गजेन्द्र ठाकुर- चारिटा उत्तर आधुनिक नाटक: सैमुअल बैकेटक फ्रेंच नाटक “वेटिंग फॉर गोडो”, हैरोल्ड पिंटरक अंग्रेजी नाटक “द बर्थडे पार्टी”, बादल सरकारक बांग्ला नाटक “एवम् इन्द्रजीत” आ उदय नारायण सिंह ‘नचिकेता’क मैथिली नाटक “नो एण्ट्री: मा प्रविश”

 𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩

[𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑓒𑓐𑓐𑓘 𑒄. 𑒧𑒹 𑒕𑒣𑒪 𑒂 𑒮𑒰𑒯𑒱𑒞𑓂𑒨 𑒁𑒏𑒰𑒠𑒹𑒧𑒲 𑒣𑒳𑒩𑒮𑓂𑒏𑒰𑒩 𑒪𑒹𑒪 𑒋𑒏𑒩 𑒔𑒨𑒢 𑓒𑓐𑓑𑓐, 𑓒𑓐𑓑𑓑 𑒥𑒰 𑓒𑓐𑓑𑓒 𑒧𑒹 𑒢𑒻 𑒦𑓄 𑒮𑒏𑒪𑒻। 𑒂𑒥 𑒄 𑒣𑒼𑒟𑒲 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨 𑒪𑒹𑒪 𑒮𑒰𑒯𑒱𑒞𑓂𑒨 𑒁𑒏𑒰𑒠𑒹𑒧𑒲 𑒣𑒳𑒩𑒮𑓂𑒏𑒰𑒩 𑒪𑒹𑒪 𑒅𑒣𑒪𑒥𑓂𑒡 𑒢𑒻 𑒩𑒯𑒞। 𑒌 𑒞𑒩𑒯𑒏 𑒂𑒢𑒼 𑒅𑒠𑒰𑒯𑒩𑒝 𑒩𑒯𑒪 𑒁𑒕𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒏 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨 𑒂 𑒫𑒱𑒬𑓂𑒫 𑒮𑒰𑒯𑒱𑒞𑓂𑒨 𑒧𑒡𑓂𑒨 𑒮𑓂𑒟𑒰𑒢 𑒢𑒲𑒔𑒰𑒿𑒏 𑒂𑒪𑒹𑒐𑒧𑒹 𑒢𑒱𑒩𑒴𑒣𑒱𑒞 𑒏𑒋𑒪 𑒖𑒰 𑒩𑒯𑒪 𑒁𑒕𑒱। 𑒄 𑒬𑒵𑓀𑒐𑒪𑒰 𑒂𑒑𑒰𑒿 𑒮𑒹𑒯𑒼 𑒖𑒰𑒩𑒲 𑒩𑒯𑒞।]

𑒔𑒰𑒩𑒱𑒙𑒰 𑒅𑒞𑓂𑒞𑒩 𑒂𑒡𑒳𑒢𑒱𑒏 𑒢𑒰𑒙𑒏: 𑒮𑒻𑒧𑒳𑒁𑒪 𑒥𑒻𑒏𑒹𑒙𑒏 𑒤𑓂𑒩𑒹𑓀𑒔 𑒢𑒰𑒙𑒏 “𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼”, 𑒯𑒻𑒩𑒼𑒪𑓂𑒛 𑒣𑒱𑓀𑒙𑒩𑒏 𑒁𑓀𑒑𑓂𑒩𑒹𑒖𑒲 𑒢𑒰𑒙𑒏 “𑒠 𑒥𑒩𑓂𑒟𑒛𑒹 𑒣𑒰𑒩𑓂𑒙𑒲”, 𑒥𑒰𑒠𑒪 𑒮𑒩𑒏𑒰𑒩𑒏 𑒥𑒰𑓀𑒑𑓂𑒪𑒰 𑒢𑒰𑒙𑒏 “𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞” 𑒂 𑒅𑒠𑒨 𑒢𑒰𑒩𑒰𑒨𑒝 𑒮𑒱𑓀𑒯 ‘𑒢𑒔𑒱𑒏𑒹𑒞𑒰’𑒏 𑒧𑒻𑒟𑒱𑒪𑒲 𑒢𑒰𑒙𑒏 “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬”
.......................................
"𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼” 𑒠𑒴 𑒁𑓀𑒏𑒲𑒨 𑒙𑓂𑒩𑒹𑒖𑒲-𑒏𑒰𑒧𑒹𑒛𑒲 𑒁𑒕𑒱। 𑒮𑒻𑒧𑒳𑒁𑒪 𑒥𑒻𑒏𑒹𑒙 𑒠𑓂𑒫𑒰𑒩𑒰 𑒄 1952 𑒄. 𑒧𑒹 𑒤𑓂𑒩𑒹𑓀𑒔 𑒦𑒰𑒭𑒰𑒧𑒹 𑒪𑒱𑒐𑒪 𑒑𑒹𑒪 𑒂 𑒋𑒏𑒩 𑒣𑒯𑒱𑒪 𑒣𑓂𑒩𑒠𑒩𑓂𑒬𑒢 𑒣𑒹𑒩𑒱𑒮𑒧𑒹 1953 𑒄. 𑒧𑒹 𑒦𑒹𑒪। 𑒋𑒏𑒩 𑒁𑓀𑒑𑓂𑒩𑒹𑒖𑒲 𑒮𑓀𑒮𑓂𑒏𑒩𑒝𑒏 𑒣𑓂𑒩𑒠𑒩𑓂𑒬𑒢 𑒪𑓀𑒠𑒢𑒧𑒹 1955 𑒄. 𑒧𑒹 𑒦𑒹𑒪 𑒂 𑒁𑓀𑒑𑓂𑒩𑒹𑒖𑒲 𑒮𑓀𑒮𑓂𑒏𑒩𑒝 1956 𑒄. 𑒧𑒹 𑒣𑓂𑒩𑒏𑒰𑒬𑒱𑒞 𑒦𑒹𑒪।
𑒯𑒻𑒩𑒼𑒪𑓂𑒛 𑒣𑒱𑓀𑒙𑒩𑒏 𑒁𑓀𑒑𑓂𑒩𑒹𑒖𑒲 𑒢𑒰𑒙𑒏 “𑒠 𑒥𑒩𑓂𑒟𑒛𑒹 𑒣𑒰𑒩𑓂𑒙𑒲” 𑒏𑒻𑒧𑓂𑒥𑓂𑒩𑒱𑒖𑒧𑒹 1958 𑒄. 𑒧𑒹 𑒧𑓀𑒔𑒱𑒞 𑒦𑒹𑒪 𑒂 1960 𑒄. 𑒧𑒹 𑒣𑓂𑒩𑒏𑒰𑒬𑒱𑒞 𑒦𑒹𑒪।

𑒥𑒰𑒠𑒪 𑒮𑒩𑒏𑒰𑒩𑒏 𑒥𑒰𑓀𑒑𑓂𑒪𑒰 𑒢𑒰𑒙𑒏 “𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞” 1962 𑒄. 𑒧𑒹 𑒪𑒱𑒐𑒪 𑒑𑒹𑒪 𑒂 𑒄 1965 𑒄. 𑒧𑒹 𑒏𑒪𑒏𑒞𑓂𑒞𑒰𑒧𑒹 𑒧𑓀𑒔𑒱𑒞 𑒦𑒹𑒪।

𑒅𑒠𑒨 𑒢𑒰𑒩𑒰𑒨𑒝 𑒮𑒱𑓀𑒯 ‘𑒢𑒔𑒱𑒏𑒹𑒞𑒰’𑒏 “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬” 2008 𑒄. 𑒧𑒹 𑒄-𑒣𑓂𑒩𑒏𑒰𑒬𑒱𑒞 𑒂 𑒤𑒹𑒩 𑒍𑒯𑒲 𑒥𑒩𑓂𑒐 𑒣𑓂𑒩𑒏𑒰𑒬𑒱𑒞 𑒦𑒹𑒪। 19 𑒤𑒩𑒥𑒩𑒲 2011 𑒏𑒹𑒿 𑒏𑒳𑒝𑒰𑒪𑒏 𑒢𑒱𑒩𑓂𑒠𑒹𑒬𑒢𑒧𑒹 𑒏𑒰𑒪𑒱𑒠𑒰𑒮 𑒩𑓀𑒑𑒰𑒪𑒨, 𑒣𑒙𑒢𑒰𑒧𑒹 𑒄 𑒛𑒹𑒜𑓃 𑒒𑒝𑓂𑒙𑒰𑒏 𑒢𑒰𑒙𑒏 𑒧𑓀𑒔𑒱𑒞 𑒦𑒹𑒪।

𑒤𑓂𑒩𑒹𑓀𑒔, 𑒁𑓀𑒑𑓂𑒩𑒹𑒖𑒲, 𑒥𑒰𑓀𑒑𑓂𑒪𑒰 𑒂 𑒧𑒻𑒟𑒱𑒪𑒲𑒏 𑒄 𑒔𑒰𑒩𑒴 𑒢𑒰𑒙𑒏 𑒣𑒼𑒮𑓂𑒙-𑒧𑒰𑒛𑒩𑓂𑒢 𑒢𑒰𑒙𑒏𑒏 𑒬𑓂𑒩𑒹𑒝𑒲𑒧𑒹 𑒑𑒰𑒢𑒪 𑒖𑒰𑒃𑒞 𑒁𑒕𑒱। 𑒖𑒐𑒢 𑒮𑒻𑒧𑒳𑒁𑒪 𑒥𑒻𑒏𑒹𑒙𑒏 “𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼” 𑒠𑒹𑒐𑒱 𑒏’ 𑒪𑒼𑒏 𑒮𑒦 𑒒𑒳𑒩𑒪 𑒩𑒯𑒟𑒱 𑒞𑒿 𑒯𑒳𑒢𑒏𑒰 𑒪𑒼𑒏𑒢𑒱𑒏𑒹𑒿 𑒋𑒏𑒙𑒰 𑒫𑒱𑒔𑒱𑒞𑓂𑒩 𑒁𑒢𑒳𑒦𑒫𑒮𑒿 𑒮𑒰𑒏𑓂𑒭𑒰𑒞𑓂𑒏𑒰𑒩 𑒦𑒹𑒪 𑒕𑒪𑒢𑓂𑒯𑒱। 𑒌 𑒢𑒰𑒙𑒏𑒧𑒹 𑒧𑒰𑒞𑓂𑒩 𑒣𑒰𑒿𑒔𑒙𑒰 𑒣𑒰𑒞𑓂𑒩 𑒁𑒕𑒱- 𑒋𑒮𑓂𑒙𑓂𑒩𑒰𑒑𑒼𑒢, 𑒫𑓂𑒪𑒰𑒠𑒲𑒧𑒲𑒩, 𑒪𑒏𑒲, 𑒣𑒼𑒖𑒼 𑒂 𑒋𑒏𑒙𑒰 𑒕𑒾𑒛𑓃𑒰। 𑒋𑒏𑒙𑒰 𑒏𑒝𑓂𑒙𑓂𑒩𑒲 𑒩𑒼𑒛𑒣𑒩 𑒮𑒰𑒿𑒗𑒧𑒹 𑒋𑒏𑒙𑒰 𑒑𑒰𑒕 𑒪𑒑 𑒋𑒮𑓂𑒙𑓂𑒩𑒰𑒑𑒼𑒢 𑒋𑒏𑒙𑒰 𑒜𑒱𑒧𑒏𑒰𑒣𑒩 𑒥𑒻𑒮𑒪 𑒁𑒕𑒱 𑒂 𑒁𑒣𑒢 𑒖𑒳𑒞𑓂𑒞𑒰 𑒠𑒳𑒢𑒴 𑒯𑒰𑒟𑒮𑒿 𑒢𑒱𑒏𑒰𑒪𑒥𑒰𑒏 𑒣𑓂𑒩𑒨𑒰𑒮 𑒏’ 𑒩𑒯𑒪 𑒁𑒕𑒱 𑒂 𑒁𑒣𑒮𑓂𑒨𑒰𑒿𑒞 𑒁𑒕𑒱, 𑒂 𑒟𑒰𑒏𑒱 𑒖𑒰𑒃𑒋। 𑒫𑓂𑒪𑒰𑒠𑒲𑒧𑒲𑒩 𑒮𑓀𑒑𑒹 𑒍 𑒑𑒣𑒏 𑒣𑓂𑒩𑒰𑒩𑒧𑓂𑒦 𑒯𑒼𑒃 𑒕𑒻, 𑒋𑒧𑓂𑒯𑒩 𑒍𑒧𑓂𑒯𑒩𑒏 𑒤𑒳𑒮𑒱𑒨𑒰𑒿𑒯𑒲𑒏 𑒢𑒧𑒑𑒩 𑒑𑒣𑒬𑒣 𑒯𑒼𑒃 𑒕𑒻। 𑒣𑒼𑒖𑒼 𑒂 𑒪𑒏𑒲 𑒁𑒥𑒻𑒋। 𑒣𑒼𑒖𑒼 𑒥𑒳𑒗𑒰𑒃𑒋 𑒧𑒰𑒪𑒱𑒏 𑒁𑒕𑒱 𑒂 𑒪𑒏𑒲 𑒠𑒰𑒮। 𑒠𑒰𑒮𑒼 𑒞𑒹𑒯𑒹𑒢 𑒖𑒏𑒩𑒰 𑒑𑒩𑓂𑒠𑒢𑒱𑒧𑒹 𑒢𑒧𑒑𑒩 𑒩𑒮𑓂𑒮𑒰 𑒣𑒼𑒖𑒼 𑒪𑒑𑒹𑒢𑒹 𑒁𑒕𑒱। 𑒣𑒯𑒱𑒢𑒹 𑒪𑒏𑒲 𑒁𑒥𑒻𑒋, 𑒤𑒹𑒩 𑒩𑒮𑓂𑒮𑒰 𑒣𑒏𑒛𑓃𑒢𑒹 𑒣𑒼𑒖𑒼। 𑒪𑒏𑒲 𑒥𑒛𑓃𑒏𑒰 𑒥𑒻𑒑, 𑒋𑒏𑒙𑒰 𑒤𑒼𑒪𑓂𑒛𑒱𑓀𑒑 𑒮𑓂𑒙𑒴𑒪, 𑒋𑒏𑒙𑒰 𑒣𑒱𑒏𑒢𑒱𑒏 𑒥𑒰𑒮𑓂𑒏𑒹𑒙 𑒂 𑒑𑓂𑒩𑒹𑒙𑒏𑒼𑒙 𑒅𑒒𑒢𑒹 𑒁𑒕𑒱। 𑒣𑒼𑒖𑒼 𑒪𑒑 𑒔𑒰𑒥𑒳𑒏 𑒕𑒻। 𑒪𑒏𑒲 𑒂𑒠𑒹𑒬𑒣𑒰𑒪𑒏 𑒁𑒕𑒱। 𑒧𑒰𑒪𑒱𑒏𑒏 𑒑𑒣 𑒧𑒰𑒢𑒱 𑒤𑒹𑒩 𑒮𑒦 𑒥𑒼𑒗 𑒅𑒚𑒰 𑒏’ 𑒚𑒰𑒜𑓃 𑒦’ 𑒖𑒰𑒃𑒋। 𑒋𑒮𑓂𑒙𑓂𑒩𑒰𑒑𑒼𑒢 𑒂 𑒫𑓂𑒪𑒰𑒠𑒲𑒧𑒲𑒩𑒏𑒹𑒿 𑒍𑒏𑒩 𑒥𑒼𑒗𑒰 𑒅𑒒𑒢𑒰𑒃 𑒢𑒲𑒏 𑒢𑒻 𑒪𑒑𑒻 𑒕𑒻। 𑒧𑒳𑒠𑒰 𑒣𑒼𑒖𑒼 𑒖𑒐𑒢 𑒏𑒯𑒻 𑒕𑒻 𑒖𑒹 𑒍 𑒍𑒯𑒱𑒢𑒹 𑒕𑒻 𑒞𑒿 𑒋𑒮𑓂𑒙𑓂𑒩𑒰𑒑𑒼𑒢 𑒣𑒼𑒖𑒼𑒏𑒹𑒿 𑒂𑒞𑒞𑒰𑒨𑒲 𑒥𑒳𑒗𑒻 𑒕𑒻। 𑒋𑒮𑓂𑒙𑓂𑒩𑒰𑒑𑒼𑒢 𑒪𑒏𑒲𑒏 𑒢𑒼𑒩 𑒣𑒼𑒕𑒻𑒋 𑒞𑒐𑒢 𑒍𑒏𑒩𑒰 𑒪𑒏𑒲 𑒧𑒳𑒏𑓂𑒏𑒰 𑒧𑒰𑒩𑒻 𑒕𑒻। 𑒣𑒼𑒖𑒼 𑒏𑒯𑒻 𑒕𑒻 𑒖𑒹 𑒞𑒼𑒩𑒰 𑒏𑒯𑒪𑒱𑒨𑒾 𑒢𑒹 𑒖𑒹 𑒪𑒏𑒲𑒏𑒹𑒿 𑒁𑒢𑒔𑒱𑒢𑓂𑒯𑒰𑒩 𑒪𑒼𑒏 𑒣𑒮𑒱𑒢𑓂𑒢 𑒢𑒻 𑒕𑒻। 𑒂 𑒋𑒮𑓂𑒙𑓂𑒩𑒰𑒑𑒼𑒢 𑒂 𑒫𑓂𑒪𑒰𑒠𑒲𑒧𑒲𑒩 𑒍𑒞’ 𑒏𑒲 𑒏’ 𑒩𑒯𑒪 𑒁𑒕𑒱? 𑒍 𑒠𑒳𑒢𑒴 𑒑𑒼𑒙𑒹 𑒏𑒼𑒢𑒼 𑒑𑒼𑒛𑒼 𑒢𑒰𑒧𑓂𑒢𑒰 𑒫𑓂𑒨𑒏𑓂𑒞𑒱𑒏 𑒥𑒰𑒙 𑒖𑒼𑒯𑒱 𑒩𑒯𑒪 𑒁𑒕𑒱।
𑒣𑒼𑒖𑒼 𑒂 𑒪𑒏𑒲 𑒔𑒪𑒱 𑒖𑒰𑒃𑒋। 𑒋𑒮𑓂𑒙𑓂𑒩𑒰𑒑𑒼𑒢 𑒂 𑒫𑓂𑒪𑒰𑒠𑒲𑒧𑒲𑒩 𑒪𑒑 𑒋𑒏𑒙𑒰 𑒕𑒾𑒛𑓃𑒰 𑒁𑒥𑒻 𑒕𑒻 𑒂 𑒏𑒯𑒻 𑒕𑒻 𑒖𑒹 𑒑𑒼𑒛𑒼 𑒂𑒃 𑒢𑒻 𑒂𑒥𑒱 𑒮𑒏𑒞𑒰, 𑒏𑒰𑒪𑓂𑒯𑒱 𑒋𑒞𑒰। 𑒤𑒹𑒩 𑒋𑒧𑓂𑒯𑒩 𑒍𑒧𑓂𑒯𑒩𑒏 𑒤𑒳𑒮𑒱𑒨𑒰𑒿𑒯𑒲𑒏 𑒑𑒣𑒬𑒣 𑒯𑒼𑒃𑒋 𑒂 𑒍𑒯𑒼 𑒕𑒾𑒛𑓃𑒰 𑒔𑒪𑒱 𑒖𑒰𑒃𑒋। 𑒞𑒐𑒢𑒹 𑒧𑓀𑒔𑒣𑒩 𑒮𑒿 𑒥𑒱𑒖𑒪𑒲 𑒔𑒪𑒱 𑒖𑒰𑒃 𑒕𑒻 𑒂 𑒤𑒹𑒩 𑒩𑒰𑒞𑒱 𑒦’ 𑒖𑒰𑒃 𑒕𑒻, 𑒔𑒢𑓂𑒠𑓂𑒩𑒧𑒰 𑒅𑒑𑒪 𑒕𑒻। 𑒫𑓂𑒪𑒰𑒠𑒲𑒧𑒲𑒩 𑒂 𑒋𑒮𑓂𑒙𑓂𑒩𑒰𑒑𑒼𑒢𑒏 𑒑𑒣𑒬𑒣 𑒬𑒳𑒩𑒴 𑒯𑒼𑒃 𑒕𑒻। 𑒤𑒳𑒮𑒱𑒨𑒰𑒿𑒯𑒲𑒏 𑒑𑒣𑒧𑒹 𑒏𑒱𑒕𑒳 𑒁𑒩𑓂𑒟𑒣𑒴𑒩𑓂𑒝 𑒑𑒣𑒬𑒣 𑒮𑒹𑒯𑒼 𑒯𑒼𑒃 𑒕𑒻। 𑒠𑒳𑒢𑒴 𑒑𑒼𑒙𑒹 𑒖𑒹𑒥𑒰𑒏 𑒢𑒱𑒩𑓂𑒝𑒨 𑒏𑒩𑒻 𑒕𑒟𑒱 𑒧𑒳𑒠𑒰 𑒯𑒱𑒪𑒻 𑒢𑒻 𑒕𑒟𑒱। 𑒣𑒯𑒱𑒪 𑒁𑓀𑒏𑒏 𑒣𑒩𑓂𑒠𑒰 𑒐𑒮𑒻𑒋।
𑒠𑒼𑒮𑒩 𑒁𑓀𑒏, 𑒫𑒋𑒯 𑒮𑒧𑒋 𑒂 𑒮𑓂𑒟𑒰𑒢। 𑒫𑓂𑒪𑒰𑒠𑒲𑒧𑒲𑒩𑒏𑒹𑒿 𑒮𑒦 𑒏𑒱𑒕𑒳 𑒧𑒼𑒢 𑒕𑒻 𑒧𑒳𑒠𑒰 𑒋𑒮𑓂𑒙𑓂𑒩𑒰𑒑𑒼𑒢 𑒥𑒱𑒮𑒩𑒱 𑒑𑒹𑒪 𑒁𑒕𑒱। 𑒋𑒮𑓂𑒙𑓂𑒩𑒰𑒑𑒼𑒢 𑒏𑒯𑒻𑒋 𑒖𑒹 𑒍 𑒮𑒦 𑒏𑒱𑒕𑒳 𑒞𑒳𑒩𑒞𑓂𑒞𑒹 𑒥𑒱𑒮𑒩𑒱 𑒖𑒰𑒃𑒋 𑒥𑒰 𑒏𑒯𑒱𑒨𑒼 𑒢𑒻 𑒥𑒱𑒮𑒩𑒻𑒋। 𑒍𑒏𑒩𑒰 𑒏𑒱𑒕𑒳-𑒏𑒱𑒕𑒳 𑒧𑒼𑒢𑒼 𑒣𑒛𑓃𑒻 𑒕𑒻। 𑒣𑒼𑒖𑒼 𑒂 𑒪𑒏𑒲 𑒁𑒥𑒻𑒋। 𑒣𑒼𑒖𑒼 𑒂𑒢𑓂𑒯𑒩 𑒦’ 𑒑𑒹𑒪 𑒁𑒕𑒱, 𑒪𑒏𑒲 𑒍𑒯𑒱𑒢𑒰 𑒥𑒼𑒗𑒰 𑒅𑒒𑒢𑒹 𑒁𑒕𑒱। 𑒩𑒮𑓂𑒮𑒰 𑒮𑒹𑒯𑒼 𑒕𑒻 𑒧𑒳𑒠𑒰 𑒏𑒱𑒕𑒳 𑒕𑒼𑒙। 𑒣𑒼𑒖𑒼 𑒂 𑒪𑒏𑒲 𑒐𑒮𑒱 𑒣𑒛𑓃𑒻𑒋। 𑒣𑒼𑒖𑒼 𑒮𑒯𑒰𑒨𑒞𑒰 𑒪𑒹𑒪 𑒏𑒯𑒻𑒋 𑒧𑒳𑒠𑒰 𑒋𑒮𑓂𑒙𑓂𑒩𑒰𑒑𑒼𑒢 𑒂 𑒫𑓂𑒪𑒰𑒠𑒲𑒧𑒲𑒩 𑒑𑒣𑒬𑒣 𑒏𑒩𑒻𑒋।
𑒋𑒮𑓂𑒙𑓂𑒩𑒰𑒑𑒼𑒢 𑒫𑓂𑒪𑒰𑒠𑒲𑒧𑒲𑒩𑒏𑒹𑒿 𑒣𑒯𑒱𑒪 𑒁𑓀𑒏 𑒖𑒹𑒏𑒰𑒿 “𑒠𑒲𑒠𑒲” 𑒏𑒯𑒻𑒋। 𑒫𑓂𑒪𑒰𑒠𑒲𑒧𑒲𑒩 𑒥𑒰𑒖𑒻𑒋 𑒖𑒹 “𑒯𑒧𑒩𑒰 𑒮𑒦𑒏𑒹𑒿 𑒤𑒳𑒮𑒱𑒨𑒰𑒿𑒯𑒲𑒏 𑒑𑒣𑒬𑒣𑒧𑒹 𑒮𑒧𑒨 𑒢𑒻 𑒥𑒩𑓂𑒥𑒰𑒠 𑒏𑒩𑒥𑒰𑒏 𑒔𑒰𑒯𑒲।“ 𑒣𑒼𑒖𑒼𑒏 “𑒮𑒯𑒰𑒨𑒞𑒰”𑒏 𑒂𑒩𑓂𑒞𑒢𑒰𑒠 𑒢𑒱𑒨𑒞 𑒁𑓀𑒞𑒩𑒰𑒪𑒣𑒩 𑒥𑒹𑒩-𑒥𑒹𑒩 𑒯𑒼𑒃 𑒕𑒻। 𑒧𑒳𑒠𑒰 𑒞𑒃𑒣𑒩 𑒋𑒮𑓂𑒙𑓂𑒩𑒰𑒑𑒼𑒢 𑒂 𑒫𑓂𑒪𑒰𑒠𑒲𑒧𑒲𑒩 𑒡𑓂𑒨𑒰𑒢 𑒢𑒻 𑒠𑒻𑒋। 𑒣𑒼𑒖𑒼 𑒂𑒥 𑒮𑒯𑒰𑒨𑒞𑒰 𑒪𑒹𑒪 𑒮𑒋 𑒤𑓂𑒩𑒻𑓀𑒏 𑒤𑒹𑒩 𑒠𑒴 𑒮𑒋 𑒤𑓂𑒩𑒻𑓀𑒏𑒏 𑒪𑒰𑒪𑒔 𑒠𑒻𑒋। 𑒫𑓂𑒪𑒰𑒠𑒲𑒧𑒲𑒩 𑒍𑒏𑒩𑒰 𑒅𑒚𑒥𑒻𑒪𑒹 𑒖𑒰𑒃𑒋, 𑒣𑓂𑒩𑒨𑒰𑒮𑒧𑒹 𑒁𑒣𑒢𑒼 𑒐𑒮𑒱 𑒣𑒛𑓃𑒻𑒋 𑒂 𑒮𑒯𑒰𑒨𑒞𑒰𑒏 𑒣𑒳𑒏𑒰𑒩 𑒏𑒩𑒻𑒋। 𑒤𑒹𑒩 𑒏𑒱𑒕𑒳 𑒑𑒣𑒬𑒣𑒏 𑒥𑒰𑒠 𑒫𑓂𑒪𑒰𑒠𑒲𑒧𑒲𑒩𑒏𑒹𑒿 𑒅𑒚𑒹𑒥𑒰𑒏 𑒣𑓂𑒩𑒨𑒰𑒮𑒧𑒹 𑒋𑒮𑓂𑒙𑓂𑒩𑒰𑒑𑒼𑒢 𑒐𑒮𑒱 𑒣𑒛𑓃𑒻𑒋। 𑒫𑓂𑒪𑒰𑒠𑒲𑒧𑒲𑒩 𑒣𑒼𑒖𑒼𑒏𑒹𑒿 𑒧𑒰𑒩𑒻𑒋, 𑒣𑒼𑒖𑒼 𑒒𑒳𑒮𑒏𑒳𑒢𑒱𑒨𑒰 𑒠𑒻𑒋। 𑒞𑒐𑒢 𑒫𑓂𑒪𑒰𑒠𑒲𑒧𑒲𑒩 𑒍𑒏𑒩𑒰 𑒞𑒰𑒏𑒻𑒋, 𑒏𑒯𑒻𑒋- 𑒂𑒥𑒱 𑒖𑒼, 𑒞𑒼𑒩𑒰 𑒢𑒼𑒏𑒮𑒰𑒢 𑒢𑒻 𑒣𑒯𑒳𑒿𑒔𑒹𑒥𑒾।
𑒋𑒮𑓂𑒙𑓂𑒩𑒰𑒑𑒼𑒢 𑒂 𑒫𑓂𑒪𑒰𑒠𑒲𑒧𑒲𑒩 𑒅𑒚𑒥𑒰𑒏 𑒣𑓂𑒩𑒨𑒰𑒮 𑒏𑒩𑒥𑒰𑒏 𑒮𑒼𑒔𑒻𑒋 𑒂 𑒅𑒚𑒱 𑒖𑒰𑒃𑒋। 𑒋𑒮𑓂𑒙𑓂𑒩𑒰𑒑𑒼𑒢 𑒏𑒯𑒻𑒋- 𑒅𑒚𑒢𑒰𑒃 𑒥𑒔𑓂𑒔𑒰𑒏 𑒐𑒹𑒪 𑒮𑒢 𑒯𑒪𑓂𑒪𑒳𑒏 𑒁𑒕𑒱 𑒂 𑒫𑓂𑒪𑒰𑒠𑒲𑒧𑒲𑒩 𑒥𑒖𑒻𑒋- 𑒄 𑒧𑒰𑒞𑓂𑒩 𑒂𑒞𑓂𑒧𑒬𑒏𑓂𑒞𑒱𑒏 𑒣𑓂𑒩𑒬𑓂𑒢 𑒁𑒕𑒱। 𑒣𑒼𑒖𑒼 𑒮𑒯𑒰𑒨𑒞𑒰 𑒪𑒹𑒪 𑒏𑒯𑒻𑒋। 𑒠𑒳𑒢𑒴 𑒣𑒼𑒖𑒼𑒏𑒹𑒿 𑒅𑒚𑒥𑒻𑒋, 𑒤𑒹𑒩 𑒕𑒼𑒛𑓃𑒻𑒋, 𑒣𑒼𑒖𑒼 𑒐𑒮𑒱 𑒣𑒛𑓃𑒻𑒋। 𑒤𑒹𑒩 𑒠𑒳𑒢𑒴 𑒍𑒏𑒩𑒰 𑒅𑒚𑒥𑒻𑒋 𑒂 𑒣𑒏𑒛𑓃𑒢𑒹 𑒩𑒯𑒻𑒋। 𑒏𑒱𑒕𑒳 𑒏𑒰𑒪𑒧𑒹 𑒏𑒢𑒹 𑒕𑒼𑒛𑓃𑒱 𑒏’ 𑒖𑒰𑒿𑒔𑒻𑒋 𑒧𑒳𑒠𑒰 𑒖𑒐𑒢 𑒣𑒼𑒖𑒼 𑒐𑒮’ 𑒪𑒑𑒻𑒋 𑒞𑒿 𑒣𑒏𑒛𑓃𑒱 𑒪𑒻𑒋। 𑒣𑒼𑒖𑒼 𑒮𑒹𑒯𑒼 𑒥𑒳𑒗𑒰 𑒣𑒛𑓃𑒻𑒋 𑒖𑒹 𑒏𑒰𑒪𑓂𑒯𑒱𑒏 𑒒𑒙𑒢𑒰 𑒥𑒱𑒮𑒩𑒪 𑒮𑒢 𑒁𑒕𑒱। 𑒍 𑒏𑒯𑒻𑒋 𑒖𑒹 𑒍 𑒋𑒏 𑒠𑒱𑒢 𑒮𑒳𑒞𑒱 𑒏’ 𑒅𑒚𑒪 𑒞𑒿 𑒁𑒣𑒢𑒰𑒏𑒹𑒿 𑒂𑒢𑓂𑒯𑒩 𑒠𑒹𑒐𑒪𑒏, 𑒍 𑒏𑒯𑒻𑒋 𑒖𑒹 𑒍𑒏𑒩𑒰 𑒪𑒑𑒻 𑒕𑒻 𑒖𑒹 𑒍 𑒁𑒐𑒢𑒼 𑒮𑒳𑒞𑒪𑒹 𑒞𑒿 𑒢𑒻 𑒁𑒕𑒱। 𑒍 𑒪𑒏𑒲𑒏 𑒫𑒱𑒭𑒨𑒧𑒹 𑒣𑒴𑒕𑒻𑒋। 𑒪𑒰𑒑𑒻𑒋 𑒖𑒹 𑒏𑒼𑒢𑒰 𑒍 𑒠𑒳𑒢𑒴 𑒐𑒮𑒪, 𑒮𑒹 𑒍𑒏𑒩𑒰 𑒧𑒼𑒢 𑒢𑒻 𑒕𑒻। 𑒣𑒼𑒖𑒼 𑒏𑒯𑒻𑒋 𑒖𑒹 𑒪𑒏𑒲𑒏 𑒑𑒩𑓂𑒠𑒢𑒱𑒏 𑒩𑒮𑓂𑒮𑒰𑒏𑒹𑒿 𑒖𑒼𑒩𑒮𑒿 𑒐𑒲𑒔𑒴 𑒥𑒰 𑒧𑒳𑒿𑒯𑒣𑒩 𑒖𑒴𑒞𑒰𑒮𑒿 𑒧𑒰𑒩𑒴 𑒞𑒿 𑒍 𑒅𑒚𑒱 𑒖𑒰𑒋𑒞। 𑒫𑓂𑒪𑒰𑒠𑒲𑒧𑒲𑒩 𑒋𑒮𑓂𑒙𑓂𑒩𑒰𑒑𑒼𑒢𑒏𑒹𑒿 𑒏𑒯𑒻𑒋 𑒖𑒹 𑒍𑒏𑒩𑒰 𑒪𑒹𑒪 𑒥𑒠𑒪𑒰 𑒪𑒹𑒥𑒰𑒏 𑒢𑒲𑒏 𑒁𑒫𑒮𑒩 𑒕𑒻। 𑒋𑒮𑓂𑒙𑓂𑒩𑒰𑒑𑒼𑒢 𑒣𑒳𑒕𑒻𑒋 (𑒍𑒏𑒩 𑒮𑓂𑒧𑒵𑒞𑒱 𑒒𑒳𑒩𑒻 𑒕𑒻!) 𑒖𑒹 𑒖𑒿 𑒪𑒏𑒲 𑒁𑒣𑒢 𑒩𑒏𑓂𑒭𑒰 𑒏𑒩𑒋 𑒞𑒐𑒢? 𑒞𑒃𑒣𑒩 𑒣𑒼𑒖𑒼 𑒥𑒰𑒖𑒻𑒋 𑒖𑒹 𑒪𑒏𑒲 𑒏𑒐𑒢𑒼 𑒁𑒣𑒢 𑒩𑒏𑓂𑒭𑒰 𑒢𑒻 𑒏𑒩𑒻𑒋। 𑒧𑒳𑒠𑒰 𑒋𑒮𑓂𑒙𑓂𑒩𑒰𑒑𑒼𑒢 𑒢𑒻 𑒫𑓂𑒪𑒰𑒠𑒲𑒧𑒲𑒩 𑒪𑒏𑒲𑒏𑒹𑒿 𑒣𑒋𑒩𑒮𑒿 𑒧𑒰𑒩’ 𑒪𑒑𑒻𑒋 𑒧𑒳𑒠𑒰 𑒁𑒣𑒢𑒹 𑒍𑒏𑒩𑒰 𑒔𑒼𑒙 𑒪𑒰𑒑𑒱 𑒖𑒰𑒃 𑒕𑒻। 𑒒𑒙𑒢𑒰𑒏𑓂𑒩𑒧𑒮𑒿 𑒪𑒑𑒻 𑒕𑒻 𑒖𑒹 𑒣𑒼𑒖𑒼 𑒂𑒥 𑒁𑒣𑒢𑒰𑒮𑒿 𑒚𑒰𑒜𑓃 𑒦’ 𑒑𑒹𑒪 𑒁𑒕𑒱।
𑒣𑒼𑒖𑒼 𑒖𑒹 𑒪𑒏𑒲𑒏𑒹𑒿 𑒏𑒼𑒢𑒼 𑒯𑒰𑒙𑒧𑒹 𑒥𑒹𑒔𑒻𑒪𑒹 𑒪’ 𑒖𑒰 𑒩𑒯𑒪 𑒁𑒕𑒱, 𑒏𑒹𑒿 𑒢𑒹 𑒏𑒰𑒪𑓂𑒯𑒱𑒏 𑒏𑒱𑒕𑒳 𑒧𑒼𑒢 𑒕𑒻 𑒂 𑒢𑒯𑒱𑒨𑒹 𑒏𑒰𑒪𑓂𑒯𑒱 𑒂𑒖𑒳𑒏 𑒏𑒱𑒕𑒳 𑒧𑒼𑒢 𑒩𑒯𑒞𑒻। 𑒍 𑒪𑒏𑒲𑒏𑒹𑒿 𑒅𑒚𑒻𑒪𑒹 𑒏𑒯𑒻𑒋 𑒂 𑒪𑒏𑒲 𑒅𑒚𑒱 𑒖𑒰𑒃𑒋 𑒂 𑒁𑒣𑒢 𑒥𑒼𑒗 𑒅𑒚𑒰 𑒪𑒻𑒋। 𑒣𑒼𑒖𑒼 𑒁𑒣𑒢 𑒔𑒰𑒥𑒳𑒏 𑒧𑒰𑓀𑒑𑒻𑒋। 𑒪𑒏𑒲 𑒮𑒦 𑒥𑒼𑒗 𑒩𑒰𑒐𑒻𑒋, 𑒂 𑒔𑒰𑒥𑒳𑒏 𑒣𑒼𑒖𑒼𑒏 𑒯𑒰𑒟𑒧𑒹 𑒠’ 𑒏’ 𑒮𑒦 𑒥𑒼𑒗 𑒅𑒚𑒰 𑒪𑒻𑒋। 𑒣𑒼𑒖𑒼 𑒩𑒮𑓂𑒮𑒰 𑒧𑒰𑓀𑒑𑒻𑒋, 𑒪𑒏𑒲 𑒮𑒦 𑒥𑒼𑒗 𑒩𑒰𑒐𑒱 𑒩𑒮𑓂𑒮𑒰 𑒣𑒼𑒖𑒼𑒏𑒹𑒿 𑒣𑒏𑒛𑓃𑒰 𑒏’ 𑒮𑒦 𑒥𑒼𑒗 𑒅𑒚𑒰 𑒪𑒻𑒋!
𑒪𑒏𑒲 𑒂 𑒣𑒼𑒖𑒼 𑒔𑒪𑒱 𑒖𑒰𑒃𑒋। 𑒍 𑒕𑒾𑓀𑒛𑓃𑒰 𑒁𑒥𑒻𑒋। 𑒍 𑒫𑓂𑒪𑒰𑒠𑒲𑒧𑒲𑒩𑒏𑒹𑒿 𑒁𑒪𑓂𑒥𑒩𑓂𑒙 𑒏𑒯𑒱 𑒮𑒧𑓂𑒥𑒼𑒡𑒱𑒞 𑒏𑒩𑒻𑒋। 𑒫𑓂𑒪𑒰𑒠𑒲𑒧𑒲𑒩 𑒣𑒳𑒕𑒻 𑒕𑒻 𑒖𑒹 𑒏𑒲 𑒍 𑒍𑒏𑒩𑒰 𑒢𑒻 𑒔𑒱𑒢𑓂𑒯𑒪𑒏, 𑒏𑒲 𑒍 𑒏𑒰𑒪𑓂𑒯𑒱 𑒢𑒻 𑒂𑒋𑒪 𑒕𑒪। 𑒕𑒾𑒛𑓃𑒰 𑒏𑒯𑒻𑒋 𑒖𑒹 𑒂𑒃 𑒍 𑒣𑒯𑒱𑒪 𑒥𑒹𑒩 𑒂𑒋𑒪 𑒁𑒕𑒱। 𑒮𑓀𑒠𑒹𑒬 𑒫𑒋𑒯 𑒕𑒻, 𑒑𑒼𑒛𑒼 𑒂𑒃 𑒢𑒻 𑒂𑒋𑒞 𑒧𑒳𑒠𑒰 𑒏𑒰𑒪𑓂𑒯𑒱 𑒁𑒫𑒬𑓂𑒨 𑒂𑒋𑒞। 𑒫𑓂𑒪𑒰𑒠𑒲𑒧𑒲𑒩 𑒣𑒳𑒕𑒻𑒋 𑒖𑒹 “𑒑𑒼𑒛𑒼” 𑒏𑒩𑒻𑒋 𑒏𑒲? 𑒞𑒿 𑒕𑒾𑒛𑓃𑒰 𑒏𑒯𑒻𑒋 𑒖𑒹 𑒑𑒼𑒛𑒼 𑒏𑒱𑒕𑒳 𑒢𑒻 𑒏𑒩𑒻𑒋। 𑒫𑓂𑒪𑒰𑒠𑒲𑒧𑒲𑒩 𑒣𑒳𑒕𑒻𑒋 𑒖𑒹 𑒕𑒾𑒛𑓃𑒰𑒏 𑒦𑒰𑒋 𑒏𑒹𑒯𑒢 𑒕𑒻। 𑒞𑒿 𑒅𑒞𑓂𑒞𑒩 𑒦𑒹𑒙𑒻 𑒕𑒻 , 𑒍 𑒠𑒳𑒐𑒱𑒞 𑒕𑒻। 𑒫𑓂𑒪𑒰𑒠𑒲𑒧𑒲𑒩 𑒣𑒳𑒕𑒻𑒋 𑒖𑒹 𑒏𑒲 𑒏𑒰𑒪𑓂𑒯𑒱 𑒍𑒏𑒩 𑒦𑒰𑒋 𑒂𑒋𑒪 𑒕𑒪𑒻- 𑒞𑒿 𑒮𑒹 𑒕𑒾𑒛𑓃𑒰𑒏𑒹𑒿 𑒢𑒻 𑒥𑒳𑒗𑒪 𑒕𑒻। 𑒕𑒾𑒛𑓃𑒰 𑒅𑒞𑓂𑒞𑒩 𑒠𑒻𑒞 𑒏𑒯𑒻𑒋 𑒖𑒹 𑒑𑒼𑒛𑒼𑒏𑒹𑒿 𑒠𑒰𑒜𑓃𑒲 𑒕𑒻 𑒂 𑒍 𑒏𑒰𑒩𑒲 𑒢𑒻 𑒑𑒼𑒩 𑒕𑒻। 𑒕𑒾𑒛𑓃𑒰 (𑒣𑒯𑒱𑒪 𑒁𑓀𑒏 𑒖𑒏𑒰𑒿) 𑒣𑒳𑒕𑒻𑒋 𑒖𑒹 𑒍 𑒑𑒼𑒛𑒼𑒏𑒹𑒿 𑒏𑒲 𑒖𑒰 𑒏’ 𑒏𑒯𑒞𑒻। 𑒫𑓂𑒪𑒰𑒠𑒲𑒧𑒲𑒩 𑒏𑒯𑒻𑒋- 𑒖𑒰 𑒏’ 𑒏𑒯𑒴 𑒖𑒹 𑒞𑒼𑒩𑒰 𑒯𑒧𑒩𑒰 𑒮𑒦𑒮𑒿 𑒦𑒹𑒿𑒙 𑒦𑒹𑒪𑒅। 𑒫𑓂𑒪𑒰𑒠𑒲𑒧𑒲𑒩 𑒕𑒾𑒛𑓃𑒰𑒣𑒩 𑒕𑒛𑓃𑒣𑒻𑒋 𑒧𑒳𑒠𑒰 𑒍 𑒣𑒛𑓃𑒰 𑒖𑒰𑒃𑒋। 𑒮𑒴𑒩𑓂𑒨𑒰𑒮𑓂𑒞 𑒯𑒼𑒃 𑒕𑒻। 𑒔𑒢𑓂𑒠𑓂𑒩𑒧𑒰 𑒠𑒹𑒐𑒰 𑒣𑒛𑓃𑒻 𑒕𑒻।
𑒋𑒮𑓂𑒙𑓂𑒩𑒰𑒑𑒼𑒢 𑒏𑒯𑒻𑒋 𑒖𑒹 𑒖𑒿 𑒠𑒳𑒢𑒴 𑒑𑒼𑒙𑒹 𑒁𑒪𑒑 𑒦’ 𑒖𑒰𑒋 𑒞𑒿 𑒄 𑒠𑒳𑒢𑒴 𑒪𑒹𑒪 𑒢𑒲𑒏 𑒯𑒹𑒞𑒻। 𑒖𑒿 𑒏𑒰𑒪𑓂𑒯𑒱 𑒑𑒼𑒛𑒼 𑒢𑒻 𑒋𑒞𑒻 𑒞𑒿 𑒍 𑒠𑒳𑒢𑒴 𑒑𑒼𑒙𑒹 𑒩𑒮𑓂𑒮𑒰𑒮𑒿 𑒪𑒙𑒏𑒱 𑒖𑒰𑒋𑒞 (𑒫𑓂𑒪𑒰𑒠𑒲𑒧𑒲𑒩 𑒏𑒯𑒻𑒋) 𑒂 𑒖𑒿 𑒋𑒞𑒻 𑒞𑒿 𑒥𑒔𑒱 𑒖𑒰𑒋𑒞। 𑒫𑓂𑒪𑒰𑒠𑒲𑒧𑒲𑒩 𑒪𑒏𑒲𑒏 𑒯𑒻𑒙𑒧𑒹 𑒞𑒰𑒏𑒻𑒋, 𑒯𑒱𑒪𑒥𑒻𑒋, 𑒤𑒹𑒩 𑒣𑒯𑒱𑒩𑒻𑒋। 𑒠𑒳𑒢𑒴 𑒖𑒹𑒥𑒰𑒏 𑒢𑒱𑒩𑓂𑒝𑒨 𑒏𑒩𑒻𑒋 𑒧𑒳𑒠𑒰 𑒏𑒱𑒨𑒼 𑒢𑒻 𑒯𑒱𑒪𑒻𑒋। 𑒣𑒩𑓂𑒠𑒰 𑒐𑒮𑒻𑒞 𑒁𑒕𑒱।
............
𑒯𑒻𑒩𑒼𑒪𑓂𑒛 𑒣𑒱𑓀𑒙𑒩𑒏 𑒞𑒲𑒢 𑒁𑓀𑒏𑒲𑒨 𑒢𑒰𑒙𑒏 “𑒠 𑒥𑒩𑓂𑒟𑒛𑒹 𑒣𑒰𑒩𑓂𑒙𑒲”
𑒣𑒲𑒙𑒹, 𑒧𑒹𑒑, 𑒮𑓂𑒙𑒻𑒢𑒪𑒹, 𑒪𑒳𑒪𑒳, 𑒑𑒼𑒪𑓂𑒛𑒥𑒩𑓂𑒑 𑒂 𑒧𑒻𑒏𑒏𑒰𑒢 𑒋𑒏𑒩 𑒣𑒰𑒞𑓂𑒩 𑒕𑒟𑒱।
𑒣𑒯𑒱𑒪 𑒁𑓀𑒏- 𑒧𑒹𑒑 𑒣𑒲𑒙𑒹𑒏𑒹𑒿 𑒖𑒪𑒐𑒻 𑒠𑒻𑒋, 𑒣𑒳𑒕𑒻𑒋 𑒖𑒹 𑒮𑓂𑒙𑒹𑒢𑒪𑒲 𑒅𑒚𑒪𑒻 𑒂𑒏𑒱 𑒢𑒻। 𑒮𑓂𑒙𑒹𑒢𑒪𑒲 𑒁𑒥𑒻𑒋, 𑒍𑒏𑒩𑒼 𑒧𑒹𑒑 𑒖𑒪𑒐𑒻 𑒠𑒻𑒋। 𑒣𑒲𑒙𑒹 𑒏𑒰𑒖𑒣𑒩 𑒔𑒪𑒱 𑒖𑒰𑒃𑒋। 𑒧𑒹𑒑 𑒂 𑒮𑓂𑒙𑒻𑒢𑒪𑒹𑒧𑒹 𑒁𑓀𑒞𑒩𑓀𑒑 𑒑𑒣 𑒯𑒼𑒃𑒋, 𑒯𑒿𑒮𑒲 𑒧𑒖𑒰𑒏 𑒯𑒼𑒃𑒋। 𑒣𑒲𑒙𑒹 𑒧𑒹𑒑𑒮𑒿 𑒏𑒯𑒢𑒹 𑒩𑒯𑒻 𑒖𑒹 𑒠𑒴 𑒑𑒼𑒙𑒹 𑒋𑒞𑒻 𑒂 𑒏𑒱𑒕𑒳 𑒠𑒱𑒢 𑒍𑒏𑒩𑒰 𑒒𑒩𑒧𑒹 𑒩𑒯𑒞𑒻। 𑒍𑒏𑒩 𑒒𑒩 𑒮𑒴𑒔𑒲 (𑒥𑒼𑒩𑓂𑒛𑒱𑓀𑒑 𑒯𑒰𑒅𑒮)𑒧𑒹 𑒕𑒻। 𑒮𑓂𑒙𑒻𑒢𑒪𑒲 𑒄 𑒮𑒳𑒢𑒱 𑒣𑒴𑒕-𑒣𑒰𑒕 𑒏𑒩𑒻 𑒕𑒻, 𑒍 𑒔𑒱𑓀𑒞𑒱𑒞 𑒦’ 𑒖𑒰𑒃𑒋। 𑒮𑓂𑒙𑒻𑒢𑒪𑒲 𑒏𑒯𑒻𑒋 𑒖𑒹 𑒍𑒏𑒩𑒰 𑒣𑒹𑒩𑒱𑒮𑒧𑒹 𑒢𑒰𑒃𑒙 𑒏𑓂𑒪𑒥𑒧𑒹 𑒣𑒱𑒨𑒰𑒢𑒼 𑒥𑒖𑒹𑒥𑒰𑒏 𑒢𑒼𑒏𑒩𑒲𑒏 𑒂𑒤𑒩 𑒂𑒋𑒪 𑒕𑒻। 𑒤𑒹𑒩 𑒋𑒟𑒹𑓀𑒮, 𑒏𑒰𑓀𑒢𑓂𑒮𑒙𑒹𑒢𑒙𑒱𑒢𑒼𑒣𑒪, 𑒖𑒰𑒑𑓂𑒩𑒹𑒥, 𑒫𑓂𑒪𑒰𑒠𑒲𑒫𑒼𑒮𑓂𑒙𑒏 𑒮𑒹𑒯𑒼। 𑒄 𑒮𑒧𑓂𑒣𑒴𑒩𑓂𑒝 𑒫𑒱𑒬𑓂𑒫𑒏 𑒠𑒩𑓂𑒬𑒢𑒥𑒪𑒰 𑒢𑒼𑒏𑒩𑒲 𑒁𑒕𑒱। 𑒣𑒳𑒕𑒪𑒰𑒣𑒩 𑒍 𑒏𑒯𑒻𑒋 𑒖𑒹 𑒍 𑒮𑓀𑒣𑒴𑒩𑓂𑒝 𑒫𑒱𑒬𑓂𑒫, 𑒮𑓀𑒣𑒴𑒩𑓂𑒝 𑒠𑒹𑒬𑒧𑒹 𑒣𑒱𑒨𑒰𑒢𑒼 𑒥𑒖𑒹𑒢𑒹 𑒁𑒕𑒱। 𑒋𑒏 𑒥𑒹𑒩 𑒍 𑒏𑓀𑒮𑒩𑓂𑒙 𑒮𑒹𑒯𑒼 𑒏𑒹𑒢𑒹 𑒩𑒯𑒋। 𑒤𑒹𑒩 𑒍 𑒏𑒯𑒻𑒋 𑒖𑒹 𑒣𑒯𑒱𑒪 𑒏𑓀𑒮𑒩𑓂𑒙 𑒧𑒹 𑒍 𑒮𑓂𑒟𑒰𑒢𑒏 𑒣𑒞𑒰 𑒯𑒩𑒰 𑒠𑒹𑒪𑒏 𑒂 𑒢𑒻 𑒣𑒯𑒳𑒿𑒔𑒱 𑒮𑒏𑒪। 𑒠𑒼𑒮𑒩 𑒏𑓀𑒮𑒩𑓂𑒙𑒧𑒹 𑒖𑒐𑒢 𑒍 𑒣𑒯𑒳𑒿𑒔𑒪 𑒞𑒿 𑒮𑓂𑒟𑒪𑒣𑒩 𑒞𑒰𑒪𑒰 𑒪𑒰𑒑𑒪 𑒩𑒯𑒻। 𑒧𑒹𑒑𑒏 𑒃𑒔𑓂𑒕𑒰 𑒢𑒻 𑒕𑒻 𑒖𑒹 𑒮𑓂𑒙𑒹𑒢𑒪𑒲 𑒏𑒞𑒾 𑒖𑒰𑒋।
𑒮𑓂𑒙𑒹𑒢𑒪𑒲𑒏𑒹𑒿 𑒪𑒰𑒑𑒻 𑒕𑒻 𑒖𑒹 𑒍 𑒠𑒳𑒢𑒴 𑒑𑒼𑒙𑒹 𑒏𑒏𑒩𑒼 𑒐𑒼𑒖𑒧𑒹 𑒁𑒕𑒱। 𑒪𑒳𑒪𑒳𑒏 𑒁𑒥𑒰𑒖 𑒁𑒥𑒻𑒋। 𑒧𑒹𑒑 𑒐𑒩𑒲𑒠𑒰𑒩𑒲𑒏 𑒗𑒼𑒩𑒰 𑒪’ 𑒏’ 𑒥𑒯𑒩𑒰 𑒖𑒰𑒃𑒋, 𑒏𑒱𑒨𑒼 𑒍𑒏𑒩𑒰𑒮𑒿 𑒧𑒱𑒮𑒹𑒖 𑒥𑒼𑒪𑓂𑒮 𑒮𑒧𑓂𑒥𑒼𑒡𑒱𑒞 𑒏’ 𑒑𑒣 𑒏𑒩𑒻 𑒕𑒻। 𑒪𑒳𑒪𑒳 𑒁𑒥𑒻𑒋 𑒂 𑒮𑓂𑒙𑒻𑒢𑒪𑒲𑒮𑒿 𑒑𑒣 𑒏𑒩𑒻𑒋। 𑒪𑒳𑒪𑒳 𑒥𑒯𑒩𑒰𑒃𑒋 𑒞𑒿 𑒑𑒼𑒪𑓂𑒛𑒥𑒩𑓂𑒑 𑒂 𑒧𑒻𑒏𑒏𑒹𑒢 𑒁𑒥𑒻𑒋। 𑒧𑒻𑒏𑒏𑒹𑒢 𑒑𑒼𑒪𑓂𑒛𑒥𑒩𑓂𑒑𑒏𑒹𑒿 𑒢𑒻𑒙 𑒏𑒯𑒱 𑒮𑒧𑓂𑒥𑒼𑒡𑒱𑒞 𑒏𑒩𑒻𑒋। 𑒮𑓂𑒙𑒻𑒢𑒪𑒲 𑒔𑒼𑒩𑒰 𑒏’ 𑒣𑒯𑒱𑒢𑒯𑒱𑒨𑒹 𑒥𑒯𑒩𑒰 𑒖𑒰𑒃𑒋। 𑒧𑒹𑒑 𑒁𑒥𑒻𑒋, 𑒑𑒼𑒪𑓂𑒛𑒥𑒩𑓂𑒑 𑒍𑒏𑒩𑒰 𑒧𑒱𑒮𑒹𑒖 𑒥𑒼𑒪𑓂𑒮 𑒏𑒯𑒱 𑒮𑒧𑓂𑒥𑒼𑒡𑒱𑒞 𑒏𑒩𑒻𑒋 𑒂 𑒁𑒣𑒢𑒰𑒏𑒹𑒿 𑒑𑒼𑒪𑓂𑒛𑒥𑒩𑓂𑒑 𑒂 𑒮𑓀𑒑𑒲𑒏𑒹𑒿 𑒧𑒻𑒏𑒏𑒹𑒢 𑒏𑒯𑒱 𑒣𑒩𑒱𑒔𑒨 𑒠𑒻𑒋। 𑒑𑒣𑒬𑒣𑒏 𑒏𑓂𑒩𑒧𑒧𑒹 𑒑𑒼𑒪𑓂𑒛𑒥𑒩𑓂𑒑 𑒣𑒳𑒕𑒻 𑒕𑒻 𑒖𑒹 𑒍𑒃 𑒩𑒯𑒢𑒱𑒯𑒰𑒩𑒏 𑒢𑒰𑒧 𑒏𑒲 𑒕𑒻 𑒂 𑒍 𑒏𑒲 𑒏𑒩𑒻𑒋। 𑒧𑒹𑒑 𑒏𑒯𑒻𑒋 𑒖𑒹 𑒍𑒏𑒩 𑒢𑒰𑒧 𑒮𑓂𑒙𑒻𑒢𑒪𑒹 𑒫𑒹𑒥𑒩 𑒕𑒻 𑒂 𑒍 𑒋𑒏 𑒥𑒹𑒩 𑒏𑓀𑒮𑒩𑓂𑒙 𑒠𑒹𑒪𑒏 𑒧𑒳𑒠𑒰 𑒏𑒹𑒨𑒩𑒙𑒹𑒏𑒩𑒏 𑒑𑒪𑒞𑒲𑒮𑒿 𑒩𑒰𑒞𑒱𑒧𑒹 𑒍 𑒍𑒞𑒻 𑒥𑒢𑓂𑒠 𑒩𑒯𑒱 𑒑𑒹𑒪 𑒂 𑒦𑒼𑒩 𑒡𑒩𑒱 𑒥𑒢𑓂𑒠 𑒩𑒯𑒪। 𑒂 𑒤𑒹𑒩 “𑒙𑒱𑒣” 𑒪’ 𑒏’ 𑒙𑓂𑒩𑒹𑒢 𑒣𑒏𑒛𑓃𑒱 𑒋𑒞’ 𑒂𑒥𑒱 𑒑𑒹𑒪। 𑒞𑒐𑒢𑒹 𑒧𑒹𑒑 𑒏𑒯𑒻𑒋 𑒖𑒹 𑒂𑒃 𑒍𑒏𑒩 “𑒥𑒩𑓂𑒟𑒛𑒹” 𑒕𑒱𑒌। 𑒂 𑒤𑒹𑒩 “𑒥𑒩𑓂𑒟𑒛𑒹 𑒣𑒰𑒩𑓂𑒙𑒲” 𑒢𑒱𑒩𑓂𑒡𑒰𑒩𑒱𑒞 𑒯𑒼𑒃 𑒕𑒻 9 𑒥𑒖𑒹। 𑒪𑒳𑒪𑒳𑒏𑒹𑒿 𑒮𑒹𑒯𑒼 𑒥𑒹𑒩𑒴 𑒣𑒯𑒩 𑒢𑒼𑒞𑒱 𑒠𑒹𑒪 𑒖𑒹𑒞𑒻। 𑒞𑒲𑒢𑒴 𑒥𑒯𑒩𑒰𑒃𑒋 𑒂 𑒮𑓂𑒙𑒻𑒢𑒪𑒲 𑒐𑒱𑒛𑓃𑒏𑒲𑒮𑒿 𑒞𑒰𑒏𑒻𑒋। 𑒧𑒹𑒑 𑒁𑒥𑒻𑒋। 𑒮𑓂𑒙𑒻𑒢𑒪𑒲 𑒍𑒃 𑒠𑒳𑒢𑒴𑒮𑒿 𑒂𑒬𑓀𑒏𑒱𑒞 𑒁𑒕𑒱। 𑒢𑒰𑒧 𑒣𑒳𑒕𑒻𑒋 𑒞𑒿 𑒧𑒹𑒑 𑒢𑒰𑒧 𑒥𑒱𑒮𑒩𑒱 𑒖𑒰𑒃𑒋 𑒂 𑒍𑒏𑒩𑒰 𑒑𑒼𑒪𑓂𑒛.. 𑒧𑒼𑒢 𑒣𑒛𑓃𑒻 𑒕𑒻 𑒞𑒿 𑒮𑓂𑒙𑒻𑒢𑒪𑒲 𑒧𑒼𑒢 𑒣𑒰𑒛𑓃𑒻 𑒕𑒻- 𑒑𑒼𑒪𑓂𑒛𑒥𑒩𑓂𑒑। 𑒧𑒹𑒑 𑒣𑒳𑒕𑒻𑒋 𑒖𑒹 𑒏𑒲 𑒮𑓂𑒙𑒹𑒢𑒪𑒲 𑒍𑒏𑒩𑒰 𑒔𑒱𑒢𑓂𑒯𑒻𑒋 𑒞𑒿 𑒮𑓂𑒙𑒻𑒢𑒪𑒲 𑒑𑒳𑒧𑓂𑒧 𑒩𑒯𑒻𑒋। 𑒤𑒹𑒩 𑒮𑓂𑒙𑒻𑒢𑒪𑒲 𑒏𑒯𑒻𑒋 𑒖𑒹 𑒂𑒃 𑒍𑒏𑒩 𑒥𑒩𑓂𑒟𑒛𑒹 𑒢𑒻 𑒕𑒱𑒌। 𑒧𑒹𑒑 𑒍𑒏𑒩𑒰 𑒪𑒹𑒪 𑒥𑒔𑓂𑒔𑒰𑒏 𑒛𑓂𑒩𑒧 𑒅𑒣𑒯𑒰𑒩𑒧𑒹 𑒁𑒢𑒢𑒹 𑒁𑒕𑒱 𑒂 𑒞𑒏𑒩 𑒥𑒠𑒪𑒰𑒧𑒹 𑒍 𑒮𑓂𑒙𑒻𑒢𑒪𑒲𑒮𑒿 𑒔𑒳𑒧𑓂𑒧𑒰 𑒧𑒰𑓀𑒑𑒻𑒋।
𑒁𑓀𑒏 2 𑒧𑒹 𑒮𑓂𑒙𑒻𑒢𑒪𑒲 𑒂 𑒧𑒻𑒏𑓂𑒏𑒰𑒢𑒏 𑒑𑒣𑒬𑒣 𑒦’ 𑒩𑒯𑒪 𑒕𑒻। 𑒮𑓂𑒙𑒻𑒢𑒪𑒲 𑒥𑒰𑒯𑒩 𑒖𑒰𑒋 𑒔𑒰𑒯𑒻𑒋। 𑒍 𑒧𑒻𑒏𑓂𑒏𑒰𑒢𑒏𑒹𑒿 𑒏𑒯𑒻 𑒕𑒻 𑒖𑒹 𑒄 𑒥𑒼𑒩𑓂𑒛𑒱𑓀𑒑 𑒯𑒰𑒅𑒮 𑒢𑒻 𑒕𑒲, 𑒢𑒯𑒱𑒨𑒹 𑒏𑒯𑒱𑒨𑒼 𑒩𑒯𑒻। 𑒣𑒲𑒙𑒹 𑒂 𑒑𑒼𑒪𑓂𑒛𑒥𑒩𑓂𑒑 𑒁𑒥𑒻𑒋। 𑒑𑒼𑒪𑓂𑒛𑒥𑒩𑓂𑒑 𑒣𑒲𑒙𑒹𑒏𑒹𑒿 𑒧𑒱𑒮𑓂𑒙𑒩 𑒥𑒼𑒪𑓂𑒮 𑒏𑒯𑒱 𑒮𑒧𑓂𑒥𑒼𑒡𑒱𑒞 𑒏𑒩𑒻𑒋। 𑒣𑒲𑒙𑒹𑒏 𑒑𑒹𑒪𑒰𑒏 𑒥𑒰𑒠 𑒮𑓂𑒙𑒻𑒢𑒪𑒲 𑒏𑒯𑒻𑒋 𑒖𑒹 𑒌 𑒒𑒩𑒏 𑒪𑒼𑒏𑒏 𑒮𑒳𑓀𑒒𑒥𑒰𑒏 𑒬𑒏𑓂𑒞𑒱 𑒔𑒪𑒱 𑒑𑒹𑒪 𑒕𑒻 𑒞𑒹𑒿 𑒍 𑒑𑒼𑒪𑓂𑒛𑒥𑒩𑓂𑒑 𑒂 𑒧𑒻𑒏𑓂𑒏𑒰𑒢𑒏 𑒐𑒞𑒩𑒰 𑒢𑒻 𑒔𑒲𑒢𑓂𑒯𑒱 𑒣𑒰𑒥𑒱 𑒩𑒯𑒪 𑒕𑒟𑒱, 𑒯𑒳𑒢𑒏𑒰 𑒮𑒦𑒏 𑒣𑓂𑒩𑒞𑒱 𑒍𑒏𑒩 (𑒮𑓂𑒙𑒻𑒢𑒪𑒲𑒏) 𑒖𑒱𑒧𑓂𑒧𑒹𑒫𑒰𑒩𑒲 𑒕𑒻।
𑒧𑒻𑒏𑓂𑒏𑒰𑒢 𑒍𑒏𑒩𑒰𑒮𑒿 𑒔𑒬𑓂𑒧𑒰 𑒕𑒲𑒢𑒱 𑒪𑒻𑒋। 𑒧𑒻𑒏𑓂𑒏𑒰𑒢 𑒂 𑒑𑒼𑒪𑓂𑒛𑒥𑒩𑓂𑒑 𑒍𑒏𑒩𑒰𑒮𑒿 𑒣𑒳𑒕𑒻𑒋 𑒖𑒹 𑒍 𑒏𑒱𑒋 𑒁𑒣𑒢 𑒣𑒞𑓂𑒢𑒲𑒏 𑒯𑒞𑓂𑒨𑒰 𑒏𑒹𑒪𑒏। 𑒍 𑒢𑒰𑒧 𑒥𑒠𑒪𑒢𑒹 𑒁𑒕𑒱 𑒂 𑒔𑒩𑒱𑒞𑓂𑒩𑒯𑒲𑒢 𑒁𑒕𑒱, 𑒮𑓂𑒞𑓂𑒩𑒲𑒏𑒹𑒿 𑒠𑒴𑒭𑒱𑒞 𑒏𑒩𑒻𑒋।
𑒗𑒑𑒛𑓃𑒰 𑒬𑒳𑒩𑒴 𑒯𑒼𑒃 𑒕𑒻। 𑒧𑒳𑒠𑒰 𑒗𑒑𑒛𑓃𑒰 𑒩𑒳𑒏𑒪𑒰𑒏 𑒥𑒰𑒠 (𑒣𑓂𑒩𑒰𑒨𑓁 𑒧𑒹𑒑𑒏𑒹𑒿 𑒢𑒻 𑒥𑒳𑒗𑒪 𑒕𑒻) 𑒧𑒹𑒑 𑒣𑒰𑒩𑓂𑒙𑒲 𑒛𑓂𑒩𑒹𑒮𑒧𑒹 𑒁𑒥𑒻𑒋। 𑒮𑒰𑒧𑒰𑒢𑓂𑒨 𑒑𑒣 𑒯𑒼𑒃 𑒕𑒻।
𑒪𑒳𑒪𑒳 𑒁𑒥𑒻𑒋, 𑒑𑒼𑒪𑓂𑒛𑒥𑒩𑓂𑒑 𑒍𑒏𑒩𑒰 𑒏𑒼𑒩𑒰𑒧𑒹 𑒥𑒻𑒮𑒥𑒻𑒋। 𑒪𑒳𑒪𑒳𑒏 𑒣𑒳𑒕𑒪𑒰𑒣𑒩 𑒖𑒹 𑒍𑒏𑒩𑒰 𑒞𑒿 𑒯𑒼𑒃 𑒕𑒪𑒻 𑒖𑒹 𑒍 “𑒢𑒻𑒙” 𑒕𑒲, 𑒑𑒼𑒪𑓂𑒛𑒥𑒩𑓂𑒑 𑒏𑒯𑒻 𑒕𑒻 𑒖𑒹 𑒍𑒏𑒩 𑒣𑒞𑓂𑒢𑒲 𑒍𑒏𑒩𑒰 “𑒮𑒱𑒧𑒹” 𑒏𑒯𑒱 𑒥𑒖𑒥𑒻 𑒕𑒻।
𑒣𑒰𑒩𑓂𑒙𑒲𑒧𑒹 𑒐𑒹𑒪 𑒬𑒳𑒩𑒴 𑒯𑒼𑒃𑒋, 𑒂𑒿𑒐𑒱𑒧𑒹 𑒣𑒙𑓂𑒙𑒲 𑒥𑒰𑒢𑓂𑒯𑒱 𑒏’। 𑒧𑒱𑒮𑒹𑒖 𑒥𑒼𑒪𑓂𑒮𑒏𑒹𑒿 𑒪𑒳𑒪𑒳 𑒮𑓂𑒏𑒰𑒩𑓂𑒤𑒮𑒿 𑒂𑒿𑒐𑒱 𑒥𑒰𑒢𑓂𑒯𑒻𑒋। 𑒍 𑒖𑒏𑒩𑒰 𑒕𑒴 𑒠𑒹𑒞 𑒞𑒏𑒩𑒰 𑒂𑒿𑒐𑒱𑒣𑒩 𑒣𑒙𑓂𑒙𑒲 𑒥𑒰𑒢𑓂𑒯𑒪 𑒖𑒰𑒋𑒞। 𑒍 𑒧𑒻𑒏𑓂𑒏𑒹𑒢𑒏𑒹𑒿 𑒕𑒳𑒥𑒻𑒋। 𑒤𑒹𑒩 𑒮𑓂𑒙𑒻𑒢𑒪𑒲 𑒕𑒳𑒂𑒃𑒋। 𑒍𑒏𑒩 𑒔𑒬𑓂𑒧𑒰 𑒪𑒹𑒪 𑒖𑒰𑒃 𑒕𑒻। 𑒮𑓂𑒙𑒹𑒢𑒪𑒲𑒏𑒹𑒿 𑒣𑒙𑓂𑒙𑒲 𑒥𑒰𑒢𑓂𑒯𑒪 𑒖𑒰𑒃 𑒕𑒻। 𑒧𑒻𑒏𑓂𑒏𑒹𑒢 𑒮𑓂𑒙𑒹𑒢𑒪𑒲𑒏 𑒔𑒬𑓂𑒧𑒰 𑒞𑒼𑒛𑓃𑒱 𑒠𑒻𑒋। 𑒧𑒻𑒏𑓂𑒏𑒹𑒢 𑒛𑓂𑒩𑒧𑒏𑒹𑒿 𑒮𑓂𑒙𑒹𑒢𑒪𑒲𑒏 𑒩𑒮𑓂𑒞𑒰𑒧𑒹 𑒩𑒰𑒐𑒻𑒋, 𑒍 𑒐𑒮𑒱 𑒣𑒛𑓃𑒻𑒋 𑒂 𑒧𑒹𑒑𑒏 𑒑𑒩𑓂𑒠𑒢𑒱 𑒠𑒥𑒥’ 𑒔𑒰𑒯𑒻𑒋, 𑒧𑒻𑒏𑓂𑒏𑒹𑒢 𑒂 𑒑𑒼𑒪𑓂𑒛𑒥𑒩𑓂𑒑 𑒥𑒔𑒥𑒻 𑒕𑒻।
𑒁𑒢𑓂𑒯𑒰𑒩 𑒣𑒮𑒩𑒻𑒋।
𑒮𑓂𑒙𑒻𑒢𑒪𑒲𑒏𑒹𑒿 𑒁𑒥𑒻𑒞 𑒠𑒹𑒐𑒱 𑒪𑒳𑒪𑒳 𑒥𑒹𑒯𑒼𑒬 𑒦’ 𑒖𑒰𑒃𑒋। 𑒮𑓂𑒙𑒻𑒢𑒪𑒹 𑒪𑒳𑒪𑒳𑒏𑒹𑒿 𑒙𑒹𑒥𑒳𑒪𑒣𑒩 𑒩𑒰𑒐𑒻𑒋। 𑒧𑒻𑒏𑓂𑒏𑒰𑒢𑒏𑒹𑒿 𑒙𑒰𑒩𑓂𑒔 𑒦𑒹𑒙𑒻 𑒕𑒻। 𑒍 𑒙𑒹𑒥𑒳𑒪 𑒂 𑒮𑓂𑒙𑒻𑒢𑒪𑒲𑒣𑒩 𑒙𑒰𑒩𑓂𑒔 𑒥𑒰𑒛𑓃𑒻𑒋।
𑒁𑓀𑒏 3: 𑒣𑒲𑒙𑒹 𑒂 𑒧𑒹𑒑𑒧𑒹 𑒑𑒣 𑒯𑒼𑒃 𑒕𑒻। 𑒧𑒹𑒑 𑒮𑓂𑒙𑒻𑒢𑒪𑒲𑒏 𑒫𑒱𑒭𑒨𑒧𑒹 𑒣𑒲𑒙𑒹𑒮𑒿 𑒣𑒳𑒕𑒻𑒋। 𑒪𑒳𑒪𑒳 𑒁𑒥𑒻𑒋, 𑒑𑒼𑒪𑓂𑒛𑒥𑒩𑓂𑒑𑒮𑒿 𑒣𑒳𑒕𑒻𑒋 𑒖𑒹 𑒍𑒏𑒩 𑒣𑒱𑒞𑒰 𑒥𑒰 𑒋𑒛𑒲 (𑒍𑒏𑒩 𑒣𑒯𑒱𑒪 𑒣𑓂𑒩𑒹𑒧𑒲) 𑒏𑒲 𑒮𑒼𑒔𑒞 𑒖𑒿 𑒍 𑒄 𑒮𑒳𑒢𑒞। 𑒍 𑒏𑒯𑒻𑒋 𑒖𑒹 𑒑𑒼𑒪𑓂𑒛𑒥𑒩𑓂𑒑 𑒁𑒣𑒢 𑒠𑒳𑒭𑓂𑒙 𑒣𑒱𑒨𑒰𑒮 𑒞𑒵𑒣𑓂𑒞 𑒏𑒹𑒪𑒏, 𑒍 𑒪𑒳𑒪𑒳𑒏𑒹𑒿 𑒮𑒹 𑒮𑒦 𑒮𑒱𑒐𑒹𑒪𑒏 𑒖𑒹 𑒋𑒏𑒙𑒰 𑒨𑒳𑒫𑒞𑒲 𑒞𑒲𑒢 𑒥𑒹𑒩 𑒥𑒱𑒨𑒰𑒯𑒪 𑒖𑒹𑒥𑒰𑒏 𑒥𑒰𑒠𑒹 𑒮𑒲𑒐𑒞। 𑒑𑒼𑒪𑓂𑒛𑒥𑒩𑓂𑒑 𑒏𑒯𑒻𑒋 𑒖𑒹 𑒍 𑒄 𑒏𑒹𑒪𑒏 𑒏𑒰𑒩𑒝 𑒪𑒳𑒪𑒳 𑒍𑒏𑒩𑒰 𑒄 𑒏𑒩’ 𑒠𑒹𑒪𑒏।
𑒪𑒳𑒪𑒳 𑒖𑒰𑒃𑒋।
𑒧𑒹𑒑𑒏 𑒁𑒢𑒳𑒣𑒮𑓂𑒟𑒱𑒞𑒱𑒧𑒹 𑒑𑒼𑒪𑓂𑒛𑒥𑒩𑓂𑒑 𑒂 𑒧𑒻𑒏𑓂𑒏𑒰𑒢 𑒮𑓂𑒙𑒹𑒢𑒪𑒲𑒏𑒹𑒿 𑒪’ 𑒖𑒰𑒃𑒋। 𑒣𑒲𑒙𑒹 𑒍𑒏𑒩𑒰 𑒕𑒼𑒛𑓃𑒻𑒪𑒹 𑒏𑒯𑒻𑒋। 𑒑𑒼𑒪𑓂𑒛𑒥𑒩𑓂𑒑 𑒂 𑒧𑒻𑒏𑓂𑒏𑒰𑒢 𑒣𑒲𑒙𑒹𑒏𑒹𑒿 𑒮𑒹𑒯𑒼 𑒮𑓀𑒑𑒧𑒹 𑒔𑒪𑒻𑒪𑒹 𑒏𑒯𑒻𑒋, 𑒏𑒰𑒩𑒧𑒹 𑒖𑒑𑒯 𑒕𑒻। 𑒣𑒲𑒙𑒹 𑒮𑓂𑒟𑒱𑒩 𑒩𑒯𑒻𑒋। 𑒣𑒲𑒙𑒹 𑒁𑒮𑒑𑒩𑒹 𑒩𑒯𑒱 𑒖𑒰𑒃𑒋, 𑒧𑒹𑒑 𑒁𑒥𑒻𑒋। 𑒣𑒳𑒕𑒻𑒋, 𑒍 𑒮𑒦 𑒑𑒹𑒪? 𑒣𑒲𑒙𑒹 𑒏𑒯𑒻𑒋- 𑒯𑒿। 𑒮𑓂𑒙𑒹𑒢𑒪𑒲𑒏 𑒫𑒱𑒭𑒨𑒧𑒹 𑒧𑒹𑒑 𑒣𑒳𑒕𑒻𑒋- 𑒍 𑒮𑒳𑒞𑒪𑒹 𑒁𑒕𑒱? 𑒣𑒲𑒙𑒹 𑒏𑒯𑒻𑒋- 𑒍 𑒮𑒳𑒞𑒪 𑒁𑒕𑒱।
-𑒮𑒳𑒞’ 𑒠𑒱𑒨𑒾।
𑒧𑒹𑒑 𑒣𑒳𑒕𑒻𑒋- 𑒏𑒲 𑒄 𑒢𑒲𑒏 𑒣𑒰𑒩𑓂𑒙𑒲 𑒢𑒻 𑒕𑒪 𑒞𑒿 𑒣𑒲𑒙𑒹 𑒏𑒯𑒻𑒋- 𑒍 𑒥𑒰𑒠𑒧𑒹 𑒂𑒋𑒪।
𑒣𑒩𑓂𑒠𑒰 𑒐𑒮𑒻𑒋।
.......
𑒥𑒰𑒠𑒪 𑒮𑒩𑒏𑒰𑒩𑒏 “𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞”
“𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞” 𑒧𑒹 𑒪𑒹𑒐𑒏, 𑒏𑒰𑒏𑒲, 𑒧𑒰𑒢𑒮𑒲, 𑒁𑒧𑒪, 𑒫𑒱𑒧𑒪, 𑒏𑒧𑒪, 𑒃𑒢𑓂𑒠𑓂𑒩𑒖𑒲𑒞 𑒂 𑒃𑒢𑓂𑒠𑓂𑒩𑒖𑒲𑒞𑒏 𑒣𑒞𑓂𑒢𑒲 ( 𑒢𑒰𑒙𑒏𑒧𑒹 𑒥𑒰𑒠𑒧𑒹) 𑒠𑒼𑒮𑒩 𑒧𑒰𑒢𑒮𑒲 𑒣𑒰𑒞𑓂𑒩 𑒁𑒕𑒱।
𑒁𑓀𑒏 1- 𑒪𑒹𑒐𑒏 𑒋𑒏𑒙𑒰 𑒢𑒰𑒙𑒏𑒏 𑒐𑒼𑒖𑒧𑒹 𑒁𑒕𑒱। 𑒍𑒏𑒩 𑒏𑒰𑒏𑒲 𑒍𑒏𑒩 𑒐𑒹𑒢𑒰𑒃-𑒣𑒱𑒢𑒰𑒃 𑒕𑒼𑒛𑓃𑒱 𑒪𑒱𑒐𑒻𑒞 𑒩𑒯𑒥𑒰𑒣𑒩 𑒞𑒧𑒮𑒰𑒋𑒪 𑒕𑒻। 𑒧𑒰𑒢𑒮𑒲 𑒣𑒳𑒕𑒻𑒋 𑒖𑒹 𑒍 𑒣𑒜𑓃𑒞 𑒖𑒹 𑒏𑒱𑒕𑒳 𑒍 𑒪𑒱𑒐𑒪𑒏। 𑒪𑒹𑒐𑒏 𑒏𑒯𑒻𑒋, 𑒍 𑒏𑒱𑒕𑒳 𑒢𑒻 𑒪𑒱𑒐𑒪𑒏। 𑒧𑒰𑒢𑒮𑒲 𑒍𑒏𑒩𑒰 𑒣𑓂𑒩𑒨𑒰𑒮 𑒏𑒩𑒻𑒪𑒹 𑒏𑒯𑒻 𑒕𑒻। 𑒪𑒹𑒐𑒏 𑒠𑒩𑓂𑒬𑒏𑒧𑒹𑒮𑒿 𑒔𑒰𑒩𑒱𑒙𑒰 𑒥𑒰𑒠𑒧𑒹 𑒂𑒥𑒻𑒥𑒪𑒰𑒏𑒹𑒿 𑒮𑓂𑒙𑒹𑒖𑒣𑒩 𑒥𑒖𑒥𑒻𑒋, 𑒁𑒧𑒪, 𑒫𑒱𑒧𑒪, 𑒏𑒧𑒪। 𑒔𑒰𑒩𑒱𑒧 𑒁𑒣𑒢 𑒢𑒰𑒧 𑒢𑒱𑒩𑓂𑒧𑒪 𑒏𑒳𑒧𑒰𑒩 𑒏𑒯𑒻𑒋। 𑒪𑒹𑒐𑒏 𑒏𑒯𑒻𑒋- 𑒄 𑒢𑒻 𑒦’ 𑒮𑒏𑒻 𑒕𑒻, 𑒁𑒣𑒢 𑒁𑒮𑒪𑒲 𑒢𑒰𑒧 𑒥𑒞𑒰𑒅। 𑒍 𑒏𑒯𑒻𑒋- 𑒃𑒢𑓂𑒠𑓂𑒩𑒖𑒲𑒞 𑒩𑒰𑒨। 𑒁𑒧𑒪, 𑒫𑒱𑒧𑒪, 𑒏𑒧𑒪 𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞। 𑒧𑒰𑒢𑒮𑒲 (𑒁𑒮𑒪𑒲 𑒢𑒰𑒧 𑒠𑒼𑒮𑒩 𑒧𑒳𑒠𑒰 𑒪𑒹𑒐𑒏 𑒏𑒯𑒻𑒋 𑒧𑒰𑒢𑒮𑒲𑒨𑒹) 𑒍𑒏𑒩 𑒧𑒧𑒱𑒨𑒾𑒞 𑒥𑒯𑒱𑒢 𑒕𑒱𑒌। 𑒍 𑒍𑒏𑒩𑒰𑒮𑒿 𑒣𑓂𑒩𑒹𑒧 𑒏𑒩𑒻𑒋, 𑒣𑒩𑒧𑓂𑒣𑒩𑒰 𑒞𑒼𑒛𑓃’ 𑒔𑒰𑒯𑒻𑒋
𑒁𑓀𑒏 2: 𑒥𑒰𑒠𑒧𑒹 𑒍𑒏𑒩𑒰 𑒪𑒰𑒑𑒻 𑒕𑒻 𑒖𑒹 𑒏𑒲 𑒖𑒿 𑒄 𑒣𑓂𑒩𑒹𑒧 𑒮𑒤𑒪 𑒦𑒃𑒨𑒼 𑒖𑒹𑒞𑒻 𑒞𑒿 𑒍𑒏𑒩𑒰 𑒅𑒞𑓂𑒞𑒩 𑒦𑒹𑒙𑒞𑒻? 𑒢𑒻 𑒢𑒹। 𑒍 𑒪𑓀𑒠𑒢 𑒮𑒹𑒯𑒼 𑒖𑒰𑒋𑒞। 𑒧𑒵𑒞𑓂𑒨𑒳 𑒔𑒰𑒯𑒻𑒋, 𑒢𑒻 𑒏’ 𑒣𑒰𑒥𑒻𑒋। 𑒪𑒹𑒐𑒏 𑒠𑓂𑒫𑒰𑒩𑒰 𑒢𑒰𑒧𑒱𑒞 𑒃𑒢𑓂𑒠𑓂𑒩𑒖𑒲𑒞𑒏 𑒧𑒰𑒢𑒮𑒲 𑒁𑒫𑒱𑒫𑒰𑒯𑒱𑒞 𑒁𑒕𑒱, 𑒯𑒖𑒰𑒩𑒲𑒥𑒰𑒑𑒧𑒹 𑒣𑒜𑓃𑒥𑒻𑒋।
𑒧𑒳𑒠𑒰 𑒁𑒧𑒪, 𑒫𑒱𑒧𑒪, 𑒏𑒧𑒪𑒏 𑒫𑒱𑒣𑒩𑒲𑒞 𑒃𑒢𑓂𑒠𑓂𑒩𑒖𑒲𑒞 𑒪𑒲𑒐𑒣𑒩 𑒢𑒻 𑒔𑒪𑒻𑒋। 𑒁𑒪𑒑 𑒏𑒱𑒕𑒳 𑒏𑒩’ 𑒔𑒰𑒯𑒻𑒋। 𑒏𑒰𑒏𑒰, 𑒖𑒏𑒩𑒰 𑒍 𑒧𑒰𑒋 𑒏𑒯𑒻𑒋, 𑒐𑒰𑒃𑒪𑒹 𑒏𑒯𑒻 𑒕𑒻 𑒂 𑒧𑒰𑒢𑒮𑒲 𑒪𑒱𑒐𑒻𑒪𑒹। 𑒧𑒳𑒠𑒰 𑒖𑒐𑒢 𑒋𑒏 𑒥𑒹𑒩 𑒧𑒰𑒢𑒮𑒲 𑒪𑒹𑒐𑒏𑒏𑒹𑒿 𑒐𑒰𑒃𑒪𑒹 𑒏𑒯𑒱 𑒠𑒻𑒋 𑒞𑒿 𑒪𑒹𑒐𑒏 𑒠𑒳𑒐𑒲 𑒦’ 𑒖𑒰𑒃𑒋, 𑒢𑒻, 𑒁𑒯𑒴𑒿? 𑒢𑒻।
𑒧𑒳𑒠𑒰 𑒤𑒹𑒩 𑒧𑒰𑒢𑒮𑒲𑒏𑒹𑒿 𑒑𑒪𑒞𑒲𑒏 𑒦𑒰𑒢 𑒯𑒼𑒃 𑒕𑒻, 𑒍 𑒍𑒏𑒩 𑒪𑒹𑒐𑒢𑒏 𑒫𑒱𑒭𑒨𑒧𑒹 𑒣𑒳𑒕𑒻𑒋। 𑒪𑒹𑒐𑒏 𑒔𑒱𑓀𑒞𑒱𑒞 𑒁𑒕𑒱, 𑒄 𑒃𑒢𑓂𑒠𑓂𑒩𑒖𑒲𑒞 𑒫𑒰𑒮𑓂𑒞𑒫𑒱𑒏𑒞𑒰𑒏𑒹𑒿 𑒢𑒻 𑒧𑒰𑒢𑒻𑒋, 𑒏𑒼𑒢𑒼 𑒣𑓂𑒩𑒞𑒱𑒥𑒠𑓂𑒡𑒞𑒰 𑒍𑒏𑒩𑒰𑒧𑒹 𑒢𑒻 𑒕𑒻। 𑒧𑒳𑒠𑒰 𑒧𑒰𑒢𑒮𑒲 𑒮𑒹 𑒢𑒻 𑒧𑒰𑒢𑒻𑒋।
𑒍 𑒮𑒣𑒢𑒰 𑒞𑒿 𑒠𑒹𑒐𑒻𑒋 𑒢𑒹।
𑒃𑒢𑓂𑒠𑓂𑒩𑒖𑒲𑒞 𑒪𑓀𑒠𑒢𑒮𑒿 𑒏𑒼𑒪𑒏𑒰𑒞𑒰 𑒒𑒳𑒩𑒻𑒋, 𑒋𑒏𑒙𑒰 𑒠𑒼𑒮𑒩 𑒮𑓂𑒞𑓂𑒩𑒲𑒮𑒿 𑒥𑒱𑒨𑒰𑒯 𑒏𑒩𑒻𑒋, 𑒍𑒏𑒩𑒼 𑒢𑒰𑒧 𑒧𑒰𑒢𑒮𑒲 𑒕𑒱𑒌 (𑒃𑒢𑓂𑒠𑓂𑒩𑒖𑒲𑒞 𑒋𑒏𑒩𑒰 𑒧𑒰𑒢𑒮𑒲 𑒏𑒯𑒻𑒋, 𑒣𑒯𑒱𑒪𑒳𑒏𑒰 𑒧𑒰𑒢𑒮𑒲 𑒖𑒹𑒏𑒩𑒰 𑒪𑒹𑒐𑒏 𑒧𑒰𑒢𑒮𑒲 𑒏𑒯𑒻𑒋 𑒍 𑒃𑒢𑓂𑒠𑓂𑒩𑒖𑒲𑒞𑒏 𑒧𑒧𑒱𑒨𑒾𑒞 𑒕𑒱𑒌, 𑒖𑒏𑒩𑒰𑒮𑒿 𑒃𑒢𑓂𑒠𑓂𑒩𑒖𑒲𑒞 𑒣𑓂𑒩𑒹𑒧 𑒏𑒩𑒻𑒋 𑒧𑒳𑒠𑒰 𑒍 𑒦𑒰𑒋𑒏 𑒩𑒱𑒬𑓂𑒞𑒰𑒮𑒿 𑒍𑒏𑒩𑒰𑒮𑒿 𑒥𑒱𑒨𑒰𑒯 𑒢𑒻 𑒏𑒩𑒻𑒋 𑒖𑒹 𑒪𑒼𑒏 𑒏𑒲 𑒏𑒯𑒞𑒻, 𑒂 𑒃𑒢𑓂𑒠𑓂𑒩𑒖𑒲𑒞 𑒪𑒹𑒐𑒏𑒏𑒹𑒿 𑒏𑒯𑒻𑒞 𑒩𑒯𑒻𑒋 𑒖𑒹 𑒍𑒏𑒩 𑒢𑒰𑒧 𑒧𑒰𑒢𑒮𑒲 𑒢𑒻 𑒕𑒱𑒌। )
𑒃𑒢𑓂𑒠𑓂𑒩𑒖𑒲𑒞 𑒥𑒳𑒗’ 𑒪𑒑𑒻𑒋 (𑒧𑒰𑒢𑒮𑒲𑒏𑒹𑒿 𑒍 𑒏𑒯𑒻𑒋) 𑒖𑒹 𑒫𑓂𑒨𑒏𑓂𑒞𑒱𑒏 𑒦𑒱𑒢𑓂𑒢𑒞𑒰𑒏 𑒧𑒰𑒞𑓂𑒩 𑒦𑓂𑒩𑒧 𑒁𑒕𑒱। 𑒮𑓂𑒫𑒣𑓂𑒢 𑒮𑓂𑒫𑒣𑓂𑒢 𑒁𑒕𑒱 𑒍 𑒫𑒰𑒮𑓂𑒞𑒫𑒱𑒏𑒞𑒰 𑒢𑒻 𑒥𑒢𑒱 𑒮𑒏𑒻𑒋। 𑒧𑒰𑒢𑒮𑒲, 𑒧𑒰𑒢𑒮𑒲, 𑒧𑒰𑒢𑒮𑒲, 𑒮𑒦 𑒧𑒰𑒢𑒮𑒲, 𑒖𑒹𑒢𑒰 𑒁𑒧𑒪, 𑒫𑒱𑒧𑒪, 𑒏𑒧𑒪। 𑒪𑒹𑒐𑒏 𑒣𑒴𑒕𑒻𑒋 𑒞𑒿 𑒃𑒢𑓂𑒠𑓂𑒩𑒖𑒲𑒞 𑒏𑒯𑒻𑒋- 𑒁𑒧𑒪, 𑒫𑒱𑒧𑒪, 𑒏𑒧𑒪 𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞 (𑒮𑒹𑒯𑒼!)।


𑒪𑒹𑒐𑒏𑒏 𑒨𑒰𑒞𑓂𑒩𑒰𑒏 𑒏𑒼𑒢𑒼 𑒪𑒏𑓂𑒭𑓂𑒨 𑒢𑒻, 𑒏𑒼𑒢𑒼 𑒅𑒠𑓂𑒠𑒹𑒬𑓂𑒨 𑒢𑒻, 𑒤𑒳𑒮𑒱𑒨𑒰𑒿𑒯𑒲𑒏 𑒨𑒰𑒞𑓂𑒩𑒰 𑒖𑒏𑒩 𑒏𑒼𑒢𑒼 𑒏𑒰𑒩𑒝 𑒢𑒻। 𑒪𑒹𑒐𑒏 𑒃𑒢𑓂𑒠𑓂𑒩𑒖𑒲𑒞𑒏𑒹𑒿 𑒏𑒯𑒻𑒋, 𑒯𑒧𑒩𑒰 𑒮𑒦𑒏𑒹𑒿 𑒖𑒲𑒥𑒰𑒏 𑒁𑒕𑒱, 𑒔𑒪𑒥𑒰𑒏 𑒁𑒕𑒱, 𑒏𑒼𑒢𑒼 𑒡𑒩𑓂𑒧𑒮𑓂𑒟𑒪 𑒢𑒻 𑒞𑒻𑒨𑒼 𑒞𑒲𑒩𑓂𑒟𑒨𑒰𑒞𑓂𑒩𑒰 𑒏𑒩𑒥𑒰𑒏 𑒁𑒕𑒱।

𑒅𑒠𑒨 𑒢𑒰𑒩𑒰𑒨𑒝 𑒮𑒱𑓀𑒯 ‘𑒢𑒔𑒱𑒏𑒹𑒞𑒰’𑒏 “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬”

𑒣𑓂𑒩𑒟𑒧 𑒏𑒪𑓂𑒪𑒼𑒪: 𑒄 𑒢𑒰𑒙𑒏 𑒖𑓂𑒨𑒼𑒞𑒱𑒩𑒲𑒬𑓂𑒫𑒩𑒏 𑒣𑒩𑒧𑓂𑒣𑒩𑒰𑒧𑒹 𑒏𑒪𑓂𑒪𑒼𑒪𑒧𑒹 (𑒯𑒳𑒢𑒏𑒩 𑒫𑒩𑓂𑒝 𑒩𑒞𑓂𑒢𑒰𑒏𑒩 𑒏𑒪𑓂𑒪𑒼𑒪𑒧𑒹 𑒫𑒱𑒦𑒏𑓂𑒞 𑒁𑒕𑒱 𑒖𑒹 𑒢𑒰𑒙𑒏 𑒢𑒯𑒱 𑒕𑒲, 𑒡𑒴𑒩𑓂𑒞-𑒮𑒧𑒰𑒑𑒧 𑒖𑒹 𑒖𑓂𑒨𑒼𑒞𑒱𑒩𑒲𑒬𑓂𑒫𑒩 𑒪𑒱𑒐𑒱𑒞 𑒢𑒰𑒙𑒏 𑒁𑒕𑒱- 𑒁𑓀𑒏𑒧𑒹 𑒫𑒱𑒦𑒏𑓂𑒞 𑒁𑒕𑒱) 𑒫𑒱𑒦𑒰𑒖𑒱𑒞 𑒁𑒕𑒱। 𑒔𑒰𑒩𑒱 𑒏𑒪𑓂𑒪𑒼𑒪𑒏 𑒫𑒱𑒦𑒰𑒖𑒢𑒏 𑒣𑓂𑒩𑒟𑒧 𑒏𑒪𑓂𑒪𑒼𑒪 𑒮𑓂𑒫𑒩𑓂𑒑 (𑒫𑒰 𑒢𑒩𑒏) 𑒏𑒹𑒩 𑒠𑓂𑒫𑒰𑒩𑒣𑒩 𑒂𑒩𑒧𑓂𑒦 𑒯𑒼𑒃𑒞 𑒁𑒕𑒱। 𑒍𑒞𑒋 𑒥𑒯𑒳𑒞 𑒩𑒰𑒮 𑒧𑒳𑒃𑒪 𑒪𑒼𑒏 𑒠𑓂𑒫𑒰𑒩𑒏 𑒦𑒲𑒞𑒩 𑒣𑓂𑒩𑒫𑒹𑒬𑒏 𑒪𑒹𑒪 𑒣𑓀𑒏𑓂𑒞𑒱𑒥𑒠𑓂𑒡 𑒕𑒟𑒱। 𑒏𑓂𑒨𑒼 𑒣𑒟 𑒠𑒳𑒩𑓂𑒒𑒙𑒢𑒰𑒧𑒹 𑒬𑒱𑒏𑒰𑒩 𑒦𑒹𑒪 𑒥𑒰𑒖𑒰𑒩𑒲 𑒕𑒟𑒱 𑒞𑒿 𑒮𑓀𑒑𑒧𑒹 𑒨𑒳𑒠𑓂𑒠𑒧𑒹 𑒧𑒵𑒞 𑒦𑒹𑒪 𑒮𑒻𑒢𑒱𑒏 𑒂 𑒔𑒼𑒩𑒱 𑒏𑒩𑒋 𑒏𑒰𑒪 𑒧𑒰𑒩𑒪 𑒑𑒹𑒪 𑒔𑒼𑒩, 𑒅𑒔𑓂𑒔𑒏𑓂𑒏𑒰 𑒂 𑒣𑒰𑒏𑒱𑒙𑒧𑒰𑒩 𑒮𑒹𑒯𑒼 𑒕𑒟𑒱। 𑒖𑓂𑒨𑒼𑒞𑒱𑒩𑒲𑒬𑓂𑒫𑒩𑒏 𑒡𑒴𑒩𑓂𑒞𑒮𑒧𑒰𑒑𑒧𑒧𑒹 𑒖𑒹 𑒁𑒞𑒱 𑒂𑒡𑒳𑒢𑒱𑒏 𑒁𑒥𑓂𑒮𑒩𑓂𑒛𑒱𑒙𑒲 𑒁𑒕𑒱 𑒮𑒹 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒮𑒹𑒯𑒼 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱। 𑒣𑓂𑒩𑒟𑒧 𑒏𑒪𑓂𑒪𑒼𑒪𑒧𑒹 𑒖𑒹 𑒥𑒰𑒖𑒰𑒩𑒲 𑒕𑒟𑒱 𑒮𑒹, 𑒣𑓀𑒏𑓂𑒞𑒱 𑒞𑒼𑒛𑓃𑒱 𑒂𑒑𑒰𑒿 𑒥𑒜𑓃𑒪𑒰 𑒅𑒞𑓂𑒞𑒩, 𑒔𑒼𑒩 𑒂 𑒅𑒔𑒏𑓂𑒏𑒰 𑒠𑒳𑒢𑒴 𑒑𑒼𑒙𑒹𑒏𑒹𑒿, 𑒏𑒰𑒪𑒩 𑒣𑒏𑒛𑓃𑒱 𑒣𑒳𑒢𑓁 𑒯𑒳𑒢𑒏𑒩 𑒮𑒦𑒏 𑒧𑒴𑒪 𑒮𑓂𑒟𑒰𑒢𑒣𑒩 𑒠𑒋 𑒁𑒥𑒻𑒞 𑒕𑒟𑒱। 𑒅𑒔𑒏𑓂𑒏𑒰 𑒖𑒹 𑒥𑒰𑒠𑒧𑒹 𑒣𑒞𑒰 𑒔𑒪𑒻𑒞 𑒁𑒕𑒱 𑒖𑒹 𑒑𑒳𑒝𑓂𑒛𑒰-𑒠𑒰𑒠𑒰 𑒟𑒱𑒏 𑒧𑒳𑒠𑒰 𑒥𑒰𑒖𑒰𑒩𑒲 𑒪𑒑 𑒮𑒘𑓂𑒔-𑒧𑒘𑓂𑒔 𑒩𑒯𑒻𑒞 𑒁𑒕𑒱, 𑒯𑒳𑒢𑒏𑒰𑒮𑒿 𑒁𑓀𑒑𑒰 𑒕𑒼𑒛𑓃𑒥𑒰𑒏 𑒪𑒹𑒪 𑒏𑒯𑒻𑒞 𑒁𑒕𑒱। 𑒧𑒳𑒠𑒰 𑒖𑒐𑒢 𑒣𑒰𑒏𑒹𑒙𑒧𑒰𑒩 𑒥𑒰𑒖𑒰𑒩𑒲 𑒠𑒱𑒮𑒮𑒿 𑒔𑒼𑒩𑒏 𑒫𑒱𑒣𑒏𑓂𑒭𑒧𑒹 𑒥𑒖𑒻𑒞 𑒁𑒕𑒱 𑒞𑒐𑒢 𑒅𑒔𑒏𑓂𑒏𑒰 𑒔𑒏𑓂𑒏𑒴 𑒢𑒱𑒏𑒰𑒪𑒱 𑒁𑒣𑒢 𑒁𑒮𑒪 𑒩𑒴𑒣𑒧𑒹 𑒂𑒥𑒱 𑒖𑒰𑒃𑒞 𑒁𑒕𑒱 𑒂 𑒣𑒰𑒏𑒹𑒙𑒧𑒰𑒩𑒣𑒩 𑒧𑒰𑒩𑒱-𑒧𑒰𑒩𑒱 𑒏𑒋 𑒅𑒚𑒻𑒞 𑒁𑒕𑒱। 𑒧𑒳𑒠𑒰 𑒖𑒐𑒢 𑒔𑒼𑒩 𑒏𑒯𑒻𑒞 𑒕𑒢𑒱 𑒖𑒹 𑒄 𑒮𑒹𑒯𑒼 𑒁𑒣𑒢𑒹 𑒥𑒱𑒩𑒰𑒠𑒩𑒲𑒏 𑒁𑒕𑒱 𑒖𑒹 𑒕𑒼𑒙-𑒕𑒲𑒢 𑒣𑒰𑒏𑒹𑒙𑒧𑒰𑒩 𑒧𑒰𑒞𑓂𑒩 𑒥𑒢𑒱 𑒮𑒏𑒪, 𑒍𑒏𑒩 𑒖𑒏𑒰𑒿 𑒧𑒰𑒿𑒖𑒪 𑒔𑒼𑒩 𑒢𑒯𑒱, 𑒂 𑒅𑒔𑒏𑓂𑒏𑒰 𑒖𑒹𑒏𑒰𑒿 𑒑𑒳𑒝𑓂𑒛𑒰-𑒥𑒠𑒧𑒰𑒬 𑒥𑒢𑒥𑒰𑒏 𑒞𑒿 𑒮𑒼𑒔𑒱𑒍 𑒢𑒘𑒱 𑒮𑒏𑒪, 𑒞𑒐𑒢 𑒅𑒔𑒏𑓂𑒏𑒰 𑒧𑒯𑒩𑒰𑒖 𑒔𑒼𑒩𑒏 𑒣𑒰𑒕𑒰𑒿 𑒣𑒛𑓃𑒱 𑒖𑒰𑒃𑒞 𑒕𑒟𑒱, 𑒖𑒹 𑒥𑒠𑒧𑒰𑒬 𑒏𑒏𑒩𑒰 𑒏𑒯𑒪𑒿𑒯। 𑒂𑒥 𑒣𑒰𑒏𑒹𑒙𑒧𑒰𑒩 𑒧𑒾𑒏𑒰 𑒠𑒹𑒐𑒱 𑒣𑒏𑓂𑒭 𑒥𑒠𑒪𑒻𑒞 𑒁𑒕𑒱 𑒂 𑒅𑒔𑒏𑓂𑒏𑒰𑒏𑒹𑒿 𑒏𑒯𑒻𑒞 𑒕𑒢𑓂𑒯𑒱 𑒖𑒹 𑒁𑒯𑒰𑒿𑒏𑒹𑒿 𑒢𑒯𑒱 𑒯𑒧𑒩𑒰 𑒏𑒯𑒪𑒏। 𑒮𑓀𑒑𑒹 𑒄𑒯𑒼 𑒏𑒯𑒻𑒞 𑒁𑒕𑒱 𑒖𑒹 𑒔𑒼𑒩𑒱 𑒞𑒿 𑒄 𑒞𑒹𑒯𑒢 𑒏𑒩𑒋 𑒖𑒢𑒻𑒞 𑒁𑒕𑒱, 𑒖𑒹 𑒑𑒱𑒩𑒯𑒟𑒏 𑒥𑒹𑒙𑒰 𑒂 𑒏𑒳𑒏𑒳𑒩 𑒮𑒦 𑒔𑒼𑒩𑒱 𑒏𑒩𑒻𑒞 𑒏𑒰𑒪 𑒣𑒲𑒙𑒻𑒞-𑒣𑒲𑒙𑒻𑒞 𑒋𑒞𑓄 𑒣𑒚𑒰 𑒠𑒹𑒪𑒏𑒋 𑒂 𑒯𑒧𑒩 𑒐𑒱𑒡𑒰𑓀𑒬 𑒏𑒩𑒻𑒞 𑒁𑒕𑒱, 𑒥𑒛𑓃𑒏𑒰 𑒔𑒼𑒩 𑒦𑒹𑒪𑒰 𑒯𑒿। 𑒦𑒠𑓂𑒩 𑒫𑓂𑒨𑒏𑓂𑒞𑒱 𑒔𑒼𑒩𑒏 𑒥𑒑𑒹𑒥𑒰𑒢𑒲 𑒠𑒹𑒐𑒱 𑒄 𑒫𑒱𑒬𑓂𑒫𑒰𑒮 𑒢𑒯𑒱 𑒏𑒋 𑒣𑒥𑒻𑒞 𑒕𑒟𑒱 𑒖𑒹 𑒍 𑒔𑒼𑒩 𑒟𑒱𑒏𑒰𑒯। 𑒞𑒰𑒯𑒱𑒣𑒩 𑒣𑒰𑒏𑒹𑒙𑒧𑒰𑒩, 𑒔𑒼𑒩 𑒧𑒯𑒰𑒩𑒰𑒖𑒏𑒹𑒿 𑒂𑒩 𑒏𑒱𑒔𑒏𑒱𑒔𑒥𑒻𑒞 𑒕𑒢𑓂𑒯𑒱। 𑒞𑒐𑒢 𑒍 𑒔𑒼𑒩 𑒧𑒯𑒩𑒰𑒖 𑒋𑒯𑒱 𑒑𑒣𑒣𑒩 𑒠𑒳𑒐 𑒣𑓂𑒩𑒏𑒙 𑒏𑒩𑒻𑒞 𑒕𑒟𑒱 𑒖𑒹 𑒢𑒯𑒱 𑒞𑒿 𑒍𑒯𑒱 𑒩𑒰𑒞𑒱 𑒋𑒯𑒱 𑒣𑒰𑒏𑒹𑒙𑒧𑒰𑒩𑒏𑒹𑒿 𑒔𑒼𑒩𑒱𑒣𑒩 𑒪𑒋 𑒖𑒋𑒞𑒟𑒱 𑒂 𑒢𑒹 𑒍 𑒯𑒳𑒢𑒏𑒰 𑒣𑒱𑒙𑒻𑒞 𑒠𑒹𑒐𑒱 𑒮𑒏𑒻𑒞। 𑒋𑒧𑓂𑒯𑒩 𑒥𑒖𑒰𑒩𑒲 𑒖𑒹 𑒣𑒯𑒱𑒢𑒹 𑒔𑒼𑒩 𑒂 𑒅𑒔𑓂𑒏𑓂𑒏𑒰𑒏𑒹𑒿 𑒏𑒰𑒪𑒩 𑒣𑒏𑒛𑓃𑒱 𑒒𑒱𑒮𑒱𑒨𑒰 𑒔𑒳𑒏𑒪 𑒕𑒪𑒰𑒯, 𑒑𑒳𑒧𑓂𑒧 𑒦𑒹𑒪 𑒮𑒦𑒙𑒰 𑒮𑒳𑒢𑒻𑒞 𑒕𑒟𑒱 𑒂 𑒠𑒳𑒐 𑒣𑓂𑒩𑒏𑒙 𑒏𑒩𑒻𑒞 𑒕𑒟𑒱 𑒖𑒹 𑒋𑒏𑒩𑒰 𑒮𑒦𑒏 𑒮𑓀𑒑 𑒮𑓂𑒫𑒩𑓂𑒑𑒧𑒹 𑒩𑒯𑒥, 𑒞𑒿 𑒮𑓂𑒫𑒩𑓂𑒑 𑒏𑒹𑒯𑒢 𑒯𑒼𑒋𑒞 𑒮𑒹 𑒢𑒯𑒱 𑒖𑒰𑒢𑒱। 𑒂𑒥 𑒥𑒖𑒰𑒩𑒲 𑒧𑒯𑒩𑒰𑒖 𑒑𑒲𑒞𑒏 𑒋𑒏𑒙𑒰 𑒙𑒳𑒏𑒛𑓃𑒲 𑒋𑒯𑒱 𑒫𑒱𑒭𑒨𑒣𑒩 𑒣𑒜𑓃𑒻𑒞 𑒕𑒟𑒱। 𑒖𑒹𑒢𑒰 𑒡𑒴𑒩𑓂𑒞𑒮𑒧𑒰𑒑𑒧𑒧𑒹 𑒑𑒲𑒞 𑒁𑒕𑒱 𑒞𑒯𑒱𑒢𑒰 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒮𑒹𑒯𑒼, 𑒄 𑒋𑒯𑒱 𑒮𑓂𑒟𑒪𑒣𑒩 𑒣𑓂𑒩𑒰𑒩𑒧𑓂𑒦 𑒯𑒼𑒃𑒞 𑒁𑒕𑒱 𑒖𑒹 𑒋𑒯𑒱 𑒢𑒰𑒙𑒏𑒏𑒹𑒿 𑒮𑓀𑒑𑒲𑒞𑒏 𑒥𑒢𑒰 𑒠𑒻𑒞 𑒁𑒕𑒱। 𑒍𑒧𑓂𑒯𑒩 𑒣𑒰𑒏𑒹𑒙𑒧𑒰𑒩𑒖𑒲 𑒮𑒦𑒏 𑒣𑒰𑒏𑒹𑒙 𑒏𑒰𑒙𑒱 𑒪𑒻𑒞 𑒕𑒟𑒱 𑒂 𑒥𑒙𑒳𑒂 𑒮𑒰𑒤 𑒏𑒋 𑒠𑒻𑒞 𑒕𑒟𑒱। 𑒂𑒥 𑒤𑒹𑒩 𑒑𑒲𑒞𑒧𑒨 𑒤𑒏𑒛𑓃𑒰 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱 𑒧𑒳𑒠𑒰 𑒞𑒐𑒢𑒹 𑒋𑒏𑒙𑒰 𑒧𑒵𑒞 𑒩𑒠𑓂𑒠𑒲𑒥𑒪𑒰 𑒮𑒦𑒏 𑒞𑓀𑒠𑓂𑒩𑒰𑒏𑒹𑒿 𑒞𑒼𑒛𑓃𑒱 𑒠𑒻𑒞 𑒕𑒟𑒱, 𑒄 𑒏𑒯𑒱 𑒖𑒹 𑒨𑒧𑒰𑒪𑒨𑒏 𑒥𑒢𑓂𑒠 𑒠𑒩𑒥𑒖𑓂𑒖𑒰𑒏 𑒍𑒯𑒱 𑒣𑒰𑒩, 𑒄 𑒥𑒙𑒳𑒂 𑒂 𑒣𑒰𑒃-𑒏𑒾𑒛𑓃𑒲 𑒏𑒼𑒢𑒼 𑒏𑒰𑒖𑒏 𑒢𑒯𑒱 𑒁𑒕𑒱। 𑒂𑒥 𑒠𑒳𑒢𑒴 𑒧𑒵𑒞 𑒦𑒠𑓂𑒩 𑒫𑓂𑒨𑒏𑓂𑒞𑒱 𑒮𑒹𑒯𑒼 𑒥𑒖𑒻𑒞 𑒕𑒟𑒱, 𑒖𑒹 𑒯𑒿 𑒠𑒼𑒮𑒩 𑒠𑒹𑒮𑒧𑒹 𑒠𑒼𑒮𑒩 𑒠𑒹𑒮𑒏 𑒮𑒱𑒏𑓂𑒏𑒰 𑒏𑒯𑒰𑒿 𑒔𑒪𑒻𑒞 𑒁𑒕𑒱। 𑒂𑒥 𑒋𑒏𑒙𑒰 𑒩𑒧𑒝𑒲𑒧𑒼𑒯𑒢 𑒢𑒰𑒧𑓂𑒢𑒰 𑒧𑒵𑒞 𑒩𑒮𑒱𑒏 𑒦𑒠𑓂𑒩 𑒫𑓂𑒨𑒏𑓂𑒞𑒱𑒏 𑒠𑒼𑒮𑒩 𑒠𑒹𑒮𑒏 𑒮𑒱𑒏𑓂𑒏𑒰 𑒢𑒯𑒱 𑒔𑒪𑒥𑒰𑒏 𑒫𑒱𑒭𑒨𑒧𑒹 𑒙𑒲𑒣 𑒠𑒻𑒞 𑒕𑒟𑒱, 𑒖𑒹 𑒯𑒿 𑒄 𑒞𑒿 𑒍𑒯𑒱𑒢𑒰 𑒁𑒕𑒱 𑒖𑒹𑒢𑒰 𑒣𑓂𑒩𑒹𑒨𑒮𑒲𑒏 𑒠𑒼𑒮𑒩𑒏 𑒣𑒞𑓂𑒢𑒲 𑒥𑒢𑒥। 𑒂𑒥 𑒋𑒯𑒱 𑒑𑒣𑒣𑒩 𑒒𑒧𑒩𑓂𑒟𑒢 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱। 𑒞𑒐𑒢 𑒩𑒧𑒝𑒲 𑒧𑒼𑒯𑒢 𑒑𑒣𑒏 𑒩𑒳𑒐𑒱 𑒒𑒳𑒧𑒰 𑒠𑒻𑒞 𑒕𑒟𑒱 𑒖𑒹 𑒠𑒩𑒥𑒖𑓂𑒖𑒰𑒏 𑒦𑒲𑒞𑒩 𑒩𑒧𑓂𑒦𑒰-𑒧𑒹𑒢𑒏𑒰 𑒮𑒦 𑒯𑒹𑒞𑒲𑒯। 𑒦𑒱𑒐𑒧𑓀𑒑𑒢𑒲 𑒖𑒹 𑒞𑒰𑒫𑒞 𑒁𑒣𑒢 𑒏𑒼𑒩𑒰𑒧𑒹 𑒪𑒹𑒪 𑒋𑒏𑒙𑒰 𑒣𑒳𑒞𑒩𑒰𑒏𑒹𑒿 𑒠𑒼𑒮𑒩𑒰𑒏 𑒯𑒰𑒟𑒧𑒹 𑒠𑒋 𑒥𑒯𑒮𑒧𑒹 𑒬𑒰𑒧𑒱𑒪 𑒦𑓄 𑒑𑒹𑒪 𑒕𑒟𑒱, 𑒄𑒩𑓂𑒭𑓂𑒨𑒰𑒫𑒬 𑒩𑒧𑓂𑒦𑒰-𑒧𑒹𑒢𑒏𑒰𑒏𑒹𑒿 𑒧𑒳𑒿𑒯𑒗𑒛𑓃𑒏𑒲 𑒃𑒞𑓂𑒨𑒰𑒠𑒱 𑒏𑒯𑒻𑒞 𑒕𑒟𑒱। 𑒧𑒳𑒠𑒰 𑒣𑒰𑒏𑒹𑒙𑒧𑒰𑒩 𑒏𑒯𑒻𑒞 𑒁𑒕𑒱 𑒖𑒹 𑒦𑒲𑒞𑒩𑒧𑒹 𑒮𑒳𑒐 𑒢𑒯𑒱 𑒠𑒳𑒐𑒼 𑒦𑒋 𑒮𑒏𑒻𑒞 𑒁𑒕𑒱। 𑒋𑒯𑒱𑒣𑒩 𑒥𑒲𑒧𑒰 𑒥𑒰𑒥𑒴 𑒁𑒣𑒢 𑒏𑒰𑒩𑓂𑒨𑒏 𑒮𑓂𑒏𑒼𑒣 𑒠𑒹𑒐𑒱 𑒣𑓂𑒩𑒮𑒢𑓂𑒢 𑒦𑒋 𑒖𑒰𑒃𑒞 𑒕𑒟𑒱। 𑒂𑒥 𑒣𑒰𑒏𑒹𑒙𑒧𑒰𑒩 𑒃𑒢𑓂𑒠𑓂𑒩𑒏 𑒫𑒖𑓂𑒩 𑒣𑒩 𑒩𑒳𑒣𑒻𑒨𑓂𑒨𑒰𑒏 𑒥𑒼𑒪𑒲 𑒬𑒳𑒩𑒴 𑒏𑒩𑒻𑒞 𑒁𑒕𑒱। 𑒋𑒯𑒱 𑒥𑒹𑒩 𑒥𑒖𑒰𑒩𑒲 𑒞𑒢𑓂𑒠𑓂𑒩𑒰 𑒦𑓀𑒑 𑒏𑒩𑒻𑒞 𑒁𑒕𑒱 𑒂 𑒠𑒳𑒢𑒴 𑒦𑒠𑓂𑒩 𑒫𑓂𑒨𑒏𑓂𑒞𑒱 𑒯𑒳𑒢𑒏𑒩 𑒮𑒧𑒩𑓂𑒟𑒢 𑒏𑒩𑒻𑒞 𑒏𑒯𑒻𑒞 𑒁𑒕𑒱, 𑒖𑒹 𑒄 𑒁𑒠𑓂𑒦𑒳𑒞 𑒢𑒲𑒪𑒰𑒧𑒲 𑒁𑒕𑒱, 𑒖𑒹 𑒏𑒩𑒥𑒰 𑒩𑒯𑒪 𑒁𑒕𑒱 𑒮𑒹 𑒣𑒰𑒏𑒹𑒙𑒧𑒰𑒩 𑒂 𑒍𑒯𑒱𑒧𑒹 𑒬𑒰𑒧𑒱𑒪 𑒁𑒕𑒱 𑒔𑒼𑒩 𑒂 𑒦𑒱𑒐𑒧𑓀𑒑𑒢𑒲, 𑒣𑒯𑒱𑒪𑒹-𑒣𑒯𑒱𑒪 𑒮𑒳𑒢𑒪 𑒁𑒕𑒱 𑒂 𑒤𑒹𑒩 𑒮𑓀𑒑𑒲𑒞𑒧𑒨 𑒤𑒏𑒛𑓃𑒰 𑒮𑒦 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱। 𑒧𑒳𑒠𑒰 𑒞𑒐𑒢𑒹 𑒢𑓀𑒠𑒲-𑒦𑒵𑓀𑒑𑒲 𑒬𑒰𑒮𑓂𑒞𑓂𑒩𑒲𑒨 𑒮𑓀𑒑𑒲𑒞𑒣𑒩 𑒢𑒔𑒻𑒞 𑒣𑓂𑒩𑒫𑒹𑒬 𑒏𑒩𑒻𑒞 𑒕𑒟𑒱। 𑒂𑒥 𑒢𑓀𑒠𑒲-𑒦𑒵𑓀𑒑𑒲𑒏 𑒄 𑒣𑒳𑒕𑒪𑒰𑒣𑒩 𑒖𑒹 𑒠𑒩𑒥𑒖𑓂𑒖𑒰𑒏 𑒦𑒲𑒞𑒩 𑒏𑒲 𑒁𑒕𑒱, 𑒮𑒦 𑒑𑒼𑒙𑒹 𑒁𑒣𑒢𑒰-𑒁𑒣𑒢𑒰 𑒯𑒱𑒮𑒰𑒥𑒮𑒿 𑒮𑓂𑒫𑒩𑓂𑒑-𑒢𑒩𑒏 𑒂 𑒁𑒏𑒰𑒮-𑒣𑒞𑒰𑒪 𑒏𑒯𑒻𑒞 𑒕𑒟𑒱। 𑒧𑒳𑒠𑒰 𑒢𑓀𑒠𑒲-𑒦𑒵𑓀𑒑𑒲 𑒏𑒯𑒻𑒞 𑒕𑒟𑒱 𑒖𑒹 𑒮𑒦 𑒑𑒼𑒙𑒹 𑒮𑒞𑓂𑒨 𑒏𑒯𑒻𑒞 𑒕𑒲 𑒂 𑒏𑓂𑒨𑒼 𑒑𑒼𑒙𑒹 𑒣𑒴𑒩𑓂𑒝 𑒮𑒞𑓂𑒨 𑒢𑒯𑒱 𑒥𑒖𑒪𑒯𑒳𑒿। 𑒤𑒹𑒩 𑒥𑒖𑒻𑒞-𑒥𑒖𑒻𑒞 𑒍 𑒏𑒯𑒋 𑒪𑒑𑒻𑒞 𑒕𑒟𑒱, 𑒏𑓂𑒨𑒼 𑒔𑒼𑒩𑒱 𑒏𑒰𑒪 𑒧𑒰𑒩𑒪 𑒑𑒹𑒪𑒰𑒯 (𑒔𑒼𑒩 𑒄 𑒮𑒳𑒢𑒱 𑒦𑒰𑒑𑒋 𑒪𑒑𑒻𑒞 𑒕𑒟𑒱 𑒞𑒿 𑒠𑒳-𑒞𑒲𑒢 𑒑𑒼𑒙𑒹 𑒣𑒏𑒛𑓃𑒱 𑒮𑒼𑒗𑒰𑒿 𑒪𑒋 𑒁𑒢𑒻𑒞 𑒕𑒢𑓂𑒯𑒱!) 𑒞𑒿 𑒏𑓂𑒨𑒼 𑒋𑒏𑓂𑒮𑒲𑒛𑒹𑒢𑓂𑒙𑒮𑒿, 𑒂 𑒋𑒯𑒱 𑒞𑒩𑒯𑒹𑒿 𑒮𑒦𑒙𑒰 𑒑𑒢𑒥𑒋 𑒪𑒑𑒻𑒞 𑒕𑒟𑒱, 𑒧𑒳𑒠𑒰 𑒥𑒲𑒧𑒰-𑒥𑒰𑒥𑒴 𑒏𑒼𑒢𑒰 𑒥𑒱𑒢 𑒧𑒵𑒞𑓂𑒨𑒳𑒏 𑒋𑒞𑒋 𑒂𑒨𑒪 𑒕𑒟𑒱 𑒮𑒹 𑒯𑒳𑒢𑒏𑒯𑒳 𑒪𑒼𑒏𑒢𑒱𑒏𑒹𑒿 𑒢𑒯𑒱 𑒥𑒳𑒗𑒪 𑒕𑒢𑓂𑒯𑒱 ! 𑒥𑒲𑒧𑒰 𑒥𑒰𑒥𑒴 𑒏𑒯𑒻𑒞 𑒕𑒟𑒱 𑒖𑒹 𑒍 𑒢𑒫 𑒧𑒰𑒩𑓂𑒏𑒹𑒙𑒏 𑒁𑒢𑓂𑒫𑒹𑒭𑒝𑒧𑒹 𑒂𑒋𑒪 𑒕𑒟𑒱 ! 𑒮𑒹 𑒥𑒱𑒢 𑒧𑒩𑒪 𑒮𑒹𑒯𑒼 𑒋𑒏 𑒑𑒼𑒙𑒹 𑒍𑒞𑒋 𑒕𑒟𑒱 ! 𑒦𑒵𑓀𑒑𑒲 𑒢𑓀𑒠𑒲𑒏𑒹𑒿 𑒜𑓃𑒹𑒩 𑒩𑒰𑒮 𑒥𑒲𑒧𑒰 𑒏𑒧𑓂𑒣𑒢𑒲𑒏 𑒂𑒑𑒧𑒢𑒮𑒿 𑒂𑒋𑒪 𑒏𑒧𑓂𑒣𑒲𑒙𑒱𑒬𑒢𑒏 𑒫𑒱𑒭𑒨𑒧𑒹 𑒥𑒳𑒗𑒥𑒻𑒞 𑒕𑒟𑒱 ! 𑒋𑒧𑓂𑒯𑒩 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰𑒧𑒹 𑒒𑒼𑓀𑒒𑒰𑒅𑒖 𑒬𑒳𑒩𑒴 𑒯𑒼𑒃𑒞 𑒕𑒢𑓂𑒯𑒱, 𑒏𑒰𑒩𑒝 𑒣𑓂𑒩𑒹𑒧𑒲 𑒂𑒥 𑒒𑒳𑒩𑒱 𑒖𑒰𑒋 𑒔𑒰𑒯𑒻𑒞 𑒕𑒟𑒱। 𑒩𑒧𑒝𑒲 𑒧𑒼𑒯𑒢 𑒣𑓂𑒩𑒹𑒧𑒲𑒏 𑒑𑒧𑒢𑒮𑒿 𑒣𑓂𑒩𑒮𑒢𑓂𑒢 𑒯𑒼𑒃𑒞 𑒕𑒟𑒱 𑒖𑒹 𑒣𑓂𑒩𑒹𑒧𑒱𑒏𑒰 𑒂𑒥 𑒁𑒮𑒑𑒩𑒹 𑒩𑒯𑒞𑒲𑒯 𑒂 𑒯𑒳𑒢𑒏𑒰 𑒪𑒹𑒪 𑒧𑒾𑒏𑒰 𑒕𑒢𑓂𑒯𑒱। 𑒧𑒳𑒠𑒰 𑒦𑒵𑓀𑒑𑒲 𑒄 𑒏𑒯𑒱 𑒖𑒹 𑒋𑒞𑒋𑒮𑒿 𑒑𑒹𑒢𑒰𑒃 𑒞𑒿 𑒮𑓀𑒦𑒫 𑒢𑒯𑒱 𑒧𑒳𑒠𑒰 𑒄 𑒦𑓄 𑒮𑒏𑒻𑒞 𑒁𑒕𑒱 𑒖𑒹 𑒠𑒳𑒢𑒴 𑒖𑒼𑒛𑓃𑒲 𑒧𑒰𑒨-𑒥𑒰𑒣 (!) 𑒏𑒹𑒿 𑒋𑒏𑓂𑒮𑒲𑒛𑒹𑒢𑓂𑒙 𑒏𑒩𑒥𑒰𑒋 𑒋𑒞𑒯𑒱 𑒥𑒖𑒥𑒰 𑒪𑒹𑒪 𑒖𑒰𑒋। 𑒧𑒳𑒠𑒰 𑒁𑒣𑒢𑒰 𑒪𑒹𑒪 𑒧𑒰𑒋-𑒥𑒰𑒣𑒏 𑒥𑒪𑒱 𑒪𑒹𑒪 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰 𑒞𑒻𑒨𑒰𑒩 𑒢𑒯𑒱 𑒕𑒟𑒱। 𑒞𑒐𑒢 𑒢𑓀𑒠𑒲 𑒦𑒵𑓀𑒑𑒲 𑒠𑒳𑒢𑒴 𑒑𑒼𑒙𑒹𑒏 𑒫𑒱𑒫𑒰𑒯 𑒑𑒰𑒖𑒰-𑒥𑒰𑒖𑒰𑒏 𑒮𑓀𑒑 𑒏𑒩𑒰 𑒠𑒻𑒞 𑒕𑒟𑒱 𑒂 𑒏𑒢𑓂𑒨𑒰𑒠𑒰𑒢 𑒏𑒩𑒻𑒞 𑒕𑒟𑒱 𑒥𑒖𑒰𑒩𑒲।
𑒠𑒼𑒮𑒩 𑒏𑒪𑓂𑒪𑒼𑒪: 𑒠𑒼𑒮𑒩 𑒏𑒪𑓂𑒪𑒼𑒪𑒏 𑒂𑒩𑒧𑓂𑒦 𑒯𑒼𑒃𑒞 𑒁𑒕𑒱 𑒋𑒯𑒱 𑒂𑒦𑒰𑒮𑒮𑒿, 𑒖𑒹 𑒏𑓂𑒨𑒼 𑒢𑒹𑒞𑒰 𑒧𑒩𑒪𑒰𑒏 𑒥𑒰𑒠 𑒂𑒥𑒋𑒥𑒪𑒰 𑒕𑒟𑒱, 𑒯𑒳𑒢𑒏𑒩 𑒠𑒳𑒢𑒴 𑒁𑒢𑒳𑒔𑒩 𑒧𑒵𑒞 𑒦𑒋 𑒂𑒥𑒱 𑒔𑒳𑒏𑒪 𑒕𑒟𑒱 𑒂 𑒢𑒹𑒞𑒰𑒖𑒲𑒏 𑒁𑒋𑒥𑒰𑒏 𑒮𑒦 𑒏𑓂𑒨𑒼 𑒣𑓂𑒩𑒞𑒲𑒏𑓂𑒭𑒰 𑒏𑒋 𑒩𑒯𑒪 𑒕𑒟𑒱, 𑒠𑒳𑒢𑒴 𑒁𑒢𑒳𑒔𑒩 𑒕𑒼𑒙-𑒧𑒼𑒙 𑒦𑒰𑒭𑒝 𑒠𑒋 𑒢𑒹𑒞𑒰𑒖𑒲𑒏 𑒫𑒱𑒪𑒧𑓂𑒥𑒮𑒿 𑒁𑒋𑒥𑒰𑒏 (𑒧𑒵𑒞𑓂𑒨𑒳𑒏 𑒥𑒰𑒠𑒼 !) 𑒏𑓂𑒭𑒞𑒱𑒣𑒴𑒩𑓂𑒞𑒱 𑒏𑒋 𑒩𑒯𑒪 𑒕𑒟𑒱, 𑒑𑒲𑒞𑒏 𑒨𑒼𑒑 𑒠𑒋। 𑒋𑒏𑒙𑒰 𑒑𑒲𑒞 𑒔𑒼𑒩 𑒢𑒯𑒱 𑒥𑒳𑒗𑒻𑒞 𑒕𑒟𑒱 𑒧𑒳𑒠𑒰 𑒦𑒱𑒐𑒧𑓀𑒑𑒢𑒲 𑒂 𑒩𑒠𑓂𑒠𑒲𑒥𑒪𑒰 𑒥𑒳𑒗𑒱 𑒖𑒰𑒃𑒞 𑒕𑒟𑒱, 𑒞𑒰𑒯𑒱 𑒣𑒩 𑒥𑒯𑒮 𑒬𑒳𑒩𑒴 𑒯𑒼𑒃𑒞 𑒁𑒕𑒱। 𑒔𑒼𑒩𑒏𑒹𑒿 𑒁𑒣𑒢𑒰𑒏𑒹𑒿 𑒔𑒼𑒩 𑒏𑒯𑒪𑒰𑒣𑒩 𑒂𑒣𑒞𑓂𑒞𑒱 𑒁𑒕𑒱 𑒂 𑒦𑒱𑒐𑒧𑓀𑒑𑒢𑒲𑒏𑒹𑒿 𑒍 𑒦𑒱𑒐-𑒧𑓀𑒑 𑒏𑒯𑒻𑒞 𑒁𑒕𑒱 𑒞𑒿 𑒦𑒱𑒐𑒧𑓀𑒑𑒢𑒲 𑒍𑒏𑒩𑒰 𑒩𑒼𑒏𑒱 𑒏𑒯𑒻𑒞 𑒕𑒟𑒱 𑒖𑒹 𑒍 𑒮𑒩𑒱𑒮𑒫𑒣𑒰𑒯𑒲𑒏 𑒁𑒢𑒮𑒴𑒨𑒰 𑒕𑒟𑒱, 𑒧𑒱𑒟𑒱𑒪𑒰-𑒔𑒱𑒞𑓂𑒩𑒏𑒰𑒩, 𑒧𑒳𑒠𑒰 𑒠𑒱𑒪𑓂𑒪𑒲𑒏 𑒁𑒬𑒼𑒏𑒥𑒮𑓂𑒞𑒲 𑒂𑒥𑒱 𑒥𑒳𑒗𑒪𑒢𑓂𑒯𑒱 𑒖𑒹 𑒋𑒯𑒱 𑒢𑒑𑒩𑒧𑒹 𑒏𑒪𑒰-𑒫𑒮𑓂𑒞𑒳 𑒏𑓂𑒨𑒼 𑒢𑒯𑒱 𑒏𑒱𑒢𑒻𑒞 𑒁𑒕𑒱 𑒂 𑒞𑒐𑒢 𑒔𑒾𑒥𑒙𑒱𑒨𑒰𑒏 𑒦𑒱𑒐𑒧𑓀𑒑𑒢𑒲 𑒥𑒢𑒱 𑒩𑒯𑒱 𑒑𑒹𑒪𑒲𑒯। 𑒔𑒼𑒩 𑒏𑒯𑒻𑒞 𑒁𑒕𑒱 𑒖𑒹 𑒧𑒰𑒞𑓂𑒩 𑒍 𑒥𑒠𑒢𑒰𑒧 𑒕𑒟𑒱, 𑒔𑒼𑒩𑒱 𑒞𑒿 𑒮𑒦 𑒏𑒩𑒻𑒞 𑒁𑒕𑒱। 𑒢𑒫 𑒥𑒰𑒞 𑒏𑒼𑒢𑒼 𑒢𑒯𑒱 𑒁𑒕𑒱, 𑒮𑒦 𑒁𑒕𑒱 𑒣𑒳𑒩𑒢𑒏𑒰𑒏 𑒔𑒼𑒩𑒱। 𑒞𑒏𑒩 𑒥𑒰𑒠 𑒢𑒹𑒞𑒰𑒖𑒲 𑒣𑒯𑒳𑒿𑒔𑒱 𑒖𑒰𑒃𑒞 𑒕𑒟𑒱 𑒂 𑒪𑒼𑒏𑒏 𑒔𑒼𑒩, 𑒅𑒔𑒏𑓂𑒏𑒰 𑒂 𑒣𑒰𑒏𑒹𑒙𑒧𑒰𑒩 𑒯𑒼𑒋𑒥𑒰𑒏 𑒏𑒰𑒩𑒝 𑒮𑒧𑒰𑒖𑒏 𑒮𑓂𑒟𑒱𑒞𑒱𑒏𑒹𑒿 𑒏𑒯𑒻𑒞 𑒕𑒟𑒱। 𑒞𑒐𑒢𑒹 𑒋𑒏𑒙𑒰 𑒫𑒰𑒧𑒣𑓀𑒟𑒲 𑒁𑒥𑒻𑒞 𑒕𑒟𑒱 𑒂 𑒍 𑒄 𑒠𑒹𑒐𑒱 𑒏𑓂𑒭𑒳𑒥𑓂𑒡 𑒕𑒟𑒱 𑒖𑒹 𑒢𑒹𑒞𑒰𑒖𑒲 𑒔𑒼𑒩, 𑒅𑒔𑒏𑓂𑒏𑒰 𑒂 𑒣𑒰𑒏𑒹𑒙𑒧𑒰𑒩𑒮𑒿 𑒒𑒱𑒩𑒪 𑒕𑒟𑒱। 𑒧𑒳𑒠𑒰 𑒔𑒼𑒩 𑒁𑒣𑒢 𑒞𑒩𑓂𑒏 𑒪𑒋 𑒣𑒳𑒢𑓁 𑒣𑓂𑒩𑒮𑓂𑒞𑒳𑒞 𑒯𑒼𑒃𑒞 𑒁𑒕𑒱 𑒂 𑒢𑒹𑒞𑒰𑒖𑒲𑒏 𑒩𑒰𑒐𑒪 “𑒔𑒼𑒩-𑒣𑒳𑒩𑒰𑒝” 𑒢𑒰𑒧𑒏 𑒂𑒡𑒰𑒩𑒣𑒩 𑒥𑒖𑒰𑒩𑒲 𑒖𑒲 𑒑𑒲𑒞 𑒬𑒳𑒩𑒴 𑒏𑒋 𑒠𑒻𑒞 𑒕𑒟𑒱।
𑒞𑒹𑒮𑒩 𑒏𑒪𑓂𑒪𑒼𑒪: 𑒂𑒥 𑒢𑒹𑒞𑒰𑒖𑒲 𑒂 𑒫𑒰𑒧𑒣𑓀𑒟𑒲𑒧𑒹 𑒑𑒚𑒥𑓀𑒡𑒢 𑒂 𑒫𑒰𑒧𑒣𑓀𑒟𑒲 𑒠𑓂𑒫𑒰𑒩𑒰 𑒮𑒩𑒏𑒰𑒩𑒏 𑒥𑒰𑒯𑒩𑒮𑒿 𑒠𑒹𑒪 𑒮𑒧𑒩𑓂𑒟𑒢𑒣𑒩 𑒔𑒩𑒔𑒰 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱। 𑒢𑒹𑒞𑒰𑒖𑒲 𑒤𑒹𑒩 𑒑𑒲𑒞𑒧𑒨 𑒯𑒼𑒃𑒞 𑒕𑒟𑒱 𑒂𑒏𑒱 𑒞𑒐𑒢𑒹 𑒮𑓂𑒙𑓀𑒙-𑒮𑒲𑒢 𑒏𑒩𑒻𑒞 𑒋𑒏𑒙𑒰 𑒧𑒳𑒃𑒪 𑒁𑒦𑒱𑒢𑒹𑒞𑒰 𑒫𑒱𑒫𑒹𑒏 𑒏𑒳𑒧𑒰𑒩𑒏 𑒁𑒋𑒪𑒰𑒮𑒿 𑒂𑒏𑒩𑓂𑒭𑒝 𑒍𑒧𑓂𑒯𑒩 𑒔𑒪𑒱 𑒖𑒰𑒃𑒞 𑒁𑒕𑒱। 𑒙𑒙𑒏𑒰-𑒥𑓂𑒩𑒹𑒏𑒱𑓀𑒑 𑒢𑓂𑒨𑒴𑒖 𑒠𑒹𑒥𑒰𑒏 𑒧𑒖𑒥𑒴𑒩𑒲𑒣𑒩 𑒢𑒹𑒞𑒰𑒖𑒲 𑒫𑓂𑒨𑓀𑒑𑓂𑒨 𑒏𑒩𑒻𑒞 𑒕𑒟𑒱। 𑒫𑒰𑒧𑒣𑓀𑒟𑒲 𑒠𑒴 𑒥𑒹𑒩 𑒠𑒴 𑒑𑒼𑒙 𑒑𑒣- 𑒢𑒫 𑒑𑒣 𑒏𑒯𑒱 𑒖𑒰𑒃𑒞 𑒕𑒟𑒱, 𑒋𑒏 𑒖𑒹 𑒥𑒱𑒢 𑒁𑒦𑒱𑒢𑒹𑒞𑒰 𑒥𑒢𑒢𑒹 𑒏𑓂𑒨𑒼 𑒢𑒹𑒞𑒰 𑒢𑒯𑒱 𑒥𑒢𑒱 𑒮𑒏𑒻𑒞 𑒁𑒕𑒱 𑒂 𑒠𑒼𑒮𑒩 𑒖𑒹 𑒔𑒼𑒩 𑒢𑒹𑒞𑒰 𑒢𑒯𑒱 𑒥𑒢𑒱 𑒮𑒏𑒻𑒕 (𑒄 𑒔𑒼𑒩 𑒏𑒯𑒻𑒞 𑒁𑒕𑒱) 𑒧𑒳𑒠𑒰 𑒢𑒹𑒞𑒰 𑒮𑒦 𑒞𑒿 𑒔𑒼𑒩𑒱 𑒏𑒩𑒥𑒰𑒧𑒹 𑒏𑒏𑒩𑒼𑒮𑒿 𑒣𑒰𑒕𑒰𑒿 𑒢𑒯𑒱 𑒕𑒟𑒱। 𑒞𑒐𑒢𑒹 𑒋𑒏𑒙𑒰 𑒅𑒔𑓂𑒔 𑒫𑓀𑒬𑒲𑒨 𑒧𑒯𑒱𑒪𑒰 𑒁𑒥𑒻𑒞 𑒕𑒟𑒱 𑒂 𑒯𑒳𑒢𑒏𑒩 𑒣𑓂𑒩𑒬𑓂𑒢𑒼𑒞𑓂𑒞𑒩𑒏 𑒥𑒰𑒠 𑒋𑒏𑒙𑒰 𑒮𑒰𑒧𑒰𑒢𑓂𑒨 𑒏𑓂𑒨𑒴𑒏 𑒮𑓀𑒑 𑒋𑒏𑒙𑒰 𑒫𑒲.𑒂𑒃.𑒣𑒲.𑒏𑓂𑒨𑒴 𑒥𑒢𑒱 𑒖𑒰𑒃𑒞 𑒁𑒕𑒱। 𑒁𑒦𑒱𑒢𑒹𑒞𑒰, 𑒢𑒹𑒞𑒰 𑒂 𑒫𑒰𑒧𑒣𑓀𑒟𑒲 𑒮𑒦 𑒫𑒲.𑒂𑒃.𑒣𑒲.𑒏𑓂𑒨𑒴𑒧𑒹 𑒚𑒰𑒜𑓃 𑒦𑓄 𑒖𑒰𑒃𑒞 𑒕𑒟𑒱 ! 𑒄 𑒣𑒳𑒕𑒪𑒰𑒣𑒩 𑒖𑒹 𑒣𑓀𑒏𑓂𑒞𑒱 𑒏𑒱𑒋𑒏 𑒥𑒢𑒪 𑒁𑒕𑒱 (?) 𑒞𑒰𑒯𑒱𑒣𑒩 𑒔𑒼𑒩-𑒣𑒰𑒏𑒹𑒙𑒧𑒰𑒩 𑒏𑒯𑒻𑒞 𑒕𑒟𑒱 𑒖𑒹 𑒯𑒳𑒢𑒏𑒰 𑒪𑒼𑒏𑒢𑒱𑒏𑒹𑒿 𑒣𑓀𑒏𑓂𑒞𑒱 𑒥𑒢𑒋𑒥𑒰𑒏 (𑒂 𑒞𑒼𑒛𑓃𑒥𑒰𑒏 𑒮𑒹𑒯𑒼) 𑒁𑒦𑓂𑒨𑒰𑒮 𑒕𑒢𑓂𑒯𑒱।
𑒔𑒞𑒳𑒩𑓂𑒟 𑒏𑒪𑓂𑒪𑒼𑒪: 𑒨𑒧𑒩𑒰𑒖 𑒮𑒦𑒏 𑒐𑒰𑒞𑒰-𑒐𑒹𑒮𑒩𑒰 𑒠𑒹𑒐𑒱 𑒪𑒻𑒞 𑒕𑒟𑒱 𑒂 𑒔𑒱𑒞𑓂𑒩𑒑𑒳𑒣𑓂𑒞 𑒄 𑒩𑒯𑒮𑓂𑒨𑒼𑒠𑓂𑒒𑒰𑒙𑒢 𑒏𑒩𑒻𑒞 𑒕𑒟𑒱 𑒖𑒹 𑒋𑒏 𑒨𑒳𑒑 𑒕𑒪 𑒖𑒐𑒢 𑒮𑒼𑒗𑒰𑒿𑒏 𑒠𑒩𑒥𑒖𑓂𑒖𑒰 𑒐𑒳𑒖𑒱𑒞𑒼 𑒕𑒪 𑒂 𑒥𑒢𑓂𑒢 𑒮𑒹𑒯𑒼 𑒯𑒼𑒃𑒞 𑒕𑒪। 𑒢𑓀𑒠𑒲 𑒦𑒵𑓀𑒑𑒲 𑒣𑒯𑒱𑒢𑒯𑒱 𑒮𑒴𑒔𑒱𑒞 𑒏𑒋 𑒠𑒹𑒪𑒢𑓂𑒯𑒱 𑒖𑒹 𑒮𑒼𑒗𑒰𑒿𑒏 𑒠𑒩𑒥𑒖𑓂𑒖𑒰 𑒮𑓂𑒫𑒣𑓂𑒢 𑒢𑒯𑒱, 𑒧𑒰𑒞𑓂𑒩 𑒥𑒳𑒗𑒥𑒰𑒏 𑒠𑒼𑒭 𑒕𑒪। 𑒠𑒩𑒥𑒖𑓂𑒖𑒰𑒏 𑒍𑒯𑒱 𑒣𑒰𑒩 𑒏𑒲 𑒁𑒕𑒱 𑒞𑒰𑒯𑒱 𑒫𑒱𑒭𑒨𑒧𑒹 𑒮𑒦 𑒏𑓂𑒨𑒼 𑒁𑒣𑒢𑒰-𑒁𑒣𑒢𑒰 𑒯𑒱𑒮𑒰𑒥𑒮𑒿 𑒅𑒞𑓂𑒞𑒩 𑒠𑒻𑒞 𑒕𑒟𑒱। 𑒔𑒱𑒞𑓂𑒩𑒑𑒳𑒣𑓂𑒞 𑒏𑒯𑒻𑒞 𑒕𑒟𑒱 𑒖𑒹 𑒮𑒦𑒏 𑒫𑒩𑓂𑒝𑒢𑒏 𑒮𑒦 𑒫𑒮𑓂𑒞𑒳 𑒕𑒻 𑒍𑒯𑒱𑒣𑒰𑒩। 𑒢𑓀𑒠𑒲-𑒦𑒵𑓀𑒑𑒲 𑒮𑒴𑒔𑒱𑒞 𑒏𑒩𑒻𑒞 𑒕𑒟𑒱 𑒖𑒹 𑒋𑒯𑒱 𑒑𑒹𑒙𑒧𑒹 𑒣𑓂𑒩𑒫𑒹𑒬 𑒢𑒱𑒭𑒹𑒡 𑒕𑒻, 𑒢𑒼 𑒋𑒝𑓂𑒙𑓂𑒩𑒲 𑒏𑒹𑒩 𑒥𑒼𑒩𑓂𑒛 𑒪𑒰𑒑𑒪 𑒕𑒻। 𑒂𑒯𑒱 𑒩𑒹 𑒥𑓂𑒥𑒰! 𑒂𑒥 𑒏𑒲 𑒯𑒼𑒁𑒋 ! 𑒢𑒹𑒞𑒰𑒖𑒲𑒏𑒹𑒿 𑒣𑒚𑒰𑒍𑒪 𑒖𑒰𑒃𑒞 𑒕𑒢𑓂𑒯𑒱 𑒨𑒧𑒩𑒰𑒖𑒏 𑒮𑒼𑒗𑒰𑒿, 𑒧𑒳𑒠𑒰 𑒯𑒳𑒢𑒏𑒩 𑒮𑒩𑒮𑓂𑒫𑒞𑒲 𑒍𑒞𑒋 𑒧𑒢𑓂𑒠 𑒦𑒋 𑒖𑒰𑒃𑒞 𑒕𑒢𑓂𑒯𑒱। 𑒥𑒠𑒩𑒲 𑒫𑒱𑒬𑒰𑒪 𑒧𑒱𑒬𑓂𑒩 𑒣𑓂𑒩𑒮𑒱𑒠𑓂𑒡 𑒢𑒹𑒞𑒰𑒖𑒲, 𑒏𑒹𑒩 𑒐𑒱𑓀𑒔𑒰𑒄 𑒬𑒳𑒩𑒴 𑒯𑒼𑒃𑒞 𑒕𑒢𑓂𑒯𑒱 𑒁𑒮𑒪𑒲 𑒏𑒹𑒩 𑒥𑒠𑒪𑒰 𑒮𑒩𑓂𑒙𑒱𑒤𑒱𑒏𑒹𑒙 𑒥𑒪𑒰 𑒏𑒧 𑒏𑒋 𑒪𑒱𑒐𑒰𑒍𑒪 𑒅𑒧𑒩𑒱𑒣𑒩। 𑒣𑒔𑒣𑒢 𑒥𑒩𑒱𑒐 𑒂𑒨𑒳 𑒂 𑒬𑒬 𑒨𑒼𑒑 𑒏𑒯𑒻𑒞 𑒁𑒕𑒱 𑒖𑒹 𑒮𑒞𑓂𑒞𑒩𑒱 𑒮𑒹 𑒆𑒣𑒩 𑒖𑒲𑒞𑒰𑒯 𑒮𑒹 𑒍 𑒂 𑒮𑓀𑒑𑒧𑒹 𑒧𑒵𑒞 𑒔𑒰𑒩𑒴 𑒮𑒻𑒢𑒱𑒏𑒏𑒹𑒿 𑒂𑒣𑒱𑒮 𑒣𑒚𑒰 𑒠𑒹𑒪 𑒖𑒰𑒃𑒞 𑒁𑒕𑒱। 𑒠𑒴𑒙𑒰 𑒮𑒻𑒢𑒱𑒏 𑒢𑒹𑒞𑒰𑒖𑒲𑒏 𑒮𑓀𑒑 𑒔𑒪𑒱 𑒖𑒰𑒃𑒞 𑒕𑒟𑒱 𑒂 𑒠𑒴 𑒙𑒰 𑒁𑒢𑒳𑒔𑒩 𑒮𑒹𑒯𑒼 𑒖𑒰𑒋 𑒔𑒰𑒯𑒻𑒞 𑒁𑒕𑒱। 𑒧𑒳𑒠𑒰 𑒢𑒹𑒞𑒰𑒖𑒲𑒏 𑒁𑒢𑒳𑒔𑒩 𑒮𑒦𑒏 𑒁𑒣𑒩𑒰𑒡 𑒥𑒛𑓃 𑒦𑒰𑒩𑒲, 𑒮𑒹 𑒔𑒱𑒞𑓂𑒩𑒑𑒳𑒣𑓂𑒞𑒏 𑒂𑒠𑒹𑒬𑒣𑒩 𑒢𑓀𑒠𑒲-𑒦𑒵𑓀𑒑𑒲 𑒯𑒳𑒢𑒏𑒰 𑒪𑒋, 𑒏𑒩𑒰𑒯𑒲𑒧𑒹 𑒦𑒳𑒖𑒥𑒰𑒏 𑒪𑒹𑒪 𑒥𑒰𑒯𑒩 𑒪𑒋 𑒖𑒰𑒃𑒞 𑒕𑒟𑒱 𑒞𑒿 𑒥𑒰𑒿𑒔𑒪 𑒠𑒳𑒢𑒴 𑒮𑒻𑒢𑒱𑒏 𑒯𑒳𑒢𑒏𑒰 𑒣𑒏𑒛𑓃𑒱 𑒏𑒹𑒿 𑒪𑒋 𑒖𑒰𑒃𑒞 𑒕𑒟𑒱 𑒂 𑒢𑓀𑒠𑒲-𑒦𑒵𑓀𑒑𑒲 𑒤𑒹𑒩 𑒧𑓀𑒔𑒣𑒩 𑒒𑒳𑒩𑒱 𑒁𑒥𑒻𑒞 𑒕𑒟𑒱। 𑒞𑒯𑒱𑒢𑒰 𑒞𑒩𑓂𑒏𑒏 𑒥𑒰𑒠 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰, 𑒠𑒳𑒢𑒴 𑒦𑒠𑓂𑒩 𑒣𑒳𑒩𑒳𑒭 𑒂 𑒥𑒖𑒰𑒩𑒲𑒏𑒹𑒿 𑒮𑒹𑒯𑒼 𑒞𑓂𑒩𑒰𑒝 𑒦𑒹𑒙𑒻𑒞 𑒕𑒢𑓂𑒯𑒱 𑒜𑒼𑒪-𑒣𑒱𑒣𑒯𑒲𑒏 𑒮𑓀𑒑 𑒯𑒳𑒢𑒏𑒰 𑒥𑒰𑒯𑒩 𑒪𑒋 𑒑𑒹𑒪 𑒖𑒰𑒃𑒞 𑒁𑒕𑒱। 𑒂𑒥 𑒢𑒢𑓂𑒠𑒲 𑒖𑒐𑒢 𑒁𑒦𑒱𑒢𑒹𑒞𑒰𑒏 𑒢𑒰𑒧 𑒫𑒱𑒫𑒹𑒏 𑒏𑒳𑒧𑒰𑒩 𑒅𑒩𑓂𑒤...𑒥𑒖𑒻𑒞 𑒕𑒟𑒱 𑒞𑒿 𑒁𑒦𑒱𑒢𑒹𑒞𑒰 𑒖𑒲 𑒩𑒼𑒏𑒱 𑒠𑒻𑒞 𑒕𑒟𑒱, 𑒖𑒹 𑒏𑒞𑒹𑒏 𑒧𑒹𑒯𑒢𑒞𑒱𑒮𑒿 𑒖𑒰𑒞𑒱 𑒯𑒳𑒢𑒏𑒩 𑒣𑒰𑒕𑒰𑒿 𑒕𑒼𑒛𑓃𑒱 𑒮𑒏𑒪 𑒁𑒕𑒱, 𑒮𑒹 𑒅𑒩𑓂𑒤 𑒞𑒿 𑒕𑒼𑒛𑓃𑒱𑒋 𑒠𑒹𑒪 𑒖𑒰𑒋। 𑒫𑒰𑒧𑒣𑓀𑒟𑒲 𑒑𑒼𑒭𑓂𑒚𑒲𑒏𑒹𑒿 𑒁𑒦𑒱𑒢𑒹𑒞𑒰 𑒠𑓂𑒫𑒰𑒩𑒰 𑒧𑒠𑒞𑒱 𑒏𑒹𑒩 𑒫𑒱𑒫𑒩𑒝𑒣𑒩 𑒫𑒰𑒧𑒣𑓀𑒟𑒲 𑒣𑓂𑒩𑒞𑒱𑒫𑒰𑒠 𑒏𑒩𑒻𑒞 𑒕𑒟𑒱। 𑒯𑒳𑒢𑒏𑒼 𑒣𑒚𑒰 𑒠𑒹𑒪 𑒖𑒰𑒃𑒞 𑒕𑒢𑒱। 𑒫𑒰𑒧𑒣𑓀𑒟𑒲𑒏 𑒏𑒲 𑒯𑒹𑒞𑒢𑓂𑒯𑒱, 𑒯𑒳𑒢𑒏𑒩 𑒏𑒟𑒰𑒧𑒹 𑒞𑒿 𑒢𑒹 𑒮𑓂𑒫𑒩𑓂𑒑-𑒢𑒩𑓂𑒏 𑒁𑒕𑒱 𑒂 𑒢𑒹 𑒨𑒧𑒩𑒰𑒖-𑒔𑒱𑒞𑓂𑒩𑒑𑒳𑒣𑓂𑒞। 𑒯𑒳𑒢𑒏𑒰 𑒁𑒣𑒢 𑒦𑒫𑒱𑒭𑓂𑒨𑒏 𑒢𑒱𑒩𑓂𑒝𑒨 𑒮𑓂𑒫𑒨𑓀 𑒏𑒩𑒥𑒰𑒏 𑒁𑒫𑒮𑒩 𑒠𑒹𑒪 𑒖𑒰𑒃𑒞 𑒕𑒢𑓂𑒯𑒱। 𑒧𑒳𑒠𑒰 𑒫𑒰𑒧𑒣𑓀𑒟𑒲 𑒏𑒯𑒻𑒞 𑒕𑒟𑒱 𑒖𑒹 𑒯𑒳𑒢𑒏𑒩 𑒬𑒱𑒏𑓂𑒭𑒰 𑒂𑒢 𑒣𑓂𑒩𑒏𑒰𑒩𑒏 𑒕𑒪𑒢𑓂𑒯𑒱, 𑒧𑒳𑒠𑒰 𑒋𑒐𑒢 𑒖𑒹 𑒮𑒼𑒗𑒰𑒿 𑒒𑒙𑒱𑒞 𑒦𑒋 𑒩𑒯𑒪 𑒕𑒢𑓂𑒯𑒱 𑒞𑒰𑒯𑒱𑒣𑒩 𑒏𑒼𑒢𑒰 𑒁𑒫𑒱𑒬𑓂𑒫𑒰𑒮 𑒏𑒩𑒟𑒳? 𑒧𑒳𑒠𑒰 𑒨𑒧𑒩𑒰𑒖 𑒏𑒯𑒻𑒞 𑒕𑒟𑒱 𑒖𑒹- 𑒦𑓄 𑒮𑒏𑒻𑒞 𑒁𑒕𑒱, 𑒖𑒹 𑒁𑒯𑒰𑒿 𑒠𑒹𑒐𑒱 𑒩𑒯𑒪 𑒕𑒲 𑒮𑒹 𑒠𑒳𑓁𑒮𑓂𑒫𑒣𑓂𑒢 𑒯𑒼𑒁𑒋, 𑒖𑒞𑒋 𑒣𑒻𑒮𑒻𑒞 𑒖𑒰𑒋𑒥 𑒍𑒞𑒋 𑒪𑒱𑒐𑒪 𑒁𑒕𑒱 𑒢𑒼 𑒋𑒝𑓂𑒙𑓂𑒩𑒲। 𑒂𑒥 𑒨𑒧𑒩𑒰𑒖 𑒣𑓂𑒩𑒬𑓂𑒢 𑒣𑒳𑒕𑒻𑒞 𑒕𑒟𑒱 𑒖𑒹 𑒫𑒱𑒭𑒧 𑒏𑒹, 𑒧𑒢𑒳𑒏𑓂𑒐 𑒂𑒏𑒱 𑒣𑓂𑒩𑒏𑒵𑒞𑒱 ? 𑒫𑒰𑒧𑒣𑓀𑒟𑒲 𑒏𑒯𑒻𑒞 𑒕𑒟𑒱 𑒖𑒹 𑒠𑒳𑒢𑒴, 𑒧𑒳𑒠𑒰 𑒣𑓂𑒩𑒏𑒵𑒞𑒱𑒧𑒹 𑒞𑒿 𑒢𑒹𑒔𑒳𑒩𑒪 𑒖𑒮𑓂𑒙𑒱𑒮 𑒏𑒠𑒰𑒔𑒱𑒞𑓂 𑒯𑒼𑒃𑒞𑒼 𑒕𑒻 𑒧𑒳𑒠𑒰 𑒧𑒢𑒳𑒏𑓂𑒐𑒏 𑒮𑓂𑒫𑒦𑒰𑒫𑒧𑒹 𑒮𑒹 𑒑𑒳𑒢𑓂𑒖𑒰𑒃𑒬 𑒏𑒞𑒋 ? 𑒧𑒳𑒠𑒰 𑒫𑒰𑒧𑒣𑓀𑒟𑒲 𑒩𑒰𑒖𑒢𑒲𑒞𑒱 𑒋𑒏𑒩 (𑒮𑒧𑒰𑒢𑒞𑒰𑒏, 𑒮𑒳𑒡𑒰𑒩 𑒏𑒹𑒩) 𑒣𑓂𑒩𑒨𑒰𑒮 𑒏𑒩𑒻𑒞 𑒁𑒕𑒱। 𑒞𑒰𑒯𑒱𑒣𑒩 𑒯𑒳𑒢𑒏𑒰 𑒮𑓀𑒑 𑒔𑒼𑒩-𑒅𑒔𑒏𑓂𑒏𑒰 𑒂 𑒣𑒰𑒏𑒹𑒙𑒧𑒰𑒩𑒏𑒹𑒿 𑒣𑒚𑒰𑒍𑒪 𑒖𑒰𑒃𑒞 𑒁𑒕𑒱, 𑒄 𑒁𑒫𑒮𑒩 𑒠𑒻𑒞 𑒖𑒹 𑒯𑒱𑒢𑒏𑒰 𑒮𑒦𑒏𑒹𑒿 𑒥𑒠𑒪𑒴। 𑒔𑒼𑒩 𑒏𑒢𑒹𑒏 𑒖𑒰𑒋𑒧𑒹 𑒃𑒞𑒮𑓂𑒞𑓁 𑒏𑒩𑒻𑒞 𑒁𑒕𑒱 𑒂 𑒄 𑒖𑒱𑒖𑓂𑒘𑒰𑒮𑒰 𑒏𑒩𑒻𑒞 𑒁𑒕𑒱 𑒖𑒹 𑒯𑒧 𑒮𑒦 𑒞𑒿 𑒖𑒰𑒃𑒋 𑒩𑒯𑒪 𑒕𑒲 𑒧𑒳𑒠𑒰 𑒋𑒯𑒱𑒮𑒿 𑒂𑒑𑒰𑒿 ? 𑒢𑓀𑒠𑒲-𑒔𑒱𑒞𑓂𑒩𑒑𑒳𑒣𑓂𑒞-𑒨𑒧𑒩𑒰𑒖 𑒮𑒧𑒫𑒹𑒞 𑒮𑓂𑒫𑒩𑒧𑒹 𑒏𑒯𑒻𑒞 𑒕𑒟𑒱- 𑒢𑒼 𑒋𑒝𑓂𑒙𑓂𑒩𑒲। 𑒦𑒵𑓀𑒑𑒲 𑒞𑒐𑒢𑒹 𑒁𑒥𑒻𑒞 𑒕𑒟𑒱, 𑒁𑒦𑒱𑒢𑒹𑒞𑒰𑒏𑒹𑒿 𑒕𑒼𑒛𑓃𑒢𑒹। 𑒨𑒧𑒩𑒰𑒖 𑒏𑒯𑒻𑒞 𑒕𑒟𑒱 - 𑒧𑒰 𑒣𑓂𑒩𑒫𑒱𑒬। 𑒦𑒵𑓀𑒑𑒲 𑒢𑒲𑒔𑒰𑒿𑒧𑒹 𑒯𑒼𑒃𑒞 𑒔𑒩𑒔𑒰𑒏 𑒑𑒣 𑒏𑒯𑒻𑒞 𑒁𑒕𑒱, 𑒖𑒹 𑒋𑒞𑒳𑒏𑓂𑒏𑒰 𑒢𑒱𑒁𑒧 𑒥𑒠𑒪𑒪 𑒖𑒋𑒥𑒰𑒏 𑒂 𑒏𑒞𑒹𑒏 𑒑𑒼𑒙𑒹𑒏𑒹𑒿 𑒣𑒵𑒟𑓂𑒫𑒲𑒣𑒩 𑒒𑒳𑒩𑒋 𑒠𑒹𑒪 𑒖𑒋𑒥𑒰𑒏 𑒔𑒩𑒔𑒰 𑒮𑒩𑓂𑒫𑒞𑓂𑒩 𑒦𑒋 𑒩𑒯𑒪 𑒁𑒕𑒱। 𑒨𑒧𑒠𑒴𑒞 𑒮𑒦 𑒁𑒢𑒹𑒩𑒹 𑒏𑒛𑓃𑒰𑒯 𑒪𑒑 𑒚𑒰𑒜𑓃 𑒕𑒟𑒱 𑒏𑓂𑒨𑒼 𑒦𑒳𑒖𑒋 𑒪𑒹𑒪 𑒏𑒯𑒰𑒿 𑒦𑒹𑒙𑒪 𑒕𑒢𑓂𑒯𑒱 (𑒧𑒰𑒞𑓂𑒩 𑒠𑒴 𑒙𑒰 𑒁𑒢𑒳𑒔𑒩 𑒕𑒼𑒛𑓃𑒱)। 𑒂𑒥 𑒏𑓂𑒨𑒼 𑒢𑒯𑒱 𑒂𑒥𑒋 𑒥𑒪𑒰 𑒥𑒔𑒪 𑒁𑒕𑒱, 𑒮𑒹 𑒮𑒦 𑒏𑒯𑒻𑒞 𑒕𑒟𑒱। 𑒔𑒱𑒞𑓂𑒩𑒑𑒳𑒣𑓂𑒞 𑒁𑒣𑒢 𑒢𑒧𑒯𑒩 𑒠𑒰𑒜𑓃𑒲 𑒂 𑒨𑒧𑒩𑒰𑒖 𑒁𑒣𑒢 𑒧𑒳𑒏𑒳𑒙 𑒅𑒞𑒰𑒩𑒱 𑒪𑒻𑒞 𑒕𑒟𑒱 𑒂 𑒮𑓂𑒫𑒰𑒦𑒰𑒫𑒱𑒏 𑒧𑒢𑒳𑒏𑓂𑒐 𑒩𑒴𑒣𑒧𑒹 𑒂𑒥𑒱 𑒖𑒰𑒃𑒞 𑒕𑒟𑒱! 𑒧𑒳𑒠𑒰 𑒔𑒱𑒞𑓂𑒩𑒑𑒳𑒣𑓂𑒞𑒏 𑒧𑒹𑒏𑒣 𑒥𑒪𑒰 𑒢𑒧𑒯𑒩 𑒠𑒰𑒜𑓃𑒲 𑒠𑒹𑒐𑒱 𑒦𑒱𑒐𑒧𑓀𑒑𑒢𑒲 𑒖𑒹 𑒍𑒞𑒋 𑒕𑒪𑒲𑒯, 𑒯𑒿𑒮𑒱 𑒠𑒻𑒞 𑒕𑒟𑒱। 𑒦𑒵𑓀𑒑𑒲 𑒅𑒠𑓂𑒒𑒰𑒙𑒢 𑒏𑒩𑒻𑒞 𑒕𑒟𑒱 𑒖𑒹 𑒦𑒱𑒐𑒧𑓀𑒑𑒢𑒲 𑒯𑒳𑒢𑒏𑒹 𑒮𑒦 𑒖𑒹𑒏𑒰𑒿 𑒏𑒪𑒰𑒏𑒰𑒩 𑒕𑒟𑒱 ! 𑒏𑒼𑒢 𑒁𑒦𑒱𑒢𑒨 ! 𑒞𑒏𑒩 𑒫𑒱𑒫𑒩𑒝 𑒧𑒳𑒯𑒥𑓂𑒥𑒞 𑒂 𑒑𑒳𑒠𑒑𑒳𑒠𑒲𑒣𑒩 𑒐𑒞𑒧 𑒯𑒼𑒃𑒞 𑒁𑒕𑒱, 𑒞𑒿 𑒦𑒱𑒐𑒧𑓀𑒑𑒢𑒲 𑒏𑒯𑒻𑒞 𑒕𑒟𑒱 𑒖𑒹 𑒢𑒯𑒱 𑒋𑒯𑒱 𑒞𑒩𑒯𑒏 𑒁𑒦𑒱𑒢𑒨 𑒞𑒿 𑒍𑒞𑒋 (𑒠𑒹𑒐𑒰 𑒏𑒋) 𑒦𑓄 𑒩𑒯𑒪 𑒁𑒕𑒱। 𑒍𑒞𑓂𑒞𑓄 𑒩𑒧𑒝𑒲 𑒧𑒼𑒯𑒢 𑒂 𑒅𑒔𑓂𑒔𑒫𑓀𑒬𑒲𑒨 𑒧𑒯𑒱𑒪𑒰 𑒢𑒱𑒦𑒰𑒏 𑒩𑒼𑒧𑒰𑓀𑒮 𑒔𑒪𑒱 𑒩𑒯𑒪 𑒁𑒕𑒱। 𑒧𑒳𑒠𑒰 𑒢𑒱𑒦𑒰𑒖𑒲 𑒞𑒿 𑒥𑒖𑒱𑒞𑒹 𑒢𑒯𑒱 𑒕𑒟𑒱। 𑒦𑒱𑒐𑒧𑓀𑒑𑒢𑒲 𑒨𑒧𑒩𑒰𑒖𑒮𑒿 𑒏𑒯𑒻𑒞 𑒕𑒟𑒱 𑒖𑒹 𑒍 𑒞𑒐𑒢𑒹 𑒥𑒖𑒞𑒲𑒯 𑒖𑒐𑒢 𑒋𑒯𑒱 𑒠𑒩𑒥𑒖𑓂𑒖𑒰𑒏 𑒞𑒰𑒪𑒰𑒏 𑒔𑒰𑒦𑒲 𑒯𑒳𑒢𑒏𑒰 𑒦𑒹𑒙𑒞𑒢𑓂𑒯𑒱, 𑒥𑒳𑒗𑒞𑒲𑒯 𑒖𑒹 𑒁𑒣𑒮𑒩𑒰 𑒥𑒢𑒥𑒰𑒧𑒹 𑒨𑒧𑒩𑒰𑒖 𑒧𑒠𑒞𑒱 𑒠𑒋 𑒮𑒏𑒻𑒞 𑒕𑒟𑒱, 𑒄 𑒩𑒧𑒝𑒲𑒏 𑒯𑒵𑒠𑒨 𑒟𑒱𑒏 𑒋𑒞𑒯𑒳 𑒢𑒼 𑒋𑒝𑓂𑒙𑓂𑒩𑒲 ! 𑒨𑒧𑒩𑒰𑒖 𑒐𑒐𑒮𑒻𑒞 𑒕𑒟𑒱, 𑒞𑒿 𑒔𑒱𑒞𑓂𑒩𑒑𑒳𑒣𑓂𑒞 𑒥𑒳𑒗𑒱 𑒖𑒰𑒃𑒞 𑒕𑒟𑒱 𑒖𑒹 𑒨𑒧𑒩𑒰𑒖 “𑒣𑓀𑒔𑒬𑒩”𑒮𑒿 𑒑𑓂𑒩𑒮𑒱𑒞 𑒦𑒋 𑒑𑒹𑒪 𑒕𑒟𑒱 ! 𑒔𑒱𑒞𑓂𑒩𑒑𑒳𑒣𑓂𑒞𑒏 𑒏𑒯𑒪𑒰 𑒅𑒞𑓂𑒞𑒩 𑒮𑒦 𑒏𑓂𑒨𑒼 𑒋𑒏 𑒏𑒰𑒞 𑒪𑒋 𑒖𑒰𑒍𑒪 𑒖𑒰𑒃𑒞 𑒕𑒟𑒱 𑒧𑒰𑒞𑓂𑒩 𑒨𑒧𑒩𑒰𑒖 𑒂 𑒢𑒱𑒦𑒰 𑒧𑓀𑒔𑒣𑒩 𑒩𑒯𑒱 𑒖𑒰𑒃𑒞 𑒕𑒟𑒱। 𑒨𑒧𑒩𑒰𑒖 𑒢𑒱𑒦𑒰𑒏 𑒮𑒼𑒗𑒰𑒿- 𑒮𑒳𑒢𑒴 𑒢𑒹 𑒢𑒱𑒦𑒰... 𑒏𑒯𑒱 𑒩𑒳𑒏𑒱 𑒖𑒰𑒃𑒞 𑒕𑒟𑒱। 𑒮𑒦𑒏 𑒅𑒞𑓂𑒮𑒰𑒯𑒱𑒞 𑒏𑒋𑒪𑒰𑒣𑒩 𑒨𑒧𑒩𑒰𑒖 𑒥𑒛𑓃𑒏𑒰 𑒔𑒰𑒦𑒲 𑒯𑒳𑒢𑒏𑒰 𑒠𑒻𑒞 𑒕𑒟𑒱, 𑒧𑒳𑒠𑒰 𑒢𑒱𑒦𑒰 𑒔𑒰𑒦𑒲 𑒦𑒹𑒙𑒪𑒰𑒣𑒩 𑒩𑒧𑒝𑒲 𑒧𑒼𑒯𑒢𑒏 𑒮𑓀𑒑 𑒞𑒹𑒢𑒰 𑒂𑒑𑒰𑒿 𑒥𑒜𑓃𑒻𑒞 𑒕𑒟𑒱 𑒖𑒹𑒢𑒰 𑒏𑒏𑒩𑒼 𑒁𑒢𑒏𑒰 𑒔𑒱𑒢𑓂𑒯𑒱𑒞𑒹 𑒢𑒯𑒱 𑒯𑒼𑒟𑒱 ! 𑒍 𑒔𑒰𑒦𑒲 𑒩𑒧𑒝𑒲 𑒧𑒼𑒯𑒢𑒏𑒹𑒿 𑒠𑒋 𑒠𑒻𑒞 𑒕𑒟𑒱 𑒧𑒳𑒠𑒰 𑒍 𑒞𑒰𑒪𑒰 𑒢𑒯𑒱 𑒐𑒼𑒪𑒱 𑒣𑒥𑒻𑒞 𑒕𑒟𑒱। 𑒤𑒹𑒩 𑒢𑒱𑒦𑒰 𑒁𑒣𑒢𑒹 𑒣𑓂𑒩𑒨𑒰𑒮 𑒏𑒩𑒋 𑒪𑒹𑒪 𑒂𑒑𑒰𑒿 𑒥𑒜𑓃𑒻𑒞 𑒕𑒟𑒱 𑒧𑒳𑒠𑒰 𑒔𑒱𑒞𑓂𑒩𑒑𑒳𑒣𑓂𑒞 𑒏𑒯𑒻𑒞 𑒕𑒟𑒱 𑒖𑒹 𑒄 𑒧𑒼𑒢𑒏 𑒠𑒩𑒥𑒖𑓂𑒖𑒰 𑒟𑒱𑒏, 𑒍𑒢𑒰 𑒢𑒯𑒱 𑒐𑒳𑒖𑒞। 𑒧𑒯𑒱𑒪𑒰 𑒚𑒏𑒋 𑒪𑒹𑒪 𑒔𑒰𑒦𑒲 𑒠𑒹𑒥𑒰𑒏 (!) 𑒑𑒣 𑒏𑒯𑒻𑒞 𑒕𑒟𑒱। 𑒮𑒦 𑒏𑓂𑒨𑒼 𑒯𑒿𑒮𑒲 𑒏𑒩𑒻𑒞 𑒕𑒢𑒱 𑒖𑒹 𑒧𑒼𑒢 𑒏𑒞𑒋 𑒕𑒼𑒛𑓃𑒱 𑒁𑒋𑒪𑒯𑒳𑒿 ? 𑒞𑒰𑒯𑒱𑒣𑒩 𑒋𑒏𑒥𑒹𑒩 𑒣𑒳𑒢𑓁 𑒩𑒧𑒝𑒲 𑒧𑒼𑒯𑒢 𑒂 𑒢𑒱𑒦𑒰 𑒧𑒼𑒢 𑒮𑓀𑒖𑒼𑒑𑒱 𑒏𑒋 𑒞𑒰𑒪𑒰 𑒐𑒼𑒪𑒥𑒰𑒏 𑒁𑒮𑒤𑒪 𑒣𑓂𑒩𑒨𑒰𑒮 𑒏𑒩𑒻𑒞 𑒕𑒟𑒱। 𑒢𑓀𑒠𑒲-𑒦𑒵𑓀𑒑𑒲-𑒦𑒱𑒐𑒧𑓀𑒑𑒢𑒲 𑒑𑒲𑒞 𑒑𑒰𑒥𑒋 𑒪𑒑𑒻𑒞 𑒕𑒟𑒱 𑒖𑒏𑒩 𑒞𑒰𑒞𑓂𑒣𑒩𑓂𑒨 𑒄𑒋𑒯 𑒖𑒹 𑒧𑒼𑒢𑒏 𑒞𑒰𑒪𑒰 𑒁𑒕𑒱 𑒪𑒰𑒑𑒪, 𑒧𑒳𑒠𑒰 𑒍𑒞𑒋 𑒁𑒕𑒱 𑒢𑒼 𑒋𑒝𑓂𑒙𑓂𑒩𑒲। 𑒧𑒳𑒠𑒰 𑒇𑒞𑒳 𑒫𑒮𑒢𑓂𑒞𑒧𑒹 𑒣𑓂𑒩𑒹𑒧 𑒯𑒼𑒃𑒕 𑒁𑒢𑒢𑓂𑒞 𑒂 𑒏𑒩𑒹𑒖 𑒏𑒯𑒻𑒞 𑒁𑒕𑒱 𑒧𑒻𑒢𑒰-𑒧𑒻𑒢𑒰 । 𑒞𑒿 𑒋𑒞𑒯𑒱 𑒢𑒼 𑒋𑒝𑓂𑒙𑓂𑒩𑒲 𑒠𑒩𑒥𑒖𑓂𑒖𑒰𑒣𑒩 𑒡𑒩𑒢𑒰 𑒠𑒹𑒪 𑒖𑒰𑒋।

𑒅𑒞𑓂𑒞𑒩 𑒂𑒡𑒳𑒢𑒱𑒏 𑒦𑒰𑒫𑒣𑓂𑒩𑒡𑒰𑒢 𑒢𑒱𑒩𑒩𑓂𑒟𑒏 (𑒋𑒥𑒮𑒩𑓂𑒛) 𑒢𑒰𑒙𑒏: 𑒋𑒢 𑒋𑒙𑒹𑒝𑓂𑒛𑒹𑒢𑓂𑒙 𑒑𑒼𑒛𑒼 𑒏 𑒮𑒻𑒧𑒳𑒁𑒪 𑒥𑒹𑒏𑒻𑒙 𑒠𑓂𑒫𑒰𑒩𑒰 𑒮𑓂𑒫𑒨𑓀 𑒤𑓂𑒩𑒹𑓀𑒔𑒮𑒿 𑒁𑓀𑒑𑓂𑒩𑒹𑒖𑒲𑒧𑒹 𑒁𑒢𑒳𑒫𑒰𑒠 𑒏𑒋𑒪 𑒑𑒹𑒪 “𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼” 𑒬𑒲𑒩𑓂𑒭𑒏𑒮𑒿 𑒂 𑒅𑒣𑒬𑒲𑒩𑓂𑒭𑒏 “𑒁 𑒙𑓂𑒩𑒹𑒖𑒱𑒏𑒰𑒧𑒹𑒛𑒲 𑒃𑒢 𑒙𑒴 𑒋𑒏𑓂𑒙𑓂𑒮” 𑒮𑒹𑒯𑒼 𑒖𑒼𑒛𑓃𑒪 𑒑𑒹𑒪 𑒖𑒹 𑒤𑓂𑒩𑒹𑓀𑒔 𑒮𑓀𑒮𑓂𑒏𑒩𑒝𑒧𑒹 𑒢𑒻 𑒕𑒪। 𑒙𑓂𑒩𑒹𑒖𑒲𑒏𑒰𑒧𑒹𑒛𑒲 𑒧𑒰𑒢𑒹 𑒙𑓂𑒩𑒹𑒖𑒹𑒛𑒲 𑒂 𑒏𑒰𑒧𑒹𑒛𑒲𑒏 𑒧𑒱𑒬𑓂𑒩𑒝। 𑒋𑒏𑒩 𑒏𑒟𑒰𑒢𑒏𑒮𑒿 𑒮𑓂𑒣𑒭𑓂𑒙 𑒦𑓄 𑒑𑒹𑒪 𑒯𑒋𑒞 𑒖𑒹 𑒋𑒏𑒩 𑒧𑒳𑒐𑓂𑒨 𑒣𑒰𑒞𑓂𑒩 “𑒑𑒼𑒛𑒼” 𑒌 𑒢𑒰𑒙𑒏𑒧𑒹 𑒕𑒻𑒯𑒹 𑒢𑒻, 𑒠𑒼𑒮𑒩 𑒍 𑒦𑒰𑒫𑒏 𑒠𑒵𑒭𑓂𑒙𑒱𑒮𑒿 𑒮𑒹𑒯𑒼 𑒢𑒰𑒙𑒏𑒏 𑒧𑒳𑒐𑓂𑒨 𑒞𑒞𑓂𑒫 𑒢𑒻 𑒕𑒻। 𑒢𑒰𑒙𑒏𑒏 𑒧𑒳𑒐𑓂𑒨 𑒞𑒞𑓂𑒫 𑒕𑒻 “𑒫𑒹𑒙𑒱𑓀𑒑” 𑒧𑒰𑒢𑒹 𑒥𑒰𑒙 𑒞𑒏𑒢𑒰𑒃। 𑒦𑒰𑒭𑒰, 𑒮𑓂𑒙𑒹𑒖, 𑒥𑒰𑒖𑒥, 𑒔𑒳𑒣𑓂𑒣 𑒩𑒯𑒥, 𑒔𑒪𑒥𑒰𑒏 𑒞𑒩𑒲𑒏𑒰, 𑒄 𑒮𑒦 𑒌 𑒢𑒰𑒙𑒏𑒏 𑒁𑒦𑒱𑒢𑓂𑒢 𑒁𑓀𑒑 𑒕𑒱𑒌। 𑒠𑒹𑒬-𑒏𑒰𑒪𑒧𑒹 𑒦𑒰𑒑𑒻𑒥𑒪𑒰 𑒥𑒢𑒖𑒰𑒩𑒰 𑒖𑒲𑒫𑒢𑒬𑒻𑒪𑒲𑒏 𑒪𑒼𑒏 𑒮𑒦 𑒁𑒕𑒱 𑒋𑒏𑒩 𑒧𑒳𑒐𑓂𑒨 𑒣𑒰𑒞𑓂𑒩। 𑒥𑒱𑒢𑒳 𑒥𑒖𑒢𑒹 𑒬𑒰𑒩𑒲𑒩𑒱𑒏 𑒦𑒰𑒫𑒮𑒿 𑒁𑒦𑒱𑒢𑒨 𑒏𑒩𑒻𑒥𑒪𑒰 “𑒧𑒰𑒃𑒧 𑒏𑒪𑒰𑒏𑒰𑒩” 𑒖𑒹𑒏𑒰𑒿 𑒌 𑒢𑒰𑒙𑒏𑒏 𑒣𑒰𑒞𑓂𑒩 𑒁𑒦𑒱𑒢𑒨 𑒏𑒩𑒻 𑒕𑒟𑒱। 𑒢𑒰𑒙𑒏𑒧𑒹 𑒣𑓂𑒪𑒰𑒙 𑒂 𑒮𑓀𑒞𑒳𑒪𑒢𑒏 𑒢𑒫 𑒣𑒩𑒱𑒦𑒰𑒭𑒰 𑒄 𑒢𑒰𑒙𑒏 𑒑𑒜𑓃𑒻𑒞 𑒁𑒕𑒱। 𑒂𑒡𑒳𑒢𑒱𑒏 𑒟𑒱𑒨𑒹𑒙𑒩𑒏𑒹𑒿 𑒄 𑒢𑒰𑒙𑒏 𑒢𑒫 𑒨𑒳𑒑𑒧𑒹 𑒣𑓂𑒩𑒫𑒹𑒬 𑒏𑒩𑒰𑒥𑒻𑒞 𑒁𑒕𑒱। 𑒥𑓂𑒩𑒱𑒙𑒹𑒢𑒏 “𑒧𑓂𑒨𑒴𑒖𑒱𑒏 𑒯𑒰𑒪” 𑒟𑒱𑒨𑒹𑒙𑒩 𑒧𑒹 𑒮𑓀𑒑𑒲𑒞 𑒯𑒰𑒮𑓂𑒨 𑒩𑒯𑒻 𑒕𑒪𑒻 𑒖𑒃𑒧𑒹 𑒖𑒲𑒫𑒢𑒏 𑒢𑒱𑒩𑒰𑒬𑒰 “𑒏𑓂𑒩𑒰𑒮-𑒙𑒰𑒏”𑒮𑒿 𑒥𑒹𑒏𑒹𑒙 𑒂 𑒩𑒰𑒖𑒢𑒻𑒞𑒱𑒏-𑒮𑒰𑒧𑒰𑒖𑒱𑒏 𑒂𑒞𑓀𑒏 𑒯𑒻𑒩𑒼𑒪𑓂𑒛 𑒣𑒱𑒢𑓂𑒙𑒩 𑒯𑒰𑒮𑓂𑒨 𑒩𑒴𑒣𑒧𑒹 𑒠𑒹𑒐𑒥𑒻𑒞 𑒕𑒟𑒱। “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬” 𑒮𑒹𑒯𑒼 𑒮𑓂𑒫𑒩𑓂𑒏 (𑒥𑒰 𑒢𑒩𑒏) 𑒏 𑒠𑓂𑒫𑒰𑒩𑒣𑒩 𑒂𑒩𑒧𑓂𑒦 𑒯𑒼𑒃𑒋 𑒖𑒞𑒋 𑒍𑒢𑒰 𑒞𑒿 𑒮𑒦 𑒧𑒵𑒞 𑒪𑒼𑒏 𑒣𑓀𑒏𑓂𑒞𑒱𑒥𑒠𑓂𑒡 𑒕𑒟𑒱 𑒧𑒳𑒠𑒰 𑒋𑒏𑒙𑒰 𑒖𑒲𑒫𑒱𑒞 𑒫𑓂𑒨𑒏𑓂𑒞𑒱 𑒮𑒹𑒯𑒼 𑒕𑒟𑒱!𑒅𑒔𑒏𑓂𑒏𑒰 𑒥𑒰𑒖𑒰𑒩𑒲 𑒪𑒑 𑒮𑒘𑓂𑒔-𑒧𑒘𑓂𑒔 𑒩𑒯𑒻𑒋! 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰𑒏 𑒍𑒞𑒋 𑒥𑒱𑒨𑒰𑒯𑒼 𑒦𑓄 𑒖𑒰𑒃 𑒕𑒻! 𑒢𑒹𑒞𑒰𑒖𑒲 𑒧𑒵𑒞𑓂𑒨𑒳𑒏 𑒥𑒰𑒠𑒼 𑒫𑒱𑒪𑒧𑓂𑒥𑒮𑒿 𑒋𑒥𑒰 𑒪𑒹𑒪 𑒁𑒦𑒱𑒬𑒣𑓂𑒞 𑒕𑒟𑒱! 𑒫𑒰𑒧𑒣𑓀𑒟𑒲 𑒍𑒞𑒾 𑒥𑒰𑒯𑒩𑒮𑒿 𑒮𑒧𑒩𑓂𑒟𑒢 𑒠𑒻 𑒕𑒟𑒱! 𑒫𑒲.𑒂𑒃.𑒣𑒲. 𑒏𑓂𑒨𑒴 𑒮𑒿 𑒍𑒞𑒾 𑒞𑓂𑒩𑒰𑒝 𑒢𑒻 𑒦𑒹𑒙𑒻 𑒕𑒻! 𑒧𑒳𑒠𑒰 𑒖𑒃 𑒠𑒩𑒥𑒖𑓂𑒖𑒰𑒏 𑒥𑒰𑒯𑒩 𑒪𑒼𑒏 𑒣𑓀𑒏𑓂𑒞𑒱𑒥𑒠𑓂𑒡 𑒕𑒟𑒱 𑒮𑒹 𑒋𑒏 𑒨𑒳𑒑𑒧𑒹 𑒐𑒳𑒖𑒱𑒞𑒼 𑒕𑒪 𑒂 𑒥𑒢𑓂𑒢 𑒮𑒹𑒯𑒼 𑒯𑒼𑒃𑒞 𑒕𑒪, 𑒄 𑒩𑒯𑒮𑓂𑒨𑒼𑒠𑓂𑒡𑒰𑒙𑒢 𑒔𑒱𑒞𑓂𑒩𑒑𑒳𑒣𑓂𑒞 𑒏𑒩𑒻 𑒕𑒟𑒱! 𑒧𑒰𑒢𑒹 𑒂𑒥 𑒄 𑒢𑒻 𑒐𑒳𑒖𑒞 𑒞𑒐𑒢 𑒃𑒢𑓂𑒞𑒖𑒰𑒩𑒲 𑒏𑒟𑒲𑒏? 𑒢𑒢𑓂𑒠𑒲-𑒦𑒵𑓀𑒑𑒲 𑒏𑒯𑒻𑒋 𑒖𑒹 𑒮𑒼𑒗𑒰𑒿𑒏 𑒠𑒩𑒥𑒖𑓂𑒖𑒰 𑒮𑓂𑒫𑒣𑓂𑒢 𑒢𑒻, 𑒧𑒰𑒞𑓂𑒩 𑒥𑒳𑒗𑒥𑒰𑒏 𑒠𑒼𑒭 𑒕𑒪! 𑒁𑒦𑒱𑒢𑒹𑒞𑒰 𑒫𑒱𑒫𑒹𑒏 𑒏𑒳𑒧𑒰𑒩 𑒁𑒣𑒢 “𑒮𑒩𑒢𑒹𑒧” 𑒣𑒳𑒕𑒪 𑒑𑒹𑒪𑒰𑒣𑒩 𑒏𑒯𑒻 𑒕𑒟𑒱 𑒖𑒹 𑒏𑒞𑒹𑒏 𑒧𑒼𑒬𑓂𑒏𑒱𑒪𑒮𑒿 𑒞𑒿 𑒖𑒰𑒞𑒱 𑒯𑒳𑒢𑒏𑒩 𑒣𑒰𑒕𑒰𑒿 𑒕𑒼𑒛𑓃𑒪𑒏 𑒁𑒕𑒱 𑒮𑒹 𑒅𑒩𑓂𑒤 𑒞𑒿 𑒕𑒼𑒛𑓃𑒱𑒨𑒹 𑒠𑒹𑒪 𑒖𑒰𑒋। 𑒫𑒰𑒧𑒣𑓀𑒟𑒲𑒏 𑒏𑒟𑒰𑒧𑒹 𑒢𑒹 𑒮𑓂𑒫𑒩𑓂𑒑-𑒢𑒩𑓂𑒏 𑒯𑒼𑒃 𑒕𑒻 𑒂 𑒢𑒯𑒱𑒨𑒹 𑒨𑒧𑒩𑒰𑒖-𑒔𑒱𑒞𑓂𑒩𑒑𑒳𑒣𑓂𑒞, 𑒧𑒳𑒠𑒰 𑒋𑒞𑒳𑒏𑓂𑒏𑒰 𑒣𑒩𑒱𑒮𑓂𑒟𑒱𑒞𑒱 𑒠𑒹𑒐𑒱 𑒏𑓄 𑒍 𑒁𑒫𑒱𑒬𑓂𑒫𑒰𑒮 𑒏𑒼𑒢𑒰 𑒏𑒩𑒟𑒳? 𑒧𑒳𑒠𑒰 𑒨𑒧𑒩𑒰𑒖𑒹 𑒯𑒳𑒢𑒏𑒰 𑒏𑒯𑒻 𑒕𑒟𑒱𑒢𑓂𑒯 𑒖𑒹 𑒄 𑒠𑒳𑓁𑒮𑓂𑒫𑒣𑓂𑒢 𑒯𑒳𑒁𑒋। 𑒨𑒧𑒠𑒴𑒞 𑒮𑒦 𑒏𑒛𑓃𑒰𑒯 𑒪𑒑 𑒁𑒢𑒹𑒩𑒹 𑒚𑒰𑒜𑓃 𑒕𑒟𑒱 𑒏𑒱𑒨𑒼 𑒦𑒴𑒖𑒻𑒪𑒹 𑒦𑒹𑒙𑒱𑒞𑒹 𑒢𑒻 𑒕𑒢𑓂𑒯𑒱, 𑒔𑒱𑒞𑓂𑒩𑒑𑒳𑒣𑓂𑒞𑒏 𑒧𑒹𑒏𑒣 𑒥𑒪𑒰 𑒠𑒰𑒜𑓃𑒲 𑒠𑒹𑒐𑒱 𑒦𑒱𑒐𑒧𑓀𑒑𑒢𑒲𑒏 𑒯𑒿𑒮𑒪𑒰𑒣𑒩 𑒦𑒵𑓀𑒑𑒲 𑒏𑒯𑒻 𑒕𑒟𑒱 𑒖𑒹 𑒦𑒱𑒐𑒧𑓀𑒑𑒢𑒲 𑒮𑒹𑒯𑒼 𑒯𑒳𑒢𑒏𑒹 𑒮𑒦 𑒖𑒹𑒏𑒰𑒿 𑒏𑒪𑒰𑒏𑒰𑒩 𑒕𑒟𑒱। 𑒧𑒼𑒢𑒏 𑒠𑒩𑒥𑒖𑓂𑒖𑒰 𑒧𑒼𑒢 𑒕𑒼𑒛𑓃𑒱 𑒋𑒪𑒰𑒣𑒩 𑒏𑒼𑒢𑒰 𑒐𑒳𑒖𑒞?
𑒤𑓂𑒩𑒹𑓀𑒔 𑒢𑒰𑒙𑒏 “𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼”, 𑒯𑒻𑒩𑒼𑒪𑓂𑒛 𑒣𑒱𑓀𑒙𑒩𑒏 𑒁𑓀𑒑𑓂𑒩𑒹𑒖𑒲 𑒢𑒰𑒙𑒏 “𑒠 𑒥𑒩𑓂𑒟𑒛𑒹 𑒣𑒰𑒩𑓂𑒙𑒲”, 𑒥𑒰𑒠𑒪 𑒮𑒩𑒏𑒰𑒩𑒏 𑒥𑒰𑓀𑒑𑓂𑒪𑒰 𑒢𑒰𑒙𑒏 “𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞” 𑒂 𑒅𑒠𑒨 𑒢𑒰𑒩𑒰𑒨𑒝 𑒮𑒱𑓀𑒯 ‘𑒢𑒔𑒱𑒏𑒹𑒞𑒰’𑒏 𑒧𑒻𑒟𑒱𑒪𑒲 𑒢𑒰𑒙𑒏 “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬” 𑒣𑒳𑒩𑒰𑒢 𑒢𑒰𑒙𑒏 𑒖𑒹𑒏𑒰𑒿 𑒣𑒩𑒱𑒦𑒰𑒭𑒱𑒞 𑒂𑒩𑒧𑓂𑒦 𑒂 𑒁𑒢𑓂𑒞𑒏 𑒣𑒩𑒱𑒡𑒱𑒮𑒿 𑒁𑒪𑒑 𑒁𑒕𑒱। 𑒄 𑒏𑒞𑒾 𑒮𑒿 𑒬𑒳𑒩𑒴 𑒦𑓄 𑒖𑒰𑒃𑒞 𑒁𑒕𑒱, 𑒏𑒞𑒾 𑒐𑒞𑒧 𑒦𑓄 𑒖𑒰𑒃𑒞 𑒁𑒕𑒱। 𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞 𑒧𑒹 𑒪𑒹𑒐𑒏 𑒣𑒰𑒞𑓂𑒩 𑒞𑒰𑒏𑒱 𑒩𑒯𑒪 𑒁𑒕𑒱, 𑒂 𑒁𑒢𑒔𑒼𑒏𑓂𑒏𑒹 𑒍 𑒠𑒩𑓂𑒬𑒏 𑒠𑒲𑒩𑓂𑒒𑒰𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒩𑒻𑒞 𑒔𑒰𑒩𑒱𑒙𑒰 𑒠𑒹𑒩𑒲𑒮𑒿 𑒂𑒋𑒪 𑒠𑒩𑓂𑒬𑒏𑒏𑒹𑒿 𑒧𑓀𑒔𑒣𑒩 𑒥𑒖𑒰 𑒪𑒻𑒋 𑒂 𑒍𑒏𑒩𑒰 𑒢𑒰𑒙𑒏𑒏 𑒣𑒰𑒞𑓂𑒩 𑒥𑒢𑒰 𑒠𑒻𑒋। 𑒔𑒰𑒩𑒱𑒧 𑒣𑒰𑒞𑓂𑒩 𑒍𑒏𑒩𑒰 𑒣𑓂𑒩𑒱𑒨 𑒕𑒻, 𑒍 𑒢𑒱𑒩𑓂𑒧𑒪 𑒢𑒻 “𑒃𑒢𑓂𑒠𑓂𑒩𑒖𑒲𑒞” 𑒕𑒲। 𑒍 𑒁𑒪𑒑 𑒁𑒕𑒱, 𑒃𑒢𑓂𑒠𑓂𑒩𑒏𑒹𑒿 𑒖𑒲𑒞𑒻𑒥𑒪𑒰 𑒌𑒞𑒱𑒯𑒰𑒮𑒱𑒏 𑒣𑒰𑒞𑓂𑒩 𑒁𑒕𑒱। 𑒍 𑒁𑒧𑒪 𑒫𑒱𑒧𑒪, 𑒏𑒧𑒪 𑒖𑒹𑒏𑒰𑒿 𑒪𑒲𑒐𑒣𑒩 𑒢𑒻 𑒔𑒪𑒞। 𑒧𑒳𑒠𑒰 𑒁𑒢𑓂𑒞 𑒖𑒰𑒃𑒞 𑒖𑒰𑒃𑒞 𑒃𑒢𑓂𑒠𑓂𑒩𑒖𑒲𑒞 𑒮𑒹𑒯𑒼 𑒁𑒧𑒪 𑒫𑒱𑒧𑒪, 𑒏𑒧𑒪 𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞 𑒦𑓄 𑒖𑒰𑒃𑒋।
𑒯𑒻𑒩𑒼𑒪𑓂𑒛 𑒣𑒱𑒢𑓂𑒙𑒩𑒏 “𑒠 𑒥𑒩𑓂𑒟𑒛𑒹 𑒣𑒰𑒩𑓂𑒙𑒲”𑒏 𑒣𑓂𑒩𑒰𑒩𑒧𑓂𑒦𑒧𑒹 𑒞𑒹𑒯𑒹𑒢 𑒮𑒧𑒲𑒏𑓂𑒭𑒰 𑒦𑒹𑒪 𑒖𑒹 𑒯𑒳𑒢𑒏𑒩 𑒪𑒹𑒐𑒏𑒲𑒨 𑒖𑒲𑒫𑒢 𑒮𑒧𑒰𑒣𑓂𑒞 𑒯𑒳𑒁𑒋 𑒣𑒩 𑒂𑒥𑒱 𑒑𑒹𑒪। 𑒧𑒳𑒠𑒰 𑒋𑒏𑒩 𑒣𑒳𑒢𑒩𑓂𑒣𑒰𑒚 𑒋𑒏𑒩𑒰 𑒏𑓂𑒪𑒰𑒮𑒱𑒏 𑒥𑒢𑒰 𑒠𑒹𑒪𑒏। 𑒏𑒱𑒕𑒳 𑒩𑒯𑒮𑓂𑒨, 𑒏𑒱𑒕𑒳 𑒂𑒞𑓀𑒏𑒏𑒹𑒿 𑒍 𑒮𑒧𑓂𑒣𑒴𑒩𑓂𑒝 𑒢𑒰𑒙𑒏𑒧𑒹 𑒥𑒢𑒹𑒢𑒹 𑒩𑒯𑒪𑒰𑒯, 𑒯𑒰𑒮𑓂𑒨 𑒏𑒟𑓂𑒨𑒏𑒹𑒿 𑒂𑒩 𑒧𑒖𑒑𑒴𑒞 𑒏𑒹𑒪𑒏। 𑒮𑓂𑒙𑒻𑒢𑒪𑒹 𑒏𑒲 𑒁𑒕𑒱, 𑒕𑒪 𑒥𑒰 𑒥𑒢𑓄 𑒔𑒯𑒻𑒞 𑒁𑒕𑒱? 𑒏𑒲 𑒍 𑒮𑓂𑒞𑓂𑒩𑒲𑒏𑒹𑒿 𑒠𑒴𑒭𑒱𑒞 𑒏𑒩𑒻𑒋, 𑒥𑒰 𑒍 𑒁𑒣𑒢 𑒣𑒞𑓂𑒢𑒲𑒏 𑒯𑒞𑓂𑒨𑒰 𑒏𑒹𑒪𑒏? 𑒧𑒳𑒠𑒰 𑒧𑒹𑒑 𑒞𑒿 𑒍𑒏𑒩𑒰 𑒣𑒮𑒱𑒢𑓂𑒢 𑒏𑒩𑒻 𑒕𑒻? 𑒍𑒏𑒩 𑒣𑒯𑒱𑒪 𑒂 𑒠𑒼𑒮𑒩 𑒏𑒢𑓂𑒮𑒩𑓂𑒙, 𑒏𑒹 𑒞𑒏𑒩 𑒥𑒰𑒡𑒏 𑒥𑒢𑒪𑒻? 𑒏𑒲 𑒍 𑒗𑒴𑒚 𑒥𑒖𑒻𑒋 𑒥𑒰 𑒫𑒩𑓂𑒞𑒧𑒰𑒢 𑒮𑒰𑒧𑒰𑒖𑒱𑒏 𑒂 𑒩𑒰𑒖𑒢𑒻𑒞𑒱𑒏 𑒣𑒩𑒱𑒦𑒰𑒭𑒰𑒮𑒿 𑒁𑒪𑒑 𑒫𑓂𑒨𑒫𑒯𑒰𑒩𑒏 𑒁𑒕𑒱? 𑒍 𑒧𑒹𑒑𑒏𑒹𑒿 𑒧𑒼𑒏𑓄 𑒔𑒰𑒯𑒻𑒋 𑒧𑒳𑒠𑒰 𑒞𑒻𑒨𑒼 𑒏𑒱𑒋 𑒧𑒹𑒑 𑒍𑒏𑒩𑒰 𑒣𑒮𑒱𑒢𑓂𑒢 𑒏𑒩𑒻 𑒕𑒻 𑒂 𑒮𑒰𑒧𑒰𑒖𑒱𑒏 𑒂 𑒩𑒰𑒖𑒢𑒻𑒞𑒱𑒏 𑒬𑒏𑓂𑒞𑒱 𑒍𑒏𑒩𑒰 𑒏𑒱𑒋 𑒂 𑒏𑒼𑒢𑒰 𑒅𑒚𑒰 𑒏𑓄 𑒪𑓄 𑒑𑒹𑒪 𑒖𑒰𑒃 𑒕𑒻, 𑒖𑒏𑒩 𑒮𑒱𑒣𑒰𑒯𑒲 𑒑𑒼𑒪𑓂𑒛𑒥𑒩𑓂𑒑 (𑒑𑒼𑒪𑓂𑒛𑒥𑒩𑓂𑒑𑒏 𑒪𑒳𑒪𑒳𑒏 𑒮𑓀𑒑 𑒩𑒯𑒮𑓂𑒨𑒧𑒨 𑒫𑓂𑒨𑒫𑒯𑒰𑒩) 𑒮𑓂𑒫𑒨𑓀 𑒂𑒠𑒩𑓂𑒬 𑒅𑒣𑒮𑓂𑒟𑒱𑒞 𑒢𑒻 𑒏𑓄 𑒣𑒰𑒥𑒻 𑒕𑒟𑒱।
𑒮𑒳𑒢𑓂𑒢-𑒧𑒮𑒰𑒢 𑒮𑒛𑓃𑒏𑒏 𑒏𑒰𑒞𑒏 𑒧𑒰𑒙𑒱𑒏 𑒜𑒱𑒧𑒏𑒰 𑒂 𑒣𑒞𑓂𑒩𑒯𑒲𑒢 𑒢𑒑𑓂𑒢 𑒑𑒰𑒕 “𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼” 𑒏 𑒮𑓂𑒙𑒹𑒖 𑒕𑒱𑒌, 𑒞𑒰𑒪𑒰 𑒪𑒰𑒑𑒪 𑒠𑒩𑒥𑒖𑓂𑒖𑒰𑒏 𑒥𑒰𑒯𑒩𑒏 𑒮𑓂𑒟𑒪/ 𑒧𑒝𑓂𑒛𑒣 “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬”𑒏 𑒮𑓂𑒙𑒹𑒖 𑒕𑒱𑒌 𑒞𑒿 “𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞”𑒧𑒹 𑒠𑒩𑓂𑒬𑒏 𑒠𑒲𑒩𑓂𑒒𑒰, 𑒮𑒋𑒯 𑒮𑓂𑒙𑒹𑒖 𑒥𑒢𑒱 𑒖𑒰𑒃𑒋। “𑒠 𑒥𑒩𑓂𑒟𑒛𑒹 𑒣𑒰𑒩𑓂𑒙𑒲”𑒧𑒹 𑒒𑒩𑒏 𑒏𑒼𑒚𑒪𑒲 𑒮𑓂𑒙𑒹𑒖 𑒕𑒱𑒌 𑒧𑒳𑒠𑒰 𑒣𑒱𑒢𑓂𑒙𑒩 𑒋𑒏𑒩 𑒣𑒰𑒞𑓂𑒩 𑒮𑓂𑒙𑒻𑒢𑒪𑒹 𑒏𑒹𑒿 𑒛𑒹𑒩𑒲𑒛𑒰𑒏 “𑒫𑒱𑒐𑒝𑓂𑒛𑒢” 𑒣𑒠𑓂𑒡𑒞𑒱𑒮𑒿 𑒏𑒐𑒢𑒼 𑒐𑒝𑓂𑒛 𑒏𑓄 𑒠𑒻𑒞 𑒕𑒟𑒱 𑒞𑒿 𑒏𑒐𑒢𑒼 𑒤𑒹𑒩𑒮𑒿 𑒖𑒼𑒛𑓃𑒱 𑒠𑒻 𑒕𑒟𑒱। 𑒪𑒼𑒏 𑒥𑒰 𑒠𑒩𑓂𑒬𑒏 𑒍𑒏𑒩𑒰𑒮𑒿 𑒄𑒩𑓂𑒭𑓂𑒨𑒰 𑒏𑒩𑓄 𑒪𑒑𑒻𑒋, 𑒐𑒢𑒹 𑒮𑒯𑒰𑒢𑒳𑒦𑒴𑒞𑒱 𑒏𑒩𑓄 𑒪𑒑𑒻𑒋 𑒐𑒢𑒹 𑒒𑒵𑒝𑒰 𑒏𑒩𑓄 𑒪𑒑𑒻𑒋, 𑒧𑒳𑒠𑒰 𑒮𑓂𑒙𑒻𑒢𑒪𑒲 𑒑𑒼𑒪𑓂𑒛𑒥𑒩𑓂𑒑 𑒂 𑒧𑒻𑒏𑓂𑒏𑒰𑒢𑒏 𑒮𑒼𑒗𑒰𑒿 𑒖𑒐𑒢 𑒢𑒱𑒩𑓂𑒥𑒪 𑒥𑒳𑒗𑒱 𑒣𑒛𑓃𑒻𑒋 𑒞𑒿 𑒠𑒩𑓂𑒬𑒏 𑒍𑒏𑒩𑒰 𑒮𑓀𑒑 𑒁𑒣𑒢𑒰𑒏𑒹𑒿 𑒠𑒹𑒐𑒻𑒋, 𑒖𑒹𑒢𑒰 𑒍 “𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞” 𑒧𑒹 𑒃𑒢𑓂𑒠𑓂𑒩𑒖𑒲𑒞 𑒮𑓀𑒑 𑒁𑒣𑒢𑒰𑒏𑒹𑒿 𑒠𑒹𑒐𑒻𑒋। “𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼” 𑒧𑒹 𑒖𑒐𑒢 𑒪𑒼𑒏 𑒑𑒳𑒪𑒰𑒧 𑒮𑓀𑒑 𑒁𑒣𑒢𑒰𑒏𑒹𑒿 𑒠𑒹𑒐𑒻𑒋 𑒞𑒐𑒢𑒹 𑒮𑒯𑒰𑒢𑒳𑒦𑒴𑒞𑒱 𑒠𑒹𑒐𑒹𑒪𑒰𑒣𑒩 𑒔𑒧𑒹𑒙𑒰 𑒣𑒛𑓃𑒪𑒰𑒣𑒩 𑒍 𑒯𑒞𑒣𑓂𑒩𑒦 𑒩𑒯𑒱 𑒖𑒰𑒃𑒋। “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬” 𑒧𑒹 𑒦𑒱𑒐𑒧𑓀𑒑𑒢𑒲 𑒄𑒩𑓂𑒭𑓂𑒨𑒰𑒫𑒬 𑒩𑒧𑓂𑒦𑒰-𑒧𑒹𑒢𑒏𑒰𑒏𑒹𑒿 𑒧𑒳𑒿𑒯𑒗𑒛𑓃𑒏𑒲 𑒏𑒯𑒻𑒋! 𑒣𑒰𑒏𑒹𑒙𑒧𑒰𑒩 𑒃𑒢𑓂𑒠𑓂𑒩𑒏 𑒫𑓂𑒩𑒖𑒣𑒩 𑒩𑒳𑒣𑒻𑒨𑓂𑒨𑒰𑒏 𑒥𑒼𑒪𑒲 𑒪𑒑𑒥𑒻𑒋। 𑒢𑒢𑓂𑒠𑒲-𑒦𑒵𑓀𑒑𑒲 𑒏𑒯𑒻𑒋 𑒖𑒹 𑒮𑒦 𑒑𑒼𑒙𑒹 𑒮𑒞𑓂𑒨 𑒕𑒲 𑒧𑒳𑒠𑒰 𑒏𑓂𑒨𑒼 𑒑𑒼𑒙𑒹 𑒣𑒴𑒩𑓂𑒝 𑒮𑒞𑓂𑒨 𑒢𑒻 𑒥𑒖𑒪𑒾𑓀। “𑒋𑒫𑒧𑓂 𑒃𑒢𑓂𑒠𑓂𑒩𑒖𑒲𑒞”𑒧𑒹 𑒃𑒢𑓂𑒠𑓂𑒩𑒖𑒲𑒞𑒏 𑒯𑒰𑒪 𑒮𑒱𑒮𑒲𑒤𑒮 𑒮𑒢 𑒕𑒻। 𑒬𑒰𑒣𑒱𑒞 𑒑𑓂𑒩𑒲𑒏 𑒧𑒱𑒟𑒏 𑒮𑒱𑒮𑒲𑒤𑒮, 𑒮𑓀𑒑𑒧𑒩𑒧𑒩𑒏 𑒣𑒰𑒟𑒩𑒣𑒩 𑒔𑒜𑓃𑒥𑒰𑒏 𑒪𑒹𑒪 𑒁𑒦𑒱𑒬𑒣𑓂𑒞, 𑒂 𑒖𑒐𑒢𑒹 𑒍 𑒔𑒼𑒙𑒲𑒣𑒩 𑒣𑒯𑒳𑒿𑒔𑒻𑒋 𑒂𑒏𑒱 𑒣𑒰𑒟𑒩 𑒤𑒹𑒩 𑒑𑒳𑒩𑒏𑒱 𑒏𑓄 𑒍𑒏𑒩𑒰 𑒢𑒲𑒔𑒰𑒿 𑒂𑒢𑒱 𑒠𑒻 𑒕𑒻। 𑒧𑒢𑒳𑒏𑓂𑒐𑒏 𑒏𑒰𑒖 𑒂 𑒖𑒲𑒫𑒢 𑒢𑒱𑒩𑒩𑓂𑒟𑒏𑒞𑒰𑒣𑒩 𑒂𑒡𑒰𑒩𑒱𑒞 𑒁𑒕𑒱। 𑒧𑒢𑒳𑒏𑓂𑒐 𑒁𑒮𑒤𑒪 𑒯𑒼𑒃𑒪𑒹 𑒁𑒦𑒱𑒬𑒣𑓂𑒞 𑒁𑒕𑒱, 𑒃𑒢𑓂𑒠𑓂𑒩𑒖𑒲𑒞 𑒖𑒹𑒏𑒰𑒿? 𑒂𑒏𑒱 “𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬”𑒏 𑒮𑓂𑒫𑒩𑓂𑒑-𑒢𑒩𑒏, 𑒨𑒧𑒩𑒰𑒖-𑒔𑒱𑒞𑓂𑒩𑒑𑒳𑒣𑓂𑒞𑒏 𑒁𑒧𑒰𑒢𑓂𑒨𑒞𑒰 𑒠𑒹𑒐𑒪𑒰𑒯𑒰 𑒑𑒣𑒏𑒹𑒿 𑒠𑒹𑒐𑒱 𑒥𑒠𑒪𑒞? 𑒧𑒳𑒠𑒰 𑒞𑒐𑒢 𑒨𑒧𑒩𑒰𑒖𑒹 𑒏𑒯𑒻 𑒕𑒟𑒱 𑒖𑒹 𑒠𑒹𑒐𑒪𑒰𑒯𑒰 𑒑𑒣 𑒠𑒳𑓁𑒮𑓂𑒫𑒣𑓂𑒢 𑒦𑓄 𑒮𑒏𑒻𑒋? “𑒫𑒹𑒙𑒱𑓀𑒑 𑒤𑒰𑒩 𑒑𑒼𑒛𑒼” 𑒄𑒬𑓂𑒫𑒩𑒏 𑒃𑒢𑓂𑒞𑒖𑒰𑒩𑒲 𑒢𑒻 𑒕𑒱𑒌, 𑒥𑒹𑒏𑒹𑒙 𑒮𑓂𑒫𑒨𑓀 𑒏𑒯𑒻 𑒕𑒟𑒱 𑒖𑒹 𑒃𑒢𑓂𑒞𑒖𑒰𑒩𑒲 “𑒑𑒰𑒛”𑒏 𑒢𑒻 “𑒑𑒼𑒛𑒼”𑒏 𑒦𑓄 𑒩𑒯𑒪 𑒁𑒕𑒱, 𑒍𑒢𑒰 𑒏𑓂𑒩𑒱𑒮𑓂𑒙𑒱𑒨𑒹𑒢𑒱𑒙𑒲 “𑒧𑒱𑒟𑒼𑒪𑒼𑒖𑒲” 𑒁𑒕𑒱 𑒮𑒹 𑒍 𑒞𑒏𑒩 𑒣𑓂𑒩𑒨𑒼𑒑 𑒏𑒩𑒻 𑒕𑒟𑒱। 𑒁𑒮𑓂𑒞𑒱𑒞𑓂𑒫𑒫𑒰𑒠𑒲 𑒫𑒱𑒔𑒰𑒩𑒡𑒰𑒩𑒰, 𑒧𑒢𑒳𑒏𑓂𑒐 𑒂 𑒥𑓂𑒩𑒯𑓂𑒧𑒰𑒝𑓂𑒛 𑒮𑒦 𑒢𑒱𑒩𑒩𑓂𑒟𑒏 𑒁𑒕𑒱, 𑒁𑒥𑒮𑒩𑓂𑒛 𑒁𑒕𑒱।