गजेन्द्र ठाकुर प्रबन्ध-निबन्ध-समालोचना

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩 𑒣𑓂𑒩𑒥𑒢𑓂𑒡-𑒢𑒱𑒥𑒢𑓂𑒡-𑒮𑒧𑒰𑒪𑒼𑒔𑒢𑒰


𑒣𑓂𑒩𑒥𑒢𑓂𑒡 𑒢𑒱𑒥𑒢𑓂𑒡 𑒮𑒧𑒰𑒪𑒼𑒔𑒢𑒰
𑒤𑒲𑒪𑓂𑒛-𑒫𑒩𑓂𑒏𑒣𑒩 𑒂𑒡𑒰𑒩𑒱𑒞 𑒐𑒱𑒮𑓂𑒮𑒰 𑒮𑒲𑒞-𑒥𑒮𑓀𑒞 𑓑.𑓓
𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩𑒏 𑒃𑒞𑒱𑒯𑒰𑒮 𑒥𑒼𑒡-𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔/ 𑒧𑓀𑒞𑓂𑒩𑒣𑒳𑒞𑓂𑒩/
𑒣𑒳𑒩𑒼𑒯𑒱𑒞 𑒂 𑒮𑓂𑒞𑓂𑒩𑒲-𑒡𑒢 𑒏𑒹𑒩 𑒮𑓀𑒠𑒩𑓂𑒦𑒧𑒹 𑓑.𑓑𑓒
𑒏𑒹𑒠𑒰𑒩𑒢𑒰𑒟 𑒔𑒾𑒡𑒩𑒲𑒏 𑒅𑒣𑒢𑓂𑒨𑒰𑒮 “𑒔𑒧𑒹𑒪𑒲 𑒩𑒰𑒢𑒲” 𑒂 "𑒧𑒰𑒯𑒳𑒩" 𑓑.𑓓𑓔
𑒢𑒔𑒱𑒏𑒹𑒞𑒰𑒏 𑒢𑒰𑒙𑒏 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑓑.𑓓𑓘
𑒩𑒔𑒢𑒰 𑒪𑒱𑒐𑒥𑒰𑒮𑒿 𑒣𑒯𑒱𑒢𑒹............... 𑓑.𑓔𑓗
𑒏𑒵𑒭𑒱-𑒧𑒞𑓂𑒮𑓂𑒨 𑒬𑒥𑓂𑒠𑒰𑒫𑒪𑒲 (𑒤𑒲𑒪𑓂𑒛-𑒫𑒩𑓂𑒏𑒣𑒩 𑒂𑒡𑒰𑒩𑒱𑒞) 𑓑.𑓘𑓗
𑒧𑒻𑒟𑒱𑒪𑒲 𑒯𑒰𑒃𑒏𑒴/ 𑒯𑒻𑒏𑒴/ 𑒏𑓂𑒭𑒝𑒱𑒏𑒰 𑓑.𑓙𑓑
𑒧𑒱𑒟𑒱𑒪𑒰𑒏 𑒥𑒰𑒜𑓃𑒱 𑓑.𑓙𑓕
𑒫𑒱𑒮𑓂𑒧𑒵𑒞 𑒏𑒫𑒱- 𑒣𑓀. 𑒩𑒰𑒧𑒖𑒲 𑒔𑒾𑒡𑒩𑒲 (𑓑𑓘𑓗𑓘-𑓑𑓙𑓕𑓒) 𑓑.𑓑𑓐𑓐
𑒫𑒱𑒠𑓂𑒨𑒰𑒣𑒞𑒱𑒏 𑒥𑒱𑒠𑒹𑒮𑒱𑒨𑒰- 𑒣𑒱𑒂 𑒠𑒹𑒮𑒰𑒿𑒞𑒩 𑓑.𑓑𑓑𑓗
𑒥𑒢𑒻𑒞-𑒥𑒱𑒑𑒛𑓃𑒻𑒞-𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒏 𑒏𑒟𑒰 𑒮𑓀𑒑𑓂𑒩𑒯𑒏 𑒮𑒧𑒲𑒏𑓂𑒭𑒰 𑓑.𑓑𑓒𑓔
𑒦𑒰𑒭𑒰 𑒂 𑒣𑓂𑒩𑒾𑒠𑓂𑒨𑒼𑒑𑒱𑒏𑒲 (𑒮𑓀𑒑𑒝𑒏, 𑒕𑒰𑒨𑒰𑓀𑒏𑒢, 𑒏𑒳𑒿𑒖𑒲 𑒣𑒙𑒪/𑒙𑓀𑒏𑒝𑒏 𑒞𑒏𑒢𑒲𑒏),
𑒁𑒢𑓂𑒞𑒩𑓂𑒖𑒰𑒪𑒣𑒩 𑒧𑒻𑒟𑒱𑒪𑒲 𑒂 𑒫𑒱𑒬𑓂𑒫𑒫𑓂𑒨𑒰𑒣𑒲 𑒁𑒢𑓂𑒞𑒩𑓂𑒖𑒰𑒪𑒣𑒩 𑒪𑒹𑒐𑒢 𑒂 𑒄-𑒣𑓂𑒩𑒏𑒰𑒬𑒢 𑓑.𑓑𑓔𑓑
𑒪𑒼𑒩𑒱𑒏 𑒑𑒰𑒟𑒰𑒧𑒹 𑒮𑒧𑒰𑒖 𑒍 𑒮𑓀𑒮𑓂𑒏𑒵𑒞𑒱 𑓑.𑓑𑓔𑓙
𑒧𑒱𑒟𑒱𑒪𑒰𑒏 𑒐𑒼𑒖 𑓑.𑓑𑓕𑓔



𑒤𑒲𑒪𑓂𑒛-𑒫𑒩𑓂𑒏𑒣𑒩 𑒂𑒡𑒰𑒩𑒱𑒞 𑒐𑒱𑒮𑓂𑒮𑒰 𑒮𑒲𑒞-𑒥𑒮𑓀𑒞
𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩 (𑒑𑒰𑒧, 𑒧𑒹𑓀𑒯𑒟, 𑒦𑒰𑒨𑒰-𑒗𑓀𑒗𑒰𑒩𑒣𑒳𑒩, 𑒖𑒱𑒪𑒰-𑒧𑒡𑒳𑒥𑒢𑒲) 𑒫𑒱𑒬𑒹𑒭 𑒮𑒯𑒨𑒼𑒑 𑒬𑓂𑒩𑒲 𑒏𑒹𑒬𑒫 𑒧𑒯𑒞𑒼 (𑒥𑒯𑒰𑒠𑒳𑒩𑒑𑓀𑒖, 𑒖𑒱𑒪𑒰 𑒏𑒱𑒬𑒢𑒑𑓀𑒖, 𑒥𑒱𑒯𑒰𑒩)
𑒋𑒯𑒱 𑒏𑓂𑒭𑒹𑒞𑓂𑒩𑒏𑒰𑒩𑓂𑒨𑒏 𑒮𑒴𑒔𑒏 𑒬𑓂𑒩𑒲 𑒏𑒹𑒬𑒫 𑒧𑒯𑒞𑒼 𑒮𑒲𑒞 𑒥𑒮𑓀𑒞𑒏 𑒤𑒲𑒪𑓂𑒛𑒫𑒩𑓂𑒏𑒧𑒹 𑒫𑒱𑒬𑒹𑒭 𑒮𑒯𑒨𑒼𑒑𑒏 𑒏𑒰𑒩𑒝 𑒋𑒯𑒱 𑒣𑓂𑒩𑒥𑒢𑓂𑒡𑒏 𑒮𑒯-𑒪𑒹𑒐𑒏 𑒕𑒟𑒱।𑒮𑒲𑒞 𑒥𑒮𑓀𑒞𑒏 𑒏𑒟𑒰𑒏 𑒏𑒻𑒏 𑒙𑒰 𑒫𑒱𑒦𑒱𑒢𑓂𑒢 𑒩𑒴𑒣 𑒣𑒰𑒍𑒪 𑒑𑒹𑒪 𑒂 𑒍𑒯𑒱 𑒮𑒦𑒏 𑒫𑒱𑒫𑒩𑒝 𑒨𑒟𑒰𑒮𑓂𑒟𑒰𑒢 𑒠𑒹𑒪 𑒑𑒹𑒪 𑒁𑒕𑒱। 𑒮𑒧𑒰𑒖 𑒂 𑒮𑓀𑒮𑓂𑒏𑒵𑒞𑒱𑒏𑒹𑒿 𑒥𑒳𑒗𑒥𑒰𑒧𑒹 𑒪𑒼𑒏 𑒏𑒟𑒰𑒏 𑒥𑒛𑓂𑒛 𑒧𑒯𑒞𑓂𑒫 𑒁𑒕𑒱, 𑒧𑒳𑒠𑒰 𑒥𑒱𑒢𑒰 𑒤𑒲𑒪𑓂𑒛-𑒫𑒩𑓂𑒏 𑒏𑒋𑒢𑒹 𑒪𑒱𑒐𑒪 𑒪𑒼𑒏𑒏𑒟𑒰 𑒁𑒣𑒢 𑒅𑒠𑓂𑒠𑒹𑒬𑓂𑒨 𑒣𑓂𑒩𑒰𑒣𑓂𑒞𑒱𑒧𑒹 𑒁𑒮𑒧𑒩𑓂𑒟 𑒩𑒯𑒻𑒞 𑒁𑒕𑒱। 𑒬𑓂𑒩𑒲 𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒖𑒲𑒏 𑒯𑒧 𑒮𑒹𑒯𑒼 𑒂𑒦𑒰𑒩𑒲 𑒕𑒲 𑒖𑒱𑒢𑒏𑒩 𑒋𑒯𑒱 𑒫𑒱𑒭𑒨𑒏 𑒂𑒪𑒹𑒐 (𑒤𑒲𑒪𑓂𑒛𑒫𑒩𑓂𑒏 𑒂 𑒪𑒼𑒏𑒏𑒟𑒰𑒣𑒩) 𑒋𑒏𑒙𑒰 𑒮𑒹𑒧𑒲𑒢𑒰𑒩𑒧𑒹 𑒮𑒳𑒢𑒪𑒰𑒏 𑒥𑒰𑒠 𑒯𑒧 𑒂𑒩 𑒞𑒢𑓂𑒧𑒨𑒞𑒰𑒮𑒿 𑒋𑒯𑒱 𑒏𑒰𑒩𑓂𑒨𑒧𑒹 𑒪𑒰𑒑𑒱 𑒑𑒹𑒪𑒯𑒳𑒿।
𑒋𑒯𑒱 𑒏𑓂𑒭𑒹𑒞𑓂𑒩𑒏𑒰𑒩𑓂𑒨𑒧𑒹 𑒂𑒡𑒳𑒢𑒱𑒏 𑒤𑒲𑒪𑓂𑒛𑒫𑒩𑓂𑒏 𑒞𑒏𑒢𑒲𑒏 𑒏𑒹𑒩 𑒅𑒣𑒨𑒼𑒑 𑒏𑒋𑒪 𑒑𑒹𑒪 𑒂 𑒮𑒯𑒦𑒰𑒑𑒱𑒞𑒰, 𑒣𑓂𑒩𑒹𑒏𑓂𑒭𑒝, 𑒮𑒰𑒏𑓂𑒭𑒰𑒞𑓂𑒏𑒰𑒩, 𑒣𑓂𑒩𑒬𑓂𑒢𑒰𑒫𑒪𑒲 𑒃𑒞𑓂𑒨𑒰𑒠𑒱𑒏 𑒂𑒡𑒰𑒩𑒣𑒩 𑒄 𑒪𑒼𑒏𑒏𑒟𑒰 𑒢𑒱𑒩𑓂𑒧𑒱𑒞 𑒦𑒹𑒪 𑒁𑒕𑒱। 𑒪𑒼𑒏𑒏𑒟𑒰-𑒏𑒫𑒱𑒞𑒰𑒏 𑒏𑒼𑒢𑒼 𑒮𑓂𑒫𑒩𑒴𑒣𑒧𑒹 𑒏𑒼𑒢𑒼 𑒣𑒩𑒱𑒫𑒩𑓂𑒞𑓂𑒞𑒢 𑒁𑒫𑒻𑒖𑓂𑒘𑒰𑒢𑒱𑒏 𑒁𑒕𑒱 𑒂 𑒞𑒏𑒩 𑒡𑓂𑒨𑒰𑒢 𑒋𑒞𑒋 𑒩𑒰𑒐𑒪 𑒑𑒹𑒪 𑒁𑒕𑒱 ।
𑒧𑒝𑒲𑒣𑒳𑒩 𑒢𑒑𑒩𑒏 𑒩𑒰𑒖𑒰 𑒧𑒯𑒹𑒬𑓂𑒫𑒩 𑒮𑒱𑓀𑒯 𑒕𑒪𑒰𑒯।
𑒍 𑒥𑒛𑓂𑒛 𑒣𑓂𑒩𑒞𑒰𑒣𑒲 𑒩𑒰𑒖𑒰 𑒕𑒪𑒰𑒯। 𑒍 𑒥𑒛𑓂𑒛 𑒢𑒱𑒏𑒹𑒢𑒰𑒮𑒿 𑒩𑒰𑒖𑓂𑒨 𑒔𑒪𑒰 𑒩𑒯𑒪 𑒕𑒪𑒰𑒯।
𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍𑒯𑒱 𑒩𑒰𑒖𑒰𑒏𑒹𑒿 𑒠𑒴 𑒙𑒰 𑒥𑒹𑒙𑒰 𑒖𑒢𑓂𑒧 𑒪𑒹𑒪𑒏।
𑒍𑒏𑒩 𑒩𑒰𑒢𑒲 𑒮𑒹𑒯𑒼 𑒥𑒛𑓂𑒛 𑒮𑒳𑒬𑒲𑒪 𑒂 𑒮𑓂𑒫𑒰𑒦𑒱𑒧𑒰𑒢𑒲 𑒕𑒪𑒲𑒯।
𑒋𑒏 𑒥𑒹𑒩𑒳𑒏𑒰 𑒑𑒣 𑒁𑒕𑒱।
𑒩𑒰𑒢𑒲 𑒁𑒣𑒢 𑒧𑒯𑒪𑒧𑒹 𑒩𑒯𑒻𑒞 𑒕𑒪𑒲𑒯 𑒂 𑒥𑒯𑒳𑒞 𑒠𑒱𑒢𑒮𑒿 𑒍𑒯𑒱 𑒧𑒯𑒪𑒧𑒹 𑒠𑒴 𑒙𑒰 𑒣𑒾𑒩𑒏𑒲 𑒔𑒱𑒛𑓃𑒻 𑒐𑒼𑒞𑒰 𑒥𑒢𑒰 𑒏𑒋 𑒩𑒯𑒻𑒞 𑒕𑒪। 𑒋𑒏 𑒠𑒱𑒢 𑒍 𑒁𑒣𑒢 𑒐𑒼𑒞𑒰𑒧𑒹 𑒠𑒴 𑒙𑒰 𑒁𑓀𑒛𑒰 𑒠𑒹𑒪𑒏। 𑒁𑓀𑒛𑒰𑒮𑒿 𑒠𑒴 𑒙𑒰 𑒥𑒔𑓂𑒔𑒰 𑒥𑒯𑒰𑒩 𑒦𑒹𑒪। 𑒋𑒏 𑒠𑒱𑒢 𑒁𑒢𑒔𑒼𑒏𑓂𑒏𑒹𑒧𑒹 𑒍𑒯𑒱 𑒥𑒔𑓂𑒔𑒰 𑒮𑒦𑒏 𑒧𑒰𑒋 𑒧𑒩𑒱 𑒑𑒹𑒪। 𑒞𑒏𑒩 𑒥𑒰𑒠 𑒣𑒾𑒩𑒏𑒲 𑒮𑒦𑒏𑒹𑒿 𑒥𑒛𑓂𑒛 𑒏𑒭𑓂𑒙 𑒯𑒼𑒧𑒋 𑒪𑒑𑒪𑒻𑒏। 𑒍𑒏𑒩 𑒥𑒰𑒣 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒋𑒏𑒙𑒰 𑒥𑒼𑒢𑒮𑒿 𑒋𑒏𑒙𑒰 𑒣𑒾𑒩𑒏𑒲𑒏𑒹𑒿 𑒥𑒱𑒨𑒰𑒯 𑒏𑒋 𑒂𑒢𑒱 𑒪𑒹𑒪𑒏। 𑒞𑒏𑒩 𑒥𑒰𑒠 𑒠𑒴-𑒔𑒰𑒩𑒱 𑒠𑒱𑒢 𑒏𑒼𑒢𑒼 𑒞𑒩𑒯𑒹𑒿 𑒥𑒲𑒞𑒪। 𑒞𑒏𑒩 𑒥𑒰𑒠 𑒋𑒏 𑒠𑒱𑒢 𑒣𑒾𑒩𑒏𑒲𑒏 𑒏𑒢𑒱𑒨𑒰𑒿 𑒍𑒯𑒱 𑒠𑒳𑒢𑒴 𑒥𑒔𑓂𑒔𑒰𑒏𑒹𑒿 𑒐𑒹𑒢𑒰𑒃 𑒐𑒳𑒁𑒋𑒪𑒰 𑒏𑒰𑒪 𑒧𑒳𑒿𑒯𑒧𑒹 𑒏𑒰𑒿𑒙 𑒡𑓄 𑒠𑒹𑒪𑒏। 𑒍 𑒠𑒳𑒢𑒴 𑒥𑒔𑓂𑒔𑒰 𑒍𑒯𑒲 𑒏𑒰𑒪 𑒧𑒩𑒱 𑒑𑒹𑒪। 𑒧𑒩𑒪𑒰𑒏 𑒥𑒰𑒠 𑒍 𑒐𑒼𑒞𑒰𑒮𑒿 𑒠𑒳𑒢𑒴 𑒥𑒔𑓂𑒔𑒰𑒏𑒹𑒿 𑒪𑒼𑒪𑒮𑒿 𑒡𑒏𑒹𑒪 𑒏𑓄 𑒢𑒲𑒔𑒰𑒿 𑒐𑒮𑒰 𑒠𑒹𑒪𑒏। 𑒍𑒯𑒱 𑒮𑒧𑒨 𑒩𑒰𑒢𑒲 𑒧𑒯𑒪𑒧𑒹 𑒕𑒪𑒲𑒯 𑒂 𑒥𑒔𑓂𑒔𑒰 𑒮𑒦𑒏𑒹𑒿 𑒐𑒮𑒥𑒻𑒞 𑒍 𑒠𑒹𑒐𑒪𑒢𑓂𑒯𑒱। 𑒍𑒯𑒲 𑒠𑒱𑒢𑒮𑒿 𑒩𑒰𑒢𑒲𑒏𑒹𑒿 𑒬𑓀𑒏𑒰 𑒦𑓄 𑒑𑒹𑒪𑒢𑓂𑒯𑒱 𑒂 𑒮𑒦 𑒠𑒱𑒢 𑒯𑒳𑒢𑒏𑒰 𑒔𑒱𑒢𑓂𑒞𑒰 𑒒𑒹𑒩𑒱 𑒪𑒹𑒪𑒏𑒢𑓂𑒯𑒱।
𑒩𑒰𑒖𑒰𑒏𑒹𑒿 𑒩𑒰𑒢𑒲 𑒏𑒯𑒪𑒢𑓂𑒯𑒱 -– 𑒯𑒹 𑒩𑒰𑒖𑒰। 𑒠𑒹𑒐𑒴। 𑒁𑒣𑒢𑒰 𑒧𑒯𑒪𑒧𑒹 𑒠𑒴 𑒙𑒰 𑒣𑒾𑒩𑒏𑒲 𑒩𑒯𑒻𑒞 𑒩𑒯𑒋। 𑒍 𑒠𑒴 𑒙𑒰 𑒥𑒔𑓂𑒔𑒰 𑒠𑒹𑒪𑒏। 𑒥𑒔𑓂𑒔𑒰𑒏 𑒧𑒰𑒋 𑒧𑒩𑒱 𑒑𑒹𑒪। 𑒞𑒏𑒩 𑒥𑒰𑒠 𑒍 𑒠𑒼𑒮𑒩 𑒥𑒱𑒨𑒰𑒯𑒱 𑒏𑒋 𑒁𑒢𑒪𑒏। 𑒠𑒴 𑒔𑒰𑒩𑒱 𑒠𑒱𑒢𑒳𑒏𑒰 𑒥𑒰𑒠 𑒍 𑒠𑒳𑒢𑒴 𑒥𑒔𑓂𑒔𑒰𑒏𑒹𑒿 𑒧𑒰𑒩𑒱 𑒠𑒹𑒪𑒏। 𑒮𑒹 𑒯𑒹 𑒩𑒰𑒖𑒰, 𑒏𑒞𑒯𑒳 𑒯𑒧𑒯𑒴𑒿 𑒧𑒩𑒱 𑒖𑒰𑒃 𑒞𑒿 𑒁𑒯𑒰𑒿 𑒠𑒼𑒮𑒩 𑒥𑒱𑒨𑒰𑒯 𑒏𑒋 𑒪𑒹𑒥 𑒞𑒐𑒢 𑒯𑒧𑒩𑒼 𑒠𑒳𑒢𑒴 𑒥𑒔𑓂𑒔𑒰𑒏 𑒄𑒋𑒯 𑒯𑒰𑒪 𑒢𑒹 𑒦𑓄 𑒖𑒰𑒋।
𑒩𑒰𑒖𑒰 𑒥𑒰𑒖𑒪- 𑒨𑒻 𑒩𑒰𑒢𑒲। 𑒋𑒐𑒢 𑒁𑒯𑒰𑒿 𑒖𑒲𑒫𑒱𑒞 𑒕𑒲, 𑒞𑒐𑒢 𑒋𑒯𑒱 𑒑𑒣𑒏 𑒁𑒯𑒰𑒿 𑒏𑒱𑒋𑒏 𑒔𑒱𑒢𑓂𑒞𑒰 𑒏𑒋 𑒩𑒯𑒪 𑒕𑒲।
𑒩𑒰𑒢𑒲 𑒥𑒖𑒪𑒲𑒯 - 𑒢𑒯𑒱 𑒩𑒰𑒖𑒰। 𑒨𑒠𑒱 𑒯𑒧 𑒧𑒩𑒱 𑒑𑒹𑒪𑒯𑒳𑒿 𑒞𑒿 𑒁𑒯𑒰𑒿 𑒥𑒱𑒨𑒰𑒯 𑒞𑒿 𑒢𑒯𑒱 𑒏𑒋 𑒪𑒹𑒥?
𑒩𑒰𑒖𑒰 𑒅𑒞𑓂𑒞𑒩 𑒠𑒹𑒪𑒏- 𑒢𑒯𑒱 । 𑒯𑒧 𑒠𑒼𑒮𑒩 𑒥𑒱𑒨𑒰𑒯 𑒢𑒯𑒱 𑒏𑒩𑒥।
𑒄 𑒏𑒯𑒱 𑒩𑒰𑒖𑒰 𑒁𑒣𑒢 𑒠𑒩𑒥𑒖𑓂𑒖𑒰𑒧𑒹 𑒂𑒣𑒮 𑒔𑒪𑒱 𑒑𑒹𑒪।
𑒍𑒯𑒲 𑒠𑒱𑒢𑒮𑒿 𑒩𑒰𑒢𑒲 𑒠𑒳𑒐𑒱𑒞 𑒩𑒯𑒋 𑒪𑒑𑒪𑒲𑒯 𑒂 𑒁𑒢𑒔𑒼𑒏𑓂𑒏𑒹 𑒋𑒏 𑒠𑒱𑒢 𑒧𑒩𑒱 𑒑𑒹𑒪𑒲𑒯।
𑒂𑒥 𑒋𑒯𑒱 𑒑𑒣𑒏𑒹𑒿 𑒪𑒋 𑒩𑒰𑒖𑒰 𑒥𑒛𑓂𑒛 𑒔𑒱𑒢𑓂𑒞𑒰𑒧𑒹 𑒣𑒛𑓃𑒱 𑒑𑒹𑒪। 𑒂𑒥 𑒠𑒳𑒢𑒴 𑒦𑒰𑒋 𑒮𑒲𑒞 𑒂 𑒥𑒮𑒢𑓂𑒞 𑒮𑒹𑒯𑒼 𑒠𑒱𑒏𑓂𑒏𑒞𑒧𑒹 𑒣𑒛𑓃𑒱 𑒑𑒹𑒪𑒰𑒯।
𑒩𑒰𑒖𑒰𑒏𑒹𑒿 𑒩𑒰𑒖𑒰𑒏 𑒐𑒥𑒰𑒮𑒱𑒢𑒲, 𑒧𑒢𑓂𑒞𑓂𑒩𑒲, 𑒧𑒳𑓀𑒬𑒲 𑒂 𑒧𑒰𑒩𑒞𑒹 𑒩𑒰𑒮 𑒪𑒼𑒏 𑒮𑒦 𑒥𑒳𑒗𑒰𑒥𑒋 𑒪𑒰𑒑𑒪।
𑒍 𑒮𑒦 𑒩𑒰𑒖𑒰𑒮𑒿 𑒏𑒯𑒋 𑒪𑒑𑒪𑒰𑒯- 𑒩𑒰𑒖𑒰 𑒨𑒠𑒱 𑒁𑒯𑒰𑒿 𑒥𑒱𑒨𑒰𑒯 𑒢𑒯𑒱 𑒏𑒩𑒻𑒞 𑒕𑒲 , 𑒞𑒐𑒢 𑒋𑒯𑒱 𑒠𑒳𑒢𑒴 𑒥𑒔𑓂𑒔𑒰𑒏 𑒏𑒲 𑒠𑒬𑒰 𑒯𑒼𑒋𑒞। 𑒢𑒹 𑒋𑒏𑒩𑒰 𑒮𑒦𑒏 𑒐𑒹𑒢𑒰𑒃𑒏 𑒏𑒼𑒢𑒼 𑒚𑒹𑒏𑒰𑒢 𑒩𑒯𑒞 𑒂 𑒢𑒯𑒱𑒨𑒹 𑒣𑒜𑓃𑒰𑒃𑒏। 𑒞𑒰𑒯𑒱 𑒠𑓂𑒫𑒰𑒩𑒹 𑒁𑒯𑒰𑒿 𑒋𑒏𑒙𑒰 𑒥𑒱𑒨𑒰𑒯 𑒏𑒩𑒴।
𑒋𑒯𑒱 𑒞𑒩𑒯𑒹𑒿 𑒥𑒳𑒗𑒍𑒪𑒰𑒣𑒩 𑒩𑒰𑒖𑒰 𑒥𑒰𑒖𑒪 - 𑒚𑒲𑒏 𑒁𑒕𑒱। 𑒖𑒐𑒢 𑒁𑒯𑒰𑒿 𑒮𑒦𑒏 𑒨𑒻𑒯 𑒫𑒱𑒔𑒰𑒩 𑒁𑒕𑒱 𑒞𑒐𑒢 𑒖𑒰𑒆, 𑒏𑒼𑒢𑒼 𑒑𑒩𑒲𑒥𑒏 𑒪𑒛𑓃𑒏𑒲 𑒦𑒹𑒙𑒞 𑒞𑒿 𑒯𑒧 𑒍𑒏𑒩𑒰 𑒮𑓀𑒑 𑒥𑒱𑒨𑒰𑒯 𑒏𑒋 𑒪𑒹𑒥।
𑒋𑒯𑒱 𑒞𑒩𑒯𑒹𑒿 𑒩𑒰𑒖𑒰𑒏 𑒮𑒦𑒙𑒰 𑒑𑒣 𑒥𑒳𑒗𑒱-𑒑𑒳𑒝𑒱 𑒧𑒳𑒢𑓂𑒬𑒲 𑒠𑒲𑒫𑒰𑒢 𑒮𑒦 𑒏𑓂𑒨𑒼 𑒪𑒛𑓃𑒏𑒲 𑒞𑒰𑒏𑒋 𑒪𑒑𑒪𑒰𑒯। 𑒋𑒏𑒙𑒰 𑒪𑒛𑓃𑒏𑒲 𑒩𑒰𑒖𑒰𑒏 𑒢𑒑𑒩𑒧𑒹 𑒦𑒹𑒙𑒪। 𑒍 𑒪𑒛𑓃𑒏𑒲 𑒧𑒯𑒰𑒑𑒩𑒲𑒥𑒏 𑒥𑒹𑒙𑒲 𑒕𑒪𑒲𑒯। 𑒩𑒰𑒖𑒰 𑒬𑒳𑒦𑒪𑒑𑓂𑒢 𑒥𑒢𑒰 𑒏𑒋 𑒍𑒯𑒱 𑒪𑒛𑓃𑒏𑒲𑒏𑒹𑒿 𑒥𑒱𑒨𑒰𑒯 𑒏𑒋 𑒂𑒢𑒱 𑒪𑒹𑒪𑒏। 𑒏𑒱𑒕𑒳 𑒠𑒱𑒢 𑒡𑒩𑒱 𑒍 𑒪𑒛𑓃𑒏𑒲 𑒒𑒩𑒧𑒹 𑒩𑒯𑒪𑒲𑒯। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍𑒏𑒩 𑒧𑒧𑒞𑒰 𑒍𑒯𑒱 𑒠𑒳𑒢𑒴 𑒦𑒰𑒋𑒣𑒩 𑒏𑒧 𑒯𑒼𑒧𑒋 𑒪𑒰𑒑𑒪। 𑒠𑒳𑒢𑒴 𑒦𑒰𑒋 𑒮𑓂𑒏𑒴𑒪𑒮𑒿 𑒣𑒜𑓃𑒱 𑒏𑒋 𑒒𑒩 𑒂𑒥𑒟𑒱 𑒂 𑒁𑒣𑒢 𑒠𑒩𑒥𑒖𑓂𑒖𑒰𑒣𑒩 𑒑𑒹𑒢𑓂𑒠 𑒪𑒋 𑒐𑒹𑒪𑒰𑒃𑒧𑒹 𑒪𑒰𑒑𑒱 𑒖𑒰𑒟𑒱। 𑒋𑒏 𑒠𑒱𑒢 𑒁𑒢𑒔𑒼𑒏𑓂𑒏𑒹𑒧𑒹 𑒑𑒹𑒢𑓂𑒠 𑒂𑒿𑒑𑒢𑒧𑒹 𑒖𑒰 𑒏𑒋 𑒐𑒮𑒱 𑒣𑒛𑓃𑒪।
𑒍𑒯𑒱 𑒮𑒧𑒨𑒧𑒹 𑒍𑒏𑒩 𑒮𑒦𑒏 𑒮𑒞𑒧𑒰𑒋 𑒂𑒿𑒑𑒢𑒧𑒹 𑒕𑒪𑒲𑒯। 𑒑𑒹𑒢𑓂𑒠 𑒐𑒮𑒪𑒰𑒏 𑒮𑓀𑒑 𑒍 𑒑𑒹𑒢𑓂𑒠𑒏𑒹𑒿 𑒅𑒚𑒰 𑒏𑒋 𑒁𑒣𑒢 𑒏𑒼𑒩𑒰𑒧𑒹 𑒩𑒰𑒐𑒱 𑒪𑒹𑒪𑒢𑓂𑒯𑒱।𑒍 𑒠𑒳𑒢𑒴 𑒦𑒰𑒋 𑒑𑒹𑒢𑓂𑒠 𑒞𑒏𑒻𑒞 𑒂𑒿𑒑𑒢𑒧𑒹 𑒁𑒋𑒪𑒰𑒯 𑒂 𑒏𑒯𑒪𑒢𑓂𑒯𑒱 𑒖𑒹 𑒧𑒰𑒋 𑒑𑒹𑒢𑓂𑒠 𑒯𑒧𑒩𑒰 𑒮𑒦𑒏𑒹𑒿 𑒠𑒋 𑒠𑒱𑒁। 𑒯𑒧 𑒠𑒳𑒢𑒴 𑒦𑒰𑒋 𑒐𑒹𑒪𑒰 𑒩𑒯𑒪 𑒕𑒲। 𑒧𑒰𑒿 𑒏𑒯𑒪𑒐𑒱𑒢𑓂𑒯 𑒖𑒹 𑒯𑒧𑒩𑒰 𑒪𑒑 𑒑𑒹𑒢𑓂𑒠 𑒢𑒯𑒱 𑒁𑒕𑒱, 𑒁𑒯𑒰𑒿 𑒮𑒦 𑒔𑒪𑒱 𑒖𑒰𑒆। 𑒑𑒹𑒢𑓂𑒠𑒏𑒹𑒿 𑒠𑒳𑒢𑒴 𑒦𑒰𑒋 𑒧𑒰𑒨𑒏 𑒏𑒼𑒩𑒰𑒧𑒹 𑒠𑒹𑒐𑒪𑒢𑓂𑒯𑒱। 𑒤𑒹𑒩 𑒏𑒯𑒪𑒢𑓂𑒯𑒱 - 𑒧𑒰𑒿 𑒯𑒧𑒩𑒰 𑒮𑒦𑒏𑒹𑒿 𑒑𑒹𑒢𑓂𑒠 𑒠𑒱𑒁। 𑒯𑒧 𑒮𑒦 𑒐𑒹𑒪𑒰𑒋𑒥। 𑒋𑒯𑒱 𑒞𑒩𑒯𑒹𑒿 𑒠𑒳𑒢𑒴 𑒦𑒰𑒋 𑒧𑒿𑒑𑒻𑒞-𑒧𑒿𑒑𑒻𑒞 𑒧𑒰𑒿𑒏 𑒏𑒼𑒩𑒰𑒮𑒿 𑒑𑒹𑒢𑓂𑒠 𑒪𑒋 𑒪𑒹𑒪𑒢𑓂𑒯𑒱 । 𑒑𑒹𑒢𑓂𑒠 𑒪𑓄 𑒪𑒹𑒪𑒰𑒏 𑒥𑒰𑒠 𑒩𑒰𑒢𑒲𑒏 𑒯𑒵𑒠𑒨𑒧𑒹 𑒥𑒛𑓂𑒛 𑒞𑒰𑒧𑒮 𑒁𑒋𑒪𑒢𑓂𑒯𑒱। 𑒩𑒰𑒢𑒲 𑒞𑒰𑒧𑒮𑒹 𑒦𑒹𑒩 𑒦𑒹𑒪 𑒏𑒼𑒔𑒣𑒩 𑒂𑒥𑒱 𑒣𑒛𑓃𑒱 𑒩𑒯𑒪𑒲𑒯 𑒂 𑒐𑒹𑒢𑒰𑒃-𑒣𑒱𑒢𑒰𑒃 𑒞𑓂𑒨𑒰𑒑𑒱 𑒠𑒹𑒪𑒢𑓂𑒯𑒱। 𑒐𑒥𑒰𑒮𑒱𑒢𑒲 𑒮𑒦 𑒥𑒳𑒗𑒰 𑒏𑒋 𑒟𑒰𑒏𑒱 𑒑𑒹𑒪𑒲𑒯 𑒖𑒹 𑒩𑒰𑒢𑒲 𑒔𑒪𑒴, 𑒯𑒧𑒩𑒰 𑒮𑒦 𑒐𑒰 𑒪𑒲। 𑒧𑒳𑒠𑒰 𑒩𑒰𑒢𑒲 𑒏𑒼𑒢𑒼 𑒅𑒞𑓂𑒞𑒩 𑒢𑒯𑒱 𑒠𑒹𑒪𑒢𑓂𑒯𑒱। 𑒍 𑒏𑒯𑒪𑒢𑓂𑒯𑒱 𑒖𑒹 𑒂𑒥 𑒯𑒧 𑒧𑒩𑒱 𑒖𑒰𑒋𑒥। 𑒋𑒞𑒹𑒏 𑒑𑒣 𑒮𑒳𑒢𑒱 𑒐𑒥𑒰𑒮𑒱𑒢𑒲 𑒩𑒰𑒖𑒰 𑒪𑒑 𑒖𑒰 𑒏𑒋 𑒏𑒯𑒪𑒏 𑒖𑒹 𑒩𑒰𑒢𑒲 𑒥𑒛𑓂𑒛 𑒠𑒳𑒐𑒱𑒞 𑒕𑒟𑒱। 𑒂𑒥 𑒥𑒔𑒥𑒰 𑒨𑒼𑒑𑓂𑒨 𑒢𑒯𑒱 𑒕𑒟𑒱। 𑒁𑒯𑒰𑒿 𑒖𑒰 𑒏𑒋 𑒠𑒹𑒐𑒴। 𑒩𑒰𑒖𑒰 𑒋𑒞𑒹𑒏 𑒑𑒣 𑒮𑒳𑒢𑒱 𑒏𑒋 𑒁𑒣𑒢 𑒧𑒯𑒪𑒧𑒹 𑒑𑒹𑒪𑒰𑒯 𑒂 𑒩𑒰𑒢𑒲𑒮𑒿 𑒣𑒳𑒕𑒪𑒢𑓂𑒯𑒱। 𑒩𑒰𑒖𑒰 𑒣𑒳𑒕𑒪𑒢𑓂𑒯𑒱 𑒖𑒹 𑒞𑒼𑒯𑒩 𑒋𑒯𑒢 𑒯𑒰𑒪𑒞 𑒏𑒼𑒢𑒰 𑒦𑒹𑒪𑒯 𑒖𑒪𑓂𑒠𑒲 𑒥𑒞𑒰𑒥𑒯।
𑒩𑒰𑒢𑒲 𑒏𑒯𑒪𑒢𑓂𑒯𑒱-𑒁𑒯𑒰𑒿 𑒯𑒧𑒩𑒰𑒮𑒿 𑒣𑒳𑒕𑒻𑒞 𑒕𑒲 𑒞𑒿 𑒣𑒯𑒱𑒢𑒹 𑒁𑒯𑒰𑒿 𑒯𑒧𑒩𑒰𑒮𑒿 𑒮𑒞 𑒏𑒩𑒴 𑒞𑒿 𑒯𑒧 𑒏𑒯𑒥। 𑒢𑒯𑒱 𑒞𑒿 𑒯𑒧 𑒧𑒩𑒱 𑒖𑒰𑒋𑒥। 𑒩𑒰𑒖𑒰 𑒏𑒱𑒕𑒳 𑒢𑒯𑒱 𑒮𑒼𑒔𑒪𑒢𑓂𑒯𑒱। 𑒍 𑒩𑒰𑒢𑒲𑒏 𑒮𑓀𑒑 𑒮𑒞 𑒏𑒋 𑒪𑒹𑒪𑒢𑓂𑒯𑒱। 𑒮𑒞 𑒏𑒹𑒪𑒰𑒏 𑒥𑒰𑒠 𑒩𑒰𑒢𑒲 𑒏𑒯𑒪𑒢𑓂𑒯𑒱- 𑒯𑒧𑒩 𑒄 𑒠𑒬𑒰 𑒁𑒯𑒰𑒿𑒏 𑒠𑒳𑒢𑒴 𑒥𑒹𑒙𑒰 𑒏𑒋𑒢𑒹 𑒁𑒕𑒱। 𑒯𑒧𑒩 𑒥𑒱𑒧𑒰𑒩𑒲𑒏 𑒨𑒻𑒯 𑒋𑒏𑒙𑒰 𑒅𑒣𑒰𑒨 𑒁𑒕𑒱 𑒢𑒯𑒱 𑒞𑒿 𑒯𑒧 𑒢𑒯𑒱 𑒥𑒔𑒱 𑒮𑒏𑒻𑒞 𑒕𑒲 - 𑒁𑒯𑒰𑒿 𑒍𑒯𑒱 𑒠𑒳𑒢𑒴𑒏𑒹𑒿 𑒧𑒰𑒩𑒱 𑒍𑒏𑒩 𑒏𑒩𑒹𑒖 𑒢𑒱𑒏𑒰𑒪𑒱 𑒯𑒧𑒩𑒰 𑒠𑒱𑒁। 𑒞𑒐𑒢 𑒯𑒧 𑒥𑒔𑒱 𑒮𑒏𑒻𑒞 𑒕𑒲। 𑒩𑒰𑒖𑒰 𑒋𑒞𑒹𑒏 𑒑𑒣 𑒮𑒳𑒢𑒱 𑒏𑒋 𑒥𑒛𑓂𑒛 𑒞𑒧𑒮𑒰 𑒑𑒹𑒪। 𑒍 𑒠𑒳𑒢𑒴 𑒥𑒹𑒙𑒰𑒏𑒹𑒿 𑒥𑒖𑒰 𑒏𑒋 𑒥𑒛𑓂𑒛 𑒧𑒰𑒩𑒱 𑒧𑒰𑒩𑒪𑒏 𑒂 𑒞𑒏𑒩 𑒥𑒰𑒠 𑒖𑒪𑓂𑒪𑒰𑒠𑒏 𑒯𑒰𑒟𑒮𑒿 𑒧𑒩𑒥𑒋𑒥𑒰 𑒪𑒹𑒪 𑒣𑒚𑒰 𑒠𑒹𑒪𑒏। 𑒖𑒪𑓂𑒪𑒰𑒠 𑒠𑒳𑒢𑒴 𑒦𑒰𑒋𑒏𑒹𑒿 𑒧𑒰𑒩𑒻𑒞-𑒣𑒱𑒙𑒻𑒞 𑒥𑒼𑒢𑒧𑒹 𑒪𑒋 𑒑𑒹𑒪। 𑒠𑒳𑒢𑒴 𑒦𑒰𑒋 𑒥𑒛𑓂𑒛 𑒏𑒰𑒢𑒱 𑒩𑒯𑒪 𑒕𑒪𑒰𑒯। 𑒖𑒐𑒢 𑒖𑒪𑓂𑒪𑒰𑒠 𑒮𑒦 𑒍𑒏𑒩𑒰 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒧𑒰𑒩𑒋 𑒪𑒰𑒑𑒪 𑒞𑒿 𑒍 𑒮𑒦 𑒏𑒯𑒪𑒢𑓂𑒯𑒱 𑒖𑒹 𑒯𑒧𑒩𑒰 𑒮𑒦𑒏𑒹𑒿 𑒢𑒯𑒱 𑒧𑒰𑒩𑒴। 𑒯𑒧𑒩𑒰 𑒮𑒦𑒏𑒹𑒿 𑒕𑒼𑒛𑓃𑒱 𑒠𑒹𑒥 𑒞𑒿 𑒯𑒧 𑒮𑒦 𑒒𑒳𑒩𑒱 𑒏𑒋 𑒢𑒑𑒩 𑒢𑒯𑒱 𑒖𑒰𑒋𑒥। 𑒁𑒯𑒰𑒿 𑒮𑒦 𑒏𑒼𑒢𑒼 𑒧𑒰𑒪-𑒖𑒰𑒢𑒫𑒩𑒏𑒹𑒿 𑒧𑒰𑒩𑒱 𑒍𑒏𑒩 𑒏𑒩𑒹𑒖 𑒖𑒰 𑒏𑒋 𑒠𑒋 𑒠𑒱𑒨𑒾𑒏। 𑒂 𑒄 𑒏𑒯𑒱 𑒠𑒳𑒢𑒴 𑒦𑒰𑒋 , 𑒮𑓀𑒑𑒧𑒹 𑒖𑒞𑒹𑒏 𑒣𑒰𑒃 𑒕𑒪𑒢𑓂𑒯𑒱 𑒮𑒹𑒯𑒼 𑒖𑒪𑓂𑒪𑒰𑒠 𑒮𑒦𑒏𑒹𑒿 𑒠𑒋 𑒠𑒹𑒪𑒢𑓂𑒯𑒱। 𑒋𑒏 𑒖𑒪𑓂𑒪𑒰𑒠 𑒏𑒯𑒪𑒏 𑒖𑒹 𑒋𑒏𑒩𑒰 𑒮𑒦𑒏𑒹𑒿 𑒧𑒰𑒩𑒱 𑒠𑒱𑒨𑒾𑒏। 𑒠𑒼𑒮𑒩 𑒏𑒯𑒪𑒏 𑒖𑒹 𑒢𑒯𑒱 𑒧𑒰𑒩𑒴। 𑒄 𑒮𑒦 𑒒𑒳𑒩𑒱 𑒏𑒋 𑒖𑒋𑒥𑒼 𑒏𑒩𑒞 𑒞𑒿 𑒯𑒧 𑒮𑒦 𑒏𑒯𑒥𑒻𑒏 𑒖𑒹 𑒯𑒧 𑒮𑒦 𑒏𑒲 𑒏𑒩𑒴। 𑒯𑒧 𑒮𑒦 𑒞𑒿 𑒏𑒩𑒹𑒖 𑒂𑒢𑒱 𑒏𑒋 𑒠𑒹𑒢𑒹 𑒕𑒪𑒯𑒳𑒿। 𑒧𑒩𑒪𑒰𑒏 𑒥𑒰𑒠 𑒖𑒲𑒥𑒱 𑒑𑒹𑒪 𑒯𑒼𑒋𑒞।
𑒖𑒪𑓂𑒪𑒰𑒠 𑒍𑒯𑒱𑒢𑒰 𑒏𑒋𑒪𑒏 𑒂 𑒠𑒳𑒢𑒴 𑒦𑒰𑒋𑒏𑒹𑒿 𑒕𑒼𑒛𑓃𑒱 𑒠𑒹𑒪𑒏।

𑒏𑒟𑒰 𑒩𑒴𑒣 𑓑: 𑒖𑒪𑓂𑒪𑒰𑒠 𑒍𑒯𑒱𑒢𑒰 𑒏𑒋𑒪𑒏 𑒂 𑒠𑒳𑒢𑒴 𑒦𑒰𑒋𑒏𑒹𑒿 𑒕𑒼𑒛𑓃𑒱 𑒠𑒹𑒪𑒏।
𑒠𑒳𑒢𑒴 𑒦𑒰𑒋 𑒍𑒯𑒱 𑒥𑒼𑒢𑒧𑒹 𑒦𑒙𑒏𑒋 𑒪𑒑𑒪𑒰𑒯। 𑒩𑒰𑒞𑒳𑒏 𑒧𑒾𑒮𑒧𑒧𑒹 𑒠𑒳𑒢𑒴 𑒦𑒰𑒋 𑒋𑒏𑒙𑒰 𑒑𑒰𑒕𑒏 𑒢𑒲𑒔𑒰𑒿 𑒮𑒴𑒞𑒱 𑒑𑒹𑒪𑒰𑒯। 𑒏𑒱𑒕𑒳 𑒏𑒰𑒪𑒏 𑒥𑒰𑒠 𑒠𑒳𑒢𑒴 𑒦𑒰𑒋 𑒅𑒚𑒱 𑒑𑒹𑒪𑒰𑒯 𑒂 𑒑𑒰𑒕𑒏 𑒆𑒣𑒩 𑒋𑒏𑒙𑒰 𑒮𑒰𑒿𑒣𑒏𑒹𑒿 𑒔𑒜𑓃𑒻𑒞 𑒠𑒹𑒐𑒪𑒢𑓂𑒯𑒱। 𑒍𑒯𑒱 𑒑𑒰𑒕𑒣𑒩 𑒠𑒴 𑒙𑒰 𑒯𑓀𑒮𑒏 𑒥𑒔𑓂𑒔𑒰 𑒩𑒯𑒻𑒞 𑒕𑒪। 𑒯𑓀𑒮 𑒔𑒩𑒥𑒰𑒏 𑒪𑒹𑒪 𑒑𑒹𑒪 𑒩𑒯𑒋। 𑒍𑒯𑒱 𑒮𑒰𑒿𑒣𑒏𑒹𑒿 𑒠𑒹𑒐𑒱 𑒏𑒋 𑒯𑓀𑒮𑒏 𑒥𑒔𑓂𑒔𑒰 𑒥𑒰𑒖𑒋 𑒪𑒰𑒑𑒪।
𑒠𑒳𑒢𑒴 𑒦𑒰𑒋 𑒮𑒼𑒔𑒪𑒏- 𑒠𑒹𑒐𑒴। 𑒄 𑒮𑒰𑒿𑒣 𑒥𑒔𑓂𑒔𑒰𑒏𑒹𑒿 𑒐𑒰 𑒖𑒋𑒞। 𑒋𑒞𑒹𑒏 𑒮𑒼𑒔𑒪𑒰𑒏 𑒥𑒰𑒠 𑒞𑒪𑒫𑒰𑒩𑒮𑒿 𑒧𑒰𑒩𑒱 𑒏𑒋 𑒮𑒰𑒿𑒣𑒏𑒹𑒿 𑒍 𑒮𑒦 𑒢𑒲𑒔𑒰𑒿 𑒐𑒮𑒰 𑒠𑒹𑒪𑒏। 𑒥𑒔𑓂𑒔𑒰 𑒥𑒖𑒢𑒰𑒃 𑒥𑒢𑓂𑒢 𑒏𑒋 𑒠𑒹𑒪𑒏। 𑒖𑒐𑒢 𑒦𑒼𑒩 𑒦𑒹𑒪 𑒞𑒿 𑒯𑓀𑒮-𑒯𑓀𑒮𑒱𑒢𑒲 𑒔𑒩𑒱 𑒏𑒋 𑒂𑒋𑒪 𑒂 𑒥𑒔𑓂𑒔𑒰 𑒪𑒹𑒪 𑒐𑒹𑒢𑒰𑒃 𑒁𑒢𑒪𑒏। 𑒥𑒔𑓂𑒔𑒰𑒏𑒹𑒿 𑒂𑒯𑒰𑒩 𑒐𑒳𑒂𑒥𑒋 𑒪𑒰𑒑𑒪 𑒞𑒿 𑒥𑒔𑓂𑒔𑒰 𑒂𑒯𑒰𑒩 𑒢𑒯𑒱 𑒐𑒋𑒪𑒏 𑒂 𑒏𑒯𑒪𑒏 𑒖𑒹 𑒧𑒰𑒿 𑒯𑒧𑒩𑒰 𑒄 𑒥𑒞𑒰𑒆 𑒖𑒹 𑒋𑒯𑒱 𑒑𑒰𑒕𑒣𑒩 𑒯𑒧 𑒣𑒯𑒱𑒪 𑒠𑒹𑒪 𑒥𑒔𑓂𑒔𑒰 𑒕𑒲 , 𑒂𑒏𑒱 𑒁𑒯𑒰𑒿 𑒣𑒯𑒱𑒢𑒯𑒱𑒨𑒼 𑒋𑒯𑒱 𑒋𑒯𑒱 𑒑𑒰𑒕𑒣𑒩 𑒥𑒔𑓂𑒔𑒰 𑒠𑒹𑒢𑒹 𑒕𑒲 । 𑒧𑒰𑒋 𑒏𑒯𑒪𑒏𑒻 𑒖𑒹 𑒯𑒧 𑒣𑒯𑒱𑒢𑒯𑒱𑒨𑒼 𑒥𑒔𑓂𑒔𑒰 𑒠𑒹𑒢𑒹 𑒕𑒲 𑒧𑒳𑒠𑒰 𑒂𑒃 𑒡𑒩𑒱𑒧𑒹 𑒧𑒰𑒞𑓂𑒩 𑒁𑒯𑒰𑒿 𑒠𑒳𑒢𑒳 𑒑𑒼𑒙𑒹𑒏 𑒧𑒴𑒿𑒯 𑒠𑒹𑒐𑒱 𑒩𑒯𑒪 𑒕𑒲।

𑒏𑒟𑒰 𑒩𑒴𑒣 𑓒: 𑒥𑒹𑒬𑒲 𑒪𑒼𑒏𑒣𑓂𑒩𑒱𑒨 𑒂 𑒣𑒮𑒩𑒪 𑒏𑓂𑒭𑒹𑒞𑓂𑒩𑒧𑒹: 𑒖𑒪𑓂𑒪𑒰𑒠 𑒍𑒯𑒱𑒢𑒰 𑒏𑒋𑒪𑒏 𑒂 𑒠𑒳𑒢𑒴 𑒦𑒰𑒋𑒏𑒹𑒿 𑒕𑒼𑒛𑓃𑒱 𑒠𑒹𑒪𑒏।
𑒠𑒳𑒢𑒴 𑒦𑒰𑒋 𑒍𑒯𑒱 𑒥𑒼𑒢𑒧𑒹 𑒦𑒙𑒏𑒋 𑒪𑒰𑒑𑒪, 𑒐𑒴𑒥 𑒥𑒾𑒂𑒋𑒪। 𑒩𑒰𑒞𑒳𑒏 𑒮𑒧𑒨 𑒠𑒳𑒢𑒴 𑒦𑒰𑒋 𑒋𑒏𑒙𑒰 𑒑𑒰𑒕𑒏 𑒞𑒩𑒧𑒹 𑒮𑒴𑒞𑒱 𑒑𑒹𑒪। 𑒦𑒼𑒩𑒹, 𑒥𑒼𑒢𑒮𑒿 𑒥𑒯𑒩𑒰𑒃𑒞 𑒠𑒼𑒮𑒩 𑒠𑒹𑒬 𑒖𑒰𑒋 𑒪𑒰𑒑𑒪। 𑒠𑒳𑒢𑒴 𑒦𑒰𑒋 𑒦𑒴𑒐-𑒣𑒱𑒂𑒮𑒏 𑒧𑒰𑒩𑒹 𑒫𑓂𑒨𑒰𑒏𑒳𑒪 𑒦𑓄 𑒑𑒹𑒪। 𑒖𑒰 𑒏𑒋 𑒋𑒏𑒙𑒰 𑒑𑒰𑒕𑒏 𑒢𑒲𑒔𑒰𑒿 𑒥𑒻𑒮𑒱 𑒏𑒋 𑒮𑒳𑒮𑓂𑒞𑒰𑒋 𑒪𑒰𑒑𑒪। 𑒍 𑒮𑒦 𑒮𑒼𑒔𑒋 𑒪𑒰𑒑𑒪 𑒖𑒹 𑒂𑒥 𑒏𑒼𑒢 𑒅𑒣𑒰𑒨 𑒏𑒩𑒴। 𑒍𑒯𑒲 𑒮𑒧𑒨 𑒍𑒯𑒱 𑒑𑒰𑒕𑒣𑒩 𑒠𑒴 𑒙𑒰 𑒧𑒋𑒢𑒰𑒏 𑒥𑒔𑓂𑒔𑒰 𑒩𑒯𑒋। 𑒍𑒯𑒱𑒧𑒹𑒮𑒿 𑒋𑒏𑒙𑒰 𑒏𑒯𑒻𑒞 𑒁𑒕𑒱 𑒖𑒹 𑒯𑒧𑒩 𑒖𑒹 𑒏𑒰𑒿𑒔𑒯𑒱 𑒧𑒾𑒮 𑒐𑒰 𑒖𑒋𑒞 𑒞𑒏𑒩𑒰 𑒥𑒛𑓂𑒛 𑒬𑒲𑒒𑓂𑒩 𑒩𑒰𑒖𑓂𑒨 𑒦𑒹𑒙𑒱 𑒖𑒋𑒞𑒻𑒏। 𑒂 𑒠𑒼𑒮𑒩 𑒏𑒯𑒪𑒏 𑒖𑒹 𑒯𑒧𑒩𑒰 𑒖𑒹 𑒂𑒑𑒱𑒧𑒹 𑒣𑒏𑒰 𑒏𑒋 𑒐𑒰𑒍𑒞 𑒞𑒿 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍 𑒩𑒰𑒖 𑒣𑒰𑒥𑒱 𑒖𑒋𑒞। 𑒋𑒞𑒹𑒏 𑒑𑒣 𑒠𑒳𑒢𑒴 𑒦𑒰𑒋 𑒮𑒳𑒢𑒪𑒏 𑒂 𑒯𑒰𑒟𑒧𑒹 𑒋𑒏𑒙𑒰 𑒪𑒰𑒚𑒲 𑒪𑒋 𑒍𑒏𑒩𑒰 𑒮𑒦𑒏𑒹𑒿 𑒧𑒰𑒩𑒱 𑒏𑒋 𑒢𑒲𑒔𑒰𑒿 𑒐𑒮𑒰 𑒠𑒹𑒪𑒏 𑒂 𑒪𑓄 𑒏𑒋 𑒥𑒱𑒠𑒰 𑒦𑒹𑒪। 𑒏𑒱𑒕𑒳 𑒠𑒴𑒩 𑒂𑒑𑒰𑒿 𑒑𑒹𑒪 𑒞𑒿 𑒠𑒹𑒐𑒪𑒏 𑒖𑒹 𑒑𑒰𑒋-𑒧𑒯𑒲𑒮 𑒔𑒩𑒰𑒥𑒋 𑒥𑒪𑒰 𑒔𑒩𑒥𑒰𑒯𑒰 𑒮𑒦 𑒋𑒏𑒙𑒰 𑒥𑒋𑒩𑒏 𑒏𑒰𑒿𑒙𑒏 𑒥𑒼𑒢 - 𑒗𑒰𑒿𑒐𑒳𑒩𑒏𑒹𑒿 𑒖𑒩𑒰 𑒩𑒯𑒪 𑒕𑒪𑒰𑒯। 𑒍 𑒠𑒳𑒢𑒴 𑒦𑒰𑒋 𑒮𑒼𑒔𑒪𑒏 𑒖𑒹 𑒁𑒯𑒲 𑒁𑒑𑒱𑒢𑒫𑒰𑒢𑒧𑒹 𑒣𑒏𑒰 𑒏𑒋 𑒋𑒏𑒩𑒰 𑒐𑒰𑒋𑒥। 𑒍𑒯𑒱 𑒂𑒑𑒱𑒧𑒹 𑒠𑒳𑒢𑒴 𑒑𑒼𑒙𑒹 𑒧𑒹𑒢𑒰𑒏 𑒥𑒔𑓂𑒔𑒰𑒏𑒹𑒿 𑒣𑒏𑒰 𑒏𑒋 𑒐𑒋𑒪𑒏। 𑒏𑒰𑒿𑒙𑒧𑒹 𑒖𑒹 𑒍 𑒮𑒦 𑒣𑒏𑒰 𑒏𑒋 𑒐𑒋𑒪𑒏 𑒞𑒿 𑒍𑒏𑒩 𑒮𑒦𑒏 𑒦𑒰𑒑𑓂𑒨𑒧𑒹 𑒮𑒹𑒯𑒼 𑒏𑒰𑒿𑒙 𑒪𑒰𑒑𑒱 𑒑𑒹𑒪𑒻𑒏।
𑒍𑒞𑒋𑒮𑒿 𑒠𑒳𑒢𑒴 𑒦𑒰𑒋 𑒥𑒱𑒠𑒰 𑒦𑒹𑒪। 𑒏𑒱𑒕𑒳 𑒠𑒴𑒩 𑒑𑒹𑒪𑒰𑒏 𑒥𑒰𑒠 𑒍𑒏𑒩𑒰 𑒮𑒦𑒏𑒹𑒿 𑒂𑒧𑒏 𑒋𑒏𑒙𑒰 𑒑𑒰𑒕𑒲 𑒦𑒹𑒙𑒪𑒻𑒏।
𑒥𑒮𑒢𑓂𑒞 𑒔𑒪𑒻𑒞-𑒔𑒪𑒻𑒞 𑒟𑒰𑒏𑒱 𑒑𑒹𑒪 𑒩𑒯𑒋 𑒂 𑒍𑒏𑒩𑒰 𑒂𑒩 𑒔𑒪𑒪 𑒢𑒯𑒱 𑒦𑓄 𑒣𑒰𑒥𑒱 𑒩𑒯𑒪 𑒕𑒪𑒋।
𑒮𑒲𑒞 𑒏𑒯𑒪𑒏-𑒦𑒰𑒃, 𑒞𑒴𑒿 𑒋𑒞𑒋 𑒥𑒻𑒮, 𑒯𑒧 𑒍𑒯𑒱 𑒑𑒰𑒧𑒮𑒿 𑒏𑒱𑒕𑒳 𑒧𑒰𑒿𑒑𑒱 𑒏𑒋 𑒁𑒢𑒻𑒞 𑒕𑒲 𑒂 𑒞𑒐𑒢 𑒐𑒰 𑒏𑒋 𑒯𑒧𑒩𑒰 𑒮𑒦 𑒂𑒑𑒰𑒿 𑒔𑒪𑒥। 𑒮𑒲𑒞 𑒧𑒿𑒑𑒥𑒰 𑒪𑒹𑒪 𑒑𑒰𑒧𑒧𑒹 𑒔𑒪𑒱 𑒑𑒹𑒪। 𑒮𑒲𑒞 𑒖𑒰𑒯𑒱 𑒑𑒰𑒧𑒧𑒹 (𑒏𑒟𑒰 𑒩𑒴𑒣 𑓓 𑒑𑒰𑒧𑒏 𑒢𑒰𑒧 𑒯𑒮𑓂𑒞𑒱𑒢𑒰𑒣𑒳𑒩 𑒮𑒹𑒯𑒼 𑒏𑒞𑒯𑒳-𑒏𑒞𑒯𑒳 𑒏𑒯𑒪 𑒖𑒰𑒃𑒞 𑒁𑒕𑒱) 𑒧𑒿𑒑𑒥𑒰𑒏 𑒪𑒹𑒪 𑒑𑒹𑒪 𑒍𑒯𑒱 𑒑𑒰𑒧𑒧𑒹 𑒩𑒰𑒖𑒰𑒏 𑒥𑒹𑒙𑒲𑒏 𑒮𑓂𑒫𑒨𑒧𑓂𑒥𑒩 𑒩𑒔𑒰𑒍𑒪 𑒑𑒹𑒪 𑒕𑒪। 𑒍𑒯𑒱 𑒮𑓂𑒟𑒰𑒢 𑒣𑒩 𑒖𑒢 𑒮𑒧𑓂𑒧𑒩𑓂𑒠 𑒕𑒪। 𑒍𑒞𑒋 𑒦𑒲𑒛𑓃 𑒠𑒹𑒐𑒱 𑒮𑒲𑒞 𑒁𑒙𑒏𑒱 𑒑𑒹𑒪 𑒂 𑒠𑒹𑒐𑒋 𑒪𑒰𑒑𑒪। 𑒮𑒲𑒞 𑒁𑒣𑒢 𑒦𑒰𑒋𑒏 𑒮𑒳𑒩𑒞𑒰 𑒥𑒱𑒮𑒩𑒱 𑒑𑒹𑒪 । 𑒮𑓂𑒫𑒨𑒧𑓂𑒥𑒩𑒧𑒹 𑒪𑒛𑓃𑒏𑒲 𑒖𑒨𑒧𑒰𑒪 𑒪𑒋 𑒮𑒦𑒰𑒧𑒹 𑒒𑒳𑒩𑒋 𑒪𑒰𑒑𑒪𑒱 𑒂 𑒧𑒰𑒪𑒰 𑒮𑒲𑒞𑒏 𑒑𑒩𑒠𑒢𑒱𑒧𑒹 𑒣𑒯𑒱𑒩𑒰 𑒠𑒹𑒪𑒏। 𑒍𑒯𑒲𑒚𑒰𑒧 𑒮𑒲𑒞𑒏 𑒥𑒱𑒨𑒰𑒯 𑒍𑒯𑒱 𑒪𑒛𑓃𑒏𑒲𑒏 𑒮𑓀𑒑 𑒦𑒋 𑒑𑒹𑒪।
(𑒩𑒴𑒣 𑓔) 𑒥𑒱𑒨𑒰𑒯𑒏 𑒣𑒯𑒱𑒢𑒹 𑒍𑒞𑒳𑒏𑓂𑒏𑒰 𑒪𑒼𑒏 𑒮𑒦 𑒥𑒰𑒖𑒋 𑒪𑒰𑒑𑒪 𑒖𑒹 𑒄 𑒩𑒰𑒖𑒰𑒏 𑒥𑒹𑒙𑒲 𑒯𑒼𑒃𑒞𑒼 𑒋𑒏𑒙𑒰 𑒦𑒱𑒐𑒧𑓀𑒑𑒰𑒏 𑒑𑒩𑒠𑒢𑒱𑒧𑒹 𑒧𑒰𑒪𑒰 𑒣𑒯𑒱𑒩𑒰 𑒠𑒹𑒪𑒏। 𑒂 𑒄𑒯𑒼 𑒖𑒹 𑒍 𑒪𑒛𑓃𑒏𑒲 𑒥𑒞𑒰𑒯𑒱 𑒦𑓄 𑒑𑒹𑒪 𑒁𑒕𑒱। 𑒍𑒏𑒩 𑒑𑒩𑒠𑒢𑒱𑒮𑒿 𑒧𑒰𑒪𑒰 𑒢𑒱𑒏𑒰𑒪𑒱 𑒏𑒋 𑒏𑒏𑒩𑒼 𑒠𑒼𑒮𑒩𑒰𑒏 𑒑𑒩𑒠𑒢𑒱𑒧𑒹 𑒧𑒰𑒪𑒰 𑒣𑒯𑒱𑒩𑒰𑒆 𑒢𑒯𑒱 𑒞𑒿 𑒥𑒱𑒨𑒰𑒯 𑒢𑒯𑒱 𑒯𑒼𑒧𑒋 𑒠𑒹𑒥। 𑒄 𑒑𑒣 𑒮𑒳𑒢𑒱 𑒪𑒛𑓃𑒏𑒲 𑒥𑒰𑒖𑒪𑒱 𑒖𑒹 𑒯𑒧𑒩 𑒦𑒰𑒑𑓂𑒨𑒧𑒹 𑒄𑒋𑒯 𑒦𑒱𑒐𑒧𑓀𑒑𑒰 𑒪𑒱𑒐𑒪 𑒁𑒕𑒱 𑒞𑒿 𑒯𑒧𑒩𑒰 𑒩𑒰𑒖𑒰 𑒏𑒞𑒋𑒮𑒿 𑒦𑒹𑒙𑒞? 𑒯𑒧 𑒋𑒏𑒩𑒹 𑒮𑓀𑒑 𑒥𑒱𑒨𑒰𑒯 𑒏𑒩𑒥। 𑒄 𑒑𑒣 𑒮𑒳𑒢𑒱 𑒮𑒦 𑒩𑒰𑒖𑒰 𑒁𑒣𑒢-𑒁𑒣𑒢 𑒒𑒩 𑒔𑒪𑒱 𑒑𑒹𑒪𑒰𑒯 𑒂 𑒏𑒯𑒪𑒢𑓂𑒯𑒱 𑒖𑒹 𑒋𑒯𑒱 𑒪𑒛𑓃𑒏𑒲𑒏𑒹𑒿 𑒋𑒯𑒱 𑒑𑒰𑒧𑒮𑒿 𑒢𑒱𑒏𑒰𑒪𑒱 𑒠𑒱𑒁 𑒂 𑒏𑒼𑒢𑒼 𑒠𑒼𑒮𑒩 𑒚𑒰𑒧 𑒣𑒚𑒰 𑒠𑒱𑒁। 𑒩𑒰𑒖𑒰 𑒍𑒢𑒰𑒯𑒲 𑒏𑒋𑒪𑒏। 𑒍𑒯𑒱 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒁𑒣𑒢 𑒑𑒰𑒧𑒮𑒿 𑒥𑒰𑒯𑒩 𑒣𑒚𑒰 𑒠𑒹𑒪𑒏। 𑒍 𑒍𑒯𑒲 𑒢𑒑𑒩𑒧𑒹 𑒩𑒯𑒋 𑒪𑒰𑒑𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒪𑒼𑒏 𑒮𑒦 𑒩𑒰𑒖𑒰𑒏𑒹𑒿 𑒏𑒯𑒋 𑒪𑒰𑒑𑒪 𑒖𑒹 𑒁𑒯𑒰𑒿 𑒍𑒯𑒱 𑒪𑒛𑓃𑒏𑒰𑒏 𑒮𑓀𑒑 𑒪𑒛𑓃𑒏𑒲𑒮𑒿 𑒕𑒼𑒛𑓃𑒰 𑒠𑒱𑒨𑒾𑒏 𑒂 𑒏𑒼𑒢𑒼 𑒠𑒼𑒮𑒩 𑒪𑒛𑓃𑒏𑒰𑒏 𑒮𑓀𑒑 𑒍𑒏𑒩 𑒥𑒱𑒨𑒰𑒯 𑒏𑒩𑒰𑒋 𑒠𑒱𑒨𑒾𑒏।
𑒮𑒦𑒏 𑒏𑒯𑒪𑒰𑒣𑒩 𑒩𑒰𑒖𑒰 𑒋𑒏𑒙𑒰 𑒏𑒳𑒙𑒢𑒲 𑒥𑒳𑒜𑓃𑒱𑒨𑒰𑒏𑒹𑒿 𑒖𑒯𑒩-𑒧𑒰𑒯𑒳𑒩 𑒮𑓀𑒑𑒧𑒹 𑒠𑒋 𑒣𑒚𑒹𑒪𑒏, 𑒖𑒞𑒋 𑒮𑒲𑒞 𑒂 𑒩𑒰𑒖𑒰𑒏 𑒥𑒹𑒙𑒲 𑒩𑒯𑒻𑒞 𑒕𑒪। 𑒍 𑒥𑒳𑒜𑓃𑒱𑒨𑒰 𑒍𑒏𑒩𑒰 𑒮𑒦𑒏 𑒮𑓀𑒑𑒹 𑒩𑒯𑒋 𑒪𑒰𑒑𑒪। 𑒏𑒱𑒕𑒳 𑒠𑒱𑒢 𑒡𑒩𑒱 𑒍 𑒍𑒞𑒯𑒱 𑒩𑒯𑒪। 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒏𑒼𑒢𑒼 𑒑𑒣𑒏 𑒔𑒱𑒢𑓂𑒞𑒰 𑒢𑒯𑒱 𑒦𑒹𑒪𑒻𑒏। 𑒋𑒏 𑒠𑒱𑒢 𑒮𑒲𑒞𑒏𑒹𑒿 𑒁𑒢𑒔𑒼𑒏𑓂𑒏𑒹𑒧𑒹 𑒥𑒛𑓂𑒛 𑒣𑒱𑒨𑒰𑒮 𑒪𑒑𑒪𑒻𑒏। 𑒍 𑒁𑒣𑒢 𑒩𑒰𑒢𑒲𑒮𑒿 𑒥𑒰𑒖𑒪-𑒯𑒧𑒩𑒰 𑒣𑒰𑒢𑒱 𑒣𑒱𑒨𑒰 𑒠𑒱𑒁। 𑒥𑒳𑒜𑓃𑒱𑒨𑒰 𑒤𑒙𑒰𑒏𑒮𑒿 𑒅𑒚𑒱 𑒏𑒋 𑒑𑒹𑒪 𑒂 𑒋𑒏 𑒑𑒱𑒪𑒰𑒮 𑒣𑒰𑒢𑒱𑒧𑒹 𑒖𑒯𑒩 𑒒𑒼𑒩𑒱 𑒮𑒲𑒞𑒏𑒹𑒿 𑒠𑒹𑒪𑒏। 𑒮𑒲𑒞𑒏𑒹𑒿 𑒥𑒛𑓃 𑒖𑒼𑒩𑒮𑒿 𑒣𑒱𑒨𑒰𑒮 𑒪𑒰𑒑𑒪 𑒩𑒯𑒻𑒏 𑒮𑒹 𑒍 𑒐𑒙𑒮𑒿 𑒣𑒰𑒢𑒱 𑒪𑓄 𑒏𑒋 𑒣𑒲𑒥𑒱 𑒑𑒹𑒪। 𑒣𑒰𑒢𑒱 𑒣𑒲𑒥𑒱𑒞𑒹 𑒮𑒲𑒞𑒏𑒹𑒿 𑒏𑒱𑒕𑒳𑒋 𑒏𑒰𑒪𑒏 𑒅𑒣𑒩𑒰𑒢𑓂𑒞 𑒥𑒛𑓂𑒛 𑒢𑒱𑒬𑒰 𑒁𑒋𑒪𑒻𑒏। 𑒮𑓂𑒟𑒱𑒩𑒹-𑒮𑓂𑒟𑒱𑒩𑒹 𑒢𑒱𑒮𑒰𑒿 𑒥𑒜𑓃𑒻𑒞 𑒑𑒹𑒪। 𑒢𑒱𑒮𑒰𑒿𑒧𑒹 𑒮𑒲𑒞 𑒍𑒢𑓂𑒒𑒩𑒰 𑒑𑒹𑒪। 𑒥𑒳𑒜𑓃𑒱𑒨𑒰 𑒥𑒰𑒖𑒪 𑒖𑒹 𑒏𑒼𑒢𑒼 𑒑𑒣 𑒢𑒯𑒱। 𑒔𑒱𑒢𑓂𑒞𑒰 𑒢𑒯𑒱 𑒏𑒩𑒴। 𑒮𑒦 𑒚𑒲𑒏 𑒦𑓄 𑒖𑒋𑒞। 𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒮𑒲𑒞 𑒧𑒩𑒱 𑒑𑒹𑒪। 𑒩𑒰𑒢𑒲 𑒐𑒴𑒥 𑒯𑒰𑒏𑓂𑒩𑒼𑒮 𑒏𑒋 𑒏𑒰𑒢𑒋 𑒪𑒰𑒑𑒪𑒱। 𑒍𑒯𑒱 𑒚𑒰𑒧 𑒏𑒼𑒢𑒼 𑒑𑒰𑒧 𑒢𑒯𑒱 𑒕𑒪। 𑒮𑒲𑒞𑒏𑒹𑒿 𑒡𑒰𑒩𑒏 𑒏𑒰𑒞 𑒪𑓄 𑒖𑒰 𑒏𑒋 𑒑𑒰𑒩𑒱 𑒠𑒹𑒪 𑒑𑒹𑒪। 𑒥𑒳𑒜𑓃𑒱𑒨𑒰 𑒏𑒯𑒪𑒏- 𑒠𑒹𑒐𑒴 𑒔𑒱𑒢𑓂𑒞𑒰 𑒢𑒯𑒱 𑒏𑒩𑒴। 𑒂𑒥 𑒯𑒧 𑒮𑒦 𑒁𑒮𑒢𑒰𑒢 𑒏𑒋 𑒪𑒲। 𑒁𑒮𑒢𑒰𑒢 𑒏𑒩𑒋 𑒑𑒹𑒪 𑒞𑒿 𑒋𑒏𑒙𑒰 𑒢𑒰𑒯 𑒏𑒱𑒢𑒰𑒩𑒧𑒹 𑒪𑒰𑒑𑒪 𑒕𑒪। 𑒥𑒳𑒜𑓃𑒱𑒨𑒰 𑒥𑒰𑒖𑒪 𑒖𑒹 𑒔𑒪𑒴, 𑒍𑒯𑒱 𑒢𑒰𑒯𑒣𑒩 𑒥𑒻𑒮𑒱 𑒏𑒋 𑒮𑓂𑒢𑒰𑒢 𑒏𑒋 𑒪𑒹𑒥। 𑒞𑒐𑒢 𑒠𑒳𑒢𑒴 𑒑𑒼𑒙𑒹 𑒍𑒯𑒲 𑒢𑒰𑒯𑒣𑒩 𑒥𑒻𑒮𑒱𑒏𑒋 𑒢𑒯𑒰𑒋 𑒪𑒰𑒑𑒪। 𑒞𑒐𑒢 𑒂𑒮𑓂𑒞𑒹-𑒂𑒮𑓂𑒞𑒹 𑒢𑒰𑒯 𑒂𑒑𑒰𑒿 𑒖𑒰𑒋 𑒪𑒰𑒑𑒪। 𑒖𑒐𑒢 𑒢𑒰𑒯 𑒥𑒲𑒔 𑒡𑒰𑒩𑒧𑒹 𑒑𑒹𑒪 𑒞𑒿 (𑒩𑒴𑒣 𑓕: 𑒋𑒞𑒋 𑒩𑒰𑒢𑒲𑒏 𑒢𑒰𑒧 𑒤𑒳𑒪𑒫𑒢𑓂𑒞𑒲 𑒮𑒹𑒯𑒼 𑒁𑒥𑒻𑒞 𑒁𑒕𑒱) 𑒩𑒰𑒢𑒲 𑒥𑒳𑒗𑒪𑒏 𑒖𑒹 𑒢𑒰𑒯 𑒥𑒲𑒔 𑒡𑒰𑒩𑒧𑒹 𑒂𑒥𑒱 𑒑𑒹𑒪 𑒁𑒕𑒱। 𑒞𑒐𑒢 𑒍𑒏𑒩𑒰 𑒥𑒳𑒗𑒥𑒰𑒧𑒹 𑒁𑒋𑒪𑒻𑒏 𑒖𑒹 𑒄 𑒥𑒳𑒜𑓃𑒱𑒨𑒰 𑒍𑒏𑒩𑒰 𑒚𑒏𑒱 𑒏𑒋 𑒪𑒋 𑒖𑒰 𑒩𑒯𑒪 𑒕𑒻। 𑒍 𑒩𑒰𑒢𑒲 𑒁𑒣𑒢 𑒣𑒞𑒱𑒏 𑒥𑒱𑒨𑒼𑒑𑒧𑒹 𑒕𑒪𑒲𑒯। 𑒍 𑒯𑒵𑒠𑒨𑒧𑒹 𑒮𑒼𑒔𑒪𑒏 𑒖𑒹 𑒍𑒏𑒩 𑒣𑒞𑒱 𑒧𑒩𑒱 𑒑𑒹𑒪 𑒕𑒻 𑒞𑒿 𑒍 𑒖𑒲𑒫𑒱𑒞 𑒩𑒯𑒱 𑒏𑒋 𑒏𑒲 𑒏𑒩𑒞। 𑒄 𑒮𑒼𑒔𑒱 𑒏𑒋 𑒢𑒰𑒯𑒮𑒿 𑒏𑒴𑒠𑒱 𑒏𑓄 𑒍 𑒡𑒰𑒩𑒧𑒹 𑒤𑒰𑒿𑒑𑒱 𑒑𑒹𑒪। 𑒦𑒿𑒮𑒻𑒞-𑒦𑒿𑒮𑒻𑒞 𑒍 𑒥𑒛𑓂𑒛 𑒠𑒴𑒩 𑒔𑒪𑒱 𑒑𑒹𑒪 𑒂 𑒍𑒞𑒋 𑒍 𑒏𑒰𑒞 𑒪𑒰𑒑𑒱 𑒑𑒹𑒪।

𑒂𑒥 𑒥𑒮𑒢𑓂𑒞𑒏 𑒐𑒱𑒮𑓂𑒮𑒰:
𑒥𑒮𑒢𑓂𑒞 𑒍𑒯𑒱 𑒑𑒰𑒕𑒲𑒧𑒹 𑒦𑒰𑒋𑒏 𑒂𑒮 𑒞𑒏𑒻𑒞 𑒩𑒯𑒋। 𑒠𑒱𑒢 𑒮𑒰𑒿𑒗𑒧𑒹 𑒥𑒠𑒪𑒋 𑒪𑒰𑒑𑒪। 𑒍𑒯𑒱 𑒑𑒰𑒕𑒲𑒧𑒹 𑒏𑒳𑒧𑓂𑒦𑒏𑒰𑒩 𑒪𑒼𑒏𑒢𑒱 𑒑𑒰𑒕𑒲𑒏 𑒣𑒰𑒞 𑒐𑒛𑓃𑒩𑒱 𑒩𑒯𑒪 𑒩𑒯𑒟𑒱। 𑒞𑒐𑒢𑒹 𑒥𑒮𑒢𑓂𑒞 𑒏𑒢𑒻𑒞-𑒏𑒢𑒻𑒞 𑒍𑒯𑒱 𑒏𑒳𑒧𑓂𑒦𑒏𑒰𑒩 𑒪𑒑 𑒑𑒹𑒪। 𑒏𑒳𑒧𑓂𑒦𑒏𑒰𑒩 𑒣𑒳𑒕𑒪𑒏-𑒁𑒯𑒰𑒿 𑒏𑒱𑒋𑒏 𑒏𑒰𑒢𑒱 𑒩𑒯𑒪 𑒕𑒲। 𑒥𑒮𑒢𑓂𑒞 𑒮𑒦 𑒑𑒣 𑒥𑒞𑒹𑒪𑒏। 𑒏𑒳𑒧𑓂𑒦𑒏𑒰𑒩 𑒏𑒯𑒪𑒏-𑒁𑒯𑒰𑒿 𑒔𑒱𑒢𑓂𑒞𑒰 𑒢𑒯𑒱 𑒏𑒩𑒴। 𑒁𑒯𑒰𑒿 𑒯𑒧𑒩𑒰 𑒒𑒩𑒣𑒩 𑒔𑒪𑒴। 𑒁𑒯𑒰𑒿 𑒯𑒧𑒩𑒰 𑒒𑒩𑒣𑒩 𑒩𑒯𑒥। 𑒥𑒮𑒢𑓂𑒞 𑒏𑒳𑒧𑓂𑒦𑒏𑒰𑒩 𑒪𑒑 𑒔𑒪𑒱 𑒑𑒹𑒪 𑒂 𑒩𑒯𑒋 𑒪𑒰𑒑𑒪। 𑒍𑒞𑒋 𑒩𑒯𑒻𑒞-𑒩𑒯𑒻𑒞 𑒋𑒏 𑒥𑒹𑒩 𑒋𑒏𑒙𑒰 𑒥𑒢𑒱𑒖𑒰𑒩𑒰 𑒁𑒣𑒢 𑒖𑒯𑒰𑒖 𑒪𑒋 𑒫𑒰𑒝𑒱𑒖𑓂𑒨 𑒏𑒩𑒋 𑒪𑒹𑒪 𑒖𑒰 𑒩𑒯𑒪 𑒕𑒪 𑒂𑒏𑒱 𑒥𑒲𑒔 𑒡𑒰𑒩𑒧𑒹 𑒍𑒏𑒩 𑒖𑒯𑒰𑒖 𑒚𑒰𑒜𑓃 𑒦𑒋 𑒑𑒹𑒪𑒻𑒏।
𑒖𑒯𑒰𑒖𑒏 𑒃𑒢𑓂𑒖𑒲𑒢𑒱𑒁𑒩𑒮𑒿 (𑒩𑒴𑒣 𑓖 𑒋𑒞𑒋 𑒥𑒢𑒱𑒖𑒰𑒩𑒰𑒏 𑒢𑒰𑒧 𑒢𑒻𑒏𑒰 𑒥𑒢𑒱𑒖𑒰𑒩𑒰 𑒮𑒹𑒯𑒼 𑒏𑒯𑒻𑒞 𑒮𑒳𑒢𑒪 𑒑𑒹𑒪) 𑒥𑒢𑒱𑒖𑒰𑒩𑒰 𑒣𑒳𑒕𑒪𑒏 𑒖𑒹 𑒏𑒲 𑒖𑒯𑒰𑒖 𑒋𑒞𑒋𑒮𑒿 𑒂𑒑𑒰𑒿 𑒢𑒯𑒱 𑒖𑒰 𑒩𑒯𑒪 𑒁𑒕𑒱। 𑒃𑒢𑓂𑒖𑒲𑒢𑒱𑒁𑒩 𑒏𑒯𑒪𑒏-𑒖𑒯𑒰𑒖 𑒥𑒪𑒱 𑒧𑒰𑒿𑒑𑒱 𑒩𑒯𑒪 𑒁𑒕𑒱। 𑒏𑒼𑒢𑒼 𑒧𑒢𑒳𑒏𑓂𑒐𑒏 𑒥𑒔𑓂𑒔𑒰𑒏 𑒥𑒪𑒱 𑒠𑒹𑒪𑒰𑒏 𑒥𑒰𑒠 𑒖𑒯𑒰𑒖 𑒂𑒑𑒰𑒿 𑒖𑒋𑒞। 𑒋𑒞𑒹𑒏 𑒑𑒣 𑒍 𑒥𑒢𑒱𑒖𑒰𑒩𑒰𑒏𑒹𑒿 𑒏𑒯𑒪𑒏 𑒞𑒿 𑒥𑒢𑒱𑒖𑒰𑒩𑒰 𑒞𑒲𑒢 𑒪𑒰𑒐 𑒩𑒳𑒣𑒻𑒨𑒰 𑒪𑒋 𑒋𑒏𑒙𑒰 𑒥𑒔𑓂𑒔𑒰𑒏 𑒞𑒪𑒰𑒬𑒧𑒹 𑒑𑒹𑒪। 𑒞𑒰𑒏𑒻𑒞-𑒞𑒰𑒏𑒻𑒞 𑒍 𑒍𑒯𑒲 𑒑𑒰𑒧𑒧𑒹 𑒑𑒹𑒪, 𑒖𑒰𑒯𑒱 𑒑𑒰𑒧𑒧𑒹 𑒥𑒮𑒢𑓂𑒞 𑒩𑒯𑒻𑒞 𑒕𑒪। 𑒥𑒢𑒱𑒖𑒰𑒩𑒰 𑒁𑒥𑒰𑒖 𑒪𑒑𑒥𑒻𑒞 𑒖𑒰 𑒩𑒯𑒪 𑒕𑒪 𑒖𑒹, 𑒖𑒹 𑒏𑓂𑒨𑒼 𑒋𑒏𑒙𑒰 𑒥𑒔𑓂𑒔𑒰 𑒠𑒹𑒞 𑒍𑒏𑒩𑒰 𑒯𑒧 𑒞𑒲𑒢 𑒪𑒰𑒐 𑒩𑒳𑒣𑒻𑒨𑒰 𑒠𑒹𑒥। 𑒋𑒯𑒱 𑒣𑓂𑒩𑒏𑒰𑒩𑒮𑒿 𑒍 𑒁𑒥𑒰𑒖 𑒪𑒑𑒥𑒻𑒞 𑒖𑒰 𑒩𑒯𑒪 𑒕𑒪। 𑒏𑓂𑒨𑒼 𑒑𑒼𑒙𑒹 𑒢𑒯𑒱 𑒥𑒰𑒖𑒪। 𑒖𑒐𑒢 𑒍 𑒏𑒳𑒧𑓂𑒦𑒏𑒰𑒩𑒏 𑒠𑒩𑒥𑒖𑓂𑒖𑒰𑒏 𑒮𑒼𑒗𑒰𑒿 𑒑𑒹𑒪 𑒞𑒿 𑒏𑒳𑒧𑓂𑒦𑒏𑒰𑒩 𑒏𑒯𑒪𑒏-𑒯𑒿 𑒯𑒧 𑒋𑒏𑒙𑒰 𑒪𑒛𑓃𑒏𑒰 𑒠𑒹𑒥। 𑒯𑒧𑒩𑒰 𑒣𑒰𑒃 𑒔𑒰𑒯𑒲। 𑒥𑒢𑒱𑒖𑒰𑒩𑒰 𑒍𑒯𑒱 𑒏𑒳𑒧𑓂𑒦𑒏𑒰𑒩𑒏𑒹𑒿 𑒞𑒲𑒢 𑒪𑒰𑒐 𑒙𑒰𑒏𑒰 𑒠𑒹𑒪𑒏 𑒂 𑒍𑒞𑒋𑒮𑒿 𑒍 𑒥𑒮𑒢𑓂𑒞𑒏𑒹𑒿 𑒪𑒋 𑒁𑒣𑒢 𑒖𑒯𑒰𑒖 𑒪𑒑 𑒑𑒹𑒪।
𑒥𑒮𑒢𑓂𑒞 𑒍𑒏𑒩𑒰𑒮𑒿 𑒣𑒳𑒕𑒪𑒏-𑒥𑒢𑒱𑒖𑒰𑒩𑒰। 𑒁𑒯𑒰𑒿 𑒯𑒧𑒩𑒰 𑒏𑒞𑒋 𑒪𑒋 𑒖𑒰 𑒩𑒯𑒪 𑒕𑒲।
𑒥𑒢𑒱𑒖𑒰𑒩𑒰 𑒥𑒰𑒖𑒪-𑒯𑒧 𑒁𑒯𑒰𑒿𑒏𑒹𑒿 𑒥𑒪𑒱 𑒔𑒜𑓃𑒋𑒥𑒰 𑒪𑒹𑒪 𑒪𑒋 𑒖𑒰 𑒩𑒯𑒪 𑒕𑒲। 𑒏𑒱𑒋𑒏 𑒞𑒿 𑒯𑒧𑒩 𑒖𑒯𑒰𑒖 𑒡𑒰𑒩𑒏 𑒥𑒲𑒔𑒧𑒹 𑒚𑒰𑒜𑓃 𑒦𑓄 𑒑𑒹𑒪 𑒁𑒕𑒱। 𑒞𑒰𑒯𑒱 𑒠𑓂𑒫𑒰𑒩𑒹 𑒁𑒯𑒰𑒿𑒏 𑒥𑒪𑒱 𑒯𑒧 𑒔𑒜𑓃𑒰𑒋𑒥। 𑒋𑒞𑒹𑒏 𑒑𑒣 𑒮𑒳𑒢𑒱 𑒏𑒋 𑒥𑒮𑒢𑓂𑒞 𑒥𑒰𑒖𑒪 𑒖𑒹 𑒯𑒹 𑒥𑒢𑒱𑒖𑒰𑒩𑒰। 𑒯𑒧𑒩𑒰 𑒍𑒞𑒋 𑒑𑒹𑒪𑒰𑒏 𑒥𑒰𑒠, 𑒖𑒯𑒰𑒖 𑒕𑒴𑒪𑒰𑒏 𑒥𑒰𑒠 𑒖𑒹 𑒖𑒯𑒰𑒖 𑒐𑒳𑒖𑒱 𑒖𑒋𑒞 𑒞𑒿 𑒁𑒯𑒰𑒿 𑒯𑒧𑒩𑒰 𑒕𑒼𑒛𑓃𑒱 𑒠𑒹𑒥 𑒢𑒹?
𑒥𑒢𑒱𑒖𑒰𑒩𑒰 𑒏𑒯𑒪𑒏-𑒯𑒧𑒩 𑒖𑒯𑒰𑒖 𑒖𑒹 𑒐𑒳𑒖𑒱 𑒖𑒋𑒞 𑒞𑒿 𑒯𑒧 𑒁𑒯𑒰𑒿𑒏𑒹𑒿 𑒕𑒼𑒛𑓃𑒱 𑒠𑒹𑒥।
𑒥𑒮𑒢𑓂𑒞 𑒥𑒲𑒔 𑒡𑒰𑒩𑒧𑒹 𑒖𑒰 𑒏𑒋 𑒯𑒰𑒟𑒮𑒿 𑒖𑒯𑒰𑒖𑒏𑒹𑒿 𑒕𑒴𑒥𑒱 𑒏𑒋 𑒥𑒰𑒖𑒪। 𑒖𑒯𑒰𑒖 𑒁𑒯𑒰𑒿 𑒖𑒰𑒆 𑒞𑒿 𑒯𑒧𑒩 𑒖𑒰𑒢 𑒥𑒰𑒿𑒔𑒱 𑒖𑒋𑒞।
𑒋𑒞𑒹𑒏 𑒏𑒯𑒥𑒰𑒏 𑒠𑒹𑒩𑒲 𑒩𑒯𑒋 𑒂𑒏𑒱 𑒖𑒯𑒰𑒖 𑒍𑒞𑒋𑒮𑒿 𑒥𑒱𑒠𑒰 𑒦𑓄 𑒑𑒹𑒪।
𑒃𑒢𑓂𑒖𑒲𑒢𑒱𑒁𑒩 𑒥𑒢𑒱𑒖𑒰𑒩𑒰𑒏𑒹𑒿 𑒏𑒯𑒪𑒏-𑒋𑒏𑒩𑒰 𑒥𑒻𑒮𑒰 𑒪𑒱𑒁 𑒖𑒯𑒰𑒖𑒧𑒹। 𑒏𑒞𑒯𑒳 𑒂𑒢 𑒚𑒰𑒧 𑒚𑒰𑒜𑓃 𑒦𑓄 𑒖𑒋𑒞 𑒞𑒐𑒢?
𑒥𑒮𑒢𑓂𑒞 𑒥𑒰𑒖𑒪-𑒯𑒧𑒩𑒰 𑒧𑒰𑒩𑒱 𑒠𑒹𑒢𑒹 𑒩𑒯𑒱𑒞𑒯𑒳𑒿 𑒞𑒿 𑒤𑒹𑒩 𑒖𑒯𑒰𑒖 𑒚𑒰𑒜𑓃 𑒦𑒹𑒪𑒰𑒏 𑒥𑒰𑒠 𑒯𑒧𑒩𑒰 𑒏𑒞𑒋𑒮𑒿 𑒁𑒢𑒱𑒞𑒯𑒳𑒿?
𑒥𑒢𑒱𑒖𑒰𑒩𑒰 𑒥𑒰𑒖𑒪-𑒕𑒼𑒛𑓃𑒱 𑒠𑒱𑒁 𑒋𑒏𑒩𑒰।
𑒥𑒮𑒢𑓂𑒞 𑒍𑒞𑒋𑒮𑒿 𑒡𑒰𑒩𑒏 𑒏𑒰𑒞𑒹-𑒏𑒰𑒞𑒹 𑒥𑒱𑒠𑒰 𑒦𑒹𑒪 𑒂 𑒍𑒞𑒋 𑒣𑒯𑒳𑒿𑒔𑒱 𑒑𑒹𑒪, 𑒖𑒞𑒋 𑒮𑒲𑒞𑒏 𑒮𑓂𑒞𑓂𑒩𑒲 𑒏𑒰𑒢𑒱 𑒩𑒯𑒪 𑒕𑒪𑒲𑒯।
𑒥𑒮𑒢𑓂𑒞 𑒣𑒳𑒕𑒪𑒏-𑒁𑒯𑒰𑒿 𑒏𑒱𑒋𑒏 𑒏𑒰𑒢𑒱 𑒩𑒯𑒪 𑒕𑒲 ?
𑒋𑒞𑒥𑒰 𑒮𑒳𑒢𑒱𑒞𑒯𑒱 𑒍 𑒏𑒰𑒢𑒥 𑒥𑒢𑓂𑒠 𑒏𑒋 𑒔𑒳𑒣 𑒦𑒋 𑒑𑒹𑒪𑒲𑒯।
𑒥𑒮𑒢𑓂𑒞 𑒏𑒯𑒪𑒏-𑒯𑒧𑒯𑒴𑒿 𑒠𑒳𑒐𑒏 𑒧𑒰𑒩𑒪 𑒕𑒲। 𑒯𑒧 𑒥𑒱𑒕𑒳𑒛𑓃𑒱 𑒏𑒋 𑒠𑒴 𑒮𑒿 𑒋𑒏 𑒦𑒋 𑒑𑒹𑒪 𑒕𑒲।
𑒮𑓂𑒞𑓂𑒩𑒲 𑒣𑒳𑒕𑒪𑒏-𑒁𑒯𑒰𑒿𑒏 𑒏𑒲 𑒢𑒰𑒧 𑒕𑒲 𑒂 𑒁𑒯𑒰𑒿𑒏 𑒦𑒰𑒋𑒏 𑒏𑒲 𑒢𑒰𑒧 𑒕𑒲?
𑒥𑒮𑒢𑓂𑒞 𑒥𑒰𑒖𑒪-𑒯𑒧𑒩 𑒢𑒰𑒧 𑒥𑒮𑒢𑓂𑒞 𑒕𑒲 𑒂 𑒯𑒧𑒩 𑒦𑒰𑒋𑒏 𑒢𑒰𑒧 𑒮𑒲𑒞 𑒕𑒪।
𑒄 𑒥𑒰𑒞 𑒮𑒳𑒢𑒻𑒞 𑒮𑓂𑒞𑓂𑒩𑒲 𑒤𑒹𑒩𑒮𑒿 𑒏𑒰𑒢𑒋 𑒪𑒰𑒑𑒪 𑒂 𑒏𑒯𑒪𑒏 𑒖𑒹 𑒁𑒯𑒰𑒿𑒏 𑒦𑒰𑒋 𑒮𑓂𑒫𑒩𑓂𑒑𑒫𑒰𑒮𑒲 𑒦𑒋 𑒑𑒹𑒪𑒰𑒯। 𑒯𑒳𑒢𑒏𑒹 𑒫𑒱𑒨𑒼𑒑𑒧𑒹 𑒯𑒧 𑒏𑒰𑒢𑒱 𑒩𑒯𑒪 𑒕𑒲। 𑒄 𑒑𑒣 𑒮𑒳𑒢𑒱 𑒏𑒋 (𑒩𑒴𑒣:𑓗 𑒋𑒞𑒋 𑒢𑒰𑒧 𑒠𑒱𑒪 𑒥𑒮𑒢𑓂𑒞 𑒮𑒹𑒯𑒼 𑒁𑒥𑒻𑒞 𑒁𑒕𑒱) 𑒥𑒮𑒢𑓂𑒞 𑒏𑒯𑒪𑒏 𑒖𑒹 𑒂𑒥 𑒯𑒧𑒩𑒼 𑒖𑒲𑒫𑒱𑒞 𑒢𑒯𑒱 𑒩𑒯𑒥𑒰𑒏 𑒁𑒕𑒱।
𑒄 𑒑𑒣 𑒮𑒳𑒢𑒱𑒞𑒯𑒱 𑒮𑒲𑒞𑒏 𑒮𑓂𑒞𑓂𑒩𑒲 𑒧𑒩𑒱 𑒑𑒹𑒪𑒱 𑒂 𑒥𑒮𑒢𑓂𑒞 𑒍𑒯𑒲 𑒮𑒧𑒨 𑒥𑒼𑒢𑒧𑒹 𑒖𑒰 𑒏𑒋 𑒋𑒏𑒙𑒰 𑒣𑒻𑒒 𑒑𑒰𑒕𑒣𑒩 𑒔𑒜𑓃𑒱 𑒏𑒋 𑒁𑒣𑒢 𑒖𑒰𑒢 𑒠𑒹𑒥𑒰𑒏 𑒪𑒹𑒪 𑒞𑒻𑒨𑒰𑒩 𑒦𑓄 𑒑𑒹𑒪। 𑒍𑒯𑒲 𑒮𑒧𑒨 𑒋𑒏𑒙𑒰 𑒂𑒏𑒰𑒬𑒫𑒰𑒝𑒲 𑒍𑒏𑒩𑒰 𑒁𑒥𑒰𑒖 𑒠𑒹𑒪𑒏-𑒥𑒮𑒢𑓂𑒞 𑒞𑒴𑒿 𑒁𑒣𑒢 𑒖𑒰𑒢 𑒢𑒯𑒱 𑒑𑒧𑒰। 𑒞𑒼𑒯𑒩 𑒦𑒰𑒋 𑒖𑒲𑒫𑒱𑒞 𑒕𑒾𑒏। 𑒖𑒼 𑒖𑒞𑒋 𑒞𑒼𑒯𑒩 𑒦𑒰𑒋𑒏 𑒮𑒰𑒩𑒰 𑒕𑒾𑒏 𑒍𑒯𑒱𑒣𑒩 𑒁𑒣𑒢 𑒠𑒯𑒱𑒢 𑒯𑒰𑒟𑒏 𑒏𑓀𑒑𑒳𑒩𑒱𑒨𑒰 𑒂𑒿𑒑𑒳𑒩 𑒏𑒰𑒙𑒱 𑒏𑒋 𑒍𑒯𑒱𑒣𑒩 𑒕𑒲𑒙𑒱 𑒠𑒹। 𑒞𑒼𑒯𑒩 𑒦𑒰𑒋 𑒖𑒲𑒫𑒱𑒞 𑒦𑒋 𑒖𑒋𑒞𑒾𑒏। 𑒋𑒞𑒹𑒏 𑒑𑒣 𑒮𑒳𑒢𑒱 𑒏𑒋 𑒥𑒮𑒢𑓂𑒞 𑒑𑒰𑒕𑒮𑒿 𑒢𑒲𑒔𑒰𑒿 𑒅𑒞𑒩𑒱 𑒑𑒹𑒪 𑒂 𑒖𑒞𑒋 𑒍𑒏𑒩 𑒦𑒰𑒋𑒏 𑒮𑒰𑒩𑒰 𑒕𑒪 𑒍𑒯𑒱𑒣𑒩 𑒍 𑒍𑒯𑒱𑒢𑒰 𑒏𑒋𑒪𑒏। 𑒮𑒲𑒞 𑒩𑒰𑒧-𑒩𑒰𑒧 𑒥𑒖𑒻𑒞 𑒅𑒚𑒱 𑒑𑒹𑒪। 𑒠𑒳𑒢𑒴 𑒦𑒰𑒃 𑒑𑒩𑒰 𑒧𑒱𑒪𑒪। 𑒍𑒯𑒱 𑒚𑒰𑒧𑒮𑒿 𑒠𑒳𑒢𑒴 𑒦𑒰𑒋 𑒥𑒱𑒠𑒰 𑒦𑒹𑒪। 𑒠𑒱𑒢𑒮𑒿 𑒮𑒰𑒿𑒗 𑒣𑒛𑓃𑒱 𑒑𑒹𑒪 𑒂 𑒠𑒳𑒢𑒴 𑒦𑒰𑒋 𑒋𑒏 𑒚𑒰𑒧 𑒑𑒰𑒕𑒏 𑒢𑒲𑒔𑒰𑒿 𑒁𑒙𑒏𑒱 𑒖𑒰𑒃 𑒑𑒹𑒪𑒰𑒯।
𑒮𑒲𑒞 𑒏𑒯𑒪𑒏-𑒦𑒰𑒋 𑒥𑒮𑒢𑓂𑒞, 𑒋𑒞𑒯𑒱 𑒩𑒳𑒏𑒻𑒞 𑒕𑒲। 𑒦𑒼𑒩 𑒦𑓄 𑒖𑒋𑒞 𑒞𑒐𑒢 𑒤𑒹𑒩 𑒯𑒧 𑒮𑒦 𑒥𑒱𑒠𑒰 𑒯𑒼𑒋𑒥।
𑒠𑒳𑒢𑒴 𑒦𑒰𑒋 𑒍𑒯𑒱 𑒑𑒰𑒕𑒏 𑒢𑒲𑒔𑒰𑒿 𑒩𑒰𑒞𑓂𑒩𑒱 𑒫𑓂𑒨𑒞𑒲𑒞 𑒏𑒩𑒋 𑒪𑒑𑒪𑒰𑒯।

𑒐𑒱𑒮𑓂𑒮𑒰 𑒩𑒴𑒣 𑓘: 𑒩𑒰𑒞𑓂𑒩𑒱𑒏 𑒥𑒰𑒩𑒯 𑒥𑒰𑒖𑒪 𑒞𑒿 𑒥𑒼𑒢𑒮𑒿 𑒋𑒏𑒙𑒰 𑒮𑒰𑒿𑒣 𑒥𑒯𑒰𑒩 𑒦𑒹𑒪 𑒂 𑒑𑒰𑒕𑒣𑒩 𑒔𑒜𑓃𑒋 𑒪𑒰𑒑𑒪। 𑒍𑒯𑒲 𑒑𑒰𑒕𑒣𑒩 𑒯𑓀𑒮𑒏 𑒐𑒼𑒞𑒰 𑒩𑒯𑒋। 𑒍𑒯𑒱 𑒯𑓀𑒮𑒏 𑒐𑒼𑒞𑒰𑒧𑒹 𑒠𑒴 𑒙𑒰 𑒯𑓀𑒮𑒏 𑒥𑒔𑓂𑒔𑒰 𑒩𑒯𑒋। 𑒮𑒰𑒿𑒣𑒏𑒹𑒿 𑒠𑒹𑒐𑒱 𑒏𑒋 𑒠𑒳𑒢𑒴 𑒥𑒔𑓂𑒔𑒰 𑒁𑒥𑒰𑒖 𑒠𑒹𑒧𑒋 𑒪𑒰𑒑𑒪। 𑒄 𑒁𑒥𑒰𑒖 𑒠𑒳𑒢𑒴 𑒦𑒰𑒋 𑒮𑒳𑒢𑒪𑒏 𑒂 𑒮𑒰𑒿𑒣𑒏𑒹𑒿 𑒑𑒰𑒕𑒣𑒩 𑒔𑒜𑓃𑒻𑒞 𑒠𑒹𑒐𑒪𑒏 𑒂 𑒮𑒼𑒔𑒪𑒏 𑒖𑒹 𑒄 𑒮𑒰𑒿𑒣 𑒥𑒔𑓂𑒔𑒰 𑒮𑒦𑒏𑒹𑒿 𑒐𑒰 𑒖𑒋𑒞 𑒮𑒹 𑒋𑒏𑒩𑒰 𑒖𑒹 𑒧𑒰𑒩𑒱 𑒠𑒲 𑒞𑒿 𑒥𑒔𑓂𑒔𑒰 𑒮𑒦𑒏 𑒖𑒰𑒢 𑒥𑒔𑒱 𑒖𑒋𑒞। 𑒍 𑒮𑒦 𑒮𑒰𑒿𑒣𑒏𑒹𑒿 𑒧𑒰𑒩𑒱 𑒠𑒹𑒪𑒏।
𑒞𑒰𑒫𑒞 𑒯𑓀𑒮 𑒠𑒯𑒧𑒹 𑒔𑒩𑒋 𑒪𑒹𑒪 𑒑𑒹𑒪 𑒩𑒯𑒋। 𑒯𑓀𑒮 𑒍𑒯𑒱 𑒐𑒼𑒞𑒰𑒧𑒹 𑒏𑒞𑒹𑒏 𑒥𑒹𑒩 𑒥𑒔𑓂𑒔𑒰 𑒠𑒹𑒢𑒹 𑒩𑒯𑒋 𑒧𑒳𑒠𑒰 𑒋𑒏𑒼𑒙𑒰 𑒥𑒔𑓂𑒔𑒰 𑒅𑒚𑒰 𑒢𑒯𑒱 𑒮𑒏𑒪 𑒩𑒯𑒋। 𑒦𑒼𑒩𑒹 𑒮𑒏𑒰𑒪𑒹 𑒯𑓀𑒮 𑒠𑒯𑒮𑒿 𑒔𑒩𑒱 𑒏𑒋 𑒂𑒋𑒪। 𑒥𑒔𑓂𑒔𑒰 𑒮𑒦𑒏𑒹𑒿 𑒖𑒲𑒫𑒱𑒞 𑒠𑒹𑒐𑒱 𑒥𑒛𑓂𑒛 𑒣𑓂𑒩𑒮𑒢𑓂𑒢 𑒦𑒹𑒪। 𑒥𑒔𑓂𑒔𑒰𑒏𑒹𑒿 𑒁𑒯𑒰𑒩 𑒠𑒹𑒧𑒋 𑒪𑒰𑒑𑒪। 𑒥𑒔𑓂𑒔𑒰 𑒧𑒳𑒿𑒯 𑒒𑒳𑒧𑒰 𑒪𑒹𑒪𑒏 𑒂 𑒣𑒳𑒕𑒪𑒏-𑒧𑒰𑒿 𑒁𑒯𑒰𑒿 𑒋𑒯𑒱 𑒑𑒰𑒕𑒣𑒩 𑒏𑒞𑒹𑒏 𑒥𑒔𑓂𑒔𑒰 𑒣𑒰𑒛𑓃𑒪𑒯𑒳𑒿 𑒂𑒏𑒱 𑒯𑒧𑒯𑒲 𑒣𑒯𑒱𑒪 𑒥𑒔𑓂𑒔𑒰 𑒕𑒲।
𑒧𑒰𑒿 𑒥𑒰𑒖𑒪𑒱-𑒢𑒯𑒱 𑒋𑒯𑒱 𑒑𑒰𑒕𑒣𑒩 𑒏𑒋𑒏 𑒥𑒹𑒩 𑒯𑒧 𑒥𑒔𑓂𑒔𑒰 𑒠𑒹𑒪𑒯𑒳𑒿 𑒧𑒳𑒠𑒰 𑒧𑒳𑒿𑒯 𑒁𑒯𑒲𑓀 𑒠𑒳𑒢𑒴𑒏 𑒯𑒧 𑒂𑒃 𑒠𑒹𑒐𑒪𑒯𑒳𑒿।
𑒥𑒔𑓂𑒔𑒰 𑒥𑒰𑒖𑒪 𑒖𑒹 𑒯𑒧𑒩𑒼 𑒧𑒳𑒿𑒯 𑒁𑒯𑒰𑒿 𑒢𑒯𑒱 𑒠𑒹𑒐𑒱 𑒮𑒏𑒱𑒞𑒯𑒳𑒿, 𑒖𑒹 𑒄 𑒧𑒳𑒮𑒰𑒤𑒱𑒩 𑒢𑒯𑒱 𑒩𑒯𑒱𑒞𑒋। 𑒢𑒲𑒔𑒰𑒿 𑒠𑒹𑒐𑒴 𑒏𑒲 𑒣𑒛𑓃𑒪 𑒁𑒕𑒱।
𑒯𑓀𑒮 𑒠𑒹𑒐𑒪𑒏 𑒖𑒹 𑒢𑒲𑒔𑒰𑒿 𑒧𑒹 𑒋𑒏𑒙𑒰 𑒮𑒰𑒿𑒣 𑒣𑒛𑓃𑒪 𑒕𑒻 𑒂 𑒠𑒴 𑒙𑒰 𑒧𑒳𑒮𑒰𑒤𑒱𑒩 𑒤𑒱𑒩𑒱 𑒩𑒯𑒪 𑒁𑒕𑒱।
𑒥𑒔𑓂𑒔𑒰 𑒥𑒰𑒖𑒪-𑒍𑒯𑒱 𑒮𑒰𑒿𑒣𑒏𑒹𑒿 𑒨𑒻𑒯 𑒠𑒳𑒢𑒴 𑒧𑒳𑒮𑒰𑒤𑒱𑒩 𑒧𑒰𑒩𑒪𑒏 𑒁𑒕𑒱। 𑒣𑒯𑒱𑒢𑒹 𑒖𑒰 𑒏𑒋 𑒍𑒯𑒲 𑒧𑒳𑒮𑒰𑒤𑒱𑒩𑒏𑒹𑒿 𑒐𑒋𑒥𑒰 𑒪𑒹𑒪 𑒠𑒱𑒨𑒾𑒏। 𑒍 𑒐𑒰𑒍𑒞 𑒞𑒿 𑒯𑒧 𑒐𑒰𑒋𑒥।
𑒯𑓀𑒮 𑒢𑒲𑒔𑒰𑒿 𑒅𑒞𑒩𑒱 𑒏𑒋 𑒂𑒋𑒪 𑒂 𑒏𑒯𑒪𑒏- 𑒧𑒳𑒮𑒰𑒤𑒱𑒩, 𑒖𑒐𑒢 𑒁𑒯𑒰𑒿 𑒢𑒯𑒱 𑒐𑒰𑒋𑒥 𑒞𑒿 𑒄 𑒠𑒳𑒢𑒴 𑒥𑒔𑓂𑒔𑒰 𑒮𑒹𑒯𑒼 𑒢𑒯𑒱 𑒐𑒰𑒋𑒞।
𑒄 𑒠𑒳𑒢𑒴 𑒦𑒰𑒋 𑒏𑒯𑒪𑒏-𑒧𑒰𑒿, 𑒐𑒹𑒢𑒰𑒃𑒮𑒿 𑒣𑓂𑒩𑒹𑒧 𑒣𑒻𑒒 𑒁𑒕𑒱। 𑒧𑒰𑒿 𑒯𑒧𑒯𑒴𑒿 𑒮𑒦, 𑒣𑒩𑒱𑒮𑓂𑒟𑒱𑒞𑒱𑒏 𑒧𑒰𑒩𑒪 𑒕𑒲। 𑒯𑒧𑒩 𑒮𑒦𑒏 𑒏𑒹 𑒮𑒯𑒰𑒨𑒞𑒰 𑒏𑒩𑒞 ?
𑒯𑓀𑒮 𑒥𑒰𑒖𑒪-𑒯𑒧𑒩 𑒮𑒯𑒰𑒨𑒞𑒰 𑒁𑒯𑒰𑒿 𑒏𑒋𑒪𑒯𑒳𑒿 𑒮𑒹 𑒁𑒯𑒰𑒿𑒏 𑒮𑒯𑒰𑒨𑒞𑒰 𑒯𑒧 𑒏𑒩𑒥। 𑒪𑒱𑒁 𑒋𑒏𑒙𑒰 𑒥𑒔𑓂𑒔𑒰 𑒯𑒧 𑒁𑒯𑒰𑒿 𑒮𑒦𑒏𑒹𑒿 𑒠𑒻𑒞 𑒕𑒲। 𑒄 𑒁𑒯𑒰𑒿𑒏 𑒮𑒯𑒰𑒨𑒞𑒰 𑒏𑒩𑒞। 𑒮𑒱𑒨𑒰𑒢 𑒦𑒹𑒪𑒰𑒣𑒩 𑒄 𑒁𑒯𑒰𑒿 𑒠𑒳𑒢𑒴 𑒦𑒰𑒋𑒏𑒹𑒿 𑒁𑒣𑒢 𑒣𑒰𑒿𑒐𑒱𑒣𑒩 𑒥𑒻𑒮𑒰 𑒏𑒋 𑒅𑒛𑓃𑒱 𑒮𑒏𑒻𑒞 𑒁𑒕𑒱। 𑒖𑒞𑒋 𑒧𑒼𑒢 𑒯𑒼𑒋𑒞, 𑒍𑒞𑒋 𑒖𑒰 𑒮𑒏𑒻𑒞 𑒕𑒲। 𑒄 𑒫𑒩𑒠𑒰𑒢 𑒯𑒧 𑒠𑒻𑒞 𑒕𑒲 𑒖𑒹 𑒁𑒯𑒰𑒿 𑒠𑒳𑒢𑒴 𑒦𑒰𑒋 𑒮𑒤𑒪 𑒩𑒯𑒥। 𑒠𑒳𑒢𑒴 𑒦𑒰𑒋 𑒣𑓂𑒩𑒝𑒰𑒧 𑒏𑒋 𑒍𑒞𑒋𑒮𑒿 𑒥𑒱𑒠𑒰 𑒦𑒹𑒪𑒰𑒯। 𑒍 𑒮𑒦 𑒖𑒞𑒋 𑒏𑒞𑒯𑒳 𑒥𑒱𑒪𑒧𑒻𑒞 𑒩𑒯𑒟𑒱, 𑒍𑒞𑒋 𑒯𑓀𑒮 𑒁𑒣𑒢 𑒠𑒳𑒢𑒴 𑒣𑒰𑒿𑒐𑒱 𑒣𑒮𑒰𑒩𑒱 𑒕𑒰𑒯 𑒏𑒋 𑒠𑒻𑒞 𑒕𑒪। 𑒋𑒯𑒱 𑒣𑓂𑒩𑒏𑒰𑒩𑒹𑒿 𑒏𑒱𑒕𑒳 𑒠𑒱𑒢 𑒥𑒲𑒞𑒪। 𑒯𑓀𑒮𑒏 𑒥𑒔𑓂𑒔𑒰 𑒣𑒻𑒒 𑒦𑓄 𑒑𑒹𑒪। 𑒍 𑒂𑒥 𑒠𑒳𑒢𑒴 𑒦𑒰𑒋𑒏𑒹𑒿 𑒔𑒜𑓃𑒰 𑒏𑒋 𑒪𑓄 𑒖𑒰𑒋 𑒨𑒼𑒑𑓂𑒨 𑒦𑓄 𑒑𑒹𑒪।
𑒯𑓀𑒮 𑒥𑒰𑒖𑒪-𑒦𑒰𑒋। 𑒂𑒥 𑒞𑒼𑒿 𑒠𑒳𑒢𑒴 𑒦𑒰𑒋 𑒯𑒧𑒩 𑒆𑒣𑒩 𑒥𑒻𑒮𑒱 𑒖𑒰𑒯। 𑒁𑒯𑒰𑒿 𑒖𑒞𑒋 𑒏𑒞𑒯𑒳 𑒏𑒯𑒥 𑒯𑒧 𑒁𑒯𑒰𑒿 𑒮𑒦𑒏𑒹𑒿 𑒪𑒋 𑒔𑒪𑒥।
𑒠𑒳𑒢𑒴 𑒦𑒰𑒋 𑒍𑒞𑒋𑒮𑒿 𑒯𑓀𑒮𑒣𑒩 𑒮𑒫𑒰𑒩 𑒦𑒋 𑒂𑒑𑒴 𑒥𑒱𑒠𑒰 𑒦𑒹𑒪𑒰𑒯 𑒂 𑒖𑒰 𑒏𑒋 𑒏𑓀𑒔𑒢𑒣𑒳𑒩 𑒬𑒯𑒩 𑒣𑒯𑒳𑒿𑒔𑒪𑒰𑒯। 𑒢𑒑𑒩𑒏 𑒥𑒰𑒯𑒩 𑒋𑒏𑒙𑒰 𑒥𑒩𑒏 𑒑𑒰𑒕 𑒕𑒪। 𑒍𑒯𑒲 𑒑𑒰𑒕𑒏 𑒪𑒑 𑒍 𑒮𑒦 𑒛𑒹𑒩𑒰 𑒐𑒮𑒹𑒪𑒏 𑒂 𑒩𑒯𑒋 𑒪𑒰𑒑𑒪, 𑒂 𑒬𑒯𑒩𑒧𑒹 𑒖𑒰 𑒏𑒋 𑒏𑒰𑒖 𑒏𑒩𑒋 𑒪𑒰𑒑𑒪। 𑒮𑒰𑒿𑒗 𑒦𑒹𑒪𑒰 𑒅𑒞𑓂𑒞𑒩, 𑒍𑒯𑒲 𑒑𑒰𑒕𑒏 𑒪𑒑 𑒐𑒹𑒢𑒰𑒃 𑒐𑒰 𑒏𑒋 𑒍 𑒮𑒦 𑒮𑒴𑒞𑒱 𑒖𑒰𑒟𑒱। 𑒯𑓀𑒮 𑒦𑒩𑒱 𑒩𑒰𑒞𑒱 𑒠𑒳𑒢𑒴 𑒦𑒰𑒋𑒏 𑒠𑒹𑒐-𑒩𑒹𑒐 𑒏𑒩𑒻𑒞 𑒕𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍𑒯𑒱 𑒏𑓀𑒔𑒢𑒣𑒳𑒩 𑒬𑒯𑒩𑒏 𑒩𑒰𑒖𑒰𑒏 𑒏𑓀𑒔𑒢𑒰 𑒢𑒰𑒧𑓂𑒢𑒰 𑒥𑒹𑒙𑒲𑒮𑒿 𑒮𑒲𑒞 𑒣𑓂𑒩𑒹𑒧 𑒏𑒩𑒋 𑒪𑒰𑒑𑒪।
𑒍𑒯𑒱 𑒪𑒛𑓃𑒏𑒲𑒏 𑒣𑓂𑒩𑒞𑓂𑒨𑒹𑒏 𑒠𑒱𑒢 𑒤𑒴𑒪𑒮𑒿 𑒍𑒖𑒢 𑒏𑒋𑒪 𑒖𑒰𑒃𑒞 𑒕𑒪। 𑒣𑓂𑒩𑒹𑒧 𑒏𑒋𑒪𑒰𑒏 𑒥𑒰𑒠 𑒪𑒛𑓃𑒏𑒲𑒏 𑒍𑒖𑒢 𑒥𑒯𑒳𑒞 𑒥𑒜𑓃𑒋 𑒪𑒰𑒑𑒪। 𑒩𑒰𑒖𑒰𑒏𑒹𑒿 𑒐𑒥𑒩 𑒦𑒹𑒪 𑒖𑒹 𑒪𑒛𑓃𑒏𑒲𑒏 𑒍𑒖𑒢 𑒏𑒱𑒋𑒏 𑒥𑒜𑓃𑒋 𑒪𑒰𑒑𑒪 𑒁𑒕𑒱 ? 𑒩𑒰𑒖𑒰 𑒁𑒣𑒢 𑒧𑒯𑒪𑒏 𑒔𑒰𑒩𑒴 𑒏𑒰𑒞 𑒮𑒱𑒣𑒰𑒯𑒲𑒏 𑒣𑒯𑒩𑒰 𑒠𑒱𑒂 𑒠𑒹𑒪𑒏। 𑒞𑒰𑒯𑒴𑒣𑒩 𑒮𑒲𑒞 𑒯𑓀𑒮𑒣𑒩 𑒮𑒫𑒰𑒩 𑒦𑒋 𑒧𑒯𑒪𑒧𑒹 𑒔𑒪𑒱 𑒖𑒰𑒃𑒞 𑒕𑒪𑒰𑒯। 𑒮𑒧𑓂𑒣𑒴𑒩𑓂𑒝 𑒬𑒯𑒩𑒧𑒹 𑒯𑒱𑒪𑒏𑒼𑒩 𑒅𑒚𑒱 𑒑𑒹𑒪 𑒖𑒹 𑒏𑒹 𑒄 𑒪𑒼𑒏 𑒁𑒕𑒱, 𑒖𑒹 𑒯𑒧𑒩 𑒩𑒰𑒖𑒰𑒏 𑒧𑒯𑒪𑒧𑒹 𑒔𑒼𑒩𑒱𑒮𑒿 𑒔𑒪𑒱 𑒖𑒰𑒃𑒞 𑒁𑒕𑒱। 𑒋𑒏 𑒠𑒱𑒢 𑒮𑓀𑒖𑒼𑒑𑒮𑒿 𑒮𑒲𑒞 𑒑𑒹𑒪 𑒂 𑒏𑒼𑒔𑒣𑒩 𑒥𑒻𑒮𑒱 𑒠𑒳𑒢𑒴 𑒑𑒼𑒙𑒹 𑒯𑒿𑒮𑒲 𑒧𑒖𑒰𑒏 𑒏𑒩𑒋 𑒪𑒰𑒑𑒪 𑒂 𑒁𑒯𑒲𑒧𑒹 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒢𑒱𑒢𑓂𑒢 𑒪𑒰𑒑𑒱 𑒑𑒹𑒪𑒻𑒏। 𑒯𑓀𑒮 𑒥𑒹𑒔𑒰𑒩𑒰 𑒒𑒳𑒩𑒱 𑒏𑒋 𑒂𑒣𑒮 𑒁𑒣𑒢 𑒛𑒹𑒩𑒰𑒣𑒩 𑒂𑒥𑒱 𑒑𑒹𑒪 𑒂 𑒦𑒼𑒩𑒧𑒹 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒋𑒏𑓂𑒏𑒹 𑒮𑓀𑒑 𑒧𑒯𑒪𑒧𑒹 𑒣𑒏𑒛𑓃𑒱 𑒪𑒹𑒪 𑒑𑒹𑒪𑒻𑒏।
𑒩𑒰𑒖𑒰 𑒮𑒦𑒙𑒰 𑒑𑒣 𑒣𑒳𑒕𑒪𑒏। 𑒮𑒲𑒞 𑒮𑒦𑒙𑒰 𑒑𑒣 𑒥𑒞𑒹𑒪𑒏।
𑒪𑒛𑓃𑒏𑒲 𑒏𑒯𑒪𑒏 𑒖𑒹 𑒯𑒧𑒩 𑒦𑒰𑒑𑓂𑒨𑒧𑒹 𑒨𑒻𑒯 𑒁𑒕𑒱 𑒂 𑒨𑒻𑒯 𑒩𑒯𑒞।
𑒩𑒰𑒖𑒰 𑒮𑒼𑒔𑒱 𑒏𑒋 𑒏𑒯𑒪𑒏-𑒁𑒯𑒰𑒿 𑒁𑒣𑒢 𑒦𑒰𑒋𑒏𑒹𑒿 𑒪𑒋 𑒂𑒆 𑒂 𑒯𑓀𑒮𑒏𑒹𑒿 𑒮𑒹𑒯𑒼।
𑒥𑒮𑒢𑓂𑒞 𑒂 𑒯𑓀𑒮𑒏𑒹𑒿 𑒮𑒲𑒞 𑒪𑒋 𑒁𑒢𑒪𑒏। 𑒯𑓀𑒮𑒏𑒹𑒿 𑒠𑒹𑒐𑒱 𑒏𑒋 𑒩𑒰𑒖𑒰 𑒥𑒛𑓂𑒛 𑒣𑓂𑒩𑒮𑒢𑓂𑒢 𑒦𑒹𑒪।
𑒩𑒰𑒖𑒰 𑒏𑒯𑒪𑒏-𑒯𑒧𑒩 𑒧𑒢𑓂𑒞𑓂𑒩𑒲𑒏𑒹𑒿 𑒋𑒏𑒙𑒰 𑒥𑒹𑒙𑒲 𑒕𑒻। 𑒠𑒳𑒢𑒴 𑒦𑒰𑒋𑒏 𑒋𑒏𑒯𑒱 𑒥𑒹𑒩 𑒥𑒱𑒨𑒰𑒯 𑒏𑒋 𑒠𑒹𑒪 𑒖𑒋𑒞।
𑒥𑒛𑓂𑒛 𑒡𑒴𑒧-𑒡𑒰𑒧𑒮𑒿 𑒠𑒳𑒢𑒴 𑒦𑒰𑒋𑒏 𑒥𑒱𑒨𑒰𑒯 𑒦𑒹𑒪।
𑒮𑒲𑒞𑒏𑒹𑒿 𑒏𑓀𑒔𑒢𑒣𑒳𑒩𑒏 𑒩𑒰𑒖 𑒦𑒹𑒙𑒪, 𑒏𑒰𑒩𑒝 𑒩𑒰𑒖𑒰𑒏 𑒞𑒿 𑒋𑒏𑒹𑒙𑒰 𑒥𑒹𑒙𑒲 𑒩𑒯𑒋। 𑒞𑒰𑒯𑒱 𑒠𑓂𑒫𑒰𑒩𑒹 𑒮𑒲𑒞 𑒏𑒱𑒕𑒳 𑒠𑒱𑒢 𑒥𑒱𑒞𑒪𑒰𑒏 𑒥𑒰𑒠 𑒏𑒯𑒪𑒏 𑒖𑒹 𑒂𑒥 𑒯𑒧 𑒁𑒣𑒢 𑒬𑒯𑒩 𑒖𑒰𑒋𑒥।
𑒩𑒰𑒖𑒰 𑒐𑒳𑒬𑒲𑒏 𑒮𑓀𑒑 𑒍𑒯𑒱 𑒔𑒰𑒩𑒴 𑒑𑒼𑒙𑒹 𑒥𑒹𑒙𑒲-𑒖𑒧𑒰𑒋𑒏𑒹𑒿 𑒥𑒱𑒠𑒰 𑒏𑒋𑒪𑒏। 𑒮𑒲𑒞-𑒥𑒮𑒢𑓂𑒞 𑒠𑒳𑒢𑒴 𑒦𑒰𑒋 𑒁𑒣𑒢 𑒠𑒹𑒬 𑒥𑒱𑒠𑒰 𑒦𑒹𑒪। 𑒏𑒱𑒕𑒳 𑒠𑒱𑒢𑒳𑒏𑒰 𑒥𑒰𑒠 𑒍 𑒮𑒦 𑒁𑒣𑒢 𑒢𑒑𑒩 𑒣𑒯𑒳𑒿𑒔𑒪 𑒞𑒿 𑒍𑒞𑒳𑒏𑓂𑒏𑒰 𑒯𑒰𑒪𑒞 𑒥𑒛𑓂𑒛 𑒑𑒧𑓂𑒦𑒲𑒩 𑒠𑒹𑒐𑒪𑒏। 𑒁𑒣𑒢 𑒩𑒰𑒖𑒏 𑒋𑒏 𑒏𑒼𑒢𑒧𑒹 𑒍 𑒮𑒦 𑒁𑒣𑒢 𑒒𑒩 𑒥𑒢𑒹𑒪𑒏 𑒂 𑒩𑒯𑒋 𑒪𑒰𑒑𑒪। 𑒮𑒲𑒞𑒏 𑒧𑒰𑒋 𑒂 𑒣𑒱𑒞𑒰 𑒠𑒳𑒢𑒴 𑒑𑒼𑒙𑒹 𑒂𑒢𑓂𑒯𑒩 𑒦𑒋 𑒑𑒹𑒪 𑒩𑒯𑒟𑒱। 𑒮𑒦 𑒠𑒱𑒮𑒢𑒮𑒿 𑒫𑒱𑒣𑒞𑓂𑒞𑒱 𑒂𑒋𑒪 𑒕𑒪𑒢𑓂𑒯𑒱। 𑒋𑒏 𑒠𑒱𑒢 𑒯𑒳𑒢𑒏𑒰 𑒣𑒞𑒰 𑒪𑒑𑒪𑒢𑓂𑒯𑒱 𑒖𑒹 𑒯𑒳𑒢𑒏𑒩 𑒩𑒰𑒖𑓂𑒨𑒏 𑒋𑒏 𑒏𑒼𑒢𑒧𑒹 𑒏𑒼𑒢𑒼 𑒠𑒼𑒮𑒩 𑒩𑒰𑒖𑒰 𑒒𑒩 𑒥𑒢𑒰 𑒏𑒋 𑒩𑒯𑒱 𑒩𑒯𑒪 𑒁𑒕𑒱। 𑒔𑒪𑒴 𑒍𑒏𑒩𑒰𑒮𑒿 𑒦𑒹𑒿𑒙 𑒏𑒋 𑒂𑒥𑒲।
𑒍 𑒮𑒦 𑒖𑒐𑒢 𑒁𑒋𑒪𑒰𑒯 𑒞𑒿 𑒠𑒩𑒥𑒖𑓂𑒖𑒰𑒣𑒩 𑒮𑒲𑒞-𑒥𑒮𑒢𑓂𑒞 𑒠𑒳𑒢𑒴 𑒑𑒼𑒙𑒹 𑒔𑒲𑒢𑓂𑒯𑒱 𑒑𑒹𑒪𑒟𑒱 𑒖𑒹 𑒨𑒻𑒯 𑒯𑒧𑒩 𑒧𑒰𑒋-𑒥𑒰𑒣 𑒕𑒟𑒱। 𑒠𑒳𑒢𑒴 𑒦𑒰𑒋 𑒁𑒣𑒢-𑒁𑒣𑒢 𑒮𑓂𑒞𑓂𑒩𑒲𑒏𑒹𑒿 𑒃𑒬𑒰𑒩𑒰 𑒏𑒋𑒪𑒢𑓂𑒯𑒱। 𑒋𑒯𑒱 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒦𑒲𑒞𑒩 𑒪𑒋 𑒖𑒃𑒨𑒢𑓂𑒯𑒳 𑒂 𑒢𑒲𑒏 𑒖𑒹𑒏𑒰𑒿 𑒁𑒮𑒢𑒰𑒢 𑒏𑒩𑒥𑒰𑒆, 𑒢𑒲𑒏 𑒏𑒣𑒛𑓃𑒰 𑒣𑒯𑒱𑒩𑒰𑒆 𑒂 𑒐𑒴𑒥 𑒂 𑒢𑒲𑒏 𑒐𑒹𑒢𑒰𑒃 𑒐𑒳𑒂𑒆 𑒂 𑒞𑒏𑒩 𑒥𑒰𑒠 𑒋𑒞𑒋 𑒂𑒢𑒴 𑒂 𑒧𑓀𑒔𑒣𑒩 𑒥𑒻𑒮𑒰𑒆।
𑒞𑒏𑒩 𑒥𑒰𑒠 𑒮𑒲𑒞 𑒂 𑒥𑒮𑒢𑓂𑒞 𑒠𑒳𑒢𑒴 𑒦𑒰𑒋 𑒧𑒰𑒿-𑒣𑒱𑒞𑒰𑒏 𑒂𑒑𑒰𑒿 𑒚𑒰𑒜𑓃 𑒦𑒋 𑒏𑒯𑒪𑒢𑓂𑒯𑒱-𑒄 𑒞𑒿 𑒥𑒞𑒰𑒆 𑒖𑒹 𑒁𑒯𑒰𑒿𑒏𑒹𑒿 𑒏𑒻𑒏𑒙𑒰 𑒥𑒹𑒙𑒰 𑒁𑒕𑒱।
𑒩𑒰𑒖𑒰 𑒧𑒯𑒹𑒬𑓂𑒫𑒩 𑒮𑒱𑓀𑒯 𑒏𑒯𑒪𑒢𑓂𑒯𑒱-𑒯𑒧𑒩𑒰 𑒠𑒴 𑒙𑒰 𑒥𑒹𑒙𑒰 𑒩𑒯𑒋 𑒧𑒳𑒠𑒰 𑒂𑒥 𑒋𑒏𑒼𑒙𑒰 𑒢𑒯𑒱 𑒁𑒕𑒱। 𑒯𑒧𑒩 𑒦𑒰𑒑𑓂𑒨𑒏 𑒠𑒼𑒐 𑒁𑒕𑒱। 𑒢𑒯𑒱 𑒖𑒰𑒢𑒱 𑒍 𑒮𑒦 𑒖𑒲𑒫𑒱𑒞 𑒁𑒕𑒱 𑒂𑒏𑒱 𑒧𑒩𑒱 𑒑𑒹𑒪? 𑒯𑒧 𑒞𑒿 𑒧𑒩𑒥𑒰 𑒠𑒹𑒢𑒹 𑒩𑒯𑒱𑒨𑒻𑒏।
𑒮𑒲𑒞-𑒥𑒮𑒢𑓂𑒞 𑒥𑒰𑒖𑒪-𑒢𑒯𑒱। 𑒁𑒯𑒰𑒿𑒏 𑒠𑒳𑒢𑒴 𑒥𑒹𑒙𑒰 𑒖𑒲𑒫𑒱𑒞 𑒁𑒕𑒱। 𑒋𑒞𑒹𑒏 𑒏𑒯𑒻𑒞 𑒍𑒏𑒩𑒰 𑒮𑒦𑒏 𑒂𑒿𑒐𑒱 𑒢𑒼𑒩𑒰 𑒑𑒹𑒪𑒻𑒏।
-–𑒣𑒱𑒞𑒰𑒖𑒲 𑒫𑒻𑒯 𑒮𑒲𑒞-𑒥𑒮𑒢𑓂𑒞 𑒯𑒧 𑒮𑒦 𑒕𑒲।
𑒍𑒯𑒲 𑒮𑒧𑒨 𑒩𑒰𑒖𑒰𑒏 𑒂𑒿𑒐𑒱 𑒐𑒳𑒖𑒱 𑒑𑒹𑒪𑒻𑒏 𑒂 𑒠𑒳𑒢𑒴𑒏𑒹𑒿 𑒁𑒿𑒏𑒫𑒰𑒩𑒧𑒹 𑒦𑒩𑒱 𑒣𑒏𑒛𑓃𑒱𑒏𑒹𑒿 𑒍 𑒏𑒰𑒢𑒋 𑒪𑒰𑒑𑒪 𑒂 𑒁𑒣𑒢 𑒑𑒪𑓂𑒞𑒲 𑒮𑓂𑒫𑒲𑒏𑒰𑒩 𑒏𑒋𑒪𑒏। 𑒡𑒢𑓂𑒨 𑒪𑒰𑒪𑒰, 𑒁𑒯𑒰𑒿𑒏 𑒁𑒅𑒩𑒠𑒰 𑒥𑒜𑓃𑒋। 𑒁𑒧𑒩 𑒩𑒯𑒴।

𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩𑒏 𑒃𑒞𑒱𑒯𑒰𑒮 𑒥𑒼𑒡-𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔/ 𑒧𑓀𑒞𑓂𑒩𑒣𑒳𑒞𑓂𑒩/ 𑒣𑒳𑒩𑒼𑒯𑒱𑒞 𑒂 𑒮𑓂𑒞𑓂𑒩𑒲-𑒡𑒢 𑒏𑒹𑒩 𑒮𑓀𑒠𑒩𑓂𑒦𑒧𑒹
𑒋𑒯𑒱 𑒣𑓂𑒩𑒥𑒢𑓂𑒡𑒧𑒹 𑒧𑒰𑒨𑒰𑒢𑒢𑓂𑒠𑒖𑒲𑒏 𑒮𑓂𑒞𑓂𑒩𑒲𑒡𑒢, 𑒣𑒳𑒩𑒼𑒯𑒱𑒞, 𑒧𑓀𑒞𑓂𑒩-𑒣𑒳𑒞𑓂𑒩 𑒂 𑒣𑓂𑒩𑒟𑒧𑓀 𑒬𑒻𑒪𑒣𑒳𑒞𑓂𑒩𑒲 𑒔- 𑒋𑒯𑒱 𑒔𑒰𑒩𑒱 𑒣𑒼𑒟𑒲𑒏 𑒖𑒹 𑒏𑒟𑒰-𑒫𑒱𑒡𑒰𑒢 𑒂 𑒮𑒰𑒯𑒱𑒞𑓂𑒨𑒱𑒏 𑒫𑒱𑒫𑒹𑒔𑒢 𑒕𑒪 𑒞𑒏𑒩𑒰 𑒨𑒟𑒰 𑒮𑓀𑒦𑒫 𑒢𑒘𑒱 𑒕𑒳𑒁𑒪 𑒑𑒹𑒪 𑒂 𑒧𑒰𑒞𑓂𑒩 𑒃𑒞𑒱𑒯𑒰𑒮-𑒥𑒼𑒡𑒏 𑒮𑒢𑓂𑒠𑒩𑓂𑒦𑒧𑒹 𑒫𑒱𑒫𑒹𑒔𑒢𑒰 𑒁𑒕𑒱।
𑒣𑓂𑒩𑒥𑓀𑒡𑒧𑒹 𑒧𑒰𑒨𑒰𑒢𑒰𑒢𑓂𑒠 𑒖𑒲𑒏 𑓑.𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔 𑓒.𑒧𑓀𑒞𑓂𑒩𑒣𑒳𑒞𑓂𑒩 𑓓.𑒣𑒳𑒩𑒼𑒯𑒱𑒞 𑒂 𑓔. 𑒮𑓂𑒞𑓂𑒩𑒲-𑒡𑒢 𑒋𑒯𑒱 𑒔𑒰𑒩𑒱 𑒌𑒞𑒱𑒯𑒰𑒮𑒱𑒏 𑒅𑒣𑒢𑓂𑒨𑒰𑒮 𑒮𑒦𑒏 𑒂𑒡𑒰𑒩 𑒣𑒩 𑒪𑒹𑒐𑒏 𑒠𑓂𑒫𑒰𑒩𑒰 𑒪𑒑𑒦𑒑 𑒠𑒴 𑒠𑒬𑒏𑒧𑒹 𑒣𑒴𑒩𑓂𑒝 𑒏𑒋𑒪 𑒑𑒹𑒪 𑒃𑒞𑒱𑒯𑒰𑒮 𑒨𑒰𑒞𑓂𑒩𑒰𑒏 𑒮𑒧𑒲𑒏𑓂𑒭𑒰 𑒏𑒋𑒪 𑒑𑒹𑒪 𑒁𑒕𑒱। 𑒋𑒯𑒱𑒧𑒹 𑒣𑓂𑒩𑒨𑒳𑒏𑓂𑒞 𑒣𑒳𑒮𑓂𑒞𑒏𑒧𑒹, 𑒧𑓀𑒞𑓂𑒩𑒣𑒳𑒞𑓂𑒩 𑒧𑒻𑒟𑒱𑒪𑒲𑒧𑒹 𑒁𑒕𑒱 𑒂 𑒬𑒹𑒭 𑒞𑒲𑒢𑒴 𑒅𑒣𑒢𑓂𑒨𑒰𑒮 𑒯𑒱𑒢𑓂𑒠𑒲𑒧𑒹, 𑒞𑒟𑒰𑒣𑒱 𑒨𑒰𑒞𑓂𑒩𑒰 𑒣𑒴𑒩𑓂𑒝𑒞𑒰𑒏 𑒠𑒵𑒭𑓂𑒙𑓂𑒫𑒰 𑒂 𑒬𑓂𑒩𑒵𑓀𑒐𑒪𑒰𑒏 𑒞𑒰𑒩𑒞𑒧𑓂𑒨 𑒂 𑒮𑒧𑒲𑒏𑓂𑒭𑒰𑒏 𑒣𑒴𑒩𑓂𑒝𑒞𑒰𑒏 𑒯𑒹𑒞𑒳 𑒔𑒰𑒩𑒴 𑒏𑒱𑒞𑒰𑒥𑒏 𑒣𑓂𑒩𑒨𑒼𑒑 𑒁𑒢𑒱𑒫𑒰𑒩𑓂𑒨 𑒕𑒪।
𑒏𑒰𑒪𑒏𑓂𑒩𑒧𑒏 𑒠𑒵𑒭𑓂𑒙𑒱𑒮𑒿 𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔 𑒣𑓂𑒩𑒟𑒧 𑒁𑒕𑒱 । 𑒋𑒯𑒱𑒧𑒹 𑓑𑓕𑓐𑓐 𑒄.𑒣𑒴.𑒮𑒿 𑒣𑒯𑒱𑒪𑒳𑒏𑒰 𑒃𑒞𑒱𑒯𑒰𑒮𑒏 𑒂𑒡𑒰𑒩 𑒪𑒹𑒪 𑒑𑒹𑒪 𑒁𑒕𑒱। 𑒧𑓀𑒞𑓂𑒩𑒣𑒳𑒞𑓂𑒩𑒧𑒹 𑓑𑓕𑓐𑓐 𑒄.𑒣𑒴. 𑒮𑒿 𑓑𑓒𑓐𑓐 𑒄.𑒣𑒴. 𑒡𑒩𑒱𑒏 𑒃𑒞𑒱𑒯𑒰𑒮 𑒅𑒣𑒢𑓂𑒨𑒰𑒮𑒏 𑒂𑒡𑒰𑒩 𑒁𑒕𑒱। 𑒄 𑒮𑒦 𑒂𑒡𑒰𑒩 𑒦𑒰𑒩𑒞 𑒨𑒳𑒠𑓂𑒡𑒏 𑒣𑒯𑒱𑒪𑒳𑒏𑒰 𑒁𑒕𑒱। 𑒣𑒳𑒩𑒼𑒯𑒱𑒞𑒧𑒹 𑓑𑓒𑓐𑓐 𑒄.𑒣𑒴.𑒮𑒿 𑓑𑓐𑓐𑓐 𑒄.𑒣𑒴. 𑒡𑒩𑒱𑒏 𑒃𑒞𑒱𑒯𑒰𑒮 𑒁𑒕𑒱- 𑒋𑒏𑒩𑒰 𑒥𑓂𑒩𑒰𑒯𑓂𑒧𑒝 𑒮𑒰𑒯𑒱𑒞𑓂𑒨𑒏 𑒨𑒳𑒑𑒏 𑒃𑒞𑒱𑒯𑒰𑒮 𑒏𑒯𑒱 𑒮𑒏𑒻𑒞 𑒕𑒲। 𑒮𑓂𑒞𑓂𑒩𑒲𑒡𑒢𑒏 𑒂𑒡𑒰𑒩 𑒁𑒕𑒱 𑒮𑒴𑒞𑓂𑒩-𑒮𑓂𑒧𑒵𑒞𑒱𑒏𑒰𑒪𑒲𑒢 𑒧𑒱𑒟𑒱𑒪𑒰।
𑒧𑒳𑒠𑒰 𑒩𑒔𑒢𑒰 𑒦𑒹𑒪 𑒧𑒻𑒟𑒱𑒪𑒲 𑒧𑓀𑒞𑓂𑒩𑒣𑒳𑒞𑓂𑒩𑒏 𑒣𑒯𑒱𑒢𑒹 -𑒢𑒫𑓀𑒥𑒩 𑓑𑓙𑓘𑓖 𑒧𑒹। 𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔 𑒋𑒏𑒩 𑒠𑒴 𑒮𑒰𑒪𑒏 𑒥𑒰𑒠 𑒩𑒔𑒱𑒞 𑒦𑒹𑒪 𑒂 𑒞𑒰𑒯𑒱𑒧𑒹 𑒧𑒰𑒨𑒰𑒢𑒢𑓂𑒠 𑒖𑒲 𑒔𑒰𑒩𑒴 𑒏𑒱𑒞𑒰𑒥𑒏 𑒩𑒔𑒢𑒰𑒏 𑒩𑒴𑒣𑒩𑒹𑒐𑒰 𑒠𑒹𑒪𑒢𑓂𑒯𑒱 𑒧𑒳𑒠𑒰 𑒄 𑒯𑒱𑒢𑓂𑒠𑒲𑒏 𑒮𑓀𑒠𑒩𑓂𑒦𑒧𑒹 𑒕𑒪। 𑒋𑒏𑒩 𑒥𑒰𑒠 𑒮𑒦𑒙𑒰 𑒏𑒱𑒞𑒰𑒥 𑒯𑒱𑒢𑓂𑒠𑒲 𑒧𑒹 𑒂𑒋𑒪। 𑒯𑒱𑒢𑓂𑒠𑒲 𑒧𑓀𑒞𑓂𑒩𑒣𑒳𑒞𑓂𑒩 𑒂𑒋𑒪 𑒖𑒰𑒯𑒱 𑒏𑒰𑒩𑒝𑒮𑒿 𑒞𑒹𑒮𑒩 𑒣𑒳𑒮𑓂𑒞𑒏 𑒣𑒳𑒩𑒼𑒯𑒱𑒞 𑒏𑒱𑒕𑒳 𑒠𑒹𑒩𑒲𑒮𑒿 𑓑𑓙𑓙𑓙 𑒧𑒹 𑒣𑓂𑒩𑒏𑒰𑒬𑒱𑒞 𑒦𑒹𑒪। 𑒮𑓂𑒞𑓂𑒩𑒲𑒡𑒢 𑒖𑒹 𑒋𑒯𑒱 𑒬𑓂𑒩𑒵𑓀𑒐𑒪𑒰𑒏 𑒁𑓀𑒞𑒱𑒧 𑒣𑒳𑒮𑓂𑒞𑒏 𑒁𑒕𑒱, 𑓒𑓐𑓐𑓗 𑒄. 𑒧𑒹 𑒣𑓂𑒩𑒏𑒰𑒬𑒱𑒞 𑒦𑒹𑒪।
“𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔” 𑒏𑒹𑒩 𑒣𑓂𑒩𑒮𑓂𑒞𑒰𑒫𑒢𑒰𑒏 𑒢𑒰𑒧 𑒏𑒫𑒔 𑒕𑒪।𑒧𑓀𑒞𑓂𑒩𑒣𑒳𑒞𑓂𑒩𑒏 𑒣𑓂𑒩𑒮𑓂𑒞𑒰𑒫𑒢𑒰𑒏 𑒢𑒰𑒧 𑒇𑒔𑒰𑒪𑒼𑒏 𑒕𑒪 𑒂 𑒄 𑒣𑒳𑒮𑓂𑒞𑒏𑒏 𑒁𑓀𑒞𑒧𑒹 𑒩𑒰𑒐𑒪 𑒑𑒹𑒪, 𑒏𑒱𑒋𑒏 𑒞𑒿 𑒄 𑒪𑒹𑒐𑒏𑒏 𑒣𑓂𑒩𑒟𑒧 𑒌𑒞𑒱𑒯𑒰𑒮𑒱𑒏 𑒩𑒔𑒢𑒰 𑒕𑒪, 𑒣𑓂𑒩𑒮𑓂𑒞𑒰𑒫𑒢𑒰𑒏𑒹𑒿 𑒁𑓀𑒞𑒧𑒹 𑒩𑒰𑒐𑒱 𑒏𑒨 𑒩𑒯𑒮𑓂𑒨 𑒂 𑒩𑒼𑒧𑒰𑓀𑒔𑒏𑒹𑒿 𑒥𑒢𑒰𑒍𑒪 𑒩𑒰𑒐𑒪 𑒑𑒹𑒪 । 𑒣𑒳𑒩𑒼𑒯𑒱𑒞𑒏 𑒣𑓂𑒩𑒮𑓂𑒞𑒰𑒫𑒢𑒰𑒏 𑒢𑒰𑒧 𑒫𑒱𑒢𑒱𑒨𑒼𑒑 𑒕𑒪 𑒂 𑒋𑒏𑒩𑒰𑒮𑒿 𑒣𑒯𑒱𑒢𑒹 𑒠𑒴𑒩𑓂𑒫𑒰𑒏𑓂𑒭𑒞 𑒧𑓀𑒞𑓂𑒩 𑒩𑒰𑒐𑒪 𑒑𑒹𑒪 𑒖𑒹 𑒦𑒰𑒩𑒞𑒏 𑒂 𑒫𑒱𑒬𑓂𑒫𑒏 𑒣𑓂𑒩𑒟𑒧 𑒠𑒹𑒬𑒦𑒏𑓂𑒞𑒱 𑒑𑒲𑒞 𑒁𑒕𑒱। 𑒧𑒱𑒟𑒱𑒪𑒰𑒧𑒹 𑒋𑒏𑒩𑒰 𑒂𑒬𑒲𑒩𑓂𑒫𑒰𑒠𑒏 𑒧𑓀𑒞𑓂𑒩𑒏 𑒩𑒴𑒣𑒧𑒹 𑒣𑓂𑒩𑒨𑒼𑒑 𑒏𑒋𑒪 𑒖𑒰𑒃𑒞 𑒁𑒕𑒱 𑒖𑒏𑒩 𑒣𑒏𑓂𑒭-𑒫𑒱𑒣𑒏𑓂𑒭𑒧𑒹 𑒫𑒱𑒮𑓂𑒞𑒵𑒞 𑒔𑒩𑒔𑒰 𑒥𑒰𑒠𑒧𑒹 𑒯𑒼𑒋𑒞।
𑒮𑓂𑒞𑓂𑒩𑒲𑒡𑒢𑒏 𑒣𑓂𑒩𑒮𑓂𑒞𑒰𑒫𑒢𑒰𑒏 𑒢𑒰𑒧 𑒪𑒹𑒐𑒏 𑒣𑒵𑒭𑓂𑒚𑒦𑒴𑒧𑒱 𑒩𑒐𑒢𑒹 𑒕𑒟𑒱 𑒖𑒹 𑒅𑒣𑒢𑓂𑒨𑒰𑒮𑒏 𑒌𑒞𑒱𑒯𑒰𑒮𑒱𑒏 𑒣𑒵𑒭𑓂𑒚𑒦𑒴𑒧𑒱 𑒣𑓂𑒩𑒠𑒰𑒢 𑒏𑒩𑒥𑒰𑒏 𑒏𑒰𑒩𑒝 𑒮𑒩𑓂𑒫𑒟𑒰 𑒮𑒧𑒲𑒔𑒲𑒢 𑒁𑒕𑒱।
𑒧𑒰𑒨𑒰𑒢𑒢𑓂𑒠𑒏 𑒃𑒞𑒱𑒯𑒰𑒮-𑒥𑒼𑒡𑒏 𑒮𑒧𑒲𑒏𑓂𑒭𑒰 𑒯𑒧 𑒬𑓂𑒩𑒳𑒞𑒱, 𑒣𑒩𑒧𑓂𑒣𑒩𑒰, 𑒞𑒩𑓂𑒏 𑒂 𑒦𑒰𑒭𑒰-𑒫𑒱𑒖𑓂𑒘𑒰𑒢𑒏 𑒂𑒡𑒰𑒩 𑒣𑒩 𑒏𑒋𑒢𑒹 𑒕𑒲। 𑒣𑒰𑒬𑓂𑒔𑒰𑒞𑓂𑒨 𑒫𑒱𑒠𑓂𑒫𑒰𑒢 𑒮𑒦𑒏 𑒅𑒔𑓂𑒕𑒱𑒭𑓂𑒙 𑒦𑒼𑒖 𑒮𑒿 𑒢𑒱𑒩𑓂𑒧𑒱𑒞 𑒦𑒰𑒩𑒞𑒲𑒨 𑒃𑒞𑒱𑒯𑒰𑒮-𑒪𑒹𑒐𑒢 𑒮𑒿 𑒥𑒔𑒱 𑒏𑒋 𑒃𑒞𑒱𑒯𑒰𑒮𑒏 𑒮𑒧𑒲𑒏𑓂𑒭𑒰 𑒦𑒹𑒪 𑒁𑒕𑒱 𑒂 𑒧𑒡𑓂𑒨 𑒋𑒬𑒱𑒨𑒰 𑒂 𑒨𑒴𑒩𑒼𑒣𑒏 𑒏𑒢𑒱𑒨𑒼 𑒣𑓂𑒩𑒦𑒰𑒫 𑒮𑒧𑒲𑒏𑓂𑒭𑒰 𑒣𑒩 𑒢𑒯𑒱 𑒣𑒛𑓃𑒋 𑒮𑒹 𑒣𑓂𑒩𑒨𑒰𑒮 𑒏𑒋𑒪 𑒑𑒹𑒪 𑒁𑒕𑒱।
𑓑. 𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔- 𑒏𑒫𑒔 𑒩𑒴𑒣𑒲 𑒣𑓂𑒩𑒮𑓂𑒞𑒰𑒫𑒢𑒰𑒏 𑒥𑒰𑒠 𑒄 𑒣𑒳𑒮𑓂𑒞𑒏 𑓑. 𑒁𑒑𑓂𑒢𑒰, 𑓒.𑒁𑒑𑓂𑒢-𑒬𑒻𑒪𑒰, 𑓓. 𑒬𑒻𑒪𑒰- 𑒏𑒩𑒰𑒪𑒲, 𑓔. 𑒏𑒩𑒰𑒪𑒲- 𑒧𑒯𑒹𑒭, 𑓕. 𑒧𑒯𑒹𑒭- 𑒣𑒰𑒩𑒫𑒞𑒲, 𑓖. 𑒑𑒝𑒹𑒭, 𑓗. 𑒯𑒩𑒏𑒱𑒮𑒢, 𑓘. 𑒏𑒱𑒮𑒢, 𑓙. 𑒯𑒩𑒣𑓂𑒣𑒰 : 𑒧𑒼𑒁𑒢 𑒑𑒰𑒿𑒫, 𑓑𑓐. 𑒑𑒝𑒹𑒭 𑒏𑒰 𑒬𑓂𑒩𑒲𑒑𑒝𑒹𑒬, 𑓑𑓑. 𑒏𑒱𑒬𑓂𑒢, 𑓑𑓒. 𑒧𑒯𑒰𑒖𑒢, 𑓑𑓓. 𑒧𑓀𑒛𑒪, 𑓑𑓔. 𑒏𑒱𑒬𑓂𑒢 𑒧𑓀𑒛𑒪, 𑓑𑓕. 𑒧𑓀𑒛𑒪 : 𑒧𑓀𑒛𑒪𑒲, 𑓑𑓖. 𑒣𑒞𑒢: 𑒣𑒳𑒩𑓀𑒠𑒩 𑒂 𑓑𑓗. 𑒅𑒣𑒮𑓀𑒯𑒰𑒩 : 𑒣𑒪𑒰𑒨𑒢 𑒐𑓀𑒛𑒧𑒹 𑒫𑒱𑒦𑒏𑓂𑒞 𑒁𑒕𑒱।
𑓑. 𑒁𑒑𑓂𑒢𑒰- 𑓒𑓐𑓐𑓐 𑒄. 𑒣𑒴. 𑒮𑒿 𑒂𑒩𑒧𑓂𑒦 𑒯𑒼𑒃𑒞 𑒁𑒕𑒱 𑒄 𑒅𑒣𑒢𑓂𑒨𑒰𑒮। 𑒐𑒼𑒯𑒧𑒹 𑒩𑒯𑒋𑒥𑒪𑒰 𑒧𑒢𑒳𑒭𑓂𑒨𑒏 𑒫𑒱𑒫𑒩𑒝 𑒬𑒳𑒩𑒴 𑒯𑒼𑒃𑒞 𑒁𑒕𑒱। 𑒥𑒰 𑒋𑒏𑒙𑒰 𑒠𑒪𑒏 𑒮𑒩𑓂𑒫𑒰𑒡𑒱𑒏 𑒥𑒪𑒱𑒭𑓂𑒚 𑒧𑒢𑒳𑒭𑓂𑒨 𑒁𑒕𑒱। 𑒣𑒴𑒩𑓂𑒫𑒖 𑒥𑒰 𑒮𑒹𑒯𑒼 𑒥𑒪𑒱𑒭𑓂𑒚 𑒕𑒪। 𑒋𑒞𑒹𑒏 𑒩𑒰𑒮 𑒥𑒔𑓂𑒔𑒰 𑒮𑒦𑒏 𑒥𑒰। 𑒋𑒏𑒙𑒰 𑒕𑒼𑒙 𑒂 𑒋𑒏𑒙𑒰 𑒣𑒻𑒒 𑒣𑒰𑒟𑒩𑒏 𑒂𑒫𑒱𑒭𑓂𑒏𑒰𑒩 𑒏𑒋𑒢𑒹 𑒕𑒪𑒰𑒯 𑒣𑒴𑒩𑓂𑒫𑒖 𑒥𑒰। 𑒁𑒧𑓂 𑒠𑒪𑒰𑒑𑓂𑒩𑒰𑒏𑒹𑒿 𑒏𑒯𑒪 𑒖𑒰𑒃𑒞 𑒕𑒪। 𑒥𑒰 𑒦𑒨𑓀𑒏𑒩 𑒑𑓀𑒡𑒫𑒪𑒰 𑒣𑒬𑒳𑒏 𑒢𑒰𑒧 𑒮𑒹𑒯𑒼 𑒕𑒪। 𑒯𑒰𑒟𑒏 𑒧𑒯𑒞𑓂𑒫 𑒥𑒜𑓃𑒪 𑒂 𑒥𑒜𑓃𑒪 𑒫𑒵𑒏𑓂𑒭𑒮𑒿 𑒠𑒴𑒩𑒲। 𑒮𑒩𑓂𑒣𑒏𑒹𑒿 𑒧𑒰𑒩𑒱 𑒏𑒋 𑒐𑒰𑒋𑒪 𑒢𑒯𑒱 𑒖𑒰𑒃𑒞 𑒁𑒕𑒱, 𑒮𑒹 𑒑𑒣 𑒣𑒴𑒩𑓂𑒫𑒖𑒮𑒿 𑒖𑓂𑒘𑒰𑒞 𑒕𑒪। 𑒣𑓂𑒩𑒰𑒔𑒲𑒢 𑒠𑒹𑒫 𑒫𑒵𑒏𑓂𑒭, 𑒠𑒼𑒮𑒩 𑒢𑒰𑒑 𑒠𑒹𑒫 𑒂 𑒞𑒹𑒮𑒩 𑒢𑒠𑒲 𑒠𑒹𑒫 𑒕𑒪𑒰𑒯। 𑒁𑒧𑓂𑒥𑒰𑒮𑒿 𑒥𑒰 𑒮𑓀𑒞𑒰𑒢 𑒅𑒞𑓂𑒣𑒢𑓂𑒢 𑒏𑒩𑒻𑒞 𑒂𑒋𑒪 𑒕𑒪𑒰𑒯। 𑒢𑒫 𑒏𑒳𑒚𑒰𑒩 𑒂 𑒢𑒫 𑒏𑒰𑒞𑒰𑒏 𑒂𑒫𑒱𑒭𑓂𑒏𑒰𑒩 𑒦𑒹𑒪। 𑒁𑓁 𑒂𑓁 𑒁𑒑 𑒁𑒑𑓂𑒑 𑒏𑒹𑒩 𑒠𑒹𑒐𑒱 𑒏𑒋 𑒫𑒢𑓂𑒨 𑒣𑒬𑒳𑒏𑒹𑒿 𑒦𑒰𑒑𑒻𑒞 𑒠𑒹𑒐𑒱 𑒋𑒏𑒩 𑒖𑒰𑒢𑒏𑒰𑒩𑒲 𑒦𑒹𑒪। 𑒧𑒰𑒢𑒳𑒭𑒲 𑒯𑒳𑒢𑒏𑒩 𑒮𑓀𑒐𑓂𑒨𑒰 𑒫𑒵𑒠𑓂𑒡𑒱 𑒏𑒩𑒻𑒞 𑒕𑒪𑒱। 𑒣𑓂𑒩𑒟𑒧 𑒧𑒰𑒢𑒳𑒭𑒲𑒏 𑒢𑒰𑒧 𑒣𑒛𑓃𑒪 𑒁𑒑𑓂𑒢𑒰। 𑒍𑒏𑒩 𑒧𑒰𑒢𑒳𑒭-𑒧𑒱𑒞𑓂𑒩 𑒕𑒪𑒰𑒯 𑒁𑒑𑓂𑒑। 𑒁𑒑𑓂𑒢𑒰 𑒠𑒪𑒰𑒑𑓂𑒩𑒰 𑒥𑒢𑒱 𑒑𑒹𑒪𑒲𑒯 𑒂 𑒯𑒳𑒢𑒏𑒩 𑒢𑒹𑒞𑒵𑒞𑓂𑒫𑒧𑒹 𑒠𑒪 𑒅𑒞𑓂𑒞𑒩 𑒠𑒱𑒬𑒱 𑒥𑒜𑓃𑒪। 𑒤𑒹𑒩 𑒪𑒹𑒐𑒏 𑒪𑒱𑒐𑒻𑒞 𑒕𑒟𑒱 𑒖𑒹 𑒣𑒵𑒟𑓂𑒫𑒲𑒏 𑒅𑒞𑓂𑒣𑒞𑓂𑒞𑒱 𑒪𑒑𑒦𑒑 𑓒𑓐𑓐 𑒏𑒩𑒼𑒛𑓃 𑒫𑒩𑓂𑒭 𑒣𑒴𑒩𑓂𑒫 𑒦𑒹𑒪 𑒖𑒹 𑒮𑒩𑓂𑒫𑒟𑒰 𑒮𑒧𑒲𑒔𑒲𑒢 𑒁𑒕𑒱। 𑒏𑒩𑓂𑒧𑒏𑒰𑒝𑓂𑒛𑒧𑒹 𑒋𑒏 𑒮𑓂𑒟𑒰𑒢 𑒣𑒩 𑒫𑒩𑓂𑒝𑒢 𑒁𑒕𑒱- “𑒥𑓂𑒩𑒰𑒯𑓂𑒧𑒝𑒹 𑒠𑓂𑒫𑒱𑒞𑒲𑒨𑒹 𑒣𑒩𑒰𑒩𑓂𑒡𑒹 𑒬𑓂𑒩𑒲 𑒮𑓂𑒫𑒹𑒞𑒫𑒰𑒩𑒰𑒯 𑒏𑒪𑓂𑒣𑒹 𑒫𑒻𑒫𑒮𑓂𑒫𑒞 𑒧𑒢𑓂𑒫𑓀𑒞𑒩𑒹 𑒁𑒭𑓂𑒚𑒰𑒫𑒱𑓀𑒬𑒞𑒱𑒞𑒧𑒹 𑒏𑒪𑒱𑒨𑒳𑒑𑒹 𑒣𑓂𑒩𑒟𑒧 𑒔𑒩𑒝𑒹” 𑒂 𑒋𑒯𑒱 𑒂𑒡𑒰𑒩 𑒣𑒩 𑒑𑒝𑒢𑒰 𑒏𑒋𑒪𑒰 𑒅𑒞𑓂𑒞𑒩 𑓑,𑓙𑓗,𑓒𑓙,𑓔𑓙,𑓐𑓓𑓒 𑒫𑒩𑓂𑒭 𑒣𑒵𑒟𑓂𑒫𑒲𑒏 𑒂𑒨𑒳 𑒁𑒥𑒻𑒞 𑒁𑒕𑒱। 𑒩𑒹𑒛𑒱𑒨𑒼𑒋𑒏𑓂𑒙𑒱𑒫 𑒫𑒱𑒡𑒱 𑒠𑓂𑒫𑒰𑒩𑒰 𑒮𑒹𑒯𑒼 𑒄𑒋𑒯 𑒅𑒞𑓂𑒞𑒩 𑒁𑒥𑒻𑒞 𑒁𑒕𑒱। 𑒨𑒴𑒩𑒼𑒣𑒧𑒹 𑒮𑒞𑓂𑒩𑒯𑒧 𑒬𑒞𑒰𑒥𑓂𑒠𑒲 𑒡𑒩𑒱 𑒣𑒵𑒟𑓂𑒫𑒲𑒏 𑒂𑒨𑒳 𑓔𑓐𑓐𑓐 𑒫𑒩𑓂𑒭 𑒧𑒰𑒢𑒪 𑒖𑒰𑒃𑒞 𑒩𑒯𑒪। 𑒄𑒩𑒰𑒢𑒏 𑒫𑒱𑒠𑓂𑒫𑒰𑒢 𑓑𑓒𑓐𑓐 𑒫𑒩𑓂𑒭 𑒣𑒯𑒱𑒢𑒹 𑒣𑒵𑒟𑓂𑒫𑒲𑒏 𑒅𑒞𑓂𑒣𑒞𑓂𑒞𑒱 𑒧𑒰𑒢𑒪𑒢𑓂𑒯𑒱। 𑒄 𑒠𑒳𑒢𑒴 𑒠𑒵𑒭𑓂𑒙𑒱𑒏𑒼𑒝 𑒫𑒻𑒖𑓂𑒘𑒰𑒢𑒱𑒏 𑒠𑒵𑒭𑓂𑒙𑒱𑒏𑒼𑒝𑒮𑒿 𑒠𑒹𑒐𑒪𑒰𑒣𑒩 𑒯𑒰𑒮𑓂𑒨𑒰𑒮𑓂𑒣𑒠 𑒪𑒑𑒻𑒞 𑒁𑒕𑒱।
𑒁𑒑𑓂𑒢𑒰-𑒬𑒻𑒪𑒰𑒮𑒿 𑒬𑒳𑒩𑒴 𑒯𑒼𑒃𑒞 𑒁𑒕𑒱 𑒠𑒼𑒮𑒩 𑒦𑒰𑒑। 𑓑𑓐𑓐𑓐𑓐 𑒄.𑒣𑒴.। 𑒦𑒰𑒭𑒰𑒏 𑒂𑒩𑓀𑒦𑒏 𑒣𑓂𑒩𑒰𑒩𑓀𑒦 𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩 𑒋𑒯𑒱𑒧𑒹 𑒣𑓂𑒩𑒏𑒙 𑒏𑒋𑒢𑒹 𑒕𑒟𑒱। 𑒋𑒯𑒱𑒧𑒹 𑒥𑒛𑓂𑒛 𑒢𑒲𑒏 𑒖𑒹𑒏𑒰𑒿, 𑒮𑓀𑒏𑒹𑒞 𑒦𑒰𑒭𑒰𑒮𑒿 𑒡𑓂𑒫𑒢𑒱𑒏 𑒮𑓀𑒥𑓀𑒡 𑒣𑒩𑒱𑒪𑒏𑓂𑒭𑒱𑒞 𑒏𑒋𑒪 𑒑𑒹𑒪 𑒁𑒕𑒱। 𑒔𑒪𑓀𑒞 𑒮𑒿 𑒮𑓂𑒟𑒱𑒩 𑒖𑒲𑒫𑒢𑒏 𑒬𑒳𑒩𑒳𑒂𑒞 𑒮𑒹𑒯𑒼 𑒠𑒹𑒐𑒰𑒨𑒪 𑒑𑒹𑒪 𑒁𑒕𑒱। 𑒞𑒏𑒩 𑒥𑒰𑒠 𑒬𑒻𑒪𑒰 𑒏𑒩𑒰𑒪𑒲 𑒁𑒡𑓂𑒨𑒰𑒨𑒏 𑒣𑓂𑒩𑒰𑒩𑓀𑒦 𑒯𑒼𑒃𑒞 𑒁𑒕𑒱, 𑓗𑓕𑓐𑓐 𑒫𑒩𑓂𑒭 𑒣𑒴𑒩𑓂𑒫𑒮𑒿। 𑒑𑒾 𑒣𑒰𑒪𑒢𑒏 𑒔𑒩𑓂𑒔𑒰 𑒯𑒼𑒃𑒞 𑒁𑒕𑒱, 𑒑𑒰𑒨𑒏 𑒮𑓀𑒐𑓂𑒨𑒰𑒧𑒹 𑒣𑒩𑓂𑒨𑒰𑒣𑓂𑒞 𑒫𑒵𑒠𑓂𑒡𑒱 𑒦𑒹𑒪 𑒕𑒪। 𑒮𑒦 𑒩𑒯𑒟𑒱 𑒔𑒩𑒥𑒰𑒯, 𑒔𑒩𑓂𑒧𑒮𑓂𑒞𑓂𑒩𑓂𑒡𑒰𑒩𑒲। 𑒂 𑒏𑒙𑒱𑒧𑒹 𑒣𑒰𑒟𑒩𑒏 𑒯𑒟𑒱𑒨𑒰𑒩। 𑒦𑒹𑒛𑓃, 𑒥𑒏𑒩𑒲 𑒂 𑒮𑒳𑒑𑓂𑒑𑒩 𑒕𑒪, 𑒏𑒱𑒕𑒳 𑒂𑒢 𑒣𑒼𑒮𑒱𑒨𑒰 𑒖𑓀𑒞𑒳 𑒖𑒰𑒞 𑒮𑒹𑒯𑒼 𑒩𑒯𑒋। 𑒒𑒰𑒮𑒏 𑒩𑒮𑓂𑒮𑒲, 𑒞𑓂𑒩𑒱𑒬𑒴𑒪 𑒂 𑒢𑒰𑒑𑒠𑒹𑒫𑒏 𑒔𑒩𑓂𑒔𑒰 𑒯𑒼𑒃𑒞 𑒁𑒕𑒱। 𑒥𑒰𑒏 𑒢𑒰𑒧 𑒂𑒥 𑒦𑓄 𑒖𑒰𑒃𑒞 𑒁𑒕𑒱, 𑒍𑒖𑒰। 𑒠𑒪𑒰𑒑𑓂𑒩𑒰𑒏 𑒢𑒰𑒧 𑒣𑒛𑓃𑒻𑒞 𑒁𑒕𑒱 𑒬𑒻𑒪𑒰 𑒏𑒩𑒰𑒪𑒲। 𑒣𑒬𑒳𑒏 𑒮𑓀𑒐𑓂𑒨𑒰 𑒥𑒜𑓃𑒪 𑒞𑒿 𑒣𑒬𑒳𑒏 𑒔𑒼𑒩𑒱 𑒮𑒹𑒯𑒼 𑒬𑒳𑒩𑒴 𑒦𑓄 𑒑𑒹𑒪।𑒣𑒲𑒣𑒩𑒏 𑒑𑒰𑒕𑒏 𑒢𑒲𑒔𑒰𑒿 𑒥𑒻𑒚𑒏𑒲𑒏 𑒣𑓂𑒩𑒰𑒩𑒧𑓂𑒦 𑒦𑒹𑒪। 𑒏𑒩𑒰𑒪𑒲𑒏 𑒢𑒰𑒧 𑒁𑓀𑒥𑒰 𑒣𑒛𑓃𑒪।
𑒏𑒩𑒰𑒪𑒲-𑒧𑒯𑒹𑒭 𑒁𑒡𑓂𑒨𑒰𑒨𑒧𑒹 𑓕𑓐𑓐𑓐 𑒄.𑒣𑒴. 𑒧𑒹 𑒏𑒵𑒭𑒱𑒏 𑒣𑓂𑒩𑒰𑒩𑒧𑓂𑒦 𑒠𑒹𑒐𑒰𑒍𑒪 𑒑𑒹𑒪 𑒁𑒕𑒱। 𑒧𑒯𑒹𑒭 𑒥𑒲𑒨𑒰 𑒥𑒰𑒑𑒳 𑒏𑒋 𑒩𑒯𑒪 𑒕𑒟𑒱। 𑒖𑒫𑒏𑒹𑒿 𑒣𑒏𑒰 𑒏𑓄 𑒐𑒨𑒥𑒰𑒏 𑒔𑒩𑓂𑒔𑒰 𑒯𑒼𑒃𑒞 𑒁𑒕𑒱। 𑒂𑒥 𑒡𑒰𑒩𑒏 𑒢𑒰𑒧 𑒮𑒹𑒯𑒼 𑒩𑒰𑒐𑒪 𑒖𑒰𑒋 𑒪𑒰𑒑𑒪। 𑒧𑒯𑒹𑒭 𑒏𑒳𑒪 𑒠𑓂𑒫𑒰𑒩𑒰 𑒣𑒼𑒮 𑒏𑒹𑒩 𑒧𑒰𑒿𑒮 𑒐𑒹𑒢𑒰𑒃 𑒞𑒿 𑒋𑒏𑒠𑒧 𑒢𑒱𑒭𑒱𑒠𑓂𑒡 𑒦𑓄 𑒑𑒹𑒪।𑒍𑒖𑒰 𑒪𑒱𑓀𑒑 𑒮𑓂𑒟𑒰𑒢𑒧𑒹 𑒥𑒻𑒮𑒪 𑒩𑒯𑒻𑒞 𑒕𑒪𑒰𑒯।
𑒞𑒏𑒩 𑒥𑒰𑒠 𑒧𑒯𑒹𑒭-𑒣𑒰𑒩𑒫𑒞𑒲 𑒁𑒡𑓂𑒨𑒰𑒨 𑒬𑒳𑒩𑒳 𑒯𑒼𑒃𑒞 𑒁𑒕𑒱 𑓔 𑒮𑒿 𑓕 𑒯𑒖𑒰𑒩 𑒫𑒩𑓂𑒭 𑒣𑒴𑒩𑓂𑒫। 𑒡𑒰𑒢𑒏 𑒤𑒮𑒱𑒪𑒏 𑒣𑓂𑒩𑒰𑒩𑓀𑒦 𑒦𑒹𑒪। 𑒣𑒰𑒩𑒫𑒞𑒲 𑒖𑒯𑒱𑒨𑒰 𑒁𑒋𑒪𑒲𑒯 𑒞𑒯𑒱𑒨𑒰 𑒍𑒞𑒳𑒏𑓂𑒏𑒰 𑒣𑓂𑒩𑒟𑒰𑒏 𑒁𑒢𑒳𑒮𑒰𑒩 𑒪𑒰𑒪 𑒧𑒰𑒙𑒱 𑒧𑒰𑒟𑒧𑒹 𑒪𑒑𑒰 𑒠𑒹𑒪 𑒑𑒹𑒪। 𑒣𑒳𑒞𑓂𑒩𑒏 𑒢𑒰𑒧 𑒑𑒝𑒹𑒭 𑒣𑒛𑓃𑒪। 𑒋𑒯𑒱𑒮𑒿 𑒣𑒯𑒱𑒢𑒹 𑒮𑓀𑒞𑒰𑒢𑒏 𑒣𑒩𑒱𑒔𑒨 𑒢𑒯𑒱 𑒠𑒹𑒪 𑒖𑒰𑒃𑒞 𑒕𑒪।
𑒑𑒝𑒹𑒭- 𑒄 𑒁𑒡𑓂𑒨𑒰𑒨 𑓔𑓐𑓐𑓐 𑒫𑒩𑓂𑒭 𑒣𑒴𑒩𑓂𑒫𑒮𑒿 𑒬𑒳𑒩𑒴 𑒯𑒼𑒃𑒞 𑒁𑒕𑒱। 𑒮𑓂𑒞𑓂𑒩𑒲-𑒣𑒳𑒩𑒳𑒭 𑒮𑓀𑒥𑓀𑒡 𑒂 𑒣𑒱𑒞𑒵 𑒏𑒳𑒪𑒏 𑒂𑒩𑓀𑒦𑒏 𑒔𑒩𑓂𑒔𑒰 𑒬𑒳𑒩𑒴 𑒦𑒹𑒪। 𑒢𑒴𑒢 𑒁𑒢𑒥𑒰𑒏 𑒂 𑒐𑒹𑒥𑒰𑒏 𑒣𑓂𑒩𑒰𑒩𑓀𑒦 𑒦𑒹𑒪। 𑒢𑒴𑒢 𑒁𑒢𑒥𑒰𑒮𑒿 𑒏𑒳𑒪𑒏 𑒢𑒰𑒧 𑒢𑒼𑒢𑒲 𑒣𑒛𑓃𑒪। 𑒖𑒫 𑒂 𑒑𑒯𑒴𑒧𑒏 𑒐𑒹𑒞𑒲𑒏 𑒣𑓂𑒩𑒰𑒩𑓀𑒦 𑒂 𑒠𑒴𑒡 𑒠𑒳𑒯𑒥𑒰𑒏 𑒂𑒩𑓀𑒦 𑒠𑒹𑒐𑒰𑒍𑒪 𑒑𑒹𑒪 𑒁𑒕𑒱। 𑒯𑒰𑒟𑒲𑒏 𑒣𑒰𑒪𑒢𑒏 𑒣𑓂𑒩𑒰𑒩𑓀𑒦 𑒂 𑒁𑒠𑒪𑒰-𑒥𑒠𑒪𑒲𑒮𑒿 𑒫𑒱𑒢𑒱𑒧𑒨𑒏 𑒣𑓂𑒩𑒰𑒩𑓀𑒦 𑒮𑒹𑒯𑒼 𑒬𑒳𑒩𑒴 𑒦𑒹𑒪। 𑒬𑒱𑒬𑓂𑒢 𑒠𑒹𑒫 𑒣𑒩 𑒖𑒪 𑒂 𑒣𑒰𑒞 𑒔𑒜𑓃𑒹𑒥𑒰𑒏 𑒣𑓂𑒩𑒰𑒩𑓀𑒦 𑒮𑒹𑒯𑒼 𑒦𑒹𑒪। 𑒨𑒫𑒏𑒹𑒿 𑒏𑒴𑒙𑒥 𑒂 𑒥𑒳𑒏𑒢𑒲 𑒏𑒩𑒥𑒰𑒏 𑒣𑓂𑒩𑒰𑒩𑓀𑒦 𑒦𑒹𑒪। 𑒑𑒯𑒴𑒧𑒏𑒹𑒿 𑒔𑒴𑒩𑒥 𑒂 𑒣𑒰𑒢𑒱𑒧𑒹 𑒦𑒱𑒖𑒰 𑒏𑒋 𑒂𑒑𑒱𑒧𑒹 𑒣𑒏𑒰𑒋𑒥 𑒣𑓂𑒩𑒰𑒩𑓀𑒦 𑒦𑒹𑒪। 𑒣𑒏𑓂𑒭𑒱𑒣𑒰𑒪𑒢 𑒏𑒩𑒋𑒥𑒪𑒰 𑒋𑒏𑒙𑒰 𑒦𑒱𑒢𑓂𑒢 𑒠𑒪 𑒕𑒪। 𑒧𑒵𑒞𑒏-𑒮𑓀𑒮𑓂𑒏𑒰𑒩 𑒂 𑒧𑒵𑒞𑓂𑒨𑒳 𑒣𑒩 𑒏𑒢𑒥𑒰𑒏 𑒣𑓂𑒩𑒰𑒩𑓀𑒦 𑒮𑒹𑒯𑒼 𑒦𑒹𑒪। 𑒪𑒱𑒣𑒱𑒏 𑒣𑓂𑒩𑒰𑒩𑓀𑒦 𑒮𑒹𑒯𑒼 𑒦𑒹𑒪।
𑒯𑒩- 𑒋𑒯𑒱 𑒁𑒡𑓂𑒨𑒰𑒨𑒏 𑒣𑓂𑒩𑒰𑒩𑓀𑒦 𑓓𑓕𑓐𑓐 𑒄.𑒣𑒴. 𑒠𑒹𑒐𑒰𑒨𑒪 𑒑𑒹𑒪 𑒁𑒕𑒱। 𑒢𑒴𑒢𑒏 𑒫𑓂𑒨𑒰𑒣𑒰𑒩 𑒂 𑒮𑒳𑒑𑒜𑓃 𑒢𑒰𑒫𑒏 𑒢𑒱𑒩𑓂𑒧𑒰𑒝 𑒣𑓂𑒩𑒰𑒩𑓀𑒦 𑒦𑒹𑒪। 𑒣𑒃𑒪𑒲𑒏 𑒏𑒪𑓂𑒣𑒢𑒰 𑒢𑒣𑒥𑒰𑒏 𑒯𑒹𑒞𑒳 𑒦𑒹𑒪। 𑒯𑒩 𑒂 𑒥𑒛𑓃𑒠𑒏 𑒮𑒧𑓂𑒧𑒱𑒪𑒢 𑒣𑓂𑒩𑒰𑒩𑓀𑒦 𑒦𑒹𑒪। 𑒃𑒢𑒰𑒩 𑒐𑒳𑒢𑒥𑒰𑒏 𑒣𑓂𑒩𑒰𑒩𑓀𑒦 𑒂 𑒖𑒢𑒏 𑒪𑓀𑒥𑒫𑒞 𑒏𑒹𑒩 𑒁𑒞𑒱𑒩𑒱𑒏𑓂𑒞 𑒔𑒾𑒛𑓃𑒰𑒃𑒧𑒹 𑒥𑒮𑒥𑒰𑒏 𑒣𑓂𑒩𑒰𑒩𑓀𑒦 𑒮𑒹𑒯𑒼 𑒦𑒹𑒪। 𑒒𑒩 𑒥𑒢𑒋𑒥𑒰𑒏 𑒣𑓂𑒩𑒰𑒩𑓀𑒦 𑒮𑒹𑒯𑒼 𑒦𑒹𑒪।𑒏𑒰𑒩𑒲, 𑒑𑒼𑒩 𑒂 𑒞𑒰𑒧𑓂𑒩𑒫𑒩𑓂𑒝𑒲 𑒏𑒰𑒨𑒰𑒏 𑒥𑒹𑒩𑒰-𑒥𑒹𑒩𑒲 𑒂𑒑𑒧𑒢 𑒯𑒼𑒃𑒞 𑒩𑒯𑒪।
𑒯𑒩𑒏𑒱𑒮𑒢 𑒁𑒡𑓂𑒨𑒰𑒨𑒏 𑒣𑓂𑒩𑒰𑒩𑒧𑓂𑒦 𑓓𑓔𑓐𑓐 𑒫𑒩𑓂𑒭 𑒣𑒴𑒩𑓂𑒫 𑒯𑒼𑒃𑒞 𑒁𑒕𑒱। 𑒏𑒵𑒭𑒱 𑒫𑒱𑒏𑒰𑒮𑒏 𑒮𑓀𑒑 𑒮𑓂𑒟𑒰𑒨𑒲 𑒢𑒱𑒫𑒰𑒮𑒏 𑒣𑓂𑒩𑒫𑒵𑒞𑓂𑒞𑒱 𑒥𑒜𑓃𑒨 𑒪𑒰𑒑𑒪। 𑒞𑒏𑒩𑒰 𑒥𑒰𑒠 𑒣𑒩𑒱𑒫𑒰𑒩𑒏 𑒩𑒴𑒣 𑒮𑓂𑒣𑒭𑓂𑒙 𑒯𑒼𑒧𑒨 𑒪𑒰𑒑𑒪। 𑒏𑒵𑒭𑒱-𑒫𑒱𑒏𑒰𑒮𑒮𑒿 𑒫𑒰𑒝𑒱𑒖𑓂𑒨 𑒫𑒱𑒮𑓂𑒞𑒰𑒩𑒏 𑒂𑒫𑒬𑓂𑒨𑒏𑒞𑒰 𑒥𑒜𑓃𑒪। 𑒆𑒢𑒏 𑒫𑒮𑓂𑒞𑓂𑒩, 𑒔𑒏𑓂𑒏𑒲, 𑒦𑒲𑒞𑒏 𑒒𑒩 𑒂 𑒃𑒢𑒰𑒩𑒏 𑒒𑒹𑒩𑒰𑒥𑒰 𑒥𑒢𑒋 𑒪𑒰𑒑𑒪।
𑒏𑒱𑒮𑒢 𑒁𑒡𑓂𑒨𑒰𑒨𑒏 𑒣𑓂𑒩𑒰𑒩𑒧𑓂𑒦 𑓓𑓓𑓐𑓐 𑒄.𑒣𑒴𑒩𑓂𑒫 𑒦𑒹𑒪। 𑒬𑓂𑒩𑒧-𑒥𑒹𑒔𑒥𑒰𑒏 𑒣𑓂𑒩𑒰𑒩𑒧𑓂𑒦 𑒦𑒹𑒪। 𑒣𑒙𑒾𑒢𑒲𑒏 𑒣𑓂𑒩𑒰𑒩𑒧𑓂𑒦𑒏 𑒮𑓀𑒑 𑒏𑒵𑒭𑒱-𑒫𑒱𑒏𑒰𑒮 𑒑𑒞𑒱 𑒣𑒏𑒛𑓃𑒪𑒏। 𑒦𑒴𑒑𑒼𑒪𑒏 𑒖𑒰𑒢𑒏𑒰𑒩𑒲 𑒦𑒹𑒪𑒰𑒮𑒿 𑒫𑒰𑒝𑒱𑒖𑓂𑒨 𑒥𑒜𑓃𑒪। 𑒁𑒪𑓀𑒏𑒰𑒩𑒏 𑒣𑓂𑒩𑒫𑒵𑒞𑓂𑒞𑒱 𑒥𑒜𑓃𑒪।
𑒯𑒛𑓃𑒣𑓂𑒣𑒰: 𑒧𑒼𑒯𑒢𑒑𑒰𑒿𑒫 𑒁𑒡𑓂𑒨𑒰𑒨 𑓓𑓒𑓐𑓐 𑒫𑒩𑓂𑒭 𑒣𑒴𑒩𑓂𑒫 𑒠𑒹𑒐𑒰𑒍𑒪 𑒑𑒹𑒪 𑒁𑒕𑒱।𑒬𑓂𑒩𑒧-𑒥𑒹𑒔𑒥𑒰𑒏 𑒯𑒹𑒞𑒳 𑒏𑒰𑒚𑒏 𑒙𑒼𑒪𑒏 𑒅𑒠𑒰𑒯𑒩𑒝 𑒁𑒥𑒻𑒞 𑒁𑒕𑒱। 𑒁𑒪𑓀𑒏𑒰𑒩 𑒣𑓂𑒩𑒫𑒵𑒞𑓂𑒞𑒱 𑒥𑒜𑓃𑒪। 𑒑𑒼𑒪𑒲𑒏 𑒧𑒰𑒪𑒰𑒏 𑒮𑓀𑒑 𑒏𑒳𑒧𑓂𑒯𑒰𑒩𑒏 𑒔𑒰𑒏 𑒮𑒹𑒯𑒼 𑒮𑒧𑓂𑒧𑒳𑒐 𑒂𑒨𑒪। 𑒮𑒧𑒰𑒖𑒧𑒹 𑒫𑒩𑓂𑒑 𑒫𑒱𑒦𑒰𑒖𑒢𑒏 𑒣𑓂𑒩𑒰𑒩𑒧𑓂𑒦 𑒦𑒹𑒪।
𑒑𑒝𑒹𑒭𑒏 𑒬𑓂𑒩𑒲𑒑𑒝𑒹𑒭 𑒁𑒡𑓂𑒨𑒰𑒨 𑓓𑓑𑓐𑓐 𑒄. 𑒣𑒴𑒩𑓂𑒫 𑒣𑓂𑒩𑒰𑒩𑒧𑓂𑒦 𑒦𑒹𑒪। 𑒠𑒏𑓂𑒭𑒱𑒝𑒰𑓀𑒔𑒪 𑒪𑒼𑒏𑒏 𑒂𑒑𑒧𑒢𑒏 𑒥𑒰𑒠 𑒯𑒛𑓃𑒣𑓂𑒣𑒰 𑒯𑒳𑒢𑒏𑒰 𑒪𑒼𑒏𑒢𑒱 𑒠𑓂𑒫𑒰𑒩𑒰 𑒥𑒢𑒹𑒥𑒰𑒏 𑒔𑒩𑓂𑒔 𑒪𑒹𑒐𑒏 𑒏𑒩𑒻𑒞 𑒕𑒟𑒱। 𑒧𑒼𑒯𑒢𑒖𑒼𑒠𑒛𑓃𑒼, 𑒪𑒼𑒟𑒪 𑒂 𑒔𑒰𑒢𑓂𑒯𑒴𑒠𑒼𑒛𑓃𑒼𑒏 𑒫𑒱𑒏𑒰𑒮 𑒫𑓂𑒨𑒰𑒣𑒰𑒩𑒱𑒏 𑒏𑒹𑒢𑓂𑒠𑓂𑒩𑒏 𑒩𑒴𑒣𑒧𑒹 𑒦𑒹𑒪। 𑒪𑒱𑒣𑒱, 𑒏𑒙𑒯𑒲 𑒑𑒰𑒛𑓃𑒲 𑒂 𑒧𑒴𑒩𑓂𑒞𑓂𑒞𑒱𑒏𑒪𑒰𑒏 𑒂𑒫𑒱𑒭𑓂𑒏𑒰𑒩 𑒦𑒹𑒪 𑒂 𑒫𑒮𑓂𑒞𑒳 𑒫𑒱𑒢𑒱𑒧𑒨𑒏 𑒯𑒹𑒞𑒳 𑒯𑒰𑒙 𑒪𑒰𑒑𑒋 𑒪𑒰𑒑𑒪। 𑒧𑒹𑒮𑒼𑒣𑒼𑒙𑒰𑒧𑒱𑒨𑒰𑒏 𑒖𑒪𑒣𑓂𑒪𑒰𑒫𑒢 𑒂 𑒮𑒳𑒧𑒹𑒩𑒲 𑒂 𑒁𑒮𑒳𑒩𑒏 𑒂𑒑𑒧𑒢𑒏 𑒔𑒩𑓂𑒔𑒰 𑒪𑒹𑒐𑒏 𑒏𑒩𑒻𑒞 𑒕𑒟𑒱।
𑒏𑒱𑒬𑓂𑒢 𑒁𑒡𑓂𑒨𑒰𑒨𑒏 𑒣𑓂𑒩𑒰𑒩𑒧𑓂𑒦 𑓓𑓐𑓐𑓐 𑒄.𑒣𑒴. 𑒮𑒿 𑒦𑒹𑒪। 𑒫𑒱𑒠𑒹𑒬 𑒫𑓂𑒨𑒰𑒣𑒰𑒩𑒏 𑒂𑒩𑒧𑓂𑒦 𑒦𑒹𑒪। 𑒞𑒰𑒧𑒏 𑒂𑒫𑒱𑒭𑓂𑒏𑒰𑒩 𑒦𑒹𑒪। 𑒏𑒵𑒭𑒱 𑒠𑒰𑒮𑒞𑓂𑒫𑒏 𑒮𑒹𑒯𑒼 𑒣𑓂𑒩𑒰𑒩𑒧𑓂𑒦 𑒦𑒹𑒪। 𑒥𑒰𑒜𑓃𑒱𑒮𑒿 𑒮𑒳𑒩𑒏𑓂𑒭𑒰𑒏 𑒯𑒹𑒞𑒳 𑒆𑒿𑒔 𑒛𑒲𑒯 𑒥𑒢𑒰𑒍𑒪 𑒖𑒰𑒋 𑒪𑒰𑒑𑒪।
𑒧𑒯𑒰𑒖𑒢 𑒁𑒡𑓂𑒨𑒰𑒨 𑓒𑓘𑓐𑓐 𑒄. 𑒣𑒴. 𑒣𑓂𑒩𑒰𑒩𑒧𑓂𑒦 𑒯𑒼𑒃𑒞 𑒁𑒕𑒱। 𑒢𑒑𑒩𑒏 𑒣𑓂𑒩𑒰𑒩𑒧𑓂𑒦 𑒫𑒰𑒝𑒱𑒖𑓂𑒨𑒏 𑒯𑒹𑒞𑒳 𑒦𑒹𑒪। 𑒢𑒯𑒩𑒱 𑒣𑒙𑒾𑒢𑒲𑒏 𑒯𑒹𑒞𑒳 𑒥𑒢𑒰𑒍𑒪 𑒖𑒰𑒋 𑒪𑒰𑒑𑒪। 𑒛𑓀𑒛𑒲 𑒞𑒩𑒰𑒖𑒴𑒏 𑒂𑒫𑒱𑒭𑓂𑒏𑒰𑒩 𑒂𑒫𑒬𑓂𑒨𑒏𑒞𑒰 𑒮𑓂𑒫𑒩𑒴𑒣 𑒦𑒹𑒪। 𑒣𑓂𑒩𑒏𑒰𑒬-𑒫𑓂𑒨𑒫𑒮𑓂𑒟𑒰𑒏 𑒥𑓂𑒨𑒼𑒿𑒞 𑒪𑒰𑒑𑒪।
𑒧𑓀𑒛𑒪 𑒁𑒡𑓂𑒨𑒰𑒨𑒧𑒹 𑒔𑒩𑓂𑒔 𑓒𑓖𑓐𑓐 𑒄.𑒣𑒴.𑒏 𑒕𑒻। 𑒮𑓀𑒮𑓂𑒟𑒰 𑒢𑒱𑒩𑓂𑒧𑒰𑒝, 𑒫𑒱𑒫𑒰𑒯 𑒫𑓂𑒨𑒫𑒮𑓂𑒟𑒰 𑒂 𑒠𑒴𑒩𑒑𑒩 𑒨𑒰𑒞𑓂𑒩𑒰𑒏 𑒯𑒹𑒞𑒳 𑒣𑒰𑒪 𑒥𑒪𑒰 𑒢𑒰𑒫𑒏 𑒢𑒱𑒩𑓂𑒧𑒰𑒝 𑒣𑓂𑒩𑒰𑒩𑒧𑓂𑒦 𑒦𑒹𑒪।
𑒏𑒱𑒬𑓂𑒢 𑒧𑓀𑒛𑒪 𑒁𑒡𑓂𑒨𑒰𑒨 𑓒𑓔𑓐𑓐 𑒄.𑒣𑒴. 𑒏𑒹𑒩 𑒏𑒰𑒪𑒐𑒝𑓂𑒛𑒮𑒿 𑒂𑒩𑒧𑓂𑒦 𑒏𑒋𑒪 𑒑𑒹𑒪 𑒁𑒕𑒱। 𑒋𑒯𑒱𑒧𑒹 𑒫𑒩𑓂𑒭𑒰𑒏 𑒁𑒦𑒰𑒫𑒏 𑒔𑒩𑒔𑒰 𑒁𑒕𑒱। 𑒂𑒩𑓂𑒨𑒏 𑒣𑒴𑒩𑓂𑒫 𑒠𑒱𑒬𑒰𑒧𑒹 𑒥𑒜𑓃𑒥𑒰𑒏 𑒔𑒩𑓂𑒔𑒰𑒮𑒿 𑒪𑒼𑒏𑒧𑒹 𑒦𑒨𑒏 𑒮𑒹𑒯𑒼 𑒔𑒩𑓂𑒔𑒰 𑒁𑒕𑒱।
𑒧𑓀𑒛𑒪:𑒧𑓀𑒛𑒪𑒲 𑒁𑒡𑓂𑒨𑒰𑒨 𑓒𑓒𑓐𑓐 𑒄.𑒣𑒴.𑒮𑒿 𑒣𑓂𑒩𑒰𑒩𑒧𑓂𑒦 𑒦𑒹𑒪। 𑒂𑒩𑓂𑒨𑒏 𑒂𑒑𑒧𑒢𑒏 𑒂 𑒫𑒩𑓂𑒭𑒰𑒏 𑒁𑒦𑒰𑒫 𑒠𑒳𑒢𑒴𑒏𑒹𑒿 𑒠𑒹𑒐𑒻𑒞 𑒪𑒼𑒟𑒪 𑒫𑒻𑒏𑒪𑓂𑒣𑒱𑒏 𑒩𑒴𑒣𑒮𑒿 𑒫𑒱𑒏𑒮𑒱𑒞 𑒯𑒼𑒧𑒋 𑒪𑒰𑒑𑒪।
𑒣𑒞𑒢:𑒣𑒳𑒩𑓀𑒠𑒩: 𑒋𑒯𑒱 𑒁𑒡𑓂𑒨𑒰𑒨𑒏 𑒏𑒰𑒪𑒐𑒝𑓂𑒛 𑓒𑓐𑓐𑓐 𑒄.𑒣𑒴.𑒮𑒿 𑒣𑓂𑒩𑒰𑒩𑒧𑓂𑒦 𑒦𑒹𑒪 𑒁𑒕𑒱। 𑒂𑒩𑓂𑒨𑒏 𑒩𑒰𑒖𑒰 𑒠𑓂𑒫𑒰𑒩𑒰 𑒣𑒳𑒩𑒏𑒹𑒿 𑒞𑒼𑒛𑓃𑒱 𑒧𑒯𑒰𑒢 𑒏𑒹𑓀𑒠𑓂𑒩 𑒯𑒛𑓃𑒣𑓂𑒣𑒰𑒏𑒹𑒿 𑒡𑓂𑒫𑒮𑓂𑒞 𑒏𑒩𑒥𑒰𑒏 𑒔𑒩𑓂𑒔𑒰𑒮𑒿 𑒧𑒰𑒨𑒰𑒢𑒢𑓂𑒠 𑒖𑒲 𑒁𑒣𑒢 𑒣𑒯𑒱𑒪 𑒏𑒱𑒞𑒰𑒥 ‘𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔’ 𑒏𑒹𑒩 𑒮𑒧𑒰𑒣𑒢 𑒏𑒩𑒻𑒞 𑒕𑒟𑒱। 𑒂𑒩𑓂𑒨 𑒯𑒛𑓃𑒣𑓂𑒣𑒰𑒏𑒹𑒿 𑒯𑒩𑒱𑒨𑒴𑒣𑒱𑒨𑒰𑒮𑒿 𑒮𑓀𑒥𑒼𑒡𑒱𑒞 𑒏𑒋𑒪, 𑒂𑒩𑓂𑒨 𑒥𑒰𑒯𑒩𑒮𑒿 𑒁𑒋𑒪𑒰𑒯 𑒣𑓂𑒩𑒦𑒵𑒞𑓂𑒞𑒱 𑒏𑒱𑒕𑒳 𑒮𑒱𑒠𑓂𑒡𑒰𑓀𑒞𑒏 𑒂𑒡𑒰𑒩 𑒣𑒩 𑒩𑒔𑒱𑒞 𑒄 𑒅𑒣𑒢𑓂𑒨𑒰𑒮 𑒌𑒞𑒱𑒯𑒰𑒮𑒱𑒏 𑒅𑒣𑒢𑓂𑒨𑒰𑒮 𑒯𑒼𑒋𑒥𑒰𑒏 𑒠𑒰𑒫𑒰 𑒏𑒩𑒻𑒞 𑒁𑒕𑒱। 𑒂 𑒋𑒯𑒱𑒧𑒹 𑓒𑓐,𑓐𑓐𑓐 𑒄.𑒣𑒴.𑒮𑒿 𑓑𑓘𑓐𑓐 𑒄.𑒣𑒴. 𑒡𑒩𑒱𑒏 𑒃𑒞𑒱𑒯𑒰𑒮𑒼𑒣𑒰𑒐𑓂𑒨𑒰𑒢𑒏 𑒔𑒩𑓂𑒔𑒰 𑒁𑒕𑒱। 𑒧𑒳𑒠𑒰 𑒧𑒾𑒪𑒱𑒏 𑒌𑒞𑒱𑒯𑒰𑒮𑒱𑒏 𑒫𑒱𑒔𑒰𑒩𑒡𑒰𑒩𑒰 𑒂 𑒢𑒫𑒲𑒢 𑒬𑒼𑒡𑒏 𑒂𑒡𑒰𑒩 𑒣𑒩 𑒋𑒏𑒩 𑒥𑒯𑒳𑒞𑒼 𑒥𑒰𑒞 𑒮𑒧𑒲𑒔𑒲𑒢 𑒥𑒳𑒗𑒢𑒰 𑒢𑒯𑒱 𑒖𑒰𑒃𑒞 𑒁𑒕𑒱।
𑒁𑒑𑓂𑒢𑒰𑒮𑒿 𑒬𑒳𑒩𑒴 𑒦𑒹𑒪 𑒄 𑒏𑒟𑒰𑒢𑒏 𑒥𑒛𑓂𑒛 𑒂𑒬𑒰 𑒠𑒱𑒁𑒍𑒢𑒹 𑒕𑒪। 𑒪𑒹𑒐𑒏 𑒣𑒯𑒱𑒪 𑒁𑒡𑓂𑒨𑒰𑒨𑒧𑒹 𑒪𑒱𑒐𑒻𑒞 𑒕𑒟𑒱 𑒖𑒹 𑒣𑒵𑒟𑓂𑒫𑒲𑒏 𑒅𑒞𑓂𑒣𑒞𑓂𑒞𑒱 𑒪𑒑𑒦𑒑 𑓒𑓐𑓐 𑒏𑒩𑒼𑒛𑓃 𑒫𑒩𑓂𑒭 𑒣𑒴𑒩𑓂𑒫 𑒦𑒹𑒪 𑒖𑒹 𑒮𑒩𑓂𑒫𑒟𑒰 𑒮𑒧𑒲𑒔𑒲𑒢 𑒁𑒕𑒱। 𑒏𑒩𑓂𑒧𑒏𑒰𑒝𑓂𑒛𑒧𑒹 𑒋𑒏 𑒮𑓂𑒟𑒰𑒢 𑒣𑒩 𑒫𑒩𑓂𑒝𑒢 𑒁𑒕𑒱- “𑒥𑓂𑒩𑒰𑒯𑓂𑒧𑒝𑒹 𑒠𑓂𑒫𑒱𑒞𑒲𑒨𑒹 𑒣𑒩𑒰𑒩𑓂𑒡𑒹 𑒬𑓂𑒩𑒲 𑒮𑓂𑒫𑒹𑒞𑒫𑒰𑒩𑒰𑒯 𑒏𑒪𑓂𑒣𑒹 𑒫𑒻𑒫𑒮𑓂𑒫𑒞 𑒧𑒢𑓂𑒫𑓀𑒞𑒩𑒹 𑒁𑒭𑓂𑒙𑒰𑒫𑒱𑓀𑒬𑒞𑒱𑒞𑒧𑒹 𑒏𑒪𑒱𑒨𑒳𑒑𑒹 𑒣𑓂𑒩𑒟𑒧 𑒔𑒩𑒝𑒹” 𑒂 𑒋𑒯𑒱 𑒂𑒡𑒰𑒩 𑒣𑒩 𑒑𑒝𑒢𑒰 𑒏𑒋𑒪𑒰 𑒅𑒞𑓂𑒞𑒩 𑓑,𑓙𑓗,𑓒𑓙,𑓔𑓙,𑓐𑓓𑓒 𑒫𑒩𑓂𑒭 𑒣𑒵𑒟𑓂𑒫𑒲𑒏 𑒂𑒨𑒳 𑒁𑒥𑒻𑒞 𑒁𑒕𑒱। 𑒩𑒹𑒛𑒱𑒨𑒼𑒋𑒏𑓂𑒙𑒱𑒫 𑒫𑒱𑒡𑒱 𑒠𑓂𑒫𑒰𑒩𑒰 𑒮𑒹𑒯𑒼 𑒄𑒋𑒯 𑒅𑒞𑓂𑒞𑒩 𑒁𑒥𑒻𑒞 𑒁𑒕𑒱। 𑒄 𑒁𑒢𑒳𑒧𑒰𑒢𑒱𑒞 𑒁𑒕𑒱 𑒖𑒹 𑒨𑒴𑒩𑒹𑒢𑒱𑒨𑒧𑒏 𑓑.𑓖𑓗 𑒦𑒰𑒑 𑓑𑓐,𑓐𑓐,𑓐𑓐,𑓐𑓐𑓐 𑒫𑒩𑓂𑒭𑒧𑒹 𑒮𑒲𑒮𑒰𑒧𑒹 𑒥𑒠𑒪𑒱 𑒖𑒰𑒃𑒞 𑒁𑒕𑒱। 𑒫𑒱𑒦𑒱𑒢𑓂𑒢 𑒣𑓂𑒩𑒏𑒰𑒩𑒏 𑒣𑒰𑒟𑒩 𑒂 𑒔𑒙𑓂𑒙𑒰𑒢𑒧𑒹 𑒮𑒲𑒮𑒰𑒏 𑒧𑒰𑒞𑓂𑒩𑒰 𑒦𑒱𑒢𑓂𑒢 𑒩𑒯𑒻𑒞 𑒁𑒕𑒱। 𑒋𑒯𑒱 𑒣𑓂𑒩𑒏𑒰𑒩𑒮𑒿 𑒑𑒝𑒢𑒰 𑒏𑒋𑒪𑒰 𑒣𑒩 𑒄 𑒖𑓂𑒘𑒰𑒞 𑒯𑒼𑒃𑒕 𑒖𑒹 𑒩𑒹𑒛𑒱𑒨𑒼𑒋𑒏𑓂𑒙𑒱𑒫 𑒣𑒠𑒰𑒩𑓂𑒟 𑓑,𑓕𑓐,𑓐𑓐,𑓐𑓐,𑓐𑓐𑓐 𑒫𑒩𑓂𑒭 𑒣𑒯𑒱𑒢𑒹 𑒫𑒱𑒠𑓂𑒨𑒧𑒰𑒢 𑒕𑒪। 𑒋𑒯𑒱 𑒣𑓂𑒩𑒏𑒰𑒩𑒹𑒿 𑒏𑒼𑒢𑒼 𑒬𑒻𑒪𑒏 𑒂𑒨𑒳 𑓒,𑓐𑓐,𑓐𑓐,𑓐𑓐,𑓐𑓐𑓐 𑒫𑒩𑓂𑒭𑒮𑒿 𑒁𑒡𑒱𑒏 𑒢𑒯𑒱 𑒦𑓄 𑒮𑒏𑒻𑒕। 𑒨𑒴𑒩𑒼𑒣𑒧𑒹 𑒮𑒞𑓂𑒩𑒯𑒧 𑒬𑒞𑒰𑒥𑓂𑒠𑒲 𑒡𑒩𑒱 𑒣𑒵𑒟𑓂𑒫𑒲𑒏 𑒂𑒨𑒳 𑓔𑓐𑓐𑓐 𑒫𑒩𑓂𑒭 𑒧𑒰𑒢𑒪 𑒖𑒰𑒃𑒞 𑒩𑒯𑒪। 𑒄𑒩𑒰𑒢𑒏 𑒫𑒱𑒠𑓂𑒫𑒰𑒢 𑓑𑓒𑓐𑓐 𑒫𑒩𑓂𑒭 𑒣𑒯𑒱𑒢𑒹 𑒣𑒵𑒟𑓂𑒫𑒲𑒏 𑒅𑒞𑓂𑒣𑒞𑓂𑒞𑒱 𑒧𑒰𑒢𑒪𑒢𑓂𑒯𑒱। 𑒋𑒯𑒱 𑒞𑒩𑒯𑒏 𑒣𑒰𑒬𑓂𑒔𑒰𑒞𑓂𑒨 𑒬𑒼𑒡𑒏𑒹𑒿 𑒪𑒹𑒐𑒏 𑒣𑒯𑒱𑒪 𑒁𑒡𑓂𑒨𑒰𑒨𑒧𑒹 𑒞𑒿 𑒢𑒏𑒰𑒩𑒱 𑒠𑒹𑒪𑒢𑓂𑒯𑒱 𑒧𑒳𑒠𑒰 𑒁𑓀𑒞 𑒡𑒩𑒱 𑒖𑒰𑒃𑒞-𑒖𑒰𑒃𑒞 𑒍 - 𑒂𑒩𑓂𑒨 𑒪𑒼𑒏𑒢𑒱 𑒯𑒛𑓃𑒣𑓂𑒣𑒰𑒏𑒹𑒿 𑒯𑒩𑒱𑒨𑒴𑒣𑒱𑒨𑒰 𑒏𑒯𑒻𑒞 𑒕𑒟𑒱 - 𑒋𑒯𑒱 𑒣𑓂𑒩𑒏𑒰𑒩𑒏 𑒣𑒰𑒬𑓂𑒔𑒰𑒞𑓂𑒨 𑒠𑒳𑒩𑒰𑒑𑓂𑒩𑒯𑒏 𑒣𑓂𑒩𑒦𑒰𑒫𑒧𑒹 𑒂𑒥𑒱 𑒑𑒹𑒪𑒰𑒯। 𑒣𑒬𑓂𑒔𑒱𑒧𑒲 𑒫𑒱𑒠𑓂𑒫𑒰𑒢𑒏 𑒅𑒔𑓂𑒕𑒱𑒭𑓂𑒙 𑒦𑒼𑒖𑒮𑒿 𑒥𑒔𑒱 𑒬𑓂𑒩𑒳𑒞𑒱 𑒣𑒩𑒧𑓂𑒣𑒩𑒰𑒏 𑒣𑒩𑒲𑒏𑓂𑒭𑒰 𑒞𑒩𑓂𑒏𑒮𑒿 𑒢𑒯𑒱 𑒏𑒋 𑒮𑒏𑒪𑒰𑒯। 𑒋𑒯𑒱 𑒣𑓂𑒩𑒏𑒰𑒩𑒹 ‘𑒣𑓂𑒩𑒟𑒧𑓀 𑒬𑒻𑒪 𑒣𑒳𑒞𑓂𑒩𑒲 𑒔’ 𑒢𑒱𑒧𑓂𑒢 𑒂𑒡𑒰𑒩 𑒣𑒩 𑒁𑒣𑒢 𑒃𑒞𑒱𑒯𑒰𑒮𑒼𑒣𑒰𑒐𑓂𑒨𑒰𑒢 𑒮𑒰𑒯𑒱𑒞𑓂𑒨𑒱𑒏 𑒩𑒴𑒣𑒮𑒿 𑒢𑒯𑒱 𑒥𑒢𑒰 𑒣𑒍𑒪𑒏 :-
𑒣𑒳𑒩𑒰𑒞𑒰𑒞𑓂𑒫𑒱𑒏, 𑒦𑒰𑒭𑒰𑒫𑒻𑒖𑓂𑒘𑒰𑒢𑒱𑒏 𑒂 𑒮𑒰𑒯𑒱𑒞𑓂𑒨𑒱𑒏 𑒮𑒰𑒏𑓂𑒭𑓂𑒨 𑒋𑒯𑒱 𑒣𑒏𑓂𑒭𑒧𑒹 𑒁𑒕𑒱 𑒖𑒹 𑒂𑒩𑓂𑒨 𑒦𑒰𑒩𑒞𑒏 𑒧𑒴𑒪 𑒢𑒱𑒫𑒰𑒮𑒲 𑒕𑒪𑒰𑒯। 𑒂𑒩𑓂𑒨 𑒦𑒰𑒭𑒰 𑒣𑒩𑒱𑒫𑒰𑒩𑒏 𑒢𑒰𑒧𑒏𑒩𑒝 𑒧𑒻𑒏𑓂𑒮𑒧𑒴𑒪𑒩 𑒠𑓂𑒫𑒰𑒩𑒰 𑒏𑒋𑒪 𑒑𑒹𑒪 𑒕𑒪। 𑒠𑓂𑒩𑒫𑒱𑒛𑓃 𑒣𑒩𑒱𑒫𑒰𑒩𑒏 𑒢𑒰𑒧𑒏𑒩𑒝 𑒣𑒰𑒠𑒩𑒲 𑒩𑒰𑒥𑒩𑓂𑒙 𑒏𑒰𑒪𑓂𑒛𑒫𑒹𑒪 𑒠𑓂𑒫𑒰𑒩𑒰 𑒏𑒋𑒪 𑒑𑒹𑒪 𑒕𑒪।𑒂𑒩𑓂𑒨𑒏 𑒂𑒏𑓂𑒩𑒧𑒝𑒏 𑒮𑒱𑒠𑓂𑒡𑒰𑓀𑒞 𑒂𑒋𑒪 𑒑𑓂𑒩𑒱𑒤𑒱𑒟𑒏 𑒇𑒑𑓂𑒫𑒹𑒠𑒏 𑒁𑒢𑒳𑒫𑒰𑒠𑒧𑒹 𑒠𑒹𑒪 𑒑𑒹𑒪 𑒤𑒴𑒙𑒢𑒼𑒙𑒮𑒿। 𑒣𑒯𑒱𑒢𑒹 𑒞𑒿 𑒄 𑒢𑒰𑒧𑒏𑒩𑒝 𑒫𑒱𑒠𑒹𑒬𑒲 𑒫𑒱𑒠𑓂𑒫𑒰𑒢 𑒠𑓂𑒫𑒰𑒩𑒰 𑒏𑒋𑒪 𑒑𑒹𑒪 𑒕𑒪 𑒞𑒰𑒯𑒱 𑒠𑓂𑒫𑒰𑒩𑒹 𑒍𑒏𑒩 𑒁𑒣𑒢 𑒅𑒠𑓂𑒠𑒹𑒬𑓂𑒨 𑒯𑒼𑒋𑒞𑒻𑒏।
𑒮𑒩𑒮𑓂𑒫𑒞𑒲 𑒢𑒠𑒲, 𑒖𑒪-𑒣𑓂𑒩𑒪𑒨, 𑒧𑒢𑒳 𑒂 𑒧𑒯𑒰𑒧𑒞𑓂𑒮𑓂𑒨𑒏 𑒏𑒟𑒰, 𑒑𑒱𑒪𑓂𑒑𑒧𑒹𑒬 𑒏𑒟𑒰 𑒏𑒰𑒫𑓂𑒨, 𑒣𑓂𑒩𑒰𑒝𑒫𑓀𑒞𑒏 𑒠𑒹𑒬 𑒑𑒱𑒪𑓂𑒑𑒧𑒹𑒬𑒏 𑒐𑒼𑒖, 𑒮𑒵𑒭𑓂𑒙𑒱𑒏𑒟𑒰 𑒂 𑒠𑒹𑒫𑒞𑓀𑒞𑓂𑒩𑒏 𑒫𑒱𑒏𑒰𑒮 𑒋𑒯𑒱 𑒮𑒦𑒙𑒰 𑒮𑒧𑒰𑒖𑒬𑒰𑒮𑓂𑒞𑓂𑒩𑒲𑒨 𑒫𑒱𑒏𑒰𑒮𑒏 𑒫𑒱𑒬𑓂𑒪𑒹𑒭𑒝 𑒂𑒩𑓂𑒨 𑒪𑒼𑒏𑒢𑒱𑒏 𑒦𑒰𑒩𑒞𑒏 𑒧𑒴𑒪 𑒢𑒱𑒫𑒰𑒮𑒲 𑒯𑒼𑒋𑒥𑒰𑒏 𑒮𑒰𑒏𑓂𑒭𑓂𑒨 𑒣𑓂𑒩𑒮𑓂𑒞𑒳𑒞 𑒏𑒩𑒻𑒞 𑒁𑒕𑒱।
𑒇𑒑𑓂𑒫𑒹𑒠𑒧𑒹 𑒧𑒰𑒞𑒵𑒮𑒞𑓂𑒞𑒰𑒞𑓂𑒧𑒏 𑒫𑓂𑒨𑒫𑒮𑓂𑒟𑒰𑒏 𑒮𑓂𑒧𑒵𑒞𑒱𑒏 𑒩𑒴𑒣𑒧𑒹 𑒥𑒯𑒳𑒫𑒔𑒢 𑒮𑓂𑒞𑓂𑒩𑒲𑒪𑒱𑓀𑒑𑒏 𑒣𑓂𑒩𑒨𑒼𑒑𑒏 𑒥𑒯𑒳𑒪𑒞𑒰 𑒁𑒕𑒱।
𑒮𑒒𑒼𑒭 𑒂 𑒧𑒯𑒰𑒣𑓂𑒩𑒰𑒝 𑒇𑒑𑓂𑒫𑒹𑒠𑒱𑒏 𑒂 𑒦𑒰𑒩𑒞𑒲𑒨 𑒦𑒰𑒭𑒰𑒏 𑒡𑓂𑒫𑒢𑒱𑒏 𑒣𑓂𑒩𑒞𑒱𑒩𑒴𑒣, 𑒢𑒯𑒱 𑒞𑒿 𑒄𑒩𑒰𑒢𑒲 𑒂 𑒢𑒯𑒱𑒨𑒹 𑒨𑒴𑒩𑒼𑒣𑒲𑒨 𑒦𑒰𑒭𑒰 𑒮𑒦𑒧𑒹 𑒦𑒹𑒙𑒻𑒞 𑒁𑒕𑒱। 𑒮𑒩𑒮𑓂𑒫𑒞𑒲 𑒂 𑒮𑒱𑒢𑓂𑒡𑒳 𑒡𑒰𑒩𑒏 𑒥𑒲𑒔𑒏 𑒮𑒦𑓂𑒨𑒞𑒰 𑒕𑒪 𑒂𑒩𑓂𑒨𑒏 𑒮𑒦𑓂𑒨𑒞𑒰। 𑒮𑒩𑒮𑓂𑒫𑒞𑒲 𑒡𑒰𑒩𑒏 𑒞𑒙𑒫𑒩𑓂𑒞𑒲 𑒦𑒩𑒞, 𑒣𑒳𑒩𑒳 𑒂 𑒁𑒢𑓂𑒨 𑒑𑒝 𑒮𑒦 𑒧𑒱𑒪𑒱 𑒏𑒋 𑒇𑒑𑒫𑒹𑒠𑒏 𑒩𑒔𑒢𑒰 𑒏𑒋𑒪𑒢𑓂𑒯𑒱। 𑒮𑒩𑒮𑓂𑒫𑒞𑒲𑒧𑒹 𑒖𑒪-𑒣𑓂𑒩𑒪𑒨𑒏 𑒥𑒰𑒠 𑒄 𑒮𑒦𑓂𑒨𑒞𑒰 𑒮𑒰𑒩𑒮𑓂𑒫𑒞 𑒣𑓂𑒩𑒠𑒹𑒬 𑒮𑒿 𑒯𑒙𑒱 𑒏𑒋 𑒏𑒳𑒩𑒳-𑒣𑒰𑓀𑒔𑒰𑒪 𑒂 𑒥𑓂𑒩𑒯𑓂𑒧𑒩𑓂𑒭𑒱 𑒣𑓂𑒩𑒠𑒹𑒬-𑒧𑒡𑓂𑒨𑒠𑒹𑒬- 𑒣𑒯𑒳𑒿𑒔𑒱 𑒑𑒹𑒪। 𑒃𑒞𑒱𑒯𑒰𑒮𑒧𑒹 𑒦𑒩𑒞 𑒪𑒼𑒏𑒢𑒱𑒏 𑒧𑒯𑒞𑓂𑒫 𑒮𑒧𑒰𑒣𑓂𑒞 𑒦𑓄 𑒑𑒹𑒪। 𑒋𑒯𑒱 𑒖𑒪 𑒣𑓂𑒩𑒪𑒨𑒏 𑒥𑒰𑒠 𑒂𑒩𑓂𑒨𑒖𑒢 𑒪𑒼𑒏𑒢𑒱𑒏 𑒫𑓀𑒬𑒖 𑒧𑒼𑒯𑒢𑒖𑒼𑒠𑒛𑓃𑒼 𑒂 𑒯𑒛𑓃𑒣𑓂𑒣𑒰 𑒢𑒑𑒩𑒏 𑒢𑒱𑒩𑓂𑒧𑒰𑒝 𑒏𑒋𑒢𑒹 𑒯𑒼𑒋𑒞𑒰𑒯 𑒮𑒹𑒯𑒼 𑒮𑒧𑓂𑒦𑒫। 𑒯𑒛𑓃𑒣𑓂𑒣𑒰 𑒮𑒦𑓂𑒨𑒞𑒰𑒏 𑓘𑓐𑓐 𑒧𑒹 𑒮𑒿 𑓕𑓓𑓐 𑒮𑒿 𑒆𑒣𑒩 𑒮𑓂𑒟𑒰𑒢 𑒋𑒯𑒱 𑒪𑒳𑒣𑓂𑒞 𑒮𑒩𑒮𑓂𑒫𑒞𑒲 𑒡𑒰𑒩𑒏 𑒞𑒙 𑒣𑒩 𑒁𑒫𑒮𑓂𑒟𑒱𑒞 𑒕𑒪। 𑒮𑒱𑒢𑓂𑒡𑒳𑒏 𑒡𑒰𑒩 𑒣𑒩 𑒋𑒯𑒱 𑒮𑓂𑒟𑒪 𑒮𑒦𑒏 𑒥𑒛𑓂𑒛 𑒏𑒧 𑒢𑒱𑒩𑓂𑒦𑒩𑒞𑒰 𑒕𑒪 𑒂 𑒖𑒐𑒢 𑒮𑒩𑒮𑓂𑒫𑒞𑒲𑒧𑒹 𑒣𑒰𑒢𑒱𑒏 𑒣𑓂𑒩𑒫𑒰𑒯 𑒒𑒙𑒪 𑒞𑒿 𑒋𑒯𑒱 𑒮𑒦 𑒏𑒹𑒢𑓂𑒠𑓂𑒩𑒏 𑒯𑓂𑒩𑒰𑒮 𑒣𑓂𑒩𑒰𑒩𑒧𑓂𑒦 𑒦𑓄 𑒑𑒹𑒪।
𑒣𑒯𑒱𑒢𑒹 𑒮𑒩𑒮𑓂𑒫𑒞𑒲𑒧𑒹 𑒖𑒪-𑒣𑓂𑒩𑒪𑒨𑒮𑒿 𑒂𑒩𑓂𑒨𑒏 𑒣𑒪𑒰𑒨𑒢 𑒦𑒹𑒪 (𑒇𑒑𑒫𑒹𑒠 𑒂 𑒨𑒖𑒳𑒩𑓂𑒫𑒹𑒠𑒏 𑒩𑒔𑒢𑒰𑒏 𑒥𑒰𑒠) 𑒂 𑒤𑒹𑒩 𑒮𑒩𑒮𑓂𑒫𑒞𑒲𑒧𑒹 𑒣𑒰𑒢𑒱𑒏 𑒏𑒧𑒲 𑒦𑒹𑒪𑒰𑒮𑒿 𑒠𑒼𑒮𑒩 𑒥𑒹𑒩 𑒂𑒩𑓂𑒨𑒏 𑒣𑒻𑒒 𑒣𑒪𑒰𑒨𑒢 𑒦𑒹𑒪 (𑒁𑒟𑒩𑓂𑒫𑒫𑒹𑒠𑒏 𑒩𑒔𑒢𑒰𑒏 𑒣𑒯𑒱𑒢𑒹)। 𑒁𑒩𑒰-𑒨𑒳𑒏𑓂𑒞 𑒩𑒟𑒏 𑒫𑒩𑓂𑒝𑒢 𑒫𑒹𑒠𑒧𑒹 𑒦𑒹𑒙𑒻𑒞 𑒁𑒕𑒱। 𑒢𑒯𑒱 𑒞𑒿 𑒄 𑒣𑒬𑓂𑒔𑒱𑒧 𑒋𑒬𑒱𑒨𑒰𑒧𑒹 𑒕𑒪 𑒂 𑒢𑒯𑒱𑒨𑒹 𑒨𑒴𑒩𑒼𑒣𑒧𑒹। 𑒦𑒰𑒩𑒞𑒲𑒨 𑒠𑒹𑒫𑒢𑒰𑒧, 𑒬𑒱𑒪𑓂𑒣, 𑒏𑒟𑒰, 𑒁𑒬𑓂𑒫𑒫𑒱𑒠𑓂𑒨𑒰, 𑒮𑓀𑒑𑒲𑒞, 𑒦𑒰𑒭𑒱𑒏 𑒞𑒞𑓂𑒫 𑒂 𑒔𑒱𑓀𑒞𑒢𑒏 𑒮𑓀𑒑 𑒄 𑒅𑒠𑓂𑒒𑒰𑒙𑒱𑒞 𑒯𑒼𑒧𑒋 𑒪𑒰𑒑𑒪 𑒣𑒬𑓂𑒔𑒱𑒧 𑒋𑒬𑒱𑒨𑒰, 𑒧𑒱𑒬𑓂𑒩 𑒂 𑒨𑒴𑒢𑒰𑒢𑒧𑒹। 𑒠𑒼𑒮𑒩 𑒮𑒯𑒮𑓂𑒩𑒰𑒥𑓂𑒠𑒲 𑒄.𑒣𑒴𑒩𑓂𑒫 𑒁𑒩𑒰𑒨𑒳𑒏𑓂𑒞𑓂𑒞 𑒩𑒟, 𑒦𑒰𑒩𑒞𑒲𑒨 𑒠𑒹𑒫𑒢𑒰𑒧, 𑒦𑒰𑒩𑒞𑒏 𑒡𑒰𑒩, 𑒇𑒑𑒫𑒹𑒠𑒱𑒏 𑒞𑒞𑓂𑒫𑒔𑒱𑓀𑒞𑒢, 𑒁𑒬𑓂𑒫𑒫𑒱𑒠𑓂𑒨𑒰, 𑒬𑒱𑒪𑓂𑒣-𑒞𑒏𑒢𑒲𑒏𑒲 𑒂 𑒣𑒳𑒩𑒰𑒞𑒢𑓂 𑒏𑒟𑒰 𑒦𑒰𑒩𑒞𑒮𑒿 𑒣𑒔𑓂𑒕𑒱𑒧 𑒋𑒬𑒱𑒨𑒰, 𑒏𑓂𑒩𑒲𑒙-𑒨𑒴𑒢𑒰𑒢 𑒠𑒱𑒬𑒱 𑒖𑒰𑒋 𑒪𑒰𑒑𑒪। 𑒏𑒰𑒪𑒏𑓂𑒩𑒧𑒮𑒿 𑒧𑒱𑒬𑓂𑒩, 𑒮𑒳𑒧𑒹𑒩-𑒥𑒹𑒥𑒲𑒪𑒼𑒢, 𑒂𑒠𑒱 𑒮𑒦𑓂𑒨𑒞𑒰 𑒂 𑒧𑒱𑒞𑓂𑒞𑒢𑒲 𑒂 𑒯𑒱𑒞𑓂𑒞𑒲 𑒮𑒦𑓂𑒨𑒞𑒰𑒮𑒿 𑒥𑒯𑒳𑒞 𑒣𑒯𑒱𑒢𑒯𑒱 𑒇𑒑𑒫𑒹𑒠𑒏 𑒁𑒡𑒱𑒏𑒰𑓀𑒬 𑒧𑓀𑒛𑒪𑒏 𑒩𑒔𑒢𑒰 𑒦𑓄 𑒑𑒹𑒪 𑒕𑒪।

𑒧𑒰𑒨𑒰𑒢𑒢𑓂𑒠𑒖𑒲𑒏 𑒋𑒯𑒱 𑒮𑒲𑒩𑒲𑒖𑒏 𑒠𑒼𑒮𑒩 𑒩𑒔𑒢𑒰 𑒧𑓀𑒞𑓂𑒩𑒣𑒳𑒞𑓂𑒩 𑒁𑒕𑒱। 𑒋𑒯𑒱𑒧𑒹 𑒇𑒑𑒫𑒻𑒠𑒱𑒏 𑒂𑒡𑒰𑒩 𑒣𑒩 𑒖𑒲𑒫𑒢-𑒠𑒩𑓂𑒬𑒢𑒏𑒹𑒿 𑒩𑒰𑒐𑒪 𑒑𑒹𑒪 𑒁𑒕𑒱।
𑒇𑒑𑒫𑒹𑒠 𑓑𑓐 𑒧𑓀𑒛𑒪𑒧𑒹 (𑒂 𑒂𑒚 𑒁𑒭𑓂𑒙𑒏𑒧𑒹 𑒮𑒹𑒯𑒼) 𑒫𑒱𑒦𑒏𑓂𑒞𑓂𑒞 𑒁𑒕𑒱। 𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩𑒖𑒲 𑒧𑓀𑒛𑒪𑒏 𑒂𑒡𑒰𑒩 𑒣𑒩 𑒧𑓀𑒞𑓂𑒩𑒣𑒳𑒞𑓂𑒩𑒏 𑒫𑒱𑒦𑒰𑒖𑒢 𑒮𑒹𑒯𑒼 𑓑𑓐 𑒧𑒝𑓂𑒛𑒪𑒧𑒹 𑒏𑒋𑒢𑒹 𑒕𑒟𑒱। 𑒋𑒯𑒱 𑒣𑒳𑒮𑓂𑒞𑒏𑒏 𑒦𑒴𑒧𑒱𑒏𑒰𑒏 𑒢𑒰𑒧 𑒁𑒕𑒱 𑒇𑒔𑒰𑒪𑒼𑒏 𑒂 𑒄 𑒣𑒳𑒮𑓂𑒞𑒏𑒏 𑒁𑓀𑒞𑒧𑒹 𑓑𑓐𑒧 𑒧𑒝𑓂𑒛𑒪𑒏 𑒥𑒰𑒠 𑒠𑒹𑒪 𑒑𑒹𑒪 𑒁𑒕𑒱।
𑒣𑓂𑒩𑒟𑒧 𑒧𑒝𑓂𑒛𑒪𑒧𑒹 𑒏𑒰𑒏𑓂𑒭𑒮𑒹𑒢𑒲 𑒣𑒳𑒞𑓂𑒩𑒲 𑒇𑒖𑒱𑒬𑓂𑒫𑒰𑒏 𑒔𑒩𑓂𑒔 𑒁𑒕𑒱 𑒮𑓀𑒑𑒯𑒱 𑒇𑒞𑒳𑒩𑓂𑒫𑒱𑒞 𑒣𑒳𑒞𑓂𑒩𑒲 𑒬𑒰𑒬𑓂𑒫𑒞𑒲𑒏 𑒮𑒹𑒯𑒼। 𑒖𑒢 𑒮𑒦𑒰 𑒂 𑒖𑒢-𑒮𑒧𑒱𑒞𑒱 𑒠𑓂𑒫𑒰𑒩𑒰 𑒩𑒰𑒖𑒰𑒏𑒹𑒿 𑒔𑓂𑒨𑒳𑒞 𑒏𑒩𑒥𑒰𑒏/ 𑒢𑒱𑒩𑓂𑒫𑒰𑒮𑒢 𑒠𑒹𑒥𑒰𑒏 𑒂 𑒠𑒼𑒮𑒩 𑒩𑒰𑒖𑒰𑒏 𑒢𑒱𑒩𑓂𑒫𑒰𑒔𑒢 𑒏𑒩𑒥𑒰𑒏 𑒔𑒩𑓂𑒔𑒰 𑒮𑒹𑒯𑒼 𑒁𑒕𑒱। 𑒢𑒹𑒞𑓂𑒩𑒏 𑒢𑒲𑒪 𑒩𑓀𑒑 𑒩𑒯𑒥𑒰𑒏 𑒥𑒠𑒪𑒰 𑒬𑓂𑒨𑒰𑒧𑒪 𑒦𑓄 𑒖𑒋𑒥𑒰𑒏 𑒔𑒩𑓂𑒔𑒰 𑒂 𑒋𑒏𑒩 𑒏𑒰𑒩𑒝 𑒐𑒰𑒮 𑒞𑒩𑒯𑒏 𑒫𑒱𑒫𑒰𑒯𑒏 𑒯𑒼𑒨𑒥𑒰𑒏 𑒔𑒩𑓂𑒔𑒰 𑒮𑒹𑒯𑒼 𑒦𑒹𑒪 𑒁𑒕𑒱।𑒫𑒱𑒞𑒮𑓂𑒞𑒰 𑒞𑒙𑒮𑒿 𑒏𑒵𑒭𑓂𑒝 𑒮𑒦𑒏 𑒢𑒱𑒩𑒢𑓂𑒞𑒩 𑒅𑒣𑒠𑓂𑒩𑒫𑒏 𑒔𑒩𑓂𑒔𑒰 𑒮𑒹𑒯𑒼 𑒁𑒕𑒱। 𑒮𑒳𑒫𑒰𑒮𑓂𑒞𑒳 𑒞𑒙𑒮𑒿 𑒩𑒏𑓂𑒞𑓂𑒞 𑒧𑒱𑒬𑓂𑒩𑒝𑒏 𑒣𑓂𑒩𑒏𑓂𑒩𑒱𑒨𑒰𑒏 𑒫𑒩𑓂𑒝𑒢 𑒁𑒕𑒱। 𑒑𑒼𑒧𑒹𑒡𑒏𑒹𑒿 𑒫𑒩𑓂𑒖𑒱𑒞 𑒏𑒋𑒪 𑒖𑒰𑒨, 𑒄 𑒫𑒱𑒔𑒰𑒩 𑒫𑒱𑒧𑒩𑓂𑒬 𑒏𑒋𑒪 𑒖𑒰𑒋 𑒪𑒰𑒑𑒪। 𑒠𑒰𑒮𑒏 𑒔𑒩𑓂𑒔𑒰 𑒮𑒹𑒯𑒼 𑒁𑒕𑒱। 𑒯𑒩𑒱𑒨𑒴𑒣𑒱𑒨𑒰 𑒣𑒞𑒢 𑒂 𑒍𑒏𑒩 𑒫𑒱𑒦𑒱𑒢𑓂𑒢 𑒢𑒑𑒩 𑒮𑒦𑒏 𑒅𑒖𑒛𑓃𑒱 𑒖𑒋𑒥𑒰𑒏 𑒔𑒩𑓂𑒔𑒰 𑒁𑒕𑒱 𑒂 𑒣𑒬𑓂𑒔𑒰𑒞𑓂, 𑒥𑒪𑓂𑒥𑒴𑒟 𑒠𑓂𑒫𑒰𑒩𑒰 𑒁𑒢𑒰𑒩𑓂𑒨 𑒮𑒦𑒏 𑒡𑓂𑒫𑒮𑓂𑒞 𑒫𑒰𑒝𑒱𑒖𑓂𑒨 𑒫𑓂𑒨𑒫𑒮𑓂𑒟𑒰𑒏𑒹𑒿 𑒮𑓀𑒑𑒚𑒱𑒞 𑒏𑒩𑒥𑒰𑒏 𑒔𑒩𑓂𑒔𑒰 𑒁𑒕𑒱।
𑒠𑓂𑒫𑒱𑒞𑒲𑒨 𑒧𑒝𑓂𑒛𑒪𑒧𑒹 𑒩𑒰𑒖𑒰𑒏𑒹𑓀 𑒮𑒧𑒱𑒞𑒱 𑒠𑓂𑒫𑒰𑒩𑒰 𑒋𑒯𑒱 𑒑𑒣𑒏 𑒪𑒹𑒪 𑒣𑒠𑒔𑓂𑒨𑒳𑒞 𑒏𑒋𑒪 𑒖𑒋𑒥𑒰𑒏 𑒔𑒩𑓂𑒔𑒰 𑒁𑒕𑒱, 𑒏𑒱 𑒡𑒹𑒢𑒳𑒏 𑒔𑒼𑒩𑒱𑒏 𑒥𑒰𑒠𑒼 𑒑𑒫𑓂𑒨-𑒨𑒳𑒠𑓂𑒡 𑒍 𑒢𑒯𑒱 𑒏𑒋𑒪𑒢𑓂𑒯𑒱। 𑒁𑒦𑒱𑒭𑒹𑒏𑒏 𑒮𑒓𑓂𑒑 𑒩𑒰𑒖𑒰 𑒮𑒹𑒯𑒼 𑒣𑓂𑒩𑒰𑒨𑓁 𑒢𑒱𑒬𑓂𑒔𑒱𑒞 𑒯𑒼𑒧𑒋 𑒪𑒑𑒪𑒰𑒯 𑒂 𑒏𑒾𑒪𑒱𑒏 𑒣𑒩𑒧𑓂𑒣𑒩𑒰 𑒔𑒪𑒱 𑒑𑒹𑒪। 𑒣𑒯𑒱𑒢𑒹 𑒮𑒧𑒱𑒞𑒱𑒏 𑒢𑒱𑒩𑓂𑒝𑒨𑒏 𑒥𑒰𑒠𑒹 𑒏𑓂𑒨𑒼 𑒮𑒧𑒩𑓂𑒟𑒢-𑒨𑒰𑒔𑒢𑒰𑒧𑒹 𑒖𑒰𑒃𑒞 𑒕𑒪𑒰𑒯, 𑒩𑒰𑒖𑒠𑒝𑓂𑒛 𑒮𑒧𑓂𑒯𑒰𑒩𑒻𑒞 𑒕𑒪𑒰𑒯। 𑒡𑒹𑒢𑒳𑒏 𑒯𑒩𑒝 𑒏𑒋𑒢𑒹 𑒕𑒪 𑒁𑒢𑒰𑒮 𑒠𑒮𑓂𑒨𑒳 𑒮𑒦। 𑒮𑒳𑒫𑒰𑒮𑓂𑒞𑒳, 𑒏𑓂𑒩𑒳𑒧𑒳, 𑒫𑒱𑒞𑒮𑓂𑒞𑒰 𑒂 𑒁𑒏𑓂𑒐𑒢𑒲𑒏 𑒞𑒙 𑒣𑒩 𑒬𑓂𑒩𑒳𑒞𑒱 𑒁𑒦𑓂𑒨𑒰𑒮 𑒂 𑒨𑒳𑒠𑓂𑒡-𑒏𑒰𑒩𑓂𑒨 𑒮𑓀𑒑𑒯𑒱 𑒔𑒪𑒻𑒞 𑒕𑒪, 𑒋𑒏𑒹 𑒮𑓀𑒑 𑒥𑓂𑒩𑒰𑒯𑓂𑒧𑒝, 𑒏𑓂𑒭𑒞𑓂𑒩𑒱𑒨 𑒂 𑒫𑒻𑒬𑓂𑒨 𑒏𑒩𑓂𑒧 𑒏𑒩𑒻𑒞 𑒕𑒟𑒱। 𑒧𑒳𑒠𑒰 𑒮𑒩𑒮𑓂𑒫𑒞𑒲𑒏 𑒞𑒙 𑒣𑒩 𑒥𑒰𑒞 𑒏𑒱𑒕𑒳 𑒠𑒼𑒮𑒩𑒹 𑒦𑓄 𑒑𑒹𑒪, 𑒇𑒭𑒱𑒑𑓂𑒩𑒰𑒧 𑒤𑒩𑒰𑒏 𑒯𑒼𑒧𑒨 𑒪𑒰𑒑𑒪। 𑒮𑒦𑒙𑒰 𑒁𑒢𑒰𑒮 𑒠𑒮𑓂𑒨𑒳 𑒠𑒰𑒮 𑒥𑒢𑒱 𑒑𑒹𑒪 𑒂 𑒠𑒰𑒮𑒲𑒮𑒿 𑒂𑒩𑓂𑒨𑒑𑒝𑒏 𑒮𑓀𑒞𑒰𑒢 𑒅𑒞𑓂𑒣𑒢𑓂𑒢 𑒯𑒼𑒧𑒋 𑒪𑒑𑒪𑒢𑓂𑒯𑒱। 𑒠𑒰𑒮𑒲𑒣𑒳𑒞𑓂𑒩 𑒪𑒼𑒏𑒢𑒱𑒏𑒹𑒿 𑒞𑒿 𑒑𑒰𑒧𑒧𑒹 𑒒𑒩 𑒥𑒢𑒹𑒥𑒰𑒏 𑒁𑒢𑒳𑒧𑒞𑒱 𑒕𑒪𑒢𑓂𑒯𑒱 𑒧𑒳𑒠𑒰 𑒁𑒢𑒰𑒮 𑒠𑒮𑓂𑒨𑒳𑒏𑒹𑒿 𑒍 𑒁𑒢𑒳𑒧𑒞𑒱 𑒢𑒯𑒱 𑒕𑒪𑒢𑓂𑒯𑒱। 𑒋𑒯𑒱 𑒑𑒣𑒏 𑒔𑒩𑓂𑒔𑒰 𑒁𑒕𑒱, 𑒖𑒹 𑒂𑒩𑓂𑒨 𑒔𑒩𑓂𑒧 𑒫𑒮𑓂𑒞𑓂𑒩 𑒣𑒯𑒱𑒩𑒻𑒞 𑒕𑒪𑒰𑒯 𑒂 𑒁𑒢𑒰𑒮 𑒠𑒮𑓂𑒨𑒳 𑒪𑒼𑒏𑒢𑒱𑒏 𑒮𑓀𑒣𑒩𑓂𑒏𑒮𑒿 𑒮𑒴𑒞𑒏 𑒫𑒮𑓂𑒞𑓂𑒩 𑒂 𑒪𑒫𑒝𑒏 𑒣𑓂𑒩𑒨𑒼𑒑 𑒮𑒱𑒐𑒪𑒢𑓂𑒯𑒱। 𑒋𑒯𑒱 𑒠𑒳𑒢𑒴 𑒔𑒲𑒖𑒏 𑒂𑒣𑒴𑒩𑓂𑒞𑓂𑒞𑒱 𑒋𑒐𑒢𑒼 𑒁𑒢𑒰𑒮 𑒪𑒼𑒏𑒢𑒱𑒏 𑒯𑒰𑒟𑒧𑒹 𑒕𑒪𑒢𑓂𑒯𑒱। 𑒁𑒢𑒰𑒩𑓂𑒨 𑒪𑒼𑒏𑒢𑒱𑒏 𑒮𑓀𑒣𑒩𑓂𑒏𑒮𑒿 𑒁𑒣𑒢 𑒬𑒥𑓂𑒠 𑒏𑒼𑒬 𑒥𑒱𑒮𑒩𑒥𑒰𑒏 𑒂 𑒞𑒏𑒩 𑒮𑓀𑒏𑒪𑒢𑒏 𑒂𑒫𑒬𑓂𑒨𑒏𑒞𑒰𑒏 𑒣𑒴𑒩𑓂𑒞𑓂𑒞𑒱𑒏 𑒯𑒹𑒞𑒳 𑒢𑒱𑒒𑒝𑓂𑒙𑒳𑒏 𑒮𑓀𑒏𑒪𑒢𑒏 𑒔𑒩𑓂𑒔𑒰 𑒮𑒹𑒯𑒼 𑒁𑒕𑒱। 𑒑𑓀𑒡𑒩𑓂𑒫 𑒫𑒱𑒫𑒰𑒯𑒏 𑒮𑒹𑒯𑒼 𑒔𑒩𑓂𑒔𑒰 𑒁𑒕𑒱।
𑒞𑒵𑒞𑒲𑒨 𑒧𑒝𑓂𑒛𑒪
𑒁𑒑𑓂𑒢𑒱𑒭𑓂𑒙𑒼𑒧 𑒨𑒖𑓂𑒘𑒏 𑒔𑒩𑓂𑒔𑒰 𑒁𑒕𑒱। 𑒕𑒰𑒑𑒩 𑒂 𑒧𑒯𑒲𑒮𑒏 𑒥𑒪𑒱 𑒏𑒹𑒩 𑒔𑒩𑓂𑒔 𑒁𑒕𑒱।
𑒧𑒰𑒿𑒮-𑒦𑒰𑒞 𑒧𑒯𑒩𑓂𑒭𑒱 𑒪𑒼𑒏𑒢𑒱𑒏𑒹𑒿 𑒣𑓂𑒩𑒱𑒨 𑒪𑒑𑒪𑒢𑓂𑒯𑒱, 𑒞𑒏𑒩 𑒔𑒩𑓂𑒔𑒰 𑒁𑒕𑒱 𑒧𑒳𑒠𑒰 𑒦𑒰𑒞𑒏 𑒥𑒠𑒪𑒰 𑒑𑒯𑒴𑒧𑒏 𑒮𑒼𑒯𑒰𑒩𑒲𑒏 𑒣𑓂𑒩𑒔𑒪𑒢 𑒋𑒐𑒢𑒼 𑒥𑒹𑒬𑒲 𑒯𑒼𑒋𑒥𑒰𑒏 𑒔𑒩𑓂𑒔𑒰 𑒁𑒕𑒱।
𑒔𑒞𑒳𑒩𑓂𑒟 𑒧𑒝𑓂𑒛𑒪
𑒩𑒰𑒖𑒰𑒏 𑒁𑒦𑒱𑒭𑒹𑒏 𑒨𑒖𑓂𑒘𑒏 𑒔𑒩𑓂𑒔𑒰 𑒂 𑒍𑒯𑒱𑒧𑒹 𑒁𑒩𑒱𑒭𑓂𑒙𑒢𑒹𑒧𑒱𑒏 𑒥𑓂𑒩𑒯𑓂𑒧𑒰 𑒥𑒢𑒥𑒰𑒏 𑒔𑒩𑓂𑒔𑒰 𑒁𑒕𑒱। 𑒑𑓂𑒩𑒰𑒧𑒝𑒲, 𑒩𑒟𑒏𑒰𑒩, 𑒏𑒧𑓂𑒧𑒩𑒱, 𑒮𑒴𑒞, 𑒮𑒹𑒢𑒰𑒢𑒲 𑒮𑒹𑒯𑒼 𑒨𑒖𑓂𑒘𑒧𑒹 𑒮𑒧𑓂𑒧𑒱𑒪𑒱𑒞 𑒕𑒪𑒰𑒯।
“𑒁𑒞𑒱 𑒣𑓂𑒩𑒰𑒔𑒲𑒢 𑒏𑒰𑒪𑒧𑒹 𑒮𑒵𑒭𑓂𑒙𑒱 𑒖𑒪𑒧𑒨 𑒕𑒪”! 𑒋𑒏𑒩 𑒔𑒩𑓂𑒔𑒰 𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩𑒖𑒲 𑒢𑒯𑒱 𑒖𑒰𑒢𑒱 𑒇𑒑𑒫𑒹𑒠𑒱𑒏 𑒨𑒳𑒑𑒧𑒹 𑒏𑒼𑒢𑒰 𑒏𑒋 𑒠𑒹𑒪𑒢𑓂𑒯𑒱।
𑒣𑒘𑓂𑒔𑒧 𑒧𑒝𑓂𑒛𑒪
𑒁𑒬𑓂𑒫𑒰𑒩𑒼𑒯𑒝 𑒣𑓂𑒩𑒞𑒱𑒨𑒼𑒑𑒱𑒞𑒰𑒏 𑒔𑒩𑓂𑒔𑒰 𑒁𑒕𑒱। 𑒁𑒢𑒰𑒮 𑒠𑒰𑒮-𑒩𑓀𑒖𑒏 𑒢𑒰𑒙𑓂𑒨𑒫𑒵𑒞𑓂𑒞𑒱𑒏 𑒔𑒩𑓂𑒔𑒰 𑒮𑒹𑒯𑒼 𑒁𑒕𑒱। 𑒩𑒰𑒖𑒰 𑒠𑓂𑒫𑒰𑒩𑒰 𑒋𑒏𑒩 𑒁𑒦𑒱𑒭𑒹𑒏 𑒏𑒰𑒩𑓂𑒨𑒏𑓂𑒩𑒧𑒧𑒹 𑒮𑓂𑒫𑒲𑒏𑒵𑒞𑒱 𑒂 𑒋𑒏𑒩 𑒦𑒹𑒪 𑒫𑒱𑒩𑒼𑒡𑒏 𑒮𑒹𑒯𑒼 𑒔𑒩𑓂𑒔𑒰 𑒁𑒕𑒱। 𑒠𑒰𑒮𑒏𑒹𑒿 𑒮𑓂𑒫𑒞𑓀𑒞𑓂𑒩 𑒏𑒵𑒭𑒱 𑒁𑒡𑒱𑒏𑒰𑒩 𑒂 𑒋𑒏𑒩𑒰 𑒯𑒹𑒞𑒳 𑒫𑒱𑒠𑒟𑒏 𑒁𑒢𑒳𑒧𑒞𑒱 𑒩𑒰𑒖𑒰 𑒠𑓂𑒫𑒰𑒩𑒰 𑒪𑒹𑒪 𑒖𑒰𑒋 𑒂𑒏𑒱 𑒢𑒯𑒱 𑒞𑒏𑒩 𑒔𑒩𑓂𑒔𑒰 𑒁𑒕𑒱।
𑒭𑒭𑓂𑒚 𑒧𑒝𑓂𑒛𑒪
𑒧𑒯𑒰𑒫𑒻𑒩𑒰𑒖𑒲 𑒨𑒖𑓂𑒘𑒏 𑒔𑒩𑓂𑒔𑒰 𑒁𑒕𑒱। 𑒮𑒧𑒮𑓂𑒞 𑒠𑒮𑓂𑒨𑒳-𑒑𑓂𑒩𑒰𑒧𑒏 𑒠𑒰𑒮 𑒥𑒢𑒱 𑒖𑒋𑒥𑒰𑒏 𑒮𑒹𑒯𑒼 𑒔𑒩𑓂𑒔𑒰 𑒁𑒕𑒱 𑒂 𑒍 𑒮𑒦 𑒣𑒬𑒳𑒣𑒰𑒪𑒢 𑒂 𑒣𑒝𑒱 𑒏𑒰𑒩𑓂𑒨 𑒏𑓄 𑒮𑒏𑒻𑒞 𑒕𑒟𑒱। 𑒢𑒑𑓂𑒢𑒖𑒱𑒞𑒏 𑒣𑓂𑒩𑒮𑓀𑒑 𑒪𑒋 𑒧𑓀𑒞𑓂𑒩 𑒑𑒰𑒨𑒢 𑒏𑒹𑒢𑒱𑒯𑒰𑒩 𑒥𑓂𑒩𑒰𑒯𑓂𑒧𑒝, 𑒑𑒫𑒱𑒭𑓂𑒚𑒱 𑒨𑒳𑒠𑓂𑒡 𑒏𑒋𑒢𑒱𑒯𑒰𑒩 𑒏𑓂𑒭𑒞𑓂𑒩𑒱𑒨 𑒂 𑒋𑒏𑒩 𑒁𑒞𑒱𑒩𑒱𑒏𑓂𑒞𑓂𑒞 𑒖𑒹 𑒏𑒵𑒭𑒱 𑒫𑒱𑒏𑒰𑒮𑒧𑒹 𑒥𑒹𑒬𑒲 𑒡𑓂𑒨𑒰𑒢 𑒠𑒻𑒞 𑒕𑒪𑒰𑒯 𑒮𑒹 𑒫𑒱𑒬- 𑒮𑒰𑒧𑒰𑒢𑓂𑒨 𑒖𑒢 𑒕𑒪𑒰𑒯 𑒧𑒳𑒠𑒰 𑒋𑒯𑒱𑒧𑒹 𑒧𑒰𑒨𑒰𑒢𑒢𑓂𑒠 𑒖𑒲 𑒫𑒻𑒬𑓂𑒨 𑒬𑒥𑓂𑒠 𑒮𑒹𑒯𑒼 𑒖𑒼𑒛𑓃𑒱 𑒠𑒹𑒢𑒹 𑒕𑒟𑒱।
𑒮𑒣𑓂𑒞𑒧 𑒧𑒝𑓂𑒛𑒪
𑒥𑒩𑓂𑒥𑒩 𑒅𑒖𑒩𑒰 𑒂𑒩𑓂𑒨𑒏 𑒂𑒏𑓂𑒩𑒧𑒝𑒏 𑒔𑒩𑓂𑒔𑒰 𑒂𑒥 𑒖𑒰 𑒏𑒋 𑒦𑒹𑒪 𑒁𑒕𑒱। 𑒣𑓂𑒩𑒰𑒨𑓁 𑒫𑒱𑒠𑒹𑒬𑒲 𑒫𑒱𑒬𑒹𑒭𑒖𑓂𑒘𑒏 𑒋𑒏 𑒦𑒰𑒑𑒏 𑒮𑓀𑒑 𑒧𑒰𑒨𑒰𑒢𑒢𑓂𑒠 𑒖𑒲 𑒮𑒹𑒯𑒼 𑒣𑒻𑒬𑒰𑒔𑒲 𑒂𑒏𑓂𑒩𑒧𑒝𑒏𑒹𑒿 𑒥𑒰𑒠𑒧𑒹 𑒖𑒰 𑒏𑒋 𑒥𑒴𑒗𑒱 𑒮𑒏𑒪𑒰𑒯 𑒂 𑒋𑒏𑒩𑒰 𑒮𑒹𑒯𑒼 𑒂𑒩𑓂𑒨𑒏 𑒠𑒼𑒮𑒩 𑒦𑒰𑒑 𑒥𑒢𑒰 𑒠𑒹𑒪𑒢𑓂𑒯𑒱। 𑒂𑒩𑓂𑒨 𑒯𑒩𑒱𑒨𑒴𑒣𑒱𑒨𑒰𑒏𑒹𑒿 𑒛𑒰𑒯𑒱 𑒏𑒋 𑒢𑒭𑓂𑒙 𑒏𑒋 𑒠𑒹𑒢𑒹 𑒕𑒪𑒰𑒯 𑒋𑒏𑒩 𑒤𑒹𑒩 𑒔𑒩𑓂𑒔 𑒂𑒥𑒱 𑒑𑒹𑒪 𑒁𑒕𑒱। 𑒧𑒼𑒯𑒢𑒖𑒼𑒠𑒛𑓃𑒼 𑒂𑒞𑓀𑒏𑒮𑒿 𑒅𑒖𑒛𑓃𑒱 𑒑𑒹𑒪 𑒤𑒹𑒩 𑒦𑒴𑒏𑒧𑓂𑒣𑒼 𑒂𑒨𑒪 𑒞𑒰𑒯𑒴𑒮𑒿 𑒢𑒑𑒩 𑒡𑓂𑒫𑒮𑓂𑒞 𑒦𑒹𑒪। 𑒂𑒥 𑒧𑒰𑒨𑒰𑒢𑒢𑓂𑒠𑒖𑒲 𑒍𑒗𑒩𑒰𑒋𑒪 𑒥𑒳𑒗𑒰𑒃𑒞 𑒕𑒟𑒱। 𑒫𑒩𑓂𑒭𑒰 𑒏𑒧 𑒯𑒼𑒋𑒥𑒰𑒏 𑒮𑒹𑒯𑒼 𑒔𑒩𑓂𑒔𑒰 𑒁𑒕𑒱।
𑒁𑒭𑓂𑒙𑒧𑓂 𑒧𑒝𑓂𑒛𑒪
𑒇𑒭𑒱𑒑𑓂𑒩𑒰𑒧𑒏 𑒔𑒩𑓂𑒔𑒰 𑒁𑒕𑒱। 𑒏𑒳𑒪𑒧𑒹 𑒠𑒰𑒮 𑒂 𑒠𑒰𑒮𑒲 𑒯𑒼𑒋𑒥𑒰𑒏 𑒮𑓀𑒏𑒹𑒞 𑒁𑒕𑒱। 𑒫𑒵𑒭𑒦 𑒣𑒰𑒪𑒢𑒏 𑒮𑒹𑒯𑒼 𑒮𑓀𑒏𑒹𑒞 𑒁𑒕𑒱। 𑒧𑓀𑒞𑓂𑒩-𑒣𑒳𑒞𑓂𑒩𑒏 𑒑𑓂𑒩𑒰𑒧𑒰𑓀𑒔𑒪 𑒔𑒪𑒱 𑒖𑒋𑒥𑒰𑒏 𑒂 𑒫𑒱𑒬𑓁-𑒫𑒻𑒬𑓂𑒨 𑒥𑒢𑒱 𑒖𑒋𑒥𑒰𑒏 𑒮𑒹𑒯𑒼 𑒔𑒩𑓂𑒔𑒰 𑒁𑒕𑒱। 𑒧𑒳𑒠𑒰 𑒂𑒑𑒰𑒿 𑒧𑒰𑒨𑒰𑒢𑒢𑓂𑒠𑒖𑒲 𑒍𑒗𑒩𑒰𑒃𑒞 𑒖𑒰𑒃𑒞 𑒕𑒟𑒱। 𑒏𑒬𑓂𑒨𑒣 𑒮𑒰𑒑𑒩 𑒞𑒙𑒮𑒿 𑒣𑓂𑒩𑒮𑓂𑒟𑒰𑒢-𑒣𑒴𑒩𑓂𑒫 𑒠𑓂𑒨𑒾𑒮 𑒂 𑒞𑓂𑒫𑒩𑒰𑒭𑓂𑒙𑓂𑒩𑒲 𑒏𑒹𑒩 𑒑𑒾𑒝 𑒠𑒹𑒫 𑒦𑓄 𑒖𑒋𑒥𑒰𑒏 𑒔𑒩𑓂𑒔𑒰 𑒁𑒕𑒱। 𑒥𑓂𑒩𑒰𑒯𑓂𑒧𑒝 𑒂 𑒏𑓂𑒭𑒞𑓂𑒩𑒱𑒨𑒏 𑒫𑒱𑒦𑒰𑒖𑒢 𑒢𑒯𑒱 𑒯𑒼𑒋𑒥𑒰𑒏 𑒔𑒩𑓂𑒔 𑒁𑒕𑒱 𑒂 𑒏𑓂𑒨𑒼 𑒏𑒼𑒢𑒼 𑒏𑒩𑓂𑒧 𑒏𑒩𑒥𑒰𑒏 𑒯𑒹𑒞𑒳 𑒮𑓂𑒫𑒞𑓀𑒞𑓂𑒩 𑒕𑒪। 𑒠𑒹𑒫𑒰𑒮𑒳𑒩 𑒮𑓀𑒑𑓂𑒩𑒰𑒧 𑒂 𑒯𑒹𑒪𑒧𑒢𑓂𑒠 𑒞𑒙𑒏 𑒨𑒳𑒠𑓂𑒡 𑒂 𑒣𑒬𑒳𑒣𑒰𑒪𑒢𑒏 𑒔𑒩𑓂𑒔𑒰 𑒁𑒕𑒱। 𑒣𑒬𑓂𑒔𑒰𑒞 𑒥𑓂𑒩𑒯𑓂𑒧𑒝 𑒂 𑒏𑓂𑒭𑒞𑓂𑒩𑒱𑒨𑒏 𑒏𑒩𑓂𑒧𑒏 𑒤𑒩𑒰𑒏 𑒯𑒼𑒋𑒥 𑒣𑓂𑒩𑒰𑒩𑒧𑓂𑒦 𑒦𑒋 𑒑𑒹𑒪। 𑒣𑒬𑓂𑒔𑒰𑒞𑓂 𑒧𑓀𑒞𑓂𑒩-𑒠𑓂𑒩𑒭𑓂𑒙𑒰 𑒇𑒭𑒱 𑒠𑓂𑒫𑒰𑒩𑒰 𑒧𑓀𑒞𑓂𑒩𑒧𑒹 𑒠𑒹𑒫𑒏 𑒂 𑒁𑒣𑒢 𑒢𑒰𑒧 𑒩𑒰𑒐𑒥 𑒣𑓂𑒩𑒰𑒩𑒧𑓂𑒦 𑒦𑒹𑒪- 𑒋𑒏𑒩 𑒔𑒩𑓂𑒔𑒰 𑒁𑒕𑒱।𑒬𑓂𑒩𑒳𑒞𑒱 𑒁𑒦𑓂𑒨𑒰𑒮𑒏 𑒣𑓂𑒩𑒰𑒩𑒧𑓂𑒦 𑒯𑒼𑒋𑒥𑒰𑒏 𑒔𑒩𑓂𑒔𑒰 𑒁𑒕𑒱 𑒏𑒰𑒩𑒝 𑒧𑓀𑒞𑓂𑒩𑒏 𑒮𑓀𑒐𑓂𑒨𑒰 𑒥𑒜𑓃𑒱 𑒑𑒹𑒪 𑒕𑒪।
𑒢𑒫𑒧𑓂 𑒧𑒝𑓂𑒛𑒪
𑒫𑒮𑓂𑒞𑒳 𑒫𑒱𑒢𑒧𑒨𑒏 𑒯𑒹𑒞𑒳 𑒯𑒰𑒙 𑒫𑓂𑒨𑒫𑒮𑓂𑒟𑒰𑒏 𑒣𑓂𑒩𑒰𑒩𑒧𑓂𑒦 𑒦𑒹𑒪। 𑒯𑒰𑒙𑒧𑒹 𑒧𑒵𑒞𑓂𑒞𑒱𑒏𑒰 𑒣𑓂𑒩𑒦𑒰𑒑𑒧𑒹 𑒠𑒰𑒮-𑒬𑒱𑒪𑓂𑒣𑒲 𑒣𑒰𑒞𑓂𑒩𑒏 𑒅𑒣𑒮𑓂𑒟𑒱𑒞𑒱 𑒂 𑒫𑒮𑓂𑒞𑓂𑒩 𑒣𑓂𑒩𑒦𑒰𑒑𑒏 𑒔𑒩𑓂𑒔𑒰 𑒁𑒕𑒱। 𑒧𑒵𑒞𑓂𑒞𑒱𑒏𑒰, 𑒯𑒮𑓂𑒞𑒱-𑒠𑒢𑓂𑒞, 𑒞𑒰𑒧𑓂𑒩 𑒮𑒲𑒣𑒲 𑒂𑒠𑒱𑒏 𑒥𑒢𑒪 𑒫𑒮𑓂𑒞𑒳𑒖𑒰𑒞𑒏 𑒔𑒩𑓂𑒔𑒰 𑒁𑒕𑒱। 𑒬𑒱𑒬𑒳-𑒩𑓀𑒖𑒢𑒏 𑒫𑒮𑓂𑒞𑒳𑒖𑒰𑒞 - 𑒖𑒹𑒢𑒰 𑒯𑒮𑓂𑒞𑒱, 𑒫𑒵𑒭𑒦 𑒂𑒠𑒱𑒏 𑒧𑒴𑒩𑓂𑒞𑓂𑒞𑒱𑒏, 𑒪𑒫𑒝𑒏, 𑒁𑒢𑓂𑒢𑒏, 𑒏𑒰𑒭𑓂𑒚𑒏 𑒂 𑒏𑒧𑓂𑒥𑒪𑒏 𑒥𑒱𑒏𑓂𑒩𑒲𑒏 𑒔𑒩𑓂𑒔𑒰 𑒁𑒕𑒱।
𑒠𑒬𑒧𑓂 𑒧𑒝𑓂𑒛𑒪
𑒬𑓂𑒫𑒹𑒞-𑒖𑒢𑒏 𑒂𑒑𑒧𑒢𑒏 -𑒥𑒩𑓂𑒥𑒩 𑒬𑓂𑒫𑒹𑒞 𑒂𑒩𑓂𑒨- 𑒮𑒴𑒔𑒢𑒰 𑒢𑒰𑒑𑒖𑒢𑒏𑒹𑒿 𑒦𑒹𑒙𑒥𑒰𑒏 𑒔𑒩𑓂𑒔𑒰 𑒁𑒕𑒱। 𑒢𑒰𑒑 𑒖𑒢 𑒠𑓂𑒫𑒰𑒩𑒰 𑒁𑒣𑒢 𑒠𑒪𑒣𑒞𑒱𑒏𑒹𑒿 𑒩𑒰𑒖𑒰 𑒏𑒯𑒪 𑒖𑒰𑒋𑒥, 𑒢𑒰𑒑𑒏 𑒣𑒴𑒩𑓂𑒫-𑒏𑒰𑒪𑒧𑒹 𑒮𑒮𑒩𑒱 𑒏𑒋 𑒨𑒧𑒳𑒢𑒰 𑒞𑒙 𑒠𑒱𑒬𑒱 𑒂𑒋𑒥 𑒂 𑒍𑒞𑒳𑒏𑓂𑒏𑒰 𑒪𑒼𑒏𑒏𑒹𑒿 𑒚𑒹𑒪 𑒏𑒋 𑒣𑒰𑒕𑒰𑒿 𑒏𑒋 𑒠𑒹𑒥𑒰𑒏 𑒮𑒹𑒯𑒼 𑒔𑒩𑓂𑒔𑒰 𑒁𑒕𑒱।𑒏𑒵𑒭𑓂𑒝 𑒖𑒢𑒏 𑒏𑒰𑒭𑓂𑒚 𑒠𑒳𑒩𑓂𑒑 𑒂 𑒢𑒰𑒑𑒏 𑒮𑓀𑒑 𑒯𑒳𑒢𑒏𑒰 𑒪𑒼𑒏𑒢𑒱𑒏𑒹𑒿 𑒮𑒹𑒯𑒼 𑒁𑒢𑒰𑒮 𑒏𑒯𑒪 𑒑𑒹𑒪 𑒁𑒕𑒱। 𑒧𑒳𑒠𑒰 𑒍 𑒪𑒼𑒏𑒢𑒱 𑒠𑒲𑒩𑓂𑒒𑒏𑒰𑒨 𑒕𑒪𑒰𑒯 𑒂 𑒢𑒰𑒑𑒖𑒢 𑒏𑒢𑒹𑒏 𑒕𑒼𑒙। 𑒋𑒯𑒱 𑒧𑒝𑓂𑒛𑒪𑒧𑒹 𑒠𑒰𑒮𑒏 𑒮𑓀𑒑 𑒬𑒴𑒠𑓂𑒩𑒏 𑒂 𑒑𑓀𑒑𑒰 𑒞𑒙𑒏 𑒮𑒹𑒯𑒼 𑒔𑒩𑓂𑒔𑒰 𑒂𑒥𑒱 𑒑𑒹𑒪 𑒁𑒕𑒱। 𑒂𑒩𑓂𑒨, 𑒠𑒰𑒮 𑒂 𑒬𑒴𑒠𑓂𑒩𑒏 𑒥𑒲𑒔𑒧𑒹 𑒮𑒯𑒨𑒼𑒑𑒏 𑒮𑓀𑒏𑒹𑒞 𑒁𑒕𑒱।
𑒁𑓀𑒞𑒧𑒹 𑒇𑒔𑒰𑒪𑒼𑒏 𑒢𑒰𑒧𑒮𑒿 𑒦𑒴𑒧𑒱𑒏𑒰 𑒪𑒱𑒐𑒪 𑒑𑒹𑒪 𑒁𑒕𑒱। 𑒠𑒹𑒫𑒰𑒮𑒳𑒩 𑒮𑓀𑒑𑓂𑒩𑒰𑒧𑒏 𑒥𑒰𑒠 𑒃𑒢𑓂𑒠𑓂𑒩 𑒁𑒮𑒳𑒩 𑒅𑒣𑒰𑒡𑒱 𑒞𑓂𑒨𑒰𑒑𑒪𑒢𑓂𑒯𑒱, 𑒯𑒱𑒞𑓂𑒞𑒲 𑒧𑒱𑒞𑓂𑒞𑒰𑒢𑒲 𑒔𑒪𑒪 𑒂 𑒂𑒩𑓂𑒨 𑒣𑒴𑒩𑓂𑒫 𑒠𑒱𑒬𑒰 𑒠𑒱𑒬𑒱 𑒥𑒜𑓃𑒪- 𑒋𑒯𑒱 𑒮𑒦 𑒞𑒟𑓂𑒨𑒏 𑒂𑒡𑒰𑒩 𑒣𑒩 𑒪𑒱𑒐𑒪 𑒄 𑒧𑓀𑒞𑓂𑒩𑒣𑒳𑒞𑓂𑒩 𑒌𑒞𑒱𑒯𑒰𑒮𑒱𑒏𑒞𑒰𑒏 𑒮𑒦𑒙𑒰 𑒧𑒰𑒢𑒠𑒝𑓂𑒛 𑒢𑒯𑒱 𑒁𑒣𑒢𑒰 𑒮𑒏𑒪।
𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩𑒖𑒲 𑒮𑒰𑒯𑒱𑒞𑓂𑒨𑒏𑒰𑒩𑒏 𑒠𑒵𑒭𑓂𑒙𑒱𑒏𑒼𑒝 𑒩𑒐𑒱𑒞𑒟𑒱 𑒂 𑒣𑒰𑒬𑓂𑒔𑒰𑒞𑓂𑒨 𑒃𑒞𑒱𑒯𑒰𑒮𑒏𑒰𑒩𑒏 𑒋𑒏 𑒦𑒰𑒑 𑒠𑓂𑒫𑒰𑒩𑒰 𑒣𑒮𑒰𑒩𑒪 𑒑𑒰𑒮𑒱𑒣𑒮𑒿 𑒥𑒔𑒱𑒞𑒟𑒱 𑒞𑒿 𑒂𑒩𑓂𑒨 𑒂𑒏𑓂𑒩𑒧𑒝𑒏 𑒮𑒱𑒠𑓂𑒡𑒰𑓀𑒞𑒏𑒹𑒿 𑒢𑒏𑒰𑒩𑒱 𑒮𑒏𑒱𑒞𑒟𑒱। 𑒮𑒩𑒮𑓂𑒫𑒞𑒲𑒏 𑒡𑒰𑒩 𑒇𑒑𑒫𑒹𑒠𑒏 𑒮𑒦 𑒧𑓀𑒛𑒪𑒧𑒹 𑒁𑒣𑒢 𑒫𑒱𑒬𑒰𑒪 𑒂 𑒂𑒯𑓂𑒪𑒰𑒠𑒏𑒰𑒩𑒲 𑒮𑓂𑒫𑒩𑒴𑒣𑒏 𑒮𑓀𑒑 𑒫𑒱𑒠𑓂𑒨𑒧𑒰𑒢 𑒁𑒕𑒱। 𑒮𑒱𑒢𑓂𑒡𑒳 𑒂𑒏𑒱 𑒮𑒩𑒮𑓂𑒫𑒞𑒲 𑒢𑒠𑒲 𑒒𑒰𑒙𑒲𑒏 𑒮𑒦𑓂𑒨𑒞𑒰 𑒞𑒐𑒢 𑒐𑒞𑒧 𑒂𑒏𑒱 𑒯𑓂𑒩𑒰𑒮𑒏 𑒮𑓂𑒟𑒱𑒞𑒱𑒧𑒹 𑒂𑒋𑒪 𑒖𑒐𑒢 𑒮𑒩𑒮𑓂𑒫𑒞𑒲 𑒮𑒳𑒐𑒰 𑒑𑒹𑒪𑒲𑒯। 𑒁𑒟𑒩𑓂𑒫𑒫𑒹𑒠𑒧𑒹 𑒮𑒹𑒯𑒼 𑒮𑒩𑒮𑓂𑒫𑒞𑒲 𑒖𑒪𑒧𑒨 𑒕𑒟𑒱। 𑒇𑒑𑒫𑒹𑒠𑒧𑒹 𑒖𑒪-𑒣𑓂𑒩𑒪𑒨𑒏 𑒏𑒼𑒢𑒼 𑒔𑒩𑓂𑒔 𑒢𑒯𑒱 𑒁𑒕𑒱 𑒂 𑒁𑒟𑒩𑓂𑒫𑒫𑒹𑒠𑒧𑒹 𑒞𑒰𑒯𑒱 𑒠𑒱𑒬𑒱 𑒮𑓀𑒏𑒹𑒞 𑒁𑒕𑒱। 𑒦𑒩𑒞𑒫𑒰𑒮𑒲 𑒖𑒐𑒢 𑒣𑒬𑓂𑒔𑒱𑒧 𑒠𑒱𑒬𑒱 𑒑𑒹𑒪𑒰𑒯, 𑒞𑒐𑒢 𑒁𑒣𑒢𑒰 𑒮𑓀𑒑 𑒖𑒪-𑒣𑓂𑒩𑒪𑒨𑒏 𑒐𑒱𑒮𑓂𑒮𑒰 𑒁𑒣𑒢𑒰 𑒮𑓀𑒑 𑒪𑒹𑒢𑒹 𑒑𑒹𑒪𑒰𑒯। 𑒖𑒪-𑒣𑓂𑒩𑒪𑒨𑒏 𑒥𑒰𑒠 𑒦𑒩𑒞𑒫𑒰𑒮𑒲 𑒮𑒰𑒩𑒮𑓂𑒫𑒞 𑒣𑓂𑒩𑒠𑒹𑒬𑒮𑒿 𑒣𑒴𑒥 𑒠𑒱𑒬𑒱 𑒏𑒳𑒩𑒳-𑒣𑒰𑓀𑒔𑒰𑒪𑒏 𑒥𑓂𑒩𑒯𑓂𑒧𑒩𑓂𑒭𑒱 𑒣𑓂𑒩𑒠𑒹𑒬 𑒠𑒱𑒬𑒱 𑒂𑒥𑒱 𑒑𑒹𑒪𑒰𑒯।
𑒮𑒩𑒮𑓂𑒫𑒞𑒲 𑒩𑒯𑒱𑒞𑒟𑒱 𑒞𑒿 𑒥𑒰𑒞 𑒏𑒱𑒕𑒳 𑒂𑒩 𑒯𑒼𑒃𑒞 𑒧𑒳𑒠𑒰 𑒮𑒳𑒐𑒰𑒨𑒪 𑒮𑒩𑒮𑓂𑒫𑒞𑒲 𑒋𑒏𑒙𑒰 𑒫𑒱𑒦𑒰𑒖𑒢 𑒩𑒹𑒐𑒰 𑒥𑒢𑒱 𑒑𑒹𑒪𑒲𑒯, 𑒂𑒩𑓂𑒨-𑒂𑒏𑓂𑒩𑒧𑒝𑒏𑒰𑒩𑒲 𑒮𑒱𑒠𑓂𑒡𑒰𑓀𑒞𑒫𑒰𑒠𑒲 𑒪𑒼𑒏𑒢𑒱𑒏𑒹𑒿 𑒍𑒯𑒱 𑒮𑒳𑒐𑒰𑒨𑒪 𑒮𑒩𑒮𑓂𑒫𑒞𑒲𑒏𑒹𑒿 𑒪𑒿𑒒𑒢𑒰𑒃 𑒁𑒮𑓀𑒦𑒫 𑒦𑓄 𑒑𑒹𑒪।
𑒮𑒱𑒢𑓂𑒡𑒳 𑒪𑒱𑒣𑒱𑒏 𑒫𑒱𑒫𑒹𑒔𑒢 𑒮𑒹𑒯𑒼 𑒥𑒱𑒢𑒰 𑒥𑓂𑒩𑒰𑒯𑓂𑒧𑒲𑒏 𑒮𑒯𑒰𑒨𑒞𑒰𑒏 𑒮𑓀𑒦𑒫 𑒢𑒯𑒱 𑒦𑓄 𑒮𑒏𑒪 𑒁𑒕𑒱।
𑒑𑓂𑒩𑒱𑒤𑒱𑒟𑒏 𑒇𑒑𑒫𑒹𑒠𑒏 𑒁𑒢𑒳𑒫𑒰𑒠𑒏 𑒣𑒰𑒠𑒙𑒱𑒣𑓂𑒣𑒝𑒲𑒧𑒹 𑒣𑒯𑒱𑒪 𑒥𑒹𑒩 𑒄 𑒂𑒬𑓀𑒏𑒰 𑒫𑓂𑒨𑒏𑓂𑒞𑓂𑒞 𑒏𑒋𑒪 𑒑𑒹𑒪 𑒖𑒹 𑒂𑒩𑓂𑒨 𑒂𑒏𑓂𑒩𑒧𑒝𑒏𑒰𑒩𑒲 𑒣𑒬𑓂𑒔𑒱𑒧𑒼𑒞𑓂𑒞𑒩𑒮𑒿 𑒂𑒥𑒱 𑒏𑒋 𑒧𑒴𑒪 𑒢𑒱𑒫𑒰𑒮𑒲𑒏 𑒠𑒳𑒩𑓂𑒑 𑒞𑒼𑒛𑓃𑒪𑒢𑓂𑒯𑒱। 𑒠𑒳𑒩𑓂𑒑𑒧𑒹 𑒩𑒯𑒢𑒱𑒯𑒰𑒩 𑒥𑒹𑒬𑒲 𑒮𑒦𑓂𑒨 𑒩𑒯𑒟𑒱। 𑓑𑓙𑓔𑓗 𑒧𑒹 𑒯𑓂𑒫𑒲𑒪𑒩 𑒄 𑒮𑒱𑒠𑓂𑒡𑒰𑓀𑒞 𑒪𑓄 𑒏𑒋 𑒁𑒋𑒪𑒰𑒯 𑒖𑒹 𑒫𑒱𑒦𑒰𑒖𑒱𑒞 𑒣𑒰𑒏𑒱𑒮𑓂𑒞𑒰𑒢 𑒮𑒦𑓂𑒨𑒞𑒰𑒏 𑒏𑒹𑒢𑓂𑒠𑓂𑒩 𑒕𑒪 𑒂 𑒂𑒩𑓂𑒨 𑒂𑒏𑓂𑒩𑒧𑒝𑒏𑒰𑒩𑒲 𑒫𑒱𑒠𑒹𑒬𑒲 𑒕𑒪𑒰𑒯। 𑒋𑒏𑒙𑒰 𑒦𑒰𑒩𑒞𑒲𑒨 𑒫𑒱𑒠𑓂𑒫𑒰𑒢 𑒩𑒰𑒧𑒣𑓂𑒩𑒮𑒰𑒠 𑒔𑓀𑒠 𑒞𑒰𑒯𑒱𑒮𑒿 𑒣𑒯𑒱𑒢𑒹 𑒄 𑒏𑒯𑒱 𑒠𑒹𑒢𑒹 𑒩𑒯𑒟𑒱 𑒖𑒹 𑒋𑒯𑒱 𑒢𑒑𑒩 𑒮𑒦𑒏 𑒢𑒱𑒫𑒰𑒮𑒲 𑒇𑒑𑒫𑒹𑒠𑒏 𑒣𑒝𑒱 𑒕𑒪𑒰𑒯। 𑒧𑒳𑒠𑒰 𑒧𑒰𑒩𑓂𑒬𑒪 𑓑𑓙𑓓𑓑 𑒄 𑒧𑒹 𑒄 𑒢𑒫 𑒑𑒣 𑒏𑒯𑒢𑒹 𑒕𑒪𑒰𑒯 𑒖𑒹 𑒂𑒩𑓂𑒨𑒏 𑒦𑒰𑒩𑒞𑒧𑒹 𑒣𑓂𑒩𑒫𑒹𑒬 𑓒𑓐𑓐𑓐 𑒄.𑒣𑒴𑒩𑓂𑒫 𑒦𑒹𑒪 𑒕𑒪 𑒂 𑒞𑒰𑒫𑒞 𑒯𑒛𑓃𑒣𑓂𑒣𑒰 𑒂 𑒧𑒼𑒯𑒢𑒖𑒼𑒠𑒛𑓃𑒼𑒏 𑒫𑒱𑒢𑒰𑒬 𑒦𑓄 𑒔𑒳𑒏𑒪 𑒕𑒪। 𑓑𑓙𑓓𑓔 𑒧𑒹 𑒑𑒰𑒩𑓂𑒛𑒢 𑒔𑒰𑒃𑒪𑓂𑒛 𑒏𑒯𑒪𑒢𑒱 𑒖𑒹 𑒂𑒩𑓂𑒨 𑒮𑓀𑒦𑒫𑒞𑓁 𑒂𑒏𑓂𑒩𑒧𑒝𑒏𑒰𑒩𑒲 𑒦𑓄 𑒮𑒏𑒻𑒞 𑒕𑒟𑒱। 𑓑𑓙𑓓𑓘 𑒧𑒹 𑒧𑒏𑒰𑒨 𑒧𑒼𑒯𑒢𑒖𑒼𑒠𑒰𑒛𑓃𑒼𑒏 𑒂𑒏𑓂𑒩𑒧𑒝𑒏𑒹𑒿 𑒢𑒏𑒰𑒩𑒪𑒢𑓂𑒯𑒱, 𑒏𑒱𑒕𑒳 𑒁𑒮𑓂𑒟𑒱𑒣𑒘𑓂𑒖𑒛𑓃𑒏 𑒂𑒡𑒰𑒩 𑒣𑒩 𑒋𑒏𑒩𑒰 𑒮𑒱𑒠𑓂𑒡 𑒏𑒋𑒢𑒰𑒃 𑒮𑓀𑒦𑒫 𑒢𑒯𑒱। 𑒛𑒹𑒪𑓂𑒮 𑓑𑓙𑓖𑓔 𑒧𑒹 𑒋𑒏𑒙𑒰 𑒢𑒱𑒥𑒢𑓂𑒡 𑒪𑒱𑒐𑒪𑒢𑓂𑒯𑒱 ‘𑒠 𑒧𑒱𑒟𑒱𑒏𑒪 𑒧𑒮𑒹𑒏𑒩 𑒂𑒤 𑒧𑒼𑒯𑓀𑒖𑒼𑒠𑒰𑒛𑓃𑒼’ 𑒂 𑒂𑒏𑓂𑒩𑒧𑒝𑒏 𑒠𑓀𑒞𑒏𑒟𑒰𑒏 𑒅𑒣𑒯𑒰𑒮 𑒏𑒋𑒪𑒢𑓂𑒯𑒱। 𑒞𑒏𑒩 𑒥𑒰𑒠 𑒯𑓂𑒫𑒲𑒪𑒩 𑓑𑓙𑓖𑓖 𑒧𑒹 𑒏𑒱𑒕𑒳 𑒣𑒰𑒕𑒰𑒿 𑒯𑒙𑒪𑒰𑒯 𑒧𑒳𑒠𑒰 𑒧𑒏𑒰𑒨𑒏 𑒏𑒥𑒰𑒨𑒪𑒲𑒏 𑒥𑒠𑒪𑒰𑒧𑒹 𑒮𑒦𑒙𑒰 𑒂𑒏𑓂𑒩𑒧𑒝𑒏 𑒖𑒱𑒧𑓂𑒧𑒹𑒠𑒰𑒩𑒲 𑒥𑒰𑒯𑒩𑒲 𑒂𑒩𑓂𑒨𑒑𑒝𑒏 𑒧𑒰𑒟 𑒣𑒩 𑒣𑒙𑒏𑒱 𑒠𑒹𑒪𑒢𑓂𑒯𑒱। 𑒂𑒥 𑒍 𑒏𑒯𑒋 𑒪𑒑𑒪𑒰𑒯 𑒖𑒹 𑒂𑒩𑓂𑒨 𑒂𑒏𑓂𑒩𑒧𑒝𑒏𑒹𑒿 𑒮𑒱𑒠𑓂𑒡 𑒢𑒯𑒱 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱 𑒧𑒳𑒠𑒰 𑒖𑓂𑒨𑒼𑒿 𑒄 𑒮𑓀𑒦𑒫 𑒢𑒯𑒱 𑒁𑒕𑒱 𑒞𑒿 𑒁𑒮𑓀𑒦𑒫 𑒮𑒹𑒯𑒼 𑒢𑒯𑒱 𑒁𑒕𑒱। 𑒮𑓂𑒙𑒳𑒂𑒩𑓂𑒙 𑒣𑒱𑒑𑒰𑒙 𑓑𑓙𑓖𑓒 𑒡𑒩𑒱 𑒯𑓂𑒫𑒲𑒪𑒩𑒏 𑒮𑓀𑒑 𑒄 𑒠𑒳𑒩𑒰𑒑𑓂𑒩𑒯 𑒏𑒩𑒻𑒞 𑒩𑒯𑒪𑒰𑒯। 𑒣𑒱𑒑𑒰𑒙 𑒂𑒩𑓂𑒨𑒏𑒹𑒿 𑒧𑒱𑒞𑒢𑓂𑒢𑒲𑒮𑒿 𑒂𑒋𑒪 𑒏𑒯𑒪𑒢𑓂𑒯𑒱। 𑒢𑒰𑒩𑓂𑒧𑒢 𑒥𑓂𑒩𑒰𑒅𑒢𑒏𑒹𑒿 𑒮𑒹𑒯𑒼 𑒣𑓀𑒖𑒰𑒥 𑒣𑓂𑒩𑒠𑒹𑒬𑒏 𑒬𑒹𑒭 𑒦𑒰𑒩𑒞𑒏 𑒮𑓀𑒑 𑒮𑒰𑓀𑒮𑓂𑒏𑒵𑒞𑒱𑒏 𑒮𑓀𑒥𑓀𑒡𑒏 𑒮𑓀𑒥𑓀𑒡𑒧𑒹 𑒬𑓀𑒏𑒰 𑒩𑒯𑒪𑒢𑓂𑒯𑒱। 𑒮𑓀𑒮𑓂𑒏𑒵𑒞 𑒂 𑒠𑓂𑒩𑒫𑒱𑒛𑓃 𑒦𑒰𑒭𑒰𑒏 𑒁𑒧𑒹𑒩𑒱𑒏𑒲 𑒫𑒱𑒬𑒹𑒭𑒖𑓂𑒘 𑒋𑒧𑒹𑒢𑒼 𑒪𑒱𑒐𑒪𑒢𑓂𑒯𑒱 𑒖𑒹 𑒮𑒱𑒢𑓂𑒡𑒳 𑒒𑒰𑒙𑒲 𑒏𑒐𑒢𑒼 𑒬𑒹𑒭 𑒦𑒰𑒩𑒞𑒮𑒿 𑒞𑒹𑒢𑒰 𑒦𑓄 𑒏𑒋 𑒮𑒰𑓀𑒮𑓂𑒏𑒵𑒞𑒱𑒏 𑒩𑒴𑒣𑒮𑒿 𑒖𑒳𑒛𑓃𑒪 𑒢𑒯𑒱 𑒕𑒪। 𑒖𑒹 𑒂𑒩𑓂𑒨 𑒍𑒞𑒋 𑒁𑒋𑒪𑒰𑒯 𑒮𑒹𑒯𑒼 𑒄𑒩𑒰𑒢𑒲 𑒮𑒦𑓂𑒨𑒞𑒰𑒮𑒿 𑒥𑒹𑒬𑒲 𑒪𑒑 𑒕𑒪𑒰𑒯।
𑒧𑒳𑒠𑒰 𑒣𑒰𑒩𑓂𑒖𑒱𑒙𑒩 𑓑𑓙𑓒𑓒 𑒧𑒹 𑒮𑒰𑒯𑒱𑒞𑓂𑒨𑒱𑒏 𑒣𑒩𑒧𑓂𑒣𑒩𑒰𑒮𑒿 𑒮𑒱𑒠𑓂𑒡 𑒏𑒋𑒪𑒢𑓂𑒯𑒱 𑒖𑒹 𑒦𑒰𑒩𑒞 𑒣𑒩 𑒂𑒩𑓂𑒨𑒏 𑒂𑒏𑓂𑒩𑒧𑒝𑒏 𑒏𑒼𑒢𑒼 𑒣𑓂𑒩𑒧𑒰𑒝 𑒢𑒯𑒱 𑒁𑒕𑒱। 𑒍 𑒮𑒱𑒠𑓂𑒡 𑒏𑒋𑒪𑒢𑓂𑒯𑒱 𑒖𑒹 𑒦𑒰𑒩𑒞𑒮𑒿 𑒂𑒩𑓂𑒨 𑒣𑒬𑓂𑒔𑒱𑒧 𑒠𑒱𑒬𑒱 𑒑𑒹𑒪𑒰𑒯 𑒂 𑒞𑒏𑒩 𑒮𑒰𑒯𑒱𑒞𑓂𑒨𑒱𑒏 𑒣𑓂𑒩𑒧𑒰𑒝 𑒅𑒣𑒪𑒥𑓂𑒡 𑒁𑒕𑒱। 𑒪𑒻𑓀𑒑𑒛𑒢 𑒮𑒹𑒯𑒼 𑒏𑒯𑒪𑒢𑓂𑒯𑒱 𑒖𑒹 𑒂𑒩𑓂𑒨 𑒦𑒰𑒩𑒞𑒏 𑒣𑓂𑒩𑒰𑒔𑒲𑒢𑒞𑒧 𑒢𑒱𑒫𑒰𑒮𑒲 𑒕𑒪𑒰𑒯 𑒂 𑒂𑒩𑓂𑒨𑒦𑒰𑒭𑒰 𑒂 𑒪𑒱𑒣𑒱𑒏 𑒣𑓂𑒩𑒨𑒼𑒑 𑒏𑒩𑒻𑒞 𑒕𑒪𑒰𑒯। 𑒥𑓂𑒩𑒱𑒖𑒹𑒙 𑒂 𑒩𑒹𑒧𑒝𑓂𑒛 𑒂𑒪𑒔𑒱𑒢 𑒂 𑒏𑒾𑒪𑒲𑒢 𑒩𑒹𑒢𑒤𑓂𑒩𑒲𑒫 𑒂𑒠𑒱 𑒫𑒱𑒠𑓂𑒫𑒰𑒢 𑒣𑓂𑒩𑒰𑒔𑒲𑒢 𑒦𑒰𑒩𑒞𑒏 𑒃𑒞𑒱𑒯𑒰𑒮𑒏 𑒣𑓂𑒩𑒞𑒱 𑒣𑒴𑒩𑓂𑒫𑒰𑒑𑓂𑒩𑒯𑒏 𑒫𑒱𑒬𑓂𑒪𑒹𑒭𑒝 𑒏𑒋𑒢𑒹 𑒕𑒟𑒱।
𑒧𑒱𑒞𑒢𑓂𑒢𑒲 𑒬𑒰𑒮𑒏 𑒧𑒱𑒞𑓂𑒩, 𑒫𑒩𑒳𑒝, 𑒃𑒢𑓂𑒠𑓂𑒩 𑒂 𑒢𑒰𑒮𑒞𑓂𑒨𑒏 𑒅𑒣𑒰𑒮𑒏 𑒕𑒪𑒰𑒯। 𑒯𑒱𑒞𑓂𑒞𑒲 𑒩𑒰𑒖𑓂𑒨𑒧𑒹 𑒮𑒹𑒯𑒼 𑒫𑒻𑒠𑒱𑒏 𑒠𑒹𑒫𑒞𑒰 𑒪𑒼𑒏𑒢𑒱𑒏 𑒣𑒴𑒖𑒰 𑒯𑒼𑒃𑒞 𑒕𑒪।𑒂𑒪𑒥𑓂𑒩𑒰𑒃𑒙 𑒂 𑒪𑒻𑓀𑒥𑒛𑒱𑒢 𑒮𑒹𑒯𑒼 𑒠𑒴 𑒯𑒖𑒰𑒩 𑒮𑒰𑒪 𑒣𑒯𑒱𑒢𑒹 𑒠𑒏𑓂𑒭𑒱𑒝-𑒣𑒬𑓂𑒔𑒱𑒧 𑒋𑒬𑒱𑒨𑒰𑒧𑒹 𑒃𑓀𑒛𑒼 𑒂𑒩𑓂𑒨 𑒦𑒰𑒭𑒰 𑒥𑒰𑒖𑒪 𑒖𑒰𑒃𑒞 𑒕𑒪 𑒂 𑒮𑓀𑒐𑓂𑒨𑒰𑒮𑒴𑒔𑒏 𑒬𑒥𑓂𑒠 𑒮𑒹𑒯𑒼 𑒦𑒰𑒩𑒞𑒲𑒨 𑒕𑒪, 𑒋𑒯𑒱 𑒞𑒟𑓂𑒨𑒏𑒹𑒿 𑒧𑒰𑒢𑒪𑒢𑓂𑒯𑒱।
𑒄 𑒪𑒼𑒏𑒢𑒱 𑒦𑒰𑒩𑒞𑒲𑒨 𑒕𑒪𑒰𑒯 𑒂 𑒇𑒑𑒫𑒹𑒠𑒏 𑒩𑒔𑒢𑒰𑒏 𑒥𑒰𑒠 𑒦𑒰𑒩𑒞𑒮𑒿 𑒥𑒰𑒯𑒩 𑒑𑒹𑒪 𑒕𑒪𑒰𑒯। 𑒥𑒯𑒳𑒫𑒔𑒢 𑒮𑓂𑒞𑓂𑒩𑒲𑒪𑒱𑓀𑒑 𑒩𑒴𑒣, 𑒇𑒑𑒫𑒹𑒠𑒏 𑒠𑒹𑒫𑒑𑒝𑒏 𑒫𑒱𑒬𑒱𑒭𑓂𑒙 𑒩𑒴𑒣 𑒁𑒢𑓂𑒨𑒞𑓂𑒩 𑒅𑒣𑒪𑒥𑓂𑒡 𑒢𑒯𑒱 𑒁𑒕𑒱। 𑒃𑓀𑒛𑒼 𑒨𑒼𑒩𑒼𑒣𑒱𑒨𑒢 𑒠𑒹𑒫𑒞𑓀𑒞𑓂𑒩𑒧𑒹 𑒦𑒰𑒩𑒞𑒲𑒨 𑒠𑒹𑒫𑒲𑒑𑒝𑒏 𑒫𑒱𑒩𑒪𑒞𑒰 𑒣𑒴𑒩𑓂𑒫𑒫𑒩𑓂𑒞𑓂𑒞𑒲 𑒦𑒰𑒩𑒞𑒲𑒨 𑒧𑒰𑒞𑒵𑒮𑒞𑓂𑒞𑒰𑒞𑓂𑒧𑒏 𑒫𑓂𑒨𑓂𑒫𑒮𑓂𑒟𑒰𑒏 𑒥𑒰𑒠𑒏 𑒨𑒼𑒩𑒼𑒣𑒲𑒨 𑒣𑒩𑒫𑒩𑓂𑒞𑓂𑒞𑒲 𑒣𑒱𑒞𑒵𑒮𑒞𑓂𑒞𑒰𑒞𑓂𑒧𑒏 𑒫𑓂𑒨𑒫𑒮𑓂𑒟𑒰𑒏 𑒣𑒩𑒱𑒔𑒰𑒨𑒏 𑒁𑒕𑒱।
𑒂𑒥 𑒂𑒆 𑒮𑒳𑒧𑒹𑒩𑒏 𑒖𑒪 𑒣𑓂𑒩𑒪𑒨𑒣𑒩 𑒖𑒹𑒏𑒱 𑓓𑓑𑓐𑓐 𑒄.𑒣𑒴. 𑒧𑒹 𑒧𑒰𑒢𑒪 𑒖𑒰𑒃𑒞 𑒁𑒕𑒱। 𑒦𑒰𑒩𑒞𑒲𑒨 𑒏𑒪𑒱 𑒮𑓀𑒫𑒞 𑓓𑓑𑓐𑓒 𑒄.𑒣𑒴. 𑒧𑒰𑒢𑒪 𑒖𑒰𑒃𑒞 𑒁𑒕𑒱। 𑒁𑒞𑓁 𑒋𑒯𑒱 𑒞𑒱𑒟𑒱𑒮𑒿 𑒣𑒴𑒩𑓂𑒫 𑒇𑒑𑒫𑒹𑒠𑒏 𑒣𑒴𑒩𑓂𑒝 𑒩𑒔𑒢𑒰 𑒦𑓄 𑒑𑒹𑒪 𑒕𑒪।
𑒠𑒹𑒫𑒰𑒮𑒳𑒩 𑒮𑓀𑒑𑓂𑒩𑒰𑒧𑒏 𑒥𑒰𑒠 𑒃𑒢𑓂𑒠𑓂𑒩 𑒁𑒮𑒳𑒩 𑒅𑒣𑒰𑒡𑒱 𑒞𑓂𑒨𑒰𑒑𑒪𑒢𑓂𑒯𑒱 𑒂𑒠𑒱 𑒑𑒣 𑒣𑒼𑒟𑒲𑒏 𑒮𑒧𑒰𑒣𑓂𑒞𑒱 𑒣𑒩 𑒇𑒔𑒰𑒪𑒼𑒏𑒧𑒹 𑒧𑒰𑒨𑒰𑒢𑒢𑓂𑒠 𑒖𑒲 𑒪𑒱𑒐𑒻𑒞 𑒕𑒟𑒱। 𑒏𑒱𑒕𑒳 𑒣𑒰𑒬𑓂𑒔𑒰𑒞𑓂𑒨 𑒫𑒱𑒠𑓂𑒫𑒰𑒢 𑒮𑒹𑒯𑒼 𑒇𑒑𑒫𑒹𑒠𑒏 𑒠𑒰𑒩𑓂𑒬𑒢𑒱𑒏 𑒧𑒯𑒞𑓂𑒫𑒏𑒹𑒿 𑒏𑒧 𑒏𑒩𑒥𑒰𑒏 𑒪𑒹𑒪 𑒄 𑒑𑒣 𑒏𑒯𑒻𑒞 𑒕𑒟𑒱 𑒖𑒹 𑒨𑒴𑒢𑒰𑒢𑒧𑒹 𑒠𑒹𑒫𑒞𑓀𑒞𑓂𑒩 𑒣𑒴𑒩𑓂𑒝 𑒩𑒴𑒣𑒮𑒿 𑒣𑒪𑓂𑒪𑒫𑒱𑒞 𑒕𑒪 𑒧𑒳𑒠𑒰 𑒇𑒑𑒫𑒹𑒠𑒱𑒏 𑒮𑒧𑒰𑒖 𑒒𑒳𑒧𑓀𑒞𑒳 𑒕𑒪 𑒂 𑒠𑒹𑒫𑒞𑓀𑒞𑓂𑒩 𑒞𑒰𑒯𑒱 𑒠𑓂𑒫𑒰𑒩𑒹 𑒫𑒱𑒏𑒮𑒱𑒞 𑒢𑒯𑒱 𑒕𑒪। 𑒍 𑒪𑒼𑒏𑒢𑒱 𑒄 𑒮𑒹𑒯𑒼 𑒏𑒯𑒻𑒞 𑒕𑒟𑒱 𑒖𑒹 𑒇𑒑𑒫𑒹𑒠𑒏 𑒩𑒔𑒢𑒰 𑒁𑒬𑓂𑒫 𑒣𑒩 𑒒𑒳𑒧𑓀𑒞𑒳 𑒖𑒲𑒫𑒢 𑒨𑒰𑒣𑒱𑒞 𑒏𑒹𑒢𑒯𑒰𑒩 𑒣𑒬𑓂𑒔𑒱𑒧𑒲 𑒂𑒏𑓂𑒩𑒧𑒝𑒏𑒰𑒩𑒲 𑒏𑒋𑒢𑒹 𑒕𑒟𑒱। 𑒇𑒑𑒫𑒹𑒠𑒱𑒏 𑒏𑒫𑒱 𑒪𑒼𑒏𑒢𑒱 𑒂𑒩𑓀𑒦𑒱𑒏 𑒮𑒰𑒧𑒴𑒯𑒱𑒏 𑒮𑓀𑒣𑒞𑓂𑒞𑒱 𑒂 𑒩𑒏𑓂𑒞𑓂𑒞 𑒮𑓀𑒥𑓀𑒡 𑒂𑒡𑒰𑒩𑒱𑒞 𑒑𑒝𑒮𑒧𑒰𑒖 𑒠𑒳𑒢𑒴𑒮𑒿 𑒣𑒩𑒱𑒔𑒱𑒞 𑒕𑒪𑒰𑒯 𑒧𑒳𑒠𑒰 𑒮𑓂𑒫𑒨𑓀 𑒍𑒯𑒱𑒮𑒿 𑒥𑒰𑒯𑒩 𑒂𑒥𑒱 𑒑𑒹𑒪 𑒕𑒪𑒰𑒯 𑒂 𑒫𑓂𑒨𑒏𑓂𑒞𑓂𑒞𑒱𑒑𑒞 𑒂 𑒏𑒳𑒙𑒳𑒧𑓂𑒥𑒏 𑒮𑓀𑒣𑒞𑓂𑒞𑒱𑒏 𑒂𑒡𑒰𑒩 𑒥𑒪𑒰 𑒫𑓂𑒨𑒫𑒮𑓂𑒟𑒰 𑒬𑒳𑒩𑒴 𑒏𑒋 𑒠𑒹𑒢𑒹 𑒕𑒪𑒰𑒯। 𑒮𑓀𑒣𑒞𑓂𑒞𑒱 𑒣𑒳𑒩𑒳𑒭 𑒏𑒹𑓀𑒠𑓂𑒩𑒱𑒞 𑒂 𑒣𑒩𑒱𑒫𑒰𑒩 𑒣𑒱𑒞𑒵𑒮𑒞𑓂𑒞𑒰𑒞𑓂𑒧𑒏 𑒕𑒪। 𑒧𑒳𑒠𑒰 𑒧𑒰𑒞𑒵𑒮𑒞𑓂𑒞𑒰𑒞𑓂𑒧𑒏 𑒫𑓂𑒨𑒫𑒮𑓂𑒟𑒰𑒏𑒹𑒿 𑒍 𑒥𑒱𑒮𑒩𑒪 𑒢𑒯𑒱 𑒕𑒪𑒰𑒯 𑒏𑒰𑒩𑒝 𑒍 𑒂𑒣𑓁 𑒧𑒰𑒞𑒩𑓁 𑒏𑒯𑒱 𑒥𑒯𑒳𑒫𑒔𑒢𑒧𑒹 𑒖𑒪𑒠𑒹𑒫𑒲𑒏 𑒅𑒣𑒰𑒮𑒢𑒰 𑒂 𑒮𑓂𑒧𑒩𑒝 𑒏𑒩𑒻𑒞 𑒕𑒟𑒱, 𑒮𑓀𑒑𑒯𑒱 𑒧𑒩𑒳𑒞𑒑𑒝 𑒮𑒠𑒱𑒐𑒢 𑒑𑒝𑒏 𑒩𑒴𑒣𑒧𑒹 𑒮𑓂𑒧𑒩𑒝 𑒂 𑒅𑒣𑒰𑒮𑒢𑒰 𑒏𑒩𑒻𑒞 𑒕𑒟𑒱।
𑒂𑒥 𑒖𑒰 𑒏𑒋 𑒋𑓀𑒑𑒹𑒪𑓂𑒮 𑒏𑒯𑒻𑒞 𑒕𑒟𑒱 𑒖𑒹 𑒨𑒴𑒢𑒰𑒢𑒧𑒹 𑒧𑒰𑒞𑒵𑒮𑒞𑓂𑒞𑒰𑒮𑒿 𑒣𑒱𑒞𑒵𑒮𑒞𑓂𑒞𑒰 𑒣𑓂𑒩𑒰𑒔𑒲𑒢 𑒏𑒰𑒪𑒏 𑒮𑒦𑒮𑒿 𑒣𑒻𑒒 𑒏𑓂𑒩𑒰𑒢𑓂𑒞𑒱 𑒕𑒪। 𑒄 𑒏𑓂𑒩𑒰𑒢𑓂𑒞𑒱 𑒇𑒑𑒫𑒹𑒠𑒱𑒏 𑒏𑒰𑒪𑒧𑒹 𑒒𑒙𑒱𑒞 𑒦𑒋 𑒑𑒹𑒪 𑒕𑒪। 𑒬𑓂𑒩𑒧𑒏 𑒫𑒻𑒬𑒱𑒭𑓂𑒙𑒲𑒏𑒩𑒝𑒮𑒿 𑒅𑒞𑓂𑒣𑒰𑒠𑒢𑒧𑒹 𑒑𑒼𑒞𑓂𑒩𑒏 𑒦𑒴𑒧𑒱𑒏𑒰 𑒒𑒙𑒱 𑒖𑒰𑒃𑒞 𑒁𑒕𑒱 𑒂 𑒏𑒳𑒙𑒳𑒧𑓂𑒥𑒏 𑒥𑒜𑓃𑒱 𑒖𑒰𑒃𑒞 𑒁𑒕𑒱। 𑒑𑒝, 𑒑𑒼𑒞𑓂𑒩, 𑒏𑒳𑒪 𑒂 𑒏𑒳𑒙𑒳𑒧𑓂𑒥𑒏 𑒏𑓂𑒩𑒧𑒬𑓁 𑒫𑒱𑒏𑒰𑒮 𑒮𑒰𑒧𑒴𑒯𑒱𑒏 𑒦𑒴𑒮𑓀𑒣𑒞𑓂𑒞𑒱𑒏 𑒮𑓀𑒑𑒚𑒢𑒮𑒿 𑒯𑒼𑒃𑒞 𑒁𑒕𑒱। 𑒇𑒑𑒫𑒹𑒠𑒧𑒹 𑒏𑒳𑒧𑓂𑒦𑒏𑒰𑒩, 𑒏𑒧𑒰𑒩 (𑒏𑒰𑒭𑓂𑒚𑒏𑒰𑒩), 𑒪𑒼𑒯𑒰𑒩 𑒂 𑒡𑒰𑒞𑒳 𑒬𑒱𑒪𑓂𑒣𑒏 𑒔𑒩𑓂𑒔 𑒁𑒕𑒱। 𑒣𑓂𑒩𑒰𑒔𑒲𑒢 𑒄𑒩𑒰𑒢𑒧𑒹 𑒁𑒮𑒳𑒩𑒏 𑒣𑓂𑒩𑒞𑒱𑒩𑒴𑒣 𑒁𑒯𑒳𑒩𑒏 𑒣𑓂𑒩𑒨𑒼𑒑 𑒦𑒹𑒪। 𑒍 𑒪𑒼𑒏𑒢𑒱 𑒋𑒏𑒩 𑒅𑒣𑒰𑒮𑒏 𑒕𑒪𑒰𑒯 𑒧𑒳𑒠𑒰 𑒁𑒮𑒳𑒩-𑒅𑒣𑒰𑒮𑒏 𑒦𑒰𑒩𑒞𑒲𑒨 𑒖𑒢𑒏 𑒣𑓂𑒩𑒦𑒰𑒫 𑒄𑒩𑒰𑒢 𑒡𑒩𑒱 𑒮𑒲𑒧𑒱𑒞 𑒕𑒪, 𑒂𑒑𑒰𑒿 𑒋𑒏𑒩 𑒣𑓂𑒩𑒮𑒰𑒩 𑒢𑒯𑒱 𑒦𑒹𑒪। 𑒦𑒰𑒩𑒞𑒧𑒹 𑒁𑒮𑒳𑒩 𑒠𑒳𑒭𑓂𑒙 𑒕𑒟𑒱 𑒧𑒳𑒠𑒰 𑒄𑒩𑒰𑒢𑒧𑒹 𑒠𑒹𑒫 𑒠𑒳𑒭𑓂𑒙 𑒕𑒟𑒱। 𑒁𑒮𑒳𑒩𑒏 𑒑𑒩𑒱𑒧𑒰 𑒮𑒧𑓂𑒣𑒴𑒩𑓂𑒝 𑒇𑒑𑒫𑒹𑒠𑒧𑒹 𑒁𑒕𑒱। 𑒏𑒼𑒢𑒼 𑒧𑒝𑓂𑒛𑒪 𑒋𑒯𑒢 𑒢𑒯𑒱 𑒁𑒕𑒱 𑒖𑒰𑒯𑒱𑒧𑒹 𑒏𑒼𑒢𑒼 𑒋𑒏 𑒫𑒰 𑒂𑒢 𑒠𑒹𑒫𑒞𑒰𑒏𑒹𑒿 𑒁𑒮𑒳𑒩 𑒢𑒯𑒱 𑒏𑒯𑒪 𑒑𑒹𑒪 𑒯𑒼𑒁𑒋। 𑒧𑒳𑒠𑒰 𑒋𑒯𑒢𑒼 𑒁𑒮𑒳𑒩 𑒕𑒟𑒱 𑒖𑒹 𑒠𑒹𑒫𑒏 𑒫𑒱𑒩𑒼𑒡𑒧𑒹 𑒕𑒟𑒱 𑒂 𑒃𑒢𑓂𑒠𑓂𑒩𑒮𑒿 𑒋𑒯𑒢 𑒁𑒠𑒹𑒫𑒰𑓁 𑒁𑒮𑒳𑒩𑒰𑓁 𑒏𑒹𑒩 𑒢𑒰𑒬𑒏 𑒯𑒹𑒞𑒳 𑒂𑒯𑓂𑒫𑒰𑒝 𑒏𑒋𑒪 𑒑𑒹𑒪 𑒁𑒕𑒱।𑒃𑒢𑓂𑒠𑓂𑒩𑒏 𑒮𑒧𑒰𑒢 𑒁𑒑𑓂𑒢𑒱 𑒮𑒹𑒯𑒼 𑒁𑒮𑒳𑒩𑒏 𑒢𑒰𑒬 𑒏𑒩𑒻𑒞 𑒕𑒟𑒱 𑒂 𑒃𑒢𑓂𑒠𑓂𑒩 𑒂 𑒥𑒵𑒯𑒮𑓂𑒣𑒞𑒱 𑒠𑒳𑒢𑒴 𑒑𑒼𑒙𑒹 𑒮𑓂𑒫𑒨𑓀 𑒁𑒮𑒳𑒩 𑒕𑒟𑒱। 𑒁𑒮𑒳𑒩 𑒠𑒹𑒫𑒞𑒰𑒏 𑒅𑒣𑒰𑒡𑒱 𑒕𑒪। 𑒇𑒑𑒫𑒹𑒠𑒧𑒹 𑒠𑒹𑒫 𑒂 𑒁𑒮𑒳𑒩𑒏 𑒮𑒠𑒵𑒬 𑒁𑒮𑒳𑒩 𑒋𑒏𑒙𑒰 𑒦𑒱𑒢𑓂𑒢 𑒫𑒩𑓂𑒑 𑒕𑒪 𑒁𑒮𑒳𑒩 𑒬𑓂𑒫𑒰𑒮 𑒪𑒻𑒞 𑒕𑒪𑒰𑒯 𑒧𑒳𑒠𑒰 𑒠𑒹𑒫 𑒢𑒯𑒱। 𑒠𑒹𑒫𑒮𑒿 𑒁𑒮𑒳𑒩 𑒥𑒹𑒬𑒲 𑒣𑓂𑒩𑒰𑒔𑒲𑒢 𑒕𑒟𑒱 𑒞𑒰𑒯𑒱 𑒠𑓂𑒫𑒰𑒩𑒹 𑒁𑒮𑒳𑒩 𑒫𑒩𑒳𑒝 𑒠𑒹𑒫 𑒂 𑒧𑒢𑒳𑒭𑓂𑒨 𑒠𑒳𑒯𑒴𑒏 𑒩𑒰𑒖𑒰 𑒕𑒟𑒱।
𑒣𑒻𑒬𑒰𑒔𑒲 𑒞𑓂𑒫𑒑𑓂 𑒞𑓂𑒫𑒔𑒰 𑒦𑒰𑒩𑒞𑒧𑒹 𑒏𑒯𑒱𑒨𑒼 𑒞𑒹𑒯𑒢 𑒂𑒯𑓂𑒪𑒰𑒠𑒮𑒿 𑒢𑒯𑒱 𑒠𑒹𑒐𑒪 𑒑𑒹𑒪 । 𑒍𑒯𑒱𑒢𑒼 𑒂𑒩𑓂𑒨 𑒂𑒏𑓂𑒩𑒧𑒝 𑒣𑒼𑒭𑒏 𑒮𑒱𑒠𑓂𑒡𑒰𑒢𑓂𑒞𑒏𑒰𑒩 𑒖𑒹 𑒄 𑒞𑒟𑓂𑒨 𑒅𑒠𑒰𑒯𑒩𑒝𑒰𑒩𑓂𑒟 𑒠𑒹𑒐𑒟𑒱 𑒖𑒹 𑒠𑒏𑓂𑒭𑒱𑒝 𑒦𑒰𑒩𑒞𑒲𑒨 𑒥𑓂𑒩𑒰𑒯𑓂𑒧𑒝, 𑒏𑒬𑓂𑒧𑒲𑒩𑒲 𑒥𑓂𑒩𑒰𑒯𑓂𑒧𑒝 𑒂 𑒢𑒹𑒣𑒰𑒪𑒏 𑒥𑓂𑒩𑒰𑒯𑓂𑒧𑒝 𑒧𑒹 𑒞𑓂𑒫𑒔𑒰 𑒢𑒯𑒱 𑒫𑒩𑒝 𑒩𑒴𑒣 𑒮𑒹𑒯𑒼 𑒦𑒱𑒢𑓂𑒢 𑒁𑒕𑒱, 𑒄 𑒮𑒱𑒠𑓂𑒡 𑒏𑒩𑒻𑒞 𑒁𑒕𑒱 𑒖𑒹 𑒄 𑒮𑒦 𑒮𑓂𑒟𑒰𑒢𑒲𑒨 𑒖𑒢 𑒕𑒟𑒱 𑒂 𑒖𑒰𑒞𑒱-𑒫𑓂𑒨𑒫𑒮𑓂𑒟𑒰𑒧𑒹 𑒞𑒰𑒯𑒱𑒩𑒴𑒣𑒹𑒿 𑒮𑒧𑓂𑒧𑒱𑒪𑒱𑒞 𑒦𑒹𑒪 𑒕𑒟𑒱 । 𑒏𑒰𑒩𑒝 𑒣𑒰𑒿𑒔-𑒮𑒋 𑒂 𑒯𑒖𑒰𑒩 𑒥𑒩𑒐𑒧𑒹 𑒧𑒰𑒢𑒫𑒬𑒰𑒮𑓂𑒞𑓂𑒩𑒲𑒨 𑒂 𑒫𑒻𑒖𑓂𑒘𑒰𑒢𑒱𑒏 𑒩𑒴𑒣𑒹𑒿 𑒍𑒞𑒹𑒏 𑒩𑒴𑒣-𑒩𑓀𑒑𑒏 𑒁𑒢𑓂𑒞𑒩 𑒮𑒧𑓂𑒦𑒫 𑒢𑒯𑒱। 𑒖𑒹 𑒨𑒴𑒩𑒼𑒣𑒫𑒰𑒮𑒲 𑒠𑒏𑓂𑒭𑒱𑒝 𑒁𑒧𑒹𑒩𑒱𑒏𑒰-𑒁𑒤𑓂𑒩𑒲𑒏𑒰𑒧𑒹 𑒕𑒟𑒱 𑒞𑒱𑒢𑒏𑒼, 𑒂 𑒖𑒹 𑒢𑒲𑒑𑓂𑒩𑒼-𑒩𑒹𑒛 𑒃𑒢𑓂𑒛𑒱𑒨𑒢 𑒁𑒧𑒹𑒩𑒱𑒏𑒰-𑒁𑒤𑓂𑒩𑒲𑒏𑒰-𑒨𑒴𑒩𑒼𑒣𑒧𑒹 𑒕𑒟𑒱 𑒞𑒱𑒢𑒏𑒼 𑒩𑒴𑒣 𑒩𑓀𑒑𑒧𑒹 𑒏𑒼𑒢𑒼 𑒣𑒩𑒱𑒫𑒩𑓂𑒞𑒢 𑒣𑒰𑒿𑒔 𑒮𑒋 𑒥𑒩𑒐𑒧𑒹 𑒢𑒯𑒱 𑒂𑒋𑒪 𑒕𑒢𑓂𑒯𑒱। 𑒄 𑒪𑒰𑒐 𑒥𑒩𑒐𑒏 𑒂𑒫𑒰𑒮𑒮𑒿 𑒮𑒧𑓂𑒦𑒫 𑒯𑒼𑒃𑒞 𑒁𑒕𑒱 𑒖𑒹 𑒑𑒩𑒧 𑒣𑓂𑒩𑒠𑒹𑒬𑒏 𑒢𑒱𑒫𑒰𑒮𑒲 𑒏𑒰𑒩𑒲 𑒂 𑒚𑓀𑒜 𑒣𑓂𑒩𑒠𑒹𑒬𑒏 𑒑𑒼𑒩 𑒯𑒼𑒃𑒞 𑒕𑒟𑒱 ।
𑒣𑒳𑒩𑒼𑒯𑒱𑒞
𑒣𑒳𑒩𑒼𑒯𑒱𑒞 𑒯𑒱𑒢𑓂𑒠𑒲𑒧𑒹 𑒁𑒕𑒱 𑒂 𑒬𑓂𑒩𑒵𑒿𑒐𑒪𑒰𑒏 𑒞𑒹𑒮𑒩 𑒣𑒼𑒟𑒲 𑒟𑒲𑒏। 𑒠𑒴𑒩𑓂𑒫𑒰𑒏𑓂𑒭𑒞 𑒖𑒏𑒩𑒰 𑒧𑒰𑒨𑒰𑒢𑒢𑓂𑒠𑒖𑒲 𑒮𑒳𑒫𑒱𑒡𑒰𑒩𑒴𑒣𑒹𑒿 𑒂𑒬𑒲𑒩𑓂𑒫𑒔𑒢 𑒮𑒹𑒯𑒼 𑒏𑒯𑒱 𑒑𑒹𑒪 𑒕𑒟𑒱 𑒮𑒿 𑒋𑒏𑒩 𑒣𑓂𑒩𑒰𑒩𑒧𑓂𑒦 𑒦𑒹𑒪 𑒁𑒕𑒱।
𑒣𑒳𑒩𑒼𑒯𑒱𑒞 𑒏𑒹𑒩 𑒂𑒩𑒧𑓂𑒦 𑒠𑒴𑒩𑓂𑒫𑒰𑒏𑓂𑒭𑒞 𑒂𑒬𑒲𑒩𑓂𑒫𑒔𑒢 𑒧𑓀𑒞𑓂𑒩𑒮𑒿 𑒯𑒼𑒃𑒞 𑒁𑒕𑒱। 𑒬𑒳𑒏𑓂𑒪 𑒨𑒖𑒳𑒩𑓂𑒫𑒹𑒠𑒏 𑒁𑒡𑓂𑒨𑒰𑒨 𑓒𑓒 𑒏𑒹𑒩 𑒧𑓀𑒞𑓂𑒩 𑓒𑓒 “𑓇 𑒂𑒥𑓂𑒩𑒯𑓂𑒧𑒢…” 𑒮𑒿 “𑒢𑓁 𑒏𑒪𑓂𑒣𑓂𑒞𑒰𑒧𑓂” 𑒡𑒩𑒱 𑒁𑒕𑒱। 𑒧𑒱𑒟𑒱𑒪𑒰𑒧𑒹 𑒋𑒯𑒱 𑒧𑓀𑒞𑓂𑒩𑒏 𑒮𑓀𑒑 𑒁𑒢𑓂𑒞𑒧𑒹 “𑓇 𑒧𑓀𑒞𑓂𑒩𑒰𑒩𑓂𑒟𑒰 𑒮𑒱𑒠𑓂𑒡𑒨𑓁 𑒮𑓀𑒞𑒳 𑒧𑒢𑒼𑒩𑒟𑒰𑓁। 𑒬𑒞𑓂𑒩𑒴𑒝𑒰𑓀 𑒥𑒳𑒠𑓂𑒡𑒱𑒢𑒰𑒬𑒼𑓄𑒮𑓂𑒞𑒳 𑒧𑒱𑒞𑓂𑒩𑒰𑒝𑒰𑒧𑒳𑒠𑒨𑒮𑓂𑒞𑒫।𑓇 𑒠𑒲𑒩𑓂𑒒𑒰𑒨𑒳𑒩𑓂𑒦𑒫। 𑓇 𑒮𑒾𑒦𑒰𑒑𑓂𑒨𑒫𑒞𑒲 𑒦𑒫”। 𑒋𑒏𑒩 𑒮𑒹𑒯𑒼 𑒧𑓀𑒞𑓂𑒩𑒼𑒔𑓂𑒔𑒰𑒩 𑒯𑒼𑒃𑒞 𑒁𑒕𑒱 𑒂 𑒋𑒯𑒱 𑒔𑒰𑒩𑒱 𑒣𑒰𑒠𑒮𑒿 𑒄 𑒧𑓀𑒞𑓂𑒩 𑒂𑒬𑒲𑒩𑓂𑒫𑒔𑒢𑒏 𑒩𑒴𑒣 𑒪𑒋 𑒪𑒻𑒞 𑒁𑒕𑒱।
𑒨𑒖𑒳𑒩𑓂𑒫𑒹𑒠𑒲𑒨 𑓒𑓒/𑓒𑓒 𑒧𑓀𑒞𑓂𑒩 𑒮𑒾𑒮𑒹𑒿 𑒦𑒰𑒩𑒞𑒧𑒹 𑒠𑒹𑒬𑒦𑒏𑓂𑒞𑓂𑒞𑒱 𑒑𑒲𑒞𑒏 𑒩𑒴𑒣𑒧𑒹 𑒧𑓀𑒞𑓂𑒩𑒼𑒔𑓂𑒔𑒰𑒩𑒱𑒞 𑒯𑒼𑒃𑒞 𑒁𑒕𑒱।
𑒠𑒴𑒩𑓂𑒫𑒰𑒏𑓂𑒭𑒞 𑒧𑓀𑒞𑓂𑒩(𑒬𑒳𑒏𑓂𑒪 𑒨𑒖𑒳𑒩𑓂𑒫𑒹𑒠 𑒁𑒡𑓂𑒨𑒰𑒨 𑓒𑓒, 𑒧𑓀𑒞𑓂𑒩 𑓒𑓒)

𑒂 𑒥𑓂𑒩𑒯𑓂𑒧𑒢𑓂𑒢𑒱𑒞𑓂𑒨𑒮𑓂𑒨 𑒣𑓂𑒩𑒖𑒰𑒣𑒞𑒱𑒩𑓂𑒈𑒭𑒱𑓁। 𑒪𑒱𑓀𑒦𑒼𑒏𑓂𑒞𑓂𑒞𑒰 𑒠𑒹𑒫𑒞𑒰𑓁। 𑒮𑓂𑒫𑒩𑒰𑒛𑒳𑒞𑓂𑒏𑒵𑒞𑒱𑒬𑓂𑒕𑒢𑓂𑒠𑓁। 𑒭𑒛𑓂𑒖𑓁 𑒮𑓂𑒫𑒩𑓁॥

𑒂 𑒥𑓂𑒩𑒯𑓂𑒧↑𑒢𑓂 𑒥𑓂𑒩𑒰𑒯𑓂𑒧↓𑒝𑒼 𑒥𑓂𑒩↑𑒯𑓂𑒧𑒫𑒩𑓂𑒔↓𑒮𑒲 𑒖𑒰↑𑒨𑒞𑒰↓𑒧𑒰 𑒩𑒰↓𑒭𑓂𑒙𑓂𑒩𑒹 𑒩𑒰↑𑒖↓𑒢𑓂𑒨𑓁 𑒬𑒳𑒩𑒹↑𑓄𑒃𑒭𑒫𑓂𑒨𑒼↓𑓄𑒞𑒱𑒫𑓂𑒨𑒰↓𑒡𑒲 𑒧↑𑒯𑒰𑒩↓𑒟𑒼 𑒖𑒰↑𑒨𑒞𑒰𑓀↓ 𑒠𑒼𑒑𑓂𑒡𑓂𑒩𑒲𑓀 𑒡𑒹↓𑒢𑒳𑒩𑓂𑒫𑒼𑒜𑒰↑𑒢↓𑒛𑓂𑒫𑒰𑒢𑒰↓𑒬𑒳𑓁 𑒮𑒣𑓂𑒞𑒱𑓁↓ 𑒣𑒳𑒩↑𑒢𑓂𑒡𑒱↓𑒩𑓂𑒨𑒼𑒫𑒰↑ 𑒖𑒱↓𑒭𑓂𑒝𑒴 𑒩↑𑒟𑒹↓𑒭𑓂𑒚𑒰𑓁 𑒮↓𑒦𑒹𑒨𑒼↓ 𑒨𑒳𑒫𑒰𑒮𑓂𑒨 𑒨𑒖↑𑒧𑒰𑒢𑒮𑓂𑒨 𑒫𑒲↓𑒩𑒼 𑒖𑒰↓𑒨𑒞𑒰𑓀 𑒢𑒱𑒏𑒰↓𑒧𑒹-𑒢𑒱↑𑒏𑒰𑒧𑒹 𑒢𑓁 𑒣↓𑒩𑓂𑒖𑒢𑓂𑒨𑒼𑓀 𑒫𑒩𑓂𑒭𑒞𑒳↓ 𑒤𑒪↑𑒫𑒞𑓂𑒨𑒼 𑒢↓𑓄𑒍𑒭↑𑒡𑒨𑓁 𑒣𑒔𑓂𑒨𑒢𑓂𑒞𑒰𑓀 𑒨𑒼𑒑𑒹𑒏𑓂𑒭↓𑒧𑒼 𑒢𑓁↑ 𑒏𑒪𑓂𑒣𑒞𑒰𑒧𑓂॥𑓒𑓒॥

𑒧𑒢𑓂𑒞𑓂𑒩𑒰𑒩𑓂𑒟𑒰𑓁 𑒮𑒱𑒠𑓂𑒡𑒨𑓁 𑒮𑒢𑓂𑒞𑒳 𑒣𑒴𑒩𑓂𑒝𑒰𑓁 𑒮𑒢𑓂𑒞𑒳 𑒧𑒢𑒼𑒩𑒟𑒰𑓁। 𑒬𑒞𑓂𑒩𑒴𑒝𑒰𑓀 𑒥𑒳𑒠𑓂𑒡𑒱𑒢𑒰𑒬𑒼𑓄𑒮𑓂𑒞𑒳 𑒧𑒱𑒞𑓂𑒩𑒰𑒝𑒰𑒧𑒳𑒠𑒨𑒮𑓂𑒞𑒫।

𑓇 𑒠𑒲𑒩𑓂𑒒𑒰𑒨𑒳𑒩𑓂𑒦𑒫। 𑓇 𑒮𑒾𑒦𑒰𑒑𑓂𑒨𑒫𑒞𑒲 𑒦𑒫।

𑒯𑒹 𑒦𑒑𑒫𑒰𑒢𑓂। 𑒁𑒣𑒢 𑒠𑒹𑒬𑒧𑒹 𑒮𑒳𑒨𑒼𑒑𑓂𑒨 𑒂 𑒮𑒩𑓂𑒫𑒖𑓂𑒘 𑒫𑒱𑒠𑓂𑒨𑒰𑒩𑓂𑒟𑒲 𑒅𑒞𑓂𑒣𑒢𑓂𑒢 𑒯𑒼𑒟𑒱, 𑒂 𑒬𑒳𑒞𑓂𑒩𑒳𑒏𑒹𑒿 𑒢𑒰𑒬 𑒏𑒋𑒢𑒱𑒯𑒰𑒩 𑒮𑒻𑒢𑒱𑒏 𑒅𑒞𑓂𑒣𑒢𑓂𑒢 𑒯𑒼𑒟𑒱। 𑒁𑒣𑒢 𑒠𑒹𑒬𑒏 𑒑𑒰𑒨 𑒐𑒴𑒥 𑒠𑒴𑒡 𑒠𑒨 𑒥𑒰𑒪𑒲, 𑒥𑒛𑓃𑒠 𑒦𑒰𑒩 𑒫𑒯𑒢 𑒏𑒩𑒋𑒧𑒹 𑒮𑒏𑓂𑒭𑒧 𑒯𑒼𑒟𑒱 𑒂 𑒒𑒼𑒛𑓃𑒰 𑒞𑓂𑒫𑒩𑒱𑒞 𑒩𑒴𑒣𑒹𑒿 𑒠𑒾𑒑𑒨 𑒥𑒪𑒰 𑒯𑒼𑒁𑒋। 𑒮𑓂𑒞𑓂𑒩𑒲𑒑𑒝 𑒢𑒑𑒩𑒏 𑒢𑒹𑒞𑒵𑒞𑓂𑒫 𑒏𑒩𑒥𑒰𑒧𑒹 𑒮𑒏𑓂𑒭𑒧 𑒯𑒼𑒟𑒱 𑒂 𑒨𑒳𑒫𑒏 𑒮𑒦𑒰𑒧𑒹 𑒍𑒖𑒣𑒴𑒩𑓂𑒝 𑒦𑒰𑒭𑒝 𑒠𑒹𑒥𑒨𑒥𑒪𑒰 𑒂 𑒢𑒹𑒞𑒵𑒞𑓂𑒫 𑒠𑒹𑒥𑒰𑒧𑒹 𑒮𑒏𑓂𑒭𑒧 𑒯𑒼𑒟𑒱। 𑒁𑒣𑒢 𑒠𑒹𑒬𑒧𑒹 𑒖𑒐𑒢 𑒂𑒫𑒬𑓂𑒨𑒏 𑒯𑒼𑒨 𑒫𑒩𑓂𑒭𑒰 𑒯𑒼𑒋 𑒂 𑒎𑒭𑒡𑒱𑒏-𑒥𑒴𑒙𑒲 𑒮𑒩𑓂𑒫𑒠𑒰 𑒣𑒩𑒱𑒣𑒏𑓂𑒫 𑒯𑒼𑒃𑒞 𑒩𑒯𑒋। 𑒋𑒫𑓀 𑒏𑓂𑒩𑒧𑒹 𑒮𑒦 𑒞𑒩𑒯𑒹𑒿 𑒯𑒧𑒩𑒰 𑒮𑒦𑒏 𑒏𑒪𑓂𑒨𑒰𑒝 𑒯𑒼𑒋। 𑒬𑒞𑓂𑒩𑒳𑒏 𑒥𑒳𑒠𑓂𑒡𑒱𑒏 𑒢𑒰𑒬 𑒯𑒼𑒋 𑒂 𑒧𑒱𑒞𑓂𑒩𑒏 𑒅𑒠𑒨 𑒯𑒼𑒋॥

𑒧𑒢𑒳𑒭𑓂𑒨𑒏𑒹𑓀 𑒏𑒼𑒢 𑒫𑒮𑓂𑒞𑒳𑒏 𑒃𑒔𑓂𑒕𑒰 𑒏𑒩𑒥𑒰𑒏 𑒔𑒰𑒯𑒲 𑒞𑒏𑒩 𑒫𑒩𑓂𑒝𑒢 𑒋𑒯𑒱 𑒧𑓀𑒞𑓂𑒩𑒧𑒹 𑒏𑒋𑒪 𑒑𑒹𑒪 𑒁𑒕𑒱।

𑒋𑒯𑒱𑒧𑒹 𑒫𑒰𑒔𑒏𑒪𑒳𑒣𑓂𑒞𑒼𑒣𑒧𑒰𑒪𑒛𑓃𑓂𑒏𑒰𑒩 𑒁𑒕𑒱।

𑒁𑒢𑓂𑒫𑒨-

𑒥𑓂𑒩𑒯𑓂𑒧↑𑒢𑓂 - 𑒫𑒱𑒠𑓂𑒨𑒰 𑒂𑒠𑒱 𑒑𑒳𑒝𑒮𑒿 𑒣𑒩𑒱𑒣𑒴𑒩𑓂𑒝 𑒥𑓂𑒩𑒯𑓂𑒧

𑒩𑒰↓𑒭𑓂𑒙𑓂𑒩𑒹 - 𑒠𑒹𑒬𑒧𑒹

𑒥𑓂𑒩↑𑒯𑓂𑒧𑒫𑒩𑓂𑒔↓𑒮𑒲-𑒥𑓂𑒩𑒯𑓂𑒧 𑒫𑒱𑒠𑓂𑒨𑒰𑒏 𑒞𑒹𑒖𑒮𑒿 𑒨𑒳𑒏𑓂𑒞𑓂𑒞

𑒂 𑒖𑒰↑𑒨𑒞𑒰𑓀↓- 𑒅𑒞𑓂𑒣𑒢𑓂𑒢 𑒯𑒼𑒋

𑒩𑒰↑𑒖↓𑒢𑓂𑒨𑓁-𑒩𑒰𑒖𑒰

𑒬𑒳𑒩𑒹↑𑓄–𑒥𑒱𑒢𑒰 𑒛𑒩 𑒥𑒪𑒰

𑒃𑒭𑒫𑓂𑒨𑒼↓- 𑒥𑒰𑒝 𑒔𑒪𑒹𑒥𑒰𑒧𑒹 𑒢𑒱𑒣𑒳𑒝

𑓄𑒞𑒱𑒫𑓂𑒨𑒰↓𑒡𑒲-𑒬𑒞𑓂𑒩𑒳𑒏𑒹𑒿 𑒞𑒰𑒩𑒝 𑒠𑒨 𑒥𑒪𑒰

𑒧↑𑒯𑒰𑒩↓𑒟𑒼-𑒣𑒻𑒒 𑒩𑒟 𑒥𑒪𑒰 𑒫𑒲𑒩

𑒠𑒼𑒑𑓂𑒡𑓂𑒩𑒲𑓀-𑒏𑒰𑒧𑒢𑒰(𑒠𑒴𑒡 𑒣𑒴𑒩𑓂𑒝 𑒏𑒩𑒋 𑒥𑒰𑒪𑒲)

𑒡𑒹↓𑒢𑒳𑒩𑓂𑒫𑒼𑒜𑒰↑𑒢↓𑒛𑓂𑒫𑒰𑒢𑒰↓𑒬𑒳𑓁 𑒡𑒹↓𑒢𑒳-𑒑𑒾 𑒫𑒰 𑒫𑒰𑒝𑒲 𑒩𑓂𑒫𑒼𑒜𑒰↑𑒢↓𑒛𑓂𑒫𑒰- 𑒣𑒻𑒒 𑒥𑒛𑓃𑒠 𑒢𑒰↓𑒬𑒳𑓁-𑒂𑒬𑒳𑓁-𑒞𑓂𑒫𑒩𑒱𑒞

𑒮𑒣𑓂𑒞𑒱𑓁↓-𑒒𑒼𑒛𑓃𑒰

𑒣𑒳𑒩↑𑒢𑓂𑒡𑒱↓𑒩𑓂𑒨𑒼𑒫𑒰↑- 𑒣𑒳𑒩↑𑒢𑓂𑒡𑒱↓- 𑒫𑓂𑒨𑒫𑒯𑒰𑒩𑒏𑒹𑒿 𑒡𑒰𑒩𑒝 𑒏𑒩𑒋 𑒥𑒰𑒪𑒲 𑒩𑓂𑒨𑒼𑒫𑒰↑-𑒮𑓂𑒞𑓂𑒩𑒲

𑒖𑒱↓𑒭𑓂𑒝𑒴-𑒬𑒞𑓂𑒩𑒳𑒏𑒹𑒿 𑒖𑒲𑒞𑒋 𑒥𑒪𑒰

𑒩↑𑒟𑒹↓𑒭𑓂𑒚𑒰𑓁-𑒩𑒟 𑒣𑒩 𑒮𑓂𑒟𑒱𑒩

𑒮↓𑒦𑒹𑒨𑒼↓-𑒅𑒞𑓂𑒞𑒧 𑒮𑒦𑒰𑒧𑒹

𑒨𑒳𑒫𑒰𑒮𑓂𑒨-𑒨𑒳𑒫𑒰 𑒖𑒹𑒯𑒢

𑒨𑒖↑𑒧𑒰𑒢𑒮𑓂𑒨-𑒩𑒰𑒖𑒰𑒏 𑒩𑒰𑒖𑓂𑒨𑒧𑒹

𑒫𑒲↓𑒩𑒼-𑒬𑒞𑓂𑒩𑒳𑒏𑒹𑒿 𑒣𑒩𑒰𑒖𑒱𑒞 𑒏𑒩𑒋𑒥𑒪𑒰

𑒢𑒱𑒏𑒰↓𑒧𑒹-𑒢𑒱↑𑒏𑒰𑒧𑒹-𑒢𑒱𑒬𑓂𑒔𑒨𑒨𑒳𑒏𑓂𑒞𑓂𑒞 𑒏𑒰𑒩𑓂𑒨𑒧𑒹

𑒢𑓁-𑒯𑒧𑒩 𑒮𑒦𑒏

𑒣↓𑒩𑓂𑒖𑒢𑓂𑒨𑒼𑓀-𑒧𑒹𑒒

𑒫𑒩𑓂𑒭𑒞𑒳↓-𑒫𑒩𑓂𑒭𑒰 𑒯𑒼𑒋

𑒤𑒪↑𑒫𑒞𑓂𑒨𑒼-𑒅𑒞𑓂𑒞𑒧 𑒤𑒪 𑒥𑒪𑒰

𑒍𑒭↑𑒡𑒨𑓁-𑒎𑒭𑒡𑒱𑓁

𑒣𑒔𑓂𑒨𑒢𑓂𑒞𑒰𑓀- 𑒣𑒰𑒏𑒋

𑒨𑒼𑒑𑒹𑒏𑓂𑒭↓𑒧𑒼-𑒁𑒪𑒦𑓂𑒨 𑒪𑒦𑓂𑒨 𑒏𑒩𑒹𑒥𑒰𑒏 𑒯𑒹𑒞𑒳 𑒏𑒋𑒪 𑒑𑒹𑒪 𑒨𑒼𑒑𑒏 𑒩𑒏𑓂𑒭𑒰

𑒢𑓁↑-𑒯𑒧𑒩𑒰 𑒮𑒦𑒏 𑒯𑒹𑒞𑒳

𑒏𑒪𑓂𑒣𑒞𑒰𑒧𑓂-𑒮𑒧𑒩𑓂𑒟 𑒯𑒼𑒋

𑒑𑓂𑒩𑒱𑒤𑒱𑒟𑒏 𑒁𑒢𑒳𑒫𑒰𑒠- 𑒯𑒹 𑒥𑓂𑒩𑒯𑓂𑒧𑒝, 𑒯𑒧𑒩 𑒩𑒰𑒖𑓂𑒨𑒧𑒹 𑒥𑓂𑒩𑒰𑒯𑓂𑒧𑒝 𑒢𑒲𑒏 𑒡𑒰𑒩𑓂𑒧𑒱𑒏 𑒫𑒱𑒠𑓂𑒨𑒰 𑒥𑒪𑒰, 𑒩𑒰𑒖𑒢𑓂𑒨-𑒫𑒲𑒩,𑒞𑒲𑒩𑓀𑒠𑒰𑒖, 𑒠𑒴𑒡 𑒠𑒋 𑒥𑒰𑒪𑒲 𑒑𑒰𑒨, 𑒠𑒾𑒑𑒨 𑒥𑒪𑒰 𑒖𑒢𑓂𑒞𑒳, 𑒅𑒠𑓂𑒨𑒧𑒲 𑒢𑒰𑒩𑒲 𑒯𑒼𑒟𑒱। 𑒣𑒰𑒩𑓂𑒖𑒢𑓂𑒨 𑒂𑒫𑒬𑓂𑒨𑒏𑒞𑒰 𑒣𑒛𑓃𑒪𑒰 𑒣𑒩 𑒫𑒩𑓂𑒭𑒰 𑒠𑒹𑒟𑒱, 𑒤𑒪 𑒠𑒹𑒨 𑒥𑒪𑒰 𑒑𑒰𑒕 𑒣𑒰𑒏𑒋, 𑒯𑒧 𑒮𑒦 𑒮𑓀𑒣𑒞𑓂𑒞𑒱 𑒁𑒩𑓂𑒖𑒱𑒞/ 𑒮𑓀𑒩𑒏𑓂𑒭𑒱𑒞 𑒏𑒩𑒲।

𑒞𑒏𑒩 𑒥𑒰𑒠 𑒪𑒹𑒐𑒏𑒲𑒨 𑒣𑓂𑒩𑒮𑓂𑒞𑒰𑒫𑒢𑒰 𑒖𑒏𑒩𑒰 𑒣𑒳𑒩𑒼𑒯𑒱𑒞𑒧𑒹 𑒫𑒱𑒢𑒱𑒨𑒼𑒑𑒏 𑒢𑒰𑒧 𑒠𑒹𑒪 𑒑𑒹𑒪 𑒁𑒕𑒱, 𑒏𑒹𑒩 𑒣𑓂𑒩𑒰𑒩𑒧𑓂𑒦 𑒯𑒼𑒃𑒞 𑒁𑒕𑒱। 𑒣𑒳𑒩𑒼𑒯𑒱𑒞 𑒬𑒞𑒣𑒟 𑒥𑓂𑒩𑒰𑒯𑓂𑒧𑒝𑒏𑒰𑒪𑒲𑒢 𑒮𑒧𑒰𑒖 𑒣𑒩 𑒂𑒡𑒰𑒩𑒱𑒞 𑒁𑒕𑒱।
𑒫𑒱𑒢𑒱𑒨𑒼𑒑𑒧𑒹 𑒣𑒴𑒩𑓂𑒫 𑒂 𑒅𑒞𑓂𑒞𑒩 𑒫𑒻𑒠𑒱𑒏 𑒨𑒳𑒑, 𑒧𑒯𑒰𑒦𑒰𑒩𑒞 𑒏𑒰𑒪 𑒃𑒞𑓂𑒨𑒰𑒠𑒱𑒏 𑒏𑒰𑒪 𑒢𑒱𑒩𑓂𑒡𑒰𑒩𑒝 𑒣𑒩 𑒔𑒩𑒔𑒰 𑒏𑒋𑒪 𑒑𑒹𑒪 𑒁𑒕𑒱। 𑒮𑓀𑒢𑓂𑒨𑒰𑒮 𑒂 𑒧𑒼𑒏𑓂𑒭 𑒡𑒰𑒩𑒝𑒰𑒏 𑒣𑓂𑒩𑒫𑒹𑒬, 𑒮𑒴𑒞𑓂𑒩 𑒮𑒰𑒯𑒱𑒞𑓂𑒨, 𑒂𑒩𑒝𑓂𑒨𑒏 𑒂 𑒅𑒣𑒢𑒱𑒭𑒠 𑒂 𑒥𑓂𑒩𑒰𑒯𑓂𑒧𑒝 𑒑𑓂𑒩𑓀𑒟𑒏 𑒩𑒔𑒢𑒰𑒏 𑒮𑒹𑒯𑒼 𑒔𑒩𑒔𑒰 𑒁𑒕𑒱।𑒏𑒩𑓂𑒧𑒝𑒰 𑒏𑒹𑒩 𑒥𑒠𑒪𑒰𑒧𑒹 𑒖𑒢𑓂𑒧𑒢𑒰 𑒮𑒱𑒠𑓂𑒡𑒰𑓀𑒞𑒏 𑒣𑓂𑒩𑒰𑒩𑒧𑓂𑒦 𑒂 𑒬𑒴𑒠𑓂𑒩 𑒬𑒥𑓂𑒠𑒏 𑒅𑒠𑓂𑒦𑒫, 𑒢𑒑𑒩𑒏, 𑒂𑒯𑒞 𑒧𑒳𑒠𑓂𑒩𑒰𑒏, 𑒅𑒠𑓂𑒨𑒼𑒑𑒏 𑒮𑒳𑒠𑒵𑒜𑓃𑒲𑒏𑒩𑒝𑒏 𑒂 𑒪𑒼𑒯𑒰𑒏 𑒣𑓂𑒩𑒨𑒼𑒑𑒏 𑒮𑒹𑒯𑒼 𑒔𑒩𑒔𑒰 𑒦𑒹𑒪 𑒁𑒕𑒱। 𑒤𑒹𑒩 𑒧𑒰𑒨𑒰𑒢𑒢𑓂𑒠 𑒖𑒲 𑒄 𑒪𑒱𑒐𑒱 𑒖𑒰𑒃𑒞 𑒕𑒟𑒱 𑒖𑒹 𑒠𑒰𑒬𑒩𑒖𑓂𑒘 𑒨𑒳𑒠𑓂𑒡 𑒄.𑒣𑒴. 𑓑𑓘𑓐𑓐 𑒧𑒹 𑒦𑒹𑒪- 𑒦𑒩𑒞 𑒂 𑒏𑒳𑒬𑒱𑒏-𑒏𑒮𑓂𑒮𑒰𑒃𑒙𑒏 𑒮𑒧𑓂𑒧𑒱𑒪𑒱𑒞 𑒮𑒧𑒴𑒯 𑒮𑒩𑒮𑓂𑒫𑒞𑒲 𑒞𑒙𑒮𑒿 𑒫𑓂𑒨𑒰𑒮 𑒢𑒠𑒲 𑒣𑒰𑒩 𑒏𑒩𑒻𑒞 𑒃𑒪𑒰𑒫𑒵𑒞 𑒣𑒩𑓂𑒫𑒞 𑒣𑓂𑒩𑒠𑒹𑒬 𑒯𑒼𑒃𑒞 ; 𑒂 𑒍 𑒪𑒼𑒏𑒢𑒱 𑒏𑒼𑒬𑒪 𑒧𑒱𑒟𑒱𑒪𑒰𑒏 𑒩𑒰𑒖𑒞𑓀𑒞𑓂𑒩𑒏, 𑒏𑒳𑒩𑒳-𑒣𑒰𑓀𑒔𑒰𑒪𑒏 𑒮𑓀𑒮𑓂𑒏𑒵𑒞𑒱𑒏 𑒫𑒱𑒏𑒮𑒱𑒞 𑒯𑒼𑒋𑒥𑒰𑒮𑒿 𑒣𑒴𑒩𑓂𑒫𑒯𑒱, 𑒮𑓂𑒟𑒰𑒣𑒢𑒰 𑒏𑒋𑒢𑒹 𑒕𑒪𑒰𑒯।
𑒣𑒳𑒩𑒼𑒯𑒱𑒞 𑒞𑒹𑒩𑒯 𑒙𑒰 𑒮𑒩𑓂𑒑𑒧𑒹 𑒫𑒱𑒦𑒏𑓂𑒞𑓂𑒞 𑒁𑒕𑒱 𑒂 𑒋𑒏𑒩 𑒁𑒢𑓂𑒞 𑒅𑒣𑒮𑓀𑒯𑒰𑒩𑒮𑒿 𑒯𑒼𑒃𑒞 𑒁𑒕𑒱। 𑒣𑓂𑒩𑒟𑒧 𑒮𑒩𑓂𑒑 𑒠𑒏𑓂𑒭𑒱𑒝 𑒣𑒰𑓀𑒔𑒰𑒪𑒏 𑒏𑒰𑓀𑒣𑒱𑒪𑓂𑒨 𑒢𑒑𑒩𑒮𑒿 𑒬𑒳𑒩𑒴 𑒯𑒼𑒃𑒞 𑒁𑒕𑒱। 𑒁𑒟𑒩𑓂𑒫𑒝𑒣𑒪𑓂𑒪𑒲𑒏 𑒣𑒬𑒳𑒬𑒰𑒪𑒰𑒧𑒹 𑒮𑒰𑒿𑒗 𑒯𑒼𑒃𑒞 𑒠𑒹𑒩𑒲 𑒅𑒚𑒻𑒞 𑒡𑒳𑒿𑒂𑒏 𑒔𑒩𑒔𑒰 𑒁𑒕𑒱। 𑒧𑒹𑒡𑒰 𑒂 𑒏𑒳𑒬𑒥𑒱𑒢𑓂𑒠𑒳𑒮𑒿 𑒏𑒟𑒰 𑒂𑒑𑒴 𑒥𑒜𑓃𑒻𑒞 𑒁𑒕𑒱। 𑒇𑒭𑒱 𑒑𑒰𑒪𑒥𑒏 𑒂𑒬𑓂𑒩𑒧𑒧𑒹 𑒇𑒑𑒫𑒹𑒠𑒏𑒹𑒿 𑒏𑓀𑒚𑒰𑒑𑓂𑒩 𑒏𑒩𑒰𑒋𑒪 𑒖𑒋𑒥𑒰𑒏 𑒂 𑒥𑒰𑒠𑒧𑒹 𑒖𑒰 𑒏𑒋 𑒏𑒵𑒭𑒱 𑒮𑓀𑒥𑓀𑒡𑒲 𑒬𑒱𑒏𑓂𑒭𑒰 𑒠𑒹𑒪 𑒖𑒋𑒥𑒰𑒏 𑒫𑒩𑓂𑒝𑒢 𑒁𑒕𑒱।
𑒠𑒼𑒮𑒩 𑒮𑒩𑓂𑒑𑒧𑒹 𑒩𑒰𑒖𑒰 𑒣𑓂𑒩𑒫𑒰𑒯𑒝 𑒖𑒻𑒥𑒰𑒪𑒱𑒏 𑒧𑒴𑒩𑓂𑒐 𑒣𑒳𑒞𑓂𑒩 𑒠𑓂𑒫𑒰𑒩𑒰 𑒥𑓂𑒩𑒰𑒯𑓂𑒧𑒝𑒏 𑒁𑒣𑒧𑒰𑒢𑒏, 𑒣𑓂𑒩𑒟𑒧 𑒬𑓂𑒩𑒼𑒞𑓂𑒩𑒱𑒨 𑒂 𑒠𑒼𑒮𑒩 𑒣𑒳𑒩𑒼𑒯𑒱𑒞 𑒥𑓂𑒩𑒰𑒯𑓂𑒧𑒝𑒏 𑒫𑒩𑓂𑒝𑒢 𑒁𑒕𑒱।
𑒞𑒹𑒮𑒩 𑒮𑒩𑓂𑒑𑒧𑒹 𑒂𑒔𑒰𑒩𑓂𑒨 𑒔𑒰𑒏𑓂𑒩𑒰𑒨𑒝𑒏 𑒁𑒣𑒧𑒰𑒢𑒏 𑒏𑒰𑒩𑒝 𑒣𑒳𑒩𑒼𑒯𑒱𑒞 𑒫𑒩𑓂𑒑 𑒠𑓂𑒫𑒰𑒩𑒰 𑒣𑒾𑒩𑒯𑒱𑒞𑓂𑒨 𑒏𑒩𑓂𑒧 𑒢𑒯𑒱 𑒏𑒩𑒥𑒰𑒏 𑒢𑒱𑒩𑓂𑒝𑒨𑒮𑒿 𑒣𑓂𑒩𑒖𑒰𑒖𑒢𑒏 𑒠𑒻𑒢𑒱𑒏 𑒁𑒑𑓂𑒢𑒱𑒯𑒼𑒞𑓂𑒩 𑒏𑒰𑒩𑓂𑒨 𑒂 𑒥𑒱𑒢𑒰 𑒪𑒑𑓂𑒢𑒏 𑒏𑒵𑒭𑒱 𑒂 𑒫𑒰𑒝𑒱𑒖𑓂𑒨 𑒏𑒰𑒩𑓂𑒨𑒧𑒹 𑒯𑒼𑒁𑒋 𑒥𑒪𑒰 𑒦𑒰𑒓𑒚𑒏 𑒫𑒩𑓂𑒝𑒢 𑒁𑒕𑒱।
𑒔𑒞𑒳𑒩𑓂𑒟 𑒮𑒩𑓂𑒑𑒧𑒹 𑒫𑓂𑒨𑒰𑒮 𑒏𑒟𑒰 𑒂 𑒦𑒰𑒩𑒞 𑒨𑒳𑒠𑓂𑒡𑒏 𑒔𑒩𑓂𑒔𑒰 𑒁𑒥𑒻𑒞 𑒁𑒕𑒱 𑒂 𑒋𑒞𑒋 𑒧𑒰𑒨𑒰𑒢𑒢𑓂𑒠 𑒖𑒲 𑒣𑒰𑒬𑓂𑒔𑒰𑒞𑓂𑒨 𑒠𑒵𑒭𑓂𑒙𑒱𑒏𑒼𑒝𑒏 𑒁𑒢𑒳𑒮𑒩𑒝 𑒏𑒩𑒻𑒞 𑒕𑒟𑒱। 𑒖𑒨 𑒏𑒰𑒫𑓂𑒨𑒏𑒹𑒿 𑒦𑒰𑒩𑒞 𑒨𑒳𑒠𑓂𑒡𑒏𑒟𑒰𑒏 𑒩𑒴𑒣 𑒠𑒋 𑒠𑒹𑒪 𑒑𑒹𑒪- 𑒄 𑒫𑒏𑓂𑒞𑓂𑒞𑒫𑓂𑒨 𑒁𑒢𑒰𑒨𑒰𑒮𑒯𑒱 𑒠𑒋 𑒩𑒯𑒪 𑒕𑒟𑒱 𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩।
𑒣𑒰𑒿𑒔𑒧 𑒮𑒩𑓂𑒑𑒧𑒹 𑒫𑒻𑒬𑓂𑒨 𑒠𑓂𑒫𑒰𑒩𑒰 𑒅𑒣𑒢𑒨𑒢 𑒮𑓀𑒮𑓂𑒏𑒰𑒩 𑒕𑒼𑒛𑓃𑒥𑒰𑒏 𑒔𑒩𑒔𑒰 𑒁𑒕𑒱 𑒧𑒳𑒠𑒰 𑒏𑓂𑒭𑒞𑓂𑒩𑒱𑒨 𑒣𑒳𑒞𑓂𑒩 𑒂 𑒣𑒳𑒞𑓂𑒩𑒲 𑒠𑒳𑒢𑒴𑒏 𑒅𑒣𑒢𑒨𑒢 𑒏𑒩𑒻𑒞 𑒕𑒪𑒰𑒯। 𑒫𑒻𑒬𑓂𑒨 𑒏𑒢𑓂𑒨𑒰 𑒬𑒱𑒏𑓂𑒭𑒰𑒮𑒿 𑒠𑒴𑒩 𑒖𑒰 𑒩𑒯𑒪 𑒕𑒪𑒲𑒯 𑒂 𑒥𑓂𑒩𑒰𑒯𑓂𑒧𑒝 𑒏𑒢𑓂𑒨𑒰 𑒑𑒳𑒩𑒳𑒏𑒳𑒪𑒏 𑒁𑒞𑒱𑒩𑒱𑒏𑓂𑒞 𑒣𑒱𑒞𑒰𑒮𑒿 𑒬𑒱𑒏𑓂𑒭𑒰 𑒪𑒋 𑒩𑒯𑒪 𑒕𑒪𑒲𑒯। 𑒥𑓂𑒩𑒰𑒯𑓂𑒧𑒝𑒏𑒹𑒿 𑒣𑒾𑒩𑒯𑒱𑒞𑓂𑒨𑒮𑒿 𑒏𑒧 𑒮𑒧𑒨 𑒦𑒹𑒙𑒻𑒞 𑒕𑒪𑒢𑓂𑒯𑒱।
𑒕𑒚𑒧 𑒮𑒩𑓂𑒑𑒧𑒹 𑒥𑓂𑒩𑒰𑒯𑓂𑒧𑒝 𑒣𑒳𑒩𑒼𑒯𑒱𑒞 𑒠𑓂𑒫𑒰𑒩𑒰 𑒁𑒟𑒩𑓂𑒫 𑒫𑒹𑒠𑒏𑒹𑒿 𑒢𑒯𑒱 𑒧𑒰𑒢𑒥𑒰𑒏 𑒔𑒩𑒔𑒰 𑒁𑒕𑒱।
𑒮𑒰𑒞𑒧 𑒮𑒩𑓂𑒑𑒧𑒹 𑒁𑒟𑒩𑓂𑒫𑒢𑒣𑒪𑓂𑒪𑒲𑒧𑒹 𑒁𑒟𑒩𑓂𑒫𑒫𑒹𑒠𑒲𑒨 𑒮𑓀𑒮𑓂𑒏𑒰𑒩𑒏 𑒬𑒱𑒏𑓂𑒭𑒰 𑒂 𑒣𑓂𑒩𑒟𑒧 𑒬𑓂𑒩𑒹𑒝𑒲𑒏 𑒥𑓂𑒩𑒰𑒯𑓂𑒧𑒝 𑒠𑓂𑒫𑒰𑒩𑒰 𑒍𑒞𑒋 𑒢𑒯𑒱 𑒖𑒋𑒥𑒰𑒏 𑒔𑒩𑒔𑒰 𑒁𑒕𑒱।
𑒂𑒚𑒧 𑒮𑒩𑓂𑒑𑒧𑒹 𑒃𑒠𑓂𑒩𑒼𑒞𑓂𑒮𑒫𑒧𑒹 𑒩𑒟𑒠𑒾𑒛𑓃, 𑒁𑒬𑓂𑒫𑒰𑒩𑒼𑒯𑒝, 𑒧𑒪𑓂𑒪𑒨𑒳𑒠𑓂𑒡, 𑒁𑒮𑒱𑒔𑒰𑒪𑒢, 𑒪𑒏𑓂𑒭𑓂𑒨𑒦𑒹𑒠 𑒂 𑒫𑒱𑒪𑒏𑓂𑒭𑒝 𑒁𑒢𑒳𑒏𑒵𑒞𑒱𑒏 𑒔𑒩𑒔𑒰 𑒁𑒕𑒱 𑒂 𑒫𑓂𑒨𑒰𑒮𑒣𑒪𑓂𑒪𑒲𑒏 𑒪𑒼𑒏 𑒠𑓂𑒫𑒰𑒩𑒰 𑒁𑒢𑒳𑒏𑒵𑒞𑒱 𑒏𑒩𑒥𑒰𑒏 𑒔𑒩𑒔𑒰 𑒁𑒕𑒱। 𑒫𑓂𑒨𑒰𑒮𑒣𑒪𑓂𑒪𑒲𑒧𑒹 𑒫𑓂𑒩𑒰𑒞𑓂𑒨 𑒏𑒩𑒳𑒭 𑒦𑒰𑒩𑒞 𑒨𑒳𑒠𑓂𑒡𑒏 𑒏𑒟𑒰 𑒏𑒯𑒱 𑒩𑒯𑒪 𑒕𑒪𑒰𑒯। 𑒦𑒰𑒩𑒞 𑒨𑒳𑒠𑓂𑒡𑒏 𑒥𑒯𑒳𑒞 𑒣𑒴𑒩𑓂𑒫 𑒦𑒩𑒞, 𑒞𑓂𑒩𑒱𑒞𑓂𑒮𑒳, 𑒏𑒱𑒫𑒲 𑒂 𑒮𑒵𑓀𑒖𑒨 𑒧𑒱𑒬𑓂𑒩𑒱𑒞 𑒖𑒢𑒏 𑒂𑒩𑓂𑒨𑒫𑒩𑓂𑒞𑒧𑒹 𑒬𑒴𑒠𑓂𑒩 𑒢𑒰𑒧𑒮𑒿 𑒮𑒳𑒧𑒹𑒩𑒱𑒨𑒰𑒏 𑒖𑒱𑒨𑒮𑒴𑒠𑓂𑒩𑒏 𑒮𑓂𑒧𑒵𑒞𑒱𑒧𑒹 𑒁𑒣𑒢𑒰𑒏𑒹𑒿 𑒑𑒾𑒩𑒫 𑒠𑒹𑒥𑒰𑒏 𑒯𑒹𑒞𑒳 𑒮𑒴𑒠𑓂𑒩 𑒏𑒯𑒥𑒰𑒏 𑒫𑒩𑓂𑒝𑒢 𑒁𑒕𑒱।
𑒢𑒫𑒧 𑒮𑒩𑓂𑒑𑒧𑒹 𑒞𑒢𑓂𑒞𑒳𑒫𑒰𑒨 𑒠𑓂𑒫𑒰𑒩𑒰 𑒮𑓂𑒞𑓂𑒩𑒲 𑒢𑒱𑒧𑒱𑒞𑓂𑒞 𑒫𑒮𑓂𑒞𑓂𑒩𑒧𑒹 𑒞𑒙𑒲𑒨𑒞𑒰 𑒠𑒹𑒪 𑒖𑒋𑒥𑒰𑒏 𑒏𑒰𑒩𑒝 𑒦𑒹𑒪 𑒁𑒢𑓂𑒞𑒩𑒏 𑒔𑒩𑒔𑒰 𑒁𑒕𑒱, 𑒣𑒯𑒱𑒢𑒹 𑒄 𑒁𑒢𑓂𑒞𑒩 𑒢𑒯𑒱 𑒕𑒪। 𑒁𑒟𑒩𑓂𑒫𑒝 𑒂 𑒨𑒰𑒖𑓂𑒘𑒱𑒏 𑒥𑓂𑒩𑒰𑒯𑓂𑒧𑒝𑒧𑒹 𑒦𑒹𑒠𑒏 𑒔𑒩𑒔𑒰 𑒁𑒕𑒱।
𑒠𑒬𑒧𑓂 𑒮𑒩𑓂𑒑𑒧𑒹 𑒬𑒱𑒬𑓂𑒢𑒠𑒹𑒫𑒏 𑒣𑒴𑒖𑒰 𑒁𑒢𑒰𑒩𑓂𑒨 𑒠𑓂𑒫𑒰𑒩𑒰 𑒯𑒼𑒋𑒥𑒰𑒏 𑒂 𑒁𑒟𑒩𑓂𑒫𑒝 𑒣𑒳𑒩𑒼𑒯𑒱𑒞 𑒠𑓂𑒫𑒰𑒩𑒰 𑒋𑒏𑒩 𑒁𑒢𑒦𑒱𑒖𑓂𑒘𑒞𑒰𑒏 𑒔𑒩𑒔𑒰 𑒁𑒕𑒱। 𑒫𑓂𑒨𑒰𑒮𑒣𑒪𑓂𑒪𑒲𑒧𑒹 𑒁𑒏𑓂𑒭𑒩 𑒪𑒱𑒣𑒱𑒏 𑒣𑓂𑒩𑒨𑒼𑒑 𑒂 𑒂𑒔𑒰𑒩𑓂𑒨 𑒑𑒰𑒪𑒥𑒏 𑒬𑓂𑒩𑒳𑒞𑒱 𑒂𑒬𑓂𑒩𑒧𑒧𑒹 𑒁𑓀𑒏 𑒪𑒱𑒣𑒱𑒏 𑒁𑒞𑒱𑒩𑒱𑒏𑓂𑒞𑓂𑒞 𑒏𑒱𑒕𑒳 𑒁𑒢𑓂𑒨 𑒠𑒹𑒐𑒥 𑒫𑒩𑓂𑒖𑒱𑒞 𑒯𑒼𑒋𑒥𑒰𑒏 𑒑𑒣 𑒏𑒯𑒪 𑒑𑒹𑒪 𑒁𑒕𑒱।
𑒋𑒑𑒰𑒩𑒯𑒧 𑒮𑒩𑓂𑒑𑒧𑒹 𑒑𑒰𑒪𑒥 𑒂𑒬𑓂𑒩𑒧𑒧𑒹 𑒠𑒝𑓂𑒛𑒢𑒲𑒞𑒱 𑒣𑒩 𑒔𑒩𑒔𑒰 𑒢𑒱𑒭𑒱𑒠𑓂𑒡 𑒯𑒼𑒋𑒥𑒰𑒏 𑒥𑒰𑒠𑒼 𑒠𑒏𑓂𑒭𑒱𑒝 𑒣𑒰𑓀𑒔𑒰𑒪𑒏 𑒮𑒦𑒰𑒮𑒠𑒏 𑒂𑒑𑓂𑒩𑒯 𑒣𑒩 𑒋𑒞𑒠 𑒮𑓀𑒥𑓀𑒡𑒲 𑒔𑒩𑒔𑒰 𑒯𑒼𑒋𑒥𑒰𑒏 𑒑𑒣 𑒁𑒕𑒱। 𑒩𑒰𑒖𑒰 𑒬𑒱𑒪𑒰𑒖𑒱𑒞 𑒠𑓂𑒫𑒰𑒩𑒰 𑒩𑒰𑒖𑒣𑒠 𑒣𑓂𑒩𑒡𑒰𑒢 𑒣𑒳𑒩𑒼𑒯𑒱𑒞𑒏𑒹𑒿 𑒠𑒹𑒥𑒰𑒏 𑒔𑒩𑒔𑒰 𑒁𑒕𑒱।
𑒥𑒰𑒩𑒯𑒧 𑒮𑒩𑓂𑒑𑒧𑒹 𑒦𑒰𑒩𑒞 𑒨𑒳𑒠𑓂𑒡𑒏 𑒥𑒰𑒠 𑒢𑒱𑒨𑒼𑒑 𑒣𑓂𑒩𑒟𑒰𑒏 𑒁𑒧𑒰𑒢𑓂𑒨 𑒦𑓄 𑒥𑒢𑓂𑒠 𑒦𑓄 𑒖𑒋𑒥𑒰𑒏 𑒥𑒰𑒞 𑒁𑒕𑒱। 𑒬𑒱𑒬𑓂𑒢𑒠𑒹𑒫𑒏 𑒬𑒱𑒫𑒠𑒹𑒫𑒮𑒿 𑒋𑒏𑒰𑒏𑒰𑒩𑒏 𑒔𑒩𑒔𑒰 𑒮𑒹𑒯𑒼 𑒁𑒕𑒱।
𑒞𑒹𑒩𑒯𑒧 𑒮𑒩𑓂𑒑𑒧𑒹 𑒏𑓂𑒩𑒻𑒫𑓂𑒨𑒩𑒰𑒖𑒏 𑒁𑒦𑒱𑒭𑒹𑒏 𑒅𑒞𑓂𑒮𑒫𑒏 𑒔𑒩𑒔𑒰 𑒁𑒕𑒱। 𑒠𑒴𑒩𑓂𑒫𑒰𑒏𑓂𑒭𑒞 𑒧𑓀𑒞𑓂𑒩𑒧𑒹
“𑓇 𑒧𑓀𑒞𑓂𑒩𑒰𑒩𑓂𑒟𑒰 𑒮𑒱𑒠𑓂𑒡𑒨𑓁 𑒮𑓀𑒞𑒳 𑒧𑒢𑒼𑒩𑒟𑒰𑓁। 𑒬𑒞𑓂𑒩𑒴𑒝𑒰𑓀 𑒥𑒳𑒠𑓂𑒡𑒱𑒢𑒰𑒬𑒼𑓄𑒮𑓂𑒞𑒳 𑒧𑒱𑒞𑓂𑒩𑒰𑒝𑒰𑒧𑒳𑒠𑒨𑒮𑓂𑒞𑒫” 𑒂 𑒠𑒲𑒩𑓂𑒒𑒰𑒨𑒳𑒩𑓂𑒦𑒫 𑒏𑒹𑒩 𑒧𑒹𑒪 𑒬𑒳𑒏𑓂𑒪 𑒨𑒖𑒳𑒩𑓂𑒫𑒹𑒠𑒏 𑓒𑓒/𑓒𑓒 𑒧𑓀𑒞𑓂𑒩𑒮𑒿 𑒏𑒋 𑒠𑒴𑒥𑒱 𑒁𑒏𑓂𑒭𑒞 𑒪𑒋, 𑒫𑒱𑒬𑒹𑒭 𑒪𑒋 𑒞𑒰𑒪 𑒑𑒞𑒱 𑒨𑒞𑒱 𑒧𑒹 𑒑𑒋𑒥𑒰𑒏 𑒫𑒩𑓂𑒝𑒢 𑒁𑒕𑒱। 𑒋𑒏𑒩 𑒁𑒢𑒳𑒫𑒰𑒠 𑒮𑒹𑒯𑒼 𑒧𑒰𑒨𑒰𑒢𑒢𑓂𑒠 𑒖𑒲 𑒠𑒹𑒢𑒹 𑒕𑒟𑒱, 𑒖𑒹 𑒑𑓂𑒩𑒱𑒤𑒱𑒟𑒏 𑒁𑒢𑒳𑒫𑒰𑒠𑒮𑒿 𑒣𑓂𑒩𑒹𑒩𑒱𑒞 𑒁𑒕𑒱:-
𑒮𑒧𑒮𑓂𑒞 𑒫𑒱𑒬𑓂𑒫𑒧𑒹 𑒥𑓂𑒩𑒰𑒯𑓂𑒧𑒝 𑒫𑒱𑒠𑓂𑒨𑒰𑒏 𑒞𑒹𑒖𑒏 𑒫𑒩𑓂𑒔𑒮𑓂𑒫 𑒮𑓂𑒟𑒰𑒣𑒱𑒞 𑒏𑒩𑒋 𑒥𑒪𑒰, 𑒮𑒩𑓂𑒫𑒞𑓂𑒩, 𑒫𑒰𑒝 𑒔𑒪𑒋𑒥𑒰𑒧𑒹 𑒢𑒱𑒣𑒳𑒝, 𑒢𑒱𑒩𑒼𑒑𑒱, 𑒧𑒯𑒰𑒩𑒟𑒲, 𑒬𑒴𑒩, 𑒨𑒖𑒧𑒰𑒢 𑒩𑒰𑒖𑓂𑒨 𑒮𑒦𑒏 𑒖𑒢𑓂𑒧 𑒯𑒼𑒋, 𑒮𑒩𑓂𑒫𑒞𑓂𑒩 𑒁𑒡𑒱𑒏𑒰𑒡𑒱𑒏 𑒠𑒴𑒡 𑒠𑒋𑒥𑒰𑒪𑒲 𑒡𑒹𑒢𑒳 𑒯𑒼𑒋, 𑒬𑒏𑓂𑒞𑒱𑒬𑒰𑒪𑒲 𑒫𑒵𑒭𑒦 𑒯𑒼𑒋, 𑒞𑒹𑒖𑒮𑓂𑒫𑒲 𑒁𑒬𑓂𑒫 𑒯𑒼𑒋, 𑒩𑒴𑒣𑒫𑒞𑒲 𑒮𑒡𑓂𑒫𑒲 𑒨𑒳𑒫𑒞𑒲 𑒯𑒼𑒟𑒱, 𑒫𑒱𑒖𑒨𑒏𑒰𑒧𑒲 𑒫𑒲𑒩𑒣𑒳𑒞𑓂𑒩 𑒯𑒼𑒟𑒱, 𑒖𑒐𑒢 𑒯𑒧 𑒏𑒰𑒧𑒢𑒰 𑒏𑒩𑒲 𑒣𑒩𑓂𑒖𑒢𑓂𑒨 𑒫𑒩𑓂𑒭𑒰 𑒠𑒹𑒟𑒱, 𑒫𑒢𑒮𑓂𑒣𑒞𑒱𑒏 𑒫𑒱𑒏𑒰𑒮 𑒯𑒼𑒋, 𑒎𑒭𑒡𑒱 𑒤𑒪𑒫𑒞𑒲 𑒂 𑒮𑒦 𑒣𑓂𑒩𑒰𑒝𑒲 𑒨𑒼𑒑𑒏𑓂𑒭𑒹𑒧𑒮𑒿 𑒣𑓂𑒩𑒮𑒢𑓂𑒢 𑒩𑒯𑒟𑒱।𑒩𑒰𑒖𑒢 𑒬𑒞𑓀𑒖𑒲𑒫𑒲 𑒯𑒼𑒟𑒱।
𑒏𑓂𑒩𑒻𑒫𑓂𑒨𑒩𑒰𑒖𑒏 𑒁𑒦𑒱𑒭𑒹𑒏𑒏 𑒪𑒹𑒪 𑒄 𑒧𑓀𑒞𑓂𑒩 𑒯𑒰𑒟𑒧𑒹 𑒁𑒏𑓂𑒭𑒞, 𑒁𑒩𑒥𑒰, 𑒥𑓂𑒩𑒲𑒯𑒱 𑒂 𑒠𑒴𑒩𑓂𑒫𑒰𑒠𑒪 𑒪𑒋 𑒂 𑒧𑓀𑒞𑓂𑒩 𑒮𑒧𑒰𑒣𑓂𑒞𑒱 𑒣𑒬𑓂𑒔𑒰𑒞 𑒩𑒰𑒖𑒰 𑒣𑒩 𑒋𑒏𑒩𑒰 𑒕𑒲𑒙𑒥𑒰𑒏 𑒂 𑒤𑒹𑒩 𑒠𑒯𑒲𑒏 𑒧𑒙𑒏𑒴𑒩𑒲𑒮𑒿 𑒠𑒯𑒲 𑒪𑒋 𑒧𑒯𑒰𑒩𑒰𑒖𑒏 𑒦𑒰𑒪 𑒣𑒩 𑒋𑒯𑒱𑒮𑒿 𑒞𑒱𑒪𑒏 𑒪𑒑𑒋𑒥𑒰𑒏 𑒫𑒩𑓂𑒝𑒢 𑒁𑒕𑒱। 𑒋𑒯𑒱 𑒣𑓂𑒩𑒏𑒩𑒝𑒧𑒹 𑒧𑒰𑒨𑒰𑒢𑒢𑓂𑒠 𑒖𑒲 𑒪𑒱𑒐𑒻𑒞 𑒕𑒟𑒱 𑒖𑒹 𑒋𑒯𑒱 𑒧𑓀𑒞𑓂𑒩𑒏, 𑒖𑒏𑒩𑒰 𑒧𑒱𑒟𑒱𑒪𑒰𑒧𑒹 𑒠𑒴𑒩𑓂𑒫𑒰𑒏𑓂𑒭𑒞 𑒧𑓀𑒞𑓂𑒩 𑒏𑒯𑒪 𑒖𑒰𑒃𑒞 𑒁𑒕𑒱, 𑒩𑒔𑒢𑒰 𑒨𑒰𑒖𑓂𑒘𑒫𑒪𑓂𑒏𑓂𑒨 𑒠𑓂𑒫𑒰𑒩𑒰 𑒫𑒰𑒖𑒮𑒢𑒹𑒨𑒲 𑒮𑓀𑒯𑒱𑒞𑒰𑒏 𑒪𑒹𑒪 𑒏𑒋𑒪 𑒑𑒹𑒪। 𑒋𑒯𑒱 𑒧𑓀𑒞𑓂𑒩𑒏 𑒅𑒣𑒨𑒼𑒑 𑒧𑒱𑒟𑒱𑒪𑒰𑒧𑒹 𑒅𑒣𑒢𑒨𑒢𑒏 𑒁𑒫𑒮𑒩 𑒣𑒩 𑒥𑒙𑒳𑒏𑒏 𑒪𑒹𑒪 𑒂 𑒫𑒱𑒫𑒰𑒯𑒏 𑒁𑒫𑒮𑒩 𑒣𑒩 𑒫𑒩-𑒫𑒡𑒳𑒏𑒏𑒹𑒿 𑒂𑒬𑒲𑒩𑓂𑒫𑒔𑒢𑒏 𑒩𑒴𑒣𑒧𑒹 𑒣𑓂𑒩𑒨𑒳𑒏𑓂𑒞 𑒯𑒼𑒁𑒋 𑒪𑒰𑒑𑒪।
𑒣𑒳𑒩𑒼𑒯𑒱𑒞𑒏 𑒁𑒢𑓂𑒞 𑒯𑒼𑒃𑒞 𑒁𑒕𑒱 𑒅𑒣𑒮𑓀𑒯𑒰𑒩𑒮𑒿। 𑒋𑒞𑒨 𑒫𑒩𑓂𑒝𑒱𑒞 𑒁𑒕𑒱, 𑒖𑒹 𑒏𑒰𑒬𑒲𑒏 𑒩𑒮𑓂𑒞𑒰𑒏 𑒁𑒢𑒰𑒩𑓂𑒨 𑒑𑓂𑒩𑒰𑒧𑒏 𑒂𑒩𑓂𑒨𑒲𑒏𑒩𑒝 𑒦𑒹𑒪 𑒂 𑒫𑓂𑒩𑒰𑒞𑓂𑒨𑒭𑓂𑒙𑒼𑒧 𑒨𑒖𑓂𑒘 𑒦𑒹𑒪। 𑒬𑒱𑒬𑓂𑒢𑒠𑒹𑒫𑒰𑓁 𑒣𑒩 𑒔𑒩𑒔𑒰 𑒁𑒕𑒱, 𑒬𑒳𑒢𑓁𑒬𑒹𑒣 𑒂𑒐𑓂𑒨𑒰𑒝 𑒂 𑒦𑒰𑒩𑒞 𑒏𑒟𑒰𑒏 𑒏𑒯𑒥𑒰𑒏 𑒣𑒩𑒧𑓂𑒣𑒩𑒰𑒏 𑒣𑓂𑒩𑒰𑒩𑒧𑓂𑒦 𑒂 𑒧𑒑𑒡 𑒠𑓂𑒫𑒰𑒩𑒰 𑒂𑒩𑓂𑒨 𑒡𑒩𑓂𑒧𑒏 𑒣𑓂𑒩𑒞𑒱 𑒫𑒱𑒞𑒵𑒭𑓂𑒝𑒰𑒏 𑒔𑒩𑓂𑒔 𑒮𑒹𑒯𑒼 𑒁𑒕𑒱।
𑒧𑒰𑒨𑒰𑒢𑒢𑓂𑒠𑒖𑒲 𑒧𑒯𑒰𑒦𑒰𑒩𑒞𑒏 𑒮𑒧𑒮𑓂𑒨𑒰𑒏 𑒮𑒧𑒰𑒡𑒰𑒢𑒧𑒹 𑒮𑒹𑒯𑒼 𑒣𑒰𑒬𑓂𑒔𑒰𑒞𑓂𑒨 𑒫𑒱𑒔𑒰𑒩𑒏 𑒪𑒼𑒏𑒢𑒱𑒏 𑒁𑒢𑒳𑒮𑒩𑒝 𑒏𑒩𑒻𑒞 𑒥𑒳𑒗𑒢𑒰 𑒖𑒰𑒃𑒞 𑒕𑒟𑒱। 𑒣𑓂𑒩𑒼𑒤𑒹𑒮𑒩 𑒫𑒹𑒥𑒩 𑒣𑒯𑒱𑒪 𑒥𑒹𑒩 𑒋𑒯𑒱 𑒮𑒱𑒠𑓂𑒡𑒰𑓀𑒞𑒏𑒹𑒿 𑒪𑒋 𑒏𑒋 𑒂𑒋𑒪 𑒕𑒪𑒰𑒯। 𑒍 𑒁𑒣𑒢 𑒫𑒱𑒔𑒰𑒩 𑒫𑓂𑒨𑒏𑓂𑒞 𑒏𑒋𑒢𑒹 𑒕𑒪𑒰𑒯 𑒖𑒹 𑓘𑓘𑓐𑓐 𑒣𑒠𑓂𑒨𑒏 𑒖𑒨 𑒮𑓀𑒯𑒱𑒞𑒰 𑒕𑒪 𑒂 𑒣𑒯𑒱𑒢𑒹 𑒨𑒳𑒠𑓂𑒡 𑒣𑒩𑓂𑒫 (𑓑𑓘 𑒣𑒩𑓂𑒫 𑒧𑒹 𑒔𑒰𑒩𑒱 𑒣𑒩𑓂𑒫 𑒦𑒲𑒭𑓂𑒧, 𑒠𑓂𑒩𑒼𑒝, 𑒏𑒩𑓂𑒝 𑒂 𑒬𑒪𑓂𑒨 𑒣𑒩𑓂𑒫) 𑒧𑒰𑒞𑓂𑒩 𑒕𑒪। 𑒍𑒏𑒩 𑒂𑒡𑒰𑒩 𑒍 𑒥𑒢𑒹𑒢𑒹 𑒕𑒪𑒰𑒯 𑒋𑒏𑒙𑒰 𑒬𑓂𑒪𑒼𑒏𑒏𑒹𑒿-
𑒁𑒭𑓂𑒙𑒾𑒬𑓂𑒪𑒼𑒏 𑒮𑒯𑒮𑓂𑒩𑒰𑒝𑒱..... 𑒁𑒯𑓀 𑒫𑒹𑒠𑓂𑒧𑒱 𑒬𑒳𑒏𑒼 𑒫𑒹𑒞𑓂𑒞𑒱 𑒮𑒘𑓂𑒖𑒨𑒼 𑒫𑒹𑒞𑓂𑒞𑒱 𑒫𑒰 𑒢 𑒫𑒰
𑒮𑓀𑒖𑒨, 𑒫𑓂𑒨𑒰𑒮 𑒂 𑒬𑒳𑒏 𑒞𑒲𑒢𑒴 𑒑𑒼𑒙𑒹 𑓘𑓘𑓐𑓐-𑓘𑓘𑓐𑓐 𑒣𑓂𑒩𑒞𑓂𑒨𑒹𑒏 𑒏𑒋 𑒦𑒰𑒩𑒞𑒏 𑒬𑓂𑒪𑒼𑒏 𑒧𑒰𑒞𑓂𑒩 𑒮𑓂𑒧𑒩𑒝 𑒏𑒋 𑒮𑒏𑒪 𑒕𑒪𑒰𑒯। 𑒧𑒰𑒢𑒹 𑒦𑒰𑒩𑒞 𑒋𑒞𑒹𑒏 𑒫𑒱𑒬𑒰𑒪 𑒕𑒪 𑒖𑒹 𑒣𑓂𑒩𑒞𑓂𑒨𑒹𑒏 𑒑𑒼𑒙𑒹 𑒮𑒧𑓂𑒣𑒴𑒩𑓂𑒝 𑒮𑓂𑒧𑒩𑒝 𑒢𑒯𑒱 𑒏𑒋 𑒮𑒏𑒪 𑒕𑒪𑒰𑒯 𑒂 𑒞𑒰𑒯𑒱 𑒠𑒵𑒭𑓂𑒙𑒱𑒮𑒿 𑒦𑒰𑒩𑒞 𑒏𑒯𑒱𑒨𑒼 𑓒𑓖𑓔𑓐𑓐 𑒬𑓂𑒪𑒼𑒏𑒮𑒿 𑒏𑒧 𑒢𑒯𑒱 𑒕𑒪, 𑒖𑒏𑒩𑒰 𑒫𑓂𑒨𑒰𑒮 𑒪𑒱𑒐𑒢𑒹 𑒕𑒪𑒰𑒯। 𑒖𑒨 𑒮𑓀𑒯𑒱𑒞𑒰 𑒦𑒰𑒩𑒞 𑒂 𑒧𑒯𑒰𑒦𑒰𑒩𑒞 𑒠𑒳𑒢𑒴𑒏𑒹𑒿 𑒏𑒯𑒪 𑒖𑒰𑒃𑒞 𑒕𑒻। 𑒨𑒳𑒠𑓂𑒡 𑒣𑒩𑓂𑒫 (𑓑𑓘 𑒣𑒩𑓂𑒫 𑒧𑒹 𑒔𑒰𑒩𑒱 𑒣𑒩𑓂𑒫 𑒦𑒲𑒭𑓂𑒧, 𑒠𑓂𑒩𑒼𑒝, 𑒏𑒩𑓂𑒝 𑒂 𑒬𑒪𑓂𑒨 𑒣𑒩𑓂𑒫) 𑒞𑒹𑒢𑒰 𑒢𑒹 𑒣𑒩𑒮𑓂𑒣𑒩 𑒠𑒼𑒮𑒩 𑒣𑒩𑓂𑒫 𑒮𑒦𑒮𑒿 𑒖𑒳𑒛𑓃𑒪 𑒁𑒕𑒱 𑒖𑒹 𑒥𑒱𑒢𑒰 𑒣𑒕𑒱𑒪𑒰 𑒣𑒩𑓂𑒫 𑒣𑒜𑓃𑒢𑒹 𑒁𑒑𑒱𑒪𑒰𑒏 𑒏𑒼𑒢𑒼 𑒦𑒰𑒿𑒖 𑒢𑒯𑒱 𑒪𑒑𑒻𑒞 𑒕𑒻। 𑒃𑒪𑒱𑒨𑒛𑒏 𑒨𑒳𑒠𑓂𑒡 𑓑𑓐 𑒮𑒰𑒪 𑒡𑒩𑒱 𑒔𑒪𑒪 𑒕𑒪 𑒧𑒳𑒠𑒰 𑒃𑒪𑒱𑒨𑒛 𑒧𑒰𑒞𑓂𑒩 𑒙𑓂𑒩𑒰𑒨𑒏 𑒒𑒹𑒩𑒰 𑒡𑒩𑒱 𑒮𑒲𑒧𑒱𑒞 𑒕𑒪। 𑒧𑒳𑒠𑒰 𑒧𑒯𑒰𑒦𑒰𑒩𑒞 𑒥𑒯𑒳𑒞 𑒣𑒯𑒱𑒢𑒹 𑒮𑒿 𑓑𑓘 𑒠𑒱𑒢𑒳𑒏𑒰 𑒨𑒳𑒠𑓂𑒡𑒏 𑒏𑒰𑒩𑒝𑒮𑒿 𑒬𑒳𑒩𑒳 𑒯𑒼𑒃𑒞 𑒁𑒕𑒱। 𑒦𑒲𑒭𑓂𑒧 𑒣𑒩𑓂𑒫 𑒕𑒚𑒧 𑒣𑒩𑓂𑒫 𑒁𑒕𑒱, 𑒠𑓂𑒩𑒼𑒝 𑒣𑒩𑓂𑒫 𑒮𑒰𑒞𑒧, 𑒏𑒩𑓂𑒝 𑒣𑒩𑓂𑒫 𑒂𑒚𑒧 𑒂 𑒬𑒪𑓂𑒨 𑒣𑒩𑓂𑒫 𑒢𑒫𑒧। 𑒞𑒏𑒩𑒰 𑒥𑒰𑒠 𑓙 𑒙𑒰 𑒣𑒩𑓂𑒫 𑒂𑒩 𑒁𑒕𑒱।
𑒏𑒱𑒋𑒏 𑒞𑒿 𑒏𑒻𑒏 𑒥𑒻𑒮𑒰𑒩𑒲𑒧𑒹 𑒧𑒯𑒰𑒦𑒰𑒩𑒞 𑒏𑒹𑒩 𑒣𑒰𑒚 𑒮𑒳𑒢𑒰𑒍𑒪 𑒖𑒰𑒃𑒞 𑒕𑒪 𑒞𑒰𑒯𑒱 𑒠𑓂𑒫𑒰𑒩𑒹 𑒄 𑒮𑓂𑒫𑒰𑒦𑒰𑒫𑒱𑒏 𑒁𑒕𑒱 𑒖𑒹 𑒣𑒳𑒩𑒰𑒢 𑒣𑒰𑒚 𑒮𑒦 𑒖𑒹 𑒦𑒋 𑒔𑒳𑒏𑒪 𑒕𑒪 𑒏𑒹𑒩 𑒤𑒹𑒩𑒮𑒿 𑒣𑒳𑒢𑓁𑒮𑓂𑒧𑒩𑒝 𑒥𑒹𑒩-𑒥𑒹𑒩 𑒏𑒋𑒪 𑒖𑒰𑒃𑒞 𑒕𑒪। 𑒞𑒰𑒯𑒱𑒮𑒿 𑒄 𑒁𑒩𑓂𑒟 𑒢𑒱𑒏𑒰𑒪𑒥 𑒖𑒹 𑒄 𑒏𑓂𑒭𑒹𑒣𑒏 𑒁𑒕𑒱, 𑒁𑒢𑒩𑓂𑒑𑒪 𑒯𑒼𑒋𑒞। 𑒞𑒯𑒱𑒢𑒰 𑒑𑒲𑒞𑒰 𑒮𑒹𑒯𑒼 𑒣𑒰𑒬𑓂𑒔𑒰𑒞𑓂𑒨 𑒫𑒱𑒠𑓂𑒫𑒰𑒢 𑒪𑒼𑒏𑒢𑒱𑒏 𑒪𑒹𑒪 𑒏𑓂𑒭𑒹𑒣𑒏 𑒁𑒕𑒱 𑒏𑒰𑒩𑒝 𑒍 𑒪𑒼𑒏𑒢𑒱 𑒦𑒰𑒩𑒞𑒲𑒨 𑒮𑓀𑒮𑓂𑒏𑒵𑒞𑒱, 𑒮𑒰𑒯𑒱𑒞𑓂𑒨 𑒂 𑒏𑒪𑒰𑒏 𑒁𑒢𑒳𑒦𑒫 𑒫𑒱𑒠𑒹𑒬𑒲 𑒧𑒰𑒢𑒮𑒱𑒏𑒞𑒰𑒮𑒿 𑒏𑒩𑒥𑒰𑒏 𑒏𑒰𑒩𑒝 𑒑𑒪𑒞𑒲 𑒏𑒩𑒻𑒞 𑒕𑒟𑒱। 𑒫𑒱𑒠𑒹𑒬𑒲 𑒫𑒱𑒠𑓂𑒫𑒰𑒢 𑒄 𑒧𑒰𑒢𑒥𑒰𑒧𑒹 𑒏𑒭𑓂𑒙 𑒁𑒢𑒳𑒦𑒫 𑒏𑒩𑒻𑒞 𑒕𑒟𑒱 𑒖𑒹 𑒧𑒯𑒰𑒦𑒰𑒩𑒞 𑒍𑒞𑒹𑒏 𑒣𑒳𑒩𑒰𑒢 𑒦𑒹𑒪𑒰𑒏 𑒥𑒰𑒠𑒼 𑒍𑒞𑒹𑒏 𑒫𑒵𑒯𑒞𑓂 𑒁𑒕𑒱 𑒂 𑒃𑒪𑒱𑒨𑒛 𑒍𑒏𑒩 𑒮𑒼𑒗𑒰𑒿 𑒏𑒱𑒕𑒳 𑒢𑒯𑒱 𑒁𑒕𑒱। 𑒮𑒹 𑒋𑒏 𑒑𑒼𑒙 𑒣𑒠𑓂𑒨𑒏 𑒫𑒹𑒥𑒩 𑒠𑓂𑒫𑒰𑒩𑒰 𑒏𑒋𑒪 𑒑𑒹𑒪 𑒧𑒱𑒟𑓂𑒨𑒰 𑒫𑓂𑒨𑒰𑒐𑓂𑒨𑒰𑒏 𑒂𑒡𑒰𑒩 𑒣𑒩 𑒖𑒨 𑒮𑓀𑒯𑒱𑒞𑒰 𑒏𑒹𑒩 𑒮𑓀𑒏𑒪𑓂𑒣𑒢𑒰 𑒂𑒋𑒪। 𑒧𑒰𑒞𑓂𑒩 𑒦𑒰𑒩𑒞 𑒂 𑒧𑒯𑒰𑒦𑒰𑒩𑒞 𑒏𑒹𑒩 𑒩𑒴𑒣𑒧𑒹 𑒋𑒯𑒱 𑒧𑒯𑒰𑒏𑒰𑒫𑓂𑒨𑒏 𑒫𑒱𑒏𑒰𑒮𑒏𑒹𑒿 𑒥𑒱𑒢𑒰 𑒏𑒼𑒢𑒼 𑒏𑒰𑒩𑒝𑒮𑒿 𑒖𑒨 𑒮𑓀𑒯𑒱𑒞𑒰, 𑒦𑒰𑒩𑒞 𑒂 𑒧𑒯𑒰𑒦𑒰𑒩𑒞 𑒩𑒴𑒣𑒲 𑒞𑒲𑒢 𑒔𑒩𑒝𑒧𑒹 𑒣𑓂𑒩𑒮𑓂𑒞𑒳𑒞 𑒏𑒋𑒪 𑒑𑒹𑒪। 𑒧𑒯𑒰𑒦𑒰𑒩𑒞 𑒏𑒹𑒩 𑒮𑒦𑒮𑒿 𑒕𑒼𑒙 𑒩𑒴𑒣𑒧𑒹 𑒮𑒹𑒯𑒼 𑓒𑓔𑓖𑓐𑓐 𑒮𑒿 𑒏𑒧 𑒬𑓂𑒪𑒼𑒏 𑒢𑒯𑒱 𑒕𑒪 𑒂 𑒖𑒨 𑒮𑓀𑒯𑒱𑒞𑒰 𑒦𑒰𑒩𑒞 𑒂 𑒧𑒯𑒰𑒦𑒰𑒩𑒞𑒏𑒹𑒿 𑒮𑒧𑓂𑒧𑒱𑒪𑒱𑒞 𑒩𑒴𑒣𑒮𑒿 𑒏𑒯𑒪 𑒖𑒰𑒃𑒞 𑒕𑒪।
𑒮𑓂𑒞𑓂𑒩𑒲𑒡𑒢
𑒄 𑒑𑓂𑒩𑒢𑓂𑒟 𑒧𑒰𑒨𑒰𑒢𑒢𑓂𑒠 𑒥𑒰𑒥𑒴𑒏 𑒃𑒞𑒱𑒯𑒰𑒮 𑒥𑒼𑒡𑒏 𑒁𑒢𑓂𑒞𑒱𑒧 𑒏𑒛𑓃𑒲 𑒁𑒕𑒱। 𑒣𑓂𑒩𑒰𑒑𑒻𑒞𑒱𑒯𑒰𑒮𑒱𑒏 “𑒣𑓂𑒩𑒟𑒧 𑒬𑒻𑒪𑒣𑒳𑒞𑓂𑒩𑒲 𑒔”, 𑒇𑒑𑒫𑒹𑒠𑒱𑒏 𑒏𑒰𑒪𑒲𑒢 “𑒧𑓀𑒞𑓂𑒩𑒣𑒳𑒞𑓂𑒩”, 𑒅𑒞𑓂𑒞𑒩𑒫𑒻𑒠𑒱𑒏𑒏𑒰𑒪𑒲𑒢 “𑒣𑒳𑒩𑒼𑒯𑒱𑒞” 𑒏𑒹𑒩 𑒥𑒰𑒠 𑒄 𑒣𑒳𑒮𑓂𑒞𑒏 𑒮𑒴𑒞𑓂𑒩-𑒮𑓂𑒧𑒵𑒞𑒱𑒏𑒰𑒪𑒲𑒢 𑒁𑒕𑒱, 𑒄 𑒑𑓂𑒩𑓀𑒟 𑒯𑒱𑒢𑓂𑒠𑒲𑒧𑒹 𑒁𑒕𑒱। 𑒂 𑒄 𑒮𑒴𑒞𑓂𑒩-𑒮𑓂𑒧𑒵𑒞𑒱𑒏𑒰𑒪𑒲𑒢 𑒅𑒣𑒢𑓂𑒨𑒰𑒮 𑒧𑒱𑒟𑒱𑒪𑒰 𑒣𑒩 𑒂𑒡𑒰𑒩𑒱𑒞 𑒁𑒕𑒱। 𑒄 𑒣𑒼𑒟𑒲 𑒣𑓂𑒩𑒰𑒩𑒧𑓂𑒦 𑒯𑒼𑒃𑒞 𑒁𑒕𑒱 𑒧𑒰𑒨𑒰𑒢𑒢𑓂𑒠𑒖𑒲𑒏 𑒣𑓂𑒩𑒮𑓂𑒞𑒰𑒫𑒢𑒰𑒮𑒿 𑒖𑒏𑒩 𑒢𑒰𑒧 𑒋𑒯𑒱 𑒐𑒝𑓂𑒛𑒧𑒹 “𑒣𑒶𑒭𑓂𑒚𑒦𑒴𑒧𑒱” 𑒁𑒕𑒱। 𑒋𑒞𑒋 𑒧𑒰𑒨𑒰𑒢𑒢𑓂𑒠𑒖𑒲 𑒩𑒰𑒧𑒰𑒨𑒝-𑒧𑒯𑒰𑒦𑒰𑒩𑒞 𑒏𑒹𑒩 𑒏𑒰𑒪 𑒑𑒝𑒢𑒰𑒏 𑒥𑒰𑒠 𑒃𑒞𑒱𑒯𑒰𑒮𑒏𑒰𑒩 𑒪𑒼𑒏𑒢𑒱𑒏 𑒋𑒏𑒧𑒰𑒞𑓂𑒩 𑒮𑒰𑒏𑓂𑒭𑓂𑒨 𑒬𑒞𑒣𑒟 𑒥𑓂𑒩𑒰𑒯𑓂𑒧𑒝𑒏 𑒔𑒩𑓂𑒔 𑒏𑒩𑒻𑒞 𑒕𑒟𑒱।
𑒧𑒱𑒟𑒱𑒪𑒰𑒏 𑒣𑓂𑒩𑒰𑒔𑒲𑒢𑒞𑒧 𑒢𑒰𑒧 𑒫𑒱𑒠𑒹𑒯 𑒕𑒪, 𑒖𑒏𑒩 𑒣𑓂𑒩𑒟𑒧 𑒫𑒩𑓂𑒝𑒢 𑒬𑒞𑒣𑒟 𑒥𑓂𑒩𑒰𑒯𑓂𑒧𑒝𑒧𑒹 𑒂𑒋𑒪 𑒁𑒕𑒱। 𑒮𑒰𑒩𑓂𑒟-𑒑𑒧𑒢𑒏 𑒣𑓂𑒩𑒏𑓂𑒩𑒱𑒨𑒰𑒏 𑒫𑒱𑒮𑓂𑒞𑒵𑒞 𑒫𑒩𑓂𑒝𑒢 𑒋𑒯𑒱 𑒑𑓂𑒩𑒢𑓂𑒟𑒧𑒹 𑒁𑒕𑒱, 𑒮𑒹 𑒧𑒰𑒨𑒰𑒢𑒢𑓂𑒠 𑒖𑒲 𑒏𑒯𑒻𑒞 𑒕𑒟𑒱।
𑒄 𑒑𑓂𑒩𑒢𑓂𑒟 𑒣𑓂𑒩𑒟𑒧 𑒂 𑒠𑓂𑒫𑒱𑒞𑒲𑒨 𑒠𑒴 𑒁𑒡𑓂𑒨𑒰𑒨𑒧𑒹 𑒁𑒕𑒱 𑒂 𑒁𑒢𑓂𑒞𑒧𑒹 𑒅𑒣𑒮𑓀𑒯𑒰𑒩 𑒁𑒕𑒱। 𑒣𑓂𑒩𑒟𑒧 𑒁𑒡𑓂𑒨𑒰𑒨𑒧𑒹 𑒣𑓂𑒩𑒟𑒧𑒮𑒿 𑒢𑒫𑒧 𑒢𑒾 𑒙𑒰 𑒮𑒞𑓂𑒩 𑒁𑒕𑒱। 𑒠𑓂𑒫𑒱𑒞𑒲𑒨 𑒁𑒡𑓂𑒨𑒰𑒨𑒧𑒹 𑒣𑓂𑒩𑒟𑒧𑒮𑒿 𑒁𑒭𑓂𑒙𑒧 𑒄 𑒂𑒚 𑒙𑒰 𑒮𑒩𑓂𑒑 𑒁𑒕𑒱।

𑒣𑓂𑒩𑒟𑒧 𑒁𑒡𑓂𑒨𑒰𑒨
𑒣𑓂𑒩𑒟𑒧 𑒮𑒞𑓂𑒩
𑒋𑒯𑒱𑒧𑒹 𑒮𑒵𑓀𑒖𑒨 𑒠𑓂𑒫𑒰𑒩𑒰 𑒏𑒋𑒪 𑒖𑒰 𑒩𑒯𑒪 𑒡𑒩𑓂𑒧-𑒣𑒬𑓂𑒔𑒰𑒞𑓂𑒞𑒰𑒣 𑒮𑓂𑒫𑒩𑒴𑒣 𑒦𑒱𑒏𑓂𑒭𑒰𑒙𑒢𑒏, 𑒣𑒞𑓂𑒢𑒲-𑒞𑓂𑒨𑒰𑒑𑒲 𑒯𑒼𑒋𑒥𑒰𑒏 𑒏𑒰𑒩𑒝 𑒕𑒯 𑒧𑒰𑒮 𑒡𑒩𑒱 𑒢𑒱𑒩𑒢𑓂𑒞𑒩 𑒋𑒏𑒙𑒰 𑒧𑒯𑒰𑒫𑓂𑒩𑒞 𑒏𑒹𑒩 𑒣𑒰𑒪𑒢 𑒏𑒩𑒥𑒰𑒏 𑒔𑒩𑒔𑒰 𑒁𑒕𑒱।
“𑒠𑓂𑒫𑒱𑒞𑒲𑒨 𑒫𑒩” 𑒏𑒹𑒩 𑒮𑒹𑒯𑒼 𑒔𑒩𑒔𑒰 𑒁𑒕𑒱।
𑒠𑓂𑒫𑒱𑒞𑒲𑒨 𑒮𑒞𑓂𑒩
𑒩𑒰𑒖𑒰 𑒥𑒯𑒳𑒪𑒰𑒬𑓂𑒫 𑒖𑒢𑒏𑒏 𑒖𑓂𑒨𑒹𑒭𑓂𑒚 𑒣𑒳𑒞𑓂𑒩 𑒏𑒩𑒰𑒪 𑒖𑒢𑒏𑒏𑒹𑒿 𑒩𑒰𑒖𑒫𑓀𑒬𑒏 𑒏𑒾𑒪𑒱𑒏 𑒣𑒩𑒧𑓂𑒣𑒩𑒰𑒏 𑒁𑒢𑒳𑒮𑒰𑒩 𑒮𑒱𑓀𑒯𑒰𑒮𑒢 𑒦𑒹𑒙𑒪𑒢𑓂𑒯𑒱, 𑒞𑒏𑒩 𑒫𑒩𑓂𑒝𑒢 𑒁𑒕𑒱।
𑒞𑒵𑒞𑒲𑒨 𑒮𑒞𑓂𑒩
𑒋𑒞𑒋 𑒣𑒳𑒩𑒰𑒢 𑒂 𑒢𑒫𑒏 𑒮𑓀𑒒𑒩𑓂𑒭 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱। 𑒫𑒰𑒩𑒳𑒝𑒲 𑒋𑒏 𑒚𑒰𑒧 𑒏𑒯𑒻𑒞 𑒕𑒟𑒱 𑒖𑒹 𑒖𑒐𑒢 𑒣𑒴𑒖𑓂𑒨 𑒞𑒰𑒞 𑒯𑒳𑒢𑒏𑒩 𑒫𑒱𑒡𑒱𑒫𑒞 𑒅𑒣𑒢𑒨𑒢 𑒏𑒩𑒥𑒍𑒪𑒢𑓂𑒯𑒱, 𑒥𑓂𑒩𑒯𑓂𑒧𑒔𑒩𑓂𑒨 𑒂𑒬𑓂𑒩𑒧𑒧𑒹 𑒫𑒱𑒡𑒱𑒫𑒞 𑒣𑓂𑒩𑒰𑒔𑒲𑒢 𑒏𑒰𑒪𑒏 𑒁𑒢𑒳𑒮𑒰𑒩 𑒬𑓂𑒩𑒳𑒞𑒱𑒏 𑒬𑒱𑒏𑓂𑒭𑒰 𑒠𑒹𑒪𑒢𑓂𑒯𑒱, 𑒞𑒿 𑒂𑒥 𑒯𑒧𑒯𑒴𑒿 𑒦𑒠𑓂𑒩𑒰 𑒏𑒢𑓂𑒨𑒰 𑒥𑒢𑒱 𑒁𑒣𑒢 𑒫𑒩𑒣𑒰𑒞𑓂𑒩𑒏 𑒢𑒱𑒩𑓂𑒫𑒰𑒔𑒢 𑒮𑓂𑒫𑒨𑓀 𑒏𑒋 𑒫𑒱𑒫𑒰𑒯 𑒏𑒩𑒋 𑒔𑒰𑒯𑒻𑒞 𑒕𑒲।
𑒔𑒞𑒳𑒩𑓂𑒟 𑒮𑒞𑓂𑒩
𑒋𑒞𑒋 𑒏𑒩𑒰𑒪 𑒖𑒢𑒏𑒏 𑒫𑒱𑒩𑒳𑒠𑓂𑒡 𑒫𑒱𑒠𑓂𑒩𑒼𑒯𑒏 𑒮𑒳𑒑𑒥𑒳𑒑𑒰𑒯𑒙𑒱𑒏 𑒔𑒩𑒔𑒰 𑒁𑒕𑒱। 𑒏𑒵𑒞𑒱 𑒖𑒢𑒏 𑒂 𑒥𑒯𑒳𑒪𑒰𑒬𑓂𑒫 𑒖𑒢𑒏𑒏 𑒏𑒰𑒪𑒧𑒹 𑒦𑒹𑒪 𑒢𑓂𑒨𑒰𑒨𑒣𑒴𑒩𑓂𑒝 𑒂 𑒣𑓂𑒩𑒖𑒰𑒯𑒱𑒞𑒏𑒰𑒩𑒲 𑒏𑒪𑓂𑒨𑒰𑒝𑒏𑒰𑒩𑒲 𑒏𑒰𑒩𑓂𑒨𑒏 𑒔𑒩𑒔𑒰 𑒦𑒹𑒪 𑒁𑒕𑒱 𑒞𑒿 𑒮𑓀𑒑𑒯𑒱 𑒮𑒲𑒩𑒡𑓂𑒫𑒖 𑒖𑒢𑒏𑒏 𑒮𑒧𑒨𑒮𑒿 𑒦𑒹𑒪 𑒧𑒱𑒟𑒱𑒪𑒰𑒏 𑒩𑒰𑒖𑓂𑒨-𑒫𑒱𑒮𑓂𑒞𑒰𑒩𑒏 𑒔𑒩𑒔𑒰 𑒮𑒹𑒯𑒼 𑒁𑒕𑒱। 𑒥𑒯𑒳𑒪𑒰𑒬𑓂𑒫 𑒧𑒩𑒻𑒞 𑒏𑒰𑒪 𑒁𑒣𑒢 𑒣𑒳𑒞𑓂𑒩 𑒏𑒩𑒰𑒪𑒏𑒹𑒿 𑒂𑒔𑒰𑒩𑓂𑒨 𑒫𑒩𑒹𑒝𑓂𑒨 𑒁𑒑𑓂𑒩𑒰𑒧𑒰𑒞𑓂𑒨𑒐𑒝𑓂𑒛 𑒏𑒹𑒩 𑒅𑒣𑒹𑒏𑓂𑒭𑒰-𑒁𑒫𑒯𑒹𑒪𑒢𑒰 𑒢𑒯𑒱 𑒏𑒩𑒥𑒰𑒏 𑒪𑒹𑒪 𑒏𑒯𑒢𑒹 𑒕𑒪𑒐𑒱𑒢𑓂𑒯 𑒧𑒳𑒠𑒰 𑒏𑒰𑒪𑒰𑒢𑓂𑒞𑒩𑒧𑒹 𑒫𑒻𑒯 𑒏𑒩𑒰𑒪 𑒖𑒢𑒏 𑒁𑒑𑓂𑒩𑒰𑒧𑒰𑒞𑓂𑒨𑒏 𑒅𑒣𑒹𑒏𑓂𑒭𑒰-𑒁𑒫𑒯𑒹𑒪𑒢𑒰 𑒏𑒩𑒋 𑒪𑒑𑒪𑒰𑒯। 𑒂𑒔𑒰𑒩𑓂𑒨 𑒫𑒩𑒹𑒝𑓂𑒨-𑒐𑒝𑓂𑒛 𑒧𑒱𑒟𑒱𑒪𑒰𑒮𑒿 𑒣𑒪𑒰𑒨𑒢 𑒏𑒋 𑒑𑒹𑒪𑒰𑒯।
𑒣𑓀𑒔𑒧 𑒮𑒞𑓂𑒩
𑒣𑓂𑒩𑒝𑒱𑒣𑒰𑒞, 𑒂𑒬𑒲𑒩𑓂𑒫𑒔𑒢 𑒂 𑒏𑒳𑒬𑒪-𑒏𑓂𑒭𑒹𑒧𑒏 𑒎𑒣𑒔𑒰𑒩𑒱𑒏𑒞𑒰𑒏 𑒫𑒩𑓂𑒝𑒢 𑒁𑒕𑒱 𑒂 𑒮𑓂𑒞𑓂𑒩𑒲𑒡𑒢𑒏 𑒔𑒩𑒔𑒰 𑒮𑒹𑒯𑒼 𑒑𑒣-𑒬𑒣𑒏 𑒏𑓂𑒩𑒧𑒧𑒹 𑒂𑒋𑒪 𑒁𑒕𑒱। 𑒄𑒯𑒼 𑒫𑒩𑓂𑒝𑒢 𑒂𑒋𑒪 𑒁𑒕𑒱 𑒖𑒹 𑒫𑒻𑒬𑒰𑒪𑒲 𑒏𑒱𑒕𑒳 𑒠𑒱𑒢 𑒏𑒾𑒬𑒪𑒏 𑒁𑒡𑒲𑒢 𑒕𑒪 𑒂 𑒦𑒰𑒩𑒞-𑒨𑒳𑒠𑓂𑒡𑒧𑒹 𑒍 𑒧𑒱𑒟𑒱𑒪𑒰𑒏 𑒁𑒡𑒲𑒢 𑒕𑒪। 𑒫𑒢𑓂𑒨 𑒦𑒴𑒧𑒱𑒏𑒹𑒿 𑒏𑒵𑒭𑒱-𑒨𑒼𑒑𑓂𑒨 𑒥𑒢𑒹𑒥𑒰𑒏 𑒅𑒣𑒩𑒰𑒢𑓂𑒞 𑒣𑒰𑒿𑒔 𑒥𑒮𑒢𑓂𑒞 𑒡𑒩𑒱 𑒏𑒩-𑒧𑒳𑒏𑓂𑒞 𑒏𑒩𑒥𑒰𑒏 𑒣𑒩𑒧𑓂𑒣𑒩𑒰𑒏𑒹𑒿 𑒩𑒰𑒖𑒰 𑒏𑒩𑒰𑒪 𑒖𑒢𑒏 𑒠𑓂𑒫𑒰𑒩𑒰 𑒞𑒼𑒛𑓃𑒱 𑒠𑒹𑒥𑒰𑒏 𑒔𑒩𑒔𑒰 𑒁𑒕𑒱।
𑒭𑒭𑓂𑒚 𑒮𑒞𑓂𑒩
𑒣𑒰𑓀𑒔𑒰𑒪-𑒖𑒢 𑒠𑓂𑒫𑒰𑒩𑒰 𑒁𑓀𑒡𑒏 𑒫𑒵𑒭𑓂𑒝𑒱𑒏 𑒢𑒰𑒨𑒏 𑒫𑒰𑒮𑒳𑒠𑒹𑒫 𑒏𑒵𑒭𑓂𑒝𑒏𑒹𑒿 𑒖𑒨-𑒏𑒰𑒫𑓂𑒨𑒏 𑒢𑒰𑒨𑒏 𑒧𑒰𑒢𑒪 𑒖𑒋𑒥𑒰𑒏 𑒔𑒩𑒔𑒰 𑒁𑒕𑒱। 𑒖𑒨-𑒏𑒰𑒫𑓂𑒨 𑒂 𑒦𑒰𑒩𑒞-𑒏𑒰𑒫𑓂𑒨𑒏 𑒣𑒬𑓂𑒔𑒱𑒧𑒏 𑒅𑒔𑓂𑒕𑒱𑒭𑓂𑒙 𑒦𑒼𑒖 𑒧𑒰𑒨𑒰𑒢𑒢𑓂𑒠𑒖𑒲𑒏 𑒧𑒼𑒢𑒮𑒿 𑒢𑒯𑒱 𑒯𑒙𑒪𑒢𑓂𑒯𑒱 𑒂 𑒖𑒨-𑒏𑒰𑒫𑓂𑒨𑒧𑒹 𑒧𑒳𑒢𑒱 𑒫𑒻𑒬𑒧𑓂𑒣𑒰𑒨𑒢 𑒫𑓂𑒨𑒰𑒮 𑒠𑓂𑒫𑒰𑒩𑒰 𑒥𑒯𑒳𑒞 𑒩𑒰𑒮 𑒬𑓂𑒪𑒼𑒏 𑒖𑒼𑒛𑓃𑒱 𑒫𑒵𑒯𑒞𑒏𑒰𑒨 𑒦𑒰𑒩𑒞 𑒏𑒰𑒫𑓂𑒨 𑒥𑒢𑒰𑒍𑒪 𑒖𑒋𑒥𑒰𑒏 𑒧𑒱𑒟𑓂𑒨𑒰 𑒞𑒟𑓂𑒨𑒏 𑒤𑒹𑒩𑒮𑒿 𑒔𑒩𑒔𑒰 𑒁𑒕𑒱। 𑒖𑒨𑒏𑒰𑒫𑓂𑒨𑒏 𑒪𑒹𑒐𑒏 𑒏𑒵𑒭𑓂𑒝 𑒠𑓂𑒫𑒻𑒣𑒰𑒨𑒢 𑒫𑓂𑒨𑒰𑒮𑒏𑒹𑒿 𑒥𑒞𑒰𑒍𑒪 𑒑𑒹𑒪 𑒁𑒕𑒱। 𑒂 𑒋𑒏𑒩 𑒥𑒹𑒩-𑒥𑒹𑒩 𑒔𑒩𑒔𑒰 𑒏𑒋𑒪 𑒑𑒹𑒪 𑒁𑒕𑒱 𑒖𑒹𑒢𑒰 𑒏𑒼𑒢𑒼 𑒫𑒱𑒬𑒹𑒭 𑒞𑒟𑓂𑒨 𑒯𑒼𑒁𑒋।
𑒤𑒹𑒩 𑒠𑒹𑒫𑒞𑓂𑒫𑒏 𑒫𑒱𑒏𑒰𑒮𑒣𑒩 𑒮𑒹𑒯𑒼 𑒔𑒩𑒔𑒰 𑒁𑒕𑒱। 𑒮𑒩𑒮𑓂𑒫𑒞𑒲 𑒡𑒰𑒩𑒏 𑒁𑒏𑒮𑓂𑒧𑒰𑒞𑓂 𑒮𑒴𑒐𑒱 𑒖𑒋𑒥𑒰𑒏 𑒮𑒹𑒯𑒼 𑒔𑒩𑒔𑒰 𑒁𑒕𑒱।
𑒮𑒩𑒮𑓂𑒫𑒞𑒲𑒏 𑒧𑒴𑒩𑓂𑒞𑒱𑒣𑒴𑒖𑒢𑒏 𑒣𑓂𑒩𑒰𑒩𑒧𑓂𑒦𑒏 𑒂 𑒧𑒰𑒞𑒵𑒠𑒹𑒫𑒲𑒏 𑒮𑒹𑒯𑒼 𑒔𑒩𑒔𑒰 𑒦𑒹𑒪 𑒁𑒕𑒱।
𑒮𑒣𑓂𑒞𑒧𑓂 𑒮𑒞𑓂𑒩
𑒮𑒩𑒮𑓂𑒫𑒞𑒲𑒏𑒹𑒿 𑒧𑒰𑒞𑒵𑒠𑒹𑒫𑒲 𑒥𑒢𑒰𑒏𑒋 𑒏𑒰𑒪𑓂𑒣𑒢𑒱𑒏 𑒮𑒩𑒮𑓂𑒫𑒞𑒲 𑒣𑓂𑒩𑒞𑒱𑒧𑒰-𑒣𑒴𑒖𑒢𑒏 𑒔𑒩𑒔𑒰 𑒁𑒕𑒱। 𑒧𑒱𑒟𑒱𑒪𑒰𑒧𑒹 𑒣𑒞𑒱𑒏 𑒢𑒰𑒧 𑒢𑒯𑒱 𑒪𑒹𑒥𑒰𑒏 𑒣𑒩𑒧𑓂𑒣𑒩𑒰𑒏 𑒮𑒹𑒯𑒼 𑒔𑒩𑒔𑒰 𑒦𑒹𑒪 𑒁𑒕𑒱।
𑒁𑒭𑓂𑒙𑒧𑓂 𑒮𑒞𑓂𑒩
𑒩𑒰𑒖𑒰𑒏 𑒁𑒞𑓂𑒨𑒰𑒔𑒰𑒩 𑒔𑒩𑒧 𑒣𑒩 𑒣𑒯𑒳𑒿𑒔𑒱 𑒑𑒹𑒪 𑒁𑒕𑒱। 𑒁𑒣𑒴𑒩𑓂𑒫𑒰 𑒠𑓂𑒫𑒰𑒩𑒰 𑒫𑒱𑒫𑒬𑒞𑒰𑒣𑒴𑒩𑓂𑒫𑒏 𑒑𑒰𑒩𑓂𑒯𑒮𑓂𑒟𑓂𑒨 𑒞𑓂𑒨𑒰𑒑 𑒂 𑒮𑓂𑒞𑓂𑒩𑒲𑒡𑒢 𑒮𑒹𑒯𑒼 𑒕𑒼𑒛𑓃𑒥𑒰𑒏 𑒔𑒩𑒔𑒰 𑒦𑒹𑒪 𑒁𑒕𑒱।
𑒢𑒫𑒧𑓂 𑒮𑒞𑓂𑒩
𑒮𑒋𑒮𑒿 𑒥𑒹𑒬𑒲 𑒑𑓂𑒩𑒰𑒧-𑒣𑓂𑒩𑒧𑒳𑒐 𑒠𑓂𑒫𑒰𑒩𑒰 𑒮𑒧𑓂𑒧𑒹𑒪𑒢-𑒅𑒣𑒫𑒹𑒬𑒢𑒏 𑒔𑒩𑒔𑒰 𑒁𑒕𑒱।
𑒣𑒰𑒿𑒔 𑒫𑒮𑒢𑓂𑒞 𑒡𑒩𑒱 𑒏𑒩-𑒧𑒳𑒏𑓂𑒞𑒱 𑒂 𑒞𑒰𑒯𑒱𑒮𑒿 𑒫𑒢𑓂𑒨𑒖𑒢 𑒂 𑒬𑒴𑒠𑓂𑒩 𑒖𑒢𑒏 𑒮𑒧𑓂𑒦𑒰𑒫𑒱𑒞 𑒣𑒪𑒰𑒨𑒢𑒏 𑒔𑒩𑒔𑒰 𑒁𑒕𑒱। 𑒮𑒲𑒩𑒡𑓂𑒫𑒖 𑒖𑒢𑒏𑒏 𑒣𑒬𑓂𑒔𑒰𑒞𑓂 𑒡𑒹𑒢𑒳-𑒯𑒩𑒝 𑒩𑒰𑒖𑓂𑒨𑒰𑒦𑒱𑒭𑒹𑒏𑒏 𑒥𑒰𑒠 𑒧𑒰𑒞𑓂𑒩 𑒋𑒏𑒙𑒰 𑒣𑒩𑒧𑓂𑒣𑒩𑒰 𑒩𑒯𑒱 𑒑𑒹𑒪, 𑒞𑒏𑒩 𑒔𑒩𑒔𑒰 𑒁𑒕𑒱। 𑒧𑒳𑒠𑒰 𑒏𑒩𑒰𑒪 𑒠𑓂𑒫𑒰𑒩𑒰 𑒁𑒣𑒢 𑒮𑒑𑒼𑒞𑓂𑒩𑒲𑒨 𑒬𑒼𑒝𑒦𑒠𑓂𑒩𑒏 𑒡𑒹𑒢𑒳 𑒢𑒯𑒱 𑒒𑒳𑒧𑒹𑒥𑒰𑒏 𑒔𑒩𑒔𑒰 𑒁𑒕𑒱। 𑒏𑒩𑒰𑒪 𑒠𑓂𑒫𑒰𑒩𑒰 𑒥𑒲𑒔𑒧𑒹 𑒣𑓂𑒩𑒡𑒰𑒢 𑒣𑒳𑒩𑒯𑒱𑒞𑒏𑒹𑒿 𑒯𑒙𑒹𑒥𑒰𑒏 𑒔𑒩𑒔𑒰 𑒁𑒕𑒱। 𑒔𑒱𑒏𑒱𑒞𑓂𑒮𑒰𑒬𑒰𑒮𑓂𑒞𑓂𑒩𑒏 𑒢𑒫𑒼𑒠𑒱𑒞 𑒔𑒱𑒏𑒱𑒞𑓂𑒮𑒏 𑒥𑒙𑒳𑒏 𑒏𑒵𑒞𑒰𑒩𑓂𑒟𑒏𑒹𑒿 𑒩𑒰𑒖𑒏𑒳𑒧𑒰𑒩𑒲𑒏 𑒔𑒱𑒏𑒱𑒞𑓂𑒮𑒰𑒏 𑒪𑒹𑒪 𑒥𑒖𑒰𑒍𑒪 𑒖𑒰𑒃𑒞 𑒁𑒕𑒱, 𑒮𑓀𑒑𑒧𑒹 𑒩𑒰𑒖𑒏𑒳𑒧𑒰𑒩𑒲𑒏 𑒮𑒐𑒲 𑒂𑒔𑒰𑒩𑓂𑒨 𑒏𑒵𑒞𑒏 𑒣𑒳𑒞𑓂𑒩𑒲 𑒫𑒰𑒩𑒳𑒝𑒲𑒏𑒹𑒿 𑒮𑒹𑒯𑒼 𑒥𑒖𑒰𑒍𑒪 𑒖𑒰𑒃𑒞 𑒁𑒕𑒱। 𑒍 𑒁𑒣𑒢 𑒁𑒢𑒳𑒖 𑒥𑒙𑒳𑒏𑒏 𑒮𑓀𑒑 𑒖𑒰𑒃𑒞 𑒕𑒟𑒱 𑒂 𑒏𑒩𑒰𑒪 𑒥𑒪𑒰𑒞𑓂 𑒁𑒣𑒢 𑒏𑒏𑓂𑒭 𑒥𑒢𑓂𑒠 𑒏𑒋 𑒯𑒳𑒢𑒏𑒰𑒮𑒿 𑒑𑒰𑓀𑒡𑒩𑓂𑒫-𑒫𑒱𑒫𑒰𑒯 𑒏𑒋 𑒪𑒻𑒞 𑒕𑒟𑒱। 𑒣𑓂𑒩𑒖𑒰 𑒫𑒱𑒠𑓂𑒩𑒼𑒯 𑒂 𑒩𑒰𑒖𑒰𑒏 𑒒𑒼𑒛𑓃𑒰 𑒣𑒩 𑒔𑒜𑓃𑒱 𑒏𑒋 𑒣𑒪𑒰𑒨𑒢𑒏 𑒮𑓀𑒑 𑒣𑓂𑒩𑒟𑒧 𑒁𑒡𑓂𑒨𑒰𑒨𑒏 𑒢𑒫𑒧 𑒂 𑒁𑒢𑓂𑒞𑒱𑒧 𑒮𑒞𑓂𑒩 𑒐𑒞𑒧 𑒦𑒋 𑒖𑒰𑒃𑒞 𑒁𑒕𑒱।
𑒠𑓂𑒫𑒱𑒞𑒲𑒨 𑒁𑒡𑓂𑒨𑒰𑒨
𑒣𑓂𑒩𑒟𑒧 𑒮𑒩𑓂𑒑
𑒮𑒱𑒞 𑒡𑒰𑒩𑒏 𑒔𑒩𑒔𑒰 𑒁𑒕𑒱। 𑒫𑒰𑒩𑒳𑒝𑒱𑒏𑒹𑒿 𑒫𑒩𑒳𑒝 𑒮𑒰𑒩𑓂𑒟𑒫𑒰𑒯 𑒮𑒦𑒏 𑒮𑓀𑒑 𑒁𑓀𑒑 𑒖𑒢𑒣𑒠 𑒔𑒪𑒥𑒰𑒏 𑒪𑒹𑒪 𑒏𑒯𑒻𑒞 𑒕𑒢𑓂𑒯𑒱। 𑒂 𑒮𑓀𑒑𑒹 𑒫𑒩𑒳𑒝 𑒄𑒯𑒼 𑒏𑒯𑒻𑒞 𑒕𑒟𑒱 𑒖𑒹 𑒁𑓀𑒑 𑒖𑒢𑒣𑒠𑒏 𑒂𑒩𑓂𑒨𑒲𑒏𑒩𑒝𑒏 𑒏𑒰𑒩𑓂𑒨 𑒁𑒐𑒢𑒼 𑒁𑒣𑒴𑒩𑓂𑒝 𑒁𑒕𑒱।
𑒠𑓂𑒫𑒱𑒞𑒲𑒨 𑒮𑒩𑓂𑒑
𑒮𑒰𑒩𑓂𑒟𑒏 𑒮𑓀𑒑 𑒡𑒢𑒳𑒩𑓂𑒡𑒩 𑒪𑒼𑒏𑒢𑒱 𑒔𑒪𑒻𑒞 𑒕𑒪𑒰𑒯, 𑒁𑒣𑒢 𑒬𑓂𑒫𑒰𑒢𑒏 𑒮𑓀𑒑। 𑒮𑒰𑒩𑓂𑒟𑒏 𑒮𑓀𑒑 𑒮𑒰𑒧𑒰𑒢𑓂𑒨 𑒖𑒢 𑒮𑒹𑒯𑒼 𑒖𑒰𑒃𑒞 𑒕𑒪𑒰𑒯।𑒫𑒩𑒳𑒝 𑒂 𑒫𑒰𑒩𑒳𑒝𑒲 𑒯𑒱𑒢𑒏𑒰 𑒮𑒦𑒏 𑒮𑓀𑒑 𑒁𑓀𑒑 𑒠𑒱𑒬𑒱 𑒥𑒱𑒠𑒰 𑒦𑒹𑒪𑒰𑒯, 𑒋𑒯𑒱 𑒖𑒢𑒣𑒠𑒏 𑒩𑒰𑒖𑒡𑒰𑒢𑒲 𑒔𑒧𑓂𑒣𑒰 𑒏𑒯𑒪 𑒑𑒹𑒪 𑒁𑒕𑒱 𑒂 𑒋𑒏𑒩𑒰 𑒑𑓀𑒑𑒰𑒏 𑒅𑒞𑓂𑒞𑒩𑒧𑒹 𑒮𑓂𑒟𑒱𑒞 𑒏𑒯𑒪 𑒑𑒹𑒪 𑒁𑒕𑒱।
𑒞𑒵𑒞𑒲𑒨 𑒮𑒩𑓂𑒑
𑒁𑓀𑒑 𑒏𑓂𑒭𑒹𑒞𑓂𑒩𑒧𑒹 𑒡𑒰𑒢𑒮𑒿 𑒮𑒼𑒗𑒹 𑒁𑒩𑒥𑒰 𑒢𑒯𑒱 𑒥𑒢𑒰𑒍𑒪 𑒖𑒋𑒥𑒰𑒏 𑒔𑒩𑒔𑒰 𑒁𑒕𑒱, 𑒍𑒞𑒋 𑒅𑒮𑒲𑒢-𑒮𑒳𑒐𑒰 𑒏𑒋 𑒜𑒹𑒏𑒲𑒮𑒿 𑒥𑒢𑒰𑒍𑒪 𑒁𑒩𑒥𑒰𑒏𑒹𑒿 𑒔𑒰𑒅𑒩 𑒏𑒯𑒪 𑒖𑒋𑒥𑒰𑒏 𑒂 𑒥𑓂𑒩𑒲𑒯𑒱𑒏𑒹𑒿 𑒡𑒰𑒢 𑒏𑒯𑒥𑒰𑒏 𑒫𑒩𑓂𑒝𑒢 𑒦𑒹𑒪 𑒁𑒕𑒱। 𑒣𑒴𑒩𑓂𑒫𑒏𑒰𑒪𑒏 𑒬𑓂𑒩𑒹𑒭𑓂𑒚𑒲 𑒠𑓂𑒫𑒱𑒖 𑒫𑒻𑒬𑓂𑒨 𑒂 𑒁𑒠𑓂𑒫𑒱𑒖 𑒢𑒫𑒲𑒢 𑒫𑒻𑒬𑓂𑒨𑒏 𑒔𑒩𑒔𑒰 𑒦𑒹𑒪 𑒁𑒕𑒱।
𑒔𑒞𑒳𑒩𑓂𑒟 𑒮𑒩𑓂𑒑
𑒂𑒩𑓂𑒨𑒲𑒏𑒩𑒝𑒏 𑒥𑒹𑒩-𑒥𑒹𑒩 𑒔𑒩𑒔𑒰 𑒣𑒰𑒬𑓂𑒔𑒰𑒞𑓂𑒨 𑒫𑒱𑒠𑓂𑒫𑒰𑒢𑒏 𑒧𑒰𑒨𑒰𑒢𑒢𑓂𑒠𑒖𑒲 𑒣𑒩 𑒣𑓂𑒩𑒦𑒰𑒫 𑒠𑒹𑒐𑒥𑒻𑒞 𑒁𑒕𑒱। 𑒂𑒩𑓂𑒨 𑒂 𑒠𑓂𑒩𑒫𑒱𑒛𑓃 𑒬𑒥𑓂𑒠 𑒠𑒳𑒢𑒴 , 𑒣𑒰𑒬𑓂𑒔𑒰𑒞𑓂𑒨 𑒪𑒼𑒏𑒢𑒱 𑒦𑒰𑒩𑒞𑒧𑒹 𑒁𑒣𑒢 𑒢𑒱𑒯𑒱𑒞 𑒮𑓂𑒫𑒰𑒩𑓂𑒟𑒏 𑒪𑒹𑒪 𑒁𑒢𑒢𑒹 𑒕𑒪𑒰𑒯। 𑒏𑒼𑒬𑒪 𑒂 𑒫𑒱𑒠𑒹𑒯𑒏 𑒣𑓂𑒩𑒮𑒰𑒩𑒏, 𑒠𑒹𑒫𑒞𑓂𑒫𑒏 𑒫𑒱𑒏𑒰𑒮𑒏 𑒮𑒧𑓂𑒣𑒴𑒩𑓂𑒝 𑒃𑒞𑒱𑒯𑒰𑒮 𑒋𑒞𑒋 𑒠𑒹𑒪 𑒑𑒹𑒪 𑒁𑒕𑒱। 𑒧𑒱𑒟𑒱𑒪𑒰𑒏 𑒠𑒯𑒲-𑒔𑒴𑒛𑓃𑒰𑒏 𑒮𑒹𑒯𑒼 𑒔𑒩𑓂𑒔 𑒂𑒋𑒪 𑒁𑒕𑒱।
𑒣𑒘𑓂𑒔𑒧 𑒮𑒩𑓂𑒑
𑒠𑒱𑒢𑒧𑒹 𑒋𑒏𑒦𑒳𑒏𑓂𑒞 𑒂 𑒩𑒰𑒞𑒱𑒧𑒹 𑒠𑒳𑒑𑓂𑒡𑒣𑒰𑒢 𑒧𑒱𑒟𑒱𑒪𑒰 𑒂 𑒣𑒰𑓀𑒔𑒰𑒪 𑒠𑒳𑒢𑒴 𑒚𑒰𑒧 𑒕𑒪। 𑒞𑒟𑒰𑒏𑒟𑒱𑒞 𑒂𑒩𑓂𑒨 𑒂 𑒮𑓂𑒟𑒰𑒢𑒲𑒨 𑒪𑒼𑒏𑒢𑒱𑒏 𑒥𑒲𑒔 𑒕𑒼𑒙-𑒧𑒼𑒙 𑒖𑒲𑒫𑒢𑒬𑒻𑒪𑒲𑒏 𑒁𑒢𑓂𑒞𑒩- 𑒂 𑒧𑒰𑒨𑒰𑒢𑒢𑓂𑒠𑒖𑒲 𑒂𑒩𑓂𑒨𑒲𑒏𑒩𑒝 𑒏𑒯𑒻𑒞 𑒕𑒟𑒱 𑒍𑒏𑒩𑒰 𑒣𑒰𑒙𑒥 !
𑒭𑒭𑓂𑒚 𑒮𑒩𑓂𑒑
𑒁𑓀𑒑𑒏 𑒑𑒵𑒯 𑒂𑒩𑓂𑒨𑒑𑓂𑒩𑒰𑒧 𑒖𑒹𑒏𑒰𑒿 𑒮𑒙𑒱 𑒏𑒋 𑒢𑒘𑒱 𑒫𑒩𑒢𑓂 𑒯𑒙𑒱-𑒯𑒙𑒱 𑒏𑒋 𑒯𑒼𑒋𑒥𑒰𑒏 𑒫𑒩𑓂𑒝𑒢 𑒁𑒕𑒱। 𑒯𑒳𑒢𑒏𑒰 𑒮𑒦 𑒠𑓂𑒫𑒰𑒩𑒰 𑒕𑒼𑒙-𑒕𑒼𑒙 𑒫𑒮𑓂𑒞𑓂𑒩 𑒂 𑒣𑒬𑒳 𑒔𑒩𑓂𑒧 𑒣𑒯𑒱𑒩𑒥𑒰𑒏 𑒮𑒹𑒯𑒼 𑒫𑒩𑓂𑒝𑒢 𑒁𑒕𑒱। 𑒫𑒢𑓂𑒨𑒖𑒢𑒏 𑒥𑒲𑒔𑒧𑒹 𑒢𑒩𑒥𑒪𑒱 𑒠𑒹𑒥𑒰𑒏 𑒣𑒩𑒧𑓂𑒣𑒩𑒰𑒏 𑒮𑓀𑒏𑒹𑒞 𑒂 𑒢𑒱𑒭𑓂𑒏𑒰𑒮𑒱𑒞 𑒫𑒢𑓂𑒨𑒖𑒢𑒮𑒿 𑒦𑒰𑒭𑒰𑒏 𑒂𑒠𑒰𑒢-𑒣𑓂𑒩𑒠𑒰𑒢 𑒮𑒹𑒯𑒼 𑒧𑒰𑒨𑒰𑒢𑒢𑓂𑒠𑒖𑒲 𑒣𑒰𑒬𑓂𑒔𑒰𑒞𑓂𑒨 𑒣𑓂𑒩𑒦𑒰𑒫𑒮𑒿 𑒑𑓂𑒩𑒯𑒝 𑒏𑒋 𑒪𑒹𑒢𑒹 𑒕𑒟𑒱।
𑒫𑒱𑒏𑓂𑒩𑒨-𑒟𑒰𑒢 𑒐𑒼𑒪𑒥𑒰𑒏 𑒖𑒰𑒯𑒱𑒮𑒿 𑒦𑒫𑒱𑒭𑓂𑒨𑒧𑒹 𑒢𑒑𑒩𑒏 𑒫𑒱𑒏𑒰𑒮 𑒮𑓀𑒦𑒫 𑒯𑒼𑒋𑒞, 𑒞𑒏𑒩 𑒔𑒩𑓂𑒔 𑒁𑒕𑒱।
𑒮𑒣𑓂𑒞𑒧 𑒮𑒩𑓂𑒑
𑒅𑒮𑒢𑒰 𑒔𑒰𑒅𑒩𑒏 𑒁𑒡𑒱𑒏 𑒮𑒳𑒣𑒰𑒔𑓂𑒨 𑒯𑒼𑒋𑒥𑒰𑒏 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒍𑒏𑒩 𑒣𑒟𑓂𑒨 𑒠𑒹𑒥𑒰𑒏 𑒑𑒣 𑒏𑒋𑒪 𑒑𑒹𑒪 𑒁𑒕𑒱।𑒪𑒾𑒯-𑒮𑒲𑒞𑒰𑒏 𑒪𑒹𑒪 𑒪𑒾𑒯𑒏𑒰𑒩, 𑒯𑒩𑒏 𑒪𑒹𑒪 𑒏𑒰𑒭𑓂𑒚𑒏𑒰𑒩, 𑒥𑒩𑓂𑒞𑒢-𑒣𑒰𑒞𑓂𑒩𑒏 𑒪𑒹𑒪 𑒏𑒳𑒧𑓂𑒦𑒏𑒰𑒩 𑒃𑒞𑓂𑒨𑒰𑒠𑒱 𑒬𑒱𑒪𑓂𑒣𑒲𑒏 𑒂𑒫𑒬𑓂𑒨𑒏𑒞𑒰 𑒂 𑒞𑒰𑒯𑒱 𑒪𑒹𑒪 𑒂𑒫𑒰𑒮-𑒦𑒴𑒧𑒱 𑒂 𑒦𑒼𑒖𑒢𑒏 𑒮𑒳𑒫𑒱𑒡𑒰 𑒠𑒹𑒥𑒰𑒏 𑒑𑒣 𑒂𑒋𑒪 𑒁𑒕𑒱।
𑒁𑒭𑓂𑒙𑒧 𑒮𑒩𑓂𑒑
𑒏𑒵𑒭𑒱 𑒅𑒞𑓂𑒣𑒰𑒠𑒢𑒏 𑒣𑒬𑓂𑒔𑒰𑒞𑓂 𑒪𑒼𑒏 𑒁𑒢𑓂𑒢𑒏 𑒥𑒠𑒪𑒰 𑒮𑒰𑒧𑒑𑓂𑒩𑒲 𑒥𑒠𑒪𑒹𑒢 𑒏𑒋 𑒮𑒏𑒻𑒞 𑒕𑒟𑒱, 𑒫𑒵𑒭𑒦-𑒑𑒰𑒛𑓃𑒲𑒮𑒿 𑒮𑒰𑒧𑒑𑓂𑒩𑒲𑒏 𑒮𑓀𑒔𑒩𑒝, 𑒋𑒏 𑒧𑒰𑒮 𑒡𑒩𑒱 𑒔𑒪𑒋𑒥𑒪𑒰 𑒨𑒖𑓂𑒘𑒏 𑒫𑓂𑒨𑒫𑒮𑓂𑒟𑒰 𑒦𑒴𑒠𑒹𑒫𑒑𑒝 𑒠𑓂𑒫𑒰𑒩𑒰 𑒏𑒋𑒪 𑒖𑒋𑒥𑒰𑒏 𑒣𑓂𑒩𑒮𑓀𑒑 𑒮𑒹𑒯𑒼 𑒂𑒋𑒪 𑒁𑒕𑒱। 𑒦𑒰𑒭𑒰-𑒬𑒱𑒏𑓂𑒭𑒝 𑒏𑓂𑒩𑒧𑒧𑒹 𑒥𑓂𑒩𑒰𑒯𑓂𑒧𑒝𑒑𑒰𑒧𑒏 𑒁𑒣𑒦𑓂𑒩𑓀𑒬 𑒥𑒰𑒦𑒢𑒑𑒰𑒧 𑒂 𑒫𑒢𑒑𑓂𑒩𑒰𑒧𑒏 𑒫𑒢𑒑𑒰𑒧 𑒦𑒋 𑒑𑒹𑒪। 𑒦𑒰𑒭𑒰 𑒮𑒱𑒐𑒰 𑒏𑒋 𑒒𑒳𑒩𑒻𑒞 𑒏𑒰𑒪 𑒫𑒰𑒩𑒳𑒝𑒲𑒣𑒩 𑒞𑒲𑒩𑒮𑒿 𑒂𑒏𑓂𑒩𑒧𑒝 𑒦𑒹𑒪 𑒂 𑒤𑒹𑒩 𑒫𑒰𑒩𑒳𑒝𑒱𑒏 𑒧𑒵𑒞𑓂𑒨𑒳 𑒦𑒋 𑒑𑒹𑒪।
𑒅𑒣𑒮𑓀𑒯𑒰𑒩
𑒠𑒼𑒮𑒩 𑒫𑒮𑒢𑓂𑒞 𑒁𑒥𑒻𑒞 𑒧𑒱𑒟𑒱𑒪𑒰𑒧𑒹 𑒑𑒝𑒞𑓀𑒞𑓂𑒩𑒏 𑒮𑓂𑒫𑒩𑒴𑒣𑒏 𑒮𑓂𑒟𑒰𑒣𑒢𑒰 𑒮𑓂𑒟𑒱𑒩 𑒦𑒋 𑒑𑒹𑒪। 𑒫𑒻𑒬𑒰𑒪𑒲 𑒂 𑒧𑒱𑒟𑒱𑒪𑒰𑒏 𑒥𑒲𑒔 𑒣𑒩𑒮𑓂𑒣𑒩 𑒮𑒧𑓂𑒫𑒰𑒠 𑒋𑒏 𑒑𑒝𑒞𑒰𑓀𑒞𑓂𑒩𑒱𑒏 𑒮𑒴𑒞𑓂𑒩𑒧𑒹 𑒖𑒳𑒛𑓃𑒥𑒰𑒏 𑒪𑒹𑒪 𑒯𑒼𑒧𑒋 𑒪𑒰𑒑𑒪। 𑒮𑒱𑒞𑒑𑓂𑒩𑒰𑒧 𑒮𑓂𑒟𑒱𑒞 𑒩𑒰𑒖𑒡𑒰𑒢𑒲𑒧𑒹 𑒣𑒴𑒩𑓂𑒫𑒧𑒹 𑒧𑒱𑒟𑒱𑒪𑒰𑒏 𑒮𑒲𑒧𑒰-𑒫𑒱𑒮𑓂𑒞𑒰𑒩𑒏 𑒔𑒩𑒔𑒰 𑒦𑒹𑒪। 𑒩𑒰𑒖𑒡𑒰𑒢𑒲 𑒮𑒱𑒞𑒑𑓂𑒩𑒰𑒧 𑒂 𑒣𑒴𑒩𑓂𑒫𑒲 𑒧𑒱𑒟𑒱𑒪𑒰𑒏 𑒖𑒱𑒞𑒑𑓂𑒩𑒰𑒧𑒏 𑒥𑒲𑒔 𑒋𑒏𑒙𑒰 𑒧𑒯𑒰𑒫𑒢 𑒕𑒪। 𑒋𑒏𑒩𑒰 𑒥𑓂𑒩𑒰𑒯𑓂𑒧𑒝𑒑𑓂𑒩𑒰𑒧 𑒂 𑒞𑓂𑒩𑒱𑒑𑓂𑒩𑒰𑒧 𑒠𑓂𑒫𑒰𑒩𑒰 𑒧𑒱𑒪𑒱𑒏𑒋 𑒖𑒛𑓃𑒰𑒏𑒋 𑒯𑒙𑒰𑒍𑒪 𑒑𑒹𑒪।

𑒦𑒰𑒭𑒰 𑒫𑒱𑒖𑓂𑒘𑒰𑒢 𑒣𑓂𑒩𑒮𑓀𑒑 - 𑒇𑒑𑒫𑒻𑒠𑒱𑒏 𑒇𑒔𑒰𑒧𑒹 𑒣𑓂𑒩𑒰𑒏𑒵𑒞𑒏 𑒏𑒱𑒕𑒳 𑒫𑒱𑒬𑒹𑒭 𑒬𑒥𑓂𑒠, 𑒡𑓂𑒫𑒢𑒱, 𑒣𑓂𑒩𑒞𑓂𑒨𑒨 𑒂 𑒫𑒰𑒏𑓂𑒨 𑒩𑒔𑒢𑒰 𑒦𑒹𑒙𑒻𑒞 𑒁𑒕𑒱। 𑒣𑒰𑒝𑒱𑒢𑒲 𑒮𑓀𑒮𑓂𑒏𑒵𑒞𑒏𑒹𑒿 𑒧𑒰𑒢𑒏 𑒦𑒰𑒭𑒰 𑒂 𑒣𑓂𑒩𑒰𑒠𑒹𑒬𑒱𑒏 𑒞𑒞𑓂𑒫𑒮𑒿 𑒧𑒳𑒏𑓂𑒞 𑒦𑒰𑒭𑒰𑒏 𑒩𑒴𑒣 𑒠𑒹𑒢𑒹 𑒕𑒪𑒰𑒯। 𑒏𑒩𑓂𑒝𑒰𑒙𑒏𑒧𑒹 𑒣𑒰𑒢𑒱𑒏𑒹𑒿 𑒢𑒲𑒩𑒴 𑒂 𑒅𑒞𑓂𑒞𑒩 𑒦𑒰𑒩𑒞𑒧𑒹 𑒖𑒪 𑒏𑒯𑒪 𑒖𑒰𑒃𑒞 𑒁𑒕𑒱। 𑒣𑒰𑒢𑒱𑒏 𑒄 𑒠𑒳𑒢𑒴 𑒩𑒴𑒣 𑒮𑓀𑒮𑓂𑒏𑒵𑒞𑒧𑒹 𑒦𑒹𑒙𑒞। 𑒣𑓂𑒩𑒰𑒏𑒵𑒞𑒱𑒏 𑒞𑒞𑓂𑒫𑒮𑒿 𑒧𑒳𑒏𑓂𑒞 𑒦𑒰𑒭𑒰 𑒥𑒢𑒹𑒥𑒰𑒏 𑒪𑒹𑒪 𑒣𑒰𑒝𑒱𑒢𑒲 𑒏𑒼𑒢𑒼 𑒏𑓂𑒭𑒹𑒞𑓂𑒩𑒏 𑒁𑒫𑒯𑒹𑒪𑒢𑒰 𑒢𑒯𑒱 𑒏𑒋𑒢𑒹 𑒕𑒪𑒰𑒯 𑒫𑒩𑒝 𑒮𑒦 𑒏𑓂𑒭𑒹𑒞𑓂𑒩𑒏 𑒬𑒥𑓂𑒠𑒏𑒼𑒭 𑒪𑒋 𑒅𑒔𑓂𑒔𑒰𑒩𑒝𑒏 𑒦𑒹𑒠𑒏𑒹𑒿 𑒐𑒞𑒧 𑒏𑒋𑒢𑒹 𑒕𑒪𑒰𑒯। 𑒥𑒯𑒳𑒞 𑒩𑒰𑒮 𑒣𑓂𑒩𑒰𑒏𑒵𑒞 𑒬𑒥𑓂𑒠 𑒮𑓀𑒮𑓂𑒏𑒵𑒞𑒧𑒹 𑒡𑓂𑒫𑒢𑓂𑒨𑒰𑒞𑓂𑒧𑒏 𑒮𑓀𑒬𑒼𑒡𑒢 𑒏𑒋 𑒪𑒹𑒪 𑒑𑒹𑒪 𑒂 𑒞𑒰𑒯𑒱𑒮𑒿 𑒥𑒰𑒠𑒧𑒹 𑒄 𑒡𑒰𑒩𑒝𑒰 𑒦𑒹𑒪 𑒖𑒹 𑒣𑓂𑒩𑒰𑒏𑒵𑒞𑒏 𑒬𑒥𑓂𑒠 𑒮𑒦 𑒞𑒠𑓂𑒦𑒫 𑒕𑒪। 𑒮𑓀𑒮𑓂𑒏𑒵𑒞𑒧𑒹 𑒞𑒠𑓂𑒦𑒫 𑒞𑒰𑒯𑒱 𑒏𑒰𑒩𑒝𑒮𑒿 𑒢𑒯𑒱 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱। 𑒞𑒯𑒱𑒢𑒰 𑒁𑒣𑒦𑓂𑒩𑓀𑒬 𑒂 𑒣𑓂𑒩𑒰𑒏𑒵𑒞 𑒦𑒰𑒭𑒰 𑒮𑒾𑒿𑒮𑒹 𑒠𑒹𑒬𑒧𑒹 𑒒𑒳𑒧𑒋 𑒥𑒪𑒰𑒏 𑒦𑒰𑒭𑒰 𑒕𑒪।
𑒦𑒰𑒩𑒞𑒧𑒹 𑒠𑒹𑒫𑒞𑓀𑒞𑓂𑒩𑒏 𑒫𑒱𑒏𑒰𑒮 𑒣𑒰𑒢𑒱 𑒮𑓀𑒥𑓀𑒡𑒲 𑒡𑒰𑒩𑒝𑒰𑒮𑒿 𑒖𑒳𑒛𑓃𑒪 𑒁𑒕𑒱। 𑒨𑒰𑒫𑒞 𑒫𑒱𑒬𑓂𑒫 𑒁𑒫𑓂𑒨𑒏𑓂𑒞 𑒁𑒕𑒱 𑒞𑒿 𑒁𑒢𑓂𑒡𑒏𑒰𑒩𑒧𑒨 𑒁𑒕𑒱, 𑒁𑒏𑒰𑒮 𑒁𑒕𑒱, 𑒫𑓂𑒨𑒏𑓂𑒞 𑒦𑒹𑒪𑒰𑒣𑒩 𑒍 𑒖𑒪 𑒥𑒢𑒱 𑒖𑒰𑒃𑒞 𑒁𑒕𑒱। 𑒁𑒏𑒰𑒮 𑒂 𑒖𑒪 𑒠𑒳𑒢𑒴 𑒦𑒰𑒩𑒞𑒲𑒨 𑒔𑒱𑒢𑓂𑒞𑒢𑒧𑒹 𑒞𑒞𑓂𑒫 𑒁𑒕𑒱। 𑒧𑒴𑒩𑓂𑒞𑒱𑒣𑒴𑒖𑒢𑒏 𑒖𑒹 𑒔𑒱𑒞𑓂𑒩 𑒧𑒰𑒨𑒰𑒢𑒢𑓂𑒠𑒖𑒲 𑒔𑒱𑒞𑓂𑒩𑒱𑒞 𑒏𑒩𑒻𑒞 𑒕𑒟𑒱 𑒍 𑒮𑒩𑒪𑒲𑒏𑒩𑒝 𑒁𑒕𑒱। 𑒦𑒰𑒭𑒰-𑒣𑓂𑒩𑒮𑒰𑒩𑒏 𑒖𑒹 𑒫𑒱𑒡𑒱 𑒍 𑒮𑓂𑒞𑓂𑒩𑒲𑒡𑒢𑒧𑒹 𑒠𑒹𑒐𑒥𑒻𑒞 𑒕𑒟𑒱 𑒮𑒹𑒯𑒼 𑒁𑒞𑒱 𑒮𑒩𑒪𑒲𑒏𑒩𑒝 𑒁𑒕𑒱।

𑒬𑓂𑒩𑒫𑒝 𑒠𑓂𑒫𑒰𑒩𑒰 𑒣𑒩𑒧𑓂𑒣𑒩𑒰𑒏 𑒢𑒱𑒩𑓂𑒫𑒯𑒝 𑒮𑒰𑒯𑒱𑒞𑓂𑒨𑒧𑒹 𑒠𑒹𑒐𑒪 𑒑𑒹𑒪 𑒕𑒪 𑒂 𑒮𑒹 𑒧𑒯𑒰𑒦𑒰𑒩𑒞𑒧𑒹 𑒏𑒱𑒕𑒳 𑒚𑒰𑒧 𑒥𑒹𑒩-𑒥𑒹𑒩 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱 , 𑒮𑒹 𑒞𑒰𑒯𑒱 𑒏𑒰𑒩𑒝 𑒏𑒞𑒹𑒏𑒼 𑒣𑒩𑓂𑒫𑒏𑒹𑒿 𑒏𑓂𑒭𑒹𑒣𑒏 𑒏𑒯𑒪 𑒖𑒰𑒋𑒥 𑒮𑒧𑓂𑒦𑒫 𑒢𑒯𑒱। 𑒫𑒹𑒠𑒏 𑒣𑓂𑒩𑒞𑒱𑒬𑒰𑒐𑓂𑒨𑒏𑒹𑒿 𑒍𑒢𑒰 𑒠𑒹𑒐𑒪𑒰𑒣𑒩 𑒄 𑒖𑓂𑒘𑒰𑒞 𑒯𑒼𑒋𑒞 𑒖𑒹 𑒪𑒱𑒐𑒥𑒰𑒏 𑒣𑒩𑒧𑓂𑒣𑒩𑒰𑒏 𑒁𑒕𑒻𑒞 𑒄 𑒮𑒧𑓂𑒦𑒫 𑒢𑒯𑒱 𑒕𑒪 𑒧𑒳𑒠𑒰 𑒧𑒯𑒰𑒦𑒰𑒩𑒞 𑒁𑒥𑒻𑒞-𑒁𑒥𑒻𑒞 𑒏𑒙𑓂𑒙𑒩𑒞𑒰 𑒥𑒜𑓃𑒪। 𑒧𑒯𑒰𑒦𑒰𑒩𑒞𑒧𑒹 𑒫𑒩𑓂𑒝𑒢 𑒁𑒕𑒱:
𑒫𑒹𑒠𑒫𑒱𑒏𑓂𑒩𑒨𑒱𑒝𑒬𑓂𑒔𑒻𑒫 𑒫𑒹𑒠𑒰𑒢𑒰𑓀𑒔𑒻𑒫𑒠𑒴𑒭𑒏𑓁।
𑒫𑒹𑒠𑒰𑒢𑒰𑓀𑒪𑒹𑒐𑒏𑒬𑓂𑒔𑒻𑒫 𑒞𑒹𑒫𑒻 𑒢𑒱𑒩𑒨𑒑𑒰𑒧𑒱𑒢𑓁॥
(𑒫𑒹𑒠𑒏 𑒫𑒱𑒏𑓂𑒩𑒹𑒞𑒰, 𑒑𑒪𑒞-𑒫𑓂𑒨𑒰𑒐𑓂𑒨𑒰 𑒏𑒋𑒢𑒱𑒯𑒰𑒩 𑒂 𑒪𑒹𑒐𑒏, 𑒮𑒦 𑒢𑒩𑒏𑒏 𑒣𑒟𑒣𑒩 𑒑𑒹𑒢𑒱𑒯𑒰𑒩 𑒕𑒟𑒱।)
𑒏𑒩𑒰𑒪 𑒣𑓂𑒩𑒮𑓀𑒑 : 𑒏𑒩𑒰𑒪 𑒖𑒢𑒏𑒏 𑒏𑒳𑒏𑒵𑒞𑓂𑒨𑒏 𑒫𑒩𑓂𑒝𑒢 𑒁𑒩𑓂𑒟𑒬𑒰𑒮𑓂𑒞𑓂𑒩𑒧𑒹 𑒋𑒢𑒰 𑒂𑒋𑒪 𑒁𑒕𑒱:
(𑓑.𑓖 𑒫𑒱𑒢𑒨𑒰𑒡𑒱𑒏𑒰𑒩𑒱𑒏𑒹𑒣𑓂𑒩𑒟𑒧𑒰𑒡𑒱𑒏𑒩𑒝𑒹 𑒭𑒛𑒼𑓄𑒡𑓂𑒨𑒰𑒨𑓁𑒃𑒢𑓂𑒠𑓂𑒩𑒱𑒨𑒖𑒨𑒹 𑒁𑒩𑒱𑒭𑒛𑓂𑒫𑒩𑓂𑒑𑒞𑓂𑒨𑒰𑒑) : 𑒞𑒠𑓂𑒫𑒱𑒩𑒳𑒠𑓂𑒡𑒫𑒵𑒞𑓂𑒞𑒱𑒩𑒫𑒬𑓂𑒨𑒹𑒢𑓂𑒠𑓂𑒩𑒱𑒨𑒬𑓂𑒔𑒰𑒞𑒳𑒩𑒢𑓂𑒞𑒼𑓄𑒣𑒱𑒩𑒰𑒖𑒰 𑒮𑒠𑓂𑒨𑒼 𑒫𑒱𑒢𑒬𑓂𑒨𑒞𑒱- 𑒨𑒟𑒰
𑒠𑒰𑒝𑓂𑒛𑒏𑓂𑒨𑒼 𑒢𑒰𑒧 𑒦𑒼𑒖𑓁 𑒏𑒰𑒧𑒰𑒠𑓂 𑒥𑓂𑒩𑒰𑒯𑓂𑒧𑒝𑒏𑒢𑓂𑒨𑒰𑒨𑒧𑒦𑒱𑒧𑒢𑓂𑒨𑒧𑒰𑒢𑓁 𑒮𑒥𑒢𑓂𑒡𑒩𑒰𑒭𑓂𑒙𑓂𑒩𑒼𑒫𑒱𑒢𑒢𑒰𑒬 𑒏𑒩𑒰𑒪𑒬𑓂𑒔 𑒫𑒻𑒠𑒹𑒯𑓁,...।
𑒦𑒱𑒏𑓂𑒭𑒳 𑒣𑓂𑒩𑒦𑒰𑒧𑒞𑒲𑒏 𑒖𑒨𑒧𑓀𑒑𑒪 𑒦𑒰𑒭𑓂𑒨 𑒋𑒯𑒱𑒧𑒹 𑒖𑒼𑒛𑓃𑒻𑒞 𑒁𑒕𑒱 𑒖𑒹 𑒏𑒩𑒰𑒪 𑒨𑒼𑒑𑒹𑒬𑓂𑒫𑒩 𑒞𑒲𑒩𑓂𑒟𑒧𑒹 𑒦𑒲𑒛𑓃 𑒠𑒱𑒬𑒱 𑒠𑒹𑒐𑒻𑒞 𑒏𑒰𑒪 𑒋𑒏𑒙𑒰 𑒮𑒳𑒢𑓂𑒠𑒩 𑒥𑓂𑒩𑒰𑒯𑓂𑒧𑒝-𑒮𑓂𑒞𑓂𑒩𑒲𑒏𑒹𑒿 𑒠𑒹𑒐𑒪𑒏 𑒂 𑒍𑒏𑒩𑒰 𑒁𑒣𑒢 𑒩𑒰𑒖𑓂𑒨 𑒖𑒥𑒩𑓂𑒠𑒮𑓂𑒞𑒲 𑒪𑒋 𑒑𑒹𑒪। 𑒍 𑒥𑓂𑒩𑒰𑒯𑓂𑒧𑒝 𑒍𑒏𑒩 𑒩𑒰𑒖𑒡𑒰𑒢𑒲 𑒑𑒹𑒪 𑒂 𑒏𑒰𑒢𑒱 𑒐𑒲𑒖𑒱 𑒏𑒋 𑒏𑒯𑒪𑒏 𑒖𑒹 𑒄 𑒡𑒩𑒞𑒲 𑒏𑒱𑒋𑒏 𑒢𑒯𑒱 𑒤𑒙𑒻𑒞 𑒁𑒕𑒱 𑒖𑒞𑒋 𑒋𑒯𑒢 𑒏𑒳𑒏𑒩𑓂𑒧𑒲 𑒩𑒰𑒖𑒰 𑒩𑒯𑒻𑒞 𑒁𑒕𑒱। 𑒡𑒩𑒞𑒲 𑒤𑒰𑒙𑒪 𑒂 𑒍𑒯𑒱𑒧𑒹 𑒏𑒩𑒰𑒪 𑒣𑒩𑒱𑒫𑒰𑒩 𑒮𑒧𑒹𑒞 𑒡𑒮𑒱 𑒏𑒋 𑒧𑒩𑒱 𑒑𑒹𑒪।
𑒋𑒏𑒙𑒰 𑒥𑓂𑒩𑒰𑒯𑓂𑒧𑒝 𑒮𑓂𑒞𑓂𑒩𑒲𑒏 𑒁𑒣𑒯𑒩𑒝 𑒏𑒩𑒰𑒪𑒏 𑒣𑒞𑒢𑒏 𑒏𑒰𑒩𑒝 𑒕𑒪 𑒄 𑒔𑒩𑒔𑒰 𑒁𑒬𑓂𑒫𑒒𑒼𑒭𑒏 𑒥𑒳𑒠𑓂𑒡𑒔𑒩𑒱𑒞𑒧𑒹 𑒮𑒹𑒯𑒼 𑒂𑒋𑒪 𑒁𑒕𑒱 𑒖𑒹𑒢𑒰 𑒏𑒾𑒙𑒱𑒪𑓂𑒨𑒏 𑒁𑒩𑓂𑒟𑒬𑒰𑒮𑓂𑒞𑓂𑒩𑒧𑒹 𑒂𑒋𑒪 𑒁𑒕𑒱। 𑒧𑒳𑒠𑒰 𑒠𑒲𑒣𑒫𑓀𑒬 𑒏𑒩𑒰𑒪 𑒖𑒢𑒏𑒏 𑒥𑒰𑒠 𑒍𑒏𑒩 𑒣𑒳𑒞𑓂𑒩 𑒂 𑒣𑒾𑒞𑓂𑒩𑒏 𑒩𑒰𑒖𑒰 𑒯𑒼𑒋𑒥𑒰𑒏 𑒫𑒩𑓂𑒝𑒢 𑒏𑒩𑒻𑒞 𑒁𑒕𑒱। 𑒥𑓂𑒩𑒰𑒯𑓂𑒧𑒝 𑒑𑓂𑒩𑓀𑒟 𑒮𑒦 𑒫𑒱𑒠𑒹𑒯𑒏𑒹𑒿 𑒩𑒰𑒖𑒬𑒰𑒯𑒲 𑒂 𑒥𑒾𑒠𑓂𑒡 𑒑𑓂𑒩𑒢𑓂𑒟 𑒮𑒦 𑒑𑒝𑒞𑓀𑒞𑓂𑒩 (𑒩𑒰𑒖𑒰 𑒮𑒧𑒱𑒞𑒱 𑒠𑓂𑒫𑒰𑒩𑒰 𑒔𑒳𑒢𑒪) 𑒏𑒯𑒻𑒞 𑒁𑒕𑒱 𑒂 𑒧𑒞 𑒫𑒱𑒦𑒱𑒢𑓂𑒢𑒞𑒰𑒏 𑒮𑒹 𑒏𑒰𑒩𑒝।

𑒋𑒯𑒱 𑒣𑓂𑒩𑒏𑒰𑒩𑒹𑓀 𑒧𑒰𑒨𑒰𑒢𑒢𑓂𑒠 𑒧𑒱𑒬𑓂𑒩𑒖𑒲𑒏 𑒌𑒞𑒱𑒯𑒰𑒮𑒱𑒏 𑒨𑒰𑒞𑓂𑒩𑒰 𑒥𑒯𑒳𑒞 𑒩𑒰𑒮 𑒋𑒯𑒢 𑒞𑒟𑓂𑒨 𑒁𑒢𑒪𑒏 𑒖𑒹 𑒏𑒼𑒢𑒼 𑒞𑒩𑒯𑒹𑒿 𑒞𑒩𑓂𑒏𑒮𑒿 𑒣𑒳𑒭𑓂𑒙 𑒢𑒯𑒱 𑒦𑒋 𑒮𑒏𑒪।

𑒏𑒹𑒠𑒰𑒩𑒢𑒰𑒟 𑒔𑒾𑒡𑒩𑒲𑒏 𑒅𑒣𑒢𑓂𑒨𑒰𑒮
“𑒔𑒧𑒹𑒪𑒲 𑒩𑒰𑒢𑒲” 𑒂 "𑒧𑒰𑒯𑒳𑒩"
𑒏𑒹𑒠𑒰𑒩𑒢𑒰𑒟 𑒔𑒾𑒡𑒩𑒲 𑒖𑒲𑒏 𑒣𑒯𑒱𑒪 𑒅𑒣𑒢𑓂𑒨𑒰𑒮 𑒔𑒧𑒹𑒪𑒲 𑒩𑒰𑒢𑒲 𑓒𑓐𑓐𑓔 𑒄. 𑒧𑒹 𑒂𑒋𑒪 । 𑒋𑒯𑒱 𑒅𑒣𑒢𑓂𑒨𑒰𑒮𑒏 𑒁𑒢𑓂𑒞 𑒋𑒯𑒱 𑒞𑒩𑒯𑒹𑒿 𑒂𑒏𑒩𑓂𑒭𑒏 𑒩𑒴𑒣𑒹𑒿 𑒦𑒹𑒪 𑒖𑒹 𑒋𑒏𑒩 𑒠𑒼𑒮𑒩 𑒦𑒰𑒑𑒏 𑒣𑓂𑒩𑒥𑒪 𑒧𑒰𑒿𑒑 𑒦𑒹𑒪 𑒂 𑒪𑒹𑒐𑒏𑒏𑒹𑒿 𑒋𑒏𑒩 𑒠𑒼𑒮𑒩 𑒦𑒰𑒑 𑒧𑒰𑒯𑒳𑒩 𑒪𑒱𑒐𑒋 𑒣𑒛𑓃𑒪𑒢𑓂𑒯𑒱। 𑒡𑒲𑒩𑒹𑒢𑓂𑒠𑓂𑒩𑒢𑒰𑒟 𑒧𑒱𑒬𑓂𑒩 𑒔𑒧𑒹𑒪𑒲 𑒩𑒰𑒢𑒲𑒏 𑒮𑒧𑒲𑒏𑓂𑒭𑒰 𑒏𑒩𑒻𑒞 𑒫𑒱𑒠𑓂𑒨𑒰𑒣𑒞𑒱 𑒙𑒰𑒃𑒧𑓂𑒮𑒧𑒹 𑒪𑒱𑒐𑒢𑒹 𑒩𑒯𑒟𑒱- “...𑒖𑒹𑒢𑒰 𑒯𑒰𑒮𑓂𑒨-𑒮𑒧𑓂𑒩𑒰𑒙 𑒯𑒩𑒱𑒧𑒼𑒯𑒢 𑒥𑒰𑒥𑒴𑒏𑒹𑒿 “𑒏𑒢𑓂𑒨𑒰𑒠𑒰𑒢”𑒏 𑒣𑒬𑓂𑒔𑒰𑒞𑓂 “𑒠𑓂𑒫𑒱𑒩𑒰𑒑𑒧𑒢” 𑒪𑒱𑒐𑒋 𑒣𑒛𑓃𑒪𑒢𑒱 𑒞𑒯𑒱𑒢𑒰 “𑒔𑒧𑒹𑒪𑒲𑒩𑒰𑒢𑒲”𑒏 𑒠𑒼𑒮𑒩 𑒦𑒰𑒑 𑒅𑒣𑒢𑓂𑒨𑒰𑒮𑒏𑒰𑒩𑒏𑒹𑒿 𑒪𑒱𑒐𑒋 𑒣𑒛𑓃𑒞𑒢𑓂𑒯𑒱”। 𑒄 𑒠𑒳𑒢𑒴 𑒐𑒝𑓂𑒛 𑒏𑒻𑒏 𑒞𑒩𑒯𑒹𑒿 𑒧𑒻𑒟𑒱𑒪𑒲 𑒅𑒣𑒢𑓂𑒨𑒰𑒮 𑒪𑒹𑒐𑒢𑒧𑒹 𑒧𑒼𑒢 𑒩𑒰𑒐𑒪 𑒖𑒋𑒞। 𑒋𑒏 𑒞𑒿 𑒖𑒹𑒢𑒰 𑒩𑒰𑒧𑒪𑒼𑒔𑒢 𑒚𑒰𑒏𑒳𑒩 𑒖𑒲 𑒏𑒯𑒻𑒞 𑒕𑒟𑒱- “..𑒣𑒰𑒩𑒮-𑒣𑓂𑒩𑒞𑒱𑒦𑒰𑒏 𑒋𑒯𑒱 𑒪𑒹𑒐𑒏𑒏 𑒣𑒠𑒰𑒩𑓂𑒣𑒝 𑒋𑒞𑒹 𑒫𑒱𑒪𑒧𑓂𑒥𑒱𑒞 𑒏𑒱𑒋𑒏?” 𑒄 𑒣𑓂𑒩𑒬𑓂𑒢 𑒮𑒞𑓂𑒨𑒹 𑒁𑒢𑒳𑒞𑓂𑒞𑒩𑒱𑒞 𑒁𑒕𑒱। 𑒪𑒹𑒐𑒏 𑒁𑒣𑒢 𑒆𑒩𑓂𑒖𑒰𑒏 𑒮𑓀𑒑 𑒁𑒧𑒹𑒩𑒱𑒏𑒰, 𑒄𑒩𑒰𑒢 𑒂 𑒂𑒢 𑒚𑒰𑒧 𑒣𑒜𑓃𑒰𑒃-𑒪𑒱𑒐𑒰𑒃𑒧𑒹 𑒪𑒰𑒑𑒪 𑒩𑒯𑒟𑒱 𑒩𑒼𑒖𑒑𑒰𑒩𑒧𑒹 𑒩𑒯𑒟𑒱 𑒧𑒳𑒠𑒰 𑒧𑒧𑒞𑒰 𑒑𑒰𑒥𑒋 𑒑𑒲𑒞𑒏 𑒢𑒱𑒩𑓂𑒧𑒰𑒞𑒰 𑒒𑒳𑒧𑒱 𑒏𑓄 𑒠𑒩𑒦𑓀𑒑𑒰 𑒁𑒋𑒪𑒰𑒯 𑒞𑒿 𑒁𑒣𑒢 𑒮𑒧𑒮𑓂𑒞 𑒖𑒲𑒫𑒢𑒰𑒢𑒳𑒦𑒫 𑒋𑒯𑒱 𑒠𑒳𑒢𑒴 𑒅𑒣𑒢𑓂𑒨𑒰𑒮𑒧𑒹 𑒅𑒞𑒰𑒩𑒱 𑒠𑒹𑒪𑒢𑓂𑒯𑒱। 𑒩𑒰𑒖𑒧𑒼𑒯𑒢 𑒗𑒰𑒮𑒿 𑒋𑒏𑒙𑒰 𑒮𑒰𑒏𑓂𑒭𑒰𑒞𑓂𑒏𑒰𑒩𑒧𑒹 𑒯𑒧 𑒋𑒯𑒱 𑒮𑒧𑓂𑒥𑒢𑓂𑒡𑒧𑒹 𑒣𑒳𑒕𑒢𑒹 𑒩𑒯𑒱𑒨𑒢𑓂𑒯𑒱 𑒞𑒿 𑒍 𑒏𑒯𑒢𑒹 𑒩𑒯𑒟𑒱 𑒖𑒹 𑒥𑒱𑒢𑒰 𑒖𑒲𑒫𑒢𑒰𑒢𑒳𑒦𑒫𑒏 𑒩𑒔𑒢𑒰 𑒮𑓀𑒦𑒫 𑒢𑒯𑒱, 𑒖𑒱𑒢𑒏𑒩 𑒖𑒲𑒫𑒢𑒰𑒢𑒳𑒦𑒫 𑒖𑒞𑒹𑒏 𑒫𑒱𑒮𑓂𑒞𑒵𑒞 𑒩𑒯𑒞𑒢𑓂𑒯𑒱 𑒮𑒹 𑒍𑒞𑒹𑒏 𑒥𑒹𑒬𑒲 𑒫𑒱𑒦𑒱𑒢𑓂𑒢𑒞𑒰 𑒂 𑒢𑒴𑒞𑒢𑒞𑒰 𑒂𑒢𑒱 𑒮𑒏𑒞𑒰𑒯। 𑒏𑒹𑒠𑒰𑒩𑒢𑒰𑒟 𑒔𑒾𑒡𑒩𑒲𑒏 “𑒔𑒧𑒹𑒪𑒲 𑒩𑒰𑒢𑒲” 𑒂 “𑒧𑒰𑒯𑒳𑒩” 𑒄 𑒮𑒱𑒠𑓂𑒡 𑒏𑒩𑒻𑒞 𑒁𑒕𑒱। 𑒔𑒧𑒹𑒪𑒲 𑒩𑒰𑒢𑒲 𑒥𑒱𑒏𑓂𑒩𑒲𑒏 𑒋𑒏𑒙𑒰 𑒢𑒫 𑒏𑒲𑒩𑓂𑒞𑒱𑒧𑒰𑒢 𑒥𑒢𑒹𑒪𑒏। 𑒧𑒰𑒞𑓂𑒩 𑒖𑒢𑒏𑒣𑒳𑒩𑒧𑒹 𑒋𑒏𑒩 𑓕𑓐𑓐 𑒣𑓂𑒩𑒞𑒱 𑒥𑒱𑒏𑒰 𑒑𑒹𑒪। 𑒪𑒹𑒐𑒏 “𑒔𑒧𑒹𑒪𑒲 𑒩𑒰𑒢𑒲”𑒏 𑒮𑒧𑒩𑓂𑒣𑒝 - “𑒍𑒯𑒱 𑒮𑒧𑒑𑓂𑒩 𑒧𑒻𑒟𑒱𑒪𑒲 𑒣𑓂𑒩𑒹𑒧𑒲𑒏𑒹𑒿 𑒖𑒹 𑒁𑒣𑒢 𑒮𑒧𑓂𑒣𑒴𑒩𑓂𑒝 𑒖𑒱𑒢𑒑𑒲𑒧𑒹 𑒁𑒣𑒢 𑒏𑒻𑓀𑒔𑒰 𑒐𑒩𑓂𑒔 𑒏𑓄 𑒧𑒻𑒟𑒱𑒪𑒲-𑒦𑒰𑒭𑒰𑒏 𑒏𑒼𑒢𑒼 𑒣𑒼𑒟𑒲-𑒣𑒞𑓂𑒩𑒱𑒏𑒰 𑒏𑒱𑒢𑒢𑒹 𑒯𑒼𑒟𑒱”- 𑒏𑒹𑒿 𑒏𑒩𑒻𑒞 𑒕𑒟𑒱, 𑒧𑒳𑒠𑒰 𑒖𑒐𑒢 𑒁𑒣𑒰𑒩 𑒥𑒱𑒏𑓂𑒩𑒲𑒏 𑒥𑒰𑒠 𑒋𑒯𑒱 𑒣𑒼𑒟𑒲𑒏 𑒠𑒼𑒮𑒩 𑒮𑓀𑒮𑓂𑒏𑒩𑒝 𑓒𑓐𑓐𑓗 𑒧𑒹 𑒋𑒏𑒩 𑒠𑒼𑒮𑒩 𑒐𑒝𑓂𑒛 “𑒧𑒰𑒯𑒳𑒩”𑒏 𑓒𑓐𑓐𑓘 𑒧𑒹 𑒂𑒥𑒋 𑒮𑒿 𑒣𑒴𑒩𑓂𑒫𑒯𑒱 𑒢𑒱𑒏𑒰𑒪𑒋 𑒣𑒛𑓃𑒪𑒢𑓂𑒯𑒱, 𑒞𑒐𑒢 𑒠𑒼𑒮𑒩 𑒦𑒰𑒑𑒧𑒹 𑒮𑒧𑒩𑓂𑒣𑒝 𑒮𑓂𑒞𑓀𑒦 𑒕𑒼𑒛𑓃𑒢𑒰𑒃𑒨𑒹 𑒪𑒹𑒐𑒏𑒏𑒹𑒿 𑒬𑓂𑒩𑒹𑒨𑒮𑓂𑒏𑒩 𑒥𑒳𑒗𑒹𑒪𑒢𑓂𑒯𑒱। 𑒋𑒏𑒩 𑒋𑒏𑒙𑒰 𑒫𑒱𑒬𑒱𑒭𑓂𑒙𑒞𑒰 𑒯𑒧𑒩𑒰 𑒥𑒳𑒗𑒥𑒰𑒧𑒹 𑒂𑒋𑒪 𑓒𑓐𑓐𑓘 𑒏𑒹𑒩 𑒁𑒢𑓂𑒞𑒱𑒧 𑒏𑒰𑒪𑒧𑒹, 𑒖𑒐𑒢 𑒯𑒩𑒱𑒨𑒰𑒝𑒰𑒏 𑒅𑒣𑒧𑒳𑒐𑓂𑒨𑒧𑓀𑒞𑓂𑒩𑒲 𑒋𑒏 𑒧𑒰𑒮 𑒡𑒩𑒱 𑒢𑒱𑒣𑒞𑓂𑒞𑒰 𑒩𑒯𑒪𑒰𑒯, 𑒧𑒳𑒠𑒰 𑒩𑒰𑒖𑒢𑒨𑒱𑒏 𑒫𑒱𑒫𑒬𑒞𑒰𑒏 𑒁𑒢𑓂𑒞𑒩𑓂𑒑𑒞 𑒖𑒰𑒡𑒩𑒱 𑒍 𑒒𑒳𑒩𑒱 𑒏𑓄 𑒢𑒯𑒱 𑒁𑒋𑒪𑒰𑒯 𑒞𑒰𑒫𑒞 𑒯𑒳𑒢𑒏𑒰𑒣𑒩 𑒏𑒼𑒢𑒼 𑒏𑒰𑒩𑓂𑒨𑒫𑒰𑒯𑒲 𑒢𑒯𑒱 𑒏𑒋𑒪 𑒖𑒰 𑒮𑒏𑒪। 𑒁𑒣𑒢 𑒑𑒳𑒪𑒰𑒥 𑒧𑒱𑒬𑓂𑒩𑒖𑒲 𑒞𑒿 𑒮𑒹𑒯𑒼 𑒁𑒯𑒲 𑒩𑒰𑒖𑒢𑒲𑒞𑒱𑒏 𑒫𑒱𑒫𑒬𑒞𑒰𑒏 𑒏𑒰𑒩𑒝 𑒢𑒱𑒣𑒞𑓂𑒞𑒰 𑒩𑒯𑒪𑒼𑒣𑒩 𑒑𑒠𑓂𑒠𑒲𑒣𑒩 𑒥𑒻𑒮𑒪𑒹 𑒩𑒯𑒪𑒰𑒯𑓂, 𑒏𑓂𑒨𑒼 𑒯𑒳𑒢𑒏𑒰 𑒯𑒿𑒙𑒰 𑒢𑒯𑒱 𑒮𑒏𑒪। 𑒔𑒰𑒯𑒹 𑒩𑒰𑒖𑓂𑒨𑒏 𑒮𑓀𑒔𑒰𑒪𑒢𑒧𑒹 𑒏𑒞𑒹𑒏 𑒗𑓀𑒗𑒙𑒱 𑒏𑒱𑒋𑒏 𑒢𑒯𑒱 𑒂𑒋𑒪 𑒯𑒼𑒁𑒋।
𑒅𑒣𑒢𑓂𑒨𑒰𑒮-𑒪𑒹𑒐𑒏𑒏 𑒖𑒲𑒫𑒢𑒰𑒢𑒳𑒦𑒫, 𑒋𑒏𑒩 𑒮𑒧𑓂𑒦𑒰𑒫𑒢𑒰 𑒔𑒰𑒩𑒱 𑒮𑒰𑒪 𑒣𑒯𑒱𑒢𑒯𑒱𑒋 𑒪𑒱𑒐𑒱 𑒏𑓄 𑒩𑒰𑒐𑒱 𑒠𑒹𑒪𑒏। 𑒦𑒫𑒱𑒭𑓂𑒨𑒫𑒏𑓂𑒞𑒰 𑒦𑒹𑒢𑒰𑒃 𑒏𑒼𑒢𑒼 𑒙𑒼𑒢𑒰-𑒙𑒰𑒣𑒩𑒮𑒿 𑒮𑓀𑒦𑒫 𑒢𑒯𑒱 𑒯𑒼𑒃𑒞 𑒁𑒕𑒱 𑒫𑒩𑒢𑓂 𑒖𑒲𑒫𑒢𑒰𑒢𑒳𑒦𑒫 𑒋𑒏𑒩𑒰 𑒮𑒧𑓂𑒦𑒫 𑒥𑒢𑒥𑒻𑒞 𑒁𑒕𑒱।
𑒋𑒯𑒱 𑒠𑒳𑒢𑒴 𑒅𑒣𑒢𑓂𑒨𑒰𑒮𑒏 𑒣𑒰𑒞𑓂𑒩 𑒔𑒧𑒞𑓂𑒏𑒰𑒩𑒲 𑒕𑒟𑒱, 𑒂 𑒮𑒤𑒪 𑒮𑒹𑒯𑒼 । 𑒏𑒰𑒩𑒝 𑒅𑒣𑒢𑓂𑒨𑒰𑒮𑒏𑒰𑒩 𑒋𑒏𑒩𑒰 𑒋𑒯𑒱 𑒜𑓀𑒑𑒮𑒿 𑒮𑒵𑒖𑒱𑒞 𑒏𑒩𑒻𑒞 𑒕𑒟𑒱 𑒖𑒹𑒢𑒰 𑒮𑒦 𑒫𑒮𑓂𑒞𑒳𑒏 𑒯𑒳𑒢𑒏𑒰 𑒫𑓂𑒨𑒏𑓂𑒞𑒱𑒑𑒞 𑒁𑒢𑒳𑒦𑒫 𑒯𑒼𑒃𑒢𑓂𑒯𑒱।
“𑒔𑒧𑒹𑒪𑒲 𑒩𑒰𑒢𑒲” 𑒅𑒣𑒢𑓂𑒨𑒰𑒮𑒏 𑒣𑓂𑒩𑒰𑒩𑒧𑓂𑒦 𑒏𑒩𑒻𑒞 𑒪𑒹𑒐𑒏 𑒋𑒏𑒩 𑒣𑒯𑒱𑒪 𑒣𑒩𑒲𑒏𑓂𑒭𑒰𑒧𑒹 𑒅𑒞𑓂𑒞𑒲𑒩𑓂𑒝 𑒯𑒼𑒃𑒞 𑒕𑒟𑒱 𑒖𑒐𑒢 𑒋𑒏𑒩 𑒪𑒨𑒰𑒞𑓂𑒧𑒏 𑒣𑓂𑒩𑒰𑒩𑒧𑓂𑒦 𑒣𑒰𑒚𑒏𑒧𑒹 𑒩𑒳𑒔𑒱 𑒅𑒞𑓂𑒣𑒢𑓂𑒢 𑒏𑒩𑒻𑒞 𑒁𑒕𑒱। -𑒏𑒲𑒩𑓂𑒞𑒱𑒧𑒳𑒐𑒏 𑒣𑒰𑒿𑒔 𑒙𑒰 𑒥𑒹𑒙𑒰𑒏 𑒢𑒰𑒧𑒏𑒩𑒝𑒏 𑒪𑒹𑒪 𑒍𑒏𑒩 𑒖𑒱𑒑𑒩𑒲 𑒠𑒼𑒮 𑒏𑒢𑓂𑒙𑒲𑒩𑒏 𑒫𑒱𑒔𑒰𑒩 𑒖𑒹 – “𑒣𑒰𑒿𑒔𑒼 𑒣𑒰𑒝𑓂𑒛𑒫 𑒥𑒪𑒰 𑒢𑒰𑒧 𑒥𑒹𑒙𑒰 𑒮𑒥𑒯𑒏 𑒩𑒰𑒐𑒱 𑒠𑒯𑒏। 𑒮𑒳𑒦𑒱𑒞𑒰 𑒯𑒹𑒞𑒾”। 𑒤𑒹𑒩 𑒋𑒏 𑒚𑒰𑒧 𑒪𑒹𑒐𑒏 𑒏𑒯𑒻𑒞 𑒕𑒟𑒱 𑒖𑒹 𑒖𑒞𑒹𑒏 𑒑𑒞𑒱𑒮𑒿 𑒥𑒔𑓂𑒔𑒰 𑒯𑒼𑒃𑒞 𑒩𑒯𑒻𑒏 𑒮𑒹 𑒏𑒾𑒩𑒫𑒏 𑒢𑒰𑒧 𑒩𑒰𑒐𑒋 𑒣𑒛𑓃𑒱𑒞𑒻𑒏। 𑒢𑒰𑒨𑒱𑒏𑒰 𑒔𑒧𑒹𑒪𑒲 𑒩𑒰𑒢𑒲𑒏 𑒂𑒑𑒧𑒢 𑒡𑒩𑒱 𑒏𑒲𑒩𑓂𑒞𑒱𑒧𑒳𑒐𑒏 𑒥𑒹𑒙𑒰 𑒮𑒦𑒏 𑒫𑒩𑓂𑒝𑒢 𑒤𑒹𑒩 𑒋𑒯𑒱 𑒏𑓂𑒩𑒧𑒧𑒹 𑒁𑓀𑒑𑓂𑒩𑒹𑒖 𑒛𑒹𑒧𑓂𑒮𑒤𑒼𑒩𑓂𑒛 𑒂 𑒩𑒴𑒣𑒏𑒳𑒧𑓂𑒧𑒩𑒱𑒏 𑒮𑒢𑓂𑒞𑒰𑒢 𑒮𑒳𑒢𑒨𑒢𑒰𑒏 𑒫𑒱𑒫𑒩𑒝 𑒁𑒥𑒻𑒞 𑒁𑒕𑒱। 𑒤𑒹𑒩 𑒩𑒴𑒣𑒏𑒳𑒧𑓂𑒧𑒩𑒱𑒏 𑒥𑒹𑒙𑒲 𑒮𑒳𑒢𑒨𑒢𑒰𑒏 𑒥𑒹𑒙𑒲 𑒬𑒢𑒱𑒔𑒩𑒲 𑒂 𑒢𑒹𑒞𑒰𑒖𑒲 𑒩𑒰𑒧𑒚𑒹𑓀𑒑𑒰 𑒮𑒱𑓀𑒯 “𑒔𑒱𑒢𑒑𑒰𑒩𑒲”𑒏 𑒫𑒱𑒫𑒰𑒯 𑒂 𑒢𑒹𑒞𑒰𑒖𑒲 𑒠𑓂𑒫𑒰𑒩𑒰 𑒬𑒢𑒱𑒔𑒩𑒲𑒏𑒹𑒿 𑒏𑒢𑒯𑒲 𑒧𑒼𑒠𑒱𑒨𑒰𑒢𑒱 𑒪𑒑 𑒪𑒼𑒏-𑒪𑒰𑒖𑒏 𑒠𑓂𑒫𑒰𑒩𑒹 𑒩𑒰𑒐𑒱 𑒣𑒙𑒢𑒰 𑒖𑒰𑒋𑒥, 𑒢𑒹𑒞𑒰𑒖𑒲𑒏 𑒧𑒵𑒞𑓂𑒨𑒳 𑒂 𑒬𑒢𑒱𑒔𑒩𑒲 𑒂 𑒏𑒲𑒩𑓂𑒞𑒱𑒧𑒳𑒐𑒏 𑒫𑒱𑒫𑒰𑒯𑒏 𑒫𑒩𑓂𑒝𑒢 𑒤𑒹𑒩𑒮𑒿 𑒐𑒱𑒮𑓂𑒮𑒰𑒏𑒹𑒿 𑒮𑒧𑒹𑒙𑒱 𑒪𑒻𑒞 𑒁𑒕𑒱।
𑒞𑒏𑒩 𑒥𑒰𑒠 𑒔𑒧𑒹𑒪𑒲 𑒩𑒰𑒢𑒲𑒏 𑒫𑒩𑓂𑒝𑒢 𑒁𑒥𑒻𑒞 𑒁𑒕𑒱 𑒖𑒹 𑒥𑒩𑒾𑒢𑒲 𑒩𑒱𑒤𑒰𑒃𑒢𑒩𑒲𑒏 𑒮𑓂𑒏𑒴𑒪𑒧𑒹 𑒥𑒼𑒩𑓂𑒛𑒱𑓀𑒑𑒧𑒹 𑒣𑒜𑓃𑒻𑒞 𑒕𑒟𑒱 𑒂 𑒋𑒯𑒱 𑒏𑒢𑒯𑒲 𑒧𑒼𑒠𑒱𑒨𑒰𑒢𑒱𑒏 𑒥𑒹𑒙𑒲 𑒕𑒟𑒱। 𑒏𑒢𑒯𑒲 𑒧𑒼𑒠𑒱𑒨𑒰𑒢𑒱𑒏 𑒧𑒵𑒞𑓂𑒨𑒳𑒏 𑒮𑒧𑒨 𑒔𑒧𑒹𑒪𑒲 𑒩𑒰𑒢𑒲 𑒠𑒮𑒧𑒰𑒏 𑒣𑒩𑒲𑒏𑓂𑒭𑒰 𑒣𑒰𑒮 𑒏𑓄 𑒪𑒹𑒢𑒹 𑒕𑒟𑒱। 𑒦𑒴𑒐𑒢 𑒮𑒱𑓀𑒯 𑒔𑒧𑒹𑒪𑒲 𑒩𑒰𑒢𑒲𑒏 𑒡𑒩𑓂𑒧 𑒣𑒱𑒞𑒰 𑒕𑒟𑒱। 𑒛𑒏𑒻𑒞𑒲𑒏 𑒫𑒱𑒫𑒩𑒝𑒏 𑒮𑓀𑒑 𑒅𑒣𑒢𑓂𑒨𑒰𑒮𑒏 𑒣𑒯𑒱𑒪 𑒦𑒰𑒑 𑒐𑒞𑒧 𑒦𑓄 𑒖𑒰𑒃𑒞 𑒁𑒕𑒱।
𑒠𑒼𑒮𑒩 𑒦𑒰𑒑𑒧𑒹 𑒫𑒱𑒡𑒰𑒨𑒏𑒖𑒲𑒏 𑒣𑒰𑒃 𑒂𑒏𑒱 𑒐𑒖𑒰𑒢𑒰 𑒪𑒳𑒙𑒥𑒰𑒏 𑒫𑒱𑒫𑒩𑒝, 𑒖𑒹 𑒏𑒱 𑒣𑒴𑒩𑓂𑒫 𑒢𑒱𑒨𑒼𑒖𑒱𑒞 𑒕𑒪, 𑒋𑒯𑒱 𑒞𑒩𑒯𑒹𑒿 𑒠𑒹𑒐𑒰𑒍𑒪 𑒑𑒹𑒪 𑒁𑒕𑒱 𑒖𑒹𑒢𑒰 𑒄 𑒫𑒱𑒡𑒰𑒨𑒏 𑒢𑒰𑓀𑒑𑒙𑒢𑒰𑒟 𑒠𑓂𑒫𑒰𑒩𑒰 𑒋𑒏𑒙𑒰 𑒂𑒡𑒳𑒢𑒱𑒏 𑒥𑒰𑒪𑒰𑒣𑒩 𑒏𑒋𑒪 𑒥𑒪𑒰𑒞𑓂𑒏𑒰𑒩𑒏 𑒣𑒩𑒱𑒝𑒰𑒧𑒏 𑒤𑒪 𑒩𑒯𑒋। 𑒂𑒥 𑒄 𑒢𑒰𑓀𑒑𑒙𑒢𑒰𑒟 𑒩𑒯𑒟𑒱 𑒧𑒳𑒐𑓂𑒨𑒧𑓀𑒞𑓂𑒩𑒲 𑒑𑒳𑒪𑒰𑒥 𑒧𑒱𑒮𑒱𑒩𑒏 𑒐𑒥𑒰𑒮 𑒖𑒹 𑒩𑒰𑒖𑒢𑒲𑒞𑒱𑒏 𑒠𑒰𑒿𑒫𑒣𑒹𑓀𑒔𑒧𑒹 𑒫𑒱𑒡𑒰𑒨𑒏 𑒥𑒢𑒱 𑒑𑒹𑒪𑒰𑒯।
𑒄 𑒔𑒩𑒱𑒞𑓂𑒩 𑓒𑓐𑓐𑓘 𑒄.𑒏 𑒁𑒩𑒫𑒱𑒢𑓂𑒠 𑒁𑒛𑒱𑒑𑒏 𑒥𑒳𑒏𑒩 𑒣𑒳𑒩𑒮𑓂𑒏𑒰𑒩𑒮𑒿 𑒮𑒧𑓂𑒧𑒰𑒢𑒱𑒞 𑒁𑓀𑒑𑓂𑒩𑒹𑒖𑒲 𑒅𑒣𑒢𑓂𑒨𑒰𑒮 “𑒠 𑒯𑓂𑒫𑒰𑒃𑒙 𑒙𑒰𑒃𑒑𑒩”𑒏 𑒥𑒪𑒩𑒰𑒧 𑒯𑒪𑒫𑒰𑒃𑒏 𑒔𑒩𑒱𑒞𑓂𑒩 𑒖𑒹 𑒔𑒰𑒯𑒏 𑒠𑒼𑒏𑒰𑒢𑒣𑒩 𑒏𑒰𑒖 𑒏𑒩𑒻𑒞 𑒠𑒱𑒪𑓂𑒪𑒲𑒧𑒹 𑒋𑒏𑒙𑒰 𑒡𑒢𑒱𑒏𑒏 𑒛𑓂𑒩𑒰𑒃𑒫𑒩 𑒥𑒢𑒱 𑒤𑒹𑒩 𑒍𑒏𑒩𑒰 𑒧𑒰𑒩𑒱 𑒮𑓂𑒫𑒨𑓀 𑒡𑒢𑒱𑒏 𑒥𑒢𑒱 𑒖𑒰𑒃𑒞 𑒁𑒕𑒱, 𑒮𑒿 𑒥𑒹𑒬 𑒧𑒱𑒪𑒻𑒞 𑒁𑒕𑒱 𑒂 𑒔𑒰𑒩𑒱 𑒥𑒩𑒐 𑒣𑒴𑒩𑓂𑒫 𑒪𑒹𑒐𑒏 𑒋𑒯𑒱 𑒔𑒩𑒱𑒞𑓂𑒩𑒏 𑒢𑒱𑒩𑓂𑒧𑒰𑒝 𑒏𑓄 𑒔𑒳𑒏𑒪 𑒕𑒟𑒱। 𑒤𑒹𑒩 𑒏𑒹.𑒖𑒲.𑒥𑒲. 𑒋𑒖𑒹𑒢𑓂𑒙 𑒦𑒰𑒙𑒰𑒖𑒲𑒏 𑒂𑒑𑒧𑒢 𑒯𑒼𑒃𑒞 𑒁𑒕𑒱 𑒖𑒹 𑒅𑒣𑒢𑓂𑒨𑒰𑒮𑒏 𑒠𑒼𑒮𑒩 𑒐𑒝𑓂𑒛 “𑒧𑒰𑒯𑒳𑒩” 𑒡𑒩𑒱 𑒁𑒣𑒢 𑒅𑒣𑒮𑓂𑒟𑒱𑒞𑒱 𑒥𑒹𑒬 𑒣𑓂𑒩𑒦𑒰𑒫𑒲 𑒩𑒴𑒣𑒹𑒿 𑒩𑒐𑒥𑒰𑒧𑒹 𑒮𑒤𑒪 𑒯𑒼𑒃𑒞 𑒕𑒟𑒱।
𑒅𑒣𑒢𑓂𑒨𑒰𑒮𑒏 𑒞𑒹𑒮𑒩 𑒦𑒰𑒑𑒧𑒹 𑒁𑒯𑒧𑒠𑒳𑒪𑓂𑒪𑒰 𑒐𑒰𑒿𑒏 𑒁𑒦𑒱𑒨𑒰𑒢 𑒮𑒹𑒯𑒼 𑒥𑒹𑒬 𑒩𑒧𑒢𑒑𑒩 𑒁𑒕𑒱 𑒂 𑒫𑒩𑓂𑒞𑒧𑒰𑒢 𑒩𑒰𑒖𑒢𑒲𑒞𑒱𑒏 𑒮𑒦 𑒏𑒳𑒩𑒴𑒣𑒞𑒰𑒏𑒹𑒿 𑒮𑒧𑒹𑒙𑒢𑒹 𑒁𑒕𑒱। 𑒅𑒣𑒢𑓂𑒨𑒰𑒮𑒏 𑒔𑒰𑒩𑒱𑒧 𑒦𑒰𑒑 𑒑𑒳𑒪𑒰𑒥 𑒧𑒱𑒮𑒱𑒩𑒏 𑒐𑒹𑒩𑒯𑒰 𑒏𑒯𑒻𑒞 𑒁𑒕𑒱 𑒂 𑒤𑒹𑒩𑒮𑒿 𑒁𑒩𑒫𑒱𑒢𑓂𑒠 𑒁𑒛𑒱𑒑𑒏 𑒥𑒪𑒩𑒰𑒧 𑒯𑒪𑒫𑒰𑒃 𑒧𑒼𑒢 𑒣𑒛𑓃𑒻𑒞 𑒕𑒟𑒱। 𑒦𑒳𑒐𑒢 𑒮𑒱𑓀𑒯𑒏 𑒮𑓀𑒑𑒲 𑒣𑒢𑓂𑒢𑒰𑒏𑒹𑒿 𑒑𑒳𑒪𑒰𑒥 𑒧𑒱𑒮𑒱𑒩 𑒥𑒖𑒥𑒻𑒞 𑒁𑒕𑒱 𑒂 𑒍𑒏𑒩𑒰 𑒦𑒳𑒐𑒢 𑒮𑒱𑓀𑒯𑒏 𑒢𑒰𑓀𑒑𑒙𑒢𑒰𑒟 𑒂 𑒁𑒯𑒧𑒠𑒳𑒪𑓂𑒪𑒰 𑒁𑒦𑒱𑒨𑒰𑒢𑒏 𑒫𑒱𑒭𑒨𑒧𑒹 𑒏𑒯𑒻𑒞 𑒁𑒕𑒱। 𑒮𑓀𑒑𑒯𑒱 𑒍𑒏𑒩𑒰 𑒧𑒰𑒩𑒥𑒰𑒏 𑒪𑒹𑒪 𑒏𑒯𑒻𑒞 𑒁𑒕𑒱 𑒮𑒹 𑒍 𑒧𑒢𑒰 𑒏𑓄 𑒠𑒻𑒞 𑒕𑒻। 𑒧𑒳𑒠𑒰 𑒑𑒳𑒪𑒰𑒥 𑒧𑒱𑒮𑒱𑒩 𑒦𑒳𑒐𑒢 𑒮𑒱𑓀𑒯𑒏𑒹𑒿 𑒕𑒪𑒮𑒿 𑒧𑒩𑒥𑒰 𑒠𑒻𑒞 𑒁𑒕𑒱।
𑒣𑒰𑒿𑒔𑒧 𑒦𑒰𑒑𑒧𑒹 𑒦𑒳𑒐𑒢 𑒮𑒱𑓀𑒯𑒏 𑒙𑓂𑒩𑒮𑓂𑒙𑒏 𑒔𑒩𑒔𑒰 𑒁𑒕𑒱, 𑒔𑒧𑒹𑒪𑒲 𑒩𑒰𑒢𑒲 𑒁𑒣𑒢 𑒁𑒛𑓂𑒛𑒰 𑒕𑒼𑒛𑓃𑒱 𑒥𑒻𑒠𑓂𑒨𑒢𑒰𑒟 𑒡𑒰𑒧 𑒔𑒪𑒱 𑒖𑒰𑒃𑒞 𑒕𑒟𑒱। 𑒂𑒥 𑒔𑒧𑒹𑒪𑒲 𑒩𑒰𑒢𑒲𑒏 𑒩𑒰𑒖𑒢𑒲𑒞𑒱𑒏 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱। 𑒮𑓂𑒙𑒱𑓀𑒑 𑒂𑒣𑒩𑒹𑒬𑒢 𑒯𑒼𑒃𑒞 𑒁𑒕𑒱 𑒂 𑒑𑒳𑒪𑒰𑒥 𑒧𑒱𑒮𑒱𑒩 𑒒𑒹𑒩𑒰 𑒖𑒰𑒃𑒞 𑒕𑒟𑒱।
𑒅𑒣𑒢𑓂𑒨𑒰𑒮𑒏 𑒕𑒚𑒧 𑒦𑒰𑒑 𑒧𑒳𑒐𑓂𑒨𑒧𑓀𑒞𑓂𑒩𑒲𑒏 𑒢𑒱𑒣𑒞𑓂𑒞𑒰 𑒩𑒯𑒪𑒰𑒏 𑒅𑒣𑒩𑒰𑒢𑓂𑒞𑒼 𑒧𑒰𑒞𑓂𑒩 𑒤𑒻𑒏𑓂𑒙 𑒤𑒰𑒃𑓀𑒛𑒱𑓀𑒑 𑒏𑒧𑒹𑒙𑒲 𑒥𑒢𑒰𑒍𑒪 𑒖𑒋𑒥𑒰𑒏 𑒔𑒩𑒔𑒰 𑒯𑒼𑒋𑒥𑒰𑒏 𑒁𑒕𑒱, 𑒖𑒹 𑒏𑒼𑒪𑒱𑒬𑒢 𑒣𑒼𑒪𑒱𑒙𑒱𑒏𑓂𑒮𑒏 𑒫𑒱𑒫𑒬𑒞𑒰𑒣𑒩 𑒙𑒱𑒣𑓂𑒣𑒝𑒲 𑒁𑒕𑒱।
𑒅𑒣𑒢𑓂𑒨𑒰𑒮𑒏 𑒠𑒼𑒮𑒩 𑒐𑒝𑓂𑒛 “𑒧𑒰𑒯𑒳𑒩”𑒏 𑒣𑒯𑒱𑒪 𑒦𑒰𑒑 𑒮𑒹𑒯𑒼 𑒒𑒳𑒩𑒱𑒨𑒰𑒃𑒞-𑒒𑒳𑒩𑒱𑒨𑒰𑒃𑒞 𑒔𑒧𑒹𑒪𑒲 𑒩𑒰𑒢𑒲𑒏 𑒣𑒰𑒩𑓂𑒙𑒲𑒏 𑒮𑓀𑒑𑒚𑒢𑒏 𑒔𑒰𑒩𑒴 𑒏𑒰𑒞 𑒂𑒥𑒱 𑒖𑒰𑒃𑒞 𑒁𑒕𑒱। 𑒮𑓂𑒞𑓂𑒩𑒲𑒣𑒩 𑒁𑒞𑓂𑒨𑒰𑒔𑒰𑒩, 𑒥𑒰𑒪-𑒫𑒱𑒡𑒫𑒰 𑒂 𑒫𑒻𑒬𑓂𑒨𑒰𑒫𑒵𑒞𑓂𑒞𑒱𑒧𑒹 𑒚𑒹𑒪𑒥𑒰𑒏 𑒞𑒹𑒯𑒢 𑒮𑓀𑒑𑒚𑒢 𑒮𑒦𑒏𑒹𑒿 𑒪𑒹𑒐𑒏 𑒁𑒣𑒢 𑒙𑒱𑒣𑓂𑒣𑒝𑒲 𑒪𑒹𑒪 𑒔𑒳𑒢𑒻𑒞 𑒕𑒟𑒱।
𑒧𑒰𑒯𑒳𑒩𑒏 𑒠𑒼𑒮𑒩 𑒦𑒰𑒑𑒧𑒹 𑒑𑒳𑒪𑒰𑒥 𑒧𑒱𑒮𑒱𑒩𑒏 𑒩𑒰𑒖𑒡𑒰𑒢𑒲 𑒣𑒠𑒰𑒩𑓂𑒣𑒝𑒏 𑒔𑒩𑒔𑒰 𑒁𑒕𑒱। 𑒔𑒧𑒹𑒪𑒲 𑒩𑒰𑒢𑒲 𑒠𑓂𑒫𑒰𑒩𑒰 𑒁𑒣𑒢 𑒁𑒦𑒱𑒨𑒰𑒢𑒏 𑒮𑒧𑒩𑓂𑒟𑒢𑒧𑒹 𑒢𑒏𑓂𑒮𑒪𑒲 𑒢𑒹𑒞𑒰𑒏 𑒁𑒛𑓂𑒛𑒰𑒣𑒩 𑒖𑒋𑒥𑒰𑒏 𑒂 𑒋𑒯𑒱 𑒥𑒯𑒢𑓂𑒢𑒹 𑒮𑒧𑒮𑓂𑒞 𑒢𑒏𑓂𑒮𑒪𑒲 𑒂𑒢𑓂𑒠𑒼𑒪𑒢𑒣𑒩 𑒪𑒹𑒐𑒏𑒲𑒨 𑒠𑒵𑒭𑓂𑒙𑒱𑒏𑒼𑒝, 𑒮𑓀𑒑𑒯𑒱 𑒥𑒼𑒢𑒏 𑒂 𑒂𑒠𑒱𑒫𑒰𑒮𑒲 𑒪𑒼𑒏𑒢𑒱𑒏 𑒮𑒔𑒱𑒞𑓂𑒩-𑒖𑒲𑒫𑒢𑓂𑒞 𑒫𑒱𑒫𑒩𑒝 𑒪𑒹𑒐𑒏𑒲𑒨 𑒏𑒾𑒬𑒪𑒏 𑒣𑓂𑒩𑒞𑒲𑒏 𑒁𑒕𑒱। 𑒔𑒧𑒹𑒪𑒲 𑒩𑒰𑒢𑒲 𑒪𑒑 𑒤𑒹𑒩 𑒩𑒯𑒮𑓂𑒨𑒼𑒠𑓂𑒒𑒰𑒙𑒢 𑒦𑒹𑒪 𑒖𑒹 𑒯𑒳𑒢𑒏𑒩 𑒧𑒰𑒋 𑒏𑒢𑒯𑒲 𑒧𑒼𑒠𑒱𑒨𑒰𑒃𑒢 𑒥𑒛𑓂𑒛 𑒣𑒻𑒒 𑒒𑒩𑒏 𑒕𑒟𑒱 𑒂 𑒯𑒳𑒢𑒏𑒩 𑒮𑓀𑒑 𑒣𑒙𑒹𑒪 𑒠𑓂𑒫𑒰𑒩𑒰 𑒁𑒞𑓂𑒨𑒰𑒔𑒰𑒩 𑒏𑒋𑒪 𑒑𑒹𑒪, 𑒔𑒧𑒹𑒪𑒲 𑒩𑒰𑒢𑒲𑒏 𑒣𑒱𑒞𑒰𑒏 𑒯𑒞𑓂𑒨𑒰 𑒏𑓄 𑒠𑒹𑒪 𑒑𑒹𑒪 𑒂 𑒥𑒹𑒔𑒰𑒩𑒲 𑒧𑒰𑒋 𑒁𑒣𑒢 𑒖𑒱𑒢𑒑𑒲 𑒏𑒢𑒯𑒲 𑒧𑒼𑒠𑒱𑒨𑒰𑒃𑒢 𑒥𑒢𑒱 𑒢𑒱𑒩𑓂𑒫𑒰𑒯 𑒏𑒋𑒪𑒢𑓂𑒯𑒱। 𑒄 𑒮𑒦 𑒑𑒣 𑒅𑒣𑒢𑓂𑒨𑒰𑒮𑒧𑒹 𑒩𑒼𑒔𑒏𑒞𑒰 𑒂𑒢𑒱 𑒠𑒻𑒞 𑒁𑒕𑒱।
𑒧𑒰𑒯𑒳𑒩𑒏 𑒞𑒹𑒮𑒩 𑒦𑒰𑒑 𑒤𑒹𑒩𑒮𑒿 𑒣𑒔𑒏𑒾𑒛𑓃𑒲 𑒧𑒱𑒨𑒰𑒿, 𑒑𑒳𑒪𑒰𑒥 𑒧𑒱𑒮𑒱𑒩, 𑒂𑒃.𑒋𑒮.𑒂𑒃. 𑒂 𑒏𑒹.𑒖𑒲.𑒥𑒲.𑒏 𑒭𑒛𑒨𑒢𑓂𑒞𑓂𑒩𑒏 𑒥𑒲𑒔 𑒩𑒯𑒮𑓂𑒨 𑒂 𑒩𑒼𑒧𑒰𑓀𑒔 𑒅𑒞𑓂𑒣𑒢𑓂𑒢 𑒏𑒩𑒻𑒞 𑒁𑒕𑒱।
𑒧𑒰𑒯𑒳𑒩𑒏 𑒔𑒰𑒩𑒱𑒧 𑒦𑒰𑒑 𑒔𑒧𑒹𑒪𑒲 𑒩𑒰𑒢𑒲 𑒠𑓂𑒫𑒰𑒩𑒰 𑒁𑒣𑒢 𑒧𑒰𑒋-𑒥𑒰𑒣𑒏 𑒮𑓀𑒑 𑒏𑒋𑒪 𑒑𑒹𑒪 𑒁𑒞𑓂𑒨𑒰𑒔𑒰𑒩𑒏 𑒥𑒠𑒪𑒰 𑒪𑒹𑒥𑒰𑒏 𑒫𑒩𑓂𑒝𑒢 𑒠𑒻𑒞 𑒁𑒕𑒱, 𑒏𑒻𑒏 𑒯𑒖𑒰𑒩 𑒏𑒩𑒼𑒛𑓃𑒏 𑒮𑒧𑓂𑒣𑒞𑓂𑒞𑒱 𑒁𑒋𑒪𑒰𑒮𑒿 𑒔𑒧𑒹𑒪𑒲 𑒩𑒰𑒢𑒲 𑒮𑒧𑓂𑒣𑒢𑓂𑒢 𑒦𑓄 𑒑𑒹𑒪𑒲𑒯।
𑒧𑒰𑒯𑒳𑒩𑒏 𑒣𑒰𑒿𑒔𑒧 𑒦𑒰𑒑 𑒩𑒰𑒖𑒢𑒻𑒞𑒱𑒏 𑒠𑒰𑒿𑒫-𑒣𑒹𑓀𑒔 𑒂 𑒔𑒧𑒹𑒪𑒲 𑒩𑒰𑒢𑒲𑒏 𑒠𑒪𑒏 𑒫𑒱𑒖𑒨𑒮𑒿 𑒐𑒞𑒧 𑒯𑒼𑒃𑒞 𑒁𑒕𑒱।
𑒫𑒱𑒫𑒹𑒔𑒢: 𑒅𑒣𑒢𑓂𑒨𑒰𑒮𑒏 𑒥𑒳𑒩𑓂𑒖𑒳𑒂 𑒣𑓂𑒩𑒰𑒩𑒧𑓂𑒦𑒏 𑒁𑒕𑒻𑒞 𑒋𑒯𑒱𑒧𑒹 𑒋𑒞𑒹𑒏 𑒖𑒙𑒱𑒪𑒞𑒰 𑒯𑒼𑒃𑒞 𑒁𑒕𑒱 𑒖𑒹 𑒋𑒯𑒱𑒧𑒹 𑒣𑓂𑒩𑒞𑒱𑒦𑒰𑒏 𑒢𑒲𑒏 𑒖𑒏𑒰𑒿 𑒣𑒩𑒲𑒏𑓂𑒭𑒝 𑒯𑒼𑒃𑒞 𑒁𑒕𑒱। 𑒅𑒣𑒢𑓂𑒨𑒰𑒮 𑒫𑒱𑒡𑒰𑒏 𑒥𑒳𑒩𑓂𑒖𑒳𑒂 𑒂𑒩𑒧𑓂𑒦𑒏 𑒏𑒰𑒩𑒝 𑒮𑒩𑓂𑒫𑒰𑓀𑒞𑒲𑒖𑒏 “𑒛𑒰𑒢 𑒏𑓂𑒫𑒱𑒏𑓂𑒖𑒼𑒙”, 𑒖𑒹 𑒮𑒞𑓂𑒩𑒯𑒧 𑒬𑒞𑒰𑒥𑓂𑒠𑒲𑒏 𑒣𑓂𑒩𑒰𑒩𑒧𑓂𑒦𑒧𑒹 𑒂𑒥𑒱 𑒑𑒹𑒪 𑒩𑒯𑒋, 𑒏𑒹𑒩 𑒁𑒕𑒻𑒞 𑒅𑒣𑒢𑓂𑒨𑒰𑒮 𑒫𑒱𑒡𑒰 𑒅𑒢𑓂𑒢𑒻𑒮𑒧 𑒬𑒞𑒰𑒥𑓂𑒠𑒲𑒏 𑒂𑒑𑒧𑒢𑒮𑒿 𑒧𑒰𑒞𑓂𑒩 𑒏𑒱𑒕𑒳 𑒮𑒧𑒨 𑒣𑒴𑒩𑓂𑒫 𑒑𑒧𑓂𑒦𑒲𑒩 𑒮𑓂𑒫𑒩𑒴𑒣 𑒣𑓂𑒩𑒰𑒣𑓂𑒞 𑒏𑓄 𑒮𑒏𑒪। 𑒅𑒣𑒢𑓂𑒨𑒰𑒮𑒧𑒹 𑒫𑒰𑒠-𑒫𑒱𑒫𑒰𑒠-𑒮𑒧𑓂𑒫𑒰𑒠𑒮𑒿 𑒅𑒞𑓂𑒣𑒢𑓂𑒢 𑒯𑒼𑒃𑒞 𑒁𑒕𑒱 𑒢𑒱𑒥𑒢𑓂𑒡, 𑒨𑒳𑒫𑒏-𑒨𑒳𑒫𑒞𑒲𑒏 𑒔𑒩𑒱𑒞𑓂𑒩 𑒁𑒢𑒻𑒞 𑒁𑒕𑒱 𑒣𑓂𑒩𑒹𑒧𑒰𑒐𑓂𑒨𑒰𑒢, 𑒪𑒼𑒏 𑒂 𑒦𑒴𑒑𑒼𑒪 𑒠𑒻𑒞 𑒁𑒕𑒱 𑒫𑒩𑓂𑒝𑒢 𑒃𑒞𑒱𑒯𑒰𑒮𑒏, 𑒂 𑒞𑒐𑒢 𑒢𑒲𑒏- 𑒐𑒩𑒰𑒣 𑒔𑒩𑒱𑒞𑓂𑒩𑒏 𑒏𑒟𑒰 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱। 𑒏𑒐𑒢𑒼 𑒣𑒰𑒚𑒏𑒏𑒹𑒿 𑒄 𑒯𑒿𑒮𑒥𑒻𑒞 𑒁𑒕𑒱, 𑒏𑒐𑒢𑒼 𑒍𑒏𑒩𑒰 𑒅𑒣𑒠𑒹𑒬 𑒠𑒻𑒞 𑒁𑒕𑒱। 𑒧𑒰𑒩𑓂𑒏𑓂𑒮𑒫𑒰𑒠 𑒅𑒣𑒢𑓂𑒨𑒰𑒮𑒏 𑒮𑒰𑒧𑒰𑒖𑒱𑒏 𑒨𑒟𑒰𑒩𑓂𑒟𑒏 𑒍𑒏𑒰𑒪𑒞𑒱 𑒏𑒩𑒻𑒞 𑒁𑒕𑒱। 𑒤𑓂𑒩𑒰𑒨𑒛 𑒮𑒦 𑒧𑒢𑒳𑒏𑓂𑒐𑒏𑒹𑒿 𑒩𑒯𑒮𑓂𑒨𑒧𑒨𑒲 𑒧𑒰𑒢𑒻𑒞 𑒕𑒟𑒱। 𑒍 𑒮𑒰𑒯𑒱𑒞𑓂𑒨𑒱𑒏 𑒏𑒵𑒞𑒱𑒏𑒹𑒿 𑒮𑒰𑒯𑒱𑒞𑓂𑒨𑒏𑒰𑒩𑒏 𑒫𑒱𑒬𑓂𑒪𑒹𑒭𑒝 𑒪𑒹𑒪 𑒔𑒳𑒢𑒻𑒞 𑒕𑒟𑒱 𑒞𑒿 𑒢𑒫 𑒤𑓂𑒩𑒰𑒨𑒛𑒫𑒰𑒠 𑒖𑒻𑒫𑒱𑒏𑒏 𑒥𑒠𑒪𑒰 𑒮𑒰𑓀𑒮𑓂𑒏𑒵𑒞𑒱𑒏 𑒞𑒞𑓂𑒫𑒏 𑒣𑓂𑒩𑒡𑒰𑒢𑒞𑒰𑒣𑒩 𑒖𑒼𑒩 𑒠𑒻𑒞 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒕𑒟𑒱। 𑒢𑒫-𑒮𑒧𑒲𑒏𑓂𑒭𑒰𑒫𑒰𑒠 𑒏𑒵𑒞𑒱𑒏 𑒫𑒱𑒮𑓂𑒞𑒵𑒞 𑒫𑒱𑒫𑒩𑒝𑒣𑒩 𑒂𑒡𑒰𑒩𑒱𑒞 𑒁𑒕𑒱। 𑒋𑒯𑒱 𑒮𑒦𑒏 𑒮𑓀𑒑 𑒖𑒲𑒫𑒢𑒰𑒢𑒳𑒦𑒫 𑒮𑒹𑒯𑒼 𑒋𑒏 𑒣𑒏𑓂𑒭𑒏 𑒯𑒼𑒃𑒞 𑒁𑒕𑒱 𑒂 𑒞𑒐𑒢 𑒋𑒞𑒋 𑒠𑒥𑒰𑒋𑒪 𑒃𑒔𑓂𑒕𑒰𑒏 𑒞𑒵𑒣𑓂𑒞𑒱𑒏 𑒪𑒹𑒪 𑒪𑒹𑒐𑒏 𑒋𑒏𑒙𑒰 𑒮𑓀𑒮𑒰𑒩𑒏 𑒩𑒔𑒢𑒰 𑒏𑒋𑒪𑒢𑓂𑒯𑒱 𑒖𑒰𑒯𑒱𑒧𑒹 𑒣𑒰𑒚𑒏 𑒨𑒟𑒰𑒩𑓂𑒟 𑒂 𑒏𑒰𑒪𑓂𑒣𑒢𑒱𑒏𑒞𑒰𑒏 𑒥𑒲𑒔𑒏 𑒂𑒛𑓃𑒱-𑒡𑒴𑒩𑒣𑒩 𑒔𑒪𑒻𑒞 𑒁𑒕𑒱।

𑒢𑒔𑒱𑒏𑒹𑒞𑒰𑒏 𑒢𑒰𑒙𑒏
𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬
𑒢𑒰𑒙𑒏𑒏 𑒏𑒟𑒰𑒢𑒏: 𑒣𑓂𑒩𑒟𑒧 𑒏𑒪𑓂𑒪𑒼𑒪: 𑒄 𑒢𑒰𑒙𑒏 𑒖𑓂𑒨𑒼𑒞𑒱𑒩𑒲𑒬𑓂𑒫𑒩𑒏 𑒣𑒩𑒧𑓂𑒣𑒩𑒰𑒧𑒹 𑒏𑒪𑓂𑒪𑒼𑒪𑒧𑒹 (𑒯𑒳𑒢𑒏𑒩 𑒫𑒩𑓂𑒝 𑒩𑒞𑓂𑒢𑒰𑒏𑒩 𑒏𑒪𑓂𑒪𑒼𑒪𑒧𑒹 𑒫𑒱𑒦𑒏𑓂𑒞 𑒁𑒕𑒱 𑒖𑒹 𑒢𑒰𑒙𑒏 𑒢𑒯𑒱 𑒕𑒲, 𑒡𑒴𑒩𑓂𑒞-𑒮𑒧𑒰𑒑𑒧 𑒖𑒹 𑒖𑓂𑒨𑒼𑒞𑒱𑒩𑒲𑒬𑓂𑒫𑒩 𑒪𑒱𑒐𑒱𑒞 𑒢𑒰𑒙𑒏 𑒁𑒕𑒱- 𑒁𑓀𑒏𑒧𑒹 𑒫𑒱𑒦𑒏𑓂𑒞 𑒁𑒕𑒱) 𑒫𑒱𑒦𑒰𑒖𑒱𑒞 𑒁𑒕𑒱। 𑒔𑒰𑒩𑒱 𑒏𑒪𑓂𑒪𑒼𑒪𑒏 𑒫𑒱𑒦𑒰𑒖𑒢𑒏 𑒣𑓂𑒩𑒟𑒧 𑒏𑒪𑓂𑒪𑒼𑒪 𑒮𑓂𑒫𑒩𑓂𑒑 (𑒫𑒰 𑒢𑒩𑒏) 𑒏𑒹𑒩 𑒠𑓂𑒫𑒰𑒩𑒣𑒩 𑒂𑒩𑒧𑓂𑒦 𑒯𑒼𑒃𑒞 𑒁𑒕𑒱। 𑒍𑒞𑒋 𑒥𑒯𑒳𑒞 𑒩𑒰𑒮 𑒧𑒳𑒃𑒪 𑒪𑒼𑒏 𑒠𑓂𑒫𑒰𑒩𑒏 𑒦𑒲𑒞𑒩 𑒣𑓂𑒩𑒫𑒹𑒬𑒏 𑒪𑒹𑒪 𑒣𑓀𑒏𑓂𑒞𑒱𑒥𑒠𑓂𑒡 𑒕𑒟𑒱। 𑒏𑓂𑒨𑒼 𑒣𑒟 𑒠𑒳𑒩𑓂𑒒𑒙𑒢𑒰𑒧𑒹 𑒬𑒱𑒏𑒰𑒩 𑒦𑒹𑒪 𑒥𑒰𑒖𑒰𑒩𑒲 𑒕𑒟𑒱 𑒞𑒿 𑒮𑓀𑒑𑒧𑒹 𑒨𑒳𑒠𑓂𑒠𑒧𑒹 𑒧𑒵𑒞 𑒦𑒹𑒪 𑒮𑒻𑒢𑒱𑒏 𑒂 𑒔𑒼𑒩𑒱 𑒏𑒩𑒋 𑒏𑒰𑒪 𑒧𑒰𑒩𑒪 𑒑𑒹𑒪 𑒔𑒼𑒩, 𑒅𑒔𑓂𑒔𑒏𑓂𑒏𑒰 𑒂 𑒣𑒰𑒏𑒱𑒙𑒧𑒰𑒩 𑒮𑒹𑒯𑒼 𑒕𑒟𑒱। 𑒖𑓂𑒨𑒼𑒞𑒱𑒩𑒲𑒬𑓂𑒫𑒩𑒏 𑒡𑒴𑒩𑓂𑒞𑒮𑒧𑒰𑒑𑒧𑒧𑒹 𑒖𑒹 𑒁𑒞𑒱 𑒂𑒡𑒳𑒢𑒱𑒏 𑒁𑒥𑓂𑒮𑒩𑓂𑒛𑒱𑒙𑒲 𑒁𑒕𑒱 𑒮𑒹 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒮𑒹𑒯𑒼 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱। 𑒣𑓂𑒩𑒟𑒧 𑒏𑒪𑓂𑒪𑒼𑒪𑒧𑒹 𑒖𑒹 𑒥𑒰𑒖𑒰𑒩𑒲 𑒕𑒟𑒱 𑒮𑒹, 𑒣𑓀𑒏𑓂𑒞𑒱 𑒞𑒼𑒛𑓃𑒱 𑒂𑒑𑒰𑒿 𑒥𑒜𑓃𑒪𑒰 𑒅𑒞𑓂𑒞𑒩, 𑒔𑒼𑒩 𑒂 𑒅𑒔𑒏𑓂𑒏𑒰 𑒠𑒳𑒢𑒴 𑒑𑒼𑒙𑒹𑒏𑒹𑒿, 𑒏𑒰𑒪𑒩 𑒣𑒏𑒛𑓃𑒱 𑒣𑒳𑒢𑓁 𑒯𑒳𑒢𑒏𑒩 𑒮𑒦𑒏 𑒧𑒴𑒪 𑒮𑓂𑒟𑒰𑒢𑒣𑒩 𑒠𑒋 𑒁𑒥𑒻𑒞 𑒕𑒟𑒱। 𑒅𑒔𑒏𑓂𑒏𑒰 𑒖𑒹 𑒥𑒰𑒠𑒧𑒹 𑒣𑒞𑒰 𑒔𑒪𑒻𑒞 𑒁𑒕𑒱 𑒖𑒹 𑒑𑒳𑒝𑓂𑒛𑒰-𑒠𑒰𑒠𑒰 𑒟𑒱𑒏 𑒧𑒳𑒠𑒰 𑒥𑒰𑒖𑒰𑒩𑒲 𑒪𑒑 𑒮𑒘𑓂𑒔-𑒧𑒘𑓂𑒔 𑒩𑒯𑒻𑒞 𑒁𑒕𑒱, 𑒯𑒳𑒢𑒏𑒰𑒮𑒿 𑒁𑓀𑒑𑒰 𑒕𑒼𑒛𑓃𑒥𑒰𑒏 𑒪𑒹𑒪 𑒏𑒯𑒻𑒞 𑒁𑒕𑒱। 𑒧𑒳𑒠𑒰 𑒖𑒐𑒢 𑒣𑒰𑒏𑒹𑒙𑒧𑒰𑒩 𑒥𑒰𑒖𑒰𑒩𑒲 𑒠𑒱𑒮𑒮𑒿 𑒔𑒼𑒩𑒏 𑒫𑒱𑒣𑒏𑓂𑒭𑒧𑒹 𑒥𑒖𑒻𑒞 𑒁𑒕𑒱 𑒞𑒐𑒢 𑒅𑒔𑒏𑓂𑒏𑒰 𑒔𑒏𑓂𑒏𑒴 𑒢𑒱𑒏𑒰𑒪𑒱 𑒁𑒣𑒢 𑒁𑒮𑒪 𑒩𑒴𑒣𑒧𑒹 𑒂𑒥𑒱 𑒖𑒰𑒃𑒞 𑒁𑒕𑒱 𑒂 𑒣𑒰𑒏𑒹𑒙𑒧𑒰𑒩𑒣𑒩 𑒧𑒰𑒩𑒱-𑒧𑒰𑒩𑒱 𑒏𑒋 𑒅𑒚𑒻𑒞 𑒁𑒕𑒱। 𑒧𑒳𑒠𑒰 𑒖𑒐𑒢 𑒔𑒼𑒩 𑒏𑒯𑒻𑒞 𑒕𑒢𑒱 𑒖𑒹 𑒄 𑒮𑒹𑒯𑒼 𑒁𑒣𑒢𑒹 𑒥𑒱𑒩𑒰𑒠𑒩𑒲𑒏 𑒁𑒕𑒱 𑒖𑒹 𑒕𑒼𑒙-𑒕𑒲𑒢 𑒣𑒰𑒏𑒹𑒙𑒧𑒰𑒩 𑒧𑒰𑒞𑓂𑒩 𑒥𑒢𑒱 𑒮𑒏𑒪, 𑒍𑒏𑒩 𑒖𑒏𑒰𑒿 𑒧𑒰𑒿𑒖𑒪 𑒔𑒼𑒩 𑒢𑒯𑒱, 𑒂 𑒅𑒔𑒏𑓂𑒏𑒰 𑒖𑒹𑒏𑒰𑒿 𑒑𑒳𑒝𑓂𑒛𑒰-𑒥𑒠𑒧𑒰𑒬 𑒥𑒢𑒥𑒰𑒏 𑒞𑒿 𑒮𑒼𑒔𑒱𑒍 𑒢𑒘𑒱 𑒮𑒏𑒪, 𑒞𑒐𑒢 𑒅𑒔𑒏𑓂𑒏𑒰 𑒧𑒯𑒩𑒰𑒖 𑒔𑒼𑒩𑒏 𑒣𑒰𑒕𑒰𑒿 𑒣𑒛𑓃𑒱 𑒖𑒰𑒃𑒞 𑒕𑒟𑒱, 𑒖𑒹 𑒥𑒠𑒧𑒰𑒬 𑒏𑒏𑒩𑒰 𑒏𑒯𑒪𑒿𑒯। 𑒂𑒥 𑒣𑒰𑒏𑒹𑒙𑒧𑒰𑒩 𑒧𑒾𑒏𑒰 𑒠𑒹𑒐𑒱 𑒣𑒏𑓂𑒭 𑒥𑒠𑒪𑒻𑒞 𑒁𑒕𑒱 𑒂 𑒅𑒔𑒏𑓂𑒏𑒰𑒏𑒹𑒿 𑒏𑒯𑒻𑒞 𑒕𑒢𑓂𑒯𑒱 𑒖𑒹 𑒁𑒯𑒰𑒿𑒏𑒹𑒿 𑒢𑒯𑒱 𑒯𑒧𑒩𑒰 𑒏𑒯𑒪𑒏। 𑒮𑓀𑒑𑒹 𑒄𑒯𑒼 𑒏𑒯𑒻𑒞 𑒁𑒕𑒱 𑒖𑒹 𑒔𑒼𑒩𑒱 𑒞𑒿 𑒄 𑒞𑒹𑒯𑒢 𑒏𑒩𑒋 𑒖𑒢𑒻𑒞 𑒁𑒕𑒱, 𑒖𑒹 𑒑𑒱𑒩𑒯𑒟𑒏 𑒥𑒹𑒙𑒰 𑒂 𑒏𑒳𑒏𑒳𑒩 𑒮𑒦 𑒔𑒼𑒩𑒱 𑒏𑒩𑒻𑒞 𑒏𑒰𑒪 𑒣𑒲𑒙𑒻𑒞-𑒣𑒲𑒙𑒻𑒞 𑒋𑒞𑓄 𑒣𑒚𑒰 𑒠𑒹𑒪𑒏𑒋 𑒂 𑒯𑒧𑒩 𑒐𑒱𑒡𑒰𑓀𑒬 𑒏𑒩𑒻𑒞 𑒁𑒕𑒱, 𑒥𑒛𑓃𑒏𑒰 𑒔𑒼𑒩 𑒦𑒹𑒪𑒰 𑒯𑒿। 𑒦𑒠𑓂𑒩 𑒫𑓂𑒨𑒏𑓂𑒞𑒱 𑒔𑒼𑒩𑒏 𑒥𑒑𑒹𑒥𑒰𑒢𑒲 𑒠𑒹𑒐𑒱 𑒄 𑒫𑒱𑒬𑓂𑒫𑒰𑒮 𑒢𑒯𑒱 𑒏𑒋 𑒣𑒥𑒻𑒞 𑒕𑒟𑒱 𑒖𑒹 𑒍 𑒔𑒼𑒩 𑒟𑒱𑒏𑒰𑒯। 𑒞𑒰𑒯𑒱𑒣𑒩 𑒣𑒰𑒏𑒹𑒙𑒧𑒰𑒩, 𑒔𑒼𑒩 𑒧𑒯𑒰𑒩𑒰𑒖𑒏𑒹𑒿 𑒂𑒩 𑒏𑒱𑒔𑒏𑒱𑒔𑒥𑒻𑒞 𑒕𑒢𑓂𑒯𑒱। 𑒞𑒐𑒢 𑒍 𑒔𑒼𑒩 𑒧𑒯𑒩𑒰𑒖 𑒋𑒯𑒱 𑒑𑒣𑒣𑒩 𑒠𑒳𑒐 𑒣𑓂𑒩𑒏𑒙 𑒏𑒩𑒻𑒞 𑒕𑒟𑒱 𑒖𑒹 𑒢𑒯𑒱 𑒞𑒿 𑒍𑒯𑒱 𑒩𑒰𑒞𑒱 𑒋𑒯𑒱 𑒣𑒰𑒏𑒹𑒙𑒧𑒰𑒩𑒏𑒹𑒿 𑒔𑒼𑒩𑒱𑒣𑒩 𑒪𑒋 𑒖𑒋𑒞𑒟𑒱 𑒂 𑒢𑒹 𑒍 𑒯𑒳𑒢𑒏𑒰 𑒣𑒱𑒙𑒻𑒞 𑒠𑒹𑒐𑒱 𑒮𑒏𑒻𑒞। 𑒋𑒧𑓂𑒯𑒩 𑒥𑒖𑒰𑒩𑒲 𑒖𑒹 𑒣𑒯𑒱𑒢𑒹 𑒔𑒼𑒩 𑒂 𑒅𑒔𑓂𑒏𑓂𑒏𑒰𑒏𑒹𑒿 𑒏𑒰𑒪𑒩 𑒣𑒏𑒛𑓃𑒱 𑒒𑒱𑒮𑒱𑒨𑒰 𑒔𑒳𑒏𑒪 𑒕𑒪𑒰𑒯, 𑒑𑒳𑒧𑓂𑒧 𑒦𑒹𑒪 𑒮𑒦𑒙𑒰 𑒮𑒳𑒢𑒻𑒞 𑒕𑒟𑒱 𑒂 𑒠𑒳𑒐 𑒣𑓂𑒩𑒏𑒙 𑒏𑒩𑒻𑒞 𑒕𑒟𑒱 𑒖𑒹 𑒋𑒏𑒩𑒰 𑒮𑒦𑒏 𑒮𑓀𑒑 𑒮𑓂𑒫𑒩𑓂𑒑𑒧𑒹 𑒩𑒯𑒥, 𑒞𑒿 𑒮𑓂𑒫𑒩𑓂𑒑 𑒏𑒹𑒯𑒢 𑒯𑒼𑒋𑒞 𑒮𑒹 𑒢𑒯𑒱 𑒖𑒰𑒢𑒱। 𑒂𑒥 𑒥𑒖𑒰𑒩𑒲 𑒧𑒯𑒩𑒰𑒖 𑒑𑒲𑒞𑒏 𑒋𑒏𑒙𑒰 𑒙𑒳𑒏𑒛𑓃𑒲 𑒋𑒯𑒱 𑒫𑒱𑒭𑒨𑒣𑒩 𑒣𑒜𑓃𑒻𑒞 𑒕𑒟𑒱। 𑒖𑒹𑒢𑒰 𑒡𑒴𑒩𑓂𑒞𑒮𑒧𑒰𑒑𑒧𑒧𑒹 𑒑𑒲𑒞 𑒁𑒕𑒱 𑒞𑒯𑒱𑒢𑒰 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒮𑒹𑒯𑒼, 𑒄 𑒋𑒯𑒱 𑒮𑓂𑒟𑒪𑒣𑒩 𑒣𑓂𑒩𑒰𑒩𑒧𑓂𑒦 𑒯𑒼𑒃𑒞 𑒁𑒕𑒱 𑒖𑒹 𑒋𑒯𑒱 𑒢𑒰𑒙𑒏𑒏𑒹𑒿 𑒮𑓀𑒑𑒲𑒞𑒏 𑒥𑒢𑒰 𑒠𑒻𑒞 𑒁𑒕𑒱। 𑒍𑒧𑓂𑒯𑒩 𑒣𑒰𑒏𑒹𑒙𑒧𑒰𑒩𑒖𑒲 𑒮𑒦𑒏 𑒣𑒰𑒏𑒹𑒙 𑒏𑒰𑒙𑒱 𑒪𑒻𑒞 𑒕𑒟𑒱 𑒂 𑒥𑒙𑒳𑒂 𑒮𑒰𑒤 𑒏𑒋 𑒠𑒻𑒞 𑒕𑒟𑒱। 𑒂𑒥 𑒤𑒹𑒩 𑒑𑒲𑒞𑒧𑒨 𑒤𑒏𑒛𑓃𑒰 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱 𑒧𑒳𑒠𑒰 𑒞𑒐𑒢𑒹 𑒋𑒏𑒙𑒰 𑒧𑒵𑒞 𑒩𑒠𑓂𑒠𑒲𑒥𑒪𑒰 𑒮𑒦𑒏 𑒞𑓀𑒠𑓂𑒩𑒰𑒏𑒹𑒿 𑒞𑒼𑒛𑓃𑒱 𑒠𑒻𑒞 𑒕𑒟𑒱, 𑒄 𑒏𑒯𑒱 𑒖𑒹 𑒨𑒧𑒰𑒪𑒨𑒏 𑒥𑒢𑓂𑒠 𑒠𑒩𑒥𑒖𑓂𑒖𑒰𑒏 𑒍𑒯𑒱 𑒣𑒰𑒩, 𑒄 𑒥𑒙𑒳𑒂 𑒂 𑒣𑒰𑒃-𑒏𑒾𑒛𑓃𑒲 𑒏𑒼𑒢𑒼 𑒏𑒰𑒖𑒏 𑒢𑒯𑒱 𑒁𑒕𑒱। 𑒂𑒥 𑒠𑒳𑒢𑒴 𑒧𑒵𑒞 𑒦𑒠𑓂𑒩 𑒫𑓂𑒨𑒏𑓂𑒞𑒱 𑒮𑒹𑒯𑒼 𑒥𑒖𑒻𑒞 𑒕𑒟𑒱, 𑒖𑒹 𑒯𑒿 𑒠𑒼𑒮𑒩 𑒠𑒹𑒮𑒧𑒹 𑒠𑒼𑒮𑒩 𑒠𑒹𑒮𑒏 𑒮𑒱𑒏𑓂𑒏𑒰 𑒏𑒯𑒰𑒿 𑒔𑒪𑒻𑒞 𑒁𑒕𑒱। 𑒂𑒥 𑒋𑒏𑒙𑒰 𑒩𑒧𑒝𑒲𑒧𑒼𑒯𑒢 𑒢𑒰𑒧𑓂𑒢𑒰 𑒧𑒵𑒞 𑒩𑒮𑒱𑒏 𑒦𑒠𑓂𑒩 𑒫𑓂𑒨𑒏𑓂𑒞𑒱𑒏 𑒠𑒼𑒮𑒩 𑒠𑒹𑒮𑒏 𑒮𑒱𑒏𑓂𑒏𑒰 𑒢𑒯𑒱 𑒔𑒪𑒥𑒰𑒏 𑒫𑒱𑒭𑒨𑒧𑒹 𑒙𑒲𑒣 𑒠𑒻𑒞 𑒕𑒟𑒱, 𑒖𑒹 𑒯𑒿 𑒄 𑒞𑒿 𑒍𑒯𑒱𑒢𑒰 𑒁𑒕𑒱 𑒖𑒹𑒢𑒰 𑒣𑓂𑒩𑒹𑒨𑒮𑒲𑒏 𑒠𑒼𑒮𑒩𑒏 𑒣𑒞𑓂𑒢𑒲 𑒥𑒢𑒥। 𑒂𑒥 𑒋𑒯𑒱 𑒑𑒣𑒣𑒩 𑒒𑒧𑒩𑓂𑒟𑒢 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱। 𑒞𑒐𑒢 𑒩𑒧𑒝𑒲 𑒧𑒼𑒯𑒢 𑒑𑒣𑒏 𑒩𑒳𑒐𑒱 𑒒𑒳𑒧𑒰 𑒠𑒻𑒞 𑒕𑒟𑒱 𑒖𑒹 𑒠𑒩𑒥𑒖𑓂𑒖𑒰𑒏 𑒦𑒲𑒞𑒩 𑒩𑒧𑓂𑒦𑒰-𑒧𑒹𑒢𑒏𑒰 𑒮𑒦 𑒯𑒹𑒞𑒲𑒯। 𑒦𑒱𑒐𑒧𑓀𑒑𑒢𑒲 𑒖𑒹 𑒞𑒰𑒫𑒞 𑒁𑒣𑒢 𑒏𑒼𑒩𑒰𑒧𑒹 𑒪𑒹𑒪 𑒋𑒏𑒙𑒰 𑒣𑒳𑒞𑒩𑒰𑒏𑒹𑒿 𑒠𑒼𑒮𑒩𑒰𑒏 𑒯𑒰𑒟𑒧𑒹 𑒠𑒋 𑒥𑒯𑒮𑒧𑒹 𑒬𑒰𑒧𑒱𑒪 𑒦𑓄 𑒑𑒹𑒪 𑒕𑒟𑒱, 𑒄𑒩𑓂𑒭𑓂𑒨𑒰𑒫𑒬 𑒩𑒧𑓂𑒦𑒰-𑒧𑒹𑒢𑒏𑒰𑒏𑒹𑒿 𑒧𑒳𑒿𑒯𑒗𑒛𑓃𑒏𑒲 𑒃𑒞𑓂𑒨𑒰𑒠𑒱 𑒏𑒯𑒻𑒞 𑒕𑒟𑒱। 𑒧𑒳𑒠𑒰 𑒣𑒰𑒏𑒹𑒙𑒧𑒰𑒩 𑒏𑒯𑒻𑒞 𑒁𑒕𑒱 𑒖𑒹 𑒦𑒲𑒞𑒩𑒧𑒹 𑒮𑒳𑒐 𑒢𑒯𑒱 𑒠𑒳𑒐𑒼 𑒦𑒋 𑒮𑒏𑒻𑒞 𑒁𑒕𑒱। 𑒋𑒯𑒱𑒣𑒩 𑒥𑒲𑒧𑒰 𑒥𑒰𑒥𑒴 𑒁𑒣𑒢 𑒏𑒰𑒩𑓂𑒨𑒏 𑒮𑓂𑒏𑒼𑒣 𑒠𑒹𑒐𑒱 𑒣𑓂𑒩𑒮𑒢𑓂𑒢 𑒦𑒋 𑒖𑒰𑒃𑒞 𑒕𑒟𑒱। 𑒂𑒥 𑒣𑒰𑒏𑒹𑒙𑒧𑒰𑒩 𑒃𑒢𑓂𑒠𑓂𑒩𑒏 𑒫𑒖𑓂𑒩 𑒣𑒩 𑒩𑒳𑒣𑒻𑒨𑓂𑒨𑒰𑒏 𑒥𑒼𑒪𑒲 𑒬𑒳𑒩𑒴 𑒏𑒩𑒻𑒞 𑒁𑒕𑒱। 𑒋𑒯𑒱 𑒥𑒹𑒩 𑒥𑒖𑒰𑒩𑒲 𑒞𑒢𑓂𑒠𑓂𑒩𑒰 𑒦𑓀𑒑 𑒏𑒩𑒻𑒞 𑒁𑒕𑒱 𑒂 𑒠𑒳𑒢𑒴 𑒦𑒠𑓂𑒩 𑒫𑓂𑒨𑒏𑓂𑒞𑒱 𑒯𑒳𑒢𑒏𑒩 𑒮𑒧𑒩𑓂𑒟𑒢 𑒏𑒩𑒻𑒞 𑒏𑒯𑒻𑒞 𑒁𑒕𑒱, 𑒖𑒹 𑒄 𑒁𑒠𑓂𑒦𑒳𑒞 𑒢𑒲𑒪𑒰𑒧𑒲 𑒁𑒕𑒱, 𑒖𑒹 𑒏𑒩𑒥𑒰 𑒩𑒯𑒪 𑒁𑒕𑒱 𑒮𑒹 𑒣𑒰𑒏𑒹𑒙𑒧𑒰𑒩 𑒂 𑒍𑒯𑒱𑒧𑒹 𑒬𑒰𑒧𑒱𑒪 𑒁𑒕𑒱 𑒔𑒼𑒩 𑒂 𑒦𑒱𑒐𑒧𑓀𑒑𑒢𑒲, 𑒣𑒯𑒱𑒪𑒹-𑒣𑒯𑒱𑒪 𑒮𑒳𑒢𑒪 𑒁𑒕𑒱 𑒂 𑒤𑒹𑒩 𑒮𑓀𑒑𑒲𑒞𑒧𑒨 𑒤𑒏𑒛𑓃𑒰 𑒮𑒦 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱। 𑒧𑒳𑒠𑒰 𑒞𑒐𑒢𑒹 𑒢𑓀𑒠𑒲-𑒦𑒵𑓀𑒑𑒲 𑒬𑒰𑒮𑓂𑒞𑓂𑒩𑒲𑒨 𑒮𑓀𑒑𑒲𑒞𑒣𑒩 𑒢𑒔𑒻𑒞 𑒣𑓂𑒩𑒫𑒹𑒬 𑒏𑒩𑒻𑒞 𑒕𑒟𑒱। 𑒂𑒥 𑒢𑓀𑒠𑒲-𑒦𑒵𑓀𑒑𑒲𑒏 𑒄 𑒣𑒳𑒕𑒪𑒰𑒣𑒩 𑒖𑒹 𑒠𑒩𑒥𑒖𑓂𑒖𑒰𑒏 𑒦𑒲𑒞𑒩 𑒏𑒲 𑒁𑒕𑒱, 𑒮𑒦 𑒑𑒼𑒙𑒹 𑒁𑒣𑒢𑒰-𑒁𑒣𑒢𑒰 𑒯𑒱𑒮𑒰𑒥𑒮𑒿 𑒮𑓂𑒫𑒩𑓂𑒑-𑒢𑒩𑒏 𑒂 𑒁𑒏𑒰𑒮-𑒣𑒞𑒰𑒪 𑒏𑒯𑒻𑒞 𑒕𑒟𑒱। 𑒧𑒳𑒠𑒰 𑒢𑓀𑒠𑒲-𑒦𑒵𑓀𑒑𑒲 𑒏𑒯𑒻𑒞 𑒕𑒟𑒱 𑒖𑒹 𑒮𑒦 𑒑𑒼𑒙𑒹 𑒮𑒞𑓂𑒨 𑒏𑒯𑒻𑒞 𑒕𑒲 𑒂 𑒏𑓂𑒨𑒼 𑒑𑒼𑒙𑒹 𑒣𑒴𑒩𑓂𑒝 𑒮𑒞𑓂𑒨 𑒢𑒯𑒱 𑒥𑒖𑒪𑒯𑒳𑒿। 𑒤𑒹𑒩 𑒥𑒖𑒻𑒞-𑒥𑒖𑒻𑒞 𑒍 𑒏𑒯𑒋 𑒪𑒑𑒻𑒞 𑒕𑒟𑒱, 𑒏𑓂𑒨𑒼 𑒔𑒼𑒩𑒱 𑒏𑒰𑒪 𑒧𑒰𑒩𑒪 𑒑𑒹𑒪𑒰𑒯 (𑒔𑒼𑒩 𑒄 𑒮𑒳𑒢𑒱 𑒦𑒰𑒑𑒋 𑒪𑒑𑒻𑒞 𑒕𑒟𑒱 𑒞𑒿 𑒠𑒳-𑒞𑒲𑒢 𑒑𑒼𑒙𑒹 𑒣𑒏𑒛𑓃𑒱 𑒮𑒼𑒗𑒰𑒿 𑒪𑒋 𑒁𑒢𑒻𑒞 𑒕𑒢𑓂𑒯𑒱!) 𑒞𑒿 𑒏𑓂𑒨𑒼 𑒋𑒏𑓂𑒮𑒲𑒛𑒹𑒢𑓂𑒙𑒮𑒿, 𑒂 𑒋𑒯𑒱 𑒞𑒩𑒯𑒹𑒿 𑒮𑒦𑒙𑒰 𑒑𑒢𑒥𑒋 𑒪𑒑𑒻𑒞 𑒕𑒟𑒱, 𑒧𑒳𑒠𑒰 𑒥𑒲𑒧𑒰-𑒥𑒰𑒥𑒴 𑒏𑒼𑒢𑒰 𑒥𑒱𑒢 𑒧𑒵𑒞𑓂𑒨𑒳𑒏 𑒋𑒞𑒋 𑒂𑒨𑒪 𑒕𑒟𑒱 𑒮𑒹 𑒯𑒳𑒢𑒏𑒯𑒳 𑒪𑒼𑒏𑒢𑒱𑒏𑒹𑒿 𑒢𑒯𑒱 𑒥𑒳𑒗𑒪 𑒕𑒢𑓂𑒯𑒱 ! 𑒥𑒲𑒧𑒰 𑒥𑒰𑒥𑒴 𑒏𑒯𑒻𑒞 𑒕𑒟𑒱 𑒖𑒹 𑒍 𑒢𑒫 𑒧𑒰𑒩𑓂𑒏𑒹𑒙𑒏 𑒁𑒢𑓂𑒫𑒹𑒭𑒝𑒧𑒹 𑒂𑒋𑒪 𑒕𑒟𑒱 ! 𑒮𑒹 𑒥𑒱𑒢 𑒧𑒩𑒪 𑒮𑒹𑒯𑒼 𑒋𑒏 𑒑𑒼𑒙𑒹 𑒍𑒞𑒋 𑒕𑒟𑒱 ! 𑒦𑒵𑓀𑒑𑒲 𑒢𑓀𑒠𑒲𑒏𑒹𑒿 𑒜𑓃𑒹𑒩 𑒩𑒰𑒮 𑒥𑒲𑒧𑒰 𑒏𑒧𑓂𑒣𑒢𑒲𑒏 𑒂𑒑𑒧𑒢𑒮𑒿 𑒂𑒋𑒪 𑒏𑒧𑓂𑒣𑒲𑒙𑒱𑒬𑒢𑒏 𑒫𑒱𑒭𑒨𑒧𑒹 𑒥𑒳𑒗𑒥𑒻𑒞 𑒕𑒟𑒱 ! 𑒋𑒧𑓂𑒯𑒩 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰𑒧𑒹 𑒒𑒼𑓀𑒒𑒰𑒅𑒖 𑒬𑒳𑒩𑒴 𑒯𑒼𑒃𑒞 𑒕𑒢𑓂𑒯𑒱, 𑒏𑒰𑒩𑒝 𑒣𑓂𑒩𑒹𑒧𑒲 𑒂𑒥 𑒒𑒳𑒩𑒱 𑒖𑒰𑒋 𑒔𑒰𑒯𑒻𑒞 𑒕𑒟𑒱। 𑒩𑒧𑒝𑒲 𑒧𑒼𑒯𑒢 𑒣𑓂𑒩𑒹𑒧𑒲𑒏 𑒑𑒧𑒢𑒮𑒿 𑒣𑓂𑒩𑒮𑒢𑓂𑒢 𑒯𑒼𑒃𑒞 𑒕𑒟𑒱 𑒖𑒹 𑒣𑓂𑒩𑒹𑒧𑒱𑒏𑒰 𑒂𑒥 𑒁𑒮𑒑𑒩𑒹 𑒩𑒯𑒞𑒲𑒯 𑒂 𑒯𑒳𑒢𑒏𑒰 𑒪𑒹𑒪 𑒧𑒾𑒏𑒰 𑒕𑒢𑓂𑒯𑒱। 𑒧𑒳𑒠𑒰 𑒦𑒵𑓀𑒑𑒲 𑒄 𑒏𑒯𑒱 𑒖𑒹 𑒋𑒞𑒋𑒮𑒿 𑒑𑒹𑒢𑒰𑒃 𑒞𑒿 𑒮𑓀𑒦𑒫 𑒢𑒯𑒱 𑒧𑒳𑒠𑒰 𑒄 𑒦𑓄 𑒮𑒏𑒻𑒞 𑒁𑒕𑒱 𑒖𑒹 𑒠𑒳𑒢𑒴 𑒖𑒼𑒛𑓃𑒲 𑒧𑒰𑒨-𑒥𑒰𑒣 (!) 𑒏𑒹𑒿 𑒋𑒏𑓂𑒮𑒲𑒛𑒹𑒢𑓂𑒙 𑒏𑒩𑒥𑒰𑒋 𑒋𑒞𑒯𑒱 𑒥𑒖𑒥𑒰 𑒪𑒹𑒪 𑒖𑒰𑒋। 𑒧𑒳𑒠𑒰 𑒁𑒣𑒢𑒰 𑒪𑒹𑒪 𑒧𑒰𑒋-𑒥𑒰𑒣𑒏 𑒥𑒪𑒱 𑒪𑒹𑒪 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰 𑒞𑒻𑒨𑒰𑒩 𑒢𑒯𑒱 𑒕𑒟𑒱। 𑒞𑒐𑒢 𑒢𑓀𑒠𑒲 𑒦𑒵𑓀𑒑𑒲 𑒠𑒳𑒢𑒴 𑒑𑒼𑒙𑒹𑒏 𑒫𑒱𑒫𑒰𑒯 𑒑𑒰𑒖𑒰-𑒥𑒰𑒖𑒰𑒏 𑒮𑓀𑒑 𑒏𑒩𑒰 𑒠𑒻𑒞 𑒕𑒟𑒱 𑒂 𑒏𑒢𑓂𑒨𑒰𑒠𑒰𑒢 𑒏𑒩𑒻𑒞 𑒕𑒟𑒱 𑒥𑒖𑒰𑒩𑒲।
𑒠𑒼𑒮𑒩 𑒏𑒪𑓂𑒪𑒼𑒪: 𑒠𑒼𑒮𑒩 𑒏𑒪𑓂𑒪𑒼𑒪𑒏 𑒂𑒩𑒧𑓂𑒦 𑒯𑒼𑒃𑒞 𑒁𑒕𑒱 𑒋𑒯𑒱 𑒂𑒦𑒰𑒮𑒮𑒿, 𑒖𑒹 𑒏𑓂𑒨𑒼 𑒢𑒹𑒞𑒰 𑒧𑒩𑒪𑒰𑒏 𑒥𑒰𑒠 𑒂𑒥𑒋𑒥𑒪𑒰 𑒕𑒟𑒱, 𑒯𑒳𑒢𑒏𑒩 𑒠𑒳𑒢𑒴 𑒁𑒢𑒳𑒔𑒩 𑒧𑒵𑒞 𑒦𑒋 𑒂𑒥𑒱 𑒔𑒳𑒏𑒪 𑒕𑒟𑒱 𑒂 𑒢𑒹𑒞𑒰𑒖𑒲𑒏 𑒁𑒋𑒥𑒰𑒏 𑒮𑒦 𑒏𑓂𑒨𑒼 𑒣𑓂𑒩𑒞𑒲𑒏𑓂𑒭𑒰 𑒏𑒋 𑒩𑒯𑒪 𑒕𑒟𑒱, 𑒠𑒳𑒢𑒴 𑒁𑒢𑒳𑒔𑒩 𑒕𑒼𑒙-𑒧𑒼𑒙 𑒦𑒰𑒭𑒝 𑒠𑒋 𑒢𑒹𑒞𑒰𑒖𑒲𑒏 𑒫𑒱𑒪𑒧𑓂𑒥𑒮𑒿 𑒁𑒋𑒥𑒰𑒏 (𑒧𑒵𑒞𑓂𑒨𑒳𑒏 𑒥𑒰𑒠𑒼 !) 𑒏𑓂𑒭𑒞𑒱𑒣𑒴𑒩𑓂𑒞𑒱 𑒏𑒋 𑒩𑒯𑒪 𑒕𑒟𑒱, 𑒑𑒲𑒞𑒏 𑒨𑒼𑒑 𑒠𑒋। 𑒋𑒏𑒙𑒰 𑒑𑒲𑒞 𑒔𑒼𑒩 𑒢𑒯𑒱 𑒥𑒳𑒗𑒻𑒞 𑒕𑒟𑒱 𑒧𑒳𑒠𑒰 𑒦𑒱𑒐𑒧𑓀𑒑𑒢𑒲 𑒂 𑒩𑒠𑓂𑒠𑒲𑒥𑒪𑒰 𑒥𑒳𑒗𑒱 𑒖𑒰𑒃𑒞 𑒕𑒟𑒱, 𑒞𑒰𑒯𑒱 𑒣𑒩 𑒥𑒯𑒮 𑒬𑒳𑒩𑒴 𑒯𑒼𑒃𑒞 𑒁𑒕𑒱। 𑒔𑒼𑒩𑒏𑒹𑒿 𑒁𑒣𑒢𑒰𑒏𑒹𑒿 𑒔𑒼𑒩 𑒏𑒯𑒪𑒰𑒣𑒩 𑒂𑒣𑒞𑓂𑒞𑒱 𑒁𑒕𑒱 𑒂 𑒦𑒱𑒐𑒧𑓀𑒑𑒢𑒲𑒏𑒹𑒿 𑒍 𑒦𑒱𑒐-𑒧𑓀𑒑 𑒏𑒯𑒻𑒞 𑒁𑒕𑒱 𑒞𑒿 𑒦𑒱𑒐𑒧𑓀𑒑𑒢𑒲 𑒍𑒏𑒩𑒰 𑒩𑒼𑒏𑒱 𑒏𑒯𑒻𑒞 𑒕𑒟𑒱 𑒖𑒹 𑒍 𑒮𑒩𑒱𑒮𑒫𑒣𑒰𑒯𑒲𑒏 𑒁𑒢𑒮𑒴𑒨𑒰 𑒕𑒟𑒱, 𑒧𑒱𑒟𑒱𑒪𑒰-𑒔𑒱𑒞𑓂𑒩𑒏𑒰𑒩, 𑒧𑒳𑒠𑒰 𑒠𑒱𑒪𑓂𑒪𑒲𑒏 𑒁𑒬𑒼𑒏𑒥𑒮𑓂𑒞𑒲 𑒂𑒥𑒱 𑒥𑒳𑒗𑒪𑒢𑓂𑒯𑒱 𑒖𑒹 𑒋𑒯𑒱 𑒢𑒑𑒩𑒧𑒹 𑒏𑒪𑒰-𑒫𑒮𑓂𑒞𑒳 𑒏𑓂𑒨𑒼 𑒢𑒯𑒱 𑒏𑒱𑒢𑒻𑒞 𑒁𑒕𑒱 𑒂 𑒞𑒐𑒢 𑒔𑒾𑒥𑒙𑒱𑒨𑒰𑒏 𑒦𑒱𑒐𑒧𑓀𑒑𑒢𑒲 𑒥𑒢𑒱 𑒩𑒯𑒱 𑒑𑒹𑒪𑒲𑒯। 𑒔𑒼𑒩 𑒏𑒯𑒻𑒞 𑒁𑒕𑒱 𑒖𑒹 𑒧𑒰𑒞𑓂𑒩 𑒍 𑒥𑒠𑒢𑒰𑒧 𑒕𑒟𑒱, 𑒔𑒼𑒩𑒱 𑒞𑒿 𑒮𑒦 𑒏𑒩𑒻𑒞 𑒁𑒕𑒱। 𑒢𑒫 𑒥𑒰𑒞 𑒏𑒼𑒢𑒼 𑒢𑒯𑒱 𑒁𑒕𑒱, 𑒮𑒦 𑒁𑒕𑒱 𑒣𑒳𑒩𑒢𑒏𑒰𑒏 𑒔𑒼𑒩𑒱। 𑒞𑒏𑒩 𑒥𑒰𑒠 𑒢𑒹𑒞𑒰𑒖𑒲 𑒣𑒯𑒳𑒿𑒔𑒱 𑒖𑒰𑒃𑒞 𑒕𑒟𑒱 𑒂 𑒪𑒼𑒏𑒏 𑒔𑒼𑒩, 𑒅𑒔𑒏𑓂𑒏𑒰 𑒂 𑒣𑒰𑒏𑒹𑒙𑒧𑒰𑒩 𑒯𑒼𑒋𑒥𑒰𑒏 𑒏𑒰𑒩𑒝 𑒮𑒧𑒰𑒖𑒏 𑒮𑓂𑒟𑒱𑒞𑒱𑒏𑒹𑒿 𑒏𑒯𑒻𑒞 𑒕𑒟𑒱। 𑒞𑒐𑒢𑒹 𑒋𑒏𑒙𑒰 𑒫𑒰𑒧𑒣𑓀𑒟𑒲 𑒁𑒥𑒻𑒞 𑒕𑒟𑒱 𑒂 𑒍 𑒄 𑒠𑒹𑒐𑒱 𑒏𑓂𑒭𑒳𑒥𑓂𑒡 𑒕𑒟𑒱 𑒖𑒹 𑒢𑒹𑒞𑒰𑒖𑒲 𑒔𑒼𑒩, 𑒅𑒔𑒏𑓂𑒏𑒰 𑒂 𑒣𑒰𑒏𑒹𑒙𑒧𑒰𑒩𑒮𑒿 𑒒𑒱𑒩𑒪 𑒕𑒟𑒱। 𑒧𑒳𑒠𑒰 𑒔𑒼𑒩 𑒁𑒣𑒢 𑒞𑒩𑓂𑒏 𑒪𑒋 𑒣𑒳𑒢𑓁 𑒣𑓂𑒩𑒮𑓂𑒞𑒳𑒞 𑒯𑒼𑒃𑒞 𑒁𑒕𑒱 𑒂 𑒢𑒹𑒞𑒰𑒖𑒲𑒏 𑒩𑒰𑒐𑒪 “𑒔𑒼𑒩-𑒣𑒳𑒩𑒰𑒝” 𑒢𑒰𑒧𑒏 𑒂𑒡𑒰𑒩𑒣𑒩 𑒥𑒖𑒰𑒩𑒲 𑒖𑒲 𑒑𑒲𑒞 𑒬𑒳𑒩𑒴 𑒏𑒋 𑒠𑒻𑒞 𑒕𑒟𑒱।
𑒞𑒹𑒮𑒩 𑒏𑒪𑓂𑒪𑒼𑒪: 𑒂𑒥 𑒢𑒹𑒞𑒰𑒖𑒲 𑒂 𑒫𑒰𑒧𑒣𑓀𑒟𑒲𑒧𑒹 𑒑𑒚𑒥𑓀𑒡𑒢 𑒂 𑒫𑒰𑒧𑒣𑓀𑒟𑒲 𑒠𑓂𑒫𑒰𑒩𑒰 𑒮𑒩𑒏𑒰𑒩𑒏 𑒥𑒰𑒯𑒩𑒮𑒿 𑒠𑒹𑒪 𑒮𑒧𑒩𑓂𑒟𑒢𑒣𑒩 𑒔𑒩𑒔𑒰 𑒬𑒳𑒩𑒴 𑒦𑒋 𑒖𑒰𑒃𑒞 𑒁𑒕𑒱। 𑒢𑒹𑒞𑒰𑒖𑒲 𑒤𑒹𑒩 𑒑𑒲𑒞𑒧𑒨 𑒯𑒼𑒃𑒞 𑒕𑒟𑒱 𑒂𑒏𑒱 𑒞𑒐𑒢𑒹 𑒮𑓂𑒙𑓀𑒙-𑒮𑒲𑒢 𑒏𑒩𑒻𑒞 𑒋𑒏𑒙𑒰 𑒧𑒳𑒃𑒪 𑒁𑒦𑒱𑒢𑒹𑒞𑒰 𑒫𑒱𑒫𑒹𑒏 𑒏𑒳𑒧𑒰𑒩𑒏 𑒁𑒋𑒪𑒰𑒮𑒿 𑒂𑒏𑒩𑓂𑒭𑒝 𑒍𑒧𑓂𑒯𑒩 𑒔𑒪𑒱 𑒖𑒰𑒃𑒞 𑒁𑒕𑒱। 𑒙𑒙𑒏𑒰-𑒥𑓂𑒩𑒹𑒏𑒱𑓀𑒑 𑒢𑓂𑒨𑒴𑒖 𑒠𑒹𑒥𑒰𑒏 𑒧𑒖𑒥𑒴𑒩𑒲𑒣𑒩 𑒢𑒹𑒞𑒰𑒖𑒲 𑒫𑓂𑒨𑓀𑒑𑓂𑒨 𑒏𑒩𑒻𑒞 𑒕𑒟𑒱। 𑒫𑒰𑒧𑒣𑓀𑒟𑒲 𑒠𑒴 𑒥𑒹𑒩 𑒠𑒴 𑒑𑒼𑒙 𑒑𑒣- 𑒢𑒫 𑒑𑒣 𑒏𑒯𑒱 𑒖𑒰𑒃𑒞 𑒕𑒟𑒱, 𑒋𑒏 𑒖𑒹 𑒥𑒱𑒢 𑒁𑒦𑒱𑒢𑒹𑒞𑒰 𑒥𑒢𑒢𑒹 𑒏𑓂𑒨𑒼 𑒢𑒹𑒞𑒰 𑒢𑒯𑒱 𑒥𑒢𑒱 𑒮𑒏𑒻𑒞 𑒁𑒕𑒱 𑒂 𑒠𑒼𑒮𑒩 𑒖𑒹 𑒔𑒼𑒩 𑒢𑒹𑒞𑒰 𑒢𑒯𑒱 𑒥𑒢𑒱 𑒮𑒏𑒻𑒕 (𑒄 𑒔𑒼𑒩 𑒏𑒯𑒻𑒞 𑒁𑒕𑒱) 𑒧𑒳𑒠𑒰 𑒢𑒹𑒞𑒰 𑒮𑒦 𑒞𑒿 𑒔𑒼𑒩𑒱 𑒏𑒩𑒥𑒰𑒧𑒹 𑒏𑒏𑒩𑒼𑒮𑒿 𑒣𑒰𑒕𑒰𑒿 𑒢𑒯𑒱 𑒕𑒟𑒱। 𑒞𑒐𑒢𑒹 𑒋𑒏𑒙𑒰 𑒅𑒔𑓂𑒔 𑒫𑓀𑒬𑒲𑒨 𑒧𑒯𑒱𑒪𑒰 𑒁𑒥𑒻𑒞 𑒕𑒟𑒱 𑒂 𑒯𑒳𑒢𑒏𑒩 𑒣𑓂𑒩𑒬𑓂𑒢𑒼𑒞𑓂𑒞𑒩𑒏 𑒥𑒰𑒠 𑒋𑒏𑒙𑒰 𑒮𑒰𑒧𑒰𑒢𑓂𑒨 𑒏𑓂𑒨𑒴𑒏 𑒮𑓀𑒑 𑒋𑒏𑒙𑒰 𑒫𑒲.𑒂𑒃.𑒣𑒲.𑒏𑓂𑒨𑒴 𑒥𑒢𑒱 𑒖𑒰𑒃𑒞 𑒁𑒕𑒱। 𑒁𑒦𑒱𑒢𑒹𑒞𑒰, 𑒢𑒹𑒞𑒰 𑒂 𑒫𑒰𑒧𑒣𑓀𑒟𑒲 𑒮𑒦 𑒫𑒲.𑒂𑒃.𑒣𑒲.𑒏𑓂𑒨𑒴𑒧𑒹 𑒚𑒰𑒜𑓃 𑒦𑓄 𑒖𑒰𑒃𑒞 𑒕𑒟𑒱 ! 𑒄 𑒣𑒳𑒕𑒪𑒰𑒣𑒩 𑒖𑒹 𑒣𑓀𑒏𑓂𑒞𑒱 𑒏𑒱𑒋𑒏 𑒥𑒢𑒪 𑒁𑒕𑒱 (?) 𑒞𑒰𑒯𑒱𑒣𑒩 𑒔𑒼𑒩-𑒣𑒰𑒏𑒹𑒙𑒧𑒰𑒩 𑒏𑒯𑒻𑒞 𑒕𑒟𑒱 𑒖𑒹 𑒯𑒳𑒢𑒏𑒰 𑒪𑒼𑒏𑒢𑒱𑒏𑒹𑒿 𑒣𑓀𑒏𑓂𑒞𑒱 𑒥𑒢𑒋𑒥𑒰𑒏 (𑒂 𑒞𑒼𑒛𑓃𑒥𑒰𑒏 𑒮𑒹𑒯𑒼) 𑒁𑒦𑓂𑒨𑒰𑒮 𑒕𑒢𑓂𑒯𑒱।
𑒔𑒞𑒳𑒩𑓂𑒟 𑒏𑒪𑓂𑒪𑒼𑒪: 𑒨𑒧𑒩𑒰𑒖 𑒮𑒦𑒏 𑒐𑒰𑒞𑒰-𑒐𑒹𑒮𑒩𑒰 𑒠𑒹𑒐𑒱 𑒪𑒻𑒞 𑒕𑒟𑒱 𑒂 𑒔𑒱𑒞𑓂𑒩𑒑𑒳𑒣𑓂𑒞 𑒄 𑒩𑒯𑒮𑓂𑒨𑒼𑒠𑓂𑒒𑒰𑒙𑒢 𑒏𑒩𑒻𑒞 𑒕𑒟𑒱 𑒖𑒹 𑒋𑒏 𑒨𑒳𑒑 𑒕𑒪 𑒖𑒐𑒢 𑒮𑒼𑒗𑒰𑒿𑒏 𑒠𑒩𑒥𑒖𑓂𑒖𑒰 𑒐𑒳𑒖𑒱𑒞𑒼 𑒕𑒪 𑒂 𑒥𑒢𑓂𑒢 𑒮𑒹𑒯𑒼 𑒯𑒼𑒃𑒞 𑒕𑒪। 𑒢𑓀𑒠𑒲 𑒦𑒵𑓀𑒑𑒲 𑒣𑒯𑒱𑒢𑒯𑒱 𑒮𑒴𑒔𑒱𑒞 𑒏𑒋 𑒠𑒹𑒪𑒢𑓂𑒯𑒱 𑒖𑒹 𑒮𑒼𑒗𑒰𑒿𑒏 𑒠𑒩𑒥𑒖𑓂𑒖𑒰 𑒮𑓂𑒫𑒣𑓂𑒢 𑒢𑒯𑒱, 𑒧𑒰𑒞𑓂𑒩 𑒥𑒳𑒗𑒥𑒰𑒏 𑒠𑒼𑒭 𑒕𑒪। 𑒠𑒩𑒥𑒖𑓂𑒖𑒰𑒏 𑒍𑒯𑒱 𑒣𑒰𑒩 𑒏𑒲 𑒁𑒕𑒱 𑒞𑒰𑒯𑒱 𑒫𑒱𑒭𑒨𑒧𑒹 𑒮𑒦 𑒏𑓂𑒨𑒼 𑒁𑒣𑒢𑒰-𑒁𑒣𑒢𑒰 𑒯𑒱𑒮𑒰𑒥𑒮𑒿 𑒅𑒞𑓂𑒞𑒩 𑒠𑒻𑒞 𑒕𑒟𑒱। 𑒔𑒱𑒞𑓂𑒩𑒑𑒳𑒣𑓂𑒞 𑒏𑒯𑒻𑒞 𑒕𑒟𑒱 𑒖𑒹 𑒮𑒦𑒏 𑒫𑒩𑓂𑒝𑒢𑒏 𑒮𑒦 𑒫𑒮𑓂𑒞𑒳 𑒕𑒻 𑒍𑒯𑒱𑒣𑒰𑒩। 𑒢𑓀𑒠𑒲-𑒦𑒵𑓀𑒑𑒲 𑒮𑒴𑒔𑒱𑒞 𑒏𑒩𑒻𑒞 𑒕𑒟𑒱 𑒖𑒹 𑒋𑒯𑒱 𑒑𑒹𑒙𑒧𑒹 𑒣𑓂𑒩𑒫𑒹𑒬 𑒢𑒱𑒭𑒹𑒡 𑒕𑒻, 𑒢𑒼 𑒋𑒝𑓂𑒙𑓂𑒩𑒲 𑒏𑒹𑒩 𑒥𑒼𑒩𑓂𑒛 𑒪𑒰𑒑𑒪 𑒕𑒻। 𑒂𑒯𑒱 𑒩𑒹 𑒥𑓂𑒥𑒰! 𑒂𑒥 𑒏𑒲 𑒯𑒼𑒁𑒋 ! 𑒢𑒹𑒞𑒰𑒖𑒲𑒏𑒹𑒿 𑒣𑒚𑒰𑒍𑒪 𑒖𑒰𑒃𑒞 𑒕𑒢𑓂𑒯𑒱 𑒨𑒧𑒩𑒰𑒖𑒏 𑒮𑒼𑒗𑒰𑒿, 𑒧𑒳𑒠𑒰 𑒯𑒳𑒢𑒏𑒩 𑒮𑒩𑒮𑓂𑒫𑒞𑒲 𑒍𑒞𑒋 𑒧𑒢𑓂𑒠 𑒦𑒋 𑒖𑒰𑒃𑒞 𑒕𑒢𑓂𑒯𑒱। 𑒥𑒠𑒩𑒲 𑒫𑒱𑒬𑒰𑒪 𑒧𑒱𑒬𑓂𑒩 𑒣𑓂𑒩𑒮𑒱𑒠𑓂𑒡 𑒢𑒹𑒞𑒰𑒖𑒲, 𑒏𑒹𑒩 𑒐𑒱𑓀𑒔𑒰𑒄 𑒬𑒳𑒩𑒴 𑒯𑒼𑒃𑒞 𑒕𑒢𑓂𑒯𑒱 𑒁𑒮𑒪𑒲 𑒏𑒹𑒩 𑒥𑒠𑒪𑒰 𑒮𑒩𑓂𑒙𑒱𑒤𑒱𑒏𑒹𑒙 𑒥𑒪𑒰 𑒏𑒧 𑒏𑒋 𑒪𑒱𑒐𑒰𑒍𑒪 𑒅𑒧𑒩𑒱𑒣𑒩। 𑒣𑒔𑒣𑒢 𑒥𑒩𑒱𑒐 𑒂𑒨𑒳 𑒂 𑒬𑒬 𑒨𑒼𑒑 𑒏𑒯𑒻𑒞 𑒁𑒕𑒱 𑒖𑒹 𑒮𑒞𑓂𑒞𑒩𑒱 𑒮𑒹 𑒆𑒣𑒩 𑒖𑒲𑒞𑒰𑒯 𑒮𑒹 𑒍 𑒂 𑒮𑓀𑒑𑒧𑒹 𑒧𑒵𑒞 𑒔𑒰𑒩𑒴 𑒮𑒻𑒢𑒱𑒏𑒏𑒹𑒿 𑒂𑒣𑒱𑒮 𑒣𑒚𑒰 𑒠𑒹𑒪 𑒖𑒰𑒃𑒞 𑒁𑒕𑒱। 𑒠𑒴𑒙𑒰 𑒮𑒻𑒢𑒱𑒏 𑒢𑒹𑒞𑒰𑒖𑒲𑒏 𑒮𑓀𑒑 𑒔𑒪𑒱 𑒖𑒰𑒃𑒞 𑒕𑒟𑒱 𑒂 𑒠𑒴 𑒙𑒰 𑒁𑒢𑒳𑒔𑒩 𑒮𑒹𑒯𑒼 𑒖𑒰𑒋 𑒔𑒰𑒯𑒻𑒞 𑒁𑒕𑒱। 𑒧𑒳𑒠𑒰 𑒢𑒹𑒞𑒰𑒖𑒲𑒏 𑒁𑒢𑒳𑒔𑒩 𑒮𑒦𑒏 𑒁𑒣𑒩𑒰𑒡 𑒥𑒛𑓃 𑒦𑒰𑒩𑒲, 𑒮𑒹 𑒔𑒱𑒞𑓂𑒩𑒑𑒳𑒣𑓂𑒞𑒏 𑒂𑒠𑒹𑒬𑒣𑒩 𑒢𑓀𑒠𑒲-𑒦𑒵𑓀𑒑𑒲 𑒯𑒳𑒢𑒏𑒰 𑒪𑒋, 𑒏𑒩𑒰𑒯𑒲𑒧𑒹 𑒦𑒳𑒖𑒥𑒰𑒏 𑒪𑒹𑒪 𑒥𑒰𑒯𑒩 𑒪𑒋 𑒖𑒰𑒃𑒞 𑒕𑒟𑒱 𑒞𑒿 𑒥𑒰𑒿𑒔𑒪 𑒠𑒳𑒢𑒴 𑒮𑒻𑒢𑒱𑒏 𑒯𑒳𑒢𑒏𑒰 𑒣𑒏𑒛𑓃𑒱 𑒏𑒹𑒿 𑒪𑒋 𑒖𑒰𑒃𑒞 𑒕𑒟𑒱 𑒂 𑒢𑓀𑒠𑒲-𑒦𑒵𑓀𑒑𑒲 𑒤𑒹𑒩 𑒧𑓀𑒔𑒣𑒩 𑒒𑒳𑒩𑒱 𑒁𑒥𑒻𑒞 𑒕𑒟𑒱। 𑒞𑒯𑒱𑒢𑒰 𑒞𑒩𑓂𑒏𑒏 𑒥𑒰𑒠 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰, 𑒠𑒳𑒢𑒴 𑒦𑒠𑓂𑒩 𑒣𑒳𑒩𑒳𑒭 𑒂 𑒥𑒖𑒰𑒩𑒲𑒏𑒹𑒿 𑒮𑒹𑒯𑒼 𑒞𑓂𑒩𑒰𑒝 𑒦𑒹𑒙𑒻𑒞 𑒕𑒢𑓂𑒯𑒱 𑒜𑒼𑒪-𑒣𑒱𑒣𑒯𑒲𑒏 𑒮𑓀𑒑 𑒯𑒳𑒢𑒏𑒰 𑒥𑒰𑒯𑒩 𑒪𑒋 𑒑𑒹𑒪 𑒖𑒰𑒃𑒞 𑒁𑒕𑒱। 𑒂𑒥 𑒢𑒢𑓂𑒠𑒲 𑒖𑒐𑒢 𑒁𑒦𑒱𑒢𑒹𑒞𑒰𑒏 𑒢𑒰𑒧 𑒫𑒱𑒫𑒹𑒏 𑒏𑒳𑒧𑒰𑒩 𑒅𑒩𑓂𑒤...𑒥𑒖𑒻𑒞 𑒕𑒟𑒱 𑒞𑒿 𑒁𑒦𑒱𑒢𑒹𑒞𑒰 𑒖𑒲 𑒩𑒼𑒏𑒱 𑒠𑒻𑒞 𑒕𑒟𑒱, 𑒖𑒹 𑒏𑒞𑒹𑒏 𑒧𑒹𑒯𑒢𑒞𑒱𑒮𑒿 𑒖𑒰𑒞𑒱 𑒯𑒳𑒢𑒏𑒩 𑒣𑒰𑒕𑒰𑒿 𑒕𑒼𑒛𑓃𑒱 𑒮𑒏𑒪 𑒁𑒕𑒱, 𑒮𑒹 𑒅𑒩𑓂𑒤 𑒞𑒿 𑒕𑒼𑒛𑓃𑒱𑒋 𑒠𑒹𑒪 𑒖𑒰𑒋। 𑒫𑒰𑒧𑒣𑓀𑒟𑒲 𑒑𑒼𑒭𑓂𑒚𑒲𑒏𑒹𑒿 𑒁𑒦𑒱𑒢𑒹𑒞𑒰 𑒠𑓂𑒫𑒰𑒩𑒰 𑒧𑒠𑒞𑒱 𑒏𑒹𑒩 𑒫𑒱𑒫𑒩𑒝𑒣𑒩 𑒫𑒰𑒧𑒣𑓀𑒟𑒲 𑒣𑓂𑒩𑒞𑒱𑒫𑒰𑒠 𑒏𑒩𑒻𑒞 𑒕𑒟𑒱। 𑒯𑒳𑒢𑒏𑒼 𑒣𑒚𑒰 𑒠𑒹𑒪 𑒖𑒰𑒃𑒞 𑒕𑒢𑒱। 𑒫𑒰𑒧𑒣𑓀𑒟𑒲𑒏 𑒏𑒲 𑒯𑒹𑒞𑒢𑓂𑒯𑒱, 𑒯𑒳𑒢𑒏𑒩 𑒏𑒟𑒰𑒧𑒹 𑒞𑒿 𑒢𑒹 𑒮𑓂𑒫𑒩𑓂𑒑-𑒢𑒩𑓂𑒏 𑒁𑒕𑒱 𑒂 𑒢𑒹 𑒨𑒧𑒩𑒰𑒖-𑒔𑒱𑒞𑓂𑒩𑒑𑒳𑒣𑓂𑒞। 𑒯𑒳𑒢𑒏𑒰 𑒁𑒣𑒢 𑒦𑒫𑒱𑒭𑓂𑒨𑒏 𑒢𑒱𑒩𑓂𑒝𑒨 𑒮𑓂𑒫𑒨𑓀 𑒏𑒩𑒥𑒰𑒏 𑒁𑒫𑒮𑒩 𑒠𑒹𑒪 𑒖𑒰𑒃𑒞 𑒕𑒢𑓂𑒯𑒱। 𑒧𑒳𑒠𑒰 𑒫𑒰𑒧𑒣𑓀𑒟𑒲 𑒏𑒯𑒻𑒞 𑒕𑒟𑒱 𑒖𑒹 𑒯𑒳𑒢𑒏𑒩 𑒬𑒱𑒏𑓂𑒭𑒰 𑒂𑒢 𑒣𑓂𑒩𑒏𑒰𑒩𑒏 𑒕𑒪𑒢𑓂𑒯𑒱, 𑒧𑒳𑒠𑒰 𑒋𑒐𑒢 𑒖𑒹 𑒮𑒼𑒗𑒰𑒿 𑒒𑒙𑒱𑒞 𑒦𑒋 𑒩𑒯𑒪 𑒕𑒢𑓂𑒯𑒱 𑒞𑒰𑒯𑒱𑒣𑒩 𑒏𑒼𑒢𑒰 𑒁𑒫𑒱𑒬𑓂𑒫𑒰𑒮 𑒏𑒩𑒟𑒳? 𑒧𑒳𑒠𑒰 𑒨𑒧𑒩𑒰𑒖 𑒏𑒯𑒻𑒞 𑒕𑒟𑒱 𑒖𑒹- 𑒦𑓄 𑒮𑒏𑒻𑒞 𑒁𑒕𑒱, 𑒖𑒹 𑒁𑒯𑒰𑒿 𑒠𑒹𑒐𑒱 𑒩𑒯𑒪 𑒕𑒲 𑒮𑒹 𑒠𑒳𑓁𑒮𑓂𑒫𑒣𑓂𑒢 𑒯𑒼𑒁𑒋, 𑒖𑒞𑒋 𑒣𑒻𑒮𑒻𑒞 𑒖𑒰𑒋𑒥 𑒍𑒞𑒋 𑒪𑒱𑒐𑒪 𑒁𑒕𑒱 𑒢𑒼 𑒋𑒝𑓂𑒙𑓂𑒩𑒲। 𑒂𑒥 𑒨𑒧𑒩𑒰𑒖 𑒣𑓂𑒩𑒬𑓂𑒢 𑒣𑒳𑒕𑒻𑒞 𑒕𑒟𑒱 𑒖𑒹 𑒫𑒱𑒭𑒧 𑒏𑒹, 𑒧𑒢𑒳𑒏𑓂𑒐 𑒂𑒏𑒱 𑒣𑓂𑒩𑒏𑒵𑒞𑒱 ? 𑒫𑒰𑒧𑒣𑓀𑒟𑒲 𑒏𑒯𑒻𑒞 𑒕𑒟𑒱 𑒖𑒹 𑒠𑒳𑒢𑒴, 𑒧𑒳𑒠𑒰 𑒣𑓂𑒩𑒏𑒵𑒞𑒱𑒧𑒹 𑒞𑒿 𑒢𑒹𑒔𑒳𑒩𑒪 𑒖𑒮𑓂𑒙𑒱𑒮 𑒏𑒠𑒰𑒔𑒱𑒞𑓂 𑒯𑒼𑒃𑒞𑒼 𑒕𑒻 𑒧𑒳𑒠𑒰 𑒧𑒢𑒳𑒏𑓂𑒐𑒏 𑒮𑓂𑒫𑒦𑒰𑒫𑒧𑒹 𑒮𑒹 𑒑𑒳𑒢𑓂𑒖𑒰𑒃𑒬 𑒏𑒞𑒋 ? 𑒧𑒳𑒠𑒰 𑒫𑒰𑒧𑒣𑓀𑒟𑒲 𑒩𑒰𑒖𑒢𑒲𑒞𑒱 𑒋𑒏𑒩 (𑒮𑒧𑒰𑒢𑒞𑒰𑒏, 𑒮𑒳𑒡𑒰𑒩 𑒏𑒹𑒩) 𑒣𑓂𑒩𑒨𑒰𑒮 𑒏𑒩𑒻𑒞 𑒁𑒕𑒱। 𑒞𑒰𑒯𑒱𑒣𑒩 𑒯𑒳𑒢𑒏𑒰 𑒮𑓀𑒑 𑒔𑒼𑒩-𑒅𑒔𑒏𑓂𑒏𑒰 𑒂 𑒣𑒰𑒏𑒹𑒙𑒧𑒰𑒩𑒏𑒹𑒿 𑒣𑒚𑒰𑒍𑒪 𑒖𑒰𑒃𑒞 𑒁𑒕𑒱, 𑒄 𑒁𑒫𑒮𑒩 𑒠𑒻𑒞 𑒖𑒹 𑒯𑒱𑒢𑒏𑒰 𑒮𑒦𑒏𑒹𑒿 𑒥𑒠𑒪𑒴। 𑒔𑒼𑒩 𑒏𑒢𑒹𑒏 𑒖𑒰𑒋𑒧𑒹 𑒃𑒞𑒮𑓂𑒞𑓁 𑒏𑒩𑒻𑒞 𑒁𑒕𑒱 𑒂 𑒄 𑒖𑒱𑒖𑓂𑒘𑒰𑒮𑒰 𑒏𑒩𑒻𑒞 𑒁𑒕𑒱 𑒖𑒹 𑒯𑒧 𑒮𑒦 𑒞𑒿 𑒖𑒰𑒃𑒋 𑒩𑒯𑒪 𑒕𑒲 𑒧𑒳𑒠𑒰 𑒋𑒯𑒱𑒮𑒿 𑒂𑒑𑒰𑒿 ? 𑒢𑓀𑒠𑒲-𑒔𑒱𑒞𑓂𑒩𑒑𑒳𑒣𑓂𑒞-𑒨𑒧𑒩𑒰𑒖 𑒮𑒧𑒫𑒹𑒞 𑒮𑓂𑒫𑒩𑒧𑒹 𑒏𑒯𑒻𑒞 𑒕𑒟𑒱- 𑒢𑒼 𑒋𑒝𑓂𑒙𑓂𑒩𑒲। 𑒦𑒵𑓀𑒑𑒲 𑒞𑒐𑒢𑒹 𑒁𑒥𑒻𑒞 𑒕𑒟𑒱, 𑒁𑒦𑒱𑒢𑒹𑒞𑒰𑒏𑒹𑒿 𑒕𑒼𑒛𑓃𑒢𑒹। 𑒨𑒧𑒩𑒰𑒖 𑒏𑒯𑒻𑒞 𑒕𑒟𑒱 - 𑒧𑒰 𑒣𑓂𑒩𑒫𑒱𑒬। 𑒦𑒵𑓀𑒑𑒲 𑒢𑒲𑒔𑒰𑒿𑒧𑒹 𑒯𑒼𑒃𑒞 𑒔𑒩𑒔𑒰𑒏 𑒑𑒣 𑒏𑒯𑒻𑒞 𑒁𑒕𑒱, 𑒖𑒹 𑒋𑒞𑒳𑒏𑓂𑒏𑒰 𑒢𑒱𑒁𑒧 𑒥𑒠𑒪𑒪 𑒖𑒋𑒥𑒰𑒏 𑒂 𑒏𑒞𑒹𑒏 𑒑𑒼𑒙𑒹𑒏𑒹𑒿 𑒣𑒵𑒟𑓂𑒫𑒲𑒣𑒩 𑒒𑒳𑒩𑒋 𑒠𑒹𑒪 𑒖𑒋𑒥𑒰𑒏 𑒔𑒩𑒔𑒰 𑒮𑒩𑓂𑒫𑒞𑓂𑒩 𑒦𑒋 𑒩𑒯𑒪 𑒁𑒕𑒱। 𑒨𑒧𑒠𑒴𑒞 𑒮𑒦 𑒁𑒢𑒹𑒩𑒹 𑒏𑒛𑓃𑒰𑒯 𑒪𑒑 𑒚𑒰𑒜𑓃 𑒕𑒟𑒱 𑒏𑓂𑒨𑒼 𑒦𑒳𑒖𑒋 𑒪𑒹𑒪 𑒏𑒯𑒰𑒿 𑒦𑒹𑒙𑒪 𑒕𑒢𑓂𑒯𑒱 (𑒧𑒰𑒞𑓂𑒩 𑒠𑒴 𑒙𑒰 𑒁𑒢𑒳𑒔𑒩 𑒕𑒼𑒛𑓃𑒱)। 𑒂𑒥 𑒏𑓂𑒨𑒼 𑒢𑒯𑒱 𑒂𑒥𑒋 𑒥𑒪𑒰 𑒥𑒔𑒪 𑒁𑒕𑒱, 𑒮𑒹 𑒮𑒦 𑒏𑒯𑒻𑒞 𑒕𑒟𑒱। 𑒔𑒱𑒞𑓂𑒩𑒑𑒳𑒣𑓂𑒞 𑒁𑒣𑒢 𑒢𑒧𑒯𑒩 𑒠𑒰𑒜𑓃𑒲 𑒂 𑒨𑒧𑒩𑒰𑒖 𑒁𑒣𑒢 𑒧𑒳𑒏𑒳𑒙 𑒅𑒞𑒰𑒩𑒱 𑒪𑒻𑒞 𑒕𑒟𑒱 𑒂 𑒮𑓂𑒫𑒰𑒦𑒰𑒫𑒱𑒏 𑒧𑒢𑒳𑒏𑓂𑒐 𑒩𑒴𑒣𑒧𑒹 𑒂𑒥𑒱 𑒖𑒰𑒃𑒞 𑒕𑒟𑒱! 𑒧𑒳𑒠𑒰 𑒔𑒱𑒞𑓂𑒩𑒑𑒳𑒣𑓂𑒞𑒏 𑒧𑒹𑒏𑒣 𑒥𑒪𑒰 𑒢𑒧𑒯𑒩 𑒠𑒰𑒜𑓃𑒲 𑒠𑒹𑒐𑒱 𑒦𑒱𑒐𑒧𑓀𑒑𑒢𑒲 𑒖𑒹 𑒍𑒞𑒋 𑒕𑒪𑒲𑒯, 𑒯𑒿𑒮𑒱 𑒠𑒻𑒞 𑒕𑒟𑒱। 𑒦𑒵𑓀𑒑𑒲 𑒅𑒠𑓂𑒒𑒰𑒙𑒢 𑒏𑒩𑒻𑒞 𑒕𑒟𑒱 𑒖𑒹 𑒦𑒱𑒐𑒧𑓀𑒑𑒢𑒲 𑒯𑒳𑒢𑒏𑒹 𑒮𑒦 𑒖𑒹𑒏𑒰𑒿 𑒏𑒪𑒰𑒏𑒰𑒩 𑒕𑒟𑒱 ! 𑒏𑒼𑒢 𑒁𑒦𑒱𑒢𑒨 ! 𑒞𑒏𑒩 𑒫𑒱𑒫𑒩𑒝 𑒧𑒳𑒯𑒥𑓂𑒥𑒞 𑒂 𑒑𑒳𑒠𑒑𑒳𑒠𑒲𑒣𑒩 𑒐𑒞𑒧 𑒯𑒼𑒃𑒞 𑒁𑒕𑒱, 𑒞𑒿 𑒦𑒱𑒐𑒧𑓀𑒑𑒢𑒲 𑒏𑒯𑒻𑒞 𑒕𑒟𑒱 𑒖𑒹 𑒢𑒯𑒱 𑒋𑒯𑒱 𑒞𑒩𑒯𑒏 𑒁𑒦𑒱𑒢𑒨 𑒞𑒿 𑒍𑒞𑒋 (𑒠𑒹𑒐𑒰 𑒏𑒋) 𑒦𑓄 𑒩𑒯𑒪 𑒁𑒕𑒱। 𑒍𑒞𑓂𑒞𑓄 𑒩𑒧𑒝𑒲 𑒧𑒼𑒯𑒢 𑒂 𑒅𑒔𑓂𑒔𑒫𑓀𑒬𑒲𑒨 𑒧𑒯𑒱𑒪𑒰 𑒢𑒱𑒦𑒰𑒏 𑒩𑒼𑒧𑒰𑓀𑒮 𑒔𑒪𑒱 𑒩𑒯𑒪 𑒁𑒕𑒱। 𑒧𑒳𑒠𑒰 𑒢𑒱𑒦𑒰𑒖𑒲 𑒞𑒿 𑒥𑒖𑒱𑒞𑒹 𑒢𑒯𑒱 𑒕𑒟𑒱। 𑒦𑒱𑒐𑒧𑓀𑒑𑒢𑒲 𑒨𑒧𑒩𑒰𑒖𑒮𑒿 𑒏𑒯𑒻𑒞 𑒕𑒟𑒱 𑒖𑒹 𑒍 𑒞𑒐𑒢𑒹 𑒥𑒖𑒞𑒲𑒯 𑒖𑒐𑒢 𑒋𑒯𑒱 𑒠𑒩𑒥𑒖𑓂𑒖𑒰𑒏 𑒞𑒰𑒪𑒰𑒏 𑒔𑒰𑒦𑒲 𑒯𑒳𑒢𑒏𑒰 𑒦𑒹𑒙𑒞𑒢𑓂𑒯𑒱, 𑒥𑒳𑒗𑒞𑒲𑒯 𑒖𑒹 𑒁𑒣𑒮𑒩𑒰 𑒥𑒢𑒥𑒰𑒧𑒹 𑒨𑒧𑒩𑒰𑒖 𑒧𑒠𑒞𑒱 𑒠𑒋 𑒮𑒏𑒻𑒞 𑒕𑒟𑒱, 𑒄 𑒩𑒧𑒝𑒲𑒏 𑒯𑒵𑒠𑒨 𑒟𑒱𑒏 𑒋𑒞𑒯𑒳 𑒢𑒼 𑒋𑒝𑓂𑒙𑓂𑒩𑒲 ! 𑒨𑒧𑒩𑒰𑒖 𑒐𑒐𑒮𑒻𑒞 𑒕𑒟𑒱, 𑒞𑒿 𑒔𑒱𑒞𑓂𑒩𑒑𑒳𑒣𑓂𑒞 𑒥𑒳𑒗𑒱 𑒖𑒰𑒃𑒞 𑒕𑒟𑒱 𑒖𑒹 𑒨𑒧𑒩𑒰𑒖 “𑒣𑓀𑒔𑒬𑒩”𑒮𑒿 𑒑𑓂𑒩𑒮𑒱𑒞 𑒦𑒋 𑒑𑒹𑒪 𑒕𑒟𑒱 ! 𑒔𑒱𑒞𑓂𑒩𑒑𑒳𑒣𑓂𑒞𑒏 𑒏𑒯𑒪𑒰 𑒅𑒞𑓂𑒞𑒩 𑒮𑒦 𑒏𑓂𑒨𑒼 𑒋𑒏 𑒏𑒰𑒞 𑒪𑒋 𑒖𑒰𑒍𑒪 𑒖𑒰𑒃𑒞 𑒕𑒟𑒱 𑒧𑒰𑒞𑓂𑒩 𑒨𑒧𑒩𑒰𑒖 𑒂 𑒢𑒱𑒦𑒰 𑒧𑓀𑒔𑒣𑒩 𑒩𑒯𑒱 𑒖𑒰𑒃𑒞 𑒕𑒟𑒱। 𑒨𑒧𑒩𑒰𑒖 𑒢𑒱𑒦𑒰𑒏 𑒮𑒼𑒗𑒰𑒿- 𑒮𑒳𑒢𑒴 𑒢𑒹 𑒢𑒱𑒦𑒰... 𑒏𑒯𑒱 𑒩𑒳𑒏𑒱 𑒖𑒰𑒃𑒞 𑒕𑒟𑒱। 𑒮𑒦𑒏 𑒅𑒞𑓂𑒮𑒰𑒯𑒱𑒞 𑒏𑒋𑒪𑒰𑒣𑒩 𑒨𑒧𑒩𑒰𑒖 𑒥𑒛𑓃𑒏𑒰 𑒔𑒰𑒦𑒲 𑒯𑒳𑒢𑒏𑒰 𑒠𑒻𑒞 𑒕𑒟𑒱, 𑒧𑒳𑒠𑒰 𑒢𑒱𑒦𑒰 𑒔𑒰𑒦𑒲 𑒦𑒹𑒙𑒪𑒰𑒣𑒩 𑒩𑒧𑒝𑒲 𑒧𑒼𑒯𑒢𑒏 𑒮𑓀𑒑 𑒞𑒹𑒢𑒰 𑒂𑒑𑒰𑒿 𑒥𑒜𑓃𑒻𑒞 𑒕𑒟𑒱 𑒖𑒹𑒢𑒰 𑒏𑒏𑒩𑒼 𑒁𑒢𑒏𑒰 𑒔𑒱𑒢𑓂𑒯𑒱𑒞𑒹 𑒢𑒯𑒱 𑒯𑒼𑒟𑒱 ! 𑒍 𑒔𑒰𑒦𑒲 𑒩𑒧𑒝𑒲 𑒧𑒼𑒯𑒢𑒏𑒹𑒿 𑒠𑒋 𑒠𑒻𑒞 𑒕𑒟𑒱 𑒧𑒳𑒠𑒰 𑒍 𑒞𑒰𑒪𑒰 𑒢𑒯𑒱 𑒐𑒼𑒪𑒱 𑒣𑒥𑒻𑒞 𑒕𑒟𑒱। 𑒤𑒹𑒩 𑒢𑒱𑒦𑒰 𑒁𑒣𑒢𑒹 𑒣𑓂𑒩𑒨𑒰𑒮 𑒏𑒩𑒋 𑒪𑒹𑒪 𑒂𑒑𑒰𑒿 𑒥𑒜𑓃𑒻𑒞 𑒕𑒟𑒱 𑒧𑒳𑒠𑒰 𑒔𑒱𑒞𑓂𑒩𑒑𑒳𑒣𑓂𑒞 𑒏𑒯𑒻𑒞 𑒕𑒟𑒱 𑒖𑒹 𑒄 𑒧𑒼𑒢𑒏 𑒠𑒩𑒥𑒖𑓂𑒖𑒰 𑒟𑒱𑒏, 𑒍𑒢𑒰 𑒢𑒯𑒱 𑒐𑒳𑒖𑒞। 𑒧𑒯𑒱𑒪𑒰 𑒚𑒏𑒋 𑒪𑒹𑒪 𑒔𑒰𑒦𑒲 𑒠𑒹𑒥𑒰𑒏 (!) 𑒑𑒣 𑒏𑒯𑒻𑒞 𑒕𑒟𑒱। 𑒮𑒦 𑒏𑓂𑒨𑒼 𑒯𑒿𑒮𑒲 𑒏𑒩𑒻𑒞 𑒕𑒢𑒱 𑒖𑒹 𑒧𑒼𑒢 𑒏𑒞𑒋 𑒕𑒼𑒛𑓃𑒱 𑒁𑒋𑒪𑒯𑒳𑒿 ? 𑒞𑒰𑒯𑒱𑒣𑒩 𑒋𑒏𑒥𑒹𑒩 𑒣𑒳𑒢𑓁 𑒩𑒧𑒝𑒲 𑒧𑒼𑒯𑒢 𑒂 𑒢𑒱𑒦𑒰 𑒧𑒼𑒢 𑒮𑓀𑒖𑒼𑒑𑒱 𑒏𑒋 𑒞𑒰𑒪𑒰 𑒐𑒼𑒪𑒥𑒰𑒏 𑒁𑒮𑒤𑒪 𑒣𑓂𑒩𑒨𑒰𑒮 𑒏𑒩𑒻𑒞 𑒕𑒟𑒱। 𑒢𑓀𑒠𑒲-𑒦𑒵𑓀𑒑𑒲-𑒦𑒱𑒐𑒧𑓀𑒑𑒢𑒲 𑒑𑒲𑒞 𑒑𑒰𑒥𑒋 𑒪𑒑𑒻𑒞 𑒕𑒟𑒱 𑒖𑒏𑒩 𑒞𑒰𑒞𑓂𑒣𑒩𑓂𑒨 𑒄𑒋𑒯 𑒖𑒹 𑒧𑒼𑒢𑒏 𑒞𑒰𑒪𑒰 𑒁𑒕𑒱 𑒪𑒰𑒑𑒪, 𑒧𑒳𑒠𑒰 𑒍𑒞𑒋 𑒁𑒕𑒱 𑒢𑒼 𑒋𑒝𑓂𑒙𑓂𑒩𑒲। 𑒧𑒳𑒠𑒰 𑒇𑒞𑒳 𑒫𑒮𑒢𑓂𑒞𑒧𑒹 𑒣𑓂𑒩𑒹𑒧 𑒯𑒼𑒃𑒕 𑒁𑒢𑒢𑓂𑒞 𑒂 𑒏𑒩𑒹𑒖 𑒏𑒯𑒻𑒞 𑒁𑒕𑒱 𑒧𑒻𑒢𑒰-𑒧𑒻𑒢𑒰 । 𑒞𑒿 𑒋𑒞𑒯𑒱 𑒢𑒼 𑒋𑒝𑓂𑒙𑓂𑒩𑒲 𑒠𑒩𑒥𑒖𑓂𑒖𑒰𑒣𑒩 𑒡𑒩𑒢𑒰 𑒠𑒹𑒪 𑒖𑒰𑒋।


𑒫𑒱𑒫𑒹𑒔𑒢: 𑒦𑒰𑒩𑒞 𑒂 𑒣𑒰𑒬𑓂𑒔𑒰𑒞𑓂𑒨 𑒢𑒰𑒙𑓂𑒨 𑒮𑒱𑒠𑓂𑒡𑒰𑓀𑒞𑒏 𑒞𑒳𑒪𑒢𑒰𑒞𑓂𑒧𑒏 𑒁𑒡𑓂𑒨𑒨𑒢𑒮𑒿 𑒄 𑒖𑓂𑒘𑒰𑒞 𑒯𑒼𑒃𑒞 𑒁𑒕𑒱 𑒧𑒰𑒢𑒫𑒏 𑒔𑒱𑒢𑓂𑒞𑒢 𑒦𑒾𑒑𑒼𑒪𑒱𑒏 𑒠𑒴𑒩𑒲𑒏𑒏 𑒁𑒕𑒻𑒞 𑒏𑒞𑒹𑒏 𑒮𑒧𑒰𑒢𑒞𑒰 𑒪𑒹𑒢𑒹 𑒩𑒯𑒻𑒞 𑒁𑒕𑒱। 𑒦𑒰𑒩𑒞𑒲𑒨 𑒢𑒰𑒙𑓂𑒨𑒬𑒰𑒮𑓂𑒞𑓂𑒩 𑒧𑒳𑒐𑓂𑒨𑒞𑓁 𑒦𑒩𑒞𑒏 “𑒢𑒰𑒙𑓂𑒨𑒬𑒰𑒮𑓂𑒞𑓂𑒩” 𑒂 𑒡𑒢𑓀𑒖𑒨𑒏 𑒠𑒬𑒩𑒴𑒣𑒏𑒣𑒩 𑒂𑒡𑒰𑒩𑒱𑒞 𑒁𑒕𑒱। 𑒣𑒰𑒬𑓂𑒔𑒰𑒞𑓂𑒨 𑒢𑒰𑒙𑓂𑒨𑒬𑒰𑒮𑓂𑒞𑓂𑒩𑒏 𑒣𑓂𑒩𑒰𑒧𑒰𑒝𑒱𑒏 𑒑𑓂𑒩𑓀𑒟 𑒁𑒕𑒱 𑒁𑒩𑒮𑓂𑒞𑒴𑒏 “𑒏𑒰𑒫𑓂𑒨𑒬𑒰𑒮𑓂𑒞𑓂𑒩”।
𑒦𑒩𑒞 𑒢𑒰𑒙𑓂𑒨𑒏𑒹𑒿 “𑒏𑒵𑒞𑒰𑒢𑒳𑒮𑒰𑒩” “𑒦𑒰𑒫𑒰𑒢𑒳𑒏𑒰𑒩” 𑒏𑒯𑒻𑒞 𑒕𑒟𑒱, 𑒡𑒢𑓀𑒖𑒨 𑒁𑒫𑒮𑓂𑒟𑒰𑒏 𑒁𑒢𑒳𑒏𑒵𑒞𑒱𑒏𑒹𑒿 𑒢𑒰𑒙𑓂𑒨 𑒏𑒯𑒻𑒞 𑒕𑒟𑒱। 𑒦𑒰𑒩𑒞𑒲𑒨 𑒮𑒰𑒯𑒱𑒞𑓂𑒨𑒬𑒰𑒮𑓂𑒞𑓂𑒩𑒧𑒹 𑒁𑒢𑒳𑒏𑒩𑒝 𑒢𑒙 𑒏𑒩𑓂𑒧 𑒁𑒕𑒱, 𑒏𑒫𑒱 𑒏𑒩𑓂𑒧 𑒢𑒯𑒱। 𑒣𑒬𑓂𑒔𑒱𑒧𑒧𑒹 𑒁𑒢𑒳𑒏𑒩𑒝 𑒏𑒩𑓂𑒧 𑒟𑒱𑒏 𑒏𑒫𑒱 𑒏𑒩𑓂𑒧, 𑒢𑒙𑒏 𑒏𑒞𑒯𑒳 𑒔𑒩𑒔𑒰 𑒢𑒯𑒱 𑒁𑒕𑒱।
𑒁𑒩𑒮𑓂𑒞𑒴 𑒢𑒰𑒙𑒏𑒧𑒹 𑒏𑒟𑒰𑒢𑒏𑒣𑒩 𑒫𑒱𑒬𑒹𑒭 𑒥𑒪 𑒠𑒻𑒞 𑒕𑒟𑒱। 𑒙𑓂𑒩𑒹𑒖𑒹𑒛𑒲𑒧𑒹 𑒏𑒟𑒰𑒢𑒏 𑒏𑒹𑒩 𑒮𑓀𑒑 𑒔𑒩𑒱𑒞𑓂𑒩-𑒔𑒱𑒞𑓂𑒩𑒝, 𑒣𑒠-𑒩𑒔𑒢𑒰, 𑒫𑒱𑒔𑒰𑒩 𑒞𑒞𑓂𑒫, 𑒠𑒵𑒬𑓂𑒨 𑒫𑒱𑒡𑒰𑒢 𑒂 𑒑𑒲𑒞 𑒩𑒯𑒻𑒞 𑒁𑒕𑒱। 𑒦𑒩𑒞 𑒏𑒯𑒻𑒞 𑒕𑒟𑒱 𑒖𑒹 𑒢𑒰𑒨𑒏𑒮𑒿 𑒮𑓀𑒥𑓀𑒡𑒱𑒞 𑒏𑒟𑒰𑒫𑒮𑓂𑒞𑒳 𑒂𑒡𑒱𑒏𑒰𑒩𑒱𑒏 𑒂 𑒂𑒡𑒱𑒏𑒰𑒩𑒱𑒏 𑒏𑒟𑒰𑒫𑒮𑓂𑒞𑒳𑒏𑒹𑒿 𑒮𑒯𑒰𑒨𑒞𑒰 𑒣𑒯𑒳𑒿𑒔𑒰𑒥𑒋𑒥𑒪𑒰 𑒏𑒟𑒰 𑒣𑓂𑒩𑒰𑒮𑓀𑒑𑒱𑒏 𑒏𑒯𑒪 𑒖𑒋𑒞। 𑒧𑒳𑒠𑒰 𑒮𑒦 𑒢𑒰𑒙𑒏𑒧𑒹 𑒣𑓂𑒩𑒰𑒮𑓀𑒑𑒱𑒏 𑒏𑒟𑒰𑒫𑒮𑓂𑒞𑒳 𑒯𑒼𑒁𑒋 𑒮𑒹 𑒂𑒫𑒬𑓂𑒨𑒏 𑒢𑒯𑒱, 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒢𑒯𑒱 𑒞𑒿 𑒏𑒼𑒢𑒼 𑒞𑒹𑒯𑒢 𑒂𑒡𑒱𑒏𑒰𑒩𑒱𑒏 𑒏𑒟𑒰𑒫𑒮𑓂𑒞𑒳 𑒁𑒕𑒱 𑒂 𑒢𑒯𑒱𑒋 𑒏𑒼𑒢𑒼 𑒣𑓂𑒩𑒰𑒮𑒰𑓀𑒑𑒱𑒏, 𑒏𑒰𑒩𑒝 𑒋𑒯𑒱𑒧𑒹 𑒢𑒰𑒨𑒏 𑒏𑒼𑒢𑒼 𑒮𑒩𑓂𑒫𑒧𑒰𑒢𑓂𑒨 𑒢𑒰𑒨𑒏 𑒢𑒯𑒱 𑒁𑒕𑒱। 𑒖𑒹 𑒥𑒖𑒰𑒩𑒲 𑒅𑒔𑓂𑒏𑓂𑒏𑒰𑒏𑒹𑒿 𑒏𑒰𑒪𑒩 𑒣𑒏𑒛𑓃𑒻𑒞 𑒕𑒟𑒱 𑒮𑒹 𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒑𑒾𑒝 𑒣𑒛𑓃𑒱 𑒖𑒰𑒃𑒞 𑒕𑒟𑒱। 𑒖𑒰𑒯𑒱 𑒅𑒔𑓂𑒏𑓂𑒏𑒰𑒏 𑒮𑒼𑒗𑒰𑒿 𑒔𑒼𑒩 𑒮𑒏𑒠𑒧 𑒩𑒯𑒻𑒞 𑒁𑒕𑒱 𑒮𑒹 𑒏𑒱𑒕𑒳 𑒏𑒰𑒪𑒏 𑒥𑒰𑒠, 𑒏𑒱𑒕𑒳 𑒢𑒫 𑒢𑒯𑒱 𑒯𑒼𑒃𑒕 𑒏𑒹𑒩 𑒠𑒩𑓂𑒬𑒢𑒣𑒩 𑒑𑒣 𑒏𑒩𑒻𑒞 𑒮𑒼𑒗𑒰𑒿 𑒁𑒥𑒻𑒞 𑒕𑒟𑒱। 𑒖𑒹 𑒨𑒧𑒩𑒰𑒖 𑒮𑒦𑒏𑒹𑒿 𑒟𑒩𑓂𑒩𑒹𑒢𑒹 𑒕𑒟𑒱, 𑒮𑒹 𑒮𑓂𑒫𑒨𑓀 𑒢𑒱𑒦𑒰𑒏 𑒮𑒼𑒗𑒰𑒿𑒧𑒹 𑒁𑒣𑒢 𑒞𑒹𑒖 𑒧𑒡𑓂𑒨𑒧 𑒯𑒼𑒃𑒞 𑒠𑒹𑒐𑒻𑒞 𑒕𑒟𑒱। 𑒦𑒱𑒐𑒧𑓀𑒑𑒢𑒲 𑒯𑒳𑒢𑒏𑒰 𑒠𑒻𑒫𑒲 𑒮𑓂𑒫𑒩𑒴𑒣 𑒅𑒞𑒰𑒩𑒢𑒹 𑒠𑒹𑒐𑒻𑒞 𑒯𑒿𑒮𑒻𑒞 𑒕𑒟𑒱 𑒞𑒿 𑒩𑒧𑒝𑒲 𑒧𑒼𑒯𑒢 𑒂 𑒢𑒱𑒦𑒰 𑒮𑒹𑒯𑒼 𑒯𑒳𑒢𑒏𑒰 𑒂 𑒔𑒱𑒞𑓂𑒩𑒑𑒳𑒣𑓂𑒞𑒏𑒹𑒿 𑒁𑒢𑓂𑒞𑒧𑒹 𑒁𑒣𑒬𑒥𑓂𑒠 𑒏𑒯𑒻𑒞 𑒕𑒟𑒱। 𑒫𑒰𑒧𑒣𑓀𑒟𑒲𑒏 𑒂 𑒁𑒦𑒱𑒢𑒹𑒞𑒰𑒏 𑒮𑒋𑒯 𑒯𑒰𑒪 𑒕𑒢𑓂𑒯𑒱। 𑒏𑒼𑒢𑒼 𑒣𑒰𑒞𑓂𑒩 𑒏𑒧𑒖𑒼𑒩 𑒢𑒯𑒱 𑒕𑒟𑒱 𑒂 𑒮𑒧𑒨-𑒣𑒩𑒱𑒮𑓂𑒟𑒱𑒞𑒱𑒣𑒩 𑒩𑒱𑒥𑒰𑒅𑒢𑓂𑒛 𑒏𑒩𑒻𑒞 𑒕𑒟𑒱।
𑒏𑒟𑒰 𑒃𑒞𑒱𑒫𑒵𑒞𑓂𑒞𑒱𑒏 𑒠𑒵𑒭𑓂𑒙𑒱𑒮𑒿 𑒣𑓂𑒩𑒐𑓂𑒨𑒰𑒞, 𑒅𑒞𑓂𑒣𑒰𑒠𑓂𑒨 𑒂 𑒧𑒱𑒬𑓂𑒩 𑒞𑒲𑒢 𑒣𑓂𑒩𑒏𑒰𑒩𑒏 𑒯𑒼𑒃𑒞 𑒁𑒕𑒱। 𑒣𑓂𑒩𑒐𑓂𑒨𑒰𑒞 𑒏𑒟𑒰 𑒃𑒞𑒱𑒯𑒰𑒮 𑒣𑒳𑒩𑒰𑒝𑒮𑒿 𑒪𑒹𑒪 𑒖𑒰𑒃𑒞 𑒁𑒕𑒱 𑒂 𑒅𑒞𑓂𑒣𑒰𑒠𑓂𑒨 𑒏𑒪𑓂𑒣𑒱𑒞 𑒯𑒼𑒃𑒞 𑒁𑒕𑒱। 𑒧𑒱𑒬𑓂𑒩𑒧𑒹 𑒠𑒳𑒢𑒴𑒏 𑒧𑒹𑒪 𑒯𑒼𑒃𑒞 𑒁𑒕𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒧𑒱𑒬𑓂𑒩 𑒃𑒞𑒱𑒫𑒵𑒞𑓂𑒞𑒱𑒏 𑒯𑒼𑒋𑒥𑒰𑒏 𑒏𑒼𑒢𑒼 𑒙𑒰 𑒑𑒳𑓀𑒖𑒰𑒃𑒬 𑒞𑒐𑒢𑒹 𑒐𑒞𑒧 𑒦𑒋 𑒖𑒰𑒃𑒞 𑒁𑒕𑒱 𑒖𑒐𑒢 𑒔𑒱𑒞𑓂𑒩𑒑𑒳𑒣𑓂𑒞 𑒂 𑒨𑒧𑒩𑒰𑒖 𑒁𑒣𑒢 𑒢𑒏𑒪𑒲 𑒦𑒹𑒭 𑒅𑒞𑒰𑒩𑒻𑒞 𑒕𑒟𑒱 𑒂 𑒦𑒱𑒐𑒧𑓀𑒑𑒢𑒲𑒏 𑒯𑒿𑒮𑒪𑒰𑒣𑒩 𑒦𑒵𑓀𑒑𑒲 𑒏𑒯𑒻𑒞 𑒕𑒟𑒱 𑒖𑒹 𑒄 𑒦𑒱𑒐𑒧𑓀𑒑𑒢𑒲 𑒮𑒹𑒯𑒼 𑒯𑒧𑒩𑒹 𑒮𑒦 𑒖𑒹𑒏𑒰𑒿 𑒏𑒪𑒰𑒏𑒰𑒩 𑒕𑒟𑒱 ! 𑒧𑒰𑒞𑓂𑒩 𑒨𑒧𑒩𑒰𑒖 𑒂 𑒔𑒱𑒞𑓂𑒩𑒑𑒳𑒣𑓂𑒞 𑒢𑒰𑒧𑒮𑒿 𑒏𑒟𑒰 𑒃𑒞𑒱𑒯𑒰𑒮-𑒣𑒳𑒩𑒰𑒝 𑒮𑒧𑓂𑒥𑒠𑓂𑒡 𑒢𑒯𑒱 𑒁𑒕𑒱 𑒂 𑒃𑒞𑒱𑒫𑒵𑒞𑓂𑒞𑒱 𑒣𑒴𑒩𑓂𑒝𑒞𑓁 𑒅𑒞𑓂𑒣𑒰𑒠𑓂𑒨 𑒁𑒕𑒱। 𑒁𑒩𑒮𑓂𑒞𑒴 𑒏𑒟𑒰𑒢𑒏𑒏𑒹𑒿 𑒮𑒩𑒪 𑒂 𑒖𑒙𑒱𑒪 𑒠𑒴 𑒣𑓂𑒩𑒏𑒰𑒩𑒏 𑒧𑒰𑒢𑒻𑒞 𑒕𑒟𑒱। 𑒞𑒰𑒯𑒱 𑒯𑒱𑒮𑒰𑒥𑒮𑒿 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒂𑒏𑒮𑓂𑒧𑒱𑒏 𑒒𑒙𑒢𑒰 𑒖𑒰𑒯𑒱 𑒮𑒩𑒪𑒞𑒰𑒏 𑒮𑓀𑒑 𑒤𑓂𑒪𑒼𑒧𑒹 𑒁𑒥𑒻𑒞 𑒁𑒕𑒱, 𑒮𑒹 𑒄 𑒢𑒰𑒙𑒏 𑒮𑒩𑒪 𑒏𑒟𑒰𑒢𑒏 𑒂𑒡𑒰𑒩𑒱𑒞 𑒏𑒯𑒪 𑒖𑒋𑒞। 𑒤𑒹𑒩 𑒁𑒩𑒮𑓂𑒞𑒴 𑒃𑒞𑒱𑒫𑒵𑒞𑓂𑒞𑒏𑒹𑒿 𑒠𑒢𑓂𑒞𑒏𑒟𑒰, 𑒏𑒪𑓂𑒣𑒢𑒰 𑒂 𑒃𑒞𑒱𑒯𑒰𑒮 𑒋𑒯𑒱 𑒞𑒲𑒢 𑒣𑓂𑒩𑒏𑒰𑒩𑒮𑒿 𑒮𑒧𑓂𑒥𑒢𑓂𑒡𑒱𑒞 𑒧𑒰𑒢𑒻𑒞 𑒕𑒟𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒏𑒹𑒿 𑒏𑒰𑒪𑓂𑒣𑒢𑒱𑒏 𑒧𑒴𑒪𑒏 𑒬𑓂𑒩𑒹𑒝𑒲𑒧𑒹 𑒋𑒯𑒱 𑒯𑒱𑒮𑒰𑒥𑒮𑒿 𑒩𑒰𑒐𑒪 𑒖𑒋𑒞। 𑒁𑒩𑒮𑓂𑒞𑒴𑒏 𑒙𑓂𑒩𑒹𑒖𑒹𑒛𑒲𑒏 𑒔𑒩𑒱𑒞𑓂𑒩 𑒨𑓃𑒬𑒮𑓂𑒫𑒲 𑒂 𑒏𑒳𑒪𑒲𑒢 𑒕𑒟𑒱- 𑒮𑒞𑓂 𑒁𑒮𑒞𑓂 𑒏𑒹𑒩 𑒧𑒱𑒬𑓂𑒩𑒝। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒖𑒹 𑒔𑒩𑒱𑒞𑓂𑒩 𑒮𑒦 𑒕𑒟𑒱 𑒞𑒰𑒯𑒱𑒧𑒹 𑒮𑒦 𑒔𑒩𑒱𑒞𑓂𑒩𑒧𑒹 𑒮𑒞𑓂 𑒁𑒮𑒞𑓂 𑒏𑒹𑒩 𑒧𑒱𑒬𑓂𑒩𑒝 𑒁𑒕𑒱। 𑒢𑒱𑒦𑒰 𑒅𑒔𑓂𑒔𑒫𑓀𑒬𑒲𑒨 𑒕𑒟𑒱 𑒧𑒳𑒠𑒰 𑒩𑒧𑒝𑒲 𑒧𑒼𑒯𑒢, 𑒖𑒹 𑒥𑒪𑒰𑒞𑓂𑒏𑒰𑒩𑒏 𑒥𑒰𑒠𑒏 𑒦𑒹𑒪 𑒣𑒱𑒙𑒰𑒢𑒏 𑒥𑒰𑒠 𑒧𑒵𑒞 𑒦𑒹𑒪 𑒕𑒟𑒱, 𑒮𑒿 𑒯𑒱𑒪𑒱-𑒧𑒱𑒪𑒱 𑒖𑒰𑒃𑒞 𑒕𑒟𑒱। 𑒦𑒱𑒐𑒧𑓀𑒑𑒢𑒲 𑒧𑒱𑒟𑒱𑒪𑒰 𑒔𑒱𑒞𑓂𑒩𑒏𑒰𑒩 𑒁𑒢𑒮𑒴𑒨𑒰 𑒕𑒟𑒱। 𑒧𑒳𑒠𑒰 𑒠𑒳𑒢𑒴 𑒦𑒠𑓂𑒩𑒣𑒳𑒩𑒳𑒭, 𑒥𑒖𑒰𑒩𑒲 𑒂 𑒔𑒰𑒩𑒴 𑒮𑒻𑒢𑒱𑒏 𑒋𑒯𑒱 𑒣𑓂𑒩𑒏𑒰𑒩𑒹𑒿 𑒥𑒱𑒢 𑒏𑒪𑒳𑒭𑒞𑒰𑒏 𑒮𑒼𑒗𑒰𑒿 𑒁𑒥𑒻𑒞 𑒕𑒟𑒱। 𑒦𑒩𑒞 𑒢𑒵𑒞𑓂𑒨 𑒮𑓀𑒑𑒲𑒞𑒏 𑒣𑓂𑒩𑒹𑒧𑒲𑒏𑒹𑒿 𑒡𑒲𑒩𑒪𑒪𑒱𑒞, 𑒬𑒰𑒢𑓂𑒞 𑒣𑓂𑒩𑒏𑒵𑒞𑒱𑒏𑒹𑒿 𑒡𑒲𑒩𑒣𑓂𑒩𑒬𑒰𑒢𑓂𑒞, 𑒏𑓂𑒭𑒞𑓂𑒩𑒱𑒨 𑒣𑓂𑒩𑒫𑒵𑒞𑓂𑒞𑒱𑒏𑒹𑒿 𑒡𑒲𑒩𑒼𑒠𑒞𑓂𑒞 𑒂 𑒄𑒩𑓂𑒭𑓂𑒨𑒰𑒪𑒴𑒏𑒹𑒿 𑒡𑒲𑒩𑒼𑒠𑓂𑒡𑒞𑓂𑒞 𑒏𑒯𑒻𑒞 𑒕𑒟𑒱। 𑒥𑒖𑒰𑒩𑒲 𑒂 𑒠𑒳𑒢𑒴 𑒦𑒠𑓂𑒩𑒣𑒳𑒩𑒳𑒭 𑒮𑓀𑒑𑒲𑒞𑒏 𑒥𑒹𑒬 𑒣𑓂𑒩𑒹𑒧𑒲 𑒕𑒟𑒱 𑒞𑒿 𑒩𑒧𑒝𑒲 𑒧𑒼𑒯𑒢 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰𑒏𑒹𑒿 𑒠𑒹𑒐𑒱 𑒏𑒋 𑒄𑒩𑓂𑒭𑓂𑒨𑒰𑒪𑒴। 𑒮𑒻𑒢𑒱𑒏 𑒮𑒦 𑒬𑒰𑒢𑓂𑒞 𑒕𑒟𑒱 𑒏𑓂𑒭𑒞𑓂𑒩𑒱𑒨𑒼𑒔𑒱𑒞 𑒑𑒳𑒝 𑒮𑒹𑒯𑒼 𑒕𑒢𑓂𑒯𑒱 𑒮𑒹 𑒡𑒲𑒩𑒼𑒠𑒞𑓂𑒞 𑒂 𑒡𑒲𑒩𑒣𑓂𑒩𑒬𑒰𑒢𑓂𑒞 𑒠𑒳𑒢𑒴 𑒕𑒟𑒱। 𑒧𑒳𑒠𑒰 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒋𑒯𑒱 𑒣𑓂𑒩𑒏𑒰𑒩𑒏 𑒫𑒱𑒦𑒰𑒖𑒢 𑒣𑒴𑒩𑓂𑒝𑒞𑒨𑒰 𑒮𑒧𑓂𑒦𑒫 𑒢𑒯𑒱 𑒁𑒕𑒱।
𑒦𑒰𑒩𑒞𑒲𑒨 𑒮𑒱𑒠𑓂𑒡𑒰𑓀𑒞 𑒏𑒰𑒩𑓂𑒨𑒏 𑒂𑒩𑒧𑓂𑒦, 𑒣𑓂𑒩𑒨𑒞𑓂𑒢, 𑒣𑓂𑒩𑒰𑒣𑓂𑒞𑓂𑒨𑒰𑒬𑒰, 𑒢𑒱𑒨𑒞𑒰𑒣𑓂𑒞𑒱 𑒂 𑒤𑒪𑒰𑒑𑒧 𑒡𑒩𑒱𑒏 𑒣𑒰𑒿𑒔 𑒙𑒰 𑒁𑒫𑒮𑓂𑒟𑒰𑒏 𑒫𑒩𑓂𑒝𑒢 𑒏𑒩𑒻𑒞 𑒁𑒕𑒱। 𑒣𑓂𑒩𑒰𑒣𑓂𑒞𑓂𑒨𑒰𑒬𑒰𑒧𑒹 𑒤𑒪 𑒣𑓂𑒩𑒰𑒣𑓂𑒞𑒱𑒏 𑒣𑓂𑒩𑒞𑒱 𑒢𑒱𑒩𑒰𑒬𑒰 𑒁𑒥𑒻𑒞 𑒁𑒕𑒱 𑒞𑒿 𑒢𑒱𑒨𑒞𑒰𑒣𑓂𑒞𑒱𑒧𑒹 𑒤𑒪 𑒣𑓂𑒩𑒰𑒣𑓂𑒞𑒱𑒏 𑒂𑒬𑒰 𑒒𑒳𑒩𑒱 𑒁𑒥𑒻𑒞 𑒁𑒕𑒱। 𑒣𑒰𑒬𑓂𑒔𑒰𑒞𑓂𑒨 𑒮𑒱𑒠𑓂𑒡𑒰𑓀𑒞𑒧𑒹 𑒁𑒕𑒱 𑒂𑒩𑒧𑓂𑒦, 𑒏𑒰𑒩𑓂𑒨-𑒫𑒱𑒏𑒰𑒮, 𑒔𑒩𑒧 𑒒𑒙𑒢𑒰, 𑒢𑒱𑒑𑒞𑒱 𑒂 𑒁𑒢𑓂𑒞𑒱𑒧 𑒤𑒪। 𑒣𑓂𑒩𑒟𑒧 𑒞𑒲𑒢 𑒁𑒫𑒮𑓂𑒟𑒰𑒧𑒹 𑒍𑒗𑒩𑒰𑒯𑒙𑒱 𑒁𑒥𑒻𑒞 𑒁𑒕𑒱, 𑒁𑒢𑓂𑒞𑒱𑒧 𑒠𑒴 𑒧𑒹 𑒮𑒼𑒗𑒩𑒰𑒯𑒙𑒱।
𑒏𑒰𑒩𑓂𑒨𑒰𑒫𑒮𑓂𑒟𑒰𑒏 𑒣𑓀𑒔 𑒫𑒱𑒦𑒰𑒖𑒢- 𑒥𑒲𑒨𑒰, 𑒥𑒱𑒢𑓂𑒠𑒳, 𑒣𑒞𑒰𑒏𑒰, 𑒣𑓂𑒩𑒏𑒩𑒲 𑒂 𑒏𑒰𑒩𑓂𑒨 𑒁𑒕𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒥𑒲𑒨𑒰 𑒁𑒕𑒱 𑒋𑒏𑒙𑒰 𑒠𑓂𑒫𑒢𑓂𑒠 - 𑒧𑒵𑒞𑓂𑒨𑒳𑒏 𑒥𑒰𑒠𑒏 𑒪𑒼𑒏𑒏, 𑒥𑒲𑒧𑒰 𑒋𑒖𑒹𑒢𑓂𑒙 𑒋𑒞𑒋 𑒥𑒱𑒢𑒳 𑒧𑒵𑒞𑓂𑒨𑒳𑒏 𑒣𑒯𑒳𑒿𑒔𑒱 𑒖𑒰𑒃𑒞 𑒕𑒟𑒱। 𑒨𑒧𑒩𑒰𑒖 𑒂 𑒔𑒱𑒞𑓂𑒩𑒑𑒳𑒣𑓂𑒞 𑒧𑒹𑒏𑒣 𑒂𑒩𑓂𑒙𑒱𑒮𑓂𑒙 𑒥𑒯𑒩𑒰𑒃𑒞 𑒕𑒟𑒱। 𑒫𑒱𑒦𑒱𑒢𑓂𑒢 𑒥𑒱𑒢𑓂𑒠𑒳 𑒠𑓂𑒫𑒰𑒩𑒰 𑒋𑒏𑒙𑒰 𑒔𑒩𑒱𑒞𑓂𑒩 𑒆𑒣𑒩 𑒢𑒲𑒔𑒰𑒿 𑒯𑒼𑒃𑒞 𑒩𑒯𑒻𑒞 𑒁𑒕𑒱। 𑒣𑒞𑒰𑒏𑒰 𑒂 𑒣𑓂𑒩𑒏𑒩𑒲 𑒁𑒫𑒰𑒢𑓂𑒞𑒩 𑒏𑒟𑒰𑒧𑒹 𑒯𑒼𑒃𑒞 𑒁𑒕𑒱 𑒮𑒹 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒢𑒯𑒱 𑒁𑒕𑒱। 𑒥𑒲𑒂𑒏 𑒫𑒱𑒏𑒮𑒱𑒞 𑒩𑒴𑒣 𑒏𑒰𑒩𑓂𑒨 𑒁𑒕𑒱 𑒧𑒳𑒠𑒰 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒍 𑒡𑒩𑒝𑒰𑒣𑒩 𑒐𑒞𑒧 𑒦𑒋 𑒖𑒰𑒃𑒞 𑒁𑒕𑒱! 𑒁𑒩𑒮𑓂𑒞𑒴 𑒋𑒏𑒩𑒰 𑒥𑒲𑒂, 𑒧𑒡𑓂𑒨 𑒂 𑒁𑒫𑒮𑒰𑒢 𑒏𑒯𑒻𑒞 𑒕𑒟𑒱। 𑒂𑒥 𑒂𑒆 𑒮𑒢𑓂𑒡𑒱𑒣𑒩, 𑒧𑒳𑒐-𑒮𑒢𑓂𑒡𑒱 𑒦𑒹𑒪 𑒥𑒲𑒖 𑒂 𑒂𑒩𑒧𑓂𑒦𑒏𑒹𑒿 𑒖𑒼𑒛𑓃𑒋𑒥𑒪𑒰, 𑒣𑓂𑒩𑒞𑒱𑒧𑒳𑒐-𑒮𑒢𑓂𑒡𑒱 𑒦𑒹𑒪 𑒥𑒱𑒢𑓂𑒠𑒳 𑒂 𑒣𑓂𑒩𑒨𑒞𑓂𑒢𑒏𑒹𑒿 𑒖𑒼𑒛𑓃𑒋𑒥𑒪𑒰, 𑒑𑒩𑓂𑒦𑒮𑒢𑓂𑒡𑒱 𑒦𑒹𑒪 𑒣𑒞𑒰𑒏𑒰 𑒂 𑒣𑓂𑒩𑒰𑒣𑓂𑒞𑓂𑒨𑒰𑒬𑒰𑒏𑒹𑒿 𑒖𑒼𑒛𑓃𑒋𑒥𑒪𑒰, 𑒫𑒱𑒧𑒩𑓂𑒬 𑒮𑒢𑓂𑒡𑒱 𑒦𑒹𑒪 𑒣𑓂𑒩𑒏𑒩𑒲 𑒂 𑒢𑒱𑒨𑒞𑒰𑒣𑓂𑒞𑒱𑒏𑒹𑒿 𑒖𑒼𑒛𑓃𑒋𑒥𑒪𑒰 𑒂 𑒢𑒱𑒩𑓂𑒫𑒯𑒝 𑒮𑒢𑓂𑒡𑒱 𑒦𑒹𑒪 𑒤𑒪𑒰𑒑𑒧 𑒂 𑒏𑒰𑒩𑓂𑒨𑒏𑒹𑒿 𑒖𑒼𑒛𑓃𑒋𑒥𑒪𑒰। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒧𑒳𑒐/ 𑒣𑓂𑒩𑒞𑒱𑒧𑒳𑒐 𑒂 𑒢𑒱𑒩𑓂𑒫𑒯𑒝 𑒮𑒢𑓂𑒡𑒱 𑒧𑒰𑒞𑓂𑒩 𑒁𑒕𑒱, 𑒬𑒹𑒭 𑒠𑒴 𑒙𑒰 𑒮𑒢𑓂𑒡𑒱 𑒢𑒯𑒱 𑒁𑒕𑒱।
𑒣𑒰𑒬𑓂𑒔𑒰𑒞𑓂𑒨 𑒮𑒱𑒠𑓂𑒡𑒰𑓀𑒞 𑒮𑓂𑒟𑒰𑒢, 𑒮𑒧𑒨 𑒂 𑒏𑒰𑒩𑓂𑒨𑒏 𑒏𑒹𑒢𑓂𑒠𑓂𑒩 𑒞𑒏𑒻𑒞 𑒁𑒕𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒮𑓂𑒟𑒰𑒢 𑒋𑒏𑒯𑒱 𑒁𑒕𑒱, 𑒮𑒧𑒨 𑒪𑒑𑒰𑒞𑒰𑒩 𑒂 𑒏𑒰𑒩𑓂𑒨 𑒁𑒕𑒱 𑒠𑓂𑒫𑒰𑒩𑒏 𑒦𑒲𑒞𑒩 𑒣𑒻𑒮𑒥𑒰𑒏 𑒂𑒏𑒰𑓀𑒏𑓂𑒭𑒰। 𑒠𑒴 𑒒𑒝𑓂𑒙𑒰𑒏 𑒢𑒰𑒙𑒏𑒧𑒹 𑒠𑒳𑒃𑒨𑒹 𑒒𑒝𑓂𑒙𑒰𑒏 𑒒𑒙𑒢𑒰𑒏𑓂𑒩𑒧 𑒫𑒩𑓂𑒝𑒱𑒞 𑒁𑒕𑒱 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒏𑒰𑒩𑓂𑒨 𑒮𑒹𑒯𑒼 𑒋𑒏𑒹𑒙𑒰 𑒁𑒕𑒱। 𑒁𑒦𑒱𑒢𑒫𑒑𑒳𑒣𑓂𑒞 𑒮𑒹𑒯𑒼 𑒏𑒯𑒻𑒞 𑒕𑒟𑒱 𑒖𑒹 𑒋𑒏 𑒁𑓀𑒏𑒧𑒹 𑒋𑒏 𑒠𑒱𑒢𑒏 𑒏𑒰𑒩𑓂𑒨𑒮𑒿 𑒥𑒹𑒬𑒲𑒏 𑒮𑒧𑒰𑒫𑒹𑒬 𑒢𑒯𑒱 𑒯𑒼𑒁𑒋 𑒂 𑒠𑒴 𑒁𑓀𑒏𑒧𑒹 𑒋𑒏 𑒫𑒩𑓂𑒭𑒮𑒿 𑒥𑒹𑒬𑒲𑒏 𑒒𑒙𑒢𑒰𑒏 𑒮𑒧𑒰𑒫𑒹𑒬 𑒢𑒯𑒱 𑒯𑒼𑒁𑒋। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒏𑒪𑓂𑒪𑒼𑒪𑒏 𑒫𑒱𑒦𑒰𑒖𑒢 𑒒𑒙𑒢𑒰𑒏 𑒢𑒱𑒩𑓂𑒠𑒱𑒭𑓂𑒙 𑒮𑒧𑒨𑒧𑒹 𑒦𑒹𑒪 𑒏𑒰𑒩𑓂𑒨𑒏 𑒂 𑒢𑒫 𑒏𑒰𑒩𑓂𑒨𑒰𑒩𑒧𑓂𑒦𑒧𑒹 𑒦𑒹𑒪 𑒫𑒱𑒪𑒧𑓂𑒥𑒏 𑒏𑒰𑒩𑒝 𑒂𑒢𑒪 𑒑𑒹𑒪 𑒁𑒕𑒱। 𑒧𑒳𑒠𑒰 𑒋𑒯𑒱 𑒞𑓂𑒩𑒱𑒏𑒏 𑒫𑒱𑒩𑒼𑒡 𑒛𑓂𑒩𑒰𑒃𑒛𑒢 𑒏𑒋𑒢𑒹 𑒕𑒪𑒰𑒯 𑒂 𑒬𑒹𑒏𑓂𑒮𑒣𑒱𑒁𑒩𑒏 𑒢𑒰𑒙𑒏𑒏 𑒮𑓂𑒫𑒔𑓂𑒕𑒢𑓂𑒠𑒞𑒰𑒏 𑒍 𑒮𑒧𑒩𑓂𑒟𑒢 𑒏𑒋𑒪𑒢𑓂𑒯𑒱। 𑒧𑒳𑒠𑒰 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒋𑒯𑒱 𑒞𑒩𑒯𑒏 𑒏𑒼𑒢𑒼 𑒮𑒧𑒮𑓂𑒨𑒰 𑒢𑒯𑒱 𑒁𑒥𑒻𑒞 𑒁𑒕𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒂𑒣𑒮𑒲 𑒑𑒣𑒬𑒣𑒧𑒹- 𑒖𑒏𑒩𑒰 𑒤𑓂𑒪𑒻𑒬𑒥𑒻𑒏 𑒮𑒹𑒯𑒼 𑒏𑒯𑒱 𑒮𑒏𑒻𑒞 𑒕𑒲- 𑒏𑒏𑒩 𑒧𑒵𑒞𑓂𑒨𑒳 𑒏𑒼𑒢𑒰 𑒦𑒹𑒪 𑒮𑒹 𑒢𑒲𑒏 𑒖𑒹𑒏𑒰𑒿 𑒠𑒩𑓂𑒬𑒱𑒞 𑒏𑒋𑒪 𑒑𑒹𑒪 𑒁𑒕𑒱।
𑒦𑒰𑒩𑒞𑒧𑒹 𑒢𑒰𑒙𑒏𑒏 𑒠𑒵𑒬𑓂𑒨𑒞𑓂𑒫𑒏 𑒮𑒧𑒩𑓂𑒟𑒢 𑒏𑒋𑒪 𑒑𑒹𑒪 𑒧𑒳𑒠𑒰 𑒁𑒩𑒮𑓂𑒞𑒴 𑒂 𑒣𑓂𑒪𑒹𑒙𑒼 𑒋𑒏𑒩 𑒫𑒱𑒩𑒼𑒡 𑒏𑒋𑒪𑒢𑓂𑒯𑒱। 𑒧𑒳𑒠𑒰 𑓑𑓖𑒧 𑒬𑒞𑒰𑒥𑓂𑒠𑒲𑒧𑒹 𑒪𑒼𑒛𑒼𑒫𑒱𑒏𑒼 𑒏𑒻𑒮𑓂𑒙𑒹𑒪𑒫𑒹𑒙𑓂𑒩𑒼 𑒠𑒵𑒬𑓂𑒨𑒞𑓂𑒫𑒏 𑒮𑒧𑒩𑓂𑒟𑒢 𑒏𑒋𑒪𑒢𑓂𑒯𑒱। 𑒛𑒱𑒙𑒹𑒙𑒰𑒩𑓂𑒙 𑒮𑒹𑒯𑒼 𑒠𑒵𑒬𑓂𑒨𑒞𑓂𑒫𑒏 𑒮𑒧𑒩𑓂𑒟𑒢 𑒏𑒋𑒪𑒢𑓂𑒯𑒱 𑒞𑒿 𑒛𑓂𑒩𑒰𑒃𑒛𑒖 𑒢𑒰𑒙𑒏𑒏 𑒣𑒚𑒢𑒲𑒨𑒞𑒰𑒏 𑒮𑒧𑒩𑓂𑒟𑒢 𑒏𑒋𑒪𑒢𑓂𑒯𑒱। 𑒠𑒹𑒮𑒱𑒨𑒩 𑒣𑒚𑒢𑒲𑒨𑒞𑒰 𑒂 𑒠𑒵𑒬𑓂𑒨𑒞𑓂𑒫 𑒠𑒳𑒢𑒴𑒏 𑒮𑒧𑒩𑓂𑒟𑒢 𑒏𑒋𑒪𑒢𑓂𑒯𑒱। 𑒁𑒦𑒱𑒢𑒫𑒑𑒳𑒣𑓂𑒞 𑒮𑒹𑒯𑒼 𑒏𑒯𑒢𑒹 𑒕𑒪𑒰𑒯 𑒖𑒹 𑒣𑒴𑒩𑓂𑒝 𑒩𑒮𑒰𑒮𑓂𑒫𑒰𑒠 𑒁𑒦𑒱𑒢𑒲𑒞 𑒦𑒹𑒪𑒰 𑒅𑒞𑓂𑒞𑒩 𑒦𑒹𑒙𑒻𑒞 𑒁𑒕𑒱, 𑒧𑒳𑒠𑒰 𑒣𑒚𑒢𑒮𑒿 𑒮𑒹𑒯𑒼 𑒩𑒮𑒰𑒮𑓂𑒫𑒰𑒠 𑒦𑒹𑒙𑒻𑒞 𑒁𑒕𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒣𑒯𑒱𑒪 𑒏𑒪𑓂𑒪𑒼𑒪𑒏 𑒣𑓂𑒩𑒰𑒩𑒧𑓂𑒦𑒧𑒹 𑒄 𑒮𑓂𑒣𑒭𑓂𑒙 𑒦𑓄 𑒖𑒰𑒃𑒞 𑒁𑒕𑒱 𑒖𑒹 𑒋𑒞𑒋 𑒠𑒵𑒬𑓂𑒨𑒞𑓂𑒫𑒏𑒹𑒿 𑒣𑓂𑒩𑒡𑒰𑒢𑒞𑒰 𑒠𑒹𑒪 𑒑𑒹𑒪 𑒁𑒕𑒱। 𑒣𑒬𑓂𑒔𑒱𑒧𑒲 𑒩𑓀𑒑𑒧𑓀𑒔𑒏 𑒢𑒰𑒙𑓂𑒨𑒫𑒱𑒡𑒰𑒢 𑒫𑒰𑒮𑓂𑒞𑒫𑒱𑒏 𑒁𑒕𑒱 𑒧𑒳𑒠𑒰 𑒦𑒰𑒩𑒞𑒲𑒨 𑒩𑓀𑒑𑒧𑓀𑒔𑒣𑒩 𑒮𑒰𑓀𑒏𑒹𑒞𑒱𑒏। 𑒖𑒹𑒢𑒰 𑒁𑒦𑒱𑒖𑓂𑒘𑒰𑒢𑒬𑒰𑒏𑒳𑓀𑒞𑒪𑒧𑓂 𑒧𑒹 𑒏𑒰𑒪𑒱𑒠𑒰𑒮 𑒏𑒯𑒻𑒞 𑒕𑒟𑒱- 𑒃𑒞𑒱 𑒬𑒩𑒮𑓀𑒡𑒰𑒢𑓀 𑒢𑒰𑒙𑒨𑒞𑒱। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒦𑒰𑒩𑒞𑒲𑒨 𑒫𑒱𑒡𑒰𑒢𑒏𑒹𑒿 𑒁𑓀𑒑𑒲𑒏𑒵𑒞 𑒏𑒋𑒪 𑒑𑒹𑒪- 𑒖𑒹𑒢𑒰 𑒧𑒵𑒞𑓂𑒨𑒳 𑒣𑓂𑒩𑒰𑒣𑓂𑒞 𑒮𑒦 𑒑𑒼𑒙𑒹 𑒠𑓂𑒫𑒰𑒩𑒰 𑒮𑓂𑒫𑒩𑓂𑒑 𑒣𑓂𑒩𑒫𑒹𑒬 𑒠𑓂𑒫𑒰𑒩𑒏 𑒁𑒠𑒵𑒬𑓂𑒨 𑒠𑒹𑒥𑒰𑒩𑒏 𑒑𑒣𑒬𑒣 𑒂 𑒁𑒦𑒱𑒢𑒨 𑒏𑒾𑒬𑒪 𑒠𑓂𑒫𑒰𑒩𑒰 𑒮𑓂𑒣𑒭𑓂𑒙𑒞𑒰। 𑒁𑓀𑒏𑒱𑒨𑒰 𑒢𑒰𑒙𑒧𑒹 𑒮𑒹𑒯𑒼 𑒣𑓂𑒩𑒠𑒩𑓂𑒬𑒢 𑒞𑒞𑓂𑒫𑒏 𑒣𑓂𑒩𑒡𑒰𑒢𑒞𑒰 𑒕𑒪। 𑒏𑒲𑒩𑓂𑒞𑒢𑒱𑒨𑒰𑒿 𑒋𑒏 𑒞𑒩𑒯𑒹𑒿 𑒮𑓀𑒑𑒲𑒞𑒏 𑒕𑒪 𑒂 𑒋𑒞𑒯𑒳 𑒁𑒦𑒱𑒢𑒨 𑒞𑒞𑓂𑒫𑒏 𑒣𑓂𑒩𑒡𑒰𑒢𑒞𑒰 𑒕𑒪। 𑒁𑓀𑒏𑒲𑒨𑒰 𑒢𑒰𑒙𑒏𑒏 𑒣𑓂𑒩𑒰𑒩𑒧𑓂𑒦 𑒧𑒵𑒠𑓀𑒑 𑒫𑒰𑒠𑒢𑒮𑒿 𑒯𑒼𑒃𑒞 𑒕𑒪। 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒻𑒟𑒱𑒪𑒲𑒏 𑒣𑒩𑒧𑓂𑒣𑒩𑒰𑒮𑒿 𑒁𑒣𑒢𑒰𑒏𑒹𑒿 𑒖𑒼𑒛𑓃𑒢𑒹 𑒁𑒕𑒱 𑒧𑒳𑒠𑒰 𑒮𑓀𑒑𑒯𑒱 𑒃𑒞𑒱𑒯𑒰𑒮, 𑒣𑒳𑒩𑒰𑒝 𑒂 𑒮𑒧𑒏𑒰𑒪𑒲𑒢 𑒖𑒲𑒫𑒢𑒔𑒏𑓂𑒩𑒏𑒹𑒿 𑒠𑒹𑒐𑒥𑒰𑒏 𑒋𑒏𑒙𑒰 𑒢𑒫 𑒠𑒵𑒭𑓂𑒙𑒱𑒏𑒼𑒝 𑒪𑒋 𑒂𑒋𑒪 𑒁𑒕𑒱, 𑒮𑒼𑒔𑒥𑒰 𑒪𑒋 𑒋𑒏𑒙𑒰 𑒢𑒫 𑒁𑓀𑒞𑒩𑓂𑒠𑒵𑒭𑓂𑒙𑒱 𑒠𑒻𑒞 𑒁𑒕𑒱।
𑒖𑓂𑒨𑒼𑒞𑒱𑒩𑒲𑒬𑓂𑒫𑒩𑒏 𑒡𑒴𑒩𑓂𑒞𑒮𑒧𑒰𑒑𑒧, 𑒫𑒱𑒠𑓂𑒨𑒰𑒣𑒞𑒱𑒏 𑒑𑒼𑒩𑒏𑓂𑒭𑒫𑒱𑒖𑒨, 𑒏𑒲𑒩𑓂𑒞𑒢𑒱𑒘𑒰 𑒢𑒰𑒙𑒏, 𑒁𑓀𑒏𑒲𑒨𑒰𑒢𑒰𑒙, 𑒧𑒳𑓀𑒬𑒲 𑒩𑒒𑒳𑒢𑒢𑓂𑒠𑒢 𑒠𑒰𑒮𑒏 𑒧𑒱𑒟𑒱𑒪𑒰 𑒢𑒰𑒙𑒏, 𑒖𑒲𑒫𑒢 𑒗𑒰𑒏 𑒮𑒳𑒢𑓂𑒠𑒩 𑒮𑓀𑒨𑒼𑒑, 𑒄𑒬𑒢𑒰𑒟 𑒗𑒰𑒏 𑒔𑒲𑒢𑒲𑒏 𑒪𑒛𑓂𑒛𑒴, 𑒑𑒼𑒫𑒱𑒢𑓂𑒠 𑒗𑒰𑒏 𑒥𑒮𑒰𑒞, 𑒧𑒝𑒱𑒣𑒠𑓂𑒧𑒏 𑒞𑒹𑒮𑒩 𑒏𑒢𑒱𑒨𑒰𑒿, 𑒢𑒔𑒱𑒏𑒹𑒞𑒰𑒖𑒲𑒏 “𑒢𑒰𑒨𑒏𑒏 𑒢𑒰𑒧 𑒖𑒲𑒫𑒢, 𑒋𑒏 𑒕𑒪 𑒩𑒰𑒖𑒰”, 𑒬𑓂𑒩𑒲𑒬𑒖𑒲𑒏 𑒣𑒳𑒩𑒳𑒭𑒰𑒩𑓂𑒟, 𑒮𑒳𑒡𑒰𑓀𑒬𑒳 𑒬𑒹𑒐𑒩 𑒔𑒾𑒡𑒩𑒲𑒏 𑒦𑒤𑒰𑒃𑒞 𑒔𑒰𑒯𑒏 𑒖𑒱𑒢𑒑𑒲, 𑒧𑒯𑒹𑒢𑓂𑒠𑓂𑒩 𑒧𑒪𑓀𑒑𑒱𑒨𑒰𑒏 𑒏𑒰𑒚𑒏 𑒪𑒼𑒏, 𑒩𑒰𑒧 𑒦𑒩𑒼𑒮 𑒏𑒰𑒣𑒛𑓃𑒱 𑒦𑓂𑒩𑒧𑒩𑒏 𑒧𑒯𑒱𑒭𑒰𑒮𑒳𑒩 𑒧𑒳𑒩𑓂𑒠𑒰𑒥𑒰𑒠, 𑒑𑓀𑒑𑒹𑒬 𑒑𑒳𑓀𑒖𑒢𑒏 𑒥𑒳𑒡𑒱𑒥𑒡𑒱𑒨𑒰 𑒏𑒹𑒩 𑒣𑒩𑒧𑓂𑒣𑒩𑒰𑒏𑒹𑒿 𑒂𑒑𑒰𑒿 𑒥𑒜𑓃𑒥𑒻𑒞 𑒢𑒔𑒱𑒏𑒹𑒞𑒰𑒖𑒲𑒏 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒞𑒰𑒩𑓂𑒏𑒱𑒏𑒞𑒰 𑒂 𑒂𑒡𑒳𑒢𑒱𑒏𑒞𑒰𑒏 𑒫𑒮𑓂𑒞𑒳𑒢𑒱𑒭𑓂𑒙𑒞𑒰𑒏𑒹𑒿 𑒚𑒰𑒧-𑒚𑒰𑒧 𑒢𑒏𑒰𑒩𑒻𑒞 𑒁𑒕𑒱। 𑒫𑒰𑒧𑒣𑓀𑒟𑒲𑒏𑒹𑒿 𑒨𑒧𑒩𑒰𑒖 𑒄𑒯𑒼 𑒏𑒯𑒻𑒞 𑒕𑒟𑒱𑒢𑓂𑒯, 𑒖𑒹 𑒫𑒰𑒧𑒣𑓀𑒟𑒲 𑒠𑒹𑒐𑒱 𑒩𑒯𑒪 𑒕𑒟𑒱 𑒮𑒹 𑒮𑒞𑓂𑒨 𑒢𑒯𑒱, 𑒮𑒣𑒢𑒼 𑒦𑒋 𑒮𑒏𑒻𑒞 𑒁𑒕𑒱। 𑒫𑒱𑒖𑓂𑒘𑒰𑒢𑒏 𑒖𑓂𑒘𑒰𑒢𑒏 𑒮𑒧𑓂𑒣𑒴𑒩𑓂𑒝𑒞𑒰𑒣𑒩 𑒙𑒲𑒏𑒰 𑒁𑒕𑒱 𑒄 𑒢𑒰𑒙𑒏। 𑒮𑒞𑓂𑒨-𑒁𑒮𑒞𑓂𑒨, 𑒮𑒦 𑒁𑒣𑒢-𑒁𑒣𑒢 𑒠𑒵𑒭𑓂𑒙𑒱𑒏𑒼𑒝𑒮𑒿 𑒞𑒏𑒩 𑒫𑒩𑓂𑒝𑒢 𑒏𑒩𑒻𑒞 𑒕𑒟𑒱। 𑒔𑒼𑒩𑒏 𑒁𑒣𑒢 𑒞𑒩𑓂𑒏 𑒕𑒢𑓂𑒯𑒱 𑒂 𑒫𑒰𑒧𑒣𑓀𑒟𑒲 𑒮𑒹𑒯𑒼 𑒏𑒯𑒻𑒞 𑒕𑒟𑒱 𑒖𑒹 𑒔𑒼𑒩 𑒢𑒹𑒞𑒰 𑒢𑒯𑒱 𑒥𑒢𑒱 𑒮𑒏𑒻𑒞 𑒕𑒟𑒱, 𑒧𑒳𑒠𑒰 𑒢𑒹𑒞𑒰𑒏 𑒔𑒼𑒩𑒱𑒣𑒩 𑒅𑒞𑒩𑒱 𑒁𑒋𑒪𑒰𑒮𑒿 𑒔𑒼𑒩𑒏 𑒫𑒵𑒞𑒱 𑒧𑒰𑒩𑒪 𑒖𑒰𑒋 𑒥𑒪𑒰 𑒕𑒢𑓂𑒯𑒱। 𑒢𑒰𑒙𑒏𑒧𑒹 𑒂𑒞𑓂𑒧-𑒏𑒹𑒢𑓂𑒠𑓂𑒩𑒱𑒞 𑒯𑒰𑒮𑓂𑒨𑒣𑒴𑒩𑓂𑒝 𑒂 𑒢𑒲𑒏-𑒐𑒩𑒰𑒥𑒏 𑒦𑒰𑒫𑒢𑒰 𑒩𑒯𑒱-𑒩𑒯𑒱 𑒐𑒞𑒧 𑒯𑒼𑒃𑒞 𑒩𑒯𑒻𑒞 𑒁𑒕𑒱। 𑒨𑒧𑒩𑒰𑒖 𑒂 𑒔𑒱𑒞𑓂𑒩𑒑𑒳𑒣𑓂𑒞 𑒡𑒩𑒱 𑒧𑒳𑒐𑒾𑒙𑒰𑒧𑒹 𑒩𑒯𑒱 𑒖𑒲𑒥𑒱 𑒩𑒯𑒪 𑒕𑒟𑒱। 𑒅𑒞𑓂𑒞𑒩 𑒂𑒡𑒳𑒢𑒱𑒏𑒞𑒰𑒏 𑒄 𑒮𑒦 𑒪𑒏𑓂𑒭𑒝𑒏 𑒮𑓀𑒑 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒋𑒏𑒹 𑒑𑒼𑒙𑒹𑒏 𑒏𑒻𑒏 𑒞𑒩𑒯𑒏 𑒔𑒩𑒱𑒞𑓂𑒩 𑒢𑒱𑒏𑒪𑒱 𑒥𑒰𑒯𑒩 𑒁𑒥𑒻𑒞 𑒁𑒕𑒱, 𑒖𑒹𑒢𑒰 𑒅𑒔𑓂𑒔𑒫𑓀𑒬𑒲𑒨 𑒧𑒯𑒱𑒪𑒰𑒏। 𑒏𑒼𑒢𑒼 𑒒𑒙𑒢𑒰𑒏 𑒮𑒧𑓂𑒣𑒴𑒩𑓂𑒝 𑒁𑒩𑓂𑒟 𑒢𑒯𑒱 𑒪𑒰𑒑𑒱 𑒣𑒥𑒻𑒞 𑒁𑒕𑒱, 𑒮𑒞𑓂𑒨 𑒏𑒐𑒢 𑒁𑒮𑒞𑓂𑒨 𑒦𑒋 𑒖𑒋𑒞 𑒞𑒏𑒩 𑒏𑒼𑒢𑒼 𑒚𑒹𑒏𑒰𑒢 𑒢𑒯𑒱। 𑒅𑒞𑓂𑒞𑒩 𑒂𑒡𑒳𑒢𑒱𑒏𑒞𑒰𑒏 𑒮𑒞𑒯𑒲 𑒔𑒱𑒢𑓂𑒞𑒢 𑒂 𑒞𑒹𑒯𑒢 𑒔𑒩𑒱𑒞𑓂𑒩 𑒮𑒦𑒏 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒦𑒩𑒧𑒰𑒩 𑒪𑒰𑒑𑒪 𑒁𑒕𑒱, 𑒂𑒬𑒰𑒫𑒰𑒠𑒱𑒞𑒰 𑒞𑒿 𑒢𑒯𑒱𑒋 𑒁𑒕𑒱 𑒧𑒳𑒠𑒰 𑒢𑒱𑒩𑒰𑒬𑒰𑒫𑒰𑒠𑒱𑒞𑒰 𑒮𑒹𑒯𑒼 𑒢𑒯𑒱 𑒁𑒕𑒱। 𑒖𑒹 𑒁𑒕𑒱 𑒞𑒿 𑒮𑒹 𑒁𑒕𑒱 𑒥𑒞𑒯𑒣𑒢𑒲, 𑒏𑒼𑒢𑒼 𑒔𑒲𑒖 𑒋𑒏 𑒞𑒩𑒯𑒹𑒿 𑒢𑒯𑒱 𑒏𑒻𑒏 𑒞𑒩𑒯𑒹𑒿 𑒮𑒼𑒔𑒪 𑒖𑒰 𑒮𑒏𑒻𑒞 𑒁𑒕𑒱- 𑒄 𑒠𑒵𑒭𑓂𑒙𑒱𑒏𑒼𑒝 𑒫𑒱𑒠𑓂𑒨𑒧𑒰𑒢 𑒁𑒕𑒱। 𑒏𑒰𑒩𑒝, 𑒢𑒱𑒨𑒢𑓂𑒞𑓂𑒩𑒝 𑒂 𑒨𑒼𑒖𑒢𑒰𑒏 𑒅𑒞𑓂𑒞𑒩 𑒣𑒩𑒱𑒝𑒰𑒧𑒣𑒩 𑒫𑒱𑒬𑓂𑒫𑒰𑒮 𑒢𑒯𑒱, 𑒫𑒩𑒢 𑒮𑓀𑒨𑒼𑒑𑒏 𑒅𑒞𑓂𑒞𑒩 𑒣𑒩𑒱𑒝𑒰𑒧𑒣𑒩 𑒥𑒹𑒬𑒲 𑒫𑒱𑒬𑓂𑒫𑒰𑒮 𑒠𑒩𑓂𑒬𑒰𑒍𑒪 𑒑𑒹𑒪 𑒁𑒕𑒱। 𑒑𑒝𑒞𑒰𑓀𑒞𑓂𑒩𑒱𑒏 𑒂 𑒢𑒰𑒩𑒲𑒫𑒰𑒠𑒲 𑒠𑒵𑒭𑓂𑒙𑒱𑒏𑒼𑒝 𑒂 𑒪𑒰𑒪 𑒗𑓀𑒛𑒰 𑒂𑒠𑒱𑒏 𑒫𑒱𑒔𑒰𑒩𑒡𑒰𑒩𑒰𑒏 𑒮𑓀𑒑𑒹 𑒣𑓂𑒩𑒞𑒲𑒏𑒏 𑒩𑒴𑒣𑒧𑒹 𑒯𑒰𑒮-𑒣𑒩𑒱𑒯𑒰𑒮 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱।
𑒋𑒯𑒱 𑒞𑒩𑒯𑒹𑒿 𑒢𑒼 𑒋𑒝𑓂𑒙𑓂𑒩𑒲: 𑒧𑒰 𑒣𑓂𑒩𑒫𑒱𑒬 𑒧𑒹 𑒅𑒞𑓂𑒞𑒩 𑒂𑒡𑒳𑒢𑒱𑒏 𑒠𑒵𑒭𑓂𑒙𑒱𑒏𑒼𑒝 𑒠𑒩𑓂𑒬𑒱𑒞 𑒯𑒼𑒃𑒞 𑒁𑒕𑒱, 𑒋𑒞𑒋 𑒣𑒰𑒚𑒏 𑒏𑒟𑒰𑒢𑒏𑒏 𑒧𑒡𑓂𑒨 𑒅𑒚𑒰𑒍𑒪 𑒫𑒱𑒦𑒱𑒢𑓂𑒢 𑒮𑒧𑒮𑓂𑒨𑒰𑒮𑒿 𑒁𑒣𑒢𑒰𑒏𑒹𑒿 𑒣𑒩𑒱𑒔𑒱𑒞 𑒣𑒥𑒻𑒞 𑒕𑒟𑒱। 𑒖𑒹 𑒠𑓂𑒫𑒢𑓂𑒠 𑒢𑒰𑒙𑒏𑒏 𑒁𑓀𑒞𑒧𑒹 𑒠𑒩𑓂𑒬𑒱𑒞 𑒦𑒹𑒪 𑒮𑒹 𑒅𑒞𑓂𑒞𑒩-𑒂𑒡𑒳𑒢𑒱𑒏 𑒨𑒳𑒑𑒏 𑒣𑒰𑒚𑒏𑒏𑒹𑒿 𑒂𑒬𑓂𑒔𑒩𑓂𑒨𑒱𑒞 𑒢𑒯𑒱 𑒏𑒩𑒻𑒞 𑒕𑒢𑓂𑒯𑒱, 𑒏𑒱𑒋𑒏 𑒞𑒿 𑒍 𑒠𑒻𑒢𑒱𑒏 𑒖𑒲𑒫𑒢𑒧𑒹 𑒋𑒯𑒱 𑒞𑒩𑒯𑒏 𑒠𑓂𑒫𑒢𑓂𑒠𑒏 𑒢𑒱𑒞𑓂𑒨 𑒮𑒰𑒧𑒢𑒰 𑒏𑒩𑒻𑒞 𑒕𑒟𑒱।

𑒩𑒔𑒢𑒰 𑒪𑒱𑒐𑒥𑒰𑒮𑒿 𑒣𑒯𑒱𑒢𑒹...............
𑒮𑒰𑒯𑒱𑒞𑓂𑒨𑒏 𑒠𑒴 𑒫𑒱𑒡𑒰 𑒁𑒕𑒱 𑒑𑒠𑓂𑒨 𑒂 𑒣𑒠𑓂𑒨 । 𑒕𑒢𑓂𑒠𑒼𑒥𑒠𑓂𑒡 𑒩𑒔𑒢𑒰 𑒣𑒠𑓂𑒨 𑒏𑒯𑒥𑒻𑒞 𑒁𑒕𑒱-𑒁𑒢𑓂𑒨𑒟𑒰 𑒍 𑒑𑒠𑓂𑒨 𑒟𑒲𑒏। 𑒕𑒢𑓂𑒠 𑒧𑒰𑒢𑒹 𑒦𑒹𑒪 𑒋𑒯𑒢 𑒩𑒔𑒢𑒰 𑒖𑒹 𑒂𑒢𑒢𑓂𑒠 𑒣𑓂𑒩𑒠𑒰𑒢 𑒏𑒩𑒋 । 𑒧𑒳𑒠𑒰 𑒋𑒯𑒱𑒮𑒿 𑒄 𑒢𑒯𑒱 𑒥𑒳𑒗𑒥𑒰𑒏 𑒔𑒰𑒯𑒲 𑒖𑒹 𑒂𑒖𑒳𑒏 𑒢𑒫 𑒏𑒫𑒱𑒞𑒰 𑒑𑒠𑓂𑒨 𑒏𑒼𑒙𑒱𑒏 𑒁𑒕𑒱 𑒏𑒰𑒩𑒝 𑒫𑒹𑒠𑒏 𑒮𑒰𑒫𑒱𑒞𑓂𑒩𑒲-𑒑𑒰𑒨𑒞𑓂𑒩𑒲 𑒧𑓀𑒞𑓂𑒩 𑒮𑒹𑒯𑒼 𑒬𑒱𑒟𑒱𑒪/ 𑒅𑒠𑒰𑒩 𑒢𑒱𑒨𑒧𑒏 𑒏𑒰𑒩𑒝, 𑒮𑒰𑒫𑒱𑒞𑓂𑒩𑒲 𑒧𑓀𑒞𑓂𑒩 𑒑𑒰𑒨𑒞𑓂𑒩𑒲 𑒕𑓀𑒠, 𑒧𑒹 𑒣𑒩𑒱𑒑𑒝𑒱𑒞 𑒯𑒼𑒃𑒞 𑒁𑒕𑒱 𑒞𑒏𑒩 𑒔𑒩𑒔𑒰 𑒢𑒲𑒔𑒰𑒿 𑒖𑒰 𑒏𑒋 𑒯𑒼𑒋𑒞 - 𑒖𑒹𑒢𑒰 𑒨𑒠𑒱 𑒁𑒏𑓂𑒭𑒩 𑒣𑒴𑒩𑒰 𑒢𑒯𑒱 𑒦𑒹𑒪 𑒞𑒿 𑒋𑒏 𑒂𑒏𑒱 𑒠𑒴 𑒁𑒏𑓂𑒭𑒩 𑒣𑓂𑒩𑒞𑓂𑒨𑒹𑒏 𑒣𑒰𑒠𑒏𑒹𑒿 𑒥𑒜𑓃𑒰 𑒪𑒹𑒪 𑒖𑒰𑒃𑒞 𑒁𑒕𑒱। 𑒨 𑒂 𑒫 𑒏𑒹𑒩 𑒮𑓀𑒨𑒳𑒏𑓂𑒞𑒰𑒏𑓂𑒭𑒩𑒏𑒹𑒿 𑒏𑓂𑒩𑒧𑒬𑓁 𑒃 𑒂 𑒅 𑒪𑒑𑒰 𑒏𑒋 𑒁𑒪𑒑 𑒏𑒋𑒪 𑒖𑒰𑒃𑒞 𑒁𑒕𑒱। 𑒖𑒹𑒢𑒰- 𑒫𑒩𑒹𑒝𑓂𑒨𑒧𑓂=𑒫𑒩𑒹𑒝𑒱𑒨𑒧𑓂
𑒮𑓂𑒫𑓁= 𑒮𑒳𑒫𑓁।
𑒂𑒖𑒳𑒏 𑒢𑒫 𑒏𑒫𑒱𑒞𑒰𑒏 𑒮𑓀𑒑 𑒯𑒰𑒃𑒏𑒴/ 𑒏𑓂𑒭𑒝𑒱𑒏𑒰/ 𑒯𑒻𑒏𑒴𑒏 𑒪𑒹𑒪 𑒧𑒻𑒟𑒱𑒪𑒲 𑒦𑒰𑒭𑒰 𑒂 𑒦𑒰𑒩𑒞𑒲𑒨, 𑒮𑓀𑒮𑓂𑒏𑒵𑒞 𑒂𑒬𑓂𑒩𑒱𑒞 𑒪𑒱𑒣𑒱 𑒫𑓂𑒨𑒫𑒮𑓂𑒟𑒰 𑒮𑒩𑓂𑒫𑒰𑒡𑒱𑒏 𑒅𑒣𑒨𑒳𑒏𑓂𑒞𑓂𑒞 𑒁𑒕𑒱। 𑒞𑒧𑒱𑒪 𑒕𑒼𑒛𑓃𑒱 𑒬𑒹𑒭 𑒮𑒦𑒙𑒰 𑒠𑒏𑓂𑒭𑒱𑒝 𑒂 𑒮𑒧𑒮𑓂𑒞 𑒅𑒞𑓂𑒞𑒩-𑒣𑒬𑓂𑒔𑒱𑒧𑒲 𑒂 𑒣𑒴𑒩𑓂𑒫𑒲 𑒦𑒰𑒩𑒞𑒲𑒨 𑒪𑒱𑒣𑒱 𑒂 𑒠𑒹𑒫𑒢𑒰𑒑𑒩𑒲 𑒪𑒱𑒣𑒱 𑒧𑒹 𑒫𑒻𑒯 𑒮𑓂𑒫𑒩 𑒂 𑒏𑒔𑒙𑒞𑒣 𑒫𑓂𑒨𑒘𑓂𑒖𑒢 𑒫𑒱𑒡𑒰𑒢 𑒁𑒕𑒱, 𑒖𑒰𑒯𑒱𑒧𑒹 𑒖𑒹 𑒪𑒱𑒐𑒪 𑒖𑒰𑒃𑒞 𑒁𑒕𑒱 𑒮𑒻𑒯 𑒥𑒰𑒖𑒪 𑒖𑒰𑒃𑒞 𑒁𑒕𑒱। 𑒧𑒳𑒠𑒰 𑒠𑒹𑒫𑒢𑒰𑒑𑒩𑒲𑒧𑒹 𑒯𑓂𑒩𑒮𑓂𑒫 “𑒃” 𑒋𑒏𑒩 𑒁𑒣𑒫𑒰𑒠 𑒁𑒕𑒱, 𑒄 𑒪𑒱𑒐𑒪 𑒖𑒰𑒃𑒞 𑒁𑒕𑒱 𑒣𑒯𑒱𑒢𑒹, 𑒧𑒳𑒠𑒰 𑒥𑒰𑒖𑒪 𑒖𑒰𑒃𑒞 𑒁𑒕𑒱 𑒥𑒰𑒠𑒧𑒹। 𑒧𑒳𑒠𑒰 𑒧𑒻𑒟𑒱𑒪𑒲𑒧𑒹 𑒄 𑒁𑒣𑒫𑒰𑒠 𑒮𑒹𑒯𑒼 𑒢𑒯𑒱 𑒁𑒕𑒱- 𑒨𑒟𑒰 '𑒁𑒕𑒱' 𑒄 𑒥𑒰𑒖𑒪 𑒖𑒰𑒃𑒞 𑒁𑒕𑒱 𑒁 𑒯𑓂𑒩𑓂𑒮𑓂𑒫 '𑒃' 𑒕 𑒫𑒰 𑒁 𑒃 𑒕। 𑒠𑒼𑒮𑒩 𑒅𑒠𑒰𑒯𑒩𑒝 𑒪𑒱𑒁- 𑒩𑒰𑒞𑒱- 𑒩𑒰 𑒃 𑒞। 𑒞𑒿 𑒮𑒱𑒠𑓂𑒡 𑒦𑒹𑒪 𑒖𑒹 𑒯𑒻𑒏𑒴𑒏 𑒪𑒹𑒪 𑒧𑒻𑒟𑒱𑒪𑒲 𑒮𑒩𑓂𑒫𑒼𑒞𑓂𑒞𑒧 𑒦𑒰𑒭𑒰 𑒁𑒕𑒱। 𑒋𑒏𑒙𑒰 𑒂𑒩 𑒅𑒠𑒰𑒯𑒩𑒝 𑒪𑒱𑒁। 𑒮𑒢𑓂𑒡𑒱 𑒮𑓀𑒮𑓂𑒏𑒵𑒞𑒏 𑒫𑒱𑒬𑒹𑒭𑒞𑒰 𑒁𑒕𑒱, 𑒧𑒳𑒠𑒰 𑒏𑒲 𑒃𑓀𑒑𑓂𑒪𑒱𑒬𑒧𑒹 𑒮𑓀𑒡𑒱 𑒢𑒯𑒱 𑒁𑒕𑒱 ? 𑒞𑒿 𑒄 𑒏𑒲 𑒁𑒕𑒱 - 𑒂𑒃𑒧 𑒑𑒼𑒃𑒓 𑒙𑒴𑒫𑒰𑒩𑓂𑒛𑓂𑒮𑒠𑒋𑒢𑓂𑒛। 𑒋𑒏𑒩𑒰 𑒪𑒱𑒐𑒪 𑒖𑒰𑒃𑒞 𑒁𑒕𑒱- 𑒂𑒃 𑒋𑒧 𑒑𑒼𑒃𑒓 𑒙𑒴𑒫𑒰𑒩𑓂𑒛𑓂𑒮 𑒠 𑒋𑒢𑓂𑒛। 𑒧𑒳𑒠𑒰 𑒣𑒰𑒝𑒱𑒢𑒱 𑒡𑓂𑒫𑒢𑒱 𑒫𑒱𑒖𑓂𑒘𑒰𑒢𑒏 𑒂𑒡𑒰𑒩 𑒣𑒩 𑒮𑓀𑒡𑒱𑒏 𑒢𑒱𑒁𑒧 𑒥𑒢𑒍𑒪𑒢𑓂𑒯𑒱, 𑒧𑒳𑒠𑒰 𑒃𑓀𑒑𑓂𑒪𑒱𑒬𑒧𑒹 𑒪𑒱𑒐𑒥𑒰 𑒏𑒰𑒪𑒧𑒹 𑒞𑒿 𑒮𑓀𑒡𑒱𑒏 𑒣𑒰𑒪𑒢 𑒢𑒯𑒱 𑒯𑒼𑒃𑒞 𑒕𑒻, 𑒂𑒃 𑒋𑒧 𑒏𑒹𑒿 𑒍𑒢𑒰 𑒂𑒃𑒧 𑒤𑒼𑒢𑒹𑒙𑒱𑒏𑒪𑒲 𑒪𑒱𑒐𑒪 𑒖𑒰𑒃𑒞 𑒁𑒕𑒱, 𑒧𑒳𑒠𑒰 𑒥𑒖𑒥𑒰 𑒏𑒰𑒪 𑒋𑒏𑒩 𑒣𑓂𑒩𑒨𑒼𑒑 𑒯𑒼𑒃𑒞 𑒁𑒕𑒱। 𑒧𑒻𑒟𑒱𑒪𑒲𑒧𑒹 𑒮𑒹𑒯𑒼 𑒨𑒟𑒰𑒮𑓀𑒦𑒫 𑒫𑒱𑒦𑒏𑓂𑒞𑓂𑒞𑒱 𑒬𑒥𑓂𑒠𑒮𑒿 𑒮𑒙𑒰 𑒏𑒋 𑒪𑒱𑒐𑒪 𑒂 𑒥𑒰𑒖𑒪 𑒖𑒰𑒃𑒞 𑒁𑒕𑒱।

𑒕𑒢𑓂𑒠 𑒠𑒴 𑒣𑓂𑒩𑒏𑒰𑒩𑒏 𑒁𑒕𑒱।𑒧𑒰𑒞𑓂𑒩𑒰 𑒕𑒢𑓂𑒠 𑒂 𑒫𑒩𑓂𑒝 𑒕𑒢𑓂𑒠 ।
𑒫𑒹𑒠𑒧𑒹 𑒫𑒩𑓂𑒝𑒫𑒵𑒞𑓂𑒞𑒏 𑒣𑓂𑒩𑒨𑒼𑒑 𑒁𑒕𑒱 𑒧𑒰𑒞𑓂𑒩𑒱𑒏 𑒕𑒢𑓂𑒠𑒏 𑒢𑒯𑒱 ।
𑒫𑒰𑒩𑓂𑒝𑒱𑒏 𑒕𑒢𑓂𑒠𑒧𑒹 𑒫𑒩𑓂𑒝/ 𑒁𑒏𑓂𑒭𑒩𑒏 𑒑𑒝𑒢𑒰 𑒧𑒰𑒞𑓂𑒩 𑒯𑒼𑒃𑒞 𑒁𑒕𑒱। 𑒯𑒪𑓀𑒞𑒨𑒳𑒏𑓂𑒞 𑒁𑒏𑓂𑒭𑒩𑒏𑒹𑒿 𑒢𑒯𑒱 𑒑𑒰𑒢𑒪 𑒖𑒰𑒃𑒞 𑒁𑒕𑒱। 𑒋𑒏𑒰𑒩 𑒅𑒏𑒰𑒩 𑒃𑒞𑓂𑒨𑒰𑒠𑒱 𑒨𑒳𑒏𑓂𑒞 𑒁𑒏𑓂𑒭𑒩𑒏𑒹𑒿 𑒍𑒯𑒱𑒢𑒰 𑒋𑒏 𑒑𑒰𑒢𑒪 𑒖𑒰𑒃𑒞 𑒁𑒕𑒱 𑒖𑒹𑒢𑒰 𑒮𑓀𑒨𑒳𑒏𑓂𑒞𑒰𑒏𑓂𑒭𑒩𑒏𑒹𑒿। 𑒮𑓀𑒑𑒯𑒱 𑒁 𑒮𑒿 𑒯 𑒏𑒹𑒿 𑒮𑒹𑒯𑒼 𑒋𑒏 𑒑𑒰𑒢𑒪 𑒖𑒰𑒃𑒞 𑒁𑒕𑒱। 𑒋𑒏𑒮𑒿 𑒥𑒹𑒬𑒲 𑒧𑒰𑒢 𑒏𑒼𑒢𑒼 𑒫𑒩𑓂𑒝/ 𑒁𑒏𑓂𑒭𑒩𑒏 𑒢𑒯𑒱 𑒯𑒼𑒃𑒕। 𑒧𑒼𑒙𑒰-𑒧𑒼𑒙𑒲 𑒞𑒲𑒢𑒙𑒰 𑒥𑒱𑒢𑓂𑒠𑒳 𑒧𑒼𑒢 𑒩𑒰𑒐𑒴-
𑓑. 𑒯𑒪𑓀𑒞𑒨𑒳𑒏𑓂𑒞 𑒁𑒏𑓂𑒭𑒩-𑓐
𑓒. 𑒮𑓀𑒨𑒳𑒏𑓂𑒞 𑒁𑒏𑓂𑒭𑒩-𑓑
𑓓. 𑒁𑒏𑓂𑒭𑒩 𑒁 𑒮𑒿 𑒯 -𑓑 𑒣𑓂𑒩𑒞𑓂𑒨𑒹𑒏।
𑒂𑒥 𑒣𑒯𑒱𑒪 𑒅𑒠𑒰𑒯𑒩𑒝 𑒠𑒹𑒐𑒴-
𑒄 𑒁𑒩𑒠𑒩𑒰𑒏 𑒧𑒹𑒒 𑒢𑒯𑒱 𑒧𑒰𑒢𑒞 𑒩𑒯𑒞 𑒥𑒩𑒮𑒱 𑒏𑒹=𑓑+𑓕+𑓒+𑓒+𑓓+𑓓+𑓑=𑓑𑓗
𑒂𑒥 𑒠𑒼𑒮𑒩 𑒅𑒠𑒰𑒯𑒩𑒝 𑒠𑒹𑒐𑒴

𑒣𑒬𑓂𑒔𑒰𑒞𑓂=𑓒
𑒂𑒥 𑒞𑒹𑒮𑒩 𑒅𑒠𑒰𑒯𑒩𑒝 𑒠𑒹𑒐𑒴
𑒂𑒥=𑓒
𑒂𑒥 𑒔𑒰𑒩𑒱𑒧 𑒅𑒠𑒰𑒯𑒩𑒝 𑒠𑒹𑒐𑒴
𑒮𑓂𑒏𑓂𑒩𑒱𑒣𑓂𑒙=𑓒
𑒧𑒳𑒐𑓂𑒨 𑒫𑒻𑒠𑒱𑒏 𑒕𑒢𑓂𑒠 𑒮𑒰𑒞 𑒁𑒕𑒱-
𑒑𑒰𑒨𑒞𑓂𑒩𑒲, 𑒅𑒭𑓂𑒝𑒱𑒏𑓂, 𑒁𑒢𑒳𑒭𑓂𑒙𑒳𑒣𑓂, 𑒥𑒵𑒯𑒞𑒲, 𑒣𑒓𑓂𑒏𑓂𑒞𑒱, 𑒞𑓂𑒩𑒱𑒭𑓂𑒙𑒳𑒣𑓂 𑒂 𑒖𑒑𑒞𑒲। 𑒬𑒹𑒭 𑒍𑒏𑒩 𑒦𑒹𑒠 𑒁𑒕𑒱, 𑒁𑒞𑒱𑒕𑒢𑓂𑒠 𑒂 𑒫𑒱𑒔𑓂𑒕𑒢𑓂𑒠। 𑒋𑒞𑒋 𑒕𑒢𑓂𑒠𑒏𑒹𑒿 𑒁𑒏𑓂𑒭𑒩𑒮𑒿 𑒔𑒱𑒢𑓂𑒯𑒪 𑒖𑒰𑒃𑒞 𑒁𑒕𑒱। 𑒖𑒹 𑒁𑒏𑓂𑒭𑒩 𑒣𑒴𑒩𑒰 𑒢𑒯𑒱 𑒦𑒹𑒪 𑒞𑒿 𑒋𑒏 𑒂𑒏𑒱 𑒠𑒴 𑒁𑒏𑓂𑒭𑒩 𑒣𑓂𑒩𑒞𑓂𑒨𑒹𑒏 𑒣𑒰𑒠𑒧𑒹 𑒥𑒜𑓃𑒰 𑒪𑒹𑒪 𑒖𑒰𑒃𑒞 𑒁𑒕𑒱। 𑒨 𑒂 𑒫 𑒏𑒹𑒩 𑒮𑓀𑒨𑒳𑒏𑓂𑒞𑒰𑒏𑓂𑒭𑒩𑒏𑒹𑒿 𑒏𑓂𑒩𑒧𑒬𑓁 𑒃 𑒂 𑒅 𑒪𑒑𑒰 𑒏𑒋 𑒁𑒪𑒑 𑒏𑒋𑒪 𑒖𑒰𑒃𑒞 𑒁𑒕𑒱। 𑒖𑒹𑒢𑒰-
𑒫𑒩𑒹𑒝𑓂𑒨𑒧𑓂=𑒫𑒩𑒹𑒝𑒱𑒨𑒧𑓂
𑒮𑓂𑒫𑓁= 𑒮𑒳𑒫𑓁
𑒑𑒳𑒝 𑒂 𑒫𑒵𑒠𑓂𑒡𑒱𑒏𑒹𑒿 𑒁𑒪𑒑 𑒏𑒋 𑒮𑒹𑒯𑒼 𑒁𑒏𑓂𑒭𑒩 𑒣𑒴𑒩 𑒏𑒋 𑒮𑒏𑒻𑒞 𑒕𑒲।
𑒋 = 𑒁 + 𑒃
𑒍 = 𑒁 + 𑒅
𑒌 = 𑒁/𑒂 + 𑒋
𑒎 = 𑒁/𑒂 + 𑒍

𑒕𑒢𑓂𑒠𑓁 𑒬𑒰𑒮𑓂𑒞𑓂𑒩𑒧𑒹 𑒣𑓂𑒩𑒨𑒳𑒏𑓂𑒞 ‘𑒑𑒳𑒩𑒳’ 𑒂 ‘𑒪𑒒𑒳’ 𑒕𑓀𑒠𑒏 𑒣𑒩𑒱𑒔𑒨 𑒣𑓂𑒩𑒰𑒣𑓂𑒞 𑒏𑒩𑒴।
𑒞𑒹𑒩𑒯 𑒙𑒰 𑒮𑓂𑒫𑒩 𑒫𑒩𑓂𑒝𑒧𑒹 𑒁,𑒃,𑒅,𑒇,𑒪𑒵 𑒄 𑒣𑒰𑒿𑒔 𑒯𑓂𑒩𑓂𑒮𑓂𑒫 𑒂𑒩 𑒂,𑒄,𑒆,𑒇,𑒋.𑒌,𑒍,𑒎, 𑒄 𑒂𑒚 𑒠𑒲𑒩𑓂𑒒 𑒮𑓂𑒫𑒩 𑒁𑒕𑒱।
𑒄 𑒮𑓂𑒫𑒩 𑒫𑒩𑓂𑒝 𑒖𑒐𑒢 𑒫𑓂𑒨𑓀𑒖𑒢 𑒫𑒩𑓂𑒝𑒏 𑒮𑓀𑒑 𑒖𑒳𑒛𑓃𑒱 𑒖𑒰𑒃𑒞 𑒁𑒕𑒱 𑒞𑒿 𑒍𑒏𑒩𑒰𑒮𑒿 ‘𑒑𑒳𑒝𑒱𑒞𑒰𑒏𑓂𑒭𑒩’ 𑒥𑒢𑒻𑒞 𑒁𑒕𑒱।
𑒏𑓂+𑒁= 𑒏,
𑒏𑓂+𑒂=𑒏𑒰 ।
𑒋𑒏 𑒮𑓂𑒫𑒩 𑒧𑒰𑒞𑓂𑒩𑒰 𑒂𑒏𑒱 𑒋𑒏 𑒑𑒳𑒝𑒱𑒞𑒰𑒏𑓂𑒭𑒩𑒏𑒹𑒿 𑒋𑒏 ‘𑒁𑒏𑓂𑒭𑒩’ 𑒏𑒯𑒪 𑒖𑒰𑒃𑒞 𑒁𑒕𑒱। 𑒏𑒼𑒢𑒼 𑒫𑓂𑒨𑓀𑒖𑒢 𑒧𑒰𑒞𑓂𑒩𑒏𑒹𑒿 𑒁𑒏𑓂𑒭𑒩 𑒢𑒯𑒱 𑒧𑒰𑒢𑒪 𑒖𑒰𑒃𑒞 𑒁𑒕𑒱- 𑒖𑒹𑒢𑒰 ‘𑒁𑒫𑒰𑒏𑓂’ 𑒬𑒥𑓂𑒠𑒧𑒹 𑒠𑒴 𑒙𑒰 𑒁𑒏𑓂𑒭𑒩 𑒁𑒕𑒱, 𑒁, 𑒫𑒰 ।

𑓑. 𑒮𑒦𑒙𑒰 𑒯𑓂𑒩𑒮𑓂𑒫 𑒮𑓂𑒫𑒩 𑒂 𑒯𑓂𑒩𑒮𑓂𑒫 𑒨𑒳𑒏𑓂𑒞 𑒑𑒳𑒝𑒱𑒞𑒰𑒏𑓂𑒭𑒩 ‘𑒪𑒒𑒳’ 𑒧𑒰𑒢𑒪 𑒖𑒰𑒃𑒞 𑒁𑒕𑒱। 𑒋𑒏𑒩𑒰 𑒆𑒣𑒩 U 𑒪𑒱𑒐𑒱 𑒋𑒏𑒩 𑒮𑓀𑒏𑒹𑒞 𑒠𑒹𑒪 𑒖𑒰𑒃𑒞 𑒁𑒕𑒱।
𑓒. 𑒮𑒦𑒙𑒰 𑒠𑒲𑒩𑓂𑒒 𑒮𑓂𑒫𑒩 𑒂𑒩 𑒠𑒲𑒩𑓂𑒒 𑒮𑓂𑒫𑒩 𑒨𑒳𑒏𑓂𑒞 𑒑𑒳𑒝𑒱𑒞𑒰𑒏𑓂𑒭𑒩 ‘𑒑𑒳𑒩𑒳’ 𑒧𑒰𑒢𑒪 𑒖𑒰𑒃𑒞 𑒁𑒕𑒱, 𑒂 𑒋𑒏𑒩 𑒮𑓀𑒏𑒹𑒞 𑒁𑒕𑒱, 𑒆𑒣𑒩𑒧𑒹 𑒋𑒏𑒙𑒰 𑒕𑒼𑒙 -।
𑓓. 𑒁𑒢𑒳𑒮𑓂𑒫𑒰𑒩 𑒏𑒱𑓀𑒫𑒰 𑒫𑒱𑒮𑒩𑓂𑒑𑒨𑒳𑒏𑓂𑒞 𑒮𑒦 𑒁𑒏𑓂𑒭𑒩 𑒑𑒳𑒩𑒴 𑒧𑒰𑒢𑒪 𑒖𑒰𑒃𑒞 𑒁𑒕𑒱।
𑓔. 𑒏𑒼𑒢𑒼 𑒁𑒏𑓂𑒭𑒩𑒏 𑒥𑒰𑒠 𑒮𑓀𑒨𑒳𑒏𑓂𑒞𑒰𑒏𑓂𑒭𑒩 𑒏𑒱𑓀𑒫𑒰 𑒫𑓂𑒨𑓀𑒖𑒢 𑒧𑒰𑒞𑓂𑒩 𑒩𑒯𑒪𑒰𑒮𑒿 𑒍𑒯𑒱 𑒁𑒏𑓂𑒭𑒩𑒏𑒹𑒿 𑒑𑒳𑒩𑒳 𑒧𑒰𑒢𑒪 𑒖𑒰𑒃𑒞 𑒁𑒕𑒱। 𑒖𑒹𑒢𑒰- 𑒁𑒔𑓂, 𑒮𑒞𑓂𑒨। 𑒋𑒯𑒱𑒧𑒹 𑒁 𑒂 𑒮 𑒠𑒳𑒢𑒴 𑒑𑒳𑒩𑒳 𑒁𑒕𑒱।
𑓕. 𑒖𑒹𑒢𑒰 𑒫𑒰𑒩𑓂𑒝𑒱𑒏 𑒕𑒢𑓂𑒠/ 𑒫𑒵𑒞𑓂𑒞 𑒫𑒹𑒠𑒧𑒹 𑒫𑓂𑒨𑒫𑒯𑒰𑒩 𑒏𑒋𑒪 𑒑𑒹𑒪 𑒁𑒕𑒱 𑒞𑒯𑒱𑒢𑒰
𑒮𑓂𑒫𑒩𑒏 𑒣𑒴𑒩𑓂𑒝 𑒩𑒴𑒣𑒮𑒿 𑒫𑒱𑒔𑒰𑒩 𑒮𑒹𑒯𑒼 𑒍𑒯𑒱 𑒨𑒳𑒑 𑒮𑒿 𑒦𑒹𑒙𑒻𑒞 𑒁𑒕𑒱। 𑒮𑓂𑒟𑒴𑒪 𑒩𑒲𑒞𑒱𑒮𑒿 𑒄 𑒫𑒱𑒦𑒏𑓂𑒞 𑒁𑒕𑒱:- 𑓑. 𑒅𑒠𑒰𑒞𑓂𑒞 𑓒. 𑒅𑒠𑒰𑒞𑓂𑒞𑒞𑒩 𑓓. 𑒁𑒢𑒳𑒠𑒰𑒞𑓂𑒞 𑓔. 𑒁𑒢𑒳𑒠𑒰𑒞𑓂𑒞𑒞𑒩 𑓕. 𑒮𑓂𑒫𑒩𑒱𑒞 𑓖. 𑒁𑒢𑒳𑒠𑒰𑒞𑓂𑒞𑒰𑒢𑒳𑒩𑒏𑓂𑒞𑒮𑓂𑒫𑒩𑒱𑒞, 𑓗. 𑒣𑓂𑒩𑒔𑒨 (𑒋𑒏𑒙𑒰 𑒬𑓂𑒩𑒳𑒞𑒱-𑒁𑒢𑒯𑒞 𑒢𑒰𑒠 𑒖𑒹 𑒥𑒱𑒢𑒰 𑒏𑒼𑒢𑒼 𑒔𑒲𑒖𑒏 𑒅𑒞𑓂𑒣𑒢𑓂𑒢 𑒯𑒼𑒃𑒞 𑒁𑒕𑒱, 𑒬𑒹𑒭 𑒮𑒦𑒙𑒰 𑒁𑒕𑒱 𑒂𑒯𑒞 𑒢𑒰𑒠 𑒖𑒹 𑒏𑒼𑒢𑒼 𑒫𑒮𑓂𑒞𑒳𑒮𑒿 𑒙𑒏𑒩𑒍𑒪𑒰 𑒣𑒩 𑒅𑒞𑓂𑒣𑒢𑓂𑒢 𑒯𑒼𑒃𑒞 𑒁𑒕𑒱)।
𑓑. 𑒅𑒠𑒰𑒞𑓂𑒞- 𑒖𑒹 𑒁𑒏𑒰𑒩𑒰𑒠𑒱 𑒮𑓂𑒫𑒩 𑒏𑒝𑓂𑒚𑒰𑒠𑒱 𑒮𑓂𑒟𑒰𑒢𑒧𑒹 𑒆𑒩𑓂𑒡𑓂𑒫 𑒦𑒰𑒑𑒧𑒹 𑒥𑒰𑒖𑒪 𑒖𑒰𑒃𑒞 𑒁𑒕𑒱। 𑒋𑒏𑒩𑒰 𑒪𑒹𑒪 𑒏𑒼𑒢𑒼 𑒔𑒹𑒢𑓂𑒯 𑒢𑒯𑒱 𑒁𑒕𑒱। 𑓒. 𑒅𑒠𑒰𑒞𑒰𑒞𑓂𑒞𑒩- 𑒏𑒝𑓂𑒚𑒰𑒠𑒱 𑒁𑒞𑒱 𑒆𑒩𑓂𑒡𑓂𑒫 𑒮𑓂𑒟𑒰𑒢𑒮𑒿 𑒥𑒰𑒖𑒪 𑒖𑒰𑒃𑒞 𑒁𑒕𑒱। 𑓓. 𑒁𑒢𑒳𑒠𑒰𑒞𑓂𑒞- 𑒖𑒹 𑒏𑒝𑓂𑒚𑒰𑒠𑒱 𑒮𑓂𑒟𑒰𑒢𑒧𑒹 𑒁𑒡𑒼𑒦𑒰𑒑𑒧𑒹 𑒅𑒔𑓂𑒔𑒰𑒩𑒱𑒞 𑒯𑒼𑒃𑒕।𑒢𑒲𑒔𑒰𑒿𑒧𑒹 𑒞𑒲𑒩𑓂𑒨𑒏 𑒔𑒹𑒢𑓂𑒯 𑒐𑒔𑒱𑒞 𑒏𑒋𑒪 𑒖𑒰𑒃𑒕। 𑓔. 𑒁𑒢𑒳𑒠𑒰𑒞𑒰𑒞𑓂𑒞𑒞𑒩- 𑒏𑒝𑓂𑒚𑒰𑒠𑒱𑒮𑒿 𑒁𑒞𑓂𑒨𑓀𑒞 𑒢𑒲𑒔𑒰𑒿 𑒥𑒰𑒖𑒪 𑒖𑒰𑒃𑒞 𑒁𑒕𑒱। 𑓕. 𑒮𑓂𑒫𑒩𑒱𑒞- 𑒖𑒰𑒯𑒱𑒧𑒹 𑒁𑒢𑒳𑒠𑒰𑒞𑓂𑒞 𑒩𑒯𑒻𑒞 𑒁𑒕𑒱 𑒏𑒱𑒕𑒳 𑒦𑒰𑒑, 𑒂 𑒏𑒱𑒕𑒳 𑒩𑒯𑒻𑒞 𑒁𑒕𑒱 𑒅𑒠𑒰𑒞𑓂𑒞। 𑒆𑒣𑒩𑒧𑒹 𑒚𑒰𑒜𑓃 𑒩𑒹𑒐𑒰 𑒐𑒹𑓀𑒔𑒪 𑒖𑒰𑒃𑒞 𑒁𑒕𑒱, 𑒋𑒯𑒱𑒧𑒹। 𑓖. 𑒁𑒢𑒳𑒠𑒰𑒏𑓂𑒞𑒰𑒢𑒳𑒩𑒏𑓂𑒞𑒮𑓂𑒫𑒩𑒱𑒞- 𑒖𑒰𑒯𑒱𑒧𑒹 𑒅𑒠𑒰𑒞𑓂𑒞, 𑒮𑓂𑒫𑒩𑒱𑒞 𑒏𑒱𑓀𑒫𑒰 𑒠𑒳𑒢𑒴 𑒥𑒰𑒠𑒧𑒹 𑒯𑒼𑒃𑒕, 𑒄 𑒞𑒲𑒢 𑒣𑓂𑒩𑒏𑒰𑒩𑒏 𑒯𑒼𑒃𑒕। 𑓗. 𑒣𑓂𑒩𑒔𑒨-𑒮𑓂𑒫𑒩𑒱𑒞𑒏 𑒥𑒰𑒠𑒏 𑒁𑒢𑒳𑒠𑒰𑒞𑓂𑒞 𑒩𑒯𑒪𑒰𑒮𑒿 𑒁𑒢𑒰𑒯𑒞 𑒢𑒰𑒠 𑒣𑓂𑒩𑒔𑒨𑒏,𑒞𑒰𑒢𑒏 𑒅𑒞𑓂𑒣𑒞𑓂𑒞𑒱 𑒯𑒼𑒃𑒞 𑒁𑒕𑒱।

𑓑. 𑒣𑒴𑒩𑓂𑒫𑒰𑒩𑓂𑒔𑒱𑒏𑒧𑒹 𑒏𑓂𑒩𑒧𑒮𑒿 𑒁𑒑𑓂𑒢𑒱, 𑒃𑒢𑓂𑒠𑓂𑒩 𑒂 𑒮𑒼𑒧 𑒣𑒨𑒧𑒰𑒢𑒏𑒹𑒿 𑒮𑓀𑒥𑒼𑒡𑒱𑒞 𑒑𑒲𑒞 𑒁𑒕𑒱।𑒞𑒠𑒳𑒣𑒩𑒰𑒢𑓂𑒞 𑒂𑒩𑒝𑓂𑒨𑒏 𑒏𑒰𑒝𑓂𑒛 𑒂 𑒧𑒯𑒰𑒢𑒰𑒧𑓂𑒢𑒲 𑒂𑒩𑓂𑒔𑒱𑒏 𑒁𑒕𑒱।𑒂𑒑𑓂𑒢𑒹𑒨, 𑒌𑒢𑓂𑒠𑓂𑒩 𑒂 𑒣𑒰𑒨𑒧𑒰𑒢 𑒣𑒩𑓂𑒫𑒏𑒹𑒿 𑒑𑓂𑒩𑒰𑒧𑒑𑒹𑒨𑒝 𑒂 𑒣𑒴𑒩𑓂𑒫𑒰𑒩𑓂𑒔𑒱𑒏𑒏 𑒬𑒹𑒭 𑒦𑒰𑒑𑒏𑒹𑒿 𑒂𑒩𑒝𑓂𑒨𑒏𑒑𑒝 𑒮𑒹𑒯𑒼 𑒏𑒯𑒪 𑒖𑒰𑒃𑒕। 𑒮𑒧𑓂𑒧𑒱𑒪𑒱𑒞 𑒩𑒴𑒣𑒹𑒿 𑒋𑒏 𑒣𑓂𑒩𑒏𑒵𑒞𑒱𑒑𑒝 𑒏𑒯𑒻𑒞 𑒕𑒲। 𑓒.𑒅𑒞𑓂𑒞𑒩𑒰𑒩𑓂𑒔𑒱𑒏: 𑒫𑒱𑒏𑒵𑒞𑒱 𑒂 𑒅𑒞𑓂𑒞𑒩𑒑𑒝 𑒮𑒹𑒯𑒼 𑒏𑒯𑒻𑒞 𑒕𑒲। 𑒑𑓂𑒩𑒰𑒧𑒑𑒹𑒨𑒑𑒝 𑒂 𑒂𑒩𑒝𑓂𑒨𑒏𑒑𑒝𑒮𑒿 𑒧𑓀𑒞𑓂𑒩 𑒔𑒳𑒢𑒱 𑒏𑒨 𑒏𑓂𑒩𑒧𑒬𑓁 𑒅𑒯𑒑𑒝 𑒂 𑒆𑒯𑓂𑒨𑒑𑒝 𑒏𑒯𑒥𑒻𑒕- 𑒞𑒠𑒢𑓂𑒞𑒩 𑒣𑓂𑒩𑒞𑓂𑒨𑒹𑒏 𑒑𑒝 𑒠𑒬𑒩𑒰𑒞𑓂𑒩, 𑒮𑓀𑒫𑒞𑓂𑒮𑒩, 𑒋𑒏𑒯, 𑒁𑒯𑒱𑒢, 𑒣𑓂𑒩𑒰𑒨𑒬𑓂𑒔𑒱𑒞 𑒂 𑒏𑓂𑒭𑒳𑒠𑓂𑒩 𑒣𑒩𑓂𑒫𑒧𑒹 𑒥𑒰𑒿𑒙𑒪 𑒖𑒰𑒃𑒕। 𑒣𑒴𑒩𑓂𑒫𑒰𑒩𑓂𑒔𑒱𑒏 𑒧𑓀𑒞𑓂𑒩𑒏 𑒪𑒨𑒏𑒹𑒿 𑒮𑓂𑒧𑒩𑒝 𑒏’ 𑒅𑒞𑓂𑒞𑒩𑒰𑒩𑓂𑒔𑒱𑒏 𑒏𑒹𑒩 𑒠𑓂𑒫𑒱𑒏, 𑒞𑓂𑒩𑒱𑒏, 𑒂 𑒔𑒞𑒳𑒭𑓂𑒙𑒏 𑒂𑒠𑒱 (𑓒,𑓓, 𑒂 𑓔 𑒧𑓀𑒞𑓂𑒩𑒏 𑒮𑒧𑒴𑒯) 𑒧𑒹 𑒋𑒯𑒱 𑒪𑒨 𑒮𑒦𑒏 𑒣𑓂𑒩𑒨𑒼𑒑 𑒯𑒼𑒃𑒕। 𑒁𑒡𑒱𑒏𑒰𑓀𑒬 𑒞𑓂𑒩𑒱𑒏 𑒂𑒠𑒱 𑒣𑓂𑒩𑒟𑒧 𑒧𑓀𑒞𑓂𑒩 𑒣𑒴𑒩𑓂𑒫𑒰𑒩𑓂𑒔𑒱𑒏 𑒯𑒼𑒃𑒞 𑒁𑒕𑒱, 𑒖𑒏𑒩 𑒪𑒨 𑒣𑒩 𑒣𑒴𑒩𑒰 𑒮𑒴𑒏𑓂𑒞 (𑒞𑓂𑒩𑒱𑒏 𑒂𑒠𑒱) 𑒑𑒰𑒍𑒪 𑒖𑒰𑒃𑒕।
𑒅𑒞𑓂𑒞𑒩𑒰𑒩𑓂𑒔𑒱𑒏 𑒅𑒯𑒰𑒑𑒝 𑒂 𑒅𑒯𑓂𑒨𑒑𑒝 𑒣𑓂𑒩𑒞𑓂𑒨𑒹𑒏 𑒪𑒨𑒏𑒹𑒿 𑒞𑒲𑒢 𑒥𑒹𑒩 𑒞𑒲𑒢 𑒣𑓂𑒩𑒏𑒰𑒩𑒹𑒿 𑒣𑒜𑓃𑒻𑒕। 𑒫𑒻𑒠𑒱𑒏 𑒏𑒩𑓂𑒧𑒏𑒰𑒝𑓂𑒛𑒧𑒹 𑒣𑓂𑒩𑒮𑓂𑒞𑒰𑒫, 𑒣𑓂𑒩𑒮𑓂𑒞𑒼𑒞𑒩 𑒠𑓂𑒫𑒰𑒩𑒰, 𑒅𑒠𑓂𑒑𑒲𑒞 𑒅𑒠𑒑𑒰𑒞𑒩 𑒠𑓂𑒫𑒰𑒩𑒰, 𑒣𑓂𑒩𑒞𑒱𑒒𑒰𑒩 𑒣𑓂𑒩𑒞𑒱𑒯𑒰𑒞𑒩 𑒠𑓂𑒫𑒰𑒩𑒰, 𑒅𑒣𑒠𑓂𑒩𑒫 𑒣𑒳𑒢𑓁 𑒅𑒠𑒑𑒰𑒞𑒵 𑒠𑓂𑒫𑒰𑒩𑒰 𑒂 𑒢𑒱𑒡𑒰𑒢 𑒞𑒲𑒢𑒴 𑒠𑓂𑒫𑒰𑒩𑒰 𑒧𑒱𑒪𑒱 𑒏𑒨 𑒑𑒰𑒍𑒪 𑒖𑒰𑒃𑒕। 𑒣𑓂𑒩𑒮𑓂𑒞𑒰𑒫𑒏 𑒣𑒯𑒱𑒢𑒹 𑒯𑒱𑓀𑒏𑒰𑒩 (𑒯𑒱𑓀,𑒯𑒳𑓀,𑒯𑓀) 𑒞𑒲𑒢𑒴 𑒠𑓂𑒫𑒰𑒩𑒰 𑒂 𑓇 𑒅𑒠𑒑𑒰𑒞𑒵 𑒠𑓂𑒫𑒰𑒩𑒰 𑒅𑒠𑒑𑒲𑒞𑒏 𑒣𑒯𑒱𑒢𑒹 𑒑𑒰𑒍𑒪 𑒖𑒰𑒃𑒕। 𑒄 𑒣𑒰𑒿𑒔 𑒦𑒏𑓂𑒞𑓂𑒞𑒱 𑒦𑒹𑒪।
𑒯𑒰𑒟𑒏 𑒧𑒳𑒠𑓂𑒩𑒰- 𑒯𑒰𑒟𑒏 𑒧𑒳𑒠𑓂𑒩𑒰 𑓑.𑓑.𑒎𑒿𑒚𑒰(𑒣𑓂𑒩𑒟𑒧 𑒂𑒿𑒑𑒳𑒩)-𑒋𑒏 𑒨𑒫 𑒠𑒴𑒩𑒲 𑒣𑒩 𑓒.𑓒. 𑒎𑒿𑒚𑒰 𑒣𑓂𑒩𑒟𑒧 𑒂𑒿𑒑𑒳𑒩𑒏𑒹𑒿 𑒕𑒳𑒥𑒻𑒞 𑓓.𑓓. 𑒎𑒿𑒚𑒰 𑒥𑒲𑒔 𑒂𑒿𑒑𑒳𑒩𑒏𑒹𑒿 𑒕𑒳𑒥𑒻𑒞 𑓔.𑓔. 𑒎𑒿𑒚𑒰 𑒔𑒰𑒩𑒱𑒧 𑒂𑒿𑒑𑒳𑒩𑒏𑒹𑒿 𑒕𑒳𑒥𑒻𑒞 𑓕.𑓕. 𑒎𑒿𑒚𑒰 𑒣𑒰𑒿𑒔𑒧 𑒂𑒿𑒑𑒳𑒩𑒏𑒹𑒿 𑒕𑒳𑒥𑒻𑒞 𑓖.𑓑𑓑. 𑒕𑒚𑒧 𑒏𑓂𑒩𑒳𑒭𑓂𑒙 𑒎𑒿𑒚𑒰 𑒣𑓂𑒩𑒟𑒧 𑒂𑒿𑒑𑒳𑒩𑒮𑒿 𑒠𑒴 𑒨𑒫 𑒠𑒴𑒩𑒲 𑒣𑒩 𑓗.𑓖. 𑒮𑒰𑒞𑒧 𑒁𑒞𑒱𑒬𑓂𑒫𑒩 𑒮𑒰𑒧𑒫𑒹𑒠 𑓘.𑓗. 𑒁𑒦𑒱𑒑𑒲𑒞 𑒇𑒑𑓂𑒫𑒹𑒠

𑒑𑓂𑒩𑒰𑒧𑒑𑒹𑒨𑒑𑒰𑒢- 𑒑𑓂𑒩𑒰𑒧 𑒂 𑒮𑒰𑒩𑓂𑒫𑒖𑒢𑒱𑒏 𑒮𑓂𑒟𑒪 𑒣𑒩 𑒑𑒰𑒍𑒪 𑒖𑒰𑒃𑒞 𑒕𑒪। 𑒂𑒩𑒝𑓂𑒨𑒏 𑒑𑒹𑒨𑒑𑒰𑒢- 𑒫𑒢 𑒂 𑒣𑒫𑒱𑒞𑓂𑒩 𑒮𑓂𑒟𑒰𑒢𑒧𑒹 𑒑𑒰𑒍𑒪 𑒖𑒰𑒃𑒞 𑒕𑒪।
𑒆𑒯𑒑𑒰𑒢- 𑒮𑒼𑒧𑒨𑒰𑒑 𑒋𑒫𑓀 𑒫𑒱𑒬𑒹𑒭 𑒡𑒰𑒩𑓂𑒧𑒱𑒏 𑒁𑒫𑒮𑒩 𑒣𑒩। 𑒣𑒴𑒩𑓂𑒫𑒰𑒩𑓂𑒔𑒱𑒏𑒮𑒿 𑒮𑓀𑒥𑓀𑒡𑒱𑒞 𑒑𑓂𑒩𑒰𑒧𑒑𑒹𑒨𑒑𑒰𑒢 𑒋𑒯𑒱 𑒫𑒱𑒡𑒱𑒮𑒿। 𑒆𑒯𑓂𑒨𑒑𑒰𑒢 𑒂𑒏𑒱 𑒩𑒯𑒮𑓂𑒨𑒑𑒰𑒢- 𑒫𑒢 𑒂 𑒣𑒫𑒱𑒞𑓂𑒩 𑒮𑓂𑒟𑒰𑒢 𑒣𑒩 𑒑𑒰𑒍𑒪 𑒖𑒰𑒃𑒞 𑒁𑒕𑒱। 𑒣𑒴𑒩𑓂𑒫𑒰𑒩𑓂𑒔𑒱𑒏𑒏 𑒂𑒩𑒝𑓂𑒨𑒏 𑒑𑒰𑒢𑒮𑒿 𑒮𑓀𑒥𑓀𑒡। 𑒢𑒰𑒩𑒠𑒲𑒨 𑒬𑒱𑒏𑓂𑒭𑒰𑒧𑒹 𑒮𑒰𑒧𑒑𑒰𑒢𑒏 𑒮𑓀𑒥𑓀𑒡𑒧𑒹 𑒢𑒱𑒩𑓂𑒠𑒹𑒬:- 𑓑.𑒮𑓂𑒫𑒩-𑓗 𑒑𑓂𑒩𑒰𑒧-𑓓 𑒧𑒴𑒩𑓂𑒕𑒢𑒰-𑓒𑓑 𑒞𑒰𑒢-𑓔𑓙
𑒮𑒰𑒞 𑒙𑒰 𑒮𑓂𑒫𑒩 𑒮𑒰,𑒩𑒹,𑒑,𑒧,𑒣,𑒡,𑒢𑒱, 𑒂 𑒞𑒲𑒢 𑒙𑒰 𑒑𑓂𑒩𑒰𑒧-𑒧𑒡𑓂𑒨,𑒧𑒢𑓂𑒠,𑒞𑒲𑒫𑓂𑒩। 𑓗*𑓓=𑓒𑓑 𑒧𑒴𑒩𑓂𑒕𑒢𑒰। 𑒮𑒰𑒞 𑒮𑓂𑒫𑒩𑒏 𑒣𑒩𑒮𑓂𑒣𑒩 𑒧𑒱𑒬𑓂𑒩𑒝 𑓗*𑓗=𑓔𑓙 𑒞𑒰𑒢।
𑒇𑒑𑒫𑒹𑒠𑒏 𑒣𑓂𑒩𑒞𑓂𑒨𑒹𑒏 𑒧𑓀𑒞𑓂𑒩 𑒑𑒾𑒞𑒧𑒏 𑓒 𑒮𑒰𑒧𑒑𑒰𑒢 (𑒣𑒩𑓂𑒏𑒏) 𑒂 𑒏𑒰𑒬𑓂𑒨𑒣𑒏 𑓑 𑒮𑒰𑒧𑒑𑒰𑒢 (𑒣𑒩𑓂𑒏𑒏) 𑒏𑒰𑒩𑒝 𑒞𑒲𑒢 𑒧𑓀𑒞𑓂𑒩𑒏 𑒥𑒩𑒰𑒥𑒩 𑒦𑓄 𑒖𑒰𑒃𑒞 𑒁𑒕𑒱। 𑒧𑒻𑒏𑒛𑒰𑒫𑒹𑒪 𑒃𑒢𑓂𑒠𑓂𑒩𑒰𑒑𑓂𑒢𑒱, 𑒧𑒱𑒞𑓂𑒩𑒰𑒫𑒩𑒳𑒝𑒾, 𑒃𑒢𑓂𑒠𑓂𑒩𑒰𑒫𑒱𑒭𑓂𑒝𑒳, 𑒁𑒑𑓂𑒢𑒱𑒭𑒼𑒧𑒾 𑒋𑒯𑒱 𑒮𑒦𑒏𑒹𑒿 𑒨𑒳𑒑𑒪𑒠𑒹𑒫𑒞𑒰 𑒧𑒰𑒢𑒪𑒢𑓂𑒯𑒱 𑒁𑒕𑒱। 𑒧𑒳𑒠𑒰 𑒨𑒳𑒑𑒪𑒠𑒹𑒫 𑒁𑒕𑒱 –𑒫𑒱𑒬𑒹𑒭𑒝-𑒫𑒱𑒣𑒩𑓂𑒨𑒨।
𑒫𑒹𑒠𑒣𑒰𑒚-
𑓑. 𑒮𑓀𑒯𑒱𑒞𑒰 𑒣𑒰𑒚 𑒁𑒕𑒱 𑒬𑒳𑒠𑓂𑒡 𑒩𑒴𑒣𑒧𑒹 𑒣𑒰𑒚।
𑒁↓𑒑𑓂𑒢𑒱𑒧𑒲↑𑒝𑓃𑒹 𑒣𑒳𑒩𑒼𑒯𑒱↑𑒞 𑒨↓𑒒𑓂𑒨𑒮𑓂𑒨↑𑒠𑒹↓𑒫𑒧𑓂𑒞𑓂𑒫𑒱𑒖↑𑒧।𑒯𑒼𑒞𑒰𑒩↑𑒩𑒞𑓂𑒢↓ 𑒡𑒰𑒞𑒧𑒧𑓂।
𑓒. 𑒣𑒠 𑒣𑒰𑒚- 𑒋𑒯𑒱𑒧𑒹 𑒣𑓂𑒩𑒞𑓂𑒨𑒹𑒏 𑒣𑒠𑒏𑒹𑓀 𑒣𑒵𑒟𑒏 𑒏𑒋 𑒣𑒜𑓃𑒪 𑒖𑒰𑒃𑒞 𑒁𑒕𑒱।
𑓓. 𑒏𑓂𑒩𑒧𑒣𑒰𑒚- 𑒋𑒞𑒨 𑒋𑒏𑒏 𑒥𑒰𑒠 𑒠𑒼𑒮𑒩, 𑒤𑒹𑒩 𑒠𑒼𑒮𑒩 𑒞𑒐𑒢 𑒞𑒹𑒮𑒩, 𑒤𑒹𑒩 𑒞𑒹𑒮𑒩 𑒞𑒐𑒢 𑒔𑒞𑒳𑒩𑓂𑒟। 𑒋𑒢𑒰 𑒏𑒋 𑒣𑒰𑒚 𑒏𑒋𑒪 𑒖𑒰𑒃𑒞 𑒁𑒕𑒱।
𑓔. 𑒖𑒙𑒰𑒣𑒰𑒚- 𑒋𑒯𑒱𑒧𑒹 𑒖𑓂𑒨𑒼𑒿 𑒞𑒲𑒢 𑒙𑒰 𑒣𑒠 𑒏, 𑒐, 𑒂 𑒑 𑒁𑒕𑒱 𑒞𑒐𑒢 𑒣𑒜𑓃𑒥𑒰𑒏 𑒏𑓂𑒩𑒧 𑒋𑒯𑒱 𑒩𑒴𑒣𑒧𑒹 𑒯𑒼𑒋𑒞। 𑒏𑒐, 𑒐𑒏, 𑒏𑒐, 𑒐𑒑, 𑒑𑒐, 𑒐𑒑। 𑓕. 𑒒𑒢𑒣𑒰𑒚-𑒋𑒯𑒱 𑒧𑒹 𑒆𑒣𑒩𑒏𑒰 𑒅𑒠𑒰𑒯𑒩𑒝𑒏 𑒁𑒢𑒳𑒮𑒰𑒩 𑒢𑒱𑒧𑓂𑒢 𑒩𑒴𑒣 𑒯𑒼𑒨𑒞- 𑒏𑒐,𑒐𑒏,𑒏𑒐𑒑,𑒑𑒐𑒏,𑒏𑒐𑒑। 𑓖. 𑒧𑒰𑒪𑒰, 𑓗. 𑒬𑒱𑒐𑒰, 𑓘. 𑒩𑒹𑒐𑒰, 𑓙. 𑒡𑓂𑒫𑒖, 𑓑𑓐. 𑒠𑒝𑓂𑒛, 𑓑𑓑. 𑒩𑒟। 𑒁𑓀𑒞𑒱𑒧 𑒂𑒚𑒏𑒹𑒿 𑒁𑒭𑓂𑒙𑒫𑒱𑒏𑒵𑒞𑒱 𑒏𑒯𑒪 𑒖𑒰𑒃𑒞 𑒁𑒕𑒱।
𑒮𑒰𑒧 𑒫𑒱𑒏𑒰𑒩 𑒮𑒹𑒯𑒼 𑓖 𑒙𑒰 𑒁𑒕𑒱, 𑒖𑒹 𑒑𑒰𑒢𑒏𑒹𑒿 𑒡𑓂𑒨𑒰𑒢𑒧𑒹 𑒩𑒐𑒻𑒞 𑒒𑒙𑒰𑒍𑒪, 𑒥𑒜𑓃𑒰𑒍𑒪 𑒖𑒰 𑒮𑒏𑒻𑒞 𑒁𑒕𑒱। 𑓑. 𑒫𑒱𑒏𑒰𑒩-𑒁𑒑𑓂𑒢𑒹𑒏𑒹𑒿 𑒍𑒑𑓂𑒢𑒰𑒨। 𑓒. 𑒫𑒱𑒬𑓂𑒪𑒹𑒭𑒝- 𑒬𑒥𑓂𑒠/𑒣𑒠𑒏𑒹𑒿 𑒞𑒼𑒛𑓃𑒢𑒰𑒃 𑓓. 𑒫𑒱𑒏𑒩𑓂𑒭𑒝-𑒮𑓂𑒫𑒩𑒏𑒹𑒿 𑒐𑒱𑓀𑒔𑒢𑒰𑒄/𑒁𑒡𑒱𑒏 𑒧𑒰𑒞𑓂𑒩𑒰𑒏 𑒥𑒛𑓃𑒰𑒥𑒩 𑒥𑒖𑒹𑒢𑒰𑒃। 𑓔. 𑒁𑒦𑓂𑒨𑒰𑒮- 𑒥𑒹𑒩-𑒥𑒹𑒩 𑒥𑒖𑒢𑒰𑒃।𑓕. 𑒫𑒱𑒩𑒰𑒧- 𑒬𑒥𑓂𑒠𑒏𑒹𑒿 𑒞𑒼𑒛𑓃𑒱 𑒏𑒨 𑒣𑒠𑒏 𑒧𑒡𑓂𑒨𑒧𑒹 ‘𑒨𑒞𑒱’। 𑓖. 𑒮𑓂𑒞𑒼𑒦-𑒂𑒪𑒰𑒣 𑒨𑒼𑒑𑓂𑒨 𑒣𑒠𑒏𑒹𑒿 𑒖𑒼𑒛𑓃𑒱 𑒪𑒹𑒥। 𑒏𑒾𑒟𑒳𑒧𑒲𑒨 𑒬𑒰𑒐𑒰 ‘𑒯𑒰𑒅’ ‘𑒩𑒰𑒃’ 𑒖𑒼𑒛𑓃𑒻𑒞 𑒕𑒟𑒱। 𑒩𑒰𑒝𑒰𑒢𑒲𑒨 𑒬𑒰𑒐𑒰 ‘𑒯𑒰𑒫𑒳’, ‘𑒩𑒰𑒨𑒱’ 𑒖𑒼𑒛𑓃𑒻𑒞 𑒕𑒟𑒱।
𑒧𑒰𑒞𑓂𑒩𑒱𑒏 𑒕𑒢𑓂𑒠𑒏 𑒣𑓂𑒩𑒨𑒼𑒑 𑒫𑒹𑒠𑒧𑒹 𑒢𑒯𑒱 𑒁𑒕𑒱 𑒫𑒩𑒢𑓂 𑒫𑒩𑓂𑒝𑒫𑒵𑒞𑓂𑒞𑒏 𑒣𑓂𑒩𑒨𑒼𑒑 𑒁𑒕𑒱 𑒂 𑒑𑒝𑒢𑒰 𑒣𑒰𑒠 𑒫𑒰 𑒔𑒩𑒝𑒏 𑒁𑒢𑒳𑒮𑒰𑒩 𑒯𑒼𑒃𑒞 𑒩𑒯𑒋। 𑒧𑒳𑒐𑓂𑒨 𑒕𑒢𑓂𑒠 𑒑𑒰𑒨𑒞𑓂𑒩𑒲, 𑒋𑒏𑒩 𑒣𑓂𑒩𑒨𑒼𑒑 𑒫𑒹𑒠𑒧𑒹 𑒮𑒦𑒮𑒿 𑒥𑒹𑒬𑒲 𑒁𑒕𑒱। 𑒞𑒏𑒩 𑒥𑒰𑒠 𑒞𑓂𑒩𑒱𑒭𑓂𑒙𑒳𑒣 𑒂 𑒖𑒑𑒞𑒲𑒏 𑒣𑓂𑒩𑒨𑒼𑒑 𑒁𑒕𑒱।
𑓑. 𑒑𑒰𑒨𑒞𑓂𑒩𑒲- 𑓘-𑓘 𑒏𑒹𑒩 𑒞𑒲𑒢 𑒣𑒰𑒠। 𑒠𑒼𑒮𑒩 𑒣𑒰𑒠𑒏 𑒥𑒰𑒠 𑒫𑒱𑒩𑒰𑒧। 𑒫𑒰 𑒋𑒏 𑒣𑒠𑒧𑒹 𑒕𑒯 𑒙𑒰 𑒁𑒏𑓂𑒭𑒩।
𑓒. 𑒞𑓂𑒩𑒱𑒭𑓂𑒙𑒳𑒣- 𑓑𑓑-𑓑𑓑 𑒏𑒹𑒩 𑓔 𑒣𑒰𑒠।
𑓓. 𑒖𑒑𑒞𑒲- 𑓑𑓒-𑓑𑓒 𑒏𑒹𑒩 𑓔 𑒣𑒰𑒠।
𑓔. 𑒅𑒭𑓂𑒝𑒱𑒏- 𑓘-𑓘 𑒏𑒹𑒩 𑒠𑒴 𑒞𑒏𑒩 𑒥𑒰𑒠 𑓑𑓒 𑒫𑒩𑓂𑒝-𑒮𑓀𑒐𑓂𑒨𑒰𑒏 𑒣𑒰𑒠।
𑓕. 𑒁𑒢𑒳𑒭𑓂𑒙𑒳𑒣- 𑓘-𑓘 𑒏𑒹𑒩 𑒔𑒰𑒩𑒱 𑒣𑒰𑒠। 𑒋𑒏𑒩 𑒣𑓂𑒩𑒨𑒼𑒑 𑒫𑒹𑒠𑒏 𑒁𑒣𑒹𑒏𑓂𑒭𑒰 𑒮𑓀𑒮𑓂𑒏𑒵𑒞 𑒮𑒰𑒯𑒱𑒞𑓂𑒨𑒧𑒹 𑒥𑒹𑒬𑒲 𑒁𑒕𑒱।
𑓖. 𑒥𑒵𑒯𑒞𑒲- 𑓘-𑓘 𑒏𑒹𑒩 𑒠𑒴 𑒂 𑒞𑒏𑒩𑒰 𑒥𑒰𑒠 𑓑𑓒 𑒂 𑓘 𑒧𑒰𑒞𑓂𑒩𑒰𑒏 𑒠𑒴 𑒣𑒰𑒠।
𑓗. 𑒣𑓀𑒏𑓂𑒞𑓂𑒞𑒱- 𑓘-𑓘 𑒏𑒹𑒩 𑒣𑒰𑒿𑒔। 𑒣𑓂𑒩𑒟𑒧 𑒠𑒴 𑒣𑒠𑒏 𑒥𑒰𑒠 𑒫𑒱𑒩𑒰𑒧 𑒁𑒥𑒻𑒕।
𑒨𑒠𑒱 𑒁𑒏𑓂𑒭𑒩 𑒣𑒴𑒩𑒰 𑒢𑒯𑒱 𑒯𑒼𑒃𑒞 𑒁𑒕𑒱, 𑒞𑒿 𑒋𑒏 𑒫𑒰 𑒠𑒴 𑒁𑒏𑓂𑒭𑒩 𑒢𑒱𑒧𑓂𑒢 𑒣𑓂𑒩𑒏𑒰𑒩𑒹𑒿 𑒒𑒙𑒰-𑒥𑒜𑓃𑒰 𑒪𑒹𑒪 𑒖𑒰𑒃𑒞 𑒁𑒕𑒱।
(𑒁) 𑒫𑒩𑒹𑒝𑓂𑒨𑒧𑓂 𑒏𑒹𑒿 𑒫𑒩𑒹𑒝𑒱𑒨𑒧𑓂 𑒮𑓂𑒫𑓁 𑒏𑒹𑒿 𑒮𑒳𑒫𑓁।
(𑒂) 𑒑𑒳𑒝 𑒂 𑒫𑒵𑒠𑓂𑒡𑒱 𑒮𑒢𑓂𑒡𑒱𑒏𑒹𑒿 𑒁𑒪𑒑 𑒏𑒋 𑒪𑒹𑒪 𑒖𑒰𑒃𑒞 𑒁𑒕𑒱।
𑒋= 𑒁 + 𑒃
𑒍= 𑒁 + 𑒅
𑒌= 𑒁/𑒂 + 𑒋
𑒎= 𑒁/𑒂 + 𑒍
𑒁𑒯𑒴 𑒣𑓂𑒩𑒏𑒰𑒩𑒹𑒿 𑒢𑒯𑒱 𑒣𑒳𑒩𑒪𑒰𑒣𑒩 𑒁𑒢𑓂𑒨 𑒫𑒱𑒩𑒰𑒛𑒰𑒠𑒱 𑒢𑒰𑒧𑒮𑒿 𑒋𑒏𑒩 𑒢𑒰𑒧𑒏𑒩𑒝 𑒯𑒼𑒃𑒞 𑒁𑒕𑒱।
𑒨𑒟𑒰- 𑒑𑒰𑒨𑒞𑓂𑒩𑒲 (𑓒𑓔)- 𑒫𑒱𑒩𑒰𑒙𑓂 (𑓒𑓒), 𑒢𑒱𑒔𑒵𑒞𑓂 (𑓒𑓓), 𑒬𑒳𑒠𑓂𑒡𑒰 (𑓒𑓔), 𑒦𑒳𑒩𑒱𑒏𑓂 (𑓒𑓕), 𑒮𑓂𑒫𑒩𑒰𑒙𑓂(𑓒𑓖)।
𑓇 𑒦𑒴𑒩𑓂𑒦𑒳𑒫𑒮𑓂𑒫𑓁 । 𑒞𑒞𑓂 𑒮𑒫𑒱𑒞𑒳𑒩𑓂𑒫𑒩𑒹𑒝𑓂𑒨𑓀। 𑒦𑒩𑓂𑒑𑒼 𑒠𑒹𑒫𑒮𑓂𑒨 𑒡𑒲𑒧𑒯𑒱 । 𑒡𑒱𑒨𑒼 𑒨𑒼 𑒢𑓁 𑒣𑓂𑒩𑒔𑒼𑒠𑒨𑒰𑒞𑓂 ।
𑒫𑒻𑒠𑒱𑒏 𑒇𑒭𑒱 𑒮𑓂𑒫𑒨𑓀𑒏𑒹𑒿 𑒂 𑒠𑒹𑒫𑒞𑒰𑒏𑒹𑒿 𑒮𑒹𑒯𑒼 𑒏𑒫𑒱 𑒏𑒯𑒻𑒞 𑒕𑒟𑒱। 𑒮𑒧𑓂𑒣𑒴𑒩𑓂𑒝 𑒫𑒻𑒠𑒱𑒏 𑒮𑒰𑒯𑒱𑒞𑓂𑒨 𑒋𑒯𑒱 𑒏𑒫𑒱 𑒔𑒹𑒞𑒢𑒰𑒏 𑒫𑒰𑒓𑓂𑒧𑒨 𑒧𑒴𑒩𑓂𑒞𑓂𑒞𑒱 𑒁𑒕𑒱। 𑒍𑒞𑒋 𑒂𑒡𑓂𑒨𑒰𑒞𑓂𑒧 𑒔𑒹𑒞𑒢𑒰, 𑒁𑒡𑒱𑒠𑒻𑒫𑒞𑓂𑒫𑒧𑒹 𑒅𑒞𑓂𑒞𑒲𑒩𑓂𑒝 𑒦𑒹𑒪 𑒁𑒕𑒱, 𑒋𑒫𑒧𑓂 𑒍𑒏𑒩𑒰 𑒂𑒡𑒱𑒦𑒾𑒞𑒱𑒏 𑒦𑒰𑒭𑒰𑒧𑒹 𑒩𑒴𑒣 𑒠𑒹𑒪 𑒑𑒹𑒪 𑒁𑒕𑒱।
𑒂𑒥 𑒖𑓂𑒨𑒼𑒞𑒱𑒩𑒲𑒬𑓂𑒫𑒩/ 𑒫𑒱𑒠𑓂𑒨𑒰𑒣𑒞𑒱/ 𑒔𑒞𑒳𑒩 𑒔𑒞𑒳𑒩𑒦𑒳𑒖/ 𑒥𑒠𑓂𑒩𑒲𑒢𑒰𑒟 𑒗𑒰 𑒬𑒥𑓂𑒠𑒰𑒫𑒪𑒲𑒮𑒿 𑒁𑒯𑒰𑒿𑒏 𑒣𑒩𑒱𑒔𑒨 𑒏𑒩𑒥𑒰 𑒩𑒯𑒪 𑒕𑒲, 𑒖𑒰𑒯𑒱𑒮𑒿 𑒁𑒯𑒰𑒿𑒏 𑒪𑒹𑒐𑒢-𑒏𑒾𑒬𑒪𑒧𑒹 𑒫𑒵𑒠𑓂𑒡𑒱 𑒯𑒼𑒋𑒞।
𑓑. 𑒏𑒫𑒱𑒬𑒹𑒐𑒩 𑒖𑓂𑒨𑒼𑒞𑒱𑒩𑒲𑒬𑓂𑒫𑒩 𑒬𑒥𑓂𑒠𑒰𑒫𑒪𑒲
𑒑𑒼𑒝𑓂𑒚𑒱 - 𑒧𑒪𑒰𑒯
𑒏𑒥𑒰𑒩 - 𑒞𑒩𑒏𑒰𑒩𑒲 𑒥𑒹𑒔𑒢𑒱𑒯𑒰𑒩
𑒣𑒙𑒢𑒱𑒂 - 𑒧𑒪𑒰𑒯
𑒪𑒥𑒰𑒪 - 𑒪𑒥𑒩𑒰
𑒪𑒾𑒖𑒱𑒯 - 𑒪𑒪𑒔𑒰𑒃𑒞 𑒖𑒲𑒯 𑒥𑒪𑒰
𑒣𑒹𑒙𑒏𑒙 - 𑒖𑒏𑒩 𑒣𑒹𑒙 𑒏𑒰𑒙𑒪 𑒕𑒻/ 𑒁𑒢𑒏𑒩 𑒣𑒹𑒙 𑒏𑒙𑒻𑒞 𑒁𑒕𑒱।
𑒢𑒰𑒏𑒙 - 𑒢𑒏𑒏𑒙𑓂𑒙𑒰
𑒥𑒋𑒩 - 𑒥𑒠𑒩𑒲𑒤𑒪
𑒥𑒰𑒥𑒳𑒩 - 𑒥𑒥𑒴𑒩
𑒐𑒳𑒮𑒰 - 𑒬𑒳𑒭𑓂𑒏
𑒔𑒳𑒮𑒰 - 𑒔𑒼𑒭𑓂𑒨
𑒤𑒩𑒳𑒯𑒲 - 𑒧𑒳𑒩𑒯𑒲/ 𑒪𑒰𑒥𑒰
𑒏𑒩𑒯𑒩 - 𑒏𑒳𑒧𑒳𑒠𑒏 𑒏𑒢𑓂𑒠
𑒧𑒪𑒻𑒔𑒰 - 𑒧𑒹𑒩𑒔𑒰𑒃
𑒮𑒰𑒩𑒳𑒏 - 𑒦𑒹𑒿𑒙𑒰 (𑒬𑓂𑒫𑒹𑒞 𑒏𑒳𑒧𑒳𑒠𑒏) 𑒏𑒢𑓂𑒠
𑒥𑒼𑒥𑒪𑒱 - 𑒒𑒹𑒔𑒳𑒪𑒱 –𑒐𑒰𑒠𑓂𑒨 𑒏𑒢𑓂𑒠
𑒥𑒰𑒿𑒮𑒲 - 𑒫𑓀𑒬𑒲
𑒯𑒳𑒪𑒳𑒏 - 𑒯𑒳𑒛𑒳𑒏𑓂𑒏𑒰 (𑒫𑒰𑒠𑓂𑒨 𑒨𑓀𑒞𑓂𑒩)
𑒖𑒼𑒯𑒰𑒩𑒱 - 𑒣𑓂𑒩𑒝𑒰𑒧
𑒞𑒼𑒩𑒯 - 𑒞𑒾𑒪𑒯
𑒥𑒩𑒰𑒥𑒯 - 𑒤𑒳𑒙𑒰 𑒏𑒋 𑒩𑒰𑒐𑒯
𑒐𑒳𑒙𑒲 - 𑒧𑒯𑒱𑒪𑒰 𑒠𑓂𑒫𑒰𑒩𑒰 𑒏𑒰𑒢𑒏 𑒆𑒩𑓂𑒡𑓂𑒫𑒦𑒰𑒑𑒧𑒹 𑒣𑒯𑒱𑒩𑒋 𑒖𑒰𑒨𑒥𑒪𑒰
𑒐𑒳𑒙𑓂𑒙𑒲
𑒮𑒱𑒓𑓂𑒏𑒪𑒲 - 𑒮𑒱𑒏𑒛𑓃𑒲
𑒔𑒳𑒪𑒱 - 𑒔𑒴𑒛𑓃𑒲
𑒞𑓂𑒩𑒱𑒏𑒰 - 𑒧𑒰𑒿𑒑 𑒙𑒲𑒏𑒰
𑒐𑒘𑓂𑒖𑒩𑒲𑒙 - 𑒐𑓀𑒖𑒢 𑒣𑒏𑓂𑒭𑒲
𑒮𑒰𑒿𑒏𑒩 - 𑒔𑒲𑒢𑒲, 𑒪𑒰𑒪𑒕𑒛𑓃𑒲
𑒥𑒱𑒩𑒢𑒲 - 𑒫𑒹𑒝𑒲, 𑒖𑒳𑒙𑓂𑒙𑒲
𑒏𑒧𑓂𑒥𑒳 - 𑒬𑓀𑒐
𑒣𑒘𑒳 - 𑒣𑒠𑓂𑒧
𑒩𑒰𑒅𑒞 - 𑒮𑒻𑒢𑒱𑒏 𑒣𑒠𑒰𑒡𑒱𑒏𑒰𑒩𑒲
𑒩𑒰𑒖𑒬𑒱𑒭𑓂𑒙 - 𑒩𑒰𑒖𑒰𑒏 𑒠𑒩𑒥𑒰𑒩𑒲
𑒣𑒳𑒩𑒣𑒞𑒱 - 𑒢𑒑𑒩𑒏 𑒧𑒳𑒐𑓂𑒨
𑒮𑒰𑒡𑒱 - 𑒮𑒹𑒚
𑒑𑒢𑓂𑒡𑒫𑒝𑒱𑒏 - 𑒏𑒮𑓂𑒞𑒴𑒩𑒲 𑒂𑒠𑒱 𑒮𑒳𑒑𑒢𑓂𑒡𑒲 𑒥𑒹𑒔𑒢𑒱𑒯𑒰𑒩
𑒥𑒹𑒪𑒫𑒰𑒩 - 𑒮𑒲𑒧𑒰𑒩𑒏𑓂𑒭𑒏
𑒩𑒰𑒖𑒣𑒳𑒞𑓂𑒩 - 𑒋𑒏𑒙𑒰 𑒣𑒠𑒰𑒡𑒱𑒏𑒰𑒩𑒲
𑒠𑓂𑒫𑒰𑒩𑒱𑒏 - 𑒩𑒰𑒖𑒠𑒩𑒥𑒰𑒩𑒧𑒹 𑒣𑓂𑒩𑒫𑒹𑒬𑒏 𑒁𑒢𑒳𑒖𑓂𑒘𑒰 𑒠𑒹𑒢𑒱𑒯𑒰𑒩
𑒣𑒢𑒱𑒯𑒰𑒩 - 𑒠𑓂𑒫𑒰𑒩𑒣𑒰𑒪
𑒁𑒑𑒯𑒩𑒰 - 𑒁𑒑𑓂𑒩𑒯𑒰𑒩 𑒣𑒰𑒥𑒱 𑒏𑒰𑒖 𑒏𑒋𑒢𑒱𑒯𑒰𑒩
𑒩𑒾𑒞𑒣𑒞𑒱/ 𑒩𑒰𑒖𑒣𑒳𑒞𑓂𑒩𑒣𑒞𑒱 - 𑒩𑒾𑒞 𑒮𑒦𑒏 𑒣𑓂𑒩𑒡𑒰𑒢
𑒮𑒢𑓂𑒡𑒱𑒫𑒱𑒑𑓂𑒩𑒯𑒱𑒏 - 𑒫𑒱𑒠𑒹𑒬𑒧𑓀𑒞𑓂𑒩𑒲
𑒧𑒯𑒰𑒧𑒯𑒞𑓂𑒞𑒏 - 𑒣𑓂𑒩𑒞𑒱𑒩𑒏𑓂𑒭𑒰𑒧𑓀𑒞𑓂𑒩𑒲
𑒣𑓂𑒩𑒞𑒱𑒥𑒪𑒏𑒩𑒝𑒰𑒡𑓂𑒨𑒏𑓂𑒭 - 𑒬𑒞𑓂𑒩𑒳𑒮𑒹𑒢𑒰𑒏 𑒖𑒰𑒮𑒴𑒮𑒲𑒏 𑒫𑒱𑒦𑒰𑒑
𑒮𑓂𑒟𑒰𑒢𑒰𑒢𑓂𑒞𑒩𑒱𑒏 - 𑒩𑒰𑒖𑒰𑒏 𑒣𑒩𑓂𑒨𑒙𑒢𑒏 𑒫𑓂𑒨𑒫𑒮𑓂𑒟𑒰 𑒏𑒹𑒢𑒱𑒯𑒰𑒩 𑒁𑒡𑒱𑒏𑒰𑒩𑒲
𑒢𑒻𑒥𑒢𑓂𑒡𑒱𑒏 - 𑒠𑒮𑓂𑒞𑒰𑒫𑒹𑒖 𑒪𑒱𑒐𑒢𑒱𑒯𑒰𑒩
𑒫𑒰𑒩𑓂𑒞𑒱𑒏 - 𑒑𑒳𑒣𑓂𑒞𑒫𑒰𑒩𑓂𑒞𑒰 𑒮𑓀𑒑𑓂𑒩𑒰𑒯𑒏, 𑒫𑒰𑒩𑓂𑒞𑒱𑒏 𑒂 𑒧𑒯𑒰𑒫𑒰𑒩𑓂𑒞𑒱𑒏 𑒣𑒘𑓂𑒖𑒲𑒧𑒹
𑒅𑒔𑓂𑒔 𑒣𑒠𑒫𑒲
𑒂𑒏𑓂𑒭𑒣𑒙𑒪𑒱𑒏 - 𑒠𑓂𑒨𑒳𑒞𑒑𑒵𑒯𑒏 𑒁𑒡𑒱𑒏𑒰𑒩𑒲
𑒐𑒛𑓂𑒑𑒑𑓂𑒩𑒰𑒯 - 𑒯𑒰𑒟𑒧𑒹 𑒐𑒛𑓂𑒑 𑒪𑒹𑒢𑒹 𑒩𑒰𑒖𑒰𑒏 𑒩𑒏𑓂𑒭𑒏- 𑒐𑒩𑓂𑒑𑒰
𑒣𑓂𑒩𑒧𑒞𑓂𑒞𑓂𑒫𑒰𑒩 - 𑒥𑒞𑒰𑒯𑒹𑒏𑒹𑒿 𑒩𑒼𑒏𑒋𑒥𑒪𑒰 𑒁𑒡𑒱𑒏𑒰𑒩𑒲
𑒥𑒱𑒬𑓂𑒫𑒰𑒮 - 𑒩𑒰𑒖𑒰𑒏 𑒁𑓀𑒞𑒩𑓀𑒑 𑒮𑒯𑒰𑒨𑒏
𑒁𑒑𑓂𑒩𑒖𑒰𑒝𑒱𑒏 - 𑒩𑒰𑒖𑒰𑒏 𑒣𑓂𑒩𑒨𑒰𑒝𑒧𑒹 𑒂𑒑𑒰-𑒂𑒑𑒰 𑒔𑒪𑒢𑒱𑒯𑒰𑒩 𑒮𑒳𑒩𑒏𑓂𑒭𑒰-𑒠𑒪
𑒑𑒴𑒜𑓃 𑒣𑒳𑒩𑒳𑒭 - 𑒑𑒳𑒣𑓂𑒞𑒔𑒩
𑒣𑓂𑒩𑒝𑒱𑒡𑒱 - 𑒑𑒳𑒣𑓂𑒞𑒔𑒩
𑒫𑒰𑒩𑓂𑒞𑒱𑒏 - 𑒑𑒳𑒣𑓂𑒞𑒔𑒩
𑒮𑒴𑒣𑒏𑒰𑒩 - 𑒦𑒢𑒮𑒲𑒨𑒰
𑒮𑒴𑒣𑒏𑒰𑒩𑒣𑒞𑒱 - 𑒦𑒢𑒮𑒱𑒨𑒰-𑒣𑓂𑒩𑒡𑒰𑒢
𑒮𑒧𑓂𑒥𑒰𑒯𑒏 - 𑒦𑒢𑒮𑒱𑒨𑒰𑒏 𑒣𑒩𑒱𑒔𑒰𑒩𑒏
𑒥𑒪𑒱𑒭𑓂𑒚 - 𑒬𑒰𑒩𑒲𑒩𑒱𑒏 𑒥𑒪𑒥𑒪𑒰 𑒁𑓀𑒑𑒩𑒏𑓂𑒭𑒏, 𑒥𑒻𑒚𑒰
𑒬𑓂𑒩𑒼𑒞𑓂𑒩𑒱𑒨 - 𑒫𑒻𑒠𑒱𑒏
𑒂𑒡𑓂𑒨𑒰𑒨𑒱𑒏 - 𑒁𑒡𑓂𑒨𑒹𑒞𑒰
𑒧𑒾𑒯𑒴𑒩𑓂𑒞𑒱𑒏 - 𑒖𑓂𑒨𑒼𑒞𑒱𑒭𑒲
𑒂𑒧𑓂𑒢𑒰𑒨𑒱𑒏 - 𑒫𑒻𑒠𑒱𑒏 𑒫𑒰 𑒞𑒰𑒢𑓂𑒞𑓂𑒩𑒱𑒏, 𑒨𑒳𑒠𑓂𑒡𑒫𑒱𑒭𑒨𑒏 𑒣𑒩𑒰𑒧𑒩𑓂𑒬𑒠𑒰𑒞𑒰
𑒔𑒴𑒛𑓃𑒰𑒧𑒝𑒱 - 𑒦𑒫𑒱𑒭𑓂𑒨𑒏𑒟𑒢𑒬𑒰𑒮𑓂𑒞𑓂𑒩
𑒣𑒿𑒔𑒩𑒳𑒐𑒲 𑒏𑒰𑒿𑒔 - 𑒣𑓂𑒩𑒱𑒖𑓂𑒧
𑒧𑒯𑒟 - 𑒅𑒔𑓂𑒔 𑒏𑒼𑒙𑒱𑒏 𑒮𑒻𑒢𑒱𑒏 𑒣𑒠, 𑒧𑒯𑒟𑒰/ 𑒧𑒹𑒯𑒞𑒰/ 𑒧𑒯𑒞𑒼
𑒧𑒳𑒠𑒯𑒟 - 𑒖𑒱𑒢𑒏𑒰 𑒯𑒰𑒟𑒧𑒹 𑒩𑒰𑒖𑒰𑒏 𑒧𑒼𑒯𑒩 𑒩𑒯𑒻𑒞 𑒕𑒪
𑒧𑒯𑒮𑒰𑒯𑒢𑒱 - 𑒂𑒣𑒴𑒩𑓂𑒞𑒱 𑒁𑒡𑒱𑒏𑒰𑒩𑒲
𑒧𑒯𑒮𑒳𑒂𑒩 - 𑒣𑓂𑒩𑒡𑒰𑒢 𑒦𑒢𑒮𑒱𑒂
𑒧𑒯𑒪 - 𑒧𑒯𑒩, 𑒮𑒧𑒵𑒠𑓂𑒡 𑒑𑒼𑒣𑒰𑒪, 𑒖𑒹𑒢𑒰 𑒢𑒢𑓂𑒠 𑒧𑒯𑒩
𑒮𑒹𑒖𑒫𑒰𑒩 - 𑒮𑒨𑓂𑒨𑒰𑒣𑒰𑒪
𑒣𑒢𑒯𑒩𑒱 - 𑒞𑒰𑒧𑓂𑒥𑒴𑒪𑒫𑒰𑒯
𑒩𑒰𑒖𑒫𑒪𑓂𑒪𑓂𑒦 - 𑒠𑒩𑒥𑒰𑒩𑒲
𑒦𑒝𑓂𑒛𑒰𑒩𑒲 - 𑒦𑒰𑒝𑓂𑒛𑒰𑒑𑒰𑒩𑒱𑒏
𑒏𑒪𑒥𑒰𑒩 - 𑒫𑒝𑒱𑒏
𑒔𑒼𑒩𑒑𑒰𑒯𑒰 - 𑒔𑒰𑒿𑒫𑒩 𑒯𑒼𑒏𑒢𑒱𑒯𑒰𑒩
𑒮𑒳𑒐𑒰𑒮𑒢 - 𑒂𑒩𑒰𑒧𑒏𑒳𑒩𑓂𑒮𑒲
𑒔𑒾𑒣𑒰𑒛𑓃𑒱 - 𑒥𑒯𑒩𑒒𑒩, 𑒠𑒪𑒰𑒢, 𑒣𑒰𑒚𑒬𑒰𑒪𑒰
𑒁𑒿𑒔𑒩𑒰 - 𑒑𑒧𑒕𑒰
𑒮𑒧𑒩𑒯𑒩 - 𑒁𑓀𑒑𑒧𑒩𑓂𑒠𑒢
𑒫𑒱𑒠𑒰𑒢 - 𑒫𑓂𑒨𑒰𑒨𑒰𑒧-𑓓𑓖 𑒣𑓂𑒩𑒏𑒰𑒩𑒏
𑒞𑒧𑒰𑒩𑒳 - 𑒞𑒰𑒧𑒰𑒏 𑒪𑒼𑒙𑒰
𑒣𑒢𑒱𑒑𑒯 - 𑒣𑒰𑒢𑒱 𑒤𑒹𑒏𑒥𑒰𑒏 𑒣𑒰𑒞𑓂𑒩
𑒞𑒧𑒏𑒳𑒝𑓂𑒛 - 𑒞𑒰𑒧𑒰𑒏 𑒑𑒿𑒯𑒲𑒩 𑒁𑒜𑓃𑒱𑒨𑒰
𑒁𑒣𑓂𑒨𑒰𑒨𑒏 - 𑒞𑒵𑒣𑓂𑒞𑒱𑒏𑒰𑒩𑒏
𑒤𑒹𑒢𑒰 - 𑒥𑒩𑒏𑒰𑒍𑒪 𑒔𑒲𑒢𑒲𑒏 𑒧𑒡𑒳𑒩
𑒖𑒹𑒘𑒼𑒢𑒰𑒩 - 𑒦𑒼𑒖
𑒮𑓂𑒫𑒩𑓂𑒑𑒠𑒳𑒩𑓂𑒪𑒦 - 𑒣𑒰𑒢
𑒠𑒝𑓂𑒛𑒱𑒨𑒰 - 𑒛𑓀𑒙𑒰𑒏 𑒅𑒣𑒩𑒏𑒰 𑒣𑒰𑒮𑒱
𑒦𑒵𑒓𑓂𑒑𑒰𑒩 - 𑒮𑓂𑒫𑒩𑓂𑒝𑒏𑒪𑒮
𑒂𑒩𑒯𑒪 - 𑒂𑒩𑒧𑓂𑒦 𑒏𑒨𑒪
𑒏𑒱𑒙𑒰𑒋𑒪 - 𑒏𑓂𑒩𑒳𑒠𑓂𑒡
𑒢𑒱𑒨𑒼𑒑𑒲 - 𑒋𑒏 𑒣𑓂𑒩𑒏𑒰𑒩𑒏 𑒤𑒏𑒲𑒩
𑒥𑒳𑒮𑒏 - 𑒦𑒴𑒮𑒰𑒏
𑒡𑒳𑒢𑒱 - 𑒒𑒴𑒛𑓃
𑒮𑓀𑒏𑒼𑒔 - 𑒕𑒼𑒙 𑒯𑒼𑒨𑒥
𑒁𑒣𑒑𑒞 - 𑒁𑒪𑒏𑓂𑒭𑒱𑒞
𑒮𑒧𑓂𑒦𑒰𑒩 - 𑒣𑓂𑒩𑒮𑒰𑒩
𑒏𑒾𑒬𑒱𑒏 - 𑒅𑒪𑓂𑒪𑒴
𑒑𑒼𑒧𑒰𑒨𑒳 - 𑒮𑒱𑒨𑒰𑒩
𑒢𑒍𑒥𑒞𑒱 - 𑒣𑓂𑒩𑒯𑒩𑒲-𑒠𑒪
𑒔𑒞𑒳𑓁𑒮𑒧 - 𑒠𑓂𑒩𑒫- 𑒦𑒲𑒞𑒩𑒏𑒰 𑒡𑒩𑒰𑒞𑒪 𑒢𑒲𑒣𑒥𑒰𑒏
𑒧𑒰𑒚 - 𑒐𑒰𑒖𑒰-𑒧𑒰𑒚
𑒅𑒢𑒔 - 𑒅𑒪𑒼𑒿𑒔, 𑒔𑒠𑓂𑒠𑒩𑒱 (𑒍𑒕𑒹𑒥𑒰𑒏)
𑒠𑒩𑓂𑒠𑓂𑒠𑒳𑒩 - 𑒥𑒹𑒓
𑒗𑒱𑒏𑒩𑒳𑒂 - 𑒗𑒲𑒓𑒳𑒩, 𑒮𑒢𑒏𑒱𑒩𑒥𑒰
𑒢𑒱𑒫𑒱𑒪 - 𑒢𑒱𑒫𑒱𑒛𑓃 𑒒𑒢
𑒏𑒰𑒏𑒼𑒪 - 𑒏𑒰𑒩-𑒏𑒾𑒂
𑒏𑒼𑒪 - 𑒮𑒴𑒑𑒩
𑒬𑒱𑒫𑒰 - 𑒑𑒱𑒠𑒩𑒢𑒲
𑒤𑒹𑒞𑓂𑒏𑒰𑒩 - 𑒦𑒴𑒏𑒥
𑒮𑒰𑒩𑓂𑒟𑒫𑒰𑒯 - 𑒫𑓂𑒨𑒰𑒣𑒰𑒩𑒲 𑒨𑒰𑒞𑓂𑒩𑒰𑒠𑒪-𑒯𑒩𑒫𑒪𑓂𑒪𑒦𑒰
𑒣𑓂𑒩𑒮𑒰𑒩𑒲 - 𑒮𑓀𑒔𑒰𑒩𑒬𑒴𑒢𑓂𑒨 𑒧𑒹𑒒
𑒁𑒐𑒪𑒳 - 𑒣𑓂𑒩𑒞𑒲𑒞 𑒯𑒼𑒃𑒞 𑒁𑒕𑒱
𑒁𑒐𑒅𑒪𑒱 - 𑒣𑒴𑒩𑓂𑒫𑒧𑒹 𑒏𑒯𑒪
𑒫𑒰𑒩𑒱𑒦𑒏𑓂𑒞 - 𑒣𑒰𑒢𑒱𑒧𑒹 𑒩𑒰𑒐𑒪 𑒥𑒰𑒮𑒲 𑒦𑒰𑒞
𑒮𑒾𑒯𑒱𑒞𑓂𑒨 - 𑒞𑒵𑒣𑓂𑒞𑒞𑒰
𑒅𑒣𑒔𑒨 - 𑒫𑒵𑒠𑓂𑒡𑒱
𑒣𑒰𑒝𑓂𑒛𑒳𑒩𑒞𑒰 - 𑒬𑓂𑒫𑒹𑒞 𑒦𑒹𑒢𑒰𑒃 𑒖𑒹𑒢𑒰 𑒬𑒩𑒠𑒧𑒹 𑒧𑒹𑒒 𑒏𑒰𑒩𑒲𑒮𑒿 𑒅𑒖𑓂𑒖𑒩 𑒦𑓄
𑒖𑒰𑒃𑒞 𑒁𑒕𑒱
𑒣𑓂𑒩𑒮𑒢𑓂𑒢𑒞𑒰 - 𑒮𑓂𑒫𑒔𑓂𑒕𑒞𑒰
𑒮𑒤𑒩𑒲 - 𑒣𑒼𑒚𑒲 𑒧𑒰𑒕
𑒞𑒩𑒓𑓂𑒑 - 𑒔𑒘𑓂𑒔𑒪𑒞𑒰
𑒬𑒰𑒪𑒱 - 𑒠𑒰𑒢𑒰 𑒦𑒩𑒪 𑒗𑒳𑒏𑒪 𑒡𑒰𑒢
𑒧𑒩𑒳𑒂 - 𑒞𑒳𑒪𑒮𑒲 𑒖𑒞𑒱𑒏 𑒣𑒳𑒭𑓂𑒣𑒫𑒵𑒏𑓂𑒭
𑒫𑒱𑒬𑒹𑒭𑒏𑒔𑓂𑒕𑒹𑒠 - 𑒏𑒣𑒰𑒩 𑒑𑒪𑒣𑒩 𑒏𑒮𑓂𑒞𑒴𑒩𑒲𑒮𑒿 𑒔𑒱𑒞𑓂𑒩 𑒥𑒢𑒰𑒨𑒥
𑒠𑒩𑓂𑒬𑒢𑒫𑒱𑒡𑒱 - 𑒠𑒰𑒿𑒞 𑒂 𑒚𑒼𑒩 𑒩𑒿𑒑𑒥
𑒫𑒮𑒢𑒫𑒱𑒡𑒱 - 𑒫𑒮𑓂𑒞𑓂𑒩 𑒩𑒿𑒑𑒥
𑒫𑒩𑓂𑒝𑒱𑒏𑒰𑒫𑒱𑒡𑒱 - 𑒔𑒱𑒞𑓂𑒩𑒪𑒹𑒐𑒢
𑒬𑒹𑒐𑒩𑒨𑒼𑒖𑒢 - 𑒐𑒼𑒣𑒰 𑒥𑒰𑒢𑓂𑒯𑒥
𑒣𑒞𑓂𑒩𑒦𑒓𑓂𑒑𑒱 - 𑒬𑒩𑒲𑒩𑒧𑒹 𑒏𑒮𑓂𑒞𑒴𑒩𑒲 𑒪𑒹𑒣𑒢
𑒑𑒢𑓂𑒡𑒨𑒳𑒏𑓂𑒞𑒱 - 𑒁𑒞𑒩-𑒤𑒳𑒪𑒹𑒪 𑒥𑒢𑒰𑒨𑒥
𑒣𑒰𑒢𑒏𑒏𑒩𑒢𑒲 - 𑒬𑒩𑒥𑒞 𑒥𑒢𑒰𑒨𑒥
𑒣𑒙𑓂𑒙𑒱𑒏𑒰𑒫𑒰𑒢 - 𑒣𑒙𑒱𑒂 𑒥𑒲𑒢𑒥
𑒞𑒩𑓂𑒏𑒳𑒏𑒩𑓂𑒧 - 𑒮𑒲𑒏𑒲-𑒬𑒱𑒪𑓂𑒣
𑒂𑒏𑒩𑒖𑓂𑒘𑒰𑒢 - 𑒦𑒴𑒞𑒞𑓂𑒞𑓂𑒫𑒫𑒱𑒖𑓂𑒘𑒰𑒢
𑒁𑒏𑓂𑒭𑒩𑒧𑒳𑒭𑓂𑒙𑒱𑒏𑒰 - 𑒂𑒿𑒑𑒳𑒩𑒏 𑒮𑓀𑒏𑒹𑒞𑒮𑒿 𑒁𑒏𑓂𑒭𑒩-𑒦𑒰𑒫𑒏 𑒢𑒱𑒩𑓂𑒠𑒹𑒬
𑒠𑒼𑒯𑒠𑒏𑒩𑒝 - 𑒏𑒵𑒞𑓂𑒩𑒱𑒧 𑒅𑒣𑒔𑒰𑒩𑒮𑒿 𑒫𑒵𑒏𑓂𑒭𑒏𑒹𑒿 𑒠𑒳𑒩𑓂𑒦𑒱𑒏𑓂𑒭𑒧𑒹 𑒣𑒳𑒭𑓂𑒣𑒱𑒞 𑒏𑒩𑒥।
𑒕𑒪𑒱𑒞𑒨𑒼𑒑 - 𑒋𑒏𑒣𑓂𑒩𑒏𑒰𑒩𑒏 𑒨𑒼𑒑
𑒩𑒮𑒫𑒰𑒠 - 𑒩𑒮𑒰𑒨𑒢𑒫𑒱𑒖𑓂𑒘𑒰𑒢
𑒠𑒳𑒏𑒴𑒪 - 𑒒𑒼𑒒𑒙-𑒍𑒜𑓃𑒢𑒲𑒏 𑒪𑒹𑒪 𑒣𑓂𑒩𑒨𑒳𑒏𑓂𑒞 𑒫𑒮𑓂𑒞𑓂𑒩
𑒏𑓂𑒭𑒾𑒧 - 𑒞𑒲𑒮𑒲𑒏 𑒮𑒼𑒢𑒮𑒿 𑒥𑒢𑒪 𑒫𑒮𑓂𑒞𑓂𑒩
𑒏𑒾𑒬𑒹𑒨 - 𑒏𑒲𑒙𑒏𑒼𑒬𑒮𑒿 𑒥𑒢𑒪 𑒞𑒮𑒩 𑒫𑒮𑓂𑒞𑓂𑒩
𑒏𑒧𑒩𑒴𑒥𑒰𑒪 - 𑒏𑒰𑒧𑒩𑒴𑒣 𑒥𑒪𑒰
𑒥𑒓𑓂𑒑𑒰𑒪 - 𑒫𑒓𑓂𑒑𑒥𑒪𑒰
𑒑𑒳𑒘𑓂𑒖𑒩 - 𑒑𑒳𑒩𑓂𑒖𑒩
𑒏𑒚𑒱𑒥𑒰𑒪 - 𑒏𑒰𑒚𑒱𑒨𑒰𑒥𑒰𑒛𑓃𑒥𑒪𑒰
𑒥𑒩𑒯𑒟𑒲 - 𑒥𑒰𑒩𑒯 𑒯𑒰𑒟𑒏
𑒥𑒻𑒓𑓂𑒑𑒢𑒰 - 𑒦𑒙𑓂𑒙𑒰𑒮𑒢 𑒩𑓀𑒑𑒥𑒪𑒰
𑒣𑒘𑓂𑒔𑒯𑒩 - 𑒣𑒰𑒿𑒔 𑒐𑒝𑓂𑒛𑒏 𑒧𑒯𑒪
𑒣𑒘𑓂𑒔𑒮𑒧 - 𑒣𑒘𑓂𑒔 𑒮𑒳𑒑𑒢𑓂𑒡𑒱𑒠𑓂𑒩𑒫𑓂𑒨𑒏 𑒔𑒴𑒩𑓂𑒝
𑒣𑓂𑒩𑒠𑒲𑒣𑒏𑒪𑒮 - 𑒁𑒯𑒱𑒥𑒰𑒞𑒏 𑒣𑒰𑒞𑒱𑒪, 𑒏𑒪𑒮𑒧𑒹 𑒩𑒰𑒐𑒪 𑒧𑒓𑓂𑒑𑒪𑒠𑒲𑒣 𑒖𑒹
𑒥𑒮𑒰𑒞𑒮𑒿 𑒧𑒱𑒗𑒰𑒨 𑒢𑒯𑒱
𑒭𑒹𑒧𑒰 - 𑒩𑒰𑒖𑒰 𑒂 𑒮𑒹𑒢𑒰𑒏 𑒁𑒮𑓂𑒟𑒰𑒨𑒲 𑒬𑒱𑒫𑒱𑒩
𑒫𑒰𑒩𑒱𑒑𑒯 - 𑒯𑒟𑒱𑒮𑒰𑒩 𑒫𑒰 𑒒𑒼𑒛𑓃𑒮𑒰𑒩
𑒋𑒏𑒔𑒼𑒃/ 𑒠𑒼𑒔𑒼𑒃 - 𑒋𑒏 𑒫𑒰 𑒠𑒴 𑒧𑒳𑒐𑓂𑒨 𑒮𑓂𑒞𑓀𑒦 𑒥𑒪𑒰 𑒞𑒧𑓂𑒥𑒴
𑒧𑒝𑓂𑒛𑒥𑒰 - 𑒧𑒛𑓃𑒥𑒰
𑒏𑒣𑒪𑒒𑒛𑓃 - 𑒏𑒣𑒛𑓃𑒰𑒏 𑒒𑒩
𑒥𑒩𑒰𑒑𑒢 - 𑒥𑒹𑒩𑒰𑒑𑒢, 𑒮𑒼𑒧-𑒩𑒫𑒱 𑒂𑒠𑒱
𑒔𑒹𑒭𑓂𑒙𑒮𑒰𑒩 - 𑒠𑓂𑒨𑒴𑒞𑒬𑒰𑒪𑒰
𑒮𑒯𑒱𑒂𑒩 - 𑒁𑒧𑓂𑒣𑒰𑒨𑒩
𑒐𑒹𑒪𑒥𑒰𑒩 - 𑒠𑓂𑒨𑒴𑒞𑒬𑒰𑒪𑒰𑒏 𑒧𑒰𑒪𑒱𑒏
𑒠𑒝𑓂𑒛𑒮𑒰𑒯 - 𑒠𑒝𑓂𑒛𑒮𑒰𑒏𑓂𑒭𑒲
𑒏𑒰𑒞 - 𑒏𑒰𑒿𑒞𑒱, 𑒯𑒰𑒩𑒱-𑒖𑒲𑒞 𑒪𑒹𑒪 𑒩𑒰𑒐𑒪 𑒠𑓂𑒩𑒫𑓂𑒨
𑒅𑒣𑒢𑒨 - 𑒮𑒧𑒲𑒣 𑒂𑒢𑒥
𑒦𑒳𑒖𑒓𑓂𑒑 - 𑒮𑒧𑒠𑒱𑒨𑒰, 𑒔𑒳𑒑𑒪𑒰
𑒒𑒪 - 𑒗𑒳𑒝𑓂𑒛
𑒁𑒑𑒱𑒩𑒰𑒢𑒱 - 𑒁𑒑𑓂𑒩𑒑𑒰𑒧𑒲 𑒩𑒏𑓂𑒭𑒏 𑒠𑒪
𑒮𑒹𑒢𑒑𑒰𑒯 - 𑒮𑒹𑒢𑒰𑒢𑒰𑒨𑒏
𑒩𑒖𑒰𑒋𑒮 - 𑒩𑒰𑒖𑒰𑒠𑒹𑒬
𑒒𑒼𑒪 - 𑒒𑒼𑒛𑓃𑒰
𑒣𑒰𑒋𑒢 - 𑒣𑒋𑒩 𑒩𑒐𑒥𑒰𑒏 𑒫𑒪𑒨
𑒣𑒪𑒰𑒢𑒱 - 𑒖𑒲𑒢 𑒪𑒑𑒰𑒋 𑒒𑒼𑒛𑓃𑒰𑒏𑒹𑒿 𑒏𑒮𑒥
𑒟𑒪𑒥𑒰𑒩 - 𑒒𑒼𑒛𑓃𑒮𑒰𑒩𑒧𑒹 𑒩𑒯𑒱 𑒁𑒬𑓂𑒫𑒏 𑒣𑒰𑒪𑒢 𑒏𑒋𑒢𑒱𑒯𑒰𑒩
𑒣𑒰𑒑 - 𑒧𑒳𑒩𑒹𑒚𑒰
𑒮𑒩𑒧𑒼𑒖𑒰 - 𑒧𑒰𑒟𑒧𑒹 𑒣𑒯𑒱𑒩𑒥𑒰𑒏 𑒧𑒼𑒖𑒰
𑒑𑒰𑒢𑓂𑒞𑒲 - 𑒑𑒰𑒿𑒞𑒲
𑒥𑒰𑒑 - 𑒔𑒰𑒥𑒳𑒏
𑒮𑒰𑒓𑓂𑒏𑒪 - 𑒏𑒛𑓃𑒲
𑒛𑒰𑒧𑓂𑒦 - 𑒏𑒰𑒿𑒔 𑒢𑒰𑒩𑒱𑒏𑒹𑒩
𑒤𑒩𑒹𑒢𑓂𑒠 - 𑒤𑒰𑒿𑒏
𑒏𑒼𑒢𑓂𑒞𑒹 - 𑒥𑒩𑒕𑒲
𑒪𑒅𑒪𑒲 - 𑒪𑒰𑒚𑒲
𑒖𑒰𑒚𑒲 - 𑒤𑒛𑓃𑒰𑒚𑒲
𑒏𑒼𑒢𑓂𑒞𑒱𑒂 - 𑒥𑒩𑒕𑒲𑒥𑒰𑒪𑒰
𑒡𑒧𑒮𑒰 - 𑒢𑒑𑒰𑒛𑓃𑒰
𑒧𑒯𑒳𑒁𑒩𑒱 - 𑒤𑒴𑒿𑒏𑒱 𑒏𑒋 𑒥𑒖𑒨𑒥𑒰𑒏 𑒋𑒏 𑒫𑒰𑒠𑓂𑒨
𑒁𑒢𑒰𑒨𑒞 - 𑒫𑒫𑒬, 𑒥𑒯𑒲𑒩
𑒭𑒞𑒥𑒰𑒩 - 𑒣𑒯𑒩𑒰𑒠𑒰𑒩
𑒥𑒰𑒃𑒞𑒱 - 𑒫𑒰𑒠𑓂𑒨𑒡𑓂𑒫𑒢𑒱
𑒙𑒰𑒣 - 𑒒𑒼𑒛𑓃𑒰𑒏 𑒐𑒳𑒩𑒣𑒰𑒞
𑒧𑒳𑒯𑒩𑒫 - 𑒧𑒳𑒐𑒡𑓂𑒫𑒢𑒱
𑒣𑒪𑒰𑒢𑒱 - 𑒏𑒮𑒱 𑒏𑒨
𑒏𑒩𑒳𑒁𑒏 - 𑒏𑒨𑒪𑒏
𑒮𑒩𑓂𑒫𑒰𑓀𑒫𑒮𑒩 - 𑒂𑒧 𑒠𑒩𑒥𑒰𑒩
𑒫𑒹𑒏𑒪𑓂𑒯𑒹𑒝𑓂𑒙𑒹 - 𑒛𑒰𑒿𑒛𑓃
𑒣𑒰𑒙 - 𑒩𑒹𑒬𑒧𑒲
𑒡𑒪𑒱 - 𑒡𑒛𑓃𑒱𑒨𑒰, 𑒏𑒣𑓂𑒣𑒰
𑒣𑒰𑒗𑒱 - 𑒣𑒏𑓂𑒭𑒲
𑒙𑒼𑒣𑒩 - 𑒙𑒼𑒣 𑒮𑒢 𑒗𑒣𑒢𑒰
𑒮𑒃𑒔𑒰𑒢 - 𑒥𑒰𑒖 𑒣𑒏𑓂𑒭𑒲
𑒣𑒱𑒞𑒬𑒰𑒪 - 𑒣𑒲𑒩𑒰 𑒮𑒰𑒿𑒐𑒳
𑒮𑒩𑒪 - 𑒡𑒴𑒣 𑒮𑒩𑒛𑓃
𑒮𑒱𑒧𑓂𑒥𑒪𑒱 - 𑒮𑒲𑒧𑒩
𑒮𑒱𑓀𑒮𑒣 - 𑒮𑒲𑒮𑒲
𑒮𑒯𑒼𑒪 - 𑒮𑒰𑒯𑒼𑒛𑓃
𑒣𑒰𑒅𑒪𑒱 - 𑒣𑒰𑒿𑒛𑓃𑒩𑒱
𑒥𑓀𑒗𑒱 - 𑒥𑒰𑒿𑒗𑒱
𑒑𑒱𑒩𑒱𑒕 - 𑒩𑒱𑒕
𑒑𑒳𑒂 - 𑒮𑒳𑒣𑒰𑒩𑒲
𑒢𑒩𑒓𑓂𑒑 - 𑒮𑒢𑓂𑒞𑒼𑒪𑒰
𑒢𑒧𑒹𑒩𑒳 - 𑒩𑒳𑒠𑓂𑒩𑒰𑒏𑓂𑒭
𑒥𑒅𑒩 - 𑒥𑒏𑒳𑒪, 𑒦𑒰𑒪𑒮𑒩𑒱
𑒕𑒼𑒪𑒓𑓂𑒑 - 𑒕𑒼𑒯𑒰𑒩𑒰
𑒖𑒳𑒛𑓃 - 𑒬𑒲𑒞𑒪
𑒋𑒪𑒰 - 𑒁𑒛𑓃𑒰𑒿𑒔𑒲
𑒮𑒳𑒐𑒧𑒹𑒪𑒰 - 𑒕𑒼𑒙𑒏𑒲 𑒁𑒛𑓃𑒰𑒿𑒔𑒲
𑒧𑒡𑒳𑒏𑒩 - 𑒬𑒞𑒰𑒫𑒩𑒲
𑒏𑒧𑓂𑒣𑒴𑒩 𑒏𑒠𑒪𑒲 - 𑒏𑒩𑓂𑒣𑒴𑒩𑒏𑒠𑒪𑒲
𑒏𑒣𑒱𑒘𑓂𑒖𑒪 - 𑒞𑒱𑒞𑒲𑒩
𑒡𑒰𑒩𑒰𑒑𑒵𑒯 - 𑒤𑒳𑒯𑒰𑒩𑒰𑒮𑒿 𑒨𑒳𑒏𑓂𑒞 𑒮𑓂𑒢𑒰𑒢𑒑𑒵𑒯
𑒮𑓂𑒟𑒹𑒨 - 𑒦𑒑𑒢𑒱𑒯𑒰𑒩 𑒢𑒯𑒱
𑒣𑒩𑒧𑓂𑒣𑒩𑒲𑒝 - 𑒫𑓀𑒬𑒣𑒩𑒧𑓂𑒣𑒩𑒰𑒮𑒿 𑒔𑒪 𑒁𑒥𑒻𑒞
𑒣𑒳𑒩𑒳𑒭 - 𑒩𑒏𑓂𑒭𑒏, 𑒮𑒱𑒣𑒰𑒯𑒲
𑒏𑒰𑒩 - 𑒏𑒰𑒩𑒲
𑒏𑒰𑒥𑒩 - 𑒔𑒱𑒞𑒏𑒰𑒥𑒩
𑒔𑒪𑒏 - 𑒔𑒩𑒏, 𑒬𑓂𑒫𑒹𑒞𑒫𑒩𑓂𑒝
𑒑𑒼𑒪 - 𑒑𑒾𑒩
𑒏𑒃𑒪 - 𑒏𑒣𑒱𑒪
𑒣𑒰𑒝𑓂𑒛𑒩 - 𑒣𑒰𑒝𑓂𑒛𑒳𑒩
𑒬𑒲𑒏𑒩𑒫𑒱𑒏𑓂𑒭𑒹𑒣 - 𑒤𑒳𑒯𑒰𑒩𑒰 𑒕𑒼𑒛𑓃𑒥
𑒑𑒝𑓂𑒛𑒴𑒭 - 𑒏𑒳𑒛𑓃𑒩𑒰
𑒢𑒰𑒏𑒖𑒪𑒥𑒳𑒠𑓂𑒥𑒳𑒠 - 𑒢𑒰𑒏𑒮𑒿 𑒖𑒪𑒧𑒹 𑒯𑒫𑒰 𑒕𑒼𑒛𑓃𑒱 𑒥𑒳𑒠𑒥𑒳𑒠 𑒥𑒢𑒰𑒨𑒥
𑒣𑒱𑒝𑓂𑒛 - 𑒣𑒲𑒛𑓃𑒲
𑒣𑒰𑒩𑒲 - 𑒥𑒹𑒜𑓃
𑒮𑒰𑒙𑒱 - 𑒐𑒳𑒙𑓂𑒙𑒰
𑒔𑒳𑒞 - 𑒂𑒧
𑒣𑒮𑓂𑒩𑒫𑒝 - 𑒮𑒼𑒞𑒰
𑒣𑒯𑒰𑒪 - 𑒑𑒱𑒩𑒱
𑒛𑒼𑒓𑓂𑒏𑒪 - 𑒛𑒼𑓀𑒑𑒩
𑒔𑒳𑒪𑒲 - 𑒔𑒼𑒙𑒲
𑒏𑒼𑒃𑒂𑒩 - 𑒏𑒼𑒫𑒱𑒠𑒰𑒩
𑒮𑒻𑒧𑓂𑒥 - 𑒮𑒲𑒧𑒩
𑒮𑒲𑒮𑒧𑒳 - 𑒮𑒲𑒮𑒼
𑒮𑒰𑒓𑓂𑒏𑒳 - 𑒮𑒰𑒿𑒐𑒳
𑒮𑒧𑒱 - 𑒬𑒢𑒱, 𑒮𑒻𑒢𑒱
𑒮𑒯𑒼𑒪 - 𑒮𑒰𑒯𑒼𑒛𑓃
𑒣𑒘𑒼𑒏𑒚 - 𑒣𑒠𑓂𑒧𑒏𑒰𑒚
𑒮𑒦𑒩 - 𑒮𑒰𑒿𑒦𑒩, 𑒁𑒭𑓂𑒙𑒰𑒣𑒠 𑒧𑒵𑒑
𑒏𑒳𑒙𑒳𑒧𑓂𑒥𑒱𑒢𑒲 - 𑒐𑒲𑒩𑒲
𑒏𑒚𑒯𑒩𑒱𑒂 - 𑒏𑒚𑒐𑒼𑒠𑒲
𑒣𑒹𑒔 - 𑒅𑒪𑓂𑒪𑒴
𑒮𑓂𑒩𑒳𑒔 - 𑒏𑒰𑒚𑒏 𑒪𑒰𑒛𑓃𑒢𑒱, 𑒠𑒰𑒥𑒱
𑒣𑒘𑓂𑒔𑒰𑒧𑒵𑒞 - 𑒠𑒯𑒲, 𑒠𑒴𑒡, 𑒒𑒵𑒞, 𑒧𑒡𑒳, 𑒬𑒩𑓂𑒏𑒩𑒰
𑒣𑒘𑓂𑒔𑒏𑒭𑒰𑒨 - 𑒬𑒩𑒲𑒩𑒧𑒹 𑒪𑒑𑒨𑒥𑒰𑒏 𑒣𑒰𑒿𑒔 𑒮𑒳𑒑𑒢𑓂𑒡𑒱𑒠𑓂𑒩𑒫𑓂𑒨𑒏 𑒔𑒴𑒩𑓂𑒝
𑒔𑒭𑒰𑒪 - 𑒨𑒴𑒣𑒏 𑒧𑒰𑒟 𑒣𑒩𑒏 𑒟𑒳𑒧𑒯𑒰
𑒅𑒠𑒴𑒐𑒪 - 𑒅𑒏𑓂𑒐𑒩𑒱
𑒔𑒧𑒮 - 𑒥𑒰𑒙𑒲
𑒮𑓀𑒦𑒵𑒞𑒱 - 𑒮𑒰𑒧𑒑𑓂𑒩𑒲
𑒮𑒣𑓂𑒞𑒡𑒰𑒢𑓂𑒨 - 𑒖𑒍, 𑒑𑒯𑒳𑒧, 𑒞𑒱𑒪, 𑒏𑒰𑒅𑒢, 𑒮𑒰𑒧, 𑒔𑒲𑒢, 𑒢𑒲𑒫𑒰𑒩
𑒂𑒭𑒰𑒜𑓃𑒠𑒝𑓂𑒛 - 𑒣𑒪𑒰𑒬𑒠𑒝𑓂𑒛
𑒞𑒩𑒳𑒞𑓂𑒫𑒔 - 𑒫𑒪𑓂𑒏𑒪
𑒫𑒵𑒏𑓂𑒭𑒲 - 𑒧𑒳𑒢𑒱𑒏 𑒥𑒻𑒮𑒥𑒰𑒏 𑒂𑒮𑒢
𑒠𑒰𑒩𑒳𑒣𑒰𑒞𑓂𑒩 - 𑒏𑒚𑒾𑒞
𑒏𑒩𑒝𑓂𑒛𑒏 - 𑒕𑒱𑒙𑓂𑒙𑒰, 𑒣𑒟𑒱𑒂
𑒥𑒯𑓂𑒂𑒩𑒱 - 𑒥𑒯𑒳𑒩𑒱𑒂, 𑒣𑒳𑒞𑒼𑒯𑒳
𑒥𑒱𑒠𑒰𑒢 - 𑒠𑒰𑒍, 𑒧𑒳𑒠𑓂𑒩𑒰
𑒅𑒦𑒩𑒱 - 𑒅𑒕𑒪𑒱 𑒏𑒋 𑒆𑒣𑒩 𑒂𑒥𑒱, 𑒏𑒳𑒬𑓂𑒞𑒲𑒏 𑒠𑒰𑒍
𑒁𑒫𑒡𑒰 - 𑒁𑒡𑒼𑒧𑒳𑒐, 𑒏𑒳𑒬𑓂𑒞𑒲𑒏 𑒠𑒰𑒍
𑒫𑒱𑒠𑓂𑒨𑒰𑒫𑒢𑓂𑒞𑒱 - 𑒢𑒩𑓂𑒞𑒏𑒲
𑒮𑒼𑒞𑒰𑒏 𑒏𑒏𑒢𑒰 - 𑒧𑒓𑓂𑒑𑒪 𑒮𑒴𑒞𑓂𑒩
𑒮𑒱𑒓𑓂𑒏𑒪𑒲 - 𑒮𑒱𑓀𑒏𑒛𑓃𑒲
𑒬𑒰𑒐 - 𑒬𑓀𑒐𑒰𑒔𑒴𑒛𑓃𑒲
𑒐𑒳𑒢𑓂𑒞𑒲 - 𑒐𑒳𑒙𑓂𑒙𑒲- 𑒏𑒰𑒢𑒏 𑒅𑒣𑒩𑒏𑒰 𑒦𑒰𑒑𑒧𑒹 𑒣𑒯𑒱𑒩𑒪 𑒖𑒰𑒃𑒕
𑒔𑒴𑒪𑒱 - 𑒔𑒴𑒛𑓃𑒲
𑒞𑒵𑒏𑒰 - 𑒧𑒰𑒿𑒑𑒙𑒲𑒏𑒰
𑒠𑒬𑒘𑒳𑒡𑒱 - 𑒠𑒮𑒾𑒢𑓂𑒯𑒲- 𑒩𑒰𑒖𑒰𑒏𑒹𑒿 𑒏𑒰𑒪𑒏 𑒮𑒴𑒔𑒢𑒰 𑒠𑒹𑒢𑒱𑒯𑒰𑒩, 𑒮𑒧𑓂𑒣𑓂𑒩𑒞𑒱
𑒦𑒰𑒙
𑒮𑒧𑒯𑒟 - 𑒮𑒧𑒯𑒮𑓂𑒞, 𑒥𑒰𑒖𑒰 𑒮𑒦𑒣𑒩 𑒋𑒏𑒥𑒹𑒩 𑒯𑒰𑒟 𑒠𑒋 𑒮𑓀𑒑𑒲𑒞
𑒢𑒱𑒏𑒰𑒪𑒥
𑒧𑒝𑓂𑒛𑒪 - 𑒯𑒰𑒟-𑒣𑒋𑒩𑒏 𑒔𑒏𑓂𑒩𑒰𑒏𑒰𑒩 𑒮𑓀𑒔𑒰𑒩 𑒏𑒋 𑒋𑒏 𑒧𑒳𑒠𑓂𑒩𑒰𑒮𑒿 𑒠𑒼𑒮𑒩
𑒧𑒳𑒠𑓂𑒩𑒰𑒧𑒹 𑒣𑒯𑒳𑒿𑒔𑒥𑒰𑒏 𑒏𑓂𑒩𑒱𑒨𑒰
𑒁𑒓𑓂𑒑𑒯𑒰𑒩 - 𑒁𑒓𑓂𑒑𑒮𑒦𑒏𑒹𑒿 𑒫𑒱𑒪𑒰𑒮𑒣𑒴𑒩𑓂𑒫𑒏 𑒅𑒔𑒱𑒞 𑒮𑓂𑒟𑒰𑒢𑒧𑒹 𑒣𑒯𑒳𑒿𑒔𑒰𑒋𑒥
𑒦𑒰𑒪 - 𑒦𑒴𑒖𑒰𑒥𑒪𑒰𑒏 𑒔𑒴𑒪𑓂𑒯𑒱
𑒍𑒥𑒰𑒩𑒲 - 𑒣𑒰𑒞𑒱𑒪
𑒬𑒱𑒫𑒰 - 𑒑𑒱𑒠𑒛𑓃𑒢𑒲
𑒦𑒲𑒧 - 𑒦𑒨𑒰𑒢𑒏
𑒅𑒪𑓂𑒏𑒰𑒧𑒳𑒐 - 𑒋𑒏 𑒖𑒰𑒞𑒱𑒏 𑒑𑒲𑒠𑒛𑓃 𑒖𑒏𑒛𑓃𑒰 𑒧𑒳𑒯𑒮𑒿 𑒡𑒡𑒩𑒰 𑒥𑒯𑒩𑒰𑒃𑒞
𑒕𑒻
𑒖𑒢𑓂𑒞𑒰𑒏 - 𑒖𑒰𑒿𑒞𑒏
𑒔𑒳𑒘𑓂𑒔𑒲 - 𑒮𑓂𑒞𑒢
𑒣𑒮𑒰𑒩 - 𑒠𑒼𑒏𑒰𑒢
𑒣𑒹𑒔𑒰 - 𑒅𑒪𑓂𑒪𑒴 𑒣𑒏𑓂𑒭𑒲
𑒭𑒲𑒭𑒲𑒪 - 𑒐𑒱𑒐𑒲𑒛𑓃
𑒢𑒹𑒅𑒩 - 𑒥𑒲𑒖𑒲
𑒁𑒣𑒩𑓂𑒨𑒢𑓂𑒞 - 𑒁𑒮𑒲𑒧
𑒣𑒰𑒙 - 𑒣𑒙𑓂𑒙𑒫𑒮𑓂𑒞𑓂𑒩
𑒏𑒰𑒣𑒪 - 𑒏𑒣𑒛𑓃𑒰
𑒮𑒏𑒪𑒰𑒞 - 𑒑𑒪𑒻𑒔𑒰
𑒠𑒳𑒮𑒳𑒐𑒰𑒮𑒢 - 𑒮𑒳𑒐𑒠 𑒬𑒨𑓂𑒨𑒰
𑒪𑒔𑒮𑒴𑒔𑒱𑒏𑒰 - 𑒢𑒍 𑒮𑒳𑒃𑒨𑒰𑒣𑒩 𑒥𑒱𑒢𑒰𑒨𑒪 𑒥𑒱𑒕𑒰𑒍𑒢
𑒣𑒩𑒱𑒏𑒩-𑒢𑒰𑒨𑒏 - 𑒠𑒪𑒣𑒞𑒱
𑒫𑒩𑓂𑒯𑒱 - 𑒏𑒳𑒬
𑒮𑒧𑒱𑒡 - 𑒖𑒰𑒩𑒢𑒱
𑒠𑒵𑒭𑒠 - 𑒣𑒰𑒟𑒩
𑒪𑒰𑒖 - 𑒪𑒰𑒥𑒰
𑒃𑒭𑓂𑒙𑒰𑒓𑓂𑒑𑒢𑒰 - 𑒦𑒰𑒫𑒲 𑒣𑒞𑓂𑒢𑒲
𑒮𑒳𑒩𑒞𑒲 - 𑒮𑒴𑒩𑒞𑒮𑒿 𑒂𑒨𑒪, 𑒮𑒧𑓂𑒣𑓂𑒩𑒞𑒱 𑒮𑒳𑒩𑒞𑒲 𑒞𑒧𑒰𑒏𑒴
𑒖𑒰𑒞𑒲𑒤𑒪 - 𑒖𑒰𑒨𑒤𑒪
𑒮𑒴𑒏𑓂𑒭𑓂𑒧𑒹𑒪𑒰 - 𑒕𑒼𑒙𑒏𑒲 𑒁𑒛𑓃𑒰𑒿𑒔𑒲
𑒑𑒳𑒪𑒞𑓂𑒫𑒏 - 𑒠𑒰𑒪𑒱𑒔𑒲𑒢𑒲
𑒣𑒞𑓂𑒩𑒏 - 𑒞𑒹𑒖𑒣𑒰𑒞
𑒣𑒱𑒩𑓂𑒣𑓂𑒣𑒪𑒲 - 𑒣𑒲𑒣𑒩𑒱
𑒏𑒙𑒳𑒏𑒲 𑒍 𑒠𑒳𑒪𑒰𑒯- 𑒠𑒳𑒪𑒰𑒩 𑒏𑒰𑒿𑒙, 𑒫𑒢𑒾𑒭𑒡𑒱
𑒧𑒴𑒪𑓂𑒨 𑒣𑒩𑒱𑒕𑒹𑒠 - 𑒧𑒴𑒪𑓂𑒨 𑒣𑒙𑒰𑒋𑒥
𑒢𑒱𑒭𑓂𑒏𑓂𑒩𑒨 - 𑒫𑒱𑒢𑒱𑒧𑒨
𑒏𑒩𑓂𑒭𑒏𑓂𑒩𑒨 - 𑒮𑒼𑒢𑒰𑒏 𑒧𑒳𑒠𑓂𑒩𑒰 𑒏𑒲𑒢𑒥
𑒁𑒓𑓂𑒏𑒣𑒩𑒱𑒮𑓂𑒟𑒱𑒞𑒱 - 𑒪𑒹𑒐𑒰-𑒖𑒼𑒐𑒰
𑒯𑒩𑒝-𑒦𑒩𑒝 - 𑒧𑒰𑒪 𑒪𑒹𑒥-𑒠𑒹𑒥
𑒫𑓂𑒨𑒫𑒔𑓂𑒕𑒹𑒠 - 𑒤𑒩𑒱𑒕𑒼𑒙
𑒢𑒭𑓂𑒙𑒏𑒰𑒏 - 𑒏𑒰𑒩 𑒏𑒾𑒂
𑒮𑒪𑒦 - 𑒤𑒞𑒱𑓀𑒑𑒰
𑒑𑓂𑒩𑒯𑒱𑒪 - 𑒪𑒑𑒰𑒩𑒲
𑒮𑒠𑓂𑒫𑒱𑒔𑒏𑓂𑒭𑒝 - 𑒢𑒲𑒏 𑒫𑒱𑒠𑓂𑒫𑒰𑒢𑓂
𑒫𑒣𑒰 - 𑒦𑒲𑒛𑓃-𑒮𑓂𑒞𑒴𑒣𑒰𑒏𑒰𑒩 𑒦𑒴𑒧𑒱
𑒐𑒼𑒪 - 𑒐𑒰𑒡𑒱
𑒯𑒮𑓂𑒞𑒏𑒰𑒝𑓂𑒛 - 𑒪𑒑𑓂𑒑𑒰
𑒑𑒳𑒝𑒏𑒰𑒝𑓂𑒛 - 𑒢𑒣𑒥𑒰𑒏 𑒪𑒑𑓂𑒑𑒰
𑒫𑒞𑓂𑒮𑒠𑒢𑓂𑒞 - 𑒥𑒰𑒕𑒰𑒏 𑒠𑒰𑒿𑒞 𑒮𑒢
𑒦𑒪𑓂𑒪 𑒢𑒐 - 𑒦𑒰𑒪𑒳𑒏 𑒢𑒐𑒏 𑒮𑒠𑒵𑒬
𑒞𑒵𑒣𑒩𑓂𑒫 - 𑒞𑒲𑒢 𑒣𑒼𑒩 𑒥𑒪𑒰
𑒮𑒣𑓂𑒞𑒣𑒩𑓂𑒫 - 𑒮𑒰𑒞 𑒣𑒼𑒩𑒥𑒪𑒰
𑒂𑒪𑒲𑒜𑓃 - 𑒠𑒯𑒱𑒢𑒰 𑒚𑒹𑒯𑒳𑒢𑒏𑒹𑒿 𑒅𑒚𑒰𑒨 𑒍 𑒥𑒰𑒧𑒰 𑒚𑒹𑒯𑒳𑒢𑒏𑒹𑒿 𑒢𑒲𑒔𑒰𑒿 𑒩𑒼𑒣𑒱
𑒚𑒰𑒜𑓃 𑒦𑒹𑒪
𑒣𑓂𑒩𑒞𑓂𑒨𑒰𑒪𑒲𑒜𑓃 - 𑒂𑒪𑒲𑒜𑓃𑒏 𑒫𑒱𑒣𑒩𑒲𑒞
𑒮𑒧𑒣𑒰𑒠 - 𑒠𑒳𑒢𑒴 𑒚𑒹𑒯𑒳𑒢 𑒋𑒏 𑒮𑒩𑒪 𑒩𑒹𑒐𑒰𑒣𑒩 𑒩𑒼𑒣𑒱 𑒚𑒰𑒜𑓃 𑒦𑒹𑒪
𑒥𑒱𑒬𑒰𑒐 - 𑒠𑒳𑒢𑒴 𑒙𑒰𑒿𑒑 𑒔𑒱𑒂𑒩𑒱 𑒚𑒰𑒜𑓃 𑒦𑒹𑒪
𑒮𑓂𑒟𑒰𑒢𑒏 - 𑒚𑒰𑒜𑓃 𑒯𑒼𑒋𑒥𑒰𑒏 𑒜𑓃𑓀𑒑
𑒁𑒮𑒢 - 𑒦𑒰𑒪𑒰
𑒑𑒼𑒏𑒩𑓂𑒝 - 𑒕𑒼𑒙 𑒦𑒰𑒪𑒰
𑒧𑒳𑒏𑒳𑒪 - 𑒏𑒪𑒱𑒏𑒰𑒏𑒰𑒩 𑒞𑒲𑒩
𑒛𑒰𑒝𑓂𑒛 - 𑒣𑒞𑒥𑒰𑒩, 𑒣𑒰𑒢𑒱 𑒅𑒣𑒕𑒥𑒰𑒏 𑒏𑒚𑒾𑒞
𑒔𑒰𑒛, 𑒔𑒛𑒏 - 𑒢𑒰𑒍 𑒮𑒦𑒏 𑒥𑒹𑒛𑓃𑒰
𑒖𑒳𑒖𑓂𑒗𑒰𑒩 - 𑒪𑒛𑓃𑒰𑒏𑒴, 𑒨𑒳𑒠𑓂𑒡-𑒣𑒠𑒰𑒞𑒱
𑒑𑒝𑒏 - 𑒑𑒝𑒱𑒞𑒖𑓂𑒘
𑒞𑒰𑒩𑒰𑒫𑒱𑒠𑓂 - 𑒞𑒰𑒩𑒰 𑒠𑒹𑒐𑒱 𑒠𑒱𑒬𑒰𑒏 𑒖𑓂𑒘𑒰𑒢 𑒏𑒩𑒍𑒢𑒱𑒯𑒰𑒩
𑒑𑒳𑒝𑒫𑒵𑒏𑓂𑒭 - 𑒧𑒮𑓂𑒞𑒴𑒪
𑒮𑒹𑒏𑒣𑒰𑒞𑓂𑒩 - 𑒢𑒰𑒍𑒮𑒿 𑒣𑒰𑒢𑒱 𑒅𑒣𑒕𑒥𑒰𑒏 𑒏𑒚𑒾𑒞
𑒫𑒼𑒯𑒱𑒞 - 𑒖𑒯𑒰𑒖𑒏 𑒥𑒹𑒛𑓃𑒰
𑒥𑒱𑒂𑒩𑒲 - 𑒩𑒰𑒞𑓂𑒩𑒱𑒦𑒼𑒖𑒢
𑒔𑒼𑒩𑒑𑒰𑒯𑒱 - 𑒔𑒰𑒧𑒩𑒱𑒑𑓂𑒩𑒰𑒯𑒱𑒝𑒲
𑒣𑒙𑒰 - 𑒕𑒼𑒙 𑒣𑒲𑒜𑓃𑒲
𑒥𑒡𑒰 - 𑒐𑒳𑒙𑓂𑒙𑒲 𑒪𑒑𑒪𑒰 𑒅𑒞𑓂𑒞𑒩 𑒐𑒩𑒰𑒆𑒿 𑒧𑒳𑒠𑒰 𑒛𑒼𑒩𑒲 𑒪𑒑𑒪𑒰 𑒅𑒞𑓂𑒞𑒩
𑒥𑒡𑒰
𑒞𑒧𑒰𑒩𑒳 - 𑒞𑒰𑒧𑓂𑒩𑒣𑒞𑓂𑒩
𑒥𑒙𑒃 - 𑒥𑒙𑒹𑒩
𑒞𑒹𑒩𑒱𑒂 - 𑒞𑒲𑒢 𑒐𑒳𑒙𑓂𑒙𑒰𑒏- 𑒠𑒴 𑒥𑒱𑒂𑒢𑒏 𑒧𑒯𑒲𑒮
𑒪𑒹𑒥𑒰𑒩𑒲 - 𑒢𑒰𑒩-𑒣𑒳𑒂𑒩
𑒁𑒡𑒞𑒹𑒩𑒯 - 𑒞𑒹𑒩𑒯𑒮𑒿 𑒂𑒡 𑒏𑒧 𑒁𑒩𑓂𑒟𑒰𑒞𑓂 𑒮𑒰𑒜𑓃𑒹 𑒥𑒰𑒩𑒯
𑒁𑒿𑒔𑒍𑒪𑒢𑒱 - 𑒯𑒰𑒟-𑒧𑒳𑒿𑒯 𑒡𑒼𑒪𑒢𑒱
𑒠𑒹𑒫𑒩𑒴𑒣𑒰 - 𑒋𑒏 𑒣𑓂𑒩𑒏𑒰𑒩𑒏 𑒔𑒰𑒢𑒲
𑓒. 𑒫𑒱𑒠𑓂𑒨𑒰𑒣𑒞𑒱 𑒬𑒥𑓂𑒠𑒰𑒫𑒪𑒲
𑒧𑒵𑒑𑒧𑒠 = 𑒏𑒮𑓂𑒞𑒴𑒩𑒲
𑒫𑒰𑒮𑒩 = 𑒠𑒱𑒢
𑒩𑒻𑒢 = 𑒩𑒰𑒞𑒱
𑒪𑒱𑒡𑒳𑒩 = 𑒩𑒏𑓂𑒞
𑒣𑒳𑒩 𑒢𑒙𑒲 = 𑒢𑒰𑒑𑒩 𑒢𑒙𑒲
𑒁𑒫𑒞𑒩𑒳 = 𑒁𑒫𑒞𑒩𑒱𑒞 𑒯𑒼𑒆
𑒏𑒢𑒏 𑒦𑒴𑒡𑒩 = 𑒮𑒳𑒧𑒹𑒩𑒳 𑒣𑒩𑓂𑒫𑒞
𑒔𑒢𑓂𑒠𑓂𑒩𑒱𑒏𑒰 𑒔𑒨 = 𑒔𑒢𑓂𑒠𑓂𑒩𑒱𑒏𑒰𑒏 𑒮𑒧𑒴𑒯
𑒢𑒱𑒣𑒰𑒞𑒱𑒢𑒱 = 𑒢𑒰𑒬 𑒏𑒩𑒋𑒥𑒰𑒪𑒲
𑒦𑒏𑓂𑒞 𑒦𑒨𑒰𑒣𑒢𑒼𑒠𑒢 = 𑒦𑒏𑓂𑒞𑒏 𑒦𑒋 𑒠𑒴𑒩 𑒏𑒩𑒋𑒥𑒰𑒪𑒲
𑒠𑒳𑒩𑒱𑒞 𑒯𑒰𑒩𑒱𑒝𑒱 = 𑒫𑒱𑒣𑒞𑓂𑒞𑒱𑒏 𑒦𑒰𑒩 𑒯𑒩𑒝 𑒏𑒩𑒋𑒥𑒰𑒪𑒲
𑒠𑒳𑒩𑓂𑒑𑒧𑒰𑒩𑒱 = 𑒦𑒨𑒓𑓂𑒏𑒩 𑒬𑒞𑓂𑒩𑒳
𑒫𑒱𑒧𑒩𑓂𑒠 = 𑒫𑒱𑒢𑒭𑓂𑒙
𑒑𑒰𑒯𑒱𑒢𑒲 = 𑒫𑒱𑒔𑒩𑒝 𑒏𑒩𑒋𑒥𑒰𑒪𑒲
𑒮𑒰𑒨𑒏 = 𑒫𑒰𑒝
𑒮𑒳𑒏𑒩 = 𑒮𑒳𑒢𑓂𑒠𑒩
𑒣𑒱𑒮𑒱𑒞 = 𑒏𑒰𑒿𑒔 𑒧𑒾𑒮
𑒣𑒰𑒩𑒝𑒰 = 𑒞𑒵𑒣𑓂𑒞𑒱
𑒩𑒦𑒮𑒹 = 𑒂𑒢𑒢𑓂𑒠𑒱𑒞 𑒏𑒩𑒋𑒥𑒰𑒪𑒲
𑒏𑒵𑒬𑒰𑒢𑒳 = 𑒁𑒑𑓂𑒢𑒱
𑒔𑒳𑒧𑓂𑒥𑓂𑒨𑒧𑒰𑒢 = 𑒔𑒳𑒧𑓂𑒥𑒢 𑒏𑒩𑒻𑒞 𑒁𑒕𑒱
𑒣𑒩𑒱𑒔𑓂𑒨𑒳𑒞𑒱 = 𑒢𑒭𑓂𑒙 𑒏𑒩𑒻𑒞 𑒁𑒕𑒱
𑒂𑒛𑓃 = 𑒪𑒰𑒪
𑒦𑒰𑒑𑒱 = 𑒫𑒏𑓂𑒩
𑒑𑒼𑒋 = 𑒢𑒳𑒏𑒰 𑒏𑒋
𑒮𑒳𑒡𑒰𑒋 = 𑒁𑒧𑒵𑒞
𑒏𑒳𑒬𑒹𑒬𑒨 = 𑒬𑒞𑒣𑒞𑓂𑒩 𑒏𑒧𑒪
𑒁𑒡𑒥𑒼𑒪𑒲 = 𑒁𑒮𑓀𑒣𑒴𑒩𑓂𑒝 𑒫𑒰𑒏𑓂𑒨
𑒐𑒢𑒹𑒐𑒢 = 𑒏𑓂𑒭𑒝𑒹-𑒏𑓂𑒭𑒝
𑒅𑒔𑒱𑒏 = 𑒔𑒏𑒱𑒞 𑒦𑒰𑒫𑒹𑒿
𑒂𑒩𑒞𑒱 = 𑒣𑒲𑒛𑓃𑒰
𑒁𑒢𑒰𑒢𑒱 = 𑒁𑒖𑓂𑒘𑒰𑒢𑒲
𑒠𑒢𑓂𑒠 = 𑒗𑒑𑒛𑓃𑒰
𑒯𑒹𑒩𑒻𑒞 = 𑒠𑒹𑒐𑒻𑒞
𑒧𑒢𑒮𑒱𑒖 = 𑒏𑒰𑒧𑒠𑒹𑒫
𑒑𑒾𑒩𑒫 = 𑒑𑒳𑒩𑒳𑒞𑒰
𑒐𑒲𑒢 = 𑒏𑓂𑒭𑒲𑒝
𑒁𑒍𑒏𑒹 = 𑒠𑒼𑒮𑒩𑒰𑒏
𑒪𑒯𑒳 = 𑒪𑒒𑒳
𑒣𑒩𑒑𑒰𑒮 = 𑒣𑓂𑒩𑒏𑒰𑒬
𑒮𑒳𑒩𑒞 𑒫𑒱𑒯𑒰𑒩 = 𑒏𑒰𑒧-𑒏𑓂𑒩𑒲𑒛𑓃𑒰
𑒢𑒫𑒩𑒓𑓂𑒑 = 𑒮𑓀𑒞𑒼𑒪𑒰
𑒮𑒢𑓂𑒞𑒰𑒣𑒪𑒱 = 𑒏𑒭𑓂𑒙 𑒠𑒹𑒢𑒰𑒃
𑒥𑒰𑒓𑓂𑒏 = 𑒫𑒏𑓂𑒩
𑒣𑒮𑒰𑒯 = 𑒣𑓂𑒩𑒮𑒰𑒡𑒢
𑒦𑒲𑒞𑒱 = 𑒦𑒨𑒮𑒿
𑒞𑒱𑒭 = 𑒞𑒲𑒏𑓂𑒭𑓂𑒝
𑒮𑒱𑒗𑒪 = 𑒮𑒱𑒠𑓂𑒡 𑒦𑒹𑒪
𑒏𑒼𑒩𑒱 = 𑒥𑒻𑒩 𑒤𑒪
𑒮𑒮𑒢 = 𑒫𑒰𑒨𑒳
𑒡𑒢𑒱 = 𑒢𑒰𑒨𑒱𑒏𑒰
𑒁𑒧𑓂𑒥𑒩 = 𑒫𑒮𑓂𑒞𑓂𑒩
𑒩𑒹𑒯 = 𑒩𑒹𑒐𑒰
𑒩𑒓𑓂𑒑 = 𑒂𑒢𑒢𑓂𑒠
𑒁𑒪𑒏𑒰 = 𑒪𑒹𑒣
𑒧𑒮𑒱 = 𑒮𑒱𑒨𑒰𑒯𑒲
𑒮𑒧𑒩𑒰 = 𑒬𑓂𑒨𑒰𑒧𑒪
𑒏𑒔𑒼𑒩𑒰 = 𑒏𑒙𑒼𑒩𑒰
𑒣𑒯𑒴 = 𑒣𑓂𑒩𑒦𑒴
𑒮𑒮𑒡𑒩 = 𑒔𑒢𑓂𑒠𑓂𑒩𑒧𑒰
𑒧𑒢𑒼𑒦𑒫 = 𑒏𑒰𑒧𑒠𑒹𑒫
𑒮𑒅𑒠𑒰𑒧𑒱𑒢𑒲 = 𑒫𑒱𑒠𑓂𑒨𑒳𑒞
𑒏𑒩𑒱𑒢𑒱 = 𑒯𑒮𑓂𑒞𑒱𑒢𑒲
𑒫𑒨𑒢 = 𑒧𑒳𑒐
𑒣𑒩𑒱𑒧𑒪 = 𑒮𑒳𑒑𑒢𑓂𑒡𑒱
𑒞𑒢𑒩𑒳𑒔𑒱 = 𑒬𑒩𑒲𑒩𑒏 𑒑𑒼𑒩𑒰𑒃
𑒁𑒩𑒳𑒗𑒰𑒨𑒪 = 𑒍𑒗𑒩𑒰 𑒑𑒹𑒪
𑒥𑒱𑒪𑒰𑒮-𑒏𑒰𑒢𑒢 = 𑒣𑓂𑒩𑒧𑒠-𑒫𑒢
𑒢𑒱𑒫𑒱𑒪 = 𑒒𑒢𑒑𑒩
𑒫𑒱𑒯𑒱 = 𑒫𑒱𑒡𑒱
𑒢𑒱𑒘 = 𑒢𑒱𑒖
𑒫𑒱𑒠𑓂𑒩𑒳𑒧 𑒠𑒪𑒹 = 𑒧𑒾𑒮𑒩𑒲𑒏 𑒣𑒰𑒞𑒧𑒹
𑒞𑒱𑒯𑒳𑒁𑒢 = 𑒞𑓂𑒩𑒱𑒦𑒳𑒫𑒢
𑒧𑒪𑓂𑒪 = 𑒣𑒯𑒪𑒧𑒰𑒢
𑒯𑒰𑒙𑒏 = 𑒮𑒼𑒢𑒰
𑒟𑒧𑓂𑒦 = 𑒮𑓂𑒞𑒧𑓂𑒦
𑒔𑒱𑒏𑒳𑒩-𑒢𑒱𑒏𑒩 = 𑒏𑒹𑒬𑒣𑒰𑒬
𑒫𑒱𑒔𑒩𑒱𑒞 = 𑒢𑒱𑒁𑒧 𑒫𑒱𑒩𑒳𑒠𑓂𑒡
𑒏𑒫𑒩𑒲 = 𑒏𑒹𑒬𑒣𑒰𑒬
𑒔𑒰𑒧𑒩𑒱 = 𑒔𑒿𑒫𑒩 𑒑𑒰𑒨
𑒮𑒧𑓂𑒦𑒮𑒱 = 𑒮𑒧𑓂𑒦𑒰𑒭𑒝
𑒢 𑒖𑒰𑒮𑒱 = 𑒢𑒯𑒱 𑒏𑒋𑒪 𑒖𑒰 𑒮𑒏𑒻𑒕
𑒯𑒳𑒞𑒰𑒮𑒹 = 𑒁𑒑𑓂𑒢𑒱
𑒧𑒼 = 𑒯𑒧
𑒣𑒲𑒯𑒪𑒱 = 𑒗𑒰𑒿𑒣𑒱 𑒠𑒹𑒪𑒏
𑒣𑒲𑒯𑒱𑒞 = 𑒂𑒔𑓂𑒕𑒰𑒠𑒱𑒞
𑒏𑒳𑒯𑒳𑒏𑒱 = 𑒧𑒰𑒨𑒰𑒫𑒱𑒢𑒲
𑒖𑒳𑒛𑓃𑒰𑒨𑒥 = 𑒬𑒲𑒞𑒪 𑒏𑒩𑒥
𑒠𑒯𑒃 = 𑒖𑒛𑓃𑒰𑒨𑒥
𑒁𑒫𑒢𑒞 = 𑒢𑒲𑒔𑒰𑒿 𑒗𑒳𑒏𑒪
𑒥𑒰𑒩𑒪 = 𑒢𑒱𑒫𑒰𑒩𑒝 𑒏𑒋𑒪
𑒡𑒰𑒍𑒪 = 𑒠𑒾𑒑𑒱 𑒣𑒛𑓃𑒪
𑒣𑒮𑒰𑒯𑒱𑒧 = 𑒣𑓂𑒩𑒮𑒰𑒡𑒢
𑒤𑒳𑒪𑒑 = 𑒩𑒼𑒧𑒰𑓀𑒔
𑒥𑒪𑒰𑒁 = 𑒫𑒪𑒨
𑒣𑒹𑒐𑒪𑒱 = 𑒠𑒹𑒐𑒪
𑒥𑒹𑒜𑓃𑒪𑒱 = 𑒪𑒹𑒣𑒙𑒪
𑒟𑒲𑒩 = 𑒮𑓂𑒟𑒱𑒩
𑒣𑒳𑒕𑒮𑒱 = 𑒣𑒳𑒕𑒻𑒞 𑒕𑒯
𑒣𑒩𑒮 = 𑒮𑓂𑒣𑒩𑓂𑒬
𑒗𑒳𑒩𑒋 = 𑒫𑓂𑒨𑒰𑒏𑒳𑒪 𑒯𑒼𑒃𑒞 𑒁𑒕𑒱
𑒁𑒧𑓂𑒥𑒳𑒠 = 𑒧𑒹𑒒
𑒡𑒢𑓂𑒠𑒰 = 𑒮𑓀𑒠𑒹𑒯
𑒣𑒳𑒞𑒪𑒱 = 𑒧𑒴𑒩𑓂𑒞𑒱
𑒃𑒢𑓂𑒠𑒳 = 𑒔𑒢𑓂𑒠𑓂𑒩𑒧𑒰
𑒧𑒯𑒱 = 𑒣𑒵𑒟𑓂𑒫𑒲
𑒧𑒰𑒗 = 𑒧𑒡𑓂𑒨
𑒐𑒱𑒢 = 𑒏𑓂𑒭𑒲𑒝
𑒧𑒡𑒳 = 𑒣𑒳𑒭𑓂𑒣 𑒩𑒮
𑒅𑒣𑒹𑒐𑒱 = 𑒅𑒣𑒹𑒏𑓂𑒭𑒰 𑒏𑒩𑒏𑒹
𑒞𑒩𑒳𑒁𑒩 = 𑒞𑒩𑒳𑒫𑒩
𑒪𑒹𑒐 = 𑒅𑒪𑓂𑒪𑒹𑒐
𑒣𑒩𑒱𑒯𑒩𑒱 = 𑒕𑒼𑒛𑓃𑒏𑒩
𑒞𑒼𑒩𑒱𑒋 = 𑒞𑒼𑒯𑒩
𑒣𑒰𑒕𑒱𑒪𑒱 = 𑒣𑒰𑒕𑒰𑒿𑒏
𑒮𑒢𑒱 = 𑒮𑒠𑒵𑒬
𑒁𑒕𑒪𑒱𑒯𑒳𑒿 = 𑒯𑒧 𑒕𑒪𑒯𑒳𑒿
𑒕𑒰𑒖𑒞 = 𑒬𑒼𑒦𑒱𑒞 𑒯𑒼𑒋𑒞
𑒒𑒼𑒮𑒱𑒢𑒲 = 𑒑𑓂𑒫𑒰𑒪𑒱𑒢
𑒥𑒟𑒳 = 𑒫𑒮𑓂𑒞𑒳
𑒁𑒩𑒞𑒪 = 𑒁𑒢𑒳𑒩𑒏𑓂𑒞
𑒩𑒫 = 𑒯𑒪𑓂𑒪𑒰
𑒩𑒰𑒯𑒱 = 𑒩𑒰𑒡𑒰
𑒞𑒰𑒣𑒱𑒢𑒱 = 𑒖𑓂𑒫𑒰𑒪𑒰
𑒥𑒨𑒢𑒹 = 𑒫𑒰𑒝𑒲
𑒡𑒩𑒢𑒱 = 𑒣𑒵𑒟𑓂𑒫𑒲
𑒃𑒟𑒱 = 𑒋𑒏𑒩
𑒖𑒼𑒞𑒱𑒁 = 𑒖𑓂𑒨𑒼𑒞𑒱𑒭
𑒧𑒳𑒩𑒕𑒃 = 𑒧𑒴𑒩𑓂𑒔𑓂𑒕𑒰
𑒂𑒃𑒞𑒱 = 𑒁𑒡𑒲𑒢𑒞𑒰
𑒧𑒯𑒞𑒹 = 𑒧𑒯𑒰𑒫𑒞𑒮𑒿
𑒢𑒫 = 𑒗𑒳𑒏𑒻𑒞 𑒁𑒕𑒱
𑒋𑒯𑒼 = 𑒄
𑒥𑒙𑒧𑒰𑒩𑒲 = 𑒩𑒮𑓂𑒞𑒰𑒧𑒹 𑒪𑒳𑒙𑒢𑒰𑒃
𑒞𑒳𑒪𑒰𑒋𑒪 = 𑒥𑒜𑓃𑒰𑒍𑒪
𑒣𑒮𑒰𑒩 = 𑒠𑒼𑒏𑒰𑒢
𑒣𑒜𑓃𑒍𑓀𑒏 = 𑒥𑒼𑒯𑒢𑒲
𑒏𑒳𑓀𑒑𑒨𑒰𑒿 = 𑒑𑒧𑒰𑒩 (𑒏𑒳𑒑𑒰𑒧𑒏)
𑒂𑒖𑒱 = 𑒪𑒑𑒰 𑒠𑒹𑒥
𑒂𑒑 = 𑒁𑒓𑓂𑒑
𑒑𑒼𑒋 = 𑒢𑒳𑒏𑒰 𑒏𑒋
𑒃𑒢𑓂𑒠𑒳𑒧𑒳𑒐𑒲 = 𑒔𑒢𑓂𑒠𑓂𑒩𑒧𑒳𑒐𑒲
𑒞𑒯𑒳 = 𑒞𑒰𑒯𑒱 𑒣𑒩𑒮𑒿
𑒣𑒩𑒱𑒯𑒩𑒱𑒯𑒯 = 𑒞𑓂𑒨𑒰𑒑𑒱 𑒠𑒹𑒥
𑒮𑒰𑒩𑒲 = 𑒮𑒰𑒩𑒱𑒏𑒰
𑒮𑒹𑒔𑒰𑒢 = 𑒥𑒰𑒖
𑒦𑒰𑒧𑒱-𑒦𑒰𑒧𑒱 = 𑒦𑓂𑒩𑒧𑒝 𑒏𑒋
𑒫𑒱𑒩𑒛𑒰 = 𑒫𑒱𑒛𑒰𑒪
𑒮𑒳𑒩𑒞𑒹 = 𑒏𑒰𑒧-𑒏𑓂𑒩𑒲𑒛𑓃𑒰
𑒏𑒰𑒯𑒱𑒁 𑒁𑒫𑒡𑒰𑒩𑒱 = 𑒫𑒱𑒬𑓂𑒫𑒰𑒮𑒣𑒴𑒩𑓂𑒫𑒏 𑒏𑒯𑒻𑒞 𑒁𑒕𑒱
𑒁𑒢𑓂𑒞𑒩 𑒢𑒰𑒩𑒲 = 𑒢𑒰𑒩𑒲𑒏 𑒯𑒵𑒠𑒨
𑒩𑒼𑒐𑒋 = 𑒩𑒼𑒭
𑒑𑓀𑒖𑒋 = 𑒑𑓀𑒖𑒢
𑒩𑓀𑒖𑒋 = 𑒣𑓂𑒩𑒮𑒢𑓂𑒢
𑒮𑒰𑒯 = 𑒍
𑒞𑒩𑒰𑒮𑒹 = 𑒦𑒋
𑒣𑒩𑒳𑒭 = 𑒏𑒚𑒱𑒢
𑒮𑒼𑒮 = 𑒬𑒳𑒭𑓂𑒏
𑒔𑒹𑒞𑒢 = 𑒮𑒧𑒩𑓂𑒟
𑒂𑒟𑒱 = 𑒁𑒕𑒱
𑒮𑒰𑒩𑒲 = 𑒮𑓀𑒑
𑒠𑒴𑒭𑒪𑒱 = 𑒠𑒳𑓁𑒐
𑒢𑒱𑒧𑒰𑒪 = 𑒢𑒱𑒩𑓂𑒧𑒰𑒪𑓂𑒨
𑒁𑓀𑒮𑒳𑒏 = 𑒫𑒮𑓂𑒞𑓂𑒩
𑒫𑒰𑒿𑒪𑒦𑒳 = 𑒫𑒪𑓂𑒪𑒦
𑒢𑒚𑒪 = 𑒢𑒭𑓂𑒙
𑒣𑒩𑒥𑒼𑒡 = 𑒣𑓂𑒩𑒥𑒼𑒡
𑒣𑒰𑓀𑒑𑒳𑒩 = 𑒣𑒻𑒩𑒏 𑒂𑓀𑒑𑒳𑒩
𑒐𑒱𑒞𑒱 = 𑒏𑓂𑒭𑒱𑒞𑒱
𑒑𑒲𑒦 = 𑒑𑓂𑒩𑒲𑒫𑒰
𑒁𑒢𑒳𑒮𑒋 = 𑒣𑒬𑓂𑒔𑒰𑒞𑒰𑒣
𑒁𑒢𑒳𑒩𑒘𑓂𑒖𑒥 = 𑒯𑒧 𑒮𑒧𑓂𑒯𑒰𑒩𑒱 𑒮𑒏𑒥
𑒫𑒱𑒩𑒧𑒰𑒢𑒹 = 𑒫𑒱𑒩𑒰𑒧-𑒮𑓂𑒟𑒪
𑒋𑒯𑒼 𑒣𑒨 = 𑒞𑒰𑒯𑒱𑒣𑒩 𑒮𑒹𑒯𑒼
𑒖𑒰𑒩 = 𑒖𑒩𑒰𑒏𑒋
𑒢𑒐𑒞 = 𑒢𑒏𑓂𑒭𑒞𑓂𑒩
𑒖𑒳𑒑𑒳𑒞𑒱𑒯𑒱 = 𑒞𑒩𑓂𑒏𑒮𑒿
𑒠𑒼𑒯𑒰𑒋 = 𑒬𑒣𑒟
𑒩𑒓𑓂𑒑 = 𑒁𑒢𑒳𑒩𑒰𑒑
𑒑𑒩𑒳𑒁 = 𑒑𑒳𑒩𑒳𑒞𑒩
𑒣𑒱𑒮𑒳𑒢 = 𑒔𑒳𑒑𑒪𑒐𑒼𑒩
𑒁𑒩𑒳𑒗𑒍𑒯𑒪 = 𑒍𑒗𑒩𑒰𑒨𑒪
𑒏𑒘𑒼𑒢𑒏𑒿 = 𑒏𑒏𑒩 𑒆𑒣𑒩
𑒥𑒰𑒩𑒱 = 𑒥𑒔𑒰 𑒏𑒋
𑒤𑒳𑒪𑒡𑒰𑒪𑒱 = 𑒤𑒴𑒪 𑒡𑒰𑒩𑒝 𑒏𑒋
𑒏𑒻𑒞𑒫𑒹 = 𑒕𑒪𑒮𑒿
𑒁𑒯 = 𑒠𑒱𑒢
𑒮𑒣𑒖𑒞 = 𑒮𑒣𑒩𑒖
𑒫𑒟𑒳 = 𑒫𑒮𑓂𑒞𑒳
𑒧𑒼𑒢𑓂𑒞𑒱 = 𑒧𑒼𑒞𑒲
𑒡𑒧𑓂𑒧𑒱𑒪 = 𑒏𑒹𑒬𑒣𑒰𑒬
𑒡𑒼𑒋𑒪 = 𑒮𑓂𑒟𑒰𑒣𑒱𑒞 𑒏𑒋𑒪
𑒁𑒓𑓂𑒑𑒱𑒩𑒱 = 𑒁𑓀𑒑𑒲𑒏𑒰𑒩 𑒏𑒩𑒥
𑒣𑒳𑒢𑒱𑒧𑒰𑒿 = 𑒣𑒴𑒩𑓂𑒝𑒱𑒧𑒰
𑒫𑒱𑒦𑒱𑒢𑒰𑒫𑒋 = 𑒁𑒪𑒑 𑒏𑒋 𑒮𑒏𑒻𑒞 𑒁𑒕𑒱
𑒂𑒢𑒢 = 𑒧𑒳𑒐
𑒞𑒱𑒧𑒱𑒬𑒩𑒱 = 𑒁𑓀𑒡𑒏𑒰𑒩𑒏 𑒥𑒻𑒩𑒲
𑒔𑒰𑒪𑒏 = 𑒣𑓂𑒩𑒹𑒩𑒏
𑒥𑒧 = 𑒅𑒑𑒪𑒱 𑒩𑒯𑒪
𑒦𑒲𑒦 = 𑒦𑒂𑒫𑒼𑒢
𑒍𑒪 = 𑒁𑒢𑓂𑒞
𑒏𑒫𑒪 = 𑒑𑓂𑒩𑒰𑒮
𑒮𑒩𑒴𑒣 = 𑒮𑒞𑓂𑒨
𑒢𑒱𑒮𑒱𑒁𑒩 = 𑒢𑒱𑒬𑒰𑒔𑒩
𑒦𑒳𑒁𑒓𑓂𑒑𑒧 = 𑒦𑒳𑒖𑒓𑓂𑒑𑒧
𑒅𑒖𑒼𑒩 = 𑒣𑓂𑒩𑒏𑒰𑒬
𑒗𑒰𑒣 = 𑒛𑒳𑒧𑒢𑒰𑒃
𑒧𑒹𑓀𑒠𑒳𑒩 = 𑒒𑒢
𑒧𑒳𑒠𑒱𑒩 = 𑒧𑒹𑒒
𑒣𑒰𑒅𑒮 = 𑒣𑒰𑒫𑒮
𑒢𑒱𑒮𑒰 = 𑒢𑒱𑒬𑒰
𑒢𑒱𑒥𑒱𑒪 = 𑒢𑒱𑒫𑒱𑒛𑓃
𑒢𑒱𑒔𑒼𑒪 = 𑒮𑒰𑒛𑓃𑒲
𑒖𑒰𑒧𑒱𑒏 = 𑒣𑓂𑒩𑒯𑒩𑒲
𑒟𑒻𑒩𑒹𑒖 = 𑒮𑓂𑒟𑒻𑒩𑓂𑒨
𑒟𑒼𑒃𑒂 = 𑒮𑓂𑒟𑒰𑒣𑒨𑒱𑒞𑓂𑒫𑒰
𑒩𑒘𑒢𑒱 = 𑒩𑒰𑒞𑓂𑒩𑒱
𑒮𑒱𑒩𑒯𑒱 = 𑒬𑒼𑒦𑒰𑒧𑒹
𑒁𑒮𑒱𑒪𑒰𑒃 = 𑒧𑓂𑒪𑒰𑒢 𑒦𑓄 𑒑𑒹𑒪𑒰𑒃
𑒫𑒰𑒪𑒿𑒦𑒴 = 𑒮𑓂𑒫𑒰𑒧𑒲
𑒧𑒳𑒮𑒋 = 𑒔𑒼𑒩𑒱 𑒏𑒩𑒥𑒰𑒏 𑒪𑒹𑒪
𑒕𑒻𑒪𑒩𑒱 = 𑒕𑒪𑒱𑒨𑒰𑒏
𑒁𑒩𑒟𑒱𑒞 = 𑒨𑒰𑒔𑒢𑒰𑒮𑒿
𑒖𑒛𑓃𑒰𑒃𑒁 = 𑒚𑒝𑓂𑒛𑒰 𑒏𑒩𑒴
𑒫𑒱𑒩𑒞 𑒩𑒮 = 𑒖𑒏𑒩 𑒮𑓂𑒫𑒰𑒠 𑒐𑒞𑒧 𑒦𑒋 𑒑𑒹𑒪
𑒁𑒔𑒹𑒞𑒢 = 𑒧𑒴𑒩𑓂𑒐
𑒏𑒏𑒹 = 𑒏𑒱𑒋𑒏
𑒪𑒰𑒒𑒫 = 𑒁𑒢𑒰𑒠𑒩
𑒔𑒱𑒙𑒱-𑒑𑒳𑒛𑓃𑒹 = 𑒑𑒳𑒛𑓃-𑒔𑒳𑒙𑓂𑒙𑒲
𑒔𑒳𑒣𑒛𑓃𑒪𑒱 = 𑒥𑓂𑒨𑒰𑒖
𑒪𑒍𑒪𑒹 𑒪𑒼𑒟𑒹 = 𑒥𑒯𑒢𑓂𑒢𑒰 𑒏𑒩𑒪𑒼 𑒅𑒣𑒩𑒰𑒢𑓂𑒞
𑒗𑒰𑒪 = 𑒬𑒳𑒭𑓂𑒏
𑒠𑒩𑒢𑒱 = 𑒠𑒩𑒰𑒩𑒱
𑒁𑒮𑒹𑒐𑒱 = 𑒁𑒬𑒹𑒭
𑒁𑒮𑒯𑒞𑒱 = 𑒁𑒮𑒯𑒢𑒬𑒲𑒪
𑒞𑒞𑓂𑒢 = 𑒞𑒢𑓂𑒞𑓂𑒩
𑒦𑒰𑒗𑒯𑒱 = 𑒧𑒡𑓂𑒨
𑒐𑒲𑒢𑒲 = 𑒏𑓂𑒭𑒲𑒝
𑒗𑒣𑒰𑒫𑒯 = 𑒜𑓃𑒏𑒻𑒞 𑒯𑒼𑒋
𑒣𑒩𑒱𑒩𑒧𑓂𑒦𑒱 = 𑒂𑒪𑒱𑒓𑓂𑒑𑒢 𑒏𑒋
𑒤𑒳𑒖𑒪𑒱 = 𑒐𑒳𑒖𑒱 𑒑𑒹𑒪
𑒒𑒼𑒭𑒮𑒱 = 𑒒𑒼𑒭𑒝𑒰
𑒢𑒐𑒩 = 𑒢𑒐
𑒣𑒰𑒿𑒔 𑒣𑒰𑒿𑒔 𑒑𑒳𑒢 𑒠𑒮 𑒑𑒳𑒢 𑒔𑒾𑒑𑒳𑒢 𑒂𑒚 𑒠𑒳𑒑𑒳𑒢 = 𑓕*𑓕*𑓑𑓐*𑓔*𑓘*𑓒=𑓑𑓖𑓐𑓐𑓐
𑒢𑒐𑒩 = 𑒢𑒐
𑒕𑒰𑒿𑒠 = 𑒬𑒼𑒦𑒰
𑒯𑒱𑒨𑒰 = 𑒯𑒵𑒠𑒨
𑒮𑒠𑒨 = 𑒮𑒯𑒰𑒨
𑒏𑒰𑒢𑒳𑒏 = 𑒏𑒵𑒭𑓂𑒝𑒰𑒏
𑒢𑒱𑒩𑒮𑒰𑒍𑒪 = 𑒢𑒲𑒩𑒮 𑒏𑒋𑒪
𑒮𑒐𑒱𑒞𑒰 = 𑒮𑒰𑒏𑓂𑒭𑒱𑒞 𑒏𑒋𑒪
𑒏𑒩𑒫𑒰𑒪 = 𑒞𑒪𑒫𑒰𑒩
𑒏𑒰𑒿𑒜𑓃 = 𑒢𑒱𑒏𑒪𑒻𑒞 𑒁𑒕𑒱
𑒏𑒰𑒩 = 𑒏𑒰𑒩𑒲
𑒅𑒖𑒰𑒑𑒩𑒱 = 𑒅𑒖𑓂𑒖𑒩
𑒣𑒩𑒱𑒣𑒢𑓂𑒞𑒱𑒯𑒱 = 𑒣𑓂𑒩𑒞𑒱𑒣𑒏𑓂𑒭𑒲𑒏𑒹𑒿
𑒣𑒨𑒑𑒢𑓂𑒛 = 𑒣𑓂𑒩𑒾𑒜𑓃
𑒧𑒡𑒳𑒧𑒐𑒱𑒏𑒰 = 𑒧𑒡𑒳𑒧𑒏𑓂𑒭𑒱𑒏𑒰
𑒅𑒡𑒰𑒩𑒪 = 𑒅𑒠𑓂𑒡𑒰𑒩 𑒏𑒋𑒪
𑒪𑒰𑒑𑒩 = 𑒨𑒳𑒏𑓂𑒞
𑒣𑒳𑒩𑒯𑒩 = 𑒫𑒱𑒫𑒰𑒯 𑒁𑒫𑒮𑒩 𑒣𑒩 𑒧𑒰𑓀𑒑𑒪𑒱𑒏 𑒏𑒪𑒬
𑒧𑒢𑓂𑒠𑒰𑒏𑒱𑒢𑒲 = 𑒑𑒓𑓂𑒑𑒰𑒖𑒪
𑒏𑒹𑒮𑒳 = 𑒏𑒱𑓀𑒬𑒳𑒏
𑒫𑒱𑒟𑒳𑒩𑒪𑒯𑒳 = 𑒣𑒮𑒰𑒩𑒱 𑒠𑒹𑒪
𑒦𑒱𑒞𑒱 = 𑒠𑒲𑒫𑒰𑒩𑒱
𑒣𑒾𑒘𑒢𑒰𑒪 = 𑒏𑒧𑒪𑒢𑒰𑒪
𑒩𑒰𑒞 = 𑒪𑒰𑒪
𑒌𑒣𑒢 = 𑒁𑒩𑒱𑒣𑒢
𑒯𑒟𑒼𑒠𑒏 = 𑒯𑒮𑓂𑒞𑒼𑒠𑒏
𑒫𑒱𑒡𑒳 = 𑒩𑒮𑓂𑒞𑒰𑒏 𑒟𑒏𑒰𑒫𑒙𑒱
𑒏𑒢𑒋-𑒏𑒹𑒂 = 𑒔𑒧𑓂𑒣𑒰+𑒏𑒹𑒩𑒰 = 𑒏𑒢𑒏+𑒏𑒠𑒪𑒲
𑒖𑒻𑒞𑒳𑒏 = 𑒠𑒯𑒹𑒖
𑒛𑒱𑒚𑒱 = 𑒠𑒵𑒭𑓂𑒙𑒱
𑒞𑒳𑒪𑒃𑒪𑒱𑒯𑒳𑒿 = 𑒬𑒲𑒒𑓂𑒩𑒞𑒰𑒮𑒿
𑒁𑒢𑒳𑒥𑒢𑓂𑒡 = 𑒪𑒑𑒍𑒢𑒰𑒃
𑒥𑒼𑒪 𑒕𑒛𑓃 = 𑒧𑒱𑒟𑓂𑒨𑒰𑒫𑒰𑒠𑒲
𑒧𑒖𑓂𑒖𑒱 = 𑒧𑒖𑓂𑒖𑒢 𑒏𑒋
𑒫𑒱𑒟𑒩𑒍 = 𑒣𑒮𑒩𑒱 𑒖𑒰𑒨
𑒣𑒰𑒛𑓃𑒩𑒱 = 𑒑𑒳𑒪𑒰𑒥 = 𑒣𑒰𑒙𑒪𑒲
𑒦𑒼𑒣𑒞𑒱 = 𑒯𑒧𑒩𑒰 𑒪𑒹𑒪
𑒫𑒰𑒅𑒪𑒱 = 𑒥𑒞𑒰𑒯𑒱
𑒫𑒱𑒡𑒳𑒢𑓂𑒞𑒳𑒠 = 𑒩𑒰𑒯𑒳
𑒮𑒹𑒩𑒲 = 𑒬𑒩𑒝𑒰𑒩𑓂𑒟𑒲
𑒣𑒩𑒦𑒵𑒞𑒏 = 𑒏𑒼𑒏𑒱𑒪
𑒧𑒞𑒹𑒿 = 𑒧𑒢𑓂𑒞𑓂𑒩
𑒏𑒱 𑒩𑒯𑒮𑒱 𑒥𑒼𑒩𑒱 = 𑒏𑒲 𑒯𑒰𑒮𑓂𑒨𑒧𑒹 𑒥𑒰𑒖𑒱 𑒩𑒯𑒪 𑒕𑒲
𑒥𑒰𑒪𑒯𑒱 𑒞𑒼𑒩𑒱 = 𑒁𑒯𑒰𑒿𑒏 𑒣𑓂𑒩𑒹𑒧𑒱𑒏𑒰𑒏𑒹𑒿
𑒦𑒩 𑒥𑒰𑒠𑒩 = 𑒧𑒹𑒒𑒮𑒿 𑒦𑒩𑒪
𑒗𑒧𑓂𑒣𑒱 = 𑒩𑒯𑒱-𑒩𑒯𑒱 𑒖𑒼𑒩𑒮𑒿
𑒮𑒒𑒢𑒹 𑒐𑒩 = 𑒞𑒲𑒫𑓂𑒩 𑒂 𑒒𑒢 𑒐𑒩
𑒛𑒰𑒯𑒳𑒏𑒱 = 𑒖𑒼𑒩𑒮𑒿
𑒟𑒹𑒒𑒰 = 𑒙𑒹𑒏 𑒏𑒋
𑒣𑒐 = 𑒣𑒏𑓂𑒭
𑒣𑒱𑒂𑒘𑒹 = 𑒣𑓂𑒩𑒱𑒨𑒞𑒧
𑒣𑒓𑓂𑒏𑒰 = 𑒪𑒹𑒣
𑒞𑒟𑒳𑒯𑒳 = 𑒍𑒯𑒱𑒧𑒹 𑒮𑒹𑒯𑒼
𑒠𑒩 = 𑒁𑒣𑒴𑒩𑓂𑒫
𑒁𑒣𑒠 = 𑒥𑒱𑒢𑒰 𑒏𑒰𑒩𑒝𑒏
𑒮𑒰𑒞𑒲 = 𑒞𑒲𑒫𑓂𑒩 𑒫𑒹𑒠𑒢𑒰
𑒁𑒫𑒟𑒰𑒘𑒹 = 𑒁𑒫𑒮𑓂𑒟𑒰
𑒣𑒮𑒰𑒃𑒪 = 𑒣𑒮𑒰𑒩𑒪
𑒩𑒰𑒮𑒹 = 𑒩𑒼𑒭
𑒥𑒰𑒪𑒦𑒳 = 𑒫𑒪𑓂𑒪𑒦
𑒁𑒋𑒞 = 𑒁𑒡𑒲𑒢
𑒮𑒣𑒴𑒢𑒹 = 𑒮𑒧𑓂𑒣𑒴𑒩𑓂𑒝
𑒠𑒱𑒑𑒢𑓂𑒞𑒩 = 𑒠𑒴𑒩 𑒠𑒹𑒬𑒧𑒹
𑒁𑒩𑒳𑒗𑒰𑒋 = 𑒍𑒗𑒩𑒪
𑒂𑒡𑒱𑒢 = 𑒁𑒡𑒲𑒢
𑒣𑒪𑒪𑒱 = 𑒦𑒹𑒪
𑒐𑒹𑒘𑒼𑒥 = 𑒏𑓂𑒭𑒧𑒰
𑒖𑒪 𑒂𑒖𑒳𑒩𑒱 = 𑒖𑒪𑒰𑒘𑓂𑒖𑒪𑒱
𑒮𑒳𑒮𑒹𑒩𑒰 = 𑒮𑒳𑒢𑓂𑒠𑒩 𑒂𑒬𑓂𑒩𑒨
𑒑𑒼𑒋 = 𑒢𑒳𑒏𑒰 𑒏𑒋
𑒮𑒧𑓂𑒦𑓂𑒩𑒧 = 𑒁𑒞𑒩𑓂𑒏𑒱𑒞
𑒏𑒩𑒰𑒛𑒯𑒰𑒩 = 𑒏𑒛𑓃𑒳𑒂𑒩 (𑒞𑒏𑒛𑓃𑒰 𑒣𑒏𑒛𑓃𑒱 𑒨𑒧𑒳𑒢𑒰 𑒣𑒰𑒩 𑒏𑒩𑒥)
𑒪𑒯𑒳-𑒪𑒯𑒳 𑒂𑒐𑒩𑒹 = 𑒪𑒒𑒳-𑒪𑒒𑒳 𑒁𑒏𑓂𑒭𑒩
𑒞𑒰𑒧𑒩𑒮 = 𑒏𑒧𑒪
𑒒𑒢𑒮𑒰𑒩 = 𑒏𑒩𑓂𑒣𑒴𑒩
𑒫𑒹𑒣𑒟𑒳 = 𑒏𑒧𑓂𑒣
𑒧𑒮𑒵𑒝 = 𑒔𑒱𑒏𑓂𑒏𑒢
𑒮𑒳𑒠𑒞𑒱 = 𑒮𑒳𑒢𑓂𑒠𑒩 𑒠𑒰𑒿𑒞𑒥𑒰𑒪𑒲
𑒮𑒳𑒞𑒱 = 𑒬𑓂𑒩𑒳𑒞𑒱
𑒖𑒞𑒱 = 𑒖𑒞𑒹𑒏
𑒒𑒧𑒱𑒁 = 𑒤𑒴𑒿𑒏𑒪 𑒖𑒰𑒃𑒞 𑒁𑒕𑒱
𑒂𑒢𑒃𑒞𑒱 = 𑒣𑒩𑒫𑒬𑒞𑒰
𑒠𑒲𑒥 = 𑒬𑒣𑒟
𑒥𑒛𑓃𑒃 = 𑒥𑒯𑒳𑒞
𑒠𑒹𑒫 𑒠𑒹𑒨𑒰𑒮𑒱𑒢𑒱 = 𑒗𑒰𑒛𑓃-𑒤𑒴𑒿𑒏 𑒏𑒩𑒋 𑒥𑒰𑒪𑒲 𑒮𑓂𑒞𑓂𑒩𑒲
𑒖𑒙𑒱𑒪𑒰 = 𑒏𑒩𑓂𑒏𑒬𑒰
𑒤𑒳𑒏𑒩𑒱 = 𑒔𑒱𑒏𑒩𑒱
𑒥𑒯𑒳𑒩𑒱 = 𑒣𑒳𑒞𑓂𑒩𑒫𑒡𑒴
𑒁𑒓𑓂𑒑𑒰 = 𑒔𑒱𑒢𑓂𑒯
𑒥𑒹𑒮𑒩 = 𑒢𑒰𑒏𑒏 𑒂𑒦𑒴𑒭𑒝
𑒨𑒢𑓂𑒞𑓂𑒩𑒱𑒨𑒰 = 𑒫𑒲𑒝𑒰 𑒥𑒖𑒰𑒥𑒋 𑒥𑒪𑒰
𑒨𑒢𑓂𑒞𑓂𑒩 = 𑒫𑒲𑒝𑒰
𑒤𑒼𑒙𑒰 = 𑒚𑒲𑒏𑒰
𑒮𑒧𑒞 = 𑒮𑒧𑓂𑒧𑒞
𑒧𑒾𑒪𑒱 = 𑒧𑒮𑓂𑒞𑒏𑒧𑒹
𑒧𑒳𑒮𑒩𑒹𑒿 = 𑒧𑒴𑒮𑒪
𑒖𑒹𑒧𑒰𑒍𑒫 = 𑒦𑒼𑒖𑒢
𑒢𑒫𑒃𑒞𑒹 = 𑒅𑒞𑒩𑒻𑒞
𑒣𑒛𑒱𑒔𑒰𑒿 = 𑒣𑒙𑒱𑒂
𑒧𑒰𑒛𑓃𑒫 = 𑒧𑒛𑓃𑒥𑒰
𑒅𑒑𑒰𑒩𑒪 = 𑒒𑒹𑒩𑒱𑒏𑒋 𑒣𑒏𑒛𑓃𑒥
𑒂𑒿𑒖𑒪 = 𑒁𑓀𑒖𑒢
𑒛𑒰𑒜𑓃𑒪 = 𑒠𑒑𑓂𑒡 𑒏𑒋𑒪
𑒑𑒾𑒯 = 𑒐𑒼𑒯/ 𑒑𑒳𑒤𑒰
𑒥𑒱𑒪𑒳𑒫𑒱𑒁 = 𑒥𑒰𑒿𑒙𑒪 𑒖𑒰𑒋
𑒧𑒅𑒪 = 𑒧𑒳𑒏𑒳𑒙
𑒛𑒰𑒜𑓃𑒞𑒱 = 𑒖𑒩𑒱 𑒖𑒰𑒨𑒞
𑒬𑓂𑒧𑒬𑓂𑒩𑒳 = 𑒠𑒰𑒜𑓃𑒲 (𑒧𑒳𑒿𑒯 𑒥𑒪𑒰, 𑒐𑒰𑒋 𑒥𑒪𑒰 𑒢𑒯𑒱)
𑒁𑒡𑒿𑒑𑒿 = 𑒁𑒩𑓂𑒡𑒰𑒓𑓂𑒑
𑒑𑒩𑒳𑒁 = 𑒁𑒡𑒱𑒏
𑒁𑒦𑒩𑒢 = 𑒣𑒯𑒱𑒩𑒥𑒰𑒏 𑒫𑒮𑓂𑒞𑓂𑒩
𑒥𑒛𑓃𑒰𑒫 = 𑒣𑓂𑒩𑒬𑓀𑒮𑒰
𑒞𑒾𑒿 = 𑒞𑒟𑒰𑒣𑒱
𑒢𑒱𑒮𑒰𑒏𑒩 = 𑒔𑒢𑓂𑒠𑓂𑒩𑒧𑒰
𑒮𑒩𑒱𑒮 = 𑒮𑒠𑒵𑒬
𑒞𑒰𑓀𑒞𑒪 = 𑒅𑒞𑓂𑒞𑒣𑓂𑒞
𑒮𑒻𑒏𑒞 = 𑒥𑒰𑒪𑒴
𑒯𑒥 = 𑒯𑒼𑒋𑒞
𑒢𑒱𑒡𑒳𑒫𑒢 = 𑒮𑓀𑒦𑒼𑒑
𑒂𑒩𑒰 = 𑒂𑒢
𑒏𑒯𑒰𑒍𑒮𑒱 = 𑒏𑒯𑒥𑒻𑒞 𑒕𑒟𑒱
𑒩𑒰𑒖𑒧𑒩𑒰𑒪 = 𑒩𑒰𑒖𑒯𑓀𑒮
𑒮𑒰𑒩𑒓𑓂𑒑 = 𑒯𑒰𑒟𑒲
𑒮𑒰𑒩𑒓𑓂𑒑𑒫𑒠𑒢 = 𑒑𑒝𑒹𑒬
𑓓. 𑒩𑒮𑒧𑒨 𑒏𑒫𑒱 𑒔𑒞𑒳𑒩 𑒔𑒞𑒳𑒩𑒦𑒳𑒖 𑒬𑒥𑓂𑒠𑒰𑒫𑒪𑒲
𑒩𑒮𑒧𑒨 𑒏𑒫𑒱 𑒔𑒞𑒳𑒩 𑒔𑒞𑒳𑒩𑒦𑒳𑒖- 𑒫𑒱𑒠𑓂𑒨𑒰𑒣𑒞𑒱 𑒏𑒰𑒪𑒲𑒢 𑒏𑒫𑒱। 𑒧𑒰𑒞𑓂𑒩 𑓑𑓗 𑒙𑒰 𑒣𑒠𑓂𑒨 𑒅𑒣𑒪𑒥𑓂𑒡, 𑒧𑒳𑒠𑒰 𑒄 𑓑𑓗 𑒙𑒰 𑒣𑒠 𑒯𑒱𑒢𑒏𑒩 𑒏𑒲𑒩𑓂𑒞𑒱𑒏𑒹𑒿 𑒁𑒏𑓂𑒭𑒨 𑒩𑒐𑒥𑒰𑒏 𑒪𑒹𑒪 𑒣𑒩𑓂𑒨𑒰𑒣𑓂𑒞 𑒁𑒕𑒱।
𑒫𑒱𑒯𑒱 - 𑒫𑒱𑒡𑒰𑒞𑒰
𑒮𑒘𑒰𑒢𑒱 - 𑒨𑒳𑒫𑒞𑒲
𑒞𑒢𑒳 - 𑒫𑒨𑒬, 𑒠𑒹𑒯
𑒂𑒿𑒞𑒩 - 𑒁𑒢𑓂𑒞𑒩, 𑒦𑒲𑒞𑒩
𑒑𑒼𑒋 - 𑒢𑒳𑒏𑒰𑒋𑒥
𑒫𑒹𑒏𑒞 - 𑒫𑓂𑒨𑒏𑓂𑒞
𑒑𑒹𑒯𑒰 - 𑒚𑒰𑒧
𑒣𑒩𑒱 - 𑒣𑓂𑒩𑒏𑒰𑒩𑒹
𑒫𑒱𑒩𑒯𑒰𑒢𑒪 - 𑒫𑒱𑒩𑒯𑒏 𑒂𑒑𑒱
𑒏𑒰𑒿𑒞𑒲 - 𑒏𑒰𑒢𑓂𑒞𑒱
𑒡𑒧𑒱𑒞 - 𑒡𑒱𑒣𑒰𑒍𑒪
𑒢𑒱𑒩𑒴𑒣𑒋 - 𑒢𑒱𑒩𑒲𑒏𑓂𑒭𑒝
𑒣𑒩𑒱𑒯𑒩 - 𑒅𑒣𑒹𑒏𑓂𑒭𑒰
𑒁𑒔𑒱𑒩𑒯𑒱𑒿 - 𑒁𑒪𑓂𑒣𑒏𑒰𑒪𑒯𑒱
𑒫𑒰𑒧𑒹 - 𑒣𑓂𑒩𑒞𑒱𑒏𑒴𑒪
𑒢𑒱𑒁 - 𑒢𑒱𑒖, 𑒁𑒣𑒢
𑒧𑒪𑒨𑒖 - 𑒔𑒰𑒢𑒢
𑒮𑒨𑒰𑒢𑒱 - 𑒫𑒱𑒩𑒯 𑒫𑒱𑒠𑒑𑓂𑒡𑒰 𑒢𑒰𑒨𑒱𑒏𑒰
𑒡𑒢𑒱 - 𑒡𑒢𑓂𑒨𑒰-𑒢𑒰𑒨𑒱𑒏𑒰
𑒯𑒹𑒩𑒮𑒱 - 𑒢𑒹𑒯𑒰𑒩𑒻𑒞
𑒯𑒩𑒭𑒱 - 𑒯𑒩𑓂𑒭𑒱𑒞 𑒦𑒋
𑒣𑒩𑒱𑒯𑒩𑒱 - 𑒧𑒹𑒙𑒰𑒨
𑒢𑒐𑒞 - 𑒞𑒩𑒹𑒑𑒝
𑒧𑒡𑒳𑒩𑒱-𑒠𑒪 - 𑒅𑒦𑒨-𑒍𑒭𑓂𑒚
𑒧𑒢𑒮𑒱𑒖 - 𑒏𑒰𑒧𑒠𑒹𑒫
𑒁𑒫𑒢𑒞 - 𑒢𑒲𑒔𑒰𑒿 𑒗𑒳𑒏𑒢𑒰𑒃
𑒯𑒳𑒞𑒰𑒮𑒢 - 𑒖𑓂𑒫𑒰𑒪𑒰
𑓔. 𑒥𑒠𑓂𑒩𑒲𑒢𑒰𑒟 𑒗𑒰 𑒬𑒥𑓂𑒠𑒰𑒫𑒪𑒲
𑒧𑒱𑒪𑒱𑒢 - 𑒧𑒡𑒳𑒧𑒏𑓂𑒐𑒲, 𑒦𑒾𑒩𑒰
𑒩𑒮𑒰𑒪 - 𑒂𑒧𑒏 𑒑𑒰𑒕, 𑒏𑒳𑒮𑒱𑒨𑒰𑒩
𑒁𑒞𑒢𑓂𑒠𑓂𑒩 - 𑒮𑒰𑒫𑒡𑒰𑒢, 𑒖𑒰𑒑𑒩𑒴𑒏
𑒐𑒠𑓂𑒨𑒼𑒞 - 𑒦𑒑𑒖𑒼𑒑𑒢𑒲
𑒠𑒳𑒩𑓂𑒫𑒰𑒩 - 𑒏𑒚𑒱𑒢
𑒨𑒞𑒱 - 𑒣𑓂𑒩𑒞𑒱𑒥𑓀𑒡, 𑒖𑒞𑒹𑒏 𑒥𑒹𑒩
𑒁𑒔𑒪𑒮𑒹𑒞𑒳 - 𑒁𑒠𑒵𑒭𑓂𑒙𑒪𑒹𑒐
𑒫𑒱𑒣𑒱𑒢 - 𑒖𑓀𑒑𑒪
𑒞𑒩𑒝𑒱 - 𑒢𑒰𑒍
𑒁𑒫𑒰𑒧 - 𑒠𑒯𑒱𑒢
𑒑𑒩𑒳𑒛𑓃𑒏𑒹𑒞𑒳 - 𑒫𑒱𑒭𑓂𑒝𑒳
𑒥𑒾𑒛𑓃𑒱 - 𑒅𑒢𑓂𑒧𑒞𑓂𑒞
𑒞𑒳𑒭𑒰𑒩 - 𑒬𑒲𑒞𑒪
𑒥𑓂𑒩𑒯𑓂𑒧𑒩𑓂𑒭𑒱𑒮𑒳𑒞 - 𑒏𑒬𑓂𑒨𑒣
𑒫𑒰𑒩𑒳𑒝𑒲 - 𑒣𑒬𑓂𑒔𑒱𑒧 𑒠𑒱𑒬𑒰
𑒏𑒬𑓂𑒨𑒣 - 𑒧𑒳𑒢𑒱 𑒍 𑒧𑒠𑓂𑒨𑒣
𑒣𑓂𑒩𑒞𑒲𑒔𑒲 - 𑒣𑒬𑓂𑒔𑒱𑒧 𑒠𑒱𑒬𑒰
𑒏𑒳𑒪𑒰𑒨 - 𑒐𑒼𑓀𑒞𑒰
𑒮𑒰𑒿𑒗 - 𑒮𑒧𑒰𑒡𑒱 𑒫𑒰 𑒮𑒧𑒳𑒔𑓂𑒔𑒨
𑒖𑒲𑒫-𑒁𑒦𑒱𑒠𑒰𑒢 - 𑒢𑒰𑒧
𑒏𑒧𑒰𑒢 - 𑒡𑒢𑒳𑒭
𑒫𑒱𑒡𑒳 - 𑒔𑒢𑓂𑒠𑓂𑒩𑒧𑒰
𑒯𑒨 - 𑒏𑒢𑒹𑒏
𑒢𑒧𑒱 - 𑒢𑒧𑒮𑓂𑒏𑒰𑒩
𑒢𑒲𑒩𑒰𑒖𑒢 - 𑒣𑓂𑒩𑒰𑒞𑓁𑒏𑒰𑒪𑒏 𑒂𑒩𑒞𑒲
𑒧𑒰𑒢𑒩 - 𑒧𑒵𑒠𑒓
𑒏𑒰𑒯𑒪 - 𑒫𑒰𑒠𑓂𑒨𑒫𑒱𑒬𑒹𑒭
𑒔𑒞𑒳𑒫𑒱𑒡 - 𑒂𑒓𑓂𑒑𑒱𑒏, 𑒫𑒰𑒔𑒱𑒏, 𑒮𑒰𑒞𑓂𑒫𑒱𑒏, 𑒂𑒯𑒰𑒩𑓂𑒨
𑒅𑒛𑓃𑒳𑒑𑒝 - 𑒞𑒩𑒹𑒑𑒝
𑒠𑒻𑒫𑒖𑓂𑒘 - 𑒖𑓂𑒨𑒼𑒞𑒱𑒭𑒲
𑒣𑒰𑒙𑒪 - 𑒪𑒰𑒪
𑒣𑒰𑒙𑒪 - 𑒫𑓂𑒨𑒰𑒣𑓂𑒞 𑒦𑒹𑒪
𑒁𑒫𑒱𑒠𑓂𑒨𑒰 - 𑒁𑒖𑓂𑒘𑒰𑒢
𑒁𑒡𑒱𑒞𑓂𑒨𑒏𑒰 - 𑒣𑒩𑓂𑒫𑒞𑒏 𑒆𑒣𑒩𑒏 𑒠𑒹𑒬
𑒏𑒳𑒬𑒝𑓂𑒛𑒱𑒏𑒰 - 𑒫𑒹𑒠𑒱𑒮𑒧𑓂𑒧𑒰𑒩𑓂𑒖𑒢𑒰𑒠𑒱
𑒧𑒹𑒡𑒰 - 𑒡𑒰𑒩𑒝𑒰𑒫𑒞𑒲 𑒥𑒳𑒠𑓂𑒡𑒱
𑒮𑒧𑓂𑒦𑒰𑒩 - 𑒮𑒰𑒧𑒑𑓂𑒩𑒲
𑒏𑒖𑓂𑒖𑒪 - 𑒏𑒰𑒩𑒲 (𑒏𑒰𑒖𑒩)
𑒦𑒴𑒨𑒮𑒲 - 𑒋𑒏 𑒣𑓂𑒩𑒏𑒰𑒩𑒏 𑒠𑒏𑓂𑒭𑒱𑒝𑒰
𑒠𑒲𑒚𑒱 - 𑒠𑒵𑒭𑓂𑒙𑒱
𑒢𑒵𑒣𑒠𑒰𑒩 - 𑒩𑒰𑒢𑒲
𑒣𑒩𑒱𑒔𑒰𑒩 - 𑒣𑒩𑒱𑒔𑒩𑓂𑒨𑒰
𑒤𑒳𑒪𑒯𑒩𑒰 - 𑒏𑒼𑒜𑓃𑒱𑒪𑒰𑒏 𑒗𑒰𑒛𑓃
𑒩𑒰𑒖𑒲𑒫 - 𑒏𑒧𑒪
𑒧𑒳𑒠𑒫𑒰𑒩𑒱 - 𑒂𑒢𑒢𑓂𑒠𑒏 𑒢𑒼𑒩
𑒞𑒵𑒭 - 𑒞𑒵𑒭𑓂𑒝𑒰
𑒣𑒰𑒘𑓂𑒔𑒖𑒢𑓂𑒨 - 𑒬𑒓𑓂𑒐
𑒖𑒑𑒞𑓂𑒞𑒰𑒞𑒰𑒏 - 𑒫𑒱𑒭𑓂𑒝𑒳
𑒣𑓂𑒩𑒞𑓂𑒨𑒦𑒱𑒫𑒰𑒠𑒢 - 𑒣𑓂𑒩𑒞𑒱𑒣𑓂𑒩𑒝𑒰𑒧
𑒖𑒴𑒙𑒱𑒏𑒰 - 𑒬𑒱𑒐𑒰
𑒑𑒼𑒋 - 𑒢𑒳𑒏𑒰𑒋
𑒑𑒳𑒩𑒳-𑒮𑒢𑓂𑒞𑒼𑒐 - 𑒠𑒏𑓂𑒭𑒱𑒝𑒰𑒠𑓂𑒩𑒫𑓂𑒨
𑒁𑒫𑒮𑒱𑒞 - 𑒣𑒴𑒩𑓂𑒝
𑒬𑓂𑒩𑒳𑒞𑒱𑒫𑒹𑒡 - 𑒏𑒩𑓂𑒝𑒫𑒹𑒡
𑒣𑓂𑒩𑒦𑒰𑒏 - 𑒣𑓂𑒩𑒞𑒱𑒦𑒰
𑒑𑒳𑒩𑒳-𑒬𑒳𑒠𑓂𑒡𑒱 - 𑒥𑒵𑒯𑒮𑓂𑒣𑒞𑒱𑒏 𑒬𑒳𑒠𑓂𑒡𑒱
𑒎𑒛𑓃𑒱 - 𑒂𑒑𑓂𑒩𑒯𑒫𑒱𑒬𑒹𑒭
𑒬𑒱𑒫𑒱𑒏𑒰 - 𑒣𑒰𑒪𑒏𑒲
𑒣𑒴𑒩𑓂𑒫𑒰𑒓𑓂𑒑-𑒏𑒵𑒞𑓂𑒨 - 𑒧𑒰𑒞𑒵𑒏𑒰𑒣𑒴𑒖𑒰𑒠𑒱
𑒁𑒠𑒧𑓂𑒦 - 𑒢𑒱𑒬𑓂𑒕𑒪
𑒫𑒻𑒖𑒨𑒢𑓂𑒞 - 𑒃𑒢𑓂𑒠𑓂𑒩𑒏 𑒏𑒼𑒚𑒰
𑒏𑒾𑒬𑒹𑒨 𑒫𑒮𑒢 - 𑒣𑒰𑒙𑒏 𑒫𑒮𑓂𑒞𑓂𑒩
𑒦𑒏𑓂𑒭𑓂𑒨 𑒔𑒞𑒳𑒩𑓂𑒫𑒱𑒡 - 𑒦𑒏𑓂𑒭𑓂𑒨-𑒦𑒰𑒞 𑒂𑒠𑒱 𑒦𑒼𑒖𑓂𑒨 𑒪𑒰𑒥𑒰 𑒂𑒠𑒱, 𑒪𑒹𑒯𑓂𑒨 𑒔𑒙𑒢𑒲
𑒂𑒠𑒱, 𑒔𑒼𑒮𑓂𑒨 𑒂𑒧𑒰 𑒂𑒠𑒱
𑒢𑒲𑒫𑒰𑒩 - 𑒍𑒃𑒩𑒲
𑒁𑒢𑒳𑒞𑒰𑒣 - 𑒣𑒬𑓂𑒔𑒰𑒞𑒰𑒣
𑒥𑒠𑓂𑒡𑒏𑒩 - 𑒏𑒵𑒣𑒝
𑒫𑒱𑒧𑒞𑒱 - 𑒫𑒱𑒩𑒏𑓂𑒞𑒱
𑒫𑒻𑒧𑒞𑓂𑒨 - 𑒧𑒞𑒦𑒹𑒠
𑒣𑓂𑒩𑒮𑒰𑒠 - 𑒣𑓂𑒩𑒮𑒢𑓂𑒢𑒞𑒰
𑒁𑒢𑒳𑒩𑒼𑒡 - 𑒩𑒼𑒔
𑒂𑒩𑓂𑒨 - 𑒬𑓂𑒩𑒹𑒭𑓂𑒚
𑒖𑒰𑒔𑒪 - 𑒣𑒩𑒲𑒏𑓂𑒭𑒱𑒞
𑒮𑒳𑒦𑒑𑒣𑓂𑒩𑒏𑓂𑒩𑒱𑒨 - 𑒮𑒳𑒨𑒬, 𑒮𑒳𑒫𑓂𑒨𑒫𑒯𑒰𑒩
𑒁𑒔𑒪𑒹𑒬 - 𑒦𑒴𑒣𑒞𑒱
𑒥𑒱𑒯𑒰𑒢 - 𑒣𑓂𑒩𑒦𑒰𑒞
𑒣𑒙𑓂𑒙𑒣𑒙𑒮𑒰𑒩 - 𑒅𑒞𑓂𑒞𑒧 𑒣𑒰𑒙𑒏 𑒫𑒮𑓂𑒞𑓂𑒩
𑒫𑒱𑒦𑒴𑒞𑒱𑒫𑒞 - 𑒌𑒬𑓂𑒫𑒩𑓂𑒨
𑒋𑒏𑒞𑒰𑒢 - 𑒋𑒏𑒰𑒑𑓂𑒩
𑒫𑒢𑒲 - 𑒫𑒰𑒢𑒣𑓂𑒩𑒮𑓂𑒟
𑒎𑒩𑓂𑒡𑓂𑒫𑒠𑒻𑒯𑒱𑒏 - 𑒣𑒩𑒪𑒼𑒏𑒼𑒣𑒏𑒰𑒩𑒏 𑒬𑓂𑒩𑒰𑒠𑓂𑒡
𑒦𑒼𑒖-𑒍𑒖 - 𑒏𑒵𑒣𑒝𑒞𑒰
𑒔𑒘𑓂𑒔𑒩𑒲𑒏 - 𑒦𑓂𑒩𑒧𑒩
𑒮𑒼𑒯𑒪 - 𑒬𑒼𑒦𑒱𑒞 𑒦𑒹𑒪
𑒕𑒰𑒢 - 𑒏𑒪𑒓𑓂𑒏
𑒁𑒠𑒏𑓂𑒭𑒱𑒝 - 𑒣𑓂𑒩𑒞𑒱𑒏𑒴𑒪
𑒃𑒢𑓂𑒠𑒲𑒫𑒩 - 𑒢𑒲𑒪 𑒏𑒧𑒪
𑒏𑒲𑒩 - 𑒮𑒴𑒑𑒰
𑒁𑒏𑒰𑒢𑒪 - 𑒮𑒳𑒢𑒪
𑒣𑒼𑒭𑒏-𑒠𑓂𑒫𑒹𑒭𑒏 - 𑒣𑒼𑒮𑒢𑒱𑒯𑒰𑒩 (𑒏𑒾𑒂𑒏) 𑒠𑓂𑒫𑒹𑒭𑒲
𑒬𑓂𑒧𑒬𑓂𑒩𑒳 - 𑒠𑒰𑒜𑓃𑒲-𑒧𑒼𑒕
𑒬𑒻𑒫𑒰𑒪-𑒪𑒞𑒱𑒏𑒰 - 𑒮𑒹𑒧𑒰𑒩𑒏 𑒪𑒞𑓂𑒞𑒲
𑒏𑒳𑒝𑓂𑒛𑒪𑒱𑒞 - 𑒪𑒣𑒹𑒙𑒪
𑒏𑒩𑓂𑒝𑒱𑒏𑒰𑒩 - 𑒏𑒢𑒻𑒪
𑒑𑓂𑒩𑒲𑒫𑒰 - 𑒑𑒩𑒠𑒢𑒱
𑒃𑒢𑓂𑒠𑓂𑒩𑒰𑒨𑒳𑒡 - 𑒫𑒖𑓂𑒩
𑒞𑒧𑒰𑒪-𑒮𑒰𑒪 - 𑒮𑒰𑒿𑒐𑒳
𑒬𑒧𑓂𑒣𑒰 - 𑒫𑒱𑒠𑓂𑒨𑒳𑒪𑓂𑒪𑒞𑒰
𑒮𑒯𑒏𑒰𑒩 - 𑒂𑒧
𑒫𑒏𑒳𑒪𑒧𑒳𑒏𑒳𑒪 - 𑒦𑒰𑒪𑒮𑒩𑒲𑒏 𑒏𑒪𑒲
𑒣𑒐𑒰𑒢 - 𑒣𑒰𑒟𑒩
𑒠𑒧𑒢𑒏 - 𑒠𑒼𑒢𑒰𑒤𑒴𑒪
𑒁𑓀𑒮𑒨𑒳𑒑𑒪 - 𑒠𑒳𑒯𑒴𑒮𑓂𑒏𑒢𑓂𑒡
𑒁𑒬𑓂𑒧𑒮𑒰𑒩 - 𑒪𑒼𑒯
𑒧𑒝𑒱𑒥𑒢𑓂𑒡 - 𑒣𑒯𑒳𑒿𑒔𑒰
𑒁𑒥𑒪𑒰𑒮𑒫 - 𑒫𑒱𑒩𑒼𑒡
𑒠𑒳𑒯𑒱𑒝 - 𑒥𑓂𑒩𑒯𑓂𑒧𑒰
𑒖𑒧𑓂𑒦𑒩𑒱𑒣𑒳 - 𑒃𑒢𑓂𑒠𑓂𑒩
𑒆𑒩𑒳 - 𑒖𑒰𑒿𑒒
𑒂𑒩𑒞 - 𑒫𑒱𑒩𑒼𑒡
𑒢𑒲𑒩𑒖 - 𑒖𑒪𑒧𑒹 𑒁𑒢𑒳𑒞𑓂𑒣𑒢𑓂𑒢, 𑒡𑒳𑒪𑒱 𑒩𑒯𑒱𑒞, 𑒫𑒱𑒩𑒼𑒡
𑒃𑒪𑒰𑒞𑒢𑒨 - 𑒣𑒳𑒩𑒳𑒩𑒫𑒰
𑒮𑒳𑒩𑒫𑒻𑒠𑓂𑒨𑒨𑒳𑒑𑒪 - 𑒠𑒳𑒯𑒴 𑒁𑒬𑓂𑒫𑒱𑒢𑒲𑒏𑒳𑒧𑒰𑒩
𑒏𑓂𑒭𑒱𑒞𑒱𑒯𑒩𑒱𑒯𑒧 - 𑒣𑒵𑒟𑓂𑒫𑒲𑒢𑓂𑒠𑓂𑒩
𑒣𑒩𑒣𑒳𑒭𑓂𑒙 - 𑒏𑒼𑒨𑒪, 𑒏𑒼𑒏𑒱𑒪, 𑒣𑒮𑒰𑒢𑓂𑒞𑒩𑒧𑒹 𑒣𑒩𑒱𑒣𑒳𑒭𑓂𑒙𑒰 𑒫𑒻𑒬𑓂𑒨𑒰
𑒧𑒡𑒳𑒣 - 𑒦𑓂𑒩𑒧𑒩, 𑒧𑒠𑓂𑒨𑒣
𑒂𑒞𑒓𑓂𑒏𑒩𑒓𑓂𑒏 - 𑒢𑒱𑒩𑓂𑒦𑒨
𑒏𑒰𑒫𑓂𑒨𑒏 - 𑒬𑒳𑒏𑒏
𑒧𑒡𑒳𑒦𑒩𑒱 - 𑒥𑒮𑒢𑓂𑒞𑒣𑒩𑓂𑒨𑒢𑓂𑒞
𑒮𑒳𑒩𑒦𑒱𑒧𑒑 - 𑒏𑒰𑒧𑒡𑒹𑒢𑒳𑒏 𑒧𑒰𑒩𑓂𑒑
𑒁𑒢𑒲𑒞𑒱 - 𑒁𑒞𑒱𑒫𑒵𑒭𑓂𑒙𑓂𑒨𑒰𑒠𑒱𑒩𑒯𑒱𑒞
𑒬𑒱𑒏𑓂𑒭𑒰𑒪𑒼𑒏 - 𑒣𑓂𑒩𑒏𑒰𑒬
𑒞𑒰𑒮𑓂𑒩𑒫 - 𑒅𑒔𑓂𑒔𑒡𑓂𑒫𑒢𑒱
𑒖𑒢𑒣𑒠 - 𑒁𑒣𑒢 𑒠𑒹𑒬
𑒮𑒰𑒦𑒱𑒢𑒱𑒫𑒹𑒬 - 𑒂𑒑𑓂𑒩𑒯𑒣𑒴𑒩𑓂𑒫𑒏
𑒡𑒰𑒩𑒝𑒰-𑒡𑓂𑒨𑒰𑒝 - 𑒁𑒭𑓂𑒙𑒰𑒓𑓂𑒑𑒨𑒼𑒑𑒏 𑒕𑒚𑒧 𑒍 𑒮𑒰𑒞𑒧 𑒁𑒓𑓂𑒑
𑒣𑓂𑒩𑒏𑒵𑒞𑒱 - 𑒮𑓂𑒫𑒦𑒰𑒫, 𑒣𑓂𑒩𑒖𑒰
𑒣𑒲𑒨𑒴𑒭-𑒨𑒴𑒭 - 𑒁𑒧𑒵𑒞𑒮𑒰𑒩
𑒧𑒰𑒩𑓂𑒞𑒝𑓂𑒛 - 𑒮𑒴𑒩𑓂𑒨
𑒮𑒞𑓂𑒫𑒏 - 𑒮𑒞𑓂𑒫𑒑𑒳𑒝
𑒮𑒾𑒧𑓂𑒨 - 𑒥𑒳𑒡𑒑𑓂𑒩𑒯
𑒫𑒰𑒏𑓂𑒣𑒞𑒱 - 𑒥𑒵𑒯𑒮𑓂𑒣𑒞𑒱
𑒩𑒫𑒱-𑒏𑒪𑓂𑒣 - 𑒮𑒴𑒩𑓂𑒨-𑒮𑒠𑒵𑒬
𑒨𑒰𑒔𑒢𑒰-𑒣𑒩𑒰𑒨𑒝 - 𑒨𑒰𑒔𑒏
𑒁𑒦𑒱𑒨𑒼𑒑𑒲 - 𑒁𑒦𑒱𑒨𑒼𑒑 𑒏𑒋𑒢𑒱𑒯𑒰𑒩
𑒏𑒻𑒩𑒫𑒰𑒧𑒼𑒠 - 𑒏𑒳𑒧𑒳𑒠𑒏 𑒮𑒾𑒩𑒦, 𑒬𑒞𑓂𑒩𑒳𑒏 𑒂𑒢𑒢𑓂𑒠
𑒁𑒢𑒳𑒠𑒰𑒩 - 𑒮𑓂𑒞𑓂𑒩𑒲𑒮𑒿 𑒁𑒢𑒳𑒑𑒞
𑒣𑒳𑒞𑓂𑒩𑒹𑒭𑓂𑒙𑒱𑒏 - 𑒣𑒳𑒞𑓂𑒩𑒼𑒞𑓂𑒣𑒰𑒠𑒏 𑒨𑒖𑓂𑒘
𑒋𑒏𑒰𑒫𑒪𑒲 - 𑒧𑒼𑒞𑒲𑒏 𑒧𑒰𑒪𑒰
𑒧𑒞𑓂𑒮𑒩𑒱𑒞𑒰 - 𑒁𑒢𑓂𑒨𑒬𑒳𑒦𑒠𑓂𑒫𑒹𑒭
𑒪𑒰𑒪𑒢𑒮𑒳𑒯𑒱𑒞𑒰 - 𑒪𑒰𑒪𑒢𑒹 𑒞𑒵𑒣𑓂𑒞 𑒫𑒰 𑒁𑒢𑒳𑒏𑒴𑒪
𑒣𑒩𑒱𑒝𑒰𑒯 - 𑒫𑒵𑒠𑓂𑒡𑒱
𑒣𑓂𑒩𑒧𑒞𑓂𑒞 - 𑒁𑒮𑒰𑒫𑒡𑒰𑒢 𑒫𑒰 𑒅𑒢𑓂𑒧𑒞𑓂𑒞
𑒥𑒰𑒪𑒫𑒬𑒰𑒧𑒹 - 𑒢𑒫𑒲𑒢 𑒯𑒟𑒱𑒢𑒲
𑒂𑒫𑒱𑒪 - 𑒣𑒓𑓂𑒏𑒱𑒪
𑒁𑒩𑓂𑒡𑒔𑒢𑓂𑒠𑓂𑒩 - 𑒔𑒢𑓂𑒠𑓂𑒩𑒏 𑒍 𑒑𑒛𑓃𑒯𑒞𑓂𑒟𑒰
𑒬𑒱𑒐𑒱𑒏𑒪𑒰𑒣 - 𑒧𑒨𑒴𑒩𑒏 𑒣𑒱𑒔𑓂𑒕, 𑒫𑒱𑒭𑒧
𑒥𑒪𑒰𑒯𑒏 - 𑒧𑒹𑒒
𑒮𑒩𑒝𑒲 - 𑒂𑒏𑒰𑒬
𑒖𑒛𑓃𑒦𑒰𑒫 - 𑒬𑒻𑒞𑓂𑒨 𑒫𑒰 𑒖𑒪𑒞𑓂𑒫
𑒧𑒹𑒔𑒏 - 𑒢𑒲𑒪
𑒠𑓂𑒫𑒱𑒩𑒠 - 𑒯𑒰𑒟𑒲
𑒡𑒧𑓂𑒧𑒱𑒪𑓂𑒪 - 𑒏𑒹𑒬𑒣𑒰𑒬
𑒫𑒱𑒪𑒏𑓂𑒭 - 𑒪𑒖𑓂𑒖𑒱𑒞
𑒣𑒟𑒱𑒏-𑒔𑒏𑓂𑒩 - 𑒔𑒏𑓂𑒩𑒥𑒰𑒏 𑒍 𑒮𑒧𑒳𑒠𑒰𑒨
𑒏𑒰𑒪𑒲 - 𑒏𑒰𑒩𑒲𑒩𑒓𑓂𑒑
𑒞𑒰𑒩𑒰 - 𑒂𑒿𑒐𑒱𑒏 𑒣𑒳𑒞𑒛𑓃𑒲
𑒏𑒰𑒪𑒲 - 𑒣𑓂𑒩𑒟𑒧𑒰 𑒧𑒯𑒰𑒫𑒱𑒠𑓂𑒨𑒰
𑒞𑒰𑒩𑒰 - 𑒠𑓂𑒫𑒱𑒞𑒲𑒨𑒰
𑒔𑒞𑒳𑒬𑓂𑒩𑒳𑒞𑒱 - 𑒬𑓂𑒩𑒳𑒞𑒱𑒫𑒹𑒠, 𑒣𑒜𑓃𑒢𑒱𑒯𑒰𑒩 𑒥𑓂𑒩𑒯𑓂𑒧𑒰
𑒬𑓂𑒩𑒳𑒞𑒱 - 𑒏𑒰𑒢, 𑒮𑒳𑒢𑒥
𑒫𑒱𑒬𑓂𑒩𑒳𑒞𑒱 - 𑒮𑒱𑒠𑓂𑒡𑒱
𑒕𑒲𑒖𑒏 - 𑒢𑒭𑓂𑒙 𑒯𑒼𑒋𑒥𑒰𑒏
𑒏𑒪𑒏𑒝𑓂𑒚𑒲 - 𑒏𑒼𑒏𑒱𑒪𑒰
𑒞𑒣𑓂𑒞-𑒞𑒣𑒢𑒲𑒨 - 𑒮𑒼𑒢𑒰, 𑒮𑓂𑒫𑒩𑓂𑒝
𑒔𑒱𑒫𑒳𑒏 - 𑒠𑒰𑒜𑓃𑒲
𑒣𑒩𑒱𑒮𑓂𑒤𑒳𑒩 - 𑒔𑒘𑓂𑒔𑒪
𑒪𑒹𑒐𑒰 - 𑒑𑒝𑒢𑒰
𑒖𑒴𑒗𑒪 - 𑒪𑒛𑓃𑒪
𑒧𑒯𑒰𑒨𑒞𑒱 - 𑒁𑒞𑒱𑒫𑒱𑒮𑓂𑒞𑒲𑒩𑓂𑒝
𑒂𑒯𑒱𑒞 - 𑒮𑓂𑒟𑒰𑒣𑒱𑒞
𑒮𑓂𑒞𑒴𑒣 - 𑒧𑒰𑒙𑒱𑒏 𑒜𑒹𑒩𑒲
𑒪𑒱𑒏𑒳𑒔𑒏 - 𑒥𑒛𑓃𑒯𑒛𑓃𑒏
𑒬𑓂𑒩𑒲𑒤𑒪-𑒧𑒠 - 𑒫𑒱𑒪𑓂𑒫𑒤𑒪𑒏 𑒑𑒩𑓂𑒫
𑒑𑒩𑓂𑒞 - 𑒐𑒞𑓂𑒞𑒰
𑒏𑒳𑒪𑒰𑒪 - 𑒏𑒳𑒧𑓂𑒯𑒰𑒩
𑒢𑒰𑒦𑒱𑒦𑒫 - 𑒥𑓂𑒩𑒯𑓂𑒧𑒰
𑒬𑒰𑒩𑒠𑒰 - 𑒁𑒠𑒵𑒬𑓂𑒨𑒰 𑒮𑒩𑒮𑓂𑒫𑒞𑒲 𑒢𑒠𑒲 (𑒁𑒪𑒐𑒩𑒴𑒣 𑒬𑒰𑒩𑒠𑒰)
𑒞𑓂𑒩𑒱𑒠𑒱𑒫𑒮 𑒮𑒰𑒩𑒱𑒝𑒲 - 𑒑𑒓𑓂𑒑𑒰
𑒫𑒪𑒲 - 𑒅𑒠𑒩𑒩𑒹𑒐𑒰 (𑒞𑒲𑒢𑒱𑒫𑒪𑒲)
𑒥𑒪𑒲 - 𑒥𑒪𑒫𑒰𑒢
𑒣𑒰𑒙𑒔𑓂𑒔𑒩 - 𑒔𑒼𑒩
𑒏𑒹𑒯𑒩𑒱 - 𑒮𑒱𑓀𑒯
𑒢𑒱𑒞𑒧𑓂𑒥𑒏 - 𑒣𑒩𑓂𑒫𑒞𑒏 𑒧𑒡𑓂𑒨 𑒦𑒰𑒑𑒏
𑒫𑒱𑒡𑒱𑒍𑒖𑒏 - 𑒣𑓂𑒩𑒞𑒰𑒣𑒏
𑒏𑒵𑒭-𑒢𑒲𑒔 - 𑒢𑒲𑒔𑒰𑒿 𑒠𑒱𑒮𑒱𑒮𑒿 𑒏𑓂𑒩𑒧𑒯𑒱 𑒣𑒰𑒞𑒩 (𑒖𑒓𑓂𑒒𑒰-𑒏𑓂𑒩𑒧-𑒏𑒵𑒭-𑒢𑒲𑒔)
𑒫𑒹𑒞𑓂𑒩-𑒠𑒝𑓂𑒛 - 𑒮𑒼𑒢𑒰𑒏 𑒁𑒡𑒱𑒏𑒰𑒩 𑒠𑒝𑓂𑒛
𑒯𑓀𑒮𑒏 - 𑒢𑒳𑒣𑒴𑒩
𑒠𑒬-𑒬𑒬𑒡𑒩 - 𑒢𑒐𑒩𑒴𑒣-𑒠𑒬𑒔𑒢𑓂𑒠𑓂𑒩𑒏
𑒪𑒰𑒖𑒹𑓀 𑒥𑒲𑒞𑒪 - 𑒮𑓀𑒏𑒳𑒔𑒱𑒞 𑒦𑒹𑒪
𑒁𑒢𑒵𑒞-𑒠𑒴𑒭𑒝-𑒏𑒵𑒣𑒰𑒝𑒲 - 𑒧𑒱𑒟𑓂𑒨𑒰𑒠𑒼𑒭𑒏 𑒕𑒳𑒩𑒲 𑒖𑒹𑒏𑒰𑒿 𑒢𑒰𑒬𑒏
𑒏𑒟𑒰𑓄𑒫𑒬𑒹𑒭 - 𑒁𑒫𑒬𑒱𑒭𑓂𑒙 𑒫𑒏𑓂𑒞𑒫𑓂𑒨
𑒯𑒩𑓂𑒭-𑒢𑒵𑒞𑓂𑒞 - 𑒑𑒰𑒞𑓂𑒩𑒫𑒱𑒏𑓂𑒭𑒹𑒣
𑒮𑒦𑒲𑒏 - 𑒦𑒲𑒞
𑒮𑒰𑒑𑒩-𑒣𑒩𑒱𑒣𑒢𑓂𑒟𑒲 - 𑒮𑒰𑒑𑒩𑒏 𑒣𑓂𑒩𑒞𑒱𑒮𑓂𑒣𑒩𑓂𑒡𑒰 𑒏𑒋𑒢𑒱𑒯𑒰𑒩
𑒮𑒧𑓂𑒣𑒳𑒙𑒱𑒞 - 𑒮𑒓𑓂𑒏𑒳𑒔𑒱𑒞
𑒫𑒱𑒑𑒹𑒨 - 𑒢𑒱𑒢𑓂𑒠𑒢𑒲𑒨
𑒫𑒱𑒖𑒲𑒯𑒲𑒩𑓂𑒭𑒰 - 𑒫𑒱𑒯𑒰𑒩𑒏 𑒃𑒔𑓂𑒕𑒰
𑒠𑒪𑒞𑒩 - 𑒣𑒰𑒞𑒏 𑒢𑒲𑒔𑒰𑒿
𑒁𑒞𑒱𑒮𑒳𑒏𑒫𑒱-𑒆𑒯 - 𑒮𑒳𑒏𑒫𑒱 𑒞𑒩𑓂𑒏𑒏 𑒁𑒑𑒼𑒔𑒩
𑒏𑒳𑒫𑒪𑒨-𑒩𑒧𑓂𑒦𑒰-𑒮𑒧𑒰𑒢- 𑒣𑒵𑒟𑓂𑒫𑒲-𑒧𑒝𑓂𑒛𑒪𑒏 𑒩𑒧𑓂𑒦𑒰 𑒮𑒠𑒵𑒬
𑒠𑒹𑒫𑒰𑒓𑓂𑒑𑒢𑒲𑒨 - 𑒠𑒹𑒫𑒰𑒓𑓂𑒑𑒢𑒰-𑒮𑒧𑓂𑒥𑒢𑓂𑒡𑒲
𑒩𑒰𑒮 - 𑒧𑒝𑓂𑒛𑒪𑒰𑒏𑒰𑒩 𑒢𑒵𑒞𑓂𑒨
𑒬𑓂𑒨𑒰𑒧𑒰 - 𑒣𑓂𑒩𑒱𑒨𑒓𑓂𑒑𑒳
𑒫𑓂𑒨𑒰𑒧𑒼𑒯𑒏 - 𑒮𑒧𑓂𑒧𑒼𑒯𑒏
𑒏𑒰𑒪 - 𑒨𑒧𑒩𑒰𑒖
𑒮𑒰𑒩𑒓𑓂𑒑 - 𑒯𑒩𑒱𑒝
𑒏𑒵𑒞𑒨𑒳𑒑 - 𑒮𑒞𑓂𑒨𑒨𑒳𑒑
𑒩𑒝-𑒋𑒏𑒞𑒰𑒢 - 𑒨𑒳𑒠𑓂𑒡𑒧𑒹 𑒮𑒩𑓂𑒫𑒠𑒰 𑒫𑒱𑒖𑒨 𑒣𑒍𑒢𑒱𑒯𑒰𑒩
𑒢𑒵𑒣𑒞𑒱-𑒣𑒞𑒰𑒏𑒱𑒢𑒲𑒏 - 𑒩𑒰𑒖𑒮𑒹𑒢𑒰𑒏
𑒫𑒱𑒏𑒙𑒣𑓂𑒩𑒞𑒲𑒏 - 𑒠𑒰𑒩𑒳𑒝𑒰𑒏𑒰𑒩
𑒣𑒳𑒝𑓂𑒛𑒩𑒲𑒏 - 𑒥𑒰𑒒
𑒠𑒱𑒢𑒹𑒢𑓂𑒠𑒳-𑒠𑒲𑒢 - 𑒠𑒱𑒢𑒏 𑒔𑒢𑓂𑒠𑓂𑒩 𑒮𑒠𑒵𑒬 𑒧𑒪𑒱𑒢
𑒮𑒩𑓂𑒫𑒮𑒯𑒰𑒏 - 𑒣𑒵𑒟𑓂𑒫𑒲𑒏
𑒪𑒲𑒢 - 𑒣𑓂𑒩𑒪𑒨𑒧𑒹 𑒣𑓂𑒩𑒰𑒣𑓂𑒞
𑒫𑒱𑒪𑒲𑒢 - 𑒫𑒱𑒪𑒰𑒋𑒪
𑒑𑒼𑒋 - 𑒩𑒰𑒐𑒱
𑒞𑒠𑒢𑒳𑒮𑒰𑒩 - 𑒣𑒰𑒕𑒰𑒿
𑒫𑒱𑒠𑒑𑓂𑒡𑒞𑒰𑒏 - 𑒩𑒮𑒱𑒏𑒞𑒰𑒏
𑒑𑒩𑒳𑒁 - 𑒣𑒻𑒒
𑒦𑒴𑒩𑒧𑒰𑒏 - 𑒦𑒴𑒞𑒪 𑒪𑒏𑓂𑒭𑓂𑒧𑒲𑒏
𑒬𑒩𑓂𑒧 - 𑒮𑒳𑒐
𑒠𑒪𑒱𑒞𑒣𑒰𑓀𑒬𑒳 - 𑒢𑒱𑒭𑓂𑒣𑒰𑒣 𑒫𑒰 𑒢𑒱𑒩𑓂𑒠𑒼𑒭
𑒦𑒫𑒱𑒞𑒫𑓂𑒨𑒫𑒬𑓂𑒨 - 𑒦𑒰𑒑𑓂𑒨𑒰𑒡𑒲𑒢
𑒁𑒢𑒢𑒳𑒩𑒴𑒣 - 𑒣𑓂𑒩𑒞𑒱𑒏𑒴𑒪
𑒣𑓂𑒩𑒝𑒱𑒡𑒰𑒢𑒪𑒲𑒢 - 𑒡𑓂𑒨𑒰𑒢𑒧𑒑𑓂𑒢
𑒠𑓂𑒫𑒱𑒖𑒠𑒞𑓂𑒞 - 𑒮𑒱𑒠𑓂𑒡𑒥𑓂𑒩𑒰𑒯𑓂𑒧𑒝𑒮𑒿 𑒠𑒹𑒪
𑒠𑒞𑓂𑒞-𑒣𑓂𑒩𑒠𑒞𑓂𑒞 - 𑒠𑒞𑓂𑒞𑒞𑓂𑒩𑒹𑒨𑒮𑒿 𑒠𑒹𑒪
𑒅𑒠𑒹𑒭 - 𑒁𑒢𑓂𑒫𑒹𑒭𑒝
𑒮𑓂𑒫𑒩𑒞𑒱 - 𑒮𑓂𑒫𑒫𑒱𑒭𑒨𑒏 𑒣𑓂𑒩𑒹𑒧
𑒡𑒻𑒩𑓂𑒨-𑒏𑒠𑒩𑓂𑒨 - 𑒁𑒡𑒲𑒩
𑒔𑒩𑒧𑒠𑒬𑒰𑒏 - 𑒧𑒵𑒞𑓂𑒨𑒳𑒏
𑒁𑒫𑒑𑒰𑒯 - 𑒂𑒪𑒼𑒛𑓃𑒢
𑒍𑒖 - 𑒞𑒹𑒖
𑒨𑒬𑒮𑓂𑒨 - 𑒨𑒬𑒼𑒖𑒢𑒏
𑒁𑒪𑒹𑒬 - 𑒢𑒱𑒬𑓂𑒕𑒪
𑒫𑒱𑒖𑒱𑒑𑒲𑒭𑒰 - 𑒫𑒱𑒖𑒨𑒏 𑒃𑒔𑓂𑒕𑒰
𑒣𑒳𑒙𑒣𑒰𑒏 - 𑒠𑒳𑒃 𑒮𑒩𑒥𑒰𑒏 𑒮𑒧𑓂𑒣𑒳𑒙𑒧𑒹 𑒫𑒮𑓂𑒞𑒳𑒏𑒹𑒿 𑒧𑒴𑒢𑒱 𑒣𑒏
𑒯𑒨𑒑𑓂𑒩𑒲𑒫 - 𑒩𑒰𑒏𑓂𑒭𑒮 𑒖𑒹𑒏𑒩𑒰 𑒫𑒱𑒭𑓂𑒝𑒳 𑒧𑒰𑒩𑒪
𑒁𑒢𑒢𑓂𑒞 - 𑒁𑒢𑓂𑒞-𑒩𑒯𑒱𑒞
𑒫𑓂𑒨𑒣𑒰𑒨 - 𑒣𑒩𑒱𑒣𑒴𑒩𑓂𑒝
𑒦𑒓𑓂𑒑 - 𑒣𑒩𑒰𑒖𑒨
𑒮𑒓𑓂𑒑𑒩 - 𑒨𑒳𑒠𑓂𑒡
𑒞𑒢𑒳 - 𑒏𑒼𑒧𑒪
𑒂𑒬𑓂𑒩𑒱𑒞-𑒠𑒳𑒩𑓂𑒑 - 𑒠𑒳𑒩𑓂𑒑𑒼𑒣𑒰𑒮𑒏
𑒠𑒳𑒩𑓂𑒑 - 𑒠𑒻𑒞𑓂𑒨𑒮𑒿 𑒮𑒹𑒫𑒱𑒞 𑒠𑒳𑒩𑓂𑒑𑒧
𑒮𑒩𑓂𑒫𑒮𑒯𑒰 - 𑒣𑒵𑒟𑓂𑒫𑒲, 𑒞𑒱𑒞𑒱𑒏𑓂𑒭𑒰, 𑒮𑒦 𑒮𑒯𑒢𑒱𑒯𑒰𑒩𑒱 𑒣𑒵𑒟𑓂𑒫𑒲
𑒧𑒢𑒳 - 𑒧𑒢𑓂𑒞𑓂𑒩
𑒬𑒱𑒫 - 𑒏𑒪𑓂𑒨𑒰𑒝𑒏𑒰𑒩𑒏
𑒏𑒴𑒩𑓂𑒔 - 𑒯𑓂𑒩𑒲𑒿
𑒬𑒱𑒐𑒱𑒖𑒰𑒨𑒰 - 𑒮𑓂𑒫𑒰𑒯𑒰
𑒂𑒐𑒩 - 𑒯𑓂𑒩𑒲𑒿 𑒑𑒾𑒩𑒱! 𑒩𑒳𑒠𑓂𑒩𑒠𑒨𑒱𑒞𑒹! 𑒨𑒼𑒑𑒹𑒬𑓂𑒫𑒩𑒲। 𑒯𑒴𑒿 𑒤𑒙 𑒮𑓂𑒫𑒰𑒯𑒰
𑒁𑒢𑓂𑒫𑒩𑓂𑒟𑒰𑒐𑓂𑒨 - 𑒨𑒟𑒰𑒩𑓂𑒟𑒢𑒰𑒧𑒰
𑒮𑒱𑒠𑓂𑒡𑒱 - 𑒮𑒱𑒠𑓂𑒡𑒱𑒏𑒹𑒿 𑒣𑓂𑒩𑒰𑒣𑓂𑒞, 𑒮𑒧𑓂𑒣𑒢𑓂𑒢
𑒥𑓂𑒩𑒰𑒯𑓂𑒧𑒝 - 𑒦𑒼𑒖-𑒣𑒘𑓂𑒔𑒰𑒓𑓂𑒑 𑒣𑒳𑒩𑒬𑓂𑒔𑒩𑒝 (𑒞𑒩𑓂𑒣𑒝 𑒧𑒰𑒩𑓂𑒖𑒢 𑒥𑓂𑒩𑒰𑒯𑓂𑒧𑒝 𑒦𑒼𑒖
𑒢𑒵𑒮𑒼𑒧)
𑒫𑒻𑒢𑓂𑒨 - 𑒩𑒰𑒖𑒰 𑒣𑒵𑒟𑒳
𑒤𑒪𑒏 - 𑒜𑒰𑒪
𑒬𑒱𑒬𑒳𑒧𑒰𑒩 - 𑒮𑒼𑒿𑒮
𑒡𑒢-𑒬𑒰𑒠 - 𑒣𑒰𑒿𑒏
𑒏𑓂𑒭𑒹𑒣𑒝𑒲 - 𑒏𑒩𑒳𑒂𑒩
𑒣𑒙𑒧𑒝𑓂𑒛𑒣 - 𑒞𑒧𑓂𑒥𑒴
𑒨𑒰𑒠𑒮𑓂𑒮𑓂𑒫𑒢 - 𑒖𑒪𑒖𑒢𑓂𑒞𑒳𑒏 𑒬𑒥𑓂𑒠
𑒣𑒴𑒞 - 𑒣𑒫𑒱𑒞𑓂𑒩
𑒠𑓂𑒫𑒱𑒩𑒠𑒏𑒰𑒿 - 𑒯𑒰𑒟𑒲𑒏𑒹𑒿
𑒠𑒰𑒢𑒖𑒪 - 𑒧𑒠𑒖𑒪
𑒧𑒢-𑒁𑒫𑒮𑒰𑒠 - 𑒠𑒳𑓁𑒐
𑒦𑒫𑓂𑒨 - 𑒬𑒳𑒦, 𑒮𑒳𑒢𑓂𑒠𑒩
𑒂𑒨𑒳𑒡𑒩𑒰𑒖𑒱 - 𑒔𑒘𑓂𑒔𑒪𑒰, 𑒫𑒱𑒠𑓂𑒨𑒳𑒞
𑒔𑒻𑒞𑓂𑒨 - 𑒣𑓂𑒩𑒮𑒱𑒠𑓂𑒡 𑒑𑒵𑒯
𑒠𑒳𑒩𑓂𑒑 - 𑒏𑒱𑒪𑒰
𑒮𑒳𑒔𑒞𑒳𑒭𑓂𑒣𑒬 - 𑒔𑒾𑒥𑒙𑓂𑒙𑒲
𑒁𑒯𑒧𑓂𑒣𑒴𑒫𑒱𑒏𑒰 - 𑒯𑒧 𑒣𑒯𑒱𑒢𑒹, 𑒞𑒿 𑒯𑒧 𑒣𑒯𑒱𑒢𑒹, 𑒋𑒯𑒱 𑒮𑓂𑒣𑒩𑓂𑒡𑒰𑒮𑒿 𑒠𑒾𑒑𑒥
𑒣𑒫𑒱 - 𑒫𑒖𑓂𑒩
𑒁𑒩𑓂𑒟 - 𑒣𑓂𑒩𑒨𑒼𑒖𑒢
𑒣𑓂𑒩𑒦𑒴𑒞 - 𑒥𑒯𑒳𑒞
𑒪𑒰𑒒𑒫 - 𑒬𑒲𑒒𑓂𑒩𑒞𑒰
𑒠𑒢𑒳𑒖-𑒞𑒢𑒳𑒖 - 𑒬𑒩𑒲𑒩𑒧𑒹 𑒅𑒞𑓂𑒣𑒢𑓂𑒢
𑒁𑒩𑓂𑒦 - 𑒢𑒹𑒢𑒰
𑒮𑒳𑒩𑒮𑒩𑒝𑒲 - 𑒂𑒏𑒰𑒬
𑒬𑒰𑒩𑒱𑒏𑒰 - 𑒧𑒋𑒢𑒰
𑒧𑒹𑒏𑒪 - 𑒢𑒩𑓂𑒧𑒠𑒰 𑒢𑒠𑒲𑒏 𑒅𑒞𑓂𑒣𑒰𑒠𑒏 𑒣𑒩𑓂𑒫𑒞
𑒣𑒩𑒱𑒣𑒰𑒙𑒲 - 𑒣𑒩𑒧𑓂𑒣𑒩𑒰
𑒅𑒞𑓂𑒏𑒼𑒔 - 𑒒𑒴𑒮
𑒫𑒱𑒞𑒰𑒢 - 𑒫𑒱𑒮𑓂𑒞𑒰𑒩
𑒣𑓂𑒩𑒏𑒼𑒭𑓂𑒚 - 𑒣𑒯𑒳𑒿𑒔𑒰
𑒁𑒓𑓂𑒑𑒳𑒩𑒲𑒨 - 𑒁𑒓𑓂𑒑𑒳𑒚𑒲
𑒏𑒹𑒞𑒢 - 𑒡𑓂𑒫𑒖𑒰
𑒢𑒱𑒩𑓂𑒧𑒧 - 𑒧𑒧𑒞𑒰𑒯𑒲𑒢
𑒅𑒠𑒱𑒐𑒩 - 𑒅𑒠𑒱𑒞
𑒠𑒲𑒡𑒱𑒞𑒱 - 𑒔𑒢𑓂𑒠𑓂𑒩𑒏𑒱𑒩𑒝
𑒠𑒏𑓂𑒭𑒱𑒝 - 𑒁𑒢𑒹𑒏𑒧𑒹 𑒮𑒧𑒰𑒢𑒰𑒢𑒳𑒩𑒰𑒑𑒲 𑒍 𑒠𑒯𑒱𑒢
𑒧𑒞𑓂𑒮𑒩𑒲 - 𑒠𑓂𑒫𑒹𑒭𑒲
𑒫𑒱𑒢𑒱𑒣𑒰𑒞𑒼𑒢𑓂𑒧𑒳𑒐 - 𑒁𑒫𑒢𑒞𑒱 𑒠𑒱𑒮 𑒣𑓂𑒩𑒫𑒵𑒞𑓂𑒞
𑒧𑒡𑒳-𑒮𑒘𑓂𑒖𑒹𑒿 - 𑒢𑒰𑒧𑒮𑒿
𑒢𑒵𑒣𑒠𑒰𑒩𑒏 - 𑒩𑒰𑒖𑒏𑒢𑓂𑒨𑒰
𑒣𑓂𑒩𑒧𑒼𑒠-𑒢𑒱𑒥𑒢𑓂𑒡𑒢 - 𑒏𑒰𑒩𑒝
𑒫𑒢𑓂𑒠𑒲 - 𑒏𑒻𑒠𑒲
𑒣𑒳𑒩𑒳𑒭𑒰𑒩𑓂𑒟 𑒔𑒞𑒳𑒭𑓂𑒙𑓂𑒨 - 𑒡𑒩𑓂𑒧, 𑒡𑒢, 𑒏𑒰𑒧 𑒍 𑒧𑒼𑒏𑓂𑒭
𑒠𑒲𑒡𑒱𑒞𑒱-𑒧𑒰𑒪𑒲 - 𑒮𑒴𑒩𑓂𑒨
𑒢𑒩𑒢𑒰𑒟 - 𑒣𑒩𑒱𑒏𑒩
𑒎𑒩𑒮-𑒮𑒳𑒞 - 𑒁𑒣𑒢𑒰𑒮𑒿 𑒡𑒩𑓂𑒧𑒣𑒞𑓂𑒢𑒲𑒧𑒹 𑒅𑒞𑓂𑒣𑒢𑓂𑒢 𑒣𑒳𑒞𑓂𑒩
𑒔𑒏𑓂𑒩𑒡𑒩 - 𑒢𑒰𑒩𑒰𑒨𑒝
𑒄𑒭𑒞𑓂𑒏𑒩 - 𑒮𑒳𑒏𑒩
𑒏𑒳𑒪𑒱𑒬𑒰𑒨𑒳𑒡𑒮𑒿 - 𑒃𑒢𑓂𑒠𑓂𑒩𑒮𑒿
𑒣𑓂𑒩𑒧𑒰-𑒮𑒰𑒪𑒱𑒞 - 𑒨𑒟𑒰𑒩𑓂𑒟𑒖𑓂𑒘𑒰𑒢𑒮𑒿 𑒮𑓂𑒤𑒲𑒞
𑒅𑒏𑓂𑒞𑒱-𑒣𑓂𑒩𑒑𑒪𑓂𑒦 - 𑒥𑒖𑒥𑒰𑒧𑒹 𑒣𑓂𑒩𑒾𑒜𑓃
𑒬𑒧𑒢 - 𑒨𑒧𑒩𑒰𑒖
𑒫𑒱𑒡𑒹𑒨 - 𑒏𑒩𑓂𑒞𑒫𑓂𑒨
𑒠𑒳𑒩𑓂𑒫𑒱𑒣𑒰𑒏 - 𑒁𑒡𑒪𑒰𑒯 𑒤𑒪
𑒮𑒓𑓂𑒏𑒪𑓂𑒣-𑒏𑒪𑓂𑒣𑒢𑒰 - 𑒧𑒰𑒢𑒮 𑒏𑒩𑓂𑒧𑒏 𑒩𑒔𑒢𑒰
𑒮𑓂𑒞𑒧𑓂𑒦𑒱𑒞 - 𑒖𑒛𑓃𑒲𑒦𑒴𑒞
𑒮𑒏𑒪-𑒏𑒩𑒝-𑒣𑒩𑒱𑒫𑒰𑒩𑒏- 𑒃𑒢𑓂𑒠𑓂𑒩𑒱𑒨 𑒫𑒩𑓂𑒑𑒏
𑒦𑒫-𑒗𑒩𑒱𑒝𑒲 - 𑒮𑓀𑒮𑒰𑒩 𑒢𑒠𑒲
𑒬𑒬𑒱𑒏𑒰𑒢𑓂𑒞 - 𑒔𑒢𑓂𑒠𑓂𑒩𑒏𑒰𑒢𑓂𑒞 𑒧𑒝𑒱
𑒩𑒖𑒢𑒱𑒏𑒩 - 𑒩𑒳𑒔𑒱𑒋𑒿- 𑒏𑒰𑒢𑓂𑒞𑒱𑒋𑒿
𑒢𑒱𑒭𑓂𑒏𑒣𑒙 - 𑒩𑒳𑒔𑒱𑒋𑒿-𑒣𑓂𑒩𑒲𑒞𑒱𑒋𑒿
𑒠𑓂𑒩𑒳𑒞 - 𑒬𑒲𑒒𑓂𑒩
𑒫𑒱𑒠𑓂𑒩𑒳𑒞 - 𑒣𑒒𑒱𑒪𑒪
𑒧𑒰𑒢𑒮𑒱𑒏 - 𑒫𑓂𑒨𑒞𑒱𑒏𑓂𑒩𑒧𑒯𑒳𑒏-𑒧𑒰𑒢𑒮-𑒫𑓂𑒨𑒦𑒱𑒔𑒰𑒩𑒯𑒳𑒏
𑒅𑒢𑓂𑒧𑒱𑒭𑒱𑒞 - 𑒥𑒜𑓃𑒪
𑒣𑓂𑒩𑒏𑒵𑒞𑒱𑒮𑓂𑒟 - 𑒔𑒻𑒞𑒢𑓂𑒨-𑒨𑒳𑒏𑓂𑒞
𑒏𑒰𑒪𑒰𑒮𑒳𑒩 - 𑒏𑒰𑒪𑒏𑒹𑒞𑒳 𑒩𑒰𑒏𑓂𑒭𑒮
𑒁𑒧𑒰𑒢 - 𑒁𑒣𑒩𑒱𑒧𑒱𑒞
𑒁𑒧𑒰𑒢𑒫 - 𑒁𑒪𑒾𑒏𑒱𑒏
𑒏𑒳𑒩𑒓𑓂𑒑𑒱𑒞 - 𑒯𑒩𑒱𑒝 𑒖𑒹𑒏𑒰𑒿 𑒏𑒳𑒠𑒻𑒞
𑒫𑒱𑒏𑓂𑒩𑒧 - 𑒫𑒱𑒪𑒏𑓂𑒭𑒝 𑒫𑒰 𑒫𑒱𑒑𑒞 𑒕𑒻 𑒏𑓂𑒩𑒧 𑒖𑒰𑒯𑒱𑒧𑒹
𑒣𑒘𑓂𑒔𑒰𑒢𑒢 - 𑒮𑒱𑓀𑒯
𑒂𑒩𑒦𑒙𑒲 - 𑒂𑒛𑒧𑓂𑒥𑒩𑒣𑒴𑒩𑓂𑒝 𑒔𑒹𑒭𑓂𑒙𑒰
𑒠𑒳𑒩𑒦𑒱𑒮𑒢𑓂𑒡𑒱 - 𑒠𑒳𑒩𑒰𑒬𑒨
𑒏𑒰𑒢𑓂𑒠𑒱𑒬𑒲𑒏 - 𑒦𑒨𑒮𑒿 𑒣𑒜𑓃𑒻𑒢𑒱𑒯𑒰𑒩
𑒁𑒢𑒰𑒟 - 𑒫𑒱𑒡𑒫𑒰
𑒡𑒵𑒭𑓂𑒙 - 𑒣𑓂𑒩𑒾𑒜𑓃
𑒢𑒱𑒏𑒵𑒭𑓂𑒙 - 𑒢𑒲𑒔, 𑒕𑒼𑒙
𑒅𑒣𑒩𑒼𑒡𑒢 - 𑒡𑒻𑒩𑒫
𑒁𑒢𑒰𑒩𑒧𑓂𑒦 - 𑒂𑒩𑒧𑓂𑒦 𑒢𑒯𑒱 𑒏𑒩𑒥
𑒦𑒰𑒢𑒳𑒧𑒰𑒢 - 𑒮𑒴𑒩𑓂𑒨
𑒏𑒵𑒏𑒪𑒰𑒬 - 𑒑𑒱𑒩𑒑𑒱𑒙
𑒮𑒢𑓂𑒢𑒰𑒯 - 𑒨𑒳𑒠𑓂𑒡𑒏 𑒅𑒠𑓂𑒨𑒼𑒑
𑒧𑒡𑒳-𑒧𑒡𑒳𑒩𑒱𑒧𑒰𑒩𑓂𑒯 - 𑒠𑓂𑒩𑒰𑒏𑓂𑒭𑒰𑒮𑒠𑒵𑒬-𑒧𑒡𑒳𑒩 𑒮𑒧 𑒧𑒡𑒳𑒩, 𑒠𑒰𑒐𑒮𑒢
𑒮𑒩𑓂𑒫𑒖𑓂𑒘𑒧𑓂𑒧𑒢𑓂𑒨 - 𑒁𑒣𑒢𑒰𑒏𑒹𑒿 𑒮𑒩𑓂𑒫𑒖𑓂𑒘 𑒧𑒰𑒢𑒢𑒱𑒯𑒰𑒩
𑒫𑒲𑒩𑒧𑒰𑒢𑒲 - 𑒁𑒣𑒢𑒰𑒏𑒹𑒿 𑒫𑒲𑒩 𑒧𑒰𑒢𑒢𑒱𑒯𑒰𑒩
𑒢𑒵𑒬𑓀𑒮 - 𑒏𑓂𑒩𑒴𑒩 (𑒫𑒰𑒞𑒏)
𑒁𑒣𑒪𑒰𑒣𑒣𑒩𑒰 - 𑒪𑒰𑒟 𑒏𑒩𑒥𑒰𑒧𑒹 𑒞𑒞𑓂𑒣𑒩
𑒣𑓂𑒩𑒰𑒟𑒧𑒱𑒏 - 𑒣𑒯𑒱𑒪𑒹 𑒥𑒹𑒩𑒳𑒏
𑒣𑓂𑒩𑒏𑒰𑒩 - 𑒠𑒱𑒫𑒰𑒩𑒏
𑒁𑒖 - 𑒥𑒞𑓂𑒞𑒴
𑒏𑒳𑒩𑒓𑓂𑒑 - 𑒯𑒩𑒱𑒝
𑒑𑒫𑒨 - 𑒑𑒼 𑒮𑒠𑒵𑒬 𑒢𑒲𑒪𑒑𑒰𑒨
𑒬𑒰𑒩𑓂𑒠𑒴𑒪 - 𑒥𑒰𑒒
𑒮𑒰𑒧𑓂𑒯𑒩 - 𑒯𑒩𑒱𑒝𑒮𑒢 𑒖𑒢𑓂𑒞𑒳
𑒦𑒴𑒞𑒢𑒰𑒟 - 𑒧𑒯𑒰𑒠𑒹𑒫
𑒣𑓂𑒩𑒧𑒟𑒩𑒰𑒖𑒱 - 𑒑𑒝𑒮𑒧𑒴𑒯
𑒬𑒵𑒓𑓂𑒑𑒲 - 𑒬𑒵𑒓𑓂𑒑𑒫𑒰𑒪𑒰
𑒖𑒙𑒲 - 𑒖𑒙𑒰𑒡𑒰𑒩𑒲
𑒫𑒰𑒩𑒝𑒩𑒠 - 𑒯𑒰𑒟𑒲𑒏𑒮𑒢 𑒠𑒰𑒿𑒞𑒥𑒰𑒪𑒰
𑒣𑒳𑒔𑓂𑒕𑒲 - 𑒢𑒰𑒓𑓂𑒑𑒩𑒱
𑒏𑒵𑒞𑓂𑒞𑒱𑒣𑒙𑒲 - 𑒥𑒰𑒒𑒏 𑒔𑒰𑒧 𑒣𑒯𑒱𑒩𑒢𑒱𑒯𑒰𑒩
𑒔𑒞𑓂𑒫𑒩 - 𑒔𑒙𑓂𑒙𑒰𑒢
𑒦𑒲𑒩𑒳𑒦𑒲𑒧𑒰 - 𑒦𑒲𑒩𑒳𑒏 𑒦𑒨𑒓𑓂𑒏𑒩
𑒣𑒙𑒪 - 𑒣𑒙𑒱 𑒑𑒹𑒪
𑒖𑒢𑓂𑒨 - 𑒨𑒳𑒠𑓂𑒡
𑒩𑒰𑒖𑒢𑓂𑒨 - 𑒏𑓂𑒭𑒞𑓂𑒩𑒱𑒨
𑒦𑒱𑒢𑓂𑒠𑒱𑒣𑒰𑒪 - 𑒜𑒹𑒪𑒧𑒰𑒮𑒳 𑒮𑒢 𑒑𑒳𑒪𑓂𑒪𑒲 𑒤𑒹𑓀𑒏𑒥𑒰𑒏 𑒁𑒮𑓂𑒞𑓂𑒩
𑒞𑒼𑒧𑒩 - 𑒧𑒢𑓂𑒟𑒢 𑒠𑒝𑓂𑒛𑒮𑒢 𑒁𑒮𑓂𑒞𑓂𑒩
𑒏𑒵𑒣𑒰𑒝 - 𑒞𑒩𑒳𑒂𑒩𑒱
𑒣𑒩𑒬𑒳 - 𑒤𑒩𑒳𑒮𑒰
𑒁𑒮𑒱 𑒡𑒹𑒢𑒳 - 𑒐𑒰𑒿𑒛𑓃, 𑒕𑒴𑒛𑓃𑒰
𑒦𑒳𑒬𑒳𑒝𑓂𑒛𑒲 - 𑒁𑒑𑓂𑒢𑒱𑒣𑓂𑒩𑒡𑒰𑒢 𑒁𑒮𑓂𑒞𑓂𑒩
𑒣𑒩𑒱𑒡 - 𑒯𑒟𑒾𑒛𑓃𑒲
𑒠𑒢𑒳𑒖𑒦𑒳𑒫𑒢 - 𑒣𑒰𑒞𑒰𑒪
𑒖𑒪𑒠-𑒕𑒰𑒨𑒰 - 𑒧𑒹𑒒𑒏 𑒕𑒰𑒯𑒩𑒱, 𑒞𑒞𑓂𑒮𑒠𑒵𑒬 𑒁𑒮𑓂𑒟𑒱𑒩
𑒧𑒵𑒞𑓂𑒨𑒳𑒬𑒏𑓂𑒞𑒱-𑒅𑒞𑓂𑒏𑓂𑒩𑒰𑒢𑓂𑒞𑒱𑒠𑒰- 𑒧𑒵𑒞𑓂𑒨𑒳𑒏𑒹𑒿 ’𑒅𑒞𑓂𑒏𑓂𑒩𑒰𑒢𑓂𑒞𑒱𑒠𑒰’ 𑒢𑒰𑒧𑒏 𑒬𑒏𑓂𑒞𑒱 𑒕𑒢𑓂𑒯𑒱 𑒖𑒰𑒯𑒱𑒮𑒿
𑒖𑒲𑒫𑒼𑒞𑓂𑒏𑓂𑒩𑒧𑒝 𑒏𑒩𑒻𑒞 𑒕𑒟𑒱
𑒫𑒵𑒢𑓂𑒠𑒰𑒩𑒏-𑒫𑒵𑒢𑓂𑒠𑒏 - 𑒠𑒹𑒫𑒮𑒧𑒴𑒯𑒏
𑒢𑒱𑒖𑒔𑒧𑒴 - 𑒮𑒹𑒢𑒰
𑒣𑒞𑒰𑒪 - 𑒁𑒞𑒪, 𑒫𑒱𑒞𑒪, 𑒮𑒳𑒞𑒪, 𑒞𑒪𑒰𑒞𑒪, 𑒧𑒯𑒰𑒞𑒪, 𑒩𑒮𑒰𑒞𑒪,
𑒣𑒰𑒞𑒰𑒪
𑒮𑒢𑓂𑒠𑒹𑒬 - 𑒮𑓀𑒫𑒰𑒠 (𑒮𑒧𑒰𑒠)
𑒞𑓂𑒩𑒱𑒠𑒱𑒫𑒯𑒳𑒿 - 𑒮𑓂𑒫𑒩𑓂𑒑𑒯𑒳𑒿
𑒣𑓂𑒩𑒞𑓂𑒨𑒴𑒭 - 𑒣𑓂𑒩𑒰𑒞𑓁 𑒏𑒰𑒪
𑒠𑒰𑒢𑒫-𑒦𑒼𑒑𑒱𑒢𑒲 - 𑒩𑒰𑒖𑒰𑒏 𑒮𑒰𑒧𑒰𑒢𑓂𑒨 𑒮𑓂𑒞𑓂𑒩𑒲
𑒁𑒦𑓂𑒨𑒰𑒮 - 𑒨𑒼𑒑𑒰𑒦𑓂𑒨𑒰𑒮
𑒏𑓂𑒪𑒹𑒬 - 𑒁𑒫𑒱𑒠𑓂𑒨𑒰-𑒮𑓂𑒧𑒱𑒞𑒰-𑒩𑒰𑒑-𑒠𑓂𑒫𑒹𑒭 𑒍 𑒁𑒦𑒱𑒢𑒱𑒫𑒹𑒬
𑒖𑒢𑒱 - 𑒖𑒢𑓂𑒧
𑒦𑒼𑒑𑒦𑒴 - 𑒦𑒼𑒑𑒮𑓂𑒟𑒰𑒢 𑒫𑒰 𑒦𑒴𑒧𑒱
𑒦𑒳𑒖𑒑𑒦𑒳𑒫𑒢 - 𑒣𑒰𑒞𑒰𑒪
𑒢𑒰𑒏 - 𑒮𑓂𑒫𑒩𑓂𑒑
𑒮𑒯𑒮𑓂𑒩𑒰𑒩 - 𑒬𑒱𑒩 𑒮𑓂𑒟𑒱𑒞 𑒮𑒯𑒮𑓂𑒩𑒠𑒪- 𑒏𑒧𑒪𑒰𑒏𑒰𑒩 𑒔𑒏𑓂𑒩
𑒢𑒱𑒩𑓂𑒧𑒢𑓂𑒞𑒳 - 𑒢𑒱𑒩𑒣𑒩𑒰𑒡 (𑒢𑒱𑒩𑓂𑒠𑒼𑒭)
𑒤𑒹𑒩𑒱 - 𑒒𑒳𑒧𑒰𑒋
𑒤𑒹𑒩𑒱 - 𑒣𑒳𑒢𑒱
𑒁𑒢𑓂𑒞𑒩𑒰𑒨 - 𑒫𑒱𑒒𑓂𑒢
𑒨𑒰𑒔𑒏𑒣𑒙𑒪𑒲𑒏𑒪𑓂𑒣 - 𑒨𑒰𑒔𑒏𑒮𑒧𑒴𑒯𑒖𑒹𑒏𑒰𑒿
𑒩𑒯𑒮𑓂𑒨𑒼𑒠𑓂𑒦𑒹𑒠𑒮𑒿 - 𑒑𑒳𑒣𑓂𑒞𑒣𑓂𑒩𑒲𑒞𑒱𑒏 𑒣𑓂𑒩𑒏𑒰𑒬𑒮𑒿
𑒪𑒼𑒏𑒣𑒞𑒱 - 𑒢𑒩𑒹𑒬
𑒧𑒡𑓂𑒨𑒧𑒪𑒼𑒏 - 𑒧𑒩𑓂𑒞𑓂𑒨𑒦𑒳𑒫𑒢
𑒁𑒡𑒼𑒦𑒳𑒫𑒢 - 𑒣𑒰𑒞𑒰𑒪
𑒢𑒩𑒩𑒱𑒏𑓂𑒞 - 𑒧𑒢𑒳𑒭𑓂𑒨𑒮𑒿 𑒩𑒯𑒱𑒞
𑒞𑒴𑒩𑓂𑒝 - 𑒬𑒲𑒒𑓂𑒩
𑒅𑒠𑓂𑒠𑒹𑒬 - 𑒅𑒔𑓂𑒔𑒰𑒩𑒝
𑒅𑒣𑒹𑒢𑓂𑒠𑓂𑒩 - 𑒫𑒰𑒧𑒢 𑒦𑒑𑒫𑒰𑒢𑓂
𑒏𑒢𑓂𑒨𑒰𑒏 - 𑒬𑒳𑒏𑓂𑒩𑒏 𑒣𑒳𑒞𑓂𑒩𑒲 𑒠𑒹𑒫𑒨𑒰𑒢𑒲𑒏
𑒁𑒩𑓂𑒟𑒢𑒰 - 𑒨𑒰𑒔𑒢𑒰
𑒮𑒣𑒩𑒱𑒏𑒩 - 𑒣𑒩𑒱𑒫𑒰𑒩 𑒣𑒩𑒱𑒖𑒢 𑒮𑒯𑒱𑒞
𑒣𑒳𑒩𑒳𑒭𑒮𑒴𑒏𑓂𑒞 - “𑒍𑒿 𑒮𑒯𑒮𑓂𑒩𑒬𑒲𑒩𑓂𑒭𑒰” 𑒃𑒞𑓂𑒨𑒰𑒠𑒱 𑒮𑒼𑒛𑓃𑒯 𑒇𑒔𑒰
𑒠𑒳𑒃 - 𑒢𑒰𑒩𑒰𑒨𑒝 𑒍 𑒞𑒳𑒩𑓂𑒫𑒮𑒳 (𑒢𑒱𑒖 𑒠𑒳𑒃 𑒥𑒰𑒣𑒏 𑒣𑒩𑒱𑒔𑒨)
𑒣𑓂𑒩𑒞𑒱𑒑𑓂𑒩𑒯 - 𑒠𑒰𑒢 𑒪𑒹𑒥
𑒪𑒰𑒖𑒯𑒼𑒧 - 𑒪𑒖𑓂𑒖𑒰𑒏 𑒯𑒫𑒢
𑒪𑒰𑒖𑒯𑒼𑒧𑒧𑒹 - 𑒪𑒰𑒫𑒰𑒮𑒿 𑒯𑒫𑒢𑒧𑒹
𑒣𑓂𑒩𑒝𑒨𑒏𑒼𑒣𑒏 - 𑒧𑒰𑒢𑒏
𑒁𑒣𑒮𑒰𑒩𑒝-𑒑𑒞𑒱 - 𑒯𑒙𑒋𑒥𑒰𑒏 𑒅𑒣𑒰𑒨
𑒣𑒩𑒧𑒰𑒝𑒳 - 𑒮𑒴𑒩𑓂𑒨𑒏 𑒣𑓂𑒩𑒦𑒰𑒧𑒹 𑒠𑒵𑒬𑓂𑒨 𑒩𑒹𑒝𑒳𑒏 𑒕𑒚𑒧 𑒦𑒰𑒑
𑒠𑓂𑒫𑒨𑒝𑒳𑒏 - 𑒠𑒴 𑒣𑒩𑒧𑒰𑒝𑒳
𑒣𑒴𑒑𑒲𑒤𑒪 - 𑒮𑒳𑒣𑒰𑒩𑒲
𑒫𑓂𑒨𑒓𑓂𑒑𑒨𑒫𑒔𑒢 - 𑒫𑓂𑒨𑒓𑓂𑒑𑓂𑒨𑒰𑒩𑓂𑒟-𑒥𑒼𑒡𑒏 𑒫𑒔𑒢
𑒠𑒱𑒫𑒮𑒔𑒞𑒳𑒭𑓂𑒙𑒨 - 𑒔𑒰𑒩𑒱
𑒑𑒰𑒢𑒔𑒰𑒞𑒳𑒩𑒲-𑒫𑒱𑒫𑒩𑒝 - 𑒣𑓂𑒩𑒏𑒰𑒬𑒢
𑒏𑒰𑒢-𑒮𑒳𑒡𑒰𑒩𑒮-𑒫𑒱𑒞𑒩𑒝- 𑒠𑒰𑒢
𑒔𑒰𑒩𑒱𑒧𑒬𑒳𑒔𑒱 - 𑒔𑒰𑒩𑒳𑒞𑒰𑒮𑒿 𑒦𑒴𑒭𑒱𑒞
𑒣𑒰𑒿𑒏𑒪 - 𑒣𑒰𑒿𑒏𑒧𑒹 𑒪𑒰𑒑𑒪
𑒢𑒱𑒧𑒲𑒪𑒱𑒞 - 𑒮𑒓𑓂𑒏𑒳𑒔𑒱𑒞
𑒏𑒲𑒪𑒱𑒞 - 𑒥𑒠𑓂𑒡 (𑒣𑒲𑒛𑓃𑒱𑒞)
𑒧𑒠𑒢-𑒩𑒳𑒖𑒰 - 𑒩𑒼𑒑
𑒢𑒱𑒩𑓂𑒫𑒰𑓀𑒣 - 𑒬𑒰𑒢𑓂𑒞𑒱 𑒏𑒩𑒥
𑒮𑒧𑒰𑒖𑒱𑒞 - 𑒣𑒴𑒖𑒱𑒞
𑒅𑒠𑓂𑒦𑒹𑒠 - 𑒫𑒱𑒏𑒰𑒮
𑒔𑒪𑒠𑒪 - 𑒣𑒲𑒣𑒛𑓃
𑒧𑒢𑓂𑒧𑒟-𑒒𑒩𑓂𑒭𑒝 - 𑒣𑓂𑒩𑒑𑒪𑓂𑒦𑒞𑒰
𑒏𑒪𑓂𑒣𑒏𑒪𑓂𑒣 - 𑒏𑒪𑓂𑒣𑒮𑒠𑒵𑒬
𑒂𑒬𑒰 - 𑒠𑒱𑒬𑒰
𑒫𑒱𑒠𑒑𑓂𑒡 - 𑒫𑒱𑒏𑒪, 𑒩𑒮𑒱𑒏
𑒮𑒳𑒩𑒞𑒫𑒱𑒞𑒰𑒢 - 𑒏𑓂𑒩𑒲𑒛𑓃𑒰-𑒏𑒪𑒰𑒣
𑒫𑒱𑒞𑒰𑒢𑒪 - 𑒫𑒱𑒮𑓂𑒞𑒲𑒩𑓂𑒝 𑒏𑒋𑒪
𑒮𑓀𑒦𑒼𑒑 - 𑒬𑒵𑓀𑒑𑒰𑒩𑒏 𑒣𑒴𑒩𑓂𑒫𑒰𑒓𑓂𑒑 𑒫𑒰 𑒏𑒹𑒪𑒱
𑒫𑒱𑒣𑓂𑒩𑒪𑒧𑓂𑒦 - 𑒬𑒵𑒓𑓂𑒑𑒰𑒩𑒏 𑒅𑒞𑓂𑒞𑒩𑒰𑒓𑓂𑒑 𑒫𑒰 𑒫𑒱𑒩𑒯
𑒁𑒫𑒮𑒱𑒞 - 𑒮𑒧𑒰𑒣𑓂𑒞
𑒫𑒱𑒡𑒳𑒩 - 𑒫𑒱𑒩𑒯𑒱𑒞 (𑒠𑒲𑒣𑒏-𑒫𑒱𑒡𑒳-𑒫𑒱𑒡𑒳𑒩)
𑒁𑒢𑒫𑒧 - 𑒢𑒱𑒩𑓂𑒠𑒼𑒭
𑒫𑒱𑒩𑒮 - 𑒢𑒱𑓁𑒮𑓂𑒣𑒵𑒯 (𑒫𑒱𑒧𑒳𑒐)
𑒣𑒘𑓂𑒔𑒨𑒖𑓂𑒘 - 𑒥𑓂𑒩𑒯𑓂𑒧𑒨𑒖𑓂𑒘 (𑒫𑒹𑒠 𑒁𑒡𑓂𑒨𑒨𑒢-𑒁𑒡𑓂𑒨𑒰𑒣𑒢), 𑒣𑒱𑒞𑒵𑒨𑒖𑓂𑒘 (𑒣𑒱𑒞𑒩𑒏
𑒞𑒩𑓂𑒣𑒝 𑒍 𑒢𑒱𑒞𑓂𑒨𑒬𑓂𑒩𑒰𑒠𑓂𑒡), 𑒠𑒹𑒫𑒨𑒖𑓂𑒘 (𑒯𑒫𑒢), 𑒦𑒴𑒞𑒨𑒖𑓂𑒘
(𑒫𑒻𑒬𑓂𑒫𑒠𑒹𑒫𑒫𑒪𑒱), 𑒢𑒵𑒣𑒖𑓂𑒘 (𑒁𑒞𑒱𑒟𑒱-𑒮𑒞𑓂𑒏𑒰𑒩)
𑒣𑒩𑓂𑒫 - 𑒣𑒰𑒥𑒢𑒱
𑒂𑒢𑓂𑒞𑒩𑒱𑒏 - 𑒁𑒢𑓂𑒞𑓁𑒏𑒩𑒝
𑒧𑒘𑓂𑒖𑒴𑒭𑒰 - 𑒣𑒹𑒙𑒲
𑒦𑒴𑒧𑒱𑒢𑒹𑒞𑒰 - 𑒣𑒵𑒟𑓂𑒫𑒲𑒣𑒞𑒱
𑒖𑒩𑒞𑒲 - 𑒥𑒵𑒠𑓂𑒡𑒰
𑒫𑒻𑒖𑒨𑒢𑓂𑒞 - 𑒃𑒢𑓂𑒠𑓂𑒩𑒰𑒝𑒲𑒮𑒿 𑒦𑒴𑒭𑒱𑒞 𑒃𑒢𑓂𑒠𑓂𑒩𑒣𑓂𑒩𑒰𑒮𑒰𑒠𑒏
𑒣𑒞𑒱-𑒣𑒩𑒱𑒔𑒰𑒩 - 𑒮𑓂𑒫𑒰𑒧𑒲𑒏 𑒮𑒹𑒫𑒰
𑒧𑒢𑓂𑒞𑓂𑒩 - 𑒫𑒱𑒔𑒰𑒩
𑒏𑒰𑒢𑓂𑒞 - 𑒣𑓂𑒩𑒱𑒨
𑒬𑓂𑒪𑒰𑒡𑒰𑒣𑒩𑒰𑒨𑒝 - 𑒣𑓂𑒩𑒬𑓀𑒮𑒰𑒧𑒹 𑒞𑒞𑓂𑒣𑒩
𑒡𑒫 - 𑒡𑒰𑒫𑒰
𑒧𑒡𑒳𑒣𑒰 - 𑒧𑒠𑓂𑒨𑒣𑒰𑒨𑒱𑒢𑒲
𑒦𑒴𑒩𑒱 - 𑒥𑒯𑒳𑒞
𑒮𑒩𑓂𑒫𑒮𑒯𑒰𑒮𑒧𑒹𑒞 - 𑒮𑒦 (𑒠𑒳𑓁𑒐𑒏𑒹𑒿) 𑒮𑒯𑒢𑒱𑒯𑒰𑒩𑒱 𑒣𑒵𑒟𑓂𑒫𑒲 𑒮𑒯𑒱𑒞
𑒏𑒰𑒮𑒩 - 𑒧𑒯𑒱𑒮𑒰
𑒯𑒱𑒝𑓂𑒛𑒼𑒩 - 𑒧𑒔𑒏𑒲
𑒬𑒻𑒪𑒴𑒭-𑒏𑒳𑒯𑒢𑒰 - 𑒢𑒙𑒏 𑒧𑒰𑒨𑒰

𑒮𑓀𑒑𑒧𑒹 𑒯𑒩𑒱𑒧𑒼𑒯𑒢 𑒗𑒰, 𑒨𑒰𑒞𑓂𑒩𑒲, 𑒡𑒴𑒧𑒏𑒹𑒞𑒳, 𑒮𑒰𑒏𑒹𑒞𑒰𑒢𑒢𑓂𑒠, 𑒩𑒰𑒧𑒦𑒠𑓂𑒩, 𑒡𑒲𑒩𑒹𑒢𑓂𑒠𑓂𑒩, 𑒏𑒰𑒣𑒛𑓃𑒱, 𑒧𑒪𑓀𑒑𑒱𑒨𑒰, 𑒢𑒔𑒱𑒏𑒹𑒞𑒰, 𑒏𑒳𑒪𑒰𑒢𑒢𑓂𑒠 𑒧𑒱𑒬𑓂𑒩, 𑒩𑒰𑒖𑒏𑒧𑒪, 𑒩𑒰𑒖𑒧𑒼𑒯𑒢 𑒗𑒰, 𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫, 𑒣𑓂𑒩𑒹𑒧𑒬𑓀𑒏𑒩 𑒮𑒱𑓀𑒯, 𑒩𑒧𑒰𑒢𑒢𑓂𑒠 𑒗𑒰 “𑒩𑒧𑒝”, 𑒧𑒼𑒯𑒢 𑒦𑒰𑒩𑒠𑓂𑒫𑒰𑒖, 𑒩𑒧𑒰𑒢𑒰𑒟 𑒗𑒰, 𑒖𑒲𑒫𑒏𑒰𑒢𑓂𑒞, 𑒣𑓂𑒩𑒦𑒰𑒮 𑒏𑒳𑒧𑒰𑒩 𑒔𑒾𑒡𑒩𑒲, 𑒪𑒱𑒪𑒲 𑒩𑒹, 𑒃𑒪𑒰𑒩𑒰𑒢𑒲 𑒮𑒱𑓀𑒯, 𑒩𑒰𑒧𑒪𑒼𑒔𑒢 𑒚𑒰𑒏𑒳𑒩𑒏𑒹𑒿 𑒣𑒜𑓃𑒲, 𑒂 𑒠𑒲𑒢𑒥𑒢𑓂𑒡𑒳 𑒗𑒰𑒏 𑒡𑒰𑒞𑒳𑒩𑒴𑒣 𑒂 𑒩𑒧𑒰𑒢𑒰𑒟 𑒗𑒰𑒏 𑒧𑒱𑒟𑒱𑒪𑒰𑒦𑒰𑒭𑒰 𑒣𑓂𑒩𑒏𑒰𑒬, 𑒂 𑒦𑒰𑒩𑒞 𑒂 𑒢𑒹𑒣𑒰𑒪𑒏 𑒏𑒏𑓂𑒭𑒰 𑒢𑒾-𑒠𑒮 𑒏𑒹𑒩 𑒣𑒼𑒟𑒲 𑒮𑒹𑒯𑒼 𑒒𑒼𑓀𑒙𑒱 𑒖𑒰𑒃 𑒂 𑒞𑒐𑒢 𑒖𑒹 𑒁𑒯𑒰𑒿 𑒧𑒱𑒟𑒱𑒪𑒰𑒏𑓂𑒭𑒩 𑒮𑒹𑒯𑒼 𑒢𑒲𑒏 𑒖𑒹𑒏𑒰𑒿 𑒣𑒜𑓃𑒲 𑒂 𑒪𑒱𑒐𑒱 𑒮𑒏𑒲 𑒞𑒿 𑒁𑒣𑒢𑒰𑒏𑒹𑒿 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨 𑒣𑒩𑒧𑓂𑒣𑒩𑒰𑒮𑒿 𑒖𑒼𑒛𑓃𑒱 𑒮𑒏𑒥 𑒂 𑒧𑒹𑒛𑒱𑒍𑒏𑓂𑒩𑒱𑒙𑒲 𑒮𑒿 𑒥𑒰𑒯𑒩 𑒂𑒥𑒱 𑒮𑒏𑒥। 𑒧𑒻𑒟𑒱𑒪𑒲 𑒣𑒞𑓂𑒩-𑒣𑒞𑓂𑒩𑒱𑒏𑒰 𑒮𑒦 𑒮𑒹𑒯𑒼 𑒣𑒜𑓃𑒲 𑒂 𑒁𑒢𑒳𑒫𑒰𑒠 𑒮𑒰𑒯𑒱𑒞𑓂𑒨 𑒮𑒹𑒯𑒼। 𑒮𑓀𑒑𑒯𑒱 𑒫𑒱𑒠𑒹𑒯-𑒧𑒱𑒟𑒱𑒪𑒰-𑒞𑒲𑒩𑒦𑒳𑒏𑓂𑒞𑒱-𑒞𑒱𑒩𑒯𑒳𑒞𑒏 𑒃𑒞𑒱𑒯𑒰𑒮 𑒂 𑒧𑒯𑒰𑒢 𑒣𑒳𑒩𑒳𑒭 𑒂 𑒧𑒯𑒱𑒪𑒰 𑒪𑒼𑒏𑒢𑒱𑒏 𑒏𑒵𑒞𑒱 𑒂 𑒔𑒩𑒱𑒞𑓂𑒩𑒏 𑒁𑒡𑓂𑒨𑒨𑒢 𑒮𑒹𑒯𑒼 𑒂𑒫𑒬𑓂𑒨𑒏। 𑒋𑒞𑒹𑒏 𑒮𑒥𑒏 𑒣𑒴𑒩𑓂𑒝 𑒦𑒹𑒪𑒰𑒏 𑒥𑒰𑒠 𑒖𑒹 𑒮𑒰𑒯𑒱𑒞𑓂𑒨 𑒁𑒯𑒰𑒿𑒏 𑒪𑒹𑒐𑒢𑒲𑒮𑒿 𑒢𑒱𑒏𑒪𑒞 𑒞𑒏𑒩 𑒮𑓂𑒫𑒰𑒠 𑒤𑒩𑒰𑒏 𑒩𑒯𑒞 ।

𑒏𑒵𑒭𑒱-𑒧𑒞𑓂𑒮𑓂𑒨 𑒬𑒥𑓂𑒠𑒰𑒫𑒪𑒲 (𑒤𑒲𑒪𑓂𑒛-𑒫𑒩𑓂𑒏𑒣𑒩 𑒂𑒡𑒰𑒩𑒱𑒞)
𑒧𑒰𑒿𑒕 𑒫𑓀𑒬𑒲𑒮𑒿 𑒮𑒹𑒯𑒼 𑒧𑒰𑒩𑒪 𑒖𑒰𑒃𑒞 𑒁𑒕𑒱।
𑒕𑒼𑒙 𑒧𑒰𑒿𑒕𑒏 𑒪𑒹𑒪 𑒖𑒰𑒪- 𑒦𑒾𑒩𑒲 𑒖𑒰𑒪𑒏 𑒣𑓂𑒩𑒨𑒼𑒑 𑒯𑒼𑒃𑒞 𑒁𑒕𑒱।
𑒦𑒱𑒩𑒐𑒰- 𑒯𑒰𑒟𑒮𑒿 𑒅𑒚𑒰 𑒏𑒋 𑒤𑒹𑓀𑒏𑒪 𑒖𑒰𑒃𑒞 𑒁𑒕𑒱। 𑒋𑒯𑒱𑒧𑒹 𑒮𑒴𑒞 𑒂 𑒪𑒼𑒯𑒰𑒏 𑒑𑒼𑒪𑒲 𑒣𑓂𑒩𑒨𑒼𑒑 𑒯𑒼𑒃𑒞 𑒁𑒕𑒱, 𑓒𑓕-𑓒𑓕 𑒑𑓂𑒩𑒰𑒧𑒏 𑒪𑒼𑒯𑒰𑒏 𑒑𑒼𑒪𑒲 𑒪𑒑𑒦𑒑 𑓒-𑓑/𑓒 𑒮𑒿 𑓕 𑒏𑒱𑒪𑒼 𑒡𑒩𑒱 𑒣𑓂𑒩𑒨𑒼𑒑𑒧𑒹 𑒂𑒢𑒪 𑒖𑒰𑒃𑒞 𑒁𑒕𑒱। 𑒁𑒢𑓂𑒞𑒰 𑒖𑒰𑒪 𑒕𑒼𑒙 𑒯𑒼𑒃𑒞 𑒁𑒕𑒱 𑒂 𑒏𑒕𑒰𑒩𑒧𑒹 𑒩𑒰𑒞𑒱𑒧𑒹 𑒪𑒑𑒰𑒍𑒪 𑒖𑒰𑒃𑒞 𑒁𑒕𑒱।
𑒏𑒼𑒚𑒲 𑒖𑒰𑒪 𑒣𑒻𑒒 𑒯𑒼𑒃𑒞 𑒁𑒕𑒱 𑒂 𑒋𑒯𑒱𑒧𑒹 𑒥𑒰𑒿𑒮𑒏 𑒣𑓂𑒩𑒨𑒼𑒑 𑒯𑒼𑒃𑒞 𑒁𑒕𑒱।
𑒥𑒱𑒮𑒰𑒩𑒲 𑒖𑒰𑒪- 𑒠𑒱𑒢𑒧𑒹 𑒧𑒰𑒿𑒕 𑒯𑒩𑒏𑒱 𑒖𑒋𑒞𑒻𑒏 𑒮𑒹 𑒩𑒰𑒞𑒱𑒧𑒹 𑒐𑒳𑒙𑓂𑒙𑒲 𑒪𑒑𑒰 𑒏𑓄 𑒩𑒰𑒞𑒱𑒧𑒹 𑒧𑒰𑒿𑒕 𑒧𑒰𑒩𑒪 𑒖𑒰𑒃𑒞 𑒕𑒻।
𑒔𑒙𑓂𑒙𑒲 𑒖𑒰𑒪- 𑒣𑓂𑒪𑒰𑒮𑓂𑒙𑒱𑒏𑒏, 𑒣𑒻𑒒-𑒕𑒼𑒙 𑒠𑒳𑒢𑒴, 𑒠𑒱𑒢𑒧𑒹 𑒣𑓂𑒩𑒨𑒳𑒏𑓂𑒞, 𑒂𑒭𑒰𑒜𑓃-𑒮𑒰𑒍𑒢 𑒠𑒳𑒢𑒴 𑒧𑒹। 𑓕-𑓑𑓐 𑒧𑒱𑒢𑒙𑒧𑒹 𑒅𑒚𑒰𑒍𑒪 𑒖𑒰𑒃𑒞 𑒕𑒻।
𑒮𑒴𑒞𑒏 𑒧𑒼𑒙 𑒣𑒻𑒩𑒰𑒬𑒴𑒙 𑒖𑒰𑒪, 𑒮𑒴𑒞 𑒂 𑒢𑒰𑒃𑒪𑒢𑒏 𑒧𑒱𑒬𑓂𑒩𑒝𑒏 𑒏𑒩𑒹𑒢𑓂𑒙 𑒖𑒰𑒪, 𑒮𑒴𑒞𑒏 𑒥𑒛𑓃𑒏𑒰 𑒯𑒰𑒙𑒰 𑒖𑒰𑒪 𑒯𑒼𑒃𑒞 𑒕𑒻।
𑒣𑒻𑒩𑒰𑒬𑒴𑒙𑒮𑒿 𑒕𑒼𑒙𑒏𑒲 𑒧𑒰𑒿𑒕 𑒅𑒛𑓃𑒱 𑒖𑒋𑒞𑒻𑒏।
𑒣𑒻𑒒 𑒧𑒕𑒪𑒲 𑒥𑒛𑓃𑒏𑒰 𑒫𑓀𑒬𑒲𑒮𑒿, 𑒥𑒛𑓃𑒏𑒰 𑒔𑒙𑓂𑒙𑒲 𑒖𑒰𑒪𑒮𑒿, 𑒮𑒴𑒞𑒰𑒏 𑒧𑒯𑒰𑒖𑒰𑒪𑒮𑒿 𑒧𑒰𑒩𑒪 𑒖𑒰𑒃𑒞 𑒁𑒕𑒱।
𑒣𑒻𑒒 𑒕𑒼𑒙 𑒠𑒳𑒢𑒴 𑒧𑒰𑒿𑒕 𑒥𑒰𑒿𑒮𑒏 𑒖𑓀𑒒𑒰𑒮𑒿 𑒧𑒰𑒩𑒪 𑒖𑒰𑒃𑒞 𑒕𑒻। 𑒋𑒏𑒩𑒰 𑓔 𑒯𑒰𑒟 𑒐𑒛𑓃𑒰 𑒢𑒰𑒩𑒱𑒨𑒪 𑒂 𑒢𑒰𑒃𑒪𑒼𑒢𑒏 𑒛𑒼𑒩𑒲𑒮𑒿 𑒥𑒰𑒢𑓂𑒯𑒪 𑒖𑒰𑒃𑒞 𑒕𑒻।
𑒥𑒰𑒿𑒮𑒏 𑒏𑒩𑒔𑒲𑒏 𑒕𑒲𑒣𑒮𑒿 𑒮𑒹𑒯𑒼 𑒧𑒰𑒿𑒕 𑒧𑒰𑒩𑒪 𑒖𑒰𑒃𑒞 𑒕𑒻।
𑒣𑒙𑒳𑒂𑒏 𑒮𑒝𑓂𑒚𑒲𑒏 𑓑𑓐𑓐-𑓒𑓐𑓐 𑒣𑒳𑒪𑓂𑒪𑒲 𑒋𑒏 𑒮𑓀𑒑 𑒪𑒑𑒰 𑒏𑒋 𑒮𑒹𑒯𑒼 𑒧𑒰𑒿𑒕 𑒧𑒰𑒩𑒪 𑒖𑒰𑒃𑒞 𑒕𑒻।
𑒯𑒰𑒙𑒰 𑒖𑒰𑒪 𑒏𑒱𑒪𑒼𑒧𑒲𑒙𑒩 𑒡𑒩𑒱 𑒣𑒻𑒒 𑒯𑒼𑒃𑒞 𑒁𑒕𑒱 𑒂 𑒮𑒴𑒞𑒰𑒏 𑒥𑒢𑒻𑒞 𑒁𑒕𑒱।
𑒔𑒰𑒿𑒔 𑒏𑒯𑒛𑓃𑒰 𑒥𑒰𑒿𑒮𑒏 𑒯𑒼𑒃𑒞 𑒁𑒕𑒱।𑒡𑒰𑒩/ 𑒥𑒠𑒯𑒰𑒪 𑒒𑒹𑒩𑒏𑒹𑒿 𑒧𑒰𑒩𑒪 𑒖𑒰𑒃𑒞 𑒁𑒕𑒱। 𑒣𑒰𑒢𑒱𑒏𑒹𑒿 𑒤𑒳𑒪𑒰 𑒏𑒋 𑒛𑒑𑒩𑒲 𑒪𑒑𑒰𑒍𑒪 𑒖𑒰𑒃𑒞 𑒕𑒻, 𑒔𑒰𑒿𑒔 𑒤𑒯𑒛𑓃𑒰𑒮𑒿 𑒒𑒹𑒩𑒪 𑒖𑒰𑒃𑒞 𑒁𑒕𑒱।
𑒧𑒰𑒿𑒕𑒏 𑒣𑓂𑒩𑒏𑒰𑒩
𑒛𑒰𑒿𑒩𑒰 𑒧𑒕𑒪𑒲 (𑒛𑒹𑒩𑒏𑒰 𑒧𑒕𑒪𑒲), 𑒧𑒴𑒿𑒯𑒰 𑒧𑒕𑒪𑒲, 𑒣𑒼𑒚𑒲, 𑒪𑒞𑓂𑒞𑒰 (𑒣𑒱𑒂 𑒧𑒰𑒿𑒕), 𑒑𑒛𑓃𑒃, 𑒣𑒪𑒫𑒰, 𑒙𑒹𑓀𑒑𑒛𑓃𑒰, 𑒮𑒱𑓀𑒒𑒲, 𑒧𑒰𑒿𑒑𑒳𑒛𑓃, 𑒔𑒣𑒛𑓃𑒰, 𑒣𑒻𑒢𑒰, 𑒩𑒹𑒫𑒰, 𑒑𑒛𑓃𑒯𑒲, 𑒅𑒩𑒢𑓂𑒟𑒰, 𑒧𑒼𑒯𑒳𑒪, 𑒥𑒳𑒂𑒩𑒲, 𑒥𑒰𑒧𑒲, 𑒥𑒑𑒯𑒰𑒩, 𑒔𑒹𑒪𑒫𑒰, 𑒏𑒾𑒁𑒪, 𑒑𑒼𑒩𑓂𑒩𑒰, 𑒮𑒾𑒪, 𑒦𑒾𑒩𑒰, 𑒏𑒖𑒰𑒪, 𑒏𑒪𑒥𑒾𑒮, 𑒔𑒱𑒞𑓂𑒞𑒪, 𑒦𑒼𑒃, 𑒏𑒞𑓂𑒞𑒲, 𑒦𑒾𑒏𑒳𑒛𑓃𑒲, 𑒮𑒱𑒪𑒼𑒢, 𑒩𑒹𑒯𑒴, 𑒧𑒱𑒩𑒏𑒰, 𑒥𑒱𑒪𑒰𑒮𑒏𑒣, 𑒮𑒱𑒪𑓂𑒫𑒩𑒏𑒣, 𑒔𑒰𑒃𑒢𑒰 𑒧𑒰𑒿𑒑𑒳𑒩, 𑒏𑒥𑒃, 𑒔𑒰𑒃𑒢𑒰 𑒏𑒥𑒃।
𑒠𑒩𑒥𑒰- 𑒕𑒼𑒙, 𑒣𑒰𑒞𑒩- 𑓒-𑓓 𑒃𑒢𑓂𑒔𑒏, 𑒣𑒲𑒚𑒣𑒩 𑒏𑒰𑒩𑒲, 𑒥𑒑𑒪 𑒮𑒤𑒹𑒠
𑒑𑒛𑓃𑒄- 𑒏𑒰𑒩𑒲
𑒔𑒼𑒣𑒛𑓃𑒰- 𑒔𑒰𑒏𑒩, 𑒏𑒰𑒩𑒲, 𑒧𑒪𑒱𑒢
𑒣𑒪𑒥𑒰- 𑒠𑒳𑒢𑒴 𑒠𑒱𑒮 𑒏𑒰𑒿𑒙, 𑒣𑒲𑒚𑒣𑒩 𑒮𑒹𑒯𑒼 𑒏𑒰𑒿𑒙, 𑒩𑓀𑒑- 𑒣𑒲𑒨𑒩-𑒅𑒖𑓂𑒖𑒩, 𑒧𑒼𑓀𑒕 𑒮𑒹𑒯𑒼 𑒯𑒼𑒃𑒞 𑒕𑒻।
𑒙𑒹𑓀𑒑𑒛𑓃𑒰- 𑒣𑒻𑒒 𑒧𑒰𑒿𑒕, 𑒋𑒏𑒩𑒼 𑒞𑒲𑒢 𑒙𑒰 𑒏𑒰𑒿𑒙, 𑒧𑒳𑒿𑒯𑒣𑒩 𑒧𑒼𑒿𑒕।
𑒮𑒱𑓀𑒒𑒲- 𑒣𑒰𑒞𑒩, 𑒠𑒴 𑒙𑒰 𑒏𑒰𑒿𑒙 𑒠𑒳𑒢𑒴 𑒠𑒱𑒮, 𑒪𑒰𑒪 𑒩𑓀𑒑𑒏 𑒂 𑒪𑒰𑒪 𑒂 𑒯𑒪𑓂𑒏𑒰 𑒏𑒰𑒩𑒲
𑒧𑒿𑒑𑒳𑒩𑒲- 𑒧𑒼𑒙 𑒂 𑒧𑒯𑒑 𑒮𑒹𑒯𑒼।𑒋𑒏𑒩𑒼 𑒠𑒴 𑒙𑒰 𑒏𑒰𑒿𑒙, 𑒪𑒰𑒪 𑒂 𑒯𑒪𑓂𑒏𑒰 𑒏𑒰𑒩𑒲
𑒣𑒻𑒢𑒰- 𑒮𑒤𑒹𑒠 𑒩𑓀𑒑𑒏, 𑒣𑒲𑒚𑒣𑒩 𑒏𑒰𑒿𑒙
𑒩𑒹𑒫𑒰- 𑒮𑒤𑒹𑒠, 𑒣𑒾𑒂-𑒂𑒡𑒰 𑒏𑒱𑒪𑒼𑒏
𑒛𑒜𑓃𑒲- 𑒣𑒲𑒚𑒣𑒩 𑒏𑒰𑒿𑒙𑒰, 𑒮𑒤𑒹𑒠
𑒅𑒩𑒢𑓂𑒟𑒰- 𑒣𑒲𑒚𑒣𑒩 𑒏𑒰𑒿𑒙, 𑒢𑒲𑒔𑒰𑒿 𑒑𑒰𑒧𑒹 𑒗𑒳𑒏𑒪, 𑒮𑒤𑒹𑒠
𑒦𑒰𑒪𑒳- 𑒪𑒧𑓂𑒥𑒰𑒃 𑒧𑒳𑒿𑒯, 𑒮𑒤𑒹𑒠- 𑒐𑒛𑓃𑒰(𑒣𑒲𑒨𑒩), 𑒆𑒣𑒩𑒧𑒹 𑒏𑒰𑒿𑒙𑒰, 𑒢𑒰𑒦𑒱𑒏 𑒪𑒑 𑒏𑒰𑒿𑒙 (𑒮𑒦 𑒧𑒰𑒿𑒕𑒧𑒹)
𑒥𑒼𑒂𑒪𑒲- 𑒣𑒻𑒒 𑒧𑒳𑒿𑒯- 𑓒𑓐 𑒏𑒱𑒪𑒼 𑒡𑒩𑒱, 𑒮𑒤𑒹𑒠, 𑒣𑒲𑒚𑒣𑒩 𑒏𑒰𑒿𑒙, 𑒣𑒐𑒢𑒰 𑒠𑒳𑒢𑒴 𑒠𑒱𑒮 (𑒮𑒦 𑒧𑒰𑒿𑒕𑒧𑒹)
𑒥𑒰𑒧𑒲- 𑒪𑒧𑓂𑒥𑒰, 𑒥𑒱𑒪𑒧𑒹 𑒩𑒯𑒻𑒞 𑒁𑒕𑒱, 𑒧𑒳𑒿𑒯 𑒂𑒑𑒴, 𑒑𑒼𑒪 𑒧𑒳𑒿𑒯, 𑒮𑒴𑒂 𑒖𑒏𑒰𑒿 𑒪𑒧𑓂𑒥𑒰, 𑒣𑒲𑒚𑒣𑒩 𑒏𑒰𑒿𑒙, 𑒢𑒰𑒦𑒱𑒣𑒩 𑒠𑒴 𑒙𑒰 𑒏𑒰𑒿𑒙
𑒥𑒒𑒰𑒩- 𑒕𑒼𑒙, 𑓑 𑒣𑒾𑒂𑒮𑒿 𑒏𑓂𑒫𑒱𑓀𑒙𑒪 𑒦𑒩𑒱𑒏, 𑒏𑒰𑒩𑒲-𑒐𑒻𑒩𑒰 (𑒣𑒲𑒨𑒩), 𑒏𑒰𑒿𑒙- 𑒣𑒲𑒚𑒣𑒩 𑒋𑒏𑒙𑒰, 𑒥𑒑𑒪𑒧𑒹 𑒠𑒴 𑒙𑒰, 𑒣𑒳𑒔𑓂𑒕𑒲-𑒔𑒰𑒏𑒩, 𑒧𑒳𑒿𑒯 𑒔𑒰𑒣𑒙, 𑒔𑒏𑒛𑓃𑒰𑒄- 𑒥𑒹𑒮𑒲।
𑒔𑒹𑒪𑒥𑒰- 𑒅𑒖𑓂𑒖𑒩, 𑒏𑒰𑒿𑒙 𑒢𑒯𑒱 𑒯𑒼𑒃𑒞 𑒕𑒻। 𑒔𑒪𑒻𑒏 𑒪𑒹𑒪 𑒠𑒳𑒢𑒴 𑒠𑒱𑒮 𑒣𑒐𑒢𑒰, 𑒧𑒰𑒿𑒕𑒧𑒹 𑒞𑒹𑒖𑒑𑒩।
𑒏𑒾𑒁𑒪- 𑒮𑒤𑒹𑒠, 𑒧𑒳𑒿𑒯 𑒢𑒧𑒑𑒩।
𑒑𑒼𑒩𑓂𑒩𑒰- 𑒧𑒼𑒿𑒕, 𑒠𑒰𑒜𑓃𑒲, 𑒏𑒰𑒿𑒙𑒰, 𑒂𑒑𑒰𑒿𑒧𑒹 𑒙𑒹𑒜𑓃
𑒮𑒰𑒅𑒪- 𑒪𑒰𑒪 𑒂 𑒣𑒲𑒨𑒩, 𑒢𑒧𑒑𑒩, 𑓒-𑓓-𑓕 𑒏𑒱𑒪𑒼𑒏
𑒦𑒾𑒩𑒰-(𑒑𑒖𑒰𑒪), 𑒮𑒰𑒅𑒪, 𑒔𑒱𑒞𑒤𑒳𑒙𑒩𑒰, 𑒣𑒻𑒒 𑓒𑓐-𑓒𑓕-𑓔𑓐 𑒏𑒱𑒪𑒼 𑒞𑒏, 𑒑𑒼𑒪-𑒑𑒼𑒪 𑒅𑒖𑓂𑒖𑒩, 𑒯𑒩𑒱𑒨𑒩 𑒂 𑒏𑒰𑒩𑒲
𑒏𑒪𑒥𑒾𑒮- 𑒩𑓀𑒑 𑒯𑒪𑓂𑒏𑒰 𑒏𑒰𑒩𑒲
𑒁𑓀𑒠𑒰𑒖𑒲 𑒧𑒰𑒿𑒕
𑒔𑒱𑒞𑓂𑒞𑒪- 𑒔𑒏𑒩𑒑𑒩 𑒥𑒹𑒮𑒲, 𑓒𑓐-𑓒𑓕 𑒏𑒱𑒪𑒼𑒏, 𑓒-𑓓 𑒤𑒲𑒙 𑒔𑒏𑒩𑒑𑒩
𑒮𑒱𑒪𑒼𑒢- 𑒣𑒰𑒪𑒞𑒴,𑓓-𑓔 𑒏𑒱𑒪𑒼𑒏,𑒣𑒼𑒐𑒩𑒱𑒧𑒹 𑒣𑒼𑒮𑒪 𑒖𑒰𑒃𑒞 𑒁𑒕𑒱।
𑒩𑒼𑒯𑒳-𑒣𑒲𑒨𑒩, 𑒯𑒪𑓂𑒏𑒰 𑒅𑒖𑓂𑒖𑒩, 𑒣𑒲𑒚𑒣𑒩 𑒏𑒰𑒿𑒙
𑒧𑒱𑒩𑒏𑒰- 𑒯𑒪𑓂𑒏𑒰 𑒪𑒰𑒪 𑒮𑒤𑒹𑒠
𑒮𑒱𑒪𑓂𑒫𑒩𑒏𑒣- 𑒣𑒰𑒪𑒞𑒴
𑒔𑒻𑒢𑒰 𑒧𑒰𑒿𑒑𑒳𑒩- 𑒔𑒪𑒰𑒢𑒲 (𑒣𑒰𑒪𑒞𑒴), 𑒠𑒳𑒢𑒴 𑒠𑒱𑒮 𑒏𑒰𑒿𑒙
𑒔𑒻𑒢𑒰 𑒏𑒥𑒃- 𑒣𑒰𑒪𑒞𑒴 (𑒔𑒪𑒰𑒢𑒲), 𑒣𑒲𑒚𑒣𑒩 𑒖𑒯𑒰𑒿-𑒞𑒯𑒰𑒿 𑒏𑒰𑒿𑒙
𑒏𑒥𑒄- 𑒏𑒢𑒤𑒩 𑒂 𑒣𑒲𑒚 𑒠𑒳𑒢𑒴 𑒚𑒰𑒧 𑒏𑒰𑒿𑒙
𑒔𑒹𑓀𑒑𑒰 𑒧𑒰𑒿𑒕- 𑒮𑒳𑒐𑒰𑒨𑒪𑒼𑒧𑒹 𑒠𑒴𑒩 𑒡𑒩𑒱 𑒔𑒪𑒱 𑒖𑒰𑒃𑒞 𑒁𑒕𑒱, 𑒏𑒥𑒄 𑒖𑒏𑒰𑒿 ।
𑒂𑒥 𑒏𑒱𑒕𑒳 𑒠𑒼𑒮𑒩 𑒖𑒪𑒖𑒲𑒫:-
𑒮𑒾𑓀𑒮- 𑒣𑒰𑒢𑒱𑒧𑒹 𑒧𑒰𑒿𑒕 𑒐𑒰𑒃𑒞 𑒁𑒕𑒱, 𑒂𑒠𑒧𑒲𑒏𑒹𑒿 𑒢𑒼𑒏𑒮𑒰𑒢 𑒢𑒯𑒱, 𑒂𑒠𑒧𑒲 𑒮𑓀𑒑𑒹 𑒐𑒹𑒪𑒰𑒃𑒞 𑒁𑒕𑒱, 𑒮𑒲𑒙𑒲𑒏 𑒁𑒫𑒰𑒖 (𑒛𑒼𑒪𑒤𑒱𑒢)
𑒒𑒛𑓃𑒱𑒨𑒰𑒪- 𑒏𑒳𑒩𑓂𑒮𑒹𑒪𑒰 𑒪𑒑 𑒑𑓀𑒑𑒰𑒧𑒹, 𑒧𑒳𑒿𑒯 𑒪𑒧𑓂𑒥𑒰, 𑒋𑒏-𑒛𑒹𑒜𑓃 𑒯𑒰𑒟,𑒠𑒰𑒿𑒞- 𑒂𑒿𑒑𑒳𑒩 𑒖𑒹𑒏𑒰𑒿, 𑒩𑓀𑒑 𑒪𑒰𑒪, 𑒣𑒳𑒕𑒩𑒲 𑒢𑒧𑒑𑒩, 𑓓 𑒯𑒰𑒟
𑒥𑒼𑒿𑒕- 𑒂𑒠𑒧𑒲𑒏 𑒩𑓀𑒑 𑒩𑒴𑒣, 𑒏𑒰𑒩𑒲, 𑒧𑒰𑒟𑒣𑒩 𑒔𑒴𑒪- 𑒏𑒹𑒬 𑒣𑒏𑒛𑓃𑒱𑒏𑒹𑒿 𑒛𑒳𑒧𑒰 𑒠𑒻𑒞 𑒕𑒻
𑒂 𑒏𑒵𑒭𑒱 𑒬𑒥𑓂𑒠𑒰𑒫𑒪𑒲:--
𑒖𑒼𑒛𑓃𑒰 𑒥𑒻𑒪/ 𑒯𑒩
𑒄𑒬- 𑒯𑒩𑒧𑒹 𑒖𑒼𑒛𑓃𑒱 𑒏𑓄 𑒣𑒰𑒪𑒼𑒧𑒹 𑒥𑒰𑒢𑓂𑒯𑒪 𑒖𑒰𑒃𑒞 𑒕𑒻।
𑒪𑒑𑒢𑒰
𑒣𑒰𑒪𑒼- 𑒏𑒢𑓂𑒯𑒰𑒣𑒩
𑒣𑒰𑒪𑒼𑒧𑒹 𑒠𑒴 𑒙𑒰 𑒏𑒢𑒻𑒪 𑒠𑒳𑒢𑒴 𑒥𑒑𑒪 𑒥𑒛𑓃𑒠𑒏𑒹𑒿 𑒋𑒢𑒹- 𑒅𑒢𑒹 (𑒋𑒧𑓂𑒯𑒩-𑒍𑒧𑓂𑒯𑒩) 𑒢𑒘𑒱 𑒯𑒼𑒧𑒋 𑒠𑒻𑒞 𑒕𑒻।
𑒏𑒢𑒻𑒪𑒮𑒿 𑒯𑒙𑒱 𑒏𑓄 𑒋𑒏 𑒮𑒫𑒰 𑒤𑒲𑒙𑒏 𑒛𑒼𑒩𑒲 𑒥𑒰𑒢𑓂𑒯𑒪 𑒖𑒰𑒃𑒞 𑒕𑒻। 𑒮𑒧𑒻𑒪 (𑒣𑒾𑒢 𑒤𑒲𑒙𑒏 𑒪𑒏𑒛𑓃𑒲𑒏/ 𑒥𑒰𑒿𑒮𑒏) 𑒧𑒹 𑒛𑒼𑒩𑒲 𑒥𑒰𑒢𑓂𑒯𑒪 𑒖𑒰𑒃𑒞 𑒕𑒻।
𑒄𑒬𑒏 𑒢𑒲𑒔𑒰𑒿𑒧𑒹 𑒣𑒹𑒙𑒰𑒩 𑒄𑒬𑒏𑒹𑒿 𑒐𑒳𑒖𑒋 𑒢𑒯𑒱 𑒠𑒻𑒞 𑒕𑒻, 𑒆𑒿𑒔-𑒢𑒲𑒔 𑒏𑒩𑒋 𑒠𑒻𑒞 𑒕𑒻।
𑒯𑒪𑒧𑒹 𑒣𑒳𑒙𑓂𑒚𑒲, 𑒢𑒲𑒔𑒰𑒿𑒧𑒹 𑒠𑒴-𑒤𑒲𑒙𑒏 𑒁𑒑𑒪 𑒤𑒪𑓂𑒪𑒲 𑒣𑒳𑒙𑓂𑒚𑒲𑒧𑒹 𑒮𑒹𑒙 𑒏𑒋𑒪 𑒖𑒰𑒃𑒞 𑒕𑒻, 𑒧𑒰𑒙𑒱 𑒅𑒐𑒰𑒛𑓃𑒻𑒞 𑒕𑒻।
𑒣𑒩𑒯𑒞 (𑒪𑒑𑒢𑒰)- 𑒯𑒩𑒫𑒰𑒯 𑒋𑒯𑒱𑒣𑒩 𑒯𑒰𑒟 𑒡𑒩𑒻𑒞 𑒁𑒕𑒱। 𑒞𑒲𑒢 𑒤𑒲𑒙𑒏/ 𑓖 𑒃𑒢𑓂𑒔𑒏 𑒧𑒳𑒙𑓂𑒚𑒲 𑒣𑒏𑒛𑓃𑒻𑒥𑒪𑒰 𑒪𑒑𑒢𑒰𑒧𑒹 𑒚𑒼𑒏𑒪 𑒖𑒰𑒃𑒞 𑒕𑒻 (𑒧𑒳𑒚𑒱𑒨𑒰)।
𑒢𑒰𑒡𑒰- 𑒣𑒰𑒪𑒼-𑒄𑒬𑒧𑒹 𑒥𑒰𑒢𑓂𑒯𑒱𑒏𑒹𑒿 𑒖𑒼𑒛𑓃𑒪 𑒖𑒰𑒃𑒞 𑒕𑒻, 𑒛𑒼𑒩𑒲 𑒯𑒼𑒃𑒞 𑒕𑒻 𑓔-𑓕 𑒤𑒲𑒙𑒏।
𑒠𑒴 𑒙𑒰 𑒧𑒻𑒛𑒼𑒩 (𑒛𑒼𑒩𑒲)- 𑓑𑓐-𑓑𑓑 𑒤𑒲𑒙𑒏 𑒠𑒴 𑒙𑒰- 𑒋𑒏𑒩𑒰 𑒔𑒾𑒏𑒲𑒧𑒹 𑒥𑒰𑒢𑓂𑒯𑒱 𑒏𑓄 𑒥𑒛𑓃𑒠𑒧𑒹 𑒥𑒰𑒢𑓂𑒯𑒱 𑒏𑓄 𑒯𑒩𑒫𑒰𑒯𑒰 𑒔𑒾𑒏𑒲 𑒠𑒻𑒞 𑒁𑒕𑒱।
𑒔𑒾𑒏𑒲- (𑒥𑒰𑒿𑒮/ 𑒪𑒏𑒛𑓃𑒲𑒏) 𑓖-𑓗 𑒤𑒲𑒙𑒏 - 𑒋𑒯𑒱𑒣𑒩 𑒯𑒩𑒫𑒰𑒯 𑒔𑒜𑓃𑒱 𑒏𑓄 𑒔𑒾𑒏𑒲 𑒠𑒻𑒞 𑒁𑒕𑒱। 𑒯𑒩𑒫𑒰𑒯𑒰𑒏 𑒯𑒰𑒟𑒧𑒹 𑒋𑒏 𑒙𑒰 𑒗𑒴𑒩/ 𑒖𑓂𑒫𑒼𑒪𑒲/ 𑒪𑒰𑒚𑒲 𑒥𑒛𑓃𑒠 𑒯𑒰𑒿𑒏𑒋 𑒪𑒹𑒪 𑒩𑒯𑒻𑒞 𑒁𑒕𑒱।
𑒑𑒹𑒯𑒴𑒿𑒏 𑒖𑒼𑒞𑒰𑒄 𑓓 𑒃𑒢𑓂𑒔 𑒑𑒯𑒩𑒰 𑒏𑓄 𑓔-𑓕 𑒙𑒰 𑒔𑒰𑒮 𑒠𑓄 𑒯𑒼𑒃𑒞 𑒁𑒕𑒱।
𑒧𑒏𑓂𑒏𑒃 𑒪𑒹𑒪 𑓔-𑓕 𑒃𑒢𑓂𑒔 𑒑𑒯𑒩𑒰𑒃 𑒏𑒩𑒋 𑒣𑒛𑓃𑒻𑒞 𑒁𑒕𑒱।
𑒥𑒲𑒨𑒰- 𑒋𑒏 𑒋𑒏𑒛𑓃 (𑓑𑓐𑓐 𑒛𑒱𑒮𑓂𑒧𑒱𑒪) 𑒧𑒹 𑓒 𑒧𑒢 𑒑𑒯𑒴𑒧𑒏 𑒥𑒲𑒨𑒰, 𑓑𑓐 𑒏𑒱𑒪𑒼 𑒧𑒏𑓂𑒏𑒃𑒏 𑒥𑒲𑒨𑒰।
𑒐𑒰𑒠- 𑒋𑒏𑒛𑓃𑒧𑒹 𑓒𑓐 𑒏𑒱. 𑒛𑒲.𑒋.𑒣𑒲., 𑓕 𑒏𑒱𑒪𑒼 𑒣𑒼𑒙𑒰𑒬, 𑓕 𑒏𑒱𑒪𑒼 𑒨𑒴𑒩𑒱𑒨𑒰, 𑓕 𑒏𑒱𑒪𑒼 𑒖𑒱𑓀𑒏 𑒑𑒯𑒴𑒧 𑒥𑒰𑒅𑒑 𑒏𑒩𑒥𑒰 𑒏𑒰𑒪 𑒠𑒹𑒪 𑒖𑒰𑒃𑒞 𑒁𑒕𑒱।
𑒧𑒏𑒃𑒧𑒹 𑒛𑒹𑒜𑓃 𑒮𑒿 𑒠𑒴 𑒤𑒲𑒙𑒏 𑒦𑒹𑒪𑒰𑒏 𑒥𑒰𑒠 𑒧𑒰𑒙𑒱 𑒔𑒜𑓃𑒰𑒍𑒪 𑒖𑒰𑒃𑒞 𑒁𑒕𑒱। 𑓒 𑒏𑒞𑒰𑒩 𑓒 𑒤𑒲𑒙 𑒔𑒾𑒛𑓃𑒰𑒃𑒮𑒿। 𑒋𑒏𑒛𑓃𑒧𑒹 𑓒 𑒏𑓂𑒫𑒱𑓀𑒙𑒪 𑒐𑒰𑒠 𑒠𑒹𑒪 𑒖𑒰𑒃𑒞 𑒁𑒕𑒱। 𑓑𑓐𑓐 𑒏𑒱𑒪𑒼 𑒛𑒲.𑒋.𑒣𑒲., 𑓕𑓐 𑒏𑒱𑒪𑒼 𑒨𑒴𑒩𑒱𑒨𑒰, 𑓒𑓐 𑒏𑒱𑒪𑒼 𑒮𑒰𑒪𑓂𑒤𑒱𑒏, 𑓑𑓒𑓐 𑒏𑒱𑒪𑒼 𑒣𑒼𑒙𑒰𑒬, 𑓑𑓐 𑒏𑒱𑒪𑒼 𑒖𑒱𑓀𑒏। 𑒣𑒰𑒢𑒱 𑒣𑒙𑒫𑒢 𑒮𑒧𑒨𑒧𑒹 𑒐𑒰𑒠 𑒠𑓄 𑒏𑓄 𑒧𑒰𑒙𑒱 𑒔𑒜𑓃𑒥𑒻𑒞 𑒕𑒱𑒨𑒻𑒏, 𑒤𑒹𑒩 𑒣𑒰𑒢𑒱 𑒣𑒙𑒥𑒻𑒞 𑒕𑒱𑒨𑒻𑒏। 𑒣𑒰𑒢𑒱 𑒣𑒙𑒹𑒪𑒰𑒏 𑒥𑒰𑒠 𑒨𑒴𑒩𑒱𑒨𑒰 𑒋𑒏 𑒋𑒏𑒛𑓃𑒧𑒹 𑒋𑒏 𑒏𑓂𑒫𑒱𑓀𑒙𑒪 𑒠𑒹𑒪 𑒖𑒰𑒃𑒞 𑒁𑒕𑒱।
𑒂𑒥 𑒞𑒩-𑒞𑒩𑒏𑒰𑒩𑒲𑒏 𑒣𑓂𑒩𑒏𑒰𑒩 :-
𑒮𑒱𑓀𑒒𑒱𑒨𑒰 𑒏𑒩𑒻𑒪𑒰- 𑒥𑒛𑓃𑒰- 𑒯𑒰𑒃 𑒥𑓂𑒩𑒹𑒏/ 𑒣𑓂𑒪𑒹𑒢
𑒕𑒼𑒙𑒏𑒲 𑒏𑒩𑒻𑒪𑒰- 𑒯𑒖𑒩𑒱𑒨𑒰/ 𑒖𑒳𑒪𑓂𑒧𑒲
𑒮𑒤𑒹𑒠 𑒏𑒩𑒻𑒪𑒰- 𑒣𑒙𑒢𑒱𑒂 (𑒢𑒖𑒪𑒲- 𑒧𑒡𑓂𑒨𑒧 𑒐𑒳𑒙𑒏)
𑒞𑒰𑒩𑒥𑒴𑒖-
𑒢𑒰𑒧𑒡𑒰𑒩𑒲-𑒮𑓂𑒫𑒰𑒠𑒱𑒭𑓂𑒙- 𑒦𑒲𑒞𑒩𑒧𑒹 𑒪𑒰𑒪, 𑒆𑒣𑒩𑒧𑒹 𑒮𑒤𑒹𑒠𑒲/ 𑒔𑒱𑒞𑒤𑒳𑒙𑒩𑒰 (𑒯𑒩𑒱𑒨𑒩-𑒅𑒖𑓂𑒖𑒩)
𑒧𑒰𑒃𑒏𑒼- 𑒯𑒪𑓂𑒏𑒰 𑒏𑒰𑒩𑒲
𑒣𑒯𑒳𑒖𑒰- 𑒧𑒰𑒃𑒏𑒼𑒮𑒿 𑒥𑒹𑒬𑒲 𑒏𑒰𑒩𑒲
𑒩𑒰𑒖𑒡𑒰𑒢𑒲- 𑒏𑒰𑒩𑒲 𑒩𑓀𑒑𑒧𑒹
𑒧𑒯𑒰𑒩𑒰𑒖𑒰- 𑒣𑒻𑒒 𑒕𑒼𑒙 𑒏𑒰𑒩𑒲 𑒩𑓀𑒑𑒧𑒹
𑒮𑒻𑒢𑒲 𑒂 𑒮𑒳𑒑𑒩𑒠𑒲𑒥𑒲- 𑒏𑒰𑒩𑒲 𑒩𑓀𑒑𑒏
𑒢𑒰𑒟- 𑒯𑒪𑓂𑒏𑒰 𑒔𑒱𑒞𑒤𑒳𑒙𑒩𑒰 (𑒅𑒖𑓂𑒖𑒩/ 𑒯𑒩𑒱𑒨𑒩)
𑒑𑓀𑒑𑒰𑒮𑒰𑒑𑒩- 𑒏𑒳𑒧𑓂𑒯𑒩 𑒖𑒹𑒏𑒰𑒿 𑒅𑒖𑓂𑒖𑒩 𑒮𑒰𑒤
𑒮𑒼𑒩𑒻𑒨𑓂𑒨𑒰- 𑒔𑒱𑒞𑒤𑒳𑒙𑒩𑒰
𑒐𑒲𑒩𑒰
𑒖𑒳𑒪𑓂𑒧𑒲- 𑒕𑒼𑒙
𑒯𑒰𑒃𑒥𑓂𑒩𑒲𑒛
𑒧𑒰𑒃𑒏𑒼- 𑒢𑒧𑒑𑒩/ 𑒯𑒩𑒱𑒨𑒩/ 𑒣𑒲𑒁𑒩
𑒧𑒯𑒰𑒩𑒰𑒖𑒰- 𑒐𑒲𑒩𑒰
𑒐𑒹𑒞𑒲𑒥𑒰𑒩𑒲- 𑒯𑒩𑒱𑒨𑒩 𑒩𑓀𑒑𑒏, 𑒢𑒧𑒑𑒩 𑒏𑒧, 𑒣𑒰𑒕𑒰𑒿𑒧𑒹 𑒧𑒼𑒙 𑒥𑒹𑒬𑒲 𑒂𑒑𑒰𑒿 𑒏𑒧।

𑒧𑒻𑒟𑒱𑒪𑒲 𑒯𑒰𑒃𑒏𑒴/ 𑒯𑒻𑒏𑒴/ 𑒏𑓂𑒭𑒝𑒱𑒏𑒰
𑒯𑒻𑒏𑒴 𑒮𑒾𑓀𑒠𑒩𑓂𑒨 𑒂 𑒦𑒰𑒫𑒏 𑒖𑒰𑒣𑒰𑒢𑒲 𑒏𑒰𑒫𑓂𑒨 𑒫𑒱𑒡𑒰 𑒁𑒕𑒱, 𑒂 𑒖𑒰𑒣𑒰𑒢𑒧𑒹 𑒋𑒏𑒩𑒰 𑒏𑒰𑒫𑓂𑒨-𑒫𑒱𑒡𑒰𑒏 𑒩𑒴𑒣 𑒠𑒹𑒪𑒢𑓂𑒯𑒱 𑒏𑒫𑒱 𑒧𑒰𑒞𑓂𑒮𑒳𑒍 𑒥𑒰𑒮𑒼 𑓑𑓖𑓔𑓔-𑓑𑓖𑓙𑓔। 𑒋𑒏𑒩 𑒩𑒔𑒢𑒰𑒏 𑒪𑒹𑒪 𑒣𑒩𑒧 𑒁𑒢𑒳𑒦𑒴𑒞𑒱 𑒂𑒫𑒬𑓂𑒨𑒏 𑒁𑒕𑒱। 𑒥𑒰𑒬𑒼 𑒏𑒯𑒢𑒹 𑒕𑒟𑒱, 𑒖𑒹 𑒖𑒹 𑒏𑓂𑒨𑒼 𑒖𑒲𑒫𑒢𑒧𑒹 𑓓 𑒮𑒿 𑓕 𑒙𑒰 𑒯𑒻𑒏𑒴𑒏 𑒩𑒔𑒢𑒰 𑒏𑒋𑒪𑒢𑓂𑒯𑒱 𑒮𑒹 𑒕𑒟𑒱 𑒯𑒻𑒏𑒴 𑒏𑒫𑒱 𑒂 𑒖𑒹 𑒠𑒮 𑒙𑒰 𑒯𑒻𑒏𑒴𑒏 𑒩𑒔𑒢𑒰 𑒏𑒋𑒢𑒹 𑒕𑒟𑒱 𑒮𑒹 𑒕𑒟𑒱 𑒧𑒯𑒰𑒏𑒫𑒱। 𑒦𑒰𑒩𑒞𑒧𑒹 𑒣𑒯𑒱𑒪 𑒥𑒹𑒩 𑓑𑓙𑓑𑓙 𑒄. 𑒧𑒹 𑒏𑒫𑒱𑒫𑒩 𑒩𑒫𑒲𑒢𑓂𑒠𑓂𑒩𑒢𑒰𑒟 𑒚𑒰𑒏𑒳𑒩 𑒖𑒰𑒣𑒰𑒢𑒮𑒿 𑒒𑒳𑒩𑒪𑒰𑒏 𑒥𑒰𑒠 𑒥𑒰𑒬𑒼𑒏 𑒠𑒴 𑒙𑒰 𑒯𑒻𑒏𑒴𑒏 𑒬𑒰𑒥𑓂𑒠𑒱𑒏 𑒁𑒢𑒳𑒫𑒰𑒠 𑒏𑒋𑒪𑒹 𑒩𑒯𑒟𑒱।

𑒯𑒻𑒏𑒴𑒏 𑒪𑒹𑒪 𑒧𑒻𑒟𑒱𑒪𑒲 𑒦𑒰𑒭𑒰 𑒂 𑒦𑒰𑒩𑒞𑒲𑒨 𑒮𑓀𑒮𑓂𑒏𑒵𑒞 𑒂𑒬𑓂𑒩𑒱𑒞 𑒪𑒱𑒣𑒱 𑒫𑓂𑒨𑒫𑒮𑓂𑒟𑒰 𑒮𑒩𑓂𑒫𑒰𑒡𑒱𑒏 𑒅𑒣𑒨𑒳𑒏𑓂𑒞𑓂𑒞 𑒁𑒕𑒱। 𑒞𑒧𑒱𑒪 𑒕𑒼𑒛𑓃𑒱 𑒬𑒹𑒭 𑒮𑒦𑒙𑒰 𑒠𑒏𑓂𑒭𑒱𑒝 𑒂 𑒮𑒧𑒮𑓂𑒞 𑒅𑒞𑓂𑒞𑒩-𑒣𑒬𑓂𑒔𑒱𑒧𑒲 𑒂𑒣𑒴𑒩𑓂𑒫𑒲 𑒦𑒰𑒩𑒞𑒲𑒨 𑒪𑒱𑒣𑒱 𑒂 𑒠𑒹𑒫𑒢𑒰𑒑𑒩𑒲 𑒪𑒱𑒣𑒱 𑒧𑒹 𑒫𑒻𑒯 𑒮𑓂𑒫𑒩 𑒂 𑒏𑒔𑒙𑒞𑒣 𑒫𑓂𑒨𑒘𑓂𑒖𑒢 𑒫𑒱𑒡𑒰𑒢 𑒁𑒕𑒱 𑒖𑒰𑒯𑒱𑒧𑒹 𑒖𑒹 𑒪𑒱𑒐𑒪 𑒖𑒰𑒃𑒞 𑒁𑒕𑒱 𑒮𑒻𑒯 𑒥𑒰𑒖𑒪 𑒖𑒰𑒃𑒞 𑒁𑒕𑒱। 𑒧𑒳𑒠𑒰 𑒠𑒹𑒫𑒢𑒰𑒑𑒩𑒲𑒧𑒹 𑒯𑓂𑒩𑒮𑓂𑒫 '𑒃' 𑒋𑒏𑒩 𑒁𑒣𑒫𑒰𑒠 𑒁𑒕𑒱, 𑒄 𑒪𑒱𑒐𑒪 𑒖𑒰𑒃𑒞 𑒁𑒕𑒱 𑒣𑒯𑒱𑒢𑒹, 𑒧𑒳𑒠𑒰 𑒥𑒰𑒖𑒪 𑒖𑒰𑒃𑒞 𑒁𑒕𑒱 𑒥𑒰𑒠𑒧𑒹। 𑒧𑒳𑒠𑒰 𑒧𑒻𑒟𑒱𑒪𑒲𑒧𑒹 𑒄 𑒁𑒣𑒫𑒰𑒠 𑒮𑒹𑒯𑒼 𑒢𑒯𑒱 𑒁𑒕𑒱- 𑒨𑒟𑒰 '𑒁𑒕𑒱' 𑒄 𑒥𑒰𑒖𑒪 𑒖𑒰𑒃𑒞 𑒁𑒕𑒱 𑒁 𑒯𑓂𑒩𑓂𑒮𑓂𑒫 '𑒃' 𑒕 𑒫𑒰 𑒁 𑒃 𑒕। 𑒠𑒼𑒮𑒩 𑒅𑒠𑒰𑒯𑒩𑒝 𑒪𑒱𑒁- 𑒩𑒰𑒞𑒱- 𑒩𑒰 𑒃 𑒞। 𑒞𑒿 𑒮𑒱𑒠𑓂𑒡 𑒦𑒹𑒪 𑒖𑒹 𑒯𑒻𑒏𑒴𑒏 𑒪𑒹𑒪 𑒧𑒻𑒟𑒱𑒪𑒲 𑒮𑒩𑓂𑒫𑒼𑒞𑓂𑒞𑒧 𑒦𑒰𑒭𑒰 𑒁𑒕𑒱। 𑒋𑒏𑒙𑒰 𑒂𑒩 𑒅𑒠𑒰𑒯𑒩𑒝 𑒪𑒱𑒁। 𑒮𑒢𑓂𑒡𑒱 𑒮𑓀𑒮𑓂𑒏𑒵𑒞𑒏 𑒫𑒱𑒬𑒹𑒭𑒞𑒰 𑒁𑒕𑒱? 𑒧𑒳𑒠𑒰 𑒏𑒲 𑒃𑓀𑒑𑓂𑒪𑒱𑒬𑒧𑒹 𑒮𑓀𑒡𑒱 𑒢𑒯𑒱 𑒁𑒕𑒱? 𑒞𑒿 𑒄 𑒏𑒲 𑒁𑒕𑒱- 𑒂𑒃𑒧 𑒑𑒼𑒃𑒓 𑒙𑒴𑒫𑒰𑒩𑓂𑒛𑓂𑒮𑒠𑒋𑒢𑓂𑒛। 𑒋𑒏𑒩𑒰 𑒪𑒱𑒐𑒪 𑒖𑒰𑒃𑒞 𑒁𑒕𑒱- 𑒂𑒃 𑒋𑒧 𑒑𑒼𑒃𑒓 𑒙𑒴𑒫𑒰𑒩𑓂𑒛𑓂𑒮 𑒠 𑒋𑒢𑓂𑒛। 𑒧𑒳𑒠𑒰 𑒣𑒰𑒝𑒱𑒢𑒱 𑒡𑓂𑒫𑒢𑒱 𑒫𑒱𑒖𑓂𑒘𑒰𑒢𑒏 𑒂𑒡𑒰𑒩 𑒣𑒩 𑒮𑓀𑒡𑒱𑒏 𑒢𑒱𑒁𑒧 𑒥𑒢𑒍𑒪𑒢𑓂𑒯𑒱, 𑒧𑒳𑒠𑒰 𑒃𑓀𑒑𑓂𑒪𑒱𑒬𑒧𑒹 𑒪𑒱𑒐𑒥𑒰 𑒏𑒰𑒪𑒧𑒹 𑒞𑒿 𑒮𑓀𑒡𑒱𑒏 𑒣𑒰𑒪𑒢 𑒢𑒯𑒱 𑒯𑒼𑒃𑒞 𑒕𑒻, 𑒂𑒃 𑒋𑒧 𑒏𑒹𑒿 𑒍𑒢𑒰 𑒂𑒃𑒧 𑒤𑒼𑒢𑒹𑒙𑒱𑒏𑒪𑒲 𑒪𑒱𑒐𑒪 𑒖𑒰𑒃𑒞 𑒁𑒕𑒱, 𑒧𑒳𑒠𑒰 𑒥𑒖𑒥𑒰 𑒏𑒰𑒪 𑒋𑒏𑒩 𑒣𑓂𑒩𑒨𑒼𑒑 𑒯𑒼𑒃𑒞 𑒁𑒕𑒱। 𑒧𑒻𑒟𑒱𑒪𑒲𑒧𑒹 𑒮𑒹𑒯𑒼 𑒨𑒟𑒰𑒮𑓀𑒦𑒫 𑒫𑒱𑒦𑒏𑓂𑒞𑓂𑒞𑒱 𑒬𑒥𑓂𑒠𑒮𑒿 𑒮𑒙𑒰 𑒏𑒋 𑒪𑒱𑒐𑒪 𑒂 𑒥𑒰𑒖𑒪 𑒖𑒰𑒃𑒞 𑒁𑒕𑒱।

𑒖𑒰𑒣𑒰𑒢𑒧𑒹 𑒄𑒬𑓂𑒫𑒩𑒏 𑒂𑒯𑓂𑒫𑒰𑒢 𑒙𑒢𑒏𑒰/ 𑒫𑒰𑒏𑒰 𑒣𑓂𑒩𑒰𑒩𑓂𑒟𑒢𑒰 𑓕 𑓗 𑓕 𑓗 𑓗 𑒮𑓂𑒫𑒩𑒴𑒣𑒧𑒹 𑒯𑒼𑒃𑒞 𑒕𑒪 𑒖𑒹 𑒥𑒰𑒠𑒧𑒹 𑓕 𑓗 𑓕 𑒂 𑓗 𑓗 𑒠𑒴 𑒪𑒹𑒐𑒏 𑒠𑓂𑒫𑒰𑒩𑒰 𑒪𑒱𑒐𑒪 𑒖𑒰𑒋 𑒪𑒰𑒑𑒪 𑒂 𑒢𑒫 𑒮𑓂𑒫𑒩𑒴𑒣 𑒣𑓂𑒩𑒰𑒣𑓂𑒞 𑒏𑒋𑒪𑒏 𑒂 𑒋𑒏𑒩𑒰 𑒩𑒹𑒢𑓂𑒑𑒰 𑒏𑒯𑒪 𑒑𑒹𑒪। 𑒩𑒹𑒢𑓂𑒑𑒰𑒏 𑒠𑒩𑒥𑒰𑒩𑒲 𑒮𑓂𑒫𑒩𑒴𑒣𑒏 𑒑𑒰𑓀𑒦𑒲𑒩𑓂𑒨 𑒍𑒜𑓃𑒢𑒹 𑒕𑒪 𑒂 𑒥𑒱𑒢 𑒑𑒰𑓀𑒦𑒲𑒩𑓂𑒨 𑒥𑒪𑒰 𑒮𑓂𑒫𑒩𑒴𑒣 𑒫𑒝𑒱𑒏𑒫𑒩𑓂𑒑𑒏 𑒪𑒹𑒪 𑒕𑒪। 𑒥𑒰𑒬𑒼 𑒫𑒝𑒱𑒏 𑒫𑒩𑓂𑒑 𑒥𑒪𑒰 𑒩𑒹𑒢𑓂𑒑𑒰 𑒩𑒔𑒪𑒢𑓂𑒯𑒱। 𑒩𑒹𑒢𑓂𑒑𑒰𑒏 𑒂𑒩𑒧𑓂𑒦 𑒯𑒼𑒏𑓂𑒏𑒳𑒮𑒿 𑒯𑒼𑒃𑒞 𑒕𑒪 𑒂 𑒯𑒻𑒏𑒰𑒃 𑒋𑒏𑒩 𑒏𑒼𑒢𑒼 𑒂𑒢 𑒣𑓀𑒏𑓂𑒞𑓂𑒞𑒱𑒏𑒹𑒿 𑒏𑒯𑒪 𑒖𑒰 𑒮𑒏𑒻𑒞 𑒕𑒪। 𑒧𑒮𑒰𑒍𑒏𑒰 𑒮𑒱𑒏𑒲 𑒩𑒹𑒢𑓂𑒑𑒰𑒏 𑒁𑒢𑓂𑒞𑒏 𑒒𑒼𑒭𑒝𑒰 𑒏𑒋𑒪𑒢𑓂𑒯𑒱 𑓑𑓙𑒧 𑒬𑒞𑒰𑒥𑓂𑒠𑒲𑒏 𑒣𑓂𑒩𑒰𑒩𑒧𑓂𑒦𑒧𑒹 𑒖𑒰 𑒏𑒋 𑒂 𑒯𑒼𑒏𑓂𑒏𑒳 𑒂 𑒯𑒻𑒏𑒰𑒃 𑒏𑒹𑒩 𑒥𑒠𑒪𑒰𑒧𑒹 𑒯𑒻𑒏𑒴 𑒣𑒠𑓂𑒨𑒏 𑒮𑒧𑒢𑓂𑒫𑒱𑒞 𑒩𑒴𑒣 𑒠𑒹𑒪𑒢𑓂𑒯𑒱। 𑒧𑒳𑒠𑒰 𑒥𑒰𑒬𑒼 𑒣𑓂𑒩𑒟𑒧𑒞𑓁 𑒋𑒏𑒩 𑒮𑓂𑒫𑒞𑓀𑒞𑓂𑒩 𑒮𑓂𑒫𑒩𑒴𑒣𑒏 𑒢𑒱𑒩𑓂𑒡𑒰𑒩𑒝 𑒏𑒋 𑒑𑒹𑒪 𑒕𑒪𑒰𑒯।
𑒯𑒻𑒏𑒴 𑒢𑒱𑒁𑒧 𑓑.
𑒯𑒻𑒏𑒴 𑓑𑓗 𑒁𑒏𑓂𑒭𑒩𑒧𑒹 𑒪𑒱𑒐𑒴 ।𑒄 𑒞𑒲𑒢 𑒣𑓀𑒏𑓂𑒞𑓂𑒞𑒱𑒧𑒹 𑒪𑒱𑒐𑒪 𑒖𑒰𑒃𑒞 𑒁𑒕𑒱- 𑓕 𑓗 𑒂 𑓕 𑒏𑒹𑒩 𑒏𑓂𑒩𑒧𑒧𑒹। 𑒁𑒏𑓂𑒭𑒩 𑒑𑒝𑒢𑒰 𑒫𑒰𑒩𑓂𑒝𑒱𑒏 𑒕𑒢𑓂𑒠𑒧𑒹 𑒖𑒹𑒢𑒰 𑒏𑒋𑒪 𑒖𑒰𑒃𑒞 𑒁𑒕𑒱 𑒞𑒯𑒱𑒢𑒰 𑒏𑒩𑒴।
𑒫𑒰𑒩𑓂𑒝𑒱𑒏 𑒕𑒢𑓂𑒠𑒏 𑒫𑒩𑓂𑒝𑒢 𑒏𑓂𑒩𑒧𑒧𑒹- 𑒮𑓀𑒨𑒳𑒏𑓂𑒞𑓂𑒞𑒰𑒏𑓂𑒭𑒩𑒏𑒹𑒿 𑒋𑒏 𑒑𑒰𑒢𑒴 𑒂 𑒯𑒪𑒢𑓂𑒞𑒏/ 𑒥𑒱𑒏𑒰𑒩𑒲𑒏/ 𑒃𑒏𑒰𑒩 𑒂𑒏𑒰𑒩 𑒂𑒠𑒱𑒏 𑒑𑒝𑒢𑒰 𑒢𑒯𑒱 𑒏𑒩𑒴।
𑒮𑒰𑒯𑒱𑒞𑓂𑒨𑒏 𑒠𑒴 𑒫𑒱𑒡𑒰 𑒁𑒕𑒱 𑒑𑒠𑓂𑒨 𑒂 𑒣𑒠𑓂𑒨।𑒕𑒢𑓂𑒠𑒼𑒥𑒠𑓂𑒡 𑒩𑒔𑒢𑒰 𑒣𑒠𑓂𑒨 𑒏𑒯𑒥𑒻𑒞 𑒁𑒕𑒱-𑒁𑒢𑓂𑒨𑒟𑒰 𑒍 𑒑𑒠𑓂𑒨 𑒟𑒲𑒏। 𑒕𑒢𑓂𑒠 𑒧𑒰𑒢𑒹 𑒦𑒹𑒪-𑒋𑒯𑒢 𑒩𑒔𑒢𑒰 𑒖𑒹 𑒂𑒢𑒢𑓂𑒠 𑒣𑓂𑒩𑒠𑒰𑒢 𑒏𑒩𑒋।
𑒕𑒢𑓂𑒠 𑒠𑒴 𑒣𑓂𑒩𑒏𑒰𑒩𑒏 𑒁𑒕𑒱।𑒧𑒰𑒞𑓂𑒩𑒱𑒏 𑒂 𑒫𑒰𑒩𑓂𑒝𑒱𑒏। 𑒫𑒹𑒠𑒧𑒹 𑒫𑒰𑒩𑓂𑒝𑒱𑒏 𑒕𑒢𑓂𑒠 𑒁𑒕𑒱।
𑒫𑒰𑒩𑓂𑒝𑒱𑒏 𑒕𑒢𑓂𑒠𑒏 𑒣𑒩𑒱𑒔𑒨 𑒪𑒱𑒁। 𑒋𑒯𑒱𑒧𑒹 𑒁𑒏𑓂𑒭𑒩 𑒑𑒝𑒢𑒰 𑒧𑒰𑒞𑓂𑒩 𑒯𑒼𑒃𑒞 𑒁𑒕𑒱। 𑒯𑒪𑓀𑒞𑒨𑒳𑒏𑓂𑒞 𑒁𑒏𑓂𑒭𑒩𑒏𑒹𑒿 𑒢𑒯𑒱 𑒑𑒰𑒢𑒪 𑒖𑒰𑒃𑒞 𑒁𑒕𑒱। 𑒋𑒏𑒰𑒩 𑒅𑒏𑒰𑒩 𑒃𑒞𑓂𑒨𑒰𑒠𑒱 𑒨𑒳𑒏𑓂𑒞 𑒁𑒏𑓂𑒭𑒩𑒏𑒹𑒿 𑒍𑒯𑒱𑒢𑒰 𑒋𑒏 𑒑𑒰𑒢𑒪 𑒖𑒰𑒃𑒞 𑒁𑒕𑒱 𑒖𑒹𑒢𑒰 𑒮𑓀𑒨𑒳𑒏𑓂𑒞𑒰𑒏𑓂𑒭𑒩𑒏𑒹𑒿। 𑒮𑓀𑒑𑒯𑒱 𑒁 𑒮𑒿 𑒯 𑒏𑒹𑒿 𑒮𑒹𑒯𑒼 𑒋𑒏 𑒑𑒰𑒢𑒪 𑒖𑒰𑒃𑒞 𑒁𑒕𑒱।𑒠𑓂𑒫𑒱𑒧𑒰𑒢𑒏 𑒏𑒼𑒢𑒼 𑒁𑒏𑓂𑒭𑒩 𑒢𑒯𑒱 𑒯𑒼𑒃𑒕।𑒧𑒳𑒐𑓂𑒨𑒞𑓁 𑒞𑒲𑒢𑒙𑒰 𑒥𑒱𑒢𑓂𑒠𑒳 𑒧𑒼𑒢 𑒩𑒰𑒐𑒴-
𑓑. 𑒯𑒪𑓀𑒞𑒨𑒳𑒏𑓂𑒞𑓂𑒞 𑒁𑒏𑓂𑒭𑒩-𑓐 𑓒. 𑒮𑓀𑒨𑒳𑒏𑓂𑒞 𑒁𑒏𑓂𑒭𑒩-𑓑 𑓓. 𑒁𑒏𑓂𑒭𑒩 𑒁 𑒮𑒿 𑒯 -𑓑 𑒣𑓂𑒩𑒞𑓂𑒨𑒹𑒏।
𑒂𑒥 𑒣𑒯𑒱𑒪 𑒅𑒠𑒰𑒯𑒩𑒝 𑒠𑒹𑒐𑒴 :-
𑒄 𑒁𑒩𑒠𑒩𑒰𑒏 𑒧𑒹𑒒 𑒢𑒯𑒱 𑒧𑒰𑒢𑒞 𑒩𑒯𑒞 𑒥𑒩𑒮𑒱 𑒏𑒹=𑓑+𑓕+𑓒+𑓒+𑓓+𑓓+𑓑=𑓑𑓗 𑒧𑒰𑒞𑓂𑒩𑒰
𑒂𑒥 𑒠𑒼𑒮𑒩 𑒅𑒠𑒰𑒯𑒩𑒝 𑒠𑒹𑒐𑒴 ; 𑒣𑒬𑓂𑒔𑒰𑒞𑓂=𑓒 𑒧𑒰𑒞𑓂𑒩𑒰 ; 𑒂𑒥 𑒞𑒹𑒮𑒩 𑒅𑒠𑒰𑒯𑒩𑒝 𑒠𑒹𑒐𑒴
𑒂𑒥=𑓒 𑒧𑒰𑒞𑓂𑒩𑒰 ; 𑒂𑒥 𑒔𑒰𑒩𑒱𑒧 𑒅𑒠𑒰𑒯𑒩𑒝 𑒠𑒹𑒐𑒴 𑒮𑓂𑒏𑓂𑒩𑒱𑒣𑓂𑒙=𑓒 𑒧𑒰𑒞𑓂𑒩𑒰
𑒯𑒻𑒏𑒴 𑒢𑒱𑒁𑒧 𑓒.
𑒫𑓂𑒨𑓀𑒑𑓂𑒨 𑒯𑒻𑒏𑒴 𑒣𑒠𑓂𑒨𑒏 𑒫𑒱𑒭𑒨 𑒢𑒯𑒱 𑒁𑒕𑒱, 𑒋𑒏𑒩 𑒫𑒱𑒭𑒨 𑒁𑒕𑒱 𑒇𑒞𑒳। 𑒖𑒰𑒣𑒰𑒢𑒧𑒹 𑒫𑓂𑒨𑓀𑒑𑓂𑒨 𑒂 𑒧𑒰𑒢𑒫 𑒠𑒳𑒩𑓂𑒥𑒪𑒞𑒰𑒏 𑒪𑒹𑒪 𑒣𑓂𑒩𑒨𑒳𑒏𑓂𑒞 𑒫𑒱𑒡𑒰𑒏𑒹𑒿 "𑒮𑒹𑒩𑓂𑒢𑓂𑒨𑒴" 𑒏𑒯𑒪 𑒖𑒰𑒃𑒞 𑒁𑒕𑒱 𑒂 𑒋𑒯𑒱𑒧𑒹 𑒏𑒱𑒩𑒹𑒖𑒲 𑒫𑒰 𑒏𑒱𑒑𑒼 𑒏𑒹𑒩 𑒫𑓂𑒨𑒰𑒏𑒩𑒝 𑒫𑒱𑒩𑒰𑒧 𑒢𑒯𑒱 𑒯𑒼𑒃𑒞 𑒁𑒕𑒱।
𑒯𑒻𑒏𑒴 𑒢𑒱𑒁𑒧 𑓓.
𑒣𑓂𑒩𑒟𑒧 𑓕 𑒫𑒰 𑒠𑒼𑒮𑒩 𑓗 𑒡𑓂𑒫𑒢𑒱𑒏 𑒥𑒰𑒠 𑒯𑒻𑒏𑒴 𑒣𑒠𑓂𑒨𑒧𑒹 𑒖𑒰𑒣𑒰𑒢𑒧𑒹 𑒏𑒱𑒩𑒹𑒖𑒲- 𑒫𑓂𑒨𑒰𑒏𑒩𑒝 𑒫𑒱𑒩𑒰𑒧- 𑒠𑒹𑒪 𑒖𑒰𑒃𑒞 𑒁𑒕𑒱।
𑒯𑒻𑒏𑒴 𑒢𑒱𑒁𑒧 𑓔.
𑒖𑒰𑒣𑒰𑒢𑒲𑒧𑒹 𑒪𑒱𑓀𑒑𑒏 𑒫𑒔𑒢 𑒦𑒱𑒢𑓂𑒢𑒞𑒰 𑒢𑒯𑒱 𑒕𑒻। 𑒮𑒹 𑒧𑒻𑒟𑒱𑒪𑒲𑒧𑒹 𑒮𑒹𑒯𑒼 𑒫𑒔𑒢𑒏 𑒮𑒧𑒰𑒢𑒞𑒰 𑒩𑒰𑒐𑒲, 𑒮𑒻𑒯 𑒅𑒔𑒱𑒞 𑒯𑒼𑒋𑒞।
𑒯𑒻𑒏𑒴 𑒢𑒱𑒁𑒧 𑓕.
𑒖𑒰𑒣𑒰𑒢𑒲𑒧𑒹 𑒋𑒏𑒯𑒱 𑒣𑓀𑒏𑓂𑒞𑓂𑒞𑒱𑒧𑒹 𑓕 𑓗 𑓕 𑒡𑓂𑒫𑒢𑒱 𑒠𑒹𑒪 𑒖𑒰𑒃𑒞 𑒁𑒕𑒱। 𑒧𑒳𑒠𑒰 𑒧𑒻𑒟𑒱𑒪𑒲𑒧𑒹 𑒞𑒲𑒢 𑒡𑓂𑒫𑒢𑒱𑒐𑒝𑓂𑒛𑒏 𑒪𑒹𑒪 𑓕 𑓗 𑓕 𑒏𑒹𑒩 𑒞𑒲𑒢 𑒣𑓀𑒏𑓂𑒞𑓂𑒞𑒱𑒏 𑒣𑓂𑒩𑒨𑒼𑒑 𑒏𑒩𑒴। 𑒧𑒳𑒠𑒰 𑒣𑒠𑓂𑒨 𑒣𑒰𑒚𑒧𑒹 𑒏𑒱𑒩𑒹𑒖𑒲 𑒫𑒱𑒩𑒰𑒧𑒏 ,𑒖𑒏𑒩𑒰 𑒪𑒹𑒪 𑒁𑒩𑓂𑒠𑓂𑒡𑒫𑒱𑒩𑒰𑒧𑒏 𑒔𑒹𑒢𑓂𑒯 𑒣𑓂𑒩𑒨𑒼𑒑 𑒏𑒩𑒴, 𑒋𑒏𑒩 𑒁𑒞𑒱𑒩𑒱𑒏𑓂𑒞𑓂𑒞 𑒋𑒏𑒯𑒱 𑒬𑓂𑒫𑒰𑒮𑒧𑒹 𑒣𑒰𑒚 𑒅𑒔𑒱𑒞 𑒯𑒼𑒋𑒞।
𑒯𑒻𑒏𑒴 𑒢𑒱𑒁𑒧 𑓖.
𑒯𑒻𑒥𑒳𑒢 𑒋𑒏𑒙𑒰 𑒨𑒰𑒞𑓂𑒩𑒰 𑒫𑒵𑒞𑓂𑒞𑒰𑓀𑒞 𑒁𑒕𑒱 𑒖𑒰𑒯𑒱𑒧𑒹 𑒮𑓀𑒏𑓂𑒭𑒱𑒣𑓂𑒞 𑒫𑒩𑓂𑒝𑒢𑒰𑒞𑓂𑒧𑒏 𑒑𑒠𑓂𑒨 𑒂 𑒯𑒻𑒏𑒴 𑒣𑒠𑓂𑒨 𑒩𑒯𑒻𑒞 𑒁𑒕𑒱। 𑒥𑒰𑒬𑒼 𑒖𑒰𑒣𑒰𑒢𑒏 𑒥𑒾𑒠𑓂𑒡 𑒦𑒱𑒏𑓂𑒭𑒳 𑒂 𑒯𑒻𑒏𑒴 𑒏𑒫𑒱 𑒕𑒪𑒰𑒯 𑒂 𑒫𑒻𑒯 𑒯𑒻𑒥𑒴𑒢𑒏 𑒣𑓂𑒩𑒝𑒹𑒞𑒰 𑒕𑒟𑒱। 𑒖𑒰𑒣𑒰𑒢𑒏 𑒨𑒰𑒞𑓂𑒩𑒰𑒏 𑒫𑒩𑓂𑒝𑒢 𑒍 𑒯𑒻𑒥𑒴𑒢 𑒠𑓂𑒫𑒰𑒩𑒰 𑒏𑒋𑒢𑒹 𑒕𑒟𑒱। 𑒣𑒰𑒿𑒔𑒙𑒰 𑒁𑒢𑒳𑒔𑓂𑒕𑒹𑒠 𑒂 𑒋𑒞𑒥𑒯𑒱 𑒯𑒻𑒏𑒴 𑒏𑒹𑒩 𑒆𑒣𑒩𑒏𑒰 𑒮𑒲𑒧𑒰 𑒩𑒰𑒐𑒲, 𑒞𑒐𑒢𑒹 𑒯𑒻𑒥𑒴𑒢𑒏 𑒂𑒞𑓂𑒧𑒰 𑒩𑒏𑓂𑒭𑒱𑒞 𑒩𑒯𑒱 𑒮𑒏𑒻𑒞 𑒁𑒕𑒱, 𑒢𑒲𑒔𑒰𑒿𑒏 𑒮𑒲𑒧𑒰 ,𑓑 𑒁𑒢𑒳𑒔𑓂𑒕𑒹𑒠 𑓑 𑒯𑒻𑒏𑒴 𑒏𑒹𑒩, 𑒞𑒿 𑒩𑒯𑒥𑒹 𑒏𑒩𑒞। 𑒯𑒻𑒏𑒴 𑒑𑒠𑓂𑒨 𑒁𑒢𑒳𑒔𑓂𑒕𑒹𑒠𑒏 𑒁𑒢𑓂𑒞𑒧𑒹 𑒍𑒏𑒩 𑒔𑒩𑒧𑒏 𑒩𑒴𑒣𑒧𑒹 𑒩𑒯𑒻𑒞 𑒁𑒕𑒱।
𑒯𑒧𑒩 𑒋𑒏𑒙𑒰 𑒯𑒻𑒥𑒴𑒢
𑒮𑒼𑒗𑒰𑒿 𑒗𑓀𑒗𑒰𑒩𑒣𑒳𑒩𑒏 𑒩𑒹𑒪𑒫𑒹-𑒮𑒛𑓃𑒏 𑒣𑒳𑒪। 𑓑𑓙𑓘𑓗 𑒮𑒢𑓂। 𑒗𑒗𑒰 𑒠𑒹𑒪𑒏 𑒏𑒧𑒪𑒰-𑒥𑒪𑒰𑒢𑒏 𑒣𑒰𑒢𑒱𑒏 𑒡𑒰𑒩, 𑒥𑒰𑒜𑓃𑒱𑒏 𑒠𑒵𑒬𑓂𑒨। 𑒤𑒹𑒩 𑒁𑒥𑒻𑒞 𑒕𑒲 𑒕𑒯𑒩 𑒪𑒑। 𑒯𑒧𑒩𑒰 𑒮𑒼𑒗𑒰𑒿𑒧𑒹 𑒋𑒏𑒚𑒰𑒧𑒮𑒿 𑒣𑒰𑒢𑒱 𑒅𑒑𑒛𑒳𑒧 𑒯𑒼𑒃𑒞 𑒗𑒗𑒰𑒃𑒞 𑒥𑒰𑒯𑒩 𑒁𑒕𑒱 𑒁𑒥𑒻𑒞। 𑒤𑒹𑒩 𑒍𑒞𑒋𑒮𑒿 𑒣𑒰𑒢𑒱𑒏 𑒡𑒰𑒩 𑒏𑒰𑒙𑒋 𑒪𑒑𑒻𑒞 𑒁𑒕𑒱 𑒧𑒰𑒙𑒱। 𑒥𑒜𑓃𑒋 𑒪𑒑𑒻𑒞 𑒁𑒕𑒱 𑒣𑒰𑒢𑒱𑒏 𑒣𑓂𑒩𑒫𑒰𑒯, 𑒁𑒥𑒻𑒞 𑒁𑒕𑒱 𑒥𑒰𑒜𑓃𑒱। 𑒒𑒳𑒩𑒱 𑒑𑒰𑒧 𑒠𑒱𑒬𑒱 𑒁𑒥𑒻𑒞 𑒕𑒲। 𑒯𑒹𑒪𑒲𑒏𑒰𑒣𑓂𑒙𑒩𑒮𑒿 𑒐𑒮𑒻𑒞 𑒁𑒕𑒱 𑒮𑒰𑒧𑒑𑓂𑒩𑒲। 𑒖𑒞𑒋 𑒂𑒋𑒪 𑒖𑒪𑒏 𑒣𑓂𑒩𑒫𑒰𑒯 𑒍𑒞𑒋 𑒮𑒰𑒧𑒑𑓂𑒩𑒲𑒏 𑒐𑒮𑒹𑒥𑒰 𑒪𑒋 𑒮𑒳𑒐𑒰𑒋𑒪 𑒅𑒥𑒹𑒩 𑒦𑒴𑒧𑒱𑒐𑒝𑓂𑒛 𑒁𑒕𑒱 𑒥𑒛𑓃 𑒟𑒼𑒛𑓃। 𑒍𑒞𑒋 𑒁𑒕𑒱 𑒖𑒢- 𑒮𑒧𑓂𑒧𑒩𑓂𑒠। 𑒯𑒹𑒪𑒲𑒏𑒰𑒣𑓂𑒙𑒩 𑒠𑒹𑒐𑒱 𑒦𑒋 𑒖𑒰𑒃𑒞 𑒁𑒕𑒱 𑒒𑒼𑒪। 𑒁𑒣𑒒𑒰𑒞𑒏 𑒁𑒕𑒱 𑒛𑒩 । 𑒯𑒹𑒪𑒲𑒏𑒰𑒣𑓂𑒙𑒩 𑒢𑒯𑒱 𑒐𑒮𑒥𑒻𑒞 𑒁𑒕𑒱 𑒍𑒞𑒋 𑒐𑒰𑒠𑓂𑒨𑒰𑒢𑓂𑒢। 𑒥𑒜𑓃𑒱 𑒖𑒰𑒃𑒞 𑒁𑒕𑒱 𑒂𑒑𑒰𑒿। 𑒐𑒮𑒥𑒻𑒞 𑒁𑒕𑒱 𑒮𑒰𑒧𑒑𑓂𑒩𑒲 𑒖𑒞𑒋 𑒥𑒱𑒢𑒳 𑒣𑒰𑒢𑒱 𑒣𑒛𑓃𑒻𑒞 𑒕𑒪 𑒠𑒳𑒩𑓂𑒦𑒱𑒏𑓂𑒭, 𑒥𑒰𑒜𑓃𑒱𑒮𑒿 𑒦𑒹𑒪 𑒁𑒕𑒱 𑒖𑒞𑒋 𑒣𑒙𑒾𑒢𑒲। 𑒏𑒰𑒩𑒝 𑒋𑒞𑒋 𑒢𑒯𑒱 𑒁𑒕𑒱 𑒁𑒣𑒒𑒰𑒞𑒏 𑒛𑒩। 𑒂𑒿𑒐𑒱𑒮𑒿 𑒯𑒧 𑒄 𑒠𑒹𑒐𑒪। 𑓑𑓙𑓘𑓗 𑒄.।
𑒣𑒋𑒩𑒹 𑒣𑒰𑒩
𑒏𑒹𑒢𑒹 𑒏𑒧𑒪𑒰 𑒡𑒰𑒩,
𑒂𑒃 𑒫𑒱𑒬𑒰𑒪



𑒬𑓂𑒩𑒲𑒧𑒞𑒱 𑒖𑓂𑒨𑒼𑒞𑒱 𑒗𑒰 𑒔𑒾𑒡𑒩𑒲𑒏 𑒃𑓀𑒑𑓂𑒪𑒱𑒬 𑒯𑒻𑒏𑒴 𑒯𑒧𑒩 𑒧𑒻𑒟𑒱𑒪𑒲 𑒁𑒢𑒳𑒫𑒰𑒠 𑒮𑒯𑒱𑒞।
(𑓑) Illusion of eye
Colourful appearance of
Rainbow in the sky
𑒂𑒿𑒐𑒱𑒏 𑒦𑓂𑒩𑒧,
𑒂𑒦𑒰𑒮 𑒫𑒩𑓂𑒝𑒧𑒨
𑒣𑒢𑒱𑒮𑒼𑒐𑒰 𑒠𑓂𑒨𑒾
(𑓒) Rainbow declares
Beginning of bright days and
End of rainy ones
𑒣𑒢𑒱𑒮𑒼𑒐𑒰𑒏,
𑒬𑒳𑒦𑓂𑒩 𑒠𑒱𑒢 𑒂𑒥𑒯
𑒐𑒱𑒔𑒰𑒯𑒢𑒱 𑒖𑒰
(𑓓) Filled with smoky fog
The wood seems to be burning
Thou' it is winter
𑒡𑒳𑒿𑒂 𑒏𑒳𑒯𑒹𑒮
𑒖𑒹𑒢𑒰 𑒖𑒛𑓃𑒻𑒞 𑒏𑒰𑒚,
𑒁𑒕𑒱 𑒄 𑒖𑒰𑒛𑓃
(𑓔) The words sound so sweet
imitated by parrots
Like baby babbles
𑒑𑒳𑒘𑓂𑒖 𑒧𑒡𑒳𑒩
𑒮𑒳𑒑𑓂𑒑𑒰𑒏 𑒁𑒦𑒱𑒢𑒨,
𑒞𑒼𑒞𑒩𑒰𑒃𑒞 𑒮𑓂𑒫𑒩
(𑓕) The sky is bright
The wind has cleared the clouds
Some still needs force
𑒁𑒏𑒰𑒬 𑒬𑓂𑒫𑒹𑒞
𑒫𑒰𑒨𑒳 𑒙𑒰𑒩𑒻𑒞 𑒧𑒹𑒒,
𑒏𑒢𑒹𑒏 𑒥𑒪

𑒧𑒱𑒟𑒱𑒪𑒰𑒏 𑒥𑒰𑒜𑓃𑒱
𑒧𑒱𑒟𑒱𑒪𑒰𑒏 𑒡𑒩𑒞𑒲 𑒥𑒰𑒜𑓃𑒱𑒏 𑒫𑒱𑒦𑒲𑒭𑒱𑒏𑒰𑒮𑒿 𑒖𑒳𑒗𑒻𑒞 𑒩𑒯𑒪 𑒁𑒕𑒱। 𑒏𑒳𑒬𑒹𑒬𑓂𑒫𑒩𑒮𑓂𑒟𑒰𑒢 𑒠𑒱𑒮𑒳𑒏𑒰 𑒏𑓂𑒭𑒹𑒞𑓂𑒩 𑒞𑒿 𑒥𑒱𑒢 𑒥𑒰𑒜𑓃𑒱𑒏, 𑒥𑒩𑒐𑒰𑒏 𑒮𑒧𑒨𑒧𑒨𑒹 𑒛𑒴𑒧𑒪 𑒩𑒯𑒻𑒞 𑒁𑒕𑒱। 𑒧𑒳𑒠𑒰 𑒄 𑒮𑓂𑒟𑒱𑒞𑒱 𑓑𑓙𑓗𑓘-𑓗𑓙 𑒏𑒹𑒩 𑒥𑒰𑒠𑒏 𑒕𑒲। 𑒣𑒯𑒱𑒢𑒹 𑒍 𑒏𑓂𑒭𑒹𑒞𑓂𑒩 𑒣𑒴𑒩𑓂𑒝 𑒩𑒴𑒣𑒮𑒿 𑒅𑒣𑒖𑒰𑒆 𑒕𑒪, 𑒧𑒳𑒠𑒰 𑒦𑒰𑒩𑒞𑒧𑒹 𑒞𑒙𑒥𑒢𑓂𑒡𑒏 𑒁𑒢𑒱𑒨𑒢𑓂𑒞𑓂𑒩𑒱𑒞 𑒢𑒱𑒩𑓂𑒧𑒰𑒝𑒏 𑒮𑓀𑒑 𑒣𑒰𑒢𑒱𑒏 𑒖𑒧𑒰𑒫 𑒍𑒞𑒋 𑒬𑒳𑒩𑒴 𑒦𑒋 𑒑𑒹𑒪। 𑒧𑒳𑒠𑒰 𑒍𑒯𑒱 𑒏𑓂𑒭𑒹𑒞𑓂𑒩𑒏 𑒥𑒰𑒜𑓃𑒱𑒏 𑒏𑒼𑒢𑒼 𑒮𑒧𑒰𑒔𑒰𑒩 𑒏𑒯𑒱𑒨𑒼 𑒢𑒯𑒱 𑒁𑒥𑒻𑒞 𑒁𑒕𑒱, 𑒏𑒯𑒱𑒨𑒼 𑒁𑒥𑒱𑒞𑒼 𑒩𑒯𑒋 𑒞𑒿 𑒧𑒰𑒞𑓂𑒩 𑒄 𑒠𑒳𑒭𑓂𑒣𑓂𑒩𑒔𑒰𑒩 𑒖𑒹 𑒄 𑒮𑒦𑒙𑒰 𑒣𑒰𑒢𑒱 𑒢𑒹𑒣𑒰𑒪𑒮𑒿 𑒕𑒼𑒛𑓃𑒪 𑒑𑒹𑒪 𑒣𑒰𑒢𑒱𑒏 𑒖𑒧𑒰𑒫 𑒁𑒕𑒱। 𑒏𑒳𑒬𑒹𑒬𑓂𑒫𑒩𑒮𑓂𑒟𑒰𑒢 𑒠𑒱𑒮𑒳𑒏𑒰 𑒪𑒼𑒏 𑒋𑒯𑒱 𑒢𑒫 𑒮𑓀𑒏𑒙𑒮𑒿 𑒪𑒛𑓃𑒥𑒰𑒏 𑒏𑒪𑒰 𑒮𑒲𑒐𑒱 𑒑𑒹𑒪𑒰𑒯। 𑒯𑒧𑒩𑒰 𑒧𑒼𑒢 𑒁𑒕𑒱 𑒍 𑒠𑒵𑒬𑓂𑒨 𑒖𑒐𑒢 𑒏𑒳𑒬𑒹𑒬𑓂𑒫𑒩𑒮𑓂𑒟𑒰𑒢𑒮𑒿 𑒧𑒯𑒱𑒭𑒲 𑒅𑒑𑓂𑒩𑒞𑒰𑒩𑒰𑒮𑓂𑒟𑒰𑒢 𑒖𑒋𑒥𑒰𑒏 𑒪𑒹𑒪 𑒯𑒧𑒩𑒰 𑒥𑒰𑒜𑓃𑒱𑒏 𑒮𑒧𑒨𑒧𑒹 𑒁𑒋𑒥𑒰𑒏 𑒪𑒹𑒪 𑒏𑒯𑒪 𑒑𑒹𑒪 𑒕𑒪 𑒏𑒰𑒩𑒝 𑒍𑒯𑒱 𑒮𑒧𑒨𑒧𑒹 𑒢𑒰𑒍𑒮𑒿 𑒑𑒹𑒢𑒰𑒃 𑒮𑒩𑒪 𑒁𑒕𑒱, 𑒄 𑒏𑒯𑒪 𑒑𑒹𑒪। 𑒩𑒳𑒐 𑒮𑒧𑒨𑒧𑒹 𑒐𑒞𑓂𑒞𑒰-𑒔𑒦𑒔𑓂𑒔𑒰𑒧𑒹 𑒢𑒰𑒍 𑒢𑒯𑒱 𑒔𑒪𑒱 𑒣𑒥𑒻𑒞 𑒁𑒕𑒱 𑒂 𑒮𑒛𑓃𑒏𑒏 𑒯𑒰𑒪 𑒞𑒿 𑒣𑒳𑒕𑒴 𑒖𑒳𑒢𑒱। 𑒤𑒮𑒱𑒪𑒏 𑒮𑓂𑒫𑒩𑒴𑒣𑒧𑒹 𑒣𑒩𑒱𑒫𑒩𑓂𑒞𑒢 𑒦𑒹𑒪, 𑒧𑒞𑓂𑒮𑓂𑒨-𑒣𑒰𑒪𑒢 𑒖𑒹𑒢𑒰 𑒞𑒹𑒢𑒰 𑒏𑓄 𑒏𑒋 𑒄 𑒏𑓂𑒭𑒹𑒞𑓂𑒩 𑒖𑒥𑒩𑒠𑒮𑓂𑒞𑒲𑒏 𑒋𑒏𑒙𑒰 𑒖𑒲𑒫𑒢-𑒏𑒪𑒰 𑒮𑒱𑒐𑒪𑒏।
𑒏𑒾𑒬𑒱𑒏𑒲 𑒧𑒯𑒰𑒩𑒰𑒢𑒲𑒏 𑓒𑓐𑓐𑓘 𑒄.𑒏 𑒣𑓂𑒩𑒏𑒼𑒣 𑒍𑒯𑒱 𑒠𑒳𑒭𑓂𑒣𑓂𑒩𑒔𑒰𑒩𑒏𑒹𑒿 𑒐𑒞𑒧 𑒏𑒋 𑒣𑒰𑒍𑒞 𑒂𑒏𑒱 𑒢𑒯𑒱 𑒮𑒹 𑒢𑒯𑒱 𑒖𑒰𑒢𑒱 !
𑒣𑒯𑒱𑒢𑒹 𑒯𑒧𑒩𑒰 𑒮𑒦 𑒄 𑒠𑒹𑒐𑒲 𑒖𑒹 𑒏𑒼𑒬𑒲 𑒂 𑒑𑓀𑒛𑒏𑒣𑒩 𑒖𑒹 𑒠𑒴 𑒙𑒰 𑒥𑒻𑒩𑒰𑒖 𑒢𑒹𑒣𑒰𑒪𑒧𑒹 𑒁𑒕𑒱 𑒍𑒏𑒩 𑒢𑒱𑒨𑒢𑓂𑒞𑓂𑒩𑒝 𑒏𑒏𑒩𑒰 𑒪𑒑 𑒁𑒕𑒱। 𑒄 𑒢𑒱𑒨𑒢𑓂𑒞𑓂𑒩𑒝 𑒁𑒕𑒱 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒖𑒪 𑒮𑓀𑒮𑒰𑒡𑒢 𑒫𑒱𑒦𑒰𑒑𑒏 𑒪𑒑 𑒂 𑒋𑒞𑒋 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒁𑒦𑒱𑒨𑒢𑓂𑒞𑒰𑒑𑒝𑒏 𑒢𑒱𑒨𑒢𑓂𑒞𑓂𑒩𑒝 𑒕𑒢𑓂𑒯𑒱। 𑒣𑒰𑒢𑒱 𑒕𑒼𑒛𑓃𑒥𑒰𑒏 𑒢𑒱𑒩𑓂𑒝𑒨 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒖𑒪 𑒮𑓀𑒮𑒰𑒡𑒢 𑒫𑒱𑒦𑒰𑒑𑒏 𑒯𑒰𑒟𑒧𑒹 𑒁𑒕𑒱। 𑒢𑒹𑒣𑒰𑒪𑒏 𑒯𑒰𑒟𑒧𑒹 𑒣𑒰𑒢𑒱 𑒕𑒼𑒛𑓃𑒥𑒰𑒏 𑒁𑒡𑒱𑒏𑒰𑒩 𑒞𑒐𑒢 𑒁𑒋𑒞 𑒖𑒐𑒢 𑒍𑒞𑒳𑒏𑓂𑒏𑒰 𑒂𑒢 𑒡𑒰𑒩 𑒣𑒩 𑒥𑒰𑒢𑓂𑒯/ 𑒕𑒯𑒩 𑒥𑒢𑒞, 𑒧𑒳𑒠𑒰 𑒮𑒹 𑓕𑓐 𑒮𑒰𑒪𑒮𑒿 𑒆𑒣𑒩 𑒦𑒹𑒪𑒰𑒏 𑒥𑒰𑒠𑒼 𑒠𑒳𑒢𑒴 𑒠𑒹𑒬𑒏 𑒥𑒲𑒔𑒧𑒹 𑒏𑒼𑒢𑒼 𑒮𑒯𑒧𑒞𑒱𑒏 𑒁𑒕𑒻𑒞 𑒮𑒧𑓂𑒦𑒫 𑒢𑒯𑒱 𑒦𑒋 𑒮𑒏𑒪। 𑒏𑒱𑒋𑒏?
𑒮𑒰𑒧𑒨𑒱𑒏 𑒒𑒙𑒢𑒰𑒏𑓂𑒩𑒧- 𑒏𑒼𑒬𑒲𑒣𑒩 𑒦𑒲𑒧𑒢𑒑𑒩 𑒥𑒻𑒩𑒹𑒖, 𑒏𑒳𑒬𑒯𑒰, 𑒢𑒹𑒣𑒰𑒪𑒧𑒹 𑒁𑒕𑒱। 𑓑𑓙𑓕𑓘 𑒧𑒹 𑒥𑒢𑒪 𑒋𑒯𑒱 𑒕𑒯𑒩𑒏 𑒖𑒲𑒫𑒢 𑓓𑓐 𑒥𑒩𑒐 𑒢𑒱𑒩𑓂𑒡𑒰𑒩𑒱𑒞 𑒕𑒪, 𑒖𑒹 𑓑𑓙𑓘𑓘 𑒧𑒹 𑒥𑒲𑒞𑒱 𑒑𑒹𑒪। 𑒠𑒳𑒢𑒴 𑒠𑒹𑒬𑒏 𑒥𑒲𑒔𑒧𑒹 𑒏𑒼𑒢𑒼 𑒮𑒯𑒧𑒞𑒱 𑒏𑒱𑒋𑒏 𑒢𑒯𑒱 𑒥𑒢𑒱 𑒣𑒰𑒍𑒪 ? 𑒕𑒯𑒩𑒏 𑒥𑒲𑒔𑒧𑒹 𑒖𑒹 𑒩𑒹𑒞 𑒖𑒧𑒰 𑒦𑒋 𑒖𑒰𑒃𑒞 𑒁𑒕𑒱, 𑒞𑒏𑒩𑒰 𑒮𑒦 𑒮𑒰𑒪 𑒯𑒙𑒰𑒍𑒪 𑒖𑒰𑒃𑒞 𑒁𑒕𑒱। 𑒏𑒰𑒩𑒝 𑒄 𑒢𑒯𑒱 𑒏𑒋𑒪𑒰𑒮𑒿 𑒍𑒏𑒩 𑒥𑒲𑒔𑒧𑒹 𑒆𑓀𑒔𑒰𑒄 𑒥𑒜𑓃𑒻𑒞 𑒖𑒋𑒞, 𑒞𑒐𑒢 𑒮𑒦 𑒮𑒰𑒪 𑒥𑒰𑒢𑓂𑒯𑒏 𑒆𑒿𑒔𑒰𑒄 𑒥𑒜𑓃𑒰𑒥𑒋 𑒣𑒛𑓃𑒞। 𑒋𑒯𑒱 𑒮𑒰𑒪 𑒄 𑒏𑒰𑒩𑓂𑒨 𑒮𑒧𑒨𑒮𑒿 𑒏𑒱𑒋𑒏 𑒢𑒯𑒱 𑒬𑒳𑒩𑒴 𑒦𑒹𑒪? 𑒤𑒹𑒩 𑒬𑒳𑒩𑒴 𑒦𑒹𑒪 𑒥𑒩𑒐𑒰, 𑓑𑓘 𑒁𑒑𑒮𑓂𑒞𑒏𑒹𑒿 𑒏𑒼𑒬𑒲 𑒥𑒰𑒢𑓂𑒯𑒧𑒹 𑓒 𑒧𑒲𑒙𑒩 𑒠𑒩𑒰𑒩𑒱 𑒂𑒥𑒱 𑒑𑒹𑒪। 𑓑𑓙𑓘𑓗 𑒄.𑒏 𑒥𑒰𑒜𑓃𑒱 𑒯𑒧 𑒂𑒿𑒐𑒱𑒮𑒿 𑒠𑒹𑒐𑒢𑒹 𑒕𑒲। 𑒗𑓀𑒗𑒰𑒩𑒣𑒳𑒩 𑒥𑒰𑒢𑓂𑒯 𑒪𑒑 𑒣𑒰𑒢𑒱 𑒗𑒗𑒰 𑒠𑒹𑒪𑒏, 𑒍𑒫𑒩𑒤𑓂𑒪𑒼 𑒦𑒋 𑒑𑒹𑒪 𑒋𑒏 𑒚𑒰𑒧𑒮𑒿, 𑒂 𑒂𑒿𑒐𑒱𑒏 𑒮𑒼𑒗𑒰𑒿 𑒯𑒧 𑒠𑒹𑒐𑒪𑒯𑒳𑒿 𑒖𑒹 𑒏𑒼𑒢𑒰 𑒞𑒏𑒩 𑒥𑒰𑒠 𑓑 𑒧𑒲𑒙𑒩𑒏 𑒏𑒙𑒰𑒫 𑒏𑒱𑒪𑒼𑒧𑒲𑒙𑒩𑒧𑒹 𑒥𑒠𑒪𑒱 𑒖𑒰𑒃𑒞 𑒁𑒕𑒱। 𑓒𑓗-𑓒𑓘 𑒁𑒑𑒮𑓂𑒞 𑓒𑓐𑓐𑓘 𑒡𑒩𑒱 𑒦𑒲𑒧𑒢𑒑𑒩 𑒥𑒻𑒩𑒹𑒖𑒏 𑒄 𑒏𑒙𑒰𑒫 𑓒 𑒏𑒱𑒪𑒼𑒧𑒲𑒙𑒩 𑒦𑒋 𑒔𑒳𑒏𑒪 𑒕𑒪। 𑒂 𑒄 𑒏𑒰𑒩𑒝 𑒦𑒹𑒪 𑒏𑒼𑒬𑒲𑒏 𑒁𑒣𑒢 𑒧𑒳𑒐𑓂𑒨 𑒡𑒰𑒩𑒮𑒿 𑒯𑒙𑒱 𑒏𑒋 𑒋𑒏𑒙𑒰 𑒢𑒫 𑒡𑒰𑒩 𑒣𑒏𑒛𑓃𑒥𑒰𑒏 𑒂 𑒢𑒹𑒣𑒰𑒪𑒏 𑒧𑒱𑒟𑒱𑒪𑒰𑓀𑒔𑒪𑒏 𑒮𑓀𑒑 𑒥𑒱𑒯𑒰𑒩𑒏 𑒧𑒱𑒟𑒱𑒪𑒰𑓀𑒔𑒪𑒏𑒹𑒿 𑒞𑒯𑒮 𑒢𑒯𑒮 𑒏𑒩𑒥𑒰𑒏। 𑒢𑒰𑒮𑒰𑒏 𑓘 𑒁𑒑𑒮𑓂𑒞 𑓒𑓐𑓐𑓘 𑒂 𑓒𑓔 𑒁𑒑𑒮𑓂𑒞 𑓒𑓐𑓐𑓘 𑒏𑒹𑒩 𑒔𑒱𑒞𑓂𑒩 𑒏𑒾𑒬𑒱𑒏𑒲𑒏 𑒢𑒫 𑒂 𑒣𑒳𑒩𑒰𑒢 𑒡𑒰𑒩𑒏 𑒥𑒲𑒔 𑓒𑓐𑓐 𑒏𑒱𑒪𑒼𑒧𑒲𑒙𑒩𑒏 𑒠𑒴𑒩𑒲 𑒠𑒹𑒐𑒰 𑒩𑒯𑒪 𑒕𑒪। 𑒦𑒲𑒧𑒢𑒑𑒩 𑒥𑒻𑒩𑒹𑒖 𑒂𑒥 𑒏𑒼𑒬𑒲𑒏 𑒋𑒏𑒙𑒰 𑒮𑒯𑒰𑒨𑒏 𑒡𑒰𑒩𑒏 𑒆𑒣𑒩 𑒥𑒢𑒪 𑒥𑒻𑒩𑒹𑒖 𑒥𑒢𑒱 𑒑𑒹𑒪 𑒩𑒯𑒋।

𑒩𑒰𑒭𑓂𑒙𑓂𑒩𑒲𑒨 𑒂𑒣𑒠𑒰: 𑒖𑒰𑒯𑒱 𑒩𑒰𑒖𑓂𑒨𑒧𑒹 𑒂𑒣𑒠𑒰 𑒁𑒥𑒻𑒞 𑒁𑒕𑒱, 𑒮𑒹 𑒏𑒹𑒢𑓂𑒠𑓂𑒩𑒮𑒿 𑒮𑒯𑒰𑒨𑒞𑒰𑒏 𑒂𑒑𑓂𑒩𑒯 𑒏𑒩𑒻𑒞 𑒁𑒕𑒱। 𑒏𑒹𑒢𑓂𑒠𑓂𑒩𑒲𑒨 𑒧𑓀𑒞𑓂𑒩𑒲𑒏 𑒙𑒲𑒧 𑒍𑒯𑒱 𑒩𑒰𑒖𑓂𑒨𑒏 𑒠𑒾𑒛𑓃𑒰 𑒏𑒩𑒻𑒞 𑒁𑒕𑒱 𑒂 𑒁𑒣𑒢 𑒩𑒱𑒣𑒼𑒩𑓂𑒙 𑒠𑒻𑒞 𑒁𑒕𑒱 𑒖𑒰𑒯𑒱𑒣𑒩 𑒏𑒹𑒢𑓂𑒠𑓂𑒩𑒲𑒨 𑒧𑓀𑒞𑓂𑒩𑒲𑒏 𑒋𑒏𑒙𑒰 𑒠𑒼𑒮𑒩 𑒙𑒲𑒧 𑒢𑒱𑒩𑓂𑒝𑒨 𑒏𑒩𑒻𑒞 𑒁𑒕𑒱, 𑒂 𑒍 𑒙𑒲𑒧 𑒢𑒱𑒩𑓂𑒝𑒨 𑒏𑒩𑒻𑒞 𑒁𑒕𑒱 𑒖𑒹 𑒄 𑒂𑒣𑒠𑒰 𑒩𑒰𑒭𑓂𑒙𑓂𑒩𑒲𑒨 𑒂𑒣𑒠𑒰 𑒁𑒕𑒱 𑒫𑒰 𑒢𑒯𑒱। 𑒥𑒱𑒯𑒰𑒩𑒏 𑒩𑒰𑒖𑒢𑒲𑒞𑒱𑒖𑓂𑒘 𑒁𑒣𑒢 𑒣𑒔𑒰𑒮 𑒮𑒰𑒪𑒏 𑒫𑒱𑒤𑒪𑒞𑒰 𑒥𑒱𑒮𑒩𑒱 𑒖𑒐𑒢 𑒋𑒏 𑒠𑒼𑒮𑒩𑒰𑒏 𑒆𑒣𑒩 𑒂𑒏𑓂𑒭𑒹𑒣𑒧𑒹 𑒪𑒰𑒑𑒪 𑒕𑒪𑒰𑒯, 𑒧𑒢𑒧𑒼𑒯𑒢 𑒮𑒱𑓀𑒯 𑒧𑓀𑒞𑓂𑒩𑒲𑒏 𑒣𑓂𑒩𑒡𑒰𑒢𑒏 𑒩𑒴𑒣𑒧𑒹 𑒠𑒾𑒛𑓃𑒰 𑒏𑒋 𑒋𑒏𑒩𑒰 𑒩𑒰𑒭𑓂𑒙𑓂𑒩𑒲𑒨 𑒂𑒣𑒠𑒰 𑒒𑒼𑒭𑒱𑒞 𑒏𑒋𑒪𑒢𑓂𑒯𑒱। 𑒏𑒰𑒩𑒝 𑒄 𑒪𑒹𑒫𑒪-𑓓 𑒏𑒹𑒩 𑒂𑒣𑒠𑒰 𑒁𑒕𑒱 𑒂 𑒄 𑒮𑒧𑓂𑒥𑒢𑓂𑒡𑒱𑒞 𑒩𑒰𑒖𑓂𑒨𑒏 𑒪𑒹𑒪 𑒁𑒮𑒑𑒩𑒹 - 𑒢𑒯𑒱 𑒞𑒿 𑒫𑒱𑒞𑓂𑒞𑒏 𑒪𑒱𑒯𑒰𑒖𑒮𑒿 𑒂 𑒢𑒯𑒱𑒋 𑒩𑒰𑒯𑒞𑒏 𑒫𑓂𑒨𑒫𑒮𑓂𑒟𑒰𑒏 𑒮𑒏𑓂𑒭𑒧𑒞𑒰𑒏 𑒯𑒱𑒮𑒰𑒥𑒮𑒿- 𑒣𑒰𑒩 𑒣𑒰𑒋𑒥 𑒮𑓀𑒦𑒫 𑒢𑒯𑒱 𑒁𑒕𑒱। 𑒂𑒥 𑒩𑒰𑒭𑓂𑒙𑓂𑒩𑒲𑒨 𑒂𑒏𑒮𑓂𑒧𑒱𑒏 𑒂𑒣𑒠𑒰 𑒏𑒼𑒭𑒮𑒿 𑒮𑒯𑒰𑒨𑒞𑒰 𑒠𑒹𑒪 𑒖𑒰 𑒩𑒯𑒪 𑒁𑒕𑒱, 𑒏𑒱𑒮𑒰𑒢𑒏 𑒇𑒝-𑒧𑒰𑒤𑒲 𑒮𑒹𑒯𑒼 𑒮𑒧𑓂𑒦𑒫 𑒁𑒕𑒱।

𑒅𑒣𑒰𑒨 𑒏𑒲 𑒯𑒼𑒁𑒋 ? 𑒏𑒳𑒬𑒹𑒬𑓂𑒫𑒩 𑒮𑓂𑒟𑒰𑒢𑒏 𑒂𑒣𑒠𑒰 𑒮𑒦-𑒮𑒰𑒪 𑒁𑒥𑒻𑒕, 𑒮𑒹 𑒮𑒦 𑒍𑒏𑒩𑒰 𑒥𑒱𑒮𑒩𑒱𑒋 𑒖𑒹𑒏𑒰𑒿 𑒑𑒹𑒪𑒰𑒯। 𑒧𑒳𑒠𑒰 𑒂𑒥 𑒏𑒲 𑒯𑒼𑒁𑒋 ? 𑒠𑒰𑒧𑒼𑒠𑒩 𑒒𑒰𑒙𑒲𑒏 𑒂 𑒧𑒨𑒴𑒩𑒏𑓂𑒭𑒲 𑒣𑒩𑒱𑒨𑒼𑒖𑒢𑒰 𑒖𑒹𑒏𑒰𑒿 𑒏𑒰𑒩𑓂𑒨 𑒏𑒼𑒬𑒲, 𑒏𑒧𑒪𑒰, 𑒦𑒳𑒞𑒯𑒲 𑒥𑒪𑒰𑒢, 𑒑𑓀𑒛𑒏, 𑒥𑒴𑒜𑓃𑒲 𑒑𑓀𑒛𑒏 𑒂 𑒥𑒰𑒑𑒧𑒞𑒲𑒣𑒩 𑒏𑒱𑒋𑒏 𑒮𑒧𑓂𑒦𑒫 𑒢𑒯𑒱 𑒦𑒹𑒪 ? 𑒫𑒱𑒬𑓂𑒫𑒹𑒬𑓂𑒫𑒩𑒻𑒨𑓂𑒨𑒰𑒏 𑒫𑒵𑒢𑓂𑒠𑒰𑒫𑒢 𑒛𑒻𑒧 𑒏𑒱𑒋𑒏 𑒮𑒤𑒪 𑒁𑒕𑒱 ? 𑒢𑒹𑒣𑒰𑒪 𑒮𑒩𑒏𑒰𑒩𑒣𑒩 𑒠𑒼𑒭𑒰𑒩𑒼𑒣𑒝 𑒏𑒋 𑒯𑒧𑒩𑒰 𑒮𑒦 𑒏𑒯𑒱𑒨𑒰 𑒡𑒩𑒱 𑒖𑒢𑒞𑒰𑒏𑒹𑒿 𑒚𑒏𑒻𑒞 𑒩𑒯𑒥 ? 𑒋𑒏𑒩 𑒋𑒏𑒧𑒰𑒞𑓂𑒩 𑒅𑒣𑒰𑒋 𑒁𑒕𑒱 𑒥𑒛𑓃𑒏𑒰 𑒨𑓀𑒞𑓂𑒩𑒮𑒿 𑒏𑒧𑒪𑒰-𑒥𑒪𑒰𑒢 𑒂𑒠𑒱𑒏 𑒆𑒣𑒩 𑒖𑒹 𑒧𑒰𑒙𑒱𑒏 𑒥𑒰𑒢𑓂𑒯 𑒥𑒰𑒢𑓂𑒯𑒪 𑒑𑒹𑒪 𑒁𑒕𑒱 𑒞𑒏𑒩𑒰 𑒞𑒼𑒛𑓃𑒱 𑒏𑒋 𑒯𑒙𑒰𑒋𑒥 𑒂 𑒏𑒔𑓂𑒔𑒰 𑒢𑒯𑒩𑒱𑒏 𑒥𑒠𑒪𑒰 𑒣𑒏𑓂𑒏𑒰 𑒢𑒯𑒩𑒱𑒏 𑒢𑒱𑒩𑓂𑒧𑒰𑒝। 𑒢𑒹𑒣𑒰𑒪 𑒮𑒩𑒏𑒰𑒩𑒮𑒿 𑒫𑒰𑒩𑓂𑒞𑒰 𑒂 𑒞𑓂𑒫𑒩𑒱𑒞 𑒮𑒧𑒰𑒡𑒢। 𑒂 𑒖𑒰 𑒡𑒩𑒱 𑒄 𑒢𑒯𑒱 𑒯𑒼𑒃𑒞 𑒁𑒕𑒱 𑒞𑒰𑒫𑒞 𑒖𑒹 𑒁𑒪𑓂𑒣𑒏𑒰𑒪𑒱𑒏 𑒅𑒣𑒰𑒨 𑒁𑒕𑒱 𑒮𑒹 𑒏𑒩𑒥, 𑒖𑒹𑒢𑒰 𑒥𑒩𑒐𑒰 𑒂𑒥𑒋𑒮𑒿 𑒣𑒯𑒱𑒢𑒹 𑒥𑒰𑒢𑓂𑒯𑒏 𑒥𑒲𑒔𑒏 𑒩𑒹𑒞𑒏𑒹𑒿 𑒯𑒙𑒰𑒋𑒥, 𑒥𑒩𑒐𑒰𑒏 𑒁𑒋𑒥𑒰𑒏 𑒥𑒰𑒙 𑒞𑒏𑒥𑒰𑒏 𑒥𑒠𑒪𑒰 𑒏𑒱𑒕𑒳 𑒣𑒯𑒱𑒢𑒯𑒱 𑒥𑒰𑒢𑓂𑒯𑒏 𑒧𑒩𑒧𑓂𑒧𑒞𑒱𑒏 𑒏𑒰𑒩𑓂𑒨 𑒏𑒩𑒥, 𑒂 𑒋𑒯𑒱 𑒮𑒦𑒧𑒹 𑒩𑒰𑒖𑒢𑒲𑒞𑒱𑒏 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰𑒏𑒹𑒿 𑒠𑒴𑒩 𑒩𑒰𑒐𑒥। 𑒏𑒼𑒬𑒲𑒏𑒹𑒿 𑒣𑒳𑒩𑒰𑒢 𑒣𑒟𑒣𑒩 𑒁𑒢𑒥𑒰𑒏 𑒯𑒹𑒞𑒳 𑒏𑒻𑒏𑒙𑒰 𑒥𑒰𑒢𑓂𑒯 𑒥𑒢𑒰𑒥𑒋 𑒣𑒛𑓃𑒞 𑒂 𑒍 𑒮𑒦 𑒋𑒏𑒩 𑒮𑒧𑒰𑒡𑒰𑒢 𑒏𑒯𑒱𑒍 𑒢𑒯𑒱 𑒥𑒢𑒱 𑒮𑒏𑒞।
𑒏𑒧𑒪𑒰 𑒡𑒰𑒩
𑒢𑒯𑒩𑒱𑒮𑒿 𑒪𑒰𑒦 𑒯𑒰𑒢𑒱- 𑒋𑒏 𑒞𑒿 𑒏𑒔𑓂𑒔𑒲 𑒢𑒯𑒩𑒱 𑒂 𑒞𑒰𑒯𑒴𑒣𑒩 𑒧𑒴𑒪𑒦𑒴𑒞 𑒛𑒱𑒖𑒰𑒃𑒢𑒏 𑒮𑒧𑒮𑓂𑒨𑒰, 𑒋𑒏𑒙𑒰 𑒅𑒠𑒰𑒯𑒩𑒝 𑒣𑒩𑓂𑒨𑒰𑒣𑓂𑒞 𑒯𑒼𑒋𑒞 𑒖𑒹𑒢𑒰-𑒞𑒹𑒢𑒰 𑒥𑒢𑒰𑒍𑒪 𑒣𑒩𑒱𑒨𑒼𑒖𑒢𑒰 𑒮𑒦𑒏। 𑒏𑒧𑒪𑒰𑒏 𑒡𑒰𑒩𑒮𑒿 𑒢𑒱𑒏𑒰𑒪𑒪 𑒣𑒕𑒥𑒰𑒩𑒲 𑒏𑒰𑒞𑒏 𑒧𑒳𑒐𑓂𑒨 𑒢𑒯𑒩𑒱 𑒖𑒨𑒢𑒑𑒩𑒮𑒿 𑒅𑒧𑒩𑒰𑒿𑒫- 𑒣𑒴𑒩𑓂𑒫𑒮𑒿 𑒣𑒕𑒥𑒰𑒩𑒲 𑒠𑒱𑒬𑒰𑒧𑒹 𑒁𑒕𑒱। 𑒧𑒳𑒠𑒰 𑒍𑒞𑒋 𑒡𑒩𑒞𑒲𑒏 𑒜𑓃𑒪𑒰𑒢 𑒅𑒞𑓂𑒞𑒩𑒮𑒿 𑒠𑒏𑓂𑒭𑒱𑒝 𑒠𑒱𑒬𑒰𑒧𑒹 𑒁𑒕𑒱। 𑒥𑒩𑒐𑒰𑒏 𑒮𑒧𑒨𑒧𑒹 𑒋𑒏𑒩 𑒣𑒩𑒱𑒝𑒰𑒧 𑒏𑒲 𑒯𑒼𑒋𑒞 𑒂𑒏𑒱 𑒏𑒲 𑒯𑒼𑒃𑒞 𑒁𑒕𑒱 ? 𑒄 𑒥𑒰𑒢𑓂𑒯 𑒥𑒢𑒱 𑒖𑒰𑒃𑒞 𑒁𑒕𑒱 𑒂 𑒋𑒏𑒩 𑒅𑒞𑓂𑒞𑒩𑒧𑒹 𑒣𑒰𑒢𑒱 𑒟𑒏𑒧𑒏𑒰 𑒖𑒰𑒃𑒞 𑒁𑒕𑒱। 𑒮𑒦 𑒮𑒰𑒪 𑒋𑒯𑒱 𑒢𑒯𑒩 𑒩𑒴𑒣𑒲 𑒥𑒰𑒢𑓂𑒯𑒮𑒿 𑒣𑒙𑒾𑒢𑒲 𑒯𑒼𑒁𑒋 𑒫𑒰 𑒢𑒯𑒱 𑒋𑒏𑒩 𑒅𑒞𑒩𑒥𑒩𑒱𑒨𑒰 𑒏𑒰𑒞𑒏 𑒤𑒮𑒱𑒪 𑒢𑒱𑒬𑓂𑒔𑒱𑒞 𑒩𑒴𑒣𑒹𑒝 𑒛𑒳𑒧𑒥𑒹 𑒙𑒰 𑒏𑒩𑒻𑒞 𑒁𑒕𑒱। 𑒤𑒪𑒢𑒰 𑒥𑒰𑒥𑒴𑒏 𑒖𑒧𑒲𑒢 𑒢𑒯𑒩𑒱𑒧𑒹 𑒢𑒘𑒱 𑒔𑒪𑒱 𑒖𑒰𑒋, 𑒮𑒹 𑒢𑒯𑒩𑒱𑒏 𑒠𑒱𑒬𑒰 𑒥𑒠𑒪𑒱 𑒠𑒹𑒪 𑒖𑒰𑒃𑒞 𑒁𑒕𑒱 !
𑒏𑒧𑒪𑒰 𑒢𑒠𑒲𑒣𑒩 𑓑𑓙𑓖𑓐 𑒄. 𑒧𑒹 𑒖𑒨𑒢𑒑𑒩𑒮𑒿 𑒗𑓀𑒗𑒰𑒩𑒣𑒳𑒩 𑒡𑒩𑒱 𑒕𑒯𑒩𑒏 𑒢𑒱𑒩𑓂𑒧𑒰𑒝 𑒦𑒹𑒪 𑒂 𑒋𑒯𑒱𑒮𑒿 𑒮𑒧𑓂𑒣𑒴𑒩𑓂𑒝 𑒏𑓂𑒭𑒹𑒞𑓂𑒩𑒏 𑒫𑒱𑒢𑒰𑒬𑒪𑒲𑒪𑒰𑒏 𑒣𑓂𑒩𑒰𑒩𑒧𑓂𑒦 𑒮𑒹𑒯𑒼 𑒦𑒋 𑒑𑒹𑒪। 𑒗𑓀𑒗𑒰𑒩𑒣𑒳𑒩𑒮𑒿 𑒂𑒑𑒰𑒿𑒏 𑒏𑓂𑒭𑒹𑒞𑓂𑒩𑒏 𑒏𑒲 𑒯𑒰𑒪 𑒦𑒹𑒪 𑒮𑒹 𑒞𑒿 𑒯𑒧 𑒏𑒳𑒬𑒹𑒬𑓂𑒫𑒩𑒏 𑒫𑒩𑓂𑒝𑒢 𑒏𑒋 𑒠𑒋 𑒔𑒳𑒏𑒪 𑒕𑒲। 𑒧𑒡𑒹𑒣𑒳𑒩, 𑒒𑒢𑒬𑓂𑒨𑒰𑒧𑒣𑒳𑒩, 𑒮𑒱𑓀𑒒𑒱𑒨𑒰 𑒋𑒯𑒱 𑒮𑒦𑒏 𑒐𑒱𑒮𑓂𑒮𑒰 𑒏𑒳𑒬𑒹𑒬𑓂𑒫𑒩𑒮𑒿 𑒦𑒱𑒢𑓂𑒢 𑒢𑒯𑒱 𑒁𑒕𑒱। 𑒏𑒧𑒪𑒰-𑒥𑒪𑒰𑒢𑒏 𑒠𑒳𑒢𑒴 𑒕𑒯𑒩𑒏 𑒥𑒲𑒔 𑒖𑒹𑒢𑒰-𑒖𑒹𑒢𑒰 𑒩𑒹𑒞 𑒦𑒩𑒻𑒞 𑒑𑒹𑒪, 𑒞𑒰𑒯𑒱 𑒏𑒰𑒩𑒝𑒹𑒿 𑒋𑒯𑒱 𑒞𑒙𑒥𑒢𑓂𑒡𑒏 𑒢𑒱𑒩𑓂𑒧𑒰𑒝𑒏 𑒥𑒲𑒮 𑒮𑒰𑒪𑒏 𑒦𑒲𑒞𑒩 𑒮𑒦 𑒏𑒱𑒕𑒳 𑒞𑒯𑒮-𑒢𑒯𑒮 𑒦𑒋 𑒑𑒹𑒪। 𑒏𑒧𑒪𑒰 𑒡𑒰𑒩 𑒖𑒹 𑒥𑒪𑒰𑒢𑒧𑒹 –𑒣𑒱𑒣𑒩𑒰𑒒𑒰𑒙 𑒪𑒑 𑓑𑓙𑓕𑓔 𑒧𑒹- 𑒧𑒱𑒪𑒱 𑒑𑒹𑒪𑒲𑒯, 𑒯𑒱𑒧𑒰𑒪𑒨𑒮𑒿 𑒥𑒯𑒱 𑒏𑒋 𑒏𑒼𑒢𑒼 𑒣𑒻𑒒 𑒪𑒏𑓂𑒏𑒛𑓃𑒏 𑒁𑒫𑒩𑒼𑒡𑒏 𑒏𑒰𑒩𑒝। 𑒂𑒥 𑒯𑒰𑒪 𑒄 𑒁𑒕𑒱 𑒖𑒹 𑒠𑒮 𑒒𑒝𑓂𑒙𑒰𑒧𑒹 𑒣𑒰𑒢𑒱𑒏 𑒖𑒪𑒮𑓂𑒞𑒩 𑒋𑒯𑒱 𑒡𑒰𑒩𑒧𑒹 𑓒 𑒧𑒲𑒙𑒩𑒮𑒿 𑒥𑒹𑒬𑒲 𑒡𑒩𑒱 𑒥𑒜𑓃𑒱 𑒖𑒰𑒃𑒞 𑒁𑒕𑒱। 𑓑𑓙𑓖𑓕 𑒄.𑒮𑒿 𑒥𑒰𑒢𑓂𑒯/ 𑒕𑒯𑒩𑒏 𑒥𑒲𑒔𑒧𑒹 𑒩𑒹𑒞 𑒋𑒞𑒹𑒏 𑒦𑒩𑒱 𑒑𑒹𑒪 𑒖𑒹 𑒋𑒏𑒩 𑒆𑒿𑒔𑒰𑒃 𑒥𑒜𑓃𑒹𑒥𑒰𑒏 𑒂𑒫𑒬𑓂𑒨𑒏𑒞𑒰 𑒦𑒋 𑒑𑒹𑒪 𑒂 𑒄 𑒧𑒰𑒿𑒑 𑒬𑒳𑒩𑒴 𑒦𑒋 𑒑𑒹𑒪 𑒖𑒹 𑒥𑒰𑒢𑓂𑒯/ 𑒕𑒯𑒩𑒏𑒹𑒿 𑒞𑒼𑒛𑓃𑒱 𑒠𑒹𑒪 𑒖𑒰𑒋 !
𑒏𑒼𑒬𑒲: 𑒏𑒼𑒬𑒲𑒏 𑒣𑒰𑒢𑒱 𑒧𑒰𑒅𑒢𑓂𑒙 𑒋𑒫𑒹𑒩𑒹𑒮𑓂𑒙, 𑒏𑓀𑒔𑒢𑒖𑓀𑒒𑒰 𑒂 𑒑𑒾𑒩𑒲-𑒬𑓀𑒏𑒩 𑒬𑒱𑒐𑒩 𑒂 𑒧𑒏𑒰𑒪𑒴 𑒣𑒩𑓂𑒫𑒞𑒬𑓂𑒩𑒵𑓀𑒐𑒪𑒰𑒮𑒿 𑒁𑒥𑒻𑒞 𑒁𑒕𑒱। 𑒢𑒹𑒣𑒰𑒪𑒧𑒹 𑒮𑒣𑓂𑒞𑒏𑒼𑒬𑒲𑒧𑒹, 𑒖𑒰𑒯𑒱𑒧𑒹 𑒃𑒢𑓂𑒠𑓂𑒩𑒰𑒫𑒞𑒲, 𑒮𑒳𑒢𑒏𑒼𑒮𑒲 (𑒦𑒼𑒙 𑒏𑒼𑒮𑒲), 𑒞𑒰𑓀𑒥𑒰 𑒏𑒼𑒮𑒲, 𑒪𑒱𑒏𑓂𑒭𑒳 𑒏𑒼𑒮𑒲, 𑒠𑒴𑒡 𑒏𑒼𑒮𑒲, 𑒁𑒩𑒳𑒝 𑒏𑒼𑒮𑒲 𑒂 𑒞𑒰𑒧𑒩 𑒏𑒼𑒮𑒲 𑒮𑒧𑓂𑒧𑒱𑒪𑒱𑒞 𑒁𑒕𑒱।
𑒋𑒯𑒱𑒧𑒹 𑒃𑒢𑓂𑒠𑓂𑒩𑒰𑒫𑒞𑒲, 𑒮𑒳𑒢𑒏𑒼𑒮𑒲, 𑒞𑒰𑓀𑒥𑒰 𑒏𑒼𑒮𑒲, 𑒪𑒱𑒏𑓂𑒭𑒳 𑒏𑒼𑒮𑒲 𑒂 𑒠𑒴𑒡 𑒏𑒼𑒮𑒲 𑒧𑒱𑒪𑒱 𑒏𑒋 𑒮𑒳𑒢𑒏𑒼𑒮𑒲𑒏 𑒢𑒱𑒩𑓂𑒧𑒰𑒝 𑒏𑒩𑒻𑒞 𑒁𑒕𑒱 𑒂 𑒄 𑒧𑒼𑒙𑒰-𑒧𑒼𑒙𑒲 𑒣𑒔𑓂𑒕𑒱𑒧𑒮𑒿 𑒣𑒴𑒩𑓂𑒫 𑒠𑒱𑒬𑒰𑒧𑒹 𑒥𑒯𑒻𑒞 𑒁𑒕𑒱, 𑒋𑒏𑒩 𑒬𑒰𑒐𑒰 𑒮𑒦 𑒧𑒼𑒙𑒰-𑒧𑒼𑒙𑒲 𑒅𑒞𑓂𑒞𑒩𑒮𑒿 𑒠𑒏𑓂𑒭𑒱𑒝 𑒠𑒱𑒬𑒰𑒧𑒹 𑒥𑒯𑒻𑒞 𑒁𑒕𑒱। 𑒄 𑒣𑒰𑒿𑒔𑒴 𑒡𑒰𑒩 𑒑𑒾𑒩𑒲 𑒬𑓀𑒏𑒩 𑒬𑒱𑒐𑒩 𑒂 𑒧𑒏𑒰𑒪𑒴 𑒣𑒩𑓂𑒫𑒞𑒬𑓂𑒩𑒵𑓀𑒐𑒪𑒰𑒏 𑒣𑒰𑒢𑒱 𑒁𑒢𑒻𑒞 𑒁𑒕𑒱।
𑒁𑒩𑒳𑒝𑒏𑒼𑒮𑒲 𑒧𑒰𑒅𑒢𑓂𑒙 𑒋𑒫𑒹𑒩𑒹𑒮𑓂𑒙 (𑒮𑒑𑒩𑒧𑒰𑒟𑒰) 𑒏𑓂𑒭𑒹𑒞𑓂𑒩𑒮𑒿 𑒣𑒰𑒢𑒱 𑒑𑓂𑒩𑒯𑒝 𑒏𑒩𑒻𑒞 𑒁𑒕𑒱। 𑒄 𑒡𑒰𑒩 𑒧𑒼𑒙𑒰-𑒧𑒼𑒙𑒲 𑒅𑒞𑓂𑒞𑒩-𑒠𑒏𑓂𑒭𑒱𑒝 𑒠𑒱𑒬𑒰𑒧𑒹 𑒥𑒯𑒻𑒞 𑒁𑒕𑒱।
𑒞𑒰𑒧𑒩 𑒏𑒼𑒮𑒲 𑒧𑒼𑒙𑒰-𑒧𑒼𑒙𑒲 𑒣𑒴𑒥𑒮𑒿 𑒣𑒔𑓂𑒕𑒱𑒧 𑒠𑒱𑒬𑒰𑒧𑒹 𑒥𑒯𑒻𑒞 𑒁𑒕𑒱 𑒂 𑒁𑒣𑒢 𑒣𑒰𑒢𑒱 𑒏𑓀𑒔𑒢𑒖𑓀𑒒𑒰 𑒣𑒩𑓂𑒫𑒞 𑒬𑓂𑒩𑒵𑓀𑒐𑒪𑒰𑒮𑒿 𑒣𑒥𑒻𑒞 𑒁𑒕𑒱।
𑒂𑒥 𑒄 𑒞𑒲𑒢𑒴 𑒬𑒰𑒐𑒰 𑒮𑒳𑒢𑒏𑒼𑒮𑒲, 𑒁𑒩𑒳𑒝𑒏𑒼𑒮𑒲 𑒂 𑒞𑒰𑒧𑒩𑒏𑒼𑒮𑒲 𑒡𑒢𑒏𑒳𑒙𑓂𑒙𑒰 𑒖𑒱𑒪𑓂𑒪𑒰𑒏 𑒞𑓂𑒩𑒱𑒫𑒹𑒝𑒲 𑒮𑓂𑒟𑒰𑒢𑒣𑒩 𑒧𑒱𑒪𑒱 𑒮𑒣𑓂𑒞𑒏𑒼𑒮𑒲 𑒥𑒢𑒱 𑒖𑒰𑒃𑒞 𑒕𑒟𑒱। 𑒋𑒞𑒋𑒮𑒿 𑓑𑓐 𑒏𑒱𑒪𑒼𑒧𑒲𑒙𑒩 𑒥𑒰𑒠 𑒔𑒞𑒩𑒰 𑒮𑓂𑒟𑒰𑒢 𑒁𑒥𑒻𑒞 𑒁𑒕𑒱 𑒖𑒞𑒋 𑒧𑒯𑒰𑒏𑒼𑒮𑒲, 𑒮𑒣𑓂𑒞𑒏𑒼𑒮𑒲 𑒫𑒰 𑒏𑒼𑒮𑒲 𑒧𑒻𑒠𑒰𑒢𑒲 𑒡𑒩𑒰𑒞𑒪𑒣𑒩 𑒁𑒥𑒻𑒞 𑒕𑒟𑒱। 𑒂𑒥 𑒅𑒞𑓂𑒞𑒩 𑒠𑒏𑓂𑒭𑒱𑒝𑒧𑒹 𑒔𑒪𑒻𑒞 𑒣𑓂𑒩𑒰𑒨𑓁 𑓕𑓐 𑒏𑒱𑒪𑒼𑒧𑒲𑒙𑒩 𑒢𑒹𑒣𑒰𑒪𑒧𑒹 𑒩𑒯𑒪𑒰 𑒅𑒞𑓂𑒞𑒩 𑒏𑒼𑒮𑒲 𑒯𑒢𑒳𑒧𑒰𑒢𑒢𑒑𑒩- 𑒦𑒲𑒧𑒢𑒑𑒩 𑒪𑒑 𑒦𑒰𑒩𑒞𑒧𑒹 𑒣𑓂𑒩𑒫𑒹𑒬 𑒏𑒩𑒻𑒞 𑒕𑒟𑒱 𑒂 𑒏𑒢𑒹𑒏 𑒠𑒏𑓂𑒭𑒱𑒝-𑒣𑒔𑓂𑒕𑒱𑒧 𑒩𑒳𑒐𑒱 𑒏𑒹𑒪𑒰𑒏 𑒥𑒰𑒠 𑒠𑒏𑓂𑒭𑒱𑒝-𑒣𑒴𑒩𑓂𑒫 𑒂 𑒣𑒔𑓂𑒕𑒱𑒧-𑒣𑒴𑒩𑓂𑒫 𑒠𑒱𑒬𑒰 𑒪𑒻𑒞 𑒁𑒕𑒱 𑒂 𑒦𑒰𑒩𑒞𑒧𑒹 𑒪𑒑𑒦𑒑 𑓑𑓓𑓐 𑒏𑒱𑒧𑒲. 𑒔𑒪𑒪𑒰𑒏 𑒥𑒰𑒠 𑒏𑒳𑒩𑒮𑒹𑒪𑒰 𑒪𑒑 𑒑𑓀𑒑𑒰𑒧𑒹 𑒧𑒱𑒪𑒱 𑒖𑒰𑒃𑒞 𑒕𑒟𑒱। 𑒏𑒼𑒮𑒲𑒧𑒹 𑒥𑒰𑒑𑒧𑒞𑒲 𑒂 𑒏𑒧𑒪𑒰𑒏 𑒡𑒰𑒩 𑒮𑒹𑒯𑒼 𑒮𑒯𑒩𑒮𑒰- 𑒠𑒩𑒦𑓀𑒑𑒰- 𑒣𑒴𑒩𑓂𑒝𑒱𑒨𑒰 𑒖𑒱𑒪𑒰𑒏 𑒮𑓀𑒑𑒧𑒣𑒩 𑒧𑒱𑒪𑒱 𑒖𑒰𑒃𑒞 𑒁𑒕𑒱।
𑒏𑒼𑒮𑒲𑒣𑒩 𑒣𑒯𑒱𑒪 𑒥𑒰𑒢𑓂𑒯 𑓑𑓒𑒧 𑒬𑒞𑒰𑒥𑓂𑒠𑒲𑒧𑒹 𑒪𑒏𑓂𑒭𑓂𑒧𑒝 𑒠𑓂𑒫𑒱𑒞𑒲𑒨 𑒠𑓂𑒫𑒰𑒩𑒰 𑒥𑒢𑒰𑒍𑒪 𑒫𑒲𑒩-𑒥𑒰𑒿𑒡 𑒕𑒪 𑒖𑒏𑒩 𑒁𑒫𑒬𑒹𑒭 𑒦𑒲𑒧𑒢𑒑𑒩𑒏 𑒠𑒏𑓂𑒭𑒱𑒝𑒧𑒹 𑒋𑒐𑒢𑒼 𑒁𑒕𑒱।
𑒦𑒲𑒧𑒢𑒑𑒩 𑒪𑒑 𑒥𑒻𑒩𑒰𑒖𑒏 𑒢𑒱𑒩𑓂𑒧𑒰𑒝𑒏 𑒮𑓀𑒑𑒹 𑒣𑒴𑒩𑓂𑒫𑒲 𑒏𑒼𑒮𑒲 𑒞𑒙𑒥𑒢𑓂𑒡 𑒮𑒹𑒯𑒼 𑒥𑒢𑒱 𑒑𑒹𑒪 𑒂 𑒣𑒴𑒩𑓂𑒫𑒲 𑒏𑒼𑒮𑒲 𑒢𑒯𑒩𑒱 𑒮𑒹𑒯𑒼।
𑒏𑒳𑒿𑒁𑒩 𑒮𑒹𑒢 𑒂𑒨𑒼𑒑 𑓑𑓙𑓖𑓖 𑒄. 𑒧𑒹 𑒏𑒼𑒮𑒲 𑒢𑒱𑒨𑒢𑓂𑒞𑓂𑒩𑒝𑒏 𑒪𑒹𑒪 𑒦𑒲𑒧𑒢𑒑𑒩𑒮𑒿 𑓒𑓓 𑒏𑒱𑒧𑒲. 𑒢𑒲𑒔𑒰𑒿 𑒛𑒑𑒧𑒰𑒩𑒰 𑒥𑒻𑒩𑒰𑒖𑒏 𑒨𑒼𑒖𑒢𑒰𑒏 𑒣𑓂𑒩𑒮𑓂𑒞𑒰𑒫 𑒠𑒹𑒪𑒏 𑒖𑒹 𑒫𑒰𑒠-𑒫𑒱𑒫𑒰𑒠 𑒂 𑒩𑒰𑒖𑒢𑒲𑒞𑒱𑒧𑒹 𑒍𑒗𑒩𑒰 𑒑𑒹𑒪। 𑒋𑒯𑒱 𑒥𑒻𑒩𑒰𑒖𑒮𑒿 𑒠𑒴 𑒤𑒰𑒨𑒠𑒰 𑒕𑒪। 𑒋𑒏 𑒞𑒿 𑒦𑒲𑒧𑒢𑒑𑒩 𑒥𑒻𑒩𑒹𑒖𑒏 𑒖𑒲𑒫𑒢-𑒏𑒰𑒪𑒰𑒫𑒡𑒱 𑒮𑒧𑒰𑒣𑓂𑒞 𑒦𑒹𑒪𑒰𑒣𑒩 𑒄 𑒥𑒻𑒩𑒹𑒖 𑒏𑒰𑒖 𑒁𑒥𑒱𑒞𑒋, 𑒠𑒼𑒮𑒩 𑒋𑒯𑒱𑒮𑒿 𑒅𑒞𑓂𑒞𑒩-𑒣𑓂𑒩𑒠𑒹𑒬𑒮𑒿 𑒁𑒮𑒧 𑒡𑒩𑒱 𑒖𑒪 𑒣𑒩𑒱𑒫𑒯𑒢 𑒫𑒱𑒏𑒮𑒱𑒞 𑒦𑓄 𑒖𑒰𑒃𑒞 𑒖𑒰𑒯𑒱𑒮𑒿 𑒅𑒞𑓂𑒞𑒩 𑒥𑒱𑒯𑒰𑒩𑒏𑒹𑒿 𑒥𑒛𑓃 𑒤𑒰𑒋𑒠𑒰 𑒯𑒼𑒃𑒞𑒋। 𑒧𑒳𑒠𑒰 𑒋𑒯𑒱 𑒥𑒻𑒩𑒹𑒖 𑒢𑒱𑒩𑓂𑒧𑒰𑒝 𑒪𑒹𑒪 𑒣𑒰𑒃 𑒂𑒫𑓀𑒙𑒢 𑒏𑒹𑒢𑓂𑒠𑓂𑒩𑒲𑒨 𑒮𑒱𑓀𑒔𑒰𑒄 𑒧𑓀𑒞𑓂𑒩𑒲 𑒛𑒰 𑒏𑒹.𑒋𑒪.𑒩𑒰𑒫 𑒢𑒯𑒱 𑒠𑒹𑒪𑒐𑒱𑒢𑓂𑒯। 𑒣𑒬𑓂𑒔𑒱𑒧𑒲 𑒏𑒼𑒮𑒲 𑒢𑒯𑒩𑒱 𑒋𑒏𑒩 𑒫𑒱𑒏𑒪𑓂𑒣 𑒩𑒴𑒣𑒧𑒹 𑒖𑒹𑒢𑒰 𑒞𑒹𑒢𑒰 𑒧𑒢𑓂𑒟𑒩 𑒑𑒞𑒱 𑒮𑒿 𑒬𑒳𑒩𑒴 𑒦𑒹𑒪 𑒧𑒳𑒠𑒰 𑒋𑒐𑒢𑒼 𑒡𑒩𑒱 𑒍𑒯𑒱𑒧𑒹 𑒏𑒰𑒖 𑒦𑒃𑒨𑒹 𑒩𑒯𑒪 𑒁𑒕𑒱।
𑒏𑒼𑒮𑒲 𑒪𑒹𑒪 𑒏𑒱𑒕𑒳 𑒢𑒯𑒱 𑒦𑓄 𑒮𑒏𑒪। 𑒫𑒱𑒔𑒰𑒩 𑒂𑒋𑒪 𑒞𑒿 𑒨𑒼𑒖𑒢𑒰 𑒁𑒮𑓂𑒫𑒲𑒏𑒵𑒞 𑒦𑒋 𑒑𑒹𑒪। 𑒖𑒞𑒹𑒏 𑒠𑒱𑒢𑒧𑒹 𑒏𑒰𑒩𑓂𑒨 𑒣𑒴𑒩𑒰 𑒯𑒹𑒥𑒰𑒏 𑒕𑒪 𑒞𑒞𑒹𑒏 𑒠𑒱𑒢 𑒫𑒱𑒫𑒰𑒠 𑒯𑒼𑒃𑒞 𑒩𑒯𑒪, 𑒛𑒑𑒧𑒰𑒩𑒰 𑒥𑒻𑒩𑒰𑒖𑒏 𑒨𑒼𑒖𑒢𑒰𑒏 𑒥𑒠𑒪𑒰𑒧𑒹 𑒮𑒮𑓂𑒞𑒰 𑒨𑒼𑒖𑒢𑒰𑒏𑒹𑒿 𑒮𑓂𑒫𑒲𑒏𑒵𑒞𑒱 𑒦𑒹𑒙𑒪 𑒧𑒳𑒠𑒰 𑒮𑒹𑒯𑒼 𑒣𑒴𑒩𑓂𑒝 𑒯𑒹𑒥𑒰𑒏 𑒥𑒰𑒙𑒹 𑒞𑒰𑒏𑒱 𑒩𑒯𑒪 𑒁𑒕𑒱 !
𑒫𑒱𑒬𑓂𑒫𑒹𑒬𑓂𑒫𑒩𑒻𑒨𑓂𑒨𑒰 𑒣𑒛𑓃𑒻𑒞 𑒕𑒟𑒱 𑒧𑒼𑒢 : 𑒯𑒻𑒠𑒩𑒰𑒥𑒰𑒠𑒮𑒿 𑓘𑓒 𑒧𑒰𑒃𑒪 𑒠𑒴𑒩 𑒧𑒴𑒮𑒲 𑒂 𑒄𑒮𑒲 𑒡𑒰𑒩𑒣𑒩 𑒥𑒰𑒢𑓂𑒯 𑒥𑒢𑒰𑒍𑒪 𑒑𑒹𑒪 𑒂 𑒢𑒑𑒩𑒮𑒿 𑓖.𑓕 𑒧𑒰𑒃𑒪𑒏 𑒠𑒴𑒩𑒲𑒣𑒩 𑒧𑒴𑒮𑒲 𑒡𑒰𑒩𑒏 𑒅𑒣𑒡𑒰𑒩𑒰 𑒥𑒢𑒰𑒍𑒪 𑒑𑒹𑒪। 𑒮𑓀𑒑𑒯𑒱 𑒡𑒰𑒩𑒏 𑒠𑒳𑒢𑒴 𑒠𑒱𑒮 𑒢𑒑𑒩𑒧𑒹 𑒞𑒙𑒥𑒢𑓂𑒡 𑒥𑒢𑒰𑒍𑒪 𑒑𑒹𑒪। 𑒏𑒵𑒭𑓂𑒝𑒩𑒰𑒖 𑒮𑒰𑒑𑒩 𑒥𑒰𑒢𑓂𑒯, 𑒯𑒳𑒢𑒏𑒩 𑒣𑓂𑒩𑒮𑓂𑒞𑒰𑒫𑒱𑒞 𑓑𑓓𑓐 𑒤𑒳𑒙 𑒆𑒿𑒔 𑒥𑒢𑒹𑒥𑒰𑒏 𑒨𑒼𑒖𑒢𑒰 𑒧𑒻𑒮𑒴𑒩 𑒩𑒰𑒖𑓂𑒨 𑒠𑓂𑒫𑒰𑒩𑒰 𑒁𑓀𑒑𑓂𑒩𑒹𑒖𑒏𑒹𑒿 𑒣𑒚𑒰𑒍𑒪 𑒑𑒹𑒪 𑒞𑒿 𑒫𑒰𑒨𑒮𑒩𑒰𑒨 𑒯𑒰𑒩𑓂𑒛𑒱𑓀𑒖 𑒍𑒏𑒩𑒰 𑒒𑒙𑒰 𑒏𑒋 𑓘𑓐 𑒤𑒲𑒙 𑒏𑒋 𑒠𑒹𑒪𑒢𑓂𑒯𑒱। 𑒫𑒱𑒬𑓂𑒫𑒹𑒬𑓂𑒫𑒩𑒻𑒨𑓂𑒨𑒰 𑒢𑒱𑒔𑒳𑒪𑒏𑒰 𑒦𑒰𑒑𑒏 𑒔𑒾𑒛𑓃𑒰𑒄 𑒥𑒜𑓃𑒰 𑒏𑒋 𑒄 𑒏𑒧𑒲 𑒣𑒴𑒩𑒰 𑒏𑒋 𑒪𑒹𑒪𑒢𑓂𑒯𑒱। 𑒥𑒲𑒔𑒹𑒧𑒹 𑒥𑒰𑒜𑓃𑒱 𑒂𑒥𑒱 𑒑𑒹𑒪 𑒞𑒿 𑒁𑒞𑒱𑒩𑒱𑒏𑓂𑒞 𑒧𑒖𑒠𑒴𑒩 𑒪𑒑𑒰 𑒏𑒋 𑒂 𑒧𑒪𑒹𑒩𑒱𑒨𑒰𑒑𑓂𑒩𑒮𑓂𑒞 𑒂 𑒂𑒢 𑒩𑒼𑒑𑒑𑓂𑒩𑒮𑓂𑒞 𑒧𑒖𑒠𑒴𑒩𑒏 𑒃𑒪𑒰𑒖 𑒪𑒋 𑒛𑒰𑒏𑓂𑒙𑒩 𑒥𑒯𑒰𑒪𑒲 𑒏𑒋, 𑒩𑒰𑒞𑒱𑒧𑒹 𑒫𑒰𑒬𑒱𑓀𑒑𑒙𑒢 𑒪𑒻𑒧𑓂𑒣 𑒪𑒑𑒰 𑒏𑒋 𑒂 𑒫𑓂𑒨𑒏𑓂𑒞𑒱𑒑𑒞 𑒢𑒱𑒑𑒩𑒰𑒢𑒲 𑒠𑓂𑒫𑒰𑒩𑒰 𑒮𑒧𑒨𑒏 𑒏𑓂𑒭𑒞𑒱𑒣𑒴𑒩𑓂𑒞𑒱 𑒏𑒹𑒪𑒢𑓂𑒯𑒱। 𑒠𑒹𑒬𑒦𑒏𑓂𑒞 𑒞𑒹𑒯𑒢 𑒕𑒪𑒰𑒯 𑒖𑒹 𑒮𑒲𑒧𑒹𑒢𑓂𑒙 𑒂𑒨𑒰𑒞 𑒢𑒯𑒱 𑒏𑒹𑒪𑒢𑓂𑒯𑒱 𑒫𑒩𑒢𑓂 𑒥𑒰𑒪𑒳, 𑒏𑒻𑒪𑓂𑒮𑒱𑒨𑒧, 𑒣𑒰𑒟𑒩 𑒂 𑒣𑒰𑒏𑒪 𑒄𑒙𑒰𑒏 𑒥𑒳𑒏𑒢𑒲 𑒧𑒱𑒪𑒰 𑒏𑒋 𑒢𑒱𑒩𑓂𑒧𑒱𑒞 𑒮𑒳𑒩𑒐𑒲𑒮𑒿 , 𑒋𑒯𑒱 𑒥𑒰𑒢𑓂𑒯𑒏 𑒢𑒱𑒩𑓂𑒧𑒰𑒝 𑒏𑒋𑒪𑒢𑓂𑒯𑒱। 𑒥𑒰𑒢𑓂𑒯 𑒢𑒱𑒩𑓂𑒧𑒰𑒝𑒮𑒿 𑒣𑒯𑒱𑒢𑒯𑒱 𑒠𑓂𑒫𑒱𑒮𑓂𑒞𑒩𑒲𑒨 𑒢𑒯𑒩𑒱𑒏 𑒢𑒱𑒩𑓂𑒧𑒰𑒝 𑒏𑒋 𑒪𑒹𑒪 𑒑𑒹𑒪।
𑒠𑒱𑒪𑓂𑒪𑒲 𑒁𑒕𑒱 𑒠𑒴𑒩 𑒋𑒐𑒢𑒼 ! : 𑒣𑓂𑒩𑒡𑒰𑒢𑒧𑓀𑒞𑓂𑒩𑒲 𑒂𑒣𑒠𑒰 𑒏𑒼𑒭 𑒂 𑒧𑒳𑒐𑓂𑒨𑒧𑓀𑒞𑓂𑒩𑒲 𑒂𑒣𑒠𑒰 𑒏𑒼𑒭𑒏 𑒁𑒞𑒱𑒩𑒱𑒏𑓂𑒞 𑒮𑓂𑒫𑒨𑓀𑒮𑒹𑒫𑒲 𑒮𑓀𑒑𑒚𑒢 𑒮𑒦𑒏 𑒏𑒼𑒭𑒧𑒹 𑒮𑒹𑒯𑒼 𑒠𑒱𑒪𑓂𑒪𑒲𑒫𑒰𑒮𑒲 𑒁𑒣𑒢 𑒁𑒢𑒳𑒠𑒰𑒢 𑒠𑒋 𑒮𑒏𑒻𑒞 𑒕𑒟𑒱।
𑒧𑒳𑒠𑒰 𑒠𑒲𑒩𑓂𑒒 𑒮𑒴𑒞𑓂𑒩𑒲 𑒏𑒰𑒖 𑒯𑒼𑒋𑒞, 𑒢𑒱𑒧𑓂𑒢 𑒥𑒱𑒢𑓂𑒠𑒳𑒣𑒩 𑒠𑒱𑒪𑓂𑒪𑒲𑒧𑒹 𑒏𑒹𑒢𑓂𑒠𑓂𑒩 𑒮𑒩𑒏𑒰𑒩𑒣𑒩 𑒠𑒫𑒰𑒥 𑒥𑒢𑒰𑒋𑒥।
𑓑. 𑒮𑓂𑒏𑒴𑒪 𑒏𑒰𑒪𑒹𑒖𑒧𑒹 𑒑𑒩𑓂𑒧𑒲 𑒞𑒰𑒞𑒱𑒪𑒏 𑒥𑒠𑒪𑒰𑒧𑒹 𑒥𑒰𑒜𑓃𑒱𑒏 𑒮𑒧𑒋 𑒕𑒳𑒙𑓂𑒙𑒲 𑒠𑒹𑒥𑒰𑒧𑒹 𑒏𑒼𑒢 𑒯𑒩𑓂𑒖 𑒁𑒕𑒱, 𑒄 𑒢𑒱𑒩𑓂𑒝𑒨 𑒏𑒼𑒢 𑒞𑒩𑒯𑒹𑒿 𑒏𑒚𑒱𑒢 𑒁𑒕𑒱? 𑒮𑒲.𑒥𑒲 𑒋𑒮.𑒄 𑒂 𑒂𑒃.𑒮𑒲.𑒋𑒮.𑒄. 𑒞𑒿 𑒕𑒼𑒛𑓃𑒴 𑒥𑒱𑒯𑒰𑒩 𑒥𑒼𑒩𑓂𑒛 𑒡𑒩𑒱 𑒄 𑒢𑒯𑒱 𑒏𑒋 𑒮𑒏𑒪 𑒁𑒕𑒱। 𑒠𑒱𑒪𑓂𑒪𑒲𑒫𑒰𑒮𑒲 𑒮𑒲.𑒥𑒲 𑒋𑒮.𑒄 𑒂 𑒂𑒃.𑒮𑒲.𑒋𑒮.𑒄.𑒮𑒿 𑒋𑒯𑒱 𑒞𑒩𑒯𑒏 𑒏𑒰𑒩𑓂𑒨𑒰𑒢𑓂𑒫𑒨𑒢 𑒏𑒩𑒰𑒥𑒟𑒱 𑒞𑒿 𑒪𑒰𑒖𑒹 𑒥𑒱𑒯𑒰𑒩 𑒥𑒼𑒩𑓂𑒛 𑒍𑒏𑒩𑒰 𑒪𑒰𑒑𑒴 𑒏𑒋 𑒠𑒹𑒞।
𑓒. 𑒦𑒰𑒩𑒞𑒧𑒹 𑒛𑒑𑒧𑒰𑒩𑒰 𑒥𑒻𑒩𑒰𑒖𑒏 𑒨𑒼𑒖𑒢𑒰𑒏 𑒣𑓂𑒩𑒰𑒩𑒧𑓂𑒦 𑒏𑒋𑒪 𑒖𑒰𑒋, 𑒏𑒰𑒩𑒝 𑒦𑒲𑒧𑒢𑒑𑒩 𑒥𑒻𑒩𑒹𑒖 𑒁𑒣𑒢 𑒖𑒲𑒫𑒢-𑒏𑒰𑒪𑒰𑒫𑒡𑒱 𑒣𑒴𑒩𑓂𑒝 𑒏𑒋 𑒪𑒹𑒢𑒹 𑒁𑒕𑒱। 𑒋𑒯𑒱𑒧𑒹 𑒤𑒢𑓂𑒛, 𑒩𑒹𑒪𑒫𑒹 𑒂 𑒮𑒛𑓃𑒏 𑒠𑒳𑒢𑒴 𑒧𑓀𑒞𑓂𑒩𑒰𑒪𑒨𑒮𑒿 𑒪𑒹𑒪 𑒖𑒰𑒋 𑒏𑒰𑒩𑒝 𑒋𑒯𑒱𑒣𑒩 𑒩𑒹𑒪 𑒂 𑒮𑒛𑓃𑒏 𑒮𑒹𑒯𑒼 𑒥𑒢𑒱 𑒮𑒏𑒻𑒕/ 𑒂 𑒥𑒢𑒥𑒰𑒏 𑒔𑒰𑒯𑒲।
𑓓. 𑒥𑒻𑒩𑒹𑒖 𑒥𑒢𑒥𑒰𑒏 𑒏𑒰𑒪𑒫𑒡𑒱𑒨𑒹𑒧𑒹 𑒣𑒏𑓂𑒏𑒲 𑒢𑒯𑒩𑒱 𑒡𑒩𑒰𑒞𑒪𑒏 𑒮𑓂𑒪𑒼𑒣𑒏 𑒁𑒢𑒳𑒮𑒰𑒩𑒹 𑒥𑒢𑒰𑒍𑒪 𑒖𑒰𑒋।
𑓔. 𑒏𑒔𑓂𑒔𑒲 𑒥𑒰𑒢𑓂𑒯 𑒮𑒦𑒏𑒹𑒿 𑒞𑒼𑒛𑓃𑒱 𑒏𑒋 𑒯𑒙𑒰 𑒠𑒹𑒪 𑒖𑒰𑒋 𑒂 𑒣𑒏𑓂𑒏𑒲 𑒥𑒰𑒢𑓂𑒯𑒏𑒹𑒿 𑒧𑒼𑒙𑒼𑒩𑒹𑒥𑒪 𑒥𑒢𑒰𑒍𑒪 𑒖𑒰𑒋, 𑒥𑒰𑒢𑓂𑒯𑒏 𑒠𑒳𑒢𑒴 𑒏𑒰𑒞 𑒣𑒩𑓂𑒨𑒰𑒣𑓂𑒞 𑒑𑒰𑒕-𑒫𑒵𑒏𑓂𑒭 𑒪𑒑𑒰𑒍𑒪 𑒖𑒰𑒋।
𑓕. 𑒥𑒱𑒯𑒰𑒩𑒧𑒹 𑒮𑒛𑓃𑒏 𑒣𑒩𑒱𑒨𑒼𑒖𑒢𑒰 𑒖𑒹𑒢𑒰 𑒮𑓂𑒫𑒣𑓂𑒢𑒏 𑒮𑒞𑓂𑒨 𑒯𑒼𑒁𑒋 𑒖𑒹𑒢𑒰 𑒠𑒹𑒐𑒰 𑒣𑒛𑓃𑒱 𑒩𑒯𑒪 𑒁𑒕𑒱, 𑒞𑒯𑒱𑒢𑒰 𑒮𑒦 𑒫𑒱𑒒𑓂𑒢-𑒥𑒰𑒡𑒰 𑒯𑒙𑒰 𑒏𑒋, 𑒨𑒳𑒠𑓂𑒡-𑒮𑓂𑒞𑒩𑒣𑒩 𑒋𑒯𑒱 𑒮𑒦𑒣𑒩 𑒏𑒰𑒖 𑒬𑒳𑒩𑒴 𑒏𑒋𑒪 𑒖𑒰𑒋।
𑒅𑒣𑒩𑒼𑒏𑓂𑒞 𑒥𑒱𑒢𑓂𑒠𑒳 𑒮𑒦𑒣𑒩 𑒠𑒱𑒪𑓂𑒪𑒲𑒧𑒹 𑒪𑒰𑒥𑒲 𑒥𑒢𑒰 𑒏𑒋 𑒏𑒹𑒢𑓂𑒠𑓂𑒩 𑒮𑒩𑒏𑒰𑒩𑒣𑒩/ 𑒧𑓀𑒞𑓂𑒩𑒰𑒪𑒨𑒣𑒩 𑒠𑒫𑒰𑒥 𑒥𑒢𑒰𑒋𑒥 𑒞𑒐𑒢𑒹 𑒥𑒱𑒯𑒰𑒩 𑒁𑒣𑒢 𑒢𑒫 𑒕𑒫𑒱 𑒥𑒢𑒰 𑒮𑒏𑒞। 𑓑𑓒𑒧 𑒬𑒞𑒰𑒥𑓂𑒠𑒲𑒧𑒹 𑒬𑒳𑒩𑒴 𑒏𑒋𑒪 𑒥𑒰𑒢𑓂𑒯 𑒞𑒐𑒢𑒹 𑒣𑒴𑒩𑓂𑒝 𑒯𑒼𑒋𑒞 𑒂 𑒡𑒰𑒩𑒮𑒦 𑒧𑒢𑒳𑒏𑓂𑒐𑒏 𑒮𑒹𑒫𑒱𑒏𑒰 𑒥𑒢𑒱 𑒮𑒏𑒞।

𑒫𑒱𑒮𑓂𑒧𑒵𑒞 𑒏𑒫𑒱- 𑒣𑓀. 𑒩𑒰𑒧𑒖𑒲 𑒔𑒾𑒡𑒩𑒲
(𑓑𑓘𑓗𑓘-𑓑𑓙𑓕𑓒)

𑒣𑓀. 𑒩𑒰𑒧𑒖𑒲 𑒔𑒾𑒡𑒩𑒲 (𑓑𑓘𑓗𑓘-𑓑𑓙𑓕𑓒) 𑒖𑒢𑓂𑒧 𑒮𑓂𑒟𑒰𑒢- 𑒑𑓂𑒩𑒰𑒧-𑒩𑒳𑒠𑓂𑒩𑒣𑒳𑒩, 𑒟𑒰𑒢𑒰-𑒁𑓀𑒡𑒩𑒰-𑒚𑒰𑒜𑓃𑒲, 𑒖𑒱𑒪𑒰-𑒧𑒡𑒳𑒥𑒢𑒲. 𑒧𑒴𑒪-𑒣𑒑𑒳𑒪𑓂𑒥𑒰𑒩 𑒩𑒰𑒖𑒹 𑒑𑒼𑒞𑓂𑒩-𑒬𑒰𑒝𑓂𑒛𑒱𑒪𑓂𑒨।
𑒫𑓀𑒬𑒰𑒫𑒪𑒲- 𑒖𑒲𑒫𑒢 𑒔𑒾𑒡𑒩𑒲 (𑒖𑒢𑓂𑒧 𑒮𑓂𑒟𑒰𑒢-𑒣𑓀𑒔𑒼𑒦-𑒠𑒩𑒱𑒦𑒓𑓂𑒑𑒰), 𑓑𑓘𑓐𑓑 𑒄.𑒧𑒹 𑒩𑒳𑒠𑓂𑒩𑒣𑒳𑒩 𑒂𑒑𑒧𑒢।
-𑒠𑒳𑒃 𑒣𑒳𑒞𑓂𑒩--𑒬𑓂𑒩𑒲 𑒩𑓀𑒑𑒲 𑒔𑒾𑒡𑒩𑒲 (𑒩𑒳𑒠𑓂𑒩𑒣𑒳𑒩𑒧𑒹 𑒖𑒢𑓂𑒧) 𑒂 𑒬𑓂𑒩𑒲 𑒏𑓀𑒞 𑒔𑒾𑒡𑒩𑒲 (𑒩𑒳𑒠𑓂𑒩𑒣𑒳𑒩𑒧𑒹 𑒖𑒢𑓂𑒧)
-𑒏𑓀𑒞 𑒔𑒾𑒡𑒩𑒲𑒏𑒹𑒿 𑒞𑒲𑒢 𑒣𑒳𑒞𑓂𑒩-𑒬𑓂𑒩𑒲 𑒔𑒳𑒧𑓂𑒧𑒢 𑒔𑒾𑒡𑒩𑒲, 𑒬𑓂𑒩𑒲 𑒥𑒳𑒡𑒢 𑒔𑒾𑒡𑒩𑒲 𑒂 𑒬𑓂𑒩𑒲 𑒩𑒴𑒠𑒢 𑒔𑒾𑒡𑒩𑒲
-𑒔𑒳𑒧𑓂𑒧𑒢 𑒔𑒾𑒡𑒩𑒲𑒏𑒹𑒿 𑒠𑒳𑒃 𑒣𑒳𑒞𑓂𑒩 𑒬𑓂𑒩𑒲 𑒑𑒼𑒢𑒲 𑒔𑒾𑒡𑒩𑒲 𑒂 𑒬𑓂𑒩𑒲 𑒣𑓀 𑒏𑒫𑒱 𑒩𑒰𑒧𑒖𑒲 𑒔𑒾𑒡𑒩𑒲.
𑒬𑓂𑒩𑒲 𑒖𑒲𑒫𑒢 𑒔𑒾𑒡𑒩𑒲- 𑒖𑒹 𑒏𑒫𑒱𑒏 𑒫𑒵𑒠𑓂𑒡-𑒣𑒱𑒞𑒰𑒧𑒯 𑒕𑒪𑒰𑒯, 𑒞𑒢𑒱𑒏𑒩 𑒠𑒼𑒐𑒞𑒩𑒲 𑒩𑒳𑒠𑓂𑒩𑒣𑒳𑒩𑒧𑒹 𑒩𑒯𑒢𑓂𑒯𑒱 𑒖𑒰𑒯𑒱 𑒏𑒰𑒩𑒝𑒮𑒿 𑒍 𑓑𑓘𑓐𑓑 𑒄.𑒧𑒹 𑒣𑓀𑒔𑒼𑒦 𑒕𑒼𑒛𑓃𑒱 𑒩𑒳𑒠𑓂𑒩𑒣𑒳𑒩 𑒥𑒮𑒱 𑒑𑒹𑒪𑒰𑒯।
𑒏𑒫𑒱𑒖𑒲𑒏 𑒣𑒱𑒞𑒰𑒧𑒯 𑒣𑒻𑒒 𑒑𑒫𑒻𑒨𑓂𑒨𑒰 𑒩𑒯𑒟𑒱𑒢𑓂𑒯। 𑒯𑒳𑒢𑒏𑒩 𑒑𑒰𑒨𑒢𑒏 𑒧𑒳𑒐𑓂𑒨 𑒏𑓂𑒭𑒹𑒞𑓂𑒩 𑒨𑒳𑒑𑒪 𑒮𑒩𑒏𑒰𑒩 𑒮𑒲𑒞𑒰𑒩𑒰𑒧𑒏 𑒦𑒏𑓂𑒞𑒱 𑒑𑒲𑒞 𑒯𑒼𑒃𑒞 𑒕𑒪, 𑒞𑒏𑒩 𑒣𑓂𑒩𑒦𑒰𑒫 𑒏𑒫𑒱𑒖𑒲 𑒣𑒩 𑒐𑒴𑒥 𑒣𑒛𑓃𑒪। 𑒍 𑒁𑒣𑓂𑒣𑒢 𑒣𑒾𑒞𑓂𑒩𑒏 𑒢𑒰𑒧 𑒩𑒰𑒧𑒖𑒲 𑒋𑒯𑒱 𑒏𑒰𑒩𑒝𑒮𑒿 𑒩𑒐𑒪𑒢𑓂𑒯𑒱। 𑒮𑓂𑒫.𑒏𑒫𑒱𑒖𑒲 𑒁𑒣𑒢 𑒢𑒰𑒧𑒏 𑒁𑒢𑒳𑒩𑒴𑒣 𑒞𑒳𑒪𑒮𑒲𑒏𑒵𑒞 𑒬𑓂𑒩𑒲𑒩𑒰𑒧𑒔𑒩𑒱𑒞 𑒧𑒰𑒢𑒮 𑒏𑓀𑒚𑒮𑓂𑒟 𑒏𑒋 𑒑𑒹𑒪 𑒕𑒪𑒰𑒯। 𑒍 𑒣𑓂𑒩𑒞𑓂𑒨𑒹𑒏 𑒣𑓂𑒩𑒬𑓂𑒢𑒏 𑒅𑒞𑓂𑒞𑒩 𑒩𑒰𑒧𑒰𑒨𑒝𑒏 𑒔𑒾𑒣𑒰𑒃𑒮𑒿 𑒏𑒩𑒻𑒞 𑒕𑒪𑒰𑒯। 𑒯𑒳𑒢𑒏𑒩 𑒖𑒲𑒫𑒢𑒏 𑒮𑒦𑒮𑒿 𑒠𑒳𑓁𑒐𑒠 𑒒𑒙𑒢𑒰 𑒕𑒢𑓂𑒯𑒱 𑒖𑒹 𑒍 𑒞𑒲𑒢 𑒫𑒱𑒫𑒰𑒯 𑒏𑒋𑒪 𑒧𑒳𑒠𑒰 𑒏𑒼𑒢𑒼 𑒣𑒞𑓂𑒢𑒲 𑒔𑒰𑒩𑒱 𑒮𑒰𑒪𑒮𑒿 𑒥𑒹𑒬𑒲 𑒢𑒯𑒱 𑒖𑒲𑒥𑒱 𑒮𑒏𑒪𑒐𑒱𑒢𑓂𑒯।𑒁𑓀𑒞𑒱𑒧 𑒫𑒱𑒫𑒰𑒯 𑒍 𑓕𑓓 𑒫𑒩𑓂𑒭𑒏 𑒁𑒫𑒮𑓂𑒟𑒰𑒧𑒹 𑒏𑒋𑒪, 𑒖𑒹 𑒋𑒏 𑒣𑒳𑒞𑓂𑒩, 𑒖𑒢𑒱𑒏𑒩 𑒢𑒰𑒧 𑒠𑒳𑒩𑓂𑒑𑒰𑒢𑒰𑒟 𑒔𑒾𑒡𑒩𑒲 (𑒠𑒳𑒐𑒱𑒨𑒰 𑒔𑒾𑒡𑒩𑒲) 𑒕𑒢𑓂𑒯𑒱, 𑒏𑒹𑒩 𑒖𑒢𑓂𑒧 𑒠𑒹𑒪𑒰𑒏 𑓑𑓕 𑒠𑒱𑒢𑒏 𑒦𑒲𑒞𑒩𑒹 𑒮𑓂𑒫𑒩𑓂𑒑𑒫𑒰𑒮𑒲 𑒦𑒋 𑒑𑒹𑒪𑒲𑒯।
𑒏𑒫𑒱𑒖𑒲 𑒁𑒣𑓂𑒣𑒢 𑒖𑒲𑒫𑒢𑒏𑒰𑒪𑒧𑒹 𑒠𑒩𑒱𑒦𑒓𑓂𑒑𑒰 𑒩𑒰𑒖𑒏 𑒁𑓀𑒞𑒩𑓂𑒑𑒞 𑒖𑒹𑒚 𑒩𑒻𑒨𑓂𑒨𑒞𑒏 𑒣𑒠 𑒣𑒩 𑒏𑒰𑒩𑓂𑒨𑒩𑒞 𑒕𑒪𑒰𑒯 𑒂 𑒞𑒹𑒮𑒩 𑒣𑒞𑓂𑒢𑒲𑒏 𑒧𑒵𑒞𑓂𑒨𑒳𑒏 𑒅𑒣𑒩𑒰𑓀𑒞 𑒍 𑒄𑒯𑒼 𑒣𑒠 𑒞𑓂𑒨𑒰𑒑𑒱 𑒏𑒋 𑒦𑒑𑒫𑒠 𑒦𑒏𑓂𑒞𑒱𑒧𑒹 𑒪𑒰𑒑𑒱 𑒑𑒹𑒪𑒰𑒯। 𑒯𑒱𑒢𑒏𑒩 𑒋𑒏𑒧𑒰𑒞𑓂𑒩 𑒣𑓂𑒩𑒏𑒰𑒬𑒱𑒞 𑒣𑒼𑒟𑒲 𑒂 𑒁𑒣𑓂𑒩𑒏𑒰𑒬𑒱𑒞 𑒣𑒰𑒝𑓂𑒛𑒳𑒪𑒱𑒣𑒱𑒧𑒹 𑒧𑒻𑒟𑒱𑒪𑒲𑒏 𑒮𑓀𑒑𑒹 𑒥𑓂𑒩𑒖𑒥𑒳𑒪𑒲𑒏 𑒏𑒫𑒱𑒞𑒰 𑒮𑒹𑒯𑒼 𑒁𑒕𑒱।
𑒯𑒱𑒢𑒏𑒩 𑒋𑒯𑒱 𑒏𑒫𑒱𑒞𑒰 𑒮𑒦𑒧𑒹 𑒯𑒱𑒢𑒏𑒰 𑒣𑒱𑒞𑒰𑒧𑒯𑒏 𑒠𑒹𑒪 𑒩𑒰𑒑 𑒥𑒼𑒡𑒏 𑒮𑓀𑒑𑒯𑒱 𑒧𑒱𑒟𑒱𑒪𑒰𑒏 𑒧𑒯𑒹𑒬𑒫𑒰𑒝𑒲, 𑒔𑒻𑒞𑒏 𑒚𑒳𑒧𑒩𑒲 𑒂 𑒦𑒖𑒢 𑒣𑓂𑒩𑒦𑒰𑒞𑒲 (𑒣𑒩𑒰𑒞𑒲) 𑒮𑒹𑒯𑒼 𑒦𑒹𑒙𑒻𑒕।
𑒖𑒹𑒢𑒰 𑒬𑓀𑒏𑒩𑒠𑒹𑒫 𑒁𑒮𑒰𑒧𑒲𑒏 𑒥𑒠𑒪𑒰 𑒧𑒻𑒟𑒱𑒪𑒲𑒧𑒹 𑒩𑒔𑒢𑒰 𑒩𑒔𑒪𑒢𑓂𑒯𑒱 𑒞𑒯𑒱𑒢𑒰 𑒏𑒫𑒱 𑒩𑒰𑒧𑒖𑒲 𑒔𑒾𑒡𑒩𑒲 𑒧𑒻𑒟𑒱𑒪𑒲𑒏 𑒁𑒞𑒱𑒩𑒱𑒏𑓂𑒞𑓂𑒞 𑒥𑓂𑒩𑒖𑒥𑒳𑒪𑒲𑒧𑒹 𑒮𑒹𑒯𑒼 𑒩𑒔𑒢𑒰 𑒩𑒔𑒪𑒢𑓂𑒯𑒱। 𑒏𑒫𑒱 𑒩𑒰𑒧𑒖𑒲𑒏 𑒮𑒦 𑒣𑒠𑓂𑒨𑒧𑒹 𑒩𑒰𑒑𑒏 𑒫𑒩𑓂𑒝𑒢 𑒁𑒕𑒱, 𑒍𑒯𑒱𑒢𑒰 𑒖𑒹𑒢𑒰 𑒫𑒱𑒠𑓂𑒨𑒰𑒣𑒞𑒱𑒏 𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒣𑒠𑒰𑒫𑒪𑒲𑒧𑒹 𑒁𑒕𑒱। 𑒄 𑒣𑓂𑒩𑒦𑒰𑒫 𑒯𑒳𑒢𑒏𑒩 𑒥𑒰𑒥𑒰 𑒖𑒹 𑒑𑒥𑒻𑒨𑓂𑒨𑒰 𑒕𑒪𑒰𑒯, 𑒮𑒿 𑒣𑓂𑒩𑒹𑒩𑒱𑒞 𑒥𑒳𑒗𑒢𑒰 𑒖𑒰𑒃𑒞 𑒁𑒕𑒱। 𑒧𑒱𑒟𑒱𑒪𑒰𑒏 𑒪𑒼𑒏 𑒣𑓀𑒔𑒠𑒹𑒫𑒼𑒣𑒰𑒮𑒏 𑒕𑒟𑒱, 𑒧𑒳𑒠𑒰 𑒬𑒱𑒫𑒰𑒪𑒨 𑒮𑒦 𑒑𑒰𑒧𑒧𑒹 𑒦𑒹𑒙𑒱 𑒖𑒋𑒞, 𑒮𑒹 𑒩𑒰𑒧𑒖𑒲 𑒔𑒾𑒡𑒩𑒲 𑒧𑒯𑒹𑒬𑒫𑒰𑒢𑒲 𑒪𑒱𑒐𑒪𑒢𑓂𑒯𑒱 𑒂 𑒔𑒻𑒞 𑒧𑒰𑒮𑒏 𑒯𑒹𑒞𑒳 𑒚𑒳𑒧𑒩𑒲 𑒂 𑒦𑒼𑒩𑒏 𑒦𑒖𑒢 (𑒣𑒩𑒰𑒞𑒲/ 𑒣𑓂𑒩𑒦𑒰𑒞𑒲) 𑒮𑒹𑒯𑒼। 𑒖𑒰𑒯𑒱 𑒩𑒰𑒑 𑒮𑒦𑒏 𑒫𑒩𑓂𑒝𑒢 𑒯𑒳𑒢𑒏𑒩 𑒏𑒵𑒞𑒱𑒧𑒹 𑒁𑒥𑒻𑒞 𑒁𑒕𑒱, 𑒮𑒹 𑒁𑒕𑒱:
𑓑. 𑒩𑒰𑒑 𑒩𑒹𑒐𑒞𑒰 𑓒 𑒪𑒰𑒫𑒝𑒲 𑓓. 𑒩𑒰𑒑 𑒗𑒣𑒞𑒰𑒪𑒰 𑓔.𑒩𑒰𑒑 𑒡𑓂𑒩𑒳𑒣𑒠 𑓕. 𑒩𑒰𑒑 𑒮𑓀𑒑𑒲𑒞 𑓖. 𑒩𑒰𑒑 𑒠𑒹𑒬 𑓗. 𑒩𑒰𑒑 𑒑𑒾𑒩𑒲 𑓘.𑒞𑒱𑒩𑒯𑒳𑒞 𑓙. 𑒦𑒖𑒢 𑒫𑒱𑒢𑒨 𑓑𑓐. 𑒦𑒖𑒢 𑒦𑒻𑒩𑒫𑒲 𑓑𑓑.𑒦𑒖𑒢 𑒑𑒖𑒪 𑓑𑓒. 𑒯𑒼𑒪𑒲 𑓑𑓓.𑒩𑒰𑒑 𑒬𑓂𑒨𑒰𑒧 𑒏𑒪𑓂𑒨𑒰𑒝 𑓑𑓔.𑒏𑒫𑒱𑒞𑒰 𑓑𑓕. 𑒛𑒧𑓂𑒤𑒏 𑒯𑒼𑒪𑒲 𑓑𑓖.𑒩𑒰𑒑 𑒏𑒰𑒑𑒴 𑒏𑒰𑒤𑒲 𑓑𑓗. 𑒩𑒰𑒑 𑒫𑒱𑒯𑒰𑒑 𑓑𑓘.𑒑𑒖𑒪𑒏 𑒚𑒳𑒧𑒩𑒲 𑓑𑓙. 𑒩𑒰𑒑 𑒣𑒰𑒫𑒮 𑒔𑒾𑒧𑒰𑒮𑒰 𑓒𑓐. 𑒦𑒖𑒢 𑒣𑓂𑒩𑒦𑒰𑒞𑒲 𑓒𑓑.𑒧𑒯𑒹𑒬𑒫𑒰𑒝𑒲 𑒂 𑓒𑓒. 𑒦𑒖𑒢 𑒏𑒲𑒩𑓂𑒞𑓂𑒞𑒢।
𑒣𑓂𑒩𑒮𑓂𑒞𑒳𑒞 𑒁𑒕𑒱 𑒯𑒳𑒢𑒏𑒩 𑒩𑒔𑒢𑒰। 𑒋𑒞𑒋 𑒯𑒳𑒢𑒏𑒩 𑒋𑒏𑒧𑒰𑒞𑓂𑒩 𑒣𑓂𑒩𑒏𑒰𑒬𑒱𑒞 𑒣𑒼𑒟𑒲 𑒂 𑒋𑒏𑒙𑒰 𑒣𑒰𑒝𑓂𑒛𑒳𑒪𑒱𑒣𑒱 𑒖𑒹 𑒏𑒫𑒱𑒖𑒲 𑒠𑓂𑒫𑒰𑒩𑒰 𑒬𑓂𑒩𑒲 𑒯𑒩𑒹𑒏𑒰𑓀𑒞 𑒔𑒾𑒡𑒩𑒲𑒮𑒿 ( 𑒂𑒥 𑒮𑓂𑒫𑒩𑓂𑒑𑒲𑒨) 𑒪𑒱𑒐𑒥𑒰𑒍𑒪 𑒑𑒹𑒪 𑒂 𑒬𑓂𑒩𑒲 𑒬𑓂𑒩𑒲𑒧𑒼𑒯𑒢 𑒔𑒾𑒡𑒩𑒲𑒖𑒲𑒏 𑒧𑒰𑒡𑓂𑒨𑒧𑒮𑒿 𑒣𑓂𑒩𑒰𑒣𑓂𑒞 𑒦𑒹𑒪 𑒏𑒹𑒩 𑒂𑒡𑒰𑒩𑒣𑒩 𑒮𑒦𑒙𑒰 𑒧𑒻𑒟𑒱𑒪𑒲 𑒣𑒠𑓂𑒨 𑒠𑒹𑒪 𑒖𑒰 𑒩𑒯𑒪 𑒁𑒕𑒱।
𑒫𑒱𑒫𑒱𑒡 𑒦𑒖𑒢𑒰𑒫𑒪𑒲
॥ 𑒬𑓂𑒩𑒲 𑒑𑒝𑒹𑒬𑒰𑒨 𑒢𑒧𑓁 ॥
𑓑. ॥ 𑒫𑒱𑒢𑒨 ॥
𑒖𑒨 𑒑𑒝𑒹𑒬 𑒬𑓀𑒏𑒩 𑒮𑒳𑒞 𑒮𑒳𑒢𑓂𑒠𑒩 𑒁𑒞𑒱 𑒏𑒵𑒣𑒰𑒪𑒳 𑒠𑒲𑒢𑒢 𑒖𑒢
𑒣𑒰𑒪𑒏 𑒪𑒧𑓂𑒥𑒼𑒠𑒩 𑒁𑒞𑒱 𑒩𑒴𑒣 𑒑𑒖𑒰𑒢𑒢, 𑒨𑒳𑒁 𑒨𑒬 𑒏𑒯𑒱 𑒢 𑒮𑒏𑒞 𑒮𑒯𑒮𑒰𑒢𑒢।
𑒯𑒧𑒕𑒲 𑒁𑒞𑒱 𑒑𑒧𑒰𑒩 𑒏𑒕𑒳 𑒖𑒰𑒢𑒢 𑒢𑒱𑒖 𑒣𑒠 𑒏𑒧𑒪 𑒠𑒹𑒯𑒳 𑒅𑒩 𑒡𑓂𑒨𑒰𑒢𑒢॥
𑒩𑒰𑒧𑒖𑒲 𑒁𑒩𑒖 𑒮𑒳𑒢𑒯𑒳 𑒏𑒕𑒳 𑒏𑒰𑒢𑒢। 𑒫𑒩𑓂𑒝𑒞 𑒔𑒯𑒞 𑒩𑒰𑒧 𑒑𑒳𑒝 𑒂𑒢𑒢॥
𑓒. ॥ 𑒩𑒰𑒑 𑒡𑓂𑒩𑒳𑒣𑒠 ॥
𑒮𑒹𑒫𑒼 𑒧𑒢 𑒬𑓀𑒏𑒩 𑒁𑒞𑒱 𑒏𑒵𑒣𑒰𑒪 𑒮𑒹𑒫𑒏 𑒠𑒳𑓁𑒐 𑒦𑓀𑒖𑒢 𑒯𑒾 𑒠𑒨𑒰𑒪,
𑒖𑒙𑒰 𑒬𑒼𑒦𑒱𑒞 𑒑𑓀𑒑 𑒡𑒰𑒩 𑒞𑒢 𑒕𑒰𑒨 𑒦𑒮𑓂𑒧 𑒅𑒩 𑒧𑒳𑓀𑒛 𑒧𑒰𑒪
𑒅𑒣𑒫𑒱𑒞 𑒦𑒳𑒖𑓀𑒑𑒧 𑒠𑒵𑒑 𑒫𑒱𑒬𑒰𑒪 𑒥𑒱𑒖𑒨𑒰 𑒢𑒱𑒞 𑒣𑒲𑒥𑒞 𑒤𑒱𑒩𑒞 𑒧𑒞𑒫𑒰𑒪।
𑒏𑒩 𑒞𑓂𑒩𑒱𑒬𑒴𑒪 𑒥𑒒 𑒕𑒰𑒪 𑒥𑒱𑒩𑒰𑒖𑒱𑒞 𑒠𑒰𑒮 𑒂𑒮 𑒩𑒰𑒐𑒢 𑒏𑒹 𑒮𑒳𑒩 𑒩𑒩𑒳
𑒏𑒻𑒪𑒰𑒬 𑒫𑒰𑒮 𑒑𑒱𑒩𑒖𑒰 𑒪𑒱𑒁 𑒮𑓀𑒑 𑒥𑒯𑒳𑒫𑒖𑒞 𑒞𑒰𑒪 𑒬𑒼𑒦𑒋 𑒬𑒬𑒱𑒦𑒰𑒪॥
𑒏𑒰𑒬𑒲𑒣𑒞𑒱 𑒞𑒹𑒩𑒼 𑒨𑒬 𑒁𑒣𑒰𑒩 𑒮𑒳𑒢𑒱 𑒂𑒨 𑒡𑒰𑒨 𑒞𑒹𑒩𑒼 𑒠𑓂𑒫𑒰𑒩
𑒩𑒰𑒧𑒖𑒲 𑒁𑒞𑒱 𑒠𑒲𑒢 𑒏𑒩 𑒢𑒹𑒯𑒰𑒪 𑒖𑒱𑒧𑒱 𑒫𑒹𑒑𑒱 𑒧𑒱𑒪𑒋 𑒁𑒫𑒡𑒹𑒬 𑒪𑒰𑒪॥

𑓓. 𑒩𑒰𑒑 𑒮𑓀𑒑𑒲𑒞
𑒢𑒰𑒔𑒞 𑒮𑓂𑒫𑒨𑓀𑒑 𑒨𑒹॥
𑒏𑒳𑓀𑒖 𑒥𑒢 𑒔𑒯𑒳𑓀 𑒍𑒩 𑒮𑒳𑒢𑓂𑒠𑒩 𑒮𑒒𑒢 𑒥𑒵𑒏𑓂𑒭 𑒥𑒢𑒰𑒨 𑒧𑒝𑓂𑒛𑒱𑒞 𑒪𑒏𑒞 𑒮𑒳𑒧𑒢 𑒪𑒖𑒰𑒨 𑒮𑒳𑒩 𑒞𑒩𑒳 𑒖𑒑𑒧𑒑𑒰𑒞 𑒧𑒨𑓀𑒏॥𑓑॥
𑒏𑒚𑒞𑒰𑒪 𑒛𑒧𑓂𑒤 𑒧𑓀𑒖𑒲𑒩 𑒥𑒰𑒖𑒞 𑒑𑒼𑒣𑒲 𑒑𑒝 𑒔𑒯𑒳𑓀 𑒠𑒱𑒮𑒱 𑒕𑒰𑒖𑒞 𑒏𑒳𑒯𑒱𑒏𑒱 𑒏𑒪𑒩𑒫 𑒧𑒼𑒩 𑒢𑒰𑒔𑒞 𑒩𑒰𑒡𑒰 𑒪𑒹𑒞 𑒧𑒵𑒠𑓀𑒑॥𑓒॥
𑒥𑒹𑒢𑒳 𑒂𑒠𑒱 𑒮𑓂𑒫𑒩𑒰𑒑 𑒥𑒰𑒖𑒞 𑒭𑒙 𑒞𑓂𑒩𑒱𑓀𑒬𑒩𑒰𑒑𑒱𑒢 𑒩𑒰𑒑 𑒑𑒰𑒫𑒞 𑒑𑒝 𑒮𑒥 𑒮𑒳𑒢𑒞 𑒡𑒰𑒫𑒞 𑒨𑒧𑒳𑒢𑒰 𑒥𑒜𑓃𑒞 𑒞𑒩𑓀𑒑॥𑓓॥
𑒞𑒱𑒯𑒳𑓀 𑒪𑒼𑒏 𑒂𑒢𑒢𑓂𑒠 𑒯𑒼𑒞 𑒮𑒳𑒢𑒱-𑒮𑒳𑒢𑒱 𑒣𑒫𑒢𑒖𑒪 𑒮𑒥 𑒤𑒱𑒩𑒞 𑒣𑒳𑒢𑒱-𑒣𑒳𑒢𑒱 𑒩𑒰𑒧𑒖𑒲 𑒑𑒵𑒯 𑒏𑒰𑒩𑓂𑒨 𑒗𑒰𑒿𑒏𑒞 𑒏𑒾𑒞𑒳𑒏 𑒩𑓀𑒑॥𑓔॥
𑓔. 𑒞𑒱𑒩𑒯𑒳𑒞
𑒫𑒰𑒩𑒱 𑒫𑒨𑒮 𑒣𑒯𑒳 𑒞𑒹𑒖𑒪 𑒮𑒖𑒢𑒲 𑒑𑒹 𑒏𑒱 𑒏𑒯𑒳 𑒞𑒢𑒱𑒏 𑒫𑒱𑒫𑒹𑒏,
𑒏𑒥𑒯𑒳 𑒢𑒻𑒢 𑒢𑒯𑒱 𑒠𑒹𑒐𑒪 𑒮𑒖𑒢𑒲𑒑𑒹 𑒁𑒫𑒡𑒱 𑒥𑒱𑒞𑒪 𑒠𑒳𑒄 𑒋𑒏।
𑒦𑒰𑒫𑒻𑒢 𑒦𑒫𑒢 𑒬𑒨𑒢 𑒮𑒳𑒐 𑒮𑒖𑒢𑒲𑒑𑒹 𑒖𑓂𑒨𑒾𑓀 𑒧𑒱𑒪𑒞 𑒦𑒩𑒱 𑒁𑓀𑒏।
𑒋𑒯𑒹𑒢 𑒖𑒲𑒫𑒢 𑒪𑒨 𑒏𑒱 𑒏𑒩𑒫 𑒮𑒖𑒢𑒲𑒑𑒹 𑒂𑒢𑒼 𑒏𑒯𑒞 𑒏𑒪𑓀𑒏।
𑒦𑒴𑒭𑒝 𑒫𑒮𑒢 𑒦𑒩𑒱 𑒮𑒧 𑒮𑒖𑒢𑒲 𑒣𑓂𑒩𑒰𑒝 𑒩𑒯𑒞 𑒁𑒥 𑒮𑒹 𑒬𑒹𑒭।
𑒢𑒱𑒩𑓂𑒠𑒨 𑒦𑒨 𑒣𑒯𑒳 𑒫𑒻𑒮𑒪 𑒮𑒖𑒢𑒲𑒑𑒹 𑒩𑒰𑒧𑒖𑒲 𑒮𑒯𑒞 𑒏𑒞 𑒬𑒼𑒏॥
𑓕. 𑒞𑒱𑒩𑒯𑒳𑒞
𑒢𑒱𑒚𑒳𑒩 𑒬𑓂𑒨𑒰𑒧 𑒢𑒯𑒱 𑒥𑒯𑒳𑒩𑒪 𑒮𑒖𑒢𑒲𑒑𑒹 𑒏𑒻𑒪𑒢𑒱 𑒥𑒔𑒢 𑒣𑓂𑒩𑒧𑒰𑒝।
𑒏𑒍𑒢 𑒫𑒱𑒡𑒱 𑒠𑒱𑒫𑒮 𑒧𑒢𑒰𑒨𑒫 𑒮𑒖𑒢𑒲𑒑𑒹 𑒯𑒱𑒞 𑒢𑒯𑒱 𑒠𑒼𑒮𑒩 𑒂𑒢॥
𑒢𑒨𑒢 𑒫𑒩𑒱𑒮 𑒞𑒢 𑒦𑒲𑒖𑒪 𑒮𑒖𑒢𑒲𑒑𑒹 𑒠𑒱𑒢 𑒠𑒱𑒢 𑒧𑒠𑒢 𑒧𑒪𑒰𑒢।
𑒬𑒱𑒩 𑒮𑒱𑒢𑓂𑒠𑒴𑒩 𑒦𑒰𑒫𑒻 𑒮𑒖𑒢𑒲𑒑𑒹 𑒦𑒴𑒭𑒝 𑒦𑒰𑒫𑒹 𑒢 𑒏𑒰𑒢॥
𑒏𑒹𑒯𑒹𑒢 𑒥𑒱𑒡𑒰𑒞𑒰 𑒢𑒱𑒩𑓂𑒠𑒨 𑒦𑒹𑒪 𑒮𑒖𑒢𑒲𑒑𑒹 𑒂𑒢𑒏 𑒠𑒳𑒐 𑒢𑒯𑒱 𑒖𑒰𑒢।
𑒩𑒰𑒧𑒖𑒲𑒏𑒹 𑒂𑒬 𑒢𑒯𑒱 𑒣𑒳𑒩𑒞 𑒮𑒖𑒢𑒲 𑒧𑒠𑒢 𑒏𑒨𑒪 𑒢𑒱𑒠𑒰𑒢॥
𑓖. 𑒦𑒖𑒢 𑒦𑒻𑒩𑒫𑒲
𑒂𑒥 𑒧𑒢 𑒯𑒩𑒱 𑒔𑒩𑒢𑒢 𑒁𑒢𑒳𑒩𑒰𑒑।
𑒞𑓂𑒨𑒰𑒑𑒱 𑒯𑒵𑒠𑒨𑒏𑒹 𑒫𑒱𑒫𑒱𑒡 𑒫𑒰𑒮𑒢𑒰 𑒠𑒧𑓂𑒦 𑒏𑒣𑒙 𑒮𑒥 𑒞𑓂𑒨𑒰𑒑॥
𑒮𑒳𑒞 𑒥𑒢𑒱𑒞𑒰 𑒣𑒩𑒱𑒖𑒢 𑒣𑒳𑒩𑒫𑒰𑒮𑒲 𑒁𑒢𑓂𑒞 𑒢 𑒂𑒥𑒹 𑒏𑒰𑒖।
𑒖𑒹 𑒣𑒠 𑒡𑓂𑒨𑒰𑒢 𑒏𑒩𑒞 𑒮𑒳𑒩 𑒢𑒩 𑒧𑒳𑒢𑒱 𑒞𑒳𑒯𑒳𑓀 𑒢𑒱𑒬𑒰 𑒂𑒥 𑒖𑒰𑒑॥
𑒦𑒖 𑒩𑒒𑒳𑒣𑒞𑒱 𑒏𑒵𑒣𑒰𑒪 𑒣𑒞𑒱 𑒞𑒰𑒩𑒼𑓀 𑒣𑒞𑒱𑒞 𑒯𑒖𑒰𑒩
𑒥𑒱𑒢𑒳 𑒯𑒩𑒱 𑒦𑒖𑒢 𑒥𑒵𑒟𑒰 𑒖𑒰𑒞𑒠𑒱𑒢 𑒮𑒣𑒢𑒰 𑒮𑒧 𑒮𑓀𑒮𑒰𑒩
𑒩𑒰𑒧𑒖𑒲 𑒮𑒢𑓂𑒞 𑒦𑒩𑒼𑒮 𑒕𑒰𑒩𑒱 𑒁𑒥 𑒮𑒲𑒞𑒰 𑒣𑒞𑒱 𑒪𑒾 𑒪𑒰𑒑॥
𑓗. ॥ 𑒩𑒰𑒑 𑒫𑒱𑒯𑒰𑒑 ॥
𑒏𑒼 𑒯𑒼𑒞 𑒠𑒼𑒮𑒩 𑒂𑒢 𑒩𑒧 𑒥𑒱𑒢𑒳॥ 𑒖𑒹 𑒣𑓂𑒩𑒦𑒳 𑒖𑒰𑒨 𑒞𑒰𑒩𑒱 𑒁𑒯𑒱𑒪𑓂𑒨𑒰 𑒖𑒹 𑒥𑒢𑒱 𑒩𑒯𑒞 𑒣𑒩𑒫𑒰𑒢॥ 𑒖𑒪 𑒥𑒱𑒔 𑒖𑒰𑒃 𑒑𑒖𑒹𑒢𑓂𑒠𑓂𑒩 𑒅𑒥𑒰𑒩𑒼 𑒮𑒳𑒢𑒞 𑒥𑒰𑒞 𑒋𑒏 𑒏𑒰𑒢॥ 𑒠𑒾𑒣𑒞𑒱 𑒔𑒲𑒩 𑒥𑒜𑓃𑒰𑒄 𑒮𑒦𑒰 𑒥𑒱𑒔 𑒖𑒰𑒢𑒞 𑒮𑒏𑒪 𑒖𑒯𑒰𑒢॥ 𑒩𑒰𑒧𑒖𑒲 𑒮𑒲𑒞𑒰-𑒣𑒞𑒱 𑒦𑒖 𑒢𑒱𑒬𑒠𑒱𑒢 𑒖𑒾 𑒮𑒳𑒐 𑒔𑒰𑒯𑒞 𑒢𑒰𑒠𑒰𑒢॥
𑓘. 𑒔𑒻𑒞 𑒏𑒹 𑒚𑒳𑒧𑒩𑒲
𑒔𑒻𑒞 𑒣𑒱𑒨𑒰 𑒢𑒯𑒱 𑒂𑒨𑒹𑒪 𑒯𑒼 𑒩𑒰𑒧𑒰 𑒔𑒱𑒞 𑒒𑒥𑒩𑒰𑒨𑒹𑒪॥
𑒦𑒫𑒢𑒼 𑒢 𑒦𑒰𑒫𑒹 𑒧𑒠𑒢 𑒮𑒞𑒰𑒥𑒹 𑒢𑒻𑒢 𑒢𑒲𑒢𑓂𑒠 𑒢𑒯𑒱 𑒪𑒰𑒑𑒪॥
𑒢𑒱𑒮𑒱𑒫𑒰𑒮𑒩 𑒏𑒼𑒃𑒪 𑒏𑒱𑒞 𑒏𑒳𑒯𑒳𑒏𑒞 𑒥𑒰𑒑 𑒥𑒰𑒑 𑒤𑒴𑒪 𑒤𑒴𑒪𑒪॥
𑒩𑒰𑒧𑒖𑒲 𑒫𑒵𑒟𑒰 𑒖𑒰𑒞 𑒇𑒞𑒳𑒩𑒰𑒖𑒯𑒱 𑒖𑒾𑓀𑒢 𑒏𑒢𑓂𑒞 𑒦𑒩𑒱 𑒧𑒱𑒪𑒪𑒩𑒰𑒧𑒰॥
𑒔𑒱𑒞 𑒒𑒥𑒩𑒰𑒨𑒹𑒪 𑒔𑒻𑒞 𑒣𑒱𑒨𑒰 𑒢𑒯𑒱 𑒂𑒨𑒪॥
𑓙. 𑒔𑒻𑒞𑒏𑒹 𑒚𑒳𑒧𑒩𑒲
𑒂𑒥𑒱 𑒑𑒹𑒪 𑒔𑒻𑒞 𑒥𑒻𑒩𑒢𑒧𑒰 𑒯𑒼 𑒩𑒰𑒧𑒰 𑒫𑒱𑒡𑒱 𑒦𑒹𑒪 𑒫𑒰𑒧𑒰॥
𑒪𑒰𑒪𑒹-𑒪𑒰𑒪𑒹 𑒔𑒴𑒢𑓂𑒠𑒩𑒲 𑒪𑒑𑒰𑒨 𑒣𑒪𑓀𑒑𑒣𑒩 𑒣𑒱𑒨𑒫𑒰 𑒢 𑒁𑒨𑒪 𑒮𑒣𑒢𑒧𑒰॥
𑒖𑒾𑒫𑒢 𑒖𑒼𑒩 𑒂𑒩 𑒦𑒻𑒪 𑒠𑒱𑒢 𑒠𑒱𑒢 𑒫𑒱𑒭 𑒮𑒢 𑒪𑒰𑒑𑒞 𑒦𑒫𑒢𑒧𑒰॥
𑒩𑒰𑒧𑒖𑒲 𑒖𑒲𑒫𑒢 𑒫𑒵𑒟𑒰 𑒋𑒯𑒱 𑒞𑒢𑒧𑒹 𑒣𑓂𑒩𑒦𑒳 𑒏𑒼𑒢 𑒠𑒹𑒐𑒪𑒼 𑒢𑒨𑒢𑒧𑒰॥
𑓑𑓐. 𑒔𑒻𑒞𑒏𑒹 𑒚𑒳𑒧𑒩𑒲
𑒂𑒥𑒱 𑒑𑒹𑒪 𑒮𑒱𑒨𑒰𑒏 𑒐𑒼𑒖𑒢𑒧𑒰 𑒯𑒼 𑒩𑒰𑒧𑒰 𑒣𑒫𑒢 𑒮𑒳𑒁𑒢𑒧𑒰॥
𑒫𑒩𑒖𑒱 𑒫𑒩𑒖𑒱 𑒯𑒰𑒩𑒹 𑒮𑒥 𑒢𑒱𑒮𑒱𑒔𑒩 𑒪𑒛𑓃𑒞 𑒏𑒾 𑒢 𑒮𑒨𑒢𑒧𑒰॥
𑒅𑒣𑒫𑒢 𑒢𑒰𑒮 𑒩𑒱𑒮𑒰𑒨 𑒪𑓀𑒏𑒣𑒞𑒱 𑒧𑒹𑒒𑒫𑒰𑒮𑒹 𑒏𑒯𑒞 𑒥𑒨𑒹𑒢𑒧𑒰॥
𑒧𑒰𑒩𑒮𑒱 𑒖𑒢𑒱 𑒮𑒳𑒞 𑒥𑒰𑒢𑓂𑒯𑒱𑒏𑒹 𑒪𑒰𑒆 𑒩𑒰𑒧𑒖𑒲 𑒥𑒳𑒗𑒞 𑒏𑒰𑒩𑒢𑒧𑒰 𑒯𑒼 𑒩𑒰𑒧𑒰॥
𑓑𑓑. 𑒧𑒯𑒹𑒬𑒫𑒰𑒝𑒲
𑒮𑒳𑒢𑒳 𑒮𑒳𑒢𑒳 𑒔𑒝𑓂𑒛𑒹𑒬𑓂𑒫𑒩 𑒢𑒰𑒟 𑒏𑒵𑒣𑒰 𑒠𑒵𑒭𑓂𑒙 𑒮𑒹 𑒋𑒏 𑒫𑒹𑒩 𑒞𑒰𑒏𑒯𑒳 𑒯𑒧 𑒕𑒲 𑒣𑒩𑒧 𑒁𑒢𑒰𑒟॥
𑒠𑒹𑒫 𑒠𑒢𑒳𑒖 𑒦𑒴𑒣𑒞𑒱 𑒏𑒞 𑒮𑒹𑒥𑒪 𑒏𑒱𑒨𑒼 𑒢 𑒠𑒳𑒐𑒏𑒹 𑒮𑒰𑒟,
𑒥𑒛𑓃𑒹 𑒢𑒱𑒩𑒰𑒮 𑒂𑒬 𑒡𑒨 𑒩𑒼𑒣𑒪 𑒁𑒯𑒰𑒿𑒏 𑒔𑒩𑒝𑒧𑒹 𑒧𑒰𑒟॥
𑒦𑒙𑒏𑒱-𑒦𑒙𑒏𑒱 𑒮𑒥𑒏𑒹 𑒩𑒳𑒔𑒱 𑒥𑒴𑒗𑒪 𑒮𑒥 𑒮𑓂𑒫𑒰𑒩𑒟𑒏𑒹 𑒮𑒰𑒟
𑒖𑒹 𑒕𑒟𑒱 𑒧𑒱𑒞𑓂𑒩 𑒁𑒣𑒹𑒏𑓂𑒭𑒱𑒞 𑒣𑒩𑒱𑒖𑒢 𑒮𑒦𑒻 𑒩𑒐𑒻 𑒕𑒟𑒱 𑒏𑓂𑒫𑒰𑒟॥
𑒢𑒯𑒱 𑒏𑒱𑒕 𑒫𑒹𑒠𑒣𑒳𑒩𑒰𑒝 𑒖𑒢𑒋 𑒕𑒲 𑒢𑒯𑒱 𑒣𑒴𑒖𑒰𑒏𑒹 𑒦𑒰𑒫
𑒢𑒱𑒮𑒱 𑒠𑒱𑒢 𑒔𑒱𑒢𑓂𑒞𑒰 𑒅𑒠𑒩𑒏𑒹 𑒤𑒴𑒮𑒱 𑒤𑒙𑒏𑒏𑒹 𑒥𑒰𑒞॥
𑒁𑒯𑒰𑒿 𑒠𑒨𑒰𑒪𑒳 𑒠𑒲𑒢𑒹𑒣𑒩 𑒮𑒥 𑒠𑒱𑒢 𑒖𑒢𑒻𑒞 𑒁𑒕𑒱 𑒮𑓀𑒮𑒰𑒩
𑒩𑒰𑒧𑒖𑒲𑒏𑒹 𑒮𑒏𑒪 𑒧𑒢𑒼𑒩𑒟 𑒣𑒴𑒩 𑒫𑒯𑒳 𑒦𑒼𑒪𑒰 𑒢𑒰𑒟॥
𑓑𑓒. 𑒧𑒯𑒹𑒬𑒫𑒰𑒢𑒲
𑒥𑒧 𑒦𑒼𑒪𑒰 𑒕𑒟𑒱 𑒁𑒢𑒧𑒼𑒪 𑒏𑒞𑒹𑒏 𑒠𑒳𑒐𑒲 𑒯𑒧
𑒖𑒰𑒃𑒞 𑒠𑒹𑒐𑒪 𑒏𑒩𑒻𑒞 𑒁𑒞𑒱 𑒁𑒢𑒒𑒼𑒪॥
𑒏𑒏𑒩𑒯𑒳 𑒠𑒹𑒫𑒱𑒏 𑒠𑒻𑒯𑒱𑒏 𑒠𑒳𑒐 𑒕𑒢𑒱
𑒏𑒏𑒩𑒯𑒳 𑒦𑒾𑒞𑒱 𑒏𑒪𑒹𑒮
𑒏𑒱𑒨𑒼 𑒁𑒥𑒻 𑒕𑒟𑒱 𑒂𑒬 𑒁𑒢𑓂𑒢 𑒙𑒏𑒰𑒏𑒹 𑒪𑒹𑒪॥
𑒏𑒞𑒹𑒏 𑒥𑒱𑒏𑒪 𑒕𑒟𑒱 𑒣𑒳𑒞𑓂𑒩 𑒠𑒰𑒩 𑒪𑒹 𑒏𑒞𑒹𑒏 𑒁𑒢𑒹𑒏 𑒏𑒪𑒹𑒮
𑒏𑒞𑒹𑒏 𑒁𑒯𑒰𑒿𑒏𑒹 𑒦𑒖𑒢 𑒏𑒩𑒻 𑒨𑒹 𑒣𑒩𑒧𑒰𑒩𑒟𑒏𑒹 𑒪𑒹𑒪॥
𑒣𑒩𑒮𑒱 𑒧𑒝𑒱 𑒁𑒯𑒰𑒿 𑒗𑒰𑒩𑒲 𑒫𑒻𑒮𑒪 𑒮𑒫𑒏𑒹 𑒠𑒳𑒐 𑒯𑒩𑒱 𑒪𑒹𑒪॥
𑒩𑒰𑒧𑒖𑒲 𑒏𑒱𑒕𑒳 𑒏𑒯𑒱 𑒢 𑒮𑒏𑒻𑒕𑒲 𑒁𑒣𑒩𑒰𑒡𑒲 𑒏𑒹 𑒪𑒹𑒪॥
𑓑𑓓. 𑒧𑒯𑒹𑒬𑒫𑒰𑒢𑒲
𑒋𑒯𑒢 𑒥𑒛𑓃𑒏𑒹 𑒐𑒼𑒖𑒱 𑒂𑒢𑒪𑒢𑓂𑒯𑒱 𑒣𑒰𑒩𑒫𑒞𑒲𑒏𑒹 𑒪𑒹𑒪॥
𑒖𑒱𑒢𑒏𑒰 𑒒𑒩 𑒢𑒯𑒱 𑒡𑒢 𑒣𑒩𑒱𑒖𑒢 𑒢𑒯𑒱 𑒖𑒰𑒞𑒱 𑒣𑒰𑒞𑒱𑒏 𑒗𑒹𑒪,
𑒛𑒧𑒩𑒳 𑒥𑒖𑒰𑒫𑒟𑒱 𑒑𑒱𑒩𑒱𑒣𑒩 𑒢𑒱𑒮𑒱 𑒠𑒱𑒢 𑒦𑒴𑒞 𑒣𑓂𑒩𑒹𑒞𑒮𑒿 𑒐𑒹𑒪॥
𑒁𑒢𑓂𑒢𑒏 𑒐𑒹𑒞𑒲 𑒏𑒱𑒕𑒳 𑒢𑒯𑒱 𑒩𑒰𑒐𑒟𑒱 𑒦𑒰𑓀𑒑 𑒡𑒳𑒟𑒳𑒩 𑒁𑒪𑒹𑒪,
𑒦𑒴𑒭𑒝 𑒑𑒞𑓂𑒩-𑒑𑒞𑓂𑒩𑒧𑒹 𑒪𑒙𑒏𑒙 𑒥𑒱𑒭𑒡𑒩 𑒠𑒹𑒐𑒱 𑒅𑒩 𑒧𑒹𑒪॥
𑒣𑒩𑒧 𑒥𑒞𑒰𑒯𑒏 𑒪𑒏𑓂𑒭𑒝 𑒮𑒦 𑒕𑒢𑒱 𑒁𑓀𑒑 𑒦𑒮𑓂𑒧 𑒪𑒹𑒣𑒱 𑒪𑒹𑒪,
𑒯𑒰𑒟𑒲 𑒒𑒼𑒛𑓃𑒰 𑒞𑓂𑒨𑒰𑒑𑒱 𑒣𑒰𑒪𑒏𑒲 𑒫𑒼𑒜𑓃 𑒥𑒛𑓃𑒠 𑒔𑒜𑓃𑒱 𑒪𑒹𑒪॥
𑒏𑒯𑒟𑒱 𑒩𑒰𑒧𑒖𑒲𑒦𑒰𑒑 𑒆𑒠𑒨 𑒁𑒥 𑒪𑒹𑒪,
𑒞𑓂𑒩𑒱𑒦𑒳𑒫𑒢 𑒣𑒞𑒱 𑒑𑒾𑒩𑒲 𑒣𑒞𑒱 𑒯𑒹𑒞𑒰 𑒮𑒰𑒖𑒴 𑒣𑒴𑒩𑒯𑒩 𑒪𑒦𑒹॥
𑓑𑓔. 𑒧𑒯𑒹𑒬𑒫𑒰𑒝𑒲
𑒯𑒧𑒩𑒼 𑒖𑒲𑒫𑒢 𑒫𑓂𑒨𑒩𑓂𑒟 𑒥𑒲𑒞𑒱 𑒑𑒹𑒪।
𑒏𑒯𑒱𑒨𑒼 𑒥𑒱𑒪𑓂𑒥𑒣𑒞𑓂𑒩 𑒢𑒯𑒱 𑒞𑒼𑒛𑓃𑒪, 𑒤𑒴𑒪 𑒩𑒼𑒣𑒱 𑒢𑒯𑒱 𑒦𑒹𑒪।
𑒁𑒏𑓂𑒭𑒞 𑒡𑒴𑒣, 𑒠𑒲𑒣𑒪𑒻, 𑒔𑒰𑒢𑒢 𑒬𑓀𑒏𑒩 𑒣𑒴𑒖𑒱 𑒢𑒯𑒱 𑒦𑒹𑒪॥
𑒏𑒞𑒹𑒏 𑒫𑒰𑒮𑒢𑒰 𑒧𑒢𑒧𑒹 𑒏𑒩𑒱-𑒏𑒩𑒱 𑒠𑒱𑒫𑒮 𑒩𑒻𑒢 𑒥𑒱𑒞𑒱 𑒑𑒹𑒪।
𑒏𑒫𑒯𑒳𑒿 𑒡𑓂𑒨𑒰𑒢 𑒬𑒰𑒢𑓂𑒞 𑒔𑒱𑒞𑓂𑒞 𑒦𑒋 𑒥𑒧-𑒥𑒧 𑒏𑒯𑒱𑒨𑒼 𑒢 𑒦𑒹𑒪॥
𑒮𑒳𑒞 𑒥𑒢𑒱𑒞𑒰𑒠𑒱 𑒫𑒱𑒭𑒨 𑒥𑒮 𑒏𑒫𑒯𑒳𑒿, 𑒧𑒢 𑒥𑒱𑒬𑓂𑒩𑒰𑒧 𑒢 𑒦𑒹𑒪।
𑒔𑒱𑒢𑓂𑒞𑒰 𑒏𑒩𑒞𑒱 𑒏𑒩𑒞𑒱 𑒠𑒱𑒢 𑒥𑒲𑒞𑒪, 𑒁𑒥 𑒖𑒩𑓂𑒖𑒩 𑒞𑒢 𑒦𑒹𑒪॥
𑒏𑒯𑒟𑒱 𑒩𑒰𑒧𑒖𑒲 𑒮𑒏𑒪 𑒂𑒬 𑒞𑒖𑒱 𑒬𑒱𑒫 𑒮𑒹𑒥𑒴 𑒁𑒪𑒥𑒹𑒪।
𑒬𑒱𑒥 𑒥𑒱𑒢𑒳 𑒠𑒼𑒮𑒩𑒏𑒹 𑒯𑒩𑒞 𑒠𑒳𑒮𑒯 𑒠𑒳𑓁𑒐 𑒢𑒱𑒬𑓂𑒔𑒨 𑒧𑒢 𑒏𑒩𑒱𑒪𑒹𑒪॥
𑓑𑓕. 𑒧𑒯𑒹𑒬𑒫𑒰𑒢𑒲
𑒬𑒱𑒫𑒏𑒹𑓀 𑒮𑒳𑒢𑒻 𑒕𑒱𑒨𑒢𑓂𑒯𑒱 𑒠𑒨𑒰𑒪
𑒠𑒳𑒐𑒱𑒨𑒰𑒏 𑒏𑒯𑒱𑒨𑒰 𑒮𑒳𑒢𑒞𑒰 𑒮𑒫𑒰𑒪।
𑒖𑒨 𑒑𑓀𑒑 𑒔𑒢𑓂𑒠𑓂𑒩 𑒦𑒰𑒪, 𑒏𑓀𑒚 𑒧𑒳𑒝𑓂𑒛𑒧𑒰𑒪, 𑒦𑓀𑒑 𑒪𑒹 𑒥𑒹𑒯𑒰𑒪॥
𑒫𑒰𑒧 𑒦𑒰𑒑 𑒣𑒰𑒩𑓂𑒫𑒞𑒲 𑒥𑒮𑒯𑒰 𑒮𑒫𑒰𑒩, 𑒁𑓀𑒑-𑒁𑓀𑒑𑒧𑒹 𑒫𑒱𑒭𑒡𑒩 𑒪𑒙𑒏𑒪 𑒯𑒖𑒰𑒩,
𑒦𑒴𑒞𑒢𑒰𑒞 𑒣𑓂𑒩𑒝𑒞 𑒣𑒰𑒪 𑒠𑒱𑒑𑒧𑓂𑒥𑒩 𑒡𑒰𑒩,
𑒦𑒮𑓂𑒧 𑒁𑓀𑒑 𑒮𑓀𑒑 𑒥𑒹𑒞𑒰𑒪 𑒛𑒧𑒩𑒳 𑒥𑒒 𑒕𑒰𑒪𑒰॥
𑒩𑒰𑒧𑒖𑒲 𑒠𑒲𑒢𑒢𑒣𑒩 𑒏𑒐𑒢 𑒏𑒩𑒥 𑒐𑒨𑒰𑒪
𑒬𑒱𑒫 𑒥𑒱𑒢𑒰 𑒯𑒧𑒩 𑒏𑒹 𑒏𑒩𑒞 𑒣𑓂𑒩𑒞𑒱𑒣𑒰𑒪॥
𑓑𑓖. 𑒧𑒯𑒹𑒬𑒫𑒰𑒝𑒲
𑒬𑒱𑒫 𑒏𑒰𑒙𑒴 𑒢𑒹 𑒖𑒘𑓂𑒖𑒰𑒪।
𑒏𑒞𑒹𑒏 𑒏𑒯𑒥 𑒯𑒧 𑒁𑒣𑒢 𑒯𑒫𑒰𑒪॥
𑒢𑒱𑒮𑒱 𑒠𑒱𑒢 𑒔𑒻𑒢 𑒢𑒯𑒱 𑒦𑒴𑒐 𑒦𑒹𑒪 𑒏𑒰𑒪
𑒔𑒱𑒢𑓂𑒞𑒰 𑒏𑒩𑒞𑒱 𑒦𑒴𑒪𑒱 𑒑𑒹𑒪 𑒁𑒯𑒰𑒿𑒏 𑒐𑒨𑒰𑒪।
𑒥𑒢𑓂𑒡𑒳 𑒫𑒩𑓂𑒑 𑒏𑒳𑒙𑒳𑒧𑓂𑒥 𑒮𑓀𑒑 𑒡𑒹𑒪𑒰𑒯 𑒁𑒢𑒹𑒏 𑒦𑒪
𑒏𑒹𑒍 𑒢 𑒮𑒯𑒰𑒨 𑒦𑒹𑒪𑒰 𑒠𑒳𑒩𑓂𑒠𑒱𑒢 𑒣𑓂𑒩𑒫𑒪।
𑒩𑒰𑒧𑒖𑒲𑒏𑒹 𑒂𑒬𑒰 𑒋𑒏 𑒖𑒿 𑒢𑒱𑒑𑒰𑒯𑒢𑒻 𑒏𑒩𑒥 𑒩𑒯𑒥 𑒥𑒹𑒏𑒪॥
𑓑𑓗. 𑒧𑒯𑒹𑒬𑒫𑒰𑒝𑒲
𑒬𑒱𑒫 𑒏𑒯𑒴𑒢𑒹 𑒥𑒳𑒗𑒰𑒨॥
𑒏𑒏𑒩𑒰 𑒏𑒯𑒥 𑒯𑒧 𑒁𑒣𑒢 𑒠𑒳𑒐 𑒖𑒰𑒨॥
𑒏𑒹𑒍 𑒢𑒹 𑒦𑒹𑒙𑒻𑒞 𑒕𑒟𑒱 𑒁𑒯𑒰𑒿𑒏 𑒮𑒧𑒳𑒠𑒰𑒨
𑒖𑒹 𑒮𑒳𑒢𑒱 𑒯𑒹𑒞𑒰𑒯 𑒞𑒳𑒩𑒞 𑒮𑒯𑒰𑒨॥
𑒯𑒱𑒞 𑒧𑒱𑒞 𑒥𑒢𑒱𑒞𑒰 𑒮𑒳𑒞 𑒮𑓂𑒫𑒰𑒮𑓂𑒟𑓂𑒨 𑒮𑒹 𑒦𑒰𑒋।
𑒢𑒱𑒩𑓂𑒡𑒢 𑒠𑒹𑒐𑒱 𑒦𑒳𑒐 𑒪𑒋 𑒕𑒣𑒱 𑒒𑒳𑒧𑒰𑒋॥
𑒥𑒧𑓂𑒦𑒼𑒪𑒰 𑒫𑒻𑒠𑓂𑒨𑒢𑒰𑒟 𑒠𑒲𑒢𑒢 𑒁𑒣𑒢𑒰𑒨 𑒗𑒰𑒛𑓃𑒲𑒧𑒹 𑒥𑒻𑒮𑒱
𑒯𑒲𑒩𑒰𑒪𑒰𑒪𑒏𑒼 𑒪𑒳𑒙𑒰𑒨॥
𑒩𑒰𑒧𑒖𑒲 𑒂𑒬𑒰 𑒪𑒑𑒰𑒨 𑒏𑒵𑒣𑒰 𑒠𑒵𑒭𑓂𑒙𑒱 𑒯𑒹𑒩𑒴
𑒢𑒰𑒟 𑒪𑒱𑒨 𑒁𑒣𑒢𑒰𑒨॥
𑒃𑒞𑒱
𑒮𑒱𑒠𑓂𑒡𑒱𑒩𑒮𑓂𑒞𑒳। 𑒬𑒳𑒦𑒘𑓂𑒔𑒰𑒮𑓂𑒞𑒳𑒮𑓂𑒞𑓂𑒩
𑓑𑓘. 𑒦𑒖𑒢 𑒫𑒱𑒢𑒨
𑒣𑓂𑒩𑒦𑒴 𑒥𑒱𑒢𑒴 𑒏𑒼𑒢 𑒏𑒩𑒞 𑒠𑒳𑒐𑓁 𑒞𑓂𑒩𑒰𑒝𑓁॥
𑒏𑒞𑒹𑒏 𑒠𑒳𑓁𑒐𑒲𑒏𑒹 𑒞𑒰𑒩𑒪 𑒖𑒑𑒧𑒹 𑒦𑒫 𑒮𑒰𑒑𑒩 𑒥𑒱𑒢𑒴 𑒖𑒪 𑒖𑒰𑒢, 𑒏𑒞𑒹𑒏 𑒔𑒴𑒏𑒱 𑒯𑒧𑒩𑒰𑒮𑒹 𑒦𑓄 𑒑𑒹𑒪 𑒮𑒼𑒩 𑒢𑒹 𑒮𑒱𑒢𑒄 𑒕𑒲 𑒏𑒰𑒢𑓁॥ 𑒁𑒯𑒰𑒿 𑒏𑒹 𑒞 𑒥𑒻𑒢𑒱 𑒣𑒩𑒪 𑒁𑒕𑒱 𑒣𑒞𑒱𑒞 𑒅𑒡𑒰𑒩𑒢 𑒢𑒰𑒧 ।𑒢𑒰𑒧𑒏 𑒙𑒹𑒏 𑒩𑒰𑒐𑒴 𑒣𑓂𑒩𑒦𑒴 𑒁𑒥𑒯𑒴𑒿 𑒯𑒧 𑒕𑒲 𑒁𑒡𑒧 𑒧𑒯𑒰𑒢𑓁॥ 𑒖𑓂𑒨𑒼𑒿 𑒢𑒘 𑒏𑒵𑒣𑒰 𑒏𑒩𑒥 𑒋𑒯𑒱 𑒖𑒢 𑒣𑒩 𑒏𑒼𑒢𑒰 𑒐𑒥𑒩𑒱 𑒪𑒹𑒞 𑒂𑒢। 𑒩𑒰𑒧𑒖𑒲 𑒣𑒞𑒱𑒞𑒏𑒹 𑒢𑒰𑒯𑒱𑒿 𑒮𑒯𑒰𑒩𑒰 𑒠𑒼𑒮𑒩 𑒏𑒹 𑒁𑒕𑒱 𑒂𑒢𑓁॥
𑓑𑓙. 𑒦𑒖𑒢 𑒪𑒏𑓂𑒭𑓂𑒧𑒲 𑒢𑒰𑒩𑒰𑒨𑒝 𑒖𑒲𑒏 𑒫𑒱𑒢𑒨
𑒪𑒏𑓂𑒭𑓂𑒧𑒲 𑒢𑒰𑒩𑒰𑒨𑒝 𑒁𑒯𑒰𑒿 𑒯𑒧𑒩𑒰 𑒍𑒩 𑒢𑒘 𑒞𑒏𑒃 𑒕𑒲 𑒨𑒾।
𑒠𑒲𑒢𑒠𑒨𑒰𑒪 𑒢𑒰𑒧 𑒁𑒯𑒰𑒿𑒏𑒹 𑒮𑒦 𑒏𑒯𑒋 𑒁𑒕𑒱 𑒨𑒾।
𑒯𑒧𑒩 𑒠𑒳𑓁𑒐 𑒠𑒹𑒐𑒱 𑒥𑒱𑒏𑒙 𑒁𑒯𑒰𑒿 𑒛𑒩𑒋 𑒕𑒲 𑒨𑒾।
𑒥𑓂𑒨𑒰𑒡 𑒑𑒝𑒱𑒏𑒰 𑒑𑒱𑒡 𑒁𑒖𑒰𑒧𑒱𑒪 𑒑𑒖𑒏𑒹 𑒅𑒥𑒰𑒩𑒪 𑒨𑒾।
𑒏𑒾𑒪 𑒏𑒱𑒩𑒰𑒞 𑒦𑒱𑒪𑒢𑒲 𑒁𑒡𑒧𑒏𑒹𑒿 𑒅𑒥𑒰𑒩𑒪 𑒨𑒾।
𑒏𑒞𑒹𑒏 𑒣𑒞𑒱𑒞𑒏𑒹 𑒞𑒰𑒩𑒪 𑒁𑒯𑒰𑒿 𑒧𑒰𑒢𑒱 𑒏𑒹 𑒮𑒏𑒞 𑒨𑒾।
𑒩𑒳𑒠𑓂𑒩𑒣𑒳𑒩𑒏𑒹 𑒦𑒼𑒪𑒰𑒢𑒰𑒟 𑒁𑒯𑒰𑒿 𑒏𑒹 𑒡𑒰𑒧 𑒑𑒹𑒪𑒰𑒨𑒼।
𑒖𑓂𑒨𑒼𑓀 𑒢 𑒯𑒧𑒩𑒰 𑒣𑒩 𑒏𑒵𑒣𑒰 𑒏𑒩𑒥 𑒯𑒧 𑒏𑒱 𑒏𑒩𑒥 𑒨𑒾।
𑒩𑒰𑒧𑒖𑒲 𑒁𑒢𑒰𑒟 𑒋𑒏 𑒠𑒰𑒮 𑒩𑒰𑒐𑒳 𑒨𑒾।
𑓒𑓐. 𑒦𑒖𑒢 𑒫𑒱𑒢𑒨 𑒦𑒑𑒫𑒞𑒲
𑒖𑒨 𑒖𑒨 𑒖𑒢𑒏 𑒢𑒢𑓂𑒠𑒱𑒢𑒲 𑒁𑒧𑓂𑒥𑒹, 𑒞𑓂𑒩𑒱𑒦𑒳𑒫𑒢 𑒏𑒹 𑒞𑒴 𑒯𑒲 𑒁𑒫𑒪𑒧𑓂𑒥𑒹𑓁।
𑒞𑒳𑒯𑒲 𑒣𑒰𑒪𑒢 𑒏𑒰𑒩𑒢𑒲 𑒖𑒑𑒞𑒏𑒹, 𑒬𑒹𑒭 𑒑𑒝𑒹𑒬 𑒮𑒳𑒩𑒢 𑒏𑒹𑓁।
𑒞𑒹𑒩𑒼 𑒧𑒯𑒱𑒧𑒰 𑒏𑒯𑒱 𑒢 𑒮𑒏𑒞 𑒏𑒼𑒅, 𑒮𑒏𑒳𑒔𑒞 𑒮𑒰𑒩𑒦 𑒮𑒳𑒩𑒣𑒞𑒱 𑒏𑒼𑓁।
𑒣𑒩𑒧𑒠𑒳𑒐𑒲 𑒋𑒯𑒱 𑒖𑒑𑒧𑒹, 𑒏𑒹 𑒢𑒘 𑒖𑒢𑒋 𑒁𑒕𑒱 𑒞𑓂𑒩𑒱𑒦𑒳𑒫𑒢𑒧𑒹𑓁॥
𑒏𑒹𑒫𑒪 𑒂𑒬𑒰 𑒁𑒯𑒰𑒿𑒏 𑒔𑒩𑒝𑒏𑒹, 𑒩𑒰𑒐𑒴 𑒠𑒰𑒮 𑒁𑒡𑒧 𑒏𑒹𑓁॥
𑒏𑒱𑒨𑒼 𑒢𑒯𑒱 𑒩𑒰𑒐𑒱 𑒮𑒏𑒪 𑒬𑒩𑒝𑒼𑓀𑒧𑒹, 𑒠𑒹𑒐 𑒠𑒳𑒐𑒲 𑒠𑒱𑒢𑒢 𑒏𑒹𑓁॥
𑒖𑓂𑒨𑒼𑒿 𑒢𑒯𑒱 𑒏𑒵𑒣𑒰 𑒏𑒩𑒥 𑒖𑒑𑒖𑒢𑒢𑒲, 𑒥𑒰𑒮 𑒖𑒰𑒢 𑒢𑒱𑒖 𑒧𑒢𑒧𑒹।
𑒞𑒾𑒿 𑒧𑒹𑒩𑒼 𑒠𑒳𑒐 𑒏𑒾𑒢 𑒯𑒙𑒰𑒫𑒞, 𑒠𑒼𑒮𑒩 𑒕𑒰𑒛𑓃𑒱 𑒁𑒯𑒰𑒿𑒏𑒹𑓁॥
𑒏𑒥𑒯𑒾𑒿 𑒁𑒫𑒮𑒩 𑒣𑒰𑒥𑒱 𑒫𑒱𑒣𑒞𑒱 𑒧𑒹𑒩𑒼 𑒏𑒯𑒱𑒨𑒼 𑒁𑒫𑒡𑒣𑒞𑒱 𑒏𑒼,
𑒩𑒰𑒧𑒖𑒲 𑒏 𑒢𑒯𑒱 𑒂𑒢 𑒮𑒯𑒰𑒩𑒰 𑒕𑒰𑒛𑓃𑒱 𑒔𑒩𑒝 𑒁𑒯𑒰𑒿𑒏𑒹𑓁॥
𑓒𑓑. 𑒦𑒖𑒢 𑒫𑒱𑒢𑒨
𑒣𑓂𑒩𑒦𑒳 𑒥𑒱𑒢𑒳 𑒏𑒾𑒢 𑒏𑒩𑒞 𑒠𑒳𑓁𑒐 𑒞𑓂𑒩𑒰𑒝𑓁॥
𑒏𑒞𑒹𑒏 𑒠𑒳𑒐𑒲𑒏𑒹 𑒞𑒰𑒩𑒪 𑒖𑒑𑒧𑒹
𑒦𑒫𑒮𑒰𑒑𑒩 𑒥𑒱𑒢𑒳 𑒖𑒪 𑒖𑒰𑒢𑓁॥
𑒏𑒞𑒹𑒏 𑒔𑒴𑒏𑒱 𑒯𑒧𑒩𑒰𑒮𑒹 𑒦𑓄 𑒑𑒹𑒪,
𑒮𑓂𑒫𑒩 𑒢𑒘 𑒮𑒳𑒢𑒋 𑒕𑒲 𑒏𑒰𑒢𑓁॥
𑒁𑒯𑒰𑒿𑒏𑒹 𑒞𑒾𑒿 𑒥𑒰𑒢𑒱 𑒣𑒛𑓃𑒪 𑒁𑒕𑒱,𑒣𑒞𑒱𑒞 𑒅𑒡𑒰𑒩𑒝 𑒢𑒰𑒧𑓁।
𑒢𑒰𑒧𑒏 𑒙𑒹𑒏 𑒩𑒰𑒐𑒳 𑒁𑒥 𑒣𑓂𑒩𑒦𑒳𑒖𑒲 𑒯𑒧 𑒕𑒲 𑒁𑒡𑒧 𑒖𑒼𑒢𑒰।
𑒏𑒵𑒣𑒰 𑒏𑒩𑒥 𑒋𑒯𑒱 𑒖𑒢 𑒣𑒩 𑒏𑒼𑒢 𑒐𑒥𑒩𑒱 𑒪𑒹𑒞 𑒂𑒢।
𑒩𑒰𑒧𑒖𑒲 𑒣𑒞𑒱𑒞𑒏𑒹 𑒢𑒰𑒯𑒱 𑒮𑒯𑒰𑒩𑒰 𑒠𑒼𑒮𑒩 𑒏𑒹 𑒁𑒕𑒱 𑒂𑒢𑓁॥
𑓒𑓒. 𑒫𑒱𑒯𑒰𑒑
𑒦𑒼𑒪𑒰 𑒯𑒹𑒩𑒴 𑒣𑒪𑒏 𑒋𑒏 𑒥𑒹𑒩𑓁॥
𑒏𑒞𑒹𑒏 𑒠𑒳𑒐𑒲𑒏𑒹 𑒞𑒰𑒩𑒪 𑒖𑒑𑒧𑒹 𑒏𑒞𑒋 𑒑𑒹𑒪𑒯𑒳𑒿 𑒧𑒹𑒩𑒼 𑒥𑒹𑒩𑓁॥
𑒦𑒴𑒞𑒢𑒰𑒟 𑒑𑒾𑒩𑒲𑒫𑒩𑒬𑓀𑒏𑒩 𑒫𑒱𑒣𑒞𑓂𑒞𑒱 𑒯𑒩𑒴 𑒋𑒯𑒱 𑒥𑒹𑒩𑓁॥
𑒖𑒼𑒢𑒰 𑒏𑒵𑒣𑒰 𑒏𑒩𑒥 𑒬𑒱𑒫𑒬𑓀𑒏𑒩 𑒏𑒭𑓂𑒙 𑒧𑒱𑒙𑒞 𑒏𑒹 𑒎𑒩𑓁॥
𑒥𑒛𑓃𑒹 𑒠𑒨𑒰𑒪𑒳 𑒖𑒰𑒢𑒱 𑒯𑒧 𑒋𑒪𑒯𑒳𑒿 𑒁𑒯𑒰𑒿𑒏 𑒬𑒩𑒝 𑒮𑒳𑒢𑒱 𑒮𑒼𑒩𑓁॥
𑒩𑒰𑒧𑒖𑒲𑒏𑒹 𑒢𑒯𑒱 𑒂𑒢 𑒮𑒯𑒰𑒩𑒰 𑒠𑒼𑒮𑒩 𑒏𑒹𑒨𑒼 𑒢𑒯𑒱 𑒎𑒩𑓁॥
𑓒𑓓. 𑒦𑒖𑒢 𑒧𑒯𑒹𑒬𑒫𑒰𑒝𑒲
𑒦𑒼𑒪𑒰 𑒏𑒐𑒢 𑒏𑒩𑒥 𑒠𑒳𑓁𑒐 𑒞𑓂𑒩𑒰𑒢?
𑒞𑓂𑒩𑒱𑒫𑒱𑒡 𑒞𑒰𑒣 𑒧𑒼𑒯𑒱 𑒂𑒨 𑒮𑒞𑒰𑒫𑒹 𑒪𑒹𑒢 𑒔𑒯𑒢 𑒧𑒹𑒩𑒼 𑒣𑓂𑒩𑒰𑒝॥
𑒢𑒱𑒬𑒱𑒫𑒰𑒮𑒩 𑒧𑒼𑒯𑒱 𑒨𑒳𑒁 𑒮𑒧𑒫𑒲𑒢𑒹 𑒣𑒪𑒦𑒩 𑒢𑒯𑒱 𑒫𑒱𑒬𑓂𑒩𑒰𑒧𑓁॥
𑒥𑒯𑒳𑒞 𑒅𑒣𑒰𑒨 𑒏𑒩𑒱𑒏𑒹 𑒯𑒧 𑒯𑒰𑒩𑒪 𑒠𑒱𑒢-𑒠𑒱𑒢 𑒠𑒳𑓁𑒐 𑒥𑒪𑒥𑒰𑒢,
𑒖𑓂𑒨𑒾𑒿 𑒢𑒯𑒱 𑒏𑒵𑒣𑒰 𑒏𑒩𑒥 𑒬𑒱𑒫𑒬𑓀𑒏𑒩 𑒏𑒭𑓂𑒙 𑒏𑒹 𑒧𑒹𑒙𑒞 𑒂𑒢॥
𑒩𑒰𑒧𑒖𑒲𑒏𑒹 𑒮𑒩𑒝 𑒩𑒰𑒐𑒴 𑒣𑓂𑒩𑒦𑒳, 𑒁𑒡𑒧 𑒬𑒱𑒩𑒼𑒧𑒝𑒱 𑒖𑒰𑒢॥𑒦𑒼𑒪𑒰.॥
𑓒𑓔. 𑒫𑒱𑒢𑒨 𑒫𑒱𑒯𑒰𑒑
𑒩𑒰𑒧 𑒥𑒱𑒢𑒳 𑒏𑒾𑒢 𑒯𑒩𑒞 𑒠𑒳𑓁𑒐 𑒂𑒢
𑒏𑒾𑒬𑒪𑒣𑒞𑒱 𑒏𑒵𑒣𑒰𑒪𑒳 𑒏𑒼𑒧𑒪 𑒔𑒱𑒞
𑒖𑒰𑒯𑒱 𑒡𑒩𑒞 𑒧𑒳𑒢𑒱 𑒡𑓂𑒨𑒰𑒢॥
𑒣𑒞𑒱𑒞 𑒁𑒢𑒹𑒏 𑒞𑒰𑒩𑒪 𑒋𑒯𑒱 𑒖𑒑𑒧𑒹,
𑒖𑒑-𑒑𑒝𑒱𑒏𑒰 𑒣𑒩𑒡𑒰𑒢॥
𑒏𑒹𑒫𑒙,𑒑𑒵𑒠𑓂𑒡 𑒁𑒖𑒰𑒧𑒱𑒪 𑒞𑒰𑒩𑒼,
𑒡𑒼𑒐𑒯𑒳𑒭𑒹 𑒪𑒱𑒨𑒼 𑒢𑒰𑒧,
𑒢𑒯𑒱 𑒠𑒨𑒰𑒪𑒳 𑒞𑒳𑒁 𑒮𑒧 𑒏𑒰𑒅 𑒠𑒼𑒮𑒩,
𑒏𑒱𑒨𑒼 𑒋𑒏 𑒡𑒢𑒫𑒰𑒢॥
𑒩𑒰𑒧𑒖𑒲 𑒁𑒬𑒩𑒝 𑒂𑒨 𑒣𑒳𑒏𑒰𑒩𑒼, 𑒦𑒫 𑒪𑒹 𑒏𑒩𑒴 𑒧𑒹𑒩𑒼 𑒞𑓂𑒩𑒰𑒝॥𑒩𑒰𑒧𑒥𑒱𑒢𑒳॥
𑓒𑓕. 𑒦𑒖𑒢 𑒫𑒱𑒢𑒨
𑒪𑒏𑓂𑒭𑓂𑒧𑒲𑒢𑒰𑒩𑒰𑒨𑒝 𑒯𑒧𑒩 𑒠𑒳𑓁𑒐 𑒏𑒐𑒢 𑒯𑒩𑒥 𑒎॥
𑒣𑒞𑒱𑒞 𑒅𑒡𑒰𑒩𑒝 𑒢𑒰𑒧 𑒁𑒯𑒰𑒿𑒏𑒹 𑒮𑒦 𑒏𑒋 𑒁𑒕𑒱 𑒎,
𑒯𑒧𑒩𑒰 𑒥𑒹𑒩 𑒣𑒩𑒧 𑒏𑒚𑒼𑒩 𑒏𑒱𑒨𑒰𑒏 𑒯𑒼𑒃 𑒕𑒲 𑒎॥
𑒞𑓂𑒩𑒱𑒫𑒱𑒡 𑒞𑒰𑒣 𑒮𑒞𑒞 𑒢𑒱𑒬𑒱 𑒠𑒱𑒢 𑒞𑒢𑒥𑒻 𑒁𑒕𑒱 𑒎॥
𑒁𑒯𑒰𑒿 𑒥𑒱𑒢𑒰 𑒠𑒼𑒮𑒩 𑒏𑒹 𑒞𑓂𑒩𑒰𑒝 𑒏𑒩𑒞 𑒎॥
𑒠𑒹𑒫 𑒠𑒢𑒳𑒖 𑒧𑒢𑒳𑒖 𑒯𑒧 𑒏𑒞𑒹𑒏 𑒮𑒹𑒫𑒪 𑒎,
𑒏𑒱𑒨𑒼 𑒢𑒹 𑒮𑒯𑒰𑒨 𑒦𑒹𑒪𑒰 𑒫𑒱𑒣𑒞𑒱 𑒏𑒰𑒪 𑒎॥
𑒏𑒞𑒹𑒏 𑒏𑒯𑒥 𑒁𑒯𑒰𑒿𑒏𑒹 𑒖𑓂𑒨𑒼𑒿 𑒢𑒹 𑒏𑒵𑒣𑒰 𑒏𑒩 𑒎,
𑒩𑒰𑒧𑒖𑒲𑒏𑒹 𑒔𑒰𑒛𑓃𑒱 𑒁𑒯𑒰𑒿𑒏 𑒏𑒹 𑒬𑒩𑒝 𑒩𑒰𑒐𑒢 𑒎॥
𑓒𑓖. 𑒦𑒖𑒢 𑒫𑒱𑒢𑒨
𑒋𑒏 𑒥𑒹𑒩 𑒞𑒰𑒏𑒴 𑒎 𑒦𑒑𑒫𑒰𑒢,
𑒁𑒯𑒰𑒿𑒏 𑒥𑒱𑒢𑒰 𑒠𑒼𑒮𑒩 𑒠𑒳𑓁𑒐 𑒏𑒹𑒯𑒳 𑒢𑒰 𑒂𑒢॥
𑒢𑒱𑒬𑒱 𑒠𑒱𑒢 𑒏𑒐𑒢𑒾 𑒏𑒪 𑒢 𑒣𑒛𑓃𑒻 𑒁𑒕𑒱,
𑒏𑒱𑒨𑒼 𑒢𑒹 𑒞𑒏𑒻𑒨𑒹 𑒂𑒢
𑒏𑒹𑒫𑒪 𑒂𑒬𑒰 𑒁𑒯𑒰𑒿𑒏 𑒔𑒩𑒝𑒏𑒹 𑒂𑒨 𑒏𑒩𑒴 𑒧𑒹𑒩𑒹 𑒞𑓂𑒩𑒰𑒝॥
𑒏𑒞𑒹𑒏 𑒁𑒡𑒧𑒏𑒹 𑒞𑒰𑒩𑒪 𑒁𑒯𑒰𑒿 𑒑𑒢𑒱 𑒢𑒹 𑒮𑒏𑒞 𑒏𑒱𑒨𑒼 𑒂𑒢,
𑒯𑒧𑒩 𑒫𑒰𑒢 𑒏𑒱𑒕𑒳 𑒢𑒰𑒯𑒱 𑒮𑒳𑒢𑒋 𑒕𑒲,
𑒥𑒯𑒱𑒩 𑒦𑒹𑒪 𑒏𑒞𑒹 𑒏𑒰𑒢॥
𑒣𑓂𑒩𑒥𑒪 𑒣𑓂𑒩𑒞𑒰𑒣 𑒁𑒯𑒰𑒿𑒏 𑒁𑒕𑒱 𑒖𑒑𑒧𑒹
𑒏𑒹 𑒢𑒯𑒱 𑒖𑒢𑒋 𑒁𑒕𑒱 𑒂𑒢,
𑒑𑒝𑒱𑒏𑒰 𑒑𑒱𑒠𑓂𑒡 𑒁𑒖𑒰𑒧𑒱𑒪 𑒑𑒖𑒏𑒹
𑒖𑒪𑒮𑒹 𑒥𑒔𑒰𑒫𑒪 𑒣𑓂𑒩𑒰𑒝॥
𑒖𑓂𑒨𑒼𑒿 𑒢𑒯𑒱 𑒏𑒵𑒣𑒰 𑒏𑒩𑒥 𑒩𑒒𑒳𑒢𑒢𑓂𑒠𑒢,
𑒫𑒱𑒣𑒞𑒱 𑒣𑒩𑒪 𑒢𑒱𑒠𑒰𑒢,
𑒩𑒰𑒧𑒖𑒲𑒏𑒹 𑒁𑒥 𑒢𑒰𑒯𑒱 𑒮𑒯𑒰𑒩𑒰,
𑒠𑒼𑒮𑒩 𑒏𑒹 𑒢𑒯𑒱 𑒂𑒢॥
𑓒𑓗. 𑒧𑒯𑒹𑒬𑒫𑒰𑒢𑒲
𑒮𑒳𑒢𑒴 𑒮𑒳𑒢𑒴 𑒎 𑒠𑒨𑒰𑒪,
𑒁𑒯𑒰𑒿 𑒮𑒢 𑒠𑒼𑒮𑒩 𑒏𑒹 𑒕𑒟𑒱 𑒏𑒵𑒣𑒰𑒪॥
𑒖𑒹 𑒁𑒯𑒰𑒿 𑒏𑒹 𑒬𑒩𑒝 𑒁𑒥𑒋 𑒁𑒕𑒱
𑒮𑒥𑒏𑒹 𑒏𑒨𑒪 𑒢𑒱𑒯𑒰𑒪,
𑒯𑒧𑒩 𑒠𑒳𑓁𑒐 𑒏𑒐𑒢 𑒯𑒩𑒥 𑒁𑒯𑒰𑒿,
𑒏𑒯𑒴𑒢𑒹 𑒗𑒰𑒩𑒲 𑒪𑒰𑒪॥
𑒖𑒙𑒰 𑒥𑒲𑒔 𑒑𑓀𑒑𑒰 𑒕𑒟𑒱 𑒬𑒼𑒦𑒱𑒞 𑒔𑒢𑓂𑒠𑓂𑒩 𑒫𑒱𑒩𑒰𑒖𑒟𑒱 𑒦𑒰𑒪,
𑒗𑒰𑒩𑒲𑒧𑒹 𑒢𑒱𑒫𑒰𑒮 𑒏𑒩𑒋 𑒕𑒲 𑒠𑒳𑒐𑒱𑒨𑒼 𑒣𑒩 𑒁𑒞𑒱 𑒐𑒨𑒰𑒪॥
𑒩𑒰𑒧𑒖𑒲𑒏𑒹 𑒬𑒩𑒝𑒧𑒹 𑒩𑒰𑒐𑒴,
𑒮𑒳𑒢𑒴 𑒮𑒳𑒢𑒴 𑒎 𑒧𑒯𑒰𑒏𑒰𑒪,
𑒫𑒱𑒣𑒞𑒱 𑒯𑒩𑒰𑒆 𑒯𑒧𑒩𑒼 𑒬𑒱𑒫𑒖𑒲 𑒏𑒩𑒴 𑒂𑒨 𑒣𑓂𑒩𑒞𑒱𑒣𑒰𑒪॥
𑓒𑓘. 𑒧𑒯𑒹𑒬𑒫𑒰𑒢𑒲
𑒏𑒰𑒙𑒴 𑒠𑒳𑓁𑒐 𑒖𑓀𑒖𑒰𑒪,
𑒏𑒵𑒣𑒰 𑒏𑒩𑒴 𑒔𑒝𑓂𑒛𑒹𑒬𑓂𑒫𑒩 𑒠𑒰𑒢𑒲 𑒏𑒰𑒙𑒴 𑒠𑒳𑓁𑒐 𑒖𑓀𑒖𑒰𑒪॥
𑒖𑓂𑒨𑒼𑒿 𑒢𑒯𑒱 𑒠𑒨𑒰 𑒏𑒩𑒥 𑒬𑒱𑒫𑒬𑓀𑒏𑒩,
𑒏𑒏𑒩𑒰 𑒏𑒯𑒥 𑒯𑒧 𑒂𑒢,
𑒠𑒱𑒢-𑒠𑒱𑒢 𑒫𑒱𑒏𑒪 𑒏𑒞𑒹𑒏 𑒠𑒳𑓁𑒐 𑒏𑒰𑒙𑒥
𑒖𑓂𑒨𑒼𑒿 𑒢𑒹 𑒏𑒩𑒥 𑒁𑒯𑒰𑒿 𑒐𑒨𑒰𑒪॥
𑒖𑒙𑒰 𑒥𑒲𑒔 𑒑𑓀𑒑𑒰 𑒕𑒟𑒱 𑒬𑒼𑒦𑒱𑒞,
𑒔𑒢𑓂𑒠𑓂𑒩 𑒅𑒠𑒨 𑒁𑒕𑒱 𑒦𑒰𑒪,
𑒧𑒵𑒑𑒕𑒰𑒪𑒰 𑒛𑒰𑒧𑒩𑒳 𑒥𑒖𑒥𑒻𑒕𑒲,
𑒦𑒰𑒿𑒑 𑒣𑒲𑒥𑒱 𑒞𑒱𑒢𑒏𑒰𑒪॥
𑒪𑒨 𑒞𑓂𑒩𑒱𑒬𑒴𑒪𑒏𑒰𑒙𑒴 𑒠𑒳𑓁𑒐 𑒏𑒰𑒙𑒴,
𑒠𑒳𑓁𑒐 𑒯𑒧𑒩𑒼 𑒫𑒹𑒑𑒱 𑒏𑒩𑒴 𑒢𑒱𑒯𑒰𑒪,
𑒩𑒰𑒧𑒖𑒲 𑒏𑒹 𑒂𑒬𑒰 𑒏𑒹𑒫𑒪 𑒁𑒯𑒰𑒿𑒏𑒹,
𑒫𑒱𑒣𑒞𑒱 𑒯𑒩𑒴 𑒏𑒩𑒱 𑒐𑒨𑒰𑒪॥
𑓒𑓙. 𑒧𑒯𑒹𑒬𑒫𑒰𑒢𑒲
𑒬𑒱𑒫 𑒏𑒩𑒴 𑒢𑒹 𑒣𑓂𑒩𑒞𑒱𑒣𑒰𑒪,
𑒁𑒯𑒰𑒿 𑒮𑒢 𑒏𑒹 𑒁𑒕𑒱 𑒠𑒼𑒮𑒩 𑒠𑒨𑒰𑒪॥
𑒦𑒮𑓂𑒧 𑒁𑓀𑒑 𑒬𑒲𑒬 𑒑𑓀𑒑 𑒞𑒲𑒪𑒏 𑒔𑒢𑓂𑒠𑓂𑒩 𑒦𑒰𑒪,
𑒦𑒰𑒿𑒑 𑒣𑒲𑒥 𑒐𑒳𑒬𑒲 𑒩𑒯𑒲,
𑒩𑒯𑒲 𑒠𑒳𑒐𑒱𑒨𑒰 𑒣𑒩 𑒐𑒨𑒰𑒪।
𑒥𑒮𑒯𑒰 𑒣𑒩 𑒒𑒳𑒧𑒪 𑒤𑒱𑒩𑒲,
𑒦𑒴𑒞 𑒑𑒝 𑒮𑒰𑒟,
𑒛𑒧𑒩𑒴 𑒥𑒖𑒰𑒥𑒲 𑒞𑒲𑒢
𑒢𑒨𑒢 𑒁𑒕𑒱 𑒫𑒱𑒬𑒰𑒪॥
𑒗𑒰𑒛𑓃𑒲𑒧𑒹 𑒢𑒱𑒫𑒰𑒮 𑒏𑒩𑒲,
𑒪𑒳𑒙𑒥𑒟𑒱 𑒯𑒲𑒩𑒰 𑒪𑒰𑒪,
𑒩𑒰𑒧𑒖𑒲 𑒏𑒹 𑒥𑒹𑒩 𑒬𑒱𑒫 𑒦𑒹𑒪𑒰𑒯 𑒏𑓀𑒑𑒰𑒪॥
𑓓𑓐. 𑒧𑒯𑒹𑒬𑒫𑒰𑒢𑒲
𑒬𑒱𑒫𑒖𑒲 𑒏𑒹𑒯𑒹𑒢 𑒏𑒻𑒪𑒾𑒿 𑒠𑒲𑒢 𑒯𑒧𑒩 𑒏𑒹𑒯𑒹𑒢॥
𑒢𑒱𑒬𑒱𑒠𑒱𑒢 𑒔𑒻𑒢 𑒢𑒯𑒱
𑒔𑒱𑒢𑓂𑒞𑒰 𑒩𑒯𑒹 𑒦𑒱𑒢𑓂𑒢,
𑒞𑒰𑒯𑒴 𑒣𑒩 𑒞𑓂𑒩𑒱𑒫𑒱𑒡 𑒞𑒰𑒣
𑒏𑒩 𑒔𑒰𑒯𑒹 𑒐𑒱𑒢𑓂𑒢॥
𑒣𑒳𑒞𑓂𑒩 𑒠𑒰𑒩𑒰 𑒏𑒯𑒪 𑒏𑒱𑒕𑒳 𑒢𑒹 𑒮𑒳𑒢𑒻 𑒁𑒕𑒱 𑒏𑒰𑒁
𑒞𑒰𑒯𑒴 𑒣𑒩 𑒣𑒩𑒱𑒖𑒢 𑒪𑒻 𑒁𑒕𑒱 𑒯𑒧𑒩 𑒣𑓂𑒩𑒰𑒝॥
𑒁𑒞𑒱 𑒠𑒨𑒰𑒪 𑒖𑒰𑒢𑒱 𑒁𑒯𑒰𑒿𑒏 𑒬𑒩𑒝 𑒁𑒨𑒪𑒯𑒳𑒿 𑒏𑒰𑒢𑒱,
𑒩𑒰𑒧𑒖𑒲 𑒏𑒹 𑒠𑒳𑓁𑒐 𑒯𑒩𑒴 𑒁𑒬𑒩𑒝 𑒖𑒢 𑒖𑒰𑒢𑒱॥
𑓓𑓑. 𑒧𑒯𑒹𑒬𑒫𑒰𑒢𑒲
𑒫𑒱𑒡𑒱 𑒥𑒛𑓃 𑒠𑒳𑓁𑒐 𑒠𑒹𑒪,
𑒑𑒾𑒩𑒲 𑒠𑒰𑒃 𑒏𑒹 𑒋𑒯𑒹𑒢 𑒫𑒩 𑒏𑒱𑒨𑒰𑒏 𑒪𑒱𑒐𑒱 𑒠𑒹𑒪॥
𑒖𑒱𑒢𑒏𑒰 𑒖𑒰𑒞𑒱 𑒢𑒯𑒱 𑒏𑒳𑒪 𑒢𑒯𑒱 𑒣𑒩𑒱𑒖𑒢,
𑒑𑒱𑒩𑒱𑒣𑒩 𑒥𑒮𑒟𑒱 𑒁𑒏𑒹𑒪,
𑒛𑒧𑒩𑒴 𑒥𑒖𑒰𑒥𑒟𑒱 𑒢𑒰𑒔𑒟𑒱 𑒁𑒣𑒢 𑒏𑒱 𑒦𑒴𑒞 𑒣𑓂𑒩𑒹𑒞 𑒮𑒹 𑒐𑒹𑒪॥
𑒦𑒮𑓂𑒧 𑒁𑓀𑒑 𑒬𑒱𑒩 𑒬𑒼𑒦𑒱𑒞 𑒑𑓀𑒑𑒰,
𑒔𑒢𑓂𑒠𑓂𑒩 𑒅𑒠𑒨 𑒕𑒢𑒱 𑒦𑒰𑒪
𑒫𑒮𑓂𑒞𑓂𑒩 𑒋𑒏𑒼𑒙𑒰 𑒢𑒯𑒱 𑒕𑒢𑒱 𑒞𑒢 𑒣𑒩
𑒆𑒣𑒩𑒧𑒹 𑒕𑒢𑒱 𑒥𑒒𑒕𑒰𑒪,
𑒫𑒱𑒭𑒡𑒩 𑒏𑒞𑒹𑒏 𑒁𑓀𑒑𑒧𑒹 𑒪𑒙𑒏𑒪,
𑒏𑓀𑒚 𑒬𑒼𑒦𑒹 𑒧𑒳𑓀𑒛𑒧𑒰𑒪,
𑒩𑒰𑒧𑒖𑒲 𑒏𑒱𑒨𑒰𑒏 𑒗𑒐𑒻𑒕𑒲 𑒧𑒻𑒢𑒰
𑒑𑒾𑒩𑒲 𑒮𑒳𑒐 𑒏𑒩𑒞𑒲 𑒢𑒱𑒯𑒰𑒪॥
𑓓𑓒. 𑒫𑒱𑒯𑒰𑒑
𑒫𑒵𑒢𑓂𑒠𑒰𑒫𑒢 𑒠𑒹𑒐𑒱 𑒪𑒱𑒁 𑒔𑒯𑒳𑒍𑒩॥
𑒏𑒰𑒪𑒲 𑒠𑒯 𑒫𑓀𑒬𑒲𑒫𑒙 𑒠𑒹𑒐𑒴,
𑒏𑒳𑓀𑒖 𑒑𑒪𑒲 𑒮𑒦 𑒚𑒾𑒩,
𑒮𑒹𑒫𑒰 𑒏𑒳𑓀𑒖𑒧𑒹 𑒚𑒰𑒏𑒳𑒩 𑒠𑒩𑓂𑒬𑒢,
𑒢𑒰𑒔𑒱 𑒪𑒱𑒁 𑒋𑒏 𑒥𑒹𑒩॥
𑒖𑒧𑒳𑒢𑒰 𑒞𑒙𑒧𑒹 𑒒𑒰𑒙 𑒧𑒢𑒼𑒯𑒩,
𑒣𑒟𑒱𑒏 𑒩𑒯𑒹 𑒏𑒞 𑒚𑒾𑒩,
𑒏𑒠𑒧 𑒑𑒰𑒕𑒏𑒹 𑒗𑒳𑒏𑒪 𑒠𑒹𑒐𑒴,
𑒔𑒲𑒩 𑒡𑒩𑒹 𑒥𑒯𑒳 𑒚𑒾𑒩॥
𑒩𑒰𑒧𑒖𑒲 𑒫𑒻𑒏𑒳𑒝𑓂𑒚 𑒫𑒵𑒢𑓂𑒠𑒰𑒫𑒢
𑒒𑒴𑒧𑒱 𑒠𑒹𑒐𑒳 𑒮𑒦 𑒚𑒾𑒩,
𑒩𑒰𑒮𑒧𑒝𑓂𑒛 𑒪’ 𑒏𑒹 𑒬𑒼𑒦𑒰 𑒠𑒹𑒐𑒴,
𑒩𑒯𑒴 𑒠𑒱𑒫𑒮 𑒏𑒱𑒕𑒳 𑒎𑒩॥
𑓓𑓓. 𑒫𑒱𑒯𑒰𑒑
𑒧𑒟𑒳𑒩𑒰 𑒠𑒹𑒐𑒱 𑒪𑒱𑒁 𑒮𑒢 𑒚𑒾𑒩॥
𑒣𑒞𑓂𑒟𑒪 𑒏𑒹 𑒖𑒹 𑒒𑒰𑒙 𑒥𑒢𑒪 𑒁𑒕𑒱,
𑒥𑒯𑒳𑒞 𑒠𑒴𑒩 𑒞𑒏 𑒬𑒼𑒩,
𑒖𑒧𑒳𑒢𑒰 𑒖𑒲𑒏𑒹 𑒞𑒲𑒩𑒧𑒹,
𑒮𑒢𑓂𑒢 𑒩𑒯𑒟𑒱 𑒏𑒞𑒹 𑒚𑒾𑒩॥
𑒁𑒮𑓂𑒙 𑒡𑒰𑒞𑒳𑒏𑒹 𑒐𑒧𑓂𑒦𑒰 𑒠𑒹𑒐𑒴,
𑒥𑒱𑒖𑒪𑒲 𑒥𑒩𑒹 𑒮𑒦 𑒚𑒾𑒩,
𑒮𑒯𑒩 𑒥𑒲𑒔𑒧𑒹 𑒮𑒳𑒢𑓂𑒠𑒩 𑒠𑒹𑒐𑒴,
𑒥𑒰𑒪𑒳 𑒦𑒹𑒙𑒞 𑒥𑒯𑒳 𑒜𑓃𑒹𑒩॥
𑒠𑒳𑒢𑒴 𑒥𑒑𑒪𑒧𑒹 𑒢𑒰𑒪𑒰 𑒬𑒼𑒦𑒹,
𑒣𑒞𑓂𑒟𑒪 𑒏𑒹 𑒯𑒻 𑒖𑒼𑒩
𑒏𑓀𑒬𑒩𑒰𑒖𑒏𑒹 𑒏𑒲𑒪𑒰 𑒠𑒹𑒐𑒴
𑒠𑒹𑒫𑒏𑒲 𑒫𑒼 𑒫𑒮𑒳𑒠𑒹𑒫॥
𑒔𑒰𑒝𑒴𑒩 𑒧𑒳𑒭𑓂𑒙𑒱𑒏 𑒨𑒼𑒠𑓂𑒡𑒰 𑒠𑒹𑒐𑒴
𑒏𑒳𑒥𑒖𑒰 𑒏𑒹 𑒒𑒩 𑒎𑒩,
𑒩𑒰𑒡𑒰 𑒏𑒵𑒭𑓂𑒝𑒏𑒹 𑒧𑒢𑓂𑒠𑒱𑒩 𑒠𑒹𑒐𑒴,
𑒠𑒰𑒅 𑒧𑒢𑓂𑒠𑒱𑒩 𑒬𑒼𑒩॥
𑒕𑒼𑒛𑓃 𑒫𑒱𑒦𑒰𑒑
𑒩𑒰𑒧𑒖𑒲 𑒧𑒡𑒳𑒥𑒢, 𑒒𑒴𑒧𑒱 𑒪𑒱𑒁 𑒂𑒥,
𑒏𑒵𑒭𑓂𑒝 𑒥𑒮𑒟𑒱 𑒖𑒹𑒯𑒱 𑒚𑒾𑒩॥
𑒑𑒼𑒏𑒳𑒪 𑒢𑒢𑓂𑒠 𑒨𑒬𑒼𑒠𑒰 𑒠𑒹𑒐𑒴
𑒏𑒵𑒭𑓂𑒝 𑒗𑒳𑒪𑒰𑒅 𑒋𑒏 𑒥𑒹𑒩॥
𑓓𑓔. 𑒧𑒯𑒹𑒬𑒫𑒰𑒢𑒲
𑒦𑒼𑒪𑒰 𑒏𑒹𑒯𑒹𑒢 𑒦𑒹𑒪𑒾𑒿 𑒏𑒚𑒼𑒩,
𑒋𑒏 𑒥𑒹𑒩 𑒞𑒰𑒏𑒴 𑒯𑒧𑒩𑒯𑒳𑒿 𑒍𑒩॥
𑒦𑒮𑓂𑒧 𑒁𑓀𑒑 𑒬𑒱𑒩 𑒑𑓀𑒑 𑒫𑒱𑒩𑒰𑒖𑒹,
𑒔𑒢𑓂𑒠𑓂𑒩𑒦𑒰𑒪 𑒕𑒫𑒱 𑒖𑒼𑒩॥
𑒫𑒰𑒯𑒢 𑒥𑒮𑒯𑒰 𑒩𑒳𑒠𑓂𑒩𑒧𑒰𑒪 𑒑𑒩,
𑒦𑒴𑒞-𑒣𑓂𑒩𑒹𑒞𑒮𑒿 𑒐𑒹𑒪॥
𑒞𑓂𑒩𑒱𑒦𑒳𑒫𑒢 𑒣𑒞𑒱 𑒑𑒾𑒩𑒲-𑒣𑒞𑒱 𑒧𑒹𑒩𑒼 𑒖𑓂𑒨𑒼𑒿 𑒢𑒹 𑒯𑒹𑒩𑒥 𑒋𑒏 𑒥𑒹𑒩,
𑒞𑒾𑒿 𑒧𑒹𑒩𑒼 𑒠𑒳𑓁𑒐 𑒏𑒍𑒢 𑒯𑒩𑒐𑒞
𑒮𑒯𑒱 𑒢 𑒮𑒏𑒞 𑒖𑒲𑒫 𑒧𑒼𑒩॥
𑒥𑒛𑓃𑒹 𑒠𑒨𑒰𑒪𑒳 𑒖𑒰𑒢𑒱 𑒯𑒧 𑒁𑒨𑒪𑒯𑒳𑒿,
𑒁𑒯𑒰𑒿𑒏 𑒬𑒩𑒝 𑒮𑒴𑒢𑒱 𑒬𑒼𑒩,
𑒩𑒰𑒧-𑒖𑒲 𑒁𑒬𑓂𑒩𑒝 𑒂𑒨 𑒣𑒳𑒏𑒰𑒩𑒼,
𑒠𑒱𑒖𑒋 𑒠𑒩𑒮 𑒋𑒏 𑒥𑒹𑒩॥
𑓓𑓕. 𑒦𑒖𑒢 𑒫𑒱𑒢𑒨
𑒮𑒳𑒢𑒴-𑒮𑒳𑒢𑒴 𑒎 𑒦𑒑𑒫𑒰𑒢,
𑒁𑒯𑒰𑒿𑒏 𑒥𑒱𑒢𑒰 𑒖𑒰𑒃 𑒁𑒕𑒱
𑒂𑒥 𑒁𑒡𑒧 𑒧𑒼𑒩𑒰 𑒣𑓂𑒩𑒰𑒝॥
𑒏𑒞𑒹𑒏 𑒬𑒳𑒩𑒏𑒹 𑒧𑒢𑒰𑒥𑒪 𑒢𑒱𑒬𑒱𑒠𑒱𑒢
𑒏𑒱𑒨𑒼 𑒢 𑒮𑒳𑒢𑒪𑒢𑒱 𑒏𑒰𑒢,
𑒁𑒞𑒱 𑒠𑒨𑒰𑒪𑒳 𑒮𑒴𑒢𑒱 𑒁𑒯𑒰𑒿𑒏 𑒬𑒩𑒝 𑒁𑒨𑒪𑒯𑒳𑒿 𑒖𑒰𑒢𑒱॥
𑒥𑒢𑓂𑒡𑒳 𑒫𑒩𑓂𑒑 𑒏𑒳𑒙𑒳𑒧𑓂𑒥 𑒮𑒦 𑒕𑒟𑒱 𑒥𑒯𑒳𑒞 𑒡𑒢𑒫𑒰𑒢,
𑒯𑒧𑒩 𑒠𑒳𑓁𑒐 𑒠𑒹𑒐𑒱-𑒠𑒹𑒐𑒱 𑒯𑒳𑒢𑒏𑒾 𑒯𑒼𑒃 𑒕𑒢𑒱 𑒯𑒰𑒢𑒱॥
𑒩𑒰𑒧𑒖𑒲 𑒢𑒱𑒩𑒰𑒮 𑒋𑒏 𑒁𑒯𑒰𑒿𑒏 𑒂𑒬𑒰 𑒖𑒰𑒢𑒱,
𑒏𑒵𑒣𑒰 𑒏𑒩𑒲 𑒯𑒹𑒩𑒳 𑒢𑒰𑒟,
𑒁𑒬𑒩𑒝 𑒖𑒢 𑒖𑒰𑒢𑒱॥
𑓓𑓖. 𑒧𑒯𑒹𑒬𑒫𑒰𑒝𑒲
𑒠𑒹𑒐𑒳 𑒠𑒹𑒐𑒳 𑒌 𑒧𑒻𑒢𑒰,
𑒑𑒾𑒩𑒲 𑒠𑒰𑒃𑒏 𑒫𑒩 𑒂𑒨𑒪 𑒕𑒟𑒱,
𑒣𑒩𑒱𑒕𑒥 𑒯𑒧 𑒏𑒼𑒢𑒰।
𑒁𑓀𑒑𑒧𑒹 𑒦𑒮𑒧 𑒕𑒢𑒱,𑒦𑒰𑒪 𑒔𑒢𑓂𑒠𑓂𑒩𑒧𑒰
𑒫𑒱𑒭𑒡𑒩 𑒮𑒦 𑒁𑓀𑒑𑒧𑒹,
𑒯𑒧 𑒢𑒱𑒏𑒙 𑒖𑒰𑒨𑒥 𑒏𑒼𑒢𑒰॥
𑒥𑒰𑒒 𑒕𑒰𑒪 𑒆𑒣𑒩 𑒬𑒼𑒦𑒢𑒱, 𑒧𑒳𑒝𑓂𑒛𑒧𑒰𑒪 𑒑𑒯𑒢𑒰,
𑒦𑒴𑒞 𑒣𑓂𑒩𑒹𑒞 𑒮𑓀𑒑 𑒁𑒨𑒪𑒢𑒱, 𑒥𑒩𑒱𑒨𑒰𑒞𑒲 𑒏𑒼𑒢𑒰॥
𑒏𑒩 𑒞𑓂𑒩𑒱𑒬𑒴𑒪 𑒛𑒰𑒧𑒩𑒳 𑒥𑒒𑒕𑒰𑒪𑒰 𑒢𑒲𑒢 𑒢𑒨𑒢𑒰
𑒯𑒰𑒟𑒲 𑒒𑒼𑒛𑓃𑒰 𑒕𑒛𑓃𑒱 𑒣𑒰𑒪𑒏𑒲 𑒫𑒰𑒯𑒢 𑒥𑒛𑓃𑒠 𑒥𑒾𑒢𑒰॥
𑒏𑒯𑒟𑒱 𑒩𑒰𑒧𑒖𑒲 𑒮𑒳𑒢𑒳 𑒌 𑒧𑒢𑒰𑒃𑒢,
𑒃𑒯𑒼 𑒕𑒟𑒱 𑒣𑒩𑒧 𑒣𑓂𑒩𑒫𑒲𑒝𑒰,
𑒞𑒲𑒢 𑒪𑒼𑒏𑒏𑒹 𑒧𑒰𑒪𑒱𑒏 𑒟𑒲𑒏𑒰,
𑒏𑒩𑒳 𑒖𑒧𑒰𑒨 𑒁𑒣𑒢𑒰॥
𑓓𑓗. 𑒧𑒯𑒹𑒬𑒫𑒰𑒢𑒲
𑒋𑒯𑒹𑒢 𑒫𑒩 𑒏𑒩𑒥 𑒯𑒧 𑒑𑒾𑒩𑒲 𑒠𑒰𑒃𑒏𑒹 𑒏𑒼𑒢𑒰॥
𑒮𑒑𑒩 𑒠𑒹𑒯 𑒮𑒰𑒿𑒣 𑒕𑒢𑒱, 𑒥𑒰𑒒 𑒕𑒰𑒪 𑒍𑒜𑓃𑒢𑒰,
𑒦𑒮𑓂𑒧 𑒕𑒢𑒱 𑒠𑒹𑒯𑒧𑒹, 𑒫𑒱𑒏𑒙 𑒪𑒑𑒢𑒱 𑒏𑒼𑒢𑒰॥
𑒖𑒙𑒰𑒧𑒹 𑒑𑓀𑒑𑒰𑒖𑒲 𑒯𑒳𑒯𑒳𑒂𑒃 𑒕𑒟𑒱 𑒖𑒹𑒢𑒰,
𑒏𑒝𑓂𑒚𑒧𑒹 𑒧𑒳𑒝𑓂𑒛𑒧𑒰𑒪 𑒬𑒼𑒦𑒋 𑒕𑒢𑒱 𑒏𑒼𑒢𑒰॥
𑒧𑒰𑒟𑒹 𑒣𑒩 𑒔𑒢𑓂𑒠𑓂𑒩𑒧𑒰 𑒫𑒱𑒩𑒰𑒖𑒟𑒱 𑒞𑒱𑒪𑒏 𑒖𑒹𑒏𑒰𑒿,
𑒯𑒰𑒟𑒱 𑒒𑒼𑒛𑓃𑒰 𑒕𑒰𑒛𑓃𑒱 𑒣𑒰𑒪𑒏𑒲, 𑒥𑒛𑓃𑒠 𑒔𑒜𑓃𑒪 𑒥𑒾𑒢𑒰॥
𑒦𑒢𑒟𑒱 𑒩𑒰𑒧𑒖𑒲 𑒮𑒳𑒢𑒳 𑒌 𑒧𑒻𑒢𑒰, 𑒑𑒾𑒩𑒲 𑒠𑒰𑒃 𑒥𑒛𑓃𑒹 𑒦𑒰𑒑𑒹,
𑒣𑒾𑒪𑒢𑒱 𑒏𑒻𑒪𑒰𑒬𑒣𑒞𑒱 𑒌𑒢𑒰॥
𑓓𑓘. 𑒦𑒖𑒢 𑒫𑒱𑒯𑒰𑒑
𑒩𑒰𑒧 𑒥𑒱𑒢𑒳 𑒫𑒱𑒣𑒞𑒱 𑒯𑒩𑒹 𑒏𑒼 𑒧𑒼𑒩॥
𑒁𑒞𑒱 𑒠𑒨𑒰𑒪𑒳 𑒏𑒼𑒬𑒪 𑒣𑒻 𑒣𑓂𑒩𑒦𑒳𑒖𑒲,
𑒖𑒰𑒢𑒞 𑒮𑒦 𑒢𑒱𑒔𑒼𑒩,
𑒧𑒼 𑒮𑒧 𑒁𑒡𑒧 𑒏𑒳𑒙𑒱𑒪 𑒏𑒰𑒨𑒩 𑒐𑒪,
𑒦𑒹𑒙𑒞 𑒢𑒯𑒱 𑒏𑓂𑒨𑒼 𑒍𑒩॥
𑒞𑒰 𑒢𑒘 𑒬𑒩𑒝 𑒂𑒃 𑒯𑒩𑒱𑒏𑒹 𑒯𑒹𑒩𑒴 𑒣𑒪𑒏 𑒋𑒏 𑒥𑒹𑒩,
𑒑𑒝𑒱𑒏𑒰 𑒑𑒱𑒠𑓂𑒡 𑒁𑒖𑒰𑒧𑒱𑒪 𑒞𑒰𑒩𑒼
𑒣𑒞𑒱𑒞 𑒁𑒢𑒹𑒏𑒼 𑒜𑒹𑒩॥
𑒠𑒳𑓁𑒐 𑒮𑒰𑒑𑒩𑒧𑒹 𑒯𑒧 𑒣𑒛𑓃𑒪 𑒕𑒲,
𑒖𑓂𑒨𑒼𑒿 𑒢 𑒏𑒩𑒥 𑒣𑓂𑒩𑒦𑒳 𑒐𑒼𑒖,
𑒢𑒾𑒿 𑒧𑒹𑒩𑒼 𑒠𑒳𑓁𑒐 𑒏𑒾𑒢 𑒯𑒰𑒩𑒰𑒫𑒢,
𑒕𑒛𑓃𑒱 𑒁𑒯𑒰𑒿 𑒏𑒹 𑒎𑒩॥
𑒫𑒱𑒣𑒞𑒱 𑒢𑒱𑒠𑒰𑒢 𑒣𑒛𑓃𑒪 𑒁𑒕𑒱 𑒢𑒱𑒬𑒱 𑒠𑒱𑒢 𑒢𑒰𑒯𑒱 𑒮𑒯𑒰𑒨𑒏 𑒎𑒩,
𑒩𑒰𑒧𑒖𑒲 𑒁𑒬𑒩𑒝 𑒬𑒩𑒝 𑒩𑒰𑒐𑒳 𑒣𑓂𑒩𑒦𑒳,
𑒏𑒵𑒣𑒰 𑒠𑒵𑒭𑓂𑒙𑒱 𑒁𑒥 𑒯𑒹𑒩𑒱॥
𑓓𑓙. 𑒦𑒖𑒢 𑒫𑒱𑒯𑒰𑒑
𑒫𑒱𑒣𑒞𑒱 𑒧𑒼𑒩𑒰 𑒏𑒰𑒙𑒴 𑒎 𑒦𑒑𑒫𑒰𑒢॥
𑒋𑒏 𑒋𑒏 𑒩𑒱𑒣𑒳 𑒮𑒹 𑒦𑒰𑒮𑒱𑒞 𑒖𑒢,
𑒞𑒳𑒧 𑒩𑒰𑒐𑒼 𑒩𑒒𑒳𑒫𑒲𑒩,
𑒯𑒧𑒩𑒼 𑒁𑒢𑒹𑒏 𑒬𑒞𑓂𑒩𑒳 𑒪𑒞𑒥𑒻 𑒁𑒕𑒱,
𑒂𑒨 𑒏𑒩𑒴 𑒧𑒹𑒩𑒼 𑒞𑓂𑒩𑒰𑒝॥
𑒖𑒪 𑒥𑒱𑒔 𑒖𑒰𑒨 𑒑𑒖𑒹𑒢𑓂𑒠𑓂𑒩 𑒥𑒔𑒰𑒨𑒼,
𑒑𑒩𑒳𑒛𑓃 𑒕𑒛𑓃𑒱 𑒧𑒻𑒠𑒰𑒢,
𑒠𑒾𑒣𑒞𑒱 𑒔𑒲𑒩 𑒥𑒜𑓃𑒰𑒨 𑒮𑒦𑒰𑒧𑒹,
𑒜𑒹𑒩 𑒏𑒨𑒪 𑒁𑒮𑒧𑒰𑒢॥
𑒏𑒹𑒫𑒙 𑒫𑒰𑒢𑒩 𑒧𑒱𑒞𑓂𑒩 𑒥𑒢𑒰𑒍𑒪,
𑒑𑒱𑒠𑓂𑒡 𑒠𑒹𑒪 𑒢𑒱𑒖 𑒡𑒰𑒧,
𑒫𑒱𑒦𑒲𑒭𑒝𑒏𑒹 𑒬𑒩𑒝𑒧𑒹 𑒩𑒰𑒐𑒪
𑒩𑒰𑒖 𑒏𑒪𑓂𑒣 𑒦𑒩𑒱 𑒠𑒰𑒢॥
𑒂𑒩𑒼 𑒁𑒡𑒧 𑒁𑒢𑒹𑒏 𑒁𑒯𑒰𑒿 𑒞𑒰𑒩𑒪
𑒮𑒫𑒩𑒲 𑒥𑓂𑒨𑒰𑒡 𑒢𑒱𑒡𑒰𑒢,
𑒩𑒰𑒧𑒖𑒲 𑒬𑒩𑒝 𑒂𑒨𑒪 𑒕𑒟𑒱,
𑒠𑒳𑒐𑒲 𑒣𑒩𑒧 𑒢𑒱𑒠𑒰𑒢॥
𑓔𑓐. 𑒧𑒯𑒹𑒬𑒫𑒰𑒢𑒲
𑒯𑒧 𑒞’ 𑒗𑒰𑒛𑓃𑒲𑒐𑒝𑓂𑒛𑒲 𑒗𑒰𑒛𑓃𑒲𑒐𑒝𑓂𑒛𑒲 𑒯𑒩𑒠𑒧 𑒏𑒯𑒥𑒢𑒱 𑒎॥
𑒏𑒩-𑒞𑓂𑒩𑒱𑒬𑒴𑒪 𑒬𑒱𑒩 𑒑𑓀𑒑 𑒫𑒱𑒩𑒰𑒖𑒹,
𑒦𑒮𑒧 𑒁𑓀𑒑 𑒮𑒼𑒯𑒰𑒄,
𑒛𑒰𑒧𑒩𑒳-𑒡𑒰𑒩𑒲 𑒛𑒰𑒧𑒩𑒳𑒡𑒰𑒩𑒲 𑒯𑒩𑒠𑒧 𑒏𑒯𑒥𑒢𑒱 𑒎॥
𑒔𑒢𑓂𑒠𑓂𑒩𑒦𑒰𑒪 𑒡𑒰𑒩𑒲 𑒯𑒧 𑒏𑒯𑒥𑒢𑒱,
𑒫𑒱𑒭𑒡𑒩𑒡𑒰𑒩𑒲 𑒫𑒱𑒭𑒡𑒩𑒡𑒰𑒩𑒲 𑒯𑒩𑒠𑒧 𑒏𑒯𑒥𑒢𑒱 𑒎॥
𑒥𑒛𑓃𑒹 𑒠𑒨𑒰𑒪𑒳 𑒠𑒱𑒑𑒧𑓂𑒥𑒩 𑒏𑒯𑒥𑒢𑒱,𑒑𑒾𑒩𑒲-𑒬𑓀𑒏𑒩 𑒏𑒯𑒥𑒢𑒱 𑒎,
𑒩𑒰𑒧𑒖𑒲𑒏𑒹𑒿 𑒫𑒱𑒣𑒞𑓂𑒞𑒱 𑒯𑒙𑒰𑒅,
𑒁𑒬𑒩𑒝𑒡𑒰𑒩𑒲 𑒏𑒯𑒥𑒢𑒱 𑒎॥
𑓔𑓑. 𑒔𑒻𑒞 𑒢𑒰𑒩𑒠𑒲 𑒖𑒢𑒰𑒢𑒲
𑒥𑒱𑒞𑒪 𑒔𑒻𑒞 𑒇𑒞𑒳𑒩𑒰𑒖 𑒔𑒱𑒞 𑒦𑒹𑒪 𑒔𑒘𑓂𑒔𑒪 𑒯𑒼,
𑒧𑒠𑒪 𑒏𑒣𑒪 𑒢𑒱𑒠𑒰𑒢 𑒮𑒳𑒧𑒢 𑒮𑒩 𑒧𑒰𑒩𑒪 𑒯𑒼॥
𑒤𑒴𑒪𑒪 𑒥𑒹𑒪𑒱 𑒑𑒳𑒪𑒰𑒥 𑒩𑒮𑒰𑒪 𑒏𑒞 𑒧𑒼𑒖𑒩𑒪 𑒯𑒼,
𑒦𑓀𑒧𑒩 𑒑𑒳𑓀𑒖 𑒔𑒯𑒳𑒍𑒩 𑒔𑒻𑒢 𑒏𑒼𑒢𑒰 𑒣𑒰𑒨𑒥 𑒯𑒼॥
𑒨𑒳𑒑 𑒮𑒧 𑒥𑒲𑒞𑒪 𑒩𑒻𑒢 𑒦𑒫𑒢 𑒢𑒯𑒱 𑒦𑒰𑒫𑒹 𑒍,
𑒮𑒳𑒢𑒱-𑒮𑒳𑒢𑒱 𑒏𑒪𑒩𑒫 𑒮𑒼𑒩 𑒢𑒼𑒩 𑒏𑒞 𑒗𑒯𑒩𑒞 𑒯𑒼॥
𑒩𑒰𑒧𑒖𑒲 𑒞𑒹𑒖𑒥 𑒁𑒥 𑒣𑓂𑒩𑒰𑒝 𑒁𑒫𑒡𑒱 𑒏𑒞 𑒥𑒲𑒞𑒪 𑒯𑒼,
𑒧𑒡𑒳𑒣𑒳𑒩 𑒑𑒹𑒪 𑒦𑒑𑒫𑒰𑒢, 𑒣𑒪𑒙𑒱 𑒢𑒯𑒱 𑒂𑒨𑒪 𑒯𑒼॥
𑓔𑓒. 𑒦𑒖𑒢 𑒪𑒏𑓂𑒭𑓂𑒧𑒲𑒢𑒰𑒩𑒰𑒨𑒝
𑒪𑒏𑓂𑒭𑓂𑒧𑒲𑒢𑒰𑒩𑒰𑒨𑒝 𑒯𑒧𑒩𑒰 𑒍𑒩 𑒢𑒯𑒱 𑒞𑒏𑒨 𑒕𑒲 𑒍𑓁॥
𑒠𑒲𑒢 𑒠𑒨𑒰𑒪 𑒢𑒰𑒧 𑒁𑒯𑒰𑒿𑒏 𑒮𑒥 𑒏𑒯𑒻𑒨𑒹 𑒨𑒾
𑒯𑒧𑒩 𑒠𑒳𑒐𑓁 𑒠𑒹𑒐𑒱 𑒫𑒱𑒏𑒙 𑒁𑒯𑒴𑒿 𑒯𑒩𑒻 𑒕𑒲 𑒨𑒼𑓁॥
𑒥𑓂𑒨𑒰𑒡 𑒑𑒝𑒱𑒏𑒰 𑒑𑒵𑒡 𑒁𑒖𑒰𑒧𑒱𑒪 𑒑𑒖𑒏𑒹 𑒅𑒥𑒰𑒛𑓃𑒪 𑒨𑒼
𑒏𑒼𑒪 𑒏𑒱𑒩𑒰𑒞 𑒦𑒲𑒪𑒢𑒱 𑒁𑒡𑒧𑒏𑒹 𑒆𑒥𑒰𑒩𑒪 𑒨𑒼
𑒏𑒞𑒹𑒏 𑒣𑒻𑒞𑒏𑒹 𑒞𑒰𑒩𑒪 𑒁𑒯𑒰𑒿 𑒑𑒢𑒱 𑒏𑒹 𑒮𑒏𑒞 𑒨𑒼
𑒩𑒳𑒠𑓂𑒩𑒣𑒳𑒩𑒏𑒹 𑒦𑒼𑒪𑒰𑒢𑒰𑒟 𑒁𑒯𑒰𑒿 𑒡𑒰𑒧 𑒑𑒹𑒪𑒰𑒨𑒼𑓁॥
𑒖𑓂𑒨𑒼𑒿 𑒢𑒘 𑒯𑒧𑒩𑒰 𑒣𑒩 𑒏𑒵𑒣𑒰 𑒏𑒩𑒥 𑒯𑒧 𑒏𑒲 𑒏𑒩𑒥 𑒨𑒾
𑒩𑒰𑒧𑒖𑒲 𑒁𑒢𑒰𑒟 𑒋𑒏 𑒠𑒰𑒮 𑒩𑒰𑒐𑒴 𑒨𑒼𑓁॥
𑓔𑓓. 𑒧𑒯𑒹𑒬𑒫𑒰𑒢𑒲
𑒬𑒱𑒫 𑒯𑒹 𑒯𑒹𑒩𑒳 𑒣𑒪𑒏 𑒋𑒏 𑒥𑒹𑒩
𑒯𑒧 𑒕𑒲 𑒣𑒛𑓃𑒪 𑒠𑒳𑒐𑒮𑒰𑒑𑒩𑒧𑒹
𑒐𑒹𑒥𑒱 𑒅𑒞𑒰𑒩𑒳 𑒋𑒯𑒱 𑒥𑒹𑒩॥
𑒖𑓂𑒨𑒼𑒿 𑒢𑒘 𑒏𑒵𑒣𑒰 𑒏𑒩𑒥 𑒬𑒱𑒫𑒬𑓀𑒏𑒩
𑒯𑒧 𑒢𑒹 𑒖𑒱𑒨𑒥 𑒨𑒯𑒱 𑒎𑒩॥
𑒞𑒱𑒫𑒱𑒡 𑒞𑒰𑒣 𑒧𑒼𑒯𑒱 𑒂𑒨 𑒮𑒞𑒰𑒨𑒼
𑒪𑒹𑒢 𑒔𑒯𑒞 𑒖𑒲𑒫 𑒧𑒼𑒩॥
𑒩𑒰𑒧𑒖𑒲𑒏𑒹𑒿 𑒢𑒯𑒱 𑒎𑒩 𑒮𑒯𑒰𑒩𑒰, 𑒁𑒬𑒩𑒝 𑒬𑒩𑒝𑒧𑒹 𑒞𑒼𑒩॥
𑓔𑓔. 𑒮𑒧𑒠𑒰𑒅𑒢
𑒑𑒾𑒢𑒰𑒏𑒹 𑒠𑒱𑒢 𑒯𑒧𑒩 𑒪𑒑𑒔𑒰𑒋𑒪
𑒮𑒐𑒱 𑒯𑒹 𑒧𑒱𑒪𑒱 𑒪𑒱𑒁 𑒮𑒏𑒪 𑒮𑒧𑒰𑒖𑓁॥
𑒥𑒯𑒳𑒩𑒱𑒢𑒱 𑒯𑒧 𑒤𑒹𑒩 𑒂𑒨𑒥 𑒋𑒯𑒱 𑒖𑒑
𑒠𑒴𑒩𑒠𑒹𑒬 𑒮𑒰𑒮𑒳𑒩𑒏𑒹 𑒩𑒰𑒖𑓁॥
𑒢𑒱𑒮𑒹 𑒠𑒱𑒢 𑒦𑒴𑒪𑒱 𑒩𑒯𑒪𑒾𑒿 𑒮𑒐𑒱𑒏𑒹 𑒮𑓀𑒑
𑒢𑒯𑒱 𑒏𑒋𑒪 𑒁𑒣𑒢 𑒏𑒱𑒕𑒳 𑒏𑒰𑒖𑓁।
𑒁𑒫𑒔𑒱𑒞 𑒔𑒱𑒞𑓂𑒞 𑒔𑓀𑒔𑒪 𑒦𑒹𑒪 𑒥𑒳𑒗𑒱
𑒧𑒼𑒩𑒰 𑒏𑒼𑒢𑒰 𑒏𑒩𑒥 𑒯𑒧 𑒏𑒰𑒖𑓁।
𑒏𑒯𑒱 𑒮𑓀𑒑 𑒖𑒰𑒋 𑒮𑓀𑒠𑒹𑒬 𑒮𑓀𑒥𑒪 𑒏𑒱𑒕𑒳
𑒠𑒴𑒩 𑒠𑒹𑒬 𑒁𑒕𑒱 𑒥𑒰𑒙𑓁॥
𑒇𑒝 𑒣𑒻𑓀𑒔 𑒋𑒏𑒼 𑒢𑒯𑒱 𑒦𑒹𑒙𑒞
𑒧𑒰𑒩𑒘𑒧𑒹 𑒏𑒳𑒬 𑒏𑒰𑒿𑒙𑓁॥
𑒯𑒧𑒩𑒰 𑒣𑒩 𑒁𑒥 𑒏𑒵𑒣𑒰 𑒏𑒩𑒥 𑒮𑒦
𑒏𑓂𑒭𑒧𑒥 𑒬𑒹𑒭 𑒁𑒣𑒩𑒰𑒡
𑒩𑒰𑒧𑒖𑒲 𑒏𑒲 𑒣𑒕𑒞𑒰𑒋 𑒏𑒩𑒥 𑒁𑒥
𑒯𑒧 𑒠𑒴𑒩 𑒠𑒹𑒬 𑒏𑒼𑒢𑒰 𑒖𑒰𑒋𑒥𑓁॥
𑓔𑓕. 𑒧𑒯𑒹𑒬𑒫𑒰𑒝𑒲
𑒏𑒞𑒹𑒏 𑒏𑒚𑒱𑒢 𑒞𑒣 𑒏𑒋𑒪𑒯𑒳𑒿 𑒑𑒾𑒩𑒲
𑒋𑒯𑒱 𑒫𑒩 𑒪𑒹 𑒏𑒼𑒢𑒰॥
𑒮𑒰𑒿𑒣 𑒮𑒦 𑒁𑓀𑒑𑒧𑒹 𑒮𑒯 𑒮𑒯 𑒏𑒩𑒢𑒱 𑒏𑒼𑒢𑒰,
𑒥𑒰𑒒 𑒕𑒰𑒪 𑒆𑒣𑒩𑒧𑒹 𑒠𑒹𑒐𑒪,
𑒧𑒳𑒝𑓂𑒛𑒧𑒰𑒪 𑒑𑒯𑒢𑒰॥
𑒮𑓀𑒑𑒧𑒹 𑒖𑒹 𑒥𑒰𑒒 𑒕𑒢𑒱,𑒥𑒛𑓃𑒠 𑒔𑒜𑓃𑒢𑒰,
𑒦𑒴𑒞 𑒣𑓂𑒩𑒹𑒞 𑒮𑓀𑒑𑒧𑒹 𑒢𑒰𑒔𑒋 𑒕𑒢𑒱 𑒏𑒼𑒢𑒰॥
𑒑𑓀𑒑𑒰𑒖𑒲 𑒖𑒙𑒰𑒧𑒹 𑒯𑒳𑒯𑒳𑒂𑒃 𑒕𑒟𑒱 𑒏𑒼𑒢𑒰,
𑒔𑒢𑓂𑒠𑓂𑒩𑒧𑒰 𑒏𑒣𑒰𑒩 𑒣𑒩 𑒬𑒼𑒦𑒋 𑒕𑒟𑒱 𑒏𑒼𑒢𑒰।
𑒦𑒢𑒟𑒱 𑒩𑒰𑒧𑒖𑒲 𑒮𑒳𑒢𑒳𑒋 𑒧𑒻𑒢𑒰,
𑒬𑒳𑒦 𑒬𑒳𑒦 𑒏𑒹 𑒑𑒾𑒩𑒲 𑒫𑒱𑒫𑒰𑒯 𑒯𑒚 𑒕𑒼𑒛𑓃𑒴 𑒁𑒣𑒢𑒰॥

𑒫𑒱𑒠𑓂𑒨𑒰𑒣𑒞𑒱𑒏 𑒥𑒱𑒠𑒹𑒮𑒱𑒨𑒰- 𑒣𑒱𑒂 𑒠𑒹𑒮𑒰𑒿𑒞𑒩
𑒦𑒼𑒖𑒣𑒳𑒩𑒲𑒏 𑒮𑒰𑒯𑒱𑒞𑓂𑒨 𑒧𑒻𑒟𑒱𑒪𑒲𑒮𑒿 𑒏𑒧 𑒮𑒧𑒵𑒠𑓂𑒡 𑒁𑒕𑒱 𑒧𑒳𑒠𑒰 𑒮𑒹 𑒁𑒕𑒱 𑒧𑒰𑒞𑓂𑒩 𑒣𑒩𑒱𑒧𑒰𑒝𑒧𑒹, 𑒑𑒳𑒝𑒫𑒞𑓂𑒞𑒰𑒏 𑒠𑒵𑒭𑓂𑒙𑒱𑒧𑒹 𑒄 𑒏𑒞𑒹𑒏 𑒏𑓂𑒭𑒹𑒞𑓂𑒩𑒧𑒹 𑒂𑒑𑒰𑒿 𑒁𑒕𑒱। 𑒦𑒼𑒖𑒣𑒳𑒩𑒲𑒏 𑒦𑒱𑒐𑒰𑒛𑓃𑒲 𑒚𑒰𑒏𑒳𑒩𑒏 𑒥𑒱𑒠𑒹𑒮𑒱𑒨𑒰𑒏 𑒮𑒢𑓂𑒠𑒩𑓂𑒦𑒧𑒹 𑒯𑒧 𑒄 𑒏𑒯𑒱 𑒩𑒯𑒪 𑒕𑒲। 𑒦𑒱𑒐𑒰𑒛𑓃𑒲 𑒚𑒰𑒏𑒳𑒩 𑒏𑒪𑒏𑒞𑓂𑒞𑒰𑒧𑒹 𑒣𑓂𑒩𑒫𑒰𑒮𑒲 𑒩𑒯𑒟𑒱, 𑒒𑒳𑒩𑒱 𑒏𑒨 𑒁𑒋𑒪𑒰𑒯 𑒂 𑒦𑒼𑒖𑒣𑒳𑒩 𑒏𑓂𑒭𑒹𑒞𑓂𑒩𑒧𑒹 𑒁𑒣𑒢 𑒏𑒭𑓂𑒙𑒏 𑒫𑒩𑓂𑒝𑒢 𑒖𑒰𑒯𑒱 𑒧𑒩𑓂𑒧𑒮𑓂𑒣𑒩𑓂𑒬𑒲 𑒩𑒴𑒣𑒮𑒿 𑒑𑒰𑒧𑒹-𑒑𑒰𑒧𑒹 𑒒𑒳𑒧𑒱 𑒏𑒋 𑒂 𑒑𑒰𑒥𑒱 𑒏𑒋 𑒮𑒳𑒢𑒍𑒪𑒢𑓂𑒯𑒱 𑒮𑒹 𑒥𑒢𑒪 𑒥𑒱𑒠𑒹𑒮𑒱𑒨𑒰 𑒢𑒰𑒙𑒏। 𑒧𑒱𑒟𑒱𑒪𑒰𑒧𑒹 𑒣𑓂𑒩𑒫𑒰𑒮 𑒂𑒖𑒳𑒏 𑒒𑒙𑒢𑒰 𑒕𑒲, 𑒑𑒰𑒧𑒏-𑒑𑒰𑒧 𑒮𑒳𑒢𑓂𑒢 𑒦𑓄 𑒑𑒹𑒪 𑒁𑒕𑒱। 𑒧𑒱𑒟𑒱𑒪𑒰𑒏 𑒥𑒱𑒠𑒹𑒮𑒱𑒨𑒰 𑒪𑒼𑒏𑒢𑒱 𑒠𑒹𑒬𑒏 𑒏𑒼𑒢-𑒏𑒼𑒢𑒧𑒹 𑒣𑒮𑒩𑒱 𑒑𑒹𑒪 𑒕𑒟𑒱। 𑒧𑒳𑒠𑒰 𑒣𑒯𑒱𑒢𑒹 𑒦𑒼𑒖𑒣𑒳𑒩 𑒃𑒪𑒰𑒏𑒰 𑒖𑒹𑒏𑒰𑒿 𑒣𑓂𑒩𑒫𑒰𑒮𑒏 𑒒𑒙𑒢𑒰 𑒧𑒱𑒟𑒱𑒪𑒰𑒧𑒹 𑒢𑒯𑒱 𑒕𑒪। 𑒣𑓂𑒩𑒫𑒰𑒮 𑒧𑒼𑒩𑓀𑒑 𑒡𑒩𑒱 𑒮𑒲𑒧𑒱𑒞 𑒕𑒪 𑒖𑒹 𑒢𑒹𑒣𑒰𑒪𑒏 𑒧𑒱𑒟𑒱𑒪𑒰𑓀𑒔𑒪 𑒏𑓂𑒭𑒹𑒞𑓂𑒩 𑒁𑒕𑒱। 𑒂 𑒞𑒰𑒯𑒱𑒮𑒿 𑒧𑒻𑒟𑒱𑒪𑒲𑒧𑒹 𑒪𑒼𑒏𑒑𑒰𑒟𑒰𑒏 𑒮𑒴𑒏𑓂𑒭𑓂𑒧 𑒫𑒱𑒫𑒩𑒝𑒏 𑒥𑒛𑓃 𑒁𑒦𑒰𑒫, 𑒖𑒹 𑒁𑒕𑒱𑒨𑒼 𑒮𑒹 𑒪𑒼𑒏𑒑𑒰𑒟𑒰 𑒢𑒰𑒨𑒏𑒏 𑒫𑒱𑒫𑒩𑒝 𑒢𑒯𑒱 𑒫𑒩𑒢 𑒧𑒯𑒰𑒏𑒰𑒫𑓂𑒨𑒏 𑒢𑒰𑒨𑒏𑒏 𑒧𑒻𑒟𑒱𑒪𑒲𑒧𑒹 𑒫𑒱𑒫𑒩𑒝 𑒖𑒹𑒏𑒰𑒿 𑒁𑒕𑒱, 𑒂 𑒥𑒼𑒗𑒱𑒪 𑒁𑒕𑒱, 𑒦𑒱𑒐𑒰𑒛𑓃𑒲 𑒚𑒰𑒏𑒳𑒩𑒏 𑒥𑒱𑒠𑒹𑒮𑒱𑒨𑒰𑒏 𑒖𑒼𑒛𑓃 𑒢𑒯𑒱। 𑒮𑒪𑒯𑒹𑒮𑒏 𑒏𑒟𑒰𑒏 𑒫𑒱𑒫𑒩𑒝 𑒪𑒱𑒁, 𑒏𑓂𑒭𑒹𑒞𑓂𑒩𑒲𑒨 𑒣𑒩𑒱𑒡𑒱 𑒣𑒰𑒩 𑒏𑒩𑒱𑒞𑒹 𑒮𑒪𑒯𑒹𑒮 𑒩𑒰𑒖𑒰𑒮𑒿 𑒔𑒼𑒩 𑒥𑒢𑒱 𑒖𑒰𑒃𑒞 𑒕𑒟𑒱 𑒂 𑒔𑒼𑒩𑒮𑒿 𑒩𑒰𑒖𑒰। 𑒞𑒯𑒱𑒢𑒰 𑒔𑒴𑒯𑒛𑓃𑒧𑒪 𑒏𑓂𑒭𑒹𑒞𑓂𑒩𑒲𑒨 𑒣𑒩𑒱𑒡𑒱 𑒣𑒰𑒩 𑒏𑒩𑒱𑒞𑒹 𑒖𑒞𑒋 𑒮𑒪𑒯𑒹𑒮 𑒩𑒰𑒖𑒰 𑒥𑒢𑒻𑒞 𑒕𑒟𑒱 𑒍𑒞𑒋 𑒔𑒼𑒩 𑒥𑒢𑒱 𑒖𑒰𑒃𑒞 𑒕𑒟𑒱, 𑒂 𑒖𑒞𑒋 𑒮𑒪𑒯𑒹𑒮 𑒔𑒼𑒩 𑒏𑒯𑒪 𑒖𑒰𑒃𑒞 𑒕𑒟𑒱 𑒍𑒞𑒳𑒏𑓂𑒏𑒰 𑒩𑒰𑒖𑒰/ 𑒬𑒏𑓂𑒞𑒱𑒬𑒰𑒪𑒲𑒏 𑒩𑒴𑒣𑒹𑒿 𑒖𑒰𑒢𑒪 𑒖𑒰𑒃𑒞 𑒕𑒟𑒱। 𑒧𑒳𑒠𑒰 𑒋𑒯𑒱 𑒮𑒦𑒣𑒩 𑒏𑒼𑒢𑒼 𑒬𑒼𑒡 𑒢𑒯𑒱 𑒦𑒋 𑒮𑒏𑒪 𑒁𑒕𑒱। 𑒋𑒯𑒱 𑒏𑓂𑒩𑒧𑒧𑒹 𑒫𑒱𑒠𑓂𑒨𑒰𑒣𑒞𑒱𑒏 𑒣𑒠𑒰𑒫𑒪𑒲𑒏 𑒣𑒠 𑒮𑒦𑒧𑒹 𑒞𑒏𑒻𑒞 𑒯𑒧𑒩𑒰 𑒮𑒧𑒏𑓂𑒭 𑒫𑒱𑒦𑒱𑒢𑓂𑒢 𑒣𑓂𑒩𑒏𑒰𑒩𑒏 𑒑𑒲𑒞 𑒮𑒦 𑒮𑒼𑒗𑒰𑒿𑒧𑒹 𑒂𑒋𑒪। 𑒋𑒯𑒱𑒧𑒹 𑒖𑒹 𑒁𑒡𑒱𑒏𑒰𑓀𑒬 𑒕𑒪 𑒮𑒹 𑒩𑒯𑒋 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰𑒏 𑒫𑒱𑒩𑒯𑒏 𑒫𑒱𑒫𑒩𑒝 𑒂 𑒥𑒱𑒠𑒹𑒮𑒱𑒨𑒰𑒏 𑒖𑒹 𑒧𑒴𑒪 𑒏𑒢𑒮𑒹𑒣𑓂𑒙 𑒁𑒕𑒱- 𑒩𑒼𑒖𑒲-𑒩𑒼𑒙𑒲 𑒂 𑒂𑒖𑒲𑒫𑒱𑒏𑒰 𑒪𑒹𑒪 𑒧𑒼𑒢-𑒧𑒰𑒩𑒱 𑒏𑒋 𑒣𑓂𑒩𑒫𑒰𑒮, 𑒞𑒰𑒯𑒱𑒮𑒿 𑒤𑒩𑒰𑒏। 𑒞𑒐𑒢 𑒖𑒰 𑒏𑒋 𑒯𑒧𑒩𑒰 𑒏𑒱𑒕𑒳 𑒫𑒱𑒬𑒳𑒠𑓂𑒡 𑒥𑒱𑒠𑒹𑒮𑒱𑒨𑒰 𑒖𑒏𑒩𑒰 𑒫𑒱𑒠𑓂𑒨𑒰𑒣𑒞𑒱 𑒣𑒱𑒂-𑒠𑒹𑒮𑒰𑒿𑒞𑒩 𑒏𑒯𑒻𑒞 𑒕𑒟𑒱 𑒦𑒹𑒙𑒪। 𑒋𑒯𑒱𑒧𑒹 𑒮𑓂𑒫𑒰𑒦𑒰𑒫𑒱𑒏 𑒩𑒴𑒣𑒹𑒿 𑒁𑒡𑒱𑒏𑒰𑓀𑒬 𑒫𑒱𑒠𑓂𑒨𑒰𑒣𑒞𑒱𑒏 𑒢𑒹𑒣𑒰𑒪 𑒣𑒠𑒰𑒫𑒪𑒲𑒮𑒿 𑒦𑒹𑒙𑒪 𑒂 𑒋𑒏𑒙𑒰 𑒢𑒑𑒹𑒢𑓂𑒠𑓂𑒩𑒢𑒰𑒟 𑒑𑒳𑒣𑓂𑒞𑒏 𑒮𑓀𑒑𑓂𑒩𑒲𑒯𑒲𑒞 𑒣𑒠𑒰𑒫𑒪𑒲𑒮𑒿। 𑒧𑒼𑒩𑓀𑒑 𑒢𑒹𑒣𑒰𑒪 𑒮𑓂𑒟𑒱𑒞 𑒧𑒱𑒟𑒱𑒪𑒰𑒏 𑒦𑒰𑒑 𑒁𑒕𑒱 𑒂 𑒣𑓂𑒩𑒫𑒰𑒮 𑒪𑒹𑒪 𑒣𑓂𑒩𑒮𑒱𑒠𑓂𑒡 𑒕𑒪, 𑒮𑒹 𑒋𑒏𑒩 𑒮𑒧𑓂𑒦𑒰𑒫𑒱𑒞 𑒏𑒰𑒩𑒝।
𑒞𑒰𑒯𑒱 𑒂𑒡𑒰𑒩𑒣𑒩 𑒄 𑒮𑓀𑒏𑒪𑓂𑒣𑒱𑒞 𑒢𑒰𑒙𑒱𑒏𑒰 𑒣𑓂𑒩𑒮𑓂𑒞𑒳𑒞 𑒁𑒕𑒱।
𑒫𑒱𑒠𑓂𑒨𑒰𑒣𑒞𑒱𑒏 𑒣𑒱𑒂 𑒠𑒹𑒮𑒰𑒿𑒞𑒩
𑒠𑒵𑒬𑓂𑒨 𑓑
𑒮𑓂𑒙𑒹𑒖𑒣𑒩 𑒯𑒧𑒩 𑒥𑒱𑒠𑒹𑒮𑒱𑒨𑒰 𑒥𑒱𑒠𑒹𑒮 𑒢𑒼𑒏𑒩𑒲𑒏 𑒪𑒹𑒪 𑒥𑒱𑒠𑒰 𑒯𑒼𑒃𑒞 𑒕𑒟𑒱 𑒂 𑒖𑒳𑒫𑒞𑒲 𑒑𑒥𑒻𑒞 𑒕𑒟𑒱- 𑒑𑒲𑒞𑒏 𑒥𑒲𑒔𑒧𑒹 𑒋𑒏𑒙𑒰 𑒣𑒟𑒱𑒏 𑒁𑒥𑒻𑒞 𑒕𑒟𑒱 । 𑒧𑓀𑒔𑒏 𑒠𑒼𑒮𑒩 𑒕𑒼𑒛𑓃𑒣𑒩 𑒔𑒼𑒩 𑒪𑒼𑒏𑒢𑒱 𑒡𑒣𑒰𑒃𑒞 𑒢𑒳𑒏𑒰𑒨𑒪 𑒕𑒟𑒱। 𑒧𑓀𑒔𑒏 𑒠𑒼𑒮𑒩 𑒕𑒼𑒩𑒣𑒩 𑒏𑒼𑒞𑒫𑒰𑒪 𑒂 𑒬𑒳𑒦𑓂𑒩 𑒡𑒼𑒞𑒲𑒡𑒰𑒩𑒲 𑒣𑒹𑒙𑒣𑒩 𑒯𑒰𑒟 𑒠𑒹𑒢𑒹 𑒢𑒱𑒤𑒱𑒏𑒱𑒩 𑒥𑒻𑒮𑒪 𑒕𑒟𑒱।
𑒡𑒢𑒕𑒲 𑒩𑒰𑒑𑒹 (𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒫𑒱𑒠𑓂𑒨𑒰𑒣𑒞𑒱 𑒣𑒠𑒰𑒫𑒪𑒲)-
𑒯𑒧 𑒖𑒳𑒫𑒞𑒲, 𑒣𑒞𑒱 𑒑𑒹𑒪𑒰𑒯 𑒥𑒱𑒠𑒹𑒮। 𑒪𑒑 𑒢𑒯𑒱 𑒥𑒮𑒋 𑒣𑒛𑓃𑒅𑒮𑒱𑒯𑒳 𑒪𑒹𑒮।
𑒯𑒧 𑒨𑒳𑒫𑒞𑒲 𑒕𑒲 𑒂 𑒯𑒧𑒩 𑒣𑒞𑒱 𑒥𑒱𑒠𑒹𑒮 𑒑𑒹𑒪 𑒕𑒟𑒱। 𑒪𑒑𑒧𑒹 𑒣𑒛𑓃𑒼𑒮𑒲𑒏 𑒏𑒼𑒢𑒼 𑒁𑒫𑒬𑒹𑒭 𑒢𑒯𑒱 𑒁𑒕𑒱।

𑒮𑒰𑒮𑒳 𑒢𑒢𑒢𑓂𑒠 𑒏𑒱𑒕𑒳𑒂𑒍 𑒢𑒯𑒱 𑒖𑒰𑒢। 𑒂𑒿𑒐𑒱 𑒩𑒞𑒾𑒢𑓂𑒡𑒲, 𑒮𑒳𑒢𑒋 𑒢 𑒏𑒰𑒢।
𑒮𑒰𑒮 𑒂 𑒢𑒢𑒠𑒱 𑒮𑒹𑒯𑒼 𑒏𑒱𑒕𑒳 𑒢𑒯𑒱 𑒥𑒳𑒗𑒻𑒞 𑒕𑒟𑒱। 𑒯𑒳𑒢𑒏𑒩 𑒮𑒦𑒏 𑒂𑒿𑒐𑒱𑒧𑒹 𑒩𑒞𑒾𑒿𑒡𑒲 𑒕𑒢𑓂𑒯𑒱 𑒂 𑒍 𑒮𑒦 𑒏𑒰𑒢𑒮𑒿 𑒮𑒹𑒯𑒼 𑒏𑒱𑒕𑒳 𑒢𑒯𑒱 𑒮𑒳𑒢𑒻𑒞 𑒕𑒟𑒱।

𑒖𑒰𑒑𑒯 𑒣𑒟𑒱𑒏, 𑒖𑒰𑒯 𑒖𑒢𑒳 𑒦𑒼𑒩। 𑒩𑒰𑒞𑒱 𑒁𑒢𑓂𑒡𑒰𑒩, 𑒑𑒰𑒧 𑒥𑒛𑓃 𑒔𑒼𑒩।
𑒯𑒹 𑒣𑒟𑒱𑒏! 𑒢𑒱𑒢𑓂𑒢𑒏𑒹𑒿 𑒞𑓂𑒨𑒰𑒑𑒴। 𑒏𑒰𑒪𑓂𑒯𑒱 𑒦𑒼𑒩𑒧𑒹 𑒢𑒯𑒱 𑒂𑒆। 𑒁𑒢𑓂𑒯𑒩𑒱𑒨𑒰 𑒩𑒰𑒞𑒱 𑒁𑒕𑒱 𑒂 𑒑𑒰𑒧𑒧𑒹 𑒥𑒛𑓂𑒛 𑒔𑒼𑒩 𑒮𑒦 𑒁𑒕𑒱।

𑒮𑒣𑒢𑒹𑒯𑒳 𑒦𑒰𑒍𑒩 𑒢 𑒠𑒹𑒁 𑒏𑒼𑒙𑒥𑒰𑒩। 𑒣𑒍𑒪𑒹𑒯𑒳 𑒪𑒼𑒞𑒹 𑒢 𑒏𑒩𑒋 𑒥𑒱𑒔𑒰𑒩।
𑒏𑒼𑒞𑒥𑒰𑒪 𑒮𑓂𑒫𑒣𑒢𑒯𑒳𑒧𑒹 𑒣𑒯𑒩𑒰 𑒢𑒯𑒱 𑒠𑒻𑒞 𑒁𑒕𑒱 𑒂 𑒢𑒼𑒞 𑒠𑒹𑒪𑒼𑒣𑒩 𑒫𑒱𑒔𑒰𑒩 𑒢𑒯𑒱 𑒏𑒩𑒻𑒞 𑒁𑒕𑒱।

𑒢𑒵𑒣 𑒃𑒟𑒱 𑒏𑒰𑒯𑒳 𑒏𑒩𑒟𑒱 𑒢𑒯𑒱 𑒮𑒰𑒞𑒱।
𑒣𑒳𑒩𑒐 𑒧𑒯𑒞 𑒮𑒥 𑒯𑒧𑒩 𑒮𑒖𑒰𑒞𑒱॥
𑒞𑒰𑒯𑒱 𑒠𑓂𑒫𑒰𑒩𑒹 𑒩𑒰𑒖𑒰 𑒏𑒏𑒩𑒼 𑒠𑒝𑓂𑒛 𑒢𑒯𑒱 𑒠𑒻𑒞 𑒕𑒟𑒱 𑒂 𑒮𑒦𑒙𑒰 𑒣𑒻𑒒 𑒪𑒼𑒏 𑒋𑒏𑒹 𑒩𑓀𑒑 𑒕𑒟𑒱।

𑒫𑒱𑒠𑓂𑒨𑒰𑒣𑒞𑒱 𑒏𑒫𑒱 𑒋𑒯 𑒩𑒮 𑒑𑒰𑒥। 𑒅𑒏𑒳𑒞𑒱𑒯𑒱 𑒦𑒰𑒫 𑒖𑒢𑒰𑒥।
𑒫𑒱𑒠𑓂𑒨𑒰𑒣𑒞𑒱 𑒏𑒫𑒱 𑒄 𑒩𑒮 𑒑𑒥𑒻𑒞 𑒕𑒟𑒱। 𑒅𑒏𑒞𑒲𑒮𑒿 𑒦𑒰𑒫 𑒖𑒢𑒰 𑒩𑒯𑒪𑒲𑒯 𑒁𑒕𑒱।

𑒫𑒱𑒠𑓂𑒨𑒰𑒣𑒞𑒱 𑒏𑒫𑒱𑒏 𑒣𑓂𑒩𑒫𑒹𑒬 𑒯𑒼𑒃𑒞 𑒕𑒢𑓂𑒯𑒱। 𑒏𑒼𑒞𑒫𑒰𑒪𑒏 𑒪𑒑 𑒬𑒳𑒦𑓂𑒩-𑒡𑒼𑒞𑒲𑒡𑒰𑒩𑒲 𑒂 𑒋𑒏𑒙𑒰 𑒑𑒩𑒲𑒥𑒏 𑒂𑒑𑒧𑒢 𑒯𑒼𑒃𑒞 𑒁𑒕𑒱। 𑒏𑒼𑒞𑒫𑒰𑒪 𑒂𑒦𑒰𑒮𑒮𑒿 𑒡𑒼𑒞𑒲𑒡𑒰𑒩𑒲𑒏 𑒣𑒏𑓂𑒭𑒧𑒹 𑒢𑒱𑒩𑓂𑒝𑒨 𑒮𑒳𑒢𑒥𑒻𑒞 𑒕𑒟𑒱 𑒂 𑒧𑓀𑒔𑒏 𑒠𑒼𑒮𑒩 𑒏𑒼𑒢𑒣𑒩 𑒥𑒻𑒮𑒪𑒱 𑒖𑒳𑒫𑒞𑒲 𑒧𑒰𑒟 𑒣𑒱𑒙𑒻𑒞 𑒕𑒟𑒱। 𑒑𑒲𑒞𑒏 𑒁𑒢𑓂𑒞𑒱𑒧 𑒔𑒰𑒩𑒱 𑒣𑒰𑒿𑒞𑒲 𑒫𑒱𑒠𑓂𑒨𑒰𑒣𑒞𑒱 𑒏𑒫𑒱 𑒑𑒥𑒻𑒞 𑒕𑒟𑒱।
𑒠𑒵𑒬𑓂𑒨 𑓒
𑒖𑒳𑒫𑒞𑒲 𑒋𑒏𑒙𑒰 𑒠𑒼𑒏𑒰𑒢 𑒐𑒼𑒪𑒢𑒹 𑒕𑒟𑒱, 𑒮𑒰𑓀𑒏𑒹𑒞𑒱𑒏। 𑒧𑓀𑒔𑒏 𑒠𑒼𑒮𑒩 𑒏𑒰𑒞𑒮𑒿 𑒮𑒰𑒮𑒳 𑒂 𑒢𑒢𑒠𑒱𑒏𑒹𑒿 𑒖𑒋𑒥𑒰𑒏 𑒂 𑒏𑓂𑒩𑒹𑒞𑒰 𑒣𑒟𑒱𑒏𑒏 𑒁𑒋𑒥𑒰𑒏 𑒮𑓀𑒑 𑒨𑒳𑒫𑒞𑒲 𑒑𑒹𑒢𑒰𑒃 𑒬𑒳𑒩𑒴 𑒏𑒩𑒻𑒞 𑒕𑒟𑒱 𑒂 𑒮𑒦 𑒣𑒰𑒿𑒞𑒱𑒏 𑒥𑒰𑒠 𑒫𑒱𑒠𑓂𑒨𑒰𑒣𑒞𑒱 𑒧𑓀𑒔𑒣𑒩 𑒁𑒥𑒻𑒞 𑒕𑒟𑒱 𑒁𑒩𑓂𑒟 𑒏𑒯𑒻𑒞 𑒕𑒟𑒱 𑒂 𑒁𑓀𑒡𑒏𑒰𑒩𑒧𑒹 𑒫𑒱𑒪𑒲𑒢 𑒦𑓄 𑒖𑒰𑒃𑒞 𑒕𑒟𑒱। 𑒧𑒳𑒠𑒰 𑒁𑒢𑓂𑒞𑒱𑒧 𑒣𑒰𑒿𑒞𑒲 𑒫𑒱𑒠𑓂𑒨𑒰𑒣𑒞𑒱 𑒑𑒥𑒻𑒞 𑒕𑒟𑒱 𑒂 𑒖𑒳𑒫𑒞𑒲 𑒍𑒏𑒩 𑒁𑒩𑓂𑒟 𑒥𑒿𑒔𑒻𑒞 𑒕𑒟𑒱।
𑒧𑒰𑒪𑒫𑒩𑒰𑒑𑒹 (𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒫𑒱𑒠𑓂𑒨𑒰𑒣𑒞𑒱 𑒣𑒠𑒰𑒫𑒪𑒲)-
𑒥𑒛𑓃𑒱 𑒖𑒳𑒛𑓃𑒱 𑒋𑒯𑒱 𑒞𑒩𑒳𑒏 𑒕𑒰𑒯𑒩𑒱, 𑒚𑒰𑒧𑒹 𑒚𑒰𑒧𑒹 𑒥𑒮 𑒑𑒰𑒧।
𑒋𑒯𑒱 𑒑𑒰𑒕𑒏 𑒕𑒰𑒯 𑒥𑒛𑓂𑒛 𑒬𑒲𑒞𑒪 𑒁𑒕𑒱। 𑒚𑒰𑒧𑒹-𑒚𑒰𑒧 𑒑𑒰𑒧 𑒥𑒮𑒪 𑒁𑒕𑒱।
𑒯𑒧 𑒋𑒏𑒮𑒩𑒱, 𑒣𑒱𑒂 𑒠𑒹𑒮𑒰𑒿𑒞𑒩, 𑒢𑒯𑒱 𑒠𑒳𑒩𑒖𑒢 𑒢𑒰𑒧।
𑒯𑒧 𑒁𑒮𑒑𑒩𑒱 𑒕𑒲, 𑒣𑓂𑒩𑒱𑒨 𑒣𑒩𑒠𑒹𑒮𑒧𑒹 𑒕𑒟𑒱, 𑒏𑒞𑒯𑒳 𑒠𑒳𑒩𑓂𑒖𑒢𑒏 𑒢𑒰𑒧 𑒢𑒯𑒱 𑒁𑒕𑒱।

𑒣𑒟𑒱𑒏 𑒯𑒹, 𑒋𑒟𑒰 𑒪𑒹𑒯 𑒥𑒱𑒮𑒩𑒰𑒧।
𑒯𑒹 𑒣𑒟𑒱𑒏! 𑒋𑒞𑒨 𑒫𑒱𑒬𑓂𑒩𑒰𑒧 𑒏𑒩𑒴।
𑒖𑒞 𑒥𑒹𑒮𑒰𑒯𑒥 𑒏𑒱𑒕𑒳 𑒢 𑒧𑒯𑒒, 𑒮𑒥𑒹 𑒧𑒱𑒪 𑒋𑒯𑒱 𑒚𑒰𑒧।
𑒖𑒹 𑒏𑒱𑒕𑒳 𑒏𑒲𑒢𑒥, 𑒏𑒱𑒕𑒳𑒍 𑒧𑒯𑒑 𑒢𑒯𑒱। 𑒮𑒦 𑒏𑒱𑒕𑒳 𑒋𑒞𑒋 𑒦𑒹𑒙𑒞।
𑒮𑒰𑒮𑒳 𑒢𑒯𑒱 𑒒𑒩, 𑒣𑒩 𑒣𑒩𑒱𑒖𑒢 𑒢𑒢𑒢𑓂𑒠 𑒮𑒯𑒖𑒹 𑒦𑒼𑒩𑒱।
𑒒𑒩𑒧𑒹 𑒮𑒰𑒮𑒳 𑒢𑒯𑒱 𑒕𑒟𑒱, 𑒣𑒩𑒱𑒖𑒢 𑒠𑒴𑒩𑒧𑒹 𑒕𑒟𑒱 𑒂 𑒢𑒢𑒠𑒱 𑒮𑓂𑒫𑒦𑒰𑒫𑒮𑒿 𑒮𑒩𑒪 𑒕𑒟𑒱।
𑒋𑒞𑒯𑒳 𑒣𑒟𑒱𑒏 𑒫𑒱𑒧𑒳𑒐 𑒖𑒰𑒋𑒥 𑒞𑒥𑒹 𑒁𑒢𑒰𑒃𑒞𑒱 𑒧𑒼𑒩𑒱।
𑒋𑒞𑒹𑒏 𑒩𑒯𑒱𑒞𑒼 𑒖𑒹 𑒁𑒯𑒰𑒿 𑒫𑒱𑒧𑒳𑒐 𑒦𑒋 𑒖𑒰𑒋𑒥 𑒞𑒿 𑒂𑒥 𑒯𑒧𑒩 𑒮𑒏𑓂𑒏 𑒢𑒯𑒱 𑒁𑒕𑒱।
𑒦𑒢 𑒫𑒱𑒠𑓂𑒨𑒰𑒣𑒞𑒱 𑒮𑒳𑒢 𑒞𑒘𑒹 𑒖𑒳𑒫𑒞𑒲 𑒖𑒹 𑒣𑒳𑒩 𑒣𑒩𑒏 𑒂𑒮।
𑒫𑒱𑒠𑓂𑒨𑒰𑒣𑒞𑒱 𑒏𑒯𑒻𑒞 𑒕𑒟𑒱- 𑒯𑒹 𑒨𑒳𑒫𑒞𑒲! 𑒮𑒳𑒢𑒴 𑒖𑒹 𑒁𑒯𑒰𑒿 𑒠𑒼𑒮𑒩𑒰𑒏 𑒂𑒮 𑒣𑒴𑒩𑒰 𑒏𑒩𑒻𑒞 𑒕𑒲।
𑒠𑒵𑒬𑓂𑒨 𑓓
𑒋𑒯𑒱 𑒑𑒲𑒞𑒧𑒹 𑒫𑒱𑒠𑓂𑒨𑒰𑒣𑒞𑒱 𑒢𑒯𑒱 𑒕𑒟𑒱। 𑒖𑒳𑒫𑒞𑒲𑒏 𑒢𑒢𑒠𑒱 𑒣𑒟𑒱𑒏𑒏𑒹𑒿 𑒠𑒥𑒰𑒩𑒱 𑒩𑒯𑒪 𑒕𑒟𑒱, 𑒮𑒹 𑒠𑒹𑒐𑒱 𑒖𑒳𑒫𑒞𑒲𑒏𑒹𑒿 𑒁𑒣𑒢 𑒣𑒱𑒂 𑒠𑒹𑒮𑒰𑒿𑒞𑒩 𑒧𑒼𑒢 𑒣𑒛𑓃𑒱 𑒖𑒰𑒃𑒞 𑒕𑒢𑓂𑒯𑒱। 𑒍 𑒢𑒢𑒠𑒱 𑒂 𑒮𑒐𑒲𑒏𑒹𑒿 𑒮𑒧𑓂𑒥𑒼𑒡𑒱𑒞 𑒏𑒋 𑒑𑒲𑒞 𑒑𑒥𑒻𑒞 𑒕𑒟𑒱। 𑒑𑒲𑒞𑒏 𑒁𑒩𑓂𑒟 𑒮𑒐𑒲 𑒏𑒯𑒻𑒞 𑒕𑒟𑒱, 𑒮𑒦 𑒣𑒰𑒿𑒞𑒲𑒏 𑒥𑒰𑒠।
𑒡𑒢𑒕𑒲𑒩𑒰𑒑𑒹 (𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒫𑒱𑒠𑓂𑒨𑒰𑒣𑒞𑒱 𑒣𑒠𑒰𑒫𑒪𑒲)-
𑒣𑒩𑒞𑒯 𑒣𑒩𑒠𑒹𑒮, 𑒣𑒩𑒯𑒱𑒏 𑒂𑒮। 𑒫𑒱𑒧𑒳𑒐 𑒢 𑒏𑒩𑒱𑒁, 𑒁𑒥𑒮 𑒠𑒱𑒮 𑒥𑒰𑒮।
𑒣𑒩𑒠𑒹𑒮𑒧𑒹 𑒢𑒱𑒞𑓂𑒨 𑒠𑒼𑒮𑒩𑒰𑒏 𑒂𑒮 𑒩𑒯𑒻𑒞 𑒁𑒕𑒱। 𑒮𑒹 𑒏𑒏𑒩𑒼 𑒫𑒱𑒧𑒳𑒐 𑒢𑒯𑒱 𑒏𑒩𑒥𑒰𑒏 𑒔𑒰𑒯𑒲। 𑒁𑒫𑒬𑓂𑒨 𑒫𑒰𑒮 𑒠𑒹𑒥𑒰𑒏 𑒔𑒰𑒯𑒲।
𑒋𑒞𑒯𑒱 𑒖𑒰𑒢𑒱𑒁 𑒮𑒐𑒱 𑒣𑒱𑒁𑒞𑒧-𑒏𑒟𑒰।
𑒯𑒹 𑒮𑒐𑒲 ! 𑒣𑓂𑒩𑒱𑒨𑒞𑒧𑒏 𑒪𑒹𑒪 𑒋𑒞𑒥𑒲 𑒏𑒟𑒰 𑒥𑒳𑒗𑒴।
𑒦𑒪 𑒧𑒢𑓂𑒠 𑒢𑒢𑓂𑒠𑒢 𑒯𑒹 𑒧𑒢𑒹 𑒁𑒢𑒳𑒧𑒰𑒢𑒱। 𑒣𑒟𑒱𑒏𑒏𑒹𑒿 𑒢 𑒥𑒼𑒪𑒱𑒁 𑒙𑒴𑒙𑒪𑒱 𑒥𑒰𑒢𑒱।
𑒯𑒹 𑒢𑒢𑒠𑒱! 𑒧𑒼𑒢𑒧𑒹 𑒢𑒲𑒏-𑒁𑒡𑒪𑒰𑒯𑒏 𑒁𑒢𑒳𑒧𑒰𑒢 𑒏𑓄 𑒣𑒟𑒱𑒏𑒏𑒹𑒿 𑒙𑒴𑒙𑒪 𑒑𑒣 𑒢𑒯𑒱 𑒥𑒰𑒖𑒴।

𑒔𑒩𑒢-𑒣𑒐𑒰𑒩𑒢, 𑒂𑒮𑒢-𑒠𑒰𑒢। 𑒧𑒡𑒳𑒩𑒯𑒳 𑒫𑒔𑒢𑒹 𑒏𑒩𑒱𑒁 𑒮𑒧𑒡𑒰𑒢।
𑒔𑒩𑒝 𑒣𑒐𑒰𑒩𑒴, 𑒂𑒮𑒢 𑒠𑒱𑒨𑒾𑒏 𑒂 𑒧𑒡𑒳𑒩 𑒫𑒔𑒢 𑒏𑒯𑒱 𑒮𑒰𑒢𑓂𑒞𑓂𑒫𑒢𑒰 𑒠𑒱𑒨𑒢𑓂𑒯𑒳।
𑒋 𑒮𑒐𑒱 𑒁𑒢𑒳𑒔𑒱𑒞 𑒋𑒞𑒹 𑒠𑒳𑒩 𑒖𑒰𑒋। 𑒂𑒍𑒩 𑒏𑒩𑒱𑒁 𑒖𑒞 𑒁𑒡𑒱𑒏 𑒥𑒛𑓃𑒰𑒃।
𑒯𑒹 𑒮𑒐𑒲 𑒣𑒟𑒱𑒏 𑒋𑒞𑒨𑒮𑒿 𑒠𑒴𑒩 𑒖𑒰𑒨𑒞 𑒮𑒹 𑒁𑒢𑒳𑒔𑒱𑒞 𑒮𑒹 𑒍𑒏𑒩 𑒂𑒩 𑒥𑒛𑓃𑒰𑒄 𑒏𑒩𑒴।
𑒠𑒵𑒬𑓂𑒨 𑓔
𑒖𑒳𑒫𑒞𑒲 𑒂 𑒢𑒢𑒠𑒱 𑒢𑒑𑒩 𑒂𑒥𑒱 𑒚𑒾𑒩 𑒡𑒹𑒢𑒹 𑒕𑒟𑒱। 𑒋𑒏𑒙𑒰 𑒣𑒟𑒱𑒏 𑒂𑒥𑒱 𑒂𑒬𑓂𑒩𑒨 𑒧𑒿𑒑𑒻𑒞 𑒕𑒟𑒱 𑒞𑒿 𑒖𑒳𑒫𑒞𑒲 𑒑𑒥𑒻𑒞 𑒕𑒟𑒱 𑒂 𑒢𑒢𑒠𑒱 𑒮𑒦 𑒣𑒰𑒿𑒞𑒲𑒏 𑒥𑒰𑒠 𑒁𑒩𑓂𑒟 𑒏𑒯𑒻𑒞 𑒕𑒟𑒱। 𑒥𑒲𑒔𑒧𑒹 𑒔𑒰𑒩𑒱 𑒣𑒰𑒿𑒞𑒲 𑒥𑒱𑒢𑒰 𑒁𑒩𑓂𑒟𑒏 𑒢𑒹𑒣𑒟𑓂𑒨𑒮𑒿 𑒁𑒥𑒻𑒞 𑒁𑒕𑒱। 𑒤𑒹𑒩 𑒖𑒳𑒫𑒞𑒲 𑒂𑒑𑒰𑒿 𑒑𑒥𑒻𑒞 𑒕𑒟𑒱 𑒂 𑒢𑒢𑒠𑒱 𑒁𑒩𑓂𑒟 𑒥𑒖𑒻𑒞 𑒕𑒟𑒱। 𑒁𑒢𑓂𑒞𑒧𑒹 𑒁𑒢𑓂𑒞𑒱𑒧 𑒠𑒴 𑒣𑒰𑒿𑒞𑒲 𑒫𑒱𑒠𑓂𑒨𑒰𑒣𑒞𑒱 𑒂𑒥𑒱 𑒑𑒥𑒻𑒞 𑒕𑒟𑒱। 𑒠𑒵𑒬𑓂𑒨𑒏 𑒁𑒢𑓂𑒞𑒧𑒹 𑒢𑒢𑒠𑒱 𑒏𑒯𑒻𑒞 𑒕𑒟𑒱 𑒖𑒹 𑒯𑒧 𑒖𑒹 𑒍𑒯𑒱 𑒠𑒱𑒢 𑒣𑒟𑒱𑒏𑒏𑒹𑒿 𑒠𑒥𑒰𑒩𑒱 𑒩𑒯𑒪 𑒕𑒪𑒯𑒳𑒿 𑒮𑒹 𑒁𑒯𑒰𑒿𑒏𑒹𑒿 𑒢𑒲𑒏 𑒢𑒯𑒱 𑒪𑒰𑒑𑒪 𑒩𑒯𑒋, 𑒧𑒳𑒠𑒰 𑒂𑒃 𑒣𑒟𑒱𑒏𑒏𑒹𑒿 𑒂𑒬𑓂𑒩𑒨 𑒏𑒱𑒋𑒏 𑒢𑒯𑒱 𑒠𑒹𑒪𑒱𑒨𑒻𑒏।
𑒏𑒼𑒪𑒰𑒩𑒩𑒰𑒑𑒹 (𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒫𑒱𑒠𑓂𑒨𑒰𑒣𑒞𑒱 𑒣𑒠𑒰𑒫𑒪𑒲)-
𑒯𑒧 𑒋𑒏𑒮𑒩𑒱, 𑒣𑒱𑒁𑒞𑒧 𑒢𑒯𑒱 𑒑𑒰𑒧। 𑒞𑒹𑒿 𑒧𑒼𑒯𑒱 𑒞𑒩𑒞𑒧 𑒠𑒹𑒃𑒞𑒹 𑒚𑒰𑒧।
𑒯𑒧 𑒋𑒏𑒮𑒩𑒱 𑒕𑒲 𑒂 𑒣𑓂𑒩𑒱𑒨𑒞𑒧 𑒑𑒰𑒧𑒧𑒹 𑒢𑒯𑒱 𑒕𑒟𑒱। 𑒞𑒰𑒯𑒱 𑒠𑓂𑒫𑒰𑒩𑒹 𑒩𑒰𑒞𑒱 𑒥𑒱𑒞𑒰𑒥𑒋 𑒪𑒹𑒪 𑒏𑒯𑒥𑒰𑒧𑒹 𑒯𑒧𑒩𑒰 𑒞𑒰𑒩𑒞𑒧𑓂𑒨 𑒦𑓄 𑒩𑒯𑒪 𑒁𑒕𑒱।
𑒁𑒢𑒞𑒯𑒳 𑒏𑒞𑒯𑒳 𑒠𑒹𑒁𑒃𑒞𑒯𑒳𑒿 𑒥𑒰𑒮। 𑒠𑒼𑒮𑒩 𑒢 𑒠𑒹𑒐𑒱𑒁 𑒣𑒛𑓃𑒍𑒮𑒱𑒍 𑒣𑒰𑒮।
𑒨𑒠𑒱 𑒏𑓂𑒨𑒼 𑒪𑒑𑒧𑒹 𑒩𑒯𑒱𑒞𑒟𑒱 𑒞𑒿 𑒠𑒼𑒮𑒩 𑒚𑒰𑒧 𑒏𑒞𑒯𑒳 𑒥𑒰𑒮 𑒠𑒹𑒐𑒰 𑒠𑒻𑒞𑒯𑒳𑒿।

𑒕𑒧𑒯 𑒯𑒹 𑒣𑒟𑒱𑒏, 𑒏𑒩𑒱𑒁 𑒯𑒧𑒹 𑒏𑒰𑒯। 𑒥𑒰𑒮 𑒢𑒑𑒩 𑒦𑒧𑒱 𑒁𑒢𑒞𑒯 𑒔𑒰𑒯।
𑒯𑒹 𑒣𑒟𑒱𑒏 𑒏𑓂𑒭𑒧𑒰 𑒏𑒩𑒴 𑒂 𑒖𑒰𑒆 𑒂 𑒢𑒑𑒩𑒧𑒹 𑒏𑒞𑒯𑒳 𑒥𑒰𑒮 𑒞𑒰𑒏𑒴।

𑒂𑒿𑒞𑒩 𑒣𑒰𑒿𑒞𑒩, 𑒮𑒰𑒿𑒗𑒏 𑒥𑒹𑒩𑒱। 𑒣𑒩𑒠𑒹𑒮 𑒥𑒮𑒱𑒁 𑒁𑒢𑒰𑒃𑒞𑒱 𑒯𑒹𑒩𑒱।
𑒥𑒲𑒔𑒧𑒹 𑒣𑓂𑒩𑒰𑒢𑓂𑒞𑒩 𑒁𑒕𑒱 𑒮𑒢𑓂𑒡𑓂𑒨𑒰𑒏 𑒮𑒧𑒨 𑒁𑒕𑒱 𑒂 𑒣𑒩𑒠𑒹𑒮𑒧𑒹 𑒦𑒫𑒱𑒭𑓂𑒨𑒏𑒹𑒿 𑒮𑒼𑒔𑒻𑒞 𑒏𑒰𑒖 𑒏𑒩𑒥𑒰𑒏 𑒔𑒰𑒯𑒲।

𑒧𑒼𑒩𑒰 𑒧𑒢 𑒯𑒹 𑒐𑒢𑒯𑒱 𑒐𑒢 𑒦𑒰𑒿𑒑। 𑒖𑒾𑒫𑒢 𑒑𑒼𑒣𑒥 𑒏𑒞 𑒧𑒢𑒮𑒱𑒖 𑒖𑒰𑒑।
𑒔𑒪 𑒔𑒪 𑒣𑒟𑒱𑒏 𑒏𑒩𑒱𑒁 𑒣... 𑒏𑒰𑒯। 𑒫𑒰𑒮 𑒢𑒑𑒩 𑒦𑒧𑒱 𑒁𑒢𑒞𑒯𑒳 𑒔𑒰𑒯।
𑒮𑒰𑒞 𑒣𑒔 𑒒𑒩 𑒞𑒢𑓂𑒯𑒱 𑒮𑒖𑒱 𑒠𑒹𑒪। 𑒣𑒱𑒂 𑒠𑒹𑒮𑒰𑒢𑓂𑒞𑒩 𑒂𑒢𑓂𑒞𑒩 𑒦𑒹𑒪।
𑒥𑒰𑒩𑒯 𑒫𑒩𑓂𑒭 𑒁𑒫𑒡𑒱 𑒏𑒋 𑒑𑒹𑒪। 𑒔𑒰𑒩𑒱 𑒫𑒩𑓂𑒭 𑒞𑒢𑓂𑒯𑒱 𑒑𑒹𑒪𑒰 𑒦𑒹𑒪।

𑒒𑒼𑒩 𑒣𑒨𑒼𑒡𑒩 𑒖𑒰𑒧𑒱𑒢𑒱 𑒦𑒹𑒠। 𑒖𑒹 𑒏𑒩𑒞𑒥 𑒞𑒰 𑒏𑒩𑒯 𑒣𑒩𑒱𑒕𑒹𑒠।
𑒦𑒨𑒰𑒍𑒢 𑒧𑒹𑒒 𑒁𑒕𑒱, 𑒩𑒞𑒳𑒏𑒰 𑒑𑒣 𑒕𑒲 𑒮𑒼𑒔𑒱 𑒏𑒋 𑒢𑒱𑒩𑓂𑒝𑒨 𑒏𑒩𑒴।

𑒦𑒢𑒃 𑒫𑒱𑒠𑓂𑒨𑒰𑒣𑒞𑒱 𑒢𑒰𑒑𑒩𑒱-𑒩𑒲𑒞𑒱। 𑒫𑓂𑒨𑒰𑒖-𑒫𑒔𑒢𑒹 𑒅𑒣𑒖𑒰𑒥 𑒣𑒱𑒩𑒲𑒞𑒱।
𑒫𑒱𑒠𑓂𑒨𑒰𑒣𑒞𑒱 𑒏𑒯𑒻𑒞 𑒕𑒟𑒱, 𑒄 𑒢𑒑𑒩𑒏 𑒩𑒲𑒞𑒱 𑒁𑒕𑒱 𑒖𑒹 𑒏𑒙𑒳 𑒫𑒔𑒢𑒮𑒿 𑒣𑓂𑒩𑒲𑒞𑒱 𑒁𑒢𑒻𑒞 𑒁𑒕𑒱।
𑒠𑒵𑒬𑓂𑒨 𑓕
𑒁𑒯𑒴 𑒠𑒵𑒬𑓂𑒨𑒧𑒹 𑒫𑒱𑒠𑓂𑒨𑒰𑒣𑒞𑒱 𑒢𑒯𑒱 𑒕𑒟𑒱। 𑒋𑒏𑒙𑒰 𑒣𑒟𑒱𑒏 𑒁𑒥𑒻𑒞 𑒕𑒟𑒱 𑒧𑒳𑒠𑒰 𑒮𑒰𑒮𑒳-𑒢𑒢𑒠𑒱 𑒏𑒏𑒩𑒼 𑒢𑒯𑒱 𑒠𑒹𑒐𑒱 𑒥𑒰𑒮 𑒏𑒩𑒥𑒰𑒮𑒿 𑒮𑓀𑒏𑒼𑒔𑒫𑒬 𑒧𑒢𑒰 𑒏𑒋 𑒂𑒑𑒰𑒿 𑒥𑒜𑓃𑒱 𑒖𑒰𑒃𑒞 𑒕𑒟𑒱। 𑒖𑒳𑒫𑒞𑒲 𑒑𑒥𑒻𑒞 𑒕𑒟𑒱।
𑒒𑒢𑒕𑒲𑒩𑒰𑒑𑒹 (𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒫𑒱𑒠𑓂𑒨𑒰𑒣𑒞𑒱 𑒣𑒠𑒰𑒫𑒪𑒲)-
𑒅𑒔𑒱𑒞 𑒥𑒮𑒋 𑒧𑒼𑒩 𑒧𑒢𑒧𑒟 𑒔𑒼𑒩। 𑒔𑒹𑒩𑒱𑒂 𑒥𑒳𑒜𑓃𑒱𑒂 𑒏𑒩𑒋 𑒁𑒑𑒼𑒩।
𑒏𑒰𑒧𑒠𑒹𑒫 𑒩𑒴𑒣𑒲 𑒔𑒼𑒩𑒏 𑒪𑒹𑒪 𑒯𑒧𑒩 𑒁𑒫𑒮𑓂𑒟𑒰 𑒚𑒲𑒏 𑒁𑒕𑒱। 𑒥𑒳𑒜𑓃𑒱𑒨𑒰 𑒔𑒹𑒩𑒲 𑒣𑒯𑒩𑒰 𑒠𑓄 𑒩𑒯𑒪 𑒕𑒟𑒱।

𑒥𑒰𑒩𑒯 𑒥𑒩𑒐 𑒁𑒫𑒡𑒱 𑒏𑒋 𑒑𑒹𑒪। 𑒔𑒰𑒩𑒱 𑒥𑒩𑒐 𑒞𑒢𑓂𑒯𑒱 𑒑𑒹𑒪𑒰𑒿 𑒦𑒹𑒪।
𑒥𑒰𑒩𑒯𑒧 𑒥𑒩𑒐𑒏 𑒩𑒯𑒲, 𑒞𑒐𑒢 𑒍 𑒑𑒹𑒪𑒰𑒯 𑒂 𑒂𑒥 𑒔𑒰𑒩𑒱 𑒥𑒩𑓂𑒐 𑒞𑒏𑒩 𑒦𑓄 𑒑𑒹𑒪।

𑒥𑒰𑒮 𑒔𑒰𑒯𑒻𑒞 𑒯𑒼𑒁 𑒣𑒟𑒱𑒏𑒯𑒳 𑒪𑒰𑒖। 𑒮𑒰𑒮𑒳 𑒢𑒢𑒢𑓂𑒠 𑒢𑒯𑒱 𑒁𑒕𑒋 𑒮𑒧𑒰𑒖।
𑒮𑒰𑒮 𑒂 𑒢𑒢𑒠𑒱 𑒏𑓂𑒨𑒼 𑒮𑓀𑒑 𑒢𑒯𑒱 𑒕𑒟𑒱 𑒂 𑒣𑒟𑒱𑒏 𑒮𑒹𑒯𑒼 𑒛𑒹𑒩𑒰 𑒠𑒹𑒥𑒰𑒮𑒿 𑒪𑒖𑒰𑒃𑒞 𑒕𑒟𑒱।

𑒮𑒰𑒞 𑒣𑒰𑒿𑒔 𑒒𑒩 𑒞𑒢𑓂𑒯𑒱 𑒮𑒖𑒱 𑒠𑒹𑒪। 𑒣𑒱𑒂 𑒠𑒹𑒮𑒰𑒿𑒞𑒩 𑒂𑒿𑒞𑒩 𑒦𑒹𑒪।
𑒍 𑒏𑒰𑒧𑒠𑒹𑒫 𑒪𑒹𑒪 𑒒𑒩 𑒮𑒖𑒰 𑒏𑒋 𑒠𑒹𑒬𑒰𑒢𑓂𑒞𑒩 𑒔𑒪𑒱 𑒑𑒹𑒪𑒰𑒯 𑒂 𑒯𑒧𑒩𑒰 𑒮𑒦𑒏 𑒥𑒲𑒔𑒧𑒹 𑒁𑒢𑓂𑒞𑒩 𑒂𑒥𑒱 𑒑𑒹𑒪।

𑒣𑒛𑓃𑒹𑒍𑒮 𑒫𑒰𑒮 𑒖𑒼𑒋𑒢𑒮𑒞 𑒦𑒹𑒪। 𑒟𑒰𑒢𑒹 𑒟𑒰𑒢𑒹 𑒁𑒫𑒨𑒫 𑒮𑒥𑒹 𑒑𑒹𑒪।
𑒣𑒛𑓃𑒼𑒮𑒏 𑒥𑒰𑒮 𑒖𑒹𑒢𑒰 𑒮𑒨 𑒨𑒼𑒖𑒢𑒏 𑒦𑓄 𑒑𑒹𑒪 𑒮𑒦 𑒮𑒩-𑒮𑒧𑓂𑒥𑒢𑓂𑒡𑒲 𑒖𑒞𑒋 𑒞𑒞𑒋 𑒔𑒪𑒱 𑒑𑒹𑒪𑒰𑒯।

𑒢𑒳𑒏𑒰𑒥𑒱𑒁 𑒞𑒱𑒧𑒱𑒩𑒏 𑒮𑒰𑒢𑓂𑒡𑒱। 𑒣𑒛𑓃𑒅𑒮𑒱𑒢𑒱 𑒠𑒹𑒁𑒋 𑒤𑒛𑓃𑒏𑒲 𑒥𑒰𑒢𑓂𑒡𑒱।
𑒪𑒼𑒏𑒏 𑒮𑒧𑒴𑒯 𑒁𑒢𑓂𑒯𑒰𑒩𑒧𑒹 𑒫𑒱𑒪𑒲𑒢 𑒦𑓄 𑒑𑒹𑒪, 𑒣𑒛𑓃𑒼𑒮𑒱𑒢 𑒤𑒰𑒙𑒏𑒱 𑒥𑒢𑓂𑒢 𑒏𑒋 𑒪𑒹𑒪𑒢𑓂𑒯𑒱।

𑒧𑒼𑒩𑒰 𑒧𑒢 𑒯𑒹 𑒐𑒢𑒯𑒱 𑒐𑒢 𑒦𑒰𑒑। 𑒑𑒧𑒢 𑒑𑒼𑒣𑒥 𑒏𑒞 𑒧𑒢𑒧𑒟 𑒖𑒰𑒑।
𑒯𑒧𑒩 𑒧𑒼𑒢 𑒏𑓂𑒭𑒝-𑒏𑓂𑒭𑒝 𑒦𑒰𑒑𑒱 𑒩𑒯𑒪 𑒁𑒕𑒱। 𑒏𑒰𑒧𑒠𑒹𑒫 𑒖𑒰𑒑𑒱 𑒩𑒯𑒪 𑒕𑒟𑒱 𑒑𑒧𑒢𑒏𑒹𑒿 𑒏𑒞𑒹𑒏 𑒏𑒰𑒪 𑒡𑒩𑒱 𑒢𑒳𑒏𑒰𑒋𑒥।

𑒠𑒵𑒬𑓂𑒨 𑓖
𑒋𑒯𑒱 𑒠𑒵𑒬𑓂𑒨𑒧𑒹 𑒮𑒹𑒯𑒼, 𑒢𑒯𑒱 𑒞𑒿 𑒢𑒢𑒠𑒱 𑒕𑒟𑒱, 𑒢𑒯𑒱𑒨𑒹 𑒮𑒰𑒮𑒳 𑒂 𑒢𑒯𑒱𑒨𑒹 𑒫𑒱𑒠𑓂𑒨𑒰𑒣𑒞𑒱। 𑒋𑒏𑒙𑒰 𑒁𑒞𑒱𑒟𑒱 𑒁𑒥𑒻𑒞 𑒕𑒟𑒱 𑒂𑒏𑒱 𑒞𑒐𑒢𑒹 𑒧𑒹𑒒 𑒪𑒰𑒡𑒱 𑒠𑒻𑒞 𑒁𑒕𑒱 𑒂 𑒖𑒳𑒫𑒞𑒲 𑒑𑒥𑒻𑒞 𑒕𑒟𑒱।
𑒡𑒢𑒕𑒲𑒩𑒰𑒑𑒹 (𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒫𑒱𑒠𑓂𑒨𑒰𑒣𑒞𑒱 𑒣𑒠𑒰𑒫𑒪𑒲)-
𑒁𑒣𑒢𑒰 𑒧𑒢𑓂𑒠𑒱𑒩 𑒥𑒻𑒮𑒪𑒱 𑒁𑒕𑒪𑒱𑒯𑒳𑒿, 𑒒𑒩 𑒢𑒯𑒱 𑒠𑒼𑒮𑒩 𑒏𑒹𑒫𑒰।
𑒁𑒣𑒢 𑒒𑒩𑒧𑒹 𑒥𑒻𑒮𑒪 𑒕𑒪𑒯𑒳𑒿, 𑒒𑒩𑒧𑒹 𑒏𑓂𑒨𑒼 𑒠𑒼𑒮𑒩 𑒢𑒯𑒱 𑒕𑒪,
𑒞𑒯𑒱𑒐𑒢𑒹 𑒣𑒯𑒱𑒂 𑒣𑒰𑒯𑒼𑒢 𑒂𑒋𑒪 𑒥𑒩𑒱𑒮𑒋 𑒪𑒰𑒑𑒪 𑒠𑒹𑒫𑒰।
𑒞𑒐𑒢𑒹 𑒣𑒟𑒱𑒏 𑒁𑒞𑒱𑒟𑒱 𑒁𑒋𑒪𑒰𑒯 𑒂 𑒥𑒩𑒐𑒰 𑒪𑒰𑒡𑒱 𑒠𑒹𑒪𑒏।

𑒏𑒹 𑒖𑒰𑒢 𑒏𑒱 𑒥𑒼𑒪𑒞𑒱 𑒣𑒱𑒮𑒳𑒢 𑒣𑒛𑓃𑒾𑒮𑒱𑒢𑒱 𑒫𑒔𑒢𑒏 𑒦𑒹𑒪 𑒁𑒫𑒏𑒰𑒮𑒹।
𑒏𑒲 𑒥𑒖𑒞𑒲𑒯 𑒄𑒩𑓂𑒭𑓂𑒨𑒰𑒪𑒳 𑒣𑒛𑓃𑒼𑒮𑒱𑒢 𑒮𑒹 𑒢𑒯𑒱 𑒖𑒰𑒢𑒱, 𑒥𑒖𑒥𑒰𑒏 𑒁𑒫𑒮𑒩 𑒖𑒹 𑒦𑒹𑒙𑒱 𑒑𑒹𑒪𑒢𑓂𑒯𑒱।
𑒒𑒼𑒩 𑒁𑒢𑓂𑒡𑒰𑒩, 𑒢𑒱𑒩𑒢𑓂𑒞𑒩 𑒡𑒰𑒩𑒰 𑒠𑒱𑒫𑒮𑒯𑒱 𑒩𑒖𑒢𑒲 𑒦𑒰𑒢𑒹।
𑒠𑒱𑒢𑒯𑒱𑒧𑒹 𑒩𑒰𑒞𑓂𑒩𑒱 𑒖𑒹𑒏𑒰𑒿 𑒯𑒼𑒧𑒋 𑒪𑒰𑒑𑒪।
𑒏𑒘𑒼𑒢𑒹 𑒏𑒯𑒥 𑒯𑒧𑒹, 𑒏𑒹 𑒣𑒞𑒱𑒁𑒋𑒞, 𑒖𑒑𑒞 𑒫𑒱𑒠𑒱𑒞 𑒣𑒿𑒔𑒥𑒰𑒢𑒹।
𑒯𑒧 𑒏𑒏𑒩𑒰 𑒏𑒯𑒥 𑒂 𑒏𑒹 𑒣𑒞𑒱𑒨𑒰𑒨𑒞। 𑒏𑒰𑒩𑒝 𑒏𑒰𑒧𑒠𑒹𑒫𑒏 𑒐𑓂𑒨𑒰𑒞𑒱 𑒞𑒿 𑒖𑒑𑒞 𑒦𑒩𑒱𑒧𑒹 𑒁𑒕𑒱।
𑒠𑒵𑒬𑓂𑒨 𑓗
𑒧𑓀𑒔𑒏 𑒋𑒏 𑒠𑒱𑒮𑒮𑒿 𑒮𑒰𑒮𑒳𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒯𑒳𑒢𑒏𑒩 𑒪𑒯𑒰𑒬 𑒢𑒱𑒏𑒪𑒻𑒞 𑒕𑒢𑓂𑒯𑒱 𑒂 𑒧𑓀𑒔𑒣𑒩 𑒁𑒢𑓂𑒯𑒰𑒩 𑒯𑒼𑒃𑒞 𑒁𑒕𑒱। 𑒤𑒹𑒩 𑒃𑒖𑒼𑒞 𑒦𑒹𑒪𑒰𑒣𑒩 𑒢𑒢𑒠𑒱𑒏 𑒫𑒩 𑒯𑒳𑒢𑒏𑒰 𑒮𑒰𑒮𑒳𑒩 𑒪𑒋 𑒖𑒰𑒃𑒞 𑒕𑒢𑓂𑒯𑒱। 𑒣𑒟𑒱𑒏 𑒩𑒮𑓂𑒞𑒰𑒣𑒩 𑒕𑒟𑒱 𑒠𑒩𑓂𑒬𑒏𑒑𑒝𑒏 𑒧𑒡𑓂𑒨 𑒂 𑒠𑒩𑓂𑒬𑒏𑒑𑒝𑒏𑒹𑒿 𑒃𑒬𑒰𑒩𑒰 𑒏𑒩𑒻𑒞 𑒖𑒳𑒫𑒞𑒲 𑒑𑒲𑒞 𑒑𑒥𑒻𑒞 𑒕𑒟𑒱 𑒂 𑒫𑒱𑒠𑓂𑒨𑒰𑒣𑒞𑒱 𑒮𑒦 𑒣𑒰𑒿𑒞𑒱𑒏 𑒥𑒰𑒠 𑒁𑒩𑓂𑒟 𑒏𑒯𑒻𑒞 𑒕𑒟𑒱। 𑒁𑒢𑓂𑒞𑒱𑒧 𑒠𑒴 𑒣𑒰𑒿𑒞𑒱𑒧𑒹 𑒫𑒱𑒠𑓂𑒨𑒰𑒣𑒞𑒱 𑒑𑒲𑒞 𑒂 𑒁𑒩𑓂𑒟 𑒠𑒳𑒢𑒴 𑒥𑒖𑒻𑒞 𑒕𑒟𑒱- 𑒫𑒱𑒠𑓂𑒨𑒰𑒣𑒞𑒱 𑒁𑒢𑓂𑒞𑒱𑒧 𑒠𑒴 𑒣𑒰𑒿𑒞𑒱 𑒂 𑒍𑒏𑒩 𑒁𑒩𑓂𑒟 𑒏𑒻𑒏 𑒥𑒹𑒩 𑒠𑒼𑒯𑒩𑒰𑒥𑒻𑒞 𑒕𑒟𑒱।
𑒢𑒑𑒹𑒢𑓂𑒠𑓂𑒩𑒢𑒰𑒟 𑒑𑒳𑒣𑓂𑒞 𑒮𑒧𑓂𑒣𑒰𑒠𑒱𑒞 𑒣𑒠𑒰𑒫𑒪𑒲-
𑒮𑒰𑒮𑒳 𑒖𑒩𑒰𑒞𑒳𑒩𑒱 𑒦𑒹𑒪𑒲। 𑒢𑒢𑒢𑓂𑒠𑒱 𑒁𑒕𑒪𑒱 𑒮𑒹𑒯𑒼 𑒮𑒰𑒮𑒳𑒩 𑒑𑒹𑒪𑒲।
𑒮𑒰𑒮𑒳 𑒔𑒪𑒱 𑒥𑒮𑒪𑒲𑒯, 𑒢𑒢𑒠𑒱 𑒮𑒹𑒯𑒼 𑒮𑒰𑒮𑒳𑒩 𑒑𑒹𑒪𑒲𑒯
𑒞𑒻𑒮𑒢 𑒢 𑒠𑒹𑒐𑒱𑒁 𑒏𑒼𑒄। 𑒩𑒨𑒢𑒱 𑒖𑒑𑒰𑒋 𑒮𑒧𑓂𑒦𑒰𑒮𑒢 𑒯𑒼𑒄।
𑒏𑓂𑒨𑒼 𑒢𑒯𑒱 𑒮𑒧𑓂𑒦𑒰𑒭𑒝𑒏 𑒪𑒹𑒪 𑒣𑒩𑓂𑒨𑒢𑓂𑒞,
𑒋𑒯𑒱 𑒣𑒳𑒩 𑒋𑒯𑒹 𑒥𑒹𑒥𑒯𑒰𑒩𑒹। 𑒏𑒰𑒯𑒳𑒏 𑒏𑒹𑒍 𑒢𑒯𑒱 𑒏𑒩𑒋 𑒣𑒳𑒕𑒰𑒩𑒹।
𑒋𑒞𑒳𑒏𑒰 𑒋𑒯𑒢 𑒥𑒹𑒥𑒯𑒰𑒩, 𑒏𑒏𑒩𑒼 𑒏𑓂𑒨𑒼 𑒣𑒳𑒕𑒰𑒩𑒲 𑒢𑒯𑒱 𑒏𑒩𑒻𑒞 𑒁𑒕𑒱।
𑒧𑒼𑒩𑒱 𑒣𑒱𑒁𑒞𑒧𑒏𑒰𑒿 𑒏𑒯𑒥𑒰। 𑒯𑒧𑒹 𑒋𑒏𑒮𑒩𑒱 𑒡𑒢𑒱 𑒏𑒞 𑒠𑒱𑒢 𑒩𑒯𑒥𑒰।
𑒯𑒧𑒩 𑒣𑒱𑒁𑒞𑒧𑒏𑒹𑒿 𑒏𑒯𑒥, 𑒯𑒧 𑒁𑒮𑒑𑒩𑒹 𑒏𑒞𑒹𑒏 𑒠𑒱𑒢 𑒩𑒯𑒥।
𑒣𑒟𑒱𑒏, 𑒏𑒯𑒥 𑒧𑒼𑒩 𑒏𑒢𑓂𑒞𑒰। 𑒯𑒧 𑒮𑒢𑒱 𑒩𑒧𑒢𑒱 𑒢 𑒞𑒹𑒖 𑒩𑒮𑒧𑒢𑓂𑒞𑒰।
𑒣𑒟𑒱𑒏 𑒯𑒳𑒢𑒏𑒰 𑒏𑒯𑒥𑒢𑓂𑒯𑒱, 𑒯𑒧𑒩𑒰 𑒮𑒢 𑒩𑒧𑒝𑒱𑒏 𑒩𑒮𑒏 𑒞𑒹𑒖 𑒏𑒐𑒢 𑒡𑒩𑒱 𑒩𑒯𑒞।
𑒦𑒢𑒃 𑒫𑒱𑒠𑓂𑒨𑒰𑒣𑒞𑒱 𑒑𑒰𑒥𑒹। 𑒦𑒧𑒱-𑒦𑒧𑒱 𑒫𑒱𑒩𑒯𑒱𑒢𑒱 𑒣𑒟𑒳𑒏 𑒥𑒳𑒗𑒰𑒥𑒹।
𑒫𑒱𑒠𑓂𑒨𑒰𑒣𑒞𑒱 𑒑𑒥𑒻𑒞 𑒕𑒟𑒱, 𑒫𑒱𑒩𑒯𑒢𑒱 𑒒𑒴𑒧𑒱-𑒒𑒴𑒧𑒱 𑒏𑒋 𑒣𑒟𑒱𑒏𑒏𑒹𑒿 𑒏𑒯𑒱 𑒩𑒯𑒪 𑒕𑒟𑒱।

𑒫𑒱𑒠𑓂𑒨𑒰𑒣𑒞𑒱 𑒑𑒥𑒻𑒞-𑒑𑒥𑒻𑒞 𑒏𑒢𑒹𑒏 𑒐𑒮𑒻𑒞 𑒕𑒟𑒱- 𑒁𑒢𑓂𑒯𑒰𑒩 𑒣𑒮𑒩𑒋 𑒪𑒑𑒻𑒞 𑒁𑒕𑒱 𑒞𑒿 𑒋𑒏 𑒑𑒼𑒙𑒹 𑒖𑒳𑒫𑒞𑒲 𑒠𑒱𑒮 𑒁𑒢𑓂𑒯𑒰𑒩𑒮𑒿 𑒁𑒥𑒻𑒞 𑒁𑒮𑓂𑒣𑒭𑓂𑒙 𑒠𑒹𑒐𑒢𑒰 𑒖𑒰𑒃𑒞 𑒕𑒟𑒱। 𑒏𑒲 𑒫𑒻𑒯 𑒕𑒟𑒱 𑒣𑒱𑒂 𑒠𑒹𑒮𑒰𑒢𑓂𑒞𑒩!! 𑒯𑒿, 𑒂𑒏𑒱 𑒢𑒯𑒱!!!

𑒣𑒱𑒂 𑒠𑒹𑒮𑒰𑒢𑓂𑒞𑒩𑒏 𑒒𑒼𑒪 𑒯𑒼𑒃𑒞 𑒁𑒕𑒱 𑒂 𑒧𑓀𑒔𑒣𑒩 𑒮𑓀𑒑𑒲𑒞𑒏 𑒧𑒡𑓂𑒨 𑒣𑒙𑒰𑒏𑓂𑒭𑒹𑒣 𑒯𑒼𑒃𑒞 𑒁𑒕𑒱।

𑒣𑒱𑒂 𑒠𑒹𑒮𑒰𑒢𑓂𑒞𑒩𑒏 𑒄 𑒏𑒢𑓂𑒮𑒹𑒣𑓂𑒙 𑒮𑒳𑒡𑒲𑒑𑒝𑒏 𑒮𑒧𑒏𑓂𑒭 𑒁𑒕𑒱 𑒂 𑒧𑒻𑒟𑒱𑒪 𑒥𑒱𑒠𑒹𑒮𑒱𑒨𑒰 𑒪𑒼𑒏𑒢𑒱𑒏 𑒫𑒩𑓂𑒞𑒧𑒰𑒢 𑒠𑒳𑒩𑓂𑒠𑒬𑒰𑒏 𑒥𑒲𑒔 𑒄 𑒧𑒯𑒰𑒏𑒫𑒱 𑒫𑒱𑒠𑓂𑒨𑒰𑒣𑒞𑒱𑒏 𑒣𑓂𑒩𑒞𑒱 𑒮𑒮𑒧𑓂𑒧𑒰𑒢 𑒁𑒩𑓂𑒣𑒱𑒞 𑒁𑒕𑒱।

𑒥𑒢𑒻𑒞-𑒥𑒱𑒑𑒛𑓃𑒻𑒞-𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒏
𑒏𑒟𑒰 𑒮𑓀𑒑𑓂𑒩𑒯𑒏 𑒮𑒧𑒲𑒏𑓂𑒭𑒰
𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒖𑒲𑒏 “𑒥𑒢𑒻𑒞 𑒥𑒱𑒑𑒛𑓃𑒻𑒞” 𑒏𑒟𑒰-𑒮𑓀𑒑𑓂𑒩𑒯𑒏 𑒮𑒦 𑒏𑒟𑒰𑒧𑒹 𑒮𑒿 𑒁𑒡𑒱𑒏𑒰𑓀𑒬𑒧𑒹 𑒄 𑒦𑒹𑒙𑒞 𑒖𑒹 𑒏𑒟𑒰 𑒐𑒱𑒮𑓂𑒮𑒰𑒮𑒿 𑒥𑒹𑒬𑒲 𑒋𑒏𑒙𑒰 𑒟𑒲𑒧 𑒪𑒋 𑒂𑒑𑒰𑒿 𑒥𑒜𑓃𑒪 𑒁𑒕𑒱 𑒂 𑒁𑒣𑒢 𑒏𑒰𑒖 𑒐𑒞𑒧 𑒏𑒩𑒱𑒞𑒯𑒱 𑒁𑒢𑓂𑒞 𑒣𑓂𑒩𑒰𑒣𑓂𑒞 𑒏𑒋𑒢𑒹 𑒁𑒕𑒱। 𑒠𑒼𑒮𑒩 𑒫𑒱𑒬𑒹𑒭𑒞𑒰 𑒁𑒕𑒱 𑒋𑒏𑒩 𑒦𑒰𑒭𑒰। 𑒥𑒪𑒔𑒢𑒧𑒰𑒏 𑒦𑒰𑒭𑒰 𑒍𑒯𑒱 𑒅𑒣𑒢𑓂𑒨𑒰𑒮𑒏 𑒧𑒳𑒐𑓂𑒨 𑒣𑒰𑒞𑓂𑒩𑒏 𑒂𑒞𑓂𑒧𑒏𑒟𑒰𑒞𑓂𑒧𑒏 𑒦𑒰𑒭𑒰 𑒁𑒕𑒱 𑒧𑒳𑒠𑒰 𑒋𑒞𑒋 𑒄 𑒦𑒰𑒭𑒰 𑒏𑒟𑒰𑒏𑒰𑒩𑒏 𑒁𑒣𑒢 𑒕𑒢𑓂𑒯𑒱 𑒂 𑒞𑒰𑒯𑒱 𑒁𑒩𑓂𑒟𑒹𑒿 𑒄 𑒋𑒏𑒙𑒰 𑒫𑒱𑒬𑒱𑒭𑓂𑒙 𑒮𑓂𑒫𑒩𑒴𑒣 𑒪𑒻𑒞 𑒁𑒕𑒱। 𑒋𑒏 𑒠𑒱𑒮 𑒏𑒟𑒰𑒏 𑒅𑒣𑒠𑒹𑒬𑒰𑒞𑓂𑒧𑒏 𑒐𑒱𑒮𑓂𑒮𑒰-𑒣𑒱𑒯𑒰𑒢𑒲 𑒮𑓂𑒫𑒩𑒴𑒣 𑒑𑓂𑒩𑒯𑒝 𑒏𑒩𑒥𑒰𑒏 𑒣𑒩𑒱𑒣𑒰𑒙𑒲𑒏 𑒫𑒱𑒩𑒳𑒠𑓂𑒡 𑒮𑒳𑒦𑒰𑒭𑒖𑒲𑒏 𑒏𑒟𑒰𑒏𑒹𑒿 𑒋𑒏𑒙𑒰 𑒮𑒲𑒧𑒱𑒞 𑒣𑒩𑒱𑒧𑒱𑒞𑒱𑒧𑒹 𑒟𑒲𑒧 𑒪𑓄 𑒏𑒋 𑒔𑒪𑒥𑒰𑒏, 𑒦𑒰𑒭𑒰𑒏 𑒬𑒱𑒪𑓂𑒣 𑒖𑒹 𑒐𑒰𑒿𑒙𑒲 𑒠𑒹𑒬𑒲 𑒁𑒕𑒱 𑒣𑒩 𑒡𑓂𑒨𑒰𑒢 𑒠𑒹𑒥𑒰𑒏 𑒮𑒧𑓂𑒧𑒱𑒪𑒱𑒞 𑒏𑒰𑒩𑒝𑒮𑒿 𑒣𑒰𑒚𑒏𑒏 𑒋𑒏 𑒫𑒩𑓂𑒑𑒏𑒹𑒿 𑒋𑒯𑒱 𑒮𑓀𑒑𑓂𑒩𑒯𑒏 𑒏𑒟𑒰 𑒮𑒦𑒧𑒹 𑒁𑒮𑒲𑒧 𑒂𑒢𑒢𑓂𑒠 𑒦𑒹𑒙𑒞𑒢𑓂𑒯𑒱 𑒞𑒿 𑒮𑓀𑒑𑒹-𑒮𑓀𑒑 𑒐𑒱𑒮𑓂𑒮𑒰-𑒣𑒱𑒯𑒰𑒢𑒲𑒮𑒿 𑒥𑒰𑒯𑒩 𑒢𑒯𑒱 𑒂𑒥𑒱 𑒮𑒏𑒪 𑒣𑒰𑒚𑒏 𑒫𑒩𑓂𑒑𑒏𑒹𑒿 𑒄 𑒏𑒟𑒰 𑒮𑓀𑒑𑓂𑒩𑒯 𑒢𑒱𑒩𑒰𑒬 𑒢𑒯𑒱 𑒏𑒩𑒞 𑒫𑒩𑒢 𑒯𑒳𑒢𑒏𑒩 𑒮𑒦𑒏 𑒩𑒳𑒔𑒱𑒏 𑒣𑒩𑒱𑒭𑓂𑒏𑒩𑒝 𑒏𑒩𑒞।
𑒏𑒱𑒕𑒳 𑒦𑒰𑒭𑒰𑒨𑒲 𑒧𑒰𑒢𑒏𑒲𑒏𑒩𑒝 𑒣𑓂𑒩𑒮𑓀𑒑- 𑒖𑒹𑒢𑒰 𑒌𑒕, 𑒁𑒕𑒱, 𑒁 𑒃 𑒕 । 𑒖𑒰𑒯𑒱 𑒏𑒰𑒪𑒧𑒹 𑒧𑒰𑒢𑒏𑒲𑒏𑒩𑒝 𑒦𑓄 𑒩𑒯𑒪 𑒕𑒪 𑒍𑒯𑒱 𑒮𑒧𑒨 𑒋𑒯𑒱𑒣𑒩 𑒡𑓂𑒨𑒰𑒢 𑒠𑒹𑒥𑒰𑒏 𑒂𑒫𑒬𑓂𑒨𑒏𑒞𑒰 𑒩𑒯𑒋। 𑒖𑒹𑒢𑒰 “𑒖𑒰𑒃𑒞 𑒩𑒯𑒲” 𑒏𑒹𑒿 “𑒖𑒰𑒞𑒱 𑒩𑒯𑒲” 𑒪𑒱𑒐𑒲 𑒂 𑒤𑒹𑒩 𑒖𑒰𑒞𑒱 (𑒖𑒰 𑒃 𑒞) 𑒪𑒹𑒪 𑒣𑓂𑒩𑒼𑒢𑒢𑓂𑒮𑒱𑒋𑒬𑒢𑒏 𑒢𑒱𑒁𑒧 𑒥𑒢𑒰𑒥𑒲 𑒞𑒹𑒯𑒢𑒹 𑒮𑒢 𑒌𑒕 𑒮𑓀𑒑𑒹 𑒁𑒕𑒱। 𑒧𑒳𑒠𑒰 𑒂𑒥 𑒠𑒹𑒩𑒲 𑒦𑓄 𑒑𑒹𑒪 𑒁𑒕𑒱 𑒮𑒹 𑒪𑒹𑒐𑒏𑒼 𑒏𑒢𑒱𑒨𑒰𑒿-𑒣𑒳𑒞𑒩𑒰 𑒧𑒹 𑒋𑒏𑒩 𑒣𑓂𑒩𑒨𑒼𑒑 𑒏𑒋 𑒠𑒱𑒬𑒰 𑒠𑒹𑒐𑒥𑒻𑒞 𑒕𑒟𑒱 𑒧𑒳𑒠𑒰 𑒠𑒼𑒮𑒩 𑒏𑒟𑒰 𑒮𑒦𑒧𑒹 𑒒𑒳𑒩𑒱 𑒖𑒰𑒃𑒞 𑒕𑒟𑒱। 𑒧𑒳𑒠𑒰 𑒋𑒯𑒱𑒮𑒿 𑒄 𑒂𑒫𑒬𑓂𑒨𑒏𑒞𑒰 𑒞𑒿 𑒮𑒱𑒠𑓂𑒡 𑒯𑒼𑒃𑒞𑒹 𑒁𑒕𑒱 𑒖𑒹 𑒋𑒏𑒙𑒰 𑒧𑒰𑒢𑒏 𑒩𑒴𑒣 𑒮𑓂𑒟𑒱𑒩 𑒏𑒋𑒪 𑒖𑒰𑒋 𑒂 “𑒕𑒻” 𑒪𑒱𑒐𑒥𑒰𑒏 𑒁𑒕𑒱 𑒞𑒿 𑒮𑒹𑒯𑒼 𑒚𑒲𑒏 𑒂 “𑒕𑒻𑒏” 𑒪𑒱𑒐𑒥𑒰𑒏 𑒁𑒕𑒱 𑒞𑒿 “𑒁𑒢𑓂𑒞𑒏 ’𑒏’ 𑒮𑒰𑒃𑒪𑒹𑒢𑓂𑒙 𑒁𑒕𑒱” 𑒮𑒹 𑒣𑓂𑒩𑒼𑒢𑒢𑓂𑒮𑒱𑒋𑒬𑒢𑒏 𑒢𑒱𑒁𑒧 𑒥𑒢𑒋। 𑒧𑒳𑒠𑒰 𑒮𑒹 𑒖𑒪𑓂𑒠𑒲 𑒥𑒢𑒋 𑒂 𑒮𑒩𑓂𑒫𑒑𑓂𑒩𑒰𑒯𑓂𑒨 𑒯𑒼𑒁𑒋 𑒞𑒏𑒩 𑒥𑒹𑒑𑒩𑒞𑒰 𑒯𑒧𑒩𑒰 𑒥𑒳𑒗𑒰𑒃𑒞 𑒁𑒕𑒱, 𑒂𑒖𑒳𑒏 𑒪𑒼𑒏𑒏𑒹𑒿 “𑒨” 𑒪𑒱𑒐𑒪 𑒖𑒰𑒋 𑒫𑒰 “𑒋” 𑒋𑒯𑒱𑒣𑒩 𑒦𑒩𑒱 𑒖𑒱𑒢𑒑𑒲 𑒪𑒛𑓃𑒥𑒰𑒏 𑒮𑒧𑒨 𑒢𑒯𑒱 𑒕𑒻, 𑒖𑒹 𑒡𑓂𑒫𑒢𑒱 𑒮𑒱𑒠𑓂𑒡𑒰𑓀𑒞 𑒏𑒯𑒻𑒞 𑒁𑒕𑒱 𑒮𑒹 𑒧𑒰𑒢𑒴, 𑒂 𑒢𑒯𑒱 𑒞𑒿 𑒣𑓂𑒩𑒼𑒢𑒢𑓂𑒮𑒱𑒋𑒬𑒢𑒏 𑒢𑒱𑒁𑒧 𑒥𑒢𑒰𑒆। “𑒢𑒯𑒱” 𑒪𑒹𑒪 “𑒢𑒘𑒱” 𑒪𑒱𑒐𑒥 𑒞𑒿 𑒥𑒳𑒗𑒥𑒰𑒧𑒹 𑒁𑒥𑒻𑒞 𑒁𑒕𑒱 𑒧𑒳𑒠𑒰 𑒢𑒃𑒿 (𑒁𑒢𑓂𑒞𑒱𑒏𑒰), 𑒢𑒃𑓀 (𑒋𑒢.𑒥𑒲.𑒙𑒲.) 𑒂 𑒢𑒿𑒃 (𑒮𑒰𑒏𑒹𑒞𑒰𑒢𑒢𑓂𑒠 - 𑒏𑒰𑒪𑒩𑒰𑒞𑓂𑒩𑒱𑒬𑓂𑒔 𑒠𑒰𑒩𑒳𑒝𑒰) 𑒧𑒹 𑒮𑒿 𑒮𑒰𑒏𑒹𑒞𑒰𑒢𑒢𑓂𑒠𑒖𑒲 𑒥𑒪𑒰 𑒣𑓂𑒩𑒨𑒼𑒑 𑒡𑓂𑒫𑒢𑒱-𑒫𑒱𑒖𑓂𑒘𑒰𑒢 𑒮𑒱𑒠𑓂𑒡𑒰𑓀𑒞𑒮𑒿 𑒥𑒹𑒬𑒲 𑒮𑒧𑒲𑒔𑒲𑒢 𑒮𑒱𑒠𑓂𑒡 𑒯𑒼𑒃𑒞 𑒁𑒕𑒱 𑒂 𑒮𑒹 𑒫𑒱𑒬𑓂𑒫𑒰𑒮 𑒢𑒯𑒱 𑒯𑒼𑒁𑒋 𑒞𑒿 𑒡𑓂𑒫𑒢𑒱 𑒣𑓂𑒩𑒨𑒼𑒑𑒬𑒰𑒪𑒰 𑒮𑒦𑒏 𑒧𑒠𑒞𑒱 𑒪𑒱𑒁।(𑒫𑒻𑒖𑓂𑒘𑒰𑒢𑒱𑒏 𑒂 𑒧𑒰𑒢𑒏 𑒧𑒻𑒟𑒱𑒪𑒲 𑒫𑒩𑓂𑒝𑒧𑒰𑒪𑒰𑒏 𑒂𑒛𑒱𑒨𑒼 𑒤𑒰𑒃𑒪 𑒫𑒱𑒠𑒹𑒯 𑒂𑒩𑓂𑒏𑒰𑒃𑒫𑒏 (http://www.videha.co.in/) 𑒫𑒱𑒠𑒹𑒯 𑒂𑒛𑒱𑒨𑒼 𑒪𑒱𑓀𑒏𑒣𑒩 𑒛𑒰𑒅𑒢𑒪𑒼𑒛/𑒬𑓂𑒩𑒫𑒝 𑒪𑒹𑒪 𑒅𑒣𑒪𑒥𑓂𑒡 𑒁𑒕𑒱।)
“𑒥𑒢𑒻𑒞 𑒥𑒱𑒑𑒛𑓃𑒻𑒞” 𑒣𑒼𑒟𑒲𑒏 𑒄 𑒋𑒏𑒙𑒰 𑒫𑒱𑒬𑒹𑒭𑒞𑒰 𑒁𑒕𑒱 𑒖𑒹 𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒖𑒲 𑒁𑒣𑒢 𑒫𑒱𑒬𑒱𑒭𑓂𑒙 𑒪𑒹𑒐𑒢-𑒬𑒻𑒪𑒲𑒏 𑒣𑓂𑒩𑒨𑒼𑒑 𑒏𑒋𑒢𑒹 𑒕𑒟𑒱 𑒖𑒹 𑒡𑓂𑒫𑒢𑓂𑒨𑒰𑒞𑓂𑒧𑒏 𑒁𑒕𑒱 𑒂 𑒧𑒰𑒢𑒏𑒲𑒏𑒩𑒝 𑒮𑒧𑓂𑒫𑒰𑒠𑒏𑒹𑒿 𑒂𑒑𑒰𑒿 𑒪𑒋 𑒖𑒋𑒥𑒰𑒧𑒹 𑒮𑒏𑓂𑒭𑒧 𑒁𑒕𑒱।

𑒏𑒟𑒰𑒏 𑒨𑒰𑒞𑓂𑒩𑒰- 𑒫𑒻𑒠𑒱𑒏 𑒂𑒐𑓂𑒨𑒰𑒢, 𑒖𑒰𑒞𑒏 𑒏𑒟𑒰, 𑒌𑒬𑒣 𑒤𑒹𑒥𑒪𑓂𑒮, 𑒣𑓀𑒔𑒞𑓀𑒞𑓂𑒩 𑒂 𑒯𑒱𑒞𑒼𑒣𑒠𑒹𑒬 𑒂 𑒮𑓀𑒑-𑒮𑓀𑒑 𑒔𑒪𑒻𑒞 𑒩𑒯𑒪 𑒪𑒼𑒏𑒑𑒰𑒟𑒰 𑒮𑒦। 𑒮𑒦 𑒚𑒰𑒧 𑒁𑒦𑒱𑒖𑒰𑒞𑓂𑒨 𑒫𑒩𑓂𑒑𑒏 𑒏𑒟𑒰𑒏 𑒮𑓀𑒑 𑒪𑒼𑒏𑒑𑒰𑒟𑒰 𑒩𑒯𑒱𑒞𑒹 𑒁𑒕𑒱।
𑒏𑒟𑒰𑒧𑒹 𑒁𑒮𑒤𑒪𑒞𑒰𑒏 𑒮𑒧𑓂𑒦𑒰𑒫𑒢𑒰 𑒅𑒣𑒢𑓂𑒨𑒰𑒮-𑒧𑒯𑒰𑒏𑒰𑒫𑓂𑒨-𑒂𑒐𑓂𑒨𑒰𑒢 𑒮𑒿 𑒥𑒹𑒬𑒲 𑒯𑒼𑒃𑒞 𑒁𑒕𑒱, 𑒏𑒰𑒩𑒝 𑒅𑒣𑒢𑓂𑒨𑒰𑒮 𑒁𑒕𑒱 “𑒮𑒼𑒣 𑒍𑒣𑒹𑒩𑒰” 𑒖𑒹 𑒧𑒯𑒱𑒢𑒰𑒏-𑒧𑒯𑒱𑒢𑒰 𑒂 𑒮𑒰𑒪𑒏-𑒮𑒰𑒪 𑒡𑒩𑒱 𑒔𑒪𑒻𑒞 𑒁𑒕𑒱 𑒂 𑒮𑒦 𑒋𑒣𑒲𑒮𑒼𑒛𑒏 𑒁𑒢𑓂𑒞𑒧𑒹 𑒋𑒏𑒙𑒰 𑒥𑒱𑒢𑓂𑒠𑒳𑒣𑒩 𑒂𑒥𑒱 𑒐𑒞𑒧 𑒯𑒼𑒃𑒞 𑒁𑒕𑒱। 𑒧𑒰𑒢𑒹 𑒮𑒞𑓂𑒞𑒩𑒱 𑒋𑒣𑒲𑒮𑒼𑒛𑒏 𑒅𑒣𑒢𑓂𑒨𑒰𑒮𑒧𑒹 𑒅𑒢𑓂𑒯𑒞𑓂𑒞𑒩𑒱 𑒋𑒣𑒲𑒮𑒼𑒛 𑒡𑒩𑒱 𑒞𑒿 𑒂𑒬𑒰 𑒥𑒢𑒱𑒞𑒹 𑒁𑒕𑒱 𑒖𑒹 𑒏𑒟𑒰 𑒋𑒏𑒙𑒰 𑒧𑒼𑒛𑓃 𑒪𑒹𑒞 𑒂 𑒁𑒢𑓂𑒞 𑒡𑒩𑒱 𑒖𑒹 𑒏𑒟𑒰𑒏 𑒠𑒱𑒬𑒰 𑒢𑒯𑒱𑒋 𑒥𑒠𑒪𑒪 𑒞𑒿 𑒣𑒳𑒩𑒢𑒏𑒰 𑒮𑒦𑒙𑒰 𑒋𑒣𑒲𑒮𑒼𑒛 𑒯𑒱𑒙 𑒂 𑒧𑒰𑒞𑓂𑒩 𑒁𑒢𑓂𑒞𑒱𑒧 𑒋𑒣𑒲𑒮𑒼𑒛 𑒤𑓂𑒪𑒰𑒣। 𑒧𑒳𑒠𑒰 𑒏𑒟𑒰 𑒋𑒏𑒩 𑒁𑒢𑒳𑒧𑒞𑒱 𑒢𑒯𑒱 𑒠𑒻𑒞 𑒁𑒕𑒱। 𑒄 𑒋𑒏 𑒋𑒣𑒲𑒮𑒼𑒛 𑒥𑒪𑒰 𑒩𑒔𑒢𑒰 𑒕𑒲 𑒂 𑒢𑒲𑒏 𑒞𑒿 𑒐𑒴𑒥𑒹 𑒢𑒲𑒏 𑒂 𑒢𑒯𑒱 𑒞𑒿 𑒐𑒩𑒰𑒣𑒹-𑒐𑒩𑒰𑒣।

𑒏𑒟𑒰-𑒑𑒰𑒟𑒰 𑒮𑒿 𑒥𑒜𑓃𑒱 𑒂𑒑𑒴 𑒖𑒰𑒃 𑒞𑒿 𑒂𑒡𑒳𑒢𑒱𑒏 𑒏𑒟𑒰-𑒑𑒪𑓂𑒣𑒏 𑒃𑒞𑒱𑒯𑒰𑒮 𑒅𑒢𑓂𑒢𑒻𑒮𑒧 𑒬𑒞𑒰𑒥𑓂𑒠𑒲𑒏 𑒁𑒢𑓂𑒞𑒧𑒹 𑒦𑒹𑒪। 𑒋𑒏𑒩𑒰 𑒪𑒒𑒳𑒏𑒟𑒰, 𑒏𑒟𑒰 𑒂 𑒑𑒪𑓂𑒣𑒏 𑒩𑒴𑒣 𑒧𑒰𑒢𑒪 𑒑𑒹𑒪। 𑒍𑒢𑒰 𑒋𑒯𑒱 𑒞𑒲𑒢𑒴𑒏 𑒥𑒲𑒔𑒏 𑒦𑒹𑒠 𑒮𑒹𑒯𑒼 𑒁𑒢𑒰𑒫𑒬𑓂𑒨𑒏 𑒩𑒴𑒣𑒮𑒿 𑒫𑓂𑒨𑒰𑒐𑓂𑒨𑒰𑒨𑒱𑒞 𑒏𑒋𑒪 𑒑𑒹𑒪। 𑒩𑒫𑒲𑒢𑓂𑒠𑓂𑒩𑒢𑒰𑒟 𑒚𑒰𑒏𑒳𑒩𑒮𑒿 𑒬𑒳𑒩𑒳 𑒦𑒹𑒪 𑒄 𑒨𑒰𑒞𑓂𑒩𑒰 𑒦𑒰𑒩𑒞𑒏 𑒋𑒏 𑒏𑒼𑒢𑒮𑒿 𑒠𑒼𑒮𑒩 𑒏𑒼𑒢 𑒡𑒩𑒱 𑒮𑒳𑒡𑒰𑒩𑒫𑒰𑒠 𑒩𑒴𑒣𑒲 𑒂𑒢𑓂𑒠𑒼𑒪𑒢𑒏 𑒣𑒩𑒱𑒝𑒰𑒧𑒮𑓂𑒫𑒩𑒴𑒣 𑒂𑒑𑒰𑒿 𑒥𑒜𑓃𑒪। 𑒁𑒮𑒧𑒱𑒨𑒰𑒏 𑒥𑒹𑒖𑒥𑒩𑒳𑒂, 𑒅𑒛𑓃𑒱𑒨𑒰𑒏 𑒤𑒏𑒲𑒩 𑒧𑒼𑒯𑒢 𑒮𑒹𑒢𑒰𑒣𑒞𑒱, 𑒞𑒹𑒪𑒳𑒑𑒳𑒏 𑒁𑒣𑓂𑒣𑒰𑒩𑒰𑒫, 𑒥𑓀𑒑𑒪𑒰𑒏 𑒏𑒹𑒠𑒰𑒩𑒢𑒰𑒟 𑒥𑒢𑒩𑓂𑒖𑒲 𑒄 𑒮𑒦 𑒑𑒼𑒙𑒹 𑒏𑒐𑒢𑒼 𑒢𑒰𑒩𑒲𑒏 𑒣𑓂𑒩𑒞𑒱 𑒮𑒧𑒩𑓂𑒟𑒢𑒧𑒹 𑒞𑒿 𑒏𑒐𑒢𑒼 𑒮𑒧𑒰𑒖𑒏 𑒮𑒴𑒠𑒐𑒼𑒩𑒏 𑒫𑒱𑒩𑒳𑒠𑓂𑒡 𑒁𑒥𑒻𑒞 𑒑𑒹𑒪𑒰𑒯। 𑒢𑒹𑒣𑒰𑒪𑒲 𑒦𑒰𑒭𑒰𑒧𑒹 “𑒠𑒹𑒫𑒲 𑒏𑒼 𑒥𑒪𑒱” 𑒮𑒴𑒩𑓂𑒨𑒏𑒰𑒢𑓂𑒞 𑒖𑓂𑒘𑒫𑒰𑒪𑒲 𑒠𑓂𑒫𑒰𑒩𑒰 𑒠𑒮𑒯𑒩𑒰𑒏 𑒣𑒬𑒳𑒥𑒪𑒱 𑒣𑓂𑒩𑒟𑒰𑒏 𑒫𑒱𑒩𑒳𑒠𑓂𑒡 𑒪𑒱𑒐𑒪 𑒑𑒹𑒪। 𑒏𑒼𑒢𑒼 𑒏𑒟𑒰 𑒣𑓂𑒩𑒹𑒧𑒏 𑒥𑓀𑒡𑒢𑒏 𑒧𑒡𑓂𑒨 𑒖𑒰𑒞𑒱-𑒡𑒢𑒏 𑒮𑒲𑒧𑒰𑒏 𑒫𑒱𑒩𑒳𑒠𑓂𑒡 𑒞𑒿 𑒏𑒼𑒢𑒼 𑒠𑒪𑒱𑒞 𑒮𑒧𑒰𑒖𑒏 𑒮𑓂𑒟𑒱𑒞𑒱 𑒂 𑒡𑒰𑒩𑓂𑒧𑒱𑒏 𑒁𑓀𑒡𑒫𑒱𑒬𑓂𑒫𑒰𑒮𑒏 𑒫𑒱𑒭𑒨𑒧𑒹 𑒪𑒱𑒐𑒪 𑒑𑒹𑒪। 𑒂 𑒄 𑒮𑒦 𑒏𑒩𑒻𑒞 𑒮𑒩𑓂𑒫𑒠𑒰 𑒏𑒟𑒰𑒏 𑒁𑒢𑓂𑒞 𑒮𑒳𑒐𑒠 𑒯𑒼𑒃𑒞 𑒕𑒪 𑒮𑒹𑒯𑒼 𑒢𑒯𑒱।
𑒫𑒰𑒠: 𑒮𑒰𑒯𑒱𑒞𑓂𑒨: 𑒅𑒞𑓂𑒞𑒩 𑒂𑒡𑒳𑒢𑒱𑒏, 𑒁𑒮𑓂𑒞𑒱𑒞𑓂𑒫𑒫𑒰𑒠𑒲, 𑒧𑒰𑒢𑒫𑒞𑒰𑒫𑒰𑒠𑒲, 𑒄 𑒮𑒦 𑒫𑒱𑒔𑒰𑒩𑒡𑒰𑒩𑒰 𑒠𑒩𑓂𑒬𑒢𑒬𑒰𑒮𑓂𑒞𑓂𑒩𑒏 𑒫𑒱𑒔𑒰𑒩𑒡𑒰𑒩𑒰 𑒟𑒱𑒏। 𑒣𑒯𑒱𑒢𑒹 𑒠𑒩𑓂𑒬𑒢𑒧𑒹 𑒫𑒱𑒖𑓂𑒘𑒰𑒢, 𑒃𑒞𑒱𑒯𑒰𑒮, 𑒮𑒧𑒰𑒖-𑒩𑒰𑒖𑒢𑒲𑒞𑒱, 𑒁𑒩𑓂𑒟𑒬𑒰𑒮𑓂𑒞𑓂𑒩, 𑒏𑒪𑒰-𑒫𑒱𑒖𑓂𑒘𑒰𑒢 𑒂 𑒦𑒰𑒭𑒰 𑒮𑒧𑓂𑒧𑒱𑒪𑒱𑒞 𑒩𑒯𑒻𑒞 𑒕𑒪। 𑒧𑒳𑒠𑒰 𑒖𑒹𑒢𑒰-𑒖𑒹𑒢𑒰 𑒫𑒱𑒖𑓂𑒘𑒰𑒢 𑒂 𑒏𑒪𑒰𑒏 𑒬𑒰𑒐𑒰 𑒮𑒦 𑒫𑒱𑒬𑒱𑒭𑓂𑒙𑒞𑒰 𑒣𑓂𑒩𑒰𑒣𑓂𑒞 𑒏𑒩𑒻𑒞 𑒑𑒹𑒪, 𑒫𑒱𑒬𑒹𑒭 𑒏𑒋 𑒫𑒱𑒖𑓂𑒘𑒰𑒢, 𑒞𑒿 𑒠𑒩𑓂𑒬𑒢𑒧𑒹 𑒑𑒝𑒱𑒞 𑒂 𑒫𑒱𑒖𑓂𑒘𑒰𑒢 𑒧𑒻𑒟𑒹𑒧𑒹𑒙𑒱𑒏𑒪 𑒪𑒰𑒖𑒱𑒏 𑒡𑒩𑒱 𑒮𑒲𑒧𑒱𑒞 𑒩𑒯𑒱 𑒑𑒹𑒪। 𑒠𑒰𑒩𑓂𑒬𑒢𑒱𑒏 𑒂𑒑𑒧𑒢 𑒂 𑒢𑒱𑒑𑒧𑒢𑒏 𑒁𑒡𑓂𑒨𑒨𑒢 𑒣𑓂𑒩𑒝𑒰𑒪𑒲, 𑒫𑒱𑒬𑓂𑒪𑒹𑒭𑒝𑒰𑒞𑓂𑒧𑒏 𑒣𑓂𑒩𑒝𑒰𑒪𑒲 𑒠𑒱𑒮 𑒥𑒜𑓃𑒪। 𑒧𑒰𑒩𑓂𑒏𑓂𑒮 𑒖𑒹 𑒠𑒳𑒢𑒱𑒨𑒰 𑒦𑒩𑒱𑒏 𑒑𑒩𑒲𑒥𑒏 𑒪𑒹𑒪 𑒋𑒏𑒙𑒰 𑒠𑒻𑒫𑒲𑒨 𑒯𑒮𑓂𑒞𑒏𑓂𑒭𑒹𑒣𑒏 𑒮𑒧𑒰𑒢 𑒕𑒪𑒰𑒯, 𑒠𑓂𑒫𑒢𑓂𑒠𑒰𑒞𑓂𑒧𑒏 𑒣𑓂𑒩𑒝𑒰𑒪𑒲𑒏𑒹𑒿 𑒁𑒣𑒢 𑒫𑓂𑒨𑒰𑒐𑓂𑒨𑒰𑒏 𑒂𑒡𑒰𑒩 𑒥𑒢𑒍𑒪𑒢𑓂𑒯𑒱। 𑒂𑒃-𑒏𑒰𑒪𑓂𑒯𑒱𑒏 “𑒛𑒱𑒮𑒏𑒮𑒢” 𑒫𑒰 𑒠𑓂𑒫𑒢𑓂𑒠 𑒖𑒰𑒯𑒱𑒧𑒹 𑒣𑒏𑓂𑒭-𑒫𑒱𑒣𑒏𑓂𑒭, 𑒠𑒳𑒢𑒴 𑒮𑒧𑓂𑒧𑒱𑒪𑒱𑒞 𑒁𑒕𑒱, 𑒠𑒩𑓂𑒬𑒢𑒏 (𑒫𑒱𑒬𑒹𑒭 𑒏𑒋 𑒭𑒛𑒠𑒩𑓂𑒬𑒢𑒏- 𑒧𑒰𑒡𑒫𑒰𑒔𑒰𑒩𑓂𑒨𑒏 𑒮𑒩𑓂𑒫𑒠𑒩𑓂𑒬𑒢 𑒮𑓀𑒑𑓂𑒩𑒯-𑒠𑓂𑒩𑒭𑓂𑒙𑒫𑓂𑒨) 𑒐𑒝𑓂𑒛𑒢-𑒧𑒝𑓂𑒛𑒢 𑒣𑓂𑒩𑒝𑒰𑒪𑒲𑒧𑒹 𑒣𑒯𑒱𑒢𑒯𑒱𑒮𑒿 𑒫𑒱𑒠𑓂𑒨𑒧𑒰𑒢 𑒕𑒪।
𑒮𑒹 𑒃𑒞𑒱𑒯𑒰𑒮𑒏 𑒁𑒢𑓂𑒞𑒏 𑒒𑒼𑒭𑒝𑒰 𑒏𑒋𑒢𑒱𑒯𑒰𑒩 𑒤𑓂𑒩𑒰𑓀𑒮𑒱𑒮 𑒤𑒳𑒏𑒱𑒨𑒰𑒧𑒰 -𑒖𑒹 𑒏𑒧𑓂𑒨𑒳𑒢𑒱𑒮𑓂𑒙 𑒬𑒰𑒮𑒢𑒏 𑒮𑒧𑒰𑒣𑓂𑒞𑒱𑒣𑒩 𑒄 𑒒𑒼𑒭𑒝𑒰 𑒏𑒋𑒢𑒹 𑒕𑒪𑒰𑒯- 𑒏𑒱𑒕𑒳 𑒠𑒱𑒢 𑒣𑒯𑒱𑒢𑒹 𑒋𑒯𑒱𑒮𑒿 𑒣𑒪𑒙𑒱 𑒑𑒹𑒪𑒰𑒯। 𑒅𑒞𑓂𑒞𑒩-𑒂𑒡𑒳𑒢𑒱𑒏𑒞𑒰𑒫𑒰𑒠 𑒮𑒹𑒯𑒼 𑒁𑒣𑒢 𑒣𑓂𑒩𑒰𑒩𑒧𑓂𑒦𑒱𑒏 𑒅𑒞𑓂𑒮𑒰𑒯𑒏 𑒥𑒰𑒠 𑒚𑒧𑒏𑒱 𑒑𑒹𑒪 𑒁𑒕𑒱। 𑒁𑒮𑓂𑒞𑒱𑒞𑓂𑒫𑒫𑒰𑒠, 𑒧𑒰𑒢𑒫𑒞𑒰𑒫𑒰𑒠, 𑒣𑓂𑒩𑒑𑒞𑒱𑒫𑒰𑒠, 𑒩𑒼𑒧𑒹𑒢𑓂𑒙𑒱𑒮𑒱𑒖𑓂𑒧, 𑒮𑒧𑒰𑒖𑒬𑒰𑒮𑓂𑒞𑓂𑒩𑒲𑒨 𑒫𑒱𑒬𑓂𑒪𑒹𑒭𑒝 𑒄 𑒮𑒦 𑒮𑓀𑒬𑓂𑒪𑒹𑒭𑒝𑒰𑒞𑓂𑒧𑒏 𑒮𑒧𑒲𑒏𑓂𑒭𑒰 𑒣𑓂𑒩𑒝𑒰𑒪𑒲𑒧𑒹 𑒮𑒧𑓂𑒧𑒱𑒪𑒱𑒞 𑒦𑒋 𑒁𑒣𑒢 𑒁𑒮𑓂𑒞𑒱𑒞𑓂𑒫 𑒥𑒔𑒹𑒢𑒹 𑒁𑒕𑒱।
𑒮𑒰𑒃𑒏𑒼-𑒋𑒢𑒹𑒪𑒱𑒮𑒱𑒮 𑒫𑒻𑒖𑓂𑒘𑒰𑒢𑒱𑒏𑒞𑒰𑒣𑒩 𑒂𑒡𑒰𑒩𑒱𑒞 𑒩𑒯𑒥𑒰𑒏 𑒏𑒰𑒩𑒝 𑒠𑓂𑒫𑒢𑓂𑒠𑒰𑒞𑓂𑒧𑒏 𑒣𑓂𑒩𑒝𑒰𑒪𑒲 𑒖𑒹𑒏𑒰𑒿 𑒁𑒣𑒢 𑒁𑒮𑓂𑒞𑒱𑒞𑓂𑒫 𑒥𑒔𑒹𑒢𑒹 𑒩𑒯𑒞।
𑒂𑒡𑒳𑒢𑒱𑒏 𑒏𑒟𑒰 𑒁𑒕𑒱 𑒏𑒲? 𑒄 𑒏𑒹𑒯𑒢 𑒯𑒼𑒋𑒥𑒰𑒏 𑒔𑒰𑒯𑒲? 𑒋𑒏𑒩 𑒏𑒱𑒕𑒳 𑒅𑒠𑓂𑒠𑒹𑒬𑓂𑒨 𑒁𑒕𑒱 𑒂𑒏𑒱 𑒯𑒼𑒋𑒥𑒰𑒏 𑒔𑒰𑒯𑒲? 𑒂 𑒞𑒏𑒩 𑒢𑒱𑒩𑓂𑒡𑒰𑒩𑒝 𑒏𑒼𑒢𑒰 𑒏𑒋𑒪 𑒖𑒰𑒋 ?
𑒏𑒼𑒢𑒼 𑒏𑒟𑒰𑒏 𑒂𑒡𑒰𑒩 𑒧𑒢𑒼𑒫𑒱𑒖𑓂𑒘𑒰𑒢 𑒮𑒹𑒯𑒼 𑒯𑒼𑒃𑒞 𑒁𑒕𑒱। 𑒏𑒟𑒰𑒏 𑒅𑒠𑓂𑒠𑒹𑒬𑓂𑒨 𑒮𑒧𑒰𑒖𑒏 𑒂𑒫𑒬𑓂𑒨𑒏𑒞𑒰𑒏 𑒁𑒢𑒳𑒮𑒰𑒩 𑒂 𑒏𑒟𑒰 𑒨𑒰𑒞𑓂𑒩𑒰𑒧𑒹 𑒣𑒩𑒱𑒫𑒩𑓂𑒞𑒢 𑒮𑒧𑒰𑒖𑒧𑒹 𑒦𑒹𑒪 𑒂 𑒯𑒼𑒃𑒞 𑒣𑒩𑒱𑒫𑒩𑓂𑒞𑒢𑒏 𑒁𑒢𑒳𑒩𑒴𑒣𑒹 𑒯𑒼𑒋𑒥𑒰𑒏 𑒔𑒰𑒯𑒲। 𑒧𑒳𑒠𑒰 𑒮𑓀𑒑𑒧𑒹 𑒍𑒯𑒱 𑒮𑒧𑒰𑒖𑒏 𑒮𑓀𑒮𑓂𑒏𑒵𑒞𑒱𑒮𑒿 𑒄 𑒏𑒟𑒰 𑒮𑓂𑒫𑒨𑒧𑒹𑒫 𑒢𑒱𑒨𑒢𑓂𑒞𑓂𑒩𑒱𑒞 𑒯𑒼𑒃𑒞 𑒁𑒕𑒱। 𑒂 𑒋𑒯𑒱𑒧𑒹 𑒍𑒯𑒱 𑒮𑒧𑒰𑒖𑒏 𑒌𑒞𑒱𑒯𑒰𑒮𑒱𑒏 𑒁𑒮𑓂𑒞𑒱𑒞𑓂𑒫 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱।
𑒖𑒹 𑒯𑒧 𑒫𑒻𑒠𑒱𑒏 𑒂𑒐𑓂𑒨𑒰𑒢𑒏 𑒑𑒣 𑒏𑒩𑒲 𑒞𑒿 𑒍 𑒩𑒰𑒭𑓂𑒙𑓂𑒩𑒏 𑒮𑓀𑒑 𑒣𑓂𑒩𑒹𑒧𑒏𑒹𑒿 𑒮𑒼𑒗𑒰𑒿 𑒁𑒢𑒻𑒞 𑒁𑒕𑒱। 𑒂 𑒮𑒧𑒰𑒖𑒏 𑒮𑓀𑒑 𑒧𑒱𑒪𑒱 𑒏𑒋 𑒩𑒯𑒢𑒰𑒃 𑒮𑒱𑒐𑒥𑒻𑒞 𑒁𑒕𑒱।
𑒖𑒰𑒞𑒏 𑒏𑒟𑒰 𑒪𑒼𑒏-𑒦𑒰𑒭𑒰𑒏 𑒣𑓂𑒩𑒮𑒰𑒩𑒏 𑒮𑓀𑒑 𑒥𑒾𑒠𑓂𑒡-𑒡𑒩𑓂𑒧 𑒣𑓂𑒩𑒮𑒰𑒩𑒏 𑒃𑒔𑓂𑒕𑒰 𑒮𑒹𑒯𑒼 𑒩𑒐𑒻𑒞 𑒁𑒕𑒱।
𑒧𑒳𑒮𑓂𑒪𑒱𑒧 𑒖𑒑𑒞𑒏 𑒏𑒟𑒰 𑒖𑒹𑒢𑒰 𑒩𑒴𑒧𑒲𑒏 “𑒧𑒮𑒢𑒫𑒲” 𑒤𑒰𑒩𑒮𑒲 𑒮𑒰𑒯𑒱𑒞𑓂𑒨𑒏 𑒫𑒱𑒬𑒱𑒭𑓂𑒙 𑒑𑓂𑒩𑒢𑓂𑒟 𑒁𑒕𑒱 𑒖𑒹 𑒖𑓂𑒘𑒰𑒢𑒏 𑒧𑒯𑒞𑓂𑒫 𑒂 𑒩𑒰𑒖𑓂𑒨𑒏 𑒅𑒢𑓂𑒢𑒞𑒱𑒏 𑒬𑒱𑒏𑓂𑒭𑒰 𑒠𑒻𑒞 𑒁𑒕𑒱।
𑒂𑒖𑒳𑒏 𑒏𑒟𑒰 𑒋𑒯𑒱 𑒮𑒦 𑒫𑒮𑓂𑒞𑒳𑒏𑒹𑒿 𑒮𑒧𑒹𑒙𑒻𑒞 𑒁𑒕𑒱 𑒂 𑒋𑒏𑒙𑒰 𑒣𑓂𑒩𑒥𑒳𑒠𑓂𑒡 𑒂 𑒧𑒰𑒢𑒫𑒲𑒨 (!) 𑒮𑒧𑒰𑒖𑒏 𑒢𑒱𑒩𑓂𑒧𑒰𑒝𑒏 𑒠𑒱𑒮 𑒂𑒑𑒰𑒿 𑒥𑒜𑓃𑒻𑒞 𑒁𑒕𑒱। 𑒂 𑒖𑒹 𑒮𑒹 𑒢𑒯𑒱 𑒁𑒕𑒱 𑒞𑒿 𑒄 𑒍𑒏𑒩 𑒅𑒠𑓂𑒠𑒹𑒬𑓂𑒨𑒧𑒹 𑒮𑒧𑓂𑒧𑒱𑒪𑒱𑒞 𑒯𑒼𑒋𑒥𑒰𑒏 𑒔𑒰𑒯𑒲। 𑒂 𑒞𑒐𑒢𑒹 𑒏𑒟𑒰𑒏 𑒫𑒱𑒬𑓂𑒪𑒹𑒭𑒝 𑒂 𑒮𑒧𑒰𑒪𑒼𑒔𑒢𑒰 𑒣𑒰𑒚𑒏𑒲𑒨 𑒫𑒱𑒫𑒬𑒞𑒰 𑒥𑒢𑒱 𑒮𑒏𑒞।
𑒏𑒧𑓂𑒨𑒴𑒢𑒱𑒮𑓂𑒙 𑒬𑒰𑒮𑒢𑒏 𑒮𑒧𑒰𑒣𑓂𑒞𑒱 𑒂 𑒥𑒩𑓂𑒪𑒱𑒢𑒏 𑒠𑒹𑒥𑒰𑒪𑒏 𑒐𑒮𑒥𑒰𑒏 𑒥𑒰𑒠 𑒤𑓂𑒩𑒰𑓀𑒮𑒱𑒮 𑒤𑒳𑒏𑒱𑒨𑒰𑒧𑒰 𑒒𑒼𑒭𑒱𑒞 𑒏𑒋𑒪𑒢𑓂𑒯𑒱 𑒖𑒹 𑒫𑒱𑒔𑒰𑒩𑒡𑒰𑒩𑒰𑒏 𑒂𑒣𑒮𑒲 𑒗𑒑𑒛𑓃𑒰𑒮𑒿 𑒮𑒵𑒖𑒱𑒞 𑒃𑒞𑒱𑒯𑒰𑒮𑒏 𑒄 𑒮𑒧𑒰𑒣𑓂𑒞𑒱 𑒁𑒕𑒱 𑒂 𑒂𑒥 𑒧𑒰𑒢𑒫𑒏 𑒯𑒱𑒞𑒏 𑒫𑒱𑒔𑒰𑒩𑒡𑒰𑒩𑒰 𑒧𑒰𑒞𑓂𑒩 𑒂𑒑𑒰𑒿 𑒥𑒜𑓃𑒞। 𑒧𑒳𑒠𑒰 𑒏𑒱𑒕𑒳 𑒠𑒱𑒢 𑒣𑒯𑒱𑒢𑒯𑒱 𑒍 𑒋𑒯𑒱 𑒧𑒞𑒮𑒿 𑒂𑒣𑒮 𑒦𑓄 𑒑𑒹𑒪𑒰𑒯 𑒂 𑒏𑒯𑒪𑒢𑓂𑒯𑒱 𑒖𑒹 𑒮𑒧𑒰𑒖𑒏 𑒦𑒲𑒞𑒩 𑒂 𑒩𑒰𑒭𑓂𑒙𑓂𑒩𑒲𑒨𑒞𑒰𑒏 𑒧𑒡𑓂𑒨 𑒋𑒐𑒢𑒼 𑒥𑒯𑒳𑒞 𑒩𑒰𑒮 𑒦𑒱𑒢𑓂𑒢 𑒫𑒱𑒔𑒰𑒩𑒡𑒰𑒩𑒰 𑒥𑒰𑒿𑒔𑒪 𑒁𑒕𑒱। 𑒞𑒯𑒱𑒢𑒰 𑒅𑒞𑓂𑒞𑒩 𑒂𑒡𑒳𑒢𑒱𑒏𑒞𑒰𑒫𑒰𑒠𑒲 𑒫𑒱𑒔𑒰𑒩𑒏 𑒖𑒻𑒏𑓂𑒮 𑒠𑒹𑒩𑒲𑒠𑒰 𑒦𑒰𑒭𑒰𑒏𑒹𑒿 𑒫𑒱𑒐𑒝𑓂𑒛𑒱𑒞 𑒏𑒋 𑒄 𑒮𑒱𑒠𑓂𑒡 𑒏𑒋𑒪𑒢𑓂𑒯𑒱 𑒖𑒹 𑒫𑒱𑒐𑒝𑓂𑒛𑒱𑒞 𑒦𑒰𑒑 𑒜𑒹𑒩 𑒩𑒰𑒮 𑒫𑒱𑒦𑒱𑒢𑓂𑒢 𑒂𑒡𑒰𑒩𑒣𑒩 𑒂𑒬𑓂𑒩𑒱𑒞 𑒁𑒕𑒱 𑒂 𑒥𑒱𑒢𑒰 𑒍𑒏𑒩𑒰 𑒥𑒳𑒗𑒢𑒹 𑒦𑒰𑒭𑒰𑒏 𑒁𑒩𑓂𑒟 𑒯𑒧 𑒢𑒯𑒱 𑒪𑒑𑒰 𑒮𑒏𑒻𑒞 𑒕𑒲।
𑒧𑒢𑒼𑒫𑒱𑒬𑓂𑒪𑒹𑒭𑒝 𑒂 𑒠𑓂𑒫𑒢𑓂𑒠𑒰𑒞𑓂𑒧𑒏 𑒣𑒠𑓂𑒡𑒞𑒱 𑒖𑒹𑒏𑒰𑒿 𑒤𑒳𑒏𑒱𑒨𑒰𑒧𑒰 𑒂 𑒠𑒹𑒩𑒲𑒠𑒰𑒏 𑒫𑒱𑒬𑓂𑒪𑒹𑒭𑒝 𑒮𑒹𑒯𑒼 𑒮𑓀𑒬𑓂𑒪𑒹𑒭𑒱𑒞 𑒦𑒋 𑒮𑒧𑒲𑒏𑓂𑒭𑒰𑒏 𑒪𑒹𑒪 𑒮𑓂𑒟𑒰𑒨𑒲 𑒣𑓂𑒩𑒞𑒱𑒧𑒰𑒢 𑒥𑒢𑒪 𑒩𑒯𑒞।
𑒮𑒳𑒦𑒰𑒭 𑒔𑒢𑓂𑒠𑓂𑒩 𑒨𑒰𑒠𑒫𑒏 𑒏𑒟𑒰-𑒮𑓀𑒑𑓂𑒩𑒯 𑒥𑒢𑒻𑒞 𑒥𑒱𑒑𑒛𑓃𑒻𑒞:
𑒮𑓂𑒫𑒞𑒢𑓂𑒞𑓂𑒩𑒞𑒰𑒏 𑒥𑒰𑒠𑒏 𑒣𑒲𑒜𑓃𑒲𑒏 𑒏𑒟𑒰𑒏𑒰𑒩 𑒕𑒟𑒱 𑒮𑒳𑒦𑒰𑒭𑒖𑒲। 𑒏𑒟𑒰𑒏 𑒧𑒰𑒡𑓂𑒨𑒧𑒮𑒿 𑒖𑒲𑒫𑒢𑒏𑒹𑒿 𑒩𑒴𑒣 𑒠𑒻𑒞 𑒕𑒟𑒱। 𑒬𑒱𑒪𑓂𑒣 𑒂 𑒏𑒟𑓂𑒨 𑒠𑒳𑒢𑒴𑒮𑒿 𑒏𑒟𑒰𑒏𑒹𑒿 𑒁𑒪𑓀𑒏𑒵𑒞 𑒏𑒋 𑒏𑒟𑒰𑒏𑒹𑒿 𑒮𑒰𑒩𑓂𑒟𑒏 𑒥𑒢𑒥𑒻𑒞 𑒕𑒟𑒱। 𑒁𑒮𑓂𑒞𑒱𑒞𑓂𑒫𑒏 𑒪𑒹𑒪 𑒮𑒰𑒧𑒰𑒢𑓂𑒨 𑒪𑒼𑒏𑒏 𑒮𑓀𑒒𑒩𑓂𑒭 𑒞𑒿 𑒋𑒯𑒱 𑒮𑓂𑒟𑒱𑒞𑒱𑒧𑒹 𑒯𑒱𑒢𑒏𑒩 𑒏𑒟𑒰 𑒮𑒦𑒧𑒹 𑒦𑒹𑒙𑒥 𑒮𑓂𑒫𑒰𑒦𑒰𑒫𑒱𑒏𑒹। 𑒏𑒋𑒏 𑒠𑒬𑒏 𑒣𑒴𑒩𑓂𑒫 𑒪𑒱𑒐𑒪 𑒯𑒱𑒢𑒏 𑒏𑒟𑒰 “𑒏𑒰𑒚𑒏 𑒥𑒢𑒪 𑒪𑒼𑒏” 𑒏 𑒥𑒠𑒩𑒱𑒨𑒰 𑒮𑒰𑒃𑒞𑒹 𑒮𑓀𑒨𑒼𑒑 𑒯𑓀𑒮𑒻𑒞 𑒩𑒯𑒋। 𑒋𑒯𑒳 𑒏𑒟𑒰 𑒮𑓀𑒑𑓂𑒩𑒯𑒏 𑒮𑒦 𑒣𑒰𑒞𑓂𑒩 𑒋𑒯𑒢𑒹 𑒮𑒢 𑒫𑒱𑒬𑒹𑒭𑒞𑒰 𑒪𑒹𑒢𑒹 𑒁𑒕𑒱। 𑒯𑒰𑒮𑓂𑒣𑒲𑒙𑒪𑒧𑒹 𑒏𑒢𑒻𑒞-𑒏𑒢𑒻𑒞 𑒮𑒳𑒞𑒪𑒰𑒏 𑒥𑒰𑒠 𑒅𑒚𑒱 𑒏𑒋 𑒏𑒼𑒢𑒼 𑒣𑒰𑒞𑓂𑒩 𑒤𑒹𑒩𑒮𑒿 𑒏𑒰𑒢𑒋 𑒪𑒑𑒻𑒞 𑒕𑒟𑒱 𑒞𑒿 𑒏𑒼𑒢𑒼 𑒣𑒰𑒞𑓂𑒩 𑒣𑓂𑒩𑒹𑒧𑒧𑒹 𑒣𑒛𑓃𑒪 𑒕𑒟𑒱। 𑒏𑒱𑒢𑒏𑒼𑒧𑒹 𑒥𑒱𑒖𑒢𑒹𑒮 𑒮𑒹𑒢𑓂𑒮 𑒕𑒢𑓂𑒯𑒱 𑒞𑒿 𑒯𑒩𑒱𑒫𑓀𑒬 𑒮𑒢 𑒣𑒰𑒞𑓂𑒩 𑒮𑒹𑒯𑒼 𑒕𑒟𑒱 𑒖𑒹 𑒅𑒣𑒏𑒰𑒩𑒏 𑒥𑒠𑒪𑒰 𑒮𑒱𑒮𑓂𑒙𑒧 𑒤𑒰𑒪𑓂𑒙𑒏 𑒏𑒰𑒩𑒝 𑒁𑒣𑒏𑒰𑒩 𑒏𑒋 𑒖𑒰𑒃𑒞 𑒕𑒟𑒱। 𑒂𑒥 “𑒥𑒢𑒻𑒞 𑒥𑒱𑒑𑒛𑓃𑒻𑒞” 𑒏𑒟𑒰 𑒮𑓀𑒑𑓂𑒩𑒯𑒏 𑒏𑒟𑒰 𑒮𑒦𑒣𑒩 𑒑𑒯𑒱𑓀𑒏𑒲 𑒢𑒖𑒩𑒱 𑒠𑒾𑒑𑒰𑒥𑒲।
𑒏𑒢𑒱𑒨𑒰𑒿-𑒣𑒳𑒞𑒩𑒰- 𑒋𑒯𑒱 𑒏𑒟𑒰𑒧𑒹 𑒩𑒮𑓂𑒞𑒰𑒧𑒹 𑒋𑒏𑒙𑒰 𑒥𑒔𑒱𑒨𑒰 𑒪𑒹𑒐𑒏𑒏 𑒣𑒋𑒩 𑒕𑒰𑒢𑒱 𑒤𑒹𑒩 𑒚𑒹𑒯𑒳𑒢𑒣𑒩 𑒧𑒰𑒟 𑒩𑒰𑒐𑒱 𑒢𑒱𑒬𑓂𑒔𑒱𑒢𑓂𑒞 𑒁𑒕𑒱, 𑒖𑒹𑒢𑒰 𑒧𑒰𑒋𑒏 𑒚𑒹𑒯𑒳𑒢𑒣𑒩 𑒧𑒰𑒟 𑒩𑒐𑒢𑒹 𑒯𑒼𑒁𑒋। 𑒢𑒹𑒥𑒼 𑒮𑒢 𑒏𑒼𑒢𑒼 𑒏𑒛𑓃𑒑𑒩 𑒔𑒲𑒖 𑒪𑒹𑒐𑒏𑒮𑒿 𑒙𑒏𑒩𑒹𑒪𑒢𑓂𑒯𑒱। 𑒄 𑒪𑒛𑓃𑒏𑒲𑒏 𑒕𑒰𑒞𑒲 𑒕𑒱𑒌। 𑒪𑒛𑓃𑒏𑒲 𑒢𑒱𑒩𑓂𑒫𑒱𑒏𑒰𑒩 𑒩𑒯𑒋 𑒖𑒹𑒢𑒰 𑒥𑒰𑒣-𑒠𑒰𑒠𑒰 𑒫𑒰 𑒦𑒰𑒋 𑒥𑒯𑒱𑒢 𑒮𑓄 𑒮𑒙𑒪 𑒯𑒼। 𑒪𑒹𑒐𑒏 𑒮𑒼𑒔𑒻𑒞 𑒕𑒟𑒱, 𑒄 𑒮𑒲𑒞𑒰 𑒥𑒢𑒞 𑒏𑒲 𑒠𑓂𑒩𑒾𑒣𑒠𑒲। 𑒩𑒰𑒥𑒢 𑒂 𑒠𑒳𑒩𑓂𑒖𑒼𑒡𑒢𑒏 𑒂𑒬𑓀𑒏𑒰 𑒪𑒹𑒐𑒏𑒏𑒹𑒿 𑒒𑒹𑒩 𑒪𑒻𑒞 𑒕𑒢𑓂𑒯𑒱।
𑒏𑒢𑒱𑒨𑒰𑒿-𑒣𑒳𑒞𑒩𑒰 𑒣𑒜𑓃𑒥𑒰𑒏 𑒥𑒰𑒠 𑒫𑒻𑒯 𑒮𑒛𑓃𑒏𑒏 𑒔𑒾𑒥𑒙𑒱𑒨𑒰 𑒁𑒕𑒱 𑒂 𑒫𑒻𑒯 𑒩𑒹𑒛-𑒪𑒰𑒃𑒙𑒣𑒩 𑒑𑒰𑒛𑓃𑒲 𑒔𑒪𑒥𑒻𑒞-𑒩𑒼𑒏𑒻𑒞 𑒏𑒰𑒪 𑒥𑒰𑒪𑒏-𑒥𑒰𑒪𑒱𑒏𑒰 𑒮𑒦 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒕𑒟𑒱। 𑒧𑒳𑒠𑒰 𑒂𑒥 𑒠𑒵𑒭𑓂𑒙𑒱𑒧𑒹 𑒣𑒩𑒱𑒫𑒩𑓂𑒞𑒢 𑒦𑓄 𑒖𑒰𑒃𑒞 𑒁𑒕𑒱। 𑒏𑒰𑒩𑒏 𑒬𑒲𑒮𑒰 𑒣𑒼𑒕𑒱 𑒣𑒰𑒃 𑒧𑒿𑒑𑒢𑒱𑒯𑒰𑒩 𑒥𑒰𑒪𑒏-𑒥𑒰𑒪𑒱𑒏𑒰𑒏𑒹𑒿 𑒣𑒰𑒃-𑒠𑒹𑒢𑒹 𑒫𑒰 𑒥𑒱𑒢 𑒠𑒹𑒢𑒹, 𑒧𑒳𑒠𑒰 𑒥𑒱𑒢𑒳 𑒮𑒼𑒔𑒢𑒹 𑒂𑒑𑒰𑒿 𑒥𑒜𑓃𑒱 𑒖𑒰𑒋𑒥𑒪𑒰 𑒠𑒵𑒭𑓂𑒙𑒱𑒏 𑒣𑒩𑒱𑒫𑒩𑓂𑒞𑒢। 𑒏𑒢𑒱𑒨𑒰𑒿-𑒣𑒳𑒞𑒩𑒰 𑒣𑒜𑓃𑒥𑒰𑒏 𑒥𑒰𑒠 𑒏𑒲 𑒯𑒳𑒢𑒏𑒩 𑒠𑒵𑒭𑓂𑒙𑒱𑒧𑒹 𑒏𑒼𑒢𑒼 𑒣𑒩𑒱𑒫𑒩𑓂𑒞𑒢 𑒢𑒯𑒱 𑒯𑒼𑒋𑒞𑒢𑓂𑒯𑒱? 𑒥𑒰𑒪𑒏 𑒞𑒿 𑒣𑒻𑒒 𑒦𑒋 𑒔𑒼𑒩𑒱 𑒏𑒩𑒞 𑒫𑒰 𑒏𑒼𑒢𑒼 𑒛𑓂𑒩𑒑 𑒏𑒰𑒩𑓂𑒙𑒹𑒪𑒏 𑒮𑒦𑒮𑒿 𑒢𑒱𑒔𑒳𑒪𑒏𑒰 𑒮𑒲𑒜𑓃𑒲 𑒥𑒢𑒞 𑒧𑒳𑒠𑒰 𑒥𑒰𑒪𑒱𑒏𑒰 ? 𑒍 𑒮𑒲𑒞𑒰 𑒥𑒢𑒞 𑒂𑒏𑒱 𑒠𑓂𑒩𑒾𑒣𑒠𑒲 𑒂𑒏𑒱 𑒂𑒧𑓂𑒩𑒣𑒰𑒪𑒲। 𑒖𑒹 𑒮𑒰𑒧𑒰𑒖𑒱𑒏 𑒮𑓀𑒮𑓂𑒟𑒰, 𑒯𑓂𑒨𑒴𑒧𑒢 𑒩𑒰𑒃𑒙𑓂𑒮 𑒂𑒩𑒑𑒹𑒢𑒰𑒃𑒖𑒹𑒬𑒢 𑒏𑒼𑒢𑒼 𑒣𑓂𑒩𑒹𑒧𑒲𑒏 𑒥𑒱𑒖𑒪𑒲𑒏 𑒐𑒰𑒧𑓂𑒯𑒣𑒩 𑒔𑒜𑓃𑒱 𑒣𑓂𑒩𑒰𑒝 𑒠𑒹𑒥𑒰𑒏 𑒡𑒧𑒏𑒲𑒣𑒩 𑒢𑒲𑒔𑒰𑒿 𑒖𑒰𑒪 𑒣𑒮𑒰𑒩𑒱 𑒏𑓄 𑒙𑒲.𑒫𑒲.𑒏𑒻𑒧𑒩𑒰𑒣𑒩 𑒁𑒣𑒢 𑒂 𑒁𑒣𑒢 𑒮𑓀𑒮𑓂𑒟𑒰𑒏 𑒢𑒰𑒧 𑒣𑓂𑒩𑒔𑒰𑒩𑒱𑒞 𑒏𑒩𑒻𑒞 𑒕𑒟𑒱 𑒍 𑒋𑒯𑒱 𑒏𑒟𑒰𑒏𑒹𑒿 𑒣𑒜𑓃𑒪𑒰𑒏 𑒥𑒰𑒠 𑒍𑒯𑒱 𑒣𑒳𑒩𑒰𑒞𑒢 𑒠𑒵𑒭𑓂𑒙𑒱𑒮𑒿 𑒏𑒰𑒖 𑒏𑒋 𑒮𑒏𑒞𑒰𑒯? 𑒍 𑒮𑒩𑒏𑒰𑒩 𑒖𑒹 𑒏𑒼𑒢𑒼 𑒯𑒰𑒮𑓂𑒣𑒲𑒙𑒪𑒏 𑒢𑒰𑒧 𑒥𑒠𑒪𑒱 𑒏𑒋 𑒖𑒨𑒣𑓂𑒩𑒏𑒰𑒬 𑒢𑒰𑒩𑒰𑒨𑒝𑒏 𑒢𑒰𑒧𑒣𑒩 𑒏𑒩𑒻𑒞 𑒁𑒕𑒱 𑒫𑒰 𑒯𑒰𑒩𑓂𑒛𑒱𑓀𑒑 𑒣𑒰𑒩𑓂𑒏𑒏 𑒢𑒰𑒧 𑒫𑒲𑒩 𑒏𑒳𑒿𑒁𑒩 𑒮𑒱𑓀𑒯𑒏 𑒢𑒰𑒧𑒣𑒩 𑒏𑒋 𑒁𑒣𑒢 𑒏𑒩𑓂𑒞𑓂𑒞𑒫𑓂𑒨𑒏 𑒃𑒞𑒱𑒬𑓂𑒩𑒲 𑒧𑒰𑒢𑒱 𑒪𑒻𑒞 𑒁𑒕𑒱 𑒍 𑒮𑒧𑒮𑓂𑒨𑒰𑒏 𑒖𑒛𑓃𑒱 𑒡𑒩𑒱 𑒣𑒯𑒳𑒿𑒔𑒱 𑒢𑒫 𑒣𑒰𑒩𑓂𑒏 𑒂 𑒢𑒫 𑒯𑒰𑒮𑓂𑒣𑒲𑒙𑒪 𑒥𑒢𑒰 𑒏𑒋 𑒖𑒨𑒣𑓂𑒩𑒏𑒰𑒬 𑒢𑒰𑒩𑒰𑒨𑒝 𑒂 𑒫𑒲𑒩 𑒏𑒳𑒿𑒁𑒩 𑒮𑒱𑓀𑒯𑒏 𑒢𑒰𑒧𑒣𑒩 𑒏𑒩𑒞 𑒂𑒏𑒱 𑒠𑒼𑒮𑒩𑒏 𑒏𑒋𑒪 𑒏𑒰𑒖𑒧𑒹 “𑒧𑒹𑒛 𑒥𑒰𑒃 𑒧𑒲” 𑒏𑒹𑒩 𑒮𑓂𑒙𑒰𑒧𑓂𑒣 𑒪𑒑𑒰𑒍𑒞? 𑒄 𑒮𑓀𑒮𑓂𑒟𑒰 𑒮𑒦 𑒂𑒃 𑒡𑒩𑒱 𑒧𑒹𑒯𑒢𑒞𑒱𑒮𑒿 𑒥𑒔𑒻𑒞 𑒁𑒋𑒥𑒰𑒏 𑒂 𑒮𑒩𑒪 𑒅𑒣𑒰𑒨 𑒞𑒏𑒥𑒰𑒏 𑒣𑓂𑒩𑒫𑒵𑒞𑓂𑒞𑒱𑒣𑒩 𑒩𑒼𑒏 𑒢𑒯𑒱 𑒪𑒑𑒰𑒍𑒞?
𑒁𑒮𑒳𑒩𑒏𑓂𑒭𑒱𑒞- 𑒙𑓂𑒩𑒹𑒢𑒮𑒿 𑒅𑒞𑒩𑒪𑒰𑒏 𑒥𑒰𑒠 𑒒𑒩𑒏 𑓒𑓐 𑒧𑒱𑒢𑒙𑒏 𑒩𑒮𑓂𑒞𑒰𑒏 𑒩𑒰𑒞𑒱 𑒖𑒞𑒹𑒏 𑒁𑒮𑒳𑒩𑒏𑓂𑒭𑒱𑒞 𑒦𑓄 𑒑𑒹𑒪 𑒁𑒕𑒱 𑒞𑒏𑒩 𑒮𑒔𑒱𑒞𑓂𑒩 𑒫𑒩𑓂𑒝𑒢 𑒄 𑒏𑒟𑒰 𑒏𑒩𑒻𑒞 𑒁𑒕𑒱। 𑒣𑒯𑒱𑒢𑒹 𑒞𑒿 𑒋𑒯𑒢 𑒢𑒯𑒱 𑒩𑒯𑒻𑒏- 𑒄 𑒁𑒕𑒱 𑒪𑒼𑒏𑒏 𑒧𑒰𑒢𑒮𑒱𑒏 𑒁𑒫𑒮𑓂𑒟𑒰। 𑒧𑒳𑒠𑒰 𑒋𑒯𑒱 𑒞𑒩𑒯𑒏 𑒮𑒧𑒮𑓂𑒨𑒰 𑒠𑒱𑒮 𑒏𑒏𑒩𑒼 𑒡𑓂𑒨𑒰𑒢 𑒏𑒯𑒰𑒿 𑒕𑒻। 𑒣𑒻𑒒-𑒣𑒻𑒒 𑒮𑒧𑒮𑓂𑒨𑒰, 𑒅𑒠𑒰𑒩𑒲𑒏𑒩𑒝 𑒂𑒢 𑒏𑒞𑒹𑒏 𑒫𑒱𑒭𑒨𑒣𑒩 𑒧𑒲𑒛𑒱𑒂𑒏 𑒡𑓂𑒨𑒰𑒢 𑒕𑒻। 𑒔𑒾𑒏-𑒔𑒾𑒩𑒰𑒯𑒰𑒏 𑒋𑒯𑒱 𑒞𑒩𑒯𑒏 𑒮𑒧𑒮𑓂𑒨𑒰𑒣𑒩 𑒢𑒫 𑒠𑒵𑒭𑓂𑒙𑒱 𑒁𑒥𑒻𑒞 𑒁𑒕𑒱, 𑒋𑒯𑒱𑒧𑒹 𑒮𑓂𑒙𑒹𑒬𑒢𑒮𑒿 𑒒𑒩𑒏 𑒥𑒲𑒔𑒏 𑒠𑒴𑒩𑒲 𑒩𑒰𑒞𑒱𑒏 𑒁𑒢𑓂𑒯𑒰𑒩𑒧𑒹 𑒣𑒯𑒰𑒛𑓃 𑒮𑒢 𑒦𑓄 𑒖𑒰𑒃𑒞 𑒁𑒕𑒱। 𑒣𑓂𑒩𑒠𑒹𑒬𑒏 𑒞𑒞𑓂𑒏𑒰𑒪𑒲𑒢 𑒏𑒰𑒢𑒴𑒢-𑒫𑓂𑒨𑒫𑒮𑓂𑒟𑒰𑒣𑒩 𑒄 𑒋𑒏 𑒞𑒩𑒯𑒏 𑒙𑒱𑒣𑓂𑒣𑒝𑒲 𑒁𑒕𑒱।
𑒋𑒏𑒰𑒏𑒲- 𑒋𑒯𑒱 𑒏𑒟𑒰𑒧𑒹 𑒏𑒳𑒮𑒹𑒮𑒩 𑒯𑒰𑒮𑓂𑒣𑒲𑒙𑒪𑒧𑒹 𑒕𑒟𑒱। 𑒯𑒰𑒮𑓂𑒣𑒲𑒙𑒪𑒏 𑒮𑒔𑒱𑒞𑓂𑒩 𑒫𑒱𑒫𑒩𑒝 𑒦𑒹𑒪 𑒁𑒕𑒱। 𑒍𑒞𑒋 𑒋𑒏𑒙𑒰 𑒮𑓂𑒞𑓂𑒩𑒲 𑒣𑒞𑒱𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒏𑒢𑒻𑒞-𑒏𑒢𑒻𑒞 𑒣𑓂𑒩𑒰𑒨𑓁 𑒮𑒳𑒞𑒱 𑒑𑒹𑒪𑒱 𑒂 𑒤𑒹𑒩 𑒢𑒱𑒢𑓂𑒢 𑒙𑒳𑒙𑒪𑒰𑒣𑒩 𑒏𑒰𑒢𑒋 𑒪𑒰𑒑𑒪𑒱। 𑒋𑒢𑒰 𑒯𑒼𑒃𑒞 𑒁𑒕𑒱। 𑒏𑒟𑒰𑒏𑒰𑒩 𑒧𑒰𑒢𑒫 𑒖𑒲𑒫𑒢𑒏 𑒋𑒏𑒙𑒰 𑒮𑒞𑓂𑒨𑒞𑒰 𑒠𑒱𑒮 𑒃𑒬𑒰𑒩𑒰 𑒠𑒻𑒞 𑒂 𑒯𑒰𑒮𑓂𑒣𑒲𑒙𑒪𑒏 𑒥𑒰𑒞-𑒫𑓂𑒨𑒫𑒮𑓂𑒟𑒰𑒣𑒩 𑒙𑒱𑒣𑓂𑒣𑒝𑒲 𑒞𑒹𑒢𑒰 𑒦𑓄 𑒏𑒋 𑒢𑒯𑒱 𑒫𑒩𑒝 𑒖𑒲𑒫𑒢𑓂𑒞𑒞𑒰 𑒠𑒹𑒐𑒰 𑒏𑒋 𑒏𑒩𑒻𑒞 𑒕𑒟𑒱।
𑒍 𑒪𑒛𑓃𑒏𑒲- 𑒋𑒯𑒱 𑒏𑒟𑒰𑒧𑒹 𑒯𑒰𑒮𑓂𑒙𑒪𑒏 𑒪𑒛𑓃𑒏𑒰-𑒪𑒛𑓃𑒏𑒲𑒏 𑒖𑒲𑒫𑒢𑒏 𑒥𑒲𑒔 𑒢𑒫𑒲𑒢 𑒢𑒰𑒧𑒏 𑒨𑒳𑒫𑒏 𑒋𑒏𑒙𑒰 𑒪𑒛𑓃𑒏𑒲𑒏 𑒯𑒰𑒟𑒧𑒹 𑒌𑓀𑒚 𑒐𑒰𑒪𑒲 𑒏𑒣, 𑒖𑒹 𑒍𑒯𑒱 𑒪𑒛𑓃𑒏𑒲𑒏 𑒂 𑒍𑒏𑒩 𑒣𑓂𑒩𑒹𑒧𑒲𑒏 𑒁𑒕𑒱, 𑒠𑒹𑒐𑒻𑒞 𑒁𑒕𑒱। 𑒪𑒛𑓃𑒏𑒲 𑒢𑒫𑒲𑒢𑒏𑒹𑒿 𑒣𑒳𑒕𑒻𑒞 𑒕𑒻 𑒖𑒹 𑒍 𑒏𑒹𑒧𑓂𑒯𑒩 𑒖𑒰 𑒩𑒯𑒪 𑒁𑒕𑒱। 𑒢𑒫𑒲𑒢𑒏𑒹𑒿 𑒯𑒼𑒃𑒞 𑒕𑒻 𑒖𑒹 𑒍 𑒍𑒏𑒩𑒰 𑒁𑒣𑒢𑒰𑒮𑒿 𑒠𑒥 𑒥𑒳𑒗𑒱 𑒏𑒣 𑒤𑒹𑓀𑒏𑒥𑒰𑒏 𑒪𑒹𑒪 𑒣𑒳𑒕𑒪𑒏। 𑒢𑒫𑒲𑒢 𑒍𑒏𑒩𑒰 𑒧𑒢𑒰 𑒏𑓄 𑒠𑒻𑒞 𑒁𑒕𑒱। 𑒫𑒱𑒔𑒰𑒩 𑒮𑒦 𑒍𑒏𑒩 𑒧𑒼𑒢𑒧𑒹 𑒒𑒳𑒩𑒧𑒻𑒞 𑒩𑒯𑒻𑒞 𑒕𑒻। 𑒄 𑒏𑒟𑒰 𑒋𑒏𑒙𑒰 𑒕𑒼𑒙 𑒒𑒙𑒢𑒰𑒣𑒩 𑒂𑒡𑒰𑒩𑒱𑒞 𑒁𑒕𑒱...𑒖𑒹 𑒍 𑒯𑒧𑒩𑒰 𑒠𑒥 𑒥𑒴𑒗𑒱 𑒔𑒰𑒯𑒏 𑒏𑒣 𑒤𑒹𑒏𑒥𑒰𑒏 𑒪𑒹𑒪 𑒏𑒯𑒪𑒏? 𑒂 𑒍 𑒠𑒵𑒜𑓃𑒞𑒰𑒮𑒿 𑒢𑒯𑒱 𑒏𑒯𑒱 𑒂𑒑𑒰𑒿 𑒥𑒜𑓃𑒱 𑒖𑒰𑒃𑒞 𑒁𑒕𑒱। 𑒋𑒏𑒰𑒏𑒲 𑒖𑒹𑒏𑒰𑒿 𑒄 𑒏𑒟𑒰 𑒮𑒹𑒯𑒼 𑒧𑒢𑒼𑒫𑒻𑒖𑓂𑒘𑒰𑒢𑒱𑒏 𑒫𑒱𑒬𑓂𑒪𑒹𑒭𑒝𑒣𑒩 𑒂𑒡𑒰𑒩𑒱𑒞 𑒁𑒕𑒱।
𑒋𑒏𑒙𑒰 𑒣𑓂𑒩𑒹𑒧 𑒏𑒟𑒰- 𑒣𑒯𑒱𑒢𑒹 𑒖𑒏𑒩𑒰 𑒒𑒩𑒧𑒹 𑒤𑒼𑒢 𑒩𑒯𑒻𑒞 𑒕𑒪 𑒞𑒏𑒩𑒰 𑒒𑒩𑒧𑒹 𑒠𑒼𑒮𑒩𑒰𑒏 𑒤𑒼𑒢 𑒁𑒥𑒻𑒞 𑒩𑒯𑒻𑒞 𑒕𑒪, 𑒖𑒹 𑒋𑒏𑒩𑒰 𑒞𑒿 𑒍𑒏𑒩𑒰 𑒥𑒖𑒰 𑒠𑒱𑒁। 𑒪𑒹𑒐𑒏𑒏 𑒒𑒩𑒧𑒹 𑒤𑒼𑒢 𑒕𑒪𑒢𑓂𑒯𑒱 𑒂 𑒍 𑒋𑒏𑒙𑒰 𑒣𑓂𑒩𑒹𑒧𑒲𑒏 𑒣𑓂𑒩𑒹𑒧𑒱𑒏𑒰𑒏 𑒤𑒼𑒢 𑒁𑒋𑒪𑒰𑒣𑒩, 𑒍𑒏𑒩 𑒣𑓂𑒩𑒹𑒧𑒲𑒏𑒹𑒿 𑒥𑒖𑒥𑒻𑒞 𑒩𑒯𑒻𑒞 𑒕𑒟𑒱। 𑒣𑓂𑒩𑒹𑒧𑒲 𑒧𑒼𑒥𑒰𑒃𑒪 𑒏𑒲𑒢𑒱 𑒪𑒻𑒞 𑒁𑒕𑒱 𑒮𑒹 𑒤𑒼𑒢 𑒂𑒋𑒥 𑒥𑒢𑓂𑒠 𑒦𑓄 𑒖𑒰𑒃𑒞 𑒁𑒕𑒱। 𑒧𑒳𑒠𑒰 𑒣𑓂𑒩𑒹𑒧𑒲 𑒠𑓂𑒫𑒰𑒩𑒰 𑒢𑒧𑓂𑒥𑒩 𑒥𑒠𑒪𑒱 𑒪𑒹𑒪𑒰𑒣𑒩 𑒣𑓂𑒩𑒹𑒧𑒱𑒏𑒰𑒏 𑒤𑒼𑒢 𑒤𑒹𑒩𑒮𑒿 𑒪𑒹𑒐𑒏𑒏 𑒒𑒩𑒣𑒩 𑒁𑒥𑒻𑒞 𑒁𑒕𑒱। 𑒣𑓂𑒩𑒹𑒧𑒱𑒏𑒰, 𑒣𑓂𑒩𑒹𑒧𑒲𑒏 𑒧𑒧𑒱𑒨𑒾𑒞 𑒥𑒯𑒱𑒢𑒏 𑒮𑒐𑒲 𑒩𑒱𑒞𑒳 𑒕𑒟𑒱 𑒂 𑒪𑒹𑒐𑒏 𑒍𑒏𑒩 𑒮𑒯𑒰𑒨𑒞𑒰𑒏 𑒪𑒹𑒪 𑒔𑒱𑒢𑓂𑒞𑒱𑒞 𑒦𑓄 𑒖𑒰𑒃𑒞 𑒕𑒟𑒱। 𑒋𑒯𑒱 𑒏𑒟𑒰𑒧𑒹 𑒣𑓂𑒩𑒹𑒧𑒲-𑒣𑓂𑒩𑒹𑒧𑒱𑒏𑒰, 𑒧𑒼𑒥𑒰𑒃𑒪 𑒂 𑒤𑒼𑒢 𑒄 𑒮𑒦 𑒢𑒫 𑒨𑒳𑒑𑒏 𑒮𑓀𑒑 𑒢𑒫 𑒏𑒟𑒰𑒧𑒹 𑒮𑒹𑒯𑒼 𑒮𑓂𑒫𑒰𑒦𑒰𑒫𑒱𑒏 𑒩𑒴𑒣𑒹𑒿 𑒁𑒥𑒻𑒞 𑒁𑒕𑒱।
𑒙𑒰𑒃𑒙𑒪 𑒏𑒟𑒰 𑒁𑒕𑒱 𑒥𑒢𑒻𑒞-𑒥𑒱𑒑𑒛𑓃𑒻𑒞। 𑒞𑒲𑒢 𑒙𑒰 𑒢𑒰𑒧𑒱𑒞 𑒣𑒰𑒞𑓂𑒩 । 𑒧𑒰𑒪𑒰, 𑒍𑒏𑒩 𑒣𑒞𑒱 𑒮𑒞𑓂𑒞𑒼 𑒂 𑒣𑒼𑒞𑒲 𑒧𑒳𑒢𑒱𑒨𑒰𑒿 । 𑒑𑒰𑒧-𑒒𑒩𑒏 𑒖𑒹 𑒮𑒰𑒮-𑒣𑒳𑒞𑒼𑒯𑒳𑒏 𑒑𑒣 𑒕𑒻, 𑒮𑒹𑒯𑒢𑓂𑒞𑒰 𑒩𑒯𑒱 𑒑𑒹𑒪 𑒖𑒹 𑒏𑒯𑒱𑒨𑒼 𑒢𑒯𑒹𑒪𑒰𑒏 𑒥𑒰𑒠 𑒐𑒰𑒃 𑒪𑒹𑒪 𑒣𑒳𑒕𑒱𑒞𑒋, 𑒋𑒯𑒢 𑒮𑒢। 𑒧𑒳𑒠𑒰 𑒮𑒻𑒯 𑒥𑒹𑒙𑒰-𑒣𑒳𑒞𑒼𑒯𑒳 𑒖𑒐𑒢 𑒥𑒰𑒯𑒩 𑒔𑒪𑒱 𑒖𑒰𑒃𑒞 𑒕𑒟𑒱 𑒞𑒿 𑒫𑒻𑒯 𑒮𑒰𑒮𑒳 𑒏𑒰𑒩 𑒏𑒾𑒂𑒏 𑒙𑒰𑒯𑒱𑒣𑒩 𑒔𑒱𑒢𑓂𑒞𑒱𑒞 𑒯𑒼𑒧𑒋 𑒪𑒑𑒻𑒞 𑒕𑒟𑒱। 𑒧𑒰𑒃𑒑𑓂𑒩𑒹𑒬𑒢𑒏 𑒥𑒰𑒠𑒏 𑒑𑒰𑒧𑒏 𑒨𑒟𑒰𑒩𑓂𑒟𑒏𑒹𑒿 𑒔𑒱𑒞𑓂𑒩𑒱𑒞 𑒏𑒩𑒻𑒞 𑒁𑒕𑒱 𑒄 𑒏𑒟𑒰। 𑒮𑒞𑓂𑒞𑒼𑒏 𑒮𑓀𑒑 𑒏𑒾𑒂 𑒮𑒹𑒯𑒼 𑒋𑒏 𑒠𑒱𑒢 𑒥𑒱𑒪𑒰 𑒖𑒋𑒞 𑒂 𑒧𑒳𑒢𑒱𑒨𑒰𑒿 𑒏𑒾𑒂 𑒂 𑒠𑒰𑒠𑒰 𑒠𑒳𑒢𑒴𑒏𑒹𑒿 𑒞𑒏𑒻𑒞 𑒩𑒯𑒞।𑒣𑓂𑒩𑒫𑒰𑒮𑒲𑒏 𑒏𑒟𑒰, 𑒥𑒹𑒙𑒰-𑒣𑒳𑒞𑒼𑒯𑒳𑒏 𑒂 𑒣𑒼𑒞𑒲𑒏 𑒏𑒟𑒰, 𑒮𑒰𑒮𑒳-𑒣𑒳𑒞𑒼𑒯𑒳𑒏 𑒗𑒑𑒛𑓃𑒰 𑒂 𑒣𑓂𑒩𑒹𑒧 !
𑒁𑒣𑒢-𑒁𑒣𑒢 𑒠𑒳𑓁𑒐 𑒏𑒟𑒰𑒧𑒹 𑒣𑒞𑓂𑒢𑒲, 𑒁𑒣𑒢 𑒁𑒫𑒯𑒹𑒪𑒢𑒰𑒏 𑒮𑓂𑒟𑒱𑒞𑒱𑒧𑒹, 𑒡𑒲𑒨𑒰-𑒣𑒳𑒞𑒰𑒏𑒹𑒿 𑒮𑒩𑒰𑒣𑒻𑒞 𑒕𑒟𑒱। 𑒩𑒰𑒞𑒱𑒧𑒹 𑒡𑒲𑒨𑒰-𑒣𑒳𑒞𑒰𑒏 𑒐𑒹𑒢𑒰𑒃, 𑒐𑒰 𑒪𑒹𑒥𑒰 𑒅𑒞𑓂𑒞𑒩 𑒦𑒢𑒮𑒰𑒒𑒩𑒏 𑒞𑒰𑒪𑒰 𑒥𑒢𑓂𑒠 𑒩𑒯𑒥𑒰𑒏 𑒮𑓂𑒟𑒱𑒞𑒱𑒧𑒹 𑒣𑒞𑓂𑒢𑒲𑒏 𑒦𑒴𑒐𑒪 𑒩𑒯𑒥 𑒂 𑒣𑒩𑒱𑒝𑒰𑒧𑒮𑓂𑒫𑒩𑒴𑒣 𑒣𑒞𑒱𑒏 𑒤𑒼𑓀𑒤𑒏 𑒮𑓂𑒫𑒩𑒮𑒿 𑒏𑒳𑒣𑒱𑒞 𑒯𑒼𑒋𑒥 𑒮𑓂𑒫𑒰𑒦𑒰𑒫𑒱𑒏। 𑒮𑒦𑒏 𑒁𑒣𑒢 𑒮𑓀𑒮𑒰𑒩 𑒕𑒻। 𑒪𑒼𑒏 𑒥𑒳𑒗𑒻𑒋 𑒖𑒹 𑒍𑒏𑒩𑒹 𑒮𑓀𑒮𑒰𑒩𑒏 𑒮𑒳𑒐 𑒂 𑒠𑒳𑓁𑒐 𑒧𑒰𑒞𑓂𑒩 𑒮𑒧𑓂𑒣𑒴𑒩𑓂𑒝 𑒕𑒻 𑒧𑒳𑒠𑒰 𑒮𑒹 𑒢𑒯𑒱 𑒁𑒕𑒱। 𑒮𑒦𑒏 𑒁𑒣𑒢 𑒮𑒳𑒐-𑒠𑒳𑓁𑒐 𑒕𑒻, 𑒁𑒣𑒢 𑒂𑒬𑒰 𑒂 𑒂𑒏𑒰𑓀𑒏𑓂𑒭𑒰 𑒕𑒻। 𑒏𑒟𑒰𑒏𑒰𑒩 𑒍𑒯𑒢 𑒮𑒞𑓂𑒨𑒏𑒹𑒿 𑒅𑒠𑓂𑒒𑒰𑒙𑒱𑒞 𑒏𑒩𑒻𑒞 𑒕𑒟𑒱, 𑒖𑒹 𑒯𑒳𑒢𑒏𑒩 𑒁𑒢𑒳𑒦𑒫𑒏 𑒁𑓀𑒞𑒩𑓂𑒑𑒞 𑒁𑒥𑒻𑒞 𑒕𑒢𑓂𑒯𑒱। 𑒂𑒞𑓂𑒧𑒰𑒢𑒳𑒦𑒴𑒞𑒱 𑒣𑒩𑒱𑒫𑒹𑒬 𑒮𑓂𑒫𑒞𑓀𑒞𑓂𑒩 𑒏𑒼𑒢𑒰 𑒦𑒋 𑒮𑒏𑒞 𑒂 𑒮𑒹 𑒮𑒳𑒦𑒰𑒭 𑒔𑒢𑓂𑒠𑓂𑒩 𑒨𑒰𑒠𑒫𑒖𑒲𑒏 𑒮𑒦 𑒏𑒟𑒰𑒧𑒹 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱।
𑒂𑒞𑓀𑒏 𑒏𑒟𑒰𑒧𑒹 𑒏𑒟𑒰𑒏𑒰𑒩𑒏𑒹𑒿 𑒣𑒳𑒩𑒰𑒢 𑒮𑓀𑒑𑒲 𑒯𑒩𑒱𑒫𑓀𑒬𑒮𑒿 𑒏𑒰𑒩𑓂𑒨𑒰𑒪𑒨𑒧𑒹 𑒦𑒹𑒿𑒙 𑒯𑒼𑒃𑒞 𑒕𑒢𑓂𑒯𑒱। 𑒪𑒹𑒐𑒏𑒏 𑒠𑒰𑒐𑒱𑒪-𑒐𑒰𑒩𑒱𑒖 𑒥𑒪𑒰 𑒏𑒰𑒖 𑒋𑒯𑒱 𑒪𑓄 𑒏𑓄 𑒢𑒯𑒱 𑒦𑒹𑒪𑒢𑓂𑒯𑒱 𑒖𑒹 𑒯𑒩𑒱𑒫𑓀𑒬𑒏 𑒮𑓂𑒟𑒰𑒢𑒰𑒢𑓂𑒞𑒩𑒝𑒏 𑒣𑒬𑓂𑒔𑒰𑒞𑓂 𑒢𑒹 𑒏𑓂𑒨𑒼 𑒯𑒳𑒢𑒏𑒰𑒮𑒿 𑒒𑒴𑒮 𑒪𑒹𑒪𑒏 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒏𑒰𑒖𑒼 𑒢𑒯𑒱 𑒏𑒹𑒪𑒏। 𑒯𑒩𑒱𑒫𑓀𑒬𑒏 𑒥𑒑𑒹𑒥𑒰𑒢𑒲 𑒒𑒴𑒮𑒏 𑒁𑒢𑒹𑒩 𑒣𑒰𑒃𑒏 𑒏𑒰𑒩𑒝 𑒕𑒪 𑒮𑒹 𑒠𑒼𑒮𑒩 𑒏𑒱𑒋𑒏 𑒁𑒣𑒢 𑒣𑒰𑒃 𑒕𑒼𑒛𑓃𑒞 ? 𑒪𑒹𑒐𑒏 𑒂𑒞𑓀𑒏𑒱𑒞 𑒕𑒟𑒱। 𑒏𑒰𑒩𑓂𑒨𑒰𑒪𑒨𑒏 𑒣𑒩𑒱𑒫𑒹𑒬, 𑒦𑓂𑒩𑒭𑓂𑒙𑒰𑒔𑒰𑒩 𑒂 𑒋𑒏 𑒑𑒼𑒙𑒹𑒏 𑒮𑓂𑒟𑒰𑒢𑒰𑓀𑒞𑒩𑒝𑒮𑒿 𑒥𑒠𑒪𑒻𑒞 𑒮𑒰𑒧𑒰𑒖𑒱𑒏 𑒮𑒧𑓂𑒥𑒢𑓂𑒡 𑒄 𑒮𑒦 𑒋𑒞𑒋 𑒫𑓂𑒨𑒏𑓂𑒞 𑒦𑒹𑒪 𑒁𑒕𑒱। 𑒂𑒃 𑒏𑒰𑒪𑓂𑒯𑒱 𑒯𑒧 𑒂𑒏𑒱 𑒁𑒯𑒰𑒿 𑒥𑓂𑒪𑒰𑒏𑒧𑒹 𑒫𑒰 𑒮𑒔𑒱𑒫𑒰𑒪𑒨𑒧𑒹 𑒏𑒼𑒢𑒼 𑒏𑒰𑒖 𑒪𑒹𑒪 𑒖𑒰𑒃𑒞 𑒕𑒲, 𑒞𑒿 𑒨𑒻𑒯 𑒢𑒹 𑒮𑒳𑒢𑒋 𑒣𑒛𑓃𑒻𑒞 𑒁𑒕𑒱, 𑒖𑒹 𑒣𑒰𑒃 𑒖𑒹 𑒧𑒰𑒿𑒑𑒞 𑒮𑒹 𑒠𑒋 𑒠𑒹𑒥𑒻𑒏 𑒂 𑒞𑒐𑒢 𑒏𑒼𑒢𑒼 𑒠𑒱𑒏𑓂𑒏𑒞 𑒯𑒼𑒁𑒋 𑒞𑒿 𑒏𑒯𑒥 ! 𑒂 𑒣𑒰𑒃𑒏 𑒥𑒠𑒪𑒰 𑒏𑒏𑒩𑒼 𑒢𑒰𑒧 𑒫𑒰 𑒣𑒻𑒩𑒫𑒲 𑒪𑒋 𑒑𑒹𑒪𑒯𑒳𑒿 𑒞𑒿 𑒏𑒩𑓂𑒧𑒔𑒰𑒩𑒲 𑒢𑒹 𑒣𑒰𑒃𑒨𑒹 𑒪𑒹𑒞 𑒂 𑒢𑒯𑒱𑒨𑒹 𑒁𑒯𑒰𑒿𑒏 𑒏𑒰𑒖 𑒯𑒼𑒋𑒞।
𑒋𑒏𑒙𑒰 𑒁𑒢𑓂𑒞 𑒏𑒟𑒰𑒧𑒹 𑒮𑒮𑒳𑒩𑒏 𑒧𑒵𑒞𑓂𑒨𑒳𑒣𑒩 𑒪𑒹𑒐𑒏𑒏 𑒮𑒰𑒜𑓃𑒴 𑒏𑒹𑒬 𑒏𑒙𑒹𑒢𑒹 𑒕𑒟𑒱 𑒂 𑒪𑒹𑒐𑒏 𑒢𑒯𑒱, 𑒋𑒯𑒱𑒣𑒩 𑒏𑒻𑒏 𑒞𑒩𑒯𑒏 𑒑𑒣 𑒯𑒼𑒃𑒞 𑒁𑒕𑒱। 𑒮𑒰𑒜𑓃𑒴 𑒏𑒹𑒬 𑒏𑒙𑒰 𑒏𑓄 𑒢𑒱𑒬𑓂𑒔𑒱𑒢𑓂𑒞 𑒕𑒟𑒱। 𑒄 𑒖𑒹 𑒮𑒰𑓀𑒮𑓂𑒏𑒵𑒞𑒱𑒏 𑒮𑒱𑒧𑓂𑒥𑒼𑒪𑒱𑒖𑓂𑒧 𑒂𑒋𑒪 𑒁𑒕𑒱, 𑒖𑒹 𑒣𑒏𑒛𑓃𑒰 𑒑𑒹𑒪 𑒮𑒹 𑒔𑒼𑒩 𑒂 𑒐𑒩𑒰𑒣 𑒏𑒰𑒖 𑒏𑒹𑒢𑒱𑒯𑒰𑒩, 𑒖𑒹 𑒢𑒯𑒱 𑒣𑒏𑒛𑓃𑒰𑒋𑒪 𑒮𑒹 𑒂𑒠𑒩𑓂𑒬𑒫𑒰𑒠𑒲। 𑒣𑒴𑒩𑒰-𑒣𑒴𑒩𑒲 𑒞𑒿 𑒢𑒯𑒱, 𑒧𑒳𑒠𑒰 𑒁𑒯𑒴 𑒏𑒟𑒰𑒧𑒹 𑒋𑒯𑒢𑒹 𑒂𑒮𑓂𑒟𑒰 𑒖𑒢𑓂𑒧 𑒪𑒻𑒞 𑒁𑒕𑒱 𑒂 𑒙𑒴𑒙𑒱 𑒖𑒰𑒃𑒞 𑒁𑒕𑒱। 𑒯𑒩𑒱𑒨𑒰𑒝𑒰𑒧𑒹 𑒥𑒰𑒣𑒼 𑒧𑒩𑒪𑒰𑒣𑒩 𑒪𑒼𑒏 𑒏𑒹𑒬 𑒢𑒯𑒱 𑒏𑒙𑒥𑒻𑒞 𑒁𑒕𑒱, 𑒞𑒿 𑒏𑒲 𑒍𑒏𑒩 𑒠𑒳𑓁𑒐𑒧𑒹 𑒏𑒼𑒢𑒼 𑒏𑒧𑒲 𑒩𑒯𑒻𑒞 𑒕𑒻 𑒞𑒹𑒿 ? 𑒣𑓀𑒖𑒰𑒥𑒏 𑒧𑒯𑒱𑒪𑒰 𑒋𑒏 𑒥𑒩𑒐𑒏 𑒥𑒰𑒠 𑒢𑒹 𑒮𑒱𑒢𑒴𑒩 𑒪𑒑𑒥𑒻𑒞 𑒕𑒟𑒱 𑒂 𑒢𑒹 𑒔𑒴𑒛𑓃𑒲 𑒣𑒯𑒱𑒩𑒻𑒞 𑒕𑒟𑒱 𑒧𑒳𑒠𑒰 𑒣𑒯𑒱𑒪 𑒥𑒩𑒐 𑒏𑒰𑒢𑓂𑒯 𑒡𑒩𑒱 𑒔𑒴𑒛𑓃𑒲 𑒦𑒩𑒪 𑒩𑒯𑒻𑒞 𑒕𑒢𑓂𑒯𑒱, 𑒞𑒿 𑒏𑒲 𑒥𑒱𑒨𑒰𑒯𑒏 𑒣𑒯𑒱𑒪 𑒥𑒩𑒐𑒏 𑒥𑒰𑒠 𑒯𑒳𑒢𑒏𑒩 𑒣𑒞𑒱-𑒣𑓂𑒩𑒹𑒧𑒧𑒹 𑒏𑒼𑒢𑒼 𑒒𑒙𑓀𑒞𑒲 𑒂𑒥𑒱 𑒖𑒰𑒃𑒞 𑒕𑒢𑓂𑒯𑒱 ?
𑒏𑒥𑒰𑒕𑒳 𑒏𑒟𑒰 𑒧𑒹 𑒔𑒧𑓂𑒣𑒲𑒥𑒪𑒰𑒏 𑒪𑒹𑒐𑒏 𑒪𑒑 𑒂𑒋𑒥, 𑒖𑒰𑒿𑒒𑒣𑒩 𑒯𑒰𑒟 𑒩𑒰𑒐𑒥। 𑒁𑒦𑒱𑒖𑒰𑒞𑓂𑒨 𑒮𑓀𑒮𑓂𑒏𑒰𑒩𑒏 𑒪𑒼𑒏 𑒪𑒑 𑒥𑒻𑒮𑒪 𑒩𑒯𑒥𑒰𑒏 𑒏𑒰𑒩𑒝𑒮𑒿 𑒪𑒹𑒐𑒏 𑒠𑓂𑒫𑒰𑒩𑒰 𑒍𑒏𑒩 𑒯𑒰𑒟 𑒯𑒙𑒰𑒋𑒥 । 𑒔𑒧𑓂𑒣𑒲𑒥𑒪𑒰 𑒠𑓂𑒫𑒰𑒩𑒰 𑒄 𑒑𑒣 𑒥𑒰𑒖𑒥 𑒖𑒹 𑒕𑒳𑒁𑒪 𑒠𑒹𑒯𑒏𑒹𑒿 𑒕𑒴𑒪𑒰𑒧𑒹 𑒏𑒼𑒢 𑒮𑓀𑒏𑒼𑒔। 𑒖𑒹𑒢𑒰 𑒔𑒧𑓂𑒣𑒲𑒫𑒪𑒰 𑒪𑒹𑒐𑒏𑒏𑒹𑒿 𑒥𑒳𑒗𑒰𑒃𑒨 𑒩𑒯𑒢𑓂𑒯𑒱 𑒖𑒹 𑒯𑒳𑒢𑒏𑒰 𑒨𑒳𑒫𑒞𑒲 𑒥𑒳𑒗𑒱 𑒩𑒯𑒪 𑒕𑒪𑒢𑓂𑒯𑒱। 𑒪𑒹𑒐𑒏𑒏𑒹𑒿 𑒪𑒑𑒻𑒞 𑒕𑒢𑓂𑒯𑒱 𑒖𑒹 𑒍 𑒮𑓂𑒞𑓂𑒩𑒲 𑒕𑒟𑒱 𑒂 𑒔𑒧𑓂𑒣𑒲𑒥𑒪𑒰 𑒍𑒏𑒩 𑒣𑒳𑒩𑒰𑒢 𑒨𑒰𑒩। 𑒚𑒰𑒧-𑒏𑒳𑒚𑒰𑒧 𑒂 𑒮𑒧𑒨-𑒏𑒳𑒮𑒧𑒨𑒏 𑒧𑒯𑒲𑒢 𑒮𑒧𑒗 𑒔𑒧𑓂𑒣𑒲𑒫𑒪𑒰𑒏𑒹𑒿 𑒢𑒯𑒱 𑒕𑒃, 𑒢𑒯𑒱 𑒞𑒿 𑒪𑒹𑒐𑒏 𑒍𑒞𑒹𑒏 𑒑𑒩𑒧𑒲𑒨𑒼𑒧𑒹 𑒔𑒧𑓂𑒣𑒲 𑒏𑒩𑒰 𑒪𑒻𑒞𑒋। 𑒔𑒧𑓂𑒣𑒲𑒫𑒪𑒰𑒏 𑒠𑒲𑒢𑒞𑒰𑒣𑒩 𑒁𑒤𑒮𑒼𑒔 𑒦𑒹𑒪𑒢𑓂𑒯𑒱 𑒧𑒳𑒠𑒰 𑒍𑒏𑒩 𑒬𑒲-𑒃-𑒃 𑒏𑒹𑒿 𑒧𑒼𑒢 𑒣𑒰𑒛𑓃𑒻𑒞 𑒫𑒱𑒞𑒵𑒭𑓂𑒝𑒰 𑒮𑒹𑒯𑒼। 𑒤𑓂𑒩𑒰𑒨𑒛𑒏 𑒧𑒢𑒼𑒫𑒱𑒬𑓂𑒪𑒹𑒭𑒝𑒏 𑒥𑒛𑓂𑒛 𑒂𑒪𑒼𑒔𑒢𑒰 𑒦𑒹𑒪 𑒖𑒹 𑒍 𑒮𑒹𑒏𑓂𑒮𑒏𑒹𑒿 𑒏𑒹𑒢𑓂𑒠𑓂𑒩𑒧𑒹 𑒩𑒰𑒐𑒱 𑒑𑒣 𑒏𑒩𑒻𑒞 𑒕𑒟𑒱। 𑒧𑒳𑒠𑒰 𑒁𑒢𑒳𑒦𑒫𑒮𑒿 𑒄 𑒑𑒣 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱 𑒖𑒹 𑒮𑒹𑒏𑓂𑒮𑒮𑒿 𑒖𑒞𑒹𑒏 𑒠𑒴𑒩𑒲 𑒥𑒢𑒰𑒋𑒥, 𑒖𑒞𑒹𑒏 𑒋𑒏𑒩𑒰 𑒫𑒰𑒩𑓂𑒞𑒰𑒪𑒰𑒣-𑒏𑒟𑒰-𑒮𑒰𑒯𑒱𑒞𑓂𑒨𑒮𑒿 𑒠𑒴𑒩 𑒩𑒰𑒐𑒥, 𑒍𑒏𑒩 𑒂𑒏𑓂𑒩𑒧𑒝 𑒞𑒞𑒹𑒏 𑒞𑒲𑒫𑓂𑒩 𑒯𑒼𑒋𑒞।
𑒏𑒰𑒩𑒥𑒰𑒩 𑒧𑒹 𑒪𑒹𑒐𑒏𑒏 𑒦𑒹𑒿𑒙 𑒧𑒱𑒮𑓂𑒙𑒩 𑒫𑒩𑓂𑒧𑒰, 𑒮𑒱𑒢𑓂𑒯𑒰 𑒂 𑒠𑒴 𑒙𑒰 𑒂𑒩 𑒑𑒼𑒙𑒹𑒮𑒿 𑒯𑒼𑒃𑒞 𑒁𑒕𑒱। 𑒥𑒰𑒩 𑒧𑒹 𑒮𑒱𑒢𑓂𑒯𑒰 𑒠𑒼𑒮𑓂𑒞𑒲 𑒂 𑒥𑒱𑒖𑒢𑒹𑒮𑒏𑒹𑒿 𑒤𑒩𑒰𑒏 𑒏𑒯𑒻𑒞 𑒠𑒴 𑒙𑒰 𑒐𑒱𑒮𑓂𑒮𑒰 𑒮𑒳𑒢𑒥𑒻𑒞 𑒁𑒕𑒱। 𑒮𑒦 𑒔𑒲𑒖𑒏 𑒧𑒼𑒪 𑒁𑒕𑒱, 𑒋𑒯𑒱𑒣𑒩 𑒋𑒏𑒙𑒰 𑒠𑒼𑒮𑓂𑒞𑒏 𑒫𑒰𑒃𑒤 𑒪𑒹𑒪 𑒙𑒲.𑒫𑒲. 𑒏𑒱𑒢𑒥𑒰𑒏 𑒥𑒰𑒠 𑒤𑓂𑒩𑒱𑒖𑒏 𑒛𑒱𑒧𑒰𑒢𑓂𑒛 𑒁𑒋𑒥𑒰𑒏 𑒑𑒣 𑒥𑒲𑒔𑒹𑒧𑒹 𑒐𑒞𑒧 𑒦𑓄 𑒖𑒰𑒃𑒞 𑒁𑒕𑒱। 𑒠𑒼𑒮𑒩 𑒐𑒱𑒮𑓂𑒮𑒰𑒧𑒹 𑒋𑒏𑒙𑒰 𑒮𑓂𑒞𑓂𑒩𑒲 𑒣𑒞𑒱𑒏 𑒖𑒰𑒢 𑒥𑒔𑒥𑒋 𑒪𑒹𑒪 𑒛𑒰𑒏𑓂𑒙𑒩𑒏 𑒤𑒲𑒮 𑒠𑒹𑒥𑒰𑒏 𑒪𑒹𑒪 𑒣𑒴𑒩𑓂𑒫 𑒣𑓂𑒩𑒹𑒧𑒲 𑒪𑒑 𑒖𑒰𑒃𑒞 𑒁𑒕𑒱। 𑒣𑒴𑒩𑓂𑒫 𑒣𑓂𑒩𑒹𑒧𑒲 𑒣𑒰𑒃 𑒠𑒹𑒥𑒰𑒏 𑒥𑒠𑒪𑒰𑒧𑒹 𑒍𑒏𑒩𑒰 𑒮𑓀𑒑𑒹 𑒩𑒰𑒞𑒱 𑒥𑒱𑒞𑒥𑒋 𑒪𑒹𑒪 𑒏𑒯𑒻𑒞 𑒕𑒻। 𑒮𑒱𑒢𑓂𑒯𑒰 𑒋𑒯𑒱 𑒏𑒟𑒰𑒧𑒹 𑒏𑒏𑒩𑒼 𑒑𑒪𑒞𑒲 𑒢𑒯𑒱 𑒧𑒰𑒢𑒻𑒞 𑒕𑒟𑒱, 𑒛𑒰𑒏𑓂𑒙𑒩 𑒥𑒱𑒢𑒰 𑒣𑒰𑒃 𑒪𑒹𑒢𑒹 𑒏𑒱𑒋𑒏 𑒃𑒪𑒰𑒖 𑒏𑒩𑒞, 𑒣𑒴𑒩𑓂𑒫 𑒣𑓂𑒩𑒹𑒧𑒲 𑒧𑒿𑒑𑒢𑒲𑒧𑒹 𑒣𑒰𑒃 𑒏𑒱𑒋𑒏 𑒠𑒹𑒞 𑒂 𑒍 𑒮𑓂𑒞𑓂𑒩𑒲 𑒖𑒹 𑒣𑒴𑒩𑓂𑒫 𑒣𑓂𑒩𑒹𑒧𑒲 𑒮𑓀𑒑 𑒩𑒰𑒞𑒱 𑒢𑒯𑒱 𑒥𑒱𑒞𑒰𑒍𑒞, 𑒞𑒿 𑒍𑒏𑒩 𑒣𑒞𑒱 𑒧𑒩𑒱 𑒖𑒋𑒞𑒻𑒏।
𑒂𑒥 𑒥𑒰𑒩𑒮𑒿 𑒪𑒹𑒐𑒏 𑒢𑒱𑒏𑒪𑒻𑒞 𑒕𑒟𑒱 𑒞𑒿 𑒠𑒩𑒥𑒰𑒢𑒏 𑒮𑒪𑒰𑒧 𑒧𑒰𑒩𑒪𑒰𑒣𑒩 𑒁𑒯𑒴𑒧𑒹 𑒣𑒻𑒮𑒰𑒏 𑒙𑒢𑒏 𑒮𑒳𑒢𑒰𑒃 𑒣𑒛𑓃𑒋 𑒪𑒑𑒻𑒞 𑒕𑒢𑓂𑒯𑒱। 𑒣𑓂𑒩𑒰𑒔𑒲𑒢 𑒧𑒴𑒪𑓂𑒨, 𑒠𑒼𑒮𑓂𑒞𑒲-𑒨𑒰𑒩𑒲 𑒂 𑒂𑒠𑒩𑓂𑒬𑒏 𑒙𑒴𑒙𑒥𑒰𑒏 𑒮𑓂𑒟𑒱𑒞𑒱 𑒋𑒏𑒙𑒰 𑒋𑒏𑒰𑒏𑒲𑒣𑒢𑒏 𑒁𑒢𑒳𑒦𑒫 𑒏𑒩𑒥𑒻𑒞 𑒁𑒕𑒱।
𑒏𑒳𑒬𑓂𑒞𑒲 𑒧𑒹 𑒮𑒹𑒯𑒼 𑒤𑓂𑒩𑒰𑒨𑒛 𑒮𑒼𑒗𑒰𑒿 𑒁𑒥𑒻𑒞 𑒕𑒟𑒱, 𑒏𑒟𑒰𑒏 𑒣𑓂𑒩𑒰𑒩𑒧𑓂𑒦 𑒪𑒳𑓀𑒑𑒲𑒣𑒩𑒏 𑒮𑒳𑒐𑒰𑒋𑒪 𑒏𑒛𑓃𑒑𑒩 𑒦𑒹𑒪 𑒠𑒰𑒑𑒮𑒿 𑒬𑒳𑒩𑒴 𑒯𑒼𑒃𑒞 𑒁𑒕𑒱। 𑒧𑒳𑒠𑒰 𑒞𑒳𑒩𑒞𑓂𑒞𑒹 𑒮𑓂𑒣𑒭𑓂𑒙 𑒯𑒼𑒃𑒞 𑒁𑒕𑒱, 𑒖𑒹 𑒍 𑒮𑒹 𑒠𑒰𑒑 𑒢𑒯𑒱 𑒁𑒕𑒱, 𑒫𑒩𑒢 𑒒𑒰𑒫𑒏 𑒠𑒰𑒑 𑒁𑒕𑒱। 𑒤𑒹𑒩 𑒯𑒰𑒙𑒏 𑒏𑒳𑒬𑓂𑒞𑒲𑒧𑒹 𑒑𑒰𑒧𑒏 𑒮𑒧𑒮𑓂𑒨𑒰𑒏 𑒢𑒱𑒣𑒙𑒰𑒩𑒰, 𑒯𑒹𑒪𑓂𑒟 𑒮𑒹𑒢𑓂𑒙𑒩𑒏 𑒥𑒢𑓂𑒠 𑒩𑒯𑒥, 𑒍𑒞𑒋 𑒄𑓀𑒙𑒰𑒏 𑒔𑒼𑒩𑒱𑒏 𑒔𑒩𑒔𑒰 𑒁𑒥𑒻𑒞 𑒁𑒕𑒱। 𑒕𑒼𑒙 𑒦𑒰𑒃 𑒏𑒼𑒢𑒼 𑒃𑒪𑒰𑒖𑒏 𑒏𑓂𑒩𑒧𑒧𑒹 𑒋𑒪𑒼𑒣𑒻𑒟𑒲𑒮𑒿 𑒯𑒙𑒱 𑒏𑒋 𑒯𑒼𑒧𑓂𑒨𑒼𑒣𑒻𑒟𑒲𑒣𑒩 𑒫𑒱𑒬𑓂𑒫𑒰𑒮 𑒏𑒩𑒋 𑒪𑒑𑒻𑒞 𑒕𑒟𑒱, 𑒋𑒯𑒱 𑒑𑒣𑒏 𑒔𑒩𑒔𑒰 𑒂𑒋𑒪 𑒁𑒕𑒱। 𑒪𑒼𑒏 𑒮𑒦𑒏 𑒒𑒰𑒫𑒏 𑒮𑒧𑒰𑒔𑒰𑒩 𑒣𑒳𑒕𑒥𑒰 𑒪𑓄 𑒁𑒋𑒢𑒰𑒃 𑒂 𑒪𑒹𑒐𑒏 𑒠𑓂𑒫𑒰𑒩𑒰 𑒮𑒦𑒏𑒹𑒿 𑒫𑒱𑒮𑓂𑒞𑒵𑒞 𑒫𑒱𑒫𑒩𑒝 𑒏𑒯𑒱 𑒮𑒳𑒢𑒍𑒢𑒰𑒃 𑒧𑒳𑒠𑒰 𑒅𑒧𑒩𑒱𑒧𑒹 𑒏𑒧 𑒫𑒨𑒮𑒏 𑒏𑒻𑒏 𑒑𑒼𑒙𑒹𑒏𑒹𑒿 𑒙𑒰𑒩𑒱 𑒠𑒹𑒢𑒰𑒃, 𑒄 𑒮𑒦 𑒏𑓂𑒩𑒧 𑒋𑒏𑒙𑒰 𑒫𑒰𑒞𑒰𑒫𑒩𑒝𑒏 𑒢𑒱𑒩𑓂𑒧𑒰𑒝 𑒏𑒩𑒻𑒞 𑒁𑒕𑒱।
𑒏𑒻𑒢𑒩𑒲 𑒂𑒃𑒪𑒻𑒝𑓂𑒛𑒏 𑒪𑒰𑒩𑒹𑒪 𑒏𑒟𑒰𑒧𑒹 𑒮𑒳𑒦𑒰𑒭 𑒂 𑒅𑒣𑒱𑒨𑒰 𑒏𑒟𑒰𑒏 𑒔𑒩𑒱𑒞𑓂𑒩 𑒕𑒟𑒱। 𑒋𑒞𑒋 𑒋𑒏𑒙𑒰 𑒥𑒱𑒧𑓂𑒥 𑒁𑒕𑒱- 𑒖𑒹𑒢𑒰 𑒢𑒱𑒩𑓂𑒝𑒨 𑒏𑒼𑒮𑒲𑒏 𑒡𑒮𑒢𑒰 𑒖𑒏𑒰𑒿। 𑒧𑒧𑒱𑒨𑒾𑒞 𑒦𑒰𑒃𑒏 𑒔𑒱𑒙𑓂𑒚𑒲, 𑒏𑒙𑒰𑒩𑒱 𑒠𑒹𑒢𑒹 𑒢𑒰𑒯𑒣𑒩 𑒖𑒋𑒥𑒰𑒏, 𑒑𑒹𑒩𑒳𑒂 𑒣𑒰𑒢𑒱𑒏 𑒡𑒰𑒩𑒧𑒹 𑒂𑒋𑒥, 𑒢𑒰𑒯𑒏 𑒕𑒲𑒙𑒣𑒩 𑒅𑒞𑒰𑒩𑒥, 𑒕𑒲𑒙𑒏 𑒥𑒰𑒠𑒼 𑒥𑒯𑒳𑒞 𑒠𑒴𑒩 𑒡𑒩𑒱 𑒖𑒰𑒿𑒒 𑒦𑒩𑒱 𑒣𑒰𑒢𑒱𑒏 𑒩𑒯𑒥। 𑒡𑒲𑒣𑒪 𑒥𑒰𑒪𑒳𑒣𑒩 𑒮𑒰𑒃𑒏𑒱𑒪𑒏𑒹𑒿 𑒚𑒹𑒪𑒻𑒞 𑒠𑒹𑒐𑒱 𑒏𑓂𑒨𑒼 𑒏𑒯𑒻𑒞 𑒕𑒢𑓂𑒯𑒱- “𑒮𑒰𑒃𑒏𑒱𑒪 𑒮𑒮𑒳𑒩𑒰𑒩𑒱𑒧𑒹 𑒠𑒹𑒪𑒏-𑒋? 𑒏𑒢𑒹 𑒥𑒛𑓃𑒠 𑒖𑒏𑒰𑒿 𑒙𑒱𑒙𑒏𑒰𑒩 𑒠𑒱𑒨𑒾𑒏”। 𑒠𑒲𑒠𑒲-𑒣𑒲𑒮𑒰 𑒁𑒯𑒱𑒚𑒰𑒧 𑒋𑒯𑒱 𑒑𑒣𑒏 𑒔𑒩𑒔𑒰 𑒮𑒳𑒢𑒪𑒢𑓂𑒯𑒱, 𑒖𑒹 𑒏𑒼𑒙𑒏 𑒐𑒰𑒞𑒱𑒩 𑒯𑒳𑒢𑒏𑒩 𑒥𑒹𑒙𑒲𑒏 𑒫𑒱𑒫𑒰𑒯 𑒠𑒴 𑒠𑒱𑒢 𑒩𑒳𑒏𑒱 𑒑𑒹𑒪 𑒕𑒪𑒢𑓂𑒯𑒱 𑒂 𑒄𑒯𑒼 𑒖𑒹 𑒥𑒹𑒮𑒲 𑒣𑒜𑓃𑒢𑒹 𑒪𑒼𑒏 𑒥𑒞𑒰𑒯 𑒦𑓄 𑒖𑒰𑒃𑒞 𑒁𑒕𑒱।𑒮𑒳𑒦𑒰𑒭 𑒔𑒰𑒯𑒱𑒨𑒼 𑒏𑓄 𑒠𑒴 𑒮𑒋 𑒙𑒰𑒏𑒰 𑒢𑒯𑒱 𑒧𑒰𑒿𑒑𑒱 𑒣𑒥𑒻𑒞 𑒕𑒟𑒱, 𑒠𑒲𑒠𑒲𑒏 𑒫𑓂𑒨𑒫𑒯𑒰𑒩 𑒁𑒮𑓂𑒣𑒭𑓂𑒙 𑒕𑒢𑓂𑒯𑒱, 𑒮𑒳𑒦𑒰𑒭 𑒂𑒬𑓂𑒫𑒮𑓂𑒞 𑒢𑒯𑒱 𑒕𑒟𑒱 𑒂 𑒒𑒳𑒩𑒱 𑒖𑒰𑒃𑒞 𑒕𑒟𑒱।
𑒞𑒵𑒭𑓂𑒝𑒰 𑒏𑒟𑒰𑒧𑒹 𑒪𑒹𑒐𑒏𑒏𑒹𑒿 𑒁𑒐𑒱𑒪𑒢 𑒦𑒹𑒙𑒻𑒞 𑒕𑒢𑓂𑒯𑒱। 𑒬𑓂𑒩𑒲𑒪𑒞𑒰𑒮𑒿 𑒍 𑒁𑒣𑒢 𑒦𑒹𑒿𑒙𑒏 𑒫𑒱𑒫𑒩𑒝 𑒏𑒯𑒱 𑒮𑒳𑒢𑒥𑒻𑒞 𑒁𑒕𑒱। 𑒣𑒰𑒿𑒔𑒧 𑒠𑒱𑒢 𑒒𑒳𑒩𑒪𑒰𑒏 𑒥𑒰𑒠 𑒙𑓂𑒩𑒹𑒢𑒧𑒹 𑒍 𑒢𑒯𑒱 𑒦𑒹𑒙𑒪𑒲𑒯। 𑒂𑒥 𑒁𑒐𑒱𑒪𑒢 𑒏𑒲 𑒏𑒩𑒞, 𑒫𑒱𑒬𑒰𑒐𑒰𑒣𑒞𑓂𑒞𑒢𑒧 𑒂 𑒫𑒱𑒖𑒨𑒫𑒰𑒛𑓃𑒰𑒏 𑒥𑒲𑒔𑒏 𑒩𑒮𑓂𑒞𑒰𑒧𑒹 𑒔𑒏𑓂𑒏𑒩 𑒏𑒰𑒙𑒞 𑒂𑒏𑒱 𑒮𑓂𑒧𑒵𑒞𑒱𑒏 𑒮𑓀𑒑 𑒠𑒱𑒢 𑒏𑒰𑒙𑒞।
𑒕𑒼𑒙-𑒕𑒼𑒙 𑒦𑒰𑒫𑒢𑒰𑒞𑓂𑒧𑒏 𑒒𑒙𑒢𑒰𑒏 𑒫𑒱𑒬𑓂𑒪𑒹𑒭𑒝 𑒁𑒕𑒱 𑒏𑒟𑒰 “𑒏𑒻𑒢𑒩𑒲 𑒂𑒃𑒪𑒻𑒝𑓂𑒛𑒏 𑒪𑒰𑒩𑒹𑒪” 𑒂 “𑒞𑒵𑒭𑓂𑒝𑒰”।
𑒠𑒰𑒢𑒰 𑒏𑒟𑒰𑒧𑒹 𑒧𑒼𑒯𑒢 𑒃𑒢𑓂𑒙𑒩𑒫𑓂𑒨𑒴 𑒪𑒹𑒪 𑒑𑒹𑒪 𑒁𑒕𑒱, 𑒍𑒞𑒋 𑒮𑒯𑒵𑒠𑒨 𑒔𑒣𑒩𑒰𑒮𑒲 𑒮𑒴𑒔𑒱𑒞 𑒏𑒩𑒻𑒞 𑒕𑒻 𑒖𑒹 𑒥𑒰𑒯𑒩𑒲𑒏𑒹𑒿 𑒢𑒯𑒱 𑒪𑒻𑒞 𑒕𑒻, 𑒣𑒲.𑒋𑒔.𑒛𑒲. 𑒩𑒯𑒱𑒞𑒋 𑒞𑒿 𑒏𑒼𑒢𑒼 𑒥𑒰𑒞 𑒩𑒯𑒱𑒞𑒋। 𑒧𑒼𑒯𑒢𑒏𑒹𑒿 𑒮𑒦 𑒔𑒲𑒖 𑒥𑒲𑒧𑒰𑒩 𑒂 𑒅𑒠𑒰𑒮 𑒪𑒑𑒻𑒞 𑒩𑒯𑒋। 𑒤𑒳𑒠𑓂𑒠𑒲 𑒂 𑒧𑒻𑒢𑒰 𑒣𑒰𑒫𑒩𑒼𑒙𑒲𑒏 𑒙𑒳𑒏𑒛𑓃𑒲𑒣𑒩 𑒔𑒲-𑒔𑒲 𑒏𑒩𑒻𑒞 𑒗𑒣𑒙𑒻𑒞 𑒩𑒯𑒋।𑒣𑓂𑒩𑒞𑒱𑒨𑒼𑒑𑒲 𑒣𑒩𑒲𑒏𑓂𑒭𑒰𑒏 𑒮𑒰𑒏𑓂𑒭𑒰𑒞𑓂𑒏𑒰𑒩𑒧𑒹 𑒥𑒰𑒯𑒩𑒲 𑒂 𑒪𑒼𑒏𑒪 𑒏𑒹𑒩 𑒖𑒹 𑒮𑓀𑒏𑒪𑓂𑒣𑒢𑒰 𑒂𑒋𑒪 𑒁𑒕𑒱 𑒞𑒏𑒩 𑒮𑒧𑓂𑒫𑒹𑒠𑒢𑒰𑒞𑓂𑒧𑒏 𑒫𑒩𑓂𑒝𑒢 𑒦𑒹𑒪 𑒁𑒕𑒱।
𑒠𑒵𑒭𑓂𑒙𑒱 𑒏𑒟𑒰𑒧𑒹 𑒣𑒜𑓃𑒰𑒃 𑒐𑒞𑒧 𑒦𑒹𑒪𑒰𑒏 𑒥𑒰𑒠 𑒢𑒼𑒏𑒩𑒲𑒏 𑒐𑒼𑒖, 𑒑𑒰𑒧𑒧𑒹 𑒪𑒼𑒏𑒮𑒦𑒏 𑒞𑒲𑒏𑓂𑒭𑓂𑒝 𑒏𑒙𑒰𑒏𑓂𑒭। 𑒤𑒹𑒩 𑒠𑒏𑓂𑒭𑒱𑒝 𑒦𑒰𑒩𑒞𑒲𑒨 𑒣𑒞𑓂𑒩𑒏𑒰𑒩𑒏 𑒣𑓂𑒩𑒹𑒩𑒝𑒰𑒮𑒿 𑒏𑒢𑒱𑒨𑒰𑒿𑒏 𑒫𑒱𑒩𑒼𑒡𑒏 𑒥𑒰𑒫𑒖𑒴𑒠 𑒑𑒰𑒧𑒧𑒹 𑒪𑒹𑒐𑒏𑒏 𑒐𑒹𑒞𑒲𑒧𑒹 𑒪𑒰𑒑𑒥। 𑒄 𑒮𑒦 𑒑𑒣 𑒋𑒏𑒙𑒰 𑒮𑒰𑒧𑒰𑒢𑓂𑒨 𑒏𑒟𑓂𑒨 𑒩𑒯𑒪𑒰𑒏 𑒥𑒰𑒠𑒼 𑒚𑒰𑒧-𑒚𑒰𑒧 𑒮𑒰𑒧𑒰𑒖𑒱𑒏 𑒮𑒞𑓂𑒨 𑒅𑒠𑓂𑒒𑒰𑒙𑒱𑒞 𑒏𑒩𑒻𑒞 𑒁𑒕𑒱। 𑒋𑒞𑒋 𑒑𑒰𑒧𑒏 𑒪𑒼𑒏𑒏 𑒏𑒳𑒙𑒲𑒔𑒰𑒪𑒲 𑒁𑒕𑒱, 𑒖𑒹 𑒏𑒰𑒖𑒏 𑒁𑒦𑒰𑒫𑒧𑒹 𑒐𑒰𑒪𑒲 𑒮𑒧𑒨 𑒥𑒹𑒬𑒲 𑒩𑒯𑒪𑒰𑒏 𑒏𑒰𑒩𑒝 𑒁𑒥𑒻𑒞 𑒁𑒕𑒱। 𑒮𑓀𑒑𑒧𑒹 𑒂𑒃-𑒏𑒰𑒪𑓂𑒯𑒱𑒏 𑒮𑓂𑒞𑓂𑒩𑒲𑒏 𑒬𑒯𑒩𑒲 𑒖𑒲𑒫𑒢 𑒖𑒲𑒥𑒰𑒏 𑒂𑒏𑒰𑓀𑒏𑓂𑒭𑒰 𑒮𑒹𑒯𑒼 𑒣𑓂𑒩𑒠𑒩𑓂𑒬𑒱𑒞 𑒏𑒩𑒻𑒞 𑒁𑒕𑒱।
𑒢𑒠𑒲 𑒏𑒟𑒰𑒧𑒹 𑒏𑒟𑓂𑒨 𑒏𑒟𑒰𑒏 𑒮𑓀𑒑𑒹 𑒔𑒪𑒻𑒞 𑒁𑒕𑒱 𑒂 𑒐𑒞𑒧 𑒦𑒋 𑒖𑒰𑒃𑒞 𑒁𑒕𑒱। 𑒑𑒑𑒢𑒠𑒹𑒫𑒏 𑒒𑒩𑒣𑒩 𑒥𑒱𑒯𑒰𑒩𑒲 𑒂𑒋𑒪 𑒕𑒻। 𑒬𑒯𑒩𑒧𑒹 𑒍𑒏𑒩𑒰 𑒋𑒏 𑒮𑒰𑒪 𑒩𑒯𑒥𑒰𑒏 𑒕𑒻। 𑒑𑒑𑒢𑒠𑒹𑒫𑒏𑒹𑒿 𑒍𑒏𑒩𑒰 𑒮𑓀𑒑 𑒧𑒏𑒰𑒢 𑒐𑒼𑒖𑒥𑒰𑒏 𑒏𑓂𑒩𑒧𑒧𑒹 𑒋𑒏𑒙𑒰 𑒪𑒛𑓃𑒏𑒲𑒮𑒿 𑒦𑒹𑒿𑒙 𑒯𑒼𑒃𑒞 𑒕𑒻। 𑒍𑒏𑒩𑒰 𑒕𑒼𑒛𑓃𑒱 𑒂𑒑𑒰𑒿 𑒥𑒜𑓃𑒪 𑒞𑒿 𑒄 𑒥𑒳𑒗𑒪𑒰𑒏 𑒥𑒰𑒠𑒼 𑒖𑒹 𑒂𑒥 𑒍𑒏𑒩𑒰𑒮𑒿 𑒤𑒹𑒩 𑒦𑒹𑒿𑒙 𑒢𑒯𑒱 𑒯𑒹𑒞𑒃 𑒍 𑒅𑒪𑓂𑒪𑒰𑒮 𑒂 𑒣𑓂𑒩𑒹𑒧𑒏 𑒁𑒢𑒳𑒦𑒴𑒞𑒱𑒮𑒿 𑒦𑒩𑒱 𑒑𑒹𑒪।
𑒣𑒩𑒪𑒨 𑒥𑒰𑒜𑒱𑒏 𑒏𑒟𑒰 𑒟𑒱𑒏, 𑒏𑒼𑒮𑒲𑒏 𑒏𑒟𑒰 𑒏𑒯𑒪 𑒑𑒹𑒪 𑒁𑒕𑒱 𑒋𑒞𑒋। 𑒥𑒾𑒏𑒲 𑒥𑒳𑒢𑒕𑒹𑒏𑒏 𑒃𑒢𑓂𑒞𑒖𑒰𑒩𑒲𑒧𑒹 𑒁𑒕𑒱। 𑒧𑒳𑒠𑒰 𑒡𑒰𑒩𑒧𑒹 𑒣𑒰𑒢𑒱 𑒥𑒜𑓃𑒱 𑒩𑒯𑒪 𑒕𑒻। 𑒏𑒼𑒬𑒲𑒏 𑒥𑒰𑒜𑓃𑒱 𑒥𑒜𑓃𑒪 𑒂𑒥𑒱 𑒩𑒯𑒪 𑒕𑒻 𑒂 𑒋𑒧𑓂𑒯𑒩 𑒧𑒰𑒋𑒏 𑒩𑒠𑓂𑒠-𑒠𑒮𑓂𑒞𑒮𑒿 𑒯𑒰𑒪-𑒥𑒹𑒯𑒰𑒪 𑒕𑒻। 𑒧𑒰𑒪-𑒖𑒰𑒪 𑒦𑒴𑒐𑒮𑒿 𑒛𑒱𑒏𑒩𑒻𑒞 𑒩𑒯𑒻। 𑒩𑒰𑒧𑒔𑒩𑒢𑒏 𑒒𑒩𑒧𑒹 𑒁𑒢𑓂𑒢𑒣𑒰𑒢𑒱 𑒥𑒹𑒬𑒲 𑒕𑒻 𑒮𑒹 𑒍 𑒮𑒦𑒏𑒹𑒿 𑒢𑒰𑒯𑒏 𑒃𑒢𑓂𑒞𑒖𑒰𑒧 𑒪𑒹𑒪 𑒏𑒯𑒻𑒞 𑒕𑒻। 𑒥𑒾𑒏𑒴𑒏 𑒒𑒩𑒮𑒿 𑒏𑒙𑒢𑒱𑒨𑒰𑒿 𑒠𑒴𑒩 𑒩𑒯𑒻। 𑒧𑒵𑒞𑓂𑒨𑒳 𑒂 𑒫𑒱𑒢𑒰𑒬 𑒥𑒾𑒏𑒴𑒏𑒹𑒿 𑒏𑒚𑒼𑒩 𑒥𑒢𑒰 𑒠𑒹𑒪𑒏𑒻𑒏, 𑒧𑒼𑒯 𑒞𑒼𑒛𑓃𑒱 𑒠𑒹𑒪𑒏𑒻𑒏। 𑒧𑒳𑒠𑒰 𑒥𑒩𑒐𑒰 𑒩𑒳𑒏𑒱 𑒑𑒹𑒪𑒻𑒏। 𑒥𑒾𑒏𑒴 𑒔𑒲𑒖 𑒮𑒦𑒏𑒹𑒿 𑒔𑒱𑒢𑓂𑒯𑒥𑒰𑒏 𑒂 𑒮𑓂𑒧𑒩𑒝 𑒏𑒩𑒥𑒰𑒏 𑒣𑓂𑒩𑒨𑒞𑓂𑒢 𑒏𑒩𑒋 𑒪𑒰𑒑𑒪।
𑒥𑒰𑒞 𑒏𑒟𑒰𑒧𑒹 𑒮𑒹𑒯𑒼 𑒏𑒟𑒰𑒏𑒰𑒩 𑒁𑒣𑒢 𑒏𑒟𑒰𑒢𑒏𑒏𑒹𑒿 𑒥𑒰𑒙 𑒔𑒪𑒱𑒞𑒹 𑒞𑒰𑒏𑒱 𑒪𑒻𑒞 𑒕𑒟𑒱 𑒂 𑒬𑒱𑒪𑓂𑒣𑒮𑒿 𑒍𑒏𑒩𑒰 𑒂𑒑𑒰𑒿 𑒥𑒜𑓃𑒥𑒻𑒞 𑒕𑒟𑒱। 𑒢𑒹𑒥𑒼 𑒠𑒼𑒏𑒰𑒢𑒣𑒩 𑒢𑒹𑒥𑒼𑒫𑒪𑒰 𑒂 𑒋𑒏𑒙𑒰 𑒪𑒼𑒏𑒏 𑒥𑒲𑒔𑒧𑒹 𑒥𑒯𑒮 𑒮𑒳𑒢𑒻𑒞 𑒪𑒹𑒐𑒏 𑒥𑒲𑒔𑒧𑒹 𑒏𑒴𑒠𑒱 𑒣𑒛𑓃𑒻𑒞 𑒕𑒟𑒱। 𑒢𑒹𑒥𑒼𑒫𑒪𑒰𑒮𑒿 𑒋𑒏 𑒑𑒼𑒙𑒹 𑒁𑒣𑒢 𑒕𑒞𑓂𑒞𑒰 𑒧𑒰𑒿𑒑𑒱 𑒩𑒯𑒪 𑒁𑒕𑒱 𑒖𑒹 𑒍 𑒢𑒲𑒔𑒰𑒿 𑒩𑒐𑒢𑒹 𑒩𑒯𑒋।𑒠𑒳𑒐𑒏 𑒑𑒣, 𑒪𑒹𑒐𑒏𑒏 𑒁𑒢𑒳𑒮𑒰𑒩, 𑒥𑒹𑒬𑒲 𑒠𑒱𑒢 𑒡𑒩𑒱 𑒪𑒼𑒏𑒏𑒹𑒿 𑒧𑒼𑒢 𑒩𑒯𑒻𑒞 𑒕𑒻।
𑒩𑓀𑒦𑒰 𑒏𑒟𑒰𑒧𑒹 𑒣𑒳𑒩𑒳𑒭-𑒮𑓂𑒞𑓂𑒩𑒲𑒏 𑒥𑒲𑒔𑒏 𑒥𑒠𑒪𑒻𑒞 𑒮𑒧𑓂𑒥𑒢𑓂𑒡𑒏 𑒞𑒲𑒫𑓂𑒩 𑒑𑒞𑒱𑒮𑒿 𑒫𑒩𑓂𑒝𑒢 𑒦𑒹𑒪 𑒁𑒕𑒱। 𑒣𑒳𑒩𑒳𑒭 𑒨𑒰𑒫𑒞 𑒮𑓂𑒞𑓂𑒩𑒲𑒮𑒿 𑒠𑒴𑒩 𑒩𑒯𑒻𑒞 𑒁𑒕𑒱 𑒞𑒿 𑒮𑒦 𑒍𑒏𑒩𑒰 𑒧𑒹𑒢𑒏𑒰 𑒂 𑒩𑒧𑓂𑒦𑒰 𑒠𑒹𑒐𑒰𑒃 𑒣𑒛𑓃𑒻𑒞 𑒕𑒻। 𑒧𑒳𑒠𑒰 𑒖𑒹 𑒮𑒧𑓂𑒫𑒰𑒠𑒏 𑒣𑓂𑒩𑒰𑒩𑒧𑓂𑒦 𑒯𑒼𑒃𑒞 𑒁𑒕𑒱 𑒞𑒿 𑒥𑒰𑒠𑒧𑒹 𑒪𑒹𑒐𑒏 𑒏𑒹𑒿 𑒪𑒑𑒻𑒞 𑒕𑒢𑓂𑒯𑒱 𑒖𑒹 𑒍 𑒥𑒹𑒙𑒲𑒨𑒹 𑒕𑒲।𑒩𑒮𑓂𑒞𑒰𑒧𑒹 𑒋𑒏 𑒮𑓂𑒞𑓂𑒩𑒲 𑒁𑒥𑒻𑒞 𑒁𑒕𑒱। 𑒪𑒹𑒐𑒏 𑒮𑒼𑒔𑒻𑒞 𑒕𑒟𑒱 𑒖𑒹 𑒄 𑒏𑒹 𑒕𑒲, 𑒩𑒧𑓂𑒦𑒰, 𑒧𑒹𑒢𑒏𑒰 𑒂𑒏𑒱...। 𑒍𑒏𑒩𑒰 𑒮𑓀𑒑 𑒥𑒹𑒙𑒰 𑒕𑒻, 𑒍𑒞𑒹𑒏 𑒮𑒳𑒢𑓂𑒢𑒩 𑒢𑒯𑒱, 𑒏𑒰𑒩𑒝 𑒋𑒏𑒩 𑒫𑒩 𑒮𑒳𑒢𑓂𑒠𑒩 𑒢𑒯𑒱 𑒯𑒼𑒋𑒞𑒻𑒏। 𑒍 𑒑𑒣𑒬𑒣𑒧𑒹 𑒏𑒐𑒢𑒼 𑒪𑒹𑒐𑒏𑒏𑒹𑒿 𑒮𑒮𑒳𑒩 𑒖𑒏𑒰𑒿, 𑒏𑒐𑒢𑒼 𑒁𑒣𑒢𑒰𑒏𑒹𑒿 𑒯𑒳𑒢𑒏𑒩 𑒥𑒹𑒙𑒲 𑒞𑒳𑒪𑓂𑒨 𑒏𑒯𑒻𑒞 𑒁𑒕𑒱। 𑒣𑒯𑒱𑒢𑒹 𑒪𑒹𑒐𑒏𑒏𑒹𑒿 𑒐𑒩𑒰𑒣 𑒪𑒑𑒪𑒢𑓂𑒯𑒱। 𑒧𑒳𑒠𑒰 𑒥𑒰𑒠𑒧𑒹 𑒪𑒹𑒐𑒏𑒏𑒹𑒿 𑒢𑒲𑒏 𑒪𑒑𑒪𑒢𑓂𑒯𑒱। 𑒧𑒳𑒠𑒰 𑒁𑒢𑓂𑒞𑒧𑒹 𑒍𑒏𑒩 𑒣𑒋𑒩 𑒕𑒴𑒥𑒋 𑒪𑒹𑒪 𑒗𑒳𑒏𑒥 𑒧𑒳𑒠𑒰 𑒥𑒱𑒢 𑒕𑒴𑒢𑒹 𑒮𑒼𑒗 𑒦𑓄 𑒖𑒰𑒋𑒥 𑒢𑒯𑒱 𑒥𑒳𑒗𑒱𑒧𑒹 𑒁𑒋𑒪𑒢𑓂𑒯𑒱।
𑒯𑒧𑒩 𑒑𑒰𑒧 𑒏𑒟𑒰𑒧𑒹 𑒪𑒹𑒐𑒏𑒏 𑒑𑒰𑒧𑒏 𑒩𑒮𑓂𑒞𑒰, 𑒏𑒙𑒢𑒱𑒨𑒰𑒿 𑒮𑒿 𑒧𑒹𑒢𑒰𑒯𑒲 𑒑𑒰𑒧𑒏 𑒪𑒼𑒏𑒏 𑒕𑒱𑒛𑓃𑒱𑒂𑒋𑒥 𑒂 𑒥𑒰𑒢𑓂𑒯𑒏 𑒥𑒲𑒔𑒧𑒹 𑒁𑒯𑒳𑒩𑒱𑒨𑒰 𑒏𑒰𑒙𑒻𑒞 𑒪𑒼𑒏𑒏 𑒫𑒩𑓂𑒝𑒢 𑒁𑒕𑒱। 𑒏𑒼𑒮𑒱𑒏𑒢𑓂𑒯𑒰𑒏 𑒪𑒼𑒏- 𑒖𑒰𑒢𑒫𑒩𑒏 𑒮𑒧𑒰𑒢, 𑒖𑒰𑒢𑒫𑒩𑒏 𑒯𑒰𑒪𑒞𑒧𑒹। 𑒏𑒙𑒢𑒱𑒨𑒰𑒿𑒧𑒹 𑒪𑒹𑒐𑒏𑒏 𑒒𑒩 𑒏𑒙𑒱 𑒑𑒹𑒪𑒢𑓂𑒯𑒱 𑒮𑒹 𑒍 𑒢𑒟𑒳𑒢𑒱𑒨𑒰𑒿 𑒋𑒯𑒱𑒚𑒰𑒧 𑒙𑒱𑒏𑒻𑒞 𑒕𑒟𑒱। 𑒧𑒕𑒥𑒰𑒯𑒱 𑒂 𑒔𑒱𑒛𑓃𑒻 𑒥𑒗𑒰𑒥𑓄 𑒪𑒹𑒪 𑒢𑒟𑒳𑒢𑒲 𑒖𑒼𑒑𑒰𑒩 𑒏𑒩𑒻𑒞 𑒁𑒕𑒱। 𑒖𑒧𑒲𑒢𑒏 𑒗𑒑𑒛𑓃𑒰 𑒕𑒢𑓂𑒯𑒱, 𑒋𑒏 𑒯𑒱𑒮𑓂𑒮𑒹𑒠𑒰𑒩𑒏 𑒖𑒧𑒲𑒢 𑒡𑒰𑒩𑒧𑒹 𑒛𑒴𑒧𑒪 𑒕𑒻 𑒮𑒹 𑒍 𑒪𑒹𑒐𑒏𑒏 𑒑𑒯𑒴𑒧𑒫𑒪𑒰 𑒐𑒹𑒞 𑒯𑒛𑓃𑒣𑒋 𑒔𑒰𑒯𑒻𑒞 𑒁𑒕𑒱। 𑒬𑒢 𑒂 𑒮𑓂𑒞𑓂𑒩𑒲𑒏 (!) 𑒣𑒰𑒕𑒴 𑒪𑒼𑒏 𑒥𑒹𑒯𑒰𑒪 𑒁𑒕𑒱।
𑒮𑓂𑒞𑓂𑒩𑒲𑒏 𑒣𑒰𑒕𑒴 𑒥𑒱𑒢 𑒏𑒰𑒩𑒝 𑒪𑒹𑒐𑒏 𑒣𑒛𑓃𑒱 𑒑𑒹𑒪 𑒕𑒟𑒱 𑒖𑒹𑒢𑒰 𑒫𑒱𑒭𑓂𑒝𑒳 𑒬𑒩𑓂𑒧𑒰 𑒣𑓀𑒔𑒞𑓀𑒞𑓂𑒩𑒧𑒹 𑒏𑒟𑒰 𑒏𑒯𑒻𑒞-𑒏𑒯𑒻𑒞 𑒬𑒴𑒠𑓂𑒩 𑒂 𑒧𑒯𑒱𑒪𑒰𑒏 𑒣𑒰𑒕𑒰𑒿 𑒣𑒛𑓃𑒱 𑒖𑒰𑒃𑒞 𑒕𑒟𑒱।
𑒨𑒰𑒫𑒞 𑒮𑒦 𑒏𑒧𑒪𑒏 𑒒𑒴𑒩 𑒪𑒑 𑒏𑒣𑒏 𑒁𑒦𑒰𑒫𑒧𑒹 𑒥𑒹𑒩𑒰-𑒥𑒹𑒩𑒲 𑒔𑒰𑒯 𑒣𑒱𑒥𑒻𑒞 𑒕𑒟𑒱, 𑒤𑒮𑒱𑒪 𑒏𑒙𑒱 𑒏𑓄 𑒮𑒱𑒥𑒢𑒢𑒏 𑒋𑒞𑒋 𑒔𑒪𑒱 𑒖𑒰𑒃-𑒋। 𑒗𑒾𑒂, 𑒏𑒰𑒮, 𑒣𑒙𑒹𑒩𑒏 𑒖𑓀𑒑𑒪 𑒖𑒐𑒢 𑒩𑒯𑒋, 𑒔𑒱𑒛𑓃𑒻 𑒥𑒛𑓂𑒛 𑒂𑒥𑒋, 𑒂𑒥 𑒏𑒧 𑒁𑒥𑒻𑒞 𑒁𑒕𑒱। 𑒐𑒜𑓃𑒱𑒨𑒰, 𑒯𑒩𑒱𑒢, 𑒧𑒰𑒕, 𑒏𑒰𑒕𑒳, 𑒛𑒼𑒏𑒰 𑒮𑒦 𑒐𑒞𑒧 𑒦𑓄 𑒩𑒯𑒪 𑒕𑒻- 𑒖𑒲𑒫𑒢𑒏 𑒮𑒰𑒡𑒢 𑒠𑒳𑒩𑓂𑒪𑒦 𑒦𑓄 𑒑𑒹𑒪 𑒁𑒕𑒱। 𑒮𑒰𑒿𑒗𑒧𑒹 𑒖𑒧𑒲𑒢𑒏 𑒣𑓀𑒔𑒻𑒞𑒲 𑒯𑒼𑒃𑒞 𑒁𑒕𑒱।𑒮𑒞𑓂𑒞𑒼𑒏 𑒥𑒏𑒛𑓃𑒲 𑒧𑒩𑒱 𑒑𑒹𑒪𑒻𑒏, 𑒣𑒳𑒞𑒼𑒯𑒳 𑒋𑒏𑒩 𑒏𑒰𑒩𑒝 𑒮𑒰𑒮𑒳𑒏 𑒮𑒩𑒰𑒣𑒥 𑒏𑒯𑒻𑒞 𑒁𑒕𑒱। 𑒮𑒰𑒮𑒳 𑒋𑒏𑒩 𑒏𑒰𑒩𑒝 𑒥𑒪𑒱 𑒑𑒕𑒪𑒼𑒣𑒩 𑒣𑒰𑒚𑒲 𑒮𑒦𑒏𑒹𑒿 𑒥𑒹𑒔𑒥 𑒏𑒯𑒻𑒞 𑒕𑒟𑒱। 𑒮𑒞𑓂𑒞𑒼𑒏 𑒥𑒹𑒙𑒲𑒏 𑒖𑒾𑒥𑒢𑒏 𑒅𑒦𑒰𑒩𑒏𑒹𑒿 𑒪𑒹𑒐𑒏 𑒣𑒳𑒩𑒳𑒭 𑒮𑒧𑓂𑒣𑒩𑓂𑒏𑒏 𑒮𑒰𑒏𑓂𑒭𑒲 𑒏𑒯𑒻𑒞 𑒕𑒟𑒱 𑒂 𑒮𑒏𑒰𑒩𑒝 𑒤𑒹𑒩𑒮𑒿 𑒧𑒯𑒱𑒪𑒰𑒏 𑒣𑒰𑒕𑒰𑒿 𑒣𑒛𑓃𑒱 𑒖𑒰𑒃𑒞 𑒕𑒟𑒱, 𑒏𑒰𑒩𑒝 𑒄 𑒡𑒰𑒩𑒝𑒰 𑒪𑒼𑒏𑒧𑒹 𑒕𑒻। 𑒮𑒞𑓂𑒞𑒼𑒏 𑒥𑒹𑒙𑒲 𑒋𑒐𑒢 𑒮𑒰𑒮𑒳𑒩 𑒢𑒯𑒱 𑒥𑒮𑒻𑒞 𑒕𑒻। 𑒮𑒳𑒏𑒢 𑒩𑒰𑒧𑒏 𑒋𑒯𑒱𑒚𑒰𑒧 𑒐𑒰𑒃𑒞 𑒏𑒰𑒪 𑒪𑒹𑒐𑒏𑒏𑒹𑒿 𑒮𑓀𑒏𑒼𑒔 𑒦𑒹𑒪𑒢𑓂𑒯𑒱, 𑒖𑒏𑒩𑒰𑒮𑒿 𑒅𑒥𑒩𑒥𑒰𑒏 𑒪𑒹𑒪 𑒍 𑒥𑒖𑒪𑒰𑒯- 𑒂𑒃 𑒞𑒼𑒩𑒰 𑒖𑒰𑒞𑒱 𑒥𑒢𑒰 𑒪𑒹𑒪𑒱𑒁𑒯। 𑒏𑒼𑒮𑒲 𑒮𑒦 𑒦𑒹𑒠𑒦𑒰𑒫𑒏𑒹𑒿 𑒣𑒰𑒙𑒱 𑒠𑒹𑒪𑒏, 𑒛𑒼𑒧, 𑒔𑒧𑒰𑒩, 𑒧𑒳𑒮𑒯𑒩, 𑒠𑒳𑒮𑒰𑒡, 𑒞𑒹𑒪𑒲, 𑒨𑒰𑒠𑒫 𑒮𑒦 𑒋𑒏𑒹 𑒏𑒪𑒮𑒿 𑒣𑒰𑒢𑒱 𑒦𑒩𑒻𑒞 𑒁𑒕𑒱। 𑒋𑒏𑒹 𑒣𑒙𑒱𑒨𑒰𑒣𑒩 𑒥𑒻𑒮𑒻𑒞 𑒁𑒕𑒱।
𑒏𑒏𑒩𑒰 𑒪𑒹𑒪 𑒏𑒟𑒰 𑒪𑒱𑒐𑒲? 𑒫𑒰 𑒏𑒯𑒲? 𑒏𑒟𑒰𑒏 𑒫𑒰𑒠: 𑒖𑒱𑒢𑒏𑒰 𑒫𑒱𑒭𑒨𑒧𑒹 𑒪𑒱𑒐𑒥 𑒮𑒹 𑒞𑒿 𑒣𑒜𑓃𑒞𑒰𑒯 𑒢𑒯𑒱। 𑒏𑒟𑒰 𑒣𑒜𑓃𑒱 𑒪𑒼𑒏 𑒣𑓂𑒩𑒥𑒳𑒠𑓂𑒡 𑒦𑓄 𑒖𑒋𑒞 ? 𑒑𑒲𑒞𑒰𑒏 𑒮𑒣𑓂𑒣𑒞 𑒐𑒰 𑒏𑒋 𑒗𑒴𑒚 𑒥𑒖𑒢𑒱𑒯𑒰𑒩𑒏 𑒮𑓀𑒐𑓂𑒨𑒰 𑒏𑒧 𑒢𑒯𑒱। 𑒞𑒹𑒿 𑒏𑒲 𑒋𑒯𑒢 𑒏𑒮𑒾𑒙𑒲𑒣𑒩 𑒩𑒔𑒱𑒞 𑒏𑒟𑒰𑒏 𑒧𑒯𑒞𑓂𑒫 𑒏𑒧 𑒦𑒋 𑒖𑒋𑒞 ?
𑒮𑒦 𑒣𑓂𑒩𑒥𑒳𑒠𑓂𑒡 𑒢𑒯𑒱 𑒯𑒼𑒋𑒞𑒰𑒯 𑒞𑒿 𑒮𑓂𑒫𑒮𑓂𑒟 𑒧𑒢𑒼𑒩𑓀𑒖𑒢 𑒞𑒿 𑒣𑓂𑒩𑒰𑒣𑓂𑒞 𑒏𑓄 𑒮𑒏𑒞𑒰𑒯। 𑒂 𑒖𑒹 𑒋𑒏𑒼𑒙𑒰 𑒫𑓂𑒨𑒏𑓂𑒞𑒱 𑒏𑒟𑒰 𑒣𑒜𑓃𑒱 𑒍𑒯𑒱 𑒠𑒱𑒬𑒰𑒧𑒹 𑒮𑒼𑒔𑒞 𑒞𑒿 𑒏𑒟𑒰𑒏 𑒮𑒰𑒩𑓂𑒟𑒏𑒞𑒰 𑒮𑒱𑒠𑓂𑒡 𑒯𑒼𑒋𑒞। 𑒂 𑒖𑒏𑒩𑒰 𑒪𑒹𑒪 𑒩𑒔𑒱𑒞 𑒁𑒕𑒱 𑒄 𑒏𑒟𑒰 𑒖𑒹 𑒍 𑒢𑒯𑒱, 𑒞𑒿 𑒍𑒏𑒩 𑒍𑒯𑒱 𑒣𑒩𑒱𑒮𑓂𑒟𑒱𑒞𑒱𑒧𑒹 𑒯𑒮𑓂𑒞𑒏𑓂𑒭𑒹𑒣 𑒏𑒩𑒥𑒰𑒧𑒹 𑒮𑒏𑓂𑒭𑒧 𑒫𑓂𑒨𑒏𑓂𑒞𑒱 𑒞𑒿 𑒣𑒜𑓃𑒞𑒰𑒯। 𑒂 𑒖𑒰 𑒄 𑒩𑒯𑒞 𑒞𑒰𑒡𑒩𑒱 𑒋𑒯𑒱 𑒞𑒩𑒯𑒏 𑒏𑒟𑒰 𑒩𑒔𑒱𑒞 𑒏𑒋𑒪 𑒖𑒰𑒃𑒞 𑒩𑒯𑒞।
𑒂 𑒖𑒹 𑒮𑒧𑒰𑒖 𑒥𑒠𑒪𑒞 𑒞𑒿 𑒮𑒰𑒧𑒰𑒖𑒱𑒏 𑒧𑒴𑒪𑓂𑒨 𑒮𑒢𑒰𑒞𑒢 𑒩𑒯𑒞 ? 𑒣𑓂𑒩𑒑𑒞𑒱𑒬𑒲𑒪 𑒏𑒟𑒰𑒧𑒹 𑒁𑒢𑒳𑒦𑒫𑒏 𑒣𑒳𑒢𑒩𑓂𑒢𑒱𑒩𑓂𑒧𑒰𑒝 𑒏𑒩𑒥, 𑒣𑒩𑒱𑒫𑒩𑓂𑒞𑒢𑒬𑒲𑒪 𑒮𑒧𑒰𑒖𑒏 𑒪𑒹𑒪, 𑒖𑒰𑒯𑒱𑒮𑒿 𑒣𑓂𑒩𑒰𑒏𑒵𑒞𑒱𑒏 𑒂 𑒮𑒰𑒧𑒰𑒖𑒱𑒏 𑒨𑒟𑒰𑒩𑓂𑒟𑒏 𑒥𑒲𑒔 𑒮𑒧𑒰𑒨𑒼𑒖𑒢 𑒯𑒼𑒁𑒋। 𑒂𑒏𑒱 𑒋𑒯𑒱 𑒣𑒩𑒱𑒫𑒩𑓂𑒞𑒢𑒬𑒲𑒪 𑒮𑒧𑒨𑒏𑒹𑒿 𑒮𑓂𑒟𑒰𑒨𑒱𑒞𑓂𑒫 𑒠𑒹𑒥𑒰 𑒪𑒹𑒪 𑒣𑒩𑒧𑓂𑒣𑒩𑒰𑒏 𑒮𑓂𑒟𑒰𑒨𑒲 𑒂 𑒧𑒴𑒪 𑒞𑒞𑓂𑒫𑒣𑒩 𑒂𑒡𑒰𑒩𑒱𑒞 𑒏𑒟𑒰𑒏 𑒂𑒫𑒬𑓂𑒨𑒏𑒞𑒰 𑒁𑒕𑒱 ? 𑒫𑓂𑒨𑒏𑓂𑒞𑒱-𑒯𑒱𑒞 𑒂 𑒮𑒧𑒰𑒖-𑒯𑒱𑒞𑒧𑒹 𑒠𑓂𑒫𑒻𑒡 𑒁𑒕𑒱 𑒂 𑒠𑒳𑒢𑒴 𑒣𑒩𑒮𑓂𑒣𑒩 𑒫𑒱𑒩𑒼𑒡𑒲 𑒁𑒕𑒱। 𑒋𑒯𑒱𑒧𑒹 𑒮𑓀𑒨𑒼𑒖𑒢 𑒂𑒫𑒬𑓂𑒨𑒏। 𑒫𑒱𑒬𑓂𑒫 𑒠𑒵𑒭𑓂𑒙𑒱 𑒂𑒫𑒬𑓂𑒨𑒏। 𑒏𑒟𑒰 𑒧𑒰𑒞𑓂𑒩 𑒫𑒱𑒔𑒰𑒩𑒏 𑒅𑒞𑓂𑒣𑒞𑓂𑒞𑒱 𑒢𑒯𑒱 𑒁𑒕𑒱 𑒖𑒹 𑒩𑒼𑒬𑒢𑒰𑒃𑒮𑒿 𑒏𑒰𑒑𑒞𑒣𑒩 𑒖𑒹𑒢𑒰-𑒞𑒹𑒢𑒰 𑒅𑒞𑒰𑒩𑒱 𑒠𑒹𑒪𑒱𑒨𑒻𑒏। 𑒄 𑒮𑒰𑒧𑒰𑒖𑒱𑒏-𑒌𑒞𑒱𑒯𑒰𑒮𑒱𑒏 𑒠𑒬𑒰𑒮𑒿 𑒢𑒱𑒩𑓂𑒠𑒱𑒬𑒱𑒞 𑒯𑒼𑒃𑒞 𑒁𑒕𑒱।
𑒞𑒿 𑒏𑒟𑒰 𑒂𑒠𑒩𑓂𑒬𑒫𑒰𑒠𑒲 𑒯𑒼𑒁𑒋, 𑒣𑓂𑒩𑒏𑒵𑒞𑒱𑒫𑒰𑒠𑒲 𑒯𑒼𑒁𑒋 𑒫𑒰 𑒨𑒟𑒰𑒩𑓂𑒟𑒫𑒰𑒠𑒲 𑒯𑒼𑒁𑒋। 𑒂𑒏𑒱 𑒋𑒯𑒱𑒧𑒹 𑒮𑒿 𑒧𑒰𑒢𑒫𑒞𑒰𑒫𑒰𑒠𑒲, 𑒮𑒰𑒧𑒰𑒖𑒱𑒏𑒞𑒰𑒫𑒰𑒠𑒲 𑒫𑒰 𑒁𑒢𑒳𑒦𑒫𑒏𑒹𑒿 𑒧𑒯𑒞𑓂𑒫 𑒠𑒹𑒧𑒋𑒥𑒪𑒰 𑒖𑓂𑒘𑒰𑒢𑒹𑒢𑓂𑒠𑓂𑒩𑒱𑒨-𑒨𑒟𑒰𑒩𑓂𑒟𑒫𑒰𑒠𑒲 𑒯𑒼𑒁𑒋 ? 𑒂 𑒢𑒯𑒱 𑒞𑒿 𑒏𑒟𑒰 𑒣𑓂𑒩𑒨𑒼𑒖𑒢𑒧𑒴𑒪𑒏 𑒯𑒼𑒁𑒋। 𑒋𑒯𑒱𑒧𑒹 𑒅𑒣𑒨𑒼𑒑𑒱𑒞𑒰𑒫𑒰𑒠, 𑒣𑓂𑒩𑒨𑒼𑒑𑒫𑒰𑒠, 𑒫𑓂𑒨𑒫𑒯𑒰𑒩𑒫𑒰𑒠, 𑒏𑒰𑒩𑒝𑒫𑒰𑒠, 𑒁𑒩𑓂𑒟𑒏𑓂𑒩𑒱𑒨𑒰𑒫𑒰𑒠 𑒂 𑒤𑒪𑒫𑒰𑒠 𑒮𑒦 𑒮𑒧𑓂𑒧𑒱𑒪𑒱𑒞 𑒁𑒕𑒱। 𑒄 𑒮𑒦𑒮𑒿 𑒂𑒡𑒳𑒢𑒱𑒏 𑒠𑒵𑒭𑓂𑒙𑒱𑒏𑒼𑒝 𑒁𑒕𑒱। 𑒁𑒣𑒢𑒰𑒏𑒹𑒿 𑒁𑒦𑒱𑒫𑓂𑒨𑒏𑓂𑒞 𑒏𑒋𑒢𑒰𑒃 𑒧𑒰𑒢𑒫𑒲𑒨 𑒮𑓂𑒫𑒦𑒰𑒫 𑒁𑒕𑒱। 𑒧𑒳𑒠𑒰 𑒍 𑒮𑒰𑒧𑒰𑒖𑒱𑒏 𑒢𑒱𑒁𑒧𑒧𑒹 𑒮𑒲𑒧𑒱𑒞 𑒦𑓄 𑒖𑒰𑒃𑒞 𑒁𑒕𑒱। 𑒣𑒩𑒱𑒮𑓂𑒟𑒱𑒞𑒱𑒮𑒿 𑒣𑓂𑒩𑒦𑒰𑒫𑒱𑒞 𑒦𑓄 𑒖𑒰𑒃𑒞 𑒁𑒕𑒱।
𑒞𑒿 𑒏𑒟𑒰 𑒁𑒢𑒳𑒦𑒫𑒏𑒹𑒿 𑒣𑒳𑒢𑒩𑓂𑒩𑒔𑒱𑒞 𑒏𑒋 𑒑𑒜𑓃𑒪 𑒖𑒋𑒞। 𑒂 𑒫𑓂𑒨𑒏𑓂𑒞𑒱𑒑𑒞 𑒔𑒹𑒞𑒢𑒰 𑒞𑒐𑒢 𑒮𑒰𑒧𑒰𑒖𑒱𑒏 𑒂 𑒮𑒰𑒧𑒴𑒯𑒱𑒏 𑒔𑒹𑒞𑒢𑒰 𑒥𑒢𑒱 𑒂𑒍𑒞। 𑒬𑒼𑒭𑒏𑒏𑒹𑒿 𑒁𑒣𑒢 𑒣𑓂𑒩𑒫𑒵𑒞𑓂𑒞𑒱𑒣𑒩 𑒁𑓀𑒏𑒳𑒬 𑒪𑒑𑒥𑒋 𑒣𑒛𑓃𑒞𑒢𑓂𑒯𑒱। 𑒞𑒿 𑒬𑒼𑒭𑒱𑒞𑒏𑒹𑒿 𑒋𑒏𑒩 𑒫𑒱𑒩𑒼𑒡 𑒧𑒳𑒐𑒩 𑒩𑒴𑒣𑒧𑒹 𑒏𑒩𑒋 𑒣𑒛𑓃𑒞𑒢𑓂𑒯𑒱।
𑒮𑓂𑒫𑒞𑓀𑒞𑓂𑒩𑒞𑒰- 𑒮𑒰𑒧𑒰𑒖𑒱𑒏 𑒣𑒩𑒱𑒫𑒩𑓂𑒞𑒢 । 𑒏𑒟𑒰 𑒞𑒐𑒢 𑒮𑓀𑒣𑓂𑒩𑒹𑒭𑒱𑒞 𑒯𑒼𑒋𑒞, 𑒮𑓀𑒫𑒰𑒠𑒏 𑒧𑒰𑒡𑓂𑒨𑒧 𑒥𑒢𑒞। 𑒏𑒟𑒰 𑒮𑒧𑒰𑒖𑒏 𑒪𑒹𑒪 𑒬𑒮𑓂𑒞𑓂𑒩 𑒞𑒐𑒢𑒹 𑒥𑒢𑒱 𑒮𑒏𑒞, 𑒬𑒏𑓂𑒞𑒱 𑒞𑒐𑒢𑒹 𑒥𑒢𑒱 𑒮𑒏𑒞।
𑒖𑒹 𑒏𑒟𑒰𑒏𑒰𑒩 𑒅𑒣𑒠𑒹𑒬 𑒠𑒹𑒞𑒰𑒯 𑒞𑒿 𑒖𑓂𑒘𑒰𑒢𑒏 𑒯𑒮𑓂𑒞𑒰𑓀𑒞𑒩𑒝 𑒏𑒩𑒞𑒰𑒯, 𑒖𑒏𑒩 𑒂𑒫𑒬𑓂𑒨𑒏𑒞𑒰 𑒂𑒥 𑒢𑒯𑒱 𑒕𑒻। 𑒖𑒐𑒢 𑒏𑒟𑒰𑒏𑒰𑒩 𑒮𑒧𑓂𑒫𑒰𑒠 𑒬𑒳𑒩𑒴 𑒏𑒩𑒞𑒰𑒯 𑒞𑒐𑒢𑒹 𑒧𑒳𑒏𑓂𑒞𑒱𑒏 𑒫𑒰𑒞𑒰𑒫𑒩𑒝 𑒥𑒢𑒞 𑒂 𑒮𑒧𑓂𑒫𑒰𑒠𑒧𑒹 𑒦𑒰𑒑 𑒪𑒹𑒢𑒱𑒯𑒰𑒩 𑒣𑒰𑒚𑒏 𑒖𑒛𑓃𑒞𑒰𑒮𑒿 𑒞𑓂𑒩𑒰𑒝 𑒣𑒍𑒞𑒰𑒯।
𑒏𑒟𑒰 𑒏𑓂𑒩𑒧𑒥𑒠𑓂𑒡 𑒯𑒼𑒁𑒋 𑒂 𑒮𑒳𑒑𑓂𑒩𑒰𑒯𑓂𑒨 𑒯𑒼𑒁𑒋 𑒞𑒐𑒢𑒹 𑒄 𑒅𑒠𑓂𑒠𑒹𑒬𑓂𑒨 𑒣𑓂𑒩𑒰𑒣𑓂𑒞 𑒏𑒩𑒞। 𑒥𑒳𑒠𑓂𑒡𑒱𑒣𑒩𑒏 𑒢𑒯𑒱 𑒫𑓂𑒨𑒫𑒯𑒰𑒩𑒣𑒩𑒏 𑒥𑒢𑒞। 𑒫𑒻𑒠𑒱𑒏 𑒮𑒰𑒯𑒱𑒞𑓂𑒨𑒏 𑒂𑒐𑓂𑒨𑒰𑒢𑒏 𑒅𑒠𑒰𑒩𑒞𑒰 𑒮𑓀𑒫𑒰𑒠𑒏𑒹𑒿 𑒖𑒢𑓂𑒧 𑒠𑒻𑒞 𑒕𑒪 𑒖𑒹 𑒣𑒾𑒩𑒰𑒝𑒱𑒏 𑒮𑒰𑒯𑒱𑒞𑓂𑒨𑒏 𑒩𑒳𑒜𑓃𑒱𑒫𑒰𑒠𑒱𑒞𑒰 𑒐𑒞𑒧 𑒏𑒋 𑒠𑒹𑒪𑒏।
𑒂 𑒮𑓀𑒫𑒰𑒠𑒏 𑒣𑒳𑒢𑒩𑓂𑒮𑓂𑒟𑒰𑒣𑒢𑒰 𑒪𑒹𑒪 𑒏𑒟𑒰𑒏𑒰𑒩𑒧𑒹 𑒫𑒱𑒬𑓂𑒫𑒰𑒮 𑒯𑒼𑒋𑒥𑒰𑒏 𑒔𑒰𑒯𑒲- 𑒞𑒩𑓂𑒏-𑒣𑒩𑒏 𑒫𑒱𑒬𑓂𑒫𑒰𑒮 𑒂 𑒁𑒢𑒳𑒦𑒫𑒣𑒩𑒏 𑒫𑒱𑒬𑓂𑒫𑒰𑒮, 𑒖𑒹 𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒧𑒹 𑒕𑒢𑓂𑒯𑒱। 𑒣𑓂𑒩𑒞𑓂𑒨𑒏𑓂𑒭𑒫𑒰𑒠𑒏 𑒫𑒱𑒬𑓂𑒪𑒹𑒭𑒝𑒰𑒞𑓂𑒧𑒏 𑒠𑒩𑓂𑒬𑒢 𑒫𑒮𑓂𑒞𑒳𑒏 𑒢𑒯𑒱, 𑒦𑒰𑒭𑒱𑒏 𑒏𑒟𑒢 𑒂 𑒁𑒫𑒡𑒰𑒩𑒝𑒰𑒏 𑒫𑒱𑒬𑓂𑒪𑒹𑒭𑒝 𑒏𑒩𑒻𑒞 𑒁𑒕𑒱 𑒮𑒹 𑒮𑒳𑒦𑒰𑒭𑒖𑒲𑒏 𑒏𑒟𑒰𑒧𑒹 𑒮𑒩𑓂𑒫𑒞𑓂𑒩 𑒠𑒹𑒐𑒥𑒰𑒧𑒹 𑒂𑒍𑒞। 𑒫𑒱𑒬𑓂𑒪𑒹𑒭𑒝𑒰𑒞𑓂𑒧𑒏 𑒁𑒟𑒫𑒰 𑒞𑒰𑒩𑓂𑒏𑒱𑒏 𑒣𑓂𑒩𑒞𑓂𑒨𑒏𑓂𑒭𑒫𑒰𑒠 𑒂 𑒁𑒮𑓂𑒞𑒱𑒞𑓂𑒫𑒫𑒰𑒠𑒏 𑒖𑒢𑓂𑒧 𑒫𑒱𑒖𑓂𑒘𑒰𑒢𑒏 𑒣𑓂𑒩𑒞𑒱 𑒣𑓂𑒩𑒞𑒱𑒏𑓂𑒩𑒱𑒨𑒰𑒏 𑒩𑒴𑒣𑒧𑒹 𑒦𑒹𑒪। 𑒋𑒯𑒱𑒮𑒿 𑒫𑒱𑒖𑓂𑒘𑒰𑒢𑒏 𑒠𑓂𑒫𑒱𑒁𑒩𑓂𑒟𑒲 𑒫𑒱𑒔𑒰𑒩𑒏𑒹𑒿 𑒮𑓂𑒣𑒭𑓂𑒙 𑒏𑒋𑒪 𑒑𑒹𑒪।
𑒣𑓂𑒩𑒒𑒙𑒢𑒰𑒬𑒰𑒮𑓂𑒞𑓂𑒩𑒧𑒹 𑒔𑒹𑒞𑒢𑒰𑒏 𑒣𑓂𑒩𑒠𑒞𑓂𑒞𑒏 𑒣𑓂𑒩𑒠𑒞𑓂𑒞 𑒩𑒴𑒣𑒧𑒹 𑒁𑒡𑓂𑒨𑒨𑒢 𑒯𑒼𑒃𑒞 𑒁𑒕𑒱। 𑒁𑒢𑒳𑒦𑒴𑒞𑒱 𑒫𑒱𑒬𑒱𑒭𑓂𑒙 𑒧𑒰𑒢𑒮𑒱𑒏 𑒏𑓂𑒩𑒱𑒨𑒰𑒏 𑒞𑒟𑓂𑒨𑒏 𑒢𑒱𑒩𑒲𑒏𑓂𑒭𑒝 𑒁𑒕𑒱। 𑒫𑒮𑓂𑒞𑒳𑒏𑒹𑒿 𑒢𑒱𑒩𑒣𑒹𑒏𑓂𑒭 𑒂 𑒫𑒱𑒬𑒳𑒠𑓂𑒡 𑒩𑒴𑒣𑒧𑒹 𑒠𑒹𑒐𑒥𑒰𑒏 𑒄 𑒧𑒰𑒡𑓂𑒨𑒧 𑒁𑒕𑒱। 𑒁𑒮𑓂𑒞𑒱𑒞𑓂𑒫𑒫𑒰𑒠𑒧𑒹 𑒧𑒢𑒳𑒭𑓂𑒨-𑒁𑒯𑒱 𑒧𑒰𑒞𑓂𑒩 𑒧𑒢𑒳𑒭𑓂𑒨 𑒁𑒕𑒱। 𑒍 𑒖𑒹 𑒏𑒱𑒕𑒳 𑒢𑒱𑒩𑓂𑒧𑒰𑒝 𑒏𑒩𑒻𑒞 𑒁𑒕𑒱 𑒍𑒯𑒱𑒮𑒿 𑒣𑒵𑒟𑒏 𑒍 𑒏𑒱𑒕𑒳 𑒢𑒯𑒱 𑒁𑒕𑒱, 𑒮𑓂𑒫𑒞𑓀𑒞𑓂𑒩 𑒯𑒼𑒋𑒥𑒰 𑒪𑒹𑒪 𑒁𑒦𑒱𑒬𑒣𑓂𑒞 𑒁𑒕𑒱 (𑒮𑒰𑒩𑓂𑒞𑓂𑒩)। 𑒯𑒹𑒑𑒹𑒪𑒏 𑒛𑒰𑒨𑒪𑒹𑒏𑓂𑒙𑒱𑒏𑓂𑒮 𑒠𑓂𑒫𑒰𑒩𑒰 𑒫𑒱𑒬𑓂𑒪𑒹𑒭𑒝 𑒂 𑒮𑓀𑒬𑓂𑒪𑒹𑒭𑒝𑒏 𑒁𑓀𑒞𑒯𑒲𑒢 𑒁𑓀𑒞𑒮𑓂𑒮𑓀𑒥𑓀𑒡 𑒠𑓂𑒫𑒰𑒩𑒰 𑒣𑓂𑒩𑒏𑓂𑒩𑒱𑒨𑒰𑒏 𑒑𑒳𑒝 𑒢𑒱𑒩𑓂𑒝𑒨 𑒂 𑒁𑒮𑓂𑒞𑒱𑒞𑓂𑒫 𑒢𑒱𑒩𑓂𑒝𑒨 𑒏𑒩𑒥𑒰𑒣𑒩 𑒖𑒼𑒩 𑒠𑒹𑒪𑒢𑓂𑒯𑒱। 𑒧𑒴𑒪𑒞𑒞𑓂𑒫 𑒖𑒞𑒹𑒏 𑒑𑒯𑒲𑓀𑒩 𑒯𑒼𑒋𑒞 𑒍𑒞𑒹𑒏 𑒮𑓂𑒫𑒩𑒴𑒣𑒮𑒿 𑒠𑒴𑒩 𑒩𑒯𑒞 𑒂 𑒫𑒰𑒮𑓂𑒞𑒫𑒱𑒏𑒞𑒰𑒮𑒿 𑒪𑒑।
𑒏𑓂𑒫𑒰𑒢𑓂𑒙𑒧 𑒮𑒱𑒠𑓂𑒡𑒰𑒢𑓂𑒞 𑒂 𑒁𑒢𑒮𑒩𑒙𑒹𑒢𑓂𑒙𑒲 𑒣𑓂𑒩𑒱𑒢𑓂𑒮𑒱𑒣𑒪 𑒮𑒹𑒯𑒼 𑒂𑒡𑒳𑒢𑒱𑒏 𑒔𑒱𑒢𑓂𑒞𑒢𑒏𑒹𑒿 𑒣𑓂𑒩𑒦𑒰𑒫𑒱𑒞 𑒏𑒋𑒢𑒹 𑒁𑒕𑒱। 𑒠𑒹𑒐𑒰𑒃 𑒣𑒛𑓃𑒋𑒥𑒪𑒰 𑒫𑒰𑒮𑓂𑒞𑒫𑒱𑒏𑒞𑒰 𑒮𑒿 𑒠𑒴𑒩 𑒦𑒲𑒞𑒩𑒏 𑒂 𑒥𑒰𑒯𑒩𑒏 𑒣𑓂𑒩𑒏𑓂𑒩𑒱𑒨𑒰 𑒮𑒦 𑒬𑒏𑓂𑒞𑒱-𑒆𑒩𑓂𑒖𑒰𑒏 𑒕𑒼𑒙 𑒞𑒞𑓂𑒫𑒏 𑒂𑒠𑒰𑒢-𑒣𑓂𑒩𑒠𑒰𑒢𑒮𑒿 𑒮𑒧𑓂𑒦𑒫 𑒯𑒼𑒃𑒞 𑒁𑒕𑒱। 𑒁𑒢𑒱𑒬𑓂𑒔𑒱𑒞𑒞𑒰𑒏 𑒮𑒱𑒠𑓂𑒡𑒰𑒢𑓂𑒞 𑒠𑓂𑒫𑒰𑒩𑒰 𑒮𑓂𑒟𑒱𑒞𑒱 𑒂 𑒮𑓂𑒫𑒩𑒴𑒣, 𑒁𑒢𑓂𑒠𑒰𑒖𑒮𑒿 𑒢𑒱𑒬𑓂𑒔𑒱𑒞 𑒏𑒩𑒋 𑒣𑒛𑓃𑒻𑒞 𑒁𑒕𑒱।
𑒞𑒲𑒢𑒮𑒿 𑒥𑒹𑒬𑒲 𑒛𑒰𑒃𑒧𑒹𑒢𑓂𑒮𑒢𑒏 𑒫𑒱𑒬𑓂𑒫𑒏 𑒣𑒩𑒱𑒏𑒪𑓂𑒣𑒢𑒰 𑒂 𑒮𑓂𑒙𑒲𑒤𑒢 𑒯𑒰𑒏𑒱𑒢𑓂𑒮𑒏 “𑒁 𑒥𑓂𑒩𑒱𑒤 𑒯𑒱𑒮𑓂𑒙𑓂𑒩𑒲 𑒂𑒤 𑒙𑒰𑒃𑒧” 𑒮𑒼𑒗𑒹-𑒮𑒼𑒗𑒲 𑒦𑒑𑒫𑒰𑒢𑒏 𑒁𑒮𑓂𑒞𑒱𑒞𑓂𑒫𑒏𑒹𑒿 𑒐𑒞𑒧 𑒏𑒋 𑒩𑒯𑒪 𑒁𑒕𑒱 𑒏𑒰𑒩𑒝 𑒋𑒯𑒱𑒮𑒿 𑒦𑒑𑒫𑒰𑒢𑒏 𑒧𑒵𑒞𑓂𑒨𑒳𑒏 𑒁𑒫𑒡𑒰𑒩𑒝𑒰 𑒮𑒹𑒯𑒼 𑒮𑒼𑒗𑒰𑒿 𑒂𑒋𑒪 𑒁𑒕𑒱, 𑒮𑒹 𑒋𑒐𑒢 𑒫𑒱𑒬𑓂𑒫𑒏 𑒢𑒱𑒨𑒢𑓂𑒞𑒰𑒏 𑒁𑒮𑓂𑒞𑒱𑒞𑓂𑒫 𑒐𑒞𑒩𑒰𑒧𑒹 𑒣𑒛𑓃𑒪 𑒁𑒕𑒱। 𑒦𑒑𑒫𑒰𑒢𑒏 𑒧𑒵𑒞𑓂𑒨𑒳 𑒂 𑒃𑒞𑒱𑒯𑒰𑒮𑒏 𑒮𑒧𑒰𑒣𑓂𑒞𑒱𑒏 𑒣𑒩𑒱𑒣𑓂𑒩𑒹𑒏𑓂𑒭𑓂𑒨𑒧𑒹 𑒧𑒻𑒟𑒱𑒪𑒲 𑒏𑒟𑒰 𑒏𑒯𑒱𑒨𑒰 𑒡𑒩𑒱 𑒐𑒱𑒮𑓂𑒮𑒰 𑒏𑒯𑒻𑒞 𑒩𑒯𑒞 ? 𑒪𑒒𑒳, 𑒁𑒞𑒱-𑒪𑒒𑒳 𑒏𑒟𑒰, 𑒏𑒟𑒰, 𑒑𑒪𑓂𑒣 𑒂𑒠𑒱𑒏 𑒫𑒱𑒬𑓂𑒪𑒹𑒭𑒝𑒧𑒹 𑒪𑒰𑒑𑒪 𑒩𑒯𑒞?
𑒖𑒹𑒢𑒰 𑒫𑒩𑓂𑒔𑒳𑒁𑒪 𑒩𑒱𑒁𑒪𑒱𑒙𑒲 𑒫𑒰𑒮𑓂𑒞𑒫𑒱𑒏𑒞𑒰 𑒏𑒹𑒿 𑒏𑒵𑒞𑓂𑒩𑒱𑒧 𑒩𑒴𑒣𑒹𑒿 𑒮𑒼𑒗𑒰𑒿 𑒂𑒢𑒱 𑒔𑒹𑒞𑒢𑒰𑒏𑒹𑒿 𑒍𑒏𑒩𑒰 𑒮𑓀𑒑 𑒋𑒏𑒰𑒏𑒰𑒩 𑒏𑒩𑒻𑒞 𑒁𑒕𑒱 𑒞𑒯𑒱𑒢𑒰 𑒥𑒱𑒢𑒰 𑒞𑒲𑒢𑒮𑒿 𑒥𑒹𑒬𑒲 𑒥𑒲𑒧𑒏 𑒣𑒩𑒱𑒏𑒪𑓂𑒣𑒢𑒰𑒏 𑒯𑒧 𑒣𑓂𑒩𑒏𑒰𑒬𑒏 𑒑𑒞𑒱𑒮𑒿 𑒖𑒹 𑒮𑒱𑒢𑓂𑒡𑒳𑒒𑒰𑒙𑒲 𑒮𑒦𑓂𑒨𑒞𑒰𑒮𑒿 𑒔𑒪𑒲 𑒞𑒿 𑒞𑒃𑒨𑒼 𑒥𑓂𑒩𑒯𑓂𑒧𑒰𑒝𑓂𑒛𑒏 𑒣𑒰𑒩 𑒂𑒃 𑒡𑒩𑒱 𑒢𑒯𑒱 𑒣𑒯𑒳𑒿𑒔𑒱 𑒮𑒏𑒥। 𑒄 𑒮𑒴𑒩𑓂𑒨 𑒁𑒩𑒥-𑒐𑒩𑒥 𑒂𑒢 𑒮𑒴𑒩𑓂𑒨𑒧𑒹𑒮𑒿 𑒋𑒏𑒙𑒰 𑒧𑒡𑓂𑒨𑒧 𑒏𑒼𑒙𑒱𑒏 𑒞𑒩𑒹𑒑𑒝- 𑒧𑒹𑒛𑒱𑒍𑒏𑒩 𑒮𑓂𑒙𑒰𑒩- 𑒁𑒕𑒱। 𑒍𑒯𑒱 𑒧𑒹𑒛𑒱𑒍𑒏𑒩 𑒮𑓂𑒙𑒰𑒩𑒏 𑒋𑒏𑒙𑒰 𑒑𑓂𑒩𑒯 𑒣𑒵𑒟𑓂𑒫𑒲 𑒂 𑒍𑒏𑒩 𑒋𑒏𑒙𑒰 𑒢𑒑𑒩-𑒑𑒰𑒧𑒧𑒹 𑒩𑒯𑒢𑒱𑒯𑒰𑒩 𑒯𑒧 𑒮𑒦 𑒁𑒣𑒢 𑒧𑒰𑒟𑒣𑒩 𑒯𑒰𑒟 𑒩𑒰𑒐𑒱 𑒔𑒱𑒢𑓂𑒞𑒱𑒞 𑒕𑒲 𑒖𑒹 𑒯𑒧𑒩 𑒮𑒧𑒮𑓂𑒨𑒰𑒮𑒿 𑒣𑒻𑒒 𑒏𑒏𑒩 𑒮𑒧𑒮𑓂𑒨𑒰 ? 𑒯𑒧𑒩 𑒏𑒟𑒰𑒏 𑒮𑒧𑒏𑓂𑒭 𑒄 𑒮𑒦 𑒫𑒻𑒖𑓂𑒘𑒰𑒢𑒱𑒏 𑒂 𑒠𑒰𑒩𑓂𑒬𑒢𑒱𑒏 𑒞𑒟𑓂𑒨 𑒔𑒳𑒢𑒾𑒞𑒲𑒏 𑒩𑒴𑒣𑒧𑒹 𑒂𑒋𑒪 𑒁𑒕𑒱।
𑒯𑒼𑒪𑒱𑒮𑓂𑒙𑒱𑒏 𑒂𑒏𑒱 𑒮𑒧𑓂𑒣𑒴𑒩𑓂𑒝𑒞𑒰𑒏 𑒮𑒧𑒢𑓂𑒫𑒨 𑒏𑒩𑒋 𑒣𑒛𑓃𑒞 ! 𑒄 𑒠𑒩𑓂𑒬𑒢 𑒠𑒰𑒩𑓂𑒬𑒢𑒱𑒏 𑒮𑒿 𑒫𑒰𑒮𑓂𑒞𑒫𑒱𑒏 𑒞𑒐𑒢𑒹 𑒥𑒢𑒞।
𑒣𑒼𑒮𑓂𑒙𑒮𑓂𑒙𑓂𑒩𑒏𑓂𑒔𑒩𑒪 𑒧𑒹𑒟𑒼𑒛𑒼𑒪𑒼𑒖𑒲 𑒦𑒰𑒭𑒰𑒏 𑒁𑒩𑓂𑒟, 𑒬𑒥𑓂𑒠, 𑒞𑒏𑒩 𑒁𑒩𑓂𑒟, 𑒫𑓂𑒨𑒰𑒏𑒩𑒝𑒏 𑒢𑒱𑒁𑒧 𑒮𑒿 𑒢𑒯𑒱 𑒫𑒩𑒢𑓂 𑒁𑒩𑓂𑒟 𑒢𑒱𑒩𑓂𑒧𑒰𑒝 𑒣𑓂𑒩𑒏𑓂𑒩𑒱𑒨𑒰𑒮𑒿 𑒪𑒑𑒥𑒻𑒞 𑒁𑒕𑒱। 𑒮𑒦 𑒞𑒩𑒯𑒏 𑒫𑓂𑒨𑒏𑓂𑒞𑒱, 𑒮𑒧𑒴𑒯 𑒪𑒹𑒪 𑒄 𑒫𑒱𑒦𑒱𑒢𑓂𑒢 𑒁𑒩𑓂𑒟 𑒡𑒰𑒩𑒝 𑒏𑒩𑒻𑒞 𑒁𑒕𑒱। 𑒦𑒰𑒭𑒰 𑒂 𑒫𑒱𑒬𑓂𑒫𑒧𑒹 𑒏𑒼𑒢𑒼 𑒁𑒢𑓂𑒞𑒱𑒧 𑒮𑒧𑓂𑒥𑒢𑓂𑒡 𑒢𑒯𑒱 𑒯𑒼𑒃𑒞 𑒁𑒕𑒱। 𑒬𑒥𑓂𑒠 𑒂 𑒍𑒏𑒩 𑒣𑒰𑒚 𑒏𑒹𑒩 𑒁𑒢𑓂𑒞𑒱𑒧 𑒁𑒩𑓂𑒟 𑒫𑒰 𑒁𑒣𑒢 𑒫𑒱𑒬𑒱𑒭𑓂𑒙 𑒁𑒩𑓂𑒟 𑒢𑒯𑒱 𑒯𑒼𑒃𑒞 𑒁𑒕𑒱।
𑒂𑒡𑒳𑒢𑒱𑒏 𑒂 𑒅𑒞𑓂𑒞𑒩 𑒂𑒡𑒳𑒢𑒱𑒏 𑒞𑒩𑓂𑒏, 𑒫𑒰𑒮𑓂𑒞𑒫𑒱𑒏𑒞𑒰, 𑒮𑒧𑓂𑒫𑒰𑒠 𑒂 𑒫𑒱𑒔𑒰𑒩𑒏 𑒂𑒠𑒰𑒢-𑒣𑓂𑒩𑒠𑒰𑒢𑒮𑒿 𑒂𑒡𑒳𑒢𑒱𑒏𑒞𑒰𑒏 𑒖𑒢𑓂𑒧 𑒦𑒹𑒪 । 𑒧𑒳𑒠𑒰 𑒤𑒹𑒩 𑒢𑒫-𑒫𑒰𑒧𑒣𑓀𑒟𑒲 𑒂𑒢𑓂𑒠𑒼𑒪𑒢 𑒤𑓂𑒩𑒰𑓀𑒮𑒧𑒹 𑒂𑒋𑒪 𑒂 𑒮𑒩𑓂𑒫𑒢𑒰𑒬𑒫𑒰𑒠 𑒂 𑒁𑒩𑒰𑒖𑒏𑒞𑒰𑒫𑒰𑒠 𑒂𑒢𑓂𑒠𑒼𑒪𑒢 𑒮𑒢 𑒫𑒱𑒔𑒰𑒩𑒡𑒰𑒩𑒰 𑒮𑒹𑒯𑒼 𑒂𑒋𑒪। 𑒄 𑒮𑒦 𑒂𑒡𑒳𑒢𑒱𑒏 𑒫𑒱𑒔𑒰𑒩-𑒣𑓂𑒩𑒏𑓂𑒩𑒱𑒨𑒰 𑒣𑓂𑒩𑒝𑒰𑒪𑒲 𑒍𑒏𑒩 𑒂𑒮𑓂𑒟𑒰-𑒁𑒫𑒡𑒰𑒩𑒝𑒰𑒮𑒿 𑒥𑒯𑒰𑒩 𑒦𑒹𑒪 𑒁𑒫𑒱𑒬𑓂𑒫𑒰𑒮𑒣𑒩 𑒂𑒡𑒰𑒩𑒱𑒞 𑒕𑒪।
𑒣𑒰𑒚𑒧𑒹 𑒢𑒳𑒏𑒰𑒋𑒪 𑒁𑒩𑓂𑒟𑒏 𑒮𑓂𑒟𑒰𑒢-𑒏𑒰𑒪 𑒮𑓀𑒠𑒩𑓂𑒦𑒏 𑒣𑒩𑒱𑒣𑓂𑒩𑒹𑒏𑓂𑒭𑓂𑒨𑒧𑒹 𑒫𑓂𑒨𑒰𑒐𑓂𑒨𑒰 𑒬𑒳𑒩𑒴 𑒦𑒹𑒪 𑒂 𑒦𑒰𑒭𑒰𑒏𑒹𑒿 𑒐𑒹𑒪𑒏 𑒧𑒰𑒡𑓂𑒨𑒧 𑒥𑒢𑒰𑒍𑒪 𑒑𑒹𑒪- 𑒪𑓀𑒑𑒳𑒋𑒖 𑒑𑒹𑒧। 𑒂 𑒋𑒯𑒱 𑒮𑒦 𑒮𑒞𑓂𑒞𑒰𑒏 𑒂 𑒫𑒻𑒡𑒞𑒰 𑒂 𑒍𑒏𑒩 𑒮𑓂𑒞𑒩𑒲𑒏𑒩𑒝𑒏 𑒂𑒪𑒼𑒔𑒢𑒰𑒏 𑒩𑒴𑒣𑒧𑒹 𑒂𑒋𑒪 𑒣𑒼𑒮𑓂𑒙𑒧𑒰𑒛𑒩𑓂𑒢𑒱𑒖𑓂𑒧।
𑒏𑓀𑒣𑓂𑒨𑒳𑒙𑒩 𑒂 𑒮𑒴𑒔𑒢𑒰 𑒏𑓂𑒩𑒰𑒢𑓂𑒞𑒱 𑒖𑒰𑒯𑒱𑒧𑒹 𑒏𑒼𑒢𑒼 𑒞𑓀𑒞𑓂𑒩𑒰𑓀𑒬𑒏 𑒢𑒱𑒩𑓂𑒧𑒰𑒞𑒰 𑒍𑒏𑒩 𑒢𑒱𑒩𑓂𑒧𑒰𑒝 𑒏𑒋 𑒍𑒏𑒩𑒰 𑒫𑒱𑒬𑓂𑒫𑒫𑓂𑒨𑒰𑒣𑒲 𑒁𑒢𑓂𑒞𑒩𑓂𑒖𑒰𑒪𑒣𑒩 𑒩𑒰𑒐𑒱 𑒠𑒻𑒞 𑒕𑒟𑒱 𑒂 𑒍 𑒞𑓀𑒞𑓂𑒩𑒰𑓀𑒬 𑒁𑒣𑒢 𑒢𑒱𑒩𑓂𑒧𑒰𑒞𑒰𑒮𑒿 𑒮𑓂𑒫𑒞𑓀𑒞𑓂𑒩 𑒁𑒣𑒢 𑒏𑒰𑒖 𑒏𑒩𑒻𑒞 𑒩𑒯𑒻𑒞 𑒁𑒕𑒱, 𑒏𑒱𑒕𑒳 𑒍𑒯𑒢𑒼 𑒏𑒰𑒩𑓂𑒨 𑒖𑒹 𑒋𑒏𑒩 𑒢𑒱𑒩𑓂𑒧𑒰𑒞𑒰 𑒍𑒏𑒩𑒰 𑒪𑒹𑒪 𑒢𑒱𑒩𑓂𑒧𑒱𑒞 𑒢𑒯𑒱 𑒏𑒋𑒢𑒹 𑒕𑒟𑒱। 𑒂 𑒏𑒱𑒕𑒳 𑒯𑒮𑓂𑒞𑒏𑓂𑒭𑒹𑒣-𑒞𑓀𑒞𑓂𑒩𑒰𑓀𑒬 𑒖𑒹𑒢𑒰 𑒫𑒰𑒨𑒩𑒮, 𑒋𑒏𑒩𑒰 𑒧𑒰𑒩𑓂𑒑𑒮𑒿 𑒯𑒙𑒰𑒥𑒻𑒞 𑒁𑒕𑒱, 𑒫𑒱𑒡𑓂𑒫𑓀𑒮𑒏 𑒥𑒢𑒥𑒻𑒞 𑒁𑒕𑒱 𑒞𑒿 𑒋𑒯𑒱 𑒫𑒰𑒨𑒩𑒮𑒏 𑒋𑓀𑒙𑒲 𑒫𑒰𑒨𑒩𑒮 𑒮𑒹𑒯𑒼 𑒋𑒏𑒙𑒰 𑒞𑓀𑒞𑓂𑒩𑒰𑓀𑒬 𑒁𑒕𑒱, 𑒖𑒹 𑒍𑒏𑒩𑒰 𑒚𑒲𑒏 𑒏𑒩𑒻𑒞 𑒁𑒕𑒱 𑒂 𑒖𑒹 𑒍𑒏𑒩𑒼 𑒮𑒿 𑒚𑒲𑒏 𑒢𑒯𑒱 𑒯𑒼𑒃𑒞 𑒁𑒕𑒱 𑒞𑒐𑒢 𑒏𑒧𑓂𑒣𑓂𑒨𑒳𑒙𑒩𑒏 𑒥𑒻𑒏𑒣 𑒪𑒋 𑒍𑒏𑒩𑒰 𑒤𑒰𑒩𑓂𑒧𑒹𑒙 𑒏𑒋 𑒠𑒹𑒪 𑒖𑒰𑒃𑒞 𑒁𑒕𑒱- 𑒏𑓂𑒪𑒲𑒢 𑒮𑓂𑒪𑒹𑒙 !
𑒣𑒴𑒿𑒖𑒲𑒫𑒰𑒠𑒏 𑒖𑒢𑒧 𑒦𑒹𑒪 𑒎𑒠𑓂𑒨𑒼𑒑𑒱𑒏 𑒏𑓂𑒩𑒰𑒢𑓂𑒞𑒱𑒮𑒿 𑒂 𑒂𑒥 𑒣𑒼𑒮𑓂𑒙 𑒃𑒢𑓂𑒛𑒮𑓂𑒙𑓂𑒩𑒱𑒨𑒪 𑒮𑒧𑒰𑒖𑒧𑒹 𑒅𑒞𑓂𑒣𑒰𑒠𑒢𑒏 𑒥𑒠𑒪𑒰 𑒮𑒴𑒔𑒢𑒰 𑒂 𑒮𑓀𑒔𑒰𑒩𑒏 𑒧𑒯𑒞𑓂𑒫 𑒥𑒜𑓃𑒱 𑒑𑒹𑒪 𑒁𑒕𑒱, 𑒮𑓀𑒑𑒝𑒏𑒏 𑒦𑒴𑒧𑒱𑒏𑒰 𑒮𑒧𑒰𑒖𑒧𑒹 𑒥𑒜𑓃𑒱 𑒑𑒹𑒪 𑒁𑒕𑒱। 𑒧𑒼𑒥𑒰𑒃𑒪, 𑒏𑓂𑒩𑒹𑒛𑒱𑒙-𑒏𑒰𑒩𑓂𑒛 𑒂 𑒮𑒦 𑒋𑒯𑒢 𑒫𑒮𑓂𑒞𑒳 𑒔𑒱𑒣𑓂𑒮 𑒂𑒡𑒰𑒩𑒱𑒞 𑒁𑒕𑒱। 𑒋𑒯𑒱 𑒥𑒹𑒩𑒳𑒏𑒰 (𑓒𑓐𑓐𑓘) 𑒏𑒼𑒮𑒲𑒏 𑒥𑒰𑒜𑓃𑒱𑒧𑒹 𑒁𑒢𑒪𑒏𑒰𑒢𑓂𑒞𑒖𑒲 𑒑𑒰𑒧𑒧𑒹 𑒤𑒰𑒿𑒮𑒪 𑒕𑒪𑒰𑒯, 𑒦𑒼𑒖𑒢 𑒪𑒹𑒪 𑒧𑒰𑒩𑒱 𑒣𑒛𑓃𑒻𑒞 𑒩𑒯𑒋 𑒧𑒳𑒠𑒰 𑒏𑓂𑒩𑒹𑒛𑒱𑒙 𑒏𑒰𑒩𑓂𑒛𑒮𑒿 𑒋.𑒮𑒲.𑒙𑒱𑒏𑒙 𑒥𑒳𑒏 𑒦𑒋 𑒑𑒹𑒪𑒢𑓂𑒯𑒱। 𑒧𑒱𑒟𑒱𑒪𑒰𑒏 𑒮𑒧𑒰𑒖𑒧𑒹 𑒮𑒴𑒔𑒢𑒰 𑒂 𑒮𑓀𑒑𑒝𑒏𑒏 𑒦𑒴𑒧𑒱𑒏𑒰𑒏 𑒂𑒩 𑒏𑒼𑒢 𑒠𑒼𑒮𑒩 𑒅𑒠𑒰𑒯𑒩𑒝 𑒔𑒰𑒯𑒲?
𑒛𑒲 𑒏𑒢𑓂𑒮𑒙𑓂𑒩𑒏𑓂𑒬𑒢 𑒂 𑒩𑒲 𑒏𑒢𑓂𑒮𑒙𑓂𑒩𑒏𑓂𑒬𑒢 𑒫𑒱𑒔𑒰𑒩 𑒩𑒔𑒢𑒰 𑒣𑓂𑒩𑒏𑓂𑒩𑒱𑒨𑒰𑒏 𑒣𑒳𑒢𑒩𑓂𑒑𑒚𑒢 𑒏𑒹𑒿 𑒠𑒹𑒐𑒥𑒻𑒞 𑒁𑒕𑒱 𑒖𑒹 𑒅𑒞𑓂𑒞𑒩 𑒎𑒠𑓂𑒨𑒼𑒑𑒱𑒏 𑒏𑒰𑒪𑒧𑒹 𑒔𑒹𑒞𑒢𑒰𑒏 𑒢𑒱𑒩𑓂𑒧𑒰𑒝 𑒢𑒫 𑒩𑒴𑒣𑒧𑒹 𑒦𑓄 𑒩𑒯𑒪 𑒁𑒕𑒱। 𑒃𑒞𑒱𑒯𑒰𑒮 𑒞𑒿 𑒢𑒯𑒱 𑒧𑒳𑒠𑒰 𑒣𑒩𑒧𑓂𑒣𑒩𑒰𑒑𑒞 𑒃𑒞𑒱𑒯𑒰𑒮𑒏 𑒁𑒢𑓂𑒞 𑒦𑓄 𑒑𑒹𑒪 𑒁𑒕𑒱। 𑒩𑒰𑒖𑓂𑒨, 𑒫𑒩𑓂𑒑, 𑒩𑒰𑒭𑓂𑒙𑓂𑒩, 𑒠𑒪, 𑒮𑒧𑒰𑒖, 𑒣𑒩𑒱𑒫𑒰𑒩, 𑒢𑒻𑒞𑒱𑒏𑒞𑒰, 𑒫𑒱𑒫𑒰𑒯 𑒮𑒦 𑒤𑒹𑒩𑒮𑒿 𑒣𑒩𑒱𑒦𑒰𑒭𑒱𑒞 𑒏𑒋𑒪 𑒖𑒰 𑒩𑒯𑒪 𑒁𑒕𑒱। 𑒧𑒰𑒩𑒞𑒹 𑒩𑒰𑒮 𑒣𑒩𑒱𑒫𑒩𑓂𑒞𑒢𑒏 𑒣𑒩𑒱𑒝𑒰𑒧𑒮𑒿, 𑒫𑒱𑒐𑓀𑒛𑒱𑒞 𑒦𑒋 𑒮𑒢𑓂𑒠𑒩𑓂𑒦𑒯𑒲𑒢 𑒦𑓄 𑒑𑒹𑒪 𑒁𑒕𑒱 𑒏𑒞𑒹𑒏 𑒮𑓀𑒮𑓂𑒟𑒰।

𑒋𑒯𑒱 𑒣𑒩𑒱𑒣𑓂𑒩𑒹𑒏𑓂𑒭𑓂𑒨𑒧𑒹 𑒧𑒻𑒟𑒱𑒪𑒲 𑒏𑒟𑒰 𑒑𑒰𑒟𑒰𑒣𑒩 𑒮𑒹𑒯𑒼 𑒋𑒏𑒙𑒰 𑒑𑒯𑒱𑓀𑒏𑒲 𑒢𑒖𑒩𑒱 𑒠𑒾𑒑𑒰𑒥𑒲।
𑒩𑒰𑒧𑒠𑒹𑒫 𑒗𑒰 𑒖𑒪𑒡𑒩 𑒗𑒰𑒏 “𑒫𑒱𑒪𑒏𑓂𑒭𑒝 𑒠𑒰𑒧𑓂𑒣𑒞𑓂𑒨” (𑒧𑒻𑒟𑒱𑒪 𑒯𑒱𑒞 𑒮𑒰𑒡𑒢, 𑒖𑒨𑒣𑒳𑒩, 𑓑𑓙𑓐𑓖 𑒄.) 𑒏𑒹𑒿 𑒧𑒻𑒟𑒱𑒪𑒲𑒏 𑒂𑒡𑒳𑒢𑒱𑒏 𑒏𑒟𑒰𑒏 𑒣𑓂𑒩𑒰𑒩𑒧𑓂𑒦 𑒧𑒰𑒢𑒪𑒢𑓂𑒯𑒱 । 𑒣𑒳𑒪𑒏𑒱𑒞 𑒧𑒱𑒬𑓂𑒩𑒏 “𑒧𑒼𑒯𑒱𑒢𑒲 𑒧𑒼𑒯𑒢” (𑓑𑓙𑓐𑓗-𑓐𑓘), 𑒖𑒢𑒮𑒲𑒠𑒢𑒏 “𑒞𑒰𑒩𑒰𑒏 𑒫𑒻𑒡𑒫𑓂𑒨” (𑒧𑒱𑒟𑒱𑒪𑒰 𑒧𑒱𑒯𑒱𑒩, 𑓑𑓙𑓑𑓗 𑒄.), 𑒬𑓂𑒩𑒲𑒏𑒵𑒭𑓂𑒝 𑒚𑒰𑒏𑒳𑒩𑒏 𑒔𑒢𑓂𑒠𑓂𑒩𑒣𑓂𑒩𑒦𑒰, 𑒞𑒳𑒪𑒰𑒣𑒞𑒱 𑒮𑒱𑓀𑒯𑒏 𑒧𑒠𑒢𑒩𑒰𑒖 𑒔𑒩𑒱𑒞, 𑒏𑒰𑒪𑒲 𑒏𑒳𑒧𑒰𑒩 𑒠𑒰𑒮𑒏 𑒁𑒠𑒪𑒰𑒏 𑒥𑒠𑒪𑒰 𑒂 𑒏𑒰𑒧𑒱𑒢𑒲𑒏 𑒖𑒲𑒫𑒢, 𑒬𑓂𑒨𑒰𑒧𑒰𑒢𑒢𑓂𑒠 𑒗𑒰𑒏 𑒁𑒏𑒱𑒘𑓂𑒔𑒢, 𑒬𑓂𑒩𑒲 𑒥𑒪𑓂𑒪𑒦 𑒗𑒰𑒏 𑒫𑒱𑒪𑒰𑒮𑒱𑒞𑒰, 𑒯𑒩𑒱𑒢𑒢𑓂𑒠𑒢 𑒚𑒰𑒏𑒳𑒩 “𑒮𑒩𑒼𑒖”𑒏 𑒄𑒬𑓂𑒫𑒩𑒲𑒨 𑒩𑒏𑓂𑒭𑒰, 𑒬𑒰𑒩𑒠𑒰𑒢𑒢𑓂𑒠 𑒚𑒰𑒏𑒳𑒩 “𑒫𑒱𑒢𑒨”𑒏 𑒞𑒰𑒩𑒰 𑒂 𑒬𑓂𑒨𑒰𑒧 𑒮𑒳𑒢𑓂𑒠𑒩 𑒗𑒰 “𑒧𑒡𑒳𑒣”𑒏 𑒣𑓂𑒩𑒞𑒱𑒖𑓂𑒘𑒰-𑒣𑒞𑓂𑒩, 𑒫𑒻𑒠𑓂𑒨𑒢𑒰𑒟 𑒧𑒱𑒬𑓂𑒩 “𑒫𑒱𑒠𑓂𑒨𑒰𑒮𑒱𑒢𑓂𑒡𑒳”𑒏 𑒑𑒣𑓂𑒣-𑒮𑒣𑓂𑒣𑒏 𑒐𑒩𑒱𑒯𑒰𑒢 𑒂 𑒣𑓂𑒩𑒥𑒼𑒡 𑒢𑒰𑒩𑒰𑒨𑒝 𑒮𑒱𑓀𑒯𑒏 𑒥𑒲𑒕𑒪 𑒤𑒴𑒪 𑒂𑒋𑒪। 𑒯𑒩𑒱𑒧𑒼𑒯𑒢 𑒗𑒰𑒏 𑒏𑒟𑒰 𑒂 𑒨𑒰𑒞𑓂𑒩𑒲𑒏 𑒅𑒣𑒢𑓂𑒨𑒰𑒮𑒱𑒏𑒰, 𑒩𑒰𑒖𑒏𑒧𑒪 𑒔𑒾𑒡𑒩𑒲, 𑒪𑒪𑒱𑒞, 𑒩𑒰𑒧𑒠𑒹𑒫 𑒗𑒰, 𑒥𑒪𑒩𑒰𑒧, 𑒣𑓂𑒩𑒦𑒰𑒮 𑒏𑒳𑒧𑒰𑒩 𑒔𑒾𑒡𑒩𑒲, 𑒡𑒴𑒧𑒏𑒹𑒞𑒳, 𑒩𑒰𑒖𑒧𑒼𑒯𑒢 𑒗𑒰, 𑒮𑒰𑒏𑒹𑒞𑒰𑒢𑒢𑓂𑒠, 𑒫𑒱𑒦𑒴𑒞𑒱 𑒂𑒢𑒢𑓂𑒠, 𑒮𑒳𑒢𑓂𑒠𑒩 𑒗𑒰 “𑒬𑒰𑒮𑓂𑒞𑓂𑒩𑒲”, 𑒡𑒲𑒩𑒹𑒢𑓂𑒠𑓂𑒩, 𑒩𑒰𑒖𑒹𑒢𑓂𑒠𑓂𑒩 𑒏𑒱𑒬𑒼𑒩, 𑒩𑒹𑒫𑒞𑒲 𑒩𑒧𑒝 𑒪𑒰𑒪, 𑒩𑒰𑒖𑒹𑒢𑓂𑒠𑓂𑒩 𑒫𑒱𑒧𑒪, 𑒩𑒰𑒧𑒦𑒠𑓂𑒩, 𑒁𑒬𑒼𑒏, 𑒬𑒱𑒫𑒬𑓀𑒏𑒩 𑒬𑓂𑒩𑒲𑒢𑒱𑒫𑒰𑒮, 𑒣𑓂𑒩𑒠𑒲𑒣 𑒥𑒱𑒯𑒰𑒩𑒲, 𑒩𑒧𑒹𑒬, 𑒧𑒰𑒢𑒹𑒬𑓂𑒫𑒩 𑒧𑒢𑒳𑒖, 𑒬𑓂𑒨𑒰𑒧 𑒠𑒩𑒱𑒯𑒩𑒹, 𑒏𑒳𑒧𑒰𑒩 𑒣𑒫𑒢, 𑒁𑒢𑒧𑒼𑒪 𑒗𑒰, 𑒧𑒱𑒟𑒱𑒪𑒹𑒬 𑒏𑒳𑒧𑒰𑒩 𑒗𑒰, 𑒯𑒩𑒱𑒬𑓂𑒔𑒢𑓂𑒠𑓂𑒩 𑒗𑒰, 𑒅𑒣𑒰𑒡𑓂𑒨𑒰𑒨 𑒦𑒴𑒭𑒝, 𑒩𑒰𑒧𑒦𑒩𑒼𑒮 𑒏𑒰𑒣𑒛𑓃𑒱 “𑒦𑓂𑒩𑒧𑒩”, 𑒦𑒳𑒫𑒢𑒹𑒬𑓂𑒫𑒩 𑒣𑒰𑒟𑒹𑒨, 𑒥𑒠𑒩𑒲 𑒢𑒰𑒩𑒰𑒨𑒝 𑒥𑒩𑓂𑒧𑒰, 𑒁𑒨𑒼𑒡𑓂𑒨𑒰𑒢𑒰𑒟 𑒔𑒾𑒡𑒩𑒲, 𑒩𑒰.𑒢𑒰.𑒮𑒳𑒡𑒰𑒏𑒩, 𑒖𑒲𑒞𑒹𑒢𑓂𑒠𑓂𑒩 𑒖𑒲𑒞, 𑒮𑒳𑒩𑒹𑒢𑓂𑒠𑓂𑒩 𑒪𑒰𑒦, 𑒖𑒨𑒢𑒰𑒩𑒰𑒨𑒝 𑒗𑒰 “𑒖𑒱𑒖𑓂𑒘𑒰𑒮𑒳”, 𑒬𑓂𑒨𑒰𑒧 𑒮𑒳𑒢𑓂𑒠𑒩 “𑒬𑒬𑒱”, 𑒩𑒧𑒹𑒬 𑒩𑒘𑓂𑒖𑒢, 𑒡𑒲𑒩𑒹𑒢𑓂𑒠𑓂𑒩 𑒣𑓂𑒩𑒹𑒧𑒩𑓂𑒭𑒱, 𑒣𑒩𑒧𑒹𑒬𑓂𑒫𑒩 𑒏𑒰𑒣𑒛𑓃𑒱, 𑒞𑒰𑒩𑒰𑒢𑒢𑓂𑒠 𑒫𑒱𑒨𑒼𑒑𑒲, 𑒢𑒰𑒑𑒹𑒢𑓂𑒠𑓂𑒩 𑒏𑒳𑒧𑒩, 𑒁𑒧𑒩𑒢𑒰𑒟, 𑒠𑒹𑒫𑒬𑓀𑒏𑒩 𑒢𑒫𑒲𑒢, 𑒁𑒢𑒪𑒏𑒰𑒢𑓂𑒞, 𑒬𑓂𑒩𑒲𑒡𑒩𑒧, 𑒢𑒲𑒞𑒰 𑒗𑒰, 𑒫𑒱𑒦𑒰 𑒩𑒰𑒢𑒲, 𑒅𑒭𑒰𑒏𑒱𑒩𑒝 𑒐𑒰𑒢, 𑒮𑒳𑒮𑓂𑒧𑒱𑒞𑒰 𑒣𑒰𑒚𑒏, 𑒬𑒹𑒤𑒰𑒪𑒱𑒏𑒰 𑒫𑒩𑓂𑒧𑒰, 𑒖𑓂𑒨𑒼𑒞𑓂𑒮𑒢𑒰 𑒔𑒢𑓂𑒠𑓂𑒩𑒧, 𑒪𑒰𑒪𑒣𑒩𑒲 𑒠𑒹𑒫𑒲 𑒋𑒯𑒱 𑒨𑒰𑒞𑓂𑒩𑒰𑒏𑒹𑒿 𑒂𑒑𑒰𑒿 𑒥𑒜𑓃𑒹𑒪𑒢𑓂𑒯𑒱।
𑒧𑒻𑒟𑒱𑒪𑒲𑒧𑒹 𑒢𑒲𑒏 𑒏𑒟𑒰 𑒢𑒯𑒱, 𑒢𑒲𑒏 𑒢𑒰𑒙𑒏 𑒢𑒯𑒱? 𑒧𑒻𑒟𑒱𑒪𑒲𑒧𑒹 𑒫𑓂𑒨𑒰𑒏𑒩𑒝 𑒢𑒯𑒱? 𑒣𑒢𑒱𑒮𑒼𑒯 𑒂 𑒣𑒢𑒱𑒑𑒩 𑒋𑒯𑒱 𑒞𑒩𑒯𑒏 𑒫𑒱𑒬𑓂𑒪𑒹𑒭𑒝 𑒏𑒞𑒋 𑒁𑒕𑒱 𑒧𑒻𑒟𑒱𑒪𑒲 𑒫𑓂𑒨𑒰𑒏𑒩𑒝 𑒧𑒹, 𑒫𑒻𑒯 𑒁𑒢𑒪, 𑒣𑒰𑒫𑒏 𑒮𑒦 𑒁𑒕𑒱 ! 𑒧𑒳𑒠𑒰 𑒠𑒲𑒢𑒥𑒢𑓂𑒡𑒳 𑒗𑒰𑒏 𑒡𑒰𑒞𑒳 𑒩𑒴𑒣 𑒣𑒼𑒟𑒲𑒧𑒹 𑒖𑒹 𑓑𑓐𑓒𑓕 𑒙𑒰 𑒋𑒯𑒱 𑒞𑒩𑒯𑒏 𑒐𑒰𑒿𑒙𑒲 𑒩𑒴𑒣 𑒁𑒕𑒱, 𑒩𑒧𑒰𑒢𑒟 𑒗𑒰𑒏 𑒧𑒱𑒟𑒱𑒪𑒰𑒦𑒰𑒭𑒰𑒣𑓂𑒩𑒏𑒰𑒬𑒧𑒹 𑒖𑒹 𑒐𑒰𑒿𑒙𑒲 𑒧𑒻𑒟𑒱𑒪𑒲 𑒫𑓂𑒨𑒰𑒏𑒩𑒝 𑒁𑒕𑒱, 𑒄 𑒠𑒳𑒢𑒴 𑒩𑒱𑒮𑒼𑒩𑓂𑒮 𑒥𑒳𑒏 𑒪𑒋 𑒧𑒰𑒢𑒏𑒲𑒏𑒩𑒝 𑒂 𑒫𑓂𑒨𑒰𑒏𑒩𑒝𑒏 𑒢𑒱𑒩𑓂𑒧𑒰𑒝 𑒮𑒩𑓂𑒫𑒟𑒰 𑒮𑓀𑒦𑒫 𑒁𑒕𑒱। 𑒧𑒳𑒠𑒰 𑒦𑓄 𑒩𑒯𑒪 𑒁𑒕𑒱 𑒄 𑒖𑒹 𑒣𑒰𑒢𑒲𑒣𑒞𑒏 𑒣𑒯𑒱𑒪 𑒨𑒳𑒠𑓂𑒡𑒏 𑒫𑒱𑒬𑓂𑒪𑒹𑒭𑒝𑒧𑒹 𑒄 𑒪𑒱𑒐𑒲 𑒖𑒹 𑒣𑒰𑒢𑒲𑒣𑒞 𑒂 𑒥𑒰𑒥𑒩𑒏 𑒥𑒲𑒔𑒧𑒹 𑒨𑒳𑒠𑓂𑒡 𑒦𑒹𑒪। 𑒩𑒰𑒧𑒦𑒠𑓂𑒩𑒏𑒹𑓀 𑒡𑒲𑒩𑒹𑒢𑓂𑒠𑓂𑒩 𑒮𑒩𑓂𑒫𑒬𑓂𑒩𑒹𑒭𑓂𑒚 𑒧𑒻𑒟𑒱𑒪𑒲 𑒏𑒟𑒰𑒏𑒰𑒩𑒏 𑒩𑒴𑒣𑒧𑒹 𑒫𑒩𑓂𑒝𑒱𑒞 𑒏𑒋𑒢𑒹 𑒕𑒟𑒱, 𑒧𑒳𑒠𑒰 𑒋𑒐𑒢 𑒡𑒩𑒱 𑒯𑒳𑒢𑒏𑒩 𑒏𑒋𑒏 𑒙𑒰 𑒏𑒟𑒰𑒏 𑒫𑒱𑒬𑓂𑒪𑒹𑒭𑒝 𑒏𑒋𑒪 𑒑𑒹𑒪 𑒁𑒕𑒱 ? 𑒢𑒔𑒱𑒏𑒹𑒞𑒰𑒏 𑒢𑒰𑒙𑒏 𑒂 𑒧𑒻𑒟𑒱𑒪𑒲𑒏 𑒮𑒹𑒏𑓂𑒮𑒣𑒱𑒁𑒩 𑒧𑒯𑒹𑒢𑓂𑒠𑓂𑒩 𑒧𑒪𑓀𑒑𑒱𑒨𑒰𑒏 𑒏𑒰𑒖𑒏 𑒂 𑒩𑒰𑒧𑒦𑒠𑓂𑒩 𑒂 𑒮𑒳𑒦𑒰𑒭 𑒔𑒢𑓂𑒠𑓂𑒩 𑒨𑒰𑒠𑒫𑒏 𑒏𑒟𑒰 𑒨𑒰𑒞𑓂𑒩𑒰𑒏 𑒮𑒢𑓂𑒠𑒩𑓂𑒦𑒧𑒹 𑒄 𑒑𑒣 𑒏𑒯𑒥 𑒂𑒫𑒬𑓂𑒨𑒏 𑒕𑒪।
𑒖𑒰𑒯𑒱 𑒮𑒧𑒨 𑒧𑒻𑒟𑒱𑒪𑒲𑒏 𑒮𑒧𑒮𑓂𑒨𑒰 𑒒𑒩-𑒒𑒩𑒮𑒿 𑒧𑒻𑒟𑒱𑒪𑒲𑒏 𑒢𑒱𑒭𑓂𑒏𑒰𑒮𑒢 𑒁𑒕𑒱, 𑒖𑒐𑒢 𑒯𑒱𑒢𑓂𑒠𑒲𑒧𑒹 𑒋𑒏 𑒯𑒰𑒟 𑒁𑒖𑒧𑒹𑒪𑒰𑒏 𑒥𑒰𑒠 𑒢𑒰𑒧 𑒢𑒯𑒱 𑒦𑒹𑒪𑒰 𑒅𑒞𑓂𑒞𑒩 𑒪𑒼𑒏 𑒧𑒻𑒟𑒱𑒪𑒲𑒏 𑒏𑒟𑒰-𑒏𑒫𑒱𑒞𑒰 𑒪𑒱𑒐𑒱 𑒂 𑒮𑒧𑓂𑒣𑒰𑒠𑒏-𑒂𑒪𑒼𑒔𑒏 𑒦𑒋, 𑒁𑒣𑒢 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰𑒏 𑒦𑒰𑒩𑒮𑒿 𑒧𑒻𑒟𑒱𑒪𑒲 𑒏𑒟𑒰-𑒏𑒫𑒱𑒞𑒰𑒏 𑒫𑒰𑒞𑒰𑒫𑒩𑒝𑒏𑒹𑒿 𑒦𑒩𑒱𑒨𑒰 𑒩𑒯𑒪 𑒕𑒟𑒱, 𑒧𑒰𑒩𑓂𑒏𑓂𑒮𑒫𑒰𑒠, 𑒤𑒹𑒧𑒱𑒢𑒱𑒖𑓂𑒧 𑒂 𑒡𑒩𑓂𑒧𑒢𑒱𑒩𑒣𑒹𑒏𑓂𑒭𑒞𑒰 𑒒𑒼𑒮𑒱𑒨𑒰-𑒒𑒼𑒮𑒱𑒨𑒰 𑒏𑒋 𑒏𑒟𑒰-𑒏𑒫𑒱𑒞𑒰𑒧𑒹 𑒦𑒩𑒪 𑒖𑒰 𑒩𑒯𑒪 𑒁𑒕𑒱, 𑒞𑒐𑒢 𑒮𑓂𑒞𑒩𑒏 𑒢𑒱𑒩𑓂𑒡𑒰𑒩𑒝 𑒮𑒋𑒯 𑒏𑓄 𑒩𑒯𑒪 𑒁𑒕𑒱, 𑒮𑓂𑒞𑒩𑒯𑒲𑒢𑒞𑒰𑒏 𑒥𑒹𑒜𑓃 𑒫𑒰𑒠 𑒥𑒢𑒪 𑒁𑒕𑒱। 𑒖𑒹 𑒑𑒩𑒲𑒥 𑒂 𑒢𑒱𑒧𑓂𑒢 𑒖𑒰𑒞𑒲𑒨𑒏 𑒬𑒼𑒭𑒝 𑒂 𑒍𑒏𑒩𑒰 𑒯𑒞𑒼𑒞𑓂𑒮𑒰𑒯𑒱𑒞 𑒏𑒩𑒥𑒰𑒧𑒹 𑒪𑒰𑒑𑒪 𑒕𑒟𑒱 𑒮𑒹 𑒧𑒰𑒩𑓂𑒏𑓂𑒮𑒫𑒰𑒠𑒏 𑒬𑒩𑒝𑒧𑒹, 𑒖𑒹 𑒧𑒯𑒱𑒪𑒰𑒏𑒹𑒿 𑒁𑒣𑒧𑒰𑒢𑒱𑒞 𑒏𑒹𑒪𑒢𑓂𑒯𑒱 𑒮𑒹 𑒤𑒹𑒧𑒱𑒢𑒱𑒖𑓂𑒧 𑒂 𑒧𑒱𑒟𑒱𑒪𑒰 𑒩𑒰𑒖𑓂𑒨 𑒂 𑒮𑓀𑒒𑒏 𑒬𑒩𑒝𑒧𑒹 𑒂 𑒖𑒹 𑒮𑒰𑒧𑓂𑒣𑓂𑒩𑒠𑒰𑒨𑒱𑒏 𑒕𑒟𑒱 𑒍 𑒡𑒩𑓂𑒧𑒢𑒱𑒩𑒣𑒹𑒏𑓂𑒭𑒞𑒰𑒏 𑒬𑒩𑒝𑒧𑒹 𑒖𑒰𑒃𑒞 𑒕𑒟𑒱। 𑒍𑒢𑒰 𑒮𑒰𑒧𑓂𑒣𑓂𑒩𑒠𑒰𑒨𑒱𑒏 𑒪𑒼𑒏 𑒤𑒹𑒧𑒱𑒢𑒱𑒮𑓂𑒙, 𑒧𑒯𑒱𑒪𑒰 𑒫𑒱𑒩𑒼𑒡𑒲 𑒧𑒰𑒩𑓂𑒏𑓂𑒮𑒱𑒮𑓂𑒙 𑒂 𑒋𑒯𑒱 𑒞𑒩𑒯𑒏 𑒏𑒞𑒹𑒏 𑒑𑒚𑒥𑓀𑒡𑒢 𑒂 𑒧𑒚𑒧𑒹 𑒖𑒰𑒃𑒞 𑒠𑒹𑒐𑒪 𑒑𑒹𑒪 𑒕𑒟𑒱। 𑒏𑓂𑒨𑒼 𑒩𑒰𑒖𑒏𑒧𑒪𑒏 𑒥𑒛𑓃𑒰𑒃𑒧𑒹 𑒪𑒰𑒑𑒪 𑒁𑒕𑒱, 𑒞𑒿 𑒏𑓂𑒨𑒼 𑒨𑒰𑒞𑓂𑒩𑒲𑒏 𑒂 𑒡𑒴𑒧𑒏𑒹𑒞𑒳𑒏 𑒞𑒿 𑒏𑓂𑒨𑒼 𑒮𑒳𑒧𑒢𑒖𑒲𑒏, 𑒂 𑒯𑒳𑒢𑒏𑒰 𑒪𑒼𑒏𑒢𑒱𑒏 𑒞𑒿 𑒏𑒲 𑒣𑒏𑓂𑒭 𑒩𑒰𑒐𑒞 𑒞𑒏𑒩 𑒂𑒩𑒱𑒧𑒹 𑒁𑒣𑒢𑒰𑒏𑒹𑒿 𑒂𑒑𑒰𑒿 𑒩𑒰𑒐𑒱 𑒩𑒯𑒪 𑒁𑒕𑒱। 𑒨𑒰𑒞𑓂𑒩𑒲𑒏 𑒣𑒰𑒩𑒼𑒏𑒹𑒿 𑒂 𑒩𑒰𑒖𑒏𑒧𑒪 𑒂 𑒡𑒴𑒧𑒏𑒹𑒞𑒳𑒏 𑒏𑒟𑒰𑒏𑒹𑒿 𑒂𑒃𑒨𑒼 𑒮𑓂𑒫𑒲𑒏𑒰𑒩 𑒢𑒯𑒱 𑒏𑒋𑒪 𑒑𑒹𑒪 𑒁𑒕𑒱- 𑒋𑒯𑒱 𑒞𑒩𑒯𑒏 𑒁𑒢𑒩𑓂𑒑𑒪 𑒣𑓂𑒩𑒪𑒰𑒣 ! 𑒏𑓂𑒨𑒼 𑒞𑒟𑒰𑒏𑒟𑒱𑒞 𑒫𑒱𑒫𑒰𑒠𑒰𑒮𑓂𑒣𑒠 𑒏𑒟𑒰𑒏 𑒮𑒧𑓂𑒣𑒰𑒠𑒢 𑒏𑒋 𑒮𑓂𑒫𑒨𑓀 𑒫𑒱𑒫𑒰𑒠 𑒅𑒞𑓂𑒣𑒢𑓂𑒢 𑒏𑒋 𑒁𑒣𑒢𑒰𑒏𑒹𑒿 𑒂𑒑𑒰𑒿 𑒩𑒰𑒐𑒱 𑒩𑒯𑒪 𑒕𑒟𑒱। 𑒧𑒰𑒞𑓂𑒩 𑒧𑒻𑒟𑒱𑒪 𑒥𑓂𑒩𑒰𑒯𑓂𑒧𑒝 𑒂 𑒏𑒩𑓂𑒝 𑒏𑒰𑒨𑒮𑓂𑒟𑒏 𑒪𑒹𑒐𑒢𑒏 𑒥𑒲𑒔 𑒮𑒲𑒧𑒱𑒞 𑒣𑓂𑒩𑒞𑒱𑒨𑒼𑒑𑒱𑒞𑒰 𑒖𑒰𑒯𑒱 𑒏𑒫𑒱-𑒏𑒟𑒰𑒏𑒰𑒩𑒏𑒹𑒿 𑒫𑒱𑒔𑒪𑒱𑒞 𑒏𑒋 𑒩𑒯𑒪 𑒕𑒢𑓂𑒯𑒱 𑒂 𑒯𑒱𑒢𑓂𑒠𑒲 𑒕𑒼𑒛𑓃𑒱 𑒧𑒻𑒟𑒱𑒪𑒲𑒧𑒹 𑒁𑒋𑒥𑒰𑒏 𑒥𑒰𑒠 𑒖𑒰𑒯𑒱 𑒑𑒞𑒱𑒮𑒿 𑒍 𑒄 𑒮𑒦 𑒏𑒩𑒞𑒥 𑒏𑒋 𑒩𑒯𑒪 𑒕𑒟𑒱, 𑒞𑒱𑒢𑒏𑒰 𑒧𑒻𑒟𑒱𑒪𑒲𑒏 𑒧𑒳𑒐𑓂𑒨 𑒮𑒧𑒮𑓂𑒨𑒰𑒣𑒩 𑒡𑓂𑒨𑒰𑒢 𑒏𑒯𑒱𑒨𑒰 𑒖𑒋𑒞𑒢𑓂𑒯𑒱 𑒮𑒹 𑒢𑒯𑒱 𑒖𑒰𑒢𑒱 ? 𑒪𑒼𑒏 𑒄𑒯𑒼 𑒥𑒳𑒗𑒻𑒞 𑒕𑒟𑒱 𑒖𑒹 𑒯𑒱𑒢𑓂𑒠𑒲𑒏 𑒥𑒰𑒠 𑒖𑒹 𑒧𑒻𑒟𑒱𑒪𑒲𑒧𑒹 𑒪𑒱𑒐𑒥 , 𑒞𑒿 𑒮𑓂𑒫𑒲𑒏𑒵𑒞𑒱 𑒞𑓂𑒫𑒩𑒱𑒞 𑒑𑒞𑒱𑒋𑒿 𑒦𑒹𑒙𑒞 ? 𑒖𑒹 𑒧𑒻𑒟𑒱𑒪𑒲𑒏 𑒩𑒔𑒢𑒰𑒏𑒰𑒩𑒹𑒿𑒏𑒹𑒿 𑒋𑒯𑒱 𑒞𑒩𑒯𑒏 𑒦𑓂𑒩𑒧 𑒕𑒢𑓂𑒯𑒱 𑒂 𑒂𑒞𑓂𑒧𑒫𑒱𑒬𑓂𑒫𑒰𑒮𑒏 𑒁𑒦𑒰𑒫 𑒕𑒢𑓂𑒯𑒱, 𑒁𑒣𑒢 𑒧𑒰𑒞𑒵𑒦𑒰𑒭𑒰𑒏 𑒮𑓀𑒣𑓂𑒩𑒹𑒭𑒝𑒲𑒨𑒞𑒰𑒣𑒩 𑒁𑒫𑒱𑒬𑓂𑒫𑒰𑒮 (!), 𑒞𑒐𑒢 𑒋𑒯𑒱 𑒦𑒰𑒭𑒰𑒏 𑒦𑒫𑒱𑒭𑓂𑒨 𑒯𑒱𑒢𑒏𑒰 𑒪𑒼𑒏𑒢𑒱𑒏 𑒏𑒰𑒢𑓂𑒯𑒣𑒩 𑒠𑒋 𑒏𑒼𑒢 𑒕𑒠𑓂𑒧 𑒯𑒧 𑒮𑒦 𑒮𑓀𑒖𑒼𑒑𑒱 𑒩𑒯𑒪 𑒕𑒲 ? 𑒮𑒹𑒧𑒲𑒢𑒰𑒩𑒧𑒹 𑒮𑒰𑒯𑒱𑒞𑓂𑒨 𑒁𑒏𑒰𑒠𑒧𑒲 𑒣𑒳𑒩𑒮𑓂𑒏𑒰𑒩 𑒣𑓂𑒩𑒰𑒣𑓂𑒞 𑒋𑒯𑒢 𑒖𑒳𑒗𑒰𑒩𑒴 𑒏𑒟𑒰𑒏𑒰𑒩, 𑒮𑒧𑓂𑒣𑒰𑒠𑒏 𑒂 𑒮𑒧𑒰𑒪𑒼𑒔𑒏 𑒮𑒦𑒏𑒹𑒿 𑒁𑒣𑒢 𑒣𑒳𑒞𑓂𑒩-𑒣𑒳𑒞𑓂𑒩𑒲-𑒣𑒞𑓂𑒢𑒲𑒏 𑒮𑓀𑒑 𑒧𑒻𑒟𑒱𑒪𑒲𑒧𑒹 𑒢𑒯𑒱 𑒫𑒩𑒢𑓂 𑒯𑒱𑒢𑓂𑒠𑒲 𑒧𑒹 (𑒁𑓀𑒑𑓂𑒩𑒹𑒖𑒲 𑒣𑓂𑒩𑒰𑒨𑓁 𑒮𑒰𑒧𑒩𑓂𑒟𑓂𑒨𑒮𑒿 𑒥𑒰𑒯𑒩 𑒕𑒢𑓂𑒯𑒱 𑒞𑒹𑒿) 𑒑𑒣 𑒏𑒩𑒻𑒞 𑒠𑒹𑒐𑒱 𑒯𑒞𑒣𑓂𑒩𑒦 𑒩𑒯𑒱 𑒖𑒰𑒃𑒞 𑒕𑒲। 𑒧𑒻𑒟𑒱𑒪𑒲𑒧𑒹 𑒥𑒲𑒮 𑒙𑒰 𑒪𑒱𑒐𑒢𑒯𑒰𑒩 𑒕𑒪𑒰𑒯 𑒂 𑒣𑒰𑒿𑒔𑒙𑒰 𑒣𑒜𑓃𑒢𑒱𑒯𑒰𑒩, 𑒮𑒹 𑒏𑒼𑒢 𑒫𑒱𑒫𑒰𑒠 𑒅𑒚𑒪 𑒯𑒼𑒋𑒞? 𑒩𑒰𑒖𑒏𑒧𑒪/ 𑒨𑒰𑒞𑓂𑒩𑒲𑒏 𑒧𑒻𑒟𑒱𑒪𑒲𑒏 𑒪𑒹𑒐𑒢 𑒮𑒾𑒧𑓂𑒨 𑒁𑒕𑒱, 𑒮𑒹 𑒯𑒳𑒢𑒏𑒩 𑒮𑒦𑒏 𑒑𑒼𑒙-𑒑𑒼𑒙 𑒩𑒔𑒢𑒰 𑒣𑒜𑓃𑒱 𑒏𑒋 𑒯𑒧 𑒏𑒯𑒱 𑒮𑒏𑒻𑒞 𑒕𑒲। 𑒞𑒰𑒯𑒱 𑒮𑓂𑒟𑒱𑒞𑒱 𑒧𑒹- 𑒄 𑒫𑒱𑒫𑒰𑒠 𑒩𑒯𑒋 𑒋𑒯𑒱 𑒏𑒫𑒱𑒞𑒰𑒧𑒹 𑒂 𑒋𑒯𑒱 𑒏𑒟𑒰𑒧𑒹- 𑒋𑒯𑒱 𑒞𑒩𑒯𑒏 𑒑𑒣 𑒂𑒢𑒱 𑒂 𑒍𑒏𑒩 𑒣𑒏𑓂𑒭𑒧𑒹 𑒁𑒣𑒢 𑒞𑒩𑓂𑒏 𑒠𑒋 𑒁𑒣𑒢 𑒪𑒹𑒐𑒢𑒲 𑒔𑒧𑒏𑒰𑒋𑒥 ? 𑒂 𑒞𑒏𑒩 𑒥𑒰𑒠 𑒨𑒰𑒞𑓂𑒩𑒲𑒏 𑒥𑒰𑒠 𑒣𑒯𑒱𑒪 𑒅𑒣𑒢𑓂𑒨𑒰𑒮𑒏𑒰𑒩 𑒤𑒪𑒢𑒰 𑒂 𑒩𑒰𑒖𑒏𑒧𑒪𑒏 𑒥𑒰𑒠 𑒣𑒯𑒱𑒪 𑒏𑒫𑒱 𑒔𑒱𑒪𑒢𑒰-𑒂𑒥 𑒞𑒿 𑒏𑒟𑒰𑒏𑒰𑒩 𑒂 𑒏𑒫𑒱𑒏 𑒖𑒼𑒛𑓃𑒲 𑒮𑒹𑒯𑒼 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱, 𑒋𑒏 𑒠𑒼𑒮𑒩𑒰𑒏 𑒦𑒏𑓂𑒞𑒱𑒧𑒹 𑒂 𑒂𑒣𑒮𑒲 𑒫𑒰𑒠𑒏𑒹𑒿 𑒂𑒑𑒰𑒿 𑒥𑒜𑓃𑒋𑒥𑒰 𑒪𑒹𑒪। 𑒧𑒻𑒟𑒱𑒪𑒲𑒏 𑒧𑒳𑒐𑓂𑒨 𑒮𑒧𑒮𑓂𑒨𑒰 𑒁𑒕𑒱 𑒖𑒹 𑒄 𑒦𑒰𑒭𑒰 𑒋𑒯𑒱 𑒮𑒲𑒧𑒱𑒞 𑒣𑓂𑒩𑒞𑒱𑒨𑒼𑒑𑒲 (𑒠𑒳𑒩𑓂𑒒𑒩𑓂𑒭!) 𑒮𑒦𑒏 𑒂𑒣𑒮𑒲 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰𑒏 𑒧𑒰𑒩𑒱𑒏 𑒥𑒲𑒔 𑒧𑒩𑒱 𑒩𑒯𑒪 𑒁𑒕𑒱। 𑒏𑒫𑒱-𑒏𑒟𑒰𑒏𑒰𑒩 𑒧𑒻𑒟𑒱𑒪𑒲𑒏𑒹𑒿 𑒁𑒣𑒢 𑒏𑒻𑒩𑒱𑒁𑒩 𑒥𑒢𑒰 𑒪𑒹𑒪𑒢𑓂𑒯𑒱, 𑒒𑒩𑒧𑒹 𑒧𑒻𑒟𑒱𑒪𑒲𑒏𑒹𑒿 𑒢𑒱𑒭𑓂𑒏𑒰𑒮𑒱𑒞 𑒏𑒋 𑒮𑒹𑒧𑒲𑒢𑒰𑒩𑒏 𑒫𑒮𑓂𑒞𑒳 𑒥𑒢𑒰 𑒠𑒹𑒪𑒢𑓂𑒯𑒱। 𑒞𑒐𑒢 𑒏𑒞𑒋 𑒣𑒰𑒚𑒏 𑒂 𑒏𑒼𑒢 𑒫𑒱𑒫𑒰𑒠 ! 𑒖𑒹 𑒮𑒧𑒮𑓂𑒨𑒰 𑒯𑒧 𑒠𑒹𑒐𑒱 𑒩𑒯𑒪 𑒕𑒲 𑒖𑒹 𑒥𑒔𑓂𑒔𑒰𑒏𑒹𑒿 𑒧𑒻𑒟𑒱𑒪𑒲𑒏 𑒫𑒰𑒞𑒰𑒫𑒩𑒝 𑒦𑒹𑒙𑒍 𑒂 𑒮𑒦 𑒖𑒰𑒞𑒱𑒏 𑒪𑒼𑒏 𑒋𑒯𑒱 𑒦𑒰𑒭𑒰𑒮𑒿 𑒣𑓂𑒩𑒹𑒧 𑒏𑒩𑒟𑒱 𑒞𑒰𑒯𑒱 𑒪𑒹𑒪 𑒏𑒟𑒰 𑒂 𑒏𑒫𑒱𑒞𑒰 𑒏𑒞𑒋 𑒂𑒑𑒰𑒿 𑒁𑒕𑒱 ? 𑒏𑒋𑒏𑒙𑒰 𑒫𑒱𑒖𑓂𑒘𑒰𑒢 𑒏𑒟𑒰, 𑒥𑒰𑒪-𑒏𑒱𑒬𑒼𑒩 𑒏𑒟𑒰-𑒏𑒫𑒱𑒞𑒰 𑒏𑒻𑒩𑒱𑒨𑒩𑒖𑒲𑒫𑒲 𑒏𑒫𑒱-𑒏𑒟𑒰𑒏𑒰𑒩 𑒪𑒱𑒐𑒱 𑒩𑒯𑒪 𑒕𑒟𑒱। 𑒂 𑒍 𑒒𑒩-𑒒𑒩𑒧𑒹 𑒣𑒯𑒳𑒿𑒔𑒋 𑒞𑒰𑒯𑒱 𑒪𑒹𑒪 𑒏𑒼𑒢 𑒣𑓂𑒩𑒨𑒰𑒮 𑒦𑒋 𑒩𑒯𑒪 𑒁𑒕𑒱 ? 𑒮𑒋-𑒠𑒴 𑒮𑒋 𑒏𑒰𑒣𑒲 𑒣𑒼𑒟𑒲 𑒕𑒣𑒥𑒰 𑒏𑒋 , 𑒞𑒏𑒩 𑒮𑒧𑒲𑒏𑓂𑒭𑒰 𑒏𑒩𑒥𑒰 𑒏𑒋, 𑒮𑒋-𑒠𑒴 𑒮𑒋 𑒏𑒰𑒣𑒲 𑒕𑒣𑒋𑒥𑒪𑒰 𑒣𑒞𑓂𑒩𑒱𑒏𑒰𑒧𑒹 𑒕𑒣𑒥𑒰 𑒏𑒋 , 𑒞𑒏𑒩 𑒤𑒼𑒙𑒼𑒮𑓂𑒙𑒹𑒙 𑒏𑒰𑒣𑒲 𑒤𑒼𑒪𑓂𑒛𑒩 𑒥𑒢𑒰 𑒏𑓄 𑒒𑒩𑒧𑒹 𑒩𑒰𑒐𑒱 𑒣𑒳𑒩𑒮𑓂𑒏𑒰𑒩 𑒪𑒹𑒪 𑒂 𑒮𑒱𑒪𑒹𑒥𑒮𑒧𑒹 𑒏𑒱𑒞𑒰𑒥 𑒪𑒑𑒹𑒥𑒰 𑒪𑒹𑒪 𑒏𑒋𑒪 𑒑𑒹𑒪 𑒞𑒱𑒏𑒛𑓃𑒧𑒏 𑒫𑒰𑒞𑒰𑒫𑒩𑒝𑒧𑒹 𑒯𑒧𑒩 𑒂𑒮 𑒑𑒻𑒩 𑒧𑒻𑒟𑒱𑒪 𑒥𑓂𑒩𑒰𑒯𑓂𑒧𑒝-𑒏𑒩𑓂𑒝 𑒏𑒰𑒨𑒮𑓂𑒟 𑒣𑒰𑒚𑒏 𑒂 𑒪𑒹𑒐𑒏𑒣𑒩 𑒖𑒰𑒋 𑒮𑓂𑒟𑒱𑒩 𑒦𑒋 𑒑𑒹𑒪 𑒁𑒕𑒱।

𑒖𑒹 𑒁𑒣𑒢 𑒒𑒩-𑒣𑒩𑒱𑒫𑒰𑒩 𑒢𑒯𑒱 𑒮𑒧𑓂𑒯𑒰𑒩𑒱 𑒮𑒏𑒪𑒰𑒯 𑒮𑒹 𑒜𑒹𑒩𑒲-𑒜𑒰𑒏𑒲 𑒦𑒰𑒭𑒰𑒨𑒲 𑒣𑒳𑒩𑒮𑓂𑒏𑒰𑒩 𑒪𑒋 𑒥𑒻𑒮𑒪 𑒕𑒟𑒱, 𑒧𑒱𑒟𑒱𑒪𑒰 𑒩𑒰𑒖𑓂𑒨 𑒥𑒢𑒋𑒥𑒰𑒧𑒹 𑒪𑒰𑒑𑒪 𑒕𑒟𑒱 , 𑒣𑒞𑒰 𑒢𑒯𑒱 𑒩𑒰𑒖𑓂𑒨 𑒏𑒼𑒢𑒰 𑒮𑒧𑓂𑒯𑒰𑒩𑒱 𑒮𑒏𑒞𑒰𑒯 𑒂 𑒍𑒏𑒩 𑒫𑒱𑒡𑒰𑒢 𑒮𑒦𑒰𑒧𑒹 𑒏𑒼𑒢 𑒦𑒰𑒭𑒰𑒧𑒹 𑒥𑒖𑒞𑒰𑒯, 𑒖𑒐𑒢 𑒯𑒳𑒢𑒏𑒰 𑒍𑒞𑒋 𑒣𑒳𑒩𑒮𑓂𑒏𑒵𑒞 𑒏𑒋𑒪 𑒖𑒋𑒞𑒢𑓂𑒯𑒱।
𑒖𑒹 𑒒𑒩𑒧𑒹 𑒧𑒻𑒟𑒱𑒪𑒲 𑒢𑒯𑒱 𑒥𑒖𑒻𑒞 𑒕𑒟𑒱 𑒮𑒹 𑒪𑒹𑒐𑒏 𑒂 𑒏𑒫𑒱 𑒥𑒢𑒪 𑒕𑒟𑒱 (𑒯𑒱𑒢𑓂𑒠𑒲-𑒧𑒻𑒟𑒱𑒪𑒲𑒧𑒹 𑒮𑒧𑒰𑒢 𑒁𑒡𑒱𑒏𑒰𑒩𑒮𑒿) 𑒯𑒱𑒢𑓂𑒠𑒲𑒧𑒹 𑒮𑒼𑒔𑒱 𑒪𑒱𑒐𑒻𑒞 𑒕𑒟𑒱 𑒂 𑒞𑒐𑒢 𑒁𑒢𑒳𑒫𑒰𑒠 𑒏𑒋 𑒧𑒾𑒪𑒱𑒏 𑒧𑒻𑒟𑒱𑒪𑒲 𑒪𑒱𑒐𑒻𑒞 𑒕𑒟𑒱 ! 𑒧𑒻𑒟𑒱𑒪𑒲 𑒏𑒟𑒰-𑒏𑒫𑒱𑒞𑒰 𑒏𑒩𑒻𑒞 𑒕𑒟𑒱!!
𑒧𑒩𑒰𑒚𑒲, 𑒅𑒩𑓂𑒠𑒴, 𑒞𑒧𑒱𑒪, 𑒏𑒢𑓂𑒢𑒛𑓃𑒮𑒿 𑒧𑒻𑒟𑒱𑒪𑒲 𑒁𑒢𑒳𑒫𑒰𑒠 𑒣𑒳𑒩𑒮𑓂𑒏𑒰𑒩 𑒢𑒱𑒩𑓂𑒪𑒖𑓂𑒖𑒞𑒰𑒮𑒿 𑒪𑒻𑒞 𑒕𑒟𑒱 , 𑒫𑒝𑒏𑓂𑒏𑒧 𑒏𑒹𑒩 𑒁𑒩𑓂𑒟 𑒣𑒳𑒕𑒥𑒢𑓂𑒯𑒱 𑒮𑒹 𑒢𑒯𑒱 𑒁𑒥𑒻𑒞 𑒕𑒢𑓂𑒯𑒱, 𑒁𑒪𑒱𑒤-𑒥𑒹-𑒮𑒹 𑒏𑒹𑒩 𑒖𑓂𑒘𑒰𑒢 𑒢𑒯𑒱, 𑒧𑒩𑒰𑒚𑒲𑒧𑒹 𑒏𑒼𑒢𑒼 𑒥𑒔𑓂𑒔𑒰𑒮𑒿 𑒑𑒣 𑒏𑒩𑒥𑒰𑒏 𑒮𑒰𑒧𑒩𑓂𑒟𑓂𑒨 𑒢𑒯𑒱 𑒕𑒢𑓂𑒯𑒱। 𑒂 𑒧𑒻𑒟𑒱𑒪𑒲𑒧𑒹 𑒯𑒳𑒢𑒏𑒩 𑒧𑒰𑒟 𑒤𑒳𑒙𑒥𑒰𑒮𑒿 𑒋𑒯𑒱 𑒠𑓂𑒫𑒰𑒩𑒹 𑒥𑒔𑒱 𑒖𑒰𑒃𑒞 𑒕𑒢𑓂𑒯𑒱 𑒏𑒰𑒩𑒝 𑒁𑒣𑒢𑒹 𑒕𑒣𑒥𑒰 𑒏𑒋 𑒮𑒧𑒲𑒏𑓂𑒭𑒰 𑒏𑒩𑒥𑒻𑒞 𑒕𑒟𑒱, 𑒮𑒹 𑒣𑒰𑒚𑒏 𑒞𑒿 𑒕𑒢𑓂𑒯𑒱 𑒢𑒯𑒱। 𑒣𑒰𑒚𑒏 𑒢𑒯𑒱 𑒩𑒯𑒋𑒧𑒹 𑒯𑒳𑒢𑒏𑒰 𑒪𑒼𑒏𑒢𑒱𑒏𑒹𑒿 𑒤𑒰𑒋𑒠𑒰 𑒕𑒢𑓂𑒯𑒱। 𑒂 𑒋𑒯𑒱 𑒣𑒳𑒩𑒮𑓂𑒏𑒰𑒩 𑒮𑒦𑒧𑒹 𑒖𑒴𑒩𑒲 𑒂 𑒋𑒛𑒫𑒰𑒃𑒖𑒩𑒲 𑒥𑒼𑒩𑓂𑒛 𑒁𑒣𑒢𑒰𑒏𑒹𑒿 𑒂𑒑𑒰𑒿 𑒏𑒩𑒥𑒰𑒧𑒹 𑒖𑒐𑒢 𑒮𑓂𑒫𑒨𑓀 𑒂𑒑𑒰𑒿 𑒁𑒥𑒻𑒞 𑒕𑒟𑒱 𑒞𑒐𑒢 𑒋𑒯𑒱 𑒮𑒲𑒧𑒱𑒞 𑒣𑓂𑒩𑒞𑒱𑒨𑒼𑒑𑒲 𑒪𑒼𑒏𑒢𑒱𑒏 𑒂𑒞𑓂𑒧𑒫𑒱𑒬𑓂𑒫𑒰𑒮 𑒏𑒞𑒹𑒏 𑒠𑒳𑒩𑓂𑒥𑒪 𑒕𑒢𑓂𑒯𑒱 , 𑒮𑒋𑒯 𑒮𑒼𑒗𑒰𑒿 𑒁𑒥𑒻𑒞 𑒁𑒕𑒱 । 𑒮𑒰𑒩𑓀𑒑 𑒏𑒳𑒧𑒰𑒩 𑒕𑒟𑒱, 𑒞𑒿 𑒥𑒪𑒩𑒰𑒧𑒏 𑒔𑒩𑒔𑒰 𑒤𑒹𑒩𑒮𑒿 𑒏𑒟𑒰𑒏𑒰𑒩𑒏 𑒩𑒴𑒣𑒧𑒹 𑒬𑒳𑒩𑒴 𑒦𑒹𑒪 𑒁𑒕𑒱 । 𑒂 𑒖𑒱𑒢𑒏𑒩 𑒮𑒢𑓂𑒞𑒰𑒢 𑒮𑒰𑒯𑒱𑒞𑓂𑒨𑒧𑒹 𑒢𑒯𑒱 𑒁𑒋𑒪𑒰𑒯 𑒯𑒳𑒢𑒏𑒩 𑒔𑒩𑒔𑒰 𑒤𑒹𑒩 𑒏𑒼𑒢𑒰 𑒯𑒼𑒋𑒞, 𑒯𑒳𑒢𑒏𑒩 𑒣𑒏𑓂𑒭 𑒏𑒹 𑒂𑒑𑒰𑒿 𑒩𑒰𑒐𑒞 ? 𑒖𑒲𑒥𑒻𑒞 𑒡𑒩𑒱 𑒢𑒹 𑒮𑒦 𑒁𑒣𑒢 𑒣𑒏𑓂𑒭 𑒮𑓂𑒫𑒨𑓀 𑒂𑒑𑒰𑒿 𑒩𑒰𑒐𑒱 𑒩𑒯𑒪 𑒕𑒟𑒱 ? 𑒧𑒳𑒠𑒰 𑒧𑒳𑒃𑒪𑒰𑒏 𑒥𑒰𑒠 ? 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨𑒏 𑒋𑒯𑒱 𑒮𑒞𑓂𑒨𑒏𑒹𑒿 𑒠𑒹𑒐𑒰𑒩 𑒏𑒩𑒥𑒰𑒏 𑒂𑒫𑒬𑓂𑒨𑒏𑒞𑒰 𑒁𑒕𑒱 । 𑒂𑒿𑒐𑒱 𑒧𑒳𑒢𑒱 𑒏𑒋 𑒮𑒹𑒯𑒼 𑒋𑒏𑒩 𑒮𑒧𑒰𑒡𑒰𑒢 𑒪𑒼𑒏 𑒧𑒳𑒠𑒰 𑒞𑒰𑒏𑒱𑒨𑒹 𑒩𑒯𑒪 𑒕𑒟𑒱।
𑒏𑓂𑒨𑒼 𑒔𑒱𑒞𑓂𑒩𑒑𑒳𑒣𑓂𑒞 𑒮𑒦𑒰 𑒐𑒼𑒪𑒱 𑒧𑒝𑒱𑒣𑒠𑓂𑒧𑒏𑒹𑒿 𑒥𑒹𑒔𑒱 𑒩𑒯𑒪 𑒕𑒟𑒱 𑒞𑒿 𑒏𑓂𑒨𑒼 𑒧𑒻𑒟𑒱𑒪 (𑒥𑓂𑒩𑒰𑒯𑓂𑒧𑒝) 𑒮𑒦𑒰 𑒐𑒼𑒪𑒱 𑒮𑒳𑒧𑒢𑒖𑒲𑒏 𑒫𑓂𑒨𑒰𑒣𑒰𑒩𑒧𑒹 𑒪𑒰𑒑𑒪 𑒕𑒟𑒱-𑒧𑒝𑒱𑒣𑒠𑓂𑒧 𑒂 𑒮𑒳𑒧𑒢𑒖𑒲𑒏 𑒂𑒩𑒱𑒧𑒹 𑒁𑒣𑒢 𑒡𑓀𑒡𑒰 𑒔𑒧𑒏𑒰 𑒩𑒯𑒪 𑒕𑒟𑒱 𑒂 𑒧𑒝𑒱𑒣𑒠𑓂𑒧 𑒂 𑒮𑒳𑒧𑒢𑒖𑒲𑒏𑒹𑒿 𑒁𑒣𑒧𑒰𑒢𑒱𑒞 𑒏𑒋 𑒩𑒯𑒪 𑒕𑒟𑒱। 𑒏𑒟𑒰-𑒏𑒫𑒱𑒞𑒰 𑒮𑓀𑒑𑓂𑒩𑒯 𑒮𑒦𑒏 𑒮𑒧𑓂𑒣𑒰𑒠𑒏𑒏 𑒔𑒹𑒪𑒰 𑒔𑒣𑒰𑒙𑒲 𑒧𑒻𑒟𑒱𑒪𑒲𑒏 𑒮𑒩𑓂𑒫𑒏𑒰𑒪𑒲𑒢 𑒏𑒟𑒰𑒏𑒰𑒩-𑒏𑒫𑒱𑒏 𑒮𑓀𑒏𑒪𑒢𑒧𑒹 𑒮𑓂𑒟𑒰𑒢 𑒣𑒰𑒥𑒱 𑒖𑒰𑒃𑒞 𑒕𑒟𑒱 , 𑒦𑒢𑒹 𑒯𑒳𑒢𑒏𑒩 𑒏𑒼𑒢𑒼 𑒣𑒯𑒱𑒪𑒹 𑒮𑓀𑒑𑓂𑒩𑒯 𑒂𑒋𑒪 𑒯𑒼𑒃𑒢𑓂𑒯𑒱 𑒫𑒰 𑒏𑒟𑒰-𑒏𑒫𑒱𑒞𑒰𑒏 𑒮𑓀𑒐𑓂𑒨𑒰 𑒯𑒰𑒮𑓂𑒨𑒰𑒮𑓂𑒣𑒠 𑒩𑒴𑒣𑒮𑒿 𑒏𑒧 𑒯𑒼𑒃𑒢𑓂𑒯𑒱। 𑒣𑒞𑓂𑒩𑒱𑒏𑒰 𑒮𑒦𑒏 𑒮𑒹𑒯𑒼 𑒫𑒋𑒯 𑒮𑓂𑒟𑒱𑒞𑒱 𑒁𑒕𑒱। 𑒫𑓂𑒨𑒏𑓂𑒞𑒱𑒑𑒞 𑒧𑒯𑒞𑓂𑒫𑒰𑒏𑒰𑓀𑒏𑓂𑒭𑒰𑒧𑒹 𑒏𑒙𑒰𑒅𑒗 𑒏𑒩𑒻𑒞 𑒥𑒱𑒢 𑒣𑒰𑒚𑒏𑒏 𑒄 𑒣𑒞𑓂𑒩𑒱𑒏𑒰 𑒮𑒦 𑒮𑓂𑒫𑒨𑓀 𑒧𑒩𑒱 𑒩𑒯𑒪 𑒁𑒕𑒱 𑒂 𑒧𑒻𑒟𑒱𑒪𑒲𑒏𑒹𑒿 𑒧𑒰𑒩𑒱 𑒩𑒯𑒪 𑒁𑒕𑒱। 𑒛𑓂𑒩𑒰𑒃𑓀𑒑 𑒩𑒴𑒧𑒧𑒹 𑒥𑒱𑒢𑒰 𑒤𑒲𑒪𑓂𑒛𑒫𑒩𑓂𑒏𑒏 𑒪𑒱𑒐𑒪 𑒪𑒼𑒏𑒏𑒟𑒰 𑒖𑒰𑒯𑒱 𑒦𑒰𑒭𑒰𑒧𑒹 𑒪𑒱𑒐𑒪 𑒖𑒰𑒃𑒞 𑒯𑒼𑒁𑒋, 𑒍𑒞𑒋 𑒋𑒯𑒱 𑒞𑒩𑒯𑒏 𑒯𑒰𑒮𑓂𑒨𑒰𑒮𑓂𑒣𑒠 𑒏𑒙𑒰𑒅𑒗 𑒮𑓂𑒫𑒰𑒦𑒰𑒫𑒱𑒏 𑒁𑒕𑒱। 𑒂𑒥 𑒞𑒿 𑒁𑒢𑓂𑒞𑒩𑓂𑒖𑒰𑒪𑒣𑒩 𑒮𑒹𑒯𑒼 𑒧𑒻𑒟𑒱𑒪𑒲𑒏 𑒏𑒱𑒕𑒳 𑒖𑒰𑒪𑒫𑒵𑒞𑓂𑒞𑒣𑒩 𑒖𑒰𑒞𑒱𑒑𑒞 𑒏𑒙𑒰𑒅𑒗 𑒂 𑒁𑒣𑒬𑒥𑓂𑒠𑒏 𑒣𑓂𑒩𑒨𑒼𑒑 𑒠𑒹𑒐𑒥𑒰𑒧𑒹 𑒂𑒋𑒪 𑒁𑒕𑒱।
𑒧𑒰𑒩𑓂𑒏𑓂𑒮𑒱𑒮𑓂𑒙 𑒂 𑒤𑒹𑒧𑒱𑒢𑒱𑒮𑓂𑒙 𑒥𑒢𑒱 𑒞𑒏𑒩𑒼 𑒫𑓂𑒨𑒰𑒣𑒰𑒩 𑒬𑒳𑒩𑒴 𑒏𑒩𑒥 𑒂 𑒁𑒣𑒢 𑒮𑓂𑒞𑒩𑒏 𑒢𑓂𑒨𑒴𑒢𑒞𑒰𑒏 𑒋𑒯𑒱 𑒞𑒩𑒯𑒹𑒿 𑒣𑒴𑒩𑓂𑒞𑒱 𑒏𑒩𑒥, 𑒮𑒲𑒧𑒱𑒞 𑒣𑓂𑒩𑒞𑒱𑒨𑒼𑒑𑒱𑒞𑒰 𑒧𑒡𑓂𑒨 𑒁𑒪𑓂𑒣 𑒣𑓂𑒩𑒞𑒱𑒦𑒰𑒨𑒳𑒏𑓂𑒞 𑒮𑒰𑒯𑒱𑒞𑓂𑒨𑒏𑒰𑒩𑒏 𑒄 𑒯𑒟𑒱𑒨𑒰𑒩 𑒥𑒢𑒱 𑒑𑒹𑒪 𑒁𑒕𑒱। 𑒖𑒹 𑒧𑒰𑒩𑓂𑒏𑓂𑒮𑒏 𑒂𑒠𑒩 𑒏𑒩𑒞 𑒮𑒹 𑒄 𑒏𑒱𑒋𑒏 𑒏𑒯𑒞 𑒖𑒹 𑒯𑒧 𑒧𑒰𑒩𑓂𑒏𑓂𑒮𑒫𑒰𑒠𑒲 𑒂𑒪𑒼𑒔𑒏 𑒂𑒏𑒱 𑒪𑒹𑒐𑒏 𑒕𑒲 ? 𑒯𑒿 𑒖𑒹 𑒧𑒰𑒩𑓂𑒏𑓂𑒮𑒏 𑒡𑓀𑒡𑒰 𑒏𑒩𑒞 𑒞𑒏𑒩 𑒫𑒱𑒭𑒨𑒧𑒹 𑒏𑒲 𑒏𑒯𑒲, 𑒡𑓀𑒡𑒰 𑒞𑒿 𑒮𑒳𑒧𑒢, 𑒩𑒰𑒖𑒏𑒧𑒪, 𑒨𑒰𑒞𑓂𑒩𑒲, 𑒧𑒝𑒱𑒣𑒠𑓂𑒧, 𑒡𑒴𑒧𑒏𑒹𑒞𑒳......𑒮𑒦𑒏 𑒬𑒳𑒩𑒴 𑒦𑒹𑒪 𑒁𑒕𑒱। 𑒂 𑒞𑒏𑒩 𑒏𑒰𑒩𑒝 𑒮𑒹𑒯𑒼 𑒮𑓂𑒣𑒭𑓂𑒙। 𑒩𑒰𑒭𑓂𑒙𑓂𑒩𑒲𑒨 𑒮𑒩𑓂𑒫𑒹𑒏𑓂𑒭𑒝 𑒄 𑒠𑒹𑒐𑒥𑒻𑒞 𑒁𑒕𑒱 𑒖𑒹 𑒮𑓀𑒮𑓂𑒏𑒵𑒞, 𑒯𑒱𑒢𑓂𑒠𑒲, 𑒧𑒻𑒟𑒱𑒪𑒲 𑒂 𑒂𑒢 𑒮𑒰𑒯𑒱𑒞𑓂𑒨 𑒏𑒰𑒪𑒹𑒖𑒧𑒹 𑒫𑒻𑒯 𑒣𑒜𑓃𑒻𑒞 𑒕𑒟𑒱 𑒖𑒱𑒢𑒏𑒰 𑒠𑒼𑒮𑒩 𑒫𑒱𑒭𑒨𑒧𑒹 𑒢𑒰𑒧𑒰𑓀𑒏𑒢 𑒢𑒯𑒱 𑒦𑒹𑒙𑒻𑒞 𑒕𑒢𑓂𑒯𑒱, 𑒣𑒞𑓂𑒩𑒏𑒰𑒩𑒱𑒞𑒰𑒧𑒹 𑒮𑒹𑒯𑒼 𑒨𑒻𑒯 𑒮𑒦 𑒁𑒥𑒻𑒞 𑒕𑒟𑒱। 𑒣𑓂𑒩𑒞𑒱𑒦𑒰 𑒫𑒱𑒣𑒢𑓂𑒢 𑒋𑒯𑒢𑒹 𑒮𑒰𑒯𑒱𑒞𑓂𑒨𑒮𑒹𑒫𑒲𑒏𑒹𑒿 𑒮𑒰𑒯𑒱𑒞𑓂𑒨𑒏 𑒔𑒬𑓂𑒏𑒰 𑒪𑒰𑒑𑒪 𑒕𑒢𑓂𑒯𑒱 𑒂 𑒯𑒱𑒢𑒏𑒹 𑒯𑒰𑒟𑒧𑒹 𑒧𑒻𑒟𑒱𑒪𑒲 𑒦𑒰𑒭𑒰𑒏 𑒦𑒫𑒱𑒭𑓂𑒨 𑒮𑒳𑒩𑒏𑓂𑒭𑒱𑒞 𑒩𑒯𑒞? 𑒧𑒳𑒠𑒰 𑒋𑒯𑒱 𑒫𑒰𑒮𑓂𑒞𑒫𑒱𑒏𑒞𑒰𑒏 𑒮𑓀𑒑 𑒂𑒑𑒰𑒿𑒏 𑒥𑒰𑒙 𑒯𑒧𑒩𑒰 𑒮𑒦𑒏 𑒣𑓂𑒩𑒞𑒲𑒏𑓂𑒭𑒰𑒧𑒹 𑒁𑒕𑒱। 𑒮𑒳𑒔𑓂𑒔𑒰 𑒧𑒻𑒟𑒱𑒪𑒲 𑒮𑒹𑒫𑒲 𑒏𑒟𑒰𑒏𑒰𑒩 𑒂 𑒣𑒰𑒚𑒏 𑒖𑒹 𑒡𑒴𑒩𑒰-𑒑𑒩𑒠𑒰𑒧𑒹 𑒖𑒋𑒥𑒰 𑒪𑒹𑒪 𑒞𑒻𑒨𑒰𑒩 𑒯𑒼𑒟𑒱, 𑒥𑒔𑓂𑒔𑒰 𑒂 𑒮𑓂𑒞𑓂𑒩𑒲 𑒖𑒢𑒞𑒰𑒏 𑒮𑒰𑒯𑒱𑒞𑓂𑒨 𑒩𑒔𑒟𑒱 𑒂 𑒁𑒣𑒢 𑒆𑒩𑓂𑒖𑒰 𑒧𑒻𑒟𑒱𑒪𑒲𑒏𑒹𑒿 𑒖𑒲𑒫𑒱𑒞 𑒩𑒐𑒥𑒰 𑒧𑒰𑒞𑓂𑒩𑒧𑒹 𑒪𑒑𑒰𑒥𑒟𑒱 𑒍 𑒬𑓂𑒩𑒹𑒝𑒲 𑒞𑒻𑒨𑒰𑒩 𑒯𑒼𑒋𑒥𑒹 𑒙𑒰 𑒏𑒩𑒞।

𑒧𑒻𑒟𑒱𑒪𑒲𑒏 𑒢𑒰𑒧𑒣𑒩 𑒏𑒼𑒢𑒼 𑒏𑒧𑓂𑒣𑓂𑒩𑒼𑒧𑒰𑒃𑒖 𑒢𑒯𑒱। 𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒖𑒲𑒏 𑒄 𑒮𑓀𑒑𑓂𑒩𑒯 𑒡𑒰𑒩𑒰𑒫𑒯𑒱𑒏 𑒩𑒴𑒣𑒧𑒹 “𑒫𑒱𑒠𑒹𑒯” 𑒄-𑒣𑒞𑓂𑒩𑒱𑒏𑒰𑒧𑒹 (http://www.videha.co.in) 𑒁𑒢𑓂𑒞𑒩𑓂𑒖𑒰𑒪𑒣𑒩 𑒄-𑒣𑓂𑒩𑒏𑒰𑒬𑒱𑒞 𑒦𑒋 𑒯𑒖𑒰𑒩𑒏-𑒯𑒖𑒰𑒩 𑒣𑒰𑒚𑒏𑒏 𑒮𑓂𑒢𑒹𑒯 𑒣𑒍𑒪𑒏, 𑒂𑒢𑒪𑒰𑒃𑒢 𑒏𑒰𑒧𑒹𑒢𑓂𑒙 𑒋𑒯𑒱 𑒏𑒟𑒰 𑒮𑒦𑒏𑒹𑒿 𑒦𑒹𑒙𑒪𑒻𑒏 𑒖𑒰𑒯𑒱𑒧𑒹 𑒥𑒹𑒬𑒲 𑒣𑒰𑒚𑒏 𑒑𑒻𑒩 𑒧𑒻𑒟𑒱𑒪 𑒥𑓂𑒩𑒰𑒯𑓂𑒧𑒝 𑒂 𑒏𑒩𑓂𑒝 𑒏𑒰𑒨𑒮𑓂𑒟 𑒩𑒯𑒟𑒱, 𑒮𑒹 𑒯𑒧 𑒯𑒳𑒢𑒏𑒩 𑒮𑒦𑒏 𑒅𑒣𑒢𑒰𑒧 𑒠𑒹𑒐𑒱 𑒁𑒢𑓂𑒠𑒰𑒖 𑒪𑒑𑒰𑒍𑒪। 𑒋𑒞𑒋 𑒄𑒯𑒼 𑒑𑒣 𑒮𑒼𑒗𑒰𑒿 𑒂𑒋𑒪 𑒖𑒹 𑒬𑒱𑒏𑓂𑒭𑒰𑒏 𑒁𑒦𑒰𑒫𑒏 𑒏𑒰𑒩𑒝 𑒮𑒹𑒯𑒼, 𑒦𑒰𑒭𑒰𑒏 𑒅𑒔𑓂𑒔𑒰𑒩𑒝 𑒂 𑒫𑒰𑒔𑒢 𑒧𑒹 𑒁𑓀𑒞𑒩 𑒁𑒥𑒻-𑒋। 𑒞𑒏𑒩 𑒄 𑒧𑒞𑒪𑒥 𑒢𑒻 𑒖𑒹 𑒥𑒪𑒔𑒢𑒧𑒰𑒏 𑒦𑒰𑒭𑒰 𑒋𑒐𑒢𑒼 𑒨𑒰𑒠𑒫 𑒖𑒲 𑒥𑒖𑒻𑒞 𑒕𑒟𑒱, 𑒂𑒥 𑒖𑒹 𑒍 𑒦𑒰𑒭𑒰 𑒏𑒟𑒰𑒏 𑒨𑒰𑒠𑒫 𑒣𑒰𑒞𑓂𑒩 𑒪𑒹𑒪 𑒣𑓂𑒩𑒨𑒼𑒑 𑒏𑒩𑒥 𑒞𑒿 𑒬𑒰𑓀𑒏𑒳𑒢𑓂𑒞𑒪𑒧𑓂 𑒏𑒹𑒩 𑒮𑓀𑒮𑓂𑒏𑒵𑒞 𑒢𑒰𑒙𑒏𑒏 𑒥𑒲𑒔 𑒖𑒢𑒮𑒰𑒧𑒰𑒢𑓂𑒨𑒏 𑒪𑒹𑒪 𑒣𑓂𑒩𑒨𑒳𑒏𑓂𑒞 𑒣𑓂𑒩𑒰𑒏𑒵𑒞 𑒖𑒹𑒏𑒰𑒿 𑒪𑒰𑒑𑒞, 𑒂 𑒍𑒯𑒱 𑒫𑒩𑓂𑒑𑒏 𑒪𑒼𑒏𑒏𑒹𑒿 𑒁𑒣𑒧𑒰𑒢𑒖𑒢𑒏 𑒮𑒹𑒯𑒼 𑒪𑒑𑒞𑒢𑓂𑒯𑒱। 𑒦𑒰𑒭𑒰 𑒔𑒪𑒰𑒨𑒧𑒰𑒢 𑒯𑒼𑒃𑒞 𑒁𑒕𑒱 𑒂 𑒪𑒹𑒐𑒢 𑒣𑒩𑒧𑓂𑒣𑒩𑒰 𑒍𑒏𑒩 𑒧𑒡𑓂𑒨 𑒮𑓂𑒟𑒱𑒩𑒞𑒰 𑒁𑒢𑒻𑒞 𑒁𑒕𑒱। 𑒮𑒹 𑒮𑒳𑒦𑒰𑒭𑒖𑒲𑒏 𑒦𑒰𑒭𑒰𑒧𑒹 𑒮𑒹𑒯𑒼 𑒄 𑒁𑒢𑓂𑒞𑒩 𑒮𑓂𑒣𑒭𑓂𑒙 𑒠𑒹𑒐𑒥𑒰𑒧𑒹 𑒁𑒥𑒻𑒞 𑒁𑒕𑒱, 𑒯𑒳𑒢𑒏𑒩 𑒏𑒟𑒰𑒏 𑒦𑒰𑒭𑒰 𑒂 𑒢𑒱𑒥𑒢𑓂𑒡𑒰𑒠𑒱𑒏 𑒦𑒰𑒭𑒰 𑒧𑒡𑓂𑒨।

𑒧𑒻𑒟𑒱𑒪 𑒥𑓂𑒩𑒰𑒯𑓂𑒧𑒝 𑒂 𑒏𑒩𑓂𑒝 𑒏𑒰𑒨𑒮𑓂𑒟 𑒞𑒿 𑒣𑒰𑒚𑒏 𑒥𑒢𑒱 𑒩𑒯𑒱𑒨𑒹 𑒢𑒯𑒱 𑒮𑒏𑒻𑒞 𑒕𑒟𑒱, 𑒬𑒲𑒒𑓂𑒩 𑒨𑒰𑒞𑓂𑒩𑒲𑒏 𑒥𑒰𑒠𑒏 𑒋𑒏𑒧𑒰𑒞𑓂𑒩 𑒖𑒢 𑒅𑒣𑒢𑓂𑒨𑒰𑒮𑒏𑒰𑒩 𑒂 𑒏𑒳𑒪𑒰𑒢𑒢𑓂𑒠 𑒧𑒱𑒬𑓂𑒩𑒏 𑒥𑒰𑒠𑒏 𑒋𑒏𑒧𑒰𑒞𑓂𑒩 𑒮𑒯𑒲 𑒁𑒩𑓂𑒟𑒧𑒹 𑒏𑒫𑒱𑒏 𑒅𑒣𑒰𑒡𑒱 𑒪𑒹𑒪 𑒪𑒰𑒪𑒰𑒨𑒱𑒞 𑒦𑒋 𑒖𑒰𑒃𑒞 𑒕𑒟𑒱। 𑒁𑒣𑒢𑒰𑒏𑒹𑒿 𑒒𑒼𑒛𑓃𑒰 𑒂 𑒥𑒰𑒒 𑒂 𑒠𑒼𑒮𑒩𑒏𑒹𑒿 𑒑𑒡𑒰 𑒂 𑒥𑒏𑒩𑒲 𑒏𑒯𑒥𑒰 𑒏𑒰𑒪 𑒍 𑒧𑒴𑒪 𑒠𑒱𑒬𑒰 𑒂 𑒮𑒧𑒮𑓂𑒨𑒰𑒮𑒿 𑒁𑒣𑒢𑒰𑒏𑒹𑒿 𑒤𑒩𑒰𑒏 𑒏𑒩𑒻𑒞 𑒕𑒟𑒱। 𑒁𑒣𑒢 𑒏𑒟𑒰-𑒏𑒫𑒱𑒞𑒰𑒣𑒩 𑒁𑒣𑒢𑒹 𑒮𑒧𑒲𑒏𑓂𑒭𑒰 𑒏𑒋 𑒂𑒞𑓂𑒧𑒧𑒳𑒑𑓂𑒡𑒞𑒰𑒏 𑒄 𑒮𑓂𑒟𑒱𑒞𑒱 𑒮𑒧𑒲𑒏𑓂𑒭𑒰𑒏 𑒠𑒳𑒩𑓂𑒥𑒪𑒞𑒰𑒮𑒿 𑒂𑒋𑒪 𑒁𑒕𑒱। 𑒋𑒯𑒱 𑒋𑒏𑒧𑒰𑒞𑓂𑒩 𑒬𑒥𑓂𑒠𑒮𑒿 𑒯𑒧𑒩𑒰 𑒫𑒱𑒞𑒵𑒭𑓂𑒝𑒰 𑒁𑒕𑒱 𑒂 𑒞𑒏𑒩 𑒢𑒱𑒠𑒰𑒢 𑒯𑒧 𑒧𑒻𑒟𑒱𑒪𑒲𑒏𑒹𑒿 𑒠𑒹𑒪 𑒮𑓂𑒪𑒼-𑒣𑒼𑒃𑒖𑒢𑒱𑓀𑒑𑒏 𑒫𑒱𑒩𑒳𑒠𑓂𑒡 “𑒫𑒱𑒠𑒹𑒯” 𑒄-𑒣𑒞𑓂𑒩𑒱𑒏𑒰𑒏 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨 𑒂𑒢𑓂𑒠𑒼𑒪𑒢𑒧𑒹 𑒠𑒹𑒐𑒻𑒞 𑒕𑒲। 𑒋𑒞𑒋 𑒮𑒰𑒪 𑒦𑒩𑒱𑒧𑒹 𑒮𑒋𑒮𑒿 𑒥𑒹𑒬𑒲 𑒪𑒹𑒐𑒏 𑒖𑒳𑒛𑓃𑒪𑒰𑒯 𑒞𑒿 𑒣𑒰𑒚𑒏𑒏 𑒮𑓀𑒐𑓂𑒨𑒰 𑒪𑒰𑒐 𑒙𑒣𑒱 𑒑𑒹𑒪। 𑒥𑒔𑓂𑒔𑒰 𑒂 𑒧𑒯𑒱𑒪𑒰𑒏 𑒮𑓀𑒑 𑒖𑒰𑒯𑒱 𑒞𑒩𑒯𑒹𑒿 𑒑𑒻𑒩 𑒧𑒻𑒟𑒱𑒪 𑒥𑓂𑒩𑒰𑒯𑓂𑒧𑒝-𑒏𑒩𑓂𑒝 𑒏𑒰𑒨𑒮𑓂𑒟 𑒣𑒰𑒚𑒏 𑒂 𑒪𑒹𑒐𑒏 𑒖𑒳𑒙𑒪𑒰𑒯 𑒮𑒹 𑒁𑒠𑓂𑒦𑒳𑒞 𑒕𑒪। 𑒯𑒧𑒩 𑒋𑒯𑒱 𑒑𑒣𑒣𑒩 𑒠𑒹𑒪 𑒖𑒼𑒩𑒏𑒹𑒿 𑒏𑒱𑒕𑒳 𑒑𑒼𑒙𑒹 (𑒧𑒻𑒟𑒱𑒪𑒲) 𑒮𑒰𑒯𑒱𑒞𑓂𑒨𑒏𑒹𑒿 𑒐𑒝𑓂𑒛𑒱𑒞 𑒏𑒩𑒥𑒰𑒏 𑒣𑓂𑒩𑒨𑒰𑒮 𑒏𑒯𑒞𑒰𑒯 𑒧𑒳𑒠𑒰 𑒯𑒧𑒩 𑒣𑓂𑒩𑒰𑒟𑒧𑒱𑒏𑒞𑒰 𑒧𑒻𑒟𑒱𑒪𑒲 𑒁𑒕𑒱, 𑒧𑒻𑒟𑒱𑒪𑒲 𑒮𑒰𑒯𑒱𑒞𑓂𑒨 𑒂𑒢𑓂𑒠𑒼𑒪𑒢 𑒁𑒕𑒱, 𑒄 𑒦𑒰𑒭𑒰 𑒖𑒹 𑒧𑒩𑒱 𑒖𑒋𑒞 𑒞𑒐𑒢 𑒍𑒏𑒩 𑒛𑓂𑒩𑒰𑒃𑓀𑒑 𑒩𑒴𑒧𑒧𑒹 𑒥𑒻𑒮𑒪 𑒠𑒳𑒩𑓂𑒒𑒩𑓂𑒭 𑒮𑒧𑓂𑒣𑒰𑒠𑒏-𑒏𑒫𑒱-𑒏𑒟𑒰𑒏𑒰𑒩-𑒧𑒱𑒟𑒱𑒪𑒰 𑒩𑒰𑒖𑓂𑒨 𑒂𑒢𑓂𑒠𑒼𑒪𑒏𑒩𑓂𑒞𑒰 𑒂 𑒮𑒧𑒰𑒪𑒼𑒔𑒏𑒏 𑒏𑒲 𑒯𑒼𑒋𑒞𑒢𑓂𑒯𑒱। 𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒖𑒲𑒏 𑒏𑒟𑒰𑒏 𑒣𑒳𑒢𑓁 𑒣𑒰𑒚 𑒂 𑒦𑒰𑒭𑒰𑒏 𑒣𑒳𑒢𑓁 𑒣𑒰𑒚 𑒋𑒯𑒱 𑒩𑒴𑒣𑒧𑒹 𑒯𑒧𑒩𑒰 𑒂𑒩 𑒂𑒏𑒩𑓂𑒭𑒱𑒞 𑒏𑒩𑒻𑒞 𑒁𑒕𑒱। 𑒂 𑒋𑒞𑒋 𑒄𑒯𑒼 𑒮𑒢𑓂𑒠𑒩𑓂𑒦𑒧𑒹 𑒮𑒧𑓂𑒧𑒱𑒪𑒱𑒞 𑒁𑒕𑒱 𑒖𑒹 𑒮𑒳𑒦𑒰𑒭𑒔𑒢𑓂𑒠𑓂𑒩 𑒨𑒰𑒠𑒫𑒖𑒲𑒏 𑒄 𑒮𑓀𑒑𑓂𑒩𑒯 𑒡𑒰𑒩𑒰𑒫𑒯𑒱𑒏 𑒩𑒴𑒣𑒧𑒹 𑒁𑒢𑓂𑒞𑒩𑓂𑒖𑒰𑒪𑒣𑒩 𑒄-𑒣𑓂𑒩𑒏𑒰𑒬𑒱𑒞 𑒦𑒋 𑒣𑓂𑒩𑒱𑓀𑒙 𑒤𑒰𑒩𑓂𑒧𑒧𑒹 𑒂𑒥𑒱 𑒩𑒯𑒪 𑒁𑒕𑒱, 𑒏𑒟𑒰𑒏 𑒣𑒳𑒢𑓁 𑒣𑒰𑒚 𑒂 𑒦𑒰𑒭𑒰𑒏 𑒣𑒳𑒢𑓁 𑒣𑒰𑒚 𑒪𑒋। 𑒂 𑒄 𑒒𑒙𑒢𑒰 𑒮𑒦 𑒠𑒱𑒢 𑒂 𑒮𑒦 𑒣𑓃𑒏𑓂𑒭𑒧𑒹 𑒧𑒻𑒟𑒱𑒪𑒲𑒏𑒹𑒿 𑒮𑒥𑒪 𑒏𑒩𑒞 𑒮𑒹 𑒂𑒬𑒰 𑒁𑒕𑒱।

𑒦𑒰𑒭𑒰 𑒂 𑒣𑓂𑒩𑒾𑒠𑓂𑒨𑒼𑒑𑒱𑒏𑒲 (𑒮𑓀𑒑𑒝𑒏, 𑒕𑒰𑒨𑒰𑓀𑒏𑒢, 𑒏𑒳𑒿𑒖𑒲 𑒣𑒙𑒪/𑒙𑓀𑒏𑒝𑒏 𑒞𑒏𑒢𑒲𑒏), 𑒁𑒢𑓂𑒞𑒩𑓂𑒖𑒰𑒪𑒣𑒩 𑒧𑒻𑒟𑒱𑒪𑒲 𑒂 𑒫𑒱𑒬𑓂𑒫𑒫𑓂𑒨𑒰𑒣𑒲 𑒁𑒢𑓂𑒞𑒩𑓂𑒖𑒰𑒪𑒣𑒩 𑒪𑒹𑒐𑒢 𑒂 𑒄-𑒣𑓂𑒩𑒏𑒰𑒬𑒢
𑒑𑒴𑒑𑒪 𑒂 𑒫𑒩𑓂𑒛𑒣𑓂𑒩𑒹𑒮 𑒠𑓂𑒫𑒰𑒩𑒰 𑒖𑒰𑒪𑒫𑒵𑒞𑓂𑒞 𑒐𑒼𑒪𑒥𑒰𑒏 𑒪𑒹𑒪 𑒥𑒯𑒳𑒞 𑒩𑒰𑒮 𑒥𑒢𑒪 𑒥𑒢𑒰𑒋𑒪 𑒣𑒩𑒱𑒏𑒪𑓂𑒣𑒱𑒞 𑒢𑒧𑒴𑒢𑒰 𑒮𑓂𑒟𑒪 𑒢𑒱𑒩𑓂𑒧𑒰𑒝 𑒪𑒹𑒪 𑒅𑒣𑒪𑒥𑓂𑒡 𑒁𑒕𑒱 𑒂 𑒍𑒞𑒋 𑒪𑒹𑒐𑒢, 𑒮𑓀𑒠𑒹𑒬 𑒂 𑒙𑒱𑒣𑓂𑒣𑒝𑒲𑒏 𑒪𑒹𑒪 𑒁𑒮𑒲𑒧𑒱𑒞 𑒠𑒞𑓂𑒞𑒰𑓀𑒬𑒢𑒱𑒡𑒱 𑒅𑒣𑒪𑒥𑓂𑒡 𑒁𑒕𑒱, 𑒖𑒞𑒋 𑒖𑒰𑒪𑒼𑒠𑓂𑒫𑒯𑒢 𑒧𑒿𑒑𑒢𑒲𑒧𑒹 𑒠𑒹𑒪 𑒖𑒰 𑒩𑒯𑒪 𑒁𑒕𑒱। 𑒄 𑒮𑒦 𑒖𑒰𑒪𑒫𑒵𑒞𑓂𑒞 𑒢𑒱𑒩𑓂𑒧𑒰𑒝 𑒮𑓂𑒟𑒪 𑒅𑒣𑒦𑒼𑒏𑓂𑒞𑒰 𑒏𑒹𑒢𑓂𑒠𑓂𑒩𑒱𑒞 𑒁𑒕𑒱 𑒂 𑒋𑒞𑒋 𑒮𑒩𑒪 𑒪𑒹𑒐𑒢-𑒣𑒠𑓂𑒡𑒞𑒱𑒏 𑒫𑓂𑒨𑒫𑒮𑓂𑒟𑒰 𑒮𑒹𑒯𑒼 𑒏𑒋𑒪 𑒑𑒹𑒪 𑒁𑒕𑒱 । 𑒧𑒳𑒠𑒰 𑒖𑒹 𑒁𑒯𑒰𑒿 𑒮𑓀𑒫𑒱𑒯𑒱𑒞 𑒣𑒵𑒔𑓂𑒕𑒢 𑒦𑒰𑒭𑒰 (𑒋𑒮.𑒏𑓂𑒨𑒴.𑒋𑒪.) 𑒂𑒡𑒰𑒩𑒱𑒞 𑒖𑒰𑒪𑒮𑓂𑒟𑒪𑒏 𑒢𑒱𑒩𑓂𑒧𑒰𑒝 𑒂 𑒣𑓂𑒩𑒥𑒢𑓂𑒡𑒢 𑒏𑒩𑒋 𑒔𑒰𑒯𑒻𑒞 𑒕𑒲 𑒞𑒿 𑒍𑒯𑒱 𑒪𑒹𑒪 𑒄 𑒢𑒱𑒥𑒢𑓂𑒡 𑒁𑒯𑒰𑒿𑒏 𑒪𑒹𑒪 𑒅𑒣𑒨𑒼𑒑𑒲 𑒩𑒯𑒞। 𑒣𑒯𑒱𑒢𑒹 𑒧𑒱𑒟𑒱𑒪𑒰𑒏𑓂𑒭𑒩 𑒂 𑒠𑒹𑒫𑒢𑒰𑒑𑒩𑒲𑒏 𑒨𑒴𑒢𑒲𑒏𑒼𑒛𑒧𑒹 𑒪𑒱𑒐𑒪 𑒖𑒋𑒥𑒰𑒏 𑒣𑓂𑒩𑒏𑓂𑒩𑒧 𑒠𑒋 𑒩𑒯𑒪 𑒕𑒲 𑒂 𑒮𑒹 𑒁𑒢𑓂𑒞𑒩𑓂𑒖𑒰𑒪𑒣𑒩 𑒣𑒜𑓃𑒪 𑒖𑒰 𑒮𑒏𑒥𑒰 𑒨𑒼𑒑𑓂𑒨 𑒏𑒼𑒢𑒰 𑒯𑒼𑒋𑒞 𑒞𑒏𑒩𑒼 𑒔𑒩𑒔𑒰 𑒯𑒼𑒋𑒞। 𑒞𑒏𑒩 𑒥𑒰𑒠 𑒖𑒰𑒪𑒮𑓂𑒟𑒪 𑒢𑒱𑒩𑓂𑒧𑒰𑒝 𑒣𑒠𑓂𑒡𑒞𑒱𑒣𑒩 𑒫𑒱𑒮𑓂𑒞𑒵𑒞 𑒔𑒩𑒔𑒰 𑒯𑒼𑒋𑒞।
𑒠𑒹𑒫𑒢𑒰𑒑𑒩𑒲 𑒪𑒱𑒣𑒱𑒏𑒹𑒿 𑒩𑒼𑒧𑒢 𑒙𑒰𑒃𑒣𑒩𑒰𑒃𑒙𑒩𑒣𑒩 𑒏𑒼𑒢 𑒙𑒰𑒃𑒣 𑒏𑒩𑒲-
𑒣𑒯𑒱𑒢𑒹 www.bhashaindia.com 𑒣𑒩 𑒖𑒰 𑒏𑒋 𑒯𑒱𑒢𑓂𑒠𑒲 IME V.𑓕 𑒁𑒫𑒰𑒩𑒼𑒣𑒱𑒞 (𑒛𑒰𑒅𑒢𑒪𑒼𑒛) 𑒏𑒩𑒴 । 𑒋𑒯𑒱 𑒫𑒱𑒡𑒱 (𑒣𑓂𑒩𑒼𑒑𑓂𑒩𑒰𑒧) 𑒏𑒹𑒿 𑒁𑒣𑒢𑒰 𑒮𑓀𑒑𑒝𑒏 (𑒏𑓀𑒣𑓂𑒨𑒳𑒙𑒩) 𑒣𑒩 𑒣𑓂𑒩𑒞𑒱𑒭𑓂𑒚𑒰𑒣𑒱𑒞 (𑒃𑓀𑒮𑓂𑒙𑒰𑒪) 𑒏𑒩𑒴 । 𑒤𑒹𑒩 𑒢𑒱𑒨𑒢𑓂𑒞𑓂𑒩𑒝 𑒣𑒙𑒪 (𑒏𑓀𑒙𑓂𑒩𑒼𑒪 𑒣𑒻𑒢𑒪) 𑒧𑒹 𑒏𑓂𑒭𑒹𑒞𑓂𑒩𑒲𑒨 𑒂 𑒦𑒰𑒭𑒰 (𑒩𑒹𑒖𑒢𑒪 𑒂 𑒪𑓀𑒑𑓂𑒫𑒹𑒖) 𑒣𑒩 𑒖𑒰 𑒏𑒋 𑒪𑓀𑒑𑓂𑒫𑒹𑒖 𑒣𑓂𑒪𑒰𑒫𑒏 (𑒙𑒻𑒥) 𑒏𑒹𑒿 𑒠𑒥𑒰𑒆 । 𑒠𑒹𑒐𑒴 𑒖𑒹 𑒏𑒰𑒧𑓂𑒣𑓂𑒪𑒹𑒏𑓂𑒮 𑒮𑓂𑒏𑓂𑒩𑒱𑒣𑓂𑒙/ 𑒩𑒰𑒃𑒙 𑒙𑒴 𑒪𑒹𑒤𑓂𑒙 𑒪𑒻𑓀𑒑𑒳𑒋𑒖 𑒣𑒩 𑒮𑒯𑒲 𑒏𑒹𑒩 𑒢𑒱𑒬𑒰𑒢 𑒪𑒰𑒑𑒪 𑒕𑒻 𑒂𑒏𑒱 𑒢𑒯𑒱 । 𑒢𑒯𑒱 𑒕𑒻 𑒞𑒿 𑒏𑒩𑒴 𑒂 𑒮𑓀𑒑𑒝𑒏 ( 𑒏𑓀𑒣𑓂𑒨𑒳𑒙𑒩) 𑒞𑒰𑒯𑒱 𑒪𑒹𑒪 𑒖𑒹 𑒖𑒹 𑒏𑒯𑒻𑒞 𑒁𑒕𑒱 𑒮𑒹 𑒏𑒩𑒴 । 𑒋𑒏𑒩𑒰 𑒥𑒰𑒠 𑒪𑓀𑒑𑓂𑒫𑒹𑒖 𑒣𑓂𑒪𑒰𑒫𑒏 (𑒙𑒻𑒥𑒏𑒹𑒿) 𑒂 𑒛𑒱𑒙𑒹𑒪𑓂𑒮 𑒏𑒹𑒿 𑒠𑒥𑒰𑒆 । 𑒤𑒹𑒩 𑒍𑒞𑒋 𑒌𑒛 𑒏𑓂𑒪𑒱𑒏 𑒏𑒩𑒴 𑒂 𑒍𑒞𑒋 𑒪𑓀𑒑𑓂𑒫𑒹𑒖 𑒧𑒹 𑒯𑒱𑒢𑓂𑒠𑒲 𑒂 𑒏𑒲𑒥𑒼𑒩𑓂𑒛 𑒧𑒹 HINDI INDIC IME 𑓑 [V.𑓕.𑓑] 𑒮𑒹𑒪𑒹𑒏𑓂𑒙 𑒏𑒋 𑒁𑒣𑓂𑒪𑒰𑒃 𑒠𑒥𑒰𑒆 । 𑒏𑓀𑒣𑓂𑒨𑒳𑒙𑒩𑒏𑒹𑒿 𑒩𑒲𑒮𑓂𑒙𑒰𑒩𑓂𑒙 𑒏𑒩𑒴 । 𑒂𑒥 𑒫𑒩𑓂𑒛 𑒛𑒼𑒏𑓂𑒨𑒳𑒧𑒹𑓀𑒙 𑒐𑒼𑒪𑒴 । 𑒫𑒰𑒧 Alt+Shift 𑒏𑒹𑒿 𑒮𑒧𑓂𑒧𑒱𑒪𑒱𑒞 𑒠𑒥𑒹𑒪𑒰 𑒅𑒞𑓂𑒞𑒩 H 𑒏𑒳𑒿𑒖𑒲𑒣𑒙𑒪 (𑒏𑒲𑒥𑒼𑒩𑓂𑒛) 𑒂𑒍𑒞 𑒢𑒯𑒱 𑒞𑒿 𑒢𑒲𑒔𑒰𑒿 𑒪𑓀𑒑𑓂𑒫𑒹𑒖𑒏𑓃𑒹𑒿 𑒏𑓂𑒪𑒱𑒏 𑒏𑒩𑒴 𑒂 𑒯𑒱𑒢𑓂𑒠𑒲 𑒔𑒳𑒢𑒱 𑒪𑒱𑒁 । 𑒏𑒳𑒿𑒖𑒲𑒣𑒙𑒪𑒧𑒹 𑒯𑒱𑒢𑓂𑒠𑒲 transliteration 𑒂 𑒂𑒢 𑒞𑒩𑒯𑒏 𑒫𑒱𑒏𑒪𑓂𑒣 𑒖𑒹𑒢𑒰 𑒩𑒹𑒧𑒱𑓀𑒑𑒙𑒢/ 𑒃𑒢𑓂𑒮𑒏𑓂𑒩𑒱𑒣𑓂𑒙 𑒏𑒳𑒿𑒖𑒲𑒣𑒙𑒪 𑒂𑒠𑒱 𑒮𑒹𑒯𑒼 𑒅𑒣𑒪𑒥𑓂𑒡 𑒁𑒕𑒱 । 𑒔𑒳𑒢𑒱 𑒏𑒋 𑒙𑒰𑒃𑒣 𑒬𑒳𑒩𑒴 𑒏𑒩𑒴 ।
𑒂𑒥 transliteration 𑒏𑒳𑒿𑒖𑒲𑒣𑒙𑒪𑒣𑒩 𑒩𑒰𑒧 𑒙𑒰𑒃𑒣 𑒏𑒩𑒥𑒰 𑒪𑒋 raama 𑒙𑒰𑒃𑒣 𑒏𑒩𑒋 𑒣𑒛𑓃𑒞 । 𑒏𑓂 (𑒯𑒪𑒢𑓂𑒞 𑒮𑒯𑒱𑒞) 𑒙𑒰𑒃𑒣 𑒏𑒩𑒥𑒰𑒏 𑒯𑒹𑒞𑒳 k 𑒠𑒥𑒰𑒆 𑒂 𑒧𑒰𑒅𑒮𑒏 𑒪𑒹𑒤𑓂𑒙 𑒥𑒙𑒢 𑒏𑓂𑒪𑒱𑒏 𑒏𑒩𑒴 𑒁𑒢𑓂𑒨𑒟𑒰 𑒮𑓂𑒣𑒹𑒮 𑒣𑒱𑒘𑓂𑒖𑒏 𑒂𑒏𑒱 𑒋𑓀𑒙𑒩 𑒣𑒱𑒘𑓂𑒖𑒏 𑒠𑒥𑒹𑒪𑒰 𑒣𑒩 𑒯𑒪𑓀𑒞 𑒅𑒛𑓃𑒱 𑒖𑒋𑒞 ।

𑒫𑒱𑒏𑒲𑒣𑒲𑒛𑒱𑒨𑒰 𑒣𑒩 𑒧𑒻𑒟𑒱𑒪𑒲 𑒣𑒩 𑒪𑒹𑒐 𑒞𑒿 𑒕𑒪 𑒧𑒳𑒠𑒰 𑒧𑒻𑒟𑒱𑒪𑒲𑒧𑒹 𑒪𑒹𑒐 𑒢𑒯𑒱 𑒕𑒪, 𑒏𑒰𑒩𑒝 𑒧𑒻𑒟𑒱𑒪𑒲𑒏 𑒫𑒱𑒏𑒲𑒣𑒲𑒛𑒱𑒨𑒰𑒏 𑒮𑓂𑒫𑒲𑒏𑒵𑒞𑒱 𑒢𑒯𑒱 𑒦𑒹𑒙𑒪 𑒕𑒪 । 𑒯𑒧 𑒥𑒯𑒳𑒞 𑒠𑒱𑒢𑒮𑒿 𑒋𑒯𑒱𑒧𑒹 𑒪𑒰𑒑𑒪 𑒩𑒯𑒲 𑒂 𑓒𑓗.𑓑𑓐.𑓒𑓐𑓐𑓘 𑒏𑒹𑒿 𑒧𑒻𑒟𑒱𑒪𑒲 𑒦𑒰𑒭𑒰𑒧𑒹 𑒫𑒱𑒏𑒲 𑒬𑒳𑒩𑒴 𑒏𑒩𑒥𑒰𑒏 𑒯𑒹𑒞𑒳 𑒮𑓂𑒫𑒲𑒏𑒵𑒞𑒱 𑒦𑒹𑒙𑒪 𑒕𑒻 । 𑒋𑒞𑒋 𑒮𑓀𑒑𑒝𑒏 𑒬𑒥𑓂𑒠 𑒮𑒦𑒏 𑒮𑓂𑒟𑒰𑒢𑒲𑒨𑒏𑒩𑒝𑒧𑒹 𑒥𑒯𑒳𑒞 𑒩𑒰𑒮 𑒁𑓀𑒑𑓂𑒩𑒹𑒖𑒲 𑒬𑒥𑓂𑒠𑒏 𑒁𑒢𑒳𑒫𑒰𑒠 𑒯𑒧 𑒏𑒋𑒢𑒹 𑒩𑒯𑒲 𑒂 𑒞𑒰𑒯𑒱𑒮𑒿 𑒋𑒯𑒱 𑒏𑒰𑒩𑓂𑒨𑒧𑒹 𑒩𑒳𑒔𑒱 𑒥𑒜𑓃𑒪 𑒂 𑒧𑒠𑒞𑒱 𑒮𑒹𑒯𑒼 𑒦𑒹𑒙𑒪 ।
𑒠𑒹𑒫𑒢𑒰𑒑𑒩𑒲𑒧𑒹 𑒙𑒰𑒃𑒣 𑒏𑒩𑒥𑒰𑒏 𑒯𑒹𑒞𑒳 𑒋𑒏𑒙𑒰 𑒂𑒩 𑒞𑒢𑓂𑒞𑓂𑒩𑒰𑓀𑒬 𑒮𑒰𑒡𑒢 (𑒮𑒰𑒤𑓂𑒙𑒫𑒹𑒁𑒩 𑒙𑒴𑒪) 𑒅𑒣𑒪𑒥𑓂𑒡 𑒁𑒕𑒱 𑒖𑒹 http://www.baraha.com/BarahaIME.htm 𑒪𑒱𑓀𑒏 𑒣𑒩 𑒅𑒣𑒪𑒥𑓂𑒡 𑒁𑒕𑒱 । 𑒋𑒏𑒩 𑒫𑒱𑒬𑒹𑒭𑒞𑒰 𑒁𑒕𑒱 𑒋𑒏𑒩 𑒮𑓀𑒮𑓂𑒏𑒵𑒞 𑒏𑒳𑒘𑓂𑒖𑒲 𑒤𑒪𑒏, 𑒖𑒹 𑒂𑒢 𑒏𑒼𑒢𑒼 𑒞𑒢𑓂𑒞𑓂𑒩𑒰𑓀𑒬𑒧𑒹 𑒅𑒣𑒪𑒥𑓂𑒡 𑒢𑒯𑒱 𑒁𑒕𑒱 । 𑒋𑒯𑒱𑒧𑒹 𑒅𑒠𑒰𑒞𑓂𑒞, 𑒁𑒢𑒳𑒠𑒰𑒞𑓂𑒞, 𑒮𑓂𑒫𑒩𑒱𑒞 𑒂 𑒏𑒱𑒕𑒳 𑒂𑒢 𑒮𑓀𑒮𑓂𑒏𑒵𑒞 𑒁𑒏𑓂𑒭𑒩 𑒅𑒣𑒪𑒥𑓂𑒡 𑒁𑒕𑒱 𑒧𑒳𑒠𑒰 𑒋𑒞𑒯𑒳 𑒮𑓂𑒫𑒰𑒮𑓂𑒞𑒱𑒏, 𑒑𑓂𑒫𑒰𑒓, 𑒁𑒘𑓂𑒖𑒲 𑒃𑒞𑓂𑒨𑒰𑒠𑒱 𑒅𑒣𑒪𑒥𑓂𑒡 𑒢𑒯𑒱 𑒁𑒕𑒱 । 𑒮↑, 𑒮↓, 𑒮॓, 𑒮𑓄 𑒏𑒹𑒿 𑒮 𑒪𑒱𑒐𑒪𑒰𑒏 𑒥𑒰𑒠 𑒮𑒱𑒤𑓂𑒙 𑓓,𑓒,𑓔 𑒂 𑓗 𑒠𑒥𑒹𑒪𑒰𑒮𑒿 𑒪𑒱𑒐𑒱 𑒮𑒏𑒻𑒞 𑒕𑒲 ।
𑒞𑒱𑒩𑒯𑒳𑒞𑒰 𑒪𑒱𑒣𑒱 𑒪𑒱𑒐𑒥𑒰𑒏 𑒯𑒹𑒞𑒳 𑒋𑒯𑒱 𑒪𑒱𑓀𑒏 𑒣𑒩 𑒖𑒰𑒆।
http://www.tirhutalipi.4t.com/
𑒧𑒳𑒠𑒰 𑒋𑒏𑒩𑒰 𑒯𑒹𑒞𑒳 𑒋𑒯𑒱 𑒪𑒱𑓀𑒏 𑒣𑒩 𑒖𑒹 𑒣𑓂𑒩𑒲𑒞𑒱 𑒤𑒰𑓀𑒢𑓂𑒙 𑒕𑒻 𑒞𑒏𑒩𑒰 𑒮𑒹𑒯𑒼 𑒁𑒫𑒰𑒩𑒼𑒣𑒱𑒞 𑒏𑒋 𑒣𑓂𑒩𑒞𑒱𑒏𑒵𑒞𑒱 𑒏𑒩𑒴 𑒂 𑒠𑒳𑒢𑒴 𑒏𑒹𑒿 𑒡𑓂𑒩𑒳𑒫𑒫𑒵𑒞𑓂𑒞 𑒔𑒰𑒪𑒏 (𑒯𑒰𑒩𑓂𑒛𑒛𑒱𑒮𑓂𑒏 𑒛𑓂𑒩𑒰𑒃𑒫) C/windows/fonts 𑒧𑒹 𑒪𑒹𑒣𑒢 𑒏𑒩𑒴 । 𑒋𑒯𑒱𑒧𑒹 𑒖𑒹 𑒤𑒰𑒢𑓂𑒙 𑒁𑒕𑒱 𑒮𑒹 Ascii 𑒧𑒹
𑒁𑒕𑒱 । 𑒏𑓂𑒩𑒳𑒞𑒠𑒹𑒫, 𑒬𑒳𑒬𑒰 𑒄 𑒮𑒦 𑒤𑒰𑒝𑓂𑒙 𑒮𑒹𑒯𑒼 𑒋𑒯𑒱 𑒞𑒩𑒯𑒏 𑒁𑒕𑒱, 𑒣𑒯𑒱𑒢𑒹 𑒅𑒣𑒨𑒼𑒑𑒲 𑒕𑒪 𑒧𑒳𑒠𑒰 𑒂𑒥 𑒮𑒩𑓂𑒔 𑒃𑓀𑒖𑒱𑒢𑒧𑒹 𑒨𑒴𑒢𑒱𑒏𑒼𑒛-𑒨𑒴.𑒙𑒲.𑒋𑒤.𑓘 𑒏𑒹𑒩 𑒮𑒩𑓂𑒔 𑒯𑒼𑒃𑒞 𑒕𑒻 𑒂 Ascii 𑒧𑒹 𑒪𑒱𑒐𑒪 𑒠𑒹𑒫𑒢𑒰𑒑𑒩𑒲𑒏 𑒮𑒩𑓂𑒔 𑒢𑒯𑒱 𑒦𑒋 𑒣𑒥𑒻𑒞 𑒁𑒕𑒱 । 𑒫𑒱𑒢𑓂𑒛𑒼𑒖𑒧𑒹 𑒧𑓀𑒑𑒪 𑒫𑒩𑓂𑒝𑒧𑒳𑒐 (𑒤𑒰𑒢𑓂𑒙) 𑒁𑒥𑒻𑒞 𑒕𑒻 𑒮𑒹 𑒨𑒴𑒢𑒲𑒏𑒼𑒛𑒧𑒹 𑒕𑒻 𑒂 𑒋𑒯𑒱𑒧𑒹 𑒪𑒱𑒐𑒪 𑒠𑒹𑒫𑒢𑒰𑒑𑒩𑒲 𑒮𑒩𑓂𑒔 𑒦𑒋 𑒖𑒰𑒃𑒞 𑒁𑒕𑒱 । 𑒧𑒱𑒟𑒱𑒪𑒰𑒏𑓂𑒭𑒩𑒏 𑒨𑒴𑒢𑒲𑒏𑒼𑒛 𑒩𑒴𑒣𑒏 𑒂𑒫𑒹𑒠𑒢 (𑒁𑓀𑒬𑒳𑒧𑒢 𑒣𑒰𑒝𑓂𑒛𑒹𑒨 𑒠𑓂𑒫𑒰𑒩𑒰 𑒠𑒹𑒪 𑒑𑒹𑒪) 𑒪𑓀𑒥𑒱𑒞 𑒁𑒕𑒱 𑒖𑒰𑒯𑒱𑒧𑒹 𑒥𑒩𑓂𑒏𑒪𑒹 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒏 𑒣𑓂𑒩𑒼𑒤𑒹𑒮𑒩 𑒛𑒹𑒥𑒼𑒩𑒰𑒯 𑒋𑒢𑓂𑒛𑒩𑒮𑒢, Project Leader, Script Encoding Initiative, Dept. of Linguistics, UC Berkeley 𑒏 𑒂𑒑𑓂𑒩𑒯𑒣𑒩 𑒯𑒧𑒯𑒳𑒿 𑒨𑒼𑒑𑒠𑒰𑒢 𑒠𑒹𑒢𑒹 𑒩𑒯𑒲 ।
𑒂𑒥 𑒏𑒱𑒕𑒳 𑒥𑒰𑒞 𑒨𑒴𑒢𑒲𑒏𑒼𑒛 𑒂 𑒖𑒰𑒪𑒮𑓂𑒟𑒪 (𑒫𑒹𑒥𑒮𑒰𑒃𑒙) 𑒏𑒹𑒩 𑒮𑓀𑒥𑓀𑒡𑒧𑒹 ।
𑒏𑒼𑒢𑒼 𑒤𑒰𑒃𑒪𑒏𑒹𑒿 𑒣𑒜𑓃𑒥𑒰𑒏 𑒯𑒹𑒞𑒳 𑒏𑓀𑒣𑓂𑒨𑒳𑒙𑒩𑒧𑒹 𑒂𑒫𑒬𑓂𑒨𑒏 𑒤𑒰𑓀𑒙 𑒯𑒼𑒋𑒥 𑒖𑒩𑒴𑒩𑒲 𑒁𑒕𑒱, 𑒢𑒯𑒱 𑒞𑒿 𑒮𑒦𑒮𑒿 𑒮𑒩𑒪 𑒅𑒣𑒰𑒨 𑒁𑒕𑒱, 𑒬𑒥𑓂𑒠-𑒮𑓀𑒮𑒰𑒡𑒏𑒧𑒹 𑒥𑒢𑒪 𑒪𑒹𑒐 (𑒫𑒩𑓂𑒛 𑒛𑒼𑒏𑓂𑒨𑒳𑒧𑒹𑓀𑒙) 𑒏𑒹𑒿 𑒣𑒲.𑒛𑒲.𑒋𑒤. 𑒤𑒰𑒃𑒪𑒧𑒹 𑒣𑒩𑒱𑒫𑒩𑓂𑒞𑓂𑒞𑒱𑒞 𑒏𑒩𑒥 । 𑒋𑒯𑒱𑒧𑒹 𑒢𑒤𑒰 𑒢𑒳𑒏𑒮𑒰𑒢 𑒠𑒳𑒢𑒴 𑒁𑒕𑒱 । 𑒢𑒤𑒰 𑒖𑒹 𑒥𑒱𑒢𑒰 𑒏𑒼𑒢𑒼 𑒤𑒰𑓀𑒙𑒏 𑒗𑓀𑒗𑒙𑒱𑒏 𑒣𑒲.𑒛𑒲.𑒋𑒤.𑒤𑒰𑒃𑒪 𑒖𑒰𑒃 𑒏𑒰𑒿𑒙𑒰/ 𑒫𑒩𑓂𑒝𑒧𑒳𑒐/ 𑒪𑒱𑒣𑒱𑒧𑒹 𑒪𑒱𑒐𑒪 𑒑𑒹𑒪 𑒁𑒕𑒱, 𑒞𑒰𑒯𑒱𑒧𑒹 𑒣𑒜𑓃𑒪 𑒖𑒰 𑒮𑒏𑒻𑒞 𑒁𑒕𑒱 । 𑒋𑒏𑒩 𑒢𑒳𑒏𑒮𑒰𑒢 𑒖𑒹 𑒖𑒐𑒢𑒹 𑒤𑒰𑒃𑒪𑒧𑒹 𑒖𑒰 𑒏𑒋 𑒮𑒹𑒫 𑒋𑒖 𑒙𑒹𑒏𑓂𑒮𑓂𑒙 𑒏𑒩𑒥 𑒞𑒿 𑒁𑓀𑒑𑓂𑒩𑒹𑒖𑒲 𑒞𑒿 𑒮𑒹𑒫 𑒦𑒋 𑒖𑒋𑒞 𑒧𑒳𑒠𑒰 𑒠𑒹𑒫𑒢𑒰𑒑𑒩𑒲 𑒞𑒹𑒯𑒢 𑒮𑒹𑒫 𑒯𑒼𑒋𑒞 𑒖𑒹 𑒣𑒜𑓃𑒱 𑒢𑒯𑒱 𑒮𑒏𑒲 । 𑒠𑒼𑒮𑒩 𑒨𑒴𑒢𑒲𑒏𑒼𑒛𑒏 𑒧𑓀𑒑𑒪𑒧𑒹 𑒙𑒰𑒃𑒣 𑒏𑒋𑒪 𑒪𑒹𑒐𑒏𑒹𑒿 𑒋𑒛𑒼𑒥 𑒁𑒏𑓂𑒩𑒼𑒥𑒹𑒙𑒮𑒿 𑒣𑒲.𑒛𑒲.𑒋𑒤.𑒧𑒹 𑒣𑒩𑒱𑒫𑒩𑓂𑒞𑓂𑒞𑒱𑒞 𑒏𑒩𑒥𑒰𑒧𑒹 𑒠𑒱𑒏𑓂𑒏𑒞 𑒯𑒼𑒁𑒋- 𑒋𑒯𑒱 𑒤𑒰𑒃𑒪𑒧𑒹 𑒏𑒐𑒢𑒼 𑒏𑒰𑒪 𑒒 𑒯𑒪𑒢𑓂𑒞 𑒂 𑒖 𑒏𑒐𑒢𑒼 𑒏𑒰𑒪 𑒔𑒞𑒳𑒩𑓂𑒦𑒳𑒖 𑒩𑒴𑒣𑒧𑒹 𑒢𑒘𑒱 𑒣𑒜𑓃𑒥𑒰 𑒨𑒼𑒑𑓂𑒨 𑒁𑒥𑒻𑒞 𑒁𑒕𑒱- 𑒞𑒿 𑒮𑓀𑒣𑒴𑒩𑓂𑒝 𑒤𑒰𑒃𑒪𑒏𑒹𑒿 𑒐𑒼𑒪𑒱 𑒏𑒋 𑒮𑒦𑒙𑒰 𑒔𑒨𑒢 𑒏𑒩𑒴, 𑒨𑒴𑒢𑒲𑒫𑒩𑓂𑒮𑒪 𑒨𑒴𑒢𑒲𑒏𑒼𑒛 𑒋𑒧.𑒋𑒮. 𑒤𑒰𑓀𑒙 𑒛𑓂𑒩𑒰𑒣 𑒛𑒰𑒅𑒢 𑒧𑒹𑒢𑒴𑒮𑒿 𑒮𑒹𑒪𑒹𑒏𑓂𑒙 𑒏𑒩𑒴, 𑒤𑒹𑒩 𑒣𑓂𑒩𑒱𑓀𑒙𑒧𑒹 𑒖𑒰 𑒏𑒋 𑒣𑓂𑒩𑒱𑓀𑒙𑒩 (𑒧𑒳𑒠𑓂𑒩𑒏) 𑒋𑒛𑒼𑒥 𑒋𑒏𑓂𑒩𑒼𑒥𑒹𑒙 𑒮𑒹𑒪𑒹𑒏𑓂𑒙 𑒏𑒩𑒴 । 𑒂𑒥 𑒄 𑒤𑒰𑒃𑒪 𑒣𑒩𑒱𑒫𑒩𑓂𑒞𑓂𑒞𑒱𑒞 𑒦𑒋 𑒖𑒋𑒞 𑒣𑒲. 𑒛𑒲. 𑒋𑒤.𑒧𑒹 ।
𑒧𑒰𑒃𑒏𑓂𑒩𑒼𑒮𑒰𑒤𑓂𑒙 𑒫𑒩𑓂𑒛𑒮𑒿 pdf 𑒧𑒹 𑒣𑒩𑒱𑒫𑒩𑓂𑒞𑓂𑒞𑒢𑒏 𑒮𑒼𑒗 𑒞𑒩𑒲𑒏𑒰 𑒁𑒕𑒱- 𑒏𑒩𑓂𑒮𑒩𑒮𑒿 𑒤𑒰𑒃𑒪, 𑒣𑓂𑒩𑒱𑓀𑒙𑒧𑒹 𑒖𑒰𑒆, 𑒂 𑒤𑒹𑒩 𑒣𑓂𑒩𑒱𑓀𑒙𑒩𑒧𑒹 𑒋𑒏𑓂𑒩𑒼𑒥𑒹𑒙 𑒛𑒱𑒮𑓂𑒙𑒲𑒪𑒩 𑒮𑒹𑒪𑒹𑒏𑓂𑒙 𑒏𑒋 𑒣𑓂𑒩𑒱𑓀𑒙 𑒏𑒧𑒰𑓀𑒛 𑒠𑒋 𑒠𑒱𑒁 । 𑒧𑒳𑒠𑒰 𑒋𑒯𑒱𑒧𑒹 𑒏𑒐𑒢𑒼 𑒏𑒰𑒪 pdf 𑒛𑒰𑒏𑓂𑒨𑒳𑒧𑒹𑓀𑒙 𑒢𑒯𑒱 𑒥𑒢𑒻𑒞 𑒕𑒻 । 𑒞𑒐𑒢 𑒣𑓂𑒩𑒱𑓀𑒙𑒩 𑒋𑒏𑓂𑒩𑒼𑒥𑒹𑒙 𑒛𑒱𑒮𑓂𑒙𑒲𑒪𑒩 𑒮𑒹𑒪𑒹𑒏𑓂𑒙 𑒏𑒋 𑒣𑓂𑒩𑒼𑒣𑒩𑓂𑒙𑒲𑒖 𑒧𑒹 𑒖𑒰𑒆 । 𑒍𑒞𑒋 𑒁𑒛𑒼𑒥 pdf 𑒮𑒹𑒙𑒱𑓀𑒑 𑒮𑒹𑒪𑒹𑒏𑓂𑒙 𑒏𑒩𑒴 । 𑒍𑒞𑒋 𑒂𑒣𑒬𑒢 𑒛𑒴 𑒢𑒰𑒙 𑒮𑒹𑓀𑒛 𑒤𑒰𑒢𑓂𑒙𑓂𑒮 𑒙𑒴 𑒛𑒱𑒮𑓂𑒙𑒱𑒪𑒩 𑒧𑒹 𑒙𑒱𑒏 𑒪𑒑𑒰𑒋𑒪 𑒯𑒼𑒋𑒞 । 𑒍𑒏𑒩𑒰 𑒁𑒢𑒔𑒹𑒏 𑒏𑒩𑒴 । 𑒂 𑒮𑒹 𑒏𑒋 𑒥𑒰𑒯𑒩 𑒂𑒆 𑒂 𑒣𑓂𑒩𑒱𑓀𑒙 𑒏𑒧𑒰𑓀𑒛 𑒠𑒱𑒁 । 𑒂𑒥 pdf 𑒛𑒰𑒏𑓂𑒨𑒳𑒧𑒹𑒢𑓂𑒙 𑒥𑒢𑒱 𑒖𑒋𑒞 । 𑒣𑒲.𑒛𑒲.𑒋𑒤. 𑒮𑓂𑒣𑓂𑒪𑒱𑒙𑒩 𑒂 𑒧𑒩𑓂𑒖𑒩 𑒮𑒰𑒤𑓂𑒙𑒫𑒹𑒨𑒩 ( 𑒖𑒹𑒢𑒰 𑒤𑓂𑒩𑒲𑒫𑒹𑒨𑒩 𑒮𑒰𑒤𑓂𑒙𑒫𑒹𑒨𑒩 𑒣𑒲.𑒛𑒲.𑒋𑒤. 𑒯𑒹𑒪𑓂𑒣𑒩/ 𑒮𑒻𑒧) 𑒏𑒹𑒩 𑒧𑒠𑒞𑒱𑒮𑒿 𑒂𑒮𑒰𑒢𑒲𑒮𑒿 𑒣𑒲.𑒛𑒲.𑒋𑒤. 𑒤𑒰𑒃𑒪 𑒖𑒼𑒛𑓃𑒱 𑒂 𑒞𑒼𑒛𑓃𑒱 𑒮𑒏𑒻𑒞 𑒕𑒲।

𑒂𑒥 𑒫𑒹𑒥𑒮𑒰𑒃𑒙 𑒥𑒢𑒹𑒥𑒰𑒏 𑒣𑒴𑒩𑓂𑒫 𑒏𑒱𑒕𑒳 𑒧𑒳𑒐𑓂𑒨 𑒥𑒰𑒞𑒏𑒹𑒿 𑒠𑒹𑒐𑒱 𑒪𑒱𑒁 । 𑒣𑒰𑒿𑒔 𑒞𑒩𑒯𑒏 𑒁𑒢𑓂𑒞𑒩𑒖𑒰𑒪 𑒑𑒫𑒹𑒭𑒏 (𑒃𑓀𑒙𑒩𑒢𑒹𑒙 𑒥𑓂𑒩𑒰𑒅𑒖𑒩) 𑒁𑒕𑒱, 𑒬𑒹𑒭 𑒮𑒦𑒙𑒰 𑒋𑒏𑒩𑒰 𑒮𑒦𑒏𑒹𑒿 𑒂𑒡𑒰𑒩 𑒥𑒢𑒰 𑒏𑒋 𑒩𑒔𑒱𑒞 𑒁𑒕𑒱 । 𑒞𑒐𑒢 𑒮𑒦𑒮𑒿 𑒣𑒯𑒱𑒢𑒹 𑒄 𑒮𑒦𑒙𑒰 𑒁𑒣𑒢𑒰 𑒏𑓀𑒣𑓂𑒨𑒳𑒙𑒩𑒧𑒹 𑒣𑓂𑒩𑒞𑒱𑒭𑓂𑒚𑒰𑒣𑒱𑒞 (𑒃𑓀𑒮𑓂𑒙𑒰𑒪) 𑒏𑒩𑒴-
𑓑. 𑒍𑒣𑒹𑒩𑒰, 𑓒. 𑒧𑒼𑒖𑒱𑒪𑓂𑒪𑒰, 𑓓. 𑒧𑒰𑒃𑒏𑓂𑒩𑒼𑒮𑒰𑒤𑓂𑒙𑒏 𑒃𑓀𑒙𑒩𑒢𑒹𑒙 𑒋𑒏𑓂𑒮𑒣𑓂𑒪𑒼𑒩𑒩 (𑒄 𑒞𑒿 𑒯𑒼𑒋𑒥𑒹 𑒏𑒩𑒞), 𑓔. 𑒑𑒴𑒑𑒪 𑒏𑓂𑒩𑒼𑒧 𑒂 𑓕. 𑒋𑒣𑒪𑒏 (𑒁𑒐𑒢 𑒡𑒩𑒱 𑒄 𑒧𑒹𑒏𑒱𑒢𑒙𑒼𑒮𑒏 𑒪𑒹𑒪 𑒕𑒪 𑒂𑒥 𑒫𑒱𑒢𑓂𑒛𑒼 𑒪𑒹𑒪 𑒮𑒹𑒯𑒼 𑒁𑒕𑒱) 𑒮𑒤𑒰𑒩𑒲 । 𑒂𑒥 𑒖𑒐𑒢 𑒖𑒰𑒪 𑒣𑒵𑒭𑓂𑒚 (𑒫𑒹𑒥 𑒣𑒹𑒖) 𑒅𑒣𑒰𑒩𑒼𑒣𑒱𑒞 (𑒁𑒣𑒪𑒼𑒛) 𑒏𑒩𑒥 𑒫𑒰 𑒣𑒯𑒱𑒢𑒯𑒳𑒿 𑒞𑒿 𑒋𑒯𑒱 𑒮𑒦𑒣𑒩 𑒐𑒼𑒪𑒱 𑒏𑒋 𑒁𑒫𑒬𑓂𑒨 𑒠𑒹𑒐𑒱 𑒪𑒱𑒁 ।
𑒠𑒹𑒫𑒢𑒰𑒑𑒩𑒲 𑒪𑒱𑒐𑒥𑒰𑒧𑒹 𑒥𑒩𑒰𑒯 𑒂𑒃.𑒋𑒧.𑒄. 𑒏𑒹𑒩 𑒨𑒼𑒑𑒠𑒰𑒢 𑒫𑒱𑒬𑒱𑒭𑓂𑒙 𑒁𑒕𑒱 । 𑒋𑒯𑒱𑒧𑒹 𑒮𑓀𑒮𑓂𑒏𑒵𑒞𑒏 𑒅𑒠𑒰𑒞𑓂𑒞, 𑒁𑒢𑒳𑒠𑒰𑒞𑓂𑒞 𑒂 𑒮𑓂𑒫𑒩𑒱𑒞 𑒏𑒹𑒩 𑒮𑓀𑒑𑒹 𑒥𑒱𑒏𑒰𑒩𑒲, 𑒠𑒹𑒫𑒢𑒰𑒑𑒩𑒲 𑒁𑓀𑒏 𑒂 𑒏𑒱𑒕𑒳 𑒮𑓀𑒑𑒲𑒞𑒏 𑒮𑓂𑒫𑒩𑒪𑒱𑒣𑒱 𑒪𑒱𑒐𑒥𑒰𑒏 𑒮𑒳𑒫𑒱𑒡𑒰 𑒁𑒕𑒱 । 𑒧𑓀𑒠𑓂𑒩 𑒮𑒣𑓂𑒞𑒏, 𑒞𑒲𑒫𑓂𑒩 𑒂 𑒏𑒼𑒧𑒪 𑒮𑓂𑒫𑒩𑒏 𑒢𑒼𑒙𑒹𑒬𑒢 𑒋𑒯𑒱𑒧𑒹 𑒁𑒕𑒱 । 𑒇,𑒈 𑒂 𑒉,𑒊 𑒂 𑒋, 𑒁𑒺 𑒁, ~ 𑒯𑒪𑒢𑓂𑒞𑒏 𑒥𑒰𑒠 𑒖𑒼𑒛𑓃𑒏 𑒮𑒳𑒫𑒱𑒡𑒰 𑒋𑒯𑒱𑒧𑒹 𑒕𑒻 । 𑒁𑒢𑒳𑒠𑒰𑒞𑓂𑒞 𑒏↓ 𑒅𑒠𑒰𑒞𑓂𑒞 𑒏↑ 𑒂 𑒮𑓂𑒫𑒩𑒱𑒞 𑒏॓ 𑒮𑒹𑒯𑒼 𑒅𑒣𑒪𑒥𑓂𑒡 𑒁𑒕𑒱 । 𑒄 𑒫𑒱𑒮𑓂𑒙𑒰𑒧𑒹 𑒮𑒹𑒯𑒼 𑒏𑒰𑒩𑓂𑒨 𑒏𑒩𑒻𑒞 𑒁𑒕𑒱 । 𑒂 𑒨𑒴𑒢𑒲𑒏𑒼𑒛 𑒤𑒰𑒢𑓂𑒙𑒧𑒹 𑒩𑒯𑒥𑒰𑒏 𑒏𑒰𑒩𑒝 𑒃𑓀𑒙𑒩𑒢𑒹𑒙 𑒣𑒩 𑒣𑒚𑒢𑒲𑒨 𑒁𑒕𑒱 ।
𑒁 𑒮𑒿 𑒯 𑒡𑒩𑒱 𑒫𑒩𑓂𑒝𑒧𑒰𑒪𑒰 𑒁𑒕𑒱 । 𑒏𑓂𑒭, 𑒞𑓂𑒩 ,𑒖𑓂𑒘 𑒍𑒢𑒰 𑒞𑒿 𑒮𑓀𑒨𑒳𑒏𑓂𑒞𑓂𑒞 𑒁𑒏𑓂𑒭𑒩 𑒁𑒕𑒱 𑒧𑒳𑒠𑒰 𑒥𑒔𑓂𑒔𑒹𑒮𑒿 𑒯𑒧𑒩𑒰 𑒮𑒦 𑒁 𑒮𑒿 𑒖𑓂𑒘 𑒞𑒏 𑒫𑒩𑓂𑒝𑒧𑒰𑒪𑒰𑒏 𑒩𑒴𑒣𑒧𑒹 𑒣𑒜𑓃𑒢𑒹 𑒕𑒲 । 𑒬𑓂𑒩 𑒮𑒹𑒯𑒼 𑒏𑓂𑒭, 𑒞𑓂𑒩, 𑒖𑓂𑒘 𑒖𑒹𑒏𑒰𑒿 𑒮𑓀𑒨𑒳𑒏𑓂𑒞 𑒁𑒏𑓂𑒭𑒩 𑒁𑒕𑒱 । 𑒖𑓂𑒘 𑒏𑒹𑒩 𑒅𑒔𑓂𑒔𑒰𑒩𑒝 𑒞𑒰𑒯𑒱 𑒠𑓂𑒫𑒰𑒩𑒹 𑒯𑒧𑒩𑒰 𑒮𑒦 𑒑 𑒂 𑒨 𑒏𑒹𑒩 𑒧𑒱𑒬𑓂𑒩𑒝 𑒠𑓂𑒫𑒰𑒩𑒰 𑒏𑒩𑒻𑒞 𑒕𑒲, 𑒮𑒹 𑒡𑒩𑒱 𑒑𑒪𑒞 𑒁𑒕𑒱 । 𑒄 𑒁𑒕𑒱 𑒖 𑒂 𑒘 𑒏𑒹𑒩 𑒮𑓀𑒨𑒳𑒏𑓂𑒞 । 𑒇 𑒏𑒹𑒩 𑒅𑒔𑓂𑒔𑒰𑒩𑒝 𑒯𑒧𑒩 𑒮𑒦 𑒏𑒩𑒻𑒞 𑒕𑒲, 𑒩𑒲 । 𑒪𑒵 𑒏𑒹𑒩 𑒅𑒔𑓂𑒔𑒰𑒩𑒝 𑒏𑒩𑒻𑒞 𑒕𑒲, 𑒪, 𑒩 𑒂 𑒄 𑒏𑒹𑒩 𑒮𑓀𑒨𑒳𑒏𑓂𑒞𑓂𑒞 । 𑒧𑒳𑒠𑒰 𑒇 𑒂 𑒪𑒵 𑒮𑓂𑒫𑒨𑓀 𑒮𑓂𑒫𑒩 𑒁𑒕𑒱, 𑒮𑓀𑒨𑒳𑒏𑓂𑒞𑒰𑒏𑓂𑒭𑒩 𑒢𑒯𑒱 । 𑒫𑒱𑒠𑒹𑒯𑒏 𑒂𑒩𑓂𑒏𑒰𑒃𑒫𑒧𑒹 𑒬𑒳𑒠𑓂𑒡 𑒅𑒔𑓂𑒔𑒰𑒩𑒝𑒏 𑒂𑒫𑒬𑓂𑒨𑒏𑒞𑒰𑒏𑒹𑒿 𑒠𑒹𑒐𑒱 𑒏𑒋 𑒁 𑒮𑒿 𑒖𑓂𑒘 𑒞𑒏 𑒮𑒦 𑒫𑒩𑓂𑒝𑒏 𑒅𑒔𑓂𑒔𑒰𑒩𑒝 𑒠𑒹𑒪 𑒑𑒹𑒪 𑒁𑒕𑒱 । 𑒦𑒰𑒩𑒞𑒲𑒨 𑒁𑓀𑒏𑒏 𑒁𑓀𑒞𑒩𑓂𑒩𑒰𑒭𑓂𑒙𑓂𑒩𑒲𑒨 𑒩𑒴𑒣𑒏 𑒣𑓂𑒩𑒨𑒼𑒑𑒏 𑒠𑒹𑒫𑒢𑒰𑒑𑒩𑒲𑒧𑒹 𑒔𑒪𑒢 𑒦𑓄 𑒑𑒹𑒪 𑒁𑒕𑒱 । 𑒦𑒰𑒩𑒞𑒲𑒨 𑒮𑓀𑒫𑒱𑒡𑒰𑒢𑒏 𑒁𑒢𑒳𑒔𑓂𑒕𑒹𑒠 𑓓𑓔𑓓(𑓑) 𑒏𑒯𑒻𑒞 𑒁𑒕𑒱 𑒖𑒹 𑒮𑓀𑒒𑒏 𑒩𑒰𑒖𑒏𑒲𑒨 𑒣𑓂𑒩𑒨𑒼𑒖𑒢𑒏 𑒯𑒹𑒞𑒳 𑒣𑓂𑒩𑒨𑒳𑒏𑓂𑒞 𑒯𑒼𑒧𑒋 𑒥𑒪𑒰 𑒁𑓀𑒏𑒏 𑒩𑒴𑒣, 𑒦𑒰𑒩𑒞𑒲𑒨 𑒁𑓀𑒏𑒏 𑒁𑓀𑒞𑒩𑓂𑒩𑒰𑒭𑓂𑒙𑓂𑒩𑒲𑒨 𑒩𑒴𑒣 𑒯𑒼𑒋𑒞। 𑒧𑒳𑒠𑒰 𑒩𑒰𑒭𑓂𑒙𑓂𑒩𑒣𑒞𑒱 𑒁𑓀𑒏𑒏 𑒠𑒹𑒫𑒢𑒰𑒑𑒩𑒲 𑒩𑒴𑒣𑒏𑒹𑒿 𑒮𑒹𑒯𑒼 𑒣𑓂𑒩𑒰𑒡𑒱𑒏𑒵𑒞 𑒏𑓄 𑒮𑒏𑒻𑒞 𑒕𑒟𑒱 ।
http://www.bhashaindia.com 𑒣𑒩 tbil converter 𑒮𑒰𑒤𑓂𑒙𑒫𑒹𑒨𑒩 𑒛𑒰𑒅𑒢𑒪𑒼𑒛 𑒏𑒩𑒴 । 𑒧𑓀𑒑𑒪 𑒤𑒰𑒢𑓂𑒙𑒧𑒹 𑒂𑒢 𑒤𑒰𑒢𑓂𑒙𑒮𑒿 𑒣𑒩𑒱𑒫𑒩𑓂𑒞𑓂𑒞𑒢 𑒏𑒩𑒥𑒰𑒏 𑒁𑒕𑒱 𑒞𑒿 𑒛𑒰𑒏𑓂𑒨𑒳𑒧𑒹𑒢𑓂𑒙 .doc 𑒔𑒨𑒢 𑒏𑒩𑒴 𑒃𑒢𑒣𑒳𑒙 𑒦𑒰𑒭𑒰𑒧𑒹 𑒯𑒱𑒢𑓂𑒠𑒲 𑒂 ascii 𑒤𑒰𑒢𑓂𑒙𑒧𑒹 𑒮𑒧𑓂𑒥𑒢𑓂𑒡𑒱𑒞 𑒤𑒰𑒢𑓂𑒙 𑒔𑒨𑒢 𑒏𑒩𑒴 । 𑒂𑒅𑒙𑒣𑒳𑒙𑒧𑒹 𑒦𑒰𑒭𑒰 𑒯𑒱𑒢𑓂𑒠𑒲 𑒂 𑒤𑒰𑒢𑓂𑒙 Unicode mangal 𑒔𑒨𑒢 𑒏𑒩𑒴 । 𑒂𑒥 𑒥𑓂𑒩𑒰𑒅𑒖 𑒏𑓄 𑒏𑒋 𑒤𑒰𑒃𑒪 𑒮𑒹𑒪𑒹𑒏𑓂𑒙 𑒏𑒩𑒴 । 𑒁𑒯𑒰𑒿𑒏 𑒏𑒧𑓂𑒣𑓂𑒨𑒳𑒙𑒩 𑒧𑒹 𑒂𑒤𑒱𑒮 𑓒𑓐𑓐𑓗 𑒁𑒕𑒱 𑒂 𑒫𑒩𑓂𑒛 𑒛𑒰𑒏𑓂𑒨𑒳𑒧𑒹𑒢𑓂𑒙 .docx 𑒋𑒏𑓂𑒮𑒙𑒹𑓀𑒬𑒢 𑒁𑒕𑒱, 𑒞𑒐𑒢 𑒋𑒏𑓂𑒮𑒙𑒹𑓀𑒬𑒢𑒏𑒹𑒿 𑒩𑒱𑒢𑒹𑒧 𑒏𑒩𑒴 .doc । 𑒂𑒥 𑒥𑓂𑒩𑒰𑒅𑒖𑒧𑒹 𑒛𑒰𑒏𑓂𑒨𑒳𑒧𑒹𑒢𑓂𑒙 𑒂𑒥𑒱 𑒖𑒋𑒞 । 𑒁𑒯𑒰𑒿𑒏 𑒏𑒧𑓂𑒣𑓂𑒨𑒳𑒙𑒩 𑒧𑒹 𑒂𑒤𑒱𑒮 𑓒𑓐𑓐𑓗 𑒢𑒯𑒱 𑒁𑒕𑒱 𑒞𑒐𑒢 𑒩𑒱𑒢𑒹𑒧 𑒏𑒹𑒪𑒰𑒮𑒿 𑒏𑒼𑒢𑒼 𑒤𑒰𑒋𑒠𑒰 𑒢𑒯𑒱 । 𑒂𑒥 𑒏𑓀𑒫𑒩𑓂𑒙 𑒏𑓂𑒪𑒱𑒏 𑒏𑒩𑒴 । 𑒢𑒴𑒞𑒢 𑒤𑒰𑒃𑒪 Unicode Mangal 𑒤𑒰𑒢𑓂𑒙𑒧𑒹 𑒥𑒢𑒱 𑒖𑒋𑒞 । 𑒁𑒯𑒰𑒿𑒏 𑒬𑒥𑓂𑒠 𑒮𑓀𑒮𑒰𑒡𑒏 𑒮𑒘𑓂𑒔𑒱𑒏𑒰 (𑒫𑒩𑓂𑒛 𑒛𑒰𑒏𑓂𑒨𑒳𑒧𑒹𑒢𑓂𑒙 𑒤𑒰𑒃𑒪) 𑒧𑒹 𑒨𑒴𑒢𑒲𑒏𑒼𑒛 𑒂 ascii 𑒫𑒩𑓂𑒝𑒧𑒳𑒐 (𑒤𑒰𑒢𑓂𑒙) 𑒧𑒱𑒪𑒪 𑒁𑒕𑒱, 𑒞𑒐𑒢 𑒁𑓀𑒠𑒰𑒖𑒲𑒮𑒿 ascii 𑒫𑒰 𑒥𑒹𑒬𑒲 𑒣𑓂𑒩𑒨𑒳𑒏𑓂𑒞 𑒯𑒼𑒋𑒥𑒪𑒰 ascii 𑒏𑒹𑒩 𑒔𑒨𑒢 𑒏𑒩𑒴 । 𑒏𑓀𑒫𑒩𑓂𑒙 𑒏𑓂𑒪𑒱𑒏 𑒏𑒩𑒴 𑒏𑒢𑓂𑒫𑒩𑓂𑒙 𑒦𑓄 𑒖𑒋𑒞 𑒨𑒴𑒢𑒲𑒏𑒼𑒛 𑒧𑓀𑒑𑒪 𑒫𑒩𑓂𑒝𑒧𑒳𑒐𑒧𑒹।
𑒖𑒰𑒪𑒮𑓂𑒟𑒪 𑒢𑒱𑒩𑓂𑒧𑒰𑒝
𑒣𑒯𑒱𑒢𑒹 𑒏𑒼𑒢𑒼 𑒂𑒢𑒪𑒰𑒃𑒢 𑒣𑓂𑒩𑒞𑒱𑒭𑓂𑒚𑒱𑒞 𑒮𑓀𑒮𑓂𑒟𑒰𑒮𑒿 𑒣𑓂𑒩𑒠𑒹𑒬 𑒢𑒰𑒧 (𑒛𑒼𑒧𑒹𑒢 𑒢𑒹𑒧) 𑒏𑒲𑒢𑒴 । 𑒅𑒠𑒰𑒯𑒩𑒝𑒮𑓂𑒫𑒩𑒴𑒣 𑒩𑒱𑒛𑒱𑒤 𑒛𑒰𑒙 𑒏𑒰𑒧 𑒣𑒩 𑒖𑒰𑒆 𑒂 𑒩𑒱𑒛𑒱𑒤 𑒯𑒼𑒮𑓂𑒙𑒱𑓀𑒑𑒣𑒩 𑒏𑓂𑒪𑒱𑒏
𑒏𑒩𑒴 । 𑒍𑒞𑒋 𑒥𑒳𑒏 𑒨𑒴𑒁𑒩 𑒛𑒼𑒧𑒹𑒢 𑒣𑒩 𑒖𑒰 𑒏𑒋 𑒃𑒔𑓂𑒕𑒱𑒞 𑒢𑒰𑒧 𑒙𑒱𑒏 𑒏𑒋 𑒠𑒹𑒐𑒴 𑒖𑒹 𑒍 𑒅𑒣𑒪𑒥𑓂𑒡 𑒁𑒕𑒱 𑒂𑒏𑒱 𑒢𑒯𑒱 । 𑒁𑒯𑒰𑒿 𑒁𑒣𑒢 𑒖𑒰𑒪𑒮𑓂𑒟𑒪𑒏 𑒯𑒹𑒞𑒳 𑒅𑒣𑒨𑒳𑒏𑓂𑒞 𑒛𑒼𑒧𑒹𑒢 𑒢𑒹𑒧 𑒏𑓂𑒩𑒹𑒛𑒱𑒙 𑒏𑒰𑒩𑓂𑒛𑒮𑒿 𑒂𑒢𑒪𑒰𑒃𑒢 𑒏𑒲𑒢𑒱 𑒮𑒏𑒻𑒞 𑒕𑒲 । 𑒄 𑒮𑒮𑓂𑒞𑒰 𑒕𑒻, 𑒠𑒮 𑒛𑒰𑒪𑒩 𑒣𑓂𑒩𑒞𑒱𑒫𑒩𑓂𑒭 𑒋𑒏𑒩 𑒁𑒡𑒱𑒏𑒞𑒧 𑒧𑒴𑒪𑓂𑒨 𑒕𑒻 । 𑒞𑒏𑒩𑒰 𑒥𑒰𑒠 𑒖𑒰𑒪𑒼𑒠𑓂𑒫𑒯𑒢 𑒮𑒹𑒫𑒰 (𑒫𑒹𑒥 𑒯𑒼𑒮𑓂𑒙𑒱𑓀𑒑 𑒮𑒩𑓂𑒫𑒱𑒮) 𑒏𑒹𑒩 𑒪𑒱𑓀𑒏𑒣𑒩 𑒖𑒰𑒆 । 𑓕 𑒫𑒰 𑒠𑒮 𑒮𑒰𑒪 𑒪𑒹𑒪 𑓑𑓐𑓐 𑒋𑒧.𑒥𑒲. 𑒮𑓂𑒟𑒰𑒢𑒏 𑒮𑓀𑒑 𑒖𑒰𑒪𑒼𑒠𑓂𑒫𑒯𑒢 𑒮𑒹𑒫𑒰 𑒪𑒱𑒁 𑒂 𑒋𑒏𑒩𑒰 𑒮𑓀𑒑 𑒧𑒰𑒨 𑒋𑒮.𑒏𑓂𑒨𑒴.𑒋𑒪. 𑒮𑒹𑒫𑒰 𑒧𑒳𑒤𑓂𑒞 𑒕𑒻 𑒧𑒳𑒠𑒰 𑒍𑒯𑒱𑒧𑒹 𑒪𑒰𑒃𑒢𑒹𑒏𑓂𑒮𑒣𑒩 𑒏𑒰𑒖 𑒏𑒩𑒋 𑒣𑒛𑓃𑒞 𑒖𑒹 𑒏𑒢𑒹𑒏 𑒏𑒚𑒱𑒢𑒰𑒯/ 𑒞𑒏𑒢𑒲𑒏𑒲 𑒦𑒋 𑒮𑒏𑒻𑒞 𑒁𑒕𑒱, 𑒮𑒹 𑒧𑒰𑒃𑒏𑓂𑒩𑒼𑒮𑒰𑒤𑓂𑒙 𑒋𑒮.𑒏𑓂𑒨𑒴.𑒋𑒪. 𑒮𑒹𑒫𑒰 𑒏𑒱𑒕𑒳 𑒂𑒩 𑒣𑒰𑒃 𑒪𑒑𑒰 𑒏𑒋 𑒁𑒯𑒰𑒿 𑒏𑒲𑒢𑒱 𑒮𑒏𑒻𑒞 𑒕𑒲 । 𑒂𑒥 𑒁𑒯𑒰𑒿 𑒪𑒑 𑓒𑓐 𑒋𑒧. 𑒥𑒲. 𑒏𑒹𑒩 𑒋𑒮.𑒏𑓂𑒨𑒴.𑒋𑒪. 𑒠𑒞𑓂𑒞𑒢𑒱𑒡𑒱 (𑒛𑒰𑒙𑒰𑒥𑒹𑒮) 𑒂 𑓘𑓐 𑒋𑒧.𑒥𑒲.𑒏𑒹𑒩 𑒮𑒰𑒃𑒙 𑒪𑒹𑒪 𑒖𑒑𑒯 𑒥𑒰𑒿𑒔𑒞 (𑒧𑒰𑒢𑒹 𑒣𑒴𑒩𑒰 𑓑𑓐𑓐 𑒋𑒧.𑒥𑒲.) 𑒂 𑒮𑒹 𑒣𑒩𑓂𑒨𑒰𑒣𑓂𑒞 𑒁𑒕𑒱। 𑒂𑒩 𑒮𑓂𑒣𑒹𑒮𑒏 𑒖𑒼𑒑𑒰𑒩 𑒧𑒿𑒑𑒢𑒲𑒧𑒹 𑒦𑒋 𑒖𑒋𑒞, 𑒞𑒏𑒩 𑒔𑒩𑒔𑒰 𑒂𑒑𑒰𑒿 𑒯𑒼𑒋𑒞। 𑒧𑒰𑒃𑒏𑓂𑒩𑒼𑒮𑒰𑒤𑓂𑒙 𑒋𑒮.𑒏𑓂𑒨𑒴.𑒋𑒪. 𑒮𑒹𑒫𑒰 𑒪𑒹𑒥𑒰𑒏 𑒅𑒣𑒩𑒰𑒢𑓂𑒞 𑒁𑒯𑒰𑒿 𑒁𑒣𑒢 𑒧𑒰𑒃𑒏𑓂𑒩𑒼𑒮𑒰𑒤𑓂𑒙 𑒋𑒏𑓂𑒮𑒹𑒪 𑒮𑒘𑓂𑒔𑒱𑒏𑒰 𑒍𑒞𑒋 𑒔𑒜𑓃𑒰 𑒮𑒏𑒻𑒞 𑒕𑒲 𑒂 𑒞𑒏𑒩 𑒅𑒣𑒨𑒼𑒑 𑒁𑒣𑒢 𑒖𑒰𑒪𑒮𑓂𑒟𑒪𑒣𑒩 𑒋𑒏𑒙𑒰 𑒧𑒡𑓂𑒨𑒮𑓂𑒟 (𑒃𑒢𑓂𑒙𑒩𑒤𑒹𑒮) 𑒥𑒢𑒰 𑒏𑒋 𑒁𑒯𑒰𑒿 𑒏𑒋 𑒮𑒏𑒻𑒞 𑒕𑒲 ।
𑒂𑒥 𑒖𑒰𑒪𑒮𑓂𑒟𑒪 (𑒫𑒹𑒥𑒮𑒰𑒃𑒙) 𑒥𑒢𑒹𑒥𑒰𑒏 𑒫𑒱𑒡𑒱𑒣𑒩 𑒫𑒱𑒔𑒰𑒩 𑒏𑒩𑒲।
𑒧𑒰𑒃𑒏𑓂𑒩𑒼𑒮𑒰𑒤𑓂𑒙 𑒤𑓂𑒩𑒢𑓂𑒙𑒣𑒹𑒖 𑒂𑒤𑒱𑒮 𑒋𑒏𑓂𑒮.𑒣𑒲. 𑒏 𑒮𑓀𑒑 𑒁𑒥𑒻𑒞 𑒁𑒕𑒱 । 𑒂𑒤𑒱𑒮 𑓒𑓐𑓐𑓓 𑒧𑒹 𑒮𑒹𑒯𑒼 𑒄 𑒁𑒪𑒑 𑒮𑒿 𑒅𑒣𑒪𑒥𑓂𑒡 𑒁𑒕𑒱 ।
𑒤𑓂𑒩𑒢𑓂𑒙𑒣𑒹𑒖𑒧𑒹 𑒥𑒢𑒪-𑒥𑒢𑒰𑒍𑒪 𑒫𑒹𑒥𑒮𑒰𑒃𑒙 𑒫𑒱𑒖𑒰𑒩𑓂𑒛 𑒔𑒪𑒰𑒆 । 𑒧𑒼𑒙𑒰-𑒧𑒼𑒙𑒲 𑒣𑒰𑒿𑒔 𑒣𑒵𑒭𑓂𑒚𑒏 𑒖𑒰𑒪-𑒮𑓂𑒟𑒪 𑒥𑒢𑒱 𑒖𑒋𑒞। 𑒋𑒯𑒱𑒧𑒹 𑒫𑒰𑒧 𑒏𑒰𑒞 𑒩𑒰𑒃𑒙 𑒏𑓂𑒪𑒱𑒏 𑒏𑒋 𑒣𑒵𑒭𑓂𑒚𑒏 𑒮𑓀𑒐𑓂𑒨𑒰 𑒥𑒜𑓃𑒰 𑒮𑒏𑒻𑒞 𑒕𑒲 । 𑒆𑒣𑒩𑒧𑒹 𑒮𑓂𑒟𑒱𑒞 𑒟𑒲𑒧𑒮𑒿 𑒁𑒣𑒢 𑒃𑒔𑓂𑒕𑒰 𑒧𑒼𑒞𑒰𑒥𑒱𑒏 𑒥𑒢𑒪-𑒥𑒢𑒰𑒍𑒪 𑒛𑒱𑒖𑒰𑒃𑒢 𑒮𑒹𑒯𑒼 𑒪𑒋 𑒮𑒏𑒻𑒞 𑒕𑒲 । 𑒮𑒰𑒃𑒙𑒏 𑒏𑒼𑒢𑒼 𑒣𑒵𑒭𑓂𑒚𑒏𑒹𑒿 𑒁𑒯𑒰𑒿 𑒤𑒼𑒙𑒼 𑒋𑒪𑒲𑒧𑒹𑒢𑓂𑒙 𑒠𑓂𑒫𑒰𑒩𑒰 𑒤𑒼𑒙𑒼 𑒑𑒻𑒪𑒩𑒲𑒧𑒹 𑒣𑒩𑒱𑒫𑒩𑓂𑒞𑒱𑒞 𑒏𑒋 𑒮𑒏𑒻𑒞 𑒕𑒲 𑒂 𑓓-𑓔-𑓕-𑓖 𑒮𑓂𑒞𑒧𑓂𑒦𑒧𑒹 𑒤𑒼𑒙𑒼 𑒮𑒦 𑒮𑒖𑒰 𑒮𑒏𑒻𑒞 𑒕𑒲 । 𑒍𑒯𑒱 𑒣𑒵𑒭𑓂𑒚𑒣𑒩 𑒛𑒥𑒪 𑒏𑓂𑒪𑒱𑒏 𑒏𑒋 𑒁𑒣𑒢 𑒮𑓀𑒑𑒝𑒏𑒮𑒿 𑒤𑒼𑒙𑒼𑒏𑒹𑒿 𑒂𑒢𑒴 𑒂 𑒨𑒴𑒢𑒲𑒏𑒼𑒛 𑒙𑒰𑒃𑒣𑒩𑒰𑒃𑒙𑒩 𑒠𑓂𑒫𑒰𑒩𑒰 𑒫𑒩𑓂𑒝𑒢 𑒙𑓀𑒏𑒱𑒞 𑒏𑒩𑒴 । 𑒣𑒵𑒭𑓂𑒚 𑒮𑒳𑒩𑒏𑓂𑒭𑒱𑒞 𑒏𑒩𑒥𑒰 𑒏𑒰𑒪 𑒔𑒱𑒞𑓂𑒩𑒏 𑒑𑒳𑒝𑒫𑒞𑓂𑒞𑒰 𑒖𑒹.𑒣𑒲.𑒖𑒲. 𑒤𑒼𑒙𑒼𑒧𑒹 𑓑 𑒮𑒿 𑓑𑓐𑓐 𑒡𑒩𑒱 𑒔𑒳𑒢𑒥𑒰𑒏 𑒫𑒱𑒏𑒪𑓂𑒣 𑒕𑒻 । 𑒖𑒞𑒹𑒏 𑒣𑒻𑒒 𑒤𑒰𑒃𑒪 𑒔𑒳𑒢𑒥 𑒞𑒞𑒹𑒏 𑒥𑒹𑒬𑒲 𑒖𑒑𑒯 𑒕𑒹𑒏𑒞 । 𑒫𑒰𑒧 𑒏𑒰𑒞 𑒂 𑒢𑒲𑒔𑒰𑒿𑒧𑒹 𑒪𑒱𑓀𑒏 𑒪𑒹𑒪 𑒔𑒱𑒪𑓂𑒛𑓂𑒩𑒹𑒢 𑒮𑒹𑒙𑒱𑓀𑒑 𑒫𑒱𑒏𑒪𑓂𑒣 𑒔𑒨𑒢 𑒏𑒋𑒪𑒰 𑒅𑒞𑓂𑒞𑒩 𑒖𑒰𑒪𑒮𑓂𑒟𑒪𑒏 𑒮𑒦 𑒣𑒵𑒭𑓂𑒚𑒏 𑒮𑒴𑒔𑒢𑒰 𑒍𑒞𑒋 𑒂𑒥𑒱 𑒖𑒋𑒞 । 𑒥𑒹𑒬𑒲 𑒣𑒵𑒭𑓂𑒚 𑒦𑒹𑒪𑒰 𑒅𑒞𑓂𑒞𑒩 𑒏𑒼𑒢𑒼 𑒣𑒵𑒭𑓂𑒚𑒏 𑒦𑒲𑒞𑒩 𑒣𑒵𑒭𑓂𑒚 𑒮𑒦𑒏 𑒬𑓂𑒩𑒵𑓀𑒐𑒪𑒰 𑒠𑒋 𑒮𑒏𑒻𑒞 𑒕𑒲 । 𑒂𑒥 𑒁𑒯𑒰𑒿𑒏 𑒮𑓀𑒑𑒝𑒏𑒧𑒹 𑒁𑒯𑒰𑒿𑒏 𑒖𑒰𑒪𑒮𑓂𑒟𑒪 𑒧𑒰𑒨 𑒛𑒼𑒏𑓂𑒨𑒳𑒧𑒹𑒢𑓂𑒙𑓂𑒮/ 𑒧𑒰𑒨 𑒫𑒹𑒥𑒧𑒹 𑒮𑒳𑒩𑒏𑓂𑒭𑒱𑒞 𑒁𑒕𑒱 ।
𑒁𑒣𑒢 𑒫𑒹𑒥𑒮𑒰𑒃𑒙𑒏 𑒫𑒰𑒮𑓂𑒞𑒫𑒱𑒏 𑒮𑓂𑒫𑒩𑒴𑒣 𑒣𑓂𑒩𑒲𑒫𑓂𑒨𑒴 𑒫𑒱𑒏𑒪𑓂𑒣 𑒠𑓂𑒫𑒰𑒩𑒰 𑒆𑒣𑒩 𑒫𑒩𑓂𑒝𑒱𑒞 𑓕 𑒣𑓂𑒩𑒏𑒰𑒩𑒏 𑒑𑒫𑒹𑒭𑒏𑒧𑒹 𑒠𑒹𑒐𑒴 । 𑒏𑒱𑒕𑒳 𑒂𑒫𑒬𑓂𑒨𑒏 𑒣𑒩𑒱𑒫𑒩𑓂𑒞𑒢 𑒤𑓂𑒩𑒢𑓂𑒙𑒣𑒹𑒖𑒣𑒩 𑒏𑒋𑒪𑒰 𑒅𑒞𑓂𑒞𑒩 𑒋𑒯𑒱 𑒮𑒰𑒃𑒙𑒏𑒹𑒿 𑒁𑒣𑒢 𑒮𑒩𑓂𑒫𑒩𑒣𑒩 𑒅𑒣𑒰𑒩𑒼𑒣𑒱𑒞 𑒏𑒋 𑒠𑒱𑒨𑒾𑒏। 𑒋𑒯𑒱 𑒪𑒹𑒪 𑒤𑒰𑒃𑒪𑒖𑒱𑒪𑒰 𑒛𑒰𑒙 𑒏𑒰𑒧 𑒣𑒩 𑒖𑒰𑒆 𑒖𑒹 𑒧𑒳𑒤𑓂𑒞 𑒞𑓀𑒞𑓂𑒩𑒰𑓀𑒬 𑒅𑒣𑒪𑒥𑓂𑒡 𑒏𑒩𑒥𑒻𑒞 𑒁𑒕𑒱 । 𑒋𑒞𑒋 𑒏𑓂𑒪𑒰𑒃𑒢𑓂𑒙 𑒂 𑒮𑒩𑓂𑒫𑒩 𑒧𑒹 𑒮𑒿 𑒏𑓂𑒪𑒰𑒃𑒢𑓂𑒙 𑒫𑒱𑒏𑒪𑓂𑒣 𑒔𑒳𑒢𑒴 𑒂 𑒞𑓀𑒞𑓂𑒩𑒰𑓀𑒬 𑒁𑒣𑒢 𑒏𑒧𑓂𑒣𑓂𑒨𑒴𑒙𑒩𑒧𑒹 𑒣𑓂𑒩𑒞𑒱𑒭𑓂𑒚𑒰𑒣𑒱𑒞 𑒏𑒩𑒴 । 𑒋𑒏𑒩𑒰 𑒥𑒰𑒠 𑒨𑒴𑒖𑒩 𑒢𑒹𑒧 𑒂 𑒣𑒰𑒮𑒫𑒩𑓂𑒛 𑒠𑒱𑒁 𑒂 𑒋𑒤.𑒙𑒲.𑒣𑒲. 𑒛𑒰𑒙 𑒛𑒼𑒧𑒹𑒢 𑒢𑒹𑒧 𑒣𑒩 𑒣𑒴𑒩𑓂𑒝 𑒖𑒰𑒪𑒮𑓂𑒟𑒪 𑒫𑒱𑒞𑒩𑒏 (𑒮𑒩𑓂𑒫𑒩) 𑒏𑒹𑒩 𑒧𑒴𑒪 𑒤𑒼𑒪𑓂𑒛𑒩𑒧𑒹 𑒅𑒣𑒰𑒩𑒼𑒣𑒱𑒞 𑒏𑒋 𑒠𑒱𑒁। 𑒁𑒯𑒰𑒿𑒏 𑒖𑒰𑒪𑒮𑓂𑒟𑒪 𑒁𑒢𑓂𑒞𑒩𑓂𑒖𑒰𑒪𑒣𑒩 𑒢𑒱𑒨𑒞 𑒖𑒰𑒪𑒮𑓂𑒟𑒪 𑒣𑒞𑒰𑒣𑒩 𑒠𑒹𑒐𑒰𑒃 𑒣𑒛𑓃𑒋 𑒪𑒰𑒑𑒞।
𑒁𑒣𑒢 𑒠𑒞𑓂𑒞𑒮𑓀𑒑𑓂𑒩𑒯 𑒏𑒼𑒢𑒼 𑒞𑒢𑓂𑒞𑓂𑒩𑒰𑓀𑒬 𑒖𑒹𑒢𑒰 𑒄.𑒋𑒧.𑒋𑒮. 𑒋𑒮.𑒏𑓂𑒨𑒴.𑒋𑒪.𑒧𑒻𑒢𑒹𑒖𑒩 𑒏𑒹𑒩 𑒧𑒰𑒡𑓂𑒨𑒧𑒮𑒿 𑒁𑒣𑒢 𑒫𑒱𑒞𑒩𑒏𑒣𑒩 𑒔𑒜𑓃𑒰𑒆 𑒂 𑒋𑒯𑒱 𑒪𑒹𑒪 𑒁𑒣𑒢 𑒮𑒹𑒫𑒰 𑒣𑓂𑒩𑒠𑒰𑒞𑒰𑒮𑒿 𑒠𑒴𑒩𑒦𑒰𑒭𑒣𑒩 𑒑𑒣 𑒏𑒋 𑒏𑒱𑒕𑒳 𑒫𑒱𑒬𑒹𑒭 𑒖𑒰𑒢𑒏𑒰𑒩𑒲 𑒪𑒱𑒁। 𑒮𑒦𑒙𑒰 𑒮𑒰𑒧𑒑𑓂𑒩𑒲 𑒔𑒜𑓃𑒱 𑒑𑒹𑒪𑒰𑒏 𑒥𑒰𑒠, 𑒁𑒣𑒢 𑒖𑒰𑒪𑒮𑓂𑒟𑒪𑒏 𑒣𑒵𑒭𑓂𑒚𑒣𑒩 𑒥𑒢𑒰𑒍𑒪 𑒧𑒡𑓂𑒨𑒮𑓂𑒟 𑒣𑒵𑒭𑓂𑒚𑒣𑒩 𑒋𑒔.𑒙𑒲.𑒋𑒧.𑒋𑒪.𑒏𑒼𑒛𑒧𑒹 𑒨𑒴𑒖𑒩 𑒢𑒹𑒧 𑒂 𑒣𑒰𑒮𑒫𑒩𑓂𑒛 𑒠𑒹𑒢𑒰𑒃 𑒢𑒯𑒱 𑒥𑒱𑒮𑒩𑒴।
𑒏𑒼𑒢𑒼 𑒣𑒵𑒭𑓂𑒚𑒣𑒩 𑒮𑓀𑒑𑒲𑒞 𑒁𑒢𑒥𑒰𑒏 𑒪𑒹𑒪 𑒏𑒧𑓂𑒣𑓂𑒨𑒴𑒙𑒩𑒮𑒿 𑒍𑒯𑒱 𑒣𑒵𑒭𑓂𑒚𑒣𑒩 𑒮𑓀𑒑𑒲𑒞𑒏 𑒮𑒘𑓂𑒔𑒱𑒏𑒰 𑒂𑒨𑒰𑒞 𑒏𑒩𑒴, 𑒧𑒳𑒠𑒰 𑒂𑒃 𑒏𑒰𑒪𑓂𑒯𑒱 𑒧𑒰𑒞𑓂𑒩 𑒍𑒣𑒹𑒩𑒰 𑒂 𑒃𑒢𑓂𑒙𑒩𑒢𑒹𑒙 𑒋𑒏𑓂𑒮𑒣𑓂𑒪𑒼𑒩𑒩𑒣𑒩 (𑒤𑓂𑒩𑒢𑓂𑒙𑒣𑒹𑒖𑒮𑒿 𑒥𑒢𑒪 𑒖𑒰𑒪𑒮𑓂𑒟𑒪𑒧𑒹) 𑒮𑓀𑒑𑒲𑒞 𑒥𑒖𑒻𑒞 𑒁𑒕𑒱।
𑒂𑒥 𑒏𑒱𑒕𑒳 𑒑𑒣 𑒣𑒵𑒭𑓂𑒚 𑒬𑒻𑒪𑒲 (𑒮𑓂𑒙𑒰𑒃𑒪 𑒬𑒲𑒙) 𑒣𑒩।
𑒁𑒯𑒰𑒿 𑒮𑒧𑓂𑒣𑒴𑒩𑓂𑒝 𑒖𑒰𑒪𑒮𑓂𑒟𑒪𑒏 𑒛𑒱𑒖𑒰𑒃𑒢 𑒖𑒹 𑒋𑒏𑓂𑒏𑒹 𑒩𑓀𑒑𑒏 𑒩𑒰𑒐𑒋 𑒔𑒰𑒯𑒲 𑒞𑒿 𑒋𑒯𑒱 𑒪𑒹𑒪 𑒮𑒦 𑒣𑒵𑒭𑓂𑒚𑒧𑒹 𑒋𑒏𑒩 𑒫𑒱𑒡𑒱𑒪𑒹𑒐 .css 𑒛𑒱𑒖𑒰𑒃𑒢 𑒥𑒢𑒰𑒏𑒋 𑒠𑒋 𑒠𑒱𑒨𑒾𑒏 𑒂 𑒋𑒏𑒙𑒰 𑒤𑒼𑒪𑓂𑒛𑒩𑒧𑒹 𑒛𑒱𑒖𑒰𑒃𑒢 𑒩𑒰𑒐𑒱 𑒠𑒱𑒨𑒾𑒏। 𑒋𑒯𑒱𑒧𑒹 𑒣𑒵𑒭𑓂𑒚𑒦𑒴𑒧𑒱𑒧𑒹 𑒥𑒰𑒖𑒋 𑒥𑒪𑒰 𑒮𑓀𑒑𑒲𑒞 𑒮𑒹𑒯𑒼 𑒩𑒯𑒱 𑒮𑒏𑒻𑒞 𑒁𑒕𑒱 । 𑒋𑒯𑒱𑒮𑒿 𑒄 𑒤𑒰𑒋𑒠𑒰 𑒁𑒕𑒱 𑒖𑒹 𑒮𑒦 𑒣𑒵𑒭𑓂𑒚 𑒐𑒳𑒖𑒥𑒰 𑒏𑒰𑒪 𑒤𑒹𑒩𑒮𑒿 𑒞𑒰𑒑𑒞𑒱 𑒢𑒯𑒱 𑒪𑒑𑒥𑒋 𑒣𑒛𑓃𑒞 𑒧𑒰𑒞𑓂𑒩 𑒋𑒏 𑒥𑒹𑒩 𑒛𑒱𑒖𑒰𑒃𑒢 𑒂 𑒮𑓀𑒑𑒲𑒞 𑒐𑒳𑒖𑒥𑒰𑒧𑒹 𑒖𑒹 𑒮𑒧𑒨 𑒪𑒰𑒑𑒞 𑒮𑒋𑒯 𑒙𑒰। 𑒠𑒼𑒮𑒩 𑒣𑒵𑒭𑓂𑒚𑒣𑒩 𑒖𑒹 𑒪𑒱𑒐𑒱𑒞 𑒁𑓀𑒬 𑒫𑒰 𑒤𑒼𑒙𑒼 𑒂𑒠𑒱 𑒩𑒯𑒞 𑒞𑒰𑒯𑒱𑒧𑒹 𑒖𑒞𑒹𑒏 𑒠𑒹𑒩𑒲 𑒪𑒰𑒑𑒞 𑒮𑒋𑒯 𑒁𑒞𑒱𑒩𑒱𑒏𑓂𑒞 𑒮𑒧𑒨 𑒧𑒰𑒞𑓂𑒩 𑒪𑒰𑒑𑒞। 𑒧𑒰𑒢𑒹 𑒁𑒯𑒰𑒿𑒏 𑒖𑒰𑒪𑒮𑓂𑒟𑒪 𑒯𑒪𑓂𑒪𑒳𑒏 𑒦𑒋 𑒖𑒋𑒞 𑒂 𑒖𑒪𑓂𑒠𑒲𑒮𑒿 𑒐𑒳𑒖𑒞।
𑒂𑒥 𑒂𑒩.𑒋𑒮.𑒋𑒮.𑒤𑒲𑒛𑒏 𑒫𑒱𑒭𑒨𑒧𑒹 𑒖𑒰𑒢𑒏𑒰𑒩𑒲 𑒪𑒲।
𑒖𑒰𑒪𑒮𑓂𑒟𑒪 𑒞𑒿 𑒥𑒢𑒱 𑒑𑒹𑒪 𑒂𑒥 𑒋𑒏𑒩 𑒣𑓂𑒩𑒔𑒰𑒩 𑒣𑓂𑒩𑒮𑒰𑒩 𑒮𑒹𑒯𑒼 𑒯𑒼𑒋𑒥𑒰𑒏 𑒔𑒰𑒯𑒲। 𑒂𑒩.𑒋𑒮.𑒋𑒮. 𑒤𑒲𑒛 𑒁𑒕𑒱 𑒩𑒱𑒁𑒪 𑒮𑒱𑒧𑓂𑒣𑒪 𑒮𑒱𑒢𑓂𑒛𑒱𑒏𑒹𑒬𑒢 𑒤𑒲𑒛 𑒏𑒹𑒩 𑒮𑓀𑒏𑓂𑒭𑒱𑒣𑓂𑒞 𑒩𑒴𑒣। 𑒋𑒏𑒙𑒰 𑒫𑒰 𑒏𑒻𑒏 𑒙𑒰 .xml 𑒤𑒰𑒃𑒪 𑒥𑒢𑒰 𑒏𑒋 𑒁𑒯𑒰𑒿 𑒁𑒣𑒢 𑒫𑒱𑒞𑒩𑒏𑒣𑒩 𑒔𑒜𑓃𑒰 𑒠𑒱𑒨𑒾𑒏। 𑒞𑒏𑒩 𑒥𑒰𑒠 𑒄 𑒋𑒏 𑒞𑒩𑒯𑒹𑒿 𑒖𑒰𑒪𑒮𑓂𑒟𑒪𑒏 𑒢𑒏𑓂𑒬𑒰 𑒥𑒢𑒰 𑒠𑒻𑒞 𑒁𑒕𑒱 𑒂 𑒖𑒐𑒢𑒹 𑒋𑒯𑒱𑒧𑒹 𑒏𑒼𑒢𑒼 𑒣𑒩𑒱𑒫𑒩𑓂𑒞𑒢 𑒁𑒥𑒻𑒞 𑒕𑒻 𑒞𑒿 𑒤𑒲𑒛-𑒩𑒲𑒛𑒩/ 𑒋𑒑𑓂𑒩𑒲𑒑𑒹𑒙𑒩𑒏𑒹𑒿 𑒖𑒰𑒪𑒮𑓂𑒟𑒪𑒣𑒩 𑒢𑒫 𑒮𑒰𑒧𑒑𑓂𑒩𑒲 𑒁𑒋𑒥𑒰𑒏 𑒮𑒴𑒔𑒢𑒰 𑒦𑒹𑒙𑒱 𑒖𑒰𑒃𑒞 𑒕𑒻। 𑒋𑒯𑒱𑒧𑒹𑒧𑒹 𑒧𑒳𑒐𑓂𑒨 𑒒𑒙𑒢𑒰𑒏/ 𑒪𑒹𑒐𑒰𑒠𑒱𑒏 𑒮𑒰𑒩𑒰𑓀𑒬 𑒩𑒯𑒻𑒞 𑒕𑒻 𑒖𑒹 𑒪𑒱𑓀𑒏𑒮𑒿 𑒖𑒳𑒛𑓃𑒪 𑒩𑒯𑒻𑒞 𑒁𑒕𑒱। 𑒍𑒯𑒱 𑒪𑒱𑓀𑒏𑒏𑒹𑒿 𑒏𑓂𑒪𑒱𑒏 𑒏𑒹𑒪𑒰 𑒅𑒞𑓂𑒞𑒩 𑒁𑒯𑒰𑒿 𑒫𑒱𑒮𑓂𑒞𑒵𑒞 𑒖𑒰𑒢𑒏𑒰𑒩𑒲 𑒣𑓂𑒩𑒰𑒣𑓂𑒞 𑒏𑒋 𑒮𑒏𑒻𑒞 𑒕𑒲। .xml 𑒨𑒳𑒏𑓂𑒞 𑒣𑒵𑒭𑓂𑒚𑒏𑒹𑒿 𑒖𑒰𑒪𑒫𑒵𑒞𑓂𑒞 (𑒥𑓂𑒪𑒰𑒑) 𑒣𑒩 𑒌𑒛 𑒑𑒰𑒛𑒖𑒹𑒙/ 𑒤𑒲𑒛/ 𑒧𑒹 𑒣𑒞𑒰 𑒩𑒴𑒣𑒧𑒹 𑒪𑒱𑒐𑒱 𑒏𑒋 𑓕 𑒮𑒿 𑓒𑓐 𑒡𑒩𑒱 𑒢𑒴𑒞𑒢 𑒮𑒰𑒧𑒑𑓂𑒩𑒲𑒏 (𑒏𑓂𑒩𑒧𑒬𑓁 𑒑𑒴𑒑𑒪 𑒂 𑒫𑒩𑓂𑒛𑒣𑓂𑒩𑒹𑒮 𑒥𑓂𑒪𑒰𑒑𑒧𑒹) 𑒁𑒠𑓂𑒨𑒞𑒢 𑒖𑒰𑒢𑒏𑒰𑒩𑒲 𑒪𑒹𑒪 𑒖𑒰𑒪𑒫𑒵𑒞𑓂𑒞 (𑒥𑓂𑒪𑒰𑒑) 𑒣𑒩 𑒩𑒰𑒐𑒪 𑒖𑒰 𑒮𑒏𑒻𑒞 𑒁𑒕𑒱। 𑒋𑒏𑒩 𑒂𑒩 𑒅𑒣𑒨𑒼𑒑 𑒕𑒻 𑒖𑒹𑒢𑒰 𑒤𑒲𑒛𑒥𑒩𑓂𑒢𑒩 𑒏𑒹𑒩 𑒧𑒰𑒡𑓂𑒨𑒧𑒮𑒿 𑒄-𑒣𑒞𑓂𑒩 𑒠𑓂𑒫𑒰𑒩𑒰 𑒮𑒠𑒮𑓂𑒨𑒏𑒹𑒿 𑒮𑒴𑒔𑒢𑒰 𑒠𑒹𑒥, 𑒯𑒹𑒛𑒪𑒰𑒃𑒢 𑒋𑒢𑒲𑒧𑒹𑒙𑒩 𑒖𑒰𑒪𑒮𑓂𑒟𑒪/ 𑒖𑒰𑒪𑒫𑒵𑒞𑓂𑒞𑒣𑒩 𑒪𑒑𑒰𑒋𑒥/ 𑒄-𑒣𑒞𑓂𑒩 𑒠𑓂𑒫𑒰𑒩𑒰 𑒃𑒔𑓂𑒕𑒱𑒞 𑒮𑒰𑒧𑒑𑓂𑒩𑒲𑒏 𑒪𑒱𑓀𑒏 𑒮𑓀𑒑𑒲𑒏𑒹𑒿 𑒣𑒚𑒰𑒋𑒥 𑒂 𑒑𑒫𑒹𑒭𑒏 𑒫𑒰 𑒤𑒲𑒛/ 𑒢𑓂𑒨𑒴𑒖 𑒩𑒲𑒛𑒩𑒏 𑒧𑒰𑒡𑓂𑒨𑒧𑒮𑒿 𑒣𑒜𑓃𑒥।
𑒞𑒏𑒩 𑒥𑒰𑒠 𑒁𑒣𑒢 𑒖𑒰𑒪𑒮𑓂𑒟𑒏𑒹𑒿 𑒑𑒴𑒑𑒪, 𑒨𑒰𑒯𑒴𑒮𑒩𑓂𑒔, 𑒪𑒰𑒃𑒫 𑒮𑒩𑓂𑒔 𑒂 𑒂𑒮𑓂𑒏 𑒛𑒰𑒙 𑒏𑒰𑒧𑒣𑒩 𑒮𑒥𑒧𑒱𑒙 𑒨𑒳𑒁𑒩 𑒮𑒰𑒃𑒙 𑒏𑒹𑒩 𑒁𑒢𑓂𑒞𑒩𑓂𑒑𑒞 𑒠𑒋 𑒠𑒱𑒨𑒾𑒏 𑒖𑒰𑒯𑒱𑒮𑒿 𑒄 𑒮𑒦 𑒁𑒢𑓂𑒫𑒹𑒭𑒝 𑒨𑒢𑓂𑒞𑓂𑒩 𑒁𑒯𑒰𑒿𑒏 𑒮𑒰𑒃𑒙𑒏𑒹𑒿 𑒞𑒰𑒏𑒱 𑒮𑒏𑒋। .xml 𑒤𑒰𑒃𑒪𑒥𑒪𑒰 𑒫𑒱𑒬𑓂𑒫𑒫𑓂𑒨𑒰𑒣𑒲 𑒁𑒢𑓂𑒞𑒩𑓂𑒖𑒰𑒪 𑒣𑒞𑒰/ 𑒮𑓀𑒏𑒹𑒞 𑒞𑒏𑒥𑒰𑒧𑒹 𑒋𑒯𑒱 𑒨𑒢𑓂𑒞𑓂𑒩 𑒮𑒦𑒏𑒹𑒿 𑒂𑒩 𑒮𑒳𑒫𑒱𑒡𑒰 𑒯𑒼𑒋𑒞𑒻𑒏, 𑒮𑒹 𑒁𑒯𑒰𑒿𑒏 𑒮𑒰𑒃𑒙𑒏 𑒧𑒳𑒤𑒞 𑒣𑓂𑒩𑒔𑒰𑒩 𑒯𑒼𑒋𑒞। .xml 𑒤𑒰𑒃𑒪 .htm 𑒏𑒹𑒩 𑒮𑓂𑒟𑒰𑒢 𑒪𑒹𑒞 𑒮𑒹 𑒢𑒯𑒱 𑒕𑒻, 𑒧𑒳𑒠𑒰 𑒋𑒯𑒱𑒮𑒿 𑒤𑒲𑒛 𑒋𑒑𑓂𑒩𑒲𑒑𑒹𑒙𑒩/ 𑒁𑒢𑓂𑒫𑒹𑒭𑒝 𑒨𑒢𑓂𑒞𑓂𑒩 𑒮𑒦𑒏𑒹𑒿 𑒖𑒰𑒪𑒮𑓂𑒟𑒪𑒣𑒩 𑒢𑒫 𑒮𑒰𑒧𑒑𑓂𑒩𑒲 𑒞𑒏𑒥𑒰𑒧𑒹 𑒮𑒳𑒫𑒱𑒡𑒰 𑒯𑒼𑒃𑒞 𑒕𑒻। 𑒖𑒐𑒢 𑒁𑒯𑒰𑒿𑒏 𑒖𑒰𑒪𑒮𑓂𑒟𑒪𑒧𑒹 𑒣𑒩𑒱𑒫𑒩𑓂𑒞𑒢 𑒂𑒥𑒋 𑒞𑒿 𑒁𑒣𑒢 𑒧𑒴𑒪 .xml 𑒤𑒰𑒃𑒪𑒏𑒹𑒿 𑒣𑒩𑒱𑒫𑒩𑓂𑒞𑒱𑒞 𑒏𑒋 𑒫𑒱𑒞𑒩𑒏𑒣𑒩 𑒔𑒜𑓃𑒰𑒆, 𑒬𑒹𑒭 𑒏𑒰𑒩𑓂𑒨 𑒤𑒲𑒛 𑒋𑒑𑓂𑒩𑒲𑒑𑒹𑒙𑒩/ 𑒁𑒢𑓂𑒫𑒹𑒭𑒝 𑒨𑒢𑓂𑒞𑓂𑒩 𑒮𑓂𑒫𑒨𑓀 𑒏𑒋 𑒪𑒹𑒞। 𑒁𑒯𑒰𑒿𑒏 𑒁𑒢𑓂𑒞𑒩𑓂𑒖𑒰𑒪 𑒑𑒫𑒹𑒭𑒏 𑒮𑒹𑒯𑒼 𑒮𑒰𑒃𑒙𑒧𑒹 𑒤𑒲𑒛 𑒩𑒯𑒪𑒰 𑒅𑒞𑓂𑒞𑒩 𑒫𑒱𑒏𑒪𑓂𑒣 𑒔𑒳𑒢𑒪𑒰𑒏 𑒥𑒰𑒠 𑒖𑒰𑒪𑒮𑓂𑒟𑒪𑒏 𑒣𑒵𑒭𑓂𑒚𑒏𑒹𑒿 𑒩𑒱𑒤𑓂𑒩𑒹𑒬 𑒏𑒋 𑒪𑒻𑒞 𑒁𑒕𑒱, 𑒏𑒰𑒩𑒝 𑒏𑒐𑒢𑒼 𑒏𑒰𑒪 𑒏𑓄 𑒙𑒹𑒧𑓂𑒣𑒩𑒼𑒩𑒲 𑒤𑒰𑒃𑒪 𑒮𑓀𑒑𑒝𑒏𑒧𑒹 𑒩𑒯𑒢𑒹 𑒣𑒳𑒩𑒢𑒏𑒹 𑒮𑒰𑒧𑒑𑓂𑒩𑒲 𑒃𑒢𑓂𑒙𑒩𑒢𑒹𑒙𑒣𑒩 𑒠𑒹𑒐𑒰𑒍𑒪 𑒖𑒰𑒃𑒞 𑒩𑒯𑒻𑒞 𑒁𑒕𑒱। 𑒧𑒳𑒠𑒰 𑒋𑒯𑒱 𑒪𑒹𑒪 𑒮𑒦 𑒣𑒵𑒭𑓂𑒚𑒧𑒹 𑒋𑒏𑒙𑒰 𑒏𑒴𑒙-𑒮𑓀𑒏𑒹𑒞 𑒠𑒹𑒧𑒋 𑒣𑒛𑓃𑒞।
𑒂𑒥 𑒏𑒱𑒕𑒳 𑒔𑒩𑒔𑒰 𑓔𑓐𑓔 𑒋𑒩𑒩 𑒣𑒵𑒭𑓂𑒚𑒏। 𑒁𑒯𑒰𑒿𑒏 𑒖𑒰𑒪𑒮𑓂𑒟𑒣𑒩 𑒏𑒼𑒢𑒼 𑒤𑒼𑒙𑒼/ 𑒪𑒱𑓀𑒏 𑒖𑒹 𑒣𑒯𑒱𑒢𑒹 𑒕𑒪 𑒧𑒳𑒠𑒰 𑒂𑒥 𑒢𑒯𑒱 𑒁𑒕𑒱 𑒏𑒹𑒿 𑒙𑒰𑒃𑒣 𑒏𑒋𑒪𑒰 𑒅𑒞𑓂𑒞𑒩 𑓔𑓐𑓔 𑒋𑒩𑒩 𑒮𑓀𑒏𑒹𑒞 𑒁𑒢𑓂𑒞𑒩𑓂𑒖𑒰𑒪 𑒑𑒫𑒹𑒭𑒏 𑒠𑒻𑒞 𑒁𑒕𑒱। 𑒁𑒣𑒢 𑒮𑒹𑒫𑒰 𑒣𑓂𑒩𑒠𑒰𑒞𑒰𑒮𑒿 𑒏𑒢𑓂𑒤𑓂𑒨𑒳𑒑𑒩𑒹𑒬𑒢 𑒮𑒧𑓂𑒥𑒢𑓂𑒡𑒲 𑒖𑒰𑒢𑒏𑒰𑒩𑒲 𑒪𑓄 𑒏𑒋 𑒁𑒣𑒢 𑒖𑒰𑒪𑒮𑓂𑒟𑒪𑒏 𑒮𑓂𑒙𑒰𑒃𑒪 𑒮𑒲𑒙𑒏 𑒯𑒱𑒮𑒰𑒥𑒮𑒿 𑒋𑒩𑒩 𑒣𑒵𑒭𑓂𑒚 𑒥𑒢𑒰𑒆, 𑒖𑒞𑒋 𑒏𑒱𑒕𑒳 𑒫𑓂𑒨𑒏𑓂𑒞𑒱𑒑𑒞 𑒮𑓀𑒠𑒹𑒬 𑒖𑒹𑒢𑒰- 𑒁𑒯𑒰𑒿 𑒠𑓂𑒫𑒰𑒩𑒰 𑒞𑒰𑒏𑒪 𑒮𑒰𑒧𑒑𑓂𑒩𑒲 𑒂𑒥 𑒅𑒣𑒪𑒥𑓂𑒡 𑒢𑒯𑒱 𑒁𑒕𑒱- 𑒏𑒹𑒩 𑒮𑓀𑒑 𑒖𑒰𑒪𑒮𑓂𑒟𑒪𑒏 𑒠𑒼𑒮𑒩 𑒪𑒱𑓀𑒏 𑒮𑒦 𑒩𑒰𑒐𑒴। 𑒧𑒳𑒠𑒰 𑒋𑒏𑒩 𑒡𑓂𑒨𑒰𑒢 𑒩𑒰𑒐𑒴 𑒖𑒹 𑒋𑒯𑒱 𑒣𑒵𑒭𑓂𑒚𑒣𑒩 𑒋𑒯𑒢 𑒏𑒴𑒙𑒮𑓀𑒏𑒹𑒞 𑒩𑒯𑒋 𑒖𑒰𑒯𑒱𑒮𑒿 𑒁𑒢𑓂𑒫𑒹𑒭𑒝 𑒨𑒢𑓂𑒞𑓂𑒩 𑒍𑒏𑒩𑒰 𑒮𑒩𑓂𑒔 𑒢𑒯𑒱 𑒏𑒩𑒋।
𑒁𑒣𑒢 𑒖𑒰𑒪𑒮𑓂𑒟𑒪𑒣𑒩 girgit.chitthajagat.in 𑒫𑒰 google translate 𑒑𑒰𑒛𑒖𑒹𑒙 𑒩𑒰𑒐𑒱 𑒮𑒏𑒻𑒞 𑒕𑒲 𑒖𑒰𑒯𑒱𑒮𑒿 𑒧𑒻𑒟𑒱𑒪𑒲𑒏 𑒮𑒰𑒧𑒑𑓂𑒩𑒲 𑒠𑒼𑒮𑒩 𑒪𑒱𑒣𑒱/𑒦𑒰𑒭𑒰 𑒮𑒦𑒧𑒹 𑒋𑒏 𑒏𑓂𑒪𑒱𑒏𑒧𑒹 𑒣𑒩𑒱𑒫𑒩𑓂𑒞𑒱𑒞 𑒦𑒋 𑒖𑒰𑒋।
𑒮𑒰𑒃𑒙𑒏 𑒣𑓂𑒩𑒔𑒰𑒩 𑒁𑒣𑒢 𑒥𑓂𑒪𑒰𑒑/ 𑒑𑓂𑒩𑒳𑒣 𑒥𑒢𑒰 𑒏𑒋 𑒂 𑒂𑒢𑒪𑒰𑒃𑒢 𑒏𑒧𑒹𑒢𑓂𑒙 𑒮𑒥𑒧𑒱𑒬𑒢 𑒪𑒹𑒪 𑒮𑒹𑒫𑒰 𑒣𑓂𑒩𑒠𑒰𑒞𑒰𑒮𑒿 𑒛𑒰𑒙 𑒢𑒹𑒙 𑒮𑒳𑒫𑒱𑒡𑒰 𑒪𑒱𑒁-𑒖𑒰𑒯𑒱𑒮𑒿 𑒫𑒱𑒞𑒩𑒏 𑒁𑒯𑒰𑒿𑒏 𑒄-𑒣𑒞𑓂𑒩 𑒮𑓀𑒏𑒹𑒞𑒣𑒩 𑒣𑒰𑒚𑒏𑒏 𑒏𑒧𑒹𑒢𑓂𑒙 𑒣𑓂𑒩𑒹𑒭𑒱𑒞 𑒏𑒋 𑒮𑒏𑒋। 𑒂 𑒋𑒯𑒱𑒮𑒿 𑒤𑒲𑒛 𑒋𑒑𑓂𑒩𑒲𑒑𑒹𑒙𑒩𑒧𑒹 𑒁𑒣𑒢 𑒤𑒲𑒛 𑒣𑓀𑒖𑒲𑒏𑒵𑒞 𑒏𑒩𑒰𑒋 𑒣𑒰𑒚𑒏𑒏 𑒮𑓀𑒐𑓂𑒨𑒰 𑒥𑒜𑓃𑒰𑒍𑒪 𑒖𑒰 𑒮𑒏𑒻𑒞 𑒁𑒕𑒱। 𑒏𑒧𑒹𑒢𑓂𑒙 𑒮𑒥𑒧𑒱𑒬𑒢 𑒙𑒰𑒃𑒣𑒣𑒻𑒛 𑒛𑒰𑒙 𑒏𑒰𑒧 (𑒣𑒹𑒛 𑒥𑓂𑒪𑒰𑒑𑒩 𑒮𑒹𑒫𑒰 𑒣𑓂𑒩𑒠𑒰𑒞𑒰) 𑒮𑒿 𑒮𑒹𑒯𑒼 𑒣𑓂𑒩𑒰𑒣𑓂𑒞 𑒏𑒋𑒪 𑒖𑒰 𑒮𑒏𑒻𑒞 𑒁𑒕𑒱, 𑒄 𑒥𑓂𑒪𑒰𑒑 𑒪𑒹𑒪 𑒞𑒿 𑒣𑒰𑒃 𑒪𑒻𑒞 𑒁𑒕𑒱 𑒧𑒳𑒠𑒰 𑒣𑓂𑒩𑒼𑒤𑒰𑒃𑒪 𑒥𑒢𑒥𑒋 𑒪𑒹𑒪 𑒢𑒯𑒱 𑒂 𑒍𑒯𑒱 𑒮𑓀𑒑𑒹 𑒥𑓂𑒪𑒰𑒑 𑒂 𑒮𑒰𑒃𑒙 𑒪𑒹𑒪 𑒏𑒧𑒹𑓀𑒙 𑒤𑒰𑒩𑓂𑒧𑒏 𑒏𑒼𑒛 𑒂 𑒮𑒳𑒫𑒱𑒡𑒰 𑒠𑒳𑒢𑒴 𑒅𑒣𑒪𑒥𑓂𑒡 𑒏𑒩𑒥𑒻𑒞 𑒁𑒕𑒱, 𑒋𑒯𑒱𑒧𑒹 𑒁𑒯𑒰𑒿 𑒖𑒰𑒪𑒮𑓂𑒟𑒪𑒣𑒩 𑒏𑒧𑒹𑓀𑒙𑒏 𑒋𑒏 𑒣𑒵𑒭𑓂𑒚𑒣𑒩 𑒮𑓀𑒐𑓂𑒨𑒰, 𑒏𑒧𑒹𑓀𑒙𑒣𑒩 𑒣𑒩𑒮𑓂𑒣𑒩 𑒫𑒰𑒩𑓂𑒞𑒰𑒪𑒰𑒣, 𑒂 𑒏𑒧𑒹𑓀𑒙 𑒧𑒰𑒛𑒹𑒩𑒹𑒬𑒢 𑒫𑒱𑒏𑒪𑓂𑒣 𑒔𑒳𑒢𑒱 𑒮𑒏𑒻𑒞 𑒕𑒲।
𑒁𑒣𑒢 𑒖𑒰𑒪𑒮𑓂𑒟𑒪𑒏 𑒂𑒩𑓂𑒏𑒰𑒃𑒫 𑒪𑒹𑒪 𑒑𑒴𑒑𑒪 𑒮𑒰𑒃𑒙 𑒂 𑒫𑒩𑓂𑒛𑒣𑓂𑒩𑒹𑒮 𑓑𑓐 𑒂 𑓓 𑒖𑒲.𑒥𑒲. 𑒏𑓂𑒩𑒧𑒬𑓁 𑒮𑓂𑒟𑒰𑒢 𑒧𑒳𑒤𑓂𑒞 𑒠𑒻𑒞 𑒁𑒕𑒱। 𑒤𑒰𑒃𑒪 𑒍𑒞𑒋 𑒁𑒣𑒪𑒼𑒛 𑒏𑒩𑒴 𑒧𑒳𑒠𑒰 𑒁𑒣𑒢 𑒮𑒰𑒃𑒙𑒣𑒩 𑒍𑒏𑒩 𑒪𑒱𑓀𑒏 𑒠𑒋 𑒠𑒱𑒨𑒾𑒏। 𑒋𑒯𑒱𑒮𑒿 𑒁𑒯𑒰𑒿 𑒁𑒣𑒢 𑒥𑒖𑒙 𑒚𑒲𑒏 𑒏𑒋 𑒮𑒏𑒻𑒞 𑒕𑒲।
𑒥𑓂𑒪𑒰𑒑𑒏 𑒨𑒴.𑒂𑒩.𑒋𑒪. 𑒨𑒠𑒱 𑒢𑒲𑒏 𑒢𑒯𑒱 𑒪𑒰𑒑𑒋 𑒞𑒿 𑒧𑒼𑒢𑒧𑒰𑒤𑒱𑒏 𑒨𑒴.𑒂𑒩.𑒋𑒪. 𑒮𑒳𑒫𑒱𑒡𑒰 𑓑𑓐 𑒛𑒰𑒪𑒩 𑒮𑒰𑒪𑒰𑒢𑒰𑒣𑒩 𑒅𑒣𑒪𑒥𑓂𑒡 𑒁𑒕𑒱, 𑒧𑒳𑒠𑒰 𑒥𑓂𑒪𑒰𑒑𑒏 𑒮𑒳𑒫𑒱𑒡𑒰𑒏 𑒁𑒞𑒱𑒩𑒱𑒏𑓂𑒞 𑒏𑒼𑒢𑒼 𑒂𑒩 𑒮𑒳𑒫𑒱𑒡𑒰 𑒋𑒯𑒱𑒮𑒿 𑒢𑒯𑒱 𑒦𑒹𑒙𑒞। 𑒧𑒳𑒠𑒰 𑒖𑒹 𑒁𑒯𑒰𑒿𑒏 𑒥𑒖𑒙 𑒥𑒯𑒳𑒞 𑒏𑒧 𑒁𑒕𑒱 𑒞𑒿 𑒋𑒏𑒩 𑒅𑒣𑒨𑒼𑒑 𑒏𑒩𑒴।
𑒁𑒯𑒰𑒿 𑒪𑒑 𑒖𑒹 𑒣𑒴𑒩𑓂𑒝 𑒮𑒰𑒃𑒙 𑒁𑒕𑒱 𑒞𑒿 𑒍𑒏𑒩 𑒋𑒏𑒙𑒰 𑒣𑒵𑒭𑓂𑒚 𑒣𑒩 𑒋𑒤.𑒙𑒲.𑒣𑒲. 𑒁𑒣𑒪𑒼𑒛𑒮𑒿 𑒛𑒱𑒮𑒏𑒮𑒢 𑒤𑒼𑒩𑒧 𑒂𑒠𑒱 𑒁𑒣𑒢 𑒮𑒰𑒃𑒙𑒏 𑒆𑒣𑒩 𑒩𑒰𑒐𑒱 𑒮𑒏𑒻𑒞 𑒕𑒲 𑒂 𑒥𑓂𑒪𑒰𑒑𑒏𑒹𑒿 𑒁𑒣𑒢 𑒮𑒰𑒃𑒙𑒧𑒹 𑒮𑒧𑓂𑒧𑒱𑒪𑒱𑒞 𑒏𑒋 𑒮𑒏𑒻𑒞 𑒕𑒲। 𑒥𑓂𑒪𑒰𑒑𑒩𑒏 𑒦𑒲𑒞𑒩 𑒣𑓂𑒩𑒏𑒰𑒬𑒢𑒏 𑒁𑒢𑓂𑒞𑒩𑓂𑒑𑒞 𑒨𑒴.𑒂𑒩.𑒋𑒪. 𑒮𑒳𑒫𑒱𑒡𑒰 𑓑𑓐 𑒛𑒰𑒪𑒩 𑒮𑒰𑒪𑒰𑒢𑒰𑒣𑒩 𑒂 𑒋𑒤.𑒙𑒲.𑒣𑒲. 𑒁𑒣𑒪𑒼𑒛 𑒄 𑒠𑒳𑒢𑒴 𑒮𑒳𑒫𑒱𑒡𑒰 𑒅𑒣𑒪𑒥𑓂𑒡 𑒕𑒻।
𑒂𑒥 𑒔𑒩𑒔𑒰 𑒤𑒹𑒫 𑒂𑒃𑒏𑒢𑒏। 𑒁𑒣𑒢 𑒪𑒼𑒑𑒼 𑒥𑓂𑒩𑒰𑒅𑒖𑒩𑒏 𑒣𑒞𑒰𑒏 𑒮𑓀𑒑 𑒠𑒹𑒥𑒰𑒏 𑒪𑒹𑒪 .ico 𑒣𑓂𑒩𑒰𑒩𑒴𑒣𑒧𑒹 𑒪𑒼𑒑𑒼𑒏 𑒔𑒱𑒞𑓂𑒩 𑒥𑒢𑒰𑒆 𑒂 𑒁𑒣𑒪𑒼𑒛 𑒏𑒩𑒴, 𑒮𑓀𑒑𑒧𑒹 𑒮𑓂𑒙𑒰𑒃𑒪𑒮𑒲𑒙𑒣𑒩 𑒋𑒏𑒩 𑒫𑒱𑒫𑒩𑒝 𑒠𑒋 𑒠𑒱𑒨𑒾𑒏। 𑒥𑓂𑒪𑒰𑒑𑒩𑒏 𑒦𑒲𑒞𑒩 𑒣𑓂𑒩𑒏𑒰𑒬𑒢𑒏 𑒁𑒢𑓂𑒞𑒩𑓂𑒑𑒞 𑒨𑒴.𑒂𑒩.𑒋𑒪. 𑒮𑒳𑒫𑒱𑒡𑒰 𑓑𑓐 𑒛𑒰𑒪𑒩 𑒮𑒰𑒪𑒰𑒢𑒰𑒣𑒩 𑒑𑒴𑒑𑒪𑒮𑓀 𑒪𑒹𑒥, 𑒞𑒿 𑒍𑒯𑒱𑒧𑒹 𑒤𑒹𑒫 𑒂𑒃𑒏𑒰𑒢 𑒑𑒴𑒑𑒪 𑒥𑒪𑒰 𑒠𑒹𑒐𑒰𑒃 𑒣𑒛𑓃𑒞, 𑒧𑒳𑒠𑒰 𑒫𑒩𑓂𑒛𑒣𑓂𑒩𑒹𑒮𑒧𑒹 𑒁𑒣𑒢 𑒤𑒹𑒫 𑒂𑒃𑒏𑒰𑒢 𑒥𑓂𑒪𑒰𑒑 𑒂 𑒏𑒮𑓂𑒙𑒧𑒰𑒃𑒖𑓂𑒛 𑒛𑒼𑒧𑒹𑒢𑒢𑒹𑒧-𑒥𑓂𑒪𑒰𑒑 𑒠𑒳𑒢𑒴 𑒣𑒩 𑒠𑒋 𑒮𑒏𑒻𑒞 𑒕𑒲।
𑒁𑒣𑒢 𑒄-𑒣𑒞𑓂𑒩𑒧𑒹 𑒮𑒱𑒑𑒢𑒹𑒔𑒩, 𑒧𑒰𑒨 𑒮𑓂𑒣𑒹𑒮, 𑒤𑒹𑒮𑒥𑒳𑒏, 𑒍𑒩𑒏𑒳𑒙, 𑒙𑓂𑒫𑒱𑒙𑒩,𑒨𑒴 𑒙𑓂𑒨𑒴𑒥, 𑒣𑒱𑒏𑒰𑒮𑒰, 𑒨𑒰𑒯𑒴𑒑𑓂𑒩𑒳𑒣 𑒂 𑒑𑒴𑒑𑒪𑒑𑓂𑒩𑒳𑒣 𑒏𑒹𑒩 𑒧𑒰𑒡𑓂𑒨𑒧𑒮𑒿, 𑒂𑒩.𑒋𑒮.𑒋𑒮.𑒤𑒲𑒛 𑒂 𑒯𑒹𑒛𑒪𑒰𑒃𑒢 𑒋𑒢𑒲𑒧𑒹𑒙𑒩 𑒖𑒹 𑒄-𑒣𑒞𑓂𑒩 𑒮𑒱𑒑𑒢𑒹𑒔𑒩𑒧𑒹 𑒮𑒹𑒯𑒼 𑒩𑒰𑒐𑒪 𑒖𑒰 𑒮𑒏𑒻𑒞 𑒁𑒕𑒱 𑒏𑒹𑒩 𑒧𑒰𑒡𑓂𑒨𑒧𑒮𑒿 𑒮𑒹𑒯𑒼 𑒋𑒏𑒩 𑒣𑓂𑒩𑒔𑒰𑒩 𑒏𑒋 𑒮𑒏𑒻𑒞 𑒕𑒲।
𑒑𑒴𑒑𑒪 𑒋𑒢𑒹𑒪𑒹𑒙𑒱𑒏𑓂𑒮 𑒂 𑒫𑒹𑒥𑒧𑒰𑒮𑓂𑒙𑒩 𑒙𑒴𑒪𑒏 𑒮𑒹𑒯𑒼 𑒅𑒣𑒨𑒼𑒑 𑒏𑒩𑒴। 𑒋𑒢𑒹𑒪𑒹𑒙𑒱𑒏𑓂𑒮𑒏 𑒙𑓂𑒩𑒻𑒏𑒩 𑒏𑒼𑒛 𑒮𑒦 𑒣𑒵𑒭𑓂𑒚𑒣𑒩 𑒠𑒱𑒁 𑒖𑒰𑒯𑒱𑒮𑒿 𑒣𑓂𑒩𑒞𑒱𑒠𑒱𑒢 𑒏𑒞𑒋𑒮𑒿 𑒏𑒹 𑒂 𑒏𑒼𑒢𑒰 𑒁𑒯𑒰𑒿𑒏 𑒖𑒰𑒪𑒮𑓂𑒟𑒪𑒣𑒩 𑒁𑒋𑒪𑒰𑒯, 𑒞𑒏𑒩 𑒖𑒰𑒢𑒏𑒰𑒩𑒲 𑒦𑒹𑒙𑒱 𑒮𑒏𑒞 𑒂 𑒫𑒹𑒥𑒧𑒰𑒮𑓂𑒙𑒩 𑒙𑒴𑒪𑒮𑒿 𑒖𑒰𑒪𑒮𑓂𑒟𑒪 𑒫𑒹𑒩𑒲𑒤𑒰𑒃 𑒏𑒩𑒴 𑒂 .xml 𑒤𑒰𑒃𑒪 𑒮𑒥𑒧𑒱𑒙 𑒏𑒩𑒴।
𑒨𑒠𑒱 𑒏𑒼𑒢𑒼 𑒣𑒵𑒭𑓂𑒚𑒣𑒩 𑒏𑒼𑒢𑒼 𑒤𑒼𑒙𑒼/ 𑒪𑒱𑓀𑒏𑒏𑒹𑒿 𑒠𑒼𑒮𑒩 𑒙𑒻𑒥/ 𑒑𑒫𑒹𑒭𑒏𑒧𑒹 𑒐𑒼𑒪𑒋 𑒔𑒰𑒯𑒲 𑒞𑒿 𑒙𑒰𑒩𑒑𑒹𑒙 𑒤𑓂𑒩𑒹𑒧/ 𑒢𑓂𑒨𑒴 𑒫𑒱𑒢𑓂𑒛𑒼-𑒥𑓂𑒪𑒻𑓀𑒏 𑒔𑒳𑒢𑒴।
𑒣𑒲.𑒛𑒲.𑒋𑒤.𑒮𑒿 𑒮𑒹𑒫 𑒋𑒖 𑒙𑒹𑒏𑓂𑒮𑓂𑒙 𑒏𑒹𑒪𑒰𑒣𑒩 𑒠𑒹𑒫𑒢𑒰𑒑𑒩𑒲 𑒩𑒴𑒣 𑒨𑒴𑒢𑒲𑒏𑒼𑒛𑒧𑒹 𑒂 𑒏𑒐𑒢𑒼 𑒏𑒰𑒪 𑒂𑒢𑒼𑒧𑒹 𑒢𑒯𑒱 𑒮𑒹𑒫 𑒯𑒼𑒃𑒞 𑒕𑒻। 𑒨𑒴𑒢𑒲𑒢𑒰𑒑𑒩𑒲𑒧𑒹 𑒣𑒲.𑒛𑒲.𑒋𑒤.𑒮𑒿 𑒏𑒰𑒣𑒲 𑒏𑒋 𑒣𑒹𑒮𑓂𑒙 𑒏𑒹𑒪𑒰𑒮𑒿 𑒠𑒹𑒫𑒢𑒰𑒑𑒩𑒲 𑒩𑒴𑒣 𑒂𑒥𑒱 𑒖𑒰𑒃𑒞 𑒕𑒻, 𑒂𑒮𑓂𑒏𑒲 𑒏𑒢𑓂𑒫𑒩𑓂𑒙𑒩𑒏 𑒮𑒯𑒰𑒨𑒞𑒰𑒮𑒿 𑒣𑒲.𑒛𑒲.𑒋𑒤𑒮𑒿 𑒨𑒴𑒢𑒲𑒏𑒼𑒛𑒧𑒹 𑒮𑒹𑒯𑒼 𑒥𑒠𑒪𑒻𑒞 𑒕𑒻, 𑒧𑒳𑒠𑒰 𑒣𑓂𑒩𑒰𑒩𑒴𑒣𑒝 𑒐𑒞𑒧 𑒦𑒋 𑒖𑒰𑒃𑒞 𑒕𑒻।
𑒤𑒢𑓂𑒙 𑒏𑒢𑓂𑒫𑒩𑓂𑒙𑒩𑒧𑒹 SIL 𑒏𑒢𑓂𑒫𑒩𑓂𑒙𑒩 𑒋𑒯𑒢 𑒙𑒴𑒪 𑒁𑒕𑒱 𑒖𑒰𑒯𑒱𑒧𑒹 𑒣𑓂𑒩𑒰𑒩𑒴𑒣𑒝 𑒐𑒞𑒧 𑒢𑒯𑒱 𑒯𑒼𑒃𑒞 𑒁𑒕𑒱 𑒂 𑒄 𑒁𑒕𑒱𑒨𑒼 𑒤𑓂𑒩𑒲 𑒞𑒢𑓂𑒞𑓂𑒩𑒰𑓀𑒬।

𑒮𑒲-𑒛𑒻𑒏 𑒣𑒳𑒝𑒹𑒏 𑒁𑒍𑒖𑒰𑒩 𑒂 𑒤𑒰𑒢𑓂𑒙 𑒮𑒹𑒯𑒼 𑒕𑒻 𑒧𑒳𑒠𑒰 𑒍𑒯𑒱𑒮𑒿 𑒫𑒱𑒬𑒹𑒭 𑒪𑒰𑒦 𑒣𑒩𑒱𑒪𑒏𑓂𑒭𑒱𑒞 𑒢𑒯𑒱 𑒦𑒋 𑒩𑒯𑒪 𑒁𑒕𑒱, 𑒅𑒢𑒙𑒹 𑒥𑒯𑒳𑒞 𑒩𑒰𑒮 𑒠𑒱𑒏𑓂𑒏𑒞 𑒖𑒹𑒢𑒰 “𑒠𑓂 𑒡” 𑒂 “𑒑𑓂 𑒩” 𑒏𑓂𑒩𑒧𑒬𑓁 𑒠𑓂𑒡 𑒂 𑒑𑓂𑒩 𑒏𑒹𑒩 𑒥𑒠𑒪𑒰𑒧𑒹 𑒠𑒹𑒐𑒥𑒰𑒧𑒹 𑒂𑒍𑒞।
𑒫𑒱𑒠𑒹𑒯 𑒄-𑒣𑒞𑓂𑒩𑒱𑒏𑒰 http://www.videha.co.in/ 𑒣𑒩 𑒂𑒢𑒪𑒰𑒃𑒢 𑒨𑒴𑒢𑒲𑒏𑒼𑒛 𑒙𑒰𑒃𑒣𑒩𑒰𑒃𑒙𑒩 𑒅𑒣𑒪𑒥𑓂𑒡 𑒁𑒕𑒱। 𑒫𑒱𑒬𑒹𑒭 𑒠𑒱𑒏𑓂𑒏𑒞 𑒦𑒹𑒪𑒰𑒣𑒩/ 𑒫𑒰 𑒋𑒏𑒩 𑒂𑒤𑒪𑒰𑒃𑒢 𑒩𑒴𑒣 𑒯𑒧𑒩𑒰𑒮𑒿 ggajendra@videha.com 𑒣𑒩 𑒄-𑒧𑒹𑒪 𑒏𑒋 𑒧𑒿𑒑𑒥𑒰 𑒮𑒏𑒻𑒞 𑒕𑒲/ 𑒠𑒼𑒮𑒩 𑒖𑒰𑒢𑒏𑒰𑒩𑒲 𑒣𑒴𑒕𑒱 𑒮𑒏𑒻𑒞 𑒕𑒲।

𑒪𑒼𑒩𑒱𑒏 𑒑𑒰𑒟𑒰𑒧𑒹 𑒮𑒧𑒰𑒖 𑒍 𑒮𑓀𑒮𑓂𑒏𑒵𑒞𑒱
𑒪𑒼𑒩𑒱𑒏 𑒑𑒰𑒟𑒰𑒧𑒹 𑒢𑒯𑒱 𑒞𑒿 𑒏𑒼𑒢𑒼 𑒃𑒞𑒱𑒯𑒰𑒮 𑒣𑓂𑒩𑒮𑒱𑒠𑓂𑒡 𑒩𑒰𑒖𑒰𑒏 𑒢𑒰𑒧 𑒂 𑒢𑒯𑒱𑒨𑒹 𑒪𑒼𑒩𑒱𑒏𑒏 𑒖𑒢𑓂𑒧 𑒂𑒏𑒱 𑒫𑒱𑒫𑒰𑒯𑒏 𑒞𑒱𑒟𑒱𑒏 𑒔𑒩𑒔𑒰 𑒁𑒕𑒱। 𑒦𑒰𑒭𑒰𑒏 𑒮𑓂𑒫𑒩𑒴𑒣 𑒧𑒾𑒐𑒱𑒏 𑒩𑒯𑒥𑒰𑒏 𑒏𑒰𑒩𑒝𑒮𑒿 𑒑𑒞𑒱𑒬𑒲𑒪 𑒁𑒕𑒱। 𑒏𑒰𑒪 𑒢𑒱𑒩𑓂𑒡𑒰𑒩𑒝 𑒮𑒹𑒯𑒼 𑒁𑒢𑒳𑒧𑒰𑒢𑒣𑒩 𑒂𑒡𑒰𑒩𑒱𑒞 𑒁𑒕𑒱। 𑒪𑒼𑒩𑒱𑒏𑒏 𑒖𑒢𑓂𑒧-𑒮𑓂𑒟𑒰𑒢 𑒑𑒾𑒩𑒰 𑒑𑒰𑒧 𑒁𑒕𑒱 𑒂 𑒏𑒰𑒩𑓂𑒨-𑒏𑒩𑓂𑒧 𑒏𑓂𑒭𑒹𑒞𑓂𑒩 𑒣𑓀𑒖𑒰𑒥𑒮𑒿 𑒢𑒹𑒣𑒰𑒪 𑒂 𑒥𑓀𑒑𑒰𑒪 𑒡𑒩𑒱 𑒁𑒕𑒱। 𑒮𑒰𑒮𑒳𑒩 𑒁𑒑𑒼𑒩𑒲 𑒑𑒰𑒧 𑒁𑒕𑒱 𑒖𑒹 𑒮𑒼𑒢 𑒡𑒰𑒩𑒏 𑒏𑒰𑒞𑒧𑒹 𑒥𑒞𑒰𑒍𑒪 𑒑𑒹𑒪 𑒁𑒕𑒱।
𑒪𑒼𑒩𑒱𑒏𑒏 𑒫𑒱𑒫𑒰𑒯- 𑒣𑒯𑒱𑒪 𑒫𑒱𑒫𑒰𑒯 𑒁𑒑𑒼𑒩𑒲 𑒑𑒰𑒧𑒏 𑒧𑓀𑒖𑒩𑒲𑒮𑒿 𑒠𑒼𑒮𑒩 𑒥𑒱𑒨𑒰𑒯 𑒔𑒢𑒧𑒰𑒮𑒿 𑒖𑒏𑒩𑒰𑒮𑒿 𑒔𑒢𑒩𑒻𑒞𑒰 𑒢𑒰𑒧𑓂𑒢𑒰 𑒣𑒳𑒞𑓂𑒩। 𑒞𑒹𑒮𑒩 𑒥𑒱𑒨𑒰𑒯 𑒯𑒩𑒠𑒲𑒑𑒜𑓃𑒏 𑒖𑒰𑒠𑒴𑒑𑒩𑒢𑒲 𑒖𑒧𑒳𑒢𑒲 𑒥𑒢𑒱𑒨𑒰𑒃𑒢𑒮𑒿 𑒖𑒰𑒯𑒱𑒮𑒿 𑒥𑒼𑒮𑒰𑒩𑒐 𑒢𑒰𑒧𑓂𑒢𑒰 𑒣𑒳𑒞𑓂𑒩।
𑒫𑒲𑒩 𑒪𑒼𑒩𑒱𑒏𑒏 𑒦𑒰𑒋 𑒮𑒿𑒫𑒩𑒴 𑒮𑒹𑒯𑒼 𑒫𑒲𑒩। 𑒍 𑒏𑒼𑒪 𑒩𑒰𑒖𑒰 𑒠𑒹𑒫𑒮𑒱𑒨𑒰 𑒠𑓂𑒫𑒰𑒩𑒰 𑒧𑒰𑒩𑒪 𑒑𑒹𑒪𑒰𑒯। 𑒥𑒰𑒠𑒧𑒹 𑒪𑒼𑒩𑒱𑒏 𑒮𑒹𑒯𑒼 𑒨𑒳𑒠𑓂𑒡 𑒏𑒩𑒻𑒞 𑒒𑒰𑒨𑒪 𑒦𑓄 𑒖𑒰𑒃𑒞 𑒕𑒟𑒱 𑒂 𑒥𑒼𑒯𑒰 𑒥𑒟𑒰𑒢𑒣𑒩 𑒪𑒼𑒩𑒱𑒏𑒏 𑒥𑒹𑒙𑒰 𑒦𑒼𑒩𑒱𑒏 𑒠𑒹𑒫𑒮𑒱𑒨𑒰𑒏𑒹𑒿 𑒣𑒩𑒰𑒖𑒱𑒞 𑒏𑒩𑒻𑒞 𑒁𑒕𑒱। 𑒪𑒼𑒩𑒱𑒏 𑒥𑒴𑒜𑓃 𑒦𑒹𑒪𑒰𑒣𑒩 𑒁𑒑𑓂𑒢𑒱 𑒮𑒧𑒰𑒡𑒱 𑒪𑒻𑒞 𑒕𑒟𑒱।
𑒪𑒼𑒩𑒱𑒏𑒏 𑒏𑒟𑒰- 𑒮𑒰𑒥𑒾𑒩𑒏 𑒖𑒢𑓂𑒧 𑒂 𑒪𑒼𑒩𑒱𑒏 𑒁𑒫𑒞𑒰𑒩, 𑒮𑒿𑒫𑒩𑒴𑒏 𑒫𑒱𑒫𑒰𑒯, 𑒧𑒰𑒿𑒖𑒻𑒩𑒏 𑒖𑒢𑓂𑒧, 𑒪𑒼𑒩𑒱𑒏-𑒧𑒰𑒿𑒖𑒻𑒩 𑒫𑒱𑒫𑒰𑒯 𑒂 𑒩𑒰𑒖𑒰 𑒧𑒾𑒪𑒰𑒑𑒞 𑒂 𑒢𑒱𑒩𑒧𑒪𑒱𑒨𑒰𑒮𑒿 𑒨𑒳𑒠𑓂𑒡, 𑒮𑒿𑒫𑒩𑒴 𑒂 𑒮𑒞𑒱𑒨𑒰𑒏 𑒫𑒱𑒫𑒰𑒯, 𑒗𑒱𑒧𑒪𑒲-𑒪𑒼𑒩𑒱𑒏 𑒨𑒳𑒠𑓂𑒡, 𑒔𑒢𑒻𑒢𑒱𑒨𑒰-𑒬𑒱𑒫𑒯𑒩 𑒫𑒱𑒫𑒰𑒯 𑒂 𑒪𑒼𑒩𑒱𑒏-𑒥𑒹𑓀𑒚𑒰 𑒔𑒧𑒰𑒩𑒏 𑒨𑒳𑒠𑓂𑒡। 𑒋𑒯𑒱 𑒑𑒰𑒟𑒰𑒧𑒹 𑒪𑒼𑒩𑒱𑒏-𑒔𑒢𑒧𑒰 𑒣𑓂𑒩𑒹𑒧 𑒂 𑒯𑒩𑒠𑒲𑒑𑒜𑓃 𑒣𑓂𑒩𑒮𑓂𑒟𑒰𑒢 𑒂 𑒩𑒰𑒖𑒰 𑒩𑒝𑒣𑒰𑒪 𑒂 𑒧𑒯𑒱𑒣𑒞𑒮𑒿 𑒪𑒼𑒩𑒱𑒏𑒏 𑒨𑒳𑒠𑓂𑒡। 𑒪𑒼𑒩𑒱𑒏 𑒂 𑒔𑒢𑒧𑒰𑒏 𑒯𑒩𑒠𑒲𑒑𑒜𑓃𑒧𑒹 𑒢𑒱𑒫𑒰𑒮, 𑒪𑒼𑒩𑒱𑒏 𑒑𑒖𑒦𑒱𑒧𑒪𑒰 𑒨𑒳𑒠𑓂𑒡, 𑒢𑒹𑒆𑒩𑒣𑒳𑒩𑒏 𑒔𑒜𑓃𑒰𑒃 𑒂 𑒪𑒼𑒩𑒱𑒏-𑒯𑒩𑒹𑒥𑒰-𑒥𑒩𑒹𑒥𑒰 𑒨𑒳𑒠𑓂𑒡, 𑒮𑓀𑒫𑒩𑒴 𑒂 𑒏𑒼𑒪 𑒨𑒳𑒠𑓂𑒡𑒧𑒹 𑒮𑒿𑒫𑒩𑒴𑒏 𑒧𑒵𑒞𑓂𑒨𑒳, 𑒪𑒼𑒩𑒱𑒏𑒏 𑒥𑒼𑒯𑒰 𑒥𑒟𑒰𑒢 𑒂𑒑𑒧𑒢, 𑒣𑒲𑒣𑒩𑒲𑒑𑒜𑓃𑒏 𑒔𑒜𑓃𑒰𑒄 𑒂 𑒪𑒼𑒩𑒱𑒏 𑒂 𑒠𑒹𑒫𑒮𑒱𑒨𑒰 𑒨𑒳𑒠𑓂𑒡, 𑒪𑒼𑒩𑒱𑒏𑒏 𑒠𑒹𑒯𑒞𑓂𑒨𑒰𑒑 𑒂 𑒦𑒼𑒩𑒱𑒏𑒏 𑒢𑒹𑒞𑒵𑒞𑓂𑒫। 𑒣𑒱𑒣𑒩𑒲𑒏 𑒣𑒯𑒱𑒪 𑒪𑒛𑓃𑒰𑒃 𑒮𑒿𑒫𑒩𑒴𑒏 𑒮𑓀𑒑, 𑒣𑒱𑒣𑒩𑒲𑒏 𑒠𑒼𑒮𑒩 𑒪𑒛𑓃𑒰𑒃 𑒪𑒼𑒩𑒱𑒏𑒏 𑒮𑓀𑒑 𑒦𑒹𑒪। 𑒤𑒹𑒩 𑒪𑒼𑒩𑒱𑒏𑒏 𑒏𑒰𑒬𑒲𑒫𑒰𑒮 𑒂 𑒧𑒵𑒞𑓂𑒨𑒳 𑒯𑒼𑒃𑒞 𑒕𑒢𑓂𑒯𑒱।

𑒪𑒼𑒩𑒱𑒏 𑒧𑒢𑒳𑒂𑒩 𑒑𑒰𑒟𑒰𑒏 𑒡𑒰𑒩𑓂𑒧𑒱𑒏 𑒮𑒰𑒧𑒰𑒖𑒱𑒏 𑒂 𑒩𑒰𑒖𑒢𑒲𑒞𑒱𑒏 𑒣𑒏𑓂𑒭 :
𑒪𑒼𑒩𑒱𑒏 𑒁𑒖𑓂𑒘𑒰𑒞 𑒢𑒰𑒧 𑒑𑒼𑒞𑓂𑒩𑒮𑒿 𑒅𑒞𑓂𑒣𑒢𑓂𑒢। 𑒨𑒰𑒠𑒫 𑒖𑒰𑒞𑒱 𑒁𑒣𑒢 𑒣𑒴𑒖𑓂𑒨 𑒪𑒼𑒩𑒱𑒏𑒏 𑒮𑒧𑓂𑒧𑒰𑒢 𑒕𑒰𑒿𑒏 𑒣𑒴𑒖𑒰𑒮𑒿 𑒏𑒩𑒻𑒞 𑒕𑒟𑒱 𑒂 𑒪𑒼𑒏𑒠𑒹𑒫, 𑒪𑒼𑒏𑒢𑒰𑒨𑒏 𑒩𑒴𑒣𑒹𑒿 𑒮𑒧𑓂𑒧𑒰𑒢 𑒠𑒻𑒞 𑒕𑒟𑒱।
𑒪𑒼𑒩𑒱𑒏𑒰𑒨𑒢𑒏 𑒧𑒻𑒟𑒱𑒪𑒲 𑒮𑓂𑒫𑒩𑒴𑒣 𑒣𑒳𑒩𑒰𑒞𑒞𑓂𑒫𑒫𑒹𑒞𑒰 𑒁𑒪𑒹𑒏𑓂𑒖𑒹𑒢𑓂𑒛𑒩 𑒏𑒢𑒱𑓀𑒒𑒧𑒏 𑒮𑓀𑒏𑒪𑒢𑒧𑒹 𑒁𑒕𑒱। 𑒏𑓂𑒫𑒰𑒩𑓂𑒙𑒩𑒪𑒲 𑒖𑒩𑓂𑒢𑒪 𑒂𑒤 𑒠 𑒧𑒲𑒟𑒱𑒏 𑒮𑒼𑒮𑒰𑒃𑒙𑒲 (𑒦𑒰𑒑-𑓕, 𑒣𑒵.𑓑𑓒𑓒 𑒮𑒿 𑓑𑓓𑓕) 𑒧𑒹 𑒦𑒰𑒑𑒪𑒣𑒳𑒩𑒏 𑒪𑒼𑒩𑒱𑒏𑒰𑒨𑒢𑒏 𑒔𑒩𑒔𑒰। 𑒂𑒩𑓂𑒏𑓂𑒨𑒼𑒪𑒼𑒖𑒱𑒏𑒪 𑒮𑒩𑓂𑒫𑒹 𑒩𑒱𑒣𑒼𑒩𑓂𑒙 𑒐𑒝𑓂𑒛 𑓑𑓖 (𑓑𑓘𑓘𑓓 𑒄.) 𑒣𑒵.𑓒𑓗-𑓒𑓘 𑒧𑒹 𑒏𑒢𑒱𑒿𑒒𑒧𑒏 𑒨𑒰𑒞𑓂𑒩𑒰 𑒫𑒵𑒞𑓂𑒞𑒰𑒢𑓂𑒞𑒧𑒹 𑒪𑒼𑒩𑒱𑒏 𑒂 𑒮𑒹𑒅𑒯𑒩 𑒫𑒰 𑒮𑒩𑒱𑒏𑒏𑒰 𑒢𑒰𑒧𑓂𑒢𑒰 𑒠𑒴 𑒙𑒰 𑒣𑒛𑓃𑒼𑒮𑒲 𑒩𑒰𑒖𑒰𑒏𑒹𑒿 𑒑𑒾𑒩𑒰 𑒑𑒰𑒧𑒏 𑒢𑒱𑒫𑒰𑒮𑒲 𑒏𑒯𑒪 𑒑𑒹𑒪 𑒁𑒕𑒱।
𑒦𑒰𑒑𑒪𑒣𑒳𑒩 𑒑𑒖𑒹𑒙𑒱𑒨𑒩 (𑒣𑒵.𑓔𑓘-𑓕𑓐) 𑒧𑒹 𑒖𑒰𑒢 𑒯𑒢𑓂𑒙𑒩 𑒪𑒼𑒩𑒱𑒏 𑒫𑒱𑒭𑒨𑒏 𑒩𑒱𑒣𑒼𑒩𑓂𑒙 𑒠𑒹𑒢𑒹 𑒕𑒟𑒱।
𑒪𑒼𑒩𑒱𑒏 𑒑𑒰𑒟𑒰 𑒪𑒼𑒩𑒱𑒏𑒰𑒨𑒢, 𑒪𑒼𑒩𑒱𑒏𑒲 𑒂 𑒪𑒼𑒩𑒱𑒏 𑒧𑒢𑒱𑒂𑒩 𑒢𑒰𑒧𑒮𑒿 𑒣𑓂𑒩𑒮𑒱𑒠𑓂𑒡 𑒁𑒕𑒱। 𑒧𑒱𑒟𑒱𑒪𑒰𑒧𑒹 𑒋𑒏𑒩 𑒣𑓂𑒩𑒬𑒮𑓂𑒞𑒱 𑒪𑒼𑒩𑒱𑒏 𑒧𑒢𑒱𑒂𑒩 𑒢𑒰𑒧𑒮𑒿 𑒁𑒕𑒱।
𑒪𑒼𑒩𑒱𑒏𑒏 𑒢𑒻𑒞𑒏 (𑒥𑒹𑒙𑒰𑒏 𑒥𑒹𑒙𑒰) 𑒢𑒰𑒧 𑒃𑒢𑓂𑒠𑒪 𑒩𑒯𑒋। 𑒧𑒻𑒟𑒱𑒪𑒲𑒏 𑒪𑒼𑒩𑒱𑒏 𑒧𑒢𑒱𑒂𑒩𑒧𑒹 𑒪𑒼𑒩𑒱𑒏𑒏 𑒫𑒱𑒫𑒰𑒯 𑒣𑓂𑒩𑒮𑓀𑒑 𑒂 𑒪𑒼𑒩𑒱𑒏𑒏 𑒏𑒢𑒱𑒨𑒰𑒿 𑒞𑒏𑒥𑒰𑒮𑒿 𑒪𑓄 𑒩𑒰𑒖𑒰 𑒮𑒯𑒠𑒹𑒫𑒮𑒿 𑒨𑒳𑒠𑓂𑒡 𑒏𑒹𑒩 𑒫𑒱𑒮𑓂𑒞𑒵𑒞 𑒔𑒩𑒔𑒰 𑒁𑒕𑒱।
𑒧𑒯𑒳𑒁𑒩𑒱 𑒐𑒝𑓂𑒛𑒧𑒹 𑒑𑒖𑒦𑒲𑒧𑒪𑒏 𑒁𑒐𑒰𑒛𑓃𑒰 𑒖𑒋𑒥𑒰𑒏 𑒪𑒹𑒪 𑒒𑒼𑒛𑓃𑒰 𑒔𑒳𑒢𑒥 𑒂 𑒑𑒖𑒦𑒲𑒧𑒪𑒏𑒹𑒿 𑒣𑒙𑒏𑒱-𑒣𑒙𑒏𑒱 𑒏𑓄 𑒧𑒰𑒩𑒥𑒰𑒏 𑒫𑒩𑓂𑒝𑒢।
𑒪𑒼𑒩𑒱𑒏 𑒠𑓂𑒫𑒰𑒩𑒰 𑒯𑒩𑒥𑒰-𑒥𑒩𑒥𑒰𑒏 𑒫𑒡।
𑒋𑒯𑒱 𑒑𑒰𑒟𑒰𑒏 𑒣𑓂𑒩𑒰𑒩𑒧𑓂𑒦𑒧𑒹 𑒮𑒳𑒧𑒱𑒩𑒢 𑒂 𑒥𑒢𑓂𑒯𑒢 𑒯𑒼𑒃𑒞 𑒁𑒕𑒱।
𑒮𑒳𑒧𑒱𑒩𑒢- 𑒃𑒢𑒞𑒲 𑒏𑒩𑒻 𑒕𑒲 𑒠𑒳𑒩𑒳𑒑𑒰 𑒧𑒱𑒢𑒞𑒲 𑒞𑒼𑒯𑒰𑒩।
𑒥𑒢𑓂𑒯𑒢- 𑒂-𑒠𑒳𑒩𑒳𑒑𑒰 𑒑𑒃 𑒣𑒳𑒩𑒳𑒥 𑒐𑒝𑓂𑒛 𑒯𑒹 𑒑𑒃
𑒤𑒹𑒩:
𑓑. 𑒫𑒱𑒫𑒰𑒯 𑒐𑒝𑓂𑒛, 𑓒. 𑒧𑒯𑒳𑒁𑒩𑒱 𑒐𑒝𑓂𑒛, 𑓓. 𑒨𑒳𑒠𑓂𑒡 𑒐𑒝𑓂𑒛

𑒧𑒝𑒱𑒣𑒠𑓂𑒧𑒖𑒲𑒏 𑒫𑒱𑒫𑒩𑒝- 𑓑. 𑒖𑒢𑓂𑒧 𑒐𑒝𑓂𑒛, 𑓒. 𑒮𑒞𑒲 𑒧𑒰𑒿𑒖𑒩𑒱 𑒐𑒝𑓂𑒛, 𑓓. 𑒔𑒢𑒻𑒢 𑒐𑒝𑓂𑒛, 𑓔. 𑒩𑒝𑒐𑒝𑓂𑒛, 𑓕. 𑒮𑒰𑒫𑒩 𑒐𑒝𑓂𑒛, 𑓖. 𑒥𑒰𑒖𑒱𑒪 𑒐𑒝𑓂𑒛, 𑓗. 𑒮𑒗𑒾𑒞𑒲 𑒐𑒝𑓂𑒛 𑒂 𑓘. 𑒢𑒹𑒣𑒰𑒪𑒮𑒿 𑒣𑓂𑒩𑒰𑒣𑓂𑒞 𑒦𑒻𑒩𑒫𑒲 𑒐𑒝𑓂𑒛।
-𑒑𑒾𑒩𑒰 𑒑𑒰𑒧𑒏 𑒥𑒳𑒜𑓃𑒏𑒴𑒫𑒰 𑒩𑒰𑒅𑒞- 𑒞𑒰𑒩𑒏 𑒑𑒰𑒕𑒏 𑒗𑒚𑒯𑒰 𑒥𑒢𑒥𑒻𑒞 𑒩𑒯𑒟𑒱। 𑓕-𑓗 𑒮𑒨 𑒣𑒯𑒪𑒧𑒰𑒢𑒏𑒹𑒿 𑒣𑒲𑒚𑒣𑒩 𑒪𑒰𑒠𑒱 𑒔𑒾𑒠𑒯 𑒏𑒼𑒮 𑒙𑒯𑒪𑒱 𑒂𑒥𑒟𑒱। 𑒧𑒳𑒠𑒰 𑒒𑒩-𑒒𑒩𑒰𑒩𑒲 𑒏𑒱𑒕𑒳𑒍 𑒢𑒯𑒱 𑒕𑒪𑒢𑓂𑒯𑒱। 𑒠𑒴 𑒙𑒰 𑒣𑒳𑒞𑓂𑒩 𑒪𑒼𑒩𑒱𑒏 𑒧𑒢𑒱𑒂𑒩 𑒂 𑒮𑒰𑒍𑒠 𑒮𑒩𑒠𑒰𑒩 𑒕𑒪𑒢𑓂𑒯𑒱।
-𑒁𑒑𑒾𑒩𑒲𑒏 𑒧𑒳𑒐𑒱𑒨𑒰 𑒮𑒹𑒫𑒰𑒔𑒢 𑒩𑒰𑒅𑒞𑒏 𑒁𑒮𑓂𑒮𑒲 𑒑𑒖𑒏 𑒡𑒼𑒞𑒲 𑒂 𑒥𑒰𑒫𑒢 𑒑𑒖𑒏 𑒧𑒳𑒩𑒹𑒚𑒰- 𑒞𑒹𑒞𑒪𑒱𑒨𑒰 𑒒𑒼𑒛𑓃𑒰 𑒕𑒪𑒢𑓂𑒯𑒱। 𑒣𑒳𑒞𑓂𑒩𑒲 𑒕𑒪𑒐𑒱𑒢𑓂𑒯 𑒧𑒰𑒿𑒖𑒩𑒱 𑒖𑒹 𑒮𑒰𑒞 𑒮𑒨 𑒮𑓀𑒑𑒲 𑒮𑓀𑒑𑒹 𑒮𑒳𑒣𑒞𑒲-𑒧𑒾𑒢𑒲 𑒐𑒹𑒪𑒰𑒃𑒞 𑒩𑒯𑒟𑒱। 𑒍𑒏𑒩 𑒥𑒱𑒨𑒰𑒯 𑒪𑒹𑒪 𑒮𑒹𑒫𑒰𑒔𑒢 𑒥𑒳𑒜𑓃𑒏𑒴𑒥𑒰𑒏 𑒍𑒞𑒨 𑒪𑒼𑒩𑒱𑒏𑒮𑒿 𑒁𑒐𑒛𑓃𑒯𑒰𑒣𑒩 𑒦𑒱𑒩𑒪- 𑒕𑒣𑓂𑒣𑒢 𑒧𑒼𑒢 𑒧𑒰𑒙𑒱𑒮𑒿 𑒞𑒩𑒯𑒞𑓂𑒟𑒲 𑒧𑒪𑒢𑒱𑒯𑒰𑒩 𑒮𑒹𑒫𑒰𑒔𑒢𑒏𑒹𑒿 𑒪𑒼𑒩𑒱𑒏 𑒙𑒰𑒪𑒱-𑒑𑒳𑒪𑓂𑒪𑒲 𑒖𑒹𑒏𑒰𑒿 𑒆𑒣𑒩 𑒤𑒹𑒏𑒱 𑒠𑒹𑒪𑒏 𑒂 𑒑𑒹𑒢 𑒖𑒹𑒏𑒰𑒿 𑒪𑒼𑒏𑒱 𑒏𑒋 𑒏𑒰𑒿𑒐 𑒞𑒩 𑒠𑒥𑒰 𑒪𑒹𑒪𑒏।
𑒥𑒱𑒨𑒰𑒯 𑒠𑒱𑒢 𑒩𑒰𑒖𑒰 𑒅𑒑𑒩𑒰 𑒣𑒧𑒰𑒩 𑒠𑓂𑒫𑒰𑒩𑒰 𑒥𑒴𑒜𑓃𑒏𑒴𑒥𑒰𑒏𑒹𑒿 𑒣𑒏𑒛𑓃𑒥𑒰𑒏 𑒣𑓂𑒩𑒨𑒰𑒮, 𑒧𑒳𑒠𑒰 𑒥𑒴𑒜𑓃𑒏𑒴𑒥𑒰 𑒦𑒏𑒳𑒪𑒰 𑒣𑒯𑒪𑒧𑒰𑒢𑒏 𑒑𑒩𑒠𑒢𑒱 𑒏𑒰𑒙𑒱 𑒪𑒹𑒪𑒏। 𑒫𑒱𑒫𑒰𑒯 𑒮𑒧𑓂𑒣𑒢𑓂𑒢 𑒦𑒹𑒪। 𑒩𑒰𑒖𑒰 𑒅𑒑𑒩𑒰 𑒣𑒧𑒰𑒩 𑒮𑒢𑒱𑒏𑒰-𑒧𑒢𑒱𑒏𑒰𑒏𑒹𑒿 𑒥𑒖𑒹𑒪𑒏- 𑒪𑒼𑒩𑒱𑒏 𑒮𑒢𑒱𑒏𑒰-𑒧𑒢𑒱𑒏𑒰𑒏 𑒧𑒴𑒛𑓃𑒲 𑒏𑒰𑒙𑒱 𑒪𑒹𑒪𑒏। 𑒑𑒾𑒩𑒰 𑒒𑒳𑒧𑒻𑒞 𑒏𑒰𑒪 𑒯𑒩𑒠𑒲𑒏 𑒩𑒰𑒖𑒰 𑒮𑒯𑒠𑒹𑒫𑒏 𑒂𑒏𑓂𑒩𑒧𑒝, 𑒪𑒼𑒩𑒱𑒏 𑒮𑒯𑒠𑒹𑒫𑒏𑒹𑒿 𑒯𑒩𑒰 𑒏𑒋 𑒍𑒏𑒩 𑒣𑒳𑒞𑓂𑒩𑒲 𑒔𑒢𑒰𑒃𑒏𑒹𑒿 𑒧𑒯𑒲𑒔𑒢𑒏 𑒂𑒿𑒑𑒢 𑒪𑓄 𑒖𑒰𑒋 𑒫𑒱𑒫𑒰𑒯 𑒏𑒋𑒪। 𑒞𑒐𑒢 𑒩𑒰𑒖𑒰 𑒧𑒯𑒳𑒁𑒩𑒱 𑒧𑒯𑒲𑒔𑒢𑒏𑒹𑒿 𑒏𑒰𑒩𑒰𑒧𑒹 𑒠𑓄 𑒠𑒹𑒪𑒏 𑒧𑒳𑒠𑒰 𑒤𑒹𑒩 𑒪𑒼𑒩𑒱𑒏𑒮𑒿 𑒛𑒩𑒰 𑒏𑒋 𑒕𑒼𑒛𑓃𑒱 𑒠𑒹𑒪𑒏। 𑒧𑒳𑒠𑒰 𑒮𑒱𑒪𑒯𑒙 𑒁𑒐𑒛𑓃𑒯𑒰𑒏 𑒮𑒩𑒠𑒰𑒩 𑒑𑒖𑒦𑒲𑒧𑒪𑒏𑒹𑒿 𑒣𑒚𑒰𑒍𑒪। 𑒧𑒳𑒠𑒰 𑒪𑒼𑒩𑒱𑒏 𑒍𑒏𑒩 𑒧𑒴𑒛𑓃𑒲 𑒏𑒰𑒙𑒱 𑒪𑒹𑒪𑒏 𑒂 𑒤𑒹𑒩 𑒩𑒰𑒖𑒰𑒮𑒿 𑒧𑒱𑒞𑓂𑒩𑒞𑒰 𑒦𑒹𑒪। 𑒠𑒳𑒢𑒴 𑒧𑒱𑒪𑒱 𑒩𑒰𑒖𑒰 𑒯𑒩𑒥𑒰-𑒥𑒩𑒥𑒰𑒮𑒿 𑒨𑒳𑒠𑓂𑒡 𑒏𑒋𑒪𑒏। 𑒯𑒩𑒥𑒰-𑒥𑒩𑒥𑒰 𑒦𑒰𑒑𑒪 𑒧𑒳𑒠𑒰 𑒡𑒳𑒟𑒩𑒰 𑒣𑒯𑒪𑒧𑒰𑒢𑒏𑒹𑒿 𑒣𑒚𑒰𑒍𑒪- 𑒪𑒼𑒩𑒱𑒏 𑒍𑒏𑒩 𑒠𑒯𑒱𑒢𑒰 𑒂𑒿𑒐𑒱 𑒢𑒱𑒏𑒰𑒪𑒱 𑒍𑒏𑒩 𑒖𑒲𑒯 𑒏𑒰𑒙𑒱 𑒪𑒹𑒪𑒏। 𑒯𑒩𑒥𑒰-𑒥𑒩𑒥𑒰𑒏 𑒣𑒳𑒢𑓁 𑒂𑒏𑓂𑒩𑒧𑒝 𑒂 𑒣𑒪𑒰𑒨𑒢 𑒧𑒳𑒠𑒰 𑒤𑒹𑒩 𑒦𑒰𑒑𑒱𑒢 𑒏𑒳𑒧𑒩 𑒁𑒢𑒰𑒩- 𑒪𑒼𑒩𑒱𑒏 𑒧𑒴𑒛𑓃𑒲 𑒏𑒰𑒙𑒱 𑒯𑒩𑒥𑒰-𑒥𑒩𑒥𑒰𑒏 𑒩𑒰𑒢𑒲 𑒣𑒠𑓂𑒧𑒰 𑒪𑒑 𑒍𑒏𑒩 𑒧𑒴𑒛𑓃𑒲 𑒤𑒹𑒏𑒪𑒏। 𑒤𑒹𑒩 𑒯𑒩𑒥𑒰-𑒥𑒩𑒥𑒰𑒏 𑒂𑒏𑓂𑒩𑒧𑒝-𑒛𑒱𑒯𑒳𑒪𑒲𑒏 𑒩𑒝𑒏𑓂𑒭𑒹𑒞𑓂𑒩𑒧𑒹 𑒯𑒰𑒫𑒲𑒑𑒜𑓃𑒏 𑒩𑒰𑒖𑒰 𑒯𑒩𑒥𑒰-𑒥𑒩𑒥𑒰𑒏 𑒧𑒴𑒛𑓃𑒲 𑒏𑒰𑒙𑒱 𑒩𑒰𑒖𑒣𑓂𑒩𑒮𑒰𑒠𑒏 𑒁𑒢𑓂𑒞𑓁𑒣𑒳𑒩𑒧𑒹 𑒤𑒹𑒏𑒪𑒏। 𑒪𑒼𑒩𑒱𑒏 𑒕𑒞𑓂𑒞𑒲𑒮 𑒙𑒰 𑒨𑒳𑒠𑓂𑒡 𑒏𑒋𑒪𑒢𑓂𑒯𑒱। 𑒪𑒼𑒩𑒱𑒏 𑒏𑒵𑒭𑒱𑒏 𑒫𑒱𑒏𑒰𑒮𑒧𑒹 𑒮𑒖𑒑 𑒕𑒪𑒰𑒯। 𑒏𑒰𑒩𑒝 -𑒠𑒼𑒮𑒩𑒰𑒏 𑒦𑒴𑒧𑒱𑒏 𑒁𑒡𑒱𑒑𑓂𑒩𑒯𑒝 𑒏𑒋 𑒥𑒯𑒳𑒮𑓀𑒐𑓂𑒨𑒏 𑒔𑒱𑒛𑓃𑒿𑒃, 𑒖𑒰𑒢𑒫𑒩 𑒂 𑒏𑒲𑒙-𑒣𑒞𑓀𑒑 𑒅𑒖𑒛𑓃𑒱 𑒑𑒹𑒪 𑒂 𑒍 𑒮𑒦 𑒃𑒢𑓂𑒠𑓂𑒩 𑒪𑒑 𑒑𑒹𑒪-– 𑒄 𑒫𑒩𑓂𑒝𑒢 𑒁𑒕𑒱।
-𑒮𑒧𑒰𑒖𑒏 𑒮𑒲𑒜𑓃𑒲𑒏 𑒂𑒃-𑒏𑒰𑒪𑓂𑒯𑒱𑒏 𑒢𑒲𑒔𑒰𑒿𑒏 𑒫𑒩𑓂𑒑 𑒂 𑒢𑒰𑒩𑒲 𑒮𑒧𑒰𑒖𑒏 𑒬𑒏𑓂𑒞𑒱𑒏 𑒫𑒱𑒮𑓂𑒞𑒰𑒩, 𑒂𑒡𑓂𑒨𑒰𑒞𑓂𑒧𑒱𑒏 𑒂 𑒪𑒾𑒏𑒱𑒏 𑒁𑒩𑓂𑒟 𑒠𑒳𑒢𑒴 𑒞𑒩𑒯𑒹𑒿।
- 𑒮𑒰𑒧𑒰𑒖𑒱𑒏 𑒮𑒲𑒜𑓃𑒲𑒏 𑒫𑒱𑒦𑒱𑒢𑓂𑒢 𑒮𑓂𑒞𑒩𑒏 𑒖𑒰𑒞𑒱𑒏 𑒁𑒢𑓂𑒞𑒩𑓂𑒫𑒱𑒩𑒼𑒡, 𑒂𑒃-𑒏𑒰𑒪𑓂𑒯𑒱𑒏 𑒞𑒟𑒰𑒏𑒟𑒱𑒞 𑒢𑒱𑒧𑓂𑒢 𑒖𑒰𑒞𑒱𑒏 𑒠𑒳𑒩𑒰𑒔𑒰𑒩𑒲 𑒣𑒰𑒞𑓂𑒩𑒏 𑒫𑒱𑒢𑒰𑒬 𑒪𑒼𑒩𑒱𑒏 𑒠𑓂𑒫𑒰𑒩𑒰। 𑒪𑒼𑒩𑒱𑒏𑒏 𑒦𑒑𑒫𑒞𑒲𑒣𑒩 𑒦𑒏𑓂𑒞𑒱 𑒕𑒪 𑒍𑒏𑒩 𑒫𑒱𑒖𑒨𑒏 𑒏𑒰𑒩𑒝।
𑒧𑒳𑒠𑒰 𑒪𑒼𑒩𑒱𑒏𑒏 𑒬𑒞𑓂𑒩𑒳𑒧𑒹 𑒞𑒟𑒰𑒏𑒟𑒱𑒞 𑒮𑒰𑒧𑒰𑒖𑒱𑒏 𑒮𑒲𑒜𑓃𑒲𑒣𑒩 𑒆𑒿𑒔 𑒮𑓂𑒟𑒰𑒢 𑒣𑓂𑒩𑒰𑒣𑓂𑒞 𑒧𑒼𑒔𑒢𑒱 𑒂 𑒑𑒖𑒦𑒲𑒧𑒪 𑒕𑒪 𑒞𑒿 𑒧𑒱𑒞𑓂𑒩𑒧𑒹 𑒮𑒹𑒯𑒼 𑒩𑒰𑒖𑒪 𑒮𑒢 𑒮𑒰𑒧𑒰𑒖𑒱𑒏 𑒮𑒲𑒜𑓃𑒲𑒧𑒹 𑒞𑒟𑒰𑒏𑒟𑒱𑒞 𑒢𑒲𑒔𑒰𑒿 𑒖𑒰𑒞𑒱𑒏।
𑒯𑒩𑒥𑒰 𑒩𑒰𑒖𑒰𑒏 𑒔𑒣𑒹𑒙𑒮𑒿 𑒠𑒳𑒯𑒥𑒲-𑒮𑒳𑒯𑒥𑒲 𑒥𑓂𑒩𑒰𑒯𑓂𑒧𑒝𑒲 𑒂 𑒑𑒰𑓀𑒑𑒹 𑒏𑓂𑒭𑒞𑓂𑒩𑒲𑒏 𑒧𑒳𑒏𑓂𑒞𑒱।
𑒅𑒒𑒩𑒰 𑒣𑒿𑒫𑒰𑒩, 𑒯𑒩𑒥𑒰-𑒥𑒩𑒥𑒰, 𑒮𑒼𑒢𑒱𑒏𑒰, 𑒧𑒢𑒱𑒏𑒰, 𑒥𑓀𑒚𑒰, 𑒏𑒼𑒪𑓂𑒯𑒧𑒏𑒛𑓃𑒰, 𑒏𑒩𑒢𑒰 𑒮𑒦 𑒖𑒰𑒞𑒲𑒨 𑒮𑒲𑒜𑓃𑒲𑒧𑒹 𑒞𑒟𑒰𑒏𑒟𑒱𑒞 𑒢𑒲𑒔𑒰𑒿𑒏 𑒣𑒰𑒞𑓂𑒩 𑒩𑒰𑒖𑒰 𑒕𑒟𑒱। 𑒧𑒰𑒞𑒵𑒠𑒹𑒫𑒲𑒏 𑒅𑒣𑒰𑒮𑒢𑒰, 𑒃𑒢𑓂𑒠𑓂𑒩𑒏 𑒣𑒞𑓂𑒢𑒲𑒏 𑒠𑒳𑒩𑓂𑒑𑒰𑒏 𑒦𑒹𑒭 𑒥𑒠𑒪𑒱 𑒂𑒋𑒥 𑒂 𑒪𑒼𑒩𑒱𑒏 𑒠𑓂𑒫𑒰𑒩𑒰 𑒯𑒳𑒢𑒏𑒰 𑒣𑒞𑓂𑒢𑒲 𑒥𑒴𑒗𑒱 𑒕𑒴𑒥𑒰𑒏 𑒅𑒣𑒩𑒰𑒢𑓂𑒞 𑒣𑒲𑒛𑓃𑒰। 𑒪𑒼𑒩𑒱𑒏 𑒧𑒰𑒿𑒖𑒩𑒱𑒏 𑒧𑒱𑒪𑒢 𑒏𑒰𑒬𑒲-𑒣𑓂𑒩𑒨𑒰𑒝।

-𑒑𑒰𑒟𑒰 𑒧𑒹𑒪𑒰, 𑒯𑒰𑒙 𑒥𑒖𑒰𑒩, 𑒫𑒱𑒬𑒱𑒭𑓂𑒙 𑒪𑒼𑒏𑒏 𑒒𑒩, 𑒮𑒰𑒩𑓂𑒫𑒖𑒢𑒱𑒏 𑒮𑓂𑒟𑒪𑒣𑒩 𑒯𑒼𑒃𑒞 𑒁𑒕𑒱 - 𑒮𑒹 𑒨𑒰𑒠𑒫 𑒖𑒰𑒞𑒱𑒏 𑒁𑒞𑒱𑒩𑒱𑒏𑓂𑒞 𑒂𑒢𑒼 𑒬𑓂𑒩𑒼𑒞𑒰। 𑒮𑒩𑓂𑒖𑒏 𑒂 𑒬𑓂𑒩𑒼𑒞𑒰𑒏 𑒣𑓂𑒩𑒞𑓂𑒨𑒏𑓂𑒭 𑒮𑓀𑒥𑓀𑒡, 𑒬𑓂𑒩𑒫𑒝𑒲𑒨, 𑒏𑒟𑒰𑒏 𑒁𑒢𑒰𑒨𑒰𑒮 𑒁𑒪𑓀𑒏𑒩𑒝, 𑒧𑒳𑒠𑒰 𑒮𑒦𑒙𑒰 𑒮𑒰𑒯𑒱𑒞𑓂𑒨𑒱𑒏 𑒪𑒏𑓂𑒭𑒝 𑒖𑒹𑒢𑒰 𑒮𑒩𑓂𑒑, 𑒕𑒢𑓂𑒠𑒥𑒠𑓂𑒡, 𑒢𑒰𑒙𑓂𑒨-𑒮𑓀𑒡𑒱 𑒂 𑒮𑓀𑒡𑓂𑒨𑒰𑓀𑒑𑒏 𑒨𑒼𑒖𑒢𑒰 𑒂 𑒫𑒮𑓂𑒞𑒳 𑒢𑒱𑒩𑓂𑒠𑒹𑒬𑒏 𑒁𑒦𑒰𑒫। 𑒫𑒮𑓂𑒞𑒳 𑒮𑓀𑒑𑒚𑒢 𑒮𑒳𑒑𑒚𑒱𑒞 𑒢𑒯𑒱। 𑒑𑒰𑒩𑒱𑒏 𑒣𑓂𑒩𑒨𑒼𑒑 𑒂 𑒧𑒠𑓂𑒨𑒣𑒰𑒢𑒏 𑒨𑒞𑓂𑒩-𑒞𑒞𑓂𑒩 𑒫𑒩𑓂𑒝𑒢, 𑒑𑓂𑒩𑒰𑒧𑒲𑒝 𑒫𑓂𑒨𑒫𑒮𑓂𑒟𑒰𑒧𑒹 𑒔𑒼𑒩𑒏 𑒮𑓂𑒟𑒰𑒢 𑒂 𑒍𑒏𑒩 𑒫𑒩𑓂𑒝𑒢, 𑒮𑓂𑒟𑒰𑒢𑒲𑒨 𑒠𑒹𑒫𑒲-𑒠𑒹𑒫𑒞𑒰𑒏 𑒔𑒩𑒔𑒰, 𑒖𑒰𑒞𑒲𑒨 𑒁𑒮𑓂𑒧𑒱𑒞𑒰𑒏 𑒣𑓂𑒩𑒞𑒲𑒏। 𑒏𑒟𑒰-𑒑𑒰𑒨𑒏 𑒂𑒬𑒳 𑒏𑒫𑒱 𑒯𑒼𑒃𑒞 𑒕𑒟𑒱-𑒋𑒏𑒙𑒰 𑒁𑒮𑓂𑒟𑒱𑒣𑒘𑓂𑒖𑒩 𑒁𑒫𑒬𑓂𑒨 𑒩𑒯𑒻𑒞 𑒁𑒕𑒱 𑒧𑒳𑒠𑒰 𑒞𑒰𑒯𑒱𑒣𑒩 𑒁𑒣𑒢 𑒯𑒱𑒮𑒰𑒥𑒮𑒿 𑒍 𑒑𑒥𑒻𑒞 𑒕𑒟𑒱। 𑒬𑒥𑓂𑒠𑒬𑓁 𑒍 𑒏𑒝𑓂𑒚𑒮𑓂𑒟 𑒢𑒯𑒱 𑒏𑒩𑒻𑒞 𑒕𑒟𑒱। 𑒣𑓂𑒩𑒰𑒩𑒧𑓂𑒦𑒧𑒹 𑒄𑒬𑓂𑒫𑒩, 𑒫𑒢𑓂𑒠𑒢𑒰 𑒂 𑒥𑒲𑒔-𑒥𑒲𑒔𑒧𑒹 𑒄𑒬𑓂𑒫𑒩𑒮𑒿 𑒏𑓂𑒭𑒧𑒰𑒨𑒰𑒔𑒢𑒰, 𑒄 𑒮𑒦 𑒑𑒰𑒨𑒢 𑒏𑓂𑒭𑒧𑒞𑒰 𑒮𑓂𑒟𑒱𑒩 𑒏𑒩𑒥𑒰𑒏 𑒅𑒠𑓂𑒠𑒹𑒬𑓂𑒨𑒮𑒿 𑒏𑒋𑒪 𑒖𑒰𑒃𑒞 𑒁𑒕𑒱। 𑒒𑒝𑓂𑒙𑒰𑒮𑒿 𑒆𑒣𑒩 𑒑𑒰𑒨𑒢𑒏 𑒥𑒲𑒔𑒧𑒹 𑒯𑒳𑒏𑓂𑒏𑒰-𑒔𑒱𑒪𑒧, 𑒧𑒠𑓂𑒨𑒣𑒰𑒢, 𑒣𑒩𑒱𑒫𑒹𑒬𑒏 𑒫𑒩𑓂𑒝𑒢 𑒯𑒼𑒃𑒞 𑒁𑒕𑒱 𑒑𑒰𑒨𑒢𑒧𑒹। 𑒢𑒱𑒩𑒏𑓂𑒭𑒩 𑒧𑒳𑒠𑒰 𑒏𑒼𑒢𑒼 𑒮𑒰𑒏𑓂𑒭𑒩𑒮𑒿 𑒥𑒹𑒬𑒲 𑒖𑓂𑒘𑒰𑒢 𑒦𑒝𑓂𑒛𑒰𑒩। 𑒪𑒼𑒩𑒱𑒏 𑒧𑒢𑒳𑒂𑒩𑒧𑒹 𑒬𑓂𑒩𑒼𑒞𑒰𑒏 𑒮𑓀𑒐𑓂𑒨𑒰, 𑒞𑒢𑓂𑒧𑒨𑒞𑒰 𑒂 𑒋𑒏𑒰𑒑𑓂𑒩𑒔𑒱𑒞𑓂𑒞𑒞𑒰𑒏 𑒣𑓂𑒩𑒦𑒰𑒫 𑒏𑒟𑒰-𑒑𑒰𑒨𑒏𑒏 𑒏𑒟𑒰 𑒫𑒰𑒔𑒢𑒣𑒩 𑒣𑒛𑓃𑒻𑒞 𑒁𑒕𑒱 𑒏𑒰𑒩𑒝 𑒄 𑒬𑓂𑒩𑒼𑒞𑒰𑒏 𑒮𑒼𑒗𑒰𑒿 𑒏𑒋𑒪 𑒖𑒰𑒃𑒞 𑒁𑒕𑒱। 𑒋𑒯𑒱 𑒁𑒩𑓂𑒟𑒹𑒿 𑒮𑒪𑓂𑒯𑒹𑒮𑒏 𑒏𑒟𑒰𑒫𑒰𑒔𑒏𑒮𑒿 𑒯𑒱𑒢𑒏𑒰𑒣𑒩 𑒥𑒹𑒬𑒲 𑒥𑒰𑒯𑓂𑒨 𑒣𑓂𑒩𑒦𑒰𑒫 𑒣𑒛𑓃𑒻𑒞 𑒕𑒢𑓂𑒯𑒱। 𑒮𑒪𑓂𑒯𑒹𑒮 𑒑𑒰𑒟𑒰 𑒬𑓂𑒩𑒼𑒞𑒰𑒏 𑒮𑒧𑒏𑓂𑒭 𑒢𑒯𑒱 𑒫𑒩𑒢 𑒂𑒩𑒰𑒡𑓂𑒨 𑒠𑒹𑒫𑒏 𑒮𑒧𑒏𑓂𑒭 𑒫𑒰𑒔𑒢 𑒏𑒋𑒪 𑒖𑒰𑒃𑒞 𑒁𑒕𑒱।
𑒑𑒰𑒟𑒰𑒏 𑒧𑒴𑒪 𑒏𑒟𑒰 𑒍𑒢𑒰 𑒞𑒿 𑒧𑒼𑒙𑒰-𑒧𑒼𑒙𑒲 𑒮𑒧𑒰𑒢 𑒩𑒯𑒻𑒞 𑒁𑒕𑒱, 𑒧𑒳𑒠𑒰 𑒣𑓂𑒩𑒮𑓂𑒞𑒳𑒞𑒱𑒏𑒩𑒝, 𑒫𑒱𑒬𑒱𑒭𑓂𑒙 𑒮𑒧𑒰𑒖, 𑒏𑓂𑒩𑒱𑒨𑒰𑒏𑒪𑒰𑒣 𑒂 𑒮𑒰𑒧𑒰𑒖𑒱𑒏 𑒧𑒩𑓂𑒨𑒰𑒠𑒰𑒏 𑒏𑒰𑒩𑒝 𑒫𑒱𑒬𑒱𑒭𑓂𑒙।
𑒨𑒳𑒠𑓂𑒡,𑒠𑓂𑒨𑒴𑒞,𑒣𑓂𑒩𑒹𑒧 𑒂 𑒫𑒱𑒫𑒰𑒯-𑒮𑒰𑓀𑒮𑓂𑒏𑒵𑒞𑒱𑒏 𑒞𑒞𑓂𑒫 𑒮𑒦 𑒧𑒯𑒰𑒏𑒰𑒫𑓂𑒨𑒧𑒹, 𑒠𑓂𑒨𑒴𑒞 –𑒧𑒰𑒢𑒮𑒱𑒏 𑒨𑒳𑒠𑓂𑒡-𑒠𑓂𑒨𑒴𑒞𑒧𑒹 𑒧𑒢𑒳𑒏𑓂𑒐𑒏𑒹𑒿 𑒥𑒰𑒖𑒲 𑒪𑒑𑒰𑒋𑒥, 𑒧𑒯𑒰𑒦𑒰𑒩𑒞𑒧𑒹 𑒂 𑒪𑒼𑒩𑒱𑒏𑒰𑒨𑒢𑒧𑒹।
𑒠𑒳𑒩𑓂𑒑𑒰 𑒠𑒹𑒫𑒲 𑒠𑓂𑒫𑒰𑒩𑒰 𑒨𑒳𑒠𑓂𑒡𑒧𑒹 𑒢𑒰𑒨𑒏𑒏 𑒮𑒯𑒰𑒨𑒞𑒰, 𑒔𑒢𑒻𑒢𑒏 𑒬𑒱𑒫𑒡𑒩𑒏𑒹𑒿 𑒕𑒼𑒛𑓃𑒱 𑒪𑒼𑒩𑒱𑒏 𑒮𑓀𑒑 𑒅𑒜𑓃𑒩𑒱 𑒖𑒰𑒋𑒥, 𑒠𑒳𑒮𑒰𑒡 𑒖𑒰𑒞𑒱𑒏 𑒧𑒯𑒣𑒞𑒱𑒨𑒰𑒮𑒿 𑒪𑒼𑒩𑒱𑒏𑒏 𑒖𑒳𑒂 𑒐𑒹𑒪𑒰𑒋𑒥 𑒂 𑒪𑒼𑒩𑒱𑒏 𑒠𑓂𑒫𑒰𑒩𑒰 𑒔𑒢𑒻𑒢𑒏𑒹𑒿 𑒖𑒳𑒂𑒧𑒹 𑒯𑒰𑒩𑒥-𑒔𑒢𑒻𑒢 𑒠𑓂𑒫𑒰𑒩𑒰 𑒣𑓂𑒩𑒞𑒱𑒫𑒰𑒠-𑒑𑒯𑒢𑒰 𑒑𑒳𑒩𑒱𑒨𑒰 𑒠𑒰𑒿𑒫𑒣𑒩, 𑒔𑒢𑒻𑒢𑒏 𑒁𑒬𑓂𑒪𑒲𑒪 𑒯𑒰𑒫-𑒦𑒰𑒫𑒮𑒿 𑒧𑒯𑒣𑒞𑒱𑒨𑒰𑒏 𑒡𑓂𑒨𑒰𑒢 𑒥𑒿𑒙𑒥 𑒂 𑒪𑒼𑒩𑒱𑒏𑒏 𑒖𑒲𑒞𑒥। 𑒪𑒼𑒩𑒱𑒏 𑒠𑓂𑒫𑒰𑒩𑒰 𑒍𑒏𑒩 𑒧𑒴𑒛𑓃𑒲 𑒏𑒰𑒙𑒥। 𑒣𑒞𑒱 𑒠𑓂𑒫𑒰𑒩𑒰 𑒁𑒢𑒳𑒔𑒱𑒞 𑒏𑒋𑒪 𑒖𑒋𑒥𑒰𑒏 𑒅𑒣𑒩𑒰𑒢𑓂𑒞𑒼 𑒣𑒞𑓂𑒢𑒲 𑒠𑓂𑒫𑒰𑒩𑒰 𑒥𑒳𑒗𑒰𑒋𑒥।
𑒪𑒼𑒩𑒱𑒏𑒏 𑒁𑒫𑒞𑒰𑒩𑒫𑒰𑒠 𑒂 𑒩𑒯𑒮𑓂𑒨
𑒏𑓂𑒩𑒼𑒡-𑒣𑓂𑒩𑒹𑒧 𑒠𑒳𑒢𑒴𑒧𑒹 𑒑𑒰𑒩𑒱 𑒅𑒢𑓂𑒧𑒳𑒏𑓂𑒞 𑒮𑒰𑓀𑒮𑓂𑒏𑒵𑒞𑒱𑒏 𑒏𑒰𑒫𑓂𑒨 𑒔𑒩𑒱𑒞𑓂𑒩। 𑒣𑓂𑒩𑒏𑒵𑒞𑒱𑒏𑒹𑒿 𑒢𑒳𑒏𑒰𑒍𑒪 𑒢𑒯𑒱 𑒑𑒹𑒪। 𑒢𑒰𑒨𑒏 𑒮𑒹𑒯𑒼 𑒑𑒰𑒩𑒱𑒏 𑒣𑓂𑒩𑒨𑒼𑒑 𑒏𑒩𑒻𑒞 𑒁𑒕𑒱।
𑒬𑒱𑒫-𑒬𑒏𑓂𑒞𑒱𑒏 𑒣𑒴𑒖𑒰, 𑒧𑒯𑒰𑒏𑒰𑒫𑓂𑒨𑒏 𑒣𑒰𑒞𑓂𑒩𑒏 𑒢𑒰𑒧 𑒂 𑒂𑒢 𑒞𑒞𑓂𑒫𑒏 𑒑𑓂𑒩𑒯𑒝 𑒖𑒹 𑒪𑒼𑒩𑒱𑒏 𑒧𑒢𑒳𑒂𑒩 𑒑𑒰𑒨𑒏𑒏 𑒅𑒠𑒰𑒩 𑒂 𑒮𑒯𑒱𑒭𑓂𑒝𑒳 𑒔𑒩𑒱𑒞𑓂𑒩𑒏𑒹𑒿 𑒠𑒹𑒐𑒥𑒻𑒞 𑒁𑒕𑒱। 𑒣𑓂𑒩𑒮𑓂𑒞𑒳𑒞𑒱 𑒏𑓂𑒭𑒧𑒞𑒰 𑒂 𑒖𑓂𑒘𑒰𑒢 𑒏𑓂𑒭𑒹𑒞𑓂𑒩 𑒯𑒱𑒢𑒏𑒰 𑒁𑒢𑒏𑓂𑒭𑒩 𑒏𑒯𑒥𑒰𑒮𑒿 𑒯𑒧𑒩𑒰 𑒩𑒼𑒏𑒻𑒞 𑒁𑒕𑒱।
𑒡𑒰𑒩𑓂𑒧𑒱𑒏 𑒫𑒱𑒬𑓂𑒫𑒰𑒮, 𑒢𑒰𑒨𑒏𑒏 𑒔𑒩𑒱𑒞𑓂𑒩 𑒂 𑒮𑒰𑒧𑒰𑒖𑒱𑒏 𑒂𑒔𑒰𑒩। 𑒖𑒲𑒫𑒢-𑒮𑓀𑒮𑓂𑒏𑒵𑒞𑒱 𑒠𑒵𑒜𑓃𑒞𑒰𑒣𑒴𑒩𑓂𑒫𑒏, 𑒧𑒯𑒰𑒏𑒰𑒫𑓂𑒨𑒏 𑒁𑒡𑒱𑒏𑒰𑓀𑒬 𑒪𑓃𑒏𑓂𑒭𑒝 𑒖𑒹𑒢𑒰 𑒩𑒮, 𑒕𑓀𑒠, 𑒑𑒳𑒝, 𑒁𑒪𑓀𑒏𑒰𑒩, 𑒮𑒩𑓂𑒑𑒏 𑒡𑓂𑒨𑒰𑒢, 𑒫𑓂𑒨𑒫𑒯𑒵𑒞 𑒡𑒰𑒩𑓂𑒧𑒱𑒏 𑒧𑒴𑒪𑓂𑒨, 𑒮𑓀𑒮𑓂𑒏𑒵𑒞𑒱𑒏 𑒮𑒧𑓂𑒣𑒴𑒩𑓂𑒝𑒞𑒰, 𑒮𑒵𑒖𑒢-𑒏𑓂𑒭𑒧𑒞𑒰(𑒑𑒰𑒨𑒏𑒏)।

𑒪𑒼𑒏𑒑𑒰𑒟𑒰-𑒢𑒰𑒔𑒏 𑒤𑒲𑒪𑓂𑒛𑒫𑒩𑓂𑒏-𑒏𑒟𑓂𑒨𑒧𑒹 𑒥𑒠𑒪𑒢𑒰𑒃 (𑒖𑒹𑒢𑒰 𑒑𑒰𑒩𑒱), 𑒁𑒣𑒢 𑒮𑓀𑒮𑓂𑒏𑒵𑒞𑒱𑒏 𑒢𑒻𑒞𑒱𑒏 𑒧𑒰𑒢𑒠𑒝𑓂𑒛𑒏 𑒂𑒡𑒰𑒩𑒣𑒩 𑒣𑒩𑒱𑒫𑒩𑓂𑒞𑒢 𑒁𑒏𑓂𑒭𑒧𑓂𑒨, 𑒁𑒣𑒢𑒰𑒏𑒹𑒿 𑒍𑒯𑒱 𑒮𑒧𑒰𑒖𑒧𑒹 𑒩𑒐𑒱𑒞𑒯𑒳 𑒅𑒠𑓂𑒠𑒹𑒬𑓂𑒨𑒣𑒩 𑒡𑓂𑒨𑒰𑒢, 𑒫𑒰𑒏𑓂𑒨 𑒬𑒥𑓂𑒠 𑒩𑒔𑒢𑒰𑒧𑒹 𑒏𑒼𑒢𑒼 𑒣𑒩𑒱𑒫𑒩𑓂𑒞𑒢 𑒢𑒯𑒱 𑒯𑒼𑒋𑒥𑒰𑒏 𑒔𑒰𑒯𑒲। 𑒞𑒱𑒩𑒱𑒨𑒰, 𑒑𑒰𑒧𑒏 𑒩𑒏𑓂𑒭𑒰 𑒂 𑒁𑒢𑒰𑒔𑒰𑒩𑒲𑒏 𑒫𑒱𑒢𑒰𑒬-𑒣𑒬𑒳𑒣𑒰𑒪 𑒂 𑒏𑒵𑒭𑒱𑒏𑒏 𑒮𑒧𑒩𑓂𑒟𑒢।
𑒪𑒼𑒩𑒱𑒏𑒏 𑒧𑒱𑒞𑓂𑒩 𑒥𑓀𑒚𑒰 𑒔𑒧𑒰𑒩, 𑒫𑒰𑒩𑒴 𑒣𑒯𑒩𑒹𑒠𑒰𑒩 (𑒣𑒰𑒮𑒫𑒰𑒢), 𑒩𑒰𑒖𑒪 𑒡𑒼𑒥𑒲, 𑒪𑒼𑒩𑒱𑒏𑒏 𑒦𑒰𑒃 𑒮𑒰𑒿𑒫𑒩।
𑒮𑒪𑒯𑒹𑒮𑒏 𑒏𑒟𑒰 𑒞𑒩𑒰𑒃 𑒏𑓂𑒭𑒹𑒞𑓂𑒩𑒏। 𑒫𑒢𑓂𑒨 𑒖𑒲𑒫 𑒂 𑒫𑒢𑒏 𑒥𑒹𑒬𑒲 𑒫𑒩𑓂𑒝𑒢, 𑒫𑒢𑓂𑒨𑒖𑒲𑒫 𑒠𑓂𑒫𑒰𑒩𑒰 𑒮𑒪𑒯𑒹𑒮𑒏 𑒮𑒯𑒰𑒨𑒞𑒰, 𑒂𑒐𑒹𑒙 𑒂 𑒥𑒪𑒱। 𑒮𑒪𑓂𑒯𑒹𑒮𑒏 𑒣𑒴𑒖𑒰 𑒮𑓂𑒟𑒪𑒣𑒩 𑒧𑒰𑒙𑒱𑒏 𑒒𑒼𑒛𑓃𑒰 𑒩𑒰𑒐𑒪 𑒖𑒰𑒃𑒞 𑒁𑒕𑒱 𑒧𑒳𑒠𑒰 𑒪𑒼𑒩𑒱𑒏𑒰𑒨𑒢𑒧𑒹 𑒢𑒯𑒱।
𑒪𑒼𑒩𑒱𑒏 𑒧𑒢𑒳𑒂𑒩𑒧𑒹 𑒁𑒪𑒾𑒏𑒱𑒏 𑒂 𑒩𑒯𑒮𑓂𑒨𑒧𑒨 𑒒𑒙𑒢𑒰 𑒥𑒹𑒬𑒲, 𑒫𑒢𑓂𑒨 𑒖𑒲𑒫𑒏 (𑒥𑒼𑒢𑒧𑒹)𑒮𑓀𑒐𑓂𑒨𑒰 𑒢𑒯𑒱 𑒏𑒹𑒩 𑒥𑒩𑒰𑒥𑒩, 𑒪𑒼𑒩𑒱𑒏𑒏 𑒣𑒰𑒞𑓂𑒩 𑒁𑒫𑒞𑒰𑒩𑒲 𑒧𑒳𑒠𑒰 𑒫𑒱𑒡𑒱𑒫𑒞 𑒣𑒴𑒖𑒰 𑒢𑒯𑒱।
𑒥𑒰𑒖𑒱𑒪 𑒏𑒾𑒂 𑒁𑒡𑒖𑒩𑒳𑒂 𑒑𑒼𑒃𑒚𑒰𑒮𑒿 𑒏𑒾𑒪𑓂𑒯𑒧𑒏𑒛𑓃𑒰𑒏 𑒑𑒜𑓃𑒏𑒹𑒿 𑒖𑒩𑒥𑒻𑒞 𑒁𑒕𑒱।
-𑒅𑒡𑒩𑒰-𑒣𑒿𑒫𑒰𑒩𑒏 𑒯𑒰𑒟𑒲-𑒏𑒖𑓂𑒖𑒪 𑒑𑒱𑒩𑒱
-𑒪𑒼𑒩𑒱𑒏𑒏 𑒏𑒙𑒩𑒰 𑒒𑒼𑒛𑓃𑒰
-𑒮𑒹𑒢𑒰𑒣𑒞𑒱 𑒥𑒩𑒥𑒰𑒏 𑒒𑒼𑒛𑓃𑒰 𑒥𑒩𑒕𑒹𑒥𑒰
-𑒥𑒰𑒖𑒱𑒪 𑒏𑒾𑒂
𑒧𑒳𑒠𑒰 𑒪𑒼𑒩𑒱𑒏 𑒧𑒢𑒳𑒂𑒩 𑒧𑒯𑒩𑒰𑒃 𑒧𑒹 𑒄 𑒮𑒦 𑒫𑒢𑓂𑒨 𑒢𑒯𑒱 𑒫𑒩𑒪 𑒣𑒼𑒮𑒳𑒂 𑒁𑒕𑒱।

𑒪𑒼𑒩𑒱𑒏𑒏 𑒁𑒮𑒪𑒲 𑒯𑒩𑒠𑒲𑒑𑒜𑓃 𑒂 𑒣𑓂𑒩𑒮𑒱𑒠𑓂𑒡 𑒏𑒩𑓂𑒧𑒏𑓂𑒭𑒹𑒞𑓂𑒩 𑒮𑒯𑒩𑒮𑒰 𑒖𑒱𑒪𑒰𑒏 𑒯𑒩𑒠𑒲𑒮𑓂𑒟𑒰𑒢 𑒁𑒕𑒱 𑒏𑒰𑒩𑒝 𑒮𑒳𑒣𑒾𑒪𑒏 𑒣𑒴𑒥 𑒮𑓂𑒟𑒱𑒞 𑒯𑒩𑒠𑒲𑒏 𑒮𑓀𑒑 𑒠𑒳𑒩𑓂𑒑𑒰𑒮𑓂𑒟𑒰𑒢 𑒬𑒥𑓂𑒠 𑒮𑒧𑓂𑒧𑒱𑒪𑒱𑒞 𑒁𑒕𑒱। 𑒋𑒯𑒱 𑒯𑒩𑒠𑒲𑒏 𑒮𑓀𑒑 𑒧𑒯𑒲𑒔𑒢𑓂𑒠𑓂𑒩 𑒮𑒰𑒯𑒴, 𑒩𑒰𑒖𑒰 𑒧𑒯𑒥𑒻𑒩, 𑒢𑒹𑒆𑒩𑒣𑒳𑒩 (𑒢𑒾𑒯𑒙𑓂𑒙𑒰), 𑒑𑓀𑒖𑒹𑒩𑒲𑒣𑒳𑒩 (𑒑𑒾𑒩𑒲𑒣𑒳𑒩), 𑒐𑒹𑒩𑒠𑒯𑒰 (𑒐𑒻𑒩𑒰 𑒡𑒰𑒩), 𑒩𑒯𑒳𑒂-𑒔𑒢𑓂𑒠𑓂𑒩𑒰𑒨𑒢-𑒧𑒻𑒢𑒰-𑒑𑒰𑒧, 𑒥𑒻𑒩𑒰𑒒𑒰𑒙, 𑒞𑒱𑒪𑒰𑒥𑒹 𑒡𑒰𑒩, 𑒥𑒻𑒩𑒰 𑒑𑒰𑒕𑒲 𑒂 𑒧𑒯𑒥𑒻𑒩𑒱𑒨𑒰 𑒑𑒰𑒧𑒏 𑒔𑒩𑒔𑒰 𑒁𑒕𑒱। 𑒪𑒼𑒩𑒱𑒏 𑒑𑒰𑒟𑒰 𑒮𑓂𑒟𑒪 𑒥𑒻𑒩𑒰𑒒𑒰𑒙𑒮𑒿 𑒣𑓂𑒩𑒰𑒣𑓂𑒞 𑒣𑒖𑒹𑒥𑒰 𑒂 𑒯𑒩𑒠𑒲 𑒯𑒰𑒃𑒮𑓂𑒏𑒴𑒪𑒮𑒿 𑒮𑒙𑒪 𑒣𑒬𑓂𑒔𑒱𑒧 𑒐𑒳𑒠𑒰𑒃𑒧𑒹 𑒣𑓂𑒩𑒰𑒣𑓂𑒞 𑒣𑒖𑒹𑒥𑒰𑒧𑒹 𑒣𑒰𑒍𑒪 𑒮𑒧𑒰𑒢𑒞𑒰 𑒋𑒏𑒩 𑒫𑓂𑒨𑒰𑒐𑓂𑒨𑒰 𑒏𑒩𑒻𑒞 𑒁𑒕𑒱।
𑒮𑒳𑒣𑒾𑒪 𑒩𑒹𑒪𑒫𑒹 𑒮𑓂𑒙𑒹𑒬𑒢𑒣𑒩 𑒩𑒹𑒪𑒫𑒹 𑒫𑒱𑒦𑒰𑒑𑒏 𑒋𑒏𑒙𑒰 𑒥𑒼𑒩𑓂𑒛 𑒪𑒰𑒑𑒪 𑒁𑒕𑒱- 𑒋𑒞𑒋𑒮𑒿 𑒣𑒰𑒿𑒔 𑒏𑒱𑒪𑒼𑒧𑒲𑒙𑒩 𑒣𑒴𑒩𑓂𑒫 𑒯𑒩𑒠𑒲 𑒠𑒳𑒩𑓂𑒑𑒰𑒮𑓂𑒟𑒰𑒢𑒧𑒹 𑒦𑒑𑒫𑒞𑒲 𑒠𑒳𑒩𑓂𑒑𑒰 𑒂 𑒫𑒲𑒩𑒣𑒳𑒩𑒳𑒭 𑒪𑒼𑒩𑒱𑒏𑒏 𑒌𑒞𑒱𑒯𑒰𑒮𑒱𑒏 𑒮𑓂𑒟𑒪 𑒠𑒩𑓂𑒬𑒢𑒲𑒨 𑒁𑒕𑒱।
𑒢𑒾𑒯𑒙𑓂𑒙𑒰 𑒪𑒑 𑒧𑒯𑒩𑓂𑒭𑒱 𑒂 𑒍𑒞𑒋 𑒣𑒰𑒪𑒲𑒦𑒰𑒭𑒰𑒏 𑒬𑒱𑒪𑒰𑒪𑒹𑒐- 𑒣𑒰𑒪𑒫𑓀𑒬𑒲𑒨- 𑒯𑒩𑒱𑒠𑓂𑒩𑒰𑒑𑒜𑓃 𑒔𑒾𑒠𑒯 𑒏𑒼𑒮𑒧𑒹 𑒫𑒱𑒮𑓂𑒞𑒵𑒞। 𑒞𑒹𑒩𑒯𑒧 𑒬𑒞𑒰𑒥𑓂𑒠𑒲𑒏 ’𑒫𑒩𑓂𑒝𑒩𑒞𑓂𑒢𑒰𑒏𑒩’𑒧𑒹 𑒪𑒼𑒩𑒱𑒏𑒏 𑒔𑒩𑒔𑒰 𑒁𑒕𑒱। 𑒫𑒩𑓂𑒝𑒩𑒞𑓂𑒢𑒰𑒏𑒩- 𑒠𑓂𑒫𑒱𑒞𑒲𑒨 𑒏𑒪𑓂𑒪𑒼𑒪𑒧𑒹 𑒪𑒼𑒩𑒱𑒏 𑒢𑒰𑒔𑒼- 𑒄 𑒫𑒩𑓂𑒝𑒢 । 𑒣𑒯𑒱𑒢𑒹 𑒄 𑒢𑒰𑒔 𑒕𑒪 𑒂𑒃-𑒏𑒰𑒪𑓂𑒯𑒱 𑒑𑒰𑒟𑒰 𑒁𑒕𑒱।

𑒢𑒹𑒆𑒩𑒲 𑒠𑒩𑒦𑓀𑒑𑒰𑒏 𑒥𑒱𑒩𑒾𑒪 𑒣𑓂𑒩𑒐𑒝𑓂𑒛𑒏 𑓑𑓓 𑒏𑒱.𑒧𑒲.𑒣𑒴𑒩𑓂𑒫 𑒑𑒰𑒧 𑒁𑒕𑒱 𑒖𑒞𑒋 𑒋𑒏𑒙𑒰 𑒑𑒜𑓃 𑒁𑒕𑒱 𑒖𑒹 𑒩𑒰𑒖𑒰 𑒪𑒼𑒩𑒱𑒏𑒮𑒿 𑒮𑒧𑓂𑒥𑒢𑓂𑒡𑒱𑒞 𑒏𑒯𑒪 𑒖𑒰𑒃𑒞 𑒁𑒕𑒱 ।

𑒧𑒱𑒟𑒱𑒪𑒰𑒏 𑒐𑒼𑒖
𑒄 𑒂𑒪𑒹𑒐 𑒯𑒧𑒩 𑒠𑒬𑒏𑒮𑒿 𑒆𑒣𑒩𑒏 𑒧𑒱𑒟𑒱𑒪𑒰𑒏 𑒨𑒰𑒞𑓂𑒩𑒰𑒏 𑒅𑒣𑒩𑒰𑒢𑓂𑒞𑒏 𑒮𑒴𑒞𑓂𑒩-𑒫𑒵𑒞𑓂𑒞𑒰𑒢𑓂𑒞 𑒁𑒕𑒱 𑒂 𑒋𑒯𑒱𑒧𑒹 𑒋𑒯𑒱 𑒮𑒦 𑒮𑓂𑒟𑒰𑒢𑒏 𑒮𑓂𑒟𑒰𑒢𑒲𑒨 𑒢𑒱𑒫𑒰𑒮𑒲 𑒂 𑒑𑒰𑒃𑒛 𑒮𑒦𑒏 𑒁𑒏𑒟𑒢𑒲𑒨 𑒨𑒼𑒑𑒠𑒰𑒢 𑒕𑒢𑓂𑒯𑒱 । 𑒏𑒐𑒢𑒼 𑒏𑒰𑒪𑒞𑒿 𑒦𑒰𑒛𑓃𑒰𑒏 𑒑𑒰𑒛𑓃𑒲𑒏 𑒛𑓂𑒩𑒰𑒃𑒫𑒩 𑒪𑒼𑒏𑒢𑒱 𑒮𑒹𑒯𑒼 𑒢𑒲𑒏 𑒑𑒰𑒃𑒛 𑒮𑒱𑒠𑓂𑒡 𑒦𑒹𑒪𑒰𑒯 ।—𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩

𑓑. 𑒑𑒾𑒩𑒲-𑒬𑓀𑒏𑒩 𑒮𑓂𑒟𑒰𑒢- 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒖𑒧𑒟𑒩𑒱 𑒑𑒰𑒧 𑒂 𑒯𑒻𑓀𑒚𑒲 𑒥𑒰𑒪𑒲 𑒑𑒰𑒧𑒏 𑒥𑒲𑒔 𑒄 𑒮𑓂𑒟𑒰𑒢 𑒑𑒾𑒩𑒲 𑒂 𑒬𑒓𑓂𑒏𑒩𑒏 𑒮𑒧𑓂𑒧𑒱𑒪𑒱𑒞 𑒧𑒴𑒩𑓂𑒞𑓂𑒞𑒱 𑒂 𑒋𑒯𑒱 𑒣𑒩 𑒧𑒱𑒟𑒱𑒪𑒰𑒏𑓂𑒭𑒩𑒧𑒹 𑒪𑒱𑒐𑒪 𑒣𑒰𑒪𑒫𑓀𑒬𑒲𑒨 𑒁𑒦𑒱𑒪𑒹𑒐𑒏 𑒏𑒰𑒩𑒝𑒮𑒿 𑒫𑒱𑒬𑒹𑒭 𑒩𑒴𑒣𑒮𑒿 𑒅𑒪𑓂𑒪𑒹𑒐𑒢𑒲𑒨 𑒁𑒕𑒱। 𑒄 𑒮𑓂𑒟𑒪 𑒋𑒏𑒧𑒰𑒞𑓂𑒩 𑒣𑒳𑒩𑒰𑒞𑒢 𑒮𑓂𑒟𑒪 𑒁𑒕𑒱 𑒖𑒹 𑒣𑒴𑒩𑓂𑒝 𑒩𑒴𑒣𑒮𑒿 𑒑𑒰𑒧𑒏 𑒅𑒞𑓂𑒮𑒰𑒯𑒲 𑒏𑒰𑒩𑓂𑒨𑒏𑒩𑓂𑒞𑓂𑒞𑒰 𑒪𑒼𑒏𑒢𑒱𑒏 𑒮𑒯𑒨𑒼𑒑𑒮𑒿 𑒣𑒴𑒩𑓂𑒝 𑒩𑒴𑒣𑒮𑒿 𑒫𑒱𑒏𑒮𑒱𑒞 𑒁𑒕𑒱। 𑒬𑒱𑒫𑒩𑒰𑒞𑓂𑒩𑒱𑒧𑒹 𑒋𑒯𑒱 𑒮𑓂𑒟𑒪𑒏 𑒔𑒳𑒯𑒔𑒳𑒯𑒲 𑒠𑒹𑒐𑒥𑒰 𑒨𑒼𑒑𑓂𑒨 𑒩𑒯𑒻𑒞 𑒁𑒕𑒱। 𑒥𑒱𑒠𑒹𑒬𑓂𑒫𑒩𑒮𑓂𑒟𑒰𑒢𑒮𑒿 𑓒-𑓓 𑒏𑒱𑒪𑒼𑒧𑒲𑒙𑒩 𑒅𑒞𑓂𑒞𑒩 𑒠𑒱𑒬𑒰𑒧𑒹 𑒄 𑒮𑓂𑒟𑒰𑒢 𑒁𑒕𑒱।
𑓒. 𑒦𑒲𑒚-𑒦𑒑𑒫𑒰𑒢𑒣𑒳𑒩 𑒁𑒦𑒱𑒪𑒹𑒐- 𑒩𑒰𑒖𑒰 𑒢𑒰𑒢𑓂𑒨𑒠𑒹𑒫𑒏 𑒣𑒳𑒞𑓂𑒩 𑒧𑒪𑓂𑒪𑒠𑒹𑒫𑒮𑒿 𑒮𑓀𑒥𑓀𑒡𑒱𑒞 𑒁𑒦𑒱𑒪𑒹𑒐 𑒋𑒞𑒋 𑒁𑒕𑒱। 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒧𑒡𑒹𑒣𑒳𑒩 𑒟𑒰𑒢𑒰𑒧𑒹 𑒄 𑒮𑓂𑒟𑒪 𑒁𑒕𑒱।
𑓓. 𑒯𑒳𑒪𑒰𑒮𑒣𑒙𑓂𑒙𑒲- 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒤𑒳𑒪𑒣𑒩𑒰𑒮 𑒟𑒰𑒢𑒰𑒏 𑒖𑒰𑒑𑒹𑒬𑓂𑒫𑒩 𑒮𑓂𑒟𑒰𑒢 𑒪𑒑 𑒯𑒳𑒪𑒰𑒮𑒣𑒙𑓂𑒙𑒲 𑒑𑒰𑒧 𑒁𑒕𑒱। 𑒏𑒰𑒩𑒲 𑒣𑒰𑒟𑒩𑒏 𑒫𑒱𑒭𑓂𑒝𑒳 𑒦𑒑𑒫𑒰𑒢𑒏 𑒧𑒴𑒩𑓂𑒞𑓂𑒞𑒱 𑒋𑒞𑒋 𑒁𑒕𑒱।
𑓔. 𑒣𑒱𑒣𑒩𑒰𑒯𑒲- 𑒪𑒾𑒏𑒯𑒰 𑒟𑒰𑒢𑒰𑒏 𑒣𑒱𑒣𑒩𑒰𑒯𑒲 𑒑𑒰𑒧𑒧𑒹 𑒫𑒱𑒭𑓂𑒝𑒳𑒏 𑒧𑒴𑒩𑓂𑒞𑓂𑒞𑒱𑒏 𑒔𑒰𑒩𑒴 𑒯𑒰𑒟 𑒦𑒑𑓂𑒢 𑒦𑒋 𑒑𑒹𑒪 𑒁𑒕𑒱।
𑓕. 𑒧𑒡𑒳𑒥𑒢- 𑒣𑒱𑒣𑒩𑒰𑒯𑒲𑒮𑒿 𑓑𑓐 𑒏𑒱𑒪𑒼𑒧𑒲𑒙𑒩 𑒅𑒞𑓂𑒞𑒩 𑒢𑒹𑒣𑒰𑒪𑒏 𑒧𑒡𑒳𑒥𑒢 𑒑𑒰𑒧𑒧𑒹 𑒔𑒞𑒳𑒩𑓂𑒦𑒳𑒖 𑒫𑒱𑒭𑓂𑒝𑒳𑒏 𑒧𑒴𑒩𑓂𑒞𑓂𑒞𑒱 𑒁𑒕𑒱।
𑓖. 𑒁𑓀𑒡𑒩𑒰-𑒚𑒰𑒜𑓃𑒲𑒏 𑒮𑓂𑒟𑒰𑒢𑒲𑒨 𑒫𑒰𑒔𑒮𑓂𑒣𑒞𑒱 𑒮𑓀𑒑𑓂𑒩𑒯𑒰𑒪𑒨- 𑒑𑒾𑒛𑓃 𑒑𑒰𑒧𑒏 𑒨𑒏𑓂𑒭𑒱𑒝𑒲𑒏 𑒦𑒫𑓂𑒨 𑒧𑒴𑒩𑓂𑒞𑓂𑒞𑒱 𑒋𑒞𑒋 𑒩𑒰𑒐𑒪 𑒁𑒕𑒱।
𑓗. 𑒏𑒧𑒪𑒰𑒠𑒱𑒞𑓂𑒨 𑒮𑓂𑒟𑒰𑒢- 𑒁𑓀𑒡𑒩𑒰 𑒚𑒰𑒜𑓃𑒲 𑒑𑒰𑒧𑒏 𑒪𑒑𑒧𑒹 𑒏𑒧𑒪𑒰𑒠𑒱𑒞𑓂𑒨 𑒮𑓂𑒟𑒰𑒢𑒏 𑒫𑒱𑒭𑓂𑒝𑒳 𑒧𑓀𑒠𑒱𑒩 𑒏𑒩𑓂𑒝𑒰𑒙 𑒩𑒰𑒖𑒰 𑒢𑒰𑒢𑓂𑒨𑒠𑒹𑒫𑒏 𑒧𑓀𑒞𑓂𑒩𑒲 𑒬𑓂𑒩𑒲𑒡𑒩 𑒠𑒰𑒮 𑒠𑓂𑒫𑒰𑒩𑒰 𑒮𑓂𑒟𑒰𑒣𑒱𑒞 𑒦𑒹𑒪।
𑓘. 𑒗𑓀𑒗𑒰𑒩𑒣𑒳𑒩 𑒁𑒢𑒳𑒧𑒝𑓂𑒛𑒪𑒏 𑒩𑒐𑒥𑒰𑒩𑒲 𑒑𑒰𑒧𑒧𑒹 𑒫𑒵𑒏𑓂𑒭𑒏 𑒢𑒲𑒔𑒰𑒿 𑒩𑒰𑒐𑒪 𑒫𑒱𑒭𑓂𑒝𑒳 𑒧𑒴𑒩𑓂𑒞𑓂𑒞𑒱, 𑒑𑒰𑓀𑒡𑒰𑒩𑒬𑒻𑒪𑒲 𑒧𑒹 𑒥𑒢𑒰𑒍𑒪 𑒑𑒹𑒪 𑒁𑒕𑒱।
𑓙. 𑒣𑒖𑒹𑒥𑒰𑒑𑒜𑓃 𑒫𑒢𑒯𑒲 𑒙𑒼𑒪- 𑒋𑒞𑒋 𑒋𑒏𑒙𑒰 𑒥𑒳𑒠𑓂𑒡 𑒧𑒴𑒩𑓂𑒞𑓂𑒞𑒱 𑒦𑒹𑒙𑒪 𑒕𑒪, 𑒧𑒳𑒠𑒰 𑒍𑒏𑒩 𑒂𑒥 𑒏𑒼𑒢𑒼 𑒣𑒞𑒰 𑒢𑒯𑒱 𑒁𑒕𑒱। 𑒄 𑒮𑓂𑒟𑒪 𑒮𑒹𑒯𑒼 𑒩𑒐𑒥𑒰𑒩𑒲 𑒑𑒰𑒧 𑒪𑒑 𑒁𑒕𑒱।
𑓑𑓐. 𑒧𑒳𑒮𑒯𑒩𑒢𑒱𑒨𑒰𑓀 𑒛𑒲𑒯- 𑒁𑓀𑒡𑒩𑒰 𑒚𑒰𑒜𑓃𑒲𑒮𑒿 𑓓 𑒏𑒱𑒪𑒼𑒧𑒲𑒙𑒩 𑒣𑒬𑓂𑒔𑒱𑒧 𑒣𑒮𑓂𑒙𑒢 𑒑𑒰𑒧 𑒪𑒑 𑒋𑒏𑒙𑒰 𑒆𑓀𑒔 𑒛𑒲𑒯 𑒁𑒕𑒱।𑒥𑒳𑒠𑓂𑒡𑒏𑒰𑒪𑒲𑒢 𑒋𑒏𑒖𑒢𑒱𑒨𑒰𑒿 𑒏𑒼𑒚𑒪𑒲, 𑒥𑒾𑒠𑓂𑒡𑒏𑒰𑒪𑒲𑒢 𑒧𑒴𑒩𑓂𑒞𑓂𑒞𑒱, 𑒣𑒰𑒃, 𑒥𑒩𑓂𑒞𑓂𑒞𑒢𑒏 𑒙𑒳𑒏𑒛𑓃𑒲 𑒂 𑒣𑒖𑒹𑒥𑒰𑒏 𑒁𑒫𑒬𑒹𑒭 𑒋𑒞𑒋 𑒁𑒕𑒱।
𑓑𑓑. 𑒦𑒑𑒲𑒩𑒟𑒣𑒳𑒩- 𑒣𑒝𑓂𑒛𑒾𑒪 𑒪𑒑 𑒦𑒑𑒲𑒩𑒟𑒣𑒳𑒩 𑒑𑒰𑒧𑒧𑒹 𑒁𑒦𑒱𑒪𑒹𑒐 𑒁𑒕𑒱 𑒖𑒰𑒯𑒱𑒮𑒿 𑒍𑒃𑒢𑒫𑒰𑒩 𑒫𑓀𑒬𑒏 𑒁𑓀𑒞𑒱𑒧 𑒠𑒳𑒢𑒴 𑒬𑒰𑒮𑒏 𑒩𑒰𑒧𑒦𑒠𑓂𑒩𑒠𑒹𑒫 𑒂 𑒪𑒏𑓂𑒭𑓂𑒧𑒲𑒢𑒰𑒟𑒏 𑒣𑓂𑒩𑒬𑒰𑒮𑒢𑒏 𑒫𑒱𑒭𑒨𑒧𑒹 𑒮𑒴𑒔𑒢𑒰 𑒦𑒹𑒙𑒻𑒞 𑒁𑒕𑒱।
𑓑𑓒. 𑒁𑒏𑒾𑒩- 𑒧𑒡𑒳𑒥𑒢𑒲𑒮𑒿 𑓒𑓐 𑒏𑒱𑒪𑒼𑒧𑒲𑒙𑒩 𑒣𑒬𑓂𑒔𑒱𑒧 𑒂 𑒅𑒞𑓂𑒞𑒩𑒧𑒹 𑒁𑒏𑒾𑒩 𑒑𑒰𑒧𑒧𑒹 𑒋𑒏𑒙𑒰 𑒆𑒿𑒔 𑒛𑒲𑒯 𑒁𑒕𑒱, 𑒖𑒞𑒋 𑒥𑒾𑒠𑓂𑒡𑒏𑒰𑒪𑒏 𑒧𑒴𑒩𑓂𑒞𑓂𑒞𑒱 𑒁𑒕𑒱।
𑓑𑓓. 𑒥𑒪𑒱𑒩𑒰𑒖𑒣𑒳𑒩 𑒏𑒱𑒪𑒰- 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒥𑒰𑒥𑒴𑒥𑒩𑒯𑒲 𑒣𑓂𑒩𑒐𑒝𑓂𑒛𑒮𑒿 𑓕 𑒏𑒱𑒪𑒼𑒧𑒲𑒙𑒩 𑒣𑒴𑒥 𑒥𑒪𑒱𑒩𑒰𑒖𑒣𑒳𑒩 𑒑𑒰𑒧 𑒁𑒕𑒱। 𑒋𑒏𑒩 𑒠𑒏𑓂𑒭𑒱𑒝 𑒠𑒱𑒬𑒰𑒧𑒹 𑒋𑒏𑒙𑒰 𑒣𑒳𑒩𑒰𑒢 𑒏𑒱𑒪𑒰𑒏 𑒁𑒫𑒬𑒹𑒭 𑒁𑒕𑒱। 𑒏𑒱𑒪𑒰 𑒔𑒰𑒩𑒱 𑒏𑒱𑒪𑒼𑒧𑒲𑒙𑒩 𑒢𑒧𑒑𑒩 𑒂 𑒋𑒏 𑒏𑒱𑒪𑒼𑒧𑒲𑒙𑒩 𑒔𑒰𑒏𑒩 𑒁𑒕𑒱। 𑒠𑒮 𑒤𑒲𑒙𑒏 𑒧𑒼𑒙 𑒠𑒹𑒥𑒰𑒪𑒮𑒿 𑒄 𑒒𑒹𑒩𑒪 𑒁𑒕𑒱।
𑓑𑓔. 𑒁𑒮𑒳𑒩𑒑𑒜𑓃 𑒏𑒱𑒪𑒰- 𑒧𑒱𑒟𑒱𑒪𑒰𑒏 𑒠𑒼𑒮𑒩 𑒏𑒱𑒪𑒰 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒣𑒴𑒥 𑒂 𑒅𑒞𑓂𑒞𑒩 𑒮𑒲𑒧𑒰 𑒣𑒩 𑒞𑒱𑒪𑒨𑒳𑒑𑒰 𑒡𑒰𑒩𑒏 𑒏𑒰𑒞𑒧𑒹 𑒧𑒯𑒰𑒠𑒹𑒫 𑒧𑒚 𑒪𑒑 𑓕𑓐 𑒋𑒏𑒛𑓃𑒧𑒹 𑒣𑒮𑒩𑒪 𑒁𑒕𑒱।
𑓑𑓕. 𑒖𑒨𑒢𑒑𑒩 𑒏𑒱𑒪𑒰- 𑒧𑒱𑒟𑒱𑒪𑒰𑒏 𑒞𑒹𑒮𑒩 𑒏𑒱𑒪𑒰 𑒁𑒕𑒱 𑒦𑒰𑒩𑒞 𑒢𑒹𑒣𑒰𑒪 𑒮𑒲𑒧𑒰 𑒣𑒩 𑒣𑓂𑒩𑒰𑒔𑒲𑒢 𑒖𑒨𑒣𑒳𑒩 𑒂 𑒫𑒩𑓂𑒞𑓂𑒞𑒧𑒰𑒢 𑒖𑒨𑒢𑒑𑒩 𑒢𑒑𑒩 𑒪𑒑। 𑒠𑒩𑒦𑓀𑒑𑒰 𑒪𑒑 𑒣𑓀𑒔𑒼𑒦 𑒑𑒰𑒧𑒮𑒿 𑒣𑓂𑒩𑒰𑒣𑓂𑒞 𑒞𑒰𑒧𑓂𑒩 𑒁𑒦𑒱𑒪𑒹𑒐 𑒣𑒩 𑒖𑒨𑒣𑒳𑒩 𑒏𑒹𑒩 𑒫𑒩𑓂𑒝𑒢 𑒁𑒕𑒱।
𑓑𑓖. 𑒢𑒢𑓂𑒠𑒢𑒑𑒜𑓃- 𑒥𑒹𑒞𑒱𑒨𑒰𑒮𑒿 𑓑𑓒 𑒧𑒲𑒪 𑒣𑒬𑓂𑒔𑒱𑒧-𑒅𑒞𑓂𑒞𑒩𑒧𑒹 𑒄 𑒏𑒱𑒪𑒰 𑒁𑒕𑒱। 𑒞𑒲𑒢 𑒣𑓀𑒏𑓂𑒞𑓂𑒞𑒱𑒧𑒹 𑓑𑓕 𑒙𑒰 𑒆𑒿𑒔 𑒛𑒲𑒯 𑒁𑒕𑒱।
𑓑𑓗. 𑒪𑒾𑒩𑒱𑒨𑒰-𑒢𑒢𑓂𑒠𑒢𑒑𑒜𑓃- 𑒢𑒢𑓂𑒠𑒢𑒑𑒜𑓃𑒮𑒿 𑒅𑒞𑓂𑒞𑒩 𑒮𑓂𑒟𑒱𑒞 𑒁𑒕𑒱, 𑒋𑒞𑒋 𑒁𑒬𑒼𑒏 𑒮𑓂𑒞𑓀𑒦 𑒂 𑒥𑒾𑒠𑓂𑒡 𑒮𑓂𑒞𑒴𑒣 𑒁𑒕𑒱।
𑓑𑓘. 𑒠𑒹𑒏𑒳𑒪𑒲𑒑𑒜𑓃- 𑒬𑒱𑒫𑒯𑒩 𑒖𑒱𑒪𑒰𑒮𑒿 𑒞𑒲𑒢 𑒏𑒱𑒪𑒼𑒧𑒲𑒙𑒩 𑒣𑒴𑒥 𑒯𑒰𑒃𑒫𑒹 𑒏𑒹𑒩 𑒏𑒰𑒞𑒧𑒹 𑒠𑒴 𑒙𑒰 𑒏𑒱𑒪𑒰𑒏 𑒁𑒫𑒬𑒹𑒭 𑒁𑒕𑒱। 𑒔𑒰𑒩𑒴 𑒠𑒱𑒬𑒱 𑒐𑒡𑒰𑒃 𑒁𑒕𑒱।
𑓑𑓙. 𑒏𑒙𑒩𑒰𑒑𑒜𑓃- 𑒧𑒳𑒖𑒤𑓂𑒤𑒩𑒣𑒳𑒩𑒧𑒹 𑒏𑒙𑒩𑒰 𑒑𑒰𑒧𑒧𑒹 𑒫𑒱𑒬𑒰𑒪 𑒑𑒜𑓃 𑒁𑒕𑒱, 𑒠𑒹𑒏𑒳𑒪𑒲 𑒑𑒜𑓃 𑒖𑒹𑒏𑒰𑒿 𑒔𑒰𑒩𑒴 𑒏𑒰𑒞 𑒐𑒡𑒰𑒃 𑒐𑒳𑒢𑒪 𑒁𑒕𑒱।
𑓒𑓐. 𑒢𑒾𑒪𑒰𑒑𑒜𑓃- 𑒥𑒹𑒑𑒳𑒮𑒩𑒰𑒨𑒮𑒿 𑓒𑓕 𑒏𑒱𑒪𑒼𑒧𑒲𑒙𑒩 𑒅𑒞𑓂𑒞𑒩 𑓓𑓕𑓐 𑒋𑒏𑒛𑓃𑒧𑒹 𑒣𑒮𑒩𑒪 𑒄 𑒑𑒜𑓃 𑒁𑒕𑒱।
𑓒𑓑. 𑒧𑓀𑒑𑒪𑒑𑒜𑓃-𑒥𑒹𑒑𑒴𑒮𑒩𑒰𑒨𑒧𑒹 𑒥𑒩𑒱𑒨𑒰𑒩𑒣𑒳𑒩 𑒟𑒰𑒢𑒰𑒧𑒹 𑒏𑒰𑒥𑒩 𑒗𑒲𑒪𑒏 𑒧𑒡𑓂𑒨 𑒋𑒏𑒙𑒰 𑒆𑒿𑒔 𑒛𑒲𑒯 𑒁𑒕𑒱। 𑒋𑒞𑒋 𑒄 𑒑𑒜𑓃 𑒁𑒕𑒱।
𑓒𑓒. 𑒁𑒪𑒾𑒪𑒲𑒑𑒜𑓃-𑒐𑒑𑒛𑓃𑒱𑒨𑒰𑒮𑒿 𑓑𑓕 𑒏𑒱𑒪𑒼𑒧𑒲𑒙𑒩 𑒅𑒞𑓂𑒞𑒩 𑒁𑒪𑒾𑒪𑒲 𑒑𑒰𑒧 𑒪𑒑 𑓑𑓐𑓐 𑒋𑒏𑒛𑓃𑒧𑒹 𑒣𑒮𑒩𑒪 𑒄 𑒑𑒜𑓃 𑒁𑒕𑒱।
𑓒𑓓. 𑒏𑒲𑒔𑒏𑒑𑒜𑓃-𑒣𑒴𑒩𑓂𑒝𑒱𑒨𑒰 𑒖𑒱𑒪𑒰𑒧𑒹 𑒛𑒹𑓀𑒑𑒩𑒒𑒰𑒙𑒮𑒿 𑓑𑓐 𑒏𑒱𑒪𑒼𑒧𑒲𑒙𑒩 𑒅𑒞𑓂𑒞𑒩 𑒧𑒯𑒰𑒢𑒢𑓂𑒠𑒰 𑒢𑒠𑒲𑒏 𑒣𑒴𑒥𑒧𑒹 𑒄 𑒑𑒜𑓃 𑒁𑒕𑒱।
𑓒𑓔. 𑒥𑒹𑒢𑒴𑒑𑒜𑓃-𑒙𑒹𑒜𑓃𑒑𑒰𑒕 𑒟𑒰𑒢𑒰𑒧𑒹 𑒏𑒫𑒪 𑒡𑒰𑒩𑒏 𑒏𑒰𑒞𑒧𑒹 𑒄 𑒑𑒜𑓃 𑒁𑒕𑒱।
𑓒𑓕. 𑒫𑒩𑒱𑒖𑒢𑒑𑒜𑓃-𑒥𑒯𑒰𑒠𑒳𑒩𑒑𑓀𑒖𑒮𑒿 𑒕𑒯 𑒏𑒱𑒪𑒼𑒧𑒲𑒙𑒩 𑒠𑒏𑓂𑒭𑒱𑒝𑒧𑒹 𑒪𑒼𑒢𑒮𑒫𑒩𑒲 𑒡𑒰𑒩𑒏 𑒏𑒰𑒞𑒧𑒹 𑒄 𑒑𑒜𑓃 𑒁𑒕𑒱।
𑓒𑓖. 𑒑𑒾𑒞𑒧 𑒞𑒲𑒩𑓂𑒟- 𑒏𑒧𑒞𑒾𑒪 𑒮𑓂𑒙𑒹𑒬𑒢𑒮𑒿 𑓖 𑒏𑒱𑒪𑒼𑒧𑒲𑒙𑒩 𑒣𑒬𑓂𑒔𑒱𑒧 𑒥𑓂𑒩𑒯𑓂𑒧𑒣𑒳𑒩 𑒑𑒰𑒧 𑒪𑒑 𑒋𑒏𑒙𑒰 𑒑𑒾𑒞𑒧 𑒏𑒳𑒝𑓂𑒛 𑒣𑒳𑒭𑓂𑒏𑒩𑒱𑒝𑒲 𑒁𑒕𑒱।
𑓒𑓗. 𑒯𑒪𑒰𑒫𑒩𑓂𑒞𑓂𑒞- 𑒖𑒢𑒏𑒣𑒳𑒩𑒮𑒿 𑓓𑓕 𑒏𑒱𑒪𑒼𑒧𑒲𑒙𑒩 𑒠𑒏𑓂𑒭𑒱𑒝 𑒣𑒬𑓂𑒔𑒱𑒧𑒧𑒹 𑒮𑒲𑒞𑒰𑒧𑒜𑓃𑒲 𑒢𑒑𑒩𑒧𑒹 𑒯𑒪𑒫𑒹𑒬𑓂𑒫𑒩 𑒬𑒱𑒫 𑒧𑒢𑓂𑒠𑒱𑒩 𑒂 𑒖𑒰𑒢𑒏𑒲 𑒧𑒢𑓂𑒠𑒱𑒩 𑒁𑒕𑒱। 𑒋𑒞𑒋𑒮𑒿 𑒛𑒹𑒜𑓃 𑒏𑒱𑒪𑒼𑒧𑒲𑒙𑒩 𑒣𑒩 𑒣𑒳𑒝𑓂𑒛𑒩𑒲𑒏 𑒏𑓂𑒭𑒹𑒞𑓂𑒩𑒧𑒹 𑒮𑒲𑒞𑒰𑒏𑒳𑒝𑓂𑒛 𑒁𑒕𑒱। 𑒯𑒪𑒰𑒫𑒩𑓂𑒞𑓂𑒞𑒧𑒹 𑒖𑒢𑒏 𑒠𑓂𑒫𑒰𑒩 𑒯𑒩 𑒔𑒪𑒋𑒥𑒰 𑒏𑒰𑒪 𑒮𑒲𑒞𑒰 𑒦𑒹𑒙𑒪𑒱 𑒕𑒪𑒲𑒯। 𑒩𑒰𑒧 𑒢𑒫𑒧𑒲 (𑒔𑒻𑒞𑓂𑒩 𑒬𑒳𑒏𑓂𑒪 𑒢𑒫𑒧𑒲) 𑒂 𑒖𑒰𑒢𑒏𑒲 𑒢𑒫𑒧𑒲 (𑒫𑒻𑒬𑒰𑒐 𑒬𑒳𑒏𑓂𑒪 𑒢𑒫𑒧𑒲) 𑒣𑒩 𑒋𑒞𑒋 𑒧𑒹𑒪𑒰 𑒪𑒑𑒻𑒞 𑒁𑒕𑒱।
𑓒𑓘. 𑒤𑒳𑒪𑒯𑒩-𑒧𑒡𑒳𑒥𑒢𑒲 𑒖𑒱𑒪𑒰𑒏 𑒯𑒩𑒪𑒰𑒐𑒲 𑒟𑒰𑒢𑒰𑒧𑒹 𑒤𑒳𑒪𑒯𑒩 𑒑𑒰𑒧𑒧𑒹 𑒖𑒢𑒏𑒏 𑒣𑒳𑒭𑓂𑒣𑒫𑒰𑒙𑒱𑒏𑒰 𑒕𑒪, 𑒖𑒞𑒋 𑒮𑒲𑒞𑒰 𑒤𑒴𑒪 𑒪𑒼𑒜𑓃𑒻𑒞 𑒕𑒪𑒲𑒯।
𑓒𑓙. 𑒖𑒢𑒏𑒣𑒳𑒩-𑒥𑒵𑒯𑒠𑓂 𑒫𑒱𑒭𑓂𑒝𑒳𑒣𑒳𑒩𑒰𑒝𑒧𑒹 𑒧𑒱𑒟𑒱𑒪𑒰𑒧𑒰𑒯𑒰𑒞𑓂𑒧𑓂𑒨𑒧𑒹 𑒖𑒢𑒏𑒣𑒳𑒩 𑒏𑓂𑒭𑒹𑒞𑓂𑒩𑒏 𑒫𑒩𑓂𑒝𑒢 𑒁𑒕𑒱। 𑒮𑒞𑓂𑒩𑒯𑒧 𑒬𑒞𑒰𑒥𑓂𑒠𑒲𑒧𑒹 𑒮𑓀𑒞 𑒮𑒴𑒩 𑒏𑒱𑒬𑒼𑒩𑒏𑒹𑒿 𑒁𑒨𑒼𑒡𑓂𑒨𑒰𑒧𑒹 𑒮𑒩𑒨𑒴 𑒡𑒰𑒩𑒧𑒹 𑒩𑒰𑒧 𑒂 𑒖𑒰𑒢𑒏𑒲𑒏 𑒠𑒴 𑒙𑒰 𑒦𑒫𑓂𑒨 𑒧𑒴𑒩𑓂𑒞𑓂𑒞𑒱 𑒦𑒹𑒙𑒪𑒢𑓂𑒯𑒱, 𑒖𑒏𑒩𑒰 𑒍 𑒖𑒰𑒢𑒏𑒲 𑒧𑒢𑓂𑒠𑒱𑒩, 𑒖𑒢𑒏𑒣𑒳𑒩𑒧𑒹 𑒮𑓂𑒟𑒰𑒣𑒱𑒞 𑒏𑒋 𑒠𑒹𑒪𑒢𑓂𑒯𑒱। 𑒫𑒩𑓂𑒞𑓂𑒞𑒧𑒰𑒢 𑒧𑒢𑓂𑒠𑒱𑒩𑒏 𑒮𑓂𑒟𑒰𑒣𑒢𑒰 𑒙𑒲𑒏𑒧𑒑𑒜𑓃𑒏 𑒧𑒯𑒰𑒩𑒰𑒢𑒲 𑒠𑓂𑒫𑒰𑒩𑒰 𑓑𑓙𑓑𑓑 𑒄. 𑒧𑒹 𑒦𑒹𑒪। 𑒢𑒑𑒩𑒏 𑒔𑒰𑒩𑒴𑒏𑒰𑒞 𑒨𑒧𑒳𑒢𑒲, 𑒑𑒹𑒩𑒳𑒐𑒰 𑒂 𑒠𑒳𑒑𑓂𑒡𑒫𑒞𑒲 𑒡𑒰𑒩 𑒁𑒕𑒱। 𑒩𑒰𑒧 𑒢𑒫𑒧𑒲 (𑒔𑒻𑒞𑓂𑒩 𑒬𑒳𑒏𑓂𑒪 𑒢𑒫𑒧𑒲),𑒖𑒰𑒢𑒏𑒲 𑒢𑒫𑒧𑒲 (𑒫𑒻𑒬𑒰𑒐 𑒬𑒳𑒏𑓂𑒪 𑒢𑒫𑒧𑒲) 𑒂 𑒫𑒱𑒫𑒰𑒯 𑒣𑓀𑒔𑒧𑒲 (𑒁𑒑𑒯𑒢 𑒬𑒳𑒏𑓂𑒪 𑒣𑓀𑒔𑒧𑒲) 𑒣𑒩 𑒋𑒞𑒋 𑒧𑒹𑒪𑒰 𑒪𑒑𑒻𑒞 𑒁𑒕𑒱।
𑓓𑓐. 𑒡𑒢𑒳𑒭𑒰- 𑒖𑒢𑒏𑒣𑒳𑒩𑒮𑒿 𑓑𑓕 𑒏𑒱𑒪𑒼𑒧𑒲𑒙𑒩 𑒅𑒞𑓂𑒞𑒩 𑒡𑒢𑒳𑒭𑒰 𑒮𑓂𑒟𑒰𑒢𑒧𑒹 𑒣𑒲𑒣𑒩𑒏 𑒑𑒰𑒕𑒏 𑒢𑒲𑒔𑒰𑒿 𑒋𑒏𑒙𑒰 𑒡𑒢𑒳𑒭𑒰𑒏𑒰𑒩 𑒐𑒝𑓂𑒛 𑒣𑒛𑓃𑒪 𑒁𑒕𑒱। 𑒩𑒰𑒧𑒏 𑒞𑒼𑒛𑓃𑒪 𑒄 𑒡𑒢𑒳𑒭 𑒁𑒕𑒱। 𑒋𑒯𑒱𑒮𑒿 𑒣𑒴𑒥 𑒫𑒰𑒝𑒑𑓀𑒑𑒰 𑒡𑒰𑒩 𑒥𑒯𑒻𑒞 𑒁𑒕𑒱 𑒖𑒹 𑒪𑒏𑓂𑒭𑓂𑒧𑒝 𑒠𑓂𑒫𑒰𑒩𑒰 𑒫𑒰𑒝𑒮𑒿 𑒅𑒠𑓂𑒒𑒰𑒙𑒱𑒞 𑒦𑒹𑒪 𑒕𑒪।
𑓓𑓑. 𑒮𑒳𑒑𑓂𑒑𑒰-𑒖𑒢𑒏𑒣𑒳𑒩 𑒪𑒑 𑒖𑒪𑒹𑒬𑓂𑒫𑒩 𑒬𑒱𑒫𑒡𑒰𑒧𑒏 𑒮𑒧𑒲𑒣 𑒮𑒳𑒑𑓂𑒑𑒰 𑒑𑓂𑒩𑒰𑒧𑒧𑒹 𑒬𑒳𑒏𑒠𑒹𑒫𑒖𑒲𑒏 𑒂𑒬𑓂𑒩𑒧 𑒁𑒕𑒱। 𑒬𑒳𑒏𑒠𑒹𑒫𑒖𑒲 𑒖𑒢𑒏𑒮𑒿 𑒬𑒱𑒏𑓂𑒭𑒰 𑒪𑒹𑒥𑒰𑒏 𑒯𑒹𑒞𑒳 𑒧𑒱𑒟𑒱𑒪𑒰 𑒂𑒋𑒪 𑒕𑒪𑒰𑒯- 𑒋𑒯𑒱 𑒚𑒰𑒧 𑒯𑒳𑒢𑒏𑒩 𑒚𑒯𑒩𑒹𑒥𑒰𑒏 𑒫𑓂𑒨𑒫𑒮𑓂𑒟𑒰 𑒦𑒹𑒪 𑒕𑒪।
𑓓𑓒. 𑒮𑒱𑓀𑒯𑒹𑒬𑓂𑒫𑒩- 𑒧𑒡𑒹𑒣𑒳𑒩𑒰𑒮𑒿 𑓕 𑒏𑒱𑒪𑒼𑒧𑒲𑒙𑒩𑒣𑒩 𑒑𑒾𑒩𑒲𑒣𑒳𑒩 𑒑𑒰𑒧 𑒪𑒑 𑒮𑒱𑓀𑒯𑒹𑒬𑓂𑒫𑒩 𑒬𑒱𑒫𑒡𑒰𑒧 𑒁𑒕𑒱।
𑓓𑓓. 𑒏𑒣𑒱𑒪𑒹𑒬𑓂𑒫𑒩-𑒏𑒣𑒱𑒪 𑒧𑒳𑒢𑒱 𑒠𑓂𑒫𑒰𑒩 𑒮𑓂𑒟𑒰𑒣𑒱𑒞 𑒧𑒯𑒰𑒠𑒹𑒫 𑒧𑒡𑒳𑒥𑒢𑒲𑒮𑒿 𑓖 𑒏𑒱𑒪𑒼𑒧𑒲𑒙𑒩 𑒣𑒬𑓂𑒔𑒱𑒧𑒧𑒹 𑒁𑒕𑒱।
𑓓𑓔. 𑒏𑒳𑒬𑒹𑒬𑓂𑒫𑒩- 𑒮𑒧𑒮𑓂𑒞𑒲𑒣𑒳𑒩𑒮𑒿 𑒅𑒞𑓂𑒞𑒩-𑒣𑒴𑒥, 𑒪𑒯𑒹𑒩𑒱𑒨𑒰𑒮𑒩𑒰𑒨𑒮𑒿 𑓖𑓐 𑒏𑒱𑒪𑒼𑒧𑒲𑒙𑒩 𑒠𑒏𑓂𑒭𑒱𑒝-𑒣𑒴𑒥 𑒂 𑒮𑒯𑒩𑒮𑒰𑒮𑒿 𑓒𑓕 𑒏𑒱𑒪𑒼𑒧𑒲𑒙𑒩 𑒣𑒬𑓂𑒔𑒱𑒧 𑒄 𑒋𑒏𑒙𑒰 𑒣𑓂𑒩𑒮𑒱𑒠𑓂𑒡 𑒬𑒱𑒫𑒮𑓂𑒟𑒰𑒢 𑒁𑒕𑒱। 𑒋𑒞𑒋 𑒔𑒱𑒛𑓃𑒻-𑒁𑒦𑓂𑒨𑒰𑒩𑒝𑓂𑒨 𑒮𑒹𑒯𑒼 𑒁𑒕𑒱 𑒖𑒞𑒋 𑒅𑒖𑓂𑒖𑒩 𑒂 𑒏𑒰𑒩𑒲 𑒑𑒻𑒥𑒩, 𑒪𑒰𑒪𑒮𑒩, 𑒠𑒱𑒒𑒾𑒕, 𑒧𑒻𑒪, 𑒢𑒏𑒙𑒰, 𑒑𑒻𑒩𑒲, 𑒑𑒑𑒢, 𑒮𑒱𑒪𑓂𑒪𑒲, 𑒁𑒡𑒰𑒢𑒲, 𑒯𑒩𑒱𑒁𑒪, 𑒔𑒰𑒯𑒰, 𑒏𑒩𑒢, 𑒩𑒞𑒥𑒰 𑒔𑒱𑒛𑓃𑒻 𑒮𑒦 𑒁𑒢𑒰𑒨𑒰𑒮𑒯𑒱 𑒢𑒫𑒧𑓂𑒥𑒩𑒮𑒿 𑒧𑒰𑒩𑓂𑒔 𑒡𑒩𑒱 𑒠𑒹𑒐𑒥𑒰𑒧𑒹 𑒁𑒋𑒞 ।
𑓓𑓕. 𑒮𑒱𑒧𑒩𑒠𑒯-𑒟𑒪𑒫𑒰𑒩𑒰 𑒮𑓂𑒙𑒹𑒬𑒢 𑒪𑒑 𑒬𑒱𑒫𑒮𑒱𑓀𑒯 𑒠𑓂𑒫𑒰𑒩𑒰 𑒥𑒮𑒰𑒍𑒪 𑒬𑒱𑒫𑒮𑒱𑓀𑒯𑒣𑒳𑒩 𑒑𑒰𑒧 𑒪𑒑 𑒄 𑒬𑒱𑒫𑒧𑒢𑓂𑒠𑒱𑒩 𑒁𑒕𑒱।
𑓓𑓖. 𑒮𑒼𑒧𑒢𑒰𑒟- 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒮𑒾𑒩𑒰𑒚 𑒑𑒰𑒧𑒧𑒹 𑒮𑒦𑒰𑒑𑒰𑒕𑒲 𑒪𑒑 𑒮𑒼𑒧𑒠𑒹𑒫 𑒧𑒯𑒰𑒠𑒹𑒫 𑒕𑒟𑒱।
𑓓𑓗. 𑒧𑒠𑒢𑒹𑒬𑓂𑒫𑒩- 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒁𑓀𑒡𑒩𑒰 𑒚𑒰𑒜𑓃𑒲𑒮𑒿 𑓔 𑒏𑒱𑒪𑒼𑒧𑒲𑒙𑒩 𑒣𑒴𑒥 𑒧𑒠𑒢𑒹𑒬𑓂𑒫𑒩 𑒬𑒱𑒫 𑒮𑓂𑒟𑒰𑒢 𑒁𑒕𑒱।
𑓓𑓘. 𑒏𑒳𑒢𑓂𑒠𑒑𑓂𑒩𑒰𑒧:𑒯𑒰𑒖𑒲𑒣𑒳𑒩𑒮𑒿 𑒥𑒞𑓂𑒞𑒲𑒮 𑒏𑒱𑒪𑒼𑒧𑒲𑒙𑒩 𑒅𑒞𑓂𑒞𑒩-𑒣𑒴𑒩𑓂𑒫𑒧𑒹 𑒥𑒮𑒰𑒡-𑒫𑒻𑒬𑒰𑒪𑒲 𑒂 𑒪𑒑𑒧𑒹 𑒫𑒰𑒮𑒼𑒏𑒳𑒝𑓂𑒛 𑒪𑒑, 𑒑𑒰𑒧 𑒑𑒜𑓃-𑒙𑒲𑒪𑒰𑒮𑒿 𑓒 𑒏𑒱.𑒧𑒲. 𑒅𑒞𑓂𑒞𑒩-𑒣𑒴𑒩𑓂𑒫 𑒁𑒕𑒱 𑒏𑒳𑒢𑓂𑒠𑒑𑓂𑒩𑒰𑒧, 𑒖𑒞𑒋 𑒖𑒻𑒢𑒏 𑓒𑓔𑒧 𑒞𑒲𑒩𑓂𑒟𑓀𑒏𑒩 𑒧𑒯𑒰𑒫𑒲𑒩𑒏 𑒖𑒢𑓂𑒧 𑒦𑒹𑒪 𑒕𑒪𑒢𑓂𑒯𑒱। 𑒋𑒞𑒋 𑒥𑒳𑒠𑓂𑒡𑒏 𑒕𑒰𑒅𑒩, 𑒁𑒦𑒱𑒭𑒹𑒏 𑒣𑒳𑒭𑒏𑒩𑒝𑒲 (𑒩𑒰𑒖𑒰 𑒁𑒦𑒱𑒭𑒹𑒏𑒮𑒿 𑒣𑒴𑒩𑓂𑒫 𑒋𑒞𑒋 𑒢𑒯𑒰𑒃𑒞 𑒩𑒯𑒟𑒱), 𑒁𑒬𑒼𑒏 𑒮𑓂𑒞𑒧𑓂𑒦 𑒂 𑒮𑓀𑒮𑒠-𑒦𑒫𑒢 (𑒩𑒰𑒖𑒰 𑒫𑒱𑒬𑒰𑒪𑒏 𑒑𑒜𑓃) 𑒁𑒕𑒱।
𑓓𑓙. 𑒔𑒝𑓂𑒛𑒹𑒬𑓂𑒫𑒩- 𑒗𑓀𑒗𑒰𑒩𑒣𑒳𑒩𑒧𑒹 𑒯𑒩𑒛𑓃𑒲 𑒑𑒰𑒧 𑒪𑒑 𑒔𑒝𑓂𑒛𑒹𑒬𑓂𑒫𑒩 𑒚𑒰𑒏𑒳𑒩 𑒠𑓂𑒫𑒰𑒩𑒰 𑒮𑓂𑒟𑒰𑒣𑒱𑒞 𑒔𑒝𑓂𑒛𑒹𑒬𑓂𑒫𑒩 𑒬𑒱𑒫𑒮𑓂𑒟𑒰𑒢 𑒁𑒕𑒱।
𑓔𑓐. 𑒥𑒱𑒠𑒹𑒬𑓂𑒫𑒩-𑒧𑒡𑒳𑒥𑒢𑒲 𑒖𑒱𑒪𑒰𑒧𑒹 𑒪𑒼𑒯𑒢𑒰𑒩𑒼𑒛 𑒮𑓂𑒙𑒹𑒬𑒢 𑒪𑒑 𑒮𑓂𑒟𑒱𑒞 𑒬𑒱𑒫𑒡𑒰𑒧𑒏 𑒮𑓂𑒟𑒰𑒣𑒢𑒰 𑒧𑒯𑒰𑒩𑒰𑒖 𑒧𑒰𑒡𑒫𑒮𑒱𑓀𑒯 𑒏𑒋𑒪𑒢𑓂𑒯𑒱। 𑒞𑒰𑒯𑒱 𑒨𑒳𑒑𑒏 𑒧𑒱𑒟𑒱𑒪𑒰𑒏𑓂𑒭𑒩𑒏 𑒁𑒦𑒱𑒪𑒹𑒐 𑒮𑒹𑒯𑒼 𑒋𑒞𑒋 𑒁𑒕𑒱।
𑓔𑓑. 𑒬𑒱𑒪𑒰𑒢𑒰𑒟- 𑒖𑒨𑒢𑒑𑒩 𑒪𑒑 𑒏𑒧𑒪𑒰 𑒡𑒰𑒩𑒏 𑒏𑒰𑒞𑒧𑒹 𑒬𑒱𑒪𑒰𑒢𑒰𑒟 𑒧𑒯𑒰𑒠𑒹𑒫 𑒕𑒟𑒱।
𑓔𑓒. 𑒅𑒑𑓂𑒩𑒢𑒰𑒟-𑒧𑒡𑒳𑒥𑒢𑒲𑒮𑒿 𑒠𑒏𑓂𑒭𑒱𑒝 𑒣𑒝𑓂𑒛𑒾𑒪 𑒮𑓂𑒙𑒹𑒬𑒢 𑒪𑒑 𑒦𑒫𑒰𑒢𑒲𑒣𑒳𑒩 𑒑𑒰𑒧𑒧𑒹 𑒅𑒑𑒢𑒰 𑒧𑒯𑒰𑒠𑒹𑒫𑒏 𑒬𑒱𑒫𑒪𑒱𑓀𑒑 𑒁𑒕𑒱। 𑒫𑒱𑒠𑓂𑒨𑒰𑒣𑒞𑒱𑒏𑒹𑒿 𑒣𑓂𑒨𑒰𑒮 𑒪𑒑𑒪𑒢𑓂𑒯𑒱 𑒞𑒿 𑒅𑒑𑒢𑒰𑒩𑒴𑒣𑒲 𑒧𑒯𑒰𑒠𑒹𑒫 𑒖𑒙𑒰𑒮𑒿 𑒑𑓀𑒑𑒰𑒖𑒪 𑒢𑒱𑒏𑒰𑒪𑒱 𑒖𑒪 𑒣𑒱𑒋𑒪𑒐𑒱𑒢𑓂𑒯। 𑒫𑒱𑒠𑓂𑒨𑒰𑒣𑒞𑒱𑒏 𑒯𑒚 𑒏𑒋𑒪𑒰 𑒣𑒩 𑒋𑒯𑒱 𑒮𑓂𑒟𑒰𑒢 𑒣𑒩 𑒅𑒑𑒢𑒰 𑒯𑒳𑒢𑒏𑒰 𑒁𑒣𑒢 𑒁𑒮𑒪 𑒬𑒱𑒫𑒩𑒴𑒣𑒏 𑒠𑒩𑓂𑒬𑒢 𑒠𑒹𑒪𑒐𑒱𑒢𑓂𑒯।
𑓔𑓓. 𑒅𑒔𑓂𑒔𑒻𑒚 𑒕𑒱𑒢𑓂𑒢𑒧𑒮𑓂𑒞𑒱𑒏𑒰 𑒦𑒑𑒫𑒞𑒲- 𑒏𑒧𑒞𑒾𑒪 𑒮𑓂𑒙𑒹𑒬𑒢𑒮𑒿 𑓑𑓖 𑒏𑒱𑒪𑒼𑒧𑒲𑒙𑒩 𑒣𑒴𑒩𑓂𑒫𑒼𑒞𑓂𑒞𑒩 𑒅𑒔𑓂𑒔𑒻𑒚𑒧𑒹 𑒏𑒰𑒪𑒱𑒠𑒰𑒮 𑒦𑒑𑒫𑒞𑒲𑒏 𑒣𑒴𑒖𑒰 𑒏𑒩𑒻𑒞 𑒕𑒪𑒰𑒯। 𑒦𑒑𑒫𑒞𑒲𑒏 𑒧𑒾𑒪𑒱𑒏 𑒧𑒴𑒩𑓂𑒞𑓂𑒞𑒱 𑒧𑒮𑓂𑒞𑒏 𑒫𑒱𑒯𑒲𑒢 𑒁𑒕𑒱।
𑓔𑓔. 𑒅𑒑𑓂𑒩𑒞𑒰𑒩𑒰- 𑒧𑒝𑓂𑒛𑒢 𑒧𑒱𑒬𑓂𑒩𑒏 𑒖𑒢𑓂𑒧𑒦𑒴𑒧𑒱 𑒧𑒯𑒱𑒭𑒲𑒧𑒹 𑒧𑒝𑓂𑒛𑒢𑒏 𑒑𑒼𑒮𑒰𑒅𑒢𑒱 𑒅𑒑𑓂𑒩𑒞𑒰𑒩𑒰 𑒕𑒟𑒱।
𑓔𑓕. 𑒦𑒠𑓂𑒩𑒏𑒰𑒪𑒱𑒏𑒰- 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒏𑒼𑒃𑒪𑒐 𑒑𑒰𑒧𑒧𑒹 𑒦𑒠𑓂𑒩𑒏𑒰𑒪𑒱𑒏𑒰 𑒧𑓀𑒠𑒱𑒩 𑒁𑒕𑒱।
𑓔𑓖. 𑒔𑒰𑒧𑒳𑒝𑓂𑒛𑒰- 𑒧𑒳𑒖𑒤𑓂𑒤𑒩𑒣𑒳𑒩 𑒖𑒱𑒪𑒰𑒧𑒹 𑒏𑒙𑒩𑒰𑒑𑒜𑓃 𑒪𑒑 𑒪𑒏𑓂𑒭𑓂𑒧𑒝𑒰 𑒫𑒰 𑒪𑒐𑒢𑒠𑒹𑒃 𑒡𑒰𑒩 𑒪𑒑 𑒠𑒳𑒩𑓂𑒑𑒰 𑒠𑓂𑒫𑒰𑒩𑒰 𑒔𑒝𑓂𑒛-𑒧𑒳𑒝𑓂𑒛𑒏 𑒫𑒡 𑒏𑒋𑒪 𑒑𑒹𑒪। 𑒍𑒯𑒱 𑒮𑓂𑒟𑒰𑒢 𑒣𑒩 𑒄 𑒧𑒢𑓂𑒠𑒱𑒩 𑒁𑒕𑒱।
𑓔𑓗. 𑒣𑒩𑒮𑒰 𑒮𑒴𑒩𑓂𑒨 𑒧𑒢𑓂𑒠𑒱𑒩- 𑒗𑓀𑒗𑒰𑒩𑒣𑒳𑒩𑒧𑒹 𑒮𑒑𑓂𑒩𑒰𑒧𑒮𑒿 𑒣𑒰𑒿𑒔 𑒏𑒱𑒪𑒼𑒧𑒲𑒙𑒩 𑒣𑒴𑒩𑓂𑒫 𑒣𑒩𑒮𑒰 𑒑𑒰𑒧𑒧𑒹 𑒮𑒰𑒜𑓃𑒹 𑒔𑒰𑒩𑒱 𑒤𑒲𑒙𑒏 𑒦𑒫𑓂𑒨 𑒮𑒴𑒩𑓂𑒨 𑒧𑒴𑒩𑓂𑒞𑓂𑒞𑒱 𑒦𑒹𑒙𑒪 𑒁𑒕𑒱।
𑓔𑓘. 𑒥𑒱𑒮𑒤𑒲- 𑒧𑒡𑒳𑒥𑒢𑒲 𑒖𑒱𑒪𑒰𑒏 𑒥𑒹𑒢𑒲𑒣𑒙𑓂𑒙𑒲 𑒟𑒰𑒢𑒰𑒧𑒹 𑒏𑒧𑒞𑒾𑒪 𑒩𑒹𑒪𑒫𑒹 𑒮𑓂𑒙𑒹𑒬𑒢𑒮𑒿 𑓖 𑒏𑒱𑒪𑒼𑒧𑒲𑒙𑒩 𑒣𑒴𑒥 𑒂 𑒏𑒣𑒱𑒪𑒹𑒬𑓂𑒫𑒩 𑒮𑓂𑒟𑒰𑒢𑒮𑒿 𑓔 𑒏𑒱𑒪𑒼𑒧𑒲𑒙𑒩 𑒣𑒬𑓂𑒔𑒱𑒧 𑒥𑒱𑒮𑒤𑒲 𑒑𑒰𑒧 𑒁𑒕𑒱। 𑒫𑒱𑒠𑓂𑒨𑒰𑒣𑒞𑒱𑒏 𑒖𑒢𑓂𑒧-𑒮𑓂𑒟𑒰𑒢 𑒄 𑒑𑒰𑒧 𑒁𑒕𑒱। 𑒋𑒞𑒋 𑒫𑒱𑒠𑓂𑒨𑒰𑒣𑒞𑒱𑒏 𑒮𑓂𑒧𑒰𑒩𑒏 𑒮𑒹𑒯𑒼 𑒁𑒕𑒱।
𑓔𑓙. 𑒧𑓀𑒠𑒰𑒩 𑒣𑒩𑓂𑒫𑒞-𑒥𑒰𑓀𑒏𑒰 𑒮𑓂𑒟𑒱𑒞 𑒮𑓂𑒟𑒪𑒧𑒹 𑒧𑒱𑒟𑒱𑒪𑒰𑒏𑓂𑒭𑒩𑒏 𑒑𑒳𑒣𑓂𑒞𑒫𑓀𑒬𑒲𑒨 𑓗𑒧𑓂 𑒬𑒞𑒰𑒥𑓂𑒠𑒲𑒏 𑒁𑒦𑒱𑒪𑒹𑒐 𑒁𑒕𑒱। 𑒮𑒧𑒳𑒠𑓂𑒩 𑒧𑓀𑒟𑒢𑒏 𑒯𑒹𑒞𑒳 𑒧𑓀𑒠𑒰𑒩𑒏 𑒣𑓂𑒩𑒨𑒼𑒑 𑒦𑒹𑒪 𑒕𑒪। 𑒢𑒱𑒏𑒙𑒧𑒹 𑒥𑒾𑓀𑒮𑒲𑒧𑒹 𑒖𑒻𑒢𑒏 𑒥𑒰𑒩𑒯𑒧 𑒞𑒲𑒩𑓂𑒟𑓀𑒏𑒩 𑒫𑒰𑒮𑒳𑒣𑒴𑒖𑓂𑒨 𑒢𑒰𑒟𑒏 𑒠𑒴𑒙𑒰 𑒧𑒴𑒩𑓂𑒞𑓂𑒞𑒱 𑒁𑒕𑒱, 𑒣𑒻𑒒 𑒧𑒴𑒩𑓂𑒞𑒱 𑒪𑒰𑒪 𑒣𑒰𑒟𑒩𑒏 𑒁𑒕𑒱 𑒞𑒿 𑒠𑒼𑒮𑒩 𑒏𑒰𑒿𑒮𑒰𑒏 𑒖𑒏𑒩 𑒮𑒼𑒗𑒰𑒿 𑒠𑒴𑒙𑒰 𑒣𑒠𑒔𑒱𑒢𑓂𑒯 𑒁𑒕𑒱। 𑒖𑒻𑒢𑒏 𑒥𑒰𑒩𑒯𑒧 𑒞𑒲𑒩𑓂𑒟𑓀𑒏𑒩 𑒫𑒰𑒮𑒳𑒣𑒴𑒖𑓂𑒨 𑒢𑒰𑒟𑒏 𑒖𑒢𑓂𑒧 𑒔𑒧𑓂𑒣𑒰𑒢𑒑𑒩𑒧𑒹 𑒂 𑒢𑒱𑒩𑓂𑒫𑒰𑒝 𑒋𑒯𑒱 𑒚𑒰𑒧 𑒦𑒹𑒪 𑒕𑒪𑒢𑓂𑒯𑒱।
𑓕𑓐. 𑒫𑒱𑒏𑓂𑒩𑒧𑒬𑒱𑒪𑒰-𑒦𑒰𑒑𑒪𑒣𑒳𑒩𑒧𑒹 𑒮𑓂𑒟𑒱𑒞 𑒣𑓂𑒩𑒰𑒔𑒲𑒢 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨। 𑒦𑒰𑒑𑒪𑒣𑒳𑒩 𑒖𑒱𑒪𑒰𑒏 𑒁𑓀𑒞𑒲𑒔𑒏 𑒑𑒰𑒧𑒧𑒹 𑒩𑒰𑒖𑒰 𑒡𑒩𑓂𑒧𑒣𑒰𑒪𑒏 𑒥𑒢𑒰𑒍𑒪 𑒥𑒳𑒠𑓂𑒡 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒁𑒕𑒱। 𑓑𑓐𑓘 𑒫𑓂𑒨𑒰𑒐𑓂𑒨𑒰𑒞𑒰 𑒪𑒹𑒪 𑒩𑒯𑒥𑒰𑒏 𑒮𑓂𑒟𑒰𑒢 𑒂 𑒥𑒰𑒯𑒩𑒮𑒿 𑒣𑒜𑓃𑒋 𑒥𑒪𑒰 𑒪𑒹𑒪 𑒮𑒹𑒯𑒼 𑒮𑓂𑒟𑒰𑒢 𑒋𑒞𑒋 𑒢𑒱𑒩𑓂𑒧𑒱𑒞 𑒁𑒕𑒱
𑓕𑓑. 𑒧𑒱𑒟𑒱𑒪𑒰𑒏 𑒥𑒲𑒮 𑒙𑒰 𑒮𑒱𑒠𑓂𑒡 𑒣𑒲𑒚—
𑓑. 𑒑𑒱𑒩𑒱𑒖𑒰𑒮𑓂𑒟𑒰𑒢 (𑒤𑒳𑒪𑒯𑒩, 𑒧𑒡𑒳𑒥𑒢𑒲), 𑓒. 𑒠𑒳𑒩𑓂𑒑𑒰𑒮𑓂𑒟𑒰𑒢 (𑒅𑒔𑒻𑒚, 𑒧𑒡𑒳𑒥𑒢𑒲), 𑓓. 𑒩𑒯𑒹𑒬𑓂𑒫𑒩𑒲 (𑒠𑒼𑒐𑒩, 𑒧𑒡𑒳𑒥𑒢𑒲), 𑓔. 𑒦𑒳𑒫𑒢𑒹𑒬𑓂𑒫𑒩𑒲𑒮𑓂𑒟𑒰𑒢 (𑒦𑒑𑒫𑒞𑒲𑒣𑒳𑒩, 𑒧𑒡𑒳𑒥𑒢𑒲), 𑓕. 𑒦𑒠𑓂𑒩𑒏𑒰𑒪𑒱𑒏𑒰 (𑒏𑒼𑒃𑒪𑒐, 𑒧𑒡𑒳𑒥𑒢𑒲), 𑓖. 𑒔𑒧𑒳𑒝𑓂𑒛𑒰 𑒮𑓂𑒟𑒰𑒢 (𑒣𑒔𑒰𑒯𑒲, 𑒧𑒡𑒳𑒥𑒢𑒲), 𑓗. 𑒮𑒼𑒢𑒰𑒧𑒰𑒃 (𑒖𑒢𑒏𑒣𑒳𑒩, 𑒢𑒹𑒣𑒰𑒪), 𑓘. 𑒨𑒼𑒑𑒢𑒱𑒠𑓂𑒩𑒰 (𑒖𑒢𑒏𑒣𑒳𑒩, 𑒢𑒹𑒣𑒰𑒪) 𑓙. 𑒏𑒰𑒪𑒱𑒏𑒰 𑒮𑓂𑒟𑒰𑒢 (𑒖𑒢𑒏𑒣𑒳𑒩 𑒮𑓂𑒟𑒰𑒢), 𑓑𑓐. 𑒩𑒰𑒖𑒹𑒬𑓂𑒫𑒩𑒲 𑒠𑒹𑒫𑒲 (𑒖𑒢𑒏𑒣𑒳𑒩, 𑒢𑒹𑒣𑒰𑒪), 𑓑𑓑. 𑒕𑒱𑒢𑒧𑒮𑓂𑒞𑒰 𑒠𑒹𑒫𑒲 (𑒅𑒖𑒰𑒢, 𑒧𑒡𑒳𑒥𑒢𑒲), 𑓑𑓒. 𑒥𑒢𑒠𑒳𑒩𑓂𑒑𑒰 (𑒐𑒩𑒩𑒐, 𑒧𑒡𑒳𑒥𑒢𑒲), 𑓑𑓓. 𑒮𑒱𑒡𑒹𑒬𑓂𑒫𑒩𑒲 𑒠𑒹𑒫𑒲 (𑒮𑒩𑒱𑒮𑒫, 𑒧𑒡𑒳𑒥𑒢𑒲), 𑓑𑓔. 𑒠𑒹𑒫𑒲-𑒮𑓂𑒟𑒰𑒢 (𑒁𑓀𑒡𑒩𑒰 𑒚𑒰𑒜𑓃𑒲, 𑒧𑒡𑒳𑒥𑒢𑒲), 𑓑𑓕. 𑒏𑓀𑒏𑒰𑒪𑒲 𑒠𑒹𑒫𑒲 (𑒦𑒰𑒩𑒞 𑒢𑒹𑒣𑒰𑒪 𑒮𑒲𑒧𑒰 𑒂 𑒩𑒰𑒧𑒥𑒰𑒑 𑒣𑓂𑒪𑒹𑒮, 𑒠𑒩𑒦𑓀𑒑𑒰) 𑓑𑓖. 𑒅𑒑𑓂𑒩𑒞𑒰𑒩𑒰 (𑒧𑒯𑒱𑒭𑒲, 𑒮𑒯𑒩𑒮𑒰), 𑓑𑓗. 𑒏𑒰𑒞𑓂𑒨𑒰𑒢𑒲 𑒠𑒹𑒫𑒲 (𑒥𑒠𑒪𑒰𑒒𑒰𑒙, 𑒮𑒯𑒩𑒮𑒰), 𑓑𑓘. 𑒣𑒳𑒩𑒢 𑒠𑒹𑒫𑒲 (𑒣𑒴𑒩𑓂𑒝𑒱𑒨𑒰𑒿), 𑓑𑓙. 𑒏𑒰𑒪𑒲 𑒮𑓂𑒟𑒰𑒢 (𑒠𑒩𑒦𑓀𑒑𑒰), 𑓒𑓐. 𑒖𑒻𑒧𑓀𑒑𑒪𑒰𑒮𑓂𑒟𑒰𑒢 (𑒧𑒳𑓀𑒑𑒹𑒩)।
𑓕𑓒. 𑒖𑒢𑒏𑒣𑒳𑒩 𑒣𑒩𑒱𑒏𑓂𑒩𑒧𑒰𑒏 𑓑𑓕 𑒮𑓂𑒟𑒪 𑒂 𑒍𑒞𑒳𑒏𑓂𑒏𑒰 𑒧𑒳𑒐𑓂𑒨 𑒠𑒹𑒫𑒞𑒰 𑓑. 𑒯𑒢𑒳𑒧𑒰𑒢𑒢𑒑𑒩- 𑒯𑒢𑒳𑒧𑒰𑒢𑒖𑒲 𑓒. 𑒏𑒪𑓂𑒨𑒰𑒝𑒹𑒬𑓂𑒫𑒩- 𑒬𑒱𑒫𑒪𑒱𑓀𑒑 𑓓. 𑒑𑒱𑒩𑒱𑒖𑒰-𑒮𑓂𑒟𑒰𑒢- 𑒬𑒏𑓂𑒞𑒱 𑓔. 𑒧𑒙𑒱𑒯𑒰𑒢𑒲- 𑒫𑒱𑒭𑓂𑒝𑒳 𑒧𑒢𑓂𑒠𑒱𑒩 𑓕. 𑒖𑒰𑒪𑒹𑒬𑓂𑒫𑒩- 𑒬𑒱𑒫𑒪𑒱𑓀𑒑 𑓖. 𑒧𑒢𑒰𑒄- 𑒧𑒰𑒝𑓂𑒛𑒫 𑒇𑒭𑒱 𑓗. 𑒬𑓂𑒩𑒳𑒫 𑒏𑒳𑒝𑓂𑒛- 𑒡𑓂𑒩𑒳𑒫 𑒧𑒢𑓂𑒠𑒱𑒩 𑓘. 𑒏𑓀𑒔𑒢 𑒫𑒢- 𑒏𑒼𑒢𑒼 𑒧𑒢𑓂𑒠𑒱𑒩 𑒢𑒘𑒱 𑒧𑒰𑒞𑓂𑒩 𑒧𑒢𑒼𑒩𑒧 𑒠𑒵𑒬𑓂𑒨 𑓙. 𑒣𑒩𑓂𑒫𑒞- 𑒣𑒰𑒿𑒔 𑒙𑒰 𑒣𑒩𑓂𑒫𑒞 𑓑𑓐. 𑒡𑒢𑒳𑒭𑒰- 𑒬𑒱𑒫𑒡𑒢𑒳𑒭𑒏 𑒙𑒳𑒏𑒛𑓃𑒲 𑓑𑓑. 𑒮𑒞𑒼𑒐𑒛𑓃𑒲- 𑒮𑒣𑓂𑒞𑒩𑓂𑒭𑒱𑒏 𑒮𑒰𑒞 𑒙𑒰 𑒏𑒳𑒝𑓂𑒛 𑓑𑓒. 𑒯𑒩𑒳𑒭𑒰𑒯𑒰- 𑒫𑒱𑒧𑒪𑒰𑒑𑓀𑒑𑒰 𑓑𑓓. 𑒏𑒩𑒳𑒝𑒰- 𑒏𑒼𑒢𑒼 𑒧𑒢𑓂𑒠𑒱𑒩 𑒢𑒯𑒱 𑒧𑒰𑒞𑓂𑒩 𑒧𑒢𑒼𑒩𑒧 𑒠𑒵𑒬𑓂𑒨 𑓑𑓔. 𑒥𑒱𑒮𑒾𑒪- 𑒫𑒱𑒬𑓂𑒫𑒰𑒧𑒱𑒞𑓂𑒩 𑒧𑒢𑓂𑒠𑒱𑒩 𑓑𑓕. 𑒖𑒢𑒏𑒣𑒳𑒩।“𑒧𑒱𑒟𑒱𑒪𑒰𑒨𑒠𑒨𑒬𑓂𑒔 𑒧𑒡𑓂𑒨𑓀𑒞𑒹 𑒩𑒱𑒣𑒫𑒼 𑒃𑒞𑒱 𑒧𑒱𑒟𑒱𑒪𑒰 𑒢𑒑𑒩𑒲” - 𑒧𑒱𑒟𑒱𑒪𑒰 𑒖𑒞𑒋 𑒬𑒞𑓂𑒩𑒳𑒏𑒹𑒿 𑒧𑒟𑒪 𑒖𑒰𑒃𑒞 𑒁𑒕𑒱- 𑒣𑒰𑒝𑒱𑒢𑒲𑒏 𑒫𑒱𑒫𑒩𑒝 ।
𑓕𑓓. 𑒔𑒻𑒢𑒣𑒳𑒩 𑒮𑒯𑒩𑒮𑒰- 𑒧𑒱𑒟𑒱𑒪𑒰𑒏 𑒋𑒏𑒧𑒰𑒞𑓂𑒩 𑒢𑒲𑒪𑒏𑓀𑒚 𑒧𑒢𑓂𑒠𑒱𑒩, 𑒮𑓀𑒑𑒧𑒹 𑒂𑒠𑒱𑒏𑒰𑒪𑒲𑒢 𑒦𑒫𑓂𑒨 𑒏𑒰𑒪𑒲-𑒧𑒢𑓂𑒠𑒱𑒩 𑒮𑒹𑒯𑒼 𑒋𑒯𑒱 𑒑𑒰𑒧𑒧𑒹 𑒁𑒕𑒱। 𑒧𑒯𑒰𑒬𑒱𑒫𑒩𑒰𑒞𑓂𑒩𑒱 𑒂 𑒏𑒰𑒪𑒲𑒣𑒴𑒖𑒰 𑒥𑒛𑓃 𑒡𑒴𑒧𑒡𑒰𑒧𑒮𑒿 𑒔𑒻𑒢𑒣𑒳𑒩𑒧𑒹 𑒯𑒼𑒃𑒞 𑒁𑒕𑒱।
𑓕𑓔. 𑒡𑒩𑒯𑒩𑒰, 𑒥𑒢𑒧𑒢𑒐𑒲, 𑒣𑒴𑒩𑓂𑒝𑒱𑒨𑒰𑒿𑒧𑒹 𑒢𑒩𑒮𑒱𑓀𑒯 𑒁𑒫𑒞𑒰𑒩𑒏 𑒮𑓂𑒟𑒰𑒢 𑒁𑒕𑒱, 𑒋𑒏𑒙𑒰 𑒐𑒼𑒯 𑒖𑒹𑒏𑒰𑒿 𑒣𑒻𑒒 𑒣𑒰𑒨𑒰 𑒁𑒕𑒱 𑒖𑒰𑒯𑒱𑒧𑒹 𑒖𑒹 𑒏𑒱𑒕𑒳 𑒤𑒹𑒏𑒥𑒻𑒏 𑒞𑒿 𑒥𑒛𑓃𑒲 𑒏𑒰𑒪 𑒡𑒩𑒱 𑒑𑒼𑓀-𑒑𑒼𑒿 𑒁𑒥𑒰𑒖 𑒯𑒼𑒃𑒞 𑒩𑒯𑒞। 𑒄 𑒮𑓂𑒟𑒰𑒢 𑒂𑒥 𑒢𑒩𑒮𑒱𑓀𑒯 𑒦𑒑𑒫𑒰𑒢𑒏 𑒧𑒴𑒩𑓂𑒞𑒱 𑒂 𑒧𑒢𑓂𑒠𑒱𑒩𑒏 𑒏𑒰𑒩𑒝𑒮𑒿 𑒥𑒹𑒬 𑒫𑒱𑒏𑒮𑒱𑒞 𑒦𑒋 𑒑𑒹𑒪 𑒁𑒕𑒱।
𑓕𑓕. 𑒢𑒹𑒆𑒩𑒲: 𑒠𑒩𑒦𑓀𑒑𑒰𑒏 𑒥𑒱𑒩𑒾𑒪 𑒣𑓂𑒩𑒐𑒝𑓂𑒛𑒮𑒿 𑓑𑓓.𑒏𑒱𑒪𑒼𑒧𑒲𑒙𑒩 𑒣𑒬𑓂𑒔𑒱𑒧𑒧𑒹 𑒋𑒏𑒙𑒰 𑒑𑒜𑓃 𑒁𑒕𑒱 𑒖𑒹 𑒪𑒼𑒩𑒱𑒏𑒏 𑒧𑒰𑒢𑒪 𑒖𑒰𑒃𑒞 𑒁𑒕𑒱।
𑓕𑓖. 𑒠𑒩𑒦𑓀𑒑𑒰 𑒏𑒻𑒟𑒼𑒪𑒱𑒏 𑒔𑒩𑓂𑒔: 𑓑𑓘𑓙𑓑𑒧𑒹 𑒮𑓂𑒟𑒰𑒣𑒱𑒞 𑒄 𑒔𑒩𑓂𑒔 𑓑𑓘𑓙𑓗 𑒏𑒹𑒩 𑒦𑒴𑒏𑒧𑓂𑒣𑒧𑒹 𑒏𑓂𑒭𑒞𑒱𑒑𑓂𑒩𑒮𑓂𑒞 𑒦𑒋 𑒑𑒹𑒪। 𑒋𑒏𑒩𑒰 𑒯𑒼𑒪𑒲 𑒩𑒼𑒖𑒹𑒩𑒲 𑒔𑒩𑓂𑒔 𑒮𑒹𑒯𑒼 𑒏𑒯𑒪 𑒖𑒰𑒃𑒞 𑒁𑒕𑒱।
𑓕𑓗. 𑒮𑒹𑓀𑒙 𑒤𑒰𑓀𑒮𑒱𑒮 𑒂𑒮𑒱𑒮𑒲 𑒔𑒩𑓂𑒔 𑒧𑒳𑒖𑒤𑓂𑒤𑒩𑒣𑒳𑒩𑒧𑒹 𑒁𑒕𑒱।
𑓕𑓘. 𑒦𑒱𑒐𑒰 𑒮𑒪𑒰𑒧𑒲 𑒧𑒖𑒰𑒩: 𑒑𑓀𑒑𑒰𑒮𑒰𑒑𑒩 𑒣𑒼𑒐𑒩𑒱 𑒠𑒩𑒦𑓀𑒑𑒰𑒏 𑒧𑒯𑒰𑒩𑒣𑒩 𑒄 𑒧𑒖𑒰𑒩 𑒁𑒕𑒱।
𑓕𑓙. 𑒠𑒩𑒦𑓀𑒑𑒰 𑒙𑒰𑒫𑒩 𑒧𑒮𑓂𑒖𑒱𑒠 𑒃𑒮𑓂𑒪𑒰𑒧 𑒧𑒞𑒰𑒫𑒪𑒧𑓂𑒥𑒲𑒏 𑒋𑒏𑒙𑒰 𑒦𑒫𑓂𑒨 𑒧𑒮𑓂𑒖𑒱𑒠 𑒂 𑒡𑒰𑒩𑓂𑒧𑒱𑒏 𑒮𑓂𑒟𑒪 𑒁𑒕𑒱।
𑓖𑓐. 𑒧𑒏𑒠𑒴𑒧 𑒥𑒰𑒥𑒰𑒏 𑒧𑒖𑒰𑒩: 𑒪𑒪𑒱𑒞 𑒢𑒰𑒩𑒰𑒨𑒝 𑒧𑒱𑒟𑒱𑒪𑒰 𑒫𑒱𑒬𑓂𑒫𑒫𑒫𑒱𑒠𑓂𑒨𑒰𑒪𑒨 𑒂 𑒏𑒰𑒧𑒹𑒬𑓂𑒫𑒩 𑒮𑒱𑓀𑒯 𑒮𑓀𑒮𑓂𑒏𑒵𑒞 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨 𑒠𑒩𑒦𑓀𑒑𑒰𑒏 𑒥𑒲𑒔 𑒮𑓂𑒟𑒱𑒞 𑒄 𑒧𑒖𑒰𑒩 𑒯𑒱𑒢𑓂𑒠𑒴 𑒂 𑒧𑒳𑒮𑓂𑒪𑒱𑒧 𑒧𑒞𑒰𑒫𑒪𑒧𑓂𑒥𑒲𑒏 𑒋𑒏𑒙𑒰 𑒣𑒰𑒫𑒢 𑒮𑓂𑒟𑒰𑒢 𑒁𑒕𑒱।
𑓖𑓑. 𑒔𑒧𑓂𑒣𑒰𑒢𑒑𑒩: 𑒦𑒰𑒑𑒪𑒣𑒳𑒩𑒏 𑒣𑒬𑓂𑒔𑒱𑒧𑒧𑒹, 𑒂𑒥 𑒢𑒑𑒩𑒮𑒿 𑒮𑒙𑒱 𑒑𑒹𑒪 𑒁𑒕𑒱। 𑒄 𑒖𑒻𑒢 𑒪𑒼𑒏𑒢𑒱𑒏 𑒋𑒏𑒙𑒰 𑒣𑒫𑒱𑒞𑓂𑒩𑒮𑓂𑒟𑒪 𑒁𑒕𑒱, 𑒋𑒞𑒋 𑒧𑒯𑒰𑒫𑒲𑒩 𑒞𑒲𑒢𑒙𑒰 𑒥𑒮𑓂𑒮𑒰𑒫𑒰𑒮 𑒏𑒋𑒢𑒹 𑒩𑒯𑒟𑒱। 𑒠𑒴 𑒙𑒰 𑒖𑒻𑒢 𑒧𑒢𑓂𑒠𑒱𑒩 𑒋𑒞𑒋 𑒁𑒕𑒱, 𑒖𑒹 𑒖𑒻𑒢𑒏 𑒥𑒰𑒩𑒯𑒧 𑒞𑒲𑒩𑓂𑒟𑓀𑒏𑒩 𑒫𑒰𑒮𑒳𑒣𑒴𑒖𑓂𑒨 𑒢𑒰𑒟𑒏𑒹𑒿 𑒮𑒧𑒩𑓂𑒣𑒱𑒞 𑒁𑒕𑒱।
𑓖𑓒. 𑒥𑒮𑒻𑒙𑒲 𑒁𑒦𑒱𑒪𑒹𑒐- 𑒣𑒴𑒝𑒱𑒨𑒰𑒿𑒧𑒹 𑒬𑓂𑒩𑒲𑒢𑒑𑒩 𑒪𑒑 𑒧𑒱𑒟𑒱𑒪𑒰𑒏𑓂𑒭𑒩𑒏 𑒄 𑒁𑒦𑒱𑒪𑒹𑒐 𑒧𑒱𑒟𑒱𑒪𑒰𑒏 𑒣𑒯𑒱𑒪 𑒧𑒯𑒱𑒪𑒰 𑒬𑒰𑒮𑒏 𑒩𑒰𑒢𑒲 𑒃𑒠𑓂𑒩𑒰𑒫𑒞𑒲𑒏 𑒩𑒰𑒖𑓂𑒨𑒏𑒰𑒪𑒏 𑒫𑒩𑓂𑒝𑒢 𑒏𑒩𑒻𑒞 𑒁𑒕𑒱। 𑒋𑒏𑒩 𑒂𑒡𑒰𑒩 𑒣𑒩 𑒧𑒠𑒢𑒹𑒬𑓂𑒫𑒩 𑒧𑒱𑒬𑓂𑒩 ’𑒋𑒏 𑒕𑒪𑒲𑒯 𑒧𑒯𑒰𑒩𑒰𑒢𑒲’ 𑒅𑒣𑒢𑓂𑒨𑒰𑒮 𑒮𑒹𑒯𑒼 𑒪𑒱𑒐𑒢𑒹 𑒕𑒟𑒱।
𑒥𑒰𑒃𑒮𑒲-𑒥𑒮𑒻𑒙𑒲, 𑒁𑒩𑒩𑒱𑒨𑒰 𑒧𑒱𑒟𑒱𑒪𑒰𑒏𑓂𑒭𑒩 𑒬𑒱𑒪𑒰𑒪𑒹𑒐- 𑒩𑒰𑒢𑒲 𑒃𑒢𑓂𑒠𑓂𑒩𑒰𑒫𑒞𑒲 (𑓑𑓗𑓘𑓔-𑓑𑓘𑓐𑓒) 𑒖𑒹 𑒤𑒴𑒛-𑒤𑒰𑒩-𑒫𑒩𑓂𑒏 𑒂 𑒁𑒢𑓂𑒨 𑒏𑒪𑓂𑒨𑒰𑒝𑒏𑒰𑒩𑒲 𑒏𑒰𑒩𑓂𑒨𑒏 𑒣𑓂𑒩𑒰𑒩𑒧𑓂𑒦 𑒏𑒋𑒪𑒢𑓂𑒯𑒱 𑒏𑒹𑒩 𑒧𑒱𑒟𑒱𑒪𑒰𑒏𑓂𑒭𑒩 𑒁𑒦𑒱𑒪𑒹𑒐, 𑒋𑒞𑒋 𑒋𑒏𑒙𑒰 𑒧𑒢𑓂𑒠𑒱𑒩𑒏 𑒆𑒣𑒩𑒧𑒹 𑒏𑒰𑒩𑒲 𑒣𑒰𑒟𑒩𑒧𑒹 𑒏𑒲𑒪𑒱𑒞 𑒁𑒕𑒱 𑒖𑒹 𑒢𑒱𑒧𑓂𑒢 𑒣𑓂𑒩𑒏𑒰𑒩𑒮𑒿 𑒁𑒕𑒱:-
𑒥𑒮𑒻𑒙𑒲 (𑒁𑒩𑒩𑒱𑒨𑒰) 𑒥𑒱𑒯𑒰𑒩, 𑒬𑒱𑒫 𑒧𑒢𑓂𑒠𑒱𑒩𑒏 𑒧𑒱𑒟𑒱𑒪𑒰𑒏𑓂𑒭𑒩 𑒬𑒱𑒪𑒰𑒪𑒹𑒐𑒏 𑒠𑒹𑒫𑒢𑒰𑒑𑒩𑒲 𑒩𑒴𑒣𑒰𑒢𑓂𑒞𑒩𑒝।

𑒫𑓀𑒬𑒹 𑒮𑒦𑒰 𑒮𑒧𑒰𑒢𑒹 𑒮𑒳𑒩𑒑𑒢 𑒥𑒱𑒠𑒱𑒞𑒹 𑒦𑒴 𑒮𑒴𑒩𑒮𑓂𑒨𑒰𑒫𑒞𑒱𑒩𑓂𑒢𑒰।
𑒩𑒰𑒖𑒰𑒦𑒴𑒞𑒏𑒵𑒭𑓂𑒝𑒠𑒹𑒫𑒼𑒢𑒵𑒣𑒞𑒱 𑒮𑒧𑒩𑒮𑒱𑓀𑒯𑒰 𑒧𑒱𑒡𑒮𑓂𑒨𑒰𑒞𑓂𑒧𑒖𑒰𑒞𑓁॥
𑒨𑒮𑓂𑒧𑒱𑒢𑓂 𑒩𑒰𑒖𑓂𑒨𑒰𑒦𑒱𑒭𑒹𑒏𑓀 𑒤𑒪𑒨𑒱𑒞𑒳 𑒧𑒱𑒫𑒞𑒠𑓂𑒦𑒏𑓂𑒞𑒱𑒞𑒳𑒭𑓂𑒙𑒼𑒧𑒯𑒹𑒬𑓁।
𑒏𑒻𑒪𑒰𑒬𑒰𑒠𑓂 𑒦𑒴𑒑𑒞𑒹𑒠𑓂𑒨𑒼𑒣𑓂𑒨𑒡𑒱𑒢 𑒮𑒞𑒱𑒞𑒩𑒰 𑒫𑒻𑒠𑓂𑒨𑒢𑒰𑒟𑒹𑒢 𑒢𑒰𑒧𑓂𑒢𑒰𑓁॥
𑒞𑒮𑓂𑒨 𑒞𑒢𑒳𑒖𑓁 𑒮𑒳𑒏𑒵𑒞𑒱𑒢𑒵𑒣𑒫𑒩𑒾 𑒫𑒱𑒬𑓂𑒫𑒢𑒰𑒟 𑒩𑒰𑒖𑒰 𑒦𑒴𑒞।
𑒫𑒱𑒩𑒢𑒰𑒩𑒰𑒨𑒝 𑒩𑒰𑒖𑒮𑓂𑒞𑒮𑓂𑒨𑒰𑒣𑓂𑒨𑒰𑒮𑒲𑒠𑓂 𑒮𑒳𑒞𑒮𑓂𑒨॥
𑒢𑒩𑒢𑒰𑒩𑒰𑒨𑒝 𑒩𑒰𑒖𑒼 𑒢𑒩𑒣𑒞𑒱 𑒏𑒳𑒪 𑒧𑒾𑒪𑒱 𑒦𑒴𑒭𑒝𑒧𑓂 𑒣𑒳𑒢𑓁।
𑒁𑒩𑓂𑒟𑒱𑒢𑒏𑒪𑓂𑒣𑒠𑓂𑒩𑒴𑒧𑒠𑒴𑒫 𑒮𑒳𑒩𑒑𑒢 𑒫𑓀𑒮𑒰𑒫𑒞𑓀𑒮𑒼𑒞𑓂𑒦𑒴𑒞॥𑓒॥
𑒞𑒮𑓂𑒧𑒰𑒠𑒱 𑒫𑒻𑒩𑒱𑒏𑒳𑒪 𑒮𑒴𑒠𑒢 𑒩𑒰𑒧𑒔𑒢𑓂𑒠𑓂𑒩 𑒢𑒰𑒩𑒰𑒨𑒝𑒼 𑒢𑒩𑒣𑒞𑒱𑒮𑓂𑒞𑒢𑒨𑒼 𑒫𑒦𑒴𑒏।
𑒮𑓀𑒧𑒼𑒠𑒱𑒞𑒰 𑒠𑒬 𑒠𑒱𑒬𑒼 𑒢𑒱𑒖 𑒏𑒲𑒩𑓂𑒞𑒱 𑒔𑒢𑓂𑒠𑓂𑒩 𑒖𑓂𑒨𑒼𑒞𑒱𑒮𑓂𑒢𑒹𑒯𑒰𑒦𑒱𑒩𑒰𑒩𑓂𑒟 𑒢𑒱𑒫𑒯𑓁 𑒮𑒳𑒩𑒱𑒫𑒞𑒬𑓂𑒔𑒨𑒹𑒝॥𑓓॥
𑒨𑒠𑓂𑒠𑒰𑒢𑒫𑒰𑒩𑒱 𑒣𑒩𑒱𑒫𑒩𑓂𑒠𑓂𑒡𑒱𑒞 𑒫𑒰𑒩𑒱 𑒩𑒰𑒬𑒱 𑒮𑒏𑓂𑒞𑒰𑒢𑓂𑒞 𑒏𑒲𑒩𑓂𑒞𑒱 𑒫𑒱𑒧𑒪𑒹𑒢𑓂𑒠𑒳 𑒧𑒩𑒱𑒔𑒱𑒏𑒰𑒦𑒱𑓁।
𑒣𑓂𑒩𑒼𑒠𑓂𑒨𑒼𑒞𑒱𑒞𑒰 𑒠𑒬𑒠𑒱𑒬𑓁 𑒮𑒞𑒢𑒳𑒖 𑒃𑒢𑓂𑒠𑓂𑒩𑒢𑒰𑒩𑒰𑒨𑒝𑒼𑒮𑓂𑒨 𑒏𑒳𑒪𑒦𑒴𑒭𑒝 𑒩𑒰𑒖𑒩𑒰𑒖𑓁॥𑓔॥
𑒞𑒹𑒢𑒔 𑒮𑒞𑓂𑒏𑒳𑒪 𑒖𑒰𑒞𑒰 𑒞𑒢𑒨𑒰 𑒧𑒢𑒥𑒼𑒡 𑒬𑒗𑒝𑒱𑓁 𑒏𑒵𑒞𑒱𑒢𑓁।
𑒣𑒩𑒱𑒝𑒲𑒞𑒰 𑒥𑒢𑓂𑒡𑒳 𑒨𑒞𑓂𑒢𑒻𑒮𑓂𑒞𑓂𑒩𑒱𑒪𑒼𑒔𑒢𑒢𑒰𑒠𑓂𑒩𑒱 𑒣𑒳𑒞𑓂𑒩𑒲𑒫॥𑓕॥
𑒨𑒮𑓂𑒨𑒰 𑒣𑓂𑒩𑒞𑒰𑒣𑒞𑒩𑒝𑒰𑒫𑒳𑒠𑒱𑒞𑒹𑓄𑒣𑒱𑒔𑒱𑒞𑒹
𑒔𑒱𑒢𑓂𑒞𑒰𑒩𑒖𑒫𑒱𑒢𑓂𑒠 𑒫𑒢𑒧𑒰𑒪𑒦𑒞𑒹 𑒫𑒱𑒏𑒰𑒮𑒧
𑒮𑒾𑒯𑒵𑒠𑒨 𑒯𑒵𑒠𑒨 𑒧𑒏𑒩𑒢𑓂𑒠 𑒔 𑒅𑒠𑓂𑒨𑒹𑒢
𑒞𑒞𑓂𑒩𑒻𑒫 𑒨𑒠𑓂 𑒑𑒳𑒝𑒑𑒝𑒰 𑒧𑒡𑒳𑒣𑒢𑓂𑒞𑒱 𑒨𑒼𑒑𑒰𑒞𑓂॥𑓖॥
𑒨𑒖𑓂𑒘𑒹𑒫𑒩𑓂𑒠𑒹𑒫 𑒑𑒝𑒼 𑒠𑓂𑒫𑒱𑒖𑒰𑒞𑒱 𑒢𑒱𑒫𑒯𑓁 𑒮𑒮𑓂𑒞𑒰𑒨𑒢𑒞𑓂𑒨𑒰𑒠𑒩𑒻𑓁।
𑒠𑒩𑓂𑒠𑒰𑒢𑒻𑒣𑒴𑒩𑓂𑒝𑓁 𑒧𑒢𑒼𑒩𑒟𑒼𑓄𑒩𑓂𑒟𑒣𑒩𑒢 𑒮𑒢𑓂𑒞𑒱𑒞𑒱𑒢𑒱𑓁 𑒮𑒖𑓂𑒖𑒢𑒰॥𑓗॥
𑒑𑒩𑓂𑒖𑓂𑒖𑒠 𑒫𑒻𑒩𑒱 𑒧𑒠𑒰𑒢𑓂𑒡𑒫𑒰𑒩𑒝 𑒔𑒣𑒬𑓂𑒔𑒘𑓂𑒔𑓁𑒣𑒹𑒞𑒰𑒣𑒰𑓀𑒏𑒳𑒩𑒾।
𑒩𑓂𑒫𑒮𑓂𑒨𑒰𑓁 𑒮𑒩𑓂𑒫𑒠𑒵𑒬𑒹𑒏𑒵𑒞𑒰𑒑𑒳𑒝 𑒔𑒧𑒹𑒩𑓂𑒧𑒮𑓂𑒨𑒰𑒬𑓂𑒔 𑒦𑒴𑒧𑒲𑒞𑒢𑒹॥𑓘॥
𑒬𑓂𑒩𑒲 𑒬𑓂𑒩𑒲 𑒃𑒢𑓂𑒠𑒳𑒧𑒞𑒱 𑒮𑒞𑒲𑒧𑒞𑒱𑒧𑒞𑒲 𑒠𑒹𑒫𑒲 𑒧𑒯𑒰𑒩𑒰𑒖𑓂𑒘𑒱𑒏𑒰
𑒖𑒰𑒞𑒰 𑒧𑒻𑒟𑒱𑒪 𑒧𑒰𑒝𑓂𑒛𑒩𑒰𑓄𑒧𑒱𑒕𑒏𑒳𑒪𑒰𑒞𑓂 𑒧𑒼𑒡𑒼𑒮𑒩𑒲 𑒖𑒰𑒢𑒨𑒰𑓁।
𑒠𑒰𑒢𑒻 𑒏𑒪𑓂𑒣𑒪𑒞𑒰 𑒧𑒡𑓁 𑒏𑒵𑒞𑒫𑒞𑒲 𑒬𑓂𑒩𑒲 𑒫𑒱𑒭𑓂𑒝𑒳 𑒮𑒹𑒫𑒰 𑒣𑒩𑒰
𑒣𑒰𑒞𑒱𑒫𑓂𑒩𑒞𑓂𑒨 𑒣𑒩𑒰𑒨𑒝𑒰𑒔 𑒮𑒞𑒞𑓀 𑒑𑓀𑒑𑒹𑒩 𑒮𑒧𑓂𑒣𑒰𑒩𑒝𑒲॥𑓙॥
𑒬𑒰𑒏𑒹𑒢𑓂𑒠𑒳 𑒢𑒫𑒔𑒢𑓂𑒠𑓂𑒩 𑒬𑒻𑒪𑒡𑒩𑒝𑒲 𑒮𑓀𑒪𑒏𑓂𑒭𑒱𑒞 𑒤𑒰𑒪𑓂𑒑𑒳𑒢𑒹
𑒧𑒰𑒮𑒱 𑒬𑓂𑒩𑒹𑒭𑓂𑒚𑒞𑒩𑒹 𑒮𑒱𑒞𑒰𑒯𑒢𑒱 𑒬𑒱𑒞𑒹𑒣𑒏𑓂𑒭𑒹 𑒠𑓂𑒫𑒱𑒞𑒲𑒨𑒰𑒨𑒰𑓀 𑒞𑒱𑒟𑒾।
𑒦𑒴𑒠𑒹𑒫𑒻𑒩𑓂𑒫𑒩 𑒫𑒻𑒠𑒱𑒏𑒹𑒩𑓂𑒧𑓂𑒧𑒚𑒧𑒨𑓀 𑒢𑒱𑒩𑓂𑒦𑒰𑒩𑒨 𑒮𑒔𑓂𑒔𑒱𑒢𑒱𑒧𑒱𑓁
𑒞𑒞𑓂𑒩𑒹 𑒮𑒹𑒢𑓂𑒠𑒳𑒧𑒞𑒱 𑒮𑒳𑒩𑒮𑓂𑒨 𑒫𑒱𑒡𑒱𑒞𑓂𑒩 𑒣𑓂𑒩𑒰𑒝 𑒣𑓂𑒩𑒞𑒱𑒭𑓂𑒚𑒰𑒫𑓂𑒨𑒡𑒰𑒞𑓂॥𑓑𑓐॥
𑒮𑒼𑒠𑒩𑒣𑒳𑒩 𑒮𑒧𑓂𑒦𑒫 𑒩𑒰𑒖𑒰𑒢𑒳𑒏𑒧𑓂𑒣𑒰𑒣𑒖𑒱𑒫𑒢𑒱𑒏𑒵𑒞𑒱𑒢𑓁।
𑒬𑓂𑒩𑒲 𑒬𑒳𑒦𑒢𑒰𑒨𑒮𑓂𑒨 𑒏𑒵𑒞𑒱𑒩𑓂𑒧𑒱𑒠𑓀 𑒫𑒱𑒖𑓂𑒘𑒹𑒏𑓂𑒭𑓀 𑒮𑒢𑓂𑒩𑒢𑓂𑒞𑒞𑒰𑒧𑓂॥𑓑𑓑॥

(𑒆𑒣𑒩𑒏𑒰 𑒮𑓂𑒟𑒰𑒢 𑒮𑒦𑒏 𑒔𑒱𑒞𑓂𑒩 http://www.videha.co.in/favorite.htm 𑒋𑒯𑒱 𑒪𑒱𑓀𑒏𑒣𑒩 𑒅𑒣𑒪𑒥𑓂𑒡 𑒁𑒕𑒱।)