गजेन्द्र ठाकुर- उल्कामुख

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒅𑒪𑓂𑒏𑒰𑒧𑒳𑒐























𑒢𑒰𑒙𑒏𑒏𑒰𑒩 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩𑒏 𑒖𑒢𑓂𑒧 𑒦𑒰𑒑𑒪𑒣𑒳𑒩𑒧𑒹 𑒮𑒢𑓂 𑓑𑓙𑓗𑓑 𑒧𑒹 𑒦𑒹𑒪𑒢𑓂𑒯𑒱 𑒂 𑒂𑒃 𑒏𑒰𑒪𑓂𑒯𑒱 𑒍 𑒠𑒱𑒪𑓂𑒪𑒲𑒧𑒹 𑒩𑒯𑒻 𑒕𑒟𑒱।



















𑒅𑒪𑓂𑒏𑒰𑒧𑒳𑒐






𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩



𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢, 𑒢𑒄 𑒠𑒱𑒪𑓂𑒪𑒲






Ulkamukh: A Maithili Drama by Gajendra Thakur first published in 2012 by M/s Shruti Publications, India
Price: Rs.100
𑒮𑒩𑓂𑒫𑒰𑒡𑒱𑒏𑒰𑒩 © 𑒣𑓂𑒩𑒲𑒞𑒱 𑒚𑒰𑒏𑒳𑒩 2012
𑒣𑒯𑒱𑒪 𑒮𑓀𑒮𑓂𑒏𑒩𑒝 : 2012
ISBN : 978-93-80538-50-1
This drama is entirely a work of fiction. The names, characters and incidents portrayed in it are the work of the author’s imagination. Any resemblance to actual persons, living or dead, events or localities, is entirely coincidental.
Gajendra Thakur asserts the moral right to be identified as the author of this work.
Every effort has been made to trace or contact all copyright holders. The publishers will be pleased to make good any omissions or rectify any mistakes brought to their attention at the earliest opportunity.
All rights reserved. This book is sold subject to the condition that it shall not, by way of trade or otherwise, be lent, resold, hired out, or otherwise circulated without the publisher’s prior written consent in any form of binding or cover other than that in which it is published and without a similar condition including this condition being imposed on the subsequent purchaser and without limiting the rights under copyright reserved above; no part of this publication may be reproduced, stored in or introduced into a retrieval system, or transmitted, in any form or by any means- photographic, electronic, mechanical, photocopying, recording, taping, information storage- or otherwise, without the prior written permission of both the copyright owner and the aforementioned publisher of this book or as expressly permitted by law.
𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢 :𑒩𑒖𑒱𑒮𑓂𑒙𑒩𑓂𑒛 𑒂𑒤𑒱𑒮: 𑓘/𑓒𑓑, 𑒦𑒴𑒞𑒪, 𑒢𑓂𑒨𑒴 𑒩𑒰𑒖𑒹𑒢𑓂𑒠𑓂𑒩 𑒢𑒑𑒩, 𑒢𑒄 𑒠𑒱𑒪𑓂𑒪𑒲-𑓑𑓑𑓐𑓐𑓐𑓘.𑒠𑒴𑒩𑒦𑒰𑒭-(𑓐𑓑𑓑) 𑓒𑓕𑓘𑓘𑓙𑓖𑓕𑓖-𑓕𑓘 𑒤𑒻𑒏𑓂𑒮- (𑓐𑓑𑓑)𑓒𑓕𑓘𑓘𑓙𑓖𑓕𑓗
Website:http://www.shruti-publication.com
e-mail: shruti.publication@shruti-publication.com
Printed at: Ajay Arts, Delhi-110002
Distributor : Pallavi Distributors, Ward no- 6, Nirmali (Supaul), 𑒧𑒼.- 957245.4.5, 9931654742
Ulkamukh: A Maithili Drama by Gajendra Thakur

𑒅𑒪𑓂𑒏𑒰𑒧𑒳𑒐
-𑒑𑓀𑒑𑒹𑒬 𑒂 𑒫𑒪𑓂𑒪𑒦𑒰𑒏 𑒣𑓂𑒩𑒹𑒧 𑒌 𑒢𑒰𑒙𑒏𑒏 𑒫𑒱𑒭𑒨 𑒁𑒕𑒱। 𑒧𑒳𑒠𑒰 𑒣𑒯𑒱𑒪 𑒠𑒴 𑒁𑓀𑒏𑒏 𑒥𑒰𑒠 𑒞𑒹𑒮𑒩 𑒂 𑒔𑒰𑒩𑒱𑒧 𑒁𑓀𑒏 𑒥𑒠𑒪𑒱 𑒖𑒰𑒃𑒋। 𑒂 𑒂𑒥𑒱 𑒖𑒰𑒃 𑒕𑒟𑒱 𑒮𑒼𑒗𑒰𑒿 𑒅𑒠𑒨𑒢, 𑒠𑒲𑒢𑒰, 𑒦𑒠𑒩𑒲, 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩, 𑒂𑒔𑒰𑒩𑓂𑒨 𑒮𑒱𑓀𑒯, 𑒂𑒔𑒰𑒩𑓂𑒨 𑒮𑒩𑒦, 𑒬𑒱𑒭𑓂𑒨 𑒮𑒰𑒯𑒲, 𑒬𑒱𑒭𑓂𑒨 𑒐𑒱𑒐𑒱𑒩, 𑒬𑒱𑒭𑓂𑒨 𑒢𑒜𑓃𑒱𑒨𑒰, 𑒬𑒱𑒭𑓂𑒨 𑒥𑒱𑒖𑓂𑒖𑒲। 𑒂 𑒬𑒳𑒩𑒴 𑒦𑓄 𑒖𑒰𑒃𑒋 𑒃𑒞𑒱𑒯𑒰𑒮𑒏 𑒋𑒏𑒙𑒰 𑒭𑒛𑒨𑓀𑒞𑓂𑒩𑒏 𑒁𑒢𑒳𑒣𑒰𑒪𑒢। 𑒧𑒳𑒠𑒰 𑒔𑒰𑒩𑒱𑒧 𑒏𑒪𑓂𑒪𑒼𑒪𑒏 𑒁𑒢𑓂𑒞𑒧𑒹 𑒦𑒑𑒞𑒰 𑒏𑒯𑒱 𑒠𑒻 𑒕𑒟𑒱 𑒁𑒣𑒢 𑒬𑒱𑒭𑓂𑒨𑒏𑒹𑒿 𑒋𑒏𑒙𑒰 𑒩𑒯𑒮𑓂𑒨.......𑒖𑒹 𑒫𑒱𑒮𑓂𑒧𑒩𑒝𑒏 𑒥𑒰𑒠𑒼 𑒂𑒥𑒱 𑒖𑒰𑒋𑒞 𑒮𑓂𑒧𑒩𑒝𑒧𑒹।...𑒥𑒢𑒱 𑒅𑒪𑓂𑒏𑒰𑒧𑒳𑒐...
- 𑒣𑒰𑒿𑒔𑒧 𑒏𑒪𑓂𑒪𑒼𑒪𑒮𑒿 𑒮𑓀𑒏𑒹𑒞𑒏 𑒥𑒠𑒪𑒰 𑒫𑒰𑒮𑓂𑒞𑒫𑒱𑒏𑒞𑒰, 𑒏𑒪𑓂𑒣𑒢𑒰𑒏 𑒥𑒠𑒪𑒰 𑒮𑒞𑓂𑒨...
-𑒣𑒯𑒱𑒪𑒮𑒿 𑒔𑒰𑒩𑒱𑒧 𑒏𑒪𑓂𑒪𑒼𑒪 𑒡𑒩𑒱 𑒧𑓀𑒔𑒣𑒩 𑒬𑒞𑒩𑓀𑒖𑒏 𑒛𑒱𑒖𑒰𑒃𑒢 𑒥𑒢𑒰𑒋𑒪 𑒒𑒢 𑒩𑒰𑒐𑒪 𑒩𑒯𑒞, 𑒣𑒰𑒿𑒔𑒧 𑒏𑒪𑓂𑒪𑒼𑒪𑒮𑒿 𑒦𑒴𑒞 𑒂 𑒏𑒪𑓂𑒣𑒢𑒰𑒏 𑒣𑓂𑒩𑒞𑒲𑒏 𑒍𑒃 𑒮𑓀𑒏𑒹𑒞𑒏 𑒥𑒠𑒪𑒰 𑒫𑒰𑒮𑓂𑒞𑒫𑒱𑒏𑒞𑒰𑒏 𑒣𑓂𑒩𑒞𑒲𑒏 𑒑𑒼𑒪𑒰 𑒩𑒰𑒐𑒪 𑒩𑒯𑒞।
- 𑒑𑓀𑒑𑒹𑒬𑒏 𑒞𑒞𑓂𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒣𑒩 𑒜𑒹𑒩 𑒩𑒰𑒮 𑒙𑒲𑒏𑒰 𑒅𑒣𑒪𑒥𑓂𑒡 𑒁𑒕𑒱, 𑒑𑓀𑒑𑒹𑒬𑒏𑒹𑒿 𑒏𑒯𑒪 𑒖𑒰𑒃 𑒕𑒢𑓂𑒯𑒱 𑒞𑒞𑓂𑒫𑒔𑒱𑒞𑒰𑒧𑒝𑒱𑒏𑒰𑒩𑒏 𑒑𑓀𑒑𑒹𑒬; 𑒧𑒳𑒠𑒰 𑒯𑒳𑒢𑒏𑒩 𑒏𑒫𑒱𑒞𑒰 𑒦𑓄 𑒑𑒹𑒪 𑒕𑒢𑓂𑒯𑒱 "𑒅𑒪𑓂𑒏𑒰𑒧𑒳𑒐"!!!
𑒧𑒻𑒟𑒱𑒪𑒲 𑒢𑒰𑒙𑒏𑒏𑒹𑒿.....................
𑒢𑒰𑒙𑒏𑒏 𑒢𑒫 𑒨𑒳𑒑𑒧𑒹 𑒣𑓂𑒩𑒫𑒹𑒬 𑒣𑓂𑒩𑒫𑒹𑒬 𑒏𑒩𑒥𑒻𑒞 𑒁𑒕𑒱.......
𑒅𑒪𑓂𑒏𑒰𑒧𑒳𑒐.........................................................
𑒫𑒱𑒠𑒹𑒯 𑒢𑒰𑒙𑓂𑒨 𑒅𑒞𑓂𑒮𑒫 𑓒𑓐𑓑𑓒 𑒧𑒹 𑒧𑓀𑒔𑒱𑒞............................
𑒢𑒱𑒩𑓂𑒠𑒹𑒬𑒏 𑒩𑒯𑒟𑒱 𑒥𑒹𑒔𑒢 𑒚𑒰𑒏𑒳𑒩..................................................................
𑒧𑓀𑒔 𑒣𑒩𑒱𑒏𑒪𑓂𑒣𑒢𑒰 𑒩𑒯𑒋 𑒦𑒩𑒞 𑒢𑒰𑒙𑓂𑒨𑒬𑒰𑒮𑓂𑒞𑓂𑒩𑒏 𑒁𑒢𑒳𑒩𑒴𑒣 ..



𑒅𑒪𑓂𑒏𑒰𑒧𑒳𑒐 (𑒧𑒻𑒟𑒱𑒪𑒲 𑒢𑒰𑒙𑒏)- 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩

𑒣𑒰𑒞𑓂𑒩 𑒣𑒩𑒱𑒔𑒨
𑒣𑒯𑒱𑒪𑒮𑒿 𑒔𑒰𑒩𑒱𑒧 𑒏𑒪𑓂𑒪𑒼𑒪 𑒡𑒩𑒱 𑒧𑓀𑒔𑒣𑒩 𑒬𑒞𑒩𑓀𑒖𑒏 𑒛𑒱𑒖𑒰𑒃𑒢 𑒥𑒢𑒰𑒋𑒪 𑒒𑒢 𑒩𑒰𑒐𑒪 𑒩𑒯𑒞, 𑒣𑒰𑒿𑒔𑒧 𑒏𑒪𑓂𑒪𑒼𑒪𑒮𑒿 𑒦𑒴𑒞 𑒂 𑒏𑒪𑓂𑒣𑒢𑒰𑒏 𑒣𑓂𑒩𑒞𑒲𑒏 𑒍𑒃 𑒮𑓀𑒏𑒹𑒞𑒏 𑒥𑒠𑒪𑒰 𑒫𑒰𑒮𑓂𑒞𑒫𑒱𑒏𑒞𑒰𑒏 𑒣𑓂𑒩𑒞𑒲𑒏 𑒑𑒼𑒪𑒰 𑒩𑒰𑒐𑒪 𑒩𑒯𑒞।

[ 𑒣𑒰𑒞𑓂𑒩: 𑒣𑒯𑒱𑒪𑒮𑒿 𑒔𑒰𑒩𑒱𑒧 𑒏𑒪𑓂𑒪𑒼𑒪 𑒡𑒩𑒱 : 𑒑𑓀𑒑𑒹𑒬 , 𑒫𑒪𑓂𑒪𑒦𑒰, 𑒠𑒹𑒫𑒠𑒞𑓂𑒞, 𑒫𑒩𑓂𑒠𑓂𑒡𑒧𑒰𑒢, 𑒅𑒠𑒨𑒢, 𑒠𑒲𑒢𑒰, 𑒦𑒠𑒩𑒲, 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩, 𑒂𑒔𑒰𑒩𑓂𑒨 𑒮𑒱𑓀𑒯, 𑒂𑒔𑒰𑒩𑓂𑒨 𑒮𑒩𑒦, 𑒬𑒱𑒭𑓂𑒨 𑒮𑒰𑒯𑒲, 𑒬𑒱𑒭𑓂𑒨 𑒐𑒱𑒐𑒱𑒩, 𑒬𑒱𑒭𑓂𑒨 𑒢𑒜𑓃𑒱𑒨𑒰, 𑒬𑒱𑒭𑓂𑒨 𑒥𑒱𑒖𑓂𑒖𑒲, 𑒦𑒑𑒞𑒰, 𑒦𑒑𑒞𑒰𑒏 𑒬𑒱𑒭𑓂𑒨।
𑒣𑒰𑒞𑓂𑒩: 𑒣𑒰𑒿𑒔𑒧 𑒏𑒪𑓂𑒪𑒼𑒪𑒮𑒿 : 𑒬𑒱𑒭𑓂𑒨 𑒮𑒰𑒯𑒲 𑒥𑒢𑒱 𑒑𑒹𑒪 𑒯𑒩𑒣𑒞𑒱 (𑒑𑓀𑒑𑒰𑒡𑒩𑒏 𑒣𑒱𑒞𑒰), 𑒑𑓀𑒑𑒹𑒬 𑒥𑒢𑒱 𑒖𑒰𑒃 𑒕𑒟𑒱 𑒑𑓀𑒑𑒰𑒡𑒩, 𑒫𑒪𑓂𑒪𑒦𑒰 𑒥𑒢𑒱 𑒖𑒰𑒃 𑒕𑒟𑒱 𑒏𑒳𑒧𑒩𑒮𑒳𑒞𑒰 (𑒑𑓀𑒑𑒰𑒡𑒩𑒏 𑒣𑒞𑓂𑒢𑒲), 𑒦𑒑𑒞𑒰 𑒥𑒢𑒱 𑒑𑒹𑒪 𑒖𑒙𑒰, 𑒦𑒑𑒞𑒰𑒏 𑒬𑒱𑒭𑓂𑒨 𑒥𑒢𑒱 𑒑𑒹𑒪 𑒠𑒪𑒱𑒞 𑒑𑒰𑒨𑒏 𑒯𑒲𑒩𑒴, 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒥𑒢𑒱 𑒖𑒰𑒃 𑒕𑒟𑒱 𑒧𑒢𑒮𑒳𑒐 (𑒖𑒲𑒫𑒹𑒏 𑒣𑒱𑒞𑒰), 𑒂𑒔𑒰𑒩𑓂𑒨 𑒮𑒱𑓀𑒯 𑒥𑒢𑒱 𑒖𑒰𑒃 𑒕𑒟𑒱 𑒯𑒩𑒱𑒏𑒩-𑒮𑒹𑒢𑒰𑒣𑒞𑒱 (𑒧𑒹𑒡𑒰𑒏 𑒣𑒱𑒞𑒰), 𑒂𑒔𑒰𑒩𑓂𑒨 𑒮𑒩𑒦 𑒥𑒢𑒱 𑒖𑒰𑒃 𑒕𑒟𑒱 𑒏𑒲𑒩𑓂𑒞𑒱 𑒮𑒱𑓀𑒯 (𑒩𑒰𑒖𑒰), 𑒫𑒩𑓂𑒠𑓂𑒡𑒧𑒰𑒢 𑒥𑒢𑒱 𑒖𑒰𑒃 𑒕𑒟𑒱 𑒧𑒱𑒞𑒴 (𑒑𑓀𑒑𑒰𑒡𑒩𑒏 𑒥𑒯𑒱𑒢𑒼𑒃), 𑒠𑒹𑒫𑒠𑒞𑓂𑒞 𑒥𑒢𑒱 𑒖𑒰𑒃 𑒕𑒟𑒱 𑒖𑒲𑒫𑒹 (𑒧𑒢𑒮𑒳𑒐𑒏 𑒥𑒹𑒙𑒰), 𑒬𑒱𑒭𑓂𑒨 𑒐𑒱𑒐𑒱𑒩 𑒥𑒢𑒱 𑒑𑒹𑒪 𑒩𑒰𑒖𑒰𑒏 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝, 𑒬𑒱𑒭𑓂𑒨 𑒢𑒜𑓃𑒱𑒨𑒰 𑒥𑒢𑒱 𑒑𑒹𑒪 𑒠𑒩𑒥𑒰𑒩𑒲-𑓑, 𑒬𑒱𑒭𑓂𑒨 𑒥𑒱𑒖𑓂𑒖𑒲 𑒥𑒢𑒱 𑒑𑒹𑒪 𑒠𑒩𑒥𑒰𑒩𑒲-𑓒, 𑒅𑒠𑒨𑒢 𑒥𑒢𑒱 𑒑𑒹𑒪 𑒧𑒰𑒡𑒫 (𑒁𑒢𑒳𑒦𑒫 𑒧𑒝𑓂𑒛𑒪𑒏 𑒮𑒠𑒮𑓂𑒨 𑒂 𑒠𑒩𑒥𑒰𑒩𑒲), 𑒠𑒲𑒢𑒰 𑒥𑒢𑒱 𑒑𑒹𑒪𑒰𑒯 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑, 𑒦𑒠𑒩𑒲 𑒥𑒢𑒱 𑒑𑒹𑒪𑒰𑒯 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓒। 𑓔 𑒙𑒰 𑒮𑓂𑒞𑓂𑒩𑒲 𑒣𑒰𑒞𑓂𑒩 𑒌 𑒁𑒢𑓂𑒞𑒱𑒧 𑒠𑒳𑒢𑒴 𑒁𑓀𑒏𑒧𑒹 𑒥𑒜𑓃𑒱 𑒖𑒰𑒃 𑒕𑒟𑒱: 𑒩𑒳𑒠𑓂𑒩𑒧𑒞𑒱 (𑒧𑒰𑒡𑒫𑒏 𑒧𑒰𑒋) 𑒮𑒼𑒯𑒰𑒑𑒼 (𑒑𑓀𑒑𑒰𑒡𑒩𑒏 𑒧𑒰𑒞𑒰), 𑒂𑒢𑒢𑓂𑒠𑒰 (𑒑𑓀𑒑𑒰𑒡𑒩𑒏 𑒥𑒯𑒱𑒢), 𑒧𑒹𑒡𑒰 (𑒯𑒩𑒱𑒏𑒩- 𑒮𑒹𑒢𑒰𑒣𑒞𑒱𑒏 𑒥𑒹𑒙𑒲)]


[ 𑒣𑒯𑒱𑒪𑒮𑒿 𑒔𑒰𑒩𑒱𑒧 𑒏𑒪𑓂𑒪𑒼𑒪 𑒡𑒩𑒱𑒏 𑒣𑒰𑒞𑓂𑒩 𑒥𑒠𑒪𑒱 𑒖𑒰𑒃 𑒕𑒟𑒱, 𑒠𑒼𑒮𑒩 𑒩𑒴𑒣𑒧𑒹 𑒣𑒰𑒿𑒔𑒧 𑒏𑒪𑓂𑒪𑒼𑒪𑒮𑒿 𑓔 𑒙𑒰 𑒮𑓂𑒞𑓂𑒩𑒲 𑒣𑒰𑒞𑓂𑒩 𑒥𑒜𑓃𑒱 𑒖𑒰𑒃 𑒕𑒟𑒱: 𑒩𑒳𑒠𑓂𑒩𑒧𑒞𑒱 (𑒧𑒰𑒡𑒫𑒏 𑒧𑒰𑒋) 𑒮𑒼𑒯𑒰𑒑𑒼 (𑒑𑓀𑒑𑒰𑒡𑒩𑒏 𑒧𑒰𑒞𑒰), 𑒂𑒢𑒢𑓂𑒠𑒰 (𑒑𑓀𑒑𑒰𑒡𑒩𑒏 𑒥𑒯𑒱𑒢), 𑒧𑒹𑒡𑒰 (𑒯𑒩𑒱𑒏𑒩- 𑒮𑒹𑒢𑒰𑒣𑒞𑒱𑒏 𑒥𑒹𑒙𑒲) ]




𑒣𑒯𑒱𑒪 𑒏𑒪𑓂𑒪𑒼𑒪
(𑒧𑓀𑒔𑒣𑒩 𑒫𑒰𑒧 𑒧𑒞𑓂𑒞𑒫𑒩𑓂𑒝𑒲𑒣𑒩 𑒏𑒴𑒙𑒏 𑒋𑒏𑒙𑒰 𑒣𑒻𑒒 𑒒𑒢 𑒂 𑒠𑒯𑒱𑒢 𑒧𑒞𑓂𑒞𑒫𑒩𑓂𑒝𑒲𑒣𑒩 𑒏𑒴𑒙𑒏 𑒋𑒏𑒙𑒰 𑒂𑒩 𑒣𑒻𑒒 𑒒𑒢 𑒩𑒰𑒐𑒪 𑒩𑒯𑒻𑒞 𑒁𑒕𑒱, 𑒒𑒢𑒏 𑒮𑒦 𑒣𑒵𑒭𑓂𑒚𑒣𑒩 𑒬𑒞𑒩𑓀𑒖𑒏 𑒂𑒏𑒵𑒞𑒱 𑒥𑒢𑒰𑒋𑒪 𑒩𑒯𑒻𑒞 𑒕𑒻॥ 𑒡𑒡𑒩𑒰 𑒤𑒹𑒏𑒻𑒞 𑒋𑒏𑒙𑒰 𑒑𑒲𑒠𑒩 𑒧𑓀𑒔𑒣𑒩 𑒔𑒰𑒩𑒴 𑒏𑒰𑒞 𑒒𑒴𑒧𑒱 𑒖𑒰𑒃𑒞 𑒁𑒕𑒱। 𑒠𑒴 𑒞𑒲𑒢𑒙𑒰 𑒙𑒰𑒩𑓂𑒔𑒮𑒿 𑒄 𑒣𑓂𑒩𑒦𑒰𑒫 𑒅𑒞𑓂𑒣𑒢𑓂𑒢 𑒏𑒋𑒪 𑒖𑒰 𑒮𑒏𑒻𑒋। 𑒣𑒰𑒕𑒴𑒮𑒿 𑒯𑒴𑒂-𑒯𑒴𑒂𑒏 𑒡𑓂𑒫𑒢𑒱𑒏 𑒮𑓀𑒑 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱। 𑒤𑒹𑒩 𑒧𑓀𑒔 𑒣𑓂𑒩𑒏𑒰𑒬𑒱𑒞 𑒯𑒼𑒃𑒞 𑒁𑒕𑒱 𑒂 𑒑𑓀𑒑𑒹𑒬 𑒂 𑒫𑒪𑓂𑒪𑒦𑒰 𑒩𑓀𑒑𑒣𑒲𑒚𑒣𑒩 𑒫𑒰𑒩𑓂𑒞𑒰𑒪𑒰𑒣𑒏 𑒧𑒳𑒠𑓂𑒩𑒰𑒧𑒹 𑒥𑒻𑒮𑒪 𑒕𑒟𑒱। 𑒥𑒲𑒔𑒧𑒹 𑒏𑒴𑒙𑒏 𑒣𑒻𑒒 𑒒𑒢 𑒧𑒞𑓂𑒞𑒫𑒩𑓂𑒝𑒲𑒮𑒿 𑒩𑓀𑒑𑒣𑒲𑒚𑒣𑒩 𑒩𑒰𑒐𑒪 𑒖𑒰𑒃𑒞 𑒁𑒕𑒱, 𑒖𑒃𑒣𑒩 𑒧𑒳𑒿𑒯 𑒐𑒮𑒰 𑒏𑓄 𑒠𑒳𑒢𑒴 𑒑𑒼𑒙𑒹 𑒑𑒣 𑒏𑓄 𑒩𑒯𑒪 𑒕𑒟𑒱। )
𑒫𑒪𑓂𑒪𑒦𑒰: 𑒅𑒭𑒰𑒏 𑒮𑓂𑒫𑒩𑓂𑒝𑒱𑒧 𑒂𑒦𑒰 𑒮𑒳𑒮𑒖𑓂𑒖𑒱𑒞 𑒇𑒭𑒱𑒏 𑒮𑓂𑒧𑒩𑒝 𑒏𑒩𑒥𑒻𑒞 𑒁𑒕𑒱।
𑒑𑓀𑒑𑒹𑒬: 𑒏𑒲 𑒦𑒹𑒪? 𑒏𑒼𑒢 𑒇𑒭𑒱𑒏 𑒔𑒩𑓂𑒔𑒰 𑒁𑒯𑒰𑒿 𑒏𑓄 𑒩𑒯𑒪 𑒕𑒲? 𑒏𑒏𑒩 𑒮𑓂𑒧𑒩𑒝 𑒁𑒥𑒻𑒋?
𑒫𑒪𑓂𑒪𑒦𑒰: 𑒁𑒯𑒰𑒿𑒏, 𑒂𑒩 𑒏𑒏𑒩?
𑒑𑓀𑒑𑒹𑒬: 𑒯𑒧 𑒏𑒯𑒱𑒨𑒰𑒮𑒿 𑒇𑒭𑒱 𑒦𑓄 𑒑𑒹𑒪𑒾𑓀। 𑒯𑒧 𑒞𑒿 𑒋𑒏𑒙𑒰 𑒮𑒰𑒡𑒰𑒩𑒝 𑒫𑒱𑒠𑓂𑒨𑒰𑒩𑓂𑒟𑒲 𑒕𑒲।
𑒫𑒪𑓂𑒪𑒦𑒰: 𑒁𑒯𑒰𑒿𑒏 𑒔𑒰𑒞𑒳𑒩𑒲𑒏 𑒮𑒦 𑒚𑒰𑒧 𑒔𑒩𑓂𑒔𑒰 𑒯𑒼𑒃𑒋।
𑒑𑓀𑒑𑒹𑒬: 𑒔𑒰𑒞𑒳𑒩𑒲𑒏 𑒔𑒩𑓂𑒔𑒰! 𑒯𑒧 𑒞𑒿 𑒫𑒰𑒏 𑒔𑒰𑒞𑒳𑒩𑒲𑒏 𑒫𑒱𑒩𑒼𑒡 𑒏𑒩𑒻 𑒕𑒲। 𑒫𑒰𑒏 𑒔𑒰𑒞𑒳𑒩𑒲 𑒞𑒟𑓂𑒨𑒣𑒩 𑒂 𑒮𑒞𑓂𑒨𑒮𑒿 𑒦𑒰𑒩𑒲 𑒢𑒻 𑒦𑓄 𑒖𑒰𑒋, 𑒞𑒏𑒩 𑒧𑒰𑒞𑓂𑒩 𑒣𑓂𑒩𑒨𑒰𑒮 𑒏𑒩𑒻 𑒕𑒲।
𑒫𑒪𑓂𑒪𑒦𑒰: 𑒧𑒳𑒠𑒰 𑒞𑒃𑒮𑒿 𑒏𑒲 𑒯𑒋𑒞। 𑒪𑒼𑒏 𑒞𑒿 𑒒𑒳𑒧𑒰 𑒤𑒱𑒩𑒰 𑒏𑓄 𑒥𑒰𑒞 𑒥𑒖𑒱𑒞𑒹 𑒁𑒕𑒱। 𑒁𑒯𑒰𑒿 𑒫𑒰𑒏 𑒔𑒰𑒞𑒳𑒩𑒲𑒏 𑒔𑒪𑒰𑒏𑒲𑒏𑒹𑒿 𑒠𑒹𑒐𑒰𑒩 𑒏𑒹𑒢𑒹 𑒕𑒱𑒌। 𑒏𑒞𑒹𑒏𑒼 𑒬𑓂𑒪𑒼𑒏𑒧𑒹 𑒌 𑒑𑒣𑒣𑒩 𑒁𑒯𑒰𑒿 𑒔𑒩𑒔𑒰 𑒏𑒹𑒢𑒹 𑒕𑒱𑒌। 𑒞𑒻𑒨𑒼 𑒪𑒼𑒏 𑒑𑒣 𑒒𑒳𑒧𑒰 𑒏𑓄 𑒥𑒰𑒖𑒱𑒨𑒹 𑒠𑒻 𑒕𑒟𑒱।
𑒑𑓀𑒑𑒹𑒬: 𑒁𑒯𑒰𑒿 𑒏𑒯𑒱𑒨𑒰𑒮𑒿 𑒯𑒧𑒩 𑒋𑒞𑒹𑒏 𑒔𑒱𑒢𑓂𑒞𑒰 𑒏𑒩𑓄 𑒪𑒑𑒪𑒾𑓀।
𑒫𑒪𑓂𑒪𑒦𑒰: 𑒠𑒹𑒐𑒴। 𑒁𑒯𑒰𑒿 𑒔𑒩𑓂𑒧𑒏𑒰𑒩 𑒙𑒼𑒪𑒧𑒹 𑒥𑒔𑓂𑒔𑒹𑒮𑒿 𑒂𑒥𑒱 𑒩𑒯𑒪 𑒕𑒲…
𑒑𑓀𑒑𑒹𑒬: 𑒂 𑒥𑒔𑓂𑒔𑒹𑒮𑒿 𑒪𑒼𑒏𑒏 𑒥𑒼𑒪 𑒮𑒳𑒢𑒱 𑒩𑒯𑒪 𑒕𑒲..
𑒫𑒪𑓂𑒪𑒦𑒰: 𑒧𑒳𑒠𑒰 𑒪𑒼𑒏𑒏 𑒥𑒼𑒪 𑒂𑒩 𑒥𑒱𑒐𑒰𑒯 𑒦𑓄 𑒑𑒹𑒪 𑒁𑒕𑒱..
𑒑𑓀𑒑𑒹𑒬: 𑒏𑒞𑒹𑒏 𑒥𑒱𑒐𑒰𑒯। 𑒮𑒞𑓂𑒨𑒏𑒰𑒧𑒏 𑒦𑒰𑒑𑓂𑒨 𑒯𑒧𑒩𑒰 𑒦𑒹𑒙𑒪 𑒁𑒕𑒱…
𑒫𑒪𑓂𑒪𑒦𑒰: 𑒏𑒼𑒢 𑒮𑒞𑓂𑒨𑒏𑒰𑒧..
𑒑𑓀𑒑𑒹𑒬: 𑒫𑒋𑒯 𑒮𑒞𑓂𑒨𑒏𑒰𑒧 𑒖𑒏𑒩𑒰 𑒣𑒱𑒞𑒰𑒏 𑒫𑒱𑒭𑒨𑒧𑒹 𑒥𑒳𑒗𑒪 𑒢𑒻 𑒕𑒪𑒻, 𑒍𑒏𑒩 𑒧𑒰𑒨𑒼𑒏𑒹𑒿 𑒢𑒻 𑒥𑒳𑒗𑒪 𑒩𑒯𑒻 𑒖𑒹 𑒏𑒹 𑒍𑒏𑒩 𑒣𑒱𑒞𑒰 𑒕𑒻। 𑒧𑒳𑒠𑒰 𑒍𑒏𑒩 𑒑𑒳𑒩𑒳 𑒑𑒾𑒞𑒧 𑒍𑒏𑒩𑒰 𑒬𑒱𑒏𑓂𑒭𑒰 𑒠𑒹𑒪𑒐𑒱𑒢𑓂𑒯।
𑒫𑒪𑓂𑒪𑒦𑒰: 𑒁𑒯𑒴𑒿𑒮𑒿 𑒣𑒴𑒕𑒪 𑒑𑒹𑒪 𑒍 𑒣𑓂𑒩𑒬𑓂𑒢 𑒑𑓀𑒑𑒹𑒬? 𑒣𑓂𑒩𑒬𑓂𑒢 𑒖𑒹..𑒖𑒹..𑒏𑒹 𑒕𑒟𑒱 𑒁𑒯𑒰𑒿𑒏 𑒣𑒱𑒞𑒰..𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒣𑒰𑒿𑒔 𑒥𑒩𑓂𑒐𑒏 𑒥𑒰𑒠 𑒏𑒼𑒢𑒰 𑒦𑒹𑒪 𑒁𑒯𑒰𑒿𑒏 𑒖𑒢𑓂𑒧…
𑒑𑓀𑒑𑒹𑒬: (𑒧𑒳𑒿𑒯 𑒒𑒳𑒧𑒰 𑒏𑓄 𑒣𑒰𑒕𑒴 𑒠𑒱𑒮 𑒞𑒰𑒏𑓄 𑒪𑒑𑒻 𑒕𑒟𑒱) 𑒣𑒴𑒕𑒪 𑒑𑒹𑒪 𑒫𑒪𑓂𑒪𑒦𑒰, 𑒣𑒴𑒕𑒪 𑒑𑒹𑒪। 𑒥𑒱𑒢𑒳 𑒣𑒱𑒞𑒰𑒏 𑒁𑒯𑒰𑒿𑒏 𑒖𑒢𑓂𑒧..𑒣𑒱𑒞𑒵 𑒣𑒩𑒼𑒏𑓂𑒭𑒹 𑒣𑒘𑓂𑒔 𑒫𑒩𑓂𑒭 𑒫𑓂𑒨𑒞𑒲𑒞𑒹 𑒑𑓀𑒑𑒹𑒬𑒼𑒞𑓂𑒣𑒞𑓂𑒞𑒱…
𑒫𑒪𑓂𑒪𑒦𑒰: (𑒑𑓀𑒑𑒹𑒬𑒏𑒹𑒿 𑒒𑒳𑒧𑒰 𑒏𑓄 𑒮𑒼𑒗𑒰𑒿 𑒪𑓄 𑒁𑒢𑒻 𑒕𑒟𑒱) 𑒕𑒼𑒛𑓃𑒴..𑒯𑒧𑒩𑒰 𑒞𑒿 𑒥𑒳𑒗𑒪𑒹 𑒁𑒕𑒱।
𑒑𑓀𑒑𑒹𑒬: 𑒑𑒳𑒩𑒳𑒖𑒲 𑒯𑒧𑒩𑒼𑒮𑒿 𑒣𑒳𑒕𑒢𑒹 𑒩𑒯𑒟𑒱 𑒣𑒱𑒞𑒰𑒏 𑒫𑒱𑒭𑒨𑒧𑒹। 𑒔𑒩𑓂𑒧𑒏𑒰𑒩 𑒙𑒼𑒪𑒏 𑒖𑒹 𑒍 𑒩𑒯𑒟𑒱 𑒖𑒹 𑒯𑒧𑒩 𑒧𑒰𑒞𑒰𑒏𑒹𑒿 𑒂𑒣𑒞𑓂𑒏𑒰𑒪𑒧𑒹 𑒮𑒯𑒰𑒨𑒞𑒰 𑒠𑒹𑒢𑒹 𑒩𑒯𑒟𑒱, 𑒂𑒥 𑒑𑒰𑒧𑒹 𑒕𑒼𑒛𑓃𑒱 𑒠𑒹𑒪𑒢𑓂𑒯𑒱।
𑒫𑒪𑓂𑒪𑒦𑒰: 𑒯𑒧𑒯𑒴𑒿 𑒮𑒋𑒯 𑒮𑒳𑒢𑒢𑒹 𑒕𑒱𑒌, 𑒢𑒻 𑒖𑒰𑒢𑒱 𑒏𑒞𑓄 𑒔𑒪𑒱 𑒑𑒹𑒪𑒰𑒯 𑒍।
𑒑𑓀𑒑𑒹𑒬: 𑒧𑒳𑒠𑒰 𑒂𑒃𑒨𑒼 𑒁𑒯𑒰𑒿𑒏 𑒙𑒼𑒪𑒧𑒹 𑒯𑒧𑒩𑒰 𑒫𑒋𑒯 𑒂𑒣𑒏𑒞𑒰 𑒦𑒹𑒙𑒻𑒋।
𑒫𑒪𑓂𑒪𑒦𑒰: 𑒂𑒯𑒰। 𑒏𑒏𑒩𑒰-𑒏𑒏𑒩𑒰𑒮𑒿।
𑒑𑓀𑒑𑒹𑒬: 𑒋𑒏𑒙𑒰 𑒞𑒿 𑒮𑒼𑒗𑒹𑒿 𑒕𑒟𑒱 𑒯𑒧𑒩।
𑒫𑒪𑓂𑒪𑒦𑒰: 𑒮𑒋𑒯 𑒂𑒣𑒏𑒞𑒰 𑒞𑒿 𑒪𑒼𑒏𑒏 𑒂𑒿𑒐𑒱𑒏𑒹𑒿 𑒢𑒻 𑒮𑒼𑒯𑒰𑒃 𑒕𑒻..𑒪𑒼𑒏𑒏 𑒂𑒿𑒐𑒱𑒧𑒹 𑒯𑒲𑓀𑒑 𑒮𑒳𑒃𑒨𑒰..
𑒑𑓀𑒑𑒹𑒬: 𑒫𑒪𑓂𑒪𑒦𑒰, 𑒁𑒯𑒰𑒿 𑒞𑒿 𑒮𑒦𑒮𑒿 𑒑𑒣 𑒏𑒩𑒻 𑒕𑒲, 𑒯𑒧𑒩𑒰𑒮𑒿, 𑒑𑒰𑒕-𑒣𑒰𑒞𑒮𑒿, 𑒔𑒱𑒛𑓃𑒻 𑒔𑒳𑒢𑒧𑒳𑒢𑒲𑒮𑒿, 𑒮𑒧𑓂𑒣𑒴𑒩𑓂𑒝 𑒣𑓂𑒩𑒏𑒵𑒞𑒱𑒮𑒿…
𑒫𑒪𑓂𑒪𑒦𑒰: 𑒁𑒯𑒰𑒿 𑒞𑒿 𑒪𑒑𑒻𑒋 𑒣𑒯𑒱𑒢𑒹 𑒏𑒞𑒰𑒏 𑒖𑒢𑓂𑒧 𑒮𑓂𑒞𑓂𑒩𑒲 𑒕𑒪𑒾𑓀..
𑒑𑓀𑒑𑒹𑒬: 𑒁𑒯𑒰𑒿 𑒧𑒱𑒟𑒱𑒪𑒰𑒏 𑒩𑒰𑒖𑒏𑒳𑒧𑒰𑒩𑒲 𑒕𑒲 𑒫𑒪𑓂𑒪𑒦𑒰। 𑒁𑒯𑒰𑒿 𑒂𑒿𑒐𑒱 𑒅𑒚𑒰 𑒏𑓄 𑒠𑒹𑒐𑒻 𑒕𑒲 𑒞𑒿 𑒪𑒑𑒻𑒋 𑒖𑒹 𑒣𑓂𑒩𑒏𑒵𑒞𑒱 𑒁𑒣𑒢 𑒯𑒵𑒠𑒨 𑒐𑒼𑒪𑒱 𑒏𑓄 𑒣𑓂𑒩𑒹𑒧 𑒏𑓄 𑒩𑒯𑒪 𑒁𑒕𑒱, 𑒁𑒯𑒰𑒿 𑒕𑒲 𑒣𑒞𑒰𑒪𑒮𑒢 𑒑𑒯𑒲𑓀𑒩 𑒂 𑒑𑒧𑓂𑒦𑒲𑒩 𑒧𑒳𑒠𑒰 𑒅𑒡𑒱𑒨𑒰𑒃𑒞 𑒧𑒹𑒒 𑒮𑒢 𑒮𑒰𑒏𑒰𑓀𑒏𑓂𑒭, 𑒫𑒩𑒏 𑒑𑒰𑒕 𑒮𑒢 𑒮𑓂𑒟𑒱𑒩 𑒧𑒳𑒠𑒰 𑒯𑒩𑒠𑒧 𑒣𑓂𑒩𑒮𑒢𑓂𑒢 𑒌 𑒡𑒰𑒢𑒏 𑒬𑒲𑒮 𑒮𑒢..(𑒐𑒹𑒞 𑒠𑒱𑒮 𑒃𑒬𑒰𑒩𑒰 𑒏𑒩𑒻 𑒕𑒟𑒱)।
𑒫𑒪𑓂𑒪𑒦𑒰: 𑒁𑒯𑒰𑒿 𑒏𑒼𑒢 𑒏𑒧 𑒕𑒲 𑒑𑓀𑒑𑒹𑒬, 𑒁𑒯𑒰𑒿 𑒫𑒱𑒠𑓂𑒫𑒞𑒰𑒮𑒿 𑒦𑒩𑒪 𑒕𑒲, 𑒏𑒼𑒢𑒼 𑒮𑒧𑓂𑒫𑒰𑒠 𑒫𑒱𑒫𑒰𑒠 𑒮𑓂𑒟𑒱𑒩𑒔𑒱𑒞𑓂𑒞 𑒦𑓄 𑒮𑒳𑒢𑒻 𑒕𑒲 𑒏𑒰𑒙𑒻 𑒕𑒲, 𑒫𑒱𑒏𑓂𑒩𑒧𑒰𑒠𑒱𑒞𑓂𑒨 𑒮𑒢 𑒢𑓂𑒨𑒰𑒨 𑒏𑒩𑒻 𑒕𑒲, 𑒫𑓂𑒨𑒫𑒯𑒰𑒩𑒲 𑒕𑒲 𑒂 𑒁𑒯𑒰𑒿 𑒮𑓂𑒟𑒱𑒩 𑒕𑒲 𑒯𑒱𑒧𑒰𑒪𑒨 𑒮𑒢।
𑒑𑓀𑒑𑒹𑒬: 𑒫𑒪𑓂𑒪𑒦𑒰, 𑒁𑒯𑒰𑒿𑒏 𑒮𑒾𑒢𑓂𑒠𑒩𑓂𑒨 𑒁𑒣𑓂𑒩𑒞𑒱𑒧 𑒁𑒕𑒱, 𑒁𑒯𑒰𑒿𑒮𑒿 𑒥𑒹𑒬𑒲 𑒣𑒴𑒩𑓂𑒝 𑒢𑒹 𑒮𑓂𑒫𑒩𑓂𑒝 𑒁𑒕𑒱 𑒢𑒹 𑒂𑒢 𑒏𑒱𑒕𑒳। 𑒁𑒯𑒰𑒿 𑒪𑒑 𑒂𑒥𑒱 𑒏𑓄 𑒪𑒑𑒻𑒋 𑒖𑒹𑒢𑒰 𑒦𑒳𑒟𑒱𑒨𑒰𑒨𑒪 𑒖𑒯𑒰𑒖 𑒏𑒱𑒢𑒰𑒩𑒣𑒩 𑒪𑒰𑒑𑒱 𑒑𑒹𑒪। 𑒯𑒧𑒩 𑒫𑒱𑒠𑓂𑒨𑒰 𑒂𑒥 𑒣𑒴𑒩𑓂𑒝 𑒯𑒼𑒃𑒋 𑒥𑒪𑒰 𑒁𑒕𑒱। 𑒏𑒱𑒕𑒳 𑒢𑒫 𑒔𑒲𑒖 𑒥𑒯𑒰𑒩 𑒏𑒹𑒪𑒾𑓀 𑒁𑒕𑒱 𑒧𑒢𑓂𑒟𑒢𑒮𑒿। 𑒧𑒱𑒟𑒱𑒪𑒰 𑒫𑒱𑒠𑓂𑒨𑒰 𑒬𑒴𑒢𑓂𑒨 𑒢𑒻 𑒦𑒹𑒪 𑒁𑒕𑒱। 𑒅𑒠𑒨𑒢𑒏 𑒥𑒰𑒠 𑒏𑒋𑒏 𑒬𑒞𑒰𑒥𑓂𑒠𑒲 𑒡𑒩𑒱 𑒧𑒱𑒟𑒱𑒪𑒰𑒧𑒹 𑒦𑒑𑒫𑒰𑒢 𑒖𑒑𑒢𑓂𑒢𑒰𑒟𑒏𑒹𑒿 𑒪𑒪𑒏𑒰𑒩𑒰 𑒠𑒻 𑒥𑒪𑒰 𑒏𑒱𑒨𑒼 𑒢𑒻 𑒦𑒹𑒪।
𑒫𑒪𑓂𑒪𑒦𑒰: 𑒯𑒹 𑒮𑒹 𑒢𑒻 𑒏𑒯𑒱𑒨𑒾। 𑒠𑒲𑒢𑒰 𑒂 𑒦𑒠𑒩𑒲 𑒮𑒹 𑒪𑒪𑒏𑒰𑒩𑒰 𑒠𑓄 𑒂𑒋𑒪 𑒩𑒯𑒟𑒱 𑒖𑒑𑒢𑓂𑒢𑒰𑒟𑒏𑒹𑒿।
𑒑𑓀𑒑𑒹𑒬: 𑒯𑒿 𑒫𑒪𑓂𑒪𑒦𑒰, 𑒧𑒰𑒋 𑒮𑒳𑒢𑒹𑒢𑒹 𑒕𑒟𑒱 𑒄 𑒐𑒱𑒮𑓂𑒮𑒰 𑒯𑒧𑒩𑒰। 𑒂 𑒠𑒲𑒢𑒰-𑒦𑒠𑒩𑒲 𑒠𑒳𑒢𑒴 𑒑𑒼𑒙𑒹 𑒫𑒱𑒖𑒨 𑒮𑒹𑒯𑒼 𑒣𑓂𑒩𑒰𑒣𑓂𑒞 𑒏𑒹𑒢𑒹 𑒩𑒯𑒟𑒱। 𑒧𑒢𑓂𑒠𑒱𑒩𑒏 𑒏𑒣𑒰𑒙 𑒐𑒳𑒖𑒱 𑒑𑒹𑒪 𑒩𑒯𑒋। 𑒯𑒹 𑒮𑒳𑒢𑒰𑒅 𑒢𑒹 𑒋𑒏𑒥𑒹𑒩 𑒄 𑒐𑒱𑒮𑓂𑒮𑒰।
𑒫𑒪𑓂𑒪𑒦𑒰: 𑒋𑒏𑓂𑒏𑒹 𑒐𑒱𑒮𑓂𑒮𑒰 𑒥𑒹𑒩-𑒥𑒹𑒩 𑒮𑒳𑒢𑒻𑒞 𑒧𑒼𑒢 𑒢𑒻 𑒦𑒩𑒻𑒋।
𑒑𑓀𑒑𑒹𑒬: 𑒢𑒻 𑒦𑒩𑒻𑒋..𑒞𑒞𑓂𑒞𑓂𑒫𑒔𑒱𑒢𑓂𑒞𑒰𑒧𑒝𑒱 𑒪𑒱𑒐𑒥𑒰𑒧𑒹 𑒄 𑒯𑒧𑒩 𑒅𑒞𑓂𑒣𑓂𑒩𑒹𑒩𑒏 𑒥𑒢𑒻𑒋..
𑒫𑒪𑓂𑒪𑒦𑒰: 𑒚𑒲𑒏 𑒕𑒻। 𑒞𑒐𑒢 𑒠𑒲𑒢𑒰 𑒯𑒧 𑒥𑒢𑒻 𑒕𑒲 𑒂 𑒦𑒠𑒩𑒲 𑒁𑒯𑒰𑒿 𑒥𑒢𑒴।
(𑒠𑒳𑒢𑒴 𑒑𑒼𑒙𑒹 𑒬𑒞𑒩𑓀𑒖𑒏 𑒒𑒢𑒏 𑒮𑒼𑒗𑒰𑒿 𑒂𑒥𑒱 𑒖𑒰𑒃 𑒕𑒟𑒱।)
𑒫𑒪𑓂𑒪𑒦𑒰: 𑒖𑒼𑒑𑒱𑒨𑒰 𑒑𑒰𑒧𑒏 𑒠𑒲𑒢𑒰 𑒋𑒪𑒻 𑒦𑒠𑒩𑒲 𑒦𑒰𑒃 𑒖𑒳𑒧𑒱 𑒯𑒹…
𑒑𑓀𑒑𑒹𑒬: 𑒏𑒰𑒪𑒴 𑒮𑒠𑒰𑒨 𑒢𑒱𑒩𑒮𑒼 𑒧𑒻𑒨𑒰𑒏 𑒥𑒹𑒙𑒰 𑒧𑒖𑒑𑒴𑒞 𑒯𑒹…
𑒫𑒪𑓂𑒪𑒦𑒰: (𑒯𑒿𑒮𑒻𑒞 𑒂 𑒑𑓀𑒑𑒹𑒬 𑒠𑒱𑒮 𑒞𑒏𑒻𑒞)
𑒠𑒲𑒢 𑒩𑒯𑒟𑒱 𑒯𑒲𑒢 𑒩𑒯𑒟𑒱 𑒧𑒳𑒠𑒰 𑒢𑒻 𑒧𑒖𑒥𑒴𑒩 𑒯𑒹
𑒬𑒱𑒏𑒰𑒩 𑒐𑒹𑒪𑒟𑒱 𑒩𑒝𑒹-𑒥𑒢𑒹 𑒏𑒼𑒩𑒟𑒱 𑒐𑒹𑒞 𑒧𑒱𑒪𑒱 𑒯𑒹
𑒣𑒰𑒿𑒔-𑒣𑒰𑒿𑒔 𑒧𑒼𑒢𑒏 𑒏𑒼𑒠𑒰𑒩𑒱 𑒪𑒹𑒢𑒹 𑒥𑒲𑒒𑒰 𑒏𑒞𑒹 𑒠𑒴𑒩 𑒯𑒹
𑒑𑓀𑒑𑒹𑒬: 𑒏𑒙𑒻𑒨𑒰 𑒥𑒼𑒢𑒏 𑒩𑒰𑒖𑒰 𑒕𑒪𑒻 𑒤𑒼𑒙𑒩𑒰 𑒑𑒲𑒠𑒩 𑒯𑒹
𑒍𑒏𑒩 𑒮𑓀𑒑𑒲 𑒡𑒰𑒧𑒢 𑒩𑒯𑒻, 𑒥𑒱𑒐 𑒧𑒬𑒯𑒴𑒩 𑒯𑒹
𑒥𑒱𑒐 𑒮𑒢 𑒥𑒼𑒪 𑒥𑒰𑒖𑒪 𑒡𑒰𑒧𑒢 𑒠𑒳𑒢𑒴 𑒦𑒰𑒃𑒏𑒹𑒿
𑒖𑒼 𑒩𑒹 𑒠𑒲𑒢𑒰 𑒖𑒼 𑒩𑒹 𑒦𑒠𑒩𑒲 𑒣𑒰𑒢𑒱𑒧𑒹 𑒥𑒮𑒻𑒪𑒹 𑒩𑒹

𑒫𑒪𑓂𑒪𑒦𑒰: 𑒩𑒹𑓄𑓄𑓄𑓄𑓄𑓄𑓄𑓄…..
𑒏𑒲 𑒥𑒖𑒪𑒹𑒿 𑒡𑒰𑒧𑒢 𑒞𑒴𑒿 𑒞𑒴𑒿, 𑒏𑒲 𑒥𑒖𑒪𑒹𑒿 𑒡𑒰𑒧𑒱𑒢 𑒑𑒹
𑒩𑒹𑓄𑓄𑓄𑓄𑓄𑓄𑓄𑓄𑓄…..
𑒯𑒧𑓂𑒧𑒩 𑒖𑒲𑒫𑒢 𑒏𑒙𑒻𑒨𑓂𑒨𑒰 𑒥𑒼𑒢𑒏 𑒞𑒴𑒿 𑒢𑒻 𑒦𑒰𑒑𑒲 𑒯𑒹
𑒯𑒧𑓂𑒧𑒩 𑒖𑒲𑒫𑒢 𑒯𑒧𑓂𑒧𑒩 𑒥𑒪𑒏𑒹𑒿 𑒥𑒳𑒗𑒪𑒹𑒿 𑒯𑒱𑒢𑒞𑒰𑒃 𑒩𑒹
𑒧𑒰𑒩𑒱-𑒧𑒰𑒩𑒱 𑒕𑒴𑒙𑒪 𑒍𑒏𑒩𑒰𑒣𑒩 𑒠𑒳𑒢𑒴 𑒦𑒰𑒃 𑒩𑒹
𑒡𑒰𑒧𑒢 𑒧𑒰𑒩𑒪, 𑒡𑒰𑒧𑒢 𑒤𑒹𑒏𑒪 𑒡𑒰𑒧𑒱𑒢𑒏 𑒂𑒑𑒴 𑒩𑒹
𑒡𑒰𑒧𑒱𑒢 𑒟𑒩𑒟𑒩 𑒏𑒩𑒻 𑒪𑒰𑒑𑒪 𑒪𑒹𑒥𑒾 𑒥𑒠𑒪𑒰 𑒦𑒰𑒃 𑒩𑒹
𑒑𑓀𑒑𑒹𑒬: 𑒤𑒼𑒙𑒩 𑒩𑒰𑒖𑒰 𑒏𑒙𑒻𑒨𑓂𑒨𑒰 𑒥𑒼𑒢𑒏 𑒕𑒪 𑒠𑒼𑒮𑒞𑒱𑒨𑒰𑒩𑒲 𑒩𑒹
𑒯𑒧𑓂𑒧𑒩 𑒠𑒼𑒮 𑒡𑒰𑒧𑒢 𑒧𑒰𑒩𑒪, 𑒠𑒳𑒢𑒴 𑒧𑒱𑒪𑒱 𑒦𑒰𑒃 𑒩𑒹
𑒡𑒰𑒧𑒱𑒢 𑒦𑒾𑒖𑒲 𑒢𑒱𑒬𑓂𑒔𑒱𑒢𑓂𑒞 𑒩𑒯𑒴, 𑒢𑒻 𑒏𑒩𑒴 𑒁𑒑𑒳𑒞𑒰𑒃 𑒯𑒹
𑒂𑒥𑒻 𑒠𑒱𑒨𑒾 𑒂𑒥𑒻 𑒠𑒱𑒨𑒾 𑒬𑒱𑒏𑒰𑒩 𑒐𑒹𑒪𑓄 𑒠𑒳𑒢𑒴 𑒦𑒰𑒃𑒏𑒹𑒿
𑒫𑒪𑓂𑒪𑒦𑒰: 𑒠𑒱𑒢 𑒥𑒲𑒞𑒪, 𑒑𑒹𑒪 𑒦𑒠𑒩𑒲 𑒠𑒲𑒢𑒰 𑒥𑒼𑒢 𑒬𑒱𑒏𑒰𑒩 𑒯𑒹
𑒮𑓀𑒑 𑒑𑒹𑒪 𑒥𑒯𑒳𑒩𑒢 𑒧𑒰𑒧𑒰 𑒤𑒼𑒙𑒩 𑒞𑒻𑒨𑒰𑒩 𑒯𑒹
𑒥𑒱𑒐𑒯𑒰 𑒠𑒰𑒿𑒞 𑒑𑒩𑒰 𑒠𑒹𑒪𑒏 𑒧𑒰𑒩𑒪 𑒠𑒳𑒢𑒴 𑒦𑒰𑒃 𑒏𑒹𑒿
𑒂𑒞𑓂𑒧𑒰 𑒥𑒢𑒱 𑒒𑒴𑒧𑒋 𑒪𑒰𑒑𑒪 𑒠𑒳𑒢𑒴 𑒦𑒰𑒃 𑒧𑒩𑒱 𑒯𑒹

𑒑𑓀𑒑𑒹𑒬: 𑒠𑒾𑒩𑒲 𑒑𑒰𑒧𑒏 𑒯𑒱𑒩𑒱𑒨𑒰 𑒞𑒧𑒼𑒪𑒱𑒢 𑒠𑒹𑒐𑒪 𑒠𑒳𑒢𑒴 𑒦𑒰𑒃𑒏𑒹𑒿
𑒠𑒾𑒩𑒲 𑒑𑒰𑒧𑒏 𑒖𑒱𑒩𑒱𑒨𑒰 𑒪𑒼𑒯𑒰𑒩𑒱𑒢 𑒠𑒹𑒐𑒪 𑒠𑒳𑒢𑒴 𑒦𑒰𑒃𑒏𑒹𑒿
𑒋𑒯𑒹𑒢 𑒫𑒩 𑒔𑒰𑒯𑒲 𑒯𑒧𑒩𑒰 𑒏𑒩𑒋 𑒪𑒰𑒑𑒪𑒱 𑒞𑒣𑒮𑓂𑒨𑒰 𑒯𑒹
𑒫𑒪𑓂𑒪𑒦𑒰 (𑒞𑒣𑒮𑓂𑒫𑒱𑒢𑒲 𑒮𑒢 𑒡𑓂𑒨𑒰𑒢 𑒪𑒑𑒹𑒢𑒹 𑒥𑒻𑒮𑒱 𑒖𑒰𑒃𑒞 𑒕𑒟𑒱):
𑒠𑒲𑒢𑒰 𑒔𑒰𑒯𑒲 𑒦𑒠𑒩𑒲 𑒔𑒰𑒯𑒲, 𑒫𑒩 𑒠𑒳𑒢𑒴 𑒮𑒐𑒲 𑒏𑓄
𑒧𑒩𑒪 𑒕𑒹𑒿 𑒞𑒿 𑒦𑒹𑒪 𑒏𑒲 𑒮𑓂𑒫𑒲𑒏𑒰𑒩𑒴 𑒑𑓀𑒑𑒰 𑒣𑒻𑒮𑒱 𑒏𑓄
(𑒑𑓀𑒑𑒹𑒬 𑒒𑒢𑒏 𑒣𑒰𑒕𑒰𑒿 𑒔𑒪 𑒖𑒰𑒃 𑒕𑒟𑒱 𑒂 𑒯𑒰𑒟 𑒅𑒚𑒥𑒻 𑒕𑒟𑒱 𑒖𑒹𑒢𑒰 𑒑𑓀𑒑𑒰𑒧𑒹 𑒯𑒼𑒟𑒱। 𑒫𑒪𑓂𑒪𑒦𑒰 𑒠𑒼𑒮𑒩 𑒏𑒰𑒞𑒮𑒿 𑒯𑒰𑒟 𑒣𑒮𑒰𑒩𑒻 𑒕𑒟𑒱।)
𑒫𑒪𑓂𑒪𑒦𑒰: 𑒧𑒰𑒞𑒻𑒩-𑒧𑒰𑒞𑒻𑒩 𑒮𑒳𑒢𑒻 𑒕𑒪𑒾𑓀 𑒧𑒰𑒞𑒻𑒩 𑒥𑒛𑓃𑒲 𑒠𑒴𑒩 𑒯𑒹
𑒁𑒢 𑒠𑒹𑒪𑒾𑓀 𑒡𑒢 𑒠𑒹𑒪𑒾𑓀, 𑒪𑒏𑓂𑒭𑓂𑒧𑒲 𑒥𑒯𑒳𑒞 𑒯𑒹
𑒋𑒏𑒹𑒙𑒰 𑒖𑒹 𑒮𑓂𑒫𑒰𑒧𑒲 𑒥𑒱𑒢𑒳 𑒪𑒰𑒑𑒻 𑒨𑓄 𑒮𑒳𑒢 𑒯𑒹
𑒧𑒰𑒞𑒻𑒩-𑒧𑒰𑒞𑒻𑒩 𑒮𑒳𑒢𑒻 𑒕𑒪𑒾𑓀.....।
(𑒞𑒐𑒢𑒹 𑒠𑒹𑒫𑒠𑒞𑓂𑒞𑒏 𑒣𑓂𑒩𑒫𑒹𑒬 𑒯𑒼𑒃𑒞 𑒁𑒕𑒱।)
𑒠𑒹𑒫𑒠𑒞𑓂𑒞: (𑒧𑒳𑒮𑓂𑒏𑒰𑒃𑒞 𑒋𑒏 𑒥𑒹𑒩 𑒫𑒪𑓂𑒪𑒦𑒰𑒏𑒹𑒿 𑒂 𑒋𑒏 𑒥𑒹𑒩 𑒑𑓀𑒑𑒹𑒬𑒏𑒹𑒿 𑒠𑒹𑒐𑒻𑒞 𑒕𑒟𑒱)
𑒏𑒧𑒪𑒰-𑒏𑒧𑒪𑒰 𑒮𑒳𑒢𑒻 𑒕𑒪𑒾𑓀 𑒏𑒧𑒪𑒰 𑒥𑒛𑓃 𑒠𑒴𑒩 𑒯𑒹𑓄𑓄
𑒑𑒯𑒥𑒩 𑒣𑒯𑒮𑒻𑒞 𑒏𑒧𑒪𑒰 𑒦𑒋 𑒑𑒹𑒪 𑒏𑒮𑒯𑒴𑒩 𑒯𑒹,
𑒁𑒢 𑒠𑒹𑒪𑒾𑓀 𑒡𑒢 𑒠𑒹𑒪𑒾𑓀 𑒪𑒏𑓂𑒭𑓂𑒧𑒲 𑒥𑒯𑒳𑒞 𑒯𑒹
𑒋𑒏𑒹𑒙𑒰 𑒖𑒹……
𑒫𑒰𑒯 𑒑𑓀𑒑𑒹𑒬। 𑒢𑒻 𑒢𑒻, 𑒫𑒰𑒏𑒔𑒰𑒞𑒳𑒩𑒲 𑒢𑒻 𑒑𑓀𑒑𑒹𑒬। 𑒏𑒼𑒢𑒼 𑒔𑒰𑒞𑒳𑒩𑒲 𑒢𑒻। 𑒄 𑒞𑒿 𑒁𑒕𑒱 𑒮𑓂𑒟𑒴𑒪 𑒣𑓂𑒩𑒹𑒧।
𑒣𑓂𑒩𑒹𑒧 𑒣𑓂𑒩𑒹𑒧 𑒠𑒹𑒐𑒲 𑒮𑒑𑒩𑒹 𑒣𑓂𑒩𑒹𑒧𑒹 𑒣𑒴𑒩𑓂𑒝 𑒯𑒹
𑒣𑓂𑒩𑒹𑒧 𑒥𑒱𑒢𑒳 𑒪𑒰𑒑𑒻 𑒨𑓄 𑒮𑒦 𑒮𑒴𑒢 𑒯𑒹…
(𑒑𑓀𑒑𑒹𑒬 𑒠𑒱𑒬 𑒞𑒰𑒏𑒱) 𑒑𑓀𑒑𑒹𑒬। 𑒏𑒲 𑒥𑒰𑒞 𑒕𑒻। 𑒌 𑒙𑒼𑒪𑒧𑒹 𑒞𑒼𑒯𑒩 𑒧𑒰𑒋𑒏𑒹𑒿 𑒮𑒹𑒯𑒼 𑒧𑒼𑒢 𑒪𑒰𑒑𑒻 𑒕𑒪𑒾 𑒂 𑒞𑒼𑒩𑒰 𑒮𑒹𑒯𑒼। 𑒧𑒳𑒠𑒰 𑒏𑒹 𑒥𑒰𑒖𑒞। 𑒢𑓂𑒨𑒰𑒨, 𑒞𑒩𑓂𑒏𑒏 𑒮𑒼𑒗𑒰𑒿 𑒏𑒹 𑒚𑒚𑒞।
(𑒫𑒪𑓂𑒪𑒦𑒰 𑒠𑒱𑒬 𑒒𑒳𑒧𑒱) 𑒫𑒪𑓂𑒪𑒦𑒰। 𑒁𑒯𑒰𑒿𑒏 𑒦𑒰𑒑…. 𑒂𑒏𑒱 𑒏𑒼𑒢𑒼 𑒧𑒢𑒞𑒰….𑒧𑒢𑒞𑒰 𑒖𑒹 𑒑𑓀𑒑𑒹𑒬𑒏 𑒧𑒰𑒋 𑒁𑒯𑒲𑓀𑒏𑒹𑒿 𑒣𑒳𑒞𑒼𑒯𑒳 𑒥𑒢𑒹𑒥𑒰 𑒪𑒹𑒪 𑒧𑒢𑒢𑒹 𑒯𑒹𑒞𑒲।…. 𑒂𑒏𑒱 𑒑𑓀𑒑𑒹𑒬𑒮𑒿 𑒮𑒞 𑒏𑒩𑒹𑒢𑒹 𑒯𑒹𑒞𑒲 𑒖𑒹 𑒯𑒧𑒩 𑒁𑒣𑒧𑒰𑒢𑒏 𑒥𑒠𑒪𑒰𑒧𑒹 𑒞𑒼𑒿 𑒁𑒯𑒲 𑒙𑒼𑒪𑒧𑒹 𑒥𑒱𑒨𑒰𑒯 𑒏𑓄 𑒏𑓄 𑒪𑒼𑒏𑒏𑒹𑒿 𑒠𑒹𑒐𑒰 𑒠𑒯𑒲𑓀।…(𑒧𑓀𑒔𑒏 𑒮𑒼𑒗𑒰𑒿 𑒒𑒳𑒩𑒱 𑒖𑒰𑒃 𑒕𑒟𑒱) 𑒢𑓂𑒨𑒰𑒨 𑒂 𑒞𑒩𑓂𑒏𑒧𑒹 𑒏𑒹 𑒖𑒲𑒞𑒞 𑒑𑓀𑒑𑒹𑒬𑒮𑒿 ? 𑒢𑓂𑒨𑒰𑒨 𑒏𑒩𑒞 𑒑𑓀𑒑𑒹𑒬….𑒞𑒩𑓂𑒏 𑒏𑒩𑒞 𑒏𑒱𑒨𑒼 𑒢𑒻।
𑒑𑓀𑒑𑒹𑒬: (𑒠𑒹𑒫𑒠𑒞𑓂𑒞 𑒠𑒱𑒬 𑒖𑒼𑒩𑒮𑒿 𑒥𑒖𑒻𑒞) 𑒠𑒹𑒫𑒠𑒞𑓂𑒞..
𑒠𑒹𑒫𑒠𑒞𑓂𑒞: (𑒠𑒹𑒫𑒠𑒞𑓂𑒞 𑒠𑒱𑒬 𑒞𑒰𑒏𑒱) 𑒢𑒻 𑒑𑓀𑒑𑒹𑒬 𑒏𑒼𑒢𑒼 𑒫𑒔𑒢 𑒔𑒞𑒳𑒩𑒰𑒃 𑒢𑒻 𑒁𑒕𑒱 𑒯𑒧𑒩𑒰𑒧𑒹। 𑒧𑒳𑒠𑒰 𑒏𑒲 𑒏𑒼𑒢𑒼 𑒞𑒩𑓂𑒏 𑒢𑒻 𑒁𑒕𑒱 𑒯𑒧𑒩 𑒫𑒔𑒢𑒧𑒹?
𑒑𑓀𑒑𑒹𑒬: (𑒠𑒹𑒫𑒠𑒞𑓂𑒞 𑒠𑒱𑒬 𑒖𑒼𑒩𑒮𑒿 𑒥𑒖𑒻𑒞) 𑒠𑒹𑒫𑒠𑒞𑓂𑒞, 𑒢𑒹 𑒯𑒧𑒩 𑒧𑒰𑒋 𑒏𑒼𑒢𑒼 𑒧𑒢𑒞𑒰 𑒧𑒰𑒢𑒢𑒹 𑒩𑒯𑒟𑒱 𑒂 𑒢𑒯𑒱𑒨𑒹 𑒯𑒧𑒩𑒰𑒮𑒿 𑒏𑒼𑒢𑒼 𑒮𑒞 𑒏𑒩𑒥𑒹𑒢𑒹 𑒩𑒯𑒟𑒱। 𑒂 𑒢𑒯𑒱𑒨𑒹 𑒌 𑒙𑒼𑒪𑒏 𑒯𑒧𑒩 𑒧𑒰𑒋𑒣𑒩 𑒏𑒋𑒪 𑒅𑒣𑒏𑒰𑒩𑒏 𑒥𑒠𑒪𑒰 𑒯𑒧𑒩 𑒂 𑒫𑒪𑓂𑒪𑒦𑒰𑒏 𑒣𑓂𑒩𑒹𑒧 𑒁𑒕𑒱। 𑒂 𑒖𑒹𑒿 𑒌 𑒣𑓂𑒩𑒹𑒧𑒧𑒹 𑒢𑒹 𑒏𑒼𑒢𑒼 𑒧𑒢𑒞𑒰 𑒕𑒻, 𑒢𑒹 𑒏𑒼𑒢𑒼 𑒮𑒞 𑒂 𑒢𑒹 𑒏𑒼𑒢𑒼 𑒅𑒣𑒏𑒰𑒩, 𑒞𑒹𑒿 𑒄 𑒣𑓂𑒩𑒹𑒧 𑒮𑓂𑒟𑒴𑒪 𑒣𑓂𑒩𑒹𑒧 𑒁𑒕𑒱।
𑒠𑒹𑒫𑒠𑒞𑓂𑒞: (𑒧𑓀𑒔𑒏 𑒮𑒼𑒗𑒰𑒿 𑒞𑒏𑒻𑒞) 𑒞𑒩𑓂𑒏! 𑒢𑒻 𑒏𑒼𑒢𑒼 𑒫𑒰𑒏 𑒔𑒰𑒞𑒳𑒩𑒲 𑒢𑒻।
(𑒑𑓀𑒑𑒹𑒬 𑒠𑒱𑒮 𑒞𑒰𑒏𑒱) 𑒧𑒳𑒠𑒰 𑒑𑓀𑒑𑒹𑒬, 𑒄 𑒋𑒏𑒙𑒰 𑒑𑒣 𑒁𑒯𑒰𑒿 𑒚𑒲𑒏 𑒏𑒯𑒪𑒾𑓀। 𑒁𑒯𑒰𑒿 𑒏 𑒂 𑒫𑒪𑓂𑒪𑒦𑒰 𑒏 𑒣𑓂𑒩𑒹𑒧𑒏 𑒞𑒿 𑒪𑒼𑒏 𑒔𑒩𑓂𑒔𑒼 𑒢𑒻 𑒏𑓄 𑒩𑒯𑒪 𑒁𑒕𑒱। 𑒠𑒴𑒩 𑒠𑒹𑒬𑒏 𑒣𑓂𑒩𑒹𑒧𑒏 𑒧𑒳𑒠𑒰 𑒔𑒩𑓂𑒔𑒰 𑒯𑒼𑒃𑒋। 𑒚𑒲𑒏𑒹 𑒏𑒯𑒪𑒾𑓀 𑒁𑒯𑒰𑒿। 𑒮𑒳𑒢𑒪 𑒁𑒕𑒱 𑒏𑒼𑒢𑒼 𑒥𑒛𑓃𑒏𑒰 𑒢𑓂𑒨𑒰𑒨𑒏 𑒑𑓂𑒩𑒢𑓂𑒟𑒏 𑒁𑒯𑒰𑒿 𑒪𑒱𑒐𑒱 𑒩𑒯𑒪 𑒕𑒲। 𑒮𑒳𑒢𑒻 𑒕𑒱𑒌 𑒖𑒹 𑒍 𑒞𑒹𑒯𑒹𑒢 𑒑𑓂𑒩𑒢𑓂𑒟 𑒥𑒢𑒱 𑒩𑒯𑒪 𑒁𑒕𑒱 𑒖𑒏𑒩 𑒔𑒩𑓂𑒔𑒰𑒧𑒹 𑒮𑒦 𑒢𑒻𑒨𑓂𑒨𑒰𑒨𑒱𑒏 𑒍𑒗𑒩𑒰 𑒖𑒹𑒞𑒰। 𑒦𑒰𑒭𑓂𑒨𑒣𑒩 𑒦𑒰𑒭𑓂𑒨, 𑒙𑒲𑒏𑒰𑒣𑒩 𑒙𑒲𑒏𑒰 𑒪𑒱𑒐𑒰𑒋𑒞 𑒍𑒃𑒣𑒩। 𑒧𑒳𑒠𑒰 𑒑𑓀𑒑𑒹𑒬, 𑒮𑒰𑒫𑒡𑒰𑒢। 𑒁𑒯𑒰𑒿𑒏 𑒣𑓂𑒩𑒹𑒧𑒏𑒹𑒿 𑒧𑒰𑒩𑒥𑒰𑒏 𑒄 𑒭𑒛𑒨𑓀𑒞𑓂𑒩 𑒞𑒿 𑒢𑒻 𑒁𑒕𑒱 𑒑𑓀𑒑𑒹𑒬। 𑒌 𑒣𑓂𑒩𑒹𑒧𑒏 𑒔𑒩𑓂𑒔 𑒮𑒹𑒯𑒼 𑒣𑒰𑒿𑒔-𑒮𑒋 𑒥𑒩𑓂𑒐𑒏 𑒥𑒰𑒠 𑒧𑒳𑒠𑒰 𑒯𑒖𑒰𑒩 𑒥𑒩𑓂𑒐𑒏 𑒦𑒲𑒞𑒩𑒹 𑒤𑒹𑒩𑒮𑒿 𑒧𑒱𑒟𑒱𑒪𑒰𑒧𑒹 𑒯𑒹𑒞𑒻। 𑒍𑒯𑒼 𑒯𑒼..𑒄 𑒏𑒲 𑒏𑒯𑒰 𑒑𑒹𑒪 𑒑𑓀𑒑𑒹𑒬। (𑒁𑒣𑒢 𑒖𑒲𑒯 𑒟𑒏𑒳𑒔𑓄 𑒪𑒑𑒻𑒋)
𑒪𑒼𑒏 𑒏𑒯𑒻𑒋 𑒖𑒹 𑒯𑒧𑒩 𑒖𑒲𑒯 𑒏𑒰𑒩𑒲 𑒁𑒕𑒱। 𑒖𑒿 𑒡𑒰𑒢𑒏 𑒐𑒹𑒞𑒏 𑒂𑒩𑒱𑒣𑒩 𑒚𑒰𑒜𑓃 𑒦𑓄 𑒯𑒧 𑒏𑒯𑒱 𑒠𑒻 𑒕𑒱𑒌 𑒖𑒹 𑒠𑒹𑒐𑒴 𑒄 𑒡𑒰𑒢 𑒏𑒹𑒯𑒹𑒢 𑒮𑒢𑒑𑒩 𑒁𑒕𑒱 𑒞𑒿 𑒍 𑒡𑒰𑒢 𑒁𑒑𑒱𑒪𑒹 𑒠𑒱𑒢 𑒖𑒩𑒱 𑒖𑒰𑒃 𑒕𑒻। 𑒪𑒼𑒏𑒹 𑒮𑒦 𑒏𑒯𑒻𑒋। (𑒤𑒹𑒩𑒮𑒿 𑒁𑒣𑒢 𑒖𑒲𑒯 𑒟𑒏𑒳𑒔𑓄 𑒪𑒑𑒻𑒋)
𑒮𑓂𑒟𑒴𑒪 𑒣𑓂𑒩𑒹𑒧𑒏 𑒔𑒩𑓂𑒔 𑒯𑒹𑒥𑒹 𑒏𑒱𑒋 𑒏𑒩𑒋 𑒑𑓀𑒑𑒹𑒬। 𑒏𑒱𑒋 𑒯𑒳𑒁𑒋 𑒮𑓂𑒟𑒴𑒪 𑒣𑓂𑒩𑒹𑒧𑒏 𑒔𑒩𑓂𑒔। 𑒌 𑒔𑒩𑓂𑒔𑒮𑒿 𑒞𑒿 𑒮𑒧𑒰𑒖𑒧𑒹 𑒮𑒧𑒩𑒮𑒞𑒰 𑒂𑒥𑒱 𑒖𑒹𑒞𑒻। 𑒮𑒹 𑒢𑒻 𑒯𑒋𑒞𑓄 𑒔𑒩𑓂𑒔 𑒌 𑒣𑓂𑒩𑒹𑒧𑒏 𑒑𑓀𑒑𑒹𑒬, 𑒢𑒻 𑒯𑒋𑒞𑓄 𑒔𑒩𑓂𑒔 𑒌 𑒣𑓂𑒩𑒹𑒧𑒏। 𑒞𑒼𑒯𑒩 𑒑𑓂𑒩𑒢𑓂𑒟𑒏 𑒔𑒩𑓂𑒔 𑒯𑒋𑒞 𑒑𑓀𑒑𑒹𑒬, 𑒞𑒼𑒯𑒩 𑒑𑓂𑒩𑒢𑓂𑒟𑒏 𑒧𑒱𑒟𑒱𑒪𑒰𑒏 𑒙𑒼𑒪 𑒂 𑒔𑒾𑒣𑒰𑓃𑒛𑓃𑒱𑒧𑒹 𑒞𑒼𑒯𑒩 𑒫𑒱𑒠𑓂𑒫𑒞𑒰𑒏 𑒮𑓀𑒑 𑒔𑒩𑓂𑒔𑒰 𑒯𑒹𑒞𑒻 𑒑𑓀𑒑𑒹𑒬, …..(𑒥𑒱𑒯𑒳𑒿𑒮𑒻𑒞)….𑒧𑒳𑒠𑒰 𑒞𑒼𑒯𑒩 𑒣𑓂𑒩𑒹𑒧𑒏 𑒏𑒼𑒢𑒼 𑒔𑒩𑓂𑒔 𑒢𑒻 𑒯𑒋𑒞। 𑒧𑒱𑒟𑒱𑒪𑒰𑒏 𑒬𑒱𑒏𑓂𑒭𑒏 𑒞𑒼𑒯𑒩 𑒣𑒼𑒟𑒲𑒏 𑒣𑓂𑒩𑒞𑒱𑒪𑒱𑒣𑒱𑒏 𑒁𑒢𑒳𑒧𑒞𑒱 𑒢𑒻 𑒠𑒹𑒟𑒱𑒢𑓂𑒯 𑒑𑓀𑒑𑒹𑒬 𑒂 𑒢𑒹 𑒍𑒏𑒩 𑒮𑒰𑒩𑒰𑓀𑒬 𑒪𑒱𑒐𑒥𑒰𑒏 𑒠𑒹𑒟𑒱𑒢𑓂𑒯 𑒁𑒢𑒳𑒧𑒞𑒱। 𑒂 𑒖𑒿 𑒥𑓀𑒑𑒰𑒪𑒏 𑒏𑒼𑒢𑒼 𑒫𑒱𑒠𑓂𑒨𑒰𑒩𑓂𑒟𑒲 𑒍𑒏𑒩 𑒣𑓂𑒩𑒞𑒱𑒪𑒱𑒣𑒱 𑒏𑒃𑒨𑒼 𑒪𑒹𑒞 𑒑𑓀𑒑𑒹𑒬 𑒞𑒿 𑒍 𑒪𑓄 𑒖𑒰 𑒮𑒏𑒞 𑒧𑒰𑒞𑓂𑒩 𑒞𑒼𑒯𑒩 𑒫𑒱𑒠𑓂𑒫𑒞𑒰। 𑒞𑒼𑒯𑒩 𑒢𑓂𑒨𑒰𑒨𑒬𑒰𑒮𑓂𑒞𑓂𑒩। 𑒞𑒼𑒯𑒩 𑒞𑒩𑓂𑒏। 𑒧𑒩𑒱 𑒖𑒹𑒞𑒯 𑒞𑒼𑒯𑒩 𑒣𑓂𑒩𑒹𑒧 𑒑𑓀𑒑𑒹𑒬। 𑒧𑒩𑒱 𑒖𑒹𑒞𑒯 𑒞𑒼𑒯𑒩 𑒮𑓂𑒟𑒴𑒪 𑒣𑓂𑒩𑒹𑒧।
𑒫𑒪𑓂𑒪𑒦𑒰: (𑒠𑒹𑒫𑒠𑒞𑓂𑒞 𑒠𑒱𑒮 𑒞𑒰𑒏𑒱 𑒖𑒼𑒩𑒮𑒿 𑒥𑒖𑒻𑒞) 𑒠𑒹𑒫𑒠𑒞𑓂𑒞, 𑒯𑒖𑒰𑒩 𑒥𑒩𑓂𑒐𑒏 𑒥𑒰𑒠 𑒞𑒿 𑒒𑒳𑒩𑒞 𑒢𑒹 𑒄 𑒣𑓂𑒩𑒹𑒧। 𑒑𑓀𑒑𑒹𑒬𑒏 𑒁𑒧𑒩 𑒣𑒼𑒟𑒲 𑒪𑒹𑒪 𑒯𑒧𑒩𑒰 𑒍 𑒣𑓂𑒩𑒞𑒲𑒏𑓂𑒭𑒰 𑒮𑓂𑒫𑒲𑒏𑒰𑒩 𑒁𑒕𑒱। 𑒔𑒩𑓂𑒔 𑒢𑒻 𑒯𑒋𑒞 𑒣𑓂𑒩𑒹𑒧𑒏…𑒯𑒰𑒯…𑒔𑒩𑓂𑒔 𑒣𑒹𑒥𑒰 𑒪𑒹𑒪 𑒣𑓂𑒩𑒹𑒧 𑒢𑒻 𑒏𑒋𑒪 𑒖𑒰𑒃𑒞 𑒁𑒕𑒱….𑒣𑓂𑒩𑒹𑒧, 𑒣𑓂𑒩𑒹𑒧 𑒏𑒲 𑒔𑒩𑓂𑒔 𑒯𑒳𑒁𑒋 𑒏𑒲 𑒞𑒹𑒿 𑒯𑒼𑒃𑒞 𑒁𑒕𑒱 𑒠𑒹𑒫𑒠𑒞𑓂𑒞?
𑒠𑒹𑒫𑒠𑒞𑓂𑒞: (𑒫𑒪𑓂𑒪𑒦𑒰 𑒠𑒱𑒮 𑒞𑒰𑒏𑒱) 𑒫𑒪𑓂𑒪𑒦𑒰, 𑒑𑓀𑒑𑒹𑒬𑒏 𑒯𑒰𑒩𑒱 𑒠𑒹𑒐 𑒩𑒯𑒪 𑒕𑒲 𑒯𑒧। 𑒑𑓀𑒑𑒹𑒬𑒏 𑒯𑒰𑒩𑒱 𑒠𑒹𑒐 𑒩𑒯𑒪 𑒕𑒲 𑒯𑒧 𑒑𑓀𑒑𑒹𑒬𑒏 𑒧𑒳𑒐𑒣𑒩। 𑒑𑓀𑒑𑒹𑒬, 𑒏𑒲 𑒞𑒼𑒿 𑒫𑒪𑓂𑒪𑒦𑒰𑒮𑒿 𑒮𑒯𑒧𑒞 𑒕𑒯। 𑒏𑒲 𑒫𑒪𑓂𑒪𑒦𑒰 𑒂 𑒞𑒼𑒯𑒩 𑒮𑓂𑒟𑒴𑒪 𑒣𑓂𑒩𑒹𑒧𑒏 𑒔𑒩𑓂𑒔 𑒢𑒻 𑒦𑒹𑒢𑒹 𑒮𑒰𑒧𑒰𑒖𑒱𑒏 𑒮𑒧𑒩𑒮𑒞𑒰𑒏 𑒞𑒼𑒯𑒩 𑒅𑒠𑓂𑒠𑒹𑒬𑓂𑒨 𑒣𑒴𑒩𑓂𑒝 𑒯𑒹𑒞𑒯? 𑒏𑒲 𑒌 𑒮𑓂𑒟𑒴𑒪 𑒣𑓂𑒩𑒹𑒧 𑒂 𑒌 𑒙𑒼𑒪𑒏 𑒢𑒰𑒩𑒰𑒬𑓀𑒮𑒲 𑒑𑒰𑒟𑒰𑒏 𑒏𑒼𑒢𑒼 𑒏𑒩𑓂𑒖 𑒞𑒼𑒩𑒰 𑒣𑒼𑒟𑒲𑒣𑒩 𑒢𑒻 𑒕𑒻 𑒑𑓀𑒑𑒹𑒬? 𑒏𑒲 𑒞𑒼𑒯𑒩 𑒣𑓂𑒩𑒔𑒝𑓂𑒛 𑒞𑒩𑓂𑒏 𑒮𑒱𑒠𑓂𑒡𑒰𑒢𑓂𑒞 𑒥𑒢𑒱 𑒏𑓄 𑒢𑒻 𑒩𑒯𑒱 𑒖𑒹𑒞𑓄 𑒑𑓀𑒑𑒹𑒬? 𑒣𑓂𑒩𑒰𑒨𑒼𑒑𑒱𑒏 𑒧𑒯𑒞𑓂𑒫 𑒐𑒞𑒧 𑒢𑒻 𑒦𑓄 𑒖𑒹𑒞𑒻 𑒏𑒲 𑒍𑒏𑒩? 𑒯𑒧 𑒦𑒩𑒼𑒮 𑒠𑒱𑒂𑒥𑒻 𑒕𑒱𑒨𑒯 𑒑𑓀𑒑𑒹𑒬, 𑒦𑒩𑒼𑒮 𑒠𑒱𑒨𑒰𑒥𑒻 𑒕𑒱𑒨𑒯, 𑒖𑒹 𑒞𑒼𑒯𑒩 𑒮𑓂𑒟𑒴𑒪 𑒣𑓂𑒩𑒹𑒧𑒏 𑒏𑒱𑒨𑒼 𑒫𑒱𑒩𑒼𑒡 𑒢𑒻 𑒏𑒩𑒞𑒯। 𑒂 𑒞𑒼𑒿 𑒥𑒳𑒗𑒻𑒞 𑒩𑒯𑒥𑒯 𑒖𑒹 𑒍 𑒮𑒦 𑒞𑒼𑒯𑒩 𑒣𑓂𑒩𑒔𑒝𑓂𑒛 𑒞𑒩𑓂𑒏𑒮𑒿 𑒯𑒰𑒩𑒱 𑒏𑓄 𑒫𑒱𑒩𑒼𑒡 𑒢𑒻 𑒏𑒹𑒪𑒢𑓂𑒯𑒱। 𑒧𑒳𑒠𑒰 𑒁𑒮𑒪 𑒥𑒰𑒞 𑒄 𑒕𑒻 𑒖𑒹 𑒞𑒼𑒯𑒩 𑒣𑒼𑒟𑒲𑒣𑒩 𑒦𑒰𑒭𑓂𑒨𑒣𑒩 𑒦𑒰𑒭𑓂𑒨 𑒂 𑒙𑒲𑒏𑒰𑒣𑒩 𑒙𑒲𑒏𑒰 𑒪𑒱𑒐𑒰𑒃𑒞 𑒩𑒯𑒞𑒯। 𑒞𑒼𑒯𑒩 𑒫𑒱𑒩𑒼𑒡 𑒞𑒿 𑒕𑒼𑒛𑓃𑒯, 𑒞𑒼𑒯𑒩 𑒮𑒢𑓂𑒞𑒰𑒢𑒼𑒏 𑒫𑒱𑒩𑒼𑒡 𑒏𑒱𑒨𑒼 𑒢𑒻 𑒏𑒩𑒞𑒯 𑒑𑓀𑒑𑒹𑒬। 𑒮𑒱𑒠𑓂𑒡𑒰𑒢𑓂𑒞 𑒥𑒢𑒱 𑒏𑓄 𑒩𑒯𑒱 𑒖𑒹𑒥𑒯 𑒞𑒼𑒿 𑒂 𑒞𑒼𑒯𑒩 𑒞𑒩𑓂𑒏।
𑒑𑓀𑒑𑒹𑒬: (𑒠𑒹𑒫𑒠𑒞𑓂𑒞 𑒠𑒱𑒮 𑒞𑒰𑒏𑒱 𑒖𑒼𑒩𑒮𑒿 𑒥𑒖𑒻𑒞) 𑒠𑒹𑒫𑒠𑒞𑓂𑒞। 𑒁𑒯𑒰𑒿𑒏 𑒏𑒼𑒢𑒼 𑒑𑒣 𑒯𑒧𑒩𑒰 𑒏𑒚𑒰𑒢𑒱 𑒢𑒻 𑒪𑒰𑒑𑒱 𑒩𑒯𑒪 𑒁𑒕𑒱। 𑒧𑒳𑒠𑒰 𑒋𑒞𑒹𑒏 𑒞𑒩𑓂𑒏𑒣𑒴𑒩𑓂𑒝 𑒑𑒣..𑒁𑒯𑒰𑒿 𑒋𑒞𑒹𑒏 𑒞𑒩𑓂𑒏𑒣𑒴𑒩𑓂𑒝 𑒑𑒣 𑒏𑒼𑒢𑒰 𑒏𑓄 𑒩𑒯𑒪 𑒕𑒲?
𑒠𑒹𑒫𑒠𑒞𑓂𑒞: (𑒧𑓀𑒔𑒏 𑒮𑒼𑒗𑒰𑒿 𑒞𑒏𑒻𑒞) 𑒋𑒞𑒹𑒏 𑒞𑒩𑓂𑒏𑒣𑒴𑒩𑓂𑒝 𑒑𑒣.. (𑒑𑓀𑒑𑒹𑒬 𑒠𑒱𑒬 𑒞𑒰𑒏𑒱) 𑒚𑒲𑒏𑒹 𑒥𑒳𑒗𑒪𑒹𑒿 𑒑𑓀𑒑𑒹𑒬। 𑒄 𑒮𑒳𑒢𑒪𑒰𑒯𑒰 𑒑𑒣 𑒕𑒲। 𑒄 𑒑𑒣 𑒯𑒧𑒩 𑒁𑒣𑒢 𑒧𑒼𑒢𑒏 𑒢𑒻 𑒁𑒕𑒱। 𑒔𑒾𑒣𑒰𑒛𑓃𑒱𑒣𑒩 𑒯𑒼𑒃𑒞 𑒬𑒱𑒏𑓂𑒭𑒏 𑒪𑒼𑒏𑒢𑒱𑒏 𑒑𑒣 𑒁𑒕𑒱 𑒄। 𑒯𑒧 𑒞𑒿 𑒏𑒱𑒕𑒳 𑒥𑒳𑒗𑒻 𑒢𑒻 𑒕𑒲, (𑒥𑒱𑒯𑒳𑒿𑒮𑒻𑒞) 𑒮𑒹 𑒖𑒰𑒢𑒱 𑒯𑒧𑒩𑒰 𑒮𑒼𑒗𑒰𑒿 𑒯𑒼𑒃𑒞 𑒩𑒯𑒻𑒋 𑒄 𑒮𑒦 𑒑𑒣..𑒖𑒰𑒃 𑒕𑒲…𑒖𑒰𑒃 𑒕𑒲…
(𑒋𑒧𑓂𑒯𑒩 𑒍𑒧𑓂𑒯𑒩 𑒞𑒏𑒻𑒞 𑒬𑒞𑒩𑓀𑒖𑒏 𑒒𑒢𑒏𑒹𑒿 𑒣𑒪𑒙𑒰𑒥𑓄 𑒪𑒑𑒻𑒋) 𑒞𑒿 𑒯𑒧𑒩𑒰 𑒏𑒲 𑒃𑒢𑒰𑒧 𑒠𑒹𑒥 𑒌 𑒞𑒩𑓂𑒏𑒣𑒴𑒩𑓂𑒝 𑒑𑒣 𑒪𑒹𑒪 𑒑𑓀𑒑𑒹𑒬। (𑒬𑒞𑒩𑓀𑒖𑒏 𑒋𑒏-𑒋𑒏𑒙𑒰 𑒐𑒰𑒢𑒰𑒏𑒹𑒿 𑒕𑒳𑒥𑒻𑒞) 𑒄 𑓖𑓔 𑒙𑒰 𑒐𑒰𑒢𑒰 𑒁𑒕𑒱 𑒬𑒞𑒩𑓀𑒖𑒏, 𑒁𑒕𑒱 𑒢𑒹 𑒑𑓀𑒑𑒹𑒬? 𑒣𑒯𑒱𑒪 𑒐𑒰𑒢𑒰𑒧𑒹 𑒋𑒏𑒙𑒰 𑒡𑒰𑒢𑒏 𑒠𑒰𑒢𑒰 𑒩𑒰𑒐𑒴।(𑒋𑒏𑒙𑒰 𑒩𑒰𑒐𑒻𑒋) 𑒠𑒼𑒮𑒩𑒣𑒩 𑒍𑒏𑒩 𑒠𑒳𑒑𑒳𑒢𑒰।(𑒠𑒴𑒙𑒰 𑒠𑒰𑒢𑒰 𑒩𑒰𑒐𑒻𑒋.. 𑒋𑒏…𑒠𑒴..𑒞𑒲𑒢..𑒔𑒰𑒩𑒱..𑒥𑒖𑒻𑒞) 𑒞𑒹𑒮𑒩𑒣𑒩 𑒠𑒼𑒮𑒩𑒏 𑒠𑒳𑒑𑒳𑒢𑒰 (𑒔𑒰𑒩𑒱𑒙𑒰 𑒠𑒰𑒢𑒰 𑒩𑒰𑒐𑒻𑒋 ..𑒋𑒏… 𑒠𑒴.... 𑒥𑒖𑒻𑒞)। (𑒤𑒹𑒩 𑓖𑓔𑒧 𑒐𑒰𑒢𑒰𑒣𑒩 𑒂𑓀𑒑𑒳𑒩 𑒩𑒐𑒻𑒋) 𑒁𑒢𑓂𑒞𑒱𑒧 𑓖𑓔𑒧 𑒐𑒰𑒢𑒰𑒣𑒩 𑒖𑒞𑒹𑒏 𑒡𑒰𑒢𑒏 𑒠𑒰𑒢𑒰 𑒁𑒥𑒻𑒋 𑒞𑒞𑒹𑒏 𑒠𑒰𑒢𑒰 𑒠𑒱𑒁 𑒯𑒧𑒩𑒰 𑒑𑓀𑒑𑒹𑒬..
𑒫𑒪𑓂𑒪𑒦𑒰: (𑒑𑓀𑒑𑒹𑒬 𑒠𑒱𑒬 𑒞𑒰𑒏𑒱 𑒐𑒱𑒮𑒱𑒨𑒰𑒋𑒪 𑒮𑓂𑒫𑒩𑒧𑒹 𑒥𑒖𑒻𑒞) 𑒠𑓄 𑒠𑒱𑒨𑒢𑓂𑒯𑒳 𑒯𑒱𑒢𑒏𑒰 𑒃𑒢𑒰𑒧 𑒑𑓀𑒑𑒹𑒬। 𑒢𑒻 𑒖𑒰𑒢𑒱 𑒄𑒯𑒼 𑒑𑒣 𑒍 𑒏𑒞𑒾𑒮𑒿 𑒮𑒳𑒢𑒱𑒨𑒹 𑒏𑓄 𑒂𑒋𑒪 𑒯𑒹𑒞𑒟𑒱।
𑒑𑓀𑒑𑒹𑒬: (𑒫𑒪𑓂𑒪𑒦𑒰 𑒠𑒱𑒬 𑒞𑒏𑒻𑒞) 𑒢𑒻 𑒫𑒪𑓂𑒪𑒦𑒰। 𑒄 𑒃𑒢𑒰𑒧 𑒌 𑒬𑒞𑒩𑓀𑒖𑒏 𑒐𑒹𑒪𑒼𑒮𑒿 𑒥𑒹𑒬𑒲 𑒫𑒱𑒭𑒧 𑒕𑒻। 𑒮𑒑𑒩 𑒣𑒵𑒟𑓂𑒫𑒲𑒏 𑒁𑒢𑓂𑒢𑒏 𑒅𑒣𑒖𑒰 𑒖𑒿 𑒣𑒰𑒿𑒔 𑒮𑒋 𑒮𑒿 𑒯𑒖𑒰𑒩 𑒥𑒩𑓂𑒐 𑒡𑒩𑒱 𑒅𑒣𑒖𑒞 𑒞𑒐𑒢 𑒖𑒰 𑒏𑓄 𑒄 𑒃𑒢𑒰𑒧 𑒠𑒹𑒪 𑒖𑒰 𑒮𑒏𑒞। (𑒠𑒹𑒫𑒠𑒞𑓂𑒞𑒏 𑒥𑒰𑓀𑒯𑒱 𑒗𑒧𑒰𑒩𑒻𑒞) 𑒠𑒹𑒫𑒠𑒞𑓂𑒞…𑒠𑒹𑒫𑒠𑒞𑓂𑒞, 𑒏𑒹 𑒥𑒰𑒖𑒻 𑒕𑒪 𑒄 𑒑𑒣 𑒠𑒹𑒫𑒠𑒞𑓂𑒞? 𑒏𑒼𑒢 𑒔𑒾𑒣𑒰𑒛𑓃𑒱𑒣𑒩 𑒯𑒼𑒃 𑒕𑒪 𑒄 𑒑𑒣 𑒠𑒹𑒫𑒠𑒞𑓂𑒞?
𑒠𑒹𑒫𑒠𑒞𑓂𑒞: (𑒛𑒹𑒩𑒰𑒃𑒞) 𑒋𑒞𑒹𑒏 𑒣𑒻𑒒 𑒁𑒕𑒱 𑒄 𑒃𑒢𑒰𑒧!! ..𑒣𑒰𑒿𑒔 𑒮𑒋 𑒥𑒩𑓂𑒐𑒏 𑒥𑒰𑒠 𑒂 𑒯𑒖𑒰𑒩 𑒥𑒩𑓂𑒐𑒮𑒿 𑒣𑒯𑒱𑒢𑒹…𑒑𑓀𑒑𑒹𑒬..𑒖𑒿 𑒄 𑒃𑒢𑒰𑒧 𑒁𑒯𑒰𑒿 𑒢𑒻 𑒠𑒹𑒥 𑒯𑒧𑒩𑒰, 𑒞𑒿 𑒞𑒰𑒫𑒞 𑒡𑒩𑒱 𑒧𑒳𑒢𑒰𑒋𑒪 𑒩𑒯𑒞 𑒁𑒯𑒰𑒿𑒏 𑒮𑓂𑒟𑒴𑒪 𑒣𑓂𑒩𑒹𑒧…𑒯𑒰 𑒯𑒰 𑒯𑒰…(𑒁𑒣𑒢𑒹 𑒮𑒿 𑒥𑒰𑒖𑒻𑒋) 𑒛𑒩𑒰𑒍𑒢 𑒮𑒢 𑒑𑒣..𑒛𑒩𑒰𑒍𑒢 𑒮𑒢 𑒑𑒣..(𑒣𑓂𑒩𑒮𑓂𑒟𑒰𑒢 𑒏𑓄 𑒖𑒰𑒃𑒞 𑒁𑒕𑒱।)
(𑒫𑒪𑓂𑒪𑒦𑒰 𑒂 𑒑𑓀𑒑𑒹𑒬 𑒋𑒏-𑒠𑒼𑒮𑒩𑒰𑒏𑒹𑒿 𑒞𑒰𑒏𑓄 𑒪𑒑𑒻𑒞 𑒕𑒟𑒱)
(𑒯𑒴𑒂-𑒯𑒴𑒂𑒏 𑒡𑓂𑒫𑒢𑒱𑒏 𑒮𑓀𑒑 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)














𑒠𑒼𑒮𑒩 𑒏𑒪𑓂𑒪𑒼𑒪
(𑒠𑒴 𑒙𑒰 𑒬𑒞𑒩𑓀𑒖-𑒒𑒢 𑒠𑒳𑒢𑒴 𑒩𑓀𑒑𑒬𑒲𑒩𑓂𑒭𑒣𑒩 𑒩𑒰𑒐𑒪 𑒁𑒕𑒱। 𑒑𑓀𑒑𑒹𑒬 𑒋𑒏𑒙𑒰 𑒬𑒞𑒩𑓀𑒖𑒏 𑒒𑒢𑒏 𑒔𑒰𑒩𑒴 𑒏𑒰𑒞 𑒒𑒴𑒧𑒱 𑒩𑒯𑒪 𑒕𑒟𑒱। 𑒠𑒼𑒮𑒩 𑒬𑒞𑒩𑓀𑒖𑒏 𑒒𑒢𑒣𑒩 𑒣𑓂𑒩𑒏𑒰𑒬 𑒕𑒻 𑒧𑒳𑒠𑒰 𑒍 𑒤𑒹𑒩 𑒫𑒱𑒪𑒳𑒣𑓂𑒞 𑒦𑓄 𑒖𑒰𑒃 𑒕𑒻। 𑒂 𑒤𑒹𑒩 𑒫𑒹𑒠𑒱𑒏𑒰𑒮𑒿 𑒋𑒏𑒙𑒰 𑒑𑒲𑒞 𑒅𑒚𑒻 𑒕𑒻।)

𑒥𑒦𑒢𑒲𑒏𑒹𑒿 𑒣𑒳𑒞𑓂𑒩 𑒞𑒼𑒯𑒹𑓀 𑒥𑒰𑒪 𑒑𑒼𑒩𑒻𑒨𑓂𑒨𑒰,
𑒣𑒼𑒟𑒲 𑒢𑒹𑒢𑒹 𑒣𑒜𑓃𑒢 𑒖𑒰𑒃 𑒯𑒹
𑒣𑒼𑒟𑒱𑒨𑒰 𑒢𑒹𑒩𑒾𑒪𑒢𑒱 𑒑𑒼𑒩𑒱𑒪 𑒖𑒰𑒃 𑒥𑒱𑒩𑒱𑒕 𑒞𑒩
𑒯𑒪𑒳𑒂𑒃 𑒒𑒩 𑒣𑒻𑒮𑒪 𑒡𑒣𑒰𑒃 𑒯𑒹
𑒏𑒱𑒕𑒳 𑒧𑒡𑒳𑒩 𑒐𑒹𑒪𑒢𑒱 𑒑𑒼𑒩𑒱𑒪 𑒏𑒱𑒕𑒼 𑒕𑒱𑒩𑒱𑒨𑒾𑒪𑒰
𑒏𑒱𑒕𑒳 𑒠𑒹𑒪 𑒪𑓀𑒏𑒰 𑒣𑒚𑒰𑒃 𑒯𑒹
𑒥𑒦𑒢𑒲𑒏 𑒣𑒳𑒞𑓂𑒩 𑒞𑒼𑒯𑒹𑒿 𑒥𑒰𑒪 𑒑𑒼𑒩𑒻𑒨𑓂𑒨𑒰
𑒑𑓂𑒫𑒰𑒪𑒱𑒢 𑒒𑒩 𑒣𑒻𑒮𑒪 𑒡𑒣𑒰𑒃 𑒯𑒹
𑒏𑒱𑒕𑒳 𑒠𑒴𑒡 𑒣𑒲𑒪𑒢𑒱 𑒑𑒼𑒩𑒱𑒪 𑒏𑒱𑒕𑒳 𑒜𑓃𑒩𑒏𑒍𑒪𑒰
𑒏𑒱𑒕𑒳 𑒠𑒹𑒪 𑒪𑓀𑒏𑒰 𑒣𑒚𑒰𑒃 𑒯𑒹

𑒑𑓀𑒑𑒹𑒬: 𑒯𑒧 𑒞𑒿 𑒥𑒦𑒢𑒲𑒏 𑒣𑒳𑒞𑓂𑒩 𑒧𑒳𑒠𑒰 𑒯𑒧𑒩 𑒣𑒳𑒞𑓂𑒩 𑒞𑒿 𑒢𑒻। 𑒍 𑒁𑒕𑒱 𑒥𑒦𑒢𑒲𑒏 𑒣𑒳𑒞𑒼𑒯𑒳𑒏 𑒣𑒳𑒞𑓂𑒩। 𑒯𑒧 𑒥𑒰𑒩𑒯 𑒯𑒖𑒰𑒩 𑒑𑓂𑒩𑒢𑓂𑒟𑒏 𑒥𑒩𑒼𑒥𑒩𑒱 𑒋𑒏𑒙𑒰 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱 𑒪𑒱𑒐𑒢𑒱𑒯𑒰𑒩 𑒪𑒹𑒐𑒏, 𑒧𑒰𑒞𑓂𑒩 𑒋𑒏𑒙𑒰 𑒮𑒰𑒡𑒰𑒩𑒝 𑒬𑒱𑒏𑓂𑒭𑒏 𑒕𑒲। 𑒯𑒧𑒩 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒏 𑒣𑓂𑒩𑒞𑒱𑒪𑒱𑒣𑒱 𑒏𑒩𑒥𑒰𑒣𑒩 𑒣𑓂𑒩𑒞𑒱𑒥𑒢𑓂𑒡 𑒏𑒹 𑒪𑒑𑒰𑒋𑒞? 𑒢𑒫𑒠𑓂𑒫𑒲𑒣𑒏 𑒫𑒱𑒠𑓂𑒨𑒰𑒩𑓂𑒟𑒲 𑒁𑒫𑒬𑓂𑒨 𑒪𑓄 𑒖𑒰𑒋𑒞 𑒯𑒧𑒩 𑒬𑒱𑒏𑓂𑒭𑒰 𑒁𑒣𑒢𑒰 𑒮𑓀𑒑।
(𑒫𑒹𑒠𑒱𑒏𑒰𑒮𑒿 𑒤𑒹𑒩 𑒑𑒲𑒞 𑒅𑒚𑒻𑒋।)
𑒥𑒦𑒢𑒲𑒏 𑒣𑒳𑒞𑓂𑒩 𑒞𑒼𑒯𑒹𑒿 𑒥𑒰𑒪 𑒑𑒼𑒩𑒻𑒨𑓂𑒨𑒰
𑒥𑒛𑓃𑒃 𑒒𑒩 𑒣𑒻𑒮𑒪 𑒡𑒣𑒰𑒃 𑒯𑒹
𑒏𑒱𑒕𑒳 𑒣𑒰𑒢 𑒐𑒹𑒪𑒢𑒱 𑒑𑒼𑒩𑒱𑒪 𑒏𑒱𑒕𑒳 𑒕𑒱𑒛𑓃𑒱𑒎𑒪𑒰
𑒏𑒱𑒕𑒳 𑒠𑒹𑒪 𑒪𑓀𑒏𑒰 𑒣𑒚𑒰𑒃 𑒯𑒹
𑒥𑒦𑒢𑒲𑒏 𑒣𑒳𑒞𑓂𑒩 𑒞𑒼𑒯𑒹𑒿 𑒥𑒰𑒪 𑒑𑒼𑒩𑒻𑒨𑓂𑒨𑒰
𑒛𑒼𑒧𑒱𑒢 𑒒𑒩 𑒣𑒻𑒮𑒪 𑒡𑒣𑒰𑒃 𑒯𑒹
𑒢𑒲𑒏 𑒢𑒲𑒏 𑒣𑒰𑒯𑒳𑒩 𑒑𑒼𑒩𑒱𑒪 𑒁𑒣𑒢𑒹 𑒔𑒜𑓃𑒰𑒍𑒪𑓄
𑒏𑒰𑒢𑒰 𑒣𑒰𑒞𑒩 𑒠𑒹𑒪 𑒯𑒛𑓃𑒏𑒰𑒃 𑒯𑒹
𑒥𑒦𑒢𑒲𑒏 𑒣𑒳𑒞𑓂𑒩 𑒞𑒼𑒯𑒹𑒿 𑒥𑒰𑒪 𑒑𑒼𑒩𑒻𑒨𑓂𑒨𑒰
𑒥𑓂𑒩𑒰𑒯𑓂𑒧𑒝 𑒒𑒩 𑒣𑒻𑒮𑒪 𑒡𑒣𑒰𑒃 𑒯𑒹
𑒢𑒲𑒏-𑒢𑒲𑒏 𑒖𑒢𑒾 𑒑𑒼𑒩𑒱𑒪 𑒁𑒣𑒢𑒹 𑒣𑒯𑒱𑒩𑒪𑒢𑒱
𑒎𑒩𑒼 𑒠𑒹𑒪𑒢𑒱 𑒍𑒗𑒩𑒰𑒃 𑒯𑒹
𑒯𑒏𑒢 𑒏𑒢𑒻 𑒕𑒻 𑒑𑒼𑒩𑒱𑒪 𑒥𑓂𑒩𑒰𑒯𑓂𑒧𑒝𑒲𑒏 𑒥𑒹𑒙𑒱𑒨𑒰
𑒥𑓂𑒩𑒰𑒯𑓂𑒧𑒝 𑒥𑒰𑒥𑒴 𑒥𑒛𑓃 𑒠𑒳𑒐 𑒠𑒹𑒪 𑒯𑒹
𑒦𑒢𑒯𑒱 𑒑𑓀𑒑𑒹𑒬 𑒮𑒳𑒢𑒴 𑒥𑒰𑒥𑒴 𑒑𑒼𑒩𑒱𑒪
𑒑𑒯𑒫𑒩 𑒣𑒻𑒮𑒱𑒨𑒹 𑒖𑒮 𑒪𑒹𑒪 𑒯𑒹
𑒑𑓀𑒑𑒹𑒬: (𑒁𑒣𑒢𑒹𑒧𑒹 𑒑𑒳𑒢𑒡𑒳𑒢 𑒏𑒩𑒻𑒞) 𑒄 𑒠𑒹𑒫𑒠𑒞𑓂𑒞 𑒏𑒲 𑒏𑒯𑒱 𑒑𑒹𑒪? 𑒧𑒳𑒠𑒰 𑒙𑒼𑒪 𑒂 𑒔𑒾𑒣𑒰𑒛𑓃𑒱𑒣𑒩 𑒯𑒧𑒩𑒰 𑒮𑒼𑒗𑒰𑒿 𑒞𑒿 𑒋𑒯𑒹𑒢 𑒏𑒱𑒨𑒼 𑒏𑒱𑒕𑒳 𑒢𑒻 𑒥𑒰𑒖𑒪 𑒁𑒕𑒱। 𑒧𑒳𑒠𑒰 𑒬𑒞𑒩𑓀𑒖𑒏 𑒁𑒢𑓂𑒢𑒏 𑒠𑒰𑒢𑒰𑒏 𑒑𑒝𑒢𑒰। 𑒍 𑒞𑒿 𑒠𑒹𑒫𑒠𑒞𑓂𑒞 𑒏 𑒮𑒏𑒧𑒹 𑒢𑒻 𑒕𑒻।
(𑒫𑒪𑓂𑒪𑒦𑒰𑒏 𑒣𑓂𑒩𑒫𑒹𑒬।)
𑒫𑒪𑓂𑒪𑒦𑒰: 𑒏𑒲 𑒦𑒹𑒪? 𑒏𑒼𑒢 𑒑𑒳𑒢𑒡𑒳𑒢𑒲 𑒪𑒰𑒑𑒪 𑒁𑒕𑒱?
𑒑𑓀𑒑𑒹𑒬: (𑒫𑒪𑓂𑒪𑒦𑒰 𑒠𑒱𑒬 𑒞𑒰𑒏𑒱) 𑒫𑒋𑒯 𑒠𑒹𑒫𑒠𑒞𑓂𑒞𑒥𑒪𑒰 𑒑𑒳𑒢𑒡𑒳𑒢𑒲।
𑒫𑒪𑓂𑒪𑒦𑒰: (𑒑𑓀𑒑𑒹𑒬 𑒠𑒱𑒬 𑒞𑒰𑒏𑒱) 𑒡𑒳𑒩 𑒕𑒼𑒛𑓃𑒴 𑒢𑒹। 𑒍𑒏𑒩𑒰 𑒥𑒳𑒠𑓂𑒡𑒱𑒏 𑒪𑒹𑒬𑒼 𑒢𑒻 𑒕𑒻..
𑒑𑓀𑒑𑒹𑒬: 𑒞𑒹𑒿 𑒞𑒿 𑒫𑒪𑓂𑒪𑒦𑒰। 𑒥𑒳𑒠𑓂𑒡𑒱𑒮𑒿 𑒏𑒰𑒖 𑒏𑒹𑒪𑒰𑒣𑒩 𑒢𑒹 𑒮𑒞𑓂𑒨 𑒂 𑒁𑒮𑒞𑓂𑒨..𑒧𑒳𑒠𑒰 𑒍𑒏𑒩𑒰 𑒥𑒳𑒠𑓂𑒡𑒱 𑒢𑒻 𑒕𑒻। 𑒞𑒹𑒿 𑒍𑒏𑒩 𑒑𑒣𑒣𑒩 𑒯𑒧𑒩𑒰 𑒮𑒼𑒔𑓄 𑒣𑒛𑓃𑒱 𑒩𑒯𑒪 𑒁𑒕𑒱।
𑒫𑒪𑓂𑒪𑒦𑒰: 𑒁𑒯𑒰𑒿 𑒞𑒿 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒏 𑒪𑒹𑒐𑒏𑒏 𑒁𑒪𑒰𑒥𑒹 𑒂𑒥 𑒏𑒫𑒱 𑒮𑒹𑒯𑒼 𑒦𑓄 𑒑𑒹𑒪 𑒕𑒲। 𑒋𑒞𑒹𑒏 𑒮𑒳𑒢𑓂𑒠𑒩 𑒑𑒲𑒞 𑒪𑒱𑒐𑓄 𑒪𑒰𑒑𑒪 𑒕𑒲। 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒧𑒹 𑒂𑒔𑒰𑒩𑓂𑒨 𑒮𑒱𑓀𑒯 𑒂 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒑𑒲𑒞𑒧𑒹 𑒥𑒰𑒪-𑒑𑒼𑒩𑒻𑒨𑓂𑒨𑒰!!
𑒑𑓀𑒑𑒹𑒬: 𑒯𑒿 𑒫𑒪𑓂𑒪𑒦𑒰। 𑒁𑒢𑒰𑒨𑒰𑒮𑒹 𑒁𑒯𑒰𑒿 𑒏𑒞𑒹𑒏 𑒢𑒲𑒏 𑒑𑒣 𑒥𑒰𑒖𑒱 𑒠𑒹𑒪𑒾𑓀 (𑒬𑒞𑒩𑓀𑒖𑒏 𑒒𑒢 𑒪𑒑 𑒖𑒰𑒃 𑒕𑒟𑒱 𑒂 𑒍𑒏𑒩𑒰 𑒙𑒹𑒜𑓃 𑒏𑓄 𑒏𑓀𑒑𑒳𑒩𑒱𑒨𑒰 𑒂𑓀𑒑𑒳𑒩𑒮𑒿 𑒏𑒼𑒢𑒣𑒩 𑒢𑒱𑒨𑒢𑓂𑒞𑓂𑒩𑒱𑒞 𑒏𑒩𑒻 𑒕𑒟𑒱।) 𑒯𑒿 𑒫𑒪𑓂𑒪𑒦𑒰…..𑒄 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱 𑒢𑒻, 𑒄 𑒂𑒔𑒰𑒩𑓂𑒨 𑒮𑒱𑓀𑒯 𑒂 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑒏 𑒣𑒩𑒱𑒦𑒰𑒭𑒰 𑒢𑒻,……. 𑒄 𑒥𑒰𑒪𑒑𑒼𑒩𑒻𑒨𑓂𑒨𑒰 𑒯𑒋𑒞 𑒮𑒧𑒩𑓂𑒟 𑒌 𑒔𑒾𑒣𑒰𑒛𑓃𑒱 𑒂 𑒙𑒼𑒪𑒏 𑒭𑒛𑒨𑓀𑒞𑓂𑒩𑒏𑒹𑒿 𑒞𑒼𑒛𑓃𑒥𑒰𑒧𑒹। (𑒑𑓀𑒑𑒹𑒬 𑒏𑓀𑒑𑒳𑒩𑒱𑒨𑒰 𑒂𑓀𑒑𑒳𑒩 𑒒𑒢𑒮𑒿 𑒯𑒙𑒰 𑒪𑒻 𑒕𑒟𑒱। 𑒒𑒢 𑒒𑒳𑒧𑒱 𑒏𑓄 𑒤𑒹𑒩 𑒮𑓂𑒟𑒱𑒩 𑒦𑓄 𑒖𑒰𑒃𑒋। (𑒑𑓀𑒑𑒹𑒬 𑒫𑒪𑓂𑒪𑒦𑒰 𑒠𑒱𑒬 𑒞𑒰𑒏𑒱 𑒥𑒰𑒖𑒻 𑒕𑒟𑒱) 𑒁𑒢𑒰𑒨𑒰𑒮𑒹 𑒁𑒯𑒰𑒿 𑒏𑒞𑒹𑒏 𑒢𑒲𑒏 𑒑𑒣 𑒥𑒰𑒖𑒱 𑒠𑒻 𑒕𑒲 𑒫𑒪𑓂𑒪𑒦𑒰।
(𑒞𑒐𑒢𑒹 𑒠𑒹𑒫𑒠𑒞𑓂𑒞 𑒣𑓂𑒩𑒫𑒹𑒬 𑒏𑒩𑒻𑒋।)
𑒠𑒹𑒫𑒠𑒞𑓂𑒞: (𑒑𑓀𑒑𑒹𑒬 𑒠𑒱𑒬 𑒞𑒰𑒏𑒱) 𑒑𑓀𑒑𑒹𑒬 𑒏𑒫𑒱!!!(𑒂𑒬𑓂𑒔𑒩𑓂𑒨𑒮𑒿 𑒯𑒰𑒟 𑒣𑒮𑒰𑒩𑒻𑒋) 𑒑𑓀𑒑𑒹𑒬 𑒞𑒞𑓂𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒏𑒰𑒩𑒏। 𑒑𑓀𑒑𑒹𑒬 𑒏𑒫𑒱𑒏 𑒏𑒫𑒱𑒞𑓂𑒫𑒏 𑒔𑒩𑓂𑒔 𑒏𑒱𑒨𑒼 𑒢𑒻 𑒏𑒩𑒞!!
𑒫𑒪𑓂𑒪𑒦𑒰: (𑒠𑒹𑒫𑒠𑒞𑓂𑒞 𑒠𑒱𑒬 𑒞𑒰𑒏𑒱) 𑒏𑒲 𑒄𑒯𑒼 𑒢𑒱𑒩𑓂𑒝𑒨 𑒙𑒼𑒪 𑒂 𑒔𑒾𑒣𑒰𑒛𑓃𑒱𑒣𑒩 𑒦𑓄 𑒑𑒹𑒪 𑒕𑒻।
𑒠𑒹𑒫𑒠𑒞𑓂𑒞: (𑒫𑒪𑓂𑒪𑒦𑒰 𑒠𑒱𑒬 𑒞𑒰𑒏𑒱) 𑒯𑒿 𑒫𑒪𑓂𑒪𑒦𑒰। 𑒧𑒳𑒠𑒰 𑒞𑒼𑒩𑒰 𑒏𑒼𑒢𑒰 𑒥𑒳𑒗𑒪 𑒕𑒾?
𑒫𑒪𑓂𑒪𑒦𑒰: (𑒠𑒹𑒫𑒠𑒞𑓂𑒞 𑒠𑒱𑒬 𑒞𑒰𑒏𑒱) 𑒥𑒳𑒗𑒪 𑒢𑒻 𑒁𑒕𑒱 𑒧𑒳𑒠𑒰 𑒂𑒥 𑒥𑒳𑒗𑒪 𑒦𑓄 𑒑𑒹𑒪 𑒖𑒹 𑒯𑒧𑒩 𑒂 𑒑𑓀𑒑𑒹𑒬𑒏 𑒣𑓂𑒩𑒹𑒧𑒏 𑒔𑒩𑓂𑒔𑒰, 𑒯𑒧𑒩 𑒂 𑒑𑓀𑒑𑒹𑒬𑒏 𑒫𑒱𑒫𑒰𑒯𑒏 𑒔𑒩𑓂𑒔𑒰𑒣𑒩 𑒣𑒯𑒩𑒳𑒂 𑒚𑒰𑒜𑓃 𑒏𑓄 𑒠𑒹𑒪 𑒑𑒹𑒪 𑒕𑒻।
𑒑𑓀𑒑𑒹𑒬: (𑒬𑒞𑒩𑓀𑒖𑒏 𑒒𑒢𑒏𑒹𑒿 𑒤𑒹𑒩 𑒙𑒹𑒜𑓃 𑒏𑒩𑒻𑒋) 𑒞𑒿 𑒯𑒧𑒩 𑒏𑒫𑒱𑒞𑒰𑒣𑒩 𑒮𑒹𑒯𑒼 𑒔𑒩𑓂𑒔𑒰 𑒢𑒻 𑒯𑒋𑒞। 𑒞𑒞𑓂𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒏 𑒮𑒦 𑒣𑒰𑒿𑒞𑒲𑒣𑒩 𑒦𑒰𑒭𑓂𑒨, 𑒙𑒲𑒏𑒰 𑒂 𑒏𑒫𑒱𑒞𑒰𑒣𑒩..
𑒫𑒪𑓂𑒪𑒦𑒰: (𑒬𑒞𑒩𑓀𑒖𑒏 𑒒𑒢 𑒑𑓀𑒑𑒹𑒬𑒮𑒿 𑒁𑒣𑒢𑒰 𑒯𑒰𑒟𑒧𑒹 𑒪𑓄 𑒪𑒻𑒋) 𑒑𑓀𑒑𑒹𑒬 𑒂𑒥 𑒁𑒯𑒰𑒿 𑒔𑒱𑒢𑓂𑒞𑒰 𑒕𑒼𑒛𑓃𑒱 𑒠𑒱𑒁। 𑒄 𑒮𑒦 𑒑𑒲𑒞 𑒯𑒧𑒩 𑒢𑒻𑒯𑒩𑒰𑒧𑒹 𑒑𑒰𑒍𑒪 𑒖𑒰𑒋𑒞। 𑒠𑒹𑒫𑒠𑒞𑓂𑒞 𑒏𑒯𑒱 𑒁𑒥𑒱𑒨𑒾 𑒙𑒼𑒪 𑒂 𑒔𑒾𑒣𑒰𑒛𑓃𑒱𑒣𑒩, 𑒑𑒲𑒞 𑒥𑒢𑓂𑒢 𑒢𑒻 𑒯𑒋𑒞। 𑒂𑒃 𑒢𑒻 𑒞𑒿 𑒮𑒰𑒞 𑒮𑒋 𑒥𑒩𑓂𑒐 𑒥𑒰𑒠𑒼 𑒌 𑒣𑓂𑒩𑒹𑒧𑒏 𑒔𑒩𑓂𑒔𑒰 𑒤𑒹𑒩𑒮𑒿 𑒯𑒋𑒞। 𑒂 𑒖𑒹 𑒣𑓂𑒩𑒹𑒧 𑒮𑒰𑒞 𑒮𑒋 𑒥𑒩𑓂𑒐 𑒃𑒢𑓂𑒞𑒖𑒰𑒩𑒲 𑒢𑒻 𑒏𑓄 𑒮𑒏𑒋 𑒍 𑒣𑓂𑒩𑒹𑒧 𑒣𑓂𑒩𑒹𑒧 𑒢𑒻। 𑒏𑒲 𑒁𑒯𑒴𑒣𑒩 𑒯𑒹𑒞𑒻 𑒏𑒼𑒢𑒼 𑒣𑓂𑒩𑒞𑒱𑒥𑒢𑓂𑒡।
𑒠𑒹𑒫𑒠𑒞𑓂𑒞: (𑒫𑒪𑓂𑒪𑒦𑒰 𑒠𑒱𑒬 𑒞𑒰𑒏𑒱) 𑒯𑒹𑒞𑒻 𑒢𑒻 𑒦𑓄 𑒑𑒹𑒪 𑒕𑒻 𑒫𑒪𑓂𑒪𑒦𑒰। 𑒠𑒹𑒐𑒴 𑒍 𑒥𑒿𑒮𑒥𑒱𑒙𑓂𑒙𑒲। 𑒌 𑒑𑒰𑒧 𑒂 𑒁𑒯𑒲 𑒑𑒰𑒧𑒏 𑒁𑒯𑒰𑒿𑒏 𑒢𑒯𑒱𑒩𑒰𑒏 𑒙𑒼𑒪𑒏 𑒥𑒲𑒔𑒧𑒹 𑒖𑒹 𑒥𑒰𑒿𑒮𑒏 𑒏𑒼𑒣𑒩 𑒮𑒦 𑒠𑒹𑒐𑒰 𑒣𑒛𑓃𑒱 𑒩𑒯𑒪 𑒁𑒕𑒱। 𑒁𑒯𑒰𑒿𑒏 𑒢𑒯𑒱𑒩𑒰𑒏𑒹𑒿 𑒣𑒩𑒠𑒹𑒮 𑒥𑒢𑒰 𑒠𑒹𑒞 𑒄 𑒏𑒼𑒣𑒛𑓃। 𑒁𑒯𑒰𑒿𑒏 𑒑𑒲𑒞 𑒍𑒃 𑒙𑒼𑒪𑒮𑒿 𑒥𑒯𑒰𑒩 𑒞𑒿 𑒯𑒋𑒞 𑒧𑒳𑒠𑒰 𑒌 𑒥𑒿𑒮𑒥𑒱𑒙𑓂𑒙𑒲𑒧𑒹 𑒍 𑒦𑒳𑒞𑒯𑒰 𑒑𑒲𑒞 𑒥𑒢𑒱 𑒒𑒳𑒩𑒞.. (𑒑𑓀𑒑𑒹𑒬 𑒠𑒱𑒬 𑒞𑒰𑒏𑒱) 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒏𑒰𑒩𑒏 𑒑𑓀𑒑𑒹𑒬..
𑒫𑒪𑓂𑒪𑒦𑒰: 𑒮𑒳𑒏𑒫𑒱𑒏𑒻𑒩𑒫𑒏𑒰𑒢𑒢𑒹𑒢𑓂𑒠𑒳𑓁 – 𑒑𑓀𑒑𑒹𑒬। 𑒁𑒣𑒢 𑒣𑒳𑒞𑓂𑒩 𑒫𑒩𑓂𑒠𑓂𑒡𑒧𑒰𑒢𑒏𑒹𑒿 𑒏𑒯𑒥𑒻 𑒯𑒧। 𑒁𑒣𑒢 𑒣𑒱𑒞𑒰𑒏 𑒏𑒫𑒱 𑒯𑒹𑒥𑒰𑒏 𑒣𑓂𑒩𑒧𑒰𑒝 𑒕𑒼𑒛𑓃𑒞 𑒍..𑒏𑒯𑒱 𑒠𑒱𑒨𑒾 𑒠𑒹𑒫𑒠𑒞𑓂𑒞 𑒄 𑒑𑒣 𑒙𑒼𑒪 𑒂 𑒔𑒾𑒣𑒰𑒛𑓃𑒱𑒣𑒩। 𑒕𑒻 𑒏𑒱𑒨𑒼 𑒍𑒞𑓄 𑒮𑒰𑒞 𑒮𑒋 𑒮𑒰𑒪 𑒪𑒛𑓃𑒻𑒥𑒪𑒰? 𑒥𑒿𑒮𑒥𑒱𑒙𑓂𑒙𑒲𑒏 𑒑𑒲𑒞 𑒒𑒳𑒩𑒱𑒨𑒰𑒃𑒞 𑒩𑒯𑒞𑒻। 𑒮𑒳𑒢𑒻 𑒕𑒱𑒌 𑒏𑒼𑒢𑒼 𑒡𑓂𑒫𑒢𑒱 𑒐𑒞𑒧 𑒢𑒻 𑒯𑒼𑒃 𑒕𑒻 𑒠𑒳𑒢𑒱𑒨𑒰𑒿𑒧𑒹। 𑒮𑒳𑒢𑒻 𑒕𑒱𑒌 𑒋𑒏𑓂𑒏𑒹 𑒞𑒩𑒯𑒏 𑒮𑒰𑒞𑒙𑒰 𑒪𑒼𑒏 𑒯𑒼𑒃 𑒕𑒻 𑒠𑒳𑒢𑒱𑒨𑒰𑒿𑒧𑒹 𑒋𑒏𑓂𑒏𑒹 𑒮𑒧𑒋𑒧𑒹। 𑒮𑒰𑒞 𑒮𑒋 𑒥𑒩𑓂𑒐𑒧𑒹 𑒮𑒰𑒞𑒙𑒰 𑒪𑒼𑒏 𑒢𑒻 𑒯𑒹𑒞𑒻 𑒏𑒲 𑒠𑒹𑒫𑒠𑒞𑓂𑒞?

𑒠𑒹𑒫𑒠𑒞𑓂𑒞: (𑒠𑒹𑒫𑒠𑒞𑓂𑒞 𑒠𑒱𑒬 𑒞𑒰𑒏𑒱) 𑒢𑒻 𑒯𑒹𑒞𑒻 𑒫𑒪𑓂𑒪𑒦𑒰। 𑒮𑒰𑒞 𑒮𑒋 𑒥𑒩𑓂𑒐𑒧𑒹 𑒋𑒏𑒙𑒰 𑒦𑓄 𑒖𑒰𑒋 𑒮𑒹𑒯𑒼 𑒥𑒯𑒳𑒞 𑒕𑒻।
𑒫𑒪𑓂𑒪𑒦𑒰: 𑒋𑒏 𑒙𑒰 𑒞𑒿 𑒯𑒹𑒞𑒻 𑒢𑒹 𑒠𑒹𑒫𑒠𑒞𑓂𑒞, 𑒞𑒿 𑒞𑒃 𑒪𑒹𑒪 𑒯𑒧𑒩 𑒮𑒦𑒏 𑒣𑓂𑒩𑒹𑒧𑒏 𑒑𑒲𑒞 𑒫𑒱𑒔𑒩𑒻𑒞 𑒩𑒯𑒞𑒻 𑒁𑒯𑒱 𑒥𑒼𑒢 𑒥𑒿𑒮𑒥𑒱𑒙𑓂𑒙𑒲𑒧𑒹। 𑒥𑒿𑒮𑒥𑒱𑒙𑓂𑒙𑒲𑒏 𑒣𑒰𑒩𑒏 𑒖𑒲𑒫𑒢, 𑒙𑒼𑒪, 𑒔𑒾𑒣𑒰𑒛𑓃𑒱 𑒮𑒦 𑒐𑒞𑒧 𑒦𑓄 𑒖𑒹𑒞𑒻 𑒠𑒹𑒫𑒠𑒞𑓂𑒞 𑒌 𑒮𑒰𑒞 𑒮𑒋 𑒥𑒩𑓂𑒐𑒧𑒹, 𑒧𑒳𑒠𑒰 𑒄 𑒦𑒳𑒞𑒯𑒰 𑒑𑒲𑒞 𑒢𑒻 𑒐𑒞𑒧 𑒯𑒹𑒞𑒻। 𑒄 𑒥𑒿𑒮𑒥𑒱𑒙𑓂𑒙𑒲 𑒂𑒞𑓂𑒧𑒰 𑒮𑒦𑒏𑒹𑒿 𑒒𑒳𑒩𑒰 𑒏𑓄 𑒂𑒢𑒞। 𑒢𑒲𑒏 𑒂𑒞𑓂𑒧𑒰 𑒮𑒦𑒏𑒹𑒿। 𑒅𑒠𑒨𑒢𑒏𑒹𑒿, 𑒠𑒲𑒢𑒰𑒏𑒹𑒿, 𑒦𑒠𑒩𑒲𑒏𑒹𑒿, 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯𑒏𑒹𑒿 𑒮𑒹𑒯𑒼….

𑒠𑒹𑒫𑒠𑒞𑓂𑒞: 𑒢𑒻 𑒐𑒞𑒧 𑒯𑒹𑒞𑒻 𑒫𑒪𑓂𑒪𑒦𑒰, 𑒢𑒻 𑒐𑒞𑒧 𑒯𑒹𑒞𑒻। 𑒢𑒲𑒏 𑒂𑒞𑓂𑒧𑒰 𑒋𑒞𑒻 𑒞𑒿 𑒠𑒳𑒩𑒰𑒞𑓂𑒧𑒰 𑒮𑒹𑒯𑒼 𑒢𑒹 𑒂𑒥𑒱 𑒖𑒰𑒋 𑒫𑒪𑓂𑒪𑒦𑒰…𑒮𑒋𑒯 𑒙𑒰 𑒛𑒩 𑒫𑒪𑓂𑒪𑒦𑒰…𑒠𑒳𑒩𑒰𑒞𑓂𑒧𑒰 𑒮𑒹𑒯𑒼 𑒢𑒻 𑒂𑒥𑒱 𑒖𑒰𑒋 (𑒠𑒹𑒫𑒠𑒞𑓂𑒞 𑒔𑒰𑒩𑒴 𑒠𑒱𑒮 𑒞𑒰𑒏𑒱 𑒗𑒙𑒏𑒰𑒩𑒱 𑒏𑓄 𑒣𑓂𑒩𑒮𑓂𑒟𑒰𑒢 𑒏𑒩𑒻𑒋। 𑒫𑒪𑓂𑒪𑒦𑒰 𑒂 𑒑𑓀𑒑𑒹𑒬 𑒬𑒞𑒩𑓀𑒖𑒏 𑒒𑒢 𑒪𑒑 𑒂𑒥𑒱 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱।)
𑒑𑓀𑒑𑒹𑒬: 𑒫𑒪𑓂𑒪𑒦𑒰, 𑒕𑒼𑒛𑓃𑒴 𑒄 𑒮𑒦। 𑒏𑒼𑒢 𑒑𑒳𑒢𑒡𑒳𑒢𑒲 𑒪𑒰𑒑𑒱 𑒑𑒹𑒪 𑒁𑒯𑒰𑒿𑒏𑒹𑒿। 𑒮𑒳𑒢𑒰𑒅 𑒢𑒹 𑒐𑒱𑒮𑓂𑒮𑒰, 𑒏𑒼𑒢𑒼 𑒠𑒼𑒮𑒩 𑒐𑒱𑒮𑓂𑒮𑒰, 𑒯𑒧𑒩𑒰 𑒂𑒥 𑒢𑓂𑒨𑒰𑒨𑒏 𑒏𑒼𑒢𑒼 𑒑𑓂𑒩𑒢𑓂𑒟 𑒢𑒻 𑒪𑒱𑒐𑒥𑒰𑒏 𑒁𑒕𑒱। 𑒂𑒥 𑒯𑒧𑒩𑒰 𑒦𑒩𑒱 𑒖𑒢𑒧 𑒏𑒫𑒱𑒞𑒹 𑒏𑒩𑒥𑒰𑒏 𑒁𑒕𑒱। 𑒮𑒳𑒢𑒰𑒅 𑒢𑒹 𑒐𑒱𑒮𑓂𑒮𑒰 𑒥𑒰𑒪𑒰𑒩𑒰𑒧 𑒂 𑒫𑓀𑒬𑒲𑒡𑒩 𑒥𑓂𑒩𑒰𑒯𑓂𑒧𑒝𑒏, 𑒫𑓂𑒨𑒰𑒒𑓂𑒩 𑒂 𑒮𑒴𑒏𑒩𑒏, 𑒑𑒯𑒱𑒪 𑒂 𑒠𑒳𑒩𑓂𑒑𑒰𑒏।
𑒫𑒪𑓂𑒪𑒦𑒰: (𑒫𑒪𑓂𑒪𑒦𑒰 𑒒𑒳𑒩𑒻 𑒕𑒟𑒱, 𑒠𑒳𑒐𑒲 𑒧𑒳𑒿𑒯𑒣𑒩 𑒧𑒳𑒮𑓂𑒏𑒲 𑒂𑒥𑒱 𑒖𑒰𑒃 𑒕𑒢𑓂𑒯𑒱 𑒂 𑒬𑒞𑒩𑓀𑒖𑒏 𑒮𑒦𑒙𑒰 𑒒𑒢𑒏𑒹𑒿 𑒍 𑒋𑒏𑒞𑓂𑒩 𑒏𑒩𑒻 𑒕𑒟𑒱 𑒂 𑒯𑒰𑒟𑒮𑒿 𑒮𑒦𑒙𑒰𑒏𑒹𑒿 𑒢𑒹𑒣𑒟𑓂𑒨 𑒠𑒱𑒮 𑒮𑒯𑒙𑒰𑒩𑒱 𑒏𑓄 𑒧𑓀𑒔𑒮𑒿 𑒯𑒙𑒰 𑒠𑒻 𑒕𑒟𑒱।)
𑒯𑒱𑒩𑓂𑒩 𑒯𑒱𑒩𑓂𑒩 𑒮𑒴𑒑𑒩 𑒖𑒰𑒃𑒋 𑒁𑒐𑒩𑒰𑒯𑒰 𑒏𑒩𑒲𑒥 𑒮𑒿
𑒣𑒰𑒕𑒴 𑒥𑓀𑒬𑒲𑒡𑒩 𑒦𑒰𑒦𑒢 𑒐𑒹𑒯𑒰𑒩𑒻𑒋 𑒦𑒲𑒩 𑒮𑒿
𑒦𑒼𑒩𑒹 𑒦𑒼𑒩𑒹 𑒁𑒐𑒩𑒰𑒯𑒰𑒧𑒹 𑒮𑒴𑒑𑒩 𑒮𑓀𑒑 𑒨𑒳𑒠𑓂𑒡 𑒩𑒹
𑒬𑓂𑒨𑒰𑒧𑒮𑒱𑓀𑒯 𑒂𑒥𑒱 𑒧𑒰𑒙𑒱 𑒤𑒹𑒏𑒪 𑒖𑒴𑒧𑒱 𑒩𑒹
𑒥𑓀𑒬𑒲𑒡𑒩𑒏𑒹𑒿 𑒞𑒰𑒧𑒮 𑒅𑒚𑒪𑒻 𑒥𑒰𑒖𑒪 𑒏𑒱𑒕𑒳 𑒥𑒰𑒞 𑒩𑒹
𑒑𑒯𑒱𑒪 𑒑𑒯𑒱𑒪 𑒏𑒯𑒱 𑒬𑓂𑒨𑒰𑒧 𑒮𑒱𑓀𑒯 𑒕𑒴𑒙𑒪 𑒖𑒼𑒩 𑒩𑒹
𑒥𑓀𑒬𑒲𑒡𑒩 𑒥𑒪𑒑𑒩 𑒕𑒪 𑒧𑒰𑒩𑒪 𑒥𑒛𑓃 𑒖𑒼𑒩 𑒩𑒹
𑒁𑒩𑒛𑓃𑒰 𑒏𑓄 𑒐𑒮𑒪 𑒬𑓂𑒨𑒰𑒧𑒮𑒱𑓀𑒯, 𑒦𑒹𑒪 𑒁𑒢𑓂𑒯𑒹𑒩 𑒯𑒹
𑒍𑒏𑒩 𑒥𑒹𑒙𑒰 𑒥𑒰𑒪𑒰𑒩𑒰𑒧 𑒏𑒹𑒪𑒏 𑒋𑒏𑒙𑒰 𑒮𑒞𑓂𑒞 𑒯𑒹
𑒋𑒏 𑒮𑒞𑓂𑒞 𑒠𑒴 𑒮𑒞𑓂𑒞 ..𑒞𑒲𑒢 𑒮𑒞𑓂𑒞…𑒯𑒿…..
𑒑𑒯𑒱𑒪 𑒠𑒱𑒁 𑒬𑒏𑓂𑒞𑒱 𑒯𑒧𑒩𑒰 𑒧𑒰𑒩𑒲 𑒥𑓀𑒬𑒲𑒡𑒩 𑒏𑒹𑒿
𑒑𑒯𑒲𑒪 𑒑𑒹𑒪𑒲 𑒠𑒳𑒩𑓂𑒑𑒰𑒖𑒲 𑒪𑒑 𑒏𑒩𑒥𑒹𑒪𑒢𑓂𑒯𑒱 𑒮𑒞𑓂𑒞 𑒯𑒹
𑒠𑒳𑒩𑓂𑒑𑒰 𑒧𑒳𑒠𑒰 𑒂𑒥𑒻 𑒕𑒟𑒱 𑒥𑓀𑒬𑒲𑒡𑒩𑒏𑒹𑒿 𑒩𑒏𑓂𑒭 𑒯𑒹
𑒥𑓀𑒬𑒲𑒡𑒩𑒏 𑒮𑒴𑒑𑒩𑒏𑒹𑒿 𑒧𑒼𑒯𑒱𑒢𑒲 𑒏𑒰𑒿𑒙𑒲 𑒦𑒼𑒏𑒱 𑒧𑒰𑒩𑒪 𑒯𑒹
𑒥𑓀𑒬𑒲𑒡𑒩 𑒞𑒧𑒮𑒰 𑒏𑓄 𑒪𑒪𑒏𑒰𑒩𑒰 𑒠𑒻𑒋 𑒥𑒰𑒪𑒰𑒩𑒰𑒧𑒏𑒹𑒿
𑒧𑒳𑒠𑒰 𑒥𑒰𑒪𑒰𑒩𑒰𑒧 𑒦𑒼𑓀𑒏𑒻𑒋 𑒏𑒰𑒿𑒙𑒲 𑒍𑒏𑒩𑒼 𑒣𑒹𑒙𑒧𑒹
𑒥𑓀𑒬𑒲𑒡𑒩𑒏 𑒣𑒹𑒙 𑒔𑒱𑒩𑒰𑒋𑒪 𑒠𑒳𑒩𑓂𑒑𑒰 𑒋𑒪𑒲 𑒥𑒲𑒔𑒧𑒹
𑒑𑓀𑒑𑒰𑒧𑒹 𑒏𑓄 𑒚𑒰𑒜𑓃 𑒏𑒋𑒪 𑒥𑒰𑒪𑒰𑒩𑒰𑒧 𑒥𑓀𑒬𑒲𑒡𑒩𑒏𑒹𑒿
𑒠𑒼𑒮𑓂𑒞𑒲 𑒦𑒹𑒪𑒻 𑒠𑒳𑒯𑒴 𑒑𑒼𑒙𑒹 𑒏 𑒥𑒲𑒔𑒧𑒹
𑒑𑒯𑒱𑒪 𑒧𑒱𑒪𑒪𑒱, 𑒧𑒱𑒪𑒪𑒱 𑒠𑒳𑒩𑓂𑒑𑒰 𑒮𑒦 𑒧𑒱𑒪𑒴 𑒮𑓀𑒑 𑒯𑒹
𑒮𑒦 𑒧𑒱𑒪𑒱 𑒥𑒜𑓃𑒴 𑒁𑒯𑒱 𑒠𑒹𑒮𑒧𑒹
((𑒫𑒪𑓂𑒪𑒦𑒰 𑒂 𑒑𑓀𑒑𑒹𑒬 𑒋𑒏-𑒠𑒼𑒮𑒩𑒰𑒏𑒹𑒿 𑒞𑒰𑒏𑓄 𑒪𑒑𑒻𑒞 𑒕𑒟𑒱)

(𑒯𑒴𑒂-𑒯𑒴𑒂𑒏 𑒡𑓂𑒫𑒢𑒱𑒏 𑒮𑓀𑒑 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)
















𑒞𑒹𑒮𑒩 𑒏𑒪𑓂𑒪𑒼𑒪
(𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒋𑒏𑒙𑒰 𑒬𑒞𑒩𑓀𑒖𑒏 𑒒𑒢𑒏 𑒔𑒰𑒩𑒴 𑒏𑒰𑒞 𑒒𑒴𑒧𑒱 𑒩𑒯𑒪 𑒕𑒟𑒱। 𑒂𑒔𑒰𑒩𑓂𑒨 𑒮𑒱𑓀𑒯 𑒠𑒼𑒮𑒩 𑒬𑒞𑒩𑓀𑒖𑒏 𑒒𑒢𑒏 𑒔𑒰𑒩𑒴 𑒏𑒰𑒞 𑒒𑒴𑒧𑒱 𑒩𑒯𑒪 𑒕𑒟𑒱। 𑒠𑒳𑒢𑒴𑒏 𑒑𑒩𑒠𑒢𑒱𑒧𑒹 𑒏𑒰𑒩𑒲 𑒏𑒣𑒛𑓃𑒰 𑒑𑒰𑒿𑒞𑒲 𑒖𑒏𑒰𑒿 𑒧𑒳𑒿𑒯 𑒦𑒱𑒩𑒰 𑒏𑓄 𑒥𑒰𑒢𑓂𑒯𑒪 𑒕𑒢𑓂𑒯𑒱। 𑒫𑒰𑒞𑒰𑒫𑒩𑒝𑒏 𑒮𑓀𑒑𑒲𑒞 𑒪𑒑𑒻𑒋 𑒖𑒹𑒢𑒰 𑒥𑒿𑒮𑒥𑒱𑒙𑓂𑒙𑒲𑒏 𑒯𑒳𑒁𑒋 𑒂 𑒦𑒳𑒞𑒯𑒰 𑒮𑒢 𑒫𑒰𑒞𑒰𑒫𑒩𑒝 𑒔𑒰𑒩𑒴 𑒠𑒱𑒬 𑒮𑒵𑒖𑒱𑒞 𑒁𑒕𑒱।)

𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒔𑒰𑒩𑓂𑒨 𑒮𑒱𑓀𑒯 𑒠𑒱𑒮 𑒞𑒰𑒏𑒱) 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒧𑒹 𑒯𑒧𑒩𑒰 𑒮𑒦𑒏 𑒔𑒩𑓂𑒔𑒰 𑒑𑓀𑒑𑒹𑒬 𑒏𑒹𑒪𑒢𑓂𑒯𑒱 𑒧𑒳𑒠𑒰 𑒂𑒥 𑒪𑒼𑒏 𑒯𑒧𑒩 𑒮𑒦𑒏 𑒁𑒮𑒪 𑒢𑒰𑒧 𑒮𑒹𑒯𑒼 𑒥𑒱𑒮𑒩𑒱 𑒑𑒹𑒪। 𑒯𑒧𑒩 𑒮𑒦𑒏 𑒣𑒼𑒟𑒲 𑒮𑒹𑒯𑒼 𑒮𑒳𑒛𑓂𑒛𑒰𑒯 𑒦𑓄 𑒑𑒹𑒪।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒠𑒱𑒮 𑒞𑒰𑒏𑒱) 𑒧𑒳𑒠𑒰 𑒁𑒣𑒢𑒰 𑒮𑒦𑒏 𑒞𑒿 𑒌𑒮𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒁𑒕𑒱𑒨𑒹 𑒢𑒻, 𑒞𑒐𑒢?
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒧𑓀𑒔𑒏 𑒮𑒼𑒗𑒰𑒿 𑒁𑒥𑒻𑒞) 𑒯𑒿𑓄𑓄𑓄𑓄𑓄𑓄, 𑒂 𑒧𑒳𑒃𑒪𑒰𑒏 𑒥𑒰𑒠 𑒦𑒴𑒞 𑒩𑒰𑒏𑒬𑒮𑒿 𑒢𑒲𑒏 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒯 𑒏𑒯𑒹𑒢𑒰𑒃 𑒦𑒹𑒪 𑒢𑒹, 𑒯𑒿𑓄𑓄𑓄𑓄𑓄𑓄𑓄𑓄𑓄𑓄𑓄𑓄𑓄।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑒏𑒹𑒿 𑒣𑒰𑒕𑒰𑒿 𑒮𑒿 𑒙𑒼𑒏𑒻𑒞) 𑒧𑒳𑒠𑒰 𑒁𑒣𑒢𑒰 𑒮𑒦𑒏 𑒞𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒕𑒪𑒻𑒯𑒹 𑒢𑒻, 𑒠𑒩𑓂𑒬𑒢𑒏 𑒮𑒱𑒠𑓂𑒡𑒰𑒢𑓂𑒞𑒧𑒹 𑒑𑓀𑒑𑒹𑒬 𑒠𑓂𑒫𑒰𑒩𑒰 𑒏𑒋𑒪 𑒂𑒔𑒰𑒩𑓂𑒨 𑒮𑒱𑓀𑒯𑓁 𑒂 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑓁 𑒏𑒯𑒱 𑒏𑓄 𑒧𑒰𑒞𑓂𑒩 𑒏𑒋𑒪 𑒑𑒹𑒪 𑒕𑒪 𑒯𑒧𑒩𑒰 𑒮𑒦𑒏 𑒔𑒩𑓂𑒔𑒰…
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒒𑒳𑒩𑒱 𑒏𑓄 𑒠𑒹𑒐𑒻𑒞) 𑒂 𑒞𑒯𑒲𑒮𑒿 𑒯𑒧𑒩𑒰 𑒮𑒦 𑒁𑒕𑒼𑒣 𑒦𑓄 𑒑𑒹𑒪𑒾𑓀 𑒏𑒱𑒢𑒹।
𑒂𑒔𑒰𑒩𑓂𑒨 𑒮𑒱𑓀𑒯: 𑒧𑒳𑒠𑒰 𑒍 𑒞𑒿 𑒂𑒢𑒼 𑒪𑒼𑒏𑒏 𑒔𑒩𑓂𑒔 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒧𑒹 𑒏𑒹𑒢𑒹 𑒕𑒟𑒱। 𑒍 𑒮𑒦 𑒏𑒱𑒋 𑒁𑒕𑒼𑒣 𑒢𑒻 𑒦𑒹𑒪𑒰…
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒏𑒰𑒩𑒝 𑒯𑒳𑒢𑒏𑒩 𑒮𑒦𑒏 𑒢𑒰𑒧 𑒑𑓀𑒑𑒹𑒬 𑒪𑒱𑒐𑒢𑒹 𑒩𑒯𑒟𑒱, 𑒮𑓂𑒣𑒭𑓂𑒙 𑒢𑒰𑒧, 𑒤𑒪𑒢𑒰 𑒂 𑒔𑒱𑒪𑒢𑒰, 𑒧𑒳𑒠𑒰 𑒁𑒣𑒢𑒰 𑒮𑒦𑒏 𑒪𑒹𑒪 𑒍 𑒂𑒔𑒰𑒩𑓂𑒨 𑒮𑒱𑓀𑒯𑓁 𑒂 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑓁 𑒧𑒰𑒞𑓂𑒩 𑒪𑒱𑒐𑒢𑒹 𑒕𑒟𑒱। 𑒮𑒹 𑒑𑓀𑒑𑒹𑒬𑒏 𑒏𑒫𑒱𑒞𑒰 𑒥𑒢𑒱 𑒑𑒹𑒪 𑒅𑒪𑓂𑒏𑒰𑒧𑒳𑒐 𑒂 𑒯𑒧 𑒮𑒦 𑒥𑒢𑒱 𑒑𑒹𑒪𑒾𑓀 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒯। 𑒑𑓀𑒑𑒹𑒬𑒏 𑒥𑒹𑒙𑒰 𑒫𑒩𑓂𑒠𑓂𑒡𑒧𑒰𑒢 𑒑𑓀𑒑𑒹𑒬𑒏 𑒫𑒱𑒭𑒨𑒧𑒹 𑒪𑒱𑒐𑒪𑒢𑓂𑒯𑒱 “𑒮𑒳𑒏𑒫𑒱 𑒏𑒻𑒩𑒫 𑒏𑒰𑒢𑒢𑒹𑒢𑓂𑒠𑒳𑓁”। 𑒧𑒳𑒠𑒰 𑒏𑒱𑒨𑒼 𑒐𑒼𑒖𑒼 𑒏𑒹𑒪𑒏𑒻 𑒔𑒾𑒣𑒰𑒛𑓃𑒱𑒣𑒩 𑒖𑒹 𑒖𑒿 𑒑𑓀𑒑𑒹𑒬 𑒏𑒫𑒱 𑒩𑒯𑒟𑒱 𑒞𑒿 𑒯𑒳𑒢𑒏𑒩 𑒏𑒫𑒱𑒞𑒰 𑒏𑒲 𑒦𑒹𑒪? 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯𑒏𑒹𑒿 𑒑𑓀𑒑𑒹𑒬 𑒂𑒠𑒩 𑒠𑒹𑒪𑒢𑓂𑒯𑒱। 𑒧𑒳𑒠𑒰 𑒏𑒱𑒋? 𑒍 𑒂𑒠𑒩 𑒩𑒯𑒋 𑒍 𑒣𑒼𑒟𑒲 𑒮𑒦 𑒍 𑒫𑒱𑒔𑒰𑒩 𑒮𑒦 𑒖𑒹 𑒯𑒧 𑒮𑒦 𑒪𑒱𑒐𑒪𑒾𑓀। 𑒞𑒿 𑒁𑒣𑒢𑒰 𑒮𑒦𑒏 𑒖𑒃 𑒣𑒼𑒟𑒲𑒏 𑒏𑒰𑒩𑒝𑒮𑒿 𑒑𑓀𑒑𑒹𑒬 𑒂𑒠𑒩 𑒩𑒴𑒣𑒧𑒹 𑒁𑒣𑒢𑒰 𑒮𑒦𑒏𑒹𑒿 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑓁 𑒂 𑒂𑒔𑒰𑒩𑓂𑒨 𑒮𑒱𑓀𑒯𑓁 𑒏𑒯𑒪𑒢𑓂𑒯𑒱 𑒮𑒹 𑒣𑒼𑒟𑒲 𑒮𑒦 𑒏𑒲 𑒦𑒹𑒪? 𑒍𑒃 𑒣𑒼𑒟𑒲 𑒮𑒦𑒧𑒹 𑒞𑒿 𑒁𑒣𑒢 𑒮𑒦𑒏 𑒁𑒮𑒪 𑒢𑒰𑒧 𑒕𑒪। 𑒍 𑒣𑒼𑒟𑒲 𑒮𑒦 𑒮𑒹𑒯𑒼 𑒮𑒳𑒛𑓂𑒛𑒰𑒯 𑒏𑓄 𑒠𑒹𑒪 𑒑𑒹𑒪।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒠𑒱𑒬 𑒞𑒰𑒏𑒱) 𑒏𑒼𑒢 𑒩𑒯𑒮𑓂𑒨 𑒕𑒻 𑒌 𑒧𑒹?
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒧𑓀𑒔𑒏 𑒁𑒑𑓂𑒩 𑒦𑒰𑒑𑒧𑒹 𑒂𑒥𑒱) 𑒁𑒮𑒳𑒩𑒏𑓂𑒭𑒰 𑒂𑒔𑒰𑒩𑓂𑒨 𑒮𑒱𑓀𑒯, 𑒁𑒮𑒳𑒩𑒏𑓂𑒭𑒰। 𑒑𑓀𑒑𑒹𑒬 𑒏𑒹𑒪𑒏 𑒩𑒏𑓂𑒭𑒰 𑒯𑒧𑒩 𑒮𑒦𑒏 𑒞𑒩𑓂𑒏𑒏 𑒬𑓂𑒩𑒲𑒯𑒩𑓂𑒭𑒏 𑒂𑒏𑓂𑒩𑒧𑒝𑒮𑒿, 𑒂 𑒥𑒢𑒹𑒪𑒏 𑒢𑒫𑓂𑒨-𑒢𑓂𑒨𑒰𑒨। 𑒢𑒫𑒏𑒰 𑒬𑒰𑒮𑓂𑒞𑓂𑒩, 𑒢𑒫𑒏𑒰 𑒢𑓂𑒨𑒰𑒨𑒬𑒰𑒮𑓂𑒞𑓂𑒩। 𑒍𑒯𑒼 𑒁𑒖𑒲𑒥𑒹 𑒦𑒹𑒪, 𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒣𑒰𑒿𑒔 𑒮𑒰𑒪 𑒥𑒰𑒠 𑒦𑒹𑒪𑒻 𑒍𑒏𑒩 𑒖𑒢𑓂𑒧 𑒂 𑒔𑒩𑓂𑒧𑒏𑒰𑒩𑒱𑒝𑒲𑒮𑒿 𑒏𑒹𑒪𑒏 𑒫𑒱𑒫𑒰𑒯। 𑒂 𑒍𑒃 𑒫𑒱𑒫𑒰𑒯𑒮𑒿 𑒖𑒹 𑒣𑒳𑒞𑓂𑒩 𑒦𑒹𑒪𑒻 𑒫𑒩𑓂𑒡𑒧𑒰𑒢 𑒮𑒹 𑒤𑒹𑒩 𑒧𑒱𑒪𑒹𑒪𑒏 𑒢𑓂𑒨𑒰𑒨 𑒂 𑒢𑒫𑓂𑒨-𑒢𑓂𑒨𑒰𑒨𑒏𑒹𑒿। 𑒧𑒳𑒠𑒰 𑒫𑒩𑓂𑒠𑓂𑒡𑒧𑒰𑒢 𑒁𑒣𑒢 𑒣𑒱𑒞𑒰𑒏 𑒏𑒫𑒱𑒞𑒰𑒏𑒹𑒿 𑒢𑒻 𑒥𑒱𑒮𑒩𑒪। 𑒁𑒮𑒳𑒩𑒏𑓂𑒭𑒰 𑒂𑒔𑒰𑒩𑓂𑒨 𑒮𑒱𑓀𑒯, 𑒔𑒾𑒣𑒰𑒛𑓃𑒱 𑒧𑒡𑓂𑒨 𑒥𑒰𑒯𑒩𑒏 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒏 𑒣𑓂𑒩𑒞𑒱𑒪𑒱𑒣𑒱 𑒣𑒏𑓂𑒭𑒡𑒩 𑒢𑒻 𑒏𑒩𑓄 𑒠𑒻 𑒕𑒪𑒐𑒱𑒢𑓂𑒯, 𑒢𑒹 𑒮𑒰𑒩-𑒮𑓀𑒏𑓂𑒭𑒹𑒣 𑒪𑒱𑒐𑓄 𑒠𑒻 𑒕𑒪𑒐𑒱𑒢𑓂𑒯। 𑒔𑒾𑒣𑒰𑒛𑓃𑒱𑒧𑒹 𑒫𑒩𑓂𑒠𑓂𑒡𑒧𑒰𑒢𑒏 𑒥𑒰𑒠 𑒮𑒦 𑒏𑒱𑒨𑒼 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩, 𑒂𑒔𑒰𑒩𑓂𑒨 𑒮𑒱𑓀𑒯 𑒂 𑒅𑒪𑓂𑒏𑒰𑒧𑒳𑒐, 𑒌 𑒮𑒦𑒏𑒹𑒿 𑒏𑒰𑒪𑓂𑒣𑒢𑒱𑒏 𑒥𑒢𑒰 𑒠𑒹𑒪𑒏।
𑒂𑒔𑒰𑒩𑓂𑒨 𑒮𑒱𑓀𑒯: (𑒣𑒰𑒕𑒴𑒮𑒿 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑒏𑒹𑒿 𑒙𑒼𑒏𑒻𑒞) 𑒧𑒳𑒠𑒰 𑒌𑒮𑒿 𑒮𑒩𑓂𑒖𑒢 𑒏𑒼𑒢𑒰 𑒯𑒋𑒞 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩? 𑒥𑒱𑒢 𑒮𑒩𑓂𑒖𑒢𑒏 𑒔𑒾𑒣𑒰𑒛𑓃𑒱𑒣𑒩 𑒫𑒱𑒠𑓂𑒨𑒰𑒩𑓂𑒟𑒲 𑒂𑒞𑓂𑒧 𑒁𑒦𑒱𑒫𑓂𑒨𑒏𑓂𑒞𑒱 𑒏𑒼𑒢𑒰 𑒏𑒩𑒞? 𑒨𑒼𑒑𑓂𑒨𑒞𑒰 𑒏𑒼𑒢𑒰 𑒥𑒜𑓃𑒞। 𑒣𑒳𑒩𑒰𑒢 𑒃𑒞𑒱𑒯𑒰𑒮, 𑒣𑒳𑒩𑒰𑒢 𑒖𑓂𑒘𑒰𑒢 𑒫𑓂𑒨𑒰𑒒𑓂𑒩, 𑒮𑒱𑓀𑒯 𑒂 𑒅𑒪𑓂𑒏𑒰𑒧𑒳𑒐 𑒥𑒢𑒱 𑒢𑒻 𑒩𑒯𑒱 𑒖𑒰𑒋𑒞? 𑒣𑓂𑒩𑒞𑒱𑒥𑒢𑓂𑒡, 𑒣𑓂𑒩𑒞𑒱𑒥𑒢𑓂𑒡..𑒤𑒹𑒩 𑒖𑓂𑒘𑒰𑒢𑒏 𑒫𑒱𑒮𑓂𑒞𑒰𑒩 𑒏𑒼𑒢𑒰 𑒯𑒋𑒞? 𑒮𑒧𑒰𑒖𑒏 𑒋𑒏 𑒫𑒩𑓂𑒑 𑒠𑒼𑒮𑒩𑒮𑒿 𑒏𑒙𑒱 𑒖𑒰𑒋𑒞… 𑒣𑓂𑒩𑒞𑒱𑒥𑒢𑓂𑒡, 𑒣𑓂𑒩𑒞𑒱𑒥𑒢𑓂𑒡..𑒌 𑒮𑒿 𑒮𑓂𑒢𑒹𑒯 𑒥𑒜𑓃𑒞 𑒫𑒰 𑒢𑒱𑒩𑒣𑒹𑒏𑓂𑒭𑒞𑒰 𑒥𑒜𑓃𑒞? 𑒖𑒹 𑒁𑒯𑒰𑒿𑒏𑒹𑒿 𑒏𑒩𑒥𑒰𑒏 𑒯𑒳𑒁𑒋 𑒏𑒩𑒴, 𑒖𑒹 𑒯𑒧𑒩𑒰 𑒏𑒩𑒥𑒰𑒏 𑒯𑒋𑒞 𑒯𑒧 𑒏𑒩𑒥..𑒏𑒲 𑒮𑒧𑒰𑒖𑒏 𑒨𑒋𑒯 𑒑𑒞𑒱 𑒯𑒋𑒞?
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒒𑒳𑒩𑒱 𑒏𑓄 𑒂𑒔𑒰𑒩𑓂𑒨 𑒮𑒱𑓀𑒯 𑒠𑒱𑒮 𑒞𑒏𑒻𑒞) 𑒂𑒔𑒰𑒩𑓂𑒨 𑒮𑒱𑓀𑒯। 𑒏𑒲 𑒌 𑒫𑒱𑒮𑓂𑒧𑒩𑒝𑒏𑒹𑒿 𑒩𑒼𑒏𑒥𑒰𑒏 𑒣𑓂𑒩𑒨𑒰𑒮 𑒢𑒻 𑒯𑒹𑒥𑒰𑒏 𑒔𑒰𑒯𑒲?
𑒂𑒔𑒰𑒩𑓂𑒨 𑒮𑒱𑓀𑒯: 𑒯𑒹𑒥𑒰𑒏 𑒔𑒰𑒯𑒲 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩। 𑒏𑒼𑒢𑒼 𑒔𑒲𑒖𑒏 𑒫𑒱𑒮𑓂𑒧𑒩𑒝 𑒞𑒰𑒫𑒞 𑒡𑒩𑒱 𑒮𑒧𑓂𑒦𑒫 𑒢𑒻 𑒖𑒰𑒡𑒩𑒱 𑒍𑒏𑒩𑒰 𑒯𑒧 𑒮𑒦 𑒥𑒳𑒗𑒢𑒰𑒃𑒋 𑒢𑒻 𑒕𑒼𑒛𑓃𑒱 𑒠𑒃।
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒥𑒳𑒗𑒱 𑒏𑓄 𑒧𑒼𑒢 𑒩𑒰𑒐𑒢𑒰𑒃, 𑒚𑒲𑒏 𑒏𑒯𑒪𑒾𑓀 𑒂𑒔𑒰𑒩𑓂𑒨 𑒮𑒱𑓀𑒯। 𑒞𑒿 𑒔𑒾𑒣𑒰𑒛𑓃𑒱𑒣𑒩 𑒄 𑒫𑓂𑒨𑒫𑒮𑓂𑒟𑒰 𑒦𑓄 𑒩𑒯𑒪 𑒯𑒋𑒞 𑒖𑒹 𑒥𑒱𑒢𑒳 𑒥𑒳𑒗𑒢𑒹 𑒣𑒰𑒚 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒨𑒰𑒠𑒱 𑒏𑒩𑒰𑒋𑒪 𑒖𑒰𑒋 𑒖𑒃𑒮𑒿 𑒮𑒦 𑒥𑒱𑒮𑒩𑒱 𑒖𑒰𑒟𑒱 𑒑𑓀𑒑𑒹𑒬 𑒂 𑒫𑒪𑓂𑒪𑒦𑒰𑒏𑒹𑒿।
𑒂𑒔𑒰𑒩𑓂𑒨 𑒮𑒱𑓀𑒯: 𑒧𑒳𑒠𑒰 𑒯𑒧 𑒮𑒦 𑒮𑓀𑒏𑒹𑒞𑒏 𑒣𑓂𑒩𑒨𑒼𑒑 𑒏𑓄 𑒮𑒏𑒻 𑒕𑒲। 𑒮𑓀𑒏𑒹𑒞𑒮𑒿 𑒮𑓂𑒧𑒩𑒝 𑒫𑒱𑒮𑓂𑒧𑒩𑒝 𑒢𑒻 𑒥𑒢𑒞। 𑒁𑒣𑒴𑒩𑓂𑒝 𑒩𑒯𑒞 𑒔𑒾𑒣𑒰𑒛𑓃𑒱𑒏 𑒣𑒰𑒚, 𑒂 𑒁𑒣𑒴𑒩𑓂𑒝 𑒣𑒰𑒚𑒏 𑒫𑒱𑒮𑓂𑒧𑒩𑒝 𑒢𑒻 𑒦𑓄 𑒮𑒏𑒻𑒋, 𑒫𑒱𑒮𑓂𑒧𑒩𑒝 𑒯𑒼𑒃𑒋 𑒧𑒰𑒞𑓂𑒩 𑒣𑒴𑒩𑓂𑒝 𑒣𑒰𑒚।
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒧𑒳𑒠𑒰 𑒏𑒼𑒢 𑒮𑓀𑒏𑒹𑒞𑒮𑒿 𑒩𑒳𑒏𑒞 𑒄 𑒫𑒱𑒮𑓂𑒧𑒩𑒝 𑒂𑒔𑒰𑒩𑓂𑒨 𑒮𑒱𑓀𑒯..
𑒂𑒔𑒰𑒩𑓂𑒨 𑒮𑒱𑓀𑒯: 𑒅𑒪𑓂𑒏𑒰𑒧𑒳𑒐…
(𑒂𑒏𑒰𑒬𑒫𑒰𑒝𑒲 𑒯𑒼𑒃𑒋…𑒂 𑒥𑒱𑒖𑒪𑒾𑒏𑒰 𑒪𑒾𑒏𑒻𑒋. 𑒅𑒪𑓂𑒏𑒰𑒧𑒳𑒐..𑒅𑒪𑓂𑒏𑒰𑒧𑒳𑒐…𑒅𑒪𑓂𑒏𑒰𑒧𑒳𑒐…𑒅𑒪𑓂𑒏𑒰𑒧𑒳𑒐…𑒔𑒰𑒩𑒴 𑒠𑒱𑒮 𑒮𑒼𑒩 𑒯𑒼𑒃𑒋…𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯 𑒫𑒰𑒧 𑒩𑓀𑒑𑒬𑒲𑒩𑓂𑒭 𑒠𑒱𑒬 𑒖𑒰𑒃 𑒕𑒟𑒱। 𑒞𑒰𑒫𑒞 𑒂𑒔𑒰𑒩𑓂𑒨 𑒬𑒩𑒦 𑒠𑒴𑒙𑒰 𑒬𑒱𑒭𑓂𑒨- 𑒬𑒱𑒭𑓂𑒨 𑒐𑒱𑒐𑒱𑒩 𑒂 𑒬𑒱𑒭𑓂𑒨 𑒬𑒰𑒯𑒲-𑒏 𑒮𑓀𑒑 𑒣𑓂𑒩𑒫𑒹𑒬 𑒏𑒩𑒻 𑒕𑒟𑒱 𑒂 𑒩𑓀𑒑𑒣𑒲𑒚 𑒯𑒼𑒃𑒞 𑒠𑒯𑒱𑒢𑒰 𑒧𑒞𑓂𑒞𑒫𑒩𑓂𑒝𑒲𑒣𑒩 𑒂𑒥𑒱 𑒖𑒰𑒃 𑒕𑒟𑒱। 𑒠𑒳𑒢𑒴 𑒬𑒱𑒭𑓂𑒨 𑒋𑒏𑒙𑒰 𑒬𑒞𑒩𑓀𑒖𑒏 𑒒𑒢 𑒅𑒚𑒰 𑒏𑓄 𑒁𑒥𑒻 𑒕𑒟𑒱। 𑒣𑓂𑒩𑒏𑒰𑒬 𑒠𑒯𑒱𑒢𑒰 𑒧𑒞𑓂𑒞𑒫𑒩𑓂𑒝𑒲𑒣𑒩 𑒏𑒹𑒢𑓂𑒠𑓂𑒩𑒱𑒞 𑒦𑓄 𑒖𑒰𑒃𑒞 𑒁𑒕𑒱। 𑒞𑒲𑒢𑒴𑒏 𑒑𑒩𑒠𑒢𑒱𑒧𑒹 𑒅𑒖𑓂𑒖𑒩 𑒏𑒣𑒛𑓃𑒰 𑒑𑒰𑒿𑒞𑒲 𑒖𑒏𑒰𑒿 𑒧𑒳𑒿𑒯 𑒦𑒱𑒩𑒰 𑒏𑓄 𑒥𑒰𑒢𑓂𑒯𑒪 𑒕𑒢𑓂𑒯𑒱। 𑒫𑒰𑒞𑒰𑒫𑒩𑒝𑒏 𑒮𑓀𑒑𑒲𑒞 𑒪𑒑𑒻𑒋 𑒖𑒹𑒢𑒰 𑒥𑒿𑒮𑒥𑒱𑒙𑓂𑒙𑒲𑒏 𑒯𑒳𑒁𑒋 𑒂 𑒦𑒳𑒞𑒯𑒰 𑒮𑒢 𑒫𑒰𑒞𑒰𑒫𑒩𑒝 𑒔𑒰𑒩𑒴 𑒠𑒱𑒬 𑒮𑒵𑒖𑒱𑒞 𑒯𑒼𑒃𑒞 𑒁𑒕𑒱।𑒫𑒰𑒞𑒰𑒫𑒩𑒝 𑒣𑒯𑒱𑒢𑒹𑒮𑒿 𑒥𑒹𑒬𑒲 𑒛𑒹𑒩𑒰𑒍𑒢 𑒦𑓄 𑒖𑒰𑒃𑒋..𑒥𑒲𑒔-𑒥𑒲𑒔𑒧𑒹 𑒑𑒲𑒠𑒩𑒏 𑒯𑒳𑒂..𑒯𑒳𑒂..𑒏 𑒁𑒥𑒰𑒖 𑒁𑒥𑒻𑒋।)
𑒂𑒔𑒰𑒩𑓂𑒨 𑒮𑒩𑒦: (𑒧𑓀𑒔𑒏 𑒮𑒼𑒗𑒰𑒿 𑒁𑒥𑒻𑒞) 𑒄 𑒑𑓀𑒑𑒹𑒬 𑒂 𑒫𑒪𑓂𑒪𑒦𑒰𑒏 𑒫𑒱𑒫𑒰𑒯… 𑒬𑒞𑒩𑓀𑒖𑒏 𑒐𑒰𑒢𑒰 𑒮𑒦 𑒠𑒻𑒞𑓂𑒨𑒰𑒏𑒰𑒩 𑒥𑒢𑒱 𑒖𑒰𑒋𑒞, 𑒮𑒰𑒞 𑒮𑒋 𑒮𑒰𑒪𑒧𑒹 𑒖𑒰𑒞𑒱 𑒐𑒞𑒧 𑒦𑓄 𑒖𑒰𑒋𑒞..𑒏𑒱𑒕𑒳 𑒏𑒩𑒴… 𑒩𑒼𑒏𑒴.. 𑒫𑒱𑒮𑓂𑒧𑒩𑒝… 𑒫𑒱𑒮𑓂𑒧𑒩𑒝…. (𑒠𑒳𑒢𑒴 𑒬𑒱𑒭𑓂𑒨 𑒠𑒱𑒮 𑒞𑒏𑒻𑒞) 𑒬𑒱𑒭𑓂𑒨 𑒐𑒱𑒐𑒱𑒩, 𑒬𑒱𑒭𑓂𑒨 𑒬𑒰𑒯𑒲।
𑒬𑒱𑒭𑓂𑒨 𑒐𑒱𑒐𑒱𑒩: (𑒂𑒔𑒰𑒩𑓂𑒨𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞, 𑒬𑒱𑒭𑓂𑒨 𑒬𑒰𑒯𑒲 𑒮𑒹𑒯𑒼 𑒣𑒰𑒕𑒰𑒿𑒮𑒿 𑒪𑒣𑒏𑒱 𑒏𑓄 𑒠𑒹𑒐𑒻𑒋) 𑒂𑒔𑒰𑒩𑓂𑒨 𑒮𑒩𑒦, 𑒁𑒣𑒴𑒩𑓂𑒝 𑒣𑒰𑒚 𑒏 𑒫𑒱𑒮𑓂𑒧𑒩𑒝 𑒢𑒻 𑒦𑓄 𑒮𑒏𑒻𑒋, 𑒫𑒱𑒮𑓂𑒧𑒩𑒝 𑒯𑒼𑒃𑒋 𑒧𑒰𑒞𑓂𑒩 𑒣𑒴𑒩𑓂𑒝 𑒣𑒰𑒚।
𑒬𑒱𑒭𑓂𑒨 𑒬𑒰𑒯𑒲: (𑒂𑒔𑒰𑒩𑓂𑒨𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞, 𑒬𑒱𑒭𑓂𑒨 𑒐𑒱𑒐𑒱𑒩 𑒮𑒹𑒯𑒼 𑒣𑒰𑒕𑒰𑒿𑒮𑒿 𑒪𑒣𑒏𑒱 𑒏𑓄 𑒠𑒹𑒐𑒻𑒋) 𑒂𑒔𑒰𑒩𑓂𑒨 𑒮𑒱𑓀𑒯 𑒂 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑒏 𑒬𑒱𑒏𑓂𑒭𑒰𑒮𑒿 𑒢𑒱𑒏𑒪𑒪 𑒁𑒕𑒱 𑒮𑓀𑒏𑒹𑒞 𑒪𑒱𑒣𑒱, 𑒮𑓀𑒏𑒹𑒞𑒮𑒿 𑒮𑓂𑒧𑒩𑒝 𑒫𑒱𑒮𑓂𑒧𑒩𑒝 𑒢𑒻 𑒥𑒢𑒞 𑒂𑒔𑒰𑒩𑓂𑒨 𑒮𑒩𑒦। 𑒍 𑒮𑓀𑒏𑒹𑒞 𑒣𑒰𑒚 𑒁𑒕𑒱 𑒅𑒪𑓂𑒏𑒰𑒧𑒳𑒐..
𑒂𑒔𑒰𑒩𑓂𑒨 𑒮𑒩𑒦: (𑒠𑒳𑒢𑒴 𑒯𑒰𑒟 𑒂𑒏𑒰𑒬𑒧𑒹 𑒅𑒚𑒰 𑒏𑓄 𑒑𑒩𑓂𑒖𑒢 𑒏𑒩𑒻 𑒕𑒟𑒱) 𑒏𑒲 𑒁𑒕𑒱 𑒄 𑒅𑒪𑓂𑒏𑒰𑒧𑒳𑒐? 𑒬𑒱𑒭𑓂𑒨 𑒐𑒱𑒐𑒱𑒩, 𑒬𑒱𑒭𑓂𑒨 𑒬𑒰𑒯𑒲..𑒏𑒲 𑒁𑒕𑒱 𑒄 𑒅𑒪𑓂𑒏𑒰𑒧𑒳𑒐? 𑒥𑒛𑓂𑒛 𑒢𑒰𑒧 𑒮𑒳𑒢𑒻 𑒕𑒱𑒌 𑒋𑒏𑒩। 𑒧𑒳𑒠𑒰 𑒔𑒾𑒣𑒰𑒛𑓃𑒱𑒣𑒩 𑒏𑒱𑒨𑒼 𑒥𑒞𑒰𑒋𑒞 𑒖𑒹 𑒏𑒲 𑒕𑒱𑒌 𑒄 𑒅𑒪𑓂𑒏𑒰𑒧𑒳𑒐?
𑒬𑒱𑒭𑓂𑒨 𑒬𑒰𑒯𑒲: 𑒂𑒔𑒰𑒩𑓂𑒨 𑒮𑒩𑒦, 𑒏𑒼𑒢𑒰 𑒠𑒹𑒐𑒥 𑒄 𑒅𑒪𑓂𑒏𑒰𑒧𑒳𑒐। 𑒄 𑒂𑒔𑒰𑒩𑓂𑒨 𑒮𑒱𑓀𑒯 𑒂 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑒏 𑒬𑒱𑒏𑓂𑒭𑒰𑒏 𑒣𑓂𑒩𑒨𑒼𑒑 𑒁𑒕𑒱 𑒖𑒹 𑒑𑓀𑒑𑒹𑒬 𑒂 𑒫𑒪𑓂𑒪𑒦𑒰 𑒁𑒣𑒢 𑒏𑒫𑒱𑒞𑒰 𑒮𑒦𑒧𑒹 𑒏𑒹𑒢𑒹 𑒕𑒟𑒱। 𑒖𑒹 𑒥𑒢𑒰 𑒠𑒹𑒪𑒏 𑒁𑒣𑒢𑒰 𑒮𑒦𑒏𑒹𑒿 𑒦𑒴𑒞, 𑒏𑒪𑓂𑒣𑒢𑒰….𑒂 𑒮𑒹𑒯𑒼 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯𑒏 𑒣𑓂𑒩𑒞𑒰𑒣𑒹…𑒮𑒦𑒙𑒰 𑒁𑒕𑒱 𑒮𑓀𑒏𑒹𑒞 𑒧𑒰𑒞𑓂𑒩, 𑒮𑓀𑒏𑒹𑒞 𑒖𑒹 𑒁𑒕𑒱 𑒔𑒰𑒩𑒴 𑒏𑒰𑒞, 𑒂 𑒖𑒹 𑒁𑒕𑒱 𑒏𑒞𑒾 𑒢𑒻।
𑒂𑒔𑒰𑒩𑓂𑒨 𑒮𑒩𑒦: 𑒧𑒳𑒠𑒰 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯…𑒍𑒯𑒼 𑒞𑒿 𑒕𑒟𑒱 𑒏𑒪𑓂𑒣𑒢𑒰..𑒞𑒐𑒢 𑒏𑒼𑒢𑒰 𑒏𑓄 𑒩𑒯𑒪 𑒕𑒟𑒱 𑒍 𑒮𑒦 𑒄?
𑒬𑒱𑒭𑓂𑒨 𑒬𑒰𑒯𑒲: 𑒁𑒣𑒢𑒰 𑒮𑒦𑒏 𑒣𑓂𑒩𑒞𑒰𑒣𑒹..
𑒬𑒱𑒭𑓂𑒨 𑒐𑒱𑒐𑒱𑒩: (𑒥𑒲𑒔𑒧𑒹 𑒙𑒼𑒏𑒻𑒞) 𑒁𑒣𑒢𑒰 𑒮𑒦𑒏 𑒣𑓂𑒩𑒞𑒰𑒣𑒹?
𑒂𑒔𑒰𑒩𑓂𑒨 𑒮𑒩𑒦: 𑒯𑒿, 𑒖𑒐𑒢 𑒫𑒱𑒮𑓂𑒧𑒩𑒝𑒏 𑒬𑒏𑓂𑒞𑒱 𑒥𑒜𑓃𑒱 𑒖𑒰𑒃𑒋 𑒞𑒿 𑒮𑓂𑒧𑒩𑒝 𑒂𑒥𑒱 𑒖𑒰𑒃𑒋 𑒍 𑒮𑒦 𑒥𑒾𑒮𑓂𑒞𑒳 𑒖𑒃𑒮𑒿 𑒯𑒧 𑒒𑒵𑒝𑒰 𑒏𑒩𑒻 𑒕𑒲। 𑒂 𑒞𑒹𑒿 𑒂𑒥𑒱 𑒑𑒹𑒪 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯। 𑒂 𑒖𑒐𑒢 𑒂𑒥𑒱 𑒑𑒹𑒪𑒰 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯 𑒞𑒿 𑒂𑒢𑒱 𑒪𑒹𑒪𑒢𑓂𑒯𑒱 𑒯𑒧𑒩𑒰 𑒮𑒦𑒏𑒹𑒿। 𑒧𑒳𑒠𑒰 𑒍 𑒮𑓀𑒏𑒹𑒞, 𑒍 𑒅𑒪𑓂𑒏𑒰𑒧𑒳𑒐 𑒌 𑒥𑒿𑒮𑒥𑒱𑒙𑓂𑒙𑒲𑒏𑒹𑒿 𑒣𑒰𑒩 𑒏𑒹𑒪𑒏 𑒏𑒼𑒢𑒰 𑒬𑒱𑒭𑓂𑒨 𑒬𑒰𑒯𑒲।
(𑒬𑒱𑒭𑓂𑒨 𑒬𑒰𑒯𑒲 𑒬𑒱𑒭𑓂𑒨 𑒐𑒱𑒐𑒱𑒩 𑒠𑒱𑒮 𑒥𑒏𑒩-𑒥𑒏𑒩 𑒞𑒏𑒻𑒞 𑒁𑒕𑒱।)
𑒬𑒱𑒭𑓂𑒨 𑒐𑒱𑒐𑒱𑒩: (𑒂𑒔𑒰𑒩𑓂𑒨 𑒮𑒩𑒦 𑒠𑒱𑒮 𑒞𑒰𑒏𑒱) 𑒂𑒔𑒰𑒩𑓂𑒨 𑒮𑒩𑒦… 𑒐𑒞𑒧 𑒞𑒿 𑒏𑒻𑒨𑒹 𑒠𑒹𑒪𑒱𑒌 𑒯𑒧 𑒮𑒦.. 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯𑒏𑒹𑒿…. 𑒖𑒿 𑒑𑓀𑒑𑒹𑒬 𑒂𑒠𑒩 𑒠𑒹𑒪𑒢𑓂𑒯𑒱 𑒯𑒳𑒢𑒏𑒰 𑒮𑒦𑒏𑒹𑒿 𑒞𑒿 𑒮𑒹 𑒣𑒼𑒟𑒲 𑒮𑒦 𑒮𑒹𑒯𑒼 𑒮𑒳𑒛𑓂𑒛𑒰𑒯 𑒦𑓄 𑒑𑒹𑒪। 𑒑𑓀𑒑𑒹𑒬𑒏 𑒏𑒫𑒱𑒞𑓂𑒫𑒏 𑒔𑒩𑓂𑒔𑒰 𑒮𑒳𑒛𑓂𑒛𑒰𑒯 𑒦𑓄 𑒑𑒹𑒪..𑒞𑒿 𑒯𑒳𑒢𑒏𑒩 𑒏𑒫𑒱𑒞𑒰 𑒥𑒢𑒱 𑒑𑒹𑒪 𑒅𑒪𑓂𑒏𑒰𑒧𑒳𑒐.. 𑒫𑒪𑓂𑒪𑒦𑒰 𑒥𑒢𑒰 𑒠𑒹𑒪𑒢𑓂𑒯𑒱 𑒍𑒏𑒩𑒰 𑒅𑒪𑓂𑒏𑒰𑒧𑒳𑒐.. 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩, 𑒂𑒔𑒰𑒩𑓂𑒨 𑒮𑒱𑓀𑒯 𑒂 𑒑𑓀𑒑𑒹𑒬.. 𑒌 𑒞𑒲𑒢𑒴 𑒢𑒰𑒧𑒏 𑒦𑒨.. 𑒣𑒳𑒩𑒰𑒢 𑒃𑒞𑒱𑒯𑒰𑒮 𑒫𑓂𑒨𑒰𑒒𑓂𑒩, 𑒮𑒱𑓀𑒯 𑒂 𑒅𑒪𑓂𑒏𑒰𑒧𑒳𑒐 𑒥𑒢𑒱 𑒑𑒹𑒪 𑒞𑒿 𑒯𑒧𑒯𑒴 𑒮𑒦 𑒞𑒿 𑒮𑒩𑒦, 𑒐𑒱𑒐𑒱𑒩 𑒂 𑒬𑒰𑒯𑒲 𑒥𑒢𑒱 𑒑𑒹𑒪𑒾𑓀। 𑒮𑒩𑒦 𑒞𑒿 𑒏𑒪𑓂𑒣𑒱𑒞 𑒦𑓄 𑒑𑒹𑒪, 𑒣𑒴𑒩𑓂𑒝 𑒏𑒪𑓂𑒣𑒱𑒞, 𑒍𑒃 𑒢𑒰𑒧𑒮𑒿 𑒞𑒿 𑒏𑒼𑒢𑒼 𑒖𑒰𑒢𑒫𑒩 𑒕𑒻𑒯𑒹 𑒢𑒻.. 𑒧𑒳𑒠𑒰 𑒮𑒩𑒦 𑒢𑒰𑒧𑒮𑒿 𑒣𑒯𑒱𑒢𑒯𑒱𑒨𑒼 𑒏𑒼𑒢𑒼 𑒖𑒢𑓂𑒞𑒳 𑒢𑒻 𑒩𑒯𑒻, 𑒧𑒳𑒠𑒰 𑒮𑒩𑒦 𑒩𑒯𑒻 𑒮𑒠𑒱𑒐𑒢.. 𑒏𑒰𑒪𑓂𑒣𑒢𑒱𑒏 𑒖𑒢𑓂𑒞𑒳.. 𑒬𑒰𑒯𑒲 𑒂 𑒐𑒱𑒐𑒱𑒩 𑒮𑒹𑒯𑒼 𑒐𑒞𑒧 𑒦𑒹𑒪 𑒖𑒰𑒃𑒋.. 𑒏𑒧 𑒦𑒹𑒪 𑒖𑒰𑒃𑒋.. 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒯 𑒮𑒢… 𑒣𑓂𑒩𑒞𑒱𑒥𑒢𑓂𑒡, 𑒣𑓂𑒩𑒞𑒱𑒥𑒢𑓂𑒡.. 𑒤𑒹𑒩 𑒖𑓂𑒘𑒰𑒢𑒏 𑒫𑒱𑒮𑓂𑒞𑒰𑒩 𑒏𑒼𑒢𑒰 𑒯𑒋𑒞?
𑒂𑒔𑒰𑒩𑓂𑒨 𑒮𑒩𑒦: (𑒁𑒫𑒱𑒬𑓂𑒫𑒰𑒮 𑒦𑒰𑒫𑒮𑒿 𑒬𑒱𑒭𑓂𑒨 𑒐𑒱𑒐𑒱𑒩 𑒠𑒱𑒮 𑒞𑒰𑒏𑒱) 𑒯𑒧 𑒣𑒴𑒩𑓂𑒝 𑒏𑒪𑓂𑒣𑒢𑒰 𑒕𑒲 𑒬𑒱𑒭𑓂𑒨 𑒐𑒱𑒐𑒱𑒩?
𑒬𑒱𑒭𑓂𑒨 𑒬𑒰𑒯𑒲: (𑒥𑒲𑒔𑒧𑒹 𑒙𑒼𑒏𑒻𑒞, 𑒂𑒔𑒰𑒩𑓂𑒨 𑒮𑒩𑒦 𑒠𑒱𑒮 𑒞𑒰𑒏𑒱) 𑒂𑒔𑒰𑒩𑓂𑒨, 𑒁𑒯𑒰𑒿 𑒏𑒪𑓂𑒣𑒢𑒰 𑒕𑒲 𑒂 𑒯𑒧 𑒮𑒦 𑒏𑒪𑓂𑒣𑒢𑒰 𑒥𑒢𑒻𑒥𑒪𑒰 𑒕𑒲।𑒔𑒾𑒣𑒰𑒛𑓃𑒱𑒣𑒩 𑒥𑒰𑒯𑒩𑒏 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒞𑒞𑓂𑒫𑒔𑒱𑒢𑓂𑒞𑒰𑒧𑒝𑒱𑒏 𑒣𑓂𑒩𑒞𑒱𑒪𑒱𑒣𑒱 𑒣𑒏𑓂𑒭𑒡𑒩 𑒢𑒻 𑒏𑒩𑓄 𑒠𑒻 𑒕𑒪𑒐𑒱𑒢𑓂𑒯, 𑒂𑒥 𑒠𑒹𑒐𑒱𑒨𑒾 𑒔𑒾𑒣𑒰𑒛𑓃𑒱𑒏 𑒠𑒬𑒰.. 𑒥𑒰𑒯𑒩𑒏 𑒫𑒱𑒠𑓂𑒨𑒰𑒩𑓂𑒟𑒰 𑒞𑒿 𑒕𑒼𑒛𑓃𑒴 𑒋𑒞𑒳𑒏𑓂𑒏𑒼 𑒫𑒱𑒡𑒰𑒩𑓂𑒟𑒲𑒏 𑒋𑒞𑒋 𑒁𑒦𑒰𑒫 𑒦𑓄 𑒑𑒹𑒪 𑒁𑒕𑒱।
𑒂𑒔𑒰𑒩𑓂𑒨 𑒮𑒩𑒦: (𑒧𑓀𑒔𑒏 𑒮𑒼𑒗𑒰𑒿 𑒂𑒥𑒱 𑒑𑒩𑓂𑒖𑒢 𑒏𑒩𑒻𑒞) 𑒯𑒧 𑒏𑒪𑓂𑒣𑒢𑒰? 𑒂𑒔𑒰𑒩𑓂𑒨 𑒮𑒩𑒦 𑒦𑒴𑒞𑒏𑒰𑒪𑒏 𑒁𑒕𑒱 𑒏𑒪𑓂𑒣𑒢𑒰 𑒂𑒏𑒱 𑒂𑒔𑒰𑒩𑓂𑒨 𑒮𑒩𑒦 𑒦𑒫𑒱𑒭𑓂𑒨𑒏𑒰𑒪𑒏 𑒁𑒕𑒱 𑒏𑒪𑓂𑒣𑒢𑒰..𑒫𑒱𑒮𑓂𑒧𑒩𑒝..𑒠𑒼𑒮𑒩𑒰𑒏𑒹𑒿 𑒫𑒱𑒮𑓂𑒧𑒩𑒝 𑒮𑒱𑒐𑒥𑒻𑒞 𑒮𑓂𑒫𑒨𑓀 𑒫𑒱𑒮𑓂𑒧𑒩𑒱𑒞 𑒦𑓄 𑒑𑒹𑒪 𑒁𑒕𑒱 𑒂𑒔𑒰𑒩𑓂𑒨 𑒮𑒩𑒦। 𑒫𑒱𑒮𑓂𑒧𑒩𑒝 𑒧𑓀𑒞𑓂𑒩..𑒄 𑒅𑒪𑓂𑒏𑒰𑒧𑒳𑒐 𑒥𑒢𑒱 𑒑𑒹𑒪 𑒁𑒕𑒱 𑒦𑒨.. 𑒠𑒼𑒮𑒩𑒰𑒏𑒹𑒿 𑒫𑒱𑒮𑓂𑒧𑒩𑒝 𑒮𑒱𑒐𑒥𑒻𑒞 𑒮𑓂𑒫𑒨𑓀 𑒫𑒱𑒮𑓂𑒧𑒩𑒱𑒞 𑒦𑓄 𑒖𑒰𑒃𑒋 𑒪𑒼𑒏।
(𑒂𑒏𑒰𑒬𑒫𑒰𑒝𑒲 𑒯𑒼𑒃𑒋…. 𑒅𑒪𑓂𑒏𑒰𑒧𑒳𑒐..𑒅𑒪𑓂𑒏𑒰𑒧𑒳𑒐…𑒅𑒪𑓂𑒏𑒰𑒧𑒳𑒐…𑒅𑒪𑓂𑒏𑒰𑒧𑒳𑒐…𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯 𑒫𑒰𑒧 𑒩𑓀𑒑𑒬𑒲𑒩𑓂𑒭𑒣𑒩 𑒣𑓂𑒩𑒏𑒰𑒬 𑒋𑒪𑒰𑒣𑒩 𑒮𑒰𑒏𑒰𑓀𑒏𑓂𑒭 𑒦𑓄 𑒖𑒰𑒃 𑒕𑒟𑒱। 𑒂𑒔𑒰𑒩𑓂𑒨 𑒬𑒩𑒦, 𑒬𑒱𑒭𑓂𑒨 𑒐𑒱𑒐𑒱𑒩 𑒂 𑒬𑒱𑒭𑓂𑒨 𑒬𑒰𑒯𑒲 𑒠𑒯𑒱𑒢𑒰 𑒧𑒞𑓂𑒞𑒫𑒩𑓂𑒝𑒲𑒣𑒩 𑒁𑒢𑓂𑒯𑒰𑒩 𑒦𑒹𑒪𑒰𑒮𑒿 𑒧𑒰𑒞𑓂𑒩 𑒕𑒰𑒯 𑒥𑒢𑒱 𑒖𑒰𑒃 𑒕𑒟𑒱। 𑒞𑒲𑒢𑒴 𑒕𑒰𑒯 𑒬𑒞𑒩𑓀𑒖𑒏 𑒒𑒢 𑒅𑒚𑒰 𑒏𑓄 𑒂𑒑𑒰𑒿 𑒥𑒜𑓃𑒻𑒞 𑒕𑒟𑒱।)

𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒯𑒧 𑒏𑒪𑓂𑒣𑒢𑒰? 𑒦𑒴𑒞𑒏𑒰𑒪𑒏 𑒏𑒪𑓂𑒣𑒢𑒰 𑒂𑒏𑒱 𑒦𑒫𑒱𑒭𑓂𑒨𑒏𑒰𑒪𑒏?..
𑒂𑒔𑒰𑒩𑓂𑒨 𑒮𑒱𑓀𑒯: (𑒥𑒲𑒔𑒧𑒹 𑒙𑒼𑒏𑒻𑒞) 𑒦𑒴𑒞𑒏𑒰𑒪𑒏 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩, 𑒦𑒴𑒞𑒏𑒰𑒪𑒏। 𑒦𑒫𑒱𑒭𑓂𑒨 𑒞𑒿 𑒫𑒪𑓂𑒪𑒦𑒏 𑒧𑒵𑒞𑓂𑒨𑒳𑒏 𑒮𑒰𑒞 𑒮𑒋 𑒮𑒰𑒪 𑒥𑒰𑒠 𑒂𑒋𑒞..𑒁𑒐𑒢 𑒞𑒿 𑒁𑒠𑒯𑒹 𑒥𑒲𑒞𑒪 𑒁𑒕𑒱… 𑒦𑒫𑒱𑒭𑓂𑒨𑒏𑒰𑒪𑒏 𑒞𑒿 𑒣𑓂𑒩𑒞𑒲𑒏𑓂𑒭𑒰 𑒁𑒕𑒱..𑒧𑒳𑒠𑒰 𑒞𑒰𑒫𑒞 𑒏𑒲 𑒏𑒲 𑒏𑒪𑓂𑒣𑒢𑒰 𑒥𑒢𑒱 𑒖𑒰𑒋𑒞…𑒏𑒲 𑒏𑒲 𑒥𑒔𑒪 𑒩𑒯𑒱 𑒖𑒰𑒋𑒞।
(𑒮𑒾𑓀𑒮𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱, 𑒁𑒢𑓂𑒯𑒰𑒩𑒹𑒧𑒹𑒮𑒿 𑒂𑒔𑒰𑒩𑓂𑒨 𑒮𑒱𑓀𑒯 𑒂 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑒏 𑒁𑒥𑒰𑒖 𑒥𑒯𑒩𑒰𑒃𑒋।)
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒞𑒐𑒢 𑒏𑒪𑓂𑒣𑒢𑒹 𑒮𑒯𑒲 𑒂𑒔𑒰𑒩𑓂𑒨 𑒮𑒱𑓀𑒯। 𑒔𑒪𑒴 𑒫𑒩𑓂𑒠𑓂𑒡𑒧𑒰𑒢, 𑒠𑒲𑒢𑒰, 𑒦𑒠𑒩𑒲 𑒂 𑒅𑒠𑒨𑒢 𑒪𑒑। 𑒫𑒋𑒯 𑒮𑒦 𑒏𑒼𑒢𑒼 𑒑𑒣 𑒥𑒞𑒹𑒞𑒰।
𑒂𑒔𑒰𑒩𑓂𑒨 𑒮𑒱𑓀𑒯: 𑒄 𑒏𑒼𑒢𑒼 𑒥𑒹𑒖𑒰𑒋 𑒑𑒣 𑒢𑒻 𑒯𑒋𑒞 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩। 𑒭𑒛𑒨𑓀𑒞𑓂𑒩𑒏𑒹𑒿 𑒞𑒿 𑒞𑒼𑒛𑓃𑒻𑒋 𑒣𑒛𑓃𑒞.. 𑒧𑒳𑒠𑒰 𑒞𑒰𑒫𑒞 𑒏𑒲 𑒏𑒲 𑒥𑒔𑒪 𑒩𑒯𑒱 𑒖𑒰𑒋𑒞 𑒮𑒋𑒯..।
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒮𑒹 𑒞𑒿 𑒠𑒹𑒐𑒱𑒨𑒹 𑒩𑒯𑒪 𑒕𑒲 𑒂𑒔𑒰𑒩𑓂𑒨 𑒮𑒱𑓀𑒯। 𑒂𑒔𑒰𑒩𑓂𑒨 𑒮𑒩𑒦 𑒂 𑒯𑒳𑒢𑒏𑒩 𑒬𑒱𑒭𑓂𑒨 𑒬𑒰𑒯𑒲 𑒂 𑒬𑒱𑒭𑓂𑒨 𑒐𑒱𑒐𑒱𑒩, 𑒍𑒯𑒼 𑒮𑒦 𑒔𑒳𑒣 𑒢𑒻 𑒕𑒟𑒱, 𑒏𑒱𑒕𑒳 𑒢𑒹 𑒏𑒱𑒕𑒳 𑒏𑒃𑒨𑒹 𑒩𑒯𑒪 𑒕𑒟𑒱। 𑒋𑒏𑒙𑒰 𑒩𑒙𑒻𑒥𑒪𑒰 𑒧𑒬𑒲𑒢 𑒥𑒢𑒱 𑒑𑒹𑒪 𑒁𑒕𑒱 𑒧𑒱𑒟𑒱𑒪𑒰𑒏 𑒫𑒱𑒠𑓂𑒨𑒰𑒩𑓂𑒟𑒲। 𑒢𑒫𑓂𑒨-𑒢𑓂𑒨𑒰𑒨 𑒥𑓀𑒑𑒰𑒪 𑒔𑒪𑒱 𑒑𑒹𑒪, 𑒞𑒏𑒩 𑒏𑒏𑒩𑒼 𑒏𑒼𑒢𑒼 𑒔𑒱𑒢𑓂𑒞𑒰 𑒢𑒻 𑒕𑒢𑓂𑒯𑒱.. 𑒖𑒹 𑒏𑒱𑒋 𑒔𑒪𑒱 𑒑𑒹𑒪.. 𑒫𑒪𑓂𑒪𑒦𑒰 𑒂 𑒑𑓀𑒑𑒹𑒬𑒏𑒹𑒿 𑒐𑒞𑒧 𑒏𑒩𑒻𑒞 𑒏𑒩𑒻𑒞 𑒍 𑒮𑒦 𑒮𑒹𑒯𑒼 𑒐𑒞𑒧 𑒦𑓄 𑒩𑒯𑒪 𑒕𑒟𑒱।
𑒂𑒔𑒰𑒩𑓂𑒨 𑒮𑒱𑓀𑒯: 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒮𑒹 𑒞𑒿 𑒂𑒩𑒼 𑒐𑒩𑒰𑒣 𑒦𑒹𑒪.. 𑒯𑒹 𑒂𑒥𑒱 𑒑𑒹𑒪𑒰𑒟𑒱 𑒫𑒩𑓂𑒠𑓂𑒡𑒧𑒰𑒢, 𑒠𑒲𑒢, 𑒦𑒠𑒩𑒲 𑒂 𑒅𑒠𑒨𑒢।

(𑒣𑓂𑒩𑒏𑒰𑒬 𑒦𑓄 𑒖𑒰𑒃𑒞 𑒁𑒕𑒱 𑒂 𑒧𑒳𑒐𑓂𑒨 𑒩𑓀𑒑𑒧𑓀𑒔 𑒮𑓂𑒟𑒪𑒣𑒩 𑒂𑒔𑒰𑒩𑓂𑒨 𑒮𑒱𑓀𑒯, 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩, 𑒅𑒠𑒨𑒢, 𑒠𑒲𑒢𑒰, 𑒦𑒠𑒩𑒲 𑒂 𑒫𑒩𑓂𑒠𑓂𑒡𑒧𑒰𑒢 𑒠𑒹𑒐𑒢𑒰 𑒖𑒰𑒃 𑒕𑒟𑒱।)

𑒂𑒔𑒰𑒩𑓂𑒨 𑒮𑒱𑓀𑒯: (𑒮𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒯𑒧 𑒮𑒦 𑒋𑒞𑒋 𑒋𑒏𑒞𑓂𑒩 𑒦𑒹𑒪 𑒕𑒲..
𑒫𑒩𑓂𑒠𑓂𑒡𑒧𑒰𑒢: (𑒥𑒲𑒔𑒹𑒧𑒹 𑒙𑒼𑒏𑒻𑒞) 𑒏𑒼𑒢𑒼 𑒁𑒏𑒰𑒪..
𑒅𑒠𑒨𑒢: 𑒏𑒼𑒢𑒼 𑒥𑒰𑒜𑓃𑒱..
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒮𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒢𑒻 𑒅𑒠𑒨𑒢, 𑒥𑒰𑒜𑓃𑒱 𑒢𑒻, 𑒢𑒻 𑒫𑒩𑓂𑒠𑓂𑒡𑒧𑒰𑒢 𑒁𑒏𑒰𑒪 𑒢𑒻..
𑒂𑒔𑒰𑒩𑓂𑒨 𑒮𑒱𑓀𑒯: (𑒫𑒩𑓂𑒠𑓂𑒡𑒧𑒰𑒢 𑒂 𑒅𑒠𑒨𑒢𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒫𑒩𑓂𑒠𑓂𑒡𑒧𑒰𑒢, 𑒮𑒼𑒔𑒏 𑒁𑒏𑒰𑒪 𑒕𑒻। 𑒅𑒠𑒨𑒢, 𑒏𑓂𑒭𑒳𑒠𑓂𑒩𑒞𑒰𑒏 𑒥𑒰𑒜𑓃𑒱 𑒂𑒋𑒪 𑒕𑒻।…
𑒠𑒲𑒢𑒰: (𑒥𑒲𑒔𑒧𑒹 𑒙𑒼𑒏𑒻𑒞) 𑒏𑒼𑒢𑒼 𑒥𑒰𑒯𑒩𑒲 𑒬𑒞𑓂𑒩𑒳..
𑒦𑒠𑒩𑒲: 𑒧𑒢𑒳𑒏𑓂𑒐 𑒂𑒏𑒱 𑒥𑒢𑒻𑒨𑒰 𑒣𑒬𑒳..
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒠𑒲𑒢𑒰 𑒂 𑒦𑒠𑒩𑒲𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒢𑒻 𑒠𑒲𑒢𑒰, 𑒏𑒼𑒢𑒼 𑒥𑒰𑒯𑒩𑒲 𑒬𑒞𑓂𑒩𑒳 𑒢𑒻। 𑒦𑒠𑒩𑒲 𑒏𑒼𑒢𑒼 𑒥𑒰𑒯𑒩𑒲 𑒢𑒻, 𑒢𑒹 𑒏𑒼𑒢𑒼 𑒧𑒢𑒳𑒏𑓂𑒐 𑒂 𑒢𑒯𑒱𑒨𑒹 𑒏𑒼𑒢𑒼 𑒥𑒢𑒻𑒨𑒰 𑒣𑒬𑒳..
𑒂𑒔𑒰𑒩𑓂𑒨 𑒮𑒱𑓀𑒯: (𑒠𑒲𑒢𑒰 𑒂 𑒦𑒠𑒩𑒲𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒮𑒦 𑒁𑒣𑒢𑒹 𑒪𑒼𑒏 𑒠𑒲𑒢𑒰-𑒦𑒠𑒩𑒲। 𑒏𑒼𑒢𑒼 𑒥𑒰𑒯𑒩𑒲 𑒬𑒞𑓂𑒩𑒳 𑒢𑒻..𑒏𑒼𑒢𑒼 𑒥𑒢𑒻𑒨𑒰 𑒢𑒻, 𑒮𑒦 𑒐𑒳𑒙𑓂𑒙𑒹 𑒣𑒛𑓃𑒯𑒏.. 𑒂𑒔𑒰𑒩𑓂𑒨 𑒮𑒩𑒦.. 𑒂 𑒯𑒳𑒢𑒏𑒩 𑒬𑒱𑒭𑓂𑒨 𑒮𑒦..
𑒅𑒠𑒨𑒢:: (𑒧𑓀𑒔𑒏 𑒮𑒼𑒗𑒰𑒿 𑒁𑒥𑒻𑒞) 𑒖𑒑𑒢𑓂𑒢𑒰𑒟 𑒧𑒢𑓂𑒠𑒱𑒩𑒧𑒹 𑒅𑒠𑒨𑒢𑒏 𑒅𑒠𑓂𑒒𑒼𑒭, 𑒖𑒹 𑒖𑒻𑒿 𑒯𑒧 𑒞𑒹𑒿 𑒞𑒴𑒿 𑒣𑒴𑒖𑒱𑒞 𑒯𑒼𑒃 𑒕𑒯। 𑒥𑒢𑓂𑒠 𑒏𑒹𑒫𑒰𑒩 𑒐𑒳𑒖𑒱 𑒑𑒹𑒪। 𑒂 𑒄 𑒏𑒹 𑒕𑒲 𑒂𑒔𑒰𑒩𑓂𑒨 𑒮𑒩𑒦.. 𑒋𑒏𑒙𑒰 𑒑𑒲𑒠𑒩..
𑒠𑒲𑒢𑒰-𑒦𑒠𑒩𑒲: (𑒮𑒧𑓂𑒫𑒹𑒞 𑒮𑓂𑒫𑒩𑒧𑒹, 𑒧𑓀𑒔𑒏 𑒮𑒼𑒗𑒰𑒿 𑒁𑒥𑒻𑒞) 𑒖𑒛𑓃𑒱𑒧𑒹 𑒠𑒳𑒢𑒴 𑒑𑒼𑒙𑒹 𑒁𑒛𑓃𑒰 𑒠𑒹𑒪𑒱𑒌 𑒬𑒩𑒲𑒩 𑒂 𑒠𑒩𑒏𑒱 𑒑𑒹𑒪𑒻 𑒠𑒹𑒫𑒰𑒩। 𑒂 𑒥𑒢𑓂𑒢 𑒏𑒹𑒫𑒰𑒩 𑒐𑒳𑒖𑒱 𑒑𑒹𑒪। 𑒂 𑒄 𑒏𑒹 𑒕𑒲 𑒂𑒔𑒰𑒩𑓂𑒨 𑒮𑒩𑒦.. 𑒋𑒏𑒙𑒰 𑒑𑒲𑒠𑒩..
𑒠𑒲𑒢𑒰: (𑒧𑓀𑒔𑒏 𑒮𑒼𑒗𑒰𑒿𑒮𑒿 𑒣𑒰𑒕𑒴 𑒒𑒳𑒧𑒻𑒞) 𑒧𑒳𑒃𑒪 𑒑𑒰𑒃𑒏 𑒯𑒛𑓂𑒛𑒲𑒧𑒹 𑒤𑒼𑒙𑒩𑒰 𑒑𑒱𑒠𑒩 𑒥𑒢𑒱 𑒢𑒳𑒏𑒰 𑒏𑓄 𑒮𑒪𑒯𑒹𑒮 𑒠𑒲𑒢𑒰-𑒦𑒠𑒩𑒲 𑒂 𑒥𑒰𑒒𑒏 𑒏𑒳𑒬𑓂𑒞𑒲 𑒠𑒹𑒐𑒟𑒱। 𑒥𑒰𑒒𑒏 𑒩𑒰𑒢 𑒣𑒏𑒛𑓃𑒱 𑒠𑒴 𑒏𑒰𑒞 𑒔𑒲𑒩 𑒏𑓄 𑒤𑒹𑒏𑒲 𑒯𑒧 𑒠𑒳𑒢𑒴 𑒦𑒰𑒿𑒃 𑒂 𑒧𑒳𑒃𑒪 𑒑𑒰𑒃𑒏 𑒯𑒛𑓂𑒛𑒲𑒮𑒿 𑒥𑒯𑒰𑒩 𑒦𑓄 𑒤𑒼𑒙𑒩𑒰 𑒑𑒲𑒠𑒩 𑒥𑒢𑒪 𑒮𑒪𑒯𑒹𑒮 𑒍𑒏𑒩𑒰 𑒖𑒼𑒛𑓃𑒱 𑒠𑒹𑒟𑒱 𑒂 𑒤𑒹𑒩 । 𑒂 𑒄 𑒏𑒹 𑒕𑒲 𑒂𑒔𑒰𑒩𑓂𑒨 𑒮𑒩𑒦.. 𑒋𑒏𑒙𑒰 𑒑𑒲𑒠𑒩..
𑒂𑒔𑒰𑒩𑓂𑒨 𑒮𑒱𑓀𑒯: 𑒮𑒦 𑒮𑒋𑒯 𑒅𑒣𑒰𑒨 𑒏𑒩𑒴, 𑒏𑒼𑒢𑒰 𑒍 𑒑𑒲𑒠𑒩 𑒤𑒹𑒏𑒞 𑒂𑒑𑒱.. 𑒖𑒹 𑒢𑒻 𑒤𑒹𑒏𑒱 𑒮𑒏𑒻 𑒍 𑒂𑒑𑒱
𑒦𑒠𑒩𑒲: 𑒧𑒱𑒟𑒱𑒪𑒰𑒏 𑒩𑒰𑒖𑒰 𑒧𑒑𑓂𑒑𑒯𑒏 𑒯𑓀𑒬𑒩𑒰𑒖-𑒫𑓀𑒬𑒩𑒰𑒖𑒮𑒿 𑒢𑒩𑒳𑒂𑒩𑒏 𑒣𑒼𑒐𑒩𑒱 𑒐𑒳𑒢𑒥𑒍𑒪𑒢𑓂𑒯𑒱 𑒧𑒳𑒠𑒰 𑒍 𑒖𑒰𑒃𑒚 𑒢𑒻 𑒅𑒚𑒰 𑒮𑒏𑒪। 𑒯𑒧 𑒠𑒳𑒢𑒴 𑒦𑒰𑒿𑒃 𑒠𑒕𑒱𑒢𑒥𑒩𑒱𑒨𑒰 𑒦𑒲𑒛𑓃𑒮𑒿 𑒖𑒰𑒃𑒚 𑒤𑒹𑒏𑒪𑒾𑓀 𑒞𑒿 𑒍 𑒮𑒼𑒗𑒹 𑒖𑒰𑒚𑒱𑒏 𑒪𑒹𑒪 𑒥𑒢𑒰𑒋𑒪 𑒐𑒰𑒡𑒱- 𑒥𑒰𑒪𑒲 𑒧𑒹 𑒖𑒰 𑒏𑓄 𑒐𑒮𑒪। 𑒄 𑒖𑒰𑒃𑒚 𑒁𑒐𑒢𑒼 𑒠𑒏𑓂𑒭𑒱𑒝 𑒠𑒱𑒮 𑒙𑒹𑒜𑓃 𑒁𑒕𑒱। 𑒂 𑒄 𑒏𑒹 𑒕𑒲 𑒂𑒔𑒰𑒩𑓂𑒨 𑒮𑒩𑒦.. 𑒋𑒏𑒙𑒰 𑒑𑒲𑒠𑒩.. 𑒖𑒹 𑒤𑒹𑒏𑒻𑒋 𑒂𑒑𑒱..
𑒂𑒔𑒰𑒩𑓂𑒨 𑒮𑒱𑓀𑒯: 𑒮𑒦 𑒮𑒋𑒯 𑒅𑒣𑒰𑒨 𑒏𑒩𑒴, 𑒏𑒼𑒢𑒰 𑒍 𑒑𑒲𑒠𑒩 𑒤𑒹𑒏𑒞 𑒂𑒑𑒱𑒏 𑒑𑒼𑒪𑒰.. 𑒂 𑒏𑒼𑒢𑒰 𑒥𑒔𑒞… 𑒏𑒼𑒢𑒰 𑒥𑒔𑒞 𑒫𑒱𑒮𑓂𑒧𑒩𑒝𑒮𑒿 𑒄 𑒠𑒹𑒬..
𑒅𑒠𑒨𑒢:: (𑒏𑒢𑒹 𑒔𑒱𑒢𑓂𑒞𑒱𑒞 𑒯𑒼𑒃𑒞) 𑒫𑒱𑒮𑓂𑒧𑒩𑒝!!!!!𑒧𑒢𑓂𑒞𑓂𑒩𑒰𑒩𑓂𑒟𑒧𑒹 𑒧𑒯𑒩𑓂𑒭𑒱 𑒣𑒞𑒘𑓂𑒖𑒪𑒱𑒏 𑒫𑒻𑒖𑓂𑒘𑒰𑒢𑒱𑒏 𑒧𑒢𑓂𑒞𑒫𑓂𑒨 “𑒨𑒔𑓂𑒕𑒥𑓂𑒠 𑒂𑒯 𑒞𑒠𑒮𑓂𑒧𑒰𑒏𑓀 𑒣𑓂𑒩𑒧𑒰𑒝𑒧𑓂” 𑒧𑒰𑒢𑒹 𑒖𑒹 𑒬𑒥𑓂𑒠 𑒂𑒏𑒱 𑒧𑓀𑒞𑓂𑒩𑒏 𑒣𑒠 𑒏𑒯𑒻𑒞 𑒁𑒕𑒱 𑒮𑒋𑒯 𑒯𑒧𑒩𑒰 𑒪𑒹𑒪 𑒣𑓂𑒩𑒧𑒰𑒝 𑒁𑒕𑒱- 𑒋𑒏𑒩 𑒁𑒩𑓂𑒟 𑒥𑒰𑒠𑒧𑒹 𑒫𑒹𑒠𑒹 𑒣𑓂𑒩𑒧𑒰𑒝 𑒁𑒕𑒱- 𑒮𑒹𑒯𑒼 𑒯𑒧𑒩𑒰 𑒢𑒰𑒧𑒮𑒿 𑒦𑒫𑒱𑒭𑓂𑒨 𑒣𑒳𑒩𑒰𑒝𑒧𑒹 𑒢𑒻 𑒖𑒰𑒢𑒱 𑒏𑒱𑒋 𑒑𑒪𑒞 𑒩𑒴𑒣𑒹𑒿 𑒠𑓄 𑒠𑒹𑒪 𑒑𑒹𑒪। 𑒁𑒢𑒏𑒩 𑒠𑒹𑒐𑒪 𑒥𑒾𑒮𑓂𑒞𑒳𑒏 𑒮𑓂𑒧𑒩𑒝 𑒁𑒢𑒏𑒰 𑒏𑒼𑒢𑒰 𑒯𑒹𑒞𑒻? 𑒫𑒱𑒮𑓂𑒧𑒩𑒝.. 𑒂𑒔𑒰𑒩𑓂𑒨 𑒮𑒩𑒦𑒏 𑒫𑒮𑓂𑒧𑒩𑒝 𑒂𑒑𑒱 𑒁𑒕𑒱 𑒣𑒮𑒩𑒱 𑒩𑒯𑒪.. 𑒂𑒥 𑒥𑒴𑒗𑒪..
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒫𑒋𑒯 𑒮𑓂𑒧𑒩𑒝 𑒐𑒞𑒧 𑒏𑒋𑒪 𑒖𑒰 𑒩𑒯𑒪 𑒕𑒻.. 𑒮𑓂𑒧𑒩𑒝 𑒫𑒱𑒮𑓂𑒧𑒩𑒝 𑒥𑒢𑒰𑒋𑒪 𑒖𑒰 𑒩𑒯𑒪 𑒕𑒻।
𑒠𑒲𑒢𑒰-𑒦𑒠𑒩𑒲 (𑒮𑒧𑓂𑒫𑒹𑒞 𑒩𑒴𑒣𑒹𑒿): 𑒡𑒰𑒧𑒲 𑒏𑒯𑒪𑒏 𑒯𑒧𑒩𑒰 𑒮𑒦𑒏𑒹𑒿 𑒏𑒰𑒖 𑒏𑒩𑒻𑒪𑒹 𑒁𑒣𑒢𑒰 𑒐𑒹𑒞𑒧𑒹। 𑒧𑒰𑒩𑒱 𑒏𑓄 𑒖𑒳𑒧𑒰 𑒏𑓄 𑒤𑒹𑒏𑒪𑒾𑓀 𑒯𑒧 𑒮𑒦 𑒍𑒏𑒩𑒰 𑒡𑒰𑒧𑒱𑒢 𑒪𑒑। 𑒡𑒰𑒧𑒱𑒢 𑒑𑒹𑒪 𑒐𑒱𑒮𑒱𑒨𑒰 𑒂 𑒥𑒖𑒹𑒪𑒏 𑒁𑒣𑒢 𑒠𑒼𑒮 𑒤𑒼𑒙𑒩𑒰 𑒑𑒲𑒠𑒩𑒏𑒹𑒿। 𑒤𑒼𑒙𑒩𑒰 𑒑𑒲𑒠𑒩 𑒧𑒰𑒩𑒪𑒏 𑒯𑒧𑒩𑒰 𑒮𑒦𑒏𑒹𑒿। 𑒧𑒳𑒠𑒰 𑒖𑒱𑒁𑒞 𑒖𑒱𑒢𑒑𑒲 𑒣𑒰𑒥𑒱 𑒏𑓄 𑒄 𑒅𑒪𑓂𑒏𑒰𑒧𑒳𑒐.. 𑒅𑒠𑒨𑒢 𑒁𑒯𑒰𑒿𑒏 𑒫𑒱𑒠𑓂𑒨𑒰 𑒣𑒰𑒮 𑒢𑒻 𑒁𑒕𑒱 𑒋𑒞𑓄.. 𑒧𑒳𑒠𑒰 𑒖𑒲𑒥𑒱 𑒑𑒹𑒪 𑒕𑒲 𑒯𑒧 𑒮𑒦 𑒧𑒩𑒱𑒨𑒼 𑒏𑓄…
𑒅𑒠𑒨𑒢:: 𑒥𑒳𑒗𑒪𑒾𑓀, 𑒂𑒥 𑒥𑒳𑒗𑒪𑒾𑓀। 𑒪𑒼𑒏𑒑𑒰𑒟𑒰 𑒥𑒢𑒥𑒋 𑒣𑒛𑓃𑒞, 𑒢𑒰𑒩𑒰𑒬𑓀𑒮𑒲 𑒖𑒑𑒥𑒋 𑒣𑒛𑓃𑒞। 𑒯𑒧𑒩 𑒂 𑒑𑓀𑒑𑒹𑒬𑒏 𑒑𑓂𑒩𑒢𑓂𑒟𑒏𑒹𑒿 𑒥𑒱𑒢𑒳 𑒥𑒳𑒗𑒢𑒹 𑒩𑒙𑒥𑒰𑒏 𑒧𑒞𑒪𑒥 𑒦𑒹𑒪 𑒫𑒱𑒮𑓂𑒧𑒩𑒝।
𑒫𑒩𑓂𑒠𑓂𑒡𑒧𑒰𑒢: (𑒑𑒩𑓂𑒖𑒢 𑒏𑒩𑒻𑒞) 𑒮𑒳𑒏𑒫𑒱𑒏𑒻𑒩𑒫𑒏𑒰𑒢𑒢𑒹𑒢𑓂𑒠𑒳𑓁 𑒑𑓀𑒑𑒹𑒬 𑒥𑒢𑒱 𑒖𑒹𑒞𑒰𑒯 𑒅𑒪𑓂𑒏𑒰𑒧𑒳𑒐।
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒖𑒹𑒢𑒰 𑒯𑒧 𑒮𑒦 𑒥𑒢𑒱 𑒑𑒹𑒪 𑒕𑒲, 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒯 𑒂𑒔𑒰𑒩𑓂𑒨 𑒮𑒱𑓀𑒯।
𑒂𑒔𑒰𑒩𑓂𑒨 𑒮𑒱𑓀𑒯: 𑒂 𑒥𑒢𑒰 𑒠𑒹𑒢𑒹 𑒕𑒲 𑒔𑒾𑒣𑒰𑒛𑓃𑒱𑒏 𑒬𑒱𑒏𑓂𑒭𑒏𑒏𑒹𑒿 𑒂𑒔𑒰𑒩𑓂𑒨 𑒮𑒩𑒦 𑒂 𑒍𑒞𑒳𑒏𑓂𑒏𑒰 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒐𑒱𑒐𑒱𑒩 𑒂 𑒬𑒰𑒯𑒲। 𑒮𑒦𑒙𑒰 𑒦𑓄 𑒖𑒰𑒋𑒞 𑒐𑒞𑒧? 𑒮𑒩𑓂𑒫𑒫𑒱𑒢𑒰𑒬..
𑒠𑒲𑒢𑒰: 𑒧𑒳𑒠𑒰 𑒠𑒾𑒩𑒲𑒫𑒰𑒪𑒲 𑒯𑒱𑒩𑒱𑒨𑒰 𑒞𑒧𑒼𑒪𑒱𑒢 𑒏𑒹𑒪𑒏 𑒞𑒣𑒮𑓂𑒨𑒰 𑒣𑒞𑒱𑒏 𑒩𑒴𑒣𑒧𑒹 𑒣𑓂𑒩𑒰𑒣𑓂𑒞𑒱 𑒪𑒹𑒪..
𑒦𑒠𑒩𑒲: 𑒂 𑒠𑒾𑒩𑒲𑒫𑒰𑒪𑒲 𑒖𑒱𑒩𑒱𑒨𑒰 𑒪𑒼𑒯𑒰𑒩𑒱𑒢 𑒏𑒹𑒪𑒏 𑒞𑒣𑒮𑓂𑒨𑒰 𑒣𑒞𑒱𑒏 𑒩𑒴𑒣𑒧𑒹 𑒣𑓂𑒩𑒰𑒣𑓂𑒞𑒱 𑒪𑒹𑒪..
𑒠𑒲𑒢𑒰-𑒦𑒠𑒩𑒲 (𑒮𑒧𑓂𑒫𑒹𑒞 𑒩𑒴𑒣𑒹𑒿): 𑒧𑒩𑒪𑒰𑒏 𑒥𑒰𑒠𑒼। 𑒑𑓀𑒑𑒰𑒧𑒹 𑒣𑒻𑒮𑒱 𑒥𑒢𑒹𑒪𑒾𑓀 𑒣𑒞𑓂𑒢𑒲 𑒠𑒳𑒢𑒴𑒏𑒹𑒿। 𑒧𑒩𑒪𑒰𑒏 𑒥𑒰𑒠𑒼। 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩.. 𑒂𑒔𑒰𑒩𑓂𑒨 𑒮𑒱𑓀𑒯.. 𑒅𑒠𑒨𑒢.. 𑒫𑒩𑓂𑒠𑓂𑒡𑒧𑒰𑒢.. 𑒧𑒩𑒱𑒨𑒼 𑒏𑓄 𑒖𑒱𑒁𑒞.. 𑒥𑒱𑒮𑒩𑒪𑒼 𑒔𑒲𑒖 𑒒𑒳𑒩𑒞..
𑒅𑒠𑒨𑒢:: 𑒑𑓀𑒑𑒹𑒬 𑒏𑒹𑒪𑒏 𑒩𑒏𑓂𑒭𑒰 𑒯𑒧𑒩 𑒞𑒩𑓂𑒏𑒏 𑒬𑓂𑒩𑒲𑒯𑒩𑓂𑒭𑒏 𑒂𑒏𑓂𑒩𑒧𑒝𑒮𑒿, 𑒢𑒫𑓂𑒨-𑒢𑓂𑒨𑒰𑒨। 𑒢𑒥𑒏𑒰 𑒬𑒰𑒮𑓂𑒞𑓂𑒩, 𑒢𑒥𑒏𑒰 𑒢𑓂𑒨𑒰𑒨𑒬𑒰𑒮𑓂𑒞𑓂𑒩। 𑒍𑒯𑒼 𑒁𑒖𑒲𑒥𑒹 𑒦𑒹𑒪, 𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒣𑒰𑒿𑒔 𑒮𑒰𑒪 𑒥𑒰𑒠 𑒦𑒹𑒪𑒻 𑒍𑒏𑒩 𑒖𑒢𑓂𑒧 𑒂 𑒔𑒩𑓂𑒧𑒏𑒰𑒩𑒱𑒝𑒲𑒮𑒿 𑒏𑒹𑒪𑒏 𑒫𑒱𑒫𑒰𑒯। 𑒂 𑒍𑒃 𑒫𑒱𑒫𑒰𑒯𑒮𑒿 𑒖𑒹 𑒣𑒳𑒞𑓂𑒩 𑒦𑒹𑒪𑒻 𑒫𑒩𑓂𑒡𑒧𑒰𑒢 𑒮𑒹 𑒤𑒹𑒩 𑒧𑒱𑒪𑒹𑒪𑒏 𑒢𑓂𑒨𑒰𑒨 𑒂 𑒢𑒫𑓂𑒨-𑒢𑓂𑒨𑒰𑒨𑒏𑒹𑒿।
𑒠𑒲𑒢𑒰-𑒦𑒠𑒩𑒲 (𑒮𑒧𑓂𑒫𑒹𑒞 𑒩𑒴𑒣𑒹𑒿): 𑒮𑒞𑓂𑒨𑒏𑒰𑒧𑒏 𑒮𑒹𑒯𑒼 𑒞𑒿 𑒮𑒋𑒯 𑒯𑒰𑒪 𑒩𑒯𑒻। 𑒣𑒱𑒞𑒰 𑒏𑒹 𑒕𑒪𑒻 𑒍𑒏𑒩𑒰 𑒥𑒳𑒗𑒪𑒹 𑒢𑒻 𑒕𑒪𑒻, 𑒖𑒥𑒰𑒪𑒰𑒏 𑒣𑒳𑒞𑓂𑒩𑒮𑒞𑓂𑒨𑒏𑒰𑒧, 𑒧𑒳𑒠𑒰 𑒑𑒾𑒞𑒧, 𑒧𑒱𑒟𑒱𑒪𑒰𑒏 𑒑𑒾𑒞𑒧, 𑒯𑒳𑒢𑒏𑒰 𑒮𑒢 𑒑𑒳𑒩𑒳 𑒦𑒹𑒙𑒪𑒻, 𑒫𑒹𑒠𑒏 𑒁𑒡𑓂𑒨𑒨𑒢 𑒏𑒹𑒪𑒢𑓂𑒯𑒱। 𑒧𑒩𑒪𑒰𑒏 𑒥𑒰𑒠𑒼 𑒅𑒠𑒨𑒢, 𑒢𑒫 𑒂 𑒣𑒳𑒩𑒰𑒢𑒏 𑒧𑒹𑒪 𑒂 𑒫𑒱𑒩𑒼𑒡 𑒯𑒼𑒃𑒋। 𑒫𑓀𑒬𑒲𑒡𑒩 𑒥𑒰𑒦𑒢 𑒂 𑒥𑒰𑒪𑒰𑒩𑒰𑒧𑒏 𑒧𑒹𑒪 𑒦𑒹𑒪, 𑒪𑒼𑒏 𑒠𑒹𑒫𑒲 𑒑𑒯𑒲𑒪 𑒂 𑒣𑒾𑒩𑒰𑒝𑒱𑒏 𑒠𑒳𑒩𑓂𑒑𑒰 𑒠𑒹𑒫𑒲𑒏 𑒧𑒹𑒪 𑒦𑒹𑒪।
𑒅𑒠𑒨𑒢:: (𑒂𑒬𑓂𑒔𑒩𑓂𑒨𑒮𑒿) 𑒧𑒩𑒪𑒰𑒏 𑒥𑒰𑒠𑒼 𑒠𑒲𑒢𑒰-𑒦𑒠𑒩𑒲।
𑒠𑒲𑒢𑒰-𑒦𑒠𑒩𑒲 (𑒮𑒧𑓂𑒫𑒹𑒞 𑒩𑒴𑒣𑒹𑒿): 𑒯𑒿 𑒅𑒠𑒨𑒢। 𑒤𑒼𑒙𑒩𑒰 𑒑𑒲𑒠𑒩 𑒥𑒢𑒪 𑒠𑒼𑒮…𑒮𑓀𑒑 𑒦𑒹𑒪𑒰𑒯 𑒮𑒪𑒯𑒹𑒮। 𑒧𑒩𑒪𑒰𑒏 𑒥𑒰𑒠𑒹…
(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱, 𑒧𑒳𑒠𑒰 𑒑𑒣𑒬𑒣 𑒮𑒳𑒢𑒥𑒰𑒧𑒹 𑒁𑒥𑒻𑒞 𑒁𑒕𑒱, 𑒂𑒔𑒰𑒩𑓂𑒨 𑒮𑒩𑒦 𑒂 𑒬𑒱𑒭𑓂𑒨 𑒬𑒰𑒯𑒲 𑒂 𑒐𑒱𑒐𑒱𑒩𑒏 𑒑𑒣𑒬𑒣।)
𑒂𑒔𑒰𑒩𑓂𑒨 𑒮𑒩𑒦: 𑒬𑒱𑒭𑓂𑒨 𑒢𑒜𑓃𑒱𑒨𑒰, 𑒬𑒱𑒭𑓂𑒨 𑒥𑒱𑒖𑓂𑒖𑒲, 𑒧𑒰𑒩𑒴 , 𑒧𑒰𑒩𑒴 𑒐𑒱𑒐𑒱𑒩 𑒂 𑒬𑒰𑒯𑒲𑒏𑒹𑒿 𑒧𑒰𑒩𑒴। 𑒫𑒱𑒠𑓂𑒨𑒰𑒧𑒹 𑒏𑓂𑒭𑒞𑒱 𑒏𑓄 𑒩𑒯𑒪 𑒁𑒕𑒱 𑒄 𑒠𑒳𑒢𑒴।
(𑒧𑒰𑒩𑒱-𑒣𑒲𑒙𑒏 𑒬𑒥𑓂𑒠 𑒂 𑒐𑒱𑒐𑒱𑒩 𑒂 𑒬𑒰𑒯𑒲𑒏 𑒂𑒩𑓂𑒞𑒢𑒰𑒠।)
𑒂𑒔𑒰𑒩𑓂𑒨 𑒮𑒩𑒦: 𑒪𑒑𑒻𑒋 𑒐𑒱𑒐𑒱𑒩 𑒂 𑒬𑒰𑒯𑒲 𑒧𑒩𑒱 𑒑𑒹𑒪। 𑒬𑒱𑒭𑓂𑒨 𑒢𑒜𑓃𑒱𑒨𑒰, 𑒬𑒱𑒭𑓂𑒨 𑒥𑒱𑒖𑓂𑒖𑒲। 𑒂𑒥 𑒣𑒜𑓃𑒰𑒃 𑒬𑒳𑒩𑒴 𑒏𑒩𑒴। 𑒏𑒼𑒢𑒼 𑒠𑒱𑒏𑓂𑒏𑒞 𑒢𑒻 𑒯𑒋𑒞 𑒂𑒥।
𑒬𑒱𑒭𑓂𑒨 𑒢𑒜𑓃𑒱𑒨𑒰: 𑒮𑒦𑒙𑒰 𑒩𑒙𑒱 𑒪𑒹𑒪𑒾𑓀 𑒂𑒔𑒰𑒩𑓂𑒨 𑒮𑒩𑒦, 𑒞𑒴𑒿 𑒩𑒙𑒱 𑒪𑒹𑒪𑒹𑒿 𑒥𑒱𑒖𑓂𑒖𑒲।
𑒬𑒱𑒭𑓂𑒨 𑒥𑒱𑒖𑓂𑒖𑒲: 𑒯𑒧𑒯𑒴𑒿 𑒮𑒦𑒙𑒰 𑒩𑒙𑒱 𑒪𑒹𑒪𑒾𑓀 𑒢𑒜𑓃𑒱𑒨𑒰। 𑒯𑒿 𑒂𑒔𑒰𑒩𑓂𑒨 𑒯𑒧𑒯𑒴𑒿 𑒮𑒦𑒙𑒰 𑒩𑒙𑒱 𑒪𑒹𑒪𑒾𑓀।
𑒂𑒔𑒰𑒩𑓂𑒨 𑒮𑒩𑒦: 𑒚𑒲𑒏 𑒕𑒻, 𑒁𑒯𑒰𑒿 𑒮𑒦 𑒖𑒰𑒃 𑒖𑒰𑒅।
(𑒧𑓀𑒔𑒣𑒩 𑒣𑓂𑒩𑒏𑒰𑒬 𑒂𑒥𑒱 𑒖𑒰𑒃𑒞 𑒁𑒕𑒱, 𑒂 𑒧𑒰𑒞𑓂𑒩 𑒂𑒔𑒰𑒩𑓂𑒨 𑒮𑒩𑒦 𑒧𑓀𑒔𑒣𑒩 𑒠𑒹𑒐𑒰 𑒣𑒛𑓃𑒻 𑒕𑒟𑒱।)
𑒂𑒔𑒰𑒩𑓂𑒨 𑒮𑒩𑒦: 𑒚𑒲𑒏 𑒕𑒻, 𑒂𑒥 𑒮𑒦 𑒚𑒲𑒏 𑒕𑒻, 𑒡𑒡𑒩𑒰 𑒯𑒧 𑒤𑒹𑒏𑒻𑒞 𑒕𑒲, 𑒯𑒧 𑒂𑒔𑒰𑒩𑓂𑒨 𑒮𑒩𑒦। 𑒥𑒢𑒥𑓄 𑒠𑒱𑒨𑒾 𑒍𑒏𑒩𑒰 𑒮𑒦𑒏𑒹𑒿 𑒅𑒪𑓂𑒏𑒰𑒧𑒳𑒐, 𑒡𑒡𑒩𑒰 𑒞𑒿 𑒯𑒧𑒯𑒴𑒿 𑒤𑒹𑒏𑒻𑒞 𑒕𑒲 । 𑒂𑒥 𑒯𑒧𑒩𑒰 𑒥𑒰𑒠 𑒥𑒢𑒞 𑒂𑒔𑒰𑒩𑓂𑒨 𑒯𑒧𑒩 𑒠𑒳𑒢𑒴 𑒬𑒱𑒭𑓂𑒨। 𑒯𑒧𑒩 𑒠𑒳𑒢𑒴 𑒬𑒱𑒭𑓂𑒨 𑒥𑒢𑒞 𑒂𑒔𑒰𑒩𑓂𑒨, 𑒂𑒔𑒰𑒩𑓂𑒨 𑒢𑒜𑓃𑒱𑒨𑒰 𑒂 𑒂𑒔𑒰𑒩𑓂𑒨 𑒥𑒱𑒖𑓂𑒖𑒲। 𑒂𑒃 𑒡𑒩𑒱 𑒞𑒿 𑒂𑒔𑒰𑒩𑓂𑒨𑒧𑒹 𑒏𑒱𑒨𑒼 𑒢𑒹 𑒏𑒱𑒨𑒼 𑒋𑒏𑒙𑒰 𑒥𑒔𑒱𑒨𑒹 𑒖𑒰𑒃 𑒕𑒪 𑒖𑒹 𑒫𑒱𑒮𑓂𑒧𑒩𑒝𑒧𑒹 𑒢𑒻 𑒩𑒯𑒻 𑒕𑒪, 𑒧𑒳𑒠𑒰 𑒂𑒥 𑒯𑒋𑒞 𑒣𑒴𑒩𑓂𑒝 𑒫𑒱𑒮𑓂𑒧𑒩𑒝। 𑒧𑒩𑒱 𑒑𑒹𑒪 𑒬𑒰𑒯𑒲 𑒂 𑒐𑒱𑒐𑒱𑒩। 𑒥𑒢𑒞 𑒂𑒔𑒰𑒩𑓂𑒨, 𑒂𑒔𑒰𑒩𑓂𑒨 𑒢𑒜𑓃𑒱𑒨𑒰 𑒂 𑒂𑒔𑒰𑒩𑓂𑒨 𑒥𑒱𑒖𑓂𑒖𑒲… 𑒯𑒋𑒞 𑒣𑒴𑒩𑓂𑒝 𑒫𑒱𑒮𑓂𑒧𑒩𑒝…
(𑒞𑒐𑒢𑒹 𑒧𑒰𑒃𑒏𑒮𑒿 𑒑𑒲𑒞 𑒂𑒥𑓄 𑒪𑒑𑒻𑒋, 𑒂𑒔𑒰𑒩𑓂𑒔 𑒮𑒩𑒦 𑒔𑒰𑒩𑒴 𑒏𑒰𑒞 𑒞𑒰𑒏𑓄 𑒪𑒑𑒻 𑒕𑒟𑒱…)
𑒋𑒏 𑒧𑒴𑒛𑓃𑒲 𑒞𑒳𑒪𑒮𑒲 𑒖𑒪 𑒮𑒰𑒖𑒱 𑒏𑒹 𑒩𑒐𑒱𑒯𑒹𑒿 𑒑𑒻 𑒧𑒪𑒯𑒲𑒢𑒱𑒨𑒰𑒿
𑒯𑒧𑒩𑒰 𑒣𑒰𑒢𑒱 𑒮𑒹𑒥 𑒠𑒹𑒫𑒞𑒰 𑒁𑒩𑒻𑒡 𑒏𑒹 𑒪𑒥𑒱𑒯𑒹𑒿 𑒑𑒻
𑒋𑒏 𑒧𑒴𑒛𑓃𑒲 𑒞𑒳𑒪𑒮𑒲 𑒖𑒪 𑒮𑒰𑒖𑒱 𑒏𑒹 𑒩𑒐𑒱𑒯𑒹𑒿 𑒑𑒻 𑒧𑒪𑒯𑒲𑒢𑒱𑒨𑒰𑒿𑓄?
𑒯𑒧𑒩𑒰 𑒑𑒾𑒩𑒡𑓂𑒨𑒰 𑒮𑒢 𑒁𑒩𑒻𑒡 𑒏𑒹 𑒪𑒥𑒱𑒯𑒹𑒿 𑒑𑒻
𑒋𑒏 𑒧𑒴𑒛𑓃𑒲 𑒞𑒳𑒪𑒮𑒲 𑒖𑒪 𑒮𑒰𑒖𑒱 𑒏𑒹 𑒩𑒐𑒱𑒯𑒹𑒿 𑒑𑒻 𑒧𑒪𑒯𑒲𑒢𑒱𑒨𑒰𑒿
𑒯𑒧𑒩𑒰 𑒑𑒯𑒲𑒪 𑒮𑒢 𑒠𑒹𑒫𑒞𑒰 𑒁𑒩𑒻𑒡 𑒏𑒹 𑒪𑒥𑒱𑒯𑒹𑒿 𑒑𑒻.....।
…..
𑒂𑒔𑒰𑒩𑓂𑒨 𑒮𑒩𑒦: (𑒔𑒰𑒩𑒴 𑒠𑒱𑒮 𑒞𑒏𑒻𑒞) 𑒏𑒹 𑒕𑒲? 𑒏𑒹 𑒕𑒲? (𑒅𑒠𑓂𑒫𑒱𑒑𑓂𑒢𑒞𑒰𑒮𑒿 𑒧𑓀𑒔𑒣𑒩 𑒫𑒱𑒔𑒩𑒝 𑒏𑒩𑒻𑒞) 𑒏𑒹 𑒕𑒲। 𑒁𑒣𑒢 𑒣𑓂𑒩𑒱𑒨 𑒬𑒱𑒭𑓂𑒨 𑒐𑒱𑒐𑒱𑒩 𑒂 𑒥𑒱𑒖𑓂𑒖𑒲𑒏𑒹𑒿 𑒧𑒰𑒩𑒪𑒾𑓀.. 𑒧𑒳𑒠𑒰 𑒄 𑒏𑒹 𑒮𑒦 𑒕𑒲 𑒖𑒹 𑒫𑒱𑒮𑓂𑒧𑒩𑒝 𑒩𑒼𑒏𑓄 𑒔𑒰𑒯𑒻𑒋। 𑒮𑓀𑒏𑒹𑒞𑒮𑒿 𑒣𑒮𑒰𑒩𑓄 𑒔𑒰𑒯𑒻𑒋 𑒍 𑒖𑒏𑒩 𑒯𑒋𑒞 𑒣𑒴𑒩𑓂𑒝 𑒫𑒱𑒮𑓂𑒧𑒩𑒝 (𑒣𑒰𑒑𑒪 𑒮𑒢 𑒋𑒧𑓂𑒯𑒩-𑒍𑒧𑓂𑒯𑒩 𑒒𑒳𑒩𑒱𑒨𑒰𑒃𑒋, 𑒁𑒥𑒰𑒖 𑒤𑒹𑒩 𑒁𑒥𑒻𑒋)।
𑒠𑒳𑒩-𑒠𑒳𑒩 𑒕𑒲𑒨𑒰 𑒋 𑒕𑒲𑒨𑒰,
𑒮𑒩𑒦𑒏 𑒧𑒳𑒿𑒯𑒮𑒿 𑒡𑒡𑒩𑒰 𑒢𑒱𑒏𑒪𑒻
𑒖𑒩𑒻 𑒏𑒱𑒕𑒳 𑒢𑒻 𑒏𑒱𑒋?
𑒠𑒳𑒩-𑒠𑒳𑒩 𑒕𑒲𑒨𑒰 𑒋 𑒕𑒲𑒨𑒰,
…..
(𑒩𑒳𑒠𑒢 𑒮𑓂𑒫𑒩𑒧𑒹 𑒨𑒋𑒯 𑒑𑒲𑒞 𑒤𑒹𑒩 𑒁𑒥𑒻𑒋, 𑒮𑒩𑒦 𑒔𑒾𑓀𑒏𑒻 𑒕𑒟𑒱। 𑒮𑓂𑒫𑒩 𑒏𑒰𑒢𑓄 𑒪𑒑𑒻𑒋, 𑒂 𑒂𑒔𑒰𑒩𑓂𑒨 𑒮𑒩𑒦 𑒯𑒿𑒮𑓄 𑒪𑒑𑒻 𑒕𑒟𑒱, 𑒯𑒿𑒮𑒱𑒞𑒹 𑒩𑒯𑒻 𑒕𑒟𑒱। 𑒮𑒑𑒩𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒋।𑒂 𑒖𑒐𑒢 𑒃𑒖𑒼𑒞 𑒯𑒼𑒃𑒋 𑒞𑒿 𑒅𑒠𑒨𑒢, 𑒠𑒲𑒢𑒰, 𑒦𑒠𑒩𑒲 𑒂 𑒫𑒩𑓂𑒠𑓂𑒡𑒧𑒰𑒢 𑒧𑒳𑒐𑓂𑒨 𑒩𑓀𑒑𑒧𑓀𑒔𑒣𑒩 𑒠𑒹𑒐𑒰 𑒣𑒛𑓃𑒻 𑒕𑒟𑒱।)
𑒅𑒠𑒨𑒢:: (𑒧𑓀𑒔𑒏 𑒮𑒼𑒗𑒰𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒂𑒥 𑒣𑒳𑒩𑒰𑒢 𑒢𑒰𑒧 𑒤𑒹𑒩𑒮𑒿 𑒩𑒐𑒥𑒰𑒏 𑒣𑒩𑒧𑓂𑒣𑒩𑒰 𑒂𑒋𑒪 𑒕𑒻। 𑒮𑒹 𑒯𑒧 𑒅𑒠𑒨𑒢। 𑒄 𑒕𑒟𑒱 𑒠𑒲𑒢𑒰, 𑒍 𑒦𑒠𑒩𑒲, 𑒍 𑒫𑒩𑓂𑒠𑓂𑒡𑒧𑒰𑒢..…𑒮𑒳𑒢𑒻 𑒕𑒱𑒌 𑒢𑒰𑒧𑒏 𑒮𑒹𑒯𑒼 𑒣𑓂𑒩𑒦𑒰𑒫 𑒣𑒛𑓃𑒻 𑒕𑒻। 𑒖𑒹 𑒮𑒹…
𑒫𑒩𑓂𑒠𑓂𑒡𑒧𑒰𑒢: (𑒣𑒰𑒕𑒴𑒮𑒿 𑒅𑒠𑒨𑒢𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒡𑒰𑒩𑒏 𑒏𑒰𑒞𑒧𑒹 𑒂 𑒮𑒰𑒿𑒣𑒥𑒪𑒰 𑒒𑒩𑒧𑒹 𑒢𑒱𑒫𑒰𑒮 𑒏𑒹𑒢𑒱𑒯𑒰𑒩𑒏𑒹𑒿 𑒔𑒻𑒢 𑒏𑒞𑓄 𑒅𑒠𑒨𑒢? 𑒄 𑒧𑒱𑒟𑒱𑒪𑒰 𑒮𑒋𑒯 𑒥𑒢𑒱 𑒑𑒹𑒪 𑒁𑒕𑒱।
𑒅𑒠𑒨𑒢:: (𑒧𑓀𑒔𑒏 𑒮𑒼𑒗𑒰𑒿 𑒒𑒳𑒩𑒱 𑒮𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒦𑒰𑒞𑒜𑒰𑒪𑒰 𑒣𑒼𑒐𑒩𑒱 𑒂 𑒮𑒰𑒑𑒜𑒰𑒪𑒰 𑒣𑒼𑒐𑒩𑒱 𑒖𑒰𑒋 𑒣𑒛𑓃𑒞, 𑒞𑒞𑓂𑒏𑒰𑒪।
𑒠𑒲𑒢𑒰: (𑒅𑒠𑒨𑒢𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒖𑒞𑒋 𑒦𑒲𑒧 𑒦𑒰𑒞 𑒂 𑒮𑒰𑒑 𑒩𑒐𑒻𑒞 𑒩𑒯𑒟𑒱?
𑒅𑒠𑒨𑒢: 𑒯𑒿, 𑒂 𑒮𑒱𑒧𑒪𑒫𑒢 𑒮𑒹𑒯𑒼।
𑒦𑒠𑒩𑒲: (𑒅𑒠𑒨𑒢𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒮𑒹𑒧𑒰𑒣𑒳𑒩 𑒖𑒞𑒋 𑒁𑒩𑓂𑒖𑒳𑒢 𑒁𑒣𑒢 𑒁𑒮𑓂𑒞𑓂𑒩-𑒬𑒮𑓂𑒞𑓂𑒩 𑒁𑒖𑓂𑒘𑒰𑒞𑒫𑒰𑒮 𑒏𑒰𑒪𑒧𑒹 𑒢𑒳𑒏𑒹𑒢𑒹 𑒩𑒯𑒟𑒱?
𑒅𑒠𑒨𑒢: 𑒯𑒿, 𑒋𑒏𑒙𑒰 𑒂𑒩 𑒨𑒳𑒠𑓂𑒡 𑒬𑒳𑒩𑒴 𑒦𑓄 𑒑𑒹𑒪 𑒁𑒕𑒱। 𑒠𑒱𑒧𑒰𑒑𑒲 𑒨𑒳𑒠𑓂𑒡.. 𑒢𑒰𑒩𑒰𑒬𑓀𑒮𑒲.. 𑒬𑒳𑒩𑒴 𑒯𑒋𑒞 𑒠𑒱𑒧𑒰𑒑𑒧𑒹..
𑒫𑒩𑓂𑒠𑓂𑒡𑒧𑒰𑒢: (𑒯𑒰𑒟 𑒣𑒮𑒰𑒩𑒱)
𑒒𑒵𑒝𑒰𑒏 𑒞𑒩𑒯𑒩𑒱𑒧𑒹
𑒣𑓂𑒩𑒹𑒧, 𑒧𑒳𑒮𑓂𑒏𑒲𑒮𑒿 𑒖𑒲𑒞𑒥 𑒒𑒵𑒝𑒰 𑒂 𑒄𑒩𑓂𑒭𑓂𑒨𑒰𑒏𑒹𑒿
𑒒𑒵𑒝𑒰𑒏 𑒞𑒩𑒯𑒩𑒱 𑒐𑒴𑒢𑓄 𑒠𑒱𑒨𑒾
𑒍𑒃 𑒞𑒩𑒯𑒩𑒱𑒧𑒹 𑒒𑒵𑒝𑒰𑒏𑒹𑒿 𑒑𑒰𑒩𑒱 𑒠𑒹𑒥𑒻
𑒁𑒣𑒢 𑒣𑓂𑒩𑒹𑒧𑒏 𑒬𑒏𑓂𑒞𑒱𑒮𑒿

𑒅𑒠𑒨𑒢:: 𑒯𑒿𑒮𑒻𑒞- 𑒧𑒳𑒮𑓂𑒏𑒱𑒨𑒰𑒃𑒞 𑒏𑒩𑒥𑒻 𑒂𑒑𑓂𑒩𑒯
𑒖𑒹 𑒣𑒩𑒱𑒬𑓂𑒩𑒧 𑒒𑒵𑒝𑒰𑒏 𑒞𑒩𑒯𑒩𑒱 𑒥𑒢𑒥𑓄𑒧𑒹 𑒪𑒑𑒾𑒪𑒏
𑒏𑒯𑒥𑒻 𑒣𑓂𑒩𑒹𑒧𑒏 𑒣𑒼𑒐𑒩𑒱 𑒏𑒰𑒙𑓄
𑒖𑒃𑒧𑒹 𑒣𑓂𑒩𑒹𑒧𑒏 𑒣𑒰𑒢𑒱 𑒥𑒩𑒐𑒰 𑒧𑒰𑒮𑒧𑒹 𑒦𑒩𑒱 𑒖𑒰𑒋𑒞
𑒂 𑒦𑒩𑒪𑒹 𑒩𑒯𑒞, 𑒞𑒞𑒹𑒏 𑒑𑒯𑒲𑓀𑒩 𑒏𑓄 𑒏𑒰𑒙𑒪 𑒩𑒯𑒞 𑒧𑒰𑒙𑒱
𑒍𑒃𑒧𑒹 𑒯𑒹𑒪𑒞 𑒣𑓂𑒩𑒹𑒧
𑒯𑒹𑒪𑒻𑒞 𑒩𑒯𑒞
𑒂 𑒥𑒯𑒱 𑒖𑒰𑒋𑒞, 𑒛𑒴𑒧𑒱 𑒖𑒰𑒋𑒞 𑒒𑒵𑒝𑒰 𑒂 𑒄𑒩𑓂𑒭𑓂𑒨𑒰
𑒛𑒴𑒧𑒱 𑒖𑒰𑒋𑒞 𑒂 𑒥𑒗𑒰 𑒏𑓄 𑒪𑓄 𑒖𑒋𑒞𑒻 𑒣𑒢𑒱𑒛𑒳𑒥𑓂𑒥𑒲 𑒍𑒏𑒩𑒰

𑒠𑒲𑒢𑒰:
𑒖𑒰𑒫𑒞 𑒯𑒧 𑒩𑒯𑒥
𑒢𑒻 𑒕𑒴𑒥𑒱 𑒮𑒏𑒞 𑒏𑓂𑒨𑒼 𑒣𑓂𑒩𑒹𑒧𑒏 𑒮𑒞𑓂𑒨𑒏 𑒣𑒳𑒞𑓂𑒩𑒏𑒹𑒿
𑒏𑒰𑒩𑒝 𑒬𑒏𑓂𑒞𑒱𑒮𑒿, 𑒆𑒩𑓂𑒖𑒰𑒮𑒿 𑒦𑒩𑒪 𑒁𑒕𑒱 𑒮𑒞𑓂𑒨𑒏 𑒣𑒳𑒞𑓂𑒩
𑒍𑒏𑒩 𑒔𑒰𑒩𑒴𑒏𑒰𑒞 𑒮𑓂𑒟𑒴𑒪-𑒣𑓂𑒩𑒹𑒧𑒏 𑒑𑒱𑒪𑒹𑒥𑒰𑒮𑒿 𑒚𑒰𑒜𑓃 𑒏𑒋𑒪 𑒒𑒹𑒩𑒰𑒥𑒰 𑒩𑒯𑒞
𑒢𑒻 𑒏𑒩𑒴 𑒔𑒱𑒢𑓂𑒞𑒰।

𑒦𑒠𑒩𑒲:
𑒂 𑒖𑒯𑒱𑒨𑒰 𑒯𑒧 𑒢𑒻 𑒩𑒯𑒥
𑒮𑒲𑒐𑒱 𑒖𑒰𑒋𑒥 𑒁𑒯𑒰𑒿 𑒮𑒦 𑒏𑒱𑒕𑒳
𑒯𑒧𑒩 𑒫𑒱𑒨𑒼𑒑 𑒥𑒢𑒰 𑒠𑒹𑒞 𑒮𑒏𑓂𑒏𑒞, 𑒞𑒲𑒫𑓂𑒩 𑒂 𑒏𑒚𑒼𑒩
𑒮𑒞𑓂𑒨𑒏 𑒫𑒱𑒩𑒼𑒡𑒲𑒏 𑒪𑒹𑒪
𑒍𑒃 𑒒𑒹𑒩𑒰𑒥𑒰𑒏𑒹𑒿 𑒞𑒼𑒛𑓃𑒥𑒰𑒏 𑒣𑓂𑒩𑒨𑒰𑒮
𑒁𑒯𑒰𑒿𑒏 𑒮𑓂𑒟𑒴𑒪-𑒣𑓂𑒩𑒹𑒧𑒲 𑒧𑒱𑒞𑓂𑒩 𑒮𑒦 𑒢𑒻 𑒯𑒹𑒧𑓄 𑒠𑒹𑒟𑒱𑒢𑓂𑒯 𑒮𑒤𑒪
𑒅𑒠𑒨𑒢:
𑒮𑒹 𑒯𑒧 𑒩𑒯𑒲 𑒫𑒰 𑒢𑒻 𑒩𑒯𑒲
𑒣𑓂𑒩𑒨𑒰𑒝 𑒟𑒧𑓂𑒯𑒞 𑒢𑒻
𑒥𑒞𑒯𑒣𑒢𑒰 𑒥𑒜𑓃𑒞 𑒢𑒻
𑒧𑒰𑒩𑒱 𑒠𑒹𑒥 𑒞𑒿 𑒧𑒰𑒩𑒱 𑒠𑒱𑒁
𑒧𑒳𑒠𑒰 𑒧𑒼𑒢 𑒩𑒰𑒐𑒴
𑒯𑒧𑒩𑒰 𑒮𑓀𑒑𑒹 𑒧𑒩𑒞 𑒂𑒩 𑒥𑒯𑒳𑒞 𑒩𑒰𑒮 𑒫𑒮𑓂𑒞𑒳
𑒧𑒳𑒠𑒰 𑒩𑒯𑒥𑒹 𑒏𑒩𑒞 𑒮𑓂𑒟𑒴𑒪-𑒣𑓂𑒩𑒹𑒧𑒲 𑒮𑒰𑒡𑒏 𑒮𑒦

𑒠𑒲𑒢𑒰:
𑒂 𑒏𑒩𑒞 𑒣𑒯𑒱𑒪 𑒢𑒵𑒞𑓂𑒨 𑒯𑒮𑓂𑒞 𑒮𑓀𑒔𑒰𑒪𑒢𑒮𑒿
𑒔𑒞𑒳𑒩𑒯𑒮𑓂𑒞
𑒂𑒢𑒢𑓂𑒠𑒮𑒿 𑒦𑒩𑒪 𑒧𑒼𑒢
𑒮𑒞𑓂𑒨, 𑒗𑒴𑒚 𑒂 𑒞𑒏𑒩 𑒢𑒱𑒩𑓂𑒝𑒨𑒏 𑒪𑒹𑒪

𑒦𑒠𑒩𑒲:
𑒮𑒢𑒑𑒼𑒯𑒱𑒏 𑒔𑒰𑒧𑒮𑒿 𑒕𑒰𑒩𑒪 𑒛𑒤-𑒐𑒖𑒳𑒩𑒲 𑒪𑒋
𑒛𑒼𑒩𑒲𑒏 𑒏𑒧𑓂𑒣𑒢𑒮𑒿 𑒡𑓂𑒫𑒢𑒱 𑒢𑒱𑒏𑒰𑒪𑒞
𑒑𑒳𑒧𑒏𑒲, 𑒍𑒃 𑒐𑒖𑒳𑒩𑒲𑒏 𑒡𑓂𑒫𑒢𑒱
𑒂 𑒑𑒳𑒧𑒏𑒲, 𑒑𑒳𑒧..𑒑𑒳𑒧..𑒑𑒳𑒧𑒏𑒲...
𑒂 𑒞𑒐𑒢 𑒠𑒼𑒮𑒩 𑒢𑒵𑒞𑓂𑒨 𑒯𑒼𑒋𑒞 𑒣𑓂𑒩𑒰𑒩𑒧𑓂𑒦
𑒠𑒲𑒢𑒰:
𑒬𑒱𑒐𑒩𑒯𑒮𑓂𑒞
𑒣𑒩𑓂𑒫𑒞𑒬𑒱𑒐𑒩𑒮𑒢
𑒨𑒳𑒠𑓂𑒡𑒏 𑒂𑒫𑒰𑒯𑒢-𑒣𑓂𑒩𑒠𑒩𑓂𑒬𑒢𑒏 𑒪𑒹𑒪
𑒒𑒵𑒝𑒰𑒏 𑒞𑒩𑒯𑒩𑒱 𑒐𑒴𑒢𑓄 𑒠𑒱𑒨𑒾
𑒧𑒰𑒩𑒱 𑒠𑒹𑒞 𑒞𑒿 𑒧𑒰𑒩𑓄 𑒠𑒱𑒎
𑒧𑒼𑒢 𑒩𑒰𑒐𑒴 𑒧𑒳𑒠𑒰
𑒯𑒧𑒩𑒰 𑒮𑓀𑒑𑒹 𑒧𑒩𑒞 𑒂𑒩 𑒥𑒯𑒳𑒞 𑒩𑒰𑒮 𑒫𑒮𑓂𑒞𑒳

𑒅𑒠𑒨𑒢:
𑒧𑒳𑒠𑒰 𑒯𑒧𑒩 𑒫𑒱𑒨𑒼𑒑 𑒥𑒢𑒰 𑒠𑒹𑒞 𑒮𑒏𑓂𑒏𑒞, 𑒞𑒲𑒫𑓂𑒩 𑒂 𑒏𑒚𑒼𑒩
𑒩𑒏𑓂𑒞𑒥𑒲𑒖𑒲 𑒮𑒞𑓂𑒨𑒣𑒳𑒞𑓂𑒩 𑒮𑒦𑒏𑒹𑒿

𑒠𑒲𑒢𑒰-𑒦𑒠𑒩𑒲: (𑒮𑒧𑓂𑒫𑒹𑒞 𑒮𑓂𑒫𑒩𑒧𑒹)
𑒥𑒳𑒜𑓃𑒱𑒨𑒰 𑒛𑒰𑒯𑒲 𑒮𑓀𑒑 𑒁𑒕𑒱
𑒏𑒧𑒪𑒏 𑒧𑒵𑒝𑒰𑒪, 𑒣𑒳𑒩𑒻𑒢𑒱, 𑒏𑒧𑒪𑒑𑒙𑓂𑒙𑒰, 𑒥𑒱𑒮𑒰𑒿𑒜𑓃𑒮𑒿 𑒦𑒩𑒪 𑒐𑒹𑒞
𑒍 𑒢𑒻 𑒕𑒟𑒱 𑒥𑒳𑒜𑓃𑒱𑒨𑒰 𑒛𑒰𑒯𑒲
𑒐𑒹𑒞 𑒖𑒹 𑒕𑒪𑒻 𑒮𑒢𑒑𑒩 𑒨𑒾
𑒮𑒹 𑒥𑒢𑒪 𑒣𑓂𑒩𑒹𑒧𑒏 𑒏𑒧𑒪𑒠𑒯
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒁𑒕𑒱 𑒯𑒧𑒩 𑒄 𑒥𑒳𑒜𑓃𑒱𑒨𑒰 𑒛𑒰𑒯𑒲
(𑒫𑒪𑓂𑒪𑒦𑒰𑒏 𑒁𑒥𑒰𑒖 𑒁𑒥𑒻𑒋, 𑒮𑒦 𑒔𑒾𑓀𑒏𑒱 𑒏𑓄 𑒠𑒹𑒐𑓄 𑒪𑒑𑒻 𑒕𑒟𑒱।)
𑒠𑒲𑒢𑒰-𑒦𑒠𑒩𑒲:
𑒥𑒳𑒜𑓃𑒱𑒨𑒰 𑒛𑒰𑒯𑒲, 𑒫𑒪𑓂𑒪𑒦𑒰.. 𑒫𑒪𑓂𑒪𑒦𑒰.. 𑒠𑒹𑒐𑒴 𑒣𑓂𑒩𑒦𑒰𑒫 𑒅𑒠𑒨𑒢.. 𑒠𑒹𑒐𑒴..

𑒫𑒪𑓂𑒪𑒦𑒰𑒏 𑒁𑒥𑒰𑒖:
𑒤𑒹𑒩 𑒫𑒋𑒯 𑒑𑒣
𑒂𑒞𑓂𑒧𑒩𑒏𑓂𑒭𑒰𑒩𑓂𑒟
𑒮𑒞𑓂𑒨𑒏 𑒫𑒱𑒩𑒼𑒡𑒧𑒹
𑒔𑒼𑒩𑒥𑒰 𑒥𑒰𑒖𑒪 𑒤𑒹𑒩
𑒮𑒩𑓂𑒖𑒢𑒏 𑒮𑒳𑒐 𑒦𑒹𑒙𑒞 𑒔𑒼𑒩𑒱𑒧𑒹?
𑒠𑒼𑒮𑒩𑒰𑒏 𑒏𑒵𑒞𑒱 𑒁𑒣𑒢𑒰 𑒢𑒰𑒧 𑒏𑒹𑒪𑒰𑒮𑒿
𑒂𑒏𑒱 𑒠𑒼𑒮𑒩𑒰𑒏 𑒧𑒹𑒯𑒢𑒞𑒱𑒏𑒹𑒿 𑒁𑒣𑒢 𑒢𑒰𑒧 𑒠𑒹𑒪𑒰𑒮𑒿
𑒠𑒼𑒮𑒩𑒰𑒏 𑒣𑓂𑒩𑒞𑒱𑒦𑒰𑒏𑒹𑒿 𑒠𑒥𑒰 𑒏𑓄
𑒏𑒳𑒙𑒲𑒔𑒰𑒪𑒱 𑒏𑓄 𑒂𑒩
𑒦𑒰𑒿𑒑 𑒣𑒲𑒥𑒱 𑒒𑒴𑒩 𑒞𑒩 𑒏𑓄 𑒑𑒼𑒪𑒻𑒮𑒲
𑒏𑒼𑒢𑒰𑒏𑒹𑒿 𑒂𑒿𑒑𑒳𑒩 𑒏𑒰𑒙𑒥 𑒖𑒹 𑒪𑒱𑒐𑒥 𑒥𑒢𑓂𑒢 𑒏𑒩𑒞
𑒞𑒼𑒛𑓃𑒱 𑒠𑒱𑒨𑒾 𑒛𑒰𑒿𑒩, 𑒏𑒰𑒙𑒱 𑒠𑒱𑒨𑒾 𑒣𑒋𑒩
𑒂𑒿𑒐𑒱 𑒢𑒱𑒏𑒰𑒪𑒱 𑒪𑒱𑒁 𑒡𑓄 𑒠𑒱𑒨𑒾 𑒩𑒰𑒪𑒩𑒏 𑒢𑒲𑒔𑒰𑒿𑒧𑒹
𑒣𑒱𑒮𑒲𑒧𑒰𑒪 𑒅𑒚𑒰 𑒠𑒱𑒨𑒾
𑒥𑒛𑓃𑒏𑒰 𑒋𑒪𑒰𑒯𑒹𑒿 𑒮𑒩𑓂𑒖𑒢𑒏 𑒮𑒳𑒐 𑒣𑒋𑒥𑒰𑒪𑒹
(𑒑𑓀𑒑𑒹𑒬𑒏 𑒁𑒥𑒰𑒖 𑒁𑒥𑒻𑒋, 𑒮𑒦 𑒔𑒾𑓀𑒏𑒱 𑒏𑓄 𑒠𑒹𑒐𑓄 𑒪𑒑𑒻 𑒕𑒟𑒱।)

𑒑𑓀𑒑𑒹𑒬𑒏 𑒁𑒥𑒰𑒖:
𑒞𑒿 𑒏𑒲 𑒯𑒰𑒩𑒱 𑒖𑒰𑒃
𑒞𑒿 𑒏𑒲 𑒕𑒼𑒛𑓃𑒱 𑒠𑒱𑒌
𑒃𑒔𑓂𑒕𑒰 𑒖𑒲𑒞𑒞 𑒂𑒏𑒱 𑒖𑒲𑒞𑒞 𑒄𑒩𑓂𑒭𑓂𑒨𑒰
𑒮𑓀𑒏𑒪𑓂𑒣 𑒯𑒧𑒩 𑒖𑒹 𑒌 𑒡𑒰𑒩𑒏𑒹𑒿 𑒧𑒼𑒛𑓃𑒱 𑒠𑒹𑒥
𑒮𑓀𑒏𑒪𑓂𑒣 𑒖𑒲𑒞𑒞 𑒂𑒏𑒱 𑒖𑒲𑒞𑒱 𑒖𑒰𑒋𑒞 𑒒𑒵𑒝𑒰
𑒧𑒳𑒠𑒰 𑒏𑒱𑒕𑒳 𑒄𑒩𑓂𑒭𑓂𑒨𑒰 𑒂 𑒒𑒵𑒝𑒰 𑒁𑒕𑒱 𑒮𑒼𑒗𑒰𑒿 𑒁𑒥𑒻𑒞
𑒄𑒩𑓂𑒭𑓂𑒨𑒰 𑒖𑒹 𑒯𑒧 𑒡𑒰𑒩𑒏𑒹𑒿 𑒢𑒻 𑒧𑒼𑒛𑓃𑒱 𑒣𑒰𑒥𑒲
𑒒𑒵𑒝𑒰 𑒖𑒹 𑒥𑒯𑒻𑒞 𑒩𑒯𑒋 𑒍 𑒍𑒯𑒱𑒢𑒰
𑒍𑒯𑒱𑒢𑒰 𑒏𑒱𑒋 𑒍𑒯𑒴𑒮𑒿 𑒦𑒨𑓀𑒏𑒩 𑒥𑒢𑒱
𑒠𑒲𑒢𑒰-𑒦𑒠𑒩𑒲:
𑒑𑓀𑒑𑒹𑒬…. 𑒠𑒹𑒐𑒴 𑒣𑓂𑒩𑒦𑒰𑒫 𑒅𑒠𑒨𑒢.. 𑒠𑒹𑒐𑒴..

𑒫𑒪𑓂𑒪𑒦𑒰𑒏 𑒁𑒥𑒰𑒖:
𑒮𑓀𑒏𑒪𑓂𑒣 𑒖𑒹 𑒯𑒧 𑒏𑒹𑒢𑒹 𑒕𑒲
𑒃𑒔𑓂𑒕𑒰 𑒖𑒹 𑒁𑒕𑒱 𑒯𑒧𑒩/ 𑒮𑒹 𑒯𑒰𑒩𑒱 𑒖𑒰𑒋
𑒂 𑒖𑒲𑒞𑒱 𑒖𑒰𑒋 𑒄𑒩𑓂𑒭𑓂𑒨𑒰-𑒠𑓂𑒫𑒹𑒭/ 𑒖𑒲𑒞𑒱 𑒖𑒰𑒋 𑒒𑒵𑒝𑒰
𑒯𑒰 𑒯𑒰𑒩𑒥𑒼 𑒏𑒩𑒲 𑒞𑒹𑒢𑒰 𑒦𑓄 𑒏𑓄 𑒖𑒹 𑒪𑒼𑒏 𑒠𑒹𑒐𑒋!/ 𑒖𑒧𑒰𑒢𑒰 𑒠𑒹𑒐𑒋!!
𑒞𑒹𑒢𑒰 𑒏𑓄 𑒯𑒰𑒩𑒋 𑒮𑓀𑒏𑒪𑓂𑒣 𑒯𑒧𑒩/ 𑒃𑒔𑓂𑒕𑒰 𑒯𑒧𑒩

𑒑𑓀𑒑𑒹𑒬𑒏 𑒁𑒥𑒰𑒖:
𑒡𑒰𑒩𑒏𑒹𑒿 𑒩𑒼𑒏𑒱 𑒠𑒹𑒥𑒰𑒏/ 𑒚𑒰𑒜𑓃 𑒦𑓄 𑒖𑒋𑒥𑒰𑒏 𑒮𑒼𑒗𑒰𑒿 𑒍𑒏𑒩
𑒂 𑒧𑒼𑒛𑓃𑒱 𑒠𑒹𑒥𑒰𑒏 𑒮𑓀𑒏𑒪𑓂𑒣 𑒍𑒃 𑒦𑒨𑓀𑒏𑒩 𑒅𑒠𑒝𑓂𑒛 𑒡𑒰𑒩𑒏𑒹𑒿
𑒧𑒳𑒠𑒰 𑒏𑒱𑒕𑒳 𑒂𑒩 𑒄𑒩𑓂𑒭𑓂𑒨𑒰 𑒁𑒕𑒱 𑒮𑒼𑒗𑒰𑒿 𑒁𑒥𑒻𑒞
𑒍 𑒠𑓂𑒫𑒹𑒭 𑒔𑒰𑒯𑒻𑒋 𑒖𑒹 𑒯𑒧𑒩 𑒣𑓂𑒩𑒨𑒰𑒮/ 𑒡𑒰𑒩𑒏𑒹𑒿 𑒧𑒼𑒛𑓃𑒥𑒰𑒏 𑒣𑓂𑒩𑒨𑒰𑒮

𑒫𑒪𑓂𑒪𑒦𑒰𑒏 𑒁𑒥𑒰𑒖:
𑒧𑒼𑒛𑓃𑒪𑒰𑒏 𑒣𑓂𑒩𑒨𑒰𑒮𑒏 𑒥𑒰𑒠 𑒦𑓄 𑒖𑒰𑒋 𑒡𑒰𑒩 𑒂𑒩 𑒦𑒨𑓀𑒏𑒩
𑒣𑒳𑒩𑒰𑒢 𑒪𑒲𑒐𑒣𑒩 𑒔𑒪𑒻𑒞 𑒩𑒯𑒋 𑒦𑓄 𑒂𑒩 𑒁𑒞𑓂𑒨𑒰𑒔𑒰𑒩𑒲
𑒂 𑒯𑒧 𑒖𑒰𑒃 𑒯𑒰𑒩𑒱
𑒂 𑒯𑒰𑒩𑒲 𑒞𑒹𑒢𑒰 𑒦𑓄 𑒏𑓄 𑒖𑒹 𑒪𑒼𑒏 𑒩𑒰𑒐𑒋 𑒧𑒼𑒢
𑒧𑒼𑒢 𑒩𑒰𑒐𑒋 𑒖𑒹 𑒏𑒱𑒨𑒼 𑒠𑒳𑒮𑓂𑒮𑒰𑒯𑒮𑒲 𑒚𑒰𑒜𑓃 𑒦𑓄 𑒑𑒹𑒪 𑒕𑒪𑒱 𑒡𑒰𑒩𑒏 𑒮𑒼𑒗𑒰𑒿
𑒞𑒏𑒩 𑒦𑒹𑒪 𑒄 𑒦𑒨𑓀𑒏𑒩 𑒣𑒩𑒱𑒝𑒰𑒧
𑒖𑒹 𑒪𑒼𑒏 𑒛𑒩𑒰 𑒏𑓄 𑒢𑒻 𑒏𑒩𑒋 𑒤𑒹𑒩 𑒠𑒳𑒮𑓂𑒮𑒰𑒯𑒮
𑒠𑒳𑒮𑓂𑒮𑒰𑒯𑒮 𑒚𑒰𑒜𑓃 𑒯𑒹𑒥𑒰𑒏 𑒅𑒠𑒝𑓂𑒛-𑒁𑒞𑓂𑒨𑒰𑒔𑒰𑒩𑒲 𑒡𑒰𑒩𑒏 𑒮𑒼𑒗𑒰𑒿𑒧𑒹
𑒪𑓄 𑒪𑒲 𑒯𑒧 𑒣𑒞𑒢𑒳𑒏𑒰𑒢/ 𑒂 𑒮𑒹 𑒮𑒳𑒢𑒱 𑒟𑒩𑒟𑒩𑒲 𑒣𑒻𑒮𑒱 𑒖𑒰𑒃 𑒪𑒼𑒏𑒏 𑒯𑒵𑒠𑒨𑒧𑒹
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒚𑒰𑒜𑓃 𑒯𑒧 𑒥𑒳𑒜𑓃𑒱𑒨𑒰 𑒛𑒰𑒯𑒲।

(𑒁𑒥𑒰𑒖 𑒬𑒰𑒢𑓂𑒞 𑒦𑓄 𑒖𑒰𑒃𑒞 𑒁𑒕𑒱, 𑒤𑒹𑒩𑒮𑒿 𑒮𑒦 𑒮𑒰𑒏𑒰𑒏𑓂𑒭 𑒦𑓄 𑒖𑒰𑒃 𑒕𑒟𑒱।)
𑒅𑒠𑒨𑒢:
𑒧𑒳𑒠𑒰 𑒯𑒧 𑒯𑒿𑒮𑒻 𑒕𑒲
𑒯𑒰𑒩𑒱 𑒞𑒿 𑒖𑒰𑒋𑒥 𑒯𑒧 𑒧𑒳𑒠𑒰 𑒯𑒧𑒩 𑒮𑒰𑒡𑒢𑒰𑒮𑒿 𑒖𑒹 𑒩𑒏𑓂𑒞𑒥𑒲𑒖 𑒐𑒮𑒞
𑒮𑒹 𑒋𑒏-𑒋𑒏𑒙𑒰 𑒚𑒼𑒣𑒏 𑒥𑒲𑒂 𑒥𑒢𑒱 𑒖𑒰𑒋𑒞 𑒮𑒯𑒮𑓂𑒩𑒥𑒰𑒜𑓃𑒢𑒱𑒏 𑒗𑒼𑒿𑒙𑒰𑒥𑒪𑒰
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒚𑒰𑒜𑓃 𑒁𑒕𑒱 𑒯𑒧𑒩 𑒄 𑒥𑒳𑒜𑓃𑒱𑒨𑒰 𑒛𑒰𑒯𑒲।
𑒠𑒲𑒢𑒰:
𑒏𑒧𑒪𑒏 𑒧𑒵𑒝𑒰𑒪, 𑒣𑒳𑒩𑒻𑒢𑒱, 𑒏𑒧𑒪𑒑𑒙𑓂𑒙𑒰, 𑒥𑒱𑒮𑒰𑒿𑒜𑓃𑒮𑒿 𑒦𑒩𑒪 𑒐𑒹𑒞 𑒥𑒢𑒞
𑒐𑒹𑒞 𑒖𑒹 𑒕𑒪𑒻 𑒮𑒢𑒑𑒩 𑒨𑒾, 𑒖𑒰𑒯𑒱𑒧𑒹 𑒒𑒵𑒝𑒰𑒏 𑒞𑒩𑒯𑒩𑒱 𑒐𑒳𑒢𑒹𑒪𑒾𑓀 𑒨𑒾
𑒒𑒵𑒝𑒰𑒏 𑒞𑒩𑒯𑒩𑒱 𑒐𑒴𑒢𑒪 𑒍𑒃 𑒐𑒹𑒞𑒧𑒹
𑒏𑒧𑒪𑒏 𑒧𑒵𑒝𑒰𑒪, 𑒣𑒳𑒩𑒻𑒢𑒱, 𑒏𑒧𑒪𑒑𑒙𑓂𑒙𑒰, 𑒥𑒱𑒮𑒰𑒿𑒜𑓃 𑒁𑒕𑒱 𑒦𑒩𑒱 𑒑𑒹𑒪
𑒦𑒠𑒩𑒲:
𑒧𑒳𑒠𑒰 𑒣𑓂𑒩𑒹𑒧𑒏 𑒏𑒧𑒪 𑒁𑒕𑒱 𑒤𑒳𑒪𑒰 𑒑𑒹𑒪।
𑒮𑒯𑒮𑓂𑒩𑒥𑒰𑒜𑓃𑒢𑒱 𑒗𑒼𑒿𑒙𑒰𑒥𑒪𑒰 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒏𑒹𑒪𑒏 𑒄।
𑒫𑒩𑓂𑒠𑓂𑒡𑒧𑒰𑒢:
𑒂 𑒞𑒐𑒢
𑒤𑒻𑒮𑒪𑒰 𑒯𑒹𑒞𑒻 𑒂𑒥
𑒖𑒐𑒢
𑒅𑒢𑒙𑒱 𑒖𑒰𑒃𑒋 𑒪𑒼𑒏
𑒅𑒢𑒙𑒱 𑒖𑒰𑒃 𑒕𑒻 𑒥𑒼𑒪
𑒕𑒢𑒹-𑒕𑒢 𑒥𑒠𑒪𑒱 𑒖𑒰𑒃𑒋
𑒥𑒱𑒔𑒏𑒰𑒥𑒻𑒋 𑒚𑒼𑒩
𑒥𑒼𑒪𑒏 𑒧𑒡𑒳𑒩 𑒫𑒰𑒝𑒲
𑒥𑒼𑒪𑒲-𑒫𑒰𑒝𑒲
𑒥𑒠𑒪𑒱 𑒖𑒰𑒃 𑒕𑒻
𑒥𑒢𑒱 𑒖𑒰𑒃𑒋 𑒥𑒱𑒐𑒰𑒯
𑒑𑒼𑒥𑒩𑒗𑒰𑒩 𑒠𑓄 𑒔𑒧𑒏𑒰𑒥𑒻 𑒕𑒲 𑒮𑓂𑒧𑒵𑒞𑒱𑒏𑒹𑒿
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒚𑒰𑒜𑓃 𑒕𑒪𑒱 𑒞𑒯𑒱𑒨𑒼 𑒯𑒧𑒩 𑒄 𑒥𑒳𑒜𑓃𑒱𑒨𑒰 𑒛𑒰𑒯𑒲।
𑒅𑒠𑒨𑒢:
𑒡𑒰𑒩𑒏𑒹𑒿 𑒩𑒼𑒏𑒥𑒰𑒏 𑒯𑒱𑒮𑓂𑒮𑒏 𑒖𑒏𑒩𑒰 𑒪𑒰𑒑𑒱 𑒑𑒹𑒪 𑒕𑒻
𑒂 𑒍 𑒮𑒦 𑒞𑒏𑒩 𑒫𑒱𑒩𑒳𑒠𑓂𑒡 𑒚𑒼𑒏𑒱 𑒏𑓄 𑒞𑒰𑒪
𑒦𑓄 𑒖𑒰𑒋𑒞 𑒚𑒰𑒜𑓃
𑒂 𑒛𑒩𑒰 𑒖𑒰𑒋𑒞 𑒠𑓂𑒫𑒹𑒭 𑒮𑓂𑒧𑒩𑒝 𑒏𑓄
𑒖𑒹 𑒤𑒹𑒩 𑒩𑒏𑓂𑒞𑒥𑒲𑒖𑒮𑒿 𑒢𑒱𑒏𑒪𑒪 𑒌 𑒮𑒯𑒮𑓂𑒩𑒥𑒰𑒜𑓃𑒢𑒱 𑒮𑒦𑒏 𑒩𑒏𑓂𑒞𑒥𑒲𑒖
𑒋𑒏𑒩 𑒮𑒦𑒏 𑒥𑒲𑒂𑒏 𑒮𑒢𑓂𑒞𑒰𑒢 𑒤𑒹𑒩 𑒂𑒩 𑒥𑒜𑓃𑒱 𑒖𑒰𑒋𑒞 𑒂𑒏𑓂𑒩𑒧𑒝𑒮𑒿
𑒏𑒰𑒩𑒝 𑒮𑓀𑒏𑒪𑓂𑒣 𑒁𑒕𑒱, 𑒃𑒔𑓂𑒕𑒰 𑒁𑒕𑒱 𑒄 𑒮𑒦
𑒡𑒰𑒩𑒏𑒹𑒿 𑒩𑒼𑒏𑒥𑒰𑒏 𑒯𑒱𑒮𑓂𑒮𑒏 𑒖𑒏𑒩𑒰 𑒪𑒰𑒑𑒱 𑒑𑒹𑒪 𑒕𑒻
𑒮𑒦 𑒮𑒧𑓂𑒫𑒹𑒞 𑒮𑓂𑒫𑒩𑒧𑒹:
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒁𑒕𑒱 𑒖𑒹 𑒖𑒏𑒩𑒰 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒁𑒯𑒰𑒿 𑒏𑒯𑒻 𑒕𑒱𑒌।
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒁𑒕𑒱 𑒖𑒹 𑒖𑒏𑒩𑒰 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒁𑒯𑒰𑒿 𑒏𑒯𑒻 𑒕𑒱𑒌।
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒁𑒕𑒱 𑒖𑒹 𑒖𑒏𑒩𑒰 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒁𑒯𑒰𑒿 𑒏𑒯𑒻 𑒕𑒱𑒌।
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒁𑒕𑒱 𑒖𑒹 𑒖𑒏𑒩𑒰 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒁𑒯𑒰𑒿 𑒏𑒯𑒻 𑒕𑒱𑒌।
(𑒪𑒑𑒻𑒋 𑒖𑒹 𑒮𑒦 𑒅𑒛𑓃𑒱𑒨𑒰 𑒩𑒯𑒪 𑒕𑒟𑒱..𑒯𑒥𑒰 𑒞𑒹𑒖 𑒥𑒯𑒻𑒋.. 𑒮𑒦 𑒯𑒰𑒟𑒏 𑒁𑒦𑒱𑒢𑒨𑒮𑒿 𑒂 𑒠𑒹𑒯𑒏 𑒯𑒫𑒰𑒏 𑒫𑒱𑒩𑒳𑒠𑓂𑒡 𑒚𑒰𑒜𑓃 𑒏𑒩𑒥𑒰𑒏 𑒁𑒦𑒱𑒢𑒨𑒮𑒿 𑒥𑒱𑒯𑒰𑒛𑓃𑒱𑒧𑒹 𑒅𑒛𑓃𑒱𑒨𑒹𑒥𑒰𑒏 𑒁𑒦𑒱𑒢𑒨 𑒏𑒩𑒻 𑒕𑒟𑒱। 𑒂𑒮𑓂𑒞𑒹 𑒂𑒮𑓂𑒞𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒋।)






𑒔𑒰𑒩𑒱𑒧 𑒏𑒪𑓂𑒪𑒼𑒪
(𑒧𑓀𑒔𑒣𑒩 𑒁𑒢𑓂𑒯𑒰𑒩 𑒁𑒕𑒱। 𑒢𑒹𑒣𑒟𑓂𑒨𑓂𑒮𑒿 𑒑𑒲𑒞 𑒁𑒥𑒻𑒞 𑒁𑒕𑒱)
𑒏𑒧𑒪𑒰 𑒧𑒻𑒨𑒰 𑒥𑒮𑒞 𑒥𑒛𑓃𑒲 𑒠𑒴𑒩
𑒑𑒧𑒏 𑒪𑒰𑒑𑒹 𑒑𑒹𑓀𑒠𑒰 𑒤𑒴𑒪
𑒏𑒟𑒲 𑒛𑒰𑒪𑒱 𑒪𑒼𑒩𑒯𑒥 𑒥𑒹𑒪𑒲-𑒔𑒧𑒹𑒪𑒲
𑒏𑒟𑒲 𑒛𑒰𑒪𑒱 𑒪𑒼𑒩𑒯𑒥 𑒁𑒩𑒯𑒴𑒪 𑒯𑒹
𑒑𑒧𑒏 𑒪𑒰𑒑𑒹 𑒑𑒹𑓀𑒠𑒰 𑒤𑒴𑒪 𑒏𑒧𑒪𑒰 𑒧𑒻𑒨𑒰.....
𑒏𑒱𑒢𑒏𑒰 𑒔𑒜𑓃𑒰𑒋𑒥 𑒥𑒹𑒪𑒲-𑒔𑒧𑒹𑒪𑒲
𑒏𑒱𑒢𑒏𑒰 𑒔𑒜𑓃𑒰𑒋𑒥 𑒁𑒩𑒯𑒴𑒪
𑒑𑒧𑒏 𑒪𑒰𑒑𑒹 𑒑𑒹𑓀𑒠𑒰 𑒤𑒴𑒪
𑒑𑒧𑒏 𑒪𑒰𑒑𑒹 𑒑𑒹𑓀𑒠𑒰 𑒤𑒴𑒪

𑒏𑒧𑒪𑒰 𑒔𑒜𑓃𑒰𑒋𑒥 𑒥𑒹𑒪𑒲-𑒔𑒧𑒹𑒪𑒲
𑒏𑒼𑒨𑒪𑒰 𑒔𑒜𑓃𑒰𑒋𑒥 𑒁𑒩𑒯𑒴𑒪,
𑒑𑒧𑒏 𑒪𑒰𑒑𑒹 𑒑𑒹𑓀𑒠𑒰 𑒤𑒴𑒪 𑒯𑒹
𑒏𑒧𑒪𑒰...𑒏𑒱𑒢𑒏𑒰 𑒮𑒿 𑒧𑒰𑓀𑒑𑒥 𑒁𑒢-𑒡𑒢 𑒮𑒼𑒢𑒧𑒰
𑒏𑒱𑒢𑒏𑒰𑒮𑒿 𑒧𑒰𑓀𑒑𑒥 𑒮𑒼𑒯𑒰𑒑 𑒑𑒹 𑒮𑒼𑒯𑒰𑒑 𑒑𑒹
𑒧𑒪𑒯𑒱𑒢𑒨𑒰𑒿 𑒠𑒹𑒐𑒻 𑒧𑒹 𑒤𑒴𑒪 𑒫𑒩 𑒪𑒰𑒪 𑒯𑒹
𑒮𑒮𑒱𑒨𑒰 𑒮𑒿 𑒧𑒰𑓀𑒑𑒥 𑒁𑒢-𑒡𑒢 𑒮𑒼𑒢𑒧𑒰
𑒧𑒰𑒞𑒻𑒩 𑒮𑒿 𑒧𑒰𑓀𑒑𑒥 𑒮𑒼𑒯𑒰𑒑 𑒑𑒹
𑒧𑒪𑒯𑒱𑒢𑒨𑒰𑒿 𑒠𑒹𑒐𑒻 𑒧𑒹 𑒤𑒴𑒪 𑒫𑒩 𑒪𑒰𑒪....।

(𑒧𑓀𑒔𑒣𑒩 𑒣𑓂𑒩𑒏𑒰𑒬 𑒁𑒥𑒻𑒋। 𑒋𑒏 𑒠𑒱𑒮 𑒧𑒞𑓂𑒞𑒫𑒩𑓂𑒝𑒲𑒣𑒩 𑒠𑒲𑒢𑒰 𑒂 𑒠𑒼𑒮𑒩 𑒠𑒱𑒮 𑒧𑒞𑓂𑒞𑒫𑒩𑓂𑒝𑒲𑒣𑒩 𑒦𑒠𑒩𑒲 𑒕𑒟𑒱, 𑒠𑒲𑒢𑒰 𑒦𑒰𑒞𑒜𑒰𑒪𑒰 𑒣𑒼𑒐𑒩𑒱 𑒂 𑒦𑒠𑒩𑒲 𑒮𑒰𑒑𑒜𑒰𑒪𑒰 𑒣𑒼𑒐𑒩𑒱𑒏 𑒏𑒰𑒞𑒧𑒹 𑒕𑒟𑒱। 𑒋𑒏 𑒠𑒱𑒮 𑒩𑓀𑒑𑒬𑒲𑒩𑓂𑒭𑒣𑒩 𑒅𑒠𑒨𑒢 𑒂 𑒠𑒼𑒮𑒩 𑒠𑒱𑒮 𑒩𑓀𑒑𑒬𑒲𑒩𑓂𑒭𑒣𑒩 𑒫𑒩𑓂𑒠𑓂𑒡𑒧𑒰𑒢 𑒕𑒟𑒱 । 𑒩𑓀𑒑𑒣𑒲𑒚 𑒐𑒰𑒪𑒲 𑒁𑒕𑒱।)

𑒫𑒩𑓂𑒠𑓂𑒡𑒧𑒰𑒢: (𑒅𑒠𑒨𑒢𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑓄) 𑒡𑒰𑒩𑒏 𑒏𑒰𑒞𑒧𑒹 𑒒𑒩 𑒥𑒢𑒹𑒢𑒹 𑒕𑒲 𑒯𑒧 𑒂 𑒮𑒰𑒿𑒣𑒥𑒪𑒰 𑒒𑒩𑒧𑒹 𑒩𑒯𑒻 𑒕𑒲 𑒁𑒯𑒰𑒿 𑒂𑒔𑒰𑒩𑓂𑒨 𑒅𑒠𑒨𑒢?
𑒅𑒠𑒨𑒢:: 𑒡𑒰𑒩𑒏 𑒏𑒰𑒞𑒧𑒹 𑒢𑒱𑒫𑒰𑒮 𑒏𑒹𑒢𑒱𑒯𑒰𑒩 𑒂 𑒂 𑒮𑒰𑒿𑒣𑒥𑒪𑒰 𑒒𑒩𑒧𑒹 𑒢𑒱𑒫𑒰𑒮 𑒏𑒹𑒢𑒱𑒯𑒰𑒩𑒏𑒹𑒿 𑒔𑒻𑒢 𑒏𑒞𑓄? 𑒫𑒩𑓂𑒠𑓂𑒡𑒧𑒰𑒢, 𑒦𑒰𑒞𑒜𑒰𑒪𑒰 𑒣𑒼𑒐𑒩𑒱 𑒂 𑒮𑒰𑒑𑒜𑒰𑒪𑒰 𑒣𑒼𑒐𑒩𑒱𑒣𑒩 𑒠𑒲𑒢𑒰 𑒦𑒠𑒩𑒲 𑒕𑒟𑒱 𑒢𑒹?
𑒠𑒲𑒢𑒰: (𑒔𑒱𑒏𑒛𑓃𑒱 𑒏𑓄) 𑒦𑒰𑒞𑒜𑒰𑒪𑒰 𑒣𑒼𑒐𑒩𑒱𑒣𑒩, 𑒖𑒞𑒋 𑒦𑒲𑒧 𑒦𑒰𑒞 𑒩𑒐𑒻𑒞 𑒩𑒯𑒟𑒱? 𑒯𑒧 𑒕𑒲 𑒠𑒲𑒢𑒰, 𑒋𑒞𑓄 𑒦𑒰𑒞𑒜𑒰𑒪𑒰 𑒣𑒼𑒐𑒩𑒱𑒣𑒩।
𑒦𑒠𑒩𑒲: (𑒔𑒱𑒏𑒛𑓃𑒱 𑒏𑓄) 𑒮𑒰𑒑𑒜𑒰𑒪𑒰 𑒣𑒼𑒐𑒩𑒱, 𑒖𑒞𑒋 𑒦𑒲𑒧 𑒮𑒰𑒑 𑒩𑒐𑒻𑒞 𑒩𑒯𑒟𑒱। 𑒯𑒧 𑒕𑒲 𑒦𑒠𑒩𑒲, 𑒋𑒞𑓄 𑒮𑒰𑒑𑒜𑒰𑒪𑒰 𑒣𑒼𑒐𑒩𑒱𑒏 𑒏𑒰𑒞𑒧𑒹।
𑒅𑒠𑒨𑒢: 𑒯𑒿, 𑒂 𑒮𑒱𑒧𑒪𑒫𑒢 𑒮𑒹𑒯𑒼 𑒖𑒰𑒋 𑒣𑒛𑓃𑒞 𑒏𑒏𑒩𑒼, 𑒍𑒞𑓄 𑒏𑒥𑓂𑒖𑒰 𑒕𑒢𑓂𑒯𑒱 𑒂𑒔𑒰𑒩𑓂𑒨 𑒮𑒩𑒦𑒏।
𑒦𑒠𑒩𑒲: 𑒯𑒿 𑒫𑒋𑒯 𑒮𑒹𑒧𑒰𑒣𑒳𑒩 𑒕𑒲 𑒮𑒱𑒧𑒪𑒫𑒢 𑒖𑒞𑒋 𑒁𑒩𑓂𑒖𑒳𑒢 𑒁𑒣𑒢 𑒁𑒮𑓂𑒞𑓂𑒩-𑒬𑒮𑓂𑒞𑓂𑒩 𑒁𑒖𑓂𑒘𑒰𑒞𑒫𑒰𑒮 𑒏𑒰𑒪𑒧𑒹 𑒢𑒳𑒏𑒹𑒢𑒹 𑒩𑒯𑒟𑒱?
𑒅𑒠𑒨𑒢: 𑒯𑒿, 𑒋𑒏𑒙𑒰 𑒂𑒩 𑒨𑒳𑒠𑓂𑒡 𑒬𑒳𑒩𑒴 𑒦𑓄 𑒑𑒹𑒪 𑒁𑒕𑒱।
𑒫𑒩𑓂𑒠𑓂𑒡𑒧𑒰𑒢: 𑒧𑒳𑒠𑒰 𑒄 𑒨𑒳𑒠𑓂𑒡 𑒬𑒰𑒮𑓂𑒞𑓂𑒩𑒰𑒩𑓂𑒟𑒮𑒿 𑒢𑒻 𑒖𑒲𑒞𑒪 𑒖𑒰 𑒮𑒏𑒻𑒋 𑒂𑒔𑒰𑒩𑓂𑒨 𑒅𑒠𑒨𑒢। (𑒩𑓀𑒑𑒣𑒲𑒚 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞।) 𑒠𑒹𑒐𑒴 𑒍𑒞𑓄 𑒮𑒦 𑒏𑒱𑒕𑒳 𑒪𑒰𑒑𑒱 𑒩𑒯𑒪 𑒁𑒕𑒱 𑒐𑒰𑒪𑒲 𑒐𑒰𑒪𑒲, 𑒧𑒳𑒠𑒰 𑒁𑒕𑒱 𑒢𑒳𑒏𑒰𑒋𑒪 𑒬𑒮𑓂𑒞𑓂𑒩, 𑒒𑒵𑒝𑒰, 𑒄𑒩𑓂𑒭𑓂𑒨𑒰-𑒠𑓂𑒫𑒹𑒭 𑒂..
𑒅𑒠𑒨𑒢: (𑒥𑒲𑒔𑒧𑒹 𑒙𑒼𑒏𑒻𑒞).. 𑒂 𑒂𑒔𑒰𑒩𑓂𑒨 𑒮𑒩𑒦। (𑒩𑓀𑒑𑒣𑒲𑒚𑒏 𑒠𑒴𑒩 𑒦𑒰𑒑 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞।) 𑒍𑓄𑓄𑓄𑓄𑓄 𑒕𑒲 𑒚𑒰𑒏𑒳𑒩𑒑𑓀𑒖, 𑒦𑒲𑒧 𑒚𑒰𑒏𑒳𑒩 𑒧𑒰𑒢𑒹 𑒦𑒢𑒮𑒱𑒨𑒰 𑒥𑒢𑒱 𑒮𑒧𑒻 𑒏𑒙𑒢𑒹 𑒩𑒯𑒟𑒱, 𑒍𑒞𑒻 𑒍 𑒏𑒲𑒔𑒏 𑒫𑒡 𑒏𑒹𑒢𑒹 𑒩𑒯𑒟𑒱।
𑒦𑒠𑒩𑒲: (𑒯𑒰𑒟 𑒅𑒚𑒰 𑒏𑓄) 𑒒𑒵𑒝𑒰𑒏 𑒫𑒡 𑒯𑒋𑒞 𑒂𑒥..
𑒠𑒲𑒢𑒰: (𑒯𑒰𑒟 𑒅𑒚𑒰 𑒏𑓄) 𑒁𑒫𑒬𑓂𑒨 𑒦𑒠𑒩𑒲…
𑒦𑒠𑒩𑒲: 𑒁𑒑𑒛𑓃𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩
𑒠𑒲𑒢𑒰: 𑒠𑒱𑒢𑒧𑒹 𑒏𑒾𑒂 𑒠𑒹𑒐𑒱 𑒏𑓄 𑒛𑒹𑒩𑒰𑒃, 𑒩𑒰𑒞𑒱𑒧𑒹 𑒢𑒠𑒲 𑒯𑒹𑒪𑒱 𑒖𑒰𑒃।
𑒦𑒠𑒩𑒲: (𑒩𑓀𑒑𑒣𑒲𑒚 𑒠𑒱𑒮 𑒂𑓀𑒑𑒳𑒩 𑒠𑒹𑒐𑒥𑒻𑒞) 𑒍𑒞𑒋 𑒧𑒢𑒱𑒯𑒰𑒩𑒲𑒧𑒹 𑒬𑓂𑒩𑒲𑒏𑒵𑒭𑓂𑒝𑒏 𑒎𑓀𑒚𑒲𑒏 𑒧𑒝𑒱 𑒯𑒹𑒩𑒰 𑒑𑒹𑒪 𑒕𑒪𑒢𑓂𑒯𑒱।
𑒅𑒠𑒨𑒢: (𑒯𑒰𑒟 𑒂 𑒧𑒳𑒿𑒯 𑒆𑒣𑒩 𑒅𑒚𑒰 𑒏𑓄 𑒔𑒱𑒏𑒩𑒱 𑒏𑓄) 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯। 𑒁𑒯𑒰𑒿 𑒮𑒦𑒏𑒹𑒿 𑒏𑒰𑒑𑒔𑒏 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒯 𑒥𑒢𑒰𑒥𑒻𑒥𑒪𑒰 𑒂𑒔𑒰𑒩𑓂𑒨 𑒮𑒩𑒦𑒏 𑒏𑒰𑒙 𑒂𑒥 𑒖𑒰 𑒏𑓄 𑒦𑒹𑒙𑒪 𑒁𑒕𑒱.. 𑒯𑒹𑒩𑒰𑒋𑒪 𑒧𑒝𑒱, 𑒄 𑒮𑓀𑒏𑒹𑒞 𑒅𑒪𑓂𑒏𑒰𑒧𑒳𑒐 𑒣𑒮𑒰𑒩𑒱 𑒠𑒱𑒨𑒾 𑒮𑒦 𑒚𑒰𑒧, 𑒚𑒰𑒧-𑒚𑒰𑒧.. 𑒖𑒹 𑒦𑒹𑒙𑒞𑒻 𑒏𑒏𑒩𑒼.. 𑒂 𑒥𑒱𑒮𑒩𑒰𑒃𑒨𑒼 𑒏𑓄 𑒮𑓂𑒧𑒩𑒝 𑒦𑓄 𑒖𑒰𑒋𑒞 𑒍।
(𑒢𑒹𑒣𑒟𑓂𑒨𑒮𑒿 𑒑𑒲𑒞 𑒁𑒥𑒻𑒞 𑒁𑒕𑒱। 𑒮𑒦 𑒮𑓂𑒟𑒱𑒩 𑒦𑓄 𑒖𑒰𑒃 𑒕𑒟𑒱।)
𑒏𑒙𑒥𑒻 𑒧𑒹 𑒮𑒼𑒢𑒰 𑒮𑒳𑒞𑒩𑒱𑒨𑒰 𑒥𑒱𑒢𑒥𑒻 𑒗𑒳𑒧𑒩𑒱 𑒖𑒰𑒪 𑒯𑒹
𑒖𑒰𑒪 𑒤𑒩𑒱-𑒤𑒩𑒱 𑒏𑒧𑒪𑒰 𑒋𑒪𑒐𑒱𑒢
𑒮𑒢-𑒗𑒳𑒢 𑒪𑒰𑒑𑒻 𑒑𑒼𑒯𑒥𑒩𑒱𑒨𑒰
𑒏𑒯𑒰𑒿 𑒑𑒹𑒪𑒲 𑒣𑒩𑒪𑒼𑒦𑒱𑒨𑒰 𑒮𑒹𑒫𑒏
𑒮𑒳𑒢 𑒪𑒑𑒻 𑒑𑒼𑒯𑒥𑒩𑒱𑒨𑒰 𑒯𑒹𑓄𑓄
𑒏𑒙𑒥𑒻......
𑒖𑒰𑒪 𑒤𑒩𑒱-𑒤𑒩𑒱 𑒑𑒰𑓀𑒑𑒼 𑒋𑒪𑒐𑒱𑒢
𑒩𑒴𑒢-𑒗𑒳𑒢 𑒪𑒑𑒻 𑒑𑒼𑒯𑒥𑒩𑒱𑒨𑒰 𑒯𑒹
𑒏𑒯𑒰𑒿 𑒑𑒹𑒪𑒲 𑒣𑒩𑒪𑒼𑒦𑒱𑒨𑒰 𑒮𑒹𑒫𑒏,
𑒮𑒳𑒢 𑒪𑒑𑒻 𑒑𑒼𑒯𑒥𑒩𑒱𑒨𑒰 𑒯𑒹
𑒮𑒳𑒢 𑒪𑒑𑒻 𑒑𑒼𑒯𑒥𑒩𑒱𑒨𑒰 𑒯𑒹

𑒏𑒙𑒥𑒻.........
𑒖𑒰𑒪 𑒤𑒩𑒱-𑒤𑒩𑒱 𑒧𑒰𑒞𑒻𑒩 𑒋𑒪𑒐𑒱𑒢
𑒩𑒴𑒢-𑒗𑒳𑒢 𑒪𑒑𑒻 𑒑𑒼𑒯𑒥𑒩𑒱𑒨𑒰 𑒯𑒹
𑒏𑒯𑒰𑒿 𑒑𑒹𑒪𑒲 𑒣𑒩𑒪𑒼𑒦𑒱𑒨𑒰 𑒮𑒹𑒫𑒏
𑒮𑒳𑒢 𑒪𑒑𑒻 𑒑𑒼𑒯𑒥𑒩𑒱𑒨𑒰 𑒯𑒹
𑒏𑒙𑒥𑒻.....
𑒥𑒱𑒢𑒥𑒻 𑒗𑒳𑒧𑒩𑒱 𑒖𑒰𑒪 𑒯𑒹।
(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।𑒤𑒹𑒩 𑒃𑒖𑒼𑒞 𑒯𑒼𑒃𑒞 𑒁𑒕𑒱 𑒂 𑒂𑒔𑒰𑒩𑓂𑒨 𑒮𑒩𑒦 𑒫𑒱𑒏𑓂𑒭𑒱𑒣𑓂𑒞 𑒁𑒫𑒮𑓂𑒟𑒰𑒧𑒹 𑒧𑒳𑒐𑓂𑒨 𑒧𑓀𑒔𑒣𑒩 𑒁𑒥𑒻 𑒕𑒟𑒱।)

𑒂𑒔𑒰𑒩𑓂𑒨 𑒮𑒩𑒦: (𑒧𑓀𑒔𑒮𑒿 𑒥𑒰𑒯𑒩 𑒣𑒰𑒕𑒴 𑒏𑒰𑒞 𑒥𑒼𑒢 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞।) 𑒄 𑒥𑒿𑒮𑒥𑒱𑒙𑓂𑒙𑒲 𑒋𑒞𑒹𑒏 𑒣𑒰𑒞𑒩 𑒏𑒱𑒋 𑒦𑓄 𑒑𑒹𑒪 𑒁𑒕𑒱। 𑒌𑒧𑒹 𑒮𑒿 𑒏𑒼𑒢𑒼 𑒁𑒥𑒰𑒖 𑒢𑒻 𑒁𑒥𑒻 𑒕𑒪𑒻, 𑒧𑒳𑒠𑒰 𑒂𑒥 𑒄 𑒑𑒲𑒞 𑒣𑒯𑒱𑒪 𑒥𑒹𑒩 𑒋𑒏𑒩𑒰 𑒔𑒲𑒛𑓃𑒱 𑒏𑓄 𑒂𑒥𑒱 𑒩𑒯𑒪 𑒁𑒕𑒱। 𑒄 𑒏𑒼𑒢𑒰 𑒩𑒼𑒏𑒱 𑒮𑒏𑒞 𑒅𑒪𑓂𑒏𑒰𑒧𑒳𑒐𑒏𑒹𑒿..𑒏𑒼𑒢𑒰 𑒩𑒼𑒏𑒱 𑒮𑒏𑒞?..(𑒚𑒧𑒏𑒱 𑒏𑓄 𑒣𑒰𑒕𑒴 𑒠𑒱𑒮 𑒞𑒰𑒏𑒱 𑒏𑓄) 𑒬𑒱𑒭𑓂𑒨..(𑒤𑒹𑒩 𑒚𑒧𑒏𑒱 𑒏𑓄) 𑒧𑒳𑒠𑒰 𑒄 𑒬𑒱𑒭𑓂𑒨 𑒮𑒦 𑒞𑒿 𑒏𑒼𑒢𑒼 𑒖𑒼𑒏𑒩𑒏 𑒁𑒕𑒱𑒨𑒹 𑒢𑒻। 𑒄 𑒮𑒦 𑒏𑒼𑒢𑒰 𑒏𑓄 𑒩𑒼𑒏𑒱 𑒮𑒏𑒞 𑒅𑒪𑓂𑒏𑒰𑒧𑒳𑒐𑒏𑒹𑒿? 𑒄 𑒮𑒦 𑒞𑒿 𑒩𑒙𑒢𑓂𑒞 𑒫𑒱𑒠𑓂𑒨𑒰𑒏 𑒣𑒰𑒪𑒏 𑒮𑒦 𑒁𑒕𑒱..𑒂 𑒮𑓂𑒞𑓂𑒩𑒲𑒏 𑒣𑓂𑒩𑒞𑒱𑒥𑒢𑓂𑒡 𑒔𑒾𑒣𑒰𑒛𑓃𑒱 𑒂 𑒙𑒼𑒪𑒧𑒹 𑒏𑓄 𑒠𑒹𑒢𑒹 𑒕𑒱𑒌 𑒣𑒯𑒱𑒢𑒯𑒱𑒨𑒹𑒮𑒿.. 𑒫𑒋𑒯 𑒮𑒦 𑒑𑒲𑒞 𑒑𑒰𑒥𑒱 𑒩𑒯𑒪 𑒁𑒕𑒱... 𑒄 𑒮𑒦 𑒞𑒿 𑒅𑒪𑓂𑒏𑒰𑒧𑒳𑒐 𑒥𑒳𑒗𑒥𑒹 𑒑𑒳𑒢𑒥𑒹 𑒢𑒻 𑒏𑒩𑒞 𑒞𑒿 𑒏𑒼𑒢𑒰 𑒏𑓄 𑒩𑒼𑒏𑒱 𑒮𑒏𑒞?
(𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒂𑒔𑒰𑒩𑓂𑒨 𑒮𑒱𑓀𑒯𑒏 𑒣𑓂𑒩𑒫𑒹𑒬।)
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒂𑒔𑒰𑒩𑓂𑒨 𑒮𑒩𑒦, 𑒥𑒯𑒳𑒞 𑒦𑒹𑒪 𑒏𑒪𑓂𑒣𑒢𑒰, 𑒟𑒰𑒏𑒱 𑒑𑒹𑒪 𑒕𑒲 𑒯𑒧।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒂𑒔𑒰𑒩𑓂𑒨 𑒮𑒩𑒦, 𑒏𑒪𑓂𑒣𑒢𑒰 𑒐𑒞𑒧। 𑒄 𑒖𑒰𑒠𑒴 𑒐𑒞𑒧, 𑒄 𑒥𑒿𑒮𑒥𑒱𑒙𑓂𑒙𑒲𑒏 𑒥𑒹𑒜𑓃 𑒐𑒞𑒧 𑒦𑒹𑒢𑒹 𑒂𑒥 𑒢𑒯𑒱𑒨𑒹 𑒯𑒧𑒩, 𑒢𑒯𑒱𑒨𑒹 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩𑒏, 𑒢𑒯𑒱𑒨𑒹 𑒁𑒯𑒰𑒿𑒏, 𑒢𑒯𑒱𑒨𑒹 𑒑𑓀𑒑𑒹𑒬𑒏, 𑒢𑒯𑒱𑒨𑒹 𑒫𑒪𑓂𑒪𑒦𑒰𑒏, 𑒢𑒯𑒱𑒨𑒹 𑒫𑒩𑓂𑒠𑓂𑒡𑒧𑒰𑒢𑒏, 𑒢𑒯𑒱𑒨𑒹 𑒅𑒠𑒨𑒢𑒏, 𑒢𑒯𑒱𑒨𑒹 𑒠𑒲𑒢𑒰𑒏 𑒂 𑒢𑒯𑒱𑒨𑒹 𑒦𑒠𑒩𑒲𑒏 𑒁𑒮𑓂𑒞𑒱𑒞𑓂𑒫 𑒥𑒰𑒿𑒔𑒪।
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: 𑒫𑒵𑒢𑓂𑒠𑒰𑒫𑒢 𑒥𑒼𑒢 𑒥𑒢𑒱 𑒑𑒹𑒪 𑒄 𑒥𑒿𑒮𑒥𑒱𑒙𑓂𑒙𑒲। (𑒥𑒰𑒙 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞) 𑒋𑒞𑓄 𑒂𑒥𑒻𑒥𑒪𑒰 𑒩𑒮𑓂𑒞𑒰 𑒄 𑒥𑒰𑒙𑒼 𑒥𑒯𑒱𑒢 𑒧𑒠𑒞𑒱 𑒏𑒹𑒢𑒰𑒃 𑒬𑒳𑒩𑒴 𑒏𑓄 𑒠𑒹𑒢𑒹 𑒁𑒕𑒱 𑒫𑒪𑓂𑒪𑒦𑒰𑒏। 𑒏𑒰𑒕𑒳𑒏 𑒐𑒼𑒣𑒛𑓃𑒲𑒧𑒹 𑒮𑒩𑒱𑒮𑒫𑒏 𑒞𑒹𑒪𑒧𑒹 𑒥𑒰𑒞𑒲 𑒩𑒰𑒐𑒱 𑒥𑒱𑒨𑒰𑒯𑒏 𑒠𑒲𑒣 𑒥𑒢𑒰𑒍𑒪 𑒑𑒹𑒪 𑒕𑒪𑒻 𑒫𑒪𑓂𑒪𑒦𑒰 𑒪𑒹𑒪। 𑒏𑒣𑒼𑒞 𑒩𑒴𑒣𑒧𑒹 𑒥𑒱𑒡-𑒥𑒱𑒡𑒰𑒞𑒰 𑒂𑒥𑒱 𑒑𑒹𑒪 𑒕𑒟𑒱। (𑒢𑒹𑒣𑒟𑓂𑒨𑒮𑒿 𑒮𑒰𑒿𑒃-𑒮𑒰𑒿𑒃 𑒏𑒩𑒻𑒞 𑒁𑒥𑒰𑒖 𑒁𑒥𑒻𑒋। 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒏𑒰𑒢 𑒣𑒰𑒟𑒱 𑒮𑒳𑒢𑒻 𑒕𑒟𑒱।) 𑒮𑒳𑒢𑒴 𑒄 𑒮𑓂𑒫𑒩। 𑒮𑓂𑒫𑒣𑓂𑒢𑒪𑒼𑒏𑒧𑒹 𑒫𑒱𑒔𑒩𑒝𑒏 𑒠𑒱𑒢 𑒐𑒞𑒧 𑒦𑒹𑒪।
𑒂𑒔𑒰𑒩𑓂𑒨 𑒮𑒱𑓀𑒯: (𑒁𑒏𑒰𑒮 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞) 𑒯𑒩𑒱𑒨𑒩 𑒣𑒰𑒿𑒐𑒱 𑒂 𑒪𑒰𑒪 𑒚𑒼𑒩𑒥𑒪𑒰 𑒄 𑒮𑒳𑒑𑓂𑒑𑒰𑒏 𑒖𑒼𑒛𑓃𑒲, 𑒪𑒙𑒣𑒙𑒱𑒨𑒰 𑒮𑒳𑒑𑓂𑒑𑒰𑒏𑒹𑒿 𑒠𑒹𑒐𑒴, (𑒁𑒏𑒰𑒮𑒧𑒹 𑒠𑒼𑒮𑒩 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞) 𑒌 𑒣𑓂𑒩𑒹𑒧 𑒮𑒐𑒰 𑒧𑒼𑒩𑒏 𑒖𑒼𑒛𑓃𑒲 𑒠𑒹𑒐𑒴, 𑒥𑒱𑒠𑒰 𑒦𑓄 𑒑𑒹𑒪 𑒁𑒕𑒱 𑒌 𑒫𑒵𑒢𑓂𑒠𑒰𑒫𑒢 𑒪𑒹𑒪।
𑒂𑒔𑒰𑒩𑓂𑒨 𑒮𑒩𑒦: (𑒂𑒔𑒰𑒩𑓂𑒨 𑒮𑒱𑓀𑒯𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒕𑒱𑒢𑓂𑒢𑒧𑒮𑓂𑒞𑒰𑒏 𑒏𑒙𑒪 𑒧𑒴𑒛𑓃𑒲𑒥𑒪𑒰 𑒡𑒛𑓃, 𑒍 𑒧𑒴𑒛𑓃𑒲 𑒡𑒛𑓃𑒮𑒿 𑒐𑒮𑒻𑒥𑒪𑒰 𑒥𑒱𑒔𑒏𑒰 𑒧𑒼𑒙𑒏𑒰 𑒡𑒰𑒩𑒏𑒹𑒿 𑒣𑒲𑒥𑒻𑒋.. 𑒬𑒼𑒢𑒱𑒞𑒏 𑒧𑒼𑒙𑒏𑒰 𑒡𑒰𑒩𑒏𑒹𑒿.. 𑒍 𑒢𑒲𑒔𑒰𑒿 𑒐𑒮𑒪 𑒧𑒴𑒛𑓃𑒲, 𑒍 𑒐𑒮𑒪 𑒧𑒴𑒛𑓃𑒲 𑒯𑒧 𑒥𑒢𑒱 𑒑𑒹𑒪 𑒕𑒲 𑒂𑒔𑒰𑒩𑓂𑒨 𑒮𑒱𑓀𑒯….. 𑒢𑒻 𑒯𑒰𑒩𑒥 𑒯𑒧.. 𑒯𑒋𑒞 𑒫𑒱𑒮𑓂𑒧𑒩𑒝.. 𑒦𑒻𑒨𑒹 𑒑𑒹𑒪 𑒁𑒕𑒱 𑒫𑒱𑒮𑓂𑒧𑒩𑒝..
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒂 𑒠𑒴𑒙𑒰 𑒂𑒩 𑒡𑒰𑒩 𑒠𑒴𑒙𑒰 𑒠𑒳𑒢𑒴 𑒏𑒰𑒞𑒧𑒹 𑒚𑒰𑒜𑓃 𑒖𑒼𑒑𑒱𑒢 𑒣𑒲𑒥𑒻 𑒕𑒻 𑒂𑒔𑒰𑒩𑓂𑒨 𑒮𑒩𑒦। 𑒠𑒲𑒢𑒰, 𑒦𑒠𑒩𑒲, 𑒍𑒃 𑒠𑒳𑒢𑒴 𑒖𑒼𑒑𑒱𑒢𑒏𑒹𑒿 𑒧𑒼𑒯𑒱 𑒪𑒹𑒪𑒢𑓂𑒯𑒱, 𑒖𑒹𑒢𑒰 𑒧𑒼𑒯𑒱 𑒪𑒹𑒢𑒹 𑒩𑒯𑒟𑒱 𑒍 𑒖𑒱𑒩𑒱𑒨𑒰 𑒪𑒼𑒯𑒰𑒩𑒱𑒢 𑒂 𑒯𑒱𑒩𑒱𑒨𑒰 𑒞𑒧𑒼𑒪𑒱𑒢𑒏𑒹𑒿 ।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒃𑒔𑓂𑒕𑒰 𑒋𑒏𑒙𑒰 𑒧𑒬𑒲𑒢 𑒕𑒲। 𑒮𑒞𑓂𑒨𑒏 𑒂 𑒃𑒞𑒱𑒯𑒰𑒮𑒏 𑒮𑒞𑓂𑒨𑒞𑒰 𑒧𑒰𑒞𑓂𑒩 𑒂𑒦𑒰𑒮𑒲..
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒮𑒞𑓂𑒨 𑒂 𑒂𑒦𑒰𑒮𑒲𑒏 𑒥𑒲𑒔 𑒦𑒹𑒠 𑒧𑒹𑒙𑒰 𑒠𑒹𑒢𑒹 𑒩𑒯𑒋 𑒄 𑒥𑒿𑒮𑒥𑒱𑒙𑓂𑒙𑒲।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒁𑒔𑒹𑒞𑒢𑒞𑒰 𑒔𑒹𑒞𑒢𑒰 𑒥𑒢𑒱 𑒑𑒹𑒪। 𑒍𑒏𑒩 𑒦𑒰𑒭𑒰 𑒁𑒕𑒱 𑒅𑒪𑓂𑒏𑒰𑒧𑒳𑒐।
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒂𑒔𑒰𑒩𑓂𑒨 𑒮𑒩𑒦, 𑒁𑒯𑒰𑒿𑒏 𑒬𑒱𑒏𑓂𑒭𑒰 𑒣𑒠𑓂𑒡𑒞𑒱𑒧𑒹 𑒏𑒱𑒕𑒳 𑒦𑒰𑒫 𑒂 𑒮𑒼𑒔 𑒫𑓀𑒔𑒱𑒞 𑒩𑒯𑒋।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒢𑒱𑒩𑒢𑓂𑒞𑒩𑒞𑒰𑒏 𑒫𑒱𑒩𑒼𑒡 𑒏𑒩𑒻𑒋 𑒅𑒪𑓂𑒏𑒰𑒧𑒳𑒐।
𑒂𑒔𑒰𑒩𑓂𑒨 𑒮𑒩𑒦: (𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒏 𑒥𑒲𑒔𑒧𑒹 𑒖𑒰 𑒮𑒼𑒗𑒰𑒿 𑒥𑒖𑒻𑒞) 𑒮𑒧𑒞𑒰𑒏 𑒪𑒑𑒏 𑒬𑒥𑓂𑒠 𑒁𑒮𑒧𑒞𑒰, 𑒢𑓂𑒨𑒰𑒨𑒏 𑒪𑒑𑒏 𑒬𑒥𑓂𑒠 𑒁𑒕𑒱 𑒁𑒢𑓂𑒨𑒰𑒨 𑒂 𑒫𑓀𑒔𑒱𑒞𑒏 𑒪𑒑𑒏 𑒬𑒥𑓂𑒠 𑒁𑒕𑒱 𑒣𑓂𑒩𑒰𑒣𑓂𑒞𑒱।
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒑𑒰𑒿 𑒥𑒜𑓃𑒱 𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒢𑒻 𑒂𑒔𑒰𑒩𑓂𑒨, 𑒄 𑒁𑒯𑒰𑒿𑒏 𑒠𑒧𑒱𑒞 𑒏𑒩𑒻𑒥𑒪𑒰 𑒬𑒱𑒏𑓂𑒭𑒰 𑒣𑒠𑓂𑒡𑒞𑒱 𑒁𑒕𑒱, 𑒋𑒏𑒩 𑒫𑒱𑒩𑒼𑒡 𑒏𑒩𑒻𑒞 𑒁𑒕𑒱 𑒅𑒪𑓂𑒏𑒰𑒧𑒳𑒐।
𑒂𑒔𑒰𑒩𑓂𑒨 𑒮𑒩𑒦: (𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒏 𑒥𑒲𑒔𑒧𑒹 𑒖𑒰 𑒮𑒼𑒗𑒰𑒿 𑒥𑒖𑒻𑒞) 𑒆𑒿𑒔 𑒮𑓂𑒟𑒰𑒢𑒏 𑒪𑒼𑒏𑒏𑒹𑒿 𑒁𑒯𑒰𑒿 𑒮𑒦 𑒢𑒲𑒔𑒰𑒿 𑒂𑒢𑓄 𑒔𑒰𑒯𑒻 𑒕𑒲 𑒂 𑒢𑒱𑒔𑒳𑒪𑒏𑒰𑒏𑒹𑒿 𑒆𑒣𑒩।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒑𑒰𑒿 𑒥𑒜𑓃𑒱 𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒁𑒯𑒰𑒿𑒏 𑒬𑒱𑒏𑓂𑒭𑒰 𑒣𑒠𑓂𑒡𑒞𑒱𑒏 𑒦𑒰𑒑 𑒁𑒕𑒱 𑒄 𑒆𑒿𑒔 𑒂 𑒢𑒲𑒿𑒔, 𑒋𑒏𑒩 𑒫𑒱𑒩𑒼𑒡 𑒏𑒩𑒻𑒞 𑒁𑒕𑒱 𑒅𑒪𑓂𑒏𑒰𑒧𑒳𑒐।
𑒂𑒔𑒰𑒩𑓂𑒨 𑒮𑒩𑒦: (𑒂𑒔𑒰𑒩𑓂𑒨 𑒮𑒱𑓀𑒯 𑒠𑒱𑒮 𑒞𑒏𑒻𑒞।) 𑒋𑒏𑒪 𑒫𑒰𑒠𑓂𑒨𑒏𑒹𑒿 𑒧𑒹𑒙𑒰 𑒏𑓄 𑒁𑒯𑒰𑒿 𑒖𑒢 𑒏𑒼𑒪𑒰𑒯𑒪 𑒂𑒢𑓄 𑒔𑒰𑒯𑒻 𑒕𑒲।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒑𑒰𑒿 𑒥𑒜𑓃𑒱 𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒖𑒢 𑒑𑒰𑒟𑒰𑒣𑒩 𑒪𑒱𑒐𑒪 𑒢𑒰𑒩𑒰𑒬𑓀𑒮𑒲𑒣𑒩 𑒢𑒰𑒔𑒞 𑒪𑒼𑒏 𑒂 𑒍𑒏𑒩𑒹 𑒮𑓀𑒑𑒹 𑒢𑒰𑒔 𑒑𑒢𑓂𑒡𑒩𑓂𑒫। 𑒮𑓂𑒧𑓂𑒫𑒹𑒞 𑒮𑓂𑒫𑒩𑒏 𑒢𑒰𑒠 𑒁𑒕𑒱 𑒅𑒪𑓂𑒏𑒰𑒧𑒳𑒐।
𑒂𑒔𑒰𑒩𑓂𑒨 𑒮𑒩𑒦: (𑒯𑒰𑒟𑒮𑒿 𑒫𑒲𑒦𑒞𑓂𑒮 𑒃𑒬𑒰𑒩𑒰 𑒏𑒩𑒻𑒞।) 𑒧𑒳𑒠𑒰 𑒩𑒔𑒢𑒰𑒏𑒰𑒩 𑒞𑒿 𑒧𑒩𑒱 𑒑𑒹𑒪। 𑒏𑒹 𑒧𑒰𑒢𑒞 𑒖𑒹 𑒏𑒹 𑒁𑒕𑒱 𑒪𑒱𑒐𑒢𑒹 𑒄 𑒅𑒪𑓂𑒏𑒰𑒧𑒳𑒐?
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒑𑒰𑒿 𑒥𑒜𑓃𑒱 𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒩𑒔𑒢𑒰𑒏𑒰𑒩𑒮𑒿 𑒥𑒹𑒬𑒲 𑒧𑒯𑒞𑓂𑒫𑒣𑒴𑒩𑓂𑒝 𑒁𑒕𑒱 𑒄 𑒩𑒔𑒢𑒰, 𑒋𑒏𑒩 𑒮𑒢𑓂𑒠𑒹𑒬, 𑒂 𑒍 𑒩𑒔𑒢𑒰 𑒂 𑒮𑓀𑒠𑒹𑒬 𑒁𑒕𑒱 𑒅𑒪𑓂𑒏𑒰𑒧𑒳𑒐।
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒑𑒰𑒿 𑒥𑒜𑓃𑒱 𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒩𑒰𑒞𑒱𑒏 𑒩𑒰𑒖𑒰 𑒕𑒪 𑒔𑒼𑒩, 𑒠𑒱𑒢𑒧𑒹 𑒧𑒰𑒪𑒱𑒏 𑒧𑒰𑒪𑒱𑒏 𑒏𑒩𑒻 𑒕𑒪। 𑒔𑒼𑒩𑒏 𑒩𑒴𑒣 𑒟𑒼𑒛𑓃𑒹 𑒯𑒼𑒃 𑒕𑒻 𑒂𑒥… 𑒂𑒥 𑒞𑒿 𑒔𑒼𑒩𑒱𑒨𑒼 𑒮𑒦 𑒏𑒩𑓄 𑒪𑒰𑒑𑒪 𑒁𑒕𑒱। 𑒣𑒯𑒱𑒢𑒹 𑒍𑒏𑒩 𑒣𑓂𑒩𑒬𑒱𑒏𑓂𑒭𑒝 𑒯𑒼𑒃𑒞 𑒩𑒯𑒋, 𑒐𑒹𑒞𑒏 𑒂𑒩𑒱𑒣𑒩। 𑒮𑒱𑓀𑒯 𑒏𑒼𑒢𑒰 𑒏𑒰𑒙𑒪 𑒖𑒰𑒨 𑒮𑒹 𑒂𑒩𑒱𑒏𑒹𑒿 𑒏𑒰𑒙𑒱 𑒏𑓄 𑒠𑒹𑒐𑒰𑒍𑒪 𑒖𑒰𑒃𑒞 𑒩𑒯𑒋। 𑒦𑒼𑒩 𑒦𑒹𑒢𑒹 𑒖𑒹 𑒪𑒼𑒏 𑒮𑒦 𑒐𑒹𑒞 𑒖𑒰𑒃𑒞 𑒕𑒪 𑒞𑒿 𑒠𑒹𑒐𑒻𑒞 𑒕𑒪। 𑒠𑒹𑒐𑒻𑒞 𑒕𑒪 𑒂𑒩𑒱𑒧𑒹 𑒏𑒰𑒙𑒪 𑒮𑒱𑓀𑒒… 𑒦𑒩𑒱 𑒑𑒰𑒧 𑒯𑒪𑓂𑒪𑒰..। 𑒩𑒾, 𑒮𑒞𑒩𑓂𑒏 𑒩𑒯𑒻 𑒖𑒰𑒃 𑒖𑒼। 𑒏𑒼𑒢𑒼 𑒣𑒻𑒒 𑒔𑒼𑒩𑒱𑒏 𑒨𑒼𑒖𑒢𑒰𑒧𑒹 𑒁𑒕𑒱 𑒄 𑒮𑒦। 𑒧𑒳𑒠𑒰 𑒤𑒹𑒩 𑒫𑒋𑒯 𑒮𑒦 𑒠𑒱𑒢𑒧𑒹 𑒮𑒰𑒧𑒰𑒢𑓂𑒨 𑒧𑒢𑒳𑒏𑓂𑒐।.....
𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩: (𑒂𑒑𑒰𑒿 𑒥𑒜𑓃𑒱 𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒠𑒴 𑒠𑒱𑒢𑒮𑒿 𑒤𑒳𑒙𑒯𑒰 𑒐𑒰 𑒏𑓄 𑒑𑒳𑒖𑒩 𑒏𑓄 𑒩𑒯𑒪 𑒕𑒲। 𑒂𑒃 𑒔𑒼𑒩𑒱 𑒪𑒹𑒪 𑒖𑒰𑒋 𑒣𑒛𑓃𑒞। 𑒥𑒔𑓂𑒔𑒰 𑒮𑒦𑒏 𑒪𑒹𑒪। 𑒠𑒹𑒯𑒧𑒹 𑒞𑒹𑒪 𑒪𑒑𑒰 𑒏𑓄, 𑒧𑒳𑒿𑒯𑒧𑒹 𑒦𑒮𑒧 𑒪𑒑𑒰 𑒏𑓄। 𑒏𑓂𑒨𑒼 𑒣𑒏𑒛𑓃𑒋 𑒔𑒰𑒯𑒞 𑒞𑒿 𑒕𑒕𑒪𑒱 𑒏𑓄 𑒦𑒰𑒑𑒱 𑒖𑒋𑒥। 𑒯𑒹 𑒏𑓂𑒨𑒼 𑒔𑒼𑒩𑒏𑒹𑒿 𑒩𑒰𑒞𑒱𑒧𑒹 𑒔𑒲𑒢𑓂𑒯𑒱 𑒪𑒹𑒪𑒯𑒳𑒿 𑒞𑒿 𑒥𑒩𑒢𑒲 𑒩𑒯𑓄 𑒠𑒹𑒥𑒻𑒏। 𑒢𑒰𑒧 𑒢𑒻 𑒥𑒏𑒱 𑒠𑒹𑒥𑒻𑒏। 𑒢𑒻 𑒞𑒿 𑒧𑒰𑒩𑒱 𑒠𑒹𑒞... 𑒏𑒰𑒩𑒝 𑒠𑒱𑒢𑒧𑒹 𑒞𑒿 𑒁𑒯𑒰𑒿 𑒧𑒰𑒪𑒱𑒏 𑒦𑓄 𑒖𑒋𑒥𑒻𑒏। 𑒮𑒹 𑒛𑒩 𑒕𑒻𑒏 𑒩𑒰𑒞𑒳𑒏 𑒩𑒰𑒖𑒰𑒏𑒹𑒿।
𑒂𑒔𑒰𑒩𑓂𑒨 𑒮𑒩𑒦: (𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒂 𑒮𑒱𑓀𑒏 𑒥𑒲𑒔𑒧𑒹 𑒖𑒰 𑒮𑒼𑒗𑒰𑒿 𑒥𑒖𑒻𑒞) 𑒏𑒲 𑒏𑒟𑒰 𑒮𑒳𑒢𑒰 𑒩𑒯𑒪 𑒕𑒲..𑒍𑒃.. 𑒍𑒃.. 𑒏𑒲 𑒏𑒯𑒪𑒱𑒌..𑒅𑒪𑓂𑒏𑒰𑒧𑒳𑒐𑒏..
𑒂𑒔𑒰𑒩𑓂𑒨 𑒮𑒱𑓀𑒯: (𑒂𑒑𑒰𑒿 𑒥𑒜𑓃𑒱 𑒂𑒔𑒰𑒩𑓂𑒨 𑒮𑒩𑒦𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒧𑒳𑒿𑒯 𑒥𑒱𑒔𑒏𑒹𑒪𑒯𑒳𑒿 𑒞𑒿 𑒪𑒼𑒏 𑒮𑒦 𑒥𑒳𑒗𑒪𑒏 𑒖𑒹 𑒣𑓂𑒩𑒮𑒢𑓂𑒢 𑒕𑒲, 𑒦𑒾𑓀𑒯𑒣𑒩 𑒖𑒼𑒩 𑒠𑒹𑒢𑒹 𑒥𑒳𑒗𑒪𑒏 𑒖𑒹 𑒔𑒱𑒢𑓂𑒞𑒢𑒬𑒲𑒪 𑒕𑒲। 𑒧𑒳𑒠𑒰 𑒯𑒵𑒠𑒨 𑒩𑒯𑒻𑒋 𑒮𑒠𑒱𑒐𑒢 𑒏𑒢𑒻𑒞। 𑒮𑒹 𑒯𑒧 𑒖𑒢𑒻𑒞 𑒕𑒲 𑒂𑒔𑒰𑒩𑓂𑒨 𑒮𑒩𑒦..
𑒂𑒔𑒰𑒩𑓂𑒨 𑒮𑒱𑓀𑒯: (𑒥𑒰𑒯𑒩 𑒁𑒏𑒰𑒮𑒧𑒹 𑒋𑒏𑒙𑒰 𑒏𑒱𑒩𑒝 𑒔𑒧𑒏𑒻𑒞𑒹 𑒩𑒯𑒻𑒞 𑒁𑒕𑒱।) 𑒂 𑒠𑒹𑒐𑒴, 𑒫𑒢𑒠𑒹𑒫𑒲 𑒮𑒹𑒯𑒼 𑒂𑒥𑒱 𑒑𑒹𑒪𑒲𑒯 𑒌 𑒫𑒵𑒢𑓂𑒠𑒰𑒫𑒢, 𑒂 𑒫𑒢𑒠𑒹𑒫𑒲𑒏 𑒮𑒐𑒲 𑒫𑒢𑒮𑒣𑓂𑒞𑒼, 𑒣𑒰𑒿𑒐𑒱𑒨𑒳𑒏𑓂𑒞 𑒧𑒧𑒰𑒞𑒰𑒧𑒨𑒲 𑒑𑒰𑒨। 𑒂𑒥𑒱 𑒑𑒹𑒪𑒲𑒯 𑒫𑒢𑒮𑒣𑓂𑒞𑒼 𑒥𑒼𑒢𑒧𑒹 𑒯𑒹𑒩𑒰𑒋𑒪 𑒅𑒪𑓂𑒏𑒰𑒧𑒳𑒐𑒏𑒹𑒿 𑒩𑒮𑓂𑒞𑒰 𑒠𑒹𑒐𑒥𑒻 𑒪𑒹𑒪।
(𑒞𑒲𑒢𑒴 𑒑𑒼𑒙𑒹 𑒞𑒹𑒢𑒰 𑒁𑒦𑒱𑒢𑒨 𑒏𑒩𑒻 𑒕𑒟𑒱 𑒖𑒹𑒢𑒰 𑒯𑒥𑒰𑒧𑒹 𑒅𑒛𑓃𑒱𑒨𑒰 𑒩𑒯𑒪 𑒯𑒼𑒟𑒱। 𑒢𑒹𑒣𑒟𑓂𑒨𑒮𑒿 𑒮𑒰𑒿𑒃-𑒮𑒰𑒿𑒃 𑒏𑒩𑒻𑒞 𑒁𑒥𑒰𑒖 𑒥𑒜𑓃𑒱𑒞𑒹 𑒖𑒰 𑒩𑒯𑒪 𑒁𑒕𑒱।)
𑒞𑒲𑒢𑒲 𑒑𑒼𑒙𑒹 𑒮𑒧𑓂𑒫𑒹𑒞: 𑒏𑒪𑓂𑒣𑒢𑒰𑒏 𑒣𑒋𑒩 𑒅𑒐𑒛𑓃𑒱 𑒩𑒯𑒪 𑒁𑒕𑒱…𑒂𑒥𑒱 𑒩𑒯𑒪 𑒁𑒕𑒱 𑒅𑒪𑓂𑒏𑒰𑒧𑒳𑒐।

𑒁𑒑𑒛𑓃𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩
𑒁𑒑𑒛𑓃𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩
𑒁𑒑𑒛𑓃𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩
𑒂𑒥𑒱 𑒑𑒹𑒪 𑒄 𑒅𑒪𑓂𑒏𑒰𑒧𑒳𑒐
(𑒅𑒛𑓃𑒱𑒨𑒰𑒃𑒞 𑒞𑒲𑒢𑒴 𑒑𑒼𑒙𑒹 𑒐𑒮𑒥𑒰𑒏 𑒁𑒦𑒱𑒢𑒨 𑒏𑒩𑒻𑒞 𑒕𑒟𑒱 𑒂 𑒮𑒑𑒩𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)
(𑒤𑒹𑒩 𑒣𑓂𑒩𑒏𑒰𑒬 𑒯𑒼𑒃𑒞 𑒁𑒕𑒱 𑒂 𑒧𑓀𑒔𑒣𑒩 𑒒𑒢𑒏 𑒮𑓂𑒟𑒰𑒢 𑒑𑒼𑒪𑒰𑒏𑒰𑒩 𑒣𑒱𑒝𑓂𑒛 𑒪𑓄 𑒪𑒻𑒞 𑒁𑒕𑒱।)

𑒦𑒑𑒞𑒰: 𑒒𑒴𑒧𑒱 𑒩𑒯𑒪 𑒁𑒕𑒱 𑒄 𑒣𑒵𑒟𑓂𑒫𑒲। (𑒑𑒼𑒪𑒰𑒏𑒹𑒿 𑒣𑒩𑒱𑒬𑓂𑒩𑒧𑒮𑒿 𑒯𑒰𑒟𑒧𑒹 𑒅𑒚𑒥𑒻𑒞 𑒕𑒟𑒱।) 𑒪𑒙𑒏𑒪 𑒁𑒕𑒱 𑒄 𑒁𑒏𑒰𑒮𑒧𑒹। 𑒋𑒏𑒩 𑒢𑒲𑒔𑒰𑒿𑒧𑒹 𑒏𑒼𑒢𑒼 𑒂𑒡𑒰𑒩 𑒢𑒻 𑒕𑒻। 𑒋𑒞𑒹𑒏 𑒦𑒰𑒩𑒲 𑒁𑒕𑒱 𑒞𑒻𑒨𑒼 𑒏𑒼𑒢𑒼 𑒦𑒰𑒩 𑒢𑒻 𑒕𑒻 𑒋𑒏𑒩𑒰𑒧𑒹।
𑒁𑒑𑒩𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩
(𑒑𑒼𑒪𑒰𑒏𑒹𑒿 𑒢𑒲𑒔𑒰𑒿𑒧𑒹 𑒩𑒰𑒐𑒱 𑒠𑒻 𑒕𑒟𑒱 𑒂 𑒒𑒮𑒏𑒱 𑒏𑓄 𑒣𑒰𑒕𑒰𑒿 𑒂𑒥𑒱 𑒖𑒰𑒃 𑒕𑒟𑒱- 𑒠𑒏𑓂𑒭𑒱𑒝 𑒠𑒱𑒬𑒰𑒧𑒹। 𑒯𑒳𑒢𑒏𑒩 𑒬𑒱𑒭𑓂𑒨 𑒁𑒥𑒻𑒞 𑒕𑒟𑒱 𑒂 𑒑𑒼𑒪𑒰𑒏𑒹𑒿 𑒒𑒳𑒧𑒥𑓄 𑒪𑒑𑒻 𑒕𑒟𑒱।)
𑒦𑒑𑒞𑒰: 𑒠𑒹𑒐𑒴। 𑒄 𑒒𑒛𑓃𑒲 𑒫𑒱𑒣𑒩𑒲𑒞 𑒠𑒱𑒬𑒰𑒧𑒹 𑒒𑒴𑒧𑒱 𑒩𑒯𑒪 𑒁𑒕𑒱 𑒄 𑒣𑒵𑒟𑓂𑒫𑒲, 𑒧𑒳𑒠𑒰 𑒖𑒿 𑒅𑒞𑓂𑒞𑒩 𑒠𑒱𑒬 𑒠𑒹𑒐𑒥𑒻 𑒞𑒐𑒢। 𑒠𑒏𑓂𑒭𑒱𑒝 𑒠𑒱𑒮 𑒞𑒏𑒥𑒻 𑒞𑒿 𑒒𑒛𑓃𑒲𑒏 𑒠𑒱𑒬𑒰𑒧𑒹 𑒒𑒳𑒧𑒻𑒞 𑒠𑒹𑒐𑒰𑒋𑒞 𑒄। 𑒂 𑒯𑒧 𑒁𑒯𑒰𑒿 𑒖𑒹 𑒌 𑒣𑒵𑒟𑓂𑒫𑒲𑒣𑒩 𑒕𑒲 𑒍𑒏𑒩𑒰𑒧𑒹 𑒦𑒰𑒩 𑒕𑒻। 𑒂 𑒄 𑒣𑒵𑒟𑓂𑒫𑒲 𑒁𑒕𑒱 𑒥𑒱𑒢 𑒦𑒰𑒩𑒏, 𑒁𑒏𑒰𑒮𑒧𑒹 𑒪𑒙𑒏𑒱 𑒩𑒯𑒪।(𑒯𑒳𑒢𑒏𑒩 𑒬𑒱𑒭𑓂𑒨 𑒣𑒵𑒟𑓂𑒫𑒲𑒏𑒹𑒿 𑒅𑒚𑒰 𑒏𑓄 𑒃𑒬𑒰𑒩𑒰 𑒏𑒩𑒻 𑒕𑒟𑒱।)
𑒁𑒑𑒩𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩
(𑒦𑒑𑒞𑒰 𑒅𑒏𑒰𑒮𑒲 𑒏𑒩𑓄 𑒪𑒑𑒻 𑒕𑒟𑒱। 𑒞𑒐𑒢𑒹 𑒦𑒑𑒞𑒰𑒏𑒹𑒿 𑒢𑒲𑒔𑒰𑒿𑒧𑒹 𑒅𑒪𑓂𑒏𑒰𑒧𑒳𑒐𑒲 𑒞𑒰𑒥𑒲𑒖 𑒦𑒹𑒙𑒻 𑒕𑒻, 𑒍𑒃𑒧𑒹 𑒮𑒩𑒦𑒏 𑒔𑒱𑒞𑓂𑒩 𑒕𑒻…𑒍 𑒔𑒱𑒏𑒛𑓃𑒱 𑒅𑒚𑒻𑒋.. “𑒄 𑒏𑒲.. 𑒄 𑒏𑒲.. 𑒅𑒪𑓂𑒏𑒰𑒧𑒳𑒐𑒲 𑒞𑒰𑒥𑒲𑒖… 𑒯𑒧 𑒏𑒯𑒻 𑒕𑒪𑒱𑒌 𑒮𑒋𑒯 𑒯𑒋𑒞..” 𑒄 𑒏𑒯𑒱 𑒞𑒰𑒥𑒲𑒖 𑒐𑒼𑒪𑒻𑒋 𑒂 𑒍𑒃𑒧𑒹𑒮𑒿 𑒞𑒰𑒪𑒣𑒞𑓂𑒩𑒣𑒩 𑒏𑒱𑒕𑒳 𑒁𑒏𑓂𑒭𑒩 𑒐𑒔𑒱𑒞 𑒩𑒹𑒬𑒰 𑒮𑒢 𑒥𑒯𑒩𑒰𑒃𑒞 𑒁𑒕𑒱.. 𑒂 𑒍 𑒐𑒳𑒬𑒲𑒮𑒿 𑒥𑒹𑒯𑒼𑒬 𑒮𑒢 𑒦𑓄 𑒖𑒰𑒃𑒋….. 𑒬𑒱𑒭𑓂𑒨 𑒑𑒼𑒪𑒰𑒏𑒹𑒿 𑒢𑒲𑒔𑒰𑒿 𑒩𑒰𑒐𑒱 𑒏𑓄 𑒦𑒑𑒞𑒰𑒏 𑒕𑒰𑒞𑒲 𑒮𑒮𑒰𑒩𑓄 𑒪𑒑𑒻 𑒕𑒟𑒱।)
𑒦𑒑𑒞𑒰𑒏 𑒬𑒱𑒭𑓂𑒨: (𑒑𑒳𑒩𑒳𑒖𑒲𑒏𑒹𑒿 𑒮𑒮𑒰𑒩𑒥 𑒕𑒼𑒛𑓃𑒱 𑒚𑒰𑒜𑓃 𑒦𑓄) 𑒠𑒏𑓂𑒭𑒱𑒝 𑒠𑒱𑒬𑒰𑒮𑒿 𑒂𑒋𑒪 𑒕𑒟𑒱 𑒑𑒳𑒩𑒳𑒖𑒲 𑒐𑒱𑒮𑓂𑒮𑒰 𑒮𑒳𑒢𑒱 𑒏𑓄.. (𑒧𑒼𑒢 𑒣𑒰𑒛𑓃𑒻𑒞) 𑒥𑒰𑒮𑒫𑒹𑒬𑓂𑒫𑒩𑒏। 𑒏𑒯𑒻 𑒕𑒟𑒱 𑒖𑒹 𑒧𑒱𑒟𑒱𑒪𑒰𑒧𑒹 𑒮𑒹𑒯𑒼 𑒯𑒹𑒞𑒻 𑒄 𑒮𑒦। 𑒯𑒖𑒰𑒩 𑒮𑒰𑒪𑒏 𑒥𑒰𑒠 𑒣𑒳𑒩𑒢𑒏𑒰 𑒑𑒣 𑒒𑒙𑒱𑒞 𑒯𑒹𑒞𑒻। (𑒧𑒳𑒮𑓂𑒏𑒲 𑒠𑒻𑒞) 𑒧𑒳𑒠𑒰 𑒑𑒳𑒩𑒳 𑒕𑒻 𑒯𑒧𑒩 𑒮𑒱𑒠𑓂𑒡, 𑒏𑒹𑒯𑒹𑒢 𑒏𑒹𑒯𑒹𑒢 𑒑𑒣 𑒥𑒰𑒖𑒻 𑒕𑒻 𑒢𑒻 𑒮𑒳𑒢𑒻 𑒕𑒱𑒌।
(𑒦𑒑𑒞𑒰 𑒯𑒼𑒬𑒧𑒹 𑒂𑒥𑒱 𑒖𑒰𑒃𑒋, 𑒥𑒹𑒮𑒲 𑒖𑒼𑒩𑒮𑒿 𑒅𑒏𑒰𑒮𑒲 𑒏𑒩𑓄 𑒪𑒑𑒻𑒋। 𑒬𑒱𑒭𑓂𑒨 𑒦𑒑𑒞𑒰𑒏 𑒕𑒰𑒞𑒲 𑒮𑒮𑒰𑒩𑓄 𑒪𑒑𑒻 𑒕𑒟𑒱। 𑒮𑒑𑒩𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)










𑒣𑒰𑒿𑒔𑒧 𑒏𑒪𑓂𑒪𑒼𑒪
𑒣𑒯𑒱𑒪𑒮𑒿 𑒔𑒰𑒩𑒱𑒧 𑒏𑒪𑓂𑒪𑒼𑒪 𑒡𑒩𑒱 𑒧𑓀𑒔𑒣𑒩 𑒬𑒞𑒩𑓀𑒖𑒏 𑒛𑒱𑒖𑒰𑒃𑒢 𑒥𑒢𑒰𑒋𑒪 𑒒𑒢 𑒩𑒰𑒐𑒪 𑒕𑒪, 𑒂𑒥 𑒣𑒰𑒿𑒔𑒧 𑒁𑓀𑒏𑒮𑒿 𑒦𑒴𑒞 𑒂 𑒏𑒪𑓂𑒣𑒢𑒰𑒏 𑒣𑓂𑒩𑒞𑒲𑒏 𑒍𑒃 𑒮𑓀𑒏𑒹𑒞𑒏 𑒥𑒠𑒪𑒰 𑒫𑒰𑒮𑓂𑒞𑒫𑒱𑒏𑒞𑒰𑒏 𑒣𑓂𑒩𑒞𑒲𑒏 𑒑𑒼𑒪𑒰 𑒩𑒰𑒐𑒪 𑒩𑒯𑒞।
[𑒮𑒼𑒯𑒰𑒑𑒼 (𑒑𑓀𑒑𑒰𑒡𑒩𑒏 𑒧𑒰𑒞𑒰), 𑒬𑒱𑒭𑓂𑒨 𑒮𑒰𑒯𑒲 𑒥𑒢𑒱 𑒑𑒹𑒪 𑒯𑒩𑒣𑒞𑒱 (𑒑𑓀𑒑𑒰𑒡𑒩𑒏 𑒣𑒱𑒞𑒰), 𑒑𑓀𑒑𑒹𑒬 𑒥𑒢𑒱 𑒖𑒰𑒃 𑒕𑒟𑒱 𑒑𑓀𑒑𑒰𑒡𑒩, 𑒫𑒪𑓂𑒪𑒦𑒰 𑒥𑒢𑒱 𑒖𑒰𑒃 𑒕𑒟𑒱 𑒏𑒳𑒧𑒩𑒮𑒳𑒞𑒰 (𑒑𑓀𑒑𑒰𑒡𑒩𑒏 𑒣𑒞𑓂𑒢𑒲), 𑒦𑒑𑒞𑒰 𑒥𑒢𑒱 𑒑𑒹𑒪 𑒖𑒙𑒰, 𑒦𑒑𑒞𑒰𑒏 𑒬𑒱𑒭𑓂𑒨 𑒥𑒢𑒱 𑒑𑒹𑒪 𑒠𑒪𑒱𑒞 𑒑𑒰𑒨𑒏 𑒯𑒲𑒩𑒴, 𑒂𑒔𑒰𑒩𑓂𑒨 𑒫𑓂𑒨𑒰𑒒𑓂𑒩 𑒥𑒢𑒱 𑒖𑒰𑒃 𑒕𑒟𑒱 𑒧𑒢𑒮𑒳𑒐 (𑒖𑒲𑒫𑒹𑒏 𑒣𑒱𑒞𑒰), 𑒂𑒔𑒰𑒩𑓂𑒨 𑒮𑒱𑓀𑒯 𑒥𑒢𑒱 𑒖𑒰𑒃 𑒕𑒟𑒱 𑒯𑒩𑒱𑒏𑒩-𑒮𑒹𑒢𑒰𑒣𑒞𑒱 (𑒧𑒹𑒡𑒰𑒏 𑒣𑒱𑒞𑒰), 𑒂𑒔𑒰𑒩𑓂𑒨 𑒮𑒩𑒦 𑒥𑒢𑒱 𑒖𑒰𑒃 𑒕𑒟𑒱 𑒏𑒲𑒩𑓂𑒞𑒱 𑒮𑒱𑓀𑒯 (𑒩𑒰𑒖𑒰), 𑒫𑒩𑓂𑒠𑓂𑒡𑒧𑒰𑒢 𑒥𑒢𑒱 𑒖𑒰𑒃 𑒕𑒟𑒱 𑒧𑒱𑒞𑒴 (𑒑𑓀𑒑𑒰𑒡𑒩𑒏 𑒥𑒯𑒱𑒢𑒼𑒃), 𑒂𑒢𑒢𑓂𑒠𑒰 (𑒑𑓀𑒑𑒰𑒡𑒩𑒏 𑒥𑒯𑒱𑒢), 𑒧𑒹𑒡𑒰 (𑒯𑒩𑒱𑒏𑒩- 𑒮𑒹𑒢𑒰𑒣𑒞𑒱𑒏 𑒥𑒹𑒙𑒲), 𑒠𑒹𑒫𑒠𑒞𑓂𑒞 𑒥𑒢𑒱 𑒖𑒰𑒃 𑒕𑒟𑒱 𑒖𑒲𑒫𑒹 (𑒧𑒢𑒮𑒳𑒐𑒏 𑒥𑒹𑒙𑒰), 𑒬𑒱𑒭𑓂𑒨 𑒐𑒱𑒐𑒱𑒩 𑒥𑒢𑒱 𑒑𑒹𑒪 𑒩𑒰𑒖𑒰𑒏 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝, 𑒬𑒱𑒭𑓂𑒨 𑒢𑒜𑓃𑒱𑒨𑒰 𑒥𑒢𑒱 𑒑𑒹𑒪 𑒠𑒩𑒥𑒰𑒩𑒲-𑓑, 𑒬𑒱𑒭𑓂𑒨 𑒥𑒱𑒖𑓂𑒖𑒲 𑒥𑒢𑒱 𑒑𑒹𑒪 𑒠𑒩𑒥𑒰𑒩𑒲-𑓒, 𑒅𑒠𑒨𑒢 𑒥𑒢𑒱 𑒑𑒹𑒪 𑒧𑒰𑒡𑒫 (𑒁𑒢𑒳𑒦𑒫 𑒧𑒝𑓂𑒛𑒪𑒏 𑒮𑒠𑒮𑓂𑒨 𑒂 𑒠𑒩𑒥𑒰𑒩𑒲), 𑒠𑒲𑒢𑒰 𑒥𑒢𑒱 𑒑𑒹𑒪𑒰𑒯 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑, 𑒦𑒠𑒩𑒲 𑒥𑒢𑒱 𑒑𑒹𑒪𑒰𑒯 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓒 , 𑒩𑒳𑒠𑓂𑒩𑒧𑒞𑒱 (𑒧𑒰𑒡𑒫𑒏 𑒧𑒰𑒋)]
(𑒢𑒹𑒣𑒟𑓂𑒨𑒮𑒿 𑒑𑒲𑒞 𑒂𑒥𑒱 𑒩𑒯𑒪 𑒁𑒕𑒱।)
𑒣𑒯𑒱𑒪 𑒧𑒰𑒮 𑒔𑒜𑓃𑒳 𑒁𑒑𑒯𑒢, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹....
𑒧𑒴𑓀𑒑𑒏 𑒠𑒰𑒪 𑒢𑒯𑒱 𑒮𑒼𑒯𑒰𑒨, 𑒏𑒹𑒯𑒢 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹....
𑒠𑒼𑒮𑒩 𑒧𑒰𑒮 𑒔𑒜𑓃𑒳 𑒣𑒴𑒮, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹.....
𑒣𑒴𑒮𑒏 𑒧𑒰𑒕𑒲 𑒢𑒹 𑒮𑒼𑒯𑒰𑒨, 𑒏𑒱 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹.....
𑒞𑒹𑒮𑒩 𑒧𑒰𑒮 𑒔𑒜𑓃𑒳 𑒧𑒰𑒒, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹.....
𑒣𑒾𑒩𑒪 𑒐𑒲𑒩 𑒢𑒹 𑒮𑒼𑒯𑒰𑒨, 𑒏𑒱 𑒏𑒹𑒯𑒢 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹....
𑒔𑒰𑒩𑒱𑒧 𑒧𑒰𑒮 𑒔𑒜𑓃𑒳 𑒤𑒰𑒑𑒳𑒢, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹....
𑒤𑒑𑒳𑒂𑒏 𑒣𑒴𑒂 𑒢𑒹 𑒮𑒼𑒯𑒰𑒨, 𑒏𑒱 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹.....
𑒣𑒰𑒿𑒔𑒧 𑒧𑒰𑒮 𑒔𑒜𑓃𑒳 𑒔𑒻𑒞, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒔𑒻𑒞 𑒏𑒹 𑒧𑒰𑒕 𑒢𑒹 𑒮𑒼𑒯𑒰𑒨, 𑒏𑒱 𑒏𑒹𑒯𑒢 𑒑𑒩𑒧 𑒮𑓀𑒍 𑒩𑒹
𑒕𑒚𑒧 𑒧𑒰𑒮 𑒔𑒜𑓃𑒳 𑒫𑒻𑒬𑒰𑒏, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹.....
𑒂𑒧 𑒏𑒹 𑒙𑒱𑒏𑒼𑒪𑒰 𑒢𑒹 𑒮𑒼𑒯𑒰𑒨, 𑒏𑒱 𑒏𑒹𑒯𑒢 𑒑𑒩𑒧 𑒮𑒹𑒍 𑒩𑒹
𑒮𑒰𑒞𑒧 𑒧𑒰𑒮 𑒔𑒜𑓃𑒳 𑒖𑒹𑒚, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹.....
𑒐𑒳𑒖𑒪 𑒏𑒹𑒬 𑒢𑒹 𑒮𑒼𑒯𑒰𑒨, 𑒏𑒱 𑒏𑒹𑒯𑒢 𑒑𑒩𑒧 𑒮𑓀𑒍 𑒩𑒹
𑒂𑒚𑒧 𑒧𑒰𑒮 𑒔𑒜𑓃𑒳 𑒁𑒐𑒰𑒜𑓃, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹.....
𑒣𑒰𑒏𑒪 𑒂𑒧 𑒢𑒹 𑒮𑒼𑒯𑒰𑒨, 𑒏𑒱 𑒏𑒹𑒯𑒢 𑒑𑒩𑒧 𑒮𑓀𑒍 𑒩𑒹
𑒢𑒫𑒧 𑒧𑒰𑒮 𑒔𑒜𑓃𑒳 𑒮𑒰𑒍𑒢, 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹....
𑒣𑒱𑒨𑒰 𑒏𑒹 𑒮𑒹𑒖 𑒢𑒹 𑒮𑒼𑒯𑒰𑒨, 𑒏𑒱 𑒏𑒹𑒯𑒢 𑒑𑒩𑒧 𑒮𑓀𑒍 𑒩𑒹
𑒠𑒮𑒧 𑒧𑒰𑒮 𑒔𑒜𑓃𑒳 𑒦𑒰𑒠𑒫, 𑒏𑒱 𑒠𑒹𑒫𑒏𑒲 𑒑𑒩𑒧 𑒮𑓀𑒍 𑒩𑒹
𑒪𑒪𑒢𑒰 𑒩𑒹....
𑒠𑒹𑒫𑒏𑒲 𑒠𑒩𑒠𑒹 𑒥𑒹𑒨𑒰𑒏𑒳𑒪 𑒠𑒑𑒩𑒱𑒢 𑒥𑒖𑒰𑒨𑒥 𑒩𑒹
𑒖𑒥 𑒖𑒢𑒧𑒪 𑒖𑒠𑒳𑒢𑒢𑓂𑒠𑒢, 𑒐𑒳𑒖𑒱 𑒑𑒹𑒪 𑒥𑓀𑒡𑒢 𑒩𑒹
𑒪𑒪𑒢𑒰 𑒩𑒹.....
𑒐𑒳𑒖𑒱 𑒑𑒹𑒪 𑒥𑒖𑓂𑒩 𑒏𑒹𑒥𑒰𑒩 𑒣𑒯𑒩𑒴 𑒮𑒦 𑒮𑒴𑒞𑒪 𑒩𑒹।
(𑒑𑒲𑒞 𑒐𑒞𑒧 𑒯𑒼𑒃𑒞𑒹 𑒋𑒏𑒙𑒰 𑒥𑒔𑓂𑒔𑒰𑒏𑒹𑒿 𑒏𑒼𑒩𑒰𑒧𑒹 𑒪𑒹𑒢𑒹 𑒯𑒩𑒣𑒞𑒱 𑒂 𑒮𑒼𑒯𑒰𑒑𑒼 𑒣𑓂𑒩𑒫𑒹𑒬 𑒏𑒩𑒻 𑒕𑒟𑒱।)
𑒯𑒩𑒣𑒞𑒱: (𑒮𑒼𑒯𑒰𑒑𑒼𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒮𑒼𑒯𑒰𑒑𑒼, 𑒑𑓀𑒑𑒰 𑒧𑒰𑒋𑒏 𑒣𑓂𑒩𑒞𑒰𑒣𑒹𑒿 𑒄 𑒠𑒱𑒢 𑒯𑒧𑒩𑒰 𑒮𑒦𑒏𑒹𑒿 𑒠𑒹𑒐𑒥𑒰𑒧𑒹 𑒂𑒋𑒪 𑒁𑒕𑒱 𑒞𑒹𑒿 𑒋𑒏𑒩 𑒢𑒰𑒧 𑒑𑓀𑒑𑒰𑒡𑒩 𑒩𑒰𑒐𑒱 𑒠𑒻𑒞 𑒕𑒱𑒌।
𑒮𑒼𑒯𑒰𑒑𑒼: 𑒁𑒥𑒮𑓂𑒮𑒹 𑒏𑒱𑒢𑒹। (𑒥𑒹𑒙𑒰𑒏𑒹𑒿 𑒏𑒼𑒩𑒰𑒧𑒹 𑒠𑒳𑒪𑒰𑒩-𑒧𑒪𑒰𑒩 𑒏𑒩𑓄 𑒪𑒑𑒻 𑒕𑒟𑒱।)

(𑒞𑒐𑒢𑒹 𑒁𑒑𑒩𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩 𑒥𑒖𑒻𑒞 𑒇𑒭𑒱 𑒖𑒙𑒰 𑒂 𑒯𑒳𑒢𑒏𑒩 𑒮𑓀𑒑 𑒠𑒪𑒱𑒞 𑒑𑒥𑒻𑒨𑓂𑒨𑒰 𑒯𑒳𑒢𑒏𑒩 𑒬𑒱𑒭𑓂𑒨 𑒯𑒲𑒩𑒴 𑒣𑓂𑒩𑒫𑒹𑒬 𑒏𑒩𑒻𑒞 𑒕𑒟𑒱।)
𑒇𑒭𑒱 𑒖𑒙𑒰: 𑒁𑒑𑒩𑒧 𑒥𑒑𑒛𑓃𑒧 𑒏𑒰𑒚 𑒏𑒚𑒧𑓂𑒥𑒩। 𑒁𑒠𑓂𑒦𑒳𑒞, 𑒁𑒠𑓂𑒦𑒳𑒞, 𑒁𑒠𑓂𑒦𑒳𑒞..𑒄 𑒥𑒔𑓂𑒔𑒰 𑒁𑒠𑓂𑒦𑒳𑒞..
𑒬𑒱𑒭𑓂𑒨 𑒯𑒲𑒩𑒴: (𑒫𑒱𑒦𑒼𑒩 𑒦𑓄 𑒥𑒔𑓂𑒔𑒰𑒏𑒹𑒿 𑒏𑒼𑒩𑒰𑒧𑒹 𑒅𑒚𑒰 𑒪𑒻 𑒕𑒟𑒱 𑒂 𑒑𑒰𑒥𑓄 𑒪𑒑𑒻 𑒕𑒟𑒱।)
𑒏𑒾𑒢𑒹 𑒧𑒰𑒮 𑒧𑒹𑒒𑒥𑒰 𑒑𑒩𑒖𑒱 𑒑𑒹𑒪
𑒏𑒼𑒢𑒹 𑒧𑒰𑒮 𑒥𑒹𑓀𑒑𑒫𑒰 𑒥𑒰𑒖𑒴 𑒩𑒹
𑒪𑒪𑒢𑒰 𑒩𑒹 𑒏𑒼𑒢𑒹 𑒧𑒰𑒮𑒹 𑒯𑒼𑒩𑒱𑒪𑒰 𑒖𑒢𑒧 𑒪𑒹𑒪
𑒏𑒱 𑒑𑒼𑒞𑒱𑒢𑒏 𑒯𑒱𑒨𑒰 𑒮𑒰𑒪𑒴 𑒩𑒹।
𑒮𑒰𑒫𑒢 𑒧𑒹𑒒𑒫𑒰 𑒑𑒩𑒖𑒱 𑒑𑒹𑒪,
𑒦𑒰𑒠𑒫 𑒥𑒹𑓀𑒑 𑒥𑒰𑒖𑒴 𑒩𑒹।
𑒂𑒮𑒱𑒢 𑒯𑒼𑒩𑒱𑒪𑒰 𑒖𑒢𑒧 𑒪𑒹𑒪
𑒏𑒱 𑒑𑒼𑒞𑒱𑒢𑒏 𑒯𑒱𑒨𑒰 𑒮𑒰𑒪𑒴 𑒩𑒹।
𑒏𑒼𑒢𑒹 𑒞𑒹𑒪 𑒠𑒹𑒫 𑒮𑒰𑒮𑒳 𑒏𑒹
𑒏𑒼𑒢𑒹 𑒢𑒢𑒠𑒱 𑒖𑒲 𑒏𑒹 𑒩𑒹।
𑒪𑒪𑒢𑒰 𑒩𑒹, 𑒏𑒩𑒴 𑒞𑒹𑒪 𑒠𑒹𑒥𑒻𑒢 𑒮𑒰𑒮𑒳 𑒖𑒲 𑒏𑒹
𑒑𑒩𑒲 𑒢𑒢𑒠𑒱 𑒖𑒲 𑒏𑒹 𑒩𑒹।
𑒪𑒪𑒢𑒰 𑒩𑒹 𑒁𑒧𑒪𑒰 𑒠𑒹𑒥𑒻𑒢 𑒑𑒼𑒞𑒱𑒢 𑒏𑒹
𑒯𑒳𑒢𑒏𑒩 𑒣𑒻𑓀𑒔 𑒯𑒹𑒞𑒢𑒱 𑒩𑒹।
𑒇𑒭𑒱 𑒖𑒙𑒰: (𑒑𑒩𑒰𑒧𑒹 𑒮𑒩𑒦 𑒐𑒔𑒱𑒞 𑒋𑒏𑒙𑒰 𑒞𑒰𑒥𑒲𑒖 𑒑𑓀𑒑𑒰𑒡𑒩𑒏𑒹𑒿 𑒣𑒯𑒱𑒩𑒰𑒥𑒻𑒞 𑒕𑒟𑒱।) 𑒄 𑒥𑒔𑓂𑒔𑒰 𑒁𑒠𑓂𑒦𑒳𑒞..𑒁𑒠𑓂𑒦𑒳𑒞..𑒁𑒠𑓂𑒦𑒳𑒞..𑒁𑒕𑒱.. 𑒮𑒰𑒧𑒰𑒢𑓂𑒨 𑒥𑒔𑓂𑒔𑒰 𑒢𑒻 𑒁𑒕𑒱 𑒄..𑒞𑒹𑒿 𑒄 𑒁𑒮𑒰𑒧𑒰𑒢𑓂𑒨 𑒦𑒹𑓀𑒙..
𑒬𑒱𑒭𑓂𑒨 𑒯𑒲𑒩𑒴: 𑒡𑒡𑒩𑒰 𑒤𑒹𑒏𑒻𑒞 𑒄 𑒑𑒲𑒠𑒩.. 𑒇𑒭𑒱 𑒖𑒙𑒰..
𑒇𑒭𑒱 𑒖𑒙𑒰: 𑒅𑒪𑓂𑒏𑒰𑒧𑒳𑒐….
(𑒔𑒰𑒩𑒴 𑒑𑒼𑒙𑒹 𑒋𑒏 𑒠𑒼𑒮𑒩𑒰𑒏 𑒧𑒳𑒿𑒯 𑒞𑒰𑒏𑓄 𑒪𑒰𑒑𑒻 𑒕𑒟𑒱।)
𑒬𑒱𑒭𑓂𑒨 𑒯𑒲𑒩𑒴: (𑒂𑒬𑓂𑒔𑒩𑓂𑒨 𑒏𑒩𑒻𑒞) 𑒅𑒪𑓂𑒏𑒰𑒧𑒳𑒐? 𑒢𑒰𑒧 𑒧𑒼𑒢 𑒣𑒛𑓃𑒱 𑒑𑒹𑒪 𑒇𑒭𑒱 𑒖𑒙𑒰।
𑒇𑒭𑒱 𑒖𑒙𑒰: (𑒂𑒬𑓂𑒔𑒩𑓂𑒨 𑒏𑒩𑒻𑒞) 𑒅𑒪𑓂𑒏𑒰𑒧𑒳𑒐?
𑒬𑒱𑒭𑓂𑒨 𑒯𑒲𑒩𑒴: (𑒂𑒬𑓂𑒔𑒩𑓂𑒨 𑒏𑒩𑒻𑒞) 𑒯𑒿, 𑒁𑒯𑒲𑓀 𑒞𑒿 𑒏𑒯𑒪𑒾𑓀, 𑒅𑒪𑓂𑒏𑒰𑒧𑒳𑒐।
𑒇𑒭𑒱 𑒖𑒙𑒰: (𑒂𑒬𑓂𑒔𑒩𑓂𑒨 𑒏𑒩𑒻𑒞) 𑒯𑒧𑒯𑒲𑓀 𑒏𑒯𑒪𑒾𑓀?
𑒯𑒩𑒣𑒞𑒱: 𑒯𑒿, 𑒁𑒯𑒲𑓀 𑒞𑒿 𑒏𑒯𑒪𑒾𑓀, 𑒅𑒪𑓂𑒏𑒰𑒧𑒳𑒐, 𑒇𑒭𑒱 𑒖𑒙𑒰।
𑒇𑒭𑒱 𑒖𑒙𑒰: (𑒂𑒬𑓂𑒔𑒩𑓂𑒨 𑒏𑒩𑒻𑒞) 𑒮𑒞𑓂𑒞𑒹, 𑒯𑒧𑒯𑒲𑓀 𑒏𑒯𑒪𑒾𑓀?
𑒮𑒼𑒯𑒰𑒑𑒼: 𑒯𑒿, 𑒇𑒭𑒱 𑒖𑒙𑒰, 𑒁𑒯𑒲𑓀 𑒞𑒿 𑒏𑒯𑒪𑒾𑓀, 𑒏𑒲 𑒏𑒼𑒢𑒼 𑒁𑒢𑒱𑒭𑓂𑒙 𑒁𑒕𑒱?
𑒇𑒭𑒱 𑒖𑒙𑒰: (𑒆𑒣𑒩 𑒞𑒏𑒻𑒞) 𑒢𑒻, 𑒏𑒼𑒢𑒼 𑒁𑒢𑒱𑒭𑓂𑒙 𑒢𑒻.. 𑒯𑒧 𑒥𑒱𑒮𑒩𑒱 𑒑𑒹𑒪 𑒩𑒯𑒲 𑒄, 𑒄 𑒯𑒧𑒩 𑒑𑒳𑒩𑒳𑒏 𑒑𑒳𑒩𑒴𑒏 𑒑𑒳𑒩𑒳𑒏 𑒑𑒳𑒩𑒳𑒏𑒹𑒿 𑒏𑒋𑒏𑒙𑒰 𑒅𑒣𑒩𑒏𑒰 𑒑𑒳𑒩𑒳 𑒠𑒹𑒢𑒹 𑒩𑒯𑒟𑒱𑒢𑓂𑒯। 𑒯𑒧 𑒌 𑒞𑒰𑒥𑒲𑒖𑒏 𑒢𑒰𑒧 𑒥𑒱𑒮𑒩𑒱 𑒑𑒹𑒪 𑒩𑒯𑒲.. 𑒂𑒃 𑒁𑒢𑒔𑒼𑒏𑓂𑒏𑒹 𑒧𑒼𑒢 𑒣𑒛𑓃𑒱 𑒑𑒹𑒪… 𑒏𑒲 𑒢𑒰𑒧 𑒩𑒐𑒢𑒹 𑒕𑒲 𑒌 𑒠𑒱𑒫𑓂𑒨 𑒥𑒰𑒪𑒏𑒏..
𑒯𑒩𑒣𑒞𑒱: 𑒑𑓀𑒑𑒰𑒡𑒩 𑒩𑒐𑒢𑒹 𑒕𑒲 𑒇𑒭𑒱 𑒖𑒙𑒰 ..

𑒇𑒭𑒱 𑒖𑒙𑒰: (𑒮𑒼𑒯𑒰𑒑𑒼 𑒂 𑒯𑒩𑒣𑒞𑒱 𑒠𑒱𑒮 𑒞𑒏𑒻𑒞) 𑒄 𑒞𑒰𑒥𑒲𑒖 𑒋𑒏𑒩 𑒑𑒩𑒰𑒧𑒹 𑒔𑒪𑒱 𑒑𑒹𑒪, 𑒯𑒧𑒩 𑒑𑒳𑒩𑒴𑒏𑒹𑒿 𑒯𑒳𑒢𑒏𑒩 𑒑𑒳𑒩𑒴 𑒠𑒹𑒢𑒹 𑒩𑒯𑒟𑒱, 𑒂 𑒯𑒳𑒢𑒏𑒰 𑒯𑒳𑒢𑒏𑒩 𑒑𑒳𑒩𑒴 𑒂 …𑒯𑒧 𑒢𑒰𑒧 𑒥𑒱𑒮𑒩𑒱 𑒑𑒹𑒪 𑒩𑒯𑒲 𑒌 𑒞𑒰𑒥𑒲𑒖𑒏..𑒅𑒪𑓂𑒏𑒰𑒧𑒳𑒐..𑒯𑒿 𑒨𑒋𑒯 𑒯𑒧𑒩 𑒑𑒳𑒩𑒴 𑒏𑒯𑒢𑒹 𑒩𑒯𑒟𑒱 𑒯𑒧𑒩𑒰 𑒂 𑒯𑒳𑒢𑒏𑒰 𑒏𑒯𑒢𑒹 𑒩𑒯𑒢𑓂𑒯𑒱 𑒯𑒳𑒢𑒏𑒩 𑒑𑒳𑒩𑒳 𑒂..𑒠𑒱𑒫𑓂𑒨..𑒠𑒱𑒫𑓂𑒨..𑒄 𑒥𑒔𑓂𑒔𑒰 𑒠𑒱𑒫𑓂𑒨..

𑒯𑒩𑒣𑒞𑒱: (𑒇𑒭𑒱 𑒖𑒙𑒰𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒇𑒭𑒱 𑒖𑒙𑒰 𑒏𑒼𑒢 𑒠𑒱𑒫𑓂𑒨 𑒑𑒳𑒝 𑒠𑒹𑒐 𑒩𑒯𑒪 𑒕𑒱𑒌 𑒁𑒯𑒰𑒿 𑒌 𑒥𑒰𑒪𑒏𑒧𑒹?

𑒮𑒼𑒯𑒰𑒑𑒼: (𑒥𑒔𑓂𑒔𑒰𑒏𑒹𑒿 𑒮𑒧𑓂𑒯𑒰𑒩𑒻𑒞 𑒇𑒭𑒱 𑒖𑒙𑒰 𑒠𑒱𑒮 𑒞𑒰𑒏𑒱।) 𑒇𑒭𑒱 𑒖𑒙𑒰, 𑒄 𑒮𑒢𑓂𑒨𑒰𑒮𑒲-𑒞𑒢𑓂𑒨𑒰𑒮𑒲 𑒞𑒿 𑒢𑒻 𑒥𑒢𑒱 𑒖𑒰𑒋𑒞?
𑒇𑒭𑒱 𑒖𑒙𑒰: 𑒮𑒹 𑒯𑒧𑒩𑒰 𑒏𑒱𑒕𑒳 𑒢𑒻 𑒥𑒳𑒗𑒪 𑒁𑒕𑒱। 𑒧𑒳𑒠𑒰 𑒪𑒑𑒻𑒋 𑒖𑒹 𑒯𑒋𑒞 𑒏𑒱𑒕𑒳। 𑒌 𑒧𑒩𑒳𑒦𑒴𑒧𑒱𑒧𑒹 𑒩𑒹𑒞𑒏 𑒥𑒲𑒔 𑒖𑒢𑓂𑒧𑒞 𑒏𑒱𑒕𑒳। 𑒧𑒳𑒠𑒰 𑒢𑒯𑒱𑒨𑒼 𑒅𑒑𑒱 𑒮𑒏𑒻𑒋..
𑒯𑒩𑒣𑒞𑒱: 𑒮𑒹 𑒏𑒱𑒋 𑒇𑒭𑒱 𑒖𑒙𑒰?
𑒬𑒱𑒭𑓂𑒨 𑒯𑒲𑒩𑒴: 𑒮𑒹 𑒌 𑒪𑒹𑒪 𑒖𑒹 𑒄 𑒞𑒰𑒥𑒲𑒖 𑒖𑒞𑓄 𑒞𑒞𑓄 𑒩𑒰𑒐𑒪 𑒩𑒯𑒻, 𑒣𑒳𑒩𑒢𑒰 𑒣𑒼𑒐𑒩𑒱 𑒂 𑒥𑒼𑒢 𑒮𑒦𑒧𑒹 … 𑒏𑒞𑒹𑒏 𑒑𑒼𑒙𑒹𑒏𑒹𑒿 𑒇𑒭𑒱 𑒖𑒙𑒰 𑒣𑒯𑒱𑒩𑒹𑒢𑒹 𑒕𑒟𑒱 𑒄 𑒞𑒰𑒥𑒲𑒖, 𑒂 𑒏𑒞𑒹𑒏 𑒑𑒼𑒙𑒹𑒏𑒹𑒿 𑒣𑒯𑒱𑒩𑒹𑒢𑒹 𑒕𑒟𑒱 𑒇𑒭𑒱 𑒖𑒙𑒰𑒏 𑒑𑒳𑒩𑒳 𑒂 𑒯𑒳𑒢𑒏𑒩 𑒑𑒳𑒩𑒳𑒏 𑒑𑒳𑒩𑒳 𑒂 𑒯𑒳𑒢𑒏𑒩𑒼 𑒑𑒳𑒩𑒳.. 𑒧𑒳𑒠𑒰 𑒢𑒻 𑒦𑒹𑒪 𑒏𑒱𑒕𑒳।

𑒮𑒼𑒯𑒰𑒑𑒼: (𑒯𑒲𑒩𑒴𑒮𑒿) 𑒏𑒲 𑒢𑒻 𑒦𑒹𑒪 𑒯𑒲𑒩𑒴?

𑒬𑒱𑒭𑓂𑒨 𑒯𑒲𑒩𑒴: 𑒧𑒩𑒳𑒦𑒴𑒧𑒱𑒧𑒹 𑒩𑒹𑒞𑒏 𑒥𑒲𑒔 𑒢𑒻 𑒖𑒢𑓂𑒧𑒪 𑒏𑒱𑒕𑒳𑒍।

(𑒇𑒭𑒱 𑒖𑒙𑒰 𑒖𑒼𑒩𑒮𑒿 𑒅𑒏𑒰𑒮𑒲 𑒏𑒩𑓄 𑒪𑒑𑒻 𑒕𑒟𑒱। 𑒬𑒱𑒭𑓂𑒨 𑒯𑒲𑒩𑒴 𑒯𑒳𑒢𑒏𑒩 𑒕𑒰𑒞𑒲 𑒮𑒮𑒰𑒩𑓄 𑒪𑒑𑒻 𑒕𑒟𑒱। 𑒮𑒑𑒩𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)
(𑒧𑓀𑒔𑒣𑒩 𑒣𑓂𑒩𑒏𑒰𑒬 𑒯𑒼𑒃𑒞 𑒁𑒕𑒱। 𑒥𑒰𑒪𑒏 𑒑𑓀𑒑𑒰𑒡𑒩 𑒣𑒻𑒒 𑒦𑓄 𑒑𑒹𑒪 𑒕𑒟𑒱। 𑒍 𑒯𑒲𑒩𑒴 𑒪𑒑 𑒯𑒳𑒢𑒏𑒩 𑒙𑒼𑒪 𑒑𑒹𑒪 𑒕𑒟𑒱। 𑒯𑒲𑒩𑒴 𑒢𑒲𑒔𑒰𑒿𑒧𑒹 𑒥𑒻𑒮𑒪 𑒕𑒟𑒱, 𑒢𑒲𑒔𑒰𑒿𑒧𑒹 𑒔𑒰𑒧𑒏 𑒏𑒱𑒕𑒳 𑒩𑒰𑒐𑒪 𑒕𑒻 𑒖𑒃𑒧𑒹 𑒯𑒲𑒩𑒴 𑒏𑒱𑒕𑒳 𑒮𑒲- 𑒮𑒰 𑒩𑒯𑒪 𑒕𑒟𑒱, 𑒥𑒑𑒪𑒧𑒹 𑒮𑒰𑒃𑓀𑒑 𑒩𑒰𑒐𑒪 𑒕𑒻 𑒂 𑒑𑓀𑒑𑒰𑒡𑒩 𑒍𑒞𑓄 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱।)
𑒬𑒱𑒭𑓂𑒨 𑒯𑒲𑒩𑒴: 𑒂𑒅 𑒑𑓀𑒑𑒰𑒡𑒩 𑒂𑒅।
𑒑𑓀𑒑𑒰𑒡𑒩: 𑒯𑒲𑒩𑒴 𑒏𑒲 𑒏𑓄 𑒩𑒯𑒪 𑒕𑒲।
𑒬𑒱𑒭𑓂𑒨 𑒯𑒲𑒩𑒴: 𑒧𑒳𑒩𑒠𑒰𑒩𑒲 𑒮𑒦 𑒜𑒹𑒩 𑒩𑒰𑒮 𑒋𑒏𑒙𑓂𑒚𑒰 𑒦𑓄 𑒑𑒹𑒪 𑒁𑒕𑒱। (𑒆𑒣𑒩 𑒧𑒳𑒿𑒯𑒹 𑒮𑒰𑒿𑒮 𑒪𑒻𑒞) 𑒄 𑒑𑒻𑒢𑒰𑒏 𑒔𑒰𑒧 𑒕𑒱𑒌, 𑒕𑒼𑒙𑒹𑒧𑒹 𑒧𑒛𑓃𑒱 𑒑𑒹𑒪𑒻।
𑒑𑓀𑒑𑒰𑒡𑒩 : (𑒮𑒰𑒃𑓀𑒑𑒣𑒩 𑒥𑒻𑒮𑒻𑒞) 𑒏𑒲 𑒏𑒩𑒥 𑒋𑒏𑒩।
𑒬𑒱𑒭𑓂𑒨 𑒯𑒲𑒩𑒴: 𑒠𑒹𑒐𑒱𑒨𑒾, 𑒧𑒰𑒢𑒩𑒱 𑒥𑒢𑒥𑒻 𑒕𑒲, 𑒖𑒿 𑒥𑒢𑒱 𑒮𑒏𑒞 𑒞𑒐𑒢। 𑒏𑒧𑓂𑒧𑒹 𑒔𑒰𑒧 𑒕𑒻। (𑒑𑓀𑒑𑒰𑒡𑒩 𑒠𑒱𑒮 𑒞𑒏𑒻𑒞) 𑒯𑒹 𑒚𑒲𑒏𑒮𑒿 𑒥𑒻𑒮𑒴 𑒢𑒻 𑒞𑒿 𑒑𑒳𑒛𑓃𑒏𑒱 𑒖𑒰𑒋𑒥।

(𑒞𑒐𑒢𑒹 𑒮𑒰𑒃𑓀𑒑𑒣𑒩 𑒮𑒿 𑒑𑓀𑒑𑒰𑒡𑒩 𑒑𑒳𑒛𑓃𑒏𑒱 𑒖𑒰𑒃 𑒕𑒟𑒱। 𑒂 𑒬𑒱𑒭𑓂𑒨 𑒯𑒲𑒩𑒴 𑒂 𑒑𑓀𑒑𑒰𑒡𑒩 𑒠𑒳𑒢𑒴 𑒑𑒼𑒙𑒹 𑒦𑒦𑒰 𑒏𑓄 𑒯𑒿𑒮𑓄 𑒪𑒑𑒻 𑒕𑒟𑒱।)
:𑒁𑒯𑒰𑒿𑒏𑒹𑒿 𑒏𑒯𑒻 𑒕𑒪𑒾𑓀। 𑒄 𑒮𑒰𑓀𑒑𑒱 𑒧𑒳𑒃𑒪 𑒣𑒻𑒒-𑒣𑒻𑒒 𑒧𑒰𑒪𑒏 𑒦𑒰𑒩 𑒮𑒯𑒱 𑒪𑒻𑒋, 𑒧𑒳𑒠𑒰 𑒁𑒯𑒰𑒿 𑒮𑒢 𑒕𑒼𑒙 𑒥𑒾𑒂𑒏 𑒦𑒰𑒩𑒏𑒹𑒿 𑒄 𑒢𑒻 𑒮𑒯𑒱 𑒮𑒏𑒪।
𑒑𑓀𑒑𑒰𑒡𑒩 : 𑒮𑒹 𑒏𑒱𑒋 𑒯𑒲𑒩𑒴?
𑒬𑒱𑒭𑓂𑒨 𑒯𑒲𑒩𑒴: 𑒌 𑒠𑒳𑒂𑒩𑒹, 𑒏𑒱𑒋𑒏𑒱 𑒏𑒼𑒢𑒼 𑒥𑒾𑒮𑓂𑒞𑒳 𑒏𑒼𑒢𑒰 𑒩𑒰𑒐𑒪 𑒖𑒰𑒋, 𑒄𑒯𑒼 𑒖𑒩𑒴𑒩𑒲 𑒕𑒻 𑒥𑒳𑒗𑒥। 𑒮𑒼𑒗𑒹 𑒏𑒯𑒱 𑒠𑒹𑒥𑒻 𑒖𑒹 𑒌 𑒮𑒰𑒃𑓀𑒑𑒣𑒩 𑒋𑒞𑒹𑒏 𑒦𑒰𑒩 𑒮𑒯𑒥𑒰𑒏 𑒬𑒏𑓂𑒞𑒱 𑒕𑒻, 𑒞𑒿 𑒮𑒹 𑒢𑒻 𑒯𑒋𑒞। 𑒫𑒋𑒯 𑒇𑒭𑒱 𑒖𑒙𑒰 𑒄 𑒮𑒦 𑒥𑒏𑒻𑒞 𑒩𑒯𑒻𑒋.. 𑒖𑒹 𑒥𑒳𑒗𑒱 𑒏𑓄 𑒥𑒰𑒖𑒴 𑒞𑒹𑒿 …
𑒑𑓀𑒑𑒰𑒡𑒩: 𑒂𑒩 𑒏𑒲 𑒮𑒦 𑒏𑒯𑒻 𑒕𑒟𑒱 𑒇𑒭𑒱 𑒖𑒙𑒰?
𑒬𑒱𑒭𑓂𑒨 𑒯𑒲𑒩𑒴: 𑒥𑒛𑓂𑒛 𑒩𑒰𑒮 𑒑𑒣। 𑒨𑒋𑒯 𑒖𑒹 𑒂𑒧𑒏 𑒦𑒰𑒩 𑒯𑒧 𑒁𑒢𑒳𑒦𑒫 𑒏𑒩𑒻 𑒕𑒲, 𑒧𑒳𑒠𑒰 𑒂𑒧𑒏 𑒑𑒰𑒕 𑒁𑒣𑒢𑒰𑒧𑒹 𑒪𑒰𑒑𑒪 𑒂𑒧𑒏 𑒦𑒰𑒩𑒏 𑒁𑒢𑒳𑒦𑒫 𑒢𑒻 𑒏𑒩𑒻𑒋।
𑒑𑓀𑒑𑒰𑒡𑒩: 𑒂𑒩 𑒏𑒲 𑒏𑒯𑒻 𑒕𑓂𑒟𑒱?
𑒬𑒱𑒭𑓂𑒨 𑒯𑒲𑒩𑒴: 𑒏𑒯𑒻 𑒕𑒟𑒱 𑒄 𑒁𑒏𑒰𑒮 𑒠𑒴 𑒦𑒰𑒑 𑒏𑒩𑒻𑒋 𑒌 𑒫𑒱𑒬𑓂𑒫𑒏𑒹𑒿..
𑒑𑓀𑒑𑒰𑒡𑒩: 𑒠𑒴 𑒦𑒰𑒑? 𑒄 𑒁𑒏𑒰𑒮 𑒠𑒴 𑒦𑒰𑒑 𑒏𑒩𑒻𑒋? 𑒧𑒳𑒠𑒰 𑒄 𑒁𑒏𑒰𑒮 𑒞𑒿 𑒠𑒹𑒐𑒰𑒃𑒞𑒹 𑒖𑒰𑒃𑒋.. 𑒞𑒐𑒢 𑒠𑒼𑒮𑒩 𑒦𑒰𑒑 𑒏𑒞𑓄 𑒌𑒞?
𑒬𑒱𑒭𑓂𑒨 𑒯𑒲𑒩𑒴: 𑒬𑒲𑒮𑒰 𑒕𑒻 𑒄 𑒁𑒏𑒰𑒮, 𑒌𑒣𑒰𑒩𑒮𑒿 𑒍𑒃𑒣𑒰𑒩 𑒠𑒹𑒐𑒻 𑒕𑒲 𑒯𑒧।
𑒑𑓀𑒑𑒰𑒡𑒩: (𑒂𑒬𑓂𑒔𑒩𑓂𑒨𑒮𑒿) 𑒚𑒲𑒏𑒹? 𑒂𑒩 𑒏𑒲 𑒏𑒯𑒻 𑒕𑒟𑒱 𑒍?
𑒬𑒱𑒭𑓂𑒨 𑒯𑒲𑒩𑒴: 𑒍 𑒏𑒯𑒻 𑒕𑒟𑒱 𑒖𑒹 𑒄 𑒬𑒥𑓂𑒠 𑒁𑒕𑒱 𑒧𑒼𑒞𑒲, 𑒄 𑒬𑒥𑓂𑒠 𑒁𑒕𑒱 𑒧𑒰𑒝𑒱𑒏𑒏 𑒃𑒖𑒼𑒞, 𑒧𑒳𑒠𑒰 𑒖𑒿 𑒬𑒥𑓂𑒠 𑒬𑒥𑓂𑒠𑒹 𑒩𑒯𑒱 𑒖𑒰𑒋 𑒂 𑒏𑒯𑒪𑒰 𑒂 𑒏𑒋𑒪𑒰𑒧𑒹 𑒁𑒢𑓂𑒞𑒩 𑒦𑓄 𑒖𑒰𑒋 𑒞𑒿 𑒌 𑒧𑒼𑒞𑒲 𑒪𑓄 𑒏𑓄 𑒏𑒲 𑒏𑒩𑒥 𑒂 𑒏𑒲 𑒏𑒩𑒥 𑒧𑒰𑒝𑒱𑒏𑒏 𑒍𑒃 𑒃𑒖𑒼𑒞𑒏𑒹𑒿 𑒪𑓄 𑒏𑓄?
𑒑𑓀𑒑𑒰𑒡𑒩: 𑒚𑒲𑒏𑒹 𑒯𑒲𑒩𑒴 𑒍 𑒦𑓄 𑒖𑒰𑒋𑒞 𑒔𑒼𑒩𑒱..
𑒬𑒱𑒭𑓂𑒨 𑒯𑒲𑒩𑒴: 𑒯𑒿
𑒑𑓀𑒑𑒰𑒡𑒩: 𑒚𑒲𑒏𑒹 𑒯𑒲𑒩𑒴 𑒍 𑒦𑓄 𑒖𑒰𑒋𑒞 𑒬𑒥𑓂𑒠𑒏 𑒯𑒞𑓂𑒨𑒰..
𑒬𑒱𑒭𑓂𑒨 𑒯𑒲𑒩𑒴: 𑒯𑒿
𑒑𑓀𑒑𑒰𑒡𑒩: 𑒚𑒲𑒏𑒹 𑒯𑒲𑒩𑒴 𑒍 𑒦𑓄 𑒖𑒰𑒋𑒞 𑒗𑒴𑒚..
𑒬𑒱𑒭𑓂𑒨 𑒯𑒲𑒩𑒴: 𑒯𑒿
𑒑𑓀𑒑𑒰𑒡𑒩: 𑒚𑒲𑒏𑒹 𑒯𑒲𑒩𑒴 𑒍 𑒦𑓄 𑒖𑒰𑒋𑒞 𑒮𑒞𑓂𑒨𑒮𑒿 𑒒𑒵𑒝𑒰..
𑒬𑒱𑒭𑓂𑒨 𑒯𑒲𑒩𑒴: 𑒯𑒿
𑒑𑓀𑒑𑒰𑒡𑒩: 𑒚𑒲𑒏𑒹 𑒯𑒲𑒩𑒴 𑒍 𑒦𑓄 𑒖𑒰𑒋𑒞 𑒒𑒧𑒝𑓂𑒛𑒲 𑒬𑒥𑓂𑒠..
𑒬𑒱𑒭𑓂𑒨 𑒯𑒲𑒩𑒴: 𑒯𑒿
𑒑𑓀𑒑𑒰𑒡𑒩: 𑒚𑒲𑒏𑒹 𑒯𑒲𑒩𑒴 𑒍 𑒦𑓄 𑒖𑒰𑒋𑒞 𑒁𑒬𑒥𑓂𑒠.. 𑒍 𑒦𑓄 𑒖𑒰𑒋𑒞 𑒠𑒼𑒭 𑒪𑒑𑒰𑒋𑒥 𑒠𑒼𑒮𑒩𑒰𑒣𑒩.. 𑒁𑒣𑒢 𑒬𑒥𑓂𑒠𑒏 𑒁𑒩𑓂𑒟 𑒢𑒻 𑒥𑒳𑒗𑒥𑒰𑒏 𑒠𑒼𑒭 𑒪𑒑𑒰𑒋𑒥 𑒠𑒼𑒮𑒩𑒰𑒣𑒩..
𑒬𑒱𑒭𑓂𑒨 𑒯𑒲𑒩𑒴: 𑒯𑒿 (𑒠𑒳𑒢𑒴 𑒑𑒼𑒙𑒹 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱 𑒂 𑒯𑒲𑒩𑒴 𑒞𑒰𑒝𑓂𑒛𑒫 𑒢𑒵𑒞𑓂𑒨𑒏 𑒂𑒏𑒵𑒞𑒱 𑒥𑒢𑒰 𑒪𑒻 𑒕𑒟𑒱 𑒂 𑒫𑒱𑒦𑒼𑒩 𑒦𑓄 𑒑𑒰𑒥 𑒪𑒑𑒻 𑒕𑒟𑒱)
𑒧𑒻𑒨𑒰 𑒠𑒳𑒂𑒩 𑒁𑒛𑓃𑒯𑒳𑒪 𑒤𑒳𑒪 𑒑𑒕𑒱𑒨𑒰
𑒧𑒰𑒿 𑒯𑒹 𑒤𑒛𑓃-𑒤𑒳𑒪 𑒪𑒳𑒥𑒡𑒪 𑒛𑒰𑒱𑒩
𑒠𑒕𑒱𑒢 𑒣𑒕𑒱𑒧 𑒮𑒿 𑒮𑒴𑒑𑒰 𑒋𑒏 𑒂𑒋𑒪
𑒧𑒰𑒿 𑒯𑒹 𑒥𑒻𑒮 𑒑𑒹𑒪 𑒁𑒛𑓃𑒯𑒳𑒪 𑒤𑒴𑒪 𑒑𑒰𑒕
𑒑𑓀𑒑𑒰𑒡𑒩: (𑒞𑒰𑒝𑓂𑒛𑒫 𑒢𑒵𑒞𑓂𑒨𑒏 𑒂𑒏𑒵𑒞𑒱 𑒥𑒢𑒰 𑒪𑒻 𑒕𑒟𑒱 𑒂 𑒫𑒱𑒦𑒼𑒩 𑒦𑓄 𑒑𑒰𑒥 𑒪𑒑𑒻 𑒕𑒟𑒱)
𑒏𑒱𑒨𑒼 𑒢𑒲𑒣𑒨 𑒁𑒑𑒳𑒂𑒩, 𑒏𑒱𑒨𑒼 𑒣𑒕𑒳𑒂𑒩
𑒯𑒧𑒯𑒳𑒿 𑒁𑒦𑒰𑒑𑒪 𑒠𑒳𑒂𑒩 𑒡𑒹𑒢𑒹 𑒚𑒰𑒜𑓃
𑒱𑒏𑒨𑒼 𑒪𑒼𑒜𑓃𑒻 𑒥𑒹𑒪𑒲 𑒤𑒴𑒪 𑒏𑒱𑒨𑒼 𑒁𑒜𑓃𑒴𑒪
𑒯𑒧𑒯𑒳𑒿 𑒁𑒦𑒰𑒑𑒪 𑒐𑒼𑒠𑒲 𑒢𑒰𑒧𑒲 𑒠𑒳𑒥𑒱
𑒏𑒱𑒨𑒼 𑒧𑒰𑓀𑒑𑒨 𑒁𑒢-𑒡𑒢, 𑒏𑒱𑒨𑒼 𑒣𑒴𑒞
𑒯𑒧𑒯𑒳𑒿 𑒁𑒦𑒰𑒑𑒪 𑒏𑒩 𑒖𑒼𑒛𑓃𑒱 𑒚𑒰𑒜𑓃।
(𑒮𑓂𑒫𑒩 𑒣𑒩𑒱𑒫𑒩𑓂𑒞𑒱𑒞 𑒏𑓄 𑒯𑒲𑒩𑒴𑒏 𑒮𑒼𑒗𑒰𑒿 𑒚𑒰𑒜𑓃 𑒦𑓄)
𑒮𑒰𑒍𑒢 𑒫𑒱𑒭𑒯𑒩𑒱 𑒪𑒹𑒪 𑒣𑓂𑒩𑒫𑒹𑒬
𑒦𑒰𑒠𑒫 𑒫𑒱𑒭𑒯𑒩𑒱 𑒐𑒹𑒪𑒪 𑒗𑒱𑒪𑒯𑒼𑒩𑒱।
𑒂𑒮𑒱𑒢 𑒫𑒱𑒭𑒯𑒩𑒱 𑒦𑒑𑒞𑒰 𑒪𑒹𑒪 𑒣𑒰𑒢
𑒏𑒰𑒞𑒱𑒏 𑒫𑒱𑒭𑒯𑒩𑒱 𑒢𑒨𑒢𑒰 𑒗𑒩𑒴 𑒢𑒼𑒩।
𑒁𑒑𑒯𑒢 𑒫𑒱𑒭𑒯𑒩𑒱 𑒯𑒹𑒞𑒲 𑒁𑒢𑒧𑒼𑒪।
𑒬𑒱𑒭𑓂𑒨 𑒯𑒲𑒩𑒴 𑒂 𑒑𑓀𑒑𑒰𑒡𑒩: (𑒮𑒧𑓂𑒫𑒹𑒞 𑒮𑓂𑒫𑒩𑒧𑒹, 𑒮𑒼𑒗𑒰𑒿-𑒮𑒼𑒗𑒲𑓀 𑒂𑒥𑒱 𑒏𑓄 𑒑𑒥𑒻𑒞 𑒕𑒟𑒱।)
𑒤𑒛𑓃𑒼 𑒢𑒹 𑒐𑒰𑒨 𑒮𑒳𑒑𑒰 𑒤𑒴𑒪𑒼 𑒢𑒹 𑒐𑒰𑒨
𑒧𑒰𑒿 𑒯𑒹 𑒣𑒰𑒞𑒹 𑒣𑒰𑒞𑒹 𑒐𑒹𑒪𑒨 𑒣𑒞𑒗𑒰𑒩
𑒏𑒯𑒰𑒿 𑒑𑒹𑒪, 𑒏𑒱𑒋 𑒦𑒹𑒪 𑒛𑒲𑒯𑒫𑒰𑒩 𑒚𑒰𑒏𑒳𑒩
𑒧𑒰𑒿 𑒯𑒹 𑒁𑒣𑒢 𑒮𑒴𑒑𑒰 𑒪𑒲𑒁 𑒮𑒳𑒧𑒗𑒰𑒨
….
(𑒮𑓂𑒫𑒩 𑒣𑒩𑒱𑒫𑒩𑓂𑒞𑒱𑒞 𑒏𑓄 𑒯𑒲𑒩𑒴𑒏 𑒠𑒴𑒩𑒮𑓂𑒞 𑒦𑓄 𑒏𑓄 𑒠𑒳𑒢𑒴 𑒚𑒰𑒜𑓃 𑒦𑓄 𑒏𑓄)
𑒆𑒿𑒔 𑒩𑒹 𑒁𑒙𑒩𑒱𑒨𑒰 𑒣𑒩 𑒫𑒱𑒭𑒯𑒩𑒱 𑒧𑒰𑒨
𑒩𑒰𑒧, 𑒢𑒲𑒔𑒲 𑒩𑒹 𑒁𑒙𑒩𑒱𑒨𑒰 𑒣𑒩 𑒮𑒼𑒢𑒩𑒰 𑒏𑒹 𑒧𑒰𑒨
𑒠𑒹𑒥𑒾 𑒩𑒹 𑒮𑒼𑒢𑒩𑒰 𑒦𑒰𑒃 𑒛𑒰𑒪𑒰 𑒦𑒩𑒱 𑒮𑒼𑒢
𑒩𑒰𑒧, 𑒑𑒜𑓃𑒱 𑒫𑒱𑒭𑒯𑒩𑒱 𑒏𑒹 𑒏𑒪𑒮 𑒣𑒔𑒰𑒮
𑒥𑒰𑒙 𑒩𑒹 𑒥𑒙𑒼𑒯𑒱𑒨𑒰 𑒏𑒱 𑒞𑒼𑒯𑒹𑓀 𑒧𑒼𑒩 𑒦𑒰𑒃
𑒩𑒰𑒧, 𑒏𑒯𑒥𑒢𑒱 𑒫𑒱𑒭𑒯𑒩𑒱 𑒏𑒹 𑒏𑒪𑒮𑒰 𑒪𑒨 𑒖𑒰𑒃
𑒞𑒼𑒯𑒩𑒼 𑒫𑒱𑒭𑒯𑒩𑒱 𑒏𑒹 𑒔𑒱𑒢𑓂𑒯𑒱𑒨𑒼 𑒢𑒹 𑒖𑒰𑒢𑒱
𑒩𑒰𑒧, 𑒏𑒯𑒥𑒢𑒱 𑒏𑒼𑒢𑒰 𑒏𑒹 𑒏𑒪𑒮 𑒪𑒋 𑒖𑒰𑒨

(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)




















𑒕𑒁𑒧 𑒏𑒪𑓂𑒪𑒼𑒪

(𑒧𑓀𑒔𑒣𑒩 𑒣𑓂𑒩𑒏𑒰𑒬 𑒯𑒼𑒃𑒞 𑒁𑒕𑒱। 𑒥𑒰𑒪𑒏 𑒑𑓀𑒑𑒰𑒡𑒩 𑒂𑒚 𑒥𑒩𑓂𑒐𑒏 𑒦𑓄 𑒑𑒹𑒪 𑒕𑒟𑒱। 𑒧𑒰𑒋-𑒥𑒰𑒣𑒮𑒿 𑒯𑒳𑒢𑒏𑒩 𑒥𑒯𑒮 𑒔𑒪𑒱 𑒩𑒯𑒪 𑒕𑒢𑓂𑒯𑒱। 𑒪𑒑𑒻𑒋 𑒏𑒼𑒢𑒼 𑒑𑒧𑓂𑒦𑒲𑒩 𑒫𑒱𑒫𑒰𑒠 𑒕𑒢𑓂𑒯𑒱।)

𑒯𑒩𑒣𑒞𑒱: 𑒋𑒯𑒢𑒼 𑒦𑒹𑒪 𑒕𑒻 𑒏𑒯𑒱𑒨𑒼, 𑒨𑒖𑓂𑒘𑒼𑒣𑒫𑒲𑒞 𑒢𑒻 𑒏𑒩𑒰𑒋𑒥? 𑒏𑒼𑒢𑒼 𑒩𑒼𑒏-𑒙𑒼𑒏 𑒯𑒧 𑒏𑒹𑒪𑒾𑓀, 𑒥𑓂𑒩𑒰𑒯𑓂𑒧𑒝𑒏 𑒥𑒔𑓂𑒔𑒰 𑒦𑓄 𑒏𑓄 𑒯𑒲𑒩𑒴𑒏 𑒙𑒼𑒪 𑒁𑒯𑒰𑒿 𑒑𑒲𑒞 𑒮𑒳𑒢𑒻𑒪𑒹, 𑒮𑒱𑒐𑒻𑒪𑒹 𑒖𑒰𑒃𑒞 𑒩𑒯𑒲, 𑒏𑒯𑒱𑒨𑒼 𑒩𑒼𑒏-𑒙𑒼𑒏 𑒏𑒹𑒪𑒾𑓀?

𑒑𑓀𑒑𑒰𑒡𑒩: (𑒁𑒣𑒢 𑒅𑒪𑓂𑒏𑒰𑒧𑒳𑒐 𑒞𑒰𑒥𑒲𑒖 𑒠𑒹𑒐𑒥𑒻𑒞) 𑒯𑒧 𑒋𑒏𑒩𑒰 𑒡𑒰𑒩𑒝 𑒏𑓄 𑒪𑒹𑒢𑒹 𑒕𑒲 𑒣𑒱𑒞𑒰𑒬𑓂𑒩𑒲। 𑒇𑒭𑒱 𑒖𑒙𑒰𑒏 𑒠𑒹𑒪 𑒄 𑒅𑒪𑓂𑒏𑒰𑒧𑒳𑒐𑒲 𑒞𑒰𑒥𑒲𑒖, 𑒠𑒹𑒐𑒴। (𑒯𑒰𑒟𑒮𑒿 𑒣𑒏𑒛𑓃𑒱 𑒏𑓄 𑒠𑒹𑒐𑒥𑒻𑒞 𑒕𑒟𑒱।) 𑒅𑒪𑓂𑒏𑒰𑒧𑒳𑒐 𑒡𑒰𑒩𑒝 𑒏𑒹𑒢𑒱𑒯𑒰𑒩𑒏𑒹𑒿 𑒏𑒼𑒢𑒼 𑒮𑓀𑒮𑓂𑒏𑒰𑒩 𑒏𑒩𑒹𑒥𑒰𑒏 𑒏𑒼𑒢 𑒂𑒫𑒬𑓂𑒨𑒏𑒞𑒰 𑒕𑒻?
(𑒯𑒩𑒱𑒣𑒞𑒱 𑒏𑓂𑒩𑒼𑒡𑒱𑒞 𑒦𑓄 𑒖𑒰𑒃 𑒕𑒟𑒱। 𑒋𑒧𑓂𑒯𑒩-𑒍𑒧𑓂𑒯𑒰𑒩 𑒖𑒰𑒋 𑒪𑒑𑒻 𑒕𑒟𑒱।)

𑒮𑒼𑒯𑒰𑒑𑒼: (𑒑𑓀𑒑𑒰𑒡𑒩 𑒠𑒱𑒮 𑒞𑒰𑒏𑒻𑒞) 𑒋𑒢𑒰 𑒢𑒻 𑒥𑒰𑒖𑒴 𑒑𑓀𑒑𑒰𑒡𑒩, 𑒋𑒯𑒹𑒢 𑒂𑒃 𑒡𑒩𑒱 𑒢𑒻 𑒦𑒹𑒪 𑒁𑒕𑒱, 𑒪𑒼𑒏 𑒏𑒲 𑒏𑒯𑒞, 𑒣𑒝𑓂𑒛𑒱𑒞 𑒮𑒦 𑒏𑒲 𑒥𑒰𑒖𑒞? 𑒖𑒱𑒠𑒣𑒢𑒰 𑒕𑒼𑒛𑓃𑒴, 𑒂𑒥 𑒁𑒯𑒰𑒿 𑒥𑒔𑓂𑒔𑒰 𑒢𑒻 𑒕𑒲। 𑒂𑒚 𑒥𑒩𑒐𑒏 𑒦𑒹𑒪𑒾𑓀।

𑒯𑒩𑒣𑒞𑒱: (𑒮𑒼𑒯𑒰𑒑𑒼 𑒠𑒱𑒮 𑒞𑒏𑒻𑒞) 𑒠𑒹𑒐𑒴। 𑒁𑒯𑒰𑒿 𑒁𑒯𑒲𑓀 𑒢𑒹 𑒏𑒯𑒻 𑒕𑒪𑒾𑓀 𑒖𑒹 𑒖𑒹𑒢𑒰-𑒖𑒹𑒢𑒰 𑒅𑒧𑒹𑒩 𑒥𑒜𑓃𑒞𑒻 𑒋𑒏𑒩 𑒖𑒱𑒠𑒣𑒢𑒰 𑒒𑒙𑒞𑒻। 𑒧𑒳𑒠𑒰 𑒯𑒧 𑒞𑒿 𑒠𑒹𑒐𑒱 𑒩𑒯𑒪 𑒕𑒲 𑒖𑒹 𑒠𑒱𑒢𑒣𑒩 𑒠𑒱𑒢 𑒋𑒏𑒩 𑒖𑒱𑒠𑒣𑒢𑒰 𑒒𑒙𑒥𑒰𑒏 𑒥𑒠𑒪𑒰 𑒥𑒜𑓃𑒱𑒞𑒹 𑒖𑒰 𑒩𑒯𑒪 𑒕𑒻। 𑒧𑒰𑒮𑓂𑒙𑒩 𑒮𑒰𑒯𑒹𑒥 𑒮𑒹𑒯𑒼 𑒏𑒯𑒱 𑒩𑒯𑒪 𑒕𑒪𑒰 𑒖𑒹 𑒏𑒼𑒢𑒼 𑒮𑒥𑒏 𑒯𑒱𑒢𑒏𑒰 𑒨𑒰𑒠𑒱 𑒏𑒩𑒻𑒪𑒹 𑒠𑒻 𑒕𑒟𑒱𑒢𑓂𑒯 𑒞𑒿 𑒮𑒦 𑒥𑒔𑓂𑒔𑒰 𑒨𑒰𑒠𑒱 𑒏𑓄 𑒪𑒻𑒞 𑒁𑒕𑒱 𑒧𑒳𑒠𑒰 𑒄 𑒍𑒃𑒧𑒹 𑒧𑒰𑒩𑒞𑒹 𑒩𑒰𑒮 𑒏𑒧𑒲 𑒢𑒱𑒏𑒰𑒪𑒱 𑒠𑒻 𑒕𑒟𑒱।

𑒑𑓀𑒑𑒰𑒡𑒩: 𑒣𑒱𑒞𑒰𑒖𑒲, 𑒣𑒰𑒚𑒬𑒰𑒪𑒰𑒧𑒹 𑒖𑒹 𑒩𑒙𑒢𑓂𑒞 𑒫𑒱𑒠𑓂𑒨𑒰 𑒣𑒜𑓃𑒰𑒋𑒪 𑒖𑒰𑒃𑒞 𑒁𑒕𑒱 𑒮𑒹 𑒯𑒧𑒩𑒰 𑒣𑒮𑒱𑒢𑓂𑒢 𑒢𑒻 𑒁𑒕𑒱। 𑒖𑒹 𑒏𑒱𑒕𑒳 𑒯𑒧 𑒣𑒴𑒕𑒻 𑒕𑒱𑒨𑒢𑓂𑒯𑒱 𑒮𑒹 𑒍 𑒥𑒳𑒗𑒰𑒥𑒻 𑒢𑒻 𑒕𑒟𑒱, 𑒏𑒯𑒻 𑒕𑒟𑒱 𑒖𑒹 𑒁𑒯𑒱𑒢𑒰 𑒩𑒙𑒱 𑒪𑒱𑒁 𑒏𑒰𑒩𑒝 𑒯𑒳𑒢𑒏𑒩 𑒑𑒳𑒩𑒴𑒖𑒲 𑒯𑒳𑒢𑒏𑒰 𑒍𑒯𑒱𑒢𑒰 𑒩𑒙𑒥𑒹𑒢𑒹 𑒕𑒟𑒱𑒢𑓂𑒯। 𑒯𑒧𑒩𑒰 𑒞𑒿 𑒪𑒑𑒻𑒋 𑒖𑒹 𑒯𑒳𑒢𑒏𑒰 𑒮𑒦𑒏𑒹𑒿 𑒁𑒣𑒢𑒹 𑒫𑒱𑒭𑒨 𑒏 𑒣𑒴𑒩𑓂𑒝 𑒖𑓂𑒘𑒰𑒢 𑒢𑒻 𑒕𑒢𑓂𑒯𑒱। 𑒥𑒹𑒓 𑒖𑒏𑒰𑒿 𑒍 𑒧𑒰𑒞𑓂𑒩 𑒙𑒩𑓂𑒩-𑒙𑒩𑓂𑒩 𑒏𑒩𑒥 𑒖𑒰𑒢𑒻 𑒕𑒟𑒱।

𑒯𑒩𑒣𑒞𑒱: (𑒧𑓀𑒔𑒏 𑒂𑒑𑒰𑒿 𑒖𑒰𑒃𑒞) 𑒪𑒱𑒁, 𑒄 𑒂𑒥 𑒢𑒫𑒏𑒰 𑒑𑒣 𑒏𑒲 𑒅𑒚𑒱 𑒑𑒹𑒪। (𑒮𑒼𑒯𑒰𑒑𑒼 𑒠𑒱𑒮 𑒞𑒏𑒻𑒞) 𑒂𑒥 𑒑𑓀𑒑𑒰𑒡𑒩𑒏𑒹𑒿 𑒣𑒳𑒕𑒱𑒨𑒾 𑒖𑒹 𑒯𑒱𑒢𑒏𑒰 𑒪𑒹𑒪 𑒢𑒫 𑒣𑒰𑒚𑒬𑒰𑒪𑒰 𑒏𑒞𑓄 𑒮𑒿 𑒥𑒢𑒞।

𑒮𑒼𑒯𑒰𑒑𑒼: (𑒑𑓀𑒑𑒰𑒡𑒩 𑒠𑒱𑒮 𑒞𑒰𑒏𑒻𑒞) 𑒥𑒹𑒙𑒰 𑒑𑒳𑒩𑒳𑒖𑒲𑒏 𑒫𑒱𑒭𑒨𑒧𑒹 𑒏𑒱𑒨𑒼 𑒋𑒢𑒰 𑒥𑒖𑒻𑒋।


𑒑𑓀𑒑𑒰𑒡𑒩: (𑒮𑒼𑒯𑒰𑒑𑒼 𑒠𑒱𑒮 𑒞𑒏𑒻𑒞) 𑒧𑒰𑒿, 𑒯𑒧 𑒞𑒿 𑒧𑒰𑒞𑓂𑒩 𑒇𑒭𑒱 𑒖𑒙𑒰𑒏𑒹𑒿 (𑒞𑒰𑒥𑒲𑒖 𑒣𑒏𑒛𑓃𑒱 𑒃𑒬𑒰𑒩𑒰 𑒏𑒩𑒻𑒞), 𑒖𑒹 𑒯𑒧𑒩𑒰 𑒄 𑒞𑒰𑒥𑒲𑒖 𑒣𑒯𑒱𑒩𑒹𑒪𑒢𑓂𑒯𑒱 𑒂 𑒯𑒳𑒢𑒏𑒩 𑒬𑒱𑒭𑓂𑒨 𑒔𑒩𑓂𑒧𑒏𑒰𑒩 𑒯𑒲𑒩𑒴𑒏𑒹𑒿 𑒁𑒣𑒢 𑒑𑒳𑒩𑒴 𑒧𑒰𑒢𑒻 𑒕𑒲।

𑒯𑒩𑒣𑒞𑒱: (𑒧𑓀𑒔𑒏 𑒂𑒑𑒰𑒿 𑒕𑒛𑓃𑒣𑒙𑒰𑒃𑒞 𑒖𑒰𑒃𑒞) 𑒔𑒩𑓂𑒧𑒏𑒰𑒩 𑒯𑒲𑒩𑒴𑒧𑒹 𑒏𑒲 𑒫𑒱𑒬𑒹𑒭𑒞𑒰 𑒕𑒻।

𑒑𑓀𑒑𑒰𑒡𑒩: (𑒯𑒩𑒣𑒞𑒱 𑒠𑒱𑒮 𑒞𑒏𑒻𑒞) 𑒯𑒳𑒢𑒏𑒰𑒧𑒹 𑒏𑒪𑒰 𑒕𑒢𑓂𑒯𑒱। 𑒧𑒳𑒃𑒪 𑒧𑒰𑒪𑒏 𑒔𑒰𑒧𑒏𑒹𑒿 𑒏𑒼𑒢𑒰 𑒣𑒏𑒰𑒋𑒪 𑒖𑒰𑒃𑒞 𑒁𑒕𑒱 𑒍𑒃𑒮𑒿 𑒞𑒩𑒯 𑒞𑒩𑒯𑒏 𑒣𑒢𑒯𑒲, 𑒧𑒰𑒢𑒩𑒱, 𑒧𑒵𑒠𑓀𑒑 𑒥𑒢𑒥𑒻 𑒕𑒟𑒱 𑒍। 𑒖𑒿 𑒏𑒼𑒢𑒼 𑒮𑒧𑒮𑓂𑒨𑒰 𑒋𑒪𑒻 𑒞𑒿 𑒏𑒱𑒕𑒳 𑒣𑒩𑒱𑒫𑒩𑓂𑒞𑒢 𑒏𑒩𑒻 𑒕𑒟𑒱 𑒁𑒣𑒢 𑒖𑓂𑒘𑒰𑒢𑒏 𑒣𑓂𑒩𑒨𑒼𑒑𑒧𑒹। 𑒑𑒰𑒥𑒻 𑒕𑒟𑒱 𑒞𑒹𑒯𑒹𑒢 𑒞𑒹𑒯𑒹𑒢 𑒑𑒲𑒞 𑒖𑒹 𑒮𑒳𑒢𑒱 𑒏𑓄 𑒏𑒞𑒹𑒏 𑒡𑒩𑓂𑒧𑒬𑒰𑒮𑓂𑒞𑓂𑒩𑒏 𑒖𑓂𑒘𑒰𑒢 𑒋𑒏𑓂𑒏𑒹 𑒑𑒲𑒞𑒧𑒹 𑒣𑓂𑒩𑒰𑒣𑓂𑒞 𑒦𑓄 𑒖𑒰𑒃𑒋।

𑒯𑒩𑒣𑒞𑒱: (𑒧𑓀𑒔𑒏 𑒂𑒑𑒰𑒿𑒮𑒿 𑒕𑒛𑓃𑒣𑒙𑒰𑒃𑒞 𑒒𑒳𑒩𑒻𑒞 𑒑𑓀𑒑𑒰𑒡𑒩 𑒠𑒱𑒮 𑒞𑒏𑒻𑒞) 𑒂 𑒇𑒭𑒱 𑒖𑒙𑒰𑒧𑒹?

𑒑𑓀𑒑𑒰𑒡𑒩: (𑒯𑒩𑒣𑒞𑒱 𑒠𑒱𑒮 𑒞𑒏𑒻𑒞) 𑒍 𑒩𑒙𑒻 𑒪𑒹𑒪 𑒢𑒻 𑒏𑒯𑒻 𑒕𑒟𑒱 𑒏𑒱𑒕𑒳। 𑒣𑒳𑒕𑒪𑒰𑒣𑒩 𑒥𑒞𑒥𑒻 𑒕𑒟𑒱। 𑒡𑒩𑓂𑒧𑒬𑒰𑒮𑓂𑒞𑓂𑒩𑒏 𑒫𑓂𑒨𑒰𑒏𑓂𑒨𑒰 𑒏𑒹𑒪𑒰𑒣𑒩 𑒞𑒧𑒮𑒰𑒃 𑒢𑒻 𑒕𑒟𑒱, 𑒫𑒩𑒢 𑒍𑒏𑒩 𑒑𑒪𑒞 𑒫𑓂𑒨𑒰𑒏𑓂𑒨𑒰𑒏𑒹𑒿 𑒮𑒳𑒡𑒰𑒩𑒻 𑒕𑒟𑒱।

𑒯𑒩𑒣𑒞𑒱: (𑒧𑓀𑒔𑒏 𑒂𑒑𑒰𑒿 𑒕𑒛𑓃𑒣𑒙𑒰𑒃𑒞 𑒖𑒰𑒃𑒞) 𑒯𑒿 𑒯𑒿 𑒞𑒹𑒿 𑒢𑒹 𑒣𑒰𑒚𑒬𑒰𑒪𑒰𑒮𑒿 𑒢𑒱𑒏𑒰𑒪𑒱 𑒠𑒹𑒪 𑒑𑒹𑒪𑒢𑓂𑒯𑒱 𑒂 𑒮𑒣𑓂𑒞𑒩𑒲𑒏 𑒥𑒼𑒢𑒏 𑒩𑒮𑓂𑒞𑒰 𑒡𑒹𑒢𑒹 𑒕𑒟𑒱।

𑒑𑓀𑒑𑒰𑒡𑒩: (𑒧𑓀𑒔𑒏 𑒂𑒑𑒰𑒿 𑒖𑒰𑒃𑒞) 𑒧𑒰𑒿-𑒣𑒱𑒞𑒰𑒖𑒲। 𑒄 𑒯𑒧𑒩 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨 𑒁𑒕𑒱.. 𑒯𑒧 𑒨𑒖𑓂𑒘𑒼𑒣𑒫𑒲𑒞 𑒢𑒻 𑒏𑒩𑒥। 𑒯𑒲𑒩𑒴 𑒏𑒯𑒻 𑒕𑒟𑒱 𑒖𑒹 𑒣𑒝𑓂𑒛𑒱𑒞 𑒪𑒼𑒏𑒢𑒱 𑒬𑒰𑒮𑓂𑒞𑓂𑒩𑒏 𑒑𑒪𑒞 𑒫𑓂𑒨𑒰𑒐𑓂𑒨𑒰 𑒏𑒩𑒻 𑒕𑒟𑒱… 𑒡𑒩𑓂𑒧𑒏𑒹𑒿 𑒕𑒰𑒑𑒩𑒏 𑒥𑒪𑒱 𑒡𑒩𑒱 𑒮𑒲𑒧𑒱𑒞 𑒏𑓄 𑒠𑒹𑒪 𑒑𑒹𑒪 𑒁𑒕𑒱..

𑒯𑒩𑒣𑒞𑒱: (𑒥𑒲𑒔𑒧𑒹 𑒏𑓂𑒩𑒼𑒡𑒱𑒞 𑒦𑓄 𑒑𑓀𑒑𑒰𑒡𑒩𑒏𑒹𑒿 𑒏𑒰𑒙𑒻 𑒕𑒟𑒱) 𑒯𑒲𑒩𑒴 𑒏𑒯𑒻 𑒕𑒟𑒱.. 𑒮𑒦 𑒑𑒣𑒧𑒹 𑒯𑒲𑒩𑒴 𑒏𑒯𑒻 𑒕𑒟𑒱.. 𑒂 𑒯𑒲𑒩𑒴𑒏𑒹𑒿 𑒏𑒹 𑒄 𑒮𑒦 𑒏𑒯𑒪𑒏𑒢𑓂𑒯𑒱..

𑒑𑓀𑒑𑒰𑒡𑒩: 𑒯𑒳𑒢𑒏𑒰 𑒇𑒭𑒱 𑒖𑒙𑒰 𑒄 𑒑𑒣 𑒏𑒯𑒪𑒐𑒱𑒢𑓂𑒯।

𑒯𑒩𑒣𑒞𑒱: (𑒂𑒩 𑒏𑓂𑒩𑒼𑒡𑒱𑒞 𑒦𑓄) 𑒂 𑒇𑒭𑒱 𑒖𑒙𑒰𑒏𑒹𑒿 𑒏𑒹 𑒏𑒯𑒪𑒏𑒢𑓂𑒯𑒱?

𑒑𑓀𑒑𑒰𑒡𑒩: 𑒇𑒭𑒱 𑒖𑒙𑒰𑒏𑒹𑒿 𑒯𑒳𑒢𑒏𑒩 𑒑𑒳𑒩𑒳 𑒏𑒯𑒪𑒐𑒱𑒢𑓂𑒯..𑒂 𑒯𑒳𑒢𑒏𑒩 𑒑𑒳𑒩𑒴𑒏𑒹𑒿 𑒯𑒳𑒢𑒏𑒩 𑒑𑒳𑒩𑒴…𑒂 ..𑒂…𑒏𑒼𑒢𑒼 𑒩𑒯𑒮𑓂𑒨 𑒕𑒻 𑒖𑒹 𑒌 𑒅𑒪𑓂𑒏𑒰𑒧𑒳𑒐𑒧𑒹 𑒕𑒻..𑒂 𑒖𑒹 𑒢𑒻 𑒕𑒻 𑒥𑒳𑒗𑒪 𑒏𑒏𑒩𑒼..

𑒯𑒩𑒣𑒞𑒱: 𑒧𑒰𑒢𑒹 𑒏𑒏𑒩𑒼 𑒥𑒳𑒗𑒪𑒹 𑒢𑒻 𑒕𑒻.. 𑒂 𑒍𑒃 𑒑𑒣𑒣𑒩 𑒁𑒯𑒰𑒿 𑒁𑒣𑒢 𑒄 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨 𑒪𑒹𑒪𑒾𑓀..

𑒑𑓀𑒑𑒰𑒡𑒩: (𑒑𑒣 𑒏𑒰𑒙𑒻𑒞) 𑒧𑒳𑒠𑒰 𑒖𑒙𑒱𑒪 𑒏𑒩𑓂𑒧𑒏𑒰𑒝𑓂𑒛 𑒁𑒯𑒰𑒿𑒏𑒹𑒿 𑒢𑒲𑒏 𑒪𑒑𑒻𑒋? 𑒯𑒧𑒩𑒰 𑒞𑒿 𑒯𑒲𑒩𑒴𑒏 𑒑𑒲𑒞𑒧𑒹 𑒥𑒹𑒬𑒲 𑒞𑒞𑓂𑒞𑓂𑒫 𑒥𑒳𑒗𑒰𑒃𑒋..𑒂 𑒯𑒿 𑒯𑒧𑒩 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨 𑒞𑒿 𑒁𑒯𑒰𑒿 𑒥𑒳𑒗𑒱𑒋 𑒑𑒹𑒪𑒱𑒌..

𑒯𑒩𑒣𑒞𑒱: 𑒂 𑒁𑒯𑒰𑒿 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨 𑒏𑓄 𑒪𑒹𑒥, 𑒂 𑒞𑒏𑒩 𑒥𑒰𑒠𑒼 𑒌 𑒒𑒩𑒧𑒹 𑒩𑒯𑒥, 𑒂 𑒁𑒯𑒰𑒿 𑒌 𑒒𑒩𑒧𑒹 𑒩𑒯𑒥 𑒂 𑒑𑒾𑒿𑒂 𑒮𑒦 𑒯𑒧𑒩𑒰 𑒌 𑒑𑒰𑒧𑒧𑒹 𑒩𑒯𑓄 𑒠𑒹𑒞.. 𑒏𑒲 𑒄 𑒮𑒦 𑒮𑒧𑓂𑒦𑒫 𑒕𑒻?

(𑒞𑒐𑒢𑒹 𑒧𑒱𑒞𑒴- 𑒑𑓀𑒑𑒰𑒡𑒩𑒏 𑒥𑒯𑒱𑒢𑒼𑒃 𑒂 𑒂𑒢𑒢𑓂𑒠𑒰- 𑒑𑓀𑒑𑒰𑒡𑒩𑒏 𑒥𑒯𑒱𑒢 𑒣𑓂𑒩𑒫𑒹𑒬 𑒏𑒩𑒻 𑒕𑒟𑒱।)

𑒂𑒢𑒢𑓂𑒠𑒰: 𑒧𑒰𑒿- 𑒣𑒱𑒞𑒰𑒖𑒲। 𑒯𑒧𑒩𑒰 𑒢𑒻 𑒪𑒑𑒻𑒋 𑒖𑒹 𑒑𑓀𑒑𑒰𑒡𑒩 𑒁𑒣𑒢 𑒥𑒰𑒞𑒮𑒿 𑒛𑒱𑒑𑒞।
𑒯𑒩𑒣𑒞𑒱: (𑒧𑓀𑒔𑒏 𑒂𑒑𑒰𑒿𑒮𑒿 𑒕𑒛𑓃𑒣𑒙𑒰𑒃𑒞 𑒒𑒳𑒩𑒻𑒞 𑒑𑓀𑒑𑒰𑒡𑒩 𑒠𑒱𑒮 𑒞𑒏𑒻𑒞) 𑒯𑒿। 𑒮𑒦 𑒑𑒣 𑒥𑒳𑒗𑒱 𑒑𑒹𑒪𑒾𑓀। 𑒯𑒱𑒢𑒏𑒰 𑒖𑒑𑒯 𑒖𑒹 𑒦𑒹𑒙𑒱 𑒑𑒹𑒪 𑒕𑒢𑓂𑒯𑒱। 𑒇𑒭𑒱 𑒖𑒙𑒰 𑒂 𑒔𑒩𑓂𑒧𑒏𑒰𑒩 𑒯𑒲𑒩𑒴, 𑒂 𑒣𑒰𑒚𑒬𑒰𑒪𑒰 𑒮𑒣𑓂𑒞𑒩𑒲𑒏 𑒥𑒼𑒢। 𑒢𑒹 𑒇𑒭𑒱 𑒖𑒙𑒰 𑒂 𑒔𑒩𑓂𑒧𑒏𑒰𑒩 𑒯𑒲𑒩𑒴𑒏𑒹𑒿 𑒬𑒱𑒭𑓂𑒨 𑒦𑒹𑒙𑒻 𑒕𑒻 𑒂 𑒢𑒹 𑒯𑒧𑒩 𑒑𑓀𑒑𑒰𑒡𑒩𑒏𑒹𑒿 𑒍𑒯𑒹𑒢 𑒑𑒳𑒩𑒳।

𑒂𑒢𑒢𑓂𑒠𑒰: 𑒧𑒰𑒿- 𑒣𑒱𑒞𑒰𑒖𑒲। 𑒑𑓀𑒑𑒰𑒡𑒩𑒏𑒹𑒿 𑒁𑒣𑓂𑒩𑒞𑓂𑒨𑒏𑓂𑒭 𑒩𑒴𑒣𑒧𑒹 𑒒𑒩 𑒕𑒼𑒛𑓃𑒥𑒰𑒏 𑒪𑒹𑒪 𑒫𑒱𑒫𑒬 𑒢𑒻 𑒏𑒩𑒴।

𑒮𑒼𑒯𑒰𑒑𑒼: (𑒂𑒢𑒢𑓂𑒠𑒰 𑒠𑒱𑒮 𑒮𑒧𑓂𑒧𑒳𑒐 𑒯𑒼𑒃𑒞) 𑒧𑒳𑒠𑒰 𑒋𑒞𑒳𑒏𑓂𑒏𑒰 𑒯𑒰𑒪 𑒢𑒻 𑒠𑒹𑒐𑒻 𑒕𑒯𑒏। 𑒨𑒖𑓂𑒘𑒼𑒣𑒫𑒲𑒞 𑒢𑒻 𑒏𑒩𑒥? 𑒋𑒯𑒢𑒼 𑒖𑒱𑒠𑓂𑒠 𑒦𑒹𑒪𑒻𑒋?

𑒯𑒩𑒣𑒞𑒱: (𑒮𑒼𑒯𑒰𑒑𑒼 𑒠𑒱𑒮 𑒮𑒧𑓂𑒧𑒳𑒐 𑒯𑒼𑒃𑒞) 𑒋𑒞𑒳𑒏𑓂𑒏𑒰 𑒯𑒰𑒪 𑒕𑒼𑒛𑓃𑒴, 𑒄 𑒯𑒧𑒩𑒼 𑒮𑓂𑒫𑒲𑒏𑒰𑒩𑓂𑒨 𑒢𑒻 𑒁𑒕𑒱.. 𑒑𑓀𑒑𑒰𑒡𑒩.. 𑒯𑒧𑒩 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨 𑒁𑒕𑒱 𑒖𑒹 𑒯𑒧 𑒮𑒦 𑒄 𑒑𑒰𑒧 𑒢𑒻 𑒕𑒼𑒛𑓃𑒥।

𑒮𑒼𑒯𑒰𑒑𑒼: (𑒯𑒩𑒱𑒣𑒞𑒱𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑓄) 𑒁𑒯𑒰𑒿𑒏𑒹𑒿 𑒏𑒹 𑒏𑒯𑒻𑒋 𑒑𑒰𑒧 𑒕𑒼𑒛𑓃𑒻𑒪𑒹।

𑒑𑓀𑒑𑒰𑒡𑒩: (𑒮𑒼𑒯𑒰𑒑𑒼𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑓄) 𑒧𑒰𑒿। 𑒯𑒱𑒢𑒏𑒩 𑒏𑒯𑒥𑒰𑒏 𑒁𑒩𑓂𑒟 𑒕𑒢𑓂𑒯𑒱 𑒖𑒹 𑒖𑒿 𑒯𑒧 𑒒𑒩 𑒢𑒻 𑒕𑒼𑒛𑓃𑒥 𑒞𑒿 𑒯𑒱𑒢𑒏𑒰 𑒑𑒰𑒧 𑒕𑒼𑒛𑓃𑒋 𑒣𑒛𑓃𑒞𑒢𑓂𑒯𑒱। 𑒣𑒱𑒞𑒰𑒬𑓂𑒩𑒲.. 𑒯𑒧 𑒂𑒃𑒨𑒹 𑒮𑒣𑓂𑒞𑒩𑒲𑒏 𑒥𑒼𑒢 𑒠𑒱𑒮 𑒥𑒱𑒠𑒰 𑒦𑓄 𑒩𑒯𑒪 𑒕𑒲.. 𑒯𑒧𑒩 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨 𑒂 𑒁𑒯𑒰𑒿𑒏 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨𑒧𑒹 𑒏𑒼𑒢𑒼 𑒮𑒰𑒧𑓂𑒨 𑒢𑒻 𑒁𑒕𑒱।

𑒮𑒼𑒯𑒰𑒑𑒼: (𑒑𑓀𑒑𑒰𑒡𑒩𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑓄) 𑒑𑓀𑒑𑒰𑒡𑒩, 𑒁𑒯𑒰𑒿 𑒂𑒚 𑒥𑒩𑓂𑒐𑒏 𑒕𑒲.. 𑒂 𑒁𑒯𑒰𑒿 𑒁𑒮𑒑𑒩𑒹…

𑒑𑓀𑒑𑒰𑒡𑒩: (𑒮𑒼𑒯𑒰𑒑𑒼𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑓄) 𑒁𑒮𑒑𑒩𑒹 𑒏𑒯𑒰𑒿, 𑒮𑒣𑓂𑒞𑒩𑒲𑒏 𑒥𑒼𑒢𑒧𑒹 𑒂𑒬𑓂𑒩𑒨 𑒣𑒏𑓂𑒏𑒰 𑒕𑒢𑓂𑒯𑒱, 𑒑𑒳𑒩𑒳𑒖𑒲 𑒮𑓀𑒑। 𑒇𑒭𑒱 𑒖𑒙𑒰 𑒂 𑒔𑒩𑓂𑒧𑒏𑒰𑒩 𑒯𑒲𑒩𑒴…

𑒑𑓀𑒑𑒰𑒡𑒩: (𑒮𑒼𑒯𑒰𑒑𑒼𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑓄) 𑒞𑒿 𑒯𑒧𑒩𑒰 𑒂𑒖𑓂𑒘𑒰 𑒠𑒱𑒁..

𑒧𑒱𑒞𑒴: 𑒢𑒻.. 𑒑𑓀𑒑𑒰𑒡𑒩𑒏𑒹𑒿 𑒯𑒧 𑒮𑒦 𑒍𑒯𑒱𑒢𑒰 𑒢𑒻 𑒕𑒼𑒛𑓃𑒱 𑒮𑒏𑒻 𑒕𑒱𑒨𑒢𑓂𑒯𑒱। 𑒯𑒧𑒯𑒴 𑒮𑒦 𑒮𑓀𑒑𑒹 𑒖𑒰𑒋𑒥..(𑒂𑒢𑒢𑓂𑒠𑒰𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒏𑒲 𑒂𑒢𑒢𑓂𑒠𑒰?

𑒂𑒢𑒢𑓂𑒠𑒰: 𑒯𑒿, 𑒯𑒧 𑒮𑒦 𑒢𑒻 𑒕𑒼𑒛𑓃𑒱 𑒮𑒏𑒻 𑒕𑒱𑒨𑒢𑓂𑒯𑒱 𑒯𑒳𑒢𑒏𑒰। 𑒧𑒰𑒿, 𑒁𑒯𑒰𑒿 𑒣𑒱𑒞𑒰𑒖𑒲 𑒪𑒑 𑒩𑒯𑒴.. 𑒯𑒧 𑒫𑒔𑒢 𑒠𑒻 𑒕𑒲 𑒖𑒹 𑒑𑓀𑒑𑒰𑒡𑒩 𑒁𑒣𑒢 𑒁𑒡𑓂𑒨𑒨𑒢 𑒣𑒴𑒩𑓂𑒝 𑒏𑒩𑒞.. 𑒂

𑒑𑓀𑒑𑒰𑒡𑒩: 𑒂 𑒄 𑒅𑒪𑓂𑒏𑒰𑒧𑒳𑒐 𑒯𑒧𑒩𑒰 𑒮𑓀𑒑 𑒁𑒕𑒱𑒨𑒹…

(𑒮𑒼𑒯𑒰𑒑𑒼 𑒫𑒱𑒔𑒪𑒱𑒞 𑒦𑓄 𑒖𑒰𑒃 𑒕𑒟𑒱, 𑒯𑒩𑒣𑒞𑒱 𑒣𑒰𑒟𑒩 𑒥𑒢𑒱 𑒖𑒰𑒃 𑒕𑒟𑒱। 𑒂 𑒮𑒑𑒩𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱। 𑒤𑒹𑒩 𑒖𑒐𑒢 𑒃𑒖𑒼𑒞 𑒯𑒼𑒃𑒞 𑒁𑒕𑒱 𑒞𑒿 𑒑𑓀𑒑𑒰𑒡𑒩, 𑒂𑒢𑒢𑓂𑒠𑒰, 𑒧𑒱𑒞𑒴, 𑒇𑒭𑒱 𑒖𑒙𑒰 𑒂 𑒯𑒲𑒩𑒴 𑒠𑒹𑒐𑒰 𑒣𑒛𑓃𑒻 𑒕𑒟𑒱। 𑒮𑒦𑒏 𑒧𑒳𑒿𑒯𑒣𑒩 𑒪𑒏𑓂𑒭𑓂𑒨 𑒣𑒰𑒥𑒱 𑒖𑒹𑒥𑒰𑒏 𑒣𑓂𑒩𑒮𑒢𑓂𑒢𑒞𑒰 𑒮𑓂𑒣𑒭𑓂𑒙 𑒠𑒹𑒐𑒰 𑒣𑒛𑓃𑒱 𑒩𑒯𑒪 𑒕𑒢𑓂𑒯𑒱।)

𑒂𑒢𑒢𑓂𑒠𑒰: 𑒇𑒭𑒱 𑒖𑒙𑒰, 𑒯𑒲𑒩𑒴। 𑒑𑓀𑒑𑒰𑒡𑒩𑒏 𑒞𑒲𑒫𑓂𑒩 𑒥𑒳𑒠𑓂𑒡𑒱 𑒣𑒰𑒚𑒬𑒰𑒪𑒰𑒧𑒹 𑒯𑒳𑒢𑒏𑒰 𑒪𑒹𑒪 𑒮𑒧𑒮𑓂𑒨𑒰 𑒥𑒢𑒱 𑒑𑒹𑒪 𑒕𑒪𑒢𑓂𑒯𑒱। 𑒑𑒳𑒩𑒳𑒖𑒲 𑒣𑓂𑒩𑒬𑓂𑒢 𑒮𑒦𑒏 𑒅𑒞𑓂𑒞𑒩 𑒢𑒻 𑒠𑓄 𑒣𑒰𑒥𑒱 𑒩𑒯𑒪 𑒕𑒪𑒰 𑒂 𑒞𑒹𑒿 𑒅𑒢𑓂𑒙𑒹 𑒑𑓀𑒑𑒰𑒡𑒩𑒏 𑒬𑒱𑒏𑒰𑒃𑒞 𑒏𑒩𑒻𑒞 𑒩𑒯𑒻 𑒕𑒪𑒰।

𑒬𑒱𑒭𑓂𑒨 𑒯𑒲𑒩𑒴: 𑒋𑒯𑒹𑒢 𑒬𑒱𑒭𑓂𑒨 𑒦𑒰𑒑𑓂𑒨𑒫𑒰𑒢𑒏𑒹𑒿 𑒦𑒹𑒙𑒻 𑒕𑒻 𑒂𑒢𑒢𑓂𑒠𑒰। 𑒧𑒳𑒠𑒰 𑒯𑒲𑒩𑒰 𑒖𑒾𑒯𑒩𑒲 𑒪𑒑 𑒢𑒻 𑒖𑒰𑒋 𑒞𑒿 𑒯𑒲𑒩𑒰 𑒣𑒰𑒟𑒩𑒹 𑒩𑒯𑒱 𑒖𑒰𑒃 𑒕𑒻।

𑒧𑒱𑒞𑒴: 𑒯𑒿, 𑒂 𑒋𑒞𑓄 𑒯𑒧𑒯𑒴𑒿 𑒮𑒦 𑒏𑒞𑒹𑒏 𑒞𑒩𑒯𑒏 𑒄𑒪𑒧 𑒮𑒲𑒐𑒱 𑒑𑒹𑒪𑒾𑓀। 𑒌 𑒥𑒼𑒢𑒏 𑒏𑒞𑒹𑒏 𑒫𑒢𑒮𑓂𑒣𑒞𑒱, 𑒖𑒢𑓂𑒞𑒳 𑒯𑒧𑒩 𑒮𑒦𑒏 𑒬𑒱𑒏𑓂𑒭 𑒥𑒢𑒱 𑒑𑒹𑒪।

𑒑𑓀𑒑𑒰𑒡𑒩: 𑒇𑒭𑒱 𑒖𑒙𑒰 𑒂 𑒬𑒱𑒭𑓂𑒨 𑒯𑒲𑒩𑒴 𑒮𑒢 𑒬𑒱𑒏𑓂𑒭𑒏 𑒖𑒿 𑒧𑒱𑒟𑒱𑒪𑒰𑒏 𑒮𑒦 𑒣𑒰𑒚𑒬𑒰𑒪𑒰𑒧𑒹 𑒦𑓄 𑒖𑒰𑒋 𑒞𑒿 𑒦𑒰𑒑𑓂𑒨𑒼𑒠𑒨 𑒦𑓄 𑒖𑒹𑒞𑒻। 𑒧𑒳𑒠𑒰 𑒍𑒞𑓄 𑒞𑒿 𑒞𑒹𑒯𑒹𑒢 𑒪𑒼𑒏 𑒮𑒦𑒏 𑒦𑒩𑓂𑒞𑒲 𑒦𑒹𑒪 𑒕𑒻 𑒖𑒹..𑒌 𑒣𑒰𑒿𑒔 𑒮𑒰𑒪𑒧𑒹 𑒖𑒞𑒹𑒏 𑒖𑓂𑒘𑒰𑒢 𑒯𑒧 𑒣𑓂𑒩𑒰𑒣𑓂𑒞 𑒏𑒹𑒪𑒾𑓀 𑒞𑒏𑒩 𑒫𑒩𑓂𑒝𑒢 𑒏𑒩𑒴 𑒢𑒹 𑒯𑒲𑒩𑒴..

𑒯𑒲𑒩𑒴: (𑒚𑒚𑒰 𑒏𑓄 𑒯𑒿𑒮𑒻 𑒕𑒟𑒱) 𑒏𑒟𑒲𑒏 𑒫𑒩𑓂𑒝𑒢 𑒏𑒩𑒴 𑒯𑒧..

𑒂𑒢𑒢𑓂𑒠𑒰: 𑒌 𑒥𑒼𑒢𑒏, 𑒌 𑒥𑒼𑒢𑒏 𑒣𑓂𑒩𑒰𑒝𑒲𑒏, 𑒖𑒹 𑒏𑓂𑒭𑒝𑒹-𑒏𑓂𑒭𑒝 𑒮𑒱𑒐𑒥𑒻𑒞 𑒩𑒯𑒻𑒋 𑒥𑒛𑓂𑒛 𑒏𑒱𑒕𑒳..

𑒯𑒲𑒩𑒴: (𑒑𑒹𑒥𑒰𑒏 𑒧𑒳𑒠𑓂𑒩𑒰𑒧𑒹 𑒯𑒰𑒟 𑒂𑒑𑒰𑒿 𑒏𑒩𑒻𑒞)
𑒮𑒰𑒿𑒣𑒯𑒱-𑒮𑒰𑒿𑒣 𑒥𑒰𑒧 𑒠𑒯𑒱𑒢 𑒕𑒪
𑒔𑒱𑒞𑓂𑒩-𑒫𑒱𑒔𑒱𑒞𑓂𑒩 𑒫𑒮𑒢𑒧𑒰
𑒢𑒱𑒞 𑒠𑒱𑒢 𑒦𑒲𑒐 𑒏𑒞𑒋 𑒮𑒿 𑒪𑒰𑒨𑒥
𑒒𑒳𑒩𑒱 𑒤𑒱𑒩𑒱 𑒖𑒰𑒯𑒳 𑒁𑓀𑒑𑒢𑒧𑒰
𑒦𑒲𑒐𑒼 𑒢𑒹 𑒪𑒱𑒁𑒋 𑒖𑒼𑒑𑒲,
𑒒𑒳𑒩𑒱𑒨𑒼 𑒢𑒹 𑒖𑒰𑒃, 𑒢𑒱𑒏𑒪𑒴 𑒁𑓀𑒑𑒢𑒧𑒰
𑒑𑓀𑒑𑒰𑒡𑒩: 𑒍𑒯𑒼..
𑒯𑒲𑒩𑒴:
𑒢𑒰 𑒖𑒰𑒋𑒥, 𑒢𑒰 𑒖𑒰𑒋𑒥 𑒢𑒰 𑒖𑒰𑒋𑒥 𑒯𑒹
𑒁𑒯𑒰𑒿 𑒏 𑒁𑓀𑒑𑒢𑒧𑒰
𑒥𑒯𑒱𑒩𑒰 𑒮𑒰𑒿𑒣𑒏 𑒧𑒰𑒛𑓃𑒥 𑒥𑒢𑒰𑒍𑒪
𑒞𑒹𑒪𑒱𑒨𑒰 𑒠𑒹𑒪 𑒥𑒢𑓂𑒯𑒢𑒧𑒰
𑒡𑒰𑒧𑒢 𑒮𑒰𑒿𑒣𑒏 𑒏𑒼𑒩𑒼 𑒥𑒢𑒰𑒍𑒪,
𑒁𑒖𑒑𑒩 𑒏𑒹 𑒠𑒹𑒪 𑒡𑒩𑒢𑒧𑒰
𑒯𑒩𑒯𑒩𑒰 𑒏𑒹 𑒏𑒰𑒛𑓃𑒰-𑒕𑒰𑒛𑓃𑒰,
𑒏𑒛𑓃𑒻𑒞 𑒏 𑒪𑒰𑒍𑒪 𑒏𑓀𑒑𑒢𑒧𑒰
𑒣𑒢𑒱𑒨𑒰𑒠𑒩𑒰𑒩 𑒏 𑒣𑒯𑒳𑒿𑒔𑒲 𑒪𑒰𑒍𑒪
𑒜𑒩𑒥𑒰 𑒏 𑒪𑒾𑒪 𑒜𑒼𑒪𑒢𑒧𑒰
𑒮𑒳𑒑𑒫𑒰 𑒮𑒰𑒿𑒣 𑒏 𑒪𑒾𑒪 𑒖𑒬𑒢𑒧𑒰
𑒔𑒰𑒢𑓂𑒠 𑒞𑒰𑒩𑒰 𑒏 𑒬𑒲𑒬𑒰 𑒪𑒰𑒍𑒪
𑒧𑒕𑒑𑒱𑒠𑓂𑒡𑒱 𑒏 𑒁𑒦𑒩𑒢𑒧𑒰

𑒑𑓀𑒑𑒰𑒡𑒩:
𑒢𑒰 𑒖𑒰𑒋𑒥, 𑒢𑒰 𑒖𑒰𑒋𑒥 𑒢𑒰 𑒖𑒰𑒋𑒥 𑒯𑒹
𑒁𑒯𑒰𑒿 𑒏 𑒁𑓀𑒑𑒢𑒧𑒰

𑒇𑒭𑒱 𑒖𑒙𑒰: (𑒅𑒚𑒱 𑒏𑓄 𑒙𑒯𑒪𑓄 𑒪𑒑𑒻𑒞 𑒕𑒟𑒱) 𑒖𑒰𑒋 𑒣𑒛𑓃𑒞 𑒑𑓀𑒑𑒰𑒡𑒩। 𑒥𑒯𑒳𑒞 𑒩𑒰𑒮 𑒏𑒰𑒖 𑒏𑒩𑒥𑒰𑒏 𑒁𑒕𑒱 𑒁𑒯𑒰𑒿𑒏𑒹𑒿। 𑒯𑒧𑒩 𑒧𑒼𑒢𑒧𑒹 𑒂𑒥 𑒮𑓀𑒞𑒳𑒭𑓂𑒙𑒱 𑒁𑒕𑒱 𑒑𑓀𑒑𑒰𑒡𑒩, 𑒁𑒯𑒰𑒿 𑒮𑒢 𑒬𑒱𑒭𑓂𑒨 𑒯𑒧𑒩𑒰 𑒦𑒹𑒙𑒪। 𑒄 𑒮𑒾𑒦𑒰𑒑𑓂𑒨 𑒯𑒧𑒩 𑒑𑒳𑒩𑒳, 𑒯𑒳𑒢𑒏𑒩 𑒑𑒳𑒩𑒳 𑒂𑒏𑒱 𑒯𑒳𑒢𑒏𑒩 𑒑𑒳𑒩𑒳𑒏𑒹𑒿 𑒢𑒻 𑒦𑒹𑒙𑒪 𑒕𑒪𑒢𑓂𑒯𑒱। 𑒁𑒯𑒰𑒿𑒏𑒹𑒿 𑒣𑒜𑓃𑒥𑒻𑒏𑒰𑒪𑒧𑒹 𑒖𑒹 𑒂𑒞𑓂𑒧 𑒮𑓀𑒞𑒳𑒭𑓂𑒙𑒱 𑒯𑒧𑒩𑒰 𑒦𑒹𑒙𑒪 𑒮𑒹 𑒁𑒠𑓂𑒦𑒳𑒞। 𑒩𑒙𑒢𑓂𑒞 𑒫𑒱𑒠𑓂𑒨𑒰𑒏 𑒁𑒐𑒳𑒢𑒏𑒰 𑒫𑒰𑒞𑒰𑒫𑒩𑒝𑒧𑒹 𑒁𑒯𑒰𑒿𑒏 𑒫𑒱𑒭𑒨𑒏𑒹𑒿 𑒥𑒳𑒗𑒥𑒰𑒏 𑒣𑓂𑒩𑒫𑒵𑒞𑓂𑒞𑒱 𑒁𑒖𑒑𑒳𑒞 𑒪𑒰𑒑𑒪। 𑒮𑒢𑓂𑒞𑒳𑒭𑓂𑒙 𑒕𑒲 𑒯𑒧.. 𑒄 𑒅𑒪𑓂𑒏𑒰𑒧𑒳𑒐𑒏 𑒣𑓂𑒩𑒦𑒰𑒫 𑒕𑒲 𑒂𑒏𑒱 𑒁𑒯𑒰𑒿𑒏 𑒣𑓂𑒩𑒦𑒰𑒫 𑒌 𑒅𑒪𑓂𑒏𑒰𑒧𑒳𑒐𑒏𑒹𑒿 𑒮𑒱𑒠𑓂𑒡 𑒥𑒢𑒰 𑒠𑒹𑒢𑒹 𑒁𑒕𑒱, 𑒢𑒻 𑒖𑒰𑒢𑒱 𑒏𑒲 𑒑𑒣 𑒁𑒕𑒱। 𑒖𑒰𑒅.. 𑒖𑒰𑒅 𑒁𑒯𑒰𑒿 𑒏𑒲𑒩𑓂𑒞𑒱 𑒮𑒱𑓀𑒯𑒏 𑒩𑒰𑒖𑒠𑒩𑒥𑒰𑒩। 𑒠𑒹𑒐𑒴 𑒏𑒲 𑒏𑒩𑒥𑒻𑒞 𑒁𑒕𑒱 𑒄 𑒅𑒪𑓂𑒏𑒰𑒧𑒳𑒐…..

(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)

























𑒮𑒰𑒞𑒧 𑒏𑒪𑓂𑒪𑒼𑒪

(𑒏𑒲𑒩𑓂𑒞𑒱 𑒮𑒱𑓀𑒯𑒏 𑒩𑒰𑒖𑒠𑒩𑒥𑒰𑒩। 𑒏𑒲𑒩𑓂𑒞𑒱 𑒮𑒱𑓀𑒯 𑒥𑒻𑒮𑒪 𑒕𑒟𑒱, 𑒠𑒩𑒥𑒰𑒩𑒲-𑓑 𑒮𑓀𑒑𑒹 𑒑𑓀𑒑𑒰𑒡𑒩 𑒂 𑒠𑒩𑒥𑒰𑒩𑒲-𑓒 𑒮𑓀𑒑𑒹 𑒩𑒰𑒖𑒰𑒏 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝𑒏 𑒣𑓂𑒩𑒫𑒹𑒬 𑒠𑒴 𑒠𑒱𑒬𑒰𑒮𑒿 𑒯𑒼𑒃𑒞 𑒁𑒕𑒱।)


𑒏𑒲𑒩𑓂𑒞𑒱 𑒮𑒱𑓀𑒯: (𑒢𑒰𑒩𑒰𑒨𑒝 𑒠𑒱𑒮 𑒞𑒏𑒻𑒞) 𑒂𑒅 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝, 𑒏𑒲 𑒦𑒹𑒪 𑒯𑒱𑒮𑒰𑒥-𑒏𑒱𑒞𑒰𑒥 𑒁𑒐𑒢𑒼 𑒧𑒱𑒪𑒪 𑒂𑒏𑒱 𑒢𑒻।

𑒠𑒩𑒥𑒰𑒩𑒲-𑓑: (𑒩𑒰𑒖𑒰 𑒠𑒱𑒮 𑒮𑒧𑓂𑒧𑒳𑒐 𑒦𑓄) 𑒏𑒼𑒢𑒰 𑒧𑒱𑒪𑒞𑒢𑓂𑒯𑒱, 𑒮𑒦 𑒩𑒙𑒢𑓂𑒞 𑒫𑒱𑒠𑓂𑒨𑒰𑒥𑒪𑒰 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦 𑒣𑒰𑒚𑒬𑒰𑒪𑒰𑒮𑒿 𑒥𑒯𑒰𑒩 𑒯𑒼𑒃𑒞 𑒁𑒕𑒱 𑒖𑒹 𑒢𑒫 𑒑𑒝𑒱𑒞𑒏 𑒣𑓂𑒩𑒬𑓂𑒢𑒏 𑒍𑒗𑒩𑒰𑒯𑒙𑒱𑒧𑒹 𑒍𑒗𑒩𑒰 𑒖𑒰𑒃𑒞 𑒁𑒕𑒱। 𑒍𑒃 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦𑒏𑒹𑒿 𑒏𑒱𑒕𑒳 𑒣𑒳𑒕𑒱𑒨𑒾 𑒞𑒿 𑒥𑒱𑒢 𑒣𑒼𑒟𑒲 𑒠𑒹𑒐𑒢𑒹 𑒮𑒳𑒩𑒛𑓃𑒱 𑒠𑒹𑒞, 𑒧𑒳𑒠𑒰 𑒍 𑒮𑒦 𑒢𑒹 𑒏𑒼𑒢𑒼 𑒯𑒱𑒮𑒰𑒥-𑒥𑒰𑒩𑒲 𑒏𑓄 𑒣𑒥𑒻𑒋 𑒂 𑒢𑒹 𑒐𑒰𑒞𑒰-𑒐𑒹𑒮𑒩𑒰 𑒧𑒱𑒪𑒰 𑒣𑒥𑒻𑒋।

𑒏𑒲𑒩𑓂𑒞𑒱 𑒮𑒱𑓀𑒯: (𑒏𑒢𑒹 𑒆𑒿𑒔 𑒁𑒥𑒰𑒖𑒧𑒹) 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝। 𑒯𑒧 𑒄 𑒏𑒲 𑒮𑒳𑒢𑒱 𑒩𑒯𑒪 𑒕𑒲?

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒯𑒩𑒥𑒛𑓃𑒰𑒃𑒞) 𑒯𑒿, 𑒯𑒿 𑒮𑒋𑒯 𑒞𑒿 𑒖𑒼𑒛𑓃𑒥𑒰 𑒩𑒯𑒪 𑒕𑒪𑒯𑒳𑒿 𑒁𑒣𑒢 𑒋𑒏𑒙𑒰 𑒬𑒱𑒭𑓂𑒨𑒮𑒿 𑒋𑒏 𑒖𑒼𑒛𑓃 𑒠𑒴 𑒖𑒼𑒛𑓃 𑒞𑒲𑒢…𑒋𑒏 𑒮𑒋 𑒡𑒩𑒱.. 𑒧𑒰𑒢𑒹 𑒧𑒰𑒢𑒹 𑒋𑒏𑒮𑒿 𑒋𑒏 𑒮𑒋 𑒡𑒩𑒱 𑒖𑒼𑒛𑓃.. 𑒏𑒯𑒢𑒹 𑒕𑒪 𑒖𑒹 𑒋𑒏 𑒒𑒝𑓂𑒙𑒰𑒧𑒹 𑒖𑒼𑒛𑓃𑒱 𑒠𑒹𑒥..𑒞𑒰𑒫𑒞 𑒄 (𑒠𑒩𑒥𑒰𑒩𑒲-𑓒 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞) 𑒒𑒲𑒔𑒱 𑒏𑓄 𑒪𑓄 𑒁𑒢𑒪𑒢𑓂𑒯𑒱।

𑒠𑒩𑒥𑒰𑒩𑒲-𑓒: (𑒠𑒧𑒮𑒰𑒃𑒞) 𑒁𑒩𑓂𑒟𑒧𑓀𑒞𑓂𑒩𑒲, 𑒏𑒰𑒪𑓂𑒯𑒱𑒨𑒼 𑒁𑒯𑒰𑒿 𑒥𑒳𑒞𑒹 𑒖𑒼𑒛𑓃 𑒧𑒱𑒪𑒰𑒍𑒪 𑒢𑒻 𑒦𑒹𑒪, 𑒖𑒼𑒛𑓃𑒣𑒩 𑒖𑒼𑒛𑓃.. 𑒎 𑒖𑒲… 𑒏𑒞𑒹𑒏 𑒒𑒰𑒙𑒰 𑒂𑒏𑒱 𑒢𑒤𑒰𑒧𑒹 𑒁𑒯𑒰𑒿𑒏 𑒐𑒰𑒞𑒰-𑒐𑒹𑒮𑒩𑒰 𑒁𑒕𑒱 𑒄 𑒞𑒿 𑒮𑒰𑒪 𑒦𑒩𑒱𑒮𑒿 𑒣𑒞𑒰 𑒔𑒪𑒱𑒨𑒹 𑒢𑒻 𑒩𑒯𑒪 𑒁𑒕𑒱।

𑒠𑒩𑒥𑒰𑒩𑒲-𑓑: (𑒧𑒯𑒩𑒰𑒖 𑒠𑒱𑒮 𑒮𑒰𑒏𑒰𑓀𑒏𑓂𑒭 𑒯𑒼𑒃𑒞) 𑒧𑒯𑒩𑒰𑒖 𑒄 𑒥𑒰𑒪𑒏 𑒍𑒞𑒻 𑒦𑒹𑒙𑒪𑒰। 𑒏𑒯𑒻𑒞 𑒩𑒯𑒟𑒱 𑒖𑒹 𑒍 𑒮𑒦 𑒯𑒱𑒮𑒰𑒥 𑒧𑒱𑒪𑒰 𑒠𑒹𑒞𑒰, 𑒮𑒧𑒨 𑒏𑒧 𑒩𑒯𑒻 𑒞𑒹𑒿 𑒮𑓀𑒑𑒹 𑒪𑒹𑒢𑒹 𑒋𑒪𑒱𑒨𑒢𑓂𑒯𑒱।

𑒑𑓀𑒑𑒰𑒡𑒩: (𑒧𑒯𑒩𑒰𑒖 𑒠𑒱𑒮 𑒮𑒰𑒏𑒰𑓀𑒏𑓂𑒭 𑒯𑒼𑒃𑒞) 𑒧𑒯𑒩𑒰𑒖 𑒖𑒿 𑒂𑒠𑒹𑒬 𑒯𑒳𑒁𑒋 𑒞𑒿 𑒯𑒧 𑒏𑒱𑒕𑒳 𑒏𑒯𑒲।

(𑒥𑒲𑒔𑒹𑒧𑒹 𑒁𑒩𑓂𑒟𑒧𑓀𑒞𑓂𑒩𑒲 𑒥𑒰𑒖𑒻 𑒕𑒟𑒱।)

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒯𑒩𑒥𑒛𑓃𑒰𑒃𑒞) 𑒋𑒏𑒮𑒿 𑒋𑒏 𑒮𑒋 𑒡𑒩𑒱 𑒖𑒼𑒛𑓃𑒧𑒹 𑒞𑒿 𑒮𑒧𑒨 𑒪𑒑𑒥𑒹 𑒢𑒹 𑒏𑒩𑒞𑒻 𑒧𑒯𑒩𑒰𑒖।

(𑒩𑒰𑒖𑒰 𑒃𑒬𑒰𑒩𑒰𑒮𑒿 𑒑𑓀𑒑𑒰𑒡𑒩𑒏𑒹𑒿 𑒥𑒖𑒥𑒰𑒏 𑒂𑒠𑒹𑒬 𑒠𑒻 𑒕𑒟𑒱।)


𑒑𑓀𑒑𑒰𑒡𑒩: (𑒧𑒯𑒩𑒰𑒖 𑒠𑒱𑒮 𑒮𑒧𑓂𑒧𑒳𑒐 𑒯𑒼𑒃𑒞) 𑒡𑒢𑓂𑒨𑒫𑒰𑒠 𑒧𑒯𑒩𑒰𑒖। (𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝 𑒠𑒱𑒮 𑒮𑒧𑓂𑒧𑒳𑒐 𑒯𑒼𑒃𑒞) 𑒋𑒏𑒮𑒿 𑒮𑒋 𑒖𑒼𑒛𑓃𑒥𑒰 𑒪𑒹𑒪 𑒣𑒯𑒱𑒢𑒹 𑒄 𑒥𑒳𑒗𑒴 𑒖𑒹 𑒮𑓀𑒐𑓂𑒨𑒰 𑒏𑒋𑒏 𑒙𑒰 𑒁𑒕𑒱।

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒥𑒱𑒯𑒳𑒿𑒮𑒻𑒞) 𑒮𑒋 𑒙𑒰 𑒂𑒩 𑒏𑒞𑒹𑒏।

𑒑𑓀𑒑𑒰𑒡𑒩: 𑒋𑒏 𑒮𑒿 𑒮𑒋 𑒂 𑒮𑒃𑒨𑒰 𑒢𑒱𑒢𑒰𑒢𑒥𑒹 𑒌𑒧𑒹 𑒂𑒥 𑒏𑒰𑒖 𑒂𑒋𑒞। 𑒋𑒏 𑒂 𑒮𑒋, 𑒠𑒴 𑒂 𑒢𑒱𑒢𑒰𑒢𑒥𑒹, 𑒞𑒲𑒢 𑒂 𑒁𑒢𑒚𑒰𑒢𑒥𑒹.. 𑒌 𑒮𑒦𑒙𑒰 𑒖𑒼𑒛𑓃𑒰𑒏 𑒏𑒞𑒹𑒏 𑒣𑒩𑒱𑒝𑒰𑒧 𑒂𑒋𑒞?

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒥𑒱𑒯𑒳𑒿𑒮𑒻𑒞) 𑒋𑒏 𑒮𑒋 𑒋𑒏 𑒂𑒩 𑒏𑒞𑒹𑒏?

𑒑𑓀𑒑𑒰𑒡𑒩: 𑒠𑒴 𑒠𑒴 𑒙𑒰 𑒖𑒼𑒛𑓃𑒰 𑒁𑒕𑒱, 𑒞𑒿 𑒮𑒋 𑒙𑒰𑒧𑒹 𑒏𑒞𑒹𑒏 𑒖𑒼𑒛𑓃𑒰 𑒦𑒹𑒪।

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒥𑒱𑒯𑒳𑒿𑒮𑒻𑒞) 𑒣𑒔𑒰𑒮𑒙𑒰 𑒂𑒩 𑒏𑒞𑒹𑒏?

𑒑𑓀𑒑𑒰𑒡𑒩: 𑒋𑒏 𑒮𑒋 𑒋𑒏 𑒏𑒹𑒩 𑒣𑒔𑒰𑒮 𑒙𑒰 𑒖𑒼𑒛𑓃𑒰 𑒁𑒕𑒱। 𑒞𑒿 𑒋𑒏 𑒮𑒋 𑒋𑒏 𑒏𑒹𑒿 𑒣𑒔𑒰𑒮𑒮𑒿 𑒑𑒳𑒝𑒰 𑒏𑒩𑒴। 𑒫𑒰 𑒣𑒔𑒰𑒮𑒏𑒹𑒿 𑒮𑒋𑒮𑒿 𑒑𑒳𑒝𑒰 𑒏𑒩𑒴 𑒂 𑒍𑒃𑒧𑒹 𑒣𑒔𑒰𑒮 𑒖𑒼𑒛𑓃𑒴..𑒏𑒞𑒹𑒏 𑒦𑒹𑒪?

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒂𑒬𑓂𑒔𑒩𑓂𑒨𑒮𑒿 𑒂𑒿𑒐𑒱 𑒤𑒰𑒛𑓃𑒱 𑒥𑒖𑒻𑒞) 𑒣𑒔𑒰𑒮𑒏𑒹𑒿 𑒮𑒋𑒮𑒿 𑒑𑒳𑒝𑒰…𑒄 𑒦𑒹𑒪 𑒣𑒰𑒿𑒔 𑒯𑒖𑒰𑒩…𑒂 𑒂𑒩 𑒣𑒔𑒰𑒮 𑒦𑒹𑒪 𑒣𑒰𑒿𑒔 𑒯𑒖𑒰𑒩 𑒣𑒔𑒰𑒮। 𑒣𑒰𑒿𑒔 𑒯𑒖𑒰𑒩 𑒣𑒔𑒰𑒮 𑒦𑒹𑒪 𑒧𑒯𑒰𑒩𑒰𑒖। 𑒯𑒿 𑒚𑒲𑒏𑒹 𑒞𑒿..

𑒏𑒲𑒩𑓂𑒞𑒱 𑒮𑒱𑓀𑒯: 𑒁𑒯𑒰𑒿𑒏 𑒬𑒱𑒭𑓂𑒨 𑒞𑒿 𑒥𑒛 𑒏𑒰𑒥𑒱𑒪 𑒁𑒕𑒱। (𑒑𑓀𑒑𑒰𑒡𑒩 𑒠𑒱𑒮 𑒞𑒏𑒻𑒞) 𑒏𑒲 𑒢𑒰𑒧 𑒁𑒕𑒱 𑒁𑒯𑒰𑒿𑒏 𑒫𑒞𑓂𑒮..

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒧𑒯𑒩𑒰𑒖 𑒠𑒱𑒮 𑒞𑒰𑒏𑒱 𑒪𑒖𑓂𑒖𑒱𑒞 𑒯𑒼𑒃𑒞) 𑒢𑒻 𑒧𑒯𑒩𑒰𑒖, 𑒄 𑒯𑒧𑒩 𑒬𑒱𑒭𑓂𑒨 𑒢𑒻 𑒕𑒟𑒱। 𑒄 𑒞𑒿 𑒯𑒧𑒩𑒰𑒮𑒿 𑒢𑒼𑒏𑒩𑒲 𑒧𑒰𑒿𑒑𑓄 𑒂𑒋𑒪 𑒩𑒯𑒟𑒱। 𑒧𑒳𑒠𑒰 𑒖𑒐𑒢 𑒣𑒳𑒕𑒪𑒱𑒨𑒢𑓂𑒯𑒱 𑒖𑒹 𑒏𑒼𑒢 𑒣𑒰𑒚𑒬𑒰𑒪𑒰𑒮𑒿 𑒕𑒲 𑒞𑒿 𑒏𑒯𑒪𑒢𑓂𑒯𑒱 𑒖𑒹 𑒮𑒣𑓂𑒞𑒩𑒲𑒮𑒿 𑒇𑒭𑒱 𑒖𑒙𑒰 𑒂 𑒯𑒳𑒢𑒏𑒩 𑒬𑒱𑒭𑓂𑒨 𑒔𑒩𑓂𑒧𑒏𑒰𑒩 𑒯𑒲𑒩𑒴𑒮𑒿 𑒄 𑒣𑒜𑓃𑒢𑒹 𑒕𑒟𑒱, 𑒏𑒼𑒢𑒼 𑒣𑒰𑒚𑒬𑒰𑒪𑒰𑒧𑒹 𑒢𑒻 𑒣𑒜𑓃𑒢𑒹 𑒕𑒟𑒱। 𑒞𑒹𑒿 𑒯𑒧 𑒢𑒼𑒏𑒩𑒲𑒣𑒩 𑒢𑒻 𑒩𑒐𑒪𑒱𑒨𑒢𑓂𑒯𑒱। 𑒯𑒧 𑒪𑒖𑓂𑒖𑒱𑒞 𑒕𑒲 𑒧𑒯𑒩𑒰𑒖। 𑒯𑒱𑒢𑒏𑒩 𑒢𑒰𑒧 𑒕𑒱𑒨𑒢𑓂𑒯𑒱 𑒑𑓀𑒑𑒰𑒡𑒩..

𑒏𑒲𑒩𑓂𑒞𑒱 𑒮𑒱𑓀𑒯: 𑒂𑒬𑓂𑒔𑒩𑓂𑒨। 𑒏𑒼𑒢𑒼 𑒣𑒰𑒚𑒬𑒰𑒪𑒰𑒧𑒹 𑒢𑒻 𑒣𑒜𑓃𑒢𑒹 𑒕𑒟𑒱! 𑒇𑒭𑒱 𑒖𑒙𑒰 𑒂 𑒯𑒳𑒢𑒏𑒩 𑒬𑒱𑒭𑓂𑒨 𑒔𑒩𑓂𑒧𑒏𑒰𑒩 𑒯𑒲𑒩𑒴𑒮𑒿 𑒣𑒜𑓃𑒪 𑒕𑒟𑒱!

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: (𑒪𑒖𑓂𑒖𑒱𑒞 𑒯𑒼𑒃𑒞) 𑒧𑒯𑒩𑒰𑒖। 𑒖𑒿 𑒂𑒠𑒹𑒬 𑒯𑒳𑒁𑒋 𑒞𑒿 𑒑𑓀𑒑𑒰𑒡𑒩𑒏𑒹𑒿 𑒯𑒧 𑒢𑒼𑒏𑒩𑒲𑒣𑒩 𑒩𑒰𑒐𑒱 𑒪𑒱𑒁𑒢𑓂𑒯𑒱?

𑒠𑒩𑒥𑒰𑒩𑒲-𑓑: (𑒁𑒩𑓂𑒟𑒧𑓀𑒞𑓂𑒩𑒲 𑒢𑒩𑒰𑒨𑒝𑒮𑒿) 𑒩𑒰𑒐𑒱 𑒪𑒱𑒨𑒢𑓂𑒯𑒱? 𑒯𑒱𑒢𑒏𑒰 𑒢𑒻 𑒩𑒐𑒥𑒢𑓂𑒯𑒱 𑒞𑒿 𑒁𑒯𑒰𑒿𑒏 𑒢𑒼𑒏𑒩𑒲 𑒐𑒞𑒩𑒰𑒧𑒹 𑒣𑒛𑓃𑒱 𑒖𑒰𑒋𑒞। 𑒮𑒰𑒪 𑒦𑒩𑒱𑒮𑒿 𑒩𑒰𑒖𑓂𑒨𑒏 𑒐𑒰𑒞𑒰-𑒐𑒹𑒮𑒩𑒰 𑒢𑒤𑒰𑒧𑒹 𑒕𑒻 𑒂𑒏𑒱 𑒢𑒼𑒏𑒮𑒰𑒢𑒧𑒹 𑒮𑒹 𑒢𑒻 𑒥𑒳𑒗𑒱 𑒩𑒯𑒪 𑒁𑒕𑒱 𑒏𑒱𑒨𑒼।

𑒏𑒲𑒩𑓂𑒞𑒱 𑒮𑒱𑓀𑒯: 𑒏𑒼𑒢𑒼 𑒥𑒰𑒞 𑒢𑒻.. (𑒠𑒩𑒥𑒰𑒩𑒲 𑓑-𑓒 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞) 𑒖𑒰𑒅 𑒂 𑒯𑒩𑒱𑒏𑒩- 𑒮𑒹𑒢𑒰𑒣𑒞𑒱𑒏𑒹𑒿 𑒥𑒖𑒰𑒅।

(𑒠𑒩𑒥𑒰𑒩𑒲 𑓑 𑒋𑒏 𑒠𑒱𑒬𑒰𑒮𑒿 𑒂 𑒠𑒩𑒥𑒰𑒩𑒲-𑓒 𑒠𑒼𑒮𑒩 𑒠𑒱𑒬𑒰𑒮𑒿 𑒥𑒯𑒩𑒰𑒃 𑒕𑒟𑒱।)

𑒏𑒲𑒩𑓂𑒞𑒱 𑒮𑒱𑓀𑒯: 𑒑𑓀𑒑𑒰𑒡𑒩 𑒁𑒯𑒰𑒿 𑒩𑒰𑒖𑒠𑒩𑒥𑒰𑒩𑒧𑒹 𑒢𑒼𑒏𑒩𑒲 𑒏𑒩𑒥𑒰𑒪𑒹 𑒞𑒻𑒨𑒰𑒩 𑒃𑒔𑓂𑒕𑒳𑒏 𑒕𑒲?

𑒑𑓀𑒑𑒰𑒡𑒩: 𑒧𑒯𑒩𑒰𑒖 𑒯𑒧 𑒞𑒿 𑒏𑒞𑒾 𑒢𑒼𑒏𑒩𑒲 𑒏𑒩𑒥𑒰𑒪𑒹 𑒞𑒻𑒨𑒰𑒩 𑒕𑒲। 𑒩𑒰𑒖𑒠𑒩𑒥𑒰𑒩𑒧𑒹 𑒢𑒼𑒏𑒩𑒲 𑒦𑒹𑒙𑒪𑒰𑒮𑒿 𑒞𑒿 𑒯𑒧𑒩 𑒬𑒱𑒏𑓂𑒭𑒰𑒏 𑒪𑒰𑒦 𑒂𑒢 𑒪𑒼𑒏𑒼𑒏𑒹𑒿 𑒦𑒹𑒙𑒞𑒻, 𑒮𑓀𑒑𑒹 𑒌 𑒞𑒩𑒯𑒏 𑒬𑒱𑒏𑓂𑒭𑒰 𑒠𑒼𑒮𑒩𑒼 𑒚𑒰𑒧 𑒯𑒳𑒁𑒋 𑒮𑒹𑒯𑒼 𑒯𑒧 𑒮𑒱𑒠𑓂𑒡 𑒏𑓄 𑒮𑒏𑒥।

(𑒠𑒩𑒥𑒰𑒩𑒲 𑓑 𑒂 𑒠𑒩𑒥𑒰𑒩𑒲-𑓒 𑒯𑒩𑒱𑒏𑒩 𑒮𑒹𑒢𑒰𑒣𑒞𑒱𑒏 𑒮𑓀𑒑 𑒁𑒥𑒻 𑒕𑒟𑒱।)

𑒏𑒲𑒩𑓂𑒞𑒱 𑒮𑒱𑓀𑒯: 𑒁𑒩𑓂𑒟𑒧𑓀𑒞𑓂𑒩𑒲 𑒂 𑒑𑓀𑒑𑒰𑒡𑒩। 𑒠𑒳𑒢𑒴 𑒑𑒼𑒙𑒹 𑒮𑓂𑒫𑒰𑒑𑒞 𑒏𑒏𑓂𑒭𑒧𑒹 𑒥𑒻𑒮𑒴 𑒑𑓄। 𑒯𑒧𑒩𑒰 𑒏𑒱𑒕𑒳 𑒁𑒞𑓂𑒨𑒰𑒫𑒬𑓂𑒨𑒏 𑒑𑒣 𑒏𑒩𑒥𑒰𑒏 𑒁𑒕𑒱। 𑒧𑒳𑒠𑒰 𑒥𑒻𑒮𑒥, 𑒏𑒞𑒾 𑒖𑒰𑒋𑒥 𑒢𑒻।

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝 𑒂 𑒑𑓀𑒑𑒰𑒡𑒩: (𑒮𑒧𑓂𑒫𑒹𑒞 𑒮𑓂𑒫𑒩𑒧𑒹) 𑒖𑒲 𑒧𑒯𑒩𑒰𑒖।

(𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝 𑒂 𑒑𑓀𑒑𑒰𑒡𑒩 𑒥𑒯𑒩𑒰 𑒖𑒰𑒃 𑒕𑒟𑒱।)

𑒮𑒹𑒢𑒰𑒣𑒞𑒱 𑒯𑒩𑒱𑒏𑒩: (𑒏𑒲𑒩𑓂𑒞𑒱 𑒮𑒱𑓀𑒯𑒮𑒿) 𑒥𑒖𑒹𑒢𑒹 𑒕𑒪𑒾𑓀 𑒧𑒯𑒩𑒰𑒖।

𑒏𑒲𑒩𑓂𑒞𑒱 𑒮𑒱𑓀𑒯: 𑒯𑒿 𑒮𑒹𑒢𑒰𑒣𑒞𑒱। 𑒂𑒃 𑒋𑒏𑒙𑒰 𑒥𑒰𑒪𑒏 𑒑𑓀𑒑𑒰𑒡𑒩 𑒠𑒹𑒐𑒰𑒃 𑒣𑒛𑓃𑒪 𑒁𑒕𑒱। 𑒥𑒛𑓂𑒛 𑒔𑒞𑒳𑒩.. 𑒥𑒛𑓂𑒛 𑒠𑒱𑒫𑓂𑒨। 𑒁𑒩𑓂𑒟𑒧𑓀𑒞𑓂𑒩𑒲 𑒞𑒿 𑒏𑒼𑒢𑒼 𑒏𑒰𑒖𑒏 𑒢𑒻 𑒁𑒕𑒱। 𑒢𑒹 𑒏𑒼𑒢𑒼 𑒯𑒱𑒮𑒰𑒥 𑒏𑒯𑒱 𑒣𑒥𑒻𑒋 𑒢𑒯𑒱𑒨𑒹 𑒏𑒼𑒢𑒼 𑒪𑒹𑒐𑒰 𑒮𑒧𑒨𑒣𑒩 𑒠𑓄 𑒣𑒥𑒻𑒋। 𑒞𑒐𑒢 𑒄 𑒕𑒻 𑒖𑒹 𑒂𑒖𑓂𑒘𑒰𑒏 𑒁𑒫𑒯𑒹𑒪𑒢𑒰 𑒢𑒻 𑒏𑒩𑒻𑒋।

𑒮𑒹𑒢𑒰𑒣𑒞𑒱 𑒯𑒩𑒱𑒏𑒩: (𑒏𑒲𑒩𑓂𑒞𑒱 𑒮𑒱𑓀𑒯𑒮𑒿) 𑒖𑒲 𑒧𑒯𑒩𑒰𑒖।

𑒏𑒲𑒩𑓂𑒞𑒱 𑒮𑒱𑓀𑒯: (𑒮𑒹𑒢𑒰𑒣𑒞𑒱 𑒯𑒩𑒱𑒏𑒩𑒮𑒿) 𑒯𑒧𑒩 𑒧𑒼𑒢𑒧𑒹 𑒋𑒏𑒙𑒰 𑒑𑒣 𑒂𑒋𑒪 𑒁𑒕𑒱। 𑒁𑒣𑒢 𑒡𑒩𑓂𑒧 𑒥𑒯𑒱𑒢 𑒏𑒳𑒧𑒩𑒮𑒳𑒞𑒰𑒏 𑒫𑒱𑒫𑒰𑒯..

𑒮𑒹𑒢𑒰𑒣𑒞𑒱 𑒯𑒩𑒱𑒏𑒩: (𑒏𑒲𑒩𑓂𑒞𑒱 𑒮𑒱𑓀𑒯𑒮𑒿) 𑒁𑒯𑒰𑒿 𑒑𑓀𑒑𑒰𑒡𑒩𑒏 𑒫𑒱𑒭𑒨𑒧𑒹 𑒞𑒿 𑒢𑒻 𑒮𑒼𑒔𑒱 𑒩𑒯𑒪 𑒕𑒲 𑒧𑒯𑒩𑒰𑒖?

𑒏𑒲𑒩𑓂𑒞𑒱 𑒮𑒱𑓀𑒯: (𑒮𑒹𑒢𑒰𑒣𑒞𑒱 𑒯𑒩𑒱𑒏𑒩𑒮𑒿) 𑒮𑒼𑒔𑒱 𑒩𑒯𑒪 𑒕𑒲 𑒮𑒹𑒢𑒰𑒣𑒞𑒱।

𑒮𑒹𑒢𑒰𑒣𑒞𑒱 𑒯𑒩𑒱𑒏𑒩: (𑒏𑒲𑒩𑓂𑒞𑒱 𑒮𑒱𑓀𑒯𑒮𑒿) 𑒧𑒳𑒠𑒰 𑒁𑒯𑒰𑒿 𑒞𑒿 𑒏𑒳𑒪𑒲𑒢𑒞𑒰𑒏 𑒣𑒏𑓂𑒭𑒩 𑒕𑒲 𑒧𑒯𑒩𑒰𑒖 𑒂 𑒑𑓀𑒑𑒰𑒡𑒩 𑒞𑒿..

𑒏𑒲𑒩𑓂𑒞𑒱 𑒮𑒱𑓀𑒯: 𑒯𑒿 𑒮𑒋𑒯 𑒞𑒿 𑒂 𑒌 𑒪𑒹𑒪 𑒯𑒳𑒢𑒏𑒰 𑒏𑒳𑒪𑒲𑒢 𑒥𑒢𑒰𑒋𑒥 𑒂𑒫𑒬𑓂𑒨𑒏। 𑒯𑒧 𑒑𑓀𑒑𑒰𑒡𑒩𑒏𑒹𑒿 𑒁𑒣𑒢 𑒡𑒩𑓂𑒧 𑒥𑒯𑒱𑒢 𑒏𑒳𑒧𑒩𑒮𑒳𑒞𑒰𑒮𑒿 𑒫𑒱𑒫𑒰𑒯 𑒏𑒩𑒥𑒰 𑒏𑓄 𑒌 𑒩𑒰𑒖𑓂𑒨𑒏 𑒣𑓂𑒩𑒡𑒰𑒢𑒧𑓀𑒞𑓂𑒩𑒲 𑒥𑒢𑒥𑒻𑒞 𑒕𑒱𑒨𑒢𑓂𑒯𑒱। 𑒮𑒹𑒢𑒰𑒣𑒞𑒱 𑒯𑒩𑒱𑒏𑒩.. 𑒄 𑒥𑒰𑒪𑒏 𑒖𑒹 𑒁𑒯𑒰𑒿𑒏 𑒮𑒼𑒗𑒰𑒿𑒮𑒿 𑒁𑒐𑒢𑒹 𑒑𑒹𑒪 𑒁𑒕𑒱.. 𑒥𑒛𑓂𑒛 𑒠𑒱𑒫𑓂𑒨 𑒁𑒕𑒱..


𑒮𑒹𑒢𑒰𑒣𑒞𑒱 𑒯𑒩𑒱𑒏𑒩: 𑒯𑒿 𑒧𑒯𑒩𑒰𑒖 (𑒠𑒩𑒥𑒰𑒩𑒲 𑓑 𑒂 𑓒 𑒠𑒱𑒮 𑒃𑒬𑒰𑒩𑒰 𑒏𑒩𑒻𑒞), 𑒁𑒐𑒢𑒹 𑒄 𑒠𑒳𑒢𑒴 𑒑𑒼𑒙𑒹 𑒯𑒳𑒢𑒏𑒩 𑒣𑓂𑒩𑒞𑒱𑒦𑒰𑒏 𑒫𑒱𑒭𑒨𑒧𑒹 𑒔𑒩𑓂𑒔𑒰 𑒏𑒩𑒻𑒞 𑒩𑒯𑒟𑒱। 𑒋𑒯𑒹𑒢 𑒫𑒩 𑒏𑒳𑒧𑒩𑒮𑒳𑒞𑒰 𑒪𑒹𑒪 𑒮𑒩𑓂𑒫𑒟𑒰 𑒅𑒣𑒨𑒳𑒏𑓂𑒞 𑒕𑒟𑒱। 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝 𑒣𑓂𑒩𑒡𑒰𑒢𑒧𑓀𑒞𑓂𑒩𑒲𑒏 𑒁𑒞𑒱𑒩𑒱𑒏𑓂𑒞 𑒦𑒰𑒩 𑒢𑒻 𑒮𑒧𑓂𑒯𑒰𑒩𑒱 𑒣𑒰𑒥𑒱 𑒩𑒯𑒪 𑒕𑒪𑒰।

𑒏𑒲𑒩𑓂𑒞𑒱 𑒮𑒱𑓀𑒯: 𑒞𑒿 𑒫𑒱𑒫𑒰𑒯𑒏 𑒮𑒦 𑒣𑓂𑒩𑒥𑒢𑓂𑒡 𑒏𑒋𑒪 𑒖𑒰𑒋 𑒮𑒹𑒢𑒰𑒣𑒞𑒱।

𑒮𑒹𑒢𑒰𑒣𑒞𑒱 𑒯𑒩𑒱𑒏𑒩: 𑒁𑒫𑒬𑓂𑒨 𑒧𑒯𑒩𑒰𑒖.. 𑒁𑒫𑒬𑓂𑒨.. 𑒬𑒲𑒒𑓂𑒩 𑒮𑒦 𑒃𑒢𑓂𑒞𑒖𑒰𑒧 𑒦𑓄 𑒖𑒰𑒋𑒞।

(𑒮𑒑𑒩𑒹 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱। 𑒤𑒹𑒩 𑒖𑒐𑒢 𑒃𑒖𑒼𑒞 𑒯𑒼𑒃𑒞 𑒁𑒕𑒱 𑒞𑒿 𑒪𑒑𑒻𑒞 𑒁𑒕𑒱 𑒖𑒹 𑒩𑒰𑒖𑒠𑒩𑒥𑒰𑒩𑒮𑒿 𑒥𑒹𑒬𑒲 𑒧𑒯𑒞𑓂𑒫𑒣𑒴𑒩𑓂𑒝 𑒑𑓀𑒑𑒰𑒡𑒩𑒏 𑒏𑒰𑒩𑓂𑒨𑒰𑒪𑒨 𑒦𑓄 𑒑𑒹𑒪 𑒁𑒕𑒱। 𑒍 𑒋𑒏𑒙𑒰 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒮𑓂𑒟𑒰𑒣𑒢𑒰 𑒏𑒹𑒢𑒹 𑒕𑒟𑒱 𑒖𑒃𑒧𑒹 𑒢𑒹 𑒏𑒼𑒢𑒼 𑒖𑒰𑒞𑒱𑒏 𑒦𑒹𑒠 𑒕𑒻 𑒂 𑒢𑒹 𑒮𑓂𑒞𑓂𑒩𑒲-𑒣𑒳𑒩𑒳𑒭𑒏 𑒦𑒹𑒠 𑒕𑒻। 𑒑𑓀𑒑𑒰𑒡𑒩, 𑒧𑒢𑒮𑒳𑒐, 𑒯𑒩𑒱𑒏𑒩, 𑒧𑒱𑒞𑒴, 𑒏𑒳𑒧𑒩𑒮𑒳𑒞𑒰, 𑒂𑒢𑒢𑓂𑒠𑒰, 𑒧𑒹𑒡𑒰, 𑒖𑒲𑒫𑒹, 𑒇𑒭𑒱 𑒖𑒙𑒰, 𑒯𑒲𑒩𑒴, 𑒧𑒰𑒡𑒫, 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑 𑒂 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓒 𑒧𑓀𑒔𑒣𑒩 𑒂𑒥𑒱 𑒖𑒰𑒃 𑒕𑒟𑒱, 𑒞𑒐𑒢𑒹 𑒣𑓂𑒩𑒏𑒰𑒬 𑒯𑒼𑒃𑒞 𑒁𑒕𑒱। 𑒮𑒦𑒏 𑒑𑒩𑒰𑒧𑒹 𑒅𑒪𑓂𑒏𑒰𑒧𑒳𑒐 𑒞𑒰𑒥𑒲𑒖 𑒪𑒙𑒏𑒪 𑒕𑒢𑓂𑒯𑒱।)


𑒑𑓀𑒑𑒰𑒡𑒩: 𑒢𑒫 𑒣𑒰𑒚𑒬𑒰𑒪𑒰 𑒮𑒦𑒧𑒹 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦 𑒮𑒼𑒔𑒱 𑒩𑒯𑒪 𑒕𑒟𑒱, 𑒏𑓄 𑒩𑒯𑒪 𑒕𑒟𑒱 𑒁𑒣𑒢𑒰 𑒯𑒰𑒟𑒮𑒿 𑒏𑒰𑒖। 𑒮𑓂𑒞𑓂𑒩𑒲-𑒬𑒱𑒏𑓂𑒭𑒰 𑒤𑒹𑒩𑒮𑒿 𑒬𑒳𑒩𑒴 𑒦𑓄 𑒑𑒹𑒪 𑒁𑒕𑒱। 𑒖𑒰𑒞𑒱-𑒣𑒰𑒞𑒱 𑒐𑒞𑒧 𑒏𑓄 𑒠𑒹𑒪 𑒑𑒹𑒪 𑒁𑒕𑒱, 𑒬𑒱𑒏𑓂𑒭𑒰 𑒮𑒦𑒏 𑒪𑒹𑒪। 𑒁𑒢𑒳𑒦𑒫-𑒧𑒝𑓂𑒛𑒪𑒏 𑒌 𑒥𑒻𑒮𑒏𑒲𑒧𑒹 𑒮𑒦𑒏 𑒮𑓂𑒫𑒰𑒑𑒞 𑒁𑒕𑒱..𑒁𑒯𑒰𑒿𑒏 𑒫𑒱𑒔𑒰𑒩 𑒮𑒦 𑒮𑒳𑒢𑒥𑒰 𑒪𑒹𑒪 𑒂𑒞𑒳𑒩 𑒕𑒟𑒱 𑒇𑒭𑒱 𑒖𑒙𑒰..

𑒇𑒭𑒱 𑒖𑒙𑒰: 𑒩𑒙𑒢𑓂𑒞 𑒢𑒻 𑒥𑒳𑒗𑒢𑓂𑒞 𑒫𑒱𑒠𑓂𑒨𑒰 𑒬𑒳𑒩𑒴 𑒦𑓄 𑒑𑒹𑒪 𑒁𑒕𑒱.. 𑒖𑒹 𑒯𑒧𑒩 𑒑𑒳𑒩𑒴 𑒫𑒰 𑒯𑒳𑒢𑒏𑒩 𑒑𑒳𑒩𑒴 𑒫𑒰 𑒯𑒳𑒢𑒏𑒩 𑒑𑒳𑒩𑒳𑒏 𑒏𑒰𑒪𑒧𑒹 𑒢𑒻 𑒕𑒪𑒻… 𑒩𑒙𑒪 𑒫𑒱𑒠𑓂𑒨𑒰 𑒞𑒿 𑒥𑒳𑒗𑒴 𑒑𑒠𑒯𑒰𑒏 𑒆𑒣𑒩 𑒩𑒰𑒐𑒪 𑒥𑒼𑒗 𑒟𑒱𑒏। 𑒏𑒲 𑒧𑒢𑒮𑒳𑒐?

𑒧𑒢𑒮𑒳𑒐: 𑒚𑒲𑒏𑒹 𑒏𑒱𑒢𑒹। (𑒁𑒣𑒢 𑒥𑒹𑒙𑒰 𑒖𑒲𑒫𑒹𑒮𑒿) 𑒮𑒦 𑒁𑒦𑓂𑒨𑒰𑒑𑒞 𑒪𑒹𑒪 𑒖𑒪𑒐𑒻𑒏 𑒫𑓂𑒨𑒫𑒮𑓂𑒟𑒰 𑒏𑒩𑒴 𑒖𑒲𑒫𑒹। (𑒯𑒩𑒱𑒏𑒩𑒮𑒿) 𑒏𑒲 𑒯𑒩𑒱𑒏𑒩 𑒁𑒯𑒰𑒿 𑒮𑒹𑒯𑒼 𑒏𑒱𑒕𑒳 𑒥𑒰𑒖𑓄 𑒔𑒰𑒯𑒻 𑒕𑒲?

𑒯𑒩𑒱𑒏𑒩: (𑒧𑒹𑒡𑒰𑒮𑒿) 𑒣𑒳𑒞𑓂𑒩𑒲 𑒧𑒹𑒡𑒰, 𑒁𑒯𑒰𑒿 𑒖𑒲𑒫𑒹𑒏 𑒮𑒯𑒨𑒼𑒑 𑒏𑒩𑒴 𑒑𑓄।

(𑒖𑒲𑒫𑒹 𑒂 𑒧𑒹𑒡𑒰 𑒥𑒯𑒩𑒰 𑒖𑒰𑒃 𑒕𑒟𑒱।)
:𑒥𑒰𑒖𑓄 𑒔𑒰𑒯𑒻 𑒕𑒲 𑒧𑒢𑒮𑒳𑒐 𑒧𑒳𑒠𑒰 𑒏𑒢𑒹 𑒏𑒰𑒪𑒧𑒹। 𑒣𑒯𑒱𑒢𑒹 𑒏𑒱𑒕𑒳 𑒂𑒩 𑒑𑓀𑒑𑒰𑒡𑒩𑒮𑒿 𑒮𑒳𑒢𑓄 𑒔𑒰𑒯𑒻 𑒕𑒲।

𑒑𑓀𑒑𑒰𑒡𑒩: 𑒁𑒢𑒳𑒦𑒫 𑒧𑒝𑓂𑒛𑒪 𑒣𑒩𑒱𑒬𑓂𑒩𑒧𑒏 𑒮𑒞𑓂𑒏𑒰𑒩 𑒏𑒩𑒻𑒞 𑒁𑒕𑒱 𑒡𑒢𑒱𑒏𑒏 𑒢𑒻। 𑒡𑒢𑒱𑒏𑒏 𑒡𑒢 𑒏𑒳𑒏𑒳𑒛𑓃𑒏 𑒠𑒴𑒡 𑒮𑒢 𑒁𑒕𑒱, 𑒖𑒃𑒮𑒿 𑒏𑒳𑒏𑒳𑒛𑓃𑒏 𑒥𑒔𑓂𑒔𑒰 𑒧𑒰𑒞𑓂𑒩𑒏 𑒣𑒼𑒭𑒝 𑒯𑒼𑒃 𑒕𑒻, 𑒧𑒱𑒭𑓂𑒙𑒰𑒢𑓂𑒢 𑒢𑒻 𑒥𑒢𑒻 𑒕𑒻।
𑒏𑒳𑒧𑒩𑒮𑒳𑒞𑒰: 𑒯𑒿, 𑒮𑒋𑒯 𑒞𑒿 𑒯𑒧 𑒁𑒣𑒢 𑒡𑒩𑓂𑒧-𑒦𑒰𑒋 𑒏𑒲𑒩𑓂𑒞𑒱 𑒮𑒱𑓀𑒯𑒏𑒹𑒿 𑒏𑒯𑒻 𑒕𑒱𑒌। 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝𑒏𑒹𑒿 𑒪𑒑𑒻𑒞 𑒩𑒯𑒻𑒞 𑒕𑒻 𑒖𑒹 𑒁𑒢𑒳𑒦𑒫𑒧𑒝𑓂𑒛𑒪𑒏 𑒮𑒦𑒙𑒰 𑒏𑒪𑓂𑒨𑒰𑒝𑒏𑒰𑒩𑒲 𑒏𑒰𑒩𑓂𑒨 𑒩𑒰𑒖𑒏𑒼𑒭𑒮𑒿 𑒦𑓄 𑒩𑒯𑒪 𑒕𑒻।

𑒂𑒢𑒢𑓂𑒠𑒰: 𑒢𑒰𑒩𑒰𑒨𑒝𑒏𑒹𑒿 𑒁𑒩𑓂𑒟 𑒢𑒲𑒞𑒱 𑒢𑒻 𑒥𑒳𑒗𑒪 𑒕𑒢𑓂𑒯𑒱। 𑒯𑒳𑒢𑒏𑒰 𑒧𑒰𑒞𑓂𑒩 𑒡𑒢-𑒫𑒮𑒴𑒪 𑒏𑒼𑒢𑒰 𑒏𑒋𑒪 𑒖𑒰𑒃 𑒕𑒻, 𑒮𑒹 𑒥𑒴𑒗𑒪 𑒕𑒢𑓂𑒯𑒱। 𑒯𑒳𑒢𑒏𑒰 𑒄 𑒢𑒻 𑒥𑒴𑒗𑒪 𑒕𑒢𑓂𑒯𑒱 𑒖𑒹 𑒡𑒢 𑒏𑒼𑒢𑒰 𑒅𑒣𑒰𑒩𑓂𑒖𑒱𑒞 𑒏𑒋𑒪 𑒖𑒰𑒃 𑒕𑒻।

𑒧𑒰𑒡𑒫: 𑒑𑓀𑒑𑒰𑒡𑒩 𑒏𑒋𑒏 𑒥𑒹𑒩 𑒏𑒲𑒩𑓂𑒞𑒱 𑒮𑒱𑓀𑒯𑒏𑒹𑒿 𑒯𑒱𑒮𑒰𑒥 𑒥𑒳𑒗𑒰 𑒠𑒹𑒢𑒹 𑒕𑒟𑒱𑒢𑓂𑒯। 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒮𑒦 𑒏𑒪𑓂𑒨𑒰𑒝𑒏𑒰𑒩𑒲 𑒏𑒰𑒩𑓂𑒨 𑒍𑒏𑒩 𑒁𑒣𑒢 𑒅𑒣𑒰𑒩𑓂𑒖𑒱𑒞 𑒡𑒢𑒮𑒿 𑒯𑒼𑒃 𑒕𑒻।

𑒏𑒳𑒧𑒩𑒮𑒳𑒞𑒰: 𑒧𑒳𑒠𑒰 𑒮𑒹 𑒢𑒰𑒩𑒰𑒨𑒝 𑒠𑒩𑒥𑒰𑒩𑒧𑒹 𑒑𑓀𑒑𑒰𑒡𑒩𑒏 𑒮𑒼𑒗𑒰𑒿𑒧𑒹 𑒞𑒿 𑒧𑒰𑒢𑒱 𑒪𑒻 𑒕𑒟𑒱 𑒧𑒳𑒠𑒰 𑒑𑓀𑒑𑒰𑒡𑒩𑒏 𑒣𑒩𑒼𑒏𑓂𑒭𑒧𑒹 𑒑𑓀𑒑𑒰𑒡𑒩𑒏 𑒒𑒳𑒧𑒾𑒂 𑒯𑒱𑒮𑒰𑒥- 𑒅𑒪𑓂𑒏𑒰𑒧𑒳𑒐𑒲 𑒒𑒳𑒧𑒾𑒂 𑒯𑒱𑒮𑒰𑒥 𑒏𑒯𑒱 𑒢𑒻 𑒧𑒰𑒢𑒥𑒰𑒏 𑒦𑓂𑒩𑒧 𑒅𑒞𑓂𑒣𑒢𑓂𑒢 𑒏𑒩𑒻 𑒕𑒟𑒱।

𑒑𑓀𑒑𑒰𑒡𑒩: 𑒮𑒰𑒿𑒣𑒏 𑒏𑒰𑒙𑒪 𑒂 𑒦𑒴𑒞-𑒣𑓂𑒩𑒹𑒞𑒏 𑒬𑒱𑒏𑒰𑒩𑒮𑒿 𑒁𑒯𑒰𑒿 𑒏𑒱𑒕𑒳 𑒣𑒴𑒕𑒱 𑒮𑒏𑒻 𑒕𑒱𑒌 𑒧𑒳𑒠𑒰 𑒡𑒢 𑒩𑒴𑒣𑒲 𑒦𑒴𑒞𑒮𑒿 𑒖𑒹 𑒑𑓂𑒩𑒮𑓂𑒞 𑒁𑒕𑒱 𑒍𑒏𑒩𑒰𑒮𑒿 𑒏𑒲 𑒣𑒳𑒕𑒥𑒻? 𑒁𑒢𑒳𑒦𑒫𑒧𑒝𑓂𑒛𑒪𑒏 𑒣𑒰𑒚𑒬𑒰𑒪𑒰 𑒡𑒢 𑒮𑓂𑒫-𑒁𑒩𑓂𑒖𑒱𑒞 𑒏𑒩𑒥 𑒮𑒱𑒐𑒥𑒻𑒞 𑒁𑒕𑒱, 𑒂𑒞𑓂𑒧𑒢𑒱𑒩𑓂𑒦𑒩 𑒦𑒹𑒢𑒰𑒃 𑒮𑒱𑒐𑒥𑒻𑒞 𑒁𑒕𑒱।

𑒧𑒢𑒮𑒳𑒐: 𑒮𑒯𑒲 𑒏𑒯𑒪𑒾𑓀 𑒑𑓀𑒑𑒰𑒡𑒩 𑒯𑒧𑒩 𑒥𑒹𑒙𑒰𑒏𑒹𑒿 𑒏𑒯𑒱𑒨𑒼 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒣𑒰𑒚𑒬𑒰𑒪𑒰𑒧𑒹 𑒁𑒢𑒳𑒦𑒫 𑒢𑒻 𑒦𑒹𑒪𑒻 𑒖𑒹 𑒍 𑒮𑒦 𑒏𑒯𑒱𑒨𑒼 𑒁𑒕𑒴𑒞 𑒕𑒪।(𑒧𑒱𑒞𑒴 𑒠𑒱𑒮 𑒞𑒰𑒏𑒱) 𑒏𑒲 𑒧𑒱𑒞𑒴?

𑒧𑒱𑒞𑒴: 𑒁𑒕𑒴𑒞 𑒢𑒻 𑒏𑒯𑒱𑒨𑒾 𑒧𑒢𑒮𑒳𑒐, 𑒁𑒢𑒳𑒦𑒫 𑒧𑒝𑓂𑒛𑒪 𑒍𑒏𑒩𑒰 𑒅𑒪𑓂𑒏𑒰𑒧𑒳𑒐𑒲 𑒢𑒰𑒧 𑒠𑒹𑒢𑒹 𑒁𑒕𑒱। (𑒧𑒰𑒡𑒫 𑒠𑒱𑒮 𑒞𑒰𑒏𑒱) 𑒧𑒰𑒡𑒫 𑒞𑒞𑒹𑒏 𑒢𑒲𑒏 𑒫𑓂𑒨𑒫𑒮𑓂𑒟𑒰 𑒏𑒹𑒢𑒹 𑒕𑒟𑒱 𑒅𑒪𑓂𑒏𑒰𑒧𑒳𑒐𑒲 𑒣𑒰𑒚𑒬𑒰𑒪𑒰 𑒮𑒦𑒏 𑒖𑒹 𑒢𑒻 𑒣𑒳𑒕𑒴।

𑒧𑒰𑒡𑒫: 𑒯𑒿 𑒅𑒪𑓂𑒏𑒰𑒧𑒳𑒐𑒲𑒮𑒦 𑒢𑒱𑒏𑒪𑒻𑒋 𑒍𑒃 𑒣𑒰𑒚𑒬𑒰𑒪𑒰𑒮𑒿। (𑒧𑒰𑒡𑒫 𑒁𑒣𑒢 𑒮𑒯𑒨𑒼𑒑𑒲-𑓑 𑒂 𑒮𑒯𑒨𑒼𑒑𑒲-𑓒 𑒠𑒱𑒮 𑒞𑒏𑒻𑒞 𑒥𑒖𑒻𑒞 𑒕𑒟𑒱।) 𑒁𑒯𑒰𑒿 𑒠𑒳𑒢𑒴 𑒅𑒪𑓂𑒏𑒰𑒧𑒳𑒐𑒲 𑒣𑒰𑒚𑒬𑒰𑒪𑒰 𑒮𑒦𑒏 𑒂𑒩𑓂𑒟𑒱𑒏 𑒖𑒩𑒴𑒩𑒞𑒱𑒏 𑒣𑒴𑒩𑓂𑒞𑒱𑒏 𑒫𑒩𑓂𑒝𑒢 𑒠𑒱𑒨𑒾।

𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑: 𑒮𑒦 𑒚𑒰𑒧 𑒅𑒪𑓂𑒏𑒰𑒧𑒳𑒐𑒲 𑒮𑒠𑒮𑓂𑒨 𑒁𑒣𑒢 𑒬𑓂𑒩𑒧𑒮𑒿 𑒬𑒱𑒏𑓂𑒭𑒏𑒏 𑒂 𑒫𑒱𑒠𑓂𑒨𑒰𑒩𑓂𑒟𑒲𑒏 𑒐𑒩𑓂𑒔 𑒅𑒚𑒰 𑒩𑒯𑒪 𑒕𑒟𑒱।

𑒧𑒰𑒡𑒫𑒏 𑒮𑒯𑒨𑒼𑒑𑒲-𑓒: 𑒮𑒦 𑒚𑒰𑒧 𑒅𑒪𑓂𑒏𑒰𑒧𑒳𑒐𑒲 𑒮𑒠𑒮𑓂𑒨 𑒅𑒪𑓂𑒏𑒰𑒧𑒳𑒐𑒲 𑒣𑒰𑒚𑒬𑒰𑒪𑒰 𑒪𑒹𑒪 𑒖𑒧𑒲𑒢 𑒂 𑒦𑒫𑒢𑒏 𑒐𑒩𑓂𑒔 𑒅𑒚𑒰 𑒩𑒯𑒪 𑒕𑒟𑒱।

𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑: 𑒪𑒼𑒏 𑒮𑒦𑒏 𑒏𑒯𑒥 𑒁𑒕𑒱 𑒖𑒹 𑒅𑒪𑓂𑒏𑒰𑒧𑒳𑒐𑒲 𑒣𑒰𑒚𑒬𑒰𑒪𑒰 𑒮𑒦 𑒯𑒳𑒢𑒏𑒰 𑒮𑒦 𑒪𑒹𑒪 𑒥𑒛 𑒯𑒱𑒞𑒏𑒰𑒩𑒲 𑒁𑒕𑒱, 𑒍𑒃 𑒣𑒰𑒚𑒬𑒰𑒪𑒰 𑒮𑒦𑒏 𑒫𑒱𑒠𑓂𑒨𑒰𑒩𑓂𑒟𑒲 𑒂 𑒬𑒱𑒏𑓂𑒭𑒏 𑒮𑒦 𑒠𑓂𑒫𑒰𑒩𑒰 𑒏𑒋𑒪 𑒖𑒰 𑒩𑒯𑒪 𑒣𑓂𑒩𑒨𑒼𑒑 𑒯𑒳𑒢𑒏𑒰 𑒮𑒦𑒏 𑒖𑒱𑒢𑒑𑒲𑒧𑒹 𑒏𑓂𑒩𑒰𑒢𑓂𑒞𑒱 𑒂𑒢𑒱 𑒠𑒹𑒢𑒹 𑒁𑒕𑒱।

𑒧𑒰𑒡𑒫𑒏 𑒮𑒯𑒨𑒼𑒑𑒲-𑓒: 𑒪𑒼𑒏 𑒮𑒦𑒏 𑒄𑒯𑒼 𑒏𑒯𑒥 𑒁𑒕𑒱 𑒖𑒹 𑒅𑒪𑓂𑒏𑒰𑒧𑒳𑒐𑒲 𑒣𑒰𑒚𑒬𑒰𑒪𑒰𑒏 𑒢𑒫-𑒣𑒳𑒩𑒰𑒢 𑒕𑒰𑒞𑓂𑒩 𑒂 𑒬𑒱𑒏𑓂𑒭𑒏 𑒯𑒳𑒢𑒏𑒰 𑒮𑒦 𑒏𑓄 𑒥𑒹𑒩-𑒥𑒐𑒞 𑒏𑒰𑒖 𑒂𑒥𑒻 𑒕𑒟𑒱𑒢𑓂𑒯 𑒂 𑒞𑒹𑒿 𑒍 𑒮𑒦 𑒌 𑒣𑒰𑒚𑒬𑒰𑒪𑒰𑒏𑒹𑒿 𑒖𑒞𑒹𑒏 𑒠𑒻 𑒕𑒟𑒱 𑒞𑒃𑒮𑒿 𑒥𑒹𑒮𑒲 𑒄 𑒣𑒰𑒚𑒬𑒰𑒪𑒰 𑒮𑒦 𑒯𑒳𑒢𑒏𑒰 𑒮𑒦𑒏𑒹𑒿 𑒂𑒣𑒱𑒮 𑒏𑒩𑒻 𑒕𑒢𑓂𑒯𑒱। (𑒂𑒢𑒢𑓂𑒠𑒰 𑒠𑒱𑒮 𑒞𑒰𑒏𑒱) 𑒂𑒢𑒢𑓂𑒠𑒰 𑒞𑒿 𑒩𑒯𑒥𑒹 𑒏𑒩𑒟𑒱, 𑒖𑒐𑒢 𑒋𑒏𑒚𑒰𑒧 𑒄 𑒑𑒣 𑒔𑒪𑒱 𑒩𑒯𑒪 𑒩𑒯𑒋।

𑒂𑒢𑒢𑓂𑒠𑒰: 𑒯𑒿, 𑒮𑒹 𑒞𑒿 𑒚𑒲𑒏𑒹। 𑒧𑒳𑒠𑒰 𑒏𑒰𑒖 𑒁𑒐𑒢 𑒂𑒩 𑒥𑒯𑒳𑒞 𑒩𑒰𑒮 𑒏𑒩𑒥𑒰𑒏 𑒁𑒕𑒱। 𑒞𑒐𑒢 𑒂𑒃 𑒄 𑒮𑒦𑒰 𑒐𑒞𑒧 𑒏𑒋𑒪 𑒖𑒰𑒋?

𑒯𑒩𑒱𑒏𑒩: 𑒢𑒻 𑒯𑒧𑒩𑒰 𑒋𑒏𑒙𑒰 𑒑𑒣 𑒏𑒯𑒥𑒰𑒏 𑒁𑒕𑒱।

𑒧𑒰𑒡𑒫: 𑒏𑒼𑒢 𑒑𑒣 𑒮𑒹𑒢𑒰𑒣𑒞𑒱 𑒯𑒩𑒱𑒏𑒩।

𑒯𑒩𑒱𑒏𑒩: 𑒧𑒰𑒡𑒫, 𑒑𑓀𑒑𑒰𑒡𑒩 𑒁𑒐𑒢 𑒥𑒰𑒯𑒩 𑒖𑒰 𑒩𑒯𑒪 𑒕𑒟𑒱, 𑒮𑒣𑓂𑒞𑒩𑒲। 𑒮𑒹 𑒁𑒯𑒲𑓀𑒏𑒹𑒿 𑒄 𑒏𑒰𑒖 𑒏𑒩𑓄 𑒣𑒛𑓃𑒞। 𑒯𑒧𑒩 𑒃𑒔𑓂𑒕𑒰 𑒁𑒕𑒱 𑒖𑒹 𑒯𑒧𑒩 𑒣𑒳𑒞𑓂𑒩𑒲 𑒧𑒹𑒡𑒰𑒏 𑒥𑒱𑒨𑒰𑒯 𑒖𑒲𑒫𑒹𑒮𑒿 𑒦𑓄 𑒖𑒰𑒋। 𑒯𑒧 𑒥𑒱𑒨𑒰𑒯𑒏 𑒃𑒢𑓂𑒞𑒖𑒰𑒧𑒧𑒹 𑒪𑒰𑒑𑒥, 𑒂 𑒏𑒱𑒋𑒏 𑒞𑒿 𑒁𑒯𑒰𑒿 𑒂 𑒯𑒧 𑒠𑒳𑒢𑒴 𑒑𑒼𑒙𑒹 𑒩𑒰𑒖𑒰𑒏 𑒠𑒩𑒥𑒰𑒩𑒧𑒹 𑒕𑒲 𑒮𑒹 𑒋𑒏𑒙𑒰 𑒎𑒣𑒔𑒰𑒩𑒱𑒏 𑒁𑒢𑒳𑒧𑒞𑒱 𑒯𑒧 𑒮𑒦 𑒩𑒰𑒖𑒰𑒮𑒿 𑒌 𑒪𑒹𑒪 𑒪𑒻 𑒕𑒲। 𑒞𑒿 𑒄 𑒦𑒰𑒩 𑒁𑒯𑒲𑓀𑒣𑒩।

𑒑𑓀𑒑𑒰𑒡𑒩: 𑒄 𑒞𑒿 𑒯𑒩𑓂𑒭𑒏 𑒫𑒱𑒭𑒨 𑒁𑒕𑒱। (𑒅𑒚𑒱 𑒏𑓄 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱। 𑒮𑒦 𑒅𑒚𑒱 𑒖𑒰𑒃 𑒕𑒟𑒱 𑒂 𑒧𑒢𑒮𑒳𑒐 𑒂 𑒯𑒩𑒱𑒏𑒩𑒏𑒹𑒿 𑒥𑒡𑒰𑒃 𑒠𑒹𑒥𑓄 𑒪𑒑𑒻 𑒕𑒟𑒱। 𑒖𑒲𑒫𑒹 𑒂 𑒧𑒹𑒡𑒰 𑒯𑒰𑒟𑒧𑒹 𑒥𑒱𑒑𑒔𑒲 𑒂𑒠𑒱 𑒪𑒹𑒢𑒹 𑒣𑓂𑒩𑒫𑒹𑒬 𑒏𑒩𑒻 𑒕𑒟𑒱। 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)

(𑒩𑒰𑒖𑒰 𑒏𑒲𑒩𑓂𑒞𑒱 𑒮𑒱𑓀𑒯𑒏 𑒠𑒩𑒥𑒰𑒩। 𑒩𑒰𑒖𑒰, 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝, 𑒠𑒩𑒥𑒰𑒩𑒲-𑓑, 𑒠𑒩𑒥𑒰𑒩𑒲-𑓒 𑒂 𑒧𑒰𑒡𑒫 𑒂 𑒯𑒳𑒢𑒏𑒩 𑒠𑒳𑒢𑒴 𑒮𑒯𑒨𑒼𑒑𑒲 𑒠𑒩𑒥𑒰𑒩𑒧𑒹 𑒕𑒟𑒱। 𑒩𑒰𑒖𑒰 𑒞𑒧𑒮𑒰𑒋𑒪 𑒮𑒢 𑒕𑒟𑒱।)

𑒠𑒩𑒥𑒰𑒩𑒲-𑓑: 𑒁𑒞𑒞𑓂𑒞𑒯 𑒦𑓄 𑒑𑒹𑒪 𑒧𑒯𑒩𑒰𑒖। 𑒥𑓂𑒩𑒰𑒯𑓂𑒧𑒝 𑒮𑒹𑒢𑒰𑒣𑒞𑒱 𑒯𑒩𑒱𑒏𑒩𑒏 𑒣𑒳𑒞𑓂𑒩𑒲 𑒂 𑒔𑒩𑓂𑒧𑒏𑒰𑒩 𑒧𑒢𑒮𑒳𑒐𑒏 𑒣𑒳𑒞𑓂𑒩𑒏 𑒫𑒱𑒫𑒰𑒯𑒏 𑒮𑒧𑒰𑒔𑒰𑒩 𑒂𑒋𑒪 𑒁𑒕𑒱।

𑒠𑒩𑒥𑒰𑒩𑒲-𑓒: 𑒏𑒼𑒢𑒼 𑒞𑒩𑒯𑒹𑒿 𑒌 𑒣𑓂𑒩𑒞𑒱𑒪𑒼𑒧 𑒫𑒱𑒫𑒰𑒯𑒏𑒹𑒿 𑒅𑒔𑒱𑒞 𑒢𑒻 𑒏𑒯𑒪 𑒖𑒰 𑒮𑒏𑒻𑒋 𑒂 𑒍𑒃 𑒮𑓂𑒟𑒱𑒞𑒱𑒧𑒹 𑒖𑒐𑒢 𑒍𑒃 𑒫𑒱𑒫𑒰𑒯𑒏𑒹𑒿 𑒩𑒰𑒖𑒰𑒖𑓂𑒘𑒰 𑒣𑓂𑒩𑒰𑒣𑓂𑒞 𑒢𑒻 𑒕𑒪𑒻।

𑒠𑒩𑒥𑒰𑒩𑒲-𑓑: 𑒮𑒹𑒯𑒼 𑒞𑒃 𑒮𑓂𑒟𑒱𑒞𑒱𑒧𑒹 𑒖𑒐𑒢 𑒮𑒹𑒢𑒰𑒣𑒞𑒱 𑒌 𑒠𑒩𑒥𑒰𑒩𑒏 𑒮𑒠𑒮𑓂𑒨 𑒕𑒟𑒱 𑒂 𑒧𑒰𑒡𑒫 𑒍𑒃 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒮𑒠𑒮𑓂𑒨 𑒕𑒟𑒱 𑒖𑒹 𑒄 𑒫𑒱𑒫𑒰𑒯 𑒏𑒩𑒹𑒪𑒏!

𑒩𑒰𑒖𑒰 𑒏𑒲𑒩𑓂𑒞𑒱 𑒮𑒱𑓀𑒯: (𑒧𑒰𑒡𑒫 𑒠𑒱𑒮 𑒞𑒰𑒏𑒱) 𑒖𑒐𑒢 𑒯𑒧 𑒖𑒲𑒫𑒹 𑒂 𑒧𑒹𑒡𑒰𑒏 𑒫𑒱𑒫𑒰𑒯𑒏 𑒁𑒢𑒳𑒧𑒞𑒱 𑒢𑒻 𑒠𑒹𑒢𑒹 𑒩𑒯𑒲 𑒞𑒐𑒢 𑒄 𑒫𑒱𑒫𑒰𑒯 𑒦𑒹𑒪 𑒏𑒼𑒢𑒰 𑒧𑒰𑒡𑒫?

𑒧𑒰𑒡𑒫: 𑒧𑒯𑒩𑒰𑒖, 𑒍 𑒞𑒿 𑒎𑒣𑒔𑒰𑒩𑒱𑒏 𑒁𑒢𑒳𑒧𑒞𑒱 𑒕𑒪, 𑒁𑒢𑒳𑒦𑒫 𑒧𑒝𑓂𑒛𑒪𑒧𑒹 𑒍𑒃 𑒫𑒱𑒫𑒰𑒯𑒏 𑒏𑒼𑒢𑒼 𑒫𑒱𑒩𑒼𑒡 𑒢𑒻 𑒦𑒹𑒪 𑒩𑒯𑒋।

𑒩𑒰𑒖𑒰 𑒏𑒲𑒩𑓂𑒞𑒱 𑒮𑒱𑓀𑒯: 𑒁𑒢𑒳𑒦𑒫 𑒧𑒝𑓂𑒛𑒪, 𑒁𑒢𑒳𑒦𑒫 𑒧𑒝𑓂𑒛𑒪। 𑒌 𑒩𑒰𑒖𑒠𑒩𑒥𑒰𑒩𑒮𑒿 𑒣𑒻𑒒 𑒦𑓄 𑒑𑒹𑒪 𑒁𑒢𑒳𑒦𑒫 𑒧𑒝𑓂𑒛𑒪?

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: 𑒯𑒧 𑒮𑒹𑒯𑒼 𑒂𑓀𑒑𑒳𑒩 𑒅𑒚𑒹𑒢𑒹 𑒩𑒯𑒲 𑒧𑒯𑒩𑒰𑒖। 𑒄 𑒁𑒢𑒳𑒦𑒫 𑒧𑒝𑓂𑒛𑒪 𑒏𑒲 𑒏𑒲 𑒮𑒠𑒰𑒫𑒩𑓂𑒞 𑒥𑒿𑒙𑒢𑒹 𑒤𑒱𑒩𑒻𑒋, 𑒩𑒰𑒖𑒏𑒼𑒭𑒏 𑒏𑓂𑒭𑒞𑒱 𑒏𑒩𑒻𑒋।

𑒧𑒰𑒡𑒫: 𑒁𑒢𑒳𑒦𑒫 𑒧𑒝𑓂𑒛𑒪𑒧𑒹 𑒮𑒦 𑒣𑒩𑒱𑒬𑓂𑒩𑒧𑒏 𑒐𑒹𑒢𑒰𑒃 𑒐𑒰𑒃𑒋 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝। 𑒁𑒯𑒰𑒿 𑒥𑒲𑒔-𑒥𑒲𑒔𑒧𑒹 𑒑𑓀𑒑𑒰𑒡𑒩𑒣𑒩 𑒄 𑒂𑒩𑒼𑒣 𑒪𑒑𑒥𑒻𑒞 𑒩𑒯𑒻 𑒕𑒱𑒨𑒢𑓂𑒯𑒱 𑒧𑒳𑒠𑒰 𑒍 𑒋𑒏𑒩 𑒢𑒲𑒏 𑒖𑒏𑒰𑒿 𑒅𑒞𑓂𑒞𑒩 𑒠𑓄 𑒠𑒹𑒢𑒹 𑒕𑒟𑒱, 𑒂 𑒁𑒯𑒰𑒿 𑒮𑓀𑒞𑒳𑒭𑓂𑒙 𑒮𑒹𑒯𑒼 𑒦𑓄 𑒑𑒹𑒪 𑒩𑒯𑒲।
𑒠𑒩𑒥𑒰𑒩𑒲-𑓑: 𑒮𑓀𑒞𑒳𑒭𑓂𑒙 𑒏𑒲 𑒯𑒹𑒞𑒰, 𑒑𑓀𑒑𑒰𑒡𑒩𑒏 𑒒𑒳𑒧𑒾𑒂 𑒯𑒱𑒮𑒰𑒥 𑒯𑒱𑒢𑒏𑒰 𑒥𑒳𑒗𑒻𑒧𑒹 𑒁𑒥𑒱𑒞𑒹 𑒢𑒻 𑒕𑒢𑓂𑒯𑒱।

𑒠𑒩𑒥𑒰𑒩𑒲-𑓒: 𑒧𑒳𑒠𑒰 𑒍 𑒮𑒦 𑒞𑒿 𑒕𑒼𑒙 𑒧𑒼𑒙 𑒑𑒣 𑒕𑒪, 𑒌𑒥𑒹𑒩 𑒞𑒿 𑒩𑒰𑒖𑒰𑒏 𑒂𑒠𑒹𑒬𑒏 𑒢𑒱𑒩𑒰𑒠𑒩 𑒦𑒹𑒪 𑒁𑒕𑒱। 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒏𑒼𑒢𑒼 𑒏𑒰𑒖𑒣𑒩 𑒩𑒰𑒖𑒰 𑒣𑓂𑒩𑒞𑒱𑒥𑒢𑓂𑒡 𑒢𑒻 𑒪𑒑𑒹𑒢𑒹 𑒩𑒯𑒟𑒱। 𑒩𑒙𑒢𑓂𑒞 𑒫𑒱𑒠𑓂𑒨𑒰 𑒐𑒞𑒧 𑒏𑒩𑒴, 𑒐𑒞𑒧 𑒦𑒹𑒪..
𑒠𑒩𑒥𑒰𑒩𑒲-𑓑: 𑒧𑒳𑒠𑒰 𑒩𑒙𑒢𑓂𑒞 𑒫𑒱𑒠𑓂𑒨𑒰𑒮𑒿 𑒯𑒱𑒮𑒰𑒥 𑒖𑒹 𑒢𑒻 𑒧𑒱𑒪𑒻 𑒕𑒪𑒢𑓂𑒯𑒱 𑒁𑒩𑓂𑒟𑒧𑓀𑒞𑓂𑒩𑒲𑒏।

𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝: 𑒧𑒳𑒠𑒰 𑒩𑒙𑒢𑓂𑒞 𑒫𑒱𑒠𑓂𑒨𑒰 𑒐𑒞𑒧 𑒦𑒹𑒢𑒹 𑒪𑒼𑒏 𑒠𑒱𑒧𑒰𑒑𑒮𑒿 𑒮𑒼𑒔𑓄 𑒪𑒰𑒑𑒪। 𑒄 𑒞𑒿 𑒣𑓂𑒩𑒰𑒩𑒧𑓂𑒦 𑒁𑒕𑒱 𑒧𑒯𑒩𑒰𑒖। 𑒧𑒢𑒮𑒳𑒐 𑒔𑒩𑓂𑒧𑒏𑒰𑒩𑒏 𑒥𑒹𑒙𑒰 𑒂 𑒥𑓂𑒩𑒰𑒯𑓂𑒧𑒝 𑒮𑒹𑒢𑒰𑒣𑒞𑒱 𑒯𑒩𑒱𑒏𑒩𑒏 𑒣𑒳𑒞𑓂𑒩𑒲𑒏 𑒫𑒱𑒫𑒰𑒯 𑒏𑓂𑒩𑒰𑒢𑓂𑒞𑒱 𑒂𑒢𑒱 𑒠𑒹𑒞..𑒏𑒲 𑒏𑒯𑒻 𑒕𑒻 𑒍𑒏𑒩𑒰..(𑒮𑒼𑒔𑒻𑒞)

𑒧𑒰𑒡𑒫𑒏 𑒬𑒱𑒭𑓂𑒨-𑓑 𑒂 𑓒: 𑒅𑒪𑓂𑒏𑒰𑒧𑒳𑒐𑒲…

𑒏𑒲𑒩𑓂𑒞𑒱 𑒮𑒱𑓀𑒯: 𑒧𑒰𑒡𑒫, 𑒁𑒯𑒰𑒿 𑒮𑒦 𑒖𑒰𑒅 𑒂 𑒯𑒩𑒱𑒏𑒩𑒏𑒹𑒿 𑒏𑒯𑒱 𑒠𑒱𑒨𑒢𑓂𑒯𑒳 𑒖𑒹 𑒂𑒥 𑒍 𑒌 𑒩𑒰𑒖𑒏 𑒮𑒹𑒢𑒰𑒣𑒞𑒱 𑒢𑒻 𑒩𑒯𑒪𑒰𑒯। 𑒂 𑒑𑓀𑒑𑒰𑒡𑒩 𑒌 𑒩𑒰𑒖𑓂𑒨𑒏 𑒣𑓂𑒩𑒡𑒰𑒢𑒧𑓀𑒞𑓂𑒩𑒲 𑒢𑒻 𑒩𑒯𑒪𑒰𑒯 𑒮𑒹𑒯𑒼 𑒁𑒢𑒳𑒦𑒫𑒧𑒝𑓂𑒛𑒪 -𑒯𑒳𑒿𑒯- 𑒁𑒢𑒳𑒦𑒫𑒧𑒝𑓂𑒛𑒪𑒏𑒹𑒿 𑒖𑒰𑒢𑒏𑒰𑒩𑒲 𑒠𑓄 𑒠𑒱𑒨𑒾। 𑒂𑒥 𑒄 𑒠𑒳𑒢𑒴 𑒦𑒰𑒩 𑒮𑒧𑓂𑒯𑒰𑒩𑒞𑒰𑒯 𑒢𑒰𑒩𑒰𑒨𑒝। 𑒧𑒰𑒡𑒫, 𑒁𑒯𑒰𑒿 𑒮𑒦 𑒖𑒰𑒅।

(𑒧𑒰𑒡𑒫 𑒂 𑒯𑒳𑒢𑒏𑒩 𑒠𑒳𑒢𑒴 𑒬𑒱𑒭𑓂𑒨𑒏 𑒣𑓂𑒩𑒮𑓂𑒟𑒰𑒢।)

𑒩𑒰𑒖𑒰 𑒏𑒲𑒩𑓂𑒞𑒱 𑒮𑒱𑓀𑒯: 𑒮𑒹𑒢𑒰𑒣𑒞𑒱 𑒢𑒰𑒩𑒰𑒨𑒝, 𑒯𑒧𑒩𑒰 𑒔𑒰𑒩𑒱𑒙𑒰 𑒂𑒿𑒐𑒱 𑒔𑒰𑒯𑒲, 𑒠𑒴𑒙𑒰 𑒧𑒹𑒡𑒰𑒏 𑒂 𑒠𑒴𑒙𑒰 𑒖𑒲𑒫𑒹𑒏। 𑒌 𑒠𑒳𑒢𑒴 𑒑𑒼𑒙𑒹𑒏 𑒂𑒿𑒐𑒱 𑒢𑒱𑒏𑒰𑒪𑒪𑒰𑒏 𑒥𑒰𑒠 𑒠𑒳𑒢𑒴𑒏𑒹𑒿 𑒣𑒰𑒑𑒪 𑒌𑒩𑒰𑒫𑒞𑒏 𑒮𑒧𑒏𑓂𑒭 𑒡𑓄 𑒠𑒱𑒨𑒾। 𑒣𑒱𑒔𑒩𑒰 𑒏𑓄 𑒠𑒱𑒨𑒾 𑒠𑒳𑒢𑒴𑒏𑒹𑒿, 𑒧𑒳𑒠𑒰 𑒣𑒯𑒱𑒢𑒹 𑒯𑒧𑒩𑒰 𑒔𑒰𑒯𑒲 𑒔𑒰𑒩𑒱𑒙𑒰 𑒂𑒿𑒐𑒱। 𑒠𑒱𑒑𑒢𑓂𑒞𑒧𑒹 𑒄 𑒮𑒧𑒰𑒔𑒰𑒩 𑒣𑒮𑒩𑒱 𑒖𑒰𑒋 𑒖𑒹 𑒣𑓂𑒩𑒞𑒱𑒪𑒼𑒧 𑒫𑒱𑒫𑒰𑒯𑒏 𑒣𑒩𑒱𑒝𑒰𑒧 𑒏𑒲 𑒯𑒼𑒃 𑒕𑒻। 𑒄 𑒮𑒧𑒰𑒔𑒰𑒩 𑒣𑒮𑒩𑒱 𑒖𑒰𑒋 𑒖𑒹 𑒩𑒰𑒖𑒰𑒖𑓂𑒘𑒰𑒏 𑒫𑒱𑒩𑒼𑒡𑒏 𑒣𑒩𑒱𑒝𑒰𑒧 𑒏𑒲 𑒯𑒼𑒃 𑒕𑒻। 𑒮𑒞𑒩𑓂𑒏𑒞𑒰𑒮𑒿 𑒄 𑒏𑒰𑒖 𑒯𑒳𑒁𑒋। 𑒧𑒰𑒡𑒫 𑒂 𑒯𑒳𑒢𑒏𑒩 𑒠𑒳𑒢𑒴 𑒮𑒯𑒨𑒼𑒑𑒲 𑒫𑒰 𑒁𑒢𑒳𑒦𑒫𑒧𑒝𑓂𑒛𑒪𑒏 𑒏𑒏𑒩𑒼 𑒌 𑒫𑒱𑒭𑒨𑒧𑒹 𑒣𑒞𑒰 𑒢𑒻 𑒔𑒪𑒋, 𑒮𑒹 𑒡𑓂𑒨𑒰𑒢 𑒩𑒰𑒐𑒥। 𑒯𑒧𑒩 𑒅𑒠𑒰𑒩𑒞𑒰𑒏 𑒑𑒪𑒞 𑒤𑒋𑒠𑒰 𑒅𑒚𑒰𑒥𑓄 𑒥𑒪𑒰𑒏𑒹𑒿 𑒄 𑒋𑒏𑒙𑒰 𑒮𑒥𑒏 𑒖𑒏𑒰𑒿 𑒯𑒹𑒞𑒻।

(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱 𑒂 𑒢𑒹𑒣𑒟𑓂𑒨𑒮𑒿 𑒖𑒲𑒫𑒹 𑒂 𑒧𑒹𑒡𑒰𑒏 𑒏𑒢𑒥𑒰𑒏 𑒁𑒥𑒰𑒖 𑒁𑒥𑒻𑒞 𑒁𑒕𑒱। 𑒤𑒹𑒩 𑒯𑒰𑒟𑒲𑒏 𑒔𑒱𑒒𑒰𑒩𑒮𑒿 𑒁𑒏𑒰𑒮𑒧𑒹 𑒥𑒱𑒖𑒪𑒲 𑒏𑒛𑓃𑒏𑓄 𑒪𑒑𑒻 𑒕𑒻। 𑒣𑒳𑒩𑒳𑒭, 𑒧𑒯𑒱𑒪𑒰 𑒂 𑒯𑒰𑒟𑒲𑒏 𑒁𑒥𑒰𑒖 𑒣𑒩𑒮𑓂𑒣𑒩 𑒧𑒱𑒖𑓂𑒗𑒩 𑒦𑓄 𑒖𑒰𑒃𑒞 𑒁𑒕𑒱। 𑒏𑒩𑒳𑒝 𑒮𑓀𑒑𑒲𑒞𑒏 𑒧𑒡𑓂𑒨 𑒂𑒮𑓂𑒞𑒹 𑒂𑒮𑓂𑒞𑒹 𑒃𑒖𑒼𑒞 𑒁𑒥𑒻𑒞 𑒁𑒕𑒱 𑒂 𑒁𑒢𑒳𑒦𑒫𑒧𑒝𑓂𑒛𑒪𑒏 𑒥𑒻𑒮𑒏𑒲 𑒠𑒹𑒐𑒰 𑒣𑒛𑓃𑒻𑒞 𑒁𑒕𑒱 𑒖𑒃𑒧𑒹 𑒑𑓀𑒑𑒰𑒡𑒩, 𑒧𑒢𑒮𑒳𑒐, 𑒯𑒩𑒱𑒏𑒩, 𑒧𑒱𑒞𑒴, 𑒏𑒳𑒧𑒩𑒮𑒳𑒞𑒰, 𑒂𑒢𑒢𑓂𑒠𑒰, 𑒇𑒭𑒱 𑒖𑒙𑒰, 𑒯𑒲𑒩𑒴, 𑒧𑒰𑒡𑒫, 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑 𑒂 𑒧𑒰𑒡𑒫𑒏 𑒮𑒯𑒨𑒼𑒑𑒲-𑓒 𑒮𑒦 𑒕𑒟𑒱 𑒧𑒳𑒠𑒰 𑒖𑒲𑒫𑒹 𑒂 𑒧𑒹𑒡𑒰 𑒢𑒻। 𑒮𑒦𑒏 𑒧𑒳𑒐𑒣𑒩 𑒠𑒳𑒐 𑒂 𑒂𑒏𑓂𑒩𑒼𑒬 𑒁𑒕𑒱।)

𑒑𑓀𑒑𑒰𑒡𑒩: 𑒏𑒲 𑒄 𑒁𑒯𑒰𑒿 𑒮𑒦𑒏 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨 𑒁𑒕𑒱?

𑒮𑒦 𑒮𑒧𑓂𑒫𑒹𑒞 𑒮𑓂𑒫𑒩𑒧𑒹: 𑒯𑒿, 𑒯𑒿, 𑒁𑒢𑓂𑒞𑒱𑒧 𑒢𑒱𑒩𑓂𑒝𑒨, 𑒑𑓀𑒑𑒰𑒡𑒩, 𑒁𑒯𑒰𑒿 𑒧𑒰𑒢𑒲 𑒢𑒻 𑒧𑒰𑒢𑒲।

𑒏𑒳𑒧𑒩𑒮𑒳𑒞𑒰: 𑒯𑒧 𑒮𑒹𑒯𑒼 𑒧𑒰𑒢𑒻 𑒕𑒲 𑒌 𑒢𑒱𑒩𑓂𑒝𑒨𑒏𑒹𑒿।

𑒑𑓀𑒑𑒰𑒡𑒩: 𑒁𑒢𑒳𑒦𑒫 𑒧𑒝𑓂𑒛𑒪𑒧𑒹 𑒮𑒩𑓂𑒫𑒠𑒰 𑒥𑒯𑒳𑒧𑒞𑒏 𑒮𑒧𑓂𑒧𑒰𑒢 𑒏𑒋𑒪 𑒑𑒹𑒪 𑒕𑒻। 𑒧𑒳𑒠𑒰 𑒋𑒏 𑒥𑒹𑒩 𑒂𑒩 𑒮𑒦 𑒑𑒼𑒙𑒹 𑒫𑒱𑒔𑒰𑒩𑒱 𑒪𑒱𑒁।

𑒂𑒢𑒢𑓂𑒠𑒰: (𑒧𑒰𑒡𑒫𑒮𑒿) 𑒧𑒰𑒡𑒫! 𑒁𑒯𑒰𑒿𑒮𑒿 𑒧𑒹𑒡𑒰 𑒂 𑒖𑒲𑒫𑒹𑒏 𑒏𑓂𑒩𑒴𑒩 𑒞𑒩𑒲𑒏𑒰𑒮𑒿 𑒏𑒋𑒪 𑒖𑒰𑒋𑒥𑒪𑒰 𑒯𑒞𑓂𑒨𑒰𑒏 𑒩𑒰𑒖𑒰𑒖𑓂𑒘𑒰 𑒑𑒳𑒣𑓂𑒞 𑒩𑒰𑒐𑒪 𑒑𑒹𑒪, 𑒮𑒹 𑒏𑒼𑒢𑒰 𑒦𑒹𑒪?

𑒯𑒩𑒱𑒏𑒩: (𑒧𑒰𑒡𑒫𑒮𑒿) 𑒏𑓂𑒩𑒴𑒩..𑒏𑓂𑒩𑒴𑒩𑒞𑒧… 𑒍𑒯.. 𑒋𑒯𑒹𑒢 𑒯𑒞𑓂𑒨𑒰, 𑒩𑒰𑒖𑒠𑒩𑒥𑒰𑒩𑒹𑒏 𑒮𑒹𑒢𑒰𑒣𑒞𑒱𑒏 𑒣𑒳𑒞𑓂𑒩𑒲𑒏 𑒂 𑒖𑒧𑒰𑒋𑒏….. 𑒌 𑒞𑒩𑒯𑒹𑒿 𑒯𑒞𑓂𑒨𑒰𑒏 𑒂𑒠𑒹𑒬.. 𑒂 𑒁𑒯𑒰𑒿 𑒋𑒏𑒩 𑒏𑒢𑒹𑒏𑒼 𑒂𑒦𑒰𑒮 𑒢𑒻 𑒣𑓂𑒩𑒰𑒣𑓂𑒞 𑒏𑓄 𑒮𑒏𑒪𑒾𑓀 𑒧𑒰𑒡𑒫?

𑒧𑒢𑒮𑒳𑒐: (𑒑𑓀𑒑𑒰𑒡𑒩𑒮𑒿) 𑒑𑓀𑒑𑒰𑒡𑒩 𑒂 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒮𑒠𑒮𑓂𑒨𑒑𑒝। 𑒢𑓂𑒨𑒰𑒨 𑒔𑒰𑒯𑒲 𑒯𑒧𑒩𑒰.. 𑒩𑒰𑒖𑒠𑒩𑒥𑒰𑒩𑒏 𑒁𑒢𑓂𑒨𑒰𑒨𑒏 𑒫𑒱𑒩𑒳𑒠𑓂𑒡 𑒢𑓂𑒨𑒰𑒨। 𑒩𑒰𑒖𑒠𑒩𑒥𑒰𑒩𑒏 𑒁𑒢𑓂𑒨𑒰𑒨𑒼𑒮𑒿 𑒏𑒚𑒼𑒩 𑒢𑓂𑒨𑒰𑒨 𑒔𑒰𑒯𑒲 𑒯𑒧𑒩𑒰..

𑒑𑓀𑒑𑒰𑒡𑒩: 𑒚𑒲𑒏 𑒕𑒻 𑒞𑒿 𑒮𑒋𑒯 𑒯𑒳𑒁𑒋। 𑒚𑒲𑒏 𑒕𑒻, 𑒞𑒿 𑒋𑒏𑒩 𑒦𑒰𑒩 𑒏𑒏𑒩𑒰𑒣𑒩 𑒠𑒹𑒪 𑒖𑒰𑒋?

𑒧𑒰𑒡𑒫: 𑒯𑒧 𑒄 𑒦𑒰𑒩 𑒪𑒻 𑒕𑒲 𑒑𑓀𑒑𑒰𑒡𑒩, 𑒮𑒯𑒩𑓂𑒭…𑒮𑒯𑒩𑓂𑒭… 𑒖𑒹 𑒩𑒰𑒖𑒠𑒩𑒥𑒰𑒩 𑒄 𑒖𑒒𑒢𑓂𑒨 𑒣𑒰𑒣 𑒏𑒹𑒢𑒹 𑒁𑒕𑒱 𑒞𑒏𑒩𑒰 𑒫𑒱𑒩𑒳𑒠𑓂𑒡 𑒯𑒧𑒯𑒲𑓀 𑒯𑒋𑒥 𑒚𑒰𑒜𑓃। 𑒖𑒹 𑒩𑒰𑒖𑒠𑒩𑒥𑒰𑒩 𑒍𑒃 𑒭𑒛𑒨𑓀𑒞𑓂𑒩𑒏𑒹𑒿 𑒯𑒧𑒩𑒰𑒮𑒿 𑒢𑒳𑒏𑒹𑒪𑒏 𑒍𑒏𑒩𑒰 𑒫𑒱𑒩𑒳𑒠𑓂𑒡 𑒯𑒧𑒩 𑒑𑒳𑒣𑓂𑒞 𑒁𑒦𑒱𑒨𑒰𑒢 𑒔𑒪𑒞.. 𑒂 𑒮𑒋𑒯 𑒯𑒋𑒞 𑒯𑒧𑒩 𑒣𑒬𑓂𑒔𑒰𑒞𑒰𑒣। (𑒁𑒣𑒢 𑒠𑒳𑒢𑒴 𑒬𑒱𑒭𑓂𑒨𑒏 𑒮𑓀𑒑 𑒧𑒰𑒡𑒫 𑒧𑓀𑒔𑒣𑒩 𑒮𑒼𑒗𑒰𑒿 𑒁𑒥𑒻 𑒕𑒟𑒱।)

𑒧𑒱𑒞𑒴: 𑒧𑒰𑒡𑒫। 𑒮𑒞𑒩𑓂𑒏 𑒩𑒯𑓄 𑒣𑒛𑓃𑒞 𑒁𑒯𑒰𑒿𑒏𑒹𑒿। 𑒩𑒰𑒖𑒠𑒩𑒥𑒰𑒩𑒧𑒹 𑒮𑒦𑒏𑒹𑒿 𑒥𑒳𑒗𑒪 𑒕𑒻 𑒖𑒹 𑒁𑒯𑒰𑒿 𑒁𑒢𑒳𑒦𑒫𑒧𑒝𑓂𑒛𑒪𑒏 𑒮𑒠𑒮𑓂𑒨 𑒕𑒲।

𑒇𑒭𑒱 𑒖𑒙𑒰: 𑒧𑒰𑒡𑒫, 𑒯𑒧 𑒂 𑒯𑒲𑒩𑒴 𑒫𑒰𑒞𑒰𑒫𑒩𑒝 𑒞𑒻𑒨𑒰𑒩 𑒏𑒩𑒥। 𑒋𑒯𑒹𑒢 𑒫𑒰𑒞𑒰𑒫𑒩𑒝 𑒖𑒹 𑒩𑒰𑒖𑒠𑒩𑒥𑒰𑒩𑒏𑒹𑒿 𑒥𑒳𑒗𑒱 𑒣𑒛𑓃𑒞𑒻 𑒖𑒹𑒢𑒰 𑒁𑒯𑒰𑒿𑒏𑒹𑒿 𑒁𑒢𑒳𑒦𑒫𑒧𑒝𑓂𑒛𑒪𑒮𑒿 𑒢𑒱𑒏𑒰𑒪𑒱 𑒠𑒹𑒪 𑒑𑒹𑒪 𑒁𑒕𑒱।

𑒯𑒲𑒩𑒴: 𑒂 𑒯𑒧 𑒄 𑒑𑒣 𑒑𑒲𑒞 𑒑𑒰𑒥𑒱 𑒏𑓄 𑒣𑒮𑒰𑒩𑒥 𑒖𑒃𑒮𑒿 𑒩𑒰𑒖𑒠𑒩𑒥𑒰𑒩𑒏𑒹𑒿 𑒥𑒳𑒗𑒱 𑒣𑒛𑓃𑒞𑒻 𑒖𑒹𑒢𑒰 𑒧𑒰𑒡𑒫𑒏𑒹𑒿 𑒁𑒢𑒳𑒦𑒫𑒧𑒝𑓂𑒛𑒪𑒮𑒿 𑒢𑒱𑒏𑒰𑒪𑒱 𑒠𑒹𑒪𑒰𑒏 𑒥𑒰𑒠 𑒁𑒢𑒳𑒦𑒫𑒧𑒝𑓂𑒛𑒪 𑒙𑒴𑒙𑒱 𑒑𑒹𑒪।

𑒑𑓀𑒑𑒰𑒡𑒩: 𑒞𑒿 𑒮𑒋𑒯 𑒯𑒳𑒁𑒋। 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒮𑒦 𑒮𑒠𑒮𑓂𑒨 𑒮𑒣𑓂𑒞𑒩𑒲 𑒣𑓂𑒩𑒮𑓂𑒟𑒰𑒢 𑒏𑒩𑒟𑒱। 𑒧𑒰𑒡𑒫, 𑒁𑒯𑒰𑒿 𑒁𑒣𑒢 𑒠𑒳𑒢𑒴 𑒮𑒯𑒨𑒼𑒑𑒲 𑒮𑓀𑒑𑒹 𑒩𑒰𑒖𑒠𑒩𑒥𑒰𑒩 𑒪𑒹𑒪 𑒣𑓂𑒩𑒮𑓂𑒟𑒰𑒢 𑒏𑒩𑒴। 𑒇𑒭𑒱 𑒖𑒙𑒰 𑒂 𑒯𑒲𑒩𑒴 𑒁𑒯𑒰𑒿 𑒮𑒦 𑒥𑒹𑒮𑒲 𑒮𑒧𑒋 𑒢𑒻 𑒪𑒑𑒰𑒋𑒥, 𑒬𑒲𑒒𑓂𑒩 𑒏𑒰𑒖 𑒮𑒧𑓂𑒣𑒢𑓂𑒢 𑒏𑓄 𑒏𑒋 𑒮𑒣𑓂𑒞𑒩𑒲𑒏 𑒥𑒼𑒢 𑒣𑒯𑒳𑒿𑒔𑒴।


(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱 𑒂 𑒖𑒐𑒢 𑒃𑒖𑒼𑒞 𑒯𑒼𑒃𑒞 𑒁𑒕𑒱 𑒞𑒿 𑒩𑒳𑒠𑓂𑒩𑒧𑒞𑒱- 𑒧𑒰𑒡𑒫𑒏 𑒧𑒰𑒋, 𑒧𑒰𑒡𑒫 𑒂 𑒧𑒰𑒡𑒫𑒏 𑒠𑒳𑒢𑒴 𑒮𑒯𑒨𑒼𑒑𑒲 𑒧𑓀𑒔𑒣𑒩 𑒕𑒟𑒱। 𑒐𑒹𑒢𑒰𑒃𑒏 𑒥𑒰𑒮𑒢 𑒥𑒑𑒪𑒧𑒹 𑒩𑒰𑒐𑒪 𑒕𑒻। 𑒩𑒳𑒠𑓂𑒩𑒧𑒞𑒱 𑒞𑒧𑒮𑒰𑒋𑒪 𑒕𑒟𑒱।)

𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑: 𑒧𑒰𑒞𑒰 𑒩𑒳𑒠𑓂𑒩𑒧𑒞𑒱, 𑒁𑒣𑒢 𑒣𑒳𑒞𑓂𑒩 𑒧𑒰𑒡𑒫 𑒂 𑒯𑒧𑒩𑒰 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒂𑒬𑒲𑒩𑓂𑒫𑒰𑒠 𑒠𑒱𑒁 𑒖𑒹 𑒁𑒢𑒳𑒦𑒫 𑒧𑒝𑓂𑒛𑒪 𑒠𑓂𑒫𑒰𑒩𑒰 𑒠𑒹𑒪 𑒏𑒰𑒖 𑒯𑒧 𑒮𑒦 𑒣𑒴𑒩𑓂𑒝 𑒏𑓄 𑒮𑒏𑒲।

𑒧𑒰𑒡𑒫𑒏 𑒮𑒯𑒨𑒼𑒑𑒲-𑓑: 𑒧𑒰𑒞𑒰 𑒩𑒳𑒠𑓂𑒩𑒧𑒞𑒱, 𑒧𑒹𑒡𑒰 𑒂 𑒖𑒲𑒫𑒹𑒏 𑒖𑒒𑒢𑓂𑒨 𑒯𑒞𑓂𑒨𑒰𑒏 𑒥𑒰𑒠 𑒔𑒳𑒣 𑒥𑒻𑒮𑒥 𑒏𑒰𑒨𑒩𑒞𑒰 𑒯𑒼𑒃𑒞𑒋। 𑒁𑒢𑒳𑒦𑒫𑒧𑒢𑓂𑒛𑒪𑒏 𑒢𑒱𑒩𑓂𑒝𑒨 𑒦𑒹𑒪 𑒁𑒕𑒱 𑒖𑒹 𑒩𑒰𑒖𑒰𑒏𑒹𑒿 𑒍𑒏𑒩 𑒏𑒵𑒞𑓂𑒨𑒏 𑒮𑒖𑒰 𑒯𑒧 𑒮𑒦 𑒠𑒲।

𑒩𑒳𑒠𑓂𑒩𑒧𑒞𑒱: (𑒧𑒰𑒡𑒫𑒮𑒿) 𑒏𑒲 𑒁𑒢𑒳𑒦𑒫 𑒧𑒝𑓂𑒛𑒪𑒏 𑒢𑒱𑒩𑓂𑒝𑒨𑒏 𑒁𑒢𑒳𑒣𑒰𑒪𑒢 𑒦𑓄 𑒑𑒹𑒪 𑒧𑒰𑒡𑒫?

𑒧𑒰𑒡𑒫: 𑒢𑒻 𑒧𑒰𑒞𑒹..𑒍𑒞𑒻 𑒥𑒯𑒩𑒹𑒥𑒰𑒏 𑒁𑒕𑒱, 𑒞𑒹𑒿 𑒮𑒼𑒔𑒪𑒾𑓀 𑒖𑒹 𑒥𑒯𑒩𑒹𑒥𑒰𑒮𑒿 𑒣𑒯𑒱𑒢𑒹 𑒒𑒩 𑒖𑒰𑒃 𑒂 𑒧𑒰𑒞𑒰𑒮𑒿 𑒂𑒬𑒲𑒩𑓂𑒫𑒰𑒠 𑒪𑒲।

𑒩𑒳𑒠𑓂𑒩𑒧𑒞𑒱: 𑒁𑒢𑒳𑒦𑒫-𑒧𑒝𑓂𑒛𑒪𑒏 𑒢𑒱𑒩𑓂𑒝𑒨𑒏 𑒥𑒱𑒢𑒳 𑒣𑒰𑒪𑒢 𑒏𑒹𑒢𑒹 𑒁𑒯𑒰𑒿 𑒒𑒩𑒧𑒹 𑒏𑒼𑒢𑒰 𑒣𑓂𑒩𑒫𑒹𑒬 𑒏𑓄 𑒑𑒹𑒪𑒾𑓀 𑒧𑒰𑒡𑒫? 𑒧𑒹𑒡𑒰 𑒂 𑒖𑒲𑒫𑒹𑒏 𑒯𑒞𑓂𑒨𑒰, 𑒮𑒹𑒯𑒼 𑒂𑒿𑒐𑒱 𑒢𑒱𑒏𑒰𑒪𑒱 𑒏𑓄 𑒂 𑒯𑒰𑒟𑒲 𑒠𑓂𑒫𑒰𑒩𑒰 𑒣𑒱𑒔𑒛𑓃𑒰 𑒏𑓄 𑒏𑒋!! 𑒁𑒯𑒰𑒿 𑒮𑒾𑒦𑒰𑒑𑓂𑒨𑒬𑒰𑒪𑒲 𑒕𑒲 𑒧𑒰𑒡𑒫 𑒖𑒹 𑒍𑒃 𑒁𑒣𑒩𑒰𑒡𑒲𑒏𑒹𑒿 𑒠𑒝𑓂𑒛 𑒠𑒹𑒥𑒰𑒏 𑒦𑒰𑒩 𑒁𑒯𑒰𑒿 𑒮𑒦𑒏𑒹𑒿 𑒠𑒹𑒪 𑒑𑒹𑒪 𑒁𑒕𑒱। 𑒧𑒳𑒠𑒰 𑒞𑒏𑒩 𑒧𑒯𑒞𑓂𑒫 𑒁𑒯𑒰𑒿 𑒮𑒦 𑒥𑒳𑒗𑒻 𑒕𑒲?

𑒧𑒰𑒡𑒫: 𑒥𑒳𑒗𑒻 𑒕𑒲 𑒧𑒰𑒞𑒹।

𑒩𑒳𑒠𑓂𑒩𑒧𑒞𑒱: (𑒥𑒩𑓂𑒞𑒢𑒮𑒿 𑒦𑒰𑒞 𑒢𑒲𑒔𑒰𑒿 𑒖𑒧𑒲𑒢𑒣𑒩 𑒤𑒹𑒏𑒻𑒞 𑒂 𑒞𑒧𑒮𑒰𑒃𑒞) 𑒏𑒲 𑒥𑒳𑒗𑒻 𑒕𑒲 𑒧𑒰𑒡𑒫? 𑒁𑒢𑒳𑒦𑒫𑒧𑒝𑓂𑒛𑒪𑒏 𑒢𑒱𑒩𑓂𑒝𑒨𑒏 𑒥𑒱𑒢𑒳 𑒣𑒰𑒪𑒢 𑒏𑒹𑒢𑒹 𑒁𑒯𑒰𑒿 𑒒𑒩𑒧𑒹 𑒏𑒼𑒢𑒰 𑒣𑓂𑒩𑒫𑒹𑒬 𑒏𑓄 𑒑𑒹𑒪𑒾𑓀 𑒣𑒳𑒞𑓂𑒩 𑒧𑒰𑒡𑒫? 𑒖𑒰𑒥𑒹 𑒁𑒯𑒰𑒿 𑒁𑒢𑒳𑒦𑒫𑒧𑒝𑓂𑒛𑒪𑒏 𑒢𑒱𑒩𑓂𑒝𑒨𑒏 𑒣𑒰𑒪𑒢 𑒢𑒻 𑒏𑒩𑒥 𑒞𑒰𑒥𑒹 𑒁𑒯𑒰𑒿 𑒏𑒳𑒏𑒳𑒛𑓃𑒏 𑒨𑒼𑒢𑒱𑒧𑒹 𑒩𑒯𑒥, 𑒂 𑒏𑒳𑒏𑒳𑒛𑓃𑒏𑒹𑒿 𑒟𑒰𑒩𑒲𑒧𑒹 𑒐𑒹𑒢𑒰𑒃 𑒐𑒹𑒥𑒰𑒏 𑒁𑒡𑒱𑒏𑒰𑒩 𑒢𑒻 𑒕𑒻। 𑒐𑒰𑒅, 𑒄 𑒢𑒲𑒔𑒰𑒿𑒧𑒹 𑒤𑒹𑒏𑒪 𑒦𑒰𑒞 𑒐𑒰𑒅।

(𑒧𑒰𑒡𑒫 𑒦𑒳𑒏𑒻𑒞 𑒕𑒟𑒱 𑒂 𑒕𑒱𑒛𑓃𑒱𑒂𑒋𑒪 𑒦𑒰𑒞 𑒐𑒰𑒋 𑒪𑒑𑒻𑒞 𑒕𑒟𑒱। 𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱।)

(𑒤𑒹𑒩 𑒧𑓀𑒔𑒣𑒩 𑒣𑓂𑒩𑒏𑒰𑒬 𑒯𑒼𑒃𑒞 𑒁𑒕𑒱। 𑒧𑓀𑒔 𑒐𑒰𑒪𑒲 𑒁𑒕𑒱। 𑒯𑒲𑒩𑒴 𑒂 𑒇𑒭𑒱 𑒖𑒙𑒰 𑒧𑓀𑒔𑒣𑒩 𑒁𑒥𑒻 𑒕𑒟𑒱।)

𑒯𑒲𑒩𑒴:
𑒯𑒰𑒟𑒏 𑒏𑓀𑒑𑒢𑒰, 𑒤𑒴𑒪 𑒏 𑒒𑒛𑓃𑒲,
𑒮𑒹𑒯𑒼 𑒏𑒯𑒰𑒿 𑒣𑒰𑒋𑒥 𑒯𑒼 𑒪𑒰𑒪।
𑒛𑒰𑒿𑒛𑓃 𑒏 𑒛𑒩𑒏𑒮, 𑒮𑒼𑒢𑒰𑒏 𑒏𑒛𑓃𑒲
𑒮𑒹 𑒢𑒻 𑒧𑒢 𑒦𑒰𑒫𑒨 𑒯𑒼 𑒪𑒰𑒪
𑒧𑒹𑒡𑒰-𑒖𑒲𑒫𑒹 𑒧𑒰𑒩𑒪 𑒑𑒹𑒪𑒰, 𑒧𑒰𑒡𑒫 𑒔𑒳𑒣𑓂𑒣𑒹 𑒁𑒕𑒱
𑒮𑒹 𑒢𑒻 𑒧𑒢 𑒦𑒰𑒫𑒨 𑒯𑒼 𑒪𑒰𑒪
𑒂𑒿𑒐𑒱 𑒢𑒱𑒏𑒰𑒪𑒪 𑒩𑒰𑒖𑒰 𑒯𑒰𑒟𑒲 𑒣𑒱𑒔𑒥𑒰𑒋𑒪
𑒧𑒹𑒡𑒰-𑒖𑒲𑒫𑒹 𑒏𑒯𑒰𑒿 𑒣𑒰𑒋𑒥 𑒯𑒼 𑒪𑒰𑒪।
𑒇𑒭𑒱 𑒖𑒙𑒰:
𑒮𑒼𑒚𑒾𑒩𑒰 𑒢𑒃 𑒐𑒰𑒋𑒥 𑒩𑒰𑒖𑒰 𑒞𑒲𑒞 𑒪𑒑𑒻𑒋
𑒧𑒰𑒡𑒫𑒏 𑒑𑒣 𑒑𑓀𑒑𑒰𑒡𑒩𑒏𑒹𑒿 𑒞𑒲𑒞 𑒪𑒑𑒻𑒋
𑒕𑒚𑒱𑒨𑒰𑒩𑒲 𑒣𑒳𑒖𑒰𑒥𑓄 𑒪𑒋 𑒧𑒰𑒨 𑒁𑒥𑒻𑒋
𑒧𑒰𑒡𑒫𑒏 𑒑𑒣 𑒑𑓀𑒑𑒰𑒡𑒩𑒏𑒹𑒿 𑒞𑒲𑒞 𑒪𑒑𑒻𑒋
𑒏𑒖𑒩𑒰 𑒮𑒹𑒠𑒻 𑒪𑒋 𑒥𑒯𑒱𑒢 𑒁𑒥𑒻𑒋।
𑒧𑒰𑒡𑒫𑒏 𑒑𑒣 𑒑𑓀𑒑𑒰𑒡𑒩𑒏𑒹𑒿 𑒞𑒲𑒞 𑒪𑒑𑒻𑒋
(𑒠𑒩𑒥𑒰𑒩𑒲-𑓑 𑒂 𑒠𑒩𑒥𑒰𑒩𑒲-𑓒 𑒏 𑒣𑓂𑒩𑒫𑒹𑒬)
𑒠𑒩𑒥𑒰𑒩𑒲-𑓑: 𑒄 𑒏𑒲 𑒏𑒯𑒻 𑒕𑒲 𑒁𑒯𑒰𑒿 𑒮𑒦? 𑒩𑒰𑒖𑒠𑒩𑒥𑒰𑒩𑒧𑒹 𑒞𑒿 𑒮𑒦𑒏𑒹𑒿 𑒥𑒳𑒗𑒪 𑒕𑒻 𑒖𑒹 𑒧𑒰𑒡𑒫 𑒂 𑒑𑓀𑒑𑒰𑒡𑒩 𑒋𑒏 𑒠𑒼𑒮𑒩𑒰𑒣𑒩 𑒁𑒮𑒲𑒧 𑒫𑒱𑒬𑓂𑒫𑒰𑒮 𑒏𑒩𑒻 𑒕𑒟𑒱।

𑒯𑒲𑒩𑒴: 𑒏𑒩𑒻 𑒕𑒟𑒱 𑒢𑒻, 𑒏𑒩𑒻 𑒩𑒯𑒟𑒱।

𑒠𑒩𑒥𑒰𑒩𑒲-𑓒: 𑒮𑒹 𑒏𑒲?

𑒇𑒭𑒱 𑒖𑒙𑒰: 𑒖𑒲𑒫𑒹 𑒂 𑒧𑒹𑒡𑒰𑒏 𑒯𑒞𑓂𑒨𑒰।

𑒠𑒩𑒥𑒰𑒩𑒲-𑓑: 𑒧𑒳𑒠𑒰 𑒍𑒃 𑒫𑒱𑒭𑒨𑒧𑒹 𑒞𑒿 𑒧𑒰𑒡𑒫𑒏𑒹𑒿 𑒏𑒱𑒕𑒳 𑒥𑒳𑒗𑒪𑒹 𑒢𑒻 𑒕𑒪𑒢𑓂𑒯𑒱।

𑒯𑒲𑒩𑒴: 𑒮𑒹 𑒞𑒿 𑒁𑒯𑒰𑒿𑒏𑒹𑒿 𑒢𑒹 𑒥𑒳𑒗𑒪 𑒁𑒕𑒱। 𑒧𑒳𑒠𑒰 𑒁𑒢𑒳𑒦𑒫-𑒧𑒝𑓂𑒛𑒪𑒧𑒹 𑒮𑒦 𑒥𑒳𑒗𑒻𑒞 𑒩𑒯𑒋 𑒖𑒹 𑒧𑒰𑒡𑒫𑒏𑒹𑒿 𑒌 𑒭𑒛𑒨𑓀𑒞𑓂𑒩𑒏 𑒫𑒱𑒭𑒨𑒧𑒹 𑒏𑒼𑒢𑒰 𑒥𑒳𑒗𑒪 𑒢𑒻 𑒦𑒹𑒪𑒢𑓂𑒯𑒱 𑒂 𑒍 𑒏𑒼𑒢𑒰 𑒋𑒏𑒩𑒰 𑒩𑒼𑒏𑒥𑒰𑒏 𑒪𑒹𑒪 𑒣𑓂𑒩𑒨𑒰𑒮𑒼 𑒢𑒻 𑒏𑓄 𑒮𑒏𑒪𑒰।

𑒇𑒭𑒱 𑒖𑒙𑒰: 𑒂 𑒞𑒹𑒿 𑒁𑒢𑒳𑒦𑒫-𑒧𑒝𑓂𑒛𑒪 𑒙𑒴𑒙𑒱 𑒑𑒹𑒪𑒻।

𑒠𑒩𑒥𑒰𑒩𑒲-𑓑: 𑒁𑒢𑒳𑒦𑒫-𑒧𑒝𑓂𑒛𑒪 𑒙𑒴𑒙𑒱 𑒑𑒹𑒪𑒻?

𑒯𑒲𑒩𑒴: 𑒧𑒰𑒡𑒫 𑒁𑒢𑒳𑒦𑒫-𑒧𑒝𑓂𑒛𑒪𑒧𑒹 𑒮𑒿 𑒢𑒱𑒏𑒪𑒱 𑒑𑒹𑒪𑒰 𑒂𑒏𑒱 𑒢𑒱𑒏𑒰𑒪𑒱 𑒠𑒹𑒪 𑒑𑒹𑒪𑒰, 𑒞𑒿 𑒠𑒳𑒢𑒴 𑒮𑓂𑒟𑒱𑒞𑒱𑒧𑒹 𑒄 𑒁𑒢𑒳𑒦𑒫-𑒧𑒝𑓂𑒛𑒪𑒏 𑒙𑒳𑒙𑒢𑒰𑒃𑒋 𑒦𑒹𑒪𑒻 𑒢𑒹।
(𑒠𑒩𑒥𑒰𑒩𑒲-𑓑 𑒂 𑓒 𑒧𑓀𑒔𑒏 𑒏𑒼𑒢𑒧𑒹 𑒖𑒰𑒃𑒞 𑒁𑒕𑒱 𑒂 𑒏𑒢𑒤𑒳𑒮𑒏𑒲 𑒏𑒩𑒻𑒞 𑒁𑒕𑒱।)

𑒠𑒩𑒥𑒰𑒩𑒲-𑓑: 𑒄 𑒞𑒿 𑒢𑒲𑒏 𑒮𑒴𑒔𑒢𑒰 𑒦𑒹𑒙𑒪, 𑒩𑒰𑒖𑒰 𑒁𑒢𑒹𑒩𑒹 𑒧𑒰𑒡𑒫𑒣𑒩 𑒬𑓀𑒏𑒱𑒞 𑒩𑒯𑒻 𑒕𑒪𑒰।

𑒠𑒩𑒥𑒰𑒩𑒲-𑓒: 𑒯𑒿, 𑒌 𑒦𑒑𑒞𑒰 𑒮𑒦𑒏𑒹𑒿 𑒣𑒞𑒼 𑒢𑒻 𑒯𑒹𑒞𑒻 𑒖𑒹 𑒍 𑒮𑒦 𑒯𑒧𑒩𑒰 𑒮𑒦𑒣𑒩 𑒏𑒞𑒹𑒏 𑒅𑒣𑒏𑒰𑒩 𑒏𑓄 𑒑𑒹𑒪 𑒁𑒕𑒱।

𑒠𑒩𑒥𑒰𑒩𑒲-𑓑: (𑒇𑒭𑒱 𑒖𑒙𑒰 𑒂 𑒯𑒲𑒩𑒴𑒏𑒹𑒿 𑒠𑒴𑒩𑒹𑒮𑒿 𑒖𑒼𑒩𑒮𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒚𑒲𑒏 𑒕𑒻 𑒦𑒑𑒞𑒰 𑒦𑒰𑒃 𑒮𑒦, 𑒂𑒥 𑒯𑒧 𑒮𑒦 𑒖𑒰𑒃 𑒕𑒲। 𑒤𑒹𑒩 𑒏𑒯𑒱𑒨𑒼 𑒥𑒳𑒪𑒻𑒞-𑒦𑒰𑓀𑒑𑒻𑒞 𑒦𑒹𑒿𑒙 𑒦𑒃𑒨𑒹 𑒖𑒰𑒋𑒞।

𑒯𑒲𑒩𑒴: 𑒚𑒲𑒏𑒹 𑒕𑒻 𑒦𑒰𑒃, 𑒦𑒹𑒿𑒙 𑒯𑒹𑒥𑒹 𑒏𑒩𑒞।
(𑒠𑒩𑒥𑒰𑒩𑒲-𑓑 𑒂 𑓒 𑒣𑓂𑒩𑒮𑓂𑒟𑒰𑒢 𑒏𑒩𑒻𑒞 𑒁𑒕𑒱।)

𑒇𑒭𑒱 𑒖𑒙𑒰: 𑒔𑒪𑒴 𑒯𑒲𑒩𑒴, 𑒏𑒰𑒖 𑒦𑓄 𑒑𑒹𑒪। 𑒂𑒥 𑒁𑒣𑒢𑒯𑒱𑒨𑒼 𑒮𑒦 𑒮𑒣𑓂𑒞𑒩𑒲 𑒥𑒼𑒢 𑒠𑒱𑒮 𑒔𑒪𑒲।

𑒯𑒲𑒩𑒴: (𑒗𑒼𑒩𑒰𑒮𑒿 𑒢𑒱𑒏𑒰𑒪𑒱 𑒏𑓄 𑒗𑒰𑒪𑒱 𑒥𑒖𑒥𑓄 𑒪𑒑𑒻𑒞 𑒁𑒕𑒱।)
𑒦𑒴𑒞 𑒣𑓂𑒩𑒹𑒞 𑒮𑒥 𑒗𑒰𑒪𑒱 𑒥𑒖𑒰𑒥𑒻
𑒨𑒼𑒑𑒱𑒢 𑒏 𑒢𑒔𑒥𑒻 𑒕𑒲 𑒯𑒹।
𑒩𑒰𑒏𑓂𑒭𑒮 𑒏 𑒮𑓀𑒯𑒰𑒩 𑒏𑒩𑒻 𑒕𑒲
𑒠𑒳𑒢𑒱𑒨𑒰𑒿 𑒏 𑒖𑒳𑒛𑓃𑒥𑒻 𑒕𑒲 𑒯𑒹।


(𑒁𑒢𑓂𑒯𑒰𑒩 𑒣𑒮𑒩𑒱 𑒖𑒰𑒃𑒞 𑒁𑒕𑒱। 𑒤𑒹𑒩 𑒖𑒐𑒢 𑒃𑒖𑒼𑒞 𑒯𑒼𑒃𑒞 𑒁𑒕𑒱 𑒞𑒿 𑒩𑒰𑒖𑒠𑒩𑒥𑒰𑒩𑒧𑒹 𑒩𑒰𑒖𑒰 𑒂 𑒢𑒰𑒩𑒰𑒨𑒝 𑒕𑒟𑒱 𑒂 𑒞𑒐𑒢𑒹 𑒠𑒩𑒥𑒰𑒩𑒲-𑓑 𑒩𑒰𑒖𑒠𑒩𑒥𑒰𑒩𑒧𑒹 𑒣𑓂𑒩𑒫𑒹𑒬 𑒏𑒩𑒻 𑒕𑒟𑒱।)

𑒠𑒩𑒥𑒰𑒩𑒲-𑓑: 𑒖𑒨 𑒧𑒯𑒩𑒰𑒖। 𑒋𑒏𑒙𑒰 𑒬𑒳𑒦 𑒮𑒴𑒔𑒢𑒰 𑒁𑒕𑒱। 𑒧𑒰𑒡𑒫𑒏𑒹𑒿 𑒁𑒢𑒳𑒦𑒫-𑒧𑒝𑓂𑒛𑒪𑒮𑒿 𑒢𑒱𑒏𑒰𑒪𑒱 𑒠𑒹𑒪 𑒑𑒹𑒪𑒻। 𑒁𑒢𑒳𑒦𑒫-𑒧𑒝𑓂𑒛𑒪𑒏𑒹𑒿 𑒂𑒬𑓀𑒏𑒰 𑒩𑒯𑒻 𑒖𑒹 𑒧𑒰𑒡𑒫 𑒖𑒲𑒫𑒹 𑒂 𑒧𑒹𑒡𑒰𑒏 𑒯𑒞𑓂𑒨𑒰𑒏 𑒩𑒰𑒖𑒰𑒖𑓂𑒘𑒰𑒏 𑒢𑒱𑒩𑓂𑒝𑒨𑒏 𑒖𑒢𑒞𑒥 𑒁𑒢𑒳𑒦𑒫-𑒧𑒝𑓂𑒛𑒪𑒮𑒿 𑒢𑒳𑒏𑒹𑒪𑒏।

𑒢𑒰𑒩𑒰𑒨𑒝: 𑒧𑒳𑒠𑒰 𑒧𑒰𑒡𑒫𑒏𑒹𑒿 𑒞𑒿 𑒄 𑒑𑒣𑓂𑒣 𑒥𑒳𑒗𑒪 𑒩𑒯𑒥𑒹 𑒢𑒻 𑒏𑒩𑒻, 𑒂 𑒖𑒐𑒢 𑒍𑒏𑒩𑒰 𑒄 𑒑𑒣 𑒥𑒳𑒗𑒪𑒹 𑒢𑒻 𑒩𑒯𑒻 𑒞𑒿 𑒍 𑒏𑒼𑒢𑒰 𑒮𑒹 𑒑𑒣 𑒏𑒏𑒩𑒼𑒮𑒿 𑒢𑒳𑒏𑒹𑒞𑒻।
𑒠𑒩𑒥𑒰𑒩𑒲-𑓑: 𑒧𑒳𑒠𑒰 𑒮𑒹 𑒑𑒣 𑒁𑒢𑒳𑒦𑒫-𑒧𑒝𑓂𑒛𑒪𑒧𑒹 𑒏𑒹 𑒧𑒰𑒢𑒞𑒻, 𑒏𑒰𑒩𑒝 𑒄 𑒩𑒰𑒖𑒰𑒖𑓂𑒘𑒰 𑒖𑒐𑒢 𑒠𑒹𑒪 𑒑𑒹𑒪, 𑒞𑒃 𑒪𑒑𑒰𑒞𑒱 𑒧𑒰𑒡𑒫 𑒩𑒰𑒖𑒠𑒩𑒥𑒰𑒩𑒹𑒧𑒹 𑒕𑒪।

𑒢𑒰𑒩𑒰𑒨𑒝: 𑒯𑒿, 𑒮𑒹 𑒞𑒿 𑒚𑒲𑒏𑒹। 𑒧𑒳𑒠𑒰 𑒁𑒯𑒰𑒿𑒏𑒹𑒿 𑒄 𑒑𑒣 𑒏𑒼𑒢𑒰 𑒣𑒞𑒰 𑒦𑒹𑒪?

𑒠𑒩𑒥𑒰𑒩𑒲-𑓑: (𑒧𑒳𑒮𑓂𑒏𑒰𑒃𑒞) 𑒯𑒧 𑒐𑒳𑒤𑒱𑒨𑒰 𑒮𑒦𑒏𑒹𑒿 𑒮𑒦𑒚𑒰𑒧 𑒪𑒑𑒹𑒢𑒹 𑒕𑒲, 𑒁𑒢𑒳𑒦𑒫-𑒧𑒝𑓂𑒛𑒪 𑒍𑒏𑒩𑒰 𑒮𑒦𑒮𑒿 𑒥𑒰𑒿𑒔𑒪 𑒟𑒼𑒛𑓃𑒥𑒹 𑒕𑒻।

(𑒞𑒐𑒢𑒹 𑒠𑒩𑒥𑒰𑒩𑒲-𑓒 𑒣𑓂𑒩𑒫𑒹𑒬 𑒏𑒩𑒻𑒞 𑒁𑒕𑒱।)

𑒠𑒩𑒥𑒰𑒩𑒲-𑓒: (𑒩𑒰𑒖𑒰𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞) 𑒖𑒨 𑒧𑒯𑒩𑒰𑒖, 𑒧𑒰𑒡𑒫 𑒂 𑒯𑒳𑒢𑒏𑒩 𑒠𑒳𑒢𑒴 𑒮𑒯𑒨𑒼𑒑𑒲 𑒩𑒰𑒖𑒠𑒩𑒥𑒰𑒩𑒧𑒹 𑒣𑓂𑒩𑒫𑒹𑒬𑒏 𑒁𑒢𑒳𑒧𑒞𑒱 𑒔𑒰𑒯𑒻 𑒕𑒟𑒱।

𑒏𑒲𑒩𑓂𑒞𑒱 𑒮𑒱𑓀𑒯: 𑒁𑒢𑒳𑒧𑒞𑒱 𑒁𑒕𑒱। 𑒞𑒲𑒢𑒴 𑒑𑒼𑒙𑒹𑒏𑒹𑒿 𑒮𑒮𑒧𑓂𑒧𑒰𑒢 𑒠𑒩𑒥𑒰𑒩𑒧𑒹 𑒂𑒢𑒪 𑒖𑒰𑒋।


(𑒠𑒩𑒥𑒰𑒩𑒲-𑓒 𑒣𑓂𑒩𑒮𑓂𑒟𑒰𑒢 𑒏𑒩𑒻𑒞 𑒁𑒕𑒱 𑒂 𑒤𑒹𑒩 𑒧𑒰𑒡𑒫 𑒂 𑒧𑒰𑒡𑒫𑒏 𑒠𑒳𑒢𑒴 𑒮𑒯𑒨𑒼𑒑𑒲𑒏 𑒮𑓀𑒑 𑒣𑓂𑒩𑒫𑒹𑒬 𑒏𑒩𑒻𑒞 𑒁𑒕𑒱।)

𑒏𑒲𑒩𑓂𑒞𑒱 𑒮𑒱𑓀𑒯: 𑒂𑒅 𑒧𑒰𑒡𑒫। 𑒯𑒧𑒩𑒰 𑒞𑒿 𑒦𑒹𑒪 𑒖𑒹 𑒑𑓀𑒑𑒰𑒡𑒩 𑒂 𑒯𑒩𑒱𑒏𑒩 𑒖𑒏𑒰𑒿 𑒁𑒯𑒴𑒿 𑒩𑒰𑒖𑒠𑒩𑒥𑒰𑒩 𑒕𑒼𑒛𑓃𑒱 𑒠𑒹𑒪𑒾𑓀।

𑒧𑒰𑒡𑒫: 𑒯𑒧 𑒩𑒰𑒖𑒠𑒩𑒥𑒰𑒩 𑒏𑒼𑒢𑒰 𑒕𑒼𑒛𑓃𑒱 𑒮𑒏𑒻 𑒕𑒲 𑒧𑒯𑒩𑒰𑒖, 𑒑𑓀𑒑𑒰𑒡𑒩 𑒂 𑒯𑒩𑒱𑒏𑒩 𑒪𑒹𑒪 𑒞𑒿 𑒁𑒢𑒳𑒦𑒫-𑒧𑒝𑓂𑒛𑒪 𑒕𑒻, 𑒢𑒻 𑒩𑒰𑒖𑒠𑒩𑒥𑒰𑒩 𑒞𑒿 𑒁𑒢𑒳𑒦𑒫-𑒧𑒝𑓂𑒛𑒪, 𑒧𑒳𑒠𑒰 𑒯𑒧𑒩𑒰 𑒪𑒹𑒪 𑒞𑒿 𑒧𑒰𑒞𑓂𑒩 𑒩𑒰𑒖 𑒠𑒩𑒥𑒰𑒩𑒹𑒙𑒰 𑒥𑒔𑒪 𑒁𑒕𑒱।

𑒢𑒰𑒩𑒰𑒨𑒝: 𑒖𑒲𑒫𑒹-𑒧𑒹𑒡𑒰𑒏 𑒧𑒵𑒞𑓂𑒨𑒳𑒠𑒝𑓂𑒛𑒏 𑒢𑒱𑒩𑓂𑒝𑒨 𑒁𑒢𑒔𑒼𑒏𑓂𑒏𑒹 𑒪𑒹𑒪 𑒑𑒹𑒪। 𑒂 𑒞𑒹𑒿 𑒁𑒯𑒰𑒿𑒏𑒹𑒿 𑒌 𑒫𑒱𑒭𑒨𑒧𑒹 𑒢𑒻 𑒥𑒞𑒰𑒍𑒪 𑒖𑒰 𑒮𑒏𑒪।

𑒧𑒰𑒡𑒫: 𑒥𑒞𑒰 𑒠𑒹𑒪𑒼 𑒖𑒃𑒞𑒋 𑒞𑒿 𑒩𑒰𑒖𑒰𑒖𑓂𑒘𑒰𑒏𑒹𑒿 𑒯𑒧 𑒥𑒠𑒪𑒱 𑒞𑒿 𑒢𑒯𑒱𑒨𑒹 𑒮𑒏𑒱𑒞𑒾𑓀 𑒁𑒩𑓂𑒟𑒧𑓀𑒞𑓂𑒩𑒲 𑒢𑒰𑒩𑒰𑒨𑒝।

𑒏𑒲𑒩𑓂𑒞𑒱 𑒮𑒱𑓀𑒯: 𑒧𑒰𑒡𑒫। 𑒖𑒿 𑒯𑒧𑒩𑒰 𑒑𑓀𑒑𑒰𑒡𑒩𑒏 𑒣𑓂𑒩𑒞𑒱 𑒏𑒼𑒢𑒼 𑒠𑓂𑒫𑒹𑒭 𑒩𑒯𑒱𑒞𑒋 𑒞𑒿 𑒯𑒧 𑒁𑒣𑒢 𑒡𑒩𑓂𑒧 𑒥𑒯𑒱𑒢 𑒏𑒳𑒧𑒩𑒮𑒳𑒞𑒰𑒏 𑒫𑒱𑒫𑒰𑒯 𑒯𑒳𑒢𑒏𑒰𑒮𑒿 𑒏𑒩𑒥𑒱𑒞𑒾𑓀? 𑒯𑒳𑒢𑒏𑒰 𑒏𑒳𑒪𑒲𑒢 𑒥𑒢𑒥𑒻𑒪𑒹 𑒯𑒧 𑒯𑒳𑒢𑒏𑒰 𑒣𑓂𑒩𑒡𑒰𑒢𑒧𑓀𑒞𑓂𑒩𑒲 𑒥𑒢𑒰 𑒠𑒹𑒪𑒱𑒨𑒢𑓂𑒯𑒱। 𑒧𑒳𑒠𑒰 𑒯𑒧𑒩𑒰 𑒏𑒲 𑒥𑒳𑒗𑒪 𑒕𑒪 𑒖𑒹 𑒍 𑒁𑒏𑒳𑒪𑒲𑒢𑒞𑒰𑒏 𑒣𑒼𑒭𑒏 𑒕𑒟𑒱, 𑒏𑒳𑒧𑒩𑒮𑒳𑒞𑒼𑒏𑒹𑒿 𑒍 𑒁𑒣𑒢𑒰 𑒩𑓀𑒑𑒧𑒹 𑒩𑒓𑒱 𑒪𑒹𑒪𑒢𑓂𑒯𑒱।

𑒧𑒰𑒡𑒫: (𑒂𑒮𑓂𑒞𑒹-𑒂𑒮𑓂𑒞𑒹 𑒩𑒰𑒖𑒰 𑒪𑒑 𑒖𑒰𑒃𑒞) 𑒯𑒿, 𑒮𑒹 𑒞𑒿 𑒍 𑒮𑒦𑒏𑒹𑒿 𑒁𑒣𑒢𑒰 𑒩𑒓𑒧𑒹 𑒩𑒓𑒱 𑒪𑒹𑒪𑒢𑒱 𑒏𑒲𑒩𑓂𑒞𑒱 𑒮𑒱𑓀𑒯
(𑒁𑒢𑓂𑒞𑒱𑒧 𑒠𑒴 𑒬𑒥𑓂𑒠 𑒍 𑒖𑒼𑒩 𑒪𑒑𑒰 𑒏𑓄 𑒥𑒖𑒻 𑒕𑒟𑒱 𑒂 𑒞𑒩𑒳𑒂𑒩𑒱𑒏 𑒂𑒒𑒰𑒞 𑒏𑒲𑒩𑓂𑒞𑒱 𑒮𑒱𑓀𑒯𑒣𑒩 𑒏𑒩𑒻 𑒕𑒟𑒱।𑒢𑒰𑒩𑒰𑒨𑒝 𑒂 𑒠𑒳𑒢𑒴 𑒠𑒩𑒥𑒰𑒩𑒲𑒏 𑒮𑓀𑒑 𑒧𑒰𑒡𑒫𑒏 𑒠𑒳𑒢𑒴 𑒬𑒱𑒭𑓂𑒨𑒧𑒹 𑒨𑒳𑒠𑓂𑒡 𑒯𑒼𑒃𑒞 𑒁𑒕𑒱। 𑒧𑒰𑒡𑒫𑒏 𑒠𑒳𑒢𑒴 𑒬𑒱𑒭𑓂𑒨 𑒠𑒳𑒢𑒴 𑒠𑒩𑒥𑒰𑒩𑒲 𑒂 𑒢𑒰𑒩𑒰𑒨𑒝𑒏𑒹𑒿 𑒑𑒕𑒰𑒛𑓃𑒢𑒹 𑒕𑒟𑒱। 𑒞𑒰𑒫𑒞 𑒩𑒰𑒖𑒰𑒏 𑒮𑒻𑒢𑒱𑒏 𑒮𑒦 𑒂𑒥𑒱 𑒖𑒰𑒃𑒞 𑒁𑒕𑒱 𑒧𑒳𑒠𑒰 𑒧𑒰𑒡𑒫 𑒁𑒣𑒢 𑒣𑒹𑒙𑒧𑒹 𑒕𑒴𑒩𑒰 𑒦𑒼𑓀𑒏𑒱 𑒂𑒞𑓂𑒧𑒯𑒞𑓂𑒨𑒰 𑒏𑓄 𑒪𑒻 𑒕𑒟𑒱। 𑒧𑒰𑒡𑒫𑒏 𑒠𑒳𑒢𑒴 𑒬𑒱𑒭𑓂𑒨𑒏𑒹𑒿 𑒩𑒰𑒖𑒰𑒏 𑒮𑒻𑒢𑒱𑒏 𑒧𑒰𑒩𑒱 𑒠𑒻 𑒕𑒟𑒱। 𑒞𑒲𑒢𑒴 𑒑𑒼𑒙𑒹𑒏 𑒑𑒩𑒰𑒮𑒿 𑒅𑒪𑓂𑒏𑒰𑒧𑒳𑒐 𑒞𑒰𑒥𑒲𑒖 𑒢𑒰𑒩𑒰𑒨𑒝 𑒢𑒱𑒏𑒰𑒪𑒻𑒞 𑒕𑒟𑒱, 𑒂 𑒮𑒦𑒏𑒹𑒿 𑒠𑒹𑒐𑒥𑒻𑒞 𑒕𑒟𑒱। 𑒁𑒢𑓂𑒯𑒰𑒩 𑒤𑒹𑒩𑒮𑒿 𑒣𑒮𑒩𑒱 𑒖𑒰𑒃𑒞 𑒁𑒕𑒱।)

(𑒤𑒹𑒩 𑒧𑓀𑒔𑒣𑒩 𑒣𑓂𑒩𑒏𑒰𑒬 𑒯𑒼𑒃𑒞 𑒁𑒕𑒱। 𑒧𑓀𑒔 𑒐𑒰𑒪𑒲 𑒁𑒕𑒱। 𑒁𑒢𑒳𑒦𑒫𑒧𑒝𑓂𑒛𑒪𑒏 𑒮𑒠𑒮𑓂𑒨 𑒧𑓀𑒔𑒣𑒩 𑒁𑒥𑒻𑒞 𑒕𑒟𑒱 𑒖𑒃𑒧𑒹 𑒑𑓀𑒑𑒰𑒡𑒩, 𑒧𑒢𑒮𑒳𑒐, 𑒯𑒩𑒱𑒏𑒩, 𑒧𑒱𑒞𑒴, 𑒏𑒳𑒧𑒩𑒮𑒳𑒞𑒰, 𑒂𑒢𑒢𑓂𑒠𑒰, 𑒇𑒭𑒱 𑒖𑒙𑒰 𑒂 𑒯𑒲𑒩𑒴 𑒕𑒟𑒱 𑒧𑒳𑒠𑒰 𑒖𑒲𑒫𑒹, 𑒧𑒹𑒡𑒰, 𑒧𑒰𑒡𑒫 𑒂 𑒧𑒰𑒡𑒫𑒏 𑒠𑒳𑒢𑒴 𑒮𑒯𑒨𑒼𑒑𑒲 𑒢𑒻 𑒕𑒟𑒱। 𑒑𑓀𑒑𑒰𑒡𑒩 𑒕𑒛𑓃𑒲 𑒡𑒹𑒢𑒹 𑒕𑒟𑒱, 𑒂 𑒬𑒰𑒢𑓂𑒞 𑒕𑒟𑒱। 𑒮𑒦 𑒥𑒻𑒮𑒱 𑒖𑒰𑒃 𑒕𑒟𑒱।)

𑒑𑓀𑒑𑒰𑒡𑒩: 𑒫𑒱𑒠𑒰 𑒪𑒹𑒥𑒰𑒏 𑒮𑒧𑒋 𑒂𑒥𑒱 𑒑𑒹𑒪। 𑒁𑒢𑒳𑒦𑒫𑒧𑒝𑓂𑒛𑒪 𑒮𑒦 𑒖𑒰𑒞𑒱𑒏𑒹𑒿 𑒢𑒱𑒏𑒙 𑒂𑒢𑒪𑒏, 𑒖𑒰𑒞𑒱 𑒐𑒞𑒧 𑒏𑒹𑒪𑒏, 𑒧𑒳𑒠𑒰..

𑒧𑒢𑒮𑒳𑒐: 𑒢𑒻 𑒑𑓀𑒑𑒰𑒡𑒩, 𑒁𑒯𑒰𑒿𑒏𑒹𑒿 𑒏𑒱𑒕𑒳 𑒢𑒻 𑒯𑒋𑒞 𑒑𑓀𑒑𑒰𑒡𑒩।

𑒯𑒩𑒱𑒏𑒩: 𑒮𑒦 𑒚𑒲𑒏 𑒦𑓄 𑒩𑒯𑒪 𑒁𑒕𑒱 𑒑𑓀𑒑𑒰𑒡𑒩, 𑒏𑒲𑒩𑓂𑒞𑒱 𑒮𑒱𑓀𑒯 𑒧𑒰𑒩𑒪 𑒑𑒹𑒪 𑒑𑓀𑒑𑒰𑒡𑒩। 𑒂𑒥 𑒮𑒦 𑒏𑒱𑒕𑒳 𑒚𑒲𑒏 𑒦𑓄 𑒖𑒰𑒋𑒞।

𑒧𑒱𑒞𑒴: 𑒧𑒳𑒠𑒰 𑒮𑓀𑒑𑒧𑒹 𑒧𑒰𑒡𑒫 𑒂 𑒧𑒰𑒡𑒫𑒏 𑒠𑒳𑒢𑒴 𑒬𑒱𑒭𑓂𑒨 𑒮𑒹𑒯𑒼 𑒧𑒩𑒱 𑒑𑒹𑒪𑒰।

𑒏𑒳𑒧𑒩𑒮𑒳𑒞𑒰: 𑒏𑒲𑒩𑓂𑒞𑒱 𑒮𑒱𑓀𑒯𑒏 𑒧𑒵𑒞𑓂𑒨𑒳 𑒂𑒫𑒬𑓂𑒨𑒏 𑒦𑓄 𑒑𑒹𑒪 𑒕𑒪। 𑒧𑒹𑒡𑒰 𑒂 𑒖𑒲𑒫𑒹𑒏 𑒖𑒒𑒢𑓂𑒨 𑒯𑒞𑓂𑒨𑒰𑒏 𑒂𑒠𑒹𑒬 𑒏𑒼𑒢𑒼 𑒧𑒢𑒳𑒏𑓂𑒐 𑒢𑒻 𑒠𑓄 𑒮𑒏𑒻𑒋। 𑒏𑒲𑒩𑓂𑒞𑒱 𑒮𑒱𑓀𑒯 𑒏𑒱𑒕𑒳 𑒋𑒯𑒹𑒢 𑒑𑒼𑒙𑒹𑒮𑒿 𑒒𑒹𑒩𑒰 𑒑𑒹𑒪𑒰 𑒖𑒹 𑒯𑒳𑒢𑒏𑒰 𑒧𑒢𑒳𑒏𑓂𑒐𑒮𑒿 𑒖𑒰𑒢𑒫𑒩 𑒥𑒢𑒰 𑒠𑒹𑒪𑒏𑒢𑓂𑒯𑒱। 𑒑𑓀𑒑𑒰𑒡𑒩, 𑒏𑒱𑒕𑒳 𑒢𑒻 𑒯𑒋𑒞 𑒁𑒯𑒰𑒿𑒏𑒹𑒿।

𑒑𑓀𑒑𑒰𑒡𑒩: 𑒢𑒻 𑒏𑒳𑒧𑒩𑒮𑒳𑒞𑒰 𑒮𑒧𑒨 𑒞𑒿 𑒮𑒥𑒯𑒏 𑒁𑒥𑒱𑒞𑒹 𑒕𑒻𑒏। 𑒯𑒧𑒩𑒰 𑒏𑒱𑒕𑒳 𑒂𑒬𑓀𑒏𑒰 𑒁𑒕𑒱, 𑒁𑒢𑒳𑒦𑒫-𑒧𑒝𑓂𑒛𑒪𑒏 𑒫𑒱𑒭𑒨𑒧𑒹।

𑒂𑒢𑒢𑓂𑒠𑒰: 𑒑𑓀𑒑𑒰𑒡𑒩, 𑒄 𑒁𑒢𑒳𑒦𑒫-𑒧𑒝𑓂𑒛𑒪 𑒍𑒯𑒱𑒢𑒰 𑒔𑒪𑒻𑒞 𑒩𑒯𑒞 𑒖𑒹𑒢𑒰 𑒁𑒯𑒰𑒿 𑒔𑒰𑒯𑒻 𑒕𑒲।

𑒑𑓀𑒑𑒰𑒡𑒩: 𑒯𑒧𑒩𑒰 𑒏𑒱𑒕𑒳 𑒛𑒩 𑒁𑒕𑒱।

𑒇𑒭𑒱 𑒖𑒙𑒰: 𑒏𑒼𑒢 𑒛𑒩 𑒑𑓀𑒑𑒰𑒡𑒩?

𑒯𑒲𑒩𑒴: 𑒏𑒼𑒢 𑒛𑒩 𑒑𑓀𑒑𑒰𑒡𑒩? 𑒁𑒢𑒳𑒦𑒫-𑒧𑒝𑓂𑒛𑒪𑒧𑒹 𑒞𑒿 𑒮𑒦 𑒖𑒰𑒞𑒱𑒏 𑒣𑓂𑒩𑒫𑒹𑒬 𑒁𑒕𑒱, 𑒮𑓂𑒞𑓂𑒩𑒲𑒏 𑒣𑓂𑒩𑒞𑒱 𑒏𑒼𑒢𑒼 𑒦𑒹𑒠𑒦𑒰𑒫 𑒢𑒻 𑒏𑒋𑒪 𑒖𑒰𑒃 𑒕𑒻।

𑒑𑓀𑒑𑒰𑒡𑒩: (𑒯𑒰𑒿𑒤𑒻𑒞 𑒥𑒖𑒻 𑒕𑒟𑒱) 𑒂𑒃 𑒕𑒻 𑒯𑒲𑒩𑒴। 𑒄 𑒏𑒰𑒪𑓂𑒯𑒱𑒨𑒼 𑒩𑒯𑒋 𑒇𑒭𑒱 𑒖𑒙𑒰, 𑒮𑒹 𑒯𑒧 𑒔𑒰𑒯𑒻 𑒕𑒲। 𑒧𑒳𑒠𑒰 𑒨𑒋𑒯 𑒙𑒰 𑒛𑒩 𑒁𑒕𑒱 𑒖𑒹 𑒥𑒠𑒪𑒰𑒏 𑒦𑒰𑒫𑒏 𑒄 𑒂𑒑𑒱 𑒁𑒢𑒳𑒦𑒫𑒧𑒝𑓂𑒛𑒪𑒏𑒹𑒿 𑒋𑒏𑒙𑒰 𑒅𑒪𑓂𑒏𑒰𑒧𑒳𑒐𑒲 𑒖𑒰𑒞𑒱 𑒢𑒻 𑒥𑒢𑒰 𑒠𑒻 𑒇𑒭𑒱 𑒖𑒙𑒰। 𑒨𑒋𑒯 𑒋𑒏𑒙𑒰 𑒛𑒩…(𑒐𑒼𑓀𑒐𑒲 𑒏𑒩𑓄 𑒪𑒰𑒑𑒻 𑒕𑒟𑒱) 𑒨𑒋𑒯 𑒋𑒏𑒙𑒰 𑒛𑒩 𑒖𑒹 𑒍𑒃𑒪 𑒮𑒡𑒹𑒥𑒰 𑒪𑒹𑒪 𑒖𑒹 𑒂𑒏𑓂𑒩𑒧𑒝 𑒁𑒢𑒳𑒦𑒫-𑒧𑒝𑓂𑒛𑒪𑒣𑒩 𑒯𑒹𑒞𑒻 𑒞𑒃𑒮𑒿 𑒁𑒢𑒳𑒦𑒫-𑒧𑒝𑓂𑒛𑒪 𑒁𑒣𑒢𑒰𑒏𑒹𑒿 𑒋𑒏𑒙𑒰 𑒒𑒹𑒩𑒰𑒧𑒹 𑒢𑒹 𑒒𑒹𑒩𑒱 𑒪𑒱𑒁𑒋, 𑒂 𑒌𑒧𑒹 𑒮𑒦 𑒖𑒰𑒞𑒱𑒏 𑒣𑓂𑒩𑒫𑒹𑒬𑒣𑒩 𑒩𑒼𑒏 𑒢𑒻 𑒪𑒰𑒑𑒱 𑒖𑒰𑒋। 𑒯𑒧𑒩𑒰 𑒑𑒹𑒪𑒰𑒏 𑒥𑒰𑒠 𑒮𑒹 𑒢𑒻 𑒯𑒳𑒁𑒋 𑒏𑒳𑒧𑒩𑒮𑒳𑒞𑒰... 𑒧𑒳𑒠𑒰 𑒥𑒠𑒪𑒰𑒑 𑒂𑒑𑒱𑒧𑒹 𑒮𑒹 𑒦𑓄 𑒖𑒹 𑒖𑒰𑒋 𑒮𑒋𑒯𑒙𑒰 𑒛𑒩.. …

(𑒐𑒼𑓀𑒐𑒲 𑒏𑒩𑓄 𑒪𑒰𑒑𑒻 𑒕𑒟𑒱, 𑒏𑒳𑒧𑒩𑒮𑒳𑒞𑒰 𑒯𑒳𑒢𑒏𑒩 𑒧𑒰𑒟𑒏𑒹𑒿 𑒏𑒼𑒩𑒰𑒧𑒹 𑒪𑓄 𑒪𑒻 𑒕𑒟𑒱। 𑒂𑒮𑓂𑒞𑒹-𑒂𑒮𑓂𑒞𑒹 𑒑𑓀𑒑𑒰𑒡𑒩 𑒣𑓂𑒩𑒰𑒝𑒞𑓂𑒨𑒰𑒑 𑒏𑒩𑒻𑒞 𑒕𑒟𑒱। 𑒁𑒢𑓂𑒯𑒰𑒩 𑒣𑒮𑒩𑓄 𑒪𑒑𑒻𑒋 𑒂 𑒢𑒹𑒣𑒟𑓂𑒨𑒮𑒿 𑒁𑒥𑒰𑒖 𑒁𑒥𑒻𑒋..
𑒛𑒩 𑒪𑒑𑒻𑒋 𑒯𑒹 𑒛𑒹𑒩𑒰𑒍𑒢 𑒪𑒑𑒻𑒋
𑒞𑒼𑒩 𑒁𑓀𑒑𑒢𑒰, 𑒦𑒨𑒰𑒍𑒢 𑒪𑒑𑒻𑒋
𑒯𑒹 𑒁𑒖𑒑𑒩 𑒏𑒹 𑒐𑒧𑓂𑒯𑒰 𑒣𑒩 𑒡𑒰𑒧𑒱𑒢 𑒏𑒹 𑒥𑒩𑒹𑒛𑓃𑒱𑒨𑒰
𑒑𑒯𑒳𑒧𑒢 𑒏 𑒏𑒼𑒩𑒼 𑒤𑒳𑒤𑒏𑒰𑒩 𑒧𑒰𑒩𑒻𑒋,
𑒛𑒩 𑒪𑒑𑒻𑒋 𑒯𑒹 𑒛𑒹𑒩𑒰𑒍𑒢 𑒪𑒑𑒻𑒋
𑒞𑒼𑒩 𑒁𑓀𑒑𑒢𑒰, 𑒦𑒨𑒰𑒍𑒢 𑒪𑒑𑒻𑒋
𑒏𑒛𑓃𑒹𑒞 𑒏𑒹 𑒥𑒞𑓂𑒞𑒲 𑒣𑒩 𑒮𑒰𑓀𑒐𑒛𑓃 𑒏𑒹 𑒥𑒢𑓂𑒯𑒢𑒧𑒰
𑒥𑒱𑒜𑓃𑒢𑒲 𑒏𑒹 𑒐𑒼𑒞𑒰 𑒒𑒢𑒒𑒢 𑒏𑒩𑒻𑒋।
𑒛𑒩 𑒪𑒑𑒻𑒋 𑒯𑒹 𑒛𑒹𑒩𑒰𑒍𑒢 𑒪𑒑𑒻𑒋
𑒞𑒼𑒩 𑒁𑓀𑒑𑒢𑒰, 𑒦𑒨𑒰𑒍𑒢 𑒪𑒑𑒻𑒋
𑒮𑒳𑒑𑒥𑒰 𑒏𑒹 𑒣𑒰𑒜𑓃𑒱 𑒣𑒩 𑒜𑒼𑒩𑒥𑒰 𑒏𑒹 𑒜𑒼𑒪𑒢𑒧𑒰
𑒣𑒢𑒱𑒨𑒰 𑒏𑒹 𑒖𑒲𑒦 𑒯𑒢𑒯𑒢 𑒏𑒩𑒻𑒋
𑒛𑒩 𑒪𑒑𑒻𑒋 𑒯𑒹 𑒛𑒹𑒩𑒰𑒍𑒢 𑒪𑒑𑒻𑒋
𑒞𑒼𑒩 𑒁𑓀𑒑𑒢𑒰, 𑒦𑒨𑒰𑒍𑒢 𑒪𑒑𑒻𑒋
𑒥𑒱𑒕𑒳𑒂 𑒏𑒹 𑒏𑒳𑒝𑓂𑒛𑒪 𑒮𑒢𑒮𑒢 𑒏𑒩𑒻𑒋।)

-𑒮𑒧𑒰𑒣𑓂𑒞-