𑒥𑒻 𑒪𑒹𑒪 𑒥𑒢𑓂𑒠𑒴𑒏𑒏 𑒪𑒰𑒃𑒮𑒹𑓀𑒮 𑒠𑒹𑒪 𑒖𑒰𑒋।
(𑒮𑒦 𑒚𑒯𑒏𑓂𑒏𑒰 𑒪𑒑𑒥𑒻𑒋।)
𑒥𑒰𑒅: 𑒯𑒾 𑒪𑒰𑒪𑒰। 𑒍𑒯𑒼 𑒖𑒧𑒰𑒢𑒰 𑒕𑒪𑒻, 𑒐𑒞𑒧 𑒦𑒹𑒪𑒻। 𑒏𑒯𑒱𑒨𑒼 𑒠𑒹𑒯𑒮𑒿 𑒥𑒪𑒑𑒩 𑒪𑒼𑒏𑒏 𑒔𑒪𑒞𑒲 𑒕𑒪𑒻, 𑒤𑒹𑒩 𑒏𑒳𑒪-𑒐𑒰𑒢𑒠𑒰𑒢𑒏 𑒔𑒪𑒞𑒲 𑒋𑒪𑒻। 𑒂𑒥 𑒯𑒰𑒟𑒮𑒿 𑒏𑒰𑒖 𑒏𑒩𑒻𑒥𑒪𑒰𑒏 𑒮𑒧𑒋 𑒂𑒋𑒪 𑒕𑒻। 𑒣𑒜𑓃𑒰𑒃-𑒪𑒱𑒐𑒰𑒃𑒣𑒩 𑒩𑒼𑒏 𑒪𑒑𑒹𑒢𑒹 𑒂𑒥 𑒩𑒼𑒏 𑒪𑒑𑒞𑒻 𑒯𑒾?
𑒥𑒱𑒪𑒙: 𑒯𑒾 𑒥𑒰𑒅। 𑒚𑒲𑒏𑒹 𑒏𑒯𑒻 𑒕𑒯। 𑒖𑒹 𑒯𑒫𑒰 𑒥𑒯𑒪 𑒕𑒻 𑒯𑒾 𑒮𑒹 𑒏𑒱𑒨𑒼 𑒩𑒼𑒏𑒱 𑒠𑒹𑒞𑒻 𑒯𑒾।
𑒥𑒰𑒅: 𑒯𑒾 𑒥𑒱𑒪𑒙। 𑒣𑓂𑒩𑒨𑒰𑒮 𑒞𑒿 𑒏𑒹𑒥𑒹 𑒢𑒹 𑒏𑒹𑒪𑒏𑒻 𑒩𑒼𑒏𑒥𑒰𑒏। 𑒧𑒳𑒠𑒰 𑒯𑒧𑒩 𑒃𑒢𑓂𑒖𑒲𑒢𑒱𑒨𑒩 𑒯𑒰𑒏𑒱𑒧 𑒥𑒛𑓂𑒛 𑒖𑒱𑒠𑓂𑒠𑒲 𑒕𑒻 𑒯𑒾। 𑒂𑒃 𑒯𑒧𑒩 𑒦𑒻𑒨𑒰𑒩𑒲 𑒖𑒱𑒥𑒻𑒞 𑒩𑒯𑒱𑒞𑒻 𑒞𑒿 𑒠𑒹𑒐𑒱𑒞𑒯𑒏 𑒬𑒰𑒢। 𑒙𑒼𑒪𑒏𑒹𑒿 𑒧𑒰𑒟𑒣𑒩 𑒅𑒚𑒰 𑒪𑒻𑒞𑒻 𑒯𑒾। 𑒑𑒩𑓂𑒠 𑒏𑓄 𑒠𑒻𑒞𑒻 𑒯𑒾। 𑒧𑒳𑒠𑒰 𑒥𑒰𑒣𑒏 𑒏𑒧𑒲 𑒏𑒏𑓂𑒏𑒰 𑒮𑒦 𑒣𑒴𑒩𑒰 𑒏𑒩𑒞𑒻 𑒯𑒾। 𑒩𑒾 𑒧𑒲𑒞, 𑒥𑒰𑒅 𑒥𑒔𑓂𑒔𑒰𑒏 𑒠𑒼𑒏𑒰𑒢𑒣𑒩 𑒖𑒼 𑒂 𑒏𑒯𑒱𑒯𑒻𑓀 𑒔𑒰𑒩𑒱 𑒁𑒜𑓃𑒻𑒨𑒰 𑒔𑒱𑒢𑓂𑒢𑒲 𑒠𑒩𑒥𑒖𑓂𑒖𑒰𑒣𑒩 𑒣𑒚𑒰𑒋𑒞, 𑒖𑒪𑓂𑒠𑒲। 𑒯𑒧𑒩 𑒢𑒰𑒧 𑒪𑒱𑒐𑒥𑒰 𑒠𑒱𑒯𑒻𑓀।
𑒪𑒰𑒪𑒰: 𑒮𑒹 𑒢𑒻 𑒯𑒹𑒞𑓄, 𑒯𑒧𑓂𑒧𑒩 𑒢𑒰𑒧 𑒪𑒱𑒐𑒥𑒰 𑒠𑒱𑒯𑒻𑓀 𑒩𑒾।
𑒠𑒰𑒠𑒰- 𑒢𑒻 𑒩𑒾, 𑒯𑒧𑓂𑒧𑒩 𑒢𑒰𑒧।
𑒥𑒱𑒪𑒙- 𑒯𑒹, 𑒥𑒰𑒅 𑒥𑒔𑓂𑒔𑒰 𑒏𑒼𑒢𑒼 𑒞𑒼𑒩𑒰 𑒮𑒦𑒏 𑒙𑒼𑒪𑒏 𑒕𑒱𑒁। 𑒯𑒧𑓂𑒧𑒩 𑒢𑒰𑒧 𑒪𑒱𑒐𑒥𑒰 𑒠𑒱𑒯𑒻𑓀 𑒩𑒾 𑒕𑒾𑒛𑓃𑒰।
𑒧𑒲𑒞- (𑒋𑒏 𑒯𑒰𑒟 𑒧𑒼𑒛𑓃𑒢𑒹) 𑒋𑒏-𑒋𑒏 𑒁𑒜𑓃𑒻𑒨𑒰 𑒔𑒰𑒩𑒴 𑒑𑒼𑒙𑒹𑒏 𑒢𑒰𑒧𑒣𑒩 𑒪𑒱𑒐𑒥𑒰 𑒠𑒹𑒥𑓄।
(𑒮𑒦 𑒯𑒿𑒮𑓄 𑒪𑒑𑒻𑒋।)
𑒜𑒼𑒪𑒯𑒼 𑒠𑒹𑒢𑒯𑒰𑒩: 𑒢𑒫𑒏𑒰 𑒃𑒢𑓂𑒖𑒲𑒢𑒱𑒨𑒩 𑒯𑒰𑒏𑒱𑒧 𑒂𑒃𑒮𑒿 𑒑𑒰𑒧𑒏 𑒥𑒰𑒯𑒩𑒏 𑒡𑒰𑒩𑒏 𑒣𑒳𑒪 𑒥𑒢𑒰𑒍𑒞, 𑒕𑒼𑒙𑒏𑒰 𑒣𑒳𑒪। 𑒍𑒏𑒩𑒰 𑒮𑒛𑓃𑒏𑒮𑒿 𑒖𑒼𑒛𑓃𑒪 𑒖𑒰𑒋𑒞। 𑒮𑒦 𑒁𑒣𑒢-𑒁𑒣𑒢 𑒐𑒹𑒞𑒏 𑒧𑒰𑒿𑒙𑒱 𑒖𑒾𑒿 𑒮𑒛𑓃𑒏𑒣𑒩 𑒏𑒰𑒙𑒱 𑒏𑓄 𑒠𑒹𑒥𑒻 𑒞𑒿 𑒖𑒹 𑒏𑒰𑒖 𑒮𑒰𑒪 𑒦𑒩𑒱𑒧𑒹 𑒯𑒹𑒥𑒰𑒏 𑒮𑒹 𑒋𑒏 𑒧𑒰𑒮𑒧𑒹 𑒦𑓄 𑒖𑒰𑒋𑒞। 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅....। 𑒢𑒫𑒏𑒰 𑒃𑒢𑓂𑒖𑒲𑒢𑒱𑒨𑒩 𑒯𑒰𑒏𑒱𑒧 𑒂𑒃𑒮𑒿 𑒑𑒰𑒧𑒏 𑒥𑒰𑒯𑒩𑒏 𑒡𑒰𑒩𑒏 𑒣𑒳𑒪 𑒥𑒢𑒰𑒍𑒞, 𑒕𑒼𑒙𑒏𑒰 𑒣𑒳𑒪।
(𑒞𑒐𑒢𑒹 𑒧𑒖𑒠𑒴𑒩 𑒮𑒦 𑒏𑒼𑒠𑒰𑒩𑒱 𑒪𑓄 𑒏𑓄 𑒂𑒥𑒱 𑒖𑒰𑒃𑒋, 𑒔𑒰𑒩𑒱𑒙𑒰 𑒏𑒼𑒠𑒰𑒩𑒱 𑒋𑒏 𑒑𑒼𑒙𑒹𑒏 𑒯𑒰𑒟𑒧𑒹 𑒥𑒹𑒬𑒲 𑒕𑒻, 𑒪𑒰𑒪𑒰, 𑒠𑒰𑒠𑒰, 𑒥𑒱𑒪𑒙 𑒂 𑒥𑒰𑒅𑒏𑒹𑒿 𑒍 𑒋𑒏-𑒋𑒏𑒙𑒰 𑒏𑒼𑒠𑒰𑒩𑒱 𑒠𑓄 𑒠𑒻 𑒕𑒻। 𑒮𑒦 𑒏𑒰𑒪𑓂𑒣𑒢𑒱𑒏 𑒩𑒴𑒣𑒮𑒿 𑒧𑒰𑒙𑒱 𑒅𑒐𑒰𑒩𑓄 𑒪𑒑𑒻 𑒖𑒰𑒃𑒋। 𑒧𑒲𑒞 𑒮𑒦𑒏𑒹𑒿 𑒠𑒹𑒐𑒻𑒞 𑒃𑒬𑒰𑒩𑒰 𑒠𑒻𑒞 𑒜𑒼𑒪𑒯𑒼 𑒠𑒹𑒢𑒯𑒰𑒩𑒏 𑒮𑓀𑒑 𑒣𑓂𑒩𑒮𑓂𑒟𑒰𑒢 𑒏𑒩𑒻𑒋। 𑒁𑒦𑒱𑒨𑒢𑓂𑒞𑒰 𑒖𑒹𑒥𑒲𑒮𑒿 𑒃𑒢𑓂𑒔𑒲 𑒙𑒹𑒣 𑒢𑒱𑒏𑒰𑒪𑒻𑒋 𑒂 𑒢𑒰𑒣-𑒖𑒼𑒐 𑒏𑒩𑓄 𑒪𑒑𑒻𑒋।)



























𑒣𑒪𑓂𑒪𑒫 𑒔𑒰𑒩𑒱
(𑒣𑒙𑒢𑒰𑒧𑒹 𑒧𑒳𑒐𑓂𑒨𑒧𑓀𑒞𑓂𑒩𑒲𑒏 𑒏𑒰𑒩𑓂𑒨𑒰𑒪𑒨। 𑒧𑒳𑒐𑓂𑒨𑒧𑓀𑒞𑓂𑒩𑒲 𑒏𑒳𑒩𑓂𑒮𑒲𑒣𑒩 𑒥𑒻𑒮𑒪 𑒕𑒟𑒱 𑒂 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒏𑒪 𑒖𑒼𑒛𑓃𑒱 𑒏𑓄 𑒚𑒰𑒜𑓃 𑒕𑒟𑒱।)
𑒧𑒳𑒐𑓂𑒨𑒧𑓀𑒞𑓂𑒩𑒲- 𑒠𑒹𑒬𑒏𑒹𑒿 𑒮𑓂𑒫𑒞𑓀𑒞𑓂𑒩 𑒦𑒹𑒢𑒰 𑒏𑒞𑒹𑒏 𑒮𑒰𑒪 𑒦𑓄 𑒑𑒹𑒪 𑒧𑒳𑒠𑒰 𑒣𑒙𑒢𑒰𑒧𑒹 𑒑𑓀𑒑𑒰 𑒢𑒠𑒲𑒣𑒩 𑒋𑒏𑒼𑒙𑒰 𑒣𑒳𑒪 𑒢𑒻 𑒥𑒢𑒪। 𑒥𑒛𑓂𑒛 𑒣𑓂𑒩𑒨𑒰𑒮 𑒏𑒹𑒪𑒰𑒣𑒩 𑒌𑒥𑒹𑒩 𑒋𑒏𑒩𑒰 𑒪𑒹𑒪 𑒤𑒝𑓂𑒛𑒏 𑒫𑓂𑒨𑒫𑒮𑓂𑒟𑒰 𑒦𑒹𑒪 𑒁𑒕𑒱। 𑒁𑒯𑒰𑒿 𑒮𑓀𑒑 𑒥𑒻𑒮𑒏𑒲 𑒌 𑒪𑒹𑒪 𑒥𑒖𑒰𑒍𑒪 𑒑𑒹𑒪 𑒁𑒕𑒱 𑒖𑒹 𑒋𑒏𑒩𑒰 𑒪𑒹𑒪 𑒖𑒹 𑒙𑒹𑒝𑓂𑒛𑒩 𑒠𑒹𑒪 𑒖𑒰𑒋𑒞 𑒞𑒏𑒩 𑒕𑒰𑒩-𑒦𑒰𑒩 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒹 𑒣𑒩 𑒢𑒹 𑒩𑒯𑒻 𑒕𑒻। 𑒁𑒐𑒥𑒰𑒩𑒧𑒹 𑒫𑒱𑒖𑓂𑒘𑒰𑒣𑒢 𑒠𑓄 𑒠𑒱𑒨𑒾 𑒧𑒳𑒠𑒰.. (𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰𑒏𑒹𑒿 𑒥𑒖𑒥𑒻 𑒕𑒟𑒱 𑒂 𑒏𑒰𑒢𑒧𑒹 𑒏𑒱𑒕𑒳 𑒤𑒳𑒮𑒤𑒳𑒮𑒰 𑒏𑓄 𑒏𑒯𑒻 𑒕𑒟𑒱) ..𑒥𑒳𑒗𑒱 𑒑𑒹𑒪𑒱𑒌 𑒢𑒹। 𑒁𑒣𑒢 𑒧𑒼𑒢𑒧𑒰𑒤𑒱𑒏 𑒪𑒼𑒏𑒏𑒹𑒿 𑒋𑒏𑒩 𑒚𑒹𑒏𑒰 𑒦𑒹𑒙𑒋। 𑒂 𑒁𑒯𑒰𑒿 𑒮𑓀𑒑𑒹 𑒃𑒢𑓂𑒖𑒲𑒢𑒱𑒨𑒩𑒱𑓀𑒑 𑒏𑒰𑒪𑒹𑒖𑒮𑒿 𑒏𑒞𑒹𑒏 𑒩𑒰𑒮 𑒫𑒱𑒠𑓂𑒨𑒰𑒩𑓂𑒟𑒲 𑒥𑒯𑒩𑒹𑒪𑒰, 𑒯𑒳𑒢𑒏𑒰 𑒮𑒦𑒏𑒹𑒿 𑒂𑒥 𑒢𑒲𑒏 𑒁𑒢𑒳𑒦𑒫 𑒦𑓄 𑒑𑒹𑒪 𑒕𑒢𑓂𑒯𑒱। 𑒍𑒃𑒧𑒹 𑒮𑒿 𑒜𑒓𑒏 𑒁𑒦𑒱𑒨𑒢𑓂𑒞𑒰 𑒮𑒦𑒏𑒹𑒿 𑒂𑒢𑒴 𑒖𑒹 𑒁𑒣𑒢 𑒏𑒰𑒖 𑒢𑒲𑒏 𑒖𑒹𑒏𑒰𑒿 𑒖𑒢𑒻𑒞 𑒯𑒼𑒟𑒱।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒯𑒿, 𑒮𑒹 𑒞𑒿 𑒏𑒩𑒻𑒋 𑒣𑒛𑓃𑒞। 𑒢𑒻 𑒞𑒿 𑒌 𑒚𑒱𑒏𑒹𑒠𑒰𑒩 𑒮𑒦𑒣𑒩 𑒪𑒑𑒰𑒧 𑒏𑒹𑒢𑒰 𑒏𑒮𑒪 𑒯𑒋𑒞।
(𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰𑒏 𑒣𑓂𑒩𑒮𑓂𑒟𑒰𑒢।)
𑒧𑒳𑒐𑓂𑒨𑒧𑓀𑒞𑓂𑒩𑒲: (𑒠𑒩𑓂𑒬𑒏 𑒠𑒱𑒮 𑒞𑒰𑒏𑒱) 𑒄 𑒑𑓀𑒑𑒰 𑒥𑓂𑒩𑒱𑒖 𑒫𑒱𑒏𑒰𑒮𑒏 𑒑𑒞𑒱 𑒥𑒜𑓃𑒰 𑒠𑒹𑒞। 𑒪𑒼𑒏 𑒖𑒹 𑒬𑒱𑒟𑒱𑒪 𑒦𑓄 𑒥𑒻𑒮𑒪 𑒁𑒕𑒱, 𑒂𑒫𑒰𑒖𑒰𑒯𑒲 𑒏𑒩𑓄 𑒪𑒰𑒑𑒞। 𑒪𑒼𑒏𑒏 𑒠𑒱𑒧𑒰𑒑 𑒂𑒫𑒰𑒖𑒰𑒯𑒲𑒮𑒿 𑒐𑒳𑒖𑒞𑒻।
(𑒢𑒹𑒣𑒟𑓂𑒨𑒮𑒿 𑒞𑒰𑒪𑒲𑒏 𑒑𑒩𑒑𑒛𑓃𑒰𑒯𑒙𑒱)
𑒥𑒛𑓂𑒛 𑒧𑒼𑒬𑓂𑒏𑒱𑒪𑒮𑒿 𑒮𑓂𑒫𑒞𑓀𑒞𑓂𑒩 𑒦𑒹𑒪 𑒁𑒕𑒱 𑒪𑒼𑒏। 𑒧𑒳𑒠𑒰 𑒌 𑒮𑓂𑒫𑒞𑓀𑒞𑓂𑒩𑒞𑒰 𑒪𑒹𑒪 𑒖𑒞𑒹𑒏 𑒥𑒪𑒱𑒠𑒰𑒢 𑒠𑒹𑒥𑓄 𑒣𑒛𑓃𑒪 𑒁𑒕𑒱, 𑒍𑒃𑒮𑒿 𑒥𑒹𑒬𑒲 𑒥𑒪𑒱𑒠𑒰𑒢 𑒠𑒹𑒧𑒋 𑒣𑒛𑓃𑒞 𑒍𑒏𑒩𑒰 𑒥𑒔𑒹𑒥𑒰 𑒪𑒹𑒪। 𑒄 𑒡𑒰𑒩, 𑒄 𑒣𑒳𑒪, 𑒮𑒦 𑒥𑒪𑒱𑒠𑒰𑒢 𑒧𑓀𑒑𑒻𑒞 𑒁𑒕𑒱। (𑒧𑓀𑒔𑒏 𑒠𑒼𑒮𑒩 𑒠𑒱𑒮 𑒯𑒰𑒟𑒮𑒿 𑒮𑓀𑒏𑒹𑒞 𑒏𑒩𑒻𑒞) 𑒄 𑒑𑓀𑒑𑒰, 𑒏𑒲 𑒥𑒳𑒗𑒰𑒃𑒋 𑒥𑒱𑒢𑒳 𑒥𑒪𑒱𑒠𑒰𑒢𑒹 𑒌𑒣𑒩 𑒣𑒳𑒪 𑒥𑒢𑒱 𑒮𑒏𑒞? 𑒐𑒴𑒢 𑒔𑒰𑒯𑒲 𑒋𑒏𑒩𑒰। 𑒏𑒲 𑒠𑓄 𑒮𑒏𑒥 𑒁𑒯𑒰𑒿?
(𑒢𑒹𑒣𑒟𑓂𑒨𑒮𑒿- 𑒯𑒧 𑒮𑒦 𑒐𑒴𑒢 𑒠𑒹𑒥, 𑒖𑒞𑒹𑒏 𑒔𑒰𑒯𑒲 𑒐𑒴𑒢 𑒠𑒹𑒥।)
𑒧𑒳𑒐𑓂𑒨𑒧𑓀𑒞𑓂𑒩𑒲- 𑒨𑒋𑒯 𑒮𑒳𑒢𑓄 𑒔𑒰𑒯𑒻 𑒕𑒪𑒾𑓀 𑒯𑒧। 𑒨𑒋𑒯 𑒠𑒹𑒐𑓄 𑒔𑒰𑒯𑒻 𑒕𑒲। 𑒯𑒧 𑒁𑒣𑒢 𑒦𑒫𑒱𑒭𑓂𑒨𑒏 𑒣𑒲𑒜𑓃𑒲 𑒪𑒹𑒪 𑒖𑒞𑒹𑒏 𑒥𑒪𑒱𑒠𑒰𑒢 𑒠𑒹𑒥, 𑒞𑒞𑒹𑒏 𑒥𑒹𑒬𑒲 𑒮𑒳𑒐𑒲 𑒦𑒫𑒱𑒭𑓂𑒨𑒏 𑒣𑒲𑒜𑓃𑒲 𑒯𑒋𑒞।
(𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒁𑒥𑒻𑒋। 𑒧𑒳𑒐𑓂𑒨𑒧𑓀𑒞𑓂𑒩𑒲 𑒠𑒩𑓂𑒬𑒏 𑒠𑒱𑒮𑒮𑒿 𑒧𑒳𑒿𑒯 𑒒𑒳𑒧𑒰 𑒏𑓄 𑒍𑒏𑒩𑒰 𑒠𑒱𑒮 𑒧𑒳𑒿𑒯 𑒏𑓄 𑒪𑒻𑒋।)
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒑𑒣 𑒦𑓄 𑒑𑒹𑒪 𑒁𑒕𑒱। 𑒚𑒱𑒏𑒹𑒠𑒰𑒩 𑒏𑒧𑒲𑒬𑒢 𑒠𑒻 𑒪𑒹𑒪 𑒞𑒻𑒨𑒰𑒩 𑒁𑒕𑒱।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒂 𑒪𑒼𑒏 𑒥𑒪𑒱𑒠𑒰𑒢 𑒠𑒻 𑒪𑒹𑒪।
(𑒠𑒳𑒢𑒴𑒏 𑒚𑒯𑒏𑓂𑒏𑒰।)
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒃𑒢𑓂𑒖𑒲𑒢𑒱𑒨𑒩𑒏 𑒪𑒱𑒮𑓂𑒙 𑒞𑒻𑒨𑒰𑒩 𑒏𑓄 𑒩𑒯𑒪 𑒕𑒲। 𑒏𑒰𑒖 𑒏𑒩𑒻𑒥𑒪𑒰 𑒪𑒼𑒏 𑒔𑒰𑒯𑒲 𑒢𑒻 𑒞𑒿 𑒄 𑒚𑒱𑒏𑒹𑒠𑒩𑒥𑒰 𑒮𑒦𑒙𑒰 𑒪𑒴𑒙𑒱 𑒐𑒰𑒋𑒞।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒏𑒧𑒲𑒬𑒢 𑒑𑒕𑒱 𑒏𑓄 𑒏𑒼𑒢𑒼 𑒐𑒩𑒲𑒠 𑒪𑒹𑒢𑒹 𑒁𑒕𑒱 𑒚𑒱𑒏𑒹𑒠𑒩𑒥𑒰। 𑒮𑒫𑒰𑒩𑒲 𑒏𑒮𑒢𑒹 𑒩𑒯𑒋 𑒣𑒛𑓃𑒞। 𑒢𑒻 𑒞𑒿 𑒪𑒼𑒏𑒏 𑒥𑒪𑒱𑒠𑒰𑒢 𑒐𑒰𑒪𑒲 𑒔𑒪𑒱 𑒖𑒰𑒋𑒞।
(𑒠𑒳𑒢𑒴𑒏 𑒚𑒯𑒏𑓂𑒏𑒰)




𑒣𑒪𑓂𑒪𑒫 𑒣𑒰𑒿𑒔

(𑒯𑒻𑒪𑓂𑒧𑒹𑒙 𑒣𑒯𑒲𑒩 𑒏𑓄 𑒁𑒦𑒱𑒨𑒢𑓂𑒞𑒰 𑒂 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰𑒏 𑒣𑓂𑒩𑒫𑒹𑒬, 𑒯𑒹𑒪𑓂𑒧𑒹𑒙 𑒣𑒯𑒱𑒩𑒢𑒹 𑒧𑒖𑒠𑒴𑒩 𑒮𑒦𑒏 𑒣𑓂𑒩𑒮𑓂𑒟𑒰𑒢।)
𑒁𑒦𑒱𑒨𑒢𑓂𑒞𑒰: 𑒏𑒰𑒖𑒏 𑒣𑓂𑒩𑒑𑒞𑒱𑒮𑒿, 𑒏𑒰𑒖 𑒏𑒩𑒥𑒰𑒏 𑒞𑒩𑒲𑒏𑒰𑒮𑒿 𑒯𑒧 𑒐𑒳𑒬𑒲 𑒢𑒻 𑒕𑒲। 𑒢𑒻 𑒞𑒿 𑒏𑒼𑒢𑒼 𑒣𑓂𑒩𑒏𑒰𑒩𑒏 𑒮𑒳𑒩𑒏𑓂𑒭𑒰𑒏 𑒃𑒢𑓂𑒞𑒖𑒰𑒧 𑒁𑒕𑒱 𑒂 𑒢𑒹 𑒮𑒧𑒰𑒢𑒏 𑒑𑒳𑒝𑒫𑒞𑓂𑒞𑒰𑒣𑒩 𑒏𑒼𑒢𑒼 𑒡𑓂𑒨𑒰𑒢 𑒁𑒕𑒱। 𑒏𑒰𑒖 𑒮𑒹𑒯𑒼 𑒮𑒦𑒙𑒰 𑒠𑒴 𑒢𑒧𑓂𑒥𑒩𑒏 𑒦𑓄 𑒩𑒯𑒪 𑒁𑒕𑒱। 𑒮𑒳𑒩𑒏𑓂𑒭𑒰𑒏 𑒃𑒢𑓂𑒞𑒖𑒰𑒧 𑒩𑒯𑒱𑒞𑒋 𑒞𑒿 𑒋𑒞𑒹𑒏 𑒧𑒖𑒠𑒴𑒩 𑒡𑒰𑒩𑒧𑒹 𑒐𑒮𑒱 𑒏𑓄, 𑒐𑒡𑒰𑒃𑒧𑒹 𑒐𑒮𑒱 𑒏𑓄 𑒧𑒬𑒲𑒢𑒣𑒩 𑒐𑒮𑒱 𑒏𑓄 𑒢𑒻 𑒧𑒩𑒱𑒞𑒋। 𑒒𑒰𑒃𑒪 𑒧𑒹 𑒮𑒿 𑒏𑒞𑒹𑒏𑒼 𑒏𑒹𑒿 𑒥𑒔𑒰𑒍𑒪 𑒖𑒰 𑒮𑒏𑒻 𑒕𑒪। 𑒤𑒩𑓂𑒮𑓂𑒙-𑒌𑒛 𑒡𑒩𑒱𑒏 𑒫𑓂𑒨𑒫𑒮𑓂𑒟𑒰 𑒢𑒻 𑒁𑒕𑒱। 𑒣𑒕𑒱𑒪𑒰 𑒧𑒰𑒮 𑒞𑒲𑒮 𑒙𑒰 𑒧𑒖𑒠𑒴𑒩 𑒧𑒩𑒱 𑒑𑒹𑒪। 𑒋𑒏 𑒮𑒰𑒪𑒧𑒹 𑒞𑒲𑒢 𑒮𑒋 𑒧𑒖𑒠𑒴𑒩 𑒧𑒩𑒱 𑒑𑒹𑒪। 𑒧𑒰𑒞𑓂𑒩 𑒠𑒮 𑒑𑒼𑒙𑒹𑒏 𑒣𑒩𑒱𑒫𑒰𑒩𑒏𑒹𑒿 𑒁𑒢𑒳𑒏𑒧𑓂𑒣𑒰𑒏 𑒁𑒢𑒳𑒬𑓀𑒮𑒰 𑒦𑒹𑒪𑒻। 𑒠𑒼𑒮𑒩 𑒮𑒦𑒏 𑒤𑒰𑒃𑒪 𑒖𑒹 𑒯𑒧 𑒥𑒜𑓃𑒹𑒪𑒾𑓀, 𑒞𑒏𑒩 𑒏𑒲 𑒦𑒹𑒪𑒻।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰:𑒠𑒹𑒐𑒴, 𑒁𑒯𑒰𑒿 𑒯𑒧𑒩𑒰 𑒮𑓀𑒑𑒹 𑒣𑒜𑓃𑒻 𑒕𑒪𑒾𑓀। 𑒁𑒯𑒰𑒿 𑒏𑒰𑒥𑒱𑒪 𑒃𑒢𑓂𑒖𑒲𑒢𑒱𑒨𑒩 𑒕𑒲 𑒧𑒳𑒠𑒰 𑒁𑒯𑒰𑒿 𑒃𑒢𑓂𑒖𑒲𑒢𑒱𑒨𑒩𑒱𑓀𑒑 𑒡𑒩𑒱 𑒁𑒣𑒢𑒰𑒏𑒹𑒿 𑒮𑒲𑒧𑒱𑒞 𑒏𑒱𑒋 𑒢𑒻 𑒩𑒰𑒐𑒻 𑒕𑒲? 𑒁𑒯𑒰𑒿 𑒥𑒱𑒢𑒰 𑒥𑒰𑒞𑒏 𑒁𑒢𑒳𑒏𑒧𑓂𑒣𑒰 𑒂 𑒁𑒢𑒳𑒠𑒰𑒢𑒏 𑒧𑒳𑒠𑓂𑒠𑒰 𑒏𑒱𑒋 𑒅𑒚𑒰 𑒩𑒯𑒪 𑒕𑒲। 𑒁𑒯𑒰𑒿 𑒥𑒛𑓃-𑒥𑒩𑒢𑒲 𑒤𑒰𑒃𑒪 𑒥𑒜𑓃𑒰 𑒠𑒹𑒪𑒱𑒌, 𑒂𑒥 𑒂𑒑𑒰𑒿 𑒏𑒲 𑒦𑒹𑒪𑒻, 𑒏𑒱𑒋 𑒦𑒹𑒪𑒻, 𑒍𑒃𑒮𑒿 𑒁𑒯𑒰𑒿𑒏𑒹𑒿 𑒏𑒲 𑒧𑒞𑒪𑒥 𑒁𑒕𑒱?
𑒁𑒦𑒱𑒨𑒢𑓂𑒞𑒰: 𑒧𑒰𑒢𑒹? 𑒃𑒢𑓂𑒖𑒲𑒢𑒱𑒨𑒩𑒱𑓀𑒑 𑒧𑒰𑒢𑒹 𑒧𑒖𑒠𑒴𑒩 𑒖𑒰𑒢𑒏 𑒏𑒼𑒢𑒼 𑒧𑒼𑒪 𑒢𑒻। 𑒥𑒼𑒢𑒱𑒯𑒰𑒩𑒏 𑒖𑒱𑒢𑒑𑒲 𑒔𑒪𑒱 𑒑𑒹𑒪𑒻 𑒧𑒳𑒠𑒰 𑒍𑒏𑒩 𑒣𑒩𑒱𑒫𑒰𑒩? 𑒍𑒏𑒩 𑒏𑒲 𑒯𑒹𑒞𑒻? 𑒍𑒏𑒩 𑒦𑒼𑒖𑒢 𑒏𑒹𑒢𑒰 𑒔𑒪𑒞𑒻? 𑒍𑒏𑒩 𑒥𑒔𑓂𑒔𑒰𑒏𑒹𑒿 𑒧𑒰𑒋-𑒥𑒰𑒣𑒏 𑒮𑓂𑒢𑒹𑒯 𑒏𑒼𑒢𑒰 𑒦𑒹𑒙𑒞𑒻? 𑒏𑒰𑒪𑓂𑒯𑒱 𑒞𑒿 𑒠𑒳𑒢𑒴 𑒥𑒼𑒢𑒱𑒯𑒰𑒩-𑒥𑒼𑒢𑒱𑒯𑒰𑒩𑒱𑒢 𑒫𑒩-𑒏𑒢𑒱𑒨𑒰𑒿 𑒣𑒳𑒪𑒏 𑒣𑒰𑒨𑒰𑒮𑒿 𑒢𑒲𑒔𑒰𑒿 𑒐𑒮𑒱 𑒏𑓄 𑒧𑒩𑒱 𑒑𑒹𑒪𑒻। 𑒍𑒏𑒩 𑒥𑒔𑓂𑒔𑒰𑒏 𑒦𑒰𑒩 𑒏𑒲 𑒮𑒩𑒏𑒰𑒩𑒣𑒩 𑒢𑒻 𑒕𑒻। 𑒂 𑒍 𑒣𑒰𑒃 𑒮𑒩𑒏𑒰𑒩𑒏 𑒖𑒹𑒥𑒲𑒮𑒿 𑒖𑒹𑒞𑒻, 𑒍𑒃𑒧𑒹 𑒁𑒯𑒰𑒿𑒏𑒹𑒿 𑒏𑒼𑒢 𑒢𑒼𑒏𑒮𑒰𑒢 𑒁𑒕𑒱।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒠𑒹𑒐𑒴। 𑒋𑒞𑒹𑒏 𑒧𑒵𑒞𑒏𑒏 𑒮𑓀𑒐𑓂𑒨𑒰 𑒖𑒿 𑒮𑒼𑒗𑒰𑒿 𑒋𑒞𑒻 𑒞𑒿 𑒯𑒧𑒩𑒰 𑒂 𑒧𑒳𑒐𑓂𑒨𑒧𑓀𑒞𑓂𑒩𑒲𑒣𑒩 𑒂𑒩𑒼𑒣 𑒪𑒰𑒑𑒞। 𑒑𑒡𑒧𑒱𑒮𑒰𑒢 𑒧𑒔𑒱 𑒖𑒹𑒞𑒻। 𑒧𑒖𑒠𑒴𑒩 𑒮𑒦 𑒚𑒰𑒧-𑒚𑒰𑒧𑒏 𑒁𑒕𑒱, 𑒧𑒳𑒠𑒰 𑒖𑒿 𑒮𑒧𑒰𑒔𑒰𑒩 𑒥𑒯𑒩𑒹𑒞𑒻 𑒞𑒿 𑒣𑒴𑒩𑒰 𑒠𑒹𑒬𑒧𑒹 𑒂𑒑𑒱 𑒪𑒰𑒑𑒱 𑒖𑒹𑒞𑒻। 𑒫𑒱𑒬𑓂𑒫𑒧𑒹 𑒥𑒠𑒢𑒰𑒧𑒲 𑒯𑒹𑒞𑒻। 𑒐𑒴𑒢𑒲 𑒧𑒼𑒏𑒠𑒧𑒰 𑒔𑒪𑒞𑒻। 𑒢𑒻 𑒯𑒧𑒯𑒲𑓀 𑒥𑒔𑒥, 𑒢𑒯𑒱𑒨𑒹 𑒧𑒳𑒐𑓂𑒨𑒧𑓀𑒞𑓂𑒩𑒲 𑒥𑒔𑒞𑒰। 𑒁𑒯𑒰𑒿𑒏 𑒔𑒪𑒞𑒹 𑒄 𑒮𑒦 𑒯𑒹𑒞𑒻। 𑒁𑒯𑒲 𑒠𑒳𑒂𑒩𑒹 𑒯𑒧 𑒁𑒯𑒰𑒿𑒏𑒹𑒿 𑒁𑒢𑒢𑒹 𑒩𑒯𑒾𑓀 𑒌 𑒣𑓂𑒩𑒼𑒖𑒹𑒏𑓂𑒙𑒧𑒹? 𑒋𑒞𑒹𑒏 𑒣𑒻𑒒 𑒣𑓂𑒩𑒼𑒖𑒹𑒏𑓂𑒙𑒧𑒹 𑒠𑒳𑒃𑒨𑒼 𑒯𑒖𑒰𑒩 𑒥𑒪𑒱 𑒑𑓀𑒑𑒰 𑒧𑒻𑒨𑒰 𑒢𑒻 𑒪𑒹𑒟𑒱𑒢𑓂𑒯? 𑒧𑒳𑒠𑒰 𑒌 𑒣𑓂𑒩𑒼𑒖𑒹𑒏𑓂𑒙𑒏 𑒮𑒧𑒰𑒣𑓂𑒞𑒱𑒏 𑒥𑒰𑒠 𑒖𑒹 𑒮𑒧𑓂𑒧𑒰𑒢 𑒯𑒧𑒩𑒰 𑒦𑒹𑒙𑒞 𑒍𑒃𑒧𑒹 𑒁𑒯𑒴𑒿𑒏 𑒯𑒱𑒮𑓂𑒮𑒰 𑒩𑒯𑒞।
𑒁𑒦𑒱𑒨𑒢𑓂𑒞𑒰: 𑒍𑒯𑒲 𑒯𑒱𑒮𑓂𑒮𑒰𑒮𑒿 𑒛𑒩𑒰 𑒩𑒯𑒪 𑒕𑒲 𑒯𑒧। 𑒮𑒧𑓂𑒧𑒰𑒢𑒏 𑒯𑒱𑒮𑓂𑒮𑒰𑒏 𑒮𑓀𑒑 𑒌 𑒥𑒪𑒱𑒏 𑒥𑒰 𑒯𑒞𑓂𑒨𑒰𑒏 𑒯𑒱𑒮𑓂𑒮𑒰 𑒮𑒹𑒯𑒼 𑒦𑒹𑒙𑒞, 𑒍𑒏𑒩 𑒯𑒱𑒮𑓂𑒮𑒰 𑒢𑒻 𑒔𑒰𑒯𑒻 𑒕𑒲 𑒯𑒧।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒁𑒯𑒰𑒿 𑒖𑒹 𑒏𑒩𑓄 𑒔𑒰𑒯𑒻 𑒕𑒲 𑒍𑒃𑒮𑒿 𑒫𑒱𑒏𑒰𑒮 𑒩𑒳𑒏𑒞।
𑒁𑒦𑒱𑒨𑒢𑓂𑒞𑒰: 𑒏𑒼𑒢 𑒫𑒱𑒏𑒰𑒮। 𑒏𑒼𑒢 𑒧𑒼𑒪𑒣𑒩 𑒯𑒋𑒞 𑒄 𑒫𑒱𑒏𑒰𑒮। 𑒂 𑒏𑒞𑒹𑒏 𑒠𑒱𑒢𑒏 𑒪𑒹𑒪 𑒁𑒕𑒱 𑒄 𑒫𑒱𑒏𑒰𑒮।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒠𑒳𑒢𑒱𑒨𑒰𑒿𑒧𑒹 𑒮𑒦 𑒚𑒰𑒧 𑒁𑒯𑒱𑒢𑒰 𑒫𑒱𑒏𑒰𑒮 𑒦𑒹𑒪 𑒕𑒻।
𑒁𑒦𑒱𑒨𑒢𑓂𑒞𑒰: 𑒞𑒹𑒿 𑒌 𑒣𑒳𑒪𑒏 𑒧𑒩𑒼𑒧𑓂𑒧𑒞𑒱 𑒅𑒠𑓂𑒒𑒰𑒙𑒢 𑒦𑒹𑒪𑒰𑒮𑒿 𑒣𑒯𑒱𑒢𑒯𑒱𑒨𑒹𑒮𑒿 𑒯𑒹𑒥𑓄 𑒪𑒰𑒑𑒪 𑒕𑒻। 𑒞𑒹𑒯𑒹𑒢 𑒧𑒖𑒑𑒴𑒞 𑒁𑒕𑒱 𑒄 𑒫𑒱𑒏𑒰𑒮।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: (𑒏𑒢𑒹 𑒖𑒼𑒩𑒮𑒿) 𑒠𑒳𑒢𑒱𑒨𑒰𑒿𑒧𑒹 𑒮𑒦 𑒚𑒰𑒧 𑒁𑒯𑒱𑒢𑒰 𑒫𑒱𑒏𑒰𑒮 𑒦𑒹𑒪 𑒕𑒻।
𑒁𑒦𑒱𑒨𑒢𑓂𑒞𑒰: 𑒞𑒹𑒿 𑒪𑒼𑒏 𑒏𑒯𑓄 𑒪𑒰𑒑𑒪 𑒁𑒕𑒱 𑒖𑒹 𑒁𑓀𑒑𑓂𑒩𑒹𑒖𑒏 𑒣𑒳𑒪 𑒚𑒰𑒜𑓃𑒹 𑒕𑒻 𑒂 𑒮𑓂𑒫𑒞𑓀𑒞𑓂𑒩 𑒦𑒰𑒩𑒞𑒏 𑒣𑒳𑒪 𑒥𑒢𑒻𑒮𑒿 𑒣𑒯𑒱𑒢𑒯𑒱𑒨𑒹 𑒙𑒴𑒙𑒱 𑒩𑒯𑒪 𑒕𑒻!
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: (𑒖𑒼𑒩𑒮𑒿) 𑒠𑒳𑒢𑒱𑒨𑒰𑒿𑒧𑒹 𑒮𑒦 𑒚𑒰𑒧 𑒁𑒯𑒱𑒢𑒰 𑒫𑒱𑒏𑒰𑒮 𑒦𑒹𑒪 𑒕𑒻।
𑒁𑒦𑒱𑒨𑒢𑓂𑒞𑒰: 𑒞𑒐𑒢 𑒞𑒿 𑒪𑒼𑒏 𑒥𑒰𑒖𑓄 𑒪𑒰𑒑𑒞 𑒖𑒹 𑒁𑓀𑒑𑓂𑒩𑒹𑒖𑒹𑒏 𑒩𑒰𑒖 𑒢𑒲𑒏 𑒩𑒯𑒻।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒥𑒰𑒖𑓄 𑒠𑒱𑒨𑒾।
𑒁𑒦𑒱𑒨𑒢𑓂𑒞𑒰: 𑒪𑒼𑒏 𑒏𑒯𑒞 𑒖𑒹 𑒮𑒦𑒙𑒰 𑒣𑒰𑒃 𑒁𑒦𑒱𑒨𑒢𑓂𑒞𑒰 𑒐𑒰 𑒑𑒹𑒪𑒻।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒥𑒰𑒖𑓄 𑒠𑒱𑒨𑒾। 𑒁𑒦𑒱𑒨𑒢𑓂𑒞𑒰 𑒏𑒲 𑒁𑒣𑒢 𑒖𑒹𑒥𑒲𑒧𑒹 𑒩𑒰𑒐𑒞, 𑒋𑒞𑒻 𑒐𑒩𑓂𑒔𑒰 𑒏𑒩𑒞। 𑒥𑒩𑒐𑒰 𑒦𑒰𑒩𑒞𑒹𑒧𑒹 𑒯𑒹𑒞𑒻 𑒃𑓀𑒑𑓂𑒪𑒻𑒝𑓂𑒛𑒧𑒹 𑒢𑒻।
𑒁𑒦𑒱𑒨𑒢𑓂𑒞𑒰: 𑒃𑒢𑓂𑒖𑒲𑒢𑒱𑒨𑒩𑒱𑓀𑒑𑒏 𑒁𑒪𑒰𑒥𑒹 𑒁𑒩𑓂𑒟𑒬𑒰𑒮𑓂𑒞𑓂𑒩𑒏 𑒮𑒹𑒯𑒼 𑒁𑒯𑒰𑒿 𑒁𑒡𑓂𑒨𑒨𑒢 𑒏𑒹𑒢𑒹 𑒕𑒲 । 𑒣𑒼𑒫𑒩𑓂𑒙𑒲 𑒋𑒝𑓂𑒛 𑒁𑒢𑒥𑓂𑒩𑒱𑒙𑒱𑒬 𑒩𑒴𑒪 𑒂𑒤 𑒃𑒝𑓂𑒛𑒱𑒨𑒰- 𑒠𑒰𑒠𑒰𑒦𑒰𑒃 𑒢𑒾𑒩𑒼𑒖𑒲। 𑒛𑓂𑒩𑒹𑒢 𑒂𑒤 𑒫𑒹𑒪𑓂𑒟𑒏 𑒮𑒱𑒠𑓂𑒡𑒰𑒢𑓂𑒞। 𑒠𑒰𑒠𑒰𑒦𑒰𑒃 𑒮𑒼𑒔𑒢𑒯𑒱𑒨𑒼 𑒢𑒻 𑒯𑒹𑒞𑒰 𑒖𑒹 𑒮𑓂𑒫𑒞𑓀𑒞𑓂𑒩 𑒦𑒰𑒩𑒞𑒏 𑒁𑒦𑒱𑒨𑒢𑓂𑒞𑒰 𑒪𑒹𑒪 𑒍 𑒄 𑒮𑒱𑒠𑓂𑒡𑒰𑒢𑓂𑒞 𑒠𑒹𑒢𑒹 𑒕𑒟𑒱।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒧𑒰𑒢𑒹 𑒁𑒯𑒰𑒿𑒏 𑒁𑒪𑒰𑒥𑒹 𑒮𑒦 𑒑𑒪𑒞 𑒕𑒻?
𑒁𑒦𑒱𑒨𑒢𑓂𑒞𑒰: 𑒢𑒻, 𑒯𑒧𑒩𑒰 𑒞𑒿 𑒪𑒑𑒻𑒋 𑒖𑒹 𑒯𑒧𑒩𑒰 𑒁𑒪𑒰𑒥𑒹 𑒮𑒦 𑒮𑒯𑒲 𑒕𑒻। 𑒧𑒳𑒠𑒰 𑒞𑒐𑒢 𑒕𑒼𑒙-𑒕𑒼𑒙 𑒔𑒲𑒖𑒏𑒹𑒿 𑒣𑒻𑒒 𑒏𑒱𑒋 𑒥𑒢𑒰 𑒩𑒯𑒪 𑒕𑒲?
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒁𑒯𑒰𑒿 𑒖𑒏𑒩𑒰 𑒕𑒼𑒙 𑒑𑒣 𑒏𑒯𑒻 𑒕𑒲, 𑒥𑒳𑒗𑒻 𑒕𑒲, 𑒮𑒹 𑒕𑒼𑒙 𑒢𑒻 𑒕𑒻।
𑒁𑒦𑒱𑒨𑒢𑓂𑒞𑒰: 𑒁𑒯𑒰𑒿𑒏 𑒯𑒰𑒟𑒧𑒹 𑒬𑒏𑓂𑒞𑒱 𑒁𑒕𑒱। 𑒧𑒳𑒐𑓂𑒨𑒧𑓀𑒞𑓂𑒩𑒲 𑒡𑒩𑒱 𑒁𑒯𑒰𑒿𑒏 𑒧𑒳𑒙𑓂𑒚𑒲𑒧𑒹 𑒕𑒟𑒱। 𑒥𑒠𑒪𑒲 𑒏𑓄 𑒠𑒱𑒁 𑒯𑒧𑒩।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒥𑒠𑒪𑒲 𑒢𑒻 𑒏𑓄 𑒮𑒏𑒻 𑒕𑒲। 𑒪𑒼𑒏 𑒁𑒯𑒰𑒿𑒏 𑒮𑓀𑒑 𑒁𑒕𑒱। 𑒧𑒖𑒠𑒴𑒩 𑒁𑒯𑒰𑒿𑒏 𑒮𑓀𑒑 𑒁𑒕𑒱। 𑒔𑒳𑒢𑒰𑒫 𑒂𑒥𑒻𑒥𑒪𑒰 𑒕𑒻। 𑒧𑒳𑒐𑓂𑒨𑒧𑓀𑒞𑓂𑒩𑒲𑒏 𑒂𑒠𑒹𑒬 𑒕𑒢𑓂𑒯𑒱, 𑒁𑒯𑒰𑒿𑒏 𑒥𑒠𑒪𑒲 𑒯𑒧 𑒢𑒻 𑒏𑓄 𑒮𑒏𑒻 𑒕𑒲।
𑒁𑒦𑒱𑒨𑒢𑓂𑒞𑒰: 𑒞𑒐𑒢?
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒁𑒯𑒰𑒿𑒏 𑒏𑒼𑒢𑒼 𑒑𑒣 𑒯𑒧 𑒢𑒻 𑒧𑒰𑒢𑒱 𑒮𑒏𑒻 𑒕𑒲।
𑒁𑒦𑒱𑒨𑒢𑓂𑒞𑒰: 𑒞𑒐𑒢?
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒞𑒐𑒢 𑒠𑒹𑒐𑒻 𑒕𑒲, 𑒥𑒳𑒗𑒥 𑒞𑒿 𑒁𑒯𑒰𑒿 𑒢𑒯𑒱𑒨𑒹।













𑒣𑒪𑓂𑒪𑒫 𑒕𑒯
(𑒧𑒳𑒐𑓂𑒨𑒧𑓀𑒞𑓂𑒩𑒲 𑒂 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒥𑒻𑒮𑒪 𑒕𑒟𑒱)
𑒧𑒳𑒐𑓂𑒨 𑒧𑓀𑒞𑓂𑒩𑒲: 𑒏𑒰𑒖𑒏𑒹𑒿 𑒛𑒱𑒮𑓂𑒙𑒩𑓂𑒥 𑒏𑓄 𑒩𑒯𑒪 𑒁𑒕𑒱। 𑒣𑓂𑒩𑒑𑒞𑒱𑒏 𑒫𑒱𑒩𑒼𑒡𑒲 𑒁𑒕𑒱। 𑒋𑒯𑒹𑒢 𑒪𑒼𑒏 𑒮𑒦𑒏𑒹𑒿 𑒏𑒲 𑒏𑒯𑒴।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒥𑒠𑒪𑒲 𑒏𑓄 𑒠𑒱𑒨𑒾। 𑒔𑒳𑒢𑒰𑒫𑒧𑒹 𑒠𑒹𑒩𑒲 𑒕𑒻। 𑒪𑒼𑒏 𑒥𑒱𑒮𑒩𑒱 𑒖𑒰𑒋𑒞।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒪𑒼𑒏 𑒞𑒿 𑒥𑒱𑒮𑒩𑒱 𑒖𑒰𑒋𑒞 𑒧𑒳𑒠𑒰 𑒫𑒱𑒣𑒏𑓂𑒭𑒲 𑒣𑒰𑒩𑓂𑒙𑒲 𑒑𑒣 𑒐𑒼𑒡𑒞। 𑒋𑒏𑒩𑒰 𑒞𑒿 𑒧𑒼𑒢 𑒯𑒼𑒃𑒋 𑒑𑒼𑒪𑒲 𑒧𑒩𑒥𑒰 𑒠𑒱𑒌।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒋𑒯𑒹𑒢 𑒑𑒪𑒞𑒲 𑒖𑒳𑒢𑒱 𑒏𑒩𑒥। 𑒦𑒑𑒞 𑒮𑒱𑓀𑒯 𑒥𑒢𑒱 𑒖𑒰𑒋𑒞।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒏𑒼𑒢𑒰 𑒦𑒑𑒞 𑒮𑒱𑓀𑒯 𑒥𑒢𑒱 𑒖𑒰𑒋𑒞? 𑒂𑒥 𑒁𑓀𑒑𑓂𑒩𑒹𑒖𑒏 𑒬𑒰𑒮𑒢 𑒟𑒼𑒛𑓃𑒥𑒹 𑒕𑒻। 𑒣𑓂𑒩𑒑𑒞𑒱 𑒫𑒱𑒩𑒼𑒡𑒲 𑒁𑒕𑒱 𑒄 𑒃𑒢𑓂𑒖𑒲𑒢𑒱𑒨𑒩। 𑒂𑒞𑓀𑒏𑒫𑒰𑒠𑒲 𑒥𑒢𑒰 𑒠𑒹𑒥𑒻।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒂𑒞𑓀𑒏𑒫𑒰𑒠𑒲 𑒢𑒻 𑒥𑒢𑒰 𑒮𑒏𑒻 𑒕𑒱𑒌। 𑒮𑒩𑒏𑒰𑒩𑒲 𑒏𑒩𑓂𑒧𑒔𑒰𑒩𑒲 𑒕𑒲, 𑒃𑒢𑓂𑒖𑒲𑒢𑒱𑒨𑒩 𑒕𑒲। 𑒣𑒥𑓂𑒪𑒱𑒏 𑒟𑒼𑒛𑓃𑒥𑒹 𑒕𑒲 𑒖𑒹 𑒂𑒞𑓀𑒏𑒫𑒰𑒠𑒲 𑒥𑒢𑒰 𑒠𑒹𑒥𑒻।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒏𑒩𑒣𑓂𑒬𑒢 𑒔𑒰𑒩𑓂𑒖𑒧𑒹 𑒤𑒿𑒮𑒰 𑒠𑒱𑒨𑒾। 𑒕𑒰𑒣𑒰 𑒧𑒩𑒥𑒰 𑒠𑒱𑒨𑒾।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒠𑒴 𑒢𑒧𑓂𑒥𑒩 𑒣𑒰𑒃 𑒪𑒻𑒞𑒹 𑒢𑒻 𑒁𑒕𑒱, 𑒕𑒰𑒣𑒰𑒧𑒹 𑒐𑒰𑒙 𑒙𑒰 𑒒𑒩𑒧𑒹 𑒦𑒹𑒙𑒞।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒏𑒼𑒢𑒼 𑒞𑒿 𑒏𑒧𑒲 𑒯𑒹𑒞𑒻। 𑒮𑒹 𑒞𑒰𑒏𑒴।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒖𑒱𑒠𑒱𑒨𑒰𑒯 𑒁𑒕𑒱, 𑒨𑒋𑒯 𑒏𑒧𑒲 𑒕𑒻।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒞𑒐𑒢 𑒧𑒩𑒥𑒰𑒃𑒋 𑒠𑒻 𑒕𑒱𑒌। 𑒏𑒼𑒢𑒼 𑒏𑒧𑒲 𑒢𑒻 𑒕𑒻 𑒞𑒿 𑒖𑒲𑒥𑒱 𑒏𑓄 𑒏𑒲 𑒏𑒩𑒞?
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒋𑒯𑒹𑒢 𑒑𑒪𑒞𑒲 𑒖𑒳𑒢𑒱 𑒏𑒩𑒥। 𑒧𑒯𑒰𑒞𑓂𑒧𑒰 𑒑𑒰𑒿𑒡𑒲 𑒥𑒢𑒱 𑒖𑒰𑒋𑒞। 𑒖𑒲𑒖𑒮 𑒏𑓂𑒩𑒰𑒃𑒮𑓂𑒙 𑒥𑒢𑒱 𑒖𑒰𑒋𑒞।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒏𑒧𑒲 𑒞𑒰𑒏𑒴। 𑒁𑒯𑒰𑒿 𑒮𑓀𑒑𑒹 𑒞𑒿 𑒍 𑒬𑒳𑒩𑒴𑒮𑒿 𑒣𑒜𑓃𑒪 𑒁𑒕𑒱। 𑒍𑒏𑒩𑒰 𑒢𑒻 𑒧𑒰𑒩𑓄 𑒔𑒰𑒯𑒻 𑒕𑒲 𑒞𑒿 𑒍𑒏𑒩𑒰𑒧𑒹 𑒏𑒧𑒲 𑒞𑒰𑒏𑒴। 𑒂 𑒏𑒧𑒲 𑒢𑒻 𑒞𑒰𑒏𑒱 𑒮𑒏𑒻 𑒕𑒲 𑒧𑒰𑒩𑒱 𑒢𑒻 𑒮𑒏𑒻 𑒕𑒲 𑒞𑒐𑒢 𑒏𑒲 𑒏𑒩𑒴। 𑒂𑒞𑓂𑒧𑒯𑒞𑓂𑒨𑒰 𑒏𑒩𑒥𑒰 𑒠𑒱𑒨𑒾?
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒂𑒞𑓂𑒧𑒯𑒞𑓂𑒨𑒰 𑒏𑒩𑒻𑒥𑒪𑒰 𑒖𑒲𑒥 𑒢𑒻 𑒁𑒕𑒱 𑒍। 𑒖𑒱𑒠𑒱𑒨𑒰𑒯 𑒁𑒕𑒱।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒞𑒿 𑒍𑒏𑒩𑒰 𑒧𑒩𑒥𑒰 𑒏𑓄 𑒂𑒞𑓂𑒧𑒯𑒞𑓂𑒨𑒰 𑒏𑒹𑒪𑒏 𑒮𑒹 𑒯𑒪𑓂𑒪𑒰 𑒏𑓄 𑒠𑒱𑒨𑒾।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒄 𑒑𑒣 𑒏𑒱𑒨𑒼 𑒏𑒱𑒨𑒼 𑒢𑒻 𑒧𑒰𑒢𑒞। 𑒮𑒦 𑒨𑒋𑒯 𑒏𑒯𑒞 𑒖𑒹 𑒯𑒞𑓂𑒨𑒰 𑒦𑒹𑒪𑒻।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒞𑒐𑒢?
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒍𑒏𑒩𑒰 𑒧𑒩𑓄 𑒣𑒛𑓃𑒞𑒻। 𑒍𑒏𑒩 𑒯𑒞𑓂𑒨𑒰 𑒯𑒹𑒞𑒻।
𑒧𑒳𑒐𑓂𑒨𑒧𑓀𑒞𑓂𑒩𑒲: 𑒂 𑒮𑒹 𑒢𑒻 𑒯𑒞𑓂𑒨𑒰 𑒪𑒑𑒥𑒰𑒏 𑒔𑒰𑒯𑒲 𑒂 𑒢𑒯𑒱𑒨𑒹 𑒂𑒞𑓂𑒧𑒯𑒞𑓂𑒨𑒰, 𑒞𑒐𑒢 𑒞𑒿 𑒍𑒏𑒩 𑒥𑒳𑒜𑒰𑒩𑒲 𑒞𑒏 𑒩𑒳𑒏𑓄 𑒣𑒛𑓃𑒞।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: (𑒏𑓂𑒩𑒴𑒩 𑒯𑒿𑒮𑒲 𑒯𑒿𑒮𑒻𑒞) 𑒢𑒯𑒱𑒨𑒹 𑒍 𑒯𑒞𑓂𑒨𑒰 𑒯𑒞𑓂𑒨𑒰 𑒪𑒑𑒞𑒻 𑒂 𑒢𑒯𑒱𑒨𑒹 𑒂𑒞𑓂𑒧𑒯𑒞𑓂𑒨𑒰। 𑒍 𑒠𑒳𑒩𑓂𑒒𑒙𑒢𑒰 𑒪𑒑𑒞𑒻। 𑒠𑒳𑒩𑓂𑒒𑒙𑒢𑒰… 𑒌 𑒮𑓂𑒫𑒞𑓀𑒞𑓂𑒩 𑒠𑒹𑒬𑒧𑒹 𑒣𑒥𑓂𑒪𑒱𑒏𑒏𑒹𑒿 𑒂𑒞𑓀𑒏𑒫𑒰𑒠𑒲 𑒥𑒢𑒰 𑒏𑓄 𑒧𑒰𑒩𑒪 𑒖𑒹𑒞𑒻 𑒂 𑒌 𑒞𑒩𑒯𑒏 𑒪𑒼𑒏𑒏𑒹𑒿 𑒠𑒳𑒩𑓂𑒒𑒙𑒢𑒰𑒧𑒹।
𑒧𑒳𑒐𑓂𑒨𑒧𑓀𑒞𑓂𑒩𑒲: (𑒏𑓂𑒩𑒴𑒩 𑒯𑒿𑒮𑒲 𑒯𑒿𑒮𑒻𑒞) 𑒡𑓄 𑒠𑒱𑒨𑒾 𑒞𑒐𑒢 𑒩𑒼𑒪𑒩𑒏 𑒢𑒱𑒔𑓂𑒔𑒰𑒿𑒧𑒹। 𑒧𑒳𑒠𑒰 𑒄 𑒮𑒧𑒳𑒔𑓂𑒔𑒰 𑒒𑒙𑒢𑒰 𑒋𑒏𑒠𑒧 𑒠𑒳𑒩𑓂𑒒𑒙𑒢𑒰 𑒪𑒑𑒥𑒰𑒏 𑒔𑒰𑒯𑒲, 𑒪𑒼𑒏 𑒖𑒿 𑒥𑒳𑒗𑒱 𑒑𑒹𑒪 𑒖𑒹 𑒧𑒰𑒩𑒪 𑒑𑒹𑒪 𑒕𑒻 𑒞𑒿 𑒚𑒲𑒏𑒹 𑒁𑒢𑒹𑒩𑒹 𑒍 𑒯𑒲𑒩𑒼 𑒥𑒢𑒱 𑒖𑒰𑒋𑒞।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒥𑒯𑒳𑒞 𑒠𑒳𑒐 𑒯𑒋𑒞 𑒯𑒧𑒩𑒰 𑒍𑒏𑒩 𑒧𑒵𑒞𑓂𑒨𑒳𑒮𑒿। 𑒯𑒧𑒩𑒹 𑒮𑓀𑒑 𑒣𑒜𑓃𑒻 𑒕𑒪। 𑒥𑒛𑓂𑒛 𑒏𑒰𑒥𑒱𑒪 𑒃𑒢𑓂𑒖𑒲𑒢𑒱𑒨𑒩 𑒕𑒪।


(𑒣𑒩𑓂𑒠𑒰)





























𑒣𑒪𑓂𑒪𑒫 𑒮𑒰𑒞
(𑒪𑒰𑒬 𑒩𑒰𑒐𑒪 𑒕𑒻, 𑒠𑒴𑒙𑒰 𑒥𑒔𑓂𑒔𑒰 𑒂 𑒃𑒢𑓂𑒖𑒲𑒢𑒱𑒨𑒩𑒏 𑒫𑒱𑒡𑒫𑒰 𑒯𑒱𑒔𑒳𑒏𑒱 𑒩𑒯𑒪 𑒁𑒕𑒱।)
𑒥𑒞𑒯𑒲 𑒧𑒰𑒋: 𑒕𑒼𑒛𑓃𑒱 𑒑𑒹𑒪...𑒯𑒾 𑒠𑒹𑒥। 𑒥𑒞𑒯𑒲𑒏 𑒥𑒹𑒙𑒰 𑒥𑒞𑒯𑒰। (𑒪𑒰𑒬 𑒅𑒒𑒰𑒛𑓃𑒱 𑒏𑓄 𑒠𑒹𑒐𑒻𑒞 𑒥𑒹𑒯𑒼𑒬 𑒦𑓄 𑒐𑒮𑒱 𑒣𑒛𑓃𑒻𑒋।)
𑒥𑒰𑒅-𑒦𑒻𑒨𑒰𑒩𑒲 𑒑𑒹𑒪। 𑒣𑒯𑒪𑒧𑒰𑒢 𑒏𑒏𑓂𑒏𑒰𑒏 𑒩𑒯𑒻𑒞 𑒦𑒰𑒞𑒱𑒖 𑒣𑒱𑒔𑒛𑓃𑒰 𑒦𑒹𑒪 𑒣𑒛𑓃𑒪 𑒁𑒕𑒱। 𑒯𑒾 𑒦𑒻𑒨𑒰𑒩𑒲, 𑒏𑒲 𑒖𑒫𑒰𑒥 𑒠𑒹𑒥𑓄 𑒞𑒼𑒩𑒰 𑒯𑒾।
𑒠𑒰𑒠𑒰- 𑒏𑒯𑒻 𑒖𑒰𑒃 𑒕𑒻 𑒖𑒹 𑒠𑒳𑒩𑓂𑒒𑒙𑒢𑒰 𑒕𑒱𑒌। 𑒠𑒳𑒩𑓂𑒒𑒙𑒢𑒰𑒧𑒹 𑒋𑒢𑒰 𑒏𑓄 𑒣𑒱𑒔𑒛𑓃𑒰 𑒯𑒼𑒃 𑒕𑒻। 𑒩𑒼𑒪𑒩 𑒞𑒿 𑒍𑒢𑒰𑒯𑒱𑒨𑒼 𑒁𑒮𑓂𑒟𑒱𑒩𑒮𑒿 𑒔𑒪𑒻 𑒕𑒻।
𑒪𑒰𑒪𑒰-𑒂𑒃 𑒡𑒩𑒱 𑒮𑒳𑒢𑒢𑒹 𑒕𑒪𑒯𑒏 𑒩𑒼𑒪𑒩𑒮𑒿 𑒣𑒱𑒔𑒰 𑒏𑓄 𑒏𑒱𑒨𑒼 𑒧𑒩𑒪 𑒯𑒼𑒃, 𑒩𑒼𑒪𑒩𑒮𑒿 𑒠𑒳𑒩𑓂𑒒𑒙𑒢𑒰 𑒯𑒼𑒃 𑒕𑒻 𑒯𑒾।
𑒥𑒱𑒪𑒙-𑒏𑒏𑒩𑒰 𑒥𑒪𑒹 𑒕𑒰𑒞𑒲 𑒤𑒳𑒪𑒹𑒥𑒻 𑒯𑒾, 𑒏𑒏𑒩𑒰 𑒏𑒯𑒥𑒻 𑒮𑓀𑒒𑒩𑓂𑒭 𑒏𑒩𑒻 𑒪𑒹𑒪। 𑒏𑒹 𑒏𑒩𑒞𑒻 𑒧𑒹𑒯𑒢𑒞𑒱 𑒯𑒾, 𑒏𑒹 𑒏𑒩𑒞𑒻 𑒏𑒰𑒢𑒴𑒢𑒏 𑒣𑒰𑒪𑒢।
𑒧𑒲𑒞-𑒏𑒹 𑒮𑒞𑓂𑒨 𑒥𑒖𑒞𑒻 𑒯𑒾, 𑒧𑒳𑒠𑒰 𑒢𑒻 𑒥𑒖𑒥𑒻 𑒞𑒿 𑒯𑒰𑒏𑒱𑒧 𑒏𑒲 𑒏𑒯𑒞 𑒯𑒾 𑒥𑒱𑒪𑒙 𑒏𑒰𑒏𑒰। 𑒢𑒻 𑒮𑓀𑒒𑒩𑓂𑒭 𑒏𑒩𑒥𑒻 𑒞𑒿 𑒯𑒰𑒏𑒱𑒧 𑒏𑒲 𑒏𑒯𑒞𑒻 𑒯𑒾। 𑒢𑒻 𑒧𑒹𑒯𑒢𑒞𑒱 𑒏𑒩𑒥𑒻 𑒞𑒿, 𑒢𑒻 𑒏𑒰𑒢𑒴𑒢𑒏 𑒣𑒰𑒪𑒢 𑒏𑒩𑒥𑒻 𑒞𑒿, 𑒞𑒿 𑒏𑒼𑒢𑒰 𑒤𑒳𑒪𑒹𑒥𑒻 𑒯𑒰𑒏𑒱𑒧𑒣𑒩 𑒕𑒰𑒞𑒲 𑒯𑒾।
𑒣𑒻𑒒 𑒦𑒰𑒋: 𑒏𑒹𑒯𑒹𑒢 𑒔𑒝𑓂𑒛𑒰𑒪 𑒦𑓄 𑒑𑒹𑒪। 𑒣𑒻𑒒 𑒦𑒰𑒋 𑒖𑒱𑒥𑒱𑒞𑒹 𑒕𑒻, 𑒂 𑒕𑒼𑒙𑒏𑒰 𑒕𑒼𑒛𑓃𑒱 𑒑𑒹𑒪। 𑒥𑒞𑒯𑒰.. 𑒔𑒰𑒙𑒲 𑒅𑒚𑒥𑒻𑒪𑒹 𑒔𑒢𑓂𑒢𑒰 𑒑𑒰𑒕𑒲 𑒔𑒪𑒱 𑒖𑒰𑒃 𑒕𑒪।𑒯𑒾, 𑒄 𑒣𑒵𑒟𑓂𑒫𑒲 𑒕𑒱𑒌, 𑒋𑒞𑓄 𑒥𑒰𑒯𑒩𑒏 𑒬𑒏𑓂𑒞𑒱 𑒢𑒻 𑒂𑒥𑒻 𑒕𑒻। 𑒋𑒞𑒳𑒏𑓂𑒏𑒹 𑒪𑒼𑒏𑒏 𑒯𑒰𑒟𑒧𑒹 𑒕𑒻 𑒢𑒲𑒏 𑒂 𑒁𑒡𑒪𑒰। 𑒥𑒹𑒮𑒲 𑒁𑒡𑒪𑒹 𑒕𑒻 𑒞𑒿 𑒁𑒡𑒪𑒹 𑒢𑒻 𑒥𑒢𑒪 𑒦𑒹𑒪𑓄? 𑒣𑒵𑒟𑓂𑒫𑒲, 𑒁𑒏𑒰𑒮 𑒍𑒯𑒱𑒢𑒰 𑒚𑒰𑒜𑓃 𑒕𑒻। 𑒄 𑒁𑒢𑓂𑒨𑒰𑒨 𑒠𑒹𑒐𑒱𑒨𑒼 𑒏𑓄 𑒦𑒴𑒏𑒧𑓂𑒣 𑒢𑒻 𑒋𑒪𑒻, 𑒁𑒢𑓂𑒯𑒩 𑒥𑒱𑒯𑒰𑒛𑓃𑒱 𑒢𑒻 𑒋𑒪𑒻। 𑒠𑒳𑒢𑒱𑒨𑒰𑒿 𑒁𑒯𑒱𑒢𑒰 𑒔𑒪𑒻𑒞 𑒩𑒯𑒞𑒻। (𑒖𑒹𑒢𑒰 𑒁𑒢𑓂𑒯𑒩-𑒥𑒱𑒯𑒰𑒛𑓃𑒱 𑒂𑒋𑒪 𑒕𑒻, 𑒮𑒦 𑒯𑒰𑒟𑒣𑒩 𑒧𑒳𑒿𑒯 𑒪𑓄 𑒪𑒻𑒞 𑒁𑒕𑒱।)

(𑒥𑒔𑓂𑒔𑒰 𑓓 𑒖𑒹 𑒂𑒥 𑒧𑒖𑒠𑒴𑒩 𑒥𑒢𑒱 𑒑𑒹𑒪 𑒁𑒕𑒱 𑒡𑒩𑒤𑒛𑓃𑒰 𑒏𑓄 𑒣𑓂𑒩𑒫𑒹𑒬 𑒏𑒩𑒻𑒞 𑒁𑒕𑒱। 𑒂𑒿𑒐𑒱 𑒏𑒰𑒩𑒲 𑒂 𑒢𑒼𑒩𑒰𑒋𑒪 𑒂 𑒏𑒣𑒛𑓃𑒰 𑒪𑒞𑓂𑒞𑒰 𑒤𑒰𑒙𑒪 𑒕𑒻।)

𑒧𑒖𑒠𑒴𑒩: 𑒢𑒼𑒏𑒩𑒲 𑒪𑒹𑒪 𑒑𑒹𑒪𑒾𑓀। 𑒚𑒹𑒪𑒰 𑒔𑒪𑒥𑒻𑒞 𑒟𑒰𑒏𑒱 𑒑𑒹𑒪𑒾𑓀। 𑒢𑒼𑒏𑒩𑒲 𑒪𑒹𑒪 𑒚𑒏𑒱-𑒤𑒳𑒮𑒱𑒨𑒰 𑒏𑓄 𑒪𑒻 𑒖𑒰𑒃 𑒑𑒹𑒪। 𑒦𑒠𑒼𑒯𑒲। (𑒦𑒠𑒼𑒯𑒲 𑒢𑒰𑒧 𑒁𑒥𑒱𑒞𑒹 𑒏𑒴𑒯𑒲 𑒦𑓄 𑒖𑒰𑒃𑒋, 𑒟𑒩𑒟𑒛𑓃𑒰𑒃𑒞 𑒏𑒰𑒢𑒻𑒞 𑒮𑓂𑒫𑒩𑒧𑒹 𑒥𑒖𑒻𑒋) 𑒏𑒰𑒖 𑒩𑒳𑒏𑒱𑒞𑒹 𑒪𑒼𑒯𑒰𑒏 𑒕𑒛𑓃𑒮𑒿 𑒧𑒰𑒩𑒻 𑒕𑒪। 𑒋𑒏 𑒙𑒰𑒃𑒧 𑒐𑒹𑒢𑒰𑒃। 𑒂𑒿𑒐𑒱𑒧𑒹 𑒢𑒱𑒢𑓂𑒢 𑒂𑒋𑒪 𑒂𑒏𑒱 𑒟𑒰𑒣𑒛𑓃। 𑒮𑓂𑒫𑒞𑓀𑒞𑓂𑒩 𑒠𑒹𑒬। 𑒮𑓂𑒫𑒞𑓀𑒞𑓂𑒩 𑒮𑓂𑒏𑒴𑒪। 𑒮𑓂𑒫𑒞𑓀𑒞𑓂𑒩 𑒏𑒰𑒪𑒹𑒖। (𑒣𑒻𑒒 𑒦𑒰𑒋𑒮𑒿) 𑒏𑒲 𑒦𑒹𑒪𑒻 𑒯𑒾। 𑒧𑒩𑒱 𑒑𑒹𑒪𑒻।
𑒣𑒻𑒒 𑒦𑒰𑒋: 𑒧𑒰𑒩𑒱 𑒠𑒹𑒪𑒏𑒻।
𑒧𑒖𑒠𑒴𑒩: 𑒧𑒰𑒩𑒱 𑒠𑒹𑒪𑒏𑒻 𑒥𑒰 𑒧𑒩𑒱 𑒑𑒹𑒪𑒻, 𑒖𑒰𑒢 𑒞𑒿 𑒢𑒱𑒏𑒪𑒱𑒨𑒹 𑒑𑒹𑒪𑒻 𑒢𑒹 𑒯𑒾। 𑒏𑒱𑒋 𑒧𑒰𑒩𑒪𑒏𑒻?
𑒣𑒻𑒒 𑒦𑒰𑒋: 𑒑𑓀𑒑𑒰 𑒣𑒳𑒪, 𑒥𑒪𑒱 𑒪𑒹𑒪𑒏𑒻 𑒄 𑒑𑓀𑒑𑒰 𑒣𑒳𑒪।
𑒧𑒖𑒠𑒴𑒩: 𑒜𑒼𑒪𑒯𑒼 𑒣𑒲𑒙𑒻 𑒕𑒪𑒻, 𑒧𑒖𑒠𑒴𑒩 𑒔𑒰𑒯𑒲, 𑒧𑒖𑒠𑒴𑒩 𑒔𑒰𑒯𑒲। 𑒑𑓀𑒑𑒰 𑒣𑒳𑒪𑒏 𑒧𑒖𑒠𑒴𑒩𑒹 𑒥𑒢𑒱 𑒖𑒃𑒞𑒾𑓀, 𑒁𑒢𑒹𑒩𑒹 𑒦𑒠𑒼𑒯𑒲 𑒑𑒹𑒪𑒾𑓀, 𑒮𑒹 𑒧𑒼𑒢𑒧𑒹 𑒯𑒳𑒁𑒋 𑒧𑒳𑒠𑒰 𑒂𑒥 𑒞𑒿।
𑒣𑒻𑒒 𑒦𑒰𑒋: 𑒦𑒢𑒹 𑒔𑒪𑒱 𑒑𑒹𑒪𑓄 𑒦𑒠𑒼𑒯𑒲, 𑒢𑒻 𑒞𑒿 𑒧𑒖𑒠𑒴𑒩 𑒮𑒦𑒏 𑒜𑒹𑒩 𑒥𑒪𑒱 𑒔𑒜𑓃𑒪 𑒕𑒻। 𑒧𑒩𑒱 𑒖𑒃𑒞𑒯। 𑒂 𑒞𑒏𑒩 𑒫𑒱𑒩𑒼𑒡 𑒄 𑒃𑒢𑓂𑒖𑒲𑒢𑒱𑒨𑒩 𑒏𑒩𑒱𑒞𑒻 𑒂 𑒍𑒯𑒼 𑒣𑒱𑒔𑒛𑓃𑒰 𑒦𑓄 𑒖𑒃𑒞𑒻।
𑒧𑒖𑒠𑒴𑒩: 𑒧𑒳𑒠𑒰 𑒦𑒠𑒼𑒯𑒲 𑒮𑒿 𑒖𑒹 𑒯𑒧𑒩𑒰 𑒮𑒦𑒏𑒹𑒿 𑒕𑒼𑒛𑓃𑒹𑒪𑒏?
𑒣𑒻𑒒 𑒦𑒰𑒋: 𑒍𑒯𑒼 𑒣𑒱𑒔𑒛𑓃𑒰 𑒦𑓄 𑒑𑒹𑒪 𑒯𑒹𑒞𑒻।
𑒧𑒖𑒠𑒴𑒩: 𑒣𑒱𑒔𑒛𑓃𑒰 𑒦𑓄 𑒑𑒹𑒪 𑒯𑒹𑒞𑒻। 𑒖𑒰𑒋 𑒠𑒻𑒯, 𑒖𑒰𑒋 𑒠𑒻𑒯 𑒦𑒠𑒼𑒯𑒲। 𑒖𑒾𑓀 𑒢𑒻 𑒣𑒱𑒔𑒛𑓃𑒰 𑒦𑒹𑒪 𑒯𑒹𑒞𑒻 𑒞𑒿 𑒥𑒔𑒹𑒥𑒻 𑒍𑒏𑒩𑒰।
(𑒧𑒖𑒠𑒴𑒩𑒏 𑒣𑓂𑒩𑒮𑓂𑒟𑒰𑒢। 𑒤𑒹𑒩 𑒂𑒑𑒧𑒢।)

𑒧𑒖𑒠𑒴𑒩: 𑒏𑒢𑒲 𑒣𑒳𑒪 𑒠𑒹𑒐𑒱𑒞𑒱𑒌। 𑒏𑒢𑒲 𑒣𑒙𑒢𑒰 𑒠𑒹𑒐𑒱𑒞𑒱𑒌। 𑒖𑒰𑒋 𑒠𑒻𑒯, 𑒖𑒰𑒋 𑒠𑒻𑒯 𑒦𑒠𑒼𑒯𑒲। 𑒖𑒾𑓀 𑒢𑒻 𑒣𑒱𑒔𑒛𑓃𑒰 𑒦𑒹𑒪 𑒯𑒹𑒞𑒻 𑒞𑒿 𑒥𑒔𑒹𑒥𑒻 𑒍𑒏𑒩𑒰।
(𑒣𑒩𑓂𑒠𑒰)






























𑒣𑒪𑓂𑒪𑒫 𑒂𑒚
(𑒋𑒏𑓂𑒏𑒹 𑒣𑒼𑒟𑒲𑒏 𑒜𑒹𑒩 𑒩𑒰𑒮 𑒣𑓂𑒩𑒞𑒱 𑒪𑒼𑒏𑒰𑒩𑓂𑒣𑒝 𑒪𑒹𑒪 𑒩𑒰𑒐𑒪 𑒁𑒕𑒱। 𑒏𑒱𑒞𑒰𑒥 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒠𑓂𑒫𑒰𑒩𑒰 𑒪𑒱𑒐𑒪 𑒕𑒻 𑒂 𑒧𑒳𑒐𑓂𑒨 𑒧𑓀𑒞𑓂𑒩𑒲 𑒋𑒏𑒩𑒰 𑒩𑒱𑒪𑒲𑒖 𑒏𑓄 𑒩𑒯𑒪 𑒕𑒟𑒱। 𑒏𑒼𑒢𑒧𑒹 𑒛𑓀𑒏𑒰 𑒩𑒰𑒐𑒪 𑒁𑒕𑒱 𑒂 𑒠𑒳𑒢𑒴 𑒪𑒼𑒏 𑒚𑒰𑒜𑓃 𑒕𑒟𑒱।)

𑒧𑒳𑒐𑓂𑒨𑒧𑓀𑒞𑓂𑒩𑒲: 𑒯𑒧𑒩𑒰 𑒐𑒳𑒬𑒲 𑒁𑒕𑒱। (𑒫𑒱𑒬𑓂𑒩𑒰𑒧) 𑒯𑒧𑒩𑒰 𑒐𑒳𑒬𑒲 𑒁𑒕𑒱 𑒖𑒹 𑒥𑒞𑓂𑒞𑒲𑒮 𑒮𑒰𑒪𑒏 𑒮𑒩𑒏𑒰𑒩𑒲 𑒮𑒹𑒫𑒰𑒏 𑒅𑒣𑒩𑒰𑒢𑓂𑒞 “𑒑𑓀𑒑𑒰 𑒥𑓂𑒩𑒱𑒖”, 𑒄 𑒣𑒼𑒟𑒲 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒧𑒰𑒞𑓂𑒩 𑒪𑒱𑒐𑒱 𑒮𑒏𑒻 𑒕𑒟𑒱। 𑒏𑒫𑒩 𑒢𑒲𑒏, 𑒣𑒢𑓂𑒢𑒰 𑒢𑒲𑒏, 𑒕𑒣𑒰𑒃 𑒢𑒲𑒏। 𑒋𑒏-𑒋𑒏 𑒣𑒰𑒿𑒞𑒲 𑒢𑒱𑒭𑓂𑒣𑒏𑓂𑒭। 𑒏𑒼𑒢𑒼 𑒃𑒞𑒱𑒯𑒰𑒮𑒏𑒰𑒩 𑒌𑒣𑒩 𑒂𑒿𑒐𑒱 𑒧𑒳𑒢𑒱 𑒏𑓄 𑒫𑒱𑒬𑓂𑒫𑒰𑒮 𑒏𑓄 𑒮𑒏𑒻 𑒕𑒟𑒱। 𑒪𑒱𑒐𑒱𑒞𑒧𑓂, 𑒪𑒱𑒐𑒱𑒞𑒏𑒹𑒿 𑒏𑒰𑒙𑒱 𑒮𑒏𑒞? 𑒑𑓀𑒑𑒰 𑒥𑓂𑒩𑒱𑒖𑒏 𑒖𑒹 𑒧𑒴𑒪 𑒦𑒰𑒫𑒢𑒰 𑒕𑒪𑒻, 𑒧𑒰𑒢𑒹 𑒪𑒼𑒏𑒏𑒹𑒿 𑒪𑒼𑒏𑒮𑒿 𑒖𑒼𑒛𑓃𑒢𑒰𑒃, 𑒍𑒏𑒩𑒰 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒣𑒴𑒩𑒰 𑒏𑒹𑒪𑒢𑓂𑒯𑒱। 𑒂𑒥 𑒢𑒻 𑒯𑒧𑒯𑒲𑓀 𑒧𑓀𑒞𑓂𑒩𑒲 𑒕𑒲, 𑒂 𑒄𑒯𑒼 𑒩𑒱𑒙𑒰𑒨𑒩 𑒦𑓄 𑒑𑒹𑒪 𑒕𑒟𑒱। 𑒧𑒳𑒠𑒰 𑒑𑓀𑒑𑒰 𑒥𑓂𑒩𑒱𑒖 𑒚𑒰𑒜𑓃 𑒁𑒕𑒱, 𑒧𑒳𑒠𑒰 𑒑𑓀𑒑𑒰𑒧𑒹 𑒂𑒥 𑒣𑒰𑒢𑒱𑒨𑒹 𑒏𑒧 𑒦𑓄 𑒑𑒹𑒪 𑒁𑒕𑒱। 𑒚𑒲𑒏 𑒕𑒻, 𑒄 𑒥𑓂𑒩𑒱𑒖 𑒯𑒱𑒪 𑒩𑒯𑒪 𑒕𑒻, 𑒖𑒩𑓂𑒖𑒩 𑒦𑓄 𑒑𑒹𑒪 𑒕𑒻। 𑒧𑒳𑒠𑒰 𑒂𑒃𑒥𑒪𑒰 𑒞𑒏𑒢𑒲𑒏 𑒞𑒐𑒢 𑒏𑒯𑒰𑒿 𑒩𑒯𑒻। 𑒢𑒥𑒏𑒰 𑒧𑒳𑒐𑓂𑒨𑒧𑓀𑒞𑓂𑒩𑒲 𑒁𑒯𑒲 𑒑𑓀𑒑𑒰𑒥𑓂𑒩𑒱𑒖𑒏 𑒥𑒑𑒪𑒧𑒹 𑒠𑒼𑒮𑒩 𑒑𑓀𑒑𑒰 𑒥𑓂𑒩𑒱𑒖 𑒥𑒢𑒹𑒥𑒰𑒏 𑒒𑒼𑒭𑒝𑒰 𑒏𑓄 𑒠𑒹𑒪𑒢𑒱 𑒁𑒕𑒱। 𑒠𑒳𑒢𑒱𑒨𑒰𑒿𑒧𑒹 𑒏𑒼𑒢 𑒔𑒲𑒖 𑒁𑒖𑒩-𑒁𑒧𑒩 𑒕𑒻।
𑒌 𑒣𑒼𑒟𑒲 “𑒑𑓀𑒑𑒰 𑒥𑓂𑒩𑒱𑒖”𑒏 𑒪𑒹𑒐𑒏𑒏𑒹𑒿 𑒯𑒧 𑒢𑒲𑒏𑒮𑒿, 𑒫𑓂𑒨𑒏𑓂𑒞𑒱𑒑𑒞 𑒩𑒴𑒣𑒹𑒿 𑒔𑒱𑒢𑓂𑒯𑒻 𑒕𑒱𑒨𑒢𑓂𑒯𑒱। 𑒯𑒧𑒩𑒹 𑒧𑒳𑒐𑓂𑒨𑒧𑓀𑒞𑓂𑒩𑒱𑒞𑓂𑒫 𑒏𑒰𑒪𑒧𑒹 𑒄 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒩𑒯𑒟𑒱। 𑒁𑒣𑒢 𑒄𑒧𑒰𑒢𑒠𑒰𑒩𑒲 𑒪𑒹𑒪 𑒖𑒰𑒢𑒪 𑒖𑒰𑒃𑒞 𑒩𑒯𑒟𑒱।
(𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒯𑒰𑒟 𑒖𑒼𑒛𑓃𑒱 𑒧𑒳𑒮𑓂𑒏𑒲 𑒠𑒻 𑒕𑒟𑒱।)
𑒯𑒱𑒢𑒏𑒹 𑒢𑒱𑒩𑓂𑒠𑒹𑒬𑒢𑒧𑒹 𑒄 𑒣𑒳𑒪𑒰 𑒥𑒢𑒪𑒻। 𑒚𑒲𑒏 𑒕𑒻, 𑒚𑒰𑒏 𑒕𑒻। (𑒫𑒱𑒬𑓂𑒩𑒰𑒧) 𑒚𑒲𑒏 𑒕𑒻 𑒖𑒹 𑒄 𑒣𑒳𑒪𑒰 𑒏𑒱𑒕𑒳 𑒠𑒱𑒢𑒧𑒹 𑒙𑒴𑒙𑒱 𑒖𑒹𑒞𑒻 𑒂 𑒥𑒑𑒪𑒹𑒧𑒹 𑒢𑒫 𑒣𑒳𑒪 𑒚𑒰𑒜𑓃 𑒦𑓄 𑒖𑒹𑒞𑒻। 𑒧𑒳𑒠𑒰 𑒍𑒃 𑒙𑒳𑒙𑒪 𑒣𑒳𑒪𑒏𑒹𑒿 𑒄 𑒣𑒼𑒟𑒲 “𑒑𑓀𑒑𑒰 𑒥𑓂𑒩𑒱𑒖” 𑒃𑒞𑒱𑒯𑒰𑒮𑒧𑒹 𑒁𑒧𑒩 𑒏𑓄 𑒠𑒹𑒞𑒻। 𑒌 𑒣𑒼𑒟𑒲𑒧𑒹 𑒯𑒧𑒩𑒼 𑒔𑒩𑓂𑒔𑒰 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰 𑒏𑒹𑒢𑒹 𑒕𑒟𑒱 (𑒧𑒳𑒮𑓂𑒏𑒲 𑒠𑒻𑒞) 𑒏𑒱𑒕𑒳 𑒥𑒹𑒬𑒱𑒨𑒹 𑒥𑒛𑓃𑒰𑒃 𑒏𑓄 𑒠𑒹𑒢𑒹 𑒕𑒟𑒱। 𑒧𑒳𑒠𑒰 𑒯𑒧 𑒞𑒿 𑒖𑒢𑒮𑒹𑒫𑒏 𑒕𑒲, 𑒖𑒢𑒞𑒰𑒏 𑒮𑒹𑒫𑒰 𑒪𑒹𑒪 𑒯𑒧 𑒖𑒹 𑒏𑒱𑒕𑒳 𑒏𑒹𑒪𑒾𑓀 𑒞𑒏𑒩 𑒫𑒩𑓂𑒝𑒢𑒏 𑒏𑒼𑒢𑒼 𑒐𑒑𑒞𑒰 𑒢𑒻 𑒕𑒪, 𑒍 𑒞𑒿 𑒯𑒧𑒩 𑒏𑒩𑓂𑒞𑒫𑓂𑒨 𑒕𑒪। (𑒫𑒱𑒬𑓂𑒩𑒰𑒧)
𑒤𑒹𑒩𑒮𑒿 𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰𑒏𑒹𑒿 𑒁𑒣𑒢 𑒏𑒩𑓂𑒧𑒚 𑒖𑒲𑒫𑒢, 𑒄𑒧𑒰𑒢𑒠𑒰𑒩 𑒔𑒩𑒱𑒞𑓂𑒩 𑒪𑒹𑒪 𑒋𑒏𑒥𑒹𑒩 𑒥𑒡𑒰𑒃 𑒠𑒻 𑒕𑒱𑒨𑒢𑓂𑒯𑒱।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: 𑒧𑒳𑒐𑓂𑒨𑒧𑓀𑒞𑓂𑒩𑒲 𑒖𑒲 𑒯𑒧𑒩 𑒧𑒹𑒢𑓂𑒙𑒩 𑒩𑒯𑒟𑒱। 𑒯𑒱𑒢𑒏𑒰 𑒪𑒹𑒪 𑒯𑒧𑒩𑒰 𑒯𑒵𑒠𑒻𑒮𑒿 𑒬𑓂𑒩𑒠𑓂𑒡𑒰 𑒁𑒕𑒱। 𑒌 𑒣𑒼𑒟𑒲𑒧𑒹 𑒏𑒱𑒕𑒳 𑒏𑒱𑒕𑒳 𑒑𑒼𑒙𑒹 𑒠𑓂𑒫𑒰𑒩𑒰 𑒏𑒋𑒪 𑒏𑒱𑒕𑒳 𑒁𑒬𑒼𑒦𑒢𑒲𑒨 𑒒𑒙𑒢𑒰𑒏𑒹𑒿 𑒕𑒼𑒛𑓃𑒱 𑒠𑒹𑒪 𑒑𑒹𑒪 𑒁𑒕𑒱। 𑒃𑒞𑒱𑒯𑒰𑒮 𑒒𑒵𑒝𑒰 𑒣𑒮𑒰𑒩𑒥𑒰𑒏 𑒧𑒰𑒡𑓂𑒨𑒧 𑒢𑒹 𑒥𑒢𑒱 𑒖𑒰𑒋 𑒞𑒻𑒿। 𑒣𑓂𑒩𑒏𑒵𑒞𑒱𑒧𑒹 𑒥𑒠𑒪𑒰𑒫 𑒋𑒪𑒻, 𑒡𑒰𑒩 𑒮𑒳𑒐𑒰 𑒑𑒹𑒪 𑒕𑒻, 𑒄 𑒮𑒦 𑒂 𑒂𑒩 𑒏𑒱𑒕𑒳 𑒔𑒲𑒖, 𑒖𑒹 𑒞𑒏𑒢𑒲𑒏𑒲 𑒧𑒳𑒠𑓂𑒠𑒰 𑒕𑒻, 𑒌 𑒣𑒳𑒪𑒣𑒩 𑒁𑒮𑒩𑒱 𑒏𑒹𑒪𑒏𑒻। 𑒢𑒫𑒏𑒰 𑒣𑒳𑒪 𑒖𑒰𑒡𑒩𑒱 𑒥𑒢𑒞𑒻, 𑒞𑒰𑒡𑒩𑒱 𑒣𑒳𑒩𑒢𑒏𑒰 𑒣𑒳𑒪 𑒔𑒪𑒱𑒞𑒹 𑒩𑒯𑒞𑒻। 𑒂 𑒄 𑒣𑒼𑒟𑒲 𑒣𑒳𑒩𑒢𑒏𑒰 𑒣𑒳𑒪𑒏𑒹𑒿 𑒁𑒧𑒩 𑒏𑓄 𑒠𑒹𑒞𑒻। 𑒍𑒏𑒩 𑒣𑒰𑒨𑒰𑒮𑒿 𑒪𑓄 𑒏𑓄 𑒁𑒢𑓂𑒞𑒱𑒧 𑒣𑒳𑒪 𑒡𑒩𑒱𑒏 𑒤𑒼𑒙𑒼 𑒥𑓂𑒪𑒻𑒏 𑒋𑒝𑓂𑒛 𑒯𑓂𑒫𑒰𑒃𑒙 𑒂 𑒩𑓀𑒑𑒲𑒢𑒧𑒹 𑒌 𑒣𑒼𑒟𑒲𑒧𑒹 𑒕𑒻। (𑒫𑒱𑒬𑓂𑒩𑒰𑒧)
𑒄𑒧𑒰𑒢𑒠𑒰𑒩𑒲 𑒞𑒿 𑒯𑒹𑒥𑒰𑒏𑒹 𑒔𑒰𑒯𑒲। (𑒧𑒳𑒮𑓂𑒏𑒲 𑒠𑒻𑒞) 𑒧𑒳𑒐𑓂𑒨𑒧𑓀𑒞𑓂𑒩𑒲𑒖𑒲 𑒯𑒧𑒩𑒰 𑒁𑒢𑒹𑒩𑒹 𑒪𑒖𑓂𑒖𑒱𑒞 𑒏𑓄 𑒩𑒯𑒪 𑒕𑒟𑒱। 𑒖𑒿 𑒄𑒧𑒰𑒢𑒠𑒰𑒩𑒲 𑒩𑒯𑒻 𑒞𑒻𑒿 𑒢𑒹 𑒄 𑒣𑒳𑒪 𑒋𑒞𑒥𑒼 𑒠𑒱𑒢 𑒙𑒱𑒏𑒪𑒻। 𑒌 𑒣𑒼𑒟𑒲𑒧𑒹 𑒞𑒲𑒮𑒹 𑒑𑒼𑒙𑒹𑒏 𑒢𑒰𑒧 𑒣𑒩𑒱𑒬𑒱𑒭𑓂𑒙𑒧𑒹 𑒠𑒹𑒪𑒰𑒕𑒱 𑒖𑒹 𑒌 𑒣𑒳𑒪 𑒢𑒱𑒩𑓂𑒧𑒰𑒝𑒧𑒹 𑒁𑒣𑒢 𑒥𑒪𑒱 𑒠𑒹𑒪𑒢𑓂𑒯𑒱। 𑒯𑒳𑒢𑒏𑒹 𑒪𑒼𑒏𑒢𑒱𑒏 𑒮𑓂𑒧𑒵𑒞𑒱𑒧𑒹 𑒄 𑒣𑒼𑒟𑒲 𑒮𑒧𑒩𑓂𑒣𑒱𑒞 𑒁𑒕𑒱।

𑒋𑒏𑒙𑒰 𑒪𑒼𑒏: (𑒛𑓀𑒏𑒰𑒣𑒩 𑒔𑒼𑒙 𑒠𑒻𑒞) 𑒂 …
(𑒧𑒖𑒠𑒴𑒩 𑒡𑒩𑒤𑒛𑓃𑒰 𑒏𑓄 𑒣𑓂𑒩𑒫𑒹𑒬 𑒏𑒩𑒻𑒋।)
𑒧𑒖𑒠𑒴𑒩: 𑒏𑒞𑒹𑒏𑒼𑒏𑒹𑒿 𑒧𑒰𑒩𑒱 𑒠𑒹𑒪 𑒑𑒹𑒪𑒻, 𑒞𑒏𑒩 𑒫𑒱𑒫𑒩𑒝 𑒏𑒞𑓄 𑒦𑒹𑒙𑒞।
𑒧𑒳𑒐𑓂𑒨 𑒧𑓀𑒞𑓂𑒩𑒲: (𑒧𑒳𑒮𑓂𑒏𑒲 𑒠𑒻𑒞) 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠।
𑒠𑒼𑒮𑒩 𑒪𑒼𑒏: (𑒛𑓀𑒏𑒰𑒣𑒩 𑒔𑒼𑒙 𑒠𑒻𑒞) 𑒧𑒢𑒳𑒏𑓂𑒐𑒏 𑒥𑒪𑒱 𑒠𑒹𑒢𑒱𑒯𑒰𑒩 𑒪𑒼𑒏𑒏 𑒥𑒪𑒱 𑒑𑓀𑒑𑒰 𑒧𑒻𑒨𑒰 𑒧𑒰𑓀𑒑𑒱 𑒩𑒯𑒪 𑒕𑒟𑒱, 𑒞𑒹𑒿 𑒢𑒹 𑒮𑒳𑒐𑒰𑒋𑒪 𑒖𑒰 𑒩𑒯𑒪 𑒕𑒟𑒱।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: (𑒧𑒳𑒮𑓂𑒏𑒲 𑒠𑒻𑒞) 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠।
(𑒜𑒼𑒪𑒯𑒼 𑒠𑒹𑒢𑒯𑒰𑒩𑒏 𑒣𑓂𑒩𑒫𑒹𑒬)
𑒜𑒼𑒪𑒯𑒼 𑒠𑒹𑒢𑒯𑒰𑒩: 𑒮𑒳𑒢𑒴-𑒮𑒳𑒢𑒴, 𑒮𑒳𑒢𑒻 𑒖𑒰𑒅। 𑒑𑓀𑒑𑒰 𑒥𑓂𑒩𑒱𑒖𑒣𑒩 𑒧𑒖𑒠𑒴𑒩𑒏 𑒖𑒩𑒴𑒩𑒲 𑒕𑒻। 𑒋𑒏 𑒠𑒱𑒮𑒏𑒰 𑒩𑒮𑓂𑒞𑒰 𑒥𑒢𑓂𑒢 𑒏𑓄 𑒏𑒋 𑒠𑒼𑒮𑒩 𑒠𑒱𑒮𑒏𑒰 𑒩𑒱𑒣𑒹𑒨𑒩 𑒔𑒪𑒱 𑒩𑒯𑒪 𑒕𑒻।
𑒧𑒖𑒠𑒴𑒩: (𑒛𑓀𑒏𑒰𑒣𑒩 𑒔𑒼𑒙 𑒠𑒻𑒞) 𑒯𑒾, 𑒖𑒯𑒱𑒨𑒰𑒮𑒿 𑒌 𑒣𑒳𑒪𑒏 𑒅𑒠𑓂𑒒𑒰𑒙𑒢 𑒦𑒹𑒪 𑒕𑒻 𑒞𑒯𑒱𑒨𑒹𑒮𑒿 𑒩𑒱𑒣𑒹𑒨𑒩𑒏 𑒚𑒏-𑒚𑒳𑒏 𑒬𑒳𑒩𑒴 𑒦𑓄 𑒑𑒹𑒪 𑒕𑒻।
𑒜𑒼𑒪𑒯𑒼 𑒠𑒹𑒢𑒯𑒰𑒩: 𑒮𑒳𑒢𑒻 𑒖𑒰𑒅, 𑒮𑒳𑒢𑒻 𑒖𑒰𑒅।
(𑒧𑒖𑒠𑒴𑒩 𑒮𑒦 𑒚𑒏-𑒚𑒳𑒏 𑒏𑓄 𑒩𑒯𑒪 𑒁𑒕𑒱, 𑒏𑒼𑒢𑒼 𑒂𑒿𑒏𑒛𑓃 𑒣𑒰𑒟𑒩 𑒮𑓂𑒙𑒹𑒖𑒏 𑒣𑒰𑒕𑒰𑒿 𑒁𑒢𑓂𑒯𑒰𑒩𑒧𑒹 𑒤𑒹𑒏𑒻𑒞 𑒁𑒕𑒱। 𑒏𑒼𑒢𑒼 𑒧𑒖𑒠𑒴𑒩 𑒖𑒨 𑒑𑓀𑒑𑒹 𑒥𑒰𑒖𑒱 𑒅𑒚𑒻𑒞 𑒁𑒕𑒱।)
𑒠𑒼𑒮𑒩 𑒪𑒼𑒏: (𑒛𑓀𑒏𑒰𑒣𑒩 𑒔𑒼𑒙 𑒠𑒻𑒞) 𑒂…
𑒧𑒖𑒠𑒴𑒩: 𑒏𑒱𑒨𑒼 𑒦𑒠𑒼𑒯𑒲𑒮𑒿 𑒧𑒖𑒠𑒴𑒩𑒏𑒹𑒿 𑒂𑒖𑒰𑒠 𑒏𑓄 𑒖𑒰𑒃 𑒕𑒻। 𑒏𑒱𑒨𑒼 𑒑𑓀𑒑𑒰 𑒣𑒳𑒪𑒏 𑒮𑒼𑒗𑒰𑒿 𑒣𑒱𑒔𑒛𑓃𑒰 𑒦𑓄 𑒖𑒰𑒃 𑒕𑒻। 𑒨𑒋𑒯 𑒮𑒦 𑒁𑒮𑒪 𑒖𑒳𑒪𑓂𑒧𑒲 𑒕𑒻। (𑒯𑒰𑒏𑓂𑒩𑒼𑒬 𑒏𑒩𑒻𑒞) 𑒨𑒋𑒯 𑒮𑒦 𑒁𑒮𑒪 𑒖𑒳𑒪𑓂𑒧𑒲 𑒕𑒻 𑒯𑒾, 𑒁𑒮𑒪 𑒖𑒳𑒪𑓂𑒧𑒲। 𑒁𑒩𑒹 𑒍𑒃 𑒃𑒢𑓂𑒖𑒲𑒢𑒱𑒨𑒩 𑒮𑒢 𑒪𑒼𑒏 𑒂𑒥𑒱 𑒏𑓄 𑒂𑒬𑒰 𑒠𑒱𑒨𑒰 𑒖𑒰𑒃 𑒕𑒻। 𑒢𑒻 𑒞𑒿 𑒏𑒯𑒱𑒨𑒰 𑒢𑒹 𑒣𑒩𑒱𑒫𑒩𑓂𑒞𑒢 𑒂𑒥𑒱 𑒖𑒃𑒞𑒻। 𑒪𑒼𑒏 𑒣𑒩𑒱𑒫𑒩𑓂𑒞𑒢 𑒂𑒢𑒱 𑒠𑒻𑒞𑒻 𑒯𑒾। (𑒯𑒰𑒏𑓂𑒩𑒼𑒬 𑒏𑒩𑒻𑒞) 𑒁𑒮𑒪 𑒖𑒳𑒪𑓂𑒧𑒲 𑒕𑒻 𑒃𑒢𑓂𑒖𑒲𑒢𑒱𑒨𑒩 𑒮𑒢 𑒪𑒼𑒏 𑒂𑒥𑒱 𑒏𑓄 𑒂𑒬𑒰 𑒠𑒱𑒨𑒰 𑒖𑒰𑒃 𑒕𑒻।
𑒧𑒳𑒐𑓂𑒨 𑒁𑒦𑒱𑒨𑒢𑓂𑒞𑒰: (𑒧𑒳𑒮𑓂𑒏𑒲 𑒠𑒻𑒞) 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠।
𑒧𑒳𑒐𑓂𑒨 𑒧𑓀𑒞𑓂𑒩𑒲: (𑒧𑒳𑒮𑓂𑒏𑒲 𑒠𑒻𑒞) 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠, 𑒡𑒢𑓂𑒨𑒫𑒰𑒠।
(𑒣𑒙𑒰𑒏𑓂𑒭𑒹𑒣।)