गजेन्द्र ठाकुर- बालमंडली / किशोर-जगत (नाटक - कथा - पद्य)

𑒐𑒝𑓂𑒛-𑓗

𑒥𑒰𑒪𑒧𑓀𑒛𑒪𑒲 / 𑒏𑒱𑒬𑒼𑒩-𑒖𑒑𑒞
(𑒢𑒰𑒙𑒏 - 𑒏𑒟𑒰 - 𑒣𑒠𑓂𑒨)



𑒥𑒰𑒪𑒧𑓀𑒛𑒪𑒲 𑒏𑒱𑒬𑒼𑒩-𑒖𑒑𑒞


𑒥𑒰𑒪-𑒢𑒰𑒙𑒏
𑒁𑒣𑒰𑒪𑒰 𑒂𑒞𑓂𑒩𑒹𑒨𑒲 𑓗.𑓕
𑒠𑒰𑒢𑒫𑒲𑒩 𑒠𑒡𑒲𑒔𑒲 𑓗.𑓑𑓑
𑒥𑒰𑒪𑒏𑒟𑒰
𑒥𑓂𑒩𑒰𑒯𑓂𑒧𑒝 𑒂 𑒚𑒰𑒏𑒳𑒩𑒏 𑒏𑒟𑒰 𑓗.𑓑𑓕
𑒩𑒰𑒖𑒰 𑒁𑒢𑒮𑒰𑒩𑒲 𑓗.𑓒𑓔
𑒩𑒰𑒖𑒰 𑒜𑒼𑒪𑒢 𑓗.𑓒𑓖
𑒥𑒑𑒱𑒨𑒰𑒏 𑒑𑒰𑒕 𑓗.𑓓𑓑
𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩 𑓗.𑓓𑓔
𑒩𑒰𑒖𑒰 𑒮𑒪𑒯𑒹𑒮 𑓗.𑓓𑓕
𑒥𑒯𑒳𑒩𑒰 𑒑𑒼𑒜𑓃𑒱𑒢 𑒢𑒙𑒳𑒂𑒠𑒨𑒰𑒪 𑓗.𑓓𑓗
𑒧𑒯𑒳𑒂 𑒒𑒙𑒫𑒰𑒩𑒱𑒢 𑓗.𑓓𑓙
𑒛𑒰𑒏𑒴 𑒩𑒾𑒯𑒱𑒝𑒹𑒨 𑓗.𑓔𑓑
𑒧𑒴𑒩𑓂𑒐𑒰𑒡𑒱𑒩𑒰𑒖 𑓗.𑓔𑓓
𑒏𑒾𑒫𑒰 𑒂 𑒤𑒳𑒠𑓂𑒠𑒲 𑓗.𑓔𑓕
𑒢𑒻𑒏𑒰 𑒥𑒢𑒱𑒖𑒰𑒩𑒰 𑓗.𑓔𑓖
𑒛𑒼𑒏𑒲 𑒛𑒼𑒏𑒰 𑓗.𑓔𑓗
𑒩𑒒𑒳𑒢𑒲 𑒧𑒩𑒩 𑓗.𑓔𑓙
𑒖𑒙-𑒖𑒙𑒱𑒢 𑓗.𑓕𑓑
𑒥𑒞𑓂𑒞𑒴 𑓗.𑓕𑓓
𑒦𑒰𑒙-𑒦𑒰𑒙𑒱𑒢 𑓗.𑓕𑓔
𑒑𑒰𑓀𑒑𑒼𑒠𑒹𑒫𑒲𑒏 𑒦𑒑𑒞𑒰 𑓗.𑓕𑓕
𑒥𑒛𑓃 𑒮𑒳𑒐 𑒮𑒰𑒩 𑒣𑒰𑒍𑒪
𑒞𑒳𑒁 𑒞𑒲𑒩𑒹 𑓗.𑓕𑓖
𑒕𑒹𑒕𑒢 𑓗.𑓕𑓗
𑒑𑒩𑒲𑒥𑒢 𑒥𑒰𑒥𑒰 𑓗.𑓕𑓘
𑒪𑒰𑒪𑒧𑒻𑒢 𑒥𑒰𑒥𑒰 𑓗.𑓕𑓙
𑒑𑒼𑒢𑒴 𑒗𑒰 𑒂 𑒠𑒮 𑒚𑒼𑒣 𑒥𑒰𑒥𑒰 𑓗.𑓖𑓐
𑒫𑒩𑓂𑒝𑒧𑒰𑒪𑒰 𑒬𑒱𑒏𑓂𑒭𑒰: 𑒁𑓀𑒏𑒱𑒞𑒰 𑓗.𑓖𑓑
𑒥𑒰𑒪-𑒏𑒫𑒱𑒞𑒰
𑒙𑓂𑒩𑒹𑒢𑒏 𑒑𑒰𑒛𑓃𑒲 𑓗.𑓖𑓓
𑒏𑒹 𑒕𑒟𑒱 𑓗.𑓖𑓔
𑒩𑒰𑒖𑒰 𑒬𑓂𑒩𑒲 𑒁𑒢𑒳𑒩𑒢𑓂𑒫𑒖 𑒮𑒱𑓀𑒯 𑓗.𑓖𑓕
𑒮𑒴𑒞𑒪 𑓗.𑓖𑓖
𑒁𑒐𑒝𑓂𑒛 𑒦𑒰𑒩𑒞 𑓗.𑓖𑓗
𑒧𑒼𑒢𑒏 𑒖𑒛𑓃𑒱𑒧𑒹 𑓗.𑓖𑓘
𑒣𑒳𑒢𑓁 𑒮𑓂𑒧𑒵𑒞𑒱 𑓗.𑓖𑓙
𑒏𑒪𑒧 𑒑𑒰𑒕𑒲 𑓗.𑓗𑓐
𑒯𑒰𑒟𑒲𑒏 𑒧𑒳𑒿𑒯𑒧𑒹 𑒪𑒰𑒑𑒪 𑒣𑒰𑒃𑒣 𑓗.𑓗𑓑
𑒥𑒰𑒢𑒩 𑒩𑒰𑒖𑒰 𑓗.𑓗𑓒
𑒔𑒱𑒛𑓃𑒱𑒨𑒰𑒐𑒰𑒢𑒰 𑓗.𑓗𑓓
𑒖𑒧𑒥𑒼𑒢𑒲 𑓗.𑓗𑓔
𑒥𑒾𑒂 𑒚𑒹𑒯𑒳𑒢𑒱𑒨𑒰 𑒧𑒰𑒩𑒱 𑓗.𑓗𑓕
𑒙𑓂𑒩𑒱𑓀𑒑-𑒙𑓂𑒩𑒱𑓀𑒑-𑒙𑓂𑒩𑒱𑓀𑒑 𑓗.𑓗𑓖
𑒦𑒼𑒩𑒏 𑒥𑒮𑒰𑒞 𑓗.𑓗𑓗
𑒕𑒰𑒯𑒏 𑒏𑒩𑒞𑒥 𑓗.𑓗𑓘
𑒮𑒣𑒢𑒰 𑓗.𑓗𑓙
𑒏𑒼𑒃𑒩𑒲𑒏 𑒏𑒴𑒏𑒴 𑓗.𑓘𑓐
𑒬𑒱𑒞𑒪𑒣𑒰𑒙𑒲 𑓗.𑓘𑓑
𑒧𑒏𑒛𑓃𑒲𑒏 𑒖𑒰𑒪 𑓗.𑓘𑓒
𑒫𑒰𑒨𑒳𑒑𑒼𑒪𑒏 𑓗.𑓘𑓓
𑒯𑒰𑒟𑒲𑒏 𑒮𑒴𑒣 𑒮𑒢 𑒏𑒰𑒢 𑓗.𑓘𑓔
𑒕𑒳𑒙𑓂𑒙𑒲 𑓗.𑓘𑓕
𑒥𑒾𑒂 𑒑𑒹𑒪 𑒮𑒳𑒢𑒱 𑓗.𑓘𑓖
𑒧𑒱𑒟𑒱𑒪𑒰 𑓗.𑓘𑓗
𑒥𑒰𑒠𑒳𑒩 𑒮𑒼𑓀𑒮 𑓗.𑓘𑓘
𑒏𑒲? 𑒏𑒱𑒋? 𑒏𑒼𑒢𑒰? 𑒏𑒹? 𑓗.𑓘𑓙
𑒤𑒹𑒩 𑒂𑒋𑒪 𑒖𑒰𑒛𑓃 𑓗.𑓙𑓐
𑒂𑒑𑒰𑒿 𑓗.𑓙𑓑
𑒁𑓀𑒡 𑒫𑒱𑒬𑓂𑒫𑒰𑒮 𑓗.𑓙𑓒
𑒁𑒦𑓂𑒨𑒰𑒮 𑓗.𑓙𑓓
𑒂𑒿𑒐𑒱𑒏 𑒔𑒬𑓂𑒧𑒰 𑓗.𑓙𑓕
𑒞𑒲𑒢𑒹 𑒙𑒰 𑒁𑒕𑒱 𑒇𑒞𑒳 𑓗.𑓙𑓖
𑒠𑒩𑒱𑒠𑓂𑒩 𑓗.𑓙𑓗
𑒩𑒾𑒯 𑒢𑒯𑒱 𑒢𑒻𑒢 𑓗.𑓙𑓘
𑒖𑒴𑒞𑒰𑒏 𑒂𑒫𑒱𑒭𑓂𑒏𑒰𑒩 𑓗.𑓙𑓙
𑒥𑒴𑒜𑓃 𑒫𑒩 𑓗.𑓑𑓐𑓐
𑒩𑒱𑒣𑒹𑒨𑒩 𑓗.𑓑𑓐𑓑
𑒢𑒼𑒏𑒩 𑓗.𑓑𑓐𑓒
𑒏𑓂𑒪𑒰𑒮𑒧𑒹 𑒁𑒥𑒰𑒖 𑓗.𑓑𑓐𑓓
𑒋𑒮.𑒋𑒧.𑒋𑒮. 𑓗.𑓑𑓐𑓔
𑒙𑒲.𑒙𑒲. 𑓗.𑓑𑓐𑓕
𑒐𑒑𑒞𑒰 𑓗.𑓑𑓐𑓖
𑒏-𑒐 𑒮𑒿 𑒠𑒩𑓂𑒬𑒢 𑓗.𑓑𑓐𑓗
𑒔𑒼𑒩𑒏𑒹𑒿 𑒮𑒱𑒐𑒰𑒥𑒯 𑓗.𑓑𑓐𑓘
𑒢𑒩𑒏 𑒢𑒱𑒫𑒰𑒩𑒝 𑒔𑒞𑒳𑒩𑓂𑒠𑒬𑒲 𑓗.𑓑𑓐𑓙
𑒢𑒾𑒏𑒩𑒲 𑓗.𑓑𑓑𑓐
𑒧𑒩𑒏𑒩𑒲 𑒛𑒱𑒪𑒰𑒃𑒙 𑓗.𑓑𑓑𑓑
𑒠𑒲𑒨𑒰𑒥𑒰𑒞𑒲 𑓗.𑓑𑓑𑓒
𑒤𑓂𑒩𑒻𑒏𑓂𑒔𑒩 𑓗.𑓑𑓑𑓓
𑒥𑒰𑒣𑒏𑒹𑒿 𑒢𑒼𑒬𑒱 𑒢𑒯𑒱
𑒦𑒹𑒙𑒪𑒢𑓂𑒯𑒱 𑓗.𑓑𑓑𑓕
𑒠𑒯𑒹𑒖 𑓗.𑓑𑓑𑓖
𑒥𑒹𑒔𑒻𑒢 𑒢𑒯𑒱 𑒢𑒱𑒔𑒻𑒢 𑒩𑒯𑒴 𑓗.𑓑𑓑𑓘
𑒯𑒼𑒃 𑒁𑒕𑒱 𑒖𑒹 𑒯𑒳𑒧
𑒪𑒳𑒏𑓂𑒐𑒲 𑒢𑒯𑒱 𑒕𑒲 𑓗.𑓑𑓑𑓙
𑒟𑒪-𑒟𑒪 𑓗.𑓑𑓒𑓐
𑒏𑓂𑒩𑒱𑒏𑒹𑒙-𑒤𑒲𑒪𑓂𑒛𑒱𑓀𑒑 𑓗.𑓑𑓒𑓑
𑒧𑒻𑒙𑓂𑒩𑒱𑒏 𑒣𑓂𑒪𑒏 𑓗.𑓑𑓒𑓒
𑒏𑒰𑒿𑒏𑒛𑓃𑒳 𑓗.𑓑𑓒𑓓
𑒏𑒻𑒣𑓂𑒙𑒢 𑓗.𑓑𑓒𑓔
𑒠𑒴𑒡 𑓗.𑓑𑓒𑓕
𑒁𑒙𑒹𑓀𑒛𑒹𑓀𑒮 𑓗.𑓑𑓒𑓖
𑒬𑒼-𑒤𑒙𑒏𑓂𑒏𑒰 𑓗.𑓑𑓒𑓗
𑒦𑒰𑒩𑒧𑒹 𑒧𑒰𑒙𑒱 𑓗.𑓑𑓒𑓘
𑒏𑓀𑒖𑒴𑒮 𑓗.𑓑𑓒𑓙
𑒣𑒰𑒃 𑓗.𑓑𑓓𑓐
𑒁𑒮𑒞𑓂𑒨 𑓗.𑓑𑓓𑓑
𑒮𑒧𑒳𑒠𑓂𑒩𑒲 𑓗.𑓑𑓓𑓒
𑒑𑒰𑒧 𑓗.𑓑𑓓𑓓
𑒪𑒼𑒪𑒲 𑓗.𑓑𑓓𑓔
𑒞𑒏𑒪𑒰𑒯𑒰 𑒠𑒱𑒢 𑓗.𑓑𑓓𑓕
𑒥𑒱𑒏𑒾𑒂 𑓗.𑓑𑓓𑓖
𑒑𑒠𑓂𑒠𑒩𑒱𑒏 𑒦𑒰𑒞 𑓗.𑓑𑓓𑓗
𑒋𑒏𑒙𑒰 𑒂𑒩 𑒏𑒼𑒣𑒩 𑓗.𑓑𑓓𑓘
𑒧𑒯𑒲𑒮 𑒣𑒩 𑒫𑒲.𑒂𑒃.𑒣𑒲. 𑓗.𑓑𑓓𑓙
𑒑𑒣𑓂𑒣-𑒮𑒩𑒏𑓂𑒏𑒰 𑓗.𑓑𑓔𑓐
𑒤𑒪𑒢𑒰𑒏 𑒥𑒹𑒙𑒰 𑓗.𑓑𑓔𑓑
𑒙𑓂𑒩𑒰𑓀𑒮𑒤𑒩 𑓗.𑓑𑓔𑓒
𑒧𑒖𑒴𑒩𑒲 𑒢𑒯𑒱 𑒧𑒰𑒿𑒑𑒯 𑓗.𑓑𑓔𑓓
𑒠𑒼𑒭𑒲 𑓗.𑓑𑓔𑓔
𑒪𑓀𑒠𑒢𑒏 𑒐𑒱𑒮𑓂𑒮𑒰 𑓗.𑓑𑓔𑓕
𑒣𑓂𑒩𑒟𑒧 𑒖𑒢𑒫𑒩𑒲 𑓗.𑓑𑓔𑓖
𑒂𑒤𑒱𑒮𑒧𑒹 𑒦𑒩𑒱 𑒩𑒰𑒞𑒱 𑒥𑒢𑓂𑒠 𑓗.𑓑𑓔𑓗
𑒢𑒰𑒢𑒲𑒏 𑒣𑒞𑓂𑒩 𑓗.𑓑𑓔𑓙
𑒏𑒹𑒫𑒰𑒛𑓃 𑒥𑒢𑓂𑒠 𑓗.𑓑𑓕𑓐
𑒖𑒹𑒚𑒰𑓀𑒬 𑓗.𑓑𑓕𑓑
𑒮𑒰𑒠𑒰 𑒂𑒏𑒱 𑒩𑓀𑒑𑒲𑒢 𑓗.𑓑𑓕𑓒
𑒖𑒼𑓀𑒏𑒯𑒲 𑒣𑒼𑒐𑒩𑒱𑒧𑒹 𑒦𑒩𑒱
𑒩𑒰𑒞𑒱 𑓗.𑓑𑓕𑓓
𑒑𑒻𑒮 𑒮𑒱𑒪𑒱𑒝𑓂𑒛𑒩𑒏 𑒔𑒼𑒩𑒱 𑓗.𑓑𑓕𑓔
𑒤𑒻𑒏𑓂𑒮 𑓗.𑓑𑓕𑓖
𑒠𑒲𑒨𑒰-𑒥𑒰𑒞𑒲 𑓗.𑓑𑓕𑓗
𑒃𑒙𑒰𑒪𑒱𑒨𑒢 𑒮𑒻𑒪𑒴𑒢 𑓗.𑓑𑓕𑓘
𑒬𑒫 𑒢𑒯𑒱 𑒅𑒚𑒞 𑓗.𑓑𑓕𑓙
𑒁𑒞𑒱𑒔𑒰𑒩 𑓗.𑓑𑓖𑓐
𑒩𑒥𑒛𑓃 𑒐𑒰𑒆 𑓗.𑓑𑓖𑓑
𑒥𑒰𑒖𑒰 𑒁𑒯𑒰𑒿 𑒥𑒖𑒰𑒆 𑓗.𑓑𑓖𑓒
𑒣𑒱𑒝𑓂𑒛𑒬𑓂𑒨𑒰𑒧 𑓗.𑓑𑓖𑓓
𑒣𑒰𑒿𑒔 𑒣𑒰𑒃𑒏 𑒪𑒰𑒪𑒕𑒛𑓃𑒲 𑓗.𑓑𑓖𑓔
𑒔𑒼𑒩𑒳𑒏𑓂𑒏𑒰 𑒫𑒱𑒫𑒰𑒯 𑓗.𑓑𑓖𑓕
𑒦𑓂𑒩𑒰𑒞𑒵𑒠𑓂𑒫𑒱𑒞𑒲𑒨𑒰 𑓗.𑓑𑓖𑓖
𑒢𑒫-𑒒𑒩𑒰𑒩𑒲 𑓗.𑓑𑓖𑓗
𑒩𑒱𑒏𑓂𑒞 𑓗.𑓑𑓖𑓘
𑒣𑓂𑒩𑒫𑒰𑒮𑒲 𑓗.𑓑𑓖𑓙
𑒫𑒹𑒠 𑓗.𑓑𑓗𑓐
𑒔𑒼𑒩𑒱 𑓗.𑓑𑓗𑓑
𑒯𑒼𑒪𑒲 𑓗.𑓑𑓗𑓒
𑒥𑒳𑒠𑓂𑒡 𑓗.𑓑𑓗𑓓
𑒏𑒼𑒚𑒱𑒨𑒰 𑒣𑒕𑒥𑒰𑒃 𑒙𑒼𑒪 𑓗.𑓑𑓗𑓕
𑒥𑒳𑒔𑓂𑒔𑒲-𑒥𑒰𑒅 𑓗.𑓑𑓗𑓖
𑒂𑒏𑒏 𑒠𑒴𑒡 𑓗.𑓑𑓗𑓘
𑒏𑒹𑒮𑒩 𑒬𑓂𑒫𑒹𑒞 𑒯𑒩𑒱𑒞
𑒞𑓂𑒩𑒱𑒫𑒰𑒩𑓂𑒝𑒱𑒏 𑓗.𑓑𑓗𑓙


𑒁𑒣𑒰𑒪𑒰 𑒂𑒞𑓂𑒩𑒹𑒨𑒲
𑒣𑒰𑒞𑓂𑒩: 𑒁𑒣𑒰𑒪𑒰: 𑒇𑒑𑒫𑒻𑒠𑒱𑒏 𑒇𑒔𑒰𑒏 𑒪𑒹𑒐𑒱𑒏𑒰
𑒁𑒞𑓂𑒩𑒱: 𑒁𑒣𑒰𑒪𑒰𑒏 𑒣𑒱𑒞𑒰
𑒫𑒻𑒠𑓂𑒨 1,2,3
𑒏𑒵𑒬𑒰𑒬𑓂𑒫: 𑒁𑒣𑒰𑒪𑒰𑒏 𑒣𑒞𑒱।
𑒫𑒹𑒭𑒦𑒴𑒭𑒰:-
𑒅𑒞𑓂𑒞𑒩𑒲𑒨 𑒫𑒮𑓂𑒞𑓂𑒩 (𑒣𑒳𑒩𑒳𑒭), 𑒫𑒪𑓂𑒏𑒪, 𑒖𑒴𑒯𑒲𑒏 𑒧𑒰𑒪𑒰 (𑒁𑒣𑒰𑒪𑒰𑒏 𑒏𑒹𑒬𑒧𑒹), 𑒠𑒝𑓂𑒛।
𑒧𑓀𑒔 𑒮𑒖𑓂𑒖𑒰 :-
𑒮𑒯𑒏𑒰𑒩-𑒏𑒳𑒘𑓂𑒖 (𑒂𑒧𑒏 𑒑𑒰𑒕𑒲), 𑒫𑒹𑒠𑒲, 𑒯𑒫𑒱𑒩𑓂𑒑𑒢𑓂𑒡, 𑒩𑒟𑒏 𑒕𑒱𑒠𑓂𑒩, 𑒨𑒳𑒑𑒏 𑒕𑒱𑒠𑓂𑒩, 𑒮𑒼𑒗𑒰𑒿𑒧𑒹 𑒮𑒰𑒯𑒲, 𑒑𑒼𑒯𑒱 𑒂 𑒑𑒱𑒩𑒑𑓃𑒱𑒙।

𑒠𑒵𑒬𑓂𑒨 𑒋𑒏
(𑒂𑒧𑒏 𑒑𑒰𑒕𑒲𑒏 𑒧𑒡𑓂𑒨 𑒋𑒏 𑒑𑒼𑒙 𑒥𑒰𑒪𑒱𑒏𑒰 𑒂 𑒥𑒰𑒪𑒏)।
𑒥𑒰𑒪𑒱𑒏𑒰: 𑒯𑒧𑒩 𑒢𑒰𑒧 𑒁𑒣𑒰𑒪𑒰 𑒁𑒕𑒱। 𑒯𑒧 𑒇𑒭𑒱 𑒁𑒞𑓂𑒩𑒱𑒏 𑒣𑒳𑒞𑓂𑒩𑒲 𑒕𑒲।𑒁𑒯𑒰𑒿 𑒏𑒹 𑒕𑒲 𑒇𑒭𑒱 𑒥𑒰𑒪𑒏।
𑒥𑒰𑒪𑒏: 𑒯𑒧 𑒬𑒱𑒏𑓂𑒭𑒰𑒏 𑒯𑒹𑒞𑒳 𑒂𑒨𑒪 𑒕𑒲। 𑒇𑒭𑒱 𑒁𑒞𑓂𑒩𑒱 𑒏𑒞𑒋 𑒕𑒟𑒱।
𑒁𑒣𑒰𑒪𑒰: 𑒇𑒭𑒱 𑒖𑒪𑒰𑒬𑒨 𑒠𑒱𑒬𑒱 𑒢𑒯𑒨𑒥𑒰𑒏 𑒯𑒹𑒞𑒳 𑒑𑒹𑒪 𑒕𑒟𑒱, 𑒁𑒥𑒱𑒞𑒹 𑒯𑒼𑒨𑒞𑒰𑒯।
(𑒞𑒐𑒢𑒯𑒱 𑒠𑒯𑒱𑒢 𑒯𑒰𑒟𑒧𑒹 𑒏𑒧𑓀𑒛𑒪 𑒂 𑒫𑒰𑒧 𑒯𑒰𑒟𑒧𑒹 𑒫𑒪𑓂𑒏𑒪 𑒪𑒹𑒢𑒹 𑒧𑒯𑒩𑓂𑒭𑒱 𑒁𑒞𑓂𑒩𑒱𑒏 𑒣𑓂𑒩𑒫𑒹𑒬।)
𑒁𑒞𑓂𑒩𑒱: 𑒣𑒳𑒞𑓂𑒩𑒲 𑒄 𑒏𑒼𑒢 𑒥𑒰𑒪𑒏 𑒂𑒨𑒪 𑒕𑒟𑒱।
𑒁𑒣𑒰𑒪𑒰: 𑒇𑒭𑒱𑒫𑒩। 𑒂𑒬𑓂𑒩𑒧𑒫𑒰𑒮𑒲𑒏 𑒮𑓀𑒐𑓂𑒨𑒰𑒧𑒹 𑒋𑒏 𑒑𑒼𑒙 𑒫𑒵𑒠𑓂𑒡𑒱 𑒯𑒼𑒨𑒞। 𑒄 𑒥𑒰𑒪𑒏 𑒬𑒱𑒏𑓂𑒭𑒰𑒏 𑒯𑒹𑒞𑒳...
𑒥𑒰𑒪𑒏: 𑒢𑒯𑒱। 𑒯𑒧𑒩 𑒁𑒐𑒢 𑒅𑒣𑒢𑒨𑒢 𑒢𑒯𑒱 𑒦𑒹𑒪 𑒁𑒕𑒱। 𑒯𑒧 𑒁𑒐𑒢 𑒧𑒰𑒝𑒫𑒏 𑒥𑒢𑒱 𑒅𑒣𑒰𑒡𑓂𑒨𑒰𑒨𑒏 𑒪𑒑 𑒬𑒱𑒏𑓂𑒭𑒰𑒏 𑒯𑒹𑒞𑒳 𑒂𑒨𑒪 𑒕𑒲। 𑒄 𑒠𑒹𑒐𑒴 𑒯𑒧𑒩 𑒯𑒰𑒟𑒏 𑒠𑒝𑓂𑒛। 𑒯𑒧 𑒠𑒝𑓂𑒛- 𑒧𑒰𑒝𑒫𑒏 𑒥𑒢𑒱 𑒮𑒦 𑒠𑒱𑒢 𑒁𑒣𑒢 𑒑𑒰𑒧𑒮𑒿 𑒂𑒨𑒥 𑒂 𑒮𑒰𑒿𑒗𑒧𑒹 𑒔𑒪𑒱 𑒖𑒰𑒨𑒥। 𑒯𑒧 𑒫𑒹𑒠 𑒧𑓀𑒞𑓂𑒩𑒮𑒿 𑒁𑒣𑒩𑒱𑒔𑒱𑒞 𑒁𑒢𑒵𑒔 𑒕𑒲।
𑒁𑒞𑓂𑒩𑒱: 𑒥𑒹𑒬 𑒞𑒐𑒢 𑒁𑒯𑒰𑒿 𑒯𑒧𑒩 𑒬𑒱𑒭𑓂𑒨𑒏 𑒩𑒴𑒣𑒧𑒹 𑒣𑓂𑒩𑒮𑒱𑒠𑓂𑒡 𑒯𑒼𑒨𑒥। 𑒠𑒱𑒢𑒏 𑒣𑒴𑒩𑓂𑒫 𑒦𑒰𑒑 𑒣𑓂𑒩𑒯𑒩𑒝 𑒫𑒱𑒠𑓂𑒨𑒰𑒏 𑒑𑓂𑒩𑒯𑒝𑒏 𑒯𑒹𑒞𑒳 𑒩𑒰𑒐𑒪 𑒑𑒹𑒪 𑒁𑒕𑒱। 𑒯𑒧 𑒖𑒹 𑒧𑓀𑒞𑓂𑒩 𑒏𑒯𑒥 𑒞𑒏𑒩𑒰 𑒁𑒯𑒰𑒿 𑒮𑓂𑒧𑒩𑒝 𑒩𑒰𑒐𑒥। 𑒣𑒳𑒢𑓁 𑒯𑒧 𑒁𑒯𑒰𑒿𑒏 𑒫𑒱𑒡𑒱𑒣𑒴𑒩𑓂𑒫𑒏 𑒅𑒣𑒢𑒨𑒢 𑒏𑒩𑒥𑒰𑒨 𑒮𑓀𑒑 𑒪𑓄 𑒂𑒢𑒥।
𑒥𑒰𑒪𑒏: 𑒫𑒱𑒣𑒬𑓂𑒔𑒱𑒞 𑒑𑒳𑒩𑒳𑒏 𑒔𑒩𑒝𑒧𑒹 𑒣𑓂𑒩𑒝𑒰𑒧।
(𑒣𑒙𑒰𑒏𑓂𑒭𑒹𑒣)
𑒠𑒵𑒬𑓂𑒨 𑒠𑒴
(𑒅𑒣𑒢𑒨𑒢 𑒮𑓀𑒮𑓂𑒏𑒰𑒩𑒏 𑒁𑓀𑒞𑒱𑒧 𑒠𑒵𑒬𑓂𑒨। 𑒁𑒣𑒰𑒪𑒰 𑒂 𑒏𑒱𑒕𑒳 𑒂𑒢 𑒇𑒭𑒱 𑒥𑒰𑒪𑒏 𑒥𑒰𑒪𑒱𑒏𑒰𑒏 𑒅𑒣𑒢𑒨𑒢 𑒮𑓀𑒮𑓂𑒏𑒰𑒩 𑒏𑒩𑒰𑒍𑒪 𑒑𑒹𑒪 𑒁𑒕𑒱।)
𑒁𑒞𑓂𑒩𑒱: 𑒁𑒣𑒰𑒪𑒰। 𑒂𑒥 𑒁𑒯𑒰𑒿𑒏 𑒁𑒮𑒪 𑒬𑒱𑒏𑓂𑒭𑒰 𑒂 𑒫𑒱𑒠𑓂𑒨𑒰 𑒬𑒳𑒩𑒴 𑒯𑒼𑒨𑒞।(𑒣𑒳𑒢𑓁 𑒂𑒢 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦𑒏 𑒠𑒱𑒬𑒱 𑒒𑒴𑒧𑒱।) 𑒁𑒯𑒰𑒿 𑒮𑒦𑒏𑒹𑒿 𑒮𑒰𑒫𑒱𑒞𑓂𑒩𑒲 𑒧𑓀𑒞𑓂𑒩𑒏 𑒢𑒱𑒨𑒧𑒱𑒞 𑒣𑒰𑒚 𑒏𑒩𑒥𑒰𑒏 𑒔𑒰𑒯𑒲। 𑓇 𑒦𑒴𑒩𑓂𑒦𑒳𑒫𑓁 𑒮𑓂𑒫𑓁 𑒞𑒞𑓂𑒮𑒫𑒱𑒞𑒳𑒩𑓂𑒫𑒩𑒹𑒝𑓂𑒨𑓀 𑒦𑒩𑓂𑒑𑒼 𑒠𑒹𑒫𑒮𑓂𑒨 𑒡𑒲𑒧𑒯𑒱 𑒡𑒱𑒨𑒼 𑒨𑒼𑒢𑓁 𑒣𑓂𑒩𑒔𑒼𑒠𑒨𑒰𑒞𑓂। 𑒮𑒫𑒱𑒞𑒰- 𑒖𑒹 𑒮𑒦𑒏 𑒣𑓂𑒩𑒹𑒩𑒏 𑒕𑒟𑒱- 𑒏𑒹𑒩 𑒫𑒩𑒹𑒝𑓂𑒨- 𑒮𑒦𑒏𑒹𑒿 𑒢𑒲𑒏 𑒪𑒰𑒑𑒨 𑒥𑒪𑒰 𑒞𑒹𑒖- 𑒣𑒵𑒟𑓂𑒫𑒲, 𑒁𑓀𑒞𑒩𑒱𑒏𑓂𑒭 𑒂 𑒮𑓂𑒫𑒩𑓂𑒑𑒪𑒼𑒏-𑒮𑒩𑓂𑒫𑒼𑒔𑓂𑒔 𑒁𑒏𑒰𑒬-𑒧𑒹 𑒣𑒮𑒩𑒪 𑒁𑒕𑒱। 𑒯𑒧 𑒍𑒏𑒩 𑒮𑓂𑒧𑒩𑒝 𑒏𑒩𑒻𑒞 𑒕𑒲। 𑒍 𑒯𑒧𑒩 𑒥𑒳𑒠𑓂𑒡𑒱 𑒂 𑒧𑒹𑒡𑒰𑒏𑒹𑒿 𑒣𑓂𑒩𑒹𑒩𑒱𑒞 𑒏𑒩𑒟𑒳।
𑒁𑒣𑒰𑒪𑒰: 𑒣𑒱𑒞𑒵𑒫𑒩। “𑓇 𑒢𑒧𑓁 𑒮𑒱𑒠𑓂𑒡𑒧” 𑒏𑒹𑒩 𑒮𑓀𑒑 𑒫𑒱𑒠𑓂𑒨𑒰𑒩𑒧𑓂𑒦𑒏 𑒣𑒴𑒩𑓂𑒫 𑒬𑒱𑒏𑓂𑒭𑒰𑒏 𑒁𑓀𑒞𑒩𑓂𑒑𑒞 𑒏𑒲 𑒮𑒦 𑒣𑒜𑓃𑒰𑒍𑒪 𑒖𑒰𑒨𑒞। 𑒁𑒞𑓂𑒩𑒱: 𑒫𑒩𑓂𑒝, 𑒁𑒏𑓂𑒭𑒩-𑒮𑓂𑒫𑒩, 𑒧𑒰𑒞𑓂𑒩𑒰- 𑒯𑓂𑒩𑓂𑒮𑓂𑒫, 𑒠𑒲𑒩𑓂𑒒 𑒂 𑒣𑓂𑒪𑒳𑒞, 𑒥𑒪𑒰𑒒𑒰𑒞- 𑒅𑒠𑒰𑒞𑓂𑒞, 𑒁𑒢𑒳𑒠𑒰𑒞𑓂𑒞, 𑒮𑓂𑒫𑒩𑒱𑒞, 𑒬𑒳𑒠𑓂𑒡 𑒅𑒔𑓂𑒔𑒰𑒩𑒝, 𑒁𑒏𑓂𑒭𑒩𑒏 𑒏𑓂𑒩𑒧𑒱𑒏 𑒫𑒱𑒢𑓂𑒨𑒰𑒮- 𑒫𑒩𑓂𑒞𑓂𑒞𑒢𑒲, 𑒣𑒜𑓃𑒥𑒰𑒏 𑒂 𑒥𑒖𑒥𑒰𑒏 𑒬𑒻𑒪𑒲, 𑒋𑒏𑒯𑒱 𑒫𑒩𑓂𑒝𑒏𑒹𑒿 𑒥𑒖𑒥𑒰𑒏 𑒏𑒻𑒏𑒙𑒰 𑒣𑓂𑒩𑒏𑒰𑒩, 𑒄 𑒮𑒦 𑒬𑒱𑒏𑓂𑒭𑒰𑒏 𑒁𑓀𑒞𑒩𑓂𑒑𑒞 𑒮𑒱𑒐𑒰𑒍𑒪 𑒖𑒰𑒨𑒞। 𑒮𑒰𑒧 𑒮𑓀𑒞𑒰𑒢- 𑒖𑒹𑒏𑒱 𑒮𑒰𑒧𑒰𑒢𑓂𑒨 𑒑𑒰𑒢 𑒁𑒕𑒱- 𑒏𑒹𑒩 𑒧𑒰𑒡𑓂𑒨𑒧𑒮𑒿 𑒬𑒱𑒏𑓂𑒭𑒰 𑒠𑒹𑒪 𑒖𑒰𑒨𑒞। 𑒁𑒣𑒰𑒪𑒰: 𑒑𑒳𑒩𑒳𑒫𑒩। 𑒂𑒬𑓂𑒩𑒧𑒏 𑒢𑒱𑒨𑒧𑒮𑒿 𑒮𑒹𑒯𑒼 𑒁𑒫𑒑𑒞 𑒏𑒩𑒰 𑒠𑒹𑒪 𑒖𑒰𑒨।
𑒁𑒞𑓂𑒩𑒱: 𑒫𑒢𑒏 𑒣𑓂𑒩𑒰𑒝𑒲 𑒁𑒫𑒡𑓂𑒨 𑒕𑒟𑒱। 𑒂𑒯𑒰𑒩𑒰𑒩𑓂𑒟 𑒤𑒪 𑒣𑒴𑒩𑓂𑒫-𑒮𑓀𑒡𑓂𑒨𑒰𑒧𑒹 𑒫𑒢-𑒫𑒵𑒏𑓂𑒭𑒮𑒿 𑒋𑒏𑒞𑓂𑒩 𑒏𑒋𑒪 𑒖𑒰𑒨𑒞। 𑒣𑓂𑒩𑒰𑒞𑓁 𑒂 𑒮𑒰𑒨𑓀 𑒁𑒑𑓂𑒢𑒱𑒯𑒼𑒞𑓂𑒩 𑒯𑒼𑒨𑒞, 𑒞𑒰𑒯𑒱 𑒯𑒹𑒞𑒳 𑒮𑒧𑒱𑒡𑒰, 𑒏𑒳𑒬, 𑒒𑒵𑒞-𑒂𑒖𑓂𑒨, 𑒋𑒫𑒧𑓂 𑒠𑒳𑒑𑓂𑒡𑒏 𑒫𑓂𑒨𑒫𑒮𑓂𑒟𑒰 𑒣𑓂𑒩𑒞𑒱𑒠𑒱𑒢 𑒧𑒱𑒪𑒱-𑒖𑒳𑒪𑒱 𑒏𑒨 𑒏𑒋𑒪 𑒖𑒰𑒨𑒞। 𑒯𑒩𑒱𑒝𑒏𑒹𑒿 𑒢𑒱𑒩𑓂𑒫𑒱𑒒𑓂𑒢 𑒂𑒬𑓂𑒩𑒧𑒧𑒹 𑒙𑒯𑒪𑒥𑒰𑒏 𑒁𑒢𑒳𑒧𑒞𑒱 𑒁𑒕𑒱। 𑒏𑒠𑒧𑓂𑒥, 𑒁𑒬𑒼𑒏, 𑒏𑒹𑒞𑒏𑒲, 𑒧𑒡𑒴𑒏, 𑒫𑒏𑒳𑒪 𑒂 𑒮𑒴𑒠𑒏𑒰𑒩𑒏 𑒑𑒰𑒕𑒏 𑒧𑒡𑓂𑒨 𑒋𑒯𑒱 𑒂𑒬𑓂𑒩𑒧𑒧𑒹 𑒨𑒠𑓂𑒨𑒣𑒱 𑒏𑒵𑒭𑒱𑒏 𑒁𑒢𑒳𑒧𑒞𑒱 𑒢𑒯𑒱 𑒁𑒕𑒱, 𑒣𑒩𑒘𑓂𑒔 𑒁𑒏𑒵𑒭𑓂𑒨 𑒦𑒴𑒧𑒱 𑒣𑒩 𑒮𑓂𑒫𑒞𑓁 𑒂 𑒥𑒲𑒨𑒰𑒏 𑒠𑓂𑒫𑒰𑒩𑒰 𑒅𑒞𑓂𑒣𑒢𑓂𑒢 𑒁𑒏𑒵𑒭𑓂𑒙𑒣𑒔𑓂𑒨 𑒁𑒢𑓂𑒢𑒏 𑒣𑓂𑒩𑒨𑒼𑒑 𑒦𑓄 𑒮𑒏𑒻𑒕।
𑒥𑒰𑒪𑒏: 𑒯𑒧 𑒮𑒦 𑒋𑒏𑒯𑒱 𑒫𑒱𑒠𑓂𑒨𑒰𑒣𑒲𑒚𑒏 𑒩𑒯𑒥𑒰𑒏 𑒏𑒰𑒩𑒝 𑒮𑒞𑒲𑒩𑓂𑒟𑓂𑒨 𑒕𑒲। 𑒑𑒳𑒩𑒳𑒫𑒩। 𑒠𑒝𑓂𑒛 𑒂 𑒏𑒧𑒝𑓂𑒛𑒪𑒏 𑒁𑒞𑒱𑒩𑒱𑒏𑓂𑒞𑓂𑒞 𑒏𑒱𑒕𑒳 𑒩𑒐𑒥𑒰𑒏 𑒁𑒢𑒳𑒧𑒞𑒱 𑒁𑒕𑒱?
𑒁𑒞𑓂𑒩𑒱: 𑒏𑒙𑒱 𑒧𑒹𑒐𑒪𑒰 𑒂 𑒧𑒵𑒑𑒔𑒩𑓂𑒧 𑒡𑒰𑒩𑒝 𑒏𑒩𑒴 𑒂 𑒁𑒣𑒢𑒰𑒏𑒹𑒿 𑒋𑒯𑒱 𑒨𑒼𑒑𑓂𑒨 𑒥𑒢𑒰𑒆 𑒖𑒰𑒯𑒱𑒮𑒿 𑒠𑓂𑒫𑒰𑒠𑒬𑒫𑒩𑓂𑒭𑒲𑒨 𑒨𑒖𑓂𑒘 𑒮𑒞𑓂𑒩𑒏 𑒯𑒹𑒞𑒳 𑒁𑒯𑒰𑒿 𑒞𑒻𑒨𑒰𑒩 𑒦𑓄 𑒮𑒏𑒲 𑒂 𑒧𑒯𑒰𑒨𑒖𑓂𑒘𑒏 𑒮𑒧𑒰𑒣𑓂𑒞𑒱𑒏 𑒣𑒬𑓂𑒔𑒰𑒞𑓂 𑒥𑓂𑒩𑒯𑓂𑒧𑒼𑒠𑒨, 𑒫𑒱𑒠𑒟 𑒣𑒩𑒱𑒭𑒠 𑒂 𑒅𑒣𑒢𑒱𑒭𑒠 𑒍 𑒁𑒩𑒝𑓂𑒨 𑒮𑓀𑒮𑒠𑒧𑒹 𑒑𑓀𑒦𑒲𑒩 𑒫𑒱𑒭𑒨 𑒣𑒩 𑒔𑒩𑓂𑒔𑒰 𑒏𑓄 𑒮𑒏𑒲।
(𑒣𑒙𑒰𑒏𑓂𑒭𑒹𑒣)
𑒠𑒵𑒬𑓂𑒨 𑒞𑒲𑒢
(𑒏𑒳𑒙𑒲𑒩𑒧𑒹 𑒇𑒭𑒱 𑒁𑒞𑓂𑒩𑒱 𑒏𑒻𑒏 𑒑𑒼𑒙 𑒫𑒻𑒠𑓂𑒨𑒏 𑒮𑓀𑒑 𑒫𑒱𑒔𑒰𑒩-𑒫𑒱𑒧𑒩𑓂𑒬 𑒏𑒋 𑒩𑒯𑒪 𑒕𑒟𑒱।)
𑒁𑒞𑓂𑒩𑒱: 𑒫𑒻𑒠𑓂𑒨𑒑𑒝। 𑒥𑒰𑒪𑒱𑒏𑒰 𑒁𑒣𑒰𑒪𑒰𑒏 𑒬𑒩𑒲𑒩𑒧𑒹 𑒞𑓂𑒫𑒏𑓂 𑒩𑒼𑒑𑒏 𑒪𑒏𑓂𑒭𑒝 𑒂𑒥𑒱 𑒩𑒯𑒪 𑒁𑒕𑒱। 𑒬𑒩𑒲𑒩 𑒣𑒩 𑒬𑓂𑒫𑒹𑒞 𑒏𑒳𑒭𑓂𑒚𑒏 𑒪𑒏𑓂𑒭𑒝 𑒠𑒹𑒐𑒥𑒰𑒧𑒹 𑒂𑒥𑒱 𑒩𑒯𑒪 𑒁𑒕𑒱।
𑒫𑒻𑒠𑓂𑒨 1: 𑒏𑒞𑒥𑒰 𑒧𑒯𑒱𑒢𑒰𑒮𑒿 𑒏𑒞𑒹𑒏𑒼 𑒎𑒭𑒡𑒱𑒏 𑒢𑒱𑒩𑓂𑒧𑒰𑒝 𑒏𑒋 𑒥𑒰𑒪𑒱𑒏𑒰𑒏𑒹𑒿 𑒐𑒼𑒂𑒍𑒪 𑒂 𑒪𑒹𑒣𑒢𑒏 𑒯𑒹𑒞𑒳 𑒮𑒹𑒯𑒼 𑒠𑒹𑒪।
𑒁𑒞𑓂𑒩𑒱: 𑒁𑒣𑒰𑒪𑒰 𑒂𑒥 𑒫𑒱𑒫𑒰𑒯𑒨𑒼𑒑𑓂𑒨 𑒦𑓄 𑒩𑒯𑒪 𑒕𑒟𑒱। 𑒯𑒳𑒢𑒏𑒰 𑒯𑒹𑒞𑒳 𑒨𑒼𑒑𑓂𑒨 𑒫𑒩 𑒮𑒹𑒯𑒼 𑒞𑒰𑒏𑒱 𑒩𑒯𑒪 𑒕𑒲।
𑒫𑒻𑒠𑓂𑒨 2: 𑒏𑒵𑒬𑒰𑒬𑓂𑒫𑒏 𑒫𑒱𑒭𑒨𑒧𑒹 𑒮𑒳𑒢𑒪 𑒁𑒕𑒱, 𑒖𑒹 𑒍 𑒮𑒩𑓂𑒫𑒑𑒳𑒝𑒮𑓀𑒣𑒢𑓂𑒢 𑒕𑒟𑒱 𑒂 𑒫𑒵𑒠𑓂𑒡 𑒧𑒰𑒞𑒰-𑒣𑒱𑒞𑒰𑒏 𑒮𑒹𑒫𑒰𑒧𑒹 𑒪𑒰𑒑𑒪 𑒕𑒟𑒱। 𑒍 𑒁𑒣𑒢 𑒁𑒣𑒰𑒪𑒰𑒏 𑒯𑒹𑒞𑒳 𑒮𑒩𑓂𑒫𑒟𑒰 𑒅𑒣𑒨𑒳𑒏𑓂𑒞 𑒫𑒩 𑒯𑒼𑒨𑒞𑒰𑒯।
𑒁𑒞𑓂𑒩𑒱: 𑒞𑒐𑒢 𑒠𑒹𑒩𑒲 𑒏𑒟𑒲𑒏। 𑒁𑒣𑒢𑒹 𑒮𑒦 𑒅𑒔𑒱𑒞 𑒠𑒱𑒢 𑒯𑒳𑒢𑒏𑒩 𑒧𑒰𑒞𑒰-𑒣𑒱𑒞𑒰𑒮𑒿 𑒮𑓀𑒣𑒩𑓂𑒏 𑒏𑒩𑒴।
𑒠𑒵𑒬𑓂𑒨 𑒔𑒰𑒩𑒱
(𑒂𑒬𑓂𑒩𑒧𑒏 𑒮𑒯𑒏𑒰𑒩-𑒏𑒳𑒘𑓂𑒖𑒧𑒹 𑒫𑒻𑒫𑒰𑒯𑒱𑒏 𑒫𑒱𑒡𑒱𑒏 𑒁𑒢𑒳𑒭𑓂𑒚𑒰𑒢 𑒁𑒕𑒱। 𑒫𑒹𑒠𑒲 𑒥𑒢𑒰𑒍𑒪 𑒑𑒹𑒪 𑒁𑒕𑒱 𑒂 𑒍𑒞𑒨 𑒇𑒞𑓂𑒫𑒱𑒖 𑒪𑒼𑒏𑒢𑒱 𑒖𑒫-𑒞𑒲𑒪 𑒏𑒹𑒩 𑒯𑒫𑒢 𑒏𑓄 𑒩𑒯𑒪 𑒕𑒟𑒱।)
𑒁𑒣𑒰𑒪𑒰 (𑒧𑒼𑒢𑒹 𑒧𑒼𑒢): 𑒧𑒰𑒟 𑒣𑒩 𑒞𑓂𑒩𑒱𑒣𑒳𑓀𑒛𑒏 𑒦𑒫𑓂𑒨-𑒩𑒹𑒐𑒰 𑒂 𑒬𑒩𑒲𑒩-𑒮𑒾𑒭𑓂𑒚𑒫𑒏 𑒮𑓀𑒑 𑒫𑒱𑒢𑒨𑒏 𑒧𑒴𑒩𑓂𑒞𑓂𑒞𑒱, 𑒄𑒋𑒯 𑒏𑒵𑒬𑒰𑒬𑓂𑒫 𑒯𑒧𑒩 𑒖𑒲𑒫𑒢𑒏 𑒮𑓀𑒑𑒲 𑒕𑒟𑒱। (𑒞𑒐𑒢𑒹 𑒏𑒵𑒬𑒰𑒬𑓂𑒫𑒏 𑒢𑒖𑒩𑒱 𑒁𑒣𑒰𑒪𑒰𑒮𑒿 𑒧𑒱𑒪𑒻𑒞 𑒕𑒢𑓂𑒯𑒱 𑒂 𑒁𑒣𑒰𑒪𑒰 𑒢𑒖𑒩𑒱 𑒢𑒲𑒔𑒰𑒿 𑒏𑒋 𑒪𑒻𑒞 𑒕𑒟𑒱। 𑒧𑒳𑒠𑒰 𑒮𑓂𑒞𑓂𑒩𑒲𑒞𑓂𑒫𑒏 𑒧𑒩𑓂𑒨𑒰𑒠𑒰𑒏𑒹𑒿 𑒩𑒐𑒻𑒞 𑒪𑒪𑒰𑒙 𑒆𑒿𑒔𑒹 𑒥𑒢𑒪 𑒩𑒯𑒻𑒞 𑒕𑒢𑓂𑒯𑒱।)
𑒁𑒞𑓂𑒩𑒱: 𑒅𑒣𑒮𑓂𑒟𑒱𑒞 𑒇𑒭𑒱-𑒧𑒝𑓂𑒛𑒪𑒲 𑒂 𑒁𑒑𑓂𑒢𑒱𑒏𑒹𑒿 𑒮𑒰𑒏𑓂𑒭𑒲 𑒧𑒰𑒢𑒻𑒞, 𑒯𑒧 𑒁𑒣𑒰𑒪𑒰 𑒂 𑒏𑒵𑒬𑒰𑒬𑓂𑒫𑒏 𑒣𑒰𑒝𑒱𑒑𑓂𑒩𑒯𑒝 𑒏𑒩𑒥𑒻𑒞 𑒕𑒲। (𑒁𑒑𑓂𑒢𑒱𑒏 𑒣𑓂𑒩𑒠𑒏𑓂𑒭𑒱𑒝𑒰 𑒏𑒩𑒻𑒞 𑒏𑒰𑒪 𑒏𑒵𑒬𑒰𑒬𑓂𑒫𑒏 𑒅𑒞𑓂𑒞𑒩𑒲𑒨 𑒫𑒮𑓂𑒞𑓂𑒩 𑒏𑒢𑒹𑒏 𑒢𑒲𑒔𑒰𑒿 𑒐𑒮𑒱 𑒣𑒛𑓃𑒪 𑒂 𑒁𑒣𑒰𑒪𑒰𑒏 𑒏𑒹𑒬𑒏 𑒖𑒴𑒯𑒲-𑒧𑒰𑒪𑒰 𑒮𑒹𑒯𑒼 𑒣𑒵𑒟𑓂𑒫𑒲 𑒣𑒩 𑒐𑒮𑒱 𑒣𑒛𑓃𑒪।)
𑒠𑒵𑒬𑓂𑒨 𑒣𑒰𑒿𑒔
(𑒁𑒣𑒰𑒪𑒰𑒏 𑒣𑒞𑒱𑒑𑒵𑒯।𑒫𑒵𑒠𑓂𑒡 𑒧𑒰𑒞𑒰-𑒣𑒱𑒞𑒰 𑒥𑒻𑒮𑒪 𑒕𑒟𑒱𑒢𑓂𑒯 𑒂 𑒁𑒣𑒰𑒪𑒰 𑒒𑒩𑒏
𑒏𑒰𑒖𑒧𑒹 𑒪𑒰𑒑𑒪 𑒕𑒟𑒱।)
𑒁𑒣𑒰𑒪𑒰: 𑒣𑓂𑒩𑒱𑒨 𑒏𑒵𑒬𑒰𑒬𑓂𑒫। 𑒋𑒞𑒹𑒏 𑒠𑒱𑒢 𑒥𑒲𑒞𑒱 𑒑𑒹𑒪। 𑒣𑒞𑒱𑒑𑒵𑒯𑒧𑒹 𑒯𑒧 𑒏𑒼𑒢𑒼 𑒢𑒱𑒨𑓀𑒞𑓂𑒩𑒝𑒏 𑒁𑒢𑒳𑒦𑒫 𑒢𑒯𑒱 𑒏𑒋𑒪𑒯𑒳𑒿। 𑒯𑒧𑒩𑒰 𑒣𑓂𑒩𑒞𑒱 𑒁𑒯𑒰𑒿𑒏 𑒏𑒼𑒧𑒪 𑒣𑓂𑒩𑒹𑒧 𑒮𑒞𑒞𑓂 𑒫𑒱𑒠𑓂𑒨𑒧𑒰𑒢 𑒩𑒯𑒪। 𑒧𑒳𑒠𑒰 𑒬𑓂𑒫𑒹𑒞 𑒞𑓂𑒫𑒏𑒏 𑒖𑒹 𑒠𑒰𑒑 𑒯𑒧𑒩𑒰 𑒣𑒩 𑒖𑓂𑒫𑒪𑒢𑓂𑒞 𑒮𑒞𑓂𑒞𑒰𑒏 𑒩𑒴𑒣𑒧𑒹 𑒁𑒕𑒱, 𑒏𑒠𑒰𑒔𑒱𑒞𑓂 𑒫𑒻𑒯 𑒏𑒱𑒕𑒳 𑒠𑒱𑒢𑒮𑒿 𑒁𑒯𑒰𑒿𑒏 𑒯𑒵𑒠𑒨𑒧𑒹 𑒯𑒧𑒩𑒰 𑒣𑓂𑒩𑒞𑒱 𑒅𑒠𑒰𑒮𑒲𑒢𑒞𑒰𑒏 𑒩𑒴𑒣𑒧𑒹 𑒣𑒩𑒱𑒝𑒞 𑒦𑒹𑒪 𑒁𑒕𑒱।
𑒏𑒵𑒬𑒰𑒬𑓂𑒫: 𑒯𑒧𑒩 𑒅𑒠𑒰𑒮𑒲𑒢𑒞𑒰 𑒁𑒣𑒰𑒪𑒰?
𑒁𑒣𑒰𑒪𑒰: 𑒯𑒿 𑒏𑒵𑒬𑒰𑒬𑓂𑒫। 𑒯𑒧 𑒠𑒹𑒐𑒱 𑒩𑒯𑒪 𑒕𑒲 𑒄 𑒣𑒩𑒱𑒫𑒩𑓂𑒞𑓂𑒞𑒢। 𑒏𑒲 𑒋𑒏𑒩 𑒏𑒰𑒩𑒝 𑒯𑒧𑒩 𑒞𑓂𑒫𑒑𑒠𑒼𑒭𑒧𑒹 𑒁𑓀𑒞𑒩𑓂𑒢𑒱𑒯𑒱𑒞 𑒁𑒕𑒱? 𑒏𑒵𑒬𑒰𑒬𑓂𑒫: 𑒯𑒹 𑒁𑒣𑒰𑒪𑒰। 𑒯𑒧𑒩𑒰 𑒦𑒲𑒞𑒩 𑒋𑒏𑒙𑒰 𑒮𑓀𑒒𑒩𑓂𑒭 𑒔𑒪𑒱 𑒩𑒯𑒪 𑒁𑒕𑒱। 𑒄 𑒮𑓀𑒒𑒩𑓂𑒭 𑒁𑒕𑒱 𑒣𑓂𑒩𑒹𑒧 𑒂 𑒫𑒰𑒮𑒢𑒰𑒏। 𑒣𑓂𑒩𑒹𑒧 𑒏𑒯𑒻𑒞 𑒁𑒕𑒱, 𑒖𑒹 𑒁𑒣𑒰𑒪𑒰 𑒥𑓂𑒩𑒯𑓂𑒧𑒫𑒰𑒠𑒱𑒢𑒲 𑒕𑒟𑒱, 𑒠𑒱𑒫𑓂𑒨 𑒢𑒰𑒩𑒲 𑒕𑒟𑒱। 𑒧𑒳𑒠𑒰 𑒫𑒰𑒮𑒢𑒰 𑒏𑒯𑒻𑒞 𑒁𑒕𑒱, 𑒖𑒹 𑒁𑒣𑒰𑒪𑒰𑒏 𑒬𑒩𑒲𑒩𑒏 𑒞𑓂𑒫𑒑𑒠𑒼𑒭 𑒢𑒹𑒞𑓂𑒩𑒧𑒹 𑒩𑒴𑒣𑒮𑒿 𑒫𑒻𑒩𑒰𑒑𑓂𑒨𑒏 𑒏𑒰𑒩𑒝 𑒥𑒢𑒱 𑒑𑒹𑒪 𑒁𑒕𑒱।
𑒁𑒣𑒰𑒪𑒰: 𑒣𑒳𑒩𑒳𑒭𑒏 𑒯𑒰𑒟𑒮𑒿 𑒮𑓂𑒞𑓂𑒩𑒲𑒏 𑒄 𑒦𑒩𑓂𑒞𑓂𑒮𑒢𑒰। 𑒏𑒰𑒧𑒢𑒰𑒮𑒿 𑒏𑒪𑒳𑒭𑒱𑒞 𑒣𑒳𑒩𑒳𑒭 𑒠𑓂𑒫𑒰𑒩𑒰 𑒢𑒰𑒩𑒲𑒏 𑒯𑒵𑒠𑒨-𑒣𑒳𑒭𑓂𑒣𑒏𑒹𑒿 𑒟𑒏𑒴𑒔𑒥 𑒕𑒲 𑒄। 𑒯𑒧 𑒫𑒹𑒠𑒏 𑒁𑒡𑓂𑒨𑒨𑒢 𑒏𑒋𑒢𑒹 𑒕𑒲। 𑒔𑒢𑓂𑒠𑓂𑒩𑒧𑒰𑒏 𑒣𑓂𑒩𑒏𑒰𑒬𑒏 𑒥𑒲𑒔𑒧𑒹 𑒍𑒏𑒩 𑒠𑒰𑒑 𑒢𑒳𑒏𑒰 𑒖𑒰𑒃𑒞 𑒁𑒕𑒱 𑒧𑒳𑒠𑒰 𑒯𑒧𑒩 𑒄 𑒬𑓂𑒫𑒹𑒞 𑒞𑓂𑒫𑒏𑓂 𑒠𑒰𑒑 𑒯𑒧𑒩 𑒫𑒱𑒬𑒰𑒪 𑒑𑒳𑒝𑒩𑒰𑒬𑒱𑒏 𑒥𑒲𑒔𑒧𑒹 𑒢𑒯𑒱 𑒧𑒹𑒙𑒰𑒨𑒪। (𑒏𑒵𑒬𑒰𑒬𑓂𑒫 𑒮𑓂𑒞𑒥𑓂𑒡 𑒦𑒨 𑒖𑒰𑒃𑒞 𑒕𑒟𑒱 𑒧𑒳𑒠𑒰 𑒏𑒱𑒕𑒳 𑒥𑒖𑒻𑒞 𑒢𑒯𑒱 𑒕𑒟𑒱।)
𑒁𑒣𑒰𑒪𑒰: 𑒮𑒥𑒪 𑒣𑒳𑒩𑒳𑒭𑒏 𑒮𑒼𑒿𑒗𑒰 𑒯𑒧 𑒁𑒣𑒢 𑒯𑒰𑒩𑒱 𑒧𑒰𑒢𑒻𑒞, 𑒁𑒣𑒢 𑒣𑒱𑒞𑒰𑒏 𑒞𑒣𑒼𑒫𑒢 𑒖𑒰 𑒩𑒯𑒪 𑒕𑒲, 𑒏𑒵𑒬𑒰𑒬𑓂𑒫।
𑒠𑒵𑒬𑓂𑒨 𑒕:
(𑒁𑒣𑒰𑒪𑒰 𑒣𑓂𑒩𑒰𑒞𑓁 𑒏𑒰𑒪𑒧𑒹 𑒮𑒧𑒱𑒡𑒰𑒮𑒿 𑒁𑒑𑓂𑒢𑒱𑒏𑒳𑒝𑓂𑒛𑒧𑒹 𑒯𑒼𑒧 𑒏𑒩𑒻𑒞 𑒃𑒢𑓂𑒠𑓂𑒩𑒏 𑒣𑒴𑒖𑒰 𑒂 𑒖𑒣𑒧𑒹 𑒪𑒰𑒑𑒱 𑒑𑒹𑒪 𑒕𑒟𑒱। 𑒏𑒳𑒬𑒰𑒮𑒢 𑒣𑒩 𑒥𑒻𑒮𑒪𑒱 𑒕𑒟𑒱।)
𑒁𑒣𑒰𑒪𑒰: 𑒡𑒰𑒩𑒏 𑒪𑒑 𑒮𑒼𑒧 𑒦𑒹𑒙𑒪, 𑒍𑒏𑒩𑒰 𑒒𑒩 𑒂𑒢𑒪 𑒂 𑒏𑒯𑒪 𑒖𑒹 𑒯𑒧 𑒋𑒏𑒩𑒰 𑒟𑒏𑒳𑒔𑒥 𑒃𑓀𑒠𑓂𑒩𑒏 𑒯𑒹𑒞𑒳, 𑒬𑒏𑓂𑒩𑒏 𑒯𑒹𑒞𑒳।𑒑𑒵𑒯-𑒑𑒵𑒯 𑒒𑒳𑒧𑒻𑒞 𑒂 𑒮𑒦𑒙𑒰 𑒠𑒹𑒐𑒻𑒞, 𑒕𑒼𑒙 𑒐𑒳𑒙𑓂𑒙𑒲𑒏 𑒄 𑒮𑒼𑒧 𑒣𑒲𑒥𑒴, 𑒠𑒰𑒿𑒞𑒮𑒿 𑒟𑒏𑒳𑒔𑒪, 𑒁𑒢𑓂𑒢 𑒂 𑒠𑒯𑒲𑒏 𑒮𑓀𑒑 𑒐𑒹𑒢𑒰𑒃 𑒏𑒰𑒪 𑒣𑓂𑒩𑒬𑓀𑒮𑒰 𑒑𑒲𑒞 𑒮𑒳𑒢𑒻𑒞। 𑒯𑒧 𑒮𑒦 𑒁𑒯𑒰𑒿𑒏𑒹𑒿 𑒢𑒲𑒏 𑒖𑒹𑒏𑒰𑒿 𑒖𑒢𑒥𑒰𑒏 𑒯𑒹𑒞𑒳 𑒁𑒫𑒻𑒏𑒪𑓂𑒣𑒱𑒏 𑒩𑒴𑒣𑒮𑒿 𑒪𑒰𑒑𑒪 𑒕𑒲 𑒧𑒳𑒠𑒰 𑒏𑓂𑒨𑒼 𑒑𑒼𑒙𑒹 𑒁𑒯𑒰𑒿𑒏𑒹𑒿 𑒣𑓂𑒩𑒰𑒣𑓂𑒞 𑒢𑒯𑒱 𑒏𑓄 𑒮𑒏𑒪 𑒕𑒲। 𑒯𑒹 𑒔𑒢𑓂𑒠𑓂𑒩, 𑒁𑒯𑒰𑒿 𑒂𑒮𑓂𑒞𑒹-𑒂𑒮𑓂𑒞𑒹 𑒂 𑒢𑒱𑒩𑒢𑓂𑒞𑒩 𑒚𑒼𑒣𑒹-𑒚𑒼𑒣𑒹 𑒃𑒢𑓂𑒠𑓂𑒩𑒧𑒹 𑒣𑓂𑒩𑒫𑒰𑒯𑒱𑒞 𑒯𑒼𑒆। 𑒏𑒲 𑒍 𑒯𑒧𑒩𑒰 𑒪𑒼𑒏𑒢𑒱𑒏 𑒮𑒯𑒰𑒨𑒞𑒰 𑒢𑒯𑒱 𑒏𑒩𑒞𑒰𑒯, 𑒯𑒧𑒩𑒰 𑒪𑒼𑒏𑒢𑒱𑒏 𑒯𑒹𑒞𑒳 𑒏𑒰𑒩𑓂𑒨 𑒢𑒯𑒱 𑒏𑒩𑒞𑒰𑒯। 𑒏𑒲 𑒍 𑒯𑒧𑒩𑒰 𑒪𑒼𑒏𑒢𑒱𑒏𑒹𑒿 𑒡𑒢𑒲𑒏 𑒢𑒯𑒱 𑒥𑒢𑒍𑒞𑒰𑒯? 𑒏𑒲 𑒯𑒧 𑒁𑒣𑒢 𑒩𑒰𑒖𑒰𑒮𑒿 𑒬𑒞𑓂𑒩𑒳𑒞𑒰𑒏 𑒥𑒰𑒠 𑒂𑒥 𑒁𑒣𑒢𑒰 𑒮𑒦𑒏𑒹𑒿 𑒃𑒢𑓂𑒠𑓂𑒩𑒮𑒿 𑒧𑒱𑒪𑒰 𑒪𑒱𑒁’। 𑒯𑒹 𑒃𑒢𑓂𑒠𑓂𑒩 𑒁𑒯𑒰𑒿 𑒞𑒲𑒢 𑒚𑒰𑒧 𑒅𑒞𑓂𑒣𑒢𑓂𑒢 𑒏𑒩𑒴- 𑒯𑒧𑒩𑒰 𑒣𑒱𑒞𑒰𑒏 𑒧𑒮𑓂𑒞𑒏 𑒣𑒩, 𑒯𑒳𑒢𑒏𑒩 𑒐𑒹𑒞𑒧𑒹 𑒂 𑒯𑒧𑒩 𑒅𑒠𑒩 𑒪𑒑। 𑒋𑒯𑒱 𑒮𑒦 𑒤𑒮𑒱𑒪𑒏𑒹𑒿 𑒆𑒑𑒨 𑒠𑒱𑒨𑒾𑒏। 𑒁𑒯𑒰𑒿 𑒯𑒧𑒩𑒰 𑒮𑒦𑒏 𑒐𑒹𑒞𑒏𑒹𑒿 𑒖𑒼𑒞𑒪𑒯𑒳𑒿, 𑒯𑒧𑒩 𑒬𑒩𑒲𑒩𑒏𑒹𑒿 𑒂 𑒯𑒧𑒩 𑒣𑒱𑒞𑒰𑒏 𑒧𑒮𑓂𑒞𑒏𑒏𑒹𑒿 𑒮𑒹𑒯𑒼। 𑒁𑒣𑒰𑒪𑒰𑒏𑒹𑒿 𑒣𑒫𑒱𑒞𑓂𑒩 𑒏𑒋𑒪। 𑒃𑒢𑓂𑒠𑓂𑒩 ! 𑒞𑒲𑒢 𑒥𑒹𑒩, 𑒋𑒏 𑒥𑒹𑒩 𑒣𑒯𑒱𑒨𑒰 𑒪𑒰𑒑𑒪 𑒑𑒰𑒛𑓃𑒲, 𑒋𑒏 𑒥𑒹𑒩 𑒔𑒰𑒩𑒱 𑒣𑒯𑒱𑒨𑒰 𑒨𑒳𑒏𑓂𑒞𑓂𑒞 𑒑𑒰𑒛𑓃𑒲𑒧𑒹 𑒂 𑒋𑒏 𑒥𑒹𑒩 𑒠𑒳𑒢𑒴 𑒥𑒩𑒠𑒏 𑒏𑒰𑒢𑓂𑒯 𑒣𑒩 𑒩𑒰𑒐𑒪 𑒨𑒳𑒑𑒏 𑒥𑒲𑒔। 𑒯𑒹 𑒬𑒞𑒏𑓂𑒩𑒞𑒳 ! 𑒂 𑒁𑒣𑒰𑒪𑒰𑒏𑒹𑒿 𑒮𑓂𑒫𑒔𑓂𑒕 𑒏𑒋𑒪 𑒂 𑒮𑒴𑒩𑓂𑒨𑒮𑒧𑒰𑒢 𑒞𑓂𑒫𑒔𑒰 𑒠𑒹𑒪। 𑒯𑒹 𑒃𑒢𑓂𑒠𑓂𑒩 !
𑒠𑒵𑒬𑓂𑒨 𑒮𑒰𑒞
(𑒧𑒯𑒰𑒨𑒖𑓂𑒘𑒏 𑒮𑒧𑒰𑒣𑓂𑒞𑒱𑒏 𑒣𑒬𑓂𑒔𑒰𑒞 𑒥𑓂𑒩𑒯𑓂𑒧𑒼𑒠𑒨𑒏 𑒠𑒵𑒬𑓂𑒨।)
𑒁𑒞𑓂𑒩𑒱: 𑒋𑒯𑒱 𑒫𑒱𑒬𑒰𑒪 𑒇𑒞𑓂𑒫𑒱𑒖𑒑𑒝𑒏 𑒧𑒡𑓂𑒨 𑒇𑒏𑒏 𑒧𑓀𑒞𑓂𑒩𑒧𑒹 𑒁𑒣𑒰𑒪𑒰𑒏 𑒇𑒔𑒰𑒏𑒹𑒿 𑒯𑒧 𑒮𑒧𑓂𑒧𑒱𑒪𑒱𑒞 𑒏𑒋 𑒮𑒏𑒻𑒞 𑒕𑒲, 𑒏𑒰𑒩𑒝 𑒄 𑒮𑓂𑒫𑒞𑓁 𑒮𑓂𑒤𑒳𑒙𑒱𑒞 𑒂 𑒁𑒦𑒱𑒧𑓀𑒞𑓂𑒩𑒱𑒞 𑒁𑒕𑒱। 𑒁𑒣𑒰𑒪𑒰𑒏 𑒔𑒩𑓂𑒧𑒩𑒼𑒑 𑒋𑒯𑒱𑒮𑒿 𑒕𑒴𑒙𑒱 𑒑𑒹𑒪, 𑒋𑒏𑒩 𑒄 𑒮𑒠𑓂𑒨𑓁 𑒣𑓂𑒩𑒧𑒰𑒝 𑒁𑒕𑒱। 𑒁𑒣𑒰𑒪𑒰 𑒋𑒯𑒱 𑒧𑓀𑒞𑓂𑒩𑒏 𑒠𑒵𑒭𑓂𑒙𑒰 𑒕𑒟𑒱।
𑒇𑒭𑒱𑒑𑒝: 𑒁𑒞𑓂𑒩𑒱, 𑒯𑒧𑒩𑒰 𑒮𑒦 𑒮𑒹𑒯𑒼 𑒋𑒯𑒱 𑒧𑓀𑒞𑓂𑒩𑒏 𑒠𑒩𑓂𑒬𑒢 𑒏𑒋𑒪। 𑒁𑒯𑒼। 𑒮𑒧𑓂𑒧𑒱𑒪𑒱𑒞 𑒏𑒩𑒥𑒰𑒏 𑒂 𑒢𑒯𑒱 𑒏𑒩𑒥𑒰𑒏 𑒞𑒿 𑒣𑓂𑒩𑒬𑓂𑒢𑒹 𑒢𑒯𑒱 𑒁𑒕𑒱। 𑒄 𑒞𑒿 𑒂𑒃𑒮𑒿 𑒇𑒏𑒏 𑒦𑒰𑒑 𑒦𑒹𑒪।
(𑒋𑒯𑒱 𑒮𑓂𑒫𑒲𑒏𑒵𑒞𑒱𑒏 𑒥𑒰𑒠 𑒥𑓂𑒩𑒯𑓂𑒧𑒼𑒠𑒨 𑒮𑒦𑒰𑒧𑒹 𑒠𑒼𑒮𑒩 𑒏𑒰𑒖 𑒮𑒦 𑒣𑓂𑒩𑒰𑒩𑒧𑓂𑒦 𑒦𑓄 𑒖𑒰𑒃𑒞 𑒁𑒕𑒱। 𑒏𑒵𑒬𑒰𑒬𑓂𑒫 𑒫𑒱𑒔𑒪𑒱𑒞 𑒧𑒼𑒢𑒹 𑒁𑒣𑒰𑒪𑒰𑒏 𑒮𑒼𑒗𑒰𑒿 𑒁𑒥𑒻𑒞 𑒕𑒟𑒱।)
𑒏𑒵𑒬𑒰𑒬𑓂𑒫: 𑒁𑒣𑒰𑒪𑒰। 𑒯𑒧 𑒠𑒳:𑒐𑒱𑒞 𑒕𑒲। 𑒁𑒯𑒰𑒿𑒏 𑒫𑒱𑒨𑒼𑒑𑒧𑒹।
𑒁𑒣𑒰𑒪𑒰: 𑒯𑒹 𑒏𑒵𑒬𑒰𑒬𑓂𑒫। 𑒃𑒢𑓂𑒠𑓂𑒩𑒏 𑒠𑒹𑒪 𑒄 𑒞𑓂𑒫𑒔𑒰 𑒨𑒼𑒑𑒏 𑒣𑒩𑒱𑒝𑒰𑒧 𑒁𑒕𑒱। 𑒁𑒯𑒰𑒿𑒏 𑒅𑒣𑒹𑒏𑓂𑒭𑒰 𑒯𑒧𑒩𑒰 𑒋𑒯𑒱 𑒨𑒼𑒑𑓂𑒨 𑒥𑒢𑒹𑒪𑒏 𑒧𑒳𑒠𑒰 𑒂𑒥 𑒋𑒯𑒱 𑒣𑒩 𑒁𑒯𑒰𑒿𑒏 𑒏𑒼𑒢𑒼 𑒁𑒡𑒱𑒏𑒰𑒩 𑒢𑒯𑒱।
(𑒠𑒳𑒢𑒴 𑒑𑒼𑒙𑒹 𑒬𑒢𑒻𑓁-𑒬𑒢𑒻𑓁 𑒧𑓀𑒔𑒏 𑒠𑒴 𑒠𑒱𑒬𑒱 𑒮𑒿 𑒥𑒯𑒩𑒰𑒋 𑒖𑒰𑒃𑒞 𑒕𑒟𑒱।)
(𑒣𑒙𑒰𑒏𑓂𑒭𑒹𑒣)

𑒠𑒰𑒢𑒫𑒲𑒩 𑒠𑒡𑒲𑒔𑒲
𑒧𑓀𑒔 𑒮𑒖𑓂𑒖𑒰:
𑒂𑒧𑓂𑒩 𑒫𑒢, 𑒣𑒼𑒐𑒩𑒱 𑒂 𑒨𑒳𑒠𑓂𑒡 𑒮𑓂𑒟𑒪

𑒫𑒹𑒭-𑒦𑒴𑒭𑒰:
𑒁𑒡𑒼 𑒫𑒮𑓂𑒞𑓂𑒩- 𑒂𑒬𑓂𑒩𑒧𑒫𑒰𑒮𑒲𑒏 𑒯𑒹𑒞𑒳
𑒂𑒬𑓂𑒫𑒱𑒢𑒏 𑒯𑒹𑒞𑒳 𑒫𑒻𑒠𑓂𑒨𑒏 𑒬𑓂𑒫𑒹𑒞 𑒫𑒮𑓂𑒞𑓂𑒩
𑒂 𑒃𑒢𑓂𑒠𑓂𑒩𑒏 𑒯𑒹𑒞𑒳 𑒨𑒼𑒠𑓂𑒡𑒰𑒏 𑒫𑒮𑓂𑒞𑓂𑒩
𑒩𑒟 𑒂 𑒁𑒮𑓂𑒞𑓂𑒩 𑒬𑒮𑓂𑒞𑓂𑒩𑒏 𑒔𑒱𑒞𑓂𑒩 𑒣𑒩𑓂𑒠𑒰 𑒣𑒩 𑒕𑒰𑒨𑒰𑓀𑒏𑒱𑒞 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱।
𑒣𑓂𑒩𑒟𑒧 𑒠𑒵𑒬𑓂𑒨
(𑒧𑒯𑒩𑓂𑒭𑒱 𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲𑒏 𑒞𑒣𑒼𑒫𑒢𑒏 𑒠𑒵𑒬𑓂𑒨। 𑒮𑒴𑒩𑓂𑒨𑒼𑒠𑒨𑒏 𑒮𑓂𑒫𑒩𑓂𑒝𑒱𑒧 𑒂𑒦𑒰, 𑒤𑒴𑒪𑒏 𑒑𑒰𑒕𑒏 𑒤𑒴𑒪𑒏 𑒮𑓀𑒑 𑒣𑒫𑒢𑒏 𑒣𑓂𑒩𑒦𑒰𑒫𑒮𑒿 𑒮𑒴𑒩𑓂𑒨 𑒠𑒱𑒬𑒱 𑒗𑒳𑒏𑒥। 𑒨𑒖𑓂𑒘𑒏 𑒡𑒴𑒿𑒂𑒮𑒿 𑒧𑒪𑒱𑒢 𑒦𑒹𑒪 𑒑𑒰𑒕𑒏 𑒣𑒰𑒞। 𑒧𑒯𑒩𑓂𑒭𑒱 𑒮𑒴𑒩𑓂𑒨𑒼𑒠𑒨𑒏 𑒠𑒵𑒬𑓂𑒨𑒏 𑒂𑒢𑒢𑓂𑒠 𑒪𑒋 𑒩𑒯𑒪 𑒕𑒟𑒱। 𑒧𑒳𑒠𑒰 𑒠𑒵𑒭𑓂𑒙𑒱𑒧𑒹 𑒁𑒞𑒵𑒣𑓂𑒞 𑒦𑒰𑒫 𑒕𑒢𑓂𑒯𑒱। 𑒍𑒯𑒱 𑒂𑒬𑓂𑒩𑒧𑒏 𑒏𑒳𑒪𑒣𑒞𑒱 𑒟𑒱𑒏𑒰𑒯 𑒧𑒯𑒩𑓂𑒭𑒱, 𑒠𑒮 𑒮𑒯𑒮𑓂𑒩 𑒕𑒰𑒞𑓂𑒩𑒏𑒹𑒿 𑒫𑒱𑒠𑓂𑒨𑒰𑒠𑒰𑒢 𑒏𑒩𑒻𑒞 𑒕𑒟𑒱, 𑒮𑒦𑒏 𑒢𑒰𑒧, 𑒑𑒰𑒧 𑒂 𑒏𑒰𑒩𑓂𑒨𑒮𑒿 𑒣𑒩𑒱𑒔𑒱𑒞 𑒕𑒟𑒱। 𑒮𑒹 𑒍 𑒞𑒐𑒢𑒹 𑒣𑓂𑒩𑒫𑒹𑒬 𑒏𑒩𑒻𑒞 𑒋𑒏𑒙𑒰 𑒁𑒣𑒩𑒱𑒔𑒱𑒞 𑒂𑒑𑓀𑒞𑒳𑒏𑒏 𑒂𑒑𑒧𑒢 𑒮𑒿 𑒮𑒰𑒏𑒰𑓀𑒏𑓂𑒭 𑒦𑓄 𑒖𑒰𑒃𑒞 𑒕𑒟𑒱।)
𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: 𑒁𑒯𑒰𑒿 𑒏𑒹 𑒕𑒲 𑒂𑒑𑓀𑒞𑒳𑒏?
𑒁𑒣𑒩𑒱𑒔𑒱𑒞: 𑒯𑒧 𑒋𑒏𑒙𑒰 𑒁𑒞𑒱𑒟𑒱 𑒕𑒲 𑒧𑒯𑒩𑓂𑒭𑒱 𑒂 𑒏𑒼𑒢𑒼 𑒣𑓂𑒩𑒨𑒼𑒖𑒢𑒮𑒿 𑒂𑒨𑒪 𑒕𑒲। 𑒏𑒵𑒣𑒰 𑒏𑒋 𑒁𑒞𑒱𑒟𑒱𑒏 𑒧𑒢𑒼𑒩𑒟 𑒣𑒴𑒩𑓂𑒝 𑒏𑒩𑒥𑒰𑒏 𑒂𑒬𑓂𑒫𑒰𑒮𑒢 𑒠𑒹𑒪 𑒖𑒰𑒨।
𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: 𑒋𑒯𑒱 𑒂𑒬𑓂𑒩𑒧𑒮𑒿 𑒏𑓂𑒨𑒼 𑒥𑒱𑒢𑒰 𑒧𑒢𑒼𑒩𑒟 𑒣𑒴𑒩𑓂𑒝 𑒏𑒋𑒢𑒹 𑒢𑒯𑒱 𑒑𑒹𑒪 𑒁𑒕𑒱 𑒂𑒑𑓀𑒞𑒳𑒏। 𑒯𑒧 𑒁𑒯𑒰𑒿𑒏 𑒮𑒦 𑒧𑒢𑒼𑒩𑒟 𑒣𑒴𑒩𑓂𑒝 𑒯𑒼𑒋𑒥𑒰𑒏 𑒂𑒬𑓂𑒫𑒰𑒮𑒢 𑒠𑒻𑒞 𑒕𑒲।
𑒁𑒣𑒩𑒱𑒔𑒱𑒞: 𑒯𑒧 𑒠𑒹𑒫𑒞𑒰 𑒪𑒼𑒏𑒢𑒱𑒏 𑒩𑒰𑒖𑒰 𑒃𑒢𑓂𑒠𑓂𑒩 𑒕𑒲। 𑒁𑒯𑒰𑒿𑒮𑒿 𑒣𑒩𑒧𑒞𑒞𑓂𑒞𑓂𑒫𑒏 𑒅𑒣𑒠𑒹𑒬𑒏 𑒯𑒹𑒞𑒳 𑒂𑒨𑒪 𑒕𑒲।𑒋𑒯𑒱𑒮𑒿 𑒁𑒯𑒰𑒿𑒏 𑒏𑒲𑒩𑓂𑒞𑓂𑒞𑒱 𑒮𑓂𑒫𑒩𑓂𑒑𑒪𑒼𑒏 𑒡𑒩𑒱 𑒣𑒯𑒳𑒿𑒔𑒞।
(𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲 𑒮𑒼𑒔𑒧𑒹 𑒣𑒛𑓃𑒪 𑒧𑓀𑒔 𑒣𑒩 𑒋𑒧𑓂𑒯𑒩𑒮𑒿 𑒍𑒧𑓂𑒯𑒩 𑒫𑒱𑒔𑒪𑒱𑒞 𑒯𑒼𑒃𑒞 𑒒𑒳𑒧𑒨 𑒪𑒑𑒻𑒞 𑒕𑒟𑒱। 𑒍 𑒧𑓀𑒔 𑒣𑒩 𑒒𑒳𑒧𑒻𑒞 𑒧𑒼𑒢𑒹-𑒧𑒼𑒢, 𑒥𑒱𑒢𑒳 𑒃𑒢𑓂𑒠𑓂𑒩𑒏𑒹𑒿 𑒠𑒹𑒐𑒢𑒹, 𑒥𑒖𑒻𑒞 𑒕𑒟𑒱 𑒖𑒹 𑒠𑒩𑓂𑒬𑒏𑒑𑒝𑒏𑒹𑒿 𑒞𑒿 𑒮𑒳𑒢𑒥𑒰𑒧𑒹 𑒁𑒥𑒻𑒞 𑒁𑒕𑒱 𑒧𑒳𑒠𑒰 𑒃𑒢𑓂𑒠𑓂𑒩 𑒋𑒯𑒢 𑒮𑒢 𑒂𑒏𑒵𑒞𑒱 𑒥𑒢𑒍𑒢𑒹 𑒩𑒯𑒻𑒞 𑒕𑒟𑒱 𑒖𑒹 𑒍 𑒏𑒱𑒕𑒳 𑒮𑒳𑒢𑒱𑒨𑒹 𑒢𑒯𑒱 𑒩𑒯𑒪 𑒕𑒟𑒱 𑒂 𑒧𑓀𑒔𑒏 𑒋𑒏 𑒠𑒼𑒑𑒧𑒹 𑒚𑒰𑒜𑓃 𑒦𑓄 𑒖𑒰𑒃𑒞 𑒕𑒟𑒱।)
𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: (𑒧𑒼𑒢𑒹-𑒧𑒼𑒢) 𑒯𑒧 𑒬𑒱𑒏𑓂𑒭𑒰 𑒠𑒹𑒥 𑒞𑒿 𑒑𑒕𑒱 𑒪𑒹𑒢𑒹 𑒕𑒲 𑒧𑒳𑒠𑒰 𑒏𑒲 𑒃𑒢𑓂𑒠𑓂𑒩 𑒋𑒏𑒩 𑒁𑒡𑒱𑒏𑒰𑒩𑒲 𑒕𑒟𑒱। 𑒥𑒖𑓂𑒩 𑒪𑒋 𑒒𑒳𑒧𑒋 𑒥𑒪𑒰, 𑒏𑒰𑒧𑒫𑒰𑒮𑒢𑒰𑒧𑒹 𑒪𑒱𑒣𑓂𑒞 𑒁𑒢𑒡𑒱𑒏𑒰𑒩𑒲 𑒫𑓂𑒨𑒏𑓂𑒞𑓂𑒞𑒱𑒏𑒹𑒿 𑒣𑒩𑒧𑒞𑒞𑓂𑒞𑓂𑒫𑒏 𑒬𑒱𑒏𑓂𑒭𑒰? 𑒧𑒳𑒠𑒰 𑒑𑒕𑒢𑒹 𑒕𑒲 𑒞𑒿 𑒁𑒣𑒢 𑒣𑓂𑒩𑒞𑒱𑒖𑓂𑒘𑒰𑒏 𑒩𑒏𑓂𑒭𑒝𑒰𑒩𑓂𑒟 𑒧𑒡𑒳-𑒫𑒱𑒠𑓂𑒨𑒰𑒏 𑒬𑒱𑒏𑓂𑒭𑒰 𑒃𑒢𑓂𑒠𑓂𑒩𑒏𑒹𑒿 𑒠𑒻𑒞 𑒕𑒱𑒨𑒢𑓂𑒯𑒱।
𑒃𑒢𑓂𑒠𑓂𑒩: 𑒏𑒼𑒢 𑒮𑒼𑒔𑒱𑒧𑒹 𑒣𑒛𑓃𑒱 𑒑𑒹𑒪𑒯𑒳𑒿 𑒧𑒯𑒩𑓂𑒭𑒱।

𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: 𑒃𑒢𑓂𑒠𑓂𑒩 𑒯𑒧 𑒁𑒯𑒰𑒿𑒏𑒹𑒿 𑒧𑒡𑒳𑒫𑒱𑒠𑓂𑒨𑒰𑒏 𑒬𑒱𑒏𑓂𑒭𑒰 𑒠𑒋 𑒩𑒯𑒪 𑒕𑒲। 𑒦𑒼𑒑𑒮𑒿 𑒠𑒴𑒩 𑒩𑒯𑒴। 𑒢𑒰𑒢𑒰 𑒣𑓂𑒩𑒏𑒰𑒩𑒏 𑒦𑒼𑒑𑒏 𑒂 𑒦𑒼𑒖𑓂𑒨𑒏 𑒣𑒠𑒰𑒩𑓂𑒟 𑒮𑒦𑒮𑒿। 𑒄 𑒮𑒦 𑒍𑒯𑒢𑒹 𑒁𑒕𑒱 𑒖𑒹𑒢𑒰 𑒤𑒴𑒪 𑒮𑒦𑒏 𑒥𑒲𑒔𑒧𑒹 𑒮𑒰𑒿𑒣। 𑒦𑒼𑒑𑒏 𑒁𑒕𑒻𑒞 𑒮𑓂𑒫𑒩𑓂𑒑 𑒁𑒡𑒱𑒣𑒞𑒱 𑒃𑒢𑓂𑒠𑓂𑒩 𑒂 𑒦𑒴𑒞𑒪𑒏 𑒢𑒱𑒏𑒵𑒭𑓂𑒙 𑒏𑒳𑒏𑒳𑒩𑒧𑒹 𑒏𑒼𑒢 𑒁𑓀𑒞𑒩 𑒩𑒯𑒞 𑒞𑒐𑒢?
(𑒃𑒢𑓂𑒠𑓂𑒩 𑒁𑒣𑒢 𑒞𑒳𑒪𑒢𑒰 𑒏𑒳𑒏𑒳𑒩𑒮𑒿 𑒏𑒋𑒪 𑒑𑒹𑒪 𑒠𑒹𑒐𑒱 𑒏𑒋 𑒞𑒰𑒧𑒮𑒹 𑒫𑒱𑒐-𑒮𑒥𑒱𑒐 𑒦𑓄 𑒑𑒹𑒪। 𑒧𑒳𑒠𑒰 𑒁𑒣𑒢𑒰 𑒣𑒩 𑒢𑒱𑒨𑓀𑒞𑓂𑒩𑒝 𑒩𑒐𑒻𑒞 𑒧𑒰𑒞𑓂𑒩 𑒋𑒏 𑒑𑒼𑒙 𑒫𑒰𑒏𑓂𑒨 𑒥𑒖𑒻𑒞 𑒧𑓀𑒔 𑒣𑒩𑒮𑒿 𑒖𑒰𑒃𑒞 𑒠𑒹𑒐𑒪 𑒖𑒰𑒃𑒞 𑒁𑒕𑒱।)
𑒃𑒢𑓂𑒠𑓂𑒩: 𑒧𑒯𑒩𑓂𑒭𑒱 𑒁𑒯𑒰𑒿𑒏 𑒄 𑒁𑒣𑒧𑒰𑒢 𑒞𑒿 𑒂𑒃 𑒯𑒧 𑒮𑒯𑒱 𑒪𑒹𑒪𑒯𑒳𑒿। 𑒧𑒳𑒠𑒰 𑒂𑒖𑒳𑒏 𑒥𑒰𑒠 𑒖𑓂𑒨𑒼𑒿 𑒁𑒯𑒰𑒿 𑒄 𑒧𑒡𑒳-𑒫𑒱𑒠𑓂𑒨𑒰 𑒏𑒏𑒩𑒼 𑒁𑒢𑒏𑒰 𑒠𑒹𑒪𑒯𑒳𑒿 𑒞𑒿 𑒁𑒯𑒰𑒿𑒏 𑒑𑒩𑒠𑒢𑒱 𑒣𑒩𑒮𑒿 𑒄 𑒧𑒮𑓂𑒞𑒱𑒭𑓂𑒏, 𑒖𑒏𑒩 𑒁𑒯𑒰𑒿𑒏𑒹𑒿 𑒒𑒧𑒝𑓂𑒛 𑒁𑒕𑒱, 𑒋𑒯𑒱 𑒦𑒴𑒧𑒱 𑒣𑒩 𑒐𑒮𑒞।
𑒠𑒵𑒬𑓂𑒨 𑒠𑒴
(𑒇𑒭𑒱𑒏 𑒂𑒬𑓂𑒩𑒧। 𑒂𑒬𑓂𑒫𑒱𑒢 𑒥𑒢𑓂𑒡𑒳𑒏 𑒂𑒑𑒧𑒢।𑒧𑒯𑒩𑓂𑒭𑒱𑒮𑒿 𑒁𑒦𑒱𑒫𑒰𑒠𑒢𑒏 𑒅𑒣𑒩𑒰𑒢𑓂𑒞 𑒫𑒰𑒩𑓂𑒞𑓂𑒞𑒰𑒪𑒰𑒣।)
𑒂𑒬𑓂𑒫𑒱𑒢 𑒥𑒢𑓂𑒡𑒳: 𑒧𑒯𑒩𑓂𑒭𑒱। 𑒂𑒥 𑒯𑒧 𑒮𑒦 𑒁𑒯𑒰𑒿𑒏 𑒧𑒡𑒳 𑒫𑒱𑒠𑓂𑒨𑒰𑒏 𑒯𑒹𑒞𑒳 𑒮𑒩𑓂𑒫𑒟𑒰 𑒮𑒳𑒨𑒼𑒑𑓂𑒨 𑒦’𑓄 𑒑𑒹𑒪 𑒕𑒲। 𑒯𑒱𑓀𑒮𑒰 𑒂 𑒦𑒼𑒑𑒏 𑒩𑒮𑓂𑒞𑒰 𑒯𑒧 𑒮𑒦 𑒕𑒼𑒛𑓃𑒱 𑒠𑒹𑒪𑒯𑒳𑒿। 𑒃𑒢𑓂𑒠𑓂𑒩 𑒮𑒼𑒧𑒨𑒰𑒑𑒧𑒹 𑒯𑒧𑒩𑒰 𑒪𑒼𑒏𑒢𑒱𑒏𑒹𑒿 𑒮𑒼𑒧𑒣𑒰𑒢𑒏 𑒯𑒹𑒞𑒳 𑒮𑒩𑓂𑒫𑒟𑒰 𑒁𑒨𑒼𑒑𑓂𑒨 𑒧𑒰𑒢𑒪𑒢𑓂𑒯𑒱 𑒧𑒳𑒠𑒰 𑒯𑒧𑒩𑒰 𑒮𑒦 𑒣𑓂𑒩𑒞𑒱𑒬𑒼𑒡 𑒢𑒯𑒱 𑒪𑒹𑒪𑒯𑒳𑒿। 𑒏𑒞𑒹𑒏 𑒣𑓀𑒑𑒳𑒏𑒹𑒿 𑒣𑒋𑒩, 𑒏𑒞𑒹𑒏 𑒂𑒢𑓂𑒯𑒩𑒏𑒹𑒿 𑒂𑒿𑒐𑒱 𑒯𑒧𑒩𑒰 𑒮𑒦 𑒠𑒹𑒪𑒯𑒳𑒿। 𑒔𑓂𑒨𑒫𑒢 𑒧𑒳𑒢𑒱𑒏 𑒥𑒳𑒜𑓃𑒰𑒣𑒰𑒏𑒹𑒿 𑒠𑒴𑒩 𑒏𑒋𑒪𑒯𑒳𑒿। 𑒂 𑒞𑒏𑒩𑒹 𑒅𑒣𑒏𑒰𑒩𑒧𑒹 𑒔𑓂𑒨𑒫𑒢 𑒯𑒧𑒩𑒰 𑒪𑒼𑒏𑒢𑒱𑒏𑒹𑒿 𑒮𑒼𑒧𑒣𑒲𑒟𑒲 𑒥𑒢𑒰 𑒠𑒹𑒪𑒢𑓂𑒯𑒱।
𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: 𑒂𑒬𑓂𑒫𑒱𑒢𑒾। 𑒥𑓂𑒩𑒯𑓂𑒧𑒖𑓂𑒘𑒰𑒢𑒏𑒏𑒹𑒿 𑒠𑒹𑒥 𑒋𑒏𑒙𑒰 𑒅𑒣𑒏𑒰𑒩𑒧𑒨𑒲 𑒏𑒰𑒩𑓂𑒨 𑒁𑒕𑒱 𑒂 𑒁𑒯𑒰𑒿 𑒪𑒼𑒏𑒢𑒱 𑒋𑒯𑒱 𑒫𑒱𑒠𑓂𑒨𑒰𑒏 𑒮𑒩𑓂𑒫𑒟𑒰 𑒨𑒼𑒑𑓂𑒨 𑒬𑒱𑒏𑓂𑒭𑒰𑒩𑓂𑒟𑒲 𑒕𑒲। 𑒃𑒢𑓂𑒠𑓂𑒩 𑒏𑒯𑒢𑒹 𑒁𑒕𑒱, 𑒖𑒹 𑒖𑒰𑒯𑒱 𑒠𑒱𑒢 𑒄 𑒫𑒱𑒠𑓂𑒨𑒰 𑒯𑒧 𑒏𑒯𑒱𑒨𑒼 𑒏𑒏𑒩𑒼 𑒠𑒹𑒥 𑒞𑒿 𑒞𑒯𑒱𑒨𑒹 𑒍 𑒯𑒧𑒩 𑒧𑒰𑒟 𑒬𑒩𑒲𑒩𑒮𑒿 𑒏𑒰𑒙𑒱 𑒐𑒮𑒰 𑒠𑒹𑒞। 𑒧𑒳𑒠𑒰 𑒄 𑒬𑒩𑒲𑒩𑒞𑒿 𑒁𑒕𑒱 𑒏𑓂𑒭𑒝𑒦𑓀𑒑𑒳𑒩। 𑒂𑒃 𑒢𑒯𑒱 𑒞𑒿 𑒏𑒰𑒪𑓂𑒯𑒱 𑒋𑒏𑒩𑒰 𑒢𑒭𑓂𑒙 𑒯𑒼𑒨𑒥𑒰𑒏 𑒕𑒻। 𑒞𑒰𑒯𑒱 𑒛𑒩𑒮𑒿 𑒯𑒧 𑒥𑓂𑒩𑒯𑓂𑒧 𑒫𑒱𑒠𑓂𑒨𑒰𑒏 𑒪𑒼𑒣 𑒢𑒯𑒱 𑒯𑒼𑒋 𑒠𑒹𑒥𑒻𑒏।
𑒂𑒬𑓂𑒫𑒱𑒢𑒾: 𑒧𑒯𑒩𑓂𑒭𑒱 𑒁𑒯𑒰𑒿𑒏 𑒄 𑒅𑒠𑒰𑒩𑒔𑒩𑒱𑒞 ! 𑒧𑒳𑒠 𑒯𑒧𑒩𑒼 𑒮𑒦 𑒬𑒪𑓂𑒨𑒏𑓂𑒩𑒱𑒨𑒰 𑒖𑒢𑒻𑒞 𑒕𑒲 𑒂 𑒣𑒯𑒱𑒢𑒹 𑒯𑒧𑒩𑒰 𑒮𑒦 𑒒𑒼𑒛𑓃𑒰𑒏 𑒧𑒮𑓂𑒞𑒏 𑒁𑒯𑒰𑒿𑒏 𑒑𑒩𑒠𑒢𑒱 𑒣𑒩 𑒪𑒑𑒰𑒋 𑒠𑒹𑒥। 𑒖𑒐𑒢 𑒃𑒢𑓂𑒠𑓂𑒩 𑒁𑒣𑒢 𑒒𑒵𑒝𑒱𑒞 𑒏𑒰𑒩𑓂𑒨 𑒏𑒩𑒞 𑒂 𑒁𑒯𑒰𑒿𑒏 𑒧𑒮𑓂𑒞𑒏𑒏𑒹𑒿 𑒏𑒰𑒙𑒞 𑒞𑒐𑒢 𑒁𑒯𑒰𑒿𑒏 𑒁𑒮𑒪𑒲 𑒧𑒮𑓂𑒞𑒏 𑒯𑒧𑒩𑒰 𑒮𑒦 𑒣𑒳𑒢𑓁 𑒁𑒯𑒰𑒿𑒏 𑒬𑒩𑒲𑒩𑒧𑒹 𑒪𑒑𑒰 𑒠𑒹𑒥।
(𑒧𑓀𑒔 𑒣𑒩 𑒂𑒥𑒰𑒖𑒰𑒯𑒲 𑒬𑒳𑒩𑒴 𑒦𑓄 𑒖𑒰𑒃𑒞 𑒁𑒕𑒱, 𑒏𑓂𑒨𑒼 𑒙𑒹𑒥𑒳𑒪 𑒁𑒢𑒻𑒞 𑒁𑒕𑒱 𑒞𑒿 𑒏𑓂𑒨𑒼 𑒔𑒏𑓂𑒏𑒴 𑒡𑒱𑒣𑒰 𑒩𑒯𑒪 𑒁𑒕𑒱 𑒖𑒹𑒢𑒰 𑒏𑒼𑒢𑒼 𑒬𑒪𑓂𑒨 𑒔𑒱𑒏𑒱𑒞𑓂𑒮𑒰𑒏 𑒏𑒰𑒩𑓂𑒨 𑒬𑒳𑒩𑒴 𑒦𑓄 𑒩𑒯𑒪 𑒯𑒼𑒁𑒨। 𑒣𑒩𑒠𑒰 𑒐𑒮𑒋 𑒪𑒑𑒻𑒞 𑒁𑒕𑒱 𑒂 𑒣𑒴𑒩𑒰 𑒐𑒮𑒱𑒞𑒼 𑒢𑒯𑒱 𑒁𑒕𑒱 𑒂𑒏𑒱 𑒤𑒹𑒩 𑒅𑒚𑒥 𑒣𑓂𑒩𑒰𑒩𑒧𑓂𑒦 𑒦𑓄 𑒖𑒰𑒃𑒞 𑒁𑒕𑒱। 𑒋𑒯𑒱 𑒥𑒹𑒩 𑒒𑒼𑒛𑓃𑒰𑒏 𑒑𑒩𑒠𑒢𑒱 𑒪𑒑𑒍𑒢𑒹 𑒧𑒯𑒩𑓂𑒭𑒱 𑒂𑒬𑓂𑒫𑒱𑒢 𑒥𑒢𑓂𑒡𑒳𑒏𑒹𑒿 𑒬𑒱𑒏𑓂𑒭𑒰 𑒠𑒻𑒞 𑒠𑒵𑒭𑓂𑒙𑒱𑒑𑒼𑒔𑒩 𑒯𑒼𑒃𑒞 𑒕𑒟𑒱।)
𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: 𑒋𑒯𑒱 𑒖𑒑𑒞𑒏 𑒮𑒦 𑒣𑒠𑒰𑒩𑓂𑒟 𑒋𑒏 𑒠𑒼𑒮𑒩𑒰𑒏 𑒅𑒣𑒏𑒰𑒩𑒲 𑒁𑒕𑒱। 𑒄 𑒖𑒹 𑒡𑒩𑒰 𑒁𑒕𑒱 𑒮𑒹 𑒮𑒦 𑒣𑒠𑒰𑒩𑓂𑒟𑒏 𑒯𑒹𑒞𑒳 𑒧𑒡𑒳 𑒁𑒕𑒱 𑒂 𑒮𑒦 𑒣𑒠𑒰𑒩𑓂𑒟 𑒍𑒏𑒩𑒰 𑒯𑒹𑒞𑒳 𑒧𑒡𑒳। 𑒮𑒧𑒮𑓂𑒞 𑒖𑒢 𑒧𑒡𑒳𑒩𑒴𑒣𑒏 𑒁𑒕𑒱। 𑒞𑒹𑒖𑒼𑒧𑒨 𑒂 𑒁𑒧𑒵𑒞𑒧𑒨। 𑒮𑒞𑓂𑒨𑒹𑒏 𑒂𑒡𑒰𑒩 𑒣𑒩 𑒮𑒴𑒩𑓂𑒨 𑒖𑓂𑒨𑒼𑒞𑒱 𑒣𑒮𑒰𑒩𑒻𑒞 𑒁𑒕𑒱 𑒋𑒯𑒱 𑒫𑒱𑒬𑓂𑒫𑒧𑒹।𑒔𑒢𑓂𑒠𑓂𑒩𑒏 𑒡𑒫𑒪 𑒣𑓂𑒩𑒏𑒰𑒬 𑒠𑒴𑒩 𑒦𑒑𑒰𑒥𑒻𑒞 𑒁𑒕𑒱 𑒩𑒰𑒞𑒱𑒏 𑒑𑒳𑒧𑒰𑒩 𑒂 𑒂𑒢𑒻𑒞 𑒁𑒕𑒱 𑒬𑒲𑒞𑒪𑒞𑒰। 𑒖𑓂𑒘𑒰𑒢𑒏 𑒅𑒠𑒨𑒮𑒿 𑒁𑒢𑓂𑒯𑒰𑒩𑒧𑒹 𑒥𑒳𑒗𑒰𑒃𑒞 𑒮𑒰𑒿𑒣 𑒠𑒹𑒐𑒰 𑒣𑒛𑓃𑒻𑒞 𑒁𑒕𑒱 𑒩𑒮𑓂𑒮𑒰। 𑒫𑒱𑒬𑓂𑒫𑒏 𑒮𑒴𑒞𑓂𑒩𑒰𑒞𑓂𑒧𑒰𑒏𑒹𑒿 𑒍𑒯𑒱 𑒣𑒩𑒧𑒰𑒞𑓂𑒧𑒰𑒏𑒹𑒿 𑒁𑒣𑒢 𑒥𑒳𑒠𑓂𑒡𑒱𑒮𑒿 𑒣𑒏𑒛𑓃𑒴। 𑒖𑒰𑒯𑒱 𑒣𑓂𑒩𑒏𑒰𑒩𑒹𑒿 𑒩𑒟𑒏 𑒢𑒹𑒧𑒱𑒧𑒹 𑒁𑒩 𑒩𑒯𑒻𑒞 𑒁𑒕𑒱 𑒞𑒰𑒯𑒱 𑒣𑓂𑒩𑒏𑒰𑒩𑒹𑒿 𑒣𑒩𑒧𑒰𑒞𑓂𑒧𑒰𑒧𑒹 𑒄 𑒮𑓀𑒣𑒴𑒩𑓂𑒝 𑒫𑒱𑒬𑓂𑒫।
(𑒞𑒐𑒢𑒹 𑒧𑓀𑒔𑒏 𑒣𑒰𑒕𑒰𑒿𑒮𑒿 𑒥𑒛𑓂𑒛 𑒥𑒹𑒬𑒲 𑒏𑒼𑒪𑒰𑒯𑒪 𑒬𑒳𑒩𑒴 𑒦𑓄 𑒖𑒰𑒃𑒞 𑒁𑒕𑒱। 𑒞𑒐𑒢𑒹 𑒥𑒖𑓂𑒩 𑒪𑒋 𑒃𑒢𑓂𑒠𑓂𑒩𑒏 𑒂𑒑𑒧𑒢 𑒯𑒼𑒃𑒞 𑒁𑒕𑒱। 𑒋𑒏𑓂𑒏𑒹 𑒣𑓂𑒩𑒯𑒰𑒩𑒧𑒹 𑒍 𑒧𑒯𑒩𑓂𑒭𑒱𑒏 𑒑𑒩𑒠𑒢𑒱 𑒏𑒰𑒙𑒱 𑒠𑒻𑒞 𑒕𑒟𑒱। 𑒤𑒹𑒩 𑒃𑒢𑓂𑒠𑓂𑒩 𑒔𑒪𑒱 𑒖𑒰𑒃𑒞 𑒕𑒟𑒱। 𑒧𑓀𑒔 𑒣𑒩 𑒂𑒥𑒰𑒖𑒰𑒯𑒲 𑒬𑒳𑒩𑒴 𑒦𑓄 𑒖𑒰𑒃𑒞 𑒁𑒕𑒱, 𑒏𑓂𑒨𑒼 𑒙𑒹𑒥𑒳𑒪 𑒁𑒢𑒻𑒞 𑒁𑒕𑒱 𑒞𑒿 𑒏𑓂𑒨𑒼 𑒔𑒏𑓂𑒏𑒴 𑒡𑒱𑒣𑒰 𑒩𑒯𑒪 𑒁𑒕𑒱, 𑒖𑒹𑒢𑒰 𑒏𑒼𑒢𑒼 𑒬𑒪𑓂𑒨 𑒔𑒱𑒏𑒱𑒞𑓂𑒮𑒰𑒏 𑒏𑒰𑒩𑓂𑒨 𑒬𑒳𑒩𑒴 𑒦𑓄 𑒩𑒯𑒪 𑒯𑒼𑒁𑒨। 𑒣𑒩𑒠𑒰 𑒐𑒮𑒋 𑒪𑒑𑒻𑒞 𑒁𑒕𑒱 𑒂 𑒣𑒴𑒩𑒰 𑒐𑒮𑒱𑒞𑒼 𑒢𑒯𑒱 𑒁𑒕𑒱 𑒂𑒏𑒱 𑒤𑒹𑒩 𑒅𑒚𑒥 𑒣𑓂𑒩𑒰𑒩𑒧𑓂𑒦 𑒦𑓄 𑒖𑒰𑒃𑒞 𑒁𑒕𑒱। 𑒋𑒯𑒱 𑒥𑒹𑒩 𑒧𑒯𑒩𑓂𑒭𑒱 𑒣𑒳𑒢𑓁 𑒁𑒣𑒢 𑒮𑓂𑒫-𑒬𑒩𑒲𑒩𑒧𑒹 𑒠𑒹𑒐𑒪 𑒖𑒰𑒃𑒞 𑒕𑒟𑒱। 𑒍 𑒥𑒻𑒮𑒪𑒹 𑒕𑒟𑒱 𑒂𑒏𑒱 𑒃𑒢𑓂𑒠𑓂𑒩 𑒁𑒣𑒢 𑒧𑒳𑒿𑒯 𑒪𑒙𑒏𑒍𑒢𑒹 𑒁𑒥𑒻𑒞 𑒁𑒕𑒱।)
𑒃𑒢𑓂𑒠𑓂𑒩: 𑒏𑓂𑒭𑒧𑒰 𑒏𑒩𑒥 𑒧𑒯𑒩𑓂𑒭𑒱 𑒯𑒧𑒩 𑒁𑒣𑒩𑒰𑒡। 𑒂𑒃 𑒂𑒬𑓂𑒫𑒱𑒢-𑒥𑒢𑓂𑒡𑒳 𑒯𑒧𑒩𑒰 𑒢𑒫-𑒩𑒮𑓂𑒞𑒰 𑒠𑒹𑒐𑒍𑒪𑒢𑓂𑒯𑒱। 𑒑𑒳𑒩𑒴𑒮𑒿 𑒋𑒏𑒼 𑒁𑒏𑓂𑒭𑒩 𑒮𑒱𑒐𑒢𑒱𑒯𑒰𑒩 𑒍𑒏𑒩 𑒂𑒠𑒩 𑒏𑒩𑒻𑒞 𑒕𑒟𑒱 𑒧𑒳𑒠𑒰 𑒯𑒧 𑒏𑒲 𑒏𑒋𑒪𑒯𑒳𑒿? 𑒁𑒮𑒪 𑒬𑒱𑒭𑓂𑒨 𑒞𑒿 𑒕𑒟𑒱 𑒂𑒬𑓂𑒫𑒱𑒢 𑒥𑒢𑓂𑒡𑒳।
𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: 𑒃𑒢𑓂𑒠𑓂𑒩। 𑒁𑒯𑒰𑒿𑒏𑒹𑒿 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒧 𑒬𑒱𑒏𑓂𑒭𑒰 𑒠𑒹𑒥𑒰𑒧𑒹 𑒣𑒩𑒰𑒓𑒧𑒳𑒐 𑒦𑒋 𑒩𑒯𑒪 𑒕𑒪𑒯𑒳𑒿। 𑒧𑒳𑒠𑒰 𑒁𑒯𑒰𑒿𑒏 𑒠𑒵𑒜𑓃𑒢𑒱𑒬𑓂𑒔𑒨 𑒂 𑒮𑒞𑓂𑒨𑒏 𑒣𑓂𑒩𑒞𑒱 𑒢𑒱𑒭𑓂𑒚𑒰𑒏 𑒠𑓂𑒫𑒰𑒩𑒹 𑒯𑒧 𑒁𑒯𑒰𑒿𑒏𑒹𑒿 𑒬𑒱𑒏𑓂𑒭𑒰 𑒠𑒹𑒪। 𑒯𑒧𑒩𑒰 𑒧𑒼𑒢𑒧𑒹 𑒁𑒯𑒰𑒿𑒏 𑒣𑓂𑒩𑒞𑒱 𑒏𑒼𑒢𑒼 𑒧𑒪𑒱𑒢𑒞𑒰 𑒢𑒯𑒱 𑒁𑒕𑒱।
𑒃𑒢𑓂𑒠𑓂𑒩: 𑒡𑒢𑓂𑒨 𑒕𑒲 𑒁𑒯𑒰𑒿 𑒂 𑒡𑒢𑓂𑒨 𑒕𑒟𑒱 𑒂𑒬𑓂𑒫𑒱𑒢𑒾। 𑒂𑒥 𑒯𑒧 𑒍 𑒃𑒢𑓂𑒠𑓂𑒩 𑒢𑒯𑒱 𑒩𑒯𑒪𑒯𑒳𑒿। 𑒯𑒧𑒩 𑒁𑒦𑒱𑒧𑒰𑒢𑒏𑒹𑒿 𑒂𑒬𑓂𑒫𑒱𑒢𑒾 𑒐𑒞𑒧 𑒏𑒋 𑒠𑒹𑒪𑒢𑓂𑒯𑒱।
(𑒃𑒢𑓂𑒠𑓂𑒩 𑒧𑓀𑒔𑒮𑒿 𑒖𑒰𑒃𑒞 𑒁𑒕𑒱। 𑒣𑒩𑒠𑒰 𑒐𑒮𑒻𑒞 𑒁𑒕𑒱।)
𑒠𑒵𑒬𑓂𑒨 𑒞𑒲𑒢
(𑒮𑓂𑒫𑒩𑓂𑒑𑒪𑒼𑒏𑒏 𑒠𑒵𑒬𑓂𑒨। 𑒔𑒰𑒩𑒴 𑒠𑒱𑒬𑒱 𑒫𑒵𑒞𑓂𑒩 𑒂 𑒬𑒧𑓂𑒥𑒩𑒏 𑒢𑒰𑒧𑒏 𑒔𑒩𑓂𑒔𑒰 𑒏𑒩𑒻𑒞 𑒪𑒼𑒏 𑒂𑒥𑒰𑒖𑒰𑒯𑒲 𑒏𑒋 𑒩𑒯𑒪 𑒕𑒟𑒱। 𑒍 𑒠𑒳𑒢𑒴 𑒑𑒼𑒙𑒹 𑒂𑒏𑓂𑒩𑒧𑒝 𑒏𑒋 𑒠𑒹𑒢𑒹 𑒁𑒕𑒱 𑒦𑒰𑒩𑒞𑒏 𑒮𑓂𑒫𑒩𑓂𑒑𑒦𑒴𑒧𑒱 𑒣𑒩। 𑒃𑒢𑓂𑒠𑓂𑒩 𑒮𑒯𑒰𑒨𑒞𑒰𑒏 𑒯𑒹𑒞𑒳 𑒧𑒯𑒩𑓂𑒭𑒱𑒏 𑒂𑒬𑓂𑒩𑒧 𑒁𑒥𑒻𑒞 𑒕𑒟𑒱।)
𑒃𑒢𑓂𑒠𑓂𑒩: 𑒫𑒵𑒞𑓂𑒩 𑒂 𑒬𑒧𑓂𑒥𑒩𑒏 𑒂𑒏𑓂𑒩𑒧𑒝 𑒞𑒿 𑒋𑒯𑒱 𑒥𑒹𑒩 𑒥𑒛𑓂𑒛 𑒣𑓂𑒩𑒔𑓀𑒛 𑒁𑒕𑒱। 𑒁𑒯𑒰𑒿𑒏 𑒫𑒱𑒔𑒰𑒩 𑒂 𑒧𑒰𑒩𑓂𑒑𑒠𑒩𑓂𑒬𑒢𑒏 𑒯𑒹𑒞𑒳 𑒂𑒨𑒪 𑒕𑒲 𑒧𑒯𑒩𑓂𑒭𑒱।
𑒠𑒡𑓂𑒨𑒓 𑒂𑒟𑒩𑓂𑒫𑒢 𑒠𑒡𑒲𑒔𑒲: 𑒃𑒢𑓂𑒠𑓂𑒩। 𑒏𑒳𑒩𑒳𑒏𑓂𑒭𑒹𑒞𑓂𑒩 𑒪𑒑 𑒋𑒏𑒙𑒰 𑒖𑒪𑒰𑒬𑒨 𑒁𑒕𑒱, 𑒖𑒏𑒩 𑒢𑒰𑒧 𑒁𑒕𑒱, 𑒬𑒩𑓂𑒨𑒝𑒰। 𑒁𑒯𑒰𑒿 𑒍𑒞𑒋 𑒖𑒰𑒆, 𑒍𑒞𑒨 𑒒𑒼𑒛𑓃𑒰𑒏 𑒧𑒴𑒛𑓃𑒲 𑒩𑒰𑒐𑒪 𑒁𑒕𑒱, 𑒖𑒰𑒯𑒱𑒮𑒿 𑒯𑒧 𑒂𑒬𑓂𑒫𑒱𑒢𑒾𑒏𑒹𑒿 𑒅𑒣𑒠𑒹𑒬 𑒠𑒹𑒢𑒹 𑒕𑒪𑒯𑒳𑒿। 𑒥𑓂𑒩𑒯𑓂𑒧𑒫𑒱𑒠𑓂𑒨𑒰 𑒍𑒯𑒱 𑒧𑒳𑒿𑒯𑒮𑒿 𑒥𑒯𑒩𑒰𑒨𑒪 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒍 𑒁𑒞𑓂𑒨𑓀𑒞 𑒏𑒚𑒼𑒩 𑒂 𑒠𑒵𑒜𑓃 𑒦𑓄 𑒑𑒹𑒪 𑒁𑒕𑒱। 𑒍𑒯𑒱𑒮𑒿 𑒢𑒰𑒢𑒰-𑒣𑓂𑒩𑒏𑒰𑒩𑒏 𑒬𑒮𑓂𑒞𑓂𑒩 𑒥𑒢𑒰𑒆, 𑒁𑒑𑓂𑒢𑒱 𑒂𑒬𑓂𑒩𑒱𑒞 𑒫𑒱𑒡𑓂𑒫𑓀𑒮𑒏𑒏 𑒣𑓂𑒩𑒨𑒼𑒑 𑒏𑒩𑒴, 𑒞𑓂𑒩𑒱𑒮𑓀𑒡𑒱 𑒫𑓂𑒩𑒖, 𑒡𑒢𑒳𑒭, 𑒃𑒭𑒳-𑒥𑒰𑒝-𑒁𑒨𑒼𑒧𑒳𑒐-𑒪𑒼𑒯𑒰𑒏 𑒮𑒴𑒔𑒲𑒧𑒳𑒐 𑒮𑒳𑒃𑒨𑒰𑒥𑒪𑒰 𑒂 𑒫𑒱𑒏𑓀𑒏𑒞𑒲𑒧𑒳𑒐- 𑒏𑒚𑒼𑒩, 𑒋𑒯𑒱 𑒞𑒩𑒯𑒏 𑒬𑒮𑓂𑒞𑓂𑒩𑒏 𑒣𑓂𑒩𑒨𑒼𑒑 𑒏𑒩𑒴, 𑒏𑒫𑒔 𑒂 𑒬𑒱𑒩𑒮𑓂𑒞𑓂𑒩𑒰𑒝𑒏 𑒣𑓂𑒩𑒨𑒼𑒑 𑒏𑒩𑒴, 𑒁𑓀𑒡𑒏𑒰𑒩 𑒣𑒮𑒰𑒩𑒨𑒥𑒪𑒰 𑒂 𑒖𑒛𑓃𑒻𑒞 𑒩𑒮𑓂𑒮𑒲 𑒠𑓂𑒫𑒰𑒩𑒰 𑒠𑒳𑒩𑓂𑒑𑓀𑒡𑒨𑒳𑒏𑓂𑒞𑓂𑒞 𑒡𑒳𑒿𑒂 𑒢𑒱𑒏𑒪𑒋𑒥𑒪𑒰 𑒬𑒮𑓂𑒞𑓂𑒩𑒏 𑒮𑒹𑒯𑒼 𑒣𑓂𑒩𑒨𑒼𑒑 𑒏𑒩𑒴 𑒂 𑒨𑒳𑒠𑓂𑒡 𑒏𑒋 𑒫𑒱𑒖𑒨𑒲 𑒥𑒢𑒴।
𑒃𑒢𑓂𑒠𑓂𑒩: 𑒖𑒹 𑒂𑒖𑓂𑒘𑒰 𑒧𑒯𑒩𑓂𑒭𑒱।
(𑒣𑒩𑒠𑒰 𑒐𑒮𑒻𑒞 𑒁𑒕𑒱 𑒂 𑒖𑒐𑒢 𑒅𑒚𑒻𑒞 𑒁𑒕𑒱 𑒞𑒿 𑒣𑒼𑒐𑒩𑒱𑒏 𑒏𑒰𑒞𑒧𑒹 𑒒𑒼𑒛𑓃𑒰𑒏 𑒧𑒴𑒛𑓃𑒲𑒮𑒿 𑒃𑒢𑓂𑒠𑓂𑒩 𑒠𑓂𑒫𑒰𑒩𑒰 𑒫𑒖𑓂𑒩 𑒂 𑒫𑒱𑒦𑒱𑒢𑓂𑒢 𑒯𑒟𑒱𑒨𑒰𑒩 𑒥𑒢𑒰𑒍𑒪 𑒖𑒰 𑒩𑒯𑒪 𑒁𑒕𑒱। 𑒤𑒹𑒩 𑒣𑒩𑒠𑒰 𑒐𑒮𑒱 𑒏𑓄 𑒖𑒐𑒢 𑒅𑒚𑒻𑒞 𑒁𑒕𑒱 𑒞𑒿 𑒁𑒑𑓂𑒢𑒱𑒨𑒳𑒏𑓂𑒞 𑒬𑒮𑓂𑒞𑓂𑒩, 𑒖𑒹 𑒤𑒙𑒏𑓂𑒏𑒰 𑒠𑓂𑒫𑒰𑒩𑒰 𑒧𑓀𑒔𑒣𑒩 𑒅𑒞𑓂𑒣𑒢𑓂𑒢 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱, 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱। 𑒧𑓀𑒔 𑒡𑒳𑒂𑒿𑒮𑒿 𑒦𑒩𑒱 𑒖𑒰𑒃𑒞 𑒁𑒕𑒱। 𑒤𑒹𑒩 𑒣𑒩𑒠𑒰 𑒐𑒮𑒻𑒞 𑒁𑒕𑒱 𑒂 𑒧𑓀𑒔𑒏 𑒣𑒰𑒕𑒰𑒿𑒮𑒿 𑒮𑒴𑒞𑓂𑒩𑒡𑒰𑒩𑒏 𑒮𑓂𑒫𑒩 𑒮𑒳𑒢𑒥𑒰𑒧𑒹 𑒁𑒥𑒻𑒞 𑒁𑒕𑒱।)
𑒮𑒴𑒞𑓂𑒩𑒡𑒰𑒩: 𑒃𑒢𑓂𑒠𑓂𑒩𑒏 𑒫𑒱𑒖𑒨 𑒦𑒹𑒪𑒢𑓂𑒯𑒱 𑒂 𑒠𑒳𑒭𑓂𑒙 𑒮𑒦 𑒐𑒼𑒯𑒧𑒹 𑒦𑒰𑒑𑒱 𑒑𑒹𑒪। 𑒄𑒋𑒯 𑒕𑒪 𑒫𑒻𑒠𑒱𑒏 𑒢𑒰𑒙𑒏 𑒥𑒰𑒠𑒧𑒹 𑒋𑒯𑒱 𑒁𑒩𑓂𑒟𑒏𑒹𑒿 𑒁𑒢𑒩𑓂𑒟 𑒏𑒋 𑒠𑒹𑒪𑒢𑓂𑒯𑒱 𑒣𑒾𑒩𑒰𑒝𑒱𑒏 𑒪𑒼𑒏𑒢𑒱, 𑒖𑒰𑒯𑒱𑒧𑒹 𑒠𑒡𑒲𑒔𑒲𑒏 𑒯𑒛𑓂𑒛𑒲𑒮𑒿 𑒃𑒢𑓂𑒠𑓂𑒩𑒏 𑒫𑒖𑓂𑒩 𑒥𑒢𑒋𑒥𑒰𑒏 𑒔𑒩𑓂𑒔 𑒏𑒋𑒪 𑒑𑒹𑒪 𑒁𑒕𑒱।
(𑒍 𑒄 𑒁𑒮𑒪 𑒥𑒰𑒞 𑒁𑒕𑒱- 𑒏𑒹𑒩 𑒤𑒳𑒮𑒤𑒳𑒮𑒰𑒯𑒙𑒱𑒏 𑒮𑓀𑒑 𑒣𑒩𑓂𑒠𑒰 𑒐𑒮𑒪𑒹 𑒩𑒯𑒻𑒞 𑒁𑒕𑒱 𑒂 𑒪𑒰𑒃𑒙 𑒏𑓂𑒭𑒝𑒱𑒏 𑒂𑒤 𑒦𑒹𑒪𑒰𑒏 𑒥𑒰𑒠 𑒂𑒢 𑒦𑒋 𑒖𑒰𑒃𑒞 𑒁𑒕𑒱।)
𑒥𑒰𑒪𑒏𑒟𑒰
𑒥𑓂𑒩𑒰𑒯𑓂𑒧𑒝 𑒂 𑒚𑒰𑒏𑒳𑒩𑒏 𑒏𑒟𑒰
𑒠𑒹𑒥𑒲𑒑𑓀𑒖 𑒋𑒏𑒙𑒰 𑒢𑒑𑒩 𑒕𑒪 𑒂 𑒍𑒯𑒱 𑒢𑒑𑒩𑒧𑒹 𑒋𑒏𑒙𑒰 𑒥𑓂𑒩𑒰𑒯𑓂𑒧𑒝 𑒩𑒯𑒻𑒞 𑒕𑒪। 𑒯𑒳𑒢𑒏𑒰 𑒦𑒑𑒫𑒰𑒢 𑒬𑓂𑒩𑒲 𑒮𑒞𑓂𑒨𑒢𑒰𑒩𑒰𑒨𑒝𑒏 𑒣𑒴𑒖𑒰𑒏 𑒢𑒱𑒧𑓀𑒞𑓂𑒩𑒝 𑒠𑒴𑒩𑒮𑒿 𑒂𑒋𑒪 𑒩𑒯𑒋। 𑒥𑓂𑒩𑒰𑒯𑓂𑒧𑒝 𑒁𑒮𑒑𑒩 𑒩𑒯𑒋 𑒂 𑒖𑒋𑒥𑒰𑒏 𑒍𑒏𑒩𑒰 𑒠𑒳𑒩𑒑𑒩 𑒕𑒪, 𑒮𑒹 𑒍 𑒁𑒣𑒢 𑒢𑒑𑒩𑒏 𑒋𑒏𑒙𑒰 𑒚𑒰𑒏𑒳𑒩𑒏 𑒥𑒔𑓂𑒔𑒰𑒏𑒹𑒿 𑒮𑓀𑒑 𑒏𑒋𑒪𑒏। 𑒚𑒰𑒏𑒳𑒩𑒏 𑒥𑒔𑓂𑒔𑒰 𑒥𑒰𑒖𑒪, 𑒖𑒹 𑒣𑓀𑒛𑒲𑒖𑒲 𑒯𑒧 𑒞𑒿 𑒁𑒯𑒰𑒿𑒏 𑒮𑓀𑒑 𑒖𑒰𑒋𑒥, 𑒧𑒳𑒠𑒰 𑒋𑒏𑒙𑒰 𑒑𑒣 𑒁𑒕𑒱। 𑒖𑒞𑒋 𑒏𑒞𑒯𑒳 𑒯𑒧𑒩𑒰 𑒏𑒼𑒢𑒼 𑒑𑒣 𑒑𑒪𑒞 𑒥𑒳𑒗𑒰𑒋𑒞, 𑒍𑒞𑒋 𑒁𑒯𑒰𑒿𑒏𑒹𑒿 𑒯𑒧𑒩𑒰 𑒥𑒳𑒗𑒰 𑒠𑒹𑒧𑒋 𑒣𑒛𑓃𑒞, 𑒢𑒯𑒱 𑒞𑒿 𑒯𑒧 𑒁𑒯𑒰𑒿𑒏 𑒮𑓀𑒑 𑒢𑒯𑒱 𑒖𑒰𑒋𑒥। 𑒣𑓀𑒛𑒱𑒞𑒖𑒲 𑒏𑒯𑒪𑒢𑓂𑒯𑒱 𑒖𑒹 𑒔𑒪𑒴 𑒥𑒳𑒗𑒰 𑒠𑒹𑒥।
𑒥𑓂𑒩𑒰𑒯𑓂𑒧𑒝 𑒂 𑒚𑒰𑒏𑒳𑒩 𑒔𑒪𑒪। 𑒔𑒪𑒻𑒞-𑒔𑒪𑒻𑒞 𑒍 𑒠𑒳𑒢𑒴 𑒑𑒼𑒙𑒹 𑒋𑒏𑒙𑒰 𑒡𑒰𑒩𑒏 𑒪𑒑 𑒣𑒯𑒳𑒿𑒔𑒪। 𑒍𑒏𑒩𑒰 𑒮𑒦𑒏𑒹𑒿 𑒡𑒰𑒩 𑒙𑒣𑒥𑒰𑒏 𑒩𑒯𑒋 𑒮𑒹 𑒍𑒞𑒋 𑒚𑒰𑒜𑓃 𑒦𑒋 𑒍 𑒮𑒦 𑒏𑒣𑒛𑓃𑒰 𑒐𑒼𑒪𑒱 𑒞𑒻𑒨𑒰𑒩 𑒦𑒹𑒪 𑒞𑒿 𑒚𑒰𑒏𑒳𑒩𑒏 𑒥𑒹𑒙𑒰 𑒡𑒰𑒩𑒧𑒹 𑒠𑒹𑒐𑒪𑒏 𑒖𑒹 𑒋𑒏𑒙𑒰 𑒪𑒯𑒰𑒮 𑒡𑒰𑒩𑒧𑒹 𑒧𑒩𑒪-𑒣𑒛𑓃𑒪 𑒕𑒻 𑒂 𑒦𑒰𑒿𑒮𑒱 𑒩𑒯𑒪 𑒕𑒻। 𑒍 𑒮𑓂𑒞𑓂𑒩𑒲 𑒕𑒪𑒱, 𑒍 𑒦𑒿𑒮𑒢𑒰 𑒥𑒰𑒪𑒳-𑒩𑒹𑒞𑒏 𑒕𑒪 𑒂 𑒍 𑒍𑒖𑒢𑒮𑒿 𑒦𑒰𑒿𑒮𑒱 𑒩𑒯𑒪 𑒕𑒪𑒱। 𑒚𑒰𑒏𑒳𑒩𑒏 𑒥𑒹𑒙𑒰 𑒄 𑒠𑒹𑒐𑒱 𑒏𑒋 𑒥𑒰𑒖𑒪 -– 𑒣𑓀𑒛𑒱𑒞 𑒍 𑒠𑒹𑒐, 𑒍 𑒪𑒯𑒰𑒮 𑒦𑒰𑒿𑒮𑒱 𑒩𑒯𑒪 𑒁𑒕𑒱, 𑒍 𑒞𑒲𑒢 𑒖𑒰𑒢 𑒥𑒯𑒳𑒞 𑒂𑒬𑓂𑒔𑒩𑓂𑒨 𑒁𑒕𑒱। 𑒣𑓀𑒛𑒱𑒞𑒖𑒲 𑒁𑒯𑒰𑒿 𑒯𑒧𑒩𑒰 𑒥𑒳𑒗𑒰 𑒠𑒱𑒁 𑒢𑒯𑒱 𑒞𑒿 𑒯𑒧 𑒒𑒳𑒩𑒱 𑒏𑒋 𑒔𑒪𑒱 𑒖𑒰𑒋𑒥। 𑒣𑓀𑒛𑒱𑒞𑒖𑒲 𑒐𑒱𑒮𑓂𑒮𑒰 𑒏𑒯𑒋 𑒪𑒑𑒪𑒰𑒯।
𑒠𑒹𑒐 𑒥𑒔𑓂𑒔𑒰। 𑒁𑒣𑒢 𑒑𑒰𑒧 𑒪𑒑 𑒏𑒹.𑒢𑒑𑒩𑒏 𑒩𑒰𑒖𑒰 𑒕𑒪 । 𑒍𑒯𑒱 𑒩𑒰𑒖𑒰𑒏 𑒋𑒏𑒙𑒰 𑒥𑒹𑒙𑒰 𑒩𑒯𑒋। 𑒍𑒏𑒩 𑒥𑒱𑒨𑒰𑒯 𑒍𑒯𑒲 𑒮𑓂𑒟𑒰𑒢𑒣𑒩 𑒦𑒹𑒪, 𑒖𑒞𑒋 𑒯𑒧 𑒮𑒦 𑒔𑒪𑒱 𑒩𑒯𑒪 𑒕𑒲।
𑒥𑒰𑒠𑒧𑒹 𑒁𑒣𑒢 𑒢𑒑𑒩𑒏 𑒩𑒰𑒖𑒰 𑒧𑒩𑒱 𑒑𑒹𑒪 । 𑒍𑒏𑒩 𑒥𑒹𑒙𑒰 𑒩𑒰𑒖𑒏𑒹𑒿 𑒮𑒧𑓂𑒯𑒰𑒩𑒱 𑒢𑒯𑒱 𑒮𑒏𑒪 𑒂 𑒩𑒰𑒖𑒏𑒹𑒿 𑒥𑒢𑓂𑒯𑒏 𑒪𑒑𑒰 𑒠𑒹𑒪𑒏। 𑒍𑒏𑒩 𑒮𑒰𑒮𑒳𑒩𑒧𑒹 𑒣𑒞𑒰 𑒪𑒑𑒪𑒻𑒏, 𑒖𑒹 𑒩𑒰𑒖𑒰 𑒩𑒰𑒖𑒣𑒰𑒙 𑒥𑒢𑓂𑒯𑒏 𑒪𑒑𑒰 𑒠𑒹𑒢𑒹 𑒁𑒕𑒱 𑒂 𑒂𑒥 𑒠𑓂𑒫𑒱𑒩𑒰𑒑𑒧𑒢 𑒏𑒩𑒹𑒥𑒰 𑒪𑒹𑒪 𑒍𑒏𑒩𑒰 𑒪𑒑 𑒣𑒰𑒃 𑒢𑒯𑒱 𑒕𑒻, 𑒞𑒿 𑒥𑒛𑓂𑒛 𑒧𑒼𑒬𑓂𑒏𑒱𑒪 𑒦𑒋 𑒑𑒹𑒪𑒻𑒏।
𑒋𑒏 𑒠𑒱𑒢 𑒍𑒏𑒩 𑒮𑒰𑒮𑒳𑒩𑒧𑒹 𑒦𑒑𑒫𑒰𑒢𑒏 𑒣𑒴𑒖𑒰 𑒦𑒋 𑒩𑒯𑒪 𑒕𑒪𑒻𑒏। 𑒍𑒯𑒱 𑒠𑒱𑒢 𑒄 𑒑𑒩𑒲𑒥 𑒩𑒰𑒖𑒰 𑒮𑒰𑒿𑒗𑒧𑒹 𑒣𑒯𑒳𑒿𑒔𑒪 𑒞𑒿 𑒣𑒴𑒖𑒰 𑒦𑒋 𑒩𑒯𑒪 𑒕𑒪। 𑒄 𑒍𑒞𑒋 𑒑𑒹𑒪 𑒞𑒿 𑒏𑒱𑒨𑒼 𑒍𑒏𑒩 𑒐𑒼𑒖-𑒣𑒳𑒕𑒰𑒩𑒲 𑒢𑒯𑒱 𑒏𑒋𑒪𑒏। 𑒍𑒞𑒯𑒱 𑒍 𑒏𑒰𑒞𑒧𑒹 𑒥𑒻𑒮𑒱 𑒑𑒹𑒪। 𑒣𑒴𑒖𑒰 𑒮𑒧𑒰𑒣𑓂𑒞 𑒦𑒹𑒪 𑒂 𑒮𑒦 𑒏𑒱𑒨𑒼 𑒣𑓂𑒩𑒮𑒰𑒠 𑒐𑒰 𑒏𑒋 𑒁𑒣𑒢-𑒁𑒣𑒢 𑒒𑒩 𑒑𑒹𑒪 𑒂 𑒒𑒩𑒥𑒰𑒩𑒲 𑒮𑒦 𑒮𑒹𑒯𑒼 𑒐𑒰-𑒣𑒲𑒥𑒱 𑒏𑒋 𑒮𑒴𑒞𑒱 𑒑𑒹𑒪। 𑒋𑒯𑒱 𑒥𑒹𑒔𑒰𑒩𑒼𑒏𑒹𑒿 𑒏𑓂𑒨𑒼 𑒢𑒯𑒱 𑒣𑒳𑒕𑒪𑒏 𑒂 𑒍 𑒍𑒯𑒲 𑒮𑓂𑒟𑒰𑒢𑒣𑒩 𑒮𑒴𑒞𑒱 𑒑𑒹𑒪। 𑒩𑒰𑒞𑒱𑒏 𑒖𑒐𑒢 𑒥𑒰𑒩𑒯 𑒥𑒰𑒖𑒪 𑒞𑒿 𑒍𑒏𑒩 𑒮𑓂𑒞𑓂𑒩𑒲 𑒅𑒚𑒱 𑒑𑒹𑒪 𑒂 𑒁𑒣𑒢 𑒒𑒼𑒛𑓃𑒮𑒢𑒲𑒨𑒰𑒿 𑒪𑒑 𑒑𑒹𑒪। 𑒍𑒞𑒋 𑒮𑒳𑒞𑒥𑒰𑒏 𑒏𑒼𑒢𑒼 𑒥𑓂𑒨𑒥𑒮𑓂𑒟𑒰 𑒢𑒯𑒱 𑒕𑒪। 𑒋𑒏𑒙𑒰 𑒐𑒰𑒙 𑒩𑒯𑒋 𑒖𑒰𑒯𑒱𑒧𑒹 𑒞𑒲 𑒙𑒰 𑒙𑒰𑒿𑒑 𑒩𑒯𑒋। 𑒋𑒏𑒙𑒰 𑒙𑒰𑒿𑒑 𑒏𑒞𑒋𑒮𑒿 𑒪𑒑𑒰𑒍𑒞। 𑒪𑒛𑓃𑒏𑒲 𑒂𑒋𑒪 𑒂 𑒍𑒯𑒱 𑒪𑒛𑓃𑒏𑒰𑒮𑒿 𑒣𑒳𑒕𑒪𑒏 𑒖𑒹 𑒞𑒴𑒿 𑒏𑒱𑒕𑒳 𑒐𑒹𑒢𑒹 𑒕𑒯। 𑒪𑒛𑓃𑒏𑒰 𑒏𑒯𑒪𑒏 𑒢𑒯𑒱। 𑒥𑒹𑒔𑒰𑒩𑒰 𑒦𑒴𑒐𑒏 𑒧𑒰𑒩𑒪 𑒥𑒔𑒪 𑒦𑒼𑒖𑒢 𑒐𑒋𑒪𑒏। 𑒍𑒯𑒴 𑒮𑒧𑒨 𑒪𑒛𑓃𑒏𑒲 𑒁𑒣𑒢 𑒣𑒞𑒱𑒏𑒹𑒿 𑒢𑒯𑒱 𑒔𑒱𑒢𑓂𑒯𑒪𑒏। 𑒍𑒏𑒩𑒰 𑒏𑒯𑒪𑒏 𑒖𑒹 𑒔𑒪 𑒂 𑒖𑒰𑒯𑒱 𑒐𑒰𑒙𑒏 𑒋𑒏𑒙𑒰 𑒙𑒰𑒿𑒑 𑒙𑒴𑒙𑒪 𑒕𑒪 𑒍𑒯𑒲 𑒐𑒰𑒙𑒧𑒹 𑒋𑒏 𑒠𑒱𑒮 𑒪𑒑𑒰 𑒠𑒹𑒪𑒏 𑒂 𑒠𑒳𑒢𑒴 𑒒𑒼𑒛𑓃𑒮𑒢𑒱𑒨𑒰𑒿 𑒂 𑒍 𑒪𑒛𑓃𑒏𑒲 𑒮𑒴𑒞𑒱 𑒑𑒹𑒪। 𑒍𑒏𑒩 𑒮𑒳𑒞𑒪𑒰𑒏 𑒥𑒰𑒠 𑒪𑒛𑓃𑒏𑒰𑒏𑒹𑒿 𑒏𑒱𑒨𑒼 𑒮𑓂𑒫𑒣𑓂𑒢 𑒠𑒻𑒞 𑒁𑒕𑒱। 𑒄 𑒩𑒰𑒖𑒰𑒏 𑒥𑒹𑒙𑒰, 𑒞𑒴𑒿 𑒁𑒣𑒢 𑒒𑒩 𑒖𑒼, 𑒍𑒞𑒋 𑒞𑒼𑒯𑒩 𑒣𑒱𑒞𑒰𑒏 𑒏𑒼𑒔𑒏 𑒢𑒲𑒔𑒰𑒿 𑒔𑒩𑒱 𑒒𑒰𑒛𑓃𑒰 𑒠𑓂𑒩𑒥 𑒕𑒯𑒳। 𑒍𑒯𑒱𑒧𑒹𑒮𑒿 𑒋𑒏 𑒒𑒰𑒛𑓃𑒰 𑒥𑒹𑒔𑒱 𑒏𑒋 𑒁𑒣𑒢 𑒩𑒰𑒖 𑒕𑒼𑒛𑓃𑒰 𑒪𑒱𑒁। 𑒄 𑒮𑒣𑒢𑒰 𑒮𑒳𑒢𑒱 𑒩𑒰𑒖𑒰𑒏 𑒥𑒹𑒙𑒰 𑒮𑓂𑒟𑒱𑒩𑒹𑒮𑒿 𑒐𑒰𑒙 𑒩𑒰𑒐𑒱, 𑒁𑒣𑒢 𑒒𑒩 𑒂𑒣𑒮 𑒂𑒥𑒱 𑒑𑒹𑒪𑒱। 𑒍 𑒁𑒣𑒢 𑒩𑒰𑒖 𑒥𑒢𑓂𑒯𑒏𑒲𑒮𑒿 𑒕𑒼𑒛𑓃𑒰 𑒪𑒹𑒪𑒏। 𑒣𑒯𑒱𑒢𑒹 𑒖𑒹𑒏𑒰𑒿 𑒦𑒋 𑒑𑒹𑒪। 𑒖𑒐𑒢 𑒍𑒏𑒩 𑒮𑒰𑒮𑒳𑒩𑒧𑒹 𑒄 𑒣𑒞𑒰 𑒔𑒪𑒪, 𑒖𑒹 𑒩𑒰𑒖𑒰 𑒣𑒯𑒱𑒢𑒹 𑒮𑒿 𑒥𑒹𑒬𑒲 𑒢𑒲𑒏 𑒦𑒋 𑒑𑒹𑒪 𑒁𑒕𑒱 𑒞𑒐𑒢 𑒍 𑒮𑒦 𑒩𑒰𑒖𑒰𑒏𑒹𑒿 𑒐𑒥𑒩𑒱 𑒏𑒋𑒪𑒏 𑒖𑒹 𑒁𑒯𑒰𑒿 𑒁𑒣𑒢 𑒠𑓂𑒫𑒱𑒩𑒰𑒑𑒧𑒢 𑒏𑒩𑒥𑒰 𑒪𑒱𑒁। 𑒩𑒰𑒖𑒰 𑒠𑒱𑒢 𑒪𑒋 𑒏𑒋 𑒑𑒹𑒪 𑒂 𑒍𑒯𑒲 𑒪𑒛𑓃𑒏𑒲𑒏𑒹𑒿 𑒑𑒾𑒢𑒰 𑒏𑒩𑒰 𑒏𑒋 𑒪𑒋 𑒁𑒢𑒪𑒏। 𑒩𑒰𑒖𑒰 𑒍𑒏𑒩𑒰 𑒋𑒏𑒙𑒰 𑒐𑒥𑒰𑒮𑒢𑒲𑒏 𑒮𑓀𑒑𑒹 𑒐𑒹𑒢𑒰𑒃𑒏 𑒮𑒦 𑒮𑒧𑒰𑒢 𑒠𑒋 𑒋𑒏𑒙𑒰 𑒏𑒼𑒚𑒪𑒲𑒧𑒹 𑒥𑒢𑓂𑒢 𑒏𑒋 𑒠𑒹𑒪𑒏। 𑒍 𑒐𑒹𑒢𑒰𑒃 𑒐𑒰𑒃𑒞 𑒕𑒪 𑒂 𑒍𑒯𑒲 𑒏𑒼𑒚𑒪𑒲𑒧𑒹 𑒩𑒯𑒻𑒞 𑒕𑒪, 𑒧𑒳𑒠𑒰 𑒩𑒰𑒖𑒰 𑒍𑒞𑒋 𑒢𑒯𑒱 𑒖𑒰𑒃𑒞 𑒕𑒪। 𑒖𑒐𑒢 𑒏𑒱𑒕𑒳 𑒠𑒱𑒢 𑒥𑒲𑒞𑒱 𑒑𑒹𑒪 𑒞𑒿 𑒋𑒏 𑒠𑒱𑒢 𑒩𑒰𑒢𑒲 𑒐𑒥𑒰𑒮𑒢𑒲𑒏𑒹𑒿 𑒣𑒚𑒍𑒪𑒏, 𑒩𑒰𑒖𑒰𑒏𑒹𑒿 𑒥𑒖𑒹𑒥𑒰𑒏 𑒪𑒹𑒪। 𑒩𑒰𑒖𑒰 𑒂𑒋𑒪 𑒞𑒿 𑒩𑒰𑒢𑒲 𑒏𑒯𑒪𑒏 𑒖𑒹 𑒁𑒯𑒰𑒿 𑒯𑒧𑒩𑒰 𑒑𑒾𑒢𑒰 𑒏𑒩𑒰 𑒏𑒋 𑒁𑒢𑒪𑒯𑒳𑒿 𑒂 𑒋𑒯𑒱 𑒏𑒼𑒚𑒪𑒲𑒧𑒹 𑒥𑒢𑓂𑒢 𑒏𑒋 𑒠𑒹𑒢𑒹 𑒕𑒲। 𑒁𑒯𑒰𑒿 𑒁𑒥𑒱𑒞𑒼 𑒢𑒯𑒱 𑒕𑒲। 𑒩𑒰𑒖𑒰 𑒏𑒯𑒪𑒏 𑒖𑒹 𑒍 𑒒𑒼𑒛𑓃𑒮𑒢𑒱𑒨𑒰𑒿 𑒢𑒯𑒱 𑒕𑒲, 𑒖𑒹 𑒙𑒴𑒙𑒪 𑒐𑒰𑒙𑒏 𑒋𑒏 𑒣𑒋𑒩 𑒫𑒻𑒯 𑒩𑒯𑒋। 𑒂 𑒥𑒰𑒿𑒔𑒪 𑒦𑒼𑒖𑒢 𑒯𑒧 𑒐𑒋𑒢𑒹 𑒩𑒯𑒲। 𑒂 𑒤𑒹𑒩 𑒫𑒻𑒯 𑒌𑓀𑒚 𑒐𑒰𑒋 𑒪𑒹𑒪 𑒯𑒧𑒩𑒰 𑒏𑒯𑒪𑒯𑒳𑒿।
𑒄 𑒮𑒳𑒢𑒱 𑒪𑒛𑓃𑒏𑒲 𑒥𑒯𑒳𑒞 𑒪𑒖𑓂𑒖𑒱𑒞 𑒦𑓄 𑒑𑒹𑒪𑒲𑒯। 𑒦𑒼𑒩 𑒦𑒹𑒪 𑒂 𑒍 𑒐𑒥𑒰𑒮𑒢𑒲𑒮𑒿 𑒏𑒯𑒪𑒏 𑒖𑒹 𑒞𑒴𑒿 𑒩𑒯, 𑒯𑒧𑒩 𑒫𑓂𑒩𑒞𑒏 𑒠𑒱𑒢 𑒁𑒕𑒱 𑒂 𑒯𑒧 𑒡𑒰𑒩𑒮𑒿 𑒢𑒯𑒰 𑒏𑒋 𑒁𑒥𑒻𑒞 𑒕𑒲। 𑒍 𑒮𑒦𑒙𑒰 𑒏𑒣𑒛𑓃𑒰 𑒐𑒼𑒪𑒱 𑒡𑒰𑒩𑒧𑒹 𑒤𑒰𑒿𑒑𑒱 𑒑𑒹𑒪। 𑒦𑒮𑒢𑒰 𑒦𑒰𑒚𑒲 𑒖𑒹 𑒦𑒮𑒻𑒞 𑒁𑒕𑒱, 𑒖𑒰𑒢 𑒄 𑒚𑒰𑒏𑒳𑒩, 𑒫𑒻𑒯 𑒪𑒛𑓃𑒏𑒲 𑒁𑒕𑒱। 𑒔𑒪𑒴 𑒯𑒧𑒩𑒰 𑒮𑒦 𑒂𑒑𑒰𑒿।
𑒠𑒼𑒮𑒩
𑒥𑓂𑒩𑒰𑒯𑓂𑒧𑒝 𑒂 𑒚𑒰𑒏𑒳𑒩 𑒍𑒃 𑒡𑒰𑒩𑒏 𑒏𑒰𑒞𑒮𑒿 𑒥𑒱𑒠𑒰 𑒦𑒹𑒪। 𑒡𑒰𑒩𑒏𑒹𑒿 𑒣𑒰𑒩 𑒏𑒩𑒻𑒞 𑒂 𑒔𑒪𑒻𑒞-𑒔𑒪𑒻𑒞 𑒍 𑒮𑒦 𑒋𑒏𑒙𑒰 𑒣𑒻𑒒 𑒑𑒰𑒧𑒧𑒹 𑒣𑒯𑒳𑒿𑒔𑒪𑒰𑒯। 𑒍𑒯𑒱 𑒑𑒰𑒧𑒧𑒹 𑒥𑒛𑓂𑒛 𑒦𑒲𑒛𑓃 𑒪𑒰𑒑𑒪 𑒩𑒯𑒋। 𑒚𑒰𑒏𑒳𑒩𑒏 𑒪𑒛𑓃𑒏𑒰 𑒖𑒰 𑒏𑒋 𑒠𑒹𑒐𑒋 𑒪𑒰𑒑𑒪 𑒞𑒿 𑒍 𑒠𑒹𑒐𑒪𑒏 𑒖𑒹 𑒋𑒏𑒙𑒰 𑒥𑒏𑒩𑒲𑒏 𑒥𑒔𑓂𑒔𑒰 𑒥𑒰𑒢𑓂𑒯𑒱 𑒏𑒋 𑒩𑒰𑒐𑒪 𑒕𑒪 𑒂 𑒖𑒹 𑒏𑒱𑒨𑒼 𑒁𑒥𑒻𑒞 𑒩𑒯𑒋 𑒮𑒹 𑒍𑒯𑒱 𑒥𑒏𑒛𑓃𑒲𑒏 𑒥𑒔𑓂𑒔𑒰𑒏𑒹𑒿 𑒠𑒴 𑒪𑒰𑒞 𑒧𑒰𑒩𑒻𑒞 𑒕𑒪। 𑒚𑒰𑒏𑒳𑒩𑒏 𑒥𑒔𑓂𑒔𑒰 𑒮𑒼𑒔𑒪𑒏 𑒖𑒹 𑒍 𑒥𑒏𑒛𑓃𑒲𑒏 𑒥𑒔𑓂𑒔𑒰 𑒏𑒼𑒢𑒼 𑒋𑒏-𑒠𑒴 𑒑𑒼𑒙𑒹𑒏 𑒤𑒮𑒱𑒪 𑒐𑒰 𑒪𑒹𑒢𑒹 𑒯𑒼𑒋𑒞, 𑒧𑒳𑒠𑒰 𑒞𑒐𑒢 𑒮𑒦 𑒧𑒱𑒪𑒱 𑒏𑒋 𑒏𑒱𑒋𑒏 𑒍𑒏𑒩𑒰 𑒧𑒰𑒩𑒱 𑒩𑒯𑒪 𑒁𑒕𑒱। 𑒍 𑒥𑓂𑒩𑒰𑒯𑓂𑒧𑒝𑒮𑒿 𑒣𑒳𑒕𑒪𑒏 𑒖𑒹 𑒄 𑒑𑒣 𑒥𑒳𑒗𑒰 𑒏𑒋 𑒏𑒯, 𑒞𑒐𑒢 𑒯𑒧 𑒮𑒦 𑒂𑒑𑒴 𑒥𑒜𑓃𑒥। 𑒥𑓂𑒩𑒰𑒯𑓂𑒧𑒝 𑒣𑒯𑒱𑒢𑒹 𑒄 𑒑𑒕𑒢𑒹 𑒕𑒪, 𑒖𑒹 𑒖𑒐𑒢 𑒍 𑒏𑒯𑒞 𑒍𑒏𑒩𑒰 𑒥𑒳𑒗𑒰 𑒏𑒋 𑒏𑒯𑒞। 𑒍𑒯𑒲 𑒮𑓂𑒟𑒰𑒢𑒣𑒩 𑒥𑒻𑒮𑒱 𑒏𑒋 𑒥𑓂𑒩𑒰𑒯𑓂𑒧𑒝 𑒐𑒱𑒮𑓂𑒮𑒰 𑒏𑒯𑒋 𑒪𑒰𑒑𑒪।
𑒮𑒳𑒢 𑒚𑒰𑒏𑒳𑒩 𑒯𑒧 𑒂𑒥 𑒐𑒱𑒮𑓂𑒮𑒰 𑒏𑒯𑒻𑒞 𑒕𑒲। 𑒪𑒼𑒠𑒲𑒣𑒳𑒩 𑒋𑒏𑒙𑒰 𑒢𑒑𑒩 𑒕𑒪। 𑒍𑒯𑒱 𑒢𑒑𑒩𑒏 𑒩𑒰𑒖𑒰 𑒣𑓂𑒩𑒞𑒰𑒣 𑒮𑒱𑓀𑒯 𑒩𑒯𑒋। 𑒯𑒳𑒢𑒏𑒩 𑒋𑒏𑒙𑒰 𑒪𑒛𑓃𑒏𑒰 𑒕𑒪 𑒂 𑒍𑒯𑒲 𑒑𑒰𑒧𑒧𑒹 𑒋𑒏𑒙𑒰 𑒚𑒰𑒏𑒳𑒩𑒏 𑒪𑒛𑓃𑒏𑒰 𑒮𑒹𑒯𑒼 𑒩𑒯𑒋। 𑒠𑒳𑒢𑒴𑒧𑒹 𑒐𑒴𑒥 𑒠𑒼𑒮𑒞𑒱𑒨𑒰𑒩𑒲 𑒔𑒪𑒻𑒞 𑒩𑒯𑒋। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒠𑒳𑒢𑒴 𑒠𑒼𑒮𑓂𑒞 𑒥𑒱𑒔𑒰𑒩 𑒏𑒋𑒪𑒏 𑒖𑒹 𑒠𑒳𑒢𑒴 𑒠𑒼𑒮𑓂𑒞 𑒒𑒼𑒛𑓃𑒰 𑒏𑒮𑒰 𑒏𑒋 𑒖𑓀𑒑𑒪 𑒬𑒱𑒏𑒰𑒩 𑒪𑒹𑒪 𑒖𑒰𑒋। 𑒞𑒏𑒩 𑒥𑒰𑒠 𑒠𑒳𑒢𑒴 𑒠𑒼𑒮𑓂𑒞 𑒒𑒼𑒛𑓃𑒰𑒣𑒩 𑒮𑒫𑒰𑒩 𑒦𑒋 𑒥𑒱𑒠𑒰 𑒦𑒹𑒪 𑒂 𑒒𑒢𑒒𑒼𑒩 𑒖𑓀𑒑𑒪 𑒣𑒯𑒳𑒿𑒔𑒱 𑒑𑒹𑒪। 𑒬𑒱𑒏𑒰𑒩 𑒐𑒹𑒪𑒰𑒃𑒞 𑒮𑒰𑒿𑒗 𑒦𑒋 𑒑𑒹𑒪 𑒂 𑒠𑒳𑒢𑒴 𑒠𑒼𑒮𑓂𑒞 𑒫𑒱𑒔𑒰𑒩 𑒏𑒋𑒪𑒏 𑒖𑒹 𑒂𑒥 𑒯𑒧 𑒮𑒦 𑒒𑒩 𑒢𑒯𑒱 𑒖𑒰 𑒮𑒏𑒥, 𑒮𑒹 𑒁𑒯𑒲 𑒥𑒼𑒢𑒧𑒹 𑒩𑒰𑒞𑒱 𑒏𑒰𑒙𑒱 𑒦𑒼𑒩𑒧𑒹 𑒒𑒩 𑒔𑒪𑒱 𑒖𑒰𑒃। 𑒍𑒞𑒋 𑒋𑒏𑒙𑒰 𑒥𑒛𑓂𑒛 𑒣𑒻𑒒 𑒑𑒰𑒕 𑒩𑒯𑒋, 𑒞𑒏𑒩𑒹 𑒢𑒲𑒔𑒰𑒿𑒧𑒹 𑒍 𑒮𑒦 𑒩𑒳𑒏𑒱 𑒑𑒹𑒪 𑒂 𑒒𑒼𑒛𑓃𑒰𑒏𑒹𑒿 𑒍𑒞𑒋 𑒥𑒰𑒢𑓂𑒯𑒱 𑒠𑒳𑒢𑒴 𑒠𑒼𑒮𑓂𑒞 𑒮𑒴𑒞𑒱 𑒑𑒹𑒪। 𑒮𑒳𑒞𑒪𑒰𑒏 𑒥𑒰𑒠 𑒩𑒰𑒞𑒱 𑒥𑒰𑒩𑒯 𑒥𑒖𑒹 𑒋𑒏 𑒖𑒼𑒛𑓃𑒰 𑒥𑒲𑒡-𑒥𑒲𑒡𑒲𑒢 𑒍𑒯𑒱 𑒑𑒰𑒕𑒏 𑒆𑒣𑒩 𑒥𑒻𑒮𑒱 𑒑𑒹𑒪। 𑒥𑒲𑒡𑒲𑒢 𑒧𑒴𑒛𑓃𑒲 𑒅𑒚𑒰 𑒏𑒋 𑒖𑒹 𑒢𑒲𑒔𑒰𑒿 𑒠𑒹𑒐𑒪𑒏 𑒞𑒿 𑒍𑒯𑒱 𑒠𑒳𑒢𑒴 𑒠𑒼𑒮𑓂𑒞𑒣𑒩 𑒍𑒏𑒩 𑒢𑒖𑒩𑒱 𑒣𑒛𑓃𑒪𑒻𑒏। 𑒥𑒲𑒡𑒲𑒢 𑒏𑒯𑒪𑒏 𑒖𑒹 𑒠𑒹𑒐𑒴 𑒏𑒞𑒹𑒏 𑒮𑒳𑒢𑓂𑒠𑒩 𑒁𑒕𑒱 𑒩𑒰𑒖𑒰𑒏 𑒥𑒹𑒙𑒰। 𑒥𑒲𑒡 𑒏𑒯𑒪𑒏 𑒖𑒞𑒹𑒏 𑒮𑒳𑒢𑓂𑒠𑒩 𑒄 𑒩𑒰𑒖𑒰𑒏 𑒥𑒹𑒙𑒰 𑒁𑒕𑒱, 𑒞𑒞𑒥𑒹 𑒮𑒳𑒢𑓂𑒠𑒩 𑒪𑒰𑒪𑒣𑒩𑒲 𑒏𑒢𑓂𑒨𑒰 𑒁𑒕𑒱, 𑒠𑒳𑒢𑒴𑒏 𑒖𑒼𑒛𑓃𑒲 𑒥𑒛𑓂𑒛 𑒮𑒳𑒢𑓂𑒠𑒩 𑒯𑒼𑒋𑒞। 𑒥𑒲𑒡𑒲𑒢 𑒏𑒯𑒪𑒏 𑒖𑒹 𑒁𑒯𑒰𑒿 𑒞𑒿 𑒮𑓂𑒫𑒨𑓀 𑒫𑒱𑒡𑒰𑒞𑒰 𑒕𑒲। 𑒠𑒳𑒢𑒴𑒏 𑒖𑒼𑒛𑓃𑒲 𑒪𑒑𑒹𑒢𑒰𑒃 𑒁𑒯𑒰𑒿𑒏 𑒏𑒰𑒖 𑒕𑒲। 𑒥𑒱𑒡𑒰𑒞𑒰 𑒍𑒯𑒱 𑒠𑒳𑒢𑒴𑒏𑒹𑒿 𑒍𑒞𑒋𑒮𑒿 𑒮𑒳𑒞𑒪𑒹𑒧𑒹 𑒅𑒚𑒰 𑒏𑒋 𑒍𑒯𑒱 𑒪𑒰𑒪𑒣𑒩𑒲 𑒏𑒢𑓂𑒨𑒰 𑒪𑒑 𑒣𑒯𑒳𑒿𑒔𑒰 𑒠𑒹𑒪𑒏। 𑒩𑒰𑒖𑒰 𑒂 𑒏𑒢𑓂𑒨𑒰 𑒋𑒏 𑒣𑒪𑓀𑒑𑒣𑒩 𑒂 𑒚𑒰𑒏𑒳𑒩 𑒠𑒼𑒮𑒩 𑒣𑒪𑓀𑒑𑒣𑒩। 𑒦𑒼𑒩 𑒦𑒹𑒪𑒰𑒣𑒩 𑒢𑒱𑒢𑓂𑒠 𑒙𑒳𑒙𑒪, 𑒞𑒿 𑒪𑒰𑒪𑒣𑒩𑒲 𑒥𑒑𑒪𑒧𑒹 𑒩𑒰𑒖𑒰𑒏 𑒪𑒛𑓃𑒏𑒰𑒏𑒹𑒿 𑒠𑒹𑒐𑒪𑒏, 𑒞𑒿 𑒐𑒴𑒥 𑒣𑓂𑒩𑒮𑒢𑓂𑒢 𑒦𑒹𑒪। 𑒍𑒏𑒩𑒰 𑒣𑒪𑓀𑒑𑒣𑒩 𑒋𑒏𑒙𑒰 𑒮𑒱𑒢𑓂𑒠𑒴𑒩𑒏 𑒣𑒳𑒛𑓃𑒱𑒂 𑒩𑒰𑒐𑒪 𑒕𑒪। 𑒣𑒩𑒲 𑒏𑒯𑒪𑒏 𑒖𑒹 𑒆𑒣𑒩𑒥𑒪𑒰 𑒯𑒧𑒩 𑒂 𑒁𑒯𑒰𑒿𑒏 𑒖𑒼𑒛𑓃𑒲 𑒧𑒱𑒪𑒰 𑒠𑒹𑒢𑒹 𑒁𑒕𑒱। 𑒂𑒥 𑒠𑒹𑒩𑒲 𑒏𑒼𑒢𑒼 𑒥𑒰𑒞𑒏 𑒢𑒯𑒱। 𑒩𑒰𑒖𑒰𑒏 𑒪𑒛𑓃𑒏𑒰 𑒂 𑒪𑒰𑒪𑒣𑒩𑒲 𑒏𑒢𑓂𑒨𑒰 𑒠𑒳𑒢𑒴𑒏 𑒍𑒞𑒋 𑒥𑒱𑒨𑒰𑒯 𑒦𑒋 𑒑𑒹𑒪। 𑒏𑒱𑒕𑒳 𑒠𑒱𑒢 𑒡𑒩𑒱 𑒍 𑒍𑒞𑒋 𑒩𑒯𑒪 𑒂 𑒞𑒏𑒩 𑒥𑒰𑒠 𑒩𑒰𑒖𑒰𑒏 𑒥𑒹𑒙𑒰 𑒁𑒣𑒢 𑒮𑒮𑒳𑒩𑒰𑒩𑒱𑒮𑒿 𑒥𑒱𑒠𑒰 𑒦𑒹𑒪 । 𑒏𑒱𑒕𑒳𑒋 𑒠𑒴𑒩 𑒂𑒑𑒰𑒿 𑒑𑒹𑒪𑒰𑒏 𑒥𑒰𑒠 𑒏𑒢𑓂𑒨𑒰𑒏𑒹𑒿 𑒋𑒏𑒙𑒰 𑒑𑒣 𑒧𑒼𑒢 𑒣𑒛𑓃𑒪𑒻𑒏। 𑒍 𑒁𑒣𑒢 𑒣𑒞𑒱𑒮𑒿 𑒏𑒯𑒪𑒏- 𑒯𑒧𑒩 𑒣𑒱𑒞𑒰𑒏𑒹𑒿 𑒔𑒼𑒪𑒰 𑒧𑒰𑒢𑒹 𑒖𑒲𑒥 𑒥𑒠𑒪 𑒏 𑒧𑓀𑒞𑓂𑒩 𑒁𑒥𑒻𑒞 𑒕𑒢𑓂𑒯𑒱। 𑒁𑒯𑒰𑒿 𑒯𑒳𑒢𑒏𑒰𑒮𑒿 𑒖𑒰 𑒏𑒋 𑒮𑒲𑒐𑒱 𑒪𑒱𑒁। 𑒍𑒞𑒋 𑒠𑒳𑒢𑒴 𑒛𑒼𑒪𑒲 𑒩𑒼𑒏𑒱 𑒏𑒋 𑒠𑒳𑒢𑒴 𑒠𑒼𑒮𑓂𑒞 𑒍𑒏𑒩 𑒣𑒱𑒞𑒰𑒖𑒲 𑒪𑒑 𑒑𑒹𑒪 𑒂 𑒖𑒰 𑒏𑒋 𑒏𑒯𑒪𑒏 𑒖𑒹 𑒯𑒧𑒩𑒰 𑒮𑒦𑒏𑒹𑒿 𑒔𑒼𑒪𑒰 𑒥𑒠𑒪𑒥𑒰𑒏 𑒧𑓀𑒞𑓂𑒩 𑒮𑒱𑒐𑒰 𑒠𑒱𑒁। 𑒍𑒯𑒱 𑒧𑓀𑒞𑓂𑒩𑒏𑒹𑒿 𑒠𑒳𑒢𑒴 𑒠𑒼𑒮𑓂𑒞 𑒮𑒲𑒐𑒱 𑒪𑒹𑒪𑒏 𑒧𑒳𑒠𑒰 𑒧𑓀𑒞𑓂𑒩 𑒮𑒱𑒐𑒪𑒰𑒏 𑒥𑒰𑒠 𑒚𑒰𑒏𑒳𑒩𑒏 𑒥𑒹𑒙𑒰𑒏 𑒧𑒼𑒢𑒧𑒹 𑒐𑒼𑒙 𑒂𑒥𑒱 𑒑𑒹𑒪𑒻𑒏। 𑒞𑒏𑒩 𑒥𑒰𑒠 𑒋𑒏 𑒛𑒼𑒪𑒲𑒣𑒩 𑒩𑒰𑒖𑒰𑒏 𑒥𑒹𑒙𑒰 𑒂 𑒣𑒩𑒲 𑒂 𑒠𑒼𑒮𑒩 𑒛𑒼𑒪𑒲𑒣𑒩 𑒚𑒰𑒏𑒳𑒩𑒏 𑒥𑒹𑒙𑒰 𑒥𑒱𑒠𑒰 𑒦𑒹𑒪𑒰𑒯। 𑒪𑒰𑒪𑒣𑒩𑒲 𑒣𑒞𑒱𑒮𑒿 𑒣𑒳𑒕𑒪𑒏 𑒖𑒹 𑒁𑒯𑒰𑒿 𑒔𑒼𑒪𑒰 𑒥𑒠𑒪𑒥𑒰𑒏 𑒧𑓀𑒞𑓂𑒩 𑒮𑒲𑒐𑒱 𑒪𑒹𑒪𑒯𑒳𑒿। 𑒞𑒿 𑒩𑒰𑒖𑒰𑒏 𑒥𑒹𑒙𑒰 𑒏𑒯𑒪𑒏-𑒯𑒿। 𑒞𑒿 𑒣𑒩𑒲 𑒏𑒯𑒪𑒏 𑒖𑒹 𑒋𑒏𑒩 𑒣𑒩𑒲𑒏𑓂𑒭𑒰 𑒏𑒩𑒴। 𑒩𑒰𑒖𑒰𑒏 𑒥𑒹𑒙𑒰 𑒏𑒯𑒪𑒏 𑒖𑒹 𑒂𑒑𑒰𑒿 𑒔𑒪𑒴। 𑒔𑒪𑒻𑒞-𑒔𑒪𑒻𑒞 𑒍 𑒮𑒦 𑒏𑒢𑒲 𑒂𑒑𑒰𑒿 𑒥𑒜𑓃𑒪𑒰𑒯। 𑒂𑒑𑒰𑒿 𑒋𑒏𑒙𑒰 𑒮𑒳𑒑𑓂𑒑𑒰 𑒧𑒩𑒪 𑒣𑒛𑓃𑒪 𑒩𑒯𑒋। 𑒄 𑒮𑒦 𑒑𑒣 𑒚𑒰𑒏𑒳𑒩 𑒮𑒳𑒢𑒻𑒞 𑒖𑒰 𑒩𑒯𑒪 𑒕𑒪। 𑒖𑒯𑒱𑒢𑒰 𑒩𑒰𑒖𑒰𑒏 𑒥𑒹𑒙𑒰 𑒮𑒳𑒑𑒰𑒏 𑒦𑒲𑒞𑒩 𑒣𑒻𑒮𑒪, 𑒍𑒯𑒲 𑒮𑒧𑒨 𑒚𑒰𑒏𑒳𑒩 𑒧𑓀𑒞𑓂𑒩 𑒣𑒜𑓃𑒱 𑒩𑒰𑒖𑒰𑒏 𑒣𑒱𑓀𑒖𑒩𑒰𑒧𑒹 𑒣𑒻𑒮𑒱 𑒑𑒹𑒪। 𑒄 𑒮𑒦 𑒣𑒩𑒲 𑒠𑒹𑒐𑒪𑒏। 𑒋𑒏 𑒛𑒼𑒪𑒲𑒣𑒩 𑒧𑒰𑒞𑓂𑒩 𑒚𑒰𑒏𑒳𑒩𑒏 𑒪𑒯𑒰𑒬 𑒣𑒛𑓃𑒪 𑒕𑒻 𑒂 𑒋𑒏 𑒣𑒩 𑒣𑒩𑒲 𑒂 𑒍 𑒚𑒰𑒏𑒳𑒩 𑒩𑒰𑒖𑒰 𑒥𑒢𑒱 𑒖𑒰 𑒩𑒯𑒪 𑒁𑒕𑒱 𑒂 𑒩𑒰𑒖𑒰𑒏 𑒖𑒲𑒫 𑒮𑒳𑒑𑓂𑒑𑒰 𑒥𑒢𑒱 𑒅𑒛𑓃𑒱 𑒑𑒹𑒪। 𑒚𑒰𑒏𑒳𑒩𑒏 𑒪𑒯𑒰𑒬 𑒤𑒹𑒏𑒱 𑒍 𑒚𑒰𑒏𑒳𑒩 𑒩𑒰𑒖𑒰 𑒥𑒢𑒱 𑒑𑒹𑒪 𑒂 𑒍𑒏𑒩 𑒣𑒱𑓀𑒖𑒛𑓃𑒰𑒧𑒹 𑒖𑒰 𑒏𑒋 𑒍𑒯𑒱 𑒪𑒰𑒪𑒣𑒩𑒲𑒏𑒹𑒿 𑒠𑒐𑒪 𑒏𑒋 𑒪𑒹𑒪𑒏। 𑒪𑒰𑒪𑒣𑒩𑒲 𑒏𑒢𑓂𑒨𑒰 𑒄 𑒥𑒳𑒗𑒱 𑒑𑒹𑒪, 𑒖𑒹 𑒄 𑒯𑒧𑒩 𑒣𑒞𑒱 𑒢𑒯𑒱 𑒁𑒕𑒱। 𑒚𑒰𑒏𑒳𑒩 𑒩𑒰𑒖𑒰 𑒁𑒣𑒢 𑒧𑒯𑒪𑒧𑒹 𑒖𑒰 𑒏𑒋 𑒩𑒯𑒋 𑒪𑒰𑒑𑒪 𑒂 𑒋𑒯𑒱 𑒫𑒱𑒭𑒨𑒧𑒹 𑒏𑒏𑒩𑒼 𑒥𑒳𑒗𑒪 𑒢𑒯𑒱 𑒩𑒯𑒻𑒏। 𑒚𑒰𑒏𑒳𑒩 𑒩𑒰𑒖𑒰 𑒏𑒢𑓂𑒨𑒰𑒮𑒿 𑒏𑒯𑒪𑒏 𑒖𑒹 𑒂𑒥 𑒯𑒧 𑒮𑒦 𑒮𑒳𑒐𑒲 𑒢𑒱𑒢𑓂𑒠𑒏 𑒩𑒰𑒞𑒱 𑒥𑒱𑒞𑒰𑒋𑒥। 𑒣𑒩𑒲 𑒏𑒯𑒪𑒏 𑒖𑒹 𑒋𑒐𑒢 𑒢𑒯𑒱। 𑒋𑒐𑒢 𑒯𑒧𑒩 𑒋𑒏𑒙𑒰 𑒏𑒾𑒪 𑒥𑒰𑒿𑒏𑒲 𑒁𑒕𑒱। 𑒍 𑒣𑒴𑒩𑒰 𑒏𑒋 𑒪𑒹𑒥 𑒞𑒏𑒩 𑒥𑒰𑒠। 𑒚𑒰𑒏𑒳𑒩 𑒩𑒰𑒖𑒰 𑒏𑒯𑒪𑒏 𑒖𑒹 𑒏𑒲 𑒏𑒾𑒪 𑒁𑒕𑒱 𑒁𑒯𑒰𑒿 𑒣𑒴𑒩𑓂𑒝 𑒏𑒋 𑒪𑒱𑒁। 𑒣𑒩𑒲 𑒏𑒯𑒪𑒏 𑒖𑒹 𑒯𑒧𑒩𑒰 𑒋𑒏𑒙𑒰 𑒧𑒢𑓂𑒠𑒱𑒩 𑒥𑒢𑒥𑒰 𑒠𑒱𑒁 𑒖𑒥𑒳𑒢𑒰𑒏 𑒞𑒙𑒣𑒩। 𑒯𑒧 𑒥𑒰𑒩𑒯 𑒥𑒩𑒐 𑒮𑒠𑒰𑒫𑓂𑒩𑒞 𑒥𑒰𑒿𑒙𑒥। 𑒞𑒏𑒩 𑒥𑒰𑒠 𑒩𑒰𑒖𑒰 𑒮𑒼𑒔𑒪𑒏 𑒖𑒹 𑒂𑒥 𑒯𑒧𑒩𑒰 𑒕𑒼𑒛𑓃𑒱 𑒏𑒋 𑒏𑒏𑒩𑒼 𑒄 𑒢𑒯𑒱 𑒯𑒼𑒋𑒞 𑒞𑒰𑒯𑒱 𑒪𑒹𑒪 𑒯𑒧 𑒋𑒏𑒙𑒰 𑒅𑒣𑒰𑒨 𑒏𑒩𑒻𑒞 𑒕𑒲, 𑒏𑒱 𑒋𑒯𑒱 𑒥𑒼𑒢𑒧𑒹 𑒖𑒞𑒹𑒏 𑒮𑒳𑒑𑒰 𑒁𑒕𑒱 𑒍𑒯𑒱 𑒮𑒦𑒏𑒹𑒿 𑒧𑒰𑒩𑒱 𑒠𑒻𑒞 𑒕𑒲। 𑒚𑒰𑒏𑒳𑒩 𑒩𑒰𑒖𑒰 𑒄 𑒮𑒼𑒔𑒱 𑒬𑒱𑒏𑒰𑒩𑒲𑒏𑒹𑒿 𑒧𑒿𑒑𑒥𑒹𑒪𑒏 𑒂 𑒍𑒏𑒩𑒰 𑒏𑒯𑒪𑒏 𑒖𑒹 𑒋𑒯𑒱 𑒖𑓀𑒑𑒪𑒧𑒹 𑒖𑒞𑒹𑒏 𑒮𑒳𑒑𑒰 𑒁𑒕𑒱, 𑒍𑒏𑒩𑒰 𑒣𑒏𑒛𑓃𑒱 𑒏𑒋 𑒂𑒢 𑒯𑒧 𑒞𑒼𑒩𑒰 𑒋𑒏 𑒮𑒳𑒑𑒰𑒏 𑒋𑒏 𑒙𑒰𑒏𑒰 𑒠𑒹𑒥𑒯𑒳। 𑒬𑒱𑒏𑒰𑒩𑒲 𑒮𑒳𑒑𑓂𑒑𑒰 𑒥𑒗𑒥𑒋 𑒪𑒰𑒑𑒪 𑒂 𑒩𑒰𑒖𑒰𑒏𑒹𑒿 𑒠𑒹𑒧𑒋 𑒪𑒰𑒑𑒪। 𑒩𑒰𑒖𑒰 𑒮𑒦 𑒮𑒳𑒑𑒰𑒏𑒹𑒿 𑒧𑒰𑒩𑒱 𑒏𑒋 𑒤𑒹𑓀𑒏𑒱 𑒠𑒻𑒞 𑒕𑒪। 𑒋𑒏 𑒠𑒱𑒢 𑒬𑒱𑒏𑒰𑒩𑒲 𑒮𑒳𑒑𑒰 𑒥𑒗𑒰 𑒏𑒋 𑒍𑒯𑒲 𑒖𑒥𑒳𑒢𑒰𑒏 𑒏𑒱𑒢𑒰𑒩 𑒡𑒋 𑒂𑒥𑒱 𑒩𑒯𑒪 𑒕𑒪, 𑒞𑒿 𑒣𑒩𑒲𑒏 𑒢𑒖𑒩𑒱 𑒍𑒯𑒱 𑒬𑒱𑒏𑒰𑒩𑒲𑒣𑒩 𑒣𑒛𑓃𑒪। 𑒍𑒏𑒩𑒰 𑒧𑒰𑒟𑒧𑒹 𑒍 𑒑𑒣 𑒧𑒼𑒢 𑒣𑒛𑓃𑒪𑒻𑒏, 𑒞𑒿 𑒍 𑒬𑒱𑒏𑒰𑒩𑒲𑒏𑒹𑒿 𑒥𑒖𑒹𑒪𑒏 𑒂 𑒣𑒳𑒕𑒪𑒏 𑒖𑒹 𑒁𑒯𑒰𑒿 𑒄 𑒮𑒳𑒑𑓂𑒑𑒰 𑒏𑒏𑒩𑒰 𑒠𑒻𑒞 𑒕𑒲। 𑒍 𑒏𑒯𑒪𑒏 𑒖𑒹 𑒄 𑒮𑒦 𑒮𑒳𑒑𑓂𑒑𑒰 𑒯𑒧 𑒁𑒯𑒲 𑒩𑒰𑒖𑒰𑒏𑒹𑒿 𑒠𑒻𑒞 𑒕𑒲। 𑒣𑒩𑒲 𑒣𑒳𑒕𑒪𑒏 𑒖𑒹 𑒩𑒰𑒖𑒰 𑒞𑒐𑒢 𑒋𑒏𑒩 𑒏𑒲 𑒏𑒩𑒻𑒞 𑒁𑒕𑒱। 𑒬𑒱𑒏𑒰𑒩𑒲 𑒏𑒯𑒪𑒏 𑒖𑒹 𑒍 𑒋𑒏𑒩𑒰 𑒮𑒦𑒏𑒹𑒿 𑒧𑒰𑒩𑒱 𑒏𑒋 𑒤𑒹𑒏𑒱 𑒠𑒻𑒞 𑒁𑒕𑒱। 𑒣𑒩𑒲𑒏𑒹𑒿 𑒄 𑒮𑒳𑒢𑒱 𑒏𑒋 𑒧𑒰𑒟 𑒠𑒳𑒐𑒰𑒋 𑒪𑒑𑒪𑒻𑒏। 𑒍 𑒬𑒱𑒏𑒰𑒩𑒲𑒏𑒹𑒿 𑒣𑒳𑒕𑒪𑒏 𑒖𑒹 𑒩𑒰𑒖𑒰 𑒋𑒏 𑒮𑒳𑒑𑒰𑒏 𑒏𑒞𑒹𑒏 𑒏𑒋 𑒣𑒰𑒃 𑒠𑒻𑒞 𑒁𑒕𑒱। 𑒬𑒱𑒏𑒰𑒩𑒲 𑒏𑒯𑒪𑒏 𑒖𑒹 𑒋𑒏 𑒮𑒳𑒑𑒰𑒏 𑒍 𑒣𑒰𑒿𑒔 𑒙𑒰𑒏𑒰 𑒠𑒻𑒞 𑒁𑒕𑒱। 𑒣𑒩𑒲 𑒏𑒯𑒪𑒏 𑒖𑒹 𑒂𑒃𑒮𑒿 𑒮𑒦 𑒮𑒳𑒑𑒰 𑒯𑒧𑒩𑒰 𑒠𑒹𑒪 𑒏𑒩, 𑒯𑒧 𑒋𑒏 𑒮𑒳𑒑𑒰𑒏 𑒠𑒮 𑒙𑒰𑒏𑒰 𑒠𑒹𑒪 𑒏𑒩𑒥। 𑒍𑒯𑒱 𑒠𑒱𑒢𑒮𑒿 𑒮𑒦 𑒬𑒱𑒏𑒰𑒩𑒲 𑒣𑒩𑒲𑒏𑒹𑒿 𑒮𑒦 𑒮𑒳𑒑𑓂𑒑𑒰 𑒠𑒹𑒧𑒋 𑒪𑒑𑒪𑒰𑒯। 𑒣𑒩𑒲 𑒮𑒦 𑒮𑒳𑒑𑒰𑒮𑒿 𑒣𑒴𑒕𑒟𑒱 𑒖𑒹 𑒁𑒯𑒰𑒿 𑒔𑒼𑒪𑒰 𑒥𑒠𑒪𑒥𑒰𑒏 𑒧𑓀𑒞𑓂𑒩 𑒖𑒢𑒻𑒞 𑒕𑒲, 𑒋𑒯𑒱 𑒞𑒩𑒯𑒹𑒿 𑒍 𑒥𑒯𑒳𑒞 𑒩𑒰𑒮 𑒮𑒳𑒑𑒰𑒏𑒹𑒿 𑒣𑒳𑒕𑒻𑒞 𑒑𑒹𑒪𑒲𑒯 𑒂 𑒕𑒼𑒛𑓃𑒻𑒞 𑒑𑒹𑒪𑒲𑒯। 𑒍𑒯𑒱𑒧𑒹 𑒮𑒿 𑒋𑒏𑒙𑒰 𑒮𑒳𑒑𑓂𑒑𑒰 𑒥𑒰𑒖𑒪- 𑒯𑒿, 𑒯𑒧 𑒔𑒼𑒪𑒰 𑒥𑒠𑒪𑒥𑒰𑒏 𑒧𑓀𑒞𑓂𑒩 𑒖𑒢𑒻𑒞 𑒕𑒲। 𑒍𑒯𑒱 𑒮𑒳𑒑𑒰𑒏𑒹𑒿 𑒣𑒩𑒲 𑒁𑒣𑒢𑒰 𑒣𑒱𑒖𑒩𑒰𑒧𑒹 𑒥𑒢𑓂𑒢 𑒏𑒋 𑒪𑒹𑒪𑒢𑓂𑒯𑒱 𑒂 𑒋𑒏𑒙𑒰 𑒕𑒼𑒙 𑒥𑒏𑒛𑓃𑒲𑒏 𑒥𑒔𑓂𑒔𑒰 𑒏𑒲𑒢𑒱 𑒏𑒋 𑒩𑒰𑒐𑒱 𑒪𑒹𑒪𑒢𑓂𑒯𑒱। 𑒏𑒢𑒹𑒏 𑒠𑒱𑒢𑒏𑒰 𑒥𑒰𑒠 𑒥𑒰𑒩𑒯 𑒥𑒩𑒐𑒏 𑒮𑒧𑒨 𑒣𑒴𑒩𑓂𑒝 𑒦𑓄 𑒑𑒹𑒪 । 𑒚𑒰𑒏𑒳𑒩 𑒩𑒰𑒖𑒰 𑒁𑒣𑒢 𑒛𑒼𑒪𑒲 𑒏𑒯𑒰𑒩 𑒣𑒚𑒹𑒪𑒏 𑒂 𑒍𑒞𑒋𑒮𑒿 𑒣𑒩𑒲𑒏𑒹𑒿 𑒁𑒣𑒢 𑒧𑒯𑒪𑒧𑒹 𑒂𑒣𑒮 𑒁𑒢𑒪𑒏। 𑒣𑒩𑒲 𑒖𑒞𑒋 𑒩𑒯𑒻𑒞 𑒕𑒪, 𑒍𑒞𑒋 𑒍 𑒥𑒏𑒩𑒲𑒏 𑒥𑒔𑓂𑒔𑒰 𑒩𑒰𑒐𑒱 𑒪𑒹𑒪𑒏 𑒂 𑒮𑒳𑒞𑒥𑒰𑒏 𑒏𑒰𑒪 𑒍𑒯𑒱 𑒥𑒏𑒛𑓃𑒲𑒏 𑒥𑒔𑓂𑒔𑒰𑒏𑒹𑒿 𑒧𑒰𑒩𑒱 𑒠𑒹𑒪𑒏। 𑒐𑒹𑒢𑒰𑒃 𑒡𑒩𑒱 𑒢𑒯𑒱 𑒐𑒋𑒪𑒏 𑒂 𑒏𑒰𑒢𑒋 𑒪𑒰𑒑𑒪𑒱। 𑒩𑒰𑒖𑒰𑒏𑒹𑒿 𑒋𑒯𑒱 𑒑𑒣𑒏 𑒣𑒞𑒰 𑒪𑒰𑒑𑒪 𑒖𑒹 𑒩𑒰𑒢𑒲 𑒐𑒹𑒢𑒰𑒃 𑒡𑒩𑒱 𑒢𑒯𑒱 𑒐𑒋𑒢𑒹 𑒕𑒟𑒱 𑒂 𑒏𑒰𑒢𑒱 𑒩𑒯𑒪 𑒕𑒟𑒱। 𑒩𑒰𑒖𑒰 𑒂𑒋𑒪 𑒂 𑒣𑒳𑒕𑒪𑒏 𑒖𑒹 𑒁𑒯𑒰𑒿 𑒏𑒱𑒋𑒏 𑒏𑒰𑒢𑒱 𑒩𑒯𑒪 𑒕𑒲। 𑒐𑒹𑒢𑒰𑒃 𑒏𑒱𑒋𑒏 𑒢𑒯𑒱 𑒐𑒋𑒢𑒹 𑒕𑒲। 𑒣𑒩𑒲 𑒚𑒰𑒏𑒳𑒩 𑒩𑒰𑒖𑒰𑒮𑒿 𑒏𑒯𑒪𑒏- 𑒯𑒧 𑒏𑒼𑒢𑒰𑒏𑒹𑒿 𑒐𑒰𑒋𑒥, 𑒄 𑒖𑒹 𑒥𑒏𑒩𑒲𑒏 𑒥𑒔𑓂𑒔𑒰 𑒧𑒩𑒱 𑒑𑒹𑒪, 𑒞𑒿 𑒯𑒧 𑒂𑒥 𑒖𑒲𑒫𑒱𑒞 𑒢𑒯𑒱 𑒩𑒯𑒥। 𑒖𑒰𑒡𑒩𑒱 𑒄 𑒥𑒏𑒩𑒲𑒏 𑒥𑒔𑓂𑒔𑒰 𑒢𑒯𑒱 𑒐𑒰𑒃𑒞 𑒕𑒪, 𑒞𑒰𑒡𑒩𑒱 𑒯𑒧 𑒢𑒯𑒱 𑒐𑒰𑒃𑒞 𑒕𑒪𑒯𑒳𑒿। 𑒄 𑒧𑒩𑒱 𑒑𑒹𑒪 𑒮𑒹 𑒂𑒥 𑒯𑒧𑒯𑒴𑒿 𑒧𑒩𑒱 𑒖𑒰𑒋𑒥। 𑒍𑒧𑓂𑒯𑒩 𑒮𑒳𑒑𑒰 𑒠𑒹𑒐𑒱 𑒩𑒯𑒪 𑒕𑒪, 𑒋𑒧𑓂𑒯𑒩 𑒚𑒰𑒏𑒳𑒩 𑒩𑒰𑒖𑒰 𑒫𑒱𑒔𑒪𑒱𑒞 𑒦𑓄 𑒩𑒯𑒪 𑒕𑒪। 𑒩𑒰𑒖𑒰 𑒮𑒼𑒔𑒱 𑒏𑒋 𑒏𑒯𑒪𑒏 𑒖𑒹 𑒁𑒯𑒰𑒿 𑒔𑒳𑒣 𑒩𑒯𑒴, 𑒥𑒏𑒩𑒲𑒏 𑒥𑒔𑓂𑒔𑒰 𑒖𑒲𑒫𑒱𑒞 𑒦𑒋 𑒖𑒰𑒋𑒞। 𑒋𑒞𑒹𑒏 𑒏𑒯𑒪𑒰𑒣𑒩 𑒣𑒩𑒲 𑒔𑒳𑒣 𑒦𑒋 𑒑𑒹𑒪𑒱 𑒂 𑒖𑒯𑒱𑒢𑒰 𑒩𑒰𑒖𑒰 𑒁𑒣𑒢 𑒔𑒼𑒪𑒰 𑒥𑒠𑒪𑒱 𑒍𑒯𑒱 𑒥𑒏𑒛𑓃𑒲𑒧𑒹 𑒣𑒻𑒮𑒪 𑒞𑒐𑒢𑒹 𑒮𑒳𑒑𑒰 𑒁𑒣𑒢𑒰 𑒩𑒰𑒖𑒰𑒏 𑒣𑒱𑓀𑒖𑒩𑒰𑒧𑒹 𑒔𑒪𑒱 𑒑𑒹𑒪। 𑒮𑒳𑒑𑒰 𑒖𑒹𑒯𑒹𑒢𑒹-𑒞𑒹𑒯𑒢𑒹 𑒣𑒛𑓃𑒪 𑒩𑒯𑒱 𑒑𑒹𑒪 𑒂 𑒚𑒰𑒏𑒳𑒩 𑒩𑒰𑒖𑒰 𑒍𑒯𑒲 𑒥𑒏𑒛𑓃𑒲𑒏 𑒣𑒱𑓀𑒖𑒩𑒰𑒧𑒹 𑒔𑒪𑒱 𑒑𑒹𑒪।
𑒮𑒳𑒢𑒪𑒯𑒳𑒿, 𑒥𑒏𑒛𑓃𑒲𑒏 𑒥𑒔𑓂𑒔𑒰 𑒫𑒋𑒯 𑒚𑒰𑒏𑒳𑒩 𑒩𑒰𑒖𑒰 𑒁𑒕𑒱 𑒂 𑒖𑒹 𑒏𑓂𑒨𑒼 𑒁𑒥𑒻𑒞 𑒁𑒕𑒱 𑒍𑒏𑒰𑒩𑒰 𑒠𑒴 𑒪𑒰𑒞 𑒧𑒰𑒩𑒻𑒞 𑒁𑒕𑒱।
𑒞𑒹𑒮𑒩
𑒥𑓂𑒩𑒰𑒯𑓂𑒧𑒝 𑒂 𑒚𑒰𑒏𑒳𑒩𑒏 𑒪𑒛𑓃𑒏𑒰 𑒍𑒞𑒋𑒮𑒿 𑒔𑒪𑒪। 𑒔𑒪𑒻𑒞-𑒔𑒪𑒻𑒞 𑒏𑒱𑒕𑒳 𑒠𑒴𑒩 𑒑𑒹𑒪 𑒞𑒿 𑒋𑒏𑒙𑒰 𑒢𑒑𑒩𑒧𑒹 𑒣𑒯𑒳𑒿𑒔𑒪। 𑒍𑒯𑒱 𑒢𑒑𑒩𑒏 𑒥𑒲𑒔 𑒔𑒾𑒥𑒙𑒱𑒨𑒰𑒣𑒩 𑒥𑒛𑓂𑒛 𑒦𑒲𑒛𑓃 𑒩𑒯𑒋। 𑒪𑒼𑒏𑒏 𑒄 𑒦𑒲𑒛𑓃 𑒠𑒹𑒐𑒱 𑒏𑒋 𑒚𑒰𑒏𑒳𑒩𑒏 𑒪𑒛𑓃𑒏𑒰 𑒠𑒾𑒑𑒱 𑒏𑒋 𑒑𑒹𑒪 𑒂 𑒠𑒹𑒐𑒪𑒏 𑒖𑒹 𑒍𑒯𑒱 𑒔𑒾𑒥𑒙𑒱𑒨𑒰𑒣𑒩 𑒋𑒏𑒙𑒰 𑒁𑒮𑓂𑒮𑒲 𑒥𑒩𑒐𑒏 𑒥𑒳𑒜𑓃𑒱𑒨𑒰𑒏𑒹𑒿 𑒤𑒰𑒿𑒮𑒲 𑒠𑒹𑒪 𑒖𑒰 𑒩𑒯𑒪 𑒁𑒕𑒱। 𑒚𑒰𑒏𑒳𑒩𑒏 𑒪𑒛𑓃𑒏𑒰 𑒮𑒼𑒔𑒪𑒏 𑒖𑒹 𑒍 𑒥𑒳𑒜𑓃𑒱𑒨𑒰 𑒏𑒏𑒩𑒼 𑒒𑒩𑒧𑒹 𑒖𑒰 𑒏𑒋 𑒦𑒴𑒐𑒧𑒹 𑒏𑒼𑒢𑒼 𑒁𑒢𑒰𑒖 𑒫𑒰 𑒦𑒰𑒞 𑒩𑒼𑒙𑒲 𑒐𑒋𑒢𑒹 𑒯𑒼𑒋𑒞, 𑒮𑒹 𑒍𑒏𑒩𑒰 𑒤𑒰𑒿𑒮𑒲𑒏 𑒮𑒖𑒰 𑒦𑓄 𑒩𑒯𑒪 𑒕𑒻। 𑒚𑒰𑒏𑒳𑒩𑒏 𑒪𑒛𑓃𑒏𑒰 𑒣𑒳𑒕𑒪𑒏- 𑒣𑓀𑒛𑒱𑒞𑒖𑒲 𑒋𑒯𑒱 𑒑𑒣𑒏𑒹𑒿 𑒯𑒧𑒩𑒰 𑒏𑒯𑒱 𑒏𑒋 𑒥𑒳𑒗𑒰 𑒠𑒱𑒁। 𑒣𑓀𑒛𑒱𑒞𑒖𑒲 𑒏𑒯𑒪𑒏 𑒖𑒹 𑒔𑒪𑒴 𑒩𑒮𑓂𑒞𑒰𑒧𑒹 𑒁𑒯𑒰𑒿𑒏𑒹𑒿 𑒥𑒳𑒗𑒰 𑒠𑒹𑒥। 𑒥𑒔𑓂𑒔𑒰 𑒏𑒯𑒪𑒏 𑒖𑒹 𑒢𑒯𑒱, 𑒋𑒞𑒯𑒱𑒨𑒹 𑒯𑒧𑒩𑒰 𑒏𑒯𑒱 𑒏𑒋 𑒥𑒳𑒗𑒰 𑒠𑒱𑒁, 𑒢𑒯𑒱 𑒞𑒿 𑒁𑒯𑒰𑒿𑒏 𑒮𑓀𑒑 𑒯𑒧 𑒢𑒯𑒱 𑒖𑒰𑒋𑒥। 𑒥𑓂𑒩𑒰𑒯𑓂𑒧𑒝 𑒏𑒯𑒪𑒏 𑒚𑒲𑒏 𑒁𑒕𑒱। 𑒮𑒳𑒢𑒴 𑒚𑒰𑒏𑒳𑒩𑒏 𑒥𑒔𑓂𑒔𑒰, 𑒥𑒻𑒮𑒴, 𑒯𑒧 𑒥𑒳𑒗𑒥𑒻𑒞 𑒕𑒲।

-𑒥𑒱𑒩𑒰𑒙𑒢𑒑𑒩𑒏 𑒥𑒱𑒩𑒰𑒙 𑒩𑒰𑒖𑒰 𑒕𑒪𑒋। 𑒯𑒳𑒢𑒏𑒰 𑒋𑒏𑒙𑒰 𑒧𑒢𑓂𑒞𑓂𑒩𑒲 𑒕𑒪𑒢𑓂𑒯𑒱। 𑒩𑒰𑒖𑒰𑒏 𑒪𑒛𑓃𑒏𑒰 𑒂 𑒧𑒢𑓂𑒞𑓂𑒩𑒲𑒏 𑒪𑒛𑓃𑒏𑒰𑒏𑒧𑒹 𑒠𑒼𑒮𑓂𑒞𑒱𑒨𑒰𑒩𑒲 𑒔𑒪𑒱 𑒩𑒯𑒪 𑒕𑒪। 𑒋𑒏 𑒠𑒱𑒢 𑒠𑒳𑒢𑒴 𑒠𑒼𑒮𑓂𑒞 𑒫𑒱𑒔𑒰𑒩 𑒏𑒋𑒪𑒏 𑒂 𑒖𑓀𑒑𑒪𑒧𑒹 𑒬𑒱𑒏𑒰𑒩 𑒐𑒹𑒪𑒰𑒃 𑒪𑒹𑒪 𑒞𑒻𑒨𑒰𑒩 𑒦𑒹𑒪 𑒂 𑒒𑒼𑒛𑓃𑒰 𑒏𑒮𑒹𑒪𑒏। 𑒥𑒼𑒢𑒧𑒹 𑒬𑒱𑒏𑒰𑒩 𑒐𑒹𑒪𑒰𑒃𑒞-𑒐𑒹𑒪𑒰𑒃𑒞 𑒮𑒰𑒿𑒗 𑒦𑒋 𑒑𑒹𑒪 𑒂 𑒍𑒯𑒲 𑒥𑒼𑒢𑒧𑒹 𑒋𑒏𑒙𑒰 𑒥𑒛𑓂𑒛 𑒣𑒻𑒒 𑒑𑒰𑒕 𑒕𑒪। 𑒠𑒳𑒢𑒴 𑒑𑒼𑒙𑒹 𑒍𑒯𑒱 𑒑𑒰𑒕𑒣𑒩 𑒔𑒜𑓃𑒱 𑒏𑒋 𑒮𑒴𑒞𑒱 𑒑𑒹𑒪। 𑒧𑓀𑒞𑓂𑒩𑒲𑒏 𑒥𑒹𑒙𑒰 𑒮𑒼𑒔𑒪𑒏 𑒖𑒹 𑒄 𑒩𑒰𑒖𑒰𑒏 𑒥𑒹𑒙𑒰 𑒁𑒕𑒱। 𑒏𑒯𑒱𑒨𑒼 𑒑𑒰𑒕𑒣𑒩 𑒢𑒯𑒱 𑒮𑒴𑒞𑒪 𑒁𑒕𑒱, 𑒮𑒹 𑒍 𑒏𑒞𑒯𑒳 𑒐𑒮𑒱 𑒢𑒯𑒱 𑒣𑒛𑓃𑒋, 𑒮𑒹 𑒮𑒼𑒔𑒱 𑒍𑒏𑒩𑒰 𑒍 𑒑𑒧𑒕𑒰𑒮𑒿 𑒥𑒰𑒢𑓂𑒯𑒱 𑒠𑒹𑒪𑒏 𑒂 𑒍 𑒠𑒼𑒮𑒩 𑒚𑒰𑒜𑓃𑒱𑒣𑒩 𑒔𑒪𑒱 𑒑𑒹𑒪। 𑒥𑒰𑒩𑒯 𑒩𑒰𑒞𑒱 𑒥𑒰𑒖𑒪 𑒞𑒿 𑒥𑒼𑒢𑒧𑒹 𑒋𑒏𑒙𑒰 𑒥𑒛𑓃 𑒣𑒻𑒒 𑒮𑒰𑒿𑒣 𑒢𑒱𑒏𑒪𑒪 𑒂 𑒍𑒯𑒱 𑒑𑒰𑒕𑒏 𑒪𑒑 𑒂𑒥𑒱 𑒁𑒣𑒢 𑒧𑒝𑒲 𑒢𑒱𑒏𑒰𑒪𑒱 𑒏𑓄 𑒩𑒰𑒐𑒱 𑒠𑒹𑒪𑒏 𑒂 𑒞𑒰𑒯𑒱𑒮𑒿 𑒃𑒖𑒼𑒞 𑒯𑒼𑒧𑒋 𑒪𑒰𑒑𑒪। 𑒮𑒩𑓂𑒣 𑒔𑒩𑒋 𑒪𑒰𑒑𑒪। 𑒍𑒯𑒱 𑒃𑒖𑒼𑒞𑒏𑒹𑒿 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒠𑒹𑒐𑒪𑒏 𑒂 𑒞𑒏𑒩 𑒥𑒰𑒠 𑒍 𑒂𑒮𑓂𑒞𑒹 𑒮𑒿 𑒑𑒰𑒕𑒏 𑒖𑒛𑓃𑒱𑒧𑒹 𑒁𑒣𑒢 𑒞𑒪𑒫𑒰𑒩 𑒚𑒰𑒜𑓃 𑒏𑒋 𑒠𑒹𑒪𑒏 𑒂 𑒤𑒹𑒩 𑒆𑒣𑒩 𑒔𑒜𑓃𑒱 𑒑𑒹𑒪। 𑒖𑒰𑒯𑒱 𑒚𑒰𑒧 𑒧𑒝𑒲 𑒖𑒩𑒱 𑒩𑒯𑒪 𑒕𑒪 𑒍𑒏𑒩 𑒮𑒼𑒗𑒰𑒿 𑒚𑒰𑒜𑓃𑒱𑒣𑒩 𑒖𑒰 𑒏𑒋 𑒑𑒧𑒕𑒰 𑒠𑒼𑒥𑒩 𑒏𑒋 𑒍𑒯𑒱 𑒧𑒝𑒲𑒣𑒩 𑒐𑒮𑒰 𑒠𑒹𑒪𑒏। 𑒧𑒝𑒲 𑒗𑒿𑒣𑒰 𑒑𑒹𑒪 𑒂 𑒁𑒢𑓂𑒯𑒰𑒩 𑒦𑓄 𑒑𑒹𑒪। 𑒮𑒰𑒿𑒣 𑒫𑓂𑒨𑒰𑒏𑒳𑒪 𑒦𑒋 𑒑𑒹𑒪 𑒂 𑒍 𑒑𑒰𑒕𑒏 𑒖𑒛𑓃𑒱𑒧𑒹 𑒁𑒣𑒢 𑒣𑒳𑒔𑓂𑒕𑒲 𑒣𑒙𑒏𑒱-𑒣𑒙𑒏𑒱 𑒏𑒋 𑒙𑒳𑒏𑒛𑓃𑒰-𑒙𑒳𑒏𑒛𑓃𑒰 𑒦𑒋 𑒑𑒹𑒪। 𑒦𑒼𑒩 𑒦𑒹𑒪 𑒞𑒿 𑒍 𑒁𑒣𑒢 𑒠𑒼𑒮𑓂𑒞 𑒩𑒰𑒖𑒰𑒏 𑒥𑒹𑒙𑒰𑒏𑒹𑒿 𑒖𑒑𑒹𑒪𑒏 𑒂 𑒏𑒯𑒪𑒏 𑒖𑒹 𑒠𑒼𑒮 𑒁𑒯𑒰𑒿 𑒞𑒿 𑒮𑒴𑒞𑒱 𑒑𑒹𑒪 𑒩𑒯𑒲। 𑒢𑒲𑒔𑒰𑒿 𑒠𑒹𑒐𑒴 𑒏𑒲 𑒦𑒹𑒪 𑒁𑒕𑒱। 𑒢𑒲𑒔𑒰𑒿𑒧𑒹 𑒑𑒧𑒕𑒰 𑒅𑒒𑒰𑒩𑒱 𑒧𑒝𑒲 𑒪𑒋 𑒍 𑒠𑒳𑒢𑒴 𑒠𑒼𑒮 𑒥𑒱𑒠𑒰 𑒦𑒹𑒪। 𑒍𑒯𑒱 𑒥𑒼𑒢𑒧𑒹 𑒋𑒏𑒙𑒰 𑒣𑒻𑒒 𑒣𑒼𑒐𑒩𑒱 𑒩𑒯𑒋। 𑒠𑒳𑒢𑒴 𑒠𑒼𑒮𑓂𑒞 𑒫𑒱𑒔𑒰𑒩𑒪𑒏 𑒖𑒹 𑒁𑒯𑒲 𑒣𑒼𑒐𑒩𑒱𑒧𑒹 𑒋𑒏𑒩𑒰 𑒡𑒼𑒥𑒱 𑒏𑒋 𑒮𑒰𑒤 𑒏𑒋 𑒪𑒲। 𑒩𑒰𑒖𑒰𑒏 𑒥𑒹𑒙𑒰 𑒢𑒲𑒔𑒰𑒿 𑒯𑒰𑒟 𑒩𑒰𑒐𑒪𑒏 𑒂 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒆𑒣𑒩𑒧𑒹 𑒯𑒰𑒟 𑒩𑒰𑒐𑒱 𑒏𑒋 𑒍𑒏𑒩𑒰 𑒮𑒰𑒤 𑒏𑒩𑒋 𑒪𑒰𑒑𑒪। 𑒍 𑒧𑒝𑒲 𑒞𑒐𑒢𑒹 𑒠𑒳𑒢𑒴 𑒠𑒼𑒮𑒏𑒹𑒿 𑒐𑒹𑓀𑒔𑒱 𑒪𑒹𑒪𑒏 𑒂 𑒍𑒞𑒋 𑒪𑓄 𑒑𑒹𑒪 𑒖𑒞𑒋 𑒢𑒰𑒑𑒫𑒞𑓂𑒞𑒲 𑒏𑒢𑓂𑒨𑒰 𑒩𑒯𑒋। 𑒢𑒰𑒑𑒫𑒞𑓂𑒞𑒲 𑒏𑒢𑓂𑒨𑒰 𑒍𑒏𑒩𑒰 𑒮𑒦𑒏𑒹𑒿 𑒠𑒹𑒐𑒪𑒏 𑒞𑒿 𑒏𑒯𑒪𑒏 𑒖𑒹 𑒁𑒯𑒰𑒿 𑒮𑒦 𑒯𑒧𑒩 𑒣𑒱𑒞𑒰𑒏𑒹𑒿 𑒧𑒰𑒩𑒱 𑒠𑒹𑒪𑒯𑒳𑒿 𑒞𑒿 𑒯𑒧 𑒏𑒯𑒱𑒨𑒰 𑒡𑒩𑒱 𑒏𑒳𑒧𑒰𑒩𑒱 𑒩𑒯𑒥। 𑒏𑒢𑓂𑒨𑒰 𑒏𑒯𑒪𑒏 𑒖𑒹 𑒁𑒯𑒰𑒿 𑒯𑒧𑒩𑒰𑒮𑒿 𑒥𑒱𑒨𑒰𑒯 𑒏𑒋 𑒪𑒱𑒁। 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒩𑒰𑒖𑒰𑒏 𑒥𑒹𑒙𑒰𑒏 𑒥𑒱𑒨𑒰𑒯 𑒍𑒯𑒱 𑒏𑒢𑓂𑒨𑒰𑒮𑒿 𑒏𑒩𑒹𑒥𑒰𑒏 𑒢𑒱𑒩𑓂𑒝𑒨 𑒏𑒋𑒪𑒏 𑒞𑒿 𑒩𑒰𑒖𑒰𑒏 𑒥𑒹𑒙𑒰 𑒏𑒯𑒪𑒏 𑒖𑒹 𑒨𑒰𑒫𑒞 𑒜𑒼𑒪 𑒥𑒰𑒖𑒰 𑒣𑒰𑒪𑒏𑒲 𑒢𑒯𑒱 𑒂𑒢𑒥, 𑒥𑒱𑒨𑒰𑒯 𑒏𑒼𑒢𑒰 𑒯𑒼𑒋𑒞। 𑒧𑒢𑓂𑒞𑓂𑒩𑒲-𑒫𑒖𑒲𑒩𑒏 𑒥𑒹𑒙𑒰 𑒜𑒼𑒪-𑒥𑒰𑒖𑒰-𑒣𑒰𑒪𑒏𑒲 𑒁𑒢𑒥𑒰 𑒪𑒹𑒪 𑒥𑒱𑒠𑒰 𑒦𑒹𑒪। 𑒠𑒼𑒮𑒩 𑒠𑒱𑒢 𑓑𑓒 𑒥𑒖𑒹 𑒠𑒱𑒢𑒧𑒹 𑒢𑒰𑒑𑒫𑒞𑒲 𑒏𑒢𑓂𑒨𑒰𑒿 𑒣𑒼𑒐𑒩𑒱𑒧𑒹 𑒢𑒯𑒰 𑒩𑒯𑒪 𑒕𑒪𑒲𑒯, 𑒞𑒐𑒢𑒹 𑒚𑒑𑒣𑒳𑒩 𑒢𑒑𑒩𑒏 𑒩𑒰𑒖𑒰𑒏 𑒪𑒛𑓃𑒏𑒰 𑒬𑒱𑒏𑒰𑒩 𑒐𑒹𑒪𑒹𑒥𑒰 𑒪𑒹𑒪 𑒖𑓀𑒑𑒪𑒧𑒹 𑒂𑒋𑒪 𑒩𑒯𑒋। 𑒑𑒩𑒧𑒲𑒏 𑒧𑒰𑒮 𑒕𑒪, 𑒍𑒏𑒩𑒰 𑒥𑒛𑓃 𑒖𑒼𑒩𑒮𑒿 𑒣𑒱𑒨𑒰𑒮 𑒪𑒑𑒪𑒻𑒏 𑒞𑒿 𑒍 𑒍𑒯𑒲 𑒣𑒼𑒐𑒩𑒱𑒧𑒹 𑒑𑒹𑒪। 𑒖𑒐𑒢𑒹 𑒍 𑒍𑒯𑒱 𑒏𑒢𑓂𑒨𑒰𑒏𑒹𑒿 𑒠𑒹𑒐𑒪𑒏 𑒞𑒿 𑒧𑒴𑒩𑓂𑒔𑓂𑒕𑒰 𑒐𑒰 𑒏𑒋 𑒐𑒮𑒱 𑒣𑒛𑓃𑒪 𑒂 𑒏𑒢𑓂𑒨𑒰 𑒣𑒼𑒐𑒩𑒱𑒏 𑒦𑒲𑒞𑒩 𑒔𑒪𑒱 𑒑𑒹𑒪𑒱। 𑒖𑒐𑒢 𑒍𑒏𑒩𑒰 𑒯𑒼𑒬 𑒁𑒋𑒪𑒻𑒏 𑒞𑒿 𑒍𑒯𑒱 𑒏𑒢𑓂𑒨𑒰𑒏𑒹𑒿 𑒍 𑒢𑒯𑒱 𑒠𑒹𑒐𑒪𑒏। 𑒍𑒯𑒱 𑒮𑒧𑒨𑒮𑒿 𑒩𑒰𑒖𑒰𑒏 𑒥𑒹𑒙𑒰 𑒁𑒣𑒢 𑒒𑒩 𑒖𑒰 𑒏𑒋 𑒣𑒰𑒑𑒪 𑒦𑒋 𑒑𑒹𑒪। 𑒄 𑒮𑒧𑒰𑒔𑒰𑒩 𑒚𑒑𑒣𑒳𑒩𑒏 𑒩𑒰𑒖𑒰𑒏𑒹𑒿 𑒣𑒞𑒰 𑒔𑒪𑒪𑒻𑒏 𑒞𑒿 𑒍 𑒥𑒛𑓂𑒛 𑒅𑒣𑒰𑒨 𑒏𑒋𑒪𑒏 𑒧𑒳𑒠𑒰 𑒍𑒏𑒩 𑒥𑒱𑒧𑒰𑒩𑒲 𑒢𑒯𑒱 𑒚𑒲𑒏 𑒦𑒹𑒪𑒻𑒏।
𑒩𑒰𑒖𑒰𑒏𑒹𑒿 𑒥𑒛𑓂𑒛 𑒔𑒱𑒢𑓂𑒞𑒰 𑒦𑓄 𑒑𑒹𑒪𑒻𑒏। 𑒩𑒰𑒖𑒰 𑒁𑒣𑒢 𑒩𑒰𑒖𑓂𑒨𑒧𑒹 𑒜𑒼𑒪𑒯𑒼 𑒣𑒱𑒙𑒥𑒰 𑒠𑒹𑒪𑒏 𑒖𑒹, 𑒖𑒹 𑒏𑓂𑒨𑒼 𑒯𑒧𑒩 𑒥𑒹𑒙𑒰𑒏𑒹𑒿 𑒚𑒲𑒏 𑒏𑒋 𑒠𑒹𑒞 𑒍𑒏𑒩𑒰 𑒩𑒰𑒖𑓂𑒨𑒏 𑒋𑒏 𑒯𑒲𑒮 𑒠𑓄 𑒠𑒹𑒪 𑒖𑒰𑒋𑒞 𑒂 𑒛𑒰𑒪𑒰 𑒦𑒩𑒱 𑒮𑒼𑒢𑒰𑒏 𑒮𑓀𑒑 𑒁𑒣𑒢 𑒥𑒹𑒙𑒲𑒏 𑒮𑓀𑒑 𑒍𑒏𑒩 𑒥𑒱𑒨𑒰𑒯 𑒮𑒹𑒯𑒼 𑒍 𑒏𑒩𑒰 𑒠𑒹𑒞। 𑒄 𑒮𑒳𑒢𑒱 𑒧𑒰𑒩𑒞𑒹 𑒩𑒰𑒮 𑒪𑒼𑒏 𑒂𑒋𑒪 𑒧𑒳𑒠𑒰 𑒍 𑒚𑒲𑒏 𑒢𑒯𑒱 𑒦𑒹𑒪𑒱। 𑒍𑒯𑒲 𑒑𑒰𑒧𑒧𑒹 𑒋𑒏𑒙𑒰 𑒥𑒳𑒜𑓃𑒱𑒨𑒰 𑒩𑒯𑒻𑒞 𑒕𑒪𑒱, 𑒧𑒯𑒰𑒑𑒩𑒲𑒥। 𑒍 𑒏𑒩𑒲𑒥-𑒏𑒩𑒲𑒥 𑒁𑒮𑓂𑒮𑒲 𑒥𑒩𑒱𑒐𑒏 𑒩𑒯𑒋। 𑒍𑒯𑒱 𑒥𑒳𑒜𑓃𑒱𑒨𑒰𑒏 𑒋𑒏𑒙𑒰 𑒥𑒞𑒰𑒯 𑒥𑒹𑒙𑒰 𑒩𑒯𑒋। 𑒍 𑒥𑒳𑒜𑓃𑒱𑒨𑒰 𑒍𑒯𑒱 𑒩𑒰𑒖𑒰𑒏 𑒥𑒹𑒙𑒰𑒏𑒹𑒿 𑒚𑒲𑒏 𑒏𑒩𑒥𑒰 𑒪𑒹𑒪 𑒞𑒻𑒨𑒰𑒩 𑒦𑒹𑒪𑒱। 𑒩𑒰𑒖𑒰 𑒍𑒏𑒩𑒰 𑒂𑒠𑒹𑒬 𑒠𑒹𑒪𑒏 𑒖𑒹 𑒖𑒼, 𑒂 𑒯𑒧𑒩 𑒥𑒹𑒙𑒰𑒏𑒹𑒿 𑒚𑒲𑒏 𑒏𑒩 𑒑𑓄। 𑒞𑒐𑒢 𑒞𑒼𑒩𑒹 𑒃𑒢𑒰𑒧 𑒮𑒹𑒯𑒼 𑒦𑒹𑒙𑒞𑒾𑒏 𑒂 𑒁𑒣𑒢 𑒥𑒹𑒙𑒲𑒏 𑒮𑓀𑒑 𑒯𑒧 𑒞𑒼𑒯𑒩 𑒥𑒹𑒙𑒰𑒏 𑒥𑒱𑒨𑒰𑒯 𑒮𑒹𑒯𑒼 𑒏𑒩𑒥𑒰 𑒠𑒹𑒥𑒾𑒏। 𑒥𑒳𑒜𑓃𑒱𑒨𑒰 𑒑𑒹𑒪 𑒂 𑒩𑒰𑒖𑒰𑒏 𑒪𑒛𑓃𑒏𑒰𑒏𑒹𑒿 𑒋𑒏𑒙𑒰 𑒏𑒼𑒚𑒰𑒧𑒹 𑒥𑒢𑓂𑒢 𑒏𑒋 𑒠𑒹𑒪𑒏 𑒂 𑒁𑒣𑒢𑒹 𑒮𑒹𑒯𑒼 𑒍𑒯𑒱 𑒏𑒼𑒚𑒰𑒧𑒹 𑒔𑒪𑒱 𑒑𑒹𑒪। 𑒥𑒳𑒜𑓃𑒱𑒨𑒰 𑒩𑒰𑒖𑒰𑒏 𑒥𑒹𑒙𑒰𑒮𑒿 𑒣𑒳𑒕𑒪𑒏, 𑒧𑒳𑒠𑒰 𑒍 𑒏𑒼𑒢𑒼 𑒅𑒞𑓂𑒞𑒩 𑒢𑒯𑒱 𑒠𑒹𑒪𑒏। 𑒞𑒐𑒢 𑒥𑒳𑒜𑓃𑒱𑒨𑒰 𑒍𑒏𑒩 𑒠𑒳𑒢𑒴 𑒑𑒰𑒪𑒧𑒹 𑒠𑒴 𑒔𑒧𑒹𑒙𑒰 𑒧𑒰𑒩𑒪𑒏 𑒂 𑒞𑒏𑒩 𑒥𑒰𑒠 𑒍 𑒥𑒰𑒖𑒪, 𑒖𑒹 𑒯𑒧 𑒖𑓀𑒑𑒪𑒧𑒹 𑒬𑒱𑒏𑒰𑒩 𑒐𑒹𑒪𑒰𑒃 𑒪𑒹𑒪 𑒑𑒹𑒪 𑒕𑒪𑒯𑒳𑒿। 𑒍𑒞𑒋 𑒋𑒏𑒙𑒰 𑒣𑒼𑒐𑒩𑒱𑒧𑒹 𑒣𑒰𑒢𑒱 𑒣𑒲𑒥𑒰 𑒪𑒹𑒪 𑒑𑒹𑒪𑒯𑒳𑒿, 𑒞𑒿 𑒋𑒏𑒙𑒰 𑒥𑒛𑓂𑒛 𑒮𑒳𑒢𑓂𑒠𑒩𑒱 𑒮𑓂𑒞𑓂𑒩𑒲𑒏𑒹𑒿 𑒠𑒹𑒐𑒪𑒯𑒳𑒿 𑒂 𑒯𑒧 𑒥𑒹𑒯𑒼𑒬 𑒦𑒋 𑒑𑒹𑒪𑒯𑒳𑒿। 𑒯𑒼𑒬 𑒁𑒋𑒪𑒰𑒣𑒩 𑒠𑒹𑒐𑒪𑒯𑒳𑒿 𑒖𑒹 𑒍 𑒪𑒛𑓃𑒏𑒲 𑒥𑒱𑒪𑒰 𑒑𑒹𑒪𑒱। 𑒞𑒐𑒢𑒹𑒮𑒿 𑒯𑒧𑒩 𑒧𑒼𑒢 𑒥𑒞𑒰𑒯 𑒦𑓄 𑒑𑒹𑒪, 𑒖𑒹 𑒏𑒯𑒱𑒨𑒰 𑒍 𑒪𑒛𑓃𑒏𑒲 𑒯𑒧𑒩𑒰 𑒦𑒹𑒙𑒱 𑒖𑒰𑒋। 𑒍 𑒥𑒳𑒜𑓃𑒱𑒨𑒰 𑒏𑒯𑒪𑒏 𑒖𑒹 𑒍𑒯𑒱 𑒪𑒛𑓃𑒏𑒲𑒏𑒹𑒿 𑒯𑒧 𑒂𑒢𑒥। 𑒋𑒐𑒢𑒮𑒿 𑒞𑒴𑒿 𑒚𑒲𑒏 𑒩𑒯, 𑒍𑒏𑒩𑒰 𑒂𑒢𑒥 𑒯𑒧𑒩 𑒏𑒰𑒖 𑒕𑒲। 𑒥𑒳𑒜𑓃𑒱𑒨𑒰𑒏 𑒏𑒯𑒪𑒰𑒣𑒩 𑒍 𑒔𑒳𑒣 𑒦𑓄 𑒑𑒹𑒪 𑒂 𑒥𑒳𑒜𑓃𑒱𑒨𑒰 𑒩𑒰𑒖𑒰𑒏𑒹𑒿 𑒏𑒯𑒪𑒏 𑒖𑒹 𑒯𑒧𑒩 𑒮𑓀𑒑 𑒣𑒰𑒿𑒔 𑒙𑒰 𑒮𑒐𑒲-𑒮𑒯𑒹𑒪𑒲 𑒔𑒰𑒯𑒲 𑒂 𑒍𑒯𑒱 𑒥𑒱𑒧𑒰𑒩𑒲𑒏𑒹𑒿 𑒯𑒧 𑒚𑒲𑒏 𑒏𑒩𑒥। 𑒩𑒰𑒖𑒰 𑒣𑒰𑒿𑒔 𑒙𑒰 𑒮𑒐𑒲 𑒠𑒹𑒪𑒏 𑒂 𑒥𑒳𑒜𑓃𑒱𑒨𑒰 𑒍𑒏𑒩𑒰 𑒮𑒦𑒏𑒹𑒿 𑒪𑓄 𑒏𑒋 𑒥𑒱𑒠𑒰 𑒦𑒹𑒪। 𑒍 𑒥𑒼𑒢 𑒠𑒱𑒮 𑒑𑒹𑒪, 𑒖𑒞𑒋 𑒍 𑒣𑒼𑒐𑒩𑒱 𑒩𑒯𑒋 𑒂 𑒍𑒏𑒩 𑒔𑒰𑒩𑒴 𑒠𑒱𑒮𑒢 𑒍 𑒮𑒦 𑒢𑒳𑒏𑒰 𑒑𑒹𑒪। 𑒖𑒐𑒢 𑒠𑒱𑒢𑒏 𑒥𑒰𑒩𑒯 𑒥𑒰𑒖𑒪 𑒞𑒿 𑒍 𑒪𑒛𑓃𑒏𑒲 𑒣𑒼𑒐𑒩𑒱𑒮𑒿 𑒢𑒱𑒏𑒪𑒪 𑒂 𑒍𑒯𑒱 𑒣𑒼𑒐𑒩𑒱𑒏 𑒧𑒯𑒰𑒩𑒣𑒩 𑒥𑒻𑒮𑒱 𑒏𑒋 𑒢𑒯𑒰𑒨 𑒪𑒰𑒑𑒪। 𑒥𑒳𑒜𑓃𑒱𑒨𑒰 𑒖𑓀𑒑𑒪𑒮𑒿 𑒥𑒯𑒰𑒩 𑒦𑒹𑒪 𑒂 𑒏𑒢𑓂𑒨𑒰𑒏 𑒥𑒑𑒪𑒧𑒹 𑒢𑒯𑒰𑒋 𑒪𑒰𑒑𑒪। 𑒥𑒳𑒜𑓃𑒱𑒨𑒰𑒏𑒹𑒿 𑒠𑒹𑒐𑒱 𑒏𑒋 𑒏𑒢𑓂𑒨𑒰 𑒮𑒼𑒔𑒪𑒏 𑒖𑒹 𑒍 𑒁𑒮𑓂𑒮𑒲 𑒥𑒩𑒐𑒏 𑒥𑒳𑒜𑓃𑒱𑒨𑒰 𑒁𑒕𑒱, 𑒍𑒏𑒩 𑒮𑒹𑒫𑒰 𑒏𑒹𑒢𑒰𑒃 𑒖𑒩𑒴𑒩𑒲 𑒁𑒕𑒱। 𑒍 𑒍𑒯𑒱 𑒥𑒳𑒜𑓃𑒱𑒨𑒰 𑒪𑒑 𑒖𑒰 𑒏𑒋 𑒍𑒏𑒩 𑒮𑒾𑒿𑒮𑒹 𑒠𑒹𑒯𑒏𑒹𑒿 𑒮𑒰𑒤 𑒏𑒩𑒋 𑒪𑒰𑒑𑒪। 𑒏𑒯𑒪𑒏 𑒧𑒰𑒿 𑒂𑒥 𑒤𑒹𑒩 𑒢𑒯𑒰 𑒪𑒱𑒁। 𑒥𑒳𑒜𑓃𑒱𑒨𑒰 𑒏𑒯𑒪𑒏 𑒪𑒰𑒆 𑒥𑒹𑒙𑒲, 𑒁𑒯𑒴𑒿𑒏 𑒮𑒾𑒿𑒮𑒹 𑒠𑒹𑒯 𑒮𑒰𑒤 𑒏𑓄 𑒠𑒻𑒞 𑒕𑒲। 𑒥𑒳𑒜𑓃𑒱𑒨𑒰 𑒏𑒢𑓂𑒨𑒰𑒏 𑒠𑒹𑒯 𑒮𑒰𑒤 𑒏𑒩𑒋 𑒪𑒰𑒑𑒪। 𑒮𑒰𑒤 𑒏𑒩𑒻𑒞 𑒥𑒳𑒜𑓃𑒱𑒨𑒰 𑒔𑒳𑒙𑒏𑒲 𑒥𑒖𑒹𑒪𑒏 𑒞𑒿 𑒍𑒏𑒩 𑒮𑒐𑒲 𑒮𑒦 𑒔𑒰𑒩𑒴 𑒠𑒱𑒮𑒢𑒮𑒿 𑒍𑒏𑒩𑒰 𑒣𑒏𑒛𑓃𑒱 𑒪𑒹𑒪𑒏 𑒂 𑒂𑒣𑒮 𑒚𑒑𑒣𑒳𑒩 𑒑𑒰𑒧 𑒠𑒱𑒮 𑒥𑒱𑒠𑒰 𑒦𑒹𑒪, 𑒖𑒞𑒋 𑒩𑒰𑒖𑒰𑒏 𑒒𑒩 𑒕𑒪। 𑒚𑒑 𑒩𑒰𑒖𑒰 𑒃𑒢𑒰𑒧 𑒠𑒹𑒥𑒰 𑒪𑒹𑒪 𑒞𑒻𑒨𑒰𑒩 𑒦𑒹𑒪 𑒂 𑒁𑒣𑒢 𑒪𑒛𑓃𑒏𑒲𑒏 𑒥𑒱𑒨𑒰𑒯 𑒍𑒏𑒩 𑒥𑒞𑒰𑒯 𑒪𑒛𑓃𑒏𑒰 𑒮𑓀𑒑 𑒏𑒩𑒋𑒥𑒰 𑒪𑒹𑒪 𑒞𑒻𑒨𑒰𑒩 𑒦𑒹𑒪। 𑒩𑒰𑒖𑒰 𑒁𑒣𑒢𑒰 𑒑𑒰𑒧𑒧𑒹 𑒖𑒞𑒹𑒏 𑒥𑒰𑒖𑒰 𑒂 𑒣𑒰𑒪𑒏𑒲 𑒩𑒯𑒋, 𑒁𑒣𑒢𑒰 𑒍𑒯𑒱𑒚𑒰𑒧 𑒁𑒢𑒥𑒰 𑒪𑒹𑒪 𑒏𑒯𑒪𑒏। 𑒍𑒯𑒱 𑒑𑒰𑒧 𑒂 𑒢𑒑𑒩𑒏 𑒮𑒦𑒙𑒰 𑒥𑒰𑒖𑒰 𑒂 𑒣𑒰𑒪𑒏𑒲, 𑒮𑒦𑒙𑒰 𑒩𑒰𑒖𑒰 𑒪𑒑 𑒔𑒪 𑒑𑒹𑒪।
𑒂𑒥 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒑𑒰𑒧-𑒑𑒰𑒧𑒧𑒹 𑒣𑒳𑒕𑒻𑒞 𑒁𑒕𑒱 𑒞𑒿 𑒮𑒦 𑒏𑒯𑒪𑒏 𑒖𑒹 𑒮𑒦𑒙𑒰 𑒥𑒰𑒖𑒰 𑒂 𑒣𑒰𑒪𑒏𑒲 𑒩𑒰𑒖𑒰 𑒍𑒯𑒱𑒚𑒰𑒧 𑒔𑒪𑒱 𑒑𑒹𑒪। 𑒍𑒞𑒋𑒮𑒿 𑒁𑒋𑒪𑒰𑒏 𑒥𑒰𑒠𑒹 𑒥𑒰𑒖𑒰 𑒦𑒹𑒙𑒞। 𑒄 𑒮𑒳𑒢𑒱 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒏𑒯𑒪𑒏 𑒖𑒹 𑒚𑒲𑒏 𑒁𑒕𑒱 𑒯𑒧 𑒏𑒢𑒹𑒏 𑒠𑒱𑒢 𑒩𑒳𑒏𑒱 𑒖𑒰𑒃𑒞 𑒕𑒲। 𑒍𑒞𑒋 𑒋𑒧𑓂𑒯𑒩 𑒥𑒳𑒜𑓃𑒱𑒨𑒰𑒏 𑒥𑒞𑒰𑒯 𑒥𑒹𑒙𑒰𑒏 𑒥𑒱𑒨𑒰𑒯𑒏 𑒠𑒱𑒢 𑒣𑒛𑓃𑒱 𑒑𑒹𑒪𑒻𑒏। 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒍𑒯𑒱 𑒑𑒰𑒧𑒏 𑒥𑒔𑓂𑒔𑒰𑒮𑒿 𑒣𑒳𑒕𑒪𑒏 𑒖𑒹 𑒄 𑒥𑒩𑒱𑒨𑒰𑒞𑒲 𑒏𑒞𑒋 𑒖𑒰𑒋𑒞। 𑒥𑒔𑓂𑒔𑒰 𑒥𑒰𑒖𑒪 𑒖𑒹 𑒥𑒩𑒱𑒨𑒰𑒞𑒲 𑒏𑒞𑒯𑒳 𑒢𑒯𑒱 𑒖𑒰𑒋𑒞। 𑒯𑒧𑒩 𑒑𑒰𑒧𑒏 𑒋𑒏𑒙𑒰 𑒥𑒳𑒜𑓃𑒱𑒨𑒰 𑒋𑒯𑒱 𑒥𑒼𑒢𑒏 𑒣𑒼𑒐𑒩𑒱𑒮𑒿 𑒋𑒏𑒙𑒰 𑒏𑒢𑓂𑒨𑒰𑒏𑒹𑒿 𑒣𑒏𑒛𑓃𑒱 𑒏𑓄 𑒁𑒢𑒢𑒹 𑒁𑒕𑒱। 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰𑒏𑒹𑒿 𑒔𑒱𑒢𑓂𑒞𑒰 𑒣𑒻𑒮𑒱 𑒑𑒹𑒪𑒻𑒏 𑒖𑒹 𑒄 𑒫𑒋𑒯 𑒪𑒛𑓃𑒏𑒲 𑒞𑒿 𑒢𑒯𑒱 𑒁𑒕𑒱। 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒁𑒣𑒢 𑒮𑒦𑒙𑒰 𑒣𑒼𑒬𑒰𑒏 𑒐𑒼𑒪𑒱𑒏𑓄 𑒩𑒰𑒐𑒱 𑒠𑒹𑒪𑒏 𑒂 𑒋𑒏𑒙𑒰 𑒦𑒱𑒐𑒧𑓀𑒑𑒰𑒏 𑒩𑒴𑒣 𑒡𑓄 𑒏𑒋 𑒩𑒰𑒖𑒰𑒏 𑒂𑒿𑒑𑒢𑒧𑒹 𑒑𑒹𑒪 𑒂 𑒍𑒯𑒱 𑒪𑒛𑓃𑒏𑒲𑒏𑒹𑒿 𑒠𑒹𑒐𑒪𑒏 𑒂 𑒃𑒬𑒰𑒩𑒰 𑒏𑓄 𑒠𑒹𑒪𑒏 𑒖𑒹 𑒮𑒰𑒿𑒗 𑒡𑒩𑒱 𑒯𑒧 𑒂𑒋𑒥। 𑒍𑒯𑒱 𑒚𑒰𑒧𑒮𑒿 𑒥𑒖𑒲𑒩𑒏 𑒥𑒹𑒙𑒰 𑒢𑒱𑒏𑒪𑒱 𑒏𑓄 𑒥𑒰𑒯𑒩 𑒂𑒋𑒪 𑒂 𑒍𑒯𑒱 𑒥𑒳𑒜𑓃𑒱𑒨𑒰 𑒂 𑒍𑒏𑒩 𑒥𑒞𑒰𑒯 𑒥𑒹𑒙𑒰𑒏 𑒣𑒞𑒰 𑒪𑒑𑒍𑒪𑒏। 𑒞𑒿 𑒠𑒹𑒐𑒪𑒏 𑒖𑒹 𑒍 𑒥𑒞𑒰𑒯 𑒥𑒔𑓂𑒔𑒰 𑒮𑒦𑒏 𑒮𑓀𑒑 𑒑𑒰𑒋-𑒧𑒯𑒲𑒮 𑒔𑒩𑒹𑒥𑒰𑒏 𑒪𑒹𑒪 𑒥𑒼𑒢 𑒑𑒹𑒪 𑒁𑒕𑒱। 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒮𑒹𑒯𑒼 𑒥𑒼𑒢 𑒔𑒪𑒱 𑒑𑒹𑒪 𑒂 𑒖𑒞𑒋 𑒣𑒰𑒑𑒪 𑒩𑒯𑒋, 𑒍𑒏𑒩𑒹 𑒮𑓀𑒑 𑒐𑒹𑒪𑒰𑒋 𑒪𑒰𑒑𑒪। 𑒥𑒔𑓂𑒔𑒰 𑒮𑒦𑒏𑒹𑒿 𑒖𑒐𑒢 𑒦𑒴𑒐 𑒪𑒑𑒪𑒻𑒏 𑒞𑒿 𑒧𑒢𑓂𑒞𑓂𑒩𑒲-𑒣𑒳𑒞𑓂𑒩 𑒂 𑒍𑒯𑒱 𑒥𑒞𑒰𑒯 𑒥𑒔𑓂𑒔𑒰𑒏𑒹𑒿 𑒕𑒼𑒛𑓃𑒱 𑒏𑒋 𑒔𑒪𑒱 𑒑𑒹𑒪। 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒍𑒯𑒱 𑒥𑒞𑒰𑒯 𑒥𑒔𑓂𑒔𑒰𑒏𑒹𑒿 𑒥𑒼𑒢𑒧𑒹 𑒦𑒲𑒞𑒩 𑒪𑒋 𑒖𑒰𑒋 𑒕𑒼𑒛𑓃𑒱 𑒠𑒹𑒪𑒏 𑒂 𑒍𑒏𑒩 𑒮𑒦𑒙𑒰 𑒏𑒣𑒛𑓃𑒰 𑒪𑒋 𑒪𑒹𑒪𑒏। 𑒏𑒢𑒹𑒏 𑒗𑒪𑒤𑒪 𑒦𑒹𑒪 𑒧𑒯𑒱𑒮𑒥𑒰𑒩 𑒮𑒦 𑒑𑒰𑒋-𑒧𑒯𑒲𑒮 𑒪𑒋 𑒒𑒳𑒩𑒋 𑒪𑒰𑒑𑒪, 𑒞𑒿 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒮𑒹𑒯𑒼 𑒥𑒞𑒰𑒯 𑒖𑒹𑒏𑒰𑒿 𑒏𑒩𑒻𑒞 𑒒𑒳𑒩𑒱 𑒂𑒋𑒪 𑒂 𑒒𑒩𑒧𑒹 𑒖𑒰 𑒏𑒋 𑒍𑒯𑒲 𑒪𑒛𑓃𑒏𑒲𑒏 𑒔𑒰𑒩𑒴 𑒠𑒱𑒮 𑒒𑒳𑒩𑒱𑒂𑒋 𑒪𑒰𑒑𑒪, 𑒖𑒏𑒩𑒰 𑒮𑓀𑒑 𑒍𑒏𑒩 𑒥𑒱𑒨𑒰𑒯 𑒯𑒼𑒧𑒋 𑒥𑒪𑒰 𑒕𑒪𑒻𑒏। 𑒍𑒯𑒱𑒢𑒰 𑒍 𑒍𑒯𑒱 𑒒𑒩𑒧𑒹 𑒮𑒹𑒯𑒼 𑒔𑒪𑒱 𑒑𑒹𑒪 𑒖𑒞𑒋 𑒍 𑒢𑒰𑒑𑒫𑒞𑒲 𑒏𑒢𑓂𑒨𑒰 𑒩𑒯𑒋 𑒂 𑒍𑒞𑒋 𑒖𑒰 𑒏𑒋 𑒏𑒯𑒪𑒏 𑒏𑒱 𑒁𑒯𑒰𑒿 𑒋𑒯𑒱 𑒏𑒣𑒛𑓃𑒰𑒏𑒹𑒿 𑒥𑒠𑒪𑒱 𑒪𑒱𑒁 𑒂 𑒣𑒼𑒙𑒩𑒲 𑒥𑒰𑒢𑓂𑒯𑒱 𑒏𑒋 𑒥𑒑𑒪𑒧𑒹 𑒠𑒥𑒰 𑒪𑒱𑒁 𑒂 𑒩𑒰𑒖𑒰𑒏 𑒪𑒛𑓃𑒏𑒲𑒥𑒪𑒰 𑒏𑒣𑒛𑓃𑒰 𑒣𑒯𑒱𑒩𑒱 𑒪𑒱𑒁। 𑒂𑒑𑒰𑒿 𑒢𑒱𑒏𑒪𑒴 𑒂 𑒣𑒰𑒕𑒰𑒿 𑒯𑒧 𑒖𑒰𑒃𑒞 𑒕𑒲। 𑒏𑒢𑓂𑒨𑒰 𑒂𑒑𑒰𑒿 𑒢𑒱𑒏𑒪𑒪𑒱, 𑒣𑒰𑒕𑒰𑒿 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒥𑒞𑒰𑒯 𑒖𑒹𑒏𑒰𑒿 𑒏𑒩𑒻𑒞, 𑒠𑒳𑒢𑒴 𑒥𑒰𑒯𑒩 𑒢𑒱𑒏𑒪𑒱 𑒑𑒹𑒪। 𑒠𑒳𑒢𑒴 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪 𑒂 𑒖𑒞𑒋 𑒣𑒼𑒐𑒩𑒱 𑒕𑒪 𑒍𑒞𑒋 𑒣𑒯𑒳𑒿𑒔𑒱 𑒑𑒹𑒪।

𑒮𑒳𑒢𑒪𑒯𑒳𑒿 𑒚𑒰𑒏𑒳𑒩𑒏 𑒥𑒹𑒙𑒰। 𑒁𑒯𑒲 𑒑𑒣𑒣𑒩 𑒁𑒮𑓂𑒮𑒲 𑒥𑒩𑒐𑒏 𑒥𑒳𑒜𑓃𑒱𑒨𑒰𑒏𑒹𑒿 𑒤𑒰𑒿𑒮𑒲 𑒠𑒹𑒪 𑒖𑒰 𑒩𑒯𑒪 𑒁𑒕𑒱, 𑒩𑒰𑒖𑒰 𑒏𑒯𑒪𑒏 𑒖𑒹 𑒄 𑒥𑒳𑒜𑓃𑒱𑒨𑒰 𑒯𑒧𑒩 𑒩𑒰𑒖𑓂𑒨𑒏 𑒯𑒱𑒮𑓂𑒮𑒰 𑒪𑒹𑒥𑒰𑒏 𑒪𑒹𑒪 𑒄 𑒭𑒛𑒨𑒢𑓂𑒞𑓂𑒩 𑒩𑒔𑒢𑒹 𑒩𑒯𑒋 𑒂 𑒞𑒹𑒿 𑒍𑒏𑒩𑒰 𑒤𑒰𑒿𑒮𑒲 𑒠𑒋 𑒩𑒯𑒪 𑒁𑒕𑒱।
𑒔𑒰𑒩𑒱𑒧
𑒂𑒥 𑒩𑒰𑒖𑒰𑒏𑒰 𑒥𑒹𑒙𑒰 𑒂 𑒏𑒢𑓂𑒨𑒰 𑒮𑓀𑒑 𑒏𑒱𑒕𑒳 𑒮𑒧𑒋 𑒥𑒱𑒞𑒰 𑒏𑒋 𑒥𑒖𑒲𑒩𑒏 𑒥𑒹𑒙𑒰 𑒤𑒹𑒩 𑒒𑒳𑒩𑒱 𑒂𑒋𑒪 𑒣𑒰𑒪𑒏𑒲 𑒂 𑒥𑒰𑒖𑒰 𑒪𑒹𑒪। 𑒍𑒯𑒱 𑒠𑒱𑒢 𑒣𑒰𑒪𑒏𑒲 𑒂 𑒥𑒰𑒖𑒰 𑒠𑒳𑒢𑒴 𑒦𑒹𑒙𑒱 𑒑𑒹𑒪 𑒂 𑒥𑒖𑒲𑒩 𑒍𑒏𑒩𑒰 𑒪𑒋 𑒔𑒪𑒱 𑒂𑒋𑒪। 𑒥𑒯𑒳𑒞 𑒢𑒲𑒏 𑒖𑒹𑒏𑒰𑒿 𑒠𑒳𑒢𑒳𑒏 𑒥𑒱𑒨𑒰𑒯 𑒦𑒹𑒪 𑒂 𑒥𑒩𑒱𑒨𑒰𑒞𑒲𑒏 𑒮𑓀𑒑 𑒁𑒣𑒢 𑒒𑒩𑒏 𑒪𑒹𑒪 𑒥𑒱𑒠𑒰 𑒦𑒹𑒪।

𑒔𑒪𑒻𑒞-𑒔𑒪𑒻𑒞 𑒏𑒱𑒕𑒳 𑒠𑒴𑒩 𑒑𑒹𑒪 𑒞𑒿 𑒮𑒰𑒿𑒗 𑒦𑒋 𑒑𑒹𑒪। 𑒋𑒏𑒙𑒰 𑒥𑒛𑓂𑒛 𑒣𑒻𑒒 𑒑𑒰𑒕𑒏 𑒪𑒑 𑒍 𑒚𑒰𑒜𑓃 𑒦𑒋 𑒑𑒹𑒪। 𑒮𑒦𑒏𑒹𑒿 𑒐𑒹𑒢𑒰𑒃 𑒐𑒳𑒂 𑒏𑒋 𑒮𑒦 𑒏𑒱𑒨𑒼 𑒮𑒴𑒞𑒱 𑒑𑒹𑒪। 𑒩𑒮𑓂𑒞𑒰𑒏 𑒟𑒏𑒰𑒢 𑒩𑒯𑒋 𑒮𑒦 𑒏𑒱𑒨𑒼 𑒢𑒱𑒢𑓂𑒢𑒧𑒹 𑒮𑒴𑒞𑒱 𑒑𑒹𑒪। 𑒩𑒰𑒞𑒱𑒏 𑒥𑒰𑒩𑒯 𑒥𑒰𑒖𑒪 𑒞𑒿 𑒥𑒱𑒡-𑒥𑒱𑒡𑒰𑒞𑒰 𑒂𑒋𑒪 𑒂 𑒍𑒯𑒱 𑒑𑒰𑒕𑒣𑒩 𑒥𑒻𑒮𑒱 𑒑𑒹𑒪। 𑒥𑒱𑒡 𑒥𑒰𑒖𑒪- 𑒥𑒛𑓂𑒛 𑒢𑒲𑒏 𑒖𑒼𑒛𑓃𑒲 𑒪𑒰𑒑𑒪 𑒁𑒕𑒱 𑒞𑒿 𑒥𑒱𑒡𑒰𑒞𑒰 𑒏𑒯𑒪𑒏 𑒖𑒹 𑒖𑒼𑒛𑓃𑒲 𑒞𑒿 𑒚𑒲𑒏𑒹 𑒥𑒛𑓂𑒛 𑒢𑒲𑒏 𑒁𑒕𑒱 𑒧𑒳𑒠𑒰 𑒩𑒰𑒖𑒰𑒏 𑒥𑒹𑒙𑒰 𑒧𑒩𑒱 𑒖𑒰𑒋𑒞। 𑒥𑒲𑒡 𑒣𑒳𑒕𑒪𑒏 –𑒏𑒱𑒋𑒏। 𑒞𑒿 𑒥𑒱𑒡𑒰𑒞𑒰 𑒥𑒰𑒖𑒪 𑒯𑒧 𑒞𑒿 𑒏𑒯𑒥 𑒧𑒳𑒠𑒰 𑒋𑒯𑒱 𑒥𑒩𑒱𑒨𑒰𑒞𑒲𑒧𑒹 𑒮𑒿 𑒏𑒱𑒨𑒼 𑒮𑒳𑒢𑒻𑒞 𑒯𑒼𑒋𑒞, 𑒞𑒿 𑒄 𑒥𑒰𑒿𑒔𑒱 𑒖𑒰𑒋𑒞। 𑒍𑒯𑒱 𑒮𑒧𑒨 𑒢𑒰𑒑𑒫𑒞𑓂𑒞𑒲 𑒏𑒢𑓂𑒨𑒰 𑒂 𑒥𑒖𑒲𑒩 𑒮𑒳𑒢𑒱 𑒩𑒯𑒪 𑒕𑒪। 𑒮𑒦𑒙𑒰 𑒧𑒱𑒪𑒰 𑒏𑒋 𑒣𑒔𑒲𑒮 𑒙𑒰 𑒮𑓀𑒏𑒙 𑒣𑒛𑓃𑒞 𑒂 𑒮𑒦𑒙𑒰 𑒮𑓀𑒏𑒙 𑒍 𑒥𑒞𑒹𑒪𑒏। 𑒦𑒼𑒩 𑒦𑒹𑒪 𑒞𑒿 𑒢𑒰𑒑𑒫𑒞𑓂𑒞𑒲 𑒏𑒢𑓂𑒨𑒰 𑒂 𑒥𑒖𑒲𑒩 𑒏𑒯𑒪𑒏 𑒖𑒹 𑒄 𑒥𑒩𑒱𑒨𑒰𑒞𑒲 𑒮𑒦𑒏𑒹𑒿 𑒋𑒞𑒋𑒮𑒿 𑒂𑒣𑒮 𑒣𑒚𑒰 𑒠𑒱𑒁 𑒂 𑒯𑒧 𑒞𑒲𑒢𑒴 𑒑𑒼𑒙𑒹 𑒋𑒞𑒋𑒮𑒿 𑒔𑒪𑒲। 𑒍𑒞𑒋𑒮𑒿 𑒞𑒲𑒢𑒴 𑒑𑒼𑒙𑒹 𑒥𑒱𑒠𑒰 𑒦𑒹𑒪 𑒂 𑒔𑒪𑒻𑒞 𑒔𑒪𑒻𑒞 𑒏𑒱𑒕𑒳 𑒠𑒴𑒩 𑒑𑒹𑒪 𑒞𑒿 𑒩𑒮𑓂𑒞𑒰𑒏 𑒏𑒰𑒞𑒧𑒹 𑒠𑒴 𑒙𑒰 𑒑𑒰𑒕 𑒕𑒪। 𑒧𑒢𑓂𑒞𑓂𑒩𑒲𑒏 𑒥𑒹𑒙𑒰 𑒂 𑒏𑒢𑓂𑒨𑒰 𑒏𑒯𑒪𑒏 𑒖𑒹 𑒯𑒧 𑒞𑒲𑒢𑒴 𑒑𑒼𑒙𑒹 𑒯𑒰𑒟 𑒣𑒏𑒛𑓃𑒱 𑒏𑒋 𑒔𑒪𑒲। 𑒩𑒰𑒖𑒰𑒏 𑒥𑒹𑒙𑒰𑒏𑒹𑒿 𑒥𑒲𑒔𑒧𑒹 𑒪𑒋 𑒠𑒳𑒢𑒴 𑒑𑒼𑒙𑒹 𑒠𑒳𑒢𑒴 𑒠𑒱𑒮𑒮𑒿 𑒯𑒰𑒟 𑒣𑒏𑒛𑓃𑒪𑒏 𑒂 𑒪𑒑 𑒑𑒹𑒪 𑒂 𑒏𑒯𑒪𑒏 𑒖𑒹 𑒯𑒧 𑒞𑒲𑒢𑒴 𑒑𑒼𑒙𑒹 𑒋𑒞𑒋𑒮𑒿 𑒠𑒾𑒑𑒱 𑒏𑒋 𑒔𑒪𑒲। 𑒄 𑒏𑒯𑒱 𑒏𑒋 𑒍 𑒮𑒦 𑒠𑒾𑒑𑒢𑒰𑒃 𑒬𑒳𑒩𑒴 𑒏𑒋𑒪𑒏 𑒂 𑒖𑒯𑒱𑒢𑒰 𑒠𑒾𑒑𑒱 𑒏𑒋 𑒂𑒑𑒰𑒿 𑒑𑒹𑒪 𑒞𑒿 𑒠𑒳𑒢𑒴 𑒠𑒱𑒮𑒏𑒰 𑒑𑒰𑒕 𑒐𑒮𑒱 𑒣𑒛𑓃𑒪। 𑒣𑒰𑒕𑒰𑒿 𑒒𑒳𑒩𑒱 𑒏𑒋 𑒍 𑒮𑒦 𑒠𑒹𑒐𑒪𑒏 𑒂 𑒥𑒰𑒖𑒪 𑒖𑒹 𑒯𑒧 𑒮𑒦 𑒠𑒾𑒑𑒱 𑒏𑒋 𑒖𑒹 𑒂𑒑𑒰𑒿 𑒢𑒯𑒱 𑒁𑒥𑒱𑒞𑒯𑒳𑒿 𑒞𑒿 𑒄 𑒯𑒧𑒩𑒰 𑒮𑒦𑒏 𑒆𑒣𑒩 𑒐𑒮𑒱 𑒣𑒛𑓃𑒱𑒞𑒋। 𑒄 𑒏𑒯𑒱 𑒍 𑒮𑒦 𑒂𑒑𑒰𑒿 𑒥𑒱𑒠𑒰 𑒦𑒹𑒪। 𑒍𑒞𑒋𑒮𑒿 𑒔𑒪𑒻𑒞-𑒔𑒪𑒻𑒞 𑒏𑒱𑒕𑒳 𑒠𑒴𑒩 𑒂𑒑𑒰𑒿 𑒍 𑒮𑒦 𑒑𑒹𑒪 𑒞𑒿 𑒩𑒮𑓂𑒞𑒰𑒧𑒹 𑒋𑒏𑒙𑒰 𑒡𑒰𑒩 𑒦𑒹𑒙𑒱 𑒑𑒹𑒪 𑒞𑒿 𑒍𑒞𑒯𑒳 𑒍𑒯𑒱𑒢𑒰 𑒩𑒰𑒖𑒰𑒏 𑒥𑒹𑒙𑒰𑒏𑒹𑒿 𑒥𑒲𑒔𑒧𑒹 𑒪𑒋 𑒠𑒳𑒢𑒴 𑒠𑒱𑒮𑒮𑒿 𑒍𑒏𑒩 𑒯𑒰𑒟 𑒣𑒏𑒛𑓃𑒱 𑒪𑒹𑒪𑒏 𑒂 𑒡𑒰𑒩𑒧𑒹 𑒔𑒪𑒋 𑒪𑒰𑒑𑒪। 𑒥𑒯𑒳𑒞 𑒞𑒹𑒖𑒲𑒮𑒿 𑒍 𑒮𑒦 𑒂𑒑𑒰𑒿 𑒥𑒜𑓃𑒪 𑒂 𑒖𑒯𑒱𑒢𑒰 𑒆𑒣𑒩 𑒑𑒹𑒪 𑒞𑒿 𑒥𑒲𑒔 𑒣𑒰𑒢𑒱𑒮𑒿 𑒢𑒱𑒏𑒪𑒱 𑒑𑒹𑒪 𑒂 𑒒𑒳𑒩𑒱 𑒏𑒋 𑒠𑒹𑒐𑒪𑒏 𑒞𑒿 𑒥𑒼𑒔𑒣𑒩 𑒢𑒖𑒩𑒱 𑒣𑒛𑓃𑒪𑒻𑒏। 𑒍 𑒮𑒦 𑒥𑒰𑒖𑒪 𑒖𑒹 𑒯𑒧 𑒮𑒦 𑒞𑒹𑒖𑒲𑒮𑒿 𑒢𑒯𑒱 𑒢𑒱𑒏𑒪𑒱𑒞𑒯𑒳𑒿 𑒞𑒿 𑒥𑒼𑒔 𑒯𑒧𑒩𑒰 𑒮𑒦𑒏𑒹𑒿 𑒣𑒏𑒛𑓃𑒱 𑒪𑒻𑒞𑒋, 𑒂 𑒞𑒏𑒩 𑒥𑒰𑒠 𑒍 𑒮𑒦 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪। 𑒁𑒣𑒢 𑒏𑒪𑒧-𑒑𑒰𑒕𑒲 𑒯𑒼𑒃𑒞 𑒒𑒩 𑒣𑒯𑒳𑒿𑒔𑒻𑒞 𑒑𑒹𑒪। 𑒧𑒰𑒩𑒞𑒹 𑒩𑒰𑒮 𑒪𑒼𑒏 𑒍𑒞𑒋 𑒖𑒧𑒰 𑒦𑒋 𑒑𑒹𑒪 𑒂 𑒩𑒰𑒖𑒰𑒏 𑒥𑒹𑒙𑒰𑒏𑒹𑒿 𑒠𑒹𑒐𑒋 𑒪𑒰𑒑𑒪 𑒂 𑒏𑒯𑒋 𑒪𑒰𑒑𑒪 𑒖𑒹 𑒥𑒛𑓂𑒛 𑒢𑒲𑒏 𑒖𑒼𑒛𑓃𑒲 𑒧𑒱𑒪𑒪 𑒁𑒕𑒱। 𑒍 𑒮𑒦 𑒧𑒯𑒪𑒏 𑒦𑒲𑒞𑒩 𑒖𑒹𑒥𑒰𑒏 𑒣𑒯𑒱𑒢𑒹 𑒁𑒑𑒳𑒪𑒏𑒰 𑒕𑒞 𑒞𑒼𑒛𑓃𑒥𑒰 𑒠𑒹𑒪𑒏। 𑒩𑒰𑒖𑒰𑒏 𑒥𑒹𑒙𑒰𑒏𑒹𑒿 𑒥𑒖𑒲𑒩𑒏 𑒥𑒹𑒙𑒰 𑒂 𑒏𑒢𑓂𑒨𑒰𑒣𑒩 𑒍𑒯𑒱𑒯𑒰𑒧 𑒬𑒏 𑒦𑒹𑒪𑒻𑒏। 𑒩𑒰𑒖𑒰 𑒂 𑒏𑒢𑓂𑒨𑒰 𑒧𑒯𑒪 𑒑𑒹𑒪। 𑒂𑒥 𑒩𑒰𑒖𑒰 𑒣𑒳𑒕𑒪𑒏 𑒖𑒹 𑒯𑒧𑒩 𑒠𑒼𑒮 𑒥𑒖𑒲𑒩𑒏𑒹𑒿 𑒥𑒖𑒰𑒆। 𑒣𑒴𑒕𑒋 𑒪𑒰𑒑𑒪 𑒖𑒹 𑒠𑒼𑒮 𑒁𑒯𑒰𑒿 𑒠𑒳𑒢𑒴 𑒑𑒼𑒙𑒹 𑒩𑒮𑓂𑒞𑒰𑒮𑒿 𑒒𑒩 𑒡𑒩𑒱 𑒋𑒞𑒹𑒏 𑒩𑒰𑒮 𑒥𑒰𑒞 𑒏𑒹𑒪𑒯𑒳𑒿, 𑒮𑒹 𑒯𑒧𑒩𑒰 𑒥𑒳𑒗𑒪 𑒢𑒯𑒱 𑒦𑒹𑒪, 𑒮𑒹 𑒁𑒯𑒰𑒿 𑒍 𑒮𑒦 𑒑𑒣 𑒯𑒧𑒩𑒰 𑒏𑒯𑒴। 𑒥𑒖𑒲𑒩𑒏 𑒥𑒹𑒙𑒰 𑒥𑒰𑒖𑒪 𑒖𑒹 𑒠𑒼𑒮 𑒄 𑒮𑒦 𑒏𑒼𑒢𑒼 𑒑𑒣 𑒢𑒯𑒱 𑒁𑒕𑒱। 𑒄 𑒮𑒦 𑒯𑒧 𑒮𑒦 𑒯𑒿𑒮𑒲 𑒏𑒋 𑒩𑒯𑒪 𑒕𑒪𑒯𑒳𑒿, 𑒖𑒹 𑒠𑒹𑒐𑒲 𑒖𑒹 𑒯𑒧𑒩 𑒮𑒦 𑒩𑒰𑒖𑒰 𑒠𑒾𑒑𑒱 𑒮𑒏𑒻𑒞 𑒕𑒟𑒱 𑒂𑒏𑒱 𑒢𑒯𑒱 , 𑒂 𑒔𑒪𑒱 𑒮𑒏𑒋 𑒕𑒟𑒱 𑒂𑒏𑒱 𑒢𑒯𑒱। 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒧 𑒮𑒦 𑒯𑒿𑒮𑒲 𑒏𑒋 𑒩𑒯𑒪 𑒕𑒪𑒯𑒳𑒿। 𑒋𑒯𑒱 𑒑𑒣𑒣𑒩 𑒩𑒰𑒖𑒰𑒏𑒹𑒿 𑒥𑒱𑒮𑓂𑒥𑒰𑒮 𑒢𑒯𑒱 𑒦𑒹𑒪𑒻𑒏 𑒂 𑒍 𑒏𑒯𑒪𑒏 𑒖𑒹 𑒖𑒹 𑒨𑒠𑒱 𑒄 𑒑𑒣 𑒁𑒯𑒰𑒿 𑒢𑒯𑒱 𑒏𑒯𑒥 𑒞𑒿 𑒁𑒯𑒰𑒿𑒏𑒹𑒿 𑒤𑒰𑒿𑒮𑒲𑒣𑒩 𑒪𑒙𑒏𑒥𑒰 𑒠𑒹𑒥। 𑒋𑒯𑒱 𑒑𑒣𑒏𑒹𑒿 𑒏𑒢𑓂𑒨𑒰 𑒮𑒹𑒯𑒼 𑒮𑒳𑒢𑒱 𑒩𑒯𑒪 𑒕𑒪𑒲𑒯। 𑒯𑒰𑒩𑒱 𑒏𑒋 𑒥𑒖𑒲𑒩𑒏 𑒥𑒹𑒙𑒰 𑒏𑒯𑒪𑒏 𑒖𑒹 𑒖𑒞𑒋𑒮𑒿 𑒥𑒩𑒱𑒨𑒰𑒞𑒲 𑒂𑒣𑒮 𑒦𑒹𑒪 𑒕𑒪। 𑒥𑒱𑒡𑒰𑒞𑒰 𑒖𑒹 𑒏𑒯𑒢𑒹 𑒕𑒪 𑒍 𑒮𑒦 𑒑𑒣 𑒏𑒯𑒪𑒏 𑒂 𑒩𑒮𑓂𑒞𑒰𑒧𑒹 𑒖𑒹 𑒥𑒱𑒞𑒪 𑒮𑒹𑒯𑒼 𑒏𑒯𑒪𑒏। 𑒄 𑒮𑒦 𑒏𑒯𑒱𑒞𑒹 𑒥𑒖𑒲𑒩𑒏 𑒥𑒹𑒙𑒰𑒏 𑒁𑒠𑒯𑒰 𑒁𑓀𑒑 𑒣𑒰𑒟𑒩𑒏 𑒦𑒋 𑒑𑒹𑒪𑒻𑒏। 𑒂 𑒖𑒐𑒢 𑒮𑒦 𑒑𑒣 𑒣𑒴𑒩𑓂𑒝 𑒦𑒹𑒪 𑒞𑒿 𑒥𑒖𑒲𑒩𑒏 𑒥𑒹𑒙𑒰 𑒍𑒯𑒲 𑒏𑒼𑒔𑒏 𑒥𑒑𑒪𑒧𑒹 𑒣𑒯𑒰𑒛𑓃 𑒥𑒢𑒱 𑒑𑒹𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒩𑒰𑒖𑒰𑒏𑒹𑒿 𑒋𑒏𑒙𑒰 𑒥𑒹𑒙𑒰 𑒩𑒰𑒞𑒱𑒧𑒹 𑒖𑒢𑓂𑒧 𑒪𑒹𑒪𑒏। 𑒏𑒯𑒪 𑒑𑒣𑒏𑒹𑒿 𑒍𑒯𑒲 𑒮𑒧𑒨 𑒍 𑒣𑒴𑒩𑓂𑒝 𑒏𑒩𑒋 𑒪𑒰𑒑𑒪 𑒂 𑒍𑒯𑒲 𑒣𑒯𑒰𑒛𑓃𑒣𑒩 𑒍𑒯𑒱 𑒥𑒰𑒪𑒏𑒏𑒹𑒿 𑒩𑒰𑒐𑒱 𑒣𑒒𑒩𑒱𑒨𑒰𑒮𑒿 𑒠𑒴 𑒙𑒳𑒏𑒛𑓃𑒲 𑒏𑒋 𑒠𑒹𑒪𑒏। 𑒍𑒏𑒩 𑒙𑒳𑒏𑒛𑓃𑒰 𑒯𑒼𑒃𑒞𑒯𑒱 𑒥𑒖𑒲𑒩𑒏 𑒥𑒹𑒙𑒰 𑒤𑒹𑒩𑒮𑒿 𑒞𑒻𑒨𑒰𑒩 𑒦𑓄 𑒑𑒹𑒪 𑒂 𑒏𑒯𑒪𑒏 𑒖𑒹 𑒯𑒧𑒩𑒰 𑒂𑒥 𑒍 𑒪𑒛𑓃𑒏𑒰 𑒠𑒱𑒁। 𑒥𑒖𑒲𑒩𑒏 𑒥𑒹𑒙𑒰 𑒍𑒯𑒱 𑒥𑒰𑒪𑒏𑒏𑒹𑒿 𑒪𑒋 𑒁𑒣𑒢 𑒮𑒰𑒮𑒳𑒩 𑒑𑒹𑒪। 𑒍 𑒥𑒰𑒩𑒯 𑒥𑒖𑒹 𑒩𑒰𑒞𑒱𑒧𑒹 𑒣𑒯𑒳𑒿𑒔𑒪। 𑒏𑒼𑒢𑒼 𑒞𑒩𑒯𑒹𑒿 𑒁𑒣𑒢 𑒮𑓂𑒞𑓂𑒩𑒲𑒏 𑒪𑒑 𑒣𑒯𑒳𑒿𑒔𑒪 𑒂 𑒮𑒦 𑒑𑒣 𑒏𑒯𑒱 𑒥𑒰𑒪𑒏𑒏𑒹𑒿 𑒂𑒧𑒏 𑒑𑒰𑒕𑒏 𑒚𑒰𑒜𑓃𑒱𑒣𑒩 𑒪𑒙𑒏𑒰 𑒠𑒹𑒪𑒏। 𑒩𑒰𑒞𑒱𑒧𑒹 𑒁𑒣𑒢 𑒮𑓂𑒞𑓂𑒩𑒲𑒏𑒹𑒿 𑒏𑒪𑒧𑒧𑒹 𑒁𑒢𑒪𑒏 𑒂 𑒥𑒰𑒪𑒏𑒏𑒹𑒿 𑒚𑒰𑒜𑓃𑒱𑒣𑒩𑒮𑒿 𑒅𑒞𑒰𑒩𑒱 𑒏𑒋 𑒢𑒲𑒔𑒰𑒿 𑒏𑒋𑒪𑒏 𑒂 𑒏𑒯𑒪𑒏 𑒖𑒹 𑒄 𑒔𑒏𑓂𑒏𑒴 𑒪𑒱𑒁 𑒂 𑒁𑒣𑒢 𑒯𑒰𑒟𑒏 𑒏𑒿𑒑𑒳𑒩𑒱𑒂 𑒂𑒿𑒑𑒳𑒩 𑒏𑒰𑒙𑒱 𑒏𑒋 𑒋𑒯𑒱 𑒥𑒔𑓂𑒔𑒰𑒣𑒩 𑒕𑒲𑒙𑒱 𑒠𑒱𑒁। 𑒖𑒐𑒢𑒹 𑒍 𑒕𑒲𑒙𑒪𑒏 𑒞𑒐𑒢𑒹 𑒍 𑒥𑒔𑓂𑒔𑒰 𑒏𑒰𑒢𑒋 𑒪𑒰𑒑𑒪 𑒂 𑒞𑒐𑒢𑒹 𑒍 𑒍𑒏𑒩𑒰 𑒪𑒋 𑒖𑒰 𑒏𑒋 𑒩𑒰𑒖𑒰𑒏𑒹𑒿 𑒠𑒹𑒪𑒏। 𑒥𑒖𑒲𑒩𑒏 𑒥𑒹𑒙𑒰 𑒏𑒯𑒪𑒏 𑒖𑒹 𑒂𑒥 𑒂𑒃 𑒠𑒱𑒢𑒮𑒿 𑒁𑒯𑒰𑒿𑒏 𑒮𑓀𑒑 𑒯𑒧𑒩 𑒠𑒼𑒮𑒞𑒱𑒨𑒰𑒩𑒲 𑒮𑒧𑒰𑒣𑓂𑒞 𑒦𑒹𑒪। 𑒄 𑒏𑒯𑒱 𑒥𑒖𑒲𑒩𑒏 𑒥𑒹𑒙𑒰 𑒁𑒣𑒢 𑒒𑒩 𑒒𑒳𑒩𑒋 𑒪𑒰𑒑𑒪, 𑒞𑒿 𑒍𑒯𑒲 𑒮𑒧𑒨 𑒩𑒰𑒖𑒰𑒏𑒹𑒿 𑒖𑓂𑒘𑒰𑒢 𑒣𑓂𑒩𑒰𑒣𑓂𑒞 𑒦𑒹𑒪 𑒂 𑒖𑒰 𑒏𑒋 𑒁𑒣𑒢 𑒠𑒼𑒮𑓂𑒞𑒏𑒹𑒿 𑒑𑒩𑒰 𑒪𑒰𑒑𑒱 𑒍 𑒏𑓂𑒭𑒧𑒰 𑒧𑒿𑒑𑒪𑒏 𑒂 𑒏𑒯𑒪𑒏 𑒖𑒹 𑒂𑒃𑒮𑒿 𑒋𑒯𑒢 𑒑𑒪𑒞𑒲 𑒯𑒧𑒩𑒰𑒮𑒿 𑒏𑒯𑒱𑒨𑒼 𑒢𑒯𑒱 𑒯𑒼𑒋𑒞 𑒂 𑒄 𑒠𑒼𑒮𑓂𑒞𑒲 𑒥𑒢𑒪 𑒩𑒯𑒞।





𑒩𑒰𑒖𑒰 𑒁𑒢𑒮𑒰𑒩𑒲
𑒩𑒰𑒖𑒰 𑒁𑒢𑒮𑒰𑒩𑒲 𑒧𑒯𑒰𑒢 𑒩𑒰𑒖𑒰 𑒕𑒪𑒰𑒯। 𑒯𑒳𑒢𑒏𑒩 𑒩𑒰𑒖𑓂𑒨 𑓑𑓔 𑒏𑒼𑒬𑒧𑒹 𑒣𑒮𑒩𑒪 𑒩𑒯𑒋। 𑒍 𑒩𑒰𑒖𑒰 𑒁𑒣𑒢 𑒧𑒢𑒼𑒏𑒰𑒧𑒢𑒰𑒏 𑒁𑒢𑒳𑒮𑒰𑒩 𑒩𑒰𑒖𑓂𑒨 𑒏𑒩𑒻𑒞 𑒕𑒪𑒰𑒯। 𑒖𑒹 𑒯𑒳𑒢𑒏𑒩 𑒯𑒵𑒠𑒨𑒧𑒹 𑒁𑒥𑒻𑒞 𑒕𑒪𑒢𑓂𑒯𑒱 𑒫𑒻𑒯 𑒏𑒩𑒻𑒞 𑒕𑒪𑒰𑒯। 𑒯𑒳𑒢𑒏𑒰 𑒞𑒲𑒢 𑒙𑒰 𑒥𑒹𑒙𑒰 𑒕𑒪𑒢𑓂𑒯𑒱। 𑒋𑒏 𑒠𑒱𑒢𑒳𑒏𑒰 𑒑𑒣 𑒁𑒕𑒱। 𑒩𑒰𑒖𑒰𑒏𑒹𑒿 𑒏𑒼𑒢𑒼 𑒫𑒮𑓂𑒞𑒳𑒏 𑒏𑒧𑒲 𑒢𑒯𑒱 𑒕𑒪𑒢𑓂𑒯𑒱। 𑒒𑒩 𑒧𑒏𑒰𑒢, 𑒥𑓀𑒑𑒪𑒰 𑒂 𑒥𑒰𑒑-𑒥𑒑𑒲𑒔𑒰𑒮𑒿 𑒦𑒩𑒪-𑒣𑒴𑒩𑒪 𑒕𑒪𑒢𑓂𑒯𑒱। 𑒋𑒏 𑒠𑒱𑒢 𑒩𑒰𑒖𑒰 𑒩𑒰𑒞𑒱𑒧𑒹 𑒮𑒴𑒞𑒪 𑒕𑒪𑒰𑒯 𑒏𑒱 𑒁𑒔𑒰𑒢𑒏𑒹 𑒍 𑒮𑒣𑒢𑒰 𑒠𑒹𑒐𑒪𑒢𑓂𑒯𑒱 𑒖𑒹 𑒯𑒧𑒩 𑒒𑒩𑒧𑒹 𑒯𑒲𑒩𑒰-𑒧𑒼𑒞𑒲 𑒗𑒩𑒱-𑒗𑒩𑒱 𑒏𑒋 𑒐𑒮𑒻𑒞 𑒁𑒕𑒱 𑒂 𑒧𑒼𑒖𑒩 𑒔𑒳𑒢𑒱-𑒔𑒳𑒢𑒱 𑒏𑒋 𑒮𑒦 𑒐𑒰𑒃𑒞 𑒁𑒕𑒱। 𑒦𑒼𑒩 𑒦𑒹𑒪 𑒞𑒿 𑒩𑒰𑒖𑒰 𑒁𑒣𑒢 𑒪𑒛𑓃𑒏𑒰𑒏𑒹𑒿 𑒏𑒯𑒪𑒏 𑒖𑒹 𑒠𑒹𑒐𑒴 𑒯𑒧 𑒩𑒰𑒞𑒱𑒧𑒹 𑒄 𑒮𑒣𑒢𑒰 𑒠𑒹𑒐𑒪𑒯𑒳𑒿। 𑒪𑒛𑓃𑒏𑒰 𑒅𑒞𑓂𑒞𑒩 𑒠𑒹𑒪𑒏 𑒖𑒹 𑒣𑒱𑒞𑒰𑒖𑒲 𑒁𑒯𑒰𑒿 𑒋𑒯𑒱 𑒑𑒣𑒏 𑒔𑒱𑒢𑓂𑒞𑒰 𑒢𑒯𑒱 𑒏𑒩𑒴, 𑒯𑒧 𑒍𑒏𑒩𑒰 𑒣𑒴𑒩𑒰 𑒏𑒋 𑒠𑒹𑒥। 𑒞𑒲𑒢𑒴 𑒦𑒰𑒋 𑒫𑒱𑒔𑒰𑒩 𑒏𑒋 𑒦𑒼𑒩𑒹 𑒒𑒼𑒛𑓃𑒰 𑒏𑒮𑒹𑒪𑒏 𑒂 𑒥𑒱𑒠𑒰 𑒦𑒹𑒪। 𑒔𑒪𑒻𑒞-𑒔𑒪𑒻𑒞 𑒋𑒏𑒙𑒰 𑒦𑒨𑓀𑒏𑒩 𑒥𑒼𑒢𑒧𑒹 𑒍 𑒮𑒦 𑒣𑒯𑒳𑒿𑒔𑒪। 𑒞𑒲𑒢𑒴 𑒦𑒰𑒋 𑒍𑒯𑒱 𑒥𑒼𑒢𑒧𑒹 𑒩𑒮𑓂𑒞𑒰 𑒥𑒱𑒮𑒩𑒱 𑒑𑒹𑒪 𑒂 𑒞𑒲𑒢 𑒩𑒮𑓂𑒞𑒰𑒣𑒩 𑒥𑒱𑒠𑒰 𑒦𑓄 𑒑𑒹𑒪। 𑒠𑒴 𑒦𑒰𑒃 𑒦𑒙𑒏𑒻𑒞 𑒩𑒯𑒪 𑒂 𑒋𑒯𑒱𑒢𑒰 𑒏𑒱𑒕𑒳 𑒠𑒱𑒢 𑒥𑒲𑒞𑒱 𑒑𑒹𑒪। 𑒕𑒼𑒙 𑒦𑒰𑒋 𑒥𑒼𑒢𑒏 𑒩𑒮𑓂𑒞𑒰𑒧𑒹 𑒦𑒴𑒐-𑒣𑒱𑒂𑒮𑒮𑒿 𑒟𑒰𑒏𑒱 𑒑𑒹𑒪 𑒂 𑒒𑒼𑒛𑓃𑒰𑒏𑒹𑒿 𑒕𑒼𑒛𑓃𑒱 𑒠𑒹𑒪𑒏 𑒂 𑒣𑒋𑒩𑒹 𑒔𑒪𑒋 𑒪𑒰𑒑𑒪। 𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒍𑒏𑒩𑒰 𑒩𑒮𑓂𑒞𑒰𑒧𑒹 𑒋𑒏𑒙𑒰 𑒃𑒢𑓂𑒮𑒰𑒢 𑒦𑒹𑒙𑒪। 𑒍𑒏𑒩𑒰𑒮𑒿 𑒍 𑒣𑒳𑒕𑒪𑒏, 𑒯𑒧𑒩 𑒮𑒼𑒢𑒰𑒩𑒴𑒣𑒲 𑒑𑒰𑒕𑒏 𑒚𑒰𑒜𑓃𑒱𑒮𑒿 𑒧𑒼𑒞𑒲 𑒗𑒩𑒻𑒞 𑒁𑒕𑒱 𑒂 𑒧𑒼𑒖𑒩 𑒔𑒳𑒢𑒱 𑒏𑒋 𑒐𑒰𑒃𑒞 𑒁𑒕𑒱। 𑒯𑒧𑒩𑒰 𑒍𑒞𑒯𑒱 𑒖𑒋𑒥𑒰𑒏 𑒁𑒕𑒱। 𑒍 𑒃𑒢𑒮𑒰𑒢 𑒏𑒯𑒪𑒏 𑒖𑒹 𑒋𑒯𑒱 𑒩𑒮𑓂𑒞𑒰𑒮𑒿 𑒔𑒪𑒱 𑒖𑒰𑒆। 𑒂𑒑𑒰𑒿 𑒋𑒏𑒙𑒰 𑒃𑒢𑒰𑒩 𑒁𑒕𑒱। 𑒍𑒯𑒲 𑒃𑒢𑒰𑒩𑒏 𑒥𑒰𑒙𑒹 𑒋𑒏𑒙𑒰 𑒩𑒮𑓂𑒞𑒰 𑒁𑒕𑒱। 𑒕𑒼𑒙𑒏𑒰 𑒦𑒰𑒋 𑒍𑒏𑒩𑒹 𑒏𑒯𑒪 𑒁𑒢𑒳𑒮𑒰𑒩 𑒔𑒪𑒻𑒞 𑒩𑒯𑒪 𑒂 𑒖𑒐𑒢 𑒍𑒯𑒱 𑒃𑒢𑒰𑒩𑒏 𑒪𑒑 𑒑𑒹𑒪 𑒞𑒿 𑒠𑒹𑒐𑒪𑒏 𑒖𑒹 𑒩𑒮𑓂𑒞𑒰 𑒍𑒯𑒲 𑒥𑒰𑒙𑒹 𑒩𑒯𑒋। 𑒍 𑒃𑒢𑒰𑒩𑒧𑒹 𑒖𑒰 𑒏𑒋 𑒐𑒮𑒱 𑒣𑒛𑓃𑒪। 𑒔𑒪𑒻𑒞-𑒔𑒪𑒻𑒞 𑒍 𑒦𑒻𑒩𑒫𑒰𑒢𑒢𑓂𑒠 𑒖𑒼𑒑𑒲 𑒪𑒑 𑒣𑒯𑒳𑒿𑒔𑒪। 𑒍 𑒖𑒼𑒑𑒲 𑒏𑒯𑒪𑒏 𑒖𑒹 𑒩𑒹 𑒥𑒔𑓂𑒔𑒰 𑒞𑒴𑒿 𑒋𑒞𑒋 𑒏𑒞𑒋𑒮𑒿 𑒁𑒋𑒪𑒿𑒯, 𑒋𑒞𑒋 𑒞𑒿 𑒏𑒼𑒢𑒼 𑒧𑒢𑒳𑒐 𑒂𑒃 𑒡𑒩𑒱 𑒢𑒯𑒱 𑒣𑒯𑒳𑒿𑒔𑒱 𑒮𑒏𑒪 𑒩𑒯𑒋। 𑒍𑒞𑒋 𑒍 𑒥𑒔𑓂𑒔𑒰 𑒍𑒯𑒱 𑒖𑒼𑒑𑒲𑒏 𑒮𑒹𑒫𑒰 𑒏𑒩𑒋 𑒪𑒰𑒑𑒪। 𑒮𑒹𑒫𑒰 𑒏𑒩𑒻𑒞 𑒏𑒱𑒕𑒳 𑒠𑒱𑒢 𑒥𑒲𑒞𑒱 𑒑𑒹𑒪 𑒞𑒿 𑒖𑒼𑒑𑒲 𑒍𑒯𑒱 𑒥𑒔𑓂𑒔𑒰𑒣𑒩 𑒥𑒛𑓂𑒛 𑒣𑓂𑒩𑒮𑒢𑓂𑒢 𑒦𑓄 𑒑𑒹𑒪, 𑒥𑒰𑒖𑒪-𑒥𑒔𑓂𑒔𑒰 𑒧𑒰𑒿𑒑 𑒏𑒲 𑒧𑒿𑒑𑒻𑒞 𑒕𑒿𑒯। 𑒯𑒧 𑒞𑒼𑒩𑒰 𑒁𑒫𑒬𑓂𑒨 𑒠𑒹𑒥𑒾𑒏। 𑒥𑒔𑓂𑒔𑒰 𑒥𑒰𑒖𑒪-𑒖𑒼𑒑𑒲 𑒥𑒰𑒥𑒰, 𑒯𑒧𑒩𑒰 𑒮𑒼𑒢𑒰𑒏 𑒑𑒰𑒕 𑒂 𑒩𑒴𑒣𑒰𑒏 𑒚𑒰𑒜𑓃𑒱 𑒖𑒰𑒯𑒱𑒧𑒹𑒮𑒿 𑒧𑒼𑒞𑒲 𑒗𑒩𑒻𑒞 𑒁𑒕𑒱 𑒂 𑒧𑒼𑒖𑒩 𑒔𑒳𑒢𑒱 𑒏𑒋 𑒐𑒰𑒃𑒞 𑒁𑒕𑒱, 𑒮𑒹 𑒔𑒰𑒯𑒲। 𑒍 𑒨𑒼𑒑𑒲 𑒄 𑒑𑒣 𑒮𑒳𑒢𑒱 𑒏𑒋 𑒥𑒛𑓂𑒛 𑒂𑒬𑓂𑒔𑒩𑓂𑒨 𑒫𑓂𑒨𑒏𑓂𑒞 𑒏𑒋𑒪𑒏। 𑒞𑒴𑒿 𑒄 𑒔𑒲𑒖 𑒏𑒼𑒢𑒰 𑒣𑒞𑒰 𑒪𑒑𑒹𑒪𑒯 । 𑒚𑒲𑒏 𑒁𑒕𑒱। 𑒯𑒧 𑒖𑒐𑒢 𑒫𑒩𑒠𑒰𑒢 𑒠𑒋 𑒔𑒳𑒏𑒪 𑒕𑒲, 𑒞𑒿 𑒁𑒫𑒬𑓂𑒨 𑒠𑒹𑒥। 𑒞𑒼𑒩𑒰 𑒏𑒭𑓂𑒙 𑒅𑒚𑒰𑒥𑒋 𑒣𑒛𑓃𑒞𑒯। 𑒦𑒼𑒩 𑒦𑒹𑒪 𑒞𑒿 𑒥𑒔𑓂𑒔𑒰𑒏𑒹𑒿 𑒋𑒏𑒙𑒰 𑒖𑓀𑒞𑓂𑒩 𑒠𑒹𑒪𑒏 𑒂 𑒏𑒯𑒪𑒏 𑒖𑒹 𑒖𑒰𑒆 𑒂 𑒮𑒰𑒞 𑒮𑒧𑒳𑒠𑓂𑒩 𑒣𑒰𑒩 𑒍𑒞𑒋 𑒋𑒏𑒙𑒰 𑒁𑒧𑒩 𑒤𑒪𑒏 𑒑𑒰𑒕 𑒁𑒕𑒱, 𑒍𑒯𑒱𑒧𑒹𑒮𑒿 𑒋𑒏𑒙𑒰 𑒤𑒪 𑒞𑒼𑒛𑓃𑒱 𑒏𑒋 𑒪𑒋 𑒂𑒢𑒴। 𑒍 𑒥𑒔𑓂𑒔𑒰 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪। 𑒮𑒳𑒑𑓂𑒑𑒰𑒏 𑒩𑒴𑒣 𑒡𑒰𑒩𑒝 𑒏𑒋𑒪𑒏, 𑒅𑒛𑓃𑒻𑒞-𑒅𑒛𑓃𑒻𑒞 𑒮𑒰𑒞 𑒮𑒧𑒳𑒠𑓂𑒩 𑒣𑒰𑒩 𑒑𑒹𑒪, 𑒖𑒞𑒋 𑒁𑒧𑒩𑒤𑒪𑒏 𑒑𑒰𑒕 𑒩𑒯𑒋। 𑒍 𑒤𑒪 𑒞𑒼𑒛𑓃𑒱 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪 𑒖𑒐𑒢 𑒍𑒏𑒩𑒰 𑒣𑒰𑒕𑒰𑒿 𑒞𑒲𑒢 𑒙𑒰 𑒣𑒩𑒲 𑒪𑒰𑒑𑒱 𑒑𑒹𑒪 𑒂 𑒍 𑒮𑒦 𑒞𑒐𑒢 𑒁𑒥𑒰𑒖 𑒠𑒹𑒪𑒏 𑒖𑒹 𑒒𑒳𑒩𑒱 𑒏𑒋 𑒠𑒹𑒐। 𑒋𑒢𑒰 𑒏𑒯𑒻𑒞, 𑒣𑒰𑒕𑒰𑒿 𑒏𑒩𑒻𑒞, 𑒔𑒪𑒱 𑒂𑒥𑒱 𑒩𑒯𑒪 𑒕𑒪 𑒍 𑒮𑒦। 𑒮𑒧𑒳𑒠𑓂𑒩 𑒙𑒣𑒪𑒰𑒏 𑒥𑒰𑒠 𑒮𑒳𑒑𑓂𑒑𑒰 𑒒𑒳𑒩𑒱 𑒏𑒋 𑒠𑒹𑒐𑒪𑒏 𑒂 𑒍𑒞𑒯𑒱 𑒧𑒩𑒱 𑒑𑒹𑒪। 𑒖𑒼𑒑𑒲 𑒄 𑒮𑒦 𑒡𑓂𑒨𑒰𑒢𑒧𑒹 𑒠𑒹𑒐𑒱 𑒩𑒯𑒪 𑒕𑒪। 𑒮𑒳𑒑𑓂𑒑𑒰 𑒒𑒳𑒩𑒱 𑒏𑒋 𑒠𑒹𑒐𑒪𑒏 𑒂 𑒧𑒩𑒱 𑒑𑒹𑒪 ! 𑒖𑒼𑒑𑒲 𑒥𑒱𑒠𑒰 𑒦𑒹𑒪 𑒁𑒣𑒢 𑒔𑒳𑒙𑓂𑒙𑒰 𑒪𑒋। 𑒔𑒳𑒙𑓂𑒙𑒰𑒮𑒿 𑒧𑒰𑒩𑒱 𑒏𑒋 𑒮𑒳𑒑𑓂𑒑𑒰𑒏𑒹𑒿 𑒖𑒱𑒋𑒪𑒏 𑒂 𑒏𑒯𑒪𑒏 𑒖𑒹 𑒂𑒥 𑒖𑒼। 𑒞𑒴𑒿 𑒤𑒪 𑒪𑒋 𑒖𑒹 𑒂𑒥 𑒔𑒪𑒧𑒹, 𑒞𑒿 𑒒𑒳𑒩𑒱 𑒏𑒋 𑒢𑒯𑒱 𑒠𑒹𑒐𑒱𑒯𑒿। 𑒋𑒢𑒰 𑒥𑒳𑒗𑒰 𑒏𑒋 𑒍𑒏𑒩𑒰 𑒖𑒼𑒑𑒲 𑒣𑒚𑒹𑒪𑒏 𑒂 𑒍 𑒔𑒪𑒱 𑒑𑒹𑒪। 𑒤𑒪 𑒞𑒼𑒛𑓃𑒱 𑒋𑒯𑒱 𑒥𑒹𑒩 𑒍 𑒅𑒛𑓃𑒻𑒞 𑒩𑒯𑒱 𑒑𑒹𑒪, 𑒒𑒳𑒩𑒱 𑒏𑒋 𑒢𑒯𑒱 𑒠𑒹𑒐𑒪𑒏 𑒂 𑒖𑒼𑒑𑒲 𑒪𑒑 𑒣𑒯𑒳𑒿𑒔𑒱 𑒑𑒹𑒪। 𑒖𑒼𑒑𑒲 𑒪𑒑 𑒍 𑒣𑒯𑒳𑒿𑒔𑒱 𑒑𑒹𑒪 𑒂 𑒍 𑒤𑒪 𑒖𑒼𑒑𑒲𑒏 𑒯𑒰𑒟𑒧𑒹 𑒠𑒹𑒪𑒏। 𑒍 𑒁𑒧𑒩 𑒤𑒪𑒮𑒿 𑒏𑒱𑒕𑒳 𑒥𑒔𑓂𑒔𑒰𑒏𑒹𑒿 𑒐𑒼𑒂 𑒠𑒹𑒪𑒏 𑒂 𑒏𑒯𑒪𑒏 𑒖𑒹 𑒂𑒥 𑒖𑒰𑒆 𑒁𑒯𑒰𑒿 𑒁𑒧𑒩 𑒦𑒋 𑒑𑒹𑒪𑒯𑒳𑒿। 𑒤𑒹𑒩 𑒍 𑒏𑒯𑒪𑒏 𑒖𑒹 𑒍𑒯𑒲 𑒮𑒰𑒞 𑒮𑒧𑒳𑒠𑓂𑒩 𑒣𑒰𑒩 𑒋𑒏𑒙𑒰 𑒏𑒪𑒧-𑒑𑒰𑒕𑒲 𑒁𑒕𑒱। 𑒍𑒯𑒲 𑒑𑒰𑒕𑒲𑒧𑒹 𑒞𑒲𑒢 𑒥𑒯𑒱𑒢 𑒩𑒯𑒻𑒞 𑒕𑒟𑒱। 𑒍𑒏𑒩𑒹 𑒪𑒑 𑒞𑒼𑒯𑒩 𑒥𑒰𑒞 𑒣𑒴𑒩𑓂𑒝 𑒯𑒼𑒋𑒞𑒾𑒏। 𑒥𑒔𑓂𑒔𑒰 𑒥𑒱𑒠𑒰 𑒦𑒹𑒪, 𑒤𑒹𑒩 𑒮𑒰𑒞 𑒮𑒧𑒳𑒠𑓂𑒩 𑒣𑒰𑒩 𑒑𑒹𑒪 𑒂 𑒍𑒯𑒲 𑒑𑒰𑒕𑒲𑒧𑒹 𑒣𑒻𑒒 𑒥𑒯𑒱𑒢 𑒪𑒑 𑒖𑒰 𑒏𑒋 𑒏𑒯𑒪𑒏 𑒞𑒿 𑒍 𑒍𑒏𑒩𑒰 𑒧𑒰𑒿𑒗𑒱𑒪 𑒪𑒑 𑒣𑒚𑒰 𑒠𑒹𑒪𑒏। 𑒍𑒏𑒩𑒰 𑒪𑒑 𑒑𑒹𑒪 𑒞𑒿 𑒍 𑒍𑒏𑒩𑒰 𑒕𑒼𑒙𑒏𑒲 𑒪𑒑 𑒣𑒚𑒰 𑒠𑒹𑒪𑒏। 𑒖𑒐𑒢 𑒍 𑒕𑒼𑒙𑒏𑒲 𑒥𑒯𑒱𑒢 𑒪𑒑 𑒑𑒹𑒪 𑒞𑒿 𑒍 𑒯𑒰𑒟𑒧𑒹 𑒔𑒏𑓂𑒏𑒴 𑒪𑒹𑒢𑒹 𑒥𑒛𑓃𑒏𑒲 𑒂 𑒧𑒰𑒿𑒗𑒱𑒪 𑒥𑒯𑒱𑒢 𑒪𑒑 𑒂𑒋𑒪। 𑒞𑒐𑒢 𑒞𑒲𑒢𑒴 𑒥𑒯𑒱𑒢 𑒍𑒯𑒱 𑒪𑒛𑓃𑒏𑒰𑒮𑒿 𑒣𑒳𑒕𑒪𑒏 𑒖𑒹 𑒞𑒼𑒿 𑒏𑒞𑒋𑒮𑒿 𑒂𑒋𑒪 𑒕𑒯। 𑒪𑒛𑓃𑒏𑒰 𑒖𑒫𑒰𑒥 𑒠𑒹𑒪𑒏 𑒖𑒹 𑒖𑒼𑒑𑒲 𑒥𑒰𑒥𑒰 𑒯𑒧𑒩𑒰 𑒣𑒚𑒹𑒢𑒹 𑒕𑒟𑒱। 𑒁𑒯𑒰𑒿 𑒮𑒦 𑒯𑒧𑒩𑒰 𑒮𑓀𑒑𑒹 𑒖𑒼𑒑𑒲𑒥𑒰𑒥𑒰 𑒪𑒑 𑒔𑒪𑒴। 𑒍 𑒔𑒰𑒩𑒴 𑒑𑒼𑒙𑒹 𑒍𑒞𑒋𑒮𑒿 𑒖𑒼𑒑𑒲𑒥𑒰𑒥𑒰 𑒪𑒑 𑒁𑒋𑒪𑒰𑒯। 𑒖𑒼𑒑𑒲𑒥𑒰𑒥𑒰 𑒏𑒯𑒪𑒏-𑒥𑒹𑒙𑒲, 𑒂𑒥 𑒁𑒯𑒰𑒿 𑒞𑒲𑒢𑒴 𑒑𑒼𑒙𑒹𑒏𑒹𑒿 𑒋𑒏𑒩𑒰 𑒮𑓀𑒑 𑒖𑒹𑒥𑒰𑒏 𑒁𑒕𑒱।
𑒍 𑒞𑒲𑒢𑒴 𑒣𑒩𑒲 𑒔𑒪𑒥𑒰 𑒪𑒹𑒪 𑒞𑒻𑒨𑒰𑒩 𑒦𑓄 𑒑𑒹𑒪𑒲𑒯। 𑒖𑒼𑒑𑒲 𑒥𑒰𑒥𑒰𑒮𑒿 𑒥𑒔𑓂𑒔𑒰 𑒏𑒯𑒪𑒏- 𑒯𑒧𑒩𑒰 𑒑𑒰𑒕 𑒢𑒯𑒱 𑒠𑒹𑒐𑒰𑒃 𑒣𑒛𑓃𑒪। 𑒍𑒯𑒱 𑒮𑒧𑒨 𑒖𑒼𑒑𑒲 𑒥𑒰𑒥𑒰 𑒂𑒠𑒹𑒬 𑒠𑒹𑒪𑒏 𑒂 𑒐𑒹𑒪𑒰 𑒠𑒹𑒐𑒹𑒪𑒏। 𑒞𑒲𑒢𑒴 𑒣𑒩𑒲 𑒋𑒏 𑒪𑒰𑒃𑒢𑒧𑒹 𑒚𑒰𑒜𑓃 𑒦𑒋 𑒑𑒹𑒪𑒲𑒯 𑒂 𑒪𑒛𑓃𑒏𑒰𑒏 𑒯𑒰𑒟𑒧𑒹 𑒔𑒏𑓂𑒏𑒴 𑒠𑒹𑒪𑒏 𑒂 𑒏𑒯𑒪𑒏 𑒖𑒹 𑒋𑒏𑓂𑒏𑒹 𑒮𑓀𑒑 𑒞𑒲𑒢𑒴 𑒣𑒩𑒲𑒏 𑒑𑒩𑒠𑒢𑒱𑒧𑒹 𑒔𑒏𑓂𑒏𑒴 𑒧𑒰𑒩𑒴 𑒂 𑒁𑒣𑒢 𑒑𑒩𑒠𑒢𑒱𑒧𑒹 𑒮𑒹𑒯𑒼 𑒧𑒰𑒩𑒴। 𑒋𑒢𑒰 𑒏𑒋𑒪𑒰𑒮𑒿 𑒮𑒼𑒢𑒰𑒏 𑒑𑒰𑒕 𑒂 𑒩𑒴𑒣𑒰𑒏 𑒚𑒰𑒜𑓃𑒱𑒣𑒩𑒮𑒿 𑒧𑒼𑒞𑒲 𑒗𑒩𑒋 𑒪𑒰𑒑𑒪 𑒂 𑒧𑒼𑒖𑒩 𑒔𑒳𑒢𑒱 𑒏𑒋 𑒐𑒰𑒋 𑒪𑒰𑒑𑒪। 𑒥𑒔𑓂𑒔𑒰𑒏𑒹𑒿 𑒂𑒥 𑒥𑒱𑒮𑒥𑒰𑒮 𑒦𑒹𑒪𑒻𑒏 𑒂 𑒞𑒐𑒢 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍 𑒔𑒰𑒩𑒴 𑒑𑒼𑒙𑒹 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪 𑒂 𑒒𑒩 𑒣𑒯𑒳𑒿𑒔𑒪।
𑒍 𑒁𑒥𑓂𑒥𑒴𑒏𑒹𑒿 𑒏𑒯𑒪𑒏 𑒣𑒱𑒞𑒰𑒖𑒲 𑒯𑒧 𑒮𑒼𑒢𑒰-𑒩𑒴𑒣𑒰𑒏 𑒑𑒰𑒕 𑒁𑒢𑒢𑒹 𑒕𑒲।
𑒩𑒰𑒖𑒰 𑒁𑒢𑒮𑒰𑒩𑒲 𑒏𑒯𑒪𑒏- 𑒥𑒹𑒫𑒏𑒴𑒤! 𑒞𑒴𑒿 𑒞𑒲𑒢𑒙𑒰 𑒎𑒩𑒞 𑒁𑒢𑒢𑒹 𑒕𑒿𑒯 𑒂 𑒏𑒯𑒻𑒞 𑒕𑒿𑒯 𑒖𑒹 𑒑𑒰𑒕 𑒁𑒢𑒢𑒹 𑒕𑒲।
𑒥𑒔𑓂𑒔𑒰 𑒏𑒯𑒪𑒏 𑒖𑒹 𑒮𑒾𑒿𑒮𑒹 𑒢𑒑𑒩𑒏 𑒪𑒼𑒏𑒏𑒹𑒿 𑒥𑒖𑒰𑒆 𑒂 𑒞𑒐𑒢 𑒯𑒧 𑒠𑒹𑒐𑒥𑒻𑒞 𑒕𑒲।
𑒩𑒰𑒖𑒰 𑒮𑒦𑒏𑒹𑒿 𑒥𑒖𑒹𑒪𑒏 𑒋𑒏𑒞𑓂𑒩 𑒏𑒋𑒪𑒏।
𑒥𑒔𑓂𑒔𑒰 𑒞𑒲𑒢𑒴 𑒣𑒩𑒲𑒏 𑒑𑒩𑒠𑒢𑒱𑒧𑒹 𑒔𑒏𑓂𑒏𑒴 𑒧𑒰𑒩𑒪𑒏 𑒂 𑒁𑒣𑒢 𑒑𑒩𑒠𑒢𑒱𑒧𑒹 𑒮𑒹𑒯𑒼। 𑒮𑒼𑒢𑒰𑒏 𑒑𑒰𑒕 𑒂 𑒩𑒴𑒣𑒰𑒏 𑒚𑒰𑒜𑓃𑒱 𑒮𑒿 𑒧𑒼𑒞𑒲 𑒗𑒩𑒋 𑒪𑒰𑒑𑒪 𑒂 𑒧𑒼𑒖𑒩 𑒔𑒳𑒢𑒱 𑒏𑒋 𑒐𑒰𑒋 𑒪𑒰𑒑𑒪।
𑒩𑒰𑒖𑒰𑒏 𑒮𑒣𑒢𑒰 𑒣𑒴𑒩𑒰 𑒦𑒹𑒪।

𑒩𑒰𑒖𑒰 𑒜𑒼𑒪𑒢
𑒑𑒜𑓃 𑒢𑒰𑒩𑒱𑒨𑒪𑒏 𑒩𑒰𑒖𑒰 𑒠𑒏𑓂𑒭 𑒩𑒯𑒋। 𑒍 𑒩𑒰𑒖𑒰 𑒥𑒛𑓂𑒛 𑒣𑓂𑒩𑒞𑒰𑒣𑒲 𑒕𑒪। 𑒧𑒳𑒠𑒰 𑒍𑒏𑒩𑒰 𑒩𑒰𑒖𑓂𑒨𑒧𑒹 𑒏𑒼𑒢𑒼 𑒯𑒰𑒙-𑒥𑒖𑒰𑒩 𑒢𑒯𑒱 𑒩𑒯𑒋। 𑒩𑒰𑒖𑒰 𑒮𑒼𑒔𑒪𑒏 𑒖𑒹 𑒯𑒧𑒩 𑒩𑒰𑒖𑓂𑒨𑒧𑒹 𑒯𑒰𑒙 𑒏𑒼𑒢𑒰 𑒪𑒑𑒞? 𑒮𑒹 𑒩𑒰𑒖𑒰 𑒁𑒣𑒢 𑒩𑒰𑒖𑓂𑒨𑒧𑒹 𑒜𑒼𑒪𑒯𑒼 𑒣𑒱𑒙𑒥𑒰 𑒠𑒹𑒪𑒏 𑒖𑒹 𑒯𑒧𑒩𑒰 𑒩𑒰𑒖𑓂𑒨𑒧𑒹 𑒯𑒰𑒙 𑒪𑒰𑒑𑒞 𑒂 𑒖𑒏𑒩 𑒖𑒹 𑒮𑒧𑒰𑒢 𑒢𑒯𑒱 𑒥𑒱𑒏𑒰𑒍𑒞 𑒮𑒹 𑒯𑒧 𑒏𑒲𑒢𑒱 𑒪𑒹𑒥। 𑒮𑒧𑓂𑒣𑒴𑒩𑓂𑒝 𑒩𑒰𑒖𑓂𑒨𑒏 𑒪𑒼𑒏 𑒂𑒥𑒋 𑒪𑒰𑒑𑒪 𑒂 𑒯𑒰𑒙 𑒪𑒑𑒥𑒋 𑒪𑒰𑒑𑒪। 𑒋𑒯𑒱 𑒣𑓂𑒩𑒏𑒰𑒩𑒹𑒿 𑒮𑒦 𑒠𑒱𑒢 𑒯𑒰𑒙𑒧𑒹 𑒖𑒹 𑒮𑒧𑒰𑒢 𑒥𑒔𑒱 𑒖𑒰𑒃𑒞 𑒕𑒪, 𑒞𑒏𑒩𑒰 𑒩𑒰𑒖𑒰 𑒏𑒲𑒢𑒱 𑒪𑒻𑒞 𑒕𑒪। 𑒋𑒯𑒱𑒢𑒰 𑒏𑒞𑒹𑒏 𑒠𑒱𑒢 𑒥𑒲𑒞𑒱 𑒑𑒹𑒪। 𑒋𑒏 𑒥𑒹𑒩 𑒋𑒏𑒙𑒰 𑒮𑒴𑒞𑒥𑒪𑒰 𑒮𑒴𑒞 𑒥𑒹𑒔𑒋 𑒪𑒹𑒪 𑒍𑒞𑒋 𑒂𑒋𑒪 𑒧𑒳𑒠𑒰 𑒞𑒰𑒫𑒞 𑒯𑒰𑒙 𑒅𑒚𑒱 𑒑𑒹𑒪 𑒩𑒯𑒋 𑒂 𑒍𑒏𑒩 𑒮𑒴𑒞𑒰 𑒢𑒯𑒱 𑒥𑒱𑒏𑒰𑒋𑒪। 𑒩𑒰𑒖𑒰 𑒍𑒏𑒩 𑒮𑒴𑒞 𑒮𑒹𑒯𑒼 𑒏𑒲𑒢𑒱 𑒪𑒹𑒪𑒏।
𑒧𑒳𑒠𑒰 𑒖𑒯𑒱𑒨𑒰𑒮𑒿 𑒩𑒰𑒖𑒰 𑒮𑒴𑒞𑒰 𑒏𑒱𑒢𑒪𑒏 𑒞𑒯𑒱𑒨𑒹𑒮𑒿 𑒍𑒏𑒩 𑒁𑒥𑒮𑓂𑒟𑒰 𑒒𑒙𑒋 𑒪𑒰𑒑𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒩𑒰𑒖𑒰𑒏 𑒯𑒰𑒪𑒞𑒱 𑒑𑒩𑒲𑒥 𑒖𑒹𑒏𑒰𑒿 𑒦𑓄 𑒑𑒹𑒪। 𑒩𑒰𑒖𑒰 𑒁𑒣𑒢 𑒮𑓂𑒞𑓂𑒩𑒲𑒮𑒿 𑒏𑒯𑒪𑒏-𑒁𑒧𑓂𑒥𑒱𑒏𑒰 𑒮𑒳𑒢𑒴। 𑒁𑒣𑒢 𑒩𑒰𑒖𑓂𑒨𑒧𑒹 𑒑𑒩𑒲𑒥𑒲 𑒣𑒮𑒩𑒱 𑒑𑒹𑒪 𑒁𑒕𑒱। 𑒂𑒥 𑒁𑒣𑒢 𑒩𑒰𑒖𑓂𑒨 𑒩𑒯𑒥𑒰 𑒨𑒼𑒑𑓂𑒨 𑒢𑒯𑒱 𑒩𑒯𑒪। 𑒍𑒞𑒋 𑒮𑒿 𑒩𑒰𑒖𑒰 𑒥𑒱𑒠𑒰 𑒦𑒹𑒪 𑒂 𑒖𑒰𑒃𑒞-𑒖𑒰𑒃𑒞 𑒏𑒼𑒢𑒼 𑒠𑒹𑒬𑒧𑒹 𑒣𑒯𑒳𑒿𑒔𑒪। 𑒍𑒯𑒱 𑒠𑒹𑒬𑒏 𑒢𑒰𑒧 𑒑𑒜𑓃𑒣𑒱𑓀𑒑𑒪 𑒩𑒯𑒋। 𑒍𑒞𑒳𑒏𑓂𑒏𑒰 𑒩𑒰𑒖𑒰𑒏 𑒢𑒰𑒧 𑒮𑒹𑒯𑒼 𑒠𑒹𑒬𑒏 𑒢𑒰𑒧𑒣𑒩 𑒕𑒪। 𑒑𑒜𑓃𑒣𑒱𑓀𑒑𑒪 𑒩𑒰𑒖𑒰𑒏 𑒍𑒯𑒲 𑒢𑒑𑒩𑒧𑒹 𑒑𑒜𑓃𑒢𑒰𑒩𑒱𑒨𑒪 𑒩𑒰𑒖𑒰 𑒒𑒳𑒧𑒻𑒞-𑒒𑒳𑒧𑒻𑒞 𑒣𑒯𑒳𑒿𑒔𑒱 𑒑𑒹𑒪 𑒂 𑒏𑒯𑒋 𑒪𑒰𑒑𑒪 𑒖𑒹 𑒯𑒹 𑒦𑒰𑒃 𑒯𑒧𑒩𑒰 𑒏𑒱𑒨𑒼 𑒢𑒼𑒏𑒩𑒲 𑒩𑒰𑒐𑒞 ? 𑒩𑒰𑒖𑒰 𑒏𑒯𑒪𑒏-𑒯𑒿। 𑒯𑒧𑒩𑒰 𑒋𑒏𑒙𑒰 𑒢𑒼𑒏𑒩𑒏 𑒖𑒩𑒴𑒩𑒲 𑒁𑒕𑒱। 𑒋𑒏𑒩𑒰 𑒩𑒰𑒐𑒱 𑒪𑒱𑒁। 𑒑𑒜𑓃𑒣𑒱𑓀𑒑𑒪 𑒩𑒰𑒖𑒰𑒏𑒹𑒿 𑒋𑒏 𑒮𑒋 𑒢𑒼𑒏𑒩 𑒩𑒯𑒋 𑒂 𑒍𑒏𑒩𑒰 𑒋𑒏𑒙𑒰 𑒂𑒩 𑒢𑒼𑒏𑒩𑒏 𑒂𑒫𑒬𑓂𑒨𑒏𑒞𑒰 𑒩𑒯𑒋 𑒏𑒰𑒩𑒝 𑒍𑒏𑒩𑒰 𑒪𑒑 𑓑𑓐𑓑 𑒙𑒰 𑒒𑒼𑒛𑓃𑒰 𑒩𑒯𑒋। 𑒍 𑒩𑒰𑒖𑒰𑒏 𑒋𑒯𑒱𑒚𑒰𑒧 𑒩𑒯𑒱 𑒑𑒹𑒪 𑒂 𑒮𑒦 𑒠𑒱𑒢 𑒒𑒼𑒛𑓃𑒰𑒏 𑒒𑒰𑒮 𑒪𑒹𑒪 𑒖𑒰𑒋 𑒪𑒰𑒑𑒪 𑒂 𑒒𑒰𑒮 𑒕𑒲𑒪𑒱 𑒏𑒋 𑒂𑒢𑒋 𑒪𑒰𑒑𑒪। 𑒑𑒜𑓃𑒢𑒰𑒩𑒱𑒨𑒪𑒏 𑒩𑒰𑒖𑒰 𑒠𑒏𑓂𑒭𑒏 𑒮𑓂𑒞𑓂𑒩𑒲 𑒑𑒩𑓂𑒦𑒫𑒞𑒲 𑒩𑒯𑒋 𑒂 𑒑𑒜𑓃𑒣𑒱𑓀𑒑𑒪𑒏 𑒩𑒰𑒖𑒰𑒏 𑒮𑓂𑒞𑓂𑒩𑒲 𑒮𑒹𑒯𑒼 𑒑𑒩𑓂𑒦𑒫𑒞𑒲 𑒩𑒯𑒋। 𑒂 𑒮𑓀𑒨𑒼𑒑 𑒋𑒯𑒢 𑒩𑒯𑒪 𑒖𑒹 𑒠𑒳𑒢𑒴 𑒩𑒰𑒖𑒰𑒏 𑒮𑓂𑒞𑓂𑒩𑒲 𑒋𑒏𑓂𑒏𑒹 𑒠𑒱𑒢 𑒖𑒢𑓂𑒧 𑒠𑒻𑒞 𑒁𑒕𑒱। 𑒣𑒱𑓀𑒑𑒪𑒏 𑒩𑒰𑒖𑒰 𑒥𑓂𑒩𑒰𑒯𑓂𑒧𑒝 𑒥𑒖𑒰 𑒏𑒋 𑒖𑓂𑒨𑒼𑒞𑒱𑒭 𑒠𑒹𑒐𑒹𑒪𑒏 𑒂 𑒩𑒰𑒖𑒰 𑒁𑒣𑒢 𑒣𑒳𑒞𑓂𑒩𑒲𑒏 𑒢𑒰𑒧 𑒩𑒰𑒐𑒪𑒏 𑒂 𑒏𑒯𑒪𑒏 𑒖𑒹 𑒋𑒏𑒩 𑒢𑒰𑒧 𑒧𑒛𑒳𑒫𑒢 𑒏𑒱𑒋𑒏 𑒁𑒕𑒱। 𑒥𑓂𑒩𑒰𑒯𑓂𑒧𑒝 𑒏𑒯𑒪𑒏 𑒖𑒹 𑒋𑒏𑒩 𑒥𑒱𑒨𑒰𑒯 𑒕𑒚𑒲 𑒩𑒰𑒞𑒱𑒏𑒹𑒿 𑒯𑒼𑒋𑒞। 𑒩𑒰𑒖𑒰 𑒍𑒯𑒲 𑒠𑒱𑒢𑒮𑒿 𑒁𑒣𑒢 𑒩𑒰𑒖𑓂𑒨𑒧𑒹 𑒞𑒰𑒏𑒻𑒞-𑒞𑒰𑒏𑒻𑒞 𑒟𑒰𑒏𑒱 𑒑𑒹𑒪𑒟𑒱 𑒧𑒳𑒠𑒰 𑒯𑒳𑒢𑒏𑒰 𑒍 𑒢𑒯𑒱 𑒦𑒹𑒙𑒪। 𑒩𑒰𑒖𑒰𑒏 𑒐𑒥𑒰𑒮𑒱𑒢𑒲 𑒏𑒯𑒪𑒏 𑒖𑒹 𑒁𑒯𑒰𑒿 𑒮𑒦 𑒔𑒱𑒢𑓂𑒞𑒰 𑒏𑒱𑒋𑒏 𑒏𑒩𑒻𑒞 𑒕𑒲। 𑒩𑒰𑒖𑒰 𑒮𑒰𑒯𑒥 𑒣𑒕𑒱𑒪𑒰 𑒥𑒹𑒩 𑒖𑒹 𑒢𑒼𑒏𑒩 𑒩𑒐𑒢𑒹 𑒕𑒟𑒱 𑒯𑒳𑒢𑒏𑒰 𑒋𑒯𑒱𑒚𑒰𑒧 𑒋𑒏𑒙𑒰 𑒪𑒛𑓃𑒏𑒰 𑒖𑒢𑓂𑒧 𑒪𑒹𑒢𑒹 𑒁𑒕𑒱। 𑒍𑒏𑒩𑒹 𑒮𑓀𑒑 𑒥𑒱𑒨𑒰𑒯 𑒏𑒩𑒰 𑒠𑒹𑒪 𑒖𑒰𑒋। 𑒍𑒯𑒱 𑒥𑒔𑓂𑒔𑒰𑒏 𑒢𑒰𑒧 𑒩𑒰𑒬𑒱𑒏 𑒁𑒢𑒳𑒮𑒰𑒩 𑒩𑒰𑒖𑒰 𑒜𑒼𑒪𑒢 𑒩𑒰𑒐𑒪 𑒑𑒹𑒪 𑒕𑒪। 𑒑𑒜𑓃𑒣𑒱𑓀𑒑𑒪𑒏 𑒩𑒰𑒖𑒰 𑒮𑒼𑒔𑒪𑒏 𑒖𑒹 𑒄 𑒥𑒛𑓂𑒛 𑒢𑒲𑒏 𑒑𑒣 𑒁𑒕𑒱, 𑒖𑒐𑒢 𑒄 𑒪𑒑𑒹𑒧𑒹 𑒁𑒕𑒱 𑒞𑒿 𑒍𑒏𑒩𑒹 𑒮𑓀𑒑 𑒥𑒱𑒨𑒰𑒯 𑒏𑒩𑒰 𑒠𑒹𑒪 𑒖𑒰𑒋। 𑒠𑒱𑒢 𑒞𑒿 𑒞𑒰𑒏𑒪𑒹 𑒩𑒯𑒋 𑒮𑒹 𑒍𑒯𑒲 𑒕𑒚𑒱𑒏 𑒩𑒰𑒞𑒱𑒧𑒹 𑒥𑒱𑒨𑒰𑒯 𑒦𑒋 𑒑𑒹𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒩𑒰𑒖𑒰 𑒠𑒏𑓂𑒭 𑒏𑒯𑒪𑒏 𑒖𑒹 𑒂𑒥 𑒋𑒞𑒋 𑒩𑒯𑒥𑒰𑒏 𑒨𑒼𑒑𑓂𑒨 𑒢𑒯𑒱 𑒁𑒕𑒱। 𑒂𑒥 𑒁𑒣𑒢 𑒠𑒹𑒬 𑒖𑒋𑒥𑒰𑒏 𑒔𑒰𑒯𑒲।
𑒩𑒰𑒖𑒰 𑒖𑒰𑒯𑒱 𑒮𑒰𑒜𑓃𑒲𑒢𑒣𑒩 𑒔𑒜𑓃𑒱 𑒏𑒋 𑒂𑒋𑒪 𑒩𑒯𑒟𑒱 𑒍𑒯𑒱 𑒮𑒰𑒜𑓃𑒲𑒢𑒏𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒮𑒰𑒜𑓃𑒱𑒢 𑒂𑒥 𑒁𑒣𑒢 𑒠𑒹𑒬 𑒔𑒪𑒴। 𑒂𑒥 𑒮𑒰𑒜𑓃𑒲𑒣𑒩 𑒔𑒜𑓃𑒱 𑒏𑒋 𑒩𑒰𑒖𑒰-𑒩𑒰𑒢𑒲 𑒥𑒱𑒠𑒰 𑒦𑒹𑒪𑒰𑒯। 𑒏𑒱𑒕𑒳 𑒠𑒴𑒩 𑒩𑒮𑓂𑒞𑒰𑒧𑒹 𑒑𑒹𑒪𑒰𑒯 𑒞𑒿 𑒋𑒏𑒙𑒰 𑒥𑒼𑒢 𑒦𑒹𑒙𑒪𑒢𑓂𑒯𑒱। 𑒍𑒯𑒱 𑒥𑒼𑒢𑒧𑒹 𑒩𑒮𑓂𑒞𑒰𑒏 𑒏𑒰𑒞𑒧𑒹 𑒋𑒏𑒙𑒰 𑒣𑒼𑒐𑒩𑒱 𑒩𑒯𑒋। 𑒍𑒯𑒲 𑒣𑒼𑒐𑒩𑒱𑒏 𑒧𑒯𑒰𑒩𑒣𑒩 𑒠𑒴 𑒙𑒰 𑒥𑒰𑒒-𑒥𑒰𑒒𑒱𑒢 𑒩𑒯𑒻𑒞 𑒕𑒪। 𑒩𑒰𑒖𑒰 𑒮𑒼𑒔𑒪𑒏 𑒖𑒹 𑒯𑒧𑒩 𑒮𑒦𑒏 𑒥𑒔𑓂𑒔𑒰 𑒖𑒐𑒢 𑒋𑒯𑒱 𑒩𑒮𑓂𑒞𑒰𑒮𑒿 𑒁𑒣𑒢 𑒮𑒰𑒮𑒳𑒩 𑒖𑒋𑒞𑒰𑒯, 𑒞𑒐𑒢 𑒄 𑒥𑒰𑒒 𑒯𑒧𑒩 𑒥𑒔𑓂𑒔𑒰 𑒮𑒦𑒏𑒹𑒿 𑒐𑒰 𑒖𑒰𑒋𑒞। 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒏𑒩𑒰 𑒧𑒰𑒩𑒱 𑒠𑒹𑒢𑒰𑒃 𑒚𑒲𑒏 𑒯𑒼𑒋𑒞। 𑒩𑒰𑒖𑒰 𑒥𑒰𑒒𑒏𑒹𑒿 𑒧𑒰𑒩𑒱 𑒠𑒹𑒪𑒏 𑒂 𑒂𑒑𑒰𑒿 𑒔𑒪𑒪 𑒞𑒿 𑒥𑒰𑒒𑒱𑒢 𑒏𑒯𑒪𑒏 𑒖𑒹 𑒩𑒰𑒖𑒰 𑒞𑒴𑒿 𑒯𑒧𑒩𑒰 𑒖𑒹𑒢𑒰 𑒩𑒰𑒿𑒛𑓃 𑒏𑒋 𑒖𑒰 𑒩𑒯𑒪 𑒕𑒯, 𑒍𑒯𑒱𑒢𑒰 𑒞𑒼𑒯𑒩 𑒥𑒹𑒙𑒰 𑒖𑒐𑒢 𑒁𑒣𑒢 𑒮𑒰𑒮𑒳𑒩 𑒖𑒹𑒞𑒯 𑒞𑒿 𑒑𑒜𑓃𑒣𑒲𑒣𑒪𑒲 𑒩𑒰𑒖𑒧𑒹 𑒍𑒏𑒩 𑒏𑒢𑒱𑒨𑒰𑒿𑒏𑒹𑒿 𑒯𑒧𑒯𑒴 𑒩𑒰𑒿𑒛𑓃 𑒏𑒋 𑒠𑒹𑒥𑒻𑒏।
𑒥𑒰𑒒𑒱𑒢𑒏 𑒄 𑒁𑒥𑒰𑒖 𑒧𑒰𑒞𑓂𑒩 𑒩𑒰𑒖𑒰 𑒮𑒳𑒢𑒪𑒏। 𑒩𑒰𑒖𑒰 𑒁𑒣𑒢 𑒒𑒩 𑒣𑒯𑒳𑒿𑒔𑒱 𑒏𑒋 𑒄 𑒑𑒣 𑒏𑒏𑒩𑒼 𑒢𑒯𑒱 𑒏𑒯𑒪𑒏। 𑒍 𑒁𑒣𑒢 𑒮𑒰𑒜𑓃𑒱𑒢𑒏𑒹𑒿 𑒋𑒏𑒙𑒰 𑒣𑒻𑒒 𑒐𑒡𑒰𑒃 𑒐𑒴𑒢𑒱 𑒏𑒋 𑒍𑒯𑒱𑒧𑒹 𑒡𑓄 𑒠𑒹𑒪𑒏 𑒏𑒰𑒩𑒝 𑒥𑒰𑒯𑒩 𑒩𑒯𑒪𑒰𑒮𑒿 𑒍 𑒄 𑒑𑒣 𑒍𑒏𑒩 𑒥𑒔𑓂𑒔𑒰𑒏𑒹𑒿 𑒮𑒳𑒢𑒰 𑒠𑒻𑒞। 𑒍𑒯𑒲 𑒮𑒧𑒨 𑒕𑒼𑒙 𑒥𑒰𑒪𑒏𑒏𑒹𑒿 𑒁𑒣𑒢 𑒤𑒳𑒪𑒫𑒰𑒛𑓃𑒲𑒏 𑒩𑒹𑒐𑒰-𑒣𑒹𑒐𑒰 𑒧𑒰𑒪𑒱𑒢𑒏 𑒮𑓀𑒑 𑒠𑒋 𑒠𑒹𑒪𑒏। 𑒍𑒏𑒩 𑒠𑒳𑒢𑒴 𑒥𑒯𑒱𑒢 𑒍𑒏𑒩𑒰 𑒥𑒛𑓂𑒛 𑒢𑒲𑒏 𑒖𑒹𑒏𑒰𑒿 𑒮𑒹𑒫𑒰 𑒏𑒩𑒋 𑒪𑒑𑒪𑒲𑒯। 𑒋𑒯𑒱𑒢𑒰 𑒏𑒩𑒻𑒞 𑒏𑒱𑒕𑒳 𑒠𑒱𑒢 𑒥𑒲𑒞𑒱 𑒑𑒹𑒪 𑒞𑒿 𑒄 𑒥𑒔𑓂𑒔𑒰 𑒮𑒧𑒩𑓂𑒟 𑒦𑓄 𑒑𑒹𑒪 𑒂 𑒞𑒐𑒢𑒼 𑒍𑒏𑒩𑒰 𑒏𑒱𑒕𑒳 𑒥𑒴𑒗𑒪 𑒢𑒯𑒱 𑒦𑒹𑒪𑒻𑒏। 𑒍𑒧𑓂𑒯𑒩 𑒍 𑒧𑒛𑓃𑒳𑒁𑒢 𑒏𑒢𑓂𑒨𑒰𑒿 𑒮𑒹𑒯𑒼 𑒣𑒻𑒒 𑒦𑓄 𑒑𑒹𑒪𑒱। 𑒏𑒢𑓂𑒨𑒰 𑒨𑒳𑒫𑒰 𑒦𑓄 𑒑𑒹𑒪𑒱 𑒞𑒿 𑒍𑒯𑒱 𑒮𑒐𑒲 𑒮𑒦𑒏 𑒒𑒳𑒧𑒻𑒞 𑒤𑒱𑒩𑒻𑒞 𑒯𑒳𑒢𑒏𑒰 𑒏𑒼𑒢𑒼 𑒮𑓀𑒑𑒲 𑒏𑒯𑒪𑒏 𑒖𑒹 𑒯𑒹 𑒥𑒯𑒱𑒢। 𑒂𑒥 𑒁𑒯𑒰𑒿 𑒮𑒧𑒩𑓂𑒟 𑒦𑓄 𑒑𑒹𑒪𑒯𑒳𑒿। 𑒁𑒯𑒰𑒿𑒏 𑒣𑒱𑒞𑒰𑒖𑒲 𑒁𑒯𑒰𑒿𑒏 𑒥𑒱𑒨𑒰𑒯𑒏 𑒫𑒱𑒭𑒨𑒧𑒹 𑒏𑒱𑒕𑒳 𑒢𑒯𑒱 𑒮𑒼𑒔𑒱 𑒩𑒯𑒪 𑒕𑒟𑒱। 𑒄 𑒥𑒰𑒞 𑒮𑒳𑒢𑒱 𑒏𑒋 𑒏𑒢𑓂𑒨𑒰𑒿 𑒥𑒛𑓃 𑒔𑒱𑒢𑓂𑒞𑒰𑒧𑒹 𑒣𑒛𑓃𑒱 𑒑𑒹𑒪𑒲𑒯। 𑒁𑒣𑒢 𑒧𑒯𑒪𑒧𑒹 𑒖𑒰 𑒏𑒋 𑒍 𑒣𑒪𑓀𑒑𑒣𑒩 𑒣𑒛𑓃𑒱 𑒩𑒯𑒪𑒲𑒯 𑒂 𑒐𑒹𑒢𑒰𑒃 𑒞𑓂𑒨𑒰𑒑𑒱 𑒠𑒹𑒪𑒢𑓂𑒯𑒱। 𑒋𑒯𑒱𑒣𑒩 𑒍𑒏𑒩 𑒧𑒰𑒋 𑒏𑒢𑓂𑒨𑒰 𑒪𑒑 𑒖𑒰𑒋 𑒏𑒯𑒪𑒏, 𑒥𑒹𑒙𑒲 𑒁𑒯𑒰𑒿 𑒐𑒹𑒢𑒰𑒃 𑒏𑒱𑒋𑒏 𑒢𑒯𑒱 𑒐𑒰𑒃𑒞 𑒕𑒲 ?
𑒏𑒢𑓂𑒨𑒰𑒿 𑒥𑒰𑒖𑒪𑒱-𑒧𑒰𑒋। 𑒮𑒐𑒲 𑒮𑒦 𑒥𑒛𑓂𑒛 𑒏𑒱𑒔𑒏𑒱𑒔𑒥𑒻𑒞 𑒁𑒕𑒱। 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒧𑒩𑒰 𑒦𑒴𑒐 𑒢𑒯𑒱 𑒪𑒑𑒻𑒞 𑒁𑒕𑒱। 𑒧𑒰𑒋 𑒏𑒯𑒪𑒏- 𑒁𑒯𑒰𑒿𑒏𑒹𑒿 𑒏𑒲 𑒏𑒯𑒱 𑒏𑒱𑒔𑒏𑒱𑒔𑒥𑒻𑒞 𑒕𑒟𑒱?
𑒏𑒢𑓂𑒨𑒰𑒿 𑒥𑒰𑒖𑒪-𑒍 𑒮𑒦 𑒯𑒧𑒩𑒰 𑒏𑒯𑒻𑒞 𑒕𑒟𑒱 𑒖𑒹 𑒁𑒯𑒰𑒿𑒏 𑒣𑒱𑒞𑒰𑒖𑒲𑒏𑒹𑒿 𑒏𑒼𑒢 𑒔𑒲𑒖𑒏 𑒏𑒧𑒲 𑒁𑒕𑒱, 𑒖𑒹 𑒁𑒯𑒰𑒿𑒏 𑒣𑒱𑒞𑒰𑒖𑒲 𑒁𑒯𑒰𑒿𑒏 𑒥𑒱𑒨𑒰𑒯 𑒢𑒯𑒱 𑒏𑒩𑒰 𑒩𑒯𑒪 𑒕𑒟𑒱?
𑒧𑒰𑒋 𑒏𑒯𑒪𑒏- – 𑒥𑒹𑒙𑒲 𑒁𑒯𑒰𑒿𑒏 𑒥𑒱𑒨𑒰𑒯 𑒕𑒚𑒲𑒏 𑒩𑒰𑒞𑒱𑒧𑒹 𑒦𑒋 𑒑𑒹𑒪 𑒁𑒕𑒱। 𑒁𑒯𑒰𑒿𑒏 𑒮𑒰𑒮𑒳𑒩 𑒑𑒜𑓃𑒢𑒰𑒩𑒱𑒨𑒪𑒧𑒹 𑒁𑒕𑒱। 𑒢𑒯𑒱 𑒖𑒰𑒢𑒱 𑒍 𑒏𑒱𑒋𑒏 𑒢𑒯𑒱 𑒁𑒥𑒻𑒞 𑒕𑒟𑒱?
𑒄 𑒮𑒳𑒢𑒱 𑒏𑒢𑓂𑒨𑒰𑒿 𑒏𑒯𑒪𑒏 𑒖𑒹 𑒯𑒧𑒩𑒰 𑒖𑒥𑒳𑒢𑒰𑒏 𑒏𑒰𑒞𑒧𑒹 𑒋𑒏𑒙𑒰 𑒧𑒏𑒰𑒢 𑒥𑒢𑒰 𑒠𑒱𑒁 𑒂 𑒮𑒦 𑒫𑒮𑓂𑒞𑒳𑒏 𑒫𑓂𑒨𑒫𑒮𑓂𑒟𑒰 𑒏𑒋 𑒠𑒱𑒁। 𑒯𑒧 𑒥𑒰𑒩𑒯 𑒥𑒩𑒱𑒐 𑒡𑒩𑒱 𑒮𑒠𑒰𑒫𑓂𑒩𑒞 𑒥𑒰𑒿𑒙𑒥। 𑒋𑒞𑒹𑒏 𑒮𑒳𑒢𑒱 𑒩𑒰𑒖𑒰 𑒍𑒯𑒱𑒢𑒰 𑒏𑒋𑒪𑒏। 𑒧𑒛𑓃𑒳𑒫𑒢 𑒏𑒢𑓂𑒨𑒰𑒿 𑒖𑒥𑒳𑒢𑒰𑒏 𑒏𑒰𑒞𑒧𑒹 𑒮𑒠𑒰𑒫𑓂𑒩𑒞 𑒥𑒿𑒙𑒢𑒰𑒃 𑒬𑒳𑒩𑒴 𑒏𑒋 𑒠𑒹𑒪𑒏।
𑒥𑒢𑒱𑒖𑒰𑒩𑒰 𑒮𑒦 𑒫𑒰𑒝𑒱𑒖𑓂𑒨 𑒏𑒩𑒥𑒰𑒏 𑒪𑒹𑒪 𑒑𑒜𑓃𑒢𑒰𑒩𑒱𑒨𑒪𑒮𑒿 𑒑𑒜𑓃-𑒣𑒱𑒢𑓂𑒑𑒪 𑒖𑒰 𑒩𑒯𑒪 𑒕𑒪𑒰𑒯। 𑒥𑒢𑒱𑒖𑒰𑒩𑒰 𑒮𑒦 𑒖𑒐𑒢 𑒑𑒜𑓃-𑒣𑒱𑒢𑓂𑒑𑒪 𑒣𑒯𑒳𑒿𑒔𑒪𑒰𑒯 𑒞𑒿 𑒖𑒥𑒳𑒢𑒰 𑒡𑒰𑒩𑒏 𑒏𑒰𑒞𑒮𑒿 𑒯𑒼𑒃𑒞 𑒂𑒑𑒰𑒿 𑒥𑒜𑓃𑒱 𑒩𑒯𑒪 𑒕𑒪𑒰𑒯। 𑒖𑒰𑒃𑒞-𑒖𑒰𑒃𑒞 𑒍 𑒮𑒦 𑒍𑒯𑒱𑒚𑒰𑒧 𑒣𑒯𑒳𑒿𑒔𑒪𑒰𑒯 𑒖𑒞𑒋 𑒧𑒛𑓃𑒳𑒫𑒢 𑒏𑒢𑓂𑒨𑒰 𑒮𑒠𑒰𑒫𑓂𑒩𑒞 𑒥𑒰𑒿𑒙𑒱 𑒩𑒯𑒪 𑒕𑒪𑒲𑒯। 𑒍 𑒏𑒢𑓂𑒨𑒰𑒿 𑒣𑒳𑒕𑒪𑒏-𑒁𑒯𑒰𑒿 𑒮𑒦 𑒏𑒞𑒋 𑒖𑒰 𑒩𑒯𑒪 𑒕𑒲 𑒂 𑒏𑒞𑒋𑒮𑒿 𑒂𑒋𑒪 𑒕𑒲। 𑒥𑒢𑒱𑒖𑒰𑒩𑒰 𑒥𑒰𑒖𑒪-𑒯𑒧 𑒮𑒦 𑒑𑒜𑓃𑒢𑒰𑒩𑒱𑒨𑒪𑒮𑒿 𑒂𑒋𑒪 𑒕𑒲 𑒂 𑒑𑒜𑓃𑒣𑒱𑒢𑓂𑒑𑒪𑒧𑒹 𑒯𑒲𑒩𑒰-𑒧𑒼𑒞𑒲𑒏 𑒫𑒰𑒝𑒱𑒖𑓂𑒨 𑒏𑒩𑒻𑒞 𑒕𑒲। 𑒏𑒢𑓂𑒨𑒰𑒿 𑒥𑒰𑒖𑒪-𑒁𑒯𑒰𑒿 𑒫𑒰𑒝𑒱𑒖𑓂𑒨 𑒏𑒋 𑒒𑒳𑒩𑒥 𑒞𑒿 𑒯𑒧𑒩 𑒋𑒏𑒙𑒰 𑒣𑒞𑓂𑒩 𑒪𑒋 𑒖𑒰𑒋𑒥?
𑒥𑒢𑒱𑒖𑒰𑒩𑒰 𑒥𑒰𑒖𑒪-𑒁𑒯𑒰𑒿 𑒣𑒞𑓂𑒩 𑒪𑒱𑒐𑒱 𑒏𑒋 𑒩𑒰𑒐𑒥, 𑒯𑒧 𑒖𑒩𑒴𑒩 𑒪𑒋 𑒖𑒰𑒋𑒥। 𑒥𑒢𑒱𑒖𑒰𑒩𑒰 𑒖𑒐𑒢 𑒒𑒳𑒩𑒪 𑒞𑒿 𑒍 𑒣𑒞𑓂𑒩 𑒪𑒋 𑒔𑒪𑒱 𑒑𑒹𑒪 𑒂 𑒖𑒐𑒢 𑒑𑒜𑓃 𑒢𑒰𑒩𑒱𑒨𑒪 𑒣𑒯𑒳𑒿𑒔𑒪 𑒞𑒿 𑒯𑒩𑒹𑒥𑒰-𑒣𑒩𑒹𑒥𑒰 𑒖𑒹 𑒠𑒳𑒢𑒴 𑒥𑒯𑒱𑒢 𑒕𑒪𑒱-𑒂 𑒥𑒛𑓂𑒛 𑒣𑒻𑒒 𑒖𑒰𑒠𑒴𑒑𑒩𑒢𑒲 𑒕𑒪𑒱- 𑒍 𑒖𑒰𑒠𑒴𑒏 𑒖𑒼𑒩𑒮𑒿 𑒣𑒞𑒰 𑒪𑒑𑒰 𑒏𑒋 𑒩𑒰𑒖𑒰𑒏𑒹𑒿 𑒐𑒥𑒩𑒱 𑒏𑒋𑒪𑒏 𑒂 𑒥𑒢𑒱𑒖𑒰𑒩𑒰𑒮𑒿 𑒍 𑒣𑒞𑓂𑒩 𑒪𑓄 𑒏𑓄 𑒍𑒏𑒩𑒰 𑒂𑒑𑒱𑒧𑒹 𑒖𑒩𑒰 𑒠𑒹𑒪𑒏 𑒂 𑒍𑒯𑒱 𑒩𑒰𑒖𑒰𑒏 𑒥𑒹𑒙𑒰𑒏𑒹𑒿 𑒋𑒏𑒩 𑒣𑒞𑒰 𑒢𑒯𑒱 𑒔𑒪𑒋 𑒠𑒹𑒪𑒏। 𑒏𑒢𑓂𑒨𑒰𑒿𑒏 𑒄 𑒣𑒞𑓂𑒩 𑒧𑒰𑒩𑒪 𑒑𑒹𑒪। 𑒍 𑒥𑒹𑒔𑒰𑒩𑒲 𑒥𑒰𑒙 𑒞𑒏𑒻𑒞 𑒩𑒯𑒪। 𑒏𑒱𑒕𑒳 𑒠𑒱𑒢 𑒥𑒲𑒞𑒪। 𑒍 𑒏𑒢𑓂𑒨𑒰𑒿 𑒋𑒏𑒙𑒰 𑒮𑒳𑒑𑓂𑒑𑒰 𑒣𑒼𑒮𑒢𑒹 𑒕𑒪𑒲𑒯। 𑒍 𑒮𑒳𑒑𑓂𑒑𑒰𑒮𑒿 𑒣𑒳𑒕𑒪𑒏-𑒏𑒲 𑒞𑒴𑒿 𑒯𑒧𑒩 𑒣𑒞𑓂𑒩 𑒪𑒋 𑒖𑒰 𑒮𑒏𑒻𑒞 𑒕𑒯। 𑒮𑒳𑒑𑓂𑒑𑒰 𑒥𑒰𑒖𑒪-𑒯𑒿। 𑒯𑒧 𑒣𑒞𑓂𑒩 𑒩𑒰𑒖𑒰𑒏𑒹𑒿 𑒠𑒋 𑒠𑒹𑒥। 𑒏𑒢𑓂𑒨𑒰𑒿 𑒣𑒞𑓂𑒩 𑒪𑒱𑒐𑒱 𑒏𑒋 𑒮𑒳𑒑𑓂𑒑𑒰𑒏 𑒑𑒩𑒠𑒢𑒱𑒧𑒹 𑒪𑒙𑒏𑒰 𑒠𑒹𑒪𑒏 𑒂 𑒏𑒯𑒪𑒏- 𑒖𑒰𑒆।
𑒮𑒳𑒑𑓂𑒑𑒰 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪। 𑒮𑒳𑒑𑓂𑒑𑒰 𑒂𑒏𑒰𑒮𑒧𑒹 𑒅𑒛𑓃𑒱 𑒥𑒱𑒠𑒰 𑒦𑒹𑒪 𑒂 𑒣𑒯𑒳𑒿𑒔𑒪 𑒑𑒜𑓃𑒢𑒰𑒩𑒱𑒨𑒪 𑒩𑒰𑒖𑓂𑒨 𑒖𑒞𑒋 𑒯𑒩𑒹𑒥𑒰-𑒣𑒩𑒹𑒥𑒰 𑒂 𑒩𑒰𑒖𑒰 𑒜𑒼𑒪𑒢 𑒩𑒯𑒟𑒱। 𑒮𑒳𑒑𑓂𑒑𑒰 𑒅𑒛𑓃𑒱 𑒏𑒋 𑒍𑒏𑒩 𑒏𑒰𑒢𑓂𑒯𑒣𑒩 𑒥𑒻𑒮𑒱 𑒑𑒹𑒪, 𑒚𑒼𑓀𑒚𑒮𑒿 𑒮𑒴𑒞𑒰 𑒏𑒰𑒙𑒱 𑒏𑒋 𑒐𑒮𑒹𑒪𑒏। 𑒍𑒯𑒱 𑒮𑒧𑒨 𑒯𑒩𑒹𑒥𑒰-𑒣𑒩𑒹𑒥𑒰 𑒩𑒰𑒖𑒰 𑒜𑒼𑒪𑒢𑒏 𑒤𑒳𑒪𑒫𑒰𑒩𑒲𑒧𑒹 𑒥𑒻𑒮𑒪 𑒩𑒯𑒋। 𑒚𑓀𑒜𑓃𑒲𑒏 𑒧𑒾𑒮𑒧 𑒕𑒪। 𑒂𑒑𑒱 𑒣𑒖𑒰𑒩𑒱 𑒏𑒋 𑒥𑒻𑒮𑒪 𑒕𑒪। 𑒖𑒐𑒢𑒹 𑒍 𑒣𑒞𑓂𑒩 𑒐𑒮𑒹𑒪𑒏 𑒞𑒐𑒢𑒹 𑒧𑒰𑒪𑒱𑒢 𑒍𑒯𑒱 𑒣𑒞𑓂𑒩𑒏𑒹𑒿 𑒂𑒑𑒱𑒧𑒹 𑒡𑓄 𑒠𑒹𑒪𑒏। 𑒩𑒰𑒖𑒰 𑒜𑒼𑒪𑒢𑒏𑒹𑒿 𑒥𑒛𑓂𑒛 𑒞𑒰𑒧𑒮 𑒅𑒚𑒪𑒻𑒏। 𑒠𑒳𑒢𑒴𑒏𑒹𑒿 𑒠𑒴-𑒠𑒴 𑒔𑒧𑒹𑒙𑒰 𑒧𑒰𑒩𑒪𑒏 𑒂 𑒏𑒯𑒪𑒏 𑒖𑒹 𑒞𑒴𑒿 𑒠𑒳𑒢𑒴 𑒑𑒼𑒙𑒹 𑒋𑒞𑒋𑒮𑒿 𑒔𑒪𑒱 𑒖𑒼। 𑒠𑒳𑒢𑒴 𑒥𑒯𑒱𑒢 𑒣𑒏𑒛𑓃𑒱 𑒏𑒋 𑒍𑒏𑒩𑒰 𑒧𑒢𑒰𑒥𑒋 𑒪𑒰𑒑𑒪। 𑒏𑒢𑓂𑒨𑒰𑒿𑒏 𑒍𑒯𑒼 𑒣𑒞𑓂𑒩 𑒐𑒞𑒧 𑒦𑒋 𑒑𑒹𑒪। 𑒏𑒢𑓂𑒨𑒰𑒿 𑒥𑒯𑒳𑒞 𑒔𑒱𑒢𑓂𑒞𑒰𑒧𑒹 𑒣𑒛𑓃𑒱 𑒑𑒹𑒪। 𑒥𑒯𑒳𑒞 𑒮𑒧𑒨 𑒂𑒩 𑒥𑒲𑒞𑒱 𑒑𑒹𑒪।
𑒋𑒏 𑒠𑒱𑒢 𑒖𑒥𑒳𑒢𑒰𑒏 𑒏𑒱𑒢𑒰𑒩𑒮𑒿 𑒋𑒏𑒙𑒰 𑒧𑒯𑒰𑒞𑓂𑒧𑒰 𑒖𑒼𑒑𑒲 𑒩𑒴𑒣𑒧𑒹 𑒖𑒰 𑒩𑒯𑒪 𑒕𑒪। 𑒏𑒢𑓂𑒨𑒰𑒿𑒏 𑒢𑒖𑒩𑒱 𑒍𑒯𑒱 𑒧𑒯𑒰𑒞𑓂𑒧𑒰𑒣𑒩 𑒣𑒛𑓃𑒱 𑒑𑒹𑒪। 𑒏𑒢𑓂𑒨𑒰𑒿 𑒥𑒛𑓂𑒛 𑒔𑒱𑒢𑓂𑒞𑒱𑒞 𑒦𑒋 𑒏𑒰𑒢𑒱 𑒩𑒯𑒪 𑒕𑒪𑒲𑒯। 𑒍 𑒮𑒰𑒡𑒳 𑒧𑒯𑒰𑒞𑓂𑒧𑒰 𑒏𑒢𑓂𑒨𑒰𑒿𑒏 𑒏𑒢𑒢𑒰𑒃 𑒮𑒳𑒢𑒱 𑒁𑒋𑒪𑒲𑒯 𑒂 𑒏𑒰𑒩𑒝 𑒣𑒳𑒕𑒪𑒏।
𑒏𑒢𑓂𑒨𑒰𑒿 𑒮𑒦𑒙𑒰 𑒯𑒰𑒪 𑒥𑒞𑒹𑒪𑒏 ।
𑒧𑒯𑒰𑒞𑓂𑒧𑒰 𑒏𑒯𑒪𑒏 𑒖𑒹 𑒞𑒴𑒿 𑒋𑒏𑒙𑒰 𑒣𑒞𑓂𑒩 𑒪𑒱𑒐𑒱 𑒏𑒋 𑒯𑒧𑒩𑒰 𑒠𑒹 𑒂 𑒯𑒧 𑒍 𑒣𑒞𑓂𑒩 𑒍𑒞𑒋 𑒣𑒯𑒳𑒿𑒔𑒰𑒋𑒥।
𑒏𑒢𑓂𑒨𑒰𑒿 𑒣𑒞𑓂𑒩 𑒪𑒱𑒐𑒱 𑒏𑒋 𑒧𑒯𑒰𑒞𑓂𑒧𑒰𑒏𑒹𑒿 𑒠𑒹𑒪𑒏। 𑒧𑒯𑒰𑒞𑓂𑒧𑒰 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪।
𑒏𑒢𑓂𑒨𑒰𑒿 𑒧𑒯𑒰𑒞𑓂𑒧𑒰𑒏𑒹𑒿 𑒑𑒰𑒿𑒖𑒰,𑒦𑒰𑒿𑒑 𑒂 𑒯𑒤𑒲𑒧 𑒠𑒹𑒪𑒏। 𑒧𑒯𑒰𑒞𑓂𑒧𑒰 𑒍𑒏𑒩𑒰 𑒐𑒰𑒃𑒞-𑒣𑒱𑒥𑒻𑒞 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒧𑒯𑒰𑒞𑓂𑒧𑒰 𑒑𑒜𑓃𑒢𑒰𑒩𑒱𑒨𑒪 𑒣𑒯𑒳𑒿𑒔𑒪, 𑒖𑒞𑒋 𑒯𑒩𑒹𑒥𑒰-𑒣𑒩𑒹𑒥𑒰 𑒂 𑒩𑒰𑒖𑒰 𑒜𑒼𑒪𑒢 𑒩𑒯𑒋। 𑒍 𑒤𑒳𑒪𑒥𑒰𑒩𑒲𑒏 𑒥𑒲𑒔𑒧𑒹 𑒁𑒣𑒢 𑒛𑒹𑒩𑒰 𑒐𑒮𑒹𑒪𑒏। 𑒩𑒰𑒞𑒳𑒏 𑒧𑒾𑒮𑒧 𑒕𑒪। 𑒦𑒼𑒩 𑒯𑒼𑒃 𑒥𑒪𑒰 𑒕𑒪। 𑒍𑒯𑒲 𑒮𑒧𑒨 𑒧𑒯𑒰𑒞𑓂𑒧𑒰 𑒋𑒏𑒙𑒰 𑒧𑒼𑒯𑒱𑒢𑒲 𑒥𑒰𑒿𑒮𑒳𑒩𑒲 𑒢𑒱𑒏𑒰𑒪𑒪𑒏 𑒂 𑒥𑒖𑒥𑒋 𑒪𑒰𑒑𑒪। 𑒍𑒯𑒱 𑒥𑒰𑒿𑒮𑒳𑒩𑒲𑒏 𑒁𑒥𑒰𑒖 𑒮𑒳𑒢𑒱 𑒩𑒰𑒖𑒰 𑒜𑒼𑒪𑒢 𑒅𑒚𑒪 𑒂 𑒔𑒪𑒥𑒰 𑒪𑒋 𑒞𑒻𑒨𑒰𑒩 𑒦𑒹𑒪 𑒞𑒿 𑒠𑒳𑒢𑒴 𑒥𑒯𑒱𑒢 𑒍𑒯𑒱 𑒥𑒰𑒿𑒮𑒳𑒩𑒲𑒣𑒩 𑒥𑒯𑒳𑒞 𑒩𑒰𑒮 𑒖𑒰𑒠𑒴-𑒑𑒳𑒝 𑒔𑒪𑒹𑒪𑒏। 𑒧𑒳𑒠𑒰 𑒧𑒯𑒰𑒞𑓂𑒧𑒰𑒏 𑒏𑒱𑒕𑒳 𑒢𑒯𑒱 𑒥𑒱𑒑𑒛𑓃𑒪। 𑒩𑒰𑒖𑒰 𑒜𑒼𑒪𑒢 𑒅𑒚𑒪 𑒂 𑒠𑒳𑒢𑒴𑒏𑒹𑒿 𑒠𑒴-𑒠𑒴 𑒪𑒰𑒞 𑒧𑒰𑒩𑒱 𑒧𑒯𑒰𑒞𑓂𑒧𑒰 𑒪𑒑 𑒑𑒹𑒪। 𑒮𑒰𑒡𑒳𑒖𑒲 𑒍𑒯𑒱 𑒣𑒞𑓂𑒩𑒏𑒹𑒿 𑒢𑒱𑒏𑒰𑒪𑒱 𑒏𑓄 𑒩𑒰𑒖𑒰 𑒜𑒼𑒪𑒢𑒏𑒹𑒿 𑒠𑒹𑒪𑒢𑓂𑒯𑒱। 𑒂𑒩 𑒮𑒹 𑒣𑒜𑓃𑒱 𑒩𑒰𑒖𑒰 𑒜𑒼𑒪𑒢 𑒞𑒰𑒧𑒮𑒹 𑒫𑒱𑒐-𑒮𑒥𑒱𑒐 𑒦𑒋 𑒑𑒹𑒪 𑒂 𑒍𑒞𑒋𑒮𑒿 𑒒𑒩 𑒑𑒹𑒪 𑒂 𑒋𑒏𑒙𑒰 𑒞𑒪𑒥𑒰𑒩 𑒪𑒋 𑒣𑒱𑒞𑒰𑒮𑒿 𑒣𑒴𑒕𑒋 𑒪𑒰𑒑𑒪 𑒖𑒹 𑒥𑒞𑒰𑒆 𑒖𑒹 𑒄 𑒯𑒧𑒩 𑒥𑒱𑒨𑒰𑒯 𑒏𑒞𑒋 𑒦𑒹𑒪 𑒁𑒕𑒱 ? 𑒣𑒱𑒞𑒰𑒏𑒹𑒿 𑒍 𑒥𑒰𑒒𑒱𑒢 𑒧𑒼𑒢 𑒣𑒛𑓃𑒱 𑒑𑒹𑒪𑒻𑒏 𑒮𑒹 𑒍 𑒗𑒴𑒚 𑒥𑒰𑒖𑒪 𑒂 𑒏𑒯𑒪𑒏 𑒖𑒹 𑒯𑒧 𑒞𑒼𑒯𑒩 𑒥𑒱𑒨𑒰𑒯 𑒢𑒯𑒱 𑒏𑒩𑒥𑒹𑒢𑒹 𑒕𑒱𑒨𑒯𑒳।
𑒞𑒰𑒧𑒮𑒹 𑒦𑒹𑒩 𑒦𑒋 𑒍 𑒍𑒯𑒱 𑒣𑒞𑓂𑒩𑒏𑒹𑒿 𑒩𑒰𑒖𑒰𑒏 𑒮𑒼𑒗𑒰𑒿 𑒩𑒰𑒐𑒪𑒏। 𑒩𑒰𑒖𑒰 𑒍 𑒣𑒜𑓃𑒱 𑒥𑒛𑓂𑒛 𑒔𑒱𑒢𑓂𑒞𑒰𑒧𑒹 𑒣𑒛𑓃𑒱 𑒑𑒹𑒪।
𑒍 𑒁𑒣𑒢 𑒥𑒹𑒙𑒰𑒏𑒹𑒿 𑒏𑒯𑒪𑒏। 𑒠𑒹𑒐𑒴 𑒥𑒹𑒙𑒰। 𑒁𑒯𑒰𑒿𑒏 𑒥𑒱𑒨𑒰𑒯 𑒯𑒧 𑒕𑒚𑒲𑒏 𑒩𑒰𑒞𑒱 𑒏𑒋𑒢𑒹 𑒕𑒲 𑒂 𑒑𑒾𑒢𑒰 𑒋𑒯𑒱 𑒠𑓂𑒫𑒰𑒩𑒹 𑒢𑒯𑒱 𑒏𑒋𑒪𑒯𑒳𑒿 𑒏𑒰𑒩𑒝 𑒁𑒥𑒻𑒞 𑒏𑒰𑒪 𑒯𑒧 𑒋𑒏𑒙𑒰 𑒥𑒰𑒒𑒏𑒹𑒿 𑒧𑒰𑒩𑒱 𑒠𑒹𑒪𑒯𑒳𑒿। 𑒤𑒹𑒩 𑒍 𑒮𑒦𑒙𑒰 𑒐𑒱𑒮𑓂𑒮𑒰 𑒏𑒯𑒱 𑒮𑒳𑒢𑒹𑒪𑒏 𑒂 𑒏𑒯𑒪𑒏, 𑒖𑒹 𑒍 𑒛𑒩𑒹 𑒍𑒏𑒩 𑒑𑒾𑒢𑒰 𑒢𑒯𑒱 𑒏𑒩𑒹𑒪𑒏।
𑒜𑒼𑒪𑒢 𑒥𑒰𑒖𑒪-𑒯𑒧𑒩 𑒮𑒫𑒰𑒩𑒲 𑒏𑒞𑒋 𑒁𑒕𑒱। 𑒯𑒧𑒩 𑒮𑒫𑒰𑒩𑒲 𑒠𑒱𑒁।
𑒩𑒰𑒖𑒰 𑒏𑒯𑒪𑒏-𑒮𑒰𑒜𑓃𑒢𑒲 𑒞𑒿 𑒞𑒩𑒯𑒰𑒩𑒰𑒏 𑒢𑒲𑒔𑒰𑒿 𑒁𑒕𑒱। 𑒍 𑒖𑒲𑒫𑒱𑒞 𑒁𑒕𑒱 𑒫𑒰 𑒧𑒩𑒱 𑒑𑒹𑒪 𑒮𑒹 𑒢𑒯𑒱 𑒖𑒰𑒢𑒱।
𑒩𑒰𑒖𑒰 𑒜𑒼𑒪𑒢 𑒞𑒩𑒯𑒩𑒰𑒏 𑒢𑒲𑒔𑒰𑒿 𑒮𑒿 𑒮𑒰𑒜𑓃𑒱𑒢𑒏𑒹𑒿 𑒥𑒯𑒰𑒩 𑒏𑒋𑒪𑒏 𑒞𑒿 𑒮𑒰𑒜𑓃𑒱𑒢𑒏 𑒠𑒹𑒯𑒧𑒹 𑒣𑒱𑒪𑓂𑒪𑒴 𑒪𑒰𑒑𑒱 𑒑𑒹𑒪 𑒕𑒪। 𑒍 𑒍𑒏𑒩𑒰 𑒮𑒰𑒤 𑒏𑒋𑒪𑒏 𑒂 𑒍𑒏𑒩𑒰 𑒔𑒢𑒰-𑒔𑒥𑒹𑒢𑒰 𑒐𑒳𑒁𑒋𑒪𑒏। 𑒐𑒳𑒂𑒥𑒻𑒞-𑒐𑒳𑒂𑒥𑒻𑒞 𑒍 𑒣𑒯𑒱𑒢𑒹 𑒖𑒹𑒏𑒰𑒿 𑒞𑒢𑓂𑒠𑒩𑒳𑒮𑓂𑒞 𑒦𑒋 𑒑𑒹𑒪।
𑒩𑒰𑒖𑒰 𑒜𑒼𑒪𑒢 𑒥𑒰𑒖𑒪-𑒮𑒰𑒜𑓃𑒱𑒢, 𑒞𑒼𑒯𑒩 𑒣𑒻𑒩 𑒥𑒯𑒳𑒞 𑒠𑒱𑒢𑒮𑒿 𑒥𑒰𑒢𑓂𑒯𑒪 𑒕𑒯। 𑒞𑒴𑒿 𑒔𑒾𑒠𑒯 𑒏𑒼𑒮𑒏 𑒩𑒮𑓂𑒞𑒰𑒏𑒹𑒿 𑒋𑒏 𑒠𑒱𑒢𑒧𑒹 𑒔𑒰𑒩𑒱 𑒔𑒾𑒐𑒛𑓃 𑒪𑒑𑒰 𑒠𑒱𑒁 𑒞𑒿 𑒯𑒧 𑒥𑒳𑒗𑒥। 𑒯𑒧 𑒮𑒦 𑒤𑒹𑒩𑒮𑒿 𑒑𑒜𑓃𑒣𑒱𑓀𑒑𑒪 𑒣𑒯𑒳𑒿𑒔𑒥। 𑒮𑒰𑒜𑓃𑒱𑒢 𑒁𑒣𑒢 𑒔𑒰𑒪𑒱 𑒋𑒏 𑒠𑒱𑒢𑒧𑒹 𑒥𑒢𑒰 𑒪𑒹𑒪𑒏। 𑒩𑒰𑒖𑒰 𑒜𑒼𑒪𑒢 𑒁𑒣𑒢 𑒮𑒰𑒮𑒳𑒩 𑒥𑒱𑒠𑒰 𑒦𑒹𑒪। 𑒮𑒰𑒜𑓃𑒱𑒢𑒣𑒩 𑒮𑓂𑒫𑒰𑒩 𑒦𑒋 𑒁𑒣𑒢 𑒏𑒰𑒢𑓂𑒯𑒣𑒩 𑒥𑒢𑓂𑒠𑒴𑒏 𑒪𑒹𑒪𑒏 𑒂 𑒥𑒱𑒠𑒰 𑒦𑒹𑒪। 𑒔𑒪𑒻𑒞-𑒔𑒪𑒻𑒞 𑒍 𑒍𑒯𑒲 𑒥𑒼𑒢𑒧𑒹 𑒣𑒯𑒳𑒿𑒔𑒪। 𑒍𑒯𑒲 𑒩𑒮𑓂𑒞𑒰𑒮𑒿 𑒍 𑒮𑒦 𑒖𑒰 𑒩𑒯𑒪 𑒕𑒪, 𑒖𑒞𑒋 𑒍 𑒥𑒰𑒒𑒱𑒢 𑒩𑒯𑒻𑒞 𑒕𑒪𑒲𑒯। 𑒥𑒰𑒒𑒱𑒢𑒏𑒹𑒿 𑒩𑒰𑒖𑒰 𑒜𑒼𑒪𑒢 𑒠𑒹𑒐𑒪𑒏 𑒂 𑒍𑒯𑒱 𑒥𑒰𑒒𑒱𑒢𑒏𑒹𑒿 𑒧𑒰𑒩𑒱 𑒠𑒹𑒪𑒏। 𑒤𑒹𑒩 𑒍 𑒁𑒣𑒢 𑒮𑒰𑒮𑒳𑒩 𑒑𑒜𑓃𑒣𑒲𑒣𑒪𑒲 𑒑𑒹𑒪 𑒂 𑒤𑒴𑒪 𑒥𑒑𑒰𑒢𑒧𑒹 𑒛𑒹𑒩𑒰 𑒐𑒮𑒹𑒪𑒏। 𑒮𑒰𑒜𑓃𑒢𑒲𑒏𑒹𑒿 𑒍 𑒍𑒞𑒯𑒱 𑒕𑒼𑒛𑓃𑒱 𑒤𑒴𑒪-𑒥𑒑𑒰𑒢𑒏𑒹𑒿 𑒞𑒼𑒛𑓃𑒱-𑒞𑒰𑒩𑒱 𑒏𑒋 𑒞𑒯𑒮-𑒢𑒯𑒮 𑒏𑒋 𑒠𑒹𑒪𑒏। 𑒧𑒰𑒪𑒱𑒢 𑒏𑒯𑒪𑒏 𑒖𑒹 𑒞𑒼𑒩𑒰 𑒩𑒰𑒖𑒰𑒮𑒿 𑒣𑒱𑒙𑒰𑒢 𑒣𑒱𑒙𑒥𑒹𑒥𑒅 𑒂 𑒖𑒞𑒹𑒏 𑒞𑒼𑒿 𑒥𑒩𑒥𑒰𑒠𑒲 𑒏𑒋𑒢𑒹 𑒕𑒿𑒯 𑒞𑒏𑒩 𑒯𑒩𑒖𑒰𑒢𑒰 𑒪𑒹𑒥𑒅। 𑒩𑒰𑒖𑒰 𑒜𑒼𑒪𑒢 𑒥𑒰𑒖𑒪- 𑒖𑒼 𑒞𑒼𑒩𑒰 𑒖𑒹 𑒏𑒩𑒥𑒰𑒏 𑒕𑒾𑒏 𑒏𑒩।
𑒧𑒰𑒪𑒱𑒢 𑒞𑒰𑒧𑒮𑒹 𑒥𑒱𑒠𑒰 𑒦𑒹𑒪𑒱 𑒂 𑒩𑒰𑒖𑒰 𑒪𑒑 𑒑𑒹𑒪𑒱। 𑒩𑒰𑒖𑒰𑒮𑒿 𑒏𑒯𑒪𑒏।
𑒩𑒰𑒖𑒰 𑒣𑒳𑒕𑒪𑒏 𑒖𑒹 𑒍 𑒏𑒞𑒳𑒏𑓂𑒏𑒰 𑒁𑒕𑒱।
𑒧𑒰𑒪𑒱𑒢 𑒏𑒯𑒪𑒏 𑒖𑒹 𑒍 𑒁𑒣𑒢 𑒒𑒩 𑒑𑒜𑓃𑒢𑒰𑒩𑒱𑒨𑒪𑒏 𑒥𑒞𑒹𑒪𑒏 𑒁𑒕𑒱।
𑒩𑒰𑒖𑒰 𑒁𑒣𑒢 𑒮𑒱𑒣𑒰𑒯𑒲 𑒮𑒦𑒏𑒹𑒿 𑒣𑒚𑒹𑒪𑒏। 𑒍 𑒮𑒦 𑒜𑒼𑒪𑒢𑒏𑒹𑒿 𑒣𑒳𑒕𑒪𑒏-𑒁𑒯𑒰𑒿 𑒏𑒞𑒳𑒏𑓂𑒏𑒰 𑒕𑒲 𑒂 𑒏𑒞𑒋𑒮𑒿 𑒂𑒋𑒪 𑒕𑒲।
𑒜𑒼𑒪𑒢 𑒥𑒰𑒖𑒪- 𑒯𑒧𑒩 𑒒𑒩 𑒑𑒜𑓃 𑒢𑒰𑒩𑒱𑒨𑒪 𑒁𑒕𑒱 𑒂 𑒯𑒧 𑒁𑒣𑒢 𑒮𑒰𑒮𑒳𑒩 𑒑𑒜𑓃𑒣𑒱𑓀𑒑𑒪- 𑒍𑒞𑒯𑒱𑒮𑒿 𑒂𑒋𑒪 𑒕𑒲।
𑒮𑒱𑒣𑒰𑒯𑒲 𑒮𑒦 𑒄 𑒑𑒣 𑒩𑒰𑒖𑒰𑒏𑒹𑒿 𑒖𑒰 𑒏𑒋 𑒏𑒯𑒪𑒏।
𑒩𑒰𑒖𑒰 𑒣𑓂𑒩𑒮𑒢𑓂𑒢𑒞𑒰𑒮𑒿 𑒮𑓂𑒫𑒰𑒑𑒞 𑒏𑒋 𑒛𑒼𑒪𑒲𑒧𑒹 𑒥𑒻𑒮𑒰 𑒏𑒋 𑒜𑒼𑒪𑒢𑒏𑒹𑒿 𑒁𑒣𑒢𑒰 𑒒𑒩 𑒁𑒢𑒪𑒏। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒩𑒰𑒖𑒰 𑒁𑒣𑒢 𑒥𑒹𑒙𑒲-𑒖𑒧𑒰𑒋𑒏𑒹𑒿 𑒑𑒜𑓃-𑒣𑒱𑓀𑒑𑒪𑒮𑒿 𑒑𑒜𑓃 𑒢𑒰𑒩𑒱𑒨𑒪𑒏 𑒪𑒹𑒪 𑒥𑒱𑒠𑒰 𑒏𑒹𑒪𑒏। 𑒍𑒞𑒋 𑒮𑒿 𑒩𑒰𑒖𑒰 𑒜𑒼𑒪𑒢 𑒂 𑒍 𑒧𑒛𑓃𑒳𑒫𑒢 𑒏𑒢𑓂𑒨𑒰𑒿 𑒁𑒣𑒢 𑒒𑒩 𑒑𑒹𑒪 𑒂 𑒁𑒣𑒢 𑒩𑒰𑒖𑓂𑒨 𑒏𑒩𑒋 𑒪𑒰𑒑𑒪।

𑒥𑒑𑒱𑒨𑒰𑒏 𑒑𑒰𑒕
𑒋𑒏𑒙𑒰 𑒧𑒮𑒼𑒧𑒰𑒞 𑒕𑒪𑒲𑒯 𑒂 𑒯𑒳𑒢𑒏𑒰 𑒋𑒏𑒹𑒙𑒰 𑒥𑒹𑒙𑒰 𑒕𑒪𑒢𑓂𑒯𑒱। 𑒍 𑒕𑒪 𑒥𑒛𑓂𑒛 𑒔𑒳𑒮𑓂𑒞-𑒔𑒪𑒰𑒏।
𑒋𑒏 𑒠𑒱𑒢𑒳𑒏𑒰 𑒑𑒣 𑒁𑒕𑒱। 𑒍 𑒮𑓂𑒞𑓂𑒩𑒲 𑒖𑒹 𑒕𑒪𑒲𑒯, 𑒁𑒣𑒢𑒰 𑒥𑒹𑒙𑒰𑒏𑒹𑒿 𑒥𑒑𑒱𑒨𑒰 𑒥𑒢𑒰 𑒏𑒋 𑒠𑒹𑒪𑒐𑒱𑒢𑓂𑒯। 𑒍𑒯𑒱 𑒥𑒰𑒪𑒏𑒏𑒹𑒿 𑒥𑒑𑒱𑒨𑒰 𑒥𑒛𑓂𑒛 𑒢𑒲𑒏 𑒪𑒑𑒻𑒞 𑒕𑒪𑒻𑒏। 𑒮𑒹 𑒍 𑒋𑒯𑒱 𑒥𑒹𑒩 𑒋𑒏𑒙𑒰 𑒥𑒑𑒱𑒨𑒰 𑒥𑒰𑒛𑓃𑒲𑒧𑒹 𑒩𑒼𑒣𑒱 𑒠𑒹𑒪𑒏। 𑒍𑒞𑒋 𑒑𑒰𑒕 𑒖𑒢𑒧𑒱 𑒑𑒹𑒪। 𑒥𑒑𑒱𑒨𑒰𑒏 𑒑𑒰𑒕, 𑒢𑒘𑒱 𑒠𑒹𑒐𑒪 𑒢𑒹 𑒮𑒳𑒢𑒪।
𑒧𑒰𑒋-𑒥𑒹𑒙𑒰 𑒍𑒯𑒱 𑒥𑒑𑒱𑒨𑒰𑒏 𑒑𑒰𑒕𑒏 𑒐𑒴𑒥 𑒮𑒹𑒫𑒰 𑒏𑒩𑒋 𑒪𑒑𑒪𑒰𑒯। 𑒏𑒢𑒹𑒏 𑒠𑒱𑒢𑒧𑒹 𑒍𑒯𑒱 𑒑𑒰𑒕𑒧𑒹 𑒐𑒴𑒥 𑒥𑒑𑒱𑒨𑒰 𑒤𑒛𑓃𑒨 𑒪𑒰𑒑𑒪। 𑒍 𑒥𑒔𑓂𑒔𑒰 𑒑𑒰𑒕 𑒣𑒩 𑒔𑒜𑓃𑒱 𑒏𑒋 𑒥𑒑𑒱𑒨𑒰 𑒞𑒼𑒛𑓃𑒱 𑒏𑒋 𑒐𑒰𑒃𑒞 𑒩𑒯𑒻𑒞 𑒕𑒪।
𑒋𑒏 𑒠𑒱𑒢𑒳𑒏𑒰 𑒑𑒣 𑒁𑒕𑒱। 𑒋𑒏𑒙𑒰 𑒛𑒰𑒃𑒢 𑒥𑒳𑒜𑓃𑒱𑒨𑒰 𑒩𑒮𑓂𑒞𑒰𑒮𑒿 𑒖𑒰 𑒩𑒯𑒪 𑒕𑒪𑒱। 𑒍𑒏𑒩𑒰 𑒧𑒢𑒳𑒏𑓂𑒐𑒏 𑒧𑒮𑒳𑒂𑒃 𑒥𑒢𑒰 𑒏𑒋 𑒐𑒰𑒨𑒧𑒹 𑒥𑒛𑓂𑒛 𑒢𑒲𑒏 𑒪𑒑𑒻𑒞 𑒩𑒯𑒻𑒏। 𑒍 𑒖𑒹 𑒍𑒯𑒱 𑒥𑒔𑓂𑒔𑒰𑒏𑒹𑒿 𑒑𑒰𑒕 𑒣𑒩 𑒔𑒜𑓃𑒪 𑒠𑒹𑒐𑒪𑒏 𑒞𑒿 𑒍𑒏𑒩 𑒧𑒼𑒢 𑒪𑒳𑒮𑒤𑒳𑒮 𑒏𑒩𑒋 𑒪𑒑𑒪𑒻𑒏। 𑒂𑒥 𑒍 𑒥𑒳𑒜𑓃𑒱𑒨𑒰 𑒧𑒼𑒢𑒮𑒴𑒥𑒰 𑒥𑒢𑒥𑒋 𑒪𑒰𑒑𑒪 𑒖𑒹 𑒏𑒼𑒢𑒰 𑒏𑒋 𑒍𑒯𑒱 𑒥𑒔𑓂𑒔𑒰𑒏𑒹𑒿 𑒤𑒳𑒮𑒱𑒨𑒰𑒥𑒲 𑒂 𑒋𑒏𑒩𑒰 𑒒𑒩 𑒪𑓄 𑒖𑒰 𑒏𑒋 𑒍𑒏𑒩 𑒧𑒮𑒳𑒂𑒃 𑒥𑒢𑒰 𑒏𑒋 𑒐𑒰𑒃।
𑒥𑒔𑓂𑒔𑒰𑒏𑒹𑒿 𑒁𑒮𑒑𑒩 𑒠𑒹𑒐𑒱 𑒍 𑒪𑒑 𑒑𑒹𑒪𑒱 𑒂 𑒥𑒔𑓂𑒔𑒰𑒏𑒹𑒿 𑒏𑒯𑒪𑒏-
“𑒥𑒾𑒂 𑒋𑒏𑒙𑒰 𑒥𑒑𑒱𑒨𑒰 𑒯𑒧𑒩𑒰 𑒢𑒯𑒱 𑒠𑒹𑒥? 𑒥𑒛𑓂𑒛 𑒦𑒴𑒐 𑒪𑒰𑒑𑒪 𑒁𑒕𑒱।
𑒥𑒔𑓂𑒔𑒰 𑒍𑒏𑒩 𑒯𑒰𑒟 𑒣𑒩 𑒥𑒑𑒱𑒨𑒰 𑒠𑒹𑒥𑒨 𑒪𑒰𑒑𑒪।
“𑒥𑒾𑒂 𑒯𑒧 𑒯𑒰𑒟𑒮𑒿 𑒏𑒼𑒢𑒰 𑒪𑒹𑒥 𑒥𑒑𑒱𑒨𑒰 𑒯𑒟𑒰𑒃𑒢 𑒦𑓄 𑒖𑒰𑒋𑒞”।
𑒥𑒔𑓂𑒔𑒰 𑒥𑒑𑒱𑒨𑒰 𑒍𑒏𑒩 𑒧𑒰𑒟 𑒣𑒩 𑒩𑒰𑒐𑒋 𑒪𑒰𑒑𑒪।
“𑒯𑒿 𑒯𑒿 𑒧𑒰𑒟 𑒣𑒩 𑒢𑒯𑒱 𑒩𑒰𑒐𑒴। 𑒧𑒟𑒰𑒃𑒢 𑒦𑓄 𑒖𑒰𑒋𑒞”।
𑒥𑒔𑓂𑒔𑒼 𑒕𑒪 𑒠𑒮 𑒥𑒳𑒡𑒱𑒨𑒰𑒩𑒏 𑒋𑒏 𑒥𑒳𑒡𑒱𑒨𑒰𑒩। 𑒐𑒼𑒃𑒕𑒧𑒹 𑒥𑒑𑒱𑒨𑒰 𑒠𑒹𑒥𑒋 𑒪𑒰𑒑𑒪।
“𑒄 𑒏𑒲 𑒏𑒩𑒻𑒞 𑒕𑒲 𑒥𑒾𑒂। 𑒥𑒑𑒱𑒨𑒰 𑒐𑒼𑒿𑒕𑒰𑒃𑒢 𑒦𑓄 𑒖𑒰𑒋𑒞, 𑒁𑒯𑒰𑒿 𑒗𑒳𑒏𑒱 𑒏𑒋 𑒥𑒼𑒩𑒰𑒧𑒹 𑒠𑒋 𑒠𑒱𑒁”।
𑒧𑒳𑒠𑒰 𑒥𑒔𑓂𑒔𑒰 𑒞𑒿 𑒕𑒪 𑒥𑒳𑒗𑒴 𑒖𑒹 𑒑𑒼𑒢𑒴 𑒗𑒰𑒏 𑒧𑒴𑒪-𑒑𑒼𑒞𑓂𑒩𑒹𑒏।
𑒥𑒰𑒖𑒪-
“𑒢𑒘𑒱 𑒑𑒋 𑒥𑒳𑒜𑓃𑒱𑒨𑒰। 𑒞𑒼𑒿 𑒯𑒧𑒩𑒰 𑒥𑒼𑒩𑒰𑒧𑒹 𑒥𑒢𑓂𑒠 𑒏𑒋 𑒦𑒰𑒑𑒱 𑒖𑒹𑒧𑒯। 𑒧𑒰𑒋 𑒯𑒧𑒩𑒰 𑒚𑒑 𑒮𑒦𑒮𑒿 𑒮𑒯𑒔𑒹𑒞 𑒩𑒯𑒥𑒰𑒏 𑒯𑒹𑒞𑒳 𑒏𑒯𑒢𑒹 𑒁𑒕𑒱”।
𑒧𑒳𑒠𑒰 𑒥𑒳𑒜𑓃𑒱𑒨𑒼 𑒕𑒪 𑒚𑒑𑒱𑒢 𑒥𑒳𑒜𑓃𑒱𑒨𑒰। 𑒚𑒏𑒱 𑒤𑒱𑒮𑒱𑒨𑒰 𑒏𑒋 𑒥𑒼𑒪𑒲-𑒥𑒰𑒢𑒲 𑒠𑒋 𑒏𑒋 𑒍𑒏𑒩𑒰 𑒧𑒢𑒰 𑒪𑒹𑒪𑒏। 𑒖𑒐𑒢𑒹 𑒥𑒔𑓂𑒔𑒰 𑒗𑒳𑒏𑒪 𑒍 𑒍𑒏𑒩𑒰 𑒥𑒼𑒩𑒰𑒧𑒹 𑒏𑒮𑒱 𑒏𑒋 𑒥𑒱𑒠𑒰 𑒦𑒹𑒪𑒱। 𑒥𑒳𑒜𑓃𑒱𑒨𑒰 𑒩𑒮𑓂𑒞𑒰𑒧𑒹 𑒟𑒰𑒏𑒱 𑒏𑒋 𑒋𑒏𑒙𑒰 𑒑𑒰𑒕𑒏 𑒕𑒰𑒯𑒩𑒱𑒧𑒹 𑒥𑒻𑒮𑒱 𑒑𑒹𑒪𑒱।
𑒏𑒢𑒹𑒏 𑒏𑒰𑒪𑒧𑒹 𑒍𑒏𑒩𑒰 𑒂𑒿𑒐𑒱 𑒪𑒰𑒑𑒱 𑒑𑒹𑒪𑒻𑒏। 𑒥𑒔𑓂𑒔𑒰 𑒧𑒾𑒏𑒰 𑒠𑒹𑒐𑒱 𑒏𑒼𑒢𑒯𑒳𑒢𑒰 𑒏𑒋 𑒍𑒯𑒱 𑒥𑒼𑒩𑒰𑒮𑒿 𑒥𑒰𑒯𑒩 𑒥𑒯𑒩𑒰 𑒑𑒹𑒪 𑒂 𑒦𑒲𑒖𑒪 𑒧𑒰𑒙𑒱, 𑒣𑒰𑒟𑒩 𑒂 𑒏𑒰𑒿𑒙-𑒏𑒴𑒮 𑒥𑒼𑒩𑒰𑒧𑒹 𑒡𑓄 𑒏𑒋 𑒍𑒯𑒱𑒢𑒰 𑒥𑒰𑒢𑓂𑒯𑒱 𑒏𑒋 𑒣𑒛𑓃𑒰 𑒑𑒹𑒪।
𑒥𑒳𑒜𑓃𑒱𑒨𑒰 𑒖𑒐𑒢 𑒮𑒴𑒞𑒱 𑒏𑒋 𑒅𑒚𑒪 𑒂 𑒥𑒼𑒩𑒰 𑒪𑓄 𑒏𑒋 𑒂𑒑𑒴 𑒥𑒜𑓃𑒪 𑒞𑒿 𑒍𑒏𑒩𑒰 𑒥𑒼𑒩𑒰 𑒦𑒩𑒱𑒑𑒩 𑒥𑒳𑒗𑒋𑒪𑒻𑒏। 𑒧𑒼𑒢𑒹-𑒧𑒼𑒢 𑒣𑓂𑒩𑒮𑒢𑓂𑒢 𑒦𑓄 𑒑𑒹𑒪𑒱 𑒄 𑒮𑒼𑒔𑒱 𑒖𑒹 𑒯𑒵𑒭𑓂𑒙-𑒣𑒳𑒭𑓂𑒙 𑒧𑒮𑒳𑒂𑒃 𑒐𑒋𑒥𑒰𑒏 𑒧𑒾𑒏𑒰 𑒥𑒯𑒳𑒞 𑒠𑒱𑒢 𑒣𑒩 𑒦𑒹𑒙𑒪 𑒕𑒻 𑒍𑒏𑒩𑒰। 𑒩𑒮𑓂𑒞𑒰𑒧𑒹 𑒦𑒲𑒖𑒪 𑒧𑒰𑒙𑒱𑒮𑒿 𑒣𑒰𑒢𑒱 𑒐𑒮𑒋 𑒪𑒰𑒑𑒪 𑒞𑒿 𑒍𑒏𑒩𑒰 𑒪𑒑𑒪𑒻𑒏 𑒖𑒹 𑒥𑒔𑓂𑒔𑒰 𑒪𑒑𑒯𑒲 𑒏𑒋 𑒩𑒯𑒪 𑒁𑒕𑒱।
𑒍 𑒏𑒯𑒪𑒏 𑒖𑒹-
”𑒧𑒰𑒟 𑒣𑒩 𑒪𑒒𑒳𑒬𑓀𑒏𑒰 𑒏𑒋 𑒩𑒯𑒪 𑒕𑒯 𑒥𑒾𑒂। 𑒏𑒼𑒢𑒼 𑒥𑒰𑒞 𑒢𑒯𑒱। 𑒒𑒩 𑒣𑒩 𑒞𑒼𑒯𑒩 𑒧𑒮𑒳𑒂𑒃 𑒥𑒢𑒰 𑒏𑒋 𑒐𑒰𑒨𑒥 𑒯𑒧”।
𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒏𑒰𑒿𑒙 𑒑𑒩𑒋 𑒪𑒑𑒪𑒻𑒏 𑒥𑒳𑒜𑓃𑒱𑒨𑒰𑒏𑒹𑒿। 𑒏𑒯𑒪𑒏-
”𑒥𑒾𑒂। 𑒥𑒱𑒙𑓂𑒚𑒴 𑒏𑒰𑒙𑒱 𑒩𑒯𑒪 𑒕𑒲। 𑒏𑒼𑒢𑒼 𑒥𑒰𑒞 𑒢𑒯𑒱 𑒏𑒞𑒹𑒏 𑒏𑒰𑒪 𑒡𑒩𑒱 𑒏𑒰𑒙𑒥”।
𑒥𑒳𑒜𑓃𑓂𑒨𑒰𑒏 𑒋𑒏𑒙𑒰 𑒥𑒹𑒙𑒲 𑒕𑒪𑒻𑒏। 𑒑𑒰𑒧 𑒣𑒩 𑒣𑒯𑒳𑒿𑒔𑒱 𑒏𑒋 𑒥𑒳𑒜𑓃𑒱𑒨𑒰 𑒍𑒏𑒩𑒰 𑒏𑒯𑒪𑒏 𑒖𑒹 𑒂𑒃 𑒋𑒏𑒙𑒰 𑒧𑒼𑒙-𑒮𑒼𑒙 𑒬𑒱𑒏𑒰𑒩 𑒁𑒕𑒱 𑒥𑒼𑒩𑒰𑒧𑒹। 𑒧𑒰𑒋 𑒥𑒹𑒙𑒲 𑒖𑒐𑒢 𑒥𑒼𑒩𑒰 𑒐𑒼𑒪𑒪𑒏 𑒞𑒿 𑒢𑒱𑒏𑒪𑒪 𑒧𑒰𑒙𑒱, 𑒏𑒰𑒿𑒙 𑒂 𑒣𑒰𑒟𑒩।
𑒏𑒼𑒢𑒼 𑒥𑒰𑒞 𑒢𑒯𑒱।
𑒥𑒳𑒜𑓃𑒱𑒨𑒰 𑒦𑒹𑒭 𑒥𑒠𑒪𑒱 𑒣𑒯𑒳𑒿𑒔𑒪 𑒤𑒹𑒩𑒮𑒿 𑒥𑒑𑒱𑒨𑒰𑒏 𑒑𑒰𑒕 𑒞𑒩।
𑒋𑒯𑒱 𑒥𑒹𑒩 𑒥𑒔𑓂𑒔𑒰 𑒍𑒏𑒩𑒰 𑒢𑒘𑒱 𑒔𑒲𑒢𑓂𑒯𑒱 𑒮𑒏𑒪। 𑒧𑒳𑒠𑒰 𑒖𑒐𑒢 𑒍 𑒗𑒳𑒏𑒱 𑒏𑒋 𑒥𑒑𑒱𑒨𑒰 𑒥𑒼𑒩𑒰𑒧𑒹 𑒠𑒹𑒥𑒰𑒏 𑒑𑒣 𑒏𑒯𑒪𑒏 𑒞𑒿 𑒥𑒔𑓂𑒔𑒰𑒏𑒹𑒿 𑒂𑒬𑓀𑒏𑒰 𑒦𑒹𑒪𑒻𑒏।
”𑒑𑒋 𑒥𑒳𑒜𑓃𑒱𑒨𑒰। 𑒞𑒼𑒿𑒯𑒲 𑒕𑒿𑒯 𑒚𑒑𑒱𑒢 𑒥𑒳𑒜𑓃𑒱𑒨𑒰”।

𑒧𑒳𑒠𑒰 𑒥𑒳𑒜𑓃𑒱𑒨𑒰 𑒖𑒐𑒢 𑒮𑒣𑓂𑒣𑒞 𑒐𑒋𑒪𑒏 𑒞𑒿 𑒍 𑒥𑒔𑓂𑒔𑒰 𑒗𑒳𑒏𑒱 𑒏𑒋 𑒥𑒑𑒱𑒨𑒰 𑒥𑒼𑒩𑒰𑒧𑒹 𑒠𑒹𑒥𑒋 𑒪𑒰𑒑𑒪। 𑒂 𑒤𑒹𑒩 𑒫𑒻𑒯 𑒥𑒰𑒞।
𑒋𑒯𑒱 𑒥𑒹𑒩 𑒥𑒳𑒜𑓃𑒱𑒨𑒰 𑒏𑒞𑒯𑒳 𑒚𑒰𑒜𑓃 𑒢𑒯𑒱 𑒦𑒹𑒪𑒱। 𑒮𑒼𑒗𑒹 𑒒𑒩 𑒣𑒯𑒳𑒿𑒔𑒪 𑒂 𑒥𑒹𑒙𑒲 𑒪𑒑 𑒥𑒼𑒩𑒰 𑒩𑒰𑒐𑒱 𑒢𑒯𑒰𑒋-𑒮𑒼𑒢𑒰𑒋 𑒪𑒹𑒪 𑒔𑒪𑒱 𑒑𑒹𑒪𑒱।𑒥𑒹𑒙𑒲 𑒖𑒹 𑒥𑒼𑒩𑒰 𑒐𑒼𑒪𑒪𑒏 𑒞𑒿 𑒋𑒏𑒙𑒰 𑒗𑒼𑒿𑒙𑒰 𑒥𑒪𑒰 𑒥𑒔𑓂𑒔𑒰𑒏𑒹𑒿 𑒠𑒹𑒐𑒪𑒏। 𑒍 𑒣𑒳𑒕𑒪𑒏-
“𑒯𑒧𑒩 𑒏𑒹𑒬 𑒢𑒧𑒑𑒩 𑒢𑒯𑒱 𑒁𑒕𑒱 𑒏𑒱𑒋𑒏?”।
“𑒁𑒯𑒰𑒿𑒏 𑒧𑒰𑒨 𑒁𑒯𑒰𑒿𑒏 𑒧𑒰𑒟 𑒆𑒐𑒛𑓃𑒱𑒧𑒹 𑒠𑒋 𑒮𑒧𑒰𑒚𑒮𑒿 𑒢𑒯𑒱 𑒏𑒳𑒙𑒢𑒹 𑒯𑒼𑒨𑒞𑒲𑒯। 𑒞𑒹𑒿 ”। 𑒥𑒔𑓂𑒔𑒰 𑒞𑒿 𑒕𑒪 𑒠𑒮 𑒯𑒼𑒮𑒱𑒨𑒩𑒏 𑒋𑒏 𑒯𑒼𑒮𑒱𑒨𑒰𑒩 𑒮𑒹 𑒍 𑒥𑒰𑒖𑒪।
𑒥𑒳𑒜𑓃𑒱𑒨𑒰𑒏 𑒥𑒹𑒙𑒲 𑒁𑒣𑒢 𑒏𑒹𑒬 𑒥𑒜𑓃𑒹𑒥𑒰𑒏 𑒯𑒹𑒞𑒳 𑒁𑒣𑒢 𑒧𑒰𑒟 𑒆𑒐𑒛𑓃𑒱𑒧𑒹 𑒠𑒹𑒪𑒏 𑒂 𑒍 𑒥𑒔𑓂𑒔𑒰 𑒍𑒏𑒩𑒰 𑒮𑒧𑒰𑒚𑒮𑒿 𑒏𑒴𑒙𑒋 𑒪𑒰𑒑𑒪।
𑒍𑒏𑒩𑒰 𑒧𑒰𑒩𑒱 𑒍𑒏𑒩 𑒧𑒰𑒮𑒳 𑒥𑒢𑒹𑒪𑒏। 𑒥𑒳𑒜𑓃𑒱𑒨𑒰 𑒖𑒐𑒢 𑒣𑒼𑒐𑒩𑒱𑒮𑒿 𑒢𑒯𑒰 𑒏𑒋 𑒂𑒨𑒪 𑒞𑒿 𑒥𑒳𑒜𑓃𑒱𑒨𑒰𑒏 𑒂𑒑𑒴 𑒍 𑒧𑒰𑒮𑒳 𑒣𑒩𑒮𑒱 𑒠𑒹𑒪𑒏।
𑒖𑒐𑒢𑒹 𑒍 𑒐𑒹𑒢𑒰𑒃 𑒣𑒩 𑒥𑒻𑒮𑒪𑒱 𑒞𑒿 𑒪𑒑𑒧𑒹 𑒋𑒏𑒙𑒰 𑒥𑒱𑒪𑒰𑒛𑓃𑒱 𑒕𑒪 𑒮𑒹 𑒥𑒰𑒖𑒱 𑒅𑒚𑒪-
“𑒧𑓂𑒨𑒰𑒿𑒆। 𑒁𑒣𑒢 𑒡𑒲𑒨𑒰 𑒁𑒣𑒢𑒹 𑒐𑒰𑒿𑒆। 𑒧𑓂𑒨𑒰𑒿𑒆”।
“𑒥𑒹𑒙𑒲 𑒋𑒏𑒩𑒰 𑒧𑒰𑒮𑒳 𑒢𑒯𑒱 𑒠𑒹𑒪𑒯𑒳𑒿 𑒏𑒲। 𑒞𑒹𑒿 𑒥𑒰𑒖𑒱 𑒩𑒯𑒪 𑒁𑒕𑒱”।
𑒍 𑒥𑒔𑓂𑒔𑒰 𑒥𑒱𑒪𑒰𑒛𑓃𑒱𑒏 𑒂𑒑𑒰𑒿 𑒧𑒰𑒮𑒳 𑒩𑒰𑒐𑒱 𑒠𑒹𑒪𑒏 𑒧𑒳𑒠𑒰 𑒥𑒱𑒪𑒰𑒛𑓃𑒱 𑒧𑒰𑒮𑒳 𑒢𑒯𑒱 𑒐𑒋𑒪𑒏।
𑒂𑒥 𑒥𑒳𑒜𑓃𑒱𑒨𑒰𑒏 𑒧𑒰𑒟 𑒒𑒳𑒧𑒪। 𑒍 𑒥𑒹𑒙𑒲𑒏𑒹𑒿 𑒮𑒼𑒩 𑒏𑒋𑒪𑒏 𑒞𑒿 𑒍 𑒥𑒔𑓂𑒔𑒰 𑒮𑒧𑒰𑒚 𑒪𑓄 𑒏𑒋 𑒂𑒨𑒪 𑒂 𑒍𑒏𑒩𑒰 𑒧𑒰𑒩𑒱 𑒠𑒹𑒪𑒏।
𑒤𑒹𑒩𑒮𑒿 𑒥𑒔𑓂𑒔𑒰 𑒥𑒑𑒱𑒨𑒰𑒏 𑒑𑒰𑒕 𑒣𑒩 𑒔𑒜𑓃𑒱 𑒥𑒑𑒱𑒨𑒰 𑒐𑒋 𑒪𑒰𑒑𑒪। 𑒥𑒛𑓂𑒛 𑒢𑒲𑒏 𑒪𑒑𑒻𑒞 𑒕𑒪 𑒍𑒏𑒩𑒰 𑒥𑒑𑒱𑒨𑒰।

𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩
𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩 𑒕𑒪𑒰𑒯 𑒮𑒱𑒠𑓂𑒡। 𑒣𑒧𑓂𑒣𑒲𑒣𑒳𑒩 𑒑𑒰𑒧𑒏। 𑒞𑓀𑒞𑓂𑒩-𑒧𑓀𑒞𑓂𑒩 𑒖𑒰𑒢𑒋𑒥𑒪𑒰। 𑒡𑒩𑓂𑒧𑒩𑒰𑒖 𑒩𑒯𑒟𑒱 𑒯𑒳𑒢𑒏𑒩 𑒏𑒳𑒪𑒠𑒹𑒫𑒞𑒰। 𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩𑒏 𑒣𑒞𑓂𑒢𑒲 𑒕𑒪𑒲𑒯 𑒪𑒐𑒱𑒧𑒰।
𑒋𑒏 𑒥𑒹𑒩 𑒮𑒰𑒡𑒳𑒏 𑒫𑒹𑒭 𑒡𑓄 𑒡𑒩𑓂𑒧𑒩𑒰𑒖 𑒦𑒱𑒏𑓂𑒭𑒰𑒏 𑒯𑒹𑒞𑒳 𑒁𑒋𑒪𑒰𑒯। 𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩 𑒪𑒐𑒱𑒧𑒰𑒏 𑒮𑓀𑒑 𑒑𑒯𑒥𑒩 𑒥𑒢𑒰 𑒩𑒯𑒪 𑒕𑒪𑒰𑒯। 𑒧𑒰𑒨 𑒮𑒴𑒣𑒧𑒹 𑒁𑒢𑓂𑒢 𑒪𑒋 𑒏𑓄 𑒁𑒨𑒪𑒲𑒯। 𑒧𑒳𑒠𑒰 𑒮𑒰𑒡𑒳 𑒏𑒯𑒪𑒐𑒱𑒢𑓂𑒯 𑒖𑒹 𑒯𑒧 𑒞𑒿 𑒦𑒲𑒐 𑒪𑒹𑒥 𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩𑒏 𑒯𑒰𑒟𑒹𑒙𑒰 𑒮𑒿। 𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩 𑒧𑒢𑒰 𑒏𑒋 𑒠𑒹𑒪𑒐𑒱𑒢𑓂𑒯 𑒖𑒹 𑒯𑒧 𑒑𑒯𑒥𑒩 𑒥𑒢𑒰𑒨𑒥 𑒕𑒼𑒛𑓃𑒱 𑒏𑒋 𑒢𑒯𑒱 𑒂𑒨𑒥। 𑒮𑒰𑒡𑒳 𑒬𑓂𑒩𑒰𑒣 𑒠𑒋 𑒠𑒹𑒪𑒐𑒱𑒢𑓂𑒯 𑒖𑒹 𑒢𑒱𑒩𑓂𑒡𑒢 𑒦𑓄 𑒖𑒨𑒞𑒰𑒯 𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩, 𑒏𑒳𑒭𑓂𑒚 𑒤𑒴𑒙𑒱 𑒖𑒋𑒞𑒢𑓂𑒯𑒱 𑒯𑒳𑒢𑒏𑒰।
𑒂𑒮𑓂𑒞𑒹-𑒂𑒮𑓂𑒞𑒹 𑒄 𑒒𑒙𑒱𑒞 𑒯𑒼𑒧𑒋 𑒪𑒰𑒑𑒪। 𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩 𑒥𑒯𑒱𑒢𑒱𑒏 𑒍𑒯𑒱𑒚𑒰𑒧 𑒔𑒪𑒱 𑒑𑒹𑒪𑒰𑒯। 𑒧𑒳𑒠𑒰 𑒍𑒞𑒨 𑒁𑒫𑒯𑒹𑒪𑒢𑒰 𑒦𑒹𑒙𑒪𑒢𑓂𑒯𑒱। 𑒖𑓂𑒨𑒼𑒞𑒱 𑒍𑒞𑒨 𑒮𑒿 𑒢𑒱𑒏𑒪𑒱 𑒑𑒹𑒪𑒰𑒯। 𑒍𑒃𑒙𑒠𑒪 𑒑𑒰𑒧 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒁𑒣𑒢 𑒮𑓀𑒑𑒲 𑒪𑒑𑒫𑒰𑒩𑒏 𑒪𑒑। 𑒋𑒏𑒙𑒰 𑒞𑒰𑓀𑒞𑓂𑒩𑒱𑒏 𑒁𑒋𑒪𑒰𑒯। 𑒏𑒯𑒪- 𑒥𑒰𑒩𑒯 𑒫𑒩𑓂𑒭 𑒡𑒩𑒱 𑒏𑒠𑒪𑒲𑒫𑒢𑒧𑒹 𑒩𑒯𑒋 𑒣𑒛𑓃𑒞। 𑒡𑒩𑓂𑒧𑒩𑒰𑒖𑒏 𑒂𑒩𑒰𑒡𑒢𑒰 𑒏𑒩𑒋 𑒣𑒛𑓃𑒞, 𑒑𑒯𑒥𑒛𑓃 𑒥𑒢𑒰𑒋 𑒏𑒩𑒔𑒲 𑒩𑒼𑒣𑒲 𑒍𑒞𑒋। 𑒥𑒰𑒿𑒮𑒏 𑒒𑒩 𑒥𑒢𑒰𑒆 𑒡𑒩𑓂𑒧𑒩𑒰𑒖𑒏 𑒯𑒹𑒞𑒳। 𑒡𑒩𑓂𑒧𑒩𑒰𑒖 𑒠𑒩𑓂𑒬𑒢 𑒠𑒹𑒞𑒰𑒯, 𑒁𑒯𑒰𑒿 𑒚𑒲𑒏 𑒦𑓄 𑒖𑒰𑒋𑒥। 𑒣𑒿𑒖𑒱𑒨𑒰𑒩 𑒔𑒪𑒪𑒰𑒯।
𑒩𑒮𑓂𑒞𑒰𑒧𑒹 𑒮𑒻𑒢𑒲 𑒑𑒰𑒕 𑒦𑒹𑒙𑒪𑒢𑓂𑒯𑒱, 𑒍𑒏𑒩 𑒕𑒰𑒯𑒧𑒹 𑒮𑒳𑒮𑓂𑒞𑒹𑒪𑒰𑒯 𑒣𑒿𑒖𑒱𑒨𑒰𑒩। 𑒧𑒳𑒠𑒰 𑒍 𑒑𑒰𑒕 𑒮𑒳𑒐𑒰 𑒑𑒹𑒪, 𑒁𑒩𑒛𑓃𑒰 𑒏𑒋 𑒐𑒮𑒱 𑒣𑒛𑓃𑒪।
𑒏𑒼𑒃𑒪𑒲𑒏𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒣𑒰𑒢𑒱 𑒂𑒢𑒱 𑒠𑒱𑒁। 𑒍 𑒅𑒛𑓃𑒪 𑒞𑒿 𑒥𑒱𑒯𑒰𑒛𑓃 𑒂𑒥𑒱 𑒑𑒹𑒪। 𑒏𑒼𑒃𑒪𑒲 𑒧𑒩𑒱 𑒑𑒹𑒪।
𑒣𑒿𑒖𑒱𑒨𑒰𑒩 𑒅𑒛𑓃𑒱 𑒏𑒋 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒏𑒠𑒪𑒲 𑒫𑒢𑒧𑒹। 𑒋𑒏𑒙𑒰 𑒧𑒯𑒱𑒮𑒥𑒰𑒩 𑒏𑒯𑒪𑒏𑒢𑓂𑒯𑒱 𑒖𑒹 𑒁𑒕𑒧𑒱𑒞𑒣𑒳𑒩 𑒑𑒰𑒧 𑒖𑒰𑒆। 𑒧𑒯𑒱𑒮𑒥𑒰𑒩 𑒕𑒪𑒰𑒯 𑒡𑒩𑓂𑒧𑒩𑒰𑒖, 𑒥𑒢𑒱 𑒑𑒹𑒪𑒰𑒯 𑒦𑒹𑒧-𑒦𑒾𑒩𑒰।
𑒋𑒏𑒙𑒰 𑒫𑓂𑒨𑒏𑓂𑒞𑓂𑒞𑒱 𑒦𑒹𑒙𑒪𑒢𑓂𑒯𑒱। 𑒍 𑒏𑒯𑒪𑒏𑒢𑓂𑒯𑒱 𑒖𑒹 𑒂𑒑𑒴 𑒫𑒩𑒏 𑒑𑒰𑒕 𑒦𑒹𑒙𑒞, 𑒍𑒏𑒩 𑒣𑒰𑒞 𑒞𑒼𑒛𑓃𑒴।𑒍𑒯𑒱 𑒣𑒩 𑒁𑒯𑒰𑒿𑒏 𑒮𑒦 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒩𑒯𑒞। 𑒄 𑒏𑒯𑒱 𑒍 𑒣𑒩𑒥𑒰 𑒥𑒢𑒱 𑒑𑒹𑒪।
𑒫𑒩𑒏 𑒣𑒰𑒞 𑒞𑒼𑒛𑓃𑒪𑒢𑓂𑒯𑒱 𑒖𑓂𑒨𑒼𑒞𑒱 𑒞𑒿 𑒍𑒯𑒱 𑒣𑒩 𑒪𑒱𑒐𑒪 𑒕𑒪, 𑒨𑒻𑒯 𑒕𑒲 𑒁𑒕𑒧𑒱𑒞𑒣𑒳𑒩। 𑒍𑒞𑒳𑒏𑓂𑒏𑒰 𑒩𑒰𑒖𑒰𑒏𑒹𑒿 𑒥𑒔𑓂𑒔𑒰 𑒢𑒯𑒱 𑒕𑒪𑒢𑓂𑒯𑒱। 𑒖𑓂𑒨𑒼𑒞𑒱 𑒂𑒬𑒲𑒩𑓂𑒫𑒰𑒠 𑒠𑒹𑒪𑒢𑓂𑒯𑒱। 𑒏𑒯𑒪𑒢𑓂𑒯𑒱, 𑒋𑒏𑒙𑒰 𑒕𑒰𑒑𑒩 𑒍𑒯𑒱 𑒠𑒱𑒢 𑒣𑒼𑒮𑒥 𑒖𑒰𑒯𑒱 𑒠𑒱𑒢 𑒑𑒩𑓂𑒦 𑒚𑒯𑒩𑒱 𑒖𑒰𑒋। 𑒯𑒧 𑒏𑒠𑒪𑒲 𑒫𑒢𑒮𑒿 𑒂𑒋𑒥 𑒞𑒿 𑒄 𑒕𑒰𑒑𑒩 𑒮𑓂𑒫𑒨𑓀 𑒐𑒳𑒙𑓂𑒙𑒰𑒮𑒿 𑒐𑒳𑒖𑒱 𑒖𑒰𑒋𑒞। 𑓑𑓒 𑒥𑒩𑒐𑒏 𑒥𑒰𑒠 𑒖𑓂𑒨𑒼𑒞𑒱 𑒏𑒠𑒪𑒲 𑒫𑒢𑒮𑒿 𑒔𑒪𑒪𑒰𑒯। 𑒏𑒼𑒃𑒪𑒲𑒏𑒹𑒿 𑒖𑒲𑒫𑒱𑒞 𑒏𑒋 𑒠𑒹𑒪𑒢𑓂𑒯𑒱। 𑒮𑒳𑒐𑒰𑒋𑒪 𑒡𑒰𑒩𑒧𑒹 𑒣𑒰𑒢𑒱 𑒂𑒥𑒱 𑒑𑒹𑒪। 𑒮𑒻𑒢𑒲𑒏 𑒑𑒰𑒕 𑒯𑒩𑒱𑒨𑒩 𑒏𑒔𑒼𑒩 𑒦𑓄 𑒖𑒲𑒥𑒱 𑒅𑒚𑒪। 𑒁𑒕𑒧𑒱𑒞𑒣𑒳𑒩 𑒑𑒰𑒧𑒧𑒹 𑒩𑒰𑒖𑒰 𑒏𑒯𑒪𑒢𑓂𑒯𑒱 𑒖𑒹 𑒕𑒰𑒑𑒩 𑒂 𑒣𑒳𑒞𑓂𑒩 𑒠𑒳𑒢𑒴 𑒋𑒏𑒯𑒱 𑒠𑒱𑒢 𑒧𑒩𑒱 𑒑𑒹𑒪। 𑒣𑒿𑒖𑒱𑒨𑒰𑒩 𑒣𑒰𑒚𑒰𑒏𑒹𑒿 𑒖𑒱𑒂 𑒠𑒹𑒪𑒢𑓂𑒯𑒱, 𑒏𑒯𑒪𑒢𑓂𑒯𑒱 𑒖𑒼 𑒞𑒼𑒿 𑒏𑒠𑒪𑒲𑒫𑒢𑒏 𑒡𑒰𑒩𑒧𑒹 𑒢𑒰𑒍 𑒣𑒩 𑒔𑒜𑓃𑒱 𑒖𑒼, 𑒧𑒢𑒳𑒏𑓂𑒐 𑒩𑒴𑒣 𑒦𑒹𑒙𑒱 𑒖𑒋𑒞𑒾𑒏। 𑒞𑒰𑒫𑒞 𑒩𑒰𑒖𑒰𑒏 𑒣𑒳𑒞𑓂𑒩 𑒮𑒹𑒯𑒼 𑒏𑒠𑒪𑒲𑒫𑒢𑒮𑒿 𑒬𑒱𑒏𑒰𑒩 𑒐𑒹𑒪𑒰 𑒏𑒋 𑒒𑒼𑒛𑓃𑒰 𑒣𑒩 𑒔𑒜𑓃𑒱 𑒏𑒋 𑒂𑒥𑒱 𑒑𑒹𑒪। 𑒖𑓂𑒨𑒼𑒞𑒱 𑒣𑒿𑒖𑒱𑒨𑒰𑒩 𑒑𑒰𑒧 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒑𑒧𑒕𑒰𑒧𑒹 𑒑𑒯𑒥𑒩 𑒪𑒹𑒢𑒹।

𑒩𑒰𑒖𑒰 𑒮𑒪𑒯𑒹𑒮
𑒩𑒰𑒖𑒰 𑒮𑒪𑒯𑒹𑒮 𑒮𑒳𑒢𑓂𑒠𑒩 𑒂 𑒫𑒲𑒩 𑒕𑒪𑒰𑒯। 𑒧𑒼𑒩𑓀𑒑, 𑒢𑒹𑒣𑒰𑒪𑒧𑒹 𑒩𑒯𑒻𑒞 𑒕𑒪𑒰𑒯। 𑒍 𑒠𑒳𑒮𑒰𑒡 𑒖𑒰𑒞𑒱𑒏 𑒕𑒪𑒰𑒯 𑒂 𑒠𑒥𑒢𑒰 𑒖𑒹 𑒧𑒼𑒩𑓀𑒑 𑒩𑒰𑒖𑒰𑒏 𑒧𑒰𑒪𑒱𑒢 𑒕𑒪𑒱, 𑒮𑒪𑒯𑒹𑒮𑒮𑒿 𑒣𑓂𑒩𑒹𑒧 𑒏𑒩𑒻𑒞 𑒕𑒪𑒱। 𑒩𑒰𑒖𑒏 𑒫𑒻𑒠𑓂𑒨 𑒠𑒥𑒢𑒰𑒮𑒿 𑒣𑓂𑒩𑒹𑒧 𑒏𑒩𑒻𑒞 𑒕𑒪𑒰𑒯 𑒂 𑒠𑒥𑒢𑒰𑒏 𑒁𑒮𑓂𑒫𑒲𑒏𑒵𑒞𑒱𑒮𑒿 𑒍 𑒂𑒞𑓂𑒧𑒯𑒞𑓂𑒨𑒰 𑒏𑒋 𑒪𑒹𑒪𑒢𑓂𑒯𑒱।
𑒮𑒪𑒯𑒹𑒮 𑒕𑒪𑒰𑒯 𑒧𑒼𑒩𑓀𑒑𑒏 𑒞𑒰𑒪𑒳𑒏𑒠𑒰𑒩 𑒢𑒾𑒩𑓀𑒑𑒲 𑒥𑒯𑒰𑒠𑒳𑒩 𑒟𑒰𑒣𑒰𑒏 𑒮𑒱𑒣𑒰𑒯𑒲। 𑒮𑒪𑒹𑒯𑒮 𑒕𑒪𑒰𑒯 𑒧𑒼𑒢𑒏 𑒩𑒰𑒖𑒰। 𑒮𑒦𑒏𑒹𑒿 𑒫𑒱𑒣𑒞𑓂𑒞𑒱𑒧𑒹 𑒮𑒯𑒰𑒨𑒞𑒰 𑒠𑒻𑒞 𑒩𑒯𑒟𑒱। 𑒞𑒰𑒯𑒱 𑒠𑓂𑒫𑒰𑒩𑒹 𑒠𑒥𑒢𑒰 𑒠𑒱𑒬𑒱 𑒯𑒳𑒢𑒏𑒩 𑒏𑒼𑒢𑒼 𑒡𑓂𑒨𑒰𑒢 𑒢𑒯𑒱 𑒕𑒪𑒢𑓂𑒯𑒱। 𑒮𑒦 𑒯𑒳𑒢𑒏𑒰 𑒩𑒰𑒖𑒰 𑒏𑒯𑒻𑒞 𑒕𑒪𑒢𑓂𑒯𑒱, 𑒮𑒹 𑒄 𑒞𑒰𑒪𑒳𑒏𑒠𑒰𑒩𑒏𑒹𑒿 𑒣𑒮𑒱𑒢𑓂𑒢 𑒢𑒯𑒱 𑒣𑒛𑓃𑒪।
𑒋𑒏 𑒠𑒱𑒢 𑒠𑒩𑒥𑒰𑒩𑒧𑒹 𑒍 𑒮𑒪𑒯𑒹𑒮𑒏𑒹𑒿 𑒣𑒳𑒕𑒪𑒏-
𑒁𑒯𑒰𑒿𑒏 𑒢𑒰𑒧 𑒏𑒲?
𑒮𑒪𑒯𑒹𑒮 𑒏𑒯𑒪𑒢𑓂𑒯𑒱- 𑒯𑒧𑒩 𑒢𑒰𑒧 𑒕𑒲 𑒩𑒰𑒖𑒰 𑒮𑒪𑒯𑒹𑒮।
𑒞𑒐𑒢 𑒟𑒰𑒣𑒰 𑒏𑒯𑒪𑒏𑒢𑓂𑒯𑒱, 𑒖𑒹 𑒁𑒯𑒰𑒿 𑒁𑒣𑒢 𑒢𑒰𑒧𑒧𑒹 𑒩𑒰𑒖𑒰 𑒢𑒯𑒱 𑒪𑒑𑒰𑒆।
𑒮𑒪𑒯𑒹𑒮 𑒏𑒯𑒪𑒢𑓂𑒯𑒱 𑒖𑒹 𑒄 𑒣𑒠𑒫𑒲 𑒕𑒲, 𑒖𑒢 𑒠𑓂𑒫𑒰𑒩𑒰 𑒠𑒹𑒪 𑒣𑒠𑒫𑒲। 𑒏𑒼𑒢𑒰 𑒕𑒼𑒛𑓃𑒥 𑒋𑒏𑒩𑒰। 𑒯𑒧 𑒕𑒼𑒛𑓃𑒱𑒨𑒼 𑒠𑒹𑒥, 𑒪𑒼𑒏 𑒞𑒿 𑒏𑒯𑒥𑒹 𑒏𑒩𑒞।
𑒞𑒐𑒢 𑒟𑒰𑒣𑒰 𑒏𑒯𑒪𑒐𑒱𑒢𑓂𑒯 𑒖𑒹 𑒪𑒼𑒏𑒏𑒹𑒿 𑒧𑒢𑒰 𑒏𑓄 𑒠𑒱𑒨𑒾𑒏।
𑒮𑒪𑒯𑒹𑒮 𑒏𑒯𑒪𑒢𑓂𑒯𑒱 𑒖𑒹 𑒪𑒼𑒏𑒏𑒹𑒿 𑒏𑒼𑒢𑒰 𑒧𑒢𑒰 𑒏𑒩𑒥𑒻𑒏। 𑒪𑒼𑒏𑒏 𑒧𑒼𑒢 𑒖𑒹 𑒍 𑒏𑒏𑒩𑒰 𑒏𑒲 𑒥𑒖𑒰𑒍𑒞।
𑒢𑒱𑒏𑒪𑒱 𑒑𑒹𑒪𑒰𑒯 𑒮𑒪𑒯𑒹𑒮 𑒍𑒞𑒋𑒮𑒿। 𑒂𑒥 𑒢𑒯𑒱 𑒢𑒱𑒧𑒯𑒞 𑒄 𑒢𑒼𑒏𑒩𑒲। 𑒂𑒃 𑒏𑒯𑒻𑒞 𑒁𑒕𑒱 𑒢𑒰𑒧 𑒕𑒼𑒛𑓃𑒋 𑒪𑒹𑒪, 𑒏𑒰𑒪𑓂𑒯𑒱 𑒏𑒱𑒕𑒳 𑒂𑒩 𑒏𑒯𑒞।
𑒣𑒱𑒞𑒱𑒨𑒾𑒞 𑒥𑒯𑒱𑒢 𑒩𑒯𑒻𑒞 𑒕𑒪𑒢𑓂𑒯𑒱 𑒧𑒳𑓀𑒑𑒹𑒩𑒧𑒹। 𑒥𑒯𑒱𑒢𑒼𑒃 𑒩𑒰𑒖 𑒠𑒩𑒦𑓀𑒑𑒰𑒏 𑒢𑒼𑒏𑒩𑒲𑒧𑒹 𑒕𑒪𑒰𑒯।
𑒋𑒧𑓂𑒯𑒩 𑒏𑒳𑒮𑒧𑒲 𑒠𑒥𑒢𑒰𑒏𑒹𑒿 𑒏𑒯𑒱 𑒠𑒹𑒪𑒏 𑒖𑒹 𑒮𑒪𑒯𑒹𑒮 𑒖𑒰 𑒩𑒯𑒪 𑒁𑒕𑒱 𑒧𑒼𑒩𑓀𑒑 𑒕𑒼𑒛𑓃𑒱 𑒏𑒋। 𑒠𑒥𑒢𑒰 𑒕𑒪𑒱 𑒏𑒧𑒩𑒴-𑒏𑒧𑒐𑓂𑒨𑒰𑒮𑒿 𑒞𑓀𑒞𑓂𑒩-𑒧𑓀𑒞𑓂𑒩 𑒮𑒱𑒐𑒢𑒹।
𑒍 𑒮𑒪𑒯𑒹𑒮𑒏𑒹𑒿 𑒏𑒯𑒪𑒏 𑒖𑒹 𑒯𑒧 𑒩𑒰𑒖𑒰𑒏 𑒠𑒩𑒥𑒰𑒩𑒧𑒹 𑒮𑒰𑒞 𑒮𑒋 𑒮𑒱𑒣𑒰𑒯𑒲𑒏 𑒮𑒩𑒠𑒰𑒩 𑒔𑒴𑒯𑒛𑓃𑒧𑒪𑒏𑒹𑒿 𑒯𑒙𑒥𑒰 𑒏𑓄 𑒁𑒯𑒰𑒿𑒏𑒹𑒿 𑒮𑒩𑒠𑒰𑒩 𑒥𑒢𑒰 𑒠𑒹𑒥। 𑒮𑒻𑒯 𑒦𑒹𑒪। 𑒥𑒛𑓃𑒏𑒰 𑒖𑒪𑒮𑒰 𑒠𑒹𑒪𑒏 𑒠𑒥𑒢𑒰, 𑒑𑒹𑒪𑒏 𑒑𑒲𑒞-
𑒩𑒾 𑒮𑒳𑒩𑒯𑒰,
𑒥𑒰𑒩𑒯 𑒥𑒩𑒮 𑒞𑒼𑒩𑒰 𑒪𑒹𑒪 𑒂𑒿𑒔𑒩 𑒥𑒢𑓂𑒯𑒪𑒾𑒿।
𑒧𑒳𑒠𑒰, 𑒏𑒹𑒪𑒏 𑒔𑒼𑒩𑒱 𑒔𑒴𑒯𑒛𑓃𑒧𑒪, 𑒔𑒼𑒩𑒹𑒪𑒏 𑒢𑒾 𑒪𑒰𑒐𑒏 𑒩𑒰𑒢𑒲𑒏 𑒯𑒰𑒩 𑒂 𑒢𑒳𑒏𑒰 𑒠𑒹𑒪𑒏 𑒮𑒪𑒯𑒹𑒮𑒏 𑒍𑒕𑒻𑒢𑒧𑒹।
𑒅𑒢𑒙𑒹 𑒔𑒴𑒯𑒛𑓃𑒧𑒪 𑒩𑒰𑒖𑒰𑒏𑒹𑒿 𑒏𑒯𑒪𑒏 𑒖𑒹 𑒮𑒪𑒯𑒹𑒮𑒏 𑒒𑒩𑒏 𑒞𑒪𑒰𑒮𑒲 𑒪𑒹𑒪 𑒖𑒰𑒋।𑒮𑒪𑒯𑒹𑒮𑒏 𑒑𑒹𑒩𑒳𑒂𑒏 𑒐𑒼𑒪𑒮𑒿 𑒐𑒮𑒪 𑒯𑒰𑒩।
𑒠𑒥𑒢𑒰 𑒏𑒰𑒪𑒲 𑒧𑒢𑓂𑒠𑒱𑒩𑒧𑒹 𑒞𑓀𑒞𑓂𑒩 𑒮𑒰𑒡𑒢𑒰 𑒬𑒳𑒩𑒴 𑒏𑒋𑒪𑒏। 𑒦𑒴𑒞-𑒣𑓂𑒩𑒹𑒞𑒏𑒹𑒿 𑒢𑒼𑒞𑒪𑒏। 𑒐𑒴𑒢 𑒥𑒼𑒏𑒩𑒥𑒹𑒪𑒏 𑒔𑒴𑒯𑒛𑓃𑒧𑒪𑒮𑒿।
𑒔𑒴𑒯𑒛𑓃𑒧𑒪 𑒮𑒦𑒙𑒰 𑒥𑒏𑒱 𑒠𑒹𑒪𑒏।
𑒮𑒪𑒯𑒹𑒮𑒏𑒹𑒿 𑒖𑒹𑒪𑒮𑒿 𑒕𑒼𑒛𑓃𑒱 𑒠𑒹𑒪 𑒑𑒹𑒪 𑒂 𑒍𑒏𑒩 𑒍𑒯𑒠𑒰 𑒥𑒜𑓃𑒰 𑒠𑒹𑒪 𑒑𑒹𑒪। 𑒔𑒴𑒯𑒛𑓃𑒧𑒪𑒏𑒹𑒿 𑒦𑒹𑒪𑒻𑒏 𑒖𑒹𑒪।
𑒠𑒥𑒢𑒰 𑒂 𑒮𑒪𑒯𑒹𑒮 𑒫𑒱𑒫𑒰𑒯 𑒏𑒋 𑒐𑒳𑒬𑒲𑒮𑒿 𑒩𑒯𑒋 𑒪𑒑𑒪𑒰𑒯।

𑒥𑒯𑒳𑒩𑒰 𑒑𑒼𑒜𑓃𑒱𑒢 𑒢𑒙𑒳𑒂𑒠𑒨𑒰𑒪
𑒋𑒏𑒙𑒰 𑒕𑒪𑒱 𑒥𑒯𑒳𑒩𑒰 𑒑𑒼𑒜𑓃𑒱𑒢 𑒂 𑒋𑒏𑒙𑒰 𑒕𑒪𑒰𑒯 𑒢𑒙𑒳𑒂 𑒠𑒨𑒰𑒪।
𑒥𑒯𑒳𑒩𑒰 𑒑𑒼𑒜𑓃𑒱𑒢 𑒢𑒩𑓂𑒞𑓂𑒞𑒏𑒲 𑒕𑒪𑒱 𑒂 𑒍𑒏𑒩𑒰 𑒖𑒰𑒠𑒴 𑒁𑒥𑒻𑒞 𑒕𑒪𑒻𑒏।
𑒢𑒙𑒳𑒂 𑒠𑒨𑒰𑒪 𑒥𑒯𑒳𑒩𑒰 𑒑𑒼𑒜𑓃𑒱𑒢𑒏 𑒣𑓂𑒩𑒬𑓀𑒮𑒏 𑒕𑒪, 𑒏𑒱𑒋𑒏 𑒞𑒿 𑒍 𑒕𑒪 𑒣𑓂𑒩𑒹𑒧𑒲, 𑒥𑒯𑒳𑒩𑒰 𑒑𑒼𑒜𑓃𑒱𑒢𑒏 𑒣𑒳𑒞𑓂𑒩𑒲𑒏।
𑒕𑒪 𑒧𑒳𑒠𑒰 𑒍𑒯𑒼 𑒞𑒰𑓀𑒞𑓂𑒩𑒱𑒏।
𑒏𑒧𑒪𑒰-𑒥𑒪𑒰𑒢𑒏 𑒏𑒰𑒞𑒏 𑒏𑒹𑒫𑒙𑒲 𑒕𑒪𑒱 𑒥𑒯𑒳𑒩𑒰, 𑒥𑒐𑒩𑒲, 𑒥𑒹𑒑𑒴𑒮𑒩𑒰𑒨𑒏 𑒩𑒯𑒢𑒱𑒯𑒰𑒩𑒱।
𑒯𑒏𑒪𑒱 𑒕𑒪𑒱, 𑒏𑒧𑒩𑒴 𑒮𑒿 𑒮𑒲𑒐𑒢𑒹 𑒕𑒪𑒱 𑒖𑒰𑒠𑒴।
𑒠𑒳𑒪𑒩𑒰 𑒠𑒨𑒰𑒪 𑒕𑒪 𑒧𑒱𑒟𑒱𑒪𑒰 𑒩𑒰𑒖𑓂𑒨𑒏 𑒦𑒩𑒾𑒛𑓃𑒏 𑒩𑒰𑒖𑒏𑒳𑒧𑒰𑒩, 𑒍𑒏𑒩𑒹 𑒢𑒰𑒧 𑒕𑒪 𑒢𑒙𑒳𑒂 𑒠𑒨𑒰𑒪।
𑒢𑒵𑒞𑓂𑒨 𑒖𑒹 𑒍 𑒥𑒯𑒳𑒩𑒰𑒮𑒿 𑒮𑒱𑒐𑒪𑒏 𑒞𑒿 𑒮𑒦 𑒢𑒰𑒧𑒹 𑒩𑒰𑒐𑒱 𑒠𑒹𑒪𑒏𑒻𑒏 𑒍𑒏𑒩 𑒢𑒙𑒳𑒂।
𑒢𑒙𑒳𑒂 𑒠𑒨𑒰𑒪𑒏 𑒑𑒳𑒩𑒴 𑒕𑒪𑒰𑒯 𑒧𑓀𑒑𑒪।
𑒮𑒱𑒠𑓂𑒡 𑒣𑒳𑒩𑒳𑒭।
𑒁𑒏𑒰𑒬𑒧𑒹 𑒥𑒱𑒢 𑒐𑒳𑒙𑓂𑒙𑒲𑒏 𑒡𑒼𑒞𑒲 𑒙𑒿𑒑𑒻𑒞 𑒕𑒪𑒰𑒯, 𑒮𑒳𑒐𑒪𑒰 𑒣𑒩 𑒅𑒞𑒰𑒩𑒻𑒞 𑒕𑒪𑒰𑒯।
𑒥𑒯𑒳𑒩𑒰 𑒑𑒰𑒕 𑒯𑒿𑒏𑒻𑒞 𑒕𑒪𑒱, 𑒖𑒏𑒩𑒰𑒮𑒿 𑒗𑒑𑒛𑓃𑒰 𑒦𑒹𑒪 𑒍𑒏𑒩𑒰 𑒮𑒳𑒑𑓂𑒑𑒰 𑒥𑒢𑒰 𑒣𑒼𑒮𑒱 𑒪𑒻𑒞 𑒕𑒪𑒲𑒯।
𑒏𑒧𑒪𑒰 𑒏𑒰𑒞𑒧𑒹 𑒩𑒯𑒻𑒞 𑒕𑒪𑒰𑒯 𑒂 𑒦𑒖𑒻𑒞 𑒕𑒪𑒰𑒯-
𑒏𑒧𑒪𑒹𑒏 𑒂𑒮𑒢, 𑒍𑒯𑒲𑒧𑒹 𑒥𑒰𑒮 𑒯𑒹 𑒏𑒧𑒪𑒰 𑒧𑒻𑒨𑓂𑒨𑒰।
𑒥𑒯𑒳𑒩𑒰 𑒫𑒩𑒏𑒹𑒿 𑒧𑒰𑒩𑒱 𑒮𑒲𑒐𑒢𑒹 𑒕𑒪 𑒖𑒰𑒠𑒴। 𑒩𑒰𑒖𑒏𑒳𑒧𑒰𑒩𑒏 𑒫𑒱𑒫𑒰𑒯𑒏 𑒣𑓂𑒩𑒮𑓂𑒞𑒰𑒫𑒏𑒹𑒿 𑒢𑒯𑒱 𑒚𑒳𑒏𑒩𑒰 𑒮𑒏𑒪𑒱 𑒧𑒳𑒠𑒰। 𑒥𑒩𑒱𑒨𑒰𑒞𑒲 𑒠𑒩𑒥𑒖𑓂𑒖𑒰 𑒪𑒰𑒑𑒪 𑒞𑒿 𑒦𑓄 𑒑𑒹𑒪𑒻𑒏 𑒏𑒯𑒰 𑒮𑒳𑒢𑒲 𑒂 𑒮𑒦𑒏𑒹𑒿 𑒥𑒢𑒰 𑒠𑒹𑒪𑒏 𑒍 𑒥𑒞𑓂𑒞𑒳।
𑒧𑓀𑒞𑓂𑒩𑒲 𑒧𑒪𑓂𑒪𑒏 𑒋𑒏 𑒂𑒿𑒐𑒱𑒏 𑒩𑒼𑒬𑓂𑒢𑒲 𑒐𑒞𑒧।
𑒂𑒯𑒱 𑒩𑒹 𑒥𑒰।
𑒫𑓂𑒨𑒰𑒣𑒰𑒩𑒲 𑒖𑒨𑒮𑒱𑓀𑒯 𑒕𑒪 𑒧𑒼𑒯𑒱𑒞 𑒧𑒯𑒳𑒩𑒰𑒏 𑒥𑒹𑒙𑒲 𑒣𑒩, 𑒍𑒏𑒩𑒹 𑒐𑒛𑓂𑒨𑓀𑒞𑓂𑒩।
𑒂𑒯𑒱 𑒩𑒹 𑒥𑒰।
𑒑𑒳𑒩𑒴 𑒪𑒑 𑒑𑒹𑒪 𑒩𑒰𑒖𑒏𑒳𑒧𑒰𑒩 𑒂 𑒂𑒠𑒹𑒬 𑒦𑒹𑒪𑒻𑒏, 𑒖𑒼 𑒏𑒰𑒧𑒰𑒐𑓂𑒨𑒰, 𑒮𑒲𑒐𑒨 𑒪𑒹𑒪 𑒭𑒙𑓂 𑒢𑒵𑒞𑓂𑒨 𑒂 𑒖𑒰𑒠𑒴।
𑒔𑒝𑓂𑒛𑒱𑒏𑒰 𑒧𑓀𑒠𑒱𑒩𑒧𑒹 𑒨𑒼𑒑𑒱𑒢𑒲𑒮𑒿 𑒭𑒙𑓂𑒢𑒵𑒞𑓂𑒨 𑒮𑒱𑒐𑒪𑒏 𑒂 𑒂𑒠𑒹𑒬 𑒦𑒹𑒪𑒻𑒏 𑒮𑒩𑓂𑒩𑒻𑒨𑒰 𑒑𑓂𑒩𑒰𑒧𑒏 𑒦𑒳𑒫𑒢 𑒧𑒼𑒯𑒱𑒢𑒲𑒮𑒿 𑒭𑒙𑓂 𑒢𑒵𑒞𑓂𑒨𑒏 𑒋𑒏 𑒁𑓀𑒑 𑒮𑒲𑒐𑒥𑒰𑒏।
𑒍𑒯𑒱 𑒑𑒰𑒧𑒏 𑒮𑒱𑒠𑓂𑒡 𑒠𑒹𑒫𑒲 𑒩𑒯𑒟𑒱 𑒫𑒰𑒑𑒹𑒬𑓂𑒫𑒩𑒲।
𑒢𑒩𑒥𑒪𑒱 𑒔𑒜𑒻𑒞 𑒕𑒪 𑒍𑒞𑒋। 𑒠𑒻𑒞𑓂𑒨 𑒁𑒥𑒻𑒞 𑒕𑒪 𑒍𑒞𑒋।
𑒮𑒱𑒐𑒪𑒏 𑒩𑒰𑒖𑒏𑒳𑒧𑒰𑒩 𑒮𑒱𑒠𑓂𑒡 𑒢𑒵𑒞𑓂𑒨 𑒁𑒢𑒯𑒠 𑒂 𑒂𑒖𑓂𑒘𑒰 𑒔𑒏𑓂𑒩।
𑒏𑒩𑒱𑒨𑒰 𑒖𑒰𑒠𑒴𑒏𑒹𑒿 𑒏𑒰𑒙𑒨 𑒥𑒪𑒰 𑒧𑓀𑒞𑓂𑒩 𑒤𑒳𑒏𑒪𑒏 𑒩𑒰𑒖𑒏𑒳𑒧𑒰𑒩𑒏 𑒏𑒰𑒢𑒧𑒹।
𑒏𑒧𑒪𑒰 𑒥𑒪𑒰𑒢 𑒪𑒑 𑒂𑒋𑒪 𑒩𑒰𑒖𑒏𑒳𑒧𑒰𑒩।
𑒥𑒯𑒳𑒩𑒰 𑒮𑒳𑒐𑒹𑒪𑒏 𑒡𑒰𑒩𑒏 𑒣𑒰𑒢𑒱।
𑒩𑒰𑒖𑒰 𑒣𑒞𑒰 𑒪𑒑𑒹𑒪𑒏 𑒖𑒴𑒏𑒱𑒨𑒰𑒮𑒿, 𑒁𑒢𑒪𑒏 𑒥𑒯𑒳𑒩𑒰𑒏𑒹𑒿। 𑒧𑒳𑒠𑒰 𑒍 𑒞𑒿 𑒪𑒑𑒰 𑒠𑒹𑒪𑒏 𑒠𑒼𑒭 𑒩𑒰𑒖𑒏𑒳𑒧𑒰𑒩 𑒣𑒩। 𑒨𑒖𑓂𑒘 𑒦𑒹𑒪 𑒞𑒻𑒨𑒼 𑒏𑒧𑒪𑒰𑒧𑒹 𑒣𑒰𑒢𑒱 𑒢𑒯𑒱 𑒂𑒋𑒪, 𑒢𑒙𑒳𑒂 𑒣𑒚𑒹𑒪𑒏 𑒮𑒦𑒙𑒰 𑒣𑒰𑒢𑒱𑒏𑒹𑒿 𑒣𑒞𑒰𑒪?
𑒢𑒙𑒳𑒂𑒏𑒹𑒿 𑒣𑒏𑒛𑓃𑒱 𑒏𑒨 𑒂𑒢𑒪 𑒑𑒹𑒪। 𑒍 𑒁𑒣𑒢 𑒢𑒵𑒞𑓂𑒨𑒮𑒿 𑒖𑒪𑒰𑒖𑒪 𑒏𑒹𑒪𑒏 𑒏𑒧𑒪𑒰𑒏𑒹𑒿।𑒧𑒳𑒠𑒰 𑒏𑒯𑒪𑒏 𑒥𑒯𑒳𑒩𑒰𑒏𑒹𑒿 𑒧𑒰𑒤𑒲 𑒠𑒱𑒨𑒾𑒏।
𑒥𑒯𑒳𑒩𑒰 𑒏𑒯𑒪𑒏 𑒂𑒥 𑒞𑒼𑒿 𑒦𑒹𑒪𑒯 𑒯𑒧𑒩 𑒥𑒹𑒙𑒲𑒏 𑒨𑒼𑒑𑓂𑒨।
𑒂𑒥𑒯 𑒥𑒩𑒱𑒨𑒰𑒞𑒲 𑒪𑓄 𑒏𑒋।
𑒢𑒙𑒳𑒂 𑒥𑒩𑒱𑒨𑒰𑒞𑒲 𑒪𑓄 𑒏𑓄 𑒣𑒯𑒳𑒿𑒔𑒪।
𑒞𑒲𑒢 𑒙𑒰 𑒣𑒰𑒢 𑒁𑒋𑒪𑒻𑒏, 𑒋𑒏 𑒏𑒧𑒪𑒰𑒏 𑒣𑒰𑒢𑒱𑒏 𑒯𑒹𑒞𑒳, 𑒠𑒼𑒮𑒩 𑒥𑒯𑒳𑒩𑒰𑒏𑒹𑒿 𑒧𑒰𑒤 𑒏𑒩𑒥𑒰𑒏

𑒯𑒹𑒞𑒳।
𑒂 𑒞𑒹𑒮𑒩 𑒍𑒏𑒩 𑒥𑒹𑒙𑒲𑒮𑒿 𑒫𑓂𑒨𑒰𑒯 𑒏𑒩𑒥𑒰𑒏 𑒯𑒹𑒞𑒳।
𑒞𑒲𑒢𑒴𑒙𑒰 𑒣𑒰𑒢 𑒅𑒚𑒹𑒪𑒏 𑒢𑒙𑒳𑒂 𑒂 𑒬𑒳𑒩𑒴 𑒦𑒹𑒪 𑒑𑒲𑒞-𑒢𑒰𑒠।
𑒣𑒱𑒨𑒰𑒮 𑒪𑒑𑒪𑒻𑒏 𑒢𑒙𑒳𑒂𑒏𑒹𑒿 𑒬𑒱𑒭𑓂𑒨 𑒗𑒱𑒪𑒧𑒱𑒪𑒏𑒹𑒿 𑒣𑒚𑒹𑒪𑒏 𑒃𑒢𑒰𑒩 𑒣𑒩।
𑒛𑒼𑒩𑒲 𑒕𑒼𑒙 𑒦𑒋 𑒑𑒹𑒪𑒻𑒏। 𑒁𑒣𑒢𑒹 𑒑𑒹𑒪 𑒢𑒙𑒳𑒂 𑒂 𑒛𑒼𑒩𑒲 𑒣𑒻𑒒 𑒦𑓄 𑒑𑒹𑒪𑒻𑒏।
𑒤𑒴𑒪𑒧𑒞𑒲 𑒕𑒪𑒱 𑒍𑒞𑒋, 𑒣𑒞𑒱𑒏 𑒣𑓂𑒩𑒞𑒱𑒦𑒰𑒮𑒿 𑒣𑓂𑒩𑒮𑒢𑓂𑒢 𑒕𑒪𑒱 𑒍।
𑒧𑒪𑓂𑒪𑒏 𑒂𑒿𑒐𑒱 𑒚𑒲𑒏 𑒏𑒋𑒪𑒏 𑒥𑒯𑒳𑒩𑒰।
𑒏𑒧𑒪𑒰 𑒣𑒯𑒳𑒿𑒔𑒪 𑒏𑒢𑒱𑒨𑒰𑒿𑒏 𑒮𑓀𑒑 𑒢𑒙𑒳𑒂।
𑒧𑒳𑒠𑒰 𑒂𑒯𑒱 𑒩𑒹𑒥𑒰।
𑒢𑒙𑒳𑒂𑒏𑒹𑒿 𑒔𑒏𑓂𑒏𑒴 𑒧𑒰𑒩𑒪𑒏 𑒥𑒯𑒳𑒩𑒰𑒮𑒿 𑒠𑒴𑒩 𑒦𑒹𑒪 𑒍𑒏𑒩 𑒬𑒱𑒭𑓂𑒨।
𑒧𑒳𑒠𑒰 𑒢𑒙𑒳𑒂 𑒔𑒜𑓃𑒹𑒢𑒹 𑒕𑒪 𑒣𑒙𑒼𑒩 𑒏𑒧𑒪𑒰 𑒧𑒻𑒨𑓂𑒨𑒰𑒏𑒹𑒿।
𑒏𑒧𑒪𑒰𑒏 𑒡𑒰𑒩 𑒐𑒴𑒢𑒹-𑒐𑒴𑒢𑒰𑒧𑒹।
𑒧𑒳𑒠𑒰 𑒏𑒰𑒧𑒰𑒐𑓂𑒨𑒰𑒏 𑒖𑒠𑒴𑒑𑒩𑒢𑒲 𑒁𑒋𑒪𑒲𑒯 𑒂 𑒖𑒲𑒫𑒲𑒞 𑒏𑒋𑒪𑒢𑓂𑒯𑒱 𑒢𑒙𑒳𑒂𑒏𑒹𑒿।
𑒠𑒳𑒬𑓂𑒧𑒢𑒏 𑒥𑒪𑒱 𑒔𑒜𑓃𑒹𑒪𑒏 𑒍 𑒏𑒧𑒪𑒰𑒏𑒹𑒿।

𑒧𑒯𑒳𑒂 𑒒𑒙𑒫𑒰𑒩𑒱𑒢
𑒧𑒯𑒳𑒂 𑒒𑒙𑒫𑒰𑒩𑒱𑒢 𑒣𑒩𑒲 𑒖𑒹𑒏𑒰𑒿 𑒮𑒳𑒢𑓂𑒠𑒩𑒱 𑒕𑒪𑒲𑒯 𑒖𑒹𑒢𑒰 𑒑𑒴𑒟𑒪 𑒂𑒿𑒙𑒰𑒧𑒹 𑒋𑒏 𑒔𑒳𑒙𑒏𑒲 𑒏𑒹𑒮𑒩, 𑒧𑒳𑒠𑒰 𑒮𑒞𑒫𑓀𑒞𑒲 𑒕𑒪𑒲𑒯।
𑒥𑒰𑒣 𑒑𑒿𑒖𑒹𑒩𑒲 𑒬𑒩𑒰𑒥𑒲 𑒂 𑒧𑒰𑒋 𑒮𑒞𑒧𑒰𑒨, 𑒢𑒖𑒩𑒱 𑒔𑒼𑒩। 𑒒𑒩𑒧𑒹 𑒮𑒞𑒧𑒰𑒋𑒏 𑒩𑒰𑒖 𑒕𑒪।
𑒮𑒼𑒪𑒯 𑒥𑒩𑒐𑒏 𑒦𑒋 𑒑𑒹𑒪 𑒩𑒯𑒟𑒱 𑒧𑒳𑒠𑒰 𑒯𑒳𑒢𑒏𑒩 𑒥𑒱𑒨𑒰𑒯𑒏 𑒔𑒱𑓀𑒞𑒰 𑒏𑒏𑒩𑒼 𑒢𑒯𑒱 𑒩𑒯𑒻𑒏। 𑒣𑒩𑒧𑒰𑒢 𑒢𑒠𑒲𑒏 𑒣𑒳𑒩𑒢𑒏𑒰 𑒒𑒰𑒙𑒏 𑒧𑒪𑒰𑒯 𑒣𑓂𑒩𑓂𑒩𑒩𑓂𑒟𑒢𑒰 𑒏𑒩𑒻𑒞 𑒕𑒟𑒱 𑒖𑒹 𑒧𑒯𑒳𑒂𑒏 𑒢𑒰𑒫𑒏𑒹𑒿 𑒏𑒱𑒢𑒰𑒩 𑒪𑒑𑒰 𑒠𑒱𑒨𑒾𑒏।
𑒮𑒰𑒍𑒢-𑒦𑒰𑒠𑒫𑒏, 𑒦𑒩𑒪 𑒡𑒰𑒩,
𑒏𑒧 𑒫𑒨𑒮𑒏 𑒧𑒯𑒳𑒂 𑒢𑒯𑒱 𑒖𑒰𑒆,
𑒋𑒯𑒱 𑒩𑒰𑒞𑒱 𑒐𑒹𑒥𑒨 𑒪𑒹𑒪 𑒢𑒰𑒯।
𑒋𑒯𑒢𑒹 𑒮𑒰𑒍𑒢-𑒦𑒰𑒠𑒫𑒏 𑒩𑒰𑒞𑒱𑒧𑒹 𑒮𑒞𑒧𑒰𑒋, 𑒒𑒰𑒙 𑒣𑒩 𑒅𑒞𑒩𑒪 𑒫𑒝𑒱𑒏𑓂 𑒏𑒹𑒿 𑒞𑒹𑒪 𑒪𑒑𑒹𑒥𑒰𑒏 𑒯𑒹𑒞𑒳 𑒧𑒯𑒳𑒂𑒏𑒹𑒿 𑒣𑒚𑒥𑒋 𑒔𑒰𑒯𑒻𑒞 𑒁𑒕𑒱 𑒂 𑒍 𑒖𑒰𑒋 𑒢𑒯𑒱 𑒔𑒰𑒯𑒻𑒞 𑒁𑒕𑒱। 𑒁𑒣𑒢 𑒧𑒰𑒋𑒏𑒹𑒿 𑒧𑒼𑒢 𑒣𑒰𑒛𑓃𑒻𑒞 𑒁𑒕𑒱।
𑒢𑒼𑒢 𑒔𑒙𑒰 𑒏𑒹𑒿 𑒏𑒱𑒋 𑒢𑒯𑒱 𑒧𑒰𑒩𑒪𑒿𑒯,
𑒣𑒼𑒮𑒪𑒿𑒯 𑒋𑒯𑒱 𑒠𑒱𑒢 𑒐𑒰𑒞𑒱𑒩।
𑒧𑒳𑒠𑒰 𑒮𑒞𑒧𑒰𑒋 𑒮𑒰𑒍𑒢-𑒦𑒰𑒠𑒫𑒏 𑒩𑒰𑒞𑒱𑒧𑒹 𑒣𑒟𑒱𑒏𑒏𑒹𑒿 𑒒𑒰𑒙 𑒣𑒰𑒩 𑒏𑒩𑒥𑒰𑒥𑒋 𑒪𑒹𑒪 𑒧𑒯𑒳𑒂𑒏𑒹𑒿 𑒣𑒚𑒰 𑒠𑒹𑒪𑒏। 𑒧𑒯𑒳𑒂 𑒥𑒱𑒠𑒰 𑒦𑒹𑒪𑒱 𑒂 𑒥𑒲𑒔 𑒩𑒮𑓂𑒞𑒰𑒧𑒹 𑒁𑒣𑒢 𑒮𑒐𑒲-𑒥𑒯𑒱𑒢𑒣𑒰 𑒤𑒴𑒪𑒧𑒞𑒲𑒮𑒿 𑒦𑒩𑒱 𑒩𑒰𑒞𑒱 𑒑𑒣 𑒏𑒩𑒻𑒞 𑒩𑒯𑒪𑒱।
𑒏𑒹𑒯𑒢 𑒧𑒰𑒋 𑒁𑒕𑒱 𑒖𑒹 𑒩𑒰𑒞𑒱𑒧𑒹 𑒒𑒰𑒙 𑒣𑒰𑒩 𑒏𑒩𑒹𑒥𑒰𑒏 𑒪𑒹𑒪 𑒏𑒯𑒻𑒞 𑒁𑒕𑒱। 𑒧𑒰𑒨 𑒄𑒯𑒼 𑒏𑒯𑒪𑒏 𑒖𑒹 𑒣𑒟𑒱𑒏 𑒣𑒰𑒃𑒥𑒪𑒰 𑒯𑒼𑒋 𑒂 𑒥𑒴𑒜𑓃 𑒯𑒼𑒋 𑒞𑒿 𑒍𑒏𑒩𑒰 𑒞𑒹𑒪-𑒧𑒰𑒪𑒱𑒮 𑒏𑒩𑒥𑒰𑒧𑒹 𑒏𑒼𑒢𑒼 𑒯𑒩𑓂𑒖 𑒢𑒯𑒱। 𑒍𑒏𑒩 𑒧𑒼𑒢𑒧𑒹 𑒖𑒹 𑒯𑒼𑒁𑒋, 𑒦𑒹𑒪 𑒞𑒿 𑒍 𑒣𑒱𑒞𑒹 𑒮𑒧𑒰𑒢।𑒍𑒏𑒩𑒰 𑒖𑒹𑒥𑒲𑒮𑒿 𑒔𑒰𑒩𑒱 𑒣𑒰𑒃 𑒢𑒱𑒏𑒰𑒪𑒱 𑒪𑒹𑒪 𑒖𑒰𑒋𑒨, 𑒁𑒯𑒲𑒧𑒹 𑒥𑒳𑒡𑒱𑒨𑒰𑒩𑒲 𑒁𑒕𑒱।
𑒤𑒴𑒪𑒧𑒞𑒲 𑒏𑒯𑒪𑒏- 𑒒𑒥𑒩𑒰𑒨𑒥 𑒢𑒯𑒱। 𑒖𑒩𑒹𑒢𑒹 𑒩𑒯𑒴 𑒣𑓂𑒩𑒹𑒧𑒏 𑒂𑒑𑒱, 𑒍𑒏𑒩𑒰 𑒪𑒹𑒪 𑒖𑒹 𑒧𑒼𑒩𑓀𑒑𑒧𑒹 𑒂𑒿𑒑𑒳𑒩 𑒣𑒩 𑒠𑒱𑒢 𑒑𑒰𑒢𑒱 𑒩𑒯𑒪 𑒁𑒕𑒱।
𑒧𑒼𑒩𑓀𑒑𑒏 𑒢𑒰𑒧 𑒮𑒳𑒢𑒱 𑒧𑒯𑒳𑒂 𑒅𑒠𑒰𑒮 𑒦𑒋 𑒑𑒹𑒪𑒱। 𑒍 𑒤𑒰𑒑𑒳𑒢𑒧𑒹 𑒂𑒨𑒞 𑒑𑓄।


𑒦𑒼𑒩𑒯𑒩𑒥𑒰𑒧𑒹 𑒍 𑒑𑒰𑒧𑒣𑒩 𑒣𑒯𑒳𑒿𑒔𑒪 𑒂 𑒧𑒰𑒋 𑒠𑒮 𑒥𑒰𑒞 𑒏𑒯𑒪𑒏𑒻𑒏। 𑒥𑒰𑒣 𑒢𑒬𑒰𑒧𑒹 𑒂𑒋𑒪 𑒞𑒿 𑒧𑒰𑒋 𑒍𑒏𑒩𑒼 𑒪𑒰𑒞 𑒧𑒰𑒩𑒱 𑒦𑒑𑒰 𑒠𑒹𑒪𑒏𑒻𑒏।
𑒞𑒐𑒢𑒹 𑒯𑒩𑒏𑒰𑒩𑒰 𑒂𑒋𑒪 𑒂 𑒧𑒰𑒋𑒏 𑒏𑒰𑒢𑒧𑒹 𑒮𑓀𑒠𑒹𑒬 𑒠𑒹𑒪𑒏। 𑒧𑒯𑒳𑒂 𑒧𑒰𑒋𑒏𑒹𑒿 𑒏𑒯𑒪𑒏 𑒖𑒹 𑒁𑒯𑒰𑒿 𑒖𑒹 𑒏𑒯𑒥 𑒮𑒹 𑒯𑒧 𑒏𑒩𑒥। 𑒫𑒝𑒱𑒏𑒏 𑒂𑒠𑒧𑒲 𑒂𑒨𑒪 𑒕𑒪, 𑒍𑒏𑒩𑒰 𑒮𑓀𑒑 𑒧𑒯𑒳𑒂 𑒒𑒰𑒙 𑒣𑒩 𑒣𑒯𑒳𑒿𑒔𑒪𑒱। 𑒫𑒝𑒱𑒏 𑒠𑒴 𑒮𑒱𑒣𑒰𑒯𑒲𑒏 𑒮𑓀𑒑 𑒢𑒰𑒫𑒧𑒹 𑒥𑒻𑒮𑒪। 𑒧𑒯𑒳𑒂 𑒢𑒰𑒫 𑒐𑒹𑒥𑒨 𑒪𑒰𑒑𑒪𑒱। 𑒧𑒳𑒠𑒰 𑒍𑒏𑒩𑒰 𑒢𑒯𑒱 𑒥𑒴𑒗𑒪 𑒩𑒯𑒋 𑒖𑒹 𑒍𑒏𑒩𑒰 𑒥𑒹𑒔𑒱 𑒠𑒹𑒪 𑒑𑒹𑒪 𑒕𑒻। 𑒮𑒱𑒣𑒰𑒯𑒲 𑒍𑒏𑒩𑒰𑒮𑒿 𑒣𑒞𑒫𑒰𑒩𑒱 𑒕𑒲𑒢𑒱 𑒪𑒹𑒪𑒏। 𑒮𑒾𑒠𑒰𑒑𑒩 𑒍𑒏𑒩𑒰 𑒏𑒼𑒩𑒰𑒧𑒹 𑒥𑒻𑒮𑒰𑒥𑒨 𑒔𑒰𑒯𑒪𑒏 𑒞𑒿 𑒍 𑒕𑒩𑒣𑒙𑒰𑒨 𑒪𑒰𑒑𑒪𑒱। 𑒮𑒱𑒣𑒰𑒯𑒲 𑒏𑒯𑒪𑒏 𑒖𑒹 𑒮𑒦𑒙𑒰 𑒣𑒰𑒃 𑒔𑒳𑒏𑒰 𑒠𑒹𑒪 𑒑𑒹𑒪 𑒁𑒕𑒱, 𑒁𑒯𑒰𑒿𑒏𑒹𑒿 𑒏𑒼𑒢𑒼 𑒧𑒿𑒑𑒢𑒲𑒧𑒹 𑒢𑒯𑒱 𑒪𑒋 𑒖𑒰 𑒩𑒯𑒪 𑒕𑒟𑒱।
𑒧𑒯𑒳𑒂 𑒮𑓂𑒟𑒱𑒩 𑒦𑒋 𑒑𑒹𑒪𑒲𑒯। 𑒍 𑒮𑒦 𑒥𑒳𑒗𑒪𑒏 𑒖𑒹 𑒧𑒯𑒳𑒂 𑒧𑒰𑒢𑒱 𑒑𑒹𑒪 𑒁𑒕𑒱। 𑒞𑒐𑒢𑒹 𑒧𑒯𑒳𑒂 𑒡𑒰𑒩𑒧𑒹 𑒏𑒴𑒠𑒱 𑒣𑒛𑓃𑒪𑒱। 𑒅𑒪𑓂𑒙𑒰 𑒡𑒰𑒩𑒧𑒹 𑒧𑒼𑒩𑓀𑒑 𑒠𑒱𑒬𑒱 𑒢𑒱𑒏𑒪𑒱 𑒖𑒰𑒋 𑒔𑒰𑒯𑒪𑒏 𑒧𑒯𑒳𑒂, 𑒖𑒞𑒨 𑒍𑒏𑒩 𑒣𑓂𑒩𑒹𑒧𑒲 𑒁𑒕𑒱। 𑒍𑒏𑒩𑒰 𑒪𑒹𑒪 𑒮𑒰𑒞 𑒣𑒰𑒪𑒏 𑒢𑒰𑒫 𑒪𑒹𑒢𑒹।
𑒮𑒾𑒠𑒰𑒑𑒩𑒏 𑒕𑒼𑒙𑒏𑒰 𑒮𑒱𑒣𑒰𑒯𑒲 𑒧𑒯𑒳𑒂𑒏𑒹𑒿 𑒣𑓂𑒩𑒹𑒧 𑒏𑒩𑒋 𑒪𑒰𑒑𑒪 𑒕𑒪, 𑒍𑒯𑒼 𑒏𑒴𑒠𑒱 𑒑𑒹𑒪 𑒏𑒼𑒬𑒱𑒏𑒲𑒏 𑒡𑒰𑒩𑒧𑒹, 𑒠𑒴𑒢𑒴 𑒛𑒴𑒥𑒱 𑒑𑒹𑒪।
𑒁𑒐𑒢𑒼 𑒮𑒰𑒍𑒢-𑒦𑒰𑒠𑒫𑒏 𑒡𑒰𑒩𑒧𑒹 𑒏𑒼𑒢𑒼 𑒒𑒙𑒫𑒰𑒩𑒏𑒹𑒿 𑒏𑒐𑒢𑒼 𑒠𑒹𑒐𑒰 𑒣𑒛𑓃𑒻𑒞 𑒕𑒻 𑒧𑒯𑒳𑒂। 𑒏𑒼𑒢𑒼 𑒐𑒱𑒮𑓂𑒮𑒰 𑒫𑒔𑒢𑒯𑒰𑒩𑒏𑒹𑒿 𑒠𑒹𑒐𑒰 𑒖𑒰𑒃𑒞 𑒁𑒕𑒱 𑒍 𑒂 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱-
𑒋𑒏𑒙𑒰 𑒕𑒪𑒲𑒯 𑒧𑒯𑒳𑒂 𑒒𑒙𑒫𑒰𑒩𑒱𑒢..............................।

𑒛𑒰𑒏𑒴 𑒩𑒾𑒯𑒱𑒝𑒹𑒨
𑒧𑒑𑒡 𑒠𑒹𑒬𑒧𑒹 𑒁𑒬𑒼𑒏𑒏 𑒣𑒱𑒞𑒰 𑒥𑒱𑒧𑓂𑒥𑒱𑒮𑒰𑒩𑒏 𑒩𑒰𑒖𑓂𑒨 𑒕𑒪। 𑒮𑓀𑒣𑒴𑒩𑓂𑒝 𑒬𑒰𑓀𑒞𑒱 𑒫𑓂𑒨𑒰𑒣𑓂𑒞 𑒕𑒪 𑒧𑒳𑒠𑒰 𑒋𑒏𑒙𑒰 𑒛𑒰𑒏𑒴 𑒩𑒾𑒯𑒱𑒝𑒹𑒨𑒏 𑒂𑒞𑓀𑒏 𑒕𑒪।
𑒩𑒾𑒯𑒱𑒝𑒹𑒨𑒏 𑒣𑒱𑒞𑒰 𑒩𑒯𑒋 𑒛𑒰𑒏𑒴 𑒪𑒾𑒯𑒐𑒳𑒩। 𑒧𑒩𑒻𑒞-𑒧𑒩𑒻𑒞 𑒍 𑒏𑒯𑒱 𑒑𑒹𑒪 𑒖𑒹 𑒧𑒯𑒰𑒫𑒲𑒩 𑒮𑓂𑒫𑒰𑒧𑒲𑒏 𑒣𑓂𑒩𑒫𑒔𑒢 𑒢𑒯𑒱 𑒮𑒳𑒢𑒋 𑒂 𑒖𑓂𑒨𑒼𑒿 𑒏𑒞𑒍 𑒣𑓂𑒩𑒫𑒔𑒢 𑒯𑒼𑒁𑒨 𑒞𑒿 𑒁𑒣𑓂𑒣𑒢 𑒏𑒰𑒢 𑒥𑒢𑓂𑒠 𑒏𑓄 𑒪𑒋, 𑒁𑒢𑓂𑒨𑒟𑒰 𑒥𑒩𑓂𑒥𑒰𑒠𑒲 𑒢𑒱𑒬𑓂𑒔𑒱𑒞 𑒯𑒼𑒋𑒞।
𑒩𑒾𑒯𑒱𑒝𑒹𑒨 𑒧𑒰𑒞𑓂𑒩 𑒣𑒰𑒃 𑒥𑒪𑒰 𑒏𑒹𑒿 𑒪𑒳𑒙𑒻𑒞 𑒕𑒪 𑒂 𑒑𑒩𑒲𑒥𑒏𑒹𑒿 𑒥𑒿𑒙𑒻𑒞 𑒕𑒪। 𑒞𑒰𑒯𑒱 𑒠𑓂𑒫𑒰𑒩𑒹 𑒑𑒰𑒧𑒏 𑒪𑒼𑒏 𑒍𑒏𑒩 𑒧𑒠𑒞𑒱 𑒏𑒩𑒻𑒞 𑒩𑒯𑒋 𑒂’ 𑒍 𑒣𑒏𑒛𑓃𑒪 𑒢𑒯𑒱 𑒖𑒰 𑒮𑒏𑒪 𑒕𑒪।
𑒋𑒏 𑒥𑒹𑒩 𑒞𑒿 𑒍 𑒁𑒣𑓂𑒣𑒢 𑒮𑓀𑒑𑒲𑒏 𑒮𑓀𑒑 𑒫𑒰𑒙𑒱𑒏𑒰𑒧𑒹 𑒣𑒰𑒙𑒪𑒱𑒣𑒳𑒞𑓂𑒩𑒏 𑒮𑒦𑒮𑒿 𑒣𑒻𑒒 𑒮𑒹𑒚𑒏 𑒣𑒳𑒞𑒼𑒯𑒳 𑒧𑒠𑒢𑒫𑒞𑒲𑒏 𑒁𑒣𑒯𑒩𑒝 𑒏𑒋 𑒪𑒹𑒪𑒏, 𑒖𑒐𑒢 𑒍𑒏𑒩 𑒣𑒞𑒱 𑒤𑒴𑒪 𑒪𑒹𑒥𑒰𑒏 𑒯𑒹𑒞𑒳 𑒑𑒹𑒪 𑒩𑒯𑒋। 𑒖𑒐𑒢 𑒍𑒏𑒩 𑒣𑒞𑒱 𑒂𑒋𑒪 𑒞𑒿 𑒩𑒾𑒯𑒱𑒝𑒹𑒨𑒏 𑒮𑓀𑒑𑒲 𑒍𑒏𑒩𑒰 𑒑𑒪𑒞 𑒖𑒰𑒢𑒏𑒰𑒩𑒲 𑒠𑓄 𑒦𑓂𑒩𑒧𑒱𑒞 𑒏𑒋𑒪𑒏।
𑒍𑒏𑒩𑒰 𑒥𑒰𑒠 𑒮𑒳𑒦𑒠𑓂𑒩 𑒮𑒹𑒚𑒏 𑒣𑒳𑒞𑓂𑒩𑒏 𑒫𑒱𑒫𑒰𑒯 𑒩𑒯𑒋। 𑒥𑒩𑒰𑒞𑒲 𑒖𑒐𑒢 𑒒𑒳𑒩𑒱 𑒩𑒯𑒪 𑒕𑒪 𑒞𑒐𑒢 𑒩𑒾𑒯𑒱𑒝𑒹𑒨 𑒮𑒹𑒚𑒰𑒢𑒲 𑒧𑒢𑒼𑒩𑒧𑒰𑒏 𑒦𑒹𑒭 𑒥𑒢𑒹𑒪𑒏 𑒂 𑒍𑒏𑒩 𑒮𑓀𑒑𑒲 𑒢𑒩𑓂𑒞𑓂𑒞𑒏 𑒥𑒢𑒱 𑒑𑒹𑒪। 𑒢𑒏𑒪𑒲 𑒢𑒩𑓂𑒞𑓂𑒞𑒏 𑒖𑒐𑒢 𑒢𑒰𑒔𑒋 𑒪𑒰𑒑𑒪 𑒞𑒐𑒢 𑒩𑒾𑒯𑒱𑒝𑒹𑒨 𑒦𑒲𑒛𑓃𑒧𑒹 𑒏𑒣𑒛𑓃𑒰𑒏 𑒮𑒰𑒿𑒣 𑒕𑒼𑒛𑓃𑒱 𑒠𑒹𑒪𑒏। 𑒩𑒾𑒯𑒱𑒝𑒹𑒨 𑒑𑒯𑒢𑒰𑒮𑒿 𑒪𑒰𑒠𑒪 𑒫𑒩𑒏𑒹𑒿 𑒅𑒚𑒰 𑒢𑒱𑒣𑒞𑓂𑒞𑒰 𑒦𑒋 𑒑𑒹𑒪।
𑒩𑒰𑒖𑒰 𑒬𑒯𑒩𑒏 𑒏𑒼𑒞𑒫𑒰𑒪𑒏𑒹𑒿 𑒥𑒖𑒹𑒪𑒏। 𑒍 𑒞𑒿 𑒩𑒾𑒯𑒱𑒝𑒹𑒨𑒏𑒹𑒿 𑒣𑒏𑒛𑓃𑒥𑒰𑒧𑒹 𑒁𑒮𑒧𑒩𑓂𑒟𑒞𑒰 𑒫𑓂𑒨𑒏𑓂𑒞 𑒏𑒋𑒪𑒏 𑒂 𑒏𑒼𑒞𑒫𑒰𑒪𑒲 𑒕𑒼𑒛𑓃𑒥𑒰𑒏 𑒥𑒰𑒞𑒼 𑒏𑒋𑒪𑒏। 𑒧𑓀𑒞𑓂𑒩𑒲 𑒁𑒦𑒨𑒏𑒳𑒧𑒰𑒩 𑒣𑒰𑒿𑒔 𑒠𑒱𑒢𑒧𑒹 𑒛𑒰𑒏𑒴 𑒩𑒾𑒯𑒱𑒝𑒹𑒨𑒏𑒹𑒿 𑒣𑒏𑒛𑓃𑒱 𑒏𑒋 𑒁𑒢𑒥𑒰𑒏 𑒑𑒣 𑒏𑒯𑒪𑒏। 𑒩𑒰𑒖𑒰 𑒞𑒞𑒹𑒏 𑒞𑒰𑒧𑒮𑒧𑒹 𑒕𑒪𑒰𑒯 𑒖𑒹 𑒣𑒰𑒿𑒔 𑒠𑒱𑒢𑒏𑒰 𑒥𑒰𑒠 𑒛𑒰𑒏𑒴 𑒩𑒾𑒯𑒱𑒝𑒹𑒨𑒏𑒹𑒿 𑒢𑒯𑒱 𑒁𑒢𑒪𑒰 𑒅𑒞𑓂𑒞𑒩 𑒁𑒦𑒨𑒏𑒳𑒧𑒰𑒩𑒏𑒹𑒿 𑒑𑒩𑒠𑒢𑒱 𑒏𑒰𑒙𑒱 𑒪𑒹𑒥𑒰𑒏 𑒥𑒰𑒞 𑒏𑒯𑒪𑒢𑓂𑒯𑒱।
𑒛𑒰𑒏𑒴 𑒩𑒾𑒯𑒱𑒝𑒹𑒨𑒏𑒹𑒿 𑒮𑒦 𑒥𑒰𑒞𑒏 𑒣𑒞𑒰 𑒔𑒪𑒱 𑒑𑒹𑒪 𑒕𑒪𑒻𑒏। 𑒁𑒦𑒨𑒏𑒳𑒧𑒰𑒩 𑒖𑒰𑒮𑒴𑒮 𑒮𑒦 𑒪𑒑𑒹𑒪𑒏। 𑒩𑒾𑒯𑒱𑒝𑒹𑒨𑒏𑒹𑒿 𑒧𑒼𑒢𑒧𑒹 𑒁𑒋𑒪𑒻𑒏 𑒖𑒹 𑒮𑒹𑒚 𑒮𑒰𑒯𑒴𑒏𑒰𑒩 𑒥𑒯𑒳𑒞 𑒦𑒹𑒪 𑒂𑒥 𑒏𑒱𑒋 𑒢𑒯𑒱 𑒩𑒰𑒖𑒧𑒯𑒪𑒧𑒹 𑒛𑒏𑒻𑒞𑒲 𑒏𑒋𑒪 𑒖𑒰𑒨। 𑒍 𑒩𑒰𑒖𑒧𑒯𑒪𑒏 𑒩𑒮𑓂𑒞𑒰 𑒣𑒩 𑒔𑒪𑒱 𑒣𑒛𑓃𑒪। 𑒩𑒮𑓂𑒞𑒰𑒧𑒹 𑒫𑒰𑒙𑒱𑒏𑒰𑒧𑒹 𑒧𑒯𑒰𑒫𑒲𑒩𑒮𑓂𑒫𑒰𑒧𑒲𑒏 𑒣𑓂𑒩𑒫𑒔𑒢 𑒔𑒪𑒱 𑒩𑒯𑒪 𑒕𑒪।
𑒩𑒾𑒯𑒱𑒝𑒹𑒨 𑒞𑒳𑒩𑒞 𑒁𑒣𑒢 𑒏𑒰𑒢 𑒥𑒢𑓂𑒠 𑒏𑒋 𑒪𑒹𑒪𑒏। 𑒧𑒳𑒠𑒰 𑒞𑒐𑒢𑒹 𑒍𑒏𑒩𑒰 𑒣𑒻𑒩𑒧𑒹 𑒏𑒰𑒿𑒙 𑒑𑒩𑒱 𑒑𑒹𑒪𑒻𑒏। 𑒧𑒯𑒰𑒫𑒲𑒩 𑒮𑓂𑒫𑒰𑒧𑒲 𑒏𑒯𑒱 𑒩𑒯𑒪 𑒕𑒪𑒰𑒯-
“𑒠𑒹𑒫𑒞𑒰 𑒪𑒼𑒏𑒢𑒱𑒏𑒹𑒿 𑒏𑒯𑒱𑒨𑒼 𑒒𑒰𑒧 𑒢𑒯𑒱 𑒕𑒳𑒙𑒻𑒞 𑒕𑒢𑓂𑒯𑒱। 𑒯𑒳𑒢𑒏𑒩 𑒧𑒰𑒪𑒰𑒏 𑒤𑒴𑒪 𑒧𑒾𑒪𑒰𑒃𑒞 𑒢𑒯𑒱 𑒁𑒕𑒱, 𑒯𑒳𑒢𑒏𑒩 𑒣𑒋𑒩 𑒡𑒩𑒞𑒲 𑒣𑒩 𑒢𑒯𑒱 𑒣𑒛𑓃𑒻𑒞 𑒕𑒢𑓂𑒯𑒱 𑒂 𑒯𑒳𑒢𑒏𑒩 𑒣𑒱𑒣𑒢𑒲 𑒢𑒯𑒱 𑒐𑒮𑒻𑒞 𑒕𑒢𑓂𑒯𑒱।”
𑒞𑒰𑒫𑒞 𑒩𑒾𑒯𑒱𑒝𑒹𑒨 𑒏𑒰𑒿𑒙 𑒢𑒱𑒏𑒰𑒪𑒱 𑒏𑒰𑒢𑒏𑒹𑒿 𑒤𑒹𑒩 𑒥𑒢𑓂𑒢 𑒏𑒋 𑒪𑒹𑒪𑒏 𑒂 𑒩𑒰𑒖𑒧𑒯𑒪𑒏 𑒠𑒱𑒬𑒱 𑒥𑒱𑒠𑒰 𑒦𑒹𑒪।𑒩𑒰𑒖𑒧𑒯𑒪𑒧𑒹 𑒮𑒦 𑒣𑒯𑒩𑒹𑒠𑒰𑒩 𑒮𑒳𑒞𑒪 𑒥𑒳𑒗𑒰𑒃𑒞 𑒕𑒪। 𑒧𑒳𑒠𑒰 𑒄 𑒁𑒦𑒨𑒏𑒳𑒧𑒰𑒩𑒏 𑒔𑒰𑒪𑒱 𑒩𑒯𑒋। 𑒍𑒏𑒩 𑒖𑒰𑒮𑒴𑒮 𑒥𑒞𑒰 𑒩𑒯𑒪 𑒩𑒯𑒋 𑒖𑒹 𑒛𑒰𑒏𑒴 𑒢𑒑𑒩 𑒂 𑒧𑒯𑒪 𑒠𑒱𑒬𑒱 𑒂𑒥𑒱 𑒩𑒯𑒪 𑒁𑒕𑒱।
𑒖𑒐𑒢𑒹 𑒍 𑒧𑒯𑒪𑒧𑒹 𑒒𑒳𑒮𑒻𑒞 𑒩𑒯𑒋 𑒞𑒿 𑒣𑒯𑒩𑒹𑒠𑒰𑒩 𑒪𑒪𑒏𑒰𑒩𑒰 𑒠𑒹𑒪𑒏। 𑒍 𑒕𑒛𑓃𑒣𑒱𑒏𑒨 𑒏𑒰𑒪𑒲 𑒧𑓀𑒠𑒱𑒩 𑒧𑒹 𑒔𑒪𑒱 𑒑𑒹𑒪। 𑒮𑒱𑒣𑒰𑒯𑒲 𑒮𑒦 𑒧𑓀𑒠𑒱𑒩𑒏𑒹𑒿 𑒒𑒹𑒩𑒱 𑒪𑒹𑒪𑒏। 𑒍 𑒖𑒐𑒢 𑒠𑒹𑒐𑒪𑒏 𑒖𑒹 𑒥𑒰𑒯𑒩𑒮𑒿 𑒮𑒦 𑒒𑒹𑒩𑒢𑒹 𑒁𑒕𑒱 𑒞𑒿 𑒮𑒱𑒣𑒰𑒯𑒲𑒏 𑒧𑒡𑓂𑒨𑒮𑒿 𑒧𑓀𑒠𑒱𑒩𑒏 𑒔𑒯𑒰𑒩𑒠𑒱𑒫𑒰𑒩𑒲 𑒕𑒛𑓃𑒣𑒱 𑒑𑒹𑒪। 𑒧𑒳𑒠𑒰 𑒍𑒞𑒯𑒳 𑒮𑒱𑒣𑒰𑒯𑒲 𑒮𑒦 𑒕𑒪 𑒂 𑒍 𑒣𑒏𑒛𑓃𑒪 𑒑𑒹𑒪। 𑒩𑒰𑒖𑒰 𑒍𑒏𑒩𑒰 𑒮𑒴𑒪𑒲 𑒣𑒩 𑒔𑒜𑓃𑒹𑒥𑒰𑒏 𑒂𑒠𑒹𑒬 𑒠𑒹𑒪𑒏𑒻𑒏। 𑒧𑒳𑒠𑒰 𑒧𑓀𑒞𑓂𑒩𑒲 𑒏𑒯𑒪𑒢𑓂𑒯𑒱 𑒖𑒹 𑒥𑒱𑒢𑒰 𑒔𑒼𑒩𑒲𑒏 𑒧𑒰𑒪 𑒥𑒩𑒰𑒧𑒠 𑒏𑒹𑒢𑒹 𑒂 𑒥𑒱𑒢𑒰 𑒔𑒱𑒢𑓂𑒯𑒰𑒮𑒲𑒏 𑒋𑒏𑒩𑒰 𑒏𑒼𑒢𑒰 𑒤𑒰𑒿𑒮𑒲 𑒠𑒹𑒪 𑒖𑒰𑒋। 𑒩𑒾𑒯𑒱𑒝𑒹𑒨 𑒧𑒾𑒏𑒰 𑒠𑒹𑒐𑒱 𑒏𑒋 𑒑𑒼𑒯𑒰𑒩𑒱 𑒪𑒑𑒹𑒪𑒏 𑒖𑒹 𑒍 𑒬𑒰𑒪𑒱 𑒑𑒰𑒧𑒏 𑒠𑒳𑒩𑓂𑒑𑒰 𑒏𑒱𑒮𑒰𑒢 𑒕𑒲। 𑒍𑒏𑒩 𑒒𑒩 𑒣𑒩𑒱𑒫𑒰𑒩 𑒍𑒯𑒱 𑒑𑒰𑒧𑒧𑒹 𑒕𑒻। 𑒍 𑒞𑒿 𑒢𑒑𑒩 𑒧𑓀𑒠𑒱𑒩 𑒠𑒩𑓂𑒬𑒢𑒏 𑒯𑒹𑒞𑒳 𑒂𑒋𑒪 𑒕𑒪। 𑒞𑒞𑒥𑒹𑒧𑒹 𑒮𑒱𑒣𑒰𑒯𑒲 𑒒𑒹𑒩𑒱 𑒪𑒹𑒪𑒏𑒻𑒏। 𑒩𑒰𑒖𑒰 𑒍𑒯𑒱 𑒑𑒰𑒧𑒧𑒹 𑒯𑒩𑒏𑒰𑒩𑒰 𑒣𑒚𑒹𑒪𑒏 𑒧𑒳𑒠𑒰 𑒑𑓂𑒩𑒰𑒧𑒲𑒝 𑒮𑒦 𑒩𑒾𑒯𑒱𑒝𑒹𑒨𑒮𑒿 𑒧𑒱𑒪𑒪 𑒕𑒪। 𑒮𑒦 𑒏𑒯𑒪𑒏𑒻𑒏 𑒖𑒹 𑒠𑒳𑒩𑓂𑒑𑒰 𑒍𑒯𑒱 𑒑𑒰𑒧𑒧𑒹 𑒩𑒯𑒻𑒞 𑒁𑒕𑒱 𑒧𑒳𑒠𑒰 𑒞𑒐𑒢 𑒏𑒞𑒯𑒳 𑒥𑒰𑒯𑒩 𑒑𑒹𑒪 𑒕𑒪। 𑒁𑒦𑒨𑒏𑒳𑒧𑒰𑒩 𑒮𑒼𑒔𑒪𑒏 𑒖𑒹 𑒋𑒏𑒩𑒰𑒮𑒿 𑒑𑒪𑒞𑒲 𑒏𑒼𑒢𑒰 𑒮𑓂𑒫𑒲𑒏𑒰𑒩 𑒏𑒩𑒥𑒰𑒥𑒲। 𑒮𑒹 𑒍 𑒛𑒰𑒏𑒴𑒏𑒹𑒿 𑒢𑒲𑒏 𑒧𑒯𑒪𑒧𑒹 𑒏𑒻𑒠𑒲 𑒥𑒢𑒰 𑒏𑒋 𑒩𑒐𑒪𑒏। 𑒛𑒰𑒏𑒴 𑒧𑒯𑒰𑒩𑒰𑒖 𑒌𑒬-𑒂𑒩𑒰𑒧𑒧𑒹 𑒛𑒴𑒥𑒱 𑒑𑒹𑒪𑒰𑒯।
𑒁𑒦𑒨𑒏𑒳𑒧𑒰𑒩 𑒋𑒏 𑒠𑒱𑒢 𑒛𑒰𑒏𑒴𑒏𑒹𑒿 𑒐𑒴𑒥 𑒧𑒠𑒱𑒩𑒰 𑒣𑒱𑒨𑒰 𑒠𑒹𑒪𑒢𑓂𑒯𑒱। 𑒍 𑒖𑒐𑒢 𑒯𑒼𑒬𑒧𑒹 𑒂𑒋𑒪 𑒞𑒿 𑒔𑒰𑒩𑒴 𑒏𑒰𑒞 𑒑𑓀𑒡𑒩𑓂𑒫-𑒁𑒣𑓂𑒮𑒩𑒰 𑒢𑒰𑒔𑒱 𑒩𑒯𑒪 𑒕𑒪।
𑒍 𑒮𑒦 𑒏𑒯𑒪𑒏𑒻𑒏 𑒖𑒹 𑒄 𑒮𑓂𑒫𑒩𑓂𑒑𑒣𑒳𑒩𑒲 𑒟𑒲𑒏 𑒂 𑒃𑒢𑓂𑒠𑓂𑒩 𑒩𑒾𑒯𑒱𑒝𑒹𑒨𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳 𑒂𑒥𑒋 𑒥𑒪𑒰 𑒩𑒯𑒟𑒱। 𑒩𑒾𑒯𑒱𑒝𑒹𑒨 𑒮𑒼𑒔𑒪𑒏 𑒖𑒹 𑒩𑒰𑒖𑒰 𑒯𑒧𑒩𑒰 𑒮𑒴𑒪𑒲 𑒣𑒩 𑒔𑒜𑓃𑒰 𑒠𑒹𑒪𑒏। 𑒧𑒳𑒠𑒰 𑒍 𑒮𑒦𑒞𑒿 𑒧𑓀𑒞𑓂𑒩𑒲𑒏 𑒣𑒚𑒰𑒍𑒪 𑒑𑒥𑒻𑒨𑒰 𑒮𑒦 𑒕𑒪।
𑒞𑒐𑒢𑒹 𑒃𑓀𑒠𑓂𑒩𑒏 𑒠𑒴𑒞 𑒂𑒋𑒪 𑒂 𑒏𑒯𑒪𑒏 𑒖𑒹 𑒩𑒾𑒯𑒱𑒝𑒹𑒨𑒏𑒹𑒿 𑒠𑒹𑒫𑒞𑒰𑒏 𑒩𑒴𑒣 𑒧𑒹 𑒁𑒦𑒱𑒭𑒹𑒏 𑒯𑒼𑒋𑒞𑒻𑒏 𑒧𑒳𑒠𑒰 𑒞𑒰𑒯𑒱𑒮𑒿 𑒣𑒯𑒱𑒢𑒹 𑒍𑒏𑒩𑒰 𑒁𑒣𑒢 𑒣𑒵𑒟𑓂𑒫𑒲𑒪𑒼𑒏 𑒣𑒩 𑒏𑒋𑒪 𑒢𑒲𑒏-𑒁𑒡𑒪𑒰𑒯 𑒏𑒰𑒩𑓂𑒨𑒏 𑒫𑒱𑒫𑒩𑒝 𑒠𑒹𑒥𑒋 𑒣𑒛𑓃𑒞𑒻𑒏।
𑒞𑒐𑒢 𑒩𑒾𑒯𑒱𑒝𑒹𑒨𑒏𑒹𑒿 𑒦𑒹𑒪𑒻𑒏 𑒖𑒹 𑒮𑒦𑒙𑒰 𑒣𑒰𑒣 𑒮𑓂𑒫𑒲𑒏𑒰𑒩 𑒏𑒋 𑒪𑒱𑒁𑒋। 𑒧𑒳𑒠𑒰 𑒞𑒐𑒢𑒹 𑒍 𑒠𑒹𑒐𑒪𑒏 𑒖𑒹 𑒠𑒻𑒫 𑒪𑒼𑒏𑒏 𑒖𑒲𑒫 𑒮𑒦 𑒒𑒰𑒧𑒹-𑒣𑒮𑒲𑒢𑒹 𑒁𑒕𑒱, 𑒧𑒰𑒪𑒰 𑒧𑒾𑒪𑒰𑒨𑒪 𑒕𑒻, 𑒣𑒋𑒩 𑒡𑒩𑒞𑒲 𑒣𑒩 𑒕𑒻 𑒂 𑒣𑒱𑒣𑒢𑒲 𑒅𑒚𑒱-𑒐𑒮𑒱 𑒩𑒯𑒪 𑒕𑒻।
𑒍 𑒁𑒣𑒢 𑒣𑒳𑒝𑓂𑒨𑒏 𑒑𑒳𑒝𑒑𑒰𑒝 𑒬𑒳𑒩𑒴 𑒏𑒋 𑒠𑒹𑒪𑒏। 𑒁𑒦𑒨𑒏𑒳𑒧𑒰𑒩 𑒩𑒰𑒖𑒰𑒏𑒹𑒿 𑒏𑒯𑒪𑒏 𑒖𑒹 𑒁𑒯𑒰𑒿 𑒖𑓂𑒨𑒼𑒿 𑒍𑒏𑒩𑒰 𑒁𑒦𑒨𑒠𑒰𑒢 𑒠𑒋 𑒠𑒹𑒥𑒻𑒏 𑒞𑒿 𑒍 𑒮𑒦𑒙𑒰 𑒑𑒣𑓂𑒣 𑒥𑒞𑒰 𑒠𑒹𑒞। 𑒮𑒻𑒯 𑒦𑒹𑒪𑒻𑒏।
𑒩𑒾𑒯𑒱𑒝𑒹𑒨 𑒢𑒑𑒩𑒏 𑒥𑒰𑒯𑒩𑒏 𑒁𑒣𑒢 𑒖𑓀𑒑𑒪𑒏 𑒑𑒳𑒤𑒰𑒏 𑒣𑒞𑒰 𑒥𑒞𑒰 𑒠𑒹𑒪𑒏। 𑒖𑒞𑒋 𑒮𑒦𑒙𑒰 𑒐𑒖𑒰𑒢𑒰 𑒂 𑒁𑒣𑒯𑒵𑒞 𑒫𑓂𑒨𑒏𑓂𑒞𑒱 𑒮𑒦 𑒕𑒪। 𑒩𑒰𑒖𑒰 𑒏𑒯𑒪𑒢𑓂𑒯𑒱 𑒖𑒹 𑒏𑒱𑒋𑒏 𑒞𑒿 𑒍𑒏𑒩𑒰 𑒁𑒦𑒨𑒠𑒰𑒢 𑒦𑒹𑒙𑒱 𑒑𑒹𑒪 𑒕𑒻 𑒞𑒰𑒯𑒱 𑒯𑒹𑒞𑒳 𑒍 𑒮𑒦 𑒮𑓀𑒣𑒠𑒰 𑒩𑒰𑒐𑒱 𑒮𑒏𑒻𑒞 𑒁𑒕𑒱। 𑒧𑒳𑒠𑒰 𑒩𑒾𑒯𑒱𑒝𑒹𑒨 𑒏𑒼𑒢𑒼𑒙𑒰 𑒫𑒮𑓂𑒞𑒳 𑒢𑒯𑒱 𑒪𑒹𑒪𑒏। 𑒍 𑒏𑒯𑒪𑒏 𑒖𑒹 𑒖𑒰𑒯𑒱 𑒧𑒯𑒰𑒫𑒲𑒩𑒮𑓂𑒫𑒰𑒧𑒲𑒏 𑒋𑒏𑒙𑒰 𑒫𑒔𑒢 𑒮𑒳𑒢𑒪𑒰𑒮𑒿 𑒍𑒏𑒩 𑒖𑒰𑒢 𑒥𑒔𑒱 𑒑𑒹𑒪𑒻𑒏, 𑒞𑒏𑒩 𑒠𑒲𑒏𑓂𑒭𑒰 𑒪𑒹𑒞 𑒂 𑒍𑒏𑒩 𑒮𑒦𑒙𑒰 𑒫𑒔𑒢 𑒮𑒳𑒢𑒱 𑒖𑒲𑒫𑒢 𑒡𑒢𑓂𑒨 𑒏𑒩𑒞।

𑒧𑒴𑒩𑓂𑒐𑒰𑒡𑒱𑒩𑒰𑒖
𑒋𑒏𑒙𑒰 𑒑𑒼𑒣𑒰𑒪𑒏 𑒕𑒪। 𑒞𑒏𑒩 𑒋𑒏𑒙𑒰 𑒥𑒹𑒙𑒰 𑒕𑒪। 𑒍𑒏𑒩 𑒏𑒢𑒱𑒨𑒰𑒿 𑒣𑒳𑒞𑓂𑒩𑒏 𑒖𑒢𑓂𑒧𑒏 𑒮𑒧𑒨 𑒧𑒩𑒱 𑒑𑒹𑒪𑒲𑒯। 𑒥𑒰 𑒥𑒔𑓂𑒔𑒰𑒏 𑒣𑒰𑒪𑒢 𑒏𑒋𑒪𑒢𑓂𑒯𑒱। 𑒧𑒳𑒠𑒰 𑒍 𑒥𑒔𑓂𑒔𑒰 𑒕𑒪 𑒧𑒯𑒰𑒧𑒴𑒩𑓂𑒐। 𑒖𑒐𑒢 𑒍 𑒥𑒰𑒩𑒯 𑒫𑒩𑓂𑒭𑒏 𑒦𑒹𑒪 𑒞𑒐𑒢 𑒍𑒏𑒩 𑒫𑒱𑒫𑒰𑒯 𑒦𑒋 𑒑𑒹𑒪। 𑒧𑒳𑒠𑒰 𑒍 𑒫𑒱𑒫𑒰𑒯𑒼 𑒥𑒱𑒮𑒩𑒱 𑒑𑒹𑒪।
𑒥𑒳𑒜𑓃𑒱𑒨𑒰 𑒥𑒰𑒏𑒹𑒿 𑒏𑒰𑒖 𑒏𑒩𑒋𑒧𑒹 𑒠𑒱𑒏𑓂𑒏𑒞 𑒯𑒼𑒃𑒞 𑒕𑒪𑒢𑓂𑒯𑒱। 𑒮𑒹 𑒍 𑒥𑒳𑒗𑒰-𑒮𑒳𑒗𑒰𑒏𑒹𑒿 𑒍𑒏𑒩𑒰, 𑒏𑒢𑒱𑒨𑒰𑒏𑒹𑒿 𑒠𑓂𑒫𑒱𑒩𑒰𑒑𑒧𑒢 𑒏𑒩𑒰 𑒏𑒋 𑒁𑒢𑒥𑒰𑒏 𑒯𑒹𑒞𑒳 𑒏𑒯𑒪𑒢𑓂𑒯𑒱। 𑒥𑒰 𑒍𑒏𑒩𑒰 𑒑𑒧𑒕𑒰𑒧𑒹 𑒩𑒮𑓂𑒞𑒰 𑒪𑒹𑒪 𑒧𑒳𑒩𑒯𑒲 𑒥𑒰𑒢𑓂𑒯𑒱 𑒠𑒹𑒪𑒢𑓂𑒯𑒱। 𑒩𑒮𑓂𑒞𑒰𑒧𑒹 𑒥𑒔𑓂𑒔𑒰𑒏𑒹𑒿 𑒦𑒴𑒐 𑒪𑒑𑒪𑒻𑒏। 𑒍 𑒑𑒧𑒕𑒰𑒮𑒿 𑒧𑒳𑒩𑒯𑒲 𑒢𑒱𑒏𑒰𑒪𑒱 𑒏𑒋 𑒖𑒐𑒢𑒹 𑒧𑒳𑒿𑒯𑒧𑒹 𑒠𑒹𑒥𑒋 𑒔𑒰𑒯𑒻𑒞 𑒕𑒪 𑒂𑒏𑒱 𑒧𑒳𑒩𑒯𑒲 𑒅𑒛𑓃𑒱 𑒖𑒰𑒃𑒞 𑒕𑒪। 𑒥𑒔𑓂𑒔𑒰 𑒥𑒰𑒖𑒋 𑒪𑒰𑒑𑒪- 𑒂𑒆, 𑒂𑒆 𑒅𑒛𑓃𑒱 𑒖𑒰𑒆।
𑒪𑒑𑒧𑒹 𑒥𑒼𑒢𑒧𑒹 𑒋𑒏𑒙𑒰 𑒔𑒱𑒛𑓃𑒲𑒧𑒰𑒩 𑒖𑒰𑒪 𑒣𑒮𑒰𑒩𑒢𑒹 𑒕𑒪। 𑒥𑒔𑓂𑒔𑒰𑒏 𑒑𑒣 𑒮𑒳𑒢𑒱 𑒏𑒋 𑒍𑒏𑒩𑒰 𑒥𑒛𑓂𑒛 𑒞𑒰𑒧𑒮 𑒅𑒚𑒪𑒻𑒏। 𑒍𑒏𑒩𑒰 𑒪𑒑𑒪𑒻𑒏 𑒖𑒹𑒢𑒰 𑒄 𑒥𑒔𑓂𑒔𑒰 𑒍𑒏𑒩 𑒔𑒱𑒛𑓃𑒻𑒏𑒹𑒿 𑒅𑒛𑓃𑒰𑒥𑒋 𑒔𑒰𑒯𑒻𑒞 𑒁𑒕𑒱। 𑒔𑒱𑒛𑓃𑒲𑒧𑒰𑒩 𑒥𑒔𑓂𑒔𑒰𑒏𑒹𑒿 𑒣𑒏𑒛𑓃𑒱 𑒏𑒋 𑒣𑒳𑒭𑓂𑒙 𑒣𑒱𑒙𑒰𑒢 𑒣𑒱𑒙𑒪𑒏।
𑒥𑒔𑓂𑒔𑒰 𑒣𑒳𑒕𑒪𑒏- 𑒯𑒧𑒩 𑒠𑒼𑒐 𑒞𑒿 𑒏𑒯𑒴?
𑒔𑒱𑒛𑓃𑒲𑒧𑒰𑒩 𑒏𑒯𑒪𑒏- 𑒋𑒢𑒰 𑒢𑒯𑒱। 𑒋𑒢𑒰 𑒥𑒰𑒖𑒴। 𑒂𑒥𑒱 𑒖𑒼। 𑒤𑒿𑒮𑒱 𑒖𑒼।
𑒂𑒥 𑒥𑒔𑓂𑒔𑒰 𑒮𑒻𑒯 𑒥𑒖𑒻𑒞 𑒂𑒑𑒴 𑒖𑒰𑒋 𑒪𑒰𑒑𑒪। 𑒂𑒥 𑒮𑒰𑒿𑒗 𑒦𑒋 𑒩𑒯𑒪 𑒕𑒪। 𑒥𑒼𑒢 𑒐𑒞𑒧 𑒯𑒼𑒋𑒥𑒪𑒰 𑒕𑒪। 𑒍𑒞𑒋 𑒔𑒼𑒩 𑒮𑒦 𑒔𑒼𑒩𑒱𑒏 𑒨𑒼𑒖𑒢𑒰 𑒥𑒢𑒰𑒋 𑒩𑒯𑒪 𑒕𑒪𑒰𑒯। 𑒍 𑒮𑒦 𑒮𑒳𑒢𑒪𑒢𑓂𑒯𑒱 𑒖𑒹 𑒄 𑒥𑒔𑓂𑒔𑒰 𑒯𑒧𑒩𑒰 𑒮𑒦𑒏𑒹𑒿 𑒣𑒏𑒛𑓃𑒰𑒥𑒋 𑒔𑒰𑒯𑒻𑒞 𑒁𑒕𑒱। 𑒮𑒹 𑒍 𑒪𑒼𑒏𑒢𑒱 𑒮𑒹𑒯𑒼 𑒍𑒏𑒩𑒰 𑒣𑒳𑒭𑓂𑒙 𑒣𑒱𑒙𑒰𑒢 𑒣𑒱𑒙𑒪𑒢𑓂𑒯𑒱।
𑒥𑒔𑓂𑒔𑒰 𑒤𑒹𑒩 𑒣𑒳𑒕𑒪𑒏- 𑒯𑒧 𑒥𑒰𑒖𑒲 𑒞𑒿 𑒏𑒲 𑒥𑒰𑒖𑒲?
𑒔𑒼𑒩𑒏 𑒮𑒩𑒠𑒰𑒩 𑒏𑒯𑒪𑒏- 𑒥𑒰𑒖 𑒖𑒹 𑒋𑒯𑒢 𑒮𑒦 𑒒𑒩𑒧𑒹 𑒯𑒼𑒋।
𑒂𑒥 𑒥𑒔𑓂𑒔𑒰 𑒨𑒻𑒯 𑒏𑒯𑒻𑒞 𑒂𑒑𑒰𑒿 𑒥𑒜𑓃𑒋 𑒪𑒰𑒑𑒪। 𑒂𑒥 𑒬𑓂𑒧𑒮𑒰𑒢𑒦𑒴𑒧𑒱 𑒂𑒥𑒱 𑒑𑒹𑒪। 𑒋𑒏𑒙𑒰 𑒖𑒧𑒲𑒢𑓂𑒠𑒰𑒩𑒏 𑒋𑒏𑒹𑒙𑒰 𑒥𑒹𑒙𑒰 𑒕𑒪𑒻𑒏। 𑒮𑒹 𑒧𑒩𑒱 𑒑𑒹𑒪 𑒕𑒪 𑒂 𑒮𑒦 𑒍𑒏𑒩𑒰 𑒛𑒰𑒯𑒥𑒰𑒏 𑒪𑒹𑒪 𑒂𑒥𑒱 𑒩𑒯𑒪 𑒕𑒪𑒰𑒯। 𑒍 𑒪𑒼𑒏𑒢𑒱 𑒥𑒔𑓂𑒔𑒰𑒏 𑒑𑒣 𑒣𑒩 𑒥𑒛𑓃 𑒏𑒳𑒣𑒱𑒞 𑒦𑒹𑒪𑒰𑒯 𑒂 𑒍𑒏𑒩𑒰 𑒣𑒳𑒭𑓂𑒙 𑒣𑒱𑒙𑒪𑒢𑓂𑒯𑒱।
𑒤𑒹𑒩 𑒖𑒐𑒢 𑒥𑒔𑓂𑒔𑒰 𑒣𑒳𑒕𑒪𑒏 𑒖𑒹 𑒏𑒲 𑒥𑒰𑒖𑒥 𑒅𑒔𑒱𑒞 𑒯𑒼𑒋𑒞 𑒞𑒿 𑒮𑒦 𑒑𑒼𑒙𑒹 𑒏𑒯𑒪𑒐𑒱𑒢𑓂𑒯 𑒖𑒹 𑒋𑒢𑒰 𑒥𑒰𑒖𑒴- 𑒋𑒯𑒢 𑒏𑒼𑒢𑒼 𑒒𑒩𑒧𑒹 𑒢𑒯𑒱 𑒯𑒼𑒋।
𑒥𑒔𑓂𑒔𑒰 𑒨𑒻𑒯 𑒑𑒣 𑒥𑒰𑒖𑒋 𑒪𑒰𑒑𑒪। 𑒂𑒥 𑒢𑒑𑒩 𑒂𑒥𑒱 𑒑𑒹𑒪 𑒕𑒪 𑒂 𑒩𑒰𑒖𑒰𑒏 𑒥𑒹𑒙𑒰𑒏 𑒫𑒱𑒫𑒰𑒯𑒏 𑒥𑒰𑒖𑒰-𑒥𑒞𑓂𑒞𑒲 𑒮𑒦 𑒦𑒋 𑒩𑒯𑒪 𑒕𑒪। 𑒥𑒩𑒱𑒨𑒰𑒞𑒲 𑒪𑒼𑒏𑒢𑒱 𑒥𑒔𑓂𑒔𑒰𑒏𑒹𑒿 𑒏𑒯𑒻𑒞 𑒮𑒳𑒢𑒪𑒢𑓂𑒯𑒱 𑒖𑒹 𑒋𑒯𑒢 𑒏𑒼𑒢𑒼 𑒒𑒩𑒧𑒹 𑒢𑒯𑒱 𑒯𑒼𑒋 𑒞𑒿 𑒍 𑒪𑒼𑒏𑒢𑒱 𑒏𑓂𑒩𑒼𑒡𑒱𑒞 𑒦𑒋 𑒤𑒹𑒩 𑒍𑒯𑒱 𑒥𑒔𑓂𑒔𑒰𑒏𑒹𑒿 𑒣𑒱𑒙𑒣𑒱𑒙𑒰 𑒠𑒹𑒪𑒐𑒱𑒢𑓂𑒯।
𑒖𑒐𑒢 𑒥𑒔𑓂𑒔𑒰 𑒣𑒳𑒕𑒪𑒏 𑒖𑒹 𑒏𑒲 𑒥𑒖𑒥𑒰𑒏 𑒔𑒰𑒯𑒲 𑒞𑒿 𑒮𑒦 𑒏𑒯𑒪𑒏 𑒖𑒹 𑒏𑒱𑒕𑒳 𑒢𑒯𑒱 𑒥𑒰𑒖𑒴। 𑒧𑒳𑒿𑒯 𑒥𑒢𑓂𑒢 𑒩𑒰𑒐𑒴।
𑒥𑒔𑓂𑒔𑒰 𑒮𑒰𑒮𑒳𑒩 𑒂𑒥𑒱 𑒑𑒹𑒪। 𑒍𑒞𑒋 𑒢𑒯𑒱𑒨𑒹 𑒏𑒱𑒕𑒳 𑒥𑒰𑒖𑒪 𑒢𑒯𑒱𑒨𑒹 𑒏𑒱𑒕𑒳 𑒐𑒋𑒪𑒏। 𑒏𑒰𑒩𑒝 𑒐𑒋𑒥𑒰𑒧𑒹 𑒧𑒳𑒿𑒯 𑒐𑒼𑒪𑒋 𑒣𑒛𑓃𑒱𑒞𑒻𑒏।
𑒦𑒼𑒩𑒹-𑒮𑒏𑒰𑒪𑒹 𑒮𑒰𑒮𑒳𑒩 𑒥𑒪𑒰 𑒮𑒦 𑒁𑒣𑒢 𑒥𑒹𑒙𑒲𑒏𑒹𑒿 𑒍𑒯𑒱 𑒥𑒔𑓂𑒔𑒰𑒏 𑒮𑓀𑒑 𑒥𑒱𑒠𑒰 𑒏𑒋 𑒠𑒹𑒪𑒢𑓂𑒯𑒱। 𑒩𑒮𑓂𑒞𑒰𑒧𑒹 𑒥𑒛𑓂𑒛 𑒣𑓂𑒩𑒐𑒩 𑒩𑒾𑒠 𑒕𑒪𑒻𑒏। 𑒍 𑒮𑒳𑒮𑓂𑒞𑒰𑒋 𑒪𑒰𑒑𑒪। 𑒧𑒳𑒠𑒰 𑒏𑒪𑒧𑒧𑒹 𑒮𑒹𑒯𑒼 𑒥𑒛𑓂𑒛 𑒑𑒳𑒧𑒰𑒩 𑒕𑒪𑒻𑒏। 𑒏𑒢𑒱𑒨𑒰𑒏𑒹𑒿 𑒥𑒛𑓂𑒛 𑒒𑒰𑒧 𑒐𑒮𑒋 𑒪𑒑𑒪𑒻𑒏 𑒂 𑒞𑒰𑒯𑒱𑒮𑒿 𑒍𑒏𑒩 𑒮𑒱𑒢𑓂𑒠𑒴𑒩 𑒡𑒼𑒐𑒩𑒱 𑒑𑒹𑒪𑒻𑒏। 𑒥𑒔𑓂𑒔𑒰𑒏𑒹𑒿 𑒦𑒹𑒪𑒻𑒏 𑒖𑒹 𑒮𑒰𑒮𑒳𑒩 𑒥𑒪𑒰 𑒍𑒏𑒩𑒰𑒮𑒿 𑒕𑒪 𑒏𑒋𑒪𑒏 𑒂 𑒍𑒏𑒩𑒰 𑒦𑒿𑒑𑒪𑒰𑒯𑒰 𑒏𑒣𑒰𑒩 𑒥𑒰𑒪𑒲 𑒏𑒢𑒱𑒨𑒰𑒿 𑒠𑒋 𑒖𑒰𑒃 𑒑𑒹𑒪 𑒁𑒕𑒱। 𑒋𑒯𑒢 𑒏𑒢𑒱𑒨𑒰𑒿𑒏𑒹𑒿 𑒑𑒰𑒧 𑒣𑒩 𑒪𑒋 𑒖𑒰𑒋 𑒍 𑒏𑒲 𑒏𑒩𑒞।
𑒍 𑒞𑒐𑒢𑒹 𑒋𑒏𑒙𑒰 𑒯𑒖𑒰𑒧𑒏𑒹𑒿 𑒥𑒏𑒩𑒲 𑒔𑒩𑒥𑒻𑒞 𑒠𑒹𑒐𑒪𑒏। 𑒍𑒏𑒩𑒰𑒮𑒿 𑒁𑒣𑒢 𑒣𑒹𑒙𑒏 𑒥𑒰𑒞 𑒏𑒯𑒥𑒰𑒏 𑒪𑒹𑒪 𑒁𑒣𑒢 𑒧𑒳𑒿𑒯 𑒐𑒼𑒪𑒪𑒏 𑒂 𑒮𑒦𑒙𑒰 𑒏𑒯𑒱 𑒑𑒹𑒪। 𑒯𑒖𑒰𑒧 𑒥𑒳𑒗𑒱 𑒑𑒹𑒪 𑒖𑒹 𑒄 𑒥𑒔𑓂𑒔𑒰 𑒧𑒴𑒩𑓂𑒐𑒰𑒡𑒱𑒩𑒰𑒖 𑒁𑒕𑒱। 𑒍 𑒍𑒏𑒩𑒰 𑒁𑒣𑒢 𑒠𑒴𑒡 𑒠𑒹𑒧𑒋 𑒥𑒰𑒪𑒲 𑒥𑒏𑒛𑓃𑒲𑒏 𑒮𑓀𑒑 𑒏𑒢𑒱𑒨𑒰𑒿𑒏 𑒥𑒠𑒪𑒹𑒢 𑒏𑒩𑒥𑒰𑒏 𑒯𑒹𑒞𑒳 𑒏𑒯𑒪𑒏। 𑒥𑒔𑓂𑒔𑒰 𑒮𑒯𑒩𑓂𑒭 𑒞𑒻𑒨𑒰𑒩 𑒦𑒋 𑒑𑒹𑒪।
𑒂𑒑𑒴 𑒍 𑒥𑒔𑓂𑒔𑒰 𑒮𑒳𑒮𑓂𑒞𑒰𑒋 𑒪𑒰𑒑𑒪 𑒂 𑒐𑒳𑒙𑓂𑒙𑒲𑒮𑒿 𑒥𑒏𑒛𑓃𑒲𑒏𑒹𑒿 𑒥𑒰𑒢𑓂𑒯𑒱 𑒠𑒹𑒪𑒏। 𑒥𑒏𑒛𑓃𑒲 𑒣𑒰𑒅𑒖 𑒏𑒩𑒋 𑒪𑒰𑒑𑒪 𑒞𑒿 𑒥𑒔𑓂𑒔𑒰𑒏𑒹𑒿 𑒦𑒹𑒪𑒻𑒏 𑒖𑒹 𑒥𑒏𑒛𑓃𑒲 𑒍𑒏𑒩 𑒧𑒳𑒿𑒯 𑒠𑒴𑒮𑒱 𑒩𑒯𑒪 𑒁𑒕𑒱। 𑒍 𑒍𑒏𑒩𑒰 𑒯𑒰𑒙 𑒪𑒋 𑒑𑒹𑒪 𑒂 𑒏𑒠𑒲𑒧𑒰𑒏 𑒮𑓀𑒑 𑒍𑒏𑒩𑒼 𑒥𑒠𑒪𑒹𑒢 𑒏𑒋 𑒪𑒹𑒪𑒏। 𑒑𑒰𑒧 𑒣𑒩 𑒖𑒐𑒢 𑒍 𑒣𑒯𑒳𑒿𑒔𑒪 𑒞𑒿 𑒍𑒏𑒩 𑒥𑒰 𑒥𑒛𑓂𑒛 𑒣𑓂𑒩𑒮𑒢𑓂𑒢 𑒦𑒹𑒪𑒲𑒯। 𑒯𑒳𑒢𑒏𑒰 𑒦𑒹𑒪𑒢𑓂𑒯𑒱 𑒖𑒹 𑒏𑒢𑒱𑒨𑒰𑒿𑒏 𑒢𑒻𑒯𑒩𑒮𑒿 𑒮𑒢𑒹𑒮𑒧𑒹 𑒏𑒠𑒲𑒧𑒰 𑒂𑒋𑒪 𑒁𑒕𑒱। 𑒧𑒳𑒠𑒰 𑒏𑒢𑒱𑒨𑒰𑒿𑒏𑒹𑒿 𑒢𑒯𑒱 𑒠𑒹𑒐𑒱 𑒞𑒏𑒩 𑒖𑒱𑒑𑒹𑒮𑒰 𑒏𑒋𑒪𑒢𑓂𑒯𑒱 𑒞𑒿 𑒥𑒔𑓂𑒔𑒰 𑒮𑒦𑒙𑒰 𑒐𑒱𑒮𑓂𑒮𑒰 𑒮𑒳𑒢𑒰 𑒠𑒹𑒪𑒏𑒢𑓂𑒯𑒱। 𑒍 𑒧𑒰𑒟 𑒣𑒲𑒙𑒱 𑒪𑒹𑒪𑒢𑓂𑒯𑒱। 𑒧𑒳𑒠𑒰 𑒥𑒔𑓂𑒔𑒰 𑒄 𑒏𑒯𑒻𑒞 𑒐𑒹𑒪𑒰𑒋 𑒔𑒪𑒱 𑒑𑒹𑒪 𑒖𑒹 𑒏𑒠𑒲𑒧𑒰𑒏 𑒞𑒩𑒏𑒰𑒩𑒲 𑒥𑒢𑒰 𑒏𑒋 𑒩𑒰𑒐𑒴।

𑒏𑒾𑒫𑒰 𑒂 𑒤𑒳𑒠𑓂𑒠𑒲
𑒋𑒏𑒙𑒰 𑒕𑒪𑒱 𑒏𑒾𑒂 𑒂 𑒋𑒏𑒙𑒰 𑒕𑒪 𑒤𑒳𑒠𑓂𑒠𑒲। 𑒠𑒳𑒢𑒴𑒏 𑒥𑒲𑒔 𑒦𑒖𑒰𑒩-𑒮𑒐𑒲 𑒏𑒹𑒩 𑒮𑓀𑒥𑓀𑒡। 𑒋𑒏 𑒥𑒹𑒩 𑒠𑒳𑒩𑓂𑒦𑒱𑒏𑓂𑒭 𑒣𑒛𑓃𑒪। 𑒐𑒹𑒢𑒰𑒃𑒏 𑒁𑒦𑒰𑒫 𑒋𑒯𑒢 𑒦𑒹𑒪 𑒖𑒹 𑒠𑒳𑒢𑒴 𑒑𑒼𑒙𑒹 𑒁𑒣𑒢-𑒁𑒣𑒢 𑒥𑒔𑓂𑒔𑒰𑒏𑒹𑒿 𑒐𑒋𑒥𑒰𑒏 𑒢𑒱𑒩𑓂𑒝𑒨 𑒏𑒋𑒪𑒢𑓂𑒯𑒱। 𑒣𑒯𑒱𑒢𑒹 𑒏𑒾𑒂𑒏 𑒥𑒹𑒩 𑒂𑒋𑒪। 𑒤𑒳𑒠𑓂𑒠𑒲 𑒂 𑒏𑒾𑒂 𑒠𑒳𑒢𑒴 𑒧𑒱𑒪𑒱 𑒏𑒋 𑒏𑒾𑒂-𑒥𑒔𑓂𑒔𑒰𑒏𑒹𑒿 𑒐𑒰 𑒑𑒹𑒪। 𑒂𑒥 𑒤𑒳𑒠𑓂𑒠𑒲𑒏 𑒥𑒹𑒩 𑒂𑒋𑒪। 𑒧𑒳𑒠𑒰 𑒤𑒳𑒠𑓂𑒠𑒲 𑒮𑒦 𑒞𑒿 𑒯𑒼𑒃𑒞𑒹 𑒁𑒕𑒱 𑒡𑒴𑒩𑓂𑒞𑓂𑒞।
“𑒁𑒯𑒰𑒿 𑒞𑒿 𑒁𑒐𑒰𑒠𑓂𑒨 𑒣𑒠𑒰𑒩𑓂𑒟 𑒐𑒰𑒃𑒞 𑒕𑒲। 𑒯𑒧𑒩 𑒥𑒔𑓂𑒔𑒰 𑒁𑒬𑒳𑒠𑓂𑒡 𑒦𑒋 𑒖𑒰𑒨𑒞। 𑒮𑒹 𑒁𑒯𑒰𑒿 𑒑𑓀𑒑𑒰𑒖𑒲𑒧𑒹 𑒧𑒳𑒿𑒯 𑒡𑒼𑒥𑒱 𑒏𑒋 𑒂𑒥𑒱 𑒖𑒰𑒆”।
𑒏𑒾𑒂 𑒅𑒛𑓃𑒻𑒞-𑒅𑒛𑓃𑒻𑒞 𑒑𑓀𑒑𑒰𑒖𑒲 𑒪𑒑 𑒑𑒹𑒪-
“𑒯𑒹 𑒑𑓀𑒑𑒰 𑒧𑒰𑒨, 𑒠𑒱𑒋 𑒣𑒰𑒢𑒱, 𑒡𑒼𑒥𑒱 𑒏𑒋 𑒚𑒼𑒜𑓃, 𑒐𑒰𑒃 𑒤𑒳𑒠𑓂𑒠𑒲𑒏 𑒥𑒔𑓂𑒔𑒰”।
𑒑𑓀𑒑𑒰 𑒧𑒰𑒨 𑒣𑒰𑒢𑒱𑒏 𑒪𑒹𑒪 𑒔𑒳𑒏𑓂𑒏𑒰 𑒁𑒢𑒥𑒰𑒏 𑒪𑒹𑒪 𑒏𑒯𑒪𑒐𑒱𑒢𑓂𑒯।
𑒂𑒥 𑒔𑒳𑒏𑓂𑒏𑒰 𑒁𑒢𑒥𑒰𑒏 𑒪𑒹𑒪 𑒏𑒾𑒂 𑒑𑒹𑒪 𑒞𑒿 𑒍𑒞𑒋𑒮𑒿 𑒧𑒰𑒙𑒱 𑒁𑒢𑒥𑒰𑒏 𑒪𑒹𑒪 𑒏𑒳𑒧𑓂𑒯𑒰𑒩 𑒧𑒯𑒰𑒩𑒰𑒖 𑒣𑒚𑒰 𑒠𑒹𑒪𑒐𑒱𑒢𑓂𑒯𑓂। 𑒐𑒹𑒞 𑒣𑒩 𑒧𑒰𑒙𑒱𑒏 𑒪𑒹𑒪 𑒏𑒾𑒂 𑒑𑒹𑒪 𑒞𑒿 𑒐𑒹𑒞 𑒍𑒏𑒩𑒰 𑒧𑒰𑒙𑒱 𑒐𑒼𑒠𑒥𑒰𑒏 𑒪𑒹𑒪 𑒯𑒱𑒩𑒝𑒱𑒏 𑒮𑒱𑓀𑒒 𑒁𑒢𑒥𑒰𑒏 𑒪𑒹𑒪 𑒫𑒱𑒠𑒰 𑒏𑒋 𑒠𑒹𑒪𑒏𑒢𑓂𑒯𑒱। 𑒯𑒱𑒩𑒝 𑒏𑒯𑒪𑒏𑒢𑓂𑒯𑒱 𑒖𑒹 𑒮𑒱𑓀𑒯𑒏𑒹𑒿 𑒥𑒖𑒰 𑒏𑒋 𑒂𑒢𑒴 𑒖𑒰𑒯𑒱𑒮𑒿 𑒍 𑒯𑒧𑒩𑒰 𑒧𑒰𑒩𑒱 𑒏𑒋 𑒁𑒯𑒰𑒿𑒏𑒹𑒿 𑒯𑒧𑒩 𑒮𑒱𑓀𑒒 𑒠𑓄 𑒠𑒹𑒧𑒋।
𑒂𑒥 𑒖𑒹 𑒏𑒾𑒂 𑒑𑒹𑒪 𑒮𑒱𑓀𑒯 𑒪𑒑 𑒞𑒿 𑒍 𑒮𑒱𑓀𑒯 𑒏𑒯𑒪𑒏- “𑒯𑒧 𑒦𑒹𑒪𑒯𑒳𑒿 𑒬𑒏𑓂𑒞𑓂𑒞𑒱𑒯𑒲𑒢, 𑒥𑒴𑒜𑓃। 𑒑𑒰𑒋𑒏 𑒠𑒴𑒡 𑒂𑒢𑒴, 𑒍𑒏𑒩𑒰 𑒣𑒲𑒥𑒱 𑒏𑒋 𑒯𑒧𑒩𑒰𑒧𑒹 𑒞𑒰𑒏𑒞𑒱 𑒂𑒨𑒞 𑒂 𑒯𑒧 𑒬𑒱𑒏𑒰𑒩 𑒏𑒋 𑒮𑒏𑒥”।
𑒑𑒰𑒋𑒏 𑒪𑒑 𑒑𑒹𑒪 𑒏𑒾𑒂 𑒞𑒿 𑒑𑒰𑒋 𑒍𑒏𑒩𑒰 𑒒𑒰𑒮 𑒁𑒢𑒥𑒰𑒏 𑒪𑒹𑒪 𑒣𑒚𑒰 𑒠𑒹𑒪𑒐𑒱𑒢𑓂𑒯। 𑒒𑒰𑒮 𑒏𑒾𑒂𑒏𑒹𑒿 𑒏𑒯𑒪𑒏 𑒖𑒹 𑒯𑒰𑒿𑒮𑒴 𑒂𑒢𑒱 𑒯𑒧𑒩𑒰 𑒏𑒰𑒙𑒱 𑒪𑒱𑒁।
𑒏𑒾𑒂 𑒑𑒹𑒪 𑒪𑒼𑒯𑒰𑒩 𑒪𑒑, 𑒥𑒰𑒖𑒪-
“𑒯𑒹 𑒪𑒼𑒯𑒰𑒩 𑒦𑒰𑒋,
𑒠𑒱𑒁 𑒯𑒰𑒿𑒮𑒴, 𑒏𑒰𑒙𑒥 𑒒𑒰𑒮, 𑒐𑒳𑒂𑒨𑒥 𑒑𑒰𑒨, 𑒣𑒰𑒥𑒱 𑒠𑒴𑒡,
𑒣𑒱𑒂𑒨𑒥 𑒮𑒱𑓀𑒯𑒏𑒹𑒿, 𑒍 𑒧𑒰𑒩𑒞 𑒯𑒩𑒱𑒝,
𑒦𑒹𑒙𑒞 𑒯𑒩𑒱𑒝𑒏 𑒮𑒱𑓀𑒒, 𑒞𑒰𑒯𑒱𑒮𑒿 𑒏𑒼𑒩𑒥 𑒧𑒰𑒙𑒱,
𑒧𑒰𑒙𑒱𑒮𑒿 𑒏𑒳𑒧𑓂𑒯𑒰𑒩 𑒥𑒢𑒍𑒞𑒰𑒯 𑒔𑒳𑒏𑓂𑒏𑒰, 𑒦𑒩𑒥 𑒑𑒓𑓂𑒑𑒰𑒖𑒪,
𑒡𑒼𑒥 𑒚𑒼𑒩, 𑒂 𑒐𑒰𑒨𑒥 𑒤𑒳𑒠𑓂𑒠𑒲𑒏 𑒥𑒔𑓂𑒔𑒰”।
𑒪𑒼𑒯𑒰𑒩 𑒏𑒯𑒪𑒢𑓂𑒯𑒱, “𑒯𑒧𑒩𑒰 𑒪𑒑 𑒠𑒴 𑒙𑒰 𑒯𑒰𑒿𑒮𑒴 𑒁𑒕𑒱, 𑒋𑒏𑒙𑒰 𑒏𑒰𑒩𑒲 𑒂 𑒋𑒏𑒙𑒰 𑒪𑒰𑒪। 𑒖𑒹 𑒣𑒮𑒱𑒢𑓂𑒢 𑒣𑒩𑒋 𑒪𑒋 𑒪𑒱𑒁”।
𑒏𑒾𑒂𑒏𑒹𑒿 𑒪𑒪𑒏𑒰 𑒯𑒰𑒿𑒮𑒴 𑒣𑒮𑒱𑒢𑓂𑒢 𑒣𑒛𑓃𑒪𑒻𑒏। 𑒍 𑒯𑒰𑒿𑒮𑒴 𑒡𑒲𑒣𑒪 𑒕𑒪, 𑒖𑒯𑒰𑒿𑒢𑒹 𑒏𑒾𑒂 𑒍𑒏𑒩𑒰 𑒁𑒣𑒢 𑒪𑒼𑒪𑒧𑒹 𑒠𑒥𑒍𑒪𑒏, 𑒕𑒩𑒣𑒙𑒰 𑒏𑒋 𑒧𑒩𑒱 𑒑𑒹𑒪।

𑒢𑒻𑒏𑒰 𑒥𑒢𑒱𑒖𑒰𑒩𑒰
𑒬𑒼𑒦𑒢𑒰𑒨𑒏𑒰 𑒕𑒪𑒰𑒯 𑒋𑒏𑒙𑒰 𑒫𑒝𑒱𑒏𑒣𑒳𑒞𑓂𑒩। 𑒯𑒳𑒢𑒏𑒩 𑒫𑒱𑒫𑒰𑒯 𑒞𑒱𑒩𑒯𑒳𑒞𑒏 𑒏𑒼𑒢𑒼 𑒮𑓂𑒟𑒰𑒢𑒧𑒹 𑒥𑒰𑒩𑒲 𑒢𑒰𑒧𑓂𑒢𑒰 𑒮𑓂𑒞𑓂𑒩𑒲𑒮𑒿 𑒦𑒹𑒪 𑒕𑒪𑒢𑓂𑒯𑒱। 𑒬𑒼𑒦𑒰 𑒠𑓂𑒫𑒱𑒩𑒰𑒑𑒧𑒢 𑒏𑒩𑒥𑒰 𑒏𑒋 𑒏𑒢𑒱𑒨𑒰𑒿𑒏𑒹𑒿 𑒁𑒢𑒪𑒢𑓂𑒯𑒱 𑒂 𑒥𑒱𑒠𑒰 𑒦𑒋 𑒑𑒹𑒪𑒰𑒯 𑒧𑒼𑒩𑓀𑒑𑒏 𑒯𑒹𑒞𑒳 𑒫𑓂𑒨𑒰𑒣𑒰𑒩 𑒏𑒩𑒥𑒰𑒏 𑒪𑒹𑒪। 𑒣𑒞𑓂𑒢𑒲𑒏 𑒮𑓀𑒑 𑒋𑒏𑒼 𑒠𑒱𑒢 𑒢𑒯𑒱 𑒥𑒱𑒞𑒰 𑒮𑒏𑒪 𑒕𑒪𑒰𑒯। 𑒩𑒰𑒞𑒱𑒧𑒹 𑒋𑒏𑒙𑒰 𑒑𑒰𑒕𑒏 𑒢𑒲𑒔𑒰𑒿𑒧𑒹 𑒖𑒐𑒢 𑒍 𑒩𑒰𑒞𑒱 𑒥𑒱𑒞𑒹𑒥𑒰𑒏 𑒪𑒹𑒪 𑒮𑒳𑒮𑓂𑒞𑒰 𑒩𑒯𑒪 𑒕𑒪𑒰𑒯 𑒞𑒐𑒢 𑒯𑒳𑒢𑒏𑒰 𑒋𑒏𑒙𑒰 𑒡𑓂𑒫𑒢𑒱 𑒮𑒳𑒢𑒥𑒰𑒧𑒹 𑒁𑒋𑒪𑒢𑓂𑒯𑒱। 𑒋𑒏𑒙𑒰 𑒛𑒏𑒯𑒩 𑒁𑒣𑒢 𑒦𑒰𑒩𑓂𑒨𑒰𑒏 𑒮𑓀𑒑 𑒍𑒯𑒱 𑒑𑒰𑒕 𑒣𑒩 𑒩𑒯𑒻𑒞 𑒕𑒪। 𑒠𑒳𑒢𑒴 𑒑𑒼𑒙𑒹 𑒑𑒣 𑒏𑒋 𑒩𑒯𑒪 𑒕𑒪𑒰𑒯, 𑒖𑒹 𑒍 𑒩𑒰𑒞𑒱 𑒥𑒛𑓃 𑒬𑒳𑒦 𑒕𑒪 𑒂 𑒍𑒯𑒱 𑒠𑒱𑒢 𑒣𑒞𑓂𑒢𑒲𑒏 𑒮𑓀𑒑 𑒖𑒹 𑒩𑒯𑒞 𑒞𑒏𑒩𑒰 𑒥𑒛𑓂𑒛 𑒣𑓂𑒩𑒞𑒱𑒦𑒰𑒫𑒰𑒢 𑒣𑒳𑒞𑓂𑒩𑒏 𑒣𑓂𑒩𑒰𑒣𑓂𑒞𑒱 𑒯𑒼𑒋𑒞𑒻𑒏।
𑒄 𑒮𑒳𑒢𑒞𑒯𑒱 𑒬𑒼𑒦𑒰 𑒒𑒩 𑒣𑒯𑒳𑒿𑒔𑒱 𑒑𑒹𑒪 𑒦𑒰𑒩𑓂𑒨𑒰 𑒪𑒑। 𑒪𑒼𑒏𑒼𑒣𑒫𑒰𑒠𑒮𑒿 𑒥𑒔𑒥𑒰𑒏 𑒪𑒹𑒪 𑒣𑒞𑓂𑒢𑒲𑒏𑒹𑒿 𑒁𑒦𑒱𑒖𑓂𑒘𑒰𑒢𑒮𑓂𑒫𑒩𑒴𑒣 𑒋𑒏𑒙𑒰 𑒎𑒿𑒚𑒲 𑒠𑒋 𑒠𑒹𑒪𑒢𑓂𑒯𑒱 𑒂 𑒔𑒪𑒱 𑒑𑒹𑒪𑒰𑒯 𑒧𑒼𑒩𑓀𑒑। 𑒍𑒞𑒋 𑓑𑓒 𑒥𑒩𑓂𑒐 𑒡𑒩𑒱 𑒫𑓂𑒨𑒰𑒣𑒰𑒩 𑒏𑒋𑒪𑒢𑓂𑒯𑒱 𑒂 𑒞𑒹𑒩𑒯𑒧 𑒥𑒩𑒐 𑒥𑒱𑒠𑒰 𑒦𑒹𑒪𑒰𑒯 𑒒𑒩𑒏 𑒪𑒹𑒪।
𑒋𑒧𑓂𑒯𑒩 𑒍𑒏𑒩 𑒏𑒢𑒱𑒨𑒰𑒏 𑒥𑒛𑓃 𑒠𑒳𑒩𑓂𑒑𑒞𑒱 𑒦𑒹𑒪𑒻𑒏। 𑒍 𑒖𑒐𑒢 𑒑𑒩𑓂𑒦𑒫𑒞𑒲 𑒦𑒋 𑒑𑒹𑒪𑒲𑒯, 𑒮𑒰𑒮𑒳-𑒮𑒮𑒳𑒩 𑒒𑒩𑒮𑒿 𑒢𑒱𑒏𑒰𑒪𑒱 𑒠𑒹𑒪𑒏𑒢𑓂𑒯𑒱 𑒯𑒳𑒢𑒏𑒰। 𑒧𑒳𑒠𑒰 𑒍𑒏𑒩 𑒠𑒱𑒁𑒩 𑒖𑒏𑒩 𑒢𑒰𑒧 𑒕𑒪 𑒔𑒞𑒳𑒩𑒑𑒢, 𑒍𑒏𑒩𑒰 𑒮𑒦𑒙𑒰 𑒏𑒟𑒰 𑒥𑒳𑒗𑒪 𑒕𑒪𑒻𑒏। 𑒍𑒞𑒋 𑒩𑒯𑒨 𑒪𑒑𑒪𑒲𑒯 𑒍। 𑒖𑒐𑒢 𑒬𑒼𑒦𑒰 𑒒𑒳𑒩𑒪 𑒞𑒐𑒢 𑒮𑒦 𑒩𑒯𑒮𑓂𑒨 𑒥𑒳𑒗𑒪𑒏 𑒂 𑒮𑒦 𑒯𑒿𑒮𑒲 𑒐𑒳𑒬𑒲 𑒩𑒯𑒋 𑒪𑒰𑒑𑒪।

𑒞𑒥 𑒥𑒰𑒩𑒲 𑒩𑒹 𑒏𑒰𑒢𑒨 𑒖𑒰𑒩 𑒥𑒹𑒖𑒰𑒩𑒼 𑒏𑒰𑒢𑒻 𑒩𑒹 𑒢𑒰।
𑒠𑒳𑒩𑓂𑒑𑒰 𑒑𑒹 𑒮𑓂𑒫𑒰𑒧𑒲 𑒏𑒹 𑒪𑒻𑒏𑒹 𑒏𑒼𑒯𑒥𑒩 𑒒𑒩 𑒪𑒹𑒫𑒰 𑒢𑒹
𑒏𑒹𑒪𑒯𑒲 𑒩𑒹 𑒢𑒰।
𑒏𑒼𑒯𑒥𑒩 𑒒𑒩 𑒮𑒹 𑒯𑒧𑒩𑒼 𑒢𑒱𑒏𑒰𑒪𑒱𑒨𑒼 𑒠𑒹𑒪𑒏𑒃 𑒩𑒹 𑒢𑒰
𑒠𑒳𑒩𑓂𑒑𑒰 𑒑𑒹 𑒏𑒹𑒢𑒰 𑒥𑒔𑒥𑒻 𑒁𑒢𑓂𑒢-𑒣𑒰𑒢𑒲 𑒥𑒱𑒢 𑒏𑒹𑒢𑒰
𑒩𑒯𑒥𑒃 𑒩𑒹 𑒢𑒰।

𑒛𑒼𑒏𑒲 𑒛𑒼𑒏𑒰
𑒋𑒏 𑒙𑒰 𑒕𑒪 𑒛𑒼𑒏𑒰 𑒂 𑒋𑒏𑒙𑒰 𑒕𑒪 𑒛𑒼𑒏𑒲।
𑒠𑒳𑒢𑒴𑒧𑒹 𑒥𑒛𑓂𑒛 𑒣𑓂𑒩𑒹𑒧। 𑒛𑒼𑒏𑒲 𑒏𑒯𑒋 𑒞𑒩𑒹𑒑𑒝 𑒪𑒋 𑒂𑒆 𑒞𑒿 𑒛𑒼𑒏𑒰 𑒞𑒩𑒹𑒑𑒝 𑒂𑒢𑒋𑒧𑒹 𑒮𑒹𑒏𑒹𑒝𑓂𑒛𑒏 𑒠𑒹𑒩𑒲 𑒦𑒋 𑒖𑒰𑒋 𑒞𑒿 𑒚𑒲𑒏 𑒧𑒳𑒠𑒰 𑒧𑒱𑒢𑒙𑒏 𑒠𑒹𑒩𑒲 𑒢𑒘𑒱 𑒯𑒼𑒧𑒋 𑒠𑒻𑒞 𑒕𑒪।
𑒮𑒱𑒨𑒰𑒩𑒏𑒹𑒿 𑒩𑒯𑒋 𑒄𑒩𑓂𑒭𑓂𑒨𑒰 𑒠𑒳𑒢𑒴𑒮𑒿। 𑒮𑒹 𑒍 𑒏𑒢𑒯𑒲 𑒮𑒱𑒨𑒰𑒩𑒱𑒢𑒮𑒿 𑒧𑒱𑒪𑒱 𑒑𑒹𑒪 𑒂 𑒋𑒏 𑒠𑒱𑒢 𑒖𑒐𑓂𑒢𑒢 𑒛𑒼𑒏𑒰 𑒂 𑒛𑒼𑒏𑒲 𑒋𑒏𑓂𑒏𑒹 𑒟𑒰𑒩𑒲𑒧𑒹 𑒦𑒼𑒖𑒢 𑒏𑒋 𑒩𑒯𑒪 𑒕𑒪, 𑒞𑒐𑒢 𑒛𑒼𑒏𑒰𑒏𑒹𑒿 𑒥𑒖𑒹𑒪𑒏। 𑒋𑒧𑓂𑒯𑒩-𑒍𑒧𑓂𑒯𑒩𑒏 𑒑𑒣 𑒏𑒋 𑒍𑒏𑒩𑒰 𑒥𑒱𑒠𑒰 𑒏𑒋 𑒠𑒹𑒪𑒏। 𑒤𑒹𑒩 𑒛𑒼𑒏𑒲𑒏𑒹𑒿 𑒥𑒖𑒹𑒪𑒏 𑒍 𑒮𑒱𑒨𑒩𑒥𑒰। 𑒣𑒳𑒕𑒪𑒏 𑒖𑒹 𑒁𑒯𑒰𑒿 𑒠𑒳𑒢𑒴 𑒑𑒼𑒙𑒹𑒧𑒹 𑒥𑒛𑓃 𑒣𑓂𑒩𑒹𑒧 𑒁𑒕𑒱 𑒧𑒳𑒠𑒰 𑒛𑒼𑒏𑒰 𑒖𑒹 𑒏𑒯𑒪𑒏 𑒞𑒰𑒯𑒱𑒮𑒿 𑒞𑒿 𑒯𑒧𑒩𑒰 𑒥𑒛𑓃 𑒠𑒳𑓁𑒐 𑒦𑒹𑒪। 𑒪𑒰𑒑𑒨-𑒋 𑒖𑒹 𑒍𑒏𑒩 𑒧𑒼𑒢 𑒏𑒏𑒩𑒼 𑒂𑒢 𑒣𑒩 𑒕𑒻। 𑒂𑒩 𑒏𑒱𑒕𑒳 𑒣𑒴𑒕𑒋 𑒪𑒰𑒑𑒪 𑒛𑒼𑒏𑒲 𑒞𑒰𑒫𑒞 𑒍 𑒮𑒱𑒨𑒩𑒥𑒰 𑒣𑒛𑓃𑒰 𑒑𑒹𑒪।
𑒂𑒥 𑒛𑒼𑒏𑒲 𑒒𑒩𑒧𑒹 𑒯𑒢𑒯𑒢-𑒣𑒙𑒣𑒙 𑒧𑒔𑒰 𑒠𑒹𑒪𑒏। 𑒛𑒼𑒏𑒰 𑒪𑒏𑒛𑓃𑒲 𑒏𑒰𑒙𑒨 𑒥𑒼𑒢 𑒠𑒱𑒬𑒱 𑒑𑒹𑒪। 𑒒𑒳𑒩𑒪 𑒢𑒯𑒱। 𑒦𑒼𑒩𑒧𑒹 𑒋𑒏𑒙𑒰 𑒖𑒼𑒑𑒲 𑒂𑒋𑒪 𑒞𑒿 𑒍𑒏𑒩𑒰𑒮𑒿 𑒛𑒼𑒏𑒲 𑒣𑒳𑒕𑒪𑒏 𑒖𑒹 𑒄 𑒏𑒲 𑒦𑒹𑒪 ? 𑒖𑒼𑒑𑒱𑒨𑒰 𑒏𑒯𑒪𑒏 𑒖𑒹 𑒄 𑒁𑒕𑒱 𑒣𑒴𑒩𑓂𑒫 𑒖𑒢𑓂𑒧𑒏 𑒮𑒩𑒰𑒣। 𑒖𑒐𑒢𑒹 𑒁𑒯𑒰𑒿 𑒛𑒼𑒏𑒲 𑒣𑒩 𑒫𑒱𑒬𑓂𑒫𑒰𑒮 𑒕𑒼𑒛𑓃𑒥 𑒛𑒼𑒏𑒰 𑒕𑒼𑒛𑓃𑒱 𑒏𑒋 𑒔𑒪𑒱 𑒖𑒰𑒋𑒞 𑒧𑒳𑒠𑒰 𑒮𑒰𑒞𑒧 𑒠𑒱𑒢 𑒦𑒹𑒙𑒱 𑒖𑒰𑒋𑒞।
𑒧𑒳𑒠𑒰 𑒛𑒼𑒏𑒲 𑒢𑒱𑒏𑒪𑒱 𑒑𑒹𑒪𑒱 𑒛𑒼𑒏𑒰𑒏𑒹𑒿 𑒞𑒰𑒏𑒋। 𑒥𑒑𑒳𑒪𑒰 𑒦𑒹𑒙𑒪𑒻𑒏 𑒛𑒼𑒏𑒲𑒏𑒹𑒿 𑒏𑒯𑒪𑒏𑒻𑒏-𑒩𑒳𑒏𑒱 𑒖𑒰𑒆 𑒋𑒯𑒱 𑒩𑒰𑒞𑒱। 𑒤𑒹𑒩 𑒮𑒱𑒨𑒩𑒥𑒰, 𑒫𑒙𑒫𑒵𑒏𑓂𑒭, 𑒧𑒰𑒢𑒮𑒩𑒼𑒫𑒩𑒏 𑒩𑒮𑓂𑒞𑒰𑒧𑒹 𑒥𑒼𑒢𑒧𑒹 𑒯𑒰𑒟𑒲 𑒮𑒦 𑒏𑒯𑒪𑒏𑒻𑒏 𑒖𑒹 𑒋𑒏 𑒋𑒏 𑒩𑒰𑒞𑒱 𑒩𑒳𑒏𑒱 𑒏𑒋 𑒖𑒰𑒆 𑒧𑒳𑒠𑒰 𑒛𑒼𑒏𑒲 𑒢𑒯𑒱 𑒩𑒳𑒏𑒪𑒱।
𑒤𑒹𑒩 𑒦𑒹𑒙𑒪 𑒧𑒴𑒮। 𑒍 𑒏𑒯𑒪𑒏 𑒖𑒹 𑒯𑒧𑒩𑒰 𑒮𑓀𑒑 𑒔𑒪𑒴, 𑒯𑒧 𑒧𑒯𑒪 𑒪𑒋 𑒖𑒰𑒨𑒥, 𑒐𑒱𑒮𑓂𑒮𑒰 𑒮𑒳𑒢𑒰𑒋𑒥 𑒕𑒯 𑒩𑒰𑒞𑒱𑒏 𑒥𑒰𑒠 𑒮𑒰𑒞𑒧 𑒩𑒰𑒞𑒱 𑒥𑒲𑒞𑒞 𑒂 𑒛𑒼𑒏𑒰 𑒦𑒹𑒙𑒞। 𑒐𑒱𑒮𑓂𑒮𑒰 𑒮𑒳𑒢𑒻𑒞-𑒮𑒳𑒢𑒥𑒻𑒞 𑒧𑒯𑒪 𑒠𑒱𑒬𑒱 𑒫𑒱𑒠𑒰 𑒦𑒹𑒪 𑒠𑒳𑒢𑒴 𑒑𑒼𑒙𑒹। 𑒧𑒴𑒮 𑒏𑒯𑒪𑒏 𑒖𑒹 𑒁𑒯𑒰𑒿 𑒯𑒿-𑒯𑒿 𑒏𑒯𑒻𑒞 𑒩𑒯𑒥 𑒐𑒱𑒮𑓂𑒮𑒰𑒏 𑒥𑒲𑒔𑒧𑒹। 𑒧𑒴𑒮𑒏 𑒐𑒱𑒮𑓂𑒮𑒰 𑒏𑒢𑒹𑒏 𑒢𑒧𑒑𑒩 𑒩𑒯𑒋। 𑒛𑒼𑒏𑒲 𑒥𑒲𑒔𑒧𑒹 𑒯𑒿 𑒏𑒯𑒥 𑒥𑒱𑒮𑒩𑒱 𑒑𑒹𑒪𑒱। 𑒂 𑒞𑒏𑒩 𑒥𑒰𑒠 𑒧𑒴𑒮 𑒮𑒹𑒯𑒼 𑒐𑒱𑒮𑓂𑒮𑒰 𑒥𑒱𑒮𑒩𑒱 𑒑𑒹𑒪। 𑒏𑒞𑒥𑒼 𑒧𑒼𑒢 𑒣𑒰𑒛𑓃𑒨 𑒔𑒰𑒯𑒪𑒏 𑒧𑒳𑒠𑒰 𑒧𑒼𑒢 𑒢𑒯𑒱 𑒣𑒛𑓃𑒪𑒻𑒏। 𑒤𑒹𑒩 𑒂𑒑𑒴 𑒥𑒜𑓃𑒪 𑒠𑒳𑒢𑒴 𑒑𑒼𑒙𑒹। 𑒋𑒏𑒙𑒰 𑒠𑒲𑒥𑒰𑒩𑒱𑒧𑒹 𑒦𑒴𑒩 𑒏𑒋 𑒠𑒳𑒢𑒴 𑒑𑒼𑒙𑒹 𑒮𑒳𑒩𑓀𑒑𑒧𑒹 𑒣𑒯𑒳𑒿𑒔𑒪 𑒞𑒿 𑒠𑒴 𑒩𑒰𑒞𑒱 𑒡𑒩𑒱 𑒔𑒪𑒻𑒞 𑒩𑒯𑒪 𑒞𑒐𑒢 𑒧𑒯𑒪 𑒂𑒋𑒪। 𑒍𑒞𑒋 𑒛𑒼𑒏𑒲 𑒯𑒪𑒳𑒂 𑒥𑒢𑒥𑒋 𑒪𑒹𑒪 𑒪𑒼𑒯𑒱𑒨𑒰𑒧𑒹 𑒮𑒧𑒰𑒢 𑒠𑒹𑒪𑒏 𑒂 𑒏𑒢𑒹𑒏 𑒣𑒰𑒢𑒱 𑒂𑒢𑒋 𑒪𑒹𑒪 𑒥𑒰𑒯𑒩 𑒑𑒹𑒪 𑒞𑒿 𑒧𑒴𑒮𑒏𑒹𑒿 𑒩𑒯𑒪 𑒢𑒘𑒱 𑒑𑒹𑒪𑒻𑒏 𑒂 𑒍 𑒪𑒼𑒯𑒱𑒨𑒰𑒧𑒹 𑒧𑒳𑒿𑒯 𑒠𑒋 𑒠𑒹𑒪𑒏 𑒂 𑒧𑒩𑒱 𑒑𑒹𑒪। 𑒛𑒼𑒏𑒲 𑒒𑒳𑒩𑒱 𑒏𑒋 𑒄 𑒠𑒹𑒐𑒪𑒏 𑒞𑒿 𑒏𑒳𑒯𑒛𑓃𑒱 𑒅𑒚𑒪।

𑒥𑒑𑒳𑒪𑒰 𑒕𑒼𑒛𑓃𑒪 𑒮𑒱𑒨𑒩𑒥𑒰 𑒕𑒼𑒛𑓃𑒪
𑒕𑒼𑒛𑓃𑒪 𑒫𑒙𑒏 𑒫𑒵𑒏𑓂𑒭
𑒯𑒰𑒟𑒲 𑒮𑒢 𑒥𑒪𑒑𑒩
𑒣𑒏𑒛𑓃𑒪 𑒄 𑒧𑒴𑒮।

𑒧𑒴𑒮 𑒦𑒻𑒨𑒰𑒏 𑒮𑓀𑒑 𑒪𑒹𑒪 𑒥𑒲𑒞𑒪 𑒕𑒯 𑒩𑒰𑒞𑒱,
𑒮𑒰𑒞𑒧 𑒩𑒰𑒞𑒱𑒧𑒹 𑒍 𑒣𑓂𑒩𑒰𑒝 𑒑𑒧𑒹𑒪𑒢𑓂𑒯𑒱

𑒂 𑒍𑒏𑒩 𑒮𑒰𑒿𑒮 𑒙𑒳𑒙𑒋 𑒪𑒑𑒪𑒻𑒏, 𑒧𑒳𑒠𑒰 𑒞𑒐𑒢𑒹 𑒠𑒩𑒥𑒖𑓂𑒖𑒰 𑒐𑒳𑒖𑒪 𑒂 𑒏𑒳𑒩𑒯𑒛𑓃𑒱 𑒪𑒹𑒢𑒹 𑒛𑒼𑒏𑒰 𑒯𑒰𑒖𑒱𑒩।

𑒩𑒒𑒳𑒢𑒲 𑒧𑒩𑒩
𑒠𑒹𑒫𑒠𑒞𑓂𑒞, 𑒏𑒰𑒬𑒲𑒩𑒰𑒧 𑒂 𑒩𑒒𑒳𑒢𑒲 𑒧𑒩𑒩 𑒞𑒲𑒢 𑒦𑒰𑒿𑒋। 𑒑𑒰𑒋 𑒔𑒩𑒰𑒥𑒋 𑒖𑒰𑒟𑒱। 𑒋𑒏 𑒥𑒹𑒩 𑒁𑒏𑒰𑒪 𑒂𑒋𑒪 𑒞𑒿 𑒩𑒒𑒳𑒢𑒲 𑒦𑒰𑒑𑒱 𑒏𑒋 𑒮𑒯𑒩𑒮𑒰𑒏 𑒥𑒢𑒧𑒰𑓀 𑒣𑓂𑒩𑒐𑒝𑓂𑒛𑒏 𑒥𑒱𑒠𑒱𑒨𑒰 𑒥𑒩𑒯𑒧𑒣𑒳𑒩 𑒑𑒰𑒧𑒧𑒹 𑒁𑒣𑒢 𑒛𑒹𑒩𑒰 𑒐𑒮𑒹𑒪𑒢𑓂𑒯𑒱।𑒋𑒞𑒋 𑒖𑒧𑒲𑒢𑓂𑒠𑒰𑒩 𑒩𑒯𑒟𑒱 𑒖𑒳𑒑𑒪 𑒂 𑒏𑒧𑒪𑒰 𑒣𑓂𑒩𑒮𑒰𑒠। 𑒖𑒳𑒑𑒪 𑒣𑓂𑒩𑒮𑒰𑒠 𑒋𑒏 𑒥𑒹𑒩 𑒠𑓀𑒑𑒪 𑒏𑒩𑒹𑒢𑒹 𑒕𑒪𑒰𑒯 𑒍𑒯𑒱 𑒠𑓀𑒑𑒪𑒏𑒹𑒿 𑒖𑒱𑒞𑒢𑒹 𑒕𑒪𑒰𑒯 𑒩𑒒𑒳𑒢𑒲। 𑒩𑒒𑒳𑒢𑒲 𑒯𑒳𑒢𑒏𑒹 𑒪𑒑 𑒑𑒹𑒪𑒰𑒯। 𑒋𑒏 𑒮𑒨 𑒥𑒲𑒒𑒰 𑒖𑒧𑒲𑒢 𑒠𑒹𑒪𑒢𑓂𑒯𑒱 𑒖𑒳𑒑𑒪 𑒣𑓂𑒩𑒮𑒰𑒠 𑒯𑒳𑒢𑒏𑒰। 𑒮𑒳𑒑𑒧𑒰𑓀 𑒑𑒰𑒧𑒧𑒹 𑒥𑒟𑒰𑒢 𑒥𑒢𑒍𑒪𑒢𑓂𑒯𑒱 𑒩𑒒𑒳𑒢𑒲। 𑒐𑒹𑒞𑒲 𑒏𑒩𑒟𑒱 𑒂 𑒣𑒩𑒱𑒫𑒰𑒩𑒮𑒿 𑒠𑒴𑒩 𑒮𑒳𑒑𑒧𑒰 𑒑𑒰𑒧𑒧𑒹 𑒩𑒯𑒟𑒱।
𑒋𑒧𑓂𑒯𑒩 𑒖𑒳𑒑𑒪 𑒣𑓂𑒩𑒮𑒰𑒠𑒏 𑒒𑒩𑒧𑒹 𑒏𑒪𑒯 𑒦𑒹𑒪 𑒂 𑒁𑒣𑒢 𑒖𑒧𑒲𑒢-𑒖𑒞𑓂𑒟𑒰 𑒍 𑒑𑒰𑒑𑒼𑒩𑒲 𑒩𑒰𑒖𑒏𑒹𑒿 𑒥𑒹𑒔𑒱 𑒠𑒹𑒪𑒢𑓂𑒯𑒱। 𑒩𑒒𑒳𑒢𑒲𑒏𑒹𑒿 𑒖𑒐𑒢 𑒄 𑒣𑒞𑒰 𑒔𑒪𑒪𑒢𑓂𑒯𑒱 𑒞𑒿 𑒯𑒳𑒢𑒏𑒰 𑒥𑒛𑓂𑒛 𑒠𑒳𑒐 𑒦𑒹𑒪𑒢𑓂𑒯𑒱।
𑒋𑒏 𑒠𑒱𑒢 𑒮𑓀𑒑𑒲𑒏 𑒮𑓀𑒑 𑒩𑒒𑒳𑒢𑒲 𑒢𑒰𑒔 𑒠𑒹𑒐𑒥𑒰𑒏 𑒪𑒹𑒪 𑒮𑒱𑒧𑒩𑒲 𑒑𑒰𑒧𑒏 𑒔𑒾𑒡𑒩𑒲𑒏 𑒠𑒪𑒰𑒢 𑒣𑒩 𑒑𑒹𑒪। 𑒔𑒾𑒡𑒩𑒲 𑒢𑒰𑒔𑒏 𑒥𑒰𑒠 𑒢𑒙𑒳𑒂𑒏𑒹𑒿 𑒎𑒿𑒚𑒲 𑒂 𑒠𑒳𑒬𑒰𑒪𑒰 𑒠𑒹𑒪𑒐𑒱𑒢𑓂𑒯। 𑒩𑒒𑒳𑒢𑒲 𑒢𑒙𑒳𑒂𑒏𑒹𑒿 𑒏𑒯𑒪𑒐𑒱𑒢𑓂𑒯 𑒖𑒹 𑒥𑒟𑒰𑒢 𑒣𑒩𑒮𑒿 𑒁𑒣𑒢 𑒣𑒮𑒱𑒢𑓂𑒢𑒏 𑒋𑒏 𑒖𑒼𑒛𑓃𑒲 𑒑𑒰𑒋 𑒯𑒰𑒿𑒏𑒱 𑒪𑒱𑒁। 𑒢𑒙𑒳𑒂 𑒐𑒳𑒬𑒲𑒮𑒿 𑒠𑒴 𑒙𑒰 𑒢𑒱𑒏𑒑𑒩 𑒑𑒰𑒨 𑒯𑒰𑒿𑒏𑒱 𑒁𑒢𑒪𑒏 𑒂 𑒐𑒳𑒬𑒲𑒮𑒿 𑒔𑒾𑒡𑒩𑒲𑒏𑒹𑒿 𑒠𑒹𑒐𑒹𑒪𑒏। 𑒧𑒳𑒠𑒰 𑒔𑒾𑒡𑒩𑒲𑒏𑒹𑒿 𑒥𑒳𑒗𑒹𑒪𑒋 𑒖𑒹 𑒩𑒒𑒳𑒢𑒲 𑒯𑒳𑒢𑒏𑒰 𑒢𑒲𑒔𑒰𑒿 𑒠𑒹𑒐𑒥𑒋 𑒔𑒰𑒯𑒻𑒞 𑒕𑒟𑒱। 𑒧𑒳𑒠𑒰 𑒮𑒼𑒗𑒰𑒿-𑒮𑒼𑒿𑒗𑒲 𑒦𑒱𑒩𑒥𑒰𑒏 𑒯𑒱𑒧𑓂𑒧𑒞 𑒞𑒿 𑒕𑒪𑒋 𑒢𑒯𑒱।
𑒮𑒹 𑒔𑒾𑒡𑒩𑒲 𑒠𑒹𑒫𑒲 𑒅𑒣𑒰𑒮𑒏 𑒖𑒰𑒠𑒴𑒏 𑒏𑒪𑒰𑒏𑒰𑒩 𑒧𑒏𑒠𑒴𑒧 𑒖𑒼𑒑𑒲𑒮𑒿 𑒦𑒹𑒿𑒙 𑒏𑒋𑒪𑒏। 𑒍 𑒖𑒼𑒑𑒲𑒏𑒹𑒿 𑒏𑒯𑒪𑒏 𑒖𑒹 𑒩𑒒𑒳𑒢𑒲𑒏𑒹𑒿 𑒯𑒧𑒩 𑒢𑒼𑒏𑒩 𑒥𑒢𑒰 𑒠𑒱𑒁। 𑒖𑒼𑒑𑒲 𑒮𑒩𑒱𑒮𑒍 𑒤𑒴𑒏𑒱 𑒕𑒱𑒙𑒪𑒏 𑒧𑒳𑒠𑒰 𑒩𑒒𑒳𑒢𑒲 𑒕𑒪 𑒠𑒹𑒫𑒲 𑒦𑒏𑓂𑒞 𑒮𑒹 𑒖𑒼𑒑𑒲𑒏 𑒖𑒰𑒠𑒴 𑒢𑒯𑒱 𑒔𑒪𑒪𑒻𑒏।
𑒔𑒝𑓂𑒛𑒱𑒏𑒰𑒏 𑒮𑒱𑒠𑓂𑒡𑒱 𑒏𑒋𑒪𑒏 𑒖𑒼𑒑𑒲 𑒂 𑒩𑒒𑒳𑒢𑒲 𑒣𑒩 𑒖𑒰𑒠𑒴 𑒮𑒿 𑒮𑒋 𑒙𑒰 𑒥𑒰𑒒𑒮𑒿 𑒒𑒹𑒩𑒥𑒰 𑒏𑒋 𑒧𑒰𑒩𑒱 𑒠𑒹𑒪𑒏। 𑒧𑒳𑒠𑒰 𑒦𑒏𑓂𑒞 𑒕𑒪 𑒩𑒒𑒳𑒢𑒲 𑒮𑒹 𑒔𑒝𑓂𑒛𑒱𑒏𑒰𑒏 𑒥𑒯𑒱𑒢 𑒏𑒰𑒧𑒰𑒐𑓂𑒨𑒰 𑒂𑒥𑒱 𑒩𑒒𑒳𑒢𑒲𑒏𑒹𑒿 𑒖𑒱𑒨𑒰 𑒠𑒹𑒪𑒢𑓂𑒯𑒱। 𑒠𑒼𑒮𑒩 𑒖𑒰𑒠𑒴 𑒪𑒹𑒪 𑒖𑒼𑒑𑒲 𑒮𑒩𑒱𑒮𑒍 𑒧𑒢𑓂𑒞𑓂𑒩𑒰𑒥𑒋 𑒪𑒹𑒪 𑒖𑒹 𑒮𑒩𑒱𑒮𑒍 𑒧𑒳𑒙𑓂𑒚𑒲𑒧𑒹 𑒪𑒹𑒪𑒏 𑒞𑒿 𑒧𑒳𑒙𑓂𑒚𑒲 𑒥𑒢𑓂𑒠𑒏-𑒥𑒢𑓂𑒠𑒹 𑒩𑒯𑒱 𑒑𑒹𑒪𑒻𑒏।
𑒤𑒹𑒩 𑒔𑒾𑒡𑒩𑒲𑒏𑒹𑒿 𑒣𑒞𑒰 𑒔𑒪𑒪𑒻𑒏 𑒖𑒹 𑒩𑒒𑒳𑒢𑒲 𑒑𑒰𑒑𑒼𑒩𑒲 𑒩𑒰𑒖𑒰𑒏 𑒪𑒑𑒰𑒢 𑒢𑒯𑒱 𑒠𑒹𑒢𑒹 𑒁𑒕𑒱। 𑒮𑒹 𑒍 𑒩𑒰𑒖𑒰 𑒪𑒑 𑒑𑒹𑒪 𑒂 𑒏𑒯𑒪𑒏 𑒖𑒹 𑒩𑒒𑒳𑒢𑒲 𑒢𑒹 𑒞𑒿 𑒁𑒣𑒢𑒹 𑒪𑒑𑒰𑒢 𑒠𑒹𑒢𑒹 𑒁𑒕𑒱 𑒂 𑒅𑒢𑒙𑒪𑒹 𑒪𑒼𑒏 𑒮𑒦𑒏𑒹𑒿 𑒪𑒑𑒰𑒢 𑒠𑒹𑒥𑒰𑒮𑒿 𑒧𑒢𑒰 𑒏𑒋 𑒩𑒯𑒪 𑒁𑒕𑒱।

𑒑𑒰𑒧 𑒣𑒩 𑒩𑒒𑒳𑒢𑒲 𑒢𑒯𑒱 𑒩𑒯𑒋 𑒂 𑒮𑒱𑒣𑒰𑒯𑒲 𑒮𑒦 𑒍𑒏𑒩 𑒦𑒰𑒋 𑒠𑒹𑒫𑒠𑒞𑓂𑒞 𑒧𑒩𑒛𑓃𑒏𑒹𑒿 𑒪𑒋 𑒫𑒱𑒠𑒰 𑒦𑒋 𑒑𑒹𑒪𑒰𑒯। 𑒩𑒮𑓂𑒞𑒰𑒧𑒹 𑒏𑒹𑒖𑒩𑒲𑒛𑒲𑒯 𑒪𑒑 𑒠𑒹𑒫𑒠𑒞𑓂𑒞 𑒩𑒒𑒳𑒢𑒲𑒏𑒹𑒿 𑒠𑒹𑒐𑒪𑒢𑓂𑒯𑒱, 𑒩𑒒𑒳𑒢𑒲 𑒮𑒹𑒯𑒼 𑒠𑒹𑒫𑒠𑒞𑓂𑒞𑒏𑒹𑒿 𑒠𑒹𑒐𑒪𑒢𑓂𑒯𑒱। 𑒧𑒳𑒠𑒰 𑒮𑒱𑒣𑒰𑒯𑒲 𑒮𑒦 𑒩𑒒𑒳𑒢𑒲𑒏𑒹𑒿 𑒢𑒯𑒱 𑒠𑒹𑒐𑒱 𑒮𑒏𑒪𑒰𑒯। 𑒧𑒳𑒠𑒰 𑒖𑒐𑒢 𑒩𑒰𑒖𑒰 𑒠𑒹𑒫𑒠𑒞𑓂𑒞𑒏𑒹𑒿 𑒏𑒰𑒪 𑒏𑒼𑒚𑒩𑒲𑒧𑒹 𑒠𑒋 𑒮𑒱𑒣𑒰𑒯𑒲 𑒮𑒦𑒏𑒹𑒿 𑒍𑒏𑒩𑒰 𑒧𑒰𑒩𑒥𑒰𑒏 𑒪𑒹𑒪 𑒏𑒯𑒪𑒏 𑒞𑒿 𑒖𑒹 𑒏𑒼𑒛𑓃𑒰 𑒔𑒪𑒥𑒨 𑒅𑒢𑒙𑒹 𑒞𑒏𑒩𑒹 𑒔𑒼𑒙 𑒪𑒰𑒑𑒋।
𑒩𑒰𑒖𑒰 𑒠𑒹𑒫𑒠𑒞𑓂𑒞𑒮𑒿 𑒏𑒯𑒪𑒏 𑒖𑒹 𑒑𑒪𑒞𑒲 𑒦𑒹𑒪 𑒂𑒥 𑒁𑒯𑒰𑒿 𑒖𑒹 𑒏𑒯𑒥 𑒮𑒻𑒯 𑒯𑒧 𑒏𑒩𑒥। 𑒠𑒹𑒫𑒠𑒞𑓂𑒞𑒏 𑒏𑒯𑒪𑒰 𑒁𑒢𑒳𑒮𑒰𑒩 𑒖𑒹 𑒩𑒻𑒨𑒞 𑒪𑒑𑒰𑒢 𑒢𑒯𑒱 𑒦𑒩𑒪𑒰𑒏 𑒏𑒰𑒩𑒝𑒮𑒿 𑒖𑒯𑒪𑒧𑒹 𑒩𑒯𑒟𑒱 𑒮𑒹 𑒕𑒼𑒛𑓃𑒱 𑒠𑒹𑒪 𑒑𑒹𑒪𑒰𑒯 𑒂 𑒩𑒰𑒖𑒰 𑒩𑒒𑒳𑒢𑒲 𑒧𑒩𑒩𑒮𑒿 𑒮𑒹𑒯𑒼 𑒒𑒙𑓂𑒙𑒲 𑒧𑒿𑒑𑒪𑒢𑓂𑒯𑒱।

𑒖𑒙-𑒖𑒙𑒱𑒢
𑒧𑒯𑒰𑒩𑒰𑒖 𑒮𑒱𑒫 𑒮𑒱𑓀𑒯 (𑓑𑓔𑓑𑓒-𑓑𑓔𑓔𑓖) 𑒧𑒱𑒟𑒱𑒪𑒰𑒏 𑒩𑒰𑒖𑒰 𑒕𑒪𑒰𑒯। 𑒫𑒱𑒠𑓂𑒨𑒰𑒣𑒞𑒱 𑒯𑒳𑒢𑒏𑒹 𑒬𑒰𑒮𑒢𑒏𑒰𑒪𑒧𑒹 𑒦𑒹𑒪 𑒕𑒪𑒰𑒯 𑒂 𑒩𑒰𑒖𑒰 𑒬𑒱𑒫 𑒮𑒱𑓀𑒯 𑒂 𑒯𑒳𑒢𑒏𑒩 𑒩𑒰𑒢𑒲 𑒪𑒐𑒱𑒧𑒰𑒩𑒰𑒢𑒲 𑒯𑒳𑒢𑒏𑒰𑒮𑒿 𑒥𑒛𑓃 𑒣𑓂𑒩𑒹𑒧 𑒏𑒩𑒻𑒞 𑒩𑒯𑒟𑒱। 𑒋𑒏 𑒙𑒰 𑒖𑒨𑒙 𑒫𑒰 𑒖𑒙 𑒢𑒰𑒧𑓂𑒢𑒰 𑒥𑒛𑓃 𑒣𑒻𑒒 𑒮𑓀𑒑𑒲𑒞𑒏𑒰𑒩 𑒮𑒹𑒯𑒼 𑒕𑒪𑒰𑒯 𑒍𑒯𑒱 𑒮𑒧𑒨𑒧𑒹। 𑒩𑒰𑒖𑒰 𑒬𑒱𑒫 𑒮𑒱𑓀𑒯 𑒯𑒳𑒢𑒏𑒰𑒮𑒿 𑒫𑒱𑒠𑓂𑒨𑒰𑒣𑒞𑒱𑒏 𑒑𑒲𑒞𑒏𑒹𑒿 𑒩𑒰𑒑-𑒩𑒰𑒑𑒱𑒢𑒲𑒧𑒹 𑒥𑒢𑓂𑒯𑒥𑒰𑒏 𑒪𑒹𑒪 𑒏𑒯𑒢𑒹 𑒩𑒯𑒟𑒱। 𑒫𑒻𑒯 𑒖𑒨𑒙 𑒖𑒙-𑒖𑒙𑒱𑒢 𑒢𑒰𑒙𑒏𑒏 𑒩𑒔𑒢𑒰 𑒏𑒋𑒪𑒢𑓂𑒯𑒱 𑒂 𑒖𑒙𑒏 𑒦𑒴𑒧𑒱𑒏𑒰 𑒮𑒹𑒯𑒼 𑒏𑒋𑒢𑒹 𑒕𑒪𑒰𑒯। 𑒮𑒰𑒍𑒢-𑒦𑒰𑒠𑒫𑒏 𑒬𑒳𑒏𑓂𑒪-𑒣𑒏𑓂𑒭𑒏 𑒩𑒰𑒞𑒱𑒧𑒹 𑒄 𑒢𑒰𑒙𑒏 𑒮𑓂𑒞𑓂𑒩𑒲𑒑𑒝 𑒠𑓂𑒫𑒰𑒩𑒰 𑒯𑒼𑒃𑒞 𑒁𑒕𑒱।
𑒖𑒙 𑒕𑒟𑒱 𑒣𑒯𑒱𑒩𑒢𑒹 𑒣𑒳𑒩𑒳𑒭-𑒣𑒩𑒱𑒡𑒰𑒢 𑒂 𑒖𑒙𑒱𑒢 𑒣𑒯𑒱𑒩𑒢𑒹 𑒕𑒟𑒱 𑒕𑒱𑒙𑒑𑒩 𑒢𑒴𑒂। 𑒂 𑒠𑒹𑒐𑒴 𑒠𑒳𑒢𑒴 𑒑𑒼𑒙𑒹 𑒁𑒣𑒢𑒰 𑒮𑓀𑒑 𑒁𑒣𑒢-𑒁𑒣𑒢 𑒮𑓀𑒑𑒲𑒏𑒹𑒿 𑒪𑒋 𑒂𑒥𑒱 𑒑𑒹𑒪 𑒕𑒟𑒱।
𑒥𑒱𑒨𑒰𑒯𑒏 𑒣𑒯𑒱𑒪 𑒮𑒰𑒪𑒏 𑒮𑒰𑒍𑒢। 𑒖𑒙𑒱𑒢 𑒖𑒰𑒋 𑒔𑒰𑒯𑒻𑒞 𑒕𑒟𑒱 𑒢𑒻𑒯𑒩 𑒧𑒳𑒠𑒰 𑒡𑒰𑒩𑒧𑒹 𑒥𑒰𑒜𑓃𑒱 𑒕𑒻, 𑒯𑒹 𑒧𑒰𑒨 𑒏𑒼𑒢𑒼 𑒢𑒾𑒂-𑒚𑒰𑒏𑒳𑒩-𑒥𑓂𑒩𑒰𑒯𑓂𑒧𑒝 𑒂𑒏𑒱 𑒣𑒻𑒒 𑒦𑒰𑒋 𑒏𑒹𑒩 𑒥𑒠𑒪𑒰𑒧𑒹 𑒕𑒼𑒙𑒏𑒰 𑒦𑒰𑒨𑒏𑒹𑒿 𑒣𑒚𑒥𑒱𑒯𑒿 𑒥𑒱𑒠𑒰𑒑𑒩𑒲𑒏 𑒪𑒹𑒪 𑒢𑒘𑒱 𑒞𑒿 𑒮𑒰𑒮𑒳𑒩 𑒥𑒪𑒰 𑒮𑒦 𑒥𑒱𑒠𑒰𑒑𑒩𑒲 𑒂𑒣𑒱𑒮 𑒏𑒋 𑒠𑒹𑒞।
𑒖𑒰𑒯𑒱 𑒢𑒫𑒏𑒢𑒱𑒨𑒰𑒿𑒏𑒹𑒿 𑒢𑒻𑒯𑒩 𑒢𑒯𑒱 𑒖𑒰𑒨 𑒠𑒹𑒪 𑒑𑒹𑒪 𑒍 𑒁𑒣𑒢 𑒣𑒞𑒱𑒏𑒹𑒿 𑒏𑒯𑒻𑒞 𑒕𑒟𑒱 𑒖𑒹 𑒖𑒙-𑒖𑒙𑒱𑒢𑒏 𑒢𑒵𑒞𑓂𑒨𑒧𑒹 𑒞𑒿 𑒦𑒰𑒑 𑒪𑒹𑒥𑒋 𑒠𑒱𑒁। 𑒧𑒳𑒠𑒰 𑒫𑒩 𑒗𑒴𑒧𑒩 𑒐𑒹𑒪𑒋𑒥𑒰𑒮𑒿 𑒧𑒢𑒰 𑒏𑒋 𑒠𑒻𑒞 𑒕𑒟𑒱 𑒞𑒐𑒢 𑒍 𑒒𑒰𑒧𑒏 𑒥𑒯𑒢𑓂𑒢𑒰 𑒥𑒢𑒰𑒋 𑒠𑒴𑒩 𑒦𑒋 𑒖𑒰𑒃𑒞 𑒕𑒟𑒱।
𑒖𑒙-𑒖𑒙𑒱𑒢 𑒥𑒲𑒔𑒧𑒹 𑒕𑒟𑒱 𑒂 𑒠𑒳𑒢𑒴𑒏 𑒮𑓀𑒑𑒲𑒧𑒹 𑒥𑒯𑒮 𑒔𑒪𑒱 𑒩𑒯𑒪 𑒁𑒕𑒱।
-𑒔𑒪𑒴 𑒗𑒴𑒧𑒩 𑒐𑒹𑒪𑒰𑒋।
-𑒏𑒼𑒢 𑒣𑒰𑒞𑒣𑒩 𑒔𑒜𑓃𑒱 𑒏𑒋।
-𑒣𑒳𑒩𑒻𑒢𑒲𑒏।
𑒖𑒙-𑒖𑒙𑒱𑒢𑒧𑒹 𑒫𑒱𑒂𑒯 𑒯𑒼𑒋 𑒥𑒪𑒰 𑒁𑒕𑒱 𑒧𑒳𑒠𑒰 𑒖𑒙 𑒏𑒱𑒕𑒳 𑒥𑒰𑒞𑒣𑒩 𑒁𑒛𑓃𑒱 𑒑𑒹𑒪, 𑒖𑒹𑒢𑒰 𑒡𑒰𑒢𑒏 𑒬𑒲𑒮 𑒖𑒹𑒏𑒰𑒿 𑒪𑒲𑒥𑒱 𑒏𑒋 𑒔𑒪𑒋 𑒖𑒙𑒱𑒢, 𑒏𑒱𑒕𑒳 𑒠𑒹𑒐𑒰𑒫𑒙𑒲 𑒫𑒱𑒩𑒼𑒡𑒏 𑒥𑒰𑒠 𑒖𑒙𑒱𑒢 𑒮𑒦𑒙𑒰 𑒧𑒰𑒢𑒱 𑒖𑒰𑒃𑒞 𑒕𑒟𑒱।
𑒤𑒹𑒩 𑒠𑒳𑒢𑒴 𑒑𑒼𑒙𑒹 𑒫𑒱𑒂𑒯 𑒏𑒋 𑒪𑒻𑒞 𑒕𑒟𑒱। 𑒤𑒹𑒩 𑒦𑒼𑒩 𑒯𑒼𑒃𑒞 𑒁𑒕𑒱, 𑒖𑒙𑒱𑒢 𑒏𑒯𑒻𑒞 𑒕𑒟𑒱 𑒖𑒹 𑒖𑒰𑒋 𑒠𑒱𑒁। 𑒁𑒿𑒑𑒢𑒰 𑒥𑒯𑒰𑒩𑒥𑒰𑒏 𑒁𑒕𑒱 𑒧𑒳𑒠𑒰 𑒖𑒙𑒰 𑒏𑒯𑒻𑒞 𑒕𑒟𑒱 𑒖𑒹 𑒁𑒿𑒑𑒢𑒰 𑒧𑒰𑒋-𑒥𑒯𑒱𑒢 𑒥𑒯𑒰𑒩𑒱 𑒪𑒹𑒞।
𑒤𑒹𑒩 𑒠𑒱𑒢 𑒥𑒱𑒞𑒻𑒞 𑒁𑒕𑒱 𑒞𑒿 𑒖𑒙𑒱𑒢 𑒏𑒯𑒻𑒞 𑒕𑒟𑒱 𑒖𑒹 𑒑𑒯𑒢𑒰 𑒏𑒱𑒋𑒏 𑒢𑒯𑒱 𑒥𑒢𑒥𑒰𑒋 𑒩𑒯𑒪 𑒕𑒲 𑒯𑒧𑒩𑒰 𑒪𑒹𑒪 𑒂𑒩 𑒥𑒯𑒢𑓂𑒢𑒰 𑒏𑒩𑒥 𑒞𑒿 𑒯𑒧 𑒮𑒼𑒢𑒰𑒩𑒏 𑒒𑒩 𑒔𑒪𑒱 𑒖𑒰𑒋𑒥।
𑒖𑒙𑒱𑒢 𑒞𑒞𑒹𑒏 𑒐𑒩𑒔𑒰 𑒏𑒩𑒥𑒻𑒞 𑒕𑒢𑓂𑒯𑒱 𑒖𑒹 𑒖𑒙𑒰𑒏 𑒯𑒰𑒟𑒲 𑒞𑒏 𑒥𑒱𑒏𑒰 𑒖𑒰𑒃𑒞 𑒕𑒢𑓂𑒯𑒱 𑒂 𑒯𑒰𑒟𑒲𑒏 𑒮𑒱𑒏𑒛𑓃𑒱 𑒧𑒰𑒞𑓂𑒩 𑒥𑒔𑒪 𑒩𑒯𑒱 𑒖𑒰𑒃𑒞 𑒕𑒢𑓂𑒯𑒱।
𑒖𑒙𑒱𑒢 𑒏𑒯𑒻𑒞 𑒕𑒟𑒱 𑒖𑒹 𑒯𑒧𑒩𑒰 𑒢𑒻𑒯𑒩 𑒖𑒋𑒥𑒰𑒏 𑒁𑒕𑒱 𑒞𑒿 𑒖𑒙𑒰 𑒏𑒯𑒻𑒞 𑒕𑒟𑒱 𑒖𑒹 𑒡𑒰𑒢𑒏 𑒤𑒮𑒱𑒪 𑒞𑒻𑒨𑒰𑒩 𑒁𑒕𑒱, 𑒞𑒏𑒩𑒰 𑒏𑒰𑒙𑒱 𑒏𑒋 𑒖𑒰𑒆। 𑒖𑒙𑒱𑒢 𑒢𑒯𑒱 𑒧𑒰𑒢𑒻𑒞 𑒕𑒟𑒱 𑒏𑒯𑒻𑒞 𑒕𑒟𑒱 𑒖𑒹 𑒋𑒯𑒱 𑒥𑒹𑒩 𑒖𑒹 𑒯𑒧 𑒖𑒰𑒋𑒥 𑒞𑒿 𑒒𑒳𑒩𑒱 𑒏𑒋 𑒢𑒯𑒱 𑒂𑒋𑒥। 𑒧𑒳𑒠𑒰 𑒮𑒾𑒞𑒱𑒢𑒏 𑒑𑒣 𑒮𑒳𑒢𑒱 𑒏𑒋 𑒛𑒹𑒩𑒰𑒋 𑒖𑒰𑒃𑒞 𑒕𑒟𑒱। 𑒥𑒲𑒔𑒧𑒹 𑒮𑓂𑒫𑒰𑓀𑒑 𑒖𑒹𑒢𑒰 𑒏𑒼𑒢𑒼 𑒩𑒼𑒑𑒲𑒏 𑒃𑒪𑒰𑒖 𑒂𑒠𑒱 𑒮𑒹𑒯𑒼 𑒯𑒼𑒃𑒞 𑒩𑒯𑒻𑒞 𑒁𑒕𑒱।
𑒖𑒙 𑒧𑒼𑒩𑓀𑒑 𑒥𑒱𑒠𑒰 𑒦𑒋 𑒖𑒰𑒃𑒞 𑒕𑒟𑒱 𑒏𑒧𑒰𑒋𑒥𑒰 𑒪𑒹𑒪। 𑒖𑒙𑒱𑒢𑒏𑒹𑒿 𑒮𑒼𑒢𑒰𑒩 𑒣𑓂𑒩𑒪𑒼𑒦𑒢 𑒠𑒻𑒞 𑒕𑒢𑓂𑒯𑒱 𑒑𑒯𑒢𑒰𑒏 𑒧𑒳𑒠𑒰 𑒖𑒙𑒱𑒢 𑒖𑒙𑒰𑒏 𑒮𑒳𑒢𑓂𑒠𑒩𑒞𑒰𑒏 𑒫𑒩𑓂𑒝𑒢 𑒏𑒩𑒻𑒞 𑒕𑒟𑒱।
𑒤𑒹𑒩 𑒖𑒙𑒰 𑒒𑒳𑒩𑒱 𑒁𑒥𑒻𑒞 𑒁𑒕𑒱। 𑒋𑒏 𑒠𑒱𑒢 𑒠𑒳𑒢𑒴 𑒑𑒼𑒙𑒹𑒧𑒹 𑒏𑒼𑒢𑒼 𑒑𑒣 𑒪𑓄 𑒏𑒋 𑒗𑒑𑒛𑓃𑒰 𑒦𑒋 𑒖𑒰𑒃𑒞 𑒕𑒢𑓂𑒯𑒱। 𑒖𑒙 𑒕𑒾𑒿𑒏𑒲𑒮𑒿 𑒖𑒙𑒱𑒢𑒏𑒹𑒿 𑒕𑒴𑒥𑒱 𑒠𑒻𑒞 𑒕𑒟𑒱। 𑒖𑒙𑒱𑒢 𑒩𑒴𑒮𑒱 𑒏𑒋 𑒒𑒩 𑒕𑒼𑒛𑓃𑒱 𑒠𑒻𑒞 𑒕𑒟𑒱। 𑒖𑒙𑒰 𑒑𑒼𑒣𑒲, 𑒧𑒢𑒱𑒯𑒰𑒩𑒱𑒢 𑒂 𑒂𑒢-𑒂𑒢 𑒩𑒴𑒣 𑒡𑒩𑒱 𑒞𑒰𑒏𑒻𑒞 𑒕𑒟𑒱 𑒯𑒳𑒢𑒏𑒰। 𑒖𑒙𑒰𑒏 𑒒𑒩𑒧𑒹 𑒗𑒼𑒪-𑒧𑒏𑒛𑓃𑒰 𑒦𑒩𑒱 𑒖𑒰𑒃𑒞 𑒕𑒢𑓂𑒯𑒱 𑒂 𑒁𑓀𑒑𑒢𑒰𑒧𑒹 𑒠𑒴𑒦𑒱 𑒖𑒢𑒧𑒱 𑒖𑒰𑒃𑒞 𑒕𑒢𑓂𑒯𑒱। 𑒞𑒐𑒢 𑒖𑒙𑒱𑒢 𑒯𑒳𑒢𑒏𑒰 𑒪𑒑 𑒂𑒥𑒱 𑒖𑒰𑒃𑒞 𑒕𑒟𑒱। 𑒤𑒹𑒩 𑒮𑓂𑒞𑓂𑒩𑒲𑒑𑒝 𑒪𑒼𑒏𑒢𑒱 𑒥𑒹𑓀𑒑 𑒮𑒦𑒏𑒹𑒿 𑒋𑒏𑒙𑒰 𑒐𑒠𑓂𑒡𑒰 𑒐𑒳𑒢𑒱 𑒏𑒋 𑒍𑒯𑒱𑒧𑒹 𑒠𑒋 𑒠𑒻𑒞 𑒕𑒟𑒱 𑒂 𑒆𑒣𑒩𑒮𑒿 𑒍𑒏𑒩𑒰 𑒏𑒴𑒙𑒻𑒞 𑒕𑒟𑒱 𑒂 𑒧𑒩𑒪 𑒥𑒹𑓀𑒑𑒏𑒹𑒿 𑒗𑒑𑒩𑒰𑒯𑒱 𑒮𑓂𑒞𑓂𑒩𑒲𑒏 𑒠𑒩𑒥𑒖𑓂𑒖𑒰𑒣𑒩 𑒤𑒹𑒏𑒱 𑒁𑒥𑒻𑒞 𑒕𑒟𑒱। 𑒍 𑒮𑓂𑒞𑓂𑒩𑒲 𑒦𑒼𑒩𑒧𑒹 𑒧𑒩𑒪 𑒥𑒹𑓀𑒑𑒏𑒹𑒿 𑒠𑒹𑒐𑒪𑒰 𑒅𑒞𑓂𑒞𑒩 𑒖𑒞𑒹𑒏 𑒑𑒰𑒩𑒱 𑒣𑒜𑓃𑒻𑒞 𑒕𑒟𑒱, 𑒞𑒞𑒹𑒏 𑒥𑒹𑒬𑒲 𑒥𑒩𑒐𑒰 𑒯𑒼𑒃𑒞 𑒁𑒕𑒱।

𑒥𑒞𑓂𑒞𑒴
𑒋𑒏𑒙𑒰 𑒥𑒏𑒛𑓃𑒲 𑒕𑒪𑒱। 𑒍𑒏𑒩𑒰 𑒋𑒏𑒙𑒰 𑒥𑒔𑓂𑒔𑒰 𑒦𑒹𑒪𑒻𑒏। 𑒧𑒳𑒠𑒰 𑒍 𑒕𑒰𑒑𑒩 𑒧𑒰𑒞𑓂𑒩 𑓔 𑒧𑒰𑒮𑒏 𑒕𑒪 𑒂𑒏𑒱 𑒠𑒳𑒩𑓂𑒑𑒰𑒣𑒴𑒖𑒰 𑒂𑒥𑒱 𑒑𑒹𑒪। 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒕𑒰𑒑𑒩𑒏 𑒥𑒪𑒱 𑒠𑒹𑒥𑒰𑒏 𑒏𑒱𑒨𑒼 𑒏𑒥𑒳𑒪𑒰 𑒏𑒹𑒢𑒹 𑒕𑒪𑒰𑒯। 𑒮𑒹 𑒥𑒏𑒛𑓃𑒲𑒏 𑒧𑒰𑒪𑒱𑒏𑒏 𑒪𑒑 𑒂𑒥𑒱 𑒕𑒰𑒑𑒩𑒏 𑒠𑒰𑒧-𑒠𑒲𑒑𑒩 𑒏𑒹𑒪𑒢𑓂𑒯𑒱। 𑒮𑓀𑒑𑒧𑒹 𑒣𑒰𑒃 𑒢𑒯𑒱 𑒁𑒢𑒢𑒹 𑒕𑒪𑒰𑒯 𑒮𑒹 𑒁𑒑𑒱𑒪𑒰 𑒠𑒱𑒢 𑒣𑒰𑒃 𑒁𑒢𑒥𑒰𑒏 𑒂 𑒕𑒰𑒑𑒩 𑒪𑒋 𑒖𑒋𑒥𑒰𑒏 𑒑𑒣 𑒏𑒋 𑒔𑒪𑒱 𑒑𑒹𑒪𑒰𑒯।
𑒥𑒏𑒛𑓃𑒲 𑒄 𑒮𑒦 𑒮𑒳𑒢𑒻𑒞 𑒕𑒪𑒱 𑒍 𑒁𑒣𑒢 𑒥𑒔𑓂𑒔𑒰𑒏𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒦𑒰𑒑𑒱 𑒖𑒰𑒆 𑒖𑓀𑒑𑒪 𑒠𑒱𑒮 𑒢𑒯𑒱 𑒞𑒿 𑒄 𑒧𑒪𑒱𑒏𑒥𑒰 𑒏𑒰𑒪𑓂𑒯𑒱 𑒁𑒯𑒰𑒿𑒏𑒹𑒿 𑒥𑒹𑒔𑒱 𑒠𑒹𑒞 𑒂 𑒏𑒱𑒢𑒢𑒯𑒰𑒩 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒁𑒯𑒰𑒿𑒏 𑒥𑒪𑒱 𑒠𑒋 𑒠𑒹𑒞।
𑒕𑒰𑒑𑒩 𑒩𑒰𑒞𑒰-𑒩𑒰𑒞𑒲 𑒖𑓀𑒑𑒪 𑒦𑒰𑒑𑒱 𑒑𑒹𑒪। 𑓒-𑓓 𑒮𑒰𑒪 𑒍 𑒖𑓀𑒑𑒪𑒧𑒹 𑒥𑒱𑒞𑒹𑒪𑒏, 𑒧𑒼𑒙-𑒮𑒼𑒙 𑒥𑒞𑓂𑒞𑒴 𑒦𑒋 𑒑𑒹𑒪, 𑒣𑒻𑒒 𑒠𑒰𑒜𑓃𑒲 𑒂 𑒮𑒱𑓀𑒒 𑒦𑒋 𑒑𑒹𑒪𑒻𑒏 𑒍𑒏𑒩𑒰। 𑒋𑒏 𑒠𑒱𑒢 𑒒𑒳𑒧𑒻𑒞-𑒒𑒳𑒧𑒻𑒞 𑒍 𑒠𑒼𑒮𑒩 𑒖𑓀𑒑𑒪𑒧𑒹 𑒔𑒪𑒱 𑒑𑒹𑒪। 𑒍𑒞𑒋 𑒋𑒏𑒙𑒰 𑒥𑒰𑒒 𑒕𑒪, 𑒥𑒞𑓂𑒞𑒴 𑒥𑒰𑒒𑒏𑒹𑒿 𑒠𑒹𑒐𑒱 𑒏𑒋 𑒒𑒥𑒛𑓃𑒰 𑒑𑒹𑒪। 𑒥𑒰𑒒 𑒮𑒹𑒯𑒼 𑒋𑒯𑒢 𑒖𑒰𑒢𑒫𑒩 𑒢𑒯𑒱 𑒠𑒹𑒐𑒢𑒹 𑒕𑒪, 𑒮𑒹 𑒍 𑒁𑒣𑒢𑒹 𑒛𑒩𑒰𑒨𑒪 𑒕𑒪। 𑒍 𑒣𑒳𑒕𑒪𑒏-
𑒢𑒰𑒧𑒲 𑒢𑒰𑒧𑒲 𑒠𑒰𑒜𑓃𑒲- 𑒧𑒼𑓀𑒕 𑒦𑒏𑒳𑒪𑒰,
𑒏𑒯𑒴 𑒏𑒞𑒋𑒮𑒿 𑒁𑒥𑒻𑒞 𑒕𑒲, 𑒢𑒘𑒱 𑒞𑒿 𑒠𑒹𑒫 𑒚𑒏𑒳𑒩𑒰।
𑒥𑒞𑓂𑒞𑒴 𑒏𑒯𑒪𑒏-
𑒁𑒩𑓂𑒔𑒳𑒢𑓂𑒢𑒲 𑒐𑒹𑒪𑒯𑒳𑒿 𑒑𑒩𑒔𑒳𑒢𑓂𑒢𑒲 𑒐𑒹𑒪𑒯𑒳𑒿, 𑒮𑒱𑓀𑒯 𑒐𑒹𑒪𑒯𑒳𑒿 𑒮𑒰𑒞।
𑒂 𑒖𑒯𑒱𑒨𑒰 𑒠𑒮 𑒥𑒰𑒒 𑒢𑒘𑒱 𑒯𑒼𑒋, 𑒞𑒯𑒱𑒨𑒰 𑒣𑒩𑒯𑒳𑒿 𑒚𑒏 𑒠𑒋 𑒅𑒣𑒰𑒮।

𑒄 𑒮𑒳𑒢𑒱 𑒥𑒰𑒒 𑒣𑒛𑓃𑒰𑒋𑒪। 𑒧𑒳𑒠𑒰 𑒩𑒮𑓂𑒞𑒰𑒧𑒹 𑒢𑒜𑒱𑒨𑒰 𑒮𑒱𑒨𑒰𑒩 𑒍𑒏𑒩𑒰 𑒦𑒹𑒙𑒪𑒻𑒏 𑒂 𑒏𑒯𑒪𑒏𑒻𑒏 𑒖𑒹 𑒁𑒯𑒰𑒿 𑒁𑒢𑒹𑒩𑒹 𑒛𑒩𑒰𑒃𑒞 𑒕𑒲। 𑒔𑒪𑒴 𑒂𑒃 𑒞𑒿 𑒢𑒲𑒏 𑒧𑒮𑒳𑒂𑒃 𑒯𑒼𑒋𑒞। 𑒍 𑒞𑒿 𑒥𑒏𑒛𑓃𑒲𑒏 𑒥𑒔𑓂𑒔𑒰 𑒁𑒕𑒱। 𑒥𑒰𑒒 𑒛𑒩𑒰𑒋𑒪 𑒕𑒪 𑒮𑒹 𑒍 𑒮𑒱𑒨𑒰𑒩𑒏 𑒣𑒋𑒩𑒧𑒹 𑒣𑒋𑒩 𑒥𑒰𑒢𑓂𑒯𑒱 𑒍𑒞𑒋 𑒖𑒋𑒥𑒰 𑒪𑒹𑒪 𑒞𑒻𑒨𑒰𑒩 𑒦𑒋 𑒑𑒹𑒪। 𑒂𑒥 𑒥𑒞𑓂𑒞𑒴 𑒖𑒹 𑒠𑒳𑒢𑒴𑒏𑒹𑒿 𑒁𑒥𑒻𑒞 𑒠𑒹𑒐𑒪𑒏 𑒞𑒿 𑒥𑒳𑒗𑒱 𑒑𑒹𑒪 𑒖𑒹 𑒄 𑒮𑒱𑒨𑒩𑒥𑒰𑒏 𑒏𑒰𑒖 𑒁𑒕𑒱। 𑒧𑒳𑒠𑒰 𑒍 𑒥𑒳𑒠𑓂𑒡𑒱𑒮𑒿 𑒏𑒰𑒖 𑒪𑒹𑒪𑒏। 𑒏𑒯𑒪𑒏-
“𑒌𑒿 𑒯𑒾, 𑒞𑒼𑒩𑒰 𑒠𑒴 𑒙𑒰 𑒥𑒰𑒒 𑒂𑒢𑒋 𑒪𑒹 𑒏𑒯𑒪𑒱𑒨𑒯𑒳 𑒂 𑒞𑒼𑒿 𑒋𑒏𑒹𑒙𑒰 𑒁𑒢𑒪𑒯”।
𑒄 𑒮𑒳𑒢𑒻𑒞 𑒠𑒹𑒩𑒲 𑒥𑒰𑒒 𑒦𑒰𑒑𑒪 𑒂 𑒮𑒱𑒨𑒩𑒥𑒰 𑒒𑒱𑒮𑒱𑒂𑒃𑒞 𑒧𑒩𑒱 𑒑𑒹𑒪।

𑒦𑒰𑒙-𑒦𑒰𑒙𑒱𑒢
𑒋𑒏𑒙𑒰 𑒕𑒪 𑒦𑒰𑒙 𑒂 𑒋𑒏𑒙𑒰 𑒕𑒪𑒱 𑒦𑒰𑒙𑒱𑒢।
𑒦𑒰𑒙𑒱𑒢 𑒋𑒏𑒙𑒰 𑒧𑒝𑒱𑒡𑒰𑒩𑒲 𑒑𑒯𑒳𑒧𑒢𑒮𑒿 𑒣𑓂𑒩𑒹𑒧 𑒏𑒩𑒻𑒞 𑒕𑒪𑒱। 𑒍 𑒮𑒰𑒿𑒣 𑒪𑒹𑒪 𑒢𑒲𑒏 𑒢𑒱𑒏𑒳𑒞 𑒥𑒢𑒥𑒻𑒞 𑒕𑒪𑒱 𑒂 𑒦𑒰𑒙𑒏𑒹𑒿 𑒥𑒮𑒱𑒨𑒰-𑒐𑒼𑒮𑒱𑒨𑒰 𑒠𑒻𑒞 𑒕𑒪𑒱। 𑒦𑒰𑒙 𑒠𑒳𑒥𑒩-𑒣𑒰𑒞𑒩 𑒯𑒼𑒃𑒞 𑒑𑒹𑒪। 𑒧𑒳𑒠𑒰 𑒦𑒰𑒙𑒱𑒢 𑒍𑒏𑒩𑒰 𑒖𑒱𑒥𑒋 𑒢𑒯𑒱 𑒠𑒋 𑒔𑒰𑒯𑒻𑒞 𑒕𑒪𑒱 𑒮𑒹 𑒍 𑒮𑒰𑒿𑒣𑒏𑒹𑒿 𑒏𑒯𑒪𑒏 𑒦𑒰𑒙𑒏𑒹𑒿 𑒏𑒰𑒙𑒱 𑒪𑒹𑒥𑒰𑒏 𑒪𑒹𑒪।
𑒂𑒥 𑒮𑒰𑒿𑒣 𑒦𑒰𑒙𑒏𑒹𑒿 𑒏𑒰𑒙𑒋 𑒪𑒹𑒪 𑒞𑒰𑒏𑒱𑒧𑒹 𑒩𑒯𑒋 𑒪𑒰𑒑𑒪। 𑒋𑒏 𑒠𑒱𑒢 𑒖𑒐𑒢 𑒦𑒰𑒙 𑒡𑒰𑒩𑒧𑒹 𑒣𑒋𑒩 𑒡𑒼𑒥𑒋 𑒪𑒹𑒪 𑒣𑒢𑒯𑒲 𑒐𑒼𑒪𑒱 𑒏𑒋 𑒩𑒐𑒪𑒏 𑒞𑒐𑒢𑒹 𑒮𑒰𑒿𑒣 𑒍𑒏𑒩 𑒣𑒢𑒯𑒲𑒧𑒹 𑒢𑒳𑒏𑒰 𑒑𑒹𑒪। 𑒦𑒰𑒙 𑒂𑒋𑒪 𑒂 𑒣𑒯𑒱𑒩𑒥𑒰𑒏 𑒣𑒯𑒱𑒢𑒹 𑒣𑒢𑒯𑒲 𑒗𑒰𑒩𑒪𑒏 𑒞𑒿 𑒍 𑒮𑒰𑒿𑒣 𑒐𑒮𑒱 𑒣𑒛𑓃𑒪। 𑒦𑒰𑒙 𑒣𑒢𑒯𑒲𑒮𑒿 𑒧𑒰𑒩𑒱-𑒧𑒰𑒩𑒱 𑒏𑒋 𑒮𑒰𑒿𑒣𑒏 𑒖𑒰𑒢 𑒪𑓄 𑒪𑒹𑒪𑒏 𑒂 𑒍𑒏𑒩𑒰 𑒧𑒰𑒩𑒱 𑒏𑒋 𑒫𑒩𑒏 𑒑𑒰𑒕𑒣𑒩 𑒪𑒙𑒏𑒰 𑒠𑒹𑒪𑒏।
𑒦𑒰𑒙 𑒖𑒐𑒢 𑒑𑒰𑒧𑒣𑒩 𑒣𑒯𑒳𑒿𑒔𑒪 𑒞𑒐𑒢 𑒍 𑒁𑒣𑒢 𑒏𑒢𑒱𑒨𑒰𑒿𑒏𑒹𑒿 𑒮𑒦𑒙𑒰 𑒐𑒱𑒮𑓂𑒮𑒰 𑒮𑒳𑒢𑒹𑒪𑒏। 𑒂𑒥 𑒦𑒰𑒙𑒱𑒢𑒏 𑒞𑒿 𑒣𑓂𑒩𑒰𑒝 𑒮𑒳𑒐𑒰 𑒑𑒹𑒪𑒻𑒏। 𑒍 𑒦𑒰𑒙𑒏 𑒮𑓀𑒑 𑒫𑒩𑒏 𑒑𑒰𑒕 𑒪𑒑 𑒑𑒹𑒪 𑒂 𑒁𑒣𑒢 𑒣𑓂𑒩𑒹𑒧𑒲 𑒮𑒰𑒿𑒣𑒏𑒹𑒿 𑒧𑒩𑒪 𑒠𑒹𑒐𑒱 𑒏𑒋 𑒥𑒹𑒯𑒼𑒬 𑒦𑓄 𑒑𑒹𑒪। 𑒦𑒰𑒙 𑒍𑒏𑒩𑒰 𑒑𑒰𑒧𑒣𑒩 𑒁𑒢𑒪𑒏। 𑒦𑒰𑒙𑒱𑒢 𑒠𑒳𑒐𑒲 𑒦𑓄 𑒁𑒮𑒑𑒩𑒹 𑒫𑒩𑒏 𑒑𑒰𑒕𑒣𑒩𑒮𑒿 𑒮𑒰𑒿𑒣 𑒅𑒞𑒰𑒩𑒱 𑒍𑒏𑒩𑒰 𑒢𑒾 𑒙𑒳𑒏𑒛𑓃𑒰 𑒏𑒋 𑒒𑒩 𑒂𑒢𑒱 𑒪𑒹𑒪𑒏। 𑒦𑒰𑒙𑒱𑒢 𑒮𑒰𑒿𑒣𑒏 𑒔𑒰𑒩𑒱 𑒙𑒰 𑒙𑒳𑒏𑒛𑓃𑒲 𑒔𑒰𑒩𑒴 𑒐𑒰𑒙𑒏 𑒣𑒰𑒃𑒮𑒏 𑒢𑒲𑒔𑒰𑒿, 𑒋𑒏𑒙𑒰 𑒧𑒔𑒱𑒨𑒰𑒏 𑒢𑒲𑒔𑒰𑒿, 𑒋𑒏𑒙𑒰 𑒞𑒹𑒪𑒧𑒹, 𑒋𑒏𑒙𑒰 𑒢𑒴𑒢𑒧𑒹, 𑒋𑒏𑒙𑒰 𑒛𑒰𑒿𑒩𑒧𑒹 𑒂 𑒋𑒏𑒙𑒰 𑒐𑒼𑒣𑒰𑒧𑒹 𑒩𑒰𑒐𑒱 𑒪𑒹𑒪𑒏। 𑒤𑒹𑒩 𑒦𑒰𑒙𑒏𑒹𑒿 𑒏𑒯𑒪𑒏 𑒖𑒹 𑒐𑒰𑒙, 𑒧𑒔𑒱𑒨𑒰, 𑒢𑒴𑒢-𑒞𑒹𑒪, 𑒛𑒰𑒿𑒩 𑒂 𑒐𑒼𑒣𑒰𑒧𑒹 𑒏𑒲 𑒁𑒕𑒱 𑒮𑒹 𑒥𑒞𑒰 𑒢𑒯𑒱 𑒞𑒿 𑒦𑒏𑒮𑒲 𑒗𑒼𑒏𑒰 𑒏𑒋 𑒧𑒰𑒩𑒥𑒾𑒏। 𑒦𑒰𑒙 𑒢𑒯𑒱 𑒥𑒞𑒰 𑒮𑒏𑒪 𑒂 𑒍 𑒏𑒯𑒪𑒏 𑒖𑒹 𑒧𑒩𑒋𑒮𑒿 𑒣𑒯𑒱𑒢𑒹 𑒍 𑒥𑒯𑒱𑒢𑒮𑒿 𑒦𑒹𑒿𑒙 𑒏𑒩𑒋 𑒔𑒰𑒯𑒻𑒞 𑒁𑒕𑒱 𑒂 𑒞𑒰𑒯𑒱 𑒪𑒹𑒪 𑒠𑒴 𑒠𑒱𑒢𑒳𑒏𑒰 𑒧𑒼𑒯𑒪𑒞𑒱 𑒍𑒏𑒩𑒰 𑒔𑒰𑒯𑒲।
𑒦𑒰𑒙 𑒁𑒣𑒢 𑒥𑒯𑒱𑒢 𑒪𑒑 𑒑𑒹𑒪 𑒞𑒿 𑒍 𑒁𑒣𑒢 𑒦𑒰𑒃𑒏 𑒎𑒩𑒠𑒰 𑒖𑒼𑒛𑓃𑒱 𑒩𑒯𑒪 𑒕𑒪𑒱। 𑒮𑒦 𑒑𑒣 𑒖𑒐𑒢 𑒍𑒏𑒩𑒰 𑒣𑒞𑒰 𑒔𑒪𑒪𑒻𑒏 𑒞𑒐𑒢 𑒍 𑒏𑒯𑒪𑒏 𑒖𑒹 𑒍𑒯𑒼 𑒮𑓀𑒑 𑒔𑒪𑒞 𑒍𑒏𑒩। 𑒩𑒮𑓂𑒞𑒰𑒧𑒹 𑒋𑒏𑒙𑒰 𑒡𑒩𑓂𑒧𑒬𑒰𑒪𑒰𑒧𑒹 𑒩𑒰𑒞𑒱𑒧𑒹 𑒠𑒳𑒢𑒴 𑒦𑒰𑒃-𑒥𑒯𑒱𑒢 𑒩𑒳𑒏𑒪 𑒧𑒳𑒠𑒰 𑒥𑒯𑒱𑒢 𑒔𑒱𑒢𑓂𑒞𑒹 𑒮𑒳𑒞𑒱 𑒢𑒯𑒱 𑒮𑒏𑒪। 𑒞𑒐𑒢𑒹 𑒡𑒩𑓂𑒧𑒬𑒰𑒪𑒰𑒏 𑒮𑒦𑒙𑒰 𑒠𑒲𑒂 𑒋𑒏 𑒚𑒰𑒧 𑒂𑒥𑒱 𑒏𑒋 𑒑𑒣 𑒏𑒩𑒋 𑒪𑒰𑒑𑒪। 𑒦𑒰𑒙𑒏 𑒥𑒯𑒱𑒢𑒏 𑒏𑒼𑒚𑒪𑒲𑒏 𑒠𑒲𑒂 𑒏𑒯𑒪𑒏 𑒖𑒹 𑒦𑒰𑒙𑒱𑒢 𑒁𑒣𑒢 𑒫𑒩 𑒦𑒰𑒙𑒏𑒹𑒿 𑒧𑒰𑒩𑒋 𑒔𑒰𑒯𑒻𑒞 𑒁𑒕𑒱 𑒂 𑒍 𑒖𑒹 𑒤𑒳𑒮𑒱𑒨𑒰𑒯𑒲𑒏 𑒣𑓂𑒩𑒯𑒹𑒪𑒱𑒏𑒰 𑒥𑒢𑒹𑒢𑒹 𑒁𑒕𑒱, 𑒮𑒹 𑒍𑒏𑒩 𑒣𑓂𑒩𑒹𑒧𑒲 𑒖𑒹 𑒧𑒩𑒪 𑒑𑒯𑒳𑒧𑒢 𑒕𑒪 𑒞𑒏𑒩𑒰 𑒍 𑒙𑒳𑒏𑒛𑓃𑒲 𑒏𑒋 𑒚𑒰𑒧-𑒚𑒰𑒧 𑒩𑒰𑒐𑒱 𑒠𑒹𑒢𑒹 𑒁𑒕𑒱 𑒂 𑒞𑒏𑒩𑒹 𑒣𑓂𑒩𑒯𑒹𑒪𑒱𑒏𑒰 𑒥𑒢𑒰 𑒠𑒹𑒢𑒹 𑒁𑒕𑒱। 𑒂𑒥 𑒦𑒼𑒩𑒧𑒹 𑒖𑒐𑒢 𑒠𑒳𑒢𑒴 𑒦𑒰𑒃 𑒥𑒯𑒱𑒢 𑒑𑒰𑒧𑒣𑒩 𑒣𑒯𑒳𑒿𑒔𑒋 𑒖𑒰𑒃 𑒑𑒹𑒪 𑒞𑒿 𑒥𑒯𑒱𑒢 𑒁𑒣𑒢 𑒦𑒾𑒖𑒲𑒏𑒹𑒿 𑒏𑒯𑒪𑒏 𑒖𑒹 𑒍 𑒮𑒹𑒯𑒼 𑒣𑓂𑒩𑒯𑒹𑒪𑒱𑒏𑒰 𑒮𑒳𑒢𑒋 𑒔𑒰𑒯𑒻𑒞 𑒁𑒕𑒱।
𑒦𑒰𑒙𑒱𑒢 𑒏𑒯𑒪𑒏 𑒖𑒹 𑒖𑓂𑒨𑒼𑒿 𑒍 𑒣𑓂𑒩𑒯𑒹𑒪𑒱𑒏𑒰 𑒢𑒘𑒱 𑒥𑒳𑒗𑒱 𑒮𑒏𑒪 𑒞𑒐𑒢 𑒍𑒏𑒩𑒼 𑒦𑒏𑒮𑒲 𑒗𑒼𑒿𑒏𑒰 𑒏𑓄 𑒍 𑒧𑒰𑒩𑒱 𑒠𑒹𑒞। 𑒞𑒐𑒢 𑒢𑒢𑒠𑒱 𑒏𑒯𑒪𑒏 𑒖𑒹 𑒨𑒠𑒱 𑒍 𑒣𑓂𑒩𑒯𑒹𑒪𑒱𑒏𑒰𑒏 𑒅𑒞𑓂𑒞𑒩 𑒠𑒋 𑒠𑒹𑒞 𑒞𑒐𑒢 𑒦𑒾𑒖𑒲𑒏𑒹𑒿 𑒦𑒏𑒮𑒲 𑒗𑒼𑒏𑒰 𑒏𑒋 𑒧𑒰𑒩𑒱 𑒠𑒹𑒞। 𑒂𑒥 𑒖𑒐𑒢𑒹 𑒦𑒰𑒙𑒱𑒢 𑒣𑓂𑒩𑒯𑒹𑒪𑒱𑒏𑒰 𑒏𑒯𑒪𑒏 𑒞𑒐𑒢𑒹 𑒥𑒯𑒱𑒢 𑒮𑒦𑒙𑒰 𑒙𑒳𑒏𑒛𑓃𑒲 𑒢𑒱𑒏𑒰𑒪𑒱-𑒢𑒱𑒏𑒰𑒪𑒱 𑒏𑓄 𑒮𑒼𑒗𑒰𑒿 𑒩𑒰𑒐𑒱 𑒠𑒹𑒪𑒏 𑒂 𑒦𑒾𑒖𑒲𑒏𑒹𑒿 𑒦𑒏𑒮𑒲 𑒗𑒼𑒏𑒰 𑒏𑓄 𑒧𑒰𑒩𑒱 𑒠𑒹𑒪𑒏।

𑒑𑒰𑓀𑒑𑒼𑒠𑒹𑒫𑒲𑒏 𑒦𑒑𑒞𑒰
𑒑𑒰𑓀𑒑𑒼𑒠𑒹𑒫𑒲 𑒧𑒪𑒰𑒯𑒱𑒢 𑒕𑒪𑒲𑒯। 𑒋𑒏 𑒠𑒱𑒢 𑒯𑒳𑒢𑒏𑒩 𑒮𑒰𑒿𑒋, 𑒁𑒣𑒢 𑒦𑒰𑒨 𑒂 𑒣𑒱𑒞𑒰𑒏 𑒮𑓀𑒑 𑒧𑒰𑒕 𑒧𑒰𑒩𑒋 𑒪𑒹𑒪 𑒑𑒹𑒪𑒰𑒯। 𑒮𑒰𑒍𑒢𑒏 𑒧𑒹𑒪𑒰 𑒔𑒪𑒱 𑒩𑒯𑒪 𑒕𑒪𑒻𑒏 𑒂 𑒧𑒱𑒟𑒱𑒪𑒰𑒧𑒹 𑒮𑒰𑒍𑒢𑒧𑒹 𑒧𑒰𑒿𑒕 𑒐𑒋𑒥𑒰 𑒂𑒏𑒱 𑒥𑒹𑒔𑒋𑒣𑒩 𑒞𑒿 𑒏𑒼𑒢𑒼 𑒧𑒢𑒰𑒯𑒲 𑒕𑒻 𑒢𑒯𑒱। 𑒑𑒰𑓀𑒑𑒼𑒠𑒹𑒫𑒲𑒏 𑒫𑒩 𑒮𑒼𑒔𑒪𑒢𑓂𑒯𑒱 𑒖𑒹 𑒂𑒃 𑒧𑒰𑒕 𑒧𑒰𑒩𑒱 𑒯𑒰𑒙𑒧𑒹 𑒥𑒹𑒔𑒥 𑒂 𑒮𑒰𑒍𑒢𑒏 𑒧𑒹𑒪𑒰𑒮𑒿 𑒑𑒰𑓀𑒑𑒼 𑒪𑒹𑒪 𑒔𑒴𑒛𑓃𑒲-𑒪𑒯𑒚𑒲 𑒂𑒢𑒥।
𑒡𑒰𑒩𑒧𑒹 𑒞𑒲𑒢𑒴 𑒑𑒼𑒙𑒹 𑒖𑒰𑒪 𑒤𑒹𑒏𑒪𑒢𑓂𑒯𑒱 𑒮𑒩𑒻𑒨𑒰 𑒣𑒰𑒟𑒪𑒢𑓂𑒯𑒱 𑒧𑒳𑒠𑒰 𑒥𑒹𑒩𑒴 𑒣𑒯𑒩 𑒡𑒩𑒱 𑒛𑒼𑒏𑒰, 𑒯𑒩𑒰𑒬𑓀𑒐 𑒂 𑒮𑒞𑒳𑒂 𑒧𑒰𑒞𑓂𑒩 𑒯𑒰𑒟 𑒁𑒋𑒪𑒢𑓂𑒯𑒱। 𑒂𑒥 𑒑𑒰𑓀𑒑𑒼𑒏 𑒫𑒩 𑒁𑒣𑒢 𑒏𑒢𑒱𑒨𑒰𑒿𑒏 𑒢𑒰𑒧 𑒪𑒋 𑒖𑒰𑒪 𑒤𑒹𑒏𑒱 𑒏𑒯𑒪𑒢𑓂𑒯𑒱 𑒖𑒹 𑒄 𑒁𑒢𑓂𑒞𑒱𑒧 𑒥𑒹𑒩 𑒕𑒲 𑒑𑒰𑓀𑒑𑒼। 𑒋𑒯𑒱 𑒥𑒹𑒩 𑒖𑒹 𑒧𑒰𑒿𑒕 𑒢𑒯𑒱 𑒂𑒋𑒪 𑒞𑒿 𑒯𑒧𑒩𑒰 𑒏𑓂𑒭𑒧𑒰 𑒏𑒩𑒥। 𑒂𑒥 𑒦𑒹𑒪 𑒄 𑒖𑒹 𑒋𑒯𑒱 𑒥𑒹𑒩 𑒖𑒰𑒪 𑒧𑒰𑒿𑒕𑒮𑒿 𑒦𑒩𑒱 𑒑𑒹𑒪। 𑒖𑒰𑒪 𑒒𑒱𑓀𑒔𑒢𑒹 𑒢𑒯𑒱 𑒒𑒱𑓀𑒔𑒰𑒋। 𑒮𑒦𑒙𑒰 𑒧𑒰𑒿𑒕 𑒥𑒹𑒔𑒱 𑒏𑒋 𑒑𑒰𑓀𑒑𑒼 𑒪𑒹𑒪 𑒪𑒯𑒚𑒲-𑒔𑒴𑒛𑓃𑒲𑒏 𑒮𑓀𑒑 𑒢𑒴𑒂 𑒮𑒹𑒯𑒼 𑒏𑒲𑒢𑒪 𑒑𑒹𑒪।
𑒁𑒑𑒱𑒪𑒰 𑒠𑒱𑒢 𑒑𑒰𑓀𑒑𑒼𑒏 𑒫𑒩 𑒑𑒰𑓀𑒑𑒼𑒏 𑒢𑒰𑒧 𑒪𑒋 𑒖𑒰𑒪 𑒤𑒹𑓀𑒏𑒪𑒢𑓂𑒯𑒱 𑒞𑒿 𑒤𑒹𑒩 𑒯𑒳𑒢𑒏𑒩 𑒖𑒰𑒪 𑒧𑒰𑒿𑒕𑒮𑒿 𑒦𑒩𑒱 𑒑𑒹𑒪𑒢𑓂𑒯𑒱 𑒧𑒳𑒠𑒰 𑒯𑒳𑒢𑒏𑒩 𑒦𑒰𑒃 𑒂 𑒥𑒰𑒥𑒴𑒏 𑒯𑒱𑒮𑓂𑒮𑒰 𑒫𑒻𑒯 𑒛𑒼𑒏𑒰-𑒏𑒰𑒿𑒏𑒛𑓃𑒳 𑒁𑒋𑒪𑒢𑓂𑒯𑒱। 𑒍 𑒪𑒼𑒏𑒢𑒱 𑒐𑒼𑒡𑒱𑒨𑒰 𑒏𑒋 𑒋𑒏𑒩 𑒩𑒯𑒮𑓂𑒨 𑒥𑒴𑒗𑒱 𑒑𑒹𑒪𑒰𑒯 𑒤𑒹𑒩 𑒄 𑒩𑒯𑒮𑓂𑒨 𑒮𑒾𑒿𑒮𑒹 𑒧𑒱𑒟𑒱𑒪𑒰𑒏 𑒧𑒪𑒰𑒯 𑒪𑒼𑒏𑒢𑒱𑒏 𑒥𑒲𑒔 𑒣𑒮𑒩𑒱 𑒑𑒹𑒪। 𑒑𑒰𑓀𑒑𑒼𑒠𑒹𑒫𑒲𑒏 𑒦𑒑𑒞𑒰 𑒋𑒐𑒢𑒼 𑒧𑒱𑒟𑒱𑒪𑒰𑒏 𑒧𑒪𑒰𑒯 𑒦𑒻𑒨𑒰 𑒪𑒼𑒏𑒢𑒱𑒧𑒹 𑒣𑓂𑒩𑒔𑒪𑒱𑒞 𑒁𑒕𑒱। 𑒮𑒦 𑒖𑒰𑒪 𑒤𑒹𑓀𑒏𑒥𑒰𑒮𑒿 𑒣𑒯𑒱𑒢𑒹 𑒑𑒰𑓀𑒑𑒼𑒏 𑒮𑓂𑒧𑒩𑒝 𑒏𑒩𑒻𑒞 𑒕𑒟𑒱।

𑒥𑒛𑓃 𑒮𑒳𑒐 𑒮𑒰𑒩 𑒣𑒰𑒍𑒪 𑒞𑒳𑒁 𑒞𑒲𑒩𑒹
𑒧𑒱𑒟𑒱𑒪𑒰𑒏 𑒩𑒰𑒖𑒰𑒏 𑒠𑒩𑒥𑒰𑒩𑒧𑒹 𑒩𑒯𑒟𑒱 𑒥𑒼𑒡𑒱 𑒏𑒰𑒨𑒮𑓂𑒟। 𑒩𑒰𑒖𑒰 𑒠𑒩𑒧𑒰𑒯𑒰 𑒠𑒹𑒟𑒱𑒢𑓂𑒯 𑒞𑒰𑒯𑒱𑒮𑒿 𑒑𑒳𑒖𑒩 𑒥𑒮𑒩 𑒯𑒼𑒃𑒞 𑒕𑒪𑒢𑓂𑒯𑒱 𑒥𑒼𑒡𑒱 𑒏𑒰𑒨𑒮𑓂𑒟𑒏। 𑒠𑒼𑒮𑒰𑒩𑒰𑒏 𑒣𑓂𑒩𑒞𑒱 𑒯𑒱𑓀𑒮𑒰, 𑒠𑒼𑒮𑒩𑒏 𑒮𑓂𑒞𑓂𑒩𑒲 𑒫𑒰 𑒡𑒢𑒏 𑒪𑒰𑒪𑒮𑒰 𑒋𑒯𑒱 𑒮𑒦𑒮𑒿 𑒦𑒩𑒱 𑒖𑒢𑓂𑒧 𑒠𑒴𑒩 𑒩𑒯𑒪𑒰𑒯 𑒥𑒼𑒡𑒱 𑒏𑒰𑒨𑒮𑓂𑒟। 𑒂𑒖𑒲𑒫𑒱𑒏𑒰𑒮𑒿 𑒁𑒞𑒱𑒩𑒱𑒏𑓂𑒞 𑒖𑒹 𑒩𑒰𑒬𑒱 𑒦𑒹𑒙𑒢𑓂𑒯𑒱 𑒮𑒹 𑒠𑒰𑒢-𑒣𑒳𑒝𑓂𑒨𑒧𑒹 𑒐𑒩𑒔𑒰 𑒦𑓄 𑒖𑒰𑒃𑒞 𑒕𑒪𑒢𑓂𑒯𑒱। 𑒦𑒼𑒪𑒰𑒥𑒰𑒥𑒰𑒏 𑒦𑒏𑓂𑒞 𑒕𑒪𑒰𑒯।
𑒖𑒹𑒢𑒰 𑒮𑒦𑒏𑒹𑒿 𑒥𑒳𑒜𑓃𑒰𑒣𑒰 𑒁𑒥𑒻𑒞 𑒕𑒻 𑒞𑒯𑒱𑒢𑒰 𑒥𑒼𑒡𑒱 𑒏𑒰𑒨𑒮𑓂𑒟𑒏 𑒧𑒵𑒞𑓂𑒨𑒳 𑒮𑒹𑒯𑒼 𑒯𑒳𑒢𑒏𑒩 𑒢𑒱𑒏𑒙 𑒁𑒋𑒪𑒢𑓂𑒯𑒱 𑒂 𑒍 𑒒𑒩-𑒠𑓂𑒫𑒰𑒩 𑒕𑒼𑒛𑓃𑒱 𑒑𑓀𑒑𑒰-𑒪𑒰𑒦 𑒏𑒩𑒥𑒰𑒏 𑒪𑒹𑒪 𑒒𑒩𑒮𑒿 𑒢𑒱𑒏𑒪𑒱 𑒑𑒹𑒪𑒰𑒯। 𑒖𑒐𑒢 𑒑𑓀𑒑𑒰 𑒡𑒰𑒩 𑒁𑒠𑒯𑒰 𑒏𑒼𑒮𑒣𑒩 𑒕𑒪𑒲𑒯 𑒞𑒐𑒢 𑒣𑒩𑒲𑒏𑓂𑒭𑒰𑒏 𑒪𑒹𑒪 𑒥𑒼𑒡𑒱 𑒏𑒰𑒨𑒮𑓂𑒟 𑒑𑓀𑒑𑒰𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒋 𑒁𑒣𑒢𑒰𑒏𑒹𑒿 𑒣𑒫𑒱𑒞𑓂𑒩 𑒏𑒩𑒥𑒰𑒏 𑒁𑒢𑒳𑒩𑒼𑒡 𑒏𑒋𑒪𑒢𑓂𑒯𑒱। 𑒑𑓀𑒑𑒰 𑒧𑒰𑒨 𑒞𑒙 𑒞𑒼𑒛𑓃𑒱 𑒂𑒥𑒱 𑒥𑒼𑒡𑒱 𑒏𑒰𑒨𑒮𑓂𑒟𑒏𑒹𑒿 𑒁𑒣𑒢𑒰𑒧𑒹 𑒮𑒧𑒰𑒯𑒱𑒞 𑒏𑒋𑒪𑒢𑓂𑒯𑒱। 𑒥𑒼𑒡𑒱 𑒏𑒰𑒨𑒮𑓂𑒟𑒏𑒹𑒿 𑒮𑒼𑒗𑒹 𑒮𑓂𑒫𑒩𑓂𑒑 𑒦𑒹𑒙𑒪𑒢𑓂𑒯𑒱।
𑒥𑒼𑒡𑒱 𑒏𑒰𑒨𑒮𑓂𑒟 𑒫𑒱𑒠𑓂𑒨𑒰𑒣𑒞𑒱𑒮𑒿 𑒣𑒴𑒩𑓂𑒫 𑒦𑒹𑒪 𑒕𑒪𑒰𑒯 𑒏𑒰𑒩𑒝 𑒄 𑒒𑒙𑒢𑒰 𑒫𑒱𑒠𑓂𑒨𑒰𑒣𑒞𑒱 𑒩𑒔𑒱𑒞 𑒮𑓀𑒮𑓂𑒏𑒵𑒞 𑒑𑓂𑒩𑓀𑒟 𑒣𑒳𑒩𑒳𑒭-𑒣𑒩𑒲𑒏𑓂𑒭𑒰𑒧𑒹 𑒫𑒩𑓂𑒝𑒱𑒞 𑒁𑒕𑒱। 𑒤𑒹𑒩 𑒫𑒱𑒠𑓂𑒨𑒰𑒣𑒞𑒱 𑒁𑒣𑒢 𑒧𑒻𑒟𑒱𑒪𑒲 𑒣𑒠 𑒥𑒛𑓃 𑒮𑒳𑒐 𑒮𑒰𑒩 𑒣𑒰𑒍𑒪 𑒞𑒳𑒁 𑒞𑒲𑒩𑒹 𑒪𑒱𑒐𑒪𑒢𑓂𑒯𑒱- 𑒂 𑒥𑒼𑒡𑒱-𑒏𑒰𑒨𑒮𑓂𑒟 𑒖𑒹𑒏𑒰𑒿 𑒑𑓀𑒑𑒰 𑒪𑒰𑒦 𑒏𑒋𑒪𑒢𑓂𑒯𑒱।

𑒕𑒹𑒕𑒢
𑒛𑒼𑒧 𑒖𑒰𑒞𑒱𑒏 𑒪𑒼𑒏𑒠𑒹𑒫𑒞𑒰 𑒕𑒹𑒕𑒢 𑒧𑒯𑒩𑒰𑒖 𑒥𑒛𑓂𑒛 𑒥𑒪𑒑𑒩 𑒕𑒪𑒰𑒯। 𑒧𑒳𑒠𑒰 𑒯𑒳𑒢𑒏𑒩 𑒮𑓀𑒑𑒲 𑒮𑒰𑒟𑒲 𑒮𑒦 𑒏𑒯𑒪𑒏𑒢𑓂𑒯𑒱 𑒖𑒹 𑒖𑒐𑒢 𑒍 𑒮𑒦 𑒮𑒯𑒱𑒠𑒰𑒣𑒳𑒩 𑒑𑒹𑒪 𑒕𑒪𑒰𑒯, 𑒥𑒰𑒿𑒮𑒏 𑒙𑒼𑒏𑒩𑒲 𑒂 𑒣𑒙𑒱𑒨𑒰 𑒮𑒦 𑒥𑒹𑒔𑒥𑒰𑒏 𑒪𑒹𑒪, 𑒞𑒐𑒢 𑒍𑒞𑒳𑒏𑓂𑒏𑒰 𑒛𑒼𑒧 𑒮𑒩𑒠𑒰𑒩 𑒧𑒰𑒢𑒱𑒏 𑒔𑒢𑓂𑒠𑒏 𑒫𑒲𑒩𑒞𑒰 𑒠𑒹𑒐𑒪𑒢𑓂𑒯𑒱। 𑒍 𑒋𑒏𑒙𑒰 𑒁𑒐𑒩𑒰𑒯𑒰 𑒥𑒢𑒹𑒢𑒹 𑒩𑒯𑒟𑒱 𑒂 𑒍𑒞𑒋 𑒋𑒏𑒙𑒰 𑒣𑒻𑒒 𑒮𑒢 𑒛𑓀𑒏𑒰 𑒩𑒰𑒐𑒪 𑒩𑒯𑒋। 𑒖𑒹 𑒍𑒯𑒱 𑒛𑓀𑒏𑒰𑒣𑒩 𑒕𑒼𑒙 𑒏𑒩𑒻𑒞 𑒕𑒪 𑒍𑒏𑒩𑒰 𑒧𑒰𑒢𑒱𑒏𑒔𑒢𑓂𑒠𑒏 𑒣𑒼𑒮𑒳𑒂 𑒮𑒳𑒑𑓂𑒑𑒩, 𑒖𑒏𑒩 𑒢𑒰𑒧 𑒔𑒙𑒱𑒨𑒰 𑒕𑒪, 𑒞𑒏𑒩𑒰𑒮𑒿 𑒪𑒛𑓃𑒋 𑒣𑒛𑓃𑒻𑒞 𑒕𑒪𑒻𑒏। 𑒧𑒰𑒢𑒱𑒏𑒔𑒢𑓂𑒠 𑒣𑓂𑒩𑒝 𑒏𑒋𑒢𑒹 𑒩𑒯𑒟𑒱 𑒏𑒱 𑒖𑒹 𑒏𑓂𑒨𑒼 𑒔𑒙𑒱𑒨𑒰𑒮𑒿 𑒖𑒲𑒞𑒱 𑒖𑒰𑒋𑒞 𑒮𑒹 𑒧𑒰𑒢𑒱𑒏𑒔𑒢𑓂𑒠𑒮𑒿 𑒪𑒛𑓃𑒥𑒰𑒏 𑒨𑒼𑒑𑓂𑒨 𑒯𑒼𑒋𑒞 𑒂 𑒖𑒹 𑒧𑒰𑒢𑒱𑒏𑒔𑒢𑓂𑒠𑒏𑒹𑒿 𑒯𑒩𑒰𑒋𑒞 𑒮𑒹 𑒧𑒰𑒢𑒱𑒏𑒔𑒢𑓂𑒠𑒏 𑒥𑒯𑒱𑒢 𑒣𑒢𑒧𑒰𑒮𑒿 𑒫𑒱𑒫𑒰𑒯𑒏 𑒁𑒡𑒱𑒏𑒰𑒩𑒲 𑒯𑒼𑒋𑒞। 𑒧𑒳𑒠𑒰 𑒄 𑒧𑒾𑒏𑒰 𑒂𑒃 𑒡𑒩𑒱 𑒢𑒯𑒱 𑒂𑒋𑒪 𑒩𑒯𑒋 𑒖𑒹 𑒏𑓂𑒨𑒼 𑒔𑒙𑒱𑒨𑒰𑒏𑒹𑒿 𑒯𑒩𑒰 𑒏𑒋 𑒧𑒰𑒢𑒱𑒏𑒔𑒢𑓂𑒠𑒮𑒿 𑒪𑒛𑓃𑒱 𑒮𑒏𑒱𑒞𑒋।
𑒠𑒱𑒢 𑒥𑒱𑒞𑒻𑒞 𑒑𑒹𑒪 𑒂 𑒋𑒏 𑒠𑒱𑒢 𑒁𑒣𑒢 𑒣𑒰𑒿𑒔 𑒣𑒮𑒹𑒩𑒲𑒏 𑒏𑒞𑓂𑒞𑒰 𑒪𑒋 𑒕𑒹𑒕𑒢 𑒧𑒯𑒩𑒰𑒖 𑒮𑒯𑒱𑒠𑒰𑒣𑒳𑒩 𑒠𑒱𑒬 𑒫𑒱𑒠𑒰 𑒦𑒹𑒪𑒰𑒯। 𑒛𑓀𑒏𑒰𑒣𑒩 𑒔𑒼𑒙 𑒏𑒩𑒥𑒰𑒮𑒿 𑒣𑒯𑒱𑒢𑒹 𑒕𑒹𑒕𑒢 𑒧𑒯𑒩𑒰𑒖 𑒋𑒏𑒙𑒰 𑒥𑒳𑒜𑓃𑒲𑒮𑒿 𑒂𑒑𑒱 𑒧𑒰𑒿𑒑𑒪𑒢𑓂𑒯𑒱 𑒂 𑒁𑒣𑒢 𑒔𑒱𑒪𑒧𑒧𑒹 𑒂𑒑𑒱 𑒂 𑒧𑒹𑒠𑒢𑒲𑒤𑒴𑒪 𑒦𑒩𑒱 𑒮𑒦𑒙𑒰 𑒣𑒲𑒥𑒱 𑒑𑒹𑒪𑒰𑒯 𑒂 𑒗𑒳𑒧𑒻𑒞 𑒛𑓀𑒏𑒰𑒣𑒩 𑒔𑒼𑒙 𑒏𑒋 𑒠𑒹𑒪𑒢𑓂𑒯𑒱। 𑒧𑒰𑒢𑒱𑒏𑒔𑒢𑓂𑒠 𑒕𑒹𑒕𑒢𑒏𑒹𑒿 𑒠𑒹𑒐𑒪𑒢𑓂𑒯𑒱 𑒂 𑒔𑒙𑒱𑒨𑒰𑒏𑒹𑒿 𑒬𑒼𑒩 𑒏𑒹𑒪𑒢𑓂𑒯𑒱। 𑒔𑒙𑒱𑒨𑒰 𑒠𑒾𑒑𑒱 𑒏𑒋 𑒂𑒋𑒪 𑒧𑒳𑒠𑒰 𑒕𑒹𑒕𑒢𑒏𑒹𑒿 𑒠𑒹𑒐𑒱 𑒣𑒛𑓃𑒰 𑒑𑒹𑒪। 𑒞𑒐𑒢 𑒣𑒢𑒧𑒰 𑒂 𑒧𑒰𑒢𑒱𑒏𑒔𑒢𑓂𑒠 𑒍𑒏𑒩𑒰 𑒪𑒪𑒏𑒰𑒩𑒰 𑒠𑒹𑒪𑒢𑓂𑒯𑒱 𑒞𑒿 𑒔𑒙𑒱𑒨𑒰 𑒠𑒾𑒑𑒱 𑒏𑒨 𑒕𑒹𑒕𑒢𑒣𑒩 𑒗𑒣𑒙𑒪 𑒧𑒳𑒠𑒰 𑒕𑒹𑒕𑒢 𑒍𑒏𑒩 𑒠𑒳𑒢𑒴 𑒣𑒋𑒩 𑒣𑒏𑒛𑓃𑒱 𑒔𑒲𑒩𑒱 𑒠𑒹𑒪𑒢𑓂𑒯𑒱। 𑒤𑒹𑒩 𑒧𑒢𑒱𑒏𑒔𑒢𑓂𑒠 𑒂 𑒕𑒹𑒕𑒢𑒧𑒹 𑒠𑓀𑒑𑒪 𑒦𑒹𑒪 𑒂 𑒕𑒹𑒕𑒢 𑒧𑒰𑒢𑒱𑒏𑒔𑒢𑓂𑒠𑒏𑒹𑒿 𑒥𑒖𑒰𑒩𑒱 𑒠𑒹𑒪𑒢𑓂𑒯𑒱। 𑒞𑒐𑒢 𑒐𑒳𑒬𑒲-𑒐𑒳𑒬𑒲 𑒧𑒰𑒢𑒱𑒏𑒔𑒢𑓂𑒠 𑒣𑒢𑒧𑒰𑒏 𑒥𑒱𑒨𑒰𑒯 𑒕𑒹𑒕𑒢𑒏 𑒮𑓀𑒑 𑒏𑒩𑒹𑒪𑒢𑓂𑒯𑒱।
𑒠𑒱𑒢 𑒥𑒱𑒞𑒻𑒞 𑒑𑒹𑒪 𑒂 𑒂𑒥 𑒕𑒹𑒕𑒢 𑒠𑒼𑒮𑒩𑒰𑒏 𑒥𑒮𑒥𑒱𑒙𑓂𑒙𑒲𑒮𑒿 𑒥𑒰𑒿𑒮 𑒏𑒰𑒙𑒋 𑒪𑒑𑒪𑒰𑒯। 𑒋𑒯𑒱𑒢𑒰 𑒋𑒏 𑒥𑒹𑒩 𑒨𑒰𑒠𑒫𑒏 𑒪𑒼𑒏𑒠𑒹𑒫𑒞𑒰 𑒏𑒵𑒭𑓂𑒝𑒰𑒩𑒰𑒧𑒏 𑒥𑒮𑒥𑒱𑒙𑓂𑒙𑒲𑒮𑒿 𑒍 𑒥𑒯𑒳𑒞 𑒩𑒰𑒮 𑒥𑒰𑒿𑒮 𑒏𑒰𑒙𑒱 𑒪𑒹𑒪𑒢𑓂𑒯𑒱। 𑒏𑒵𑒭𑓂𑒝𑒰𑒩𑒰𑒧 𑒁𑒣𑒢 𑒮𑒳𑒥𑒩𑒢 𑒯𑒰𑒟𑒲𑒣𑒩 𑒔𑒜𑓃𑒱 𑒁𑒋𑒪𑒰𑒯 𑒂 𑒂𑒧𑒏 𑒏𑒪𑒧𑒧𑒹 𑒕𑒹𑒕𑒢𑒏𑒹𑒿 𑒣𑒢𑒧𑒰 𑒮𑓀𑒑 𑒮𑒳𑒞𑒪 𑒠𑒹𑒐𑒪𑒢𑓂𑒯𑒱। 𑒮𑒳𑒥𑒩𑒢 𑒣𑒰𑒿𑒔 𑒣𑒮𑒹𑒩𑒲𑒏 𑒏𑒞𑓂𑒞𑒰𑒏𑒹𑒿 𑒮𑒴𑒜𑓃𑒮𑒿 𑒅𑒚𑒹𑒪𑒏 𑒂 𑒕𑒹𑒕𑒢𑒏 𑒑𑒩𑒠𑒢𑒱𑒣𑒩 𑒩𑒰𑒐𑒱 𑒠𑒹𑒪𑒏 𑒂 𑒁𑒣𑒢 𑒦𑒩𑒱𑒑𑒩 𑒣𑒋𑒩 𑒏𑒞𑓂𑒞𑒰𑒣𑒩 𑒩𑒰𑒐𑒱 𑒠𑒹𑒪𑒏।

𑒑𑒩𑒲𑒥𑒢 𑒥𑒰𑒥𑒰
𑒏𑒧𑒪𑒰 𑒏𑒰𑒞𑒏 𑒅𑒡𑒩𑒰 𑒑𑒰𑒧𑒧𑒹 𑒞𑒲𑒢𑒙𑒰 𑒮𑓀𑒑𑒲 𑒩𑒯𑒟𑒱। 𑒣𑒯𑒱𑒢𑒹 𑒑𑒰𑒧𑒹-𑒑𑒰𑒧𑒹 𑒁𑒐𑒩𑒰𑒯𑒰 𑒩𑒯𑒋, 𑒍𑒞𑒋 𑒄 𑒞𑒲𑒢𑒴 𑒮𑓀𑒑𑒲 𑒏𑒳𑒬𑓂𑒞𑒲 𑒪𑒛𑓃𑒟𑒱 𑒂 𑒣𑒯𑒪𑒧𑒰𑒢𑒲 𑒏𑒩𑒟𑒱। 𑒥𑒩𑒯𑒧 𑒚𑒰𑒏𑒳𑒩 𑒩𑒯𑒟𑒱 𑒥𑓂𑒩𑒰𑒯𑓂𑒧𑒝, 𑒒𑒰𑒮𑒲 𑒩𑒯𑒟𑒱 𑒨𑒰𑒠𑒫 𑒂 𑒑𑒩𑒲𑒥𑒢 𑒩𑒯𑒟𑒱 𑒡𑒼𑒥𑒱। 𑒁𑒐𑒩𑒰𑒯𑒰 𑒪𑒑 𑒏𑒧𑒪𑒰 𑒧𑒰𑒃𑒏 𑒣𑒲𑒛𑓃𑒲 𑒕𑒪। 𑒋𑒏 𑒥𑒹𑒩 𑒑𑒩𑒲𑒥𑒢𑒏 𑒣𑒋𑒩 𑒍𑒯𑒱 𑒣𑒲𑒛𑓃𑒲𑒧𑒹 𑒪𑒰𑒑𑒱 𑒑𑒹𑒪𑒢𑓂𑒯𑒱, 𑒖𑒰𑒯𑒱𑒮𑒿 𑒏𑒧𑒪𑒰 𑒧𑒻𑒨𑓂𑒨𑒰 𑒞𑒧𑒮𑒰 𑒑𑒹𑒪𑒲𑒯 𑒂 𑒃𑒢𑓂𑒠𑓂𑒩𑒏 𑒠𑒩𑒥𑒰𑒩𑒮𑒿 𑒋𑒏𑒙𑒰 𑒥𑒰𑒒𑒱𑒢 𑒁𑒢𑒪𑒢𑓂𑒯𑒱 𑒂 𑒍𑒏𑒩𑒰𑒮𑒿 𑒁𑒐𑒩𑒰𑒯𑒰𑒧𑒹 𑒑𑒩𑒲𑒥𑒢𑒏 𑒨𑒳𑒠𑓂𑒡 𑒦𑒹𑒪। 𑒑𑒩𑒲𑒥𑒢 𑒧𑒰𑒩𑒪 𑒑𑒹𑒪𑒰𑒯। 𑒑𑒩𑒲𑒥𑒢𑒏𑒹𑒿 𑒏𑒧𑒪𑒰 𑒡𑒰𑒩𑒧𑒹 𑒤𑒹𑓀𑒏𑒱 𑒠𑒹𑒪 𑒑𑒹𑒪𑒢𑓂𑒯𑒱 𑒂 𑒯𑒳𑒢𑒏𑒩 𑒪𑒯𑒰𑒬 𑒋𑒏𑒙𑒰 𑒡𑒼𑒥𑒱𑒨𑒰 𑒒𑒰𑒙𑒣𑒩 𑒏𑒣𑒛𑓃𑒰 𑒮𑒰𑒤 𑒏𑒩𑒻𑒞 𑒋𑒏𑒙𑒰 𑒡𑒼𑒥𑒱 𑒪𑒑 𑒣𑒯𑒳𑒿𑒔𑒪। 𑒯𑒳𑒢𑒏𑒰 𑒏𑒣𑒛𑓃𑒰 𑒮𑒰𑒤 𑒏𑒩𑒋𑒧𑒹 𑒠𑒱𑒏𑓂𑒏𑒞 𑒦𑒹𑒪𑒢𑓂𑒯𑒱 𑒮𑒹 𑒍 𑒪𑒯𑒰𑒬𑒏𑒹𑒿 𑒮𑒯𑒙𑒰𑒩𑒱 𑒏𑒋 𑒠𑒼𑒮𑒩 𑒠𑒱𑒮 𑒥𑒯𑒰 𑒠𑒹𑒪𑒢𑓂𑒯𑒱।
𑒋𑒧𑓂𑒯𑒩 𑒑𑒩𑒲𑒥𑒢𑒏 𑒏𑒢𑒱𑒨𑒰𑒿 𑒑𑒩𑒲𑒥𑒢𑒏 𑒧𑒳𑒃𑒪𑒰𑒏 𑒮𑒧𑒰𑒔𑒰𑒩 𑒮𑒳𑒢𑒱 𑒠𑒳𑒐𑒱𑒞 𑒧𑒼𑒢𑒹 𑒂𑒩𑓂𑒞𑒢𑒰𑒠 𑒏𑒋 𑒦𑒑𑒫𑒰𑒢𑒏𑒹𑒿 𑒮𑒳𑒧𑒱𑒩𑒪𑒢𑓂𑒯𑒱। 𑒂𑒥 𑒦𑒑𑒫𑒰𑒢𑒏 𑒏𑒵𑒣𑒰𑒮𑒿 𑒑𑒩𑒲𑒥𑒢𑒏 𑒂𑒞𑓂𑒧𑒰 𑒋𑒏 𑒑𑒼𑒙𑒹𑒏 𑒬𑒩𑒲𑒩𑒧𑒹 𑒣𑒻𑒮𑒱 𑒑𑒹𑒪 𑒂 𑒍 𑒦𑒑𑒞𑒰 𑒐𑒹𑒪𑒰𑒋 𑒪𑒰𑒑𑒪। 𑒦𑒑𑒞𑒰 𑒏𑒯𑒪𑒢𑓂𑒯𑒱 𑒖𑒹 𑒋𑒏 𑒑𑒼𑒙𑒹 𑒡𑒼𑒥𑒱 𑒯𑒳𑒢𑒏𑒩 𑒁𑒣𑒧𑒰𑒢 𑒏𑒹𑒪𑒢𑓂𑒯𑒱 𑒮𑒹 𑒍 𑒬𑒰𑒣 𑒠𑒻𑒞 𑒕𑒟𑒱𑒢𑓂𑒯 𑒖𑒹 𑒮𑒦 𑒡𑒼𑒥𑒱 𑒧𑒱𑒪𑒱 𑒯𑒳𑒢𑒏𑒩 𑒪𑒯𑒰𑒬𑒏𑒹𑒿 𑒏𑒧𑒪𑒰 𑒡𑒰𑒩𑒮𑒿 𑒢𑒱𑒏𑒰𑒪𑒱 𑒏𑒋 𑒠𑒰𑒯-𑒮𑓀𑒮𑓂𑒏𑒰𑒩 𑒏𑒩𑒟𑒱 𑒢𑒯𑒱 𑒞𑒿 𑒡𑒼𑒥𑒱 𑒮𑒦𑒏 𑒦𑒙𑓂𑒚𑒲𑒧𑒹 𑒏𑒣𑒛𑓃𑒰 𑒖𑒩𑒱 𑒖𑒰𑒋𑒞। 𑒮𑒦 𑒑𑒼𑒙𑒹 𑒄 𑒮𑒳𑒢𑒱 𑒡𑒰𑒩𑒧𑒹 𑒏𑒴𑒠𑒱 𑒪𑒯𑒰𑒬𑒏𑒹𑒿 𑒢𑒱𑒏𑒰𑒪𑒱 𑒠𑒰𑒯 𑒮𑓀𑒮𑓂𑒏𑒰𑒩 𑒏𑒹𑒪𑒢𑓂𑒯𑒱। 𑒞𑒏𑒩 𑒥𑒰𑒠𑒮𑒿 𑒑𑒩𑒲𑒥𑒢 𑒥𑒰𑒥𑒰 𑒦𑒙𑓂𑒚𑒲𑒏 𑒏𑒣𑒛𑓃𑒰𑒏 𑒩𑒏𑓂𑒭𑒰 𑒏𑒩𑒻𑒞 𑒂𑒋𑒪 𑒕𑒟𑒱।

𑒪𑒰𑒪𑒧𑒻𑒢 𑒥𑒰𑒥𑒰
𑒢𑒾𑒯𑒙𑓂𑒙𑒰𑒧𑒹 𑒠𑒴 𑒙𑒰 𑒮𑓀𑒑𑒲 𑒩𑒯𑒟𑒱 𑒧𑒢𑒮𑒰𑒩𑒰𑒧 𑒂 𑒪𑒰𑒪𑒧𑒻𑒢 𑒥𑒰𑒥𑒰। 𑒠𑒳𑒢𑒴 𑒑𑒼𑒙𑒹 𑒔𑒧𑒰𑒩 𑒖𑒰𑒞𑒱𑒏 𑒩𑒯𑒟𑒱 𑒂 𑒮𑓀𑒑𑒹-𑒮𑓀𑒑𑒹 𑒧𑒯𑒲𑒮 𑒔𑒩𑒰𑒥𑒟𑒱। 𑒍𑒯𑒱 𑒮𑒧𑒨𑒧𑒹 𑒢𑒾𑒯𑒙𑓂𑒙𑒰𑒧𑒹 𑒥𑒛𑓂𑒛 𑒣𑒻𑒒 𑒖𑓀𑒑𑒪 𑒩𑒯𑒋, 𑒍𑒞𑒯𑒱 𑒋𑒏 𑒠𑒱𑒢 𑒪𑒰𑒪𑒧𑒻𑒢𑒏 𑒧𑒯𑒲𑒮𑒏𑒹𑒿 𑒥𑒰𑒒𑒱𑒢𑒱𑒨𑒰 𑒒𑒹𑒩𑒱 𑒪𑒹𑒪𑒏𑒢𑓂𑒯𑒱। 𑒪𑒰𑒪𑒧𑒻𑒢 𑒧𑒯𑒲𑒮𑒏𑒹𑒿 𑒥𑒔𑒥𑒋𑒧𑒹 𑒥𑒰𑒒𑒱𑒢𑒮𑒿 𑒪𑒛𑓃𑒋 𑒞𑒿 𑒪𑒑𑒪𑒰𑒯 𑒧𑒳𑒠𑒰 𑒮𑓂𑒞𑓂𑒩𑒲𑒖𑒰𑒞𑒱𑒏 𑒥𑒰𑒒𑒱𑒢𑒣𑒩 𑒁𑒣𑒢 𑒮𑒧𑓂𑒣𑒴𑒩𑓂𑒝 𑒬𑒏𑓂𑒞𑒱𑒏 𑒣𑓂𑒩𑒨𑒼𑒑 𑒢𑒯𑒱 𑒏𑒹𑒪𑒢𑓂𑒯𑒱 𑒂 𑒧𑒰𑒩𑒪 𑒑𑒹𑒪𑒰𑒯। 𑒧𑒢𑒮𑒰𑒩𑒰𑒧𑒏𑒹𑒿 𑒍 𑒧𑒩𑒻𑒞-𑒧𑒩𑒻𑒞 𑒏𑒯𑒪𑒢𑓂𑒯𑒱 𑒖𑒹 𑒧𑒳𑒃𑒪𑒰𑒏 𑒥𑒰𑒠 𑒯𑒳𑒢𑒏𑒩 𑒠𑒰𑒯 𑒮𑓀𑒮𑓂𑒏𑒰𑒩 𑒢𑒲𑒏𑒮𑒿 𑒏𑒋𑒪 𑒖𑒰𑒃𑒢𑓂𑒯𑒱। 𑒧𑒳𑒠𑒰 𑒧𑒢𑒮𑒰𑒩𑒰𑒧 𑒑𑒰𑒧𑒣𑒩 𑒏𑒏𑒩𑒼 𑒄 𑒑𑒣 𑒢𑒯𑒱 𑒏𑒯𑒪𑒢𑓂𑒯𑒱। 𑒋𑒯𑒱𑒮𑒿 𑒪𑒰𑒪𑒧𑒻𑒢 𑒥𑒰𑒥𑒰𑒏𑒹𑒿 𑒥𑒛𑓂𑒛 𑒞𑒰𑒧𑒮 𑒔𑒜𑓃𑒪𑒢𑓂𑒯𑒱 𑒂 𑒍 𑒧𑒢𑒮𑒰𑒩𑒰𑒧𑒏𑒹𑒿 𑒥𑒏𑒰 𑒏𑓄 𑒧𑒰𑒩𑒱 𑒠𑒹𑒪𑒢𑓂𑒯𑒱। 𑒤𑒹𑒩 𑒮𑒦 𑒑𑒼𑒙𑒹 𑒧𑒱𑒪𑒱 𑒏𑒋 𑒪𑒰𑒪𑒧𑒻𑒢 𑒥𑒥𑒰𑒏 𑒠𑒰𑒯 𑒮𑓀𑒮𑓂𑒏𑒰𑒩 𑒏𑒋𑒪𑒢𑓂𑒯𑒱 𑒂 𑒯𑒳𑒢𑒏𑒩 𑒦𑒑𑒞𑒰 𑒧𑒰𑒢𑒪 𑒑𑒹𑒪। 𑒋𑒐𑒢𑒼 𑒍 𑒦𑒑𑒞𑒰𑒏 𑒠𑒹𑒯𑒧𑒹 𑒣𑒻𑒮𑒱 𑒧𑒢𑒞𑒰 𑒣𑒴𑒩𑒰 𑒏𑒩𑒻𑒞 𑒕𑒟𑒱।

𑒑𑒼𑒢𑒴 𑒗𑒰 𑒂 𑒠𑒮 𑒚𑒼𑒣 𑒥𑒰𑒥𑒰
𑒧𑒱𑒟𑒱𑒪𑒰 𑒩𑒰𑒖𑓂𑒨𑒧𑒹 𑒦𑒨𑓀𑒏𑒩 𑒮𑒳𑒐𑒰𑒛𑓃 𑒣𑒛𑓃𑒪। 𑒩𑒰𑒖𑒰 𑒜𑓃𑒼𑒪𑒯𑒼 𑒣𑒱𑒙𑒥𑒰 𑒠𑒹𑒪𑒢𑓂𑒯𑒱, 𑒖𑒹 𑒖𑒹 𑒏𑓂𑒨𑒼 𑒋𑒏𑒩 𑒞𑒼𑒛𑓃 𑒥𑒞𑒰𑒍𑒞 𑒍𑒏𑒩𑒰 𑒣𑒳𑒩𑒮𑓂𑒏𑒰𑒩 𑒦𑒹𑒙𑒞।
𑒋𑒏𑒙𑒰 𑒫𑒱𑒬𑒰𑒪𑒏𑒰𑒨 𑒥𑒰𑒥𑒰 𑒠𑒮 𑒙𑒰 𑒚𑒼𑒣 𑒏𑒋𑒢𑒹 𑒩𑒰𑒖𑒰𑒏 𑒠𑒩𑒥𑒰𑒩𑒧𑒹 𑒄 𑒏𑒯𑒻𑒞 𑒁𑒋𑒪𑒰𑒯 𑒖𑒹 𑒍 𑒮𑒨 𑒫𑒩𑓂𑒭 𑒯𑒱𑒧𑒰𑒪𑒨𑒧𑒹 𑒞𑒣𑒮𑓂𑒨𑒰 𑒏𑒋𑒢𑒹 𑒕𑒟𑒱 𑒂 𑒨𑒖𑓂𑒘𑒮𑒿 𑒫𑒩𑓂𑒭𑒰 𑒏𑒩𑒰 𑒮𑒏𑒻𑒞 𑒕𑒟𑒱। 𑒮𑒰𑒿𑒗𑒧𑒹 𑒯𑒳𑒢𑒏𑒰 𑒮𑓂𑒟𑒰𑒢 𑒂 𑒮𑒰𑒧𑒑𑓂𑒩𑒲 𑒦𑒹𑒙𑒱 𑒑𑒹𑒪𑒢𑓂𑒯𑒱। 𑒑𑒼𑒢𑒴 𑒗𑒰 𑒏𑒞𑒯𑒳 𑒣𑒯𑒳𑒢𑒰𑒃 𑒏𑒩𑒥𑒰𑒏 𑒪𑒹𑒪 𑒑𑒹𑒪 𑒩𑒯𑒟𑒱। 𑒖𑒐𑒢 𑒮𑒰𑒿𑒗𑒧𑒹 𑒒𑒳𑒩𑒪𑒰𑒯 𑒞𑒐𑒢 𑒏𑒢𑒱𑒘𑒰𑒏 𑒧𑒳𑒿𑒯𑒮𑒿 𑒮𑒦𑒙𑒰 𑒑𑒣 𑒮𑒳𑒢𑒱 𑒂𑒬𑓂𑒔𑒩𑓂𑒨𑒔𑒏𑒱𑒞 𑒯𑒳𑒢𑒏𑒰 𑒠𑒩𑓂𑒬𑒢𑒰𑒩𑓂𑒟 𑒫𑒱𑒠𑒰 𑒦𑒹𑒪𑒰𑒯।
𑒋𑒧𑓂𑒯𑒩 𑒦𑒼𑒩 𑒦𑒹𑒪𑒰𑒮𑒿 𑒣𑒯𑒱𑒢𑒯𑒱 𑒮𑒾𑒿𑒮𑒹 𑒮𑒼𑒩 𑒦𑒋 𑒑𑒹𑒪 𑒖𑒹 𑒋𑒏𑒙𑒰 𑒥𑒲𑒮 𑒚𑒼𑒣 𑒥𑒰𑒥𑒰 𑒮𑒹𑒯𑒼 𑒣𑒡𑒰𑒩𑒱 𑒔𑒳𑒏𑒪 𑒕𑒟𑒱।
𑒂𑒥 𑒠𑒮 𑒚𑒼𑒣 𑒥𑒰𑒥𑒰𑒏 𑒦𑒹𑒿𑒙 𑒯𑒳𑒢𑒏𑒰𑒮𑒿 𑒦𑒹𑒪𑒢𑓂𑒯𑒱 𑒞𑒿 𑒍 𑒏𑒯𑒪𑒢𑓂𑒯𑒱-
“𑒁𑒯𑒰𑒿 𑒥𑒲𑒮 𑒚𑒼𑒣 𑒥𑒰𑒥𑒰 𑒕𑒲 𑒞𑒿 𑒯𑒧 𑒬𑓂𑒩𑒲 𑒬𑓂𑒩𑒲 𑓑𑓐𑓘 𑒥𑒲𑒮 𑒚𑒼𑒣 𑒥𑒰𑒥𑒰 𑒕𑒲। 𑒏𑒯𑒴 𑒁𑒯𑒰𑒿 𑒏𑒼𑒢 𑒫𑒱𑒡𑒱𑒨𑒹 𑒫𑒩𑓂𑒭𑒰 𑒏𑒩𑒰𑒋𑒥”।
“𑒯𑒧 𑒋𑒏𑒙𑒰 𑒥𑒰𑒿𑒮 𑒩𑒐𑒢𑒹 𑒕𑒲 𑒖𑒏𑒩𑒰𑒮𑒿 𑒧𑒹𑒒𑒏𑒹𑒿 𑒐𑒼𑒿𑒔𑒰𑒩𑒥 𑒂 𑒫𑒩𑓂𑒭𑒰 𑒯𑒼𑒋𑒞”।
“𑒍𑒞𑒹𑒏 𑒙𑒰𑒏 𑒥𑒰𑒿𑒮 𑒩𑒐𑒻𑒞 𑒕𑒲 𑒏𑒞𑒋”।
“𑒁𑒯𑒰𑒿 𑒋𑒯𑒢 𑒜𑒼𑓀𑒑𑒲 𑒮𑒰𑒡𑒳𑒏 𑒧𑒳𑒿𑒯𑒧𑒹”।
𑒂𑒥 𑒍 𑒠𑒮 𑒚𑒼𑒣 𑒥𑒰𑒥𑒰 𑒬𑒾𑒔𑒏 𑒥𑒯𑒢𑓂𑒢𑒰 𑒏𑒋 𑒫𑒱𑒠𑒰 𑒦𑒹𑒪𑒰।
“𑒎। 𑒁𑒣𑒢 𑒐𑒩𑒰𑒧 𑒂 𑒏𑒧𑒝𑓂𑒛𑒪 𑒞𑒿 𑒪𑒋 𑒖𑒰𑒆”। 𑒧𑒳𑒠𑒰 𑒍 𑒞𑒿 𑒦𑒰𑒑𑒪 𑒂 𑒪𑒼𑒏 𑒮𑒦 𑒣𑒕𑒼𑒛𑓃 𑒏𑒋 𑒍𑒏𑒩 𑒠𑒰𑒜𑓃𑒲 𑒣𑒏𑒛𑓃𑒱 𑒒𑒲𑒔𑒋 𑒔𑒰𑒯𑒪𑒏। 𑒧𑒳𑒠𑒰 𑒍 𑒠𑒰𑒜𑓃𑒲 𑒕𑒪 𑒢𑒏𑒪𑒲 𑒂 𑒞𑒰𑒯𑒱 𑒪𑒹𑒪 𑒄 𑒢𑒼𑒔𑒰 𑒑𑒹𑒪। 𑒂 𑒍 𑒜𑓃𑒼𑓀𑒑𑒲 𑒧𑒾𑒏𑒰 𑒣𑒰𑒥𑒱 𑒦𑒰𑒑𑒱 𑒑𑒹𑒪। 𑒞𑒐𑒢 𑒑𑒼𑒢𑒴 𑒗𑒰 𑒮𑒹𑒯𑒼 𑒁𑒣𑒢 𑒧𑒼𑒕 𑒠𑒰𑒜𑓃𑒲 𑒯𑒙𑒰 𑒏𑒋 𑒁𑒣𑒢 𑒩𑒴𑒣𑒧𑒹 𑒂𑒥𑒱 𑒑𑒹𑒪𑒰𑒯। 𑒩𑒰𑒖𑒰 𑒯𑒳𑒢𑒏𑒩 𑒔𑒞𑒳𑒩𑒞𑒰𑒏 𑒮𑒧𑓂𑒧𑒰𑒢 𑒏𑒋𑒪𑒢𑓂𑒯𑒱।

𑒫𑒩𑓂𑒝𑒧𑒰𑒪𑒰 𑒬𑒱𑒏𑓂𑒭𑒰: 𑒁𑓀𑒏𑒱𑒞𑒰
𑒁𑒏𑒰𑒠𑒰𑒩𑒳𑒝 𑒮𑒧𑒨 𑒕𑒪 । 𑒁𑓀𑒏𑒱𑒞𑒰 𑒁𑒓𑒻𑒚𑒲𑒧𑒼𑒛𑓃 𑒏𑒋𑒪𑒏। 𑒍𑒏𑒩 𑒣𑒱𑒞𑒰 𑒏𑒯𑒪𑒢𑓂𑒯𑒱-
“𑒁𑒞𑒞𑓂𑒞𑒯 𑒏𑒩𑒋 𑒕𑒲। 𑒖𑒪𑓂𑒠𑒲𑒮𑒿 𑒗𑒙𑒏𑒰𑒩𑒱 𑒏𑓄 𑒔𑒪𑒴।

𑒁𑓀𑒏𑒱𑒞𑒰 𑒁𑒏𑒔𑓂𑒕 𑒦𑓄 𑒑𑒹𑒪𑒱। 𑒔𑒪𑒻𑒞-𑒔𑒪𑒻𑒞 𑒍𑒏𑒩 𑒣𑒋𑒩 𑒠𑒳𑒐𑒰 𑒑𑒹𑒪𑒻𑒏।
𑒩𑒮𑓂𑒞𑒰𑒧𑒹 𑒍 𑒋𑒏𑒙𑒰 𑒪𑒰𑒪𑒕𑒛𑓃𑒲 𑒥𑒪𑒰𑒏𑒹𑒿 𑒠𑒹𑒐𑒪𑒏।
“𑒯𑒧𑒩𑒰 𑒪𑒰𑒪𑒕𑒛𑓃𑒲 𑒏𑒲𑒢𑒱 𑒠𑒱𑒁”।
“𑒁𑓀𑒏𑒱𑒞𑒰 𑒁𑒏𑒩-𑒡𑒏𑒩 𑒢𑒯𑒱 𑒐𑒰𑒆”।
“𑒢𑒯𑒱। 𑒯𑒧𑒩𑒰 𑒄 𑒔𑒰𑒯𑒥𑒹 𑒏𑒩𑒲”।
“𑒁𑒯𑒴𑒿 𑒁𑒡𑒏𑓂𑒏𑒲 𑒕𑒲। 𑒋𑒐𑒢𑒹 𑒞𑒿 𑒏𑒞𑒹𑒏 𑒩𑒰𑒮 𑒔𑒲𑒖 𑒐𑒋𑒢𑒹 𑒩𑒯𑒲”।
𑒣𑒱𑒞𑒰 𑒞𑒻𑒨𑒼 𑒍𑒏𑒩𑒰 𑒪𑒰𑒪𑒕𑒛𑓃𑒲 𑒏𑒲𑒢𑒱 𑒠𑒹𑒪𑒢𑓂𑒯𑒱।
𑒩𑒮𑓂𑒞𑒰𑒧𑒹 𑒁𑒑𑒱𑒢𑒫𑒰𑒢 𑒠𑒹𑒐𑒱 𑒁𑓀𑒏𑒱𑒞𑒰 𑒥𑒰𑒖𑒪𑒱-
“𑒄 𑒂𑒑𑒱 𑒏𑒱𑒋𑒏 𑒪𑒰𑒑𑒪 𑒁𑒕𑒱”?
“𑒥𑒼𑒢-𑒗𑒰𑒿𑒏𑒳𑒩 𑒐𑒞𑒧 𑒏𑒩𑒥𑒰𑒏 𑒪𑒹𑒪”।
“𑒁𑒏𑓂𑒐𑒖 𑒑𑒰𑒕 𑒮𑒦 𑒞𑒻𑒨𑒼 𑒢𑒯𑒱 𑒖𑒩𑒪 𑒁𑒕𑒱”।

𑒣𑓂𑒩𑒬𑓂𑒢: 𑒥𑒔𑒱𑒨𑒰𑒏 𑒢𑒰𑒧 𑒏𑒲 𑒕𑒲?
𑒅𑒞𑓂𑒞𑒩: 𑒁𑓀𑒏𑒱𑒞𑒰।
𑒣𑓂𑒩𑒬𑓂𑒢: 𑒮𑒧𑒨 𑒏𑒹𑒯𑒢 𑒕𑒪?
𑒅𑒞𑓂𑒞𑒩: 𑒁𑒏𑒰𑒠𑒰𑒩𑒳𑒝।
𑒣𑓂𑒩𑒬𑓂𑒢: 𑒁𑓀𑒏𑒱𑒞𑒰 𑒔𑒪𑒻𑒞-𑒔𑒪𑒻𑒞.......𑒦𑓄 𑒑𑒹𑒪 𑒕𑒪𑒱।
𑒅𑒞𑓂𑒞𑒩: 𑒁𑒏𑒔𑓂𑒕।
𑒣𑓂𑒩𑒬𑓂𑒢: 𑒣𑒱𑒞𑒰 ......𑒐𑒰𑒋 𑒪𑒹𑒪 𑒧𑒢𑒰 𑒏𑒹𑒪𑒢𑓂𑒯𑒱।
𑒅𑒞𑓂𑒞𑒩: 𑒁𑒏𑒩-𑒡𑒏𑒩।
𑒣𑓂𑒩𑒬𑓂𑒢: 𑒩𑒮𑓂𑒞𑒰𑒧𑒹 𑒥𑒼𑒢-𑒗𑒰𑒏𑒳𑒿𑒛𑓃𑒏𑒹𑒿 𑒂𑒑𑒱𑒮𑒿 𑒖𑒩𑒰𑒍𑒪 𑒖𑒰𑒃𑒞 𑒩𑒯𑒋। 𑒍𑒯𑒱 𑒂𑒑𑒱𑒏 𑒪𑒹𑒪 𑒣𑓂𑒩𑒨𑒳𑒏𑓂𑒞 𑒬𑒥𑓂𑒠 𑒩𑒯𑒋...।
𑒅𑒞𑓂𑒞𑒩: 𑒁𑒑𑒱𑒢𑒫𑒰𑒢।
𑒣𑓂𑒩𑒬𑓂𑒢: 𑒁𑒑𑒱𑒢𑒫𑒰𑒢𑒧𑒹 𑒏𑒹𑒯𑒢 𑒥𑒼𑒢-𑒗𑒰𑒿𑒏𑒳𑒛𑓃 𑒢𑒯𑒱 𑒖𑒩𑒪?
𑒅𑒞𑓂𑒞𑒩: 𑒁𑒏𑓂𑒐𑒖।

𑒂𑒑𑒰𑒿:-
𑒏𑒢𑒲 𑒏𑒰𑒪 𑒠𑒳𑒢𑒴 𑒥𑒰𑒣 𑒥𑒹𑒙𑒲 𑒑𑒰𑒕𑒏 𑒕𑒰𑒯𑒧𑒹 𑒥𑒻𑒮𑒱 𑒖𑒰𑒃 𑒑𑒹𑒪𑒰𑒯। 𑒁𑓀𑒏𑒱𑒞𑒰 𑒅𑒏𑒛𑓃𑒴 𑒦𑒋 𑒥𑒻𑒮𑒱 𑒑𑒹𑒪𑒱 𑒂 𑒅𑒏𑒮𑒣𑒰𑒏𑒮 𑒏𑒩𑒋 𑒪𑒰𑒑𑒪𑒱।

“𑒁𑒯𑒰𑒿𑒏𑒹𑒿 𑒅𑒐𑒲-𑒥𑒱𑒐𑒲 𑒏𑒱𑒋𑒏 𑒪𑒰𑒑𑒪 𑒁𑒕𑒱 𑒁𑓀𑒏𑒱𑒞𑒰? 𑒮𑒰𑒿𑒗 𑒦𑓄 𑒑𑒹𑒪 𑒁𑒕𑒱। 𑒏𑒢𑒹𑒏 𑒏𑒰𑒪 𑒂𑒩 𑒔𑒪𑒥 𑒞𑒿 𑒒𑒩 𑒂𑒥𑒱 𑒖𑒰𑒋𑒞”।

𑒞𑒐𑒢𑒹 𑒁𑒏𑒰𑒮𑒧𑒹 𑒁𑓀𑒏𑒱𑒞𑒰 𑒅𑒏𑒰𑒣𑒞𑒓𑓂𑒑 𑒠𑒹𑒐𑒪𑒏।
“𑒋𑒏 𑒅𑒐𑒩𑒰𑒯𑒰 𑒔𑒪𑒪𑒰𑒏 𑒥𑒰𑒠𑒼 𑒑𑒰𑒧𑒣𑒩 𑒢𑒯𑒱 𑒣𑒯𑒳𑒿𑒔𑒪𑒯𑒳𑒿”|
“𑒔𑒪𑒴। 𑒔𑒪𑒲। 𑒩𑒮𑓂𑒞𑒰 𑒡𑓄 𑒏𑓄 𑒔𑒪𑒴 𑒢𑒯𑒱 𑒞𑒿 𑒅𑒛𑓃𑒏𑒳𑒮𑓂𑒮𑒲 𑒠𑒹𑒯𑒧𑒹 𑒪𑒰𑒑𑒱 𑒖𑒰𑒋𑒞”।
“𑒠𑒱𑒢 𑒩𑒯𑒱𑒞𑒋 𑒞𑒿 𑒐𑒹𑒞𑒧𑒹 𑒍𑒛𑓃𑒯𑒰 𑒐𑒋𑒞𑒯𑒳𑒿”।
“𑒏𑒪𑒧𑒧𑒹 𑒍𑒑𑒩𑒥𑒰𑒯 𑒮𑒦 𑒂𑒥𑒱 𑒑𑒹𑒪। 𑒏𑒛𑓃𑒹𑒏𑒧𑒰𑒢 𑒁𑒕𑒱, 𑒁𑒣𑒢-𑒁𑒣𑒢 𑒧𑒔𑒰𑒢𑒣𑒩”।
“𑒃𑒖𑒼𑒩𑒱𑒨𑒰𑒧𑒹 𑒠𑒹𑒐𑒴। 𑒠𑒱𑒢𑒧𑒹 𑒥𑒩𑒐𑒰 𑒦𑒹𑒪 𑒩𑒯𑒋 𑒮𑒹 𑒪𑒼𑒏 𑒮𑒦 𑒐𑒹𑒞𑒧𑒹 𑒏𑒠𑒥𑒰 𑒏𑒹𑒢𑒹 𑒁𑒕𑒱”।
“𑒏𑒧𑒩𑒮𑒰𑒩𑒱 𑒂𑒥𑒱 𑒑𑒹𑒪 𑒂 𑒁𑒣𑒢 𑒮𑒦𑒏 𑒒𑒩 𑒮𑒹𑒯𑒼”।

𑒙𑒱𑒣𑓂𑒣𑒝𑒲: 𑒣𑒯𑒱𑒪 𑒦𑒰𑒑𑒧𑒹 𑒁 𑒅𑒞𑓂𑒞𑒩𑒥𑒪𑒰 𑒣𑓂𑒩𑒬𑓂𑒢 𑒣𑒴𑒕𑒪 𑒑𑒹𑒪 𑒕𑒪। 𑒋𑒯𑒱 𑒦𑒰𑒑 𑒪𑒹𑒪 “𑒍” 𑒂 “𑒏” 𑒫𑒩𑓂𑒝𑒮𑒿 𑒬𑒳𑒩𑒴 𑒯𑒼𑒁𑒋𑒥𑒪𑒰 𑒅𑒞𑓂𑒞𑒩 𑒮𑒦𑒏 𑒪𑒹𑒪 𑒣𑓂𑒩𑒬𑓂𑒢 𑒥𑒢𑒰𑒆।
𑒋𑒯𑒱𑒢𑒰 𑒏𑒔𑒙𑒞𑒣 𑒫𑒩𑓂𑒝𑒧𑒰𑒪𑒰𑒮𑒿 𑒬𑒳𑒩𑒳 𑒯𑒼𑒁𑒋𑒥𑒪𑒰 𑒬𑒥𑓂𑒠 𑒥𑒯𑒳𑒪 𑒐𑒱𑒮𑓂𑒮𑒰 𑒥𑒢𑒰𑒆 𑒂 𑒥𑒔𑓂𑒔𑒰𑒏𑒹𑒿 𑒮𑒳𑒢𑒰𑒆 𑒂 𑒤𑒹𑒩 𑒍𑒏𑒩𑒰𑒮𑒿 𑒣𑓂𑒩𑒬𑓂𑒢 𑒣𑒴𑒕𑒴। 𑒐𑒱𑒮𑓂𑒮𑒰 𑒏𑒞𑒰𑒏 𑒥𑒹𑒩 𑒥𑒔𑓂𑒔𑒰𑒏𑒹𑒿 𑒮𑒳𑒢𑒰𑒍𑒪 𑒖𑒰𑒋, 𑒮𑒹 𑒥𑒔𑓂𑒔𑒰𑒏 𑒏𑓂𑒭𑒧𑒞𑒰 𑒂 𑒏𑒟𑒰𑒧𑒹 𑒣𑓂𑒩𑒨𑒳𑒏𑓂𑒞 𑒬𑒥𑓂𑒠𑒰𑒫𑒪𑒲𑒏 𑒮𑓀𑒐𑓂𑒨𑒰𑒏 𑒯𑒱𑒮𑒰𑒥𑒮𑒿 𑒢𑒱𑒩𑓂𑒡𑒰𑒩𑒱𑒞 𑒏𑒩𑒴।

𑒥𑒰𑒪-𑒏𑒫𑒱𑒞𑒰
𑒙𑓂𑒩𑒹𑒢𑒏 𑒑𑒰𑒛𑓃𑒲
𑒕𑒳𑒏 𑒕𑒳𑒏 𑒕𑒳𑒏
𑒦𑒩𑒪 𑒮𑒫𑒰𑒩𑒲
𑒙𑓂𑒩𑒹𑒢𑒏 𑒑𑒰𑒛𑓃𑒲

𑒣𑒼𑒐𑒩𑒱 𑒑𑒰𑒕𑒲
𑒠𑒾𑒑𑒪 𑒖𑒰𑒃 𑒕𑒲

𑒙𑓂𑒩𑒹𑒢 𑒑𑒰𑒛𑓃𑒲
𑒚𑒰𑒜𑓃 𑒮𑒫𑒰𑒩𑒲
𑒣𑒼𑒐𑒩𑒱 𑒑𑒰𑒕𑒲
𑒠𑒾𑒑𑒪 𑒖𑒰𑒃 𑒕𑒲!!

𑒙𑓂𑒩𑒹𑒢 𑒑𑒰𑒛𑓃𑒲 𑒡𑒰𑒩𑒏 𑒏𑒰𑒞𑒧𑒹
𑒂𑒋𑒪 𑒮𑓂𑒙𑒹𑒬𑒢 𑒕𑒳𑒙𑒪 𑒥𑒰𑒞𑒧𑒹
𑒙𑓂𑒩𑒹𑒢 𑒔𑒪𑒪 𑒠𑒾𑒑𑒪 𑒦𑒩𑒱 𑒩𑒰𑒞𑒱
𑒮𑒳𑒞𑒪 𑒑𑒰𑒕 𑒥𑒵𑒔𑓂𑒕 𑒦𑒹𑒪 𑒣𑒩𑒰𑒞


𑒏𑒹 𑒕𑒟𑒱
𑒏𑒹 𑒕𑒟𑒱 𑒖𑒱𑒢𑒏𑒩 𑒯𑒮𑓂𑒞-𑒩𑒹𑒐𑒧𑒹
𑒁𑒕𑒱 𑒣𑒩𑒱𑒬𑓂𑒩𑒧𑒮𑒿 𑒥𑒜𑓃𑒥 𑒪𑒱𑒐𑒪
𑒏𑒹 𑒕𑒟𑒱 𑒖𑒱𑒢𑒏𑒰 𑒪𑒪𑒰𑒙 𑒧𑒡𑓂𑒨
𑒣𑒩𑒱𑒬𑓂𑒩𑒧𑒏 𑒑𑒰𑒟𑒰 𑒩𑒯𑒻𑒕 𑒮𑒏𑒪

𑒖𑒹 𑒕𑒟𑒱 𑒮𑒳𑒮𑓂𑒞 𑒞𑒏𑒩𑒹 𑒔𑒧𑒏𑒻𑒞
𑒁𑒕𑒱 𑒯𑒰𑒟𑒏 𑒩𑒹𑒐𑒰 𑒥𑒳𑒗𑒴 𑒮𑒐𑒰
𑒖𑒱𑒢𑒏𑒰 𑒒𑒰𑒧 𑒢𑒯𑒱 𑒐𑒮𑒢𑓂𑒯𑒱
𑒕𑒢𑓂𑒯𑒱 𑒪𑒪𑒰𑒙 𑒔𑒧𑒏𑒻𑒞 𑒢𑒯𑒱 𑒥𑒹𑒖𑒰𑒋

𑒩𑒰𑒖𑒰 𑒬𑓂𑒩𑒲 𑒁𑒢𑒳𑒩𑒢𑓂𑒫𑒖 𑒮𑒱𑓀𑒯
𑒋𑒏 𑒮𑒳𑒩𑒧𑒹 𑒥𑒰𑒖𑒱 𑒠𑒹𑒐𑒰𑒆 𑒢𑒯𑒱 𑒁𑒩𑒳𑒢𑒢𑓂𑒫𑒢 𑒢𑒯𑒱 𑒮𑒱𑓀𑒯 𑒣𑒴𑒩𑒰 𑒋𑒏𑒯𑒱 𑒥𑒹𑒩 𑒮𑒳𑒢𑒰𑒆 𑒩𑒰𑒖𑒰 𑒬𑓂𑒩𑒲 𑒁𑒢𑒳𑒩𑒢𑓂𑒫𑒖 𑒮𑒱𑓀𑒯


𑒮𑒴𑒞𑒪
𑒮𑒴𑒞𑒪 𑒡𑒩𑒞𑒲
𑒮𑒴𑒞𑒪 𑒂𑒏𑒰𑒬
𑒮𑒴𑒞𑒱 𑒑𑒹𑒪 𑒔𑒱𑒛𑓃𑒻
𑒮𑒴𑒞𑒪 𑒑𑒰𑒕-𑒣𑒰𑒞
𑒮𑒴𑒞𑒪 𑒥𑒾𑒂
𑒮𑒴𑒞𑒪 𑒥𑒳𑒔𑓂𑒔𑒲
𑒮𑒴𑒞𑒪 𑒥𑒰𑒥𑒰
𑒮𑒴𑒞𑒪 𑒥𑒰𑒥𑒲
𑒮𑒴𑒞𑒪 𑒔𑒢𑓂𑒠 𑒧𑒰𑒧𑒰 𑒂𑒥
𑒮𑒴𑒞𑒴-𑒮𑒴𑒞𑒴 𑒥𑒾𑒂
𑒅𑒚𑒥𑒰𑒏 𑒁𑒕𑒱
𑒦𑒼𑒩𑒹-𑒮𑒏𑒰𑒪

𑒁𑒐𑒝𑓂𑒛 𑒦𑒰𑒩𑒞
𑒡𑒲𑒩 𑒫𑒲𑒩 𑒕𑒲 𑒧𑒰𑒞𑒳 𑒥𑒹𑒩 𑒏𑒲
𑒁𑒥𑒹𑒩 𑒯𑒼𑒃𑒞 𑒮𑒓𑓂𑒏𑒪𑓂𑒣𑒏 𑒏𑓂𑒭𑒝 𑒄
𑒥𑒳𑒠𑓂𑒡𑒱 𑒫𑒩𑓂𑒔𑒮𑒱 𑒣𑒩𑓂𑒖𑒢𑓂𑒨 𑒥𑒩𑒱𑒮𑒟𑒱
𑒮𑒦𑒰 𑒥𑒱𑒔 𑒫𑒰𑒏𑓂 𑒢𑒱𑒏𑒮𑒟𑒱
𑒎𑒭𑒡𑒲𑒏 𑒥𑒴𑒙𑒲 𑒣𑒰𑒏𑒋 𑒨𑒟𑒹𑒭𑓂𑒚𑒰
𑒁𑒪𑒦𑓂𑒨 𑒪𑒦𑓂𑒨𑒏 𑒨𑒼𑒑 𑒩𑒏𑓂𑒭𑒰

𑒂𑒑𑒰𑒿 𑒢𑒱𑒬𑓂𑒔𑒨𑒹𑒝 𑒏𑒰𑒩𑓂𑒨𑒏 𑒏𑓂𑒩𑒧𑒏
𑒣𑒩𑒰𑒦𑒫 𑒯𑒼𑒋 𑒮𑒦 𑒬𑒞𑓂𑒩𑒳 𑒮𑒦𑒏
𑒫𑒵𑒠𑓂𑒡𑒱 𑒥𑒳𑒠𑓂𑒡𑒱𑒏 𑒯𑒼𑒁𑒋 𑒢𑒰𑒬 𑒬𑒞𑓂𑒩𑒳𑒞𑓂𑒫𑒏
𑒧𑒱𑒞𑓂𑒩𑒏 𑒅𑒠𑒨 𑒯𑒼𑒁𑒋 𑒦𑒩𑒱 𑒖𑒑𑒞

𑒢𑒑𑒩 𑒔𑒰𑒪𑒢 𑒏𑒩𑒟𑒱 𑒮𑓂𑒞𑓂𑒩𑒲𑒑𑒝
𑒏𑒵𑒭𑒱 𑒮𑒳𑒤𑒪 𑒯𑒼𑒁𑒋 𑒏𑒩𑒴 𑒣𑓂𑒩𑒨𑒞𑓂𑒢
𑒫𑒵𑒏𑓂𑒭-𑒖𑒢𑓂𑒞𑒳𑒏 𑒮𑓀𑒑 𑒥𑒜𑒱 𑒂𑒥
𑒚𑒰𑒜 𑒯𑒼𑒆 𑒢𑒯𑒱 𑒦𑒰𑒩𑒞 𑒦𑒹𑒪 𑒮𑒰𑒿𑒗
𑒠𑒼𑒧𑒴 𑒫𑒩𑓂𑒔𑒮𑒱𑒏 𑒑𑒰𑒕 𑒗𑒯𑒩𑒰𑒆 𑒣𑒰𑒏𑒪 𑒤𑒪𑒰𑒢𑒱
𑒢𑒘𑒱 𑒮𑒼𑒔𑒥𑒰𑒏 𑒁𑒢𑒳𑒏𑒩𑒝𑒏 𑒁𑒕𑒱 𑒥𑒹𑒩 𑒣𑓂𑒩𑒰𑒝𑒲

𑒫𑒩𑓂𑒔𑒮𑓂𑒫 𑒁𑒐𑒝𑓂𑒛 𑒦𑒩𑒞𑒏 𑒧𑒢𑒮𑒱𑒏 𑒖𑒑𑒞𑒧𑒹
𑒣𑒴𑒩𑓂𑒝 𑒯𑒼𑒋𑒞 𑒧𑒢𑒼𑒩𑒟 𑒮𑒦𑒏 𑒏𑓂𑒨𑒼 𑒕𑒳𑒙𑒞 𑒢𑒘𑒱

𑒧𑒼𑒢𑒏 𑒖𑒛𑓃𑒱𑒧𑒹
𑒣𑓀𑒏𑓂𑒞𑓂𑒞𑒱𑒥𑒠𑓂𑒡 𑒣𑒳𑒢𑓁 𑒏𑒱𑒘𑓂𑒔 𑒢𑒘𑒱 𑒖𑒰𑒢𑒱 𑒏𑒱𑒋 𑒮𑒹𑒖𑒪
𑒧𑒼𑒢𑒏 𑒖𑒛𑓃𑒱𑒧𑒹 𑒩𑒰𑒐𑒪 𑒮𑒞𑒞 𑒏𑒰𑒩𑓂𑒨𑒏 𑒏𑓂𑒩𑒧 𑒦𑒹𑒙𑒪

𑒣𑒩𑓂𑒫𑒞 𑒬𑒱𑒐𑒩 𑒮𑒼𑒗𑒰𑒿 𑒁𑒥𑒻𑒞 𑒯𑒱𑒨𑒰𑒆 𑒑𑒧𑒰𑒥𑒟𑒱
𑒥𑒪 𑒒𑒙𑒪 𑒖𑒹𑒏𑒩 𑒣𑒰𑒩 𑒠𑒳𑓁𑒐𑒏 𑒮𑒰𑒑𑒩 𑒏𑒩𑒻𑒞
𑒏𑒩𑒥𑒰𑒏 𑒮𑒱𑒠𑓂𑒡𑒱 𑒮𑒼𑒗𑒰𑒿 𑒕𑒟𑒱 𑒖𑒹 𑒏𑓂𑒨𑒼 𑒫𑒱𑒏𑒪
𑒦𑒼𑒟𑒪𑒰𑒃𑒞 𑒣𑓂𑒨𑒰𑒮𑒪 𑒁𑒩𑒝𑓂𑒨𑒣𑒟 𑒧𑒹 𑒯𑒿 𑒥𑒹𑒏𑒪

𑒧𑒼𑒢𑒏 𑒖𑒛𑓃𑒱𑒧𑒹 𑒩𑒰𑒐𑒪 𑒮𑒞𑒞 𑒏𑒰𑒩𑓂𑒨𑒏 𑒏𑓂𑒩𑒧 𑒦𑒹𑒙𑒪
𑒣𑓀𑒏𑓂𑒞𑓂𑒞𑒱𑒥𑒠𑓂𑒡 𑒣𑒳𑒢𑓁 𑒏𑒱𑒘𑓂𑒔 𑒢𑒘𑒱 𑒖𑒰𑒢𑒱 𑒏𑒱𑒋 𑒮𑒹𑒖𑒪

𑒯𑒰𑒟 𑒠𑒋 𑒞𑒲𑒩 𑒂𑒢𑒱 𑒠𑒋 𑒏𑒩𑒼𑒿𑒙 𑒞𑒐𑒢 𑒞𑒞
𑒧𑒢𑒮𑒱𑒏 𑒁𑒢𑓂𑒯𑒰𑒩𑒏 𑒧𑒡𑓂𑒨 𑒫𑒱𑒔𑒩𑒝𑒯𑒱 𑒮𑒞𑒞
𑒣𑓂𑒩𑒏𑒰𑒬𑒏 𑒍𑒞𑒋 𑒏𑒋 𑒅𑒞𑓂𑒣𑒞𑓂𑒞𑒱 𑒚𑒰𑒧𑒯𑒱 𑒞𑒐𑒢
𑒫𑒱𑒣𑒞𑓂𑒞𑒱𑒏 𑒣𑒛𑓃𑒪 𑒏𑓂𑒨𑒼 𑒂𑒥 𑒢𑒘𑒱 𑒯𑒼𑒋𑒞 𑒁𑒥𑒪

𑒧𑒼𑒢𑒏 𑒖𑒛𑓃𑒱𑒧𑒹 𑒩𑒰𑒐𑒪 𑒮𑒞𑒞 𑒏𑒰𑒩𑓂𑒨𑒏 𑒏𑓂𑒩𑒧 𑒦𑒹𑒙𑒪
𑒣𑓀𑒏𑓂𑒞𑓂𑒞𑒱𑒥𑒠𑓂𑒡 𑒏𑒋 𑒣𑒳𑒢𑓁 𑒏𑒱𑒘𑓂𑒔 𑒖𑒰𑒢𑒱 𑒏𑒱𑒋 𑒮𑒹𑒖𑒪

𑒏𑒩𑒥𑒰𑒏 𑒁𑒕𑒱 𑒪𑒼𑒏 𑒏𑒪𑓂𑒨𑒰𑒝𑒏 𑒧𑒢 𑒫𑒔𑒢 𑒏𑒩𑓂𑒧𑒯𑒱
𑒢𑒘𑒱 𑒁𑒕𑒱 𑒁𑒣𑒢 𑒁𑒦𑒱𑒧𑒰𑒢 𑒕𑒼𑒛𑓃𑒥 𑒁𑒡𑓁 𑒣𑒟 𑒄
𑒒𑒳𑒩𑒞 𑒁𑒦𑒱𑒧𑒰𑒢 𑒠𑒹𑒬𑒏 𑒞𑒐𑒢 𑒁𑒦𑒱𑒧𑒰𑒢𑒲 𑒯𑒧𑒯𑒳𑒿 𑒕𑒲
𑒢𑒘𑒱 𑒞𑒿 𑒤𑒳𑒮𑒱𑒨𑒹𑒏 𑒁𑒦𑒱𑒧𑒰𑒢 𑒪𑒋 𑒏𑒩𑒥 𑒣𑒳𑒢𑓁 𑒏𑒲

𑒧𑒼𑒢𑒏 𑒖𑒛𑓃𑒱𑒧𑒹 𑒩𑒰𑒐𑒪 𑒮𑒞𑒞 𑒏𑒰𑒩𑓂𑒨𑒏 𑒏𑓂𑒩𑒧𑒏 𑒄
𑒣𑓀𑒏𑓂𑒞𑓂𑒞𑒱𑒥𑒠𑓂𑒡 𑒣𑒳𑒢𑓁 𑒏𑒱𑒘𑓂𑒔 𑒖𑒰𑒢𑒱 𑒏𑒋 𑒮𑒹𑒖𑒪 𑒕𑒲

𑒣𑒳𑒢𑓁 𑒮𑓂𑒧𑒵𑒞𑒱
𑒥𑒱𑒞𑒪 𑒥𑒩𑓂𑒐 𑒥𑒱𑒞𑒪 𑒨𑒳𑒑
𑒥𑒱𑒞𑒪 𑒮𑒯𑒮𑓂𑒩𑒰𑒥𑓂𑒠𑒱 𑒂𑒥
𑒧𑒼𑒢 𑒣𑒰𑒛𑓃𑒱 𑒟𑒰𑒏𑒪 𑒏𑒲
𑒯𑒼𑒨𑒞 𑒮𑓂𑒧𑒵𑒞𑒱𑒏 𑒬𑒰𑒣

𑒫𑒻𑒯 𑒣𑒳𑒢𑓁 𑒣𑒳𑒢𑓁 𑒒𑒙𑒱𑒞
𑒯𑒰𑒩𑒱 𑒯𑒧𑒩 𑒫𑒱𑒖𑒨 𑒍𑒏𑒩
𑒢𑒯𑒱 𑒪𑒹𑒪𑒯𑒳𑒿 𑒣𑒰𑒚 𑒏𑒼𑒢𑒼
𑒮𑓂𑒧𑒵𑒞𑒱𑒮𑒿 𑒣𑒳𑒢𑓁 𑒣𑒳𑒢𑓁

𑒮𑒦𑒏 𑒨𑒼𑒑 𑒨𑒰𑒫𑒞 𑒢𑒯𑒱
𑒯𑒼𑒋𑒞 𑒑𑒋 𑒮𑒧𑓂𑒧𑒱𑒪𑒢
𑒯𑒰𑒩𑒱 𑒯𑒧𑒩 𑒫𑒱𑒖𑒨 𑒍𑒏𑒩
𑒯𑒼𑒋𑒞 𑒏𑒐𑒢𑒯𑒳 𑒢𑒯𑒱 𑒥𑒢𑓂𑒠

𑒏𑒪𑒧 𑒑𑒰𑒕𑒲
𑒮𑒾𑒿𑒮𑒹 𑒑𑒧𑒏𑒻𑒞
𑒤𑒴𑒪 𑒢𑒱𑒏𑒪𑒻𑒞 𑒣𑒰𑒞
𑒮𑒦 𑒖𑒰𑒃 𑒑𑒹𑒪 𑒃𑒮𑒏𑒴𑒪
𑒞𑒐𑒢𑒹 𑒥𑒯𑒪 𑒥𑒮𑒰𑒞

𑒂𑒧𑒏 𑒑𑒰𑒕𑒏 𑒣𑒰𑒞
𑒏𑒲𑒛𑓃𑒰 𑒕𑒪 𑒪𑒰𑒑𑒪
𑒒𑒼𑒩𑒢𑒏 𑒕𑒪 𑒄 𑒣𑓂𑒩𑒞𑒰𑒣
𑒒𑒼𑒩𑒢 𑒕𑒞𑓂𑒞𑒰 𑒥𑒪𑒰 𑒣𑒰𑒞
𑒔𑒳𑒙𑓂𑒙𑒲 𑒪𑒰𑒪 𑒪𑒰𑒪
𑒖𑒐𑒢 𑒥𑒯𑒪 𑒥𑒮𑒰𑒞

𑒯𑒰𑒟𑒲𑒏 𑒧𑒳𑒿𑒯𑒧𑒹 𑒪𑒰𑒑𑒪 𑒣𑒰𑒃𑒣
𑒥𑒰𑒢𑒩 𑒮𑒼𑒔𑒪𑒏 𑒏𑒲 ?
𑒖𑒲𑒞𑒋-𑒋 𑒄 𑒯𑒰𑒟𑒲
𑒋𑒯𑒱 𑒯𑒼𑒪𑒲𑒧𑒹 𑒯𑒧𑒯𑒴𑒿
𑒧𑒳𑒿𑒯 𑒪𑒑𑒰𑒋𑒥 𑒣𑒰𑒃𑒣

𑒣𑒰𑒃𑒣 𑒪𑒑𑒍𑒢𑒹 𑒯𑒰𑒤𑒲
𑒦𑒩𑒱 𑒩𑓀𑒑 𑒍 𑒥𑒰𑒢𑒩
𑒩𑒯𑒋 𑒏𑒩𑒻𑒞 𑒃𑒢𑓂𑒞𑒖𑒰𑒩𑒲

𑒂𑒿𑒐𑒱 𑒪𑒰𑒑𑒪𑒋 𑒍𑒏𑒩
𑒢𑒰𑒏𑒧𑒹 𑒦𑒹𑒪𑒋 𑒮𑒳𑒩𑒮𑒩𑒲
𑒂𑓄𑓄𑓄𑒕𑒲
𑒐𑒮𑒪 𑒩𑓀𑒑 𑒦𑒩𑒪 𑒣𑒰𑒃𑒣 𑒮𑒠𑓂𑒨𑒯𑒱

𑒥𑒰𑒢𑒩 𑒩𑒰𑒖𑒰
𑒮𑒱𑒿𑒯 𑒩𑒰𑒖𑒮𑒿 𑒦𑒹𑒪 𑒣𑒲𑒛𑓃𑒱𑒞 𑒫𑒢-𑒖𑒢 𑒋𑒪𑒹𑒏𑓂𑒬𑒢 𑒏𑒩𑒰𑒨𑒪 𑒧𑒱𑒪𑒱 𑒮𑒦 𑒏𑓂𑒨𑒼 𑒮𑓀𑒐𑓂𑒨𑒰 𑒫𑒰𑒢𑒩𑒏 𑒯𑒩𑒱𑒝 𑒧𑒱𑒪𑒰 𑒏𑒨 𑒕𑒪 𑒥𑒹𑒬𑒲 𑒮𑒹 𑒩𑒰𑒖𑒰 𑒦𑒹𑒪 𑒥𑒰𑒢𑒩 𑒖𑒼 !
𑒮𑒱𑓀𑒯𑒩𑒰𑒖𑒏𑒹𑒿 𑒞𑒰𑒧𑒮 𑒁𑒨𑒪𑒢𑓂𑒯𑒱 𑒐𑒰 𑒑𑒹𑒪 𑒯𑒩𑒱𑒝𑒩𑒰𑒖𑒏 𑒥𑒔𑓂𑒔𑒰 𑒋𑒏𑒠𑒱𑒢
𑒠𑒰𑒥𑒲𑒮𑒿 𑒯𑒩𑒱𑒝 𑒑𑒹𑒪 𑒮𑒧𑓂𑒧𑒳𑒐 𑒫𑒰𑒢𑒩 𑒩𑒰𑒖𑒰 𑒏𑒯𑒪𑒢𑓂𑒯𑒱- 𑒥𑒠𑒧𑒰𑒬𑒲 𑒁𑒕𑒱 𑒮𑒱𑓀𑒯𑒏 𑒏𑒯𑒱 𑒢𑒱𑒏𑒪𑒱 𑒑𑒹𑒪 𑒖𑓀𑒑𑒪 𑒥𑒱𑒔𑓂𑒔𑒯𑒱

𑒑𑒰𑒕𑒏 𑒛𑒰𑒩𑒱 𑒣𑒏𑒛𑓃𑒱 𑒕𑒱𑒣𑓂𑒣𑒲 𑒡𑒩𑒱 𑒐𑒴𑒥 𑒧𑒔𑒹𑒪𑒏 𑒡𑒴𑒧

𑒞𑒰𑒧𑒮𑒹 𑒫𑒱𑒐 𑒦𑒨 𑒮𑒱𑓀𑒯𑒩𑒰𑒖 𑒐𑒋𑒪𑒏 𑒥𑒔𑓂𑒔𑒰 𑒮𑒦𑒙𑒰 𑒧𑒵𑒑𑒩𑒰𑒖𑒏 𑒔𑒳𑒢𑒱 𑒖𑒐𑒢 𑒮𑒳𑒢𑒰𑒍𑒪 𑒖𑒰𑒨 𑒫𑒢𑒩𑒰𑒖𑒏𑒹𑒿 𑒤𑒹𑒩 𑒫𑒻𑒯 𑒡𑒴𑒧 𑒍 𑒤𑒹𑒩 𑒧𑒔𑒰𑒍𑒪
𑒧𑒵𑒑𑒩𑒰𑒖 𑒏𑒯𑒪 𑒯𑒹 𑒢𑒵𑒣 𑒋𑒯𑒱 𑒯𑒩𑒏𑓀𑒣𑒮𑒿 𑒏𑒲 𑒯𑒼𑒨𑒞 ? 𑒖𑒲𑒫𑒱𑒞 𑒯𑒼𑒋𑒞 𑒏𑒲 𑒯𑒧𑒩 𑒮𑓀𑒞𑒰𑒢?

𑒏𑒯𑒪 𑒢𑒵𑒣 𑒏𑒯𑒴 𑒦𑒰𑒨 𑒯𑒧𑓂𑒧𑒩 𑒧𑒹𑒯𑒢𑒞𑒱𑒧𑒹 𑒁𑒕𑒱 𑒏𑒲 𑒏𑒧𑒖𑒼𑒩𑒲 𑒏𑒩𑒪 𑒣𑓂𑒩𑒨𑒰𑒮 𑒯𑒧 𑒦𑒩𑒱𑒮𑒏 𑒧𑒳𑒠𑒰 𑒥𑒳𑒗𑒴 𑒯𑒧𑒩𑒼 𑒧𑒖𑒥𑒴𑒩𑒲 !

𑒔𑒱𑒛𑓃𑒱𑒨𑒰𑒐𑒰𑒢𑒰
𑒔𑒱𑒛𑓃𑒱𑒨𑒰𑒐𑒰𑒢𑒰
𑒦𑒰𑒪𑒴 𑒧𑒰𑒧𑒰
𑒥𑒢𑓂𑒠𑒩 𑒧𑒰𑒧𑒰
𑒪𑒳𑒏𑓂𑒐𑒲
𑒐𑒱𑒐𑒲𑒩
𑒏𑒾𑒂 𑒏𑒳𑒔𑒩𑒋
𑒂𑒋𑒞 𑒏𑓂𑒨𑒼 𑒒𑒩

𑒧𑒳𑒩𑒑𑒰𑒏 𑒏𑒳𑒏𑒛𑓃𑒴-𑒏𑒴
𑒁𑓀𑒛𑒰 𑒧𑒳𑒩𑒑𑒰𑒧𑒹 𑒣𑒻𑒮𑒪
𑒧𑒳𑒩𑒑𑒰 𑒁𑓀𑒛𑒰𑒮𑒿 𑒢𑒱𑒏𑒪𑒪 !

𑒙𑒱𑒏𑒪𑒲 𑒩𑓀𑒑-𑒥𑒱𑒩𑓀𑒑𑒏
𑒐𑒴𑒥 𑒒𑒳𑒧𑒋 𑒅𑒛𑓃𑒻 𑒁𑒕𑒱
𑒙𑒱𑒏𑒪𑒲 𑒣𑒰𑒿𑒐𑒱 𑒣𑒮𑒰𑒩𑒪
𑒤𑒴𑒪𑒏 𑒩𑓀𑒑 𑒥𑒳𑒗𑒰𑒃𑒋


𑒖𑒧𑒥𑒼𑒢𑒲
𑒖𑒧𑒥𑒼𑒢𑒲𑒏 𑒖𑒼𑒧
𑒣𑒮𑒩𑒪
𑒖𑒼𑒧 𑒩𑓀𑒑 𑒔𑒰𑒩𑒴𑒏𑒰𑒞
𑒣𑒲𑒔𑒪 𑒣𑒱𑒮𑒲𑒧𑒰𑒪
𑒋𑒞𑓂𑒞𑒹𑒏 𑒆𑒿𑒔 𑒑𑒰𑒕
𑒠𑒼𑒧𑒥 𑒧𑒳𑒠𑒰 𑒁𑒕𑒱 𑒥𑒛𑓂𑒛 𑒆𑒿𑒔
𑒥𑒼𑒢 𑒮𑒳𑒣𑒰𑒩𑒲 𑒞𑒼𑒛𑓃𑒱 𑒔𑒪𑒲 𑒒𑒳𑒩𑒱

𑒥𑒾𑒂 𑒚𑒹𑒯𑒳𑒢𑒱𑒨𑒰 𑒧𑒰𑒩𑒱
𑒥𑒾𑒂 𑒚𑒹𑒯𑒳𑒢𑒱𑒨𑒰 𑒧𑒰𑒩𑒱
𑒦𑒹𑒪 𑒮𑒼𑒗 𑒦𑒋 𑒚𑒰𑒜𑓃
𑒪𑒏𑒛𑓃𑒲𑒏 𑒞𑒱𑒢𑒣𑒯𑒱𑒨𑒰
𑒠𑒹𑒪𑒏 𑒥𑒰𑒥𑒴 𑒂𑒢𑒱
𑒣𑒯𑒱𑒢𑒯𑒱 𑒦𑒋 𑒑𑒹𑒪 𑒚𑒰𑒜𑓃
𑒣𑒏𑒛𑓃𑒱 𑒏𑒲 𑒯𑒼𑒋𑒞 𑒂𑒥!

𑒙𑓂𑒩𑒱𑓀𑒑-𑒙𑓂𑒩𑒱𑓀𑒑-𑒙𑓂𑒩𑒱𑓀𑒑
𑒙𑓂𑒩𑒱𑓀𑒑-𑒙𑓂𑒩𑒱𑓀𑒑-𑒙𑓂𑒩𑒱𑓀𑒑
𑒏𑒻𑒩𑒱𑒨𑒩 𑒥𑒪𑒰 𑒮𑒰𑒃𑒏𑒱𑒪
𑒥𑒰𑒥𑒴 𑒂𑒢𑒪 𑒏𑒲𑒢𑒱

𑒙𑓂𑒩𑒱𑓀𑒑-𑒙𑓂𑒩𑒱𑓀𑒑-𑒙𑓂𑒩𑒱𑓀𑒑
𑒥𑒱𑒢 𑒏𑒻𑒩𑒱𑒨𑒩𑒏 𑒮𑒰𑒃𑒏𑒱𑒪
𑒢𑒯𑒱 𑒏𑒼𑒢𑒼 𑒏𑒰𑒖𑒏 𑒄𑒯 !

𑒙𑓂𑒩𑒱𑓀𑒑-𑒙𑓂𑒩𑒱𑓀𑒑-𑒙𑓂𑒩𑒱𑓀𑒑
𑒥𑒻𑒮 𑒥𑒻𑒮 𑒥𑒻𑒮
𑒏𑒻𑒩𑒱𑒨𑒩𑒣𑒩 𑒂𑒥𑒱

𑒙𑓂𑒩𑒱𑓀𑒑-𑒙𑓂𑒩𑒱𑓀𑒑-𑒙𑓂𑒩𑒱𑓀𑒑
𑒣𑒻𑒛𑒪 𑒣𑒩 𑒣𑒋𑒩
𑒮𑒦 𑒩𑒮𑓂𑒞𑒰 𑒠𑒻𑒯 !

𑒦𑒼𑒩𑒏 𑒥𑒮𑒰𑒞
𑒦𑒼𑒩𑒏 𑒥𑒮𑒰𑒞
𑒅𑒚𑒴-𑒅𑒚𑒴 𑒥𑒳𑒔𑓂𑒔𑒲
𑒦𑒹𑒪 𑒣𑓂𑒩𑒰𑒞
𑒩𑒰𑒞𑒱𑒧𑒹 𑒮𑒦𑒙𑒰 𑒮𑒳𑒢𑓂𑒢
𑒦𑒼𑒩𑒧𑒹 𑒔𑒱𑒛𑓃𑒻-𑒔𑒳𑒢𑒧𑒳𑒢

𑒤𑒴𑒪𑒏 𑒑𑒰𑒕
𑒦𑒼𑒩𑒏 𑒥𑒮𑒰𑒞
𑒦𑒩𑒪 𑒢𑒫 𑒤𑒴𑒪𑒮𑒿
𑒦𑒹𑒪 𑒣𑓂𑒩𑒰𑒞

𑒕𑒰𑒯𑒏 𑒏𑒩𑒞𑒥
𑒕𑒰𑒯𑒏 𑒏𑒩𑒞𑒥
𑒠𑒳𑒣𑒯𑒩𑒱𑒨𑒰𑒧𑒹 𑒕𑒼𑒙
𑒩𑒾𑒠𑒏 𑒞𑒲𑒫𑓂𑒩𑒞𑒰𑒧𑒹 𑒧𑒩𑒻𑒞
𑒮𑒰𑒿𑒗𑒏 𑒩𑒾𑒠 𑒬𑒲𑒞𑒪
𑒕𑒰𑒯 𑒯𑒿𑒮𑒻𑒋
𑒯𑒼𑒃𑒋 𑒣𑒻𑒒


𑒏𑒩 𑒖𑒼𑒩𑒱 𑒏𑒩𑒻𑒋 𑒣𑓂𑒩𑒝𑒰𑒧
“𑒕𑒰𑒯 𑒦𑒰𑒋
𑒕𑒯 𑒞𑒼𑒿 𑒣𑒻𑒒”

𑒮𑒣𑒢𑒰
𑒂𑒃 𑒠𑒹𑒐𑒪 𑒮𑒣𑒢𑒰
𑒒𑒩 𑒂𑒋𑒪 𑒥𑒾𑒂
𑒁𑒮𑒑𑒩 𑒕𑒲 𑒜𑒯𑒢𑒰𑒃𑒞
𑒥𑒾𑒂 𑒮𑓀𑒑𑒹 𑒐𑒹𑒪𑒰𑒋𑒥

𑒧𑒰𑒋𑒏 𑒦𑒹𑒪𑒻𑒏 𑒥𑒯𑒢𑓂𑒢𑒰 !
𑒯𑒧𑓂𑒧𑒩 𑒗𑒼𑒩𑒰-𑒗𑒣𑒙𑒰
𑒥𑒱𑒢𑒳 𑒮𑒩𑒱𑒨𑒹𑒢𑒹 𑒖𑒰𑒟𑒱

𑒯𑒧 𑒏𑒯𑒪𑒱𑒨𑒻 𑒠𑒹𑒩𑒲
𑒞𑒻𑒨𑒰𑒩 𑒏𑒩𑒥𑒋𑒧𑒹
𑒏𑒱𑒌 𑒏𑒩𑒻𑒕𑒲 𑒁𑒯𑒰𑒿

𑒧𑒰𑒋 𑒏𑒯𑒻𑒋
𑒅𑒚𑒪𑒯𑒳𑒿 𑒠𑒹𑒩𑒲𑒮𑒿 𑒁𑒯𑒰𑒿
𑒅𑒢𑒙𑒹 𑒯𑒧𑒩𑒰 𑒏𑒯𑒋 𑒕𑒲 ?
𑒮𑓂𑒏𑒴𑒪𑒧𑒹 𑒯𑒼𑒧𑒋 𑒠𑒱𑒨𑒾 𑒢𑒹 𑒠𑒹𑒩𑒲 !


𑒏𑒼𑒃𑒩𑒲𑒏 𑒏𑒴𑒏𑒴
𑒏𑒼𑒃𑒩𑒲𑒏 𑒏𑒴𑒏𑒴
𑒏𑒾𑒂𑒏 𑒏𑒩𑒛𑓃𑒥 𑒏𑒰𑒆𑒿
𑒩𑒰𑒞𑒱𑒧𑒹 𑒑𑒰𑒕𑒲𑒏 𑒏𑒲𑒛𑓃𑒲𑒏 𑒮𑓂𑒫𑒩
𑒋𑒯𑒢 𑒮𑒢-
“𑒢𑒰𑒢𑒲 𑒞𑒮𑒪𑒰 𑒪𑒰- 𑒦𑒰𑒞 𑒣𑒏𑒰!”
𑒩𑒰𑒞𑒱𑒏 𑒩𑒞𑒱𑒔𑒩𑒏 𑒖𑒲𑒫𑒢 𑒂𑒯𑒰

𑒩𑒰𑒞𑒱𑒧𑒹 𑒃𑒖𑒼𑒞 𑒦𑒑𑒖𑒼𑒑𑒢𑒲𑒏
𑒩𑒰𑒞𑒱𑒧𑒹 𑒁𑒥𑒻𑒋 𑒠𑒱𑒢𑒧𑒹 𑒥𑒱𑒪𑒰𑒃𑒋
𑒠𑒱𑒢𑒧𑒹 𑒍𑒏𑒩 𑒏𑒰𑒖𑒹 𑒏𑒲?
𑒠𑒼𑒮𑒩 𑒩𑒞𑒱𑒔𑒩𑒏 𑒮𑓂𑒫𑒩-
“𑒏𑓂𑒫𑒻𑒙𑒲𑒏𑓂𑒫𑒱𑒏”
𑒩𑒰𑒞𑒱𑒏 𑒩𑒞𑒱𑒔𑒩𑒏 𑒖𑒲𑒫𑒢 𑒄

𑒬𑒱𑒞𑒪𑒣𑒰𑒙𑒲
𑒬𑒱𑒞𑒪𑒣𑒰𑒙𑒲 𑒯𑒧𑓂𑒧𑒩
𑒣𑒼𑒟𑒲 𑒯𑒧𑓂𑒧𑒩 𑒧𑒢𑒼𑒯𑒩 𑒣𑒼𑒟𑒲
𑒮𑒦𑒙𑒰 𑒣𑒜𑓃𑒲
𑒮𑒰𑒿𑒗𑒏 𑒣𑓂𑒩𑒏𑒰𑒬 𑒗𑒪𑒤𑒪
𑒢𑒯𑒱 𑒋𑒯𑒱 𑒥𑒹𑒩𑒧𑒹 𑒣𑒜𑒴
𑒥𑒰𑒣 𑒩𑒾 𑒥𑒰𑒣
𑒂𑒿𑒐𑒱 𑒯𑒼𑒋𑒞 𑒐𑒩𑒰𑒣

𑒧𑒏𑒛𑓃𑒲𑒏 𑒖𑒰𑒪
𑒧𑒏𑒛𑓃𑒲𑒏 𑒖𑒰𑒪
𑒧𑒰𑒿𑒕𑒏 𑒪𑒹𑒪 𑒧𑒯𑒰𑒖𑒰𑒪

𑒏𑒲𑒛𑓃𑒲𑒏 𑒤𑒿𑒮𑒥
𑒧𑒰𑒕𑒏 𑒏𑒴𑒠𑒥
𑒧𑒯𑒰𑒖𑒰𑒪 𑒐𑒮𑒥
𑒧𑒰𑒕𑒏 𑒏𑒩𑒞𑒥-𑒐𑒹𑒪

𑒧𑒳𑒠𑒰 𑒂𑒃 𑒥𑒳𑒗𑒪𑒯𑒳𑒿
𑒩𑒯𑒋 𑒄 𑒖𑒲𑒥𑒰𑒏 𑒮𑓀𑒒𑒩𑓂𑒭
𑒖𑒹 𑒂𑒃 𑒏𑒋 𑒩𑒯𑒪 𑒕𑒲 𑒯𑒧
𑒋𑒯𑒱 𑒠𑒱𑒪𑓂𑒪𑒲 𑒢𑒑𑒩𑒱𑒨𑒰𑒧𑒹

𑒫𑒰𑒨𑒳𑒑𑒼𑒪𑒏
𑒫𑒰𑒨𑒳𑒑𑒼𑒪 𑒥𑒻𑒪𑒴𑒢
𑒯𑒩𑒱𑒨𑒩 𑒣𑒲𑒁𑒩
𑒋𑒯𑒱𑒧𑒹 𑒦𑒩𑒱 𑒩𑓀𑒑 𑒤𑒹𑒏𑒲 𑒦𑒰𑒋𑒏 𑒧𑒴𑒯
𑒦𑒩𑒱 𑒋𑒯𑒱𑒧𑒹 𑒂𑒥 𑒯𑒰𑒃𑒛𑓂𑒩𑒼𑒖𑒢
𑒥𑒹𑒔𑒻 𑒕𑒲 𑒥𑒔𑓂𑒔𑒰 𑒮𑒦𑒏𑒹𑒿
𑒅𑒛𑓃𑒥𑒻 𑒕𑒟𑒱 𑒍 𑒆𑒣𑒩 𑒑𑒑𑒢𑒧𑒹

𑒯𑒰𑒟𑒲𑒏 𑒮𑒴𑒣 𑒮𑒢 𑒏𑒰𑒢
𑒯𑒰𑒟𑒲𑒏 𑒮𑒴𑒣𑒮𑒢 𑒏𑒰𑒢
𑒣𑒰𑒃𑒣 𑒥𑒪𑒰 𑒧𑒴𑒯𑒮𑒿 𑒦𑒩𑒻𑒋 𑒣𑒰𑒢𑒱

𑒧𑒳𑒿𑒯 𑒢𑒲𑒔𑒰𑒿𑒧𑒹 𑒂𑒩
𑒠𑒴 𑒙𑒰 𑒣𑒻𑒒 𑒠𑒰𑒿𑒞
𑒔𑒏𑒰𑒔𑒏 𑒚𑒰𑒜𑓃

𑒧𑒼𑒙-𑒧𑒼𑒙 𑒋𑒏𑒩 𑒣𑒋𑒩
𑒣𑒳𑒔𑓂𑒕𑒲 𑒁𑒕𑒱 𑒪𑒙𑒏𑒻𑒞
𑒔𑒲𑒢𑓂𑒯𑒱 𑒖𑒰𑒃 𑒕𑒱𑒨𑒻𑒏 𑒋𑒏𑒩𑒰 𑒯𑒧
𑒧𑒼𑒙 𑒯𑒰𑒟𑒲𑒏 𑒡𑒧𑓂𑒧𑒏-𑒡𑒧

𑒕𑒳𑒙𑓂𑒙𑒲
𑒂𑒃 𑒕𑒳𑒙𑓂𑒙𑒲
𑒏𑒰𑒪𑓂𑒯𑒱 𑒕𑒳𑒙𑓂𑒙𑒲
𑒒𑒴𑒧𑒥-𑒤𑒱𑒩𑒥 𑒖𑒰𑒋𑒥 𑒑𑒰𑒧
𑒢𑒰𑒢𑒰-𑒢𑒰𑒢𑒲 𑒧𑒰𑒧𑒰-𑒧𑒰𑒧𑒲
𑒔𑒱𑒛𑓃𑒻-𑒔𑒳𑒢𑒧𑒳𑒢𑒲 𑒮𑒦𑒮𑒿 𑒧𑒱𑒪𑒰𑒢

𑒥𑒩𑒐𑒰 𑒥𑒳𑒢𑓂𑒢𑒲 𑒂𑒋𑒪
𑒧𑒹𑒒 𑒠𑒯𑒼𑒠𑒱𑒮 𑒦𑒰𑒑𑒪
𑒏𑒰𑒩𑒲 𑒧𑒹𑒒 𑒅𑒖𑓂𑒖𑒩 𑒧𑒹𑒒
𑒒𑒙𑒰 𑒣𑒮𑒩𑒪
𑒔𑒱𑒛𑓃𑒻-𑒔𑒳𑒢𑒧𑒳𑒢𑒲 𑒂𑒋𑒪
𑒂𑒃 𑒕𑒳𑒙𑓂𑒙𑒲
𑒏𑒰𑒪𑓂𑒯𑒱 𑒕𑒳𑒙𑓂𑒙𑒲
𑒒𑒴𑒧𑒥-𑒤𑒱𑒩𑒥 𑒖𑒰𑒋𑒥 𑒑𑒰𑒧
𑒢𑒰𑒢𑒰-𑒢𑒰𑒢𑒲 𑒧𑒰𑒧𑒰-𑒧𑒰𑒧𑒲
𑒔𑒱𑒛𑓃𑒻-𑒔𑒳𑒢𑒧𑒳𑒢𑒲 𑒮𑒦𑒮𑒿 𑒧𑒱𑒪𑒰𑒢

𑒥𑒾𑒂 𑒑𑒹𑒪 𑒮𑒳𑒢𑒱
𑒋𑒏 𑒠𑒴 𑒞𑒲𑒢
𑒥𑒾𑒂 𑒑𑒹𑒪 𑒮𑒳𑒢𑒱
𑒔𑒰𑒩𑒱 𑒣𑒰𑒿𑒔 𑒕𑒯
𑒮𑒳𑒢𑒱 𑒦𑒹𑒪 𑒦𑒨𑒰𑒫𑒯
𑒮𑒰𑒞 𑒂𑒚 𑒢𑒾
𑒑𑒹𑒪 𑒦𑒠𑒥𑒩𑒱𑒨𑒰 𑒦𑒰𑒋
𑒠𑒮 𑒋𑒑𑒰𑒩𑒯 𑒥𑒰𑒩𑒯
𑒯𑒧𑒩𑒰 𑒂𑒥𑒱 𑒅𑒥𑒰𑒩𑒯
𑒞𑒹𑒩𑒯 𑒔𑒾𑒠𑒯 𑒣𑒢𑓂𑒠𑓂𑒩𑒯
𑒯𑒼𑒋𑒞 𑒂𑒥 𑒮𑒪𑒯𑒢𑓂𑒢𑒰
𑒮𑒼𑒪𑒯 𑒮𑒞𑒩𑒯 𑒂𑒩
𑒦𑒹𑒪 𑒦𑒹𑒩 𑒃𑒨𑒰𑒩
𑒁𑒚𑒰𑒩𑒯 𑒅𑒢𑓂𑒢𑒻𑒮 𑒥𑒲𑒮
𑒂𑒥 𑒟𑒰𑒏𑒪 𑒄𑒯
𑒄𑒯 𑒮𑒨 𑒯𑒖𑒰𑒩
𑒯𑒿 𑒂𑒥 𑒂𑒋𑒪 𑒞𑒹𑒖𑒲 𑒃𑒨𑒰𑒩

𑒧𑒱𑒟𑒱𑒪𑒰
𑒧𑒟𑒪 𑒖𑒞𑒋 𑒬𑒞𑓂𑒩𑒳𑒏𑒹𑒿
𑒧𑒱𑒟𑒱𑒪𑒰 𑒕𑒪 𑒍 𑒡𑒩𑒞𑒲
𑒮𑒦 𑒡𑒏𑒱𑒨𑒹𑒪𑒏 𑒁𑒣𑒢𑒰-𑒁𑒣𑒢𑒲
𑒮𑒦 𑒚𑒼𑓀𑒚𑒱𑒨𑒹𑒪𑒏 𑒨𑒾

𑒖𑒢𑒏 𑒖𑒢-𑒫𑒱𑒬 𑒮𑒦 𑒁𑒣𑓂𑒣𑒢
𑒑𑒳𑒩𑒳-𑒧𑒰𑒞𑒰-𑒣𑒱𑒞𑒰 𑒄 𑒞𑒲𑒢𑒴
𑒢𑒯𑒱 𑒗𑒳𑒏𑒥 𑒕𑒼𑒛𑓃𑒱 𑒏𑒏𑒩𑒼 𑒮𑒼𑒗𑒰𑒿
𑒧𑒳𑒠𑒰 𑒁𑒦𑒱𑒧𑒰𑒢𑒏 𑒡𑒩𑒞𑒲 𑒕𑒼𑒛𑓃𑒪
𑒕𑒼𑒛𑓃𑒪 𑒁𑒦𑒱𑒧𑒰𑒢 𑒄𑒯
𑒮𑒦 𑒡𑒏𑒱𑒨𑒹𑒪𑒏 𑒁𑒣𑒢𑒰-𑒁𑒣𑒢𑒲
𑒮𑒦 𑒚𑒼𑓀𑒚𑒱𑒨𑒹𑒪𑒏 𑒨𑒾

𑒥𑒰𑒠𑒳𑒩 𑒮𑒼𑓀𑒮
𑒥𑒰𑒠𑒳𑒩 𑒥𑒰𑒠𑒳𑒩
𑒩𑒰𑒛𑒰𑒩 𑒨𑒳𑒏𑓂𑒞 𑒄
𑒥𑒰𑒠𑒳𑒩 𑒥𑒰𑒠𑒳𑒩
𑒣𑒥𑒻-𑒋 𑒦𑒼𑒖𑒢

𑒣𑓂𑒩𑒞𑒱𑒡𑓂𑒫𑒢𑒱𑒏 𑒏𑒰𑒩𑒝
𑒥𑒔𑒃-𑒋 𑒏𑒼𑒢𑒼
𑒠𑒳𑒩𑓂𑒒𑒙𑒢𑒰𑒮𑒿
𑒥𑒰𑒠𑒳𑒩 𑒥𑒰𑒠𑒳𑒩
𑒩𑒰𑒛𑒰𑒩 𑒨𑒳𑒏𑓂𑒞 𑒄

𑒮𑒼𑓀𑒮-𑒛𑒼𑒪𑒤𑒱𑒢 𑒁𑒕𑒱 𑒢𑒰𑒧
𑒮𑒼𑓀𑒮-𑒛𑒼𑒪𑒤𑒱𑒢
𑒁𑒥𑒰𑒖 𑒢𑒱𑒏𑒰𑒪𑒋
𑒣𑓂𑒩𑒞𑒱𑒡𑓂𑒫𑒢𑒱 𑒂𑒢𑒋
𑒧𑒰𑒕𑒏 𑒖𑒰𑒪 𑒤𑒹𑒏𑒪
𑒥𑒔𑒃-𑒋 𑒄 𑒥𑒠𑒪𑒱 𑒩𑒮𑓂𑒞𑒰
𑒠𑒳𑒩𑓂𑒒𑒙𑒢𑒰𑒮𑒿

𑒥𑒰𑒠𑒳𑒩 𑒥𑒰𑒠𑒳𑒩
𑒩𑒰𑒛𑒰𑒩 𑒨𑒳𑒏𑓂𑒞 𑒄
𑒥𑒰𑒠𑒳𑒩 𑒥𑒰𑒠𑒳𑒩
𑒮𑒼𑓀𑒮-𑒛𑒼𑒪𑒤𑒱𑒢
𑒁𑒥𑒰𑒖 𑒢𑒱𑒏𑒰𑒪𑒋
𑒣𑓂𑒩𑒞𑒱𑒡𑓂𑒫𑒢𑒱 𑒂𑒢𑒋

𑒏𑒲? 𑒏𑒱𑒋? 𑒏𑒼𑒢𑒰? 𑒏𑒹?
𑒏𑒲? 𑒏𑒱𑒋? 𑒏𑒼𑒢𑒰? 𑒏𑒹?
𑒑𑒩𑓂𑒧𑒲 𑒮𑒿 𑒥𑒩𑒐𑒰
𑒥𑒩𑒐𑒰𑒮𑒿 𑒣𑒢𑒱𑒮𑒼𑒐𑒰
𑒥𑒩𑒐𑒰𑒧𑒹 𑒔𑒰𑒪𑒲
𑒔𑒰𑒪𑒲𑒮𑒿 𑒧𑒰𑒙𑒱
𑒔𑒰𑒪𑒲 𑒥𑒱𑒢 𑒣𑒋𑒩𑒏

𑒧𑒰𑒙𑒱𑒮𑒿 𑒒𑒰𑒮
𑒒𑒰𑒮 𑒐𑒰𑒋 𑒑𑒰𑒋
𑒑𑒰𑒋𑒮𑒿 𑒠𑒴𑒡
𑒥𑒾𑒂 𑒣𑒲𑒥𑒴
𑒑𑒰𑒋𑒏 𑒥𑒰𑒕𑒰
𑒣𑒲𑒥𑒱 𑒥𑒯𑒋 𑒯𑒩
𑒯𑒩𑒮𑒿 𑒐𑒹𑒞
𑒐𑒹𑒞𑒮𑒿 𑒡𑒰𑒢
𑒡𑒰𑒢𑒮𑒿 𑒦𑒰𑒞
𑒥𑒾𑒂 𑒐𑒰𑒟𑒱

𑒥𑒾𑒂𑒏 𑒠𑒹𑒯
𑒠𑒴𑒡 𑒦𑒰𑒞

𑒣𑒰𑒢𑒱𑒏 𑒦𑒰𑒣
𑒅𑒛𑓃𑒋 𑒁𑒏𑒰𑒮
𑒁𑒏𑒰𑒮𑒮𑒿 𑒥𑒩𑒐𑒰
𑒥𑒩𑒐𑒰𑒮𑒿 𑒔𑒰𑒪𑒲
𑒔𑒰𑒪𑒲𑒮𑒿 𑒧𑒰𑒙𑒱
𑒧𑒰𑒙𑒱𑒮𑒿 𑒡𑒰𑒢
𑒏𑒲? 𑒏𑒱𑒋? 𑒏𑒼𑒢𑒰? 𑒏𑒹?

𑒤𑒹𑒩 𑒂𑒋𑒪 𑒖𑒰𑒛𑓃
𑒤𑒹𑒩 𑒂𑒋𑒪 𑒖𑒰𑒛𑓃
𑒏𑒛𑓃𑒏𑒩𑒰𑒃𑒞 𑒁𑒕𑒱 𑒯𑒰𑒩
𑒥𑒱𑒯𑒰𑒩𑒲!!
𑒪𑒰𑒑𑒋-𑒨𑒹 𑒦𑒹𑒪 𑒦𑒼𑒩
𑒑𑒰𑒩𑒱𑒮𑒿 𑒤𑒹𑒩 𑒬𑒳𑒩𑒴 𑒦𑒹𑒪 𑒣𑓂𑒩𑒰𑒞
𑒥𑒱𑒢𑒳 𑒞𑒻𑒨𑓂𑒨𑒰𑒩𑒲

𑒂𑒑𑒰𑒿
𑒮𑒴𑒩𑓂𑒨𑒮𑒿 𑒣𑒴𑒥 𑒂 𑒁𑒏𑒰𑒮𑒮𑒿 𑒆𑒿𑒔
𑒣𑒵𑒟𑓂𑒫𑒲𑒮𑒿 𑒢𑒲𑒔𑒰𑒿 𑒔𑒱𑒢𑓂𑒞𑒢 𑒏𑒩𑒴 𑒁𑒕𑒱 𑒏𑒲?

𑒁𑒣𑒢 𑒒𑒩-𑒑𑒰𑒧𑒏 𑒁𑒣𑒢 𑒠𑒹𑒬𑒏
𑒧𑒰𑒞𑒰-𑒣𑒱𑒞𑒰-𑒑𑒳𑒩𑒳𑒏 𑒏𑒩𑓂𑒖 𑒧𑒼𑒢 𑒩𑒰𑒐𑒱

𑒞𑒰𑒧𑒮𑒧𑒹 𑒞𑒼𑒛𑓃𑒥 𑒫𑒮𑓂𑒞𑒳 𑒢𑒯𑒱 𑒏𑒚𑒱𑒢 𑒁𑒕𑒱
𑒏𑒼𑒢𑒰 𑒞𑒼𑒛𑓃𑒪𑒏𑒹𑒿 𑒖𑒼𑒛𑓃𑒥 𑒞𑒏𑒩 𑒥𑒰𑒙 𑒞𑒰𑒏𑒱

𑒮𑒴𑒩𑓂𑒨𑒮𑒿 𑒣𑒴𑒥 𑒂 𑒁𑒏𑒰𑒮𑒮𑒿 𑒆𑒿𑒔
𑒣𑒵𑒟𑓂𑒫𑒲𑒮𑒿 𑒢𑒲𑒔𑒰𑒿 𑒔𑒱𑒢𑓂𑒞𑒢 𑒏𑒩𑒴 𑒁𑒕𑒱 𑒏𑒲?


𑒁𑓀𑒡 𑒫𑒱𑒬𑓂𑒫𑒰𑒮
𑒮𑒳𑒧𑒹𑒩𑒳 𑒣𑒩𑓂𑒫𑒞𑒏 𑒔𑒰𑒩𑒴-𑒏𑒰𑒞 𑒔𑒹𑒢𑓂𑒯 𑒠𑒹𑒐𑒰𑒨 𑒏𑒯𑒪𑒏 𑒑𑒰𑒃𑒛 𑒮𑒩𑓂𑒣 𑒏𑒹𑒩 𑒔𑒹𑒢𑓂𑒯 𑒁𑒕𑒱 𑒄
𑒦𑒹𑒪 𑒮𑒧𑒳𑒠𑓂𑒩-𑒧𑓀𑒟𑒢 𑒋𑒯𑒱 𑒣𑒩𑓂𑒫𑒞𑒮𑒿 𑒮𑒩𑓂𑒣𑒏 𑒩𑒮𑓂𑒮𑒰 𑒁𑒕𑒱 𑒔𑒹𑒢𑓂𑒯 𑒕𑒼𑒛𑓃𑒱 𑒑𑒹𑒪 𑒔𑒰𑒩𑒴-𑒏𑒰𑒞 𑒞𑒯𑒲𑒮𑒿

𑒮𑓀𑒑𑒲 𑒯𑒧𑒩 𑒯𑒿𑒮𑒪 𑒏𑒯𑒪𑒏 𑒏𑒼𑒢𑒼 𑒣𑒯𑒰𑒛𑓃 𑒣𑒩 𑒖𑒰𑒆 𑒣𑒯𑒰𑒛𑓃 𑒆𑒣𑒩 𑒔𑒜𑓃𑒨 𑒪𑒹𑒪 𑒑𑒼𑒪𑒰𑒏𑒰𑒩 𑒩𑒮𑓂𑒞𑒰 𑒥𑒢𑒥𑒰𑒆

𑒢𑒯𑒱 𑒞𑒿 𑒮𑒼𑒗𑒹 𑒆𑒣𑒩 𑒔𑒜𑓃𑒥 𑒮𑒼𑒗𑒹 𑒐𑒮𑒥 𑒢𑒲𑒔𑒰𑒿 𑒧𑒳𑒯𑒹𑒿 𑒯𑒍 𑒑𑒰𑒃𑒛 𑒞𑒼𑒯𑒴𑒿 𑒫𑒱𑒬𑓂𑒫𑒰𑒮𑒏 𑒕𑒯 𑒁𑓀𑒡-𑒏𑒰𑒝𑓂𑒛 𑒮𑒳𑒢𑒹𑒥𑒰 𑒪𑒋

𑒁𑒦𑓂𑒨𑒰𑒮
𑒣𑒴𑒕𑒪 𑒑𑒳𑒩𑒴𑒮𑒿 𑒧𑒵𑒠𑓀𑒑𑒣𑒩 𑒯𑒰𑒟𑒏 𑒑𑒞𑒱 𑒦𑒨 𑒩𑒯𑒪 𑒁𑒕𑒱 𑒏𑒱𑒋𑒏 𑒧𑓀𑒠 𑒑𑒳𑒩𑒳 𑒏𑒯𑒪𑒢𑓂𑒯𑒱 𑒮𑒹 𑒏𑒩𑒴 𑒁𑒦𑓂𑒨𑒰𑒮 𑒞𑒐𑒢 𑒣𑓂𑒩𑒞𑒱𑒠𑒱𑒢
𑒣𑓂𑒩𑒞𑒱𑒠𑒱𑒢 𑒞𑒿 𑒏𑒩𑒱𑒞𑒯𑒱 𑒕𑒲 𑒯𑒧 𑒋𑒏𑒩 𑒮𑒠𑒱𑒐𑒢 𑒁𑒦𑓂𑒨𑒰𑒮 𑒞𑒯𑒳𑒐𑒢 𑒯𑒧𑒩 𑒒𑒙𑒨 𑒁𑒕𑒱 𑒑𑒞𑒱
𑒂 𑒙𑒴𑒙𑒨 𑒁𑒕𑒱 𑒪𑒨 𑒞𑒰𑒞
𑒏𑒩𑒴 𑒦𑒼𑒩 𑒮𑒰𑒿𑒗 𑒁𑒯𑒰𑒿 𑒁𑒦𑓂𑒨𑒰𑒮 𑒥𑒱𑒢𑒰 𑒏𑒩𑒱 𑒢𑒰𑒑𑒰 𑒦𑒼𑒩 𑒏𑒩𑒥 𑒁𑒦𑓂𑒨𑒰𑒮 𑒖𑒐𑒢 𑒮𑒰𑒿𑒗𑒧𑒹 𑒙𑒴𑒙𑒞 𑒢𑒯𑒱 𑒪𑒨 𑒮𑒰𑒿𑒗𑒧𑒹 𑒏𑒩𑒥 𑒣𑒳𑒢𑒩𑒰𑒦𑓂𑒨𑒰𑒮 𑒯𑒼𑒨𑒞 𑒦𑒼𑒩𑒧𑒹 𑒯𑒰𑒟 𑒑𑒞𑒱𑒧𑒨
𑒑𑒳𑒩𑒳𑒮𑒿 𑒣𑒴𑒕𑒪 𑒏𑒼𑒢𑒰 𑒏𑒋 𑒋𑒯𑒱 𑒔𑒙𑓂𑒙𑒰𑒢 𑒏𑒰𑒙𑒱 𑒒𑒼𑒛𑓃𑒰 𑒥𑒢𑒰𑒋𑒥 𑒒𑒼𑒙𑒏 𑒑𑒞𑒱𑒧𑒨 𑒥𑒢𑒥𑒋𑒧𑒹 𑒋𑒏 𑒧𑒰𑒮 𑒥𑒹𑒏𑒰𑒩 𑒪𑒑𑒰𑒍𑒪
𑒏𑒯𑒪 𑒑𑒳𑒩𑒴 𑒞𑒐𑒢 𑒏𑒩𑒴 𑒏𑒪𑓂𑒣𑒢𑒰 𑒋𑒯𑒱 𑒖𑒛𑓃-𑒣𑒰𑒟𑒩𑒧𑒹 𑒒𑒼𑒙𑒏 𑒒𑒼𑒛𑓃𑒰 𑒠𑒹𑒐𑒱 𑒏𑒩𑒴 𑒣𑓂𑒩𑒯𑒰𑒩
𑒖𑒞𑒋 𑒪𑒰𑒑𑒋 𑒒𑒼𑒙𑒏 𑒢𑒯𑒱 𑒁𑒕𑒱


𑒖𑒞𑒋 𑒣𑒰𑒟𑒩 𑒥𑒹𑒬𑒲 𑒁𑒕𑒱
𑒞𑒼𑒛𑓃𑒱 𑒁𑒯𑒰𑒿 𑒯𑒙𑒰𑒆
𑒥𑒢𑒞 𑒒𑒼𑒛𑓃𑒰 𑒏𑓂𑒭𑒝𑒯𑒱
𑒒𑒼𑒛𑓃𑒰 𑒔𑒙𑓂𑒙𑒰𑒢𑒏 𑒥𑒢𑒰𑒆

𑒏𑒯𑒪 𑒍 𑒑𑒳𑒩𑒴𑒖𑒲
𑒏𑒰𑒖 𑒫𑒻𑒯 𑒁𑒕𑒱 𑒮𑒼𑒔𑒥𑒰𑒏 𑒁𑒕𑒱 𑒄 𑒤𑒹𑒩 𑒣𑒯𑒱𑒢𑒹 𑒥𑒹𑒬𑒲 𑒏𑒰𑒖 𑒪𑒑𑒻𑒞 𑒕𑒪 𑒂𑒥 𑒟𑒼𑒛𑓃 𑒁𑒕𑒱 𑒦𑒹𑒪

𑒂𑒿𑒐𑒱𑒏 𑒔𑒬𑓂𑒧𑒰
𑒠𑒰𑒠𑒰 𑒣𑒯𑒳𑒿𑒔𑒪𑒰𑒯 𑒛𑒰𑒏𑓂𑒙𑒩 𑒪𑒑 𑒣𑒳𑒕𑒪 𑒯𑒼𑒃𑒋 𑒏𑒲 𑒥𑒰𑒥𑒰 𑒧𑒩𑓂𑒩 𑒛𑒰𑒏𑓂𑒙𑒩 𑒁𑒯𑒰𑒿 𑒕𑒲 𑒯𑒧𑒯𑒲𑓀 𑒥𑒞𑒰𑒆 𑒦𑒹𑒪 𑒏𑒲 𑒯𑒧𑒩𑒰?
𑒎𑒿𑒚𑒰𑒮𑒿 𑒏𑒨 𑒬𑒳𑒩𑒴 𑒥𑒞𑒰𑒆 𑒣𑒯𑒳𑒿𑒔𑒰 𑒡𑒩𑒱𑒏 𑒮𑒧𑒰𑒔𑒰𑒩 𑒏𑒯𑒪 𑒣𑒯𑒱𑒢𑒹 𑒏𑒩𑒴 𑒚𑒲𑒏 𑒂𑒿𑒐𑒱𑒏𑒹𑒿 𑒎 𑒮𑒩𑒏𑒰𑒩
𑒏𑒼𑒢𑒼 𑒔𑒬𑓂𑒧𑒰 𑒢𑒯𑒱 𑒤𑒱𑒙 𑒣𑒛𑓃𑒪 𑒠𑒴𑒩𑒥𑒲𑒢𑒏 𑒬𑒲𑒬𑒰 𑒖𑒐𑒢 𑒪𑒑𑒰𑒍𑒪 𑒏𑒯𑒪 𑒯𑒿 𑒁𑒕𑒱 𑒂𑒥 𑒏𑒼𑒢𑒯𑒳𑒢𑒰 𑒦𑒰𑒐𑒋 𑒁𑒏𑓂𑒭𑒩 𑒔𑒩𑒰𑒔𑒩
𑒮𑒛𑓃𑒯𑒲 𑒂𑒧 𑒠𑒹𑒐𑒱 𑒥𑒖𑒪𑒰𑒯 𑒥𑒴𑒜𑓃 𑒦𑒹𑒪𑒯𑒳𑒿 𑒯𑒧 𑒁𑒯𑒰𑒿 𑒥𑒳𑒗𑒨 𑒕𑒲 𑒥𑒔𑓂𑒔𑒰 𑒥𑒻𑒪𑒴𑒢𑒮𑒿 𑒐𑒹𑒪𑒰𑒨𑒥 𑒯𑒧 𑒮𑒹 𑒫𑒨𑒮 𑒢𑒯𑒱 𑒁𑒕𑒱
𑒁𑒔𑓂𑒕𑒰 𑒁𑒔𑓂𑒕𑒰 !
𑒨𑒾 𑒠𑒰𑒠𑒰 𑒄 𑒮𑒛𑓃𑒯𑒲 𑒕𑒲 𑒯𑒧 𑒣𑒛𑓃𑒱 𑒑𑒹𑒪 𑒕𑒲 𑒮𑒼𑒿𑒔𑒯𑒱 𑒮𑒛𑓃𑒯𑒲 𑒂𑒧 𑒁𑒯𑒰𑒿 𑒏𑒼𑒢𑒰 𑒠𑒹𑒐𑒥 𑒔𑒬𑓂𑒧𑒰𑒏 𑒢𑓀𑒥𑒩𑒹 𑒑𑒪𑒞 𑒣𑒛𑓃𑒪 𑒁𑒕𑒱

𑒞𑒲𑒢𑒹 𑒙𑒰 𑒁𑒕𑒱 𑒇𑒞𑒳
𑒣𑒳𑒕𑒪 𑒮𑓂𑒏𑒴𑒪 𑒏𑒱𑒋𑒏 𑒢𑒯𑒱 𑒁𑒋𑒪𑒯𑒳𑒿
𑒧𑒰𑒮𑓂𑒙𑒩 𑒮𑒰𑒯𑒹𑒥 𑒯𑒼𑒃𑒞 𑒕𑒪 𑒥𑒩𑒐𑒰 𑒖𑒰𑒃𑒞𑒯𑒳𑒿 𑒯𑒧 𑒕𑒪 𑒦𑒲𑒖𑒱
𑒥𑒩𑒐𑒰𑒧𑒹 𑒖𑒰𑒋𑒥 𑒁𑒯𑒰𑒿 𑒦𑒲𑒖𑒱 𑒑𑒩𑓂𑒧𑒲𑒧𑒹 𑒪𑒰𑒑𑒞 𑒪𑒴-𑒑𑒩𑓂𑒧𑒲 𑒂 𑒖𑒰𑒛𑓃𑒏 𑒬𑒲𑒞𑒪𑒯𑒩𑒲𑒧𑒹 𑒯𑒰𑒩-𑒯𑒰𑒛𑓃 𑒯𑒼𑒃𑒞 𑒖𑒰𑒋𑒥
𑒮𑒰𑒪𑒧𑒹 𑒣𑒜𑓃𑒰𑒃-𑒣𑒜𑒋 𑒏𑒯𑒱𑒨𑒰 𑒂𑒋𑒥
𑒥𑒾𑒂 𑒯𑒼𑒃𑒞 𑒁𑒕𑒱 𑒄 𑒞𑒲𑒢𑒱𑒨𑒹𑒙𑒰 𑒇𑒞𑒳


𑒠𑒩𑒱𑒠𑓂𑒩
𑒂𑒚 𑒮𑒨 𑒥𑒲𑒒𑒰 𑒐𑒹𑒞 𑒏𑒞𑒹𑒏 𑒣𑒼𑒐𑒩𑒱 𑒔𑒰𑒮-𑒥𑒰𑒮
𑒧𑒳𑒠𑒰 𑒏𑒰𑒪𑒏 𑒑𑒞𑒱 𑒥𑒹𑒔𑒱 𑒥𑒱𑒏𑒢𑒱 𑒮𑒦𑒙𑒰 𑒏𑒹𑒪𑒢𑓂𑒯𑒱 𑒮𑒧𑒰𑒣𑓂𑒞

𑒗𑓀𑒗𑒰𑒩𑒣𑒳𑒩𑒮𑒿 𑒡𑒼𑒞𑒲 𑒏𑒲𑒢𑒱 𑒒𑒳𑒩𑒻𑒞 𑒏𑒰𑒪 𑒠𑒹𑒐𑒪 𑒧𑒰𑒿𑒕 𑒥𑒱𑒏𑒰𑒃𑒞 𑒡𑒼𑒞𑒲 𑒒𑒳𑒩𑒰 𑒏𑒋 𑒂𑒢𑒪 𑒂 𑒏𑒲𑒢𑒪 𑒧𑒰𑒿𑒕 𑒮𑒳𑒂𑒃𑒠

𑒣𑒴𑒕𑒪 𑒏𑒯𑒪 𑒯𑒾 𑒧𑒰𑒕 𑒄
𑒏𑒰𑒪𑓂𑒯𑒱 𑒏𑒞𑒋𑒮𑒿 𑒦𑒹𑒙𑒞 𑒡𑒼𑒞𑒲 𑒞𑒿 𑒖𑒐𑒢𑒹 𑒣𑒰𑒃 𑒯𑒼𑒋𑒞 𑒖𑒰𑒋𑒥 𑒏𑒲𑒢𑒱 𑒪𑒰𑒋𑒥 𑒞𑒳𑒩𑒞
𑒠𑒩𑒱𑒠𑓂𑒩𑒞𑒰𑒏 𑒏𑒰𑒩𑒝 𑒯𑒳𑒢𑒏𑒩 𑒯𑒧 𑒂𑒥 𑒥𑒴𑒗𑒱 𑒑𑒹𑒪 𑒕𑒲 𑒋𑒏 𑒠𑒱𑒢𑒳𑒏𑒰 𑒑𑒣 𑒢𑒯𑒱 𑒄 𑒮𑒦 𑒠𑒱𑒢𑒳𑒏𑒰 𑒔𑒩𑒱𑒞𑓂𑒩 𑒕𑒲

𑒩𑒾𑒯 𑒢𑒯𑒱 𑒢𑒻𑒢
𑒯𑒿 𑒨𑒾 𑒢𑒻𑒢 𑒁𑒕𑒱 𑒄 𑒧𑒳𑒠𑒰 𑒬𑒯𑒩𑒏 𑒪𑒼𑒏 𑒏𑒲 𑒥𑒳𑒗𑒋 𑒮𑒦 𑒞𑒰𑒏𑒻𑒞 𑒁𑒕𑒱 𑒩𑒾𑒯 𑒢𑒻𑒢 𑒏𑒯𑒥𑒨 𑒞𑒿 𑒏𑓂𑒨𑒼 𑒢𑒯𑒱 𑒏𑒲𑒢𑒨
𑒕𑒰𑒑𑒩 𑒐𑒮𑓂𑒮𑒲 𑒂 𑒥𑒏𑒩𑒲𑒏 𑒁𑓀𑒞𑒩 𑒖𑓂𑒨𑒼𑒿 𑒖𑒰𑒨𑒥 𑒤𑒩𑒱𑒕𑒰𑒥𑒨
𑒥𑒱𑒏𑒰𑒨𑒞 𑒏𑒱𑒕𑒳 𑒢𑒯𑒱 𑒋𑒯𑒱 𑒢𑒑𑒩𑒧𑒹
𑒋𑒯𑒱 𑒢𑒑𑒩𑒧𑒹 𑒥𑒱𑒢𑒳 𑒙𑒰𑒏𑒰 𑒏𑒱𑒕𑒳 𑒢𑒯𑒱 𑒂𑒥𑒨

𑒖𑒴𑒞𑒰𑒏 𑒂𑒫𑒱𑒭𑓂𑒏𑒰𑒩
𑒖𑒐𑒢 𑒑𑒛𑓃𑒪 𑒋𑒏 𑒏𑒰𑒿𑒙 𑒩𑒰𑒖𑒰 𑒏𑒯𑒪𑒏 𑒍𑒕𑒰𑒅 𑒔𑒩𑓂𑒧 𑒂 𑒔𑒩𑓂𑒧𑒮𑒿 𑒧𑒰𑒙𑒱𑒏𑒹𑒿 𑒕𑒰𑒛𑓃𑒱 𑒏𑒋 𑒩𑒰𑒖𑒡𑒰𑒢𑒲 𑒢𑒱𑒭𑓂𑒏𑓀𑒙𑒏 𑒥𑒢𑒰𑒆

𑒖𑒐𑒢 𑒮𑒦𑒙𑒰 𑒔𑒩𑓂𑒧 𑒂𑒢𑒱 𑒏𑒋 𑒢𑒯𑒱 𑒣𑒴𑒩𑓂𑒝 𑒦𑒋 𑒮𑒏𑒪 𑒍𑒕𑒰𑒍𑒢 𑒋𑒏 𑒔𑒩𑓂𑒧𑒏𑒰𑒩 𑒂𑒍𑒪 𑒂 𑒩𑒰𑒖𑒰𑒏𑒹𑒿 𑒤𑒩𑒱𑒕𑒰𑒨 𑒥𑒳𑒗𑒰𑒍𑒪
𑒣𑒻𑒩 𑒥𑒰𑒢𑓂𑒯𑒱 𑒪𑒲 𑒔𑒩𑓂𑒧𑒮𑒿 𑒂𑒏𑒱 𑒣𑒵𑒟𑓂𑒫𑒲𑒏𑒹𑒿 𑒍𑒯𑒱𑒮𑒿 𑒪𑒋 𑒗𑒰𑒿𑒣𑒲 𑒢𑒱𑒭𑓂𑒏𑓀𑒙𑒏 𑒡𑒩𑒞𑒲 𑒢𑒯𑒱 𑒧𑒳𑒠𑒰
𑒧𑒰𑒩𑓂𑒑 𑒢𑒱𑒭𑓂𑒏𑓀𑒙𑒏 𑒯𑒼𑒋𑒞 𑒑𑒋
𑒖𑒴𑒞𑒰𑒏 𑒦𑒋𑒪 𑒣𑒠𑒰𑒩𑓂𑒣𑒝 𑒞𑒯𑒱𑒢𑒰
𑒩𑒰𑒖𑒰 𑒣𑓂𑒩𑒮𑒢𑓂𑒢 𑒏𑒯𑒪 𑒯𑒼𑒁𑒋 𑒋𑒯𑒱𑒢𑒰

𑒥𑒴𑒜𑓃 𑒫𑒩
𑒏𑒞𑒨 𑒕𑒲 𑒂𑒨𑒪 𑒂𑒃 ?
𑒞𑒰𑒏𑒱 𑒩𑒯𑒪 𑒕𑒲 𑒫𑒩 𑓑𑓕-𑓑𑓕 𑒫𑒩𑒐𑒏 𑒠𑒴𑒙𑒰 𑒁𑒕𑒱 𑒏𑒞𑒯𑒳 𑒁𑒦𑒛𑓃𑒪 ?
𑒩𑓀𑒑 𑒮𑒱𑒪𑒹𑒥𑒲 𑒮𑒱𑓀𑒒 𑒧𑒳𑒚𑒱𑒨𑒰 𑒁𑒠𑓀𑒞 𑒞𑒏𑒻𑒞 𑒕𑒲 𑒂𑒃 𑒮𑒹 𑒦𑒹𑒙𑒞 𑒏𑒯𑒱𑒨𑒰 ?
𑓑𑓕-𑓑𑓕 𑒏𑒹𑒩 𑒠𑒴 𑒑𑒼𑒙𑒏 𑒥𑒠𑒪𑒹𑒢 𑓓𑓐 𑒏𑒹𑒩 𑒦𑒹𑒙𑒞 𑒋𑒏𑒙𑒰 𑒥𑒰𑒪-𑒫𑒱𑒫𑒰𑒯𑒏 𑒠𑒱𑒢 𑒑𑒹𑒪

𑒩𑒱𑒣𑒹𑒨𑒩
𑒮𑓂𑒏𑒴𑒪𑒏 𑒞𑒰𑒪𑒰𑒏 𑒩𑒱𑒣𑒹𑒨𑒩 𑒏𑒹𑒪𑒏 𑒥𑒱𑒪 𑒧𑒼𑒙𑒑𑒩 𑒖𑒐𑒢 𑒠𑒹𑒪𑒏 𑒏𑒰𑒩𑒲𑒑𑒩 𑒣𑒴𑒕𑒪 𑒋𑒯𑒱 𑒁𑒪𑒧𑒲𑒩𑒰𑒏 𑒞𑒿 𑒞𑒰𑒪𑒰 𑒢𑒯𑒱 𑒧𑒯𑒑 𑒕𑒪 ?
𑒩𑒱𑒣𑒹𑒨𑒩𑒮𑒿 𑒮𑒮𑓂𑒞𑒧𑒹 𑒞𑒿 𑒢𑒫 𑒞𑒰𑒪𑒰 𑒂𑒨𑒞 𑒑𑒨
𑒎 𑒥𑒰𑒥𑒴 𑒞𑒐𑒢 𑒏𑒧𑒲𑒬𑒢 𑒁𑒯𑒲𑓀 𑒖𑒰𑒨 𑒂𑒆 𑒠𑓄

𑒢𑒼𑒏𑒩
𑒤𑒼𑒢 𑒏𑓄 𑒏𑒨 𑒒𑒩𑒧𑒹 𑒣𑒴𑒕𑒪 𑒣𑒴𑒕𑒪𑒢𑓂𑒯𑒱 𑒥𑒹𑒙𑒰𑒏 𑒁𑒤𑒮𑒩
𑒕𑒟𑒱 𑒥𑒹𑒙𑒰 𑒒𑒩𑒧𑒹 𑒏𑒲 ?
𑒂𑒏𑒱..

𑒂𑒏𑒱 𑒂𑒑𑒴 𑒣𑒳𑒕𑒱𑒞𑒟𑒱 𑒍 𑒥𑒖𑒪𑒰𑒯 𑒠𑒨 𑒏𑒨 𑒋𑒏 𑒡𑒳𑒞𑒏𑒰𑒩𑒲
𑒋𑒯𑒱 𑒤𑒼𑒢𑒏 𑒯𑒧 𑒥𑒱𑒪 𑒦𑒩𑒻𑒞 𑒕𑒲 𑒢𑒯𑒱 𑒏𑒩𑒴 𑒁𑒯𑒰𑒿 𑒣𑒳𑒢𑒱 𑒥𑒰𑒞 𑒧𑒻𑒮𑒹𑒖 𑒁𑒯𑒰𑒿𑒏 𑒠𑒹𑒥 𑒯𑒧 𑒣𑒳𑒞𑓂𑒩𑒏𑒹𑒿 𑒮𑒹 𑒕𑒲 𑒏𑒹 𑒁𑒯𑒰𑒿 𑒪𑒰𑒙?
𑒢𑒾𑒏𑒩 𑒢𑒯𑒱 𑒁𑒯𑒰𑒿𑒏 𑒢𑒹 𑒕𑒲 𑒯𑒧 𑒁𑒣𑒢 𑒣𑒳𑒞𑓂𑒩𑒏 𑒏𑒢𑒱𑒨𑒰 𑒏𑒹𑒩 𑒙𑒰 𑒕𑒲 𑒯𑒧 𑒢𑒾𑒏𑒩 𑒥𑒳𑒗𑒴 𑒄 𑒨𑒾 𑒁𑒤𑒮𑒩

𑒏𑓂𑒪𑒰𑒮𑒧𑒹 𑒁𑒥𑒰𑒖
𑒠𑒳𑒢𑒴 𑒠𑒱𑒬𑒏 𑒥𑒹𑓀𑒔𑒏𑒹𑒿 𑒅𑒚𑒰𑒏𑒨 𑒣𑒳𑒕𑒪𑒢𑓂𑒯𑒱 𑒂𑒨𑒪 𑒏𑒼𑒢 𑒏𑒰𑒞𑒮𑒿 𑒁𑒥𑒰𑒖
𑒣𑒏𑒛𑓃𑒪 𑒋𑒏 𑒏𑒰𑒞𑒏𑒹𑒿 𑒕𑒼𑒛𑓃𑒪 𑒤𑒹𑒩 𑒏𑒋𑒪 𑒠𑒴 𑒤𑒰𑒛𑓃𑒱
𑒂𑒡𑒏-𑒂𑒡 𑒏𑒩𑒻𑒞 𑒣𑒯𑒳𑒿𑒔𑒪𑒰𑒯 𑒤𑒹𑒩 𑒪𑒑 𑒪𑒏𑓂𑒭𑓂𑒨
𑒠𑒳𑒃 𑒑𑒼𑒙 𑒧𑒡𑓂𑒨 𑒖𑒰𑒢𑒱 𑒢𑒯𑒱 𑒮𑒏𑒪𑒰𑒯 𑒁𑒥𑒰𑒖 𑒏𑒹𑒪𑒏 𑒏𑒼𑒢 𑒫𑒞𑓂𑒮

𑒋𑒮.𑒋𑒧.𑒋𑒮.
𑒏𑒯𑒴 𑒋𑒯𑒱𑒧𑒹 𑒁𑒯𑒰𑒿 𑒕𑒲 𑒮𑒯𑒧𑒞 𑒂 𑒏𑒲 𑒕𑒲 𑒁𑒯𑒰𑒿 𑒁𑒮𑒯𑒧𑒞 𑒠𑒳𑒢𑒴 𑒩𑒴𑒣𑒧𑒹 𑒠𑒱𑒁 𑒁𑒯𑒰𑒿 𑒁𑒣𑒢 𑒫𑒱𑒔𑒰𑒩 𑒏𑒨 𑒋𑒮.𑒋𑒧.𑒋𑒮.
𑒂𑒯𑒱 𑒏𑒧𑒰𑒆 𑒁𑒯𑒰𑒿 𑒩𑒳𑒣𑒻𑒨𑓂𑒨𑒰 𑒯𑒧 𑒥𑒴𑒛𑓃𑒱 𑒕𑒲 𑒦𑒰𑒃 𑒢𑓂𑒨𑒳 𑒙𑒹𑒏𑓂𑒢𑒼𑒪𑒼𑒖𑒲 𑒕𑒲 𑒄 𑒮𑒦 𑒥𑒳𑒩𑒥𑒏 𑒏𑓂𑒨𑒼 𑒢𑒯𑒱 𑒂𑒃

𑒙𑒲.𑒙𑒲.
𑒧𑒖𑒱𑒮𑓂𑒙𑓂𑒩𑒹𑒙 𑒔𑒹𑒏𑒱𑒓 𑒦𑒹𑒪 𑒥𑒱𑒢 𑒙𑒱𑒏𑒙 𑒥𑒪𑒰 𑒫𑒲𑒩 𑒮𑒦 𑒦𑒰𑒑𑒪
𑒥𑒰𑒡𑒹-𑒥𑒰𑒡𑒹
𑒐𑒹𑒯𑒰𑒩𑒪𑒏 𑒣𑒳𑒪𑒱𑒮 𑒖𑒐𑒢 𑒔𑒣𑓂𑒣𑒪 𑒕𑒼𑒛𑓃𑒪 𑒍𑒞𑒨 𑒥𑒹𑒮𑒳𑒡 𑒞𑒢
𑒧𑒳𑒠𑒰 𑒥𑒳𑒩𑒥𑒏 𑒪𑒰𑒪 𑒋𑒏𑒙𑒰 𑒋𑒏 𑒔𑒣𑓂𑒣𑒪 𑒪𑒹𑒪𑒏 𑒅𑒚𑒰𑒨 𑒠𑒼𑒮𑒩 𑒔𑒣𑓂𑒣𑒪 𑒕𑒼𑒛𑓃𑒱 𑒣𑒛𑓃𑒰𑒨𑒪 𑒂𑒨𑒪 𑒑𑒰𑒧 𑒯𑒿𑒤𑒰𑒃𑒞
𑒮𑒦 𑒯𑒿𑒮𑒱 𑒣𑒳𑒕𑒪𑒏 𑒯𑒾 𑒥𑒰𑒥𑒴 𑒋𑒏𑒙𑒰 𑒔𑒙𑓂𑒙𑒲 𑒪𑒨 𑒏𑒨 𑒏𑒼𑒢 𑒣𑒻𑒩𑒧𑒹 𑒣𑒯𑒱𑒩𑒥 𑒋𑒏𑒩𑒰 𑒠𑒼𑒮𑒩 𑒐𑒰𑒪𑒲 𑒩𑒯𑒞 𑒑𑒋

𑒄 𑒥𑒳𑒩𑒥𑒏𑒯𑒰 𑒥𑒳𑒩𑒥𑒏𑒹 𑒩𑒯𑒪 𑒯𑒿𑒮𑒱 𑒦𑒹𑒩 𑒦𑒹𑒪 𑒮𑒦
𑒠𑒼𑒮𑒩 𑒠𑒱𑒢 𑒥𑒰𑒡 𑒮𑒦 𑒑𑒹𑒪
𑒠𑒹𑒐𑒪 𑒮𑒥𑒯𑒏 𑒠𑒳𑒢𑒴 𑒔𑒙𑓂𑒙𑒲 𑒦𑒹𑒪 𑒕𑒪 𑒢𑒱𑒣𑒞𑓂𑒞𑒰 𑒥𑒳𑒩𑒥𑒏𑒯𑒰𑒏 𑒋𑒏 𑒔𑒙𑓂𑒙𑒱𑒨𑒹 𑒕𑒪 𑒥𑒰𑒿𑒔𑒪 𑒢𑒯𑒱 𑒪𑒹𑒪𑒏 𑒏𑓂𑒨𑒼 𑒮𑒼𑒔𑒱 𑒏𑒩𑒥 𑒏𑒲 𑒋𑒏𑒙𑒰?
𑒧𑒳𑒿𑒯 𑒪𑒙𑒏𑒍𑒢𑒹 𑒮𑒦 𑒒𑒴𑒩𑒪 𑒂 𑒢𑒰𑒧 𑒥𑒠𑒪𑒪𑒏 𑒥𑒳𑒩𑒥𑒏𑒯𑒰𑒏 𑒙𑒲.𑒙𑒲. 𑒥𑒰𑒥𑒴𑒏𑒹𑒿 𑒄 𑒚𑒏𑒪𑒏 𑒢𑒰𑒧 𑒯𑒼𑒨𑒞 𑒮𑒻𑒯 𑒋𑒏𑒩 𑒂𑒥

𑒐𑒑𑒞𑒰
𑒑𑒼𑒩 𑒪𑒰𑒑𑒱 𑒧𑒾𑒮𑒲𑒏𑒹𑒿 𑒢𑒱𑒏𑒪𑒪 𑒣𑒴𑒕𑒞𑒲𑒯 𑒁𑒕𑒱 𑒏𑒱𑒕𑒳 𑒐𑒑𑒞𑒰 𑒂𑒃 𑒢𑒯𑒱 𑒣𑒴𑒕𑒪 𑒖𑒐𑒢 𑒥𑒻𑒮𑒪 𑒤𑒹𑒩 𑒍 𑒞𑒐𑒢
𑒤𑒹𑒩 𑒅𑒚𑒪 𑒧𑒾𑒮𑒲 𑒤𑒹𑒩 𑒢𑒯𑒱 𑒣𑒳𑒕𑒪𑒐𑒱𑒢𑓂𑒯 𑒄 𑒮𑒼𑒔𑒱 𑒖𑒹 𑒩𑒯𑒻𑒞 𑒢𑒯𑒱 𑒕𑒢𑓂𑒯𑒱 𑒣𑒰𑒃𑒏 𑒏𑒰𑒖
𑒖𑒰𑒋𑒥 𑒏𑒼𑒢𑒰 𑒣𑒰𑒃𑒏 𑒥𑒛𑓂𑒛 𑒁𑒦𑒰𑒫 !

𑒂𑒃 𑒢𑒯𑒱 𑒣𑒴𑒕𑒪 𑒖𑒐𑒢 𑒥𑒻𑒮𑒪 𑒤𑒹𑒩 𑒍 𑒞𑒐𑒢

𑒪𑒼𑒏 𑒏𑒯𑒻𑒕 𑒂𑒨𑒪 𑒕𑒟𑒱 𑒐𑒑𑒞𑒹 𑒍𑒢𑒰 𑒠𑒩𑓂𑒬𑒢𑒯𑒳𑒿 𑒠𑒳𑒩𑓂𑒪𑒦
𑒁𑒯𑒲𑒿 𑒏𑒯𑒴 𑒐𑒑𑒞𑒰𑒧𑒹 𑒏𑓂𑒨𑒼 𑒁𑒕𑒱 𑒣𑒳𑒕𑒻𑒞
𑒂𑒑𑒴𑒮𑒿 ?
𑒂𑒃 𑒢𑒯𑒱 𑒣𑒴𑒕𑒪 𑒖𑒐𑒢 𑒥𑒻𑒮𑒪 𑒤𑒹𑒩 𑒍 𑒞𑒐𑒢

𑒏-𑒐 𑒮𑒿 𑒠𑒩𑓂𑒬𑒢
𑒙𑓂𑒨𑒳𑒬𑒢 𑒣𑒜𑓃𑒥𑒨 𑒖𑒰𑒃𑒞 𑒕𑒿𑒯 𑒃𑒖𑓂𑒖𑒞 𑒞𑒿 𑒏𑒩𑒻𑒞 𑒕𑒾𑒏? 𑒖𑒪𑒐𑒻 𑒞𑒿 𑒢𑒯𑒱𑒨𑒹 𑒣𑒩𑒘𑓂𑒔 𑒔𑒰𑒯𑒼-𑒣𑒰𑒢𑒱𑒏 𑒯𑒹𑒞𑒳 𑒣𑒳𑒕𑒻𑒞 𑒕𑒾𑒯 ?
𑒙𑓂𑒨𑒳𑒬𑒢 𑒏𑒨 𑒐𑒰𑒃𑒞 𑒕𑒲 𑒏𑒲 𑒏𑒯𑒪𑒯𑒳𑒿 𑒯𑒹 𑒮𑒹 𑒢𑒯𑒱 𑒥𑒰𑒖𑒴 𑒠𑓂𑒩𑒼𑒝𑒏 𑒢𑒫 𑒁𑒫𑒞𑒰𑒩 𑒕𑒲 𑒯𑒧

𑒮𑒹 𑒕𑒱𑒨𑒢𑓂𑒯𑒱 𑒏𑒯𑒱 𑒠𑒹𑒢𑒹 𑒖𑒰𑒃𑒞 𑒠𑒹𑒩𑒲 𑒏𑒩𑒯 𑒖𑒪𑒐𑒻𑒏 𑒫𑓂𑒨𑒫𑒮𑓂𑒟𑒰 𑒢𑒯𑒱 𑒞𑒿 𑒕𑒲 𑒢𑒯𑒱 𑒯𑒧 𑒠𑓂𑒩𑒼𑒝 𑒎𑒚𑒰𑒿𑒏 𑒢𑒯𑒱 𑒏𑒼𑒢𑒼 𑒪𑒰𑒪𑒮𑒰

𑒧𑒰𑒞𑓂𑒩 𑒣𑒜𑓃𑒹𑒥𑒢𑓂𑒯𑒱 𑒕𑒍 𑒧𑒯𑒱𑒢𑒰 𑒠𑒩𑓂𑒬𑒢 𑒢𑒯𑒱 𑒯𑒼𑒨𑒞𑒢𑓂𑒯𑒱 𑒏-𑒐 𑒏𑒹𑒩 𑒢𑒯𑒱 𑒮𑒹 𑒢𑒯𑒱 𑒥𑒰𑒖𑒴 𑒐𑒳𑒂 𑒣𑒱𑒨𑒰 𑒏𑒋 𑒏𑒹𑒢𑒹 𑒁𑒕𑒱 𑒜𑒹𑒩

𑒔𑒼𑒩𑒏𑒹𑒿 𑒮𑒱𑒐𑒰𑒥𑒯
𑒨𑒾 𑒏𑒰𑒏𑒰 𑒕𑒲 𑒁𑒯𑒰𑒿 𑒐𑒰𑒙𑒏𑒹𑒿 𑒡𑒼𑒏𑒛𑓃𑒲 𑒏𑒱𑒋𑒏 𑒥𑒢𑒍𑒢𑒹 𑒐𑒼𑒪𑒱 𑒢𑒹𑒫𑒰𑒛𑓃 𑒤𑒹𑒩 𑒒𑒼𑒩𑒱𑒏𑒹𑒿
𑒥𑒢𑒰𑒆 𑒐𑒰𑒙 𑒋𑒐𑒢 𑒢𑒫𑒲𑒢𑒹
𑒏𑒯𑒪𑒢𑓂𑒯𑒱 𑒏𑒰𑒏𑒰 𑒯𑒹 𑒯𑒾 𑒠𑒹𑒐𑒯 𑒂𑒨𑒞 𑒩𑒰𑒞𑒱𑒧𑒹 𑒖𑒹 𑒔𑒼𑒩 𑒣𑒙𑒏𑒞 𑒪𑒰𑒚𑒲 𑒐𑒰𑒙 𑒣𑒩 𑒂 𑒡𑒼𑒏𑒛𑓃𑒲𑒧𑒹 𑒩𑒯𑒢𑒹
𑒔𑒼𑒙 𑒢𑒯𑒱 𑒪𑒰𑒑𑒞 𑒧𑒼𑒩

𑒣𑒩𑒘𑓂𑒔 𑒏𑒰𑒏𑒰 𑒖𑓂𑒨𑒼𑒿 𑒍 𑒔𑒪𑒥𑒋 𑒪𑒰𑒚𑒲 𑒢𑒲𑒔𑒰𑒿 𑒥𑒰𑒙𑒹 𑒫𑒰𑒯 𑒥𑒹𑒙𑒰 𑒏𑒯𑒱 𑒠𑒱𑒯𑒯 𑒔𑒼𑒩𑒏𑒹𑒿 𑒄 𑒑𑒣 𑒞𑒼𑒯𑒲𑒿 𑒖𑒰 𑒏𑒨

𑒢𑒩𑒏 𑒢𑒱𑒫𑒰𑒩𑒝 𑒔𑒞𑒳𑒩𑓂𑒠𑒬𑒲
𑒦𑒳𑒐𑒪𑒹 𑒦𑒩𑒱 𑒠𑒱𑒢 𑒠𑒱𑒢 𑒥𑒱𑒞𑒱 𑒑𑒹𑒪 𑒢𑒩𑒏 𑒢𑒱𑒫𑒰𑒩𑒝 𑒪𑒨 𑒯𑒧 𑒩𑒯𑒪𑒯𑒳𑒿 𑒮𑒰𑒿𑒗𑒧𑒹 𑒧𑓀𑒠𑒱𑒩 𑒫𑒱𑒠𑒰 𑒮𑒦 𑒦𑒹𑒪
𑒠𑒳𑒩𑓂𑒑𑒰𑒣𑒴𑒖𑒰 𑒪𑒑𑒧𑒹 𑒂𑒨𑒪 𑒮𑒱𑓀𑒑𑒩𑒯𑒰𑒩 𑒏𑒹𑒩 𑒔𑒪𑒞𑒲 𑒦𑒹𑒪 𑒧𑒰𑒙𑒱 𑒏𑒰𑒙𑒱 𑒑𑒼𑒥𑒩𑒮𑒿 𑒢𑒲𑒣𑒱 𑒏𑒨 𑒦𑒼𑒩𑒹-𑒦𑒼𑒩 𑒤𑒴𑒪 𑒪𑒼𑒜𑓃𑒱 𑒪𑒹𑒪
𑒮𑒩𑒮𑓂𑒫𑒞𑒲 𑒣𑒴𑒖𑒰𑒏 𑒮𑒧𑒨𑒧𑒹 𑒥𑒻𑒩 𑒁𑒬𑒼𑒏𑒏-𑒑𑒰𑒕-𑒣𑒰𑒞 𑒑𑒼𑒪𑒲𑒏 𑒪𑒹𑒪
𑒥𑒼𑒢𑒹-𑒥𑒼𑒢 𑒧𑒯𑒳𑒂𑒏 𑒤𑒩𑒏 𑒪𑒹𑒪 𑒒𑒴𑒧𑒱-𑒒𑒰𑒧𑒱 𑒁𑒨𑒪𑒯𑒳𑒿 𑒦𑒹𑒪-𑒦𑒹𑒩

𑒁𑒝𑓂𑒛𑒲𑒏 𑒥𑒲𑒨𑒰 𑒞𑒹𑒪𑒯𑒰𑒢𑒲𑒧𑒹 𑒠𑒋 𑒞𑒩𑒳𑒂 𑒍𑒏𑒩 𑒞𑒹𑒪𑒏 𑒐𑒋𑒪
𑒏𑒳𑒝𑓂𑒛𑒪𑒲 𑒧𑒱𑒩𑒔𑒰𑒃𑒏 𑒤𑒩𑒧𑒹 𑒁𑓀𑒞𑒩 𑒥𑒳𑒗𑒻𑒞-𑒥𑒳𑒗𑒻𑒞 𑒠𑒱𑒢 𑒏𑒞𑒹𑒏 𑒑𑒹𑒪

𑒮𑒳𑒑𑓂𑒑𑒼𑒏𑒹𑒿 𑒄 𑒐𑒼𑒂𑒨 𑒩𑒰𑒧𑒰𑒨𑒝
𑒮𑒳𑒢𑒪𑒰 𑒏𑒞𑓂𑒞𑒹𑒏 𑒠𑒱𑒢 𑒦𑒋 𑒑𑒹𑒪

𑒢𑒾𑒏𑒩𑒲
𑒢𑒾𑒏𑒩𑒲 𑒢𑒯𑒱 𑒏𑒩𑒲 𑒞𑒐𑒢 𑒦𑒹𑒙𑒨 𑒞𑒢𑒐𑒰 𑒞𑒢 𑒐𑒰𑒨𑒞 𑒫𑒹𑒞𑒢 𑒦𑒹𑒙𑒞 𑒥𑒱𑒢𑒰 𑒞𑒢𑒯𑒱 𑒂𑒥 𑒏𑒞𑒹 𑒥𑒳𑒗𑒰𑒨𑒥
𑒑𑒰𑒧 𑒒𑒴𑒩𑒱 𑒖𑓂𑒨𑒼𑒿 𑒖𑒰𑒨𑒥 𑒐𑒰𑒨𑒥 𑒏𑒲 𑒏𑒧𑒪𑒰𑒏 𑒥𑒰𑒪𑒴 𑒎 𑒑𑒳𑒪𑒰𑒥 𑒏𑒰𑒏𑒰 𑒣𑒯𑒱𑒢𑒹 𑒯𑒧𑒩𑒰 𑒄𑒋𑒯 𑒥𑒳𑒗𑒰𑒆
𑒦𑒩𑒱 𑒠𑒱𑒢𑒏𑒰 𑒚𑒹𑒯𑒲 𑒁𑒕𑒱 𑒖𑒰𑒃𑒞 𑒖𑒐𑒢 𑒖𑒰𑒃𑒞 𑒕𑒲 𑒮𑒴𑒃𑒞 𑒦𑒼𑒩 𑒅𑒚𑒪𑒰 𑒮𑓀𑒞𑒰 𑒁𑒐𑒢𑒯𑒳𑒿 𑒮𑒧𑒮𑓂𑒨𑒰𑒮𑒿 𑒁𑒕𑒱 𑒢𑒯𑒱 𑒕𑒴𑒙𑒱

𑒧𑒩𑒏𑒩𑒲 𑒛𑒱𑒪𑒰𑒃𑒙
𑒮𑒼𑒗𑒰𑒿𑒮𑒿 𑒞𑓂𑒩𑒱𑒣𑒳𑒝𑓂𑒛-𑒔𑒰𑒢𑒢 𑒠𑒹𑒢𑒹 𑒂𑒨𑒪 𑒩𑒯𑒟𑒱 𑒅𑒠𑒢𑒰
𑒠𑒹𑒐𑒪 𑒑𑒰𑒧𑒏 𑒣𑓂𑒩𑒫𑒰𑒮𑒲 𑒖𑒯𑒱𑒢𑒰 𑒏𑒯𑒪 𑒩𑒾 𑒕𑒿 𑒞𑒼𑒿 𑒦𑒰𑒃 𑒅𑒠𑒢𑒰
𑒮𑓀𑒑 𑒏𑒙𑒪𑒯𑒳𑒿 𑒥𑒰𑒿𑒮
𑒂𑒫𑒰𑒖𑒏𑒹𑒿 𑒠𑒥𑒹𑒥𑒰 𑒪𑒹𑒪
𑒖𑒛𑓃𑒱𑒧𑒹 𑒥𑒰𑒢𑓂𑒯𑒲 𑒑𑒧𑒕𑒰
𑒂 𑒙𑒹𑓀𑒑𑒰𑒩𑒲𑒮𑒿 𑒠𑒴 𑒕𑒯𑒧𑒹
𑒏𑒰𑒙𑒨 𑒕𑒪𑒯 𑒞𑒼𑒿

𑒣𑒳𑒩𑒢𑒰𑒯𑒰𑒏 𑒛𑒥𑒩𑒰𑒧𑒹
𑒪𑒲𑒜𑓃𑒏 𑒢𑒲𑒔𑒰𑒿 𑒢𑒳𑒏𑒰 𑒏𑒨
𑒏𑒩𑒲 𑒮𑓀𑒣𑒢𑓂𑒢
𑒏𑒰𑒖 𑒥𑒱𑒢 𑒫𑒱𑒒𑓂𑒢

𑒣𑒬𑓂𑒔𑒰𑒞𑓂 𑒦𑒹𑒪𑒯𑒳𑒿 𑒣𑓂𑒩𑒫𑒰𑒮𑒲 𑒧𑒩𑒏𑒩𑒲-𑒛𑒱𑒪𑒰𑒃𑒙 𑒠𑒨𑒏𑒹𑒿 𑒞𑒼𑒿 𑒦𑒹𑒪𑒯 𑒑𑒰𑒧𑒏 𑒫𑒰𑒮𑒲
𑒣𑓀𑒛𑒱𑒞𑒏 𑒁𑒏𑒰𑒪 𑒕𑒪 𑒢𑒯𑒱 𑒕𑒪𑒯 𑒏𑒼𑒢𑒼 𑒏𑓀𑒣𑒲𑒙𑒲𑒬𑒢
𑒦𑒹𑒪𑒯𑒳𑒿 𑒁𑒯𑒰𑒿 𑒎 𑒦𑒖𑒰𑒩 𑒑𑒰𑒧𑒏 𑒢𑒫 𑒅𑒠𑒨𑒢𑒰𑒔𑒰𑒩𑓂𑒨

𑒠𑒲𑒨𑒰𑒥𑒰𑒞𑒲
𑒁𑒢𑓂𑒯𑒩𑒱𑒨𑒰 𑒦𑒑𑒹𑒪𑒏
𑒃𑒖𑒼𑒩𑒱𑒨𑒰 𑒥𑒖𑒹𑒪𑒏
𑒠𑒲𑒨𑒰𑒥𑒰𑒞𑒲 𑒯𑒧𑓂𑒧𑒩
𑒞𑒩𑒹𑒑𑒝 𑒥𑒖𑒹𑒪𑒏

𑒁𑒏𑒰𑒮𑒮𑒿 𑒅𑒞𑒰𑒩𑒱
𑒩𑒐𑒪𑒯𑒳𑒿 𑒁𑒣𑓂𑒣𑒢 𑒠𑓂𑒫𑒰𑒩𑒱

𑒤𑓂𑒩𑒻𑒏𑓂𑒔𑒩
𑒯𑒰𑒮𑓂𑒣𑒲𑒙𑒪𑒧𑒹 𑒂𑒥𑒰𑒖𑒰𑒯𑒲
𑒑𑒰𑒧𑒏 𑒣𑓂𑒩𑒫𑒰𑒮𑒲𑒏 𑒥𑒳𑒗𑒻𑒞 𑒕𑒪𑒰𑒯 𑒖𑒐𑒢 𑒮𑒧𑒰𑒔𑒰𑒩 𑒣𑒱𑒞𑒰𑒏 𑒦𑒩𑓂𑒞𑓂𑒞𑒲𑒏 𑒚𑒰𑒧𑒯𑒱 𑒠𑒩𑒦𑒓𑓂𑒑𑒰 𑒥𑒮-𑒮𑓂𑒙𑒻𑓀𑒛𑒯𑒱𑒮𑒿 𑒑𑒰𑒧 𑒖𑒨𑒥𑒰𑒏 𑒥𑒠𑒪𑒰 𑒂𑒥𑒟𑒱 𑒯𑒰𑒮𑓂𑒣𑒲𑒙𑒪

𑒏𑒲 𑒏𑒹𑒪𑒯𑒳𑒿 𑒬𑒩𑒲𑒩𑒏𑒹𑒿
𑒢𑒯𑒱𑒨𑒹 𑒥𑒢𑒹𑒪𑒯𑒳𑒿 𑒖𑒧𑒲𑒢-𑒖𑒞𑓂𑒟𑒰 𑒥𑒔𑓂𑒔𑒰 𑒮𑒦𑒏 𑒪𑒹𑒪 𑒢𑒯𑒱
𑒩𑒰𑒐𑒪 𑒠𑒵𑒭𑓂𑒙𑒱 𑒨𑒻𑒯 𑒫𑓂𑒨𑒟𑒰
𑒏𑒲 𑒮𑒦 𑒏𑒩𑒻𑒞 𑒏𑒞𑒨 𑒢𑒯𑒱 𑒣𑒜𑓃𑒻𑒞 𑒔𑒝𑓂𑒛𑒰𑒪 𑒏𑒱𑒋 𑒦𑒹𑒪𑒯𑒳𑒿 𑒯𑒹 𑒏𑒏𑓂𑒏𑒰
𑒍𑒞𑒯𑒱 𑒥𑒻𑒮𑒪 𑒕𑒪𑒰𑒯 𑒙𑒳𑒙𑒱𑒨𑒰𑒿 𑒣𑒱𑒞𑒰𑒏 𑒮𑒧𑒏𑓂𑒭 𑒣𑒯𑒱𑒢𑒯𑒱𑒿 𑒥𑒳𑒗𑒢𑒹 𑒕𑒪𑒰𑒯 𑒖𑒹 𑒏𑒏𑒰𑒏𑒹𑒿 𑒕𑒪𑒢𑓂𑒯𑒱 𑒦𑒹𑒪 𑒤𑓂𑒩𑒻𑒏𑓂𑒔𑒩
𑒏𑒯𑒪 𑒣𑒯𑒱𑒢𑒹 𑒮𑒧𑒰𑒔𑒰𑒩 𑒞𑒿 𑒣𑒳𑒕𑒱𑒁𑒢𑓂𑒯𑒳 𑒔𑒰𑒯𑒼 𑒂𑒥 𑒁𑒥𑒻𑒞 𑒯𑒼𑒨𑒞 𑒣𑒻𑒩 𑒯𑒰𑒟 𑒡𑒼𑒂𑒨 𑒁𑒢𑒱𑒯𑒢𑓂𑒯𑒳 !
𑒏𑒯𑒪 𑒣𑒻𑒩 𑒙𑒳𑒙𑒱 𑒑𑒹𑒪 𑒏𑒲 𑒏𑒏𑒰 𑒣𑒱𑒞𑒰 𑒏𑒱𑒕𑒳 𑒥𑒖𑒱𑒞𑒟𑒱
𑒥𑒖𑒪𑒰𑒯 𑒙𑒳𑒙𑒱𑒨𑒰𑒿

𑒯𑒼𑒃𑒕 𑒙𑒴𑒙𑒥 𑒂 𑒤𑓂𑒩𑒻𑒏𑓂𑒔𑒩 𑒋𑒏𑓂𑒏𑒹 𑒢𑒯𑒱 𑒕𑒪𑒢𑓂𑒯𑒱 𑒥𑒴𑒗𑒪 𑒮𑒹 𑒏𑒯𑒪 𑒢𑒯𑒱 𑒔𑒱𑓀𑒞𑒰 𑒏𑒩𑒻𑒞 𑒖𑒰𑒅 𑒦𑒑𑒫𑒰𑒢 𑒩𑒏𑓂𑒭 𑒩𑒐𑒪𑒢𑓂𑒯𑒱 𑒤𑓂𑒩𑒻𑒏𑓂𑒔𑒩𑒹 𑒦𑒹𑒪𑒢𑓂𑒯𑒱
𑒣𑒻𑒩 𑒙𑒴𑒙𑒪𑒢𑓂𑒯𑒱 𑒢𑒯𑒱 𑒥𑒰𑒅

𑒥𑒰𑒣𑒏𑒹𑒿 𑒢𑒼𑒬𑒱 𑒢𑒯𑒱 𑒦𑒹𑒙𑒪𑒢𑓂𑒯𑒱
𑒨𑒾 𑒥𑒳𑒗𑒪𑒯𑒳𑒿 𑒥𑒳𑒔𑓂𑒔𑒳𑒢𑒏 𑒑𑒣𑓂𑒣 𑒢𑒯𑒱 𑒏𑒩𑒻𑒞 𑒕𑒲 𑒐𑒱𑒡𑒰𑓀𑒬
𑒮𑒳𑒢𑒴 𑒯𑒧𑓂𑒧𑒩 𑒮𑒰𑒿𑒔

𑒮𑒧𑒨𑒏 𑒕𑒪𑒋 𑒢𑒯𑒱 𑒯𑒧𑒩𑒼 𑒁𑒦𑒰𑒫 𑒏𑒯𑒪 𑒯𑒿 𑒮𑒳𑒢𑒰𑒅 𑒏𑒱𑒕𑒳 𑒦𑒰𑒭𑒝-𑒦𑒰𑒐

𑒠𑒹𑒐𑒱 𑒣𑒳𑒕𑒪𑒱𑒨𑒻𑒏 𑒥𑒳𑒔𑓂𑒔𑒳𑒢𑒏𑒹𑒿 𑒯𑒾 𑒄 𑒏𑒲 𑒅𑒖𑒩𑒰 𑒢𑒰𑒿𑒏𑒮𑒿 𑒮𑒳𑒿𑒒𑒢𑒹 𑒖𑒰𑒃𑒞 𑒕𑒯 𑒏𑒯𑒪𑒏 𑒏𑒰𑒏𑒰 𑒐𑒼𑒐𑒲𑒿 𑒯𑒼𑒃𑒞 𑒕𑒪 𑒐𑒼𑒐𑒲𑒿𑒏 𑒄 𑒠𑒫𑒰𑒃 𑒁𑒕𑒱
𑒎 𑒥𑒰𑒥𑒴 𑒥𑒰𑒣 𑒧𑒩𑒱 𑒑𑒹𑒪𑒻𑒏 𑒧𑒼𑒬𑒏𑒱𑒪 𑒩𑒯𑒨 𑒢𑒾𑒿𑒮𑒱 𑒦𑒹𑒙𑒥 𑒧𑒳𑒠𑒰 𑒠𑒹𑒐𑒴 𑒥𑒹𑒙𑒰 𑒮𑒼𑒿𑒙𑒻𑒞 𑒁𑒕𑒱 𑒫𑒱𑒏𑓂𑒮 𑒫𑒹𑒣𑒼𑒩𑒥

𑒢𑒯𑒱 𑒏𑒩𑒻𑒞 𑒕𑒟𑒱 𑒐𑒱𑒡𑒰𑓀𑒬𑒮𑒳𑒢𑒱𑒨𑒢𑓂𑒯𑒳 𑒯𑒳𑒢𑒏𑒩 𑒮𑒰𑒿𑒔


𑒠𑒯𑒹𑒖
𑒙𑓂𑒩𑒹𑒢𑒧𑒹 𑒦𑒹𑒙𑒪𑒢𑓂𑒯𑒱 𑒒𑒙𑒏 𑒨𑒾 𑒤𑒪𑒢𑒰 𑒥𑒰𑒥𑒴 𑒧𑒳𑒿𑒯 𑒠𑒹𑒐𑒰𑒥𑒏 𑒖𑒼𑒑 𑒢𑒯𑒱 𑒕𑒼𑒛𑓃𑒪 𑒂𑒑𑒰𑒿 𑒏𑒲-𑒏𑒲 𑒥𑒰𑒖𑒴
𑒬𑒰𑓀𑒞 𑒥𑒻𑒮𑒴 𑒦𑒹𑒪 𑒏𑒲?
𑒁𑒯𑒰𑒿𑒏 𑒁𑒕𑒻𑒞 𑒯𑒼𑒃𑒞 𑒏𑒲 ? 𑒋𑒯𑒱 𑒑𑒩𑒲𑒥𑒏 𑒣𑒳𑒞𑓂𑒩𑒲𑒏 𑒏𑒢𑓂𑒨𑒰𑒠𑒰𑒢 𑒮𑓀𑒦𑒫 𑒩𑒯𑒋 𑒏𑒲 𑒦𑒰𑒃𑒖𑒲?
𑒎 𑒁𑒯𑒰𑒿 𑒑𑒕𑒱 𑒪𑒹𑒪𑒱𑒨𑒢𑓂𑒯𑒱 𑒦𑒹𑒪 𑒏𑒼𑒖𑒑𑒩𑒰 𑒠𑓂𑒫𑒱𑒩𑒰𑒑𑒧𑒢𑒼 𑒦𑒹𑒙𑒪𑒢𑓂𑒯𑒱 𑒏𑒱𑒕𑒳𑒍𑒙𑒰 𑒢𑒯𑒱 𑒫𑒩𑒰𑒑𑒞𑒏𑒹𑒿 𑒏𑒼𑒢𑒼𑒙𑒰 𑒃𑒖𑓂𑒖𑒞 𑒢𑒯𑒱 𑒩𑒰𑒐𑒪𑒢𑓂𑒯𑒱 𑒍
𑒨𑒾 𑒁𑒯𑒴𑒿 𑒯𑒠𑓂𑒠 𑒏𑒋𑒪𑒯𑒳𑒿 𑒧𑒼𑒢 𑒢𑒯𑒱 𑒏𑒲-𑒏𑒲 𑒑𑒕𑒪𑒱𑒨𑒢𑓂𑒯𑒱
𑒍𑒯𑒱 𑒮𑒳𑒩𑒧𑒹 𑒕𑒪𑒳𑒯𑒳𑒿 𑒥𑒹𑒮𑒳𑒡 𑒯𑒿 𑒧𑒹 𑒯𑒿 𑒙𑒰 𑒧𑒱𑒪𑒹𑒪𑒱𑒨𑒢𑓂𑒯𑒱 𑒏𑒯𑒻𑒞 𑒑𑒹𑒪𑒰𑒯 𑒍 𑒋𑒏 𑒣𑒩 𑒋𑒏 𑒢𑒯𑒱 𑒏𑒯𑒱 𑒏𑓄 𑒥𑒳𑒩𑒥𑒏𑒲 𑒏𑒩𑒱𑒞𑒯𑒳𑒿 ? 𑒪𑒏𑓂𑒭𑓂𑒧𑒲𑒣𑒰𑒞𑓂𑒩 𑒕𑒟𑒱 𑒮𑒹 𑒪𑒏𑓂𑒭𑓂𑒧𑒲 𑒠𑒹𑒪𑒱𑒨𑒢𑓂𑒯𑒱 𑒂𑒥𑒼 𑒞𑒿 𑒖𑒰𑒢 𑒥𑒏𑒮𑒟𑒳
𑒧𑒼𑒙𑒩𑒮𑒰𑒨𑒏𑒱𑒪 𑒪𑒨 𑒏𑒲 𑒏𑒩𑒞𑒟𑒱 𑒠𑒹𑒯𑒼-𑒠𑒬𑒰 𑒞𑒰𑒯𑒱 𑒪𑒹𑒪𑒹 𑒔𑒰𑒯𑒲 𑒔𑒹𑒢𑒏 𑒪𑒹𑒪 𑒥𑒹𑒔𑒻𑒢 𑒏𑒱𑒋 𑒕𑒟𑒱
𑒢𑒱𑒔𑒹𑒢 𑒩𑒯𑒟𑒳 𑒁𑒕𑒱 𑒥𑒰𑒞 𑒄
𑒞𑒰𑒏𑒱 𑒩𑒯𑒪 𑒕𑒲 𑒣𑒳𑒞𑓂𑒩𑒏 𑒯𑒹𑒞𑒳 𑒞𑒏𑒻𑒞 𑒩𑒯𑒲 𑒁𑒯𑒲𑓀𑒏 𑒂𑒮 𑒎 𑒕𑒪𑒯𑒳𑒿 𑒏𑒞𑒨 𑒦𑒰𑒿𑒮𑒪 𑒁𑒯𑒰𑒿 𑒨𑒾 𑒒𑒙𑒏𑒩𑒰𑒖
𑒏𑒼𑒢𑒼 𑒧𑒼𑒙𑒑𑒩 𑒁𑒮𑒰𑒧𑒲 𑒂𑒢𑒱 𑒏𑒩𑒴 𑒅𑒠𑓂𑒡𑒰𑒩 𑒞𑒲𑒢𑒴 𑒥𑒹𑒙𑒲𑒏 𑒏𑒩𑓂𑒖𑒮𑒿 𑒅𑒥𑒰𑒩𑒟𑒱 𑒔𑒰𑒯𑒲 𑒋𑒯𑒢 𑒑𑒳𑒝𑒰𑒢𑒳𑒩𑒰𑒑𑒲

𑒥𑒹𑒔𑒻𑒢 𑒢𑒯𑒱 𑒢𑒱𑒔𑒻𑒢 𑒩𑒯𑒴
𑒠𑒾𑒑𑒱-𑒠𑒾𑒑𑒱 𑒏𑒨 𑒣𑒼𑒮𑓂𑒙-𑒂𑒤𑒱𑒮 𑒦𑒹𑒪𑒯𑒳𑒿 𑒖𑒐𑒢 𑒁𑒣𑒮𑓂𑒨𑒰𑒿𑒞 𑒏𑒱𑒋𑒏 𑒞𑒿
𑒧𑒢𑒲𑒂𑒩𑓂𑒛𑒩𑒏 𑒕𑒪 𑒂𑒮
𑒣𑒳𑒕𑒪 𑒋𑒐𑒢 𑒡𑒩𑒱 𑒁𑒕𑒱 𑒢𑒯𑒱 𑒂𑒨𑒪 𑒧𑒢𑒲𑒂𑒩𑓂𑒛𑒩 𑒨𑒾 𑒣𑓂𑒩𑒦𑒰𑒮
𑒔𑒱𑒙𑓂𑒚𑒲𑒨𑒹𑒏 𑒮𑓀𑒑 𑒣𑒚𑒹𑒢𑒹 𑒕𑒪𑒟𑒱 𑒣𑒰𑒃 𑒔𑒱𑒙𑓂𑒚𑒲 𑒞𑒿 𑒮𑒧𑒨𑒹𑒮𑒿 𑒣𑒯𑒳𑒿𑒔𑒪 𑒙𑒰𑒏𑒰 𑒏𑒱𑒋 𑒢𑒯𑒱 𑒥𑒰𑒅 ?
𑒣𑒼𑒮𑓂𑒙 𑒥𑒰𑒥𑒴 𑒏𑒋 𑒢𑒹𑒢𑒹 𑒩𑒯𑒟𑒱 𑒯𑒳𑒢𑒏𑒩 𑒣𑒰𑒃𑒮𑒿 𑒏𑒼𑒢𑒼 𑒅𑒠𑓂𑒨𑒧

𑒏𑒯𑒪 𑒔𑒱𑒙𑓂𑒚𑒲 𑒁𑒥𑒻𑒞 𑒁𑒕𑒱 𑒥𑒹𑒙𑒰 𑒁𑒕𑒱 𑒕𑒙𑓂𑒚𑒴 𑒁𑒯𑒰𑒿𑒏 𑒣𑒰𑒃 𑒣𑒚𑒥𑒻𑒞 𑒮𑒧𑒨𑒮𑒿 𑒞𑒿 𑒣𑒯𑒳𑒿𑒔𑒻𑒞 𑒧𑒳𑒠𑒰 𑒣𑒚𑒥𑒻𑒞 𑒁𑒕𑒱 𑒕𑒳𑒔𑓂𑒕𑒹 𑒮𑓀𑒠𑒹𑒬

𑒥𑒹𑒔𑒻𑒢 𑒏𑒱𑒋 𑒕𑒲 𑒏𑒲 𑒁𑒣𑓂𑒣𑒢 𑒅𑒠𑓂𑒨𑒧 𑒏𑒩𑒥
𑒯𑒧 𑒁𑒯𑒰𑒿𑒏 𑒙𑒰𑒏𑒰𑒮𑒿 𑒮𑒹 𑒥𑒳𑒗𑒻𑒞 𑒕𑒲 ?

𑒠𑒼𑒮𑒩 𑒑𑒰𑒧𑒏 𑒣𑒼𑒮𑓂𑒙𑒥𑒰𑒥𑒴 𑒤𑒹𑒏𑒻𑒞 𑒁𑒕𑒱 𑒔𑒱𑒙𑓂𑒚𑒲 𑒏𑒧𑒪𑒰𑒏 𑒡𑒰𑒩𑒧𑒹 𑒯𑒧 𑒕𑒲 𑒥𑒿𑒙𑒻𑒞 𑒞𑒹𑒿 𑒏𑒯𑒻𑒞 𑒕𑒲
𑒖𑒹 𑒦𑒹𑒙𑒪 𑒁𑒕𑒱 𑒧𑒰𑒞𑓂𑒩 𑒮𑓀𑒠𑒹𑒬 𑒁𑒯𑒰𑒿𑒏𑒹𑒿

𑒯𑒼𑒃 𑒁𑒕𑒱 𑒖𑒹 𑒯𑒳𑒧 𑒪𑒳𑒏𑓂𑒐𑒲 𑒢𑒯𑒱 𑒕𑒲
𑒠𑒹𑒐𑒱 𑒯𑒳𑒢𑒏𑒰 (𑒑𑒰𑒩𑒱𑒣𑒜𑓃𑒳𑒂𑒏𑒹𑒿) 𑒠𑒹𑒥𑒨 𑒪𑒰𑒑𑒪𑒟𑒱 𑒑𑒰𑒩𑒱 𑒪𑒳𑒏𑓂𑒐𑒲𑒏 𑒢𑒰𑒧 𑒪𑒨 𑒏𑒨 𑒮𑒰𑒞 𑒣𑒳𑒩𑒐𑒰𑒏𑒹𑒿 𑒠𑒹𑒪𑒢𑓂𑒯𑒱 𑒞𑒰𑒩𑒱
𑒍 𑒁𑒢𑒚𑒹𑒢𑒹 𑒚𑒰𑒜𑓃
𑒥𑒴𑒗𑒪 𑒠𑒻𑒞 𑒁𑒕𑒱 𑒄 𑒪𑒳𑒏𑓂𑒐𑒲𑒏𑒹𑒿 𑒑𑒰𑒩𑒱
𑒏𑒯𑒪 𑒁𑒢𑓂𑒞𑒧𑒹 (𑒑𑒰𑒩𑒱 𑒣𑒜𑓃𑒢𑒱𑒯𑒰𑒩) 𑒯𑒾 𑒏𑒲 𑒕𑒯 𑒯𑒼𑒃𑒞 ? 𑒧𑒴𑒿𑒯 𑒞𑒿 𑒠𑒹𑒐𑒴 𑒏𑒹𑒯𑒢 𑒁𑒕𑒱 𑒁𑒣𑓂𑒣𑒢 𑒪𑒳𑒏𑓂𑒐𑒲 𑒢𑒯𑒱 𑒁𑒣𑒢𑒰𑒏𑒹𑒿 𑒕𑒲 𑒥𑒳𑒗𑒻𑒞?

𑒟𑒪-𑒟𑒪
𑒏𑒞𑒥𑒼 𑒠𑒱𑒢 𑒥𑒲𑒞𑒪 𑒑𑒠𑓂𑒠𑒰 𑒖𑒹𑒏𑒰𑒿 𑒟𑒪𑒟𑒪 𑒣𑒙𑓂𑒙𑒲 𑒙𑒼𑒪𑒏 𑒍 𑒩𑒮𑓂𑒞𑒰 𑒦𑒹𑒪 𑒂𑒃 𑒢𑒱𑒣𑒞𑓂𑒞𑒰
𑒧𑒰𑒙𑒱 𑒐𑒮𑒰 𑒏𑒨 𑒪𑒑𑒰 𑒐𑒩𑓀𑒖𑒰 𑒣𑒖𑒹𑒥𑒰𑒏 𑒠𑒨 𑒣𑓀𑒏𑓂𑒞𑒱 𑒢𑒫-𑒥𑒔𑓂𑒔𑒰 𑒮𑒦 𑒏𑒼𑒢𑒰 𑒗𑒴𑒪𑒞 𑒍𑒯𑒱 𑒑𑒠𑓂𑒠𑒰 𑒣𑒩 𑒂𑒃 ?
𑒟𑒪-𑒟𑒪 𑒏𑒩𑒻𑒞 𑒍 𑒩𑒮𑓂𑒞𑒰 𑒪𑒼𑒏𑒏 𑒬𑒼𑒏 𑒏𑒯𑒰𑒿 𑒦𑒹𑒪 𑒥𑓀𑒠 ? 𑒧𑒰𑒿 𑒮𑒲𑒞𑒹 𑒏𑒲 𑒁𑒯𑒰𑒿 𑒥𑒱𑒪𑒹𑒪𑒯𑒳𑒿 𑒍𑒯𑒱 𑒠𑒩𑒰𑒩𑒱𑒧𑒹 𑒏𑒩𑒻𑒞 𑒁𑓀𑒞

𑒏𑓂𑒩𑒱𑒏𑒹𑒙-𑒤𑒲𑒪𑓂𑒛𑒱𑓀𑒑
𑒯𑒧 𑒥𑒰𑒥𑒰 𑒏𑒩𑒴 𑒏𑒲 𑒣𑒯𑒱𑒢𑒹 𑒥𑒰𑒪𑒱𑓀𑒑 𑒂 𑒏𑒱 𑒥𑒻𑒙𑒱𑓀𑒑
𑒥𑒰𑒪𑒱𑓀𑒑 𑒏𑒨 𑒯𑒧 𑒖𑒰𑒨𑒥 𑒟𑒰𑒏𑒱 𑒥𑒻𑒙𑒱𑓀𑒑 𑒏𑒩𑒱 𑒐𑒰𑒨𑒥 𑒏𑒲 𑒧𑒰𑒩𑒱 ?
𑒣𑒯𑒱𑒪𑒹 𑒠𑒱𑒢 𑒞𑒴𑒿 𑒦𑒰𑒿𑒮𑒱 𑒑𑒹𑒪𑒯 𑒮𑒹 𑒮𑒳𑒢𑒯 𑒄 𑒥𑒰𑒞 𑒥𑒾𑒂 𑒥𑒻𑒙𑒱𑓀𑒑 𑒥𑒰𑒪𑒱𑓀𑒑 𑒕𑒼𑒛𑓃𑒱-𑒕𑒰𑒛𑓃𑒱 𑒣𑒯𑒱𑒢𑒹 𑒏𑒩𑒯 𑒑𑓄 𑒤𑒲𑒪𑓂𑒛𑒱𑓀𑒑 𑒯𑒟𑒾𑒂


𑒧𑒻𑒙𑓂𑒩𑒱𑒏 𑒣𑓂𑒪𑒏
𑒯𑒾 𑒮𑒦𑒏𑒹𑒿 𑒮𑒳𑒢𑒪𑒯𑒳𑒿 𑒏𑒹𑒢𑒹
𑒥𑒲.𑒋.
𑒋𑒧.𑒋.
𑒧𑒳𑒠𑒰 𑒥𑒳𑒗𑒪 𑒢𑒯𑒱 𑒕𑒪 𑒛𑒱𑒑𑓂𑒩𑒲 𑒠𑒼𑒮𑒩𑒼 𑒯𑒼𑒃𑒕 𑒂𑒢𑒼-𑒂𑒢𑒼
𑒂𑒃 𑒋𑒏 𑒣𑒏𑒚𑒼𑒮 𑒥𑒙𑒳𑒏 𑒁𑒕𑒱 𑒂𑒨𑒪 𑒠𑒪𑒰𑒢 𑒣𑒩 𑒣𑒴𑒕𑒪 𑒏𑒼𑒢 𑒁𑓀𑒑𑓂𑒩𑒹𑒖𑒱𑒨𑒰 𑒛𑒱𑒑𑓂𑒩𑒲 𑒕𑒲 𑒪𑒹𑒢𑒹 𑒧𑒻𑒙𑓂𑒩𑒱𑒏 𑒣𑓂𑒪𑒏 𑒋𑒯𑒢𑒹 𑒏𑒱𑒕𑒳 𑒥𑒰𑒖𑒪
𑒯𑒾 𑒏𑒰𑒏𑒰 𑒁𑒕𑒱 𑒏𑒲 𑒍 𑒑𑒹𑒪 𑒍𑒏𑒩 𑒑𑒹𑒪𑒰𑒏 𑒥𑒰𑒠 𑒯𑒧 𑒥𑒰𑒖𑒥 𑒏𑒰𑒩𑒝 𑒁𑒕𑒱 𑒦𑒹𑒪 𑒍 𑒤𑒹𑒪

𑒏𑒰𑒿𑒏𑒛𑓃𑒳
𑒏𑒰𑒿𑒏𑒛𑓃𑒳𑒑𑒝𑒏𑒹𑒿 𑒕𑒼𑒛𑓃𑒪 𑒋𑒏𑒙𑒰 𑒛𑓂𑒩𑒧𑒧𑒹 𑒢𑒯𑒱 𑒥𑒢𑓂𑒢 𑒏𑒋𑒪𑒏 𑒆𑒣𑒩𑒮𑒿 𑒜𑒰𑒏𑒢𑒮𑒿 𑒣𑒳𑒕𑒪 𑒯𑒧 𑒕𑒲 𑒢𑒱𑓁𑒬𑓀𑒏 𑒁𑒣𑒢𑒹 ?

𑒨𑒾 𑒯𑒧𑒩 𑒙𑒼𑒪𑒏 𑒄 𑒁𑒕𑒱 𑒏𑒰𑒿𑒏𑒛𑓃𑒳 𑒮𑒦 𑒋𑒏 𑒠𑒼𑒮𑒩𑒰𑒏 𑒙𑒰𑒿𑒑 𑒐𑒲𑓀𑒔𑒞 𑒥𑒏𑓂𑒬𑒰 𑒥𑒢𑓂𑒠 𑒏𑒩𑒥𑒰𑒏 𑒏𑒩𑒴 𑒢𑒯𑒱 𑒔𑒱𑒢𑓂𑒞𑒰 𑒐𑒳𑒖𑒪𑒼 𑒮𑒦𑒙𑒰 𑒮𑒦 𑒚𑒰𑒧𑒹 𑒩𑒯𑒞 !


𑒏𑒻𑒣𑓂𑒙𑒢
𑒫𑒰𑒪𑒲𑒫𑒰𑒪𑒧𑒹 𑒐𑒹𑒪𑒰𑒃𑒞 𑒏𑒰𑒪 𑒣𑒣𑓂𑒣𑒴 𑒦𑒰𑒃𑒏 𑒯𑒼𑒃𑒕 𑒯𑒳𑒩𑒠𑓀𑒑 𑒐𑒹𑒪𑒰𑒨𑒥 𑒯𑒧 𑒤𑒰𑒩𑒫𑒰𑒩𑓂𑒛𑒮𑒿 𑒢𑒯𑒱 𑒢𑒲𑒏 𑒐𑒹𑒪𑒰𑒃𑒞 𑒕𑒲
𑒞𑒿 𑒂𑒑𑒴 𑒐𑒹𑒪𑒢𑒰𑒃 𑒠𑒹𑒐𑒰𑒋𑒥 𑒯𑒧 !

𑒮𑒦 𑒮𑒼𑒔𑒱 𑒫𑒱𑒔𑒰𑒩 𑒏𑒨 𑒥𑒢𑒰𑒍𑒪 𑒏𑒻𑒣𑓂𑒙𑒢 𑒣𑒣𑓂𑒣𑒴 𑒦𑒰𑒨𑒏𑒹𑒿 𑒙𑒲𑒧𑒏 𑒯𑒰𑒩𑒱 𑒠𑒹𑒐𑒱 𑒏𑒨
𑒐𑒹𑒪𑒰𑒃𑒟 𑒣𑒕𑒰𑒞𑒱 𑒣𑒰𑒕𑒳𑒋𑒮𑒿
𑒤𑒰𑒩𑒫𑒰𑒩𑓂𑒛 𑒥𑒢𑒴 𑒁𑒯𑒲𑓀 𑒮𑒦
𑒢𑒯𑒱 𑒞𑒿 𑒧𑒻𑒔 𑒯𑒰𑒩𑒋 𑒖𑒰𑒋𑒥 𑒂𑒑𑒳𑒋𑒮𑒿


𑒠𑒴𑒡
𑒧𑒯𑒲𑒮 𑒪𑒰𑒑𑒪 𑒕𑒪 𑒪𑒰𑒑𑒨 𑒥𑒯𑒱𑒢 𑒠𑒰𑒃𑒏 𑒚𑒰𑒧
𑒣𑒯𑒳𑒿𑒔𑒪𑒯𑒳𑒿 𑒂𑒮 𑒪𑒹𑒢𑒹 𑒚𑒰𑒿𑒆 𑒦𑒹𑒪 𑒥𑒻𑒮𑒪𑒯𑒳𑒿
𑒠𑒴𑒡 𑒕𑒪 𑒖𑒰𑒃𑒞 𑒎𑒿𑒙𑒪 𑒧𑒳𑒠𑒰 𑒥𑒯𑒱𑒢 𑒠𑒰𑒃 𑒏𑒹𑒿 𑒑𑒣𑓂𑒣𑒧𑒹
𑒯𑒼𑒮𑒹 𑒢𑒯𑒱 𑒩𑒯𑒪
𑒦𑒼𑒖𑒢 𑒮𑒧𑒰𑒣𑓂𑒞𑒹 𑒣𑓂𑒩𑒰𑒨 𑒕𑒪 𑒠𑒴𑒡 𑒩𑒰𑒐𑒪 𑒎𑒿𑒙𑒰𑒃𑒞𑒹 𑒩𑒯𑒪
𑒏𑒯𑒪 𑒯𑒧 𑒯𑒹 𑒥𑒯𑒱𑒢 𑒠𑒰𑒃 𑒁𑒥𑒻𑒞 𑒩𑒯𑒲 𑒩𑒮𑓂𑒞𑒰𑒧𑒹 𑒠𑒹𑒐𑒪 𑒮𑒰𑒿𑒣 𑒋𑒏 𑒥𑒛𑓃-𑒣𑒻𑒒 𑒋𑒞𑒨𑒮𑒿 𑒍𑒯𑒱 𑒪𑒼𑒯𑒱𑒨𑒰 𑒡𑒩𑒱 𑒢𑒧𑒑𑒩 𑒠𑒴𑒡 𑒖𑒞𑒨 𑒁𑒕𑒱 𑒎𑒿𑒙𑒰𑒃𑒞
𑒍𑒯 𑒦𑒻𑒨𑒰 𑒥𑒱𑒮𑒩𑒪𑒯𑒳𑒿 𑒯𑒧 𑒠𑒴𑒡 𑒩𑒯𑒪 𑒎𑒿𑒙𑒰𑒃𑒞 𑒧𑒼𑒢𑒧𑒹 𑒥𑒰𑒞 𑒞𑒞𑒹𑒏 𑒕𑒪 𑒒𑒳𑒧𑒩𑒪 𑒯𑒼𑒬 𑒏𑒯𑒰𑒿 𑒕𑒪 𑒂𑒃

𑒁𑒙𑒹𑓀𑒛𑒹𑓀𑒮
𑒪𑒹𑒙 𑒏𑒱𑒋 𑒁𑒋𑒪𑒯𑒳𑒿 𑒁𑒯𑒰𑒿 𑒁𑒙𑒹𑓀𑒛𑒹𑓀𑒮 𑒪𑒑𑒰𑒆
𑒪𑒰𑒪 𑒥𑒯𑒰𑒠𑒳𑒩 𑒁𑒨𑒪𑒰𑒯 𑒖𑒐𑒢 𑒠𑒹𑒐𑒪 𑒕𑒪 𑒏𑓂𑒩𑒰𑒮 𑒪𑒑𑒰𑒋𑒪 𑒢𑒯𑒱 𑒠𑒹𑒪 𑒡𑓂𑒨𑒰𑒢 𑒮𑒰𑒃𑒢 𑒏𑒋𑒪
𑒣𑒴𑒕𑒪 𑒧𑒰𑒮𑓂𑒙𑒩 “𑒪𑒹𑒙 𑒕𑒲 𑒂𑒨𑒪? 𑒆𑒣𑒩𑒮𑒿 𑒏𑒋 𑒯𑒮𑓂𑒞𑒰𑒏𑓂𑒭𑒩 𑒏𑓂𑒩𑒰𑒮 𑒢𑒳𑒏𑒨𑒥𑒰 𑒪𑒹𑒪
𑒧𑒳𑒠𑒰 𑒢𑒯𑒱 𑒁𑒕𑒱 𑒄 𑒧𑒹𑒙𑒰𑒨𑒪” !
𑒪𑒰𑒪 𑒥𑒯𑒰𑒠𑒳𑒩 𑒏𑒯𑒪 𑒮𑒳𑒢𑒴 𑒄 𑒏𑒹 𑒏𑒩𑒞 𑒢𑒱𑒩𑓂𑒝𑒨 𑒞𑒐𑒢 𑒯𑒧 𑒏𑒋𑒪 𑒯𑒮𑓂𑒞𑒰𑒏𑓂𑒭𑒩 𑒣𑒯𑒱𑒢𑒹 𑒏𑓂𑒩𑒰𑒮 𑒪𑒑𑒰𑒍𑒪 𑒁𑒯𑒰𑒿 𑒏𑒐𑒢?

𑒬𑒼-𑒤𑒙𑒏𑓂𑒏𑒰
𑒏𑒲 𑒨𑒾 𑒥𑒰𑒥𑒴 𑒬𑒼-𑒤𑒙𑒏𑓂𑒏𑒰 𑒥𑒛𑓂𑒛 𑒠𑒹𑒢𑒹 𑒕𑒲 𑒂𑒃 𑒣𑒯𑒱𑒢𑒹 𑒏𑒼𑒢𑒼 𑒠𑒱𑒢 𑒂𑒥𑒱 𑒥𑒳𑒗𑒰𑒨𑒥 𑒢𑒯𑒱 𑒖𑒰𑒨𑒥 𑒣𑒛𑓃𑒞𑒰𑒨
𑒠𑒯𑒼-𑒠𑒱𑒬𑒰 𑒠𑒮 𑒠𑒱𑒢 𑒠𑒹𑒞 𑒏𑒰𑒖 𑒠𑒹𑒞 𑒔𑒰𑒪𑒱 𑒮𑓀𑒑 𑒔𑒰𑒪𑒱𑒮 𑒮𑒰𑒪 𑒥𑒛𑓃𑒰 𑒠𑒹𑒢𑒹 𑒕𑒲 𑒬𑒼-𑒤𑒞𑒏𑓂𑒏𑒰 𑒏𑒩𑒴 𑒣𑒯𑒱𑒢𑒹 𑒏𑒱𑒕𑒳 𑒏𑒰𑒖

𑒦𑒰𑒩𑒧𑒹 𑒧𑒰𑒙𑒱
𑒏𑒰𑒥𑒱𑒪 𑒚𑒰𑒏𑒳𑒩 𑒏𑒯𑒪 𑒖𑒼𑒢𑒏𑒹𑒿 𑒦𑒰𑒩𑒧𑒹 𑒧𑒰𑒙𑒱 𑒅𑒒𑒱 𑒂𑒢𑒴 𑒠𑒳𑒯𑒳 𑒠𑒱𑒬𑒱 𑒦𑒰𑒩 𑒩𑒯𑒞 𑒞𑒿 𑒥𑒼𑒗 𑒠𑒳𑒢𑒴 𑒠𑒱𑒬𑒱 𑒖𑒰𑒨𑒞 𑒏𑒧 𑒟𑒰𑒏𑒥 𑒁𑒯𑒰𑒿 𑒂 𑒧𑒰𑒙𑒱 𑒮𑒹𑒯𑒼 𑒥𑒹𑒬𑒲 𑒂𑒍𑒞
𑒠𑒱𑒨𑒰𑒠 𑒏𑒪𑒰𑒧𑒲 𑒚𑒰𑒏𑒳𑒩 𑒠𑒹𑒐𑒱 𑒄
𑒮𑒼𑒔𑒪 𑒍𑒏𑒩 𑒢𑒼𑒏𑒮𑒰𑒢𑒏 𑒦𑒰𑒿𑒖 𑒦𑒩𑒱𑒨𑒰 𑒞𑒼𑒩𑒰 𑒖𑒰𑒢 𑒧𑒰𑒩𑒞𑒯 𑒋𑒏𑒹 𑒥𑒼𑒢𑒱𑒧𑒹 𑒠𑒼𑒥𑒩 𑒏𑒰𑒖 !

𑒣𑒙𑒏𑒱 𑒦𑒰𑒩 𑒦𑒩𑒱𑒨𑒰 𑒣𑒛𑓃𑒰𑒨𑒪 𑒏𑒰𑒥𑒱𑒪 𑒚𑒰𑒏𑒳𑒩 𑒩𑒯𑒪 𑒧𑒮𑒼𑒿𑒮𑒱 𑒪𑓀𑒒𑒲 𑒧𑒰𑒩𑒱 𑒣𑒋𑒩 𑒐𑒹𑓀𑒔𑒱 𑒏𑒨 𑒁𑒣𑓂𑒣𑒢 𑒏𑒼𑒢 𑒦𑒪 𑒦𑒹𑒪 𑒯𑒹 𑒦𑒰𑒃 ?

𑒏𑓀𑒖𑒴𑒮
𑒞𑒲𑒧𑒢 𑒧𑒰𑒿𑒑𑒪 𑒦𑒢𑒮𑒱𑒨𑒰𑒮𑒿 𑒮𑒴𑒿𑒒𑒰 𑒩𑒯𑒪 𑒕𑒪 𑒑𑒧𑒏 𑒏𑒯𑒱𑒨𑒼 𑒞𑒿 𑒁𑒨𑒥𑒯 𑒯𑒧𑒩𑒰 𑒪𑒑 𑒠𑒹𑒥𑒯 𑒞𑒐𑒢 𑒅𑒞𑓂𑒞𑒩
𑒬𑒯𑒩 𑒦𑒑𑒹𑒪𑒑 𑒣𑒰𑒃 𑒏𑒧𑒹𑒪𑒯𑒳𑒿 𑒧𑒰𑒿𑒑𑒪 𑒣𑒰𑒃 𑒏𑒱𑒕𑒳 𑒠𑒻𑒯 𑒥𑒠𑒪𑒰 𑒣𑒰𑒃𑒏 𑒗𑒢𑒏 𑒮𑒳𑒢𑒋𑒥𑒯 𑒑𑒧𑒏𑒮𑒿 𑒢𑒯𑒱 𑒕𑒪 𑒧𑒼𑒢 𑒦𑒩𑒻𑒞


𑒣𑒰𑒃
𑒠𑒹𑒐𑒴 𑒣𑒰𑒃 𑒢𑒯𑒱 𑒪𑒱𑒁 𑒁𑒯𑒰𑒿 𑒥𑒹𑒙𑒰 𑒫𑒱𑒫𑒰𑒯𑒧𑒹
𑒏𑒰𑒩𑒝 𑒖𑒹 𑒣𑒳𑒞𑒼𑒯𑒳 𑒏𑒩𑒞 𑒅𑒕𑒢𑓂𑒢𑒛𑓃 𑒣𑒰𑒃 𑒥𑒰𑒪𑒲 𑒂𑒨𑒞 𑒖𑓂𑒨𑒼𑒿
𑒣𑒴𑒕𑒪
𑒁𑒯𑒰𑒿 𑒮𑒦 𑒖𑒹 𑒕𑒪𑒱𑒨𑒻𑒏 𑒪𑒹𑒢𑒹 𑒥𑒹𑒙𑒰 𑒫𑒱𑒫𑒰𑒯𑒧𑒹 𑒣𑒰𑒃 𑒏𑒯𑒪𑒢𑓂𑒯𑒱 𑒁𑒯𑒴𑒧𑒹 𑒑𑒣𑓂𑒣 𑒁𑒕𑒱 𑒠𑒴𑒙𑒰
𑒣𑒯𑒱𑒪 𑒖𑒹 𑒣𑒰𑒃 𑒠𑒥𑒥𑒻𑒞 𑒁𑒕𑒱 𑒪𑒼𑒏𑒏𑒹𑒿 𑒧𑒳𑒠𑒰 𑒠𑒼𑒮𑒩
𑒖𑒹 𑒠𑒥𑒰 𑒠𑒻𑒞 𑒕𑒱𑒨𑒻𑒏 𑒯𑒧𑒩𑒰 𑒮𑒦 𑒣𑒰𑒃𑒏𑒹𑒿
𑒖𑒹 𑒏𑒯𑒪𑒯𑒳𑒿 𑒑𑒳𑒢𑒴 𑒞𑒏𑒩𑒹 𑒯𑒧𑒩𑒰 𑒮𑒦𑒣𑒩 𑒢𑒯𑒱 𑒂𑒅 𑒠𑒰𑒃 𑒑𑒹 !


𑒁𑒮𑒞𑓂𑒨
𑒯𑒧 𑒏𑒏𑓂𑒏𑒩 𑒏𑒰𑒖 𑒢𑒯𑒱 𑒏𑒋𑒪𑒯𑒳𑒿 𑒥𑒹𑒩 𑒣𑒩 𑒧𑒳𑒠𑒰 𑒏𑒰𑒖 𑒏𑓂𑒨𑒼 𑒂𑒨𑒪? 𑒁𑒮𑒞𑓂𑒨 𑒢𑒯𑒱 𑒏𑒯𑒱𑒨𑒼 𑒕𑒲 𑒥𑒰𑒖𑒪 𑒮𑒞𑓂𑒨𑒏 𑒂𑒮 𑒢𑒯𑒱 𑒕𑒼𑒛𑓃𑒪𑒯𑒳𑒿 𑒂 𑒁𑒮𑒞𑓂𑒨𑒏 𑒥𑒰𑒙 𑒮𑒹𑒯𑒼 𑒢𑒯𑒱 𑒞𑒰𑒏𑒪
𑒨𑒾 𑒁𑒯𑒰𑒿 𑒋𑒯𑒢𑒼 𑒏𑓂𑒨𑒼 𑒥𑒖𑒻𑒞 𑒁𑒕𑒱 𑒁𑒮𑒞𑓂𑒨 𑒢𑒯𑒱 𑒕𑒲 𑒏𑒯𑒱𑒨𑒼 𑒥𑒰𑒖𑒪 𑒋𑒯𑒱𑒮𑒿 𑒣𑒻𑒒 𑒏𑒼𑒢𑒼 𑒁𑒮𑒞𑓂𑒨 𑒁𑒕𑒱 ?

𑒏𑓂𑒨𑒼 𑒠𑒳𑓁𑒐𑒲 𑒏𑒯𑒪𑒏 𑒞𑒿 𑒏𑒰𑒖 𑒏𑒹𑒪𑒯𑒳𑒿 𑒁𑒣𑒢𑒹 𑒖𑒰 𑒏𑒨 𑒞𑒿 𑒢𑒯𑒱 𑒣𑒳𑒕𑒪𑒯𑒳𑒿 𑒍𑒏𑓂𑒏𑒩 𑒏𑒰𑒖 𑒁𑒣𑒢𑒹 𑒦𑒨 𑒖𑒰𑒃𑒞 𑒕𑒻 𑒞𑒿 𑒅𑒣𑒏𑒩𑒱 𑒏𑒨 𑒣𑒳𑒕𑒻𑒞 𑒕𑒲
𑒂 𑒖𑓂𑒨𑒼𑒿 𑒏𑒰𑒖𑒧𑒹 𑒦𑒰𑒿𑒑𑒚 𑒯𑒼𑒃𑒞 𑒕𑒻 𑒞𑒿 𑒢𑒱𑒣𑒞𑓂𑒞𑒰 𑒦𑒨 𑒖𑒰𑒃𑒞 𑒕𑒲 𑒥𑒹𑒩 𑒣𑒩 𑒋𑒯𑒢𑒹 𑒏𑒰𑒖 𑒁𑒯𑒰𑒿 𑒁𑒥𑒻𑒞 𑒕𑒲 !

𑒯𑒧 𑒂𑒪𑒰𑓀𑒏𑒰𑒩𑒱𑒏 𑒣𑓂𑒩𑒨𑒼𑒑 𑒏𑒹𑒪𑒯𑒳𑒿 𑒞𑒹𑒿 𑒙𑒰𑒿𑒑 𑒣𑒏𑒛𑓃𑒻𑒞 𑒖𑒰𑒃𑒞 𑒕𑒲 ?


𑒮𑒧𑒳𑒠𑓂𑒩𑒲
𑒮𑓀𑒮𑓂𑒏𑒵𑒞𑒏 𑒣𑒰𑒚 𑒢𑒯𑒱 𑒣𑒜𑓃𑒪 𑒏𑒼𑒢 𑒣𑒰𑒚 𑒁𑒯𑒰𑒿 𑒣𑒜𑓃𑒢𑒹 𑒕𑒲 𑒣𑓀𑒛𑒱𑒞 𑒏𑒯𑒱 𑒥𑒖𑒥𑒻𑒞 𑒁𑒕𑒱 𑒮𑒦 𑒏𑓂𑒨𑒼 𑒞𑓂𑒩𑒱𑒣𑒳𑒝𑓂𑒛 𑒡𑒰𑒩𑒝 𑒏𑒋𑒢𑒹 𑒕𑒲 !
𑒩𑒯𑒟𑒱 𑒯𑒧𑒩 𑒣𑒳𑒩𑒐𑒰 𑒣𑓀𑒛𑒱𑒞 𑒕𑒼𑒛𑓃𑒴 𑒯𑒧𑒩𑒰 𑒯𑒧𑒩 𑒃𑒞𑒱𑒯𑒰𑒮 𑒠𑒹𑒐𑒴 𑒧𑒱𑒟𑒱𑒪𑒰𑒏 𑒑𑒾𑒩𑒫 𑒨𑒰𑒖𑓂𑒘𑒫𑒪𑒏𑓂𑒨 𑒏𑒣𑒱𑒪 𑒏𑒝𑒰𑒠𑒏 𑒠𑒹𑒬 𑒕𑒲 𑒄 𑒖𑒻𑒧𑒱𑒢𑒲𑒏 𑒑𑒾𑒞𑒧𑒏 𑒁𑒕𑒻𑒞𑒯𑒳𑒿
𑒣𑒳𑒕𑒻 𑒕𑒲 𑒣𑒝𑓂𑒛𑒱𑒞 𑒏𑒹𑒯𑒢 𑒕𑒲
𑒮𑒰𑒧𑒳𑒠𑓂𑒩𑒱𑒏 𑒫𑒱𑒠𑓂𑒨𑒰 𑒖𑓂𑒨𑒼𑒞𑒱𑒭𑒱𑒏 𑒖𑒢𑒨 𑒕𑒲
𑒢𑒯𑒱 𑒮𑒳𑒢𑒪 𑒤𑒹𑒩 𑒥𑒯𑒮 𑒏𑒱𑒋 𑒏𑒹𑒢𑒹 𑒕𑒲 ? 𑒤𑒹𑒩 𑒕𑒲 𑒯𑒿𑒮𑒲 𑒏𑒩𑒻𑒞 𑒁𑒯𑒰𑒿 𑒦𑒢𑒹 𑒦𑒫𑒱𑒭𑓂𑒨𑒏 𑒕𑒲 𑒯𑒧 𑒯𑒰𑒪 𑒏𑒱𑒋 𑒪𑒹𑒢𑒹 !


𑒑𑒰𑒧
𑒞𑒲𑒮 𑒫𑒩𑓂𑒭 𑒢𑒾𑒏𑒩𑒲 𑒏𑒃𑒨𑒼 𑒏𑒨 𑒢𑒯𑒱 𑒥𑒢𑒪 𑒋𑒏𑒼𑒙𑒰 𑒧𑒱𑒞𑓂𑒩
𑒂𑒮-𑒣𑒛𑓃𑒼𑒮𑒲 𑒔𑒱𑒢𑓂𑒯𑒻𑒞𑒼 𑒢𑒯𑒱 𑒁𑒕𑒱 𑒂𑒤𑒱𑒮𑒏 𑒣𑒴𑒕𑒴 𑒢𑒯𑒱 𑒑𑒞𑒱
𑒑𑒰𑒧 𑒕𑒼𑒛𑓃𑒱 𑒬𑒯𑒩 𑒕𑒲 𑒂𑒨𑒪 𑒧𑒳𑒠𑒰 𑒁𑒕𑒱 𑒧𑒼𑒢 𑒮𑒰𑒞 𑒖𑒢𑒧 𑒒𑒴𑒩𑒱 𑒢𑒯𑒱 𑒖𑒰𑒨𑒥 𑒑𑒰𑒧 𑒕𑒼𑒛𑓃𑒱 𑒢𑒑𑒩𑒏 𑒏𑒼𑒢𑒼 𑒏𑒼𑒢


𑒪𑒼𑒪𑒲
𑒋𑒯𑒱 𑒬𑒥𑓂𑒠 𑒣𑒩 𑒦𑒹𑒪 𑒡𑒧𑒑𑒱𑒖𑓂𑒖𑒩 𑒪𑒼𑒪 𑒯𑒧𑓂𑒧𑒩 𑒁𑒕𑒱 𑒢𑒯𑒱 𑒥𑒜𑓃𑒪 𑒋𑒞𑒹𑒏 𑒮𑒳𑒢𑓂𑒠𑒩 𑒚𑒼𑒜𑓃𑒏𑒹𑒿 𑒕𑒲 𑒁𑒯𑒰𑒿
𑒪𑒼𑒪𑒲 𑒏𑒯𑒱 𑒩𑒯𑒪 ?
𑒯𑒿𑒮𑒪 𑒯𑒧 𑒢𑒯𑒱 𑒮𑓂𑒧𑒵𑒞𑒱𑒏𑒹𑒿 𑒕𑒼𑒛𑓃𑒱 𑒕𑒲 𑒮𑒏𑒪𑒯𑒳𑒿 𑒁𑒯𑒰𑒿 𑒤𑒻𑒬𑒢-𑒪𑒱𑒣𑒱𑒮𑓂𑒙𑒱𑒏 𑒨𑒳𑒑𑒼𑒧𑒹 𑒪𑒼𑒪𑒲𑒏𑒹𑒿 𑒐𑒩𑒰𑒥 𑒥𑒳𑒗𑒪𑒯𑒳𑒿 𑒁𑒯𑒰𑒿 !


𑒞𑒏𑒪𑒰𑒯𑒰 𑒠𑒱𑒢
𑒫𑒱𑒫𑒰𑒯 𑒠𑒱𑒢 𑒞𑒏𑒹𑒥𑒰𑒏 𑒥𑒰𑒞 𑒨𑒳𑒫𑒏 𑒥𑒰𑒖𑒪 𑒣𑓀𑒛𑒱𑒞𑒖𑒲 𑒁𑒯𑒴𑒿 𑒢𑒯𑒱 𑒥𑒳𑒗𑒪𑒯𑒳𑒿 𑒁𑒧𑒹𑒩𑒱𑒏𑒰𑒏 𑒣𑓂𑒩𑒑𑒞𑒱 𑒍𑒞𑒨 𑒏𑒹 𑒠𑒱𑒢 𑒞𑒏𑒥𑒻𑒞 𑒁𑒕𑒱 𑒏𑒯𑒴 ?
𑒁𑒯𑒰𑒿 𑒁𑒡𑒐𑒱𑒖𑓂𑒖𑒴 𑒫𑒱𑒠𑓂𑒫𑒰𑒢 𑒮𑒳𑒢𑒴
𑒯𑒧𑒩 𑒞𑒏𑒪𑒰𑒯𑒰 𑒠𑒱𑒢𑒧𑒹 𑒫𑒱𑒫𑒰𑒯 𑒏𑒨 𑒗𑒑𑒛𑓃𑒰-𑒗𑒰𑒿𑒙𑒱 𑒏𑒩𑒱𑒞𑒯𑒳 𑒥𑒳𑒗𑒳 𑒖𑒱𑒢𑒑𑒲 𑒦𑒩𑒱 𑒣𑒛𑓃𑒻 𑒁𑒕𑒱 𑒢𑒱𑒧𑒰𑒯𑒨
𑒍𑒞𑒨 𑒥𑒱𑒢𑒳 𑒠𑒱𑒢𑒳𑒏 𑒫𑒱𑒫𑒰𑒯 𑒥𑒰𑒞 𑒦𑒼𑒩𑒮𑒿 𑒮𑒰𑒿𑒗𑒹𑒧𑒹 𑒦𑒨 𑒖𑒰𑒃𑒕 𑒮𑒧𑒰𑒣𑓂𑒞

𑒥𑒱𑒏𑒾𑒂
𑒥𑒛𑓃 𑒣𑒻𑒒 𑒦𑒼𑒖 𑒅𑒣𑒢𑒨𑒢𑒏
𑒣𑒕𑒥𑒰𑒩𑒱 𑒣𑒰𑒩𑒏 𑒕𑒟𑒱 𑒢𑒫-𑒡𑒢𑒱𑒏
𑒥𑒲.𑒏𑒹.𑒢𑒰𑒧 𑒢𑒯𑒱 𑒮𑒳𑒢𑒪 𑒍𑒞𑒨 𑒚𑒰𑒜𑓃 𑒍 𑒡𑒢𑒱𑒏
𑒂𑒩𑒾 𑒥𑒱𑒏𑒾𑒂 𑒕𑒿 𑒞𑒴𑒯𑒲𑒿
𑒠𑒴𑒙𑒰 𑒣𑒰𑒃 𑒦𑒹𑒪 𑒍 𑒦𑒰𑒃 𑒏𑒪𑒏𑒞𑓂𑒞𑒰 𑒢𑒑𑒩𑒲𑒏 𑒣𑓂𑒩𑒞𑒰𑒣𑒹 𑒢𑒯𑒱 𑒞𑒿 𑒧𑒩𑒱𑒞𑒯𑒳𑒿 𑒥𑒱𑒏𑒾𑒋 𑒥𑒢𑒱 𑒥𑒲.𑒏𑒹. 𑒢𑒰𑒧 𑒦𑒹𑒪 𑒂𑒥 𑒖𑒰𑒋


𑒑𑒠𑓂𑒠𑒩𑒱𑒏 𑒦𑒰𑒞
𑒑𑒞𑓂𑒩- 𑒑𑒞𑓂𑒩 𑒁𑒕𑒱 𑒣𑒰𑒿𑒖𑒩 𑒮𑒢
𑒯𑒛𑓂𑒛𑒲 𑒢𑒱𑒏𑒪𑒪 𑒥𑒰𑒯𑒩 𑒦𑒹𑒪 𑒦𑒰𑒞 𑒡𑒰𑒢𑒏 𑒢𑒯𑒱 𑒦𑒹𑒙𑒨 𑒞𑒿 𑒑𑒠𑓂𑒠𑒩𑒱𑒨𑒼𑒏 𑒏𑒱𑒋 𑒢𑒯𑒱 𑒠𑒹𑒪
𑒎 𑒥𑒰𑒥𑒴 𑒑𑒯𑒴𑒧𑒏 𑒢𑒯𑒱 𑒣𑒴𑒕𑒴 𑒁𑒕𑒱 𑒍𑒏𑒩 𑒠𑒰𑒧 𑒥𑒹𑒬𑒲 𑒦𑒹𑒪 𑒑𑒹𑒪 𑒍 𑒖𑒧𑒰𑒢𑒰 𑒥𑒛𑓃𑒏𑒰 𑒥𑒰𑒞-𑒑𑒣𑓂𑒣𑒏 𑒢𑒯𑒱 𑒐𑒹𑒪𑒞 𑒐𑒹𑒪

𑒋𑒏𑒙𑒰 𑒂𑒩 𑒏𑒼𑒣𑒩
𑒑𑒣𑓂𑒣 𑒣𑒩 𑒑𑒣𑓂𑒣 𑒣𑓂𑒩𑒏𑒰𑒝𑓂𑒛𑒞𑒰𑒏 𑒫𑒱𑒠𑓂𑒫𑒞𑒰𑒏
𑒯𑒧𑓂𑒧𑒩 𑒣𑒳𑒩𑒐𑒰 𑒄 𑒯𑒰𑒟𑒲𑒏 𑒔𑒩𑓂𑒔𑒰 𑒮𑒱𑒏𑓂𑒏𑒛𑓃𑒱-𑒖𑓀𑒖𑒲𑒩 𑒙𑒰 𑒖𑒏𑒩 𑒥𑒰𑒿𑒔𑒪
𑒂𑒿𑒑𑒢𑒧𑒹 𑒪𑒰𑒪𑒙𑒹𑒢 𑒢𑒯𑒱 𑒫𑒩𑒢𑓂 𑒛𑒱𑒥𑒱𑒨𑒰 𑒙𑒱𑒧𑒙𑒱𑒧𑒰𑒃𑒞
𑒪𑒰𑒪𑒙𑒹𑒢 𑒑𑒰𑒧𑒧𑒹 𑒮𑒧𑒵𑒠𑓂𑒡𑒱𑒏 𑒣𑓂𑒩𑒞𑒲𑒏 !
𑒤𑒹𑒩 𑒠𑒪𑒰𑒢 𑒣𑒩 𑒑𑒣𑓂𑒣𑒏 𑒕𑒼𑒛𑓃 𑒋𑒏𑒙𑒰 𑒏𑒼𑒣𑒩 𑒠𑒱𑒨𑒾𑒏 𑒂𑒅𑒩

𑒧𑒯𑒲𑒮 𑒣𑒩 𑒫𑒲.𑒂𑒃.𑒣𑒲.
𑒕𑒪𑒯𑒳𑒿 𑒯𑒧 𑒮𑒦 𑒖𑒰𑒃𑒞 𑒂𑒩 𑒧𑒰𑒩𑒱 𑒪𑒼𑒏𑒮𑒦 𑒣𑒋𑒩𑒹-𑒣𑒋𑒩𑒹 𑒠𑒳𑒩𑓂𑒑𑒰𑒮𑓂𑒟𑒰𑒢𑒧𑒹 𑒕𑒪 𑒏𑒼𑒢𑒼 𑒧𑒹𑒪𑒰 𑒠𑒹𑒐𑒱 𑒯𑒧𑒩𑒰 𑒮𑒦𑒏𑒹𑒿 𑒥𑒰𑒙 𑒠𑒹𑒪
𑒧𑒰𑒩𑒱 𑒪𑒼𑒏 𑒕𑒪 𑒍𑒞𑒨 𑒕𑒪𑒯𑒳𑒿 𑒧𑒯𑒲𑒮 𑒣𑒩 𑒯𑒧 𑒔𑒰𑒩𑒱𑒙𑒰 𑒫𑒲.𑒂𑒃.𑒣𑒲.𑒨𑒹 ! 𑒍𑒏𑒩 𑒮𑒦𑒏 𑒥𑒰𑒞 𑒕𑒪 𑒪𑒾𑒏𑒱𑒏 𑒖𑓂𑒨𑒼𑒿 𑒯𑒧𑒩𑒰 𑒪𑒼𑒏𑒢𑒱𑒏 𑒂𑒡𑓂𑒨𑒰𑒞𑓂𑒧𑒱𑒏 𑒞𑒹𑒿 𑒧𑒴𑒪-𑒑𑒼𑒞𑓂𑒩𑒏 𑒣𑓂𑒩𑒦𑒰𑒫𑒹 !!


𑒑𑒣𑓂𑒣-𑒮𑒩𑒏𑓂𑒏𑒰
𑒢𑒯𑒱 𑒑𑒹𑒪𑒟𑒱 𑒒𑒴𑒧𑒨 𑒥𑒴𑒩𑒱 𑒥𑒳𑒗𑒻𑒞 𑒁𑒕𑒱 𑒥𑒛𑓂𑒛 𑒕𑒢𑓂𑒯𑒱 𑒏𑒰𑒖 𑒂𑒃-𑒏𑒰𑒪𑓂𑒯𑒱 𑒞𑒿 𑒯𑒱𑒢𑒏𑒩 𑒔𑒪𑒞𑒲 𑒁𑒕𑒱 𑒯𑒧𑒩𑒰 𑒮𑒦𑒞𑒿 𑒏𑒩𑒻𑒞 𑒕𑒲 𑒥𑒹𑒏𑒰𑒖𑒏 𑒏𑒰𑒖 !

𑒤𑒪𑒢𑒰𑒏 𑒥𑒹𑒙𑒰
𑒦𑒼𑒖 𑒠𑒹𑒪𑒢𑓂𑒯𑒱 𑒩𑒹𑓀𑒖𑒩𑒏 𑒥𑒰𑒣 𑒂𑒯 𑒏𑒧𑒹𑒢𑒹 𑒁𑒕𑒱 𑒞𑒿
𑒤𑒪𑒢𑒰𑒏 𑒥𑒹𑒙𑒰 !
𑒦𑒼𑒖 𑒮𑒧𑒰𑒣𑓂𑒞𑒱 𑒣𑒩 𑒣𑒰𑒢 𑒮𑒳𑒣𑒰𑒩𑒲 𑒪𑒨 𑒠𑒹𑒐𑒪
𑒩𑒹𑓀𑒖𑒩𑒏𑒹𑒿 𑒪𑒼𑒏
𑒁𑒍 𑒏𑒯𑒴 𑒏𑒼𑒢 𑒥𑒼𑒢𑒏𑒹𑒿 𑒮𑒰𑒤 𑒏𑒋𑒪 𑒋𑒯𑒱 𑒦𑒼𑒖𑒏 𑒪𑒹𑒪 !

𑒙𑓂𑒩𑒰𑓀𑒮𑒤𑒩
𑒢𑒰𑒩𑓂𑒧𑓂𑒮𑒏 𑒯𑒱𑒮𑒰𑒥𑒹 𑒙𑓂𑒩𑒰𑓀𑒮𑒤𑒩 𑒏𑒋𑒪 𑒯𑒧 𑒁𑒯𑒰𑒿𑒏 𑒏𑒯𑒪𑒢𑓂𑒯𑒱 𑒍 𑒕𑒪 𑒋𑒏𑒩 𑒏𑒼𑒢 𑒧𑒯𑒰𑒬𑒨 𑒖𑒩𑒴𑒩𑒞𑒱
𑒏𑒋𑒪 𑒮𑒹𑒫𑒰 𑒯𑒧 𑒁𑒯𑒰𑒿𑒏 𑒩𑒰𑒞𑒱-𑒠𑒱𑒢 𑒦𑒼𑒩 𑒡𑒩𑒱
𑒁𑒣𑓂𑒣𑒢 𑒒𑒩𑒏 𑒏𑒰𑒖 𑒕𑒼𑒛𑓃𑒪 𑒁𑒯𑒰𑒿𑒏 𑒏𑒰𑒖𑒏𑒹𑒿 𑒂𑒑𑒴 𑒩𑒰𑒐𑒪 𑒞𑒰𑒯𑒱𑒧𑒹 𑒢𑒯𑒱 𑒯𑒧 𑒪𑒑𑒰𑒨𑒪 𑒢𑒰𑒩𑓂𑒧𑓂𑒮 𑒢𑒰𑒩𑓂𑒧𑓂𑒮 𑒏𑒹𑒩 𑒢𑒯𑒱 𑒑𑒣𑓂𑒣 𑒕𑒪 𑒂𑒨𑒪
𑒙𑓂𑒩𑒰𑓀𑒮𑒤𑒩𑒧𑒹 𑒄 𑒏𑒞𑒨𑒮𑒿 𑒂𑒥𑒱 𑒑𑒹𑒪 𑒬𑓂𑒩𑒲𑒧𑒰𑒢 !

𑒞𑒐𑒢𑒯𑒱 𑒩𑒼𑒏𑒪 𑒯𑒳𑒢𑒏 𑒙𑓂𑒩𑒰𑓀𑒮𑒤𑒩 𑒎𑒤𑒱𑒮𑒩 𑒞𑒞𑓂𑒏𑒰𑒪

𑒧𑒖𑒴𑒩𑒲 𑒢𑒯𑒱 𑒧𑒰𑒿𑒑𑒯
𑒦𑒩𑒱 𑒠𑒱𑒢 𑒐𑒙𑒱 𑒯𑒧 𑒑𑒹𑒪𑒯𑒳𑒿 𑒧𑒰𑒿𑒑𑒨 𑒁𑒣𑒢 𑒧𑒖𑒴𑒩𑒲 𑒏𑒯𑒪𑒢𑓂𑒯𑒱 𑒖𑓂𑒨𑒼𑒿 𑒧𑒖𑒴𑒩𑒲 𑒧𑒿𑒑𑒥𑒯 𑒧𑒰𑒩𑒱 𑒠𑒹𑒥𑒯 𑒯𑒧 𑒕𑒴𑒩𑒲
𑒏𑒯𑒪 𑒢𑒯𑒱 𑒥𑒩𑒴 𑒠𑒱𑒁 𑒧𑒖𑒴𑒩𑒲 𑒧𑒰𑒩𑒴 𑒢𑒯𑒱 𑒣𑒩𑒘𑓂𑒔 𑒄 𑒕𑒴𑒩𑒲
𑒖𑒱𑒨𑒥 𑒖𑒐𑒢 𑒯𑒧 𑒏𑒩𑒥 𑒏𑒰𑒖 𑒏𑒨 𑒂𑒢𑒼 𑒚𑒰𑒧 𑒖𑒲-𑒯𑒖𑒴𑒩𑒲

𑒠𑒼𑒭𑒲
𑒠𑒼𑒭𑒲 𑒕𑒯 𑒞𑒼𑒿 𑒢𑒯𑒱 𑒕𑒲 𑒧𑒰𑒪𑒱𑒏
𑒠𑒹𑒪𑒏 𑒠𑒴 𑒮𑒙𑒏𑓂𑒏𑒰
𑒯𑒧 𑒕𑒲 𑒠𑒼𑒭𑒲 𑒥𑒰𑒖𑒪 𑒞𑒐𑒢 𑒥𑒞𑒰 𑒮𑓀𑒑𑒲𑒏 𑒣𑒞𑒰
𑒮𑒰𑒿𑒗 𑒡𑒩𑒱 𑒣𑒛𑓃𑒪 𑒧𑒰𑒩𑒱 𑒣𑒩𑒘𑓂𑒔 𑒢𑒯𑒱 𑒥𑒞𑒰 𑒮𑒏𑒪 𑒍 𑒢𑒰𑒧 𑒮𑒓𑓂𑒑𑒲𑒏
𑒏𑒰𑒩𑒝
𑒕𑒪 𑒢𑒯𑒱 𑒍 𑒠𑒼𑒭𑒲 𑒢𑒰𑒧 𑒥𑒞𑒰𑒨𑒞 𑒞𑒐𑒢 𑒏𑒟𑒲𑒏


𑒪𑓀𑒠𑒢𑒏 𑒐𑒱𑒮𑓂𑒮𑒰
𑒪𑒢𑓂𑒠𑒢𑒏 𑒮𑒰𑒅𑒟 𑒯𑒰𑒪𑒧𑒹 𑒬𑒯𑒲𑒠 𑒦𑒱𑓀𑒛𑒩𑒰 𑒪𑒹𑒮𑓂𑒙𑒩𑒧𑒹 𑒬𑒯𑒲𑒠 𑒮𑒞𑒫𑓀𑒞-𑒥𑒹𑒁𑓀𑒞

𑒪𑒹𑒮𑓂𑒙𑒩𑒧𑒹 𑒮𑒦 𑒁𑒣𑒢𑒹 𑒪𑒼𑒏 𑒢𑒯𑒱 𑒦𑒹𑒙𑒻𑒕 𑒁𑓀𑒑𑓂𑒩𑒹𑒖 𑒋𑒏𑒼𑒙𑒰 𑒦𑒹𑒙𑒢𑒹 𑒯𑒧𑒯𑒲 𑒧𑒿𑒑𑒻𑒞 𑒖𑒰𑒃𑒞 𑒕𑒲 𑒫𑒲𑒮𑒰𑒣𑒰𑒮𑒣𑒼𑒩𑓂𑒙
𑒮𑒹𑒯𑒼 𑒁𑓀𑒑𑓂𑒩𑒹𑒖 𑒮𑒦𑒮𑒿 𑒮𑒦𑒙𑒰
𑒯𑒼𑒨𑒞 𑒐𑒱𑒡𑒰𑓀𑒬 𑒮𑒳𑒢𑒴 𑒞𑒐𑒢𑒼
𑒢𑒯𑒱 𑒧𑒰𑒢𑒥 𑒯𑒧 𑒑𑒳𑒩𑒳𑒏𑒳𑒪𑒏𑒹𑒿
𑒃𑒞𑒱𑒯𑒰𑒮𑒮𑒿 𑒢𑒯𑒱 𑒪𑒹𑒥 𑒮𑒥𑒏
𑒞𑒿 𑒂𑒋𑒞 𑒣𑒳𑒢𑓁 𑒍 𑒒𑒳𑒩𑒱
𑒁𑓀𑒑𑓂𑒩𑒹𑒖𑒏 𑒢𑒰𑒧 𑒏𑒞𑒹𑒏 𑒠𑒱𑒢 𑒡𑒩𑒱 𑒪𑒹𑒥
𑒮𑒦 𑒁𑒕𑒱 𑒑𑒹𑒪 𑒥𑒳𑒗𑒱

𑒣𑓂𑒩𑒟𑒧 𑒖𑒢𑒫𑒩𑒲
𑒣𑓂𑒩𑒟𑒧 𑒖𑒢𑒫𑒩𑒲 𑒠𑒹𑒐𑒪 𑒋𑒏 𑒦𑒼𑒩𑒹-𑒦𑒼𑒩 𑒠𑒴𑒡𑒏 𑒪𑒹𑒪 𑒪𑒰𑒑𑒱 𑒪𑒰𑒃𑒢 𑒖𑒐𑒢 𑒂𑒨𑒪 𑒥𑒹𑒩
𑒐𑒳𑒬𑒲-𑒣𑓂𑒩𑒤𑒳𑒪𑓂𑒪𑒱𑒞 𑒣𑒰𑒍𑒪 𑒤𑒹𑒩

𑒧𑒳𑒠𑒰 𑒩𑒮𑓂𑒞𑒰𑒏 𑒥𑒲𑒔𑒯𑒱 𑒐𑒮𑒪 𑒠𑒴𑒡 𑒍𑒯 𑒦𑒹𑒪 𑒁𑒣𑒬𑒏𑒳𑒢 𑒥𑒯𑒳𑒞
𑒮𑒳𑒢𑒱 𑒐𑒾𑒿𑒖𑒰𑒃 𑒏𑒯𑒪 𑒢𑒯𑒱 𑒮𑒹 𑒣𑒞𑒰 𑒢𑒯𑒱 𑒬𑒏𑒳𑒢𑒹 𑒯𑒼𑒁𑒨 𑒖𑒹
𑒏𑒯𑒪 𑒯𑒿-𑒯𑒿 𑒬𑒏𑒳𑒢𑒹 𑒟𑒲𑒏 𑒧𑒰𑒿 𑒣𑒵𑒟𑓂𑒫𑒲𑒏𑒹𑒿 𑒪𑒰𑒑𑒪 𑒁𑒩𑓂𑒒𑓂𑒨
𑒣𑓂𑒩𑒟𑒧𑒹 𑒣𑒰𑒨𑒪 𑒣𑓂𑒩𑒟𑒧𑒏 𑒦𑒼𑒑 𑒯𑒩𑒞𑒲𑒯 𑒮𑒦𑒙𑒰 𑒠𑒳𑓁𑒐 𑒂 𑒩𑒼𑒑

𑒂𑒤𑒱𑒮𑒧𑒹 𑒦𑒩𑒱 𑒩𑒰𑒞𑒱 𑒥𑒢𑓂𑒠
𑒮𑒰𑒿𑒗 𑒣𑒩𑒪 𑒮𑒦 𑒅𑒚𑒪 𑒑𑒹𑒪 𑒁𑒣𑓂𑒣𑒢-𑒁𑒣𑓂𑒣𑒢 𑒒𑒩 𑒥𑒰𑒥𑒴𑒖𑒲 𑒩𑒯𑒟𑒱 𑒤𑒰𑒃𑒪𑒧𑒹 𑒏𑒩𑒻𑒞 𑒁𑒣𑒢𑒰𑒏𑒹𑒿 𑒫𑓂𑒨𑒮𑓂𑒞
𑒔𑒾𑒏𑒲𑒠𑒰𑒩 𑒢𑒯𑒱 𑒠𑒹𑒪𑒏 𑒡𑓂𑒨𑒰𑒢 𑒏𑒹𑒪𑒏 𑒥𑒢𑓂𑒠 𑒍𑒯𑒱 𑒩𑒰𑒞𑒱 𑒯𑒧𑒩𑒰 𑒮𑒦 𑒔𑒱𑓀𑒞𑒱𑒞 𑒦𑒹𑒪𑒯𑒳𑒿 𑒏𑒋𑒪𑒯𑒳𑒿 𑒔𑒱𑓀𑒞𑒱𑒞 𑒏𑒕𑒧𑒕 𑒡𑒩𑒱 𑒣𑓂𑒩𑒰𑒞𑒱
𑒦𑒼𑒩𑒧𑒹 𑒖𑒐𑒢 𑒠𑒩𑒥𑒰𑒢 𑒐𑒼𑒪𑒱 𑒠𑒹𑒐𑒪𑒏 𑒯𑒳𑒢𑒏𑒰 𑒂𑒤𑒱𑒮𑒧𑒹 𑒧𑒰𑒤𑒲 𑒧𑒰𑒿𑒑𑒱 𑒎𑒿𑒒𑒰𑒨𑒪 𑒣𑒯𑒳𑒿𑒔𑒹𑒪𑒏 𑒒𑒩 𑒖𑒪𑓂𑒠𑒲𑒮𑒿
𑒋𑒏 𑒥𑒴𑒜𑓃𑒲 𑒯𑒧𑒩 𑒣𑒛𑓃𑒼𑒮𑒲 𑒏𑒯𑒪𑒢𑓂𑒯𑒱 𑒏𑒼𑒢𑒰 𑒩𑒯𑒪 𑒦𑒹𑒪 𑒯𑒧𑒩𑒰 𑒮𑒦 𑒞𑒿 𑒢𑒯𑒱 𑒞𑒏𑒱𑒞𑒯𑒳𑒿 𑒥𑒰𑒙 𑒩𑒰𑒞𑒱 𑒦𑒩𑒱𑒧𑒹 𑒦𑒨 𑒖𑒨𑒞𑒯𑒳𑒿 𑒁𑒣𑒮𑓂𑒨𑒰𑒿𑒞 𑒥𑒹𑒙𑒰 𑒮𑒦 𑒪𑒖𑒏𑒼𑒙𑒩 𑒧𑒳𑒿𑒯𑒔𑒴𑒩𑒴 𑒕𑒢𑓂𑒯𑒱 𑒯𑒱𑒢𑒏 𑒯𑒹 𑒠𑒰𑒃 (𑒯𑒧𑒩 𑒧𑒰𑒃)

𑒯𑒰𑒪𑒲𑒏𑓂𑒩𑒰𑒮 𑒮𑓂𑒏𑒴𑒪 𑒠𑒩𑒦𑓀𑒑𑒰𑒧𑒹 𑒦𑒹𑒪 𑒕𑒪 𑒒𑒙𑒱𑒞 𑒋𑒏 𑒥𑒰𑒞
𑒑𑒩𑓂𑒧𑒲 𑒞𑒰𑒞𑒱𑒪𑒧𑒹 𑒥𑒔𑓂𑒔𑒰𑒏𑒹𑒿 𑒥𑒢𑓂𑒠 𑒏𑒋𑒪 𑒠𑒩𑒥𑒰𑒢
𑒧𑒯𑒱𑒢𑒰 𑒦𑒩𑒱 𑒐𑒼𑒖𑒥𑒲𑒢 𑒦𑒹𑒪 𑒢𑒯𑒱 𑒔𑒪𑒪 𑒣𑒞𑒰 𑒏𑒟𑒴𑒏 𑒮𑓂𑒏𑒴𑒪 𑒐𑒴𑒖𑒪 𑒠𑒹𑒐𑒪 𑒥𑒔𑓂𑒔𑒰𑒏 𑒪𑒯𑒰𑒬 𑒮𑒦 𑒯𑒳𑒖𑒴𑒧
𑒥𑒰𑒣 𑒍𑒏𑒩 𑒧𑒳𑒿𑒯𑒔𑒳𑒩𑒴 𑒕𑒪 𑒮𑓂𑒏𑒴𑒪𑒮𑒿 𑒖𑓂𑒨𑒼𑒿 𑒥𑒔𑓂𑒔𑒰 𑒢𑒯𑒱 𑒂𑒨𑒪 𑒮𑒳𑒞𑒪𑒹 𑒕𑒼𑒛𑓃𑒱 𑒑𑒋𑒪 𑒞𑒐𑒢 𑒑𑒹𑒪 𑒩𑒯𑒨 𑒣𑒕𑒞𑒰𑒨𑒪

𑒥𑒔𑓂𑒔𑒰 𑒠𑒹𑒥𑒰𑒪 𑒣𑒩 𑒪𑒱𑒐𑒢𑒹 𑒩𑒯𑒨 𑒁𑒣𑒢 𑒏𑒭𑓂𑒙𑒏 𑒥𑒐𑒰𑒢 𑒣𑒰𑒢𑒱 𑒦𑒼𑒖𑒢 𑒥𑒱𑒢𑒰 𑒦𑒹𑒪𑒨 𑒍𑒏𑒩 𑒣𑓂𑒩𑒰𑒝𑒰𑓀𑒞


𑒢𑒰𑒢𑒲𑒏 𑒣𑒞𑓂𑒩
𑒣𑒞𑓂𑒩 𑒂𑒨𑒪 𑒧𑒼𑒢 𑒚𑒲𑒏 𑒢𑒯𑒱 𑒪𑒏𑓂𑒭𑓂𑒧𑒲 𑒁𑒯𑒰𑒿 𑒠𑒹𑒐𑒱 𑒖𑒰𑒅 𑒋𑒯𑒱 𑒥𑒹𑒩 𑒢𑒯𑒱 𑒥𑒰𑒿𑒔𑒥
𑒢𑒯𑒱 𑒄 𑒑𑒣 𑒥𑒳𑒗𑒳 𑒥𑒰𑒅

𑒣𑒹𑒙𑒏 𑒁𑒪𑒮𑒩 𑒁𑒕𑒱 𑒐𑒨𑒢𑒹 𑒔𑒙𑒏𑒰𑒩 𑒮𑒿 𑒐𑒰𑒍𑒪 𑒖𑒹𑒢𑒰 𑒧𑒮𑒪𑓂𑒪𑒰 𑒁𑓀𑒞𑒱𑒧 𑒏𑓂𑒭𑒝 𑒠𑒹𑒐𑒥𑒰𑒏 𑒥𑒛𑓂𑒛 𑒁𑒕𑒱 𑒧𑒼𑒢 𑒔𑒱𑒙𑓂𑒚𑒲 𑒪𑒱𑒐𑒥𑒰𑒪𑒹 𑒁𑒨𑒪𑒰𑒯 𑒞𑒹𑒯𑒪𑓂𑒪𑒰

𑒏𑓂𑒨𑒼 𑒢𑒯𑒱 𑒣𑒯𑒳𑒿𑒔𑒹𑒪𑒏𑒢𑓂𑒯𑒱 𑒪𑒏𑓂𑒭𑓂𑒧𑒲𑒏𑒹𑒿 𑒏𑒯𑒪 𑒔𑒱𑒙𑓂𑒚𑒲𑒧𑒹 𑒁𑒕𑒱 𑒦𑒰𑒛𑓃𑒦𑒲𑒮 𑒏𑒋𑒪
𑒋𑒏 𑒙𑒰 𑒂𑒩 𑒔𑒱𑒙𑓂𑒚𑒲 𑒂𑒋𑒪 𑒖𑒹 𑒧𑒰𑒨 𑒑𑒹𑒪𑒲𑒯 𑒠𑒹𑒯 𑒕𑒼𑒛𑓃𑒱
𑒪𑒏𑓂𑒭𑓂𑒧𑒲𑒏 𑒥𑒹𑒙𑒰 𑒥𑒼𑒏𑒰𑒩𑒱 𑒣𑒰𑒩𑒱 𑒏𑒰𑒢𑒨 𑒏𑒯𑒪𑒏 𑒕𑒲 𑒯𑒧 𑒮𑒦 𑒁𑒮𑒯𑒰𑒨
𑒢𑒯𑒱 𑒁𑒨𑒞𑒲𑒯 𑒯𑒧𑒩 𑒪𑒏𑓂𑒭𑓂𑒧𑒲 𑒧𑒰𑒨𑒏 𑒧𑒳𑒿𑒯 𑒠𑒹𑒐𑒨 𑒁𑓀𑒞𑒱𑒧 𑒥𑒹𑒩 𑒢𑒰𑒧 𑒩𑒙𑒻𑒞 𑒁𑒯𑒰𑒿𑒏 𑒄 𑒥𑒴𑒜𑓃𑒱
𑒑𑒳𑒖𑒩𑒱 𑒑𑒹𑒪𑒱 𑒖𑒑 𑒕𑒼𑒛𑓃𑒱
𑒁𑒣𑒢 𑒒𑒩𑒏 𑒯𑒰𑒪 𑒏𑒲 𑒏𑒯𑒴 𑒦𑒑𑒫𑒰𑒢𑒹 𑒕𑒟𑒱 𑒮𑒯𑒰𑒨 𑒒𑒩𑒒𑒳𑒮𑓂𑒮𑒴 𑒮𑒦 𑒒𑒩𑒧𑒹 𑒁𑒕𑒱 𑒠𑒻𑒫 𑒏𑒵𑒣𑒰 𑒯𑒹 𑒠𑒰𑒨

𑒏𑒹𑒫𑒰𑒛𑓃 𑒥𑒢𑓂𑒠
𑒥𑒰𑒯𑒩𑒮𑒿 𑒂𑒥𑒨𑒧𑒹 𑒦𑒹𑒪 𑒪𑒹𑒙 𑒕𑒼𑒙 𑒦𑒰𑒨 𑒏𑒋𑒪 𑒏𑒹𑒫𑒰𑒛𑓃 𑒥𑒢𑓂𑒠 𑒏𑒱𑒕𑒳 𑒏𑒰𑒪𑒏 𑒥𑒰𑒠 𑒖𑒐𑒢 𑒐𑒳𑒖𑒪 𑒦𑒻𑒨𑓂𑒨𑒰 𑒏𑒯𑒪 𑒯𑒹 𑒁𑒢𑒳𑒖 𑒠𑒳𑓁𑒐𑒲 𑒕𑒲 𑒯𑒧 𑒣𑒰𑒛𑓃𑒱 𑒄 𑒧𑒼𑒢 𑒁𑒯𑒱𑒢𑒰 𑒖𑒐𑒢 𑒕𑒪𑒯𑒳𑒿 𑒯𑒧 𑒮𑒦 𑒥𑒔𑓂𑒔𑒰 𑒣𑒱𑒞𑒰 𑒏𑒋𑒪𑒢𑓂𑒯𑒱 𑒒𑒩 𑒥𑒢𑓂𑒠
𑒏𑒢𑒹𑒏 𑒠𑒹𑒩𑒲 𑒯𑒼𑒨𑒥𑒰𑒏 𑒏𑒰𑒩𑒝 𑒣𑒳𑒕𑒪𑒢𑓂𑒯𑒱 𑒢𑒯𑒱 𑒍 𑒞𑒳𑒩𑓀𑒞
𑒞𑒳𑒩𑓀𑒞 𑒏𑒰𑒏𑒰 𑒮𑒹𑒯𑒼 𑒥𑒳𑒗𑒰𑒍𑒪 𑒥𑒰𑒪 𑒫𑒱𑒖𑓂𑒘𑒰𑒢𑒏 𑒠𑓂𑒫𑓀𑒠 𑒖𑒹 𑒦𑒹𑒪 𑒮𑒹 𑒥𑒱𑒮𑒩𑒱 𑒬𑒳𑒩𑒴 𑒏𑒩𑒴 𑒢𑒫 𑒖𑒲𑒫𑒢 𑒮𑓂𑒫𑒰𑒔𑓂𑒕𑓀𑒠

𑒖𑒹𑒚𑒰𑓀𑒬
𑒕𑒼𑒙 𑒦𑒰𑒨𑒏𑒹𑒿 𑒠𑒹𑒪 𑒣𑒩𑒞𑒲
𑒂 𑒩𑒰𑒐𑒪 𑒮𑒹𑒯𑒼 𑒖𑒹𑒚𑒰𑓀𑒬
𑒧𑒩𑒪 𑒖𑒐𑒢 𑒏𑒢𑒱𑒨𑒰𑒿 𑒞𑒐𑒢 𑒦𑒼𑒖𑒏 𑒏𑒋𑒪 𑒫𑒵𑒞𑓂𑒞𑒰𑓀𑒞

𑒏𑒯𑒪 𑒢𑒧𑒯𑒩 𑒦𑒼𑒖 𑒏𑒩𑒴 𑒣𑒰𑒃 𑒢𑒯𑒱 𑒞𑒏𑒩 𑒢𑒹 𑒥𑒯𑒢𑓂𑒢𑒰 𑒖𑒏𑒩𑒹 𑒏𑒯𑒥𑒨 𑒮𑒹 𑒠𑒨 𑒠𑒹𑒞 𑒔𑒲𑒢𑒲 𑒔𑒰𑒅𑒩 𑒮𑒪𑒯𑒰𑒢𑒰
𑒐𑒹𑒞 𑒥𑒹𑒔𑒱 𑒏𑒨 𑒯𑒧 𑒏𑒋𑒪𑒯𑒳𑒿 𑒬𑓂𑒩𑒰𑒠𑓂𑒡 𑒣𑒱𑒞𑒰𑒏 𑒍𑒯𑒱 𑒥𑒹𑒩
𑒁𑒣𑒢𑒰 𑒥𑒹𑒩𑒧𑒹 𑒢𑒯𑒱 𑒔𑒪𑒞 𑒥𑒯𑒢𑓂𑒢𑒰 𑒤𑒹𑒩 𑒥𑒳𑒗𑒴 𑒋𑒏 𑒥𑒹𑒩

𑒮𑒰𑒠𑒰 𑒂𑒏𑒱 𑒩𑓀𑒑𑒲𑒢
𑒥𑓂𑒪𑒻𑒏 𑒋𑒝𑓂𑒛 𑒯𑓂𑒫𑒰𑒃𑒙𑒏 𑒑𑒹𑒪 𑒖𑒧𑒰𑒢𑒰 𑒮𑒰𑒠𑒰 𑒂𑒏𑒱 𑒩𑓀𑒑𑒲𑒢
𑒠𑒩𑒱𑒦𑓀𑒑𑒰 𑒏𑒰𑒪𑒲 𑒧𑓀𑒠𑒱𑒩 𑒪𑒑𑒏
𑒪𑒮𑓂𑒮𑒲 𑒥𑒪𑒰𑒏 𑒄 𑒧𑒹𑒐-𑒧𑒲𑒢
𑒖𑒐𑒢 𑒥𑒴𑒗𑒱 𑒢𑒯𑒱 𑒮𑒏𑒪𑒯𑒳𑒿 𑒞𑒐𑒢 𑒏𑒯𑒪 𑒋𑒏𑒑𑒼𑒙 𑒧𑒲𑒞 𑒮𑒰𑒠𑒰 𑒦𑒹𑒪 𑒮𑒰𑒠𑒰 𑒂 𑒦𑒰𑓀𑒑𑒏 𑒮𑓀𑒑 𑒦𑒹𑒪 𑒩𑓀𑒑𑒲𑒢


𑒖𑒼𑓀𑒏𑒯𑒲 𑒣𑒼𑒐𑒩𑒱𑒧𑒹 𑒦𑒩𑒱 𑒩𑒰𑒞𑒱
𑒮𑒳𑒢𑒻𑒞 𑒕𑒪𑒯𑒳𑒿 𑒖𑒹 𑒥𑒛𑓃𑒥𑒛𑓃𑒱𑒨𑒰𑒥𑒰𑒥𑒴 𑒮𑒰𑒯𑒹𑒥𑒏 𑒪𑒑𑒰𑒢 𑒠𑒹𑒪𑒰𑒧𑒹 𑒖𑓂𑒨𑒼𑒿 𑒯𑒼𑒃𑒞 𑒕𑒪 𑒪𑒹𑒙 𑒦𑒩𑒱 𑒩𑒰𑒞𑒱 𑒚𑒰𑒜𑓃 𑒏𑒋𑒪 𑒖𑒼𑓀𑒏𑒯𑒲 𑒣𑒼𑒐𑒩𑒱𑒧𑒹
𑒥𑒲𑒞𑒪 𑒨𑒳𑒑 𑒁𑒨𑒪𑒰𑒯 𑒤𑒹𑒩 𑒖𑒐𑒢 𑒯𑒰𑒟𑒲 𑒣𑒩 𑒪𑒹𑒥𑒰𑒏 𑒯𑒹𑒞𑒳 𑒪𑒑𑒰𑒢-𑒪𑒯𑒢𑒰 𑒖𑒯𑒱𑒢𑒰 𑒑𑒰𑒩𑒱-𑒑𑒴𑒛𑓃𑒱 𑒠𑒻𑒞 𑒯𑒰𑒟𑒲 𑒣𑒩 𑒕𑒴𑒙𑒪 𑒙𑒼𑒪𑒏-𑒙𑒼𑒪 𑒧𑒳𑒿𑒯 𑒠𑒳𑒮𑒢𑒰
𑒖𑒧𑒲𑒢𑒠𑒰𑒩𑒲 𑒐𑒞𑒧 𑒦𑒹𑒪𑒼 𑒣𑒩 𑒮𑒼𑒔𑒪 𑒏𑒱𑒕𑒳 𑒪𑒲 𑒁𑒮𑒴𑒪𑒱 𑒧𑒳𑒠𑒰 𑒪𑒼𑒏 𑒮𑒦 𑒥𑒳𑒡𑒱𑒨𑒰𑒩𑒲 𑒏𑒋𑒪 𑒢𑒯𑒱 𑒁𑒋𑒪𑒰𑒯 𑒍 𑒒𑒴𑒩𑒱


𑒑𑒻𑒮 𑒮𑒱𑒪𑒱𑒝𑓂𑒛𑒩𑒏 𑒔𑒼𑒩𑒱
𑒑𑒹𑒪𑒯𑒳𑒿 𑒩𑒣𑒙 𑒪𑒱𑒐𑒰𑒥𑒨 𑒦𑒹𑒪 𑒕𑒪 𑒮𑒱𑒪𑒱𑒝𑓂𑒛𑒩𑒏 𑒔𑒼𑒩𑒱 𑒧𑒼𑓀𑒕 𑒥𑒪𑒰 𑒟𑒰𑒢𑒹𑒠𑒰𑒩 𑒥𑒖𑒪𑒰𑒯 𑒥𑒴𑒛𑓃𑒱 𑒥𑒳𑒗𑒻𑒞 𑒕𑒲 𑒯𑒧𑒩𑒰 𑒮𑒦𑒏𑒹𑒿 𑒛𑒥𑒪 𑒮𑒱𑒪𑒱𑒢𑒛𑒩 𑒔𑒰𑒯𑒲 𑒋𑒤. 𑒂𑒃. 𑒂𑒩. 𑒮𑒮𑓂𑒞𑒰 𑒢𑒯𑒱 𑒢𑒯𑒱 𑒮𑒮𑓂𑒞𑒰 𑒁𑒕𑒱 𑒋𑒞𑒹𑒏 𑒯𑒹 𑒦𑒰𑒃
𑒯𑒧 𑒏𑒯𑒪 𑒛𑒥𑒪 𑒮𑒱𑒪𑒹𑒝𑓂𑒛𑒩 𑒞𑒿 𑒁𑒕𑒱𑒨𑒹 𑒯𑒧𑒩𑒰
𑒁𑒔𑓂𑒕𑒰 𑒞𑒿
𑒞𑒹𑒮𑒩 𑒮𑒱𑒪𑒹𑒝𑓂𑒛𑒩 𑒪𑒹𑒥𑒰𑒏 𑒁𑒕𑒱 𑒠𑒹𑒩𑒲 ?
𑒞𑒰𑒏𑒪 𑒏𑒞𑒨 𑒔𑒼𑒩𑒏𑒹𑒿 𑒁𑒯𑒰𑒿 𑒁𑒯𑒰𑒿𑒏 𑒞𑒏𑒢𑒰𑒃 𑒁𑒕𑒱 𑒖𑒹𑒢𑒰 𑒔𑒪𑒻𑒞 𑒁𑒕𑒱 𑒏𑒼𑒪𑓂𑒯𑒴𑒏 𑒥𑒩𑒠
𑒦𑒩𑒱 𑒠𑒱𑒢 𑒒𑒳𑒧𑒻𑒕 𑒢𑒯𑒱 𑒥𑒜𑓃𑒻𑒕 𑒋𑒏𑒼 𑒛𑒹𑒑 𑒁𑒯𑒿 𑒢𑒯𑒱 𑒏𑒩𑒴 𑒮𑒻𑒯 𑒣𑓂𑒩𑒑𑒞𑒱𑒏 𑒢𑒰𑒧 𑒣𑒩 𑒋𑒯𑒱 𑒥𑒹𑒩
𑒮𑓂𑒏𑒴𑒙𑒩𑒏 𑒔𑒼𑒩𑒱𑒏 𑒥𑒹𑒩 𑒏𑒯𑒪𑒏 𑒃𑓀𑒮𑓂𑒨𑒼𑒩𑒹𑓀𑒮𑒏 𑒣𑒰𑒃 𑒔𑒰𑒯𑒲 𑒏𑒯𑒴 𑒁𑒯𑒰𑒿𑒮𑒿 𑒏𑒼𑒩𑓂𑒙𑒧𑒹 𑒦𑓄 𑒣𑒰𑒋𑒞 𑒠𑒹𑒪 𑒁𑒯𑒰𑒿𑒮𑒿 𑒑𑒥𑒰𑒯𑒲

𑒤𑒹𑒩𑒲 𑒣𑒛𑓃𑒱 𑒖𑒰𑒨𑒞 𑒁𑒯𑒰𑒿𑒏𑒹𑒿 𑒣𑒳𑒢𑓁𑒣𑓂𑒩𑒰𑒞 𑒯𑒼𑒋𑒞 𑒏𑒼𑒩𑓂𑒙𑒧𑒹 𑒖𑒰𑒨𑒥 𑒅𑒪𑒙𑒰 𑒢𑒱𑒩𑓂𑒝𑒨𑒼 𑒦𑓄 𑒖𑒰𑒨𑒞 𑒥𑒴𑒗𑒱 𑒤𑒹𑒩 𑒮𑒹 𑒂𑒨𑒥

𑒮𑓀𑒑 𑒑𑒹𑒪 𑒛𑓂𑒩𑒰𑒃𑒫𑒩 𑒏𑒯𑒪𑒏 𑒢𑒼𑒏𑒩𑒲 𑒕𑒻 𑒋𑒏𑒩𑒹 𑒚𑒲𑒏 𑒣𑒰𑒃𑒨𑒼 𑒁𑒕𑒱 𑒏𑒧𑒰𑒃𑒞 𑒏𑒩𑒻𑒞 𑒩𑓀𑒑𑒠𑒰𑒩𑒲
𑒤𑒹𑒏𑒻𑒞 𑒣𑒰𑒢𑒏 𑒣𑒲𑒏


𑒤𑒻𑒏𑓂𑒮
𑒤𑒻𑒏𑓂𑒙𑒩𑒲 𑒣𑒯𑒳𑒿𑒔𑒱 𑒏𑒯𑒪 𑒏𑒩𑒴 𑒮𑒩𑓂𑒔 𑒫𑒰𑒩𑓀𑒙 𑒣𑒩 𑒮𑒰𑒃𑒢 𑒧𑒰𑒪𑒱𑒏 𑒏𑒯𑒪 𑒩𑒳𑒏𑒴 𑒏𑒱𑒕𑒳 𑒏𑒰𑒪 𑒡𑒩𑒱 𑒤𑒼𑒢 𑒏𑒩𑒨 𑒕𑒲 𑒂𑒃

𑒙𑓂𑒩𑒰𑓀𑒮𑒤𑒩𑒏 𑒂𑒩𑓂𑒛𑒩 𑒂𑒨𑒪 𑒩𑒱𑒪𑒲𑒫𑒱𑒓𑒑𑒏 𑒮𑓀𑒑𑒯𑒱 𑒁𑒤𑒮𑒩 𑒢𑒱𑒏𑒪𑒪 𑒍𑒞𑒨𑒮𑒿 𑒫𑒰𑒩𑓀𑒙 𑒥𑒱𑒢𑒰 𑒋𑒏𑓂𑒮𑒲𑒏𑓂𑒨𑒴𑒙 𑒏𑒹𑒢𑒯𑒱

𑒠𑒲𑒨𑒰-𑒥𑒰𑒞𑒲
𑒂𑒨𑒪 𑒠𑒲𑒨𑒰 𑒥𑒰𑒞𑒲 𑒏𑒞𑒹𑒏 𑒁𑒧𑒰𑒫𑒮𑓂𑒨𑒰 𑒁𑒕𑒱 𑒥𑒲𑒞𑒪 𑒖𑒏𑒩 𑒁𑒢𑓂𑒯𑒰𑒩𑒧𑒹 𑒪𑒰𑒑𑒪 𑒔𑒼𑒙 𑒏𑒞𑒹𑒏 𑒖𑒲𑒫 𑒟𑒏𑒳𑒔𑒰𑒨𑒪 𑒣𑒋𑒩𑒯𑒱 𑒁𑒢𑓂𑒯𑒰𑒩𑒏 𑒕𑒪 𑒕𑒰𑒞𑒲
𑒠𑒲𑒨𑒰 𑒥𑒰𑒞𑒲 𑒁𑒢𑒪𑒏 𑒣𑓂𑒩𑒏𑒰𑒬 𑒖𑓂𑒘𑒰𑒢-𑒖𑓂𑒨𑒼𑒞𑒱𑒏 𑒁𑒏𑒰𑒬 𑒢𑒧𑒢 𑒏𑒩𑒨 𑒕𑒲 𑒯𑒧 𑒋𑒯𑒱 𑒥𑒰𑒞𑒏 𑒁𑓀𑒡𑒏𑒰𑒩-𑒞𑒱𑒧𑒱𑒩 𑒏𑒹𑒩 𑒯𑒼𑒥𑒨 𑒢𑒰𑒬

𑒃𑒙𑒰𑒪𑒱𑒨𑒢 𑒮𑒻𑒪𑒴𑒢
𑒒𑒩 𑒦𑒹𑒪 𑒮𑒧𑒮𑓂𑒞𑒲𑒣𑒳𑒩 𑒠𑒱𑒪𑓂𑒪𑒲𑒧𑒹 𑒕𑒲 𑒂𑒨𑒪 𑒐𑒼𑒪𑒱 𑒮𑒻𑒪𑒴𑒢 𑒃𑒙𑒰𑒪𑒱𑒨𑒢 𑒁𑒨𑒪𑒯𑒳𑒿 𑒏𑒧𑒰𑒨 𑒪𑒹𑒪

𑒣𑒳𑒪𑒱𑒮𑒏 𑒩𑒼𑒏 𑒠𑒹𑒐𑒱 𑒏𑒨 𑒑𑒹𑒪𑒯𑒳𑒿 𑒑𑒰𑒧 𑒒𑒳𑒩𑒱 𑒣𑒳𑒢𑓁 𑒕𑒲 𑒂𑒨𑒪 𑒮𑒻𑒪𑒴𑒢 𑒏𑒞𑒨 𑒥𑒰𑒢𑒰𑒍𑒪?
𑒄𑒙𑒰 𑒣𑒩 𑒖𑒹 𑒕𑒲 𑒁𑒯𑒰𑒿 𑒥𑒻𑒮𑒪 𑒮𑒻𑒯 𑒏𑒯𑒥𑒻𑒕 𑒃𑒙𑒰𑒪𑒱𑒨𑒢
𑒁𑒯𑒴 𑒣𑒩 𑒁𑒕𑒱 𑒣𑒳𑒪𑒱𑒮𑒏 𑒧𑒾𑒐𑒱𑒏-𑒩𑒼𑒏 𑒮𑒹𑒯𑒼 𑒡𑒩𑒱 𑒢𑒯𑒱 𑒥𑒴𑒗𑒪 𑒁𑒯𑒰𑒿 ?


𑒬𑒫 𑒢𑒯𑒱 𑒅𑒚𑒞
𑒑𑒰𑒧𑒏 𑒏𑒢𑒱𑒨𑒰𑒿 𑒧𑒴𑒃𑒪𑒱 𑒬𑒫 𑒁𑒿𑒑𑒢𑒰𑒧𑒹 𑒩𑒰𑒐𑒪 𑒮𑒦 𑒨𑒳𑒫𑒰 𑒏𑒋𑒢𑒹 𑒁𑒕𑒱 𑒢𑒑𑒩 𑒠𑒱𑒬𑒱 𑒣𑒪𑒰𑒨𑒢 𑒖𑒹 𑒏𑓂𑒨𑒼 𑒩𑒯𑒟𑒱 𑒮𑒹 𑒒𑒳𑒧𑒻𑒞 𑒩𑒯𑒟𑒱 𑒥𑓂𑒪𑒰𑒏 𑒠𑒱𑒬𑒱 𑒮𑒰𑒿𑒗𑒧𑒹 𑒁𑒨𑒪𑒰𑒯 𑒠𑒹𑒐𑒪 𑒏𑒯𑒪 𑒦𑒹𑒪𑒲𑒯 𑒧𑒳𑒃𑒪
𑒑𑒰𑒧𑒣𑒩 𑒏𑓂𑒨𑒼 𑒢𑒯𑒱 𑒅𑒚𑒹𑒪𑒏 𑒬𑒫𑒏𑒹𑒿 𑒏𑒱𑒋𑒏 ? 𑒯𑒧 𑒏𑒼𑒢𑒰 𑒕𑒳𑒥𑒱𑒞𑒯𑒳𑒿 𑒦𑒰𑒥𑒯𑒳 𑒍 𑒯𑒼𑒨𑒞𑒲𑒯 𑒧𑒳𑒃𑒪 𑒣𑒩 𑒦𑒰𑒥𑒯𑒳 𑒏𑒲 𑒦𑒻𑒮𑒳𑒩 𑒏𑒹𑒪𑒯𑒳𑒿 𑒁𑒞𑒞𑓂𑒞𑒯 𑒮𑒧𑒨 𑒥𑒠𑒪𑒪 𑒢𑒯𑒱 𑒥𑒠𑒪𑒪 𑒄 𑒑𑒰𑒧 𑒯𑒧𑒩

𑒁𑒞𑒱𑒔𑒰𑒩
𑒞𑒲𑒢 𑒮𑒰𑒪 𑒕𑒪 𑒁𑒞𑒱𑒔𑒰𑒩 𑒢𑒯𑒱 𑒯𑒼𑒨𑒞 𑒋𑒯𑒱 𑒏𑒰𑒩𑒝 𑒥𑒱𑒨𑒰𑒯 𑒣𑓀𑒛𑒱𑒞𑒥𑒹 𑒮𑒦 𑒥𑒳𑒗𑒟𑒳𑒢𑓂𑒯 𑒕𑒢𑓂𑒯𑒱 𑒣𑒞𑒩𑒰 𑒮𑒦 𑒖𑒹 𑒥𑒱𑒏𑒰𑒃𑒞 𑒣𑒏𑒛𑓃𑒞 𑒮𑒦 𑒥𑒢𑒰𑒩𑒮𑒲 𑒣𑒞𑒩𑒰𑒏𑒹𑒿 𑒮𑒹𑒯𑒼 𑒢𑒯𑒱 𑒥𑒱𑒏𑒰𑒍𑒞
𑒮𑒧𑒨 𑒁𑒦𑒰𑒫𑒹𑒿 𑒯𑒼𑒨𑒞 𑒄 𑒖𑓂𑒨𑒼𑒿 𑒁𑒞𑒱𑒬𑒨 𑒦𑓄 𑒖𑒰𑒨𑒞

𑒩𑒥𑒛𑓃 𑒐𑒰𑒆
𑒩𑒥𑒛𑓃 𑒐𑒰𑒆 𑒂 𑒫𑒧𑒢 𑒏𑒩𑒴 𑒔𑒙𑓂𑒙𑒲 𑒁𑒣𑒔𑒢𑒲𑒨 𑒞𑒟𑓂𑒨 𑒮𑒦 𑒠𑒹𑒐𑒪 𑒦𑓂𑒩𑒰𑒞 𑒥𑒛𑓃 𑒕𑒪 𑒥𑒳𑒡𑒱𑒨𑒰𑒩 𑒏𑒹𑒪𑒏 𑒒𑒙𑒏𑒻𑒞𑒲 𑒬𑒳𑒩𑒴 𑒖𑒐𑒢 𑒦𑒹𑒪 𑒮𑒱𑒠𑓂𑒡𑒰𑓀𑒞 𑒫𑒱𑒫𑒰𑒠 𑒫𑒱𑒫𑒰𑒯 𑒚𑒲𑒏 𑒦𑒹𑒪𑒰𑒏 𑒥𑒰𑒠𑒏 𑒠𑒼𑒮𑒩 𑒮𑒱𑒠𑓂𑒡𑒰𑓀𑒞 𑒪𑒛𑓃𑒏𑒰 𑒫𑒱𑒫𑒰𑒯 𑒏𑒰𑒪𑒧𑒹 𑒥𑒱𑒮𑒩𑒪𑒰𑒯 𑒦𑒰𑒭𑒝 𑒢𑒫 𑒮𑒱𑒠𑓂𑒡𑒰𑓀𑒞𑒏 𑒮𑒵𑒖𑒢 𑒏𑒨 𑒏𑒹𑒪𑒢𑓂𑒯𑒱 𑒮𑒧𑓂𑒧𑒰𑒩𑓂𑒖𑒢

𑒥𑒰𑒖𑒰 𑒁𑒯𑒰𑒿 𑒥𑒖𑒰𑒆
𑒧𑒹𑒯𑒢𑒞𑒱 𑒁𑒯𑒰𑒿 𑒏𑒩𑒴 𑒤𑒪 𑒯𑒧𑒩𑒰 𑒠𑒱𑒁
𑒔𑒱𑒞𑓂𑒩 𑒁𑒯𑒰𑒿 𑒥𑒢𑒰𑒆 𑒂𑒫𑒩𑒝 𑒮𑒖𑒰𑒆 𑒯𑒧𑒩 𑒏𑒱𑒞𑒰𑒥𑒏
𑒢𑒵𑒞𑓂𑒨 𑒯𑒧 𑒏𑒩𑒴 𑒥𑒰𑒖𑒰 𑒁𑒯𑒰𑒿 𑒥𑒖𑒰𑒆
𑒏𑒵𑒞𑒱 𑒯𑒧𑒩 𑒩𑒯𑒞 𑒧𑒹𑒯𑒢𑒞𑒱 𑒏𑒩𑒥 𑒁𑒯𑒰𑒿 𑒂𑒃𑒮𑒿 𑒢𑒯𑒱 𑒄 𑒥𑒰𑒞
𑒁𑒕𑒱 𑒞𑒯𑒱𑒨𑒰𑒮𑒿 𑒖𑒯𑒱𑒨𑒰𑒮𑒿 𑒬𑒰𑒯𑒖𑒯𑒰𑒿

𑒣𑒱𑒝𑓂𑒛𑒬𑓂𑒨𑒰𑒧
𑒠𑒯𑒹𑒖 𑒫𑒱𑒩𑒼𑒡𑒲 𑒣𑓂𑒩𑒼𑒤𑒹𑒮𑒩 𑒏𑒹𑒩 𑒮𑒳𑒢𑒴 𑒄 𑒥𑒰𑒞 𑒣𑒳𑒞𑓂𑒩𑒲 𑒫𑒱𑒫𑒰𑒯𑒧𑒹 𑒏𑒋𑒪 𑒋𑒏𑒩 𑒜𑒹𑒩 𑒣𑓂𑒩𑒔𑒰𑒩
𑒣𑒳𑒞𑓂𑒩𑒏 𑒫𑒱𑒫𑒰𑒯𑒧𑒹 𑒥𑒠𑒪𑒱 𑒮𑒱𑒠𑓂𑒡𑒰𑓀𑒞 𑒫𑒡𑒴 𑒩𑒯𑒨 𑒬𑓂𑒨𑒰𑒧 𑒧𑒳𑒠𑒰 𑒧𑒰𑒩𑒳𑒞𑒱 𑒦𑒹𑒙𑒨 𑒬𑓂𑒫𑒹𑒞 𑒮𑒱𑒠𑓂𑒡𑒰𑓀𑒞𑒏 𑒧𑒴𑒪𑒧𑒹
𑒕𑒼𑒛𑓃𑒴 𑒫𑒱𑒫𑒹𑒏 !

𑒣𑒰𑒿𑒔 𑒣𑒰𑒃𑒏 𑒪𑒰𑒪𑒕𑒛𑓃𑒲
𑒣𑒩𑒱𑒫𑒰𑒩 𑒕𑒪 𑒔𑒪𑒰 𑒩𑒯𑒪 𑒥𑒹𑒔𑒱 𑒦𑒩𑒱 𑒠𑒱𑒢 𑒣𑒰𑒿𑒔 𑒣𑒰𑒃𑒏 𑒪𑒰𑒪𑒕𑒛𑓃𑒲 𑒠𑒮 𑒣𑒰𑒃𑒧𑒹 𑒏𑒢𑒹𑒏 𑒧𑒼𑒙 𑒪𑒣𑒹𑒙𑒢
𑒢𑒯𑒰𑒃𑒞 𑒮𑒰𑒿𑒗𑒧𑒹 𑒚𑒹𑒪𑒰 𑒔𑒪𑒰 𑒏𑒨 𑒂𑒨𑒪 𑒥𑒹𑒙𑒰𑒏𑒹𑒿 𑒣𑒜𑓃𑒰𑒨𑒪 𑒂𑒃.𑒂𑒃.𑒙𑒲.𑒧𑒹 𑒣𑒜𑓃𑒱 𑒢𑒱𑒏𑒪𑒪 𑒏𑒋𑒪𑒏 𑒫𑒱𑒫𑒰𑒯 𑒖𑒖𑒏 𑒕𑒪𑒱 𑒍 𑒥𑒹𑒙𑒲
𑒣𑒱𑒞𑒰 𑒏𑒼𑒢 𑒏𑒭𑓂𑒙𑒮𑒿 𑒣𑒜𑒰𑒍𑒪 𑒑𑒹𑒪 𑒥𑒱𑒮𑒩𑒱 𑒣𑒱𑒞𑒰𑒏 𑒮𑓂𑒧𑒵𑒞𑒱𑒮𑒿 𑒠𑒴𑒩 𑒢𑒬𑒰-𑒧𑒠𑒱𑒩𑒰𑒧𑒹 𑒪𑒲𑒢 𑒏𑒢𑒱𑒨𑒰𑒿 𑒣𑒩𑒹𑒬𑒰𑒢 𑒪𑒑𑒹𑒪𑒢𑓂𑒯𑒱 𑒂𑒑𑒱 𑒗𑒛𑓃𑒏𑒪𑒱 𑒍𑒏𑒩𑒰 𑒥𑒔𑒹𑒥𑒰𑒧𑒹 𑒍𑒯𑒼 𑒑𑒹𑒪𑒰 𑒗𑒛𑓃𑒏𑒱

𑒏𑒢𑒱𑒨𑒰𑒿 𑒞𑒿 𑒑𑒳𑒖𑒱𑒩𑒱 𑒑𑒹𑒪𑒲𑒯 𑒚𑒰𑒧𑒹
𑒧𑒳𑒠𑒰 𑒍 𑒞𑒲𑒢 𑒧𑒰𑒮 𑒡𑒩𑒱 𑒏𑒭𑓂𑒙 𑒏𑒰𑒙𑒱 𑒣𑒬𑓂𑒔𑒰𑒞𑓂𑒞𑒰𑒣 𑒏𑒋 𑒧𑒳𑒃𑒪𑒰𑒯 𑒥𑒹𑒔𑒰𑒩𑒹

𑒔𑒼𑒩𑒳𑒏𑓂𑒏𑒰 𑒫𑒱𑒫𑒰𑒯
𑒮𑒱𑒐𑒰𑒨𑒥
𑒯𑒱𑒮𑓂𑒮𑒏 𑒕𑒴𑒙𑒞 𑒢𑒯𑒱 𑒂𑒢𑒥 𑒏𑒢𑒱𑒨𑒰𑒿𑒏𑒹𑒿 𑒦𑒰𑒨𑒏 𑒧𑒰𑒟 𑒙𑒴𑒙𑒞 !
𑒦𑒹𑒪 𑒡𑒧𑒑𑒱𑒖𑓂𑒖𑒩 𑒮𑒰𑒪𑒏 𑒮𑒰𑒪 𑒥𑒲𑒞𑒪 𑒨𑒳𑒫𑒏-𑒨𑒳𑒫𑒞𑒲 𑒠𑒳𑒢𑒴 𑒦𑒹𑒪 𑒔𑒼𑒩 𑒫𑒱𑒫𑒰𑒯𑒏 𑒏𑒻𑒠𑒲
𑒢𑒯𑒱 𑒕𑒪 𑒏𑒼𑒢𑒼 𑒯𑒰𑒟 𑒣𑒩𑓀𑒔 𑒕𑒪 𑒮𑒖𑒰 𑒣𑒥𑒻𑒞
𑒦𑒰𑒑𑒪 𑒒𑒩𑒮𑒿 𑒨𑒳𑒫𑒏 𑒂𑒥 𑒣𑒕𑒞𑒰𑒨𑒪 𑒒𑒩𑒥𑒰𑒩𑒲 𑒧𑒳𑒠𑒰 𑒏𑒲 𑒯𑒼𑒨𑒞 𑒂𑒥 𑒍 𑒮𑒧𑒰𑒖𑒏 𑒫𑓂𑒨𑒦𑒱𑒔𑒰𑒩𑒲

𑒋𑒪𑒹𑒏𑓂𑒬𑒢𑒏 𑒗𑒑𑒛𑓃𑒰𑒧𑒹 𑒦𑒰𑒨-𑒦𑒰𑒨𑒏𑒹𑒿 𑒧𑒰𑒩𑒪 𑒔𑒼𑒩𑒳𑒏𑓂𑒏𑒰 𑒫𑒱𑒫𑒰𑒯𑒏 𑒒𑒙𑒢𑒰𑒧𑒹 𑒍𑒏𑒩𑒰 𑒠𑒼𑒯𑒩𑒰𑒨𑒪 !


𑒦𑓂𑒩𑒰𑒞𑒵𑒠𑓂𑒫𑒱𑒞𑒲𑒨𑒰
𑒏𑒨 𑒚𑒰𑒿𑒆 𑒥𑒻𑒮𑒪𑒱 𑒂𑒮𑒧𑒹 𑒕𑒪𑒱 𑒦𑒰𑒨 𑒂𑒍𑒞

𑒂𑒿𑒐𑒱𑒏 𑒢𑒼𑒩 𑒕𑒪 𑒮𑒳𑒐𑒰𑒨𑒪 𑒮𑒰𑒪𑒧𑒹 𑒋𑒏 𑒥𑒹𑒩 𑒕𑒪 𑒁𑒥𑒻𑒞 𑒔𑒝𑓂𑒛𑒰𑒪
𑒏𑒢𑒱𑒨𑒰𑒿𑒏 𑒑𑒣 𑒣𑒩
𑒮𑒹𑒯𑒼 𑒏𑓂𑒩𑒧 𑒄 𑒙𑒴𑒙𑒪
𑒏𑒨 𑒚𑒰𑒿𑒆 𑒥𑒻𑒮𑒪𑒱 𑒡𑒼𑒐𑒩𑒱 𑒁𑒩𑒱𑒣𑒢 𑒫𑒱𑒮𑒩𑓂𑒖𑒱𑒞 𑒠𑒱𑒢 𑒥𑒲𑒞𑒪 𑒕𑒪 𑒮𑒰𑒿𑒗 𑒂𑒨𑒪


𑒢𑒫-𑒒𑒩𑒰𑒩𑒲
𑒮𑒰𑒿𑒣 𑒏𑒰𑒙𑒪 𑒢𑒢𑓂𑒠𑒱𑒢𑒲𑒏𑒹𑒿 𑒢𑒫 𑒒𑒩𑒰𑒩𑒲 𑒪𑒹𑒪𑒏 𑒐𑒴𑒢 𑒙𑒼𑒪𑒏 𑒒𑒩𑒰𑒩𑒲 𑒕𑒼𑒛𑓃𑒴 𑒖𑒳𑒢𑒱 !
𑒄 𑒫𑒱𑒬𑒰𑒪 𑒖𑒢𑒮𑓀𑒐𑓂𑒨𑒰 𑒋𑒞𑒨 𑒕𑒪 𑒥𑒢𑒪 𑒋𑒏𑒙𑒰 𑒏𑒰𑒪 𑒄 𑒢𑒫-𑒒𑒩𑒰𑒩𑒲 𑒪𑒹𑒪𑒏 𑒣𑓂𑒩𑒰𑒝 𑒙𑒼𑒪𑒏 𑒒𑒩𑒰𑒩𑒲 𑒮𑒰𑒥𑒱𑒏𑒏 𑒛𑒲𑒯 𑒣𑒩𑒘𑓂𑒔 𑒁𑒕𑒱 𑒕𑒼𑒙 𑒂𑒥 𑒏𑒲 ?
𑒐𑒴𑒢 𑒪𑒹𑒪𑒏 𑒂𑒥 𑒄 𑒥𑒢𑒱 𑒑𑒹𑒪 𑒁𑒐𑓂𑒐𑒖 𑒢𑒫 𑒒𑒩𑒰𑒩𑒲 𑒯𑒼𑒨𑒞 𑒕𑒼𑒙 𑒏𑒱𑒕𑒳 𑒏𑒰𑒪 𑒁𑒢𑒢𑓂𑒞𑒩


𑒩𑒱𑒏𑓂𑒞
𑒣𑒰𑒿𑒔𑒧 𑒫𑒩𑓂𑒑𑒮𑒿 𑒮𑒰𑒞𑒧 𑒫𑒩𑓂𑒑𑒧𑒹 𑒞𑒛𑓃𑒣𑒱 𑒑𑒹𑒪 𑒕𑒪𑒯𑒳𑒿 𑒯𑒧 𑒕𑒙𑓂𑒚𑒰 𑒫𑒩𑓂𑒑𑒏 𑒁𑒢𑒳𑒦𑒫 𑒁𑒕𑒱 𑒩𑒱𑒏𑓂𑒞 𑒥𑒰 𑒂 𑒥𑒰𑒥𑒰 𑒖𑒢𑓂𑒧𑒏 𑒣𑒯𑒱𑒢𑒯𑒱
𑒣𑓂𑒩𑒰𑒣𑓂𑒞 𑒏𑒋𑒪𑒢𑓂𑒯𑒱 𑒧𑒵𑒞𑓂𑒨𑒳 𑒫𑒰𑒞𑓂𑒮𑓂𑒪𑓂𑒨𑒏 𑒁𑒢𑒳𑒦𑒫 𑒦𑒹𑒪 𑒩𑒱𑒏𑓂𑒞 𑒧𑒰𑒿 𑒋𑒏𑒹 𑒥𑒯𑒱𑒢𑒱 𑒕𑒪𑒱 𑒞𑒹𑒿 𑒧𑒾𑒮𑒲-𑒧𑒾𑒮𑒰𑒏 𑒁𑒢𑒳𑒦𑒫𑒼 𑒢𑒯𑒱 𑒄𑒯𑒼 𑒩𑒯𑒪 𑒩𑒱𑒏𑓂𑒞
𑒏𑓂𑒨𑒼 𑒏𑒯𑒻𑒞 𑒁𑒕𑒱 𑒖𑒹 𑒕𑒚𑒰𑒧𑒹 𑒣𑒜𑓃𑒻𑒞 𑒕𑒲 𑒥𑒰 𑒂 𑒥𑒰𑒥𑒰𑒏 𑒮𑓀𑒑 𑒒𑒳𑒧𑒻𑒞 𑒕𑒲 𑒧𑒾𑒮𑒲-𑒧𑒾𑒮𑒰𑒏 𑒏𑒰𑒖 𑒅𑒠𑓂𑒨𑒧𑒧𑒹 𑒖𑒰𑒃𑒞 𑒕𑒲 𑒞𑒿 𑒯𑒧 𑒏𑒯𑒻𑒞 𑒕𑒲 𑒖𑒹 𑒄 𑒏𑒼𑒢 𑒮𑓀𑒥𑓀𑒡 𑒏𑒼𑒢 𑒫𑒩𑓂𑒑 𑒁𑒕𑒱 𑒄 𑒕𑒼𑒛𑓃𑒱 𑒮𑒏𑒻𑒞 𑒕𑒲
𑒅𑒞𑓂𑒞𑒩 𑒦𑒹𑒙𑒻𑒕 𑒁𑒯𑒰𑒿 𑒢𑒯𑒱 𑒥𑒳𑒗𑒥
𑒧𑒳𑒠𑒰 𑒢𑒫 𑒮𑓀𑒥𑓀𑒡 𑒢𑒥 𑒢𑒑𑒩 𑒢𑒫 𑒦𑒰𑒭𑒰 𑒢𑒫𑒲𑒢 𑒣𑒲𑒜𑓃𑒲𑒏𑒹𑒿 𑒏𑒼𑒢𑒰 𑒥𑒳𑒗𑒰𑒨𑒥 𑒍 𑒏𑒼𑒢𑒰 𑒥𑒳𑒗𑒞 ? 𑒍 𑒞𑒿 𑒢𑒯𑒱 𑒥𑒴𑒗𑒱 𑒮𑒏𑒞 𑒏𑒰𑒏𑒰-𑒏𑒰𑒏𑒲 𑒢𑒯𑒱 𑒥𑒴𑒗𑒞 𑒠𑒲𑒨𑒰-𑒥𑒰𑒞𑒲 𑒐𑒙𑒻𑒞 𑒠𑒾𑒛𑓃𑒻𑒞 𑒂 𑒢𑒯𑒱 𑒒𑒳𑒩𑒱 𑒂𑒍𑒞 𑒏𑒏𑒩𑒰 𑒥𑒳𑒗𑒰𑒨𑒥 𑒂 𑒏𑒹 𑒥𑒴𑒗𑒞 ?

𑒣𑓂𑒩𑒫𑒰𑒮𑒲
𑒮𑓀𑒑𑒯𑒱 𑒏𑒰𑒙𑒪 𑒒𑒰𑒮 𑒧𑒯𑒲𑒮 𑒮𑓀𑒑𑒹 𑒔𑒩𑒹𑒪𑒯𑒳𑒿 𑒣𑒳𑒕𑒻𑒞 𑒕𑒲 𑒑𑒯𑒴𑒧 𑒄 𑒣𑒰𑒏𑒞 𑒏𑒯𑒱𑒨𑒰?
𑒠𑒴 𑒠𑒱𑒢 𑒠𑒱𑒪𑓂𑒪𑒲 𑒑𑒹𑒪𑒯𑒳𑒿 𑒮𑒦𑒙𑒰 𑒥𑒱𑒮𑒩𑒪𑒯𑒳𑒿 𑒄𑒯𑒼 𑒥𑒱𑒮𑒩𑒱 𑒑𑒹𑒪𑒯𑒳𑒿 𑒖𑒹 𑒡𑒰𑒢 𑒏𑒙𑒰𑒃𑒕 𑒏𑒯𑒱𑒨𑒰 ?


𑒫𑒹𑒠
𑒫𑒹𑒠 𑒫𑒰𑒏𑓂𑒨 𑒣𑒩𑒧 𑒮𑒞𑓂𑒨 𑒮𑓀𑒮𑓂𑒏𑒵𑒞 𑒮𑒰𑒯𑒱𑒞𑓂𑒨 𑒁𑒞𑒱 𑒅𑒞𑓂𑒞𑒧 𑒏𑒩𑒻𑒞 𑒕𑒲 𑒁𑒯𑒰𑒿 𑒫𑒏𑓂𑒞𑓂𑒞𑒫𑓂𑒨 𑒧𑒳𑒠𑒰 𑒁𑒯𑒰𑒿 𑒏𑒲 𑒁𑒯𑒰𑒿𑒏 𑒣𑒳𑒩𑒐𑒰 𑒧𑒩𑒱 𑒑𑒹𑒪𑒰𑒯 𑒥𑒱𑒢 𑒮𑒳𑒢𑒢𑒹 𑒫𑒹𑒠 𑒫𑒰𑒏𑓂𑒨
𑒥𑒱𑒢 𑒣𑒜𑓃𑒢𑒹 𑒮𑓀𑒮𑓂𑒏𑒵𑒞

𑒨𑒾 𑒁𑒯𑒰𑒿 𑒢𑒯𑒱 𑒣𑒜𑓃𑒪𑒯𑒳𑒿 𑒁𑒯𑒰𑒿 𑒁𑒢𑒏𑒰 𑒁𑒢𑒡𑒱𑒏𑒰𑒩 𑒥𑒢𑒹𑒥𑒰𑒏 𑒔𑒹𑒭𑓂𑒙𑒰 𑒏𑒋𑒪𑒯𑒳𑒿 𑒁𑒯𑒰𑒿

𑒕𑒲 𑒫𑒹𑒠𑒏 𑒁𑒣𑓂𑒩𑒹𑒧𑒲 𑒢𑒯𑒱 𑒁𑒕𑒱 𑒏𑓂𑒭𑒧𑒞𑒰 𑒫𑒹𑒠𑒏 𑒣𑒏𑓂𑒭 𑒂𑒏𑒱 𑒫𑒱𑒣𑒏𑓂𑒭𑒧𑒹 𑒥𑒖𑒥𑒰𑒏 𑒫𑒹𑒠 𑒫𑒰𑒏𑓂𑒨 𑒮𑒞𑓂𑒨
𑒋𑒏𑒩𑒰 𑒥𑒢𑒹𑒢𑒹 𑒕𑒲 𑒁𑒯𑒰𑒿 𑒤𑒏𑒛𑓃𑒰

𑒔𑒼𑒩𑒱
𑒑𑒹𑒪𑒯𑒳𑒿 𑒑𑒰𑒧 𑒂 𑒋𑒧𑓂𑒯𑒩 𑒂𑒨𑒪 𑒤𑒼𑒢 𑒮𑒧𑒰𑒔𑒰𑒩 𑒔𑒼𑒩𑒱𑒏 𑒕𑒳𑒙𑓂𑒙𑒲 𑒯𑒼𑒨𑒥𑒪𑒰 𑒕𑒪 𑒮𑒧𑒰𑒣𑓂𑒞 𑒧𑒳𑒠𑒰 𑒔𑒼𑒩𑒏 𑒑𑒝𑒢𑒰 𑒕𑒪 𑒚𑒲𑒏

𑒂𑒥𑒨𑒮𑒿 𑒋𑒏𑓂𑒏𑒹 𑒠𑒱𑒢 𑒣𑒯𑒱𑒢𑒹 𑒪𑒑𑒹𑒪𑒢𑓂𑒯𑒱 𑒒𑒰𑒞 𑒞𑒼𑒛𑓃𑒱 𑒏𑒨 𑒏𑒹𑒥𑒰𑒛𑓃 𑒅𑒡𑒹𑒮𑒪 𑒒𑒩-𑒥𑒰𑒩 𑒢𑒯𑒱 𑒣𑒰𑒥𑒱 𑒏𑒼𑒢𑒼𑒙𑒰 𑒔𑒲𑒖 𑒒𑒳𑒩𑒪 𑒧𑒰𑒟 𑒣𑒲𑒙𑒱
𑒦𑒼𑒩𑒧𑒹 𑒣𑒛𑓃𑒼𑒮𑒲 𑒏𑒋𑒪𑒢𑓂𑒯𑒱 𑒛𑒰𑒨𑒪 𑒮𑒨 𑒣𑒳𑒪𑒱𑒮 𑒂𑒨𑒪 𑒯𑒰𑒩𑒱 𑒟𑒰𑒏𑒱 𑒏𑒨 𑒣𑒛𑓃𑒼𑒮𑒲𑒮𑒿 𑒏𑒱𑒢𑒥𑒰𑒨 𑒠𑒴 𑒙𑒰 𑒁𑒞𑒱𑒩𑒱𑒏𑓂𑒞 𑒞𑒰𑒪 (𑒣𑒳𑒪𑒱𑒮 𑒧𑒯𑒩𑒰𑒖 𑒁𑒣𑒢 𑒒𑒩𑒏 𑒯𑒹𑒞𑒳 𑒋𑒏𑒙𑒰 𑒥𑒹𑒬𑒲𑒨𑒹 𑒏𑓄) 𑒔𑒰𑒦𑒲 𑒪𑒹𑒪𑒢𑓂𑒯𑒱 𑒁𑒣𑒢 𑒏𑒰𑒥𑒱𑒖𑒧𑒹
𑒔𑒼𑒩 𑒯𑒩𑒥𑒛𑓃𑒲𑒧𑒹 𑒕𑒪 𑒔𑒪𑒱 𑒑𑒹𑒪 𑒧𑒳𑒠𑒰 𑒣𑒳𑒪𑒱𑒮 𑒧𑒯𑒰𑒬𑒨𑒏 𑒯𑒰𑒟 𑒔𑒰𑒦𑒲 𑒂𑒋𑒪 𑒂 𑒬𑒼-𑒏𑒹𑒬𑒏 𑒔𑒰𑒢𑒲𑒏 𑒢𑒩𑓂𑒞𑓂𑒞𑒏𑒲 𑒑𑒳𑒧 𑒦𑒹𑒪
𑒔𑒼𑒩𑒏𑒹𑒿 𑒕𑒪 𑒛𑒩 𑒑𑒹𑒙𑒏 𑒠𑒩𑒥𑒰𑒢𑒏 𑒮𑒹 𑒕𑒪𑒰𑒯 𑒍 𑒑𑒯𑒢𑒰𑒏 𑒂 𑒢𑒏𑒠𑒲𑒏 𑒞𑒰𑒏𑒱𑒧𑒹
𑒧𑒳𑒠𑒰 𑒣𑒳𑒪𑒱𑒮 𑒧𑒯𑒰𑒩𑒰𑒖 𑒠𑒨 𑒩𑒰𑒥 𑒠𑒾𑒥 𑒠𑒩𑒥𑒰𑒢𑒯𑒳𑒿𑒏𑒹𑒿 𑒢𑒱𑒏𑒪𑒪𑒰𑒯 𑒔𑒼𑒩𑒱 𑒏𑒨 𑒥𑒩𑒖𑒼𑒛𑓃𑒲𑒮𑒿

𑒯𑒼𑒪𑒲
𑒡𑒳𑒩𑒐𑒹𑒪𑒏 𑒏𑒰𑒠𑒼-𑒧𑒰𑒙𑒱𑒮𑒿 𑒩𑒯𑒟𑒱 𑒁𑒏𑒔𑓂𑒕 𑒩𑓀𑒑 𑒁𑒥𑒲𑒩 𑒦𑒢𑒹 𑒂𑒨𑒪 𑒧𑒳𑒠𑒰 𑒪𑒑𑒻𑒕 𑒙𑒏𑒰
𑒮𑒰𑒤-𑒮𑒳𑒟𑒛𑓃𑒰 𑒥𑒳𑒗𑒻𑒞 𑒕𑒪𑒯𑒳𑒿 𑒋𑒏𑒩𑒰 𑒧𑒳𑒠𑒰 𑒢𑒱𑒥𑓀𑒡 𑒢𑒱𑒏𑒪𑒻𑒞 𑒁𑒕𑒱 𑒩𑓀𑒑𑒏 𑒏𑒹𑒧𑒱𑒏𑒪𑒏 𑒫𑒱𑒭𑒨𑒧𑒹 𑒫𑒱𑒭𑒨 𑒁𑒕𑒱 𑒣𑒳𑒩𑒢𑒏𑒹
𑒫𑒋𑒯 𑒕𑒪 𑒚𑒲𑒏 𑒨𑒾 𑒏𑒏𑒰

𑒠𑒰𑒩𑒴 𑒣𑒱𑒢𑒯𑒰𑒩 𑒮𑒼𑒧𑒩𑒮𑒏 𑒔𑒩𑓂𑒔𑒰 𑒏𑒩𑒻𑒞 𑒢𑒯𑒱 𑒁𑒒𑒰𑒃𑒞 𑒕𑒟𑒱 𑒠𑒹𑒫𑒞𑒼 𑒣𑒱𑒥𑒻𑒞 𑒩𑒯𑒟𑒱 𑒍𑒏𑒩𑒰 𑒣𑒳𑒩𑒢𑒏𑒰 𑒢𑒰𑒧𑒮𑒿
𑒁𑒕𑒱 𑒯𑒼𑒪𑒲
𑒧𑒱𑒞𑓂𑒩𑒞𑒰 𑒥𑒜𑓃𑒹𑒥𑒰𑒮𑒿 𑒥𑒹𑒬𑒲 𑒒𑒙𑒰 𑒩𑒯𑒪 𑒁𑒕𑒱 𑒂𑒃 𑒏𑒰𑒪𑓂𑒯𑒱 𑒄


𑒥𑒳𑒠𑓂𑒡
𑒯𑒵𑒠𑒨 𑒪𑒑 𑒁𑒕𑒱 𑒖𑒹𑒥𑒲 𑒮𑒹 𑒖𑒐𑒢 𑒩𑒯𑒨 𑒐𑒰𑒪𑒲 𑒧𑒼𑒢 𑒏𑒼𑒢𑒰 𑒩𑒯𑒞 𑒣𑓂𑒩𑒮𑒢𑓂𑒢 𑒥𑒳𑒠𑓂𑒡 𑒮𑒹𑒯𑒼 𑒏𑒯𑒱 𑒑𑒹𑒪 𑒕𑒪𑒰𑒯 𑒄
𑒧𑒳𑒧𑓂𑒥𑒃𑒧𑒹 𑒮𑒴𑒣 𑒧𑒿𑒑𑒪𑒯𑒳𑒿 𑒣𑒳𑒕𑒪𑒏 𑒁𑒯𑒰𑒿 𑒮𑒦𑒧𑒹 𑒖𑒻𑒢𑒲 𑒏𑒻𑒏𑒙𑒰 𑒕𑒲 𑒠𑒹𑒞 𑒪𑒯𑒮𑒳𑒢 𑒏𑒲 𑒢𑒯𑒱 𑒩𑒯𑒨 𑒞𑒰𑒞𑓂𑒣𑒩𑓂𑒨 𑒂𑒣𑒠𑓂𑒏𑒰𑒪𑒹 𑒩𑒯𑒱 𑒑𑒹𑒪 𑒁𑒕𑒱 𑒂𑒃 𑒏𑒰𑒪𑓂𑒯𑒱 𑒮𑒠𑒱𑒐𑒢
𑒧𑒳𑒧𑓂𑒥𑒃 𑒮𑒹𑒪 𑒙𑒻𑒏𑓂𑒮𑒧𑒹 𑒏𑒩𑒻𑒞 𑒕𑒟𑒱 𑒦𑒩𑒱 𑒠𑒱𑒢 𑒏𑒰𑒖 𑒞𑒻𑒿 𑒣𑓂𑒩𑒼𑒢𑒢𑒬𑒱𑒨𑒹𑒬𑒢 𑒦𑒹𑒪 𑒕𑒢𑓂𑒯𑒱 𑒧𑒩𑒰𑒚𑒲
“𑒕𑒲 𑒯𑒧𑒯𑒳𑒿 𑒃𑒪𑒰𑒏𑒹𑒏 𑒪𑒼𑒏 𑒅𑒞𑓂𑒣𑒰𑒠 𑒫𑒱𑒦𑒰𑒑 𑒁𑒕𑒱 𑒏𑒹𑒢𑓂𑒠𑓂𑒩𑒲𑒨 𑒮𑒩𑒏𑒰𑒩 𑒮𑓀𑒣𑒩𑓂𑒏 𑒥𑒰𑒯𑒩𑒲𑒮𑒿 𑒥𑒹𑒬𑒲 𑒏𑒢𑒱𑒨𑒰𑒿 𑒏𑒩𑒃 𑒕𑒟𑒱 𑒍𑒞𑒯𑒱 𑒏𑒰𑒖 𑒯𑒳𑒢𑒏𑒩 𑒥𑒼𑒪𑒲 𑒕𑒢𑓂𑒯𑒱 𑒠𑒹𑒬𑒲”
𑒕𑒞𑓂𑒞𑒲𑒮𑒑𑒜𑓃𑒏 𑒕𑒞𑓂𑒞𑒲𑒮 𑒒𑓀𑒙𑒰𑒏 𑒨𑒰𑒞𑓂𑒩𑒰 𑒅𑒞𑓂𑒞𑒩-𑒧𑒡𑓂𑒨 𑒏𑓂𑒭𑒹𑒞𑓂𑒩𑒏 𑒮𑓂𑒞𑒴𑒣𑒏 𑒥𑓀𑒑𑒰𑒪 - 𑒣𑓀𑒖𑒰𑒥 𑒒𑒴𑒧𑒪 𑒥𑓀𑒑𑒰𑒪𑒲 𑒏𑒯𑒪𑒢𑓂𑒯𑒱 𑒮𑒳𑒢𑒳 𑒖𑒹 𑒖𑓂𑒨𑒼𑒿 𑒥𑓀𑒑𑒰𑒪𑒲 𑒖𑒰𑒨𑒞 𑒮𑓀𑒑 𑒏𑒩𑒞 𑒏𑒰𑒢𑒴𑒢𑒲 𑒥𑒰𑒞 𑒮𑒩𑒠𑒰𑒩𑒖𑒲 𑒏𑒯𑒪𑒢𑓂𑒯𑒱 𑒩𑒼𑒛 𑒣𑒩 𑒩𑒹𑒛 𑒪𑒰𑒃𑒙 𑒩𑒯𑒪𑒼 𑒏𑒩𑒴 𑒣𑒰𑒩
𑒮𑒼𑒗𑒰𑒿𑒮𑒿 𑒁𑒥𑒻𑒞 𑒕𑒪 𑒋𑒏𑒙𑒰 𑒮𑒩𑒠𑒰𑒩
𑒏𑒯𑒪 𑒏𑒩𑒞 𑒂𑒥 𑒄 𑒁𑒩𑒰𑒛𑓃𑒱

𑒮𑒏𑓂𑒮𑒹𑒢𑒰 𑒏𑒯𑒪𑒏 𑒋𑒏 𑒧𑒻𑒟𑒱𑒪𑒏𑒹𑒿- 𑒧𑒻𑒟𑒱𑒪 𑒁𑒕𑒱 𑒧𑒻𑒟𑒱𑒪𑒏 𑒣𑒩𑒧 𑒬𑒞𑓂𑒩𑒳 𑒯𑒧 𑒏𑒯𑒪 𑒮𑒏𑓂𑒮𑒹𑒢𑒰𑒏𑒹𑒿 𑒯𑒹
𑒖𑒳𑒢𑒱 𑒏𑒩𑒴 𑒯𑒳𑒢𑒏𑒰 𑒠𑒴𑒩𑒱 𑒏𑒰𑒖 𑒮𑒦𑒙𑒰 𑒗𑒙 𑒏𑒩𑒰𑒆 𑒖𑒳𑒢𑒱 𑒦𑒛𑓃𑒏𑒰𑒆

𑒥𑒳𑒠𑓂𑒡𑒏 𑒦𑒴𑒧𑒱𑒮𑒿 𑒒𑒳𑒩𑒱 𑒂𑒨𑒪 𑒕𑒟𑒱 𑒠𑒱𑒪𑓂𑒪𑒲𑒏 𑒮𑒛𑓃𑒏 𑒣𑒩 𑒋𑒯𑒱 𑒥𑒹𑒩 𑒣𑒰𑒙𑒪𑒱𑒣𑒳𑒞𑓂𑒩 𑒦𑒰𑒩𑒞𑒏 𑒩𑒯𑒨 𑒩𑒰𑒖𑒡𑒰𑒢𑒲 𑒠𑒱𑒪𑓂𑒪𑒲 𑒥𑒢𑒪 𑒩𑒰𑒖𑒡𑒰𑒢𑒲 𑒂𑒥 𑒕𑒪𑒯𑒳𑒿 𑒞𑒞𑒨 𑒣𑒳𑒢𑒱 𑒤𑒹𑒩
𑒏𑒼𑒢 𑒖𑒳𑒪𑒳𑒧 𑒯𑒧 𑒏𑒋𑒪 𑒂𑒥𑒱 𑒋𑒞𑒋 ?
𑒏𑒝𑒰𑒠 𑒏𑒣𑒱𑒪 𑒑𑒾𑒞𑒧 𑒖𑒹𑒧𑒱𑒢𑒲 𑒠𑒹𑒞𑒟𑒱 𑒖𑓂𑒨𑒼𑒿 𑒢𑒯𑒱 𑒏𑒰𑒖 𑒏𑒯𑒪𑒢𑓂𑒯𑒱 𑒄 𑒚𑒲𑒏𑒹 𑒯𑒵𑒠𑒨 𑒪𑒑 𑒖𑒹𑒥𑒲 𑒠𑒹𑒢𑒹 𑒁𑒕𑒱 𑒮𑒲𑒥𑒱
𑒮𑒾𑒿𑒮𑒹 𑒠𑒹𑒬 𑒒𑒳𑒧𑒪𑒯𑒳𑒿 𑒋𑒯𑒱 𑒣𑒹𑒙𑒏 𑒪𑒹𑒪
𑒖𑒹𑒥𑒲𑒧𑒹 𑒣𑒰𑒃 𑒢𑒯𑒱 𑒩𑒯𑒞 𑒅𑒣𑒰𑒮𑒹 𑒏𑒩𑒥 𑒯𑒧 𑒦𑒰𑒃
𑒖𑒹𑒥𑒲𑒏 𑒪𑒑 𑒁𑒕𑒱 𑒯𑒵𑒠𑒨 𑒞𑒐𑒢 𑒮𑒹 𑒏𑒼𑒢𑒰 𑒩𑒯𑒞 𑒣𑓂𑒩𑒮𑒢𑓂𑒢
𑒖𑒹 𑒩𑒯𑒞 𑒄 𑒐𑒰𑒪𑒲 ? 𑒥𑒳𑒠𑓂𑒡 𑒮𑒹𑒯𑒼 𑒏𑒯𑒱 𑒑𑒹𑒪𑒰𑒯 𑒄 !


𑒏𑒼𑒚𑒱𑒨𑒰 𑒣𑒕𑒥𑒰𑒃 𑒙𑒼𑒪
𑒥𑒴𑒜𑓃 𑒕𑒪𑒰𑒯 𑒧𑒩𑒻𑒏 𑒧𑒰𑒢 𑒣𑒳𑒞𑓂𑒩 𑒣𑒳𑒕𑒪 𑒁𑒕𑒱 𑒏𑒼𑒢𑒼 𑒃𑒔𑓂𑒕𑒰 𑒖𑒹𑒢𑒰 𑒧𑒡𑒳𑒩 𑒐𑒨𑒥𑒰𑒏 𑒧𑒼𑒢 𑒢𑒲𑒏 𑒏𑒣𑒛𑓃𑒰 𑒣𑒯𑒱𑒩𑒥𑒰𑒏 𑒧𑒼𑒢 𑒤𑒪-𑒤𑒴𑒪 𑒐𑒨𑒥𑒰𑒏 𑒧𑒼𑒢
𑒏𑒼𑒚𑒰𑒏 𑒒𑒩 𑒥𑒢𑒨𑒥𑒰𑒏 𑒃𑒔𑓂𑒕𑒰 𑒣𑒴𑒩𑓂𑒝 𑒦𑒨 𑒣𑒰𑒨𑒞 𑒏𑒱𑒕𑒳 𑒮𑒰𑒪𑒏 𑒥𑒰𑒠𑒹 𑒏𑒯𑒴 𑒏𑒼𑒢𑒼 𑒕𑒼𑒙-𑒧𑒼𑒙 𑒃𑒔𑓂𑒕𑒰 𑒣𑒴𑒩 𑒏𑒩𑒥 𑒯𑒧 𑒚𑒰𑒧𑒹

𑒯𑒾 𑒏𑒯𑒱𑒞𑒼 𑒪𑒰𑒖𑒹 𑒯𑒼𑒃𑒞 𑒁𑒕𑒱 𑒣𑒕𑒱𑒥𑒰𑒩𑒱 𑒙𑒼𑒪 𑒏𑒼𑒚𑒱𑒨𑒰𑒏 𑒩𑒮𑓂𑒞𑒰 𑒠𑒳𑒩𑒱𑒑𑒩𑒼 𑒩𑒯𑒪𑒰 𑒅𑒞𑓂𑒞𑒩 𑒍𑒏𑒩𑒹 𑒡𑒹𑒪𑒯𑒳𑒿 𑒖𑒰𑒃𑒞 𑒠𑒳𑒩𑓂𑒑𑒰𑒮𑓂𑒟𑒰𑒢 𑒏𑒰𑒩𑒝 𑒙𑒼𑒪 𑒕𑒪 𑒍 𑒁𑒛𑒫𑒰𑓀𑒮𑓂𑒛
𑒧𑒼𑒢𑒧𑒹 𑒪𑒹𑒢𑒹 𑒄 𑒃𑒔𑓂𑒕𑒰 𑒖𑒰𑒃𑒞 𑒕𑒲 𑒖𑒹 𑒍𑒯𑒱 𑒙𑒼𑒪𑒧𑒹 𑒯𑒼𑒃𑒞 𑒫𑒱𑒫𑒰𑒯
𑒏𑒯𑒻𑒞 𑒞𑒰𑒫𑒞 𑒯𑒰𑒪𑒞 𑒥𑒱𑒑𑒛𑓃𑒱 𑒑𑒹𑒪𑒢𑓂𑒯𑒱 𑒂 𑒍 𑒥𑒴𑒜𑓃 𑒮𑓂𑒫𑒩𑓂𑒑𑒫𑒰𑒮𑒲 𑒦𑒹𑒪𑒰𑒯

𑒧𑒩𑒪𑒼𑒣𑒩 𑒧𑒼𑒯 𑒮𑓀𑒑 𑒖𑒰𑒃𑒞 𑒁𑒕𑒱
𑒃𑒔𑓂𑒕𑒰𑒏 𑒢𑒱𑒨𑓀𑒞𑓂𑒩𑒝 𑒁𑒕𑒻𑒞

𑒥𑒳𑒔𑓂𑒔𑒲-𑒥𑒰𑒅
𑒥𑒳𑒔𑓂𑒔𑒲-𑒥𑒰𑒅
𑒏𑒱𑒞𑒰𑒥 𑒥𑒹𑒔𑒱 𑒏𑒋
𑒏𑒧𑒰𑒃𑒞 𑒁𑒯𑒰𑒿𑒏𑒹𑒿 𑒠𑒹𑒐𑒱
𑒮𑒛𑓃𑒏𑒏 𑒔𑒾𑒥𑒙𑒱𑒨𑒰𑒣𑒩
𑒁𑒣𑒢 𑒧𑒻𑒟𑒱𑒪𑒲 𑒦𑒰𑒭𑒰 𑒥𑒖𑒻𑒞
𑒦𑒩𑒱 𑒖𑒰𑒃𑒞 𑒁𑒕𑒱 𑒧𑒼𑒢 𑒑𑒩𑓂𑒫𑒮𑒿 𑒮𑒹𑒯𑒼
𑒔𑒼𑒩𑒱 𑒞𑒿 𑒢𑒯𑒱 𑒏𑓄 𑒩𑒯𑒪 𑒕𑒲
𑒧𑒹𑒯𑒢𑒞𑒱𑒮𑒿 𑒏𑒧𑒰 𑒩𑒯𑒪 𑒕𑒲
𑒄 𑒧𑒖𑒴𑒩𑒏 𑒙𑒼𑒪𑒲
𑒩𑒰𑒖 𑒏𑒩𑒞 𑒠𑒱𑒪𑓂𑒪𑒲𑒣𑒩

𑒧𑒰𑒩𑒲𑒬𑒮 𑒂 𑒫𑒹𑒮𑓂𑒙 𑒃𑒢𑓂𑒛𑒲𑒖𑒧𑒹
𑒋𑒯𑒱𑒢𑒰 𑒯𑒹𑓀𑒖𑒏-𑒯𑒹𑓀𑒖 𑒔𑒪𑒻𑒞 𑒩𑒯𑒋 𑒧𑒖𑒴𑒩𑒏 𑒙𑒼𑒪𑒲

𑒮𑒦 𑒚𑒰𑒧 𑒁𑒯𑒰𑒿𑒏 𑒐𑒱𑒡𑒰𑓀𑒬
𑒏𑒰𑒩𑒝 𑒁𑒯𑒰𑒿 𑒧𑒿𑒑𑒻𑒞 𑒕𑒲 𑒧𑒰𑒞𑓂𑒩 𑒏𑒰𑒖
𑒢𑒯𑒱 𑒧𑒿𑒑𑒻𑒞 𑒕𑒲 𑒠𑒩𑒧𑒰𑒯𑒰
𑒄 𑒥𑒱𑒯𑒰𑒩𑒲 𑒮𑒦 𑒩𑒹𑒙 𑒏𑒧 𑒏𑒋 𑒠𑒹𑒪𑒏 𑒁𑒕𑒱 !

𑒋𑒯𑒱 𑒐𑒱𑒡𑒰𑓀𑒬𑒧𑒹 𑒯𑒧 𑒠𑒹𑒐𑒱 𑒩𑒯𑒪 𑒕𑒲 𑒦𑒨
𑒐𑒹𑒞 𑒥𑒹𑒔𑒱 𑒥𑒢𑒪 𑒮𑒹𑒚 𑒮𑒦𑒧𑒹
𑒥𑒛𑓃𑒏𑒰 𑒑𑒰𑒛𑓃𑒲𑒧𑒹 𑒬𑒲𑒮𑒰 𑒐𑒼𑒪𑒱 𑒥𑒰𑒖𑒰 𑒥𑒖𑒥𑒻𑒞 𑒕𑒟𑒱
𑒖𑒹 𑒮𑒦 !

𑒑𑒰𑒧𑒏 𑒑𑒰𑒧 𑒅𑒣𑒙𑒱
𑒧𑒰𑒃𑒪𑒏 𑒧𑒰𑒃𑒪 𑒣𑒋𑒩𑒹 𑒔𑒪𑒻𑒞
𑒧𑒳𑒠𑒰 𑒍𑒯𑒴 𑒏𑒢𑒲 𑒮𑒢 𑒠𑒩𑒧𑒰𑒯𑒰𑒮𑒿 𑒥𑒔𑒰 𑒏𑒋
𑒑𑒰𑒧 𑒣𑒚𑒹𑒥𑒰 𑒪𑒹𑒪 𑒧𑒢𑒲𑒂𑒩𑓂𑒛𑒩𑒏 𑒪𑒰𑒃𑒢𑒧𑒹 𑒪𑒰𑒑𑒪
𑒥𑒹𑒩-𑒥𑒹𑒩 𑒤𑒰𑒩𑓂𑒧 𑒁𑒕𑒱 𑒦𑒩𑒥𑒻𑒞 𑒍 𑒏𑒱𑒩𑒰𑒢𑒲
𑒧𑒴𑒩𑒐 𑒏𑒯𑒻𑒞
𑒐𑒾𑓀𑒗𑒰𑒃𑒞

𑒍𑒯𑒱 𑒏𑒱𑒩𑒰𑒢𑒲𑒏 𑒐𑒾𑒿𑒗𑒰𑒃𑒞 𑒮𑓂𑒫𑒩
𑒕𑒻 𑒍𑒏𑒩 𑒯𑒰𑒩𑒱𑒏 𑒣𑓂𑒩𑒞𑒲𑒏
𑒧𑒰𑒞𑓂𑒩 𑒋𑒏 𑒣𑒲𑒜𑓃𑒲𑒏 𑒁𑒕𑒱 𑒑𑒣
𑒏𑒩𑒞 𑒁𑒯𑒰𑒿 𑒥𑒰𑒠 𑒩𑒰𑒖
𑒁𑒑𑒱𑒪𑒰 𑒣𑒲𑒜𑓃𑒲
𑒋𑒯𑒱 𑒠𑒱𑒪𑓂𑒪𑒲𑒣𑒩

𑒂𑒏𑒏 𑒠𑒴𑒡
𑒧𑒼𑒢 𑒣𑒛𑓃𑒪 𑒔𑒼𑒩𑒱 𑒏𑒹𑒩 𑒥𑒰𑒞 𑒔𑒼𑒩𑒏 𑒂𑒿𑒐𑒱𑒧𑒹 𑒂𑒏𑒏 𑒣𑒰𑒞 𑒣𑒰𑒞𑒏 𑒠𑒴𑒡 𑒣𑒛𑓃𑒪𑒰 𑒮𑓀𑒞𑒰 𑒔𑒼𑒩 𑒮𑒼𑒔𑒪𑒏 𑒂𑒥 𑒂𑒿𑒐𑒱 𑒑𑒹𑒪 𑒕𑒼𑒛𑓃𑒱
𑒏𑒯𑒪𑒏 𑒧𑒼𑒢𑒹 𑒥𑒳𑒠-𑒥𑒳𑒠𑒰𑒨 𑒏𑒩𑒳 𑒞𑒹𑒪 𑒢𑒯𑒱 𑒠𑒹𑒥 𑒧𑒼𑒩 𑒦𑒰𑒨
𑒁𑒩𑓂𑒏𑒏 𑒠𑒴𑒡𑒏 𑒮𑓀𑒑 𑒏𑒩𑒳 𑒞𑒹𑒪 𑒥𑒢𑒰 𑒠𑒹𑒞 𑒮𑒴𑒩𑒠𑒰𑒮𑒏 𑒔𑒹𑒪
𑒑𑒾𑒫𑒰𑒿 𑒏𑒹𑒪𑒢𑓂𑒯𑒱 𑒥𑒳𑒩𑒥𑒏𑒲 𑒋𑒯𑒱 𑒥𑒹𑒩 𑒔𑒼𑒩𑒏 𑒥𑒳𑒢𑒪 𑒖𑒰𑒪𑒏 𑒕𑒪 𑒤𑒹𑒩 𑒞𑒹𑒪 𑒜𑓃𑒰𑒩𑒱 𑒣𑒚𑒾𑒪𑒢𑓂𑒯𑒱 𑒔𑒼𑒩𑒏𑒹𑒿 𑒑𑒰𑒧

𑒧𑒳𑒠𑒰 𑒩𑒮𑒰𑒨𑒢 𑒦𑒹𑒪 𑒫𑒱𑒣𑒩𑒲𑒞 𑒔𑒼𑒩𑒏 𑒂𑒿𑒐𑒱 𑒥𑒔𑒱 𑒑𑒹𑒪 𑒯𑒹 𑒧𑒲𑒞 𑒑𑒾𑒂𑒿𑒏 𑒏𑒰𑒖𑒏 𑒯𑒧 𑒪𑒹𑒥 𑒢𑒯𑒱 𑒣𑒏𑓂𑒭 𑒧𑒰𑒞𑓂𑒩 𑒮𑒳𑒢𑒰𑒨𑒪 𑒩𑒙𑒢𑓂𑒞 𑒫𑒱𑒠𑓂𑒨𑒰𑒏 𑒫𑒱𑒣𑒏𑓂𑒭

𑒏𑒹𑒮𑒩 𑒬𑓂𑒫𑒹𑒞 𑒯𑒩𑒱𑒞 𑒞𑓂𑒩𑒱𑒫𑒰𑒩𑓂𑒝𑒱𑒏
𑒏𑒹𑒮𑒩 𑒬𑓂𑒫𑒹𑒞 𑒯𑒩𑒱𑒞 𑒞𑓂𑒩𑒱𑒫𑒰𑒩𑓂𑒝𑒱𑒏
𑒧𑒡𑓂𑒨 𑒢𑒲𑒪 𑒔𑒏𑓂𑒩 𑒁𑒕𑒱 𑒬𑒼𑒦𑒱𑒞
𑒔𑒾𑒥𑒲𑒮 𑒏𑒲𑒪𑒏 𑒔𑒏𑓂𑒩 𑒐𑒔𑒱𑒞 𑒁𑒕𑒱
𑒁𑒕𑒱 𑒯𑒰𑒟 𑒯𑒧𑒩 𑒣𑒞𑒰𑒏𑒰 𑒄,
𑒫𑒢𑓂𑒠𑒢, 𑒦𑒰𑒩𑒞𑒦𑒴𑒧𑒱𑒏 𑒣𑒴𑒖𑒢,
𑒏𑒩𑒨 𑒕𑒲 𑒯𑒧, 𑒪𑒋 𑒁𑒩𑒱𑒧𑒩𑓂𑒠𑒢𑒏 𑒯𑒧 𑒣𑓂𑒩𑒝।

𑒁𑒯𑒩𑓂𑒢𑒱𑒬 𑒖𑒰𑒑𑒱 𑒏𑒩𑒥 𑒯𑒧 𑒩𑒏𑓂𑒭𑒰
𑒣𑓂𑒩𑒰𑒝𑒏 𑒥𑒪𑒱𑒠𑒰𑒢 𑒠𑒋 𑒠𑒹𑒥 𑒁𑒣𑒢
𑒮𑒳𑒐 𑒣𑒮𑒩𑒞 𑒠𑒳𑒐 𑒠𑒴𑒩 𑒯𑒼𑒋𑒞 𑒑𑒋
𑒕𑒲 𑒯𑒧 𑒠𑒹𑒬𑒏 𑒄 𑒠𑒹𑒬 𑒯𑒧𑒩

𑒁𑒣𑒢 𑒁𑒣𑒢 𑒣𑒟𑒧𑒹 𑒪𑒰𑒑𑒪 𑒮𑒦
𑒏𑒩𑒞 𑒡𑒢𑓂𑒨-𑒡𑒰𑒢𑓂𑒨𑒏 𑒣𑒴𑒩𑓂𑒞𑒱 𑒖𑒐𑒢
𑒯𑒰𑒟 𑒞𑓂𑒩𑒱𑒫𑒰𑒩𑓂𑒝𑒱𑒏 𑒔𑒏𑓂𑒩 𑒐𑒔𑒱𑒞 𑒥𑒱𑒔
𑒥𑒜𑓃𑒞 𑒏𑒲𑒩𑓂𑒞𑒱𑒏 𑒮𑓀𑒑 𑒠𑒹𑒬 𑒞𑒐𑒢।

𑒏𑒩𑒱 𑒫𑒢𑓂𑒠𑒢 𑒧𑒰𑒞𑒵𑒦𑒴𑒧𑒱𑒏 𑒣𑒴𑒖𑒢,
𑒕𑒲 𑒯𑒧, 𑒥𑒜𑓃𑒱 𑒁𑒩𑒱𑒧𑒩𑓂𑒠𑒢𑒏 𑒪𑒋 𑒣𑓂𑒩𑒝।

𑒮𑒧𑒞𑒪 𑒣𑒩𑓂𑒫𑒞 𑒞𑒙 𑒮𑒑𑒩𑒏
𑒑𑒓𑓂𑒑𑒰 𑒑𑒼𑒠𑒰𑒫𑒩𑒲 𑒏𑒰𑒫𑒹𑒩𑒲 𑒞𑒰𑒣𑓂𑒞𑒲,
𑒢𑒩𑓂𑒧𑒠𑒰𑒏 𑒣𑒰𑒫𑒢 𑒡𑒰𑒩,𑒮𑒩𑒮𑓂𑒫𑒞𑒲,
𑒮𑒱𑒢𑓂𑒡𑒳 𑒨𑒧𑒳𑒢𑒰𑒏 𑒏𑒰𑒞𑒏 𑒯𑒧
𑒕𑒲 𑒣𑓂𑒩𑒑𑒞𑒱𑒏 𑒂𑒏𑒰𑓀𑒏𑓂𑒭𑒲

𑒠𑒹𑒬𑒏 𑒢𑒱𑒩𑓂𑒧𑒰𑒝𑒏 𑒏𑒰𑒩𑓂𑒧𑒱𑒏 𑒁𑒫𑒱𑒔𑒪,
𑒮𑓂𑒫𑒔𑓂𑒕 𑒡𑒰𑒩𑒏 𑒏𑒰𑒞𑒏 𑒥𑒰𑒮𑒲,
𑒏𑒲𑒩𑓂𑒞𑒱 𑒞𑓂𑒩𑒱𑒫𑒰𑒩𑓂𑒝𑒱𑒏 𑒯𑒰𑒟 𑒪𑒹𑒢𑒹 𑒕𑒲,
𑒫𑒢𑓂𑒠𑒢 𑒏𑒩𑒻𑒞 𑒧𑒰𑒿 𑒦𑒰𑒩𑒞𑒲𑒏,
𑒏𑒲𑒩𑓂𑒞𑒱𑒏 𑒁𑒦𑒱𑒪𑒰𑒭𑒲,
𑒂𑒢𑓂𑒯𑒲𑒏 𑒥𑒱𑒯𑒰𑒩𑒱𑒏 𑒂𑒏𑒰𑓀𑒏𑓂𑒭𑒲।

*𑒄 𑒣𑒠𑓂𑒨 𑒮𑒧𑒩𑓂𑒣𑒱𑒞 𑒁𑒕𑒱 𑓑𑓖 𑒥𑒪𑒱𑒠𑒰𑒢𑒲𑒏 𑒢𑒰𑒧 𑒖𑒹 𑒧𑒳𑒧𑓂𑒥𑒄𑒧𑒹 𑒠𑒹𑒬𑒏 𑒮𑒧𑓂𑒧𑒰𑒢𑒏 𑒩𑒏𑓂𑒭𑒰𑒩𑓂𑒟 𑒁𑒣𑒢 𑒣𑓂𑒩𑒰𑒝𑒏 𑒥𑒪𑒱𑒠𑒰𑒢 𑒠𑒹𑒪𑒢𑓂𑒯𑒱।𑓑. 𑒋𑒢.𑒋𑒮.𑒖𑒲. 𑒧𑒹𑒖𑒩 𑒮𑒢𑓂𑒠𑒲𑒣 𑒅𑒢𑓂𑒢𑒲𑒏𑒵𑒭𑓂𑒝𑒢𑓂, 𑓒. 𑒋.𑒙𑒲.𑒋𑒮.𑒔𑒲𑒤 𑒯𑒹𑒧𑓀𑒞 𑒏𑒛𑓃𑒏𑒛𑓃𑒹, 𑓓. 𑒁𑒬𑒼𑒏 𑒏𑒰𑒧𑒙𑒹, 𑓔. 𑒃𑓀𑒮𑓂𑒣𑒹𑒏𑓂𑒙𑒩 𑒫𑒱𑒖𑒨 𑒮𑒰𑒪𑒮𑓂𑒏𑒩, 𑓕. 𑒋𑒢.𑒋𑒮.𑒖𑒲 𑒯𑒫𑒪𑒠𑒰𑒩 𑒑𑒖𑒹𑒢𑓂𑒠𑓂𑒩 𑒮𑒱𑓀𑒯 "𑒥𑒱𑒭𑓂𑒙", 𑓖. 𑒃𑓀𑒮𑓂𑒣𑒹𑒏𑓂𑒙𑒩 𑒬𑒬𑒰𑓀𑒏 𑒬𑒱𑒢𑓂𑒠𑒹, 𑓗. 𑒃𑓀𑒮𑓂𑒣𑒹𑒏𑓂𑒙𑒩 𑒋.𑒂𑒩.𑒔𑒱𑒙𑒪𑒹, 𑓘. 𑒮𑒥 𑒃𑓀𑒮𑓂𑒣𑒹𑒏𑓂𑒙𑒩 𑒣𑓂𑒩𑒏𑒰𑒬 𑒧𑒼𑒩𑒹, 𑓙. 𑒏𑒰𑓀𑒮𑓂𑒙𑒹𑒥𑒪 𑒫𑒱𑒖𑒨 𑒐𑒰𑓀𑒛𑒹𑒏𑒩, 𑓑𑓐. 𑒋.𑒋𑒮.𑒂𑒃. 𑒫𑒲.𑒁𑒥𑒰𑒪𑒹, 𑓑𑓑. 𑒥𑒰𑒅 𑒮𑒰𑒥 𑒠𑒳𑒩𑓂𑒑𑒳𑒩𑒹, 𑓑𑓒. 𑒢𑒰𑒢𑒰𑒮𑒰𑒯𑒥 𑒦𑒼𑒮𑒪𑒹,𑓑𑓓. 𑒏𑒰𑓀𑒮𑒙𑒹𑒥𑒪 𑒖𑒨𑒫𑓀𑒞 𑒣𑒰𑒙𑒱𑒪, 𑓑𑓔. 𑒏𑒰𑓀𑒮𑒙𑒹𑒥𑒪 𑒬𑒹𑒒𑒼𑒭 𑒣𑒰𑒙𑒱𑒪, 𑓑𑓕. 𑒁𑒧𑓂𑒥𑒰𑒠𑒰𑒮 𑒩𑒰𑒧𑒔𑒢𑓂𑒠𑓂𑒩 𑒣𑒫𑒰𑒩 𑒂 𑓑𑓖. 𑒋𑒮.𑒮𑒲.𑒔𑒾𑒡𑒩𑒲