𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩
𑒅𑒣𑒢𑓂𑒨𑒰𑒮-𑒮𑒯𑒮𑓂𑒩𑒥𑒰𑒜𑓃𑒢𑒱
“𑒋𑒏 𑒠𑒱𑒢 𑒏𑒪𑒱𑒞𑒏𑒹𑒿 𑒠𑒹𑒐𑒪𑒯𑒳𑒿 𑒖𑒹 𑒚𑒹𑒯𑒳𑒢𑒱𑒨𑒰𑒿 𑒧𑒰𑒩𑒢𑒹 𑒂𑒑𑒴 𑒖𑒰 𑒩𑒯𑒪 𑒕𑒟𑒱 । 𑒂𑒿𑒑𑒢𑒮𑒿 𑒥𑒰𑒯𑒩 𑒦𑒹𑒪𑒰 𑒣𑒩 𑒖𑒞𑒋 𑒂𑒿𑒏𑒩-𑒣𑒰𑒟𑒩 𑒠𑒹𑒐𑒪𑒢𑓂𑒯𑒱 𑒞𑒞𑒋 𑒚𑒹𑒯𑒳𑒢 𑒅𑒚𑒰 𑒏𑓄, 𑒧𑒰𑒞𑓂𑒩 𑒯𑒰𑒟 𑒂 𑒣𑒋𑒩𑒣𑒩 𑒂𑒑𑒴 𑒥𑒜𑒋 𑒪𑒑𑒪𑒰𑒯”, 𑒣𑒞𑓂𑒢𑒲𑒏𑒹𑒿 𑒧𑒼𑒢 𑒣𑒛𑓃𑒪𑒢𑓂𑒯𑒱।
“𑒋𑒏 𑒠𑒱𑒢 𑒯𑒧 𑒠𑒹𑒐𑒪𑒯𑒳𑒿 𑒖𑒹 𑒍 𑒠𑒹𑒥𑒰𑒪𑒏𑒹𑒿 𑒣𑒏𑒛𑓃𑒱 𑒏𑓄 𑒐𑒱𑒛𑓃𑒏𑒲 𑒣𑒩 𑒚𑒰𑒜𑓃 𑒯𑒹𑒥𑒰𑒏 𑒣𑓂𑒩𑒨𑒰𑒮𑒧𑒹 𑒕𑒟𑒱 । 𑒯𑒧𑒩𑒼 𑒏𑒲 𑒤𑒴𑒩𑒪 𑒖𑒹 𑒔𑒪𑒴 𑒂𑒃 𑒕𑒼𑒛𑓃𑒱 𑒠𑒻𑒞 𑒕𑒱𑒨𑒢𑓂𑒯𑒱। 𑒮𑓂𑒫𑒨𑒧 𑒣𑓂𑒩𑒨𑒰𑒮 𑒏𑒩𑒞𑒰𑒯 । 𑒠𑒴 𑒥𑒹𑒩 𑒣𑓂𑒩𑒨𑒰𑒮𑒧𑒹 𑒆𑒣𑒩 𑒖𑒰𑒃𑒞-𑒖𑒰𑒃𑒞 𑒠𑒹𑒫𑒰𑒪𑒏𑒹𑒿 𑒣𑒏𑒛𑓃𑒢𑒹-𑒣𑒏𑒛𑓃𑒢𑒹 𑒏𑒼𑒔 𑒣𑒩 𑒐𑒮𑒱 𑒑𑒹𑒪𑒰𑒯 । 𑒯𑒰𑒟 𑒣𑒯𑒳𑒿𑒔𑒥𑒹 𑒢𑒯𑒱 𑒏𑒩𑒢𑓂𑒯𑒱 । 𑒤𑒹𑒩 𑒞𑒹𑒮𑒩 𑒥𑒹𑒩 𑒖𑒹𑒢𑒰 𑒤𑒰𑒿𑒑𑒱 𑒑𑒹𑒪𑒰𑒯 𑒂 𑒯𑒰𑒟 𑒐𑒱𑒛𑓃𑒏𑒲 𑒣𑒩 𑒣𑒯𑒳𑒿𑒔𑒱 𑒑𑒹𑒪𑒢𑓂𑒯𑒱 𑒂 𑒋𑒏𑒠𑒧𑓂𑒧𑒹 𑒚𑒰𑒜𑓃 𑒦𑓄 𑒑𑒹𑒪𑒰𑒯”, 𑒗𑒱𑓀𑒑𑒳𑒩 𑒥𑒰𑒥𑒴𑒏𑒹𑒿 𑒋𑒏𑒰𑒋𑒏𑒲 𑒧𑒼𑒢 𑒣𑒛𑓃𑒪𑒢𑓂𑒯𑒱।
“𑒋𑒏 𑒠𑒱𑒢 𑒯𑒧 𑒋𑒏-𑒠𑒴 𑒥𑒰𑒖𑒱 𑒏𑓄 𑒯𑒱𑒮𑒰𑒥 𑒏𑓄 𑒩𑒯𑒪 𑒕𑒪𑒯𑒳𑒿 । 𑒯𑒧 𑒥𑒖𑒪𑒯𑒳𑒿 𑒋𑒏 𑒞𑒿 𑒄 𑒥𑒖𑒪𑒰𑒯, 𑒯𑒴𑒿 । 𑒤𑒹𑒩 𑒯𑒧 𑒥𑒖𑒪𑒯𑒳𑒿 𑒠𑒴 𑒞𑒿 𑒄 𑒥𑒖𑒪𑒰𑒯, 𑒆 । 𑒞𑒐𑒢 𑒯𑒧𑒩𑒰 𑒪𑒰𑒑𑒪 𑒖𑒹 𑒄 𑒞𑒿 𑒯𑒧𑒩 𑒢𑒏𑒪 𑒅𑒞𑒰𑒩𑒱 𑒩𑒯𑒪 𑒕𑒟𑒱”।
“𑒋𑒏 𑒠𑒱𑒢 𑒐𑒹𑒞 𑒣𑒩𑒮𑒿 𑒁𑒋𑒪𑒯𑒳𑒿 𑒂 𑒢𑒯𑒰-𑒮𑒼𑒢𑒰 𑒦𑒼𑒖𑒢 𑒏𑓄 𑒐𑒐𑒮𑒱 𑒩𑒯𑒪 𑒕𑒪𑒯𑒳𑒿। 𑒁𑒯𑒰𑒯𑒰𑓄 𑒏𑒹𑒪𑒯𑒳𑒿 𑒞𑒿 𑒪𑒰𑒑𑒪 𑒖𑒹𑒢𑒰 𑒏𑒪𑒱𑒞 𑒮𑒹𑒯𑒼 𑒁𑒯𑒰𑒯𑒰𑓄 𑒏𑒹𑒪𑒟𑒱 । 𑒒𑒳𑒩𑒱 𑒏𑓄 𑒠𑒹𑒐𑒪𑒯𑒳𑒿 𑒞𑒿 𑒍 𑒥𑒻𑒮𑒱 𑒏𑓄 𑒑𑒹𑓀𑒠𑒮𑒿 𑒐𑒹𑒪𑒰 𑒩𑒯𑒪 𑒕𑒪𑒰𑒯 । 𑒠𑒼𑒮𑒩 𑒥𑒹𑒩 𑒐𑒐𑒮𑒪𑒯𑒳𑒿 𑒞𑒿 𑒣𑒳𑒢𑓁 𑒄 𑒐𑒐𑒮𑒪𑒰𑒯 । 𑒯𑒧 𑒏𑒯𑒪𑒯𑒳𑒿 𑒖𑒹 𑒂𑒩 𑒏𑒱𑒕𑒳 𑒢𑒯𑒱, 𑒄 𑒯𑒧𑒩 𑒢𑒏𑒪 𑒏𑓄 𑒩𑒯𑒪 𑒕𑒟𑒱 । 𑒠𑒪𑒰𑒢 𑒣𑒩 𑒮𑒦 𑒏𑓂𑒨𑒼 𑒯𑒿𑒮𑓄 𑒪𑒰𑒑𑒪 । 𑒤𑒹𑒩 𑒞𑒿 𑒖𑒹 𑒂𑒥𑒋 𑒏𑒯𑒋- 𑒏𑒪𑒱𑒞 𑒆𑒯𑒳𑒯𑒴𑒿, 𑒞𑒿 𑒖𑒫𑒰𑒥𑒧𑒹 𑒄𑒯𑒼 𑒆𑒯𑒴𑒯𑒴𑒿 𑒏𑒯𑒟𑒱, 𑒋𑒏𑒙𑒰 𑒠𑒼𑒮𑒩𑒹 𑒞𑒩𑒲𑒏𑒰𑒮𑒿।”
𑒖𑒰𑒯𑒱 𑒥𑒰𑒪𑒏𑒏𑒹𑒿 𑒗𑒱𑓀𑒑𑒳𑒩𑒥𑒰𑒥𑒴 𑒣𑒯𑒱𑒪-𑒣𑒯𑒱𑒪 𑒁𑒢𑓂𑒨𑒧𑒢𑒮𑓂𑒏 𑒣𑒛𑓃𑒪 𑒂 𑒧𑒰𑒞𑓂𑒩 𑒮𑒣𑒢𑒰𑒧𑒹 𑒯𑒿𑒮𑒻𑒞 𑒠𑒹𑒐𑒪𑒐𑒱𑒢𑓂𑒯 𑒮𑒹 𑒞𑒏𑒩 𑒥𑒰𑒠 𑒚𑒹𑒯𑒳𑒢𑒱𑒨𑒰 𑒧𑒰𑒩𑒻𑒞, 𑒤𑒹𑒩 𑒔𑒪𑒻𑒞 𑒂𑒥 𑒬𑒱𑒏𑓂𑒭𑒰-𑒠𑒲𑒏𑓂𑒭𑒰 𑒣𑓂𑒩𑒰𑒣𑓂𑒞 𑒏𑓄 𑒩𑒯𑒪 𑒕𑒢𑓂𑒯𑒱 । 𑒯𑒳𑒢𑒏𑒰 𑒁𑒐𑒢𑒼 𑒧𑒼𑒢 𑒣𑒛𑓃𑒱 𑒩𑒯𑒪 𑒕𑒪𑒢𑓂𑒯𑒱 𑒖𑒹 𑒏𑒼𑒢𑒰 𑒚𑒹𑒯𑒳𑒢𑒱𑒨𑒰 𑒠𑒻𑒞 𑒏𑒰𑒪 𑒢𑒹𑒢𑒰𑒏 𑒯𑒰𑒟 𑒂𑒑𑒴 𑒢𑒯𑒱 𑒥𑒜𑒻𑒏 𑒂 𑒍 𑒥𑒹𑓀𑒑 𑒖𑒏𑒰𑒿 𑒣𑒰𑒕𑒴𑒮𑒿 𑒮𑒼𑒗𑒹 𑒂𑒑𑒴 𑒤𑒰𑒿𑒑𑒱 𑒖𑒰𑒃𑒞 𑒕𑒪 । 𑒣𑒴𑒩𑒰 𑒥𑒹𑓀𑒑 𑒖𑒏𑒰𑒿- 𑒁𑒢𑒰𑒨𑒰𑒮𑒯𑒱 𑒍 𑒯𑒿𑒮𑒱 𑒅𑒚𑒪𑒰𑒯 ।
𑒣𑒞𑓂𑒢𑒲 𑒣𑒴𑒕𑒱 𑒠𑒹𑒪𑒐𑒱𑒢𑓂𑒯 –“𑒏𑒼𑒢 𑒥𑒰𑒞 𑒣𑒩 𑒧𑒳𑒮𑓂𑒏𑒲 𑒠𑒹𑒪𑒯𑒳𑒿 ?”, 𑒞𑒿 𑒣𑒯𑒱𑒢𑒹 𑒞𑒿 𑒍 𑒢𑒰-𑒢𑒳𑒏𑒳𑒩 𑒏𑒹𑒪𑒢𑓂𑒯𑒱, 𑒤𑒹𑒩 𑒮𑒦𑒙𑒰 𑒧𑒼𑒢𑒧𑒹 𑒮𑒼𑒔𑒪-𑒒𑒳𑒩𑒧𑒪 𑒑𑒣 𑒏𑒯𑒱 𑒠𑒹𑒪𑒐𑒱𑒢𑓂𑒯 𑒂 𑒮𑒳𑒢𑒱 𑒪𑒹𑒪𑒢𑓂𑒯𑒱 । 𑒂𑒥 𑒞𑒏𑒩𑒰 𑒥𑒰𑒠 𑒑𑒣𑒮𑒿 𑒑𑒣 𑒢𑒱𑒏𑒪𑓄 𑒪𑒰𑒑𑒪।
𑒮𑒢𑓂 𑓑𑓘𑓘𑓕 𑒄.। 𑒗𑒱𑓀𑒑𑒳𑒩 𑒚𑒰𑒏𑒳𑒩𑒏 𑒒𑒩𑒧𑒹 𑒋𑒏𑒙𑒰 𑒥𑒰𑒪𑒏𑒏 𑒖𑒢𑓂𑒧 𑒦𑒹𑒪 𑒩𑒯𑒋 ।
𑒄 𑒫𑒩𑓂𑒭 𑒏𑒰𑓀𑒑𑓂𑒩𑒹𑒮 𑒣𑒰𑒩𑓂𑒙𑒲𑒏 𑒮𑓂𑒟𑒰𑒣𑒢𑒰𑒏 𑒏𑒰𑒩𑒝 𑒥𑒰𑒠𑒏 𑒮𑒧𑒨𑒧𑒹 𑒋𑒏𑒙𑒰 𑒧𑒯𑒞𑓂𑒞𑓂𑒫𑒣𑒴𑒩𑓂𑒝 𑒒𑒙𑒢𑒰𑒏 𑒩𑒴𑒣𑒧𑒹 𑒫𑒩𑓂𑒝𑒱𑒞 𑒯𑒼𑒧𑒋𑒥𑒪𑒰 𑒕𑒪 । 𑒁𑓀𑒑𑓂𑒩𑒹𑒖𑒲 𑒩𑒰𑒖 𑒁𑒣𑒢𑒰𑒏𑒹𑒿 𑒣𑒴𑒩𑓂𑒝𑒩𑒴𑒣𑒮𑒿 𑒮𑓂𑒟𑒰𑒣𑒱𑒞 𑒏𑓄 𑒔𑒳𑒏𑒪 𑒩𑒯𑒋 । 𑒩𑒰𑒖𑒰-𑒩𑒖𑒫𑒰𑒛𑓃𑒰𑒮𑒦 𑒁𑒣𑒢𑒰𑒏𑒹𑒿 𑒁𑓀𑒑𑓂𑒩𑒹𑒖𑒏 𑒧𑒱𑒞𑓂𑒩 𑒥𑒳𑒗𑒫𑒰𑒧𑒹 𑒑𑒾𑒩𑒫𑒏 𑒁𑒢𑒳𑒦𑒫 𑒏𑒩𑒻𑒞 𑒕𑒪𑒰𑒯 । 𑒬𑒻𑒏𑓂𑒭𑒱𑒏 𑒖𑒑𑒞𑒧𑒹 𑒏𑒰𑓀𑒑𑓂𑒩𑒹𑒮 𑒬𑒲𑒒𑓂𑒩𑒯𑒱 𑒅𑒣𑒠𑓂𑒩𑒫𑒲 𑒞𑒞𑓂𑒫𑒏 𑒩𑒴𑒣𑒧𑒹 𑒣𑓂𑒩𑒔𑒰𑒩𑒱𑒞 𑒦𑒋 𑒑𑒹𑒪 𑒩𑒯𑒋 । 𑒮𑓀𑒮𑓂𑒏𑓃𑒵𑒞𑒏 𑒩𑒙𑒢𑓂𑒞 𑒫𑒱𑒠𑓂𑒨𑒰𑒏 𑒮𑓂𑒫𑒩𑒴𑒣 𑒐𑒞𑒧 𑒯𑒼𑒁𑒋𑒥𑒪𑒰
𑒕𑒪 । 𑒮𑒩𑒏𑒰𑒩𑒲 𑒣𑒠 𑒥𑒱𑒢𑒰 𑒂𑒓𑓂𑒪 𑒮𑒱𑒐𑒢𑒹 𑒦𑒹𑒙𑒥 𑒁𑒮𑓀𑒦𑒫 𑒕𑒪 । 𑒮𑒩𑒏𑒰𑒩𑒲 𑒣𑒠𑒏 𑒞𑒰𑒞𑓂𑒣𑒩𑓂𑒨 𑒩𑒰𑒖𑒰-𑒩𑒖𑒫𑒰𑒛𑓃𑒰𑒏 𑒫𑒮𑒴𑒪𑒲 𑒏𑒰𑒩𑓂𑒨𑒮𑒿 𑒮𑓀𑒥𑓀𑒡𑒱𑒞 𑒂 𑒍𑒞𑒥𑒯𑒱 𑒡𑒩𑒱 𑒮𑒲𑒧𑒱𑒞 𑒕𑒪 ।
𑒞𑒐𑒢 𑒥𑒰𑒪𑒏𑒏𑒹𑒿 𑒮𑓀𑒮𑓂𑒏𑓃𑒵𑒞 𑒬𑒱𑒏𑓂𑒭𑒰𑒏 𑒧𑒼𑒯𑒮𑒿 𑒠𑒴𑒩 𑒩𑒰𑒐𑒪 𑒑𑒹𑒪 । 𑒣𑒩𑒱𑒫𑒰𑒩𑒧𑒹 𑒁𑓀𑒑𑓂𑒩𑒹𑒖𑒲𑒏 𑒣𑓂𑒩𑒫𑒹𑒬 𑒣𑓂𑒩𑒰𑒨𑓁 𑒢𑒯𑒱𑒨𑒹𑒏 𑒥𑒩𑒰𑒥𑒩 𑒕𑒪 𑒂 𑒞𑒰𑒯𑒱 𑒏𑒰𑒩𑒝𑒮𑒿 𑒣𑒩𑒱𑒫𑒰𑒩 𑒋𑒏 𑒣𑒲𑒜𑓃𑒲 𑒣𑒰𑒕𑒴 𑒔𑒪𑒱 𑒑𑒹𑒪 𑒩𑒯𑒋 । 𑒧𑒳𑒠𑒰 𑒗𑒱𑓀𑒑𑒳𑒩 𑒥𑒰𑒥𑒴 𑒁𑒣𑒢 𑒣𑒳𑒞𑓂𑒩𑒏 𑒪𑒹𑒪 𑒋𑒏𑒙𑒰 𑒏𑒪𑒏𑒞𑒱𑒨𑒰𑒥𑒰𑒥𑒴 𑒧𑒰𑒮𑓂𑒙𑒩𑒏𑒹𑒿 𑒩𑒰𑒐𑒱 𑒬𑒱𑒏𑓂𑒭𑒰𑒏 𑒫𑓂𑒨𑒫𑒮𑓂𑒟𑒰 𑒏𑒋𑒪𑒢𑓂𑒯𑒱 । 𑒞𑒠𑒳𑒣𑒩𑒰𑓀𑒞 𑒠𑒩𑒱𑒦𑒓𑓂𑒑𑒰𑒧𑒹 𑒋𑒏𑒙𑒰 𑒠𑒼𑒮𑒩 𑒥𑓀𑒑𑒰𑒪𑒲𑒥𑒰𑒥𑒴 𑒥𑒰𑒪𑒏𑒏𑒹𑒿 𑒁𑓀𑒑𑓂𑒩𑒹𑒖𑒲𑒏 𑒬𑒱𑒏𑓂𑒭𑒰 𑒠𑒹𑒪𑒐𑒱𑒢𑓂𑒯 । 𑒥𑒰𑒪𑒏 𑒏𑒪𑒱𑒞 𑒬𑒢𑒻𑓁 𑒬𑒢𑒻𑓁 𑒁𑒣𑒢 𑒔𑒰𑒞𑒳𑒩𑓂𑒨𑒮𑒿 𑒧𑓀𑒞𑓂𑒩𑒧𑒳𑒑𑓂𑒡 𑒏𑒩𑒥𑒰𑒏 𑒏𑒪𑒰𑒧𑒹 𑒣𑒰𑒩𑓀𑒑𑒞 𑒦𑓄 𑒑𑒹𑒪𑒰𑒯।
“𑒯𑒧 𑒖𑒹 𑒮𑒳𑒢𑒹𑒪𑒯𑒳𑒿 𑒞𑒐𑒢 𑒯𑒱𑒢𑒏𑒩 𑒫𑒨𑒮 𑒯𑒼𑒋𑒞𑒢𑓂𑒯𑒱, 𑒕𑒯 𑒂𑒏𑒱 𑒮𑒰𑒞 𑒧𑒰𑒮”।
“𑒯𑒧 𑒖𑒹 𑒮𑒳𑒢𑒹𑒪𑒯𑒳𑒿 𑒞𑒐𑒢 𑒅𑒧𑒩𑒱 𑒏𑒞𑒹𑒏 𑒯𑒹𑒞𑒢𑓂𑒯𑒱, 𑒥𑒛𑓃 𑒥𑒹𑒮𑒲 𑒞𑒿 𑒢𑒾 𑒂𑒏𑒱 𑒠𑒮 𑒧𑒰𑒮𑒏”।
𑒣𑒞𑓂𑒢𑒲 𑒮𑒰𑒮𑒳-𑒮𑒮𑒳𑒩 𑒫𑒰 𑒥𑒰𑒯𑒩𑒲 𑒮𑒠𑒮𑓂𑒨 𑒢𑒯𑒱 𑒩𑒯𑒪𑒰 𑒣𑒩 𑒮𑒼𑒗𑒹 -‘𑒑𑒣 𑒮𑒳𑒢𑒪𑒯𑒳𑒿’ 𑒂𑒏𑒱 𑒄 𑒏𑒩𑒴 𑒫𑒰 𑒍 𑒏𑒩𑒴 𑒥𑒖𑒻𑒞 𑒕𑒪𑒲𑒯 । 𑒧𑒳𑒠𑒰 𑒮𑒰𑒮𑒳-𑒮𑒮𑒳𑒩𑒏 𑒮𑒼𑒗𑒰𑒿 𑒥𑒖𑒻𑒞 𑒩𑒯𑒟𑒱- 𑒮𑒳𑒢𑒻𑒞 𑒕𑒟𑒱𑒢𑓂𑒯, 𑒤𑒪𑒢𑒰 𑒏𑒯𑒻𑒞 𑒕𑒪𑒻𑒏 । 𑒂 𑒤𑒹𑒩 𑒗𑒱𑓀𑒑𑒳𑒩 𑒥𑒰𑒥𑒴 𑒏𑒲 𑒏𑒧 𑒕𑒪𑒰𑒯. 𑒍𑒯𑒼 𑒍𑒯𑒱𑒢𑒰 𑒑𑒲𑒞𑒰𑒏 𑒠𑒩𑓂𑒬𑒢-𑒏𑒰𑒖𑒏 𑒪𑒹𑒪 𑒏𑒰𑒖𑒏 𑒁𑒢𑒳𑒏𑒩𑒝𑒧𑒹 𑒅𑒞𑓂𑒞𑒩 𑒠𑒹𑒟𑒱 । 𑒧𑒳𑒠𑒰 𑒋𑒏𑒰𑓀𑒞𑒧𑒹 𑒤𑒹𑒩 𑒮𑒦 𑒚𑒲𑒏 ।
𑒣𑒳𑒢𑓁 𑒧𑒳𑒮𑓂𑒏𑒳𑒩𑒰 𑒅𑒚𑒪𑒰𑒯 𑒗𑒱𑓀𑒑𑒳𑒩 𑒥𑒰𑒥𑒴, 𑒄 𑒣𑓂𑒩𑒝 𑒧𑒼𑒢𑒹-𑒧𑒼𑒢 𑒪𑒹𑒪𑒟𑒱 𑒖𑒹 𑒏𑒪𑒱𑒞𑒏𑒹𑒿 𑒋𑒯𑒱 𑒖𑓀𑒖𑒰𑒪𑒮𑒿 𑒧𑒳𑒏𑓂𑒞 𑒏𑒩𑒹𑒞𑒟𑒱, 𑒍𑒯𑒼 𑒞𑒿 𑒥𑒴𑒗𑒟𑒳 𑒖𑒹 𑒣𑒱𑒞𑒰 𑒏𑒼𑒢𑒼 𑒣𑒳𑒩𑒰𑒢-𑒡𑒳𑒩𑒰𑒢 𑒪𑒼𑒏 𑒢𑒯𑒱 𑒕𑒟𑒱𑒢 ।
𑒣𑒞𑓂𑒢𑒲 𑒣𑒳𑒢𑓁 𑒣𑒳𑒕𑒪𑒟𑒱𑒢𑓂𑒯 𑒖𑒹 𑒂𑒥 𑒏𑒼𑒢 𑒥𑒰𑒞 𑒣𑒩 𑒧𑒳𑒮𑓂𑒏𑒲 𑒕𑒴𑒙𑒪 । 𑒧𑒳𑒠𑒰 𑒋𑒯𑒱 𑒥𑒹𑒩 𑒗𑒱𑓀𑒑𑒳𑒩 𑒥𑒰𑒥𑒴 𑒏𑒢𑓂𑒢𑒲 𑒏𑒰𑒙𑒱 𑒑𑒹𑒪𑒰𑒯 । 𑒧𑒳𑒮𑓂𑒏𑒲 𑒠𑒻𑒞 𑒠𑒪𑒰𑒢 𑒠𑒱𑒮 𑒥𑒯𑒩𑒰 𑒑𑒹𑒪𑒰𑒯, 𑒍𑒞𑒋 𑒏𑒱𑒕𑒳 𑒑𑒼𑒙𑒹 𑒁𑒐𑒛𑓃𑒰𑒯𑒰𑒏 𑒩𑒐-𑒩𑒐𑒰𑒥𑒏 𑒥𑒰𑒞 𑒏𑓄 𑒩𑒯𑒪 𑒕𑒪𑒰𑒯 । 𑒦𑒼𑒩𑒯𑒰 𑒏𑒰𑒞𑒏 𑒁𑒐𑒛𑓃𑒰𑒯𑒰𑒏 𑒑𑒣𑒹 𑒏𑒱𑒕𑒳 𑒂𑒩 𑒕𑒪 । 𑒦𑒼𑒩𑒹-𑒦𑒼𑒩 𑒮𑒦 𑒞𑒳𑒩𑒱𑒨𑒰𑒏 𑒥𑒔𑓂𑒔𑒰 𑒮𑒦, 𑒖𑒫𑒰𑒢 -𑒮𑒦 𑒣𑒯𑒳𑒿𑒔𑒱 𑒖𑒰𑒃𑒞 𑒕𑒪 । 𑒋𑒏𑒠𑒧 𑒑𑒠𑓂𑒠𑒰 𑒮𑒢 𑒁𑒐𑒛𑓃𑒰𑒯𑒰, 𑒧𑒰𑒙𑒱 𑒏𑓄 𑒏𑒼𑒩𑒱 𑒂 𑒔𑒴𑒛𑓃𑒱 𑒏𑓄 𑒥𑒢𑒰𑒋𑒪 । 𑒥𑒰𑒪𑒏 𑒏𑒪𑒱𑒞𑒏𑒹𑒿 𑒕𑒼𑒛𑓃𑒱 𑒮𑒦 𑒥𑒔𑓂𑒔𑒰 𑒍𑒞𑒋 𑒣𑒯𑒳𑒿𑒔𑒻𑒞 𑒕𑒪 । 𑒗𑒱𑓀𑒑𑒳𑒩 𑒥𑒰𑒥𑒴𑒏𑒹𑒿 𑒋𑒯𑒱 𑒑𑒣𑒣𑒩 𑒏𑒔𑒼𑒙 𑒯𑒼𑒃𑒢𑓂𑒯𑒱 𑒞𑒿 𑒂𑒢 𑒪𑒼𑒏 𑒮𑒦 𑒏𑒯𑒟𑒱𑒢𑓂𑒯, 𑒖𑒹 𑒮𑒹 𑒏𑒲 𑒏𑒯𑒻𑒞 𑒕𑒲 । 𑒁𑒯𑒰𑒿 𑒯𑒳𑒢𑒏𑒰 𑒏𑒼𑒢𑒼 𑒅𑒠𑓂𑒠𑒹𑒬𑓂𑒨𑒏 𑒣𑓂𑒩𑒰𑒣𑓂𑒞𑒱 𑒪𑒹𑒪 𑒁𑒣𑒢𑒰𑒮𑒿 𑒠𑒴𑒩 𑒩𑒐𑒢𑒹 𑒕𑒲 𑒞𑒿 𑒋𑒯𑒱𑒧𑒹 𑒏𑒔𑒼𑒙 𑒏𑒟𑒲𑒏 । 𑒋𑒏𑒾𑒩𑒮𑒿 𑒚𑒰𑒏𑒳𑒩 𑒣𑒩𑒱𑒫𑒰𑒩𑒏 𑒧𑒰𑒞𑓂𑒩 𑒋𑒏 𑒒𑒩 𑒧𑒹𑓀𑒯𑒟 𑒂𑒋𑒪 𑒂 𑒂𑒥 𑒍𑒯𑒱𑒮𑒿 𑒣𑒰𑒿𑒔𑒙𑒰 𑒣𑒩𑒱𑒫𑒰𑒩 𑒦𑓄 𑒑𑒹𑒪 𑒁𑒕𑒱 । 𑒛𑒏𑒯𑒲 𑒧𑒰𑒿𑒕𑒏 𑒯𑒱𑒮𑓂𑒮𑒰𑒧𑒹 𑒋𑒏𑒙𑒰 𑒙𑒼𑒪𑒏 𑒥𑒩𑒰𑒥𑒩𑒲 𑒚𑒏𑒳𑒩𑒣𑒙𑓂𑒙𑒲𑒏𑒹𑒿 𑒦𑒹𑒙𑒱 𑒑𑒹𑒪 𑒕𑒻𑒏। 𑒏𑒪𑒱𑒞𑒏 𑒞𑒳𑒩𑒱𑒨𑒰𑒏 𑒥𑒔𑓂𑒔𑒰𑒏𑒹𑒿 𑒪𑓄 𑒏𑓄 𑒂𑒚𑒙𑒰 𑒣𑒩𑒱𑒫𑒰𑒩 𑒁𑒕𑒱 𑒚𑒏𑒳𑒩𑒣𑒙𑓂𑒙𑒲𑒧𑒹 । 𑒁𑒐𑒢𑒹𑒮𑒿 𑒥𑒔𑓂𑒔𑒰 𑒮𑒦𑒏𑒹𑒿 𑒧𑒰𑒢𑓂𑒨𑒞𑒰 𑒠𑓄 𑒠𑒹𑒪 𑒑𑒹𑒪 𑒕𑒻𑒏 ।
𑒞𑒐𑒢𑒹 𑒋𑒏𑒾𑒩𑒮𑒿 𑒋𑒏𑒙𑒰 𑒮𑒧𑒰𑒠𑒲 𑒁𑒋𑒪𑒰𑒯 𑒂 𑒦𑒼𑒖𑒣𑒞𑓂𑒩𑒣𑒩 𑒞𑒱𑒩𑒯𑒳𑒞𑒰𑒧𑒹 𑒪𑒱𑒐𑒪 𑒮𑓀𑒠𑒹𑒬 𑒠𑒹𑒪𑒐𑒱𑒢𑓂𑒯 । 𑒗𑒱𑓀𑒑𑒳𑒩 𑒥𑒰𑒥𑒴 𑒁𑒿𑒑𑒢𑒰𑒮𑒿 𑒪𑒼𑒙𑒰 𑒂 𑒋𑒏 𑒛𑒼𑒪 𑒣𑒰𑒢𑒱 𑒯𑒳𑒢𑒏𑒰 𑒠𑒹𑒪𑒐𑒱𑒢𑓂𑒯 𑒂 𑒣𑒞𑓂𑒩 𑒣𑒜𑓃𑒋 𑒪𑒑𑒪𑒰𑒯 । 𑒣𑓂𑒩𑒰𑒨𑓁 𑒏𑒼𑒢𑒼 𑒅𑒣𑒢𑒨𑒢𑒏 𑒯𑒏𑒰𑒩 𑒕𑒪𑒢𑓂𑒯𑒱 ।
‘𑒣𑒩𑒞𑒰𑒣𑒳𑒩𑒏 𑒮𑒦𑒰𑒑𑒰𑒕𑒲 𑒠𑒹𑒐𑒱 𑒏𑓄 𑒖𑒰𑒋𑒥, 𑒄 𑒂𑒠𑒹𑒬𑒣𑒴𑒩𑓂𑒝 𑒂𑒑𑓂𑒩𑒯 𑒗𑒱𑓀𑒑𑒳𑒩 𑒥𑒰𑒥𑒴 𑒮𑒧𑒰𑒠𑒲𑒏𑒹𑒿 𑒠𑒹𑒪𑒐𑒱𑒢𑓂𑒯 । 𑒋𑒏𑒙𑒰 𑒣𑒴𑒩𑓂𑒫𑒖𑒮𑒿 𑒧𑒴𑒪-𑒑𑒼𑒞𑓂𑒩𑒏 𑒧𑒰𑒡𑓂𑒨𑒧𑒮𑒿 𑒖𑒳𑒛𑓃𑒪 𑒠𑒱𑒨𑒰𑒠𑒏 𑒣𑓂𑒩𑒞𑒱 𑒁𑒢𑒰𑒨𑒰𑒮𑒯𑒱 𑒋𑒏𑒞𑓂𑒫𑒏 𑒣𑓂𑒩𑒹𑒩𑒝𑒰 𑒦𑒹𑒪𑒢𑓂𑒯𑒱 । 𑒤𑒹𑒩 𑒂𑒿𑒑𑒢𑒧𑒹 𑒣𑒞𑓂𑒩 𑒣𑒜𑓃𑒥 𑒣𑓂𑒩𑒰𑒩𑓀𑒦 𑒏𑒋𑒪𑒢𑓂𑒯𑒱।
॥𑒬𑓂𑒩𑒲𑓁॥
𑒮𑓂𑒫𑒮𑓂𑒞𑒱 𑒯𑒩𑒱𑒫𑒠𑒩𑒰𑒡𑓂𑒨𑒬𑓂𑒩𑒲𑒧𑒮𑓂𑒞𑒳 𑒗𑒱𑓀𑒑𑒳𑒩 𑒚𑒰𑒏𑒳𑒩 𑒣𑒱𑒞𑒵𑒔𑒩𑒝 𑒏𑒧𑒪𑒹𑒭𑒳 𑒃𑒞𑓁 𑒬𑓂𑒩𑒲 𑒑𑒳𑒪𑒰𑒥𑒮𑓂𑒨 𑒏𑒼𑒙𑒱𑒬𑓁 𑒣𑓂𑒩𑒝𑒰𑒧𑒰𑓁 𑒮𑓀𑒞𑒳 । 𑒬𑒞𑓀 𑒏𑒳𑒬𑒪𑒧𑓂 । 𑒂𑒑𑒰𑒿 𑒮𑒧𑒰𑒔𑒰𑒩 𑒖𑒹 𑒯𑒧𑒩 𑒮𑒳𑒣𑒳𑒞𑓂𑒩 𑒬𑓂𑒩𑒲 𑒑𑒛𑓃𑒹𑒮 𑒂 𑒔𑒢𑓂𑒠𑓂𑒩𑒧𑒼𑒯𑒢𑒏 𑒅𑒣𑒢𑒨𑒢 𑒮𑓀𑒮𑓂𑒏𑒰𑒩𑒏 𑒮𑒧𑒰𑒔𑒰𑒩 𑒮𑒳𑒢𑒥𑒻𑒞 𑒯𑒩𑓂𑒭𑒱𑒞 𑒕𑒲 । 𑒁𑒯𑒰𑒿𑒏 𑒣𑓂𑒩𑒣𑒱𑒞𑒰𑒧𑒯 𑒂 𑒯𑒧𑒩 𑒣𑓂𑒩𑒣𑒱𑒞𑒰𑒧𑒯 𑒮𑓀𑒑𑒯𑒱 𑒣𑒜𑓃𑒪𑒢𑓂𑒯𑒱 । 𑒁𑒣𑒢 𑒑𑒼𑒞𑓂𑒩𑒲𑒨𑒏 𑒮𑒧𑒰𑒔𑒰𑒩 𑒪𑒻𑒞-𑒠𑒻𑒞 𑒩𑒯𑒥𑒰𑒏 𑒢𑒱𑒩𑓂𑒠𑒹𑒬 𑒯𑒧𑒩 𑒣𑒱𑒞𑒰𑒧𑒯 𑒠𑒹𑒢𑒹 𑒑𑒹𑒪 𑒕𑒪𑒰𑒯 । 𑒯𑒩𑓂𑒭𑒏 𑒫𑒰 𑒬𑒼𑒏𑒏 𑒏𑒼𑒢𑒼 𑒒𑒙𑒢𑒰𑒏 𑒮𑒴𑒔𑒢𑒰 𑒯𑒧𑒩𑒰 𑒑𑒰𑒧𑒮𑒿 𑒁𑒯𑒰𑒿𑒏 𑒑𑒰𑒧 𑒂 𑒁𑒯𑒰𑒿𑒏 𑒑𑒰𑒧𑒮𑒿 𑒯𑒧𑒩𑒰 𑒑𑒰𑒧 𑒢𑒯𑒱 𑒁𑒋𑒢𑒹 𑒂 𑒫𑒱𑒬𑒹𑒭 𑒏𑓄 𑒁𑒬𑒼𑒔𑒏 𑒫𑒱𑒔𑒰𑒩 𑒢𑒯𑒱 𑒏𑒋𑒢𑒹 𑒦𑒫𑒱𑒭𑓂𑒨𑒧𑒹 𑒁𑒢𑒱𑒭𑓂𑒙𑒏 𑒛𑒩 𑒁𑒕𑒱 । 𑒮𑓀𑒣𑓂𑒩𑒞𑒱 𑒁𑒣𑒢𑒹 𑒣𑒰𑒿𑒔𑒼 𑒚𑒰𑒏𑒳𑒩 𑒑𑒳𑒩𑒳𑒖𑒢𑒏 𑒞𑒳𑒪𑓂𑒨 𑒣𑒰𑒿𑒔 𑒣𑒰𑓀𑒛𑒫𑒏 𑒮𑒧𑒰𑒢 𑒮𑒧𑒰𑒩𑒼𑒯𑒧𑒹 𑒂𑒥𑒱 𑒏𑒵𑒞𑒰𑒩𑓂𑒟 𑒏𑒩𑒲 । 𑒁𑒯𑒲𑓀𑒏𑒹𑒿 𑒁𑒣𑒢 𑒖𑓂𑒨𑒹𑒭𑓂𑒚 𑒣𑒳𑒞𑓂𑒩𑒏 𑒂𑒔𑒰𑒩𑓂𑒨 𑒥𑒢𑒹𑒥𑒰𑒏 𑒫𑒱𑒔𑒰𑒩 𑒏𑒋𑒢𑒹 𑒕𑒲 । 𑒣𑒩𑒞𑒰𑒣𑒳𑒩𑒏 𑒮𑒦𑒰𑒑𑒰𑒕𑒲𑒏 𑒣𑓀𑒔𑒏𑒼𑒬𑒲𑒧𑒹 𑒁𑒣𑒢𑒹 𑒮𑒦 𑒑𑒹𑒪 𑒕𑒲, 𑒞𑒹𑒿 𑒥𑒯𑒳𑒞 𑒩𑒰𑒮 𑒪𑒼𑒏 𑒑𑒣-𑒬𑒣𑒏 𑒪𑒹𑒪 𑒪𑒰𑒪𑒰𑒨𑒱𑒞 𑒮𑒹𑒯𑒼 𑒕𑒟𑒱 । 𑒁𑒑𑒪𑒰 𑒧𑒯𑒱𑒢𑒰𑒏 𑒣𑓂𑒩𑒟𑒧 𑒮𑒼𑒧𑒏𑒹𑒿 𑒖𑓂𑒨𑒼𑒿 𑒂𑒥𑒱 𑒖𑒰𑒃 𑒞𑒿 𑒮𑒦 𑒏𑒰𑒩𑓂𑒨 𑒢𑒱𑒩𑒢𑓂𑒞𑒩 𑒔𑒪𑒻𑒞 𑒩𑒯𑒞 । 𑒥𑒳𑒡𑒮𑒿 𑒣𑓂𑒩𑒰𑒨𑓁 𑒣𑓂𑒩𑒰𑒩𑒧𑓂𑒦𑒱𑒏 𑒏𑒰𑒩𑓂𑒨 𑒮𑒦 𑒬𑒳𑒩𑒳 𑒦𑓄 𑒖𑒋𑒞। 𑒃𑒞𑒱 𑒬𑒳𑒦𑒧𑓂 ।
𑒥𑒪𑒰𑒢 𑒡𑒰𑒩𑒏 𑒏𑒰𑒞𑒧𑒹 𑒣𑒩𑒞𑒰𑒣𑒳𑒩𑒏 𑒔𑒞𑒩𑒪-𑒔𑒞𑒩𑒪 𑒑𑒰𑒕 𑒮𑒦 𑒂 𑒞𑒏𑒩 𑒢𑒲𑒔𑒰𑒿 𑒮𑒦𑒰𑒑𑒰𑒕𑒲 । 𑒥𑒪𑒰𑒢𑒏 𑒡𑒰𑒩 𑒐𑒴𑒥 𑒑𑒯𑒲𑓀𑒩 𑒂 𑒣𑒴𑒩𑓂𑒝 𑒬𑒰𑓀𑒞 । 𑒄 𑒞𑒿 𑒥𑒰𑒠𑒧𑒹 𑒯𑒱𑒧𑒰𑒪𑒨𑒮𑒿 𑒏𑒼𑒢𑒼 𑒣𑒻𑒒 𑒑𑒰𑒕 𑒥𑒪𑒰𑒢𑒧𑒹 𑒐𑒮𑒪 𑒂 𑒣𑒱𑒣𑒩𑒰𑒒𑒰𑒙 𑒪𑒑 𑒮𑒼𑒗 𑒩𑒯𑒪𑒰𑒏 𑒥𑒠𑒪𑒰 𑒙𑒹𑒜𑓃 𑒦𑓄 𑒡𑒰𑒩𑒏𑒹𑒿 𑒩𑒼𑒏𑒱 𑒠𑒹𑒪𑒏 𑒂 𑒋𑒏𑒙𑒰 𑒢𑒫 𑒡𑒰𑒩 𑒏𑒧𑒪𑒰𑒏 𑒅𑒞𑓂𑒣𑒞𑓂𑒞𑒱 𑒦𑒹𑒪 । 𑒥𑒪𑒰𑒢 𑒗𑓀𑒗𑒰𑒩𑒣𑒳𑒩 𑒠𑒱𑒮 𑒂 𑒏𑒧𑒪𑒰- 𑒧𑒹𑓀𑒯𑒟, 𑒑𑒜𑓃𑒱𑒨𑒰 𑒂 𑒢𑒩𑒳𑒂𑒩 𑒠𑒱𑒮 । 𑒥𑒪𑒰𑒢 𑒑𑒯𑒲𑓀𑒩 𑒂 𑒬𑒰𑓀𑒞, 𑒩𑒹𑒞𑒏 𑒏𑒞𑒯𑒳 𑒣𑒞𑒰 𑒢𑒯𑒱; 𑒧𑒳𑒠𑒰 𑒏𑒧𑒪𑒰 𑒤𑒹𑒢𑒱𑒪, 𑒫𑒱𑒢𑒰𑒬𑒏𑒰𑒩𑒲 । 𑒥𑒰𑒜𑓃𑒱𑒏 𑒮𑓀𑒑 𑒩𑒹𑒞 𑒏𑒧𑒪𑒰 𑒂𑒢𑒋 𑒪𑒑𑒪𑒲𑒯 । 𑒑𑓂𑒩𑒲𑒭𑓂𑒧 𑒇𑒞𑒳𑒧𑒹 𑒥𑒪𑒰𑒢 𑒁𑒣𑒢 𑒣𑒴𑒩𑓂𑒫 𑒩𑒴𑒣 𑒡𑒹𑒢𑒹 𑒩𑒯𑒻𑒞 𑒕𑒟𑒱, 𑒥𑒱𑒢𑒰 𑒢𑒰𑒯𑒏 𑒣𑒰𑒩 𑒏𑒹𑒢𑒰𑒃 𑒏𑒚𑒱𑒢 । 𑒏𑒱𑓀𑒞𑒳 𑒋𑒯𑒱 𑒧𑒰𑒮𑒧𑒹 𑒏𑒧𑒪𑒰𑒧𑒯𑒰𑒩𑒰𑒢𑒲𑒏𑒹𑒿 𑒣𑒋𑒩𑒹 𑒪𑒼𑒏 𑒣𑒰𑒩 𑒏𑒩𑒻𑒞 𑒕𑒟𑒱 । 𑒮𑒦𑒰𑒑𑒰𑒕𑒲𑒏 𑒮𑒦𑒙𑒰 𑒔𑒞𑒩𑒪 𑒑𑒰𑒕 𑒥𑒰𑒜𑓃𑒱𑒏 𑒣𑓂𑒩𑒏𑒼𑒣𑒧𑒹 𑒮𑒳𑒐𑒰 𑒑𑒹𑒪 । 𑒔𑒰𑒩𑒴 𑒠𑒱𑒮 𑒩𑒹𑒞 । 𑒂 𑒮𑒦𑒰𑒑𑒰𑒕𑒲 𑒅𑒣𑒙𑒱 𑒑𑒹𑒪 । 𑒔𑒪𑒱 𑒑𑒹𑒪 𑒮𑒦𑒙𑒰 𑒫𑒻𑒦𑒫 𑒮𑒾𑒩𑒰𑒚 । 𑒗𑒱𑓀𑒑𑒳𑒩 𑒥𑒰𑒥𑒴𑒏 𑒏𑒰𑒪𑒧𑒹 𑒣𑒩𑒞𑒼𑒣𑒳𑒩𑒏 𑒡𑓂𑒩𑒳𑒫𑒮𑒿 𑒣𑓀𑒔𑒏𑒼𑒬𑒲 𑒢𑒰𑒣𑒪 𑒖𑒰𑒃𑒞 𑒕𑒪 ।
𑒏𑒪𑒱𑒞 𑒠𑒩𑒱𑒦𑒓𑓂𑒑𑒰𑒮𑒿 𑒣𑒩𑒮𑒴 𑒂𑒥𑒱 𑒖𑒋𑒞𑒰𑒯, 𑒞𑒐𑒢 𑒯𑒳𑒢𑒏𑒰 𑒪𑓄 𑒏𑓄 𑒋𑒏𑒾𑒩
𑒖𑒰𑒋𑒥 । 𑒥𑒹𑒔𑒰𑒩𑒹 𑒥𑒯𑒳𑒞 𑒠𑒱𑒢 𑒞𑒣𑒮𑓂𑒨𑒰 𑒏𑒋𑒪𑒢𑓂𑒯𑒱 । 𑒋𑒯𑒱 𑒥𑒹𑒩 𑒧𑒰𑒧𑒰 𑒑𑒰𑒧, 𑒠𑒲𑒠𑒲 𑒑𑒰𑒧 𑒮𑒦 𑒚𑒰𑒧 𑒒𑒳𑒧𑒰 𑒠𑒹𑒥𑒢𑓂𑒯𑒱 । 𑒮𑒦𑒏𑒹𑒿 𑒧𑒼𑒢 𑒪𑒰𑒑𑒪 𑒕𑒻𑒏।
𑒣𑒱𑒞𑒰-𑒣𑒳𑒞𑓂𑒩 𑒋𑒏𑒾𑒩 𑒣𑒯𑒳𑒿𑒔𑒪𑒰𑒯 । 𑒄 𑒑𑒰𑒧 𑒏𑒼𑒢𑒼 𑒞𑒩𑒯𑒹𑒿 𑒂𑒢 𑒖𑒏𑒰𑒿 𑒢𑒯𑒱 𑒪𑒑𑒪𑒢𑓂𑒯𑒱 । 𑒖𑒹𑒢𑒰 𑒖𑒧𑒒𑒙 𑒪𑒑𑒪𑒰 𑒣𑒩 𑒬𑒰𑒮𑓂𑒞𑓂𑒩𑒰𑒩𑓂𑒟𑒏 𑒣𑒩𑒧𑓂𑒣𑒩𑒰 𑒩𑒯𑒪 𑒁𑒕𑒱, 𑒞𑒯𑒱𑒢𑒰 𑒫𑒱𑒠𑓂𑒫𑒞𑒧𑒝𑓂𑒛𑒪𑒲𑒧𑒹 𑒫𑒱𑒦𑒱𑒢𑓂𑒢 𑒫𑒱𑒭𑒨 𑒣𑒩 𑒔𑒩𑓂𑒔𑒰 𑒯𑒳𑒁𑒋 𑒪𑒰𑒑𑒪 । 𑒔𑒩𑓂𑒔𑒰𑒧𑒹 𑒁𑓀𑒑𑓂𑒩𑒹𑒖𑒲 𑒬𑒰𑒮𑒢 𑒂 𑒦𑒰𑒩𑒞𑒫𑒰𑒮𑒲𑒏 𑒮𑒻𑒢𑓂𑒨 𑒁𑒦𑒱𑒨𑒰𑒢 𑒮𑒹𑒯𑒼 𑒩𑒯𑒪 । 𑒧𑒿𑒑𑒩𑒴𑒥𑒰𑒥𑒴 𑒪𑒰𑒪 𑒏𑒼𑒙 𑒣𑒯𑒱𑒩𑒱 𑒏𑒋 𑒏𑒞𑒹𑒏 𑒪𑒛𑓃𑒰𑒃 𑒪𑒛𑓃𑒪 𑒕𑒪𑒰𑒯 । 𑓑𑓘𑓖𑓗-𑓖𑓘 𑒏 𑒁𑒥𑒲𑒮𑒲𑒢𑒱𑒨𑒰 𑒨𑒳𑒠𑓂𑒡𑒧𑒹 𑒮𑒩 𑒔𑒰𑒩𑓂𑒪𑓂𑒮 𑒢𑒹𑒣𑒱𑒨𑒩𑒏 𑒮𑓀𑒑 𑒏𑒼𑒢𑒰𑒏𑒹𑒿 𑒁𑒦𑒱𑒨𑒰𑒢𑒧𑒹 𑒍 𑒑𑒹𑒪 𑒕𑒪𑒰𑒯, 𑒞𑒏𑒩 𑒫𑒩𑓂𑒝𑒢 𑒫𑒱𑒮𑓂𑒞𑒵𑒞 𑒩𑒴𑒣𑒧𑒹 𑒠𑒹𑒥𑒋 𑒪𑒑𑒪𑒰𑒯 𑒧𑒿𑒑𑒩𑒴𑒥𑒰𑒥𑒴 । 𑒠𑓂𑒫𑒱𑒞𑒲𑒨 𑒁𑒤𑒑𑒰𑒢-𑒨𑒳𑒠𑓂𑒡𑒧𑒹 𑒏𑒼𑒢𑒰 𑒮𑒧𑒨𑒏 𑒁𑒦𑒰𑒫𑒧𑒹 𑒮𑒹𑒢𑒰𑒏𑒹𑒿 𑒪𑒰𑒪𑒏 𑒥𑒠𑒪𑒰 𑒧𑒪𑒱𑒕𑒯 𑒫𑒩𑓂𑒠𑒲 𑒪𑒑𑒥𑒋 𑒣𑒛𑓃𑓂𑒪𑒻𑒏 𑒞𑒏𑒩 𑒫𑒩𑓂𑒝𑒢 𑒮𑒹𑒯𑒼 𑒠𑒹𑒪𑒢𑓂𑒯𑒱 । 𑒨𑒻𑒯 𑒫𑒩𑓂𑒠𑒲 𑒥𑒰𑒠𑒧𑒹 𑒐𑒰𑒏𑒲 𑒩𑓀𑒑𑒏 𑒩𑒴𑒣𑒧𑒹 𑒣𑓂𑒩𑒮𑒱𑒠𑓂𑒡 𑒦𑓄 𑒑𑒹𑒪 । 𑒋𑒢𑒤𑒲𑒪𑓂𑒛 𑒩𑒰𑒨𑒤𑒪𑒏 𑒐𑒱𑒮𑓂𑒮𑒰 𑒖𑒹 𑓑𑓘𑓕𑓗 𑒏 𑒮𑓂𑒫𑒞𑓀𑒞𑓂𑒩𑒞𑒰 𑒮𑓀𑒑𑓂𑒩𑒰𑒧𑒧𑒹 𑒣𑒩𑒱𑒝𑒞 𑒦𑒹𑒪, 𑒏𑒹𑒩 𑒥𑒠𑒪𑒰𑒧𑒹 𑒥𑒹𑒬 𑒢𑒧𑒑𑒩 𑒮𑓂𑒢𑒰𑒃𑒛𑒩 𑒩𑒰𑒨𑒤𑒪 𑒖𑒹 𑓑𑓘𑓘𑓗 𑒧𑒹 𑒠𑒹𑒪 𑒑𑒹𑒪 । 𑒧𑒿𑒑𑒩𑒴 𑒥𑒰𑒥𑒴 𑒏𑒰𑓀𑒑𑓂𑒩𑒹𑒮𑒏 𑒔𑒩𑓂𑒔𑒰 𑒮𑒹𑒯𑒼 𑒏𑒹𑒪𑒢𑓂𑒯𑒱 ।𑒍𑒧𑓂𑒯𑒩 𑒗𑒱𑓀𑒑𑒳𑒩 𑒥𑒰𑒥𑒴 𑒦𑒼𑒖-𑒦𑒰𑒞𑒏 𑒤𑒹𑒯𑒩𑒱𑒮𑓂𑒙 𑒂 𑒋𑒮𑓂𑒙𑒲𑒧𑒹𑒙 𑒥𑒢𑒥𑒋 𑒪𑒑𑒪𑒰𑒯 । 𑒏𑒪𑒱𑒞 𑒮𑒹𑒯𑒼 𑒁𑒣𑒢 𑒞𑒳𑒩𑒱𑒨𑒰𑒏 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦𑒏 𑒮𑓀𑒑 𑒧𑒑𑒢 𑒦𑓄 𑒑𑒹𑒪𑒰𑒯 । 𑒍𑒯𑒱 𑒦𑒲𑒛𑓃𑒧𑒹 𑒩𑒰𑒖𑒹 𑒑𑒰𑒧𑒏 𑒤𑒢𑓂𑒢𑒴 𑒥𑒰𑒥𑒴 𑒮𑒹𑒯𑒼 𑒂𑒋𑒪 𑒕𑒪𑒰𑒯 । 𑒋𑒏𑒾𑒩𑒧𑒹 𑒯𑒳𑒢𑒏𑒩 𑒥𑒯𑒱𑒢-𑒥𑒯𑒱𑒢𑒼𑒃 𑒩𑒯𑒻𑒞 𑒕𑒪𑒐𑒱𑒢𑓂𑒯 । 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒞𑒋 𑒋𑒢𑒰𑒃-𑒑𑒹𑒢𑒰𑒃 𑒍 𑒏𑒱𑒕𑒳 𑒥𑒹𑒬𑒲 𑒏𑒩𑒻𑒞 𑒕𑒪𑒰𑒯 । 𑒏𑒪𑒱𑒞𑒏𑒹𑒿 𑒋𑒯𑒱𑒮𑒿 𑒣𑒯𑒱𑒢𑒹 𑒍 𑒢𑒯𑒱 𑒠𑒹𑒐𑒢𑒹 𑒩𑒯𑒟𑒱 । 𑒋𑒏𑒰𑒋𑒏 𑒅𑒞𑓂𑒮𑒳𑒏𑒞𑒰 𑒦𑒹𑒪𑒢𑓂𑒯𑒱 𑒂 𑒏𑒪𑒱𑒞𑒏 𑒫𑒱𑒭𑒨𑒧𑒹 𑒣𑒴𑒕𑒣𑒰𑒕 𑒏𑒹𑒪𑒢𑓂𑒯𑒱 । 𑒄 𑒖𑒰𑒢𑒱 𑒖𑒹 𑒏𑒪𑒱𑒞 𑒗𑒱𑓀𑒑𑒳𑒩𑒥𑒰𑒥𑒴𑒏 𑒮𑒳𑒣𑒳𑒞𑓂𑒩 𑒕𑒟𑒱, 𑒏𑓂𑒭𑒝𑒯𑒱𑒧𑒹 𑒗𑒱𑓀𑒑𑒳𑒩𑒥𑒰𑒥𑒴 𑒪𑒑 𑒒𑒳𑒮𑒏𑒱 𑒏𑓄 𑒔𑒪𑒱 𑒁𑒋𑒪𑒰𑒯 । 𑒫𑒰𑒩𑓂𑒞𑓂𑒞𑒰𑒪𑒰𑒣𑒏 𑒏𑓂𑒩𑒧𑒧𑒹 𑒗𑒱𑓀𑒑𑒳𑒩 𑒥𑒰𑒥𑒴 𑒮𑒿 𑒄𑒯𑒼 𑒣𑒞𑒰 𑒪𑒑𑒪𑒢𑓂𑒯𑒱 𑒖𑒹 𑒖𑒧𑒲𑒢𑓂𑒠𑒰𑒩𑒲𑒏 𑒣𑒩𑓂𑒧𑒰𑒢𑒹𑒢𑓂𑒙 𑒮𑒹𑒙𑒪𑒧𑒹𑒢𑓂𑒙𑒏 𑒥𑒰𑒠 𑒠𑒩𑒱𑒦𑒓𑓂𑒑𑒰 𑒩𑒰𑒖𑒏𑒹𑒿 𑒫𑒮𑒴𑒪𑒲𑒏 𑒪𑒹𑒪 𑒣𑒩𑒑𑒢𑒰𑒏 𑒂𑒡𑒰𑒩𑒣𑒩 𑒧𑒱𑒟𑒱𑒪𑒰 𑒏𑓂𑒭𑒹𑒞𑓂𑒩𑒮𑒿 𑒏𑒩 𑒫𑒮𑒴𑒪𑒲𑒏 𑒁𑒡𑒱𑒏𑒰𑒩 𑒣𑓂𑒩𑒰𑒣𑓂𑒞 𑒦𑒹𑒪 𑒂 𑒣𑒜𑓃𑒰𑒃𑒏 𑒥𑒰𑒠 𑒏𑒪𑒱𑒞 𑒏𑒙𑒱𑒯𑒰𑒩𑒧𑒹 𑒏𑒩 𑒫𑒮𑒴𑒪𑒲𑒏 𑒏𑒰𑒩𑓂𑒨𑒏 𑒯𑒹𑒞𑒳 𑒖𑒋𑒞𑒰𑒯 । 𑒋𑒧𑓂𑒯𑒩 𑒁𑓀𑒑𑓂𑒩𑒹𑒖𑒲𑒏 𑒬𑒱𑒏𑓂𑒭𑒰 𑒏𑒪𑒱𑒞 𑒣𑒴𑒩𑓂𑒝 𑒏𑓄 𑒪𑒹𑒢𑒹 𑒕𑒪𑒰𑒯 । 𑒣𑒞𑒰 𑒪𑒰𑒑𑒪 𑒖𑒹 𑒤𑒢𑓂𑒢𑒴 𑒥𑒰𑒥𑒴 𑒁𑒣𑒢 𑒥𑒔𑒱𑒨𑒰𑒏 𑒯𑒹𑒞𑒳 𑒨𑒼𑒑𑓂𑒨 𑒫𑒩𑒏 𑒞𑒰𑒏𑒱𑒧𑒹 𑒕𑒟𑒱 । 𑒞𑒐𑒢 𑒫𑒱𑒔𑒰𑒩 𑒦𑒹𑒪 𑒖𑒹 𑒣𑒩𑒞𑒰𑒣𑒳𑒩𑒏 𑒮𑒦𑒰𑒑𑒰𑒕𑒲𑒧𑒹 𑒁𑒑𑒱𑒪𑒰 𑒧𑒯𑒱𑒢𑒰𑒧𑒹 𑒤𑒢𑓂𑒢𑒴 𑒥𑒰𑒥𑒴 𑒂𑒥𑒟𑒱 𑒂 𑒗𑒱𑓀𑒑𑒳𑒩 𑒥𑒰𑒥𑒴𑒏𑒹𑓀 𑒂𑒞𑒱𑒟𑓂𑒨𑒏 𑒁𑒫𑒮𑒩 𑒦𑒹𑒙𑒢𑓂𑒯𑒱 । 𑒧𑒳𑒠𑒰 𑒥𑒲𑒔𑒯𑒱𑒧𑒹 𑒠𑒱𑒨𑒰𑒠 𑒮𑒦 𑒗𑒱𑓀𑒑𑒳𑒩 𑒥𑒰𑒥𑒴𑒏𑒿 𑒞𑒹𑒢𑒰 𑒢𑒹 𑒒𑒹𑒩𑒪𑒏𑒢𑓂𑒯𑒱 𑒖𑒹 𑒏𑒪𑒱𑒞𑒏 𑒫𑒱𑒫𑒰𑒯 𑒤𑒢𑓂𑒢𑒴 𑒥𑒰𑒥𑒴𑒏 𑒥𑒔𑒱𑒨𑒰𑒮𑒿 𑒚𑒲𑒏 𑒏𑒩𑒻𑒞 𑒂 𑒦𑒩𑒰𑒧𑒧𑒹 𑒮𑒱𑒠𑓂𑒡𑒰𑓀𑒞 𑒏𑒩𑒹𑒢𑒯𑒱 𑒍 𑒑𑒰𑒧 𑒣𑒯𑒳𑒿𑒔𑒪𑒰𑒯 । 𑒛𑒩𑒼 𑒯𑒼𑒃𑒢𑓂𑒯𑒱 𑒖𑒹 𑒏𑒢𑒱𑒨𑒰𑒿 𑒢𑒹 𑒏𑒞𑒯𑒳 𑒩𑒣𑒙𑒰 𑒠𑓄 𑒠𑒹𑒟𑒱 । 𑒧𑒳𑒠𑒰 𑒫𑒱𑒫𑒰𑒯𑒏 𑒥𑒰𑒞 𑒮𑒳𑒢𑒱𑒞𑒯𑒱 𑒏𑒢𑒱𑒨𑒰𑒿 𑒐𑒳𑒬𑒲𑒮𑒿 𑒥𑒞𑒰𑒯𑒱 𑒖𑒏𑒰𑒿 𑒦𑓄 𑒑𑒹𑒪𑒲𑒯 । 𑒣𑒕𑒱𑒪𑒰 𑒔𑒰𑒩𑒱 𑒠𑒱𑒢𑒮𑒿 𑒖𑒞𑒹𑒏 𑒑𑒳𑒢𑒡𑒳𑒢𑒲 𑒪𑒰𑒑𑒪 𑒩𑒯𑒢𑓂𑒯𑒱 𑒮𑒦𑒙𑒰 𑒐𑒞𑒧 𑒦𑓄 𑒑𑒹𑒪𑒢𑓂𑒯𑒱।
𑒣𑒰𑒿𑒫-𑒣𑒻𑒠𑒪 𑒏𑒱𑓀𑒫𑒰 𑒏𑒙𑒯𑒲 𑒑𑒰𑒛𑓃𑒲 𑒨𑒻𑒯 𑒕𑒪 𑒨𑒰𑒞𑒰𑒨𑒰𑒞𑒏 𑒮𑒰𑒡𑒢 । 𑒧𑒯𑒤𑒰 𑒮𑒹𑒯𑒼 𑒮𑒥𑒰𑒩𑒲 𑒕𑒪 𑒮𑒹𑒯𑒼 𑒥𑒹𑒬 𑒢𑒏𑓂𑒏𑒰𑒬𑒲𑒫𑒪𑒰 𑒂 𑒦𑒩𑒱𑒑𑒩 । 𑒫𑒩 𑒧𑒯𑒤𑒰 𑒣𑒩 𑒂 𑒥𑒩𑒱𑒨𑒰𑒞𑒲𑒧𑒹 𑒖𑒹 𑒨𑒳𑒫𑒰 𑒩𑒯𑒟𑒱 𑒮𑒹 𑒣𑒋𑒩𑒹 । 𑒂 𑒖𑒹 𑒏𑒢𑒹𑒏 𑒅𑒧𑒩𑒱𑒑𑒩 𑒩𑒯𑒟𑒱 𑒮𑒹 𑒏𑒙𑒯𑒲 𑒑𑒰𑒛𑓃𑒲𑒣𑒩 𑒫𑒱𑒠𑒰 𑒦𑒹𑒪𑒰𑒯 । 𑒠𑒩𑒥𑒖𑓂𑒖𑒰𑒣𑒩 𑒮𑓂𑒫𑒰𑒑𑒞 𑒦𑒹𑒪𑒢𑓂𑒯𑒱 । 𑒮𑒳𑒑𑒢𑓂𑒡𑒱, 𑒤𑒴𑒪, 𑒖𑒪𑒣𑒰𑒢 । 𑒄 𑒮𑒦 𑒥𑒩𑒱𑒨𑒰𑒞𑒲𑒧𑒹 𑒏𑒱𑒕𑒳 𑒑𑒼𑒙𑒹𑒏𑒹𑒿 𑒁𑒢𑒮𑒼𑒯𑒰𑒿𑒞 𑒪𑒑𑒪𑒢𑓂𑒯𑒱 । 𑒥𑒩𑒱𑒨𑒰𑒞𑒲 𑒪𑒼𑒏𑒢𑒱𑒏 𑒑𑒣𑓂𑒣 𑒮𑒩𑒏𑓂𑒏𑒰 𑒔𑒪𑒻𑒞 𑒩𑒯𑒪 । 𑒬𑒰𑒮𑓂𑒞𑓂𑒩𑒰𑒩𑓂𑒟 𑒂 𑒔𑒳𑒙𑒳𑒏𑓂𑒏𑒰 । 𑒁𑒿𑒑𑒢𑒰𑒧𑒹 𑒣𑒩𑒱𑒕𑒢𑒱 𑒂 𑒫𑒱𑒡𑒱-𑒫𑓂𑒨𑒫𑒯𑒰𑒩 𑒞𑒿 𑒠𑒪𑒰𑒢 𑒣𑒩 𑒑𑒣𑓂𑒣𑒏 𑒤𑒴𑒯𑒰𑒩𑒱 । 𑒥𑒲𑒔-𑒥𑒲𑒔𑒧𑒹 𑒏𑓂𑒨𑒼 𑒂𑒥𑒱 𑒏𑓄 𑒏𑒱𑒕𑒳 𑒞𑒰𑒏𑒟𑒱-𑒥𑒰𑒖𑒟𑒱 𑒂 𑒤𑒹𑒩 𑒏𑒞𑒯𑒳 𑒖𑒰𑒟𑒱 । 𑒑𑒯𑒢𑒰 𑒏𑒞𑒋 𑒕𑒻𑒏 । 𑒒𑒼𑒒𑒙 𑒏𑒹 𑒠𑒹𑒟𑒱𑒢𑓂𑒯 । 𑒒𑒼𑒒𑒙𑒰𑒯𑒲 𑒢𑒴𑒂 𑒢𑒯𑒱 𑒦𑒹𑒙𑒱 𑒩𑒯𑒪 𑒁𑒕𑒱 । 𑒋𑒯𑒱𑒮𑒿 𑒫𑒱𑒫𑒰𑒯𑒏 𑒏𑓂𑒩𑒧 𑒂 𑒣𑓂𑒩𑒑𑒞𑒱𑒏 𑒫𑒱𑒭𑒨𑒧𑒹 𑒥𑒩𑒱𑒨𑒰𑒞𑒲 𑒪𑒼𑒏𑒢𑒱𑒏𑒹𑒿 𑒮𑒹𑒯𑒼 𑒣𑒞𑒰 𑒔𑒪𑒻𑒞 𑒩𑒯𑒻𑒞 𑒕𑒪𑒢𑓂𑒯𑒱। 𑒋𑒫𑒧𑓂 𑒣𑓂𑒩𑒏𑒰𑒩𑒹 𑒂𑒿𑒑𑒢 𑒂 𑒠𑒩𑒥𑒖𑓂𑒖𑒰 𑒠𑒳𑒢𑒴 𑒚𑒰𑒧 𑒫𑒱𑒫𑒰𑒯𑒏 𑒏𑒰𑒩𑓂𑒨𑒏𑓂𑒩𑒧 𑒦𑒼𑒩𑒏 𑒣𑒰𑒿𑒔 𑒥𑒖𑒹 𑒡𑒩𑒱 𑒔𑒪𑒻𑒞 𑒩𑒯𑒪 । 𑒫𑒩 𑒂 𑒏𑒢𑒱𑒨𑒰𑒿𑒏 𑒯𑒰𑒟𑒧𑒹 𑒥𑓂𑒩𑒯𑓂𑒧𑒔𑒰𑒩𑒲 𑒛𑒼𑒩𑒲 𑒥𑒰𑒢𑓂𑒯𑒱 𑒠𑒹𑒪 𑒑𑒹𑒪, 𑒖𑒹 𑒔𑒰𑒩𑒱 𑒠𑒱𑒢 𑒡𑒩𑒱 𑒩𑒯𑒞 । 𑒞𑒏𑒩 𑒥𑒰𑒠 𑒫𑒱𑒫𑒰𑒯 𑒣𑒴𑒩𑓂𑒝 𑒦𑒹𑒪 ।
𑒫𑒱𑒠𑒰𑒃𑒏 𑒠𑒱𑒢 𑒞𑒏𑒰 𑒏𑒋 𑒗𑒱𑓀𑒑𑒳𑒩 𑒥𑒰𑒥𑒴 𑒣𑒚𑒹𑒪𑒐𑒱𑒢𑓂𑒯 𑒂 𑒏𑒪𑒱𑒞 𑒁𑒣𑒢 𑒑𑒰𑒧 𑒂𑒥𑒱 𑒑𑒹𑒪𑒰𑒯 । 𑒂𑒥 𑒯𑒳𑒢𑒏𑒩 𑒏𑒙𑒱𑒯𑒰𑒩 𑒖𑒋𑒥𑒰𑒏 𑒞𑒻𑒨𑒰𑒩𑒲 𑒏𑒋𑒪 𑒑𑒹𑒪𑒢𑓂𑒯𑒱 । 𑒁𑒬𑓂𑒩𑒳𑒣𑒴𑒩𑒱𑒞 𑒢𑒹𑒞𑓂𑒩𑒮𑒿 𑒧𑒰𑒋 𑒂 𑒑𑓂𑒩𑒰𑒧𑒲𑒝𑒮𑒿 𑒫𑒱𑒠𑒰 𑒪𑒹𑒪𑒰𑒏 𑒥𑒰𑒠 𑒏𑒪𑒱𑒞 𑒁𑒣𑒢 𑒩𑒼𑒖𑒑𑒰𑒩 𑒣𑒩 𑒑𑒹𑒪𑒰𑒯।
𑒏𑒼𑒬𑒲𑒏 𑒫𑒱𑒦𑒲𑒭𑒱𑒏𑒰𑒮𑒿 𑒞𑓂𑒩𑒮𑓂𑒞 𑒏𑓂𑒭𑒹𑒞𑓂𑒩 𑒯𑒼𑒃𑒞 𑒏𑒙𑒱𑒯𑒰𑒩 𑒣𑒯𑒳𑒿𑒔𑒱 𑒏𑓄 𑒏𑒪𑒱𑒞 𑒁𑒣𑒢 𑒏𑒰𑒖𑒧𑒹 𑒬𑒲𑒒𑓂𑒩𑒯𑒱 𑒣𑒰𑒩𑓀𑒑𑒞 𑒦𑓄 𑒑𑒹𑒪𑒰𑒯 । 𑒏𑒰𑒖𑒏 𑒁𑒡𑒱𑒏𑒞𑒰 𑒦𑒹𑒪𑒰𑒣𑒩 𑒁𑒣𑒢 𑒣𑒱𑒞𑒱𑒨𑒾𑒞 𑒦𑒰𑒋 𑒂 𑒦𑒰𑒞𑒱𑒖𑒏𑒹𑒿 𑒮𑒹𑒯𑒼 𑒥𑒖𑒰 𑒪𑒹𑒪𑒢𑓂𑒯𑒱। 𑒋𑒯𑒱 𑒏𑓂𑒭𑒹𑒞𑓂𑒩𑒏 𑒪𑒼𑒏𑒏 𑒥𑒲𑒔𑒧𑒹 𑒟𑒼𑒛𑓃𑒥𑒹𑒏 𑒠𑒱𑒢𑒧𑒹 𑒁𑒣𑒢 𑒣𑓂𑒩𑒞𑒱𑒭𑓂𑒚𑒰 𑒥𑒜𑓃𑒰 𑒪𑒹𑒪𑒟𑒱 𑒏𑒪𑒱𑒞 । 𑒋𑒞𑒋 𑒖𑒧𑒲𑒢𑓂𑒠𑒰𑒩𑒲𑒏 𑒣𑒩𑒧𑒰𑒢𑒹𑓀𑒙 𑒮𑒹𑒙𑒪𑒧𑒹𑒢𑓂𑒙𑒏 𑒫𑒱𑒭𑒨𑒧𑒹 𑒣𑒳𑒩𑒰𑒢 𑒁𑒢𑒳𑒦𑒫 𑒥𑒛𑓃 𑒐𑒩𑒰𑒣 𑒕𑒪 । 𑒫𑒮𑒴𑒪𑒲 𑒣𑒠𑒰𑒡𑒱𑒏𑒰𑒩𑒲𑒏 𑒦𑓂𑒩𑒭𑓂𑒙 𑒞𑒩𑒲𑒏𑒰 𑒮𑒦𑒏𑒹𑒿 𑒏𑒪𑒱𑒞 𑒥𑒠𑒪𑒱 𑒠𑒹𑒪𑒐𑒱𑒢𑓂𑒯 । 𑒧𑒳𑒠𑒰 𑒏𑒰𑒪𑒏 𑒪𑒑 𑒏𑒱𑒕𑒳 𑒂𑒩𑒹 𑒪𑒱𑒐𑒪 𑒩𑒯𑒋 । 𑒏𑒪𑒱𑒞𑒏 𑒠𑓂𑒫𑒱𑒩𑒰𑒑𑒧𑒢𑒏 𑒣𑒯𑒱𑒢𑒯𑒱 𑒯𑒳𑒢𑒏𑒩 𑒧𑒰𑒋 𑒑𑒳𑒖𑒩𑒱 𑒑𑒹𑒪𑒐𑒱𑒢𑓂𑒯 । 𑒥𑒛𑓂𑒛 𑒩𑒰𑒮 𑒮𑒾𑒐-𑒧𑒢𑒼𑒩𑒟 𑒪𑒹𑒢𑒹 𑒔𑒪𑒱 𑒑𑒹𑒪𑒲𑒯 𑒧𑒰𑒋 । 𑒏𑒐𑒢𑒼 𑒏𑒪𑒱𑒞𑒏𑒹𑒿 𑒏𑒯𑒻𑒞 𑒕𑒪𑒐𑒱𑒢𑓂𑒯 𑒖𑒹 𑒞𑒼𑒩𑒰 𑒏𑒢𑒱𑒨𑒰𑒿𑒮𑒿 𑒐𑒴𑒥 𑒗𑒑𑒛𑓃𑒰 𑒏𑒩𑒥𑒾𑒏 𑒞𑒐𑒢 𑒠𑒹𑒐𑒥𑒾𑒏 𑒖𑒹 𑒞𑒴𑒿 𑒯𑒧𑒩 𑒣𑒏𑓂𑒭 𑒪𑒻𑒞 𑒕𑒿𑒯 𑒂𑒏𑒱 𑒏𑒢𑒱𑒨𑒰𑒿𑒏। 𑒂𑒥 𑒗𑒱𑓀𑒑𑒳𑒩 𑒥𑒰𑒥𑒴 𑒮𑒹𑒯𑒼 𑒁𑒢𑓂𑒨𑒧𑒢𑒮𑓂𑒏 𑒩𑒯𑒋 𑒪𑒑𑒪𑒰𑒯 । 𑒏𑒪𑒱𑒞 𑒏𑒯𑒥𑒼 𑒏𑒹𑒪𑒐𑒱𑒢𑓂𑒯 𑒖𑒹 𑒮𑒿𑒑𑒯𑒱 𑒔𑒪𑒴, 𑒧𑒳𑒠𑒰 𑒦𑒩𑒱 𑒖𑒢𑓂𑒧 𑒖𑒞𑒋 𑒩𑒯𑒪𑒰𑒯 𑒍𑒯𑒱 𑒚𑒰𑒧𑒏𑒹𑒿 𑒕𑒼𑒛𑓃𑒟𑒳 𑒏𑒼𑒢𑒰 ?
𑒞𑒹𑒮𑒩 𑒮𑒰𑒪 𑒏𑒪𑒱𑒞𑒏 𑒠𑓂𑒫𑒱𑒩𑒰𑒑𑒧𑒢 𑒦𑒹𑒪𑒢𑓂𑒯𑒱 𑒂 𑒞𑒏𑒩𑒰 𑒥𑒰𑒠𑒹 𑒗𑒱𑓀𑒑𑒳𑒩 𑒥𑒰𑒥𑒴 𑒢𑒱𑒬𑓂𑒔𑒱𑓀𑒞 𑒦𑓄 𑒮𑒏𑒪𑒰𑒯 । 𑒖𑒰𑒃𑒞-𑒖𑒰𑒃𑒞 𑒏𑒪𑒱𑒞𑒏𑒹𑒿 𑒏𑒯𑒻𑒞 𑒑𑒹𑒪𑒐𑒱𑒢𑓂𑒯 𑒖𑒹 𑒞𑒼𑒿 𑒞𑒿 𑒥𑒹𑒬𑒲𑒏𑒰𑒪 𑒑𑒰𑒧𑒮𑒿 𑒥𑒰𑒯𑒩𑒹 𑒩𑒯𑒪𑒯 । 𑒯𑒧𑒩𑒰 𑒮𑒥𑒯𑒏 𑒮𑒹𑒫𑒰 𑒞𑒿 𑒄 𑒥𑒳𑒔𑒱𑒨𑒰 𑒏𑒹𑒪𑒏 । 𑒁𑒣𑒢 𑒥𑒯𑒱𑒢𑒏 𑒦𑒰𑒩 𑒂𑒥 𑒞𑒼𑒯𑒲𑒿 𑒅𑒚𑒰𑒥𑒯 । 𑒯𑒧 𑒮𑒼𑒔𑒢𑒹 𑒕𑒪𑒯𑒳𑒿 𑒖𑒹 𑒋𑒏𑒩 𑒫𑒱𑒫𑒰𑒯 𑒠𑒰𑒢 𑒏𑒩𑒥𑒰𑒃𑒋 𑒏𑓄 𑒢𑒱𑒬𑓂𑒔𑒱𑓀𑒞 𑒯𑒋𑒥 । 𑒧𑒳𑒠𑒰 𑒞𑒼𑒯𑒩 𑒧𑒰𑒋 𑒯𑒧𑒩𑒰 𑒞𑒼𑒛𑓃𑒱 𑒠𑒹𑒪𑒢𑓂𑒯𑒱 । 𑒂𑒥 𑒞𑒴𑒿 𑒁𑒣𑒢𑒰 𑒖𑒼𑒑𑒩 𑒦𑒃𑒋 𑒑𑒹𑒪 𑒕𑒯 । 𑒣𑒰𑒿𑒔 𑒥𑒩𑒐𑒏 𑒥𑒹𑒙𑒰 𑒩𑒯𑒻𑒞 𑒕𑒻𑒏 𑒞𑒐𑒢𑒼 𑒪𑒼𑒏 𑒏𑒹𑒿 𑒪𑒼𑒏 𑒏𑒯𑒻𑒞 𑒕𑒻𑒏 𑒖𑒹 𑒁𑒯𑒰𑒿 𑒏𑒹𑒿 𑒏𑒼𑒢 𑒥𑒰𑒞𑒏 𑒔𑒱𑓀𑒞𑒰 𑒁𑒕𑒱, 𑒣𑒰𑒿𑒔 𑒥𑒩𑒐𑒏 𑒥𑒹𑒙𑒰 𑒁𑒕𑒱 । 𑒞𑒴𑒿 𑒞𑒿 𑒂𑒥 𑒣𑒜𑓃𑒱 𑒪𑒱𑒐𑒱 𑒏𑓄 𑒁𑒣𑒢 𑒖𑒲𑒫𑒢 𑒨𑒰𑒣𑒢 𑒏𑒩𑒻𑒞 𑒕𑒯 । 𑒤𑒹𑒩 𑒣𑒳𑒞𑒼𑒯𑒳𑒏𑒹𑒿 𑒥𑒳𑒔𑒱𑒨𑒰𑒏 𑒯𑒰𑒟 𑒣𑒏𑒛𑓃𑒰 𑒏𑓄 𑒋𑒯𑒱 𑒪𑒼𑒏𑒮𑒿 𑒕𑒳𑒙𑓂𑒙𑒲 𑒪𑒹𑒪𑒢𑓂𑒯𑒱 𑒗𑒱𑒿𑒑𑒳𑒩 𑒥𑒰𑒥𑒴 । 𑒏𑒪𑒱𑒞 𑒯𑒳𑒢𑒏𑒰 𑒋𑒞𑒹𑒏 𑒯𑒩𑒥𑒛𑓃𑒲𑒧𑒹 𑒏𑒯𑒱𑒨𑒼 𑒢𑒯𑒱 𑒠𑒹𑒐𑒢𑒹 𑒕𑒪𑒐𑒱𑒢𑓂𑒯 । 𑒮𑓂𑒟𑒱𑒩, 𑒬𑒰𑓀𑒞𑒔𑒱𑒞𑓂𑒞 𑒂 𑒤𑒪𑒏 𑒔𑒱𑓀𑒞𑒰 𑒏𑒹𑒢𑒱𑒯𑒰𑒩 𑒏𑒱𑒮𑒰𑒢 𑒮𑒹𑒯𑒼 𑒁𑒣𑒢 𑒖𑒲𑒫𑒢-𑒮𑓀𑒑𑒲𑒏 𑒮𑓀𑒑 𑒕𑒳𑒙𑒪𑒰𑒏 𑒥𑒰𑒠 𑒁𑒡𑒲𑒩 𑒦𑓄 𑒑𑒹𑒪 𑒕𑒪 ।
𑒏𑒪𑒱𑒞𑒏𑒹𑒿 𑒏𑒙𑒱𑒯𑒰𑒩 𑒒𑒳𑒩𑒪𑒰𑒏 𑒥𑒰𑒠𑒼 𑒋𑒏𑒹𑒙𑒰 𑒔𑒱𑒢𑓂𑒞𑒰 𑒪𑒰𑒑𑒪 𑒩𑒯𑒻𑒞 𑒕𑒪𑒢𑓂𑒯𑒱 । 𑒮𑒹 𑒕𑒪 𑒥𑒳𑒔𑒱𑒨𑒰𑒏 𑒫𑒱𑒫𑒰𑒯𑒏 । 𑒣𑒱𑒞𑒰𑒏 𑒩𑒯𑒻𑒞 𑒍 𑒏𑒼𑒢𑒼 𑒣𑒩𑒹𑒬𑒰𑒢𑒲𑒮𑒿 𑒔𑒱𑒢𑓂𑒞𑒱𑒞 𑒢𑒯𑒱 𑒯𑒼𑒃𑒞 𑒕𑒪𑒰𑒯 । 𑒧𑒳𑒠𑒰 𑒯𑒳𑒢𑒏𑒰 𑒑𑒹𑒪𑒰𑒏 𑒥𑒰𑒠 𑒂𑒥 𑒪𑒼𑒏𑒼𑒏𑒹𑒿 𑒠𑒹𑒐𑒹𑒥𑒰𑒏 𑒕𑒪𑒢𑓂𑒯𑒱 𑒖𑒹 𑒏𑓂𑒨𑒼 𑒄 𑒢𑒯𑒱 𑒏𑒯𑒋 𑒖𑒹 𑒥𑒰𑒣𑒏 𑒑𑒹𑒪𑒰𑒏 𑒥𑒰𑒠 𑒥𑒯𑒱𑒢 𑒣𑒩 𑒡𑓂𑒨𑒰𑒢 𑒢𑒯𑒱 𑒠𑒹𑒪𑒢𑓂𑒯𑒱 𑒏𑒪𑒱𑒞 । 𑒣𑒱𑒞𑒰𑒏 𑒥𑒩𑒐𑒲 𑒡𑒩𑒱 𑒫𑒱𑒫𑒰𑒯𑒏 𑒣𑓂𑒩𑒬𑓂𑒢 𑒅𑒚𑒹𑒥𑒼 𑒏𑒼𑒢𑒰 𑒏𑒩𑒱𑒞𑒟𑒱 । 𑒧𑒳𑒠𑒰 𑒮𑒧𑒨 𑒥𑒱𑒞𑒥𑒰𑒧𑒹 𑒏𑒞𑒹𑒏 𑒠𑒹𑒩𑒲 𑒪𑒑𑒻𑒞 𑒕𑒻𑒏 । 𑒣𑒴𑒩𑒰 𑒑𑒰𑒧𑒏 𑒦𑒼𑒖 𑒏𑓄 𑒏𑒪𑒱𑒞 𑒥𑒳𑒔𑒱𑒨𑒰𑒏 𑒫𑒱𑒫𑒰𑒯𑒏 𑒪𑒹𑒪 𑒫𑒩 𑒞𑒰𑒏𑒋𑒧𑒹 𑒪𑒰𑒑𑒱 𑒑𑒹𑒪𑒰𑒯 । 𑒣𑒩𑒞𑒰𑒣𑒳𑒩𑒏 𑒮𑒦𑒰𑒑𑒰𑒕𑒲𑒧𑒹 𑒑𑒹𑒪𑒰𑒯 𑒧𑒳𑒠𑒰 𑒏𑒼𑒢𑒼 𑒫𑒩 𑒣𑒮𑒱𑒢𑓂𑒢 𑒢𑒯𑒱 𑒣𑒛𑓃𑒪𑒢𑓂𑒯𑒱 𑒖𑒹 𑒥𑒳𑒔𑒱𑒨𑒰𑒏 𑒯𑒹𑒞𑒳 𑒮𑒳𑒨𑒼𑒑𑓂𑒨 𑒯𑒼𑒁𑒋 । 𑒣𑒢𑓂𑒠𑓂𑒩𑒯 𑒠𑒱𑒢𑒏 𑒕𑒳𑒙𑓂𑒙𑒲 𑒥𑒹𑒏𑒰𑒩 𑒑𑒹𑒪𑒢𑓂𑒯𑒱 । 𑒣𑒳𑒢𑓁 𑒏𑒙𑒱𑒯𑒰𑒩 𑒣𑒯𑒳𑒿𑒔𑒱 𑒑𑒹𑒪𑒰𑒯 । 𑒏𑒰𑒩𑓂𑒨𑒏 𑒏𑓂𑒩𑒧𑒧𑒹 𑒑𑒱𑒠𑓂𑒡𑒾𑒩, 𑒥𑒰𑒜𑓃 𑒃𑒞𑓂𑒨𑒰𑒠𑒱 𑒑𑓀𑒑𑒰𑒏 𑒠𑒏𑓂𑒭𑒱𑒝 𑒠𑒱𑒮𑒏 𑒣𑒩𑒱𑒫𑒰𑒩 𑒮𑒦𑒮𑒿 𑒮𑒹𑒯𑒼 𑒣𑒩𑒱𑒔𑒨 𑒦𑒹𑒪𑒢𑓂𑒯𑒱 । 𑒍𑒯𑒱𑒮𑒿 𑒯𑒳𑒢𑒏𑒰 𑒥𑒰𑒜𑓃 𑒢𑒑𑒩𑒏 𑒪𑒑𑒏 𑒑𑒰𑒧𑒏 𑒋𑒏𑒙𑒰 𑒪𑒛𑓃𑒏𑒰𑒏 𑒫𑒱𑒭𑒨𑒧𑒹 𑒣𑒞𑒰 𑒔𑒪𑒪𑒢𑓂𑒯𑒱 𑒖𑒹 𑒑𑒱𑒠𑓂𑒡𑒾𑒩 𑒮𑓂𑒙𑒹𑒙𑒧𑒹 𑒏𑒰𑒩𑓂𑒨 𑒏𑓄 𑒩𑒯𑒪
𑒕𑒪𑒰𑒯 । 𑒔𑒼𑒙𑓂𑒙𑒯𑒱 𑒍 𑒪𑒛𑓃𑒏𑒰𑒮𑒿 𑒦𑒹𑒿𑒙 𑒏𑒩𑒥𑒰𑒏 𑒪𑒹𑒪 𑒑𑒱𑒠𑓂𑒡𑒾𑒩 𑒣𑒯𑒳𑒿𑒔𑒱 𑒑𑒹𑒪𑒰𑒯 । 𑒥𑒰𑒪𑒏 𑒁𑒞𑓂𑒨𑓀𑒞 𑒠𑒱𑒫𑓂𑒨 𑒕𑒪𑒰𑒯 । 𑒣𑒞𑒰 𑒪𑓄 𑒥𑒰𑒜𑓃 𑒣𑒯𑒳𑒿𑒔𑒱 𑒏𑓄 𑒥𑒰𑒪𑒏𑒏 𑒣𑒱𑒞𑒰𑒮𑒿 𑒑𑒣 𑒏𑒹𑒪𑒢𑓂𑒯𑒱 । 𑒣𑓀𑒔𑒏𑒼𑒬𑒲𑒏 𑒏𑒟𑒰 𑒏𑒞𑒥𑒰 𑒠𑒱𑒢𑒏 𑒥𑒰𑒠 𑒥𑒰𑒜𑓃 𑒢𑒑𑒩𑒏 𑒪𑒑𑒏 𑒋𑒯𑒱 𑒏𑓂𑒭𑒹𑒞𑓂𑒩𑒧𑒹 𑒂𑒋𑒪 𑒕𑒪 𑒮𑒹 𑒋𑒯𑒱 𑒏𑒟𑒰𑒏𑒹𑒿 𑒏𑒰𑒙𑒥 𑒏𑒚𑒱𑒢 𑒩𑒯𑒋 । 𑒮𑒦𑒙𑒰 𑒑𑒣𑒬𑒣 𑒏𑓄 𑒣𑒳𑒢𑓁 𑒦𑒩𑒰𑒧𑒧𑒹 𑒮𑒱𑒠𑓂𑒡𑒰𑓀𑒞 𑒏𑒩𑒹𑒢𑒹 𑒧𑒹𑓀𑒯𑒟 𑒣𑒯𑒳𑒿𑒔𑒪𑒰𑒯 । 𑒥𑒴𑒜𑓃- 𑒣𑒳𑒩𑒰𑒢 𑒖𑒹 𑒏𑓂𑒨𑒼 𑒮𑒳𑒢𑒪𑒢𑓂𑒯𑒱 𑒮𑒹 𑒂𑒬𑓂𑒔𑒩𑓂𑒨𑒔𑒏𑒱𑒞 𑒩𑒯𑒱 𑒑𑒹𑒪𑒰𑒯 । 𑒥𑒜𑓃𑒋 𑒣𑒴𑒞 𑒣𑒱𑒞𑒰𑒏 𑒡𑒩𑒧𑒹- 𑒗𑒱𑓀𑒑𑒳𑒩 𑒥𑒰𑒥𑒴 𑒖𑒹𑒢𑒰 𑒏𑒪𑒱𑒞𑒏 𑒮𑒱𑒠𑓂𑒡𑒰𑓀𑒞 𑒏𑒩𑒹𑒢𑒯𑒱 𑒣𑒯𑒳𑒿𑒔𑒪 𑒕𑒪𑒰𑒯 𑒞𑒯𑒱𑒢𑒰 𑒏𑒪𑒱𑒞 𑒏𑒹𑒪𑒢𑓂𑒯𑒱, 𑒫𑒰𑒯…। 𑒏𑒟𑒰 𑒍𑒢𑒰𑒞𑒿 𑒠𑒴𑒩𑒑𑒩 𑒦𑒹𑒪𑒢𑓂𑒯𑒱, 𑒧𑒳𑒠𑒰 𑒏𑒪𑒱𑒞 𑒮𑓂𑒫𑒨𑒧𑓂 𑒢𑒹𑒢𑒹𑒮𑒿 𑒠𑒴𑒩𑒠𑒹𑒬𑒏 𑒥𑒰𑒮𑒲 𑒕𑒪𑒰𑒯, 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒳𑒢𑒏𑒰 𑒮𑒦 𑒔𑒲𑒖𑒏 𑒁𑒢𑒳𑒦𑒫 𑒕𑒪𑒢𑓂𑒯𑒱, 𑒨𑒻𑒯 𑒮𑒼𑒔𑒱 𑒮𑒦 𑒮𑓀𑒞𑒼𑒭 𑒏𑒋𑒪𑒏 । 𑒣𑒴𑒩𑒰 𑒙𑒼𑒪 𑒫𑒱𑒫𑒰𑒯𑒏 𑒞𑒻𑒨𑒰𑒩𑒲𑒧𑒹 𑒪𑒰𑒑𑒱 𑒑𑒹𑒪 । 𑒥𑒳𑒔𑒱𑒨𑒰𑒏𑒹𑒿 𑒏𑒼𑒢𑒼 𑒠𑒱𑒏𑓂𑒏𑒞 𑒢𑒯𑒱 𑒯𑒼𑒋𑒞𑒻𑒏 । 𑒮𑒩𑓂𑒫𑒑𑒳𑒝 𑒮𑓀𑒣𑒢𑓂𑒢 𑒁𑒕𑒱 𑒥𑒳𑒔𑒱𑒨𑒰 । 𑒑𑒲𑒞-𑒢𑒰𑒠 𑒪𑒱𑒁 𑒂𑒏𑒱 𑒮𑒩𑒰𑒨-𑒏𑒙𑒼𑒩𑒰, 𑒠𑒮𑒼 𑒯𑒖𑒰𑒩 𑒧𑒯𑒰𑒠𑒹𑒫 𑒮𑒳𑒑𑒜𑓃 𑒣𑒰𑒞𑒩-𑒣𑒰𑒞𑒩 𑒕𑒢𑒯𑒱𑒧𑒹 𑒥𑒢𑒰 𑒠𑒻𑒞 𑒁𑒕𑒱 । 𑒖𑒰𑒯𑒱 𑒒𑒩𑒧𑒹 𑒖𑒋𑒞 𑒞𑒏𑒩𑒰 𑒔𑒧𑒏𑒰 𑒠𑒹𑒞 ।
𑒫𑒱𑒫𑒰𑒯 𑒫𑒱𑒡𑒱-𑒫𑒱𑒡𑒰𑒢𑒮𑒿 𑒮𑓀𑒣𑒢𑓂𑒢 𑒦𑓄 𑒑𑒹𑒪 । 𑒫𑒩𑒣𑒏𑓂𑒭 𑒮𑓀𑒑𑒯𑒱 𑒠𑓂𑒫𑒱𑒩𑒰𑒑𑒧𑒢𑒏 𑒣𑓂𑒩𑒮𑓂𑒞𑒰𑒫 𑒩𑒰𑒐𑒪𑒢𑓂𑒯𑒱, 𑒧𑒳𑒠𑒰 𑒏𑒪𑒱𑒞 𑒞𑒻𑒨𑒰𑒩 𑒢𑒯𑒱 𑒦𑒹𑒪𑒰𑒯, 𑒞𑒐𑒢 𑒥𑒳𑒔𑒱𑒨𑒰𑒏 𑒯𑒰𑒟𑒏 𑒕𑒰𑒣 𑒪𑓄 𑒏𑓄 𑒫𑒩𑒣𑒏𑓂𑒭𑒏𑒹𑒿 𑒖𑒰𑒋 𑒣𑒛𑓃𑒪𑒢𑓂𑒯𑒱 ।
𑒏𑒪𑒱𑒞𑒏 𑒣𑒞𑓂𑒢𑒲 𑒕𑒪𑒲𑒯 𑒣𑒴𑒩𑓂𑒝 𑒬𑒳𑒠𑓂𑒡𑒰 । 𑒥𑒳𑒔𑒱𑒨𑒰𑒮𑒿 𑒥𑒯𑒱𑒢𑒰𑒣𑒰 𑒕𑒪𑒢𑓂𑒯𑒱 । 𑒥𑒳𑒔𑒱𑒨𑒼 𑒦𑒾𑒖𑒲-𑒦𑒾𑒖𑒲 𑒏𑒯𑒻𑒞 𑒢𑒯𑒱 𑒟𑒏𑒻𑒞 𑒕𑒪𑒲𑒯 । 𑒞𑒹𑒮𑒩 𑒮𑒰𑒪 𑒠𑓂𑒫𑒱𑒩𑒰𑒑𑒧𑒢𑒏 𑒠𑒱𑒢 𑒦𑒹𑒪𑒻𑒏 । 𑒥𑒳𑒔𑒱𑒨𑒰𑒏 𑒮𑓀𑒑 𑒖𑒹 𑒐𑒥𑒰𑒮𑒢𑒲 𑒑𑒹𑒪 𑒕𑒪𑒲𑒯 𑒮𑒹 𑒂𑒥𑒱 𑒏𑓄 𑒑𑓀𑒑𑒰 𑒂 𑒑𑓀𑒑𑒰 𑒣𑒰𑒩𑒏 𑒠𑒵𑒬𑓂𑒨𑒏 𑒫𑒩𑓂𑒝𑒢 𑒏𑒩𑒋 𑒪𑒑𑒪𑒲𑒯 𑒞𑒿 𑒦𑒰𑒅𑒖𑒏 𑒂𑒿𑒐𑒱𑒮𑒿 𑒠𑒯𑒼-𑒥𑒯𑒼 𑒢𑒼𑒩 𑒔𑒳𑒥𑒋 𑒪𑒑𑒪𑒢𑓂𑒯𑒱 । 𑒏𑒪𑒱𑒞𑒮𑒿 𑒏𑒞𑒹𑒏 𑒥𑒹𑒩 𑒣𑒳𑒕𑒪𑒟𑒱𑒢𑓂𑒯 𑒖𑒹 𑒄 𑒥𑒰𑒜𑓃 𑒕𑒻𑒏 𑒏𑒞𑒋 । 𑒮𑒧𑒨𑒏 𑒮𑓀𑒑 𑒮𑒦 𑒏𑒱𑒕𑒳 𑒮𑒰𑒧𑒰𑒢𑓂𑒨 𑒦𑓄 𑒖𑒰𑒃𑒞 𑒁𑒕𑒱 । 𑒥𑒳𑒔𑒱𑒨𑒰 𑒖𑒐𑒢 𑒋𑒏-𑒠𑒴 𑒥𑒹𑒩 𑒁𑒋𑒪𑒟𑒱-𑒑𑒹𑒪𑒟𑒱 𑒞𑒐𑒢 𑒦𑒰𑒅𑒖 𑒂𑒩𑒼 𑒢𑒱𑒬𑓂𑒔𑒱𑒢𑓂𑒞 𑒦𑓄 𑒑𑒹𑒪𑒲𑒯 । 𑒋𑒫𑒧𑓂 𑒏𑓂𑒩𑒧𑒹 𑒏𑒪𑒱𑒞 𑒣𑒳𑒢𑓁 𑒋𑒏𑒰𑒏𑒲 𑒦𑓄 𑒑𑒹𑒪𑒰𑒯 । 𑒤𑒹𑒩 𑒂𑒋𑒪 𑒦𑒴𑒏𑒧𑓂𑒣 । 𑒮𑒢𑓂 𑒔𑒾𑓀𑒞𑒲𑒮𑒏 𑒦𑒴𑒏𑒧𑓂𑒣𑒧𑒹 𑒧𑒯𑒰𑒠𑒹𑒫 𑒣𑒼𑒐𑒩𑒱𑒣𑒩 𑒣𑒞𑓂𑒢𑒲 𑒂 𑒠𑒳𑒯𑒳 𑒣𑒳𑒞𑓂𑒩𑒲 𑒂 𑒋𑒏𑒙𑒰 𑒣𑒳𑒞𑓂𑒩𑒏 𑒮𑓀𑒑 𑒥𑒱𑒞𑒰𑒍𑒪 𑒩𑒰𑒞𑒱𑒏 𑒥𑒰𑒠 𑒣𑒩𑒱𑒫𑒰𑒩 𑒮𑒯𑒱𑒞 𑒏𑒱𑒕𑒳 𑒠𑒱𑒢𑒳𑒏𑒰 𑒪𑒹𑒪 𑒏𑒙𑒱𑒯𑒰𑒩 𑒑𑒹𑒪𑒰𑒯 । 𑒏𑒰𑒩𑒝 𑒕𑒪 𑒧𑒯𑒱𑒢𑒰 𑒦𑒩𑒱 𑒔𑒪𑒪 𑒕𑒼𑒙-𑒕𑒼𑒙 𑒦𑒴𑒏𑓀𑒣𑒏 𑒞𑒩𑓀𑒑 । 𑒧𑒳𑒠𑒰 𑒣𑒞𑓂𑒢𑒲𑒏𑒹𑒿 𑒒𑒩𑒏 𑒣𑒲𑒛𑓃𑒰 𑒮𑒞𑒥𑒋 𑒪𑒑𑒪𑒢𑓂𑒯𑒱 । 𑒒𑒩 𑒞𑒿 𑒦𑒴𑒏𑒧𑓂𑒣𑒧𑒹 𑒜𑒯𑒱 𑒑𑒹𑒪 𑒕𑒪𑒢𑓂𑒯𑒱, 𑒮𑒹 𑒏𑒪𑒱𑒞 𑒦𑒴𑒧𑒱𑒏 𑒍𑒯𑒱 𑒙𑒳𑒏𑒛𑓃𑒰𑒏𑒹𑒿 𑒕𑒼𑒛𑓃𑒱 𑒑𑒰𑒧𑒏 𑒤𑒳𑒪𑒫𑒰𑒩𑒲𑒏 𑒏𑒰𑒞𑒧𑒹 𑒢𑒫 𑒒𑒩𑒏 𑒢𑒱𑒩𑓂𑒧𑒰𑒝 𑒏𑒹𑒪𑒢𑓂𑒯𑒱 । 𑒁𑒣𑒢 𑒣𑒳𑒩𑒰𑒢 𑒛𑒲𑒯 𑒁𑒣𑒢 𑒠𑒱𑒨𑒰𑒠𑒏𑒹𑒿 𑒠𑓄 𑒋𑒯𑒱 𑒢𑒥𑒏𑒰 𑒛𑒲𑒯𑒣𑒩 𑒒𑒩𑒯𑒙 𑒏𑒋𑒪𑒢𑓂𑒯𑒱 । 𑒞𑒏𑒩𑒰 𑒥𑒰𑒠 𑒋𑒏𑒙𑒰 𑒣𑒳𑒞𑓂𑒩 𑒋𑒫𑒧𑓂 𑒋𑒏𑒙𑒰 𑒣𑒳𑒞𑓂𑒩𑒲𑒏 𑒣𑓂𑒩𑒰𑒣𑓂𑒞𑒱 𑒂𑒍𑒩 𑒦𑒹𑒪𑒢𑓂𑒯𑒱 । 𑒣𑒳𑒢𑓁 𑒋𑒏𑒙𑒰 𑒣𑒰𑒩𑒱𑒫𑒰𑒩𑒱𑒏 𑒔𑒏𑓂𑒩𑒏 𑒣𑓂𑒩𑒰𑒩𑓀𑒦 𑒦𑓄 𑒑𑒹𑒪 ।
𑒁𑒣𑒢 𑒥𑒔𑒱𑒨𑒰 𑒮𑒦 𑒮𑒹𑒯𑒼 𑒂𑒥 𑒫𑒱𑒫𑒰𑒯 𑒨𑒼𑒑𑓂𑒨 𑒪𑒰𑒑𑒋 𑒪𑒑𑒪𑒢𑓂𑒯𑒱 । 𑒁𑒣𑒢 𑒥𑒔𑓂𑒔𑒰 𑒞𑒿 𑒮𑒠𑒱𑒐𑒢 𑒥𑒔𑓂𑒔𑒹 𑒪𑒑𑒻𑒞 𑒕𑒻𑒏 𑒧𑒳𑒠𑒰 𑒞𑒹𑒿 𑒏𑒲 । 𑒣𑒯𑒱𑒪 𑒥𑒔𑒱𑒨𑒰𑒏 𑒫𑒱𑒫𑒰𑒯 𑒏𑒕𑒥𑒲 𑒂 𑒠𑒼𑒮𑒩𑒏 𑒐𑒩𑒩𑒐 𑒏𑒩𑒹𑒪𑒐𑒱𑒢𑓂𑒯 । 𑒏𑒕𑒥𑒲𑒏 𑒣𑒩𑒱𑒫𑒰𑒩 𑒮𑒹𑒯𑒼 𑒩𑒰𑒖-𑒠𑒩𑒥𑒰𑒩𑒏 𑒏𑒩𑓂𑒧𑒔𑒰𑒩𑒲 𑒕𑒪𑒰𑒯 । 𑒒𑒼𑒛𑓃𑒰, 𑒧𑒯𑒤𑒰, 𑒔𑒰𑒮-𑒥𑒰𑒮….। 𑒧𑒳𑒠𑒰 𑒥𑒔𑓂𑒔𑒰 𑒯𑒼𑒋𑒥𑒰𑒏 𑒏𑓂𑒩𑒧𑒧𑒹 𑒏𑒪𑒱𑒞𑒏 𑒣𑓂𑒩𑒟𑒧 𑒣𑒳𑒞𑓂𑒩𑒲𑒏 𑒠𑒹𑒯𑒰𑓀𑒞 𑒦𑓄 𑒑𑒹𑒪𑒢𑓂𑒯𑒱 𑒧𑒳𑒠𑒰 𑒍𑒏𑒩 𑒢𑒢𑒏𑒱𑒩𑒥𑒲 𑒥𑒔𑒱 𑒑𑒹𑒪 𑒂 𑒍 𑒧𑒰𑒞𑒵𑒏𑒹 𑒧𑒹 𑒩𑒯𑒋 𑒪𑒰𑒑𑒪 । 𑒧𑒳𑒠𑒰 𑒍𑒯𑒼 𑒣𑒰𑒿𑒔𑒹 𑒫𑒩𑓂𑒭𑒏 𑒯𑒼𑒋𑒞 𑒂𑒏𑒱 𑒋𑒏 𑒠𑒱𑒢 𑒣𑒹𑒙𑒧𑒹 𑒠𑒩𑓂𑒠𑒏 𑒬𑒱𑒏𑒰𑒃𑒞 𑒦𑒹𑒪𑒻𑒏 𑒂 𑒍𑒯𑒼 𑒦𑒑𑒫𑒰𑒢𑒏 𑒒𑒩 𑒧𑒰𑒋𑒏 𑒮𑒹𑒫𑒰𑒧𑒹 𑒔𑒪𑒱 𑒑𑒹𑒪 । 𑒏𑒪𑒱𑒞 𑒖𑒲𑒫𑒢 𑒂 𑒧𑒵𑒞𑓂𑒨𑒳𑒏 𑒋𑒯𑒱 𑒮𑓀𑒑𑓂𑒩𑒰𑒧𑒏𑒹𑒿 𑒠𑒹𑒐𑒻𑒞 𑒩𑒯𑒪𑒰𑒯 । 𑒏𑒯𑒱𑒨𑒼 𑒑𑒰𑒧𑒧𑒹 𑒯𑒻𑒖𑒰𑒏 𑒣𑓂𑒩𑒏𑒼𑒣 𑒣𑒛𑓃𑒋 𑒪𑒰𑒑𑒪 𑒕𑒪 𑒞𑒿 𑒏𑒯𑒱𑒨𑒼 𑒣𑓂𑒪𑒹𑒑 𑒂 𑒏𑒲 𑒏𑒲 ? 𑒋𑒏 𑒑𑒼𑒙𑒰𑒏𑒹𑒿 𑒪𑒼𑒏 𑒖𑒩𑒰 𑒏𑓄 𑒂𑒥𑒋 𑒞𑒿 𑒠𑒼𑒮𑒩 𑒑𑒼𑒙𑒰𑒏 𑒧𑒵𑒞𑓂𑒨𑒳𑒏 𑒮𑒧𑒰𑒔𑒰𑒩 𑒦𑒹𑒙𑒋 । 𑒧𑒳𑒠𑒰 𑒏𑒪𑒱𑒞𑒏 𑒣𑒩𑒱𑒫𑒰𑒩 𑒁𑒏𑓂𑒭𑒳𑒝𑓂𑒝 𑒩𑒯𑒪𑒢𑓂𑒯𑒱।
𑒏𑒪𑒱𑒞𑒏 𑒏𑒙𑒱𑒯𑒰𑒩𑒧𑒹 𑒣𑒠𑒼𑒢𑓂𑒢𑒞𑓂𑒞𑒱 𑒂 𑒣𑓂𑒩𑒞𑒱𑒭𑓂𑒚𑒰 𑒥𑒜𑓃𑒻𑒞 𑒩𑒯𑒪𑒢𑓂𑒯𑒱 । 𑒦𑒰𑒞𑒱𑒖 𑒮𑒦 𑒣𑒴𑒩𑓂𑒫 𑒩𑒴𑒣𑒹𑒝 𑒍𑒞𑒋 𑒩𑒯𑒻𑒞 𑒕𑒪𑒢𑓂𑒯𑒱 । 𑒠𑒳𑒯𑒴 𑒣𑒳𑒞𑓂𑒩 𑒏𑒹𑒖𑒩𑒲𑒫𑒰𑒪 𑒯𑒰𑒄 𑒮𑓂𑒏𑒴𑒪, 𑒗𑓀𑒗𑒰𑒩𑒣𑒳𑒩𑒧𑒹 𑒣𑒜𑓃𑒋 𑒪𑒰𑒑𑒪 𑒕𑒪𑒟𑒱𑒢𑓂𑒯 । 𑒏𑒰𑒪𑒏 𑒧𑓀𑒟𑒩 𑒑𑒞𑒱𑒧𑒹 𑒏𑒐𑒢𑒼 𑒏𑒰𑒪 𑒑𑒞𑒱 𑒂𑒥𑒱 𑒖𑒰𑒃𑒞 𑒁𑒕𑒱 । 𑒁𑒣𑒢 𑒞𑒹𑒮𑒩 𑒣𑒳𑒞𑓂𑒩𑒲𑒏 𑒫𑒱𑒫𑒰𑒯 𑒞𑒧𑒳𑒩𑒱𑒨𑒰 𑒪𑒑 𑒂𑒧𑒰𑒩𑒴𑒣𑒲 𑒑𑒰𑒧𑒧𑒹 𑒏𑒩𑒥𑒰 𑒏𑒋 𑒏𑒪𑒱𑒞 𑒖𑒹𑒢𑒰 𑒢𑒱𑒬𑓂𑒔𑒱𑓀𑒞 𑒦𑓄 𑒑𑒹𑒪𑒰𑒯 । 𑒁𑒣𑒢 𑒣𑒻𑒒 𑒣𑒳𑒞𑓂𑒩𑒏 𑒫𑒱𑒫𑒰𑒯 𑒏𑒩𑒹𑒪𑒢𑓂𑒯𑒱 𑒂 𑒕𑒼𑒙 𑒣𑒳𑒞𑓂𑒩𑒏 𑒁𑒏𑒰𑒠𑒧𑒱𑒏 𑒣𑓂𑒩𑒞𑒱𑒦𑒰𑒏 𑒣𑓂𑒩𑒞𑒱 𑒢𑒱𑒬𑓂𑒔𑒱𑒢𑓂𑒞 𑒦𑒹𑒪𑒰𑒯 । 𑒧𑒳𑒠𑒰 𑒕𑒼𑒙 𑒣𑒳𑒞𑓂𑒩𑒏 𑒁𑓀𑒡𑒫𑒱𑒬𑓂𑒫𑒰𑒮𑒲 𑒯𑒼𑒋𑒥𑒰𑒧𑒹 𑒮𑒹𑒯𑒼 𑒯𑒳𑒢𑒏𑒰 𑒏𑒼𑒢𑒼 𑒮𑓀𑒠𑒹𑒯 𑒢𑒯𑒱 𑒕𑒪𑒢𑓂𑒯𑒱 । 𑒂 𑒋𑒏𑒩 𑒏𑒰𑒩𑒝 𑒕𑒪 𑒖𑒹 𑒋𑒏 𑒠𑒱𑒢 𑒯𑒪𑓂𑒪𑒰 𑒅𑒚𑒪𑒻𑒏, 𑒖𑒹 𑒒𑒢𑒑𑒩 𑒔𑒢𑓂𑒢𑒰-𑒑𑒰𑒕𑒲𑒧𑒹, 𑒖𑒞𑒋 𑒠𑒱𑒢𑒼𑒧𑒹 𑒁𑒢𑓂𑒯𑒰𑒩 𑒩𑒯𑒻𑒞 𑒕𑒻𑒏, 𑒏𑒼𑒢𑒼 𑒑𑒰𑒕𑒏 𑒢𑒲𑒔𑒰𑒿 𑒔𑒰𑒙𑒲 𑒅𑒚𑒻𑒞 𑒕𑒻𑒏 । 𑒞𑒐𑒢 𑒯𑒳𑒢𑒏𑒩 𑒄 𑒣𑒳𑒞𑓂𑒩 𑒔𑒰𑒙𑒲 𑒅𑒚𑒰𑒥𑒋 𑒍𑒞𑒋 𑒣𑒯𑒳𑒿𑒔𑒱 𑒑𑒹𑒪 𑒕𑒪𑒢𑓂𑒯𑒱 । 𑒮𑒹 𑒖𑒐𑒢 𑒂𑒚𑒧 𑒫𑒩𑓂𑒑𑒧𑒹 𑒫𑒱𑒖𑓂𑒘𑒰𑒢 𑒫𑒰 𑒏𑒪𑒰 𑒔𑒳𑒢𑒥𑒰𑒏 𑒥𑒹𑒩 𑒁𑒋𑒪𑒻𑒏, 𑒞𑒐𑒢 𑒣𑒳𑒞𑓂𑒩𑒏 𑒫𑒱𑒖𑓂𑒘𑒰𑒢 𑒫𑒱𑒭𑒨 𑒪𑒹𑒥𑒰𑒏 𑒢𑒱𑒩𑓂𑒝𑒨𑒧𑒹 𑒯𑒰𑒿 𑒧𑒹 𑒯𑒰𑒿 𑒧𑒱𑒪𑒰 𑒠𑒹𑒪𑒐𑒱𑒢𑓂𑒯 𑒏𑒪𑒱𑒞 𑒥𑒰𑒥𑒴 । 𑒏𑒞𑒹𑒏 𑒑𑒼𑒙𑒹 𑒏𑒯𑒪𑒐𑒱𑒢𑓂𑒯 𑒖𑒹 𑒮𑒞𑓂𑒨𑒢𑒰𑒩𑒰𑒨𑒝 𑒥𑒰𑒥𑒴 𑒂 𑒏𑒹-𑒏𑒹 𑒮𑒰𑒃𑓀𑒮 𑒪𑓄 𑒤𑒻𑒪 𑒏𑓄 𑒑𑒹𑒪𑒰𑒯, 𑒥𑒰𑒠𑒧𑒹 𑒣𑒳𑒢𑓁 𑒂𑒩𑓂𑒙𑓂𑒮 𑒫𑒱𑒭𑒨 𑒪𑒹𑒥𑒋 𑒣𑒛𑓃𑒪𑒢𑓂𑒯𑒱 । 𑒧𑒳𑒠𑒰 𑒢𑒢𑓂𑒠 𑒢𑒯𑒱 𑒧𑒰𑒢𑒪𑒟𑒱 । 𑒮𑒰𑒃𑓀𑒮𑒼𑒧𑒹 𑒑𑒝𑒱𑒞 𑒪𑒹𑒪𑒢𑓂𑒯𑒱 । 𑒏𑒪𑒱𑒞 𑒮𑒼𑒔𑒪𑒟𑒱 𑒖𑒹 𑒫𑒱𑒖𑓂𑒘𑒰𑒢 𑒫𑒱𑒭𑒨 𑒣𑒜𑓃𑒱 𑒁𑒠𑒵𑒬𑓂𑒨𑒏 𑒣𑓂𑒩𑒞𑒱 𑒮𑓂𑒢𑒹𑒯𑒧𑒹 𑒢𑒢𑓂𑒠𑒏 𑒩𑒳𑒔𑒱 𑒏𑒧 𑒯𑒹𑒞𑒢𑓂𑒯𑒱 । 𑒣𑒞𑒰 𑒢𑒯𑒱 𑒏𑒱𑒋𑒏 𑒋𑒏𑒩 𑒥𑒰𑒠 𑒏𑒪𑒱𑒞 𑒢𑒱𑒬𑓂𑒔𑒱𑓀𑒞 𑒖𑒏𑒰𑒿 𑒦𑓄 𑒑𑒹𑒪𑒰𑒯 । 𑒏𑒙𑒱𑒯𑒰𑒩𑒮𑒿 𑒋𑒏 𑒥𑒹𑒩 𑒑𑒰𑒧 𑒂𑒋𑒪𑒹 𑒩𑒯𑒟𑒱 । 𑒦𑒼𑒩𑒧𑒹 𑒢𑒱𑒞𑓂𑒨𑒏𑓂𑒩𑒱𑒨𑒰𑒮𑒿 𑒢𑒱𑒫𑒵𑒞𑓂𑒞 𑒦𑓄 𑒏𑒪𑒱𑒞 𑒯𑒰𑒟 𑒧𑒙𑒱𑒨𑒰𑒥𑒋 𑒪𑒹𑒪 𑒔𑒱𑒏𑒢𑒲 𑒧𑒰𑒙𑒱𑒏 𑒜𑓃𑒹𑒩 𑒠𑒱𑒬𑒱 𑒥𑒜𑓃𑒱 𑒩𑒯𑒪 𑒕𑒪𑒰𑒯 𑒂𑒏𑒱 𑒣𑒞𑒰 𑒢𑒯𑒱 𑒏𑒲 𑒦𑒹𑒪𑒢𑓂𑒯𑒱, 𑒯𑒰𑒟𑒏 𑒪𑒼𑒙𑒰 𑒠𑒴𑒩 𑒤𑒹𑒏𑒰 𑒑𑒹𑒪𑒢𑓂𑒯𑒱 । 𑒍 𑒢𑒲𑒔𑒰𑒿 𑒐𑒮𑒱 𑒣𑒛𑓃𑒪𑒰𑒯 । 𑒏𑒢𑒱𑒨𑒰𑒿 𑒠𑒾𑒑𑒪 𑒁𑒋𑒪𑒲𑒯 । 𑒧𑒳𑒠𑒰 𑒖𑒲𑒫𑒢𑒏 𑒐𑒹𑒪 𑒋𑒏 𑒥𑒹𑒩 𑒦𑒹𑒙𑒻𑒕 𑒂 𑒋𑒏𑓂𑒏𑒹 𑒥𑒹𑒩 𑒔𑒪𑒱𑒨𑒼 𑒖𑒰𑒃𑒕 । 𑒢𑒢𑓂𑒠 𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒮𑒰𑒏𑓂𑒭𑒲 𑒕𑒪𑒰𑒯 । 𑒧𑒵𑒞𑓂𑒨𑒳𑒏 𑒄 𑒣𑓂𑒩𑒏𑒰𑒩 𑒯𑒳𑒢𑒏𑒰 𑒪𑒹𑒪 𑒮𑒩𑓂𑒫𑒟𑒰 𑒢𑒫𑒲𑒢 𑒂 𑒮𑒩𑓂𑒫𑒟𑒰 𑒩𑒯𑒮𑓂𑒨𑒧𑒨𑒲 𑒕𑒪 । 𑒁𑒠𑒵𑒬𑓂𑒨𑒏 𑒬𑒏𑓂𑒞𑒱 𑒫𑒱𑒖𑓂𑒘𑒰𑒢𑒏 𑒮𑒩𑓂𑒫𑒼𑒔𑓂𑒔𑒞𑒰𑒏𑒹𑒿 𑒢𑒢𑓂𑒠𑒏 𑒖𑒲𑒫𑒢𑒧𑒹 𑒠𑒥𑒰𑒥𑒋 𑒪𑒰𑒑𑒪।
𑒫𑒵𑒞𑓂𑒞𑒏 𑒑𑒼𑒪𑒰𑒏𑒰𑒩 𑒂𑒏𑒵𑒞𑒱 𑒏𑒹𑓀𑒠𑓂𑒩𑒏 𑒣𑒩𑒱𑒡𑒱𑒧𑒹 𑒒𑒳𑒧𑒻𑒞 𑒋𑒏𑒙𑒰 𑒔𑒏𑓂𑒩 𑒣𑒴𑒩𑒰 𑒏𑒹𑒪𑒏 । 𑒁𑒠𑒵𑒬𑓂𑒨 𑒏𑒹𑓀𑒠𑓂𑒩𑒏 𑒤𑒰𑒿𑒮𑒧𑒹 𑒤𑒿𑒮𑒪 । 𑒢𑒢𑓂𑒠 𑒁𑒣𑒢 𑒨𑒬𑒼𑒠𑒰 𑒧𑒰𑒋𑒏 𑒕𑒞𑓂𑒩𑒕𑒰𑒨𑒰𑒧𑒹 𑒥𑒜𑓃𑒋 𑒪𑒑𑒪𑒰𑒯, 𑒅𑒧𑒩𑒱𑒨𑒼𑒧𑒹 𑒂 𑒣𑒜𑓃𑒰𑒃𑒨𑒼𑒧𑒹 । 𑒁𑒣𑒢 𑒬𑒱𑒏𑓂𑒭𑒏 𑒪𑒼𑒏𑒢𑒱𑒏 𑒣𑓂𑒩𑒱𑒨 𑒣𑒰𑒞𑓂𑒩 𑒦𑓄 𑒑𑒹𑒪𑒰𑒯 𑒢𑒢𑓂𑒠 । 𑒯𑒳𑒢𑒏𑒩 𑒣𑓂𑒩𑒻𑒏𑓂𑒙𑒱𑒏𑒪𑒏 𑒏𑒰𑒣𑒲𑒏 𑒮𑒰𑒤-𑒮𑒳𑒟𑒩𑒰 𑒩𑒴𑒣𑒏 𑒔𑒩𑓂𑒔𑒰 𑒮𑒩𑓂𑒫𑒞𑓂𑒩 𑒬𑒱𑒏𑒏𑓂𑒭𑒯𑒳 𑒫𑒩𑓂𑒑𑒧𑒹 𑒯𑒼𑒧𑒋 𑒪𑒰𑒑𑒪 । 𑒤𑒴𑒪-𑒮𑒢 𑒁𑒏𑓂𑒭𑒩 𑒯𑒳𑒢𑒏𑒩 𑒬𑒰𑒩𑒲𑒩𑒱𑒏 𑒮𑒾𑒢𑓂𑒠𑒩𑓂𑒨𑒮𑒿 𑒧𑒹𑒪 𑒐𑒰𑒃𑒞
𑒕𑒪 ।
𑒋𑒯𑒱 𑒥𑒲𑒔 𑒋𑒏𑒙𑒰 𑒂𑒩 𑒒𑒙𑒢𑒰 𑒒𑒙𑒱𑒞 𑒦𑒹𑒪 । 𑒨𑒬𑒼𑒠𑒰 𑒧𑒰𑒋𑒏 𑒠𑒳𑒯𑒳 𑒣𑒳𑒞𑓂𑒩 𑒦𑒑𑒫𑒞𑓂𑒞𑒲 𑒒𑒩𑒏 𑒮𑒼𑒗𑒰𑒿𑒧𑒹 𑒢𑒲𑒔𑒰𑒿𑒧𑒹 𑒮𑒳𑒞𑒪 𑒕𑒪𑒰𑒯 । 𑒦𑒼𑒩𑒧𑒹 𑒧𑒰𑒋 𑒠𑒹𑒐𑒪𑒢𑓂𑒯𑒱 𑒖𑒹 𑒑𑒯𑒳𑒧𑒢 𑒮𑒰𑒿𑒣 𑒔𑒰𑒩𑒱 𑒙𑒳𑒏𑒛𑓃𑒰 𑒦𑒹𑒪 𑒣𑒛𑓃𑒪 𑒁𑒕𑒱 𑒂 𑒥𑒱𑒖𑓂𑒖𑒲 𑒥𑒔𑓂𑒔𑒰 𑒮𑒦𑒏 𑒧𑒰𑒟 𑒪𑒑 𑒚𑒰𑒜𑓃 𑒣𑒯𑒩𑒰 𑒠𑓄 𑒩𑒯𑒪 𑒁𑒕𑒱 । 𑒣𑓂𑒩𑒰𑒨𑓁 𑒥𑒱𑒖𑓂𑒖𑒲𑒏 𑒧𑒰𑒩𑒱 𑒣𑒛𑓃𑒪𑒻𑒏 𑒑𑒯𑒳𑒧𑒢𑒏𑒹𑒿 𑒂 𑒠𑒳𑒯𑒳 𑒣𑒳𑒞𑓂𑒩 𑒮𑒳𑒩𑒏𑓂𑒭𑒱𑒞 𑒩𑒯𑒪𑒢𑓂𑒯𑒱 𑒨𑒬𑒼𑒠𑒰 𑒧𑒰𑒋𑒏 । 𑒢𑒢𑓂𑒠 𑒋𑒯𑒱 𑒒𑒙𑒢𑒰𑒏 𑒮𑓂𑒧𑒵𑒞𑒱𑒏 𑒮𑓀𑒑 𑒂𑒑𑒴 𑒥𑒜𑓃𑒋 𑒪𑒑𑒪𑒰𑒯 । 𑒥𑒲𑒔𑒧𑒹 𑒥𑒿𑒙𑒫𑒰𑒩𑒰 𑒦𑒹𑒪 । 𑒒𑒩𑒰𑒩𑒲 𑒮𑒦, 𑒢𑒱𑒏𑒯𑒰 𑒐𑒹𑒞 𑒮𑒦 𑒮𑒦𑒙𑒰 𑒠𑒴-𑒠𑒴 𑒙𑒳𑒏𑒛𑓃𑒰 𑒯𑒼𑒧𑒋
𑒪𑒰𑒑𑒪 । 𑒥𑒰𑒯𑒩𑒲 𑒪𑒼𑒏 𑒮𑒦 𑒏𑒯𑒻𑒞 𑒕𑒪 𑒖𑒹 𑒠𑒳𑒢𑒴 𑒦𑒰𑒋𑒏 𑒮𑓀𑒑 𑒁𑒢𑓂𑒨𑒰𑒨 𑒦𑓄 𑒩𑒯𑒪 𑒁𑒕𑒱 । 𑒮𑓂𑒏𑒰𑒪𑒩𑒬𑒱𑒣 𑒣𑓂𑒩𑒰𑒣𑓂𑒞 𑒏𑓄 𑒢𑒢𑓂𑒠 𑒂𑒩.𑒏𑒹.𑒏𑒰𑒪𑒹𑒖 𑒧𑒡𑒳𑒥𑒢𑒲𑒧𑒹 𑒁𑓀𑒞𑒩-𑒮𑓂𑒢𑒰𑒞𑒏 𑒫𑒱𑒖𑓂𑒘𑒰𑒢𑒏 𑒑𑒝𑒱𑒞 𑒬𑒰𑒐𑒰𑒧𑒹 𑒢𑒰𑒧𑒰𑓀𑒏𑒢 𑒪𑒹𑒪𑒢𑓂𑒯𑒱। 𑒬𑒳𑒩𑒴𑒧𑒹 𑒑𑒝𑒱𑒞 𑒥𑒳𑒗𑒥𑒰𑒧𑒹 𑒠𑒱𑒏𑓂𑒏𑒞 𑒦𑒹𑒪𑒢𑓂𑒯𑒱 𑒞𑒿 𑒩𑒙𑒋 𑒪𑒑𑒪𑒰𑒯 । 𑒑𑒝𑒱𑒞𑒏𑒹𑒿 𑒩𑒙𑒥𑒰𑒏 𑒥𑒳𑒠𑓂𑒡𑒱 𑒄 𑒮𑒼𑒔𑒱𑒏𑒹𑒿 𑒪𑒑𑒹𑒪𑒟𑒱 𑒖𑒹 𑒥𑒰𑒠𑒧𑒹 𑒪𑒼𑒏 𑒄 𑒢𑒯𑒱 𑒏𑒯𑒋, 𑒖𑒹 𑒏𑒲 𑒮𑒼𑒔𑒱 𑒏𑓄 𑒫𑒱𑒖𑓂𑒘𑒰𑒢𑒏 𑒔𑒨𑒢 𑒏𑒋𑒪𑒏 । 𑒧𑒳𑒠𑒰 𑒏𑒱𑒕𑒳 𑒠𑒱𑒢𑒏𑒰 𑒥𑒰𑒠 𑒩𑒙𑒻𑒞 𑒏𑓂𑒩𑒧𑒧𑒹 𑒥𑒳𑒗𑒥𑒰𑒧𑒹 𑒮𑒹𑒯𑒼 𑒂𑒥𑒋 𑒪𑒑𑒪𑒢𑓂𑒯𑒱। 𑒑𑒰𑒧𑒏 𑒤𑒳𑒙𑒥𑒰𑒪 𑒧𑒻𑒠𑒰𑒢𑒏 𑒮𑓂𑒧𑒵𑒞𑒱𑒋 𑒬𑒹𑒭 𑒩𑒯𑒪𑒢𑓂𑒯𑒱, 𑒐𑒹𑒪𑒹𑒥𑒰𑒏 𑒁𑒫𑒮𑒩𑒹 𑒢𑒯𑒱 𑒦𑒹𑒙𑒢𑓂𑒯𑒱 । 𑒑𑒝𑒱𑒞𑒏 𑒬𑒱𑒏𑓂𑒭𑒏 𑒞𑒲𑒢 𑒮𑒋 𑒣𑓂𑒩𑒬𑓂𑒢𑒏 𑒮𑒹𑒙 𑒣𑒩𑒲𑒏𑓂𑒭𑒰𑒏 𑒣𑒯𑒱𑒢𑒹 𑒠𑒻𑒞 𑒕𑒪𑒐𑒱𑒢𑓂𑒯 𑒂 𑒏𑒯𑒻𑒞 𑒕𑒪𑒐𑒱𑒢𑓂𑒯 𑒖𑒹, 𑒖𑒹 𑒏𑓂𑒨𑒼 𑒮𑒰𑒚𑒱 𑒣𑓂𑒩𑒞𑒱𑒬𑒞 𑒣𑓂𑒩𑒬𑓂𑒢𑒏 𑒮𑒯𑒲-𑒮𑒯𑒲 𑒅𑒞𑓂𑒞𑒩 𑒥𑒢𑒰 𑒪𑒹𑒞𑒰𑒯 𑒍 𑒣𑓂𑒩𑒟𑒧 𑒬𑓂𑒩𑒹𑒝𑒲𑒧𑒹 𑒢𑒱𑒬𑓂𑒔𑒱𑒞 𑒩𑒴𑒣𑒮𑒿 𑒅𑒞𑓂𑒞𑒲𑒩𑓂𑒝
𑒯𑒼𑒋𑒞𑒰𑒯 । 𑒢𑒢𑓂𑒠 𑒮𑒞𑓂𑒞𑒩𑒱 𑒣𑓂𑒩𑒞𑒱𑒬𑒞 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒞𑒻𑒨𑒰𑒩 𑒏𑓄 𑒬𑒱𑒏𑓂𑒭𑒏𑒏𑒹𑒿 𑒠𑒹𑒐𑒰
𑒠𑒹𑒪𑒐𑒱𑒢𑓂𑒯 । 𑒂𑒬𑒰𑒢𑒳𑒩𑒴𑒣 𑒥𑒰𑒠𑒧𑒹 𑒣𑒩𑒲𑒏𑓂𑒭𑒰𑒏 𑒣𑒩𑒱𑒝𑒰𑒧 𑒁𑒋𑒪𑒰𑒣𑒩 𑒣𑓂𑒩𑒟𑒧 𑒬𑓂𑒩𑒹𑒝𑒲 𑒦𑒹𑒙𑒪𑒢𑓂𑒯𑒱 । 𑓑𑓙𑓕𑓙 𑒧𑒹 𑒃𑓀𑒖𑒲𑒢𑒱𑒨𑒩𑒱𑓀𑒑𑒧𑒹 𑒢𑒰𑒧𑒰𑓀𑒏𑒢𑒏 𑒯𑒹𑒞𑒳 𑒂𑒫𑒹𑒠𑒢 𑒠𑓄 𑒠𑒹𑒪𑒐𑒱𑒢𑓂𑒯 । 𑒁𑓀𑒏𑒏 𑒂𑒡𑒰𑒩 𑒣𑒩 𑒮𑒩𑓂𑒫𑒼𑒔𑓂𑒔 𑒁𑓀𑒏 𑒁𑒋𑒪𑒰 𑒅𑒞𑓂𑒞𑒩 𑒧𑒳𑒖𑒤𑓂𑒤𑒩𑒣𑒳𑒩 𑒃𑓀𑒮𑓂𑒙𑒲𑒙𑓂𑒨𑒴𑒙 𑒂𑒤 𑒙𑒹𑒏𑓂𑒢𑒰𑒪𑒼𑒖𑒲𑒧𑒹 𑒢𑒰𑒧𑒰𑓀𑒏𑒢 𑒪𑓄 𑒪𑒹𑒪𑒟𑒱 । 𑒍𑒯𑒱 𑒮𑒧𑒨 𑒧𑒰𑒞𑓂𑒩 𑒮𑒱𑒫𑒱𑒪 𑒃𑓀𑒖𑒲𑒢𑒱𑒨𑒩𑒱𑓀𑒑 𑒬𑒰𑒐𑒰𑒏 𑒣𑒜𑓃𑒰𑒄 𑒍𑒯𑒱 𑒮𑓀𑒮𑓂𑒟𑒰𑒢𑒧𑒹 𑒯𑒼𑒃𑒞 𑒕𑒪𑒻𑒏, 𑒮𑒹 𑒍𑒯𑒱 𑒬𑒰𑒐𑒰𑒧𑒹 𑒢𑒰𑒧𑒰𑓀𑒏𑒢 𑒪𑓄 𑒡𑒼𑒞𑒲-𑒏𑒳𑒩𑓂𑒞𑓂𑒞𑒰 𑒣𑒯𑒱𑒩𑒱 𑒏𑓄 𑒍𑒞𑒋 𑒣𑒯𑒳𑒿𑒔𑒱 𑒑𑒹𑒪𑒰𑒯 । 𑒣𑓂𑒩𑒼𑒤𑒹𑒮𑒩 𑒠𑒲𑒏𑓂𑒭𑒱𑒞 𑒮𑒰𑒯𑒹𑒥 𑒫𑒩𑓂𑒏𑒬𑒰𑒣𑒏 𑒧𑒬𑒲𑒢 𑒠𑒹𑒐𑒰 𑒏𑒯𑒪𑒐𑒱𑒢𑓂𑒯 𑒖𑒹 𑒋𑒯𑒱𑒧𑒹 𑒡𑒼𑒞𑒲 𑒤𑒿𑒮𑒱 𑒖𑒋𑒞 । 𑒮𑒹 𑒤𑒳𑒪𑒣𑒻𑓀𑒙 𑒂 𑒬𑒩𑓂𑒙 𑒣𑒯𑒱𑒩𑒱 𑒏𑓄 𑒂𑒆 । 𑒠𑒴 𑒙𑒰 𑒤𑒳𑒪𑒣𑒻𑒢𑓂𑒙 𑒂 𑒬𑒩𑓂𑒙 𑒏𑒲𑒢𑒋 𑒣𑒛𑓃𑒪𑒢𑓂𑒯𑒱 𑒢𑒢𑓂𑒠𑒏𑒹𑒿 । 𑒏𑒣𑒛𑓃𑒰 𑒏𑒲𑒢𑒱 𑒮𑒱𑒋𑒥𑒱𑒞𑒟𑒱 𑒞𑒿 𑒜𑓃𑒹𑒩 𑒠𑒱𑒢 𑒪𑒰𑒑𑒱 𑒖𑒋𑒞𑒢𑓂𑒯𑒱 𑒮𑒹 𑒩𑒹𑒛𑒲𑒧𑒹𑒛 𑒏𑒲𑒢𑒋 𑒣𑒛𑓃𑒪𑒢𑓂𑒯𑒱 । 𑒧𑒳𑒠𑒰 𑒑𑒰𑒧 𑒖𑒰𑒟𑒱 𑒞𑒿 𑒑𑒰𑒧𑒮𑒿 𑒠𑒴𑒩 𑒥𑒱𑒠𑒹𑒮𑒩𑒹 𑒮𑓂𑒟𑒰𑒢𑒧𑒹 𑒤𑒳𑒪𑒣𑒻𑒢𑓂𑒙-𑒬𑒩𑓂𑒙 𑒥𑒠𑒪𑒱 𑒏𑓄 𑒡𑒼𑒞𑒲 𑒏𑒳𑒩𑓂𑒞𑓂𑒞𑒰 𑒣𑒯𑒱𑒩𑒱 𑒪𑒻𑒞 𑒕𑒪𑒰𑒯 । 𑒏𑒯𑒱𑒨𑒼 𑒑𑒰𑒧 𑒤𑒳𑒪𑒣𑒻𑓀𑒙 𑒣𑒯𑒱𑒩𑒱 𑒏𑓄 𑒢𑒯𑒱 𑒑𑒹𑒪 𑒕𑒪𑒰𑒯 । 𑒮𑒢𑓂 𑓑𑓙𑓕𑓙 𑒮𑒿 𑓑𑓙𑓖𑓓 𑒡𑒩𑒱 𑒃𑓀𑒖𑒲𑒢𑒱𑒨𑒩𑒱𑓀𑒑𑒏 𑒣𑒜𑓃𑒰𑒃 𑒔𑒪𑒪𑒢𑓂𑒯𑒱 𑒂 𑒞𑒐𑒢 𑒥𑒱𑒯𑒰𑒩 𑒮𑒩𑒏𑒰𑒩𑒧𑒹 𑒃𑓀𑒖𑒲𑒢𑒱𑒨𑒩𑒱𑓀𑒑 𑒁𑒮𑒱𑒮𑒙𑒹𑓀𑒢𑓂𑒙 𑒂 𑒋𑒏 𑒮𑒰𑒪𑒏 𑒥𑒰𑒠 𑓑𑓙𑓖𑓔 𑒮𑒿 𑒮𑒯𑒰𑒨𑒏 𑒁𑒦𑒱𑒨𑒢𑓂𑒞𑒰𑒏 𑒩𑒴𑒣𑒧𑒹 𑒥𑒯𑒰𑒪𑒲 𑒦𑒹𑒪𑒢𑓂𑒯𑒱 । 𑒃𑓀𑒖𑒲𑒢𑒱𑒨𑒩𑒱𑓀𑒑 𑒣𑒜𑓃𑒰𑒃 𑒫𑒱𑒬𑒹𑒭 𑒐𑒩𑓂𑒔 𑒥𑒪𑒰 𑒕𑒪 𑒮𑒹 𑒋𑒯𑒱 𑒬𑒩𑓂𑒞𑓂𑒞𑒢𑒰𑒧𑒰𑒏 𑒮𑓀𑒑 𑒫𑒱𑒫𑒰𑒯 𑒦𑒹𑒪𑒢𑓂𑒯𑒱 𑒖𑒹 𑒣𑒜𑓃𑒰𑒃𑒏 𑒐𑒩𑓂𑒔𑒰 𑒮𑒮𑒳𑒩 𑒅𑒚𑒹𑒟𑒱𑒢𑓂𑒯 । 𑒧𑒳𑒠𑒰 𑒑𑒩𑓂𑒧𑒲 𑒞𑒰𑒞𑒱𑒪𑒧𑒹 𑒋𑒏 𑒧𑒰𑒮 𑒂 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒣𑓀𑒠𑓂𑒩𑒯 𑒠𑒱𑒢𑒏 𑒕𑒳𑒙𑓂𑒙𑒲 𑒏𑒰𑒪𑒹𑒖𑒧𑒹 𑒩𑒯𑒻𑒞 𑒕𑒪𑒻𑒏 𑒮𑒹 𑒋𑒞𑒹𑒏 𑒠𑒱𑒢𑒳𑒏𑒰 𑒣𑒰𑒃 𑒮𑒮𑒳𑒩 𑒏𑒰𑒙𑒱 𑒪𑒻𑒞 𑒕𑒪𑒟𑒱𑒢𑓂𑒯 𑒂 𑒮𑒰𑒪𑒧𑒹 𑒥𑒰𑒩𑒯 𑒧𑒰𑒮𑒏 𑒥𑒠𑒪𑒰 𑒧𑒰𑒞𑓂𑒩 𑒮𑒰𑒜𑓃𑒹 𑒠𑒮 𑒧𑒯𑒱𑒢𑒰𑒏 𑒐𑒩𑓂𑒔𑒰 𑒠𑒻𑒞 𑒩𑒯𑒟𑒱𑒢𑓂𑒯 । 𑒥𑒰𑒠𑒧𑒹 𑒖𑓂𑒨𑒼𑒿 𑒮𑒰𑒮𑒳𑒩𑒏 𑒪𑒼𑒏 𑒏𑒯𑒱𑒨𑒼 𑒄 𑒅𑒣𑒩𑒰𑒑 𑒠𑒻𑒞 𑒕𑒪𑒢𑓂𑒯𑒱 𑒖𑒹 𑒯𑒧𑒯𑒲 𑒮𑒦 𑒃𑓀𑒖𑒲𑒢𑒱𑒨𑒩𑒱𑓀𑒑 𑒏𑒩𑒥𑒹𑒪𑒯𑒳𑒿 𑒁𑒕𑒱 𑒞𑒿 𑒢𑒢𑓂𑒠 𑒮𑒹𑒯𑒼 𑒯𑒿𑒮𑒱 𑒏𑓄 𑒅𑒣𑒩𑓂𑒨𑒳𑒏𑓂𑒞 𑒥𑒰𑒞𑒏 𑒐𑒳𑒪𑒰𑒮𑒰 𑒏𑓄 𑒠𑒻𑒞 𑒕𑒪𑒐𑒱𑒢𑓂𑒯 । 𑒫𑒵𑒞𑓂𑒞𑒏 𑒣𑒩𑒱𑒡𑒱 𑒖𑒹𑒢𑒰 𑒣𑒻𑒒 𑒦𑒹𑒪 𑒖𑒰 𑒩𑒯𑒪 𑒕𑒪 । 𑒏𑒰𑒪𑒏 𑒣𑒩𑒱𑒡𑒱 𑒣𑒯𑒱𑒢𑒹 𑒣𑒴𑒩𑓂𑒝 𑒔𑒏𑓂𑒩 𑒣𑒴𑒩𑒰 𑒏𑒋𑒪𑒏 𑒂 𑒂𑒥 𑒣𑒩𑒱𑒡𑒱𑒏 𑒫𑒱𑒮𑓂𑒞𑒰𑒩 𑒬𑒳𑒩𑒳 𑒦𑓄 𑒑𑒹𑒪 । 𑒠𑒳𑓁𑒐-𑒮𑒳𑒐 𑒂 𑒅𑒞𑓂𑒟𑒰𑒢-𑒣𑒞𑒢𑒏 𑒐𑒱𑒮𑓂𑒮𑒰 ।
𑒮𑓂𑒫𑒞𑓀𑒞𑓂𑒩𑒞𑒰 𑒠𑒱𑒫𑒮𑒏 𑒠𑒱𑒢𑒏 𑒅𑒧𑓀𑒑, 𑒗𑓀𑒛𑒰 𑒪𑓄 𑒏𑓄 𑒮𑓂𑒏𑒴𑒪𑒏 𑒥𑒔𑓂𑒔𑒰𑒏 𑒮𑓀𑒑 𑓑𑓕 𑒁𑒑𑒮𑓂𑒞 𑓑𑓙𑓔𑓗 𑒏𑒹𑒿 𑒒𑒳𑒧𑒻𑒞 𑒕𑒪𑒰𑒯 । 𑒏𑒰𑓀𑒑𑓂𑒩𑒹𑒮𑒏 𑒦𑒏𑓂𑒞𑒱 𑒮𑓀𑒑𑒧𑒹 𑒩𑒯𑒪𑒢𑓂𑒯𑒱 । 𑒧𑒳𑒠𑒰 𑓑𑓙𑓖𑓒 𑒏 𑒔𑒲𑒢𑒲 𑒂𑒏𑓂𑒩𑒧𑒝𑒏 𑒥𑒰𑒠 𑒦𑒰𑒩𑒞𑒲𑒨 𑒮𑒹𑒢𑒰𑒏 𑒣𑒰𑒕𑒴 𑒯𑒙𑒥𑒰𑒏 𑒠𑒳𑓁𑒮𑓂𑒫𑒣𑓂𑒢 । 𑒫𑒰𑒨𑒳𑒮𑒹𑒢𑒰𑒏 𑒅𑒣𑒨𑒼𑒑 𑒢𑒯𑒱 𑒏𑒩𑒥𑒰𑒏 𑒦𑒰𑒩𑒞𑒏 𑒂𑒬𑓂𑒔𑒩𑓂𑒨𑒖𑒢𑒏 𑒢𑒱𑒩𑓂𑒝𑒨𑒏 𑒥𑒰𑒠𑒏 𑒧𑒢𑓁𑒮𑓂𑒟𑒱𑒞𑒱 𑒕𑒪 𑒣𑒪𑒰𑒨𑒢𑒏 𑒂 𑒯𑒰𑒩𑒱𑒏 । 𑒂𑒪 𑒃𑓀𑒛𑒱𑒨𑒰 𑒩𑒹𑒛𑒱𑒨𑒼𑒏 𑒒𑒼𑒭𑒝𑒰 𑒖𑒹 𑒯𑒧𑒩 𑒮𑒹𑒢𑒰 𑒑𑒩𑓂𑒫𑒮𑒿 𑒣𑒰𑒕𑒴 𑒯𑒙𑒱 𑒩𑒯𑒪 𑒁𑒕𑒱 - 𑒮𑒳𑒢𑒱 𑒢𑒢𑓂𑒠𑒏 𑒯𑒵𑒠𑒨 𑒩𑒳𑒏𑒱 𑒮𑒢 𑒖𑒰𑒃𑒢𑓂𑒯𑒱 । 𑒮𑒹 𑒖𑒐𑒢 𑓑𑓙𑓖𑓕 𑒏 𑒨𑒳𑒠𑓂𑒡𑒏 𑒥𑒹𑒩 𑒃𑓀𑒖𑒲𑒢𑒱𑒨𑒩𑒏 𑒦𑒩𑓂𑒞𑓂𑒞𑒲 𑒮𑒹𑒢𑒰𑒧𑒹 𑒏𑒻𑒣𑓂𑒙𑒢𑒏 𑒩𑒴𑒣𑒧𑒹 𑒬𑒳𑒩𑒳 𑒦𑒹𑒪 𑒞𑒐𑒢 𑒢𑒢𑓂𑒠 𑒂 𑒮𑒰𑒯𑒰 𑒮𑒰𑒯𑒹𑒥 𑒂𑒫𑒹𑒠𑒢 𑒠𑓄 𑒠𑒹𑒪𑒐𑒱𑒢𑓂𑒯 । 𑒮𑒰𑒯𑒰 𑒮𑒰𑒯𑒹𑒥𑒏 𑒏𑒢𑒱𑒨𑒰𑒿 𑒞𑒿 𑒏𑒰𑒢𑒋 𑒪𑒑𑒪𑒲𑒯 𑒂 𑒮𑒰𑒯𑒰 𑒮𑒰𑒯𑒹𑒥𑒏𑒹𑒿 𑒩𑒳𑒏𑒱 𑒖𑒰𑒋 𑒣𑒛𑓃𑒪𑒢𑓂𑒯𑒱 । 𑒢𑒢𑓂𑒠𑒏 𑒣𑒞𑓂𑒢𑒲 𑒋𑒏𑒼 𑒥𑒹𑒩 𑒣𑓂𑒩𑒞𑒱𑒩𑒼𑒡 𑒢𑒯𑒱 𑒏𑒋𑒪𑒢𑓂𑒯𑒱 । 𑒧𑒳𑒠𑒰 𑒍𑒖𑒢𑒧𑒹 𑒥𑒹𑒬𑒲 𑒦𑒹𑒪𑒰𑒮𑒿 𑒕𑒿𑒙𑒰 𑒑𑒹𑒪𑒰𑒯 𑒢𑒢𑓂𑒠 । 𑒧𑒮𑒼𑒮𑒱 𑒏𑓄 𑒩𑒯𑒱 𑒑𑒹𑒪𑒰𑒯 । 𑒞𑒏𑒩 𑒥𑒰𑒠 𑒖𑒹 𑒬𑒩𑒲𑒩 𑒒𑒙𑒹𑒥𑒰𑒏 𑒮𑒴𑒩 𑒔𑒜𑓃𑒪𑒢𑓂𑒯𑒱, 𑒮𑒹 𑒥𑒜𑓃𑒱𑒞𑒹 𑒑𑒹𑒪𑒢𑓂𑒯𑒱 । 𑒋𑒏𑒹𑒙𑒰 𑒮𑒣𑒢𑒰 𑒕𑒪𑒢𑓂𑒯𑒱 - 𑒑𑒰𑒧𑒧𑒹 𑒏𑒼𑒚𑒰𑒏 𑒒𑒩 । 𑒮𑒹 𑒮𑒦𑒙𑒰 𑒮𑒩𑓂𑒫𑒹 𑒮𑒦𑒏 𑒢𑒏𑓂𑒬𑒰 𑒆𑒣𑒩 𑒏𑓄 𑒒𑒩𑒏 𑒏𑒳𑒩𑓂𑒮𑒲 𑒠𑒹𑒪𑒢𑓂𑒯𑒱 𑒖𑒹 𑒮𑒛𑓃𑒏𑒧𑒹 𑒒𑒩𑒏 𑒏𑒼𑒢𑒼 𑒦𑒰𑒑 𑒢𑒯𑒱 𑒖𑒰𑒋 । 𑒧𑒏𑒰𑒢𑒏 𑒛𑒱𑒖𑒰𑒃𑒢𑒏 𑒧𑒰𑒞𑓂𑒩 𑒂𑒡𑒹 𑒦𑒰𑒑 𑒣𑒴𑒩𑒰 𑒦𑓄 𑒮𑒏𑒪𑒢𑓂𑒯𑒱 । 𑒖𑒞𑒋-𑒖𑒞𑒋 𑒙𑓂𑒩𑒰𑓀𑒮𑒤𑒩 𑒯𑒼𑒃𑒢𑓂𑒯𑒱 𑒋𑒏𑒙𑒰 𑒢𑒫 𑒁𑒢𑒳𑒦𑒫 𑒦𑒹𑒙𑒢𑓂𑒯𑒱 । 𑒍𑒯𑒱 𑒮𑒧𑒨 𑒏𑒢𑒱𑒨𑒰𑒿𑒏𑒹𑒿 𑒞𑒵𑒞𑒲𑒨 𑒣𑒳𑒩𑒳𑒭𑒏 𑒩𑒴𑒣𑒧𑒹 𑒮𑓀𑒥𑒼𑒡𑒱𑒞 𑒏𑒩𑒥𑒰𑒏 𑒣𑓂𑒩𑒔𑒪𑒢 𑒕𑒪𑒻𑒏, 𑒧𑒳𑒠𑒰 𑒢𑒢𑓂𑒠 𑒠𑓂𑒫𑒱𑒞𑒲𑒨 𑒣𑒳𑒩𑒳𑒭𑒧𑒹 𑒮𑓀𑒥𑒼𑒡𑒢 𑒬𑒳𑒩𑒳 𑒏𑒹𑒪𑒢𑓂𑒯𑒱 । 𑒋𑒏𑒩 𑒂𑒪𑒼𑒔𑒢𑒰 𑒯𑒼𑒋𑒥𑒰𑒏 𑒥𑒠𑒪𑒰 𑒑𑒰𑒧𑒧𑒹 𑒂𑒢𑒼 𑒪𑒼𑒏 𑒮𑒦 𑒄 𑒮𑓀𑒥𑒼𑒡𑒢 𑒁𑒣𑒢𑒰 𑒒𑒩𑒧𑒹 𑒬𑒳𑒩𑒳 𑒏𑒩𑒻𑒞 𑒖𑒰𑒃𑒞 𑒑𑒹𑒪𑒰𑒯 । 𑒮𑓂𑒟𑒰𑒢𑒰𑒢𑓂𑒞𑒩𑒝𑒏 𑒏𑓂𑒩𑒧𑒧𑒹 𑒛𑒹𑒯𑒩𑒲-𑒂𑒢-𑒮𑒼𑒢𑒧𑒹 𑒫𑒱𑒏𑒰𑒮 𑒏𑒰𑒩𑓂𑒨𑒧𑒹 𑒑𑓂𑒩𑒰𑒧𑒲𑒝 𑒂𑒠𑒱𑒫𑒰𑒮𑒲𑒏 𑒣𑒴𑒩𑓂𑒝 𑒮𑒯𑒨𑒼𑒑 𑒦𑒹𑒙𑒪𑒢𑓂𑒯𑒱 । 𑒏𑒯𑒱𑒨𑒼 𑒣𑒰𑒃 𑒠𑒹𑒐𑒱 𑒏𑓄 𑒁𑓀𑒞𑒩𑒰𑒞𑓂𑒧𑒰 𑒢𑒯𑒱 𑒛𑒱𑒑𑒪𑒢𑓂𑒯𑒱 । 𑒖𑒲-𑒖𑒰𑒢𑒮𑒿 𑒖𑒲𑒣 𑒅𑒚𑒰 𑒏𑓄 𑒁𑒣𑒢 𑒏𑒰𑒩𑓂𑒨𑒏𑒹𑒿 𑒣𑒴𑒩𑓂𑒝 𑒏𑒩𑒟𑒱 । 𑒏𑒐𑒢𑒼 𑒖𑒲𑒣 𑒞𑒹𑒖 𑒯𑒼𑒃𑒢𑓂𑒯𑒱 𑒞𑒿 𑒧𑒼𑒢 𑒣𑒛𑓃𑒢𑓂𑒯𑒱 𑒖𑒹 𑒏𑒼𑒢𑒼 𑒥𑒔𑓂𑒔𑒰 𑒢𑒹 𑒣𑒱𑒔𑒰 𑒖𑒰𑒋 । 𑒧𑒳𑒠𑒰 𑒏𑒯𑒱𑒨𑒼 𑒏𑒼𑒢𑒼 𑒠𑒳𑒩𑓂𑒒𑒙𑒢𑒰 𑒢𑒯𑒱 𑒦𑒹𑒪𑒢𑓂𑒯𑒱 । 𑒑𑒰𑒧𑒏 𑒮𑒦 𑒖𑒰𑒞𑒱𑒏 𑒪𑒼𑒏𑒏𑒹𑒿 𑒏𑒞𑒯𑒳 𑒢𑒹 𑒏𑒞𑒯𑒳 𑒧𑒮𑓂𑒙𑒩𑒹 𑒩𑒰𑒪 𑒣𑒩 𑒢𑒼𑒏𑒩𑒲 𑒠𑒹𑒪𑒢𑓂𑒯𑒱 । 𑒮𑓂𑒟𑒰𑒢𑒲𑒨 𑒪𑒼𑒏𑒏𑒹𑒿 𑒮𑒹𑒯𑒼 𑒢𑒼𑒏𑒩𑒲 𑒏𑒩𑒥𑒰𑒏 𑒯𑒹𑒞𑒳 𑒣𑓂𑒩𑒼𑒞𑓂𑒮𑒰𑒯𑒱𑒞 𑒏𑒩𑒻𑒞 𑒕𑒪𑒰𑒯 । 𑒮𑓂𑒟𑒰𑒢𑒲𑒨 𑒑𑒩𑒲𑒥 𑒂𑒠𑒱𑒫𑒰𑒮𑒲 𑒢𑒢𑓂𑒠𑒏𑒹𑒿 𑒠𑒹𑒫𑒞𑒰 𑒥𑒳𑒗𑒻𑒞 𑒕𑒪𑒰𑒯 । 𑒋𑒞𑒯𑒱 𑒠𑒧𑒰𑒏 𑒣𑒯𑒱𑒪 𑒥𑒹𑒩 𑒁𑒙𑒻𑒏 𑒦𑒹𑒪𑒢𑓂𑒯𑒱 𑒢𑒢𑓂𑒠 𑒣𑒩 । 𑒮𑓂𑒟𑒰𑒢𑒲𑒨 𑒫𑒻𑒠𑓂𑒨 𑒠𑒱𑒢-𑒩𑒰𑒞𑒱 𑒋𑒏 𑒏𑓄 𑒖𑓀𑒑𑒪𑒮𑒿 𑒥𑒲𑒙 𑒂𑒢𑒱 𑒏𑓄 𑒠𑒹𑒪𑒏𑒢𑓂𑒯𑒱 । 𑒠𑒧𑒰𑒏 𑒃𑒪𑒰𑒖 𑒋𑒪𑒼𑒣𑒻𑒟𑒲𑒧𑒹 𑒢𑒯𑒱 𑒁𑒕𑒱 𑒧𑒳𑒠𑒰 𑒋𑒯𑒱 𑒥𑒴𑒙𑒲𑒏 𑒋𑒏𑒧𑒰𑒞𑓂𑒩 𑒐𑒼𑒩𑒰𑒏𑒲 𑒮𑒿 𑒁𑒑𑒱𑒪𑒰 𑒏𑒞𑒹𑒏 𑒮𑒰𑒪 𑒡𑒩𑒱 𑒢𑒢𑓂𑒠 𑒠𑒧𑒰𑒮𑒿 𑒠𑒴𑒩 𑒩𑒯𑒪𑒰𑒯 । 𑒮𑒿𑒑𑒲 𑒮𑒦 𑒦𑒼𑒪𑒹𑒢𑒰𑒟 𑒢𑒰𑒧 𑒩𑒰𑒐𑒱 𑒠𑒹𑒪𑒟𑒱𑒢𑓂𑒯 । 𑒏𑒞𑒹𑒏 𑒏𑒧𑒰𑒃-𑒡𑒧𑒰𑒃𑒏 𑒞𑒩𑒲𑒏𑒰 𑒮𑒦 𑒮𑒱𑒐𑒹𑒥𑒰𑒏 𑒣𑓂𑒩𑒨𑒰𑒮 𑒮𑒹𑒯𑒼 𑒏𑒹𑒪𑒐𑒱𑒢𑓂𑒯 । 𑒧𑒳𑒠𑒰 𑒑𑓂𑒩𑒰𑒧𑒲𑒝 𑒖𑒢𑒏 𑒪𑒰𑒔𑒰𑒩𑒲𑒏𑒹𑒿 𑒞𑒞𑒹𑒏 𑒪𑒑𑒮𑒿 𑒠𑒹𑒐𑒢𑒹 𑒕𑒪𑒰𑒯 𑒢𑒢𑓂𑒠 𑒖𑒹 𑒋𑒯𑒱 𑒮𑒦 𑒑𑒣 𑒠𑒱𑒮 𑒡𑓂𑒨𑒰𑒢𑒼 𑒢𑒯𑒱 𑒖𑒰𑒃𑒞 𑒕𑒪𑒢𑓂𑒯𑒱 । 𑒞𑒰𑒯𑒳𑒧𑒹 𑒑𑒩𑒲𑒥𑒲𑒏 𑒥𑒰𑒠𑒼 𑒖𑒹 𑒂𑒣𑒏𑒞𑒰 𑒮𑓂𑒟𑒰𑒢𑒲𑒨 𑒖𑒢𑒮𑒿 𑒦𑒹𑒙𑒻𑒞 𑒕𑒪𑒢𑓂𑒯𑒱, 𑒞𑒏𑒩𑒰 𑒥𑒰𑒠 ? 𑒋𑒯𑒱 𑒥𑒲𑒔 𑒋𑒏 𑒣𑒳𑒞𑓂𑒩𑒲𑒏 𑒣𑓂𑒩𑒰𑒣𑓂𑒞𑒱 𑒮𑒹𑒯𑒼 𑒦𑒹𑒪𑒢𑓂𑒯𑒱 । 𑒠𑒼𑒮𑒩 𑒥𑒹𑒩 𑒣𑒳𑒞𑓂𑒩𑒏 𑒣𑓂𑒩𑒰𑒣𑓂𑒞𑒱 𑒦𑒹𑒪𑒢𑓂𑒯𑒱 । 𑒣𑒳𑒞𑓂𑒩𑒲 𑒧𑒰𑒧𑒰 𑒑𑒰𑒧𑒧𑒹 𑒖𑒢𑓂𑒧 𑒪𑒹𑒪𑒟𑒱𑒢𑓂𑒯 𑒂 𑒣𑒳𑒞𑓂𑒩 𑒁𑒣𑒢 𑒑𑒰𑒧𑒧𑒹 । 𑒥𑒔𑓂𑒔𑒰 𑒮𑒦𑒏 𑒮𑓂𑒟𑒱𑒞𑒣𑓂𑒩𑒖𑓂𑒘 𑒦𑒰𑒫, 𑒤𑒹𑒩 𑒯𑒿𑒮𑒥 𑒤𑒹𑒩 𑒚𑒹𑒯𑒳𑒢𑒱𑒨𑒰...... 𑒥𑒔𑓂𑒔𑒰𑒏 𑒥𑒜𑓃𑒥𑒰𑒏 𑒣𑓂𑒩𑒏𑓂𑒩𑒱𑒨𑒰𑒏 𑒠𑒩𑓂𑒬𑒢 𑒍𑒯𑒱𑒢𑒰 𑒁𑒕𑒱 𑒖𑒹𑒢𑒰 𑒫𑒱𑒬𑓂𑒫𑒏 𑒢𑒱𑒩𑓂𑒧𑒰𑒝 𑒍 𑒍𑒏𑒩 𑒔𑒹𑒞𑒢𑒰𑒏 𑒫𑒱𑒏𑒰𑒮 । 𑒯𑒳𑒢𑒏𑒩 𑒋𑒏𑒙𑒰 𑒦𑒰𑒞𑒱𑒖𑒏 𑒠𑒹𑒯𑒰𑓀𑒞 𑒢𑒹𑒢𑒹𑒧𑒹 𑒦𑓄 𑒑𑒹𑒪 𑒩𑒯𑒢𑓂𑒯𑒱 𑒂 𑒞𑒏𑒩 𑒥𑒰𑒠 𑒋𑒯𑒱 𑒠𑒳𑒢𑒴 𑒥𑒔𑓂𑒔𑒰𑒏 𑒣𑓂𑒩𑒞𑒱 𑒮𑓂𑒟𑒱𑒞𑒣𑓂𑒩𑒖𑓂𑒘𑒞𑒰𑒏 𑒦𑒰𑒫, 𑒮𑒳𑒐𑒧𑒹 𑒮𑒳𑒐𑒲 𑒢𑒯𑒱 𑒂 𑒠𑒳:𑒐𑒧𑒹 𑒠𑒳𑒐𑒲 𑒢𑒯𑒱 𑒏 𑒁𑒫𑒞𑒩𑒝 𑒦𑒹𑒪 𑒢𑒢𑓂𑒠𑒧𑒹 । 𑒢𑒢𑓂𑒠 𑒠𑒱𑒪𑓂𑒪𑒲 𑒏𑒼𑒢𑒼 𑒙𑓂𑒩𑒹𑒢𑒱𑓀𑒑𑒧𑒹 𑒑𑒹𑒪 𑒕𑒪𑒰𑒯 । 𑒋𑒏 𑒩𑒰𑒞𑒱 𑒮𑒣𑒢𑒰 𑒠𑒹𑒐𑒪𑒢𑓂𑒯𑒱 𑒖𑒹 𑒯𑒳𑒢𑒏𑒩 𑒦𑒰𑒞𑒱𑒖 𑒢𑒫𑒲𑒢 𑒑𑒰𑒧𑒧𑒹 𑒤𑒴𑒮𑒏 𑒒𑒩𑒏 𑒍𑒮𑒰𑒩𑒰 𑒣𑒩 𑒥𑒻𑒮𑒪 𑒕𑒟𑒱 । 𑒍 𑒢𑒹𑒢𑒰 𑒖𑒏𑒩𑒰𑒮𑒿 𑒢𑒢𑓂𑒠𑒏𑒹𑒿 𑒥𑒛𑓂𑒛 𑒂𑒣𑒏𑒞𑒰 𑒕𑒪𑒢𑓂𑒯𑒱, 𑒅𑒚𑒱 𑒏𑒋 𑒐𑒹𑒪𑒰𑒃 𑒪𑒹𑒪 𑒖𑒰𑒃𑒞 𑒁𑒕𑒱 । 𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒣𑒹𑒙𑒧𑒹 𑒠𑒩𑓂𑒠𑒏 𑒬𑒱𑒏𑒰𑒃𑒞 𑒏𑒩𑒻𑒞 𑒁𑒕𑒱 । 𑒮𑒦 𑒏𑓂𑒨𑒼 𑒖𑒧𑒰 𑒦𑓄 𑒖𑒰𑒃𑒞 𑒕𑒟𑒱 । 𑒥𑒴𑒜𑓃-𑒣𑒳𑒩𑒰𑒢 𑒁𑒣𑒢-𑒁𑒣𑒢 𑒢𑒳𑒮𑓂𑒐𑒰 𑒠𑒹𑒥𑒋 𑒪𑒑𑒻𑒞 𑒕𑒟𑒱 । 𑒧𑒳𑒠𑒰 𑒏𑒢𑒱𑒋 𑒏𑒰𑒪𑒏 𑒥𑒰𑒠 𑒥𑒔𑓂𑒔𑒰𑒏 𑒧𑒵𑒞𑓂𑒨𑒳 𑒦𑓄 𑒖𑒰𑒃𑒞 𑒁𑒕𑒱 । 𑒢𑒢𑓂𑒠𑒏 𑒂𑒿𑒐𑒱 𑒐𑒳𑒖𑒱 𑒑𑒹𑒪𑒢𑓂𑒯𑒱 । 𑒯𑒳𑒢𑒏𑒰 𑒁𑒣𑒢 𑒥𑒛𑓃𑒏𑒲 𑒥𑒯𑒱𑒢𑒏 𑒥𑒔𑒱𑒨𑒰 𑒧𑒼𑒢 𑒣𑒛𑓃𑒪𑒢𑓂𑒯𑒱 । 𑒋𑒯𑒢𑒹 𑒒𑒙𑒢𑒰 𑒕𑒪 𑒍𑒯𑒼 । 𑒥𑒔𑒱𑒨𑒰𑒏𑒹𑒿 𑒏𑓂𑒨𑒼 𑒥𑒴𑒜𑓃𑒲 𑒣𑒹𑒙 𑒣𑒩 𑒯𑒰𑒟 𑒠𑓄 𑒠𑒹𑒢𑒹 𑒕𑒪 𑒂 𑒍 𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒮𑓀𑒨𑒼𑒑𑒫𑒬 𑒣𑒹𑒙 𑒠𑒩𑓂𑒠𑒮𑒿 𑒏𑒰𑒪 𑒏𑒫𑒪𑒱𑒞 𑒦𑓄 𑒑𑒹𑒪 𑒕𑒪𑒲𑒯 । 𑒢𑒢𑓂𑒠𑒏𑒹𑒿 𑒁𑒠𑒵𑒬𑓂𑒨, 𑒦𑒴𑒞-𑒣𑓂𑒩𑒹𑒞, 𑒩𑒰𑒏𑒬 𑒂 𑒛𑒰𑒃𑒢 𑒖𑒼𑒑𑒱𑒢 𑒋𑒯𑒱 𑒮𑒦𑒣𑒩 𑒁𑒮𑒲𑒧 𑒫𑒱𑒬𑓂𑒫𑒰𑒮 𑒕𑒪𑒢𑓂𑒯𑒱 । 𑒄 𑒮𑒦 𑒮𑒼𑒔𑒱𑒞𑒹 𑒍 𑒖𑒼𑒩-𑒖𑒼𑒩𑒮𑒿 𑒏𑒰𑒢𑒋 𑒪𑒑𑒪𑒰𑒯 । 𑒮𑓀𑒑𑒲 𑒮𑒦 𑒯𑒛𑓃𑒥𑒛𑓃𑒰 𑒏𑓄 𑒅𑒚𑒻𑒞 𑒖𑒰𑒃𑒞 𑒑𑒹𑒪𑒰𑒯 । 𑒖𑒐𑒢 𑒮𑒦 𑒮𑒧𑒰𑒔𑒰𑒩 𑒖𑓂𑒘𑒰𑒞 𑒯𑒼𑒃𑒞 𑒑𑒹𑒪𑒢𑓂𑒯𑒱 𑒞𑒿 𑒏𑒱𑒕𑒳 𑒑𑒼𑒙𑒹 𑒏𑒯𑒪𑒐𑒱𑒢𑓂𑒯 𑒖𑒹 𑒦𑒰𑒞𑒱𑒖𑒏 𑒁𑒅𑒩𑒠𑒰 𑒥𑒜𑓃𑒱 𑒑𑒹𑒪 । 𑒢𑒢𑓂𑒠𑒏 𑒧𑒳𑒿𑒯 𑒪𑒙𑒏𑒪 𑒠𑒹𑒐𑒱 𑒏𑓄 𑒏𑓂𑒨𑒼-𑒏𑓂𑒨𑒼 𑒯𑒳𑒢𑒏 𑒁𑒦𑒱𑒨𑓀𑒞𑒰𑒏 𑒫𑒻𑒖𑓂𑒘𑒰𑒢𑒱𑒏 𑒠𑒵𑒭𑓂𑒙𑒱𑒏𑒼𑒝𑒏𑒹𑒿 𑒧𑒼𑒢 𑒣𑒰𑒛𑓃𑒋
𑒏𑒯𑒪𑒐𑒱𑒢𑓂𑒯 । 𑒧𑒳𑒠𑒰 𑒢𑒢𑓂𑒠𑒏𑒹𑒿 𑒥𑒼𑒪-𑒦𑒩𑒼𑒮 𑒏𑓂𑒨𑒼 𑒢𑒯𑒱 𑒠𑓄 𑒮𑒏𑒪𑒰𑒯 । 𑒢𑒢𑓂𑒠 𑒙𑓂𑒩𑒹𑒢𑒱𑓀𑒑 𑒕𑒼𑒛𑓃𑒱 𑒏𑓄 𑒮𑒣𑒢𑒹𑒏 𑒑𑒣𑒣𑒩 𑒑𑒰𑒧 𑒥𑒱𑒠𑒰 𑒦𑓄 𑒑𑒹𑒪𑒰𑒯 । 𑒞𑒹𑒮𑒩 𑒠𑒱𑒢 𑒑𑒰𑒧 𑒣𑒯𑒳𑒿𑒔𑒪𑒰𑒯 𑒞𑒿 𑒦𑒻𑒨𑒰𑒏𑒹𑒿 𑒏𑒹𑒬 𑒏𑒙𑒹𑒢𑒹 𑒠𑒹𑒐𑒱 𑒏𑓄 𑒮𑒬𑓀𑒏𑒱𑒞 𑒦𑓄 𑒑𑒹𑒪𑒰𑒯 । 𑒑𑒰𑒧𑒏 𑒮𑒲𑒧𑒰𑓀𑒞𑒹𑒮𑒿 𑒖𑒹 𑒏𑓂𑒨𑒼 𑒦𑒹𑒙𑒢𑓂𑒯𑒱 𑒮𑒹 𑒏𑒢𑒹𑒏 𑒠𑒳:𑒐𑒲 𑒮𑓂𑒫𑒩𑒧𑒹 𑒑𑒣 𑒏𑒩𑒢𑓂𑒯𑒱 । 𑒂𑒿𑒑𑒢 𑒣𑒯𑒳𑒿𑒔𑒪𑒰𑒯 𑒞𑒿 𑒧𑒰𑒨 𑒖𑒼𑒩-𑒖𑒼𑒩𑒮𑒿 𑒏𑒰𑒢𑒋 𑒪𑒑𑒪𑒲𑒯 । 𑒮𑒣𑒢𑒰𑒏 𑒮𑒦𑒙𑒰 𑒑𑒣 𑒮𑒞𑓂𑒨 𑒥𑒳𑒗𑒹𑒪𑒢𑓂𑒯𑒱, 𑒁𑒏𑓂𑒭𑒩𑒬𑓁 𑒮𑒞𑓂𑒨 । 𑒦𑒰𑒞𑒱𑒖 𑒯𑒳𑒢𑒏𑒰 𑒏𑒹𑒬 𑒏𑒙𑒰𑒥𑒋 𑒪𑒹𑒪 𑒮𑒯𑒲 𑒮𑒧𑒨 𑒣𑒩 𑒥𑒖𑒰 𑒪𑒹𑒪𑒐𑒱𑒢𑓂𑒯 । 𑒢𑒫𑒲𑒢𑒏 𑒤𑒼𑒙𑒼𑒏 𑒣𑒰𑒕𑒰𑒿𑒧𑒹 𑒁𑓀𑒑𑓂𑒩𑒹𑒖𑒲𑒧𑒹 𑒍𑒏𑒩 𑒖𑒢𑓂𑒧𑒏 𑒂 𑒧𑒵𑒞𑓂𑒨𑒳𑒏 𑒞𑒱𑒟𑒱𑒏 𑒮𑓀𑒑 𑒍𑒏𑒩 𑒞𑒼𑒞𑒩𑒰𑒨𑒪 𑒥𑒼𑒪𑒲𑒧𑒹 𑒏𑒰𑒏𑒰-𑒏𑒏𑒰 𑒏𑒯𑒥𑒰𑒏 𑒥𑒰𑒞 𑒤𑒰𑒅𑓀𑒙𑒹𑒢 𑒣𑒹𑒢𑒏 𑒮𑒱𑒨𑒰𑒯𑒲𑒮𑒿 𑒢𑒢𑓂𑒠 𑒪𑒱𑒐𑒪𑒢𑓂𑒯𑒱 । 𑒏𑒼𑒚𑒰𑒏 𑒒𑒩 𑒥𑒢𑒥𑒰𑒏 𑒣𑒯𑒱𑒢𑒯𑒱 𑒍 𑒔𑒪 𑒑𑒹𑒪𑒰𑒯, 𑒑𑒹𑒪𑒰𑒏 𑒥𑒰𑒠𑒼 𑒧𑒳𑒠𑒰 𑒮𑓂𑒫𑒣𑓂𑒢𑒧𑒹 𑒏𑒰𑒏𑒰𑒏𑒹𑒿 𑒢𑒯𑒏𑒹𑒬𑒏 𑒠𑒱𑒢 𑒥𑒖𑒰 𑒏𑒋 ।
𑒣𑒳𑒞𑓂𑒩𑒲𑒏 𑒖𑒢𑓂𑒧𑒏 𑒥𑒰𑒠 𑒏𑒼𑒚𑒰𑒏 𑒒𑒩𑒼 𑒥𑒢𑒢𑒰𑒋 𑒬𑒳𑒩𑒳 𑒦𑓄 𑒑𑒹𑒪𑒢𑓂𑒯𑒱 । 𑒣𑒳𑒞𑓂𑒩𑒲 𑒖𑒐𑒢 𑒣𑒻𑒒 𑒦𑒹𑒪𑒢𑓂𑒯𑒱 𑒞𑒿 𑒧𑒼𑒢 𑒣𑒰𑒛𑓃𑒥𑒰𑒏 𑒏𑓂𑒩𑒧𑒧𑒹 𑒏𑒯𑒻𑒞 𑒕𑒪𑒲𑒯 𑒖𑒹 𑒒𑒩𑒏 𑒏𑒳𑒩𑓂𑒮𑒲 𑒣𑒛𑓃𑒥𑒰𑒏 𑒪𑒹𑒪 𑒖𑒹 𑒐𑒡𑒰𑒃 𑒐𑒳𑒢𑒪 𑒑𑒹𑒪 𑒕𑒪 𑒮𑒹 𑒥𑒛𑓂𑒛 𑒑𑒿𑒯𑒲𑒩 𑒕𑒪 । 𑒧𑒳𑒠𑒰 𑒣𑒱𑒞𑒰 𑒧𑒼𑒢 𑒣𑒰𑒛𑓃𑒟𑒱𑒢𑓂𑒯 𑒖𑒹 𑒏𑒰𑒏𑒰 𑒁𑒯𑒰𑒿𑒏𑒹𑒿 𑒯𑒰𑒟𑒮𑒿 𑒣𑒏𑒛𑓃𑒱 𑒏𑓄 𑒐𑒡𑒰𑒃𑒧𑒹 𑒣𑒰𑒞 𑒮𑒦 𑒮𑒰𑒤 𑒏𑒩𑒥𑒰𑒏 𑒪𑒹𑒪 𑒢𑒲𑒔𑒰𑒿 𑒏𑓄 𑒠𑒻𑒞 𑒕𑒪𑒰𑒯, 𑒞𑒐𑒢 𑒐𑒡𑒰𑒃 𑒥𑒯𑒳𑒞 𑒑𑒿𑒯𑒲𑒩 𑒏𑒼𑒢𑒰 𑒦𑒹𑒪 । 𑒣𑒳𑒞𑓂𑒩𑒲 𑒥𑒰 𑒏𑒹𑒩 𑒏𑒼𑒩𑒰𑒧𑒹 𑒋𑒏𑒩 𑒮𑒧𑒰𑒡𑒰𑒢𑒏 𑒯𑒹𑒞𑒳 𑒣𑒯𑒳𑒿𑒔𑒱 𑒖𑒰𑒃𑒞 𑒕𑒪𑒲𑒯 𑒖𑒹 𑒐𑒡𑒰𑒃 𑒞𑒿 𑒥𑒯𑒳𑒞 𑒑𑒿𑒯𑒲𑒩 𑒥𑒳𑒗𑒰𑒃𑒞 𑒕𑒪, 𑒞𑒐𑒢 𑒄𑒯𑒼 𑒥𑒰𑒞 𑒮𑒯𑒲 𑒖𑒹 𑒏𑒰𑒏𑒰 𑒯𑒰𑒟𑒹𑒮𑒿 𑒐𑒡𑒰𑒃𑒧𑒹 𑒅𑒞𑒰𑒩𑒱 𑒠𑒻𑒞 𑒕𑒪𑒰𑒯 । 𑒢𑒢𑓂𑒠𑒏 𑒧𑒰𑒋 𑒥𑒔𑓂𑒔𑒰 𑒮𑒦𑒏 𑒥𑒰 𑒦𑓄 𑒑𑒹𑒪𑒲𑒯 । 𑒢𑒢𑓂𑒠𑒏 𑒣𑒳𑒞𑓂𑒩𑒏𑒹𑒿 𑒥𑒰 𑒢𑒢𑓂𑒠𑒏 𑒢𑒢𑓂𑒠 𑒏𑒯𑒻𑒞 𑒕𑒪𑒲𑒯 । 𑒏𑒐𑒢𑒼 𑒑𑒼𑒣𑒰𑒪 𑒞𑒿 𑒏𑒐𑒢𑒼 𑒩𑒰𑒖𑒏𑒳𑒧𑒰𑒩 𑒏𑒯𑒻𑒞 𑒕𑒪𑒲𑒯, 𑒍𑒏𑒩 𑒯𑒿𑒮𑒲, 𑒎𑒿𑒚𑒱𑒨𑒰 𑒏𑒰𑒩𑒲 𑒒𑒢𑒑𑒩 𑒏𑒹𑒬 । 𑒥𑒰 𑒏 𑒏𑒼𑒚𑒰𑒏 𑒒𑒩 𑒥𑒢𑒱 𑒑𑒹𑒪𑒢𑓂𑒯𑒱 𑒞𑒿 𑒣𑒹𑒙𑒏 𑒠𑒩𑓂𑒠 𑒬𑒳𑒩𑒳 𑒦𑒹𑒪𑒢𑓂𑒯𑒱 । 𑒧𑒳𑒠𑒰 𑒢𑒢𑓂𑒠 𑒋𑒯𑒱 𑒥𑒹𑒩 𑒁𑒣𑒢 𑒒𑒩𑒏 𑒣𑒹𑒙𑒏 𑒠𑒩𑓂𑒠𑒏 𑒠𑒴 𑒙𑒰 𑒧𑒵𑒞𑓂𑒨𑒳𑒏𑒹𑒿 𑒁𑒠𑒵𑒬𑓂𑒨𑒏 𑒢𑒱𑒩𑓂𑒠𑒹𑒬𑒣𑒩 𑒯𑒼𑒃𑒞 𑒠𑒹𑒐𑒪𑒰𑒏 𑒅𑒞𑓂𑒞𑒩 𑒧𑒰𑒋𑒏𑒹𑒿 𑒃𑒪𑒰𑒖𑒏 𑒯𑒹𑒞𑒳 𑒏𑒻𑒏 𑒚𑒰𑒧, 𑒋𑒪𑒼𑒣𑒻𑒟𑒱𑒏 𑒛𑒰𑒏𑓂𑒙𑒩𑒏 𑒪𑒑 𑒣𑒻𑒒-𑒣𑒻𑒒 𑒢𑒑𑒩𑒧𑒹, 𑒪𑓄 𑒑𑒹𑒪𑒰𑒯 । 𑒛𑒰𑒨𑒑𑒢𑒼𑒮 𑒦𑒹𑒪𑒢𑓂𑒯𑒱 𑒏𑒻𑓀𑒮𑒩 𑒢𑒰𑒧𑒏 𑒠𑒳:𑒐𑒠𑒰𑒨𑒲 𑒩𑒼𑒑 । 𑒋𑒯𑒱 𑒥𑒲𑒧𑒰𑒩𑒲𑒏 𑒃𑒪𑒰𑒖 𑒩𑒼𑒑𑒼𑒮𑒿 𑒥𑒹𑒬𑒲 𑒠𑒳𑓁𑒐𑒠𑒰𑒨𑒲 𑒕𑒪 । 𑒩𑒹𑒛𑒱𑒨𑒧𑒮𑒿 𑒙𑓂𑒨𑒴𑒧𑒩𑒏𑒹𑒿
𑒖𑒩𑒹𑒢𑒰𑒃 । 𑒥𑒰 𑒙𑒴𑒙𑒱 𑒑𑒹𑒪𑒲𑒯 । 𑒣𑒙𑒢𑒹𑒧𑒹 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒢𑓂𑒯𑒱 । 𑒍𑒞𑒯𑒱 𑒠𑒰𑒯 𑒮𑓀𑒮𑓂𑒏𑒰𑒩 𑒑𑓀𑒑𑒰-𑒞𑒙 𑒣𑒩 𑒦𑒹𑒪𑒢𑓂𑒯𑒱 𑒏𑒰𑒩𑒝 𑒍𑒞𑒋 𑒧𑒰𑒢𑓂𑒨𑒞𑒰 𑒕𑒪 𑒖𑒹 𑒑𑓀𑒑𑒰 𑒞𑒙𑒣𑒩 𑒑𑒰𑒋𑒏 𑒥𑒼𑒪𑒲 𑒖𑒞𑒹𑒏 𑒠𑒴𑒩 𑒡𑒩𑒱 𑒮𑒳𑒢𑒰𑒃 𑒣𑒛𑓃𑒻𑒞 𑒁𑒕𑒱 𑒞𑒞𑒹𑒏 𑒠𑒴𑒩 𑒧𑒑𑒯𑒏 𑒏𑓂𑒭𑒹𑒞𑓂𑒩 𑒢𑒯𑒱 𑒧𑒰𑒢𑒪 𑒖𑒰𑒃𑒞 𑒁𑒕𑒱 । 𑒞𑒠𑓀𑒞𑒩 𑒬𑓂𑒩𑒰𑒠𑓂𑒡 𑒏𑒩𑓂𑒧 𑒑𑒰𑒧𑒧𑒹 𑒦𑒹𑒪 । 𑒥𑒰 𑒔𑒪𑒱 𑒑𑒹𑒪𑒲𑒯, 𑒢𑒢𑓂𑒠𑒏 𑒠𑓂𑒫𑒱𑒞𑒲𑒨 𑒣𑒳𑒞𑓂𑒩𑒏 𑒖𑒢𑓂𑒧𑒏 𑒣𑒯𑒱𑒢𑒯𑒱 । 𑒧𑒳𑒠𑒰 𑒥𑒰 𑒏 𑒔𑒩𑒔𑒰 𑒒𑒩𑒧𑒹 𑒯𑒼𑒃𑒞𑒹 𑒩𑒯𑒪 । 𑒥𑒰 𑒏𑒹𑒩 𑒤𑒼𑒙𑒼 𑒥𑒰 𑒏𑒹𑒩 𑒢𑒰𑒞𑒱 𑒮𑒦𑒏 𑒣𑓂𑒩𑒹𑒩𑒝𑒰 𑒬𑓂𑒩𑒼𑒞 𑒥𑒢𑒪 𑒩𑒯𑒪 । 𑒖𑒹 𑒮𑒣𑒹𑒞𑒰𑒏 𑒑𑒰𑒕 𑒥𑒰 𑒏𑒹𑒩 𑒬𑓂𑒩𑒰𑒠𑓂𑒡𑒧𑒹 𑒅𑒮𑒩𑒑𑒪 𑒑𑒹𑒪 𑒕𑒪 𑒞𑒏𑒩 𑒂𑒧 𑒯𑒳𑒢𑒏𑒩 𑒢𑒰𑒞𑒱-𑒢𑒰𑒞𑒱𑒢 𑒢𑒯𑒱 𑒐𑒰𑒃𑒞 𑒕𑒪𑒢𑓂𑒯𑒱 । 𑒖𑒹 𑒂𑒧 𑒐𑒮𑒻𑒞 𑒕𑒪 𑒮𑒹 𑒥𑒰𑒥𑒰𑒏 𑒮𑒰𑒩𑒰 𑒣𑒩 𑒩𑒰𑒐𑒱 𑒠𑒹𑒪 𑒖𑒰𑒃𑒞 𑒕𑒪 । 𑒑𑒼𑒠𑒰𑒢 𑒂 𑒫𑒻𑒞𑒩𑒝𑒲 𑒣𑒰𑒩 𑒏𑒩𑒹𑒥𑒰𑒏 𑒫𑒱𑒡𑒱𑒧𑒹 𑒖𑒹 𑒑𑒰𑒋𑒏𑒹𑒿 𑒠𑒰𑒑𑒪 𑒑𑒹𑒪𑒻𑒏 𑒞𑒏𑒩𑒰 𑒠𑒹𑒐𑒱 𑒥𑒰 𑒏𑒹𑒩 𑒠𑒳𑒯𑒳 𑒣𑒳𑒞𑓂𑒩 𑒣𑓂𑒩𑒝 𑒪𑒹𑒪𑒢𑓂𑒯𑒱 𑒖𑒹 𑒂𑒥 𑒄 𑒏𑒰𑒖 𑒦𑒫𑒱𑒭𑓂𑒨𑒧𑒹 𑒏𑒯𑒱𑒨𑒼 𑒢𑒯𑒱 𑒏𑒋𑒪 𑒖𑒋𑒞 । 𑒁𑒣𑒢 𑒡𑒻𑒩𑓂𑒨𑒮𑒿 𑒧𑒵𑒞𑓂𑒨𑒳𑒮𑒿 𑒣𑒯𑒱𑒢𑒹 𑒥𑒰 𑒁𑒣𑒢 𑒣𑒩𑒱𑒫𑒰𑒩𑒏𑒹𑒿 𑒣𑒳𑒢𑓁 𑒁𑒣𑒢 𑒣𑒴𑒩𑓂𑒫 𑒣𑓂𑒩𑒞𑒱𑒭𑓂𑒚𑒰 𑒂 𑒮𑒩𑒮𑓂𑒫𑒞𑒲𑒏 𑒦𑒏𑓂𑒞𑒏 𑒩𑒴𑒣𑒧𑒹 𑒣𑓂𑒩𑒞𑒱𑒭𑓂𑒚𑒱𑒞 𑒏𑒩𑒥𑒰𑒧𑒹 𑒮𑒏𑓂𑒭𑒧 𑒦𑒹𑒪𑒲𑒯 ।
𑒧𑒵𑒞𑓂𑒨𑒳𑒮𑒿 𑒣𑒯𑒱𑒢𑒹 𑒥𑒳𑒔𑒱𑒨𑒰 𑒮𑒹𑒯𑒼 𑒥𑒰𑒜𑓃𑒮𑒿 𑒁𑒣𑒢 𑒦𑒾𑒖𑒲𑒏𑒹𑒿 𑒦𑒹𑓀𑒙 𑒏𑒩𑒋 𑒪𑒹𑒪 𑒣𑒙𑒢𑒰 𑒁𑒋𑒪𑒲𑒯 । 𑒠𑒳𑒢𑒴 𑒢𑒢𑒠𑒱 𑒂 𑒦𑒾𑒖𑒲 𑒣𑒳𑒩𑒰𑒢-𑒣𑒳𑒩𑒰𑒢 𑒑𑒣𑒬𑒣𑒧𑒹 𑒁𑒣𑒢𑒰- 𑒁𑒣𑒢𑒰𑒏𑒹𑒿 𑒥𑒱𑒮𑒩𑒥𑒻𑒞 𑒑𑒹𑒪𑒲𑒯 । 𑒦𑒾𑒖𑒲 𑒦𑓄 𑒑𑒹𑒪 𑒕𑒪𑒲𑒯 𑒥𑒔𑓂𑒔𑒰 𑒮𑒦𑒏 𑒥𑒰 𑒂 𑒢𑒢𑒠𑒱 𑒦𑓄 𑒑𑒹𑒪 𑒕𑒪𑒲𑒯 𑒥𑒔𑓂𑒔𑒰 𑒮𑒦𑒏 𑒥𑒳𑒜𑓃𑒱𑒨𑒰 𑒠𑒲𑒠𑒲 । 𑒥𑒳𑒜𑒱𑒨𑒰 𑒠𑒲𑒠𑒲𑒏 𑒐𑒱𑒮𑓂𑒮𑒰 𑒥𑒔𑓂𑒔𑒰 𑒮𑒦𑒏 𑒧𑒡𑓂𑒨 𑒥𑒛𑓂𑒛 𑒪𑒼𑒏𑒣𑓂𑒩𑒱𑒨 𑒦𑓄 𑒑𑒹𑒪 𑒕𑒪 । 𑒥𑒵𑒯𑒞𑓂𑒏𑒟𑒰𑒏 𑒐𑒱𑒮𑓂𑒮𑒰 𑒮𑒢 𑒢𑒧𑒑𑒩-𑒏𑒻𑒏 𑒩𑒰𑒞𑒱𑒧𑒹 𑒐𑒞𑒧 𑒯𑒼𑒁𑒋𑒥𑒪𑒰 । 𑒐𑒱𑒮𑓂𑒮𑒰 𑒮𑒳𑒢𑒥𑒰𑒏 𑒏𑓂𑒩𑒧𑒧𑒹 𑒋𑒏 𑒥𑒔𑓂𑒔𑒰 𑒮𑒳𑒞𑒱 𑒖𑒰𑒃𑒞 𑒕𑒪, 𑒤𑒹𑒩 𑒍𑒯𑒱𑒮𑒿 𑒣𑒻𑒒 𑒥𑒔𑓂𑒔𑒰 𑒮𑒳𑒞𑒻𑒞 𑒩𑒯𑒋 𑒂 𑒮𑒦𑒮𑒿 𑒣𑒰𑒕𑒰𑒿 𑒮𑒦𑒮𑒿 𑒣𑒻𑒒 𑒥𑒔𑓂𑒔𑒰 𑒮𑒳𑒞𑒻𑒞 𑒕𑒪 । 𑒁𑒑𑒱𑒪𑒰 𑒩𑒰𑒞𑒱 𑒧𑒰𑒩𑒱 𑒬𑒳𑒩𑒳, 𑒮𑒦𑒮𑒿 𑒣𑒻𑒒 𑒥𑒔𑓂𑒔𑒰 𑒏𑒯𑒢𑓂𑒯𑒱 𑒖𑒹 𑒖𑒞𑒋 𑒮𑒿 𑒐𑒞𑒧 𑒏𑒹𑒪𑒯𑒳𑒿 𑒞𑒞𑒋 𑒮𑒿 𑒬𑒳𑒩𑒳 𑒏𑒩𑒴 । 𑒄 𑒮𑒦 𑒣𑒯𑒱𑒢𑒹 𑒮𑒳𑒞𑒱 𑒑𑒹𑒪𑒟𑒱 𑒞𑒿 𑒄 𑒮𑒦 𑒁𑒣𑒢 𑒥𑒳𑒗𑒟𑒳 । 𑒧𑒳𑒠𑒰 𑒥𑒳𑒜𑓃𑒱𑒨𑒼 𑒠𑒲𑒠𑒲 𑒏𑒧 𑒢𑒯𑒱 𑒕𑒪𑒲𑒯 । 𑒁𑒣𑒢 𑒐𑒱𑒮𑓂𑒮𑒰 𑒏𑒢𑒹𑒏 𑒂𑒍𑒩 𑒂𑒑𑒴𑒮𑒿 𑒬𑒳𑒩𑒴 𑒏𑒩𑒻𑒞 𑒕𑒪𑒲𑒯 । 𑒖𑒐𑒢 𑒮𑒦𑒮𑒿 𑒣𑒻𑒒 𑒥𑒔𑓂𑒔𑒰 𑒏𑒯𑒋 𑒖𑒹 𑒋𑒏𑒩 𑒣𑒯𑒱𑒢𑒹𑒏 𑒐𑒱𑒮𑓂𑒮𑒰 𑒯𑒧 𑒏𑒯𑒰𑒿 𑒮𑒳𑒢𑒪𑒯𑒳𑒿, 𑒞𑒿 𑒥𑒳𑒜𑓃𑒱𑒨𑒰 𑒠𑒲𑒠𑒲 𑒏𑒯𑒟𑒱𑒢𑓂𑒯 𑒖𑒹 𑒯𑒧 𑒥𑒞𑒰𑒯𑒱 𑒖𑒏𑒰𑒿 𑒐𑒱𑒮𑓂𑒮𑒰 𑒏𑒯𑒱𑒞𑒹 𑒩𑒯𑒱 𑒑𑒹𑒪𑒯𑒳𑒿 𑒂 𑒁𑒯𑒴𑒿 𑒮𑒳𑒞𑒱 𑒑𑒹𑒪
𑒕𑒪𑒯𑒳𑒿 । 𑒞𑒐𑒢 𑒯𑒧 𑒐𑒱𑒮𑓂𑒮𑒰 𑒏𑒯𑒥 𑒥𑒢𑓂𑒠 𑒏𑒋 𑒠𑒹𑒪𑒯𑒳𑒿 । 𑒞𑒐𑒢 𑒢𑒱𑒩𑓂𑒝𑒨 𑒦𑒹𑒪 𑒖𑒹 𑒖𑒞𑒋𑒮𑒿 𑒮𑒦𑒮𑒿 𑒕𑒼𑒙 𑒥𑒔𑓂𑒔𑒰 𑒔𑒰𑒯𑒻𑒞 𑒁𑒕𑒱, 𑒞𑒞𑒯𑒱𑒮𑒿 𑒐𑒱𑒮𑓂𑒮𑒰 𑒬𑒳𑒩𑒳 𑒏𑒋𑒪 𑒖𑒰𑒋 ।
𑒥𑒛𑓃𑒏𑒰 𑒏𑒼𑒪𑒰 𑒥𑒪𑒰 𑒐𑒹𑒞𑒧𑒹 𑒢𑒢𑓂𑒠 𑒥𑒼𑒩𑒱𑓀𑒑 𑒑𑒩𑒥𑒹𑒪𑒢𑓂𑒯𑒱 𑒖𑒰𑒯𑒱𑒮𑒿 𑒣𑒰𑒢𑒱𑒏 𑒪𑒹𑒪 𑒪𑒪𑒰𑒋𑒪 𑒄 𑒥𑒰𑒡 𑒮𑒱𑓀𑒔𑒱𑒞 𑒦𑓄 𑒖𑒰𑒋 । 𑒧𑒳𑒠𑒰 𑒏𑒞𑒹𑒏𑒼 𑒠𑒱𑒢𑒳𑒏𑒰 𑒖𑒼𑒢 𑒧𑒖𑒠𑒴𑒩- 𑒧𑒱𑒮𑓂𑒞𑓂𑒩𑒲-𑒏𑒰𑒩𑒲𑒑𑒩 𑒮𑒦𑒏 𑒣𑒩𑒱𑒬𑓂𑒩𑒧𑒏 𑒥𑒰𑒠 𑒄 𑒣𑒞𑒰 𑒪𑒰𑒑𑒪 𑒖𑒹 𑒢𑒲𑒔𑒰𑒿𑒧𑒹 𑒣𑒰𑒢𑒱𑒏 𑒁𑒦𑒰𑒫 𑒩𑒯𑒋 । 𑒪𑒹𑒋𑒩 𑒢𑒯𑒱 𑒦𑒹𑒙𑒥𑒰𑒏 𑒏𑒰𑒩𑒝𑒮𑒿 𑒣𑒰𑒃𑒣 𑒐𑒹𑒞𑒹𑒧𑒹 𑒪𑒰𑒑𑒪 𑒩𑒯𑒪 𑒂 𑒮𑒳𑒐𑒰𑒋𑒪 𑒥𑒱𑒢 𑒣𑒰𑒢𑒱𑒏 𑒍𑒞𑒯𑒱 𑒑𑒰𑒛𑓃𑒪 𑒩𑒯𑒪 । 𑒥𑒔𑓂𑒔𑒰 𑒮𑒦𑒏 𑒪𑒹𑒪 𑒄 𑒐𑒹𑒞 𑒥𑒼𑒩𑒱𑓀𑒑 𑒥𑒪𑒰 𑒐𑒹𑒞𑒏 𑒢𑒰𑒧𑒮𑒿 𑒣𑓂𑒩𑒮𑒱𑒠𑓂𑒡
𑒦𑒹𑒪 । 𑒥𑒰𑒠𑒧𑒹 𑒍𑒯𑒱 𑒑𑒰𑒧𑒧𑒹 𑒮𑒩𑒏𑒰𑒩𑒲 𑒥𑒼𑒩𑒱𑓀𑒑 𑒑𑒰𑒧𑒧𑒹 𑒪𑒑𑒥𑒰𑒏 𑒒𑒼𑒭𑒢𑒰 𑒦𑒹𑒪 । 𑒧𑒳𑒠𑒰 𑒢𑒢𑓂𑒠𑒏 𑒦𑒻𑒨𑒰𑒏𑒹𑒿 𑒣𑒞𑒰 𑒪𑒑𑒪𑒢𑓂𑒯𑒱 𑒖𑒹 𑒄 𑒥𑒼𑒩𑒱𑓀𑒑 𑒍𑒯𑒱 𑒣𑒰𑒢𑒱 𑒫𑒱𑒯𑒲𑒢 𑒥𑒰𑒡𑒧𑒹 𑒢𑒯𑒱 𑒑𑒛𑓃𑒰𑒋𑒞 𑒫𑒩𑒢𑓂 𑒍𑒯𑒱 𑒥𑒰𑒡𑒧𑒹 𑒑𑒛𑓃𑒰𑒋𑒞 𑒖𑒰𑒯𑒱𑒧𑒹 𑒥𑒰𑒩𑒯𑒼𑒧𑒰𑒮 𑒣𑒰𑒢𑒱 𑒪𑒰𑒑𑒪 𑒩𑒯𑒻𑒞 𑒁𑒕𑒱 । 𑒍 𑒏𑒱𑒕𑒳 𑒑𑒼𑒙𑒹𑒏𑒹𑒿 𑒪𑓄 𑒏𑓄 𑒣𑒙𑒢𑒰 𑒣𑒯𑒳𑒿𑒔𑒱 𑒧𑒳𑒐𑓂𑒨𑒧𑓀𑒞𑓂𑒩𑒲𑒏𑒹𑒿 𑒂𑒫𑒹𑒠𑒢 𑒠𑒹𑒪𑒢𑓂𑒯𑒱 । 𑒞𑒐𑒢 𑒖𑒰 𑒏𑓄 𑒍𑒯𑒱 𑒮𑒳𑒐𑒰𑒋𑒪 𑒥𑒰𑒡𑒏 𑒖𑒲𑒩𑓂𑒝𑒼𑒠𑓂𑒡𑒰𑒩 𑒦𑒹𑒪 । 𑒮𑒰𑒞 𑒯𑒰𑒟𑒏 𑒅𑒖𑓂𑒖𑒩 𑒁𑓀𑒑𑓂𑒩𑒹𑒖 𑒃𑓀𑒖𑒲𑒢𑒱𑒨𑒩 𑒏𑒼𑒢-𑒏𑒼𑒢 𑒧𑒬𑒲𑒢 𑒪𑓄 𑒏𑓄 𑒂𑒋𑒪 𑒂 𑒠𑒳𑒃𑒨𑒹 𑒠𑒱𑒢𑒧𑒹 𑒥𑒼𑒩𑒱𑓀𑒑 𑒑𑒰𑒩𑒱 𑒏𑓄 𑒔𑒪𑒱 𑒑𑒹𑒪 । 𑒧𑒳𑒠𑒰 𑒥𑒰𑒠𑒧𑒹 𑒏𑓂𑒨𑒼 𑒏𑒯𑒪𑒢𑓂𑒯𑒱 𑒖𑒹 𑒍 𑒁𑒧𑒹𑒩𑒱𑒏𑒢 𑒕𑒪 𑒂 𑒏𑒰𑒩𑒝 𑒮𑒹𑒯𑒼 𑒠𑒹𑒪𑒢𑓂𑒯𑒱 𑒖𑒹 𑒮𑒦𑒙𑒰 𑒅𑒖𑓂𑒖𑒩 𑒪𑒼𑒏 𑒁𑓀𑒑𑓂𑒩𑒹𑒖 𑒯𑒼𑒁𑒋 𑒮𑒹 𑒖𑒩𑒴𑒩𑒲 𑒢𑒯𑒱 । 𑒤𑒹𑒩 𑒏𑒧𑒪𑒰 𑒥𑒪𑒰𑒢𑒏 𑒠𑒳𑒢𑒳 𑒏𑒰𑒞 𑒕𑒯𑒩𑒏 𑒢𑒱𑒩𑓂𑒧𑒰𑒝 𑒦𑒹𑒪 । 𑒏𑒱𑒕𑒳 𑒠𑒱𑒢 𑒡𑒩𑒱 𑒚𑒲𑒏 𑒩𑒯𑒪 𑒧𑒳𑒠𑒰 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒮𑓂𑒟𑒱𑒞𑒱 𑒄 𑒦𑒹𑒪 𑒖𑒹 𑒠𑒳𑒢𑒳 𑒕𑒯𑒩𑒏 𑒥𑒲𑒔𑒧𑒹 𑒥𑒰𑒪𑒳 𑒦𑒩𑒻𑒞 𑒑𑒹𑒪 𑒂 𑒖𑒞𑒹𑒏 𑒕𑒯𑒩𑒏𑒹𑒿 𑒆𑒿𑒔 𑒏𑒩𑒴 𑒞𑒞𑒹𑒏 𑒏𑒧 । 𑒗𑓀𑒗𑒰𑒩𑒣𑒳𑒩 𑒣𑒳𑒪𑒏 𑒢𑒲𑒔𑒰𑒿 𑒡𑒩𑒱 𑒥𑒰𑒪𑒳 𑒦𑒩𑒱 𑒑𑒹𑒪 । 𑒏𑒢𑒱𑒨𑒼 𑒣𑒰𑒢𑒱 𑒂𑒥𑒋 𑒞𑒿 𑒣𑒰𑒢𑒱 𑒐𑒞𑒩𑒰𑒏 𑒔𑒹𑒢𑓂𑒯𑒮𑒿 𑒣𑒰𑒩 𑒦𑓄 𑒖𑒰𑒃𑒞 𑒩𑒯𑒋 𑒂 𑒤𑒰𑒙𑒏𑒮𑒿 𑒥𑒰𑒯𑒰 𑒥𑒰𑒙𑒹 𑒣𑒰𑒢𑒱 𑒣𑒼𑒐𑒩𑒱-𑒐𑒹𑒞𑒏𑒹𑒿 𑒛𑒳𑒧𑒰 𑒠𑒻𑒞 𑒕𑒪 । 𑒖𑒹 𑒐𑒹𑒞 𑒥𑒯𑒳𑒞 𑒆𑒿𑒔 𑒂 𑒠𑒴 𑒣𑒰𑒃 𑒧𑒼𑒪𑒏 𑒕𑒪 𑒮𑒹 𑒢𑒲𑒏 𑒦𑓄 𑒑𑒹𑒪 𑒂 𑒢𑒱𑒏𑒯𑒰 𑒐𑒹𑒞𑒧𑒹 𑒐𑒹𑒞𑒲 𑒥𑒢𑓂𑒠 𑒦𑓄 𑒑𑒹𑒪 । 𑒠𑒳𑒢𑒴 𑒕𑒯𑒩𑒏 𑒥𑒲𑒔𑒏 𑒥𑒪𑒳𑒂𑒯𑒲 𑒖𑒧𑒲𑒢𑒧𑒹 𑒞𑒲𑒢-𑒞𑒲𑒢 𑒥𑒹𑒩 𑒩𑒼𑒣𑒢𑒲 𑒏𑒩𑒋 𑒣𑒛𑓃𑒻𑒞 𑒕𑒪 । 𑒪𑒼𑒏𑒏𑒹𑒿 𑒂𑒥 𑒣𑒩𑒼𑒩 𑒂 𑒁𑒪𑓂𑒯𑒳𑒂𑒏 𑒐𑒹𑒞𑒲 𑒋𑒯𑒱 𑒥𑒪𑒳𑒂𑒯𑒲 𑒖𑒧𑒲𑒢𑒧𑒹 𑒬𑒳𑒩𑒴 𑒏𑒩𑒋 𑒣𑒛𑓃𑒪 । 𑒛𑒏𑒯𑒲 𑒣𑒼𑒐𑒩𑒱𑒏 𑒔𑒰𑒩𑒴 𑒏𑒰𑒞𑒏 𑒥𑒜𑓃𑒧𑒼𑒞𑒩𑒧𑒹 𑒕𑒱𑒙𑒳𑒂 𑒡𑒰𑒢𑒏 𑒐𑒹𑒞𑒲 𑒏𑒩𑒋 𑒣𑒛𑓃𑒪 𑒏𑒰𑒩𑒝 𑒩𑒼𑒣𑒢𑒲 𑒅𑒣𑒖𑒏 𑒯𑒱𑒮𑒰𑒥𑒮𑒿 𑒧𑒯𑒑 𑒦𑓄 𑒑𑒹𑒪 । 𑒣𑒴𑒩𑓂𑒝𑒰𑒯𑒰 𑒥𑒰𑒡 𑒣𑒰𑒢𑒱𑒮𑒿 𑒦𑒩𑒪 𑒩𑒯𑒻𑒞 𑒕𑒪 । 𑒏𑒼𑒚𑒱𑒨𑒰-𑒧𑒹𑒯𑒟𑒏 𑒥𑒲𑒔𑒧𑒹 𑒋𑒏𑒙𑒰 𑒦𑒼𑒩𑒯𑒰 𑒕𑒪-𑒑𑒿𑒯𑒲𑒩 𑒣𑒙𑓂𑒙𑒲- 𑒣𑓂𑒩𑒰𑒨𑓁 𑒏𑒼𑒬𑒲𑒏 𑒏𑒼𑒢𑒼 𑒣𑒳𑒩𑒢𑒏𑒰 𑒕𑒱𑒙𑒏𑒪 𑒡𑒰𑒩 । 𑒧𑒳𑒠𑒰 𑒁𑒐𑒳𑒢𑒏𑒰 𑒏𑒼𑒬𑒲𑒏 𑒦𑒾𑒑𑒼𑒪𑒱𑒏 𑒠𑒴𑒩𑒲𑒏 𑒏𑒰𑒩𑒝 𑒋𑒯𑒱 𑒣𑒩 𑒮𑓀𑒠𑒹𑒯 𑒏𑒋𑒢𑒱𑒯𑒰𑒩𑒏 𑒮𑓀𑒐𑓂𑒨𑒰 𑒮𑒹𑒯𑒼 𑒥𑒹𑒬 । 𑒋𑒯𑒱 𑒦𑒼𑒩𑒯𑒰 𑒏𑒰𑒞𑒧𑒹 𑒧𑒹𑒯𑒟𑒏 𑒂 𑒏𑒼𑒚𑒱𑒨𑒰𑒏 𑒥𑒲𑒔 𑒦𑒹𑒪 𑒣𑒳𑒩𑒰𑒢 𑒮𑓀𑒒𑒩𑓂𑒭𑒏 𑒐𑒱𑒮𑓂𑒮𑒰….𑒣𑒕𑒱𑒧𑒰-𑒦𑒳𑒧𑒱𑒯𑒰𑒩 𑒙𑒼𑒪𑒏 𑒋𑒏𑒙𑒰 𑒂𑒢𑓂𑒯𑒩 𑒥𑒴𑒜𑓃𑒏
𑒏𑒩𑒞𑒥 । 𑒥𑒴𑒜𑓃𑒏𑒹𑒿 𑒮𑒦 𑒥𑒰𑒢𑓂𑒯𑒱 𑒏𑓄 𑒩𑒐𑒪𑒏𑒢𑓂𑒯𑒱 𑒖𑒹 𑒍 𑒧𑒰𑒩𑒱 𑒏𑒩𑒋 𑒢𑒯𑒱 𑒣𑒯𑒳𑒿𑒔𑒱 𑒖𑒰𑒟𑒱 । 𑒧𑒳𑒠𑒰 𑒏𑒹𑒥𑒰𑒛𑓃𑒲 𑒞𑒼𑒛𑓃𑒱 𑒂 𑒥𑒛𑓃𑒏𑒰 𑒥𑒰𑒿𑒮𑒧𑒹 𑒤𑒩𑒮𑒰-𑒦𑒰𑒪𑒰 𑒪𑒑𑒰 𑒏𑓄 𑒍 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒪𑒛𑓃𑒥𑒰𑒏 𑒪𑒹𑒪 । 𑒮𑒫𑒰 𑒧𑒼𑒢 𑒔𑒴𑒛𑓃𑒲 𑒏𑒼𑒚𑒱𑒨𑒰𑒧𑒹 𑒤𑒴𑒙𑒪 𑒍𑒯𑒱 𑒧𑒰𑒩𑒱𑒧𑒹 । 𑒂 𑒧𑒰𑒩𑒱 𑒏𑒼𑒢 𑒑𑒣 𑒣𑒩..𑒮𑒴𑒑𑒩𑒏 𑒮𑒲𑒩𑒰𑒏 𑒪𑒹𑒪 ।……𑒋𑒏𑒙𑒰 𑒂𑒩 𑒏𑒟𑒰 - 𑒥𑒴𑒜𑓃𑒰 𑒏𑒰𑒏𑒰𑒏 𑒗𑒚𑒯𑒰𑒏 𑒏𑒟𑒰, 𑒮𑒦𑒙𑒰 𑒥𑒰𑒢𑒩 𑒮𑒦 𑒛𑒩𑒏 𑒪𑒹𑒪 𑒏𑒪𑒧-𑒑𑒰𑒕𑒲 𑒕𑒼𑒛𑓃𑒱 𑒣𑒛𑓃𑒰 𑒑𑒹𑒪 𑒕𑒪 । 𑒂𑒃 𑒏𑒰𑒪𑓂𑒯𑒱𑒏 𑒕𑒾𑒩𑒰 𑒮𑒦𑒏𑒹𑒿 𑒠𑒹𑒐𑒱𑒨𑒾𑒏, 𑒗𑒚𑒯𑒰 𑒏𑒱𑒨𑒼 𑒧𑒰𑒩𑒱 𑒏𑓄 𑒠𑒹𑒐𑒰𑒥𑒨 𑒖𑒹 𑒖𑒼𑒧𑒏 𑒤𑒳𑒢𑒑𑒲𑒏𑒹𑒿 𑒕𑒴𑒥𑒱 𑒪𑒋 । 𑒮𑒦𑒙𑒰 𑒁𑒐𑒩𑒰𑒯𑒰 𑒪𑒼𑒏 𑒮𑒦 𑒖𑒼𑒞𑒱 𑒪𑒹𑒪𑒏, 𑒞𑒐𑒢 𑒬𑒩𑒲𑒩 𑒏𑒼𑒢𑒰 𑒥𑒢𑒻𑒞 𑒖𑒋𑒞𑒢𑓂𑒯𑒱 ।
𑒢𑒢𑓂𑒠𑒏 𑒛𑒹𑒩𑒰 𑒣𑒩 𑒥𑒳𑒜𑓃𑒱𑒨𑒰 𑒠𑒲𑒠𑒲 𑒋𑒏 𑒥𑒹𑒩 𑒥𑒰𑒜𑓃𑒮𑒿 𑒁𑒣𑒢 𑒥𑒹𑒙𑒰𑒏𑒹𑒿 𑒪𑓄 𑒏𑓄 𑒁𑒋𑒪𑒲𑒯, 𑒥𑒹𑒙𑒰𑒏 𑒢𑒼𑒏𑒩𑒲𑒏 𑒪𑒹𑒪 । 𑒥𑒰𑒜𑓃𑒏 𑒪𑒰𑒃 𑒏𑒹𑒩 𑒮𑓂𑒫𑒰𑒠 𑒥𑒔𑓂𑒔𑒰 𑒮𑒦 𑒥𑒳𑒜𑓃𑒱𑒨𑒰 𑒠𑒲𑒠𑒲𑒏 𑒣𑒙𑒢𑒰 𑒂𑒏𑒱 𑒑𑒰𑒧 𑒁𑒋𑒪𑒹 𑒣𑒩 𑒔𑒱𑒐𑒻𑒞 𑒖𑒰𑒃𑒞 𑒕𑒪 । 𑒖𑒧𑒲𑒢𑓂𑒠𑒰𑒩𑒲 𑒣𑓂𑒩𑒟𑒰𑒏 𑒮𑒧𑒰𑒣𑓂𑒞𑒱𑒏 𑒥𑒰𑒠 𑒢𑒾𑒏𑒩𑒲𑒏 𑒔𑒪𑒞𑒲 𑒦𑓄 𑒑𑒹𑒪 𑒕𑒪 𑒂 𑒠𑒱𑒏𑓂𑒏𑒞 𑒮𑒹𑒯𑒼 । 𑒞𑒰𑒯𑒱𑒧𑒹 𑒮𑒩𑒏𑒰𑒩𑒲 𑒢𑒼𑒏𑒩𑒲𑒏 । 𑒖𑒨𑒩𑒰𑒧 𑒢𑒾𑒂 𑒞𑒐𑒢 𑒢𑒹 𑒏𑒯𑒻𑒞 𑒕𑒟𑒱 𑒖𑒹 𑒢𑒢𑓂𑒠 𑒮𑒦 𑒖𑒰𑒞𑒱𑒏𑒹𑒿 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒠𑒹𑒪𑒐𑒱𑒢𑓂𑒯 𑒧𑒳𑒠𑒰 𑒢𑒾𑒂-𑒚𑒰𑒏𑒳𑒩 𑒙𑒰 𑒥𑒔𑒱 𑒑𑒹𑒪 । 𑒮𑒹 𑒢𑒢𑓂𑒠 𑒢𑒯𑒱 𑒞𑒿 𑒯𑒳𑒢𑒏𑒩 𑒥𑒹𑒙𑒹𑒮𑒿 𑒁𑒣𑒢 𑒥𑒹𑒙𑒰𑒏 𑒪𑒹𑒪 𑒢𑒼𑒏𑒩𑒲 𑒧𑒰𑒿𑒑𑒞𑒰𑒯 । 𑒮𑒦𑒏𑒹𑒿 𑒢𑒼𑒏𑒩𑒲 𑒦𑒹𑒙𑒪𑒻𑒏 𑒧𑒳𑒠𑒰 𑒥𑒳𑒜𑓃𑒱𑒨𑒰 𑒠𑒲𑒠𑒲𑒏 𑒥𑒹𑒙𑒰𑒏𑒹𑒿 𑒢𑒼𑒏𑒩𑒲 𑒢𑒯𑒱 𑒦𑒹𑒙𑒪𑒢𑓂𑒯𑒱 । 𑒏𑒱𑒕𑒳 𑒮𑒧𑒨-𑒮𑒰𑒪 𑒮𑒹𑒯𑒼 𑒥𑒠𑒪𑒪, 𑒢𑒯𑒱 𑒞𑒿 𑒣𑒯𑒱𑒢𑒹 𑒞𑒿 𑒪𑒼𑒏 𑒢𑒼𑒏𑒩𑒲 𑒏𑒩𑒻𑒨𑒼 𑒢𑒯𑒱 𑒔𑒰𑒯𑒻𑒞 𑒕𑒪 । 𑒣𑒳𑒥𑒰𑒃 𑒙𑒼𑒪𑒏 𑒑𑒳𑒪𑒰𑒥 𑒗𑒰 𑒏𑒯𑒻𑒞 𑒕𑒪𑒰𑒯 𑒖𑒹 𑒢𑒼𑒏𑒩𑒲𑒏 𑒧𑒰𑒢𑒹 𑒦𑒹𑒪 𑒢𑒯𑒱 𑒏𑒩𑒲 𑒂 𑒏𑒩𑒲 𑒞𑒿 𑒏𑒲 𑒣𑒰𑒥𑒲-𑒫𑒹𑒞𑒢 𑒧𑒰𑒢𑒹 𑒥𑒱𑒢𑒰 𑒞𑒢 𑒂 𑒞𑒢𑒐𑒰 𑒧𑒰𑒢𑒹 𑒞𑒢𑒏𑒹𑒿 𑒐𑒰 । 𑒥𑒳𑒜𑓃𑒱𑒨𑒰 𑒠𑒲𑒠𑒲𑒏 𑒂𑒢𑒪 𑒥𑒰𑒜𑓃𑒏 𑒪𑒰𑒃 𑒂 𑒏𑒞𑒹𑒏 𑒩𑒰𑒞𑒱 𑒡𑒩𑒱 𑒔𑒪𑒋 𑒥𑒪𑒰 𑒐𑒱𑒮𑓂𑒮𑒰 । 𑒑𑒰𑒧 𑒒𑒩𑒧𑒹 𑒏𑒐𑒢𑒼 𑒏𑒰𑒪 𑒬𑒳𑒩𑒳 𑒦𑓄 𑒑𑒹𑒪 𑒂𑒢 𑒂𑒢 𑒣𑓂𑒩𑒏𑒰𑒩𑒰𑓀𑒞𑒩𑒏 𑒐𑒱𑒮𑓂𑒮𑒰, 𑒃𑒢𑒰𑒩, 𑒣𑒼𑒐𑒩𑒱,𑒏𑒩𑒲𑒢,𑒥𑒰𑒯𑒰,𑒐𑒞𑓂𑒞𑒰,𑒑𑒰𑒕𑒲-𑒣𑒼𑒐𑒩𑒱𑒏 𑒥𑒲𑒔 𑒂 𑒋𑒯𑒱 𑒮𑒦𑒏 𑒪𑒹𑒪 𑒯𑒼𑒥𑒋𑒥𑒪𑒰 𑒕𑒼𑒙-𑒧𑒼𑒙 𑒗𑒑𑒩𑒰-𑒗𑒰𑒿𑒙𑒲 𑒂𑒏𑒱 𑒩𑒧𑒝-𑒔𑒧𑒢𑒏 𑒧𑒡𑓂𑒨 𑒢𑒢𑓂𑒠𑒏 𑒢𑒢𑓂𑒠 𑒮𑒦 𑒥𑒜𑓃𑒋 𑒪𑒑𑒪𑒰𑒯 । 𑒢𑒢𑓂𑒠 𑒁𑒣𑒢 𑒥𑒔𑓂𑒔𑒰 𑒮𑒦𑒏𑒹𑒿 𑒑𑒰𑒧𑒮𑒿 𑒠𑒴𑒩 𑒢𑒯𑒱 𑒏𑒋𑒪𑒢𑓂𑒯𑒱। 𑒑𑒩𑓂𑒧𑒲 𑒞𑒰𑒞𑒱𑒪, 𑒯𑒼𑒪𑒲 𑒂 𑒠𑒳𑒩𑓂𑒑𑒰𑒣𑒴𑒖𑒰, 𑒞𑒲𑒢 𑒥𑒹𑒩 𑒏𑒧𑒮𑒿 𑒏𑒧 𑒮𑒰𑒪 𑒦𑒩𑒱𑒧𑒹 𑒮𑒧𑒮𑓂𑒞 𑒣𑒩𑒱𑒫𑒰𑒩 𑒖𑒋𑒥𑒹𑒙𑒰 𑒏𑒩𑒻𑒞 𑒕𑒪 । 𑒥𑒔𑓂𑒔𑒰 𑒮𑒦 𑒂𑒧 𑒐𑒋𑒥𑒰𑒏 𑒯𑒹𑒞𑒳 𑒠𑒲𑒠𑒲𑒏 𑒑𑒰𑒧 𑒖𑒰𑒃𑒞 𑒕𑒪 । 𑒣𑒋𑒩𑒹-𑒣𑒋𑒩 𑒠𑒴𑒩-𑒠𑒴𑒩 𑒡𑒩𑒱, 𑒏𑒯𑒱𑒨𑒼 𑒏𑒧𑒪𑒰𑒏 𑒩𑒹𑒞𑒏 𑒥𑒲𑒔 𑒞𑒿 𑒏𑒯𑒱𑒨𑒼 𑒂𑒧𑒏 𑒑𑒰𑒕𑒲𑒏 𑒧𑒡𑓂𑒨 𑒔𑒪𑒻𑒞 𑒔𑒪𑒥𑒰𑒏 𑒁𑒢𑒳𑒦𑒫𑒹 𑒏𑒱𑒕𑒳 𑒦𑒱𑒢𑓂𑒢 𑒕𑒪 । 𑒂𑒧𑒏 𑒧𑒰𑒮𑒧𑒹 𑒂𑒧𑒏 𑒏𑒪𑒧𑒧𑒹 𑒩𑒰𑒞𑓂𑒩𑒱𑒏 𑒧𑒰𑒕-𑒦𑒰𑒞𑒏 𑒥𑒢𑒦𑒼𑒖, 𑒐𑒳𑒩𑒔𑒢𑒮𑒿 𑒂𑒧𑒏 𑒐𑒼𑒃𑒔𑒰 𑒯𑒙𑒋𑒥𑒰𑒏 𑒁𑒢𑒳𑒦𑒫, 𑒞𑒲-𑒞𑒲, ‘𑒖𑒏𑒩𑒹 𑒢𑒰𑒧 𑒪𑒰𑒪 𑒕𑒛𑓃𑒲’ 𑒂 𑒮𑒞𑒒𑒩𑒱𑒨𑒰 𑒐𑒹𑒪𑒹𑒥𑒰𑒏 𑒁𑒢𑒳𑒦𑒫, 𑒮𑓀𑒚𑒲𑒧𑒹 𑒂𑒑𑒱 𑒪𑒑𑒰 𑒏𑒋 𑒡𑒳𑒿𑒂 𑒢𑒱𑒏𑒰𑒪𑒥𑒰𑒏 𑒁𑒢𑒳𑒦𑒫 𑒂𑒏𑒱 𑒏𑒰𑒿𑒔 𑒂𑒧𑒧𑒹 𑒔𑒴𑒢 𑒪𑒑𑒰𑒏𑒋 𑒐𑒋𑒥𑒰𑒏 𑒅𑒣𑒩𑒰𑓀𑒞 𑒍𑒏𑒩 𑒧𑒲𑒚 𑒦𑓄 𑒖𑒋𑒥𑒰𑒏 𑒁𑒢𑒳𑒦𑒫, 𑒄 𑒮𑒦 𑒁𑒢𑒳𑒦𑒫 𑒂𑒃 𑒏𑒰𑒪𑓂𑒯𑒱𑒏 𑒥𑒔𑓂𑒔𑒰𑒏𑒹𑒿 𑒏𑒼𑒢𑒰 𑒦𑒹𑒙𑒞𑒻𑒏 𑒨𑒰𑒫𑒞 𑒍𑒏𑒩𑒰 𑒮𑒦𑒏𑒹𑒿 𑒑𑒰𑒧 𑒋𑒢𑒰𑒃 𑒖𑒹𑒢𑒰𑒃 𑒢𑒯𑒱 𑒏𑒩𑒰𑒋𑒥 । 𑒢𑒢𑓂𑒠 𑒞𑒿 𑒋𑒏𑒥𑒹𑒩 𑒁𑒣𑒢 𑒖𑒧𑒰𑒨𑒏𑒹𑒿 𑒏𑒯𑒢𑒯𑒱𑒨𑒼 𑒩𑒯𑒟𑒱 𑒖𑒹 𑒂𑒑𑒰𑒿𑒏 𑒮𑒰𑒞 𑒖𑒢𑓂𑒧 𑒬𑒯𑒩 𑒠𑒱𑒬𑒱 𑒒𑒳𑒩𑒱 𑒏𑒨 𑒢𑒯𑒱
𑒂𑒋𑒥 । 𑒮𑒢𑓂 𑓑𑓙𑓗𑓕 𑒏 𑒣𑒙𑒢𑒰𑒏 𑒥𑒰𑒜𑓃𑒱𑒏 𑒮𑒧𑒨 𑒢𑒢𑓂𑒠 𑒑𑓀𑒑𑒰𑒏 𑒅𑒞𑓂𑒞𑒩 𑒑𑓀𑒑𑒰 𑒣𑒳𑒪 𑒣𑒩𑒱𑒨𑒼𑒖𑒢𑒰𑒧𑒹 𑒂𑒥𑒱 𑒑𑒹𑒪 𑒕𑒪𑒰𑒯। 𑒢𑒢𑓂𑒠 𑒠𑒳𑒃 𑒣𑒳𑒞𑓂𑒩 𑒂 𑒋𑒏 𑒣𑒳𑒞𑓂𑒩𑒲𑒏 𑒮𑓀𑒑 𑒁𑒣𑒢 𑒣𑒩𑒱𑒫𑒰𑒩 𑒔𑒪𑒰 𑒩𑒯𑒪 𑒕𑒪𑒰𑒯 । 𑒞𑒲𑒢𑒴 𑒥𑒔𑓂𑒔𑒰 𑒮𑓂𑒏𑒴𑒪𑒧𑒹 𑒣𑒜𑓃𑒰𑒃-𑒪𑒱𑒐𑒰𑒃 𑒏𑒩𑒻𑒞 𑒖𑒰𑒃𑒞 𑒕𑒪𑒰𑒯 । 𑒞𑒐𑒢 𑒏𑒏𑒩𑒰 𑒥𑒳𑒗𑒪 𑒕𑒪𑒻𑒏 𑒖𑒹 𑒄 𑒥𑒩𑒐 𑒢𑒢𑓂𑒠 𑒂 𑒯𑒳𑒢𑒏𑒩 𑒥𑒔𑓂𑒔𑒰 𑒮𑒦𑒏 𑒖𑒲𑒫𑒢𑒏 𑒋𑒏𑒙𑒰 𑒫𑒱𑒦𑒰𑒖𑒢 𑒩𑒹𑒐𑒰 𑒥𑒢𑒞 𑒂 𑒖𑒲𑒫𑒢𑒏 𑒡𑒰𑒩𑒏𑒹𑒿 𑒥𑒠𑒪𑒱 𑒠𑒹𑒞।
𑒂𑒩𑒳𑒝𑒱𑒏 𑒫𑒵𑒞𑓂𑒞𑒰𑓀𑒞𑒏 𑒮𑒰𑒩𑒰𑓀𑒬 𑒨𑒻𑒯 𑒁𑒕𑒱 𑒖𑒹 𑒯𑒳𑒢𑒏 𑒖𑒢𑓂𑒧𑒏 𑒮𑒧𑒨 𑒯𑒳𑒢𑒏𑒩 𑒣𑒱𑒞𑒰𑒏𑒹𑒿 𑒏𑓂𑒨𑒼 𑒏𑒯𑒱 𑒠𑒹𑒪𑒏𑒢𑓂𑒯𑒱 𑒖𑒹 𑒥𑒔𑒱𑒨𑒰 𑒦𑒹𑒪 𑒁𑒕𑒱 । 𑒠𑒴-𑒞𑒲𑒢 𑒠𑒱𑒢 𑒡𑒩𑒱 𑒯𑒳𑒢𑒏𑒰 𑒠𑒱𑒧𑒰𑒑𑒧𑒹 𑒕𑒪𑒢𑓂𑒯𑒱 𑒖𑒹 𑒥𑒹𑒙𑒱𑒨𑒹 𑒦𑒹𑒪 𑒁𑒕𑒱 । 𑒕𑒚𑒱𑒯𑒰𑒩𑒱𑒏 𑒋𑒏 𑒠𑒱𑒢 𑒣𑒯𑒱𑒢𑒹 𑒯𑒳𑒢𑒏𑒰 𑒣𑒞𑒰 𑒔𑒪𑒪𑒢𑓂𑒯𑒱 𑒖𑒹 𑒥𑒹𑒙𑒰 𑒦𑒹𑒪 𑒕𑒢𑓂𑒯𑒱 । 𑒋𑒯𑒱 𑒁𑒢𑒱𑒬𑓂𑒔𑒱𑒞𑒞𑒰𑒏 𑒅𑒣𑒩𑒰𑓀𑒞 𑒨𑒻𑒯 𑒮𑒱𑒠𑓂𑒡 𑒦𑒹𑒪 𑒖𑒹 𑒨𑒰𑒫𑒞 𑒮𑒞𑓂𑒨𑒏 𑒖𑒹 𑒩𑒴𑒣 𑒥𑒴𑒗𑒪 𑒁𑒕𑒱 𑒮𑒻𑒯 𑒞𑒰𑒫𑒞 𑒡𑒩𑒱 𑒮𑒞𑓂𑒨 𑒩𑒯𑒞 । 𑒮𑒞𑓂𑒨𑒏 𑒫𑒱𑒦𑒱𑒢𑓂𑒢 𑒩𑒴𑒣, 𑒖𑒹 𑒁𑒮𑒞𑓂𑒨 𑒞𑒿 𑒢𑒯𑒱 𑒁𑒕𑒱, 𑒞𑒏𑒩𑒹 𑒣𑓂𑒩𑒞𑒱𑒏𑒲𑒩𑓂𑒞𑒱𑒏 𑒩𑒴𑒣𑒧𑒹 𑒂𑒩𑒳𑒝𑒱𑒏 𑒫𑓂𑒨𑒏𑓂𑒞𑒱𑒞𑓂𑒫𑒏 𑒣𑓂𑒩𑒰𑒠𑒳𑒩𑓂𑒦𑒰𑒫 𑒦𑒹𑒪𑒻𑒏। 𑒖𑒢𑓂𑒧𑒹𑒮𑒿 𑒋𑒯𑒱 𑒂𑒦𑒰𑒭𑒱𑒞 𑒮𑒞𑓂𑒨𑒏 𑒫𑒱𑒦𑒱𑒢𑓂𑒢 𑒩𑒴𑒣𑒏 𑒮𑒰𑒏𑓂𑒭𑒲 𑒩𑒯𑒪𑒰𑒯 𑒂𑒩𑒳𑒝𑒱 । 𑒂𑒩𑒳𑒝𑒱𑒏 𑒖𑒢𑓂𑒧𑒏 𑒣𑒯𑒱𑒢𑒯𑒱 𑒥𑒰 𑒏𑒹𑒩 𑒠𑒹𑒯𑒰𑓀𑒞 𑒦𑓄 𑒑𑒹𑒪𑒢𑓂𑒯𑒱। 𑒥𑒰𑒠𑒼 𑒧𑒹 𑒖𑒐𑒢-𑒖𑒐𑒢 𑒥𑒰 𑒏𑒹𑒩 𑒔𑒩𑓂𑒔𑒰 𑒁𑒥𑒻𑒞 𑒕𑒪, 𑒂𑒩𑒳𑒝𑒱 𑒡𑓂𑒨𑒰𑒢𑒮𑒿 𑒮𑒳𑒢𑒻𑒞 𑒕𑒪𑒰𑒯 𑒂 𑒁𑒣𑒢 𑒖𑒱𑒖𑓂𑒘𑒰𑒮𑒰 𑒥𑒜𑒥𑒻𑒞 𑒕𑒪𑒰𑒯। 𑒋𑒫𑒧 𑒏𑓂𑒩𑒧𑒹 𑒥𑒰 𑒯𑒳𑒢𑒏𑒩 𑒖𑒲𑒫𑒢𑒏 𑒁𑓀𑒑 𑒦𑓄 𑒑𑒹𑒪𑒲𑒯 । 𑒥𑒰 𑒯𑒳𑒢𑒏𑒩 𑒖𑒢𑓂𑒧𑒏 𑒣𑒯𑒱𑒢𑒯𑒱 𑒮𑒿 𑒬𑒩𑒲𑒩𑒩𑒴𑒣𑒹 𑒢𑒯𑒱 𑒕𑒪𑒲𑒯, 𑒧𑒳𑒠𑒰 𑒯𑒳𑒢𑒏𑒩 𑒁𑒫𑒮𑓂𑒟𑒱𑒞𑒱 𑒋𑒯𑒱 𑒒𑒩𑒧𑒹 𑒮𑒠𑒱𑒐𑒢 𑒕𑒪𑒢𑓂𑒯𑒱 । 𑒂𑒩𑒳𑒝𑒱𑒏 𑒏𑒟𑒰 𑒂 𑒢𑒢𑓂𑒠𑒏 𑒏𑒟𑒰𑒏 𑒥𑒲𑒔𑒏 𑒞𑒰𑒩𑒞𑒧𑓂𑒨 𑒣𑒯𑒱𑒢𑒹 𑒞𑒿 𑒢𑒯𑒱 𑒥𑒳𑒗𑒱 𑒣𑒛𑓃𑒱 𑒩𑒯𑒪 𑒕𑒪 । 𑒧𑒳𑒠𑒰 𑒣𑓂𑒩𑒏𑒵𑒞𑒱𑒏 𑒮𑓀𑒑𑒯𑒱 𑒂𑒩𑒳𑒝𑒱 𑒮𑒹𑒯𑒼 𑒁𑒣𑒢 𑒣𑓂𑒩𑒞𑒱𑒦𑒰 𑒠𑒹𑒐𑒰𑒥𑒋 𑒪𑒑𑒪𑒰𑒯 । 𑒧𑒢𑒳𑒭𑓂𑒨𑒏 𑒣𑓂𑒩𑒫𑒵𑒞𑓂𑒞𑒱𑒨𑒹 𑒯𑒼𑒃𑒕 𑒮𑒧𑒰𑒢𑒞𑒰 𑒂 𑒞𑒳𑒪𑒢𑒰 𑒏𑒩𑒥𑒰𑒏, 𑒮𑒰𑒧𑓂𑒨 𑒂 𑒫𑒻𑒭𑒧𑓂𑒨𑒏 𑒮𑒧𑒰𑒪𑒼𑒔𑒢𑒰 𑒂 𑒫𑒱𑒫𑒹𑒔𑒢𑒧𑒹 𑒏𑒞𑒹𑒏 𑒑𑒼𑒙𑒹 𑒁𑒣𑒢 𑒖𑒱𑒢𑒑𑒲 𑒥𑒱𑒞𑒰 𑒠𑒻𑒞 𑒕𑒟𑒱 । 𑒂𑒩𑒳𑒝𑒱 𑒂 𑒢𑒢𑓂𑒠𑒏 𑒥𑒲𑒔 𑒮𑒹𑒯𑒼 𑒁𑒢𑒰𑒨𑒰𑒮𑒯𑒱 𑒮𑒰𑒧𑓂𑒨 𑒠𑒹𑒐𑒪 𑒖𑒰 𑒮𑒏𑒻𑒞 𑒁𑒕𑒱 । 𑒠𑒳𑒯𑒳 𑒑𑒼𑒙𑒹𑒏 𑒆𑒣𑒩𑒲 𑒣𑓂𑒩𑒞𑒱𑒦𑒰 𑒂 𑒞𑒟𑒰𑒏𑒟𑒱𑒞 𑒫𑒻𑒔𑒰𑒩𑒱𑒏 𑒧𑒞𑒦𑒹𑒠𑒏 𑒩𑒯𑒱𑒞𑒯𑒳 𑒖𑒹 𑒧𑒴𑒪 𑒫𑓂𑒨𑒏𑓂𑒞𑒱𑒞𑓂𑒫𑒏 𑒮𑒰𑒧𑓂𑒨 𑒯𑒼𑒃𑒞 𑒕𑒻𑒏, 𑒮𑒹 𑒠𑒳𑒢𑒴 𑒑𑒼𑒙𑒹𑒧𑒹 𑒫𑒩𑓂𑒞𑓂𑒞𑒧𑒰𑒢 𑒁𑒕𑒱 । 𑒋𑒯𑒢 𑒮𑒢 𑒥𑒳𑒗𑒢𑒰 𑒖𑒰𑒃𑒞 𑒕𑒪 । 𑒧𑒡𑓂𑒨 𑒫𑒩𑓂𑒑𑒏 𑒥𑒔𑓂𑒔𑒰𑒏 𑒪𑒰𑒪𑒢-𑒣𑒰𑒪𑒢 𑒂 𑒣𑒼𑒭𑒝 𑒖𑒰𑒯𑒱 𑒂𑒬𑒰 𑒍 𑒂𑒏𑒰𑓀𑒏𑓂𑒭𑒰𑒮𑒿 𑒯𑒼𑒃𑒞 𑒁𑒕𑒱, 𑒞𑒏𑒩 𑒁𑒣𑒫𑒰𑒠 𑒂𑒩𑒳𑒝𑒱 𑒢𑒯𑒱 𑒕𑒪𑒰𑒯 । 𑒖𑒹𑒢𑒰 𑒮𑒦 𑒧𑒰𑒞𑒰-𑒣𑒱𑒞𑒰 𑒁𑒣𑒢 𑒢𑒹𑒢𑒰𑒏 𑒕𑒼𑒙𑒼 𑒕𑒼𑒙 𑒥𑒰𑒞𑒧𑒹 𑒣𑓂𑒩𑒞𑒱𑒦𑒰𑒏 𑒕𑒰𑒣 𑒠𑒹𑒐𑒻𑒞 𑒕𑒟𑒱 𑒞𑒯𑒱𑒢𑒰 𑒂𑒩𑒳𑒝𑒱𑒏 𑒧𑒰𑒞𑒰-𑒣𑒱𑒞𑒰 𑒫𑒱𑒬𑒹𑒭 𑒏𑒋 𑒣𑒱𑒞𑒰 𑒢𑒢𑓂𑒠, 𑒂𑒩𑒳𑒝𑒱𑒏 𑒫𑓂𑒨𑒏𑓂𑒞𑒱𑒞𑓂𑒫𑒧𑒹 𑒫𑒱𑒬𑒹𑒭 𑒣𑓂𑒩𑒞𑒱𑒦𑒰 𑒠𑒹𑒐𑒋 𑒪𑒑𑒪𑒰𑒯 । 𑒂𑒩𑒳𑒝𑒱 𑒏𑒹𑒿 𑒐𑒴𑒥 𑒮𑓂𑒫𑒣𑓂𑒢𑒮𑒦 𑒁𑒥𑒻𑒞 𑒕𑒪𑒢𑓂𑒯𑒱 । 𑒞𑒯𑒱𑒢𑒰 𑒠𑒰𑒿𑒞 𑒮𑒹𑒯𑒼 𑒮𑒴𑒞𑒪𑒧𑒹 𑒏𑒙𑒏𑒙𑒰𑒃𑒞 𑒕𑒪𑒢𑓂𑒯𑒱 । 𑒮𑒣𑒢𑒰𑒧𑒹 𑒢𑒲𑒏 𑒂 𑒁𑒡𑒪𑒰𑒯 𑒠𑒳𑒢𑒴 𑒣𑓂𑒩𑒏𑒰𑒩𑒏 𑒞𑒞𑓂𑒫 𑒩𑒯𑒻𑒞 𑒕𑒪𑒢𑓂𑒯𑒱 𑒧𑒳𑒠𑒰 𑒛𑒩𑒰𑒍𑒢 𑒞𑒞𑓂𑒫 𑒫𑒱𑒬𑒹𑒭 𑒩𑒯𑒻𑒞 𑒕𑒪𑒢𑓂𑒯𑒱 । 𑒥𑒯𑒳𑒞 𑒠𑒱𑒢 𑒡𑒩𑒱 𑒂𑒩𑒳𑒝𑒱 𑒋𑒯𑒱 𑒣𑓂𑒩𑒨𑒰𑒮𑒧𑒹 𑒩𑒯𑒟𑒱 𑒖𑒹 𑒏𑒼𑒢𑒰 𑒏𑒋 𑒮𑒣𑒢𑒰 𑒂𑒏𑒱 𑒠𑒳𑓁𑒮𑓂𑒫𑒣𑓂𑒢 𑒁𑒋𑒢𑒰𑒃 𑒥𑒢𑓂𑒠 𑒦𑒋 𑒖𑒋𑒞 । 𑒥𑒲𑒔 𑒩𑒰𑒞𑒱𑒧𑒹 𑒍 𑒒𑒰𑒧𑒹-𑒣𑒮𑒲𑒢𑒹 𑒦𑒋 𑒖𑒰𑒃𑒞 𑒩𑒯𑒟𑒱 𑒂 𑒖𑒐𑒢 𑒢𑒱𑒢𑓂𑒢 𑒐𑒳𑒖𑒢𑒱 𑒞𑓄 𑒠𑒹𑒐𑒟𑒱 𑒖𑒹 𑒧𑒰𑒞𑒰-𑒣𑒱𑒞𑒰 𑒣𑓀𑒐𑒰 𑒯𑒼𑒿𑒏𑒱 𑒩𑒯𑒪 𑒕𑒟𑒱𑒢𑓂𑒯 । 𑒮𑒦𑒮𑒿 𑒣𑒯𑒱𑒢𑒹 𑒏𑒏𑒩 𑒖𑒢𑓂𑒧 𑒦𑒹𑒪 𑒂 𑒞𑒏𑒩 𑒣𑒯𑒱𑒢𑒹 𑒏𑒏𑒩, 𑒂 𑒮𑒦𑒏𑒹𑒿 𑒦𑒑𑒫𑒰𑒢 𑒥𑒢𑒍𑒪𑒢𑓂𑒯𑒱 𑒞𑒿 𑒦𑒑𑒫𑒰𑒢𑒏𑒹𑒿 𑒏𑒹 𑒥𑒢𑒼𑒪𑒏𑒢𑓂𑒯𑒱 । 𑒄 𑒮𑒦 𑒮𑒼𑒔𑒱-𑒮𑒼𑒔𑒱 𑒏𑒋 𑒂𑒩𑒳𑒝𑒱 𑒔𑒱𑓀𑒞𑒱𑒞 𑒦𑒋 𑒖𑒰𑒃𑒞 𑒕𑒪𑒰𑒯। 𑒩𑒰𑒞𑒱𑒧𑒹 𑒮𑓂𑒫𑒣𑓂𑒢𑒧𑒹 𑒯𑒳𑒢𑒏𑒰 𑒯𑒼𑒃𑒞 𑒕𑒪𑒢𑓂𑒯𑒱 𑒖𑒹 𑒃𑒢𑒰𑒩𑒩𑒴𑒣𑒲 𑒣𑓂𑒩𑒏𑒵𑒞𑒱𑒧𑒹 𑒍 𑒑𑒰𑒧𑒏 𑒕𑒰𑒞𑒣𑒩 𑒒𑒴𑒧𑒱 𑒩𑒯𑒪 𑒕𑒟𑒱 । 𑒤𑒹𑒩 𑒍 𑒕𑒞𑒏 𑒏𑒰𑒞𑒧𑒹 𑒖𑒰𑒋 𑒪𑒑𑒻𑒞 𑒕𑒟𑒱 । 𑒤𑒹𑒩 𑒖𑒹𑒢𑒰 𑒣𑒼𑒐𑒩𑒱𑒏 𑒏𑒕𑒹𑒩 𑒁𑒕𑒱, 𑒞𑒯𑒱𑒢𑒰 𑒕𑒞𑒏 𑒏𑒰𑒞𑒹 𑒏𑒰𑒞 𑒥𑒱𑒢 𑒃𑒔𑓂𑒕𑒹𑒏 𑒖𑒰𑒃𑒞 𑒩𑒯𑒻𑒞 𑒕𑒟𑒱, 𑒤𑒹𑒩 𑒔𑒰𑒯𑒻𑒞 𑒕𑒟𑒱, 𑒖𑒹 𑒏𑒰𑒞𑒮𑒿 𑒯𑒙𑒱 𑒏𑒋 𑒥𑒲𑒔 𑒕𑒞𑒣𑒩 𑒂𑒥𑒱 𑒖𑒰𑒃 । 𑒏𑒱𑓀𑒞𑒳 𑒃𑒢𑒰𑒩 𑒩𑒴𑒣𑒲 𑒣𑓂𑒩𑒏𑒵𑒞𑒱𑒏 𑒑𑒳𑒩𑒳𑒞𑓂𑒫𑒧𑒹 𑒍 𑒐𑒱𑒔𑒰𑒃𑒞 𑒔𑒪𑒱 𑒖𑒰𑒃𑒞 𑒕𑒟𑒱 । 𑒂 𑒐𑒮𑒱 𑒖𑒰𑒃𑒞 𑒕𑒟𑒱 । 𑒁𑒢𑒰𑒨𑒰𑒮𑒯𑒱 𑒢𑒱𑒢𑓂𑒢 𑒐𑒳𑒖𑒻𑒞 𑒕𑒢𑓂𑒯𑒱 𑒞𑒿 𑒐𑒳𑒬𑒲 𑒂 𑒠𑒳𑓁𑒐 𑒠𑒳𑒢𑒴 𑒣𑓂𑒩𑒏𑒰𑒩𑒏 𑒦𑒰𑒫𑒢𑒰 𑒧𑒼𑒢𑒧𑒹 𑒁𑒥𑒻𑒞 𑒕𑒢𑓂𑒯𑒱 । 𑒐𑒳𑒬𑒲 𑒋𑒯𑒱 𑒥𑒰𑒞𑒏 𑒖𑒹 𑒮𑓂𑒫𑒣𑓂𑒢𑒹 𑒕𑒪 𑒄, 𑒨𑒟𑒰𑒩𑓂𑒟 𑒢𑒯𑒱 । 𑒠𑒳𑓁𑒐 𑒋𑒯𑒱 𑒥𑒰𑒞𑒏 𑒖𑒹 𑒤𑒹𑒩 𑒢𑒹 𑒏𑒞𑒯𑒳 𑒋𑒯𑒱 𑒣𑓂𑒩𑒏𑒰𑒩𑒏 𑒠𑒳𑓁𑒮𑓂𑒫𑒣𑓂𑒢 𑒤𑒹𑒩 𑒂𑒥𑒋 । 𑒣𑒱𑒞𑒰𑒮𑒿 𑒣𑒴𑒕𑒟𑒱 𑒖𑒹 𑒁𑒯𑒰𑒿 𑒮𑒹𑒯𑒼 𑒋𑒯𑒢 𑒮𑒣𑒢𑒰 𑒮𑒳𑒢𑒻𑒞 𑒕𑒲, 𑒢𑒯𑒱 𑒢𑒯𑒱 𑒠𑒹𑒐𑒻𑒞 𑒕𑒲 𑒞𑒿 𑒍 𑒏𑒯𑒟𑒱 𑒖𑒹 𑒢𑒯𑒱 𑒂𑒥 𑒢𑒯𑒱। 𑒯𑒿 𑒖𑒐𑒢 𑒍 𑒥𑒔𑓂𑒔𑒰 𑒩𑒯𑒟𑒱 𑒞𑒿 𑒮𑒣𑒢𑒰 𑒠𑒹𑒐𑒟𑒱, 𑒥𑒛𑓃𑒏𑒰 𑒗𑒼𑒙𑒰𑒥𑒪𑒰 𑒮𑒯𑒮𑓂𑒩𑒥𑒰𑒜𑓃𑒢𑒱𑒏 । 𑒂𑒑𑒱 𑒥𑒼𑒏𑒩𑒻𑒞 𑒞𑒧𑒮𑒰𑒋𑒪, 𑒖𑒹𑒢𑒰 𑒣𑒵𑒟𑓂𑒫𑒲𑒏𑒹𑒿 𑒑𑒲𑒩𑒱 𑒪𑒹𑒞 । 𑒮𑒣𑒢𑒰 𑒞𑒿 𑒮𑒣𑒢𑒹 𑒕𑒲 𑒖𑒹 𑒁𑒯𑒰𑒿 𑒮𑒼𑒔𑒥 𑒮𑒹 𑒩𑒰𑒞𑒱𑒧𑒹 𑒁𑒋𑒞। 𑒢𑒯𑒱 𑒖𑒰𑒢𑒱 𑒏𑒹 𑒥𑒴𑒜𑓃-𑒣𑒳𑒩𑒰𑒢 𑒮𑒯𑒮𑓂𑒩𑒥𑒰𑒜𑓃𑒢𑒱𑒏 𑒐𑒱𑒮𑓂𑒮𑒰 𑒯𑒧𑒩𑒰 𑒮𑒳𑒢𑒰 𑒠𑒹𑒪𑒢𑓂𑒯𑒱। 𑒏𑒲 𑒮𑒦 𑒏𑒯𑒱 𑒠𑒹𑒪𑒢𑓂𑒯𑒱 𑒖𑒹 𑒮𑒯𑒮𑓂𑒩𑒥𑒰𑒜𑓃𑒢𑒱𑒏 𑒂𑒑𑒧𑒢 𑒁𑒢𑒱𑒭𑓂𑒙𑒏 𑒮𑓀𑒏𑒹𑒞 𑒁𑒕𑒱 𑒖𑒹 𑒄 𑒖𑒰𑒯𑒱 𑒥𑒩𑒐 𑒂𑒋𑒪 𑒞𑒰𑒯𑒱 𑒥𑒩𑒐𑒮𑒿 𑒏𑒻𑒏 𑒮𑒰𑒪 𑒡𑒩𑒱 𑒥𑒲𑒧𑒰𑒩𑒲 𑒁𑒏𑒰𑒪 𑒣𑒛𑓃𑒱𑒞𑒹 𑒩𑒯𑒪। 𑒨𑒻𑒯 𑒮𑒦 𑒯𑒧𑒩 𑒮𑒣𑒢𑒰𑒧𑒹 𑒁𑒥𑒻𑒞 𑒕𑒪। 𑒧𑒳𑒠𑒰 𑒮𑒹 𑒥𑒔𑓂𑒔𑒰𑒧𑒹 𑒂𑒥 𑒞𑒿 𑒢𑒱𑒢𑓂𑒢𑒹 𑒏𑒧 𑒁𑒥𑒻𑒞 𑒁𑒕𑒱 𑒞𑒿 𑒮𑒣𑒢𑒰 𑒏𑒞𑒋𑒮𑒿 𑒁𑒋𑒞। 𑒂 𑒂𑒩𑒳𑒝𑒱 𑒮𑒼𑒔𑒟𑒱 𑒖𑒹 𑒏𑒞𑒹𑒏 𑒢𑒲𑒏 𑒯𑒼𑒃𑒞 𑒖𑒹 𑒯𑒳𑒢𑒏𑒼 𑒢𑒱𑒢𑓂𑒢 𑒏𑒧𑓂𑒧 𑒁𑒥𑒱𑒞𑒢𑓂𑒯𑒱। 𑒋𑒯𑒱 𑒥𑒲𑒔 𑒂𑒩𑒳𑒝𑒱 𑒏𑒐𑒢 𑒢𑒱𑒢𑓂𑒢 𑒁𑒥𑒻𑒞 𑒁𑒕𑒱 𑒂 𑒏𑒐𑒢 𑒮𑓂𑒫𑒣𑓂𑒢 𑒋𑒯𑒱 𑒮𑒦 𑒣𑒩 𑒖𑒹𑒢𑒰 𑒬𑒼𑒡 𑒏𑒩𑒋 𑒪𑒑𑒪𑒰𑒯। 𑒤𑒹𑒩 𑒁𑒑𑒱𑒪𑒰 𑒠𑒱𑒢 𑒧𑒼𑒢 𑒣𑒰𑒛𑓃𑒟𑒱, 𑒖𑒹 𑒢𑒾 𑒥𑒖𑒹 𑒡𑒩𑒱 𑒖𑒰𑒑𑒪 𑒕𑒪𑒯𑒳𑒿, 𑒠𑒮𑒼 𑒥𑒖𑒹 𑒨𑒰𑒫𑒞 𑒖𑒰𑒑𑒪𑒹 𑒕𑒪𑒯𑒳𑒿, 𑒞𑒐𑒢 𑒏𑒐𑒢 𑒮𑒳𑒞𑒪𑒯𑒳𑒿 । 𑒤𑒹𑒩 𑒏𑒱𑒕𑒳𑒋 𑒠𑒱𑒢𑒧𑒹 𑒍 𑒁𑒣𑒢𑒰 𑒧𑒼𑒢𑒏𑒹 𑒥𑒯𑒙𑒰𑒩𑒱 𑒪𑒹𑒪𑒢𑓂𑒯𑒱, 𑒖𑒹 𑒖𑓂𑒨𑒼𑒿 𑒯𑒳𑒢𑒏𑒰 𑒄 𑒧𑒼𑒢 𑒣𑒛𑓃𑒱 𑒖𑒰𑒃𑒢𑓂𑒯𑒱 𑒖𑒹 𑒢𑒱𑒢𑓂𑒢 𑒏𑒐𑒢 𑒂𑒋𑒪 𑒞𑒐𑒢 𑒞𑒿 𑒍 𑒖𑒰𑒑𑒪𑒹 𑒩𑒯𑒱 𑒖𑒋𑒞𑒰𑒯 । 𑒯𑒳𑒢𑒏𑒩 𑒢𑒰𑒧 𑒏𑒞𑒹𑒏 𑒥𑒹𑒩 𑒥𑒠𑒪𑒪 𑒑𑒹𑒪 । 𑒣𑒳𑒩𑒰𑒞𑒢 𑒑𑓂𑒩𑓀𑒟 𑒮𑒦𑒏 𑒁𑒡𑓂𑒨𑒨𑒢 𑒢𑓀𑒠 𑒋𑒯𑒱 𑒯𑒹𑒞𑒳 𑒏𑒋𑒪𑒢𑓂𑒯𑒱 । 𑒤𑒹𑒩 𑒯𑒳𑒢𑒏 𑒣𑒜𑓃𑒰𑒃-𑒪𑒱𑒐𑒰𑒃𑒏 𑒏𑒰𑒩𑓂𑒨 𑒬𑒳𑒩𑒳 𑒦𑒹𑒪𑒢𑓂𑒯𑒱। 𑒬𑓂𑒩𑒲 𑒑𑒝𑒹𑒬𑒖𑒲𑒏 𑒁𑓀𑒏𑒳𑒬 𑒕𑒯 𑒜𑓃𑓀𑒑𑒮𑒿 𑒪𑒱𑒐𑒢𑒰𑒃 𑒮𑒱𑒐𑒰𑒍𑒪 𑒑𑒹𑒪𑒢𑓂𑒯𑒱 𑒂𑒩𑒳𑒝𑒱𑒏𑒹𑒿 𑒂 𑒋𑒯𑒱 𑒂𑒏𑒵𑒞𑒱𑒏 𑒮𑓀𑒑 𑒑𑒾𑒩𑒲𑒬𑓀𑒏𑒩𑒏 𑒁𑒦𑓂𑒨𑒩𑓂𑒟𑒢𑒰-𑒮𑒱𑒠𑓂𑒡𑒱𑒩𑒮𑓂𑒞𑒳।
𑒮𑒰𑒞𑒹 𑒦𑒫𑒞𑒳 𑒮𑒳𑒣𑓂𑒩𑒲𑒞𑒰 𑒠𑒹𑒫𑒲 𑒬𑒱𑒐𑒩 𑒫𑒰𑒮𑒱𑒢𑒲
𑒅𑒑𑓂𑒩𑒹𑒢 𑒞𑒣𑒮𑒰 𑒪𑒥𑓂𑒡𑒼 𑒨𑒨𑒰 𑒣𑒬𑒳𑒣𑒞𑒱𑓁 𑒣𑒞𑒱𑓁।
𑒮𑒱𑒠𑓂𑒡𑒱𑓁 𑒮𑒰𑒡𑓂𑒨𑒹 𑒮𑒞𑒰𑒧𑒮𑓂𑒞𑒳 𑒣𑓂𑒩𑒮𑒰𑒠𑒰𑓀𑒞𑒮𑓂𑒨 𑒡𑒴𑒩𑓂𑒖𑒙𑒹𑓁
𑒖𑒰𑒯𑓂𑒝𑒫𑒲𑒤𑒹𑒢𑒪𑒹𑒐𑒹𑒫 𑒨𑒢𑓂𑒨𑒴𑒡𑒱 𑒬𑒬𑒱𑒢𑓁 𑒏𑒪𑒰 ॥
𑒣𑒬𑒳𑒣𑒞𑒱𑓁 𑒣𑒞𑒱𑓁 𑒏𑒯𑒱 𑒂𑒩𑒳𑒝𑒱 𑒐𑒴𑒥 𑒯𑒿𑒮𑒟𑒱 । 𑒋𑒯𑒱𑒮𑒿 𑒯𑒳𑒢𑒏𑒩 𑒞𑒼𑒞𑒩𑒹𑒢𑒰𑒃 𑒮𑒹𑒯𑒼 𑒮𑒧𑒰𑒣𑓂𑒞 𑒦𑒋 𑒑𑒹𑒪𑒢𑓂𑒯𑒱 । 𑒋𑒏 𑒮𑒿 𑒮𑒋 𑒡𑒩𑒱𑒏 𑒣𑒰𑒚𑒧𑒹 𑒂𑒩𑒳𑒝𑒱𑒏𑒹𑒿 𑒣𑒬𑒳𑒣𑒞𑒱𑓁𑒣𑒞𑒱𑓁 𑒥𑒪𑒰 𑒞𑒰𑒩𑒞𑒧𑓂𑒨 𑒧𑒼𑒢 𑒣𑒛𑓃𑒻𑒞 𑒕𑒪𑒢𑓂𑒯𑒱 । 𑒠𑒮 𑒮𑒿 𑒅𑒢𑓂𑒢𑒻𑒮 𑒂 𑒤𑒹𑒩 𑒥𑒲𑒮 𑒮𑒿 𑒅𑒢𑒞𑒲𑒮 । 𑒢𑒢𑓂𑒠𑒏 𑒕𑒼𑒙 𑒣𑒳𑒞𑓂𑒩 𑒂𑒩𑒳𑒝𑒱 𑒬𑒳𑒩𑒳𑒁𑒯𑒱𑒮𑒿 𑒢𑒢𑓂𑒠𑒏 𑒂𑒬𑒰 𑒂 𑒂𑒏𑒰𑓀𑒏𑓂𑒭𑒰𑒏 𑒣𑓂𑒩𑒞𑒲𑒏 𑒥𑒢𑒋 𑒪𑒰𑒑𑒪 𑒕𑒪𑒰𑒯 । 𑒋𑒏𑒩 𑒏𑒱𑒕𑒳 𑒏𑒰𑒩𑒝 𑒮𑒹𑒯𑒼 𑒕𑒪𑒻𑒏 । 𑒋𑒏𑒮𑒿 𑒮𑒋 𑒡𑒩𑒱 𑒪𑒱𑒐𑒥 𑒢𑒢𑓂𑒠 𑒯𑒳𑒢𑒏𑒰 𑒮𑒱𑒐𑒰 𑒩𑒯𑒪 𑒕𑒪𑒰𑒯 । 𑒢𑒢𑓂𑒠 𑒯𑒳𑒢𑒏𑒰 𑒋𑒏𑒮𑒿 𑒠𑒮 𑒡𑒩𑒱 𑒪𑒱𑒐𑒢𑒰𑒃 𑒂 𑒥𑒖𑒢𑒰𑒃 𑒮𑒱𑒐𑒹𑒪𑒐𑒱𑒢𑓂𑒯 𑒂 𑒋𑒑𑒰𑒩𑒯𑒮𑒿 𑒂𑒑𑒰𑒿 𑒮𑒹𑒯𑒼 𑒮𑒱𑒐𑒰𑒥𑒋 𑒪𑒰𑒑𑒪𑒐𑒱𑒢𑓂𑒯 । 𑒣𑒳𑒢𑓁 𑒄 𑒮𑒼𑒔𑒱 𑒏𑒋 𑒖𑒹 𑒥𑒰𑒪𑒏 𑒣𑒩 𑒋𑒞𑒹𑒏 𑒥𑒼𑒗 𑒪𑒠𑒢𑒰𑒃 𑒚𑒲𑒏 𑒢𑒯𑒱 𑒁𑒕𑒱 𑒍 𑒩𑒳𑒏𑒱 𑒑𑒹𑒪𑒰𑒯 । 𑒣𑒩𑓀𑒞𑒳 𑒥𑒰𑒪𑒏𑒏𑒹𑒿 𑒋𑒑𑒰𑒩𑒯𑒮𑒿 𑒥𑒲𑒮, 𑒤𑒹𑒩 𑒋𑒏𑓂𑒏𑒻𑒮𑒮𑒿 𑒞𑒲𑒮 𑒖𑒋𑒥𑒰 𑒡𑒩𑒱 𑒋𑒯𑒱 𑒥𑒰𑒞𑒏 𑒣𑒞𑒰 𑒦𑓄 𑒑𑒹𑒪𑒢𑓂𑒯𑒱 𑒖𑒹 𑒄 𑒞𑒿 𑒋𑒏 𑒮𑒿 𑒠𑒮 𑒞𑒏𑒏 𑒣𑒳𑒢𑒩𑒰𑒫𑒵𑒞𑓂𑒞𑒱 𑒧𑒰𑒞𑓂𑒩 𑒕𑒻𑒏 । 𑒍 𑒋𑒏𑒩 𑒎𑒔𑒱𑒞𑓂𑒨𑒏 𑒁𑒣𑒢 𑒣𑒱𑒞𑒰𑒮𑒿 𑒔𑒩𑓂𑒔𑒰 𑒏𑒹𑒪𑒢𑓂𑒯𑒱 𑒞𑒿 𑒣𑒱𑒞𑒰 𑒯𑒳𑒢𑒏𑒰 𑒋𑒏𑒮𑒿 𑒮𑒋 𑒡𑒩𑒱 𑒪𑒱𑒐𑒥𑒰𑒏 𑒔𑒳𑒢𑒾𑒞𑒲 𑒠𑓄 𑒠𑒹𑒪𑒐𑒱𑒢𑓂𑒯 । 𑒥𑒰𑒪𑒏 𑒮𑒹 𑒪𑒱𑒐𑒱 𑒏𑒋 𑒖𑒐𑒢 𑒠𑒹𑒐𑒰 𑒠𑒹𑒪𑒐𑒱𑒢𑓂𑒯 𑒞𑒏𑒩𑒰 𑒥𑒰𑒠 𑒣𑓂𑒩𑒞𑓂𑒨𑒹𑒏 𑒬𑒥𑓂𑒠𑒏𑒹𑒿 𑒏𑒼𑒢 𑒢𑒰𑒧 𑒠𑒹𑒪 𑒖𑒰𑒋 𑒞𑒏𑒩 𑒮𑒧𑒮𑓂𑒨𑒰 𑒂𑒋𑒪 । 𑒢𑒢𑓂𑒠 𑒋𑒑𑒰𑒩𑒯, 𑒋𑒏𑓂𑒏𑒻𑒮, 𑒅𑒢𑓂𑒢𑒰𑒮𑒲 𑒂 𑒢𑒥𑒰𑒮𑒲𑒏 𑒫𑒱𑒬𑒹𑒭 𑒩𑒴𑒣𑒮𑒿 𑒔𑒩𑓂𑒔𑒰 𑒏𑒹𑒪𑒢𑓂𑒯𑒱 । 𑒧𑒰𑒿 𑒖𑒐𑒢 𑒂𑒡𑒰 𑒒𑓀𑒙𑒰𑒏 𑒣𑓂𑒩𑒑𑒞𑒱𑒏 𑒮𑒧𑒲𑒏𑓂𑒭𑒰𑒏 𑒯𑒹𑒞𑒳 𑒁𑒋𑒪𑒲𑒯 𑒞𑒐𑒢 𑒯𑒳𑒢𑒏𑒰 𑒣𑒞𑒰 𑒪𑒑𑒪𑒢𑓂𑒯𑒱 𑒖𑒹 𑒣𑒰𑒚𑓂𑒨𑒏𑓂𑒩𑒧 𑒞𑒿 𑒣𑒱𑒞𑒰-𑒣𑒳𑒞𑓂𑒩𑒏 𑒥𑒲𑒔 𑒣𑒴𑒩𑓂𑒝 𑒦𑓄 𑒔𑒳𑒏𑒪 𑒁𑒕𑒱 । 𑒣𑒱𑒞𑒰 𑒑𑒠𑒑𑒠 𑒦𑒋 𑒑𑒹𑒪𑒰𑒯 𑒂 𑒧𑒰𑒿 𑒋𑒯𑒱 𑒒𑒙𑒢𑒰𑒏 𑒔𑒩𑓂𑒔𑒰 𑒥𑒯𑒳𑒞 𑒏𑒧 𑒑𑒼𑒙𑒹𑒮𑒿 𑒏𑒹𑒪𑒢𑓂𑒯𑒱 𑒖𑒹 𑒏𑒞𑒯𑒳 𑒏𑒏𑒩𑒼 𑒢𑒖𑒩𑒱 𑒢𑒯𑒱 𑒪𑒰𑒑𑒱 𑒖𑒰𑒋 । 𑒋𑒯𑒢𑒹-𑒋𑒯𑒢 𑒜𑒹𑒩 𑒩𑒰𑒮 𑒅𑒠𑒰𑒯𑒩𑒝 𑒣𑒱𑒞𑒰𑒏 𑒯𑒵𑒠𑒨𑒧𑒹 𑒣𑒳𑒞𑓂𑒩𑒏 𑒏𑒼𑒢𑒼 𑒑𑒪𑒞𑒲 𑒢𑒯𑒱 𑒏𑒹𑒢𑒱𑒯𑒰𑒩𑒏 𑒕𑒫𑒱 𑒁𑓀𑒏𑒱𑒞 𑒏𑒩𑒥𑒰𑒧𑒹 𑒮𑒏𑓂𑒭𑒧 𑒦𑓄 𑒑𑒹𑒪।
𑒂𑒩𑒳𑒝𑒱𑒏𑒹𑒿 𑒁𑒣𑓂𑒣𑒢 𑒣𑒳𑒩𑒢𑒰 𑒥𑒰𑒞 𑒮𑒦𑒏𑒹𑒿 𑒧𑒼𑒢 𑒩𑒐𑒥𑒰𑒏 𑒡𑒳𑒢𑒱 𑒖𑒹𑒏𑒰𑒿 𑒕𑒪𑒢𑓂𑒯𑒱 । 𑒏𑒼𑒢 𑒄𑒮𑓂𑒫𑒲 𑒧𑒹 𑒏𑒲 𑒦𑒹𑒪, 𑒏𑒼𑒢 𑒄𑒮𑓂𑒫𑒲 𑒮𑒿 𑒏𑒲-𑒏𑒲 𑒦𑒹𑒪 𑒮𑒹 𑒏𑒼𑒢𑒰 𑒨𑒰𑒠𑒱 𑒯𑒼𑒋𑒞 । 𑒯𑒧 𑒥𑒔𑓂𑒔𑒰𑒧𑒹 𑒏𑒲 𑒮𑒦 𑒏𑒋𑒪𑒯𑒳𑒿 –𑒁𑒣𑓂𑒣𑒢 𑒣𑒱𑒞𑒰-𑒧𑒰𑒞𑒰 𑒂𑒏𑒱 𑒂𑒢𑒼 𑒥𑒴𑒜𑓃-𑒣𑒳𑒩𑒰𑒢 𑒮𑒦𑒏 𑒖𑒲𑒫𑒢𑒏 𑒒𑒙𑒢𑒰𑒏𑓂𑒩𑒧𑒏 𑒮𑒦 𑒑𑒣 𑒥𑒳𑒗𑒥𑒰𑒏 𑒪𑒰𑒪𑒮𑒰 𑒯𑒳𑒢𑒏𑒰𑒧𑒹 𑒕𑒪𑒢𑓂𑒯𑒱। 𑒏𑒐𑒢𑒼𑒏𑒰𑒪𑒏𑒹𑒿 𑒯𑒳𑒢𑒏𑒰 𑒋𑒯𑒱 𑒑𑒣𑒏 𑒕𑒑𑒳𑓀𑒞𑒰 𑒯𑒼𑒃𑒞 𑒩𑒯𑒢𑓂𑒯𑒱 𑒖𑒹 𑒥𑒱𑒢𑒰 𑒯𑒳𑒢𑒏𑒩 𑒠𑒹𑒐𑒢𑒼, 𑒋𑒯𑒱 𑒫𑒱𑒬𑓂𑒫𑒧𑒹 𑒮𑒦 𑒑𑒼𑒙𑒹 𑒮𑒦 𑒏𑒰𑒖 𑒏𑒼𑒢𑒰 𑒏𑒋 𑒩𑒯𑒪 𑒁𑒕𑒱 । 𑒧𑒰𑒢𑒹 𑒄 𑒖𑒹 𑒖𑒐𑒢 𑒂𑒩𑒳𑒝𑒱 𑒮𑒳𑒞𑒪 𑒕𑒟𑒱 𑒞𑒐𑒢𑒼 𑒫𑒱𑒬𑓂𑒫 𑒔𑒪𑒱 𑒏𑒼𑒢𑒰 𑒩𑒯𑒪 𑒁𑒕𑒱 । 𑒯𑒳𑒢𑒏𑒰 𑒥𑒔𑓂𑒔𑒰𑒏 𑒠𑒳𑒃-𑒔𑒰𑒩𑒱𑒙𑒰 𑒒𑒙𑒢𑒰 𑒧𑒰𑒞𑓂𑒩 𑒧𑒼𑒢 𑒩𑒯𑒢𑓂𑒯𑒱 । 𑒖𑒹𑒢𑒰 𑒏𑒱 𑒮𑒱𑒢𑒹𑒧𑒰 𑒯𑒰𑒪𑒧𑒹 𑒥𑒰𑒥𑒲 𑒮𑒱𑒢𑒹𑒧𑒰𑒏 𑒮𑓂𑒧𑒩𑒝, 𑒮𑓂𑒙𑒳𑒛𑒱𑒨𑒼𑒧𑒹 𑒧𑒰𑒞𑒰-𑒣𑒱𑒞𑒰𑒏 𑒮𑓀𑒑 𑒧𑒳𑓀𑒛𑒢𑒏 𑒣𑒯𑒱𑒢𑒹 𑒏𑒹𑒬𑒥𑒪𑒰 𑒤𑒼𑒙𑒼 𑒐𑒱𑒔𑒹𑒥𑒰𑒏 𑒮𑓂𑒧𑒵𑒞𑒱 । 𑒤𑒹𑒩 𑒏𑒼𑒢𑒼 𑒑𑒣 𑒣𑒩 𑒧𑒰𑒿 𑒠𑓂𑒫𑒰𑒩𑒰 𑒡𑓂𑒨𑒰𑒢 𑒢𑒯𑒱 𑒠𑒹𑒪𑒰𑒏 𑒅𑒣𑒩𑒰𑓀𑒞 𑒦𑒩𑒱 𑒒𑒩𑒏 𑒔𑒰𑒦𑒲𑒏 𑒗𑒰𑒥𑒰𑒏𑒹𑒿 𑒮𑒼𑒿𑒗𑒰𑒏 𑒛𑒥𑒩𑒰𑒧𑒹 𑒤𑒹𑓀𑒏𑒱 𑒠𑒹𑒥𑒰𑒏 𑒮𑓂𑒧𑒵𑒞𑒱 । 𑒑𑒰𑒧𑒧𑒹 𑒏𑒼𑒢𑒼 𑒏𑒰𑒖-𑒅𑒠𑓂𑒨𑒧𑒏 𑒦𑒲𑒛𑓃𑒏 𑒠𑒵𑒬𑓂𑒨 । 𑒤𑒹𑒩 𑒂𑒩𑒳𑒝𑒱 𑒋𑒯𑒱 𑒮𑒦𑒣𑒩 𑒮𑒼𑒔𑒪𑒰𑒏 𑒥𑒰𑒠 𑒨𑒻𑒯 𑒢𑒱𑒭𑓂𑒏𑒩𑓂𑒭 𑒢𑒱𑒏𑒰𑒪𑒪𑒢𑓂𑒯𑒱 𑒖𑒹 𑓑𑓙𑓗𑓖 𑒄.𑒮𑒿 𑒯𑒳𑒢𑒏𑒰 𑒮𑒦 𑒏𑒱𑒕𑒳 𑒧𑒼𑒢 𑒕𑒢𑓂𑒯𑒱, 𑒏𑒰𑒩𑒝 𑒞𑒐𑒢 𑒍 𑓕-𑓖 𑒥𑒩𑒐𑒏 𑒯𑒼𑒋𑒞𑒰𑒯 𑒂 𑒋𑒯𑒱 𑒫𑒩𑓂𑒭𑒮𑒿 𑒧𑒰𑒿 𑒯𑒳𑒢𑒏𑒰 𑒁𑒐𑒥𑒰𑒩 𑒣𑒜𑓃𑒥𑒰𑒏 𑒯𑒱𑒮𑓂𑒮𑒏 𑒡𑒩𑒰 𑒠𑒹𑒢𑒹 𑒕𑒪𑒐𑒱𑒢𑓂𑒯 । 𑒥𑒯𑒳𑒞 𑒠𑒱𑒢𑒳𑒏𑒰 𑒥𑒰𑒠 𑒋𑒏 𑒠𑒱𑒢 𑒢𑒢𑓂𑒠𑒏𑒹𑒿 𑒂𑒩𑒳𑒝𑒱𑒏 𑒛𑒰𑒨𑒩𑒲 𑒯𑒰𑒟 𑒪𑒰𑒑𑒱 𑒑𑒹𑒪𑒢𑓂𑒯𑒱 𑒖𑒰𑒯𑒱𑒧𑒹 𑒂𑒩𑒳𑒝𑒱 𑒁𑒣𑒢 𑒮𑓂𑒧𑒵𑒞𑒱𑒏 𑒒𑒙𑒢𑒰𑒏𑓂𑒩𑒧𑒏 𑒃𑒞𑒱𑒯𑒰𑒮𑒏𑒰𑒩 𑒖𑒹𑒏𑒰𑒿 𑒫𑒩𑓂𑒝𑒢 𑒠𑒹𑒢𑒹 𑒩𑒯𑒟𑒱।
𑒯𑒧, 𑒂𑒩𑒳𑒝𑒱, 𑒮𑒢𑓂 𑓑𑓙𑓗𑓖 𑒄.𑒏𑒹𑒿 𑒁𑒣𑒢 𑒖𑒲𑒫𑒢𑒏 𑒫𑒱𑒦𑒰𑒖𑒢 𑒩𑒹𑒐𑒰 𑒧𑒰𑒢𑒻𑒞 𑒕𑒲 । 𑒏𑒰𑒩𑒝 𑒋𑒯𑒱𑒮𑒿 𑒣𑒯𑒱𑒢𑒹 𑒯𑒧𑒩𑒰 𑒁𑒣𑒢 𑒖𑒲𑒫𑒢𑒏 𑒒𑒙𑒢𑒰𑒏𑓂𑒩𑒧 𑒏𑒱𑒕𑒳 𑒙𑒴𑒙𑒪 𑒏𑒛𑓃𑒲𑒏 𑒩𑒴𑒣𑒧𑒹 𑒥𑒱𑒢𑒰 𑒞𑒰𑒩𑒞𑒧𑓂𑒨𑒏 𑒥𑒳𑒗𑒢𑒰 𑒖𑒰𑒃𑒞 𑒁𑒕𑒱 । 𑒏𑒐𑒢𑒼𑒏𑒹𑒿 𑒯𑒧𑒩𑒰 𑒄𑒯𑒼 𑒯𑒼𑒃𑒞 𑒁𑒕𑒱 𑒖𑒹 𑒋𑒯𑒱 𑒧𑒹 𑒮𑒿 𑒏𑒱𑒕𑒳 𑒣𑒴𑒩𑓂𑒫 𑒖𑒢𑓂𑒧𑒏 𑒏𑒼𑒢𑒼 𑒒𑒙𑒢𑒰𑒏𑓂𑒩𑒧 𑒞𑒿 𑒢𑒯𑒱 𑒁𑒕𑒱 ? 𑒮𑒢𑓂 𑓑𑓙𑓗𑓖 𑒄.। 𑒯𑒧 𑒑𑓀𑒑𑒰𑒥𑓂𑒩𑒱𑒖 𑒣𑓂𑒩𑒼𑒖𑒹𑒏𑓂𑒙𑒏 𑒑𑓀𑒑𑒰𑒏 𑒅𑒞𑒩𑒥𑒰𑒩𑒲 𑒏𑒰𑒞𑒧𑒹 𑒯𑒰𑒖𑒲𑒣𑒳𑒩𑒧𑒹 𑒥𑒢𑒰𑒋𑒪 𑒏𑒰𑒪𑒼𑒢𑒲𑒧𑒹 𑒁𑒣𑒢 𑒧𑒰𑒞𑒰-𑒣𑒱𑒞𑒰 𑒂 𑒣𑒻𑒒 𑒦𑒰𑒋-𑒥𑒯𑒱𑒢𑒏 𑒮𑓀𑒑 𑒩𑒯𑒱 𑒩𑒯𑒪 𑒕𑒲 । 𑒣𑒱𑒞𑒰𑒖𑒲 𑒫𑓂𑒨𑒫𑒮𑒰𑒨𑒮𑒿 𑒮𑒩𑒏𑒰𑒩𑒲 𑒁𑒦𑒱𑒨𑓀𑒞𑒰 𑒕𑒟𑒱 𑒧𑒳𑒠𑒰 𑒯𑒼𑒧𑓂𑒨𑒼𑒣𑒻𑒟𑒱𑒏 𑒔𑒱𑒏𑒱𑒞𑓂𑒮𑒰𑒧𑒹 𑒮𑒹𑒯𑒼 𑒋𑒧.𑒛𑒲.(𑒑𑒼𑒪𑓂𑒛 𑒧𑒹𑒛𑒹𑒪𑒱𑒮𑓂𑒙) 𑒕𑒟𑒱 𑒂 𑒯𑒳𑒢𑒏𑒩 𑒄 𑒋𑒏 𑒞𑒩𑒯 𑒮𑒿 𑒯𑒰𑒥𑒲 𑒕𑒢𑓂𑒯𑒱 । 𑒦𑒩𑒱 𑒏𑒰𑒪𑒼𑒢𑒲𑒏 𑒪𑒼𑒏 𑒔𑓀𑒠𑒰 𑒋𑒏𑒞𑓂𑒩 𑒏𑒋 𑒯𑒼𑒧𑓂𑒨𑒼𑒣𑒻𑒟𑒱𑒏 𑒠𑒥𑒰𑒃 𑒏𑒰𑒢𑒣𑒳𑒩𑒮𑒿 𑒧𑒿𑒑𑒥𑒻𑒞 𑒕𑒟𑒱 । 𑒥𑒰𑒥𑒴𑒖𑒲𑒏 𑒮𑓀𑒑 𑒋𑒏𑒰𑒡 𑒑𑒼𑒙𑒹 𑒏𑒰𑒢𑒣𑒳𑒩 𑒖𑒰 𑒏𑒋 𑒠𑒫𑒰𑒃 𑒮𑒦 𑒪𑒹𑒢𑒹 𑒁𑒥𑒻𑒞 𑒕𑒟𑒱 । 𑒯𑒧𑒩𑒰 𑒮𑒦𑒏 𑒮𑒩𑒏𑒰𑒩𑒲 𑒏𑓂𑒫𑒰𑒩𑓂𑒙𑒩𑒏 𑒛𑓂𑒩𑒰𑒃𑓀𑒑 𑒩𑒴𑒧𑒧𑒹 𑒋𑒏𑒙𑒰 𑒁𑒪𑒧𑒲𑒩𑒰, 𑒠𑒴 𑒙𑒰 𑒏𑒳𑒩𑓂𑒮𑒲 𑒂 𑒋𑒏𑒙𑒰 𑒙𑒹𑒥𑒳𑒪 𑒔𑒱𑒏𑒱𑒞𑓂𑒮𑒏𑒲𑒨 𑒏𑒰𑒩𑓂𑒨𑒏 𑒯𑒹𑒞𑒳 𑒮𑒧𑒩𑓂𑒣𑒱𑒞 𑒁𑒕𑒱 । 𑒯𑒧𑒩 𑒋𑒏𑒙𑒰 𑒕𑒼𑒙𑒏𑒰 𑒙𑒹𑒥𑒳𑒪 𑒮𑒹𑒯𑒼 𑒋𑒯𑒱 𑒩𑒴𑒧𑒧𑒹 𑒩𑒯𑒻𑒞 𑒁𑒕𑒱, 𑒖𑒰𑒯𑒱𑒧𑒹 𑒞𑒲𑒮 𑒣𑒰𑒃𑒏 𑒂𑒩𑓂𑒨𑒰𑒫𑒩𑓂𑒞𑓂𑒞 𑒁𑒐𑒥𑒰𑒩 𑒯𑒧 𑒁𑒣𑓂𑒣𑒢 𑒧𑒰𑒿𑒏𑒹𑒿 𑒣𑒜𑓃𑒱 𑒏𑒋 𑒮𑒳𑒢𑒥𑒻𑒞 𑒕𑒱𑒨𑒢𑓂𑒯𑒱 । 𑒖𑒞𑒋 𑒡𑒩𑒱 𑒯𑒧𑒩𑒰 𑒧𑒼𑒢 𑒁𑒕𑒱, 𑒋𑒯𑒱 𑒏𑒰𑒪𑒼𑒢𑒲𑒏 𑒠𑒴𑒙𑒰 𑒦𑒰𑒑 𑒕𑒪 । 𑒔𑒰𑒩𑒴 𑒠𑒱𑒬𑒱 𑒔𑒯𑒩𑒠𑒱𑒫𑒰𑒩𑒲 𑒕𑒪, 𑒋𑒯𑒱 𑒏𑒰𑒪𑒼𑒢𑒲𑒏 𑒥𑒲𑒔𑒧𑒹 𑒮𑒹𑒯𑒼 𑒋𑒏𑒙𑒰 𑒠𑒱𑒥𑒰𑒩𑒱 𑒕𑒪 𑒖𑒹 𑒋𑒯𑒱 𑒏𑒰𑒪𑒼𑒢𑒲𑒏𑒹𑒿 ‘𑒩𑒯𑒋𑒥𑒪𑒰’ 𑒂 ‘𑒑𑒼𑒠𑒰𑒧𑒥𑒪𑒰’ 𑒋𑒯𑒱 𑒠𑒴 𑒯𑒲𑒮𑒧𑒹 𑒥𑒿𑒙𑒻𑒞 𑒕𑒪 । 𑒑𑒼𑒠𑒰𑒧𑒥𑒪𑒰 𑒃𑒪𑒰𑒏𑒰𑒧𑒹 𑒧𑒰𑒩𑒱 𑒩𑒰𑒮 𑒪𑒼𑒯𑒰𑒏 𑒕𑒛𑓃, 𑒖𑒼𑒐𑒨 𑒥𑒪𑒰 𑒧𑒬𑒲𑒢 𑒂 𑒙𑓂𑒩𑒏 𑒮𑒦𑒏 𑒮𑓀𑒑 𑒋𑒏𑒙𑒰 𑒏𑒠𑒧𑓂𑒥𑒏 𑒑𑒰𑒕𑒏 𑒮𑓂𑒧𑒵𑒞𑒱 𑒯𑒧𑒩𑒰 𑒁𑒕𑒱 । 𑒖𑒼𑒐𑒨 𑒥𑒪𑒰 𑒋𑒏𑒙𑒰 𑒧𑒬𑒲𑒢 𑒞𑒞𑒹𑒏 𑒣𑒻𑒒 𑒕𑒪 𑒖𑒰𑒯𑒱 𑒣𑒩 𑒯𑒧 𑒖𑒐𑒢 𑒚𑒰𑒜𑓃 𑒯𑒼𑒃𑒞 𑒕𑒪𑒯𑒳𑒿 𑒞𑒿 𑒍𑒏𑒩 𑒏𑒰𑒿𑒙𑒰 𑒯𑒱𑒪𑒥𑒼 𑒡𑒩𑒱 𑒢𑒯𑒱 𑒏𑒩𑒻𑒞 𑒕𑒪 । 𑒯𑒧𑒩𑒰 𑒥𑒞𑒰𑒍𑒪 𑒑𑒹𑒪 𑒕𑒪 𑒖𑒹 𑒋𑒯𑒱 𑒣𑒩 𑒦𑒩𑒱𑒑𑒩 𑒔𑒲𑒖 𑒮𑒦 𑒧𑒰𑒞𑓂𑒩 𑒖𑒼𑒐𑒪 𑒖𑒰 𑒮𑒏𑒻𑒞
𑒁𑒕𑒱 । 𑒣𑒢𑓂𑒠𑓂𑒩𑒯-𑒮𑒞𑓂𑒩𑒯 𑒏𑒱𑒪𑒼𑒏 𑒣𑒰𑒿𑒔 𑒮𑒰𑒞 𑒥𑒩𑓂𑒭𑒏 𑒥𑒔𑓂𑒔𑒰𑒏 𑒦𑒰𑒩 𑒋𑒏𑒩𑒰 𑒯𑒹𑒞𑒳 𑒢𑒼𑒿𑒮𑒱𑒏 𑒮𑒧𑒰𑒢 𑒁𑒕𑒱 । 𑒋𑒯𑒱 𑒑𑒓𑓂𑒑𑒰-𑒥𑓂𑒩𑒱𑒖 𑒏𑒰𑒪𑒼𑒢𑒲𑒏 𑒩𑒯𑒋𑒥𑒪𑒰 𑒏𑓂𑒭𑒹𑒞𑓂𑒩𑒧𑒹 𑒋𑒏𑒙𑒰 𑒣𑒻𑒒 𑒂 𑒋𑒏𑒙𑒰 𑒕𑒼𑒙 𑒧𑒻𑒠𑒰𑒢 𑒕𑒪 । 𑒠𑒳𑒢𑒴𑒏 𑒥𑒲𑒔 𑒋𑒏𑒙𑒰 𑒣𑒻𑒒 𑒣𑒰𑒢𑒱𑒏 𑒙𑓀𑒏𑒲 𑒂 𑒣𑒧𑓂𑒣 𑒯𑒰𑒅𑒮 𑒕𑒪 । 𑒣𑒧𑓂𑒣 𑒯𑒰𑒅𑒮𑒧𑒹 𑒣𑒰𑒢𑒱 𑒖𑒰𑒯𑒱 𑒥𑒰𑒙𑒹 𑒁𑒥𑒻𑒞 𑒕𑒪𑒻𑒏 𑒮𑒹 𑒥𑒹𑒮 𑒧𑒼𑒙𑒑𑒩 𑒣𑒰𑒃𑒣 𑒕𑒪𑒻𑒏 𑒂 𑒯𑒧𑒩𑒰 𑒁𑒐𑒢𑒼 𑒧𑒼𑒢 𑒁𑒕𑒱 𑒖𑒹 𑒍 𑒍𑒯𑒱𑒢𑒰 𑒐𑒳𑒖𑒪 𑒩𑒯𑒻𑒞 𑒕𑒪𑒻𑒏 । 𑒯𑒧 𑒍𑒯𑒱𑒧𑒹 𑒂𑒿𑒐𑒱 𑒠𑒋 𑒏𑓄 𑒞𑒏𑒢𑒯𑒱𑒨𑒼 𑒩𑒯𑒲 𑒧𑒳𑒠𑒰 𑒠𑒼𑒮𑒩 𑒥𑒹𑒩 𑒛𑒩𑒮𑒿 𑒣𑒰𑒕𑒴 𑒯𑒿𑒙𑒱 𑒑𑒹𑒪𑒯𑒳𑒿, 𑒖𑒹 𑒏𑒞𑒯𑒳 𑒐𑒮𑒱 𑒣𑒛𑓃𑒪𑒯𑒳𑒿 𑒞𑒐𑒢 𑒏𑒲 𑒯𑒼𑒋𑒞 । 𑒍 𑒣𑒰𑒃𑒣 𑒋𑒏𑒙𑒰 𑒥𑒼𑒩𑒰𑒮𑒿 𑒗𑒰𑒿𑒣𑒪 𑒩𑒯𑒻𑒞 𑒕𑒪 । 𑒣𑒻𑒒 𑒏𑓂𑒩𑒲𑒛𑒰𑓀𑒑𑒝𑒏 𑒅𑒞𑒩𑒥𑒰𑒩𑒲 𑒏𑒰𑒞𑒧𑒹 𑒋𑒏𑒙𑒰 𑒏𑒼𑒙𑒰𑒥𑒪𑒰 𑒠𑒼𑒏𑒰𑒢 𑒩𑒯𑒻𑒏 । 𑒍𑒯𑒱𑒮𑒿 𑒣𑒕𑒥𑒰𑒩𑒲 𑒏𑒰𑒞𑒧𑒹 𑒋𑒏𑒙𑒰 𑒯𑒢𑒳𑒧𑒰𑒢𑒖𑒲𑒏 𑒧𑒴𑒩𑓂𑒞𑓂𑒞𑒱 𑒂 𑒧𑓀𑒠𑒱𑒩 𑒥𑒢𑒱 𑒩𑒯𑒪 𑒕𑒪 𑒖𑒹 𑒥𑒯𑒳𑒞 𑒣𑒯𑒱𑒢𑒯𑒱 𑒥𑒢𑒱 𑒑𑒹𑒪 𑒩𑒯𑒻𑒞 𑒧𑒳𑒠𑒰 𑒏𑒰𑒩𑒲𑒑𑒩 𑒯𑒢𑒳𑒧𑒰𑒢𑒖𑒲𑒏 𑒢𑒰𑒏 𑒚𑒲𑒏𑒮𑒿 𑒢𑒯𑒱 𑒪𑒑𑒰 𑒣𑒰𑒥𑒱 𑒩𑒯𑒪 𑒕𑒪 । 𑒯𑒢𑒳𑒧𑒰𑒢𑒖𑒲𑒏 𑒢𑒰𑒏 𑒔𑒰𑒯𑒹 𑒞𑒿 𑒮𑒰𑒧𑒑𑓂𑒩𑒲𑒏 𑒮𑒧𑒳𑒔𑒱𑒞 𑒧𑒞𑓂𑒩𑒰𑒏 𑒁𑒢𑒳𑒣𑒰𑒞 𑒢𑒯𑒱 𑒩𑒯𑒪𑒰𑒏 𑒏𑒰𑒩𑒝 𑒫𑒰 𑒏𑒏𑒩𑒼 𑒥𑒠𑒧𑒰𑒬𑒲𑒏 𑒏𑒰𑒩𑒝 𑒙𑒴𑒙𑒱 𑒖𑒰𑒃𑒞 𑒩𑒯𑒋 𑒏𑒱𑓀𑒞𑒳 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒯𑒢𑒳𑒧𑒰𑒢𑒖𑒲𑒏 𑒧𑒴𑒩𑓂𑒞𑓂𑒞𑒱 𑒥𑒢𑒱 𑒏𑒋 𑒞𑒻𑒨𑒰𑒩 𑒦𑓄 𑒑𑒹𑒪 𑒩𑒯𑒋 । 𑒧𑓀𑒑𑒪 𑒠𑒱𑒢𑒏𑒹𑒿 𑒂𑒩𑒞𑒲 𑒯𑒼𑒧𑒋 𑒪𑒰𑒑𑒪 𑒕𑒪, 𑒣𑒴𑒩𑒰 𑒏𑒰𑒪𑒼𑒢𑒲 𑒖𑒹𑒢𑒰 𑒦𑒏𑓂𑒞𑒱-𑒦𑒰𑒫𑒮𑒿 𑒦𑒩𑒱 𑒅𑒚𑒪 𑒩𑒯𑒋 । 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒮𑒦𑒏 𑒅𑒞𑓂𑒮𑒰𑒯𑒧𑒹 𑒏𑒢𑒹𑒏 𑒏𑒧𑒲 𑒂𑒥𑒋 𑒪𑒰𑒑𑒪, 𑒖𑒹𑒢𑒰 𑒂𑒢 𑒮𑓀𑒮𑓂𑒟𑒰𑒏 𑒮𑓀𑒑 𑒯𑒼𑒃𑒞 𑒁𑒕𑒱, 𑒣𑓂𑒩𑒰𑒩𑒧𑓂𑒦𑒱𑒏 𑒅𑒞𑓂𑒮𑒰𑒯 𑒏𑓂𑒩𑒧𑒬𑓁 𑒏𑒧 𑒯𑒼𑒃𑒞 𑒑𑒹𑒪 𑒂 𑒧𑓀𑒠𑒱𑒩𑒏 𑒮𑓀𑒑 𑒖𑒳𑒙𑒪 𑒮𑒦𑒙𑒰 𑒮𑒰𑒧𑒰𑒖𑒱𑒏 𑒏𑒰𑒩𑓂𑒨𑒏𑓂𑒩𑒧𑒏 𑒨𑒼𑒖𑒢𑒰 𑒨𑒼𑒖𑒢𑒹 𑒩𑒯𑒱 𑒑𑒹𑒪 । 𑒯𑒧 𑒏𑒰𑒪𑒼𑒢𑒲𑒮𑒿 𑒠𑒴𑒩 𑒋𑒏𑒙𑒰 𑒮𑓂𑒏𑒴𑒪𑒧𑒹 𑒣𑒜𑓃𑒥𑒰𑒏 𑒯𑒹𑒞𑒳 𑒖𑒰𑒋 𑒪𑒰𑒑𑒪 𑒕𑒪𑒯𑒳𑒿 । 𑒯𑒧𑒩 𑒣𑒻𑒒 𑒦𑒰𑒃 𑒂 𑒥𑒯𑒱𑒢 𑒮𑒹𑒯𑒼 𑒍𑒯𑒱 𑒮𑓂𑒏𑒴𑒪𑒧𑒹 𑒣𑒜𑓃𑒻𑒞 𑒩𑒯𑒟𑒱 । 𑒋𑒏 𑒠𑒱𑒢𑒏𑒰 𑒑𑒣𑓂𑒣 𑒁𑒕𑒱 𑒖𑒹 𑒮𑓂𑒏𑒴𑒪𑒧𑒹 𑒯𑒧𑒩𑒰 𑒏𑒼𑒢𑒼 𑒠𑒼𑒮𑒩 𑒥𑒔𑓂𑒔𑒰𑒏 𑒮𑓀𑒑 𑒗𑒑𑒛𑓃𑒰 𑒦𑒋 𑒑𑒹𑒪 । 𑒠𑒳𑒢𑒳 𑒑𑒼𑒙𑒹𑒏 𑒮𑓀𑒑 𑒮𑓂𑒪𑒹𑒙 𑒩𑒯𑒋 । 𑒯𑒧 𑒂 𑒍 𑒠𑒼𑒮𑒩 𑒥𑒔𑓂𑒔𑒰 𑒋𑒏𑒩𑒰 𑒯𑒟𑒱𑒨𑒰𑒩𑒏 𑒩𑒴𑒣𑒧𑒹 𑒣𑓂𑒩𑒨𑒼𑒑 𑒏𑒩𑒋 𑒪𑒰𑒑𑒪𑒯𑒳𑒿 । 𑒯𑒧 𑒮𑒼𑒔𑒋 𑒪𑒑𑒪𑒯𑒳𑒿 𑒖𑒹 𑒖𑓂𑒨𑒼𑒿 𑒮𑓂𑒪𑒹𑒙𑒏𑒹𑒿 𑒠𑒼𑒮𑒩 𑒥𑒔𑓂𑒔𑒰𑒏 𑒧𑒰𑒟 𑒣𑒩 𑒧𑒰𑒩𑒥𑒻𑒏 𑒞𑒿 𑒬𑒼𑒢𑒱𑒞 𑒢𑒱𑒏𑒪𑒋 𑒪𑒑𑒞𑒻𑒏 । 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒧 𑒮𑓂𑒪𑒹𑒙𑒏𑒹𑒿 𑒩𑒏𑓂𑒭𑒰𑒞𑓂𑒧𑒏 𑒩𑒴𑒣𑒹𑒿 𑒣𑓂𑒩𑒨𑒼𑒑 𑒏𑒹𑒪𑒯𑒳𑒿 । 𑒧𑒳𑒠𑒰 𑒍 𑒠𑒼𑒮𑒩 𑒥𑒔𑓂𑒔𑒰 𑒧𑒔𑓀𑒛 𑒕𑒪… ….𑒐𑒔𑓂𑒔….𑒯𑒧𑒩 𑒧𑒰𑒟𑒮𑒿 𑒬𑒼𑒢𑒱𑒞𑒏 𑒡𑒰𑒩 𑒢𑒱𑒏𑒪𑒋 𑒪𑒰𑒑𑒪 । 𑒙𑒲𑒔𑒩 𑒮𑒦 𑒯𑒧𑒩𑒰 𑒣𑓂𑒩𑒱𑓀𑒮𑒣𑒪𑒏 𑒩𑒴𑒧𑒧𑒹 𑒪𑒋 𑒑𑒹𑒪𑒟𑒱 । 𑒩𑒳𑒃𑒨𑒰𑒧𑒹 𑒮𑒹𑒫𑒪𑒼𑒢 𑒫𑒰 𑒛𑒱𑒙𑒰𑒪 𑒢𑒯𑒱 𑒏𑒱𑒕𑒳 𑒠𑒼𑒮𑒩𑒹 𑒕𑒪, 𑒍𑒏𑒩 𑒩𑓀𑒑 𑒂 𑒮𑒳𑒑𑓀𑒡 𑒯𑒧𑒩𑒰 𑒁𑒐𑒢 𑒡𑒩𑒱 𑒧𑒼𑒢 𑒁𑒕𑒱, 𑒤𑒩𑓂𑒮𑓂𑒙-𑒋𑒛𑒏 𑒥𑒰𑒠 𑒮𑒰𑒿𑒗 𑒯𑒼𑒋𑒥𑒰𑒏 𑒂 𑒕𑒳𑒙𑓂𑒙𑒲𑒏 𑒥𑒹𑒩 𑒢𑒯𑒱 𑒞𑒰𑒏𑒪 𑒑𑒹𑒪 । 𑒮𑓂𑒏𑒴𑒪𑒏 𑒩𑒱𑒏𑓂𑒬𑒰 𑒖𑒰𑒯𑒱 𑒣𑒩 “𑒮𑒰𑒫𑒡𑒰𑒢 𑒥𑒔𑓂𑒔𑒹” 𑒪𑒱𑒐𑒪 𑒕𑒪 𑒏𑒹𑒩 𑒥𑒰𑒙 𑒢𑒯𑒱 𑒖𑒼𑒯𑒱 𑒋𑒏𑒙𑒰 𑒠𑒼𑒮𑒩 𑒩𑒱𑒏𑓂𑒬𑒰𑒧𑒹 𑒯𑒧𑒩𑒰 𑒠𑒲𑒠𑒲𑒏 (𑒥𑒯𑒱𑒢𑒏) 𑒮𑓀𑒑 𑒒𑒩 𑒣𑒚𑒰 𑒠𑒹𑒪 𑒑𑒹𑒪 । 𑒯𑒧 𑒠𑒲𑒠𑒲𑒏𑒹𑒿 𑒣𑒳𑒕𑒪𑒱𑒨𑒻𑒏, 𑒖𑒹 “𑒮𑒰𑒫𑒡𑒰𑒢 𑒥𑒔𑓂𑒔𑒹” 𑒏𑒹𑒩 𑒁𑒩𑓂𑒟 𑒏𑒲 𑒦𑒹𑒪 । 𑒯𑒧𑒩𑒰 𑒪𑒑𑒻𑒞 𑒕𑒪 𑒖𑒹 𑒋𑒏𑒩 𑒁𑒩𑓂𑒟 𑒕𑒪 𑒖𑒹 𑒮𑒦𑒙𑒰 𑒥𑒔𑓂𑒔𑒰 𑒖𑒹 𑒍𑒯𑒱 𑒩𑒱𑒏𑓂𑒬𑒰𑒧𑒹 𑒥𑒻𑒮𑒪 𑒁𑒕𑒱, 𑒮𑒹 𑒮𑒦 𑒮𑒰𑒫𑒡𑒰𑒢 𑒁𑒕𑒱, 𑒂 𑒋𑒯𑒱 𑒥𑒰𑒞𑒮𑒿 𑒍 𑒠𑒼𑒮𑒩 𑒕𑒾𑒛𑓃𑒰 𑒁𑒮𑒯𑒧𑒞𑒱 𑒠𑒹𑒐𑒰 𑒩𑒯𑒪 𑒕𑒪 𑒂 𑒞𑒰𑒯𑒱 𑒑𑒣𑓂𑒣 𑒣𑒩 𑒗𑒑𑒛𑓃𑒰 𑒥𑒖𑒩𑒱 𑒑𑒹𑒪 𑒕𑒪 । 𑒠𑒲𑒠𑒲𑒏 𑒅𑒞𑓂𑒞𑒩 𑒩𑒯𑒋 𑒖𑒹 𑒄 𑒪𑒱𑒐𑒥𑒰𑒏 𑒅𑒠𑓂𑒠𑒹𑒬𑓂𑒨 𑒔𑒹𑒞𑒰𑒫𑒢𑒲 𑒕𑒻𑒏, 𑒖𑒹 𑒏𑒼𑒢𑒼 𑒠𑒼𑒮𑒩 𑒑𑒰𑒛𑓃𑒲 𑒣𑒰𑒕𑒴 𑒮𑒿 𑒚𑒼𑒏𑒩 𑒢𑒯𑒱 𑒧𑒰𑒩𑒱 𑒠𑒻𑒏 𑒂 𑒮𑒧𑓂𑒯𑒩𑒱 𑒏𑒋 𑒔𑒪𑒋 ।
“𑒧𑒳𑒠𑒰 𑒏𑒱𑒋𑒏”- 𑒯𑒧 𑒮𑓀𑒞𑒳𑒭𑓂𑒙 𑒢𑒯𑒱 𑒯𑒼𑒃𑒞 𑒣𑒳𑒕𑒪𑒱𑒨𑒢𑓂𑒯𑒱 । 𑒋𑒯𑒢𑒹 𑒣𑓂𑒩𑒬𑓂𑒢 𑒂 𑒅𑒞𑓂𑒞𑒩𑒏 𑒮𑓀𑒑 𑒯𑒧 𑒥𑒜𑓃𑒋 𑒪𑒰𑒑𑒪 𑒕𑒪𑒯𑒳𑒿 । 𑒂 𑒥𑒜𑓃𑒻𑒞- 𑒥𑒜𑓃𑒻𑒞 𑒏𑒯𑒱𑒨𑒼 𑒏𑒰𑒪 𑒐𑒱𑒮𑒱𑒨𑒹𑒪𑒰 𑒣𑒩 𑒧𑒰𑒿 𑒏𑒯𑒟𑒱, 𑒖𑒹 𑒮𑒼𑒔𑒻𑒞 𑒩𑒯𑒲 𑒖𑒹 𑒏𑒯𑒱𑒨𑒰 𑒣𑒻𑒒 𑒯𑒼𑒋𑒞 𑒂 𑒣𑒻𑒒 𑒦𑒹𑒪 𑒞𑒿 𑒢𑒰𑒏𑒧𑒹 𑒠𑒧 𑒏𑒋 𑒠𑒹𑒢𑒹 𑒁𑒕𑒱।
𑒏𑒰𑒪𑒼𑒢𑒲𑒏 𑒥𑒰𑒯𑒩𑒏 𑒏𑓂𑒩𑒱𑒬𑓂𑒔𑒱𑒨𑒢 𑒮𑓀𑒞𑒏 𑒢𑒰𑒧 𑒣𑒩 𑒥𑒢𑒪 𑒮𑓂𑒏𑒴𑒪𑒧𑒹 𑒯𑒧 𑒮𑒦 𑒦𑒰𑒃-𑒥𑒯𑒱𑒢 𑒖𑒰𑒃𑒞 𑒩𑒯𑒲 । 𑒮𑓂𑒪𑒹𑒙𑒮𑒿 𑒏𑒣𑒰𑒩 𑒤𑒼𑒛𑓃𑒥𑒋𑒪𑒰𑒏 𑒥𑒰𑒠 𑒥𑒰𑒥𑒴𑒖𑒲 𑒏𑒰𑒪𑒼𑒢𑒲𑒧𑒹 𑒂𑒤𑒱𑒮𑒩 𑒮𑒦𑒏 𑒧𑒲𑒙𑒱𑓀𑒑 𑒏𑒩𑒥𑒍𑒪𑒢𑓂𑒯𑒱 । 𑒤𑒻𑒮𑒪𑒰 𑒦𑒹𑒪 𑒖𑒹 𑒐𑒹𑒪𑒰𑒏 𑒧𑒻𑒠𑒰𑒢 𑒂 𑒅𑒞𑓂𑒞𑒩𑒥𑒩𑒱𑒨𑒰 𑒮𑒲𑒧𑓀𑒞𑒏 𑒠𑒹𑒥𑒰𑒪𑒮𑒿 𑒮𑒙𑒪 𑒏𑒼𑒙𑒰𑒏 𑒠𑒼𑒏𑒰𑒢 (𑒮𑒰𑒩𑓂𑒫𑒖𑒢𑒱𑒏 𑒫𑒱𑒞𑒩𑒝 𑒣𑓂𑒩𑒝𑒰𑒪𑒲𑒏 𑒠𑒼𑒏𑒰𑒢𑒏𑒹𑒿 𑒏𑒼𑒙𑒰𑒏 𑒠𑒼𑒏𑒰𑒢 𑒏𑒯𑒪 𑒖𑒰𑒃𑒞 𑒕𑒪) 𑒁𑒣𑒢 𑒂𑒫𑒬𑓂𑒨𑒏𑒞𑒰𑒮𑒿 𑒥𑒹𑒬𑒲 𑒣𑒻𑒒 𑒒𑒩𑒧𑒹 𑒕𑒪 । 𑒍𑒯𑒱 𑒏𑒼𑒙𑒰𑒥𑒪𑒰𑒏 𑒪𑒰𑒃𑒮𑒹𑓀𑒮 𑒮𑒹𑒯𑒼 𑒏𑒼𑒢𑒼 𑒏𑒰𑒩𑒝𑒮𑒿 𑒮𑒧𑒰𑒣𑓂𑒞 𑒦𑒋 𑒑𑒹𑒪 𑒕𑒪𑒻𑒏, 𑒮𑒹 𑒍𑒯𑒱 𑒋𑒮𑒥𑒹𑒮𑓂𑒙𑒮 𑒥𑒪𑒰 𑓓-𑓔 𑒏𑒼𑒚𑒪𑒲𑒏 𑒒𑒩𑒏𑒹𑒿 𑒣𑓂𑒩𑒰𑒟𑒧𑒱𑒏 𑒫𑒱𑒠𑓂𑒨𑒰𑒪𑒨 𑒥𑒢𑒋𑒥𑒰𑒏 𑒢𑒱𑒩𑓂𑒝𑒨 𑒪𑒹𑒪 𑒑𑒹𑒪 𑒂 𑒠𑒴-𑒔𑒰𑒩𑒱𑒙𑒰 𑒬𑒱𑒏𑓂𑒭𑒏𑒏 𑒥𑒯𑒰𑒪𑒲 𑒏𑒋, 𑒠𑒴 𑒔𑒰𑒩𑒱𑒙𑒰 𑒪𑒼𑒏𑒏 𑒏𑒧𑒹𑒙𑒲 𑒥𑒢𑒰𑒋 𑒮𑓂𑒏𑒴𑒪 𑒬𑒳𑒩𑒳 𑒏𑒋 𑒠𑒹𑒪 𑒑𑒹𑒪 । 𑒣𑒛𑓃𑒼𑒮𑒏 𑒑𑓀𑒛𑒏 𑒏𑒰𑒪𑒼𑒢𑒲𑒏𑒹𑒿 𑒮𑒹𑒯𑒼 𑒕𑒯 𑒧𑒯𑒲𑒢𑒰 𑒥𑒰𑒠 𑒢𑒼𑒞 𑒠𑒹𑒪 𑒑𑒹𑒪 𑒖𑒹 𑒁𑒯𑒴𑒿 𑒁𑒣𑓂𑒣𑒢 𑒏𑒰𑒪𑒼𑒢𑒲𑒏 𑒥𑒔𑓂𑒔𑒰 𑒮𑒦𑒏𑒹𑒿 𑒋𑒞𑒋 𑒣𑒜𑓃𑒰 𑒮𑒏𑒻𑒞 𑒕𑒲 । 𑒅𑒞𑓂𑒞𑒩𑒥𑒩𑒱𑒨𑒰 𑒠𑒹𑒥𑒰𑒪 𑒣𑒩 𑒥𑒰𑒯𑒩 𑒠𑒱𑒬𑒱𑒮𑒿 𑒮𑓂𑒏𑒴𑒪𑒏 𑒢𑒰𑒧 𑒪𑒱𑒐𑒪 𑒑𑒹𑒪 𑒖𑒹 𑒏𑒱𑒕𑒳 𑒠𑒱𑒢𑒏 𑒥𑒰𑒠 𑒧𑒪𑒱𑒕𑒼𑒿𑒯 𑒯𑒼𑒃𑒞 𑒑𑒹𑒪 । 𑒧𑒳𑒠𑒰 𑒮𑓂𑒏𑒴𑒪𑒏 𑒣𑓂𑒩𑒞𑒱𑒭𑓂𑒚𑒰 𑒥𑒜𑓃𑒻𑒞 𑒑𑒹𑒪 । 𑒏𑓂𑒨𑒼 𑒑𑒼𑒙𑒹 𑒖𑓂𑒨𑒼𑒿 𑒁𑒣𑓂𑒣𑒢 𑒥𑒔𑓂𑒔𑒰𑒏 𑒢𑒰𑒧 𑒪𑒱𑒐𑒰𑒥𑒋 𑒁𑒥𑒻𑒞 𑒕𑒪𑒰𑒯 𑒞𑒿 𑒯𑒳𑒢𑒏𑒩 𑒥𑒔𑓂𑒔𑒰𑒏𑒹𑒿 𑒋𑒏 𑒏𑒱𑓀𑒫𑒰 𑒏𑒐𑒢𑒼 𑒏𑒰𑒪𑒏𑒹𑒿 𑒠𑒳𑒃 𑒫𑒩𑓂𑒑 𑒢𑒲𑒔𑒰𑒿 𑒢𑒰𑒧𑒰𑓀𑒏𑒢 𑒪𑒹𑒪 𑒖𑒋𑒥𑒰𑒏 𑒑𑒣𑓂𑒣 𑒬𑒱𑒏𑓂𑒭𑒏𑒑𑒝 𑒏𑒩𑒻𑒞 𑒕𑒪𑒰𑒯 । 𑒁𑒣𑓂𑒣𑒢 𑒮𑓂𑒏𑒴𑒪𑒏 𑒮𑓂𑒞𑒩 𑒏𑒢𑒹𑒏 𑒆𑒿𑒔 𑒯𑒼𑒋𑒥𑒰𑒏 𑒑𑒣𑓂𑒣 𑒏𑒩𑒻𑒞 𑒕𑒪𑒰𑒯 । 𑒥𑒹𑒬𑒲 𑒖𑒱𑒠𑓂𑒠 𑒏𑒹𑒪𑒰 𑒣𑒩 𑒯𑒧𑒩𑒰 𑒥𑒖𑒰 𑒏𑒋 𑒙𑒹𑒮𑓂𑒙 𑒪𑒻𑒞 𑒕𑒪𑒰𑒯 𑒂 𑒖𑒰𑒯𑒱 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒞𑒹𑒮𑒩 𑒫𑒩𑓂𑒑𑒏 𑒢𑒰𑒧𑒰𑓀𑒏𑒢𑒏 𑒁𑒦𑒱𑒪𑒰𑒭𑒲 𑒢𑒯𑒱 𑒠𑒋 𑒣𑒰𑒍𑒪 𑒕𑒪𑒰𑒯 𑒮𑒹 𑒣𑓂𑒩𑒬𑓂𑒢 𑒯𑒧𑒩𑒰 𑒮𑒿 𑒣𑒳𑒕𑒻𑒞 𑒕𑒪𑒰𑒯 𑒂 𑒯𑒧𑓂𑒧𑒩 𑒮𑒯𑒲 𑒅𑒞𑓂𑒞𑒩 𑒣𑒩 𑒍 𑒏𑒳𑒙𑒱𑒪 𑒧𑒳𑒮𑓂𑒏𑒰𑒢 𑒠𑒻𑒞 𑒢𑒰𑒧𑒰𑓀𑒏𑒢𑒏 𑒯𑒹𑒞𑒳 𑒂𑒋𑒪 𑒥𑒰𑒪𑒏𑒏 𑒁𑒦𑒱𑒦𑒰𑒫𑒏 𑒠𑒱𑒬𑒱 𑒧𑒳𑒿𑒯 𑒏𑒩𑒻𑒞 𑒕𑒪𑒰𑒯 । 𑒧𑒼𑒙𑒰-𑒧𑒼𑒙𑒲 𑒥𑒳𑒗𑒳 𑒖𑒹 𑒍𑒯𑒱 𑒮𑓂𑒏𑒴𑒪𑒏 𑒯𑒧 𑒮𑒦𑒮𑒿 𑒅𑒖𑓂𑒖𑒫𑒪 𑒫𑒱𑒠𑓂𑒨𑒰𑒩𑓂𑒟𑒲 𑒕𑒪𑒯𑒳𑒿-𑒖𑒏𑒩 𑒮𑒼𑒗𑒰𑒿𑒧𑒹, 𑒍𑒯𑒱 𑒑𑒰𑒧𑒮𑒿 𑒂𑒋𑒪 𑒫𑒱𑒠𑓂𑒨𑒰𑒩𑓂𑒟𑒲𑒏 𑒁𑒋𑒪𑒰𑒏 𑒣𑒯𑒱𑒢𑒹, 𑒏𑓂𑒨𑒼 𑒚𑒰𑒜𑓃 𑒢𑒯𑒱 𑒦𑒋 𑒮𑒏𑒪 𑒕𑒪 । 𑒣𑒜𑓃𑒰𑒃𑒏 𑒣𑓂𑒩𑒞𑒱 𑒋𑒏𑒙𑒰 𑒫𑒱𑒬𑒱𑒭𑓂𑒙 𑒪𑒑𑒰𑒫 𑒕𑒪 𑒯𑒧𑒩𑒰𑒧𑒹, 𑒖𑒹 𑒥𑒰𑒠𑒧𑒹 𑒏𑓂𑒩𑒧𑒬𑓁 𑒅𑒠𑒰𑒮𑒲𑒢𑒞𑒰𑒧𑒹 𑒥𑒠𑒪𑒋 𑒪𑒰𑒑𑒪 । 𑒮𑒹 𑒋𑒏 𑒥𑒹𑒩 𑒖𑒐𑒢 𑒥𑒼𑒐𑒰𑒩𑒮𑒿 𑒥𑒛𑓃𑒥𑒛𑓃𑒰𑒃𑒞 𑒕𑒪𑒯𑒳𑒿 𑒞𑒯𑒱𑒨𑒰 𑒣𑒩𑒲𑒏𑓂𑒭𑒰𑒏 𑒠𑒱𑒢 𑒩𑒯𑒻𑒏 । 𑒥𑒛𑓃𑒥𑒛𑓃𑒰 𑒩𑒯𑒪 𑒕𑒪𑒯𑒳𑒿 𑒖𑒹 𑒣𑒩𑒲𑒏𑓂𑒭𑒰 𑒢𑒹 𑒕𑒴𑒙𑒱
𑒖𑒰𑒋 । 𑒒𑒩𑒣𑒩 𑒣𑓂𑒩𑒬𑓂𑒢 𑒂 𑒏𑒰𑒣𑒲 𑒂𑒋𑒪 𑒂 𑒞𑒐𑒢 𑒁𑒣𑓂𑒣𑒢 𑒣𑒩𑒲𑒏𑓂𑒭𑒰 𑒠𑓄 𑒮𑒏𑒪𑒯𑒳𑒿 𑒯𑒧 । 𑒮𑓂𑒏𑒴𑒪 𑒕𑒪 𑒕𑒼𑒙-𑒕𑒲𑒢 𑒧𑒳𑒠𑒰 𑒍𑒏𑒩 𑒮𑒦 𑒑𑒞𑒱𑒫𑒱𑒡𑒱𑒧𑒹 𑒏𑒰𑒪𑒼𑒢𑒲𑒏 𑒢𑒱𑒫𑒰𑒮𑒲𑒑𑒝 𑒮𑒼𑒞𑓂𑒮𑒰𑒯 𑒦𑒰𑒑 𑒪𑒻𑒞 𑒕𑒪𑒰𑒯 । 𑒏𑓂𑒩𑒲𑒛𑒰𑒏𑓂𑒩𑒱𑒨𑒰 𑒯𑒼𑒁𑒋 𑒂𑒏𑒱 𑒮𑒰𑓀𑒮𑓂𑒏𑒵𑒞𑒱𑒏 । 𑒏𑓂𑒩𑒲𑒛𑓃𑒰𑒧𑒹 𑒠𑒴 𑒫𑒱𑒠𑓂𑒨𑒰𑒩𑓂𑒟𑒲 𑒋𑒏-𑒋𑒏 𑒣𑒋𑒩 𑒛𑒼𑒩𑒲𑒮𑒿 𑒥𑒰𑒢𑓂𑒯𑒱 𑒏𑒋 𑒞𑒲𑒢 𑒙𑒰𑒿𑒑 𑒥𑒢𑒰𑒋 𑒠𑒾𑒑𑒻𑒞 𑒕𑒪𑒰𑒯 । 𑒠𑒾𑒑𑒱 𑒏𑒋 𑒧𑒻𑒠𑒰𑒢𑒏 𑒠𑒼𑒮𑒩 𑒕𑒼𑒛𑓃𑒣𑒩 𑒩𑒰𑒐𑒪 𑒥𑓂𑒪𑒻𑒏 𑒥𑒼𑒩𑓂𑒛𑒣𑒩 𑒪𑒱𑒐𑒪 𑒯𑒱𑒮𑒰𑒥𑒏𑒹𑒿 𑒥𑒢𑒰𑒋 𑒠𑒾𑒑𑒱 𑒏𑒋 𑒂𑒣𑒮 𑒁𑒋𑒥𑒰𑒏 𑒐𑒹𑒪𑒧𑒹 𑒬𑒰𑒩𑒲𑒩𑒱𑒏 𑒂 𑒧𑒰𑒢𑒮𑒱𑒏 𑒠𑒳𑒯𑒳𑒏 𑒣𑒩𑒲𑒏𑓂𑒭𑒰 𑒯𑒼𑒃𑒞 𑒕𑒪 𑒖𑒰𑒯𑒱𑒧𑒹 𑒯𑒧 𑒁𑒑𑓂𑒩𑒝𑒲 𑒁𑒥𑒻𑒞 𑒕𑒪𑒯𑒳𑒿 । 𑒯𑒧𑒩𑒰 𑒠𑒴 𑒑𑒼𑒙 𑒒𑒙𑒢𑒰 𑒂𑒩 𑒧𑒼𑒢 𑒣𑒛𑓃𑒱 𑒩𑒯𑒪 𑒁𑒕𑒱 । 𑒣𑒯𑒱𑒪 𑒒𑒙𑒢𑒰 𑒋𑒏 𑒑𑒼𑒙 𑒥𑒔𑓂𑒔𑒰𑒏 𑒑𑒰𑒧𑒮𑒿 𑒂𑒋𑒥 । 𑒍 𑒯𑒧𑒩𑒰 𑒯𑒹𑒞𑒳 𑒏𑒱𑒕𑒳 𑒠𑒱𑒢 𑒣𑒜𑓃𑒰𑒄𑒧𑒹 𑒔𑒳𑒢𑒾𑒞𑒲𑒏 𑒩𑒴𑒣𑒧𑒹 𑒩𑒯𑒪 𑒏𑒰𑒩𑒝 𑒍𑒏𑒩 𑒑𑒰𑒧 𑒥𑒪𑒰 𑒏𑒱𑒞𑒰𑒥𑒧𑒹 𑒏𑒱𑒕𑒳 𑒢𑒫𑒲𑒢 𑒖𑒰𑒢𑒏𑒰𑒩𑒲 𑒩𑒯𑒻𑒏 𑒧𑒳𑒠𑒰 𑒞𑒏𑒩 𑒏𑒼𑒙𑒰 𑒣𑒴𑒩𑒰 𑒦𑒹𑒪𑒰𑒏 𑒥𑒰𑒠 𑒯𑒧 𑒍𑒏𑒩 𑒔𑒳𑒢𑒾𑒞𑒲𑒏𑒹𑒿 𑒐𑒞𑒧 𑒏𑒋
𑒠𑒹𑒪𑒯𑒳𑒿 । 𑒠𑒼𑒮𑒩 𑒒𑒙𑒢𑒰 𑒕𑒪 𑒋𑒏 𑒑𑒼𑒙 𑒥𑒔𑓂𑒔𑒰𑒏 𑒋𑒏𑓂𑒮𑒲𑒛𑒹𑓀𑒙 𑒖𑒏𑒩 𑒥𑒰𑒠 𑒯𑒧 𑒮𑒦 𑒐𑒹𑒪𑒰𑒃 𑒏𑒰𑒪𑒧𑒹 𑒙𑒰𑒃𑒧 𑒢𑒱𑒏𑒰𑒪𑒱 𑒍𑒏𑒩𑒰 𑒐𑒱𑒛𑓃𑒏𑒲𑒮𑒿 𑒠𑒹𑒐𑒱 𑒁𑒥𑒻𑒞 𑒩𑒯𑒱𑒨𑒻𑒏 । 𑒥𑒰𑒠𑒧𑒹 𑒏𑒯𑒱𑒨𑒼 𑒏𑒰𑒪 𑒍𑒏𑒩 𑒩𑒴𑒧 𑒧𑒹 𑒖𑒰 𑒏𑒋 𑒍𑒏𑒩 𑒛𑒰𑒨𑒩𑒲 𑒮𑒹𑒯𑒼 𑒠𑒹𑒐𑒱 𑒁𑒥𑒻𑒞 𑒩𑒯𑒲 । 𑒍𑒏𑒩 𑒏𑒱𑒕𑒳 𑒁𑓀𑒬 𑒯𑒧𑒩𑒰 𑒧𑒼𑒢 𑒁𑒕𑒱 𑒮𑒹 𑒋𑒢𑒰 𑒁𑒕𑒱 ।
“𑒁𑒣𑓂𑒣𑒢 𑒮𑒦𑒏 𑒑𑒣𑓂𑒣 𑒏𑒩𑒥𑒰 𑒪𑒹𑒪 𑒯𑒧𑒩𑒰 𑒪𑒑𑒧𑒹 𑒮𑒧𑒨𑒏 𑒁𑒦𑒰𑒥 𑒩𑒯𑒋 𑒪𑒰𑒑𑒪 । 𑒏𑒱𑒕𑒳 𑒞𑒿 𑒋𑒏𑒩 𑒏𑒰𑒩𑒝 𑒩𑒯𑒪 𑒯𑒧𑓂𑒧𑒩 𑒁𑒣𑓂𑒣𑒢 𑒂𑒠𑒞𑒱 𑒂 𑒏𑒱𑒕𑒳 𑒋𑒏𑒩 𑒏𑒰𑒩𑒝 𑒩𑒯𑒪 𑒯𑓂𑒧𑓂𑒧𑒩 𑒋𑒏𑓂𑒮𑒲𑒛𑒹𑓀𑒙, 𑒖𑒏𑒩 𑒏𑒰𑒩𑒝 𑒯𑒧𑓂𑒧𑒩 𑒖𑒲𑒫𑒢𑒏 𑒛𑒹𑒜 𑒮𑒰𑒪 𑒥𑒳𑒗𑒰 𑒣𑒛𑓃𑒪 𑒖𑒹𑒢𑒰 𑒛𑒹𑒜 𑒠𑒱𑒢 𑒖𑒹𑒏𑒰𑒿 𑒥𑒲𑒞𑒱 𑒑𑒹𑒪 । 𑒏𑒱𑒕𑒳 𑒋𑒯𑒱 𑒥𑒰𑒞𑒏 𑒠𑒱𑒮 𑒮𑒹𑒯𑒼 𑒯𑒧𑒩 𑒡𑓂𑒨𑒰𑒢 𑒑𑒹𑒪 𑒖𑒹 𑒛𑒹𑒜 𑒮𑒰𑒪𑒧𑒹 𑒖𑒞𑒹𑒏 𑒮𑒧𑒨𑒏 𑒢𑒳𑒏𑒮𑒰𑒢 𑒦𑒹𑒪 𑒞𑒏𑒩 𑒏𑓂𑒭𑒞𑒱𑒣𑒴𑒩𑓂𑒞𑒱 𑒏𑒼𑒢𑒰 𑒏𑒋 𑒯𑒼𑒋𑒞 । 𑒏𑒱𑒕𑒳 𑒞𑒿 𑒦𑒼𑒩𑒧𑒹 𑒅𑒚𑒱 𑒏𑒋 𑒮𑒧𑒨 𑒥𑒔𑒹𑒥𑒰𑒏 𑒫𑒱𑒔𑒰𑒩 𑒂𑒋𑒪 𑒧𑒳𑒠𑒰 𑒂𑒿𑒐𑒱𑒏 𑒢𑒱𑒢𑓂𑒢 𑒞𑒰𑒯𑒱 𑒧𑒹 𑒥𑒰𑒡𑒏 𑒥𑒢𑒱 𑒑𑒹𑒪 । 𑒞𑒐𑒢 𑒮𑒰𑒧𑒖𑒱𑒏 𑒮𑓀𑒥𑓀𑒡𑒏𑒹𑒿 𑒮𑒲𑒧𑒱𑒞 𑒏𑒩𑒥𑒰𑒏 𑒫𑒱𑒔𑒰𑒩 𑒂𑒋𑒪 । 𑒋𑒯𑒱𑒧𑒹 𑒯𑒧𑒩𑒰 𑒥𑒱𑒢 𑒣𑓂𑒩𑒨𑒰𑒮𑒏 𑒮𑒤𑒪𑒞𑒰 𑒦𑒹𑒙𑒱 𑒑𑒹𑒪 𑒕𑒪 । 𑒋𑒏𑒩 𑒏𑒰𑒩𑒝 𑒕𑒪 𑒯𑒧𑒩 𑒢𑒯𑒱 𑒐𑒞𑒧 𑒣𑓂𑒩𑒞𑒲𑒞 𑒯𑒼𑒧𑒋𑒥𑒪𑒰 𑒥𑒲𑒧𑒰𑒩𑒲 । 𑒋𑒯𑒱𑒧𑒹 𑒫𑒱𑒦𑒱𑒢𑓂𑒢 𑒛𑒰𑒏𑓂𑒙𑒩𑒏 𑒍𑒣𑒱𑒢𑒱𑒨𑒢, 𑒏𑒱𑒕𑒳 𑒑𑒪𑒞 𑒂𑒣𑒩𑒹𑒬𑒢 𑒂 𑒋𑒏𑒩 𑒮𑒧𑓂𑒧𑒱𑒪𑒱𑒞 𑒃𑒧𑓂𑒣𑓂𑒩𑒹𑒮𑒢 𑒄 𑒖𑒹 𑒂𑒥 𑒯𑒧𑒩𑒰 𑒁𑒣𑒰𑒯𑒱𑒖𑒏 𑒖𑒲𑒫𑒢 𑒖𑒲𑒥𑒋 𑒣𑒛𑓃𑒞 । 𑒂𑒢𑒏 𑒥𑒰𑒞 𑒞𑒿 𑒕𑒼𑒛𑒴 𑒯𑒧𑒩𑒰 𑒁𑒣𑒢𑒼 𑒧𑒼𑒢𑒧𑒹 𑒄 𑒥𑒰𑒞 𑒂𑒥𑒋 𑒪𑒰𑒑𑒪 𑒕𑒪 । 𑒪𑒑𑒻𑒞 𑒕𑒪 𑒖𑒹 𑒛𑒰𑒏𑓂𑒙𑒩 𑒮𑒦 𑒤𑒴𑒮𑒱𑒨𑒰𑒯𑒱𑒿𑒏 𑒂𑒬𑓂𑒫𑒰𑒮𑒢 𑒠𑒋 𑒩𑒯𑒪 𑒁𑒕𑒱 । 𑒋𑒯𑒱 𑒏𑓂𑒩𑒧𑒧𑒹 𑒤𑒼𑒢 𑒮𑒿 𑒪𑓄 𑒏𑒋 𑒯𑒰𑒪 𑒮𑒧𑒰𑒔𑒰𑒩 𑒣𑒳𑒕𑒢𑒯𑒰𑒩𑒏 𑒮𑓀𑒐𑓂𑒨𑒰 𑒮𑒹𑒯𑒼 𑒒𑒙𑒱 𑒑𑒹𑒪 𑒕𑒪 । 𑒮𑒹 𑒖𑒐𑒢 𑒁𑒔𑒰𑒢𑒏𑒹 𑒥𑒻𑒬𑒰𑒐𑒲 𑒂 𑒤𑒹𑒩 𑒕𑒛𑓃𑒲𑒣𑒩 𑒁𑒋𑒪𑒰𑒏 𑒥𑒰𑒠 𑒯𑒧 𑒏𑒰𑒩 𑒔𑒪𑒰𑒥𑒋 𑒪𑒑𑒪𑒯𑒳𑒿 𑒞𑒿 𑒥𑒯𑒳𑒞 𑒑𑒼𑒙𑒹𑒏𑒹𑒿 𑒤𑒹𑒩 𑒮𑒿 𑒯𑒧𑒩𑒰 𑒮𑓀𑒑 𑒮𑒰𑒧𑒰𑒢𑓂𑒨 𑒮𑓀𑒥𑓀𑒡 𑒥𑒢𑒰𑒥𑒋𑒧𑒹 𑒁𑒮𑒳𑒫𑒱𑒡𑒰 𑒯𑒼𑒧𑒋 𑒪𑒑𑒪𑒢𑓂𑒯𑒱 । 𑒖𑒹 𑒯𑒧𑒩𑒰𑒮𑒿 𑒠𑒴𑒩 𑒢𑒯𑒱 𑒑𑒹𑒪 𑒩𑒯𑒟𑒱 𑒞𑒢𑒱𑒏𑒰𑒮𑒿 𑒞𑒿 𑒯𑒧 𑒖𑒥𑒩𑓂𑒠𑒮𑓂𑒞𑒲𑒨𑒼 𑒮𑓀𑒥𑓀𑒡 𑒩𑒐𑒪𑒯𑒳𑒿 𑒧𑒳𑒠𑒰 𑒠𑒼𑒮𑒩 𑒠𑒱𑒬𑒱 𑒑𑒹𑒪 𑒪𑒼𑒏𑒮𑒿 𑒯𑒧𑒩 𑒫𑓂𑒨𑒫𑒯𑒰𑒩 𑒢𑒱𑒩𑒣𑒹𑒏𑓂𑒭 𑒩𑒯𑒻𑒞 𑒕𑒪 𑒮𑒹 𑒣𑒳𑒢𑓁𑒮𑓀𑒥𑓀𑒡 𑒥𑒢𑒹𑒥𑒰𑒮𑒿 𑒪𑒼𑒏 𑒯𑒞𑒼𑒞𑓂𑒮𑒰𑒯𑒱𑒞 𑒩𑒯𑒋 𑒪𑒑𑒪𑒰𑒯 । 𑒠𑒳𑒩𑓂𑒠𑒱𑒢𑒧𑒹 𑒖𑒹 𑒯𑒧𑒩𑒰𑒣𑒩 𑒯𑒿𑒮𑒟𑒱 𑒞𑒢𑒱𑒏𑒩 𑒣𑓂𑒩𑒞𑒱 𑒄 𑒫𑓂𑒨𑒫𑒯𑒰𑒩 𑒮𑒯𑒰𑒢𑒦𑒴𑒞𑒱𑒣𑓂𑒩𑒠𑒯𑒱 𑒧𑒰𑒢𑒪 𑒖𑒋𑒞 । 𑒋𑒯𑒱𑒮𑒿 𑒮𑒧𑒨𑒡𑒩𑒱 𑒐𑒴𑒥 𑒥𑒔𑒋 𑒪𑒰𑒑𑒪। 𑒬𑒳𑒩𑒳𑒧𑒹 𑒞𑒿 𑒪𑒰𑒑𑒪 𑒖𑒹𑒢𑒰 𑒂𑒤𑒱𑒮𑒧𑒹 𑒏𑓂𑒨𑒼 𑒔𑒱𑒢𑓂𑒯𑒞 𑒂𑒏𑒱 𑒢𑒯𑒱 । 𑒧𑒳𑒠𑒰 𑒖𑒐𑒢 𑒯𑒧 𑒂𑒤𑒱𑒮 𑒣𑒯𑒳𑒿𑒔𑒪𑒯𑒳𑒿 𑒞𑒿 𑒪𑒰𑒑𑒪 𑒖𑒹𑒢𑒰 𑒯𑒲𑒩𑒼 𑒖𑒹𑒏𑒰𑒿 𑒮𑓂𑒫𑒰𑒑𑒞 𑒦𑒹𑒪 𑒯𑒼𑒁𑒋 । 𑒧𑒳𑒠𑒰 𑒋𑒯𑒱𑒧𑒹 𑒄 𑒥𑒰𑒞 𑒮𑓀𑒑𑒲-𑒮𑒰𑒟𑒲 𑒮𑒦 𑒢𑒳𑒏𑒰 𑒪𑒹𑒪𑒏 𑒖𑒹 𑒯𑒧𑒩 𑒕𑒛𑓃𑒲𑒮𑒿 𑒔𑒪𑒢𑒰𑒃 𑒯𑒳𑒢𑒏𑒰 𑒮𑒦𑒏 𑒦𑒲𑒞𑒩 𑒯𑒰𑒯𑒰𑒏𑒰𑒩 𑒧𑒔𑒰 𑒩𑒯𑒪 𑒕𑒪𑒢𑓂𑒯𑒱 । 𑒮𑒦 𑒧𑒰𑒞𑓂𑒩 𑒯𑒧𑒩 𑒯𑒱𑒧𑓂𑒧𑒞𑒏 𑒣𑓂𑒩𑒬𑓀𑒮𑒰 𑒏𑒩𑒻𑒞 𑒩𑒯𑒻𑒞 𑒕𑒪𑒰𑒯 । 𑒖𑒐𑒢 𑒯𑒧 𑒕𑒛𑓃𑒲 𑒕𑒼𑒛𑓃𑒱 𑒏𑒋 𑒔𑒪𑒋 𑒪𑒑𑒪𑒯𑒳𑒿 𑒂 𑒖𑒲𑒢𑓂𑒮 𑒬𑒩𑓂𑒙-𑒣𑒻𑓀𑒙 𑒣𑒯𑒱𑒩𑒱 𑒏𑒋 𑒁𑒋𑒪𑒯𑒳𑒿 𑒞𑒐𑒢 𑒋𑒏 𑒑𑒼𑒙𑒹 𑒮𑓀𑒑𑒲 𑒏𑒯𑒪𑒏 𑒖𑒹 𑒂𑒥 𑒁𑒯𑒰𑒿 𑒣𑒳𑒩𑒢𑒏𑒰 𑒩𑒴𑒣𑒧𑒹 𑒒𑒳𑒩𑒱 𑒩𑒯𑒪 𑒕𑒲 । 𑒋𑒯𑒱 𑒥𑒰𑒞𑒏𑒹𑒿 𑒯𑒧 𑒒𑒩𑒣𑒩 𑒂𑒥𑒱 𑒏𑓄 𑒮𑒼𑒔𑒋 𑒪𑒑𑒪𑒯𑒳𑒿 । 𑒁𑒣𑒢 𑒔𑒪𑒋 𑒏𑒰𑒪𑒏 𑒤𑒼𑒙𑒼𑒏𑒹𑒿 𑒣𑒞𑓂𑒢𑒲𑒏 𑒧𑒠𑒞𑒱 𑒮𑒿 𑒯𑒻𑒝𑓂𑒛𑒲𑒏𑒻𑒧 𑒠𑓂𑒫𑒰𑒩𑒰 𑒫𑒲𑒨𑒼𑒛𑒲𑒑𑓂𑒩𑒰𑒤𑒲 𑒏𑒩𑒥𑒋𑒪𑒯𑒳𑒿 । 𑒋𑒏𑒥𑒹𑒩 𑒞𑒿 𑒮𑒢𑓂𑒢 𑒩𑒯𑒱 𑒑𑒹𑒪𑒯𑒳𑒿 । 𑒔𑒪𑒥𑒰𑒏 𑒞𑒩𑒲𑒏𑒰 𑒂𑒥𑒼 𑒢𑒹𑒿𑒑𑒛𑓃𑒰 𑒏𑒋 𑒠𑒾𑒑𑒥𑒰 𑒮𑒢 𑒪𑒰𑒑𑒪 𑒕𑒪 । 𑒣𑒯𑒱𑒢𑒹 𑒞𑒿 𑒂𑒩 𑒥𑒹𑒬𑒲 𑒯𑒼𑒋𑒞 𑒧𑒳𑒠𑒰 𑒮𑓀𑒑𑒲 𑒮𑒦 𑒋𑒏𑒼 𑒩𑒞𑓂𑒞𑒲 𑒣𑒞𑒰 𑒡𑒩𑒱 𑒢𑒯𑒱 𑒔𑒪𑒋 𑒠𑒹𑒪𑒏 । 𑒥𑒰𑒠𑒧𑒹 𑒒𑒩𑒏 𑒪𑒼𑒏 𑒏𑒯𑒪𑒏 𑒖𑒹 𑒄 𑒞𑒿 𑒥𑒛𑓂𑒛 𑒏𑒧 𑒁𑒕𑒱, 𑒣𑒯𑒱𑒢𑒹 𑒞𑒿 𑒂𑒩 𑒥𑒹𑒮𑒲 𑒕𑒪 । 𑒞𑒐𑒢 𑒯𑒧𑒩𑒰 𑒥𑒳𑒗𑒥𑒰𑒧𑒹 𑒂𑒋𑒪 𑒖𑒹 𑒮𑓀𑒑𑒲𑒮𑒦 𑒂 𑒍 𑒮𑒦 𑒖𑒹 𑒯𑒧𑒩𑒰𑒮𑒿 𑒪𑒑𑒰𑒫 𑒁𑒢𑒳𑒦𑒫 𑒏𑒩𑒻𑒞 𑒕𑒪𑒰𑒯, 𑒞𑒢𑒱𑒏𑒰 𑒏𑒞𑒹𑒏 𑒐𑒩𑒰𑒥 𑒪𑒑𑒻𑒞 𑒯𑒼𑒋𑒞𑒢𑓂𑒯𑒱 । 𑒞𑒏𑒩𑒰 𑒥𑒰𑒠 𑒯𑒧𑒩𑒰 𑒯𑒳𑒢𑒏𑒩 𑒮𑒦𑒏 𑒣𑓂𑒩𑒼𑒞𑓂𑒮𑒰𑒯𑒢 𑒂 𑒯𑒧𑒩 𑒯𑒱𑒧𑓂𑒧𑒞𑒏 𑒣𑓂𑒩𑒬𑓀𑒮𑒰 𑒏𑒩𑒻𑒞 𑒩𑒯𑒥𑒰𑒏 𑒩𑒯𑒮𑓂𑒨𑒏 𑒣𑒞𑒰 𑒔𑒪𑒪 । 𑒁𑒣𑒢 𑒣𑓂𑒩𑒰𑒩𑒧𑓂𑒦𑒱𑒏 𑒖𑒲𑒫𑒢𑒏 𑒋𑒏𑒰𑒏𑒲𑒣𑒢 𑒂 𑒢𑒾𑒏𑒩𑒲-𑒔𑒰𑒏𑒩𑒲 𑒣𑒏𑒛𑓃𑒪𑒰𑒏 𑒥𑒰𑒠 𑒮𑒰𑒩𑓂𑒫𑒖𑒢𑒱𑒏 𑒖𑒲𑒫𑒢𑒧𑒹 𑒁𑒪𑒑-𑒟𑒪𑒑 𑒣𑒛𑓃𑒱 𑒖𑒋𑒥𑒰𑒏 𑒮𑓀𑒠𑒹𑒯, 𑒂𑒬𑒰, 𑒁𑒣𑒹𑒏𑓂𑒭𑒰 𑒏𑒱𑓀𑒫𑒰 𑒁𑒯𑒮𑒰𑒮-𑒤𑒲𑒪𑒱𑓀𑒑𑒏 𑒥𑒰𑒠 𑒖𑒹 𑒋𑒯𑒱 𑒞𑒩𑒯𑒏 𑒁𑒢𑒳𑒦𑒫 𑒦𑒹𑒪 𑒮𑒹 𑒯𑒧𑒩 𑒫𑓂𑒨𑒏𑓂𑒞𑒱𑒞𑓂𑒫𑒏 𑒦𑒱𑒢𑓂𑒢 𑒫𑒱𑒏𑒰𑒮𑒏𑒹𑒿 𑒂𑒩 𑒠𑒵𑒜𑓃𑒞𑒰 𑒣𑓂𑒩𑒠𑒰𑒢 𑒏𑒹𑒪𑒏”।
𑒍 𑒞𑒿 𑒕𑒪 𑒯𑒧𑒩𑒹 𑒮𑓀𑒑𑒲 𑒧𑒳𑒠𑒰 𑒏𑒪𑓂𑒣𑒢𑒰 𑒏𑓄 𑒩𑒯𑒪 𑒕𑒪 𑒖𑒹𑒢𑒰 𑒏𑒼𑒢𑒼 𑒣𑒻𑒒 𑒫𑒱𑒨𑒰𑒯𑒪 𑒫𑓂𑒨𑒏𑓂𑒞𑒱 𑒯𑒼𑒁𑒋 𑒂 𑒏𑒰𑒪𑓂𑒣𑒢𑒱𑒏 𑒩𑒴𑒣𑒮𑒿 𑒚𑒲𑒏 𑒦𑒹𑒪𑒰𑒏 𑒥𑒰𑒠𑒏 𑒫𑒩𑓂𑒝𑒢 𑒁𑒣𑒢 𑒛𑒰𑒨𑒩𑒲𑒧𑒹 𑒏𑒋𑒢𑒹 𑒕𑒪 । 𑒧𑒖𑒠𑒴𑒩𑒏 𑒙𑒼𑒪 𑒂 𑒮𑒰𑒿𑒗𑒧𑒹 𑒚𑒹𑒪𑒰𑒑𑒰𑒛𑓃𑒲 𑒣𑒩 𑒯𑒳𑒢𑒏𑒰 𑒪𑒼𑒏𑒢𑒱 𑒠𑓂𑒫𑒰𑒩𑒰 𑒁𑒣𑒢 𑒏𑒣𑒛𑓃𑒰 𑒮𑒳𑒐𑒰𑒋𑒥, 𑒋𑒯𑒱 𑒮𑒦𑒏𑒹𑒿 𑒠𑒹𑒐𑒱 𑒏𑓄 𑒯𑒧 𑒫𑒱𑒔𑒪𑒱𑒞 𑒦𑓄 𑒖𑒰𑒃𑒞 𑒕𑒪𑒯𑒳𑒿 । 𑒄 𑒠𑒹𑒐𑒪𑒰𑒏 𑒥𑒰𑒠𑒼 𑒖𑒹 𑒯𑒳𑒢𑒏𑒰 𑒪𑒼𑒏𑒢𑒱𑒏 𑒧𑒳𑒿𑒯𑒣𑒩 𑒯𑒿𑒮𑒲 𑒕𑒢𑓂𑒯𑒱, 𑒥𑒱𑒢 𑒒𑒩 𑒩𑒯𑒪𑒼 𑒅𑒞𑓂𑒞𑒩 । 𑒕𑒼𑒙-𑒕𑒼𑒙 𑒥𑒔𑓂𑒔𑒰 𑒮𑒦𑒏𑒹𑒿 𑒦𑒲𑒐 𑒧𑒿𑒑𑒻𑒞 𑒠𑒹𑒐𑒥, 𑒯𑒧 𑒮𑒦 𑒖𑒐𑒢 𑒐𑒹𑒪𑒰𑒃𑒞 𑒩𑒯𑒲 𑒞𑒿 𑒍𑒏𑒩𑒰 𑒮𑒦𑒏 𑒯𑒧𑒩𑒰 𑒮𑒦𑒏 𑒠𑒱𑒬𑒱 𑒏𑒰𑒞𑒩 𑒠𑒵𑒭𑓂𑒙𑒱𑒋 𑒠𑒹𑒐𑒥 । 𑒪𑒼𑒏 𑒮𑒦𑒏 𑒠𑒳𑒞𑓂𑒏𑒰𑒩, 𑒏𑒯𑒱𑒨𑒼 𑒯𑒧𑒩𑒼 𑒣𑒩 𑒄 𑒫𑒱𑒣𑒞𑓂𑒞𑒱 𑒂𑒥𑒱 𑒖𑒰𑒋 𑒞𑒐𑒢 ? 𑒤𑒹𑒩 𑒠𑒼𑒮𑒩 𑒏𑓂𑒨𑒼 𑒯𑒳𑒢𑒏𑒰 𑒪𑒼𑒏𑒢𑒱𑒏 𑒠𑒱𑒬𑒱 𑒞𑒏𑒥𑒼 𑒢𑒯𑒱 𑒏𑒩𑒢𑓂𑒯𑒱, 𑒞𑒿 𑒏𑒲 𑒯𑒧𑒯𑒲 𑒙𑒰 𑒂𑒢 𑒥𑒔𑓂𑒔𑒰𑒮𑒿 𑒦𑒱𑒢𑓂𑒢 𑒕𑒲 𑒂 𑒄 𑒮𑒦 𑒮𑒼𑒔𑒢𑒲 𑒪𑒰𑒑𑒪 𑒩𑒯𑒻𑒞 𑒕𑒪 । 𑒯𑒧 𑒄 𑒮𑒼𑒔𑒻𑒞 𑒩𑒯𑒲 𑒖𑒹 𑒖𑒐𑒢 𑒯𑒧 𑒏𑒼𑒢𑒼 𑒮𑓂𑒟𑒰𑒢 𑒣𑒩 𑒢𑒯𑒱 𑒩𑒯𑒻𑒞 𑒕𑒲 𑒞𑒐𑒢𑒼 𑒞𑒿 𑒮𑒦 𑒏𑒰𑒩𑓂𑒨 𑒑𑒞𑒱𑒮𑒿 𑒔𑒪𑒻𑒞 𑒁𑒕𑒱 । 𑒏𑒱𑒞𑒰𑒥𑒧𑒹 𑒯𑒧 𑒣𑒜𑓃𑒢𑒹 𑒩𑒯𑒲 𑒖𑒹 𑒏𑒱𑒕𑒳 𑒖𑒲𑒫 𑒖𑓀𑒞𑒳 𑒧𑒰𑒞𑓂𑒩 𑒠𑒴 𑒛𑒰𑒃𑒧𑒹𑓀𑒮𑒢𑒧𑒹 𑒠𑒹𑒐𑒻𑒞 𑒁𑒕𑒱 । 𑒯𑒧𑒩𑒰 𑒮𑒦 𑒞𑒲𑒢 𑒛𑒰𑒃𑒧𑒹𑓀𑒮𑒢𑒧𑒹 𑒖𑒱𑒥𑒻𑒞 𑒕𑒲, 𑒞𑒿 𑒄 𑒖𑒹 𑒦𑒴𑒏𑓀𑒣𑒏 𑒂 𑒂𑒢-𑒂𑒢 𑒫𑒱𑒣𑒞𑓂𑒞𑒱 𑒮𑒦 𑒁𑒥𑒻𑒞 𑒁𑒕𑒱 𑒮𑒹 𑒏𑒼𑒢𑒼 𑒔𑒰𑒩𑒱 𑒛𑒰𑒃𑒧𑒹𑓀𑒮𑒢𑒧𑒹 𑒏𑒰𑒩𑓂𑒨 𑒏𑒩𑒋 𑒥𑒪𑒰𑒞𑒿 𑒢𑒯𑒱 𑒏𑓄 𑒩𑒯𑒪 𑒁𑒕𑒱 𑒖𑒹 𑒏𑒪𑓂𑒣𑒢𑒰𑒞𑒲𑒞 𑒁𑒕𑒱 ।
𑒣𑒰𑒿𑒔 𑒣𑒰𑒃𑒧𑒹 𑒪𑒰𑒪𑒕𑒛𑓃𑒲 𑒥𑒪𑒰𑒏𑒹𑒿 𑒠𑒹𑒐𑒰 𑒏𑓄 𑒥𑒰𑒥𑒴𑒖𑒲 𑒏𑒯𑒻𑒞 𑒩𑒯𑒟𑒱 𑒖𑒹 𑒠𑒹𑒐𑒴 𑒄𑒯𑒼 𑒪𑒼𑒏𑒢𑒱 𑒁𑒣𑒢 𑒣𑒩𑒱𑒫𑒰𑒩𑒏 𑒑𑒳𑒖𑒩 𑒣𑒰𑒿𑒔-𑒣𑒰𑒿𑒔 𑒣𑒰𑒃𑒏 𑒄 𑒪𑒰𑒪𑒕𑒛𑓃𑒲 𑒥𑒹𑒔𑒱 𑒏𑒋 𑒏𑓄 𑒩𑒯𑒪 𑒕𑒟𑒱 । 𑒣𑒰𑒃𑒏 𑒧𑒯𑒞𑓂𑒫 𑒂 𑒍𑒏𑒩 𑒂𑒫𑒬𑓂𑒨𑒏𑒞𑒰 𑒖𑒞𑒹𑒏 𑒥𑒜𑓃𑒰𑒆 𑒞𑒞𑒹𑒏 𑒥𑒜𑓃𑒞 । 𑒁𑒣𑒢-𑒁𑒣𑒢 𑒫𑒰𑒞𑒰𑒫𑒩𑒝𑒏 𑒂 𑒖𑒲𑒫𑒢𑒏 𑒥𑒰𑒠𑒏 𑒖𑒲𑒫𑒢𑒏 - 𑒋𑒯𑒱 𑒮𑒦𑒏 𑒮𑓀𑒑 𑒖𑒲𑒢𑒰𑒃, 𑒩𑒰𑒞𑒱𑒧𑒹 𑒥𑒛𑓃𑒥𑒛𑓃𑒹𑒢𑒰𑒃 𑒄 𑒮𑒦 𑒑𑒼𑒙 𑒏𑒰𑒩𑓂𑒨𑒏 𑒮𑓀𑒑 𑒣𑒜𑓃𑒰𑒃 𑒂 𑒣𑒱𑒞𑒰𑒏 𑒢𑒾𑒏𑒩𑒲𑒏 𑒣𑒩𑒹𑒬𑒰𑒢𑒲 𑒮𑒦 𑒔𑒪𑒻𑒞 𑒩𑒯𑒪 । 𑒯𑒧𑒩𑒰 𑒧𑒼𑒢 𑒣𑒛𑓃𑒻𑒞 𑒁𑒕𑒱 𑒖𑒹 𑒋𑒏 𑒠𑒱𑒢 𑒦𑒼𑒩𑒹-𑒦𑒼𑒩 𑒋𑒏 𑒑𑒼𑒙 𑒚𑒲𑒏𑒹𑒠𑒰𑒩𑒏 𑒮𑒴𑒙𑒏𑒹𑒬𑒣𑒩 𑒯𑒧𑒩 𑒥𑒰𑒥𑒴𑒖𑒲 𑒖𑒼𑒩𑒮𑒿 𑒪𑒰𑒞 𑒧𑒰𑒩𑒢𑒹 𑒕𑒪𑒰𑒯 । 𑒮𑒴𑒙𑒏𑒹𑒬 𑒖𑒰 𑒏𑓄 𑒠𑒴𑒩 𑒐𑒮𑒪 𑒂 𑒍𑒯𑒱𑒧𑒹 𑒩𑒰𑒐𑒪 𑒩𑒳𑒣𑒻𑒨𑓂𑒨𑒰 𑒮𑒾𑒿𑒮𑒹 𑒕𑒱𑒛𑓃𑒱𑒨𑒰 𑒑𑒹𑒪 । 𑒯𑒧𑒩 𑒋𑒏 𑒑𑒼𑒙 𑒣𑒱𑒞𑒱𑒨𑒾𑒞 𑒦𑒰𑒃 𑒕𑒪𑒰𑒯 𑒖𑒹 𑒮𑒦𑒙𑒰 𑒣𑒰𑒃𑒏𑒹𑒿 𑒅𑒚𑒰 𑒮𑒴𑒙𑒏𑒹𑒬𑒧𑒹 𑒩𑒰𑒐𑒱 𑒫𑒰𑒣𑒮 𑒚𑒲𑒏𑒹𑒠𑒰𑒩𑒏𑒹𑒿 𑒠𑓄 𑒫𑒰𑒣𑒮 𑒏𑒋 𑒠𑒹𑒪𑒐𑒱𑒢𑓂𑒯 𑒂 𑒄𑒯𑒼 𑒏𑒯𑒪𑒐𑒱𑒢𑓂𑒯 𑒖𑒹 𑒖𑒪𑓂𑒠𑒲𑒮𑒿 𑒦𑒰𑒑𑒱 𑒖𑒰𑒆 𑒢𑒯𑒱 𑒞𑒿 𑒣𑒳𑒪𑒱𑒮𑒏𑒹𑒿 𑒣𑒏𑒛𑓃𑒥𑒰 𑒠𑒹𑒞𑒰𑒯 । 𑒧𑒰𑒿 𑒯𑒧𑒩𑒰 𑒦𑒲𑒞𑒩𑒏𑒰 𑒏𑒼𑒚𑒪𑒲 𑒪𑓄 𑒑𑒹𑒪𑒲𑒯 । 𑒯𑒧 𑒥𑒔𑓂𑒔𑒰 𑒕𑒪𑒯𑒳𑒿 𑒧𑒳𑒠𑒰 𑒯𑒧𑒩𑒰 𑒥𑒳𑒗𑒥𑒰𑒧𑒹 𑒂𑒥𑒱 𑒑𑒹𑒪 𑒕𑒪 𑒖𑒹 𑒄 𑒣𑒰𑒃 𑒯𑒧𑒩𑒰 𑒥𑒰𑒥𑒴𑒖𑒲𑒏𑒹𑒿 𑒑𑓀𑒑𑒰-𑒥𑓂𑒩𑒱𑒖𑒏 𑒚𑒲𑒏𑒹𑒠𑒰𑒩𑒏 𑒠𑒱𑒬𑒱𑒮𑒿 𑒁𑒣𑒢 𑒃𑓀𑒖𑒲𑒢𑒱𑒨𑒩𑒱𑓀𑒑 𑒕𑒼𑒛𑓃𑒱 𑒏𑓄 𑒥𑒱𑒢𑒰 𑒏𑒼𑒢𑒼 𑒦𑒰𑒓𑒚𑒏 𑒏𑒰𑒩𑓂𑒨 𑒯𑒼𑒧𑒋 𑒠𑒹𑒥𑒰 𑒪𑓄 𑒠𑒹𑒪 𑒖𑒋𑒥𑒰𑒏 𑒣𑓂𑒩𑒨𑒰𑒮 𑒕𑒪 । 𑒥𑒰𑒥𑒴𑒖𑒲 𑒥𑒯𑒳𑒞 𑒏𑒰𑒪 𑒡𑒩𑒱 𑒥𑒛𑓃𑒥𑒛𑓃𑒰𑒃𑒞 𑒩𑒯𑒪𑒰𑒯 । 𑒏𑒐𑒢𑒼 𑒠𑒰𑒪𑒱𑒧𑒹 𑒢𑒴𑒢 𑒏𑒧 𑒩𑒯𑒪𑒰 𑒅𑒞𑓂𑒞𑒩 𑒂𑒏𑒱 𑒂𑒢 𑒏𑒼𑒢𑒼 𑒏𑒰𑒩𑒝𑒮𑒿 𑒥𑒩𑓂𑒞𑓂𑒞𑒢𑒏𑒹𑒿 𑒤𑒹𑓀𑒏𑒥𑒰𑒏 𑒮𑓂𑒫𑒩𑒮𑒿 𑒠𑒹𑒯 𑒮𑒱𑒯𑒩𑒱 𑒖𑒰𑒃𑒞 𑒕𑒪 । 𑒤𑒹𑒩 𑒏𑒱𑒕𑒳 𑒏𑓂𑒭𑒝𑒏 𑒔𑒳𑒣𑓂𑒣𑒲𑒏 𑒥𑒰𑒠 𑒮𑒦 𑒥𑒔𑓂𑒔𑒰𑒏𑒹𑒿 𑒥𑒖𑒰𑒍𑒪 𑒖𑒰𑒃𑒞 𑒕𑒪 𑒂 𑒠𑒳𑒪𑒰𑒩 𑒧𑒪𑒰𑒩 𑒯𑒼𑒃𑒞 𑒕𑒪 । 𑒯𑒧 𑒫𑒩𑓂𑒑𑒧𑒹 𑒣𑓂𑒩𑒟𑒧 𑒁𑒥𑒻𑒞 𑒕𑒪𑒯𑒳𑒿 𑒂 𑒣𑒩𑒱𑒝𑒰𑒧 𑒢𑒱𑒏𑒪𑒥𑒰𑒏 𑒠𑒱𑒢 𑒋𑒏𑒙𑒰 𑒏𑒰𑒪𑒼𑒢𑒲𑒏 𑒮𑒱𑒢𑓂𑒯𑒰 𑒔𑒰𑒔𑒲 𑒮𑒦 𑒥𑒹𑒩 𑒪𑒙𑓂𑒚𑒰 𑒐𑒼𑒂𑒥𑒻𑒞 𑒩𑒯𑒟𑒱 । 𑒣𑓂𑒩𑒰𑒨𑓁 𑒑𑒳𑒩 𑒂 𑒂𑒙𑒰𑒮𑒿 𑒥𑒢𑒪 𑒋𑒯𑒱 𑒪𑒙𑓂𑒚𑒰𑒏 𑒮𑓂𑒫𑒰𑒠 𑒯𑒧 𑒥𑒱𑒮𑒩𑒱 𑒢𑒯𑒱 𑒮𑒏𑒪 𑒕𑒲 । 𑒍𑒯𑒱 𑒔𑒰𑒔𑒲𑒏 𑒋𑒏𑒙𑒰 𑒁𑒩𑓂𑒠𑓂𑒡-𑒣𑒰𑒑𑒪 𑒠𑒱𑒁𑒩 𑒕𑒪𑒢𑓂𑒯𑒱 𑒖𑒹 𑒮𑒱𑒞𑒰𑒩 𑒥𑒖𑒥𑒻𑒞 𑒩𑒯𑒻𑒞 𑒕𑒪 । 𑒋𑒏 𑒥𑒹𑒩 𑒑𑓀𑒑𑒰𑒧𑒹 𑒮𑓂𑒙𑒲𑒧𑒩𑒮𑒿 𑒯𑒧𑒩𑒰 𑒮𑒦 𑒍𑒯𑒱 𑒣𑒰𑒩 𑒖𑒰𑒋 𑒩𑒯𑒪 𑒕𑒪𑒯𑒳𑒿 𑒞𑒿 𑒍 𑒍𑒯𑒱 𑒮𑓂𑒙𑒲𑒧𑒩 𑒣𑒩𑒮𑒿 𑒁𑒣𑒢 𑒦𑒰𑒋𑒏𑒹𑒿 𑒤𑒹𑓀𑒏𑒥𑒰 𑒪𑒹𑒪 𑒍 𑒅𑒠𑓂𑒨𑒞 𑒦𑓄 𑒑𑒹𑒪 𑒕𑒪 । 𑒍𑒯𑒱 𑒔𑒰𑒔𑒲𑒏𑒹𑒿 𑒋𑒏𑒙𑒰 𑒥𑒹𑒙𑒲 𑒩𑒯𑒢𑓂𑒯𑒱 𑒩𑒖𑒢𑒲 । 𑒣𑒞𑒰 𑒢𑒯𑒱 𑒏𑒼𑒢 𑒥𑒱𑒧𑒰𑒩𑒲 𑒦𑒹𑒪𑒻𑒏, 𑒥𑒹𑒔𑒰𑒩𑒲 𑒋𑒪𑒼𑒣𑒻𑒟𑒱𑒏 𑒠𑒫𑒰𑒃𑒏 𑒤𑒹𑒩𑒧𑒹 𑒍𑒕𑒰𑒍𑒢 𑒡𑓄 𑒪𑒹𑒪𑒏 । 𑒯𑒧 𑒮𑒦 𑒏𑒞𑒰𑒏 𑒥𑒹𑒩 𑒯𑒳𑒢𑒏𑒰 𑒠𑒹𑒐𑒥𑒰 𑒪𑒹𑒪 𑒖𑒰𑒃𑒞 𑒩𑒯𑒲 । 𑒯𑒧𑒩𑒰 𑒠𑒼𑒮𑒩𑒰𑒏 𑒁𑒯𑒱𑒚𑒰𑒧 𑒖𑒰𑒋𑒧𑒹 𑒡𑒰𑒐 𑒯𑒼𑒃𑒞 𑒩𑒯𑒋 𑒧𑒳𑒠𑒰 𑒍𑒞𑒋 𑒏𑒏𑒩𑒼 𑒮𑓀𑒑𑒹 𑒣𑒯𑒳𑒿𑒔𑒱 𑒖𑒰𑒃𑒞 𑒩𑒯𑒲 । 𑒯𑒳𑒢𑒏𑒰 𑒮𑒦 𑒏𑓂𑒨𑒼 𑒠𑒲𑒠𑒲 𑒏𑒯𑒻𑒞 𑒩𑒯𑒱𑒨𑒢𑓂𑒯𑒱 । 𑒯𑒧𑒩𑒰 𑒮𑒦𑒮𑒿 𑒥𑒛𑓂𑒛 𑒣𑒻𑒒 𑒩𑒯𑒟𑒱 । 𑒧𑒳𑒠𑒰 𑒏𑒱𑒕𑒳 𑒠𑒱𑒢𑒏 𑒥𑒰𑒠 𑒯𑒳𑒢𑒏𑒩 𑒧𑒵𑒞𑓂𑒨𑒳 𑒦𑓄
𑒑𑒹𑒪𑒢𑓂𑒯𑒱 । 𑒧𑒵𑒞𑓂𑒨𑒳𑒮𑒿 𑒯𑒧𑒩 𑒧𑒰𑒢𑒮𑒱𑒏 𑒠𑓂𑒫𑓀𑒠, 𑒋𑒯𑒱 𑒒𑒙𑒢𑒰𑒏 𑒥𑒰𑒠 𑒂𑒥 𑒂𑒩 𑒪𑒑 𑒥𑒳𑒗𑒰𑒋 𑒪𑒰𑒑𑒪 । 𑒯𑒳𑒢𑒏𑒩 𑒧𑒵𑒞𑓂𑒨𑒳𑒏 𑒥𑒰𑒠𑒼 𑒍 𑒔𑒰𑒔𑒲 𑒁𑒣𑒢 𑒥𑒹𑒙𑒰 𑒮𑒦𑒏𑒹𑒿 𑒁𑒑𑒱𑒪𑒰 𑒠𑒱𑒢 𑒮𑓂𑒏𑒴𑒪𑒏 𑒯𑒹𑒞𑒳 𑒞𑒻𑒨𑒰𑒩 𑒏𑒋 𑒣𑒚𑒹𑒪𑒢𑓂𑒯𑒱 𑒖𑒹 𑒏𑒰𑒪𑒼𑒢𑒲𑒏 𑒋𑒏𑒑𑒼𑒙 𑒠𑒼𑒮𑒩 𑒠𑒥𑓀𑒑 𑒔𑒰𑒔𑒲𑒏𑒹𑒿 𑒣𑒮𑒱𑒢𑓂𑒢 𑒢𑒯𑒱 𑒣𑒛𑓃𑒪𑒢𑓂𑒯𑒱 𑒂 𑒋𑒏𑒩 𑒔𑒩𑓂𑒔𑒰 𑒥𑒯𑒳𑒞 𑒠𑒱𑒢 𑒡𑒩𑒱 𑒏𑒰𑒪𑒼𑒢𑒲𑒧𑒹 𑒯𑒼𑒃𑒞 𑒩𑒯𑒪 । 𑒔𑒰𑒔𑒲𑒏 𑒦𑒰𑒃 𑒧𑒳𑒖𑒤𑓂𑒤𑒩𑒣𑒳𑒩 𑒃𑓀𑒮𑓂𑒙𑒲𑒙𑓂𑒨𑒴𑒙 𑒂𑒤 𑒙𑒹𑒏𑓂𑒢𑒰𑒪𑒼𑒖𑒲𑒧𑒹 𑒫𑓂𑒨𑒰𑒐𑓂𑒨𑒰𑒞𑒰 𑒩𑒯𑒟𑒱। 𑒋𑒯𑒱 𑒏𑒰𑒪𑒹𑒖𑒮𑒿 𑒯𑒧𑒩 𑒥𑒰𑒥𑒴𑒖𑒲 𑒮𑒹𑒯𑒼 𑒃𑓀𑒖𑒲𑒢𑒱𑒨𑒩𑒱𑓀𑒑 𑒣𑒰𑒮 𑒏𑒋𑒢𑒹 𑒩𑒯𑒟𑒱 । 𑒍 𑒯𑒰𑒖𑒲𑒣𑒳𑒩𑒧𑒹 𑒑𑓀𑒑𑒰-𑒥𑓂𑒩𑒱𑒖 𑒏𑒰𑒪𑒼𑒢𑒲 𑒮𑓂𑒟𑒱𑒞 𑒯𑒧𑒩 𑒮𑒦𑒏 𑒒𑒩 𑒣𑒩 𑒂𑒋𑒪 𑒩𑒯𑒟𑒱 𑒂 𑒁𑒣𑒢 𑒥𑒯𑒢𑒼𑒃𑒏𑒹𑒿 𑒥𑒛𑓂𑒛 𑒤𑒗𑓂𑒗𑒞𑒱 𑒏𑒋𑒢𑒹 𑒩𑒯𑒟𑒱𑒢𑓂𑒯 । 𑒣𑒙𑒢𑒰 𑒖𑒰 𑒏𑒋 𑒢𑒲𑒏 𑒃𑒪𑒰𑒖 𑒏𑒩𑒹𑒥𑒰𑒧𑒹 𑒁𑒮𑒤𑒪 𑒩𑒯𑒥𑒰𑒏 𑒏𑒰𑒩𑒝 𑒣𑒰𑒃𑒏𑒹𑒿 𑒥𑒞𑒹𑒢𑒹 𑒩𑒯𑒟𑒱𑒢𑓂𑒯 । 𑒯𑒧𑒩𑒰 𑒧𑒼𑒢𑒧𑒹 𑒄 𑒫𑒱𑒔𑒰𑒩 𑒂𑒋𑒪 𑒩𑒯𑒋 𑒖𑒹 𑒣𑒙𑒢𑒰𑒧𑒹 𑒣𑒻𑒒 𑒛𑒰𑒏𑓂𑒙𑒩 𑒩𑒯𑒻𑒞 𑒁𑒕𑒱 𑒖𑒹 𑒧𑒵𑒞𑓂𑒨𑒳𑒏𑒹𑒿 𑒖𑒲𑒞𑒱 𑒮𑒏𑒻𑒞 𑒁𑒕𑒱 । 𑒧𑒳𑒠𑒰 𑒋𑒏 𑒠𑒱𑒢 𑒯𑒧𑒩𑒰 𑒮𑒦𑒏 𑒮𑓀𑒑 𑒩𑒯𑒋𑒥𑒪𑒰 𑒑𑒰𑒧𑒏 𑒣𑒱𑒞𑒱𑒨𑒾𑒞 𑒦𑒰𑒋 𑒖𑒐𑒢 𑒣𑒩𑒧𑒰𑒝𑒳 𑒨𑒳𑒠𑓂𑒡𑒏 𑒔𑒩𑓂𑒔𑒰 𑒏𑒋 𑒩𑒯𑒪 𑒕𑒪𑒰𑒯 𑒂 𑒄𑒯𑒼 𑒖𑒹 𑒍𑒯𑒱 𑒮𑒧𑒨𑒧𑒹 𑒣𑒵𑒟𑓂𑒫𑒲 𑒣𑒩 𑒋𑒞𑒹𑒏 𑒣𑒩𑒧𑒰𑒝𑒳 𑒁𑒮𑓂𑒞𑓂𑒩-𑒬𑒮𑓂𑒞𑓂𑒩 𑒫𑒱𑒠𑓂𑒨𑒧𑒰𑒢 𑒩𑒯𑒋 𑒖𑒰𑒯𑒱𑒮𑒿 𑒣𑒵𑒟𑓂𑒫𑒲𑒏𑒹𑒿 𑒏𑒞𑒰𑒏 𑒥𑒹𑒩 𑒢𑒭𑓂𑒙 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱, 𑒞𑒐𑒢 𑒯𑒧𑒩 𑒄𑒯𑒼 𑒩𑒏𑓂𑒭𑒰 𑒏𑒫𑒔 𑒙𑒴𑒙𑒱 𑒑𑒹𑒪 𑒕𑒪 ।
𑒯𑒧𑒩 𑒣𑒳𑒩𑒰𑒢 𑒖𑒲𑒫𑒢𑒏 𑒄 𑒋𑒏𑒙𑒰 𑒢𑒲𑒏 𑒁𑒢𑒳𑒦𑒫 𑒕𑒪। 𑒥𑒰𑒠𑒧𑒹 𑒠𑒳𑒩𑓂𑒒𑒙𑒢𑒰 𑒞𑒿 𑒯𑒿𑒮𑒲-𑒐𑒹𑒪 𑒦𑓄 𑒑𑒹𑒪 । 𑒢𑒯𑒱 𑒞𑒿 𑒋𑒏𑒩𑒰𑒮𑒿 𑒏𑒼𑒢𑒼 𑒠𑒳𑓁𑒐 𑒯𑒼𑒃𑒞 𑒕𑒪 𑒢𑒯𑒱𑒨𑒹 𑒏𑒼𑒢𑒼 𑒪𑒏𑓂𑒭𑓂𑒨𑒏 𑒣𑓂𑒩𑒞𑒱 𑒞𑒹𑒢𑒰 𑒦𑓄 𑒏𑒋 𑒣𑒛𑓃𑒻𑒞 𑒕𑒪𑒯𑒳𑒿 । 𑒐𑒹𑒪 𑒮𑒹𑒯𑒼 𑒫𑒻𑒯 𑒢𑒲𑒏 𑒪𑒰𑒑𑒋 𑒖𑒰𑒯𑒱𑒧𑒹 𑒙𑒲𑒧 𑒢𑒯𑒱 𑒫𑒩𑒢 𑒫𑓂𑒨𑒏𑓂𑒞𑒱𑒑𑒞 𑒮𑓂𑒣𑒩𑓂𑒡𑒰 𑒩𑒯𑒻𑒞 𑒕𑒪 𑒏𑒰𑒩𑒝 𑒙𑒲𑒧𑒧𑒹 𑒠𑒼𑒮𑒩𑒰𑒏 𑒣𑓂𑒩𑒠𑒩𑓂𑒬𑒢 𑒯𑒰𑒩𑒱𑒏 𑒮𑓂𑒟𑒱𑒞𑒱𑒧𑒹 𑒥𑒯𑒢𑓂𑒢𑒰 𑒥𑒢𑒱 𑒖𑒰𑒃𑒞 𑒁𑒕𑒱 । 𑒋𑒏𑒩 𑒏𑒰𑒩𑒝 𑒮𑒹𑒯𑒼 𑒕𑒪, 𑒏𑒱𑒋𑒏 𑒞𑒿 𑒋𑒯𑒱𑒧𑒹 𑒙𑒲𑒧𑒏 𑒣𑓂𑒩𑒠𑒩𑓂𑒬𑒢 𑒣𑒩 𑒫𑓂𑒨𑒏𑓂𑒞𑒱𑒑𑒞 𑒣𑓂𑒩𑒠𑒩𑓂𑒬𑒢 𑒢𑒱𑒩𑓂𑒦𑒩 𑒢𑒯𑒱 𑒏𑒩𑒻𑒞 𑒕𑒪 𑒂 𑒖𑒹 𑒥𑒛𑓃𑒰𑒃 𑒂𑒏𑒱 𑒥𑒳𑒩𑒰𑒃 𑒦𑒹𑒙𑒻𑒞 𑒕𑒪 𑒮𑒹 𑒫𑓂𑒨𑒏𑓂𑒞𑒱𑒨𑒹𑒏𑒹𑒿 𑒦𑒹𑒙𑒻𑒞 𑒕𑒪 । 𑒁𑒯𑒰𑒿 𑒄 𑒢𑒯𑒱 𑒏𑒯𑒱 𑒮𑒏𑒻𑒞 𑒕𑒲 𑒖𑒹 𑒍𑒏𑒩𑒰 𑒏𑒰𑒩𑒝 𑒯𑒧 𑒯𑒰𑒩𑒪𑒯𑒳𑒿, 𑒯𑒧 𑒞𑒿 𑒢𑒲𑒏 𑒣𑓂𑒩𑒠𑒩𑓂𑒬𑒢 𑒏𑒋𑒢𑒹 𑒩𑒯𑒲 । 𑒮𑓂𑒏𑒴𑒪 𑒂 𑒣𑒜𑓃𑒰𑒃𑒏 𑒁𑒞𑒱𑒩𑒱𑒏𑓂𑒞 𑒍𑒢𑒰 𑒏𑓂𑒩𑒲𑒛𑓃𑒰𑒏 𑒮𑓂𑒟𑒰𑒢 𑒢𑓂𑒨𑒴𑒢𑒹 𑒕𑒪 । 𑒪𑒏𑓂𑒭𑓂𑒨𑒏 𑒣𑓂𑒩𑒞𑒱 𑒖𑒹 𑒢𑒱𑒩𑒣𑒹𑒏𑓂𑒭𑒞𑒰 𑒥𑒰𑒠𑒧𑒹 𑒯𑒧𑒩𑒰𑒧𑒹 𑒂𑒋𑒪 𑒕𑒪 𑒮𑒹 𑒍𑒯𑒱 𑒮𑒧𑒨𑒧𑒹 𑒢𑒯𑒱 𑒕𑒪 । 𑒍𑒯𑒱 𑒮𑒧𑒨𑒧𑒹 𑒞𑒿 𑒖𑒑𑒞𑒏𑒹𑒿 𑒖𑒱𑒞𑒥𑒰𑒏 𑒡𑒳𑒢𑒱 𑒕𑒪 । 𑒠𑓂𑒫𑒱𑒞𑒲𑒨 𑒮𑓂𑒟𑒰𑒢𑒏 𑒞𑒿 𑒏𑒼𑒢𑒼 𑒣𑓂𑒩𑒬𑓂𑒢𑒹 𑒢𑒯𑒱 𑒕𑒪 । 𑒠𑓂𑒫𑒱𑒞𑒲𑒨 𑒮𑓂𑒟𑒰𑒢𑒏 𑒧𑒰𑒢𑒹 𑒕𑒪 𑒁𑒢𑒳𑒞𑓂𑒞𑒲𑒩𑓂𑒝 𑒦𑒹𑒢𑒰𑒃 । 𑒐𑒹𑒪𑒼𑒧𑒹, 𑒣𑒜𑓃𑒰𑒃𑒨𑒼𑒧𑒹, 𑒧𑒰𑒩𑒱-𑒣𑒲𑒙𑒧𑒹 𑒮𑒹𑒯𑒼 । 𑒑𑒰𑒧 𑒂𑒢-𑒖𑒰𑒢 𑒐𑒴𑒥 𑒯𑒼𑒃𑒞 𑒩𑒯𑒋 । 𑒑𑒰𑒧 𑒖𑒰𑒃𑒞 𑒩𑒯𑒲 𑒞𑒿 𑒧𑒯𑒰𑒠𑒹𑒫 𑒣𑒼𑒐𑒩𑒱 𑒣𑒩𑒏𑒰 𑒮𑓂𑒏𑒴𑒪𑒧𑒹 𑒏𑒰𑒏𑒰 𑒬𑒱𑒏𑓂𑒭𑒏𑒏𑒹𑒿 𑒏𑒯𑒱 𑒁𑒥𑒻𑒞 𑒕𑒪𑒰𑒯 𑒂 𑒯𑒧 𑒕𑒳𑒙𑓂𑒙𑒲𑒨𑒼 𑒧𑒹 𑒮𑓂𑒏𑒴𑒪 𑒖𑒰𑒃𑒞 𑒩𑒯𑒲 । 𑒏𑒥𑒛𑓂𑒛𑒲, 𑒮𑒞𑒒𑒩𑒱𑒨𑒰, 𑒪𑒰𑒪-𑒕𑒛𑓃𑒲 𑒄 𑒮𑒦 𑒐𑒹𑒪𑒏 𑒢𑒰𑒧𑒼 𑒞𑒿 𑒬𑒯𑒩𑒏 𑒥𑒔𑓂𑒔𑒰𑒏𑒹𑒿 𑒥𑒴𑒗𑒪 𑒢𑒯𑒱
𑒯𑒼𑒋𑒞𑒻𑒏 । 𑒁𑒮𑓂𑒞𑒳 𑒍𑒞𑒳𑒏𑓂𑒏𑒰 𑒣𑒜𑓃𑒰𑒃𑒏 𑒮𑒦 𑒣𑓂𑒩𑒝𑒰𑒪𑒲 𑒁𑒪𑒑 𑒕𑒪 । 𑒣𑓂𑒩𑒞𑒱𑒠𑒱𑒢 𑒏𑒩𑒔𑒲 𑒏𑒪𑒧𑒮𑒿 𑒪𑒱𑒐𑒢𑒰 𑒪𑒱𑒐𑒋𑒧𑒹 𑒠𑒹𑒯 𑒮𑒱𑒯𑒩𑒱 𑒖𑒰𑒃𑒞 𑒕𑒪 𑒂 𑒩𑒼𑒖𑒢𑒰𑒧𑒔𑒰 𑒮𑒹𑒯𑒼 𑒋𑒯𑒱 𑒣𑓂𑒩𑒏𑒰𑒩𑒹 𑒪𑒱𑒐𑒻𑒞 𑒩𑒯𑒲-𑒦𑒼𑒩𑒹-𑒮𑒏𑒰𑒪𑒹 𑒅𑒚𑒪𑒯𑒳𑒿 𑒢𑒱𑒞𑓂𑒨 𑒏𑒰𑒩𑓂𑒨𑒏 𑒅𑒣𑒩𑒰𑓀𑒞 𑒖𑒪𑒐𑒃 𑒏𑓄 𑒣𑒜𑒥𑒰𑒏 𑒪𑒹𑒪 𑒥𑒻𑒮𑒪𑒯𑒳𑒿, 𑒤𑒹𑒩 𑒮𑓂𑒏𑒴𑒪 𑒑𑒹𑒪𑒯𑒳𑒿, 𑒍𑒞𑒋 𑒮𑒿 𑒋𑒪𑒯𑒳𑒿, 𑒣𑒳𑒢𑓁 𑒐𑒹𑒢𑒰𑒃 𑒐𑒹𑒪𑒯𑒳𑒿 । 𑒤𑒹𑒩 𑒮𑓂𑒏𑒴𑒪 𑒑𑒹𑒪𑒯𑒳𑒿, 𑒤𑒹𑒩 𑒑𑒰𑒧 𑒣𑒩 𑒋𑒪𑒯𑒳𑒿 𑒂 𑒤𑒹𑒩 𑒖𑒪𑒐𑒻 𑒏𑒋𑒪𑒯𑒳𑒿 । 𑒤𑒹𑒩 𑒐𑒹𑒪𑒰𑒃 𑒪𑒹𑒪 𑒑𑒹𑒪𑒯𑒳𑒿 । 𑒤𑒹𑒩 𑒂𑒥𑒱 𑒏𑓄 𑒪𑒰𑒪𑒙𑒹𑒢𑒏 𑒬𑒲𑒬𑒰𑒏𑒹𑒿 𑒮𑒰𑒤 𑒏𑒹𑒪𑒯𑒳𑒿, 𑒤𑒹𑒩 𑒣𑒜𑓃𑒪𑒯𑒳𑒿 𑒂 𑒤𑒹𑒩 𑒦𑒑𑒫𑒰𑒢𑒏 𑒢𑒰𑒧 𑒪𑓄 𑒮𑒴𑒞𑒱 𑒑𑒹𑒪𑒯𑒳𑒿 । 𑒩𑒫𑒱 𑒠𑒱𑒢𑒏 𑒕𑒳𑒙𑓂𑒙𑒲𑒏 𑒥𑒠𑒪𑒰 𑒮𑒼𑒧 𑒠𑒱𑒢 𑒠𑒴 𑒠𑒱𑒢𑒏 𑒩𑒼𑒖𑒢𑒰𑒧𑒔𑒰 𑒪𑒱𑒐𑒱 𑒏𑒋 𑒪𑓄 𑒖𑒰𑒋 𑒣𑒛𑓃𑒻𑒞 𑒕𑒪 । 𑒍𑒞𑒋 𑓑𑓕 𑒁𑒑𑒮𑓂𑒞𑒏 𑒅𑒞𑓂𑒮𑒰𑒯 𑒮𑒹𑒯𑒼 𑒠𑒼𑒮𑒩𑒹 𑒞𑒩𑒯𑒏 𑒕𑒪 । 𑒮𑒰𑒿𑒗-𑒂 𑒦𑒼𑒩𑒧𑒹 𑓑𑓕 𑒁𑒑𑒮𑓂𑒞- 𑒮𑓂𑒫𑒞𑓀𑒞𑓂𑒩𑒞𑒰 𑒠𑒱𑒫𑒮, 𑒦𑒰𑒩𑒞 𑒧𑒰𑒞𑒰𑒏 𑒖𑒨 𑒏𑒹𑒩 𑒮𑓀𑒑 𑒮𑒦 𑒧𑒯𑒰𑒣𑒳𑒩𑒳𑒭 𑒪𑒼𑒏𑒢𑒱𑒏 𑒖𑒨 𑒏𑒩𑒻𑒞 𑒖𑒰𑒃𑒞 𑒕𑒪𑒯𑒳𑒿 । 𑒧𑒳𑒠𑒰 𑒧𑒰𑒮𑓂𑒙𑒩 𑒮𑒰𑒯𑒹𑒥𑒏 𑒄 𑒑𑒣 𑒢𑒯𑒱 𑒥𑒳𑒗𑒢𑒰 𑒑𑒹𑒪 𑒕𑒪 𑒖𑒹 𑒧𑒰𑒩𑒱-𑒣𑒲𑒙 𑒢𑒯𑒱 𑒏𑒩𑒻𑒞 𑒖𑒃𑒯𑓄 । 𑒧𑒳𑒠𑒰 𑒖𑒐𑒢 𑒦𑒼𑒩𑒧𑒹 𑒖𑒨𑒏 𑒢𑒰𑒠 𑒑𑒰𑒧𑒏 𑒮𑒲𑒧𑒰𑒢 𑒣𑒩 𑒮𑒿 𑒖𑒰𑒋 𑒏𑒰𑒪 𑒮𑒳𑒢𑒪𑒯𑒳𑒿 𑒞𑒐𑒢 𑒣𑒞𑒰 𑒔𑒪𑒪 𑒖𑒹 𑒄 𑒑𑒣 𑒧𑒰𑒮𑓂𑒙𑒩 𑒮𑒰𑒯𑒥 𑒏𑒱𑒋𑒏 𑒏𑒯𑒢𑒹 𑒕𑒪𑒰𑒯 । 𑒧𑒯𑒱𑒢𑒰𑒟𑒣𑒳𑒩𑒏 𑒮𑓂𑒏𑒴𑒪𑒏 𑒥𑒔𑓂𑒔𑒰 𑒮𑒦 𑒖𑒐𑒢𑒹 𑒍𑒧𑓂𑒯𑒩𑒮𑒿 𑒁𑒥𑒻𑒞 𑒩𑒯𑒋 𑒂𑒏𑒱 𑒞𑒐𑒢𑒹 𑒧𑒰𑒩𑒱 𑒥𑒖𑒩𑒱 𑒑𑒹𑒪 । 𑒏𑒼𑒢𑒯𑒳𑒢𑒰 𑒗𑒼𑒣-𑒞𑒰𑒣 𑒏𑒋𑒪 𑒑𑒹𑒪 । 𑒤𑒹𑒩 𑒑𑒰𑒧𑒣𑒩 𑒖𑒹 𑒁𑒋𑒪𑒯𑒳𑒿 𑒞𑒐𑒢 𑒣𑒳𑒩𑒢𑒏𑒰 𑒥𑒻𑒔𑒏 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦 𑒁𑒣𑒢 𑒐𑒱𑒮𑓂𑒮𑒰 𑒬𑒳𑒩𑒴 𑒏𑒋𑒪𑒏 𑒖𑒹 𑒏𑒼𑒢𑒰 𑒣𑒼𑒐𑒩𑒱𑒧𑒹 𑒣𑒻𑒮𑒰-𑒣𑒻𑒮𑒰𑒏𑒹𑒿 𑒏𑒹𑒩𑒰𑒏 𑒟𑒧 𑒣𑒰𑒢𑒱𑒧𑒹 𑒠𑓄 𑒏𑒋 𑒮𑓂𑒫𑒞𑓀𑒞𑓂𑒩𑒞𑒰 𑒠𑒱𑒫𑒮 𑒠𑒱𑒢 𑒧𑒰𑒩𑒢𑒹 𑒩𑒯𑒋 𑒑𑒹𑒪 𑒕𑒪𑒟𑒱𑒢𑓂𑒯 𑒁𑒢𑒑𑒾𑒂𑒿 𑒏𑒹𑒿 । 𑒤𑒹𑒩 𑒍𑒯𑒼 𑒮𑒦 𑒠𑒼𑒮𑒩 𑒮𑒰𑒪 𑒥𑒠𑒪𑒰 𑒪𑒹𑒥𑒰𑒏 𑒞𑒰𑒏𑒱𑒧𑒹 𑒕𑒪 𑒧𑒳𑒠𑒰 𑒞𑒰𑒯𑒴 𑒥𑒹𑒩…। 𑒠𑒼𑒮𑒩 𑒮𑒰𑒪 𑒤𑒹𑒩 𑒫𑒻𑒯 𑒧𑒲𑒙𑒱𑓀𑒑, 𑒠𑒳𑒢𑒴 𑒑𑒰𑒧𑒏 𑒮𑓂𑒏𑒴𑒪𑒏 𑒧𑒡𑓂𑒨 𑒧𑒳𑒠𑒰 𑒋𑒯𑒱 𑒥𑒹𑒩 𑒠𑒼𑒮𑒩 𑒑𑒰𑒧 𑒥𑒪𑒰 𑒙𑒲𑒧 𑒩𑒮𑓂𑒞𑒰 𑒥𑒠𑒪𑒱 𑒪𑒹𑒪𑒏 ।
𑒧𑒰𑒩𑒱 𑒥𑒗𑒥 𑒑𑒰𑒧𑒧𑒹 𑒋𑒏𑒙𑒰 𑒣𑒩𑓂𑒫 𑒖𑒹𑒏𑒰𑒿 𑒕𑒪 । 𑒠𑒳𑒩𑓂𑒑𑒰𑒮𑓂𑒟𑒰𑒢𑒧𑒹 𑒔𑒰𑒏𑒪𑒹𑒙𑒏 𑒥𑒳𑒃𑒨𑒰𑒧𑒏 𑒤𑒴𑒙𑒥 𑒂 𑒏𑒼𑒢𑒼 𑒏𑒙𑒒𑒩𑒰 𑒏𑒱𑓀𑒫𑒰 𑒙𑒰𑒙𑒏 𑒐𑒳𑒙𑓂𑒙𑒰 𑒅𑒐𑒰𑒛𑓃𑒱 𑒏𑒋 𑒧𑒰𑒩𑒱-𑒣𑒲𑒙 𑒬𑒳𑒩𑒴 𑒏𑒩𑒥 । 𑒂 𑒥𑒰𑒠𑒏 𑒖𑒹 𑒑𑒣𑓂𑒣 𑒯𑒼𑒃𑒞 𑒕𑒪 𑒮𑒹 𑒧𑒢𑒼𑒩𑓀𑒖𑒏 । 𑒋𑒏 𑒥𑒹𑒩 𑒋𑒏𑒙𑒰 𑒁𑒡𑒫𑒨𑒮𑒴 𑒋𑒏 𑒑𑒼𑒙 𑒢𑒫-𑒢𑒾𑒞𑒰𑒩𑒏𑒹𑒿 𑒠𑒴-𑒔𑒰𑒩𑒱 𑒔𑒧𑒹𑒙𑒰 𑒧𑒰𑒩𑒱 𑒠𑒹𑒪𑒢𑓂𑒯𑒱 । 𑒥𑒰𑒠𑒏 𑒒𑒙𑒢𑒰𑒏 𑒯𑒹𑒞𑒳 𑒯𑒧 𑒏𑒰𑒢 𑒣𑒟𑒢𑒹 𑒩𑒯𑒲 𑒞𑒿 𑒯𑒧𑒩 𑒣𑒱𑒞𑒱𑒨𑒾𑒞 𑒍𑒯𑒱 𑒑𑒾𑒂𑒿𑒏𑒹𑒿 𑒣𑒳𑒕𑒪𑒐𑒱𑒢𑓂𑒯 𑒖𑒹 𑒫𑒻𑒯 𑒥𑒰𑒞 𑒩𑒯𑒋 𑒢𑒹 । 𑒮𑒦 𑒏𑓂𑒨𑒼 𑒋𑒏𑒧𑒞 𑒩𑒯𑒟𑒱 𑒖𑒹 𑒫𑒻𑒯 𑒥𑒰𑒞 𑒩𑒯𑒋 । 𑒋𑒯𑒱 𑒥𑒹𑒩 𑒯𑒧 𑒯𑒰𑒩𑒱 𑒏𑓄 𑒣𑒳𑒕𑒪𑒱𑒨𑒢𑓂𑒯𑒱 𑒖𑒹 𑒫𑒻𑒯 𑒏𑒼𑒢 𑒥𑒰𑒞 𑒁𑒕𑒱 𑒖𑒹 𑒮𑒦𑒏𑒹𑒿 𑒥𑒴𑒗𑒪 𑒁𑒕𑒱 𑒧𑒳𑒠𑒰 𑒯𑒧𑒩𑒰 𑒢𑒯𑒱 𑒥𑒴𑒗𑒪 𑒁𑒕𑒱 । 𑒍 𑒏𑒯𑒪𑒢𑓂𑒯𑒱 𑒖𑒹 𑒋𑒯𑒱 𑒨𑒳𑒫𑒰𑒣𑒩 𑒁𑒣𑒢 𑒥𑒔𑒱𑒨𑒰𑒏 𑒒𑒙𑒏𑒻𑒞𑒲𑒏 𑒯𑒹𑒞𑒳 𑒍 𑒁𑒡𑒫𑒨𑒮𑒴 𑒑𑒹𑒪 𑒩𑒯𑒟𑒱 𑒧𑒳𑒠𑒰 𑒏𑒟𑒰 𑒢𑒯𑒱 𑒮𑒳𑒞𑒩𑒪𑒢𑓂𑒯𑒱 । 𑒍𑒯𑒱 𑒨𑒳𑒫𑒏𑒏 𑒫𑒱𑒫𑒰𑒯 𑒠𑒼𑒮𑒩 𑒚𑒰𑒧 𑒦𑒋 𑒑𑒹𑒪𑒢𑓂𑒯𑒱, 𑒮𑒹 𑒞𑒏𑒩𑒹 𑒏𑒻𑒢 𑒪𑓄 𑒏𑒋 𑒏𑒼𑒢𑒼 𑒤𑒳𑒮𑒱𑒨𑒰𑒯𑒲𑒏 𑒪𑒰𑒟 𑒪𑓄 𑒂𑒃 𑒍𑒏𑒩𑒰 𑒏𑒳𑒙𑒪𑒢𑓂𑒯𑒱
𑒁𑒕𑒱 । 𑒯𑒧 𑒣𑒳𑒕𑒪𑒱𑒨𑒢𑓂𑒯𑒱 𑒖𑒹 𑒖𑓂𑒨𑒼𑒿 𑒫𑒱𑒫𑒰𑒯 𑒦𑓄 𑒖𑒰𑒃𑒞 𑒞𑒿 𑒮𑒮𑒳𑒩 𑒖𑒧𑒰𑒋𑒏 𑒮𑓀𑒥𑓀𑒡
𑒩𑒯𑒻𑒞 । 𑒞𑒐𑒢 𑒋𑒯𑒱 𑒤𑒳𑒮𑒱𑒨𑒰𑒯𑒲 𑒑𑒣 𑒣𑒩 𑒧𑒰𑒩𑒱 𑒥𑒖𑒩𑒻𑒞 ? 𑒮𑒦 𑒏𑒯𑒟𑒱 𑒖𑒹 𑒁𑒯𑒰𑒿 𑒞𑒿 𑒞𑒹𑒮𑒩𑒹 𑒑𑒣 𑒣𑒩 𑒔𑒪𑒱 𑒑𑒹𑒪𑒯𑒳𑒿 । 𑒩𑒰𑒞𑒱𑒧𑒹 𑒢𑒰𑒙𑒏 𑒠𑒹𑒐𑒻𑒞 𑒁𑒏𑒰𑒮𑒧𑒹 𑒛𑓀𑒛𑒲-𑒞𑒩𑒰𑒖𑒴 𑒠𑒹𑒐𑒥, 𑒐𑒰𑒪𑒲 𑒛𑓀𑒛𑒲 𑒕𑒻𑒏 𑒞𑒿 𑒞𑒩𑒰𑒖𑒴 𑒏𑒱𑒨𑒻𑒏 𑒏𑒯𑒻𑒞 𑒕𑒱𑒨𑒻𑒏? 𑒤𑒹𑒩 𑒍𑒯𑒱 𑒢𑒰𑒙𑒏𑒼𑒧𑒹 𑒁𑒢𑒑𑒾𑒿𑒂 𑒮𑒿 𑒧𑒰𑒩𑒱 𑒥𑒗𑒹𑒥𑒰𑒏 𑒯𑒧𑒩 𑒮𑓀𑒑𑒲𑒏 𑒋𑒏𑒙𑒰 𑒔𑒰𑒪𑒱 । 𑒦𑒹𑒪 𑒄 𑒖𑒹 𑒢𑒰𑒙𑒏 𑒠𑒹𑒐𑒋 𑒏𑒰𑒪 𑒍 𑒋𑒏𑒙𑒰 𑒁𑒢𑒑𑒾𑒿𑒂𑒏𑒹𑒿 𑒐𑒾𑒿𑒗𑒰 𑒩𑒯𑒪 𑒕𑒪𑒰𑒯 । 𑒧𑒰𑒩𑒱 𑒁𑓀𑒙-𑒬𑓀𑒙 𑒥𑒏𑒻𑒞 𑒕𑒪𑒰𑒯 । 𑒂 𑒍 𑒏𑒱𑒕𑒳 𑒥𑒰𑒖𑒋 𑒞𑒿 𑒏𑒯𑒻𑒞 𑒕𑒪𑒰𑒯 𑒖𑒹 𑒁𑒐𑒢𑒹 𑒢𑒩𑒹𑒝 𑒦𑒻𑒨𑒰𑒏𑒹𑒿 𑒥𑒖𑒰𑒋𑒥 । 𑒞𑒰𑒯𑒱𑒣𑒩 𑒍 𑒏𑒯𑒪𑒢𑓂𑒯𑒱 𑒖𑒹 𑒖𑒰𑒆 𑒁𑒯𑒰𑒿𑒏 𑒢𑒩𑒹𑒝 𑒦𑒻𑒨𑒰𑒏 𑒛𑒩 𑒯𑒧𑒩𑒰 𑒢𑒯𑒱 𑒁𑒕𑒱 । 𑒂𑒥 𑒂𑒑𑒴
𑒮𑒳𑒢𑒴 । 𑒯𑒧𑒩 𑒧𑒱𑒞𑓂𑒩 𑒁𑒢𑒰𑒨𑒰𑒮𑒯𑒱 𑒖𑒼𑒩𑒮𑒿 𑒏𑒰𑒢𑒋 𑒪𑒑𑒪𑒰𑒯, 𑒠𑒯𑒼-𑒥𑒯𑒼 𑒢𑒼𑒩 𑒐𑒮𑒋 𑒪𑒑𑒪𑒢𑓂𑒯𑒱 । 𑒦𑒼𑒏𑒰𑒩𑒱 𑒣𑒰𑒛𑓃𑒻𑒞 𑒢𑒩𑒹𑒝 𑒪𑒑 𑒣𑒯𑒳𑒿𑒔𑒪𑒰𑒯 𑒖𑒹 𑒋𑒏𑒙𑒰 𑒁𑒢𑒑𑒾𑒿𑒂 𑒧𑒰𑒩𑒪𑒏 𑒁𑒕𑒱 𑒂 𑒏𑒯𑒻𑒞 𑒁𑒕𑒱 𑒖𑒹 𑒏𑒹 𑒢𑒩𑒹𑒝 𑒍𑒏𑒩 𑒯𑒧𑒩𑒰 𑒏𑒼𑒢𑒼 𑒛𑒩 𑒢𑒯𑒱 𑒁𑒕𑒱, 𑒂𑒩𑒼 𑒁𑒝𑓂𑒙-
𑒬𑒝𑓂𑒙 । 𑒂𑒥 𑒢𑒩𑒹𑒝 𑒦𑒻𑒨𑒰 𑒣𑒯𑒳𑒿𑒔𑒪𑒰𑒯 𑒖𑒹 𑒥𑒞𑒰 𑒞𑒿 𑒍 𑒏𑒹 𑒕𑒲 ? 𑒖𑒐𑒢𑒹 𑒙𑒰𑒩𑓂𑒔 𑒍𑒯𑒱 𑒫𑓂𑒨𑒏𑓂𑒞𑒱𑒣𑒩 𑒠𑒹𑒪𑒢𑓂𑒯𑒱, 𑒥𑒖𑒪𑒰𑒯, 𑒦𑒖𑒰𑒩 𑒨𑒾 । 𑒁𑒯𑒰𑒿 𑒕𑒲 । 𑒖𑒩𑒴𑒩 𑒁𑒯𑒲 𑒕𑒾𑒛𑓃𑒰𑒏 𑒑𑒪𑓂𑒞𑒲 𑒕𑒲 । 𑒁𑒢𑒏𑒰 𑒫𑒱𑒭𑒨𑒧𑒹 𑒏𑒯𑒻𑒞 𑒞𑒿 𑒣𑒞𑒱𑒨𑒰 𑒖𑒃𑒞𑒯𑒳𑒿 । 𑒧𑒳𑒠𑒰 𑒁𑒯𑒰𑒿𑒏 𑒫𑒱𑒭𑒨𑒧𑒹 । 𑒂 𑒄𑒯𑒼 𑒢𑒯𑒱 𑒏𑒯𑒪𑒏 𑒄 𑒕𑒾𑒛𑓃𑒰 𑒖𑒹 𑒁𑒯𑒰𑒿 𑒞𑒧𑒮𑒹𑒪𑒱𑒨𑒻𑒏 𑒫𑒩𑒢𑓂 𑒄 𑒖𑒹 𑒧𑒰𑒩𑒪𑒢𑓂𑒯𑒱 𑒁𑒕𑒱 । 𑒂 𑒢𑒹𑒣 𑒏𑒲 𑒔𑒳𑒂 𑒩𑒯𑒪 𑒕𑒪 𑒖𑒹𑒢𑒰 𑒏𑒞𑒹𑒏 𑒧𑒰𑒩𑒱 𑒣𑒛𑓃𑒪 𑒯𑒼𑒁𑒋 । 𑒯𑒧𑒩𑒰 𑒮𑒿 𑒢𑒩𑒹𑒝 𑒣𑒳𑒕𑒪𑒢𑓂𑒯𑒱 𑒖𑒹 𑒦𑒰𑒋 𑒏𑒱𑒕𑒳 𑒋𑒏𑒩𑒰 𑒏𑒯𑒥𑒼 𑒏𑒋𑒪𑒢𑓂𑒯𑒱 𑒞𑒿 𑒯𑒧 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒢𑒯𑒱 । 𑒋𑒯𑒱 𑒣𑒩 𑒯𑒧𑒩 𑒧𑒱𑒞𑓂𑒩𑒏 𑒢𑒼𑒩 𑒖𑒞𑒋𑒮𑒿 𑒂𑒋𑒪 𑒕𑒪𑒢𑓂𑒯𑒱, 𑒞𑒞𑒯𑒱 𑒔𑒪𑒱 𑒑𑒹𑒪𑒢𑓂𑒯𑒱 । 𑒤𑒖𑓂𑒗𑒞𑒱 𑒧𑒴𑒛𑓃𑒲 𑒗𑒳𑒏𑒰 𑒏𑒋 𑒮𑒳𑒢𑒪𑒢𑓂𑒯𑒱 𑒂 𑒢𑒩𑒹𑒝 𑒦𑒰𑒃𑒏 𑒑𑒹𑒪𑒰 𑒣𑒩 𑒮𑒦𑒏𑒹𑒿 𑒏𑒯𑒪𑒢𑓂𑒯𑒱, 𑒖𑒹 𑒄 𑒢𑒩𑒹𑒝 𑒏𑒰𑒏𑒰𑒏 𑒮𑓀𑒑𑒲 𑒕𑒟𑒱𑒢𑓂𑒯, 𑒏𑓂𑒨𑒼 𑒯𑒱𑒢𑒏𑒰 𑒏𑒱𑒕𑒳 𑒏𑒯𑒥𑒯𑒳𑒢𑓂𑒯 𑒞𑒿 𑒥𑒹𑒖𑒰𑒋 𑒦𑓄 𑒖𑒰𑒃𑒞 𑒖𑒋𑒞𑒯𑒳 । 𑒂 𑒂𑒮𑓂𑒞𑒹𑒮𑒿 𑒏𑒯𑒪𑒟𑒱 𑒖𑒹 𑒥𑒔𑒱 𑒑𑒹𑒪 𑒂𑒃 𑒄 ।
𑒑𑒰𑒧𑒏 𑒣𑓂𑒩𑒰𑒃𑒧𑒩𑒲 𑒮𑓂𑒏𑒴𑒪𑒧𑒹 𑒮𑒦 𑒏𑒪𑒰𑒏 𑒣𑒩𑒲𑒏𑓂𑒭𑒰 𑒯𑒼𑒃𑒞 𑒕𑒪 । 𑒮𑓀𑒑𑒲𑒞, 𑒔𑒱𑒞𑓂𑒩, 𑒢𑒰𑒙𑒏 । 𑒑𑒰𑒧𑒧𑒹 𑒯𑒰𑒩𑒧𑒼𑒢𑒱𑒨𑒧, 𑒜𑓃𑒼𑒪𑒏 𑒥𑒖𑒹𑒢𑒯𑒰𑒩 𑒐𑒴𑒥 𑒩𑒯𑒟𑒱 । 𑒣𑒯𑒱𑒢𑒹 𑒠𑒳𑒩𑓂𑒑𑒰 𑒣𑒴𑒖𑒰𑒙𑒰 𑒧𑒹 𑒢𑒰𑒙𑒏 𑒯𑒼𑒃𑒞 𑒕𑒪 𑒧𑒳𑒠𑒰 𑒣𑒕𑒰𑒞𑒱 𑒖𑒰 𑒏𑓄 𑒏𑒵𑒭𑓂𑒝𑒰𑒭𑓂𑒙𑒧𑒲, 𑒏𑒰𑒪𑒲 𑒣𑒴𑒖𑒰 𑒃𑒞𑓂𑒨𑒰𑒠𑒱𑒧𑒹 𑒮𑒹𑒯𑒼 𑒢𑒰𑒙𑒏 𑒐𑒹𑒪𑒹𑒢𑒰𑒃 𑒬𑒳𑒩𑒴 𑒦𑓄 𑒑𑒹𑒪 । 𑒯𑒩𑒐𑒰 𑒩𑒰𑒧𑒪𑒲𑒪𑒰 𑒣𑒰𑒩𑓂𑒙𑒲 𑒮𑒹𑒯𑒼 𑒋𑒏 𑒧𑒯𑒱𑒢𑒰 𑒐𑒹𑒪𑒰 𑒏𑓄 𑒑𑒹𑒪 𑒕𑒪 । 𑒁𑒯𑒴𑒧𑒹 𑒠𑒴 𑒔𑒰𑒩𑒱 𑒠𑒱𑒢𑒣𑒩 𑒩𑒰𑒧𑒪𑒲𑒪𑒰𑒏 𑒥𑒲𑒔𑒧𑒹 𑒢𑒰𑒙𑒏 𑒯𑒼𑒃𑒞 𑒕𑒪 । 𑒐𑒹𑒪 𑒬𑒳𑒩𑒴 𑒦𑒹𑒪 𑒩𑒰𑒧𑒪𑒲𑒪𑒰 𑒣𑒰𑒩𑓂𑒙𑒲𑒏 𑒥𑒱𑒢𑒰 𑒥𑒖𑒹𑒢𑒯𑒱 । 𑒧𑒳𑒠𑒰 𑒠𑒴 𑒔𑒰𑒩𑒱 𑒠𑒱𑒢 𑒡𑒩𑒱 𑒧𑒰𑒪𑒰 𑒏𑓂𑒨𑒼 𑒢𑒹 𑒏𑓂𑒨𑒼 𑒅𑒚𑒥𑒻𑒞 𑒑𑒹𑒪𑒰𑒯 । 𑒩𑒰𑒧𑒪𑒲𑒪𑒰 𑒣𑒰𑒩𑓂𑒙𑒲𑒏 𑒮𑒦 𑒏𑒪𑒰𑒏𑒰𑒩𑒏 𑒋𑒏 𑒠𑒱𑒢𑒏 𑒐𑒹𑒢𑒰𑒃𑒏 𑒐𑒩𑒔𑒰𑒏𑒹𑒿 𑒧𑒰𑒪𑒰 𑒅𑒚𑒹𑒢𑒰𑒃 𑒏𑒯𑒪 𑒖𑒰𑒃𑒞 𑒕𑒪 । 𑒠𑒴-𑒔𑒰𑒩𑒱 𑒠𑒱𑒢 𑒞𑒿 𑒧𑒰𑒃𑒏 𑒣𑒩 𑒏𑓂𑒨𑒼 𑒢 𑒏𑓂𑒨𑒼 𑒖𑒼𑒬𑒧𑒹 𑒖𑒰 𑒏𑓄 𑒯𑒧 𑒧𑒰𑒪𑒰 𑒅𑒚𑒰𑒋𑒥 𑒞𑒿 𑒯𑒧 𑒅𑒚𑒰𑒋𑒥 𑒏𑒯𑒻𑒞 𑒑𑒹𑒪𑒰𑒯 𑒧𑒳𑒠𑒰 𑒠𑒴 𑒔𑒰𑒩𑒱 𑒠𑒱𑒢𑒳𑒏𑒰 𑒥𑒰𑒠 𑒩𑒰𑒧𑒪𑒲𑒪𑒰 𑒣𑒰𑒩𑓂𑒙𑒲𑒏 𑒂𑒩𑓂𑒠𑓂𑒩 𑒁𑒢𑒳𑒩𑒼𑒡𑒏𑒹𑒿 𑒠𑒹𑒐𑒻𑒞 𑒑𑒾𑒿𑒂 𑒮𑒦 𑒙𑒼𑒪𑒏 𑒁𑒢𑒳𑒮𑒰𑒩 𑒧𑒰𑒪𑒰 𑒅𑒚𑒹𑒥𑒰𑒏 𑒋𑒏𑒙𑒰 𑒏𑓂𑒩𑒧 𑒥𑒢𑒰 𑒠𑒹𑒪𑒐𑒱𑒢𑓂𑒯 । 𑒍𑒯𑒱 𑒮𑒧𑒨𑒧𑒹 𑒁𑒦𑒱𑒢𑒨 𑒠𑒹𑒐𑒢𑒰𑒃 𑒋𑒏𑒙𑒰 𑒔𑒧𑒞𑓂𑒏𑒰𑒩 𑒮𑒢 𑒥𑒳𑒗𑒰𑒃𑒞 𑒕𑒪 𑒂 𑒯𑒧 𑒁𑒣𑒢 𑒏𑒻𑒩𑒱𑒨𑒩 𑒥𑒰𑒠𑒧𑒹 𑒁𑒦𑒱𑒢𑒹𑒞𑒰𑒏 𑒩𑒴𑒣𑒧𑒹 𑒥𑒢𑒹𑒥𑒰𑒏 𑒧𑒼𑒢𑒹-𑒧𑒼𑒢 𑒃𑒔𑓂𑒕𑒰 𑒩𑒐𑒻𑒞 𑒕𑒪𑒯𑒳𑒿 । 𑒍𑒯𑒱 𑒮𑒧𑒨 𑒋𑒏 𑒬𑒢𑒱 𑒮𑓂𑒏𑒴𑒪𑒧𑒹 𑒢𑒰𑒙𑒏 𑒐𑒹𑒪𑒹𑒥𑒰𑒏 𑒣𑓂𑒪𑒰𑒢 𑒬𑒱𑒏𑓂𑒭𑒏𑒑𑒝𑒏 𑒮𑓂𑒫𑒲𑒏𑒵𑒞𑒱𑒮𑒿 𑒥𑒢𑒪 । 𑒢𑒰𑒙𑒏𑒏 𑒏𑒱𑒞𑒰𑒥 𑒏𑒞𑒋𑒮𑒿 𑒁𑒋𑒞 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒧 𑒋𑒏𑒙𑒰 𑒢𑒰𑒙𑒏 𑒠𑒰𑒢𑒫𑒲𑒩 𑒠𑒡𑒲𑒔𑒲 𑒪𑒱𑒐𑒪𑒯𑒳𑒿 । 𑒮𑓂𑒏𑒴𑒪𑒏 𑒏𑒪𑒰𑒏𑒰𑒩 𑒮𑒦𑒏𑒹𑒿 𑒋𑒏𑒞𑓂𑒩 𑒏𑒋𑒪𑒯𑒳𑒿 । 𑒂𑒥 𑒏𑒪𑒰𑒏𑒰𑒩 𑒮𑒦𑒏 𑒢𑒰𑒧 𑒞𑒿 𑒮𑒳𑒢𑒴 । 𑒣𑒼𑒙𑒯𑒰, 𑒪𑒳𑒪𑓂𑒯𑒰, 𑒢𑒹𑒿𑒑𑒛𑓃𑒰, 𑒣𑒼𑒙𑒮𑒳𑒛𑓃𑒏𑒰, 𑒪𑒹𑒪𑒯𑒰, 𑒜𑓃𑒯𑒲𑒥𑒪𑒰, 𑒏𑒢𑒯𑒰, 𑒁𑒢𑓂𑒯𑒩𑒰, 𑒞𑒼𑒞𑒩𑒰𑒯𑒰, 𑒥𑒾𑒏𑒰, 𑒥𑒯𑒱𑒩𑒰 𑒄 𑒮𑒦 𑒯𑒧𑒩 𑒥𑒰𑒪 𑒏𑒪𑒰𑒏𑒰𑒩 𑒩𑒯𑒟𑒱 । 𑒏𑒰𑒩𑒝 𑒖𑒹 𑒁𑒣𑒢𑒰𑒏𑒹𑒿 𑒬𑒳𑒦𑓂𑒩-𑒬𑒰𑒦𑓂𑒩 𑒥𑒳𑒗𑒟𑒱 𑒮𑒹 𑒏𑒱𑒋𑒏 𑒢𑒰𑒙𑒏 𑒐𑒹𑒪𑒹𑒞𑒰𑒯 । 𑒠𑒯𑒲𑒏𑒹𑒿 𑒞𑒼𑒞𑒩𑒰𑒏𑒹𑒿 𑒏𑒯𑒱𑒨𑒼 𑒏𑓂𑒨𑒼 𑒜𑓃𑒯𑒲 𑒥𑒰𑒖𑒪 𑒞𑒿 𑒍𑒏𑒩 𑒢𑒰𑒧 𑒜𑓃𑒯𑒲𑒥𑒪𑒰 𑒦𑓄 𑒑𑒹𑒪𑒻𑒏। 𑒮𑒩𑓂𑒠𑒲𑒧𑒹 𑒏𑒯𑒱𑒨𑒼 𑒣𑒼𑒙𑒰 𑒔𑒳𑒥𑒻𑒞 𑒩𑒯𑒱 𑒑𑒹𑒪𑒻𑒏 𑒞𑒿 𑒣𑒼𑒙𑒯𑒰 𑒦𑓄 𑒑𑒹𑒪 𑒂 𑒠𑒼𑒮𑒩 𑒋𑒯𑒢 𑒦𑒹𑒪 𑒞𑒿 𑒠𑒳𑒢𑒴𑒧𑒹 𑒁𑒢𑓂𑒞𑒩 𑒏𑒼𑒢𑒰 𑒏𑒩𑒲 । 𑒮𑒹 𑒍 𑒖𑒹 𑒣𑒼𑒙𑒰 𑒐𑒮𑒻𑒞 𑒏𑒰𑒪 𑒮𑒳𑒩𑒏𑒱𑒞𑒼 𑒁𑒕𑒱 𑒮𑒹 𑒞𑒏𑒩 𑒢𑒰𑒧 𑒦𑓄 𑒑𑒹𑒪 𑒣𑒼𑒙𑒮𑒳𑒩𑒏𑒰 । 𑒂𑒑𑒰𑒿 𑒂𑒆 । 𑒏𑒏𑒩𑒼 𑒁𑒢𑓂𑒯𑒩𑒱𑒨𑒰 𑒩𑒰𑒞𑒱𑒧𑒹 𑒚𑒹𑒮 𑒪𑒰𑒑𑒱 𑒑𑒹𑒪𑒻𑒏 𑒞𑒿 𑒏𑒼𑒢 𑒁𑒞𑒞𑓂𑒞𑓁 𑒦𑒹𑒪𑒻𑒏 ? 𑒯𑒿 𑒍𑒏𑒩 𑒢𑒰𑒧 𑒁𑒢𑓂𑒯𑒩𑒰 𑒦𑓄 𑒑𑒹𑒪𑒻𑒏 । 𑒥𑒔𑓂𑒔𑒰𑒧𑒹 𑒠𑒹𑒩𑒲𑒮𑒿 𑒥𑒖𑒢𑒰𑒃 𑒬𑒳𑒩𑒴 𑒏𑒋𑒢𑒹 𑒕𑒪𑒯𑒳𑒿 𑒞𑒿 𑒁𑒯𑒰𑒿 𑒦𑓄 𑒑𑒹𑒪𑒯𑒳𑒿 𑒥𑒾𑒏𑒰 । 𑒮𑒼𑒗𑒑𑒩 𑒕𑒲 𑒞𑒿 𑒪𑒹𑒪𑒯𑒰 । 𑒑𑒣𑒏𑒹𑒿 𑒁𑒢𑒚𑒥𑒻𑒞 𑒕𑒲 𑒞𑒿 𑒦𑒹𑒪𑒯𑒳𑒿 𑒥𑒯𑒱𑒩𑒰 । 𑒢𑒫 𑒒𑒛𑓃𑒲 𑒣𑒯𑒱𑒩𑒪𑒰𑒏 𑒥𑒰𑒠 (𑒒𑒛𑓃𑒲 𑒣𑒰𑒥𑒢𑒱 𑒠𑒱𑒢 𑒫𑒢𑒮𑓂𑒣𑒞𑒱𑒏 𑒒𑒛𑓃𑒲) 𑒯𑒰𑒟 𑒏𑒢𑒹𑒏 𑒮𑒼𑒗 𑒩𑒰𑒐𑒱 𑒪𑒹𑒪𑒯𑒳𑒿 𑒞𑒿 𑒦𑒹𑒪𑒯𑒳𑒿 𑒪𑒳𑒪𑓂𑒯𑒰 । 𑒞𑒼𑒞𑒩𑒰𑒃𑒞 𑒞𑒿 𑒮𑒦 𑒁𑒕𑒱 𑒧𑒳𑒠𑒰 𑒏𑒥𑒱𑒨𑒰𑒚𑒲 𑒙𑒼𑒪𑒏 𑒕𑒲 𑒞𑒿 𑒪𑒼𑒏 𑒢𑒰𑒧 𑒩𑒰𑒐𑒱 𑒠𑒹𑒪𑒏 𑒞𑒼𑒞𑒩𑒰𑒯𑒰 । 𑒏𑒢𑒹𑒏 𑒛𑒹𑒜𑓃 𑒦𑓄 𑒞𑒰𑒏𑒱 𑒠𑒹𑒪𑒯𑒳𑒿 𑒂𑒏𑒱 𑒣𑒱𑒣𑒢𑒲𑒏𑒹𑒿 𑒅𑒢𑒙𑒰 𑒏𑓄 𑒏𑒏𑒩𑒼 𑒛𑒩𑒹𑒪𑒯𑒳𑒿 𑒞𑒿 𑒦𑒹𑒪𑒯𑒳𑒿 𑒏𑒢𑒯𑒰 । 𑒚𑒹𑒮 𑒪𑒑𑒪𑒰𑒏 𑒥𑒰𑒠 𑒏𑒢𑒹𑒏 𑒗𑒐𑒰 𑒏𑓄 𑒔𑒪𑒪𑒯𑒳𑒿 𑒞𑒿 𑒦𑒹𑒪𑒯𑒳𑒿 𑒢𑒹𑓀𑒑𑒛𑓃𑒰 । 𑒂 𑒖𑓂𑒨𑒼𑒿 𑒏𑒢𑒹𑒏 𑒣𑒰𑒃 𑒥𑒪𑒰𑒏 𑒥𑒹𑒙𑒰 𑒕𑒲 𑒂𑒏𑒱 𑒧𑒰𑒋 𑒏𑒢𑒹𑒏 𑒠𑒥𑓀𑒑 𑒕𑒟𑒱 𑒞𑒿 𑒏𑒢𑒰𑒯 𑒩𑒯𑒪𑒼 𑒅𑒞𑓂𑒞𑒩 𑒏𑓂𑒨𑒼 𑒏𑒢𑒯𑒰 𑒏𑒯𑒱 𑒏𑓄 𑒠𑒹𑒐𑒍 !
𑒁𑒮𑓂𑒞𑒳 𑒋𑒯𑒱 𑒥𑒰𑒪 𑒏𑒪𑒰𑒏𑒰𑒩 𑒮𑒦𑒏 𑒮𑓀𑒑 𑒬𑒢𑒱 𑒠𑒱𑒢 𑒯𑒼𑒋𑒞 𑒯𑒧𑒩 𑒢𑒰𑒙𑒏 𑒠𑒰𑒢𑒫𑒲𑒩 𑒠𑒡𑒲𑒔𑒲।
𑒂 𑒢𑒱𑒨𑒞 𑒞𑒱𑒟𑒱𑒏𑒹𑒿 𑒬𑒳𑒩𑒴 𑒦𑒹𑒪 𑒠𑒰𑒢𑒫𑒲𑒩 𑒠𑒡𑒲𑒔𑒲 𑒢𑒰𑒙𑒏 । 𑒮𑓂𑒏𑒴𑒪 𑒐𑒳𑒖𑒥𑒰𑒮𑒿 𑒏𑒱𑒕𑒳 𑒏𑒰𑒪 𑒣𑒯𑒱𑒢𑒯𑒱 𑒯𑒧 𑒮𑒦 𑒣𑒯𑒳𑒿𑒔𑒱 𑒑𑒹𑒪𑒯𑒳𑒿 𑒮𑓂𑒏𑒴𑒪 । 𑒥𑒩𑒝𑓂𑒛𑒰𑒏 𑒋𑒏 𑒏𑒼𑒢𑒧𑒹 𑒑𑒰𑒧 𑒣𑒩𑒮𑒿 𑒂𑒢𑒪 𑒔𑒠𑓂𑒠𑒩𑒱𑒏 𑒣𑒩𑓂𑒠𑒰 𑒥𑒢𑒪 । 𑒩𑒮𑓂𑒮𑒲 𑒚𑒲𑒏𑒮𑒿 𑒢𑒯𑒱 𑒪𑒰𑒑𑒱 𑒮𑒏𑒪 𑒮𑒹 𑒄𑒋𑒯 𑒢𑒱𑒩𑓂𑒝𑒨 𑒦𑒹𑒪 𑒖𑒹 𑒔𑒠𑓂𑒠𑒩𑒱𑒏𑒹𑒿 𑒆𑒣𑒩 𑒅𑒚𑒰-𑒐𑒮𑒰 𑒏𑒋 𑒏𑒰𑒖 𑒢𑒱𑒏𑒰𑒪𑒪 𑒖𑒋𑒞 । 𑒞𑒏𑒩𑒰 𑒥𑒰𑒠 𑒏𑒪𑒰𑒏𑒰𑒩 𑒮𑒦 𑒁𑒣𑒢-𑒁𑒣𑒢 𑒛𑓂𑒩𑒹𑒮 𑒣𑒯𑒱𑒩𑒋 𑒪𑒑𑒪𑒰𑒯 । 𑒛𑓂𑒩𑒹𑒮 𑒏𑒲 𑒕𑒪 𑒧𑒰𑒞𑓂𑒩 𑒣𑒰𑒅𑒛𑒩 𑒪𑒑𑒰 𑒏𑒋 𑒂 𑒑𑒧𑒕𑒰-𑒡𑒼𑒞𑒲 𑒣𑒯𑒱𑒩𑒱 𑒏𑒋, 𑒮𑒦 𑒮𑒦 𑒞𑒩𑒯𑒏 𑒛𑓂𑒩𑒹𑒮 𑒣𑒯𑒱𑒩𑒱 𑒪𑒹𑒪𑒏 । 𑒖𑒰𑒯𑒱 𑒧𑒰𑒮𑓂𑒙𑒩𑒮𑒰𑒯𑒹𑒥𑒏 𑒛𑓂𑒨𑒴𑒙𑒲 𑒪𑒰𑒑𑒪 𑒕𑒪 𑒢𑒰𑒙𑒏𑒏 𑒮𑓀𑒔𑒰𑒪𑒢𑒏 𑒯𑒹𑒞𑒳, 𑒯𑒳𑒢𑒏𑒰 𑒏𑒼𑒢𑒼 𑒂𑒫𑒬𑓂𑒨𑒏 𑒏𑒰𑒩𑓂𑒨 𑒧𑒼𑒢 𑒣𑒛𑓃𑒱 𑒑𑒹𑒪𑒢𑓂𑒯𑒱 𑒮𑒹 𑒍 𑒍𑒯𑒱 𑒠𑒱𑒢 𑒕𑒳𑒙𑓂𑒙𑒲 𑒧𑒰𑒩𑒱 𑒠𑒹𑒪𑒢𑓂𑒯𑒱 । 𑒑𑒰𑒧𑒏 𑒣𑒻𑒒 𑒞𑒳𑒩𑒱𑒨𑒰𑒏𑒹𑒿 𑒞𑒰𑒫𑒞 𑒥𑒳𑒗𑒥𑒰𑒧𑒹 𑒂𑒥𑒱 𑒑𑒹𑒪𑒻𑒏 𑒖𑒹 𑒣𑓂𑒩𑒰𑒃𑒧𑒩𑒲 𑒮𑓂𑒏𑒴𑒪𑒏 𑒕𑒾𑒛𑓃𑒰 𑒮𑒦 𑒢𑒰𑒙𑒏 𑒏𑓄 𑒩𑒯𑒪 𑒁𑒕𑒱 । 𑒮𑒹 𑒞𑒳𑒩𑒞𑓂𑒞𑒹𑒧𑒹 𑒠𑒮 𑒙𑒰 𑒣𑒻𑒒 𑒥𑒔𑓂𑒔𑒰 𑒮𑒦 𑒖𑒴𑒙𑒱 𑒑𑒹𑒪 𑒂 𑒣𑒱𑒯𑒏𑒰𑒩𑒲 𑒠𑒹𑒢𑒰𑒃 𑒬𑒳𑒩𑒴 𑒏𑓄 𑒠𑒹𑒪𑒏 । 𑒯𑒧 𑒮𑒦 𑒏𑒪𑒰𑒏𑒰𑒩𑒏𑒹𑒿 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒄 𑒮𑒦 𑒅𑒞𑓂𑒞𑒹𑒖𑒱𑒞 𑒏𑓄 𑒏𑒋 𑒯𑒧𑒩 𑒮𑒦𑒏 𑒢𑒰𑒙𑒏𑒏𑒹𑒿 𑒠𑒴𑒩𑒱 𑒏𑒩𑒞 । 𑒧𑒳𑒠𑒰 𑒕𑒼𑒙𑒹 𑒦𑒰𑒃 𑒦𑒲𑒛𑓃𑒱 𑒑𑒹𑒪𑒰𑒯 ।𑒏𑒯𑒋 𑒪𑒑𑒪𑒰𑒯 𑒖𑒹 𑒯𑒹 𑒥𑒾𑒂 𑒮𑒦, 𑒯𑒧 𑒢𑒰𑒙𑒏𑒏 𑒛𑓂𑒩𑒹𑒮𑒧𑒹 𑒕𑒲 𑒞𑒹𑒿 𑒄 𑒢𑒯𑒱 𑒥𑒳𑒗𑒴 𑒖𑒹 𑒧𑒰𑒩𑒱 𑒢𑒯𑒱 𑒏𑒩𑒥। 𑒋𑒐𑒢𑒹 𑒛𑓂𑒩𑒹𑒮 𑒤𑒹𑒏𑒱-𑒤𑒰𑒃𑒏 𑒏𑓄 𑒯𑒧 𑒮𑒦 𑒏𑒩𑓂𑒧 𑒏𑓄 𑒠𑒃 𑒖𑒰𑒋𑒥 𑒁𑒯𑒰𑒿 𑒮𑒦𑒏। 𑒧𑒳𑒠𑒰 𑒣𑒱𑒯𑒏𑒲 𑒣𑒰𑒛𑓃𑒢𑒯𑒰𑒩𑒏 𑒮𑓀𑒐𑓂𑒨𑒰𑒧𑒹 𑒒𑒙𑒞𑒲 𑒢𑒯𑒱 𑒦𑒹𑒪 । 𑒂 𑒕𑒼𑒙𑒹 𑒦𑒰𑒃 𑒥𑒰𑒖𑒱 𑒅𑒚𑒪𑒰𑒯 𑒖𑒹 𑒕𑒼𑒛𑓃𑒴 𑒂𑒃 𑒋𑒯𑒱 𑒢𑒰𑒙𑒏𑒏𑒹𑒿 । 𑒯𑒱𑒢𑒏𑒰 𑒮𑒦𑒏 𑒥𑒠𑒧𑒮𑓂𑒞𑒲 𑒯𑒧 𑒋𑒐𑒢𑒹 𑒚𑒲𑒏 𑒏𑒩𑒻𑒞 𑒕𑒲। 𑒂 𑒐𑒳𑒙𑓂𑒙𑒰 𑒅𑒐𑒰𑒛𑓃𑒱 𑒏𑓄 𑒠𑒾𑒑𑒪𑒰𑒯 । 𑒞𑒰𑒫𑒞 𑒟𑒰𑒧𑓂𑒯-𑒟𑒼𑒧𑓂𑒯 𑒏𑒩𑒋 𑒥𑒪𑒰𑒏 𑒖𑒳𑒧𑒰𑒢 𑒦𑓄 𑒑𑒹𑒪𑒻𑒏 𑒂 𑒞𑒏𑒩𑒰 𑒮𑓀𑒑𑒯𑒱 𑒢𑒰𑒙𑒏 𑒠𑒰𑒢𑒫𑒲𑒩 𑒠𑒡𑒲𑒔𑒲 𑒖𑒹 𑒯𑒧𑒩 𑒪𑒱𑒐𑒪 𑒕𑒪 𑒂 𑒖𑒏𑒩 𑒧𑓀𑒔𑒢𑒏 𑒢𑒱𑒩𑓂𑒠𑒹𑒬𑒢 𑒯𑒧 𑒏𑒩𑒋 𑒥𑒪𑒰 𑒕𑒪𑒯𑒳𑒿, 𑒥𑒲𑒔𑒯𑒱𑒧𑒹 𑒐𑒞𑒧 𑒦𑓄 𑒑𑒹𑒪 । 𑒏𑒱𑒕𑒳 𑒠𑒱𑒢 𑒡𑒩𑒱 𑒕𑒼𑒙𑒹 𑒦𑒰𑒃𑒮𑒿 𑒧𑒴𑒯𑒰-𑒤𑒳𑒪𑓂𑒪𑒲 𑒩𑒯𑒪 । 𑒍 𑒂𑒥𑒟𑒱 𑒂 𑒏𑒯𑒟𑒱 𑒖𑒹 𑒏𑒲 𑒏𑒩𑒴, 𑒞𑒰𑒧𑒮 𑒅𑒚𑒱 𑒑𑒹𑒪 𑒕𑒪 । 𑒍𑒯𑒼 𑒮𑒦 𑒁𑒞𑒞𑓂𑒞𑒯 𑒏𑓄 𑒠𑒹𑒢𑒹 𑒕𑒪 । 𑒤𑒹𑒩 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒮𑒦𑒙𑒰 𑒮𑒰𑒧𑒰𑒢𑓂𑒨 𑒦𑓄 𑒑𑒹𑒪 । 𑒩𑒰𑒧𑒪𑒲𑒪𑒰𑒏 𑒂 𑒢𑒰𑒙𑒏𑒏 𑒦𑒴𑒞 𑒮𑒹𑒯𑒼 𑒋𑒯𑒱 𑒒𑒙𑒢𑒰𑒏 𑒥𑒰𑒠 𑒯𑒧𑒩𑒰 𑒣𑒩𑒮𑒿 𑒅𑒞𑒩𑒱 𑒑𑒹𑒪 ।
𑒑𑒝𑒱𑒞 𑒂 𑒫𑒱𑒖𑓂𑒘𑒰𑒢𑒏 𑒁𑒞𑒱𑒩𑒱𑒏𑓂𑒞𑓂𑒞 𑒏𑒼𑒢𑒼 𑒂𑒢 𑒫𑒱𑒭𑒨𑒏𑒹𑒿 𑒢𑒯𑒱 𑒞𑒿 𑒯𑒧 𑒋𑒏 𑒥𑒹𑒩𑒮𑒿 𑒠𑒼𑒮𑒩 𑒥𑒹𑒩 𑒣𑒜𑓃𑒻𑒞 𑒕𑒪𑒯𑒳𑒿 𑒂 𑒢𑒯𑒱𑒨𑒹 𑒋𑒯𑒱 𑒯𑒹𑒞𑒳 𑒧𑒰𑒮𑓂𑒙𑒩 𑒮𑒰𑒯𑒹𑒥𑒹 𑒏𑒯𑒻𑒞 𑒕𑒪𑒰𑒯 । 𑒏𑒼𑒢𑒼 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒧𑒰𑒮𑓂𑒙𑒩 𑒮𑒰𑒯𑒹𑒥 𑒃𑒞𑒱𑒯𑒰𑒮 𑒂 𑒢𑒰𑒑𑒩𑒱𑒏 𑒬𑒰𑒮𑓂𑒞𑓂𑒩𑒏 𑒏𑒱𑒞𑒰𑒥𑒏𑒹𑒿 𑒋𑒏𑒮𑒿 𑒠𑒼𑒮𑒩-𑒞𑒹𑒮𑒩 𑒥𑒹𑒩 𑒣𑒜𑓃𑒻𑒞 𑒠𑒹𑒐𑒱 𑒖𑒰𑒃𑒞 𑒕𑒪𑒰𑒯 𑒞𑒐𑒢 𑒞𑒿 𑒍𑒯𑒱 𑒫𑒱𑒠𑓂𑒨𑒰𑒩𑓂𑒟𑒲𑒏 𑒢𑒰𑒧𑒹 𑒍𑒯𑒱 𑒫𑒱𑒭𑒨𑒮𑒿 𑒣𑒛𑓃𑒱 𑒖𑒰𑒃𑒞 𑒕𑒪 । 𑒂𑒥 𑒍 𑒑𑒝𑒱𑒞𑒼 𑒣𑒜𑓃𑒞 𑒞𑒿 𑒍𑒏𑒩𑒰 𑒮𑒳𑒢𑒋 𑒣𑒛𑓃𑒞𑒻𑒏 𑒖𑒹 𑒥𑒰𑒥𑒴 𑒄 𑒃𑒞𑒱𑒯𑒰𑒮 𑒢𑒯𑒱 𑒕𑒱𑒨𑒻𑒏 𑒖𑒹 𑒏𑓀𑒚𑒮𑓂𑒟 𑒏𑒋 𑒩𑒯𑒪 𑒕𑒲 । 𑒮𑒻𑒨𑒰-𑒢𑒱𑒢𑒰𑒢𑒥𑒹 𑒁𑒢𑒚𑒰𑒢𑒥𑒹- 𑒮𑒢𑓂𑒞𑒰𑒢𑒥𑒹-𑒕𑒱𑒨𑒰𑒢𑒥𑒹-𑒣𑒢𑒔𑒰𑒢𑒥𑒹 𑒏𑒯𑒻𑒞-𑒏𑒯𑒻𑒞 𑒂 𑒥𑒼𑒩𑒰𑒏 𑒂𑒮𑒢𑒲𑒏𑒹𑒿 𑒥𑒩𑒐𑒰𑒏 𑒮𑒧𑒨𑒧𑒹 𑒕𑒞𑓂𑒞𑒰 𑒥𑒢𑒍𑒢𑒹 𑒣𑒰𑒿𑒔-𑒔𑒰𑒩𑒱-𑒞𑒲𑒢-𑒠𑒴-𑒋𑒏-𑒋𑒏-𑒋𑒏 𑒏𑒩𑒻𑒞 𑒦𑒰𑒑𑒻𑒞 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦 । 𑒏𑒯𑒱𑒨𑒼 𑒕𑒳𑒙𑓂𑒙𑒲𑒏 𑒠𑒱𑒢 𑒖𑓂𑒨𑒼𑒿 𑒏𑒥𑒛𑓂𑒛𑒲 𑒐𑒹𑒪𑒰𑒃 𑒏𑒰𑒪 𑒧𑒰𑒮𑓂𑒙𑒩 𑒮𑒰𑒯𑒹𑒥 𑒮𑒰𑒃𑒏𑒱𑒪 𑒣𑒩 𑒔𑒜𑓃𑒪 𑒠𑒹𑒐𑒰 𑒣𑒛𑓃𑒟𑒱 𑒞𑒿 𑒏𑒥𑒛𑓂𑒛𑒲-𑒏𑒥𑒛𑓂𑒛𑒲, 𑒧𑒰𑒮𑓂𑒙𑒩 𑒮𑒰𑒯𑒹𑒥 𑒣𑓂𑒩𑒝𑒰𑒧, 𑒏𑒥𑒛𑓂𑒛𑒲-𑒏𑒥𑒛𑓂𑒛𑒲 𑒏𑒯𑒻𑒞 𑒦𑒰𑒑𑒻𑒞 𑒩𑒯𑒟𑒱 𑒫𑒱𑒠𑓂𑒨𑒰𑒩𑓂𑒟𑒲 । 𑒂 𑒋𑒯𑒢𑒹 𑒋𑒏𑒙𑒰 𑒒𑒙𑒢𑒰𑒧𑒹 𑒯𑒧 𑒧𑒰𑒮𑓂𑒙𑒩 𑒮𑒰𑒯𑒹𑒥𑒏𑒹𑒿 𑒚𑒰𑒜𑓃 𑒦𑓄 𑒏𑒋 𑒮𑒰𑒿𑒮 𑒞𑒼𑒛𑓃𑒱 𑒏𑒋 𑒣𑓂𑒩𑒝𑒰𑒧 𑒏𑒋𑒢𑒹 𑒩𑒯𑒱𑒨𑒢𑓂𑒯𑒱 𑒂 𑒋𑒯𑒱 𑒏𑓂𑒩𑒧𑒧𑒹 𑒫𑒱𑒣𑒏𑓂𑒭𑒲 𑒣𑒰𑒩𑓂𑒙𑒲 𑒠𑓂𑒫𑒰𑒩𑒰 𑒪𑒼𑒏𑒱 𑒪𑒹𑒪 𑒑𑒹𑒪 𑒕𑒪𑒯𑒳𑒿 𑒞𑒿 𑒋𑒯𑒱 𑒣𑒩 𑒏𑒼𑒃𑒪𑒐 𑒥𑒪𑒰 𑒧𑒰𑒮𑓂𑒙𑒩 𑒮𑒰𑒯𑒹𑒥 𑒣𑓂𑒩𑒮𑒢𑓂𑒢 𑒦𑒹𑒪 𑒩𑒯𑒟𑒱 𑒂 𑒞𑒏𑒩 𑒔𑒩𑓂𑒔𑒰 𑒮𑓂𑒏𑒴𑒪𑒧𑒹 𑒮𑒦𑒏 𑒮𑒧𑒏𑓂𑒭 𑒏𑒋𑒢𑒹 𑒩𑒯𑒟𑒱 । 𑒥𑒳𑒗𑒳 𑒖𑒹 𑒑𑒰𑒧𑒏 𑒣𑓂𑒩𑒫𑒰𑒮, 𑒥𑒰𑒠𑒏 𑒮𑒧𑒨𑒧𑒹 𑒋𑒏𑒙𑒰 𑒣𑒻𑒒 𑒮𑓀𑒥𑒪 𑒮𑒱𑒠𑓂𑒡 𑒦𑒹𑒪 𑒕𑒪 । 𑒐𑒛𑓃𑒰𑒧 𑒣𑒯𑒱𑒩𑒱 𑒏𑒋 𑒑𑒞𑒱𑒮𑒿 𑒠𑒾𑒑𑒻𑒞 𑒩𑒯𑒲 𑒤𑒹𑒩 𑒥𑒩𑓂𑒭𑒰𑒧𑒹 𑒂𑒩𑒱 𑒣𑒩 𑒣𑒱𑒔𑓂𑒕𑒛𑓃 𑒣𑒩 𑒐𑒛𑓃𑒰𑒧 𑒣𑒯𑒱𑒩𑒱 𑒏𑒋 𑒠𑒾𑒑𑒻𑒞 𑒩𑒯𑒲 । 𑒣𑒱𑒔𑓂𑒕𑒛𑓃 𑒣𑒩 𑒐𑒛𑓃𑒰𑒧 𑒢𑒯𑒱 𑒣𑒱𑒕𑒛𑓃𑒻𑒞 𑒕𑒪 । 𑒥𑒰𑒠𑒧𑒹 𑒯𑒫𑒰𑒃 𑒔𑒣𑓂𑒣𑒪𑒏 𑒂𑒑𑒧𑒢 𑒦𑒹𑒪𑒰𑒏 𑒥𑒰𑒠 𑒏𑒞𑒹𑒏 𑒑𑒼𑒙𑒹 𑒐𑒮𑒱-𑒐𑒮𑒱 𑒏𑒋 𑒛𑒰𑒿𑒩𑒣𑒩 𑒑𑒩𑒧 𑒣𑒰𑒢𑒱𑒏 𑒦𑒰𑒣 𑒪𑒻𑒞 𑒕𑒪𑒰𑒯 । 𑒁𑒑𑒱𑒪𑒯𑒲, 𑒏𑒱𑒩𑒰𑒮𑒢 𑒞𑒹𑒪𑒏 𑒪𑒰𑒃𑒢, 𑒩𑒼𑒬𑒢𑒰𑒃𑒏 𑒑𑒼𑒙𑒲, 𑒪𑒥𑒢𑒔𑒴𑒮, 𑒩𑒥𑒛𑓃𑒏 𑒥𑒰𑒪, 𑒍𑒡𑒱𑒏 𑒑𑒹𑓀𑒠, 𑒣𑒮𑒲𑒡𑒏 𑒩𑒮𑒏 𑒫𑒱𑒭𑒮𑒿 𑒣𑒼𑒐𑒩𑒱𑒧𑒹 𑒧𑒰𑒕 𑒧𑒩𑒪𑒰𑒏 𑒥𑒰𑒠 𑒦𑒹𑒪 𑒠𑒴 𑒙𑒼𑒪𑒏 𑒥𑒲𑒔𑒧𑒹 𑒥𑒰𑒗𑒪 𑒧𑒰𑒩𑒱, 𑒥𑒰𑒜𑓃𑒱𑒏 𑒠𑒵𑒬𑓂𑒨 𑒠𑒹𑒐𑒥𑒰𑒏 𑒪𑒹𑒪 𑒖𑒳𑒙𑒪 𑒦𑒲𑒛𑓃, 𑒕𑒼𑒙-𑒕𑒼𑒙 𑒑𑒣 𑒣𑒩 𑒯𑒼𑒃𑒞 𑒣𑓀𑒔𑒻𑒞𑒲, 𑒂𑒧𑒏 𑒧𑒰𑒮𑒧𑒹 𑒂𑒧𑒏 𑒖𑒰𑒥𑒲𑒮𑒿 𑒥𑒯𑒩𑒰𑒃𑒞 𑒑𑒕𑒣𑒏𑓂𑒏𑒴 𑒂𑒧𑒏 𑒕𑒙𑒰, 𑒄 𑒮𑒦 𑒙𑒰 𑒁𑒪𑒼𑒣𑒱𑒞 𑒞𑒿 𑒢𑒯𑒱 𑒦𑓄 𑒖𑒋𑒞 ।
“𑒏𑒰𑒏𑒰 𑒨𑒾, 𑒯𑒧 𑒢𑒯𑒱 𑒪𑒑𑒹𑒪𑒱𑒁𑒢𑓂𑒯𑒱 𑒏𑒥𑒏𑒥𑒰𑒅𑒕”। 𑒄 𑒑𑒣 𑒏𑒯𑒻𑒞 𑒯𑒧𑒩 𑒂𑒿𑒐𑒱𑒧𑒹 𑒢𑒼𑒩 𑒂𑒥𑒱 𑒑𑒹𑒪 𑒕𑒪 । 𑒥𑒢𑒰𑒃𑒏𑒹𑒿 𑒏𑒱𑒕𑒳 𑒑𑒼𑒙𑒹 𑒕𑒾𑒛𑓃𑒰 𑒮𑒦 𑒠𑒪𑒰𑒢 𑒣𑒩 𑒮𑒳𑒞𑒪𑒧𑒹 𑒏𑒥𑒏𑒥𑒰𑒅𑒕 𑒪𑒑𑒰 𑒠𑒹𑒢𑒹 𑒕𑒪𑒢𑓂𑒯𑒱 । 𑒏𑒪𑒧 𑒠𑒱𑒬𑒱𑒮𑒿 𑒐𑒹𑒪𑒰-𑒏𑒳𑒠𑒰 𑒏𑒋 𑒮𑒦 𑒂𑒥𑒱 𑒩𑒯𑒪 𑒕𑒪 । 𑒧𑒯𑒰𑒩𑒏 𑒏𑒰𑒞𑒧𑒹 𑒏𑒥𑒏𑒥𑒰𑒅𑒕𑒏 𑒣𑒰𑒞 𑒞𑒼𑒛𑓃𑒪𑒏 𑒂 𑒋𑒏𑒩 𑒣𑒰𑒞𑒏𑒹𑒿 𑒔𑒧𑒛𑓃𑒰 𑒣𑒩 𑒩𑒑𑒛𑓃𑒪𑒰𑒮𑒿 𑒯𑒼𑒁𑒋𑒥𑒪𑒰 𑒣𑒩𑒱𑒝𑒰𑒧𑒣𑒩 𑒔𑒩𑓂𑒔𑒰 𑒯𑒼𑒧𑒋 𑒪𑒰𑒑𑒪 । 𑒏𑓂𑒨𑒼 𑒁𑒣𑒢 𑒔𑒧𑒛𑓃𑒰 𑒣𑒩 𑒪𑒑𑒹𑒥𑒰𑒏 𑒯𑒹𑒞𑒳 𑒞𑒻𑒨𑒰𑒩 𑒢𑒯𑒱 𑒕𑒪 𑒮𑒹 𑒠𑒪𑒰𑒢 𑒣𑒩 𑒥𑒢𑒰𑒃𑒏𑒹𑒿 𑒮𑒳𑒞𑒪 𑒠𑒹𑒐𑒱 𑒯𑒳𑒢𑒏𑒹 𑒠𑒹𑒯 𑒣𑒩 𑒣𑒰𑒞 𑒩𑒑𑒛𑓃𑒱 𑒠𑒹𑒪𑒏𑒢𑓂𑒯𑒱 । 𑒣𑒰𑒕𑒰𑒿𑒮𑒿 𑒯𑒧 𑒁𑒥𑒻𑒞 𑒕𑒪𑒯𑒳𑒿 𑒂 𑒮𑒦 𑒕𑒾𑒛𑓃𑒰 𑒞𑒿 𑒢𑒱𑒣𑒞𑓂𑒞𑒰 𑒦𑒋 𑒑𑒹𑒪, 𑒥𑒢𑒰𑒃𑒏 𑒢𑒖𑒩𑒱 𑒯𑒧𑒩𑒰 𑒣𑒩 𑒣𑒛𑓃𑒪𑒢𑓂𑒯𑒱 । 𑒮𑒹 𑒍 𑒏𑒰𑒏𑒰𑒏𑒹𑒿 𑒏𑒯𑒱 𑒠𑒹𑒪𑒐𑒱𑒢𑓂𑒯 । 𑒏𑒰𑒏𑒰 𑒯𑒧𑒩 𑒏𑒼𑒢𑒼 𑒑𑒣 𑒢𑒯𑒱 𑒮𑒳𑒢𑒪𑒢𑓂𑒯𑒱 𑒂 𑒠𑒮 𑒥𑒹𑒩 𑒏𑒰𑒢 𑒣𑒏𑒛𑓃𑒱 𑒏𑒋 𑒅𑒙𑓂𑒚𑒰-𑒥𑒻𑒮𑒲 𑒏𑒩𑒥𑒰𑒏 𑒮𑒖𑒰 𑒦𑒹𑒙𑒪 । 𑒮𑓀𑒑𑒯𑒱 𑒮𑒰𑒿𑒗𑒧𑒹 𑒮𑓀𑒑𑒲 𑒮𑒦𑒏 𑒮𑓀𑒑 𑒐𑒹𑒪𑒹𑒥𑒰𑒏 𑒥𑒠𑒪𑒰 𑒏𑒰𑒏𑒰 𑒂 𑒯𑒳𑒢𑒏 𑒦𑒖𑒰𑒩 𑒮𑒦𑒏 𑒮𑓀𑒑 𑒐𑒹𑒞 𑒣𑒟𑒰𑒩𑒏 𑒠𑒱𑒬𑒱 𑒒𑒴𑒧𑒥𑒰𑒏 𑒢𑒱𑒩𑓂𑒝𑒨 𑒦𑒹𑒪 𑒖𑒰𑒯𑒱𑒮𑒿 𑒯𑒧𑒩 𑒥𑒠𑒧𑒮𑓂𑒞𑒲 𑒏𑒧 𑒯𑒼𑒁𑒋 । 𑒥𑒰𑒜𑓃𑒱𑒏 𑒮𑒧𑒨 𑒕𑒪, 𑒢𑒰𑒍𑒣𑒩 𑒥𑒰𑒜𑒱𑒏 𑒠𑒵𑒬𑓂𑒨 𑒂 𑒮𑒱𑒪𑓂𑒪𑒲𑒏 𑒬𑒱𑒏𑒰𑒩 । 𑒥𑒰𑒠𑒧𑒹 𑒞𑒿 𑒋𑒏𑒩 𑒬𑒱𑒏𑒰𑒩𑒣𑒩 𑒮𑒩𑒏𑒰𑒩 𑒣𑓂𑒩𑒞𑒱𑒥𑓀𑒡 𑒪𑒑𑒰 𑒠𑒹𑒪𑒏 । 𑒧𑒳𑒠𑒰 𑒧𑒼𑒢 𑒯𑒧𑒩 𑒙𑒰𑒿𑒑𑒪 𑒩𑒯𑒪 𑒑𑒰𑒧 𑒣𑒩𑒏 𑒏𑒪𑓂𑒣𑒱𑒞 𑒐𑒹𑒪 𑒮𑒦𑒏 𑒠𑒱𑒮, 𑒖𑒹 𑒯𑒧𑒩 𑒮𑒦𑒏 𑒮𑓀𑒑𑒲 𑒮𑒦 𑒐𑒹𑒪𑒰𑒃𑒞 𑒯𑒼𑒋𑒞𑒰𑒯 । 𑒄 𑒕𑒪 𑒣𑒯𑒱𑒪 𑒠𑒱𑒢 । 𑒠𑒼𑒮𑒩 𑒠𑒱𑒢 𑒥𑒹𑒩𑒴 𑒣𑒯𑒩 𑒡𑒩𑒱 𑒯𑒧 𑒋𑒯𑒱 𑒣𑓂𑒩𑒞𑓂𑒨𑒰𑒬𑒰𑒧𑒹 𑒕𑒪𑒯𑒳𑒿, 𑒖𑒹 𑒂𑒃 𑒤𑒹𑒩𑒮𑒿 𑒏𑒰𑒏𑒰𑒏 𑒮𑓀𑒑 𑒖𑒰𑒋 𑒣𑒛𑓃𑒞 । 𑒍𑒢𑒰 𑒮𑓀𑒑𑒲 𑒮𑒦𑒏𑒹𑒿 𑒯𑒧 𑒄 𑒦𑒰𑒮 𑒢𑒯𑒱 𑒯𑒼𑒧𑒋 𑒠𑒹𑒪𑒱𑒨𑒻𑒏 𑒖𑒹 𑒯𑒧 𑒋𑒏𑒼 𑒩𑒞𑓂𑒞𑒲 𑒔𑒱𑒢𑓂𑒞𑒱𑒞 𑒕𑒲 𑒂 𑒍 𑒮𑒦 𑒢𑒰𑒍 𑒂 𑒮𑒱𑒪𑓂𑒪𑒲𑒏 𑒐𑒱𑒮𑓂𑒮𑒰 𑒞𑒢𑓂𑒧𑒨𑒞𑒰𑒮𑒿 𑒮𑒳𑒢𑒻𑒞 𑒩𑒯𑒪𑒰𑒯 । 𑒧𑒳𑒠𑒰 𑒯𑒧𑒩 𑒧𑒳𑒐𑒰𑒏𑒵𑒞𑒱 𑒠𑒹𑒐𑒱 𑒏𑒋 𑒏𑒰𑒏𑒰 𑒣𑒳𑒕𑒪𑒢𑓂𑒯𑒱, 𑒖𑒹 𑒂𑒃 𑒯𑒧𑒩𑒰 𑒮𑒦𑒏 𑒮𑓀𑒑 𑒖𑒋𑒥𑒰𑒏 𑒧𑒼𑒢 𑒢𑒯𑒱 𑒁𑒕𑒱 ? 𑒞𑒿 𑒯𑒧 𑒢𑒘𑒱 𑒢𑒯𑒱 𑒏𑒯𑒱 𑒮𑒏𑒪𑒱𑒨𑒢𑓂𑒯𑒱 । 𑒧𑒳𑒠𑒰 𑒤𑒹𑒩 𑒁𑒣𑒢𑒰𑒏𑒹𑒿 𑒮𑒧𑓂𑒯𑒰𑒩𑒻𑒞 𑒏𑒯𑒪𑒱𑒨𑒢𑓂𑒯𑒱 𑒖𑒹 𑒧𑒼𑒢 𑒞𑒿 𑒑𑒰𑒧𑒹 𑒣𑒩 𑒪𑒑𑒻𑒞 𑒁𑒕𑒱 । 𑒞𑒐𑒢 𑒏𑒰𑒏𑒰𑒏𑒹𑒿 𑒠𑒨𑒰 𑒪𑒰𑒑𑒱 𑒑𑒹𑒪𑒢𑓂𑒯𑒱 𑒂 𑒋𑒯𑒱 𑒣𑓂𑒩𑒞𑒱𑒥𑒢𑓂𑒡𑒏 𑒮𑓀𑒑 𑒖𑒹 𑒯𑒧 𑒂𑒥 𑒑𑒰𑒧𑒣𑒩 𑒥𑒠𑒧𑒮𑓂𑒞𑒲 𑒢𑒯𑒱 𑒏𑒩𑒥 𑒯𑒧𑒩𑒰 𑒑𑒰𑒧 𑒣𑒩 𑒩𑒯𑒥𑒰𑒏 𑒕𑒴𑒙𑒱 𑒦𑒹𑒙𑒱 𑒑𑒹𑒪 ।
𑒑𑒰𑒧𑒧𑒹 𑒛𑒹𑒜𑓃 𑒮𑒰𑒪 𑒡𑒩𑒱 𑒩𑒯𑒪𑒯𑒳𑒿 𑒂 𑒖𑒐𑒢 𑒥𑒰𑒥𑒴𑒖𑒲𑒏 𑒙𑓂𑒩𑒰𑓀𑒮𑒤𑒩 𑒣𑒙𑒢𑒰 𑒦𑓄 𑒑𑒹𑒪𑒢𑓂𑒯𑒱, 𑒞𑒐𑒢 𑒥𑒛𑓃𑒏𑒰 𑒦𑒻𑒨𑒰𑒏 𑒮𑓀𑒑𑒹 𑒣𑒯𑒪𑒹𑒖𑒰𑒒𑒰𑒙 𑒂 𑒧𑒯𑒹𑒢𑓂𑒠𑓂𑒩𑒴𑒒𑒰𑒙 𑒠𑓄 𑒏𑒋 𑒣𑒙𑒢𑒰 𑒂𑒥𑒱 𑒑𑒹𑒪𑒯𑒳𑒿। 𑒍𑒞𑒋 𑒮𑓂𑒏𑒴𑒪 𑒮𑒦𑒧𑒹 𑒣𑓂𑒩𑒫𑒹𑒬 𑒣𑒩𑒲𑒏𑓂𑒭𑒰 𑒯𑒼𑒃𑒞 𑒕𑒪 𑒂 𑒥𑒰𑒥𑒴𑒖𑒲 𑒦𑒰𑒋𑒏𑒹𑒿 𑒕𑒚𑒰𑒮𑒿 𑒮𑒞𑒧𑒰𑒏 𑒯𑒹𑒞𑒳 𑒂 𑒯𑒧𑒩𑒰 𑒣𑒔𑒧𑒰𑒮𑒿 𑒕𑒚𑒰 𑒂 𑒮𑒞𑒧𑒰 𑒠𑒳𑒢𑒴 𑒫𑒩𑓂𑒑𑒏 𑒯𑒹𑒞𑒳 𑒣𑓂𑒩𑒫𑒹𑒬 𑒣𑒩𑒲𑒏𑓂𑒭𑒰𑒧𑒹 𑒥𑒻𑒮𑒍𑒪𑒢𑓂𑒯𑒱। 𑒂 𑒞𑒏𑒩 𑒥𑒰𑒠 𑒯𑒧𑒩𑒰 𑒄 𑒥𑒳𑒗𑒥𑒰𑒧𑒹 𑒂𑒋𑒪 𑒖𑒹 𑒏𑒱𑒋𑒏 𑒯𑒧𑒩𑒰 𑒥𑒰𑒥𑒴𑒖𑒲 𑒣𑒔𑒧𑒹𑒧𑒹 𑒕𑒚𑒰𑒏 𑒫𑒱𑒖𑓂𑒘𑒰𑒢 𑒂 𑒑𑒝𑒱𑒞 𑒣𑒜𑓃𑒱 𑒪𑒹𑒥𑒰𑒏 𑒯𑒹𑒞𑒳 𑒏𑒯𑒢𑒹 𑒕𑒪𑒰𑒯 । 𑒣𑓂𑒩𑒫𑒹𑒬 𑒣𑒩𑒲𑒏𑓂𑒭𑒰𑒧𑒹 𑒄𑒋𑒯 𑒠𑒳𑒢𑒴 𑒫𑒱𑒭𑒨 𑒣𑒴𑒕𑒪 𑒖𑒰𑒃𑒞 𑒕𑒪 । 𑒁𑒮𑓂𑒞𑒳 𑒯𑒧𑒩 𑒕𑒚𑒰 𑒂 𑒮𑒞𑒧𑒰 𑒠𑒳𑒢𑒴 𑒫𑒩𑓂𑒑𑒏 𑒪𑒹𑒪 𑒂 𑒦𑒰𑒋𑒏𑒹𑒿 𑒮𑒞𑒧𑒰𑒏 𑒪𑒹𑒪 𑒔𑒨𑒢 𑒖𑒱𑒪𑒰 𑒮𑓂𑒏𑒴𑒪𑒧𑒹 𑒦𑒋 𑒑𑒹𑒪 । 𑒤𑒹𑒩 𑒬𑒯𑒩𑒏 𑒮𑒩𑒏𑒰𑒩𑒲𑒨𑒼 𑒮𑓂𑒏𑒴𑒪𑒧𑒹 𑒛𑓂𑒩𑒹𑒮 𑒕𑒪𑒻𑒏, 𑒮𑒹 𑒂𑒬𑓂𑒔𑒩𑓂𑒨 । 𑒮𑒹 𑒠𑒳𑒢𑒴 𑒑𑒼𑒙𑒹 𑒥𑒰𑒥𑒴𑒖𑒲𑒏 𑒮𑓀𑒑 𑒠𑒼𑒏𑒰𑒢 𑒑𑒹𑒪𑒯𑒳𑒿 𑒂 𑒛𑓂𑒩𑒹𑒮 𑒮𑒱𑒨𑒰𑒍𑒪 𑒑𑒹𑒪, 𑒠𑒴-𑒠𑒴 𑒙𑒰 𑒯𑒰𑒤 𑒣𑒻𑓀𑒙 𑒂 𑒋𑒏-𑒋𑒏𑒙𑒰 𑒁𑓀𑒑𑒰 । 𑒮𑓂𑒏𑒴𑒪𑒏 𑒣𑒯𑒱𑒪𑒳𑒏𑒹 𑒠𑒱𑒢 𑒧𑒰𑒩𑒱 𑒯𑒼𑒃𑒞-𑒯𑒼𑒃𑒞 𑒥𑒔𑒪 । 𑒋𑒏𑒙𑒰 𑒕𑒾𑒛𑓃𑒰 𑒯𑒧𑒩𑒰 𑒠𑒹𑒯𑒰𑒞𑒲 𑒏𑒯𑒪𑒏 𑒞𑒿 𑒮𑒹 𑒞𑒿 𑒯𑒧𑒩𑒰 𑒏𑒼𑒢𑒼 𑒐𑒩𑒰𑒣 𑒢𑒯𑒱 𑒪𑒰𑒑𑒪 । 𑒍𑒯𑒱 𑒅𑒧𑒩𑒱𑒧𑒹 𑒠𑒹𑒯𑒰𑒞𑒲 𑒬𑒥𑓂𑒠 𑒯𑒧𑒩𑒰 𑒢𑒲𑒏𑒹 𑒪𑒑𑒻𑒞 𑒕𑒪, 𑒧𑒳𑒠𑒰 𑒂𑒃 𑒮𑒼𑒔𑒻𑒞 𑒕𑒲 𑒞𑒿 𑒪𑒑𑒻𑒞 𑒁𑒕𑒱 𑒖𑒹 𑒍 𑒄 𑒬𑒥𑓂𑒠 𑒫𑓂𑒨𑓀𑒑𑓂𑒨𑒰𑒞𑓂𑒧𑒏 𑒩𑒴𑒣𑒹𑒿 𑒏𑒯𑒢𑒹 𑒕𑒪। 𑒤𑒹𑒩 𑒖𑒐𑒢 𑒍 𑒠𑒹𑒐𑒪𑒏 𑒖𑒹 𑒄 𑒞𑒿 𑒢𑒯𑒱 𑒐𑒾𑒿𑒗𑒰𑒋𑒪 𑒞𑒐𑒢 𑒥𑓀𑒑𑒰𑒪𑒲-𑒥𑓀𑒑𑒰𑒪𑒲 𑒏𑒯𑒢𑒰𑒃 𑒬𑒳𑒩𑒴 𑒏𑒋𑒪𑒏 । 𑒯𑒧 𑒠𑒳𑒢𑒴 𑒦𑒰𑒃 𑒣𑒰𑒞𑒩 𑒠𑒳𑒥𑒩 𑒂 𑒬𑒳𑒦𑓂𑒩-𑒬𑒰𑒦𑓂𑒩 𑒔𑒱𑒏𑓂𑒏𑒢-𑒔𑒳𑒢𑒧𑒳𑒢 𑒪𑒑𑒻𑒞 𑒕𑒪𑒯𑒳𑒿, 𑒞𑒰𑒯𑒱 𑒠𑓂𑒫𑒰𑒩𑒹 𑒍 𑒯𑒧𑒩𑒰 𑒮𑒦𑒏𑒹𑒿 𑒥𑓀𑒑𑒰𑒪𑒲 𑒥𑒳𑒗𑒱 𑒩𑒯𑒪 𑒕𑒪। 𑒯𑒧 𑒄 𑒫𑓂𑒨𑓀𑒑𑓂𑒨 𑒢𑒯𑒱 𑒮𑒯𑒱 𑒮𑒏𑒪𑒯𑒳𑒿 𑒂 𑒍𑒏𑒩𑒰 𑒠𑒱𑒬𑒱 𑒧𑒰𑒩𑒱-𑒧𑒰𑒩𑒱 𑒏𑒋 𑒕𑒳𑒙𑒪𑒯𑒳𑒿 । 𑒦𑒰𑒋 𑒥𑒲𑒔-𑒥𑒔𑒰𑒍 𑒏𑒋𑒪𑒏 । 𑒂𑒥 𑒍 𑒕𑒾𑒛𑓃𑒰 𑒏𑒰𑒢𑒨-𑒐𑒲𑒖𑒨 𑒪𑒰𑒑𑒪 𑒂 𑒣𑒻𑒒 𑒫𑒩𑓂𑒑𑒏 𑒏𑒼𑒢𑒼 𑒥𑒠𑒧𑒰𑒬 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒥𑒖𑒰𑒥𑒋 𑒪𑒹𑒪 𑒑𑒹𑒪 । 𑒤𑒹𑒩 𑒒𑒳𑒩𑒱 𑒏𑒋 𑒖𑒹 𑒂𑒨𑒪 𑒞𑒿 𑒍𑒏𑒩 𑒏𑒰𑒢𑒥-𑒐𑒲𑒖𑒥 𑒥𑒢𑓂𑒢 𑒦𑒋 𑒑𑒹𑒪 𑒕𑒪𑒻𑒏, 𑒯𑒧𑒩𑒰 𑒏𑒯𑒪𑒏 𑒖𑒹 𑒯𑒧𑒩 𑒦𑒰𑒑𑓂𑒨 𑒢𑒲𑒏 𑒁𑒕𑒱 𑒖𑒹 𑒖𑒏𑒩𑒰 𑒍 𑒥𑒖𑒰𑒥𑒋 𑒑𑒹𑒪 𑒕𑒪 𑒮𑒹 𑒂𑒃 𑒮𑓂𑒏𑒴𑒪 𑒢𑒯𑒱 𑒂𑒋𑒪 𑒁𑒕𑒱 । 𑒠𑒴 𑒞𑒲𑒢 𑒠𑒱𑒢 𑒡𑒩𑒱 𑒯𑒧 𑒄 𑒑𑒳𑒢-𑒡𑒳𑒢 𑒏𑒩𑒻𑒞 𑒩𑒯𑒪𑒯𑒳𑒿 𑒖𑒹 𑒍 𑒍𑒯𑒱 𑒥𑒠𑒧𑒰𑒬𑒏𑒹𑒿 𑒥𑒖𑒰 𑒏𑒋 𑒢𑒯𑒱 𑒂𑒢𑒱 𑒪𑒱𑒁𑒋 । 𑒍𑒯𑒱𑒢𑒰 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍𑒏𑒩𑒰 𑒤𑒹𑒩 𑒏𑒼𑒢𑒼 𑒠𑒼𑒮𑒩 𑒕𑒾𑒛𑓃𑒰𑒮𑒿 𑒗𑒑𑒛𑓃𑒰 𑒦𑒹𑒪𑒻𑒏 𑒂 𑒍𑒯𑒱 𑒠𑒱𑒢 𑒍 𑒯𑒲𑒩𑒼 𑒕𑒾𑒛𑓃𑒰 𑒮𑓂𑒏𑒴𑒪 𑒂𑒋𑒪 𑒕𑒪 । 𑒯𑒧𑒩𑒹 𑒮𑒼𑒗𑒰𑒿𑒧𑒹 𑒍 𑒯𑒧𑒩 𑒏𑒏𑓂𑒭𑒰𑒧𑒹 𑒂𑒋𑒪 𑒂 𑒠𑒼𑒮𑒩 𑒫𑒱𑒠𑓂𑒨𑒰𑒩𑓂𑒟𑒲𑒏𑒹𑒿 𑒋𑒏 𑒤𑒻𑒙 𑒣𑒹𑒙𑒧𑒹 𑒧𑒰𑒩𑒪𑒏𑒻𑒏 । 𑒏𑓂𑒨𑒼 𑒥𑒔𑒥𑒋 𑒪𑒹𑒪 𑒞𑒿 𑒢𑒯𑒱 𑒑𑒹𑒪𑒻𑒏 𑒧𑒳𑒠𑒰 𑒥𑒰𑒠𑒧𑒹 𑒖𑒐𑒢 𑒋𑒏𑒙𑒰 𑒏𑓂𑒪𑒰𑒮𑒧𑒹 𑒬𑒱𑒏𑓂𑒭𑒏 𑒢𑒯𑒱 𑒁𑒋𑒪𑒰𑒯 𑒂 𑒫𑒱𑒠𑓂𑒨𑒰𑒩𑓂𑒟𑒲 𑒮𑒦 𑒐𑒰𑒪𑒲 𑒑𑒣-𑒬𑒣 𑒏𑒋 𑒩𑒯𑒪 𑒕𑒪 𑒞𑒐𑒢 𑒋𑒯𑒱 𑒥𑒰𑒞𑒏 𑒢𑒱𑒩𑓂𑒝𑒨 𑒦𑒹𑒪 𑒖𑒹 𑒂𑒥 𑒍𑒯𑒱 𑒫𑒱𑒠𑓂𑒨𑒰𑒩𑓂𑒟𑒲𑒮𑒿 𑒏𑓂𑒨𑒼 𑒑𑒣 𑒢𑒯𑒱 𑒏𑒩𑒞 𑒂 𑒏𑓂𑒪𑒰𑒮 𑒙𑒲𑒔𑒩𑒮𑒿 𑒋𑒯𑒱 𑒑𑒣𑒏 𑒬𑒱𑒏𑒰𑒃𑒞 𑒏𑒋𑒪 𑒖𑒋𑒞 𑒖𑒰𑒯𑒱𑒮𑒿 𑒍 𑒍𑒯𑒱 𑒥𑒠𑒧𑒰𑒬 𑒫𑒱𑒠𑓂𑒨𑒰𑒩𑓂𑒟𑒲𑒏 𑒏𑓂𑒪𑒰𑒮 𑒙𑒲𑒔𑒩𑒏𑒹𑒿 𑒋𑒯𑒱 𑒒𑒙𑒢𑒰𑒏 𑒫𑒱𑒭𑒨𑒧𑒹 𑒥𑒞𑒰𑒥𑒟𑒱 । 𑒂𑒥 𑒍 𑒣𑒱𑒢𑒏𑒰𑒯 𑒫𑒱𑒠𑓂𑒨𑒰𑒩𑓂𑒟𑒲 𑒬𑒳𑒏-𑒣𑒰𑒏 𑒏𑒩𑒋 𑒪𑒰𑒑𑒪 । 𑒤𑒹𑒩 𑒍 𑒍𑒯𑒱 𑒫𑒱𑒠𑓂𑒨𑒰𑒩𑓂𑒟𑒲𑒏 𑒪𑒑 𑒑𑒹𑒪, 𑒍𑒏𑒩𑒰 𑒏𑒰𑒢 𑒦𑒩𑒱 𑒂𑒋𑒪 𑒖𑒹 𑒮𑒦 𑒍𑒏𑒩𑒰 𑒫𑒱𑒩𑒳𑒠𑓂𑒡𑒧𑒹 𑒔𑒰𑒪𑒱 𑒔𑒪𑒱 𑒩𑒯𑒪 𑒁𑒕𑒱 । 𑒍 𑒥𑒠𑒧𑒰𑒬 𑒂𑒥𑒱 𑒏𑒋 𑒮𑒦𑒏𑒹𑒿 𑒅𑒚𑒥𑒰𑒏 𑒪𑒹𑒪 𑒏𑒯𑒪𑒏 𑒧𑒳𑒠𑒰 𑒏𑓂𑒨𑒼 𑒢𑒯𑒱 𑒅𑒚𑒪 । 𑒞𑒏𑒢 𑒍 𑒯𑒧𑒩𑒰 𑒏𑒯𑒪𑒏 𑒖𑒹 𑒅𑒚𑒴 । 𑒯𑒧 𑒅𑒚𑒱 𑒑𑒹𑒪𑒯𑒳𑒿 𑒂 𑒞𑒐𑒢 𑒍𑒯𑒱𑒢𑒰 𑒋𑒏-𑒋𑒏 𑒏𑓄 𑒏𑒋 𑒞𑒲𑒢 𑒔𑒰𑒩𑒱 𑒑𑒼𑒙𑒹𑒏𑒹𑒿 𑒅𑒚𑒹𑒪𑒏 𑒂 𑒤𑒹𑒩 𑒮𑒦𑒏𑒹𑒿 𑒅𑒚𑒥𑒰𑒏 𑒪𑒹𑒪 𑒏𑒯𑒪𑒏 । 𑒮𑒦 𑒅𑒚𑒱 𑒑𑒹𑒪 । 𑒞𑒐𑒢 𑒮𑒦𑒏𑒹𑒿 𑒡𑒧𑒏𑒲 𑒠𑒹𑒧𑒋 𑒪𑒰𑒑𑒪 । 𑒧𑒳𑒠𑒰 𑒋𑒯𑒱 𑒥𑒹𑒩 𑒯𑒧𑒩 𑒮𑒦𑒏 𑒏𑓂𑒪𑒰𑒮 𑒧𑒼𑒢𑒲𑒙𑒩 𑒏𑒱𑒕𑒳 𑒯𑒱𑒧𑓂𑒧𑒞𑒮𑒿 𑒏𑒰𑒖 𑒪𑒹𑒪𑒏 𑒂 𑒍𑒏𑒩𑒰 𑒍𑒯𑒱 𑒕𑒾𑒛𑓃𑒰𑒏 𑒫𑒱𑒭𑒨𑒧𑒹 𑒏𑒯𑒋 𑒪𑒰𑒑𑒪 । 𑒯𑒧𑒩𑒰 𑒠𑒹𑒐𑒰 𑒏𑒋 𑒏𑒯𑒪𑒏 𑒖𑒹 𑒋𑒏𑒩𑒰 𑒠𑒹𑒐𑒻𑒞 𑒕𑒲? 𑒏𑒢𑒱𑒨𑒼 𑒥𑒠𑒧𑒰𑒬 𑒪𑒑𑒻𑒞 𑒁𑒕𑒱, 𑒋𑒏𑒩𑒼 𑒁𑒯𑒰𑒿𑒏 𑒢𑒰𑒧 𑒪𑓄 𑒏𑒋 𑒠𑒥𑒰𑒛𑓃𑒱 𑒩𑒯𑒪 𑒕𑒪 । 𑒍 𑒕𑒾𑒛𑓃𑒰 𑒞𑒿 𑒯𑒳𑒝𑓂𑒛 𑒕𑒪 𑒮𑒹 𑒍𑒏𑒩 𑒣𑒰𑒩𑒰 𑒔𑒜𑓃𑒱 𑒑𑒹𑒪𑒻𑒏 𑒂 𑒯𑒧𑒩 𑒫𑒩𑓂𑒑𑒏 𑒣𑒱𑒢𑒏𑒰𑒯𑒰 𑒕𑒾𑒛𑓃𑒰𑒏𑒹𑒿 𑒔𑒹𑒞𑒾𑒢𑒲 𑒠𑒹𑒪𑒏𑒻𑒏 𑒖𑒹 𑒂𑒃 𑒠𑒱𑒢𑒮𑒿 𑒏𑒢𑒻𑒞-𑒐𑒱𑒖𑒻𑒞 𑒍𑒏𑒩𑒰 𑒪𑒑 𑒢𑒯𑒱 𑒂𑒍𑒞 𑒂 𑒍𑒏𑒩 𑒢𑒰𑒧 𑒪𑓄 𑒏𑒋 𑒏𑒏𑒩𑒼𑒮𑒿 𑒗𑒑𑒛𑓃𑒰 𑒢𑒯𑒱 𑒏𑒩𑒞 । 𑒋𑒯𑒱𑒢𑒰 𑒮𑓂𑒏𑒴𑒪 𑒔𑒪𑒱 𑒩𑒯𑒪 𑒕𑒪 𑒂𑒏𑒱 𑒋𑒏 𑒠𑒱𑒢 𑒋𑒏𑒙𑒰 𑒕𑒾𑒛𑓃𑒰 𑒫𑒩𑓂𑒑𑒧𑒹 𑒣𑒱𑒯𑒏𑒲 𑒧𑒰𑒩𑒱 𑒠𑒹𑒪𑒏𑒻𑒏 । 𑒍 𑒕𑒾𑒛𑓃𑒰 𑒥𑒲𑒔𑒯𑒱𑒧𑒹 𑒥𑒧𑓂𑒥𑒄 𑒦𑒰𑒑𑒱 𑒑𑒹𑒪 𑒕𑒪 𑒥𑒰𑒪 𑒏𑒪𑒰𑒏𑒰𑒩 𑒥𑒢𑒥𑒰𑒏 𑒪𑒹𑒪 । 𑒒𑒳𑒩𑒱 𑒏𑒋 𑒂𑒋𑒪 𑒞𑒿 𑒫𑒩𑓂𑒑 𑒬𑒱𑒏𑓂𑒭𑒏 𑒣𑒳𑒕𑒪𑒢𑓂𑒯𑒱 𑒖𑒹 𑒏𑒱𑒋𑒏 𑒒𑒳𑒩𑒱 𑒁𑒋𑒪𑒯𑒳𑒿 । 𑒞𑒿 𑒍 𑒯𑒳𑒢𑒏𑒰 𑒏𑒯𑒪𑒏𑒢𑓂𑒯𑒱 𑒖𑒹 𑒮𑒦 𑒍𑒞𑒋 𑒏𑒯𑒪𑒏 𑒖𑒹 𑒋𑒞𑒋 𑒞𑒿 𑒮𑒦 𑒥𑒲.𑒋., 𑒋𑒧.𑒋. 𑒁𑒕𑒱, 𑒁𑒯𑒰𑒿 𑒏𑒧𑒮𑒿 𑒏𑒧 𑒧𑒻𑒙𑓂𑒩𑒱𑒏𑒼 𑒏𑒋 𑒪𑒱𑒁𑒯 । 𑒂𑒥 𑒣𑒱𑒯𑒏𑒲𑒏 𑒥𑒰𑒠 𑒫𑒩𑓂𑒑 𑒬𑒱𑒏𑓂𑒭𑒏 𑒣𑒜𑓃𑒰𑒃 𑒕𑒼𑒛𑓃𑒱 𑒏𑒋 𑒍𑒏𑒩 𑒁𑒢𑓂𑒫𑒹𑒭𑒝𑒧𑒹 𑒪𑒰𑒑𑒱 𑒑𑒹𑒪 । 𑒣𑒱𑒯𑒏𑒲 𑒏𑒼𑒢 𑒠𑒱𑒬𑒱𑒮𑒿 𑒂𑒋𑒪 । 𑒥𑒯𑒳𑒧𑒞𑒏 𑒂𑒡𑒰𑒩 𑒣𑒩 𑒋𑒏 𑒏𑒰𑒞𑒏𑒹𑒿 𑒕𑒰𑒿𑒙𑒱 𑒠𑒹𑒪 𑒑𑒹𑒪 । 𑒂𑒥 𑒂𑒑𑒴𑒮𑒿 𑒂𑒋𑒪 𑒂𑒏𑒱 𑒣𑒰𑒕𑒴𑒮𑒿 । 𑒞𑒰𑒯𑒱 𑒂𑒡𑒰𑒩 𑒣𑒩 𑒮𑒹𑒯𑒼 𑒋𑒏𑒙𑒰 𑒥𑒹𑓀𑒔 𑒢𑒱𑒩𑓂𑒡𑒰𑒩𑒝 𑒦𑒋 𑒑𑒹𑒪 । 𑒍𑒯𑒱 𑒥𑒹𑓀𑒔 𑒣𑒩 𑒕𑒯 𑒑𑒼𑒙𑒹 𑒕𑒪𑒰𑒯 । 𑒂𑒥 𑒄 𑒢𑒱𑒩𑓂𑒡𑒰𑒩𑒝 𑒯𑒼𑒧𑒋 𑒪𑒰𑒑𑒪 𑒖𑒹 𑒥𑒰𑒧 𑒏𑒰𑒞𑒮𑒿 𑒂𑒨𑒪 𑒂𑒏𑒱 𑒠𑒯𑒱𑒢𑒮𑒿 । 𑒤𑒹𑒩 𑒕𑒯𑒧𑒹 𑒮𑒿 𑒠𑒴 𑒑𑒼𑒙𑒹𑒏 𑒢𑒱𑒩𑓂𑒡𑒰𑒩𑒝 𑒥𑒯𑒳𑒧𑒞𑒏 𑒂𑒡𑒰𑒩 𑒣𑒩 𑒏𑒋𑒪 𑒑𑒹𑒪 । 𑒍𑒯𑒱𑒧𑒹𑒮𑒿 𑒋𑒏𑒙𑒰 𑒯𑒧𑒩𑒰 𑒪𑒼𑒏𑒢𑒱𑒏 𑒥𑒧𑓂𑒥𑒃𑒨𑒰 𑒯𑒲𑒩𑒼 𑒕𑒪𑒰𑒯, 𑒖𑒢𑒱𑒏𑒩 𑒥𑒧𑓂𑒥𑒃𑒏 𑒐𑒱𑒮𑓂𑒮𑒰 𑒙𑒱𑒤𑒱𑒢𑒮𑒿 𑒪𑓄 𑒏𑒋 𑒪𑒹𑒖𑒩 𑒏𑓂𑒪𑒰𑒮 𑒡𑒩𑒱 𑒔𑒪𑒻𑒞 𑒩𑒯𑒻𑒞 𑒕𑒪 । 𑒧𑒳𑒠𑒰 𑒋𑒯𑒱 𑒠𑒳𑒢𑒴 𑒑𑒼𑒙𑒹𑒧𑒹 𑓑:𑓑 𑒏𑒹𑒩 𑒙𑒰𑒃 𑒦𑒋 𑒑𑒹𑒪 𑒏𑒰𑒩𑒝 𑒏𑓂𑒨𑒼 𑒧𑒰𑒢𑒋 𑒯𑒹𑒞𑒳 𑒞𑒻𑒨𑒰𑒩 𑒢𑒯𑒱 𑒖𑒹 𑒣𑒱𑒯𑒏𑒲 𑒏𑒹 𑒧𑒰𑒩𑒪𑒏” ।
𑒋𑒏𑒩 𑒥𑒰𑒠 𑒛𑒰𑒨𑒩𑒲 𑒐𑒰𑒪𑒲 𑒕𑒪 । 𑒢𑒢𑓂𑒠 𑒥𑒹𑒙𑒰𑒏𑒹𑒿 𑒥𑒖𑒰 𑒏𑒋 𑒛𑒰𑒨𑒩𑒲 𑒠𑒋 𑒠𑒹𑒪𑒢𑓂𑒯𑒱 𑒂 𑒧𑒰𑒞𑓂𑒩 𑒄 𑒏𑒯𑒪𑒢𑓂𑒯𑒱 𑒖𑒹 𑒣𑒜𑓃𑒰𑒄 𑒣𑒩 𑒡𑓂𑒨𑒰𑒢 𑒠𑒱𑒁 । 𑒋𑒯𑒱 𑒥𑒰𑒞 𑒣𑒩 𑒪𑒖𑓂𑒖𑒱𑒞 𑒯𑒼𑒋𑒥𑒰𑒏 𑒏𑒼𑒢𑒼 𑒥𑒰𑒞 𑒢𑒯𑒱 𑒕𑒪 𑒧𑒳𑒠𑒰 𑒂𑒩𑒳𑒝𑒱𑒏𑒹𑒿 𑒯𑒳𑒢𑒏𑒩 𑒦𑒰𑒋 𑒥𑒯𑒱𑒢 𑒋𑒯𑒱 𑒑𑒣𑒏 𑒪𑒹𑒪 𑒥𑒯𑒳𑒞 𑒠𑒱𑒢 𑒡𑒩𑒱 𑒏𑒱𑒔𑒏𑒱𑒔𑒰𑒥𑒻𑒞 𑒩𑒯𑒪𑒐𑒱𑒢𑓂𑒯 । 𑒁𑒮𑓂𑒞𑒳 𑒋𑒏 𑒠𑒱𑒢 𑒍 𑒛𑒰𑒨𑒩𑒲𑒏𑒹𑒿 𑒤𑒰𑒛𑓃𑒱 𑒠𑒹𑒪𑒢𑓂𑒯𑒱 𑒂 𑒄 𑒂𑒞𑓂𑒧𑒏𑒟𑒰𑒞𑓂𑒧𑒏 𑒅𑒣𑒢𑓂𑒨𑒰𑒮 𑒣𑒴𑒩𑓂𑒝 𑒯𑒼𑒋𑒥𑒰𑒮𑒿 𑒣𑒯𑒱𑒢𑒯𑒱 𑒐𑒞𑒧 𑒦𑒋 𑒑𑒹𑒪 ।
𑒢𑒢𑓂𑒠𑒏 𑒁𑒫𑓂𑒨𑒫𑓂𑒮𑓂𑒟𑒰𑒏 𑒫𑒱𑒩𑒳𑒠𑓂𑒡 𑒬𑒳𑒩𑒴 𑒏𑒋𑒪 𑒑𑒹𑒪 𑒮𑓀𑒒𑒩𑓂𑒭 𑒏𑒱𑒕𑒳 𑒠𑒱𑒢𑒏𑒰 𑒫𑒱𑒩𑒰𑒧 𑒪𑒹𑒢𑒹 𑒕𑒪 । 𑒑𑒰𑒧𑒧𑒹 𑒥𑒔𑓂𑒔𑒰 𑒮𑒦 𑒛𑒹𑒜𑓃 𑒮𑒰𑒪 𑒩𑒯𑒪 𑒕𑒪𑒢𑓂𑒯𑒱, 𑒠𑒩𑒧𑒰𑒯𑒰 𑒥𑒯𑒳𑒞 𑒠𑒱𑒢 𑒡𑒩𑒱 𑒥𑒢𑓂𑒠 𑒕𑒪𑒢𑓂𑒯𑒱 । 𑒑𑒰𑒧𑒧𑒹 𑒣𑒻𑒒 𑒦𑒰𑒋 𑒋𑒏𑒙𑒰 𑒦𑒰𑒫𑒲 𑒩𑒰𑒖𑒢𑒲𑒞𑒱𑒖𑓂𑒘𑒏𑒹𑒿 𑒏𑒯𑒱 𑒏𑒋 𑒢𑒢𑓂𑒠𑒏 𑒣𑒠𑒮𑓂𑒟𑒰𑒣𑒢 𑒏𑓂𑒭𑒹𑒞𑓂𑒩𑒲𑒨 𑒏𑒰𑒖𑒮𑒿 𑒯𑒙𑒰 𑒏𑒋 𑒂𑒤𑒱𑒮𑒧𑒹 𑒔𑒱𑒞𑓂𑒩 𑒣𑒩𑒱𑒨𑒼𑒖𑒢𑒰 𑒂𑒏𑒱 𑒛𑒱𑒖𑒰𑒃𑒢𑒧𑒹 𑒏𑒩𑒥𑒰𑒋 𑒠𑒹𑒢𑒹 𑒕𑒪𑒐𑒱𑒢𑓂𑒯 । 𑒮𑓀𑒑𑒹 𑒄𑒯𑒼 𑒏𑒯𑒢𑒹 𑒕𑒪𑒐𑒱𑒢𑓂𑒯 𑒖𑒹 𑒁𑒣𑒢 𑒂𑒤𑒱𑒮 𑒖𑒰𑒆 𑒂𑒆 𑒂 𑒥𑒔𑓂𑒔𑒰 𑒮𑒦 𑒣𑒩 𑒡𑓂𑒨𑒰𑒢 𑒠𑒱𑒁 । 𑒮𑒦𑒮𑒿 𑒧𑒱𑒪𑒱 𑒖𑒳𑒪𑒱 𑒏𑒋 𑒩𑒯𑒴 । 𑒢𑒢𑓂𑒠 𑒣𑒙𑒢𑒰 𑒂𑒥𑒱 𑒏𑒋 𑒦𑒰𑒋𑒏 𑒮𑒦 𑒑𑒣 𑒣𑒩 𑒡𑓂𑒨𑒰𑒢 𑒠𑒹𑒢𑒹 𑒕𑒪𑒰𑒯 । 𑒣𑒙𑒢𑒰𑒧𑒹 𑒥𑒹𑒙𑒲𑒏 𑒏𑒰𑒪𑒹𑒖𑒧𑒹 𑒢𑒰𑒧𑒰𑓀𑒏𑒢 𑒏𑒩𑒥𑒰𑒋 𑒧𑒯𑒰𑒫𑒱𑒠𑓂𑒨𑒰𑒪𑒨𑒏 𑒣𑒰𑒩𑓂𑒬𑓂𑒫𑒧𑒹 𑒏𑒱𑒩𑒰𑒨𑒰𑒣𑒩 𑒒𑒩 𑒞𑒰𑒏𑒪𑒢𑓂𑒯𑒱 । 𑒠𑒳𑒢𑒴 𑒥𑒹𑒙𑒰𑒏 𑒢𑒰𑒧𑒰𑓀𑒏𑒢𑒏 𑒯𑒹𑒞𑒳 𑒣𑓂𑒩𑒫𑒹𑒬 𑒣𑒩𑒲𑒏𑓂𑒭𑒰 𑒏𑒹𑒩 𑒤𑒰𑒩𑓂𑒧 𑒮𑒦 𑒦𑒩𑒥𑒰𑒋 𑒮𑒦𑒏𑒹𑒿 𑒣𑒙𑒢𑒰 𑒥𑒖𑒰 𑒪𑒹𑒪𑒢𑓂𑒯𑒱 । 𑒦𑒰𑒞𑒱𑒖𑒏𑒹𑒿 𑒏𑒯𑒪𑒐𑒱𑒢𑓂𑒯 𑒖𑒹 𑒮𑒦𑒏𑒹𑒿 𑒪𑒋 𑒏𑒋 𑒂𑒥𑒱 𑒖𑒰𑒆 𑒂 𑒣𑒯𑒪𑒹𑒖𑒰𑒒𑒰𑒙𑒧𑒹 𑒥𑒔𑓂𑒔𑒰 𑒥𑒰𑒥𑒴 𑒥𑒪𑒰 𑒢𑒯𑒱 𑒫𑒩𑒢 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒮𑓂𑒙𑒲𑒧𑒩 𑒣𑒏𑒛𑓃𑒥𑒰𑒏 𑒂𑒠𑒹𑒬 𑒠𑒹𑒪𑒐𑒱𑒢𑓂𑒯 । 𑒏𑒰𑒩𑒝 𑒋𑒏𑒙𑒰 𑒢𑒱𑒖𑒲 𑒮𑓂𑒙𑒲𑒧𑒩 𑒥𑒔𑓂𑒔𑒰 𑒥𑒰𑒥𑒴𑒏 𑒮𑒹𑒯𑒼 𑒔𑒪𑒻𑒞 𑒕𑒪 𑒧𑒳𑒠𑒰 𑒍 𑒥𑒹𑒬𑒲 𑒣𑒮𑒹𑒢𑓂𑒖𑒩 𑒪𑒋 𑒏𑓄 𑒔𑒪𑒻𑒞 𑒕𑒪, 𑒮𑓀𑒑𑒯𑒱 𑒮𑒩𑒏𑒰𑒩𑒲 𑒮𑓂𑒙𑒲𑒧𑒩 𑒁𑒣𑒢 𑒮𑒧𑒨𑒮𑒿 𑒔𑒪𑒻𑒞 𑒕𑒪, 𑒍𑒯𑒱𑒧𑒹 𑒣𑒻𑒮𑒹𑓀𑒖𑒩 𑒩𑒯𑒋 𑒫𑒰 𑒢𑒯𑒱 । 𑒮𑒩𑒏𑒰𑒩𑒲 𑒮𑓂𑒙𑒲𑒧𑒩𑒧𑒹 𑒨𑒰𑒞𑓂𑒩𑒲𑒏 𑒮𑓀𑒐𑓂𑒨𑒰 𑒮𑒲𑒧𑒱𑒞 𑒕𑒪 𑒞𑒰𑒯𑒱 𑒯𑒹𑒞𑒳 𑒙𑒱𑒏𑒙 𑒏𑒹𑒩 𑒢𑒱𑒨𑒧𑒱𑒞 𑒯𑒱𑒮𑒰𑒥 𑒕𑒪 𑒂 𑒮𑒦 𑒨𑒰𑒞𑓂𑒩𑒲𑒏 𑒥𑒲𑒧𑒰 𑒯𑒼𑒃𑒞 𑒕𑒪, 𑒄 𑒥𑒰𑒞 𑒢𑒱𑒖𑒲 𑒮𑓂𑒙𑒲𑒧𑒩𑒧𑒹 𑒢𑒯𑒱 𑒕𑒪। 𑒦𑒰𑒞𑒱𑒖𑒏 𑒮𑓀𑒑 𑒣𑒞𑓂𑒢𑒲 𑒂 𑒣𑒳𑒞𑓂𑒩-𑒣𑒳𑒞𑓂𑒩𑒲 𑒮𑒦 𑒂𑒥𑒱 𑒑𑒹𑒪𑒐𑒱𑒢𑓂𑒯 । 𑒑𑓀𑒑𑒰 𑒥𑓂𑒩𑒱𑒖 𑒏𑒰𑒪𑒼𑒢𑒲𑒧𑒹 𑒢𑒢𑓂𑒠 𑒋𑒏𑒰𑒏𑒲 𑒩𑒯𑒻𑒞 𑒕𑒪𑒰𑒯 । 𑒣𑒩𑒱𑒫𑒰𑒩𑒏 𑒪𑒼𑒏𑒏𑒹𑒿 𑒮𑒹𑒯𑒼 𑒂𑒮𑒣𑒛𑓃𑒼𑒮𑒮𑒿 𑒥𑒹𑒬𑒲 𑒧𑒹𑒪-𑒖𑒼𑒪 𑒏𑒩𑒥𑒰𑒏 𑒁𑒢𑒳𑒧𑒞𑒱 𑒢𑒯𑒱 𑒠𑒹𑒢𑒹 𑒕𑒪𑒰𑒯 । 𑒧𑒳𑒠𑒰 𑒣𑒙𑒢𑒰𑒧𑒹 𑒮𑒦𑒙𑒰 𑒅𑒢𑒙𑒱 𑒑𑒹𑒪 𑒕𑒪 । 𑒣𑒛𑓃𑒼𑒮𑒧𑒹 𑒋𑒏𑒙𑒰 𑒩𑒱𑒙𑒰𑒨𑒩𑓂𑒛 𑒤𑒾𑒖𑒲 𑒕𑒪𑒰𑒯, 𑒋𑒏𑒙𑒰 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒣𑒳𑒪𑒱𑒮 𑒕𑒪𑒰𑒯 𑒂 𑒋𑒏𑒙𑒰 𑒥𑒱𑒯𑒰𑒩 𑒮𑒔𑒱𑒫𑒰𑒪𑒨𑒏 𑒏𑒩𑓂𑒧𑒔𑒰𑒩𑒲 । 𑒢𑒢𑓂𑒠 𑒠𑒳𑒢𑒴 𑒥𑒹𑒙𑒰𑒏𑒹𑒿 𑒪𑒋 𑒁𑒑𑒱𑒪𑒰 𑒠𑒱𑒢 𑒞𑒲𑒢𑒴 𑒑𑒼𑒙𑒹𑒏 𑒒𑒩 𑒑𑒹𑒪𑒰𑒯 𑒂 𑒮𑒦𑒮𑒿 𑒢𑒧𑒮𑓂𑒏𑒰𑒩-𑒣𑒰𑒞𑒲 𑒏𑒩𑒥𑒍𑒪𑒐𑒱𑒢𑓂𑒯 । 𑒥𑒹𑒙𑒰-𑒥𑒹𑒙𑒲 𑒮𑒦 𑒮𑓂𑒏𑒴𑒪 𑒖𑒰𑒋 𑒪𑒰𑒑𑒪 𑒕𑒪𑒢𑓂𑒯𑒱 । 𑒢𑒢𑓂𑒠 𑒣𑒰𑒿𑒔 𑒏𑒱𑒪𑒼𑒧𑒲𑒙𑒩 𑒂𑒤𑒱𑒮 𑒣𑒋𑒩𑒹 𑒖𑒰𑒟𑒱 𑒂 𑒒𑒳𑒩𑒞𑒲 𑒏𑒰𑒪 𑒒𑒩𑒏 𑒏𑒰𑒖-𑒅𑒠𑓂𑒨𑒧 𑒮𑒹𑒯𑒼 𑒏𑒩𑒻𑒞 𑒂𑒥𑒟𑒱 । 𑒖𑒹𑒢𑒰 𑒥𑒵𑒯𑒮𑓂𑒣𑒞𑒱𑒏𑒹𑒿 𑒯𑒰𑒙 𑒪𑒑𑒻𑒞 𑒕𑒪 𑒞𑒿 𑒍𑒞𑒋𑒮𑒿 𑒯𑒩𑒱𑒨𑒩 𑒞𑒩𑒏𑒰𑒩𑒲, 𑒔𑒰𑒅𑒩 𑒠𑒰𑒪𑒱 𑒃𑒞𑓂𑒨𑒰𑒠𑒱 𑒂𑒢𑒥, 𑒄 𑒮𑒦 । 𑒯𑒰𑒙 𑒩𑒫𑒱𑒏 𑒕𑒳𑒙𑓂𑒙𑒲𑒏 𑒠𑒱𑒢 𑒮𑒹𑒯𑒼 𑒪𑒑𑒻𑒞 𑒕𑒪 𑒂 𑒍𑒯𑒴 𑒠𑒱𑒢 𑒁𑒣𑒢𑒹 𑒖𑒰 𑒏𑒋 𑒮𑒦𑒙𑒰 𑒒𑒩𑒏 𑒏𑒰𑒖 𑒏𑒩𑒻𑒞 𑒕𑒪𑒰𑒯 । 𑒥𑒔𑓂𑒔𑒰 𑒮𑒦𑒏 𑒏𑒰𑒖 𑒧𑒰𑒞𑓂𑒩 𑒣𑒜𑓃𑒥𑒰 𑒡𑒩𑒱 𑒮𑒲𑒧𑒱𑒞 𑒕𑒪 । 𑒠𑒴𑒡 𑒣𑒻𑒏𑒹𑒙 𑒥𑒪𑒰 𑒁𑒥𑒻𑒞 𑒕𑒪𑒢𑓂𑒯𑒱 𑒏𑒰𑒩𑒝 𑒅𑒚𑒰𑒢𑒰 𑒠𑒳𑒯𑒥𑒰 𑒏𑒋 𑒁𑒢𑒥𑒰𑒧𑒹 𑒥𑒔𑓂𑒔𑒰 𑒮𑒦𑒏 𑒣𑒜𑓃𑒰𑒃𑒧𑒹 𑒦𑒰𑒿𑒑𑒚 𑒣𑒛𑓃𑒻𑒞 । 𑒥𑒛𑓃𑒏𑒰 𑒥𑒹𑒙𑒰 𑒖𑒹 𑒑𑓀𑒑𑒰 𑒥𑓂𑒩𑒱𑒖 𑒏𑒰𑒪𑒼𑒢𑒲𑒧𑒹 𑒏𑒯𑒱𑒨𑒼 𑒏𑒏𑒩𑒼 𑒤𑒴𑒪 𑒅𑒐𑒰𑒛𑓃𑒱 𑒪𑒻𑒞 𑒕𑒪 𑒂 𑒏𑒯𑒱𑒨𑒼 𑒏𑒏𑒩𑒼 𑒐𑒱𑒛𑓃𑒏𑒲 𑒣𑒩 𑒑𑒱𑒙𑓂𑒙𑒲 𑒤𑒹𑓀𑒏𑒱 𑒠𑒻𑒞 𑒕𑒪, 𑒛𑒹𑒜𑓃 𑒮𑒰𑒪𑒏 𑒑𑓂𑒩𑒰𑒧 𑒣𑓂𑒩𑒫𑒰𑒮𑒏 𑒥𑒰𑒠 𑒬𑒰𑒢𑓂𑒞 𑒦𑒋 𑒑𑒹𑒪 𑒕𑒪𑒢𑓂𑒯𑒱 । 𑒢𑒢𑓂𑒠𑒏𑒹𑒿 𑒧𑒼𑒢 𑒕𑒢𑓂𑒯𑒱 𑒖𑒹 𑒏𑒰𑒪𑒼𑒢𑒲𑒧𑒹 𑒋𑒏 𑒥𑒹𑒩 𑒥𑒹𑒙𑒰𑒏𑒹𑒿 𑒪𑒋 𑒣𑒛𑓃𑒼𑒮𑒲𑒏 𑒍𑒯𑒱𑒚𑒰𑒧 𑒑𑒹𑒪 𑒕𑒪𑒰𑒯 𑒂 𑒣𑒛𑓃𑒼𑒮𑒲𑒏 𑒣𑒞𑓂𑒢𑒲𑒮𑒿 𑒥𑒹𑒙𑒰 𑒏𑓂𑒭𑒧𑒰 𑒨𑒰𑒔𑒢𑒰 𑒏𑒋𑒢𑒹 𑒕𑒪𑒐𑒱𑒢𑓂𑒯 । 𑒏𑒰𑒩𑒝 𑒏𑒰𑒩𑓂𑒨𑒰𑒪𑒨𑒮𑒿 𑒁𑒋𑒪𑒰 𑒅𑒞𑓂𑒞𑒩 𑒖𑓂𑒘𑒰𑒞 𑒦𑒹𑒪 𑒕𑒪𑒢𑓂𑒯𑒱 𑒖𑒹 𑒥𑒹𑒙𑒰 𑒯𑒳𑒢𑒏𑒰 𑒣𑒩 𑒑𑒱𑒙𑓂𑒙𑒲 𑒤𑒹𑒿𑒏𑒢𑒹 𑒕𑒪𑒐𑒱𑒢𑓂𑒯, 𑒖𑒐𑒢 𑒍 𑒥𑒹𑒔𑒰𑒩𑒲 𑒐𑒱𑒛𑓃𑒏𑒲 𑒪𑒑 𑒚𑒰𑒜𑓃𑒱 𑒥𑒰𑒯𑒩 𑒠𑒱𑒬𑒱 𑒏𑒱𑒕𑒳 𑒠𑒹𑒐𑒱 𑒩𑒯𑒪 𑒕𑒪𑒲𑒯 । 𑒂 𑒕𑒼𑒙 𑒥𑒹𑒙𑒰 𑒋𑒏 𑒥𑒹𑒩 𑒏𑒼𑒢𑒼 𑒣𑒻𑒒 𑒥𑒔𑓂𑒔𑒰𑒏𑒹𑒿 𑒣𑒰𑒟𑒩 𑒤𑒹𑓀𑒏𑒱 𑒏𑒋 𑒧𑒰𑒩𑒢𑒹 𑒕𑒪𑒐𑒱𑒢𑓂𑒯, 𑒖𑒐𑒢 𑒍 𑒥𑒔𑓂𑒔𑒰 𑒮𑒰𑒃𑒏𑒱𑒪 𑒣𑒩 𑒔𑒜𑓃𑒪 𑒕𑒪 । 𑒦𑒹𑒪 𑒄 𑒕𑒪 𑒖𑒹 𑒍 𑒣𑒻𑒒 𑒥𑒔𑓂𑒔𑒰 𑒏𑒰𑒪𑒼𑒢𑒲𑒏 𑒋𑒏 𑒔𑒏𑓂𑒏𑒩 𑒏𑒰𑒙𑒱 𑒏𑒋 𑒮𑒰𑒃𑒏𑒱𑒪 𑒪𑒾𑒙𑒹𑒥𑒰𑒏 𑒁𑒣𑒢 𑒫𑒔𑒢𑒏 𑒣𑒰𑒪𑒢 𑒢𑒯𑒱 𑒏𑒋𑒢𑒹 𑒕𑒪 𑒂 𑒒𑒳𑒩𑒪𑒰𑒏 𑒥𑒰𑒠 -𑒠𑒼𑒮𑒩 𑒔𑒏𑓂𑒏𑒩 𑒪𑒑𑒰 𑒏𑒋 𑒁𑒥𑒻𑒞 𑒕𑒲- 𑒄 𑒥𑒖𑒻𑒞-𑒥𑒖𑒻𑒞 𑒮𑒰𑒃𑒏𑒱𑒪 𑒪𑒋 𑒂𑒑𑒴 𑒥𑒜𑓃𑒱 𑒩𑒯𑒪 𑒕𑒪 । 𑒕𑒼𑒙𑒏𑒰 𑒥𑒹𑒙𑒰 𑒏𑓂𑒭𑒧𑒰 𑒨𑒰𑒔𑒢𑒰 𑒏𑒩𑒥𑒰𑒮𑒿 𑒮𑒹𑒯𑒼 𑒧𑒢𑒰 𑒏𑒋 𑒠𑒹𑒢𑒹 𑒕𑒪𑒐𑒱𑒢𑓂𑒯 𑒏𑒰𑒩𑒝 𑒍 𑒮𑒼𑒔𑒻𑒞 𑒕𑒪𑒰𑒯 𑒖𑒹 𑒯𑒳𑒢𑒏𑒩 𑒏𑒼𑒢𑒼 𑒑𑒪𑒞𑒲 𑒢𑒯𑒱 𑒕𑒪𑒢𑓂𑒯𑒱 । 𑒥𑒹𑒬 𑒞𑒐𑒢 𑒋𑒯𑒱 𑒥𑒹𑒩 𑒥𑒔𑓂𑒔𑒰 𑒮𑒦𑒏𑒹𑒿 𑒖𑒐𑒢 𑒢𑒢𑓂𑒠 𑒣𑒛𑓃𑒼𑒮𑒲 𑒮𑒦𑒮𑒿 𑒦𑒹𑒿𑒙 𑒏𑒩𑒥𑒰𑒥𑒋 𑒪𑒹𑒪 𑒑𑒹𑒪 𑒕𑒪𑒰𑒯 𑒞𑒰𑒫𑒞 𑒡𑒩𑒱 𑒥𑒛𑓃𑒏𑒰 𑒥𑒹𑒙𑒰 𑒞𑒿 𑒣𑒴𑒩𑓂𑒝𑒞𑒨𑒰 𑒁𑒣𑒢 𑒔𑒘𑓂𑒔𑒪 𑒮𑓂𑒫𑒦𑒰𑒫𑒏 𑒫𑒱𑒣𑒩𑒲𑒞 𑒮𑓂𑒫𑒦𑒰𑒫𑒏 𑒦𑒋 𑒑𑒹𑒪 𑒕𑒪𑒰𑒯 𑒧𑒳𑒠𑒰 𑒕𑒼𑒙 𑒥𑒹𑒙𑒰 𑒁𑒣𑒢 𑒮𑓂𑒫𑒦𑒰𑒫𑒣𑒩 𑒠𑒳𑒩𑒰𑒑𑓂𑒩𑒯 𑒏𑒩𑒻𑒞 𑒮𑓂𑒟𑒱𑒩 𑒕𑒪𑒰𑒯 । 𑒢𑒢𑓂𑒠𑒏 𑒠𑒳𑒢𑒴 𑒥𑒹𑒙𑒰 𑒫𑒩𑓂𑒑𑒧𑒹 𑒣𑓂𑒩𑒟𑒧 𑒁𑒥𑒻𑒞 𑒕𑒪𑒢𑓂𑒯𑒱 । 𑒏𑒱𑒕𑒳 𑒠𑒱𑒢 𑒡𑒩𑒱 𑒮𑒦𑒙𑒰 𑒚𑒲𑒏-𑒚𑒰𑒏 𑒔𑒪𑒻𑒞 𑒩𑒯𑒪 । 𑒣𑒳𑒩𑒢𑒏𑒰 𑒮𑒦𑒙𑒰 𑒔𑒱𑒢𑓂𑒞𑒰-𑒤𑒱𑒏𑒱𑒩 𑒪𑒑𑒻𑒞 𑒕𑒪 𑒖𑒹𑒢𑒰 𑒐𑒞𑒧 𑒦𑒋 𑒑𑒹𑒪 𑒯𑒼𑒁𑒋 । 𑒑𑒰𑒧𑒏 𑒋𑒏 𑒠𑒴 𑒑𑒼𑒙𑒹 𑒮𑒹𑒯𑒼 𑒣𑒙𑒢𑒰𑒧𑒹 𑒩𑒯𑒻𑒞 𑒕𑒪𑒰𑒯 । 𑒧𑒯𑒱𑒢𑒰𑒧𑒹 𑒋𑒏𑒙𑒰 𑒩𑒫𑒱 𑒢𑒱𑒬𑓂𑒔𑒱𑒞 𑒕𑒪, 𑒖𑒰𑒯𑒱 𑒠𑒱𑒢 𑒮𑒦 𑒑𑒼𑒙𑒹 𑒏𑒞𑒯𑒳 𑒒𑒳𑒧𑒋 𑒪𑒹𑒪 𑒖𑒰𑒃𑒞 𑒕𑒪𑒰𑒯 । 𑒋𑒏 𑒩𑒫𑒱 𑒏𑒼𑒢𑒼 𑒑𑒾𑒿𑒂𑒏 𑒁𑒯𑒱𑒚𑒰𑒧 𑒞𑒿 𑒏𑒼𑒢𑒼 𑒂𑒢 𑒥𑒹𑒩 𑒔𑒱𑒛𑓃𑒱𑒨𑒰𑒐𑒰𑒢𑒰𑒏 𑒨𑒰𑒞𑓂𑒩𑒰 । 𑒋𑒏 𑒥𑒹𑒩 𑒔𑒱𑒛𑓃𑒱𑒨𑒰𑒐𑒰𑒢𑒰 𑒑𑒹𑒪 𑒩𑒯𑒟𑒱 𑒮𑒦 𑒑𑒼𑒙𑒹 𑒞𑒿 𑒂𑒩𑒳𑒝𑒱 𑒢𑒢𑓂𑒠𑒏𑒹𑒿 𑒣𑒳𑒕𑒪𑒐𑒱𑒢𑓂𑒯-
“𑒯𑒧𑒩𑒰 𑒮𑒦 𑒂𑒋𑒪 𑒕𑒲 𑒔𑒱𑒛𑓃𑒱𑒨𑒰𑒐𑒰𑒢𑒰, 𑒥𑒰𑒯𑒩𑒧𑒹 𑒥𑒼𑒩𑓂𑒛 𑒪𑒰𑒑𑒪 𑒁𑒕𑒱 𑒥𑒼𑒙𑒹𑒢𑒱𑒏𑒪 𑒑𑒰𑒩𑓂𑒛𑒹𑒢𑒏 𑒂 𑒑𑒹𑒙𑒏 𑒆𑒣𑒩𑒧𑒹 𑒪𑒱𑒐𑒪 𑒁𑒕𑒱 𑒥𑒰𑒨𑒼𑒪𑒼𑒖𑒱𑒏𑒪 𑒑𑒰𑒩𑓂𑒛𑒹𑒢”।
“𑒣𑒯𑒱𑒢𑒹 𑒮𑒼𑒢𑒣𑒳𑒩𑒧𑒹𑒪𑒰 𑒮𑒦𑒧𑒹 𑒁𑒮𑓂𑒟𑒰𑒨𑒲 𑒔𑒱𑒛𑓃𑒻 𑒮𑒦𑒏 𑒣𑓂𑒩𑒠𑒩𑓂𑒬𑒢 𑒯𑒼𑒃𑒞 𑒕𑒪 𑒂 𑒪𑒼𑒏𑒏 𑒖𑒲𑒯 𑒣𑒩 𑒍𑒏𑒩𑒰 𑒪𑒹𑒪 𑒔𑒱𑒛𑓃𑒱𑒨𑒰𑒐𑒰𑒢𑒰 𑒬𑒥𑓂𑒠 𑒂𑒥𑒱 𑒑𑒹𑒪 । 𑒧𑒳𑒠𑒰 𑒋𑒞𑒋 𑒞𑒿 𑒏𑒞𑒰𑒏 𑒥𑒲𑒒𑒰𑒧𑒹 𑒫𑒵𑒏𑓂𑒭 𑒮𑒦 𑒪𑒰𑒑𑒪 𑒁𑒕𑒱, 𑒣𑓂𑒩𑒞𑓂𑒨𑒹𑒏 𑒫𑒵𑒏𑓂𑒭 𑒣𑒩 𑒍𑒏𑒩 𑒢𑒰𑒧 𑒂 𑒫𑒢𑒮𑓂𑒣𑒞𑒱𑒬𑒰𑒮𑓂𑒞𑓂𑒩𑒲𑒨 𑒫𑒱𑒫𑒩𑒝 𑒮𑒹𑒯𑒼 𑒪𑒱𑒐𑒪 𑒁𑒕𑒱 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒏𑒩 𑒢𑒰𑒧 𑒁𑓀𑒑𑓂𑒩𑒹𑒖𑒲𑒧𑒹 𑒫𑒢𑒮𑓂𑒣𑒞𑒱 𑒅𑒠𑓂𑒨𑒰𑒢𑒏 𑒪𑒹𑒪 𑒥𑒼𑒙𑒹𑒢𑒱𑒏𑒪 𑒑𑒰𑒩𑓂𑒛𑒢 𑒣𑒛𑓃𑒱 𑒑𑒹𑒪 । 𑒧𑒳𑒠𑒰 𑒥𑒰𑒠𑒧𑒹 𑒁𑒢𑒳𑒦𑒫 𑒏𑒋𑒪 𑒑𑒹𑒪 𑒖𑒹 𑒖𑒢𑓂𑒞𑒳 𑒂 𑒫𑒢𑒮𑓂𑒣𑒞𑒱𑒏 𑒩𑒴𑒣𑒧𑒹 𑒠𑒴 𑒞𑒩𑒯𑒏 𑒖𑒲𑒫𑒫𑒱𑒖𑓂𑒘𑒰𑒢 𑒁𑒕𑒱 । 𑒋𑒯𑒱 𑒅𑒠𑓂𑒨𑒰𑒢𑒧𑒹 𑒫𑒢𑒮𑓂𑒣𑒞𑒱, 𑒔𑒱𑒛𑓃𑒻 𑒂 𑒥𑒰𑒒-𑒮𑒱𑓀𑒯 𑒃𑒞𑓂𑒨𑒰𑒠𑒱 𑒮𑒹𑒯𑒼 𑒣𑓂𑒩𑒠𑒩𑓂𑒬𑒱𑒞 𑒁𑒕𑒱 । 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒏𑒩 𑒢𑒰𑒧 𑒥𑒰𑒨𑒼𑒪𑒼𑒖𑒱𑒏𑒪 𑒑𑒰𑒩𑓂𑒛𑒢 𑒫𑒰 𑒖𑒻𑒫𑒱𑒏 𑒅𑒠𑓂𑒨𑒰𑒢 𑒠𑒋 𑒠𑒹𑒪 𑒑𑒹𑒪 । 𑒣𑒳𑒩𑒢𑒏𑒰 𑒥𑒼𑒩𑓂𑒛 𑒖𑒞𑒋-𑒞𑒞𑒋 𑒩𑒯𑒱𑒨𑒹 𑒑𑒹𑒪”।
𑒋𑒏 𑒥𑒹𑒩 𑒮𑒦 𑒑𑒼𑒙𑒹 𑒑𑒹𑒪 𑒩𑒯𑒟𑒱 𑒋𑒏𑒙𑒰 𑒑𑒾𑒿𑒂𑒏 𑒁𑒯𑒱𑒚𑒰𑒧 । 𑒍𑒞𑒋 𑒔𑒩𑓂𑒔𑒰 𑒔𑒪𑒋 𑒪𑒰𑒑𑒪 𑒖𑒹 𑒑𑓀𑒑𑒰 𑒣𑒳𑒪 𑒏𑒹𑒩 𑒅𑒠𑓂𑒒𑒰𑒙𑒢 𑒠𑒴 𑒞𑒲𑒢 𑒮𑒰𑒪𑒮𑒿 𑒋𑒯𑒱 𑒮𑒰𑒪 𑒯𑒼𑒋𑒞- 𑒁𑒑𑒱𑒪𑒰 𑒮𑒰𑒪 𑒯𑒼𑒋𑒞 𑒋𑒯𑒱 𑒞𑒩𑒯𑒏 𑒔𑒩𑒔𑒰 𑒁𑒕𑒱 । 𑒢𑒢𑓂𑒠𑒮𑒿 𑒍 𑒪𑒼𑒏𑒢𑒱 𑒣𑒳𑒕𑒪𑒐𑒱𑒢𑓂𑒯-
“𑒁𑒯𑒰𑒿𑒏 𑒥𑒳𑒗𑒢𑒹 𑒏𑒯𑒱𑒨𑒰 𑒡𑒩𑒱 𑒋𑒯𑒱 𑒣𑒳𑒪𑒏 𑒅𑒠𑓂𑒒𑒰𑒙𑒢 𑒦𑒋 𑒖𑒋𑒞𑒻𑒏 । 𑒧𑒳𑒐𑓂𑒨𑒧𑒢𑓂𑒞𑓂𑒩𑒲 𑒞𑒿 𑒏𑒯𑒢𑒹 𑒕𑒟𑒱 𑒖𑒹 𑒋𑒯𑒱 𑒮𑒰𑒪 𑒋𑒏𑒩 𑒅𑒠𑓂𑒒𑒰𑒙𑒢 𑒦𑒋 𑒖𑒋𑒞𑒻𑒏”।
“𑒏𑒯𑒱𑒨𑒼 𑒢𑒯𑒱 𑒯𑒼𑒋𑒞𑒻𑒏 । 𑒠𑒴-𑒞𑒲𑒢 𑒮𑒰𑒪𑒮𑒿 𑒞𑒿 𑒮𑒳𑒢𑒱 𑒩𑒯𑒪 𑒕𑒱𑒨𑒻𑒏। 𑒨𑒰𑒫𑒞 𑒋𑒏𑒙𑒰 𑒣𑒰𑒨𑒰 𑒥𑒢𑒻𑒞 𑒕𑒻𑒏 𑒞𑒿 𑒍𑒯𑒱𑒧𑒹 𑒞𑒞𑒹𑒏 𑒢𑒹 𑒥𑒰𑒪𑒳 𑒠𑒹𑒢𑒹 𑒩𑒯𑒻𑒞 𑒕𑒻𑒏 𑒖𑒹 𑒏𑒱𑒕𑒳 𑒠𑒱𑒢𑒧𑒹 𑒠𑒩𑒰𑒩𑒱 𑒣𑒛𑓃𑒱 𑒖𑒰𑒃𑒞 𑒕𑒻𑒏 । 𑒤𑒹𑒩 𑒩𑒰𑒞𑒰-𑒩𑒰𑒞𑒲 𑒍𑒏𑒩𑒰 𑒞𑒼𑒛𑓃𑒱 𑒏𑒋 𑒤𑒹𑒩𑒮𑒿 𑒢𑒫 𑒣𑒰𑒨𑒰 𑒥𑒢𑒹𑒢𑒰𑒃 𑒬𑒳𑒩𑒴 𑒏𑒩𑒻𑒞 𑒖𑒰𑒃𑒞 𑒁𑒕𑒱”।
𑒑𑓀𑒑𑒰 𑒣𑒳𑒪𑒏 𑒔𑒩𑒔𑒰 𑒮𑒳𑒢𑒱 𑒢𑒢𑓂𑒠𑒏 𑒮𑒼𑒗𑒰𑒿 𑒣𑒰𑒨𑒰 𑒣𑒩𑒮𑒿 𑒑𑓀𑒑𑒰𑒖𑒲𑒧𑒹 𑒐𑒮𑒻𑒞 𑒖𑒼𑒢-𑒧𑒖𑒠𑒴𑒩 𑒮𑒦𑒏 𑒔𑒱𑒞𑓂𑒩 𑒢𑒰𑒔𑒱 𑒖𑒰𑒃𑒞 𑒕𑒪𑒢𑓂𑒯𑒱 । 𑒢𑒢𑓂𑒠𑒏 𑒫𑒱𑒫𑒰𑒠 𑒚𑒱𑒏𑒹𑒠𑒰𑒩 𑒂 𑒮𑓀𑒑𑒲 𑒁𑒦𑒱𑒨𑒢𑓂𑒞𑒰 𑒮𑒦𑒮𑒿 𑒏𑒰𑒖𑒏 𑒮𑓀𑒥𑓀𑒡𑒧𑒹 𑒯𑒼𑒃𑒞 𑒩𑒯𑒻𑒞 𑒕𑒪𑒢𑓂𑒯𑒱 । 𑒋𑒏𑒙𑒰 𑒣𑒰𑒨𑒰𑒏 𑒏𑒰𑒩𑓂𑒨𑒏 𑒮𑓀𑒥𑓀𑒡𑒧𑒹 𑒢𑒢𑓂𑒠 𑒁𑒣𑒢 𑒫𑒱𑒩𑒼𑒡 𑒣𑓂𑒩𑒏𑒙 𑒏𑒋𑒢𑒹 𑒕𑒪𑒰𑒯, 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍 𑒣𑒰𑒨𑒰 𑒤𑒰𑒙𑒱 𑒑𑒹𑒪, 𑒋𑒏𑒙𑒰 𑒣𑒻𑒒 𑒠𑒩𑒰𑒩𑒱 𑒣𑒛𑓃𑒱 𑒑𑒹𑒪 𑒕𑒪 𑒥𑒲𑒔𑒼-𑒥𑒲𑒔 । 𑒩𑒰𑒞𑒰-𑒩𑒰𑒞𑒲 𑒚𑒱𑒏𑒹𑒠𑒰𑒩-𑒁𑒦𑒱𑒨𑒢𑓂𑒞𑒰 𑒪𑒼𑒏𑒢𑒱 𑒍𑒏𑒩𑒰 𑒞𑒼𑒛𑓃𑒥𑒹𑒪𑒢𑓂𑒯𑒱 । 𑒩𑒰𑒞𑒱 𑒦𑒩𑒱𑒧𑒹 𑒏𑒞𑒯𑒳𑒮𑒿 𑒍𑒞𑒹𑒏 𑒫𑒱𑒬𑒰𑒪 𑒣𑒰𑒨𑒰 𑒏𑒼𑒢𑒰 𑒙𑒴𑒙𑒱 𑒮𑒏𑒻𑒞 𑒕𑒪, 𑒏𑒻𑒏 𑒠𑒱𑒢 𑒪𑒑𑒻𑒞? 𑒮𑒹 𑒁𑒑𑒱𑒪𑒰 𑒠𑒱𑒢 𑒠𑒩𑒰𑒩𑒱𑒏 𑒮𑓂𑒟𑒰𑒢 𑒣𑒩 𑒞𑒱𑒩𑒣𑒰𑒪 𑒥𑒱𑒕𑒰𑒍𑒪 𑒑𑒹𑒪, 𑒖𑒹 𑒏𑒏𑒩𑒼 𑒢𑒖𑒩𑒱 𑒢𑒯𑒱 𑒣𑒛𑓃𑒱 𑒖𑒰𑒃 । 𑒋𑒯𑒱 𑒒𑒙𑒢𑒰𑒏 𑒔𑒩𑒔𑒰 𑒥𑒯𑒳𑒞 𑒠𑒱𑒢 𑒡𑒩𑒱 𑒯𑒼𑒃𑒞 𑒩𑒯𑒪 । 𑒢𑒢𑓂𑒠𑒏 𑒂𑒠𑒩 𑒁𑒣𑒢 𑒢𑒲𑒔𑒰𑒿𑒏 𑒏𑒩𑓂𑒧𑒔𑒰𑒩𑒲𑒏 𑒥𑒲𑒔 𑒋𑒯𑒱 𑒒𑒙𑒢𑒰𑒮𑒿 𑒥𑒜𑓃𑒱 𑒑𑒹𑒪 𑒕𑒪𑒢𑓂𑒯𑒱 𑒧𑒳𑒠𑒰 𑒂𑒥 𑒚𑒱𑒏𑒹𑒠𑒰𑒩 𑒂 𑒁𑒦𑒱𑒨𑒢𑓂𑒞𑒰 𑒪𑒼𑒏𑒢𑒱𑒏 𑒥𑒲𑒔 𑒢𑒢𑓂𑒠 𑒩𑒰𑒫𑒝 𑒥𑒢𑒱 𑒑𑒹𑒪 𑒕𑒪𑒰𑒯 । 𑒮𑒦 𑒙𑒰 𑒏𑒰𑒖 𑒚𑒲𑒏-𑒚𑒰𑒏 𑒔𑒪𑒱 𑒩𑒯𑒪 𑒕𑒪 । 𑒢𑒢𑓂𑒠𑒏 𑒥𑒔𑓂𑒔𑒰 𑒮𑒦 𑒑𑒝𑒱𑒞 𑒂 𑒫𑒱𑒖𑓂𑒘𑒰𑒢𑒏 𑒁𑓀𑒏𑒑𑒝𑒱𑒞𑒲𑒨 𑒣𑓂𑒩𑒬𑓂𑒢 𑒮𑒦 𑒖𑒢𑒥𑒩𑒲𑒮𑒿 𑒧𑒰𑒩𑓂𑒔 𑒡𑒩𑒱 𑒥𑒢𑒰 𑒪𑒻𑒞 𑒕𑒪𑒢𑓂𑒯𑒱 । 𑒧𑒳𑒠𑒰 𑒒𑒩𑒏 𑒮𑒦 𑒏𑒰𑒖 𑒏𑒱𑒋𑒏 𑒞𑒿 𑒢𑒢𑓂𑒠 𑒮𑓂𑒫𑒨𑓀 𑒏𑒋 𑒪𑒻𑒞 𑒕𑒪𑒰𑒯, 𑒢𑒢𑓂𑒠𑒏 𑒥𑒔𑓂𑒔𑒰 𑒮𑒦 𑒮𑓂𑒏𑒴𑒪 𑒑𑒹𑒢𑒰𑒃 𑒂 𑒒𑒩 𑒁𑒋𑒢𑒰𑒃𑒏 𑒁𑒞𑒱𑒩𑒱𑒏𑓂𑒞𑓂𑒞 𑒥𑒰𑒯𑒩𑒲 𑒠𑒳𑒢𑒱𑒨𑒰𑒮𑒿 𑒁𑒢𑒦𑒱𑒖𑓂𑒘 𑒕𑒪𑒰𑒯 । 𑒏𑒞𑒍 𑒒𑒳𑒧𑒋 𑒖𑒰𑒟𑒱 𑒞𑒿 𑒢𑒢𑓂𑒠𑒏 𑒮𑓀𑒑𑒹, 𑒋𑒏 𑒞𑒩𑒯𑒹𑒿 𑒥𑒳𑒗𑒴 𑒖𑒹 𑒢𑒢𑓂𑒠𑒏 𑒥𑒔𑓂𑒔𑒰 𑒮𑒦𑒏 𑒫𑓂𑒨𑒏𑓂𑒞𑓂𑒞𑒱𑒞𑓂𑒫 𑒋𑒏𑒙𑒰 𑒁𑒪𑒑𑒹 𑒩𑒲𑒞𑒱𑒮𑒿 𑒢𑒱𑒩𑓂𑒧𑒱𑒞 𑒦𑒋 𑒩𑒯𑒪 𑒕𑒪𑒢𑓂𑒯𑒱 । 𑒢𑒢𑓂𑒠 𑒮𑒰𑒧𑒰𑒢𑓂𑒨 𑒖𑒲𑒫𑒢 𑒫𑓂𑒨𑒞𑒲𑒞 𑒏𑒋 𑒩𑒯𑒪 𑒕𑒪𑒰𑒯 𑒧𑒳𑒠𑒰 𑒑𑓀𑒑𑒰 𑒣𑒳𑒪𑒏 𑒏𑒼𑒢𑒼 𑒔𑒩𑒔𑒰 𑒯𑒳𑒢𑒏𑒩 𑒁𑒢𑓂𑒞𑒩𑒧𑒢𑒧𑒹 𑒯𑒳𑒪𑒱𑒧𑒰𑒪𑒱 𑒬𑒳𑒩𑒴 𑒏𑒋 𑒠𑒻𑒞 𑒕𑒪𑒢𑓂𑒯𑒱 । 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒬𑒢𑒻𑓁-𑒬𑒢𑒻𑓁 𑒑𑒾𑒿𑒂-𑒒𑒩𑒳𑒂𑒏 𑒂 𑒠𑒼𑒮𑓂𑒞-𑒧𑒯𑒲𑒧 𑒪𑒑 𑒖𑒋𑒥𑒰𑒏 𑒏𑓂𑒩𑒧 𑒏𑒧 𑒯𑒼𑒧𑒋 𑒪𑒰𑒑𑒪 । 𑒤𑒹𑒩 𑒢𑒘𑒱 𑒞𑒿 𑒏𑒼𑒢𑒼 𑒠𑒼𑒮𑓂𑒞-𑒧𑒯𑒲𑒧, 𑒢𑒘𑒱 𑒞𑒿 𑒏𑒼𑒢𑒼 𑒠𑒼𑒮𑓂𑒞𑒏 𑒒𑒩 𑒁𑒋𑒢𑒰𑒃-𑒑𑒹𑒢𑒰𑒃 ।
𑒍𑒯𑒱 𑒮𑒧𑒨𑒧𑒹 𑒧𑒲𑒛𑒱𑒁𑒧 𑒫𑒹𑒦𑒏 𑒋𑒏𑒙𑒰 𑒖𑒰𑒣𑒰𑒢𑒲 𑒙𑓂𑒩𑒰𑓀𑒖𑒱𑒮𑓂𑒙𑒩 𑒢𑒢𑓂𑒠𑒏 𑒒𑒩𑒧𑒹 𑒕𑒪𑒢𑓂𑒯𑒱, 𑒫𑒻𑒯 𑒧𑒢𑒼𑒩𑓀𑒖𑒢𑒏 𑒋𑒏𑒧𑒰𑒞𑓂𑒩 𑒮𑒰𑒡𑒢 𑒕𑒪 । 𑒯𑒳𑒢𑒏𑒩 𑒥𑒔𑓂𑒔𑒰 𑒮𑒦 𑒋𑒏𑒩𑒰 𑒩𑒹𑒛𑒱𑒨𑒼 𑒏𑒯𑒻𑒞 𑒖𑒰𑒃 𑒕𑒪𑒰𑒯, 𑒂 𑒢𑒢𑓂𑒠 𑒥𑒳𑒗𑒥𑒻𑒞 𑒕𑒪𑒐𑒱𑒢𑓂𑒯 𑒖𑒹 𑒩𑒹𑒛𑒱𑒨𑒼 𑒥𑒛𑓂𑒛 𑒣𑒻𑒒 𑒯𑒼𑒃𑒞 𑒁𑒕𑒱, 𑒙𑓂𑒩𑒰𑓀𑒖𑒱𑒮𑓂𑒙𑒩 𑒂𑒏𑒰𑒩𑒧𑒹 𑒕𑒼𑒙 𑒯𑒼𑒃𑒞 𑒁𑒕𑒱 । 𑒢𑒢𑓂𑒠 𑒖𑒐𑒢 𑒢𑒼𑒏𑒩𑒲 𑒬𑒳𑒩𑒴 𑒏𑒋𑒢𑒹 𑒩𑒯𑒟𑒱 𑒞𑒿 𑒥𑒳𑒬 𑒏𑒧𑓂𑒣𑒢𑒲𑒏 𑒋𑒏𑒙𑒰 𑒩𑒹𑒛𑒱𑒨𑒼 𑒑𑒰𑒧 𑒪𑒋 𑒑𑒹𑒪 𑒕𑒪𑒰𑒯 । 𑒮𑒾𑒿𑒮𑒹 𑒙𑒼𑒪𑒥𑒻𑒨𑓂𑒨𑒰𑒏 𑒦𑒲𑒛𑓃 𑒖𑒳𑒧𑒱 𑒑𑒹𑒪 𑒕𑒪 𑒩𑒹𑒛𑒱𑒨𑒼 𑒮𑒳𑒢𑒥𑒰𑒏 𑒪𑒹𑒪 । 𑒧𑒳𑒠𑒰 𑒄 𑒖𑒰𑒣𑒰𑒢𑒲 𑒧𑒲𑒛𑒱𑒁𑒧 𑒫𑒹𑒦 𑒩𑒹𑒛𑒱𑒨𑒼 𑒧𑒗𑒼𑒪𑒰 𑒂𑒏𑒰𑒩𑒏 𑒥𑒻𑒙𑒩𑒲𑒮𑒿 𑒔𑒪𑒻𑒞 𑒕𑒪 𑒂 𑒐𑒴𑒥 𑒥𑒻𑒙𑒩𑒲 𑒐𑒰𑒃𑒞 𑒕𑒪, 𑒧𑒰𑒢𑒹 𑒄 𑒙𑓂𑒩𑒰𑓀𑒖𑒱𑒮𑓂𑒙𑒩 । 𑒥𑒻𑒙𑒩𑒲 𑒣𑓂𑒩𑒰𑒨𑒬𑓁 𑒧𑒯𑒱𑒢𑒰𑒏 𑒠𑒮 𑒞𑒱𑒟𑒱 𑒡𑒩𑒱 𑒔𑒪𑒻𑒞 𑒕𑒪 । 𑒥𑒻𑒙𑒩𑒲 𑒋𑒏 𑒧𑒯𑒱𑒢𑒰𑒧𑒹 𑒋𑒏 𑒥𑒹𑒩 𑒁𑒥𑒻𑒞 𑒕𑒪, 𑒧𑒯𑒱𑒢𑒥𑒰𑒩𑒲 𑒏𑒱𑒩𑒰𑒢𑒰𑒏 𑒫𑒮𑓂𑒞𑒳𑒖𑒰𑒞𑒏 𑒮𑓀𑒑 । 𑒮𑒹 𑒢𑒢𑓂𑒠𑒏 𑒥𑒔𑓂𑒔𑒰 𑒪𑒼𑒏𑒢𑒱𑒏 𑒧𑒢𑒼𑒩𑓀𑒖𑒢𑒏 𑒍 𑒮𑒰𑒡𑒢 𑒧𑒯𑒱𑒢𑒰𑒧𑒹 𑒥𑒲𑒮 𑒠𑒱𑒢 𑒏𑒰𑒖 𑒢𑒯𑒱 𑒏𑒩𑒻𑒞 𑒕𑒪 । 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒥𑒔𑓂𑒔𑒰 𑒮𑒦 𑒣𑒪𑓀𑒑𑒏 𑒠𑒳𑒢𑒴 𑒏𑒰𑒞 𑒠𑒴 𑒙𑒰 𑒑𑒼𑒪 𑒣𑒼𑒮𑓂𑒙 𑒥𑒢𑒥𑒻𑒞 𑒕𑒪𑒰𑒯। 𑒄 𑒑𑒼𑒪 𑒣𑒼𑒮𑓂𑒙 𑒣𑓂𑒪𑒰𑒮𑓂𑒙𑒱𑒏𑒏 𑒋𑒏-𑒠𑒼𑒮𑒩𑒰𑒧𑒹 𑒖𑒳𑒛𑓃𑒨 𑒥𑒪𑒰 𑒐𑒹𑒪 𑒮𑒰𑒧𑒑𑓂𑒩𑒲𑒮𑒿 𑒥𑒢𑒻𑒞 𑒕𑒪, 𑒄 𑒐𑒹𑒪 𑒮𑒰𑒧𑒑𑓂𑒩𑒲 𑒣𑒞𑒰 𑒢𑒯𑒱 𑒏𑒞𑒹𑒏 𑒠𑒱𑒢𑒮𑒿 𑒒𑒩𑒧𑒹 𑒣𑒛𑓃𑒪 𑒕𑒪, 𑒣𑓂𑒩𑒰𑒨𑓁 𑒑𑓀𑒑𑒰 𑒥𑓂𑒩𑒱𑒖 𑒏𑒰𑒪𑒼𑒢𑒲𑒧𑒹 𑒏𑒼𑒢𑒼 𑒮𑓀𑒑𑒲 𑒠𑒹𑒢𑒹 𑒕𑒪𑒐𑒱𑒢𑓂𑒯 । 𑒢𑒢𑓂𑒠𑒏 𑒠𑒳𑒢𑒴 𑒥𑒹𑒙𑒰 𑒠𑒳𑒢𑒴 𑒠𑒱𑒬𑒱 𑒏𑒏𑒥𑒰𑒏 𑒮𑓂𑒙𑒱𑒏𑒮𑒿 𑒐𑒹𑒪𑒰𑒃𑒞 𑒕𑒪𑒰𑒯। 𑒋 𑒥𑒲 𑒮𑒲 𑒛𑒲 𑒏 𑒏𑒔𑒏𑒰𑒩𑒰𑒏 𑒐𑒹𑒪-𑒮𑒰𑒧𑒑𑓂𑒩𑒲 𑒥𑒰𑒪 𑒥𑒢𑒻𑒞 𑒕𑒪 । 𑒐𑒹𑒪𑒏 𑒢𑒱𑒁𑒧 𑒮𑒹𑒯𑒼 𑒦𑒱𑒢𑓂𑒢 𑒕𑒪। 𑒧𑒰𑒞𑓂𑒩 𑒋𑒏 𑒬𑒰𑒙𑒧𑒹 𑒋𑒏 𑒑𑒼𑒪 𑒣𑒼𑒮𑓂𑒙𑒮𑒿 𑒠𑒼𑒮𑒩 𑒑𑒼𑒪 𑒣𑒼𑒮𑓂𑒙𑒧𑒹 𑒑𑒼𑒪 𑒏𑒩𑒋 𑒣𑒛𑓃𑒻𑒞 𑒕𑒪 । 𑒋𑒯𑒱 𑒞𑒩𑒯𑒏 𑒏𑒻𑒏𑒙𑒰 𑒢𑒴𑒞𑒢 𑒏𑓂𑒩𑒲𑒛𑓃𑒰𑒏 𑒖𑒢𑒏 𑒕𑒪𑒰𑒯 𑒢𑒢𑓂𑒠𑒏 𑒠𑒳𑒢𑒴 𑒣𑒳𑒞𑓂𑒩। 𑒋𑒯𑒱 𑒞𑒩𑒯𑒹𑒿 𑒮𑒧𑒨 𑒥𑒱𑒞𑒻𑒞 𑒑𑒹𑒪 । 𑒥𑒰𑒯𑒩 𑒋𑒢𑒰𑒃-𑒑𑒹𑒢𑒰𑒃 𑒏𑒱𑒕𑒳 𑒏𑒧 𑒦𑒻𑒨𑒹 𑒑𑒹𑒪 𑒕𑒪 । 𑒞𑒏𑒩 𑒥𑒰𑒠 𑒠𑒴𑒙𑒰 𑒒𑒙𑒢𑒰 𑒦𑒹𑒪 । 𑒋𑒏 𑒞𑒿 𑒕𑒪 𑒑𑒓𑓂𑒑𑒰 𑒣𑒳𑒪𑒏 𑒅𑒠𑓂𑒒𑒰𑒙𑒢 । 𑒂 𑒠𑒼𑒮𑒩 𑒕𑒧𑒰𑒯𑒲 𑒣𑒩𑒲𑒏𑓂𑒭𑒰𑒧𑒹 𑒢𑒢𑓂𑒠𑒏 𑒠𑒳𑒢𑒴 𑒥𑒹𑒙𑒰 𑒣𑒯𑒱𑒪 𑒥𑒹𑒩 𑒣𑓂𑒩𑒟𑒧 𑒮𑓂𑒟𑒰𑒢 𑒣𑓂𑒩𑒰𑒣𑓂𑒞 𑒢𑒘𑒱 𑒏𑒋 𑒮𑒏𑒪 𑒕𑒪𑒰𑒯 । 𑒋𑒏𑒩 𑒥𑒰𑒠 𑒢𑒢𑓂𑒠 𑒁𑒮𑒯𑒖 𑒯𑒼𑒧𑒋 𑒪𑒑𑒪𑒰𑒯 । 𑒍𑒢𑒰 𑒋𑒯𑒱 𑒠𑒳𑒢𑒴 𑒒𑒙𑒢𑒰𑒧𑒹 𑒏𑒼𑒢𑒼 𑒂𑒣𑒮𑒲 𑒮𑒧𑓂𑒥𑒢𑓂𑒡 𑒢𑒯𑒱 𑒕𑒪 𑒧𑒳𑒠𑒰 𑒢𑒢𑓂𑒠𑒏 𑒁𑒢𑓂𑒞𑒩𑓂𑒧𑒢𑒏 𑒖𑒹 𑒯𑒳𑒪𑒱𑒧𑒰𑒪𑒱 𑒕𑒪𑒢𑓂𑒯𑒱 𑒮𑒹 𑒥𑒜𑓃𑒋 𑒪𑒑𑒪𑒢𑓂𑒯𑒱 । 𑒂𑒥 𑒍 𑒏𑒱𑒋𑒏 𑒞𑒿 𑒮𑒩𑒏𑒰𑒩𑒲 𑒞𑒢𑓂𑒞𑓂𑒩𑒮𑒿 𑒢𑓂𑒨𑒰𑒨 𑒢𑒘𑒱 𑒣𑒰𑒥𑒱 𑒮𑒏𑒪 𑒕𑒪𑒰𑒯 𑒂 𑒣𑒳𑒞𑓂𑒩 𑒪𑒼𑒏𑒢𑒱 𑒮𑒹𑒯𑒼 𑒣𑒜𑓃𑒰𑒃𑒧𑒹 𑒣𑒱𑒕𑒛𑓃𑒱 𑒑𑒹𑒪 𑒕𑒪𑒢𑓂𑒯𑒱, 𑒮𑒹 𑒁𑒠𑒵𑒬𑓂𑒨 𑒬𑒏𑓂𑒞𑒱𑒏 𑒣𑓂𑒩𑒞𑒱 𑒯𑒳𑒢𑒏 𑒂𑒮𑒏𑓂𑒞𑒱 𑒤𑒹𑒩𑒮𑒿 𑒥𑒜𑓃𑒋 𑒪𑒑𑒪𑒢𑓂𑒯𑒱 । 𑒮𑒦 𑒣𑒩𑒱𑒝𑒰𑒧𑒏 𑒏𑒰𑒩𑒝 𑒯𑒼𑒃𑒞 𑒕𑒻𑒏 𑒂 𑒏𑒰𑒩𑒝𑒏 𑒢𑒱𑒠𑒰𑒢 𑒖𑒐𑒢 𑒠𑒵𑒬𑓂𑒨 𑒞𑒢𑓂𑒞𑓂𑒩 𑒠𑓂𑒫𑒰𑒩𑒰 𑒢𑒘𑒱 𑒯𑒼𑒃𑒞 𑒁𑒕𑒱, 𑒞𑒐𑒢 𑒁𑒠𑒵𑒬𑓂𑒨𑒏 𑒣𑓂𑒩𑒞𑒱 𑒪𑒼𑒏𑒏 𑒂𑒏𑒩𑓂𑒭𑒝 𑒥𑒜𑓃𑒱 𑒖𑒰𑒃𑒞 𑒁𑒕𑒱 । 𑒂 𑒢𑒢𑓂𑒠 𑒞𑒿 𑒁𑒠𑒵𑒬𑓂𑒨𑒏 𑒣𑓂𑒩𑒞𑒱 𑒣𑒯𑒱𑒢𑒯𑒱𑒮𑒿, 𑒥𑒰𑒪𑓂𑒨𑒏𑒰𑒪𑒹𑒮𑒿 𑒂𑒏𑒩𑓂𑒭𑒱𑒞 𑒕𑒪𑒰𑒯 ।
“𑒢𑒢𑓂𑒠 𑒕𑒟𑒱”?
𑒋𑒏 𑒑𑒼𑒙 𑒁𑒡𑒫𑒨𑒮𑒴, 𑒧𑒳𑒿𑒯𑒏 𑒠𑒰𑒿𑒞 𑒣𑒰𑒢 𑒢𑒱𑒩𑒢𑓂𑒞𑒩 𑒐𑒋𑒪𑒰𑒮𑒿 𑒏𑒰𑒩𑒲 𑒩𑓀𑒑𑒏 𑒦𑒹𑒪, 𑒣𑒰𑒞𑒩 𑒠𑒳𑒥𑒩 𑒣𑒱𑒝𑓂𑒛𑒬𑓂𑒨𑒰𑒧 𑒩𑓀𑒑𑒏, 𑒢𑒢𑓂𑒠𑒏 𑒒𑒩𑒏 𑒑𑓂𑒩𑒲𑒪 𑒐𑒙𑒐𑒙𑒰 𑒏𑒋 𑒣𑒳𑒕𑒪𑒢𑓂𑒯𑒱 ।
“𑒢𑒯𑒱 । 𑒂𑒤𑒱𑒮𑒮𑒿 𑒢𑒯𑒱 𑒂𑒋𑒪 𑒕𑒟𑒱 𑒧𑒳𑒠𑒰 𑒂𑒥𑒻𑒨𑒹 𑒥𑒪𑒰 𑒕𑒟𑒱 । 𑒦𑒲𑒞𑒩 𑒂𑒅, 𑒥𑒻𑒮𑒴”- 𑒢𑒢𑓂𑒠𑒏 𑒥𑒰𑒪𑒏 𑒏𑒯𑒪𑒐𑒱𑒢𑓂𑒯 ।
“𑒯𑒧 𑒂𑒥𑒱 𑒩𑒯𑒪 𑒕𑒲 𑒏𑒢𑒹𑒏 𑒏𑒰𑒪𑒏 𑒥𑒰𑒠”।
𑒏𑒱𑒕𑒳 𑒏𑒰𑒪𑒏 𑒥𑒰𑒠 𑒢𑒢𑓂𑒠 𑒮𑒳𑒩𑒮𑒳𑒩𑒰𑒨𑒪 𑒁𑒣𑒢 𑒡𑒳𑒢𑒧𑒹, 𑒖𑒹𑒢𑒰 𑒍 𑒁𑒥𑒻𑒞 𑒕𑒪𑒰𑒯, 𑒥𑒱𑒢𑒰 𑒫𑒰𑒧-𑒠𑒯𑒱𑒢 𑒠𑒹𑒐𑒢𑒹, 𑒒𑒩 𑒣𑒯𑒳𑒿𑒔𑒪𑒰𑒯 । 𑒣𑒰𑒕𑒰𑒿 𑒪𑒰𑒑𑒪 𑒍𑒯𑒼 𑒧𑒯𑒰𑒬𑒨 𑒒𑒩 𑒣𑒯𑒳𑒿𑒔𑒪𑒰𑒯। 𑒢𑒢𑓂𑒠 𑒯𑒳𑒢𑒏𑒰 𑒠𑒹𑒐𑒱 𑒥𑒰𑒖𑒱 𑒅𑒚𑒪𑒰𑒯-
“𑒬𑒼𑒦𑒰 𑒥𑒰𑒥𑒴। 𑒏𑒞𑒹𑒏 𑒠𑒱𑒢𑒳𑒏𑒰 𑒥𑒰𑒠”।
“𑒔𑒱𑒢𑓂𑒯𑒱 𑒑𑒹𑒪𑒯𑒳𑒿”- 𑒬𑒼𑒦𑒰 𑒥𑒰𑒥𑒴 𑒥𑒖𑒪𑒰𑒯 ।
𑒂 𑒋𑒏𑒩 𑒅𑒞𑓂𑒞𑒩𑒧𑒹 𑒢𑒢𑓂𑒠 𑒥𑒻𑒮𑒱 𑒑𑒹𑒪𑒰𑒯 𑒂 𑒯𑒳𑒢𑒏𑒩 𑒂𑒿𑒐𑒱𑒮𑒿 𑒠𑒯𑒼-𑒥𑒯𑒼 𑒢𑒼𑒩 𑒔𑒳𑒥𑒋 𑒪𑒑𑒪𑒢𑓂𑒯𑒱 ।
“𑒋𑒯 𑒥𑒞𑒰𑒯, 𑒁𑒐𑒢𑒼 𑒡𑒩𑒱 𑒥𑒞𑒯𑒣𑒢𑒲 𑒑𑒹𑒪 𑒢𑒘𑒱 𑒁𑒕𑒱”। 𑒬𑒼𑒦𑒰𑒥𑒰𑒥𑒴𑒏 𑒁𑒢𑓂𑒞𑒩𑓂𑒧𑒢 𑒋𑒯𑒱 𑒞𑒩𑒯𑒏 𑒂𑒠𑒩 𑒣𑒰𑒥𑒱 𑒑𑒠𑒑𑒠 𑒦𑒋 𑒩𑒯𑒪 𑒕𑒪।
𑒬𑒼𑒦𑒰𑒥𑒰𑒥𑒴 𑒕𑒪𑒰𑒯 𑒏𑒕𑒥𑒲 𑒑𑒰𑒧𑒏 । 𑒢𑒢𑓂𑒠𑒏 𑒮𑒦𑒮𑒿 𑒣𑒻𑒒 𑒥𑒯𑒱𑒢𑒏 𑒠𑒱𑒁𑒩 । 𑒥𑒯𑒱𑒢 𑒥𑒹𑒔𑒰𑒩𑒲 𑒞𑒿 𑒧𑒩𑒱𑒋 𑒑𑒹𑒪 𑒕𑒪𑒲𑒯, 𑒦𑒑𑒱𑒢𑒲 𑒧𑒰𑒧𑒰𑒑𑒰𑒧𑒧𑒹 - 𑒢𑒢𑓂𑒠𑒏 𑒑𑒰𑒧 𑒧𑒹𑒯𑒟𑒧𑒹- 𑒣𑒹𑒙 𑒠𑒳𑒐𑒋𑒪𑒰𑒮𑒿 𑒁𑒏𑒮𑓂𑒧𑒰𑒞𑒹 𑒏𑒰𑒪-𑒏𑒫𑒪𑒱𑒞 𑒦𑒋 𑒑𑒹𑒪 𑒕𑒪𑒲𑒯 । 𑒢𑒢𑓂𑒠𑒏 𑒥𑒯𑒱𑒢𑒾𑒅 𑒥𑒜𑓃𑒱𑒨𑒰 𑒔𑒰𑒮-𑒥𑒰𑒮 𑒥𑒪𑒰 𑒒𑒼𑒛𑓃𑒰𑒣𑒩 𑒔𑒜𑓃𑒱 𑒪𑒑𑒰𑒢 𑒫𑒮𑒴𑒪𑒲 𑒪𑒋 𑒢𑒱𑒏𑒪𑒻𑒞 𑒕𑒪𑒰𑒯 । 𑒧𑒳𑒠𑒰 𑒦𑒑𑒱𑒢𑒲𑒏 𑒧𑒳𑒃𑒪𑒰𑒏 𑒥𑒰𑒠 𑒥𑒯𑒱𑒢𑒾𑒅𑒮𑒿 𑒮𑒧𑓂𑒥𑒢𑓂𑒡 𑒏𑒧 𑒯𑒼𑒃𑒞 𑒑𑒹𑒪 𑒕𑒪𑒢𑓂𑒯𑒱 । 𑒏𑒼𑒢𑒼 𑒖𑒰𑒢𑒱 𑒥𑒳𑒗𑒱 𑒏𑒋 𑒢𑒯𑒱 𑒫𑒩𑒢𑓂 𑒁𑒢𑒰𑒨𑒰𑒮𑒯𑒱 । 𑒂 𑒂𑒃 𑒣𑒔𑒲𑒮 𑒮𑒰𑒪𑒏 𑒥𑒰𑒠 𑒬𑒼𑒦𑒰𑒥𑒰𑒥𑒴𑒮𑒿 𑒣𑒙𑒢𑒰𑒧𑒹 𑒦𑒹𑒿𑒙 𑒦𑒹𑒪 𑒕𑒪𑒢𑓂𑒯𑒱 ।
“𑒍𑒗𑒰𑒖𑒲 𑒏𑒼𑒢𑒰 𑒕𑒟𑒱। 𑒯𑒧𑒩𑒰𑒮𑒦 𑒥𑒯𑒳𑒞 𑒏𑒯𑒪𑒱𑒁𑒢𑓂𑒯𑒱 𑒖𑒹 𑒠𑒼𑒮𑒩 𑒫𑒱𑒫𑒰𑒯 𑒏𑒋 𑒪𑒱𑒁 𑒧𑒳𑒠𑒰 𑒢𑒯𑒱 𑒧𑒰𑒢𑒪𑒢𑓂𑒯𑒱”।
“𑒂𑒥 𑒍 𑒣𑒳𑒩𑒰𑒢 𑒔𑒰𑒮-𑒥𑒰𑒮 𑒐𑒞𑒧 𑒦𑒋 𑒑𑒹𑒪 । 𑒖𑒧𑒲𑒢𑓂𑒠𑒰𑒩𑒲 𑒐𑒞𑒧 𑒂 𑒔𑒰𑒮-𑒥𑒰𑒮 𑒮𑒹𑒯𑒼 । 𑒧𑒳𑒠𑒰 𑒐𑒩𑒔𑒰 𑒫𑒻𑒯 𑒣𑒳𑒩𑒢𑒏𑒹 । 𑒮𑒹 𑒐𑒹𑒞 𑒥𑒹𑒔𑒱-𑒥𑒹𑒔𑒱 𑒏𑒞𑒹𑒏 𑒠𑒱𑒢 𑒏𑒰𑒖 𑒔𑒪𑒱𑒞𑒋। 𑒮𑒦 𑒥𑒰𑒯𑒩 𑒠𑒱𑒮 𑒦𑒰𑒑𑒋 𑒪𑒰𑒑𑒪 । 𑒧𑒳𑒠𑒰 𑒯𑒧 𑒏𑒯𑒪𑒱𑒁𑒢𑓂𑒯𑒱 𑒖𑒹 𑒁𑒯𑒰𑒿 𑒯𑒧𑒩𑒰 𑒮𑒦𑒮𑒿 𑒥𑒯𑒳𑒞 𑒣𑒻𑒒 𑒕𑒲, 𑒥𑒯𑒳𑒞 𑒮𑒳𑒐 𑒠𑒹𑒐𑒢𑒹 𑒕𑒲, 𑒮𑒹 𑒁𑒯𑒰𑒿 𑒥𑒰𑒯𑒩 𑒖𑒰𑒋 𑒏𑒼𑒢𑒼 𑒕𑒼𑒙 𑒏𑒰𑒖 𑒏𑒩𑒥 𑒮𑒹 𑒯𑒧𑒩𑒰 𑒮𑒦𑒏𑒹𑒿 𑒢𑒲𑒏 𑒢𑒯𑒱 𑒪𑒰𑒑𑒞”।
𑒬𑒼𑒦𑒰 𑒥𑒰𑒥𑒴 𑒏𑓀𑒚𑒧𑒹 𑒣𑒰𑒢𑒏 𑒣𑒰𑒞 𑒂𑒥𑒱 𑒖𑒋𑒥𑒰𑒏 𑒥𑒯𑒢𑓂𑒢𑒰 𑒏𑒋 𑒔𑒳𑒣 𑒦𑒋 𑒑𑒹𑒪𑒰𑒯, 𑒧𑒳𑒠𑒰 𑒮𑒞𑓂𑒨 𑒄 𑒕𑒪 𑒖𑒹 𑒯𑒳𑒢𑒏𑒩 𑒂𑒿𑒐𑒱 𑒂 𑒏𑓀𑒚 𑒠𑒳𑒢𑒴 𑒦𑒰𑒫𑒰𑒞𑒱𑒩𑒹𑒏𑒧𑒹 𑒁𑒫𑒩𑒳𑒠𑓂𑒡 𑒦𑒋 𑒑𑒹𑒪 𑒕𑒪𑒢𑓂𑒯𑒱। 𑒏𑒱𑒕𑒳 𑒏𑒰𑒪 𑒔𑒳𑒣 𑒩𑒯𑒱 𑒤𑒹𑒩 𑒂𑒑𑒰𑒿 𑒥𑒰𑒖𑒋 𑒪𑒑𑒪𑒰𑒯-
“𑒮𑒹 𑒏𑒯𑒱 𑒥𑒱𑒢𑒰 𑒯𑒳𑒢𑒏𑒩 𑒎𑒣𑒔𑒰𑒩𑒱𑒏 𑒁𑒢𑒳𑒧𑒞𑒱 𑒪𑒹𑒢𑒹 𑒒𑒩𑒮𑒿 𑒔𑒴𑒛𑓃𑒰-𑒑𑒴𑒛𑓃 𑒪𑒋 𑒢𑒱𑒏𑒪𑒱 𑒑𑒹𑒪𑒯𑒳𑒿 । 𑒩𑒢𑒹-𑒥𑒢𑒹 𑒮𑒱𑒧𑒩𑒱𑒨𑒰 𑒮𑓂𑒢𑒰𑒢 𑒏𑒋 𑒢𑒰𑒍𑒮𑒿 𑒑𑓀𑒑𑒰𑒣𑒰𑒩 𑒏𑒋𑒪𑒯𑒳𑒿 𑒂 𑒮𑒼𑒯𑒧𑒹 𑒣𑒙𑒢𑒰 𑒣𑒯𑒳𑒿𑒔𑒱 𑒑𑒹𑒪𑒯𑒳𑒿 । 𑒣𑒯𑒱𑒢𑒹 𑒋𑒏𑒙𑒰 𑒔𑒰𑒯𑒏 𑒠𑒼𑒏𑒰𑒢𑒣𑒩 𑒏𑒱𑒕𑒳 𑒠𑒱𑒢 𑒏𑒰𑒖 𑒏𑒋𑒪𑒯𑒳𑒿 । 𑒍𑒯𑒱 𑒠𑒱𑒢𑒧𑒹 𑒣𑒙𑒢𑒰𑒧𑒹 𑒁𑒣𑒢 𑒮𑒦 𑒠𑒱𑒮𑒏𑒰 𑒪𑒼𑒏 𑒍𑒞𑒹𑒏 𑒧𑒰𑒞𑓂𑒩𑒰𑒧𑒹 𑒢𑒯𑒱 𑒩𑒯𑒟𑒱 । 𑒁𑒫𑒮𑓂𑒟𑒼 𑒏𑒧 𑒕𑒪 । 𑒤𑒹𑒩 𑒏𑒻𑒏 𑒮𑒰𑒪 𑒍𑒞𑒋 𑒩𑒯𑒪𑒯𑒳𑒿, 𑒥𑒰𑒠𑒧𑒹 𑒣𑒞𑒰 𑒔𑒪𑒪 𑒖𑒹 𑒋𑒯𑒱 𑒥𑒲𑒔 𑒑𑒰𑒧𑒧𑒹 𑒞𑒩𑒯-𑒞𑒩𑒯𑒏 𑒑𑒣 𑒅𑒛𑓃𑒪 । 𑒖𑒹 𑒧𑒩𑒰 𑒑𑒹𑒪 𑒂𑒏𑒱 𑒮𑒰𑒡𑒳 𑒥𑒢𑒱 𑒑𑒹𑒪 𑒬𑒼𑒦𑒰 । 𑒤𑒹𑒩 𑒖𑒐𑒢 𑒁𑒣𑒢 𑒔𑒰𑒯𑒏 𑒠𑒼𑒏𑒰𑒢 𑒐𑒼𑒪𑒪𑒯𑒳𑒿 𑒞𑒐𑒢 𑒖𑒰 𑒏𑒋 𑒑𑒰𑒧 𑒋𑒏𑒙𑒰 𑒣𑒼𑒮𑓂𑒙𑒏𑒰𑒩𑓂𑒛 𑒣𑒚𑒹𑒪𑒱𑒨𑒻𑒏 । 𑒂𑒥 𑒞𑒿 𑒥𑒲𑒮 𑒮𑒰𑒪𑒮𑒿 𑒥𑒲.𑒋𑒢.𑒏𑒰𑒪𑒹𑒖𑒱𑒋𑒙 𑒮𑓂𑒏𑒴𑒪 𑒪𑒑 𑒔𑒰𑒯𑒏 𑒠𑒼𑒏𑒰𑒢 𑒔𑒪𑒰 𑒩𑒯𑒪 𑒕𑒲 । 𑒍𑒞𑒯𑒱 𑒣𑒰𑒢𑒏 𑒮𑓂𑒙𑒰𑒪 𑒮𑒹𑒯𑒼 𑒪𑒑𑒰 𑒠𑒹𑒢𑒹 𑒕𑒱𑒨𑒻𑒏”।
“𑒮𑒦𑒙𑒰 𑒠𑒰𑒿𑒞 𑒙𑒴𑒙𑒱 𑒑𑒹𑒪 𑒬𑒼𑒦𑒰 𑒥𑒰𑒥𑒴”।
“𑒔𑒰𑒯𑒏 𑒠𑒼𑒏𑒰𑒢𑒧𑒹 𑒩𑒯𑒻𑒞-𑒩𑒯𑒻𑒞 𑒔𑒰𑒯 𑒣𑒲𑒥𑒰𑒏 𑒯𑒱𑒮𑓂𑒮𑒏 𑒦𑒋 𑒑𑒹𑒪 । 𑒧𑒳𑒠𑒰 𑒞𑒰𑒯𑒱𑒮𑒿 𑒏𑒼𑒢𑒼 𑒠𑒱𑒏𑓂𑒏𑒞 𑒢𑒯𑒱 𑒦𑒹𑒪 । 𑒧𑒳𑒠𑒰 𑒖𑒐𑒢 𑒣𑒰𑒢𑒏 𑒠𑒼𑒏𑒰𑒢 𑒂𑒥𑒱 𑒑𑒹𑒪 𑒞𑒐𑒢 𑒑𑒩𑒧 𑒔𑒰𑒯 𑒣𑒱𑒥𑒱𑒨𑒻𑒏 𑒂 𑒞𑒰𑒯𑒱𑒣𑒩𑒮𑒿 𑒚𑓀𑒜𑓃𑒰 𑒣𑒰𑒢 𑒠𑒰𑒿𑒞 𑒞𑒩𑒧𑒹 𑒡𑒋 𑒠𑒱𑒨𑒻𑒏 𑒮𑒹 𑒞𑒰𑒯𑒱𑒮𑒿 𑒑𑒩𑒧-𑒮𑒩𑓂𑒠 𑒦𑒹𑒪𑒰𑒮𑒿 𑒮𑒦𑒙𑒰 𑒠𑒰𑒿𑒞 𑒙𑒴𑒙𑒱 𑒑𑒹𑒪”।
𑒋𑒯𑒱 𑒑𑒣𑒣𑒩 𑒢𑒢𑓂𑒠 𑒂 𑒬𑒼𑒦𑒰 𑒥𑒰𑒥𑒴 𑒠𑒳𑒢𑒴 𑒑𑒼𑒙𑒹 𑒯𑒿𑒮𑒱 𑒣𑒛𑓃𑒪𑒰𑒯 ।
𑒤𑒹𑒩 𑒑𑒣-𑒬𑒣 𑒔𑒪𑒋 𑒪𑒰𑒑𑒪 । 𑒬𑒼𑒦𑒰𑒏 𑒦𑒾𑒖𑒲 𑒞𑒿 𑒧𑒩𑒱 𑒑𑒹𑒪 𑒕𑒪𑒲𑒯 𑒧𑒳𑒠𑒰 𑒖𑓂𑒨𑒼𑒿 𑒦𑒞𑒲𑒖𑒲 𑒖𑒱𑒥𑒻𑒞 𑒩𑒯𑒱𑒞𑒟𑒱 𑒞𑒿 𑒧𑒹𑓀𑒯𑒟 𑒏𑒕𑒥𑒲𑒏 𑒥𑒲𑒔 𑒮𑓀𑒥𑓀𑒡 𑒖𑒲𑒫𑒱𑒞 𑒩𑒯𑒻𑒞, 𑒧𑒳𑒠𑒰 𑒥𑒱𑒣𑒞𑒱 𑒖𑒹 𑒂𑒋𑒪 𑒞𑒿 𑒮𑒦𑒙𑒰 𑒋𑒏𑒹 𑒥𑒹𑒩 । 𑒢𑒢𑓂𑒠𑒏𑒹𑒿 𑒧𑒼𑒢 𑒣𑒛𑓃𑒪𑒢𑓂𑒯𑒱 𑒖𑒹 𑒦𑒑𑒱𑒢𑒲 𑒐𑒹𑒪𑒰𑒃𑒞 𑒕𑒪𑒲𑒯 𑒣𑒛𑓃𑒼𑒮𑒧𑒹 𑒂 𑒂𑒥𑒱 𑒏𑒋 𑒢𑒢𑓂𑒠𑒏 𑒧𑒰𑒋𑒏𑒹𑒿 𑒏𑒯𑒪𑒢𑓂𑒯𑒱, 𑒖𑒹 𑒤𑒪𑒢𑒰-𑒁𑒿𑒑𑒢𑒰𑒏 𑒤𑒪𑒢𑒰 𑒑𑒼𑒙𑒹 𑒣𑒹𑒙𑒣𑒩 𑒯𑒰𑒟 𑒩𑒰𑒐𑒱 𑒠𑒹𑒪𑒏𑒢𑓂𑒯𑒱 𑒂 𑒞𑒐𑒢𑒹 𑒞𑒹𑒯𑒢 𑒣𑒹𑒙-𑒠𑒩𑓂𑒠 𑒬𑒳𑒩𑒴 𑒦𑒹𑒪𑒢𑓂𑒯𑒱 𑒖𑒹 𑒏𑒞𑒥𑒼 𑒮𑒮𑒰𑒩𑒪 𑒑𑒹𑒪𑒢𑓂𑒯𑒱 𑒞𑒻𑒍 𑒢𑒯𑒱 𑒚𑒲𑒏 𑒦𑒹𑒪𑒢𑓂𑒯𑒱 𑒂 𑒢𑒢𑓂𑒠𑒏 𑒂𑒿𑒐𑒱𑒏 𑒮𑒼𑒗𑒰𑒿𑒧𑒹 𑒥𑒔𑒱𑒨𑒰𑒏 𑒩𑒯𑒮𑓂𑒨𑒧𑒨 𑒧𑒵𑒞𑓂𑒨𑒳 𑒦𑒋 𑒑𑒹𑒪𑒻𑒏 ।
𑒬𑒼𑒦𑒰𑒥𑒰𑒥𑒴 𑒏𑒯𑒪𑒢𑓂𑒯𑒱- “𑒍 𑒥𑒔𑒱𑒨𑒼 𑒙𑒰 𑒖𑒹 𑒖𑒲𑒥𑒞𑒱 𑒩𑒯𑒱𑒞𑒋 𑒞𑒿 𑒮𑒧𑓂𑒥𑒢𑓂𑒡 𑒖𑒳𑒛𑓃𑒪 𑒩𑒯𑒱𑒞𑒋”।
𑒧𑒳𑒠𑒰 𑒢𑒢𑓂𑒠 𑒖𑒹𑒢𑒰 𑒏𑒞𑒯𑒳 𑒠𑒼𑒮𑒩 𑒚𑒰𑒧 𑒔𑒪𑒱 𑒑𑒹𑒪 𑒕𑒪𑒰𑒯 । 𑒁𑒣𑒢 𑒍𑒯𑒱 𑒫𑒱𑒭𑒨𑒣𑒩 𑒖𑒹 𑒯𑒳𑒢𑒏𑒰 𑒣𑓂𑒩𑒱𑒞𑒑𑒩 𑒕𑒪𑒢𑓂𑒯𑒱, 𑒥𑒔𑓂𑒔𑒹𑒮𑒿 । 𑒄 𑒖𑒹 𑒣𑒰𑒩𑒱𑒫𑒰𑒩𑒱𑒏 𑒖𑓀𑒖𑒰𑒪, 𑒯𑒰𑒙𑒮𑒿 𑒞𑒩𑒏𑒰𑒩𑒲 𑒂𑒢𑒥, 𑒥𑒔𑓂𑒔𑒰𑒏 𑒣𑒩𑒲𑒏𑓂𑒭𑒰𑒏 𑒣𑒩𑒱𑒝𑒰𑒧𑒏 𑒔𑒱𑒢𑓂𑒞𑒰 𑒏𑒩𑒥, 𑒄 𑒮𑒦 𑒁𑒣𑒢 𑒁𑒑𑓂𑒩𑒖𑒏 𑒏𑒯𑒪𑒰𑒮𑒿 𑒏𑒳𑒧𑒼𑒢𑒮𑒿 𑒏𑒋 𑒩𑒯𑒪 𑒩𑒯𑒟𑒱 ।
𑒑𑓀𑒑𑒰 𑒥𑓂𑒩𑒱𑒖𑒏 𑒅𑒠𑓂𑒒𑒰𑒙𑒢 𑒦𑒋 𑒑𑒹𑒪 𑒂 𑒠𑒳𑒢𑒴 𑒣𑒳𑒞𑓂𑒩 𑒫𑒩𑓂𑒑𑒧𑒹 𑒣𑓂𑒩𑒟𑒧 𑒢𑒯𑒱 𑒏𑒹𑒪𑒏𑒢𑓂𑒯𑒱 । 𑒤𑒹𑒩 𑒣𑒳𑒞𑓂𑒩𑒲 𑒮𑒹𑒯𑒼 𑒫𑒱𑒖𑓂𑒘𑒰𑒢 𑒪𑒹𑒢𑒹 𑒕𑒪𑒲𑒯, 𑒁𑒢𑓂𑒞𑒩 𑒮𑓂𑒢𑒰𑒞𑒏𑒧𑒹, 𑒞𑒰𑒯𑒴𑒧𑒹 𑒖𑒲𑒫𑒫𑒱𑒖𑓂𑒘𑒰𑒢 । 𑒧𑒳𑒠𑒰 𑒬𑒢𑒻𑓁-𑒬𑒢𑒻𑓁 𑒕𑒧𑒰𑒯𑒲 𑒂𑒋𑒪, 𑒫𑒰𑒩𑓂𑒭𑒱𑒏 𑒣𑒩𑒲𑒏𑓂𑒭𑒰 𑒂𑒋𑒪 𑒧𑒳𑒠𑒰 𑒮𑒦𑒏𑒹𑒿 𑒁𑓀𑒏 𑒞𑒿 𑒢𑒲𑒏 𑒂𑒥𑒢𑓂𑒯𑒱, 𑒧𑒳𑒠𑒰 𑒣𑓂𑒩𑒟𑒧 𑒮𑓂𑒟𑒰𑒢 𑒢𑒯𑒱 𑒣𑓂𑒩𑒰𑒣𑓂𑒞 𑒯𑒼𑒃𑒞 𑒕𑒪𑒢𑓂𑒯𑒱 । 𑒑𑓀𑒑𑒰-𑒥𑓂𑒩𑒱𑒖 𑒂 𑒣𑒩𑒲𑒏𑓂𑒭𑒰𑒏 𑒁𑓀𑒏𑒧𑒹 𑒞𑒿 𑒏𑒼𑒢𑒼 𑒣𑒩𑒮𑓂𑒣𑒩 𑒮𑓀𑒥𑓀𑒡 𑒢𑒯𑒱 𑒕𑒪 । 𑒧𑒳𑒠𑒰 𑒢𑒢𑓂𑒠𑒏 𑒫𑒱𑒬𑓂𑒫𑒰𑒮 𑒧𑒰𑒞𑒰-𑒣𑒱𑒞𑒰𑒏 𑒏𑒩𑓂𑒧𑒮𑒿 𑒣𑒳𑒞𑓂𑒩-𑒣𑒳𑒞𑓂𑒩𑒲𑒏 𑒂𑒑𑒰𑒿 𑒥𑒜𑓃𑒥𑒰𑒣𑒩 𑒕𑒪 । 𑒑𑓀𑒑𑒰-𑒣𑒳𑒪 𑒢𑒱𑒩𑓂𑒧𑒰𑒝𑒧𑒹 𑒖𑒹 𑒦𑓂𑒩𑒭𑓂𑒙𑒰𑒔𑒰𑒩 𑒕𑒪 𑒍𑒏𑒩 𑒫𑒱𑒩𑒳𑒠𑓂𑒡 𑒁𑒦𑒱𑒨𑒰𑒢𑒧𑒹 𑒯𑒳𑒢𑒏𑒩 𑒫𑒱𑒤𑒪𑒞𑒰 𑒂 𑒁𑒑𑓂𑒩𑒖𑒏 𑒏𑒯𑒪𑒰𑒣𑒩 𑒣𑒰𑒩𑒱𑒫𑒰𑒩𑒱𑒏 𑒅𑒞𑓂𑒞𑒩𑒰𑒠𑒰𑒨𑒱𑒞𑓂𑒫 𑒣𑒴𑒩𑒰 𑒏𑒩𑒥𑒰𑒏 𑒣𑓂𑒩𑒨𑒰𑒮 𑒋𑒏𑒩 𑒏𑒰𑒩𑒝 𑒕𑒪 । 𑒋𑒯𑒱 𑒥𑒲𑒔 𑒋𑒏 𑒥𑒹𑒩 𑒥𑒔𑓂𑒔𑒰 𑒮𑒦𑒏 𑒏𑒰𑒏𑒰 𑒂 𑒢𑒢𑓂𑒠𑒏 𑒁𑒑𑓂𑒩𑒖 𑒣𑒙𑒢𑒰 𑒛𑒹𑒩𑒰𑒣𑒩 𑒁𑒋𑒪𑒰𑒯। 𑒢𑒢𑓂𑒠 𑒑𑒼𑒩 𑒪𑒰𑒑𑒱 𑒏𑒋 𑒏𑒯𑒪𑒢𑓂𑒯𑒱-
“𑒑𑓀𑒑𑒰 𑒣𑒳𑒪 𑒠𑒹𑒢𑒹 𑒂𑒋𑒪 𑒕𑒲 𑒂𑒏𑒱 𑒮𑓂𑒙𑒲𑒧𑒩𑒮𑒿”।
“𑒂𑒋𑒪 𑒞𑒿 𑒕𑒲 𑒮𑓂𑒙𑒲𑒧𑒩𑒮𑒿, 𑒥𑒳𑒗𑒪𑒹 𑒢𑒯𑒱 𑒕𑒪𑒋 𑒖𑒹 𑒑𑓀𑒑𑒰 𑒣𑒳𑒪𑒏 𑒅𑒠𑓂𑒒𑒰𑒙𑒢 𑒦𑒋 𑒑𑒹𑒪 𑒕𑒻𑒏 । 𑒮𑒹 𑒒𑒳𑒩𑒥 𑒞𑒿 𑒣𑒳𑒪𑒏 𑒩𑒮𑓂𑒞𑒹 𑒖𑒰𑒋𑒥 । 𑒮𑒳𑒢𑒻𑒞 𑒕𑒱𑒨𑒻𑒏 𑒖𑒹 𑒢𑒥𑒏𑒰-𑒢𑒥𑒏𑒰 𑒛𑒲𑒪𑒏𑓂𑒮 𑒏𑒼𑒔 𑒮𑒦 𑒜𑒹𑒩𑒏-𑒜𑒹𑒩 𑒐𑒳𑒖𑒪 𑒕𑒻𑒏”।
“𑒢𑒯𑒱 𑒏𑒼𑒢𑒼 𑒖𑒩𑒴𑒩𑒲 𑒢𑒯𑒱 𑒁𑒕𑒱 𑒣𑒳𑒪𑒮𑒿 𑒖𑒋𑒥𑒰𑒏 । 𑒥𑒛𑓂𑒛 𑒑𑒛𑓃𑒥𑒩𑒲 𑒦𑒹𑒪 𑒕𑒻𑒏 𑒋𑒏𑒩 𑒢𑒱𑒩𑓂𑒧𑒰𑒝𑒧𑒹 । 𑒏𑒯𑒱𑒨𑒼 𑒡𑒮𑒱 𑒖𑒋𑒞𑒻𑒏”।
𑒁𑒑𑓂𑒩𑒖𑒏𑒹𑒿 𑒏𑒱𑒕𑒳 𑒥𑒳𑒗𑒱 𑒢𑒯𑒱 𑒣𑒛𑓃𑒪𑒢𑓂𑒯𑒱 𑒖𑒹 𑒏𑒲 𑒦𑒹𑒪 𑒁𑒕𑒱 𑒢𑒢𑓂𑒠𑒏𑒹𑒿 ।
“𑒧𑒼𑒢 𑒚𑒲𑒏 𑒩𑒯𑒻𑒞 𑒕𑒯 𑒢𑒹 । 𑒠𑒧𑒰 𑒥𑒹𑒬𑒲 𑒞𑓀𑒑 𑒞𑒿 𑒢𑒯𑒱 𑒏𑒋 𑒩𑒯𑒪 𑒕𑒯”- 𑒠𑒳𑒢𑒴 𑒦𑒰𑒿𑒋 𑒠𑒧𑒰𑒏 𑒩𑒼𑒑𑒲 𑒕𑒪𑒰𑒯।
“𑒢𑒘𑒱 𑒮𑒹 𑒮𑒦 𑒚𑒲𑒏 𑒁𑒕𑒱 । 𑒧𑒳𑒠𑒰 𑒁𑒯𑒰𑒿𑒏 𑒏𑒯𑒪𑒰𑒮𑒿 𑒮𑒦𑒙𑒰 𑒣𑒳𑒩𑒰𑒢 𑒑𑒣 𑒥𑒱𑒮𑒩𑒥𑒰𑒏 𑒔𑒹𑒭𑓂𑒙𑒰 𑒏𑒋𑒪𑒯𑒳𑒿 । 𑒍𑒯𑒱 𑒣𑒳𑒪 𑒢𑒱𑒩𑓂𑒧𑒰𑒝𑒧𑒹 𑒖𑒹 𑒮𑒦 𑒦𑒹𑒪, 𑒧𑒖𑒠𑒴𑒩 𑒮𑒦𑒏 𑒣𑒰𑒨𑒰𑒣𑒩 𑒮𑒿 𑒒𑒳𑒩𑒕𑒰𑒯𑒲 𑒐𑒰 𑒏𑒋 𑒐𑒮𑒥 𑒠𑒹𑒐𑒻𑒞 𑒩𑒯𑒪𑒯𑒳𑒿, 𑒮𑒻𑒏𑒛𑓃𑒰𑒧𑒹 𑒧𑒖𑒠𑒴𑒩𑒮𑒦 𑒧𑒩𑒱 𑒑𑒹𑒪। 𑒂 𑒦𑓂𑒩𑒭𑓂𑒙𑒰𑒔𑒰𑒩𑒮𑒿 𑒁𑒣𑒢 𑒒𑒩 𑒦𑒩𑒪𑒢𑓂𑒯𑒱 𑒁𑒦𑒱𑒨𑒢𑓂𑒞𑒰 𑒪𑒼𑒏𑒢𑒱 । 𑒂𑒥 𑒖𑒐𑒢 𑒣𑒳𑒪𑒏 𑒅𑒠𑓂𑒒𑒰𑒙𑒢 𑒦𑒹𑒪 𑒞𑒐𑒢 𑒧𑒰𑒞𑓂𑒩 𑓓𑓐 𑒙𑒰 𑒧𑒖𑒠𑒴𑒩𑒏 𑒢𑒰𑒧 𑒬𑒱𑒪𑒰𑒣𑒩 𑒪𑒱𑒐𑒱 𑒏𑒋 𑒙𑒰𑒿𑒑𑒱 𑒠𑒹𑒪𑒢𑓂𑒯𑒱 𑒂 𑒮𑒦 𑒁𑒦𑒱𑒨𑒢𑓂𑒞𑒰𑒏𑒹𑒿 𑒣𑒳𑒩𑒮𑓂𑒏𑒰𑒩𑒏 𑒒𑒼𑒭𑒝𑒰 𑒦𑒋 𑒑𑒹𑒪 । 𑒏𑒯𑒱𑒨𑒰 𑒄 𑒣𑒳𑒪 𑒙𑒴𑒙𑒱 𑒏𑒋 𑒐𑒮𑒱 𑒣𑒛𑓃𑒞 𑒞𑒏𑒩 𑒏𑒼𑒢𑒼 𑒚𑒹𑒏𑒰𑒢 𑒢𑒯𑒱 । 𑒯𑒧 𑒮𑓀𑒒𑒩𑓂𑒭 𑒬𑒳𑒩𑒴 𑒏𑒋𑒪𑒯𑒳𑒿 𑒞𑒿 𑒠𑒩𑒧𑒰𑒯𑒰 𑒥𑒢𑓂𑒠 𑒏𑒩𑒰 𑒠𑒃 𑒑𑒹𑒪 । 𑒮𑒦 𑒮𑓂𑒟𑒰𑒢𑒰𑓀𑒞𑒩𑒝𑒏 𑒥𑒰𑒠 𑒠𑒩𑒧𑒰𑒯𑒰 𑒥𑒢𑓂𑒠 𑒦𑒋 𑒖𑒰𑒃𑒞 𑒁𑒕𑒱 𑒂 𑒣𑒩𑒱𑒫𑒰𑒩𑒏𑒹𑒿 𑒑𑒰𑒧𑒧𑒹 𑒕𑒼𑒛𑓃𑒋 𑒣𑒛𑓃𑒻𑒞 𑒁𑒕𑒱 । 𑒁𑒯𑒰𑒿𑒏 𑒏𑒯𑒪𑒰𑒮𑒿 𑒮𑓀𑒒𑒩𑓂𑒭𑒏𑒹𑒿 𑒕𑒼𑒛𑓃𑒱 𑒋𑒯𑒱 𑒮𑓂𑒟𑒰𑒢𑒰𑓀𑒞𑒩𑒝𑒧𑒹 𑒁𑒋𑒪𑒯𑒳𑒿 । 𑒥𑒱𑒮𑒩𑒋 𑒔𑒰𑒯𑒪𑒯𑒳𑒿 𑒮𑒦𑒙𑒰 । 𑒐𑒮𑒻𑒞 𑒪𑒯𑒰𑒮, 𑒏𑒢𑒻𑒞 𑒯𑒳𑒢𑒏𑒩 𑒮𑒦𑒏 𑒣𑒩𑒱𑒫𑒰𑒩 । 𑒮𑒣𑒢𑒰𑒧𑒹 𑒁𑒥𑒻𑒞 𑒩𑒯𑒪 𑒄 𑒮𑒦 𑒮𑒯𑒮𑓂𑒩𑒥𑒰𑒜𑓃𑒢𑒱𑒏 𑒩𑒴𑒣 𑒥𑒢𑒱 𑒏𑒋 । 𑒯𑒧𑒩𑒹 𑒮𑒢 𑒏𑒼𑒢𑒼 𑒬𑒰𑒣𑒱𑒞 𑒂𑒞𑓂𑒧𑒰 𑒁𑒕𑒱 𑒍 𑒮𑒯𑒮𑓂𑒩𑒥𑒰𑒜𑓃𑒢𑒱 𑒖𑒹 𑒁𑒣𑒢 𑒮𑓀𑒒𑒩𑓂𑒭 𑒁𑒡𑒐𑒱𑒖𑓂𑒖𑒴 𑒕𑒼𑒛𑓃𑒱 𑒧𑒩𑒱 𑒑𑒹𑒪 𑒯𑒼𑒋𑒞 𑒂 𑒂𑒥 𑒥𑓂𑒩𑒯𑓂𑒧𑒰𑒝𑓂𑒛𑒧𑒹 𑒒𑒳𑒩𑒱𑒂 𑒩𑒯𑒪 𑒁𑒕𑒱 । 𑒂𑒥 𑒠𑒹𑒐𑒴 𑒞𑒲𑒢𑒴 𑒥𑒔𑓂𑒔𑒰𑒏 𑒣𑒩𑒲𑒏𑓂𑒭𑒰 𑒣𑒩𑒱𑒝𑒰𑒧, 𑒮𑒦𑒠𑒱𑒢 𑒣𑓂𑒩𑒟𑒧 𑒏𑒩𑒻𑒞 𑒁𑒥𑒻𑒞 𑒩𑒯𑒟𑒱, 𑒂𑒥 𑒏𑒲 𑒦𑒋 𑒑𑒹𑒪𑒢𑓂𑒯𑒱। 𑒯𑒧 𑒖𑒹 𑒮𑓀𑒒𑒩𑓂𑒭 𑒥𑒲𑒔𑒹𑒧𑒹 𑒕𑒼𑒛𑓃𑒪𑒯𑒳𑒿 𑒞𑒏𑒩 𑒕𑒲 𑒄 𑒣𑒩𑒱𑒝𑒰𑒧”। 𑒢𑒢𑓂𑒠 𑒯𑒥𑒼𑒜𑓃𑒏𑒰𑒩 𑒦𑒋 𑒏𑒰𑒢𑒋 𑒪𑒑𑒪𑒰𑒯 ।
“𑒡𑒳𑒩 𑒥𑒞𑒰𑒯 । 𑒖𑒹 𑒦𑓂𑒩𑒭𑓂𑒙𑒰𑒔𑒰𑒩 𑒏𑒋𑒪𑒢𑓂𑒯𑒱 𑒮𑒹 𑒢𑒹 𑒖𑒰𑒢𑒞𑒰𑒯 । 𑒖𑒹 𑒧𑒖𑒠𑒴𑒩 𑒪𑒼𑒏𑒢𑒱𑒏 𑒁𑒡𑒱𑒏𑒰𑒩 𑒧𑒰𑒩𑒪𑒢𑓂𑒯𑒱 𑒞𑒱𑒢𑒏𑒰 𑒢𑒹 𑒤𑒪 𑒦𑒹𑒙𑒞𑒢𑓂𑒯𑒱 । 𑒁𑒯𑒰𑒿 𑒞𑒿 𑒁𑒣𑒢𑒰 𑒦𑒩𑒱𑒮𑒏 𑒮𑓀𑒒𑒩𑓂𑒭 𑒏𑒩𑒥𑒹 𑒏𑒋𑒪𑒯𑒳𑒿 । 𑒂 𑒁𑒣𑒢 𑒣𑒰𑒩𑒱𑒫𑒰𑒩𑒱𑒏 𑒖𑒲𑒫𑒢 𑒏𑒹 𑒢𑒘𑒱 𑒔𑒪𑒥𑒻𑒞 𑒁𑒕𑒱 । 𑒠𑒼𑒮𑒩𑒰𑒏 𑒑𑒪𑒞𑒲𑒏 𑒠𑓂𑒫𑒰𑒩𑒹 𑒁𑒣𑒢 𑒥𑒔𑓂𑒔𑒰𑒮𑒦𑒏𑒹𑒿 𑒥𑒱𑒪𑒙𑓄 𑒠𑒹𑒥𑒻𑒏 । 𑒋𑒯𑒱𑒧𑒹 𑒋𑒏𑒩 𑒮𑒦𑒏 𑒏𑒼𑒢 𑒏𑒮𑒴𑒩 𑒕𑒻𑒏?”
𑒤𑒹𑒩 𑒠𑒳𑒢𑒴 𑒦𑒰𑒋𑒿𑒏 𑒑𑒰𑒧-𑒒𑒩𑒏 𑒑𑒣-𑒬𑒣 𑒬𑒳𑒩𑒴 𑒦𑒹𑒪𑒢𑓂𑒯𑒱 । 𑒢𑒢𑓂𑒠 𑒥𑒖𑒻𑒞-𑒥𑒖𑒻𑒞 𑒏𑒞𑒯𑒳 𑒥𑒲𑒔𑒧𑒹 𑒑𑒳𑒧 𑒦𑒋 𑒖𑒰𑒃𑒞 𑒕𑒪𑒰𑒯 । 𑒁𑒑𑓂𑒩𑒖𑒏𑒹𑒿 𑒥𑒳𑒗𑒪 𑒕𑒪𑒢𑓂𑒯𑒱 𑒖𑒹 𑒄 𑒥𑒱𑒯𑒰𑒩𑒱 𑒂𑒥 𑒢𑒯𑒱 𑒟𑒧𑓂𑒯𑒞 । 𑒥𑒼𑒪-𑒦𑒩𑒼𑒮 𑒠𑒻𑒞 𑒩𑒯𑒪𑒰𑒯 𑒧𑒳𑒠𑒰 𑒥𑒔𑓂𑒔𑒹𑒮𑒿 𑒠𑒹𑒐𑒢𑒹 𑒕𑒟𑒱 𑒢𑒢𑓂𑒠𑒏 𑒖𑒱𑒠𑒣𑒢𑒰, 𑒢𑒯𑒱 𑒖𑒰𑒢𑒱 𑒂𑒥 𑒏𑒲 𑒏𑒩𑒞 । 𑒦𑒰𑒥𑒯𑒳𑒮𑒿 𑒮𑒼𑒗𑒰𑒿-𑒮𑒼𑒿𑒗𑒲 𑒑𑒣 𑒢𑒯𑒱 𑒯𑒼𑒃𑒞 𑒕𑒪𑒢𑓂𑒯𑒱 । 𑒧𑒳𑒠𑒰 𑒁𑒣𑒩𑒼𑒏𑓂𑒭 𑒮𑒧𑓂𑒥𑒼𑒡𑒢 𑒏𑒋 𑒏𑒯𑒪𑒢𑓂𑒯𑒱-
“𑒏𑒢𑒱𑒨𑒰𑒿 𑒂𑒥 𑒁𑒯𑒲𑓀𑒣𑒩 𑒁𑒕𑒱 । 𑒥𑒔𑓂𑒔𑒰 𑒮𑒦𑒣𑒩 𑒡𑓂𑒨𑒰𑒢 𑒩𑒰𑒐𑒥”।
𑒢𑒢𑓂𑒠 𑒁𑒑𑓂𑒩𑒖𑒏𑒹𑒿 𑒮𑓀𑒑 𑒪𑓄 𑒖𑒰 𑒏𑒋 𑒧𑒯𑒹𑒢𑓂𑒠𑓂𑒩𑒴𑒒𑒰𑒙𑒧𑒹 𑒮𑓂𑒙𑒲𑒧𑒩𑒣𑒩 𑒕𑒼𑒛𑓃𑒱 𑒁𑒋𑒪𑒰𑒯, 𑒏𑒰𑒩𑒝 𑒯𑒳𑒢𑒏𑒰 𑒛𑒩 𑒕𑒪𑒢𑓂𑒯𑒱 𑒖𑒹 𑒏𑒞𑒯𑒳 𑒄 𑒥𑒲𑒔𑒹𑒧𑒹 𑒥𑒮𑒮𑒿 𑒣𑒳𑒪𑒏 𑒩𑒮𑓂𑒞𑒹 𑒢𑒯𑒱 𑒥𑒱𑒠𑒰 𑒦𑒋 𑒖𑒰𑒟𑒱 𑒂 𑒣𑒳𑒪 𑒞𑒿 𑒂𑒃 𑒢𑒯𑒱 𑒞𑒿 𑒏𑒰𑒪𑓂𑒯𑒱 𑒡𑒮𑒥𑒹 𑒏𑒩𑒞 ।
𑒞𑒏𑒩 𑒥𑒰𑒠 𑒖𑓂𑒨𑒼𑒞𑒱𑒭 𑒏𑒳𑒝𑓂𑒛𑒪𑒲 𑒃𑒞𑓂𑒨𑒰𑒠𑒱𑒏 𑒐𑒼𑒖-𑒥𑒲𑒢 𑒣𑓂𑒩𑒰𑒩𑒧𑓂𑒦 𑒏𑒹𑒪𑒢𑓂𑒯𑒱 𑒢𑒢𑓂𑒠 । 𑒦𑒱𑒢𑓂𑒢-𑒦𑒱𑒢𑓂𑒢 𑒞𑒩𑒯𑒏 𑒣𑒰𑒟𑒩 𑒮𑒦, 𑒩𑒞𑓂𑒢 𑒮𑒦 𑒥𑒔𑓂𑒔𑒰 𑒮𑒦𑒏 𑒯𑒰𑒟𑒧𑒹 𑒠𑒹𑒪𑒢𑓂𑒯𑒱 𑒂 𑒁𑒣𑒢 𑒂𑒿𑒑𑒳𑒩𑒧𑒹 𑒣𑒯𑒱𑒩𑒋 𑒪𑒑𑒪𑒰𑒯 । 𑒋𑒏 𑒥𑒹𑒩 𑒯𑒢𑒳𑒧𑒰𑒢 𑒔𑒪𑒲𑒮𑒰 𑒏𑒲𑒢𑒱 𑒏𑒋 𑒁𑒢𑒪𑒢𑓂𑒯𑒱 𑒞𑒿 𑒖𑒞𑒹𑒏 𑒑𑒼𑒙𑒹 𑒒𑒩𑒧𑒹 𑒕𑒪 𑒮𑒦𑒏 𑒪𑒹𑒪 𑒋𑒏-𑒋𑒏𑒙𑒰 𑒂𑒢𑒱 𑒪𑒹𑒪𑒢𑓂𑒯𑒱 । 𑒣𑒰𑒿𑒔-𑒠𑒮 𑒙𑒰 𑒤𑒰𑒖𑒱𑒪𑒹 𑒒𑒩𑒧𑒹 𑒩𑒯𑒻𑒞 𑒕𑒪, 𑒪𑒼𑒏 𑒮𑒦𑒏 𑒪𑒹𑒪 । 𑒖𑒹 𑒥𑒰𑒯𑒩𑒮𑒿 𑒂𑒥𑒟𑒱 𑒯𑒳𑒢𑒏𑒰 𑒋𑒏-𑒋𑒏 𑒙𑒰 𑒯𑒢𑒳𑒧𑒰𑒢 𑒔𑒪𑒲𑒮𑒰 𑒣𑒏𑒛𑓃𑒰 𑒠𑒹𑒪 𑒖𑒰𑒃𑒞 𑒕𑒪𑒢𑓂𑒯𑒱 । 𑒋𑒯𑒱 𑒡𑒼𑒐𑒰-𑒡𑒼𑒐𑒲𑒧𑒹 𑒋𑒏 𑒠𑒱𑒢 𑒢𑒢𑓂𑒠𑒏𑒹𑒿 𑒋𑒏𑒙𑒰 𑒚𑒏 𑒞𑒰𑒢𑓂𑒞𑓂𑒩𑒱𑒏𑒮𑒿 𑒦𑒹𑒿𑒙 𑒦𑒋 𑒑𑒹𑒪𑒢𑓂𑒯𑒱 । 𑒢𑒢𑓂𑒠𑒏 𑒧𑒢𑒼𑒫𑒱𑒖𑓂𑒘𑒰𑒢𑒏𑒹𑒿 𑒍 𑒞𑒹𑒢𑒰𑒏𑒹𑒿 𑒣𑒏𑒛𑓃𑒪𑒏 𑒖𑒹 𑒢𑒢𑓂𑒠 𑒯𑒳𑒢𑒏𑒰 𑒦𑒑𑒫𑒰𑒢𑒏 𑒠𑒴𑒞 𑒥𑒳𑒗𑒋 𑒪𑒑𑒪𑒰𑒯 । 𑒍 𑒞𑒰𑓀𑒞𑓂𑒩𑒱𑒏 𑒁𑒣𑒢𑒰 𑒪𑒑 𑒮𑒦 𑒫𑒮𑓂𑒞𑒳𑒏 𑒮𑒧𑒰𑒡𑒰𑒢 𑒩𑒐𑒢𑒹 𑒕𑒪, 𑒦𑓂𑒩𑒭𑓂𑒙𑒰𑒔𑒰𑒩𑒲𑒏𑒹𑒿 𑒠𑒝𑓂𑒛 𑒠𑒱𑒂 𑒮𑒏𑒥𑒰𑒏, 𑒥𑒔𑓂𑒔𑒰 𑒮𑒦𑒏 𑒩𑒱𑒖𑒪𑓂𑒙 𑒢𑒲𑒏 𑒏𑒩𑒹𑒥𑒰𑒏, 𑒮𑒦𑒏𑒹𑒿 𑒮𑓂𑒫𑒮𑓂𑒟 𑒩𑒐𑒥𑒰𑒏 𑒂 𑒂𑒩 𑒂𑒩 𑒞𑒩𑒯𑒏 𑒮𑒧𑒮𑓂𑒨𑒰 𑒮𑒦𑒏 । 𑒄 𑒮𑒦𑒙𑒰 𑒮𑒧𑒮𑓂𑒨𑒰𑒏 𑒮𑒧𑒰𑒡𑒰𑒢𑒏 𑒂𑒡𑒰𑒩 𑒕𑒪 𑒞𑓀𑒞𑓂𑒩 𑒫𑒱𑒖𑓂𑒘𑒰𑒢, 𑒖𑒏𑒩 𑒫𑒱𑒬𑓂𑒫𑒮𑒢𑒲𑒨𑒞𑒰𑒣𑒩 𑒏𑒼𑒢𑒼 𑒣𑓂𑒩𑒏𑒰𑒩𑒏 𑒁𑒫𑒱𑒬𑓂𑒫𑒰𑒮 𑒢𑒢𑓂𑒠𑒏𑒹𑒿 𑒏𑒯𑒱𑒨𑒼 𑒢𑒯𑒱 𑒕𑒪𑒢𑓂𑒯𑒱 । 𑒍 𑒞𑒰𑒢𑓂𑒞𑓂𑒩𑒱𑒏 𑒢𑒢𑓂𑒠𑒮𑒿 𑒑𑒳𑒣𑓂𑒞 𑒣𑒴𑒖𑒰-𑒣𑒰𑒚 𑒪𑒹𑒪 𑒣𑒰𑒃-𑒏𑒾𑒛𑓃𑒲𑒏 𑒧𑒰𑒿𑒑 𑒏𑒩𑒋 𑒪𑒰𑒑𑒪 । 𑒍 𑒞𑒰𑒢𑓂𑒞𑓂𑒩𑒱𑒏 𑒏𑒯𑒱𑒨𑒼 𑒏𑒯𑒢𑓂𑒯𑒱 𑒖𑒹 𑒧𑒰𑒞𑒰 𑒮𑒣𑒢𑒰 𑒠𑒹𑒪𑒢𑓂𑒯𑒱 𑒁𑒕𑒱 𑒖𑒹 𑒂𑒥 𑒠𑒳𑒭𑓂𑒙𑒏 𑒢𑒰𑒬 𑒯𑒼𑒋𑒞। 𑒂𑒥𑒋 𑒠𑒱𑒎𑒏 𑒂𑒮𑒱𑒢, 𑒬𑒰𑒩𑒠𑒲𑒨 𑒢𑒫𑒩𑒰𑒞𑓂𑒩𑒧𑒹 𑒮𑒧𑓂𑒣𑒴𑒩𑓂𑒝 𑒮𑒱𑒠𑓂𑒡𑒱 𑒦𑒋 𑒖𑒋𑒞 । 𑒤𑒹𑒩 𑒧𑒰𑒩𑒱 𑒩𑒰𑒮 𑒣𑒴𑒖𑒰 𑒣𑒰𑒚𑒏 𑒫𑒱𑒡𑒱, 𑒬𑒫𑒰𑒮𑒢-𑒨𑒼𑒑 𑒂𑒠𑒱 𑒥𑒞𑒰 𑒠𑒹𑒪𑒏𑒢𑓂𑒯𑒱 𑒢𑒢𑓂𑒠𑒏𑒹𑒿 𑒂 𑒢𑒢𑓂𑒠 𑒍𑒯𑒱 𑒮𑒦 𑒫𑒱𑒡𑒱𑒏 𑒁𑒢𑒳𑒮𑒩𑒝 𑒍𑒯𑒱𑒢𑒰 𑒏𑒩𑒋 𑒪𑒑𑒪𑒰𑒯 𑒖𑒹𑒢𑒰 𑒋𑒏𑒙𑒰 𑒫𑒱𑒠𑓂𑒨𑒰𑒩𑓂𑒟𑒲 𑒁𑒣𑒢 𑒑𑒳𑒩𑒳𑒏 𑒣𑒰𑒚𑒏 𑒁𑒦𑓂𑒨𑒰𑒮 𑒢𑒱𑒁𑒧𑒏 𑒁𑒢𑒳𑒩𑒴𑒣 𑒏𑒩𑒻𑒞 𑒁𑒕𑒱 । 𑒂𑒮𑒱𑒢 𑒦𑒩𑒱 𑒮𑒦 𑒏𑒰𑒖 𑒕𑒼𑒛𑓃𑒱 𑒢𑒢𑓂𑒠 𑒋𑒯𑒱 𑒮𑒦𑒧𑒹 𑒪𑒰𑒑𑒪 𑒩𑒯𑒪𑒰𑒯 𑒧𑒳𑒠𑒰 𑒂𑒮𑒱𑒢 𑒂𑒋𑒪 𑒂 𑒔𑒪𑒱𑒍 𑒑𑒹𑒪 𑒧𑒳𑒠𑒰 𑒢𑒘𑒱 𑒏𑒱𑒕𑒳 𑒯𑒹𑒥𑒰𑒏 𑒕𑒪 𑒂 𑒢𑒹 𑒏𑒱𑒕𑒳 𑒦𑒹𑒪 । 𑒂𑒮𑒱𑒢𑒧𑒹 𑒏𑒯𑒪 𑒑𑒹𑒪 𑒖𑒹 𑒂𑒥 𑒦𑓂𑒩𑒭𑓂𑒙 𑒁𑒦𑒱𑒨𑒢𑓂𑒞𑒰 𑒮𑒦𑒏𑒹𑒿 𑒮𑒖𑒰 𑒦𑒹𑒙𑒥𑒹 𑒏𑒩𑒞𑒻𑒏, 𑒂𑒥𑒋 𑒠𑒱𑒎𑒏 𑒥𑒩𑒐𑒰 । 𑒋𑒯𑒱𑒢𑒰 𑒮𑒰𑒪 𑒥𑒲𑒞𑒱 𑒑𑒹𑒪 𑒧𑒳𑒠𑒰 𑒮𑒖𑒰 𑒠𑒱𑒁𑒋𑒥𑒰𑒏 𑒖𑒹 𑒮𑒧𑒨 𑒮𑒲𑒧𑒰 𑒕𑒪 𑒮𑒹 𑒂𑒑𑒰𑒿 𑒥𑒜𑓃𑒻𑒞 𑒩𑒯𑒪 । 𑒣𑓀𑒛𑒱𑒞𑒖𑒲𑒏𑒹𑒿 𑒏𑒱𑒕𑒳 𑒂𑒩𑓂𑒟𑒱𑒏 𑒮𑒧𑒮𑓂𑒨𑒰 𑒮𑒹𑒯𑒼 𑒁𑒋𑒪𑒢𑓂𑒯𑒱 𑒂 𑒢𑒢𑓂𑒠𑒏𑒹𑒿 𑒞𑒏𑒩 𑒦𑒰𑒩 𑒫𑒯𑒢 𑒏𑒩𑒋 𑒣𑒛𑓃𑒪𑒢𑓂𑒯𑒱 । 𑒒𑒩-𑒠𑓂𑒫𑒰𑒩𑒣𑒩 𑒣𑓀𑒛𑒱𑒞𑒖𑒲𑒏 𑒥𑒔𑓂𑒔𑒰 𑒮𑒦 𑒮𑒹𑒯𑒼 𑒞𑒰𑓀𑒞𑓂𑒩𑒱𑒏 𑒫𑒱𑒠𑓂𑒨𑒰 𑒬𑒳𑒩𑒴 𑒏𑒋 𑒠𑒹𑒪𑒏। 𑒣𑒪𑓀𑒑𑒏 𑒢𑒲𑒔𑒰𑒿 𑒦𑒑𑒫𑒞𑒲- 𑒄 𑒬𑒥𑓂𑒠 𑒣𑓀𑒛𑒱𑒞𑒖𑒲 𑒫𑒰 𑒞𑒰𑓀𑒞𑓂𑒩𑒱𑒏𑒖𑒲𑒏 𑒥𑒔𑓂𑒔𑒰 𑒥𑒰𑒖𑒟𑒱 𑒂 𑒢𑒢𑓂𑒠 𑒣𑒪𑓀𑒑𑒏 𑒢𑒲𑒔𑒰𑒿 𑒦𑒑𑒫𑒞𑒲𑒏𑒹𑒿 𑒞𑒰𑒏𑒋 𑒪𑒰𑒑𑒟𑒱 । 𑒤𑒹𑒩 𑒣𑓀𑒛𑒱𑒞𑒖𑒲 𑒫𑒱𑒫𑒰𑒯-𑒠𑒰𑒢𑒏 𑒣𑓂𑒩𑒮𑓂𑒞𑒰𑒫 𑒁𑒣𑒢 𑒣𑒳𑒞𑓂𑒩-𑒣𑒳𑒞𑓂𑒩𑒲𑒏 𑒩𑒰𑒐𑒋 𑒪𑒑𑒪𑒰𑒯, 𑒢𑒢𑓂𑒠𑒏 𑒃𑓀𑒖𑒲𑒢𑒱𑒨𑒩 𑒦𑒰𑒞𑒱𑒖𑒮𑒿 𑒁𑒣𑒢 𑒣𑒳𑒞𑓂𑒩𑒲𑒏 𑒂 𑒁𑒣𑒢 𑒣𑒳𑒞𑓂𑒩𑒮𑒿 𑒢𑒢𑓂𑒠𑒏 𑒣𑒳𑒞𑓂𑒩𑒲𑒏 । 𑒂𑒥 𑒢𑒢𑓂𑒠𑒏 𑒧𑒼𑒢 𑒅𑒔𑒙𑒱 𑒑𑒹𑒪𑒢𑓂𑒯𑒱, 𑒨𑒰𑒫𑒞 𑒁𑒣𑒢𑒰 𑒡𑒩𑒱 𑒑𑒣 𑒮𑒲𑒧𑒱𑒞 𑒕𑒪𑒢𑓂𑒯𑒱 𑒞𑒰𑒫𑒞 𑒡𑒩𑒱 𑒮𑓂𑒫𑒲𑒏𑒰𑒩 𑒕𑒪𑒢𑓂𑒯𑒱 𑒧𑒳𑒠𑒰 𑒥𑒰𑒪-𑒥𑒔𑓂𑒔𑒰𑒏 𑒁𑒯𑒱𑒞 𑒯𑒳𑒢𑒏𑒰 𑒏𑒯𑒱𑒨𑒼 𑒮𑓂𑒫𑒲𑒏𑒰𑒩 𑒢𑒯𑒱 𑒦𑒹𑒪𑒢𑓂𑒯𑒱 । 𑒋𑒧𑓂𑒯𑒩 𑒑𑒰𑒧𑒏 𑒋𑒏-𑒠𑒴 𑒑𑒼𑒙 𑒢𑒢𑓂𑒠𑒏 𑒦𑒰𑒞𑒱𑒖 𑒂 𑒢𑒢𑓂𑒠𑒏 𑒦𑒻𑒨𑒰 𑒮𑒹𑒯𑒼 𑒞𑒰𑓀𑒞𑓂𑒩𑒱𑒏𑒏𑒹𑒿 𑒒𑒩𑒣𑒩 𑒖𑒰𑒋 𑒩𑒥𑒰𑒛𑓃𑒱 𑒠𑒹𑒪𑒐𑒱𑒢𑓂𑒯, 𑒮𑒹 𑒍𑒯𑒼 𑒁𑒢𑓂𑒞𑒧𑒹 𑒮𑓂𑒫𑒲𑒏𑒰𑒩 𑒏𑒋 𑒪𑒹𑒪𑒏 𑒖𑒹 𑒍𑒏𑒩𑒰 𑒏𑒼𑒢𑒼 𑒞𑓀𑒞𑓂𑒩-𑒧𑓀𑒞𑓂𑒩 𑒢𑒯𑒱 𑒁𑒥𑒻𑒞 𑒕𑒻𑒏 𑒂 𑒢𑒯𑒱𑒨𑒹 𑒍 𑒋𑒯𑒱 𑒫𑒱𑒡𑒱𑒮𑒿 𑒏𑒏𑒩𑒼 𑒮𑒖𑒰 𑒠𑒱𑒂 𑒮𑒏𑒻𑒞 𑒁𑒕𑒱 । 𑒢𑒢𑓂𑒠𑒮𑒿 𑒪𑒹𑒪 𑒣𑒰𑒃 𑒍 𑒒𑒳𑒩𑒰 𑒠𑒹𑒞 𑒍 𑒄 𑒑𑒣 𑒮𑒹𑒯𑒼 𑒏𑒯𑒪𑒏, 𑒧𑒳𑒠𑒰 𑒏𑒯𑒱𑒨𑒼 𑒣𑒰𑒃 𑒒𑒳𑒩𑒰 𑒢𑒯𑒱 𑒮𑒏𑒪 । 𑒢𑒢𑓂𑒠𑒏 𑒪𑒹𑒪 𑒄 𑒋𑒏𑒙𑒰 𑒣𑒻𑒒 𑒂𑒒𑒰𑒞 𑒕𑒪𑒢𑓂𑒯𑒱। 𑒦𑒏𑓂𑒭𑒲 𑒑𑒰𑒧𑒏 𑒍𑒯𑒱 𑒞𑒰𑓀𑒞𑓂𑒩𑒱𑒏𑒏 𑒒𑒩𑒏 𑒥𑒑𑒪𑒮𑒿 𑒖𑒰𑒟𑒱 𑒧𑒳𑒠𑒰 𑒢𑒯𑒱 𑒞𑒿 𑒫𑒻𑒯 𑒙𑒼𑒏𑒻𑒞 𑒕𑒪𑒢𑓂𑒯𑒱 𑒂 𑒢𑒯𑒱𑒨𑒹 𑒢𑒢𑓂𑒠 𑒍𑒏𑒩𑒰 𑒙𑒼𑒏𑒻𑒞 𑒕𑒪𑒐𑒱𑒢𑓂𑒯 । 𑒋𑒧𑓂𑒯𑒩 𑒢𑒢𑓂𑒠𑒏 𑒣𑒳𑒞𑓂𑒩𑒲𑒏 𑒫𑒱𑒫𑒰𑒯 𑒦𑒋 𑒑𑒹𑒪𑒢𑓂𑒯𑒱 𑒂 𑒢𑒢𑓂𑒠 𑒖𑒹𑒢𑒰 𑒮𑒦 𑒠𑒱𑒮𑒮𑒿 𑒂𑒮𑒩𑒰 𑒕𑒼𑒛𑓃𑒱 𑒥𑒱𑒢𑒰 𑒪𑒏𑓂𑒭𑓂𑒨𑒏 𑒖𑒱𑒢𑒑𑒲𑒏 𑒣𑒟𑒣𑒩 𑒂𑒑𑒰𑒿 𑒥𑒜𑓃𑒋 𑒪𑒑𑒪𑒰𑒯 ।
𑒣𑒋𑒩𑒹 𑒂𑒤𑒱𑒮 𑒑𑒹𑒢𑒰𑒃-𑒋𑒢𑒰𑒃, 𑒮𑒰𑒿𑒗𑒧𑒹 𑒮𑒼𑒔𑒻𑒞 𑒩𑒯𑒢𑒰𑒃 । 𑒏𑒱𑒕𑒳 𑒑𑓂𑒩𑓀𑒟 𑒮𑒦𑒏 𑒖𑒹 𑒣𑒚𑒢 𑒯𑒼𑒃𑒞 𑒕𑒪𑒢𑓂𑒯𑒱 𑒮𑒹𑒯𑒼 𑒥𑒢𑓂𑒢 𑒦𑒋 𑒑𑒹𑒪 𑒕𑒪𑒢𑓂𑒯𑒱 । 𑒥𑒔𑓂𑒔𑒰 𑒮𑒦𑒏 𑒮𑓀𑒑 𑒥𑒻𑒮𑒱 𑒏𑒋 𑒖𑒹 𑒣𑒜𑓃𑒻𑒞 𑒕𑒪𑒰𑒯 𑒮𑒹𑒯𑒼 𑒂𑒥 𑒏𑒯𑒰𑒿 𑒦𑓄 𑒣𑒥𑒻𑒞 𑒕𑒪𑒢𑓂𑒯𑒱 । 𑒤𑒑𑒳𑒂 𑒂 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒑𑒰𑒧 𑒖𑒹𑒥𑒰𑒏 𑒖𑒹 𑒏𑓂𑒩𑒧 𑒕𑒪𑒢𑓂𑒯𑒱 𑒮𑒹𑒯𑒼 𑒂𑒥 𑒙𑒴𑒙𑒱 𑒩𑒯𑒪 𑒕𑒪𑒢𑓂𑒯𑒱 । 𑒣𑒴𑒩𑒰 𑒣𑒩𑒱𑒫𑒰𑒩 𑒂𑒥 𑒧𑒰𑒞𑓂𑒩 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒑𑒰𑒧 𑒖𑒰𑒃𑒞 𑒩𑒯𑒟𑒱 । 𑒧𑒳𑒠𑒰 𑒢𑒢𑓂𑒠 𑒤𑒑𑒳𑒂𑒧𑒹 𑒁𑒮𑒑𑒩𑒹 𑒑𑒰𑒧 𑒖𑒹𑒢𑒰𑒃 𑒢𑒘𑒱 𑒥𑒱𑒮𑒩𑒻𑒞 𑒕𑒪𑒰𑒯 । 𑒋𑒯𑒱𑒢𑒰 𑒑𑒰𑒧 𑒖𑒰𑒃 𑒂𑒥𑒋𑒧𑒹 𑒢𑒢𑓂𑒠 𑒑𑒰𑒧𑒧𑒹 𑒋𑒏𑒙𑒰 𑒠𑒴𑒩𑒏 𑒣𑒲𑒮𑒰𑒏 𑒋𑒯𑒱𑒚𑒰𑒧 𑒖𑒰𑒋 𑒂𑒥𑒋 𑒪𑒑𑒪𑒰𑒯 । 𑒣𑒲𑒮𑒰 𑒏𑒰𑒪𑒲𑒏 𑒦𑒏𑓂𑒞 𑒩𑒯𑒟𑒱 । 𑒯𑒳𑒢𑒏𑒩 𑒑𑒰𑒧 𑒢𑒢𑓂𑒠𑒏 𑒑𑒰𑒧𑒏 𑒥𑒑𑒪𑒧𑒹 𑒕𑒪𑒢𑓂𑒯𑒱 । 𑒥𑒹𑒔𑒰𑒩𑒹 𑒢𑒲𑒏 𑒪𑒼𑒏 । 𑒢𑒢𑓂𑒠 𑒯𑒳𑒢𑒏𑒰 𑒪𑒑 𑒖𑒰𑒟𑒱 𑒂 𑒣𑓂𑒩𑒫𑒔𑒢 𑒮𑒳𑒢𑒟𑒱 । 𑒤𑒹𑒩 𑒯𑒳𑒢𑒏𑒰𑒮𑒿 𑒠𑒲𑒏𑓂𑒭𑒰 𑒮𑒹𑒯𑒼 𑒪𑒹𑒪𑒢𑓂𑒯𑒱 । 𑒏𑒰𑒪𑒲-𑒮𑒯𑒮𑓂𑒩𑒝𑒰𑒧𑒏 𑒣𑒰𑒚𑒏 𑒁𑒞𑒱𑒩𑒱𑒏𑓂𑒞 𑒂𑒩 𑒏𑒱𑒕𑒳 𑒢𑒘𑒱, 𑒢𑒢𑓂𑒠 𑒦𑒩𑒱 𑒠𑒱𑒢 𑒍𑒯𑒲 𑒣𑒰𑒚𑒧𑒹 𑒪𑒰𑒑𑒪 𑒩𑒯𑒟𑒱 । 𑒢𑒢𑓂𑒠𑒏 𑒧𑒼𑒢𑒧𑒹 𑒛𑒰𑒃𑒢-𑒖𑒼𑒑𑒱𑒢 𑒮𑒦𑒏 𑒫𑒱𑒔𑒰𑒩 𑒁𑒥𑒻𑒞 𑒩𑒯𑒻𑒞 𑒕𑒪𑒢𑓂𑒯𑒱 । 𑒂𑒮-𑒣𑒛𑓃𑒼𑒮𑒏 𑒪𑒼𑒏𑒏𑒹𑒿 𑒬𑓀𑒏𑒰𑒏 𑒠𑒵𑒭𑓂𑒙𑒱𑒋𑒿 𑒠𑒹𑒐𑒻𑒞 𑒩𑒯𑒻𑒞 𑒕𑒪𑒰𑒯 । 𑒥𑒔𑓂𑒔𑒰-𑒮𑒦𑒏 𑒮𑓀𑒑 𑒣𑒩𑒲𑒏𑓂𑒭𑒰 𑒠𑒱𑒂𑒥𑒨 𑒖𑒰𑒃𑒞 𑒕𑒪𑒰𑒯, 𑒬𑓀𑒏𑒱𑒞 𑒧𑒼𑒢𑒹 𑒖𑒹 𑒯𑒳𑒢𑒏𑒩 𑒏𑒼𑒢𑒼 𑒬𑒞𑓂𑒩𑒳 𑒯𑒳𑒢𑒏𑒩 𑒥𑒔𑓂𑒔𑒰 𑒮𑒦𑒏𑒹𑒿 𑒯𑒰𑒢𑒱 𑒢𑒘𑒱 𑒣𑒯𑒳𑒿𑒔𑒰𑒥𑒋 । 𑒧𑒳𑒠𑒰 𑒣𑒲𑒮𑒰𑒖𑒲𑒮𑒿 𑒠𑒲𑒏𑓂𑒭𑒰 𑒪𑒹𑒪𑒰𑒏 𑒥𑒰𑒠 𑒯𑒳𑒢𑒏𑒰𑒧𑒹 𑒫𑒱𑒩𑒏𑓂𑒞𑒱𑒖𑒢𑒱𑒞 𑒂𑒞𑓂𑒧𑒫𑒱𑒬𑓂𑒫𑒰𑒮 𑒂𑒋𑒪 𑒕𑒪𑒢𑓂𑒯𑒱 । 𑒤𑒹𑒩 𑒮𑒦𑒙𑒰 𑒏𑒰𑒖 𑒧𑒢𑓂𑒟𑒩 𑒑𑒞𑒱𑒮𑒿 𑒯𑒼𑒧𑒋 𑒪𑒰𑒑𑒪 । 𑒥𑒔𑓂𑒔𑒰 𑒮𑒦𑒏 𑒣𑒜𑓃𑒰𑒃-𑒪𑒱𑒐𑒰𑒃, 𑒍𑒏𑒩 𑒮𑒦𑒏 𑒢𑒼𑒏𑒩𑒲-𑒔𑒰𑒏𑒩𑒲 । 𑒫𑒻𑒯 𑒧𑒡𑓂𑒨𑒧 𑒫𑒩𑓂𑒑𑒏 𑒖𑒼𑒛𑓃𑒪 𑒣𑒰𑒃, 𑒫𑒻𑒯 𑒧𑒡𑓂𑒨𑒧𑒫𑒩𑓂𑒑𑒲𑒨 𑒂𑒏𑒰𑓀𑒏𑓂𑒭𑒰 । 𑒥𑒱𑒂𑒯-𑒠𑒰𑒢𑒏 𑒗𑒧𑒹𑒪𑒰 । 𑒒𑒩𑒏 𑒂 𑒥𑒰𑒯𑒩𑒏 𑒕𑒼𑒙-𑒧𑒼𑒙 𑒫𑒰𑒠-𑒫𑒱𑒫𑒰𑒠 । 𑒥𑒔𑓂𑒔𑒰 𑒮𑒦𑒏 𑒫𑒱𑒬𑓂𑒫𑒮𑒿 𑒣𑓂𑒩𑒞𑒱𑒨𑒼𑒑𑒱𑒞𑒰 𑒏𑒩𑒥𑒰𑒏 𑒮𑒰𑒯𑒮 𑒠𑒹𑒐𑒱 𑒢𑒢𑓂𑒠 𑒖𑒹𑒢𑒰 𑒂𑒩 𑒂𑒬𑓂𑒫𑒮𑓂𑒞 𑒦𑓄 𑒑𑒹𑒪 𑒕𑒪𑒰𑒯 । 𑒏𑒰𑒩𑒝 𑒒𑒩𑒮𑒿 𑒥𑒰𑒯𑒩 𑒏𑒯𑒱𑒨𑒼 𑒯𑒳𑒢𑒏𑒩 𑒥𑒔𑓂𑒔𑒰 𑒮𑒦 𑒢𑒱𑒏𑒪𑒻𑒞 𑒢𑒯𑒱 𑒩𑒯𑒋 । 𑒒𑒩 𑒁𑒋𑒪𑒰𑒏 𑒥𑒰𑒠 𑒠𑒼𑒮-𑒧𑒯𑒲𑒧 𑒮𑒦 𑒮𑒹𑒯𑒼 𑒢𑒯𑒱 । 𑒥𑒰𑒯𑒩𑒏 𑒠𑒳𑒢𑒱𑒨𑒰𑒿𑒮𑒿 𑒞𑒻𑒨𑒼 𑒣𑓂𑒩𑒞𑒱𑒨𑒼𑒑𑒱𑒞𑒰 𑒏𑒋 𑒩𑒯𑒪 𑒕𑒪 । 𑒣𑓂𑒩𑒞𑒱𑒨𑒼𑒑𑒱𑒞𑒰 𑒣𑒩𑒲𑒏𑓂𑒭𑒰𑒏 𑒪𑒱𑒐𑒱𑒞 𑒣𑒩𑒲𑒏𑓂𑒭𑒰𑒧𑒹 𑒅𑒞𑓂𑒞𑒲𑒩𑓂𑒝 𑒦𑓄 𑒖𑒰𑒃𑒞 𑒕𑒪𑒰𑒯 𑒧𑒳𑒠𑒰 𑒮𑒰𑒏𑓂𑒭𑒰𑒞𑓂𑒏𑒰𑒩𑒧𑒹 𑒦𑒰𑒭𑒰 𑒂 𑒣𑓂𑒩𑒰𑒢𑓂𑒞𑒏 𑒑𑒣 𑒂𑒥𑒱 𑒖𑒰𑒃𑒞 𑒕𑒪𑒢𑓂𑒯𑒱 । 𑒢𑒢𑓂𑒠 𑒥𑒔𑓂𑒔𑒰 𑒮𑒦𑒏 𑒏𑒯𑒱𑒨𑒼 𑒍𑒯𑒱 𑒞𑒩𑒯𑒏 𑒫𑒰𑒞𑒰𑒫𑒩𑒝𑒧𑒹 𑒣𑒰𑒪𑒢 𑒢𑒘𑒱 𑒏𑒋𑒢𑒹 𑒕𑒪𑒰𑒯 𑒮𑒹 𑒥𑒔𑓂𑒔𑒼 𑒮𑒦 𑒂𑒬𑓂𑒔𑒩𑓂𑒨𑒔𑒏𑒱𑒞 𑒦𑓄 𑒖𑒰𑒃𑒞 𑒕𑒪𑒰𑒯 𑒖𑒹 𑒄 𑒏𑒼𑒢 𑒢𑒫 𑒣𑒩𑒱𑒫𑒹𑒬 𑒁𑒕𑒱 । 𑒧𑒳𑒠𑒰 𑒤𑒹𑒩 𑒢𑒢𑓂𑒠𑒏 𑒠𑒳𑒢𑒴 𑒣𑒳𑒞𑓂𑒩 𑒢𑒼𑒏𑒩𑒲𑒧𑒹 𑒪𑒰𑒑𑒱 𑒑𑒹𑒪𑒰𑒯 । 𑒂𑒩𑒳𑒝𑒱𑒮𑒿 𑒢𑒢𑓂𑒠𑒏𑒹𑒿 𑒖𑒞𑒹𑒏 𑒣𑒻𑒒 𑒣𑒠𑒏 𑒂𑒬𑒰 𑒕𑒪𑒢𑓂𑒯𑒱 𑒮𑒹 𑒞𑒿 𑒍 𑒢𑒘𑒱 𑒣𑒰𑒥𑒱 𑒮𑒏𑒪 𑒩𑒯𑒟𑒱 𑒧𑒳𑒠𑒰 𑒦𑒰𑒩𑒞 𑒮𑒩𑒏𑒰𑒩𑒏 𑒥𑒲 𑒑𑓂𑒩𑒳𑒣𑒏 𑒢𑒼𑒏𑒩𑒲 𑒦𑒹𑒙𑒱 𑒑𑒹𑒪 𑒕𑒪𑒢𑓂𑒯𑒱 𑒯𑒳𑒢𑒏𑒰 । 𑒖𑒧𑒰𑒨 𑒮𑒹𑒯𑒼 𑒁𑒦𑒱𑒨𑒢𑓂𑒞𑒰 𑒕𑒪𑒐𑒱𑒢𑓂𑒯 𑒍 𑒮𑒹𑒯𑒼 𑒮𑒩𑒏𑒰𑒩𑒲 𑒮𑒹𑒫𑒰𑒧𑒹 𑒪𑒰𑒑𑒱 𑒑𑒹𑒪𑒰𑒯 । 𑒠𑒼𑒮𑒩 𑒥𑒹𑒙𑒰 𑒮𑒹𑒯𑒼 𑒥𑒻𑓀𑒏𑒧𑒹 𑒁𑒡𑒱𑒏𑒰𑒩𑒲 𑒥𑒢𑒱 𑒑𑒹𑒪𑒢𑓂𑒯𑒱 । 𑒮𑒱𑒢𑒹𑒧𑒰 𑒯𑒰𑒪𑒧𑒹 𑓑𑓐 𑒥𑒩𑒐𑒮𑒿 𑒮𑒱𑒢𑒹𑒧𑒰 𑒢𑒯𑒱 𑒠𑒹𑒐𑒢𑒹 𑒩𑒯𑒟𑒱 𑒢𑒢𑓂𑒠𑒏 𑒥𑒔𑓂𑒔𑒰 𑒮𑒦 । 𑒣𑒙𑒢𑒰𑒏 𑒣𑒴𑒖𑒰𑒏 𑒧𑒹𑒪𑒰, 𑒣𑒙𑒢𑒠𑒹𑒫𑒲, 𑒑𑒼𑒪𑒒𑒩 𑒏𑒱𑒕𑒳 𑒢𑒯𑒱 𑒠𑒹𑒐𑒢𑒹 𑒕𑒪𑒰𑒯 𑒢𑒢𑓂𑒠𑒏 𑒥𑒔𑓂𑒔𑒰 𑒮𑒦 । 𑒋𑒯𑒱 𑒫𑒱𑒭𑒨𑒣𑒩 𑒣𑒯𑒱𑒢𑒹 𑒞𑒿 𑒪𑒼𑒏 𑒯𑒿𑒮𑒲 𑒏𑒩𑒢𑓂𑒯𑒱 𑒧𑒳𑒠𑒰 𑒥𑒰𑒠𑒧𑒹 𑒮𑒦𑒏𑒹𑒿 𑒪𑒰𑒑𑒋 𑒖𑒹 𑒄𑒋𑒯 𑒞𑒿 𑒢𑒢𑓂𑒠𑒏 𑒣𑒩𑒱𑒫𑒰𑒩𑒏 𑒫𑒱𑒬𑒱𑒭𑓂𑒙𑒞𑒰 𑒞𑒿 𑒢𑒯𑒱 𑒥𑒢𑒱 𑒑𑒹𑒪 𑒁𑒕𑒱 ? 𑒢𑒢𑓂𑒠𑒏 𑒒𑒩𑒧𑒹 𑒙𑒹𑒪𑒲𑒫𑒱𑒖𑒢 𑒮𑒹𑒯𑒼 𑒢𑒯𑒱 𑒕𑒪𑒢𑓂𑒯𑒱 𑒄 𑒮𑒹𑒯𑒼 𑒪𑒼𑒏 𑒮𑒦𑒏 𑒪𑒹𑒪 𑒂𑒬𑓂𑒔𑒩𑓂𑒨𑒏 𑒫𑒱𑒭𑒨 𑒕𑒪 । 𑒢𑒢𑓂𑒠 𑒂 𑒯𑒳𑒢𑒏𑒩 𑒮𑒧𑓂𑒣𑒴𑒩𑓂𑒝 𑒣𑒩𑒱𑒫𑒰𑒩 𑒦𑒰𑒩𑒞𑒲𑒨 𑒙𑒹𑒪𑒲𑒫𑒱𑒖𑒢𑒣𑒩 𑒣𑓂𑒩𑒮𑒰𑒩𑒱𑒞 𑒦𑒹𑒪 𑒩𑒰𑒧𑒰𑒨𑒝 𑒡𑒰𑒩𑒰𑒫𑒰𑒯𑒱𑒏𑒏 𑒋𑒏𑒼𑒙𑒰 𑒋𑒣𑒲𑒮𑒼𑒛 𑒢𑒯𑒱 𑒠𑒹𑒐𑒢𑒹 𑒕𑒪𑒰𑒯 । 𑒏𑒰𑒩𑒝 𑒢𑒢𑓂𑒠𑒏 𑒒𑒩𑒧𑒹 𑒙𑒹𑒪𑒲𑒫𑒱𑒖𑒢 𑒕𑒪𑒢𑓂𑒯𑒱 𑒢𑒯𑒱 𑒂 𑒏𑓂𑒨𑒼 𑒑𑒼𑒙𑒹 𑒠𑒼𑒮𑒩𑒰𑒏 𑒒𑒩 𑒍𑒯𑒳𑒢𑒰 𑒢𑒯𑒱 𑒖𑒰𑒃𑒞 𑒩𑒯𑒟𑒱, 𑒙𑒲.𑒫𑒲. 𑒠𑒹𑒐𑒋 𑒪𑒹𑒪 𑒖𑒋𑒥𑒰𑒏 𑒞𑒿 𑒣𑓂𑒩𑒬𑓂𑒢𑒹 𑒢𑒯𑒱 𑒕𑒪𑒋 । 𑒢𑒼𑒏𑒩𑒲 𑒣𑒏𑒛𑓃𑒪𑒰𑒏 𑒥𑒰𑒠 𑒂𑒩𑒳𑒝𑒱 𑒒𑒩𑒧𑒹 𑒋𑒏𑒙𑒰 𑒙𑒹𑒪𑒲𑒫𑒱𑒖𑒢 𑒁𑒢𑒪𑒢𑓂𑒯𑒱 । 𑒍𑒞𑒋 𑒧𑒯𑒰𑒦𑒰𑒩𑒞𑒏 𑒣𑓂𑒩𑒔𑒰𑒩 𑒠𑒹𑒐𑒱 𑒢𑒢𑓂𑒠 𑒋𑒏 𑒠𑒱𑒢 𑒣𑒞𑓂𑒢𑒲𑒏𑒹𑒿 𑒏𑒯𑒪𑒐𑒱𑒢𑓂𑒯-
“𑒁𑒣𑒢 𑒙𑒲.𑒫𑒲.𑒧𑒹 𑒧𑒯𑒰𑒦𑒰𑒩𑒞 𑒏𑒱𑒋𑒏 𑒢𑒯𑒱 𑒠𑒻𑒞 𑒁𑒕𑒱 ?”
“𑒁𑒣𑒢𑒰 𑒙𑒲.𑒫𑒲.𑒧𑒹 𑒐𑒰𑒪𑒲 𑒛𑒲.𑒛𑒲.𑓑 𑒁𑒕𑒱 । 𑒆𑒣𑒩𑒧𑒹 𑒋𑒏 𑒑𑒼𑒙𑒹 𑒩𑒯𑒻𑒞 𑒕𑒟𑒱 𑒮𑒹 𑒏𑒯𑒻𑒞 𑒩𑒯𑒟𑒱 𑒖𑒹 𑒯𑒳𑒢𑒏𑒰 𑒒𑒩𑒧𑒹 𑒥𑒹𑒙𑒰 𑒋𑒏𑒙𑒰 𑓓𑓐𑓐 𑒙𑒰𑒏𑒰𑒧𑒹 𑒧𑒬𑒲𑒢 𑒁𑒢𑒪𑒢𑓂𑒯𑒱-𑒋 । 𑒍𑒏𑒩𑒰 𑒙𑒲.𑒫𑒲.𑒧𑒹 𑒪𑒑𑒰 𑒠𑒹𑒪𑒰𑒮𑒿 𑒛𑒲.𑒛𑒲.𑒧𑒹𑒙𑓂𑒩𑒼 𑒁𑒥𑒻𑒞 𑒕𑒻𑒏 । 𑒍𑒯𑒲𑒧𑒹 𑒧𑒯𑒰𑒦𑒰𑒩𑒞 𑒁𑒥𑒻𑒞 𑒕𑒻𑒏 । 𑒥𑒹𑒙𑒰 𑒞𑒲𑒢 𑒯𑒖𑒰𑒩𑒧𑒹 𑒙𑒲.𑒫𑒲.𑒏𑒲𑒢𑒱 𑒠𑒹𑒪𑒢𑓂𑒯𑒱 । 𑒂𑒥 𑒞𑒲𑒢 𑒮𑒋 𑒙𑒰𑒏𑒰 𑒁𑒯𑒰𑒿 𑒪𑒑𑒰 𑒏𑒋 𑒍 𑒧𑒬𑒲𑒢 𑒁𑒑𑒱𑒪𑒰 𑒧𑒰𑒮𑒏 𑒠𑒩𑒧𑒰𑒯𑒰𑒮𑒿 𑒂𑒢𑒱 𑒪𑒹𑒥”।
“𑒖𑒱𑒢𑒏𑒩 𑒙𑒲.𑒫𑒲.𑒕𑒢𑓂𑒯𑒱 𑒮𑒻𑒯 𑒞𑒏𑒩 𑒧𑒬𑒲𑒢𑒼 𑒁𑒢𑒞𑒰𑒯”।
𑒂𑒩𑒳𑒝𑒱𑒏𑒹𑒿 𑒋𑒯𑒱 𑒑𑒣𑒏 𑒖𑒐𑒢 𑒣𑒞𑒰 𑒪𑒰𑒑𑒪𑒢𑓂𑒯𑒱 𑒞𑒿 𑒯𑒳𑒢𑒏𑒰 𑒯𑒿𑒮𑒲 𑒪𑒰𑒑𑒱 𑒑𑒹𑒪𑒢𑓂𑒯𑒱 । 𑒁𑒑𑒱𑒪𑒹 𑒠𑒱𑒢 𑒍𑒯𑒱 𑒧𑒬𑒲𑒢𑒏𑒹𑒿 𑒪𑒑𑒥𑒹𑒪𑒢𑓂𑒯𑒱 । 𑒁𑒑𑒱𑒪𑒰 𑒩𑒫𑒱 𑒣𑒱𑒞𑒰𑒖𑒲 𑒖𑒐𑒢 𑒧𑒯𑒰𑒦𑒰𑒩𑒞 𑒠𑒹𑒐𑒪𑒢𑓂𑒯𑒱 𑒞𑒿 𑒮𑒦 𑒑𑒼𑒙𑒹 𑒥𑒛𑓂𑒛 𑒣𑓂𑒩𑒮𑒢𑓂𑒢 𑒦𑒹𑒪𑒰𑒯 । 𑒍𑒯𑒲 𑒧𑒰𑒮𑒧𑒹 𑒂𑒩𑒳𑒝𑒱 𑒂𑒩𑓂𑒧𑓂𑒮 𑒂𑒏𑒱 𑒯𑒟𑒱𑒨𑒰𑒩𑒏 𑒙𑓂𑒩𑒹𑒢𑒱𑓀𑒑 𑒪𑒹𑒪 𑒣𑒙𑒢𑒰𑒮𑒿 𑒥𑒰𑒯𑒩 𑒑𑒹𑒪𑒰𑒯 । 𑒋𑒯𑒱 𑒋𑒏 𑒧𑒰𑒮𑒏 𑒙𑓂𑒩𑒹𑒢𑒱𑓀𑒑𑒏 𑒥𑒲𑒔𑒧𑒹 𑒠𑒳𑒩𑓂𑒑𑒰 𑒣𑒴𑒖𑒰 𑒣𑒛𑓃𑒻𑒞 𑒩𑒯𑒋 । 𑒣𑒱𑒞𑒰𑒖𑒲 𑒣𑒯𑒱𑒪 𑒥𑒹𑒩 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒑𑒰𑒧 𑒢𑒯𑒱 𑒑𑒹𑒪 𑒩𑒯𑒟𑒱। 𑒂𑒩𑒳𑒝𑒱 𑒮𑒹𑒯𑒼 𑒥𑒲𑒔𑒧𑒹 𑒬𑒳𑒏𑓂𑒩-𑒬𑒢𑒱-𑒩𑒫𑒱𑒏 𑒠𑒳𑒩𑓂𑒑𑒰𑒣𑒴𑒖𑒰𑒏 𑒕𑒳𑒙𑓂𑒙𑒲 𑒠𑒹𑒐𑒱 𑒣𑒙𑒢𑒰 𑒂𑒥𑒱 𑒑𑒹𑒪𑒰𑒯 । 𑒩𑒫𑒱 𑒠𑒱𑒢 𑒩𑒯𑒋 । 𑒧𑒯𑒰𑒦𑒰𑒩𑒞 𑒔𑒪𑒱 𑒩𑒯𑒪 𑒩𑒯𑒋 । 𑒂𑒩𑒳𑒝𑒱𑒏 𑒋𑒏𑒹𑒙𑒰 𑒮𑓀𑒑𑒲 𑒩𑒯𑒢𑓂𑒯𑒱 । 𑒍𑒏𑒩𑒰 𑒮𑓀𑒑𑒹 𑒂𑒩𑒳𑒝𑒱 𑒥𑒱𑒢 𑒐𑒹𑒢𑒹-𑒣𑒲𑒢𑒹 𑒏𑒼𑒢𑒼 𑒏𑒰𑒖𑒮𑒿 𑒥𑒰𑒯𑒩 𑒑𑒹𑒪 𑒕𑒪𑒰𑒯 । 𑒮𑓀𑒑𑒲𑒏 𑒮𑓀𑒑𑒹 𑒒𑒩𑒣𑒩 𑒁𑒋𑒪𑒰𑒯। 𑒧𑒰𑒿 𑒠𑒳𑒢𑒴 𑒑𑒼𑒙𑒹 𑒪𑒹𑒪 𑒐𑒹𑒢𑒰𑒃 𑒁𑒢𑒪𑒐𑒱𑒢𑓂𑒯 ।
“𑒥𑒰𑒥𑒴𑒖𑒲 𑒐𑒰 𑒪𑒹𑒪𑒟𑒱”।
“𑒯𑒿 𑒞𑓄 । 𑒞𑒲𑒢 𑒥𑒖𑒻𑒞 𑒁𑒕𑒱 । 𑒧𑒯𑒰𑒦𑒰𑒩𑒞 𑒠𑒹𑒐𑒪𑒰𑒏 𑒥𑒰𑒠 𑒐𑒰 𑒏𑒋 𑒮𑒴𑒞𑒪 𑒕𑒟𑒱 । 𑒁𑒯𑒰𑒿 𑒮𑒦 𑒐𑒰𑒆, 𑒞𑒰𑒫𑒞 𑒯𑒧 𑒯𑒳𑒢𑒏𑒰 𑒔𑒰𑒯 𑒥𑒢𑒰 𑒏𑓄 𑒠𑒻𑒞 𑒕𑒱𑒨𑒢𑓂𑒯𑒱, 𑒞𑒐𑒢𑒹 𑒢𑒱𑒢𑓂𑒢 𑒙𑒳𑒙𑒞𑒢𑓂𑒯𑒱”।
𑒂𑒩𑒳𑒝𑒱 𑒠𑒴-𑒞𑒲𑒢 𑒏𑒾𑒩 𑒐𑒰 𑒏𑓄 𑒅𑒚𑒱 𑒑𑒹𑒪𑒰𑒯 । 𑒯𑒳𑒢𑒏𑒩 𑒮𑓀𑒑𑒲 𑒏𑒰𑒩𑒝 𑒣𑒳𑒕𑒪𑒐𑒱𑒢𑓂𑒯-
“𑒏𑒲 𑒦𑒹𑒪”?
“𑒣𑒞𑒰 𑒢𑒘𑒱। 𑒒𑒥𑒩𑒰𑒯𑒙𑒱 𑒦𑓄 𑒩𑒯𑒪 𑒁𑒕𑒱”।
“𑒏𑒰𑒪𑓂𑒯𑒱 𑒙𑓂𑒩𑒹𑒢𑒱𑓀𑒑𑒣𑒩 𑒖𑒋𑒥𑒰𑒏 𑒁𑒕𑒱 𑒢𑒹 । 𑒞𑒰𑒯𑒱 𑒠𑓂𑒫𑒰𑒩𑒹”।
“𑒣𑒞𑒰 𑒢𑒘𑒱”।
𑒞𑒰𑒫𑒞 𑒦𑒲𑒞𑒩𑒮𑒿 𑒁𑒥𑒰𑒖 𑒂𑒋𑒪 । 𑒮𑒦 𑒏𑓂𑒨𑒼 𑒠𑒾𑒑𑒪𑒰𑒯।
“𑒏𑒲 𑒦𑒹𑒪 𑒧𑒰𑒿”।
“𑒠𑒹𑒐𑒴 𑒢𑒹 । 𑒔𑒰𑒯 𑒂𑒢𑒱 𑒏𑓄 𑒠𑒹𑒪𑒱𑒨𑒢𑓂𑒯𑒱-𑒯𑒿, 𑒧𑒳𑒠𑒰 𑒂𑒿𑒐𑒱 𑒐𑒼𑒪𑒱 𑒏𑓄 𑒠𑒹𑒐𑒱𑒨𑒹 𑒢𑒘𑒱 𑒩𑒯𑒪 𑒕𑒟𑒱 । 𑒂𑒢 𑒠𑒱𑒢 𑒞𑒿 𑒔𑒰𑒯𑒏 𑒢𑒰𑒧 𑒮𑒳𑒢𑒱𑒞𑒹 𑒠𑒹𑒩𑒲 𑒅𑒚𑒱 𑒏𑒋 𑒥𑒻𑒮𑒱 𑒖𑒰𑒃𑒞 𑒕𑒪𑒰𑒯”।
𑒢𑒢𑓂𑒠𑒏 𑒬𑒩𑒲𑒩 𑒁𑒏𑒛𑓃𑒱 𑒑𑒹𑒪 𑒕𑒪𑒢𑓂𑒯𑒱 । 𑒏𑒢𑓂𑒢𑒰-𑒩𑒼𑒯𑒙 𑒮𑒳𑒢𑒱 𑒆𑒣𑒩𑒧𑒹 𑒩𑒯𑒢𑒱𑒯𑒰𑒩 𑒋𑒏𑒙𑒰 𑒛𑒰𑒏𑓂𑒙𑒩 𑒂𑒪𑒰 𑒪𑓄 𑒂𑒋𑒪 𑒕𑒪𑒰𑒯 𑒂 𑒢𑒢𑓂𑒠𑒏 𑒧𑒵𑒞𑓂𑒨𑒳𑒏 𑒒𑒼𑒭𑒝𑒰 𑒏𑒋 𑒠𑒹𑒢𑒹 𑒩𑒯𑒟𑒱। 𑒂𑒩𑒳𑒝𑒱 𑒁𑒫𑒰𑒏 𑒑𑒳𑒧𑓂𑒧 𑒦𑒹𑒪 𑒚𑒰𑒜𑓃 𑒦𑓄 𑒑𑒹𑒪 𑒩𑒯𑒟𑒱 । 𑒯𑒳𑒢𑒏𑒩 𑒮𑓀𑒑𑒲 𑒢𑒘𑒱 𑒖𑒰𑒢𑒱 𑒏𑒼𑒢 𑒥𑒰𑒙𑒹 𑒁𑒣𑒢 𑒮𑓀𑒑𑒲 𑒮𑒦𑒏𑒹𑒿 𑒥𑒖𑒰 𑒏𑓄 𑒪𑓄 𑒁𑒢𑒢𑒹 𑒕𑒪𑒰𑒯 । 𑒮𑒦𑒏 𑒛𑓂𑒨𑒴𑒙𑒲 𑒪𑒑𑒰 𑒠𑒹𑒪𑒢𑓂𑒯𑒱 । 𑒏𑒏𑒩𑒼 𑒑𑒹𑒙𑒣𑒩 𑒞𑒿 𑒏𑒏𑒩𑒼 𑒛𑓂𑒩𑒰𑒃𑓀𑒑 𑒩𑒴𑒧𑒧𑒹 । 𑒪𑒼𑒏𑒏 𑒦𑒲𑒛𑓃 𑒪𑒰𑒑𑒋 𑒪𑒰𑒑𑒪 𑒕𑒪 । 𑒯𑒳𑒢𑒏𑒩 𑒮𑓀𑒑𑒲 𑒮𑒦 𑒮𑒧𑒰𑒢 𑒥𑒱𑒕𑒰𑒍𑒢𑒧𑒹 𑒮𑒧𑒹𑒙𑒱 𑒥𑒱𑒕𑒾𑒢𑒰 𑒧𑒼𑒛𑓃𑒱 𑒂𑒩𑒳𑒝𑒱 𑒪𑒑 𑒁𑒋𑒪𑒰𑒯 ।
“𑒏𑓂𑒩𑒱𑒨𑒰-𑒏𑒩𑓂𑒧𑒏 𑒞𑒻𑒨𑒰𑒩𑒲 𑒏𑒩𑒋 𑒣𑒛𑓃𑒞 𑒂𑒩𑒳𑒝𑒱 । 𑒥𑒰𑒿𑒮𑒒𑒰𑒙 𑒡𑒩𑒱 𑒪𑓄 𑒖𑒋𑒥𑒰𑒏 𑒫𑓂𑒨𑒫𑒮𑓂𑒟𑒰 𑒏𑒩𑒋 𑒣𑒛𑓃𑒞 । 𑒯𑒧 𑒖𑒰𑒃 𑒕𑒲 𑒑𑒰𑒛𑓃𑒲𑒏 𑒫𑓂𑒨𑒫𑒮𑓂𑒟𑒰 𑒏𑒩𑒋”।
“𑒥𑒰𑒥𑒴𑒖𑒲𑒏𑒹𑒿 𑒑𑒰𑒧𑒮𑒿 𑒥𑒛𑓂𑒛 𑒪𑒑𑒰𑒫 𑒩𑒯𑒢𑓂𑒯𑒱। 𑒏𑒯𑒻𑒞 𑒩𑒯𑒟𑒱 𑒖𑒹 𑒁𑒑𑒱𑒪𑒰 𑒮𑒰𑒞 𑒖𑒢𑓂𑒧 𑒡𑒩𑒱 𑒢𑒑𑒩 𑒒𑒳𑒧𑒱 𑒏𑒋 𑒢𑒯𑒱 𑒂𑒋𑒥 । 𑒍𑒢𑒰 𑒥𑒰 𑒏𑒹𑒩 𑒠𑒰𑒯 𑒮𑓀𑒮𑓂𑒏𑒰𑒩 𑒥𑒰𑒥𑒴𑒖𑒲 𑒣𑒙𑒢𑒹𑒧𑒹 𑒏𑒋𑒢𑒹 𑒩𑒯𑒟𑒱 । 𑒧𑒳𑒠𑒰 𑒍𑒯𑒱 𑒮𑒧𑒨𑒧𑒹 𑒣𑒙𑒢𑒰𑒏 𑒄 𑒑𑓀𑒑𑒰-𑒥𑓂𑒩𑒱𑒖 𑒢𑒯𑒱 𑒩𑒯𑒋 । 𑒂𑒥 𑒞𑒿 𑒑𑒰𑒛𑓃𑒲𑒮𑒿 𑒯𑒱𑒢𑒏𑒰 𑒪𑓄 𑒑𑒹𑒪 𑒖𑒰 𑒮𑒏𑒻𑒞 𑒁𑒕𑒱, 𑒞𑒐𑒢 𑒠𑒰𑒯-𑒮𑓀𑒮𑓂𑒏𑒰𑒩 𑒦𑒼𑒩𑒧𑒹 𑒑𑒰𑒧𑒹𑒧𑒹 𑒦𑓄 𑒖𑒋𑒞”।
“𑒯𑒧 𑒫𑓂𑒨𑒫𑒮𑓂𑒟𑒰 𑒏𑒩𑒻𑒞 𑒕𑒲”।
𑒂𑒩𑒳𑒝𑒱𑒏 𑒍 𑒮𑓀𑒑𑒲 𑒯𑒢𑒳𑒧𑒰𑒢𑒹 𑒕𑒪 । 𑒏𑒢𑒲 𑒏𑒰𑒪𑒧𑒹 𑒑𑒰𑒛𑓃𑒲 𑒂𑒥𑒱 𑒑𑒹𑒪 । 𑒩𑒮𑓂𑒞𑒰𑒧𑒹 𑒣𑒳𑒪𑒱𑒮 𑒪𑒰𑒬 𑒠𑒹𑒐𑒱 𑒩𑒼𑒏𑒞 𑒮𑒹 𑒮𑒧𑒮𑓂𑒨𑒰 𑒂𑒋𑒪।
“𑒁𑒯𑒰𑒿 𑒪𑒑 𑒫𑒩𑓂𑒠𑒲 𑒥𑒪𑒰 𑒣𑒩𑒱𑒔𑒨-𑒣𑒞𑓂𑒩 𑒞𑒿 𑒯𑒋𑒞 𑒢𑒹”।
“𑒯𑒿, 𑒁𑒕𑒱”।
“𑒍𑒢𑒰 𑒠𑒱𑒏𑓂𑒏𑒞 𑒁𑒋𑒥𑒰𑒏 𑒞𑒿 𑒢𑒯𑒱 𑒔𑒰𑒯𑒲 𑒧𑒳𑒠𑒰 𑒖𑓂𑒨𑒼𑒿 𑒩𑒮𑓂𑒞𑒰𑒧𑒹 𑒣𑒳𑒪𑒱𑒮 𑒙𑒼𑒏𑒋 𑒞𑒿 𑒠𑒹𑒐𑒰 𑒠𑒹𑒥𑒋”।
𑒒𑒩 𑒐𑒰𑒪𑒲 𑒦𑓄 𑒑𑒹𑒪 । 𑒞𑒰𑒪𑒰 𑒪𑒰𑒑𑒱 𑒑𑒹𑒪 । 𑒠𑒳𑒢𑒴 𑒦𑒰𑒋 𑒂 𑒧𑒰𑒋 𑒧𑒵𑒞 𑒣𑒱𑒞𑒰𑒏 𑒮𑓀𑒑 𑒬𑒳𑒏𑓂𑒪𑒣𑒏𑓂𑒭𑒏 𑒍𑒯𑒱 𑒩𑒰𑒞𑒱𑒧𑒹 𑒣𑒙𑒢𑒰 𑒢𑒑𑒩𑒮𑒿 𑒢𑒱𑒏𑒪𑒱 𑒑𑒹𑒪𑒰𑒯 । 𑒑𑓀𑒑𑒰-𑒥𑓂𑒩𑒱𑒖𑒣𑒩 𑒑𑒰𑒛𑓃𑒲 𑒚𑒰𑒜𑓃 𑒦𑒹𑒪 । 𑒧𑒵𑒞 𑒫𑓂𑒨𑒏𑓂𑒞𑒱𑒏 𑒋𑒏𑒙𑒰 𑒮𑒴𑒔𑒲 𑒙𑒰𑒿𑒑𑒪 𑒕𑒪, 𑒖𑒼𑒢-𑒧𑒖𑒠𑒴𑒩𑒏 । 𑒄 𑒮𑒦 𑒣𑒳𑒪 𑒥𑒢𑒹𑒥𑒰𑒧𑒹 𑒐𑒮𑒱 𑒏𑓄 𑒧𑒩𑒱 𑒑𑒹𑒪 𑒕𑒪𑒰𑒯 । 𑒂𑒩𑒳𑒝𑒱 𑒑𑒰𑒛𑓃𑒲𑒮𑒿 𑒅𑒞𑒩𑒱 𑒮𑒴𑒔𑒲 𑒠𑒹𑒐𑒻𑒞 𑒕𑒟𑒱 ।
𑒅𑒩𑒰𑒿𑒫, 𑒗𑒰 𑒂 𑒂𑒩 𑒧𑒰𑒩𑒞𑒹 𑒩𑒰𑒮 𑒧𑒖𑒠𑒴𑒩। 𑒋𑒏𑒙𑒰 “𑒗𑒰” 𑒅𑒣𑒰𑒡𑒱𑒏 𑒧𑒖𑒠𑒴𑒩, 𑒥𑒹𑒬𑒲 𑒂𑒠𑒱𑒫𑒰𑒮𑒲 𑒅𑒣𑒰𑒡𑒱𑒏! 𑒥𑒯𑒳𑒞 𑒩𑒰𑒮 𑒧𑒴𑒃𑒪 𑒕𑒪𑒰𑒯, 𑒏𑒞𑒰𑒏 𑒮𑒻𑒏𑒛𑓃𑒰𑒧𑒹 𑒧𑒳𑒠𑒰 𑒩𑒰𑒞𑒰-𑒩𑒰𑒞𑒱 𑒣𑒳𑒪𑒱𑒮𑒏 𑒧𑒠𑒞𑒱𑒮𑒿 𑒁𑒦𑒱𑒨𑒢𑓂𑒞𑒰-𑒚𑒱𑒏𑒹𑒠𑒰𑒩𑒮𑒦 𑒪𑒯𑒰𑒮 𑒦𑒮𑒱𑒨𑒰 𑒠𑒻𑒞 𑒕𑒪𑒰𑒯। 𑓓𑓐 𑒑𑒼𑒙𑒹𑒏 𑒢𑒰𑒧 𑒧𑒳𑒠𑒰 𑒕𑒪 𑒋𑒞𑒋 ।
“𑒣𑒰𑒨𑒰𑒏 𑒆𑒣𑒩𑒮𑒿 𑒒𑒳𑒩𑒱𑒨𑒰-𑒒𑒳𑒩𑒱𑒨𑒰 𑒏𑓄 𑒐𑒮𑒻𑒞 𑒧𑒖𑒠𑒴𑒩, 𑒏𑒞𑒹𑒏 𑒚𑒰𑒧 𑒯𑒧 𑒮𑒴𑒔𑒢𑒰 𑒠𑒹𑒢𑒹 𑒩𑒯𑒲, 𑒏𑒼𑒢𑒼 𑒮𑒳𑒢𑒥𑒰𑒯𑒱 𑒢𑒘𑒱 𑒦𑒹𑒪 । 𑒍𑒏𑒩𑒰 𑒮𑒦𑒏𑒹𑒿 𑒢𑓂𑒨𑒰𑒨 𑒢𑒘𑒱 𑒠𑒱𑒂 𑒮𑒏𑒪𑒯𑒳𑒿 𑒞𑒿 𑒪𑒑𑒻𑒞 𑒁𑒕𑒱 𑒖𑒹 𑒠𑒼𑒭𑒲 𑒯𑒧𑒯𑒴 𑒕𑒲”। 𑒢𑒢𑓂𑒠𑒏 𑒛𑒰𑒨𑒩𑒲𑒏 𑒄 𑒁𑓀𑒬 𑒋𑒏 𑒥𑒹𑒩 𑒂𑒩𑒳𑒝𑒱 𑒣𑒜𑓃𑒢𑒹 𑒕𑒪𑒰𑒯 । 𑒍 𑒮𑒼𑒔𑒪𑒢𑓂𑒯𑒱 𑒖𑒹 𑒔𑒪𑒴 𑒒𑒳𑒩𑒱 𑒏𑓄 𑒂𑒋𑒥 𑒞𑒐𑒢 𑒥𑒰𑒥𑒴𑒖𑒲𑒏 𑒛𑒰𑒨𑒩𑒲 𑒞𑒰𑒏𑒥, 𑒏𑒞𑒋 𑒕𑒢𑓂𑒯𑒱।
𑒤𑒹𑒩 𑒑𑒰𑒛𑓃𑒲 𑒂𑒑𑒰𑒿 𑒥𑒜𑓃𑒪 । 𑒑𑓀𑒑𑒰 𑒥𑓂𑒩𑒱𑒖 𑒣𑒰𑒕𑒰𑒿 𑒕𑒳𑒙𑒱 𑒑𑒹𑒪 । 𑒂𑒑𑒰𑒿 𑒑𑓀𑒑𑒰-𑒥𑓂𑒩𑒱𑒖 𑒏𑒰𑒪𑒼𑒢𑒲 𑒂𑒋𑒪 । 𑒂𑒩𑒳𑒝𑒱𑒏 𑒥𑒰𑒪𑒏𑒟𑒰𑒏 𑒮𑒰𑒏𑓂𑒭𑒲 । 𑒮𑓂𑒏𑒴𑒪, 𑒒𑒩 𑒂 𑒐𑒹𑒪𑒹𑒥𑒰𑒏 𑒧𑒻𑒠𑒰𑒢। 𑒮𑒙𑒪𑒹 𑒑𑓀𑒑𑒰 𑒥𑓂𑒩𑒱𑒖𑒏 𑒑𑒼𑒛𑒰𑒢 । 𑒏𑒞𑒰𑒏 𑒥𑒹𑒩 𑒔𑒼𑒩𑒱𑒏 𑒮𑒧𑒰𑒢 𑒙𑓂𑒩𑒏𑒮𑒿 𑒋𑒞𑒋𑒮𑒿 𑒢𑒱𑒏𑒪𑒻𑒞 𑒕𑒪, 𑒋𑒏𑒰𑒡 𑒥𑒹𑒩 𑒡𑒩𑒰𑒨𑒪 𑒕𑒪 । 𑒥𑒛𑓃𑒏𑒰 𑒡𑒩𑒰𑒋𑒪 𑒙𑓂𑒩𑒏, 𑒏𑒞𑒹𑒏 𑒔𑒏𑓂𑒏𑒰 𑒥𑒪𑒰, 𑒪𑒼𑒏 𑒑𑒳𑒧𑒙𑒲𑒪𑒑 𑒧𑒹𑒪𑒰 𑒖𑒹𑒢𑒰 𑒠𑒹𑒐𑒋 𑒣𑒯𑒳𑒿𑒔𑒻𑒞 𑒕𑒪𑒋 । 𑒥𑒔𑓂𑒔𑒰-𑒮𑒦 𑒙𑓂𑒩𑒏𑒏 𑒔𑒏𑓂𑒏𑒰 𑒑𑒢𑒻𑒞 𑒕𑒪𑒰𑒯, 𑓑𑓔 𑒔𑒏𑓂𑒏𑒰 𑒥𑒪𑒰 𑒁𑒕𑒱 𑒫𑒰 𑓑𑓖 𑒔𑒏𑓂𑒏𑒰 𑒥𑒪𑒰।
𑒖𑒲𑒫𑒢𑒏 𑒣𑓂𑒩𑒞𑒱𑒨𑒼𑒑𑒱𑒞𑒰𑒧𑒹 𑒮𑒦𑒙𑒰 𑒖𑒹𑒢𑒰 𑒥𑒱𑒮𑒩𑒱 𑒑𑒹𑒪 𑒕𑒪𑒰𑒯 𑒂𑒩𑒳𑒝𑒱 । 𑒦𑓂𑒩𑒭𑓂𑒙𑒰𑒔𑒰𑒩, 𑒖𑒼𑒢-𑒥𑒼𑒢𑒱𑒯𑒰𑒩𑒏 𑒧𑒵𑒞𑓂𑒨𑒳, 𑒣𑒱𑒞𑒰𑒏 𑒮𑓀𑒒𑒩𑓂𑒭 𑒮𑒦𑒙𑒰 𑒮𑒼𑒗𑒰𑒿 𑒂𑒥𑒱 𑒩𑒯𑒪 𑒁𑒕𑒱 𑒧𑒳𑒠𑒰 𑒂𑒥।
“𑒤𑒹𑒩𑒮𑒿 𑒮𑒼𑒗𑒰𑒿 𑒂𑒋𑒪 𑒄 𑒮𑒦𑒙𑒰, 𑒣𑒱𑒞𑒰𑒏 𑒮𑓂𑒧𑒵𑒞𑒱 𑒥𑒢𑒱 𑒏𑓄 𑒧𑒳𑒠𑒰 𑒣𑒱𑒞𑒰𑒏 𑒯𑒰𑒩𑒱 𑒥𑒢𑒱 𑒏𑒋 𑒞𑒿 𑒢𑒘𑒱 । 𑒄 𑒢𑒰𑒧 𑒂𑒩𑒳𑒝𑒱 𑒏𑒱𑒋𑒏 𑒯𑒧𑒩𑒰 𑒪𑒹𑒪 𑒔𑒳𑒢𑒢𑒹 𑒕𑒪𑒰𑒯 𑒥𑒰𑒥𑒴𑒖𑒲”।
“𑒏𑒲 𑒥𑒖𑒪𑒯𑒳𑒿 𑒥𑒹𑒙𑒰”- 𑒧𑒰𑒿 𑒣𑒳𑒕𑒪𑒐𑒱𑒢𑓂𑒯।
“𑒢𑒯𑒱 । 𑒄 𑒏𑒰𑒪𑒼𑒢𑒲 𑒠𑒹𑒐𑒱 𑒏𑓄 𑒏𑒱𑒕𑒳 𑒧𑒼𑒢 𑒣𑒛𑓃𑒱 𑒑𑒹𑒪”।
“𑒢𑒯𑒱 𑒠𑒹𑒐𑒴 𑒄 𑒣𑒣𑒱𑒨𑒰𑒯𑒰 𑒏𑒰𑒪𑒼𑒢𑒲𑒏𑒹𑒿”।
𑒑𑓀𑒑𑒰-𑒥𑓂𑒩𑒱𑒖𑒏 𑒔𑒩𑒔𑒰 𑒒𑒩𑒧𑒹 𑒙𑒻𑒥𑒴 𑒥𑒢𑒱 𑒑𑒹𑒪 𑒩𑒯𑒋 । 𑒂𑒩𑒳𑒝𑒱𑒏𑒹𑒿 𑒥𑒳𑒗𑒪 𑒕𑒢𑓂𑒯𑒱 𑒄 । 𑒧𑒳𑒠𑒰 𑒋𑒏𑒙𑒰 𑒂𑒩 𑒣𑓂𑒩𑒰𑒩𑒧𑓂𑒦 𑒞𑒿 𑒢𑒘𑒱 𑒦𑓄 𑒖𑒋𑒞 । 𑒂𑒩𑒳𑒝𑒱𑒏 𑒣𑓂𑒩𑒬𑓂𑒢𑒮𑒿 𑒧𑒰𑒿 𑒦𑒲𑒞𑒩𑒮𑒿 𑒒𑒥𑒩𑒰 𑒑𑒹𑒪 𑒕𑒪𑒲𑒯 ।
𑒂𑒥 𑒖𑒹 𑒔𑒳𑒣𑓂𑒣𑒲 𑒣𑒮𑒩𑒪 𑒮𑒹 𑒑𑒰𑒧𑒹𑒧𑒹 𑒖𑒰 𑒏𑒋 𑒐𑒞𑒧 𑒦𑒹𑒪 । 𑒩𑒮𑓂𑒞𑒰𑒧𑒹 𑒋𑒏𑒙𑒰 𑒣𑓂𑒩𑒏𑒰𑒬 𑒐𑒝𑓂𑒛 𑒙𑒴𑒙𑒱 𑒏𑒋 𑒐𑒮𑒪 𑒮𑒯𑒮𑓂𑒩𑒥𑒰𑒜𑓃𑒢𑒱 𑒢𑒯𑒱 𑒍𑒏𑒩 𑒢𑓂𑒨𑒴𑒢 𑒩𑒴𑒣, 𑒕𑒰𑒛𑓃𑒢𑒱 ।
𑒁𑒑𑓂𑒩𑒖 𑒧𑒵𑒞 𑒦𑒰𑒋𑒏 𑒧𑒳𑒿𑒯 𑒣𑒏𑒛𑓃𑒱 𑒏𑒰𑒢𑒋 𑒪𑒑𑒪𑒰𑒯 ।
“𑒋𑒯𑒢 𑒦𑒻𑒨𑒰𑒩𑒲 𑒏𑒏𑒩 𑒯𑒹𑒞𑒋 । 𑒡𑒳𑒩 𑒥𑒞𑒰𑒯, 𑒣𑒻𑒒 𑒦𑒰𑒨𑒏𑒹𑒿 𑒏𑓂𑒨𑒼 𑒕𑒼𑒛𑓃𑒱 𑒏𑓄 𑒣𑒯𑒱𑒢𑒹 𑒔𑒪𑒱 𑒖𑒰𑒃𑒞 𑒁𑒕𑒱 । 𑒏𑒯𑒱𑒨𑒼 𑒢𑒯𑒱 𑒏𑒢𑒹𑒢𑒹 𑒕𑒪𑒯 𑒞𑒿 𑒂𑒃 𑒏𑒱𑒋 𑒏𑒢𑒥𑒰 𑒩𑒯𑒪 𑒕𑒯”। 𑒮𑒾𑒿𑒮𑒹 𑒙𑒼𑒪 𑒖𑒳𑒙𑒱 𑒂𑒋𑒪 𑒕𑒪 । 𑒮𑒧𑒰𑒔𑒰𑒩 𑒮𑒳𑒢𑒪𑒰𑒏 𑒥𑒰𑒠 𑒏𑒏𑒩𑒼 𑒒𑒩𑒧𑒹 𑒐𑒹𑒢𑒰𑒃 𑒢𑒯𑒱 𑒥𑒢𑒪 𑒕𑒪𑒻𑒏 । 𑒣𑒞𑒰 𑒢𑒘𑒱 𑒏𑒹 𑒏𑒏𑒩𑒰 𑒙𑒹𑒪𑒲𑒤𑒼𑒢 𑒏𑓄 𑒠𑒹𑒢𑒹 𑒩𑒯𑒻𑒏 𑒖𑒹 𑒮𑒧𑒰𑒔𑒰𑒩 𑒋𑒞𑒋 𑒣𑒯𑒳𑒿𑒔𑒱 𑒑𑒹𑒪 𑒩𑒯𑒋 ।
“𑒏𑒪𑒧𑒧𑒹 𑒥𑒰𑒥𑒴𑒏 𑒮𑒰𑒩𑒰 𑒪𑒑 𑒠𑒰𑒯 𑒯𑒹𑒞𑒢𑓂𑒯𑒱”, 𑒁𑒑𑓂𑒩𑒖𑒏 𑒋𑒯𑒱 𑒃𑒔𑓂𑒕𑒰𑒏 𑒥𑒰𑒠 𑒪𑒯𑒰𑒮 𑒍𑒞𑒋 𑒑𑒹𑒪 । 𑒏𑒰𑒢𑓂𑒯𑒣𑒩 𑒅𑒚𑒰 𑒏𑒋 𑒮𑒦 𑒣𑒯𑒳𑒿𑒔𑒪𑒰𑒯 𑒏𑒪𑒧-𑒑𑒰𑒕𑒲 ।
“𑒠𑒹𑒐𑒱𑒨𑒾, 𑒏𑒹𑒢𑒰 𑒧𑒴𑒿𑒯𑒣𑒩 𑒯𑒿𑒮𑒲 𑒕𑒻𑒏, 𑒋𑒏𑒼 𑒩𑒞𑓂𑒞𑒲 𑒧𑒴𑒃𑒪 𑒪𑒑𑒻𑒞 𑒁𑒕𑒱”- 𑒢𑒢𑓂𑒠𑒏 𑒁𑒑𑓂𑒩𑒖 𑒥𑒖𑒪𑒰𑒯।
𑒂𑒩𑒳𑒝𑒱𑒏 𑒣𑒻𑒒 𑒦𑒰𑒋 𑒖𑒐𑒢𑒹 𑒁𑒣𑒢 𑒂𑒑𑒱 𑒪𑒹𑒪 𑒯𑒰𑒟 𑒣𑒱𑒞𑒰𑒏 𑒠𑒱𑒮 𑒥𑒜𑓃𑒹𑒪𑒢𑓂𑒯𑒱 𑒂𑒏𑒱 𑒍 𑒫𑒱𑒔𑒪𑒱𑒞 𑒮𑒢 𑒦𑓄 𑒑𑒹𑒪𑒰𑒯 । 𑒏𑒰𑒏𑒰 𑒦𑒩𑒼𑒮 𑒠𑒹𑒪𑒐𑒱𑒢𑓂𑒯 । 𑒂𑒑𑒱𑒧𑒹 𑒧𑒱𑒪𑒻𑒞 𑒑𑒹𑒪 𑒍 𑒧𑒵𑒞 𑒬𑒩𑒲𑒩, 𑒣𑒳𑒢𑓁 𑒒𑒳𑒩𑒱 𑒁𑒋𑒥𑒰𑒏 𑒏𑒼𑒢𑒼 𑒮𑒧𑓂𑒦𑒰𑒫𑒢𑒰𑒏𑒹𑒿 𑒐𑒞𑒧 𑒏𑒩𑒻𑒞 ।
𑒮𑒦𑒙𑒰 𑒫𑒱𑒡-𑒫𑓂𑒨𑒫𑒯𑒰𑒩, 𑒪𑒑𑒻𑒞 𑒩𑒯𑒋 𑒖𑒹𑒢𑒰 𑒏𑒏𑒩𑒼 𑒧𑒵𑒞𑓂𑒨𑒳𑒏 𑒢𑒯𑒱 𑒫𑒩𑒢𑓂 𑒏𑒼𑒢𑒼 𑒣𑒰𑒥𑒢𑒱𑒏 𑒃𑒢𑓂𑒞𑒖𑒰𑒧-𑒥𑒰𑒞 𑒦𑓄 𑒩𑒯𑒪 𑒁𑒕𑒱, 𑒡𑒴𑒧-𑒡𑒰𑒧𑒮𑒿 । 𑒧𑒯𑒰𑒣𑒰𑒞𑓂𑒩 𑒂𑒏𑒱 𑒏𑓀𑒙𑒰𑒯𑒰 𑒥𑓂𑒩𑒰𑒯𑓂𑒧𑒝𑒏 𑒢𑒱𑒩𑓂𑒠𑒹𑒬𑒰𑒢𑒳𑒮𑒰𑒩 𑒯𑒼𑒃𑒞 𑒬𑓂𑒩𑒰𑒠𑓂𑒡𑒏𑒩𑓂𑒧 𑒂 𑒮𑒰𑒿𑒗𑒏 𑒣𑒰𑒚 𑒑𑒩𑒳𑒛𑓃-𑒣𑒳𑒩𑒰𑒝𑒏 𑒁𑒫𑒱𑒬𑓂𑒫𑒮𑒢𑒲𑒨 𑒫𑒱𑒫𑒩𑒝𑒏 । 𑒮𑒦 𑒮𑒧𑓂𑒣𑒢𑓂𑒢 𑒦𑓄 𑒑𑒹𑒪 ।
𑒣𑒩𑒧 𑒬𑒰𑓀𑒞𑒱 𑒂 𑒏𑒱 𑒒𑒼𑒩 𑒏𑒼𑒪𑒰𑒯𑒪 । 𑒁𑒣𑒢 𑒁𑒞𑒲𑒞𑒏 𑒣𑒳𑒢𑒩𑓂𑒫𑒱𑒬𑓂𑒪𑒹𑒭𑒝𑒧𑒹 𑒩𑒞 𑒩𑒯𑒥𑒰𑒏 𑒒𑒙𑒢𑒰𑒏𑓂𑒩𑒧 𑒯𑒳𑒢𑒏𑒰 𑒧𑒼𑒢 𑒣𑒛𑓃𑒱 𑒖𑒰𑒃𑒞 𑒕𑒢𑓂𑒯𑒱 ।
𑒂𑒩𑒳𑒝𑒱 𑒚𑒰𑒏𑒳𑒩 𑒏𑒱𑒕𑒳 𑒁𑒮𑓂𑒫𑒮𑓂𑒟 𑒩𑒯𑒟𑒱 𑒂 𑒏𑒪𑒏𑒞𑓂𑒞𑒰𑒧𑒹 𑒫𑒳𑒛𑒪𑒻𑒝𑓂𑒛 𑒢𑒩𑓂𑒮𑒱𑓀𑒑 𑒯𑒼𑒧𑒏 𑒮𑒧𑒲𑒣𑒮𑓂𑒟 𑒮𑓂𑒟𑒱𑒞 𑒫𑒱𑒬𑒰𑒪𑒏𑒰𑒨 𑒁𑒣𑒰𑒩𑓂𑒙𑒧𑒹𑓀𑒙𑒏 𑒁𑒣𑒢 𑒤𑓂𑒪𑒻𑒙𑒧𑒹 𑒁𑒮𑒑𑒩𑒯𑒱 𑒁𑒮𑓂𑒫𑒮𑓂𑒟 𑒮𑓂𑒟𑒱𑒞𑒱𑒧𑒹 𑒁𑒡𑓂𑒨𑒰𑒫𑒮𑒢𑒧𑒹 𑒪𑒲𑒢 । 𑒁𑒬𑒰𑓀𑒞𑒱𑒏 𑒏𑓂𑒭𑒝 𑒯𑒳𑒢𑒏𑒰 𑒩𑒯𑒱-𑒩𑒯𑒱 𑒏𑒋 𑒁𑒢𑒰𑒨𑒰𑒮𑒯𑒱 𑒧𑒼𑒢 𑒣𑒛𑓃𑒱 𑒩𑒯𑒪 𑒕𑒢𑓂𑒯𑒱 । 𑒖𑒐𑒢 𑒍 𑒁𑒣𑒢 𑒮𑒧𑒮𑓂𑒨𑒰 𑒮𑒦 𑒁𑒣𑒢 𑒯𑒱𑒞-𑒮𑓀𑒥𑓀𑒡𑒲 𑒮𑒦𑒏𑒹𑒿 𑒮𑒳𑒢𑒰 𑒏𑒋 𑒁𑒣𑒢 𑒧𑒼𑒢𑒏 𑒦𑒰𑒩 𑒏𑒧 𑒏𑒩𑒻𑒞 𑒩𑒯𑒟𑒱 । 𑒬𑒢𑒻𑓁-𑒬𑒢𑒻𑓁 𑒮𑒧𑒮𑓂𑒨𑒰 𑒮𑒦 𑒥𑒜𑓃𑒻𑒞𑒹 𑒔𑒪 𑒑𑒹𑒪 𑒋𑒞𑒹𑒏 𑒡𑒩𑒱 𑒖𑒹 𑒂𑒥 𑒠𑒼𑒮𑒩𑒏𑒹𑒿 𑒮𑒳𑒢𑒹𑒪𑒰𑒣𑒩𑒰𑓀𑒞 𑒧𑒼𑒢 𑒂𑒩 𑒅𑒔𑒙𑒱 𑒖𑒰𑒃𑒞 𑒕𑒪𑒢𑓂𑒯𑒱 । 𑒞𑒰𑒯𑒱 𑒠𑓂𑒫𑒰𑒩𑒹 𑒂𑒥 𑒍 𑒁𑒣𑒢𑒹 𑒡𑒩𑒱 𑒮𑒲𑒧𑒱𑒞 𑒩𑒯𑒋 𑒪𑒑𑒪𑒰𑒯 । 𑒯𑒱𑒞 𑒮𑓀𑒥𑓀𑒡𑒲 𑒮𑒦 𑒥𑒳𑒗𑒨 𑒪𑒑𑒪𑒰𑒯 𑒖𑒹 𑒂𑒩𑒳𑒝𑒱 𑒮𑒧𑒮𑓂𑒨𑒰𑒮𑒿 𑒩𑒯𑒱𑒞 𑒦𑒋 𑒑𑒹𑒪 𑒕𑒟𑒱 । 𑒥𑒔𑓂𑒔𑒹𑒮𑒿 𑒮𑒣𑒢𑒰𑒧𑒹 𑒦𑒨𑒰𑒫𑒯 𑒔𑒲𑒖 𑒮𑒦 𑒠𑒹𑒐𑒰𑒃 𑒣𑒛𑓃𑒻𑒞 𑒕𑒪𑒢𑓂𑒯𑒱 𑒂𑒩𑒳𑒝𑒱𑒏𑒹𑒿 । 𑒁𑒐𑒢 𑒡𑒩𑒱 𑒯𑒳𑒢𑒏𑒰 𑒧𑒼𑒢 𑒕𑒢𑓂𑒯𑒱 𑒏𑒼𑒢𑒰 𑒂𑒡-𑒂𑒡 𑒣𑒯𑒩 𑒩𑒰𑒞𑒱𑒧𑒹 𑒍 𑒒𑒰𑒧𑒹-𑒣𑒮𑒲𑒢𑒹 𑒦𑓄 𑒖𑒰𑒃𑒞 𑒩𑒯𑒟𑒱 𑒂 𑒯𑒳𑒢𑒏𑒩 𑒧𑒰𑒞𑒰-𑒣𑒱𑒞𑒰 𑒔𑒱𑓀𑒞𑒱𑒞 𑒦𑓄 𑒥𑒲𑒨𑒢𑒱 𑒯𑒼𑒏𑒻𑒞 𑒩𑒯𑒻𑒞 𑒕𑒪𑒐𑒱𑒢𑓂𑒯 । 𑒣𑒱𑒞𑒰𑒏-𑒣𑒱𑒞𑒰 𑒂 𑒞𑒏𑒩 𑒖𑒢𑓂𑒧𑒠𑒰𑒞𑒰 𑒏𑒹? 𑒦𑒑𑒫𑒰𑒢 𑒖𑓂𑒨𑒼𑒿 𑒮𑒦𑒏 𑒣𑒴𑒩𑓂𑒫𑒖 𑒞𑒐𑒢 𑒯𑒳𑒢𑒏𑒩 𑒣𑒴𑒩𑓂𑒫𑒖𑒏𑒹 ? 𑒪𑒼𑒏𑒮𑒦 𑒋𑒯𑒱 𑒣𑓂𑒩𑒬𑓂𑒢 𑒮𑒦𑒏𑒹𑒿 𑒯𑒿𑒮𑒲𑒧𑒹 𑒅𑒛𑓃𑒰 𑒠𑒻𑒞 𑒕𑒪𑒰𑒯, 𑒏𑒱𑒢𑓂𑒞𑒳 𑒥𑒰𑒠𑒧𑒹 𑒖𑒐𑒢 𑒂𑒩𑒳𑒝𑒱 𑒠𑒩𑓂𑒬𑒢𑒬𑒰𑒮𑓂𑒞𑓂𑒩 𑒣𑒜𑓃𑒪𑒢𑓂𑒯𑒱 𑒞𑒐𑒢 𑒯𑒳𑒢𑒏𑒰 𑒣𑒞𑒰 𑒔𑒪𑒪𑒢𑓂𑒯𑒱 𑒖𑒹 𑒋𑒏𑒩 𑒅𑒞𑓂𑒞𑒩𑒏 𑒯𑒹𑒞𑒳 𑒏𑒞𑒹𑒏 𑒇𑒭𑒱-𑒧𑒳𑒢𑒱 𑒮𑒹𑒯𑒼 𑒁𑒣𑒢 𑒖𑒲𑒫𑒢 𑒮𑒧𑒩𑓂𑒣𑒱𑒞 𑒏𑒋 𑒔𑒳𑒏𑒪 𑒕𑒟𑒱, 𑒧𑒳𑒠𑒰 𑒄 𑒣𑓂𑒩𑒬𑓂𑒢 𑒋𑒐𑒢𑒼 𑒁𑒢𑒳𑒞𑓂𑒞𑒩𑒱𑒞𑒹 𑒁𑒕𑒱 । 𑒁𑒮𑓂𑒫𑒮𑓂𑒟𑒞𑒰𑒏 𑒮𑓂𑒟𑒱𑒞𑒱𑒧𑒹 𑒤𑒹𑒩𑒮𑒿 𑒄 𑒮𑒦 𑒁𑒢𑒳𑒞𑓂𑒞𑒩𑒱𑒞 𑒣𑓂𑒩𑒬𑓂𑒢 𑒯𑒳𑒢𑒏𑒰 𑒮𑒧𑒏𑓂𑒭 𑒮𑓂𑒫𑒣𑓂𑒢 𑒥𑒢𑒱 𑒂𑒥𑒱 𑒑𑒹𑒪 𑒕𑒢𑓂𑒯𑒱 । 𑒏𑒐𑒢𑒼𑒏𑒹𑒿 𑒢𑒱𑒢𑓂𑒠𑒧𑒹 𑒯𑒳𑒢𑒏𑒰 𑒪𑒑𑒢𑓂𑒯𑒱 𑒖𑒹 𑒍 𑒒𑒩𑒏 𑒕𑒞 𑒣𑒩 𑒕𑒟𑒱 𑒂 𑒢𑒯𑒱 𑒔𑒰𑒯𑒱𑒞𑒼 𑒬𑒢𑒻𑓁-𑒬𑒢𑒻𑓁 𑒕𑒞𑒏 𑒥𑒱𑒢 𑒒𑒹𑒩𑒪 𑒦𑒰𑒑 𑒠𑒱𑒬𑒱 𑒑𑒹𑒪 𑒖𑒰 𑒩𑒯𑒪 𑒕𑒟𑒱 । 𑒑𑒳𑒩𑒳𑒞𑓂𑒫𑒏 𑒏𑒼𑒢𑒼 𑒬𑒏𑓂𑒞𑒱 𑒯𑒳𑒢𑒏𑒰 𑒐𑒲𑒔𑒱 𑒩𑒯𑒪 𑒕𑒢𑓂𑒯𑒱 𑒮𑒯𑒮𑓂𑒩𑒥𑒰𑒜𑓃𑒢𑒱 𑒮𑒢 𑒥𑒛𑓃𑒏𑒰 𑒗𑒼𑒿𑒙𑒰𑒥𑒪𑒰𑒏 𑒠𑒹𑒯𑒏 𑒑𑒳𑒩𑒳𑒞𑓂𑒫 𑒬𑒏𑓂𑒞𑒱 । 𑒞𑒰𑒫𑒞 𑒡𑒩𑒱 𑒖𑒰𑒫𑒞 𑒍 𑒢𑒲𑒔𑒰𑒿 𑒢𑒯𑒱 𑒐𑒮𑒱 𑒣𑒛𑓃𑒻𑒞 𑒕𑒟𑒱 । 𑒏𑒲 𑒄 𑒕𑒪 𑒏𑒼𑒢𑒼 𑒣𑓂𑒩𑒰𑒩𑒥𑓂𑒡𑒏 𑒠𑒱𑒬𑒰𑒢𑒱𑒩𑓂𑒠𑒹𑒬 𑒂𑒏𑒱 𑒏𑒼𑒢𑒼 𑒦𑒫𑒱𑒭𑓂𑒨𑒏 𑒠𑒳𑒩𑓂𑒒𑒙𑒢𑒰𑒮𑒿 𑒥𑒔𑒥𑒰𑒏 𑒮𑓀𑒠𑒹𑒬 ? 𑒏𑒱𑒕𑒳 𑒠𑒱𑒢 𑒡𑒩𑒱 𑒞𑒿 𑒂𑒩𑒳𑒝𑒱 𑒮𑒳𑒞𑒥𑒰𑒏 𑒮𑒯𑒲 𑒮𑒧𑒨𑒏 𑒣𑒞𑒰 𑒪𑒑𑒥𑒻𑒞 𑒩𑒯𑒪𑒰𑒯 𑒣𑒩𑓀𑒞𑒳 𑒬𑒢𑒻𑓁-𑒬𑒢𑒻𑓁 𑒯𑒳𑒢𑒏𑒰 𑒄 𑒣𑒞𑒰 𑒪𑒰𑒑𑒱 𑒑𑒹𑒪𑒢𑓂𑒯𑒱 𑒖𑒹 𑒮𑓂𑒫𑒣𑓂𑒢 𑒂 𑒢𑒱𑒢𑓂𑒢 𑒋𑒯𑒱 𑒖𑒲𑒫𑒢𑒏 𑒠𑒴𑒙𑒰 𑒋𑒯𑒢 𑒩𑒯𑒮𑓂𑒨 𑒁𑒕𑒱 𑒖𑒹 𑒢𑒱𑒨𑒧 𑒫𑒱𑒩𑒳𑒠𑓂𑒡 𑒁𑒕𑒱 𑒂 𑒁𑒢𑒳𑒞𑓂𑒞𑒩𑒱𑒞 𑒁𑒕𑒱 । 𑒂 𑒂𑒩𑒳𑒝𑒱 𑒣𑒻𑒒 𑒦𑒹𑒪𑒟𑒱, 𑒤𑒹𑒩 𑒯𑒳𑒢𑒏𑒩 𑒣𑒜𑓃𑒰𑒃 𑒬𑒳𑒩𑒳 𑒏𑒋𑒪 𑒑𑒹𑒪- 𑒁𑒑𑒮𑓂𑒞𑓂𑒨𑒏 𑒮𑓂𑒞𑒼𑒞𑓂𑒩- 𑒮𑒩𑒮𑓂𑒫𑒞𑒱 𑒢𑒧𑒮𑓂𑒞𑒳𑒦𑓂𑒨𑒧 𑒫𑒩𑒠𑒹 𑒏𑒰𑒧𑒩𑒴𑒣𑒱𑒝𑒲, 𑒫𑒱𑒠𑓂𑒨𑒰𑒩𑒧𑓂𑒦𑒧𑓂 𑒏𑒩𑒱𑒭𑓂𑒨𑒰𑒧𑒱 𑒮𑒱𑒠𑓂𑒡𑒱𑒩𑓂𑒦𑒫𑒞𑒳𑒧𑒹 𑒮𑒠𑒰 । 𑒬𑓂𑒩𑒲𑒑𑒝𑒹𑒭𑒖𑒲𑒏 𑒁𑓀𑒏𑒳𑒬𑒏 𑒮𑓀𑒑 𑒑𑒾𑒩𑒱𑒬𑓀𑒏𑒩𑒏 𑒁𑒦𑓂𑒨𑒩𑓂𑒟𑒢𑒰 𑒮𑒱𑒠𑓂𑒡𑒱𑒩𑒮𑓂𑒞𑒳 । 𑒮𑒰𑒞𑒹 𑒦𑒫𑒞𑒳 𑒮𑒳𑒣𑓂𑒩𑒲𑒞𑒰 𑒠𑒹𑒫𑒲 𑒬𑒱𑒐𑒩 𑒫𑒮𑒱𑒢𑒲, 𑒅𑒑𑓂𑒩𑒹𑒢 𑒞𑒣𑒮𑒰 𑒪𑒥𑓂𑒡𑒼 𑒨𑒨𑒰 𑒣𑒬𑒳𑒣𑒞𑒱𑓁𑒣𑒞𑒱𑓁,𑒮𑒱𑒠𑓂𑒡𑒱𑓁𑒮𑒰𑒡𑓂𑒨𑒹 𑒮𑒞𑒰𑒧𑒮𑓂𑒞𑒳 𑒣𑓂𑒩𑒮𑒠𑒰𑓀𑒞𑒮𑓂𑒨 𑒡𑒴𑒩𑓂𑒖𑒙𑒹𑓁, 𑒖𑒰𑒯𑓂𑒢𑒫𑒲𑒤𑒹𑒢𑒪𑒹𑒐𑒹𑒫 𑒨𑒢𑓂𑒨𑒴𑒡𑒱 𑒬𑒬𑒱𑒢𑓁 𑒏𑒪𑒰 । 𑒋𑒯𑒱 𑒬𑓂𑒪𑒼𑒏𑒏𑒹𑒿 𑒥𑒖𑒻𑒞 𑒏𑒰𑒪 𑒣𑓂𑒩𑒰𑒨𑓁 𑒂𑒩𑒳𑒝𑒱 𑒣𑒬𑒳𑒣𑒞𑒱𑓁𑒣𑒞𑒱𑓁𑒏 𑒮𑒰𑒧𑒫𑒹𑒠𑒲𑒨 𑒞𑒰𑒩𑒞𑒧𑓂𑒨𑒏 𑒥𑒰𑒠 𑒁𑒢𑒰𑒨𑒰𑒮𑒯𑒱 𑒯𑒰 𑒯𑒰 𑒏𑓄 𑒏𑒋 𑒖𑒼𑒩𑒮𑒿 𑒯𑒿𑒮𑒋 𑒪𑒑𑒻𑒞 𑒕𑒪𑒰𑒯 𑒂 𑒥𑒲𑒔𑒯𑒱 𑒧𑒹 𑒩𑒳𑒏𑒱 𑒖𑒰𑒃𑒞 𑒕𑒪𑒰𑒯 । 𑒣𑒱𑒞𑒰 𑒮𑒼𑒔𑒪𑒢𑓂𑒯𑒱 𑒖𑒹 𑒏𑒧 𑒫𑒨𑒮𑒧𑒹 𑒣𑒜𑓃𑒰𑒃 𑒬𑒳𑒩𑒳 𑒏𑒹𑒪𑒰𑒮𑒿 𑒂𑒩𑒳𑒝𑒱𑒏 𑒏𑒳𑒩𑓂𑒮𑒲 𑒣𑒩 𑒥𑒻𑒮𑒱 𑒏𑓄 𑒧𑒰𑒟𑒣𑒩 𑒯𑒰𑒟 𑒩𑒰𑒐𑒱 𑒏𑓄 𑒥𑒻𑒮𑒥𑒰𑒏 𑒂𑒠𑒞𑒱 𑒞𑒿 𑒐𑒞𑒧 𑒯𑒼𑒋𑒞𑒢𑓂𑒯𑒱 । 𑒧𑒰𑒋𑒏 𑒋𑒏𑒙𑒰 𑒑𑒣𑓂𑒣 𑒯𑒳𑒢𑒏𑒰 𑒣𑒮𑒱𑒢𑓂𑒢 𑒢𑒯𑒱 𑒕𑒪𑒢𑓂𑒯𑒱। 𑒍 𑒥𑒱𑒔𑓂𑒔𑒧𑒹 𑒑𑒣𑓂𑒣 𑒏𑒩𑒻𑒞-𑒏𑒩𑒻𑒞 𑒂𑒩𑒳𑒝𑒱𑒏 𑒥𑒰𑒞𑒏𑒹𑒿 𑒁𑒢𑒚𑒱𑒨𑒰 𑒠𑒻𑒞 𑒕𑒪𑒟𑒱𑒢𑓂𑒯। 𑒋𑒏𑒥𑒹𑒩 𑒧𑒰𑒋𑒏 𑒏𑒼𑒢𑒼 𑒮𑓀𑒑𑒲 𑒂𑒋𑒪 𑒕𑒪𑒲𑒯। 𑒂𑒩𑒳𑒝𑒱𑒏 𑒏𑒼𑒢𑒼 𑒥𑒰𑒞𑒣𑒩 𑒧𑒰𑒋 𑒡𑓂𑒨𑒰𑒢 𑒢𑒯𑒱 𑒠𑓄 𑒩𑒯𑒪 𑒕𑒪𑒲𑒯। 𑒂𑒩𑒳𑒝𑒱𑒏 𑒯𑒰𑒟𑒧𑒹 𑒦𑒩𑒱 𑒒𑒩𑒏 𑒔𑒰𑒦𑒲𑒏 𑒗𑒰𑒥𑒰 𑒕𑒪𑒢𑓂𑒯𑒱 𑒞𑒹𑒿 𑒍 𑒏𑒯𑒪𑒐𑒱𑒢𑓂𑒯 𑒖𑒹 𑒖𑓂𑒨𑒼𑒿 𑒯𑒳𑒢𑒏𑒩 𑒥𑒰𑒞 𑒢𑒯𑒱 𑒮𑒳𑒢𑒪 𑒖𑒋𑒞𑒢𑓂𑒯𑒱 𑒞𑒿 𑒍 𑒗𑒰𑒥𑒰𑒏𑒹𑒿 𑒮𑒼𑒗𑒰𑒿𑒏 𑒛𑒥𑒩𑒰𑒧𑒹 𑒤𑒹𑒏𑒱 𑒠𑒹𑒞𑒰𑒯। 𑒧𑒰𑒋 𑒮𑒼𑒔𑒪𑒢𑓂𑒯𑒱 𑒖𑒹 𑒯𑒰𑒿-𑒯𑒰𑒿 𑒏𑒹𑒪𑒰𑒣𑒩 𑒗𑒰𑒥𑒰 𑒤𑒹𑒏𑒱𑒨𑒹𑒙𑒰 𑒠𑒹𑒞𑒰𑒯 𑒞𑒻𑒿 𑒂𑒩 𑒁𑒢𑒚𑒱𑒨𑒰 𑒠𑒹𑒪𑒐𑒱𑒢𑓂𑒯। 𑒣𑒩𑒱𑒝𑒰𑒧 𑒠𑒳𑒢𑒳 𑒞𑒩𑒯𑒹𑒿 𑒋𑒏𑒹 𑒯𑒹𑒥𑒰𑒏 𑒕𑒪। 𑒔𑒰𑒦𑒲 𑒥𑒯𑒳𑒞 𑒐𑒼𑒖 𑒏𑒹𑒪𑒼 𑒣𑒩 𑒢𑒯𑒱 𑒦𑒹𑒙𑒪। 𑒋𑒐𑒢𑒼 𑒒𑒩𑒏 𑒮𑒦 𑒁𑒪𑒧𑒲𑒩𑒰 𑒂𑒠𑒱𑒏 𑒔𑒰𑒦𑒲 𑒛𑒳𑒣𑓂𑒪𑒲𑒏𑒹𑒙 𑒁𑒕𑒱। 𑒋𑒞𑒹𑒏 𑒠𑒱𑒢𑒏 𑒥𑒰𑒠 𑒄 𑒮𑒦 𑒮𑒼𑒔𑒱 𑒂𑒩𑒳𑒝𑒱𑒏 𑒧𑒳𑒿𑒯𑒣𑒩 𑒁𑒢𑒰𑒨𑒰𑒮𑒯𑒱 𑒧𑒳𑒮𑓂𑒏𑒲 𑒂𑒥𑒱 𑒑𑒹𑒪𑒢𑓂𑒯𑒱।𑒮𑒱𑒠𑓂𑒡𑒰𑓀𑒞𑒫𑒰𑒠𑒲 𑒣𑒱𑒞𑒰𑒏𑒹𑒿 𑒢𑒼𑒏𑒩𑒲𑒧𑒹 𑒏𑒱𑒕𑒳 𑒢𑒹 𑒏𑒱𑒕𑒳 𑒠𑒱𑒏𑓂𑒏𑒞 𑒯𑒼𑒃𑒞𑒹 𑒩𑒯𑒻𑒞 𑒕𑒪𑒢𑓂𑒯𑒱 𑒞𑒰𑒯𑒱 𑒠𑓂𑒫𑒰𑒩𑒹 𑒍 𑒂𑒩𑒳𑒝𑒱𑒏𑒹𑒿 𑒖𑒪𑓂𑒠𑒲 𑒮𑒿 𑒖𑒪𑓂𑒠𑒲 𑒣𑒻𑒒 𑒠𑒹𑒐𑒋 𑒔𑒰𑒯𑒻𑒞 𑒕𑒪𑒰𑒯। 𑒞𑒹𑒮𑒩 𑒮𑒿 𑒮𑒼𑒗𑒹 𑒣𑒰𑒿𑒔𑒧 𑒫𑒩𑓂𑒑𑒧𑒹 𑒤𑒢𑒥𑒰 𑒠𑒹𑒪 𑒑𑒹𑒪𑒢𑓂𑒯𑒱।𑒤𑒹𑒩 𑒦𑒹𑒪 𑒄 𑒖𑒹 𑒯𑒼𑒪𑒲𑒏 𑒕𑒳𑒙𑓂𑒙𑒲𑒧𑒹 𑒢𑒱𑒁𑒧𑒰𑒢𑒳𑒮𑒰𑒩 𑒮𑒦 𑒑𑒼𑒙𑒹 𑒑𑒰𑒧 𑒑𑒹𑒪 𑒕𑒪𑒰𑒯। 𑒯𑒼𑒪𑒲 𑒂 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒮𑒦 𑒥𑒹𑒩 𑒑𑒰𑒧 𑒖𑒋𑒥𑒰𑒏 𑒢𑒱𑒨𑒧 𑒖𑒹𑒏𑒰𑒿 𑒕𑒪𑒻𑒏। 𑒣𑒱𑒞𑒰𑒖𑒲 𑒮𑒦𑒏𑒹𑒿 𑒕𑒼𑒛𑓃𑒱 𑒏𑒋 𑒫𑒰𑒣𑒱𑒮 𑒦𑒋 𑒑𑒹𑒪𑒰𑒯। 𑒤𑒹𑒩 𑒠𑒩𑒧𑒰𑒯𑒰 𑒥𑒢𑓂𑒠 𑒦𑓄 𑒑𑒹𑒪 𑒕𑒪𑒢𑓂𑒯𑒱 𑒣𑓂𑒩𑒰𑒨𑓃𑓁 𑒨𑒻𑒯 𑒔𑒱𑒙𑓂𑒚𑒲 𑒑𑒰𑒧 𑒂𑒋𑒪 𑒕𑒪 𑒖𑒹 𑒂𑒥 𑒮𑒦𑒏𑒹𑒿 𑒑𑒰𑒧𑒯𑒱 𑒧𑒹 𑒩𑒯𑒋 𑒣𑒛𑓃𑒞𑒢𑓂𑒯𑒱। 𑒧𑒰𑒋 𑒞𑒿 𑒏𑒰𑒢𑒋 𑒪𑒑𑒪𑒲𑒯 𑒧𑒳𑒠𑒰 𑒂𑒩𑒳𑒝𑒱 𑒐𑒴𑒥 𑒣𑓂𑒩𑒮𑒢𑓂𑒢 𑒦𑒹𑒪𑒰𑒯। 𑒧𑒳𑒠𑒰 𑒮𑒩𑒏𑒰𑒩𑒲 𑒮𑓂𑒏𑒴𑒪𑒧𑒹 𑒍𑒯𑒱 𑒮𑒧𑒨 𑒫𑒩𑓂𑒑𑒏 𑒂𑒑𑒰𑒿𑒧𑒹 𑒢𑒫𑒲𑒢- 𑒄 𑒪𑒑𑒰 𑒏𑒋 𑒋𑒏 𑒫𑒩𑓂𑒑 𑒏𑒧𑒧𑒹 𑒪𑒱𑒐𑒥𑒰𑒏 𑒑𑒪𑒞 𑒣𑒩𑒧𑓂𑒣𑒩𑒰 𑒢𑒫𑒲𑒢 𑒬𑒱𑒏𑓂𑒭𑒰 𑒢𑒲𑒞𑒱𑒏 𑒂𑒪𑒼𑒏𑒧𑒹 𑒪𑒹𑒪 𑒑𑒹𑒪 𑒕𑒪𑒻𑒏 𑒏𑒰𑒩𑒝 𑒢𑒫𑒲𑒢 𑒢𑒲𑒞𑒱𑒧𑒹 𑒂𑒩 𑒏𑒱𑒕𑒳𑒍 𑒢𑒫𑒲𑒢 𑒢𑒯𑒱 𑒕𑒪। 𑒣𑒱𑒞𑒰𑒖𑒲𑒏𑒹𑒿 𑒖𑒐𑒢 𑒋𑒯𑒱 𑒥𑒰𑒞𑒏 𑒣𑒞𑒰 𑒔𑒪𑒪𑒢𑓂𑒯𑒱 𑒞𑒿 𑒍 𑒞𑒧𑒮𑒰𑒨𑒪𑒼 𑒕𑒪𑒰𑒯 𑒂 𑒋𑒏𑒩 𑒣𑓂𑒩𑒞𑒱𑒏𑒰𑒩 𑒮𑓂𑒫𑒩𑒴𑒣 𑒣𑒰𑒿𑒔𑒧 𑒏𑓂𑒪𑒰𑒮𑒏 𑒥𑒰𑒠 𑒖𑒐𑒢 𑒍 𑒮𑒦 𑒬𑒯𑒩 𑒫𑒰𑒣𑒮 𑒁𑒋𑒪𑒰𑒯 𑒞𑒿 𑒂𑒩𑒳𑒝𑒱𑒏𑒹𑒿 𑒤𑒹𑒩 𑒋𑒏 𑒫𑒩𑓂𑒑 𑒞𑒩𑒣𑒰 𑒏𑒋 𑒮𑒼𑒗𑒹 𑒕𑒚𑒧 𑒫𑒩𑓂𑒑𑒏 𑒥𑒠𑒪𑒰𑒧𑒹 𑒮𑒰𑒞𑒧 𑒫𑒩𑓂𑒑𑒧𑒹 𑒢𑒰𑒧 𑒪𑒱𑒐𑒫𑒰 𑒠𑒹𑒪𑒢𑓂𑒯𑒱। 𑒕𑒚𑒧 𑒫𑒩𑓂𑒑𑒏 𑒫𑒱𑒖𑓂𑒘𑒰𑒢 𑒂 𑒑𑒝𑒱𑒞𑒏 𑒣𑒜𑓃𑒰𑒃 𑒣𑒰𑒿𑒔𑒧𑒹 𑒫𑒩𑓂𑒑𑒧𑒹 𑒏𑒋 𑒪𑒹𑒥𑒰𑒏 𑒣𑒱𑒞𑒰𑒏 𑒢𑒱𑒩𑓂𑒠𑒹𑒬𑒏 𑒅𑒠𑓂𑒠𑒹𑒬𑓂𑒨𑒏 𑒖𑒰𑒢𑒏𑒰𑒩𑒲 𑒂𑒩𑒳𑒝𑒱𑒏𑒹𑒿 𑒞𑒐𑒢 𑒖𑒰 𑒏𑒋 𑒦𑒹𑒪𑒢𑓂𑒯𑒱 𑒖𑒐𑒢 𑒣𑓂𑒩𑒫𑒹𑒬-𑒣𑒩𑒲𑒏𑓂𑒭𑒰𑒧𑒹 𑒨𑒻𑒯 𑒠𑒳𑒢𑒳 𑒫𑒱𑒭𑒨 𑒣𑒴𑒕𑒪 𑒑𑒹𑒪 𑒂 𑒂𑒩𑒳𑒝𑒱 𑒕𑒙𑓂𑒚𑒰 𑒂 𑒮𑒞𑒧𑒰 𑒠𑒳𑒢𑒳 𑒫𑒩𑓂𑒑𑒏 𑒣𑓂𑒩𑒫𑒹𑒬 𑒣𑒩𑒲𑒏𑓂𑒭𑒰𑒧𑒹 𑒥𑒻𑒮𑒪𑒰𑒯 𑒂 𑒮𑒤𑒪 𑒦𑒹𑒪𑒰𑒯। 𑒥𑒯𑒳𑒞 𑒠𑒱𑒢 𑒥𑒰𑒠 𑒡𑒩𑒱 𑒖𑒐𑒢 𑒏𑓂𑒨𑒼 𑒂𑒢𑒼 𑒮𑓀𑒠𑒩𑓂𑒦𑒧𑒹 𑒕𑒚𑒧 𑒫𑒩𑓂𑒑𑒏 𑒔𑒩𑓂𑒔𑒰 𑒏𑒩𑒻𑒞 𑒕𑒪 𑒞𑒿 𑒂𑒩𑒳𑒝𑒱𑒏𑒹𑒿 𑒏𑒱𑒕𑒳 𑒁𑒢𑒦𑒱𑒖𑓂𑒘𑒞𑒰𑒏 𑒥𑒼𑒡 𑒯𑒼𑒃𑒞 𑒕𑒪𑒢𑓂𑒯𑒱।𑒑𑒰𑒧𑒏 𑒣𑓂𑒩𑒫𑒰𑒮𑒧𑒹 𑒋𑒏𑒥𑒹𑒩 𑒂𑒩𑒳𑒝𑒱 𑒣𑒱𑒞𑒰𑒏𑒹𑒿 𑒔𑒱𑒙𑓂𑒚𑒲 𑒪𑒱𑒐𑒢𑒹 𑒕𑒪𑒰𑒯 𑒏𑒰𑒩𑒝 𑒯𑒳𑒢𑒏𑒩 𑒖𑒳𑒞𑓂𑒞𑒰 𑒬𑒯𑒩𑒹𑒧𑒹 𑒕𑒴𑒙𑒱 𑒑𑒹𑒪 𑒕𑒪𑒢𑓂𑒯𑒱। 𑒖𑒳𑒞𑓂𑒞𑒰𑒞𑒿 𑒂𑒥𑒱𑒨𑒹 𑒑𑒹𑒪𑒢𑓂𑒯𑒱 𑒮𑓀𑒑𑒯𑒱 𑒔𑒱𑒙𑓂𑒚𑒲𑒧𑒹 𑒂𑒩𑒳𑒝𑒱𑒏 𑒪𑒱𑒐𑒪 𑒞𑒲𑒢 𑒙𑒰 𑒬𑒰𑒥𑓂𑒠𑒱𑒏 𑒑𑒪𑒞𑒲𑒏 𑒫𑒱𑒫𑒩𑒝 𑒮𑒹𑒯𑒼 𑒂𑒋𑒪 𑒂 𑒄𑒯𑒼 𑒧𑒼𑒢 𑒣𑒰𑒛𑓃𑒪 𑒑𑒹𑒪 𑒖𑒹 𑒋𑒏𑒥𑒹𑒩 𑒠𑒾𑒑𑒱 𑒏𑒋 𑒑𑒝𑒱𑒞𑒏 𑒣𑓂𑒩𑒬𑓂𑒢 𑒯𑒪 𑒏𑒩𑒥𑒰𑒏 𑒣𑓂𑒩𑒞𑒱𑒨𑒼𑒑𑒱𑒞𑒰𑒧𑒹 𑒞𑒲𑒢𑒏 𑒥𑒠𑒪𑒰 𑒯𑒩𑒥𑒛𑓃𑒲𑒧𑒹 𑒠𑒳𑒃𑒨𑒹𑒙𑒰 𑒣𑓂𑒩𑒬𑓂𑒢𑒏𑒹𑒿 𑒯𑒪 𑒏𑓄 𑒏𑒋 𑒂𑒩𑒳𑒝𑒱 𑒏𑒼𑒢𑒰 𑒁𑒣𑒢 𑒏𑒰𑒣𑒲 𑒖𑒧𑒰 𑒏𑒋 𑒠𑒹𑒢𑒹 𑒕𑒪𑒰𑒯। 𑒯𑒳𑒢𑒏𑒩 𑒮𑓂𑒫𑒦𑒰𑒫𑒧𑒹 𑒏𑓂𑒩𑒼𑒡𑒏 𑒣𑓂𑒩𑒫𑒹𑒬 𑒏𑒐𑒢 𑒦𑒹𑒪𑒢𑓂𑒯𑒱 𑒮𑒹 𑒞𑒿 𑒯𑒳𑒢𑒏𑒼 𑒢𑒯𑒱 𑒥𑒳𑒗𑒥𑒰𑒧𑒹 𑒁𑒋𑒪𑒢𑓂𑒯𑒱 𑒧𑒳𑒠𑒰 𑒣𑒱𑒞𑒰𑒖𑒲 𑒯𑒳𑒢𑒏𑒰 “𑒏𑓂𑒩𑒼𑒡𑒏 𑒮𑒧𑒰𑒢 𑒏𑒼𑒢𑒼 𑒠𑒼𑒮𑒩 𑒩𑒱𑒣𑒳 𑒢𑒯𑒱” 𑒋𑒯𑒱 𑒮𑓀𑒮𑓂𑒏𑒵𑒞 𑒬𑓂𑒪𑒼𑒏𑒏 𑒠𑒮 𑒥𑒹𑒩 𑒣𑒰𑒚 𑒏𑒩𑒥𑒰𑒏 𑒢𑒱𑒩𑓂𑒠𑒹𑒬 𑒠𑒹𑒢𑒹 𑒕𑒪𑒐𑒱𑒢𑓂𑒯- 𑒮𑒹 𑒡𑒩𑒱 𑒧𑒼𑒢 𑒕𑒢𑓂𑒯𑒱। 𑒋𑒏𑒙𑒰 𑒒𑒙𑒢𑒰 𑒮𑒹𑒯𑒼 𑒦𑒹𑒪 𑒕𑒪 𑒖𑒰𑒯𑒱𑒧𑒹 𑒮𑓂𑒏𑒴𑒪𑒧𑒹 𑒋𑒏𑒙𑒰 𑒥𑒔𑓂𑒔𑒰 𑒗𑒑𑒛𑓃𑒰𑒏 𑒧𑒡𑓂𑒨 𑒮𑒱𑒪𑒹𑒙𑒮𑒿 𑒯𑒳𑒢𑒏𑒩 𑒧𑒰𑒟 𑒤𑒼𑒛𑓃𑒱 𑒠𑒹𑒢𑒹 𑒕𑒪𑒢𑓂𑒯𑒱। 𑒂𑒩𑒳𑒝𑒱 𑒮𑒹𑒯𑒼 𑒮𑒱𑒪𑒹𑒙 𑒅𑒚𑒹𑒪𑒟𑒱 𑒧𑒳𑒠𑒰 𑒄 𑒮𑒼𑒔𑒱 𑒖𑒹 𑒍𑒏𑒩 𑒧𑒰𑒟 𑒤𑒴𑒙𑒱 𑒖𑒋𑒞𑒻𑒏 𑒯𑒰𑒟 𑒩𑒼𑒏𑒱 𑒪𑒹𑒢𑒹 𑒕𑒪𑒰𑒯। 𑒋𑒏𑒩 𑒣𑒩𑒱𑒝𑒰𑒧𑒮𑓂𑒫𑒩𑒴𑒣 𑒯𑒳𑒢𑒏𑒩 𑒣𑒱𑒞𑒰 𑒠𑒴 𑒑𑒼𑒙 𑒏𑒰𑒖 𑒏𑒹𑒪𑒢𑓂𑒯𑒱। 𑒋𑒏 𑒞𑒿 𑒯𑒳𑒢𑒏𑒩 𑒮𑒱𑒪𑒹𑒙𑒏𑒹𑒿 𑒥𑒠𑒪𑒱 𑒏𑒋 𑒪𑒼𑒯𑒰𑒏 𑒥𑒠𑒪𑒰 𑒪𑒏𑒛𑓃𑒲𑒏 𑒏𑒼𑒩𑒥𑒪𑒰 𑒮𑒱𑒪𑒹𑒙 𑒠𑒹𑒪𑒐𑒱𑒢𑓂𑒯 𑒖𑒏𑒩 𑒏𑒼𑒢𑒼 𑒢𑒹 𑒏𑒼𑒢𑒼 𑒦𑒰𑒑𑒏 𑒪𑒏𑒛𑓃𑒲 𑒐𑒳𑒖𑒱 𑒖𑒰𑒃𑒞 𑒕𑒪𑒻𑒏 𑒂 𑒠𑒼𑒮𑒩 𑒖𑒹 𑒏𑒰𑒪𑒼𑒢𑒲𑒧𑒹 𑒮𑒧𑒏𑒏𑓂𑒭 𑒁𑒡𑒱𑒏𑒰𑒩𑒲𑒏 𑒥𑒻𑒚𑒏 𑒥𑒖𑒰 𑒏𑒋 𑒏𑒰𑒪𑒼𑒢𑒲-𑒁𑒯𑒱𑒧𑒹 𑒮𑓂𑒏𑒴𑒪 𑒐𑒼𑒪𑒱 𑒠𑒹𑒪 𑒑𑒹𑒪 𑒖𑒞𑒋 𑒂𑒩𑒳𑒝𑒱 𑒣𑒜𑓃𑒋 𑒪𑒑𑒪𑒰𑒯। 𑒥𑒰𑒠𑒧𑒹 𑒏𑓂𑒨𑒼 𑒣𑓀𑒛𑒱𑒞 𑒖𑒐𑒢 𑒫𑒰𑒪𑓂𑒧𑒲𑒏𑒱 𑒩𑒰𑒧𑒰𑒨𑒝𑒏 𑒮𑒳𑒢𑓂𑒠𑒩𑒏𑒰𑒝𑓂𑒛𑒏 𑒣𑒰𑒚 𑒞𑒿 𑒏𑓂𑒨𑒼 𑒖𑓂𑒨𑒼𑒞𑒱𑒭 𑒏𑒿𑒑𑒳𑒩𑒱𑒨𑒰 𑒂𑒿𑒑𑒳𑒩𑒧𑒹 𑒧𑒼𑒞𑒲 𑒂 𑒏𑒱 𑒧𑒴𑒢𑒮𑓂𑒙𑒼𑒢 𑒣𑒯𑒱𑒩𑒥𑒰𑒏 𑒮𑒪𑒰𑒯 𑒏𑓂𑒩𑒼𑒡 𑒏𑒧 𑒏𑒩𑒥𑒰𑒏 𑒪𑒹𑒪 𑒠𑒹𑒥𑒋 𑒪𑒑𑒻𑒞 𑒕𑒪𑒰𑒯 𑒞𑒿 𑒍 𑒮𑓀𑒮𑓂𑒏𑒵𑒞 𑒬𑓂𑒪𑒼𑒏 𑒯𑒳𑒢𑒏𑒰 𑒧𑒼𑒢 𑒣𑒛𑓃𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒥𑒰𑒪 𑒮𑓀𑒮𑓂𑒏𑒰𑒩𑒏 𑒁𑓀𑒞𑒩𑓂𑒑𑒞 𑒮𑒯𑒰𑒨𑒞𑒰 𑒧𑒰𑒿𑒑𑒥𑒰𑒧𑒹 𑒂 𑒮𑒧𑒗𑒾𑒞𑒰 𑒏𑒩𑒥𑒰𑒧𑒹 𑒁𑒐𑒢𑒼 𑒯𑒳𑒢𑒏𑒰 𑒁𑒮𑒯𑒖𑒞𑒰 𑒁𑒢𑒳𑒦𑒫 𑒯𑒼𑒃𑒞 𑒕𑒢𑓂𑒯𑒱। 𑒧𑒳𑒠𑒰 𑒯𑒰𑒩𑒱 𑒂 𑒖𑒲𑒞 𑒠𑒳𑒢𑒳𑒏𑒹𑒿 𑒥𑒩𑒰𑒥𑒩 𑒥𑒴𑒗𑒱 𑒨𑒳𑒠𑓂𑒡 𑒏𑒩𑒥𑒰𑒏 𑒫𑒱𑒬𑓂𑒫𑒰𑒮 𑒯𑒳𑒢𑒏𑒰𑒧𑒹 𑒢𑒯𑒱 𑒩𑒯𑒪𑒢𑓂𑒯𑒱। 𑒂 𑒫𑒱𑒖𑒨 𑒯𑒳𑒢𑒏𑒩 𑒪𑒏𑓂𑒭𑓂𑒨 𑒥𑒢𑒻𑒞 𑒑𑒹𑒪𑒢𑓂𑒯𑒱 𑒬𑒢𑒻𑓁-𑒬𑒢𑒻𑓁। 𑒖𑒏𑒩 𑒍 𑒖𑒲-𑒖𑒰𑒢𑒮𑒿 𑒧𑒠𑒞𑒱 𑒏𑒋𑒪𑒢𑓂𑒯𑒱 𑒮𑒹𑒯𑒼 𑒮𑒧𑒨𑒣𑒩 𑒯𑒳𑒢𑒏𑒩 𑒮𑓀𑒑 𑒠𑒹𑒪𑒏𑒢𑓂𑒯𑒱। 𑒮𑒧𑒨-𑒮𑒧𑒨 𑒣𑒩 𑒏𑒋𑒪 𑒑𑒹𑒪 𑒮𑒧𑒗𑒾𑒞𑒰 𑒮𑒦 𑒯𑒳𑒢𑒏𑒩 𑒮𑓀𑒒𑒩𑓂𑒭𑒏𑒹𑒿 𑒏𑒧 𑒏𑒹𑒪𑒏𑒢𑓂𑒯𑒱। 𑒖𑒞𑒹𑒏𑒮𑒿 𑒠𑒼𑒮𑓂𑒞𑒱𑒨𑒰𑒩𑒲 𑒕𑒪𑒢𑓂𑒯𑒱 𑒞𑒏𑒩𑒹 𑒢𑒱𑒦𑒹𑒢𑒰𑒃 𑒧𑒳𑒬𑓂𑒏𑒱𑒪 𑒦𑒋 𑒩𑒯𑒪 𑒕𑒪𑒢𑓂𑒯𑒱। 𑒤𑒹𑒩 𑒞𑒿 𑒢𑒫 𑒬𑒯𑒩𑒧𑒹 𑒢𑒫 𑒮𑓀𑒑𑒲𑒏 𑒯𑒹𑒞𑒳 𑒮𑓂𑒟𑒰𑒢 𑒢𑒯𑒱 𑒥𑒔𑒪। 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰𑒏 𑒁𑓀𑒞 𑒢𑒯𑒱 𑒂 𑒖𑒲𑒫𑒢 𑒖𑒲𑒥𑒰𑒏 𑒏𑒪𑒰 𑒮𑒦𑒏 𑒁𑒠𑓂𑒫𑒱𑒞𑒲𑒨 𑒁𑒕𑒱। 𑒂𑒩𑒳𑒝𑒱 𑒄 𑒢𑒰𑒧 𑒂𑒥 𑒏𑒐𑒢𑒼-𑒏𑒐𑒢𑒼 𑒒𑒩𑒧𑒹 𑒮𑒳𑒢𑒰𑒃 𑒣𑒛𑓃𑒻𑒞 𑒕𑒪। 𑒏𑒪𑒏𑒞𑓂𑒞𑒰 𑒬𑒯𑒩 𑒣𑓂𑒩𑒞𑒱𑒦𑒰𑒏 𑒣𑒴𑒖𑒰 𑒏𑒩𑒻𑒞 𑒁𑒕𑒱। 𑒧𑒳𑒠𑒰 𑒫𑓂𑒨𑒫𑒮𑒰𑒨𑒲 𑒯𑒼𑒋𑒥𑒰𑒧𑒹 𑒋𑒏𑒙𑒰 𑒥𑒰𑒡𑒰 𑒕𑒪 - 𑒁𑓀𑒑𑓂𑒩𑒹𑒖𑒲𑒏 𑒮𑓀𑒑 𑒥𑒰𑒓𑒪𑒰𑒏 𑒖𑓂𑒘𑒰𑒢 𑒖𑒹 𑒍 𑒥𑒰𑒙 𑒔𑒪𑒻𑒞 𑒮𑒲𑒐𑒱 𑒑𑒹𑒪𑒰𑒯। 𑒫𑓂𑒨𑒮𑓂𑒞 𑒖𑒲𑒫𑒢𑒧𑒹 𑒥𑒲𑒧𑒰𑒩𑒲𑒏 𑒮𑓂𑒟𑒱𑒞𑒱-𑒁𑒯𑒱𑒧𑒹 𑒯𑒳𑒢𑒏𑒰 𑒂𑒩𑒰𑒧 𑒦𑒹𑒙𑒻𑒞 𑒕𑒪𑒢𑓂𑒯𑒱। 𑒥𑒲𑒧𑒰𑒩𑒱𑒨𑒹𑒧𑒹 𑒮𑒼𑒔𑒥𑒰𑒏 𑒂𑒠𑒞𑒱 𑒧𑒼𑒢 𑒣𑒛𑓃𑒻𑒞 𑒕𑒪𑒢𑓂𑒯𑒱। 𑒂 𑒄 𑒤𑓂𑒪𑒻𑒙 𑒏𑒱𑒢𑒪𑒰𑒏 𑒥𑒰𑒠 𑒧𑒰𑒋𑒏𑒹𑒿 𑒮𑒹𑒯𑒼 𑒥𑒖𑒰 𑒪𑒹𑒪𑒐𑒱𑒢𑓂𑒯। 𑒍𑒢𑒰 𑒯𑒳𑒢𑒏𑒰 𑒥𑒳𑒗𑒪 𑒕𑒪𑒢𑓂𑒯𑒱 𑒖𑒹 𑒧𑒰𑒋 𑒋𑒯𑒱 𑒮𑒦𑒮𑒿 𑒣𑓂𑒩𑒦𑒰𑒫𑒱𑒞 𑒢𑒯𑒱 𑒯𑒼𑒋𑒞𑒲𑒯। 𑒏𑒰𑒩𑒝 𑒍 𑒁𑒡𑒱𑒏𑒰𑒩𑒲 𑒣𑒞𑓂𑒢𑒲 𑒕𑒪𑒲𑒯 𑒂 𑒣𑒳𑒞𑓂𑒩𑒏𑒹𑒿 𑒮𑒹𑒯𑒼 𑒍𑒯𑒱 𑒩𑒴𑒣𑒧𑒹 𑒠𑒹𑒐𑒥𑒰𑒏 𑒏𑒰𑒧𑒢𑒰 𑒕𑒪𑒢𑓂𑒯𑒱। 𑒄 𑒢𑒫 𑒬𑒯𑒩 𑒯𑒳𑒢𑒏 𑒣𑒳𑒞𑓂𑒩𑒏 𑒫𑓂𑒨𑒏𑓂𑒞𑒱𑒞𑓂𑒫𑒧𑒹 𑒮𑒻𑒠𑓂𑒡𑒰𑓀𑒞𑒱𑒏𑒞𑒰𑒏 𑒮𑓂𑒟𑒰𑒢𑒣𑒩 𑒣𑓂𑒩𑒰𑒨𑒼𑒑𑒱𑒏𑒞𑒰𑒏 𑒣𑓂𑒩𑒞𑒱𑒬𑒞𑒞𑒰 𑒥𑒜𑓃𑒰 𑒠𑒹𑒢𑒹 𑒕𑒪𑒢𑓂𑒯𑒱। 𑒂𑒥 𑒮𑒧𑒨𑒰𑒦𑒰𑒫𑒏 𑒏𑒰𑒩𑒝 𑒮𑓂𑒫𑒰𑒮𑓂𑒟𑓂𑒨 𑒐𑒩𑒰𑒥 𑒦𑒹𑒪𑒹𑒣𑒩𑒰𑓀𑒞 𑒮𑒼𑒔𑒥𑒼𑒏 𑒮𑒧𑒨 𑒣𑒳𑒞𑓂𑒩𑒏𑒹𑒿 𑒦𑒹𑒙𑒻𑒞 𑒕𑒪𑒢𑓂𑒯𑒱।𑒫𑓂𑒨𑒫𑒮𑒰𑒨𑒧𑒹 𑒮𑒤𑒪𑒞𑒰 𑒣𑓂𑒩𑒰𑒣𑓂𑒞𑒱𑒏 𑒣𑒴𑒩𑓂𑒫 𑒂𑒩𑒳𑒝𑒱 𑒋𑒏𑒙𑒰 𑒏𑒰𑒑𑒖𑒏 𑒣𑓂𑒩𑒱𑓀𑒙𑒱𑓀𑒑 𑒣𑓂𑒩𑒹𑒮𑒧𑒹 𑒏𑒰𑒖 𑒏𑒹𑒢𑒰𑒃 𑒬𑒳𑒩𑒳 𑒏𑒹𑒪𑒢𑓂𑒯𑒱। 𑒁𑒣𑒢 𑒧𑒱𑒞𑓂𑒩𑒫𑒞 𑒣𑓂𑒩𑒱𑓀𑒙𑒱𑓀𑒑 𑒣𑓂𑒩𑒹𑒮 𑒧𑒰𑒪𑒱𑒏𑒮𑒿 𑒠𑒩𑒧𑒰𑒯𑒰𑒏 𑒥𑒠𑒪𑒰 𑒣𑒩𑓂𑒮𑒹𑓀𑒙𑒹𑒖 𑒣𑒩 𑒏𑒰𑒖 𑒏𑒩𑒥𑒰𑒏 𑒂𑒑𑓂𑒩𑒯 𑒏𑒹𑒪𑒢𑓂𑒯𑒱। 𑒂𑒩𑓂𑒛𑒩 𑒂𑒢𑒱 𑒥𑒰𑒃𑓀𑒛𑒱𑓀𑒑 𑒂 𑒣𑓂𑒩𑒱𑓀𑒙𑒱𑓀𑒑 𑒏𑒩𑒥𑒰𑒥𑒟𑒱 𑒂 𑒂𑒮𑓂𑒞𑒹-𑒂𑒮𑓂𑒞𑒹 𑒁𑒣𑒢 𑒋𑒏𑒙𑒰 𑒣𑓂𑒩𑒱𑓀𑒙𑒱𑓀𑒑 𑒣𑓂𑒩𑒹𑒮 𑒪𑒑𑒍𑒪𑒟𑒱। 𑒏𑒱𑒕𑒳 𑒑𑒼𑒙𑒹 𑒯𑒱𑒢𑒏𑒰 𑒁𑒯𑒱𑒚𑒰𑒧𑒮𑒿 𑒕𑒣𑒰𑒃 𑒏𑒩𑒥𑒰 𑒏𑒋 𑒑𑓂𑒩𑒰𑒯𑒏𑒏𑒹𑒿 𑒥𑒹𑒔𑒟𑒱। 𑒯𑒳𑒢𑒏𑒰 𑒖𑒐𑒢 𑒋𑒯𑒱 𑒥𑒰𑒞𑒏 𑒣𑒞𑒰 𑒔𑒪𑒪𑒢𑓂𑒯𑒱 𑒞𑒿 𑒍 𑒋𑒏𑒙𑒰 𑒔𑒪𑒰𑒏𑒲 𑒏𑒹𑒪𑒟𑒱 𑒖𑒹 𑒮𑒦 𑒥𑓀𑒛𑒪𑒧𑒹 𑒁𑒣𑒢 𑒣𑓂𑒩𑒹𑒮𑒏 𑒏𑒻𑒪𑒹𑓀𑒛𑒩 𑒡𑓄 𑒠𑒹𑒪𑒐𑒱𑒢𑓂𑒯। 𑒖𑒐𑒢 𑒁𑓀𑒞𑒱𑒧 𑒅𑒣𑒦𑒼𑒏𑓂𑒞𑒰𑒏𑒹𑒿 𑒣𑒞𑒰 𑒔𑒪𑒪𑒻𑒏 𑒖𑒹 𑒍 𑒮𑒦 𑒁𑒢𑒰𑒫𑒬𑓂𑒨𑒏𑒹 𑒠𑒪𑒰𑒪𑒏 𑒧𑒰𑒡𑓂𑒨𑒧𑒮𑒿 𑒮𑒧𑒰𑒢 𑒏𑒲𑒢𑒱 𑒩𑒯𑒪 𑒕𑒪𑒰𑒯 𑒞𑒿 𑒍 𑒮𑒦 𑒮𑒼𑒗𑒹 𑒂𑒩𑒳𑒝𑒱 𑒣𑓂𑒩𑒱𑓀𑒙𑒱𑓀𑒑 𑒣𑓂𑒩𑒹𑒮𑒏𑒹𑒿 𑒂𑒩𑓂𑒛𑒩 𑒠𑒹𑒥𑒋 𑒪𑒰𑒑𑒪। 𑒂𑒩𑒳𑒝𑒱𑒏𑒹𑒿 𑒒𑒩𑒧𑒹 𑒁𑒣𑒢 𑒢𑒰𑒧 𑒏𑒐𑒢𑒯𑒳𑒿 𑒏𑒰𑒪𑒹 𑒮𑒳𑒢𑒱 𑒣𑒛𑓃𑒢𑓂𑒯𑒱। 𑒏𑒱𑒞𑒰𑒥𑒏 𑒆𑒣𑒩 𑒕𑒣𑒪 𑒯𑒳𑒢𑒏𑒩 𑒢𑒰𑒧 𑒞𑒿 𑒏𑒼𑒢𑒼 𑒏𑓀𑒣𑒢𑒲𑒏 𑒕𑒪𑒻𑒏- 𑒂 𑒍 𑒍𑒏𑒩𑒰𑒮𑒿 𑒢𑒱𑒏𑒙𑒞𑒰 𑒁𑒢𑒳𑒦𑒫 𑒢𑒯𑒱 𑒏𑓄 𑒣𑒰𑒥𑒱 𑒮𑒏𑒻𑒞 𑒕𑒪𑒰𑒯। 𑒮𑓀𑒮𑒰𑒩𑒏 𑒏𑒳𑒔𑒰𑒪𑒱 𑒯𑒳𑒢𑒏𑒩 𑒣𑒱𑒞𑒰𑒏 𑒮𑓀𑒒𑒩𑓂𑒭𑒏 𑒁𑓀𑒞 𑒏𑒹𑒢𑒹 𑒕𑒪𑒢𑓂𑒯𑒱 𑒧𑒳𑒠𑒰 𑒂𑒩𑒳𑒝𑒱 𑒫𑓂𑒨𑒰𑒫𑒮𑒰𑒨𑒱𑒏 𑒨𑒳𑒠𑓂𑒡 𑒧𑒮𑓂𑒞𑒱𑒭𑓂𑒏𑒮𑒿 𑒪𑒛𑓃𑒻𑒞 𑒂 𑒖𑒱𑒞𑒻𑒞 𑒑𑒹𑒪𑒰𑒯।𑒧𑒰𑒋𑒏 𑒁𑒋𑒪𑒰𑒏 𑒥𑒰𑒠 𑒂𑒩𑒳𑒝𑒱 𑒄 𑒢𑒰𑒧 𑒥𑒲𑒮𑒼 𑒥𑒹𑒩 𑒠𑒱𑒢 𑒦𑒩𑒱𑒧𑒹 𑒮𑒳𑒢𑒰𑒃 𑒣𑒛𑓃𑒋 𑒪𑒰𑒑𑒪। 𑒍𑒏𑒩 𑒮𑓀𑒑𑒲 𑒪𑒼𑒏𑒢𑒱 𑒅𑒣𑒩𑒼𑒏𑓂𑒞 𑒫𑓂𑒨𑒰𑒫𑒮𑒰𑒨𑒱𑒏 𑒮𑒤𑒪𑒞𑒰𑒏 𑒒𑒙𑒢𑒰 𑒮𑒦𑒏𑒹𑒿 𑒖𑒐𑒢 𑒂𑒩𑒳𑒝𑒱𑒏 𑒧𑒰𑒋𑒏𑒹𑒿 𑒮𑒳𑒢𑒥𑒻𑒞 𑒩𑒯𑒻𑒞 𑒕𑒪𑒰𑒯, 𑒄 𑒮𑒼𑒔𑒱 𑒖𑒹 𑒍 𑒁𑒣𑒢 𑒧𑒱𑒞𑓂𑒩𑒏 𑒥𑒛𑓃𑒰𑒃 𑒏𑓄 𑒩𑒯𑒪 𑒕𑒪𑒰𑒯 𑒞𑒿 𑒂𑒩𑒳𑒝𑒱 𑒁𑒮𑒯𑒖𑒞𑒰𑒏 𑒁𑒢𑒳𑒦𑒫 𑒏𑒩𑒋 𑒪𑒑𑒻𑒞 𑒕𑒪𑒰𑒯 𑒂 𑒑𑒣𑓂𑒣𑒏𑒹𑒿 𑒠𑒼𑒮𑒩 𑒠𑒱𑒬𑒱 𑒧𑒼𑒛𑓃𑒱 𑒠𑒻𑒞 𑒕𑒪𑒰𑒯। 𑒯𑒳𑒢𑒏𑒩 𑒧𑒰𑒋 𑒞𑒿 𑒖𑒹𑒢𑒰 𑒯𑒳𑒢𑒏 𑒫𑒱𑒫𑒰𑒯𑒏 𑒯𑒹𑒞𑒳 𑒂𑒋𑒪 𑒕𑒪𑒲𑒯। 𑒧𑒰𑒨 𑒖𑒐𑒢 𑒖𑒱𑒠𑓂𑒠 𑒚𑒰𑒢𑒪𑒢𑓂𑒯𑒱 𑒞𑒿 𑒯𑒳𑒢𑒏𑒰 𑒂𑒬𑓂𑒔𑒩𑓂𑒨 𑒦𑒹𑒪𑒢𑓂𑒯𑒱 𑒏𑒰𑒩𑒝 𑒒𑒩𑒧𑒹 𑒖𑒱𑒠𑓂𑒠𑒏 𑒋𑒏𑒰𑒡𑒱𑒏𑒰𑒩 𑒞𑒿 𑒯𑒳𑒢𑒏𑒹𑒙𑒰 𑒕𑒪𑒢𑓂𑒯𑒱। 𑒧𑒳𑒠𑒰 𑒧𑒰𑒋 𑒥𑒴𑒗𑒱 𑒑𑒹𑒪 𑒕𑒪𑒲𑒯 𑒖𑒹 𑒯𑒳𑒢𑒏𑒩 𑒥𑒹𑒙𑒰 𑒣𑓂𑒩𑒻𑒏𑓂𑒙𑒱𑒏𑒪 𑒦𑒋 𑒑𑒹𑒪 𑒕𑒢𑓂𑒯𑒱 𑒂 𑒖𑒱𑒠𑓂𑒠 𑒏𑒹𑒢𑒰𑒃 𑒥𑒱𑒮𑒩𑒱 𑒑𑒹𑒪 𑒕𑒢𑓂𑒯𑒱। 𑒂𑒩𑒳𑒝𑒱 𑒮𑒼𑒔𑒪𑒢𑓂𑒯𑒱 𑒖𑒹 𑒕𑒼𑒙𑒧𑒹 𑒥𑒛𑓂𑒛 𑒖𑒱𑒠𑓂𑒠 𑒣𑒴𑒩𑒰 𑒏𑒩𑒥𑒍𑒢𑒹 𑒕𑒟𑒱 𑒞𑒹𑒿 𑒂𑒥 𑒯𑒱𑒢𑒏𑒩 𑒖𑒱𑒠𑓂𑒠 𑒣𑒴𑒩𑒰 𑒏𑒩𑒥𑒰𑒏 𑒮𑒧𑒨 𑒂𑒋𑒪 𑒁𑒕𑒱। 𑒫𑒱𑒫𑒰𑒯 𑒤𑒹𑒩 𑒥𑒔𑓂𑒔𑒰। 𑒧𑒰𑒋 𑒁𑒣𑒢 𑒢𑒰𑒞𑒱𑒧𑒹 𑒣𑒞𑒱𑒏 𑒩𑒴𑒣 𑒠𑒹𑒐𑒪𑒢𑓂𑒯𑒱। 𑒣𑒞𑒱𑒏 𑒧𑒵𑒞𑓂𑒨𑒳𑒏 𑒣𑒯𑒱𑒢𑒯𑒱 𑒥𑒹𑒙𑒰 𑒣𑓂𑒩𑒻𑒏𑓂𑒙𑒱𑒏𑒪 𑒥𑒢𑒱 𑒑𑒹𑒪 𑒕𑒪𑒢𑓂𑒯𑒱। 𑒧𑒳𑒠𑒰 𑒂𑒥 𑒄 𑒢𑒯𑒱 𑒯𑒼𑒋𑒞। 𑒖𑒹 𑒏𑒰𑒖 𑒥𑒹𑒙𑒰 𑒢𑒯𑒱 𑒏𑒋 𑒮𑒏𑒪 𑒮𑒹 𑒂𑒥 𑒢𑒻𑒞 𑒏𑒩𑒞। 𑒢𑒰𑒞𑒱𑒏 𑒢𑒰𑒧𑒧𑒹 𑒥𑒹𑒙𑒰 𑒂 𑒣𑒞𑒱 𑒠𑒳𑒯𑒳𑒏 𑒢𑒰𑒧𑒏 𑒮𑒧𑒰𑒫𑒹𑒬 𑒏𑒹𑒪𑒢𑓂𑒯𑒱- 𑒂𑒩𑒳𑒝𑒱 𑒢𑒢𑓂𑒠। 𑒤𑒹𑒩 𑒣𑒜𑓃𑒰𑒃 𑒬𑒳𑒩𑒳- 𑒮𑒱𑒠𑓂𑒡𑒩𑒮𑓂𑒞𑒳-𑒬𑓂𑒩𑒲 𑒑𑒝𑒹𑒬𑒖𑒲𑒏 𑒁𑓀𑒏𑒳𑒬 𑒂 𑒫𑒻𑒯 𑒅𑒑𑓂𑒩𑒹𑒢 𑒞𑒣𑒮𑒰 𑒪𑒥𑓂𑒡𑒼 𑒨𑒨𑒰 𑒣𑒬𑒳𑒣𑒞𑒱𑓁𑒣𑒞𑒱𑓁। 𑒯𑒳𑒢𑒏𑒩 𑒥𑒹𑒙𑒰𑒏𑒹𑒿 𑒣𑒞𑒱 𑒣𑒜𑓃𑒹𑒪𑒐𑒱𑒢𑓂𑒯 𑒍 𑒞𑒿 𑒒𑒩 𑒮𑒧𑓂𑒯𑒰𑒩𑒻𑒞 𑒕𑒪𑒲𑒯। 𑒂𑒥 𑒣𑒳𑒞𑒼𑒯𑒳 𑒒𑒩 𑒮𑒧𑓂𑒯𑒰𑒩𑒪𑒢𑓂𑒯𑒱, 𑒥𑒹𑒙𑒰𑒏𑒹𑒿 𑒞𑒿 𑒤𑒳𑒩𑒮𑒞𑒱𑒨𑒹 𑒢𑒯𑒱। 𑒂𑒥 𑒥𑒰 𑒣𑒜𑒹𑒞𑒲𑒯 𑒢𑒰𑒞𑒱𑒏𑒹𑒿।
𑒅𑒞𑒣𑒞𑓂𑒮𑓂𑒨𑒹𑒞 𑒯𑒱𑒧𑒧 𑒏𑒼𑓄𑒣𑒱 𑒮𑒧𑒰𑒢𑒡𑒩𑓂𑒧𑒰 𑒏𑒰𑒪𑒼𑒯𑓂𑒨𑒧 𑒢𑒱𑒩𑒫𑒡𑒱𑒩𑓂𑒫𑒱𑒣𑒳𑒪𑒰 𑒔 𑒣𑒵𑒟𑓂𑒫𑒲।
𑒣𑒵𑒟𑓂𑒫𑒲 𑒫𑒱𑒬𑒰𑒪 𑒁𑒕𑒱 𑒂 𑒏𑒰𑒪 𑒢𑒱𑒮𑓂𑒮𑒲𑒧,𑒁𑒢𑓀𑒞, 𑒋𑒯𑒱 𑒯𑒹𑒞𑒳 𑒫𑒱𑒬𑓂𑒫𑒰𑒮 𑒁𑒕𑒱 𑒖𑒹 𑒂𑒃 𑒢𑒯𑒱 𑒞𑒿 𑒏𑒰𑒪𑓂𑒯𑒱 𑒏𑓂𑒨𑒼 𑒢𑒹 𑒏𑓂𑒨𑒼 𑒯𑒧𑒩 𑒣𑓂𑒩𑒨𑒰𑒮𑒏𑒹𑒿 𑒮𑒰𑒩𑓂𑒟𑒏 𑒥𑒢𑒰𑒋𑒞। 𑒂𑒩𑒳𑒝𑒱 𑒁𑒣𑒢𑒰𑒏𑒹𑒿 𑒁𑒣𑒢 𑒧𑒰𑒋𑒮𑒿 𑒠𑒴𑒩 𑒁𑒢𑒳𑒦𑒫 𑒏𑒹𑒪𑒢𑓂𑒯𑒱, 𑒏𑒱𑒕𑒳 𑒁𑒮𑓂𑒫𑒮𑓂𑒟 𑒮𑒹𑒯𑒼 𑒕𑒟𑒱 𑒂 𑒫𑒳𑒛𑒪𑒻𑒝𑓂𑒛 𑒢𑒩𑓂𑒮𑒱𑓀𑒑 𑒯𑒼𑒧𑒏 𑒮𑒧𑒲𑒣𑒮𑓂𑒟 𑒮𑓂𑒟𑒱𑒞 𑒫𑒱𑒬𑒰𑒪𑒏𑒰𑒨 𑒁𑒣𑒰𑒩𑓂𑒙𑒧𑒹𑓀𑒙𑒏 𑒁𑒣𑒢 𑒤𑓂𑒪𑒻𑒙𑒧𑒹 𑒁𑒮𑒑𑒩𑒯𑒱 𑒁𑒡𑓂𑒨𑒰𑒫𑒮𑒢𑒧𑒹 𑒪𑒲𑒢 𑒁𑒣𑒢 𑒁𑒞𑒲𑒞𑒏 𑒣𑒳𑒢𑒩𑓂𑒫𑒱𑒬𑓂𑒪𑒹𑒭𑒝𑒧𑒹 𑒩𑒞 𑒕𑒟𑒱। 𑒣𑓂𑒩𑒞𑒱𑒨𑒼𑒑𑒱𑒞𑒰 𑒣𑒩𑒲𑒏𑓂𑒭𑒰 𑒮𑒦𑒏 𑒅𑒧𑒩𑒱 𑒥𑒰𑒏𑒲 𑒕𑒪𑒢𑓂𑒯𑒱𑒨𑒹 𑒮𑒹 𑒠𑒴 𑒔𑒰𑒩𑒱𑒙𑒰 𑒣𑒩𑒲𑒏𑓂𑒭𑒰𑒧𑒹 𑒥𑒻𑒮𑒱 𑒑𑒹𑒪𑒰𑒯 𑒂 𑒏𑒹𑒢𑓂𑒠𑓂𑒩 𑒮𑒩𑒏𑒰𑒩𑒏 𑒄 𑒑𑓂𑒩𑒳𑒣 𑒥𑒲 𑒫𑒩𑓂𑒠𑒲𑒥𑒪𑒰 𑒁𑒡𑒱𑒏𑒰𑒩𑒲 𑒥𑒢𑒱 𑒑𑒹𑒪𑒰𑒯। 𑒧𑒰𑒿𑒏𑒹𑒿 𑒏𑒢𑒹𑒏 𑒮𑓀𑒞𑒼𑒐 𑒦𑒹𑒪𑒢𑓂𑒯𑒱 𑒖𑒹 𑒏𑓂𑒪𑒰𑒮 𑒫𑒢 𑒢𑒯𑒱 𑒧𑒳𑒠𑒰 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒞𑒿 𑒏𑒹𑒪𑒏, 𑒄 𑒥𑒱𑒖𑒢𑒹𑒮-𑒞𑒱𑒖𑒢𑒹𑒮 𑒞𑒿 𑒕𑒼𑒛𑓃𑒪𑒏।
“𑒔𑒪𑒯 𑒏𑒢𑒹𑒏 𑒐𑒰 𑒪𑒻𑒯, 𑒋𑒢𑒰 𑒏𑒹𑒢𑒹 𑒏𑒰𑒖 𑒢𑒯𑒱 𑒔𑒪𑒞𑒯”। 𑒂𑒩𑒳𑒝𑒱𑒏 𑒕𑒼𑒙𑒏𑒰 𑒧𑒰𑒧𑒰 𑒣𑓂𑒩𑒹𑒧𑒣𑒴𑒩𑓂𑒫𑒏 𑒠𑒥𑒰𑒛𑓃𑒱 𑒏𑒋 𑒏𑒯𑒪𑒢𑓂𑒯𑒱। 𑒏𑓂𑒩𑒱𑒨𑒰-𑒏𑒩𑓂𑒧 𑒐𑒞𑒧 𑒦𑓄 𑒑𑒹𑒪 𑒕𑒪 𑒂𑒥 𑒒𑒳𑒩𑒥𑒰𑒏 𑒥𑒹𑒩 𑒂𑒥𑒱 𑒑𑒹𑒪 𑒕𑒪, 𑒢𑒼𑒏𑒩𑒲𑒏 𑒮𑓀𑒑 𑒣𑒱𑒞𑒰𑒏 𑒧𑒰𑒩𑓂𑒑𑒣𑒩 𑒒𑒳𑒩𑒥𑒰𑒏 𑒮𑒹𑒯𑒼।
𑓑𑓙𑓙𑓕 𑒏 𑒢𑒫𑒧𑓂𑒥𑒩𑒏 𑒧𑒰𑒮।
𑒏𑒹𑒬 𑒏𑒙𑒰𑒨𑒪 𑒧𑒳𑒿𑒯𑒹𑒿 𑒑𑒰𑒧𑒮𑒿 𑒠𑒩𑒱𑒦𑒓𑓂𑒑𑒰 𑒂 𑒍𑒞𑒋𑒮𑒿 𑒣𑒙𑒢𑒰𑒏 𑒥𑒮 𑒣𑒩 𑒔𑒜𑓃𑒪𑒰𑒯 𑒂𑒩𑒳𑒝𑒱। 𑒏𑒱𑒕𑒳 𑒏𑒱𑒞𑒰𑒥 𑒥𑒹𑒔𑒱𑒢𑒯𑒰𑒩 𑒁𑒋𑒪𑒰𑒯, 𑒞𑒳𑒏 𑒧𑒱𑒪𑒹𑒢𑒹 𑒮𑒦 𑒏𑒱𑒞𑒰𑒥𑒏 𑒫𑒱𑒬𑒹𑒭𑒞𑒰 𑒏𑒯𑒱 𑒮𑒳𑒢𑒍𑒪𑒢𑓂𑒯𑒱।𑒐𑒱𑒮𑓂𑒮𑒰-𑒣𑒱𑒯𑒰𑒢𑒲, 𑒅𑒣𑒔𑒰𑒩, 𑒤𑒴𑒪𑒢-𑒠𑒹𑒫𑒲 𑒮𑒿 𑒪𑒋 𑒧𑒢𑒼𑒯𑒩 𑒣𑒼𑒟𑒲 𑒡𑒩𑒱 𑒮𑒦 𑒨𑒰𑒞𑓂𑒩𑒲𑒑𑒝𑒏𑒹𑒿 𑒋𑒏-𑒋𑒏 𑒙𑒰 𑒣𑒛𑓃𑒮𑒻𑒞 𑒑𑒹𑒪𑒰𑒯।𑒍𑒯𑒱𑒧𑒹 𑒮𑒿 𑒏𑒱𑒕𑒳 𑒧𑒼𑒪-𑒧𑒼𑒪𑒰𑒃 𑒏𑒋𑒪𑒰𑒏 𑒅𑒞𑓂𑒞𑒩 𑒥𑒱𑒏𑒋𑒥𑒼 𑒏𑒋𑒪𑒢𑓂𑒯𑒱 𑒂 𑒮𑒦𑒙𑒰 𑒫𑒰𑒣𑒮 𑒪𑒋 𑒖𑒰𑒃𑒞 𑒑𑒹𑒪𑒰𑒯। 𑒥𑒮𑒮𑒿 𑒅𑒞𑒩𑒻𑒞 𑒏𑒰𑒪 𑒏𑓀𑒛𑒏𑓂𑒙𑒩𑒮𑒿 𑒫𑒰𑒠-𑒫𑒱𑒫𑒰𑒠 𑒮𑒹𑒯𑒼 𑒦𑒹𑒪𑒢𑓂𑒯𑒱। 𑒤𑒹𑒩 𑒢𑒹𑒥𑒼𑒏 𑒩𑒮 𑒢𑒱𑒏𑒰𑒪𑒥𑒰𑒏 𑒨𑓀𑒞𑓂𑒩𑒏 𑒂𑒫𑒱𑒭𑓂𑒏𑒰𑒩𑒏 𑒔𑒜𑓃𑒪𑒰𑒯, 𑒩𑒮 𑒢𑒱𑒏𑒰𑒪𑒱 𑒠𑒹𑒐𑒍𑒪𑒢𑓂𑒯𑒱, 𑒐𑒪𑒰𑒮𑒲𑒮𑒿 𑒫𑒰𑒠-𑒫𑒱𑒫𑒰𑒠𑒏 𑒅𑒣𑒩𑒰𑓀𑒞 𑒍𑒯𑒼 𑒅𑒞𑒩𑒱 𑒑𑒹𑒪𑒰𑒯।𑒤𑒹𑒩 𑒏𑒏𑒥𑒰 𑒥𑒪𑒰, 𑒣𑒹𑒢 𑒥𑒪𑒰 𑒂 𑒣𑒹𑒔𑒏𑒬 𑒥𑒪𑒰 𑒮𑒦 𑒔𑒜𑓃𑒱 𑒏𑒋 𑒅𑒞𑒩𑒻𑒞 𑒑𑒹𑒪𑒰𑒯। 𑒣𑒳𑒕𑒪𑒰𑒏 𑒅𑒣𑒩𑒰𑓀𑒞 𑒣𑒞𑒰 𑒪𑒰𑒑𑒪𑒢𑓂𑒯𑒱 𑒖𑒹 𑒑𑒰𑒛𑓃𑒲 𑒮𑒰𑒜𑓃𑒹 𑒠𑒮 𑒥𑒖𑒹 𑒐𑒳𑒖𑒞, 𑒄 𑒑𑒣𑓂𑒣 𑒥𑒮 𑒥𑒪𑒰 𑒗𑒳𑒙𑓂𑒚𑒹 𑒥𑒰𑒖𑒪 𑒕𑒪। 𑒣𑒕𑒳𑒪𑒏𑒰 𑒥𑒮𑒏 𑒮𑒫𑒰𑒩𑒲𑒏𑒹𑒿 𑒮𑒲𑒙 𑒢𑒯𑒱 𑒦𑒹𑒙𑒪 𑒕𑒪𑒢𑓂𑒯𑒱, 𑒮𑒹 𑒥𑒹𑒬𑒲 𑒁𑒥𑒹𑒩𑒼 𑒢𑒯𑒱 𑒯𑒼𑒋𑒞 𑒂 𑒮𑒲𑒙𑒼 𑒦𑒹𑒙𑒱 𑒖𑒋𑒞, 𑒋𑒯𑒱 𑒞𑒩𑓂𑒏𑒏 𑒮𑓀𑒑 𑒧𑒰𑒩𑓂𑒏𑒹𑒙𑒱𑓀𑒑𑒏 𑒅𑒣𑒏𑒩𑒝𑒏 𑒩𑒴𑒣𑒧𑒹 𑒄 𑒬𑒮𑓂𑒞𑓂𑒩 𑒕𑒼𑒛𑓃𑒪 𑒑𑒹𑒪 𑒕𑒪। 𑒑𑒰𑒛𑓃𑒲 𑒐𑒳𑒖𑒥𑒰𑒏 𑒮𑒧𑒨 𑒕𑒪 𑓑𑓑 𑒥𑒖𑒹 𑒧𑒳𑒠𑒰 𑓑𑓑 𑒥𑒰𑒖𑒱 𑒏𑒋 𑒣𑒰𑒿𑒔 𑒧𑒱𑒢𑒙 𑒡𑒩𑒱 𑒥𑒯𑒮 𑒯𑒼𑒃𑒞 𑒩𑒯𑒪 𑒖𑒹 𑒒𑒛𑓃𑒲𑒧𑒹 𑓑𑓑 𑒥𑒰𑒖𑒪 𑒁𑒕𑒱 𑒂𑒏𑒱 𑒢𑒯𑒱। 𑒣𑒰𑒕𑒰𑒿 𑒋𑒑𑒰𑒩𑒯 𑒥𑒰𑒖𑒱 𑒏𑒋 𑒠𑒮 𑒧𑒱𑒢𑒙 𑒣𑒩 𑒖𑒐𑒢 𑒥𑒰𑒠𑒧𑒹 𑒖𑒰𑒋𑒥𑒪𑒰 𑒥𑒮𑒏 𑒏𑓀𑒛𑒏𑓂𑒙𑒩, 𑒁𑒬𑒼𑒏 𑒧𑒱𑒬𑓂𑒩𑒰 𑒂 𑒬𑒰𑒯𑒲𑒏 𑒥𑒮𑒏 𑒥𑒲𑒔𑒏 𑒦𑒱𑒛𑓃𑓀𑒞𑒏 𑒥𑒰𑒞 𑒏𑒋 𑒗𑒑𑒛𑓃𑒰 𑒥𑒖𑒰𑒩𑒱 𑒠𑒹𑒪𑒏 -𑒖𑒹 𑒋𑒏𑒼 𑒮𑒹𑒏𑒹𑓀𑒛 𑒖𑓂𑒨𑒼𑒿 𑒪𑒹𑒙 𑒯𑒼𑒋𑒞 𑒞𑒿 𑒖𑒹 𑒥𑒳𑒗𑒳 𑒮𑒹 𑒦𑒋 𑒖𑒋𑒞- 𑒞𑒐𑒢 𑒛𑓂𑒩𑒰𑒃𑒫𑒩 𑒁𑒏𑒮𑓂𑒧𑒰𑒞𑒹 𑒯𑒰𑒩𑓂𑒢 𑒥𑒖𑒰𑒥𑒋 𑒪𑒰𑒑𑒪। 𑒂𑒩𑒳𑒝𑒱𑒏 𑒥𑒑𑒪𑒏 𑒮𑒲𑒙 𑒣𑒩 𑒥𑒻𑒮𑒪𑒱 𑒋𑒏𑒙𑒰 𑒥𑒴𑒜𑓃𑒱 𑒥𑒹𑒙𑒰𑒏𑒹𑒿 𑒖𑒼𑒩𑒮𑒿 𑒥𑒖𑒰𑒥𑒋 𑒪𑒑𑒪𑒲𑒯, 𑒣𑒰𑒿𑒔 𑒧𑒱𑒢𑒙 𑒑𑒩𑒠𑒧 𑒑𑒼𑒪 𑒯𑒼𑒃𑒞 𑒩𑒯𑒪। 𑒮𑒦 𑒨𑒰𑒞𑓂𑒩𑒲 𑒔𑒜𑓃𑒱 𑒑𑒹𑒪𑒰𑒯 𑒂 𑒠𑒴-𑒔𑒰𑒩𑒱𑒙𑒰 𑒨𑒰𑒞𑓂𑒩𑒲 𑒖𑒹 𑒁𑒐𑒢𑒹 𑒩𑒱𑒏𑓂𑒬𑒰𑒮𑒿 𑒅𑒞𑒩𑒪 𑒕𑒪𑒰𑒯, 𑒖𑒼𑒩-𑒖𑒼𑒩𑒮𑒿 𑒥𑒰𑒖𑒋 𑒪𑒑𑒪𑒰𑒯। 𑒣𑒕𑒳𑒪𑒏𑒰 𑒥𑒮 𑒥𑒪𑒰 𑒯𑒳𑒢𑒏𑒩 𑒧𑒼𑒙𑒰-𑒔𑒼𑒙𑒰 𑒅𑒚𑒰 𑒏𑒋 𑒁𑒣𑒢𑒰 𑒥𑒮𑒧𑒹 𑒪𑓄 𑒖𑒰𑒋 𑒔𑒰𑒯𑒻𑒞 𑒕𑒪𑒢𑓂𑒯𑒱 𑒧𑒳𑒠𑒰 𑒍 𑒪𑒼𑒏𑒢𑒱 𑒣𑒜𑓃𑒪 𑒪𑒱𑒐𑒪 𑒕𑒪𑒰𑒯 𑒂 𑒁𑒑𑒳𑒪𑒏𑒹 𑒥𑒮𑒮𑒿 𑒖𑒰𑒋 𑒔𑒰𑒯𑒻𑒞 𑒕𑒪𑒰𑒯। 𑒍 𑒪𑒼𑒏𑒢𑒱 𑒠𑒴-𑒔𑒰𑒩𑒱𑒙𑒰 𑒔𑒾𑒡𑒩𑒲-𑒏𑒳𑒿𑒁𑒩𑒏 𑒢𑒰𑒧-𑒑𑒰𑒧 𑒑𑒢𑒍𑒪𑒢𑓂𑒯𑒱, 𑒞𑒐𑒢 𑒍𑒯𑒱 𑒥𑒮 𑒥𑒪𑒰𑒏𑒹𑒿 𑒥𑒳𑒗𑒍𑒪𑒻𑒏 𑒖𑒹 𑒄 𑒮𑒦 𑒤𑒮𑒰𑒠𑒲 𑒪𑒼𑒏 𑒮𑒦 𑒁𑒕𑒱- 𑒮𑒹 𑒏𑒯𑒪𑒏 𑒖𑒹 𑒙𑒴 𑒥𑒰𑒃 𑒙𑒴𑒏 𑒥𑒠𑒪𑒰 𑒍𑒯𑒱 𑒙𑒴 𑒥𑒰𑒃 𑒟𑓂𑒩𑒲 𑒡𑒏𑓂𑒏𑒰𑒑𑒰𑒛𑓃𑒲𑒧𑒹 𑒚𑒰𑒜𑓃𑒹 𑒖𑒋𑒥𑒰𑒏𑒹 𑒖𑓂𑒨𑒼𑒿 𑒃𑒔𑓂𑒕𑒰 𑒁𑒕𑒱 𑒞𑒿 𑒯𑒧 𑒏𑒲 𑒏𑒩𑒴- 𑒏𑒱𑒩𑒰𑒨𑒼 𑒍 𑒋𑒏𑒼 𑒣𑒰𑒃 𑒏𑒧 𑒢𑒯𑒱 𑒪𑒹𑒞। 𑒮𑒹 𑒠𑒴-𑒔𑒰𑒩𑒱 𑒑𑒼𑒙 𑒥𑒹𑒬𑒲 𑒨𑒰𑒞𑓂𑒩𑒲 𑒪𑒹𑒥𑒰𑒏 𑒧𑒢𑒮𑒴𑒥𑒰 𑒣𑒴𑒩𑒰 𑒦𑒹𑒪𑒰𑒏 𑒥𑒰𑒠 𑒛𑓂𑒩𑒰𑒃𑒫𑒩 𑒑𑒰𑒛𑓃𑒲 𑒯𑒰𑒿𑒏𑒱 𑒠𑒹𑒪𑒏। 𑒍𑒯𑒱 𑒩𑒱𑒏𑓂𑒬𑒰-𑒮𑒦 𑒣𑒩𑒮𑒿 𑒋𑒏 𑒑𑒼𑒙 𑒁𑒡𑒫𑒨𑒮𑒴 𑒫𑓂𑒨𑒏𑓂𑒞𑒱 𑒔𑒜𑓃𑒪 𑒕𑒪𑒰𑒯 ।𑒮𑓀𑒨𑒼𑒑 𑒄 𑒦𑒹𑒪 𑒖𑒹 𑒂𑒩𑒳𑒝𑒱𑒏 𑒠𑒼𑒮𑒩 𑒥𑒑𑒪𑒧𑒹 𑒥𑒻𑒮𑒪 𑒫𑓂𑒨𑒏𑓂𑒞𑒱 𑒑𑒳𑒢𑒡𑒳𑒢 𑒏𑒩𑒻𑒞 𑒕𑒪𑒰𑒯 𑒖𑒹 𑒤𑒪𑒢𑒰𑒿 𑒥𑒛𑓃𑒰 𑒥𑒴𑒛𑓃𑒱 𑒁𑒕𑒱, 𑒋𑒐𑒢 𑒡𑒩𑒱 𑒢𑒯𑒱 𑒂𑒋𑒪। 𑒑𑒰𑒛𑓃𑒲 𑒐𑒳𑒖𑒪𑒰𑒏 𑒥𑒰𑒠 𑒁𑒑𑒱𑒪𑒰 𑒔𑒾𑒏 𑒣𑒩 𑒁𑒮𑒏𑒮𑒰 𑒏𑒋 𑒍 𑒅𑒞𑒩𑒱 𑒑𑒹𑒪𑒰𑒯 𑒂 𑒞𑒏𑒩 𑒥𑒰𑒠 𑒍𑒯𑒱 𑒙𑒴 𑒥𑒰𑒃 𑒟𑓂𑒩𑒲 𑒑𑓃𑒰𑒛𑓃𑒲𑒏 𑒞𑒲𑒢 𑒮𑒲𑒙 𑒥𑒪𑒰 𑒯𑒲𑒮𑒧𑒹 𑒂𑒩𑒳𑒝𑒱𑒏 𑒥𑒑𑒪𑒧𑒹 𑒍𑒯𑒱 𑒮𑒖𑓂𑒖𑒢𑒏𑒹𑒿 𑒖𑒑𑒯 𑒦𑒹𑒙𑒱 𑒑𑒹𑒪𑒢𑓂𑒯𑒱।
𑒂𑒩𑒳𑒝𑒱𑒏 𑒧𑒼𑒢 𑒮𑓂𑒟𑒱𑒩 𑒕𑒪𑒢𑓂𑒯𑒱 𑒂 𑒥𑒹𑒬𑒲 𑒥𑒖𑒥𑒰𑒏 𑒃𑒔𑓂𑒕𑒰 𑒢𑒯𑒱 𑒕𑒪𑒢𑓂𑒯𑒱। 𑒧𑒳𑒠𑒰 𑒥𑒑𑒪𑒑𑒲𑒩 𑒣𑒯𑒱𑒢𑒹 𑒁𑒣𑓂𑒣𑒢 𑒦𑒰𑒑𑓂𑒨𑒏𑒹𑒿 𑒡𑒢𑓂𑒨𑒫𑒰𑒠 𑒠𑒹𑒪𑒢𑓂𑒯𑒱 𑒖𑒏𑒩 𑒣𑓂𑒩𑒞𑒰𑒣𑒹 𑒯𑒳𑒢𑒏𑒰 𑒮𑒲𑒙 𑒦𑒹𑒙𑒪𑒢𑓂𑒯𑒱। 𑒣𑒙𑒢𑒰𑒧𑒹 𑒂𑒫𑒬𑓂𑒨𑒏 𑒏𑒰𑒩𑓂𑒨 𑒕𑒪𑒢𑓂𑒯𑒱 𑒞𑒹𑒿 𑒪𑒹𑒙 𑒖𑒰𑒋𑒥𑒪𑒰 𑒥𑒮𑒮𑒿 𑒑𑒹𑒪𑒰 𑒅𑒞𑓂𑒞𑒩 𑒏𑒰𑒖𑒧𑒹 𑒦𑒰𑒓𑒚 𑒣𑒛𑓃𑒱𑒞𑒢𑓂𑒯𑒱। 𑒤𑒹𑒩 𑒁𑒣𑓂𑒣𑒢 𑒣𑒩𑒱𑒔𑒨 𑒁𑒮𑒱𑒮𑓂𑒙𑒹𑓀𑒙 𑒛𑒰𑒨𑒩𑒹𑒏𑓂𑒙𑒩𑒏 𑒩𑒴𑒣𑒧𑒹 𑒠𑒹𑒪𑒰𑒏 𑒅𑒣𑒩𑒰𑓀𑒞 𑒄 𑒮𑒴𑒔𑒢𑒰 𑒠𑒹𑒪𑒢𑓂𑒯𑒱 𑒖𑒹 𑒠𑒩𑒱𑒦𑒓𑓂𑒑𑒰𑒏 𑒮𑓀𑒑 𑒣𑒙𑒢𑒼𑒧𑒹 𑒯𑒳𑒢𑒏𑒩 𑒧𑒏𑒰𑒢 𑒕𑒢𑓂𑒯𑒱। 𑒠𑒳𑒢𑒴 𑒒𑒩 𑒁𑒣𑓂𑒣𑒢 𑒣𑒳𑒩𑒳𑒭𑒰𑒩𑓂𑒟𑒮𑒿 𑒥𑒢𑒋𑒥𑒰𑒏 𑒑𑒣𑓂𑒣𑒏 𑒮𑓀𑒑, 𑒠𑒳𑒢𑒴 𑒒𑒩𑒏 𑒠𑒳𑒧𑒯𑒪𑒰 𑒂 𑒧𑒰𑒩𑒥𑒪 𑒂 𑒑𑓂𑒩𑒹𑒢𑒰𑒃𑒙𑒮𑒿 𑒨𑒳𑒏𑓂𑒞 𑒯𑒼𑒋𑒥𑒰𑒏 𑒥𑒰𑒞𑒼 𑒏𑒯𑒪𑒢𑓂𑒯𑒱। 𑒥𑒖𑒥𑒻𑒏𑒰 𑒪𑒼𑒏 𑒏𑒹𑒿 𑒮𑒳𑒢𑒱𑒢𑒱𑒯𑒰𑒩 𑒪𑒼𑒏 𑒥𑒛𑓂𑒛 𑒣𑒮𑒱𑒢𑓂𑒢 𑒣𑒛𑓃𑒻𑒞 𑒁𑒕𑒱 𑒮𑒹 𑒍 𑒂𑒩𑒳𑒝𑒱𑒏𑒹𑒿 𑒣𑒮𑒱𑒢𑓂𑒢 𑒏𑒩𑒋 𑒪𑒑𑒪𑒰𑒯। 𑒂 𑒞𑒹𑒿 𑒣𑒳𑒕𑒪𑒢𑓂𑒯𑒱-
“𑒣𑒙𑒢𑒰𑒧𑒹 𑒁𑒣𑒢𑒹𑒏 𑒧𑒏𑒰𑒢 𑒏𑒼𑒢 𑒧𑒯𑒪𑓂𑒪𑒰𑒧𑒹 𑒁𑒕𑒱”।
𑒂𑒩𑒳𑒝𑒱 𑒏𑒯𑒪𑒐𑒱𑒢𑓂𑒯- “𑒁𑒣𑓂𑒣𑒢 𑒧𑒏𑒰𑒢 𑒢𑒯𑒱 𑒁𑒕𑒱,𑒏𑒱𑒩𑒰𑒨𑒰 𑒣𑒩 𑒕𑒲”।
𑒏𑒱𑒕𑒳 𑒏𑒰𑒪𑒏 𑒬𑒰𑓀𑒞𑒱𑒏 𑒣𑒬𑓂𑒔𑒰𑒞 𑒍 𑒮𑒖𑓂𑒖𑒢 𑒣𑒢𑒥𑒙𑓂𑒙𑒲𑒮𑒿 𑒣𑒰𑒢 𑒥𑒯𑒰𑒩 𑒏𑒋 𑒂𑒩𑒳𑒝𑒱𑒮𑒿 𑒣𑒳𑒕𑒪𑒢𑓂𑒯𑒱 𑒖𑒹-
“𑒣𑒰𑒢 𑒐𑒰𑒃𑒞 𑒕𑒲”।
“𑒢𑒯𑒱”।
𑒋𑒯𑒱 𑒅𑒞𑓂𑒞𑒩𑒏 𑒣𑒬𑓂𑒔𑒰𑒞 𑒁𑒣𑓂𑒣𑒢 𑒫𑒱𑒬𑒹𑒭𑒖𑓂𑒘𑒞𑒰 𑒠𑒹𑒐𑒥𑒻𑒞 𑒍 𑒏𑒯𑒪𑒢𑓂𑒯𑒱, 𑒖𑒹-
“𑒯𑒧 𑒞𑒿 𑒁𑒯𑒰𑒿𑒏 𑒠𑒰𑒿𑒞𑒹 𑒠𑒹𑒐𑒱 𑒏𑒋 𑒥𑒳𑒗𑒱 𑒑𑒹𑒪 𑒕𑒪𑒯𑒳𑒿”।
𑒣𑒰𑒢 𑒐𑒹𑒪𑒰𑒏 𑒥𑒰𑒠 𑒁𑒣𑓂𑒣𑒢 𑒥𑒹𑒙𑒲 𑒮𑒦𑒏 𑒮𑒰𑒮𑒳𑒩𑒏 𑒔𑒩𑓂𑒔𑒰 𑒏𑒋𑒪𑒢𑓂𑒯𑒱। 𑒥𑒹𑒙𑒰𑒏 𑒂𑒃.𑒋.𑒋𑒮. 𑒏𑒹𑒩 𑒞𑒻𑒨𑒰𑒩𑒲 𑒏𑒩𑒥𑒰𑒏 𑒑𑒣𑓂𑒣 𑒏𑒋𑒪𑒢𑓂𑒯𑒱 𑒂 𑒏𑒼𑒢𑒼 𑒑𑓂𑒩𑒳𑒣𑒏 𑒔𑒩𑓂𑒔𑒰 𑒮𑒹𑒯𑒼 𑒏𑒋𑒪𑒢𑓂𑒯𑒱 𑒖𑒹 𑒫𑒱𑒠𑓂𑒨𑒰𑒩𑓂𑒟𑒲 𑒪𑒼𑒏𑒢𑒱𑒏 𑒥𑒲𑒔 𑒋𑒯𑒱 𑒞𑒻𑒨𑒰𑒩𑒲𑒏 𑒯𑒹𑒞𑒳 𑒞𑒻𑒨𑒰𑒩 𑒦𑒹𑒪 𑒕𑒪 𑒂 𑒍𑒯𑒱 𑒑𑓂𑒩𑒳𑒣𑒧𑒹 𑒣𑓂𑒩𑒫𑒹𑒬 𑒧𑒰𑒞𑓂𑒩 𑒣𑓂𑒩𑒞𑒱𑒦𑒰𑒫𑒰𑒢 𑒪𑒼𑒏𑒢𑒱𑒏 𑒯𑒹𑒞𑒳 𑒮𑒲𑒧𑒱𑒞 𑒕𑒪। 𑒤𑒹𑒩 𑒂𑒐𑒱𑒩𑒲𑒧𑒹 𑒄𑒯𑒼 𑒏𑒯𑒪𑒢𑓂𑒯𑒱 𑒖𑒹 𑒍𑒯𑒱 𑒣𑓂𑒩𑒞𑒱𑒦𑒰𑒫𑒰𑒢 𑒑𑓂𑒩𑒳𑒣𑒏 𑒮𑒠𑒮𑓂𑒨𑒞𑒰 𑒯𑒳𑒢𑒏𑒩 𑒣𑒳𑒞𑓂𑒩𑒏𑒹𑒿 𑒮𑒹𑒯𑒼 𑒣𑓂𑒩𑒰𑒣𑓂𑒞 𑒕𑒢𑓂𑒯𑒱। 𑒂𑒑𑒰𑒿 𑒥𑒜𑓃𑒻𑒞-𑒥𑒜𑓃𑒻𑒞 𑒑𑒰𑒛𑓃𑒲 𑒋𑒏𑒙𑒰 𑒪𑒰𑒃𑒢 𑒯𑒼𑒙𑒪 𑒣𑒩 𑒚𑒰𑒜𑓃 𑒦𑒹𑒪। 𑒏𑒱𑒕𑒳 𑒨𑒰𑒞𑓂𑒩𑒲 𑒋𑒏𑒩 𑒫𑒱𑒩𑒼𑒡 𑒏𑒋𑒪𑒢𑓂𑒯𑒱। 𑒋𑒏 𑒑𑒼𑒙𑒹 𑒏𑒯𑒪𑒢𑓂𑒯𑒱 𑒖𑒹 𑒄 𑒛𑓂𑒩𑒰𑒃𑒫𑒩-𑒏𑓀𑒛𑒏𑓂𑒙𑒩 𑒐𑒹𑒢𑒰𑒃 𑒐𑒋𑒥𑒰𑒏 𑒠𑓂𑒫𑒰𑒩𑒹 𑒋𑒯𑒱 𑒒𑒙𑒱𑒨𑒰 𑒪𑒰𑒃𑒢 𑒯𑒼𑒙𑒪𑒧𑒹 𑒑𑒰𑒛𑓃𑒲 𑒩𑒼𑒏𑒻𑒞 𑒁𑒕𑒱। 𑒋𑒏𑒩 𑒮𑒦𑒏 𑒐𑒹𑒢𑒰𑒃 𑒋𑒞𑒋 𑒧𑒳𑒤𑓂𑒞𑒱𑒨𑒰 𑒕𑒻𑒏 𑒂 𑒮𑓀𑒑𑒯𑒱 𑒮𑒴𑒔𑒢𑒰 𑒦𑒹𑒙𑒪 𑒖𑒹 𑒧𑒳𑒤𑓂𑒞𑒱𑒨𑒰 𑒏𑒲 𑒩𑒯𑒞𑒻𑒏 𑒍𑒏𑒩 𑒮𑒦𑒏 𑒥𑒱𑒪 𑒨𑒰𑒞𑓂𑒩𑒲𑒑𑒝𑒮𑒿 𑒣𑒩𑒼𑒏𑓂𑒭 𑒩𑒴𑒣𑒧𑒹 𑒪𑒹𑒪 𑒖𑒰𑒃𑒞 𑒕𑒻𑒏 𑒂 𑒥𑒳𑒗𑒳 𑒖𑒹 𑒋𑒏𑒩 𑒮𑒦𑒏 𑒥𑒱𑒪 𑒨𑒰𑒞𑓂𑒩𑒲 𑒮𑒦 𑒦𑒩𑒻𑒞 𑒕𑒟𑒱। 𑒯𑒳𑒢𑒏𑒩 𑒄𑒯𑒼 𑒁𑒣𑒲𑒪 𑒕𑒪𑒢𑓂𑒯𑒱 𑒖𑒹 𑒏𑓂𑒨𑒼 𑒑𑒼𑒙𑒹 𑒢𑒯𑒱 𑒅𑒞𑒩𑒋 𑒂 𑒯𑒰𑒩𑒱 𑒏𑓄 𑒥𑒮𑒏𑒹𑒿 𑒮𑓂𑒙𑒰𑒩𑓂𑒙 𑒏𑒩𑒋 𑒣𑒛𑓃𑒞𑒻𑒏। 𑒏𑒱𑒕𑒳 𑒏𑒰𑒪𑒏 𑒅𑒣𑒩𑒰𑓀𑒞 𑒋𑒏𑒰𑒋𑒏𑒲 𑒮𑒦 𑒑𑒼𑒙𑒹 𑒅𑒞𑒩𑒻𑒞 𑒑𑒹𑒪𑒰𑒯 𑒂 𑒍 𑒮𑒖𑓂𑒖𑒢 𑒮𑒹𑒯𑒼 𑒐𑒱𑒮𑒱𑒨𑒰𑒋𑒪 𑒅𑒞𑒩𑒱 𑒤𑒩𑒰𑒏 𑒦𑓄 𑒚𑒰𑒜𑓃 𑒦𑒋 𑒧𑒱𑒟𑒱𑒪𑒰𑓀𑒔𑒪𑒏 𑒠𑒳𑒩𑓂𑒠𑒬𑒰𑒏 𑒏𑒰𑒩𑒝𑒏 𑒫𑓂𑒨𑒰𑒐𑓂𑒨𑒰𑒧𑒹 𑒯𑒳𑒢𑒏𑒩 𑒑𑒣𑓂𑒣 𑒢𑒯𑒱 𑒧𑒰𑒢𑒥𑒰𑒏 𑒧𑒢𑒼𑒫𑒵𑒞𑓂𑒞𑒱𑒏𑒹𑒿 𑒮𑒹𑒯𑒼 𑒠𑒼𑒭𑒲 𑒏𑒩𑒰𑒩𑒱 𑒠𑒹𑒪𑒟𑒱𑒢𑓂𑒯। 𑒑𑒰𑒛𑓃𑒲 𑒤𑒹𑒩 𑒐𑒳𑒖𑒪 𑒂 𑒏𑒱𑒕𑒳 𑒠𑒴𑒩 𑒂𑒑𑒴 𑒖𑒰 𑒏𑒋 𑒡𑒏𑓂𑒏𑒰𑒏 𑒮𑓀𑒑 𑒚𑒰𑒜𑓃 𑒦𑒋 𑒑𑒹𑒪। 𑒏𑓀𑒛𑒏𑓂𑒙𑒩 𑒏𑒯𑒪𑒏 𑒖𑒹 𑒮𑒦 𑒅𑒞𑒩𑒻𑒞 𑒖𑒰𑒆। 𑒑𑒰𑒛𑓃𑒲 𑒣𑓀𑒏𑓂𑒔𑒩 𑒦𑒋 𑒑𑒹𑒪। 𑒪𑒰𑒃𑒢 𑒯𑒼𑒙𑒪 𑒣𑒩 𑒑𑒰𑒛𑓃𑒲 𑒢𑒯𑒱 𑒩𑒼𑒏𑒥𑒰𑒏 𑒁𑒣𑒲𑒪 𑒏𑒹𑒢𑒱𑒯𑒰𑒩 𑒮𑒖𑓂𑒖𑒢𑒏 𑒧𑒞 𑒕𑒪𑒢𑓂𑒯𑒱 𑒖𑒹 𑒪𑒰𑒃𑒢 𑒯𑒼𑒙𑒪𑒣𑒩 𑒖𑒹 𑒑𑒰𑒛𑓃𑒲 𑒚𑒰𑒜𑓃 𑒦𑒹𑒪, 𑒞𑒐𑒢𑒹𑒮𑒿 𑒖𑒞𑒩𑒰 𑒐𑒩𑒰𑒥 𑒦𑒋 𑒑𑒹𑒪 𑒁𑒕𑒱। 𑒂𑒥 𑒂𑒑𑒴 𑒠𑒹𑒐𑒴 𑒏𑒲-𑒏𑒲 𑒯𑒼𑒃𑒞 𑒁𑒕𑒱। 𑒢𑒲𑒔𑒰𑒿 𑒅𑒞𑒩𑒪𑒰𑒏 𑒥𑒰𑒠 𑒔𑒰𑒩𑒱-𑒔𑒰𑒩𑒱, 𑒣𑒰𑒿𑒔-𑒣𑒰𑒿𑒔 𑒑𑒼𑒙𑒹𑒏 𑒑𑒼𑒪𑒰 𑒥𑒢𑒱 𑒑𑒹𑒪। 𑒄 𑒖𑒑𑒯 𑒣𑓂𑒩𑒰𑒨𑓁 𑒫𑒻𑒬𑒰𑒪𑒲𑒏 𑒂𑒮𑒣𑒰𑒮 𑒕𑒪। 𑒋𑒏 𑒑𑒼𑒙𑒹 𑒐𑒹𑒞𑒏 𑒫𑒱𑒮𑓂𑒞𑒰𑒩𑒏 𑒠𑒱𑒬𑒱 𑒡𑓂𑒨𑒰𑒢 𑒠𑒹𑒪𑒢𑓂𑒯𑒱। 𑒒𑒩 𑒮𑒦𑒏 𑒌𑒪-𑒤𑒻𑒪 𑒯𑒼𑒋𑒥𑒰𑒏 𑒮𑒹𑒯𑒼 𑒔𑒩𑓂𑒔𑒰 𑒦𑒹𑒪। 𑒮𑓀𑒑𑒯𑒱 𑒯𑒳𑒢𑒏𑒩 𑒮𑒦𑒏 𑒑𑒰𑒧 𑒠𑒱𑒬𑒱 𑒒𑒩 𑒣𑒩 𑒒𑒩 𑒂 𑒔𑒰𑒩 𑒣𑒩 𑒔𑒰𑒩 𑒔𑒜𑓃𑒪 𑒩𑒯𑒻𑒞 𑒁𑒕𑒱 𑒂 𑒮𑒹 𑒗𑒑𑒛𑓃𑒰𑒏 𑒏𑒰𑒩𑒝 𑒁𑒕𑒱, 𑒁𑒯𑒴 𑒣𑒩 𑒔𑒩𑓂𑒔𑒰 𑒦𑒹𑒪।
𑒂𑒩𑒳𑒝𑒱𑒏 𑒥𑒑𑒪𑒧𑒹 𑒖𑒹 𑒁𑒡𑒫𑒨𑒮𑒴 𑒫𑓂𑒨𑒏𑓂𑒞𑒱 𑒩𑒯𑒟𑒱 𑒮𑒹 𑒏𑒱𑒕𑒳 𑒎𑓀𑒒𑒰𑒨𑒪 𑒮𑒢 𑒕𑒪𑒰𑒯 𑒏𑒱𑒋𑒏 𑒞𑒿 𑒋𑒯𑒱 𑒫𑓂𑒨𑒫𑒡𑒰𑒢𑒮𑒿 𑒯𑒳𑒢𑒏𑒰 𑒖𑒹 𑒏𑒢𑒲-𑒧𑒢𑒲 𑒦𑒏𑓂𑒏 𑒪𑒰𑒑𑒪 𑒕𑒪𑒢𑓂𑒯𑒱 𑒮𑒹 𑒙𑒴𑒙𑒱 𑒑𑒹𑒪 𑒕𑒪𑒢𑓂𑒯𑒱। 𑒯𑒳𑒢𑒏𑒩 𑒥𑒏𑒰𑒩 𑒪𑒰𑒃𑒢 𑒯𑒼𑒙𑒪 𑒣𑒩 𑒂𑒏𑒱 𑒢𑒲𑒔𑒰𑒿 𑒚𑒰𑒜𑓃 𑒦𑒹𑒪𑒰𑒣𑒩 𑒧𑒢𑓂𑒠 𑒦𑓄 𑒑𑒹𑒪 𑒕𑒪𑒢𑓂𑒯𑒱, 𑒮𑒹 𑒂𑒩𑒳𑒝𑒱 𑒁𑒢𑒳𑒦𑒫 𑒏𑒋𑒪𑒢𑓂𑒯𑒱। 𑒤𑒹𑒩 𑒥𑒮 𑒔𑒪𑒱 𑒣𑒛𑓃𑒪 𑒂 𑒍 𑒮𑒖𑓂𑒖𑒢 𑒣𑒳𑒢𑓁 𑒬𑒳𑒩𑒴 𑒦𑒋 𑒑𑒹𑒪𑒰𑒯। 𑒯𑒰𑒖𑒲𑒣𑒳𑒩 𑒬𑒯𑒩 𑒁𑒋𑒪𑒰𑒣𑒩 𑒞𑒿 𑒯𑒳𑒢𑒏 𑒮𑓂𑒧𑒵𑒞𑒱 𑒂𑒩 𑒞𑒲𑒏𑓂𑒭𑓂𑒝 𑒦𑓄 𑒑𑒹𑒪𑒢𑓂𑒯𑒱।
𑒏𑒱𑒕𑒳 𑒏𑒰𑒪 𑒥𑒮 𑒔𑒪𑒪 𑒞𑒿 𑒋𑒏𑒙𑒰 𑒏𑒰𑒪𑒼𑒢𑒲𑒏 𑒠𑒱𑒬𑒱 𑒃𑒬𑒰𑒩𑒰 𑒏𑒋 𑒍 𑒏𑒯𑒪𑒢𑓂𑒯𑒱-
“𑒄 𑒕𑒲 𑒑𑓀𑒑𑒰 𑒥𑓂𑒩𑒱𑒖 𑒏𑒰𑒪𑒼𑒢𑒲, 𑒏𑒲 𑒕𑒪 𑒂 𑒂𑒥 𑒏𑒲 𑒦𑓄 𑒑𑒹𑒪 𑒁𑒕𑒱। 𑒋𑒏 𑒦𑒰𑒑𑒧𑒹 𑒩𑒯𑒥𑒰𑒏 𑒯𑒹𑒞𑒳 𑒏𑓂𑒫𑒰𑒩𑓂𑒙𑒩 𑒂 𑒠𑒼𑒮𑒩 𑒦𑒰𑒑𑒧𑒹 𑒑𑒱𑒙𑓂𑒙𑒲-𑒕𑒛𑓃-𑒮𑒲𑒧𑒹𑓀𑒙 𑒮𑒦 𑒦𑒩𑒪 𑒩𑒯𑒻𑒞 𑒕𑒪। 𑒂𑒥 𑒞𑒿 𑒏𑒰𑒪𑒼𑒢𑒲𑒏 𑒧𑒹𑓀𑒙𑒹𑒢𑒹𑓀𑒮𑒼 𑒢𑒯𑒱 𑒦𑒋 𑒩𑒯𑒪 𑒁𑒕𑒱”।
𑒂𑒩𑒳𑒝𑒱 𑒔𑒾𑒿𑒏𑒱 𑒑𑒹𑒪𑒰𑒯। 𑒏𑒯𑒪𑒢𑓂𑒯𑒱-
“𑒋𑒞𑒨 𑒋𑒏𑒙𑒰 𑒮𑓂𑒏𑒴𑒪𑒼 𑒞𑒿 𑒕𑒪”।
𑒍 𑒮𑒼𑒗𑒰𑒿 𑒃𑒬𑒰𑒩𑒰 𑒠𑒻𑒞 𑒠𑒹𑒐𑒹𑒪𑒢𑓂𑒯𑒱-
“𑒠𑒹𑒐𑒴, 𑒍𑒞𑒋 𑒢𑒰𑒧𑒼 𑒪𑒱𑒐𑒪 𑒁𑒕𑒱। 𑒥𑒩𑒐𑒰 𑒥𑒳𑒢𑓂𑒢𑒲𑒧𑒹 𑒢𑒰𑒧 𑒁𑒠𑒯𑒰-𑒕𑒱𑒠𑒯𑒰 𑒧𑒹𑒙𑒰 𑒑𑒹𑒪 𑒁𑒕𑒱”- 𑒤𑒹𑒩 𑒍 𑒔𑒾𑒿𑒏𑒱 𑒏𑒋 𑒣𑒳𑒕𑒪𑒢𑓂𑒯𑒱-
“𑒁𑒯𑒰𑒿𑒏𑒹𑒿 𑒏𑒼𑒢𑒰 𑒥𑒳𑒗𑒪 𑒁𑒕𑒱”।
-𑒯𑒧 𑒋𑒯𑒱 𑒮𑓂𑒏𑒴𑒪𑒧𑒹 𑒣𑒜𑓃𑒢𑒹 𑒕𑒲।
-𑒧𑒳𑒠𑒰 𑒋𑒯𑒱 𑒏𑒰𑒪𑒼𑒢𑒲𑒧𑒹 𑒞𑒿 𑒑𑓀𑒑𑒰 𑒣𑒳𑒪 𑒢𑒱𑒩𑓂𑒧𑒰𑒝𑒏 𑒁𑒦𑒱𑒨𑓀𑒞𑒰 𑒪𑒼𑒏𑒢𑒱 𑒧𑒰𑒞𑓂𑒩 𑒩𑒯𑒻𑒞 𑒕𑒪𑒰𑒯 𑒂 𑒮𑓂𑒏𑒴𑒪𑒧𑒹 𑒯𑒳𑒢𑒏𑒹 𑒥𑒔𑓂𑒔𑒰 𑒮𑒦𑒏𑒹𑒿 𑒣𑒜𑓃𑒥𑒰𑒏 𑒯𑒹𑒞𑒳 𑒋𑒯𑒱 𑒮𑓂𑒏𑒴𑒪𑒏 𑒢𑒱𑒩𑓂𑒧𑒰𑒝 𑒦𑒹𑒪 𑒕𑒪।
-𑒯𑒧 𑒮𑒦 𑒁𑒯𑒲 𑒏𑒰𑒪𑒼𑒢𑒲𑒧𑒹 𑒩𑒯𑒻𑒞 𑒕𑒪𑒯𑒳𑒿।
-𑒁𑒯𑒰𑒿𑒏 𑒣𑒱𑒞𑒰𑒏 𑒢𑒰𑒧 𑒏𑒲 𑒕𑒲।
-𑒬𑓂𑒩𑒲 𑒢𑒢𑓂𑒠 𑒚𑒰𑒏𑒳𑒩।
𑒣𑒱𑒞𑒰𑒏 𑒧𑒵𑒞𑓂𑒨𑒳 𑒣𑓀𑒠𑓂𑒩𑒯 𑒠𑒱𑒢 𑒣𑒯𑒱𑒢𑒯𑒱 𑒦𑒹𑒪 𑒩𑒯𑒢𑓂𑒯𑒱 𑒮𑒹 𑒮𑓂𑒫𑒩𑓂𑒑𑒲𑒨 𑒏𑒯𑒥𑒰𑒏 𑒯𑒱𑒮𑓂𑒮𑒏 𑒢𑒯𑒱 𑒣𑒛𑓃𑒪 𑒕𑒪𑒢𑓂𑒯𑒱।
-𑒁𑒯𑒰𑒿 𑒚𑒰𑒏𑒳𑒩𑒖𑒲𑒏 𑒣𑒳𑒞𑓂𑒩 𑒕𑒲।
𑒄 𑒏𑒯𑒱 𑒂𑒩𑒳𑒝𑒱 𑒠𑒱𑒬𑒱 𑒍 𑒁𑒣𑒢𑒞𑓂𑒫𑒮𑒿 𑒥𑒹𑒬𑒲 𑒧𑒧𑒞𑓂𑒫𑒏 𑒠𑒵𑒭𑓂𑒙𑒱 𑒠𑒹𑒪𑒢𑓂𑒯𑒱।
“𑒁𑒯𑒰𑒿𑒏 𑒢𑒰𑒧 𑒏𑒲 𑒕𑒲”। 𑒂𑒩𑒳𑒝𑒱 𑒣𑒳𑒕𑒪𑒐𑒱𑒢𑓂𑒯।
“𑒂𑒃.𑒋.𑒂𑒖𑒧” - 𑒍 𑒅𑒞𑓂𑒞𑒩 𑒠𑒹𑒪𑒢𑓂𑒯𑒱।
𑒞𑒐𑒢 𑒂𑒩𑒳𑒝𑒱 𑒯𑒳𑒢𑒏𑒩 𑒮𑒦𑒙𑒰 𑒥𑒔𑓂𑒔𑒰𑒏 𑒢𑒰𑒧 𑒑𑒢𑒰 𑒠𑒹𑒪𑒐𑒱𑒢𑓂𑒯। 𑒯𑒳𑒢𑒏𑒩 𑒋𑒏𑒙𑒰 𑒥𑒹𑒙𑒰 𑒢𑒹𑒯𑒰𑒪 𑒂𑒖𑒧 𑒂𑒩𑒳𑒝𑒱𑒏 𑒏𑓂𑒪𑒰𑒮𑒧𑒹 𑒣𑒜𑓃𑒻𑒞 𑒕𑒪। 𑒂𑒥 𑒯𑒳𑒢𑒏𑒩 𑒮𑓂𑒫𑒩 𑒥𑒠𑒪𑒱 𑒑𑒹𑒪𑒢𑓂𑒯𑒱।
-𑒏𑒰𑒪𑒼𑒢𑒲𑒧𑒹 𑒠𑒴 𑒑𑒼𑒙𑒹 𑒐𑒴𑒥 𑒣𑒴𑒖𑒰 𑒏𑒩𑒻𑒞 𑒕𑒪𑒰𑒯। 𑒋𑒏𑒙𑒰 𑒣𑒰𑒝𑓂𑒛𑒹 𑒖𑒲 𑒂 𑒠𑒼𑒮𑒩 𑒁𑒯𑒰𑒿𑒏 𑒣𑒱𑒞𑒰𑒖𑒲। 𑒣𑒰𑒝𑓂𑒛𑒹𑒖𑒲 𑒞𑒿 𑒣𑒴𑒖𑒰𑒏 𑒮𑓀𑒑 𑒣𑒰𑒃𑒨𑒼 𑒏𑒧𑒰𑒃𑒞 𑒕𑒪𑒰𑒯। 𑒧𑒳𑒠𑒰 𑒁𑒯𑒰𑒿𑒏 𑒣𑒱𑒞𑒰𑒖𑒲 𑒕𑒪𑒰𑒯 𑒣𑒴𑒩𑓂𑒝 𑒄𑒧𑒰𑒢𑒠𑒰𑒩 𑒂 𑒠𑒨𑒰𑒪𑒳। 𑒔𑓀𑒠𑒰 𑒏𑒋 𑒯𑒼𑒧𑓂𑒨𑒼𑒣𑒻𑒟𑒱𑒏 𑒠𑒫𑒰𑒃 𑒏𑒰𑒢𑒣𑒳𑒩𑒮𑒿 𑒁𑒢𑒻𑒞 𑒕𑒪𑒰𑒯, 𑒂 𑒧𑒳𑒤𑓂𑒞 𑒃𑒪𑒰𑒖 𑒏𑒰𑒪𑒼𑒢𑒲 𑒥𑒪𑒰𑒏𑒹𑒿 𑒠𑒻𑒞 𑒕𑒪𑒰𑒯। 𑒯𑒧𑒩 𑒥𑒹𑒙𑒲𑒏 𑒧𑒰𑒟𑒧𑒹 𑒥𑒛𑓃𑒏𑒰 𑒑𑒴𑒩 𑒦𑒋 𑒑𑒹𑒪 𑒕𑒪𑒻𑒏। 𑒏𑒼𑒢𑒼 𑒋𑒪𑒼𑒣𑒻𑒟𑒱𑒏 𑒥𑒪𑒰𑒮𑒿 𑒚𑒲𑒏 𑒢𑒯𑒱 𑒦𑒹𑒪 𑒕𑒪𑒻𑒏। 𑒁𑒯𑒲𑓀𑒏 𑒣𑒱𑒞𑒰𑒖𑒲 𑒍𑒏𑒩𑒰 𑒚𑒲𑒏 𑒏𑒹𑒢𑒹 𑒕𑒪𑒐𑒱𑒢𑓂𑒯। 𑒃𑓀𑒖𑒲𑒢𑒱𑒨𑒩 𑒩𑒯𑒱𑒞𑒯𑒳𑒿 𑒯𑒼𑒧𑓂𑒨𑒼𑒣𑒻𑒟𑒲𑒏 𑒛𑒱𑒑𑓂𑒩𑒲 𑒯𑒳𑒢𑒏𑒰 𑒩𑒯𑒢𑓂𑒯𑒱।
𑒛𑓂𑒩𑒰𑒃𑓀𑒑 𑒩𑒴𑒧𑒧𑒹 𑒯𑒼𑒧𑓂𑒨𑒼𑒣𑒻𑒟𑒲𑒏 𑒕𑒼𑒙-𑒣𑒻𑒒, 𑒮𑒰𑒠𑒰-𑒩𑓀𑒑𑒲𑒢 𑒬𑒲𑒬𑒲 𑒮𑒦 𑒂𑒩𑒳𑒝𑒱𑒏 𑒂𑒿𑒐𑒱𑒏 𑒮𑒼𑒗𑒰𑒿 𑒂𑒥𑒱 𑒑𑒹𑒪।
-𑒂𑒃 𑒏𑒰𑒪𑓂𑒯𑒱 𑒏𑒞𑒋 𑒣𑒼𑒮𑓂𑒙𑒹𑒛 𑒕𑒟𑒱। 𑒥𑒯𑒳𑒞 𑒠𑒱𑒢𑒮𑒿 𑒮𑒧𑓂𑒣𑒩𑓂𑒏𑒹 𑒙𑒴𑒙𑒱 𑒑𑒹𑒪। 𑒋𑒞𑒳𑒏𑓂𑒏𑒰 𑒥𑒰𑒠 𑒏𑒞𑒯𑒳 𑒮𑓀𑒑𑒹 𑒣𑒼𑒮𑓂𑒙𑒱𑓀𑒑 𑒮𑒹𑒯𑒼 𑒢𑒯𑒱 𑒩𑒯𑒪। 𑒥𑒳𑒗𑒴 𑒦𑒹𑒿𑒙 𑒦𑒹𑒢𑒰 𑒣𑒢𑓂𑒠𑓂𑒩𑒯 𑒮𑒰𑒪𑒮𑒿 𑒆𑒣𑒩 𑒦𑒋 𑒑𑒹𑒪 𑒁𑒕𑒱।
-𑒣𑒢𑓂𑒠𑓂𑒩𑒯 𑒠𑒱𑒢 𑒣𑒯𑒱𑒢𑒹 𑒯𑒳𑒢𑒏𑒩 𑒧𑒵𑒞𑓂𑒨𑒳 𑒦𑒋 𑒑𑒹𑒪𑒢𑓂𑒯𑒱।
𑒂𑒩𑒳𑒝𑒱𑒏 𑒏𑒙𑒰𑒨𑒪 𑒏𑒹𑒬 𑒠𑒱𑒬𑒱 𑒠𑒹𑒐𑒱 𑒍 𑒏𑒯𑒪𑒢𑓂𑒯𑒱-
-𑒯𑒧𑒩𑒹 𑒮𑒿 𑒑𑒪𑓂𑒞𑒲 𑒦𑒹𑒪। 𑒏𑒹𑒬 𑒏𑒙𑒹𑒢𑒹 𑒠𑒹𑒐𑒱𑒨𑒼 𑒏𑓄 𑒢𑒯𑒱 𑒣𑒳𑒕𑒪𑒯𑒳𑒿। 𑒞𑒹𑒿 𑒁𑒯𑒰𑒿 𑒦𑒩𑒱 𑒩𑒮𑓂𑒞𑒰 𑒑𑒳𑒧𑓂𑒧 𑒕𑒪𑒯𑒳𑒿।
𑒤𑒹𑒩 𑒏𑒯𑒋 𑒪𑒑𑒪𑒰𑒯-
-𑒧𑒖𑒠𑒴𑒩𑒏 𑒣𑓂𑒩𑒞𑒱 𑒥𑒛𑓂𑒛 𑒔𑒱𑓀𑒞𑒰 𑒩𑒯𑒻𑒞 𑒕𑒪𑒢𑓂𑒯𑒱।
𑒞𑒰𑒫𑒞 𑒥𑒮 𑒑𑓀𑒑𑒰 𑒣𑒳𑒪 𑒣𑒩 𑒂𑒥𑒱 𑒑𑒹𑒪 𑒕𑒪। 𑒂𑒑𑒰𑒿 𑒤𑒰𑒙𑒏 𑒣𑒩 𑒥𑒮𑒏𑒹𑒿 𑒙𑒱𑒏𑒙 𑒏𑒙𑒹𑒥𑒰𑒏 𑒯𑒹𑒞𑒳 𑒚𑒰𑒜𑓃 𑒏𑓄 𑒠𑒹𑒪 𑒑𑒹𑒪𑒻𑒏। 𑒏𑓂𑒨𑒼 𑒑𑒼𑒙𑒹 𑒮𑓀𑒫𑒰𑒠𑒼 𑒠𑒹𑒪𑒏 𑒖𑒹 𑒂𑒑𑒴 𑒫𑒢-𑒫𑒹 𑒖𑒹𑒏𑒰𑒿 𑒁𑒕𑒱। 𑒋𑒏 𑒏𑒰𑒞𑒧𑒹 𑒩𑒱𑒣𑒹𑒨𑒩𑒱𑓀𑒑 𑒔𑒪𑒱 𑒩𑒯𑒪 𑒁𑒕𑒱। 𑒂𑒩𑒳𑒝𑒱𑒏 𑒂𑒑𑒰𑒿 𑒠𑒵𑒬𑓂𑒨 𑒒𑒴𑒧𑒱 𑒑𑒹𑒪𑒢𑓂𑒯𑒱। 𑒋𑒯𑒱 𑒣𑒳𑒪𑒏 𑒢𑒱𑒩𑓂𑒧𑒰𑒝𑒏𑒰𑒪𑒏 𑒣𑒰𑒨𑒰 𑒮𑒦𑒏। 𑒏𑒰𑒪𑒼𑒢𑒲𑒏 𑒙𑒴𑒙𑒪 𑒠𑒹𑒥𑒰𑒪𑒏 𑒣𑒖𑒹𑒥𑒰 𑒮𑒦। 𑒍 𑒠𑒹𑒥𑒰𑒪 𑒮𑒦 𑒮𑒰𑒪 𑒙𑒴𑒙𑒻𑒞 𑒕𑒪। 𑒣𑒱𑒞𑒰𑒖𑒲 𑒏𑒯𑒻𑒞 𑒕𑒪𑒐𑒱𑒢𑓂𑒯 𑒖𑒹 𑒃𑓀𑒖𑒲𑒢𑒱𑒨𑒩 𑒂 𑒚𑒹𑒏𑒹𑒠𑒰𑒩 𑒮𑒦 𑒧𑒱𑒪𑒪 𑒁𑒕𑒱। 𑒤𑒹𑒩 𑒧𑒼𑒢 𑒣𑒛𑓃𑒪𑒢𑓂𑒯𑒱 𑒮𑒴𑒙𑒏𑒹𑒮 𑒦𑒩𑒪 𑒩𑒳𑒣𑒻𑒨𑓂𑒨𑒰। 𑒂𑒩𑒳𑒝𑒱𑒏 𑒣𑒱𑒞𑒰𑒖𑒲 𑒋𑒏 𑒪𑒰𑒞 𑒧𑒰𑒩𑒢𑒹 𑒕𑒪𑒰𑒯 𑒂 𑒮𑒴𑒙𑒏𑒹𑒮 𑒠𑒴𑒩 𑒤𑒹𑒏𑒰 𑒑𑒹𑒪 𑒩𑒯𑒋। 𑒋𑒏 𑒑𑒼𑒙 𑒣𑒱𑒞𑒨𑒾𑒞 𑒦𑒰𑒋 𑒩𑒯𑒻𑒞 𑒕𑒪𑒐𑒱𑒢𑓂𑒯 𑒒𑒩𑒧𑒹, 𑒮𑒹 𑒮𑒦𑒙𑒰 𑒩𑒳𑒣𑒻𑒨𑓂𑒨𑒰 𑒍𑒯𑒱 𑒮𑒴𑒙𑒏𑒹𑒮𑒧𑒹 𑒩𑒰𑒐𑒱 𑒍𑒯𑒱 𑒚𑒱𑒏𑒹𑒠𑒰𑒩𑒏𑒹𑒿 𑒠𑒹𑒪𑒢𑓂𑒯𑒱। 𑒧𑒰𑒿 𑒮𑒦𑒏𑒹𑒿 𑒦𑒱𑒞𑒩𑒱𑒨𑒰 𑒏𑒼𑒚𑒪𑒲 𑒠𑒱𑒬𑒱 𑒪𑓄 𑒑𑒹𑒪𑒲𑒯। 𑒋𑒏 𑒥𑒹𑒩 𑒢𑒢𑓂𑒠 𑒣𑒳𑒪𑒏 𑒣𑒰𑒨𑒰 𑒮𑒦𑒏 𑒪𑒑 𑒂𑒩𑒳𑒝𑒱𑒏𑒹𑒿 𑒮𑓂𑒙𑒲𑒧𑒩𑒮𑒿 𑒪𑓄 𑒑𑒹𑒪 𑒕𑒪𑒐𑒱𑒢𑓂𑒯 𑒂 𑒏𑒯𑒢𑒹 𑒩𑒯𑒟𑒱𑒢𑓂𑒯-
-𑒠𑒹𑒐𑒴। 𑒋𑒯𑒱 𑒣𑒰𑒨𑒰𑒏 𑒢𑒱𑒩𑓂𑒧𑒰𑒝𑒧𑒹 𑒏𑒞𑒹𑒏 𑒑𑒼𑒙 𑒧𑒖𑒠𑒴𑒩 𑒆𑒣𑒩𑒮𑒿 𑒒𑒱𑒩𑒢𑒲 𑒖𑒹𑒏𑒰𑒿 𑒢𑒰𑒔𑒱 𑒏𑓄 𑒑𑓀𑒑𑒰𑒧𑒹 𑒐𑒮𑒱 𑒣𑒛𑓃𑒪। 𑒮𑒋𑒮𑒿 𑒆𑒣𑒩। 𑒏𑒞𑒹𑒏 𑒯𑒧𑒩𑒰 𑒂𑒿𑒐𑒱𑒏 𑒮𑒼𑒗𑒰𑒿। 𑒍𑒯𑒱𑒧𑒹𑒮𑒿 𑒧𑒰𑒞𑓂𑒩 𑒏𑒱𑒕𑒳𑒋 𑒣𑒩𑒱𑒫𑒰𑒩𑒏𑒹𑒿 𑒏𑓀𑒣𑒹𑒢𑒬𑒹𑒮𑒢 𑒠𑒹𑒪 𑒑𑒹𑒪𑒻𑒏। 𑒂𑒢 𑒮𑒦𑒏 𑒢𑒹 𑒪𑒱𑒮𑓂𑒙𑒧𑒹 𑒢𑒰𑒧 𑒕𑒻𑒏, 𑒢𑒹 𑒏𑓂𑒨𑒼 𑒣𑒞𑒰 𑒪𑒑𑒹𑒪𑒏𑒻𑒏। 𑒞𑒻𑒨𑒼 𑒮𑒦 𑒁𑒦𑒱𑒨𑓀𑒞𑒰 𑒪𑒼𑒏𑒢𑒱 𑒚𑒱𑒏𑒹𑒠𑒰𑒩𑒮𑒿 𑒧𑒱𑒪𑒪 𑒁𑒕𑒱।
𑒦𑒏𑓂𑒏 𑒙𑒴𑒙𑒪𑒢𑓂𑒯𑒱 𑒂𑒩𑒳𑒝𑒱𑒏। 𑒥𑒮𑒮𑒿 𑒅𑒞𑒩𑒱 𑒍𑒯𑒱 𑒣𑒳𑒪𑒏 𑒢𑒱𑒩𑓂𑒧𑒰𑒝𑒧𑒹 𑒬𑒯𑒲𑒠 𑒧𑒖𑒠𑒴𑒩𑒏 𑒪𑒱𑒮𑓂𑒙 𑒤𑒹𑒩 𑒠𑒹𑒐𑒪𑒢𑓂𑒯𑒱। 𑒥𑒯𑒳𑒞 𑒏𑒧 𑒪𑒼𑒏𑒏 𑒢𑒰𑒧 𑒕𑒪-𑒣𑓂𑒩𑒰𑒨𑓁 𑒥𑒱𑒢 𑒏𑓀𑒣𑒹𑓀𑒢𑒮𑒹𑒬𑒢 𑒥𑒪𑒰𑒏 𑒢𑒰𑒧 𑒢𑒯𑒱 𑒩𑒯𑒻𑒏। 𑒥𑒮 𑒬𑒳𑒩𑒴 𑒯𑒼𑒋𑒥𑒰𑒏 𑒮𑒴𑒩𑒮𑒰𑒩 𑒏𑒋𑒪𑒏 𑒞𑒿 𑒂𑒩𑒳𑒝𑒱 𑒂 𑒂𑒖𑒧 𑒮𑒰𑒯𑒥 𑒥𑒮 𑒣𑒩 𑒡𑒛𑓃𑒤𑒛𑓃𑒰 𑒏𑓄 𑒔𑒜𑓃𑒪𑒰𑒯।
𑒍 𑒣𑒳𑒢𑓁 𑒥𑒰𑒖𑒋 𑒪𑒑𑒪𑒰𑒯।
-𑒣𑒙𑒢𑒰𑒧𑒹 𑒁𑒯𑒰𑒿 𑒏𑒯𑒪𑒯𑒳𑒿 𑒖𑒹 𑒏𑒱𑒩𑒰𑒨𑒰𑒏 𑒧𑒏𑒰𑒢𑒧𑒹 𑒩𑒯𑒋 𑒖𑒰𑒃𑒞 𑒕𑒲।
-𑒯𑒿। 𑒣𑒱𑒞𑒰𑒏 𑒏𑓂𑒩𑒱𑒨𑒰𑒏𑒩𑓂𑒧𑒏 𑒯𑒹𑒞𑒳 𑒑𑒰𑒧 𑒑𑒹𑒪 𑒕𑒪𑒯𑒳𑒿, 𑒣𑒱𑒞𑒰𑒏 𑒧𑒵𑒞𑓂𑒨𑒳𑒏 𑒅𑒣𑒩𑒰𑓀𑒞 𑒧𑒰𑒿 𑒏𑒹𑒩 𑒧𑒼𑒢 𑒍𑒯𑒱 𑒒𑒩𑒧𑒹 𑒢𑒯𑒱 𑒪𑒑𑒞𑒢𑓂𑒯𑒱, 𑒞𑒰𑒯𑒱 𑒯𑒹𑒞𑒳 𑒍 𑒑𑒰𑒧𑒹𑒧𑒹 𑒩𑒯𑒱 𑒑𑒹𑒪 𑒕𑒟𑒱। 𑒂𑒥 𑒣𑒙𑒢𑒰 𑒣𑒯𑒳𑒿𑒔𑒱 𑒏𑓄 𑒠𑒼𑒮𑒩 𑒛𑒹𑒩𑒰 𑒞𑒰𑒏𑒥। 𑒍𑒢𑒰 𑒯𑒧 𑒞𑒿 𑒏𑒪𑒏𑒞𑓂𑒞𑒰𑒧𑒹 𑒢𑒼𑒏𑒩𑒲 𑒏𑒩𑒻𑒞 𑒕𑒲।
-𑒥𑒳𑒗𑒴। 𑒞𑒲𑒮 𑒥𑒩𑒐 𑒣𑒲.𑒛𑒥𑒪𑓂𑒨𑒳.𑒛𑒲. 𑒧𑒹 𑒄𑒧𑒰𑒢𑒠𑒰𑒩𑒲𑒮𑒿 𑒏𑒰𑒩𑓂𑒨 𑒏𑒋𑒪𑒰𑒏 𑒅𑒞𑓂𑒞𑒩 𑒋𑒏𑒙𑒰 𑒒𑒩𑒼 𑒢𑒯𑒱 𑒥𑒢𑒰 𑒮𑒏𑒪𑒰𑒯। 𑒪𑒼𑒏 𑒏𑒲-𑒏𑒲 𑒢𑒯𑒱 𑒏𑒋 𑒑𑒹𑒪। 𑒯𑒧𑒯𑒳𑒿 𑓑𑓙𑓘𑓑 𑒏 𑒥𑒰𑒠 𑒁𑒯𑒲𑓀𑒏 𑒣𑒱𑒞𑒰𑒖𑒲𑒏 𑒪𑒰𑒃𑒢 𑒣𑒩 𑒔𑒪𑒋 𑒪𑒑𑒪𑒯𑒳𑒿। 𑒠𑒴 𑒙𑒰 𑒒𑒩𑒼 𑒖𑒹 𑒥𑒢𑒹𑒢𑒹 𑒕𑒲 𑒮𑒹 𑒢𑒰𑒧𑒹-𑒧𑒰𑒞𑓂𑒩𑒏 𑒠𑒴-𑒧𑒯𑒪𑒰। 𑒁𑒡𑒐𑒱𑒖𑓂𑒖𑒴, 𑒆𑒣𑒩𑒧𑒹 𑒋𑒏-𑒋𑒏𑒙𑒰 𑒏𑒼𑒚𑒪𑒲 𑒁𑒕𑒱। 𑒁𑒯𑒰𑒿𑒏 𑒣𑒱𑒞𑒰𑒏𑒹𑒿 𑒏𑒲 𑒠𑒹𑒪𑒏𑒢𑓂𑒯𑒱 𑒮𑒩𑒏𑒰𑒩 ? 𑒂 𑒏𑒲 𑒦𑒹𑒙𑒪𑒢𑓂𑒯𑒱। 𑒩𑒱𑒙𑒰𑒨𑒩𑒧𑒹𑒝𑓂𑒙𑒏 𑒣𑒯𑒱𑒢𑒯𑒱 𑒧𑒵𑒞𑓂𑒨𑒳। 𑒢𑒹 𑒏𑒼𑒢𑒼 𑒮𑒧𑓂𑒧𑒰𑒢। 𑒣𑒳𑒪𑒏 𑒅𑒠𑓂𑒒𑒰𑒙𑒢 𑒣𑒩 𑒠𑒴-𑒠𑒴 𑒯𑒖𑒰𑒩 𑒮𑒦 𑒁𑒦𑒱𑒨𑓀𑒞𑒰𑒏𑒹𑒿 𑒮𑒩𑒏𑒰𑒩 𑒠𑒹𑒪𑒏। 𑒍 𑒞𑒿 𑒁𑒪𑓂𑒪𑒰-𑒦𑒑𑒫𑒰𑒢𑒏 𑒩𑒴𑒣 𑒕𑒪𑒰𑒯। 𑒮𑒧𑓂𑒧𑒰𑒢𑒏 𑒪𑒰𑒪𑒮𑒰𑒏 𑒯𑒹𑒞𑒳 𑒏𑒰𑒖 𑒢𑒯𑒱 𑒏𑒋𑒪𑒢𑓂𑒯𑒱। 𑒮𑒦 𑒫𑒩𑓂𑒏𑓂𑒮 𑒛𑒱𑒫𑒲𑒖𑒢𑒧𑒹 𑒖𑒋𑒥𑒰𑒏 𑒯𑒹𑒞𑒳 𑒣𑒻𑒩𑒫𑒲 𑒏𑒩𑒋 𑒂 𑒄 𑒢𑒢-𑒫𑒩𑓂𑒏𑓂𑒮𑒧𑒹 𑒖𑒋𑒥𑒰𑒏 𑒯𑒹𑒞𑒳 𑒣𑒻𑒩𑒫𑒲 𑒏𑒩𑒟𑒱।
𑒤𑒹𑒩 𑒍 𑒂𑒩𑒳𑒝𑒱𑒮𑒿 𑒣𑒳𑒕𑒪𑒢𑓂𑒯𑒱 𑒖𑒹-
-𑒁𑒯𑒰𑒿 𑒏𑒲 𑒏𑒩𑒻𑒞 𑒕𑒲।
-𑒣𑒱𑒞𑒰,𑒧𑒰𑒋 𑒂 𑒦𑒰𑒋 𑒣𑒙𑒢𑒰𑒧𑒹 𑒩𑒯𑒻𑒞 𑒕𑒪𑒰𑒯, 𑒯𑒧 𑒏𑒪𑒏𑒞𑓂𑒞𑒰𑒧𑒹 𑒃𑓀𑒙𑒹𑒪𑒲𑒖𑒹𑒢𑓂𑒮 𑒫𑒱𑒦𑒰𑒑𑒧𑒹 𑒕𑒲, 𑒏𑒯𑒱𑒨𑒼 𑒫𑒩𑒠𑒲 𑒩𑒯𑒻𑒞 𑒁𑒕𑒱 𑒏𑒯𑒱𑒨𑒼 𑒧𑒢𑒰𑒯𑒲 𑒩𑒯𑒻𑒞 𑒁𑒕𑒱।
-𑒠𑒩𑒦𑓀𑒑𑒼𑒧𑒹 𑒂 𑒣𑒙𑒢𑒼 𑒧𑒹 𑒂𑒅। 𑒧𑒰𑒨𑒼𑒏𑒹𑒿 𑒁𑒢𑒱𑒨𑒢𑓂𑒯𑒳। 𑒯𑒧𑒩 𑒣𑒞𑓂𑒢𑒲𑒏𑒹𑒿 𑒥𑒛𑓂𑒛 𑒢𑒲𑒏 𑒪𑒑𑒞𑒢𑓂𑒯𑒱। 𑒢𑒹𑒯𑒰𑒪 𑒞𑒿 𑒣𑒙𑒢𑒹𑒧𑒹 𑒁𑒕𑒱।
𑒤𑒹𑒩 𑒁𑒣𑒢 𑒣𑒙𑒢𑒰 𑒂 𑒠𑒩𑒦𑓀𑒑𑒰 𑒠𑒳𑒢𑒴 𑒚𑒰𑒧𑒏 𑒣𑒞𑒰 𑒁𑒣𑒢 𑒮𑓂𑒢𑒹𑒯𑒱𑒪 𑒯𑒰𑒟𑒮𑒿 𑒣𑒏𑒛𑓃𑒥𑒻𑒞 𑒣𑒙𑒢𑒰𑒏 𑒯𑒰𑒩𑓂𑒛𑒱𑓀𑒑 𑒣𑒰𑒩𑓂𑒏 𑒥𑒮 𑒮𑓂𑒙𑒻𑒝𑓂𑒛 𑒣𑒩 𑒅𑒞𑒩𑒪𑒰𑒯।
𑒥𑒰𑒯𑒩𑒮𑒿 𑒣𑒙𑒢𑒰 𑒁𑒋𑒪𑒰𑒣𑒩 𑒯𑒼𑒩𑓂𑒛𑒱𑓀𑒑𑒏𑒹𑒿 𑒠𑒹𑒐𑒱 𑒂𑒩𑒳𑒝𑒱 𑒣𑓂𑒩𑒮𑒢𑓂𑒢 𑒦𑒋 𑒖𑒰𑒃𑒞 𑒕𑒪𑒰𑒯। 𑒧𑒳𑒠𑒰 𑒣𑒱𑒞𑒰𑒏 𑒕𑒰𑒨𑒰𑒏 𑒠𑒴𑒩 𑒦𑒹𑒪𑒰𑒏 𑒥𑒰𑒠 𑒂𑒥 𑒋𑒯𑒱 𑒢𑒑𑒩𑒮𑒿 𑒪𑒑𑒰𑒫 𑒢𑒯𑒱 𑒣𑓂𑒩𑒞𑒱𑒨𑒼𑒑𑒱𑒞𑒰 𑒏𑒩𑒋 𑒣𑒛𑓃𑒞𑒢𑓂𑒯𑒱 𑒯𑒳𑒢𑒏𑒰। 𑒄 𑒏𑒼𑒢 𑒮𑓀𑒨𑒼𑒑𑒣𑒩 𑒮𑓀𑒨𑒼𑒑 𑒦𑓄 𑒩𑒯𑒪 𑒕𑒪। 𑒂𑒖𑒧 𑒮𑒰𑒯𑒹𑒥 𑒂𑒃𑒨𑒹 𑒏𑒼𑒢𑒰 𑒦𑒹𑒙𑒱 𑒑𑒹𑒪𑒰𑒯। 𑒣𑒢𑓂𑒠𑓂𑒩𑒯 𑒮𑒰𑒪𑒮𑒿 𑒏𑒱𑒋𑒏 𑒏𑓂𑒨𑒼 𑒢𑒯𑒱 𑒦𑒹𑒙𑒪 𑒩𑒯𑒟𑒱 𑒂 𑒁𑒏𑒮𑓂𑒧𑒰𑒞𑓂 𑒢𑒱𑒨𑒞𑒱 𑒏𑒲 𑒔𑒰𑒯𑒋 𑒕𑒢𑓂𑒯𑒱 𑒯𑒳𑒢𑒏𑒰𑒮𑒿।
𑒩𑒱𑒏𑓂𑒬𑒰 𑒣𑒏𑒛𑓃𑒱 𑒒𑒩𑒏 𑒪𑒹𑒪 𑒢𑒱𑒏𑒪𑒪𑒰𑒯। 𑒤𑒹𑒩 𑒮𑒼𑒔𑒢𑒲 𑒪𑒰𑒑𑒱 𑒑𑒹𑒪𑒢𑓂𑒯𑒱।
𑒋𑒏 𑒥𑒹𑒩 𑒥𑒰𑒥𑒴𑒖𑒲𑒏𑒹𑒿 𑒏𑒙𑒯𑒩𑒏 𑒏𑒼𑒂 𑒐𑒹𑒪𑒰𑒏 𑒥𑒰𑒠 𑒣𑒹𑒙 𑒤𑒴𑒪𑒱 𑒑𑒹𑒪𑒢𑓂𑒯𑒱, 𑒠𑒴 𑒥𑒖𑒹 𑒩𑒰𑒞𑒱𑒧𑒹। 𑒄𑒯𑒼 𑒢𑒯𑒱 𑒤𑒳𑒩𑒰𑒃𑒞 𑒕𑒪𑒢𑓂𑒯𑒱, 𑒖𑒹 𑒥𑒑𑒪𑒧𑒹 𑒬𑓂𑒩𑒫𑒢𑒖𑒲𑒏 𑒥𑒰𑒥𑒴𑒏𑒹𑒿 𑒥𑒖𑒰 𑒪𑒱𑒨𑒢𑓂𑒯𑒱 𑒖𑒹 𑒏𑒼𑒢𑒼 𑒛𑒰𑒏𑓂𑒙𑒩𑒏𑒹𑒿 𑒥𑒖𑒰 𑒠𑒹𑒞𑒰𑒯। 𑒤𑒳𑒩𑒰𑒨𑒪 𑒞𑒿 𑒕𑒪𑒢𑓂𑒯𑒱 𑒧𑒳𑒠𑒰 𑒏𑒯𑒱𑒨𑒼 𑒑𑒣 𑒢𑒯𑒱 𑒕𑒪𑒢𑓂𑒯𑒱 𑒞𑒿 𑒂𑒃 𑒏𑒰𑒖 𑒣𑒛𑓃𑒪𑒰 𑒣𑒩 𑒏𑒯𑒱𑒞𑒟𑒱𑒢𑓂𑒯 𑒮𑒹 𑒯𑒱𑒨𑒰𑒆 𑒢𑒯𑒱 𑒦𑒹𑒪𑒢𑓂𑒯𑒱। 𑒧𑒰𑒋 𑒏𑒹𑒥𑒰𑒛𑓃 𑒣𑒲𑒙𑒱 𑒏𑒋 𑒣𑒛𑓃𑒼𑒮𑒲𑒏𑒹𑒿 𑒅𑒚𑒹𑒪𑒢𑓂𑒯𑒱, 𑒏𑒢𑒻𑒞 𑒐𑒱𑒖𑒻𑒞 𑒩𑒯𑒪𑒲𑒯। 𑒣𑒛𑓃𑒼𑒮𑒲 𑒛𑒰𑒏𑓂𑒙𑒩𑒏𑒹𑒿 𑒥𑒖𑒍𑒪𑒏, 𑒞𑒐𑒢 𑒖𑒰 𑒏𑒋 𑒥𑒰𑒥𑒴𑒖𑒲𑒏 𑒖𑒰𑒢 𑒥𑒰𑒿𑒔𑒪𑒢𑓂𑒯𑒱। 𑒧𑒰𑒨 𑒬𑓂𑒩𑒰𑒣 𑒮𑒹𑒯𑒼 𑒠𑒻𑒞 𑒩𑒯𑒪𑒐𑒱𑒢𑓂𑒯 𑒂 𑒄𑒯𑒼 𑒏𑒯𑒻𑒞 𑒩𑒯𑒪𑒐𑒱𑒢𑓂𑒯 𑒖𑒹 𑒣𑒰𑒿𑒔 𑒫𑒩𑓂𑒭𑒏 𑒥𑒹𑒙𑒰 𑒩𑒯𑒻𑒞 𑒕𑒻𑒏 𑒞𑒿 𑒮𑒦 𑒦𑒩𑒼𑒮 𑒠𑒻𑒞 𑒕𑒻𑒏 𑒖𑒹 𑒏𑒢𑒻𑒞 𑒏𑒱𑒋𑒏 𑒕𑒲, 𑒁𑒯𑒰𑒿𑒏𑒹𑒿 𑒞𑒿 𑒣𑒰𑒿𑒔 𑒫𑒩𑓂𑒭𑒏 𑒥𑒹𑒙𑒰 𑒁𑒕𑒱। 𑒂 𑒄 𑒮𑒦 .....𑒖𑒰𑒯, 𑒁𑒣𑒢𑒹 𑒦𑒼𑒑𑒥𑒯 𑒯𑒧 𑒞𑒿 𑒠𑒳𑒢𑒱𑒨𑒰𑒮𑒿 𑒔𑒪𑒱 𑒖𑒰𑒋𑒥। 𑒥𑒯𑒱𑒢 𑒏𑒰𑒪𑒹𑒖𑒧𑒹 𑒣𑒜𑓃𑒻𑒞 𑒕𑒪𑒐𑒱𑒢𑓂𑒯। 𑒏𑒰𑒪𑒹𑒖𑒏 𑒩𑒮𑓂𑒞𑒰 𑒣𑒋𑒩𑒹 𑒖𑒰𑒋 𑒣𑒛𑓃𑒻𑒞 𑒕𑒪𑒢𑓂𑒯𑒱। 𑒂 𑒏𑒰𑒪𑒹𑒖𑒮𑒿 𑒂𑒑𑒰𑒿 𑒮𑓂𑒏𑒴𑒪 𑒕𑒪𑒢𑓂𑒯𑒱 𑒂𑒩𑒳𑒝𑒱 𑒠𑒳𑒢𑒴 𑒦𑒰𑒿𑒋𑒏। 𑒥𑒯𑒱𑒢 𑒏𑒯𑒪𑒐𑒱𑒢𑓂𑒯 𑒖𑒹 𑒁𑒯𑒴𑒿 𑒮𑒦 𑒯𑒧𑒩 𑒮𑓀𑒑𑒹 𑒔𑒪𑒴। 𑒋𑒏 𑒠𑒱𑒢 𑒠𑒳𑒢𑒴 𑒦𑒰𑒿𑒨 𑒮𑓀𑒑 𑒑𑒹𑒥𑒼 𑒏𑒋𑒪 𑒩𑒯𑒟𑒱। 𑒧𑒳𑒠𑒰 𑒑𑒣 𑒥𑒱𑒢𑒳 𑒏𑒹𑒢𑒹 𑒠𑒳𑒢𑒴 𑒦𑒰𑒿𑒨 𑒂𑒑𑒴-𑒂𑒑𑒴 𑒗𑒙𑒏𑒻𑒞 𑒔𑒪 𑒑𑒹𑒪𑒰𑒯। 𑒧𑒼𑒢𑒧𑒹 𑒄𑒯𑒼 𑒦𑒨 𑒕𑒪𑒢𑓂𑒯𑒱 𑒖𑒹 𑒕𑒾𑒛𑓃𑒰 𑒮𑒦 𑒔𑒲𑒢𑓂𑒯𑒱 𑒢𑒯𑒱 𑒖𑒰𑒋 𑒖𑒹 𑒯𑒧𑒩𑒰 𑒮𑒦𑒏 𑒄 𑒥𑒯𑒱𑒢 𑒕𑒟𑒱। 𑒂𑒥 𑒄 𑒮𑒼𑒔𑒻𑒞 𑒕𑒟𑒱 𑒖𑒹 𑒔𑒱𑒢𑓂𑒯𑒱𑒨𑒹 𑒖𑒰𑒃𑒞 𑒞𑒿 𑒏𑒲 𑒯𑒼𑒃𑒞। 𑒁𑒣𑒢 𑒫𑓂𑒨𑒏𑓂𑒞𑒱𑒞𑓂𑒞𑓂𑒫𑒏 𑒫𑒱𑒏𑒰𑒮𑒧𑒹 𑒏𑒧𑒲 𑒕𑒪𑒢𑓂𑒯𑒱 𑒄 ? 𑒥𑒰𑒠𑒧𑒹 𑒣𑒻𑒒 𑒦𑒹𑒪𑒰𑒯 𑒞𑒿 𑒧𑒰𑒿-𑒥𑒰𑒣𑒏𑒹𑒿 𑒅𑒏𑒙𑒻𑒞 𑒕𑒟𑒱 𑒖𑒹 𑒒𑒩𑒒𑒳𑒮𑓂𑒮𑒴 𑒂 𑒧𑒳𑒿𑒯𑒔𑒳𑒩𑒴𑒏 𑒮𑓀𑒖𑓂𑒘𑒰 𑒖𑒹 𑒠𑒹𑒪𑒯𑒳𑒿 𑒁𑒯𑒰𑒿 𑒮𑒦, 𑒏𑒯𑒱𑒨𑒼 𑒄 𑒮𑒼𑒔𑒪𑒯𑒳𑒿, 𑒖𑒹 𑒏𑒼𑒢𑒼 𑒣𑒛𑓃𑒼𑒮𑒲𑒮𑒿 𑒑𑒣𑓂𑒣 𑒢𑒯𑒱 𑒏𑒩𑒥𑒰𑒏, 𑒮𑓀𑒑𑒲-𑒮𑒰𑒟𑒲 𑒢𑒯𑒱 𑒥𑒢𑒋𑒥𑒰𑒏, 𑒒𑒴𑒧𑒥-𑒤𑒱𑒩𑒥 𑒢𑒯𑒱 𑒏𑒩𑒥𑒰𑒏 𑒅𑒣𑒠𑒹𑒬𑒏 𑒣𑒰𑒕𑒴 -𑒖𑒹 𑒁𑒯𑒰𑒿 𑒮𑒦 𑒅𑒣𑒠𑒹𑒬 𑒠𑒹𑒪𑒯𑒳𑒿- 𑒍𑒏𑒩 𑒣𑒰𑒕𑒰𑒿 𑒃𑒔𑓂𑒕𑒰 𑒮𑒧𑒰𑒖𑒏 𑒥𑒳𑒩𑒰𑒃𑒮𑒿 𑒠𑒴𑒩 𑒏𑒩𑒥𑒰𑒏 𑒕𑒪, 𑒣𑒩𑓀𑒞𑒳 𑒨𑒻𑒯 𑒞𑒿 𑒥𑒢𑒹𑒪𑒏 𑒧𑒳𑒿𑒯𑒔𑒳𑒩𑒴 𑒂 𑒒𑒩𑒒𑒳𑒮𑓂𑒮𑒴 𑒮𑒦𑒏𑒹𑒿।𑒩𑒰𑒞𑒱𑒧𑒹 𑒧𑒰𑒋-𑒥𑒰𑒣𑒏 𑒗𑒑𑒛𑓃𑒰𑒏 𑒮𑒲𑒢 𑒮𑒣𑒢𑒰𑒧𑒹 𑒠𑒹𑒐𑒻𑒞 𑒕𑒪𑒰𑒯 𑒂 𑒛𑒩𑒰 𑒏𑒋 𑒅𑒚𑒱 𑒖𑒰𑒃𑒞 𑒕𑒪𑒰𑒯। 𑒣𑒻𑒒 𑒦𑒰𑒋 𑒥𑒯𑒱𑒢𑒮𑒿 𑒁𑒩𑒳𑒝𑒱𑒏𑒹𑒿 𑒐𑒴𑒥 𑒗𑒑𑒛𑓃𑒰 𑒯𑒼𑒃𑒞 𑒕𑒪𑒢𑓂𑒯𑒱 𑒧𑒳𑒠𑒰 𑒋𑒏 𑒥𑒹𑒩 𑒧𑒰𑒋-𑒥𑒰𑒣𑒏 𑒗𑒑𑒛𑓃𑒰𑒏 𑒥𑒰𑒠, 𑒐𑒴𑒥 𑒏𑒰𑒢𑒪 𑒕𑒪𑒰𑒯, 𑒐𑒴𑒥 𑒥𑒰𑒖𑒪 𑒕𑒪𑒰𑒯। 𑒍𑒯𑒱 𑒒𑒙𑒢𑒰𑒏 𑒣𑒯𑒱𑒢𑒹 𑒏𑒱𑒕𑒳 𑒠𑒱𑒢𑒮𑒿 𑒦𑒰𑒋-𑒥𑒯𑒱𑒢𑒮𑒿 𑒗𑒑𑒛𑓃𑒰𑒏 𑒥𑒰𑒠 𑒙𑒼𑒏𑒰-𑒙𑒼𑒏𑒲 𑒥𑒢𑓂𑒠 𑒕𑒪𑒢𑓂𑒯𑒱। 𑒮𑒦 𑒥𑒹𑒩 𑒫𑒻𑒯 𑒪𑒼𑒏𑒢𑒱 𑒂𑒑𑒰𑒿 𑒦𑓄 𑒙𑒼𑒏𑒻𑒞 𑒕𑒪𑒰𑒯। 𑒧𑒳𑒠𑒰 𑒋𑒯𑒱 𑒥𑒹𑒩 𑒂𑒩𑒳𑒝𑒱 𑒏𑒰𑒢𑒻𑒞-𑒏𑒰𑒢𑒻𑒞 𑒥𑒯𑒱𑒢𑒏𑒹𑒿 𑒙𑒼𑒏𑒪𑒢𑓂𑒯𑒱 𑒂 𑒤𑒹𑒩 𑒏𑒯𑒱𑒨𑒼 𑒥𑒯𑒱𑒢𑒮𑒿 𑒗𑒑𑒛𑓃𑒰 𑒢𑒯𑒱 𑒦𑒹𑒪𑒢𑓂𑒯𑒱। 𑒦𑒰𑒋 𑒣𑒱𑒚𑒱𑒨𑒰 𑒕𑒪𑒢𑓂𑒯𑒱, 𑒮𑓀𑒑𑒹 𑒣𑒜𑓃𑒻𑒞 𑒕𑒪𑒐𑒱𑒢𑓂𑒯, 𑒞𑒰𑒯𑒱 𑒯𑒹𑒞𑒳 𑒍𑒏𑒩𑒰𑒮𑒿 𑒞𑒿 𑒗𑒑𑒛𑓃𑒰 𑒯𑒼𑒃𑒞𑒹 𑒩𑒯𑒪𑒢𑓂𑒯𑒱, 𑒧𑒳𑒠𑒰 𑒏𑒧-𑒮𑒧।𑒋𑒯𑒱 𑒮𑒦 𑒑𑒣𑒏 𑒯𑒹𑒞𑒳 𑒧𑒰𑒿 𑒣𑒱𑒞𑒰𑒖𑒲𑒏𑒹𑒿 𑒠𑒼𑒭𑒲 𑒏𑒯𑒟𑒱। 𑒧𑒰𑒿 𑒮𑒦𑒮𑒿- 𑒣𑒛𑓃𑒼𑒮𑒲-𑒮𑓀𑒥𑓀𑒡𑒲, 𑒖𑒰𑒢-𑒣𑒯𑒔𑒰𑒢𑒮𑒿 𑒑𑒣 𑒏𑒩𑒥𑒰𑒮𑒿 𑒏𑒯𑒱𑒨𑒼 𑒢𑒯𑒱 𑒩𑒼𑒏𑒪𑒢𑓂𑒯𑒱 𑒂 𑒏𑒯𑒟𑒱𑒢𑓂𑒯 𑒖𑒹 𑒮𑒦𑒙𑒰 𑒠𑒼𑒭 𑒣𑒱𑒞𑒰𑒏 𑒕𑒪𑒢𑓂𑒯𑒱।𑒋𑒏 𑒥𑒹𑒩 𑒑𑓂𑒪𑒼𑒥 𑒏𑒱𑒢𑒥𑒰𑒏 𑒖𑒱𑒠𑓂𑒠 𑒏𑒋𑒪𑒢𑓂𑒯𑒱 𑒂𑒩𑒳𑒝𑒱। 𑒏𑒋𑒏 𑒥𑒹𑒩 𑒮𑒧𑒨 𑒠𑒹𑒪 𑒑𑒹𑒪𑒢𑓂𑒯𑒱 𑒖𑒹 𑒂𑒃 𑒁𑒋𑒞- 𑒏𑒰𑒪𑓂𑒯𑒱 𑒁𑒋𑒞। 𑒂𑒩𑒳𑒝𑒱 𑒣𑒜𑓃𑒥 𑒕𑒼𑒛𑓃𑒱 𑒠𑒹𑒪𑒢𑓂𑒯𑒱। 𑒂 𑒞𑒐𑒢 𑒖𑒰 𑒏𑒋 𑒑𑓂𑒪𑒼𑒥 𑒁𑒋𑒪𑒢𑓂𑒯𑒱। 𑒥𑒯𑒱𑒢 𑒁𑒐𑒢𑒼 𑒏𑒯𑒻𑒞 𑒕𑒟𑒱𑒢𑓂𑒯 𑒖𑒹 𑒑𑓂𑒪𑒼𑒥 𑒁𑒢𑒥𑒰𑒏 𑒖𑒱𑒠𑓂𑒠𑒏 𑒣𑒴𑒩𑒰 𑒦𑒹𑒪𑒰𑒏 𑒥𑒰𑒠 𑒁𑒩𑒳𑒝𑒱𑒏 𑒣𑒜𑓃𑒰𑒃𑒏 𑒪𑒨 𑒙𑒴𑒙𑒱 𑒑𑒹𑒪𑒢𑓂𑒯𑒱। 𑒫𑒩𑓂𑒑𑒧𑒹 𑒮𑓂𑒟𑒰𑒢 𑒣𑓂𑒩𑒟𑒧𑒮𑒿 𑒢𑒲𑒔𑒰𑒿 𑒂𑒥𑒱 𑒑𑒹𑒪𑒢𑓂𑒯𑒱 𑒂 𑒣𑒱𑒞𑒰𑒖𑒲 𑒋𑒏𑒩 𑒏𑒰𑒩𑒝 𑒞𑓀𑒞𑓂𑒩-𑒧𑓀𑒞𑓂𑒩𑒧𑒹 𑒞𑒰𑒏𑒋 𑒪𑒑𑒪𑒰𑒯। 𑒋𑒏𑒙𑒰 𑒞𑒰𑓀𑒞𑓂𑒩𑒱𑒏𑒮𑒿 𑒦𑒹𑒿𑒙 𑒦𑓄 𑒑𑒹𑒪𑒢𑓂𑒯𑒱।𑒏𑒞𑒹𑒏 𑒠𑒱𑒢 𑒮𑒦 𑒑𑒰𑒧𑒧𑒹 𑒩𑒯𑒻𑒞 𑒖𑒰𑒃𑒞 𑒑𑒹𑒪𑒰𑒯। 𑒑𑓀𑒑𑒰 𑒥𑓂𑒩𑒱𑒖 𑒏𑒰𑒪𑒼𑒢𑒲𑒧𑒹 𑒋𑒏𑒙𑒰 𑒋𑒏𑒰𑒅𑒢𑓂𑒙𑒹𑓀𑒙 𑒥𑒰𑒥𑒴 𑒕𑒪𑒰𑒯। 𑒍 𑒥𑒰𑒥𑒴𑒖𑒲𑒏𑒹𑒿 𑒏𑒯𑒪𑒐𑒱𑒢𑓂𑒯 𑒖𑒹 𑒁𑒯𑒰𑒿 𑒞𑒿 𑒒𑒴𑒮 𑒢𑒯𑒱 𑒪𑒻𑒞 𑒕𑒲 𑒧𑒳𑒠𑒰 𑒁𑒯𑒰𑒿𑒏 𑒣𑒞𑓂𑒢𑒲 𑒁𑒯𑒰𑒿𑒏 𑒢𑒰𑒧 𑒣𑒩 𑒒𑒴𑒮 𑒪𑒻𑒞 𑒕𑒟𑒱। 𑒞𑒏𑒩 𑒥𑒰𑒠 𑒮𑒦 𑒑𑒰𑒧 𑒣𑒯𑒳𑒿𑒔𑒰 𑒠𑒹𑒪 𑒑𑒹𑒪𑒰𑒯। 𑒮𑒦 𑒙𑓂𑒩𑒰𑓀𑒮𑒤𑒩𑒏 𑒥𑒰𑒠 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒢𑒾𑒏𑒩𑒲𑒧𑒹 𑒠𑒩𑒧𑒰𑒯𑒰 𑒥𑓀𑒠 𑒦𑓄 𑒖𑒰𑒃𑒞 𑒕𑒻𑒏। 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒮𑒦 𑒙𑓂𑒩𑒰𑓀𑒮𑒤𑒩𑒏 𑒥𑒰𑒠 𑒢𑒢𑓂𑒠 𑒮𑒦𑒏𑒹𑒿 𑒑𑒰𑒧 𑒣𑒚𑒰 𑒠𑒻𑒞 𑒕𑒪𑒰𑒯। 𑒋𑒯𑒱 𑒏𑓂𑒩𑒧𑒧𑒹 𑒋𑒏 𑒥𑒹𑒩 𑒮𑒦 𑒑𑒰𑒧𑒧𑒹 𑒕𑒪𑒰𑒯। 𑒢𑒢𑓂𑒠𑒏 𑒔𑒱𑒙𑓂𑒚𑒲 𑒧𑒰𑒿𑒏 𑒢𑒰𑒧𑒮𑒿 𑒑𑒰𑒧 𑒂𑒋𑒪 𑒕𑒪𑒢𑓂𑒯𑒱। 𑒂𑒩𑒳𑒝𑒱 𑒣𑒜𑓃𑒢𑒹 𑒩𑒯𑒟𑒱। 𑒢𑒢𑓂𑒠 𑒂𑒩𑒳𑒝𑒱𑒏 𑒧𑒰𑒋𑒏𑒹𑒿 𑒪𑒱𑒐𑒢𑒹 𑒕𑒪𑒰𑒯 𑒖𑒹 𑒖𑓂𑒨𑒼𑒿 𑒁𑒯𑒰𑒿 𑒒𑒴𑒮𑒏 𑒣𑒰𑒃 𑒪𑒹𑒢𑒹 𑒕𑒲 𑒞𑒿 𑒪𑒾𑒙𑒰 𑒠𑒱𑒨𑒾𑒏। 𑒯𑒧 𑒫𑒱𑒖𑒲𑒪𑒹𑓀𑒮𑒏𑒹𑒿 𑒪𑒱𑒐𑒢𑒹 𑒕𑒲, 𑒕𑒰𑒣𑒰 𑒣𑒛𑓃𑒞, 𑒞𑒐𑒢 𑒣𑒰𑒃 𑒢𑒱𑒏𑒪𑒞 𑒞𑒿 𑒥𑒛𑓂𑒛 𑒥𑒠𑒢𑒰𑒧𑒲 𑒯𑒼𑒋𑒞।
𑒋𑒯𑒱 𑒮𑒦 𑒣𑒩𑒱𑒮𑓂𑒟𑒱𑒞𑒱𑒧𑒹 𑒮𑓂𑒏𑒴𑒪𑒧𑒹 𑒂𑒩𑒳𑒝𑒱 𑒒𑒩𑒏 𑒣𑒩𑒱𑒮𑓂𑒟𑒱𑒞𑒱𑒏𑒹𑒿 𑒥𑒱𑒮𑒩𑒱 𑒖𑒋𑒥𑒰𑒏 𑒣𑓂𑒩𑒨𑒰𑒮 𑒏𑒩𑒋 𑒪𑒑𑒪𑒰𑒯। 𑒗𑒳𑒙𑓂𑒚𑒹𑒏𑒿 𑒯𑒿𑒮𑒋 𑒪𑒑𑒪𑒰𑒯। 𑒄 𑒂𑒠𑒞𑒱 𑒣𑒏𑒛𑓃𑒱 𑒪𑒹𑒪𑒢𑓂𑒯𑒱। 𑒒𑒩𑒏 𑒥𑒛𑓃𑒰𑒃 𑒏𑒩𑒋 𑒪𑒑𑒪𑒰𑒯। 𑒪𑒼𑒏 𑒮𑒦 𑒢𑒢𑓂𑒠𑒏 𑒄𑒧𑒰𑒢𑒠𑒰𑒩𑒲𑒏 𑒞𑒿 𑒔𑒩𑓂𑒔𑒰 𑒏𑒩𑒱𑒞𑒹 𑒩𑒯𑒋। 𑒂𑒩𑒳𑒝𑒱 𑒒𑒩𑒏 𑒏𑒪𑒯𑒏 𑒫𑒱𑒭𑒨 𑒒𑒩𑒏 𑒥𑒰𑒯𑒩 𑒁𑒢𑒥𑒰𑒮𑒿 𑒣𑒩𑒯𑒹𑒖 𑒏𑒩𑒋 𑒪𑒑𑒪𑒰𑒯, 𑒪𑒼𑒏 𑒥𑒳𑒗𑒞 𑒞𑒿 𑒯𑒿𑒮𑒞। 𑒂 𑒥𑒳𑒗𑒴 𑒖𑒹 𑒄𑒧𑒰𑒢𑒠𑒰𑒩𑒲𑒏 𑒑𑓂𑒪𑒻𑒧𑒩𑒏𑒹𑒿 𑒖𑒱𑒥𑒻𑒞 𑒖𑒰𑒃𑒞 𑒑𑒹𑒪𑒰𑒯। 𑒮𑒼𑒔𑒥𑒰𑒏 𑒂 𑒑𑒳𑒢𑒡𑒳𑒢𑒲𑒏 𑒂𑒠𑒞𑒱 𑒋𑒯𑒢 𑒣𑒛𑓃𑒪𑒢𑓂𑒯𑒱 𑒖𑒹 𑒮𑒳𑒞𑒻𑒞 𑒮𑒣𑒢𑒰𑒧𑒹 𑒂 𑒖𑒑𑒻𑒞 𑒪𑒱𑒐𑒥𑒰-𑒣𑒜𑓃𑒥𑒰 𑒏𑒰𑒪 𑒡𑒩𑒱 𑒄 𑒮𑒯𑒮𑓂𑒩𑒥𑒰𑒜𑓃𑒢𑒱 𑒖𑒹𑒏𑒰𑒿 𑒣𑒰𑒕𑒰𑒿 𑒢𑒯𑒱 𑒕𑒼𑒛𑓃𑒪𑒏𑒢𑓂𑒯𑒱। 𑒠𑒮𑒧𑒰𑒧𑒹 𑒕𑒧𑒰𑒯𑒲 𑒣𑒩𑒲𑒏𑓂𑒭𑒰 𑒏𑒱𑒕𑒳 𑒠𑒱𑒢 𑒣𑒯𑒱𑒢𑒹 𑒠𑒹𑒢𑒹 𑒩𑒯𑒟𑒱। 𑒏𑒰𑒧𑒩𑓂𑒮𑒏 𑒣𑒩𑒲𑒏𑓂𑒭𑒰𑒧𑒹 𑒋𑒏𑒙𑒰 𑒣𑓂𑒩𑒬𑓂𑒢 𑒥𑒢𑒹𑒪𑒢𑓂𑒯𑒱। 𑒧𑒳𑒠𑒰 𑒍 𑒑𑒪𑒞 𑒥𑒢𑒱 𑒑𑒹𑒪𑒢𑓂𑒯𑒱, 𑒤𑒹𑒩 𑒠𑒼𑒮𑒩 𑒂 𑒞𑒹𑒮𑒩 𑒥𑒹𑒩 𑒣𑓂𑒩𑒨𑒰𑒮 𑒏𑒹𑒪𑒢𑓂𑒯𑒱। 𑒮𑒦𑒙𑒰 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒁𑒥𑒻𑒞 𑒕𑒪𑒢𑓂𑒯𑒱 𑒧𑒳𑒠𑒰 𑒣𑒯𑒱𑒪𑒹 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒣𑒴𑒩𑒰 𑒢𑒯𑒱 𑒦𑓄 𑒩𑒯𑒪 𑒕𑒪𑒢𑓂𑒯𑒱। 𑒏𑒰𑒣𑒲𑒏𑒹𑒿 𑒁𑓀𑒑𑒰𑒏 𑒢𑒲𑒔𑒰𑒿𑒧𑒹 𑒢𑒳𑒏𑒰 𑒪𑒹𑒪𑒢𑓂𑒯𑒱। 𑒂 𑒣𑒰𑒢𑒱 𑒣𑒲𑒥𑒰𑒏 𑒥𑒯𑒢𑓂𑒢𑒹 𑒖𑒹 𑒥𑒯𑒩𑒹𑒪𑒰𑒯 𑒞𑒿 𑒒𑒩 𑒣𑒯𑒳𑒿𑒔𑒱 𑒑𑒹𑒪𑒰𑒯। 𑒣𑒜𑓃𑒻𑒞-𑒣𑒜𑓃𑒻𑒞 𑒮𑒼𑒔𑒋 𑒪𑒑𑒻𑒞 𑒕𑒪𑒰𑒯। 𑒋𑒏𑓂𑒏𑒹 𑒣𑒢𑓂𑒢𑒰 𑒅𑒢𑒙𑒹𑒢𑒹 𑒒𑓀𑒙𑒰 𑒥𑒲𑒞𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒔𑒱𑒛𑓃𑒱𑒨𑒰𑒐𑒰𑒢𑒰 𑒑𑒹𑒪 𑒩𑒯𑒟𑒱 𑒋𑒏 𑒥𑒹𑒩। 𑒏𑒱𑒕𑒳 𑒑𑒼𑒙𑒹 𑒯𑒳𑒢𑒏𑒩 𑒮𑒦𑒏 𑒮𑒩-𑒮𑓀𑒥𑓀𑒡𑒲 𑒪𑒼𑒏𑒢𑒱 𑒍𑒞𑒋 𑒯𑒳𑒢𑒏𑒰 𑒮𑒦𑒏𑒹𑒿 𑒦𑒹𑒙𑒱 𑒑𑒹𑒪𑒐𑒱𑒢𑓂𑒯। 𑒥𑒛𑓂𑒛 𑒯𑒰𑒃-𑒤𑒰𑒃 𑒮𑒦। 𑒍𑒢𑒰 𑒞𑒿 𑒏𑒯𑒪𑒐𑒱𑒢𑓂𑒯 𑒏𑒱𑒕𑒳 𑒢𑒯𑒱 𑒧𑒳𑒠𑒰 𑒯𑒳𑒢𑒏𑒩 𑒮𑒦𑒏 𑒥𑒑𑒹𑒥𑒰𑒢𑒲 𑒠𑒹𑒐𑒱 𑒏𑒋 𑒂𑒩𑒳𑒝𑒱𑒧𑒹 𑒯𑒲𑒢 𑒦𑒰𑒫𑒢𑒰 𑒁𑒋𑒪𑒢𑓂𑒯𑒱। 𑒔𑒳𑒣𑓂𑒣𑒹 𑒦𑒲𑒛𑓃𑒧𑒹 𑒢𑒱𑒏𑒪𑒱 𑒒𑒩𑒏 𑒪𑒹𑒪 𑒣𑒯𑒳𑒿𑒔𑒱 𑒑𑒹𑒪𑒰𑒯। 𑒖𑒹𑒥𑒲𑒧𑒹 𑒣𑒰𑒃 𑒢𑒯𑒱 𑒩𑒯𑒢𑓂𑒯𑒱 𑒮𑒹 𑒣𑒋𑒩𑒹 𑒢𑒱𑒏𑒪𑒱 𑒑𑒹𑒪𑒰𑒯। 𑒍𑒞𑒋 𑒔𑒱𑒛𑓃𑒱𑒨𑒰𑒐𑒰𑒢𑒰𑒧𑒹 𑒮𑒦 𑒛𑒩𑒰𑒃𑒞 𑒩𑒯𑒪 𑒖𑒹 𑒏𑒞𑒋 𑒯𑒩𑒰 𑒑𑒹𑒪। 𑒮𑒦 𑒒𑒩 𑒣𑒯𑒳𑒿𑒔𑒪 𑒞𑒿 𑒮𑒦𑒏𑒹𑒿 𑒤𑒳𑒮𑒱𑒨𑒹𑒿 𑒏𑒯𑒪𑒢𑓂𑒯𑒱 𑒖𑒹 𑒮𑒞𑓂𑒞𑒹 𑒦𑒼𑒟𑒪𑒰 𑒑𑒹𑒪 𑒩𑒯𑒟𑒱। 𑒮𑒞𑓂𑒞 𑒥𑒰𑒞 𑒏𑒏𑒩𑒼 𑒢𑒯𑒱 𑒥𑒞𑒹𑒪𑒢𑓂𑒯𑒱।𑒮𑒦 𑒪𑒼𑒏 𑒖𑒹 𑒦𑒹𑒙𑒟𑒱𑒢𑓂𑒯 𑒨𑒻𑒯 𑒏𑒯𑒟𑒱𑒢𑓂𑒯 𑒖𑒹 𑒁𑒯𑒰𑒿 𑒤𑒪𑒢𑒰𑒏 𑒥𑒹𑒙𑒰 𑒕𑒲। 𑒥𑒹𑒔𑒰𑒩𑒹 𑒦𑒑𑒫𑒰𑒢𑒹 𑒕𑒟𑒱। 𑒂𑒤𑒱𑒮𑒧𑒹 𑒣𑒱𑒞𑒰𑒏 𑒠𑒩𑒧𑒰𑒯𑒰𑒏 𑒪𑒹𑒪 𑒣𑒹-𑒮𑓂𑒪𑒱𑒣 𑒥𑒢𑒥𑒰𑒥𑒋 𑒣𑒛𑓃𑒻𑒞 𑒩𑒯𑒢𑓂𑒯𑒱। 𑒋𑒏 𑒥𑒹𑒩 𑒂𑒩𑒳𑒝𑒱 𑒣𑒹-𑒮𑓂𑒪𑒱𑒣 𑒥𑒢𑒥𑒋 𑒑𑒹𑒪 𑒕𑒪𑒰𑒯। 𑒏𑒱𑒩𑒰𑒢𑒲 𑒥𑒰𑒥𑒴 𑒥𑒰𑒖𑒪- 𑒯𑒱𑒢𑒏𑒩 𑒣𑒱𑒞𑒰𑒏 𑒣𑒹-𑒮𑓂𑒪𑒱𑒣 𑒥𑒱𑒢𑒰 𑒣𑒰𑒃 𑒪𑒹𑒢𑒹 𑒥𑒢𑒰 𑒠𑒱𑒨𑒢𑓂𑒯𑒳। 𑒣𑒱𑒞𑒰𑒖𑒲𑒮𑒿 𑒢𑒯𑒱 𑒞𑒿 𑒮𑒯𑒏𑒩𑓂𑒧𑒲 𑒐𑒳𑒬 𑒕𑒪𑒢𑓂𑒯𑒱 𑒢𑒯𑒱𑒨𑒹 𑒚𑒲𑒏𑒹𑒠𑒰𑒩 𑒮𑒦। 𑒮𑒯𑒏𑒩𑓂𑒧𑒲 𑒋𑒯𑒱 𑒪𑓄 𑒏𑒋 𑒖𑒹 𑒢𑒯𑒱 𑒮𑓂𑒫𑒨𑓀 𑒏𑒧𑒰𑒃𑒞 𑒁𑒕𑒱, 𑒢𑒯𑒱𑒨𑒹 𑒠𑒼𑒮𑒩𑒰𑒏𑒹𑒿 𑒏𑒧𑒰𑒨 𑒠𑒻𑒞 𑒁𑒕𑒱। 𑒣𑒻𑒒𑒦𑒰𑒨𑒏 𑒑𑒱𑒢𑒞𑒲 𑒥𑒔𑓂𑒔𑒰𑒧𑒹 𑒥𑒠𑒧𑒰𑒬𑒧𑒹 𑒯𑒼𑒃𑒞 𑒕𑒪𑒢𑓂𑒯𑒱। 𑒋𑒏 𑒥𑒹𑒩 𑒙𑓂𑒩𑒰𑓀𑒮𑒤𑒩𑒏 𑒥𑒰𑒠 𑒖𑒐𑒢 𑒮𑒦 𑒑𑒰𑒧 𑒑𑒹𑒪𑒰𑒯, 𑒞𑒿 𑒣𑒻𑒒 𑒦𑒰𑒨 𑒖𑒹 𑒮𑒦𑒏 𑒤𑒳𑒪𑒫𑒰𑒛𑓃𑒲𑒮𑒿 𑒢𑒲𑒏-𑒢𑒲𑒏 𑒑𑒰𑒕 𑒅𑒐𑒰𑒛𑓃𑒱 𑒏𑒨 𑒁𑒣𑒢𑒰 𑒒𑒩𑒏 𑒂𑒑𑒰𑒿 𑒪𑒑𑒰 𑒪𑒻𑒞 𑒕𑒪𑒰𑒯, 𑒮𑒹 𑒂𑒥 𑒋𑒏𑒯𑒱 𑒮𑒰𑒪𑒧𑒹 𑒠𑒥𑓂𑒥𑒴, 𑒮𑒦𑒮𑒿 𑒣𑒰𑒕𑒴 𑒥𑒻𑒮𑒢𑒱𑒯𑒰𑒩 𑒫𑒱𑒠𑓂𑒨𑒰𑒩𑓂𑒟𑒲𑒏 𑒑𑒱𑒢𑒞𑒲𑒧𑒹 𑒂𑒥𑒱 𑒑𑒹𑒪𑒰𑒯। 𑒍𑒯𑒱 𑒥𑒹𑒩 𑒙𑓂𑒩𑒰𑓀𑒮𑒤𑒩𑒏 𑒥𑒰𑒠𑒏 𑒑𑒰𑒧𑒧𑒹 𑒢𑒱𑒫𑒰𑒮 𑒏𑒱𑒕𑒳 𑒥𑒹𑒬𑒲 𑒢𑒧𑒑𑒩 𑒦𑓄 𑒑𑒹𑒪 𑒕𑒪𑒢𑓂𑒯𑒱। 𑒤𑒹𑒩 𑒧𑒳𑒐𑓂𑒨𑒧𑓀𑒞𑓂𑒩𑒲 𑒣𑒠𑒏 𑒠𑒰𑒫𑒹𑒠𑒰𑒩 𑒋𑒏𑒙𑒰 𑒢𑒹𑒞𑒰𑒖𑒲 𑒖𑒐𑒢 𑒑𑒰𑒧𑒧𑒹 𑒫𑒼𑒙 𑒧𑒿𑒑𑒥𑒰𑒏 𑒪𑒹𑒪 𑒁𑒋𑒪𑒰𑒯 𑒞𑒐𑒢 𑒏𑒰𑒏𑒰 𑒯𑒳𑒢𑒏𑒰𑒮𑒿 𑒦𑒹𑒿𑒙 𑒏𑒋𑒪𑒢𑓂𑒯𑒱 𑒂 𑒏𑒯𑒪𑒐𑒱𑒢𑓂𑒯 𑒖𑒹 𑒯𑒧𑒩 𑒦𑒰𑒋𑒏𑒹𑒿 𑒫𑒩𑓂𑒏𑓂𑒮𑒮𑒿 𑒢𑒢-𑒫𑒩𑓂𑒏𑓂𑒮 𑒧𑒹 𑒙𑓂𑒩𑒰𑓀𑒮𑒤𑒩 𑒏𑒋 𑒠𑒱𑒨𑒾𑒏, 𑒥𑒔𑓂𑒔𑒰 𑒮𑒦 𑒣𑒼𑒮𑒰 𑒖𑒋𑒞𑒻𑒏।𑒢𑒹𑒞𑒰𑒖𑒲 𑒏𑒯𑒪𑒢𑓂𑒯𑒱 𑒖𑒹 𑒖𑓂𑒨𑒼𑒿 𑒯𑒧 𑒖𑒲𑒞𑒱 𑒑𑒹𑒪𑒯𑒳𑒿 𑒞𑒿 𑒄 𑒏𑒰𑒖 𑒞𑒿 𑒯𑒧 𑒖𑒩𑒴𑒩 𑒏𑒩𑒥। 𑒫𑒩𑓂𑒏𑓂𑒮𑒧𑒹 𑒖𑒋𑒥𑒰𑒏 𑒣𑒻𑒩𑒫𑒲 𑒞𑒿 𑒥𑒯𑒳𑒞 𑒂𑒋𑒪 𑒧𑒳𑒠𑒰 𑒢𑒢-𑒫𑒩𑓂𑒏𑓂𑒮𑒧𑒹 𑒖𑒋𑒥𑒰𑒏 𑒯𑒹𑒞𑒳 𑒄 𑒣𑒯𑒱𑒪𑒹 𑒣𑒻𑒩𑒫𑒲 𑒕𑒲।𑒮𑓀𑒨𑒼𑒑 𑒋𑒯𑒢 𑒦𑒹𑒪 𑒖𑒹 𑒍 𑒢𑒹𑒞𑒰𑒖𑒲 𑒖𑒲𑒞𑒱 𑒑𑒹𑒪𑒰𑒯 𑒂 𑒧𑒳𑒐𑓂𑒨𑒧𑓀𑒞𑓂𑒩𑒲 𑒮𑒹𑒯𑒼 𑒥𑒢𑒱 𑒑𑒹𑒪𑒰𑒯। 𑒍 𑒬𑒣𑒟 𑒑𑓂𑒩𑒯𑒝 𑒏𑒹𑒪𑒰𑒏 𑒥𑒰𑒠 𑒄 𑒏𑒰𑒖 𑒡𑒩𑒱 𑒏𑒹𑒪𑒢𑓂𑒯𑒱 𑒖𑒹 𑒣𑒱𑒞𑒰𑒖𑒲𑒏 𑒙𑓂𑒩𑒰𑓀𑒮𑒤𑒩 𑒏𑒋 𑒠𑒹𑒪𑒐𑒱𑒢𑓂𑒯। 𑒂 𑒢𑒢𑓂𑒠𑒏 𑒣𑒩𑒱𑒫𑒰𑒩 𑒣𑒳𑒢𑓁 𑒬𑒯𑒩 𑒂𑒥𑒱 𑒑𑒹𑒪 𑒩𑒯𑒢𑓂𑒯𑒱 । 𑒑𑒰𑒧𑒧𑒹 𑒩𑒯𑒟𑒱 𑒞𑒿 𑒋𑒏 𑒑𑒼𑒙𑒹 𑒖𑒹 𑒂𑒩𑒳𑒝𑒱𑒏 𑒦𑒰𑒋𑒏 𑒮𑓀𑒑𑒲 𑒕𑒪𑒰𑒯, 𑒏𑒏𑒩𑒼 𑒁𑒢𑒏𑒰 𑒣𑓂𑒩𑒮𑓀𑒑𑒧𑒹 𑒏𑒯𑒢𑒹 𑒕𑒪𑒰𑒯।𑒯𑒳𑒢𑒏𑒩 𑒁𑒢𑒳𑒮𑒰𑒩- 𑒮𑓀𑒑𑒲𑒏 𑒧𑒰𑒋𑒏 𑒮𑓂𑒫𑒦𑒰𑒫 𑒞𑒲𑒫𑓂𑒩 𑒕𑒪𑒢𑓂𑒯𑒱 𑒂 𑒍 𑒐𑒹𑒢𑒰𑒃 𑒐𑒰𑒃𑒞𑒹 𑒏𑒰𑒪 𑒗𑒑𑒛𑓃𑒰 𑒏𑒩𑒋 𑒪𑒑𑒻𑒞 𑒕𑒪𑒲𑒯। 𑒧𑒳𑒠𑒰 𑒍𑒯𑒱 𑒠𑒱𑒢 𑒏𑒏𑒩𑒼 𑒁𑒢𑒏𑒰 𑒍 𑒂𑒩 𑒞𑒲𑒫𑓂𑒩 𑒮𑓂𑒫𑒦𑒰𑒫𑒏 𑒠𑒹𑒐𑒢𑒹 𑒕𑒪𑒰𑒯।𑒐𑒩𑒰𑒥 𑒂𑒩𑓂𑒟𑒱𑒏 𑒮𑓂𑒟𑒱𑒞𑒱𑒏 𑒅𑒣𑒩𑒰𑓀𑒞 𑒯𑒼𑒁𑒋𑒥𑒪𑒰 𑒏𑒪𑒯𑒏 𑒣𑒩𑒱𑒝𑒰𑒧 𑒂𑒩𑒳𑒝𑒱 𑒠𑒹𑒐𑒱 𑒩𑒯𑒪 𑒕𑒪𑒰𑒯। 𑒠𑒴 𑒙𑒰 𑒒𑒙𑒢𑒰 𑒯𑒳𑒢𑒏𑒰 𑒫𑒱𑒔𑒪𑒱𑒞 𑒏𑒋 𑒠𑒻𑒞 𑒕𑒪𑒢𑓂𑒯𑒱। 𑒋𑒏𑒙𑒰 𑒞𑒿 𑒃𑒢𑒏𑒧 𑒙𑒻𑒏𑓂𑒮 𑒏𑒙𑒾𑒞𑒲𑒏 𑒧𑒰𑒮- 𑒧𑒰𑒩𑓂𑒔 𑒧𑒰𑒮। 𑒄 𑒒𑒙𑒢𑒰 𑒞𑒿 𑒮𑒦 𑒮𑒰𑒪𑒹 𑒯𑒼𑒃𑒞 𑒕𑒪, 𑒧𑒳𑒠𑒰 𑒏𑒙𑒾𑒞𑒲 𑒥𑒜𑓃𑒻𑒞-𑒥𑒜𑓃𑒻𑒞 𑒋𑒏 𑒮𑒰𑒪 𑒂𑒥𑒱 𑒏𑒋 𑒣𑒴𑒩𑒰 𑒧𑒰𑒩𑓂𑒔 𑒧𑒰𑒮𑒏 𑒠𑒩𑒧𑒰𑒯𑒰 𑒏𑒰𑒙𑒱 𑒪𑒹𑒪𑒏। 𑒧𑒰𑒿 𑒏𑒯𑒻𑒞 𑒕𑒪𑒐𑒱𑒢𑓂𑒯 𑒖𑒹 𑒂𑒥 𑒦𑒼𑒖𑒢 𑒏𑒼𑒢𑒰 𑒔𑒪𑒋 𑒖𑒨𑒞𑒾𑒯। 𑒂𑒥 𑒦𑒲𑒐 𑒧𑒰𑒿𑒑𑒋 𑒖𑒃𑒯𑒿 𑒑𑓄 𑒮𑒦 𑒑𑒼𑒙𑒹। 𑒧𑒳𑒠𑒰 𑒢𑒢𑓂𑒠 𑒋𑒏𑒙𑒰 𑒑𑒰𑒧𑒏 𑒦𑒰𑒞𑒱𑒖𑒏𑒹𑒿 𑒣𑒼𑒮𑓂𑒙𑒏𑒰𑒩𑓂𑒛 𑒣𑒚𑒹𑒪𑒢𑓂𑒯𑒱 𑒂 𑒍 𑒂𑒚 𑒮𑒨 𑒙𑒰𑒏𑒰 𑒂𑒢𑒱 𑒏𑒨 𑒠𑓄 𑒑𑒹𑒪𑒐𑒱𑒢𑓂𑒯 𑒞𑒐𑒢 𑒖𑒰 𑒏𑒋 𑒁𑒮𑒳𑒩𑒏𑓂𑒭𑒰𑒏 𑒦𑒰𑒫𑒢𑒰 𑒐𑒞𑓂𑒧 𑒦𑒹𑒪 𑒕𑒪। 𑒦𑒲𑒐 𑒧𑒿𑒑𑒻𑒞 𑒁𑒐𑒢𑒼 𑒂𑒩𑒳𑒝𑒱 𑒖𑓂𑒨𑒼𑒿 𑒏𑒏𑒩𑒼 𑒠𑒹𑒐𑒻𑒞 𑒕𑒟𑒱 𑒞𑒿 𑒧𑒼𑒢 𑒏𑒪𑒣𑒨 𑒪𑒑𑒻𑒞 𑒕𑒢𑓂𑒯𑒱। 𑒠𑒼𑒮𑒩 𑒒𑒙𑒢𑒰 𑒕𑒪 𑒖𑒐𑒢 𑒯𑒳𑒢𑒏𑒩 𑒒𑒩𑒏 𑒂𑒿𑒑𑒰 𑒋𑒏𑒙𑒰 𑒋𑒏𑓂𑒮𑒲𑒛𑒹𑓀𑒙 𑒦𑒹𑒪 𑒕𑒪 𑒂 𑒍𑒏𑒩𑒰 𑒥𑒰𑒠 𑒯𑒳𑒢𑒏𑒩 𑒦𑒰𑒃 𑒐𑒹𑒢𑒰𑒃 𑒕𑒼𑒛𑓃𑒱 𑒠𑒹𑒢𑒹 𑒕𑒪𑒰𑒯 𑒂 𑒏𑒰𑒢𑒱-𑒏𑒰𑒢𑒱 𑒏𑒋 𑒂𑒿𑒐𑒱 𑒪𑒰𑒪 𑒏𑒋 𑒪𑒹𑒢𑒹 𑒕𑒪𑒰𑒯। 𑒢𑒢𑓂𑒠 𑒖𑒐𑒢 𑒥𑒳𑒗𑒥𑒋 𑒪𑒑𑒪𑒰𑒯 𑒞𑒿 𑒍 𑒖𑒫𑒰𑒥 𑒠𑒹𑒪𑒢𑓂𑒯𑒱-
-𑒁𑒯𑒰𑒿𑒏𑒹𑒿 𑒖𑓂𑒨𑒼𑒿 𑒏𑒱𑒕𑒳 𑒦𑓄 𑒖𑒋𑒞 𑒞𑒐𑒢 𑒯𑒧𑒩𑒰 𑒮𑒦𑒏 𑒏𑒲 𑒯𑒼𑒋𑒞।
𑒣𑒱𑒞𑒰𑒖𑒲 𑒃𑓀𑒬𑓂𑒨𑒼𑒩𑒹𑓀𑒮 𑒥𑒹𑒢𑒲𑒤𑒱𑒙, 𑒖𑒲.𑒣𑒲.𑒋𑒤., 𑒑𑓂𑒩𑒹𑒔𑓂𑒨𑒳𑒙𑒲 𑒂𑒠𑒱𑒏 𑒯𑒱𑒮𑒰𑒥 𑒪𑒑𑒰𑒨 𑒣𑒳𑒞𑓂𑒩𑒏𑒹𑒿 𑒥𑒳𑒗𑒹𑒪𑒢𑓂𑒯𑒱 𑒖𑒹 𑓙𑓙𑓐𑓐𑓐 𑒩𑒳𑒣𑒨𑓂𑒨𑒰 𑒞𑒿 𑒞𑒳𑒩𑒞 𑒦𑒹𑒙𑒞 𑒂 𑒤𑒹𑒩 𑒧𑒯𑒱𑒢𑒹-𑒧𑒯𑒱𑒢𑒹 𑒣𑒹𑓀𑒬𑒢𑒼 𑒦𑒹𑒙𑒞। 𑒪𑒑𑒦𑒑 𑒋𑒏 𑒒𑓀𑒙𑒰 𑒞𑒏 𑒥𑒰𑒥𑒴𑒖𑒲 𑒣𑒻𑒒 𑒣𑒳𑒞𑓂𑒩𑒏𑒹𑒿 𑒥𑒳𑒗𑒥𑒻𑒞 𑒩𑒯𑒪𑒰𑒯। 𑒋𑒏 𑒥𑒹𑒩 𑒂𑒩𑒳𑒝𑒱𑒏 𑒍𑒯𑒱𑒚𑒰𑒧 𑒋𑒏 𑒑𑒼𑒙 𑒣𑒲𑒮𑒰 𑒂𑒨𑒪 𑒕𑒪𑒰𑒯। 𑒂𑒃𑒨𑒼 𑒒𑒩𑒧𑒹 𑒏𑓂𑒨𑒼 𑒁𑒥𑒻𑒞 𑒕𑒟𑒱 𑒞𑒿 𑒮𑒦 𑒮𑒳𑒩𑒏𑓂𑒭𑒱𑒞 𑒁𑒢𑒳𑒦𑒫 𑒏𑒩𑒻𑒞 𑒕𑒟𑒱। 𑒢𑒢𑓂𑒠 𑒣𑒲𑒮𑒰𑒏 𑒮𑒰𑒩 𑒦𑒹𑒪𑒐𑒱𑒢𑓂𑒯 𑒮𑒹 𑒋𑒯𑒱 𑒍𑒯𑒠𑒰𑒮𑒿 𑒯𑒿𑒮𑒲 𑒮𑒹𑒯𑒼 𑒔𑒪𑒱 𑒩𑒯𑒪 𑒕𑒪।𑒍 𑒏𑒯𑒪𑒢𑓂𑒯𑒱 𑒖𑒹 𑒢𑒢𑓂𑒠𑒹 𑒖𑒹𑒏𑒰𑒿 𑒄𑒧𑒰𑒢𑒠𑒰𑒩 𑒋𑒏𑒙𑒰 𑒥𑒲.𑒛𑒲.𑒍. 𑒮𑒰𑒯𑒹𑒥 𑒗𑓀𑒗𑒰𑒩𑒣𑒳𑒩𑒧𑒹 𑒕𑒪𑒰𑒯। 𑒣𑒱𑒞𑒰𑒖𑒲 𑒯𑒳𑒢𑒏𑒩 𑒧𑒪𑒰𑒯 𑒕𑒪𑒐𑒱𑒢𑓂𑒯, 𑒏𑒭𑓂𑒙 𑒏𑒰𑒙𑒱 𑒁𑒤𑒮𑒩 𑒦𑒹𑒪𑒰𑒯। 𑒧𑒳𑒠𑒰 𑒢𑒢𑓂𑒠𑒏 𑒖𑒹𑒿𑒏𑒰 𑒯𑒳𑒢𑒏𑒼 𑒒𑒩𑒧𑒹 𑒐𑒰𑒙𑒹 𑒙𑒰 𑒕𑒪𑒢𑓂𑒯𑒱। 𑒣𑒲𑒮𑒰 𑒯𑒳𑒢𑒏𑒰 𑒏𑒯𑒪𑒐𑒱𑒢𑓂𑒯 𑒖𑒹 𑒏𑒟𑒲 𑒪𑒹 𑒁𑒤𑒮𑒩 𑒦𑒹𑒪𑒯𑒳𑒿, 𑒑𑒰𑒧𑒧𑒹 𑒩𑒯𑒱𑒞𑒯𑒳𑒿 𑒂 𑒧𑒔𑒰𑒢 𑒣𑒩 𑒥𑒻𑒮𑒱 𑒧𑒰𑒕 𑒦𑒰𑒞 𑒐𑒋𑒞𑒯𑒳𑒿। 𑒧𑒰𑒕𑒏 𑒏𑒰𑒩𑒥𑒰𑒩𑒧𑒹 𑒤𑒰𑒨𑒠𑒰 𑒯𑒼𑒃𑒞।
𑒂𑒩𑒳𑒝𑒱𑒏 𑒥𑒯𑒱𑒢𑒏 𑒫𑒱𑒫𑒰𑒯𑒏 𑒥𑒰𑒠 𑒒𑒩𑒧𑒹 𑒏𑒐𑒢𑒼 𑒏𑒰𑒪 𑒥𑒯𑒱𑒢𑒼𑒃 𑒁𑒥𑒻𑒞 𑒕𑒪𑒐𑒱𑒢𑓂𑒯। 𑒖𑒧𑒰𑒨𑒏 𑒁𑒥𑒱𑒞𑒹 𑒠𑒹𑒩𑒲 𑒂𑒩𑒳𑒝𑒱𑒏 𑒧𑒰𑒿𑒏 𑒗𑒑𑒛𑓃𑒰 𑒣𑒱𑒞𑒰𑒖𑒲 𑒮𑒿 𑒬𑒳𑒩𑒴 𑒦𑓄 𑒖𑒰𑒃𑒞 𑒕𑒪𑒢𑓂𑒯𑒱, 𑒏𑒱𑒋𑒏𑒞𑒿 𑒒𑒩𑒧𑒹 𑒃𑓀𑒞𑒖𑒰𑒧 𑒞𑒿 𑒏𑒱𑒕𑒳𑒍 𑒩𑒯𑒱𑒞𑒹 𑒢𑒯𑒱 𑒕𑒪। 𑒙𑓂𑒩𑒰𑓀𑒮𑒤𑒩𑒏 𑒥𑒰𑒠 𑒣𑒱𑒞𑒰𑒖𑒲𑒏 𑒁𑒦𑒱𑒨𑒰𑒢 𑒒𑒴𑒮𑒐𑒼𑒩𑒏𑒹𑒿 𑒮𑒖𑒰 𑒠𑒹𑒥𑒨 𑒣𑒩 𑒔𑒪𑒪। 𑒂 𑒖𑒐𑒢 𑒮𑒩𑒏𑒰𑒩𑒲 𑒞𑓀𑒞𑓂𑒩 𑒣𑒩𑒮𑒿 𑒫𑒱𑒬𑓂𑒫𑒰𑒮 𑒐𑒞𑒧 𑒦𑒋 𑒑𑒹𑒪𑒢𑓂𑒯𑒱 𑒞𑒐𑒢 𑒍𑒯𑒱 𑒞𑒰𑓀𑒞𑓂𑒩𑒱𑒏𑒏 𑒤𑒹𑒩𑒧𑒹 𑒣𑒛𑓃𑒱 𑒑𑒹𑒪𑒰𑒯। 𑒒𑒩𑒧𑒹 𑒧𑒰𑒞𑒰-𑒣𑒱𑒞𑒰𑒏 𑒥𑒲𑒔 𑒏𑒪𑒯 𑒥𑒜𑓃𑒱 𑒑𑒹𑒪। 𑒋𑒏 𑒠𑒱𑒢 𑒣𑒱𑒞𑒰𑒖𑒲𑒮𑒿 𑒂𑒩𑒳𑒝𑒱𑒏 𑒥𑒯𑒮𑒰-𑒥𑒯𑒮𑒲 𑒦𑒋 𑒑𑒹𑒪𑒢𑓂𑒯𑒱 𑒂 𑒞𑒲𑒢𑒴 𑒦𑒰𑒨 𑒥𑒯𑒱𑒢 𑒑𑒩𑒰 𑒪𑒰𑒑𑒱 𑒏𑓄 𑒏𑒰𑒢𑒨 𑒪𑒑𑒪𑒰𑒯। 𑒞𑒏𑒩𑒰 𑒥𑒰𑒠𑒮𑒿 𑒁𑒩𑒳𑒝𑒱𑒏 𑒦𑒰𑒨-𑒥𑒯𑒱𑒢 𑒮𑒦𑒮𑒿 𑒗𑒑𑒛𑓃𑒰 𑒯𑒼𑒨𑒥 𑒮𑒧𑒰𑒣𑓂𑒞 𑒦𑓄 𑒑𑒹𑒪𑒢𑓂𑒯𑒱।
𑒂𑒩𑒳𑒝𑒱 𑒁𑒢𑒹𑒩 𑒑𑒳𑒢𑒡𑒳𑒢 𑒏𑒩𑒻𑒞 𑒒𑒩𑒣𑒩 𑒣𑒯𑒳𑒿𑒔𑒪𑒟𑒱।
𑒠𑒴-𑒞𑒲𑒢 𑒡𑒩𑒱 𑒠𑒼𑒮𑒩 𑒏𑒱𑒩𑒰𑒨𑒰𑒏 𑒧𑒏𑒰𑒢 𑒞𑒰𑒏𑒋 𑒪𑒹𑒪 𑒢𑒱𑒏𑒪𑒪 𑒏𑒩𑒟𑒱 𑒂 𑒮𑒰𑒿𑒗𑒧𑒹 𑒫𑒻𑒯 𑒑𑒳𑒢𑒡𑒳𑒢𑒲।
𑒋𑒏 𑒥𑒹𑒩 𑒒𑒩 𑒂𑒥𑒱 𑒩𑒯𑒪 𑒕𑒪𑒰𑒯 𑒮𑓂𑒏𑒴𑒪𑒮𑒿।
𑒒𑒩 𑒁𑒥𑒻𑒞 𑒏𑒰𑒪 𑒧𑒼𑒢 𑒏𑒼𑒢𑒰 𑒠𑒢𑒱 𑒏𑓄 𑒩𑒯𑒪 𑒕𑒪𑒢𑓂𑒯𑒱। 𑒮𑓂𑒏𑒴𑒪𑒮𑒿 𑒒𑒩 𑒂𑒥𑒱 𑒩𑒯𑒪 𑒕𑒪𑒰𑒯। 𑒩𑒮𑓂𑒞𑒰𑒧𑒹 𑒮𑒦 𑒏𑓂𑒨𑒼 𑒋𑒏 𑒠𑒼𑒮𑒩𑒰 𑒮𑒿 𑒏𑒱𑒕𑒳 𑒁𑒮𑓀𑒦𑒫 𑒒𑒙𑒱𑒞 𑒯𑒼𑒋𑒥𑒰𑒏 𑒑𑒣 𑒏𑓄 𑒩𑒯𑒪 𑒕𑒪𑒰𑒯। 𑒂𑒩𑒳𑒝𑒱 𑒠𑒳𑒢𑒴 𑒦𑒰𑒋 𑒮𑒰𑒞𑒧 𑒏𑒏𑓂𑒭𑒰𑒧𑒹 𑒣𑒜𑓃𑒻𑒞 𑒩𑒯𑒟𑒱, 𑒮𑓀𑒑𑒯𑒱-𑒮𑓀𑒑। 𑒧𑒳𑒠𑒰 𑒂𑒃 𑒣𑒻𑒒 𑒦𑒰𑒋𑒏 𑒣𑒹𑒙𑒧𑒹 𑒠𑒩𑓂𑒠 𑒕𑒪𑒢𑓂𑒯𑒱 𑒮𑒹 𑒍 𑒙𑒱𑒤𑒲𑒢𑒏 𑒥𑒰𑒠 𑒕𑒳𑒙𑓂𑒙𑒲 𑒪𑓄 𑒒𑒩 𑒔𑒪𑒱 𑒑𑒹𑒪 𑒕𑒪𑒰𑒯। 𑒮𑓂𑒏𑒴𑒪𑒧𑒹 𑒮𑒦𑒏𑒹𑒿 𑒯𑒿𑒮𑒻𑒞 𑒠𑒹𑒐𑒻𑒞 𑒩𑒯𑒟𑒱, 𑒞𑒿 𑒁𑒣𑒢 𑒒𑒩𑒏 𑒮𑓂𑒟𑒱𑒞𑒱 𑒧𑒼𑒢 𑒣𑒛𑓃𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒄𑒩𑓂𑒭𑓂𑒨𑓃𑒰 𑒮𑒹𑒯𑒼 𑒯𑒼𑒃𑒞 𑒕𑒪𑒢𑓂𑒯𑒱 𑒂𑒢 𑒥𑒔𑓂𑒔𑒰𑒏 𑒦𑒰𑒑𑓂𑒨 𑒣𑒩। 𑒤𑒹𑒩 𑒧𑒼𑒢𑒧𑒹 𑒄𑒯𑒼 𑒯𑒼𑒃𑒞 𑒕𑒪𑒢𑓂𑒯𑒱 𑒖𑒹 𑒯𑒳𑒢𑒏𑒹 𑒮𑒦 𑒖𑒹𑒏𑒰𑒿 𑒣𑒩𑒱𑒮𑓂𑒟𑒱𑒞𑒱 𑒯𑒼𑒋𑒞𑒻𑒏 𑒋𑒏𑒩𑒼 𑒮𑒦𑒏। 𑒧𑒳𑒠𑒰 𑒗𑒳𑒙𑓂𑒚𑒹 𑒣𑓂𑒩𑒮𑒢𑓂𑒢𑒞𑒰𑒏 𑒢𑒰𑒙𑒏 𑒏𑒩𑒻𑒞 𑒖𑒰𑒃𑒞 𑒁𑒕𑒱। 𑒒𑒩𑒧𑒹 𑒧𑒰𑒋-𑒥𑒰𑒣𑒏 𑒏𑒪𑒯𑒏 𑒥𑒲𑒔 𑒛𑒩𑒰𑒨𑒪 𑒮𑒢 𑒩𑒯𑒻𑒞 𑒩𑒯𑒟𑒱। 𑒪𑒑𑒻𑒞 𑒩𑒯𑒻𑒞 𑒕𑒪𑒢𑓂𑒯𑒱 𑒖𑒹 𑒄 𑒮𑒦 𑒣𑒩𑒱𑒮𑓂𑒟𑒱𑒞𑒱 𑒏𑒯𑒱𑒨𑒼 𑒐𑒞𑓂𑒧 𑒢𑒯𑒱 𑒯𑒼𑒋𑒞𑒻𑒏। 𑒢𑒯𑒱 𑒞𑒿 𑒠𑒼𑒮𑒩𑒮𑒿 𑒑𑒣𑓂𑒣 𑒏𑒋 𑒮𑒏𑒻𑒞 𑒕𑒟𑒱, 𑒢𑒯𑒱𑒨𑒹 𑒏𑒏𑒩𑒼 𑒁𑒣𑒢 𑒧𑒼𑒢𑒏 𑒑𑒣𑓂𑒣𑒹 𑒏𑒯𑒱 𑒮𑒏𑒻𑒞 𑒕𑒟𑒱। 𑒥𑒹𑒩-𑒥𑒐𑒞 𑒏𑒯𑒱𑒨𑒼 𑒁𑒣𑒢 𑒮𑒯𑒰𑒨𑒞𑒰𑒏 𑒯𑒹𑒞𑒳 𑒮𑒹𑒯𑒼 𑒮𑒼𑒩 𑒢𑒯𑒱 𑒏𑓄 𑒮𑒏𑒻𑒞 𑒕𑒟𑒱। 𑒧𑒰𑒨 𑒚𑒲𑒏𑒹 𑒒𑒩𑒒𑒳𑒮𑒏𑒰, 𑒧𑒳𑒿𑒯𑒠𑒳𑒥𑓂𑒥𑒩 𑒂𑒠𑒱 𑒫𑒱𑒬𑒹𑒭𑒝𑒮𑒿 𑒫𑒱𑒦𑒴𑒭𑒱𑒞 𑒏𑒩𑒻𑒞 𑒕𑒪𑒐𑒱𑒢𑓂𑒯। 𑒮𑒰𑒿𑒗𑒧𑒹 𑒒𑒳𑒧𑒢𑒰𑒃 𑒂𑒏𑒱 𑒠𑒳𑒩𑓂𑒑𑒰𑒣𑒴𑒖𑒰𑒏 𑒧𑒹𑒪𑒰 𑒑𑒹𑒢𑒰𑒃 𑒄 𑒮𑒦 𑒥𑒰𑒞 𑒯𑒳𑒢𑒏𑒰 𑒮𑒦𑒏 𑒖𑒲𑒫𑒢𑒮𑒿 𑒠𑒴𑒩 𑒕𑒪𑒢𑓂𑒯𑒱। 𑒋𑒏 𑒥𑒹𑒩 𑒦𑒴𑒏𑒧𑓂𑒣 𑒖𑒹𑒏𑒰𑒿 𑒂𑒨𑒪 𑒕𑒪, 𑒮𑒦 𑒏𑓂𑒨𑒼 𑒑𑓂𑒩𑒲𑒪 𑒞𑒼𑒛𑓃𑒱 𑒏𑒨 𑒥𑒯𑒩𑒰𑒨𑒪, 𑒧𑒳𑒠𑒰 𑒂𑒩𑒳𑒝𑒱 𑒐𑒰𑒙 𑒣𑒩 𑒣𑒛𑓃𑒪𑒹 𑒩𑒯𑒱 𑒑𑒹𑒪𑒰𑒯। 𑒏𑒱𑒕𑒳 𑒞𑒿 𑒁𑒏𑒩𑓂𑒧𑒝𑓂𑒨𑒞𑒰𑒫𑒬 𑒂 𑒏𑒱𑒕𑒳 𑒄 𑒮𑒼𑒔𑒱 𑒏𑒨, 𑒖𑒹 𑒏𑒲 𑒯𑒼𑒨𑒞 𑒒𑒩 𑒙𑒴𑒙𑒱 𑒠𑒹𑒯 𑒣𑒩 𑒐𑒮𑒞 𑒞𑒿, 𑒮𑒧𑒮𑓂𑒨𑒰𑒮𑒿 𑒧𑒳𑒏𑓂𑒞𑒱𑒨𑒼 𑒞𑒿 𑒦𑒹𑒙𑒞। 𑒍𑒯𑒱 𑒠𑒱𑒢 𑒮𑓂𑒏𑒴𑒪𑒮𑒿 𑒒𑒳𑒩𑒻𑒞 𑒏𑒰𑒪 𑒒𑒩𑒏 𑒪𑒑𑒧𑒹 𑒣𑒯𑒳𑒿𑒔𑒪𑒰𑒯 𑒞𑒿 𑒦𑒲𑒛𑓃 𑒠𑒹𑒐𑒱 𑒧𑒼𑒢 𑒯𑒠𑒮𑒱 𑒑𑒹𑒪𑒢𑓂𑒯𑒱 𑒖𑒹 𑒥𑒰𑒥𑒴𑒖𑒲𑒏𑒹𑒿 𑒞𑒿 𑒏𑒱𑒕𑒳 𑒢𑒯𑒱 𑒦𑓄 𑒑𑒹𑒪𑒢𑓂𑒯𑒱। 𑒒𑒩𑒧𑒹 𑒣𑒯𑒳𑒿𑒔𑒪𑒰𑒯 𑒞𑒿 𑒧𑒰𑒿-𑒥𑒯𑒱𑒢𑒮𑒿 𑒣𑒴𑒕𑒨 𑒪𑒑𑒪𑒰𑒯, 𑒖𑒹 𑒏𑒲 𑒦𑒹𑒪? 𑒮𑒦 𑒥𑒼𑒪 𑒦𑒩𑒼𑒮 𑒠𑒹𑒥𑒋 𑒪𑒑𑒪𑒟𑒱𑒢𑓂𑒯 𑒞𑒿 𑒂𑒩𑒼 𑒞𑒰𑒧𑒮 𑒅𑒚𑒋 𑒪𑒰𑒑𑒪𑒢𑓂𑒯𑒱।𑒖𑒼𑒩𑒮𑒿 𑒏𑒰𑒢𑒱 𑒏𑒨 𑒥𑒰𑒖𑒨 𑒪𑒑𑒪𑒰𑒯-
-𑒥𑒰𑒥𑒴𑒖𑒲 𑒧𑒩𑒱 𑒑𑒹𑒪𑒰𑒯 𑒏𑒲? 𑒏𑒞𑒋 𑒕𑒢𑓂𑒯𑒱 𑒯𑒳𑒢𑒏𑒩 𑒧𑒵𑒞 𑒬𑒩𑒲𑒩।
𑒞𑒰𑒯𑒱 𑒣𑒩 𑒥𑒯𑒱𑒢 𑒏𑒯𑒪𑒐𑒱𑒢𑓂𑒯-
-𑒢𑒯𑒱, 𑒯𑒳𑒢𑒏𑒰 𑒏𑒱𑒕𑒳 𑒢𑒯𑒱 𑒦𑒹𑒪𑒢𑓂𑒯𑒱। 𑒁𑒯𑒰𑒿𑒏 𑒮𑓀𑒑𑒲 𑒖𑒹 𑒧𑒏𑒰𑒢 𑒧𑒰𑒪𑒱𑒏𑒏 𑒥𑒹𑒙𑒰 𑒁𑒕𑒱 𑒮𑒹 𑒍 𑒍𑒏𑒩 𑒕𑒼𑒙 𑒦𑒰𑒋, 𑒍𑒏𑒩 𑒣𑒱𑒞𑒰 𑒂 𑒩𑒱𑒏𑓂𑒬𑒰𑒥𑒪𑒰, 𑒔𑒰𑒩𑒴 𑒑𑒼𑒙𑒹 𑒩𑒱𑒏𑓂𑒬𑒰𑒣𑒩 𑒖𑒰𑒃𑒞 𑒕𑒪𑒰𑒯। 𑒥𑒹𑒔𑒰𑒩𑒰 𑒩𑒱𑒏𑓂𑒬𑒰 𑒥𑒪𑒰 𑒫𑒱𑒫𑒰𑒯 𑒏𑓄 𑒏𑒋 𑒏𑒢𑒱𑒨𑒰𑒿𑒏𑒹𑒿 𑒁𑒢𑒢𑒯𑒱𑒨𑒹 𑒕𑒪। 𑒋𑒏𑒙𑒰 𑒫𑒱𑒬𑒰𑒪 𑒙𑓂𑒩𑒏 𑒩𑒱𑒏𑓂𑒬𑒰𑒏𑒹𑒿 𑒡𑒏𑓂𑒏𑒰 𑒧𑒰𑒩𑒱 𑒠𑒹𑒪𑒏𑒻𑒏। 𑒚𑒰𑒧𑒯𑒱 𑒧𑒩𑒱 𑒖𑒰𑒋 𑒑𑒹𑒪𑒰𑒯।
𑒂𑒩𑒳𑒝𑒱𑒏 𑒏𑒰𑒢𑒥 𑒐𑒞𑒧 𑒦𑒋 𑒑𑒹𑒪𑒢𑓂𑒯𑒱। 𑒄 𑒖𑒹 𑒂𑒤𑒞 𑒂𑒋𑒪 𑒕𑒪𑒻𑒏 𑒮𑒹 𑒂𑒃 𑒏𑒏𑒩𑒼 𑒁𑒢𑒏𑒰 𑒒𑒩𑒧𑒹 । 𑒍𑒢𑒰 𑒍 𑒖𑒹 𑒧𑒵𑒞 𑒦𑒹𑒪 𑒕𑒪 𑒣𑓂𑒩𑒞𑒱𑒠𑒱𑒢 𑒣𑓂𑒩𑒰𑒞𑓁 𑒂𑒩𑒳𑒝𑒱𑒏 𑒮𑓀𑒑 𑒛𑒹𑒜𑓃 𑒮𑒰𑒪𑒮𑒿 𑒮𑓂𑒏𑒴𑒪 𑒖𑒰 𑒩𑒯𑒪 𑒕𑒪 । 𑒮𑒦 𑒠𑒱𑒢 𑒣𑓂𑒩𑒰𑒞𑓁 𑒮𑒲𑒜𑓃𑒲𑒣𑒩 𑒍 𑒏𑒰𑒪𑒥𑒹𑒪 𑒥𑒖𑒥𑒻𑒞 𑒕𑒪𑒰𑒯 𑒂 𑒍 𑒮𑒲𑒜𑓃𑒲𑒮𑒿 𑒅𑒞𑒩𑒻𑒞 𑒕𑒪 𑒂 𑒮𑓀𑒑𑒹 𑒮𑒦 𑒮𑓂𑒏𑒴𑒪 𑒖𑒰𑒃𑒞 𑒕𑒪𑒰𑒯। 𑒧𑒼𑒢 𑒣𑒛𑓃𑒪𑒢𑓂𑒯𑒱 𑒖𑒹 𑒏𑒰𑒪𑓂𑒯𑒱 𑒮𑒹𑒯𑒼 𑒮𑒦 𑒠𑒱𑒢 𑒖𑒹𑒏𑒰𑒿 𑒍 𑒏𑒰𑒪𑒥𑒹𑒪 𑒥𑒖𑒹𑒢𑒹 𑒕𑒪𑒰𑒯 𑒞𑒿 𑒍𑒏𑒩 𑒥𑒯𑒱𑒢 𑒖𑒹 𑒔𑒬𑓂𑒧𑒰 𑒪𑒑𑒥𑒻𑒞 𑒕𑒪𑒱 𑒂 𑒗𑒢𑒏𑒰𑒯𑒱 𑒕𑒪𑒲𑒯, 𑒮𑒹 𑒆𑒣𑒩𑒮𑒿 𑒞𑒧𑒮𑒰𑒏𑒹𑒿 𑒏𑒯𑒪𑒏𑒢𑓂𑒯𑒱 𑒖𑒹 𑒏𑒞𑒹𑒏 𑒖𑒼𑒩𑒮𑒿 𑒂 𑒠𑒹𑒩𑒲 𑒡𑒩𑒱 𑒏𑒰𑒪𑒥𑒹𑒪 𑒥𑒖𑒥𑒻𑒞 𑒕𑒲, 𑒂 𑒮𑒹𑒯𑒼 𑒖𑒹 𑒥𑒹𑒩-𑒥𑒹𑒩 𑒏𑒱𑒋𑒏 𑒥𑒖𑒥𑒻𑒞 𑒕𑒲, 𑒂𑒥𑒱 𑒩𑒯𑒪 𑒁𑒕𑒱। 𑒏𑒰𑒪𑓂𑒯𑒱 𑒞𑒿 𑒍 𑒂𑒋𑒪 𑒧𑒳𑒠𑒰 𑒂𑒩𑒳𑒝𑒱 𑒞𑒐𑒢𑒯𑒱 𑒏𑒯𑒱 𑒠𑒹𑒪𑒐𑒱𑒢𑓂𑒯 𑒖𑒹 𑒏𑒰𑒪𑓂𑒯𑒱𑒮𑒿 𑒯𑒧 𑒏𑒰𑒪𑒥𑒹𑒪 𑒢𑒯𑒱 𑒥𑒖𑒰𑒨𑒥, 𑒁𑒯𑒰𑒿𑒏𑒹𑒿 𑒯𑒧𑒩𑒰 𑒮𑓀𑒑𑒹 𑒖𑒨𑒥𑒰𑒏 𑒯𑒼𑒁𑒋 𑒞𑒿 𑒢𑒲𑒔𑒰𑒿 𑒅𑒞𑒩𑒱 𑒏𑓄 𑒂𑒆 𑒂 𑒮𑓀𑒑 𑒔𑒪𑒴। 𑒍 𑒢𑒯𑒱 𑒂𑒋𑒪 𑒞𑒿 𑒂𑒩𑒳𑒝𑒱 𑒏𑒱𑒋𑒏 𑒏𑒰𑒪𑒥𑒹𑒪 𑒥𑒖𑒥𑒱𑒞𑒟𑒱। 𑒛𑒹𑒜𑓃 𑒮𑒰𑒪𑒧𑒹 𑒣𑒯𑒱𑒪 𑒥𑒹𑒩 𑒦𑒹𑒪 𑒕𑒪 𑒖𑒹 𑒂𑒩𑒳𑒝𑒱 𑒏𑒰𑒪𑒥𑒹𑒪 𑒢𑒯𑒱 𑒥𑒖𑒹𑒢𑒹 𑒕𑒪𑒰𑒯 𑒂 𑒍 𑒛𑒹𑒜𑓃 𑒮𑒰𑒪𑒧𑒹 𑒣𑒯𑒱𑒪 𑒥𑒹𑒩 𑒮𑓂𑒏𑒴𑒪 𑒢𑒰𑒑𑒰 𑒏𑒋𑒢𑒹 𑒕𑒪। 𑒂𑒥 𑒂𑒩𑒳𑒝𑒱𑒏 𑒧𑒼𑒢𑒧𑒹 𑒯𑒼𑒧𑒋 𑒪𑒑𑒪𑒢𑓂𑒯𑒱 𑒖𑒹 𑒏𑒞𑒯𑒳 𑒍 𑒥𑒰𑒖𑒱 𑒞𑒿 𑒢𑒯𑒱 𑒠𑒹𑒢𑒹 𑒯𑒼𑒋𑒞 𑒖𑒹 𑒂𑒩𑒳𑒝𑒱 𑒏𑒰𑒪𑓂𑒯𑒱𑒮𑒿 𑒏𑒰𑒪𑒥𑒹𑒪 𑒢𑒯𑒱 𑒥𑒖𑒍𑒞𑒰𑒯। 𑒧𑒳𑒠𑒰 𑒏𑒱𑓀𑒮𑒰𑒃𑒞 𑒍𑒏𑒩 𑒏𑒼𑒢𑒼 𑒂𑒢𑒼 𑒏𑒰𑒩𑓂𑒨𑒏𑓂𑒩𑒧 𑒯𑒼𑒋𑒞𑒻𑒏। 𑒏𑒱𑒋𑒏 𑒞𑒿 𑒕𑒼𑒙 𑒦𑒰𑒋 𑒂 𑒣𑒱𑒞𑒰𑒏 𑒮𑓀𑒑 𑒩𑒱𑒏𑓂𑒬𑒰𑒮𑒿 𑒏𑒞𑒯𑒳 𑒖𑒰 𑒩𑒯𑒪 𑒕𑒪। 𑒁𑒮𑓂𑒞𑒳 𑒂𑒩𑒳𑒝𑒱 𑒔𑒱𑓀𑒞𑒱𑒞 𑒕𑒪𑒰𑒯 𑒧𑒳𑒠𑒰 𑒠𑒳𑓁𑒐𑒲 𑒢𑒯𑒱। 𑒧𑒼𑒢𑒏 𑒑𑒣 𑒏𑒱𑒨𑒼 𑒥𑒳𑒗𑒋 𑒢𑒯𑒱 𑒞𑒹𑒿 𑒧𑒳𑒿𑒯 𑒪𑒙𑒏𑒹𑒢𑒹 𑒚𑒰𑒜𑓃 𑒩𑒯𑒟𑒱। 𑒍 𑒞𑒿 𑒧𑒰𑒞𑓂𑒩 𑒮𑒼𑒔𑒢𑒹 𑒩𑒯𑒟𑒱 𑒖𑒹 𑒏𑒰𑒪𑓂𑒯𑒱𑒮𑒿 𑒋𑒏𑒩𑒰 𑒮𑓀𑒑𑒹 𑒮𑓂𑒏𑒴𑒪 𑒢𑒯𑒱 𑒖𑒋𑒞𑒰𑒯, 𑒖𑒋𑒞 𑒄 𑒁𑒮𑒑𑒩𑒹। 𑒧𑒳𑒠𑒰 𑒍 𑒞𑒿 𑒁𑒮𑒑𑒩𑒹 𑒢𑒯𑒱 𑒖𑒋𑒞 𑒮𑒹 𑒮𑒞𑓂𑒨 𑒏𑒋 𑒠𑒹𑒐𑒰 𑒠𑒹𑒪𑒏। 𑒁𑒩𑒳𑒝𑒱𑒏 𑒧𑒰𑒋𑒏 𑒂𑒿𑒐𑒱𑒧𑒹 𑒢𑒼𑒩 𑒕𑒪𑒢𑓂𑒯𑒱 𑒧𑒳𑒠𑒰 𑒁𑒩𑒳𑒝𑒱𑒏 𑒦𑒲𑒞𑒩 𑒣𑓂𑒩𑒮𑒢𑓂𑒢𑒞𑒰, 𑒏𑒱𑒋𑒏 𑒞𑒿 𑒯𑒳𑒢𑒏𑒩 𑒣𑒱𑒞𑒰𑒖𑒲𑒏 𑒧𑒵𑒞𑓂𑒨𑒳 𑒖𑒹 𑒙𑒩𑒱 𑒑𑒹𑒪 𑒕𑒪𑒢𑓂𑒯𑒱।
𑒠𑒼𑒮𑒩 𑒏𑒱𑒩𑒰𑒨𑒰𑒏 𑒒𑒩 𑒞𑒏𑒪𑒰𑒏 𑒥𑒰𑒠 𑒠𑒳𑒢𑒴 𑒦𑒰𑒿𑒋 𑒮𑒦𑒙𑒰 𑒮𑒧𑒰𑒢 𑒢𑒫𑒏𑒰 𑒒𑒩𑒧𑒹 𑒩𑒰𑒐𑒱 𑒧𑒰𑒿𑒏𑒹𑒿 𑒑𑒰𑒧𑒮𑒿 𑒂𑒢𑒱 𑒪𑒹𑒪𑒢𑓂𑒯𑒱।
𑒂𑒩𑒳𑒝𑒱 𑒁𑒣𑒢 𑒢𑒼𑒏𑒩𑒲 𑒣𑒩 𑒔𑒪𑒱 𑒑𑒹𑒪𑒰𑒯।
“𑒢𑒯𑒱 𑒋𑒯𑒢 𑒏𑒼𑒢𑒼 𑒥𑒰𑒞 𑒢𑒯𑒱 𑒁𑒕𑒱”, 𑒄 𑒞𑒿 𑒯𑒧𑒩 𑒮𑒦𑒏 𑒏𑒰𑒩𑓂𑒨𑒏 𑒁𑓀𑒞𑒩𑓂𑒑𑒞 𑒏𑒩𑒃𑒋 𑒣𑒛𑓃𑒻𑒞 𑒕𑒻𑒏”।
“𑒧𑒳𑒠𑒰 𑒁𑒯𑒰𑒿𑒏𑒹𑒿 𑒄 𑒢𑒯𑒱 𑒥𑒳𑒗𑒱 𑒣𑒛𑓃𑒻𑒞 𑒁𑒕𑒱 𑒖𑒹 𑒋𑒯𑒱 𑒥𑒹𑒩 𑒏𑒱𑒕𑒳 𑒥𑒹𑒬𑒲 𑒏𑓂𑒩𑒴𑒩 𑒦𑓄 𑒑𑒹𑒪𑒯𑒳𑒿 𑒁𑒯𑒰𑒿 𑒮𑒦?”
“𑒏𑓂𑒩𑒴𑒩𑒞𑒰𑒏 𑒞𑒿 𑒏𑒼𑒢𑒼 𑒥𑒰𑒞 𑒢𑒯𑒱 𑒁𑒕𑒱। 𑒯𑒧𑒩𑒰 𑒮𑒦 𑒞𑒿 𑒏𑒼𑒢𑒼 𑒫𑒱𑒬𑒹𑒭 𑒮𑒴𑒔𑒢𑒰𑒏 𑒂𑒡𑒰𑒩 𑒣𑒩 𑒏𑒰𑒩𑓂𑒨 𑒏𑒩𑒻𑒞 𑒕𑒲”।
“𑒧𑒰𑒢𑒱 𑒪𑒱𑒁 𑒖𑒹 𑒯𑒧𑒩𑒰 𑒏𑒏𑒩𑒼𑒮𑒿 𑒠𑒳𑒬𑓂𑒧𑒢𑒲 𑒁𑒕𑒱 𑒂 𑒍𑒯𑒱 𑒂𑒡𑒰𑒩 𑒣𑒩 𑒫𑒱𑒦𑒰𑒑𑒏𑒹𑒿 𑒍 𑒁𑒣𑒢 𑒫𑓂𑒨𑒏𑓂𑒞𑓂𑒞𑒱𑒑𑒞 𑒮𑓂𑒫𑒰𑒩𑓂𑒟 𑒂 𑒗𑒑𑒛𑓃𑒰𑒏 𑒯𑒹𑒞𑒳 𑒣𑓂𑒩𑒨𑒼𑒑 𑒏𑒋 𑒮𑒏𑒻𑒞 𑒁𑒕𑒱”।
“𑒁𑒯𑒰𑒿𑒏𑒹𑒿 𑒏𑒏𑒩𑒼𑒣𑒩 𑒬𑓀𑒏𑒰 𑒁𑒕𑒱?”
“𑒢𑒯𑒱 𑒯𑒧 𑒞𑒿 𑒅𑒠𑒰𑒯𑒩𑒝 𑒠𑒋 𑒩𑒯𑒪 𑒕𑒪𑒯𑒳𑒿”।
“𑒢𑒯𑒱 𑒯𑒧𑒩𑒰 𑒮𑒦 𑒏𑒼𑒢𑒼 𑒮𑒴𑒔𑒢𑒰𑒏 𑒂𑒡𑒰𑒩 𑒣𑒩 𑒮𑒼𑒗𑒹 𑒥𑒱𑒠𑒰 𑒢𑒯𑒱 𑒯𑒼𑒃𑒞 𑒕𑒲। 𑒣𑒯𑒱𑒢𑒹 𑒍𑒏𑒩 𑒑𑓀𑒫𑒹𑒭𑒝𑒰 𑒏𑒩𑒻𑒞 𑒕𑒲 𑒂 𑒞𑒏𑒩𑒹 𑒥𑒰𑒠 𑒋𑒞𑒹𑒏 𑒚𑒰𑒧 𑒮𑒩𑓂𑒔 𑒏𑒩𑒥𑒰𑒏 𑒁𑒢𑒳𑒧𑒞𑒱 𑒦𑒹𑒙𑒻𑒞 𑒁𑒕𑒱”।
“𑒧𑒳𑒠𑒰 𑒂𑒥 𑒁𑒯𑒰𑒿 𑒄 𑒏𑒯𑒱𑒨𑒼 𑒠𑒹𑒥 𑒖𑒹 𑒁𑒯𑒰𑒿𑒏 𑒏𑒼𑒢𑒼 𑒑𑒪𑒞𑒲 𑒢𑒯𑒱 𑒁𑒕𑒱 𑒞𑒿 𑒏𑒲 𑒯𑒧𑒩 𑒃𑒖𑓂𑒖𑒞 𑒪𑒾𑒙𑒱 𑒏𑒋 𑒁𑒋𑒞”।
“𑒋𑒢𑒰 𑒞𑒿 𑒯𑒧𑒩𑒰 𑒮𑒦𑒏𑒹𑒿 𑒯𑒰𑒟-𑒣𑒩 𑒯𑒰𑒟 𑒠𑒋 𑒥𑒻𑒮𑒱 𑒖𑒰𑒋 𑒣𑒛𑓃𑒞। 𑒧𑒳𑒠𑒰 𑒁𑒯𑒴𑒿𑒏 𑒑𑒣 𑒚𑒲𑒏 𑒁𑒕𑒱। 𑒁𑒯𑒰𑒿𑒏 𑒣𑓂𑒩𑒞𑒱 𑒖𑓂𑒨𑒼𑒿 𑒠𑓂𑒫𑒹𑒭𑒫𑒬 𑒏𑓂𑒨𑒼 𑒏𑒰𑒩𑓂𑒨 𑒏𑒋𑒢𑒹 𑒯𑒼𑒋𑒞 𑒞𑒿 𑒍𑒏𑒩𑒰 𑒣𑒩 𑒏𑒰𑒩𑓂𑒨𑒫𑒰𑒯𑒲 𑒏𑒋𑒪 𑒖𑒋𑒞।”
“𑒏𑒲 𑒏𑒰𑒩𑓂𑒨𑒫𑒰𑒯𑒲 𑒯𑒼𑒋𑒞। 𑒯𑒧𑒩𑒰 𑒣𑒩 𑒞𑒿 𑒏𑒰𑒩𑓂𑒨𑒫𑒰𑒯𑒲 𑒦𑓄 𑒑𑒹𑒪। 𑒯𑒧𑒩 𑒮𑒦𑒙𑒰 𑒥𑒰𑒨𑒩 𑒙𑒴𑒙𑒱 𑒖𑒋𑒞। 𑒯𑒧 𑒮𑒦 𑒋𑒞𑒹𑒏 𑒣𑒳𑒩𑒰𑒢 𑒕𑒲, 𑒞𑒲𑒢 𑒣𑒳𑒮𑓂𑒞𑒮𑒿 𑒋𑒯𑒱 𑒏𑒰𑒩𑓂𑒨𑒧𑒹 𑒪𑒰𑒑𑒪 𑒕𑒲। 𑒏𑒩𑒥𑒼 𑒏𑒩𑒥 𑒞𑒿 𑒏𑓂𑒪𑒹𑓀𑒛𑒹𑒮𑓂𑒙𑒰𑒃𑒢 𑒩𑒱𑒧𑒴𑒫𑒪 𑒏𑒩𑒥 ? 𑒮𑒦 𑒥𑒰𑒨𑒩𑒣𑒩 𑒞𑒿 𑒩𑒹𑒛 𑒦𑓄 𑒑𑒹𑒪, 𑒏𑒱𑒕𑒳 𑒏𑒞𑒯𑒳 𑒢𑒯𑒱 𑒦𑒹𑒙𑒪 𑒮𑒹 𑒏𑒹 𑒣𑒞𑒱𑒨𑒰𑒨𑒞 ?”
𑒍𑒏𑒩 𑒥𑒰𑒞𑒼 𑒚𑒲𑒏 𑒕𑒪𑒻𑒏। 𑒄 𑒣𑓂𑒪𑒰𑒃𑒫𑒳𑒛𑒏 𑒫𑓂𑒨𑒰𑒣𑒰𑒩𑒲 𑒋𑒏 𑒢𑓀𑒥𑒩𑒏 𑒏𑒰𑒖𑒏 𑒯𑒹𑒞𑒳 𑒖𑒰𑒢𑒪 𑒖𑒰𑒃𑒞 𑒕𑒪 𑒧𑒳𑒠𑒰 𑒂𑒩𑒳𑒝𑒱𑒏𑒹𑒿 𑒖𑒹 𑒮𑒴𑒔𑒢𑒰 𑒣𑓂𑒩𑒰𑒣𑓂𑒞 𑒦𑒹𑒪 𑒕𑒪𑒢𑓂𑒯𑒱 𑒮𑒹 𑒍𑒏𑒩 𑒫𑒱𑒣𑒩𑒲𑒞 𑒕𑒪। 𑒧𑒳𑒠𑒰 𑒄 𑒩𑒹𑒛 𑒞𑒿 𑒐𑒰𑒪𑒲 𑒑𑒹𑒪। 𑒤𑒻𑒏𑓂𑒙𑒩𑒲, 𑒒𑒩, 𑒛𑒲𑒪𑒩 𑒮𑒦 𑒚𑒰𑒧𑒮𑒿 𑒙𑒲𑒧 𑒐𑒰𑒪𑒲 𑒯𑒰𑒟 𑒂𑒋𑒪। 𑒧𑒳𑒠𑒰 𑒂𑒥 𑒂𑒤𑒱𑒮𑒩𑒏𑒹𑒿 𑒏𑒲 𑒖𑒫𑒰𑒥 𑒠𑒹𑒞𑒰𑒯। 𑒢𑒰𑒧𑒲 𑒏𑓀𑒣𑒢𑒲 𑒕𑒪, 𑒁𑒡𑒱𑒏𑒰𑒩𑒲𑒑𑒝 𑒛𑒩𑒰 𑒏𑓄 𑒩𑒹𑒛𑒏 𑒁𑒢𑒳𑒧𑒞𑒱 𑒂𑒩𑒳𑒝𑒱𑒏 𑒫𑓂𑒨𑒏𑓂𑒞𑓂𑒞𑒱𑒑𑒞 𑒣𑓂𑒩𑒞𑒱𑒭𑓂𑒚𑒰𑒏𑒹𑒿 𑒠𑒹𑒐𑒻𑒞 𑒠𑒹𑒢𑒹 𑒕𑒪𑒰𑒯। 𑒯𑒹𑒛𑒏𑓂𑒫𑒰𑒩𑓂𑒙𑒩𑒮𑒿 𑒤𑒼𑒢𑒣𑒩 𑒤𑒼𑒢 𑒂𑒩𑒳𑒝𑒱𑒏𑒹𑒿 𑒂𑒥𑒱 𑒩𑒯𑒪 𑒕𑒪𑒢𑓂𑒯𑒱, 𑒦𑒼𑒩 𑒞𑒿 𑒩𑒹𑒛𑒧𑒹 𑒦𑒃𑒨𑒹 𑒑𑒹𑒪 𑒕𑒪, 𑒠𑒮 𑒥𑒖𑒹 𑒂𑒤𑒱𑒮𑒧𑒹 𑒩𑒱𑒣𑒼𑒩𑓂𑒙 𑒠𑒹𑒥𑒰𑒏 𑒯𑒹𑒞𑒳 𑒏𑒯𑒪 𑒑𑒹𑒪 𑒕𑒪𑒢𑓂𑒯𑒱। 𑒤𑒻𑒏𑓂𑒙𑒩𑒲𑒏 𑒧𑒰𑒪𑒱𑒏 𑒮𑒹𑒯𑒼 𑒋𑒧𑓂𑒯𑒩-𑒍𑒧𑓂𑒯𑒩𑒏 𑒥𑒰𑒞 𑒪𑓄 𑒏𑓄 𑒠𑒮 𑒥𑒰𑒞 𑒮𑒳𑒢𑒰 𑒠𑒹𑒪𑒏𑒢𑓂𑒯𑒱। 𑒮𑓂𑒫𑒩𑓂𑒝𑒣𑓂𑒪𑒰𑒃 𑒢𑒰𑒧𑓂𑒢𑒰 𑒄 𑒏𑓀𑒣𑒢𑒲𑒏 𑒠𑒱𑒪𑓂𑒪𑒲 𑒡𑒩𑒱 𑒣𑒯𑒳𑒿𑒔𑒱 𑒕𑒪𑒻𑒏। 𑒁𑒏𑒔𑓂𑒕 𑒦𑓄 𑒏𑓄 𑒂𑒩𑒳𑒝𑒱 𑒦𑒼𑒩𑒧𑒹 𑒛𑒹𑒩𑒰 𑒣𑒯𑒳𑒿𑒔𑒱 𑒧𑒼𑒥𑒰𑒃𑒪 𑒂𑒤 𑒏𑓄 𑒏𑒋 𑓙 𑒥𑒖𑒹𑒏 𑒁𑒪𑒰𑒩𑓂𑒧 𑒪𑒑𑒰 𑒏𑓄 𑒮𑒳𑒞𑒥𑒰𑒏 𑒣𑓂𑒩𑒨𑒰𑒮 𑒏𑒩𑒋 𑒪𑒑𑒪𑒰𑒯। 𑒏𑒰𑒪𑓂𑒯𑒱 𑒦𑒼𑒩𑒹𑒮𑒿 𑒩𑒹𑒛 𑒔𑒪𑒱 𑒩𑒯𑒪 𑒕𑒪, 𑒄 𑒏𑒼𑒢𑒰 𑒦𑒹𑒪, 𑒏𑒼𑒢𑒼 𑒏𑓂𑒪𑒹𑓀𑒛𑒹𑒮𑓂𑒙𑒰𑒃𑒢 𑒩𑒱𑒧𑒴𑒫𑒪𑒏 𑒏𑒔𑓂𑒔𑒰 𑒣𑒩𑓂𑒔𑒲 𑒏𑒱𑒋𑒏 𑒢𑒯𑒱 𑒦𑒹𑒙𑒪। 𑒏𑒹𑒮 𑒪𑒲𑒏 𑒞𑒿 𑒢𑒯𑒱 𑒦𑓄 𑒑𑒹𑒪। 𑒧𑒳𑒠𑒰 𑒏𑒹𑒮𑒏 𑒫𑒱𑒭𑒨𑒧𑒹 𑒂𑒩𑒳𑒝𑒱𑒏𑒏 𑒁𑒞𑒱𑒩𑒱𑒏𑓂𑒞𑓂𑒞 𑒛𑒰𑒨𑒩𑒹𑒏𑓂𑒙𑒩 𑒫𑒱𑒖𑒲𑒪𑒹𑓀𑒮𑒏𑒹𑒿 𑒧𑒰𑒞𑓂𑒩 𑒥𑒳𑒗𑒪 𑒕𑒪𑒢𑓂𑒯𑒱। 𑒄 𑒮𑒦 𑒥𑒱𑒕𑒾𑒢 𑒣𑒩 𑒮𑒼𑒔𑒱𑒞𑒹 𑒩𑒯𑒟𑒱, 𑒞𑒰𑒫𑒞 𑒢𑒱𑒢𑓂𑒠 𑒞𑒿 𑒢𑒯𑒱 𑒪𑒑𑒪𑒢𑓂𑒯𑒱 𑒧𑒳𑒠𑒰 𑓙 𑒥𑒖𑒹𑒏 𑒁𑒪𑒰𑒩𑓂𑒧 𑒥𑒰𑒖𑒱 𑒅𑒚𑒪।
𑒂𑒤𑒱𑒮𑒧𑒹 𑒮𑒦 𑒏𑓂𑒨𑒼 𑒖𑒹𑒢𑒰 𑒯𑒱𑒢𑒏𑒹 𑒥𑒰𑒙 𑒞𑒰𑒏𑒱 𑒩𑒯𑒪 𑒕𑒪𑒰𑒯। 𑒏𑒞𑒹𑒏 𑒑𑒼𑒙𑒹 𑒄𑒯𑒼 𑒮𑒳𑒢𑒰 𑒠𑒹𑒪𑒏𑒢𑓂𑒯𑒱, 𑒖𑒹 𑒋𑒯𑒱 𑒏𑒹𑒮𑒏 𑒃𑓀𑒙𑒹𑒪𑒱𑒖𑒹𑓀𑒮 𑒯𑒳𑒢𑒏𑒼 𑒮𑒦𑒏 𑒪𑒑 𑒕𑒪𑒢𑓂𑒯𑒱 𑒧𑒳𑒠𑒰 𑒋𑒯𑒱 𑒞𑒩𑒯𑒏 𑒏𑒹𑒮𑒧𑒹 𑒏𑓂𑒪𑒹𑓀𑒛𑒹𑒮𑒙𑒰𑒃𑒢 𑒩𑒱𑒧𑒴𑒫𑒪𑒏𑒹𑒿 𑒮𑒱𑒠𑓂𑒡 𑒏𑒹𑒢𑒰𑒃 𑒧𑒳𑒬𑓂𑒏𑒱𑒪 𑒯𑒼𑒃𑒞 𑒕𑒻𑒏, 𑒞𑒰𑒯𑒱 𑒯𑒹𑒞𑒳 𑒍 𑒪𑒼𑒏𑒢𑒱 𑒋𑒯𑒱𑒧𑒹 𑒯𑒰𑒟 𑒢𑒯𑒱 𑒠𑒹𑒪𑒢𑓂𑒯𑒱। 𑒏𑒰𑒢𑒰𑒤𑒴𑒮𑒲 𑒯𑒼𑒧𑒋 𑒪𑒰𑒑𑒪 𑒖𑒹 𑒥𑒛𑓂𑒛 𑒯𑒲𑒩𑒼 𑒥𑒢𑒻𑒞 𑒕𑒪𑒰𑒯 𑒂𑒥 𑒙𑓂𑒩𑒰𑓀𑒮𑒤𑒩 𑒂𑒩𑓂𑒛𑒩 𑒪𑓄 𑒏𑒋 𑒢𑒱𑒏𑒪𑒞𑒰𑒯 𑒛𑒰𑒨𑒩𑒹𑒏𑓂𑒙𑒩𑒏 𑒂𑒤𑒱𑒮𑒮𑒿।
𑒂𑒩𑒳𑒝𑒱 𑒛𑒰𑒨𑒩𑒹𑒏𑓂𑒙𑒩𑒏 𑒂𑒤𑒱𑒮𑒧𑒹 𑒑𑒹𑒪𑒰𑒯 𑒂 𑒮𑒼𑒗𑒹 𑒏𑒱𑒕𑒳 𑒠𑒱𑒢𑒏 𑒮𑒧𑒨 𑒧𑒰𑒿𑒑𑒱 𑒪𑒹𑒪𑒢𑓂𑒯𑒱। 𑒏𑒲 𑒣𑓂𑒪𑒰𑒢 𑒕𑒢𑓂𑒯𑒱, 𑒋𑒯𑒱 𑒫𑒱𑒭𑒨𑒧𑒹 𑒑𑒣-𑒬𑒣 𑒒𑒳𑒧𑒰 𑒠𑒹𑒪𑒟𑒱। 𑒋𑒯𑒱 𑒥𑒹𑒩 𑒏𑒼𑒢𑒼 𑒣𑓂𑒩𑒏𑒰𑒩𑒏 𑒏𑒼𑒢𑒼 𑒦𑓂𑒩𑒧 𑒢𑒯𑒱 𑒩𑒰𑒐𑒋 𑒔𑒰𑒯𑒻𑒞 𑒕𑒪𑒰𑒯।
𑒂𑒥 𑒂𑒩𑒳𑒝𑒱 𑒮𑓂𑒫𑒩𑓂𑒝 𑒣𑓂𑒪𑒰𑒃𑒏 𑒤𑒻𑒏𑓂𑒙𑒩𑒲𑒮𑒿 𑒂 𑒍𑒏𑒩 𑒛𑒲𑒪𑒩𑒮𑒿 𑒯𑒙𑒱 𑒏𑓄 𑒏𑒰𑒩𑓂𑒨 𑒏𑒩𑒋 𑒪𑒑𑒪𑒰𑒯। 𑒮𑒦𑒙𑒰 𑒠𑒮𑓂𑒞𑒰𑒫𑒹𑒖𑒏𑒹𑒿 𑒒𑒼𑒐𑒱 𑒑𑒹𑒪𑒰𑒯। 𑒏𑒱𑒕𑒳 𑒖𑒰𑒢𑒏𑒰𑒩𑒲 𑒏𑒰𑒑𑒖 𑒣𑒩 𑒮𑒹𑒯𑒼 𑒪𑒱𑒐𑒋 𑒪𑒑𑒪𑒰𑒯। 𑒤𑒹𑒩 𑒁𑒣𑒢 𑒣𑓂𑒪𑒰𑒢𑒏 𑒯𑒱𑒮𑒰𑒥𑒮𑒿 𑒏𑒪𑒏𑒞𑓂𑒞𑒰𑒮𑒿 𑒣𑒙𑒢𑒰 𑒂 𑒍𑒞𑒋𑒮𑒿 𑒁𑒩𑒩𑒱𑒨𑒰𑒏 𑒯𑒹𑒞𑒳 𑒥𑒱𑒠𑒰 𑒦𑓄 𑒑𑒹𑒪𑒰𑒯।
𑒣𑒰𑒢 𑒞𑒿 𑒐𑒰𑒃𑒞 𑒢𑒯𑒱 𑒩𑒯𑒟𑒱 𑒂 𑒔𑒰𑒯 𑒮𑒹𑒯𑒼 𑒒𑒩𑒹 𑒙𑒰 𑒧𑒹 𑒣𑒱𑒥𑒻𑒞 𑒩𑒯𑒟𑒱। 𑒧𑒳𑒠𑒰 𑒪𑒼𑒏𑒮𑒿 𑒏𑒱𑒕𑒳 𑒖𑒢𑒥𑒰𑒏 𑒯𑒼 𑒞𑒿 𑒥𑒱𑒢𑒰 𑒔𑒰𑒯 𑒂 𑒣𑒰𑒢𑒏 𑒠𑒼𑒏𑒰𑒢 𑒑𑒹𑒢𑒹 𑒏𑒼𑒢𑒰 𑒏𑒰𑒖 𑒔𑒪𑒞। 𑒮𑒹 𑒍 𑒔𑒰𑒯 𑒣𑒰𑒢 𑒬𑒳𑒩𑒴 𑒏𑒋𑒪𑒢𑓂𑒯𑒱। 𑒥𑒰𑒥𑒳𑒪 𑒠𑒰𑒠𑒰𑒏 𑒑𑒳𑒪𑒏𑒢𑓂𑒠 𑒥𑒪𑒰 𑒣𑒰𑒢 𑒢𑒲𑒏𑒼 𑒥𑒛𑓂𑒛 𑒪𑒰𑒑𑒢𑓂𑒯𑒱। 𑒞𑒏𑒩𑒰 𑒥𑒰𑒠 𑒥𑒰𑒥𑒳𑒪 𑒠𑒰𑒠𑒰 𑒁𑒩𑒩𑒱𑒨𑒰𑒏 𑒪𑒑 𑒣𑒰𑒮𑒏 𑒮𑒦𑒙𑒰 𑒣𑓂𑒪𑒰𑒃𑒫𑒳𑒛𑒏 𑒤𑒻𑒏𑓂𑒙𑒩𑒲𑒏 𑒪𑒱𑒮𑓂𑒙 𑒠𑓄 𑒠𑒹𑒪𑒏𑒢𑓂𑒯𑒱। 𑒧𑒳𑒠𑒰 𑒤𑒻𑒏𑓂𑒙𑓂𑒩𑒲 𑒮𑒦𑒏 𑒣𑒯𑒳𑒿𑒔𑒥𑒰𑒏 𑒩𑒼𑒛 𑒮𑒦𑒏 𑒦𑒑𑒫𑒰𑒢𑒹 𑒧𑒰𑒪𑒱𑒏 𑒩𑒯𑒟𑒱। 𑒡𑒴𑒪-𑒡𑒏𑓂𑒏𑒩𑒧𑒹 𑒏𑒯𑒳𑒢𑒰 𑒖𑒰 𑒏𑒋 𑒋𑒏𑒙𑒰 𑒤𑒻𑒏𑓂𑒙𑒩𑒲𑒏 𑒣𑒞𑒰 𑒔𑒪𑒪𑒢𑓂𑒯𑒱 𑒖𑒹 𑒮𑓂𑒫𑒩𑓂𑒝𑒣𑓂𑒪𑒰𑒃𑒏𑒹𑒿 𑒮𑒣𑓂𑒪𑒰𑒃 𑒠𑒻𑒞 𑒕𑒪, 𑒍𑒞𑒳𑒏𑓂𑒏𑒰 𑒠𑒩𑒥𑒰𑒢 𑒂𑒩𑒳𑒝𑒱𑒏𑒹𑒿 𑒏𑒯𑒪𑒏𑒢𑓂𑒯𑒱 𑒖𑒹 𑒧𑒰𑒪𑒱𑒏 𑒠𑒼𑒮𑒩 𑒤𑒻𑒏𑓂𑒙𑒩𑒲𑒧𑒹 𑒥𑒻𑒮𑒻𑒞 𑒕𑒟𑒱, 𑒮𑒹 𑒠𑒴 𑒙𑒰 𑒤𑒻𑒏𑓂𑒙𑓂𑒩𑒲𑒏 𑒣𑒞𑒰 𑒔𑒪𑒱 𑒑𑒹𑒪𑒢𑓂𑒯𑒱 𑒂𑒩𑒳𑒝𑒱𑒏𑒹𑒿।
𑒂𑒩𑒳𑒝𑒱 𑒟𑒰𑒏𑒪-𑒯𑒰𑒩𑒪 𑒍𑒯𑒱 𑒤𑒻𑒏𑓂𑒙𑒩𑒲𑒧𑒹 𑒣𑒯𑒳𑒿𑒔𑒪𑒰𑒯। 𑒋𑒏 𑒑𑒼𑒙 𑒧𑒰𑒩𑒫𑒰𑒛𑓃𑒲 𑒮𑒖𑓂𑒖𑒢 𑒥𑒻𑒮𑒪 𑒩𑒯𑒟𑒱।
“𑒏𑒞𑒋𑒮𑒿 𑒂𑒋𑒪 𑒕𑒲”।
“𑒂𑒋𑒪 𑒞𑒿 𑒣𑒙𑒢𑒰𑒮𑒿 𑒕𑒲 𑒧𑒳𑒠𑒰 𑒒𑒳𑒩𑒥 𑒏𑒼𑒢𑒰 𑒮𑒹 𑒢𑒯𑒱 𑒥𑒳𑒗𑒱 𑒣𑒛𑓃𑒻𑒞 𑒁𑒕𑒱”।
“𑒯𑒿, 𑒋𑒏 𑒑𑒼𑒙 𑒢𑒹𑒞𑒰𑒏 𑒖𑒹𑒪𑒮𑒿 𑒥𑒰𑒯𑒩 𑒑𑒼𑒪𑒲 𑒧𑒰𑒩𑒱 𑒏𑒋 𑒯𑒞𑓂𑒨𑒰 𑒏𑓄 𑒠𑒹𑒪 𑒑𑒹𑒪 𑒁𑒕𑒱। 𑒢𑒹𑒞𑒰𑒖𑒲 𑒩𑒯𑒟𑒱 𑒞𑒿 𑒖𑒹𑒪𑒧𑒹 𑒧𑒳𑒠𑒰 𑒒𑒳𑒧𑒋 𑒤𑒱𑒩𑒋 𑒣𑒴𑒩𑓂𑒝𑒱𑒨𑒰𑒿 𑒖𑒹𑒪𑒮𑒿 𑒥𑒰𑒯𑒩 𑒥𑒱𑒢𑒰 𑒢𑒱𑒁𑒧𑒏 𑒢𑒱𑒏𑒪𑒪 𑒩𑒯𑒟𑒱। 𑒖𑒹𑒪𑒩 𑒏𑒲 𑒏𑒩𑒞𑒰𑒯। 𑒣𑒱𑒕𑒪𑒰 𑒧𑒰𑒮 𑒋𑒏 𑒑𑒼𑒙 𑒏𑒻𑒠𑒲𑒏𑒹𑒿 𑒣𑒳𑒩𑒢𑒏𑒰 𑒖𑒹𑒪𑒩 𑒒𑒳𑒧𑒋 𑒯𑒹𑒞𑒳 𑒢𑒯𑒱 𑒠𑒹𑒢𑒹 𑒕𑒪𑒟𑒱𑒢𑓂𑒯 𑒞𑒿 𑒦𑒙𑓂𑒙𑒰 𑒥𑒖𑒰𑒩𑒧𑒹 𑒑𑒼𑒪𑒲 𑒧𑒰𑒩𑒱 𑒠𑒹𑒪𑒏𑒢𑓂𑒯𑒱। 𑒋𑒯𑒱 𑒥𑒹𑒩 𑒖𑒹 𑒒𑒳𑒧𑒋 𑒠𑒹𑒪𑒐𑒱𑒢𑓂𑒯 𑒞𑒿 𑒮𑒩𑒏𑒰𑒩 𑒮𑒮𑓂𑒣𑒹𑒢𑓂𑒛 𑒏𑓄 𑒠𑒹𑒪𑒏𑒢𑓂𑒯𑒱 𑒢𑒫𑒏𑒰 𑒖𑒹𑒪𑒩𑒏𑒹𑒿। 𑒞𑒰𑒯𑒱 𑒯𑒞𑓂𑒨𑒰𑒏 𑒥𑒰𑒠 𑒥𑒢𑓂𑒠𑒏 𑒂𑒯𑓂𑒫𑒰𑒢 𑒁𑒕𑒱। 𑒯𑒧𑒩𑒰 𑒮𑓀𑒑𑒹 𑒩𑒯𑒴। 𑒋𑒞𑒋 𑒯𑒧𑒯𑒴 𑒁𑒣𑒢 𑒑𑒹𑒮𑓂𑒙 𑒯𑒰𑒅𑒮𑒧𑒹 𑒩𑒯𑒻𑒞 𑒕𑒲। 𑒣𑒩𑒱𑒫𑒰𑒩 𑒮𑒱𑒪𑒲𑒑𑒳𑒛𑓃𑒲𑒧𑒹 𑒩𑒯𑒻𑒞 𑒁𑒕𑒱। 𑒫𑒱𑒫𑒰𑒯 𑒢𑒯𑒱 𑒦𑒹𑒪 𑒁𑒕𑒱। 𑒦𑒼𑒩𑒧𑒹 𑒯𑒧𑒩𑒰 𑒏𑒪𑒏𑒞𑓂𑒞𑒰 𑒖𑒋𑒥𑒰𑒏 𑒁𑒕𑒱। 𑒣𑒯𑒱𑒢𑒹 𑒮𑒱𑒪𑒱𑒑𑒳𑒛𑓃𑒲 𑒁𑒣𑒢 𑒑𑒰𑒛𑓃𑒲𑒮𑒿 𑒖𑒰𑒋𑒥 𑒞𑒿 𑒩𑒴𑒙 𑒥𑒠𑒪𑒱 𑒏𑓄 𑒣𑒴𑒩𑓂𑒝𑒱𑒨𑒰𑒿 𑒥𑒮 𑒮𑓂𑒙𑒻𑒝𑓂𑒛𑒧𑒹 𑒁𑒯𑒰𑒿𑒏𑒹𑒿 𑒕𑒼𑒛𑓃𑒻𑒞 𑒖𑒰𑒋𑒥”।
𑒨𑒳𑒫𑒰 𑒥𑒖𑒏𑓂𑒏𑒩 𑒩𑒯𑒟𑒱 𑒮𑒹 𑒂𑒩𑒳𑒝𑒱𑒏𑒹𑒿 𑒢𑒲𑒏 𑒪𑒑𑒪𑒢𑓂𑒯𑒱। 𑒩𑒰𑒞𑒱𑒧𑒹 𑒑𑒹𑒮𑓂𑒙 𑒯𑒰𑒅𑒮𑒧𑒹 𑒥𑒯𑒳𑒞 𑒑𑒣𑓂𑒣 𑒦𑒹𑒪𑒢𑓂𑒯𑒱। 𑒢𑒹𑒞𑒰𑒏 𑒩𑓀𑒑𑒠𑒰𑒩𑒲𑒏, 𑒔𑒢𑓂𑒠𑒰 𑒥𑒪𑒰 𑒮𑒦 𑒖𑒥𑒩𑓂𑒠𑒮𑓂𑒞𑒲 𑒩𑒮𑒲𑒠 𑒏𑒰𑒙𑒱 𑒖𑒰𑒃𑒞 𑒕𑒪𑒢𑓂𑒯𑒱।
“𑒋𑒢𑒰𑒧𑒹 𑒞𑒿 𑒥𑒱𑒢𑒰 𑒏𑓂𑒪𑒹𑒢𑒛𑒹𑒮𑓂𑒙𑒰𑒃𑒢 𑒏𑒋𑒢𑒹 𑒒𑒰𑒙𑒰 𑒦𑓄 𑒖𑒋𑒞, 𑒯𑒿 𑒧𑒖𑒥𑒴𑒩𑒲 𑒕𑒻𑒏। 𑒂 𑒞𑒏𑒩 𑒠𑒼𑒭𑒲 𑒞𑒿 𑒄 𑒢𑒹𑒞𑒰 𑒮𑒦 𑒕𑒟𑒱। 𑒫𑓂𑒨𑒰𑒣𑒰𑒩𑒲 𑒏𑒲 𑒏𑒩𑒍”।
𑒂𑒥 𑒧𑒰𑒩𑒫𑒰𑒛𑓃𑒲 𑒨𑒳𑒫𑒰 𑒖𑒏𑒩 𑒢𑒰𑒧 𑒢𑒫𑒪 𑒕𑒪 𑒏𑒢𑒹𑒏 𑒏𑒢𑒕𑒱𑒨𑒰 𑒏𑓄 𑒂𑒩𑒳𑒝𑒱 𑒠𑒱𑒬𑒱 𑒠𑒹𑒐𑒪𑒏। 𑒂𑒩𑒳𑒝𑒱𑒏𑒹𑒿 𑒦𑒹𑒪𑒢𑓂𑒯𑒱 𑒖𑒹 𑒍𑒏𑒩𑒰 𑒏𑒼𑒢𑒼 𑒬𑓀𑒏𑒰 𑒞𑒿 𑒢𑒯𑒱 𑒦𑒹𑒪𑒻𑒏।
“𑒢𑒯𑒱 𑒏𑓂𑒪𑒹𑓀𑒛𑒹𑒮𑓂𑒙𑒰𑒃𑒢 𑒢𑒯𑒱 𑒏𑒩𑒥𑒰𑒏 𑒞𑒿 𑒮𑒱𑒠𑓂𑒡𑒰𑓀𑒞 𑒁𑒕𑒱 𑒯𑒧𑒩𑒰 𑒮𑒦𑒏। 𑒯𑒿 𑒏𑒱𑒕𑒳 𑒋𑒛𑒖𑒹𑒮𑓂𑒙𑒧𑒹𑓀𑒙 𑒏𑒩𑒋 𑒣𑒛𑓃𑒻𑒞 𑒁𑒕𑒱”।
𑒂𑒩𑒳𑒝𑒱𑒏𑒹𑒿 𑒧𑒼𑒢 𑒣𑒛𑒪𑒢𑓂𑒯𑒱 𑒖𑒹 𑒏𑒼𑒢𑒰 𑒮𑓂𑒫𑒩𑓂𑒝 𑒣𑓂𑒪𑒰𑒃𑒏 𑒧𑒰𑒪𑒱𑒏𑒼 𑒥𑒖𑒻𑒞-𑒥𑒖𑒻𑒞 𑒥𑒰𑒖𑒱 𑒠𑒹𑒢𑒹 𑒕𑒪 𑒖𑒹 𑒏𑒩𑒥𑒼 𑒏𑒩𑒥 𑒞𑒿 𑒏𑓂𑒪𑒹𑒢𑒛𑒹𑒮𑓂𑒙𑒰𑒃𑒢 𑒩𑒱𑒧𑒴𑒫𑒪 𑒏𑒩𑒥।
𑒞𑒐𑒢 𑒏𑒩𑒻𑒞 𑒏𑒲 𑒖𑒰𑒃𑒞 𑒁𑒕𑒱 𑒄 𑒮𑒦। 𑒍𑒢𑒰 𑒁𑒩𑒩𑒱𑒨𑒰𑒏 𑒄 𑒤𑒻𑒏𑓂𑒙𑒩𑒲 𑒮𑓂𑒫𑒩𑓂𑒝 𑒣𑓂𑒪𑒰𑒃𑒏 𑒯𑒹𑒞𑒳 𑒖𑒰𑒥 𑒫𑒩𑓂𑒏 𑒏𑒩𑒻𑒞 𑒕𑒪, 𑒂 𑒞𑒰𑒯𑒱 𑒯𑒹𑒞𑒳 𑒮𑒩𑒏𑒰𑒩𑒲 𑒛𑓂𑒨𑒴𑒙𑒲𑒏 𑒮𑒦 𑒦𑒰𑒩 𑒮𑓂𑒫𑒩𑓂𑒝 𑒣𑓂𑒪𑒰𑒃 𑒣𑒩 𑒩𑒯𑒻𑒏। 𑒄 𑒏𑓂𑒪𑒹𑒢𑒛𑒹𑒮𑓂𑒙𑒰𑒃𑒢 𑒏𑒩𑒱𑒨𑒼 𑒏𑓄 𑒏𑒲 𑒏𑒩𑒞। 𑒙𑒻𑒏𑓂𑒮 𑒞𑒿 𑒠𑒼𑒮𑒩𑒰𑒏𑒹𑒿 𑒠𑒹𑒥𑒰𑒏 𑒕𑒻𑒏।
𑒞𑒐𑒢𑒹 𑒋𑒏𑒙𑒰 𑒤𑒼𑒢 𑒁𑒋𑒪𑒻𑒏। 𑒩𑒱𑓀𑒑 𑒢𑒧𑒑𑒩 𑒩𑒯𑒻𑒏 𑒮𑒹 𑒂𑒩𑒳𑒝𑒱𑒏𑒹𑒿 𑒥𑒳𑒗𑒥𑒰𑒧𑒹 𑒦𑒰𑓀𑒑𑒚 𑒢𑒯𑒱 𑒦𑒹𑒪𑒢𑓂𑒯𑒱 𑒖𑒹 𑒄 𑒥𑒰𑒯𑒩𑒏 𑒋𑒮.𑒙𑒲.𑒛𑒲.𑒏𑒰𑒪 𑒁𑒕𑒱। 𑒍𑒯𑒱 𑒏𑒰𑒪𑒏 𑒥𑒰𑒠 𑒋𑒏𑒰𑒋𑒏 𑒍 𑒨𑒳𑒫𑒰 𑒂𑒩𑒳𑒝𑒱 𑒠𑒱𑒬𑒱 𑒞𑒰𑒏𑒱 𑒏𑒋 𑒔𑒳𑒣𑓂𑒣𑒲 𑒪𑒑𑒰 𑒑𑒹𑒪।
𑒦𑒢𑒮𑒱𑒨𑒰 𑒖𑒏𑒩𑒰 𑒢𑒫𑒪𑒖𑒲 𑒗𑒰 𑒏𑒯𑒱 𑒮𑓀𑒥𑒼𑒡𑒱𑒞 𑒏𑓄 𑒩𑒯𑒪 𑒕𑒪𑒰𑒯, 𑒐𑒹𑒢𑒰𑒃 𑒥𑒢𑒱 𑒖𑒹𑒥𑒰𑒏 𑒮𑒴𑒔𑒢𑒰 𑒠𑒹𑒪𑒏𑒢𑓂𑒯𑒱। 𑒂𑒩𑒳𑒝𑒱 𑒂 𑒢𑒫𑒪𑒏 𑒥𑒲𑒔 𑒧𑒰𑒞𑓂𑒩 𑒎𑒣𑒔𑒰𑒩𑒱𑒏 𑒑𑒣 𑒦𑒹𑒪। 𑒤𑒹𑒩 𑒠𑒳𑒢𑒴 𑒑𑒼𑒙𑒹 𑒮𑒴𑒞𑒱 𑒑𑒹𑒪𑒰𑒯। 𑒦𑒼𑒩𑒧𑒹 𑒁𑒣𑒢 𑒫𑒔𑒢𑒏 𑒁𑒢𑒳𑒮𑒰𑒩 𑒍 𑒨𑒳𑒫𑒰 𑒂𑒩𑒳𑒝𑒱𑒏𑒹𑒿 𑒣𑒴𑒩𑓂𑒝𑒱𑒨𑒰𑒿 𑒥𑒮 𑒮𑓂𑒙𑒻𑒝𑓂𑒛 𑒕𑒼𑒛𑓃𑒱 𑒠𑒹𑒪𑒏𑒢𑓂𑒯𑒱। 𑒅𑒞𑒩𑒥𑒰𑒮𑒿 𑒣𑒯𑒱𑒢𑒹 𑒂𑒩𑒳𑒝𑒱 𑒢𑒫𑒪𑒮𑒿 𑒣𑒳𑒕𑒪𑒢𑓂𑒯𑒱।
“𑒏𑒪𑒏𑒞𑓂𑒞𑒰𑒧𑒹 𑒮𑓂𑒫𑒩𑓂𑒝 𑒣𑓂𑒪𑒰𑒃𑒏 𑒂𑒤𑒱𑒮 𑒕𑒻𑒏। 𑒍𑒞𑒯𑒱 𑒖𑒰 𑒩𑒯𑒪 𑒕𑒲 𑒏𑒲 ?”
𑒍 𑒨𑒳𑒫𑒰 𑒯𑒿𑒮𑒪।
“𑒁𑒯𑒰𑒿 𑒫𑒱𑒖𑒱𑒪𑒹𑓀𑒮𑒮𑒿 𑒕𑒲। 𑒯𑒧𑒩𑒰 𑒏𑒰𑒪𑓂𑒯𑒱 𑒖𑒹 𑒋𑒮.𑒙𑒲.𑒛𑒲. 𑒂𑒋𑒪 𑒕𑒪 𑒮𑒹 𑒮𑓂𑒫𑒩𑓂𑒝-𑒣𑓂𑒪𑒰𑒃𑒏 𑒏𑒪𑒏𑒞𑓂𑒞𑒰 𑒂𑒤𑒱𑒮𑒮𑒿 𑒂𑒋𑒪 𑒕𑒪। 𑒁𑒯𑒰𑒿𑒏 𑒫𑒱𑒦𑒰𑒑𑒹𑒏 𑒏𑓂𑒨𑒼 𑒑𑒼𑒙𑒹 𑒯𑒳𑒢𑒏𑒰 𑒮𑒦𑒏𑒹𑒿 𑒁𑒯𑒰𑒿𑒏 𑒁𑒩𑒩𑒱𑒨𑒰 𑒨𑒰𑒞𑓂𑒩𑒰𑒏 𑒫𑒱𑒭𑒨𑒧𑒹 𑒮𑒴𑒔𑒢𑒰 𑒠𑒹𑒪𑒐𑒱𑒢𑓂𑒯। 𑒠𑒹𑒐𑒴 𑒯𑒧 𑒏𑒯𑒢𑒹 𑒕𑒲 𑒖𑒹 𑒯𑒧 𑒧𑒰𑒞𑓂𑒩 𑒋𑒛𑒖𑒹𑒮𑓂𑒙𑒧𑒹𑓀𑒙 𑒏𑒩𑒻𑒞 𑒕𑒲। 𑒂 𑒞𑒰𑒯𑒱𑒮𑒿 𑒯𑒧𑒩𑒰 𑒏𑒼𑒢 𑒤𑒰𑒋𑒠𑒰 𑒯𑒼𑒃𑒞 𑒁𑒕𑒱? 𑒙𑒻𑒏𑓂𑒮 𑒞𑒿 𑒯𑒧𑒩𑒰 𑒪𑒑𑒻𑒞 𑒢𑒯𑒱 𑒁𑒕𑒱। 𑒯𑒿, 𑒞𑒰𑒯𑒱𑒮𑒿 𑒯𑒧𑒩𑒰 𑒏𑒰𑒖 𑒦𑒹𑒙𑒻𑒞 𑒁𑒕𑒱। 𑒂 𑒥𑒰𑒯𑒩𑒲 𑒕𑒼𑒙-𑒧𑒼𑒙 𑒐𑒩𑓂𑒔𑒰, 𑒫𑒱𑒦𑒰𑒑𑒏, 𑒣𑒳𑒪𑒱𑒮𑒏, 𑒢𑒹𑒞𑒰𑒏 𑒢𑒱𑒏𑒪𑒱 𑒖𑒰𑒃𑒞 𑒁𑒕𑒱। 𑒞𑒐𑒢 𑒥𑒹𑒬”।
𑒄 𑒏𑒯𑒱 𑒍 𑒮𑒖𑓂𑒖𑒢 𑒂𑒩𑒳𑒝𑒱𑒏𑒹𑒿 𑒯𑒞𑒣𑓂𑒩𑒦 𑒏𑒩𑒻𑒞 𑒔𑒪𑒱 𑒑𑒹𑒪𑒰𑒯।
𑒂𑒥 𑒏𑒪𑒏𑒞𑓂𑒞𑒰 𑒣𑒯𑒳𑒿𑒔𑒱 𑒏𑒋 𑒂𑒩𑒳𑒝𑒱 𑒖𑒐𑒢 𑒂𑒤𑒱𑒮 𑒣𑒯𑒳𑒿𑒔𑒪𑒰𑒯 𑒞𑒿 𑒮𑒦𑒏𑒹𑒿 𑒥𑒳𑒗𑒪 𑒩𑒯𑒻𑒏 𑒖𑒹 𑒂𑒩𑒳𑒝𑒱 𑒞𑒰𑒯𑒱 𑒤𑒻𑒏𑓂𑒙𑓂𑒩𑒲𑒏 𑒫𑒱𑒖𑒱𑒙 𑒮𑒩𑒏𑒰𑒩𑒲 𑒐𑒩𑓂𑒔𑒰 𑒣𑒩 𑒏𑒋𑒪𑒢𑓂𑒯𑒱 𑒁𑒕𑒱 𑒖𑒏𑒩𑒰 𑒣𑒩 𑒮𑒩𑒏𑒰𑒩 𑒙𑒻𑒏𑓂𑒮𑒏 𑒧𑒰𑒤𑒲 𑒠𑒹𑒢𑒹 𑒕𑒻𑒏।
𑒛𑒰𑒨𑒩𑒹𑒏𑓂𑒙𑒩𑒮𑒿 𑒦𑒹𑒿𑒙 𑒏𑒋𑒪𑒰𑒏 𑒥𑒰𑒠 𑒂𑒩𑒳𑒝𑒱 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒣𑒙𑒢𑒰 𑒂 𑒤𑒹𑒩𑒮𑒿 𑒏𑒪𑒏𑒞𑓂𑒞𑒰। 𑒣𑒳𑒪𑒱𑒮 𑒟𑒰𑒢𑒰𑒧𑒹 𑒒𑒳𑒧𑒻𑒞 𑒩𑒯𑒪𑒰𑒯 𑒂 𑒣𑒞𑒰 𑒏𑒩𑒻𑒞 𑒩𑒯𑒪𑒰𑒯 𑒖𑒹 𑒮𑓂𑒫𑒩𑓂𑒝-𑒣𑓂𑒪𑒰𑒃 𑒂𑒏𑒱 𑒍𑒏𑒩 𑒏𑒼𑒢𑒼 𑒏𑒩𑓂𑒧𑒔𑒰𑒩𑒲𑒏 𑒫𑒱𑒩𑒳𑒠𑓂𑒡 𑒏𑒼𑒢𑒼 𑒏𑒹𑒮 𑒕𑒻𑒏 𑒞𑒿 𑒢𑒯𑒱। 𑒧𑒳𑒠𑒰 𑒍𑒞𑒋 𑒞𑒿 𑒮𑓂𑒫𑒩𑓂𑒝 𑒣𑓂𑒪𑒰𑒃 𑒥𑒛𑓂𑒛 𑒢𑒲𑒏 𑒕𑒫𑒱 𑒬𑒳𑒩𑒳𑒋𑒮𑒿 𑒥𑒢𑒹𑒢𑒹 𑒕𑒪। 𑒂𑒥 𑒂𑒩𑒳𑒝𑒱 𑒮𑒼𑒔𑒧𑒹 𑒣𑒛𑓃𑒱 𑒑𑒹𑒪𑒰𑒯। 𑒃𑒢𑒣𑒳𑒙-𑒂𑒅𑒙𑒣𑒳𑒙 𑒏𑒹𑒩 𑒁𑒢𑒳𑒣𑒰𑒞𑒮𑒿 𑒄 𑒏𑓀𑒣𑒢𑒲 𑒏𑒩𑒼𑒛𑓃𑒼 𑒩𑒳𑒣𑒨𑒰𑒏 𑒙𑒻𑒏𑓂𑒮𑒏 𑒔𑒼𑒩𑒱 𑒏𑒋 𑒩𑒯𑒪 𑒁𑒕𑒱। 𑒧𑒳𑒠𑒰 𑒣𑓂𑒩𑒧𑒰𑒝 𑒏𑒼𑒢𑒼 𑒢𑒯𑒱।
𑒂𑒩𑒳𑒝𑒱 𑒟𑒰𑒢𑒰 𑒮𑒦𑒧𑒹 𑒁𑒣𑒢 𑒣𑒞𑒰 𑒂 𑒤𑒼𑒢 𑒢𑓀𑒥𑒩 𑒕𑒼𑒛𑓃𑒱 𑒠𑒹𑒪𑒢𑓂𑒯𑒱 𑒖𑒹 𑒖𑓂𑒨𑒼𑒿 𑒏𑒼𑒢𑒼 𑒏𑒹𑒮 𑒋𑒯𑒱 𑒏𑓀𑒣𑒢𑒲 𑒏𑒱𑓀𑒫𑒰 𑒋𑒏𑒩 𑒏𑒩𑓂𑒧𑒔𑒰𑒩𑒲𑒏 𑒮𑓀𑒥𑓀𑒡𑒧𑒹 𑒯𑒼𑒁𑒋 𑒞𑒿 𑒞𑒏𑒩 𑒮𑒴𑒔𑒢𑒰 𑒯𑒳𑒢𑒏𑒰 𑒠𑒹𑒪 𑒖𑒰𑒃𑒢𑓂𑒯।𑒁𑒣𑒢 𑒛𑒰𑒨𑒩𑒹𑒏𑓂𑒙𑒩𑒮𑒿 𑒏𑒯𑒪𑒐𑒱𑒢𑓂𑒯 𑒖𑒹 𑒏𑓂𑒪𑒼𑒖𑒩 𑒩𑒱𑒣𑒼𑒩𑓂𑒙 𑒁𑒐𑒢 𑒢𑒯𑒱 𑒠𑒹𑒥। 𑒠𑒹𑒐𑒻𑒞 𑒕𑒲 𑒏𑒱𑒕𑒳 𑒖𑒰𑒢𑒏𑒰𑒩𑒲 𑒏𑒞𑒯𑒳𑒮𑒿 𑒦𑒹𑒙𑒻𑒞 𑒁𑒕𑒱 𑒂𑒏𑒱 𑒢𑒯𑒱।
𑒕𑒯 𑒧𑒰𑒮𑒏 𑒥𑒰𑒠।
𑒦𑒼𑒩𑒧𑒹 𑒩𑒱𑓀𑒑 𑒦𑒹𑒪।
“𑒯𑒧 𑒏𑒪𑒏𑒞𑓂𑒞𑒰, 𑒮𑒰𑒪𑓂𑒙 𑒪𑒹𑒏 𑒟𑒰𑒢𑒰𑒮𑒿 𑒥𑒰𑒖𑒱 𑒩𑒯𑒪 𑒕𑒲। 𑒋𑒏 𑒑𑒼𑒙𑒹 𑒋𑒏𑒙𑒰 𑒏𑒧𑒣𑓂𑒪𑒹𑒢 𑒪𑒱𑒐𑒹𑒢𑒹 𑒕𑒟𑒱 𑒖𑒹 𑒮𑓂𑒫𑒩𑓂𑒝-𑒣𑓂𑒪𑒰𑒃 𑒂𑒤𑒱𑒮𑒮𑒿 𑒣𑒹𑒧𑒹𑒢𑓂𑒙 𑒪𑓄 𑒏𑓄 𑒒𑒳𑒩𑒻𑒞 𑒏𑒰𑒪 𑒯𑒳𑒢𑒏𑒩 𑒮𑒴𑒙𑒏𑒹𑒮 𑒂𑒙𑒼 𑒥𑒪𑒰 𑒕𑒲𑒢𑒱 𑒪𑒹𑒪𑒏𑒢𑓂𑒯𑒱 𑒖𑒰𑒯𑒱𑒧𑒹 𑒏𑒱𑒕𑒳 𑒏𑒻𑒬 𑒂 𑒔𑒹𑒏 𑒕𑒪𑒢𑓂𑒯𑒱”।
“𑒏𑒞𑒹𑒏 𑒏𑒻𑒮 𑒂 𑒏𑒞𑒹𑒏 𑒔𑒹𑒏”।
“𑓑.𑓗𑓙 𑒪𑒰𑒐 𑒏𑒻𑒮 𑒂 𑓑.𑓘𑓓 𑒪𑒰𑒐𑒏 𑒔𑒹𑒏, 𑒣𑓂𑒩𑒰𑒨𑓁 𑒏𑒻𑒮𑒏 𑒏𑒼𑒢𑒼 𑒃𑒢𑒮𑓂𑒨𑒼𑒩𑒹𑓀𑒮 𑒩𑒯𑒢𑓂𑒯𑒱, 𑒞𑒰𑒯𑒱 𑒠𑓂𑒫𑒰𑒩𑒹 𑒋𑒤.𑒂𑒃.𑒂𑒩. 𑒏𑒩𑒍𑒪𑒢𑓂𑒯𑒱 𑒁𑒕𑒱। 𑒔𑒹𑒏𑒏 𑒞𑒿 𑒣𑒹𑒧𑒹𑓀𑒙 𑒮𑓂𑒙𑒰𑒣 𑒦𑓄 𑒖𑒋𑒞”।
𑒂𑒩𑒳𑒝𑒱 𑒙𑒲𑒧𑒏 𑒮𑓀𑒑 𑒍𑒯𑒱 𑒑𑒼𑒙𑒹𑒏 𑒒𑒩 𑒣𑒩 𑒕𑒰𑒣𑒰 𑒧𑒰𑒩𑒪𑒢𑓂𑒯𑒱 𑒖𑒏𑒩 𑒣𑒰𑒃 𑒂 𑒏𑒻𑒮 𑒂𑒙𑒼 𑒥𑒪𑒰 𑒕𑒲𑒢𑒱 𑒪𑒹𑒢𑒹 𑒕𑒪।
𑒕𑒰𑒣𑒰𑒏 𑒥𑒲𑒔𑒧𑒹 𑒂𑒩𑒳𑒝𑒱𑒏𑒹𑒿 𑒋𑒏𑒙𑒰 𑒛𑒰𑒨𑒩𑒲 𑒦𑒹𑒙𑒪𑒢𑓂𑒯𑒱। 𑒞𑒏𑒩𑒰 𑒥𑒰𑒠 𑒣𑒙𑒢𑒰 𑒤𑒼𑒢 𑒏𑓄 𑒁𑒩𑒩𑒱𑒨𑒰𑒏 𑒤𑒻𑒏𑓂𑒙𑒩𑒲𑒮𑒿 𑒢𑒫𑒲𑒢𑒞𑒧 𑒩𑒱𑒧𑒴𑒫𑒪𑒏 𑒩𑒱𑒙𑒩𑓂𑒢 𑒧𑒿𑒑𑒰 𑒪𑒹𑒪𑒟𑒱। 𑒤𑒹𑒩 𑒍 𑒮𑒖𑓂𑒖𑒢 𑒖𑒱𑒢𑒏𑒰 𑒒𑒩𑒣𑒩 𑒕𑒰𑒣𑒰 𑒣𑒛𑓃𑒪 𑒕𑒪, 𑒏𑒹𑒿 𑒂𑒤𑒱𑒮 𑒁𑒢𑒪𑒢𑓂𑒯𑒱। 𑒩𑒮𑓂𑒞𑒰𑒧𑒹 𑒣𑒞𑒰 𑒔𑒪𑒪 𑒖𑒹 𑒍 𑒮𑒖𑓂𑒖𑒢 𑒢𑒫𑒪𑒏 𑒥𑒯𑒢𑒼𑒃 𑒕𑒪𑒰𑒯 𑒂 𑒁𑒩𑒩𑒱𑒨𑒰𑒏 𑒤𑒻𑒏𑓂𑒙𑒩𑒲𑒏 𑒋𑒏𑒰𑒅𑒢𑓂𑒙𑒹𑒢𑓂𑒙 𑒯𑒼𑒋𑒥𑒰𑒏 𑒮𑓀𑒑𑒯𑒱 𑒮𑓂𑒫𑒩𑓂𑒝-𑒣𑓂𑒪𑒰𑒃𑒧𑒹 𑒪𑒰𑒃𑒖𑒢 𑒁𑒡𑒱𑒏𑒰𑒩𑒲 𑒮𑒹𑒯𑒼 𑒕𑒪𑒰𑒯।
𑒂𑒥 𑒮𑒦 𑒞𑒟𑓂𑒨 𑒮𑒼𑒿𑒗𑒰 𑒕𑒪। 𑒖𑒹 𑒛𑒰𑒨𑒩𑒲 𑒦𑒹𑒙𑒪 𑒕𑒪 𑒞𑒰𑒯𑒱𑒧𑒹 𑒏𑒻𑒮 𑒂 𑒔𑒹𑒏𑒏 𑒏𑒰𑒪𑒧 𑒥𑒢𑒪 𑒕𑒪। 𑒞𑒱𑒟𑒱 𑒮𑒯𑒱𑒞 𑒫𑒱𑒫𑒩𑒝 𑒕𑒪। 𑒔𑒹𑒏𑒏 𑒦𑒳𑒑𑒞𑒰𑒢𑒏 𑒏𑒰𑒪𑒧 𑒁𑒩𑒩𑒱𑒨𑒰 𑒤𑒻𑒏𑓂𑒙𑒩𑒲𑒏 𑒏𑓂𑒪𑒱𑒨𑒩𑒹𑓀𑒮𑒮𑒿 𑒧𑒱𑒪𑒱 𑒑𑒹𑒪 𑒕𑒪 𑒂 𑒄𑒯𑒼 𑒮𑒱𑒠𑓂𑒡 𑒦𑓄 𑒑𑒹𑒪 𑒖𑒹 𑒮𑒦 𑒙𑓂𑒩𑒰𑓀𑒖𑒹𑒏𑓂𑒮𑒢𑒧𑒹 𑒪𑒑𑒦𑒑 𑒁𑒠𑒯𑒰𑒏 𑒣𑒹𑒧𑒹𑓀𑒙 𑒮𑓂𑒫𑒩𑓂𑒝-𑒣𑓂𑒪𑒰𑒃 𑒠𑓂𑒫𑒰𑒩𑒰 𑒏𑒻𑒮𑒧𑒹 𑒠𑒹𑒪 𑒖𑒰𑒃𑒞 𑒕𑒪। 𑒂 𑒞𑒏𑒩 𑒫𑒱𑒫𑒩𑒝 𑒢𑒯𑒱 𑒞𑒿 𑒮𑓂𑒫𑒩𑓂𑒝-𑒣𑓂𑒪𑒰𑒃𑒏 𑒐𑒰𑒞𑒰𑒧𑒹 𑒩𑒯𑒻𑒞 𑒕𑒪 𑒂 𑒢𑒯𑒱𑒨𑒹 𑒁𑒩𑒩𑒱𑒨𑒰𑒏 𑒤𑒻𑒏𑓂𑒙𑒩𑒲𑒧𑒹। 𑒮𑓂𑒫𑒩𑓂𑒝𑒣𑓂𑒪𑒰𑒃 𑒙𑒻𑒏𑓂𑒮 𑒮𑒹𑒯𑒼 𑒧𑒰𑒞𑓂𑒩 𑒔𑒹𑒏 (𑒣𑒏𑒱𑒨𑒰) 𑒠𑓂𑒫𑒰𑒩𑒰 𑒑𑒹𑒪 𑒁𑒠𑒯𑒰 𑒩𑒱𑒧𑒴𑒫𑒪𑒏 𑒣𑒹𑒧𑒹𑓀𑒙 𑒣𑒩 𑒠𑒻𑒞 𑒕𑒪। 𑒂𑒩𑒳𑒝𑒱 𑒄 𑒩𑒱𑒣𑒼𑒩𑓂𑒙 𑒛𑒰𑒨𑒩𑒹𑒏𑓂𑒙𑒩 𑒏𑒹𑒿 𑒠𑓄 𑒠𑒹𑒪𑒢𑓂𑒯𑒱।
𑒋𑒏𑒰𑒅𑒢𑓂𑒙𑒹𑒢𑓂𑒙𑒏 𑒁𑒣𑒩𑒰𑒡 𑒥𑒹𑒪𑒹𑒥𑒪 𑒕𑒪𑒻𑒏। 𑒏𑒼𑒩𑓂𑒙 𑒍𑒏𑒩𑒰 𑒥𑒹𑒪𑒣𑒩 𑒕𑒼𑒛𑓃𑒱 𑒠𑒹𑒪𑒏𑒻𑒏।
“𑒢𑒫𑒪𑒏 𑒮𑒧𑒰𑒔𑒰𑒩 𑒏𑒯𑒴। 𑒥𑒛𑓂𑒛 𑒢𑒲𑒏 𑒪𑒼𑒏 𑒁𑒕𑒱। 𑒧𑒳𑒠𑒰 𑒏𑒱𑒕𑒳 𑒥𑒞𑒹𑒪𑒏 𑒢𑒯𑒱”।
“𑒍𑒏𑒩 𑒏𑒰𑒪𑓂𑒯𑒱 𑒁𑒩𑒩𑒱𑒨𑒰𑒮𑒿 𑒮𑒱𑒪𑓂𑒪𑒲𑒑𑒳𑒛𑓃𑒲 𑒖𑒰𑒃𑒞 𑒏𑒰𑒪 𑒮𑒛𑓃𑒏 𑒠𑒳𑒩𑓂𑒒𑒙𑒢𑒰𑒧𑒹 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒻𑒏 𑒏𑒱𑓀𑒫𑒰 𑒏𑒩𑒰 𑒠𑒹𑒪 𑒑𑒹𑒪𑒻𑒏। 𑒖𑒧𑒰𑒨 𑒥𑒰𑒥𑒴𑒏 𑒮𑓀𑒑 𑒋𑒞𑒋𑒮𑒿 𑒮𑒼𑒗𑒹 𑒯𑒧𑒩𑒰 𑒮𑒦 𑒍𑒞𑒯𑒱 𑒖𑒰𑒋𑒥”। 𑒋𑒏 𑒑𑒼𑒙 𑒅𑒞𑓂𑒞𑒹𑒖𑒱𑒞 𑒮𑓂𑒫𑒩 𑒥𑒪𑒰 𑒫𑓂𑒨𑒏𑓂𑒞𑒱 𑒖𑒹 𑒋𑒏𑒰𑒅𑒢𑓂𑒙𑒹𑒢𑓂𑒙 𑒥𑒰𑒥𑒴𑒏𑒹𑒿 𑒪𑒹𑒥𑒰𑒏 𑒯𑒹𑒞𑒳 𑒂𑒋𑒪 𑒕𑒪 𑒥𑒰𑒖𑒱 𑒅𑒚𑒪 ।
“𑒧𑒳𑒠𑒰 𑒄 𑒥𑒴𑒗𑒱 𑒪𑒱𑒁 𑒖𑒹 𑒁𑒯𑒰𑒿𑒏 𑒄 𑒮𑒤𑒪𑒞𑒰 𑒯𑒧𑒩 𑒥𑒳𑒩𑒥𑒏𑒲𑒮𑒿 𑒦𑒹𑒙𑒪 𑒁𑒕𑒱। 𑒖𑓂𑒨𑒼𑒿 𑒯𑒧 𑒏𑒻𑒮𑒏 𑒃𑒢𑒮𑓂𑒨𑒼𑒩𑒹𑓀𑒮 𑒏𑓂𑒪𑒹𑒧𑒏 𑒪𑒰𑒪𑒔𑒧𑒹 𑒢𑒯𑒱 𑒣𑒛𑓃𑒱𑒞𑒯𑒳𑒿 𑒞𑒿 𑒄 𑒮𑒦 𑒢𑒯𑒱 𑒯𑒼𑒃𑒞”- 𑒖𑒧𑒰𑒨 𑒥𑒰𑒥𑒴 𑒥𑒰𑒖𑒱 𑒅𑒚𑒪𑒰𑒯।
𑒛𑒰𑒨𑒩𑒹𑒏𑓂𑒙𑒩 𑒮𑓂𑒫𑒩𑓂𑒝𑒣𑓂𑒪𑒰𑒃𑒏 𑒫𑒱𑒩𑒳𑒠𑓂𑒡 𑒏𑒰𑒩𑓂𑒨𑒫𑒰𑒯𑒲𑒏 𑒪𑒹𑒪 𑒂𑒩𑓂𑒛𑒩 𑒠𑒹𑒪𑒢𑓂𑒯𑒱। 𑒮𑓂𑒫𑒩𑓂𑒝 𑒣𑓂𑒪𑒰𑒃𑒏 𑒫𑒱𑒩𑒳𑒠𑓂𑒡 𑒏𑒩𑒼𑒛𑓃𑒼𑒏 𑒩𑒳𑒣𑒻𑒨𑒰𑒏 𑒙𑒻𑒏𑓂𑒮 𑒒𑒼𑒙𑒰𑒪𑒰𑒏 𑒬𑒼-𑒏𑒰𑒖 𑒢𑒼𑒙𑒱𑒮 𑒮𑒹𑒯𑒼 𑒣𑒚𑒰 𑒠𑒹𑒪 𑒑𑒹𑒪। 𑒂𑒩𑒳𑒝𑒱 𑒔𑒱𑓀𑒞𑒰𑒧𑒑𑓂𑒢 𑒕𑒪𑒰𑒯।
“𑒚𑒲𑒏𑒹 𑒞𑒿 𑒏𑒯𑒪𑒏 𑒢𑒫𑒪। 𑒋𑒛𑒖𑒹𑒮𑓂𑒙𑒧𑒹𑓀𑒙𑒹 𑒞𑒿 𑒏𑓄 𑒩𑒯𑒪 𑒕𑒪। 𑒔𑒼𑒩𑒱 𑒞𑒿 𑒏𑓂𑒨𑒼 𑒂𑒢 𑒏𑓄 𑒩𑒯𑒪 𑒕𑒪। 𑒍 𑒞𑒿 𑒧𑒰𑒞𑓂𑒩 𑒧𑒰𑒡𑓂𑒨𑒧 𑒕𑒪। 𑒯𑒧𑒯𑒴 𑒞𑒿 𑒏𑒞𑒯𑒳 𑒢𑒯𑒱 𑒥𑒢𑒱 𑒑𑒹𑒪 𑒕𑒲 𑒧𑒰𑒡𑓂𑒨𑒧, 𑒢𑒫𑒪𑒏 𑒧𑒵𑒞𑓂𑒨𑒳𑒏 ?”
𑒂𑒩𑒳𑒝𑒱𑒏 𑒫𑓂𑒨𑒫𑒮𑒰𑒨𑒱𑒏 𑒮𑒤𑒪𑒞𑒰𑒏 𑒥𑒰𑒠 𑒢𑒼𑒏𑒩𑒲 𑒧𑒡𑓂𑒨 𑒮𑒹𑒯𑒼 𑒮𑒤𑒪𑒞𑒰𑒏 𑒬𑒳𑒩𑒳𑒂𑒞 𑒦𑓄 𑒑𑒹𑒪। 𑒧𑒰𑒡𑓂𑒨𑒧 𑒥𑒢𑒟𑒱 𑒫𑒰 𑒢𑒯𑒱 𑒧𑒳𑒠𑒰 𑒣𑒱𑒞𑒰 𑒖𑒹𑒏𑒰𑒿 𑒯𑒰𑒩𑒞𑒰𑒯 𑒢𑒯𑒱। 𑒧𑒼𑒢 𑒣𑒛𑓃𑒻𑒞 𑒩𑒯𑒢𑓂𑒯𑒱 𑒯𑒳𑒢𑒏𑒰 𑒮𑒦𑒙𑒰 𑒑𑒣 𑒥𑒲𑒔-𑒥𑒲𑒔𑒧𑒹 ।
“𑒏𑒯𑒪𑒯𑒳𑒿 𑒮𑒳𑒢𑒻𑒞 𑒕𑒱𑒨𑒻𑒏। 𑒥𑒹𑒙𑒲 𑒣𑒻𑒒 𑒦𑓄 𑒩𑒯𑒪 𑒁𑒕𑒱। 𑒥𑒹𑒙𑒰 𑒮𑒦𑒏 𑒪𑒹𑒪 𑒏𑒱𑒕𑒳 𑒢𑒯𑒱 𑒏𑒋𑒪𑒯𑒳𑒿। 𑒁𑒣𑒢 𑒒𑒩𑒼 𑒢𑒯𑒱 𑒥𑒢𑒪। 𑒩𑒱𑒙𑒰𑒨𑒩 𑒦𑒹𑒪𑒰𑒏 𑒥𑒰𑒠 𑒏𑒞𑒋 𑒩𑒯𑒥 ?”
“𑒥𑒹𑒙𑒲𑒏 𑒔𑒱𑒢𑓂𑒞𑒰 𑒢𑒯𑒱 𑒏𑒩𑒴। 𑒥𑒹𑒙𑒰 𑒥𑒪𑒰 𑒁𑒣𑒢𑒹 𑒔𑒪𑒱 𑒏𑒋 𑒁𑒋𑒞। 𑒯𑒧𑒩𑒰 𑒮𑒦𑒏𑒹𑒿 𑒖𑒞𑒹𑒏 𑒮𑒳𑒫𑒱𑒡𑒰 𑒦𑒹𑒙𑒪 𑒕𑒪, 𑒞𑒰𑒯𑒱𑒮𑒿 𑒥𑒹𑒬𑒲 𑒮𑒳𑒫𑒱𑒡𑒰 𑒯𑒱𑒢𑒏𑒰 𑒮𑒦𑒏𑒹𑒿 𑒦𑒹𑒙𑒱 𑒩𑒯𑒪 𑒕𑒢𑓂𑒯𑒱। 𑒞𑒐𑒢 𑒣𑒜𑓃𑓂𑒟𑒳 𑒫𑒰 𑒢𑒯𑒱 𑒮𑒹 𑒄 𑒮𑒦 𑒖𑒰𑒢𑒟𑒱। 𑒩𑒱𑒙𑒰𑒨𑒩𑒧𑒹𑒢𑓂𑒙𑒏 𑒥𑒰𑒠 𑒑𑒰𑒧 𑒖𑒰 𑒏𑒋 𑒩𑒯𑒥। 𑒮𑒰𑒞 𑒖𑒢𑓂𑒧 𑒬𑒯𑒩 𑒠𑒱𑒬𑒱 𑒒𑒳𑒧𑒱 𑒏𑒋 𑒢𑒯𑒱 𑒂𑒋𑒥”।
“𑒏𑓂𑒨𑒼 𑒮𑒩-𑒏𑒳𑒙𑒳𑒧 𑒁𑒥𑒻𑒞 𑒕𑒟𑒱 𑒞𑒿 𑒯𑒳𑒢𑒏𑒰 𑒮𑒞𑓂𑒏𑒰𑒩 𑒏𑒩𑒥𑒰 𑒪𑒹𑒪 𑒒𑒩𑒧𑒹 𑒃𑓀𑒞𑒖𑒰𑒧𑒼 𑒢𑒯𑒱 𑒩𑒯𑒻𑒞 𑒁𑒕𑒱”।
“𑒃𑓀𑒞𑒖𑒰𑒧 𑒏𑒩𑒥𑒰𑒏 𑒏𑒲 𑒖𑒩𑒴𑒩𑒞𑒱 𑒁𑒕𑒱। 𑒋𑒏 𑒣𑒻𑒪𑒲 𑒥𑒹𑒬𑒲 𑒪𑒑𑒰 𑒠𑒱𑒨𑒾𑒏 𑒁𑒠𑒯𑒢𑒧𑒹”।
𑒂𑒩𑒳𑒝𑒱 𑒧𑒰𑒋-𑒥𑒰𑒣𑒏 𑒋𑒯𑒱 𑒞𑒩𑒯𑒏 𑒫𑒰𑒩𑓂𑒞𑓂𑒞𑒰𑒪𑒰𑒣 𑒮𑒳𑒢𑒱 𑒣𑒻𑒒 𑒦𑒹𑒪𑒟𑒱। 𑒋𑒏 𑒥𑒹𑒩 𑒯𑒰𑒮𑓂𑒣𑒲𑒙𑒪𑒧𑒹 𑒣𑒱𑒞𑒰𑒖𑒲𑒏𑒹𑒿 𑒠𑒹𑒐𑒋 𑒪𑒹𑒪 𑒋𑒏 𑒑𑒼𑒙 𑒏𑒳𑒙𑒳𑒧𑓂𑒥 𑒂𑒋𑒪 𑒩𑒯𑒟𑒱। 𑒯𑒳𑒢𑒏𑒩 𑒑𑒣 𑒮𑒹𑒯𑒼 𑒏𑒱𑒕𑒳 𑒋𑒯𑒢𑒹 𑒥𑒳𑒗𑒰 𑒣𑒛𑓃𑒪𑒢𑓂𑒯𑒱।
“𑒏𑒲 𑒏𑓄 𑒪𑒹𑒪𑒯𑒳𑒿 𑒬𑒩𑒲𑒩𑒏𑒹𑒿। 𑒄 𑒥𑒔𑓂𑒔𑒰 𑒮𑒦𑒏𑒹𑒿 𑒠𑒹𑒐𑒱 𑒏𑒋 𑒧𑒼𑒯𑒼 𑒢𑒯𑒱 𑒦𑒹𑒪। 𑒏𑒞𑒋 𑒣𑒜𑓃𑒻𑒞 𑒖𑒰𑒃𑒞 𑒄 𑒮𑒦। 𑒂 𑒏𑒼𑒢𑒼 𑒙𑒰 𑒮𑒳𑒫𑒱𑒡𑒰, 𑒢𑒯𑒱𑒨𑒹 𑒏𑒼𑒢𑒼 𑒙𑒰 𑒔𑒱𑒢𑓂𑒞𑒹 𑒕𑒪 𑒁𑒯𑒰𑒿𑒏𑒹𑒿। 𑒁𑒣𑒢𑒼 𑒂 𑒋𑒏𑒩𑒼 𑒮𑒦𑒏 𑒖𑒱𑒢𑒑𑒲 𑒥𑒩𑓂𑒥𑒰𑒠 𑒏𑒋𑒪𑒯𑒳𑒿।”
𑒞𑒐𑒢𑒹 𑒫𑓂𑒨𑒫𑒡𑒰𑒢 𑒦𑒹𑒪। 𑒣𑒞𑓂𑒢𑒲 𑒏𑒯𑒪𑒐𑒱𑒢𑓂𑒯 𑒖𑒹 𑒋𑒏𑒙𑒰 𑒤𑒼𑒢 𑒯𑒼𑒪𑓂𑒛 𑒁𑒕𑒱-
“𑒂𑒩𑒳𑒝𑒱। 𑒋𑒏𑒙𑒰 𑒣𑒻𑒒 𑒩𑒰𑒖𑒢𑒲𑒞𑒱 𑒔𑒪𑒱 𑒩𑒯𑒪 𑒁𑒕𑒱 𑒂𑒤𑒱𑒮𑒧𑒹। 𑒁𑒯𑒰𑒿𑒏 𑒫𑒱𑒩𑒳𑒠𑓂𑒡 𑒭𑒛𑓂𑒨𑓀𑒞𑓂𑒩 𑒔𑒪𑒱 𑒩𑒯𑒪 𑒁𑒕𑒱। 𑒁𑒯𑒰𑒿𑒏𑒹𑒿 𑒔𑒹𑒞𑒹𑒢𑒰𑒃 𑒯𑒧𑒩 𑒏𑒰𑒖 𑒕𑒪। 𑒧𑒳𑒠𑒰 𑒁𑒯𑒰𑒿 𑒞𑒿 𑒏𑒼𑒢𑒼 𑒞𑒩𑒯𑒏 𑒣𑓂𑒩𑒞𑒱𑒏𑓂𑒩𑒱𑒨𑒰 𑒠𑒻𑒞𑒹 𑒢𑒯𑒱 𑒕𑒲”- 𑒤𑒼𑒢 𑒣𑒩 𑒯𑒳𑒢𑒏𑒩 𑒫𑒻𑒯 𑒋𑒏𑒧𑒰𑒞𑓂𑒩 𑒮𑓀𑒑𑒲 𑒩𑒰𑒧𑒦𑒏𑓂𑒞-𑒯𑒢𑒳𑒧𑒰𑒢𑒏 𑒁𑒥𑒰𑒖 𑒮𑒳𑒢𑒱 𑒩𑒯𑒪 𑒕𑒪𑒰𑒯 𑒂𑒩𑒳𑒝𑒱।
“𑒂𑒩𑒳𑒝𑒱। 𑒏𑒲 𑒦𑓄 𑒑𑒹𑒪। 𑒥𑒰𑒥𑒴𑒖𑒲 𑒖𑒹𑒏𑒰𑒿 𑒛𑒩𑒰𑒋𑒪 𑒩𑒯𑒥। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒯𑒰𑒩𑒱 𑒧𑒰𑒢𑒱 𑒇𑒭𑒱 𑒦𑓄 𑒖𑒰𑒋𑒥। 𑒂𑒏𑒱 𑒠𑒳𑒭𑓂𑒙𑒏 𑒮𑓀𑒯𑒰𑒩 𑒏𑒩𑒥। 𑒋𑒯𑒱 𑒠𑒳𑒢𑒴𑒧𑒹 𑒏𑒲 𑒔𑒳𑒢𑒥 𑒁𑒯𑒰𑒿”।
“𑒔𑒱𑒢𑓂𑒞𑒰 𑒢𑒯𑒱 𑒏𑒩𑒴”- 𑒯𑒿𑒮𑒻𑒞 𑒥𑒖𑒪𑒰𑒯 𑒂𑒩𑒳𑒝𑒱 𑒤𑒼𑒢 𑒣𑒩 𑒂 𑒤𑒼𑒢 𑒩𑒰𑒐𑒱 𑒠𑒹𑒪𑒢𑓂𑒯𑒱।
𑒂𑒤𑒱𑒮𑒏 𑒋𑒏𑒙𑒰 𑒪𑒰𑒥𑒲 𑒂𑒩𑒳𑒝𑒱𑒏 𑒣𑒰𑒕𑒰𑒿 𑒣𑒛𑓃𑒱 𑒑𑒹𑒪 𑒕𑒪। 𑒙𑓂𑒩𑒰𑓀𑒮𑒤𑒩-𑒣𑒼𑒮𑓂𑒙𑒱𑓀𑒑 𑒏𑒹𑒩 𑒥𑒰𑒠 𑒂𑒩𑒳𑒝𑒱𑒏 𑒆𑒣𑒩 𑒠𑒫𑒰𑒥 𑒂𑒥𑒱 𑒑𑒹𑒪 𑒕𑒪। 𑒏𑒱𑒕𑒳 𑒑𑒼𑒙𑒹 𑒯𑒳𑒢𑒏𑒩 𑒫𑒱𑒩𑒳𑒠𑓂𑒡 𑒥𑒱𑒢𑒰-𑒏𑒼𑒢𑒼 𑒂𑒡𑒰𑒩𑒏 𑒏𑒱𑒕𑒳 𑒏𑒧𑓂𑒣𑓂𑒪𑒹𑒢 𑒏𑒋 𑒠𑒹𑒢𑒹 𑒕𑒪𑒢𑓂𑒯𑒱। 𑒋𑒏𑒙𑒰 𑒂𑒤𑒱𑒮𑒩 𑒬𑒬𑒰𑓀𑒏 𑒏𑒹𑒩 𑒯𑒰𑒟 𑒕𑒪𑒻𑒏 𑒋𑒯𑒱𑒧𑒹। 𑒍𑒏𑒩 𑒐𑒰𑒮-𑒐𑒰𑒮 𑒂𑒠𑒧𑒲𑒏 𑒣𑒼𑒮𑓂𑒙𑒱𑓀𑒑 𑒧𑒼𑒢-𑒧𑒳𑒞𑒰𑒥𑒱𑒏 𑒢𑒯𑒱 𑒦𑒹𑒪 𑒩𑒯𑒋 𑒂 𑒍 𑒣𑓂𑒩𑒼𑒧𑒼𑒬𑒢𑒧𑒹 𑒂𑒩𑒳𑒝𑒱𑒏𑒹𑒿 𑒣𑒰𑒕𑒰𑒿 𑒏𑒩𑒋 𑒔𑒰𑒯𑒻𑒞 𑒕𑒪। 𑒋𑒯𑒱 𑒥𑒲𑒔𑒧𑒹 𑒂𑒩𑒳𑒝𑒱𑒏 𑒤𑒼𑒢 𑒏𑒱𑒕𑒳 𑒠𑒱𑒢 𑒛𑒹𑒛 𑒕𑒪𑒢𑓂𑒯𑒱। 𑒞𑒏𑒩𑒰 𑒥𑒰𑒠 𑒯𑒳𑒢𑒏𑒩 𑒤𑒼𑒢𑒮𑒿 𑒁𑒥𑒳𑒡𑒰𑒥𑒲 𑒂 𑒠𑒳𑒥𑒃 𑒤𑒼𑒢 𑒏𑒋𑒪 𑒑𑒹𑒪 𑒕𑒪। 𑒧𑒳𑒠𑒰 𑒍𑒯𑒱 𑒮𑒧𑒨𑒧𑒹 𑒮𑒩𑒏𑒰𑒩𑒲 𑒤𑒼𑒢𑒧𑒹 𑒂𑒃.𑒋𑒮.𑒛𑒲. 𑒏𑒹𑒩 𑒮𑒳𑒫𑒱𑒡𑒰𑒏 𑒯𑒹𑒞𑒳 𑒙𑒹𑒪𑒲𑒤𑒼𑒢 𑒫𑒱𑒦𑒰𑒑𑒏𑒹𑒿 𑒮𑒴𑒔𑒱𑒞 𑒏𑒩𑒋 𑒣𑒛𑓃𑒻𑒞 𑒕𑒪। 𑒯𑒳𑒢𑒏𑒩 𑒂𑒤𑒱𑒮𑒏 𑒋𑒏𑒙𑒰 𑒣𑓂𑒩𑒬𑒰𑒮𑒢𑒱𑒏 𑒁𑒡𑒱𑒏𑒰𑒩𑒲 𑒙𑒹𑒪𑒲𑒤𑒼𑒢 𑒫𑒱𑒦𑒰𑒑𑒏𑒹𑒿 𑒔𑒱𑒙𑓂𑒚𑒲 𑒪𑒱𑒐𑒱 𑒏𑒋 𑒄 𑒮𑒳𑒫𑒱𑒡𑒰 𑒂𑒩𑒳𑒝𑒱𑒏 𑒖𑒰𑒢𑒏𑒰𑒩𑒲𑒏 𑒥𑒱𑒢𑒰 𑒏𑒩𑒥𑒰𑒋 𑒠𑒹𑒢𑒹 𑒕𑒪। 𑒫𑒱𑒖𑒲𑒪𑒹𑓀𑒮𑒏 𑒖𑒰𑒿𑒔𑒧𑒹 𑒍 𑒥𑒨𑒰𑒢 𑒠𑒹𑒢𑒹 𑒕𑒪 𑒖𑒹 𑒂𑒩𑒳𑒝𑒱 𑒋𑒯𑒱 𑒂𑒤𑒱𑒮𑒏 𑒧𑒳𑒐𑓂𑒨 𑒕𑒟𑒱 𑒂 𑒯𑒳𑒢𑒏𑒩 𑒧𑒾𑒐𑒱𑒏 𑒂𑒠𑒹𑒬𑒼𑒏 𑒣𑒰𑒪𑒢 𑒏𑒩𑒋 𑒣𑒛𑓃𑒻𑒞 𑒕𑒢𑓂𑒯𑒱 𑒯𑒳𑒢𑒏𑒰। 𑒮𑒹 𑒂𑒃.𑒋𑒮.𑒛𑒲. 𑒏𑒹𑒩 𑒮𑒳𑒫𑒱𑒡𑒰𑒏 𑒪𑒹𑒪 𑒙𑒹𑒪𑒲𑒤𑒼𑒢 𑒫𑒱𑒦𑒰𑒑𑒏𑒹𑒿 𑒍 𑒂𑒩𑒳𑒝𑒱𑒏 𑒧𑒾𑒐𑒱𑒏 𑒂𑒠𑒹𑒬 𑒣𑒩 𑒔𑒱𑒙𑓂𑒚𑒲 𑒪𑒱𑒐𑒢𑒹 𑒕𑒪𑒰𑒯। 𑒧𑒰𑒤𑒱𑒨𑒰 𑒍𑒏𑒩𑒰 𑒞𑒼𑒛𑓃𑒱 𑒪𑒹𑒢𑒹 𑒕𑒪 𑒂 𑒍𑒯𑒱𑒧𑒹 𑒍 𑒣𑓂𑒩𑒬𑒰𑒮𑒢𑒱𑒏 𑒁𑒡𑒱𑒏𑒰𑒩𑒲 𑒁𑒣𑒢𑒰𑒏𑒹𑒿 𑒮𑒹𑒯𑒼 𑒤𑒿𑒮𑒰 𑒪𑒹𑒢𑒹 𑒕𑒪।
𑒮𑒼𑒧 𑒠𑒱𑒢 𑒤𑒻𑒏𑓂𑒮 𑒂𑒋𑒪 𑒂 𑒂𑒩𑒳𑒝𑒱𑒏 𑒙𑓂𑒩𑒰𑓀𑒮𑒤𑒩 𑒦𑓄 𑒑𑒹𑒪।
“𑒩𑒱𑒣𑓂𑒩𑒹𑒖𑒹𑓀𑒙 𑒏𑒩𑒴 𑒋𑒯𑒱 𑒂𑒠𑒹𑒬𑒏 𑒫𑒱𑒩𑒳𑒠𑓂𑒡”- 𑒫𑒻𑒯 𑒔𑒱𑒩𑒣𑒩𑒱𑒔𑒱𑒞 𑒮𑓂𑒫𑒩, 𑒧𑒝𑒲𑒢𑓂𑒠𑓂𑒩𑒏।
“𑒁𑒯𑒴𑒿 𑒏𑒼𑒢 𑒗𑒧𑒹𑒪𑒰𑒧𑒹 𑒣𑒛𑓃𑒪 𑒕𑒲। 𑒮𑒦 𑒚𑒲𑒏 𑒦𑓄 𑒖𑒋𑒞”- 𑒥𑒖𑒪𑒰𑒯 𑒂𑒩𑒳𑒝𑒱 𑒤𑒼𑒢 𑒣𑒩।
𑒬𑒬𑒰𑓀𑒏𑒏 𑒒𑒩𑒣𑒩 𑒣𑒰𑒩𑓂𑒙𑒲 𑒦𑒹𑒪।
“𑒧𑒱𑒮𑓂𑒙𑒩 𑒂𑒩𑒳𑒝𑒱 𑒩𑒱𑒣𑓂𑒩𑒹𑒮𑒹𑒢𑓂𑒙 𑒞𑒏 𑒢𑒯𑒱 𑒏𑒋𑒪𑒢𑓂𑒯𑒱। 𑒩𑒱𑒪𑒲𑒫 𑒦𑓄 𑒏𑒋 𑒔𑒪𑒱 𑒑𑒹𑒪𑒰𑒯। 𑒥𑒳𑒗𑒴 𑒮𑒩𑒹𑒢𑓂𑒛𑒩 𑒏𑒋 𑒠𑒹𑒪𑒢𑓂𑒯𑒱 𑒁𑒣𑒢𑒰𑒏𑒹𑒿 ”।
“𑒣𑓂𑒩𑒼𑒧𑒼𑒬𑒢 𑒥𑒳𑒗𑒴 𑒖𑒹 𑒠𑒮 𑒮𑒰𑒪 𑒡𑒩𑒱 𑒩𑒳𑒏𑒪 𑒩𑒯𑒞𑒢𑓂𑒯𑒱। 𑒮𑒲𑒢𑒱𑒨𑒩𑒱𑒙𑒲 𑒧𑒰𑒩𑒪 𑒖𑒋𑒞𑒢𑓂𑒯𑒱। 𑒥𑒠𑒢𑒰𑒧𑒲 𑒦𑒹𑒪𑒢𑓂𑒯𑒱 𑒮𑒹 𑒁𑒪𑒑। 𑒮𑒳𑒢𑒻𑒞 𑒕𑒲 𑒖𑒹 𑒤𑒼𑒢𑒣𑒩 𑒠𑒳𑒥𑒃𑒏 𑒮𑓂𑒧𑒑𑒪𑒩 𑒮𑒦𑒮𑒿 𑒑𑒣 𑒏𑒩𑒻𑒞 𑒕𑒪𑒰𑒯”।
𑒍𑒧𑓂𑒯𑒩 𑒂𑒩𑒳𑒝𑒱𑒏𑒹𑒿 𑒁𑒣𑒢 𑒥𑒰𑒥𑒴𑒖𑒲𑒏 𑒙𑓂𑒩𑒰𑓀𑒮𑒤𑒩, 𑒄𑒧𑒰𑒢𑒠𑒰𑒩𑒲𑒏 𑒪𑒹𑒪 𑒏𑒋𑒪 𑒮𑓀𑒒𑒩𑓂𑒭, 𑒮𑓀𑒒𑒩𑓂𑒭𑒏 𑒫𑒱𑒤𑒪𑒞𑒰 𑒂 𑒞𑒏𑒩 𑒥𑒰𑒠 𑒯𑒳𑒢𑒏𑒩 𑒞𑓀𑒞𑓂𑒩-𑒫𑒱𑒠𑓂𑒨𑒰 𑒂 𑒣𑒴𑒖𑒰-𑒣𑒰𑒚𑒏 𑒠𑒱𑒬𑒱 𑒁𑒣𑒢𑒰𑒏𑒹𑒿 𑒍𑒗𑒩𑒰𑒋𑒥 𑒂 𑒒𑒩-𑒠𑓂𑒫𑒰𑒩, 𑒂𑒤𑒱𑒮 𑒂 𑒮𑒰𑓀𑒮𑒰𑒩𑒱𑒏𑒞𑒰𑒮𑒿 𑒫𑒱𑒩𑒏𑓂𑒞𑓂𑒞𑒱 𑒧𑒼𑒢 𑒣𑒛𑓃𑒱 𑒑𑒹𑒪𑒢𑓂𑒯𑒱। 𑒋𑒯𑒱 𑒮𑒦 𑒒𑒙𑒢𑒰𑒏𑓂𑒩𑒧𑒏 𑒥𑒰𑒠 𑒯𑒳𑒢𑒏𑒩 𑒧𑒳𑒿𑒯𑒣𑒩 𑒋𑒏𑒙𑒰 𑒔𑒱𑒢𑓂𑒞𑒰𑒏 𑒩𑒹𑒐𑒰 𑒂𑒋𑒪 𑒕𑒪𑒢𑓂𑒯𑒱। 𑒧𑒳𑒠𑒰 𑒮𑒹 𑒥𑒹𑒬𑒲 𑒠𑒱𑒢 𑒡𑒩𑒱 𑒢𑒯𑒱 𑒩𑒯𑒪𑒢𑓂𑒯𑒱 𑒂𑒩𑒳𑒝𑒱𑒏 𑒧𑒼𑒢 𑒣𑒩। 𑒯𑒰𑒩𑒱𑒏𑒹𑒿 𑒖𑒲𑒞𑒧𑒹 𑒏𑒞𑒼𑒏 𑒥𑒹𑒩 𑒥𑒠𑒪𑒢𑒹 𑒕𑒪𑒰𑒯 𑒍। 𑒢𑒼𑒏𑒩𑒲𑒨𑒼𑒧𑒹 𑒂 𑒍𑒯𑒱𑒮𑒿 𑒣𑒯𑒱𑒢𑒹 𑒫𑓂𑒨𑒫𑒮𑒰𑒨𑒧𑒹 𑒮𑒹𑒯𑒼।
“𑒏𑒲 𑒨𑒾 𑒧𑒝𑒲𑒢𑓂𑒠𑓂𑒩। 𑒏𑒼𑒢𑒼 𑒤𑒼𑒢-𑒤𑒰𑒢 𑒢𑒯𑒱। 𑒯𑒧𑒩 𑒙𑓂𑒩𑒰𑓀𑒮𑒤𑒩 𑒦𑓄 𑒑𑒹𑒪 𑒞𑒿 𑒁𑒯𑒰𑒿 𑒮𑒦 𑒞𑒿 𑒥𑒱𑒮𑒩𑒱𑒨𑒹 𑒑𑒹𑒪𑒯𑒳𑒿”।
“𑒯𑒧 𑒏𑒲, 𑒮𑒦 𑒏𑓂𑒨𑒼 𑒥𑒱𑒮𑒩𑒱 𑒑𑒹𑒪 𑒁𑒯𑒰𑒿𑒏𑒹𑒿 𑒋𑒞𑒋”।
“𑒁𑒯𑒰𑒿 𑒏𑒲 𑒥𑒳𑒗𑒪𑒯𑒳𑒿। 𑒖𑒹 𑒯𑒧 𑒮𑒹𑒯𑒼 𑒥𑒱𑒮𑒩𑒱 𑒑𑒹𑒪 𑒕𑒲। 𑒁𑒯𑒰𑒿𑒏𑒹𑒿 𑒧𑒼𑒢 𑒁𑒕𑒱। 𑒯𑒧 𑒖𑒐𑒢 𑒃𑓀𑒙𑒩𑒏 𑒥𑒰𑒠 𑒥𑒰𑒥𑒴𑒖𑒲𑒏 𑒃𑒔𑓂𑒕𑒰𑒏 𑒫𑒱𑒩𑒳𑒠𑓂𑒡 𑒫𑒱𑒖𑓂𑒘𑒰𑒢 𑒕𑒼𑒛𑓃𑒱 𑒏𑒋 𑒏𑒪𑒰 𑒫𑒱𑒭𑒨 𑒪𑒹𑒢𑒹 𑒕𑒪𑒯𑒳𑒿। 𑒫𑒱𑒖𑓂𑒘𑒰𑒢𑒏 𑒮𑒦𑒙𑒰 𑒏𑒱𑒞𑒰𑒥 𑓑𑓑 𑒥𑒖𑒹 𑒩𑒰𑒞𑒱𑒧𑒹 𑒣𑒼𑒐𑒩𑒱𑒧𑒹 𑒤𑒹𑓀𑒏𑒱 𑒠𑒹𑒢𑒹 𑒕𑒪𑒱𑒨𑒻𑒏। 𑒏𑒼𑒢𑒼𑒙𑒰 𑒁𑒫𑒬𑒹𑒭𑒼 𑒢𑒯𑒱 𑒕𑒼𑒛𑓃𑒢𑒹 𑒕𑒪𑒯𑒳𑒿 𑒍𑒯𑒱 𑒫𑒱𑒭𑒨𑒏 𑒁𑒣𑒢 𑒒𑒩𑒧𑒹। 𑒂 𑒖𑒐𑒢 𑒏𑒪𑒰 𑒫𑒱𑒭𑒨𑒧𑒹 𑒣𑓂𑒩𑒟𑒧 𑒬𑓂𑒩𑒹𑒝𑒲 𑒂𑒋𑒪 𑒕𑒪 𑒞𑒐𑒢 𑒑𑒹𑒪 𑒕𑒪𑒯𑒳𑒿 𑒑𑒰𑒧। 𑒞𑒏𑒩𑒰 𑒣𑒯𑒱𑒢𑒹 𑒏𑒞𑒹𑒏 𑒥𑒩𑒱𑒨𑒰𑒞𑒲 𑒕𑒼𑒛𑓃𑒢𑒹 𑒕𑒪𑒯𑒳𑒿, 𑒏𑒞𑒹𑒏 𑒖𑒢𑓂𑒧-𑒧𑒵𑒞𑓂𑒨𑒳। 𑒧𑒳𑒠𑒰 𑒑𑒰𑒧 𑒢𑒯𑒱 𑒑𑒹𑒪 𑒕𑒪𑒯𑒳𑒿”।
“𑒋𑒯 𑒦𑒰𑒄। 𑒁𑒯𑒰𑒿𑒏𑒹𑒿 𑒞𑒿 𑒮𑒦𑒙𑒰 𑒧𑒼𑒢 𑒁𑒕𑒱। 𑒯𑒧𑒩𑒰 𑒞𑒿 𑒦𑒹𑒪 𑒖𑒹 𑒁𑒯𑒴𑒿 𑒏𑒰𑒏𑒰 𑒖𑒹𑒏𑒰𑒿 𑒦𑓄 𑒑𑒹𑒪𑒯𑒳𑒿। 𑒄 𑒮𑒦 𑒏𑓂𑒭𑒧𑒰𑒏 𑒨𑒼𑒑𑓂𑒨 𑒢𑒯𑒱 𑒁𑒕𑒱। 𑒏𑒢𑒹𑒏 𑒠𑒹𑒐𑒰 𑒠𑒱𑒨𑒾𑒏। 𑒂𑒥 𑒯𑒧𑒩𑒰 𑒫𑒱𑒬𑓂𑒫𑒰𑒮 𑒦𑓄 𑒑𑒹𑒪 𑒖𑒹 𑒏𑒱𑒕𑒳 𑒯𑒼𑒋𑒞”।
“𑒤𑒹𑒩 𑒫𑒻𑒯 𑒑𑒣। 𑒖𑒐𑒢 𑒁𑒯𑒰𑒿 𑒢𑒯𑒱 𑒥𑒠𑒪𑒪𑒯𑒳𑒿 𑒞𑒐𑒢 𑒯𑒧 𑒏𑒼𑒢𑒰 𑒥𑒠𑒪𑒥। 𑒕𑒼𑒛𑓃𑒢𑒹 𑒕𑒪𑒯𑒳𑒿 𑒏𑒱𑒕𑒳 𑒠𑒱𑒢 𑒁𑒣𑒢𑒰𑒏𑒹𑒿। 𑒂𑒥 𑒮𑒳𑒢𑒴। 𑒖𑒹 𑒏𑒯𑒻𑒞 𑒕𑒲 𑒮𑒹 𑒙𑒰 𑒏𑒩𑒴। 𑒥𑒹𑒬𑒲 𑒥𑒰𑒖𑒥 𑒖𑒳𑒢𑒱। 𑒖𑒰𑒯𑒱 𑒮𑒧𑒨𑒏 𑒏𑒰𑒪 𑒯𑒧𑒩 𑒙𑒹𑒪𑒲𑒤𑒼𑒢𑒮𑒿 𑒥𑒰𑒯𑒩𑒲 𑒠𑒹𑒬 𑒏𑒋𑒪 𑒑𑒹𑒪 𑒕𑒪 𑒍𑒯𑒱 𑒮𑒧𑒨𑒧𑒹 𑒞𑒿 𑒯𑒧𑒩 𑒙𑒹𑒪𑒲𑒤𑒼𑒢 𑒐𑒩𑒰𑒥 𑒕𑒪, 𑒄 𑒞𑒿 𑒁𑒯𑒰𑒿𑒏𑒹𑒿 𑒥𑒳𑒗𑒪𑒹 𑒁𑒕𑒱। 𑒒𑒩𑒮𑒿 𑒙𑒹𑒪𑒲𑒤𑒼𑒢 𑒫𑒱𑒦𑒰𑒑𑒏𑒹𑒿 𑒏𑒧𑓂𑒣𑓂𑒪𑒹𑒢 𑒮𑒹𑒯𑒼 𑒪𑒱𑒐𑒥𑒰𑒍𑒪 𑒑𑒹𑒪 𑒕𑒪। 𑒧𑒳𑒠𑒰 𑒮𑒹 𑒙𑒹𑒪𑒲𑒤𑒼𑒢𑒹 𑒣𑒩 𑒪𑒱𑒐𑒥𑒰𑒍𑒪 𑒑𑒹𑒪 𑒕𑒪। 𑒏𑒼𑒢𑒼 𑒪𑒱𑒐𑒱𑒞 𑒣𑒞𑓂𑒩 𑒂 𑒍𑒏𑒩 𑒣𑓂𑒩𑒰𑒣𑓂𑒞𑒱 𑒩𑒬𑒲𑒠 𑒞𑒿 𑒁𑒕𑒱 𑒢𑒯𑒱। 𑒧𑒳𑒠𑒰 𑒄 𑒣𑒞𑒰 𑒏𑒩𑒴 𑒖𑒹 𑒋𑒯𑒱 𑒞𑒩𑒯𑒏 𑒏𑒧𑓂𑒣𑓂𑒪𑒹𑒢𑒏 𑒏𑒼𑒢𑒼 𑒩𑒹𑒏𑒰𑒩𑓂𑒛 𑒙𑒹𑒪𑒲𑒤𑒼𑒢 𑒫𑒱𑒦𑒰𑒑𑒏 𑒪𑒑 𑒩𑒯𑒻𑒞 𑒕𑒻𑒏 𑒂𑒏𑒱 𑒢𑒯𑒱”।
𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒧𑒝𑒲𑒢𑓂𑒠𑓂𑒩𑒏 𑒤𑒼𑒢 𑒂𑒋𑒪 𑒖𑒹 𑒤𑒼𑒢 𑒫𑒱𑒦𑒰𑒑 𑒋𑒏 𑒧𑒯𑒲𑒢𑒰𑒏 𑒥𑒰𑒠 𑒏𑒧𑓂𑒣𑓂𑒪𑒹𑒢 𑒢𑓀𑒥𑒩 𑒤𑒹𑒩𑒮𑒿 𑒬𑒳𑒩𑒳𑒮𑒿 𑒠𑒹𑒥 𑒬𑒳𑒩𑒴 𑒏𑒋 𑒠𑒻𑒞 𑒕𑒻𑒏। 𑒮𑒹 𑒄 𑒏𑒰𑒖 𑒢𑒯𑒱 𑒦𑒹𑒪।
“𑒥𑒹𑒬 𑒞𑒐𑒢 𑒄 𑒣𑒞𑒰 𑒏𑒩𑒴 𑒖𑒹 𑒯𑒧𑒩 𑒢𑓀𑒥𑒩𑒮𑒿 𑒏𑒏𑒩𑒰-𑒏𑒏𑒩𑒰 𑒏𑒼𑒢-𑒏𑒼𑒢 𑒢𑓀𑒥𑒩 𑒣𑒩 𑒫𑒱𑒠𑒹𑒬 𑒤𑒼𑒢 𑒏𑒋𑒪 𑒑𑒹𑒪 𑒕𑒪। 𑒂 𑒍𑒯𑒱 𑒫𑒱𑒠𑒹𑒬𑒲𑒏 𑒤𑒼𑒢 𑒏𑒼𑒢-𑒏𑒼𑒢 𑒢𑓀𑒥𑒩 𑒣𑒩 𑒂𑒋𑒪 𑒁𑒕𑒱”।
“𑒯𑒿। 𑒋𑒯𑒱 𑒑𑒣𑒏 𑒞𑒿 𑒯𑒧𑒩𑒰 𑒮𑒳𑒩𑒞𑒹 𑒢𑒯𑒱 𑒩𑒯𑒪”।
𑒂𑒥 𑒧𑒝𑒲𑒢𑓂𑒠𑓂𑒩 𑒖𑒹 𑒙𑒹𑒪𑒲𑒤𑒼𑒢 𑒢𑓀𑒥𑒩𑒏 𑒮𑒴𑒔𑒲 𑒁𑒢𑒪𑒢𑓂𑒯𑒱, 𑒮𑒹 𑒮𑒦𑒙𑒰 𑒙𑒹𑒪𑒲𑒤𑒼𑒢 𑒥𑒴𑒟 𑒮𑒦𑒏 𑒕𑒪। 𑒧𑒳𑒠𑒰 𑒏𑒼𑒢𑒼 𑒙𑒰 𑒏𑒰𑒪 𑒂𑒩𑒳𑒝𑒱𑒏 𑒢𑓀𑒥𑒩 𑒣𑒩 𑒢𑒯𑒱 𑒂𑒋𑒪 𑒕𑒪।
𑒫𑒱𑒖𑒲𑒪𑒹𑓀𑒮𑒏 𑒮𑒳𑒢𑒥𑒰𑒯𑒲𑒧𑒹 𑒄 𑒮𑒦 𑒫𑒩𑓂𑒝𑒢 𑒖𑒐𑒢 𑒂𑒩𑒳𑒝𑒱 𑒏𑒋𑒪𑒢𑓂𑒯𑒱 𑒞𑒐𑒢 𑒬𑒬𑒰𑓀𑒏 𑒯𑒞𑒣𑓂𑒩𑒦 𑒩𑒯𑒱 𑒑𑒹𑒪। 𑒄 𑒞𑒿 𑒢𑒲𑒏 𑒦𑒹𑒪 𑒖𑒹 𑒬𑒬𑒰𑓀𑒏𑒏 𑒂𑒠𑒧𑒲 𑒮𑒦 𑒥𑒴𑒟 𑒥𑒪𑒰𑒮𑒿 𑒮𑓀𑒣𑒩𑓂𑒏 𑒩𑒐𑒢𑒹 𑒕𑒪, 𑒢𑒯𑒱 𑒞𑒿 𑒍𑒯𑒼 𑒮𑒦 𑒤𑒿𑒮𑒻𑒞 𑒂 𑒮𑓀𑒑𑒯𑒱 𑒬𑒬𑒰𑓀𑒏𑒼𑒏 𑒢𑒰𑒧 𑒁𑒥𑒻𑒞 𑒋𑒯𑒱 𑒮𑒦𑒧𑒹। 𑒁𑒮𑓂𑒞𑒳 𑒂𑒩𑒳𑒝𑒱 𑒖𑒰𑒿𑒔𑒮𑒿 𑒥𑒰𑒯𑒩 𑒢𑒱𑒏𑒪𑒱 𑒑𑒹𑒪𑒰𑒯।
“𑒦𑒰𑒃। 𑒯𑒧 𑒧𑒝𑒲𑒢𑓂𑒠𑓂𑒩। 𑒍𑒏𑒩𑒰 𑒮𑒦𑒏𑒹𑒿 𑒞𑒿 𑒏𑒱𑒕𑒳 𑒢𑒯𑒱 𑒦𑒹𑒪𑒻𑒏।“
“𑒯𑒧𑒩 𑒙𑓂𑒩𑒰𑓀𑒮𑒤𑒩 𑒠𑒱𑒪𑓂𑒪𑒲 𑒦𑒹𑒪 𑒁𑒕𑒱। 𑒠𑒹𑒐𑒻𑒞 𑒕𑒲। 𑒁𑒯𑒰𑒿 𑒢𑒱𑒬𑓂𑒔𑒱𑓀𑒞 𑒩𑒯𑒴”।
“𑒯𑒧 𑒞𑒿 𑒍𑒯𑒱 𑒠𑒱𑒢 𑒢𑒱𑒬𑓂𑒔𑒱𑓀𑒞 𑒦𑓄 𑒑𑒹𑒪𑒯𑒳𑒿 𑒖𑒯𑒱𑒨𑒰 𑒁𑒯𑒰𑒿 𑒣𑒳𑒩𑒢𑒏𑒰 𑒑𑒣 𑒮𑒦 𑒮𑒳𑒢𑒹𑒪𑒯𑒳𑒿। 𑒏𑒰𑒏𑒰𑒏 𑒁𑒣𑒧𑒰𑒢𑒏 𑒥𑒠𑒪𑒰 𑒁𑒯𑒰𑒿𑒏𑒹𑒿 𑒪𑒹𑒥𑒰𑒏 𑒁𑒕𑒱। 𑒧𑒰𑒞𑓂𑒩 𑒫𑓂𑒨𑒏𑓂𑒞𑓂𑒞𑒱 𑒮𑒦 𑒥𑒠𑒪𑒪 𑒁𑒕𑒱। 𑒔𑒩𑒱𑒞𑓂𑒩 𑒮𑒦 𑒫𑒻𑒯 𑒁𑒕𑒱”।
𑒠𑒱𑒪𑓂𑒪𑒲𑒧𑒹 𑒂𑒩𑒳𑒝𑒱 𑒫𑒱𑒖𑒲𑒪𑒹𑓀𑒮 𑒫𑒱𑒦𑒰𑒑𑒏 𑒮𑒴𑒔𑒢𑒰-𑒣𑓂𑒩𑒾𑒠𑓂𑒨𑒼𑒑𑒱𑒏𑒲 𑒬𑒰𑒐𑒰𑒧𑒹 𑒣𑒠𑒮𑓂𑒟𑒰𑒣𑒱𑒞 𑒦𑒹𑒪𑒰𑒯। 𑒋𑒯𑒱 𑒫𑒱𑒦𑒰𑒑𑒏𑒹𑒿 𑒬𑓀𑒙𑒱𑓀𑒑 𑒣𑒼𑒮𑓂𑒙𑒱𑓀𑒑 𑒧𑒰𑒢𑒪 𑒖𑒰𑒃𑒞 𑒕𑒪। 𑒫𑒱𑒖𑒲𑒪𑒹𑓀𑒮𑒏 𑒋𑒢𑒏𑓂𑒫𑒰𑒨𑒩𑒲𑒮𑒿 𑒥𑒰𑒯𑒩 𑒢𑒱𑒏𑒪𑒪𑒰𑒏 𑒥𑒰𑒠𑒼 𑒂𑒩𑒳𑒝𑒱 𑒋𑒯𑒱 𑒣𑒼𑒮𑓂𑒙𑒱𑓀𑒑𑒏𑒹 𑒔𑒳𑒢𑒪𑒢𑓂𑒯𑒱 𑒮𑒹 𑒋𑒯𑒱𑒮𑒿 𑒞𑒿 𑒄𑒋𑒯 𑒮𑒱𑒠𑓂𑒡 𑒯𑒼𑒃𑒞 𑒁𑒕𑒱 𑒖𑒹 𑒂𑒩𑒳𑒝𑒱 𑒟𑒰𑒏𑒱 𑒑𑒹𑒪𑒰𑒯। 𑒣𑒰𑒿𑒔 𑒮𑒰𑒪 𑒏𑒼𑒢𑒧𑒹 𑒥𑒻𑒮𑒪 𑒩𑒯𑒞𑒰𑒯। 𑒬𑒬𑒰𑓀𑒏𑒏 𑒑𑓂𑒩𑒳𑒣 𑒣𑓂𑒩𑒤𑒳𑒪𑓂𑒪 𑒕𑒪।
𑒋𑒧𑓂𑒯𑒩 𑒂𑒩𑒳𑒝𑒱 𑒁𑒣𑒢 𑒫𑒱𑒖𑓂𑒘𑒰𑒢𑒏 𑒕𑒼𑒛𑓃𑒪 𑒣𑒰𑒚 𑒤𑒹𑒩𑒮𑒿 𑒬𑒳𑒩𑒴 𑒏𑒋𑒪𑒢𑓂𑒯𑒱। 𑒦𑒩𑒱 𑒠𑒱𑒢 𑒏𑒧𑓂𑒣𑓂𑒨𑒳𑒙𑒩 𑒂 𑒍𑒏𑒩 𑒞𑒏𑒢𑒲𑒏𑒲 𑒫𑒱𑒬𑒹𑒭𑒖𑓂𑒘 𑒮𑒦𑒮𑒿 𑒦𑒱𑒛𑓃𑒪 𑒩𑒯𑒟𑒱। 𑒍𑒯𑒼 𑒪𑒼𑒏𑒢𑒱 𑒥𑒯𑒳𑒞 𑒠𑒱𑒢𑒏 𑒥𑒰𑒠 𑒋𑒯𑒢 𑒁𑒡𑒱𑒏𑒰𑒩𑒲 𑒠𑒹𑒐𑒢𑒹 𑒕𑒪𑒰𑒯 𑒖𑒹 𑒦𑒱𑒛𑓃𑒪 𑒁𑒕𑒱, 𑒏𑒰𑒖𑒮𑒿। 𑒠𑒼𑒮𑒩 𑒪𑒼𑒏𑒢𑒱 𑒞𑒿 𑒏𑒼𑒯𑒳𑒢𑒰 𑒙𑒩𑓂𑒧 𑒣𑒴𑒩𑓂𑒝 𑒏𑒋 𑒦𑒰𑒑𑒻𑒞 𑒕𑒟𑒱।
𑒍𑒢𑒰 𑒠𑒹𑒐𑒪 𑒖𑒰𑒋 𑒞𑒿 𑒄 𑒫𑒱𑒦𑒰𑒑 𑒥𑒛𑓂𑒛 𑒮𑓀𑒫𑒹𑒠𑒢𑒬𑒲𑒪 𑒕𑒪। 𑒂𑒥 𑒂𑒩𑒳𑒝𑒱𑒏 𑒁𑒣𑒢 𑒫𑒱𑒦𑒰𑒑𑒏 𑒮𑒦 𑒏𑒩𑓂𑒧𑒔𑒰𑒩𑒲𑒮𑒿 𑒥𑒹𑒬 𑒢𑒱𑒏𑒙𑒞𑒰 𑒦𑓄 𑒑𑒹𑒪 𑒕𑒪𑒢𑓂𑒯𑒱। 𑒮𑒦𑒏 𑒂𑒫𑒹𑒠𑒢 𑒮𑒧𑒨𑒮𑒿 𑒂𑒑𑒴 𑒥𑒜𑓃𑒻𑒞 𑒕𑒪। 𑒮𑒦𑒙𑒰 𑒂𑒤𑒱𑒮𑒏 𑒃𑒏𑓂𑒫𑒱𑒣𑒧𑒹𑓀𑒙 𑒢𑒫 𑒂𑒥𑒋 𑒪𑒰𑒑𑒪। 𑒣𑒯𑒱𑒪𑒳𑒏𑒰 𑒂𑒤𑒱𑒮𑒩 𑒮𑒦 𑒞𑒿 𑒮𑒧𑒨 𑒏𑒰𑒙𑒱 𑒦𑒰𑒑𑒋 𑒏𑒹𑒩 𑒤𑒹𑒩𑒧𑒹 𑒩𑒯𑒻𑒞 𑒕𑒪 𑒂 𑒂𑒤𑒱𑒮𑒏 𑒂𑒫𑒬𑓂𑒨𑒏 𑒂𑒫𑒬𑓂𑒨𑒏𑒞𑒰 𑒮𑒹𑒯𑒼 𑒣𑒴𑒩𑓂𑒝 𑒢𑒯𑒱 𑒏𑒩𑒻𑒞 𑒖𑒰𑒃 𑒕𑒪।
𑒂𑒤𑒱𑒮𑒧𑒹 𑒋𑒏𑒙𑒰 𑒃𑒏𑓂𑒫𑒱𑒣𑒧𑒹𑒢𑓂𑒙 𑒂𑒋𑒪 𑒕𑒪, 𑒏𑒩𑒣𑓂𑒬𑒢 𑒩𑒼𑒏𑒋 𑒪𑒹𑒪। 𑒋𑒯𑒱𑒧𑒹 𑒮𑓂𑒧𑒑𑒪𑒩 𑒮𑒦𑒏 𑒤𑒼𑒢 𑒙𑒹𑒣 𑒏𑒩𑒥𑒰𑒏 𑒮𑒳𑒫𑒱𑒡𑒰 𑒕𑒪।
𑒏𑒱𑒕𑒳 𑒠𑒱𑒢 𑒮𑒧𑒨 𑒫𑓂𑒨𑒞𑒲𑒞 𑒯𑒼𑒃𑒞 𑒩𑒯𑒪।
“𑒧𑒝𑒲𑒢𑓂𑒠𑓂𑒩। 𑒏𑒼𑒢𑒼 𑒤𑒼𑒢-𑒤𑒰𑒢 𑒢𑒯𑒱”।
“𑒯𑒧 𑒞𑒿 𑒂𑒥 𑒢𑒱𑒬𑓂𑒔𑒱𑒢𑓂𑒞 𑒕𑒲 𑒦𑒰𑒃”।
“𑒯𑒿 𑒮𑒧𑒨 𑒂𑒥𑒱 𑒑𑒹𑒪 𑒁𑒕𑒱। 𑒋𑒏𑒙𑒰 𑒏𑒰𑒖 𑒏𑒩𑒴, 𑒮𑓂𑒧𑒑𑓂𑒪𑒩𑒏 𑒮𑓀𑒑 𑒬𑒬𑒰𑓀𑒏𑒏 𑒮𑓀𑒥𑓀𑒡𑒏 𑒮𑓀𑒥𑓀𑒡𑒧𑒹 𑒋𑒏𑒙𑒰 𑒢𑓂𑒨𑒴𑒖 𑒢𑒱𑒏𑒪𑒥𑒰 𑒠𑒱𑒨𑒾𑒏 𑒁𑒐𑒥𑒰𑒩𑒧𑒹। 𑒂𑒑𑒰𑒿 𑒮𑒦 𑒔𑒲𑒖 𑒞𑒻𑒨𑒰𑒩 𑒁𑒕𑒱”।
𑒍𑒧𑓂𑒯𑒩 𑒁𑒐𑒥𑒰𑒩𑒧𑒹 𑒐𑒥𑒩𑒱 𑒢𑒱𑒏𑒪𑒪 𑒂 𑒧𑓀𑒞𑓂𑒩𑒲𑒏 𑒖𑒢 𑒮𑓀𑒣𑒩𑓂𑒏 𑒣𑒠𑒰𑒡𑒱𑒏𑒰𑒩𑒲 𑒖𑒏𑒩 𑒏𑒰𑒖 𑒫𑒱𑒦𑒰𑒑𑒏 𑒐𑒥𑒩𑒱𑒏𑒹𑒿 𑒁𑒐𑒥𑒰𑒩𑒮𑒿 𑒏𑒰𑒙𑒱 𑒏𑒋 𑒧𑓀𑒞𑓂𑒩𑒲 𑒡𑒩𑒱 𑒣𑒯𑒳𑒿𑒔𑒰𑒨𑒥 𑒕𑒪 𑒍𑒯𑒱 𑒏𑓂𑒪𑒱𑒣𑒱𑓀𑒑𑒏𑒹𑒿 𑒧𑓀𑒞𑓂𑒩𑒲𑒖𑒲 𑒪𑒑 𑒣𑒯𑒳𑒿𑒔𑒰𑒋 𑒠𑒹𑒪𑒢𑓂𑒯𑒱। 𑒮𑒧𑒨 𑒮𑒧𑒲𑒔𑒲𑒢 𑒕𑒪 𑒏𑒰𑒩𑒝 𑒫𑒱𑒦𑒰𑒑𑒲𑒨 𑒧𑓀𑒞𑓂𑒩𑒲𑒖𑒲𑒣𑒩 𑒜𑒹𑒩 𑒂𑒩𑒼𑒣 𑒍𑒯𑒱 𑒮𑒧𑒨 𑒂𑒋𑒪 𑒕𑒪𑒢𑓂𑒯𑒱, 𑒮𑓀𑒮𑒠𑒏 𑒮𑒞𑓂𑒩 𑒔𑒪𑒱 𑒩𑒯𑒪 𑒕𑒪 𑒮𑒹 𑒍 𑒏𑒼𑒢𑒼 𑒞𑒩𑒯𑒏 𑒩𑒱𑒮𑓂𑒏 𑒢𑒯𑒱 𑒪𑒹𑒪𑒢𑓂𑒯𑒱। 𑒃𑓀𑒏𑓂𑒫𑒰𑒨𑒩𑒲𑒏 𑒂𑒩𑓂𑒛𑒩 𑒠𑒋 𑒠𑒹𑒪𑒢𑓂𑒯𑒱।
𑒫𑒱𑒖𑒱𑒪𑒹𑓀𑒮 𑒫𑒱𑒦𑒰𑒑𑒧𑒹 𑒏𑒹𑒬 𑒂𑒋𑒪। 𑒍𑒏𑒩 𑒂𑓀𑒞𑒩𑒱𑒏 𑒥𑒻𑒚𑒏𑒲 𑒯𑒼𑒃𑒞 𑒕𑒪 𑒖𑒰𑒯𑒱𑒧𑒹 𑒮𑒴𑒔𑒢𑒰-𑒣𑓂𑒩𑒾𑒠𑓂𑒨𑒼𑒑𑒱𑒏𑒲 𑒫𑒱𑒦𑒰𑒑𑒏𑒹𑒿 𑒮𑒹𑒯𑒼 𑒥𑒖𑒰𑒍𑒪 𑒖𑒰𑒃𑒞 𑒕𑒪। 𑒮𑒦 𑒏𑒹𑒬𑒧𑒹 𑒧𑒼𑒙𑒰-𑒧𑒼𑒙𑒲 𑒣𑓂𑒩𑒾𑒠𑓂𑒨𑒼𑒑𑒱𑒏𑒲 𑒫𑒱𑒦𑒰𑒑 𑒁𑒢𑒰𑒡𑒱𑒏𑒰𑒩 𑒣𑓂𑒩𑒧𑒰𑒝 𑒣𑒞𑓂𑒩 𑒠𑒋 𑒠𑒻𑒞 𑒕𑒪। 𑒂 𑒏𑒹𑒬 𑒃𑓀𑒏𑓂𑒫𑒰𑒨𑒩𑒲𑒏 𑒥𑒰𑒠 𑒮𑒧𑒰𑒣𑓂𑒞 𑒦𑓄 𑒖𑒰𑒃𑒞 𑒕𑒪।
𑒧𑒲𑒙𑒱𑓀𑒑𑒏 𑒞𑒱𑒟𑒱 𑒞𑒨 𑒦𑒹𑒪। 𑒧𑒲𑒙𑒱𑓀𑒑𑒧𑒹 𑒂𑒩𑒳𑒝𑒱 𑒫𑒱𑒖𑒱𑒪𑒹𑓀𑒮 𑒏𑒧𑒹𑒙𑒲𑒏 𑒮𑒠𑒮𑓂𑒨𑒏 𑒩𑒴𑒣𑒧𑒹 𑒬𑒰𑒧𑒱𑒪 𑒦𑒹𑒪𑒰𑒯।
“𑒬𑒬𑒰𑓀𑒏 𑒣𑒩 𑒏𑒼𑒢𑒼 𑒞𑒩𑒯𑒏 𑒏𑒼𑒢𑒼 𑒂𑒩𑒼𑒣 𑒮𑒱𑒠𑓂𑒡 𑒢𑒯𑒱 𑒯𑒼𑒃𑒞 𑒕𑒢𑓂𑒯𑒱। 𑒂𑒩𑒳𑒝𑒱 𑒁𑒯𑒰𑒿𑒏 𑒫𑒱𑒦𑒰𑒑𑒏𑒹𑒿 𑒙𑒹𑒪𑒲𑒤𑒼𑒢 𑒙𑒻𑒣𑒱𑓀𑒑𑒏 𑒅𑒣𑒏𑒩𑒝 𑒅𑒣𑒪𑒥𑓂𑒡 𑒏𑒩𑒥𑒰𑒍𑒪 𑒑𑒹𑒪 𑒕𑒪। 𑒧𑒳𑒠𑒰 𑒁𑒣𑒢 𑒂𑒤𑒱𑒮𑒧𑒹 𑒞𑒿 𑒤𑒻𑒏𑓂𑒮 𑒧𑒬𑒲𑒢𑒼 𑓖 𑒧𑒰𑒮 𑒏𑒱𑒢𑒰𑒏𑒋 𑒩𑒰𑒐𑒪 𑒩𑒯𑒪𑒰𑒏 𑒥𑒰𑒠 𑒪𑒑𑒰𑒍𑒪 𑒖𑒰𑒃𑒞 𑒁𑒕𑒱, 𑒞𑒐𑒢 𑒄 𑒧𑒬𑒲𑒢 𑒋𑒐𑒢𑒼 𑒩𑒰𑒐𑒪𑒹 𑒯𑒼𑒋𑒞 𑒂𑒏𑒱 𑒏𑒱𑒕𑒳 𑒏𑓀𑒫𑒩𑓂𑒬𑒹𑒬𑒢 𑒩𑒹𑒏𑒰𑒩𑓂𑒛𑒼 𑒦𑒹𑒪 𑒁𑒕𑒱”।
“𑒬𑓂𑒩𑒲𑒧𑒰𑒢। 𑒄 𑒧𑒬𑒲𑒢 𑒋𑒯𑒱 𑒧𑒰𑒮𑒏 𑒣𑒯𑒱𑒪 𑒞𑒱𑒟𑒱𑒏𑒹𑒿 𑒂𑒋𑒪 𑒂 𑒍𑒯𑒱 𑒞𑒱𑒟𑒱𑒮𑒿 𑒋𑒏𑒩 𑒅𑒣𑒨𑒼𑒑 𑒬𑒳𑒩𑒴 𑒦𑓄 𑒑𑒹𑒪। 𑒋𑒯𑒱 𑒏𑒹𑒬𑒧𑒹 𑒖𑒰𑒯𑒱 𑒮𑓂𑒧𑒑𑒪𑒩𑒏 𑒢𑒰𑒧 𑒂𑒋𑒪 𑒁𑒕𑒱 𑒍𑒏𑒩 𑒢𑒰𑒧 𑒍𑒯𑒱 𑒮𑒴𑒔𑒲𑒧𑒹 𑒁𑒕𑒱 𑒖𑒏𑒩 𑒏𑒰𑒪 𑒩𑒹𑒏𑒰𑒩𑓂𑒛 𑒏𑒩𑒥𑒰𑒏 𑒂𑒠𑒹𑒬 𑒯𑒧𑒩𑒰 𑒦𑒹𑒙𑒪 𑒕𑒪। 𑒬𑒬𑒰𑓀𑒏𑒏 𑒏𑓀𑒫𑒩𑓂𑒬𑒹𑒬𑒢 𑒋𑒯𑒱 𑒫𑓂𑒨𑒏𑓂𑒞𑓂𑒞𑒱𑒮𑒿 𑒢𑒯𑒱 𑒏𑒹𑒩 𑒥𑒩𑒰𑒥𑒩 𑒁𑒕𑒱। 𑒂𑒡-𑒂𑒡 𑒧𑒱𑒢𑒙𑒏 𑒠𑒴 𑒙𑒰 𑒏𑓀𑒫𑒩𑓂𑒬𑒹𑒬𑒢। 𑒠𑒼𑒮𑒩 𑒏𑓀𑒫𑒩𑓂𑒬𑒹𑒬𑒢 𑒢𑒾 𑒥𑒖𑒹 𑒩𑒰𑒞𑒱𑒏 𑒕𑒲 𑒂 𑒋𑒯𑒱 𑒏𑓀𑒫𑒩𑓂𑒬𑒹𑒬𑒢𑒏 𑒥𑒰𑒠 𑒍𑒯𑒱 𑒮𑓂𑒧𑒑𑒪𑒩𑒏 𑒤𑒼𑒢 𑒁𑒣𑒢 𑒏𑒩𑓂𑒧𑒔𑒰𑒩𑒲𑒏𑒹𑒿 𑒖𑒰𑒃𑒞 𑒕𑒻𑒏 𑒂 𑒞𑒰𑒯𑒴𑒧𑒹 𑒧𑒰𑒞𑓂𑒩 𑒂𑒡 𑒧𑒱𑒢𑒙 𑒍 𑒪𑒑𑒥𑒻𑒞 𑒁𑒕𑒱”।
“𑒄 𑒏𑒼𑒢 𑒞𑒰𑒩𑒲𑒐𑒏 𑒁𑒕𑒱”।
“𑒣𑒰𑒿𑒔 𑒞𑒰𑒩𑒲𑒐𑒏”।
“𑒕𑒯 𑒞𑒰𑒩𑒲𑒐𑒏 𑒦𑒼𑒩𑒧𑒹 𑒋𑒯𑒱 𑒮𑓂𑒧𑒑𑒪𑒩𑒏 𑒍𑒯𑒱𑒚𑒰𑒧 𑒩𑒹𑒛 𑒦𑒹𑒪 𑒕𑒪 𑒂 𑒏𑒱𑒕𑒳 𑒢𑒯𑒱 𑒦𑒹𑒙𑒪 𑒕𑒪। 𑒄 𑒮𑒦 𑒤𑒼𑒢𑒏 𑒛𑒱𑒙𑒹𑒪 𑒠𑒱𑒁 𑒂𑒩𑒳𑒝𑒱”।
“𑒣𑒯𑒱𑒪 𑒏𑒰𑒪𑒧𑒹 𑒬𑒬𑒰𑓀𑒏 𑒏𑒯𑒻𑒞 𑒕𑒟𑒱 𑒖𑒹 𑒮𑒰𑒜𑓃𑒹 𑒂𑒚 𑒥𑒖𑒹 𑒒𑒩 𑒣𑒩 𑒂𑒥𑒱 𑒏𑒋 𑒦𑒹𑓀𑒙 𑒏𑒩𑒴। 𑒥𑒛𑓂𑒛 𑒖𑒩𑒴𑒩𑒲 𑒑𑒣 𑒁𑒕𑒱। 𑒍 𑒢𑒾 𑒥𑒖𑒹 𑒠𑒼𑒮𑒩 𑒏𑓀𑒫𑒩𑓂𑒬𑒹𑒬𑒢𑒧𑒹 𑒞𑒧𑒮𑒰𑒃𑒞 𑒏𑒯𑒻𑒞 𑒕𑒟𑒱 𑒖𑒹 𑒢𑒾 𑒥𑒰𑒖𑒱 𑒑𑒹𑒪 𑒂 𑒁𑒯𑒰𑒿 𑒋𑒐𑒢 𑒡𑒩𑒱 𑒢𑒯𑒱 𑒁𑒋𑒪𑒯𑒳𑒿। 𑒋𑒯𑒱𑒧𑒹 𑒅𑒞𑓂𑒞𑒩 𑒮𑒹𑒯𑒼 𑒦𑒹𑒙𑒻𑒞 𑒁𑒕𑒱 𑒖𑒹 𑒍 𑒮𑓂𑒧𑒑𑒪𑒩 𑒬𑒬𑒰𑓀𑒏𑒏 𑒑𑒹𑒙 𑒣𑒩 𑒚𑒰𑒜𑓃 𑒁𑒕𑒱”।
“𑒞𑒹𑒮𑒩 𑒤𑒼𑒢𑒧𑒹 𑒏𑒲 𑒫𑒰𑒩𑓂𑒞𑓂𑒞𑒰𑒪𑒰𑒣 𑒁𑒕𑒱”।
“𑒞𑒹𑒮𑒩 𑒤𑒼𑒢 𑒍 𑒮𑓂𑒧𑒑𑒪𑒩 𑒁𑒣𑒢 𑒂𑒤𑒱𑒮 𑒮𑓂𑒙𑒰𑒤𑒏𑒹𑒿 𑒮𑒰𑒜𑓃𑒹 𑒢𑒾 𑒥𑒖𑒹 𑒏𑒩𑒻𑒞 𑒁𑒕𑒱। 𑒍 𑒏𑒩𑓂𑒧𑒔𑒰𑒩𑒲𑒏𑒹𑒿 𑒂𑒠𑒹𑒬 𑒠𑒻𑒞 𑒁𑒕𑒱 𑒖𑒹 𑒞𑒳𑒩𑒞 𑒂𑒤𑒱𑒮 𑒂𑒆, 𑒯𑒧𑒯𑒳𑒿 𑒣𑒯𑒳𑒿𑒔𑒻𑒞 𑒕𑒲। 𑒥𑒮 𑒋𑒏𑒩 𑒁𑒞𑒱𑒩𑒱𑒏𑓂𑒞 𑒏𑒱𑒕𑒳 𑒢𑒯𑒱। 𑒏𑒼𑒢𑒼 𑒋𑒫𑒲𑒛𑒹𑓀𑒮 𑒢𑒯𑒱 𑒦𑒹𑒙𑒱 𑒮𑒏𑒪 𑒋𑒯𑒱 𑒏𑒹𑒮𑒧𑒹। 𑒏𑒯𑒴 𑒞𑒿 𑒯𑒧 𑒢𑒼 𑒂𑒥𑓂𑒖𑒹𑒏𑓂𑒬𑒢 𑒮𑒩𑓂𑒙𑒱𑒤𑒱𑒏𑒹𑒙 𑒠𑒋 𑒠𑒱𑒁”।
“𑒂𑒩𑒳𑒝𑒱। 𑒏𑒲 𑒏𑒯𑒻𑒞 𑒕𑒲 𑒁𑒯𑒰𑒿। 𑒁𑒯𑒰𑒿𑒏 𑒫𑒱𑒦𑒰𑒑 𑒞𑒿 𑒂𑒃 𑒡𑒩𑒱 𑒏𑒼𑒢𑒼 𑒏𑒰𑒖 𑒢𑒯𑒱 𑒏𑒋𑒢𑒹 𑒕𑒪 𑒧𑒳𑒠𑒰 𑒂𑒃 𑒞𑒿 𑒮𑒦𑒙𑒰 𑒏𑒛𑓃𑒲 𑒖𑒼𑒛𑓃𑒱 𑒠𑒹𑒪𑒯𑒳𑒿 𑒁𑒯𑒰𑒿। 𑒬𑒬𑒰𑓀𑒏 𑒤𑒼𑒢 𑒏𑒋𑒪𑒏 𑒖𑒹 𑒦𑒹𑓀𑒙 𑒏𑒩𑒴। 𑒠𑒼𑒮𑒩 𑒤𑒼𑒢 𑒣𑒩 𑒍 𑒫𑓂𑒨𑒏𑓂𑒞𑓂𑒞𑒱 𑒍𑒏𑒩 𑒑𑒹𑒙 𑒣𑒩 𑒚𑒰𑒜𑓃 𑒕𑒪। 𑒞𑒹𑒮𑒩 𑒤𑒼𑒢𑒧𑒹 𑒍𑒏𑒩 𑒏𑒩𑓂𑒧𑒔𑒰𑒩𑒲 𑒂𑒤𑒱𑒮 𑒍𑒞𑒹𑒏 𑒩𑒰𑒞𑒱𑒧𑒹 𑒏𑒲 𑒏𑒩𑒋 𑒖𑒰𑒃𑒞 𑒁𑒕𑒱। 𑒩𑒹𑒛𑒏 𑒐𑒥𑒩𑒱 𑒬𑒬𑒰𑓀𑒏 𑒪𑒲𑒏 𑒏𑒋𑒪𑒢𑓂𑒯𑒱। 𑒍 𑒏𑒩𑓂𑒧𑒔𑒰𑒩𑒲 𑒮𑒦𑒙𑒰 𑒏𑒰𑒑𑒖 𑒯𑒙𑒰 𑒠𑒹𑒪𑒏 𑒂 𑒯𑒧𑒩 𑒫𑒱𑒦𑒰𑒑𑒏 𑒂𑒤𑒱𑒮𑒩 𑒦𑒼𑒩𑒧𑒹 𑒕𑒳𑒔𑓂𑒕 𑒯𑒰𑒟 𑒒𑒳𑒩𑒱 𑒏𑒋 𑒂𑒥𑒱 𑒑𑒹𑒪𑒰𑒯। 𑒂𑒥 𑒋𑒏𑒙𑒰 𑒤𑒼𑒢 𑒂𑒩 𑒏𑒩𑒴। 𑒬𑒬𑒰𑓀𑒏𑒏 𑒢𑓀𑒥𑒩 𑒙𑒹𑒣 𑒞𑒿 𑒢𑒯𑒱 𑒦𑓄 𑒮𑒏𑒪 𑒕𑒪 𑒧𑒳𑒠𑒰 𑒣𑓂𑒩𑒏𑓂𑒩𑒱𑒨𑒰𑒏 𑒁𑒢𑒳𑒮𑒰𑒩 𑒍𑒏𑒩 𑒂𑒫𑒰𑒖𑒏 𑒮𑒻𑓀𑒣𑒪 𑒧𑒻𑒔 𑒏𑒩𑒥𑒰𑒏 𑒔𑒰𑒯𑒲। 𑒍 𑒤𑒼𑒢 𑒅𑒚𑒰𑒨𑒞 𑒞𑒿 𑒑𑒪𑒞 𑒢𑓀𑒥𑒩 𑒏𑒯𑒱 𑒏𑒰𑒙𑒱 𑒠𑒱𑒨𑒾𑒏”।
“𑒮𑒻𑒯 𑒯𑒼𑒋𑒞”।
𑒞𑒐𑒢𑒹 𑒄 𑒣𑓂𑒩𑒏𑓂𑒩𑒱𑒨𑒰 𑒏𑒋𑒪 𑒑𑒹𑒪।
“𑒄 𑒞𑒿 𑒍𑒣𑒢 𑒂 𑒬𑒙 𑒏𑒹𑒮 𑒁𑒕𑒱”- 𑒫𑒱𑒖𑒲𑒪𑒹𑓀𑒮 𑒏𑒧𑒹𑒙𑒲𑒏 𑒁𑒡𑓂𑒨𑒏𑓂𑒭 𑒧𑒯𑒰𑒢𑒱𑒠𑒹𑒬𑒏𑒏𑒹𑒿 𑒥𑒞𑒍𑒪𑒢𑓂𑒯𑒱। 𑒧𑒯𑒰𑒢𑒱𑒠𑒹𑒬𑒏 𑒬𑒬𑒰𑓀𑒏𑒏𑒹𑒿 𑒥𑒖𑒥𑒍𑒪𑒢𑓂𑒯𑒱 𑒂 𑒍𑒏𑒩𑒰 𑒠𑒴 𑒙𑒰 𑒫𑒱𑒏𑒪𑓂𑒣 𑒠𑒹𑒪𑒢𑓂𑒯𑒱।
“𑒬𑒬𑒰𑓀𑒏, 𑒋𑒯𑒱 𑒮𑒦 𑒒𑒙𑒢𑒰𑒏 𑒥𑒰𑒠 𑒁𑒯𑒰𑒿 𑒪𑒑 𑒠𑒴 𑒙𑒰 𑒫𑒱𑒏𑒪𑓂𑒣 𑒁𑒕𑒱। 𑒫𑒱𑒦𑒰𑒑𑒮𑒿 𑒏𑓀𑒣𑒪𑒮𑒩𑒲 𑒮𑒹𑒫𑒰 𑒢𑒱𑒫𑒵𑒞𑓂𑒞𑒱 𑒪𑒹𑒥𑒋 𑒣𑒛𑒞 𑒁𑒯𑒰𑒿𑒏𑒹𑒿। 𑒢𑒯𑒱 𑒞𑒿 𑒃𑓀𑒏𑓂𑒫𑒰𑒨𑒩𑒲 𑒂𑒑𑒰𑒿 𑒥𑒜𑓃𑒞”।
𑒬𑒬𑒰𑓀𑒏 𑒏𑓀𑒣𑒪𑒮𑒩𑒲 𑒮𑒹𑒫𑒰𑒢𑒱𑒫𑒵𑒞𑓂𑒞𑒱 𑒪𑒋 𑒪𑒹𑒪𑒢𑓂𑒯𑒱। 𑒫𑒱𑒦𑒰𑒑 𑒕𑒼𑒛𑓃𑒱 𑒏𑒋 𑒔𑒪𑒱 𑒑𑒹𑒪𑒰𑒯।
“𑒦𑒰𑒃 𑒧𑒝𑒲𑒢𑓂𑒠𑓂𑒩। 𑒏𑒼𑒢𑒼 𑒤𑒼𑒢-𑒤𑒰𑒢 𑒢𑒯𑒱”।
“𑒦𑒖𑒰𑒩। 𑒯𑒧 𑒞𑒿 𑒍𑒯𑒱 𑒠𑒱𑒢 𑒢𑒱𑒬𑓂𑒔𑒱𑓀𑒞 𑒦𑓄 𑒑𑒹𑒪 𑒕𑒪𑒯𑒳𑒿 𑒖𑒰𑒯𑒱 𑒠𑒱𑒢 𑒯𑒧𑒩𑒰 𑒥𑒳𑒗𑒥𑒰𑒧𑒹 𑒂𑒍𑒪 𑒖𑒹 𑒁𑒯𑒰𑒿𑒏𑒹𑒿 𑒥𑒔𑓂𑒔𑒰𑒥𑒪𑒰 𑒮𑒦𑒙𑒰 𑒑𑒣 𑒧𑒼𑒢 𑒁𑒕𑒱। 𑒏𑒰𑒏𑒰 𑒂 𑒁𑒯𑒰𑒿𑒧𑒹 𑒏𑒼𑒢𑒼 𑒁𑓀𑒞𑒩 𑒢𑒯𑒱। 𑒧𑒰𑒩𑓂𑒑 𑒧𑒰𑒞𑓂𑒩 𑒠𑒴 𑒞𑒩𑒯𑒏 𑒩𑒯𑒪। 𑒋𑒯𑒱 𑒫𑒱𑒖𑒨𑒏 𑒧𑒰𑒩𑓂𑒑 𑒣𑒩 𑒁𑒯𑒰𑒿 𑒔𑒪𑒲 𑒞𑒰𑒯𑒱 𑒯𑒹𑒞𑒳 𑒏𑒞𑒹𑒏 𑒏𑒯𑒻𑒞 𑒕𑒪𑒯𑒳𑒿 𑒁𑒯𑒰𑒿𑒏𑒹𑒿, 𑒮𑒹 𑒧𑒼𑒢 𑒁𑒕𑒱 𑒢𑒹। 𑒧𑒳𑒠𑒰 𑒍𑒯𑒱 𑒠𑒱𑒢 𑒖𑒐𑒢 𑒯𑒧𑒩𑒰 𑒁𑒯𑒰𑒿 𑒥𑒔𑓂𑒔𑒰𑒏 𑒑𑒣 𑒮𑒦 𑒏𑒯𑒋 𑒪𑒑𑒪𑒯𑒳𑒿 𑒞𑒯𑒱𑒨𑒹 𑒢𑒱𑒬𑓂𑒔𑒱𑒢𑓂𑒞 𑒦𑓄 𑒑𑒹𑒪 𑒕𑒪𑒯𑒳𑒿 𑒯𑒧”।
𑒂𑒩𑒳𑒝𑒱𑒏 𑒣𑒜𑓃𑒰𑒃𑒏 𑒑𑓂𑒩𑒰𑒤 𑒣𑒱𑒞𑒰𑒏 𑒧𑒼𑒢𑒏 𑒮𑓀𑒑 𑒥𑒢𑒻𑒞-𑒥𑒱𑒑𑒛𑓃𑒻𑒞 𑒩𑒯𑒻𑒞 𑒕𑒪𑒢𑓂𑒯𑒱। 𑒧𑒳𑒠𑒰 𑒒𑒳𑒩𑒱 𑒏𑒋 𑒣𑒳𑒢𑓁 𑒪𑒏𑓂𑒭𑓂𑒨 𑒣𑓂𑒩𑒰𑒣𑓂𑒞 𑒏𑒩𑒻𑒞 𑒕𑒪𑒰𑒯। 𑒢𑒼𑒏𑒩𑒲𑒧𑒹 𑒩𑒯𑒱𑒞𑒯𑒳 𑒄 𑒒𑒙𑒢𑒰 𑒋𑒏 𑒥𑒹𑒩 𑒤𑒹𑒩 𑒦𑒹𑒪 𑒕𑒪।
𑒂 𑒤𑒹𑒩 𑒋𑒏𑒙𑒰 𑒮𑒩𑒏𑒰𑒩𑒲 𑒨𑒰𑒞𑓂𑒩𑒰𑒏 𑒥𑒰𑒠 𑒂𑒩𑒳𑒝𑒱𑒏 𑒦𑒹𑒪 𑒋𑒏𑓂𑒮𑒲𑒛𑒹𑒢𑓂𑒙 । 𑓑𑓕 𑒠𑒱𑒢 𑒡𑒩𑒱 𑒫𑒹𑓀𑒙𑒲𑒪𑒹𑒙𑒩 𑒣𑒩 𑒤𑒹𑒩 𑒋𑒏 𑒮𑒰𑒪 𑒡𑒩𑒱 𑒥𑒻𑒬𑒰𑒐𑒲 𑒣𑒩 𑒩𑒯𑒪𑒰𑒏 𑒥𑒰𑒠 𑒣𑒳𑒢𑓁 𑒁𑒣𑒢 𑒣𑒻𑒩 𑒣𑒩 𑒚𑒰𑒜𑓃 𑒦𑓄 𑒑𑒹𑒪𑒰𑒯 𑒂𑒩𑒳𑒝𑒱 । 𑒍 𑒥𑒔𑓂𑒔𑒰 𑒖𑒹 𑒛𑒰𑒨𑒩𑒲 𑒪𑒱𑒐𑒻𑒞 𑒕𑒪 𑒏𑒞𑒋 𑒯𑒼𑒋𑒞 । 𑒍 𑒏𑒰𑒪𑓂𑒣𑒢𑒱𑒏 𑒏𑒟𑒰𑒏𑒰𑒩 𑒮𑒦𑒙𑒰 𑒮𑒞𑓂𑒞𑒹 𑒪𑒱𑒐𑒢𑒹 𑒕𑒪, 𑒂𑒩𑒳𑒝𑒱𑒏 𑒦𑒫𑒱𑒭𑓂𑒨𑒏 𑒫𑒏𑓂𑒞𑒫𑓂𑒨 𑒏𑓄 𑒩𑒯𑒪 𑒕𑒪 𑒍 । 𑒂𑒩𑒳𑒝𑒱𑒏 𑒛𑒰𑒨𑒩𑒲𑒧𑒹 𑒮𑒹𑒯𑒼 𑒨𑒻𑒯 𑒁𑓀𑒏𑒱𑒞 𑒦𑒹𑒪-
“𑒁𑒣𑓂𑒣𑒢 𑒧𑒰𑒢𑒹 𑒯𑒧𑒩 –-𑒂𑒩𑒳𑒝𑒱𑒏- 𑒫𑒱𑒭𑒨𑒧𑒹 𑒑𑒣𑓂𑒣 𑒏𑒩𑒥𑒰 𑒪𑒹𑒪 𑒯𑒧𑒩𑒰 𑒪𑒑𑒧𑒹 𑒮𑒧𑒨𑒏 𑒁𑒦𑒰𑒥 𑒩𑒯𑒨 𑒪𑒰𑒑𑒪 । 𑒏𑒱𑒕𑒳 𑒞𑒿 𑒋𑒏𑒩 𑒏𑒰𑒩𑒝 𑒩𑒯𑒪 𑒯𑒧𑓂𑒧𑒩 𑒁𑒣𑓂𑒣𑒢 𑒂𑒠𑒞𑒱 𑒂 𑒏𑒱𑒕𑒳 𑒋𑒏𑒩 𑒏𑒰𑒩𑒝 𑒩𑒯𑒪 𑒯𑓂𑒧𑓂𑒧𑒩 𑒋𑒏𑓂𑒮𑒲𑒛𑒹𑓀𑒙, 𑒖𑒏𑒩 𑒏𑒰𑒩𑒝𑒫𑒮 𑒯𑒧𑓂𑒧𑒩 𑒖𑒲𑒫𑒢𑒏 𑒛𑒹𑒜 𑒮𑒰𑒪 𑒥𑒳𑒗𑒰 𑒣𑒛𑓃𑒪 𑒖𑒹𑒢𑒰 𑒛𑒹𑒜𑓃 𑒠𑒱𑒢 𑒖𑒹𑒏𑒰𑒿 𑒥𑒲𑒞𑒱 𑒑𑒹𑒪 । 𑒏𑒱𑒕𑒳 𑒋𑒯𑒱 𑒥𑒰𑒞𑒏 𑒠𑒱𑒮 𑒮𑒹𑒯𑒼 𑒯𑒧𑒩 𑒡𑓂𑒨𑒰𑒢 𑒑𑒹𑒪 𑒖𑒹 𑒛𑒹𑒜 𑒮𑒰𑒪𑒧𑒹 𑒖𑒞𑒹𑒏 𑒮𑒧𑒨𑒏 𑒢𑒳𑒏𑒮𑒰𑒢 𑒦𑒹𑒪 𑒞𑒏𑒩 𑒏𑓂𑒭𑒞𑒱𑒣𑒴𑒩𑓂𑒞𑒱 𑒏𑒼𑒢𑒰 𑒏𑒋 𑒯𑒼𑒋𑒞 । 𑒞𑒐𑒢 𑒮𑒰𑒧𑒖𑒱𑒏 𑒮𑓀𑒥𑓀𑒡𑒏𑒹𑒿 𑒮𑒲𑒧𑒱𑒞 𑒏𑒩𑒥𑒰𑒏 𑒫𑒱𑒔𑒰𑒩 𑒂𑒋𑒪 । 𑒋𑒯𑒱𑒧𑒹 𑒯𑒧𑒩𑒰 𑒥𑒱𑒢 𑒣𑓂𑒩𑒨𑒰𑒮𑒏 𑒮𑒤𑒪𑒞𑒰 𑒦𑒹𑒙𑒱 𑒑𑒹𑒪 𑒕𑒪 । 𑒋𑒏𑒩 𑒏𑒰𑒩𑒝 𑒕𑒪 𑒯𑒧𑒩 𑒢𑒯𑒱 𑒐𑒞𑒧 𑒣𑓂𑒩𑒞𑒲𑒞 𑒯𑒼𑒧𑒋𑒥𑒪𑒰 𑒥𑒲𑒧𑒰𑒩𑒲 । 𑒋𑒯𑒱𑒧𑒹 𑒫𑒱𑒦𑒱𑒢𑓂𑒢 𑒛𑒰𑒏𑓂𑒙𑒩𑒏 𑒍𑒣𑒱𑒢𑒱𑒨𑒢, 𑒏𑒱𑒕𑒳 𑒑𑒪𑒞 𑒂𑒣𑒩𑒹𑒬𑒢 𑒂 𑒋𑒏𑒩 𑒮𑒧𑓂𑒧𑒱𑒪𑒱𑒞 𑒃𑒧𑓂𑒣𑓂𑒩𑒹𑒮𑒢 𑒄, 𑒖𑒹 𑒂𑒥 𑒯𑒧𑒩𑒰 𑒁𑒣𑒰𑒯𑒱𑒖𑒏 𑒖𑒲𑒫𑒢 𑒖𑒲𑒥𑒋 𑒣𑒛𑓃𑒞 । 𑒂𑒢𑒏 𑒥𑒰𑒞 𑒞𑒿 𑒕𑒼𑒛𑒴 𑒯𑒧𑒩𑒰 𑒁𑒣𑒢𑒼 𑒧𑒼𑒢𑒧𑒹 𑒄 𑒥𑒰𑒞 𑒂𑒥𑒋 𑒪𑒰𑒑𑒪 𑒕𑒪 । 𑒪𑒑𑒻𑒞 𑒕𑒪 𑒖𑒹 𑒛𑒰𑒏𑓂𑒙𑒩 𑒮𑒦 𑒤𑒴𑒮𑒱𑒨𑒰𑒯𑒱𑒿𑒏 𑒂𑒬𑓂𑒫𑒰𑒮𑒢 𑒠𑒋 𑒩𑒯𑒪 𑒁𑒕𑒱 । 𑒋𑒯𑒱 𑒏𑓂𑒩𑒧𑒧𑒹 𑒤𑒼𑒢𑒮𑒿 𑒪𑓄 𑒏𑒋 𑒯𑒰𑒪 𑒮𑒧𑒰𑒔𑒰𑒩 𑒣𑒳𑒕𑒢𑒱𑒯𑒰𑒩 𑒡𑒩𑒱𑒏 𑒮𑓀𑒐𑓂𑒨𑒰 𑒮𑒹𑒯𑒼 𑒒𑒙𑒱 𑒑𑒹𑒪 𑒕𑒪 । 𑒮𑒹 𑒖𑒐𑒢 𑒁𑒢𑒔𑒼𑒏𑓂𑒏𑒹 𑒥𑒻𑒬𑒰𑒐𑒲, 𑒤𑒹𑒩 𑒕𑒛𑓃𑒲𑒣𑒩 𑒁𑒋𑒪𑒰𑒏 𑒥𑒰𑒠 𑒯𑒧 𑒏𑒰𑒩 𑒔𑒪𑒰𑒥𑒋 𑒪𑒑𑒪𑒯𑒳𑒿 𑒞𑒿 𑒥𑒯𑒳𑒞 𑒑𑒼𑒙𑒹𑒏𑒹𑒿 𑒤𑒹𑒩 𑒮𑒿 𑒯𑒧𑒩𑒰 𑒮𑓀𑒑 𑒮𑒰𑒧𑒰𑒢𑓂𑒨 𑒮𑓀𑒥𑓀𑒡 𑒥𑒢𑒰𑒥𑒋𑒧𑒹 𑒁𑒮𑒳𑒫𑒱𑒡𑒰 𑒯𑒼𑒧𑒋 𑒪𑒑𑒪𑒢𑓂𑒯𑒱। 𑒖𑒹 𑒯𑒧𑒩𑒰𑒮𑒿 𑒠𑒴𑒩 𑒢𑒯𑒱 𑒑𑒹𑒪 𑒩𑒯𑒟𑒱 𑒞𑒢𑒱𑒏𑒰𑒮𑒿 𑒞𑒿 𑒯𑒧 𑒖𑒥𑒩𑓂𑒠𑒮𑓂𑒞𑒲𑒨𑒼 𑒮𑓀𑒥𑓀𑒡 𑒩𑒐𑒪𑒯𑒳𑒿 𑒧𑒳𑒠𑒰 𑒠𑒼𑒮𑒩 𑒠𑒱𑒬𑒱 𑒑𑒹𑒪 𑒪𑒼𑒏𑒮𑒿 𑒯𑒧𑒩 𑒫𑓂𑒨𑒫𑒯𑒰𑒩 𑒢𑒱𑒩𑒣𑒹𑒏𑓂𑒭 𑒩𑒯𑒻𑒞 𑒕𑒪, 𑒮𑒹 𑒣𑒳𑒢𑓁𑒮𑓀𑒥𑓀𑒡 𑒥𑒢𑒹𑒥𑒰𑒮𑒿 𑒪𑒼𑒏 𑒯𑒞𑒼𑒞𑓂𑒮𑒰𑒯𑒱𑒞 𑒩𑒯𑒋 𑒪𑒑𑒪𑒰𑒯 । 𑒠𑒳𑒩𑓂𑒠𑒱𑒢𑒧𑒹 𑒖𑒹 𑒯𑒧𑒩𑒰𑒣𑒩 𑒯𑒿𑒮𑒟𑒱 𑒞𑒢𑒱𑒏𑒩 𑒣𑓂𑒩𑒞𑒱 𑒄 𑒫𑓂𑒨𑒫𑒯𑒰𑒩 𑒮𑒯𑒰𑒢𑒦𑒴𑒞𑒱𑒣𑓂𑒩𑒠𑒯𑒱 𑒧𑒰𑒢𑒪 𑒖𑒋𑒞 । 𑒋𑒯𑒱𑒮𑒿 𑒮𑒧𑒨𑒡𑒩𑒱 𑒐𑒴𑒥 𑒥𑒔𑒋 𑒪𑒰𑒑𑒪। 𑒬𑒳𑒩𑒳𑒧𑒹 𑒞𑒿 𑒪𑒰𑒑𑒪 𑒖𑒹𑒢𑒰 𑒂𑒤𑒱𑒮𑒧𑒹 𑒏𑓂𑒨𑒼 𑒔𑒱𑒢𑓂𑒯𑒞 𑒂𑒏𑒱 𑒢𑒯𑒱 । 𑒧𑒳𑒠𑒰 𑒖𑒐𑒢 𑒯𑒧 𑒂𑒤𑒱𑒮 𑒣𑒯𑒳𑒿𑒔𑒪𑒯𑒳𑒿 𑒞𑒿 𑒪𑒰𑒑𑒪 𑒖𑒹𑒢𑒰 𑒯𑒲𑒩𑒼 𑒖𑒹𑒏𑒰𑒿 𑒮𑓂𑒫𑒰𑒑𑒞 𑒦𑒹𑒪 𑒯𑒼𑒁𑒋 । 𑒧𑒳𑒠𑒰 𑒋𑒯𑒱𑒧𑒹 𑒄 𑒥𑒰𑒞 𑒮𑓀𑒑𑒲-𑒮𑒰𑒟𑒲 𑒮𑒦 𑒢𑒳𑒏𑒰 𑒪𑒹𑒪𑒏 𑒖𑒹 𑒯𑒧𑒩 𑒕𑒛𑓃𑒲 𑒮𑒿 𑒔𑒪𑒢𑒰𑒃 𑒯𑒳𑒢𑒏𑒰 𑒮𑒦𑒏 𑒦𑒲𑒞𑒩 𑒯𑒰𑒯𑒰𑒏𑒰𑒩 𑒧𑒔𑒰 𑒩𑒯𑒪 𑒕𑒪𑒢𑓂𑒯𑒱 । 𑒮𑒦 𑒧𑒰𑒞𑓂𑒩 𑒯𑒧𑒩 𑒯𑒱𑒧𑓂𑒧𑒞𑒏 𑒣𑓂𑒩𑒬𑓀𑒮𑒰 𑒏𑒩𑒻𑒞 𑒩𑒯𑒻𑒞 𑒕𑒪𑒰𑒯 । 𑒖𑒐𑒢 𑒯𑒧 𑒕𑒛𑓃𑒲 𑒕𑒼𑒛𑓃𑒱 𑒏𑒋 𑒔𑒪𑒋 𑒪𑒑𑒪𑒯𑒳𑒿 𑒞𑒐𑒢 𑒋𑒏 𑒑𑒼𑒙𑒹 𑒮𑓀𑒑𑒲 𑒏𑒯𑒪𑒏 𑒖𑒹 𑒂𑒥 𑒁𑒯𑒰𑒿 𑒣𑒳𑒩𑒢𑒏𑒰 𑒩𑒴𑒣𑒧𑒹 𑒒𑒳𑒩𑒱 𑒩𑒯𑒪 𑒕𑒲 । 𑒋𑒯𑒱 𑒥𑒰𑒞𑒏𑒹𑒿 𑒯𑒧 𑒒𑒩𑒣𑒩 𑒂𑒥𑒱 𑒏𑓄 𑒮𑒼𑒔𑒋 𑒪𑒑𑒪𑒯𑒳𑒿 । 𑒁𑒣𑒢 𑒔𑒪𑒋 𑒏𑒹𑒩 𑒤𑒼𑒙𑒼𑒏𑒹𑒿 𑒣𑒞𑓂𑒢𑒲𑒏 𑒧𑒠𑒞𑒱 𑒮𑒿 𑒯𑒻𑒝𑓂𑒛𑒲𑒏𑒻𑒧 𑒠𑓂𑒫𑒰𑒩𑒰 𑒫𑒲𑒨𑒼𑒛𑒲𑒑𑓂𑒩𑒰𑒤𑒲 𑒏𑒩𑒥𑒋𑒪𑒯𑒳𑒿 । 𑒋𑒏𑒥𑒹𑒩 𑒞𑒿 𑒮𑒢𑓂𑒢 𑒩𑒯𑒱 𑒑𑒹𑒪𑒯𑒳𑒿 । 𑒔𑒪𑒥𑒰𑒏 𑒞𑒩𑒲𑒏𑒰 𑒂𑒥𑒼 𑒢𑒹𑒿𑒑𑒛𑓃𑒰 𑒏𑒋 𑒠𑒾𑒑𑒥 𑒮𑒢 𑒪𑒰𑒑𑒪 𑒕𑒪 । 𑒣𑒯𑒱𑒢𑒹 𑒞𑒿 𑒂𑒩 𑒥𑒹𑒬𑒲 𑒯𑒼𑒋𑒞 𑒧𑒳𑒠𑒰 𑒮𑓀𑒑𑒲 𑒮𑒦 𑒋𑒏𑒼 𑒩𑒞𑓂𑒞𑒲 𑒣𑒞𑒰 𑒡𑒩𑒱 𑒢𑒯𑒱 𑒔𑒪𑒋 𑒠𑒹𑒪𑒏 । 𑒥𑒰𑒠𑒧𑒹 𑒒𑒩𑒏 𑒪𑒼𑒏 𑒏𑒯𑒪𑒏 𑒖𑒹 𑒄 𑒞𑒿 𑒥𑒛𑓂𑒛 𑒏𑒧 𑒁𑒕𑒱, 𑒣𑒯𑒱𑒢𑒹 𑒞𑒿 𑒂𑒩 𑒥𑒹𑒮𑒲 𑒕𑒪 । 𑒞𑒐𑒢 𑒯𑒧𑒩𑒰 𑒥𑒳𑒗𑒥𑒰𑒧𑒹 𑒂𑒋𑒪 𑒖𑒹 𑒮𑓀𑒑𑒲𑒮𑒦 𑒂 𑒍 𑒮𑒦 𑒖𑒹 𑒯𑒧𑒩𑒰𑒮𑒿 𑒪𑒑𑒰𑒫 𑒁𑒢𑒳𑒦𑒫 𑒏𑒩𑒻𑒞 𑒕𑒪𑒰𑒯, 𑒞𑒢𑒱𑒏𑒰 𑒏𑒞𑒹𑒏 𑒐𑒩𑒰𑒥 𑒪𑒑𑒻𑒞 𑒯𑒼𑒋𑒞𑒢𑓂𑒯𑒱 । 𑒞𑒏𑒩𑒰 𑒥𑒰𑒠 𑒯𑒧𑒩𑒰 𑒯𑒳𑒢𑒏𑒩 𑒮𑒦𑒏 𑒣𑓂𑒩𑒼𑒞𑓂𑒮𑒰𑒯𑒢 𑒂 𑒯𑒧𑒩 𑒯𑒱𑒧𑓂𑒧𑒞𑒱𑒏 𑒣𑓂𑒩𑒬𑓀𑒮𑒰 𑒏𑒩𑒻𑒞 𑒩𑒯𑒥𑒰𑒏 𑒩𑒯𑒮𑓂𑒨𑒏 𑒣𑒞𑒰 𑒔𑒪𑒪 । 𑒁𑒣𑒢 𑒣𑓂𑒩𑒰𑒩𑒧𑓂𑒦𑒱𑒏 𑒖𑒲𑒫𑒢𑒏 𑒋𑒏𑒰𑒏𑒲𑒣𑒢 𑒂 𑒢𑒾𑒏𑒩𑒲-𑒔𑒰𑒏𑒩𑒲 𑒣𑒏𑒛𑓃𑒪𑒰𑒏 𑒥𑒰𑒠 𑒮𑒰𑒩𑓂𑒫𑒖𑒢𑒱𑒏 𑒖𑒲𑒫𑒢𑒧𑒹 𑒁𑒪𑒑-𑒟𑒪𑒑 𑒣𑒛𑓃𑒱 𑒖𑒋𑒥𑒰𑒏 𑒮𑓀𑒠𑒹𑒯, 𑒂𑒬𑒰, 𑒁𑒣𑒹𑒏𑓂𑒭𑒰 𑒏𑒱𑓀𑒫𑒰 𑒁𑒢𑒳𑒦𑒫𑒏 𑒥𑒰𑒠 𑒖𑒹 𑒋𑒯𑒱 𑒞𑒩𑒯𑒏 𑒁𑒢𑒳𑒦𑒫 𑒦𑒹𑒪 𑒮𑒹 𑒯𑒧𑒩 𑒫𑓂𑒨𑒏𑓂𑒞𑒱𑒞𑓂𑒫𑒏 𑒦𑒱𑒢𑓂𑒢 𑒫𑒱𑒏𑒰𑒮𑒏𑒹𑒿 𑒂𑒩 𑒠𑒵𑒜𑓃𑒞𑒰 𑒣𑓂𑒩𑒠𑒰𑒢 𑒏𑒹𑒪𑒏”।
𑒏𑒻𑒏𑒙𑒰 𑒂𑒣𑒹𑒩𑒹𑒬𑒢 𑒦𑒹𑒪𑒢𑓂𑒯𑒱 𑒂 𑒁𑒢𑒹𑒮𑓂𑒟𑒱𑒬𑒱𑒨𑒰𑒮𑒿 𑒥𑒰𑒯𑒩 𑒁𑒥𑒻𑒞 𑒏𑒰𑒪 𑒂𑒩𑒳𑒝𑒱𑒏𑒹𑒿 𑒪𑒰𑒑𑒢𑓂𑒯𑒱 𑒖𑒹 𑒍 𑒗𑒼𑒿𑒙𑒰 𑒥𑒪𑒰 𑒮𑒯𑒮𑓂𑒩𑒥𑒰𑒜𑓃𑒢𑒱 𑒗𑒧𑒰𑒩𑒱 𑒏𑒋 𑒋𑒯𑒱 𑒫𑒱𑒬𑓂𑒫𑒧𑒹 𑒤𑒹𑓀𑒏𑒱 𑒠𑒻𑒞 𑒕𑒢𑓂𑒯𑒱 𑒯𑒳𑒢𑒏𑒰 ।𑒧𑒵𑒞𑓂𑒨𑒳 𑒣𑒩 𑒫𑒱𑒖𑒨 𑒏𑒋𑒪𑒢𑓂𑒯𑒱 𑒂𑒩𑒳𑒝𑒱। 𑒧𑒳𑒠𑒰 𑒛𑒹𑒜𑓃 𑒥𑒩𑒐 𑒥𑒰𑒠 𑒖𑒐𑒢 𑒂𑒤𑒱𑒮 𑒁𑒋𑒪𑒰𑒯 𑒞𑒐𑒢 𑒪𑒼𑒏𑒏𑒹𑒿 𑒫𑒱𑒬𑓂𑒫𑒰𑒮𑒹 𑒢𑒯𑒱 𑒦𑒹𑒪𑒻𑒏। 𑒧𑒳𑒐 𑒣𑒩 𑒫𑒻𑒯 𑒔𑒱𑒩𑒣𑒩𑒱𑒔𑒱𑒞 𑒯𑒿𑒮𑒲। 𑒪𑒼𑒏 𑒮𑒦 𑒞𑒿 𑒄𑒯𑒼 𑒏𑒯𑒻𑒞 𑒕𑒪 𑒖𑒹 𑒄 𑒋𑒏𑓂𑒮𑒲𑒛𑒹𑓀𑒙 𑒦𑒹𑒪 𑒢𑒯𑒱 𑒕𑒪 𑒫𑒩𑒢𑓂 𑒏𑒩𑒥𑒰𑒍𑒪 𑒑𑒹𑒪 𑒕𑒪। 𑒏𑒰𑒩𑒝 𑒢𑒫𑒪𑒏 𑒋𑒏𑓂𑒮𑒲𑒛𑒹𑓀𑒙 𑒖𑒹𑒏𑒰𑒿 𑒕𑒪 𑒄 𑒋𑒏𑓂𑒮𑒲𑒛𑒹𑓀𑒙।
Friday, October 21, 2022
गजेन्द्र ठाकुर -उपन्यास-सहस्रबाढ़नि
Subscribe to:
Post Comments (Atom)
-
"भालसरिक गाछ" Post edited multiple times to incorporate all Yahoo Geocities "भालसरिक गाछ" materials from 2000 onwards as...
-
जेठक दुपहरि बारहो कलासँ उगिलि उगिलि भीषण ज्वाला आकाश चढ़ल दिनकर त्रिभुवन डाहथि जरि जरि पछबा प्रचण्ड बिरड़ो उदण्ड सन सन सन सन...
-
खंजनि चलली बगढड़ाक चालि, अपनो चालि बिसरली अपन वस्तुलक परित्याकग क’ आनक अनुकरण कयलापर अपनो व्यिवहार बिसरि गेलापर व्यंपग्यय। खइनी अछि दुइ मो...
No comments:
Post a Comment
"विदेह" प्रथम मैथिली पाक्षिक ई पत्रिका http://www.videha.co.in/:-
सम्पादक/ लेखककेँ अपन रचनात्मक सुझाव आ टीका-टिप्पणीसँ अवगत कराऊ, जेना:-
1. रचना/ प्रस्तुतिमे की तथ्यगत कमी अछि:- (स्पष्ट करैत लिखू)|
2. रचना/ प्रस्तुतिमे की कोनो सम्पादकीय परिमार्जन आवश्यक अछि: (सङ्केत दिअ)|
3. रचना/ प्रस्तुतिमे की कोनो भाषागत, तकनीकी वा टंकन सम्बन्धी अस्पष्टता अछि: (निर्दिष्ट करू कतए-कतए आ कोन पाँतीमे वा कोन ठाम)|
4. रचना/ प्रस्तुतिमे की कोनो आर त्रुटि भेटल ।
5. रचना/ प्रस्तुतिपर अहाँक कोनो आर सुझाव ।
6. रचना/ प्रस्तुतिक उज्जवल पक्ष/ विशेषता|
7. रचना प्रस्तुतिक शास्त्रीय समीक्षा।
अपन टीका-टिप्पणीमे रचना आ रचनाकार/ प्रस्तुतकर्ताक नाम अवश्य लिखी, से आग्रह, जाहिसँ हुनका लोकनिकेँ त्वरित संदेश प्रेषण कएल जा सकय। अहाँ अपन सुझाव ई-पत्र द्वारा editorial.staff.videha@gmail.com पर सेहो पठा सकैत छी।
"विदेह" मानुषिमिह संस्कृताम् :- मैथिली साहित्य आन्दोलनकेँ आगाँ बढ़ाऊ।- सम्पादक। http://www.videha.co.in/
पूर्वपीठिका : इंटरनेटपर मैथिलीक प्रारम्भ हम कएने रही 2000 ई. मे अपन भेल एक्सीडेंट केर बाद, याहू जियोसिटीजपर 2000-2001 मे ढेर रास साइट मैथिलीमे बनेलहुँ, मुदा ओ सभ फ्री साइट छल से किछु दिनमे अपने डिलीट भऽ जाइत छल। ५ जुलाई २००४ केँ बनाओल “भालसरिक गाछ” जे http://gajendrathakur.blogspot.com/ पर एखनो उपलब्ध अछि, मैथिलीक इंटरनेटपर प्रथम उपस्थितिक रूपमे अखनो विद्यमान अछि। फेर आएल “विदेह” प्रथम मैथिली पाक्षिक ई-पत्रिका http://www.videha.co.in/पर। “विदेह” देश-विदेशक मैथिलीभाषीक बीच विभिन्न कारणसँ लोकप्रिय भेल। “विदेह” मैथिलक लेल मैथिली साहित्यक नवीन आन्दोलनक प्रारम्भ कएने अछि। प्रिंट फॉर्ममे, ऑडियो-विजुअल आ सूचनाक सभटा नवीनतम तकनीक द्वारा साहित्यक आदान-प्रदानक लेखकसँ पाठक धरि करबामे हमरा सभ जुटल छी। नीक साहित्यकेँ सेहो सभ फॉरमपर प्रचार चाही, लोकसँ आ माटिसँ स्नेह चाही। “विदेह” एहि कुप्रचारकेँ तोड़ि देलक, जे मैथिलीमे लेखक आ पाठक एके छथि। कथा, महाकाव्य,नाटक, एकाङ्की आ उपन्यासक संग, कला-चित्रकला, संगीत, पाबनि-तिहार, मिथिलाक-तीर्थ,मिथिला-रत्न, मिथिलाक-खोज आ सामाजिक-आर्थिक-राजनैतिक समस्यापर सारगर्भित मनन। “विदेह” मे संस्कृत आ इंग्लिश कॉलम सेहो देल गेल, कारण ई ई-पत्रिका मैथिलक लेल अछि, मैथिली शिक्षाक प्रारम्भ कएल गेल संस्कृत शिक्षाक संग। रचना लेखन आ शोध-प्रबंधक संग पञ्जी आ मैथिली-इंग्लिश कोषक डेटाबेस देखिते-देखिते ठाढ़ भए गेल। इंटरनेट पर ई-प्रकाशित करबाक उद्देश्य छल एकटा एहन फॉरम केर स्थापना जाहिमे लेखक आ पाठकक बीच एकटा एहन माध्यम होए जे कतहुसँ चौबीसो घंटा आ सातो दिन उपलब्ध होअए। जाहिमे प्रकाशनक नियमितता होअए आ जाहिसँ वितरण केर समस्या आ भौगोलिक दूरीक अंत भऽ जाय। फेर सूचना-प्रौद्योगिकीक क्षेत्रमे क्रांतिक फलस्वरूप एकटा नव पाठक आ लेखक वर्गक हेतु, पुरान पाठक आ लेखकक संग, फॉरम प्रदान कएनाइ सेहो एकर उद्देश्य छ्ल। एहि हेतु दू टा काज भेल। नव अंकक संग पुरान अंक सेहो देल जा रहल अछि। विदेहक सभटा पुरान अंक pdf स्वरूपमे देवनागरी, मिथिलाक्षर आ ब्रेल, तीनू लिपिमे, डाउनलोड लेल उपलब्ध अछि आ जतए इंटरनेटक स्पीड कम छैक वा इंटरनेट महग छैक ओतहु ग्राहक बड्ड कम समयमे ‘विदेह’ केर पुरान अंकक फाइल डाउनलोड कए अपन कंप्युटरमे सुरक्षित राखि सकैत छथि आ अपना सुविधानुसारे एकरा पढ़ि सकैत छथि।
मुदा ई तँ मात्र प्रारम्भ अछि।
अपन टीका-टिप्पणी एतए पोस्ट करू वा अपन सुझाव ई-पत्र द्वारा editorial.staff.videha@gmail.com पर पठाऊ।