गजेन्द्र ठाकुर- शब्दशास्त्रम्

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩𑒏 𑒖𑒢𑓂𑒧 𑒦𑒰𑒑𑒪𑒣𑒳𑒩𑒧𑒹 𑒮𑒢𑓂 𑓑𑓙𑓗𑓑 𑒧𑒹 𑒦𑒹𑒪𑒢𑓂𑒯𑒱 𑒂 𑒂𑒃 𑒏𑒰𑒪𑓂𑒯𑒱 𑒍 𑒠𑒱𑒪𑓂𑒪𑒲𑒧𑒹 𑒩𑒯𑒻 𑒕𑒟𑒱।



























𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂






𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩



𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢, 𑒢𑒄 𑒠𑒱𑒪𑓂𑒪𑒲


















Shabdshastram: An anthology of Maithili Short stories by Gajendra Thakur first published in 2012 by M/s Shruti Publications, India
Price: Rs.100
𑒮𑒩𑓂𑒫𑒰𑒡𑒱𑒏𑒰𑒩 © 𑒣𑓂𑒩𑒲𑒞𑒱 𑒚𑒰𑒏𑒳𑒩 2012
𑒣𑒯𑒱𑒪 𑒮𑓀𑒮𑓂𑒏𑒩𑒝 : 2012
ISBN : 978-93-80538-52-5
This anthology of Maithili Short stories is entirely a work of fiction. The names, characters and incidents portrayed in it are the work of the author’s imagination. Any resemblance to actual persons, living or dead, events or localities, is entirely coincidental.
Gajendra Thakur asserts the moral right to be identified as the author of this work.
Every effort has been made to trace or contact all copyright holders. The publishers will be pleased to make good any omissions or rectify any mistakes brought to their attention at the earliest opportunity.
All rights reserved. This book is sold subject to the condition that it shall not, by way of trade or otherwise, be lent, resold, hired out, or otherwise circulated without the publisher’s prior written consent in any form of binding or cover other than that in which it is published and without a similar condition including this condition being imposed on the subsequent purchaser and without limiting the rights under copyright reserved above; no part of this publication may be reproduced, stored in or introduced into a retrieval system, or transmitted, in any form or by any means- photographic, electronic, mechanical, photocopying, recording, taping, information storage- or otherwise, without the prior written permission of both the copyright owner and the aforementioned publisher of this book or as expressly permitted by law.
𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢 :𑒩𑒖𑒱𑒮𑓂𑒙𑒩𑓂𑒛 𑒂𑒤𑒱𑒮: 𑓘/𑓒𑓑, 𑒦𑒴𑒞𑒪, 𑒢𑓂𑒨𑒴 𑒩𑒰𑒖𑒹𑒢𑓂𑒠𑓂𑒩 𑒢𑒑𑒩, 𑒢𑒄 𑒠𑒱𑒪𑓂𑒪𑒲-𑓑𑓑𑓐𑓐𑓐𑓘.𑒠𑒴𑒩𑒦𑒰𑒭-(𑓐𑓑𑓑) 𑓒𑓕𑓘𑓘𑓙𑓖𑓕𑓖-𑓕𑓘 𑒤𑒻𑒏𑓂𑒮- (𑓐𑓑𑓑)𑓒𑓕𑓘𑓘𑓙𑓖𑓕𑓗
Website:http://www.shruti-publication.com
e-mail: shruti.publication@shruti-publication.com
Printed at: Ajay Arts, Delhi-110002
Distributor : Pallavi Distributors, Ward no- 6, Nirmali (Supaul), 𑒧𑒼.- 957245.4.5, 9931654742
Shabdshastram: An anthology of Maithili Short stories Drama by Gajendra Thakur
𑒁𑒢𑒳𑒏𑓂𑒩𑒧
𑒞𑒮𑓂𑒏𑒩
𑒮𑓀𑒒𑒩𑓂𑒭
𑒮𑒱𑒠𑓂𑒡 𑒧𑒯𑒰𑒫𑒲𑒩
𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂
𑒠𑒱𑒪𑓂𑒪𑒲
𑒧𑒳𑒞𑒰𑒪𑒱𑒤
𑒯𑒧 𑒢𑒻 𑒖𑒰𑒋𑒥 𑒫𑒱𑒠𑒹𑒬
𑒯𑒩𑒰𑒯𑒩𑒲
𑒞𑒐𑒢, 𑒖𑒐𑒢




























𑒞𑒮𑓂𑒏𑒩
𑓑
𑒬𑒰𑒪𑒱𑒑𑓂𑒩𑒰𑒧𑒧𑒹 𑒕𑒱𑒠𑓂𑒩 𑒯𑒼𑒃𑒞 𑒁𑒕𑒱, 𑒏𑒰𑒩𑒲 𑒣𑒰𑒟𑒩 𑒧𑒰𑒞𑓂𑒩 𑒢𑒩𑓂𑒧𑒠𑒰𑒧𑒹 𑒦𑒹𑒙𑒻𑒞 𑒁𑒕𑒱। 𑒖𑒧𑒮𑒧 𑒑𑒰𑒧𑒧𑒹 𑒮𑒦 𑒏𑒱𑒕𑒳 𑒥𑒠𑒪𑒪 𑒁𑒕𑒱, 𑒑𑓂𑒩𑒰𑒧𑒠𑒹𑒫𑒞𑒰𑒏 𑒛𑒱𑒯𑒥𑒰𑒩 𑒮𑓂𑒟𑒰𑒢𑒮𑒿 𑒪𑓄 𑒏𑓄 𑒮𑒦 𑒚𑒰𑒧 𑒧𑒳𑒠𑒰 𑒏𑒱𑒕𑒳 𑒢𑒹 𑒏𑒱𑒕𑒳 𑒪𑒰𑒏𑓂𑒭𑒝𑒱𑒏 𑒫𑒮𑓂𑒞𑒳 𑒠𑒹𑒐𑒱𑒨𑒹 𑒩𑒯𑒪 𑒕𑒲। 𑒧𑒳𑒠𑒰 𑒯𑒧𑒩 𑒑𑒰𑒟𑒰𑒏 𑒏𑒼𑒢𑒼 𑒪𑒏𑓂𑒭𑒝 𑒋𑒞𑒋 𑒢𑒻 𑒁𑒕𑒱।
𑒑𑒰𑒕𑒲 𑒂 𑒥𑒰𑒡 𑒥𑒼𑒢 𑒮𑒦𑒙𑒰 𑒣𑒞𑒩𑒰 𑒑𑒹𑒪 𑒁𑒕𑒱। 𑒮𑒋 𑒥𑒩𑓂𑒐। 𑒥𑒱𑒖𑓂𑒗𑒴 𑒂𑒧𑒏 𑒍 𑒑𑒰𑒕𑒲। 𑒥𑒲𑒯𑒩𑒱 𑒮𑒦𑒮𑒿 𑒦𑒩𑒪। 𑒦𑒰𑒿𑒞𑒱-𑒦𑒰𑒿𑒞𑒱𑒏 𑒔𑒱𑒛𑓃𑒻-𑒔𑒳𑒢𑒧𑒳𑒢𑒲 𑒂 𑒕𑒼𑒙 𑒣𑒻𑒒 𑒖𑒲𑒫-𑒖𑒢𑓂𑒞𑒳। 𑒢𑒹𑒢𑒰 𑒩𑒯𑒲। 𑒖𑒹𑒚𑒮𑒿 𑒁𑒑𑒯𑒢 𑒐𑒳𑒩𑒔𑒢𑒱𑒘𑒰 𑒪𑒞𑓂𑒞𑒲 𑒪𑒑 𑒑𑒣 𑒏𑒩𑒻𑒞 𑒯𑒧 𑒂 𑒧𑒰𑒪𑒞𑒲। 𑒏𑒯𑒱𑒨𑒼 𑒤𑒰𑒑𑒳𑒢-𑒔𑒻𑒞𑒧𑒹 𑒖𑒰𑒃 𑒞𑒿 𑒪𑒫𑒓𑒪𑒞𑒰𑒏 𑒪𑒞𑓂𑒞𑒲 𑒪𑒑 𑒑𑒣 𑒏𑒩𑒲। 𑒧𑒪𑒏𑒼𑒏𑒰, 𑒏𑒳𑒧𑒳𑒠, 𑒦𑒹𑓀𑒙, 𑒏𑒧𑒪𑒑𑒙𑓂𑒙𑒰 𑒏𑒢𑓂𑒠, 𑒩𑒏𑓂𑒞𑒰𑒦 𑒥𑒱𑒮𑒰𑒿𑒜𑓃𑒏 𑒞𑒰𑒏𑒱𑒧𑒹 𑒏𑒰𑒠𑒼-𑒣𑒰𑒢𑒱𑒧𑒹 𑒒𑒳𑒧𑒻𑒞 𑒯𑒧 𑒂 𑒍। 𑒐𑒳𑒪𑓂𑒪𑒹 𑒣𑒋𑒩, 𑒏𑒰𑒿𑒙-𑒏𑒴𑒮𑒏 𑒥𑒲𑒔 𑒞𑒛𑓃𑒣𑒰𑒢-𑒞𑒛𑓃𑒣𑒱 𑒏𑓄 𑒏𑒳𑒠𑒻𑒞। 𑒂𑒧𑒏 𑒏𑒪𑒧𑒧𑒹 𑒮𑒞𑒒𑒩𑒱𑒨𑒰 𑒐𑒹𑒪𑒰𑒃𑒞। 𑒯𑒧 𑒂 𑒧𑒰𑒪𑒞𑒲। 𑒏𑒩𑒥𑒲𑒩𑒮𑒿 𑒥𑒹𑒜𑒻𑒞 𑒁𑒣𑒢 𑒏𑒰𑒪𑓂𑒣𑒢𑒱𑒏-𑒒𑒩। 𑒋𑒏𑒯𑒩𑒰, 𑒠𑒼𑒯𑒰𑒩𑒰, 𑒖𑒙𑒰𑒡𑒰𑒩𑒲𑒏 𑒥𑒲𑒂 𑒦𑒩𑒱 𑒮𑒰𑒪 𑒖𑒼𑒑𑒥𑒻𑒞 𑒧𑒰𑒪𑒞𑒲। 𑒧𑒰𑒪𑒞𑒲 𑒮𑒹𑒯𑒼 𑒯𑒼𑒋𑒞 𑒯𑒧𑒩𑒹 𑒥𑒋𑒮𑒏। 𑒧𑒰𑒋 𑒏𑒯𑒻𑒞 𑒕𑒪 𑒖𑒹 𑒧𑒰𑒪𑒞𑒲 𑒕𑒯 𑒧𑒰𑒮𑒏 𑒖𑒹𑒚 𑒕𑒪 𑒯𑒧𑒩𑒰𑒮𑒿 𑒧𑒳𑒠𑒰 𑒣𑒱𑒞𑒰 𑒏𑒯𑒻𑒞 𑒕𑒪𑒰 𑒖𑒹 𑒕𑒯 𑒧𑒰𑒮𑒏 𑒕𑒼𑒙 𑒁𑒕𑒱 𑒧𑒰𑒪𑒞𑒲 𑒯𑒧𑒩𑒰𑒮𑒿। 𑒂 𑒣𑒱𑒞𑒰 𑒮𑒹 𑒏𑒱𑒋𑒏 𑒏𑒯𑒻 𑒕𑒪𑒰𑒯 𑒮𑒹 𑒥𑒰𑒠𑒧𑒹 𑒖𑒰 𑒏𑓄 𑒢𑒹 𑒥𑒳𑒗𑒪𑒱𑒌।
𑒦𑒩𑒱 𑒂𑒧𑒏 𑒧𑒰𑒮 𑒂𑒧𑒏 𑒑𑒰𑒕𑒲𑒏 𑒠𑒱𑒢𑒳𑒏𑒰 𑒍𑒑𑒩𑒥𑒰𑒯𑒲𑒏 𑒦𑒰𑒩 𑒯𑒧𑒩𑒹 𑒠𑒳𑒢𑒴 𑒑𑒼𑒙𑒹𑒣𑒩 𑒕𑒪। 𑒧𑒳𑒠𑒰 𑒮𑒰𑒿𑒗 𑒯𑒼𑒋𑒥𑒰𑒮𑒿 𑒣𑒯𑒱𑒢𑒹 𑒯𑒧𑒩 𑒧𑒰𑒧𑒰 𑒥𑒕𑒩𑒴 𑒂 𑒧𑒰𑒪𑒞𑒲𑒏 𑒥𑒰𑒥𑒴 𑒐𑒑𑒢𑒰𑒟𑒖𑒲 𑒏𑒪𑒧 𑒂𑒥𑒱 𑒖𑒰𑒃𑒞 𑒕𑒪𑒰𑒯, 𑒩𑒰𑒞𑒱𑒏 𑒍𑒑𑒩𑒥𑒰𑒯𑒲𑒏 𑒪𑒹𑒪। 𑒧𑒳𑒠𑒰 𑒯𑒧𑒩 𑒮𑒦𑒏 𑒑𑒰𑒟𑒰𑒏 𑒏𑒼𑒢𑒼 𑒪𑒏𑓂𑒭𑒝 𑒋𑒞𑒋 𑒮𑒹𑒯𑒼 𑒢𑒻 𑒁𑒕𑒱। 𑒯𑒧𑒩 𑒮𑒦𑒏 𑒧𑒰𑒢𑒹 𑒏𑒹𑒬𑒫 𑒂 𑒧𑒰𑒪𑒞𑒲𑒏।
𑒧𑒳𑒠𑒰 𑒍𑒯𑒱 𑒣𑒏𑓂𑒏𑒰𑒏 𑒛𑒱𑒯𑒥𑒰𑒩 𑒮𑓂𑒟𑒰𑒢 𑒪𑒑 𑒏𑒰𑒩𑒲 𑒩𑓀𑒑𑒏 𑒬𑒰𑒪𑒱𑒑𑓂𑒩𑒰𑒧 𑒯𑒧 𑒞𑒰𑒏𑒱 𑒩𑒯𑒪 𑒕𑒲। 𑒕𑒱𑒠𑓂𑒩𑒨𑒳𑒏𑓂𑒞 𑒬𑒰𑒪𑒱𑒑𑓂𑒩𑒰𑒧। 𑒋𑒏𑒙𑒰 𑒢𑒳𑒏𑒰 𑒏𑓄 𑒩𑒐𑒢𑒹 𑒕𑒪𑒯𑒳𑒿 𑒋𑒞𑓂𑒞𑒻 𑒏𑒞𑒯𑒳।
𑒑𑒾𑒿𑒂 𑒮𑒦 𑒡𑒩𑒱 𑒐𑒴𑒥 𑒐𑒩𑓂𑒔𑒰 𑒏𑒋𑒢𑒹 𑒁𑒕𑒱 𑒋𑒯𑒱 𑒛𑒱𑒯𑒥𑒰𑒩𑒏 𑒮𑓂𑒟𑒰𑒢𑒏 𑒧𑓀𑒛𑒣 𑒥𑒢𑒋𑒥𑒰𑒧𑒹। 𑒣𑒯𑒱𑒢𑒹 𑒞𑒿 𑒏𑒱𑒕𑒳𑒍 𑒢𑒘𑒱 𑒩𑒯𑒻। 𑒩𑒰𑒖𑒰 𑒖𑒹 𑒥𑒢𑒹𑒪𑒏 𑒣𑒼𑒐𑒩𑒱𑒏 𑒒𑒰𑒙 𑒂 𑒞𑒏𑒩 𑒏𑒰𑒞𑒧𑒹 𑒣𑒏𑓂𑒏𑒰𑒏 𑒧𑒢𑓂𑒠𑒱𑒩 𑒮𑒋𑒯। 𑒧𑒳𑒠𑒰 𑒥𑒹𑒔𑒰𑒩𑒼 𑒣𑒴𑒖𑒰 𑒏𑒻𑒨𑒼 𑒢𑒘𑒱 𑒮𑒏𑒪𑒰𑒯। 𑒪𑒰𑒖𑒏 𑒠𑓂𑒫𑒰𑒩𑒹 𑒯𑒧𑒩 𑒋𑒯𑒱 𑒑𑒰𑒧𑒧𑒹 𑒂𑒥𑒱𑒨𑒼 𑒢𑒘𑒱 𑒮𑒏𑒪𑒰𑒯।

𑓒
𑒯𑒧 𑒏𑒹𑒬𑒫, 𑒑𑒰𑒧 𑒧𑓀𑒑𑒩𑒾𑒢𑒲, 𑒢𑒩𑒾𑒢𑒹 𑒮𑒳𑒪𑓂𑒯𑒢𑒲, 𑒣𑒩𑒰𑒬𑒩 𑒑𑒼𑒞𑓂𑒩, 𑒏𑒫𑒱 𑒧𑒡𑒳𑒩𑒰𑒣𑒞𑒱𑒏 𑒣𑒳𑒞𑓂𑒩।
𑒧𑒰𑒪𑒞𑒲- 𑒧𑒰𑒝𑓂𑒛𑒩 𑒮𑒱𑒯𑒾𑒪 𑒧𑒴𑒪𑒏 𑒏𑒰𑒬𑓂𑒨𑒣 𑒑𑒼𑒞𑓂𑒩𑒲 𑒐𑒑𑒢𑒰𑒟 𑒗𑒰, 𑒑𑒰𑒧 𑒖𑒧𑒮𑒧𑒏 𑒣𑒳𑒞𑓂𑒩𑒲 𑒧𑒰𑒪𑒞𑒲।
𑒐𑒑𑒢𑒰𑒟𑒖𑒲 𑒂 𑒯𑒧𑒩 𑒧𑒰𑒧𑒰 𑒥𑒕𑒩𑒴𑒧𑒹 𑒦𑒖𑒰𑒩 𑒪𑒰𑒑𑒪। 𑒖𑒧𑒮𑒧𑒧𑒹 𑒯𑒧𑒩 𑒧𑒰𑒧𑒰 𑒑𑒰𑒧। 𑒧𑒰𑒧𑒰𑒑𑒰𑒧 𑒡𑒩𑒱 𑒮𑒳𑒐𑒱𑒞𑒑𑒩, 𑒯𑒧 𑒮𑒦 𑒞𑒿 𑒠𑒩𑒱𑒠𑓂𑒩𑒹। 𑒮𑒹 𑒯𑒧 𑒋𑒏 𑒧𑒰𑒮 𑒑𑒩𑒧𑒲 𑒞𑒰𑒞𑒱𑒪 𑒂 𑒣𑒢𑓂𑒠𑓂𑒩𑒯 𑒠𑒱𑒢 𑒠𑒳𑒩𑓂𑒑𑒰𑒣𑒴𑒖𑒰𑒮𑒿 𑒕𑒚𑒱 𑒡𑒩𑒱 𑒧𑒰𑒧𑒹𑒑𑒰𑒧𑒧𑒹 𑒩𑒯𑒻𑒞 𑒩𑒯𑒲। 𑒑𑒩𑒧𑒲 𑒞𑒰𑒞𑒱𑒪𑒧𑒹 𑒮𑒣𑒹𑒞𑒰 𑒣𑒏𑒥𑒰𑒮𑒿 𑒪𑓄 𑒏𑓄 𑒏𑒪𑒏𑒞𑒱𑒨𑒰 𑒂𑒧 𑒣𑒏𑒥𑒰 𑒡𑒩𑒱 𑒑𑒰𑒕𑒲 𑒍𑒑𑒩𑒲। 𑒂 𑒠𑒳𑒩𑓂𑒑𑒰𑒣𑒴𑒖𑒰𑒧𑒹 𑒐𑒭𑓂𑒚𑒲𑒮𑒿 𑒪𑓄 𑒏𑓄 𑒦𑒮𑒰𑒢 𑒡𑒩𑒱 𑒠𑒳𑒩𑓂𑒑𑒰𑒣𑒴𑒖𑒰 𑒠𑒹𑒐𑒲। 𑒤𑒹𑒩 𑒠𑒲𑒨𑒰𑒥𑒰𑒞𑒲𑒧𑒹 𑒏𑒢𑒮𑒳𑒣𑒞𑒲 𑒖𑒩𑒰𑒥𑒲 𑒂 𑒕𑒚𑒱𑒧𑒹 𑒑𑒰𑒧 𑒒𑒳𑒩𑒱 𑒖𑒰𑒃। 𑒂 𑒥𑒲𑒔-𑒥𑒲𑒔𑒧𑒹 𑒞𑒿 𑒖𑒰𑒃𑒞 𑒩𑒯𑒥𑒹 𑒏𑒩𑒲।
𑒧𑒰𑒪𑒞𑒲 𑒮𑓀𑒑𑒹 𑒐𑒴𑒥 𑒗𑒑𑒛𑓃𑒰 𑒮𑒹𑒯𑒼 𑒯𑒼𑒃 𑒕𑒪। 𑒔𑒾𑒟𑒰𑒧𑒹 𑒩𑒯𑒲 𑒣𑓂𑒩𑒰𑒨𑓁। 𑒑𑒩𑒧𑒲 𑒞𑒰𑒞𑒱𑒪𑒧𑒹 𑒧𑒰𑒧𑒰 𑒑𑒰𑒧𑒏 𑒂𑒧𑒏 𑒑𑒰𑒕𑒲 𑒑𑒹𑒪 𑒩𑒯𑒲। 𑒏𑒼𑒢𑒼 𑒑𑒣𑒣𑒩 𑒧𑒰𑒪𑒞𑒲𑒮𑒿 𑒩𑒴𑒮𑒰-𑒤𑒳𑒪𑓂𑒪𑒲 𑒦𑓄 𑒑𑒹𑒪। 𑒡𑒩𑒱 𑒥𑒾𑒮𑒪𑒏 𑒧𑒰𑒪𑒞𑒲𑒨𑒹। 𑒂 𑒥𑒾𑒮𑒥𑒼 𑒏𑒼𑒢𑒰 𑒏𑒹𑒪𑒏।
-𑒯𑒧 𑒁𑒯𑒰𑒿𑒮𑒿 𑒒𑒙𑓂𑒙𑒲 𑒧𑒰𑒢𑒻 𑒕𑒲 𑒍𑒯𑒱 𑒑𑒣𑒏 𑒪𑒹𑒪।
-𑒏𑒼𑒢 𑒑𑒣।
-𑒖𑒃 𑒑𑒣𑒣𑒩 𑒁𑒯𑒰𑒿𑒮𑒿 𑒗𑒑𑒛𑓃𑒰 𑒦𑒹𑒪।
𑒂 𑒍 𑒑𑒣 𑒢𑒘𑒱 𑒯𑒧𑒩𑒰 𑒧𑒼𑒢 𑒣𑒛𑓃𑒪 𑒂 𑒢𑒹 𑒧𑒰𑒪𑒞𑒲𑒏𑒹𑒿। 𑒧𑒳𑒠𑒰 𑒤𑒹𑒩 𑒧𑒰𑒪𑒞𑒲𑒮𑒿 𑒏𑒯𑒱𑒨𑒼 𑒏𑒼𑒢𑒼 𑒑𑒣𑒣𑒩 𑒯𑒧 𑒗𑒑𑒛𑓃𑒰 𑒢𑒘𑒱 𑒏𑒹𑒪𑒯𑒳𑒿। 𑒫𑒋𑒯 𑒧𑒳𑒿𑒯 𑒤𑒳𑒪𑒰𑒥𑒋 𑒞𑒿 𑒯𑒧𑒯𑒲 𑒣𑒳𑒕𑒱𑒌 𑒖𑒹 𑒏𑒼𑒢 𑒑𑒣𑒣𑒩 𑒧𑒳𑒿𑒯 𑒤𑒳𑒪𑒹𑒪𑒯𑒳𑒿 𑒮𑒹 𑒞𑒿 𑒧𑒼𑒢 𑒢𑒯𑒱𑒨𑒹 𑒯𑒋𑒞 𑒞𑒐𑒢 𑒁𑒢𑒹𑒩𑒹 𑒢𑒹 𑒗𑒑𑒛𑓃𑒰 𑒏𑒩𑒻 𑒕𑒲।
𑒑𑒩𑒧𑒲 𑒞𑒰𑒞𑒱𑒪𑒏 𑒥𑒰𑒠 𑒠𑒳𑒩𑓂𑒑𑒰𑒣𑒴𑒖𑒰 𑒂 𑒠𑒳𑒩𑓂𑒑𑒰𑒣𑒴𑒖𑒰𑒏 𑒕𑒳𑒙𑓂𑒙𑒲𑒏 𑒥𑒰𑒠 𑒑𑒩𑒧𑒲 𑒞𑒰𑒞𑒱𑒪𑒏 𑒥𑒰𑒙 𑒖𑒼𑒯𑒻 𑒪𑒑𑒪𑒯𑒳𑒿। 𑒮𑒹 𑒏𑒯𑒱𑒨𑒰𑒮𑒿 𑒮𑒹 𑒏𑒲 𑒧𑒼𑒢 𑒁𑒕𑒱 ?

𑓓
𑒣𑒱𑒞𑒰 𑒑𑒰𑒧𑒧𑒹 𑒥𑒙𑒰𑒃 𑒏𑒩𑒟𑒱। 𑒧𑒱𑒛𑒱𑒪 𑒮𑓂𑒏𑒴𑒪𑒏 𑒥𑒰𑒠 𑒏𑒼𑒢𑒼 𑒮𑓂𑒏𑒴𑒪 𑒢𑒯𑒱𑒨𑒹 𑒩𑒯𑒻 𑒂𑒮-𑒣𑒛𑓃𑒼𑒮𑒧𑒹। 𑒮𑓀𑒮𑓂𑒏𑒵𑒞 𑒣𑒰𑒚𑒬𑒰𑒪𑒰 𑒮𑒦 𑒥𑒢𑓂𑒢𑒹 𑒦𑓄 𑒑𑒹𑒪 𑒩𑒯𑒻।
𑒮𑒹 𑒞𑒰𑒞𑒱𑒪 𑒥𑒪𑒰 𑒏𑒼𑒢𑒼 𑒥𑒰𑒞 𑒂𑒥 𑒩𑒯𑒥𑒹 𑒢𑒘𑒱 𑒏𑒩𑒋। 𑒦𑒩𑒱 𑒮𑒰𑒪 𑒥𑒳𑒗𑒴 𑒏𑒰𑒖𑒹 𑒂𑒏𑒱 𑒞𑒰𑒞𑒱𑒪𑒹। 𑒢𑒰𑒢𑒰-𑒢𑒰𑒢𑒲 𑒖𑒱𑒥𑒱𑒞𑒹 𑒩𑒯𑒟𑒱। 𑒧𑒰𑒋𑒏 𑒪𑒱𑒨𑒾𑒢 𑒏𑒩𑒰𑒥𑒋 𑒪𑒹𑒪 𑒏𑒱𑒨𑒼 𑒢𑒹 𑒏𑒱𑒨𑒼 𑒂𑒥𑒱𑒨𑒹 𑒖𑒰𑒃 𑒕𑒪। 𑒯𑒧𑒯𑒳𑒿 𑒠𑒴 𑒔𑒰𑒩𑒱 𑒧𑒰𑒮𑒧𑒹 𑒧𑒰𑒧𑒰 𑒑𑒰𑒧 𑒏𑒼𑒢𑒼 𑒪𑒰𑒟𑒹 𑒦𑒃𑒨𑒹 𑒁𑒥𑒻𑒞 𑒕𑒪𑒯𑒳𑒿।
𑒑𑒰𑒧𑒣𑒩 𑒏𑒋𑒏 𑒙𑒰 𑒮𑒧𑒮𑓂𑒨𑒰। 𑒢𑒘𑒱 𑒖𑒰𑒢𑒱 𑒏𑒼𑒢 𑒦𑒰𑒿𑒖 𑒩𑒯𑒻 𑒖𑒹 𑒣𑒰𑒿𑒖𑒱𑒏 𑒩𑒏𑓂𑒭𑒰𑒏 𑒑𑒣 𑒣𑒱𑒞𑒰𑒏 𑒧𑒳𑒿𑒯𑒹 𑒮𑒳𑒢𑒻𑒞 𑒩𑒯𑒻𑒞 𑒕𑒪𑒯𑒳𑒿। 𑒂 𑒮𑒹 𑒯𑒧𑒩 𑒥𑒱𑒨𑒰𑒯 𑒧𑒰𑒪𑒞𑒲 𑒮𑓀𑒑𑒹 𑒦𑒹𑒢𑒹 𑒙𑒰 𑒮𑒿 𑒮𑒧𑓂𑒦𑒫, 𑒮𑒹𑒯𑒼 𑒯𑒳𑒢𑒏𑒰 𑒧𑒳𑒿𑒯𑒹 𑒅𑒔𑒩𑒻𑒞 𑒕𑒪𑒢𑓂𑒯𑒱।
𑒧𑒰𑒪𑒞𑒲 𑒯𑒧𑒩 𑒮𑓀𑒑𑒲 𑒧𑒳𑒠𑒰 𑒋𑒯𑒱 𑒑𑒣-𑒬𑒣𑒮𑒿 𑒍𑒏𑒩 𑒯𑒧𑒩 𑒠𑒴𑒩𑒲 𑒥𑒜𑓃𑒱 𑒖𑒹𑒏𑒰𑒿 𑒑𑒹𑒪। 𑒖𑒹 𑒮𑒯𑒖𑒞𑒰 𑒯𑒧𑒩𑒰 𑒂 𑒍𑒏𑒩𑒰 𑒧𑒡𑓂𑒨 𑒕𑒪 𑒮𑒹 𑒐𑒞𑒧 𑒯𑒼𑒁𑒋 𑒪𑒰𑒑𑒪। 𑒖𑒹𑒢𑒰 𑒍𑒏𑒩𑒰 𑒠𑒹𑒐𑒱𑒞𑒹 𑒯𑒧𑒩 𑒧𑒼𑒢𑒧𑒹 𑒣𑒞𑓂𑒢𑒲𑒏 𑒕𑒫𑒱 𑒢𑒖𑒩𑒱 𑒂𑒥𑒻 𑒪𑒰𑒑𑒪 𑒕𑒪, 𑒞𑒯𑒱𑒢𑒰 𑒞𑒿 𑒍𑒏𑒩𑒼 𑒧𑒼𑒢𑒧𑒹 𑒢𑒹 𑒁𑒥𑒻𑒞 𑒯𑒼𑒋𑒞𑒻𑒏।

𑓔
𑒯𑒧𑒩 𑒑𑒰𑒧 𑒂𑒋𑒪 𑒩𑒯𑒟𑒱 𑒥𑒕𑒩𑒴 𑒧𑒰𑒧𑒰।
𑒧𑒡𑒳𑒩𑒰𑒣𑒞𑒱- “𑒥𑒕𑒩𑒴 𑒂𑒥 𑒁𑒯𑒲𑓀𑒏 𑒯𑒰𑒟𑒧𑒹 𑒯𑒧𑒩 𑒮𑒦𑒙𑒰 𑒃𑒖𑓂𑒖𑒞 𑒁𑒕𑒱। 𑒐𑒑𑒢𑒰𑒟𑒏 𑒣𑒳𑒞𑓂𑒩𑒲 𑒏𑒹𑒬𑒫𑒏 𑒪𑒹𑒪 𑒮𑒩𑓂𑒫𑒟𑒰 𑒅𑒣𑒨𑒳𑒏𑓂𑒞। 𑒮𑒳𑒢𑓂𑒠𑒩𑒱 𑒮𑒳𑒬𑒲𑒪 𑒁𑒕𑒱 𑒞𑒿 𑒏𑒹𑒬𑒫 𑒮𑒹𑒯𑒼 𑒖𑒥𑒩𑓂𑒠𑒮𑓂𑒞 𑒁𑒕𑒱। 𑒋𑒏𑓂𑒏𑒹 𑒥𑒞𑒰𑒩𑒲𑒏 𑒁𑒕𑒱 𑒧𑒳𑒠𑒰 𑒏𑒱𑒕𑒳 𑒠𑒱𑒢𑒳𑒏𑒰 𑒕𑒼𑒙𑒹 𑒁𑒕𑒱 𑒧𑒰𑒪𑒞𑒲। 𑒯𑒹। 𑒁𑒯𑒰𑒿𑒏𑒹𑒿 𑒞𑒿 𑒄 𑒥𑒳𑒗𑒪𑒹 𑒁𑒕𑒱 𑒖𑒹 𑓗𑓐𑓐 𑒙𑒰𑒏𑒰 𑒪𑒛𑓃𑒏𑒲𑒥𑒪𑒰𑒏𑒹𑒿 𑒠𑒋 𑒯𑒧𑒩 𑒫𑒱𑒫𑒰𑒯 𑒏𑒩𑒰 𑒯𑒧𑒩 𑒣𑒱𑒞𑒰 𑒣𑒰𑒿𑒖𑒱 𑒥𑒢𑒰𑒍𑒪। 𑒧𑒳𑒠𑒰 𑒂𑒥 𑒖𑒧𑒲𑒢 𑒖𑒞𑓂𑒟𑒰 𑒢𑒻 𑒁𑒕𑒱। 𑒏𑒰𑒪𑓂𑒯𑒱 𑒒𑒼𑒛𑓃𑒲𑒏𑒹𑒿 𑒔𑒱𑒪𑒧 𑒣𑒱𑒨𑒰𑒋 𑒍𑒯𑒱𑒣𑒩 𑒔𑒜𑓃𑒱 𑒂𑒋𑒪 𑒕𑒪𑒰𑒯 𑒣𑒘𑓂𑒖𑒲𑒏𑒰𑒩। 𑒮𑒰𑒤𑒹 𑒏𑒯𑒱 𑒠𑒹𑒪𑒢𑓂𑒯𑒱 𑒖𑒹 𑒧𑒰𑒞𑓂𑒩 𑒐𑒑𑒢𑒰𑒟𑒹𑒏 𑒣𑒳𑒞𑓂𑒩𑒲𑒮𑒿 𑒁𑒡𑒱𑒏𑒰𑒩𑒧𑒰𑒪𑒰 𑒥𑒢𑒻𑒞 𑒁𑒕𑒱। 𑒂 𑒮𑒹 𑒢𑒻 𑒦𑒹𑒢𑒹 𑒣𑒳𑒥𑒰𑒩𑒱𑒣𑒰𑒩 𑒬𑓂𑒩𑒼𑒞𑓂𑒩𑒱𑒨𑒏 𑒬𑓂𑒩𑒹𑒝𑒲𑒮𑒿 𑒔𑒳𑒞 𑒦𑓄 𑒖𑒰𑒋𑒥 𑒯𑒧”।
𑒥𑒕𑒩𑒴- “𑒯𑒧 𑒣𑒳𑒕𑒻 𑒕𑒱𑒨𑒢𑓂𑒯𑒱 𑒐𑒑𑒢𑒰𑒟𑒮𑒿। 𑒮𑓀𑒑𑒲 𑒞𑒿 𑒕𑒟𑒱 𑒧𑒳𑒠𑒰 𑒯𑒳𑒢𑒏𑒩 𑒧𑒼𑒢𑒧𑒹 𑒏𑒲 𑒕𑒢𑓂𑒯𑒱 𑒮𑒹 𑒫𑒋𑒯 𑒢𑒹 𑒏𑒯𑒞𑒰𑒯”।

𑒂 𑒢𑒹 𑒖𑒰𑒢𑒱 𑒏𑒱𑒋𑒏 𑒣𑓂𑒩𑒹𑒧𑒮𑒿 𑒦𑒩𑒱 𑒑𑒹𑒪 𑒕𑒪 𑒯𑒧𑒩 𑒧𑒼𑒢। 𑒥𑒱𑒠𑒰 𑒦𑓄 𑒑𑒹𑒪 𑒩𑒯𑒲 𑒯𑒳𑒢𑒏𑒰 𑒮𑓀𑒑𑒹।

𑓕
𑒧𑒰𑒪𑒞𑒲- “𑒏𑒹𑒬𑒫। 𑒞𑒼𑒯𑒩 𑒏𑒞𑓂𑒞𑒾 𑒠𑒼𑒮𑒩 𑒚𑒰𑒧 𑒥𑒱𑒨𑒰𑒯 𑒦𑓄 𑒖𑒋𑒞𑒾𑒏 𑒞𑒐𑒢 𑒯𑒧𑒩𑒰𑒮𑒿 𑒦𑒹𑒿𑒙 𑒏𑒼𑒢𑒰 𑒯𑒼𑒋𑒞𑒾𑒏”।
𑒏𑒹𑒬𑒫- “𑒂 𑒞𑒼𑒯𑒩 𑒏𑒏𑒩𑒼 𑒠𑒼𑒮𑒩𑒰𑒮𑒿 𑒥𑒱𑒨𑒰𑒯 𑒦𑓄 𑒖𑒋𑒞𑒾𑒏 𑒞𑒿 𑒋𑒯𑒢 𑒁𑒢𑒩𑓂𑒑𑒪 𑒣𑓂𑒩𑒬𑓂𑒢 𑒮𑒦 𑒏𑒏𑒩𑒰𑒮𑒿 𑒏𑒩𑒧𑒹”?
𑒧𑒰𑒪𑒞𑒲- “𑒧𑒳𑒠𑒰 𑒋𑒏𑒙𑒰 𑒑𑒣 𑒥𑒳𑒗𑒪𑒯𑒲𑓀। 𑒏𑒰𑒪𑓂𑒯𑒱 𑒞𑒼𑒯𑒩 𑒧𑒰𑒧𑒰 𑒯𑒧𑒩 𑒣𑒱𑒞𑒰𑒮𑒿 𑒯𑒧𑓂𑒧𑒩-𑒞𑒼𑒯𑒩 𑒥𑒱𑒨𑒰𑒯𑒏 𑒔𑒩𑒔𑒰 𑒏𑓄 𑒩𑒯𑒪 𑒕𑒪𑒰𑒯”।
𑒏𑒹𑒬𑒫- “𑒞𑒐𑒢”।
𑒧𑒰𑒪𑒞𑒲- “𑒢𑒘𑒱, 𑒮𑒦𑒙𑒰 𑒞𑒿 𑒚𑒲𑒏𑒹 𑒧𑒳𑒠𑒰 𑒞𑒐𑒢𑒹 𑒠𑒩𑒦𑓀𑒑𑒰 𑒩𑒰𑒖𑒰𑒏 𑒠𑒴𑒞 𑒥𑒢𑒱 𑒋𑒏 𑒑𑒼𑒙𑒹 𑒂𑒥𑒱 𑒑𑒹𑒪𑒰𑒯 𑒂 𑒏𑒯𑒋 𑒪𑒑𑒪𑒰𑒯 𑒖𑒹 𑒩𑒰𑒖𑒰𑒏 𑒮𑒧𑒰𑒠 𑒁𑒕𑒱”।
𑒏𑒹𑒬𑒫- “𑒩𑒰𑒖𑒰𑒏 𑒏𑒼𑒢 𑒮𑒧𑒰𑒠”।
𑒧𑒰𑒪𑒞𑒲- “𑒏𑒱𑒨𑒹𑒢𑒹 𑒑𑒹𑒪𑒱𑒌। 𑒧𑒳𑒠𑒰 𑒯𑒧𑒩 𑒣𑒱𑒞𑒰𑒏𑒹𑒿 𑒍 𑒠𑒴𑒞 𑒏𑒯𑒪𑒢𑓂𑒯𑒱 𑒖𑒹 𑒥𑒹𑒙𑒲𑒏 𑒥𑒱𑒨𑒰𑒯𑒏 𑒔𑒩𑓂𑒔 𑒏𑒱𑒕𑒳 𑒠𑒱𑒢 𑒩𑒳𑒏𑒱 𑒏𑓄 𑒏𑒩𑒥𑒰𑒏 𑒪𑒹𑒪”।
𑒏𑒹𑒬𑒫- “𑒞𑒼𑒯𑒩 𑒮𑒳𑒢𑓂𑒠𑒩𑒞𑒰𑒃 𑒞𑒿 𑒕𑒾𑒯𑒹 𑒞𑒹𑒯𑒢𑒹। 𑒩𑒰𑒖𑒼𑒏 𑒢𑒖𑒩𑒱𑒧𑒹 𑒞𑒼𑒩𑒰 𑒪𑒹𑒪 𑒏𑒼𑒢𑒼 𑒪𑒛𑓃𑒏𑒰 𑒁𑒦𑒩𑒪 𑒕𑒻 𑒏𑒲”?
𑒧𑒰𑒪𑒞𑒲- “𑒏𑒱𑒨𑒹𑒢𑒹 𑒑𑒹𑒪𑒱𑒌”।
𑓖
𑒩𑒰𑒖𑒰𑒏 𑒧𑒢𑓂𑒞𑓂𑒩𑒲𑒏 𑒮𑒫𑒰𑒩𑒲 𑒐𑒑𑒢𑒰𑒟𑒏 𑒠𑒩𑒥𑒖𑓂𑒖𑒰𑒣𑒩! 𑒠𑒳𑒃𑒨𑒹 𑒠𑒱𑒢𑒧𑒹 𑒏𑒲𑒮𑒿 𑒏𑒲 𑒦𑓄 𑒑𑒹𑒪। 𑒍 𑒠𑒴𑒞 𑒖𑒰 𑒏𑓄 𑒏𑒱𑒕𑒳 𑒏𑒯𑒱 𑒞𑒿 𑒢𑒘𑒱 𑒁𑒋𑒪𑒻 𑒖𑒹 𑒐𑒑𑒢𑒰𑒟 𑒁𑒣𑒢 𑒥𑒹𑒙𑒲𑒏 𑒥𑒱𑒨𑒰𑒯 𑒪𑒹𑒪 𑒡𑒩𑒤𑒩𑒰𑒨𑒪 𑒕𑒟𑒱। 𑒮𑒹 𑒮𑒞𑒩𑓂𑒏𑒲 𑒠𑒹𑒐𑒱𑒨𑒾। 𑒪𑒼𑒏 𑒮𑒦 𑒑𑒩𑓂𑒠𑒧𑒑𑒼𑒪 𑒏𑒩𑒻𑒞। 𑒮𑒦 𑒮𑓂𑒫𑒰𑒑𑒞𑒧𑒹 𑒖𑒳𑒙𑒪। 𑒂 𑒯𑒧𑒯𑒳𑒿 𑒮𑒦 𑒔𑒲𑒖𑒏 𑒖𑒰𑒋𑒖𑒰 𑒪𑒻𑒞 𑒩𑒯𑒲। 𑒮𑒰𑒿𑒗 𑒯𑒼𑒃𑒞-𑒯𑒼𑒃𑒞 𑒯𑒧𑒩 𑒣𑒱𑒞𑒰 𑒮𑒹𑒯𑒼 𑒂𑒥𑒱 𑒑𑒹𑒪 𑒕𑒪𑒰𑒯। 𑒍𑒧𑓂𑒯𑒩 𑒩𑒰𑒖𑒰𑒏 𑒧𑒢𑓂𑒞𑓂𑒩𑒲𑒏 𑒮𑓂𑒫𑒰𑒩𑒲 𑒑𑒹𑒪 𑒂 𑒋𑒧𑓂𑒯𑒩 𑒯𑒧𑒩 𑒣𑒱𑒞𑒰 𑒧𑒰𑒟𑒣𑒩 𑒯𑒰𑒟 𑒩𑒐𑒢𑒹 𑒑𑒳𑒧𑓂𑒧 𑒩𑒯𑒱 𑒑𑒹𑒪𑒰𑒯। 𑒐𑒑𑒢𑒰𑒟 𑒮𑒹𑒯𑒼 𑒧𑒾𑒢।
𑒩𑒰𑒖𑒰 𑒁𑒣𑒢 𑒥𑒱𑒨𑒰𑒯 𑒧𑒰𑒪𑒞𑒲𑒮𑒿 𑒏𑒩𑒥𑒰𑒏 𑒣𑓂𑒩𑒮𑓂𑒞𑒰𑒫 𑒐𑒑𑒢𑒰𑒟 𑒪𑒑 𑒣𑒚𑒹𑒢𑒹 𑒕𑒪𑒰𑒯। 𑒧𑒯𑒰𑒩𑒰𑒖 𑒥𑒲𑒩𑒹𑒬𑓂𑒫𑒩 𑒮𑒱𑓀𑒯। 𑒏𑒯𑒴 𑒞𑒿। 𑒁𑒣𑒢𑒹 𑒔𑒰𑒪𑒲𑒮𑒮𑒿 𑒅𑒣𑒩𑒹 𑒯𑒼𑒋𑒞 𑒂 𑒋𑒯𑒱 𑒞𑒹𑒩𑒯-𑒔𑒾𑒠𑒯 𑒥𑒩𑒐𑒏 𑒥𑒔𑒱𑒨𑒰𑒮𑒿 𑒥𑒱𑒨𑒰𑒯𑒏 𑒣𑓂𑒩𑒮𑓂𑒞𑒰𑒫। 𑒐𑒑𑒢𑒰𑒟𑒏 𑒏𑒲 𑒍𑒏𑒰𑒞𑒱 𑒖𑒹 𑒍𑒏𑒩𑒰 𑒧𑒢𑒰 𑒏𑒩𑒱𑒞𑒟𑒱𑒢𑓂𑒯।
𑒯𑒧𑒩 𑒣𑒱𑒞𑒰 𑒔𑒱𑒢𑓂𑒞𑒱𑒞 𑒖𑒹 𑒂𑒥 𑒣𑒰𑒿𑒖𑒱 𑒢𑒻 𑒥𑒰𑒿𑒔𑒞।
𑒍𑒯𑒱 𑒠𑒱𑒢 𑒮𑒰𑒿𑒗𑒧𑒹 𑒏𑒼𑒢𑒙𑒰 𑒪𑒑 𑒧𑒰𑒪𑒞𑒲𑒮𑒿 𑒯𑒧𑒩 𑒦𑒹𑒿𑒙 𑒦𑒹𑒪। 𑒏𑒩𑒖𑒢𑒲 𑒮𑒢-𑒮𑒢 𑒂𑒿𑒐𑒱 𑒤𑒳𑒪𑒪, 𑒖𑒹𑒢𑒰 𑒯𑒥𑒼𑒜𑓃𑒏𑒰𑒩 𑒦𑓄 𑒏𑒰𑒢𑒪 𑒯𑒼𑒁𑒋। 𑒏𑒲 𑒮𑒦 𑒑𑒣 𑒏𑒹𑒪𑒯𑒳𑒿 𑒧𑒼𑒢𑒼 𑒢𑒘𑒱 𑒁𑒕𑒱। 𑒯𑒿 𑒂𑒐𑒱𑒩𑒲𑒧𑒹 𑒯𑒧 𑒏𑒯𑒢𑒹 𑒡𑒩𑒱 𑒩𑒯𑒱𑒌 𑒖𑒹 𑒮𑒦 𑒚𑒲𑒏 𑒦𑓄 𑒖𑒰𑒋𑒞।
𑓗
𑒖𑒧𑒮𑒧𑒧𑒹 𑒥𑒲𑒩𑒹𑒬𑓂𑒫𑒩 𑒮𑒱𑓀𑒯 𑒪𑒹𑒪 𑒪𑒛𑓃𑒏𑒲 𑒢𑒱𑒯𑒳𑒕𑒪 𑒑𑒹𑒪!
𑒖𑒧𑒮𑒧 𑒑𑒰𑒧𑒧𑒹 𑒣𑒼𑒐𑒩𑒱 𑒐𑒳𑒢𑒰𑒍𑒪 𑒑𑒹𑒪। 𑒍𑒞𑒋 𑒧𑒢𑓂𑒠𑒱𑒩 𑒥𑒢𑒪 𑒖𑒹 𑒩𑒰𑒖𑒰 𑒠𑒼𑒮𑒩𑒰𑒏 𑒧𑒢𑓂𑒠𑒱𑒩𑒧𑒹 𑒏𑒼𑒢𑒰 𑒣𑒴𑒖𑒰 𑒏𑒩𑒞𑒰𑒯।
𑒧𑒳𑒠𑒰 𑒯𑒧𑒯𑒳𑒿 𑒩𑒯𑒲 𑒧𑒡𑒳𑒩𑒰𑒣𑒞𑒱 𑒏𑒫𑒱𑒏 𑒣𑒳𑒞𑓂𑒩 𑒏𑒹𑒬𑒫।
𑒥𑒱𑒨𑒰𑒯𑒏 𑒠𑒱𑒢 𑒪𑒑𑒲𑒔𑒹 𑒩𑒯𑒻 𑒂 𑒠𑒼𑒮𑒩 𑒏𑒼𑒢𑒼 𑒠𑒱𑒢 𑒮𑒹𑒯𑒼 𑒢𑒘𑒱 𑒩𑒯𑒻। 𑒂 𑒍𑒯𑒱 𑒠𑒱𑒢 𑒧𑒰𑒪𑒞𑒲𑒮𑒿 𑒮𑒦 𑒑𑒣 𑒦𑒃𑒨𑒹 𑒑𑒹𑒪 𑒕𑒪।
𑒏𑒙𑒯𑒲 𑒑𑒰𑒛𑓃𑒲𑒧𑒹 𑒂𑒑𑒴𑒏 𑒔𑒰𑒣 𑒂 𑒣𑒰𑒕𑒴𑒏 𑒅𑒪𑒰𑒛𑓃, 𑒂𑒑𑒰𑒿𑒏 𑒔𑒰𑒣 𑒢𑒲𑒏 𑒏𑒰𑒩𑒝 𑒣𑒰𑒕𑒰𑒿 𑒅𑒪𑒰𑒛𑓃 𑒦𑒹𑒪𑒰𑒣𑒩 𑒑𑒰𑒛𑓃𑒲 𑒅𑒢𑒙𑒱 𑒖𑒰𑒋𑒞। 𑒧𑒳𑒠𑒰 𑒯𑒧 𑒍𑒯𑒱𑒢𑒰 𑒑𑒰𑒛𑓃𑒲𑒏𑒹𑒿 𑒅𑒪𑒰𑒛𑓃 𑒏𑒹𑒢𑒹 𑒥𑒿𑒮𑒥𑒱𑒙𑓂𑒙𑒲 𑒪𑒑 𑒧𑒰𑒪𑒞𑒲𑒏 𑒃𑒢𑓂𑒞𑒖𑒰𑒩𑒲𑒧𑒹 𑒩𑒯𑒲।
𑒍 𑒂𑒨𑒪𑒱 𑒂 𑒑𑒰𑒛𑓃𑒲𑒣𑒩 𑒥𑒻𑒮𑒱 𑒑𑒹𑒪𑒱। 𑒖𑒹 𑒏𑒱𑒨𑒼 𑒩𑒮𑓂𑒞𑒰𑒧𑒹 𑒠𑒹𑒐𑒋 𑒮𑒹 𑒛𑒩𑒹 𑒢𑒘𑒱 𑒙𑒼𑒏𑒋 𑒖𑒹 𑒑𑒰𑒛𑓃𑒲 𑒢𑒹 𑒅𑒢𑒙𑒱 𑒖𑒰𑒃 𑒋𑒏𑒩। 𑒋𑒏𑒙𑒰 𑒣𑒞𑒩𑓀𑒑𑒲 𑒔𑒱𑒛𑓃𑒻 𑒠𑒹𑒐𑒱 𑒅𑒪𑓂𑒪𑒮𑒱𑒞 𑒯𑒼𑒁𑒋 𑒪𑒰𑒑𑒪𑒱 𑒧𑒰𑒪𑒞𑒲 𑒞𑒿 𑒂𑒿𑒑𑒳𑒩𑒮𑒿 𑒯𑒧 𑒍𑒏𑒩 𑒚𑒼𑒜𑓃 𑒥𑒢𑓂𑒢 𑒏𑓄 𑒠𑒹𑒪𑒱𑒌।
𑒧𑒰𑒪𑒞𑒲𑒏𑒹𑒿 𑒪𑓄 𑒏𑓄 𑒑𑒰𑒧 𑒂𑒥𑒱 𑒑𑒹𑒪𑒯𑒳𑒿, 𑒡𑒼𑒞𑒲 𑒩𑓀𑒑𑒰𑒃𑒞 𑒕𑒪। 𑒤𑒹𑒩 𑒖𑒹 𑒧𑒰𑒪𑒞𑒲𑒏 𑒣𑒞𑒰 𑒏𑒩𑒥𑒰𑒏 𑒪𑒹𑒪 𑒂𑒋𑒪 𑒩𑒯𑒋 𑒞𑒏𑒩𑒰 𑒣𑒏𑒛𑓃𑒱 𑒩𑒰𑒐𑒪। 𑒂 ’𑒏𑒢𑓂𑒨𑒰𑒠𑒰𑒢 𑒏𑒹 𑒏𑒩𑒞’𑒏 𑒁𑒢𑒒𑒼𑒪 𑒦𑒹𑒪𑒰𑒣𑒩 𑒍𑒏𑒩𑒰 𑒮𑒼𑒗𑒰𑒿 𑒁𑒢𑒪𑒯𑒳𑒿 𑒖𑒹 𑒏𑒢𑓂𑒨𑒰𑒠𑒰𑒢 𑒨𑒋𑒯 𑒏𑒩𑒥𑒰𑒍𑒞।
𑒮𑒪𑒧𑒬𑒰𑒯𑒲 𑒔𑒧𑒩𑒅 𑒖𑒳𑒞𑓂𑒞𑒰 𑒅𑒞𑒰𑒩𑒱 𑒡𑒼𑒞𑒲 𑒣𑒯𑒲𑒩𑒱 𑒯𑒧 𑒫𑒱𑒫𑒰𑒯 𑒪𑒹𑒪 𑒫𑒱𑒡 𑒮𑒦 𑒣𑒴𑒩𑓂𑒝 𑒏𑒹𑒪𑒯𑒳𑒿। 𑒧𑒰𑒪𑒞𑒲𑒏 𑒮𑒲𑒟𑒧𑒹 𑒮𑒱𑒢𑒳𑒩 𑒯𑒧𑒩𑒹 𑒯𑒰𑒟𑒮𑒿 𑒠𑒹𑒥 𑒪𑒱𑒐𑒪 𑒖𑒹 𑒩𑒯𑒻।

𑓘
𑒞𑒏𑒩 𑒥𑒰𑒠 𑒩𑒰𑒖𑒰 𑒥𑒲𑒩𑒹𑒬𑒫𑒩 𑒮𑒱𑓀𑒯 𑒏𑒲 𑒏𑒩𑒞𑒰𑒯?
𑒣𑒘𑓂𑒖𑒲𑒏𑒰𑒩𑒏𑒹𑒿 𑒥𑒖𑒰 𑒏𑓄 𑒯𑒧𑒩 𑒢𑒰𑒧𑒧𑒹 𑒞𑒮𑓂𑒏𑒩 𑒅𑒣𑒰𑒡𑒱 𑒪𑒑𑒥𑒰𑒍𑒪। 𑒧𑒳𑒠𑒰 𑒧𑒡𑒳𑒩𑒰𑒣𑒞𑒱 𑒁𑒣𑒢 𑒣𑒳𑒞𑓂𑒩𑒏 𑒣𑓂𑒩𑒞𑒱 𑒑𑒩𑓂𑒫𑒼𑒢𑓂𑒢𑒞𑓂𑒞। 𑒥𑒰𑒒𑒏 𑒥𑒹𑒙𑒰 𑒥𑒰𑒒। 𑒣𑒰𑒘𑓂𑒖𑒱 𑒂 𑒣𑒰𑒢𑒱 𑒁𑒡𑒼𑒑𑒰𑒧𑒲 𑒧𑒳𑒠𑒰 𑒐𑒑𑒢𑒰𑒟 𑒗𑒰- 𑒬𑓂𑒩𑒲𑒏𑒰𑒢𑓂𑒞 𑒗𑒰 𑒣𑒰𑒿𑒖𑒱, 𑒞𑒮𑓂𑒏𑒩 𑒏𑒹𑒬𑒫𑒏 𑒬𑓂𑒩𑒼𑒞𑓂𑒩𑒱𑒨 𑒍𑒯𑒱𑒚𑒰𑒧 𑒫𑒱𑒫𑒰𑒯 𑒏𑒋𑒪𑒰𑒣𑒩 𑒬𑓂𑒩𑒼𑒞𑓂𑒩𑒱𑒨 𑒬𑓂𑒩𑒹𑒝𑒲 𑒫𑒱𑒩𑒰𑒖𑒧𑒰𑒢 𑒩𑒯𑒞𑒢𑓂𑒯𑒱।
𑒂 𑒮𑒋 𑒥𑒩𑓂𑒐𑒏 𑒥𑒰𑒠 𑒂𑒃 𑒋𑒯𑒱 𑒑𑒰𑒧𑒧𑒹 𑒏𑒼𑒢𑒼 𑒢𑒰𑒙𑒏 𑒯𑒼𑒋𑒞𑒻𑒏। 𑒮𑒳𑒪𑓂𑒞𑒰𑒢𑒰 𑒛𑒰𑒏𑒴।
𑒂 𑒯𑒧 𑒞𑒮𑓂𑒏𑒩 𑒏𑒹𑒬𑒫, 𑒧𑓀𑒑𑒩𑒾𑒢𑒲 𑒢𑒩𑒾𑒢𑒹 𑒮𑒳𑒪𑓂𑒯𑒢𑒲- 𑒣𑒩𑒰𑒬𑒩 𑒑𑒼𑒞𑓂𑒩, 𑒏𑒫𑒱 𑒧𑒡𑒳𑒩𑒰𑒣𑒞𑒱𑒏 𑒣𑒳𑒞𑓂𑒩 𑒁𑒣𑒢 𑒑𑒰𑒟𑒰𑒏 𑒏𑒼𑒢𑒼 𑒋𑒏𑒙𑒰 𑒪𑒏𑓂𑒭𑒝 𑒋𑒞𑒋 𑒖𑒧𑒮𑒧 𑒑𑒰𑒧𑒧𑒹 𑒞𑒰𑒏𑒱 𑒩𑒯𑒪 𑒕𑒲। 𑒧𑒳𑒠𑒰 𑒩𑒰𑒖𑒰 𑒥𑒲𑒩𑒹𑒬𑓂𑒫𑒩 𑒮𑒱𑓀𑒯𑒏 𑒫𑒋𑒯 𑒣𑒼𑒐𑒩𑒱 𑒂 𑒂𑒥 𑒜𑓃𑒢𑒧𑒢𑒰𑒋𑒪 𑒧𑒢𑓂𑒛𑒱𑒪 𑒠𑒹𑒐𑒻 𑒕𑒲, 𑒥𑒹𑒔𑒰𑒩𑒼 𑒒𑒳𑒩𑒱 𑒏𑓄 𑒪𑒰𑒖𑒹 𑒋𑒯𑒱 𑒑𑒰𑒧𑒧𑒹 𑒋𑒥𑒼 𑒢𑒻 𑒏𑒹𑒪𑒰𑒯।
𑒨𑒋𑒯 𑒣𑒼𑒐𑒩𑒱 𑒂 𑒜𑓃𑒢𑒧𑒢𑒰𑒋𑒪 𑒧𑒢𑓂𑒠𑒱𑒩 𑒯𑒧𑒩 𑒣𑓂𑒩𑒹𑒧𑒏 𑒁𑒕𑒱 𑒁𑒫𑒬𑒹𑒭।





𑒮𑓀𑒒𑒩𑓂𑒭
𑓑

𑒤𑒰𑒃𑒪𑒏 𑒑𑒹𑒿𑒙, 𑒑𑒩𑒠𑒰𑒮𑒿 𑒮𑒢𑒪। 𑒍𑒯𑒱𑒧𑒹 𑒮𑒿 𑒋𑒏-𑒋𑒏𑒙𑒰 𑒏𑒰𑒑𑒞 𑒢𑒱𑒏𑒰𑒪𑒱 𑒧𑒳𑒿𑒯𑒣𑒩 𑒩𑒳𑒧𑒰𑒪 𑒩𑒰𑒐𑒱 𑒗𑒰𑒩𑒱 𑒩𑒯𑒪 𑒕𑒲। 𑒍𑒃𑒧𑒹 𑒮𑒿 𑒏𑒱𑒕𑒳 𑒏𑒰𑒖𑒏 𑒫𑒮𑓂𑒞𑒳 𑒢𑒱𑒏𑒪𑒻𑒞 𑒁𑒕𑒱, 𑒏𑒱𑒕𑒳 𑒥𑒹𑒏𑒰𑒖𑒏। 𑒫𑒱𑒡𑒫𑒰 𑒮𑒼𑒯𑒰𑒑𑒼𑒏 𑒏𑒹𑒮-𑒧𑒳𑒏𑒠𑒧𑒰𑒏 𑒤𑒰𑒃𑒪। 𑒧𑒰𑒢-𑒁𑒣𑒧𑒰𑒢𑒏 𑒐𑒰𑒞𑒰-𑒐𑒹𑒮𑒩𑒰। 𑒂𑒩𑒼𑒣-𑒣𑓂𑒩𑒞𑓂𑒨𑒰𑒩𑒼𑒣𑒏 𑒣𑓂𑒩𑒏𑒩𑒝𑒏 𑒏𑓂𑒩𑒧। 𑒥𑒴𑒜𑓃 𑒧𑒯𑒱𑒪𑒰𑒏 𑒨𑒳𑒫𑒰𑒫𑒮𑓂𑒟𑒰𑒏 𑒐𑒱𑒮𑓂𑒮𑒰, 𑒏𑒱𑒕𑒳 𑒮𑒞𑓂𑒨, 𑒏𑒱𑒕𑒳 𑒧𑒱𑒟𑓂𑒨𑒰𑒩𑒼𑒣। 𑒣𑒞𑒱 𑒂 𑒣𑒳𑒞𑓂𑒩𑒏 𑒖𑒲𑒫𑒢। 𑒥𑒹𑒢𑒑𑓂𑒢 𑒯𑒼𑒃𑒞 𑒯𑒧𑒩 𑒮𑒦𑒏 𑒮𑒦𑓂𑒨𑒞𑒰𑒏 𑒕𑒰𑒣। 𑒏𑒱𑒋𑒏 𑒔𑒰𑒢𑒢 𑒒𑒮𑒢𑒹 𑒩𑒯𑒻𑒞 𑒁𑒕𑒱 𑒄 𑒥𑒴𑒜𑓃𑒲। 𑒦𑒑𑒫𑒰𑒢 𑒣𑒩 𑒋𑒞𑒹𑒏 𑒦𑒩𑒼𑒮? 𑒋𑒯𑒱 𑒅𑒧𑒩𑒱𑒧𑒹 𑒥𑒹𑒙𑒰𑒏 𑒮𑓂𑒧𑒰𑒩𑒏 𑒥𑒢𑒹𑒥𑒰𑒏 𑒖𑒱𑒠𑓂𑒠? 𑒯𑒰𑒩𑒱 𑒂 𑒖𑒲𑒞𑒏 𑒞𑒰𑒩𑒞𑒧𑓂𑒨𑒏 𑒥𑒲𑒔, 𑒋𑒐𑒢 𑒤𑒹𑒩 𑒋𑒏𑒙𑒰 𑒠𑒼𑒮𑒩𑒹 𑒣𑒹𑒙𑒲𑒬𑒢? 𑒖𑒱𑒞𑒥𑒰𑒏 𑒏𑒼𑒢 𑒁𑒠𑓂𑒦𑒳𑒞 𑒪𑒑𑒢 𑒪𑒰𑒑𑒪 𑒕𑒻𑒏 𑒍𑒏𑒩𑒰। 𑒯𑒰𑒩𑒱𑒞𑒹 𑒩𑒯𑒪 𑒁𑒕𑒱 𑒦𑒩𑒱 𑒖𑒱𑒢𑒑𑒲, 𑒞𑒻𑒨𑒼!
𑒣𑒯𑒱𑒢𑒹 𑒞𑒿 𑒏𑒳𑒧𑒼𑒢𑒮𑒿 𑒧𑓀𑒛𑒪 𑒮𑒩𑒏 𑒏𑒯𑒪𑒰𑒣𑒩 𑒄 𑒏𑒰𑒖 𑒯𑒰𑒟𑒧𑒹 𑒪𑒹𑒢𑒹 𑒩𑒯𑒲। 𑒧𑒳𑒠𑒰 𑒂𑒥 𑒯𑒧𑒩𑒼 𑒃𑒔𑓂𑒕𑒰 𑒦𑓄 𑒑𑒹𑒪 𑒁𑒕𑒱, 𑒃𑒔𑓂𑒕𑒰 𑒍𑒏𑒩 𑒣𑒹𑒙𑒲𑒬𑒢𑒏𑒹𑒿 𑒨𑒟𑒰𑒬𑒲𑒒𑓂𑒩 𑒠𑒰𑒐𑒱𑒪 𑒏𑒩𑒥𑒰𑒏। 𑒃𑒔𑓂𑒕𑒰 𑒍𑒏𑒩𑒰 𑒖𑒱𑒞𑒹𑒥𑒰𑒏। 𑒄 𑒤𑒰𑒃𑒪𑒏 𑒑𑒩𑒠𑒰, 𑒑𑒩𑒠𑒰𑒮𑒿 𑒮𑒰𑒢𑒪 𑒏𑒰𑒑𑒞-𑒣𑒞𑓂𑒞𑒩 𑒮𑒦। 𑒛𑒮𑓂𑒙𑒮𑒿 𑒋𑒪𑒩𑓂𑒖𑒲 𑒁𑒕𑒻𑒞 𑒯𑒧 𑒋𑒯𑒱𑒧𑒹 𑒒𑒼𑒮𑒱𑒨𑒰 𑒑𑒹𑒪 𑒕𑒲। 𑒋𑒯𑒱 𑒥𑒳𑒜𑓃𑒱𑒨𑒰𑒏 𑒯𑒰𑒩𑒱𑒏 𑒢𑒧𑒑𑒩 𑒤𑒹𑒯𑒩𑒱𑒮𑓂𑒙, 𑒞𑒏𑒩 𑒮𑒼𑒗𑒰𑒿 𑒯𑒧𑒩 𑒁𑒣𑒢 𑒯𑒰𑒩𑒱 𑒮𑒦𑒏 𑒏𑒼𑒢𑒼 𑒪𑒹𑒐𑒰 𑒢𑒻। 𑒋𑒏𑒩𑒰 𑒖𑒱𑒞𑒋𑒥𑒰𑒏 𑒖𑒱𑒠𑓂𑒠𑒏 𑒂𑒑𑒰𑒿 𑒁𑒣𑒢 𑒁𑒣𑓂𑒩𑒞𑓂𑒨𑒏𑓂𑒭 𑒫𑒱𑒖𑒨 𑒪𑒐𑒻𑒞 𑒁𑒕𑒱। 𑒮𑒼𑒗𑒰𑒿-𑒮𑒼𑒗𑒲 𑒫𑒱𑒖𑒨 𑒢𑒻 𑒞𑒿 𑒋𑒯𑒱 𑒥𑒳𑒜𑓃𑒱𑒨𑒰𑒏 𑒧𑒰𑒡𑓂𑒨𑒧𑒮𑒿 𑒮𑒧𑓂𑒦𑒰𑒫𑒱𑒞 𑒫𑒱𑒖𑒨𑒏 𑒣𑒹𑒙𑒲𑒬𑒢। 𑒯𑒰𑒩𑒞 𑒞𑒿 𑒄 𑒥𑒳𑒜𑓃𑒱𑒨𑒰 𑒂 𑒖𑒹 𑒄 𑒥𑒳𑒜𑓃𑒱𑒨𑒰 𑒖𑒲𑒞𑒞 𑒞𑒿 𑒖𑒲𑒞𑒥 𑒯𑒧। 𑒄 𑒥𑒳𑒜𑓃𑒱𑒨𑒰 𑒡𑒩𑒱 𑒁𑒕𑒱 𑒁𑒑𑒩𑒖𑒱𑒞। 𑒂𑒤𑒱𑒮𑒧𑒹 𑒮𑒦𑒮𑒿 𑒗𑒑𑒛𑓃𑒰 𑒏𑒹𑒢𑒹 𑒁𑒕𑒱। 𑒏𑒰𑒩𑓂𑒨𑒰𑒪𑒨𑒏 𑒏𑓂𑒨𑒼 𑒑𑒼𑒙𑒹 𑒋𑒏𑒩 𑒣𑒹𑒙𑒲𑒬𑒢 𑒂𑒑𑒰𑒿 𑒥𑒜𑓃𑒹𑒥𑒰𑒏 𑒪𑒹𑒪 𑒞𑒻𑒨𑒰𑒩 𑒢𑒻। 𑒧𑓀𑒛𑒪 𑒮𑒩 𑒧𑒳𑒠𑒰 𑒋𑒏𑒩 𑒮𑒦𑒙𑒰 𑒢𑒐𑒛𑓃𑒰 𑒥𑒩𑒠𑒰𑒮𑓂𑒞 𑒏𑒩𑒻𑒞 𑒕𑒟𑒱। 𑒋𑒏𑒩 𑒥𑒹𑒙𑒰 𑒯𑒳𑒢𑒏𑒩 𑒥𑒻𑒔𑒧𑒹𑒙 𑒕𑒪𑒢𑓂𑒯𑒱। 𑒢𑒲𑒏 𑒪𑒼𑒏 𑒕𑒟𑒱, 𑒮𑒖𑓂𑒖𑒢। 𑒏𑒰𑒩𑓂𑒨𑒰𑒪𑒨𑒏 𑒏𑒢𑒲𑒨 𑒮𑒠𑒮𑓂𑒨 𑒮𑒦𑒮𑒿 𑒯𑒧𑒩𑒰 𑒏𑒯𑒱𑒨𑒼 𑒏𑒼𑒢𑒼 𑒣𑓂𑒩𑒞𑒱𑒨𑒼𑒑𑒱𑒞𑒰 𑒢𑒻 𑒯𑒼𑒃𑒞 𑒁𑒕𑒱। 𑒧𑒳𑒠𑒰 𑒅𑒔𑓂𑒔 𑒣𑒠𑒰𑒡𑒱𑒏𑒰𑒩𑒲 𑒮𑒦𑒮𑒿 𑒤𑒰𑒃𑒪𑒼𑒣𑒩 𑒂 𑒍𑒯𑒱𑒢𑒼 𑒏𑒱𑒕𑒳 𑒢𑒹 𑒏𑒱𑒕𑒳 𑒯𑒼𑒃𑒞𑒹 𑒩𑒯𑒻𑒞 𑒁𑒕𑒱। 𑒧𑒳𑒠𑒰 𑒧𑓀𑒛𑒪 𑒮𑒩 𑒢𑒲𑒏 𑒪𑒼𑒏। 𑒮𑒖𑓂𑒖𑒢। 𑒂 𑒋𑒯𑒱 𑒣𑒹𑒙𑒲𑒬𑒢𑒏𑒹𑒿 𑒠𑒹𑒥𑒰𑒏 𑒦𑒰𑒩 𑒍 𑒯𑒧𑒩𑒹𑒣𑒩 𑒕𑒼𑒛𑓃𑒢𑒹 𑒕𑒟𑒱। 𑒥𑒳𑒗𑒪 𑒕𑒢𑓂𑒯𑒱 𑒖𑒹 𑒁𑒡𑒱𑒏𑒰𑒩𑒲 𑒮𑒦 𑒍𑒯𑒱 𑒣𑒹𑒙𑒲𑒬𑒢𑒧𑒹 𑒢𑒹𑒓𑒩𑒲 𑒧𑒰𑒩𑒞। 𑒂 𑒞𑒐𑒢 𑒠𑒼𑒮𑒩 𑒮𑒦 𑒥𑒲𑒔𑒹𑒧𑒹 𑒣𑒹𑒙𑒲𑒬𑒢 𑒕𑒼𑒛𑓃𑒱 𑒦𑒰𑒑𑒱 𑒖𑒋𑒞। 𑒧𑒳𑒠𑒰 𑒯𑒧 𑒞𑒿 𑒮𑒹 𑒦𑒹𑒪𑒰𑒣𑒩 𑒣𑒰𑒕𑒴 𑒣𑒛𑓃𑒱 𑒖𑒰𑒋𑒥 𑒂 𑒞𑒐𑒢 𑒣𑒹𑒙𑒲𑒬𑒢 𑒠𑒰𑒐𑒱𑒪 𑒦𑓄 𑒮𑒏𑒞 𑒯𑒧𑒩𑒹 𑒥𑒳𑒞𑒹। 𑒄 𑒫𑒱𑒬𑓂𑒫𑒰𑒮 𑒕𑒢𑓂𑒯𑒱 𑒧𑓀𑒛𑒪 𑒮𑒩𑒏𑒹𑒿।
“𑒁𑒯𑒰𑒿𑒣𑒩 𑒮𑒿 𑒯𑒧𑒩 𑒫𑒱𑒬𑓂𑒫𑒰𑒮 𑒅𑒚𑒱 𑒑𑒹𑒪 𑒁𑒕𑒱 । 𑒋𑒏 𑒧𑒯𑒱𑒢𑒰𑒮𑒿 𑒗𑒳𑒙𑓂𑒚𑒹 𑒒𑒳𑒧𑒰 𑒩𑒯𑒪 𑒕𑒲। 𑒋𑒐𑒢 𑒡𑒩𑒱 𑒣𑒹𑒙𑒲𑒬𑒢 𑒢𑒻 𑒦𑒹𑒪 𑒠𑒰𑒐𑒱𑒪 𑒏𑒋𑒪”- 𑒥𑒳𑒜𑓃𑒱𑒨𑒰 𑒂𑒃 𑒪𑒑𑒰 𑒏𑓄 𑒞𑒹𑒮𑒩 𑒥𑒹𑒩 𑒄 𑒮𑒦 𑒑𑒣 𑒮𑒳𑒢𑒹𑒪𑒏 𑒁𑒕𑒱 𑒂 𑒔𑒪𑒱 𑒑𑒹𑒪 𑒁𑒕𑒱। 𑒣𑒯𑒱𑒪 𑒥𑒹𑒩 𑒞𑒿 𑒯𑒧 𑒧𑓀𑒛𑒪 𑒮𑒩𑒏𑒹𑒿 𑒏𑒯𑒥𑒼 𑒏𑒹𑒪𑒱𑒨𑒢𑓂𑒯𑒱 𑒖𑒹 𑒏𑒼𑒢 𑒤𑒹𑒩𑒧𑒹 𑒯𑒧𑒩𑒰 𑒮𑒦 𑒣𑒛𑓃𑒪 𑒕𑒲। 𑒋𑒯𑒱 𑒥𑒳𑒜𑓃𑒱𑒨𑒰 𑒪𑒹𑒪 𑒖𑒰𑒢-𑒣𑓂𑒩𑒰𑒝 𑒪𑒑𑒹𑒢𑒹 𑒕𑒲। 𑒧𑒳𑒠𑒰 𑒠𑒹𑒐𑒴, 𑒠𑒮 𑒙𑒰 𑒑𑒣 𑒮𑒳𑒢𑒰 𑒏𑓄 𑒔𑒪𑒱 𑒑𑒹𑒪। 𑒧𑒳𑒠𑒰 𑒧𑓀𑒛𑒪 𑒮𑒩 𑒏𑒯𑒪𑒢𑓂𑒯𑒱 𑒖𑒹- “𑒢𑒘𑒱 𑒨𑒾। 𑒮𑒧𑒋𑒏 𑒧𑒰𑒩𑒪 𑒁𑒕𑒱 𑒄 । 𑒖𑒹𑒯𑒢 𑒪𑒼𑒏 𑒮𑒦𑒮𑒿 𑒂𑒃 𑒡𑒩𑒱 𑒋𑒏𑒩𑒰 𑒦𑒹𑒿𑒙 𑒕𑒻, 𑒞𑒹𑒯𑒢𑒹 𑒢𑒹 𑒥𑒳𑒗𑒞 𑒄 𑒁𑒣𑒢𑒰 𑒮𑒦𑒏𑒹𑒿”। 𑒄 𑒑𑒩𑒠𑒰 𑒮𑒰𑒢𑒪 𑒤𑒰𑒃𑒪 𑒮𑒦𑒏𑒹𑒿 𑒧𑒳𑒠𑒰 𑒂𑒥 𑒒𑒼𑓀𑒙𑒱 𑒑𑒹𑒪 𑒕𑒲 𑒯𑒧, 𑒥𑒳𑒗𑒴 𑒮𑒼𑓀𑒐𑒱 𑒑𑒹𑒪 𑒕𑒲। 𑒂𑒃 𑒤𑒹𑒩 𑒥𑒳𑒜𑓃𑒱𑒨𑒰 𑒄 𑒮𑒦 𑒑𑒣 𑒏𑒯𑒱 𑒥𑒯𑒰𑒩 𑒦𑓄 𑒑𑒹𑒪। 𑒯𑒧 𑒂 𑒧𑓀𑒛𑒪 𑒮𑒩 𑒋𑒏 𑒠𑒼𑒮𑒩𑒰𑒏𑒹𑒿 𑒠𑒹𑒐𑒱 𑒩𑒯𑒪 𑒕𑒲। 𑒥𑒱𑒢𑒳 𑒯𑒿𑒮𑒢𑒹। 𑒣𑒩𑒰𑒖𑒨𑒏 𑒕𑒰𑒯 𑒠𑒳𑒢𑒴 𑒑𑒼𑒙𑒹𑒏 𑒧𑒳𑒿𑒯𑒣𑒩 𑒁𑒕𑒱।
“𑒦𑓄 𑒑𑒹𑒪 𑒁𑒕𑒱 𑒮𑒩। 𑒋𑒯𑒱 𑒬𑒳𑒏𑓂𑒩 𑒡𑒩𑒱 𑒣𑒹𑒙𑒲𑒬𑒢 𑒠𑒰𑒐𑒱𑒪 𑒦𑓄 𑒖𑒰𑒋𑒞”।
“𑒧𑒳𑒠𑒰 𑒁𑒯𑒰𑒿𑒏 𑒮𑓂𑒟𑒰𑒢𑒰𑒢𑓂𑒞𑒩𑒝 𑒦𑓄 𑒑𑒹𑒪 𑒁𑒕𑒱, 𑒬𑒳𑒏𑓂𑒩 𑒠𑒱𑒢 𑒡𑒩𑒱 𑒁𑒯𑒰𑒿𑒏𑒹𑒿 𑒖𑒋𑒥𑒰𑒏 𑒁𑒕𑒱”।
“𑒏𑒯𑒪𑒯𑒳𑒿 𑒢𑒹 𑒯𑒧। 𑒦𑓄 𑒖𑒰𑒋𑒞 𑒬𑒳𑒏𑓂𑒩 𑒠𑒱𑒢 𑒡𑒩𑒱। 𑒖𑒋𑒥𑒰𑒮𑒿 𑒣𑒯𑒱𑒢𑒹 𑒠𑒰𑒐𑒱𑒪 𑒏𑒃𑒨𑒹 𑒏𑓄 𑒖𑒰𑒋𑒥। 𑒣𑒩𑒱𑒝𑒰𑒧 𑒞𑒿 𑒥𑒰𑒠𑒧𑒹 𑒣𑒞𑒰 𑒪𑒰𑒑𑒱𑒨𑒹 𑒖𑒰𑒋𑒞”।
𑒥𑒱𑒢𑒳 𑒯𑒿𑒮𑒢𑒹, 𑒥𑒱𑒢𑒳 𑒞𑒧𑒮𑒰𑒋𑒪 𑒧𑒳𑒐𑒰𑒏𑒵𑒞𑒱 𑒪𑒹𑒢𑒹 𑒥𑒯𑒩𑒰𑒃𑒞 𑒕𑒲। 𑒏𑓄 𑒠𑒻𑒞 𑒕𑒱𑒌𑒏 𑒠𑒰𑒐𑒱𑒪 𑒋𑒏𑒩 𑒣𑒹𑒙𑒲𑒬𑒢। 𑒯𑒰𑒩𑒞 𑒞𑒿 𑒄 𑒯𑒰𑒩𑒞। 𑒖𑒲𑒞𑒞 𑒖𑒹 𑒄, 𑒞𑒿 𑒖𑒲𑒞𑒥 𑒯𑒧।


𑓒
𑒮𑒼𑒯𑒰𑒑𑒼। 𑒑𑒜𑓃 𑒥𑒪𑒱𑒩𑒰𑒖𑒣𑒳𑒩𑒏 𑒥𑒮𑒱𑒢𑓂𑒠𑒰 𑒋𑒏𑒩 𑒣𑒩𑒱𑒫𑒰𑒩। 𑒐𑒹𑒞𑒲-𑒥𑒰𑒛𑓃𑒲 𑒢𑒲𑒏, 𑒞𑒩𑒏𑒰𑒩𑒲 𑒥𑒹𑒔𑒱 𑒢𑒲𑒏 𑒖𑒧𑒲𑒢-𑒖𑒞𑓂𑒟𑒰 𑒥𑒢𑒹𑒢𑒹। 𑒕𑒯 𑒦𑒰𑒿𑒋𑒣𑒩 𑒦𑒹𑒪 𑒕𑒪𑒲𑒯 𑒮𑒼𑒯𑒰𑒑𑒼।
𑒣𑒱𑒞𑒰𑒏 𑒠𑒳𑒪𑒰𑒩𑒱। 𑒧𑒰𑒞𑒰𑒏 𑒠𑒳𑒪𑒰𑒩𑒱। 𑒮𑒦 𑒦𑒰𑒋𑒿𑒏 𑒠𑒳𑒪𑒰𑒩𑒱। 𑒧𑒳𑒠𑒰 𑒧𑒰𑒞𑓂𑒩 𑒠𑒮 𑒥𑒩𑒐। 𑒤𑒹𑒩 𑒫𑒱𑒫𑒰𑒯 𑒦𑓄 𑒑𑒹𑒪𑒢𑓂𑒯𑒱। 𑒣𑒞𑒱𑒮𑒿 𑒣𑓂𑒩𑒹𑒧 𑒕𑒪𑒢𑓂𑒯𑒱 𑒫𑒰 𑒢𑒻 𑒕𑒪𑒢𑓂𑒯𑒱, 𑒄 𑒑𑒣 𑒑𑒩𑒠𑒰 𑒪𑒰𑒑𑒪 𑒏𑒼𑒩𑓂𑒙 𑒤𑒰𑒃𑒪𑒧𑒹 𑒢𑒻 𑒪𑒱𑒐𑒪 𑒁𑒕𑒱।
𑒯𑒳𑒢𑒏𑒩 𑒢𑒻𑒯𑒩𑒏 𑒔𑒩𑓂𑒔 𑒧𑒰𑒞𑓂𑒩 𑒋𑒏 𑒣𑒻𑒩𑒰𑒑𑓂𑒩𑒰𑒤𑒧𑒹 𑒐𑒞𑒧 𑒁𑒕𑒱। 𑒧𑒰𑒞𑓂𑒩 𑒄 𑒫𑒱𑒫𑒩𑒝 𑒁𑒕𑒱 𑒖𑒹 𑒣𑒞𑒱𑒏 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒢𑓂𑒯𑒱 𑒖𑒐𑒢 𑒯𑒱𑒢𑒏𑒩 𑒅𑒧𑒩𑒱 𑒁𑒚𑒰𑒩𑒯 𑒥𑒩𑒐𑒏 𑒕𑒪𑒢𑓂𑒯𑒱।
𑒧𑒳𑒠𑒰 𑒋𑒏𑒙𑒰 𑒥𑒹𑒙𑒰 𑒦𑒑𑒫𑒰𑒢𑒏 𑒏𑒵𑒣𑒰𑒮𑒿 𑒧𑒵𑒞𑓂𑒨𑒳𑒏 𑒣𑒴𑒩𑓂𑒫 𑒣𑒞𑒱 𑒯𑒳𑒢𑒏𑒰 𑒠𑓄 𑒑𑒹𑒪 𑒕𑒪𑒐𑒱𑒢𑓂𑒯। 𑒁𑒚𑒰𑒩𑒯 𑒥𑒩𑒐𑒏 𑒅𑒧𑒩𑒱। 𑒋𑒏𑒙𑒰 𑒥𑒔𑓂𑒔𑒰।
𑒧𑒳𑒠𑒰 𑒑𑒩𑒠𑒰𑒥𑒪𑒰 𑒤𑒰𑒃𑒪𑒧𑒹 𑒢𑒯𑒱𑒨𑒹 𑒮𑒰𑒮𑒳𑒩𑒏 𑒏𑒼𑒢𑒼 𑒪𑒼𑒏𑒏 𑒂 𑒢𑒯𑒱𑒨𑒹 𑒢𑒻𑒯𑒩𑒏 𑒏𑒼𑒢𑒼 𑒦𑒰𑒋-𑒥𑒢𑓂𑒡𑒳𑒏 𑒏𑒼𑒢𑒼 𑒑𑒥𑒰𑒯𑒲 𑒫𑒰 𑒏𑒱𑒕𑒳𑒍 𑒦𑒹𑒙𑒪। 𑒞𑒰𑒯𑒱𑒮𑒿 𑒄 𑒪𑒰𑒑𑒪 𑒖𑒹 𑒦𑒰𑒋 𑒮𑒦 𑒁𑒣𑒢-𑒁𑒣𑒢 𑒣𑒩𑒱𑒫𑒰𑒩𑒧𑒹 𑒫𑓂𑒨𑒮𑓂𑒞 𑒦𑓄 𑒖𑒰𑒃 𑒑𑒹𑒪 𑒯𑒼𑒋𑒞𑒰𑒯। 𑒞𑒐𑒢 𑒮𑒼𑒯𑒰𑒑𑒼𑒏 𑒄 𑒥𑒨𑒰𑒢 𑒖𑒹 𑒍 𑒢𑒻𑒯𑒩𑒏 𑒠𑒳𑒪𑒰𑒩𑒱 𑒕𑒪𑒲𑒯! 𑒧𑒰𑒋-𑒥𑒰𑒣𑒏 𑒂 𑒕𑒯 𑒦𑒰𑒿𑒋𑒏। 𑒧𑒰𑒋-𑒥𑒰𑒣 𑒞𑒿 𑒔𑒪𑒴 𑒥𑒴𑒜𑓃 𑒦𑓄 𑒧𑒩𑒱 𑒑𑒹𑒪 𑒯𑒼𑒋𑒞𑒰𑒯, 𑒧𑒳𑒠𑒰 𑒦𑒰𑒋 𑒮𑒦?
𑒏𑒭𑓂𑒙 𑒏𑒰𑒙𑒱 𑒁𑒤𑒹𑒪𑒏𑒹𑒿 𑒣𑒜𑓃𑒹𑒪𑒢𑓂𑒯𑒱-𑒪𑒱𑒐𑒹𑒪𑒢𑓂𑒯𑒱 𑒮𑒼𑒯𑒰𑒑𑒼। 𑒥𑒲𑒮 𑒥𑒩𑒐𑒏 𑒥𑒹𑒙𑒰 𑒦𑒹𑒪𑒢𑓂𑒯𑒱 𑒞𑒿 𑒍𑒯𑒼 𑒧𑒵𑒞𑓂𑒨𑒳𑒏𑒹𑒿 𑒣𑓂𑒩𑒰𑒣𑓂𑒞 𑒏𑒋𑒪𑒏। 𑒢𑒲𑒏 𑒮𑒩𑒏𑒰𑒩𑒲 𑒢𑒼𑒏𑒩𑒲 𑒦𑒹𑒙𑒪𑒹 𑒕𑒪𑒻𑒏। 𑒒𑒙𑒏 𑒮𑒦 𑒒𑒳𑒩𑒱𑒨𑒰𑒃𑒨𑒹 𑒩𑒯𑒪 𑒕𑒪𑒻𑒏। 𑒂𑒚 𑒥𑒩𑒐𑒏 𑒫𑒻𑒫𑒰𑒯𑒱𑒏 𑒖𑒲𑒫𑒢𑒏 𑒥𑒰𑒠 𑒥𑒲𑒮 𑒥𑒩𑓂𑒐𑒏 𑒫𑒻𑒡𑒫𑓂𑒨। 𑒂𑒥 𑒣𑒳𑒞𑒼𑒯𑒳 𑒁𑒥𑒱𑒞𑒻𑒏 𑒂 𑒢𑒻𑒞-𑒢𑒰𑒞𑒱𑒢 𑒮𑓀𑒑𑒹 𑒍 𑒐𑒹𑒪𑒰𑒃𑒞𑒋। 𑒧𑒳𑒠𑒰 𑒞𑒐𑒢𑒹 𑒄 𑒫𑒖𑓂𑒩𑒣𑒰𑒞। 𑒧𑒳𑒠𑒰 𑒯𑒧𑒩 𑒞𑒿 𑒞𑒯𑒱𑒨𑒰 𑒖𑒢𑓂𑒧𑒼 𑒢𑒻 𑒦𑒹𑒪 𑒕𑒪 𑒯𑒼𑒋𑒞। 𑒢𑒘𑒱, 𑒮𑒞𑓂𑒞𑒹। 𑒥𑒳𑒗𑒴 𑒖𑒰𑒯𑒱 𑒥𑒩𑒐 𑒋𑒯𑒱 𑒥𑒳𑒜𑓃𑒱𑒨𑒰𑒏 𑒥𑒹𑒙𑒰𑒏 𑒧𑒵𑒞𑓂𑒨𑒳 𑒦𑒹𑒪 𑒕𑒪𑒻, 𑒞𑒰𑒯𑒱 𑒥𑒩𑒐 𑒯𑒧𑒩 𑒖𑒢𑓂𑒧 𑒦𑒹𑒪 𑒩𑒯𑒋। 𑒂 𑒞𑒏𑒩𑒼 𑒥𑒰𑒃𑒮 𑒥𑒩𑒐 𑒥𑒲𑒞𑒱 𑒑𑒹𑒪। 𑒥𑒴𑒜𑓃𑒲 𑒂𑒥 𑒯𑒧𑒩𑒰 𑒮𑒧𑒏𑓂𑒭 𑒁𑒕𑒱। 𑒍𑒏𑒩 𑒥𑒹𑒙𑒰𑒏 𑒥𑒻𑒔𑒧𑒹𑒙 𑒯𑒧𑒩 𑒧𑓀𑒛𑒪 𑒮𑒩। 𑒂 𑒯𑒧 𑒍𑒯𑒲 𑒣𑒠𑒣𑒩 𑒕𑒲 𑒖𑒰𑒯𑒱 𑒣𑒠𑒣𑒩 𑒍𑒏𑒩 𑒥𑒹𑒙𑒰 𑒂𑒃𑒮𑒿 𑒥𑒰𑒃𑒮 𑒥𑒩𑓂𑒐 𑒣𑒯𑒱𑒢𑒹 𑒢𑒼𑒏𑒩𑒲 𑒬𑒳𑒩𑒴𑒯 𑒏𑒋𑒢𑒹 𑒩𑒯𑒋। 𑒕𑒯 𑒧𑒰𑒮 𑒧𑒰𑒞𑓂𑒩 𑒢𑒼𑒏𑒩𑒲 𑒏𑒋𑒢𑒹 𑒩𑒯𑒋 𑒂𑒏𑒱...। 𑒬𑒳𑒏𑓂𑒩 𑒠𑒱𑒢 𑒡𑒩𑒱 𑒮𑒧𑒨 𑒥𑒰𑒿𑒔𑒪 𑒁𑒕𑒱 𑒯𑒧𑒩𑒰 𑒪𑒑। 𑒏𑒲 𑒏𑒩𑒴? 𑒄 𑒥𑒳𑒜𑓃𑒱𑒨𑒰 𑒯𑒯𑒰𑒋𑒪-𑒤𑒳𑒤𑒳𑒂𑒋𑒪 𑒁𑒥𑒻𑒞 𑒁𑒕𑒱। 𑒮𑒩𑒏𑒰𑒩𑒲 𑒏𑒰𑒪𑒼𑒢𑒲𑒏 𑒑𑒹𑒙𑒣𑒩 𑒁𑒣𑒢 𑒥𑒹𑒙𑒰𑒏 𑒧𑒴𑒩𑓂𑒞𑒱 𑒪𑒑𑒹𑒥𑒰𑒏 𑒂𑒑𑓂𑒩𑒯 𑒪𑒼𑒏 𑒮𑒦𑒮𑒿 𑒏𑒩𑒻𑒋, 𑒏𑒻𑒏 𑒥𑒩𑒐𑒮𑒿। 𑒧𑒳𑒠𑒰 𑒋𑒏𑒩 𑒗𑒢𑒏𑒰𑒯𑒱 𑒥𑒪𑒰 𑒮𑓂𑒫𑒦𑒰𑒫𑒮𑒿, 𑒫𑓂𑒨𑒫𑒯𑒰𑒩𑒮𑒿 𑒪𑒼𑒏 𑒋𑒏𑒩𑒰𑒣𑒩 𑒞𑒧𑒮𑒰 𑒅𑒚𑒻𑒞 𑒁𑒕𑒱। 𑒋𑒏𑒩𑒰 𑒁𑒩𑓂𑒠𑓂𑒡-𑒥𑒞𑒰𑒯 𑒒𑒼𑒭𑒱𑒞 𑒏𑓄 𑒠𑒹𑒪 𑒑𑒹𑒪 𑒁𑒕𑒱। 𑒧𑒳𑒠𑒰 𑒋𑒯𑒱 𑒥𑒹𑒩 𑒞𑒿 𑒋𑒏𑒩 𑒏𑒰𑒖 𑒏𑒱𑒕𑒳 𑒠𑒼𑒮𑒩𑒹 𑒞𑒩𑒯𑒏 𑒕𑒻𑒏। 𑒁𑒯𑒲 𑒮𑒣𑓂𑒞𑒰𑒯 𑒏𑒱𑒕𑒳 𑒏𑒩𑒋 𑒣𑒛𑓃𑒞। 𑒠𑒹𑒐𑒻 𑒕𑒲।
𑓓
“𑒁𑒤𑒹𑒪𑒏𑒹𑒿 𑒧𑒩𑒥𑒰𑒏 𑒩𑒯𑒱𑒞𑒻 𑒞𑒿 𑒁𑒯𑒰𑒿𑒏 𑒩𑒱𑒫𑒰𑒪𑓂𑒫𑒩𑒮𑒿 𑒁𑒣𑒢 𑒧𑒰𑒟𑒣𑒩 𑒏𑒱𑒌 𑒧𑒰𑒩𑒱𑒞𑒋। 𑒍𑒏𑒩𑒰 𑒪𑒑 𑒞𑒿 𑒁𑒣𑒢 𑒮𑒩𑓂𑒫𑒱𑒮 𑒩𑒱𑒫𑒰𑒪𑓂𑒫𑒩 𑒩𑒯𑒋”।
“𑒬𑓂𑒩𑒲𑒧𑒰𑒢𑓂। 𑒯𑒧𑒩 𑒥𑒹𑒙𑒰𑒏 𑒯𑒞𑓂𑒨𑒰 𑒏𑒋𑒢𑒹 𑒁𑒕𑒱 𑒖𑒙𑒰𑒬𑓀𑒏𑒩। 𑒯𑒧𑒩 𑒖𑒲𑒫𑒢 𑒢𑒩𑓂𑒏 𑒥𑒢𑒰 𑒠𑒹𑒪𑒏। 𑒥𑒲𑒮 𑒮𑒰𑒪𑒏 𑒯𑒧𑒩 𑒞𑒣𑒮𑓂𑒨𑒰 𑒮𑒧𑒰𑒣𑓂𑒞 𑒏𑓄 𑒠𑒹𑒪𑒏। 𑒋𑒏𑒩𑒰 𑒮𑒖𑒰𑒋 𑒠𑒹𑒪 𑒖𑒰𑒋”।
“𑒧𑒳𑒠𑒰 𑒖𑒖 𑒮𑒰𑒯𑒹𑒥। 𑒖𑒙𑒰𑒬𑓀𑒏𑒩 𑒂 𑒁𑒤𑒹𑒪𑒏 𑒁𑒪𑒰𑒥𑒹 𑒍𑒯𑒱 𑒒𑒩𑒧𑒹 𑒏𑓂𑒨𑒼 𑒢𑒻 𑒕𑒪। 𑒯𑒧𑒩 𑒏𑒰𑒢𑒴𑒢 𑒏𑒯𑒻𑒋 𑒖𑒹 𑒠𑒮 𑒠𑒼𑒭𑒲 𑒥𑒯𑒩𑒰 𑒖𑒰𑒋 𑒧𑒳𑒠𑒰 𑒋𑒏𑒙𑒰 𑒢𑒱𑒩𑓂𑒠𑒼𑒭𑒏𑒹𑒿 𑒮𑒖𑒰 𑒢𑒻 𑒦𑒹𑒙𑒋। 𑒏𑒹 𑒑𑒥𑒰𑒯𑒲 𑒠𑒹𑒞 𑒖𑒐𑒢 𑒞𑒹𑒮𑒩 𑒏𑓂𑒨𑒼 𑒩𑒯𑒥𑒹 𑒢𑒻 𑒏𑒩𑒋”?
“𑒧𑒳𑒠𑒰 𑒖𑒖 𑒮𑒰𑒯𑒹𑒥 𑒁𑒣𑒢𑒹 𑒏𑒯𑒱 𑒩𑒯𑒪 𑒕𑒟𑒱 𑒖𑒹 𑒁𑒤𑒹𑒪 𑒠𑒼𑒮𑒩𑒰𑒏 𑒩𑒱𑒫𑒰𑒪𑓂𑒫𑒩𑒮𑒿 𑒁𑒣𑒢𑒰𑒣𑒩 𑒑𑒼𑒪𑒲 𑒏𑒱𑒋𑒏 𑒔𑒪𑒰𑒍𑒞। 𑒂 𑒁𑒣𑒢𑒰𑒣𑒩 𑒑𑒼𑒪𑒲 𑒔𑒪𑒹𑒥𑒰𑒏 𑒁𑒩𑓂𑒟 𑒦𑒹𑒪 𑒂𑒞𑓂𑒧𑒯𑒞𑓂𑒨𑒰। 𑒯𑒧𑒩 𑒥𑒹𑒙𑒰 𑒯𑒧𑒩𑒰 𑒁𑒮𑒑𑒩 𑒕𑒼𑒛𑓃𑒱 𑒂𑒞𑓂𑒧𑒯𑒞𑓂𑒨𑒰 𑒏𑓄 𑒪𑒹𑒞? 𑒏𑒱𑒋𑒏 𑒏𑒩𑒞 𑒍 𑒂𑒞𑓂𑒧𑒯𑒞𑓂𑒨𑒰”?
“𑒖𑒙𑒰𑒬𑓀𑒏𑒩𑒏𑒹𑒿 𑒯𑒱𑒩𑒰𑒮𑒞𑒧𑒹 𑒪𑒹𑒪 𑒖𑒰𑒋...𑒁𑒑𑒱𑒪𑒰 𑒮𑒳𑒢𑒫𑒰𑒄....”।
𑒤𑒰𑒃𑒪 𑒣𑒜𑓃𑒱𑒞𑒹 𑒩𑒯𑒲 𑒂𑒏𑒱 𑒥𑒴𑒜𑓃𑒲 𑒥𑒱𑒯𑒰𑒛𑓃𑒱 𑒖𑒹𑒏𑒰𑒿 𑒂𑒋𑒪𑒱।
“𑒁𑒯𑒰𑒿𑒏 𑒔𑒹𑒪𑒰𑒏 𑒞𑒿 𑒙𑓂𑒩𑒰𑓀𑒮𑒤𑒩 𑒦𑓄 𑒑𑒹𑒪 𑒧𑓀𑒛𑒪 𑒮𑒩! 𑒮𑒦 𑒋𑒏𑓂𑒏𑒹 𑒩𑓀𑒑𑒏 𑒕𑒲। 𑒯𑒧𑒩 𑒥𑒹𑒙𑒰𑒏 𑒧𑒴𑒩𑓂𑒞𑒱 𑒏𑒰𑒪𑒼𑒢𑒲𑒏 𑒑𑒹𑒙𑒣𑒩 𑒪𑒰𑒑𑒱 𑒖𑒰𑒃𑒞 𑒞𑒿 𑒏𑒼𑒢 𑒁𑒢𑒩𑓂𑒟 𑒦𑓄 𑒖𑒃𑒞𑒻𑒏। 𑒧𑒳𑒠𑒰 𑒮𑒦 𑒁𑒣𑒢-𑒁𑒣𑒢 𑒒𑒩 𑒣𑒩𑒱𑒫𑒰𑒩𑒧𑒹 𑒪𑒰𑒑𑒪 𑒁𑒕𑒱! 𑒖𑒹 𑒑𑒹𑒪 𑒮𑒹 𑒑𑒹𑒪। 𑒁𑒢𑒏𑒰 𑒏𑒲 𑒏𑒯𑒴, 𑒯𑒧𑒩 𑒦𑒰𑒃𑒨𑒹 𑒮𑒦𑒏𑒹𑒿 𑒠𑒹𑒐𑒴। 𑒏𑒯𑒻 𑒪𑒹𑒪 𑒞𑒿 𑒕𑒯 𑒙𑒰....”। 𑒯𑒢𑒯𑒢-𑒣𑒙𑒣𑒙 𑒏𑒩𑒻𑒞 𑒍 𑒥𑒯𑒰𑒩 𑒦𑓄 𑒑𑒹𑒪𑒱। 𑒧𑓀𑒛𑒪 𑒮𑒩 𑒍𑒏𑒩𑒰-“𑒮𑒳𑒢𑒴। 𑒯𑒱𑒢𑒏𑒩 𑒙𑓂𑒩𑒰𑓀𑒮𑒤𑒩 𑒦𑒹𑒪 𑒕𑒢𑓂𑒯𑒱 𑒧𑒳𑒠𑒰 𑒋𑒐𑒢 𑒬𑒳𑒏𑓂𑒩 𑒠𑒱𑒢 𑒡𑒩𑒱 𑒩𑒯𑒞𑒰𑒯”- 𑒄 𑒮𑒦 𑒏𑒯𑒱𑒨𑒹 𑒩𑒯𑒪 𑒕𑒪𑒰𑒯 𑒧𑒳𑒠𑒰 𑒍 𑒦𑒓𑓂𑒑𑒞𑒩𑒰𑒯𑒱 𑒢𑒻 𑒮𑒳𑒢𑒪𑒏। 𑒏𑒱𑒋𑒏 𑒮𑒳𑒢𑒞?
“𑒏𑒲 𑒦𑒹𑒪? 𑒖𑒰𑒋 𑒠𑒱𑒨𑒾𑒏। 𑒬𑒳𑒏𑓂𑒩 𑒠𑒱𑒢 𑒣𑒹𑒙𑒲𑒬𑒢 𑒤𑒰𑒃𑒪 𑒦𑓄 𑒖𑒋𑒞𑒻𑒏 𑒞𑒿 𑒍𑒏𑒩 𑒑𑒼𑒮𑓂𑒮𑒰 𑒁𑒣𑒢𑒹 𑒚𑓀𑒜𑓃𑒰 𑒦𑓄 𑒖𑒋𑒞𑒻𑒏”।
𑓔
“𑒏𑒯𑒴 𑒖𑒙𑒰𑒬𑓀𑒏𑒩। 𑒯𑒧𑒩𑒰 𑒞𑒿 𑒁𑒤𑒹𑒪𑒏 𑒂𑒞𑓂𑒧𑒯𑒞𑓂𑒨𑒰𑒏 𑒏𑒼𑒢𑒼 𑒏𑒰𑒩𑒝 𑒢𑒻 𑒥𑒳𑒗𑒢𑒰 𑒖𑒰𑒃𑒞 𑒁𑒕𑒱। 𑒄 𑒮𑒞𑓂𑒨 𑒖𑒹 𑒍𑒯𑒱 𑒧𑒵𑒞𑓂𑒨𑒳𑒏 𑒑𑒥𑒰𑒯 𑒢𑒻 𑒁𑒕𑒱। 𑒧𑒳𑒠𑒰 𑒍𑒯𑒱 𑒏𑒼𑒚𑒪𑒲𑒧𑒹 𑒧𑒰𑒞𑓂𑒩 𑒠𑒴 𑒑𑒼𑒙𑒹 𑒩𑒯𑒟𑒱। 𑒁𑒤𑒹𑒪 𑒂 𑒖𑒙𑒰𑒬𑓀𑒏𑒩। 𑒂 𑒁𑒯𑒰𑒿𑒏 𑒩𑒱𑒫𑒰𑒪𑓂𑒫𑒩𑒏 𑒑𑒼𑒪𑒲 𑒁𑒤𑒹𑒪𑒏 𑒧𑒰𑒟𑒧𑒹 𑒑𑒹𑒪𑒻𑒏।”
“𑒧𑒳𑒠𑒰 𑒖𑒖 𑒮𑒰𑒯𑒹𑒥। 𑒯𑒧𑒩𑒰 𑒏𑒱𑒕𑒳 𑒮𑒴𑒔𑒢𑒰 𑒦𑒹𑒙𑒪 𑒁𑒕𑒱 𑒖𑒰𑒯𑒱𑒮𑒿 𑒯𑒧𑒩 𑒠𑒱𑒧𑒰𑒑 𑒒𑒴𑒧𑒱 𑒑𑒹𑒪 𑒁𑒕𑒱। 𑒍𑒢𑒰 𑒯𑒧 𑒄 𑒮𑒴𑒔𑒢𑒰 𑒮𑒰𑒩𑓂𑒫𑒖𑒢𑒱𑒏 𑒏𑒩𑒥𑒰𑒏 𑒣𑒏𑓂𑒭𑒧𑒹 𑒢𑒻 𑒕𑒪𑒯𑒳𑒿 𑒏𑒰𑒩𑒝 𑒋𑒯𑒱𑒮𑒿 𑒋𑒏𑒙𑒰 𑒦𑒴𑒔𑒰𑒪 𑒂𑒍𑒞। 𑒧𑒳𑒠𑒰 𑒖𑒐𑒢 𑒯𑒧𑒩 𑒏𑓂𑒪𑒰𑒃𑒢𑓂𑒙𑒣𑒩 𑒤𑒰𑒿𑒮𑒲𑒏 𑒮𑒖𑒰𑒏 𑒐𑒞𑒩𑒰 𑒒𑒳𑒩𑒧𑒱 𑒩𑒯𑒪 𑒁𑒕𑒱, 𑒯𑒧𑒩𑒰 𑒪𑒑 𑒋𑒏𑒩𑒰 𑒮𑒰𑒩𑓂𑒫𑒖𑒢𑒱𑒏 𑒏𑒩𑒥𑒰𑒏 𑒁𑒞𑒱𑒩𑒱𑒏𑓂𑒞 𑒂𑒩 𑒏𑒼𑒢𑒼 𑒅𑒣𑒰𑒨 𑒢𑒻 𑒁𑒕𑒱।”
“𑒄 𑒏𑒰𑒩𑒲 𑒏𑒼𑒙 𑒣𑒯𑒲𑒩 𑒤𑒹𑒩 𑒏𑒼𑒢𑒼 𑒥𑒯𑒢𑓂𑒢𑒰 𑒁𑒢𑒢𑒹 𑒁𑒕𑒱। 𑒯𑒧 𑒑𑒩𑒲𑒥 𑒪𑒼𑒏 𑒕𑒲 𑒮𑒩𑒏𑒰𑒩। 𑒯𑒧𑒩𑒰 𑒏𑒼𑒩𑓂𑒙𑒏 𑒞𑒰𑒩𑒲𑒐𑒣𑒩 𑒂𑒥𑒋𑒧𑒹 𑒜𑒹𑒩 𑒐𑒩𑒔𑒰 𑒅𑒚𑒥𑒋 𑒣𑒛𑓃𑒻𑒞 𑒁𑒕𑒱। 𑒋𑒏𑒩𑒰 𑒮𑒖𑒰 𑒠𑒹𑒢𑒹𑒮𑒿 𑒯𑒧𑒩 𑒥𑒹𑒙𑒰 𑒒𑒳𑒩𑒱 𑒏𑓄 𑒞𑒿 𑒢𑒻 𑒂𑒍𑒞 𑒧𑒳𑒠𑒰 𑒄 𑒤𑒹𑒩 𑒋𑒯𑒢 𑒏𑒰𑒖 𑒢𑒻 𑒏𑒩𑒋 𑒮𑒹 𑒙𑒰 𑒯𑒧 𑒔𑒰𑒯𑒻 𑒕𑒲।”
“𑒧𑒳𑒠𑒰 𑒮𑒼𑒯𑒰𑒑𑒼 𑒠𑒹𑒫𑒲𑒖𑒲। 𑒄 𑒏𑒹𑒮 𑒏𑒞𑒹𑒏 𑒧𑒰𑒮𑒮𑒿 𑒔𑒪𑒱 𑒩𑒯𑒪 𑒁𑒕𑒱 𑒧𑒳𑒠𑒰 𑒢𑒯𑒱𑒨𑒹 𑒁𑒯𑒰𑒿𑒏 𑒣𑒩𑒱𑒫𑒰𑒩𑒏 𑒂 𑒢𑒯𑒱𑒨𑒹 𑒁𑒯𑒰𑒿𑒏 𑒮𑒰𑒮𑒳𑒩𑒏 𑒏𑓂𑒨𑒼 𑒑𑒼𑒙𑒹 𑒂𑒋𑒪”।
𑒂𑒑𑒰𑒿𑒏 𑒂𑒩𑒼𑒣 𑒣𑓂𑒩𑒞𑓂𑒨𑒰𑒩𑒼𑒣𑒧𑒹 𑒮𑒼𑒯𑒰𑒑𑒼𑒣𑒩 𑒔𑒩𑒱𑒞𑓂𑒩𑒯𑒲𑒢𑒞𑒰𑒏 𑒂𑒩𑒼𑒣 𑒪𑒑𑒰𑒍𑒪 𑒑𑒹𑒪 𑒩𑒯𑒻 𑒂 𑒮𑒱𑒠𑓂𑒡 𑒏𑒩𑒥𑒰𑒏 𑒣𑓂𑒩𑒨𑒰𑒮 𑒏𑒋𑒪 𑒑𑒹𑒪 𑒩𑒯𑒻 𑒖𑒹 𑒯𑒳𑒢𑒏𑒩 𑒣𑒳𑒞𑓂𑒩 𑒁𑒣𑒢 𑒧𑒰𑒋𑒏 𑒣𑓂𑒩𑒹𑒧𑒲 𑒮𑒦𑒮𑒿 𑒂𑒖𑒱𑒖 𑒂𑒥𑒱 𑒏𑓄 𑒂𑒞𑓂𑒧𑒯𑒞𑓂𑒨𑒰 𑒏𑒋𑒢𑒹 𑒕𑒪। 𑒖𑒙𑒰𑒬𑓀𑒏𑒩 𑒥𑒔𑒱 𑒑𑒹𑒪 𑒩𑒯𑒋। 𑒂𑒥 𑒞𑒿 𑒍 𑒩𑒱𑒙𑒰𑒨𑒩 𑒦𑓄 𑒮𑒩𑒏𑒰𑒩𑒲 𑒣𑒹𑓀𑒬𑒢 𑒅𑒚𑒰 𑒩𑒯𑒪 𑒁𑒕𑒱।
𑓕
𑒥𑒱𑒯𑒰𑒩𑒬𑒩𑒲𑒤 𑒒𑒳𑒩𑒱 𑒯𑒧 𑒥𑒴𑒜𑓃𑒲𑒏 𑒣𑒹𑒙𑒲𑒬𑒢 𑒠𑒰𑒐𑒱𑒪 𑒏𑓄 𑒠𑒻 𑒕𑒲। 𑒣𑒞𑒱𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒂𑒤𑒱𑒮 𑒥𑒪𑒰 𑒮𑒦 𑒮𑒩𑓂𑒙𑒱𑒤𑒱𑒏𑒹𑒙𑒏 𑒁𑒦𑒰𑒫𑒧𑒹 𑒍𑒏𑒩 𑒖𑒢𑓂𑒧 𑒞𑒱𑒟𑒱𑒣𑒰𑒿𑒔 𑒮𑒰𑒪 𑒒𑒙𑒰 𑒠𑒹𑒢𑒹 𑒩𑒯𑒻, 𑒏𑒼𑒢𑒼 𑒖𑒰𑒢𑒱 𑒥𑒴𑒗𑒱 𑒏𑓄 𑒮𑒹 𑒢𑒻। 𑒧𑒳𑒠𑒰 𑒥𑒳𑒜𑓃𑒱𑒨𑒰 𑒞𑒻 𑒖𑒧𑒰𑒢𑒰𑒧𑒹 𑒧𑒻𑒙𑓂𑒩𑒱𑒏 𑒕𑒪। 𑒧𑒻𑒙𑓂𑒩𑒱𑒏𑒏 𑒮𑒩𑓂𑒙𑒱𑒤𑒱𑒏𑒹𑒙𑒏 𑒖𑒢𑓂𑒧 𑒞𑒱𑒟𑒱𑒏 𑒯𑒱𑒮𑒰𑒥𑒮𑒿 𑒣𑒰𑒿𑒔 𑒮𑒰𑒪 𑒂𑒩 𑒢𑒼𑒏𑒩𑒲 𑒕𑒻। 𑒔𑒪𑒴, 𑒖𑒹 𑒦𑒹𑒪𑒻 𑒋𑒏𑒩𑒰 𑒮𑓀𑒑, 𑒠𑒹𑒐𑒲 𑒂𑒥। 𑒁𑒑𑒱𑒪𑒰 𑒮𑒰𑒪 𑒩𑒱𑒙𑒰𑒨𑒩𑒧𑒹𑒢𑓂𑒙 𑒕𑒻, 𑒖𑒹 𑒣𑒰𑒿𑒔 𑒮𑒰𑒪 𑒥𑒜𑓃𑒱 𑒖𑒋𑒞𑒻𑒏 𑒞𑒿 𑒂𑒩 𑒢𑒲𑒏। 𑒯𑒧𑒩 𑒙𑓂𑒩𑒰𑓀𑒮𑒤𑒩 𑒞𑒿 𑒦𑒃𑒨𑒹 𑒑𑒹𑒪 𑒩𑒯𑒋 𑒮𑒹 𑒯𑒧 𑒁𑒣𑒢 𑒗𑒼𑒩-𑒗𑒣𑒙𑒰 𑒂 𑒮𑒧𑒰𑒢 𑒔𑒲𑒖-𑒥𑒾𑒮𑓂𑒞𑒳 𑒪𑓄 𑒏𑓄 𑒁𑒣𑒢 𑒢𑒫 𑒑𑒢𑓂𑒞𑒫𑓂𑒨 𑒮𑓂𑒟𑒪𑒣𑒩 𑒥𑒱𑒠𑒰 𑒦𑓄 𑒖𑒰𑒃𑒞 𑒕𑒲। 𑒏𑒰𑒩𑓂𑒨𑒰𑒪𑒨𑒮𑒿 𑒖𑒰𑒃𑒞 𑒏𑒰𑒪 𑒥𑒳𑒜𑓃𑒱𑒨𑒰 𑒦𑒹𑒙𑒻𑒞 𑒁𑒕𑒱, 𑒏𑒪 𑒖𑒼𑒛𑓃𑒢𑒹 𑒚𑒰𑒜𑓃, 𑒖𑒹𑒢𑒰 𑒏𑒯𑒱 𑒩𑒯𑒪 𑒯𑒼𑒋- 𑒡𑒢𑓂𑒨𑒫𑒰𑒠। 𑒯𑒧 𑒍𑒯𑒱 𑒏𑒰𑒪𑓂𑒣𑒢𑒱𑒏 𑒡𑒢𑓂𑒨𑒫𑒰𑒠𑒏 𑒅𑒞𑓂𑒞𑒩 𑒠𑒻 𑒕𑒲- 𑒏𑒰𑒖 𑒦𑓄 𑒖𑒰𑒋 𑒞𑒐𑒢 𑒢𑒹।
𑓖
𑒏𑒋𑒏 𑒮𑒰𑒪 𑒥𑒲𑒞𑒱 𑒑𑒹𑒪। 𑒏𑒱𑒕𑒳 𑒫𑓂𑒨𑒮𑓂𑒞𑒞𑒰𑒏 𑒏𑒰𑒩𑒝𑒮𑒿 𑒂 𑒏𑒱𑒕𑒳 𑒣𑒹𑒙𑒲𑒬𑒢 𑒁𑒮𑓂𑒫𑒲𑒏𑒵𑒞 𑒦𑓄 𑒖𑒋𑒥𑒰𑒏 𑒮𑒧𑓂𑒦𑒰𑒫𑒱𑒞 𑒮𑒧𑓂𑒦𑒰𑒫𑒢𑒰𑒮𑒿 𑒣𑒩𑒱𑒝𑒰𑒧𑒏 𑒣𑓂𑒩𑒞𑒱 𑒅𑒞𑓂𑒮𑒳𑒏 𑒢𑒘𑒱 𑒩𑒯𑒻 𑒕𑒲। 𑒧𑒳𑒠𑒰 𑒧𑓀𑒛𑒪 𑒮𑒩 𑒋𑒏 𑒠𑒱𑒢 𑒦𑒹𑒙𑒱 𑒖𑒰𑒃 𑒕𑒟𑒱।
“𑒍𑒏𑒩 𑒣𑒹𑒙𑒲𑒬𑒢 𑒮𑓂𑒫𑒲𑒏𑒵𑒞 𑒏𑓄 𑒪𑒹𑒪𑒏𑒻 𑒫𑒱𑒦𑒰𑒑। 𑒩𑒱𑒙𑒰𑒨𑒩𑒧𑒹𑓀𑒙𑒏 𑒠𑒱𑒢𑒮𑒿 𑒣𑒯𑒱𑒢𑒯𑒱𑒨𑒹 𑒂𑒠𑒹𑒬 𑒂𑒥𑒱 𑒑𑒹𑒪 𑒩𑒯𑒻। 𑒂𑒥 𑒍 𑒣𑒰𑒿𑒔 𑒮𑒰𑒪 𑒂𑒩 𑒮𑓀𑒒𑒩𑓂𑒭 𑒏𑒩𑒞, 𑒮𑒩𑒏𑒰𑒩𑒲 𑒏𑒰𑒪𑒼𑒢𑒲𑒏 𑒑𑒹𑒙𑒣𑒩 𑒁𑒣𑒢 𑒥𑒹𑒙𑒰𑒏 𑒧𑒴𑒩𑓂𑒞𑒱 𑒪𑒑𑒹𑒥𑒰𑒏 𑒪𑒹𑒪 𑒫𑒰 ….𑒫𑒰 𑒂𑒢 𑒏𑒼𑒢𑒼 𑒮𑓀𑒒𑒩𑓂𑒭”।
𑒂𑒯! 𑒋𑒯𑒱 𑒥𑒳𑒜𑓃𑒱𑒨𑒰𑒏 𑒖𑒲𑒞𑒏 𑒥𑒰𑒠 𑒯𑒧𑒩 𑒁𑒣𑒢 𑒯𑒰𑒩𑒱 𑒮𑒦𑒏 𑒢𑒧𑒑𑒩 𑒤𑒹𑒯𑒩𑒱𑒮𑓂𑒙𑒏 𑒂𑒥 𑒏𑒼𑒢𑒼 𑒪𑒹𑒐𑒰 𑒢𑒻। 𑒂𑒥 𑒯𑒧𑒩𑒼 𑒃𑒔𑓂𑒕𑒰 𑒦𑓄 𑒑𑒹𑒪 𑒁𑒕𑒱, 𑒃𑒔𑓂𑒕𑒰 𑒖𑒱𑒞𑒥𑒰𑒏। 𑒮𑒼𑒗𑒰𑒿-𑒮𑒼𑒗𑒲 𑒫𑒱𑒖𑒨𑒏 𑒃𑒔𑓂𑒕𑒰, 𑒋𑒯𑒱 𑒥𑒳𑒜𑓃𑒱𑒨𑒰𑒏 𑒧𑒰𑒡𑓂𑒨𑒧𑒮𑒿 𑒦𑒹𑒪 𑒁𑒣𑓂𑒩𑒞𑓂𑒨𑒏𑓂𑒭 𑒫𑒱𑒖𑒨𑒏 𑒥𑒰𑒠।






𑒮𑒱𑒠𑓂𑒡 𑒧𑒯𑒰𑒫𑒲𑒩
𑓑
𑒥𑒰𑒢𑓂𑒯𑒏 𑒏𑒰𑒞𑒧𑒹 𑒁𑒢𑒧𑒢𑒰 𑒠𑒲𑒠𑒲𑒏 𑒒𑒩।
𑒒𑒩 𑒢𑒻 𑒗𑒼𑒣𑒛𑓃𑒲 𑒏𑒯𑒴। 𑒑𑒰𑒧𑒏 𑒧𑒼𑒙𑒰𑒧𑒼𑒙𑒲 𑒮𑒦 𑒁𑒿𑒑𑒢𑒰𑒧𑒹 𑒋𑒏𑒙𑒰 𑒫𑒱𑒡𑒫𑒰𑒏 𑒒𑒩 𑒩𑒯𑒻𑒞 𑒕𑒻। 𑒧𑒳𑒠𑒰 𑒖𑒐𑒢𑒹 𑒣𑒩𑒱𑒫𑒰𑒩 𑒣𑒻𑒒 𑒯𑒼𑒃𑒞 𑒁𑒕𑒱 𑒞𑒿 𑒏𑓂𑒨𑒼 𑒁𑒣𑒢 𑒒𑒩𑒏 𑒧𑒳𑒿𑒯 𑒒𑒳𑒧𑒰 𑒪𑒻𑒞 𑒁𑒕𑒱 𑒞𑒿 𑒏𑓂𑒨𑒼 𑒥𑒹𑒜𑓃 𑒥𑒢𑒰 𑒠𑒻𑒞 𑒁𑒕𑒱। 𑒂 𑒏𑒐𑒢𑒼 𑒏𑒰𑒪 𑒍𑒯𑒱 𑒩𑒰𑒿𑒛𑓃-𑒧𑒮𑒼𑒧𑒰𑒞𑒏 𑒒𑒩𑒏 𑒮𑓂𑒟𑒰𑒢 𑒣𑒩𑒱𑒫𑒩𑓂𑒞𑒢 𑒦𑓄 𑒖𑒰𑒃𑒞 𑒁𑒕𑒱, 𑒂 𑒮𑒹 𑒞𑒹𑒯𑒢𑒹 𑒮𑒢 𑒮𑓂𑒟𑒱𑒞𑒱 𑒕𑒪 𑒁𑒢𑒧𑒢𑒰 𑒠𑒲𑒠𑒲𑒏 𑒒𑒩𑒏।
𑒧𑒳𑒠𑒰 𑒁𑒢𑒧𑒢𑒰 𑒠𑒲𑒠𑒲𑒏 𑒒𑒩 𑒥𑒰𑒢𑓂𑒯𑒏 𑒏𑒰𑒞𑒧𑒹 𑒕𑒢𑓂𑒯𑒱। 𑒮𑒼𑒗𑒰𑒿𑒏 𑒧𑒖𑒏𑒼𑒚𑒱𑒨𑒰 𑒙𑒼𑒪𑒏 𑒕𑒟𑒱 𑒧𑒳𑒠𑒰 𑒒𑒳𑒮𑒏𑒱 𑒏𑓄 𑒯𑒧𑒩 𑒒𑒩 𑒪𑒑 𑒂𑒥𑒱 𑒑𑒹𑒪 𑒕𑒟𑒱।𑒮𑒧𑒓𑒑𑒩 𑒪𑒼𑒏 𑒮𑒦। 𑒂𑒮-𑒣𑒛𑓃𑒼𑒮𑒏 𑒡𑒲-𑒥𑒹𑒙𑒲 𑒠𑒱𑒢𑒧𑒹, 𑒠𑒳𑒣𑒯𑒩𑒱𑒨𑒰𑒧𑒹 𑒖𑒰𑒃𑒞 𑒕𑒟𑒱। 𑒜𑒲𑒪-𑒪𑒲𑒐 𑒥𑒱𑒕𑒥𑒰𑒏 𑒪𑒹𑒪। 𑒏𑒏𑒩 𑒍 𑒪𑒑𑒏 𑒕𑒟𑒱, 𑒮𑒹 𑒧𑒩𑒪𑒰𑒏 𑒥𑒰𑒠 𑒣𑒞𑒰 𑒔𑒪𑒞। 𑒬𑓂𑒩𑒰𑒠𑓂𑒡𑒏 𑒮𑒧𑒋 𑒖𑒹 𑒪𑒑𑒏 𑒁𑒕𑒱 𑒮𑒹 𑒂𑒑𑒱 𑒠𑒹𑒞 𑒂 𑒞𑒏𑒩𑒰 𑒒𑒩𑒰𑒩𑒲 𑒦𑒹𑒙𑒞𑒻𑒏। 𑒧𑒳𑒠𑒰 𑒮𑒹𑒯𑒼 𑒮𑒧𑓂𑒦𑒰𑒫𑒢𑒰 𑒂𑒥 𑒢𑒻। 𑒗𑓀𑒗𑒰𑒩𑒣𑒳𑒩𑒧𑒹 𑒮𑒰𑒮𑒳𑒩 𑒕𑒪𑒢𑓂𑒯𑒱 𑒁𑒢𑒧𑒢𑒰 𑒠𑒲𑒠𑒲𑒏। 𑒍𑒞𑒋 𑒁𑒣𑒢 𑒥𑒯𑒱𑒢𑒱𑒏 𑒥𑒹𑒙𑒰𑒏𑒹𑒿 𑒁𑒣𑒢 𑒥𑒹𑒙𑒰 𑒥𑒢𑒰 𑒩𑒰𑒐𑒱 𑒪𑒹𑒢𑒹 𑒕𑒟𑒱। 𑒧𑒳𑒠𑒰 𑒢𑒻𑒯𑒩𑒏 𑒧𑒼𑒯 𑒢𑒻 𑒕𑒴𑒙𑒪 𑒕𑒢𑓂𑒯𑒱।
𑒐𑒼𑒣𑒛𑓃𑒲𑒧𑒹 𑒁𑒥𑒻𑒞 𑒕𑒟𑒱। 𑒧𑒰𑒮𑒧𑒹 𑒋𑒏 𑒥𑒹𑒩 𑒞𑒿 𑒁𑒫𑒬𑓂𑒨𑒹। 𑒁𑒣𑒢𑒹𑒮𑒿 𑒐𑒹𑒢𑒰𑒃-𑒣𑒱𑒢𑒰𑒃, 𑒦𑒰𑒢𑒮-𑒦𑒰𑒞। 𑒧𑒳𑒠𑒰 𑒗𑓀𑒗𑒰𑒩𑒣𑒳𑒩𑒧𑒹 𑒥𑒹𑒮 𑒣𑒻𑒒 𑒒𑒩, 𑒂𑒿𑒑𑒢। 𑒥𑒹𑒙𑒰-𑒣𑒳𑒞𑒼𑒯𑒳𑒏𑒹𑒿 𑒏𑒯𑒱𑒨𑒼 𑒧𑒳𑒠𑒰 𑒋𑒞𑒋 𑒢𑒻 𑒂𑒢𑒪𑒢𑓂𑒯𑒱।
𑒮𑒾𑒿𑒮𑒹 𑒑𑒰𑒧 𑒫𑒱𑒡𑒫𑒰𑒏𑒹𑒿 𑒠𑒲𑒠𑒲 𑒏𑒯𑒻𑒞 𑒁𑒕𑒱 𑒖𑒹 𑒍 𑒢𑒻𑒯𑒩𑒧𑒹 𑒩𑒯𑒻𑒞 𑒕𑒟𑒱। 𑒂 𑒤𑒪𑒢𑒰 𑒑𑒰𑒧 𑒥𑒰𑒪𑒲 𑒏𑒰𑒏𑒲 𑒖𑒹 𑒍 𑒮𑒰𑒮𑒳𑒩𑒧𑒹 𑒩𑒯𑒻𑒞 𑒕𑒟𑒱।
𑒮𑒹 𑒮𑒾𑒿𑒮𑒹 𑒑𑒰𑒧 𑒯𑒳𑒢𑒏𑒰 𑒁𑒢𑒧𑒢𑒰 𑒠𑒲𑒠𑒲 𑒏𑒯𑒻𑒞 𑒕𑒪𑒢𑓂𑒯𑒱।
𑒐𑒼𑒣𑒛𑓃𑒲𑒏 𑒏𑒰𑒞𑒧𑒹 𑒋𑒏𑒙𑒰 𑒦𑒑𑒫𑒰𑒢𑒏 𑒧𑒢𑓂𑒠𑒱𑒩 𑒥𑒢𑒹𑒢𑒹 𑒕𑒟𑒱। 𑒧𑒯𑒰𑒫𑒲𑒩 𑒥𑒖𑒩𑓀𑒑𑒥𑒪𑒲𑒏। 𑒬𑒳𑒩𑒳𑒯𑒹𑒮𑒿 𑒄 𑒏𑒼𑒚𑒰𑒏 𑒩𑒯𑒻 𑒮𑒹 𑒢𑒻, 𑒧𑒳𑒠𑒰 𑒥𑒢𑒰 𑒠𑒹𑒪𑒢𑓂𑒯𑒱 𑒍𑒏𑒩𑒰 𑒏𑒼𑒚𑒰𑒏। 𑒁𑒢𑓂𑒢-𑒣𑒰𑒢𑒱 𑒥𑒹𑒔𑒱 𑒏𑓄। 𑒣𑒯𑒱𑒢𑒹 𑒞𑒿 𑒐𑒼𑒣𑒛𑓃𑒱𑒨𑒹 𑒩𑒯𑒻। 𑒖𑒯𑒱𑒨𑒰 𑒁𑒢𑒧𑒢𑒰 𑒠𑒲𑒠𑒲 𑒗𑓀𑒗𑒰𑒩𑒣𑒳𑒩 𑒖𑒰𑒃𑒞 𑒩𑒯𑒟𑒱, 𑒁𑒣𑒢 𑒐𑒼𑒣𑒛𑓃𑒲𑒏 𑒤𑒛𑓃𑒏𑒲 𑒦𑒱𑒩𑒏𑒰 𑒏𑓄 𑒖𑒰𑒃𑒞 𑒩𑒯𑒟𑒱। 𑒥𑒰𑒠𑒧𑒹 𑒞𑒰𑒪𑒰 𑒂 𑒮𑒱𑒏𑓂𑒏𑒛𑓃𑒱𑒮𑒿 𑒥𑒢𑓂𑒢 𑒮𑒹𑒯𑒼 𑒏𑒩𑒋 𑒪𑒰𑒑𑒪 𑒩𑒯𑒟𑒱। 𑒧𑒳𑒠𑒰 𑒥𑒖𑒩𑓀𑒑𑒥𑒪𑒲𑒏 𑒧𑒢𑓂𑒠𑒱𑒩 𑒍𑒯𑒱𑒢𑒰 𑒐𑒳𑒖𑒪 𑒩𑒯𑒻𑒞 𑒕𑒪। 𑒪𑒼𑒏 𑒮𑒦𑒏 𑒪𑒹𑒪..𑒔𑒾𑒣𑒯𑒩। 𑒡𑒲-𑒥𑒹𑒙𑒲 𑒑𑒰𑒧𑒏, 𑒮𑒰𑒤-𑒮𑒤𑒰𑒄, 𑒗𑒰𑒛𑓃𑒴-𑒥𑒯𑒰𑒩𑒴 𑒏𑒩𑒻𑒞 𑒩𑒯𑒟𑒱। 𑒣𑒏𑓂𑒏𑒰𑒏 𑒧𑒳𑒠𑒰 𑒥𑒰𑒠𑒧𑒹 𑒦𑒹𑒪, 𑒕𑒰𑒞 𑒜𑒪𑒰𑒃 𑒂𑒩 𑒥𑒰𑒠𑒧𑒹। 𑒣𑒱𑒙𑒳𑒂 𑒩𑒯𑒋 𑒣𑒯𑒱𑒢𑒹। 𑒖𑒧𑒲𑒢𑒏 𑒣𑓂𑒪𑒰𑒮𑓂𑒙𑒩 𑒏𑒩𑒥𑒋 𑒔𑒰𑒯𑒻𑒞 𑒩𑒯𑒟𑒱, 𑒧𑒳𑒠𑒰 𑒋𑒮𑓂𑒙𑒲𑒧𑒹𑒙 𑒥𑒹𑒬𑒲 𑒦𑓄 𑒑𑒹𑒪𑒢𑓂𑒯𑒱। 𑒦𑒑𑒫𑒰𑒢𑒏 𑒒𑒩 𑒔𑒳𑒥𑒻𑒞 𑒩𑒯𑒞? 𑒧𑒳𑒠𑒰 𑒜𑒪𑒰𑒄 𑒂 𑒣𑓂𑒪𑒰𑒮𑓂𑒙𑒩 𑒪𑒹𑒪 𑒣𑒰𑒃 𑒏𑒞𑒋𑒮𑒿 𑒂𑒍𑒞?
𑒂𑒃 𑒯𑒧𑒩𑒰 𑒪𑒑𑒻𑒋 𑒖𑒹 𑒯𑒧 𑒮𑒦 𑒐𑒴𑒥 𑒧𑒹𑒯𑒢𑒞𑒱 𑒏𑒩𑒻𑒞 𑒕𑒲। 𑒏𑒏𑒩𑒼𑒮𑒿 𑒮𑒩𑒼𑒏𑒰𑒩 𑒢𑒻 𑒁𑒕𑒱। 𑒍𑒯, 𑒮𑒧𑒻𑒋 𑒢𑒻 𑒦𑒹𑒙𑒻𑒞 𑒁𑒕𑒱। 𑒧𑒳𑒠𑒰 𑒁𑒢𑒧𑒰𑒢𑒰 𑒠𑒲𑒠𑒲𑒏 𑒠𑒱𑒢𑒔𑒩𑓂𑒨𑒰, 𑒦𑒼𑒩𑒮𑒿 𑒮𑒰𑒿𑒗 𑒦𑒑𑒫𑒰𑒢 𑒪𑒹𑒪 𑒮𑒧𑒩𑓂𑒣𑒱𑒞। 𑒧𑒳𑒠𑒰 𑒣𑒼𑒮𑒣𑒳𑒞𑓂𑒩 𑒪𑒹𑒪 𑒮𑒹𑒯𑒼 𑒮𑒧𑒋 𑒢𑒱𑒏𑒰𑒪𑒻𑒞 𑒕𑒟𑒱। 𑒥𑒲𑒔-𑒥𑒲𑒔𑒧𑒹 𑒗𑓀𑒗𑒰𑒩𑒣𑒳𑒩 𑒥𑒖𑒰𑒩 𑒪𑒑 𑒮𑓂𑒟𑒱𑒞 𑒁𑒣𑒢 𑒑𑒰𑒧 𑒖𑒰𑒃𑒞 𑒕𑒟𑒱। 𑒍𑒞𑒳𑒏𑓂𑒏𑒼 𑒥𑓂𑒨𑒼𑒿𑒞 𑒪𑒑𑒥𑒻𑒞 𑒕𑒟𑒱। 𑒤𑒹𑒩 𑒑𑒰𑒧 𑒁𑒥𑒻𑒞 𑒕𑒟𑒱..𑒢𑒻𑒯𑒩। 𑒠𑒹𑒐𑒴..𑒑𑒲𑒞𑒰 𑒣𑒜𑓃𑒱 𑒮𑓂𑒟𑒱𑒞𑒣𑓂𑒩𑒖𑓂𑒘 𑒥𑒢𑒥𑒰𑒏 𑒁𑒯𑒰𑒿𑒏 𑒣𑓂𑒩𑒨𑒰𑒮। 𑒧𑒳𑒠𑒰 𑒁𑒢𑒧𑒢𑒰 𑒠𑒲𑒠𑒲। 𑒑𑒼𑒩 𑒪𑒑𑒻 𑒕𑒲 𑒠𑒲𑒠𑒲। 𑒢𑒱𑒏𑒹𑒢𑒰 𑒩𑒯𑒴। 𑒢𑒯𑒱𑒨𑒹 𑒐𑒳𑒬𑒲, 𑒢𑒯𑒱𑒨𑒹 𑒏𑒼𑒢𑒼 𑒠𑒳𑒐𑒹। 𑒢𑒹 𑒏𑒼𑒢𑒼 𑒂𑒫𑒦𑒑𑒞𑒏 𑒪𑒰𑒪𑒮𑒰 𑒂 𑒢𑒹 𑒏𑒼𑒢𑒼 𑒞𑒩𑒯𑒏 𑒮𑒯𑒨𑒼𑒑 𑒣𑓂𑒩𑒰𑒣𑓂𑒞𑒱𑒏 𑒂𑒏𑒰𑓀𑒏𑓂𑒭𑒰।
𑒖𑒼𑒢 𑒞𑒰𑒏𑒻 𑒪𑒹𑒪 𑒖𑒰𑒃𑒞 𑒕𑒟𑒱 𑒡𑒢𑒳𑒏𑒙𑒼𑒪𑒲, 𑒠𑒳𑒮𑒡𑒙𑒼𑒪𑒲। 𑒍𑒞𑒳𑒏𑓂𑒏𑒰 𑒪𑒼𑒏 𑒃𑒖𑓂𑒖𑒞𑒱𑒨𑒼 𑒠𑒻 𑒕𑒢𑓂𑒯𑒱, 𑒏𑒼𑒢 𑒯𑒳𑒢𑒏𑒩 𑒒𑒩𑒰𑒩𑒲 𑒪𑒹𑒥𑒰𑒏 𑒕𑒢𑓂𑒯𑒱 𑒯𑒱𑒢𑒏𑒰 𑒮𑒦𑒏𑒹𑒿। 𑒍𑒞𑒋 𑒯𑒿𑒮𑒱𑒞𑒼 𑒠𑒹𑒐𑒻 𑒕𑒱𑒨𑒢𑓂𑒯𑒱। 𑒁𑒣𑒢 𑒙𑒼𑒪𑒏 𑒪𑒼𑒏𑒮𑒿 𑒯𑒙𑓂𑒚𑒹 𑒏𑒼𑒢𑒼 𑒏𑒰𑒖 𑒪𑒹𑒪 𑒏𑒯𑒱𑒞𑒼 𑒢𑒻 𑒕𑒟𑒱। 𑒋𑒏𑒙𑒰 𑒏𑒰𑒖 𑒏𑒩𑒞 𑒂 𑒏𑒢𑒱𑒨𑒰𑒿𑒏𑒹𑒿 𑒖𑒰 𑒏𑓄 𑒏𑒯𑒞। 𑒂 𑒤𑒹𑒩 𑒠𑒮 𑒮𑒰𑒪 𑒡𑒩𑒱 𑒍𑒏𑒩 𑒏𑒢𑒱𑒨𑒰𑒿 𑒮𑒳𑒢𑒥𑒻𑒞 𑒩𑒯𑒞।
-𑒠𑒲𑒠𑒲, 𑒯𑒢𑒳𑒧𑒰𑒢 𑒖𑒲𑒏 𑒏𑒰𑒖 𑒕𑒻, 𑒮𑒛𑓃𑒏𑒏 𑒏𑒰𑒞𑒧𑒹 𑒕𑒟𑒱। 𑒯𑒧𑒯𑒴𑒿 𑒮𑒦 𑒞𑒿 𑒖𑒰𑒃𑒞-𑒁𑒥𑒻𑒞 𑒧𑒰𑒟 𑒗𑒳𑒏𑒰 𑒏𑓄 𑒣𑒳𑒖𑒥𑒹 𑒏𑒩𑒥𑒢𑓂𑒯𑒱। 𑒮𑒹 𑒥𑒱𑒢𑒳 𑒥𑒼𑒢𑒱 𑒪𑒹𑒢𑒹 𑒯𑒧 𑒄 𑒏𑒰𑒖 𑒏𑒩𑒥।
- 𑒢𑒻 𑒨𑒾 𑒞𑒲𑒩𑓂𑒟-𑒥𑒩𑓂𑒞 𑒂 𑒦𑒑𑒫𑒰𑒢𑒏 𑒏𑒰𑒖 𑒧𑒿𑒑𑒢𑒲𑒧𑒹 𑒢𑒻 𑒏𑒩𑒥𑒰𑒏-𑒏𑒩𑒹𑒥𑒰𑒏 𑒔𑒰𑒯𑒲। 𑒯𑒧 𑒏𑒼𑒢𑒼 𑒩𑒰𑒢𑒲-𑒧𑒯𑒩𑒰𑒢𑒲 𑒕𑒲 𑒖𑒹 𑒥𑒹𑒑𑒰𑒩𑒲 𑒐𑒙𑒰 𑒏𑓄 𑒧𑒢𑓂𑒠𑒱𑒩 𑒥𑒢𑒥𑒰𑒋𑒥 𑒂 𑒣𑒼𑒐𑒩𑒱 𑒐𑒳𑒢𑒰𑒋𑒥।
𑒧𑒳𑒠𑒰 𑒜𑒪𑒻𑒨𑓂𑒨𑒰 𑒂 𑒣𑓂𑒪𑒰𑒮𑓂𑒙𑒩!

𑓒

𑒮𑒛𑓃𑒏𑒏 𑒏𑒰𑒞𑒏 𑒦𑒑𑒫𑒰𑒢𑒏 𑒋𑒯𑒱 𑒧𑒢𑓂𑒠𑒱𑒩𑒏 𑒮𑒙𑒪 𑒋𑒏 𑒥𑒲𑒒𑒰 𑒐𑒹𑒞, 𑒮𑒦𑒙𑒰 𑒁𑒢𑒧𑒢𑒰 𑒠𑒲𑒠𑒲𑒏। 𑒜𑒪𑒻𑒨𑓂𑒨𑒰 𑒦𑓄 𑒑𑒹𑒪𑒰𑒏 𑒥𑒰𑒠 𑒦𑒑𑒫𑒰𑒢𑒏 𑒢𑒰𑒧𑒮𑒿 𑒪𑒱𑒐𑒱 𑒠𑒹𑒞𑒲𑒯। 𑒖𑒹 𑒁𑒢𑓂𑒢-𑒣𑒰𑒢𑒱 𑒯𑒼𑒋𑒞𑒻𑒏 𑒍𑒯𑒱𑒮𑒿 𑒦𑒑𑒫𑒰𑒢𑒏 𑒒𑒩𑒏 𑒔𑒴𑒢-𑒣𑒼𑒔𑒰𑒩𑒰 𑒂 𑒮𑒤𑒰𑒄 𑒯𑒼𑒃𑒞 𑒩𑒯𑒞।
𑒏𑒞𑒹𑒏 𑒠𑒱𑒢𑒮𑒿 𑒣𑒛𑓃𑒼𑒮𑒲 𑒣𑒕𑒼𑒛𑓃 𑒡𑒹𑒢𑒹 𑒕𑒢𑓂𑒯𑒱।
“𑒠𑒲𑒠𑒲। 𑒞𑒼𑒯𑒩 𑒮𑒦𑒮𑒿 𑒪𑒑𑒏 𑒦𑒰𑒞𑒱𑒖 𑒯𑒧𑒯𑒲𑓀 𑒕𑒱𑒨𑒾। 𑒄 𑒖𑒧𑒲𑒢 𑒯𑒧𑒩 𑒒𑒩𑒮𑒿 𑒮𑒙𑒪 𑒁𑒕𑒱। 𑒣𑒯𑒱𑒪𑒳𑒏𑒰 𑒪𑒼𑒏 𑒥𑒰𑒢𑓂𑒯-𑒮𑒛𑓃𑒏𑒏 𑒏𑒰𑒞𑒧𑒹 𑒕𑒼𑒙 𑒖𑒰𑒞𑒱 𑒂 𑒧𑒮𑒼𑒧𑒰𑒞𑒏𑒹𑒿 𑒒𑒩 𑒥𑒢𑒰 𑒠𑒻𑒞 𑒩𑒯𑒻। 𑒧𑒳𑒠𑒰 𑒂𑒥 𑒖𑒧𑒰𑒢𑒰 𑒥𑒠𑒪𑒱 𑒑𑒹𑒪 𑒕𑒻।𑒂𑒥 𑒞𑒿 𑒮𑒛𑓃𑒏𑒏 𑒏𑒰𑒞𑒏 𑒒𑒩 𑒂 𑒖𑒧𑒲𑒢𑒏 𑒧𑒼𑒪 𑒥𑒜𑓃𑒱 𑒑𑒹𑒪 𑒕𑒻। 𑒞𑒴𑒿 𑒂𑒃 𑒢𑒹 𑒏𑒰𑒪𑓂𑒯𑒱 𑒧𑒩𑒱 𑒖𑒋𑒧𑒹। 𑒞𑒐𑒢 𑒄 𑒖𑒧𑒲𑒢 𑒯𑒧𑒩𑒰 𑒮𑒦 𑒣𑒙𑒲𑒠𑒰𑒩 𑒪𑒹𑒪 𑒗𑒑𑒛𑓃𑒰𑒏 𑒏𑒰𑒩𑒝 𑒥𑒢𑒞। ”
𑒞𑒴𑒿 𑒂𑒃 𑒢𑒹 𑒏𑒰𑒪𑓂𑒯𑒱 𑒧𑒩𑒱 𑒖𑒋𑒧𑒹- 𑒏𑒯𑒱 𑒏𑓄 𑒠𑒹𑒐𑒱𑒨𑒾𑒏 𑒏𑒼𑒢𑒼 𑒮𑒡𑒫𑒰𑒏𑒹𑒿। 𑒧𑒳𑒠𑒰 𑒧𑒮𑒼𑒧𑒰𑒞𑒮𑒿 𑒏𑒯𑒱 𑒮𑒏𑒻 𑒕𑒱𑒌- 𑒦𑒢𑒹 𑒍𑒏𑒩 𑒣𑒼𑒮𑒣𑒳𑒞𑓂𑒩- 𑒣𑒳𑒞𑒼𑒯𑒳- 𑒢𑒻𑒞-𑒢𑒰𑒞𑒱𑒢 𑒯𑒼𑒃। 𑒚𑒲𑒏 𑒕𑒻 𑒥𑒰𑒥𑒴।
“𑒦𑒑𑒫𑒰𑒢𑒏 𑒪𑒹𑒪 𑒢𑒱𑒯𑒳𑒕𑒪 𑒁𑒕𑒱 𑒄 𑒖𑒧𑒲𑒢। 𑒁𑒯𑒲𑒮𑒿 𑒞𑒿 𑒯𑒧𑒩 𑒑𑒳𑒖𑒩 𑒔𑒪𑒻𑒋। 𑒖𑒹 𑒏𑒱𑒕𑒳 𑒣𑒹𑒙 𑒏𑒰𑒙𑒱 𑒏𑓄 𑒥𑒔𑒥𑒻𑒞 𑒕𑒲 𑒮𑒹 𑒏𑒼𑒬𑒱𑒪𑓂𑒨𑒰- 𑒦𑒑𑒫𑒰𑒢𑒏 𑒒𑒩𑒏 𑒜𑒪𑒻𑒨𑒰 𑒂 𑒣𑓂𑒪𑒰𑒮𑓂𑒙𑒩 𑒪𑒹𑒪। 𑒗𑓀𑒗𑒰𑒩𑒣𑒳𑒩𑒏 𑒖𑒧𑒲𑒢-𑒖𑒰𑒪𑒏 𑒣𑒰𑒃 𑒮𑒦 𑒥𑒹𑒙𑒰 𑒣𑒳𑒞𑒼𑒯𑒳𑒏 𑒕𑒢𑓂𑒯𑒱। 𑒮𑒹 𑒯𑒧 𑒏𑒼𑒢𑒰.. ”
“𑒤𑒹𑒩 𑒠𑒲𑒠𑒲। 𑒞𑒴𑒿 𑒑𑒣 𑒥𑒳𑒗𑒥𑒹 𑒢𑒻 𑒏𑒋𑒪𑒹𑒿। 𑒖𑒰 𑒖𑒱𑒥𑒻 𑒕𑒹𑒿 𑒩𑒰𑒐 𑒢𑒹। 𑒏𑒩 𑒢𑒹 𑒑𑒳𑒖𑒩। 𑒯𑒧 𑒞𑒿 𑒏𑒯𑒻 𑒕𑒱𑒨𑒾 𑒖𑒹 𑒞𑒼𑒩𑒰 𑒧𑒩𑒪𑒰𑒏 𑒥𑒰𑒠 𑒖𑒹 𑒣𑒙𑒲𑒠𑒰𑒩 𑒮𑒦 𑒂𑒣𑒮𑒧𑒹 𑒪𑒛𑓃𑒞 𑒮𑒹 𑒞𑒼𑒩𑒰 𑒢𑒲𑒏 𑒪𑒑𑒞𑒾। 𑒂 𑒯𑒧 𑒞𑒼𑒯𑒩 𑒮𑒦𑒮𑒿 𑒂𑒣𑓂𑒞 𑒦𑒰𑒞𑒱𑒖...।”
𑒠𑒹𑒐𑒱𑒨𑒾, 𑒏𑒯𑒻 𑒕𑒻 𑒖𑒹। 𑒦𑒰𑒞𑒱𑒖 𑒥𑒰𑒯𑒩𑒧𑒹 𑒢𑒼𑒏𑒩𑒲 𑒏𑒩𑒻 𑒕𑒟𑒱। 𑒖𑒹 𑒑𑒰𑒧𑒧𑒹 𑒩𑒯𑒻𑒋 𑒮𑒹 𑒞𑒿 𑒦𑒹𑒿𑒙 𑒏𑒩𑒋𑒧𑒹 𑒮𑓀𑒏𑒼𑒔 𑒏𑒩𑒻𑒋 𑒖𑒹 𑒏𑒱𑒕𑒳 𑒠𑒹𑒧𑒋 𑒢𑒻 𑒣𑒛𑓃𑒋। 𑒄 𑒧𑒳𑒠𑒰 𑒖𑒯𑒱𑒨𑒰 𑒑𑒰𑒧𑒧𑒹 𑒁𑒥𑒻𑒋 𑒂 𑒯𑒧 𑒑𑒰𑒧𑒧𑒹 𑒩𑒯𑒻 𑒕𑒲 𑒞𑒿 𑒦𑒹𑒿𑒙 𑒏𑒩𑒥𑒰𑒏 𑒪𑒹𑒪 𑒁𑒥𑒱𑒞𑒹 𑒁𑒕𑒱। 𑒂 𑒋𑒯𑒱 𑒥𑒹𑒩 𑒞𑒿 𑒯𑒧 𑒗𑓀𑒗𑒰𑒩𑒣𑒳𑒩𑒧𑒹 𑒩𑒯𑒲 𑒞𑒿 𑒍𑒞𑒯𑒳 𑒂𑒋𑒪 𑒩𑒯𑒋। 𑒮𑒻𑒯 𑒞𑒿 𑒏𑒯𑒪𑒱𑒨𑒻 𑒖𑒹 𑒄 𑒏𑒼𑒢𑒰 𑒏𑓄 𑒤𑒳𑒩𑒹𑒪𑒻। 𑒮𑒹 𑒂𑒥 𑒥𑒳𑒗𑒪𑒱𑒌। 𑒧𑒳𑒠𑒰 𑒄 𑒜𑒪𑒻𑒨𑓂𑒨𑒰 𑒏𑒼𑒢𑒰 𑒏𑓄 𑒯𑒼𑒋𑒞। 𑒣𑓂𑒪𑒰𑒮𑓂𑒙𑒩 𑒞𑒿 𑒥𑒰𑒠𑒼𑒧𑒹 𑒏𑒩𑒥𑒰 𑒠𑒹𑒥𑒻। 𑒞𑒞𑒹𑒏 𑒔𑒳𑒥𑒻𑒋, 𑒋𑒯𑒱 𑒮𑒰𑒪 𑒞𑒿 𑒂𑒩𑒼 𑒥𑒹𑒬𑒲 𑒔𑒳𑒥𑒋 𑒪𑒰𑒑𑒪 𑒁𑒕𑒱। 𑒣𑒱𑒙𑒳𑒂 𑒕𑒞, 𑒠𑒳𑒃𑒨𑒼 𑒮𑒰𑒪 𑒢𑒻 𑒔𑒪𑒪। 𑒍𑒏𑒩𑒰 𑒍𑒠𑒰𑒩𑒱 𑒏𑓄 𑒜𑓃𑒪𑒻𑒨𑓂𑒨𑒰 𑒏𑒩𑒞 𑒏𑒩𑒲𑒧 𑒧𑒱𑒨𑒰𑒿 𑒂 𑒪𑒕𑒧𑒲 𑒧𑒱𑒮𑓂𑒞𑓂𑒩𑒲, 𑒞𑒐𑒢𑒹 𑒚𑒲𑒏 𑒯𑒼𑒋𑒞। 𑒠𑒹𑒐𑒻 𑒕𑒲।
𑒦𑒰𑒞𑒱𑒖𑒏 𑒂𑒥𑒰𑒖𑒰𑒯𑒲 𑒥𑒜𑓃𑒱 𑒑𑒹𑒪 𑒁𑒕𑒱 𑒂𑒃-𑒏𑒰𑒪𑓂𑒯𑒱।
“𑒚𑒲𑒏 𑒕𑒻 𑒠𑒲𑒠𑒲, 𑒁𑒠𑒯𑒹 𑒖𑒧𑒲𑒢 𑒠𑓄 𑒠𑒱𑒁। 𑒠𑒮 𑒏𑒙𑓂𑒚𑒰𑒧𑒹 𑒁𑒯𑒰𑒿𑒏 𑒦𑒰𑒞𑒱𑒖𑒏 𑒥𑒮𑒼𑒥𑒰𑒮𑒏 𑒮𑓀𑒑 𑒦𑒑𑒫𑒰𑒢𑒏 𑒪𑒹𑒪 𑒮𑒹𑒯𑒼 𑒖𑒧𑒲𑒢 𑒥𑒔𑒱 𑒖𑒰𑒋𑒞।”
“𑒧𑒳𑒠𑒰 𑒥𑒰𑒢𑓂𑒯𑒣𑒩 𑒁𑒯𑒰𑒿𑒏 𑒒𑒩𑒰𑒩𑒲𑒏 𑒪𑒰𑒑𑒱 𑒞𑒿 𑒢𑒯𑒱𑒨𑒹 𑒯𑒼𑒋𑒞। 𑒞𑒐𑒢 𑒏𑒲 𑒤𑒋𑒠𑒰 𑒯𑒼𑒋𑒞 𑒁𑒯𑒰𑒿𑒏𑒹𑒿।”
“𑒕𑒼𑒛𑓃𑒴 𑒢𑒹। 𑒋𑒐𑒢𑒼 𑒞𑒿 𑒙𑒼𑒪 𑒠𑓄 𑒏𑓄 𑒁𑒥𑒱𑒞𑒹 𑒢𑒹 𑒕𑒲। 𑒔𑒾𑒏-𑒔𑒾𑒥𑒙𑒱𑒨𑒰 𑒂 𑒥𑒰𑒢𑓂𑒯𑒏 𑒏𑒰𑒞𑒧𑒹 𑒒𑒩 𑒥𑒢𑒹𑒥𑒰𑒏 𑒞𑒿 𑒂𑒥 𑒢𑒹 𑒔𑒪𑒢 𑒦𑒹𑒪 𑒁𑒕𑒱। 𑒂 𑒂𑒥 𑒔𑒾𑒥𑒙𑒱𑒨𑒰 𑒂 𑒥𑒰𑒢𑓂𑒯𑒏 𑒏𑒰𑒞𑒧𑒹 𑒞𑒿 𑒦𑒑𑒫𑒰𑒢𑒹𑒏 𑒒𑒩 𑒢𑒹 𑒬𑒼𑒦𑒞𑒢𑓂𑒯𑒱। 𑒠𑒮 𑒏𑒙𑓂𑒚𑒰𑒏 𑒠𑒮 𑒯𑒖𑒰𑒩 𑒖𑒯𑒱𑒨𑒰 𑒏𑒯𑒥 𑒯𑒧 𑒠𑓄 𑒠𑒹𑒥। 𑒩𑒖𑒱𑒮𑓂𑒙𑓂𑒩𑒲 𑒥𑒰𑒠𑒹𑒧𑒹 𑒥𑒩𑒳 𑒯𑒼𑒋𑒞।”
“𑒚𑒲𑒏 𑒕𑒻। 𑒞𑒐𑒢 𑒯𑒧 𑒮𑒼𑒔𑒱 𑒏𑓄 𑒏𑒯𑒥। 𑒋𑒏 𑒥𑒹𑒩 𑒥𑒹𑒙𑒰 𑒣𑒳𑒞𑒼𑒯𑒳𑒮𑒿 𑒣𑒴𑒕𑒱 𑒪𑒻𑒞 𑒕𑒲।”
𑒏𑒼𑒢 𑒅𑒣𑒰𑒋। 𑒦𑒑𑒫𑒰𑒢𑒏 𑒒𑒩𑒏 𑒠𑒹𑒥𑒰𑒪 𑒮𑒦𑒧𑒹 𑒏𑒖𑒩𑒲 𑒪𑒰𑒑𑒱 𑒑𑒹𑒪 𑒁𑒕𑒱। 𑒠𑒹𑒥𑒰𑒪 𑒕𑒼𑒛𑓃𑒴, 𑒥𑒖𑒩𑓀𑒑𑒥𑒪𑒲𑒏 𑒧𑒴𑒩𑓂𑒞𑒱𑒧𑒹 𑒮𑒹𑒯𑒼 𑒏𑒖𑒩𑒲 𑒪𑒰𑒑𑒱 𑒑𑒹𑒪 𑒁𑒕𑒱। 𑒁𑒢𑒧𑒢𑒰 𑒠𑒲𑒠𑒲 𑒮𑒼𑒔𑒱𑒞𑒹 𑒩𑒯𑒱 𑒑𑒹𑒪𑒟𑒱। 𑒂 𑒮𑒼𑒔𑒱𑒞𑒹-𑒮𑒼𑒔𑒱𑒞𑒹 𑒦𑒼𑒩 𑒦𑓄 𑒑𑒹𑒪𑒢𑓂𑒯𑒱।
𑒠𑓄 𑒠𑒻 𑒕𑒱𑒌 𑒖𑒧𑒲𑒢। 𑒂𑒩 𑒅𑒣𑒰𑒨 𑒏𑒲। 𑒢𑒘𑒱।
𑒥𑒹𑒙𑒰-𑒣𑒳𑒞𑒼𑒯𑒳 𑒏𑒯𑒪𑒐𑒱𑒢𑓂𑒯 𑒖𑒹 𑒧𑒰𑒋। 𑒍𑒞𑒳𑒏𑓂𑒏𑒰 𑒖𑒧𑒲𑒢 𑒞𑒿 𑒦𑒑𑒫𑒰𑒢𑒏 𑒕𑒢𑓂𑒯𑒱। 𑒂 𑒯𑒧 𑒮𑒦 𑒮𑒹 𑒬𑒳𑒩𑒳𑒯𑒹 𑒮𑒿 𑒥𑒳𑒗𑒻 𑒕𑒲। 𑒧𑒳𑒠𑒰 𑒠𑒹𑒐𑒥। 𑒍 𑒏𑒼𑒢𑒼 𑒔𑒰𑒪𑒱 𑒞𑒿 𑒢𑒻 𑒔𑒪𑒱 𑒩𑒯𑒪 𑒁𑒕𑒱।
“𑒏𑒼𑒢 𑒔𑒰𑒪𑒱। 𑒣𑒰𑒃 𑒞𑒿 𑒏𑒱𑒕𑒳 𑒥𑒹𑒬𑒲𑒋 𑒠𑓄 𑒩𑒯𑒪 𑒁𑒕𑒱।”
𑒦𑒑𑒫𑒰𑒢𑒏 𑒧𑒢𑓂𑒠𑒱𑒩𑒏 𑒪𑒹𑒪, 𑒠𑒮 𑒏𑒙𑓂𑒚𑒰 𑒏𑒧 𑒟𑒼𑒛𑓃𑒥𑒹𑒏 𑒯𑒼𑒃 𑒕𑒻। 𑒣𑒰𑒃 𑒖𑒳𑒙𑒥𑒻𑒞-𑒖𑒳𑒙𑒥𑒻𑒞 𑒧𑒩𑒱 𑒑𑒹𑒪𑒯𑒳𑒿। 𑒄 𑒁𑒡𑒐𑒩𑒳 𑒧𑒢𑓂𑒠𑒱𑒩 𑒍𑒯𑒱𑒢𑒹 𑒩𑒯𑒱 𑒖𑒰𑒋𑒞 ? 𑒑𑒣 𑒏𑒩𑒻 𑒕𑒲 𑒪𑒕𑒧𑒲 𑒧𑒱𑒮𑓂𑒞𑓂𑒩𑒲 𑒂 𑒏𑒩𑒲𑒧 𑒧𑒱𑒂𑒿 𑒮𑒿।
𑒠𑒮 𑒯𑒖𑒰𑒩𑒧𑒹 𑒜𑒪𑒻𑒨𑓂𑒨𑒰, 𑒣𑓂𑒪𑒰𑒮𑓂𑒙𑒩𑒏 𑒮𑓀𑒑 𑒔𑒯𑒩𑒠𑒱𑒫𑒰𑒩𑒲 𑒮𑒹𑒯𑒼 𑒥𑒢𑒱 𑒖𑒰𑒋𑒞। 𑒋𑒮𑓂𑒙𑒲𑒧𑒹𑒙 𑒥𑒢𑒱 𑒑𑒹𑒪। 𑒩𑒖𑒱𑒮𑓂𑒙𑓂𑒩𑒲𑒏 𑒁𑒑𑒱𑒪𑒹 𑒠𑒱𑒢𑒮𑒿 𑒏𑒰𑒖 𑒂𑒩𑒧𑓂𑒦। 𑒂 𑒦𑒰𑒠𑒫𑒏 𑒣𑒯𑒱𑒢𑒹 𑒮𑒧𑒰𑒣𑒢।

𑓓
𑒔𑒪𑒴 𑒩𑒖𑒱𑒮𑓂𑒙𑓂𑒩𑒲 𑒦𑓄 𑒑𑒹𑒪। 𑒠𑒰𑒮𑒖𑒲 𑒏𑒰𑒑𑒖-𑒣𑒞𑓂𑒞𑒩𑒧𑒹 𑒥𑒛𑓂𑒛 𑒧𑒰𑒯𑒱𑒩 𑒪𑒼𑒏। 𑒣𑒳𑒕𑒥𑒰𑒏 𑒏𑒰𑒖 𑒕𑒻! - 𑒡𑒳𑒩। 𑒣𑒏𑒱𑒨𑒰 𑒏𑒰𑒑𑒖 𑒥𑒢𑒪 𑒯𑒋𑒞।
“𑒦𑒑𑒫𑒰𑒢𑒏 𑒪𑒹𑒪 𑒏𑒰𑒑𑒖 𑒥𑒢𑒹𑒥𑒰𑒏 𑒣𑒯𑒱𑒪 𑒁𑒫𑒮𑒩 𑒦𑒹𑒙𑒪 𑒁𑒕𑒱 𑒠𑒲𑒠𑒲”- 𑒠𑒰𑒮𑒖𑒲𑒏 𑒑𑒣𑒮𑒿 𑒁𑒢𑒧𑒢𑒰 𑒠𑒲𑒠𑒲 𑒠𑒰𑒮𑒼𑒠𑒰𑒮 𑒦𑓄 𑒑𑒹𑒪𑒲𑒯।
𑒪𑒼𑒏 𑒏𑒯𑒻 𑒕𑒻 𑒗𑒳𑒙𑓂𑒚𑒹 𑒖𑒹 𑒪𑒼𑒏𑒏 𑒬𑓂𑒩𑒠𑓂𑒡𑒰 𑒦𑒑𑒫𑒰𑒢𑒣𑒩 𑒮𑒿 𑒏𑒧 𑒦𑒹𑒪 𑒖𑒰𑒃 𑒕𑒻। 𑒄 𑒠𑒰𑒮𑒖𑒲। 𑒏𑒯𑒱𑒨𑒼 𑒢𑒹 𑒦𑒹𑒿𑒙 𑒂 𑒢𑒹 𑒖𑒰𑒢 𑒣𑒯𑒱𑒔𑒰𑒢। 𑒠𑒴 𑒙𑒰 𑒩𑒖𑒱𑒮𑓂𑒙𑓂𑒩𑒲𑒏 𑒏𑒰𑒑𑒞- 𑒋𑒏𑒙𑒰 𑒠𑒮𑒏𑒚𑒱𑒨𑒰 𑒦𑒰𑒞𑒱𑒖𑒏 𑒢𑒰𑒧 𑒂 𑒠𑒼𑒮𑒩 𑒦𑒑𑒫𑒰𑒢𑒏 𑒢𑒰𑒧, 𑒧𑒳𑒠𑒰 𑒋𑒏𑓂𑒏𑒹 𑒤𑒲𑒮𑒧𑒹 𑒥𑒢𑒰 𑒩𑒯𑒪 𑒕𑒟𑒱। 𑒮𑒰𑒤𑒹 𑒏𑒯𑒱 𑒠𑒹𑒪𑒐𑒱𑒢𑓂𑒯- 𑒠𑒲𑒠𑒲 𑒦𑒑𑒫𑒰𑒢𑒏 𑒖𑒧𑒲𑒢𑒏 𑒩𑒖𑒱𑒮𑓂𑒙𑓂𑒩𑒲𑒏 𑒣𑒰𑒃 𑒯𑒧 𑒋𑒏𑒠𑒧𑓂𑒧𑒹 𑒢𑒻 𑒪𑒹𑒥। 𑒖𑒹 𑒥𑒹𑒩-𑒥𑒐𑒞𑒣𑒩 𑒏𑒰𑒖 𑒂𑒥𑒋 𑒮𑒻𑒯 𑒢𑒹 𑒁𑒣𑓂𑒣𑒢 𑒪𑒼𑒏। 𑒚𑒲𑒏𑒹 𑒥𑒴𑒜𑓃-𑒣𑒳𑒩𑒰𑒢 𑒏𑒯𑒱 𑒑𑒹𑒪 𑒕𑒟𑒱। 𑒨𑒻𑒯 𑒮𑒦 𑒠𑒹𑒐𑒱 𑒏𑓄 𑒢𑒹 𑒏𑒯𑒢𑒹 𑒕𑒟𑒱।
𑒁𑒢𑒧𑒢𑒰 𑒠𑒲𑒠𑒲 𑒥𑒰𑒃𑒧𑒹 𑒕𑒟𑒱। 𑒣𑒋𑒩𑒹 𑒑𑒰𑒧 𑒁𑒋𑒪𑒲𑒯।𑒮𑒼𑒯𑒧𑒹 𑒏𑒱𑒕𑒳 𑒢𑒻 𑒤𑒳𑒩𑒰𑒃𑒞 𑒕𑒢𑓂𑒯𑒱। 𑒧𑒢𑓂𑒠𑒱𑒩𑒏𑒹𑒿 𑒁𑒖𑒥𑒰𑒩𑒴, 𑒏𑒰𑒪𑓂𑒯𑒱𑒮𑒿 𑒏𑒰𑒖𑒏 𑒂𑒩𑒧𑓂𑒦 𑒁𑒕𑒱। 𑒪𑒕𑒧𑒲 𑒧𑒱𑒮𑓂𑒞𑓂𑒩𑒲 𑒁𑒣𑒢 𑒞𑒹𑒑𑒰𑒩𑒲, 𑒛𑒼𑒩𑒲, 𑒏𑒩𑒝𑒲 𑒮𑒦 𑒩𑒰𑒐𑒱 𑒑𑒹𑒪 𑒁𑒕𑒱। 𑒛𑒥𑓂𑒥𑒳𑒏 𑒮𑒦 𑒣𑒰𑒢𑒱 𑒦𑒩𑒥𑒰𑒏 𑒪𑒹𑒪 𑒁𑒢𑒧𑒢𑒰 𑒠𑒲𑒠𑒲 𑒖𑒼𑒑𑒰 𑒏𑓄 𑒩𑒰𑒐𑒢𑒯𑒱𑒨𑒹 𑒕𑒟𑒱। 𑒣𑒼𑒐𑒩𑒱 𑒥𑒑𑒪𑒹𑒧𑒹 𑒁𑒕𑒱। 𑒪𑒲𑒜𑓃𑒮𑒿 𑒦𑒩𑒪, 𑒧𑒳𑒠𑒰 𑒏𑒰𑒞𑒧𑒹 𑒧𑒯𑒲𑒮 𑒮𑒦𑒏𑒹𑒿 𑒣𑒰𑒢𑒱 𑒣𑒱𑒋𑒥𑒰𑒏 𑒪𑒹𑒪 𑒪𑒼𑒏 𑒮𑒦 𑒏𑒢𑒹𑒏 𑒮𑒰𑒤 𑒏𑒃𑒋 𑒠𑒹𑒢𑒹 𑒁𑒕𑒱।
𑒧𑒳𑒠𑒰 𑒦𑒼𑒩𑒹𑒧𑒹 𑒒𑒼𑒪-𑒤𑒳𑒔𑒳𑒏𑓂𑒏𑒰। 𑒏𑒩𑒲𑒧 𑒧𑒱𑒂𑒿𑒏𑒹𑒿 𑒏𑒰𑒖 𑒏𑒩𑒥𑒰𑒮𑒿 𑒩𑒼𑒏𑒱 𑒠𑒹𑒪 𑒑𑒹𑒪। 𑒏𑒹 𑒩𑒼𑒏𑒪𑒏? 𑒦𑒰𑒞𑒱𑒖𑒏𑒹𑒿 𑒐𑒥𑒩𑒱 𑒠𑒱𑒨𑒾𑒏। 𑒧𑒳𑒠𑒰 𑒍 𑒞𑒿 𑒏𑒰𑒪𑓂𑒯𑒱 𑒗𑓀𑒗𑒰𑒩𑒣𑒳𑒩𑒮𑒿 𑒮𑒼𑒗𑒹 𑒢𑒼𑒏𑒩𑒲𑒣𑒩 𑒔𑒪𑒱 𑒑𑒹𑒪𑒰𑒯। 𑒩𑒖𑒱𑒮𑓂𑒙𑓂𑒩𑒲𑒏 𑒏𑒰𑒑𑒞 𑒍𑒢𑒰 𑒞𑒿 𑒁𑒢𑒧𑒰𑒢𑒰 𑒠𑒲𑒠𑒲 𑒪𑒑 𑒮𑒹𑒯𑒼 𑒕𑒢𑓂𑒯𑒱। 𑒦𑒰𑒞𑒱𑒖𑒏 𑒮𑒰𑒩 𑒩𑒼𑒏𑒢𑒹 𑒁𑒕𑒱 𑒏𑒰𑒖। 𑒔𑒯𑒰𑒩𑒠𑒱𑒥𑒰𑒩𑒲 𑒢𑒻 𑒥𑒢𑒥𑒋 𑒠𑒹𑒞। 𑒧𑒳𑒠𑒰 𑒏𑒰𑒪𑓂𑒯𑒱 𑒩𑒖𑒱𑒮𑓂𑒙𑓂𑒩𑒲 𑒏𑒰𑒪 𑒞𑒿 𑒩𑒯𑒋 𑒄𑒯𑒼। 𑒞𑒐𑒢? 𑒏𑒯𑒻𑒞 𑒁𑒕𑒱 𑒖𑒹 𑒥𑒰𑒢𑓂𑒯𑒏 𑒏𑒰𑒞𑒥𑒪𑒰 𑒖𑒧𑒲𑒢 𑒧𑒹𑒯𑒧𑒰𑒢𑒏 𑒕𑒱𑒨𑒢𑓂𑒯𑒱, 𑒌𑒿 𑒨𑒾। 𑒞𑒐𑒢 𑒞𑒿 𑒄 𑒧𑒢𑓂𑒠𑒱𑒩𑒼 𑒍𑒏𑒩𑒹 𑒯𑒱𑒮𑓂𑒮𑒰𑒧𑒹 𑒦𑓄 𑒑𑒹𑒪𑒻। 𑒏𑒼𑒢𑒼 𑒥𑒳𑒗𑒥𑒰𑒧𑒹 𑒑𑒪𑒞𑒲 𑒞𑒿 𑒢𑒻 𑒏𑓄 𑒩𑒯𑒪 𑒁𑒕𑒱। 𑒦𑒰𑒞𑒱𑒖 𑒧𑒰𑒮𑒏 𑒬𑒳𑒩𑒳𑒯𑒹𑒧𑒹 𑒖𑒰 𑒏𑓄 𑒞𑒿 𑒁𑒍𑒞𑒰𑒯, 𑒠𑒩𑒧𑒰𑒯𑒰 𑒪𑒻𑒋 𑒏𑓄 𑒢𑒹। 𑒧𑒰𑒮 𑒦𑒩𑒱 𑒁𑒢𑒧𑒰𑒢𑒰 𑒠𑒲𑒠𑒲 𑒑𑒰𑒧 𑒂 𑒗𑓀𑒗𑒰𑒩𑒣𑒳𑒩 𑒏𑒩𑒻𑒞 𑒩𑒯𑒪𑒲𑒯। 𑒥𑒹𑒙𑒰 𑒣𑒳𑒞𑒼𑒯𑒳 𑒏𑒯𑒢𑓂𑒯𑒱 𑒖𑒹 𑒄 𑒦𑒰𑒞𑒱𑒖𑒹𑒏 𑒔𑒰𑒪𑒱 𑒞𑒿 𑒢𑒻 𑒁𑒕𑒱। 𑒢𑒘𑒱, 𑒮𑒹 𑒢𑒻 𑒏𑒯𑒴। 𑒠𑒰𑒮𑒖𑒲 𑒞𑒿 𑒢𑒲𑒏 𑒪𑒼𑒏 𑒩𑒯𑒋। 𑒠𑒹𑒐𑒴।
𑓔
“𑒠𑒲𑒠𑒲। 𑒁𑒯𑒰𑒿𑒏𑒹𑒿 𑒏𑒼𑒢𑒼 𑒡𑒼𑒐𑒰 𑒦𑓄 𑒩𑒯𑒪 𑒁𑒕𑒱।”
“𑒞𑒐𑒢 𑒞𑒿 𑒄 𑒧𑒢𑓂𑒠𑒱𑒩𑒼 𑒁𑒯𑒲𑓀𑒏 𑒦𑒹𑒪 𑒢𑒹।”
“𑒢𑒘𑒱 𑒠𑒲𑒠𑒲। 𑒄 𑒧𑒢𑓂𑒠𑒱𑒩 𑒞𑒿 𑒦𑒑𑒫𑒰𑒢𑒏 𑒕𑒱𑒨𑒢𑓂𑒯𑒱। 𑒯𑒳𑒢𑒏𑒹 𑒩𑒯𑒞𑒢𑓂𑒯𑒱। 𑒂 𑒣𑒰𑒕𑒴𑒏 𑒖𑒧𑒲𑒢𑒏 𑒧𑒰𑒪𑒱𑒏 𑒮𑒹𑒯𑒼 𑒦𑒑𑒫𑒰𑒢𑒹।”
“𑒂 𑒞𑒐𑒢 𑒞𑒿 𑒯𑒧𑒩 𑒄 𑒐𑒼𑒣𑒛𑓃𑒲 𑒮𑒹𑒯𑒼 𑒁𑒯𑒲𑓀𑒏 𑒦𑒹𑒪 𑒢𑒹।”
“𑒢𑒘𑒱 𑒠𑒲𑒠𑒲। 𑒁𑒯𑒰𑒿 𑒖𑒯𑒱𑒨𑒰 𑒡𑒩𑒱 𑒖𑒲𑒥 𑒞𑒯𑒱𑒨𑒰 𑒡𑒩𑒱 𑒩𑒯𑒴। 𑒏𑒹 𑒧𑒢𑒰 𑒏𑒩𑒞? ”
“𑒥𑒾𑒂 𑒥𑒛𑓂𑒛 𑒅𑒣𑒏𑒰𑒩 𑒁𑒯𑒰𑒿𑒏। 𑒂 𑒣𑒰𑒕𑒴 𑒠𑒱𑒮𑒏𑒰 𑒖𑒧𑒲𑒢𑒏 𑒪𑒰𑒑𑒱 𑒞𑒿 𑒢𑒘𑒱 𑒥𑒰𑒢𑓂𑒯 𑒠𑒱𑒮𑒮𑒿 𑒁𑒕𑒱 𑒂 𑒢𑒯𑒱𑒨𑒹 𑒙𑒼𑒪 𑒠𑒱𑒮𑒮𑒿।”
“𑒠𑒲𑒠𑒲। 𑒁𑒯𑒰𑒿 𑒯𑒧𑒩𑒰 𑒖𑒧𑒲𑒢 𑒥𑒰𑒙𑒹 𑒖𑒰𑒆 𑒢𑒹 𑒏𑒹 𑒧𑒢𑒰 𑒏𑒩𑒞? 𑒂 𑒂𑒩𑒱𑒣𑒩 𑒥𑒰𑒙𑒹 𑒐𑒹𑒞𑒧𑒹 𑒮𑒦 𑒖𑒰𑒃𑒞𑒹 𑒁𑒕𑒱। 𑒖𑒏𑒩 𑒐𑒹𑒞 𑒥𑒰𑒢𑓂𑒯𑒏 𑒏𑒰𑒞𑒧𑒹 𑒢𑒻 𑒕𑒻 𑒮𑒹 𑒏𑒲 𑒁𑒣𑒢 𑒐𑒹𑒞𑒣𑒩 𑒢𑒻 𑒖𑒰 𑒮𑒏𑒻𑒋। 𑒁𑒯𑒰𑒿 𑒞𑒿 𑒢𑒥𑒏𑒰 𑒪𑒼𑒏𑒏 𑒦𑒱𑒢𑓂𑒢-𑒦𑒱𑒢𑒰𑒅𑒖 𑒥𑒪𑒰 𑒑𑒣 𑒏𑓄 𑒩𑒯𑒪 𑒕𑒲।”
“𑒧𑒳𑒠𑒰 𑒄 𑒮𑒦 𑒁𑒯𑒰𑒿 𑒣𑒯𑒱𑒢𑒹 𑒏𑒯𑒰𑒿 𑒏𑒯𑒢𑒹 𑒩𑒯𑒲।”
“𑒠𑒲𑒠𑒲, 𑒁𑒯𑒰𑒿𑒏𑒹𑒿 𑒮𑒦𑒙𑒰 𑒏𑒯𑒢𑒹 𑒩𑒯𑒲। 𑒧𑒳𑒠𑒰 𑒪𑒑𑒻𑒞 𑒁𑒕𑒱 𑒖𑒹 𑒁𑒯𑒰𑒿𑒏𑒹𑒿 𑒡𑒼𑒐𑒰 𑒦𑓄 𑒩𑒯𑒪 𑒁𑒕𑒱। 𑒢𑒻 𑒫𑒱𑒬𑓂𑒫𑒰𑒮 𑒯𑒼𑒃𑒋 𑒞𑒿 𑒠𑒰𑒮𑒖𑒲𑒏𑒹𑒿 𑒥𑒖𑒰 𑒠𑒻𑒞 𑒕𑒲। 𑒍 𑒞𑒿 𑒞𑒹𑒯𑒪𑓂𑒪𑒰 𑒁𑒕𑒱।”
“𑒁𑒔𑓂𑒕𑒰 𑒞𑒿 𑒍𑒯𑒼 𑒧𑒱𑒪𑒪 𑒁𑒕𑒱।”
“𑒠𑒴 𑒩𑒖𑒱𑒮𑓂𑒙𑓂𑒩𑒲𑒏 𑒏𑒰𑒑𑒞 𑒥𑒢𑒰 𑒏𑓄 𑒥𑒹𑒔𑒰𑒩𑒰 𑒋𑒏 𑒩𑒖𑒱𑒮𑓂𑒙𑓂𑒩𑒲𑒏 𑒣𑒰𑒃 𑒪𑒹𑒪𑒏 𑒂 𑒁𑒯𑒰𑒿 𑒏𑒯𑒱 𑒩𑒯𑒪 𑒕𑒲 𑒖𑒹 𑒧𑒱𑒪𑒪 𑒁𑒕𑒱।”- 𑒦𑒰𑒞𑒱𑒖𑒏 𑒮𑓂𑒫𑒩 𑒞𑒲𑒫𑓂𑒩 𑒦𑓄 𑒑𑒹𑒪𑒢𑓂𑒯𑒱। 𑒯𑒰𑒿𑒤𑒋 𑒪𑒑𑒪𑒰𑒯 𑒂 𑒖𑒼𑒩-𑒖𑒼𑒩𑒮𑒿 𑒥𑒖𑒻𑒞 𑒥𑒱𑒠𑒰 𑒦𑓄 𑒑𑒹𑒪𑒰𑒯।
𑓕
𑒁𑒢𑒧𑒰𑒢𑒰 𑒠𑒲𑒠𑒲𑒏 𑒪𑒹𑒪 𑒢𑒻𑒯𑒩𑒏 𑒄 𑒦𑒼𑒩 𑒮𑒰𑒮𑒳𑒩𑒏 𑒍𑒯𑒱 𑒦𑒼𑒩 𑒖𑒹𑒏𑒰𑒿 𑒩𑒯𑒢𑓂𑒯𑒱 𑒖𑒰𑒯𑒱 𑒠𑒱𑒢 𑒍 𑒫𑒱𑒡𑒫𑒰 𑒦𑒹𑒪 𑒩𑒯𑒟𑒱। 𑒂𑒃 𑒑𑒰𑒧𑒏 𑒡𑒲-𑒥𑒹𑒙𑒲 𑒜𑓃𑒲𑒪-𑒪𑒲𑒐 𑒥𑒱𑒕𑒥𑒰 𑒪𑒹𑒪 𑒢𑒻 𑒁𑒋𑒪𑒲𑒯। 𑒁𑒢𑒧𑒰𑒢𑒰 𑒠𑒲𑒠𑒲𑒏 𑒩𑒰𑒞𑒱 𑒦𑒩𑒱𑒏 𑒫𑒰𑒩𑓂𑒞𑒰𑒪𑒰𑒣- 𑒥𑒖𑒩𑓀𑒑 𑒥𑒪𑒲𑒏 𑒮𑓀𑒑। 𑒋𑒐𑒢𑒹 𑒋𑒯𑒱 𑒦𑒼𑒩𑒧𑒹 𑒐𑒞𑒧 𑒦𑒹𑒪 𑒁𑒕𑒱। 𑒪𑒼𑒏 𑒮𑒦 𑒁𑒿𑒑𑒢𑒰𑒧𑒹 𑒥𑒔𑓂𑒔𑒰𑒏𑒹𑒿 𑒚𑒼𑒏𑒱 𑒏𑓄 𑒮𑒳𑒞𑒰 𑒩𑒯𑒪 𑒩𑒯𑒋। 𑒦𑒼𑒩𑒧𑒹 𑒏𑒱𑒕𑒳 𑒑𑒼𑒙𑒹 𑒂𑒥𑒱 𑒣𑓀𑒔𑒻𑒞𑒲 𑒏𑒩𑒹𑒥𑒰𑒏 𑒮𑒳𑒗𑒰𑒫 𑒠𑒋 𑒑𑒹𑒪𑒢𑓂𑒯𑒱। 𑒧𑒳𑒠𑒰 𑒁𑒢𑒧𑒰𑒢𑒰 𑒠𑒲𑒠𑒲𑒏 𑒩𑒼𑒭 𑒞𑒿 𑒥𑒖𑒩𑓀𑒑𑒥𑒪𑒲𑒮𑒿 𑒕𑒪𑒢𑓂𑒯𑒱।
“𑒦𑒑𑒫𑒰𑒢𑒏 𑒖𑒧𑒲𑒢 𑒁𑒠𑒯𑒰 𑒥𑒹𑒔𑒱 𑒏𑓄 𑒦𑒑𑒫𑒰𑒢𑒏 𑒒𑒩 𑒥𑒢𑒥𑒱𑒞𑒯𑒳𑒿, 𑒧𑒳𑒠𑒰 𑒧𑒢𑓂𑒠𑒱𑒩𑒏 𑒮𑒙𑒪 𑒖𑒧𑒲𑒢 𑒩𑒖𑒱𑒮𑓂𑒙𑓂𑒩𑒲 𑒏𑒩𑒰 𑒪𑒹𑒪𑒏 𑒂 𑒖𑒹 𑒖𑒧𑒲𑒢 𑒥𑒔𑒪 𑒍𑒯𑒱𑒮𑒿 𑒧𑒢𑓂𑒠𑒱𑒩𑒏 𑒪𑒰𑒑𑒱𑒨𑒹 𑒢𑒻 𑒩𑒯𑒪। 𑒪𑒰𑒑𑒱 𑒞𑒿 𑒕𑒼𑒛𑓃𑒴 𑒍𑒯𑒱 𑒣𑒩 𑒖𑒋𑒥𑒰𑒏 𑒩𑒮𑓂𑒞𑒹 𑒥𑒢𑓂𑒢 𑒏𑓄 𑒠𑒹𑒪𑒏। 𑒂 𑒄 𑒥𑒖𑒩𑓀𑒑𑒥𑒪𑒲। 𑒧𑒯𑒰𑒫𑒲𑒩। 𑒏𑒼𑒢 𑒬𑒏𑓂𑒞𑒱 𑒕𑒻𑒏 𑒋𑒏𑒩𑒰𑒧𑒹 ? 𑒔𑒰𑒪𑒲𑒮 𑒮𑒰𑒪 𑒣𑒹𑒙 𑒏𑒰𑒙𑒱 𑒏𑓄 𑒯𑒱𑒢𑒏𑒰 𑒐𑒼𑒣𑒛𑓃𑒲𑒮𑒿 𑒣𑒏𑓂𑒏𑒰𑒏 𑒒𑒩𑒧𑒹 𑒁𑒢𑒪𑒯𑒳𑒿। 𑒜𑒪𑒻𑒨𑓂𑒨𑒰 𑒦𑓄 𑒖𑒃𑒞𑒋, 𑒔𑒯𑒩𑒠𑒱𑒫𑒰𑒩𑒲 𑒥𑒢𑒱 𑒖𑒃𑒞𑒋 𑒮𑒻𑒯 𑒙𑒰 𑒧𑒢𑒼𑒩𑒟 𑒩𑒯𑒋, 𑒂 𑒮𑒹𑒯𑒼 𑒯𑒱𑒢𑒏𑒹 𑒪𑒹𑒪। 𑒯𑒰... ”
𑓖
𑒋𑒯𑒱 𑒦𑒼𑒩𑒧𑒹 𑒦𑒰𑒞𑒱𑒖𑒏 𑒠𑓂𑒫𑒰𑒩𑒱𑒣𑒩 𑒚𑒰𑒜𑓃 𑒁𑒢𑒧𑒰𑒢𑒰 𑒠𑒲𑒠𑒲। 𑒪𑒼𑒏 𑒮𑒦𑒏 𑒧𑒼𑒢𑒹 𑒖𑒹 𑒂𑒥 𑒂𑒩 𑒥𑒰𑒗𑒞 𑒗𑒑𑒛𑓃𑒰। 𑒧𑒳𑒠𑒰 𑒄 𑒏𑒲 𑒦𑓄 𑒩𑒯𑒪 𑒁𑒕𑒱। 𑒪𑒕𑒧𑒱𑒨𑒰𑒿𑒏 𑒦𑒰𑒋 𑒩𑒱𑒏𑓂𑒬𑒰 𑒁𑒢𑒪𑒏 𑒁𑒕𑒱। 𑒁𑒢𑒧𑒰𑒢𑒰 𑒠𑒲𑒠𑒲 𑒦𑒰𑒞𑒱𑒖𑒏 𑒮𑓀𑒑 𑒗𑓀𑒗𑒰𑒩𑒣𑒳𑒩 𑒖𑒰 𑒩𑒯𑒪 𑒕𑒟𑒱। 𑒏𑒹 𑒏𑒯𑒪𑒏? 𑒯𑒳𑒢𑒏𑒰𑒮𑒿 𑒞𑒿 𑒏𑒏𑒩𑒼 𑒑𑒣𑒼 𑒢𑒻 𑒦𑒹𑒪 𑒩𑒯𑒻। 𑒯𑒧 𑒏𑒯𑒢𑒯𑒱𑒨𑒼 𑒩𑒯𑒱𑒨𑒢𑓂𑒯𑒱 𑒣𑓀𑒔𑒻𑒞𑒲 𑒏𑒩𑒰𑒆, 𑒧𑒳𑒠𑒰 𑒧𑒢𑒰 𑒖𑒹𑒏𑒰𑒿 𑒏𑓄 𑒠𑒹𑒢𑒹 𑒩𑒯𑒟𑒱। 𑒁𑒔𑓂𑒕𑒰, 𑒪𑒕𑒧𑒲𑒏 𑒦𑒰𑒋 𑒏𑒯𑒪𑒏। 𑒯𑒿, 𑒩𑒱𑒏𑓂𑒬𑒰 𑒥𑒖𑒥𑒻 𑒪𑒹𑒪 𑒖𑒹 𑒑𑒹𑒪 𑒩𑒯𑒋, 𑒮𑒹 𑒏𑒯𑒢𑒹 𑒯𑒋𑒞 𑒖𑒹 𑒗𑓀𑒗𑒰𑒩𑒣𑒳𑒩 𑒖𑒹𑒥𑒰𑒏 𑒁𑒕𑒱।
𑒠𑒰𑒮𑒖𑒲𑒏𑒹𑒿 𑒋𑒏𑒙𑒰 𑒂𑒩 𑒩𑒖𑒱𑒮𑓂𑒙𑓂𑒩𑒲𑒏 𑒏𑒰𑒑𑒞 𑒥𑒢𑒥𑒋 𑒣𑒛𑓃𑒪𑒢𑓂𑒯𑒱। 𑒁𑒢𑒧𑒰𑒢𑒰 𑒠𑒲𑒠𑒲𑒏𑒹𑒿 𑒠𑒹𑒐𑒱 𑒍 𑒮𑒩𑓂𑒠 𑒦𑓄 𑒑𑒹𑒪 𑒩𑒯𑒟𑒱 𑒖𑒹 𑒖𑒰𑒢𑒱 𑒢𑒻 𑒥𑒴𑒜𑓃𑒲 𑒏𑒲 𑒮𑒦 𑒮𑒳𑒢𑒍𑒟𑒱𑒢𑓂𑒯। 𑒧𑒳𑒠𑒰 𑒁𑒢𑒧𑒰𑒢𑒰 𑒠𑒲𑒠𑒲 𑒞𑒞𑒹𑒏 𑒢𑒹 𑒞𑒰𑒧𑒮𑒧𑒹 𑒕𑒪𑒲𑒯 𑒖𑒹 𑒏𑒱𑒕𑒳 𑒢𑒻 𑒥𑒖𑒪𑒲𑒯। 𑒞𑒰𑒧𑒮 𑒣𑒲𑒥𑒱 𑒑𑒹𑒪𑒲𑒯। 𑒍𑒯𑒼 𑒣𑒰𑒕𑒴 𑒥𑒪𑒰 𑒖𑒧𑒲𑒢 𑒦𑒰𑒞𑒱𑒖𑒏𑒹𑒿 𑒩𑒖𑒱𑒮𑓂𑒙𑓂𑒩𑒲 𑒏𑓄 𑒠𑒹𑒪𑒢𑓂𑒯𑒱। 𑒂 𑒗𑓀𑒗𑒰𑒩𑒣𑒳𑒩-𑒮𑓂𑒙𑒹𑒬𑒢𑒮𑒿 𑒒𑒳𑒩𑒱 𑒏𑓄 𑒗𑓀𑒗𑒰𑒩𑒣𑒳𑒩 𑒥𑒖𑒰𑒩 𑒠𑒱𑒮 𑒥𑒹𑒙𑒰 𑒣𑒳𑒞𑒼𑒯𑒳 𑒪𑒑 𑒣𑒋𑒩𑒹 𑒥𑒱𑒠𑒰 𑒦𑒹𑒪𑒲𑒯।
𑒪𑒕𑒧𑒲𑒏 𑒦𑒰𑒋 𑒒𑒳𑒩𑒱 𑒂𑒋𑒪। 𑒠𑒴 𑒮𑒫𑒰𑒩𑒲𑒏𑒹𑒿 𑒪𑓄 𑒑𑒹𑒪 𑒩𑒯𑒋 𑒧𑒳𑒠𑒰 𑒧𑒰𑒞𑓂𑒩 𑒋𑒏 𑒮𑒫𑒰𑒩𑒲 𑒪𑓄 𑒏𑓄 𑒒𑒳𑒩𑒱 𑒂𑒋𑒪। 𑒮𑓀𑒑𑒧𑒹 𑒮𑓀𑒠𑒹𑒬 𑒪𑒹𑒢𑒹 𑒑𑒹𑒪। 𑒪𑒕𑒧𑒲 𑒧𑒱𑒮𑓂𑒞𑓂𑒩𑒲 𑒂 𑒏𑒩𑒲𑒧 𑒧𑒱𑒂𑒿 𑒪𑒹𑒪 𑒮𑓀𑒠𑒹𑒬। 𑒏𑒰𑒪𑓂𑒯𑒱 𑒦𑒼𑒩𑒹𑒮𑒿 𑒏𑒰𑒖 𑒂𑒩𑒧𑓂𑒦। 𑒤𑒹𑒩𑒮𑒿?
𑓗
𑒔𑒯𑒩𑒠𑒹𑒥𑒰𑒪𑒲 𑒥𑒢𑒪। 𑒦𑒑𑒫𑒰𑒢𑒏 𑒧𑒢𑓂𑒠𑒱𑒩 𑒂 𑒁𑒢𑒧𑒰𑒢𑒰 𑒠𑒲𑒠𑒲𑒏 𑒒𑒩𑒏𑒹𑒿 𑒥𑒰𑒩𑒱 𑒏𑓄। 𑒏𑒯𑒱 𑒠𑒹𑒢𑒹 𑒕𑒱𑒨𑒢𑓂𑒯𑒱 𑒠𑒲𑒠𑒲 𑒏𑒹𑒿। 𑒯𑒳𑒢𑒏𑒰 𑒖𑒱𑒥𑒻𑒞 𑒏𑓂𑒨𑒼 𑒕𑒴𑒞𑒢𑓂𑒯𑒱 𑒢𑒻 𑒯𑒳𑒢𑒏𑒩 𑒒𑒩।
𑒒𑒩 𑒂𑒏𑒱 𑒐𑒼𑒣𑒛𑓃𑒲, 𑒋𑒏 𑒮𑒰𑒪 𑒏𑒢𑒹𑒏 𑒙𑒴𑒙𑒪। 𑒠𑒼𑒮𑒩 𑒦𑒠𑒥𑒩𑒱𑒨𑒰𑒧𑒹 𑒐𑒳𑒙𑓂𑒙𑒰 𑒮𑒩𑒱 𑒏𑓄 𑒐𑒮𑒱 𑒣𑒛𑓃𑒪। 𑒧𑒳𑒠𑒰 𑒁𑒢𑒧𑒰𑒢𑒰 𑒠𑒲𑒠𑒲 𑒢𑒻 𑒁𑒋𑒪𑒲𑒯। 𑒮𑒧𑒰𑒠 𑒠𑒹𑒢𑒹 𑒩𑒯𑒢𑓂𑒯𑒱 𑒢𑒻𑒯𑒩𑒏 𑒋𑒏 𑒑𑒼𑒙𑒹। 𑒜𑒪𑒻𑒨𑒰 𑒢𑒯𑒱𑒨𑒹 𑒦𑒹𑒪𑒢𑓂𑒯𑒱 𑒥𑒖𑒩𑓀𑒑𑒥𑒪𑒲𑒏। 𑒁𑒢𑒧𑒢𑒰 𑒠𑒲𑒠𑒲 𑒯𑒩𑒱𑒠𑓂𑒫𑒰𑒩𑒮𑒿 𑒒𑒳𑒩𑒱 𑒁𑒋𑒪𑒲𑒯। 𑒪𑒼𑒏 𑒣𑒳𑒕𑒪𑒏𑒢𑓂𑒯𑒱- 𑒏𑒲 𑒧𑒰𑒿𑒑𑒪𑒯𑒳𑒿 𑒑𑓀𑒑𑒰 𑒧𑒰𑒋𑒮𑒿।
“𑒨𑒋𑒯 𑒖𑒹 𑒁𑓀𑒡𑒫𑒱𑒬𑓂𑒫𑒰𑒮 𑒯𑒧𑒩𑒰 𑒧𑒼𑒢𑒮𑒿 𑒯𑒙𑒰 𑒠𑒱𑒁”।
“𑒂 𑒏𑒲 𑒠𑒹𑒪𑒱𑒨𑒢𑓂𑒯𑒱 𑒑𑓀𑒑𑒰 𑒧𑒰𑒋𑒏𑒹𑒿 ?”
“𑒁𑒣𑒢 𑒞𑒰𑒧𑒮 𑒠𑓄 𑒠𑒹𑒪𑒱𑒨𑒢𑓂𑒯𑒱”।
𑒁𑒢𑒧𑒰𑒢𑒰 𑒠𑒲𑒠𑒲 𑒨𑒋𑒯 𑒏𑒯𑒟𑒱- 𑒏𑒲 𑒏𑒩𑒥𑒢𑓂𑒯𑒱। 𑒏𑒼𑒢𑒼 𑒬𑒏𑓂𑒞𑒱𑒨𑒹 𑒢𑒻 𑒕𑒢𑓂𑒯𑒱 𑒥𑒖𑒩𑓀𑒑𑒥𑒪𑒲𑒧𑒹। 𑒐𑒮𑒋 𑒠𑒱𑒨𑒾𑒏 𑒐𑒼𑒣𑒛𑓃𑒲। 𑒮𑒼𑓀𑒑𑒩 𑒪𑒰𑒑𑒪 𑒒𑒩 𑒏𑒞𑒹𑒏 𑒠𑒱𑒢 𑒏𑒰𑒖 𑒠𑒹𑒞।
𑓘
𑒏𑒻𑒏 𑒥𑒩𑒐 𑒥𑒲𑒞𑒪। 𑒏𑒻𑒏 𑒥𑒩𑒐 𑒢𑒻 𑒣𑒰𑒿𑒔𑒧𑒹 𑒮𑒰𑒪 𑒞𑒿। 𑒦𑒰𑒞𑒱𑒖 𑒑𑒰𑒧𑒣𑒩 𑒂𑒋𑒪 𑒩𑒯𑒟𑒱। 𑒠𑒩𑒧𑒰𑒯𑒰 𑒅𑒚𑒰 𑒏𑓄। 𑒣𑒼𑒐𑒩𑒱 𑒠𑒱𑒮𑒮𑒿 𑒔𑒣𑓂𑒣𑒰𑒏𑒪𑒣𑒩। 𑒪𑒼𑒙𑒰 𑒪𑒹𑒢𑒹 𑒥𑒻𑒮𑒪𑒰𑒯 𑒂𑒏𑒱 𑒕𑒰𑒞𑒲𑒧𑒹 𑒠𑒩𑓂𑒠 𑒅𑒚𑒪𑒢𑓂𑒯𑒱। 𑒢𑒻 𑒥𑒔𑒱 𑒮𑒏𑒪𑒰𑒯। 𑒪𑒼𑒏 𑒮𑒦 𑒏𑒯𑒋, 𑒠𑒹𑒐𑒴 𑒁𑒢𑒧𑒰𑒢𑒰 𑒠𑒲𑒠𑒲𑒏 𑒬𑓂𑒩𑒰𑒣, 𑒥𑒛𑓂𑒛 𑒏𑒰𑒢𑒪 𑒩𑒯𑒟𑒱 𑒠𑒲𑒠𑒲 𑒍𑒯𑒱 𑒠𑒱𑒢। 𑒍𑒯𑒱𑒮𑒿 𑒣𑒯𑒱𑒢𑒹 𑒥𑒖𑒩𑓀𑒑𑒥𑒪𑒲𑒏 𑒧𑒴𑒩𑓂𑒞𑒱𑒧𑒹 𑒚𑒲𑒏𑒹 𑒬𑒏𑓂𑒞𑒱 𑒢𑒻 𑒩𑒯𑒋। 𑒧𑒳𑒠𑒰 𑒯𑒵𑒠𑒨𑒮𑒿 𑒠𑒹𑒪 𑒬𑓂𑒩𑒰𑒣 𑒪𑒰𑒑𑒻 𑒕𑒻। 𑒍𑒯𑒲 𑒠𑒱𑒢 𑒖𑒰𑒑𑒵𑒞 𑒦𑓄 𑒑𑒹𑒪 𑒩𑒯𑒟𑒱 𑒥𑒖𑒩𑓀𑒑𑒥𑒪𑒲। 𑒂 𑒂𑒃 𑒬𑒏𑓂𑒞𑒱 𑒠𑒹𑒐𑒰 𑒠𑒹𑒪𑒐𑒱𑒢𑓂𑒯।
𑒧𑒳𑒠𑒰 𑒮𑒧𑒠𑒱𑒨𑒰𑒏𑒹𑒿 𑒁𑒢𑒧𑒰𑒢𑒰 𑒠𑒲𑒠𑒲 𑒏𑒯𑒪𑒐𑒱𑒢𑓂𑒯 𑒖𑒹 𑒣𑒰𑒟𑒩𑒼𑒧𑒹 𑒖𑒰𑒢 𑒯𑒼𑒃 𑒕𑒻। 𑒯𑒩𑓂𑒙 𑒁𑒙𑒻𑒏 𑒦𑒹𑒪 𑒯𑒼𑒋𑒞𑒻𑒏। 𑒣𑒩𑒮𑒴 𑒋𑒞𑒯𑒱 𑒋𑒏𑒙𑒰 𑒧𑒰𑒩𑒫𑒰𑒛𑓃𑒲𑒏𑒹𑒿 𑒁𑒙𑒻𑒏 𑒦𑒹𑒪 𑒩𑒯𑒻। 𑒔𑒱𑒢𑓂𑒞𑒰-𑒤𑒱𑒏𑒱𑒩𑒮𑒿 𑒯𑒼𑒃𑒞 𑒕𑒻𑒏 𑒋𑒏𑒩 𑒁𑒙𑒻𑒏। 𑒋𑒞𑒋 𑒛𑒰𑒏𑒛𑒩 𑒮𑒦 𑒩𑒯𑒻, 𑒧𑒰𑒩𑒫𑒰𑒛𑓃𑒲 𑒥𑒰𑒿𑒔𑒱 𑒑𑒹𑒪। 𑒑𑒰𑒧𑒧𑒹 𑒠𑒹𑒩𑒲 𑒦𑒹𑒢𑒹 𑒖𑒰𑒢 𑒢𑒻 𑒥𑒔𑒻 𑒕𑒻। 𑒞𑒹𑒿 𑒢𑒹 𑒯𑒧𑒯𑒴𑒿 𑒋𑒯𑒱 𑒥𑒳𑒜𑓃𑒰𑒩𑒲𑒧𑒹 𑒥𑒹𑒙𑒹 𑒣𑒳𑒞𑒼𑒯𑒳 𑒪𑒑 𑒗𑓀𑒗𑒰𑒩𑒣𑒳𑒩𑒧𑒹 𑒩𑒯𑒱 𑒩𑒯𑒪 𑒕𑒲।
𑓙
𑒑𑒰𑒧 𑒁𑒕𑒱 𑒧𑒯𑒱𑒮𑒥𑒰𑒩 𑒥𑓂𑒩𑒰𑒯𑓂𑒧𑒝𑒏 𑒑𑒰𑒧। 𑒮𑒳𑒐𑒩𑒰𑒞𑒱𑒏 𑒠𑒱𑒢 𑒯𑒴𑒛𑓃𑒰-𑒯𑒴𑒛𑓃𑒲𑒏 𑒐𑒹𑒪 𑒖𑒹 𑒋𑒯𑒱 𑒧𑒯𑒱𑒮𑒥𑒰𑒛𑓃 𑒥𑓂𑒩𑒰𑒯𑓂𑒧𑒝 𑒮𑒦𑒏 𑒠𑒹𑒐𑒪𑒯𑒳𑒿 𑒞𑒿 𑒣𑒼𑒪𑒼𑒏 𑒐𑒹𑒪𑒧𑒹 𑒏𑒼𑒢𑒼 𑒩𑒳𑒔𑒱 𑒢𑒻 𑒩𑒯𑒪। 𑒮𑒧𑒱𑒨𑒰𑒏 𑒛𑒼𑒧𑒮𑒿 𑒏𑒲𑒢𑒪 𑒮𑒳𑒑𑓂𑒑𑒩𑒏𑒹𑒿 𑒦𑒰𑒿𑒑 𑒣𑒱𑒂𑒋 𑒧𑒰𑒞𑒪 𑒧𑒯𑒲𑒮 𑒠𑓂𑒫𑒰𑒩𑒰 𑒯𑒴𑒛𑓃𑒰 𑒪𑒹𑒥।
𑒔𑒩𑒥𑒰𑒯 𑒖𑒹 𑒧𑒯𑒲𑒮𑒏 𑒣𑒯𑒳𑒪𑒰𑒚 𑒣𑒏𑒛𑓃𑒱 𑒏𑒪𑒰𑒏𑒰𑒩𑒲𑒮𑒿 𑒥𑒻𑒮𑒪 𑒕𑒪 𑒮𑒹𑒯𑒼 𑒁𑒠𑓂𑒦𑒳𑒞𑒹। 𑒛𑒼𑒧𑒏 𑒏𑒰𑒖 𑒣𑒰𑒥𑒢𑒱-𑒞𑒱𑒯𑒰𑒩𑒧𑒹 𑒞𑒿 𑒯𑒼𑒃𑒞𑒹 𑒁𑒕𑒱। 𑒣𑒹𑒙𑒰𑒩 𑒥𑒢𑒹𑒥𑒰𑒮𑒿 𑒮𑒴𑒣, 𑒥𑒲𑒁𑒢𑒱 𑒮𑒦 𑒏𑒱𑒕𑒳 𑒥𑒢𑒹𑒥𑒰𑒧𑒹 𑒛𑒼𑒧𑒏 𑒏𑒰𑒖 𑒂 𑒣𑒰𑒯𑒳𑒢 𑒣𑒩𑒐 𑒪𑒹𑒪 𑒂 𑒥𑒩𑒱𑒨𑒰𑒞𑒲 𑒪𑒹𑒪 𑒖𑒹 𑒐𑒮𑓂𑒮𑒲 𑒏𑒰𑒙𑒪 𑒖𑒰𑒋𑒞 𑒞𑒰𑒯𑒱 𑒪𑒹𑒪 𑒧𑒱𑒂𑒿𑒙𑒼𑒪𑒲𑒏 𑒏𑒰𑒖। 𑒐𑒮𑓂𑒮𑒲𑒏 𑒧𑒴𑒛𑓃𑒰 𑒠𑒳𑒩𑓂𑒑𑒰𑒣𑒴𑒖𑒰𑒏 𑒥𑒪𑒱𑒧𑒹 𑒏𑒧𑒱𑒙𑒲 𑒪𑓄 𑒪𑒻𑒞 𑒁𑒕𑒱।
𑒡𑒳𑒩 𑒏𑒞𑒋 𑒦𑒰𑒿𑒮𑒱 𑒑𑒹𑒪𑒯𑒳𑒿।
𑒮𑒹 𑒧𑒱𑒂𑒿 𑒖𑒹 𑒐𑒮𑓂𑒮𑒲 𑒏𑒰𑒙𑒻𑒞 𑒁𑒕𑒱 𑒮𑒹 𑒯𑒪𑒰𑒪 𑒏𑓄 𑒏𑓄। 𑒑𑒩𑒠𑒢𑒱 𑒁𑒠𑒯𑒰 𑒪𑒙𑒏𑒪𑒹 𑒩𑒯𑒻𑒞 𑒕𑒻, 𑒧𑒳𑒠𑒰 𑒧𑒰𑒅𑒮 𑒥𑒢𑒰-𑒮𑒼𑒢𑒰 𑒏𑓄 𑒑𑒩𑒠𑒢𑒱 𑒪𑓄 𑒖𑒰𑒃𑒨𑒹 𑒂 𑒐𑒪𑒩𑒰 𑒮𑒹𑒯𑒼। 𑒞𑒐𑒢 𑒧𑒯𑒱𑒮𑒥𑒰𑒩 𑒥𑓂𑒩𑒰𑒯𑓂𑒧𑒝𑒧𑒹 𑒮𑒿 𑒖𑒹 𑒯𑒢𑒳𑒧𑒰𑒢𑒖𑒲 𑒧𑒢𑓂𑒠𑒱𑒩𑒣𑒩 𑒦𑒖𑒢 𑒂 𑒁𑒭𑓂𑒙𑒖𑒰𑒧 𑒏𑒩𑒻𑒞 𑒕𑒟𑒱 𑒮𑒹 𑒍𑒯𑒲 𑒐𑒪𑒩𑒰𑒮𑒿 𑒥𑒢𑒪 𑒜𑒼𑒪𑒏 𑒏𑒱𑒢𑒻𑒞 𑒕𑒟𑒱। 𑒂 𑒮𑒹 𑒏𑒲𑒩𑓂𑒞𑒢 𑒦𑒃𑒨𑒼 𑒩𑒯𑒪 𑒕𑒪।
𑒮𑒱𑒠𑓂𑒡 𑒧𑒯𑒰𑒫𑒲𑒩𑒖𑒲𑒏 𑒧𑒢𑓂𑒠𑒱𑒩𑒏 𑒂𑒑𑒰𑒿। 𑒩𑒰𑒧𑒢𑒫𑒧𑒲 𑒠𑒱𑒢 𑒑𑒰𑒛𑓃𑒪 𑒥𑒛𑓃𑒏𑒰 𑒡𑒳𑒖𑒰। 𑒙𑒢𑒙𑒢𑒰𑒃𑒞 𑒒𑒛𑓃𑒲𑒒𑒝𑓂𑒙 𑒂𑒏𑒱 𑒂𑒩 𑒏𑒱𑒕𑒳। 𑒯𑒢𑒳𑒧𑒰𑒢𑒖𑒲𑒏 𑒡𑒴𑒖𑒰 𑒤𑒯𑒩𑒰 𑒩𑒯𑒪 𑒁𑒕𑒱। 𑒮𑒰𑒿𑒗𑒏 𑒏𑒰𑒪। 𑒧𑒯𑒱𑒮𑒥𑒰𑒩 𑒮𑒦𑒏 𑒂𑒑𑒧 𑒦𑓄 𑒑𑒹𑒪 𑒁𑒕𑒱। 𑒏𑒼𑒢𑒼 𑒣𑒰𑒥𑒢𑒱 𑒯𑒳𑒁𑒋, 𑒯𑒴𑒛𑓃𑒰𑒯𑒴𑒛𑓃𑒲 𑒂𑒏𑒱 𑒩𑒰𑒧𑒢𑒫𑒧𑒲 𑒮𑒱𑒠𑓂𑒡 𑒯𑒢𑒳𑒧𑒰𑒢𑒖𑒲𑒏 𑒂𑒑𑒰𑒿 𑒏𑒲𑒩𑓂𑒞𑒢 𑒯𑒼𑒃𑒞𑒹 𑒁𑒕𑒱। 𑒮𑒹 𑒥𑒰𑒥𑒴 𑒑𑒾𑒿𑒂𑒏 𑒬𑓂𑒩𑒠𑓂𑒡𑒰𑒏 𑒑𑒣 𑒕𑒱𑒌। 𑒮𑒹 𑒂𑒃𑒨𑒼 𑒦𑓄 𑒩𑒯𑒪 𑒁𑒕𑒱।
𑒒𑒴𑒩𑒏 𑒡𑒳𑒿𑒂 𑒧𑒰𑒪 𑒥𑒱𑒚𑒾𑒩𑒲𑒏𑒹𑒿 𑒧𑒰𑒪𑒏 𑒠𑒹𑒯𑒮𑒿 𑒁𑒪𑒑 𑒏𑒩𑒥𑒰𑒏 𑒣𑓂𑒩𑒨𑒰𑒮𑒧𑒹 𑒁𑒕𑒱। 𑒋𑒏 𑒑𑒼𑒙𑒹𑒏 𑒮𑓀𑒑 𑒠𑒼𑒮𑒩 𑒑𑒼𑒙𑒹 𑒁𑒋𑒪 𑒕𑒟𑒱, 𑒮𑒣𑓂𑒣𑒞 𑒐𑒋𑒥𑒰𑒏 𑒪𑒹𑒪। 𑒯𑒢𑒳𑒧𑒰𑒢𑒖𑒲𑒏 𑒧𑒢𑓂𑒠𑒱𑒩 𑒑𑒾𑒿𑒂 𑒮𑒦 𑒣𑓂𑒪𑒰𑒮𑓂𑒙𑒩 𑒏𑒩𑒥𑒰 𑒠𑒹𑒢𑒹 𑒕𑒟𑒱। 𑒜𑒪𑒻𑒨𑓂𑒨𑒰 𑒮𑒹𑒯𑒼 𑒦𑓄 𑒑𑒹𑒪 𑒁𑒕𑒱। 𑒧𑒢𑓂𑒠𑒱𑒩𑒏 𑒥𑒩𑒝𑓂𑒛𑒰 𑒕𑒴𑒥𑒱 𑒏𑓄 𑒇𑒝 𑒣𑒔𑒹𑒢𑒯𑒰𑒩𑒏 𑒮𑓀𑒐𑓂𑒨𑒰 𑒢𑒑𑒝𑓂𑒨, 𑒞𑒻𑒨𑒼 𑒋𑒏𑒙𑒰 𑒁𑒣𑒫𑒰𑒠 𑒞𑒿 𑒁𑒕𑒱𑒨𑒹- 𑒍 𑒏𑒯𑒻 𑒕𑒟𑒱- 𑒮𑒣𑓂𑒣𑒞 𑒞𑒿 𑒞𑒼𑒛𑓃𑒥𑒰 𑒪𑒹𑒪 𑒐𑒰𑒋𑒪 𑒖𑒰𑒃 𑒕𑒻। 𑒯𑒿 𑒦𑒰𑒃, 𑒋𑒏 𑒥𑒹𑒩 𑒮𑒣𑓂𑒣𑒞 𑒐𑒹𑒢𑒹 𑒖𑒹 𑒇𑒝𑒮𑒿 𑒫𑒱𑒧𑒳𑒏𑓂𑒞𑒱 𑒦𑒹𑒙𑒱 𑒖𑒰𑒋 𑒞𑒿 𑒯𑒩𑓂𑒖𑒹 𑒏𑒼𑒢। 𑒧𑒳𑒠𑒰 𑒋𑒏𑒹𑒙𑒰 𑒁𑒣𑒫𑒰𑒠। 𑒁𑒢𑒧𑒰𑒢𑒰 𑒠𑒲𑒠𑒲𑒏𑒹𑒿 𑒂𑒥 𑒮𑒦 𑒁𑒢𑒧𑒰𑒢𑒰 𑒥𑒰𑒥𑒰 𑒮𑒹𑒯𑒼 𑒏𑒯𑒻𑒞 𑒕𑒢𑓂𑒯𑒱। 𑒏𑒋𑒏 𑒥𑒩𑒐 𑒦𑒹𑒪 𑒧𑒳𑒃𑒢𑒰 𑒯𑒳𑒢𑒏𑒩। 𑒒𑒳𑒩𑒱 𑒏𑓄 𑒢𑒯𑒱𑒨𑒹 𑒁𑒋𑒪𑒲𑒯। 𑒦𑒰𑒞𑒱𑒖𑒏 𑒒𑒩𑒰𑒩𑒲𑒏 𑒠𑒼𑒭 𑒢𑒱𑒫𑒰𑒩𑒝𑒰𑒩𑓂𑒟 𑒏𑒼𑒢𑒼 𑒣𑓀𑒛𑒱𑒞𑒏 𑒏𑒯𑒪𑒰𑒣𑒩 𑒐𑒳𑒙𑓂𑒙𑒰𑒣𑒩 𑒋𑒏𑒙𑒰 𑒑𑒰𑒋 𑒥𑒰𑒢𑓂𑒯𑒱 𑒠𑒹𑒪 𑒑𑒹𑒪 𑒕𑒻, 𑒖𑒏𑒩𑒰 𑒋𑒢𑒯𑒰𑒩-𑒑𑒹𑒢𑒯𑒰𑒩 𑒮𑒠𑒱𑒐𑒢 𑒒𑒰𑒮 𑒐𑒰𑒃𑒞 𑒠𑒹𑒐𑒻𑒞 𑒕𑒟𑒱, 𑒞𑒯𑒱𑒮𑒿 𑒒𑒩𑒰𑒩𑒲𑒏𑒹𑒿 𑒢𑒖𑒩𑒱-𑒑𑒳𑒖𑒩𑒱 𑒢𑒻 𑒪𑒑𑒞𑒻𑒏।
𑒯𑒢𑒳𑒧𑒰𑒢𑒖𑒲𑒏 𑒡𑒳𑒖𑒰 𑒤𑒯𑒩𑒰 𑒩𑒯𑒪 𑒁𑒕𑒱। 𑒮𑒰𑒿𑒗𑒏 𑒏𑒰𑒪। 𑒑𑒼𑒢𑒩 𑒦𑒰𑒋 𑒏𑒲𑒩𑓂𑒞𑒢𑒧𑒹 𑒜𑒼𑒪𑒏𑒏 𑒟𑒰𑒣𑒣𑒩 𑒟𑒰𑒣 𑒪𑒑𑒰 𑒩𑒯𑒪 𑒕𑒟𑒱।
𑒁𑒢𑒧𑒰𑒢𑒰 𑒥𑒰𑒥𑒰𑒏 𑒑𑒣 𑒂𑒥 𑒏𑒱𑒕𑒳 𑒪𑒼𑒏𑒼 𑒮𑒦 𑒧𑒰𑒢𑒪𑒏। 𑒚𑒲𑒏𑒹। 𑒯𑒢𑒳𑒧𑒰𑒢𑒖𑒲𑒏 𑒧𑒴𑒩𑓂𑒞𑒱𑒏 𑒂𑒑𑒰𑒿 𑒦𑒏𑓂𑒞 𑒠𑒴𑒙𑒰 𑒑𑒼𑒪 𑒥𑒢𑒱 𑒑𑒹𑒪 𑒁𑒕𑒱। 𑒋𑒏 𑒑𑒼𑒪𑒏 𑒫𑒱𑒔𑒰𑒩 𑒏𑒢𑒹𑒏 𑒫𑒻𑒖𑓂𑒘𑒰𑒢𑒱𑒏 𑒕𑒻𑒏- 𑒁𑒢𑒧𑒰𑒢𑒰 𑒠𑒲𑒠𑒲 𑒖𑒹 𑒥𑒰𑒿𑒔𑒪 𑒠𑒮 𑒏𑒙𑓂𑒚𑒰𑒏 𑒩𑒖𑒱𑒮𑓂𑒙𑓂𑒩𑒲 𑒏𑓄 𑒠𑒹𑒪𑒐𑒱𑒢𑓂𑒯 𑒮𑒋𑒯 𑒢𑒹 𑒣𑒻𑒮𑒰 𑒠𑒹𑒪𑒏𑒻 𑒔𑒱𑒢𑓂𑒞𑒰-𑒤𑒱𑒏𑒱𑒩 𑒦𑒰𑒞𑒱𑒖𑒏 𑒕𑒰𑒞𑒲𑒧𑒹। 𑒢𑒻 𑒮𑒧𑓂𑒯𑒰𑒩𑒱 𑒮𑒏𑒪 𑒁𑒢𑒧𑒰𑒢𑒰 𑒠𑒲𑒠𑒲𑒏 𑒄 𑒂𑒏𑓂𑒩𑒧𑒝 𑒍। 𑒚𑒲𑒏𑒹 𑒣𑒰𑒟𑒩𑒧𑒹 𑒏𑒼𑒢𑒼 𑒬𑒏𑓂𑒞𑒱 𑒟𑒼𑒛𑓃𑒥𑒹𑒏 𑒯𑒼𑒃 𑒕𑒻। 𑒧𑒳𑒠𑒰 𑒠𑒼𑒮𑒩 𑒑𑒼𑒪 𑒧𑒯𑒰𑒫𑒲𑒩 𑒯𑒢𑒳𑒧𑒰𑒢𑒖𑒲𑒏 𑒮𑒱𑒠𑓂𑒡 𑒂 𑒖𑒰𑒑𑒵𑒞 𑒯𑒼𑒋𑒥𑒰𑒧𑒹 𑒫𑒱𑒬𑓂𑒫𑒰𑒮 𑒏𑓄 𑒩𑒯𑒪 𑒁𑒕𑒱- 𑒨𑒾, 𑒔𑒳𑒙𑓂𑒙𑒲𑒏𑒹𑒿 𑒧𑒰𑒙𑒱 𑒠𑓄 𑒠𑒱𑒨𑒾 𑒞𑒿 𑒍𑒯𑒼 𑒧𑒛𑓃𑒱 𑒖𑒰𑒋𑒞 𑒧𑒳𑒠𑒰 𑒥𑒱𑒏𑒳𑒙𑒱 𑒏𑓄 𑒖𑒹 𑒏𑒰𑒙𑒞 𑒮𑒹 𑒕𑒼𑒛𑓃𑒞 𑒢𑒻। 𑒂 𑒄 𑒧𑒰𑒙𑒱 𑒁𑒢𑒧𑒢𑒰 𑒠𑒲𑒠𑒲 𑒧𑒯𑒰𑒫𑒲𑒩𑒖𑒲 𑒏𑒹𑒿 𑒠𑒹𑒪𑒐𑒱𑒢𑓂𑒯 𑒞𑒿 𑒍 𑒏𑒼𑒢𑒰 𑒕𑒼𑒛𑓃𑒱 𑒠𑒱𑒞𑒟𑒱𑒢𑓂𑒯।
𑒑𑒼𑒢𑒩 𑒦𑒰𑒋 𑒏𑒲𑒩𑓂𑒞𑒢𑒧𑒹 𑒜𑒼𑒪𑒏𑒣𑒩 𑒟𑒰𑒣𑒣𑒩 𑒟𑒰𑒣 𑒪𑒑𑒰 𑒩𑒯𑒪 𑒕𑒟𑒱, 𑒥𑒳𑒗𑒴 𑒮𑒱𑒠𑓂𑒡 𑒧𑒯𑒰𑒥𑒲𑒩𑒖𑒲𑒏𑒹𑒿 𑒧𑒢𑒰𑒃𑒨𑒹 𑒏𑓄 𑒕𑒼𑒛𑓃𑒞𑒰𑒯, 𑒦𑒰𑒿𑒑𑒏 𑒑𑒼𑒪𑒰 𑒁𑒮𑒩𑒱 𑒏𑓄 𑒩𑒯𑒪 𑒕𑒢𑓂𑒯𑒱, 𑒂𑒿𑒐𑒱 𑒞𑒿 𑒔𑒜𑓃𑒪𑒹 𑒕𑒢𑓂𑒯𑒱, 𑒯𑒰𑒟 𑒮𑒹𑒯𑒼 𑒩𑒳𑒏𑒻 𑒏𑓄 𑒢𑒰𑒧 𑒢𑒻 𑒪𑓄 𑒩𑒯𑒪 𑒕𑒢𑓂𑒯𑒱, 𑒂 𑒯𑒳𑒢𑒏𑒩 𑒢𑒖𑒩𑒱𑒮𑒿 𑒠𑒹𑒐𑒲 𑒞𑒿 𑒮𑒱𑒠𑓂𑒡 𑒧𑒯𑒰𑒫𑒲𑒩𑒏 𑒣𑒰𑒟𑒩𑒏 𑒧𑒳𑒩𑒳𑒞 𑒖𑒰𑒑𑒵𑒞 𑒦𑓄 𑒑𑒹𑒪 𑒠𑒹𑒐𑒰 𑒣𑒛𑓃𑒞, 𑒖𑒹𑒢𑒰 𑒍𑒯𑒱𑒧𑒹 𑒖𑒰𑒢 𑒂𑒥𑒱 𑒑𑒹𑒪 𑒯𑒼!




























𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂
(𑒄 𑒏𑒟𑒰 “𑒖𑒐𑒢 𑒞𑒐𑒢” 𑒣𑒞𑓂𑒩𑒱𑒏𑒰 𑒂 “𑒏𑒟𑒰 𑒣𑒰𑒩𑒮” 𑒏𑒟𑒰 𑒮𑓀𑒏𑒪𑒢𑒧𑒹 𑒕𑒣𑒪 𑒁𑒕𑒱, 𑒧𑒳𑒠𑒰 𑒠𑒳𑒢𑒴 𑒚𑒰𑒧 𑒮𑓀𑒏𑒲𑒩𑓂𑒝 𑒖𑒰𑒞𑒱𑒫𑒰𑒠𑒲 𑒧𑒰𑒢𑒮𑒱𑒏𑒞𑒰𑒥𑒪𑒰 𑒮𑒧𑓂𑒣𑒰𑒠𑒏 𑒪𑒼𑒏𑒢𑒱 𑒋𑒏𑒩 𑒏𑒱𑒕𑒳 𑒧𑒯𑒞𑓂𑒫𑒣𑒴𑒩𑓂𑒝 𑒦𑒰𑒑 𑒏𑒰𑒙𑒱 𑒠𑒹𑒢𑒹 𑒕𑒟𑒱। 𑒋𑒞𑓄 𑒮𑒧𑓂𑒣𑒴𑒩𑓂𑒝 𑒏𑒟𑒰 𑒁𑒫𑒱𑒏𑒪 𑒩𑒴𑒣𑒧𑒹 𑒠𑒹𑒪 𑒖𑒰 𑒩𑒯𑒪 𑒁𑒕𑒱।)
𑒮𑒱𑓀𑒯 𑒩𑒰𑒬𑒱𑒧𑒹 𑒮𑒴𑒩𑓂𑒨, 𑒧𑒼𑒙𑒰-𑒧𑒼𑒙𑒲 𑒮𑒼𑒪𑒯 𑒁𑒑𑒮𑓂𑒞 𑒮𑒿 𑒮𑒼𑒪𑒯 𑒮𑒱𑒞𑒧𑓂𑒥𑒩 𑒡𑒩𑒱। 𑒏𑒱𑒕𑒳 𑒮𑒳𑒐𑒹𑒥𑒰𑒏 𑒯𑒼𑒁𑒋 𑒞𑒿 𑒮𑒦𑒮𑒿 𑒏𑒛𑓃𑒰 𑒩𑒾𑒠। 𑒮𑒱𑓀𑒯 𑒩𑒰𑒬𑒱𑒧𑒹 𑒧𑒱𑒞𑒴𑒏 𑒣𑒱𑒞𑒰𑒏 𑒞𑒰𑒪𑒣𑒞𑓂𑒩 𑒮𑒦 𑒣𑒮𑒩𑒪 𑒩𑒯𑒻𑒞 𑒕𑒪, 𑒫𑒰𑒩𑓂𑒭𑒱𑒏 𑒣𑒩𑒱𑒩𑒏𑓂𑒭𑒝 𑒨𑒼𑒖𑒢𑒰, 𑒖𑒹 𑒋𑒯𑒱 𑒞𑒰𑒪𑒣𑒞𑓂𑒩 𑒮𑒦𑒧𑒹 𑒖𑒰𑒢 𑒤𑒳𑒏𑒻𑒞 𑒕𑒪। 𑒂𑒢𑒢𑓂𑒠𑒰 𑒧𑒱𑒞𑒴𑒏 𑒣𑒱𑒞𑒰𑒖𑒲𑒏 𑒋𑒯𑒱 𑒞𑒰𑒪𑒣𑒞𑓂𑒩 𑒮𑒦𑒏 𑒣𑒩𑒱𑒩𑒏𑓂𑒭𑒝 𑒧𑒢𑒼𑒨𑒼𑒑𑒮𑒿 𑒏𑒩𑒻𑒞 𑒩𑒯𑒟𑒱। 𑒏𑒛𑓃𑒑𑒩 𑒩𑒾𑒠𑒧𑒹 𑒞𑒰𑒪𑒣𑒞𑓂𑒩 𑒣𑒮𑒰𑒩𑒻𑒞 𑒂𑒢𑒢𑓂𑒠𑒰, 𑒧𑒱𑒞𑒴𑒏𑒹𑒿 𑒍𑒯𑒱𑒢𑒰 𑒧𑒼𑒢 𑒕𑒢𑓂𑒯𑒱। 𑒧𑒱𑒞𑒴 𑒮𑓀𑒑 𑒖𑒱𑒢𑒑𑒲 𑒥𑒲𑒞𑒱 𑒑𑒹𑒪𑒢𑓂𑒯𑒱 𑒂𑒢𑒢𑓂𑒠𑒰𑒏। 𑒧𑒳𑒠𑒰 𑒋𑒯𑒱 𑒥𑒩𑒐𑒏 𑒮𑒱𑓀𑒯𑒩𑒰𑒬𑒱 𑒁𑒋𑒪𑒰𑒮𑒿 𑒣𑒴𑒩𑓂𑒫𑒯𑒱 𑒂𑒢𑒢𑓂𑒠𑒰 𑒔𑒪𑒱 𑒑𑒹𑒪𑒲𑒯... 𑒂 𑒂𑒥 𑒖𑒐𑒢 𑒍 𑒢𑒻 𑒕𑒟𑒱 𑒞𑒐𑒢 𑒖𑒲𑒫𑒢𑒏 𑒣𑒩𑒱𑒩𑒏𑓂𑒭𑒝 𑒏𑒼𑒢𑒰 𑒯𑒼𑒋𑒞। 𑒧𑒱𑒞𑒴𑒏 𑒂 𑒍𑒯𑒱 𑒞𑒰𑒪𑒣𑒞𑓂𑒩 𑒮𑒦𑒏 𑒖𑒲𑒫𑒢𑒏..
𑒦𑓂𑒩𑒧। 𑒬𑒥𑓂𑒠𑒏 𑒦𑓂𑒩𑒧। 𑒬𑒥𑓂𑒠𑒏 𑒁𑒩𑓂𑒟 𑒯𑒧 𑒮𑒦 𑒑𑒜𑓃𑒱 𑒪𑒻𑒞 𑒕𑒲। 𑒂 𑒤𑒹𑒩 𑒦𑓂𑒩𑒧 𑒬𑒳𑒩𑒴 𑒦𑓄 𑒖𑒰𑒃𑒞 𑒁𑒕𑒱।

𑒪𑒳𑒏𑒹𑒮𑒩𑒲 𑒁𑒿𑒑𑒢𑒰 𑒔𑒰𑒢𑒢 𑒒𑒢 𑒑𑒕𑒱𑒨𑒰
𑒞𑒯𑒱 𑒞𑒩 𑒏𑒼𑒃𑒪𑒲 𑒒𑓄𑒧𑒔𑒰𑒢 𑒯𑒹
𑒏𑒙𑒥𑒻 𑒔𑒢𑒢 𑒑𑒰𑒕, 𑒥𑒹𑒜𑓃𑒥𑒻 𑒁𑒿𑒑𑒢𑒧𑒰
𑒕𑒳𑒙𑒱 𑒖𑒹𑒞𑓄 𑒏𑒼𑒃𑒪𑒲 𑒒𑓄𑒧𑒔𑒰𑒢 𑒯𑒹
𑒏𑒰𑒢𑓄 𑒪𑒑𑒪𑒲 𑒐𑒲𑒖𑓄 𑒪𑒰𑒑𑒪, 𑒥𑒼𑒢 𑒏𑒹 𑒏𑒼𑒃𑒪𑒱𑒨𑒰
𑒙𑒴𑒙𑒱 𑒑𑒹𑒪𑓄 𑒏𑒼𑒃𑒪𑒲 𑒒𑓄𑒧𑒔𑒰𑒢 𑒯𑒹
𑒖𑒰𑒢𑒴 𑒏𑒰𑒢𑒴 𑒖𑒰𑒢𑒴 𑒏𑒲, 𑒖𑒼𑒥𑒼𑒢 𑒏𑒹 𑒏𑒼𑒃𑒪𑒱𑒨𑒰
𑒁𑒯𑒱 𑒖𑒹𑒞𑓄 𑒏𑒼𑒃𑒪𑒲 𑒒𑓄𑒧𑒔𑒰𑒢 𑒯𑒹
𑒖𑒯𑒱 𑒥𑒼𑒢 𑒖𑒹𑒥𑓄 𑒏𑒼𑒃𑒪𑒲
𑒩𑒯𑒱 𑒖𑒹𑒞 𑒞𑓄 𑒢𑒱𑒬𑒢𑒧𑒰
𑒖𑒢𑒴 𑒗𑒩𑒴 𑒢𑒨𑒢𑒰 𑒮𑒹 𑒪𑒼𑒩 𑒯𑒹
𑒮𑒼𑒢𑒹 𑒮𑒹 𑒧𑒹𑒜𑓃𑒰𑒨𑒹𑒥 𑒏𑒼𑒃𑒪𑒲 𑒞𑒼𑒩𑒼 𑒠𑒳𑒢𑒴 𑒣𑒿𑒐𑒱𑒨𑒰
𑒩𑒴𑒣𑒹 𑒮𑒹 𑒧𑒹𑒩𑒰𑒨𑒹𑒥 𑒠𑒳𑒢𑒴 𑒚𑒼𑒩 𑒯𑒹
𑒖𑒰𑒯𑒹 𑒥𑒼𑒢 𑒖𑒹𑒥𑓄 𑒏𑒼𑒃𑒪𑒲 𑒩𑒳𑒢𑒗𑒳𑒢𑒳 𑒥𑒰𑒪𑒧
𑒩𑒯𑒱 𑒖𑒹𑒞𑓄 𑒩𑒏𑒞𑒧𑒰𑒪𑒰 𑒏𑒹 𑒢𑒱𑒬𑒰𑒢 𑒯𑒹

𑒏𑒼𑒢𑒼 𑒨𑒳𑒫𑒞𑒲𑒏 𑒁𑒥𑒰𑒖 𑒔𑒩𑓂𑒧𑒏𑒰𑒩 𑒙𑒼𑒪𑒮𑒿 𑒁𑒥𑒻𑒞 𑒥𑒳𑒗𑒢𑒰 𑒑𑒹𑒪..𑒂𑒢𑒢𑓂𑒠𑒰𑒏 𑒁𑒥𑒰𑒖।
𑒧𑒳𑒠𑒰 𑒂𑒢𑒢𑓂𑒠𑒰 𑒞𑒿 𑒔𑒪𑒱 𑒑𑒹𑒪𑒲, 𑒏𑒢𑒱𑒨𑒹 𑒏𑒰𑒪 𑒣𑒯𑒱𑒢𑒹 𑒍𑒏𑒩 𑒪𑒯𑒰𑒬 𑒠𑒹𑒐𑒱 𑒂𑒋𑒪 𑒕𑒟𑒱 𑒥𑒔𑒪𑒴। 𑒧𑒱𑒞𑒴𑒏𑒹𑒿 𑒮𑒧𑒰𑒔𑒰𑒩 𑒏𑒯𑒱 𑒛𑒼𑒧𑒰𑒮𑒲 𑒒𑒳𑒩𑒱 𑒑𑒹𑒪 𑒕𑒟𑒱। 𑒂 𑒂𑒢𑒢𑓂𑒠𑒰, 𑒍 𑒞𑒿 𑒥𑒴𑒜𑓃 𑒦𑓄 𑒧𑒩𑒪𑒲𑒯𑒹𑒿। 𑒞𑒐𑒢 𑒄 𑒁𑒥𑒰𑒖, 𑒨𑒳𑒫𑒞𑒲 𑒂𑒢𑒢𑓂𑒠𑒰𑒏। 𑒦𑓂𑒩𑒧। 𑒬𑒥𑓂𑒠𑒏 𑒦𑓂𑒩𑒧। 𑒏𑒯𑒻𑒞 𑒩𑒯𑒟𑒱 𑒧𑒱𑒞𑒴𑒏 𑒣𑒱𑒞𑒰 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏 𑒧𑒰𑒩𑒞𑒹 𑒩𑒰𑒮 𑒑𑒣 𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂 𑒣𑒩। 𑒬𑒥𑓂𑒠𑒏 𑒁𑒩𑓂𑒟 𑒯𑒧 𑒮𑒦 𑒑𑒜𑓃𑒱 𑒪𑒻𑒞 𑒕𑒲। 𑒂 𑒤𑒹𑒩 𑒦𑓂𑒩𑒧 𑒬𑒳𑒩𑒴 𑒦𑓄 𑒖𑒰𑒃𑒞 𑒁𑒕𑒱।

I
𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂

𑒑𑒩𑓂𑒠𑒧 𑒑𑒼𑒪 𑒦𑒹𑒪 𑒕𑒪।
𑒁𑒢𑒒𑒼𑒪 𑒧𑒔𑒱 𑒑𑒹𑒪 𑒕𑒪𑒻। 𑒥𑒪𑒰𑒢 𑒡𑒰𑒩𑒧𑒹 𑒏𑒼𑒢𑒼 𑒪𑒯𑒰𑒬 𑒥𑒯𑒪 𑒔𑒪𑒱 𑒖𑒰 𑒩𑒯𑒪 𑒕𑒪। 𑒡𑒼𑒥𑒱𑒨𑒰𑒒𑒰𑒙 𑒪𑒑 𑒏𑒰𑒞 𑒪𑒰𑒑𑒪 𑒕𑒪।
𑒏𑒞𑒹𑒏 𑒠𑒴𑒩𑒮𑒿 𑒂𑒋𑒪 𑒕𑒪 𑒮𑒹 𑒢𑒻 𑒖𑒰𑒢𑒱। 𑒏𑒼𑒢𑒼 𑒥𑒋𑒮𑒑𑒩 𑒧𑒯𑒱𑒪𑒰𑒏 𑒪𑒯𑒰𑒬 𑒕𑒪। 𑒡𑒼𑒥𑒱𑒢 𑒪𑒯𑒰𑒬𑒏𑒹𑒿 𑒔𑒲𑒢𑓂𑒯𑒱 𑒑𑒹𑒪 𑒩𑒯𑒟𑒱। 𑒑𑒾𑒂𑒿𑒏𑒹𑒿 𑒏𑒯𑒱 𑒠𑒻 𑒕𑒟𑒱 𑒍𑒏𑒩 𑒢𑒰𑒧 𑒂 𑒣𑒞𑒰। 𑒑𑒾𑒂𑒿 𑒏𑒹, 𑒍𑒯𑒱 𑒑𑒰𑒧𑒏 𑒛𑒼𑒧𑒰𑒮𑒲𑒏 𑒥𑒔𑒪𑒴𑒏𑒹𑒿। 𑒧𑒵𑒞𑒏𑒏 𑒒𑒩𑒧𑒹 𑒐𑒥𑒩𑒱 𑒦𑓄 𑒑𑒹𑒪 𑒕𑒪𑒻। 𑒋𑒮𑒏𑒩𑒹 𑒋𑒏𑒙𑒰 𑒥𑒳𑒜𑓃𑒰 𑒩𑒯𑒻𑒋 𑒍𑒯𑒱 𑒒𑒩𑒧𑒹...𑒧𑒱𑒞𑒴।
𑒧𑒱𑒞𑒴𑒏 𑒙𑒼𑒪𑒥𑒻𑒨𑒰 𑒑𑒾𑒿𑒂 𑒮𑒦 𑒪𑒯𑒰𑒬𑒏𑒹𑒿 𑒛𑒲𑒯𑒣𑒩 𑒂𑒢𑒱 𑒪𑒹𑒢𑒹 𑒕𑒪 𑒂 𑒤𑒹𑒩 𑒧𑒱𑒞𑒴 𑒍𑒏𑒩 𑒠𑒰𑒯-𑒮𑓀𑒮𑓂𑒏𑒰𑒩 𑒏𑓄 𑒠𑒹𑒢𑒹 𑒩𑒯𑒟𑒱।
𑒑𑒰𑒧𑒧𑒹 𑒁𑒯𑒲 𑒑𑒣𑒏 𑒔𑒩𑓂𑒔𑒰 𑒩𑒯𑒻। 𑒥𑒔𑒪𑒴 𑒥𑒳𑒜𑓃𑒰𑒏𑒹𑒿 𑒥𑒳𑒗𑒪 𑒕𑒢𑓂𑒯𑒱 𑒏𑒱𑒕𑒳 𑒂𑒩 𑒑𑒣। 𑒔𑒱𑒢𑓂𑒯𑒻 𑒕𑒟𑒱 𑒍 𑒍𑒯𑒱 𑒪𑒯𑒰𑒬𑒏 𑒧𑒢𑒳𑒏𑓂𑒐𑒏𑒹𑒿। 𑒢𑒫𑒏𑒰 𑒪𑒼𑒏𑒏𑒹𑒿 𑒥𑒯𑒳𑒞 𑒩𑒰𑒮 𑒑𑒣 𑒢𑒻 𑒥𑒳𑒗𑒪 𑒕𑒻।
𑒂𑒢𑒢𑓂𑒠𑒰𑒏 𑒪𑒯𑒰𑒬..
-𑒂𑒢𑒢𑓂𑒠𑒰 𑒥𑒛𑓂𑒛 𑒢𑒲𑒏 𑒩𑒯𑒻। 𑒥𑒳𑒗𑒢𑒳𑒏। 𑒍𑒏𑒩 𑒥𑒔𑒱𑒨𑒰 𑒮𑒦 𑒮𑒦𑒙𑒰 𑒮𑒳𑒐𑒱𑒞𑒑𑒩 𑒒𑒩𑒧𑒹 𑒕𑒻..𑒥𑒹𑒙𑒰 𑒮𑒹𑒯𑒼 𑒫𑒱𑒠𑓂𑒫𑒰𑒢। 𑒧𑒱𑒞𑒴, 𑒂𑒢𑒢𑓂𑒠𑒰𑒏 𑒫𑒩 𑒮𑒹𑒯𑒼 𑒅𑒠𑓂𑒦𑒙..𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏𑒏 𑒣𑒳𑒞𑓂𑒩..। 𑒧𑒳𑒠𑒰 𑒏𑒯𑒱𑒨𑒼 𑒧𑒱𑒞𑒴 𑒂𑒏𑒱 𑒂𑒢𑒢𑓂𑒠𑒰 𑒏𑒼𑒢𑒼 𑒐𑒑𑒞𑒰𑒧𑒹 𑒏𑒏𑒩𑒼 𑒂𑒑𑒰𑒿 𑒯𑒰𑒟 𑒢𑒻 𑒣𑒮𑒰𑒩𑒢𑒹 𑒕𑒟𑒱।
𑒥𑒔𑒪𑒴 𑒮𑒹𑒯𑒼 𑒂𑒥 𑒥𑒴𑒜𑓃 𑒦𑓄 𑒑𑒹𑒪 𑒕𑒟𑒱, 𑒗𑒳𑒢𑒏𑒳𑒙 𑒥𑒴𑒜𑓃। 𑒯𑒱𑒢𑒏𑒰𑒮𑒿 𑒣𑒻𑒒 𑒧𑒰𑒞𑓂𑒩 𑒧𑒱𑒞𑒴 𑒕𑒟𑒱𑒢𑓂𑒯। 𑒪𑒼𑒏 𑒮𑒦 𑒠𑒳𑒢𑒴 𑒑𑒼𑒙𑒹𑒏𑒹𑒿 𑒥𑒳𑒜𑓃𑒰 𑒏𑒯𑒱 𑒥𑒖𑒥𑒻 𑒕𑒢𑓂𑒯𑒱।
𑒂 𑒋𑒯𑒱 𑒥𑒔𑒪𑒴 𑒥𑒳𑒜𑓃𑒰𑒏𑒹𑒿 𑒥𑒳𑒗𑒪 𑒕𑒢𑓂𑒯𑒱 𑒜𑒹𑒩 𑒩𑒰𑒮 𑒑𑒣।
.....
𑒧𑒱𑒞𑒴 𑒂 𑒬𑓂𑒩𑒲𑒏𑒩𑒏 𑒫𑒰𑒩𑓂𑒞𑒰𑒪𑒰𑒣। 𑒏𑒱𑒕𑒳 𑒥𑒳𑒗𑒱𑒌 𑒂 𑒏𑒱𑒕𑒳 𑒢𑒻।
-𑒧𑒱𑒞𑒴। 𑒦𑒰𑒧𑒞𑒲𑒧𑒹 𑒫𑒰𑒔𑒮𑓂𑒣𑒞𑒱 𑒏𑒯𑒻 𑒕𑒟𑒱 𑒖𑒹 𑒁𑒫𑒱𑒠𑓂𑒨𑒰 𑒖𑒲𑒫𑒣𑒩 𑒂𑒬𑓂𑒩𑒱𑒞 𑒁𑒕𑒱 𑒂 𑒫𑒱𑒭𑒨 𑒥𑒢𑒱 𑒑𑒹𑒪 𑒁𑒕𑒱। 𑒂𑒞𑓂𑒧𑒮𑒰𑒏𑓂𑒭𑒰𑒞𑓂𑒏𑒰𑒩 𑒪𑒹𑒪 𑒏𑒼𑒢 𑒫𑒱𑒡𑒱 𑒮𑓂𑒫𑒲𑒏𑒰𑒩 𑒏𑒩𑒥? 𑒁𑒮𑒞𑓂𑒨 𑒏𑒟𑒴𑒏 𑒏𑒰𑒩𑒝 𑒏𑒼𑒢𑒰 𑒦𑓄 𑒮𑒏𑒞? 𑒏𑒼𑒢𑒼 𑒥𑒾𑒮𑓂𑒞𑒳𑒏 𑒮𑒞𑓂𑒞𑒰 𑒍𑒏𑒩𑒰 𑒮𑒞𑓂𑒨 𑒏𑒼𑒢𑒰 𑒥𑒢𑒰 𑒠𑒹𑒞, 𑒞𑓂𑒩𑒱𑒏𑒰𑒪𑒧𑒹 𑒍𑒏𑒩 𑒅𑒣𑒮𑓂𑒟𑒱𑒞𑒱 𑒏𑒼𑒢𑒰 𑒮𑒱𑒠𑓂𑒡 𑒏𑓄 𑒮𑒏𑒞? 𑒖𑒹 𑒥𑒾𑒮𑓂𑒞𑒳 𑒢𑒻 𑒞𑒿 𑒮𑒞𑓂𑒨 𑒁𑒕𑒱 𑒂 𑒢𑒯𑒱𑒨𑒹 𑒁𑒮𑒞𑓂𑒨 𑒂 𑒢𑒻 𑒁𑒕𑒱 𑒋𑒯𑒱 𑒠𑒳𑒢𑒴𑒏 𑒨𑒳𑒑𑓂𑒧𑒩𑒴𑒣; 𑒮𑒻𑒯 𑒁𑒕𑒱 𑒁𑒢𑒱𑒩𑓂𑒫𑒰𑒔𑓂𑒨। 𑒥𑒱𑒢𑒰 𑒏𑒼𑒢𑒼 𑒫𑒮𑓂𑒞𑒳 𑒂 𑒍𑒏𑒩 𑒖𑓂𑒘𑒰𑒢 𑒩𑒐𑒢𑒱𑒯𑒰𑒩𑒏 𑒬𑒴𑒢𑓂𑒨𑒏 𑒁𑒫𑒡𑒰𑒩𑒝𑒰 𑒏𑒼𑒢𑒰 𑒥𑒴𑒗𑓄𑒧𑒹 𑒂𑒍𑒞?
-𑒧𑒱𑒞𑒴। 𑒏𑒳𑒧𑒰𑒩𑒱𑒪 𑒏𑒯𑒻 𑒕𑒟𑒱 𑒂𑒞𑓂𑒧𑒰 𑒔𑒻𑒞𑒢𑓂𑒨 𑒖𑒛𑓃 𑒁𑒕𑒱, 𑒖𑒰𑒑𑒪𑒧𑒹 𑒥𑒼𑒡 𑒂 𑒮𑒴𑒞𑒪𑒧𑒹 𑒥𑒼𑒡𑒩𑒯𑒱𑒞।
-𑒧𑒱𑒞𑒴। 𑒦𑒰𑒧𑒞𑒲𑒧𑒹 𑒫𑒰𑒔𑒮𑓂𑒣𑒞𑒱 𑒏𑒯𑒻 𑒕𑒟𑒱 𑒖𑒹 𑒂𑒞𑓂𑒧𑒮𑒰𑒏𑓂𑒭𑒰𑒞𑓂𑒏𑒰𑒩𑒮𑒿 𑒩𑒯𑒱𑒞 𑒬𑒰𑒮𑓂𑒞𑓂𑒩𑒧𑒹 𑒏𑒳𑒬𑒪 𑒫𑓂𑒨𑒏𑓂𑒞𑒱 𑒮𑒩-𑒮𑒧𑒰𑒖𑒮𑒿 𑒣𑒬𑒳𑒫𑒞 𑒫𑓂𑒨𑒫𑒯𑒰𑒩 𑒏𑒩𑒻𑒞 𑒕𑒟𑒱, 𑒪𑒰𑒚𑒲 𑒪𑒻𑒞 𑒁𑒥𑒻𑒞 𑒫𑓂𑒨𑒏𑓂𑒞𑒱𑒏𑒹𑒿 𑒠𑒹𑒐𑒱 𑒦𑒰𑒑𑒱 𑒖𑒰𑒃 𑒕𑒟𑒱, 𑒒𑒰𑒮 𑒪𑒻𑒞 𑒁𑒥𑒻𑒞 𑒫𑓂𑒨𑒏𑓂𑒞𑒱𑒏𑒹𑒿 𑒠𑒹𑒐𑒱 𑒪𑒑 𑒖𑒰𑒃𑒞 𑒕𑒟𑒱। 𑒧𑒰𑒢𑒹 𑒛𑒩𑒮𑒿 𑒒𑒥𑒛𑓃𑒰𑒃 𑒕𑒟𑒱।
“𑒂𑒞𑓂𑒧𑒮𑒰𑒏𑓂𑒭𑒰𑒞𑓂𑒏𑒰𑒩𑒮𑒿 𑒩𑒯𑒱𑒞 𑒬𑒰𑒮𑓂𑒞𑓂𑒩𑒧𑒹 𑒏𑒳𑒬𑒪 𑒫𑓂𑒨𑒏𑓂𑒞𑒱 𑒮𑒩-𑒮𑒧𑒰𑒖𑒮𑒿 𑒣𑒬𑒳𑒫𑒞 𑒫𑓂𑒨𑒫𑒯𑒰𑒩 𑒏𑒩𑒻𑒞 𑒕𑒟𑒱, 𑒪𑒰𑒚𑒲 𑒪𑒻𑒞 𑒁𑒥𑒻𑒞 𑒫𑓂𑒨𑒏𑓂𑒞𑒱𑒏𑒹𑒿 𑒠𑒹𑒐𑒱 𑒦𑒰𑒑𑒱 𑒖𑒰𑒃 𑒕𑒟𑒱, 𑒒𑒰𑒮 𑒪𑒻𑒞 𑒁𑒥𑒻𑒞 𑒫𑓂𑒨𑒏𑓂𑒞𑒱𑒏𑒹𑒿 𑒠𑒹𑒐𑒱 𑒪𑒑 𑒖𑒰𑒃𑒞 𑒕𑒟𑒱। 𑒧𑒰𑒢𑒹 𑒛𑒩𑒮𑒿 𑒒𑒥𑒛𑓃𑒰𑒃 𑒕𑒟𑒱।” 𑒄 𑒑𑒣 𑒧𑒳𑒠𑒰 𑒮𑒩𑒱𑒨𑒰 𑒏𑓄 𑒥𑒴𑒗𑒥𑒰𑒧𑒹 𑒂𑒋𑒪 𑒩𑒯𑒋 𑒯𑒧𑒩𑒰।

....
𑒂𑒧𑒏 𑒧𑒰𑒮 𑒩𑒯𑒻।
𑒥𑒰𑒢𑒩 𑒂 𑒥𑒢𑒑𑒠𑒯𑒰 𑒐𑒹𑒞 𑒮𑒦𑒏𑒹𑒿 𑒡𑒰𑓀𑒑𑒢𑒹 𑒁𑒕𑒱 𑒂 𑒣𑒰𑒩𑒰 𑒥𑒰𑒩𑒲𑒏𑒹𑒿।
“𑒮𑒦𑒙𑒰 𑒢𑒰𑒬 𑒏𑓄 𑒠𑒹𑒪𑒏𑒻 𑒥𑒔𑒪𑒴। 𑒩𑒰𑒞𑒱𑒧𑒹 𑒞𑒿 𑒢𑒘𑒱 𑒮𑒳𑒗𑒻 𑒕𑒻। 𑒦𑒼𑒩𑒹-𑒦𑒼𑒩 𑒏𑒪𑒧 𑒖𑒰 𑒏𑓄 𑒠𑒹𑒐𑒻 𑒕𑒲। 𑒥𑒢𑒑𑒠𑒯𑒰 𑒮𑒦𑒙𑒰 𑒤𑒮𑒱𑒪 𑒐𑒰 𑒪𑒹𑒪𑒏 𑒂𑒥 𑒄 𑒥𑒰𑒢𑒩 𑒂𑒧𑒏 𑒣𑒰𑒕𑒰𑒿 𑒪𑒰𑒑𑒪 𑒁𑒕𑒱।”
𑒯𑒧𑒩𑒰 𑒥𑒳𑒗𑒪 𑒁𑒕𑒱 𑒖𑒹 𑒂𑒧𑒏 𑒧𑒰𑒮𑒧𑒹 𑒥𑒰𑒢𑒩 𑒂 𑒥𑒢𑒑𑒠𑒯𑒰 𑒍𑒯𑒱 𑒥𑒩𑒐 𑒋𑒏𑓂𑒏𑒹 𑒮𑓀𑒑 𑒂𑒋𑒪 𑒕𑒪𑒻।
𑒂𑒧𑒹𑒏 𑒧𑒰𑒮 𑒩𑒯𑒻। 𑒮𑒹 𑒧𑒱𑒞𑒴 𑒍𑒑𑒩𑒥𑒰𑒯𑒲𑒧𑒹 𑒪𑒰𑒑𑒞 𑒂𑒥। 𑒂𑒧𑒏 𑒙𑒱𑒏𑒳𑒪𑒰 𑒣𑒻𑒒 𑒦𑓄 𑒩𑒯𑒪 𑒕𑒻। 𑒧𑒔𑒰𑒢 𑒥𑒰𑒢𑓂𑒯𑒥𑒰𑒏 𑒩𑒯𑒻 𑒧𑒱𑒞𑒴𑒏𑒹𑒿। 𑒯𑒧𑒯𑒴𑒿 𑒮𑓀𑒑𑒧𑒹 𑒩𑒯𑒱𑒨𑒻। 𑒥𑒰𑒿𑒮 𑒏𑒰𑒙𑒱 𑒏𑓄 𑒁𑒥𑒻𑒞 𑒩𑒯𑒲।
𑒛𑒥𑒩𑒰 𑒏𑒰𑒞 𑒠𑓄 𑒏𑓄 𑒁𑒥𑒱 𑒩𑒯𑒪 𑒕𑒪𑒯𑒳𑒿। 𑒦𑒼𑒩𑒯𑒩𑒥𑒰 𑒕𑒪। 𑒁𑒏𑒰𑒮 𑒧𑒡𑓂𑒨 𑒪𑒰𑒪 𑒩𑒹𑒐 𑒏𑒢𑒹𑒏 𑒣𑒱𑒩𑒾𑒿𑒕 𑒦𑒹𑒪 𑒥𑒳𑒗𑒢𑒰 𑒑𑒹𑒪 𑒕𑒪।
-𑒪𑒲𑒐 𑒠𑓄 𑒏𑓄 𑒔𑒪𑒴 𑒥𑒔𑒪𑒴।
𑒐𑒹𑒞𑒏 𑒥𑒲𑒔𑒧𑒹 𑒪𑒲𑒐 𑒠𑒹𑒢𑒹 𑒂𑒑𑒰𑒿 𑒥𑒜𑓃𑓄 𑒪𑒰𑒑𑒪𑒯𑒳𑒿।
𑒞𑒐𑒢𑒹 𑒯𑒧 𑒬𑒼𑒝𑒱𑒞 𑒠𑒹𑒐𑒪𑒯𑒳𑒿। 𑒯𑒧𑒩 𑒠𑒹𑒯 𑒬𑒼𑒢𑒱𑒞 𑒠𑒹𑒐𑒱 𑒮𑒩𑓂𑒠 𑒦𑓄 𑒑𑒹𑒪।
𑒧𑒳𑒠𑒰 𑒢𑒱𑒬𑒰𑒿𑒮 𑒕𑒼𑒛𑓃𑒪𑒯𑒳𑒿। 𑒥𑒰𑒿𑒮𑒏 𑒞𑒲𑒏𑓂𑒭𑓂𑒝 𑒣𑒰𑒞 𑒋𑒏𑒙𑒰 𑒥𑒰𑒪𑒱𑒏𑒰𑒏 𑒯𑒰𑒟 𑒂 𑒧𑒳𑒿𑒯𑒏𑒹𑒿 𑒢𑒼𑒕𑒛𑓃𑒻𑒞 𑒑𑒹𑒪 𑒩𑒯𑒻। 𑒧𑒱𑒞𑒴𑒏 𑒥𑒰𑒿𑒮𑒏 𑒢𑒼𑒕𑒰𑒛𑓃 𑒍𑒏𑒩𑒰 𑒪𑒰𑒑𑒪 𑒩𑒯𑒻।
𑒧𑒱𑒞𑒴 𑒯𑒰𑒟𑒮𑒿 𑒥𑒰𑒿𑒮 𑒤𑒹𑒏𑒱 𑒏𑓄 𑒍𑒯𑒱 𑒥𑒰𑒪𑒱𑒏𑒰 𑒪𑒑 𑒔𑒪𑒱 𑒑𑒹𑒪 𑒕𑒪।
𑒢𑒼𑒩𑒰𑒋𑒪 𑒂𑒿𑒐𑒱𑒏 𑒍𑒯𑒱 𑒥𑒰𑒪𑒱𑒏𑒰𑒏 𑒬𑒼𑒝𑒱𑒞 𑒣𑒼𑒕𑒱 𑒧𑒱𑒞𑒴 𑒍𑒏𑒩 𑒢𑒼𑒕𑒰𑒩𑒣𑒩 𑒧𑒰𑒙𑒱 𑒩𑒑𑒛𑓃𑒱 𑒠𑒹𑒢𑒹 𑒩𑒯𑒻।
-𑒏𑒲 𑒏𑓄 𑒩𑒯𑒪 𑒕𑒲।
-𑒬𑒼𑒢𑒱𑒞 𑒥𑒢𑓂𑒢 𑒦𑓄 𑒖𑒰𑒋𑒞।
𑒥𑒰𑒪𑒱𑒏𑒰 𑒪𑒲𑒐𑒣𑒩 𑒂𑒑𑒰𑒿 𑒠𑒾𑒑𑒱 𑒑𑒹𑒪 𑒕𑒪𑒲𑒯।
-𑒏𑒲 𑒢𑒰𑒧 𑒕𑒲 𑒁𑒯𑒰𑒿𑒏।
-𑒂𑒢𑒢𑓂𑒠𑒰।
-𑒏𑒼𑒢 𑒑𑒰𑒧𑒏 𑒕𑒲।
-𑒁𑒯𑒲 𑒑𑒰𑒧𑒏।
-𑒁𑒯𑒲 𑒑𑒰𑒧𑒏?
𑒯𑒧 𑒠𑒳𑒢𑒴 𑒑𑒼𑒙𑒹 𑒮𑓀𑒑𑒹 𑒥𑒰𑒖𑒪 𑒩𑒯𑒲।
𑒯𑒿, 𑒂𑒢𑒢𑓂𑒠𑒰 𑒢𑒰𑒧 𑒩𑒯𑒻 𑒍𑒏𑒩। 𑒂 𑒧𑒱𑒞𑒴𑒏 𑒣𑒯𑒱𑒪 𑒦𑒹𑒿𑒙 𑒫𑒻𑒯 𑒩𑒯𑒻।
...
𑒧𑒔𑒰𑒢𑒼 𑒥𑒢𑓂𑒯𑒰 𑒑𑒹𑒪 𑒩𑒯𑒋। 𑒧𑒳𑒠𑒰 𑒂𑒢𑒢𑓂𑒠𑒰 𑒤𑒹𑒩 𑒢𑒻 𑒦𑒹𑒙𑒪 𑒩𑒯𑒋।
𑒧𑒱𑒞𑒴 𑒣𑒳𑒕𑒻𑒞 𑒩𑒯𑒋।
-𑒏𑒼𑒢 𑒙𑒼𑒪𑒏 𑒕𑒲 𑒍। 𑒢𑒯𑒱𑒨𑒹 𑒧𑒱𑒮𑒩𑒙𑒼𑒪𑒲𑒏 𑒁𑒕𑒱, 𑒢𑒯𑒱𑒨𑒹 𑒣𑒕𑒱𑒧𑒰𑒙𑒼𑒪𑒲𑒏 𑒂 𑒢𑒯𑒱𑒨𑒹 𑒚𑒏𑒳𑒩𑒙𑒼𑒪𑒲𑒏।
-𑒛𑒼𑒧𑒰𑒮𑒲𑒏 𑒩𑒯𑒱𑒞𑒋 𑒞𑒿 𑒯𑒧 𑒔𑒱𑒢𑓂𑒯𑒱𑒞𑒹 𑒩𑒯𑒱𑒞𑒱𑒌।
-𑒞𑒐𑒢 𑒏𑒼𑒢𑒰 𑒁𑒕𑒱 𑒍 𑒁𑒣𑒢 𑒑𑒰𑒧𑒏। 𑒂 𑒁𑒣𑒢 𑒑𑒰𑒧𑒏 𑒁𑒕𑒱 𑒞𑒿 𑒂𑒃 𑒡𑒩𑒱 𑒦𑒹𑒿𑒙 𑒏𑒱𑒋 𑒢𑒻 𑒦𑒹𑒪 𑒩𑒯𑒋 𑒍𑒏𑒩𑒰𑒮𑒿।
𑒧𑒳𑒠𑒰 𑒥𑒱𑒔𑓂𑒔𑒹𑒧𑒹 𑒮𑓀𑒨𑒼𑒑 𑒦𑒹𑒪 𑒕𑒪। 𑒧𑒱𑒞𑒴𑒏 𑒙𑒼𑒪𑒧𑒹 𑒤𑒳𑒠𑒹 𑒦𑒰𑒃𑒏 𑒥𑒹𑒙𑒰𑒏 𑒅𑒣𑒢𑒨𑒢 𑒩𑒯𑒻। 𑒥𑒿𑒮𑒏𑒙𑓂𑒙𑒲 𑒠𑒱𑒢 𑒣𑒱𑒣𑒯𑒲𑒥𑒪𑒰𑒏𑒹𑒿 𑒥𑒖𑒥𑒻𑒪𑒹 𑒯𑒧 𑒑𑒰𑒧𑒏 𑒥𑒰𑒯𑒩 𑒔𑒩𑓂𑒧𑒏𑒰𑒩 𑒙𑒼𑒪 𑒑𑒹𑒪 𑒩𑒯𑒲।
-𑒯𑒱𑒩𑒴 𑒦𑒰𑒃, 𑒯𑒱𑒩𑒳𑒂 𑒦𑒰𑒃।
-𑒂𑒥𑒻 𑒕𑒟𑒱।
𑒏𑒼𑒢𑒼 𑒥𑒰𑒪𑒱𑒏𑒰𑒏 𑒁𑒥𑒰𑒖 𑒂𑒋𑒪 𑒩𑒯𑒋। 𑒁𑒥𑒰𑒖 𑒔𑒱𑒢𑓂𑒯𑒪 𑒮𑒢।
-𑒁𑒯𑒰𑒿 𑒏𑒹 𑒕𑒲।
-𑒯𑒧 𑒯𑒱𑒩𑒴𑒏 𑒥𑒹𑒙𑒲। 𑒏𑒲 𑒏𑒰𑒖 𑒁𑒕𑒱?
-𑒣𑒱𑒣𑒯𑒲 𑒪𑓄 𑒏𑓄 𑒋𑒐𑒢 𑒡𑒩𑒱 𑒁𑒯𑒰𑒿𑒏 𑒥𑒰𑒥𑒴 𑒢𑒻 𑒣𑒯𑒳𑒿𑒔𑒪 𑒕𑒟𑒱। 𑒥𑒖𑒥𑒻𑒪𑒹 𑒂𑒋𑒪 𑒕𑒱𑒨𑒢𑓂𑒯𑒱।
-𑒞𑒯𑒲 𑒍𑒩𑒱𑒨𑒰𑒢𑒧𑒹 𑒪𑒰𑒑𑒪 𑒕𑒟𑒱।
-𑒁𑒯𑒰𑒿𑒏 𑒢𑒰𑒧 𑒏𑒲 𑒕𑒲?
𑒞𑒐𑒢𑒹 𑒙𑒰𑒙 𑒣𑒩𑒏 𑒪𑒞𑓂𑒞𑒲𑒏𑒹𑒿 𑒯𑒿𑒙𑒥𑒻𑒞 𑒫𑒻𑒯 𑒥𑒰𑒪𑒱𑒏𑒰 𑒮𑒼𑒗𑒰𑒿 𑒂𑒥𑒱 𑒑𑒹𑒪𑒱।
-𑒯𑒧 𑒂𑒢𑒢𑓂𑒠𑒰। 𑒯𑒧 𑒁𑒯𑒰𑒿𑒏𑒹𑒿 𑒔𑒲𑒢𑓂𑒯𑒱 𑒑𑒹𑒪 𑒩𑒯𑒲। 𑒁𑒯𑒰𑒿𑒏 𑒏𑒲 𑒢𑒰𑒧 𑒕𑒲?
𑒯𑒧 𑒞𑒿 𑒮𑒩𑓂𑒠 𑒦𑒹𑒪 𑒖𑒰𑒃𑒞 𑒩𑒯𑒲। 𑒧𑒳𑒠𑒰 𑒅𑒞𑓂𑒞𑒩 𑒠𑒹𑒥𑒰𑒏𑒹 𑒕𑒪।
-𑒥𑒔𑒪𑒴।
-𑒂 𑒁𑒯𑒰𑒿𑒏 𑒮𑓀𑒑𑒲𑒏।
-𑒧𑒱𑒞𑒴, 𑒣𑓀𑒛𑒱𑒞 𑒬𑓂𑒩𑒲𑒏𑒩𑒏 𑒥𑒹𑒙𑒰।
𑒧𑒱𑒞𑒴𑒏 𑒣𑒱𑒞𑒰𑒏 𑒢𑒰𑒧 𑒮𑒹𑒯𑒼 𑒯𑒧 𑒂𑒢𑒢𑓂𑒠𑒰𑒏𑒹𑒿 𑒥𑒞𑒰 𑒠𑒹𑒪𑒱𑒌। 𑒣𑒳𑒕𑒢𑒹 𑒞𑒿 𑒢𑒻 𑒕𑒪𑒱 𑒍, 𑒧𑒳𑒠𑒰 𑒢𑒻 𑒖𑒰𑒢𑒱 𑒏𑒱𑒋𑒏..𑒏𑒯𑒱 𑒠𑒹𑒪𑒱𑒌।
𑒞𑒐𑒢𑒹 𑒯𑒱𑒩𑒳𑒂 𑒣𑒱𑒣𑒯𑒲 𑒪𑒹𑒢𑒹 𑒂𑒥𑒱 𑒑𑒹𑒪 𑒩𑒯𑒟𑒱। 𑒯𑒳𑒢𑒏𑒰 𑒮𑓀𑒑𑒹 𑒯𑒧 𑒙𑒼𑒪𑒣𑒩 𑒂𑒥𑒱 𑒑𑒹𑒪𑒯𑒳𑒿।
𑒩𑒮𑓂𑒞𑒰𑒧𑒹 𑒯𑒱𑒩𑒳𑒂𑒏𑒹𑒿 𑒣𑒳𑒕𑒪𑒱𑒨𑒢𑓂𑒯𑒱- 𑒂𑒢𑒢𑓂𑒠𑒰 𑒁𑒯𑒰𑒿𑒏 𑒥𑒹𑒙𑒲 𑒕𑒟𑒱। 𑒧𑒳𑒠𑒰 𑒏𑒯𑒱𑒨𑒼 𑒠𑒹𑒐𑒪𑒱𑒨𑒢𑓂𑒯𑒱 𑒢𑒻।
-𑒧𑒰𑒧𑒰𑒑𑒰𑒧𑒧𑒹 𑒥𑒹𑒬𑒲 𑒠𑒱𑒢 𑒩𑒯𑒻 𑒕𑒪𑒻। 𑒧𑒳𑒠𑒰 𑒂𑒥 𑒔𑒹𑒞𑒢𑒑𑒩 𑒦𑓄 𑒑𑒹𑒪 𑒕𑒻। 𑒮𑒹 𑒑𑒰𑒧 𑒪𑓄 𑒁𑒢𑒢𑒹 𑒕𑒱𑒌।
-𑒤𑒹𑒩 𑒧𑒰𑒧𑒰𑒑𑒰𑒧 𑒏𑒯𑒱𑒨𑒰 𑒖𑒋𑒞𑒲𑒯।
-𑒢𑒘𑒱, 𑒂𑒥 𑒍 𑒔𑒹𑒞𑒢𑒑𑒩 𑒦𑓄 𑒑𑒹𑒪 𑒁𑒕𑒱। 𑒂𑒥 𑒮𑓀𑒑𑒹 𑒩𑒯𑒞।
𑒣𑓀𑒛𑒱𑒞𑒖𑒲𑒏 𑒥𑒹𑒙𑒰 𑒧𑒱𑒞𑒴, 𑒯𑒧𑒩 𑒮𑓀𑒑𑒲 𑒧𑒱𑒞𑒴, 𑒄 𑒑𑒣 𑒮𑒳𑒢𑒱 𑒏𑒲 𑒯𑒼𑒋𑒞𑒻𑒏 𑒍𑒏𑒩𑒰 𑒧𑒼𑒢𑒣𑒩। 𑒏𑒻𑒏 𑒠𑒱𑒢𑒮𑒿 𑒍𑒏𑒩 𑒣𑒳𑒕𑒰𑒩𑒲 𑒏𑓄 𑒩𑒯𑒪 𑒕𑒪। 𑒯𑒧 𑒮𑒼𑒔𑒢𑒹 𑒩𑒯𑒲 𑒖𑒹 𑒦𑒢𑒹 𑒧𑒰𑒧𑒰𑒑𑒰𑒧 𑒔𑒪𑒱 𑒖𑒰𑒋 𑒂𑒢𑒢𑓂𑒠𑒰 𑒂 𑒏𑒢𑒹𑒏 𑒠𑒱𑒢𑒧𑒹 𑒧𑒱𑒞𑒴𑒏 𑒣𑒳𑒕𑒰𑒩𑒲𑒮𑒿 𑒯𑒧 𑒥𑒰𑒿𑒔𑒱 𑒖𑒰𑒋𑒥।
𑒧𑒳𑒠𑒰 𑒂𑒥 𑒞𑒿 𑒂𑒢𑒢𑓂𑒠𑒰 𑒑𑒰𑒧𑒹𑒧𑒹 𑒩𑒯𑒞 𑒂 𑒣𑓀𑒛𑒱𑒞 𑒬𑓂𑒩𑒲𑒏𑒩𑒏 𑒥𑒹𑒙𑒰 𑒧𑒱𑒞𑒴..
𑒡𑒳𑒩..𑒯𑒧𑒯𑒲𑓀 𑒅𑒢𑒙𑒰-𑒣𑒳𑒢𑒙𑒰 𑒮𑒼𑒔𑒱 𑒪𑒹𑒢𑒹 𑒕𑒲। 𑒍𑒯𑒱𑒢𑒰 𑒠𑒴-𑒔𑒰𑒩𑒱 𑒥𑒹𑒩 𑒧𑒱𑒞𑒴 𑒂𑒢𑒢𑓂𑒠𑒰𑒏 𑒫𑒱𑒭𑒨𑒧𑒹 𑒣𑒳𑒕𑒰𑒩𑒲 𑒏𑒹𑒢𑒹 𑒁𑒕𑒱। 𑒞𑒏𑒩 𑒧𑒰𑒢𑒹 𑒄 𑒟𑒼𑒛𑓃𑒥𑒹𑒏 𑒦𑒹𑒪𑒻 𑒖𑒹..
𑒧𑒳𑒠𑒰 𑒖𑒹 𑒮𑒻𑒯 𑒦𑒹𑒪𑒻 𑒞𑒐𑒢 ?..
𑒣𑓀𑒛𑒱𑒞𑒏 𑒥𑒹𑒙𑒰 𑒂 𑒔𑒩𑓂𑒧𑒏𑒰𑒩𑒏 𑒥𑒹𑒙𑒲..
𑒣𑓀𑒛𑒱𑒞 𑒬𑓂𑒩𑒲𑒏𑒩 𑒧𑒰𑒢𑒞𑒰𑒯?..𑒑𑒾𑒂𑒿 𑒒𑒩𑒳𑒂 𑒧𑒰𑒢𑒞?
𑒡𑒳𑒩। 𑒤𑒹𑒩 𑒯𑒧 𑒅𑒢𑒙𑒰-𑒣𑒳𑒢𑒙𑒰 𑒮𑒼𑒔𑒱 𑒩𑒯𑒪 𑒕𑒲। 𑒣𑒱𑒣𑒯𑒲 𑒥𑒰𑒖𑒋 𑒪𑒰𑒑𑒪 𑒩𑒯𑒋 𑒂 𑒪𑒲𑒐𑒣𑒩 𑒠𑒹𑒢𑒹 𑒯𑒧 𑒂 𑒧𑒱𑒞𑒴, 𑒦𑒩𑒱 𑒙𑒼𑒪𑒏 𑒮𑓂𑒞𑓂𑒩𑒲𑒑𑒝-𑒣𑒳𑒩𑒳𑒭𑒏 𑒮𑓀𑒑𑒹 𑒥𑒿𑒮𑒥𑒱𑒙𑓂𑒙𑒲 𑒣𑒯𑒳𑒿𑒔𑒱 𑒑𑒹𑒪 𑒩𑒯𑒲। 𑒩𑒮𑓂𑒞𑒰𑒧𑒹 𑒍𑒯𑒱 𑒮𑓂𑒟𑒪𑒏𑒹𑒿 𑒁𑒏𑒰𑒢𑒢𑒹 𑒩𑒯𑒲। 𑒧𑒱𑒞𑒴 𑒂 𑒂𑒢𑒢𑓂𑒠𑒰𑒏 𑒣𑒯𑒱𑒪 𑒧𑒱𑒪𑒢𑒏 𑒮𑓂𑒟𑒪𑒏𑒹𑒿- 𑒏𑒼𑒢𑒼 𑒁𑒥𑒰𑒖 𑒪𑒰𑒑𑒪 𑒁𑒥𑒻𑒞..𑒧𑒰𑒞𑓂𑒩 𑒮𑓀𑒑𑒲𑒞..𑒮𑓂𑒫𑒩 𑒢𑒻।
𑒥𑒩𑒳𑒂 𑒥𑒰𑒿𑒮 𑒮𑒦𑒣𑒩 𑒟𑒣𑓂𑒣𑒰 𑒠𑓄 𑒠𑒹𑒢𑒹 𑒩𑒯𑒻 𑒂 𑒮𑒦 𑒥𑒰𑒿𑒮 𑒏𑒙𑒢𑒰𑒃 𑒬𑒳𑒩𑒴 𑒏𑓄 𑒠𑒹𑒢𑒹 𑒩𑒯𑒟𑒱। 𑒧𑒛𑓃𑒥𑒚𑒙𑓂𑒚𑒲 𑒂𑒃𑒨𑒹 𑒕𑒻। 𑒒𑒰𑒧𑒹-𑒣𑒮𑒲𑒢𑒹 𑒦𑒹𑒢𑒹 𑒏𑒢𑒹𑒏 𑒧𑒼𑒢 𑒞𑒼𑒭𑒱𑒞 𑒦𑒹𑒪। 𑒏𑒢𑓂𑒯𑒰𑒣𑒩 𑒥𑒰𑒿𑒮 𑒪𑒹𑒢𑒹 𑒯𑒧 𑒂 𑒧𑒱𑒞𑒴 𑒍𑒯𑒲 𑒩𑒮𑓂𑒞𑒹 𑒥𑒱𑒠𑒰 𑒦𑒹𑒪 𑒩𑒯𑒲..𑒍𑒯𑒲 𑒪𑒲𑒐 𑒠𑒹𑒢𑒹।
…
𑒧𑒳𑒠𑒰 𑒧𑒱𑒞𑒴 𑒯𑒧𑒩𑒰 𑒮𑒠𑒱𑒐𑒢 𑒙𑒼𑒏𑒰𑒩𑒰 𑒠𑒹𑒧𑒋 𑒪𑒰𑒑𑒪। 𑒏𑒰𑒩𑒝 𑒏𑒼𑒢𑒼 𑒏𑒰𑒖 𑒯𑒧 𑒋𑒞𑒹𑒏 𑒠𑒹𑒩𑒲𑒮𑒿 𑒢𑒘𑒱 𑒏𑒹𑒢𑒹 𑒩𑒯𑒱𑒌। 𑒍 𑒯𑒧𑒩 𑒩𑒰𑒧 𑒩𑒯𑒋 𑒂 𑒯𑒧 𑒍𑒏𑒩 𑒯𑒢𑒳𑒧𑒰𑒢।
𑒧𑒔𑒰𑒢𑒣𑒩 𑒋𑒯𑒱𑒢𑒰 𑒋𑒏 𑒠𑒱𑒢 𑒯𑒧 𑒧𑒱𑒞𑒴𑒏𑒹𑒿 𑒏𑒯𑒱 𑒠𑒹𑒪𑒱𑒌-
-𑒧𑒱𑒞𑒴, 𑒥𑒱𑒮𑒩𑒱 𑒖𑒼 𑒍𑒏𑒩𑒰। 𑒏𑒟𑒲 𑒪𑒹𑒪 𑒥𑒠𑒢𑒰𑒧𑒲 𑒏𑒩𑒥𑒱𑒯𑒲𑓀 𑒍𑒏𑒩। 𑒯𑒱𑒩𑒳𑒂𑒏 𑒥𑒹𑒙𑒲 𑒕𑒱𑒌 𑒂𑒢𑒢𑓂𑒠𑒰। 𑒍𑒢𑒰 𑒞𑒼𑒯𑒩 𑒢𑒰𑒧 𑒯𑒧𑒩𑒰𑒮𑒿 𑒍 𑒣𑒳𑒕𑒪𑒏 𑒞𑒿 𑒯𑒧 𑒞𑒼𑒯𑒩 𑒢𑒰𑒧 𑒂 𑒞𑒼𑒯𑒩 𑒣𑒱𑒞𑒰𑒖𑒲𑒏 𑒢𑒰𑒧 𑒮𑒹𑒯𑒼 𑒏𑒯𑒱 𑒠𑒹𑒪𑒱𑒌।
-𑒯𑒧𑒩 𑒣𑒱𑒞𑒰𑒖𑒲𑒏 𑒢𑒰𑒧 𑒍 𑒣𑒳𑒕𑒢𑒹 𑒩𑒯𑒾?
-𑒢𑒻 𑒣𑒳𑒕𑒢𑒹 𑒩𑒯𑒋। 𑒧𑒳𑒠𑒰..
-𑒞𑒐𑒢 𑒏𑒱𑒋 𑒏𑒯𑒪𑒯𑒲𑓀?
-𑒂𑒃 𑒢𑒹 𑒏𑒰𑒪𑓂𑒯𑒱 𑒞𑒿 𑒣𑒞𑒰 𑒪𑒰𑒑𑒥𑒹 𑒏𑒩𑒞𑒻..
-𑒖𑒯𑒱𑒨𑒰 𑒪𑒑𑒱𑒞𑒻 𑒞𑒯𑒱𑒨𑒰 𑒪𑒑𑒱𑒞𑒻..𑒂𑒥 𑒍 𑒯𑒧𑒩𑒰𑒮𑒿 𑒏𑒙𑒞..𑒯𑒧𑒩 𑒧𑒹𑒯𑒢𑒞𑒱 𑒞𑒴𑒿 𑒥𑒜𑓃𑒰 𑒠𑒹𑒪𑒹𑒿..
-𑒏𑒼𑒢 𑒧𑒹𑒯𑒢𑒞𑒱। 𑒞𑒴𑒿 𑒣𑓀𑒛𑒱𑒞 𑒬𑓂𑒩𑒲𑒏𑒩𑒏 𑒥𑒹𑒙𑒰 𑒂 𑒍 𑒯𑒱𑒩𑒳𑒂 𑒔𑒩𑓂𑒧𑒏𑒰𑒩𑒏 𑒥𑒹𑒙𑒲। 𑒏𑒟𑒲𑒪𑒹 𑒥𑒠𑒢𑒰𑒧𑒲 𑒏𑒩𑒥𑒱𑒯𑒲𑓀 𑒍𑒏𑒩।
-𑒥𑒱𑒨𑒰𑒯 𑒏𑒩𑒥𑒻 𑒩𑒾। 𑒥𑒠𑒢𑒰𑒧𑒲 𑒏𑒱𑒋 𑒏𑒩𑒥𑒻।
-𑒏𑒏𑒩𑒰 𑒚𑒏𑒻 𑒕𑒱𑒯𑒲𑓀 ?
-𑒏𑒏𑒩𑒼 𑒢𑒻 𑒩𑒾।
𑒋𑒯𑒱𑒢𑒰 𑒁𑒢𑒔𑒼𑒏𑓂𑒏𑒹𑒧𑒹 𑒢𑒱𑒩𑓂𑒝𑒨 𑒪𑒻𑒞 𑒕𑒪 𑒧𑒱𑒞𑒴। 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏𑒏 𑒥𑒹𑒙𑒰 𑒧𑒱𑒞𑒴 𑒢𑒻𑒨𑓂𑒨𑒰𑒨𑒱𑒏। 𑒍𑒏𑒩𑒰 𑒒𑒩𑒧𑒹 𑒞𑒰𑒪𑒣𑒞𑓂𑒩 𑒮𑒦 𑒣𑒮𑒩𑒪 𑒩𑒯𑒻𑒞 𑒠𑒹𑒐𑒢𑒹 𑒕𑒪𑒱𑒌। 𑒮𑒹 𑒦𑒩𑒼𑒮 𑒢𑒻 𑒦𑓄 𑒩𑒯𑒪 𑒕𑒪।
-𑒑𑒰𑒧𑒧𑒹 𑒏𑒯𑒱𑒨𑒼 𑒠𑒹𑒐𑒪𑒱𑒌 𑒢𑒻 𑒍𑒏𑒩𑒰।
-𑒞𑒴𑒿 𑒑𑒰𑒧𑒧𑒹 𑒩𑒯𑒪𑒹𑒿 𑒏𑒯𑒱𑒨𑒰। 𑒑𑒳𑒩𑒳𑒖𑒲𑒏 𑒣𑒰𑒚𑒬𑒰𑒪𑒰𑒮𑒿 𑒣𑒾𑒩𑒳𑒏𑒹𑒿 𑒞𑒿 𑒂𑒋𑒪 𑒕𑒹𑒿।
-𑒧𑒳𑒠𑒰 𑒞𑒴𑒿𑒯𑒲𑓀 𑒏𑒼𑒢 𑒠𑒹𑒐𑒢𑒹 𑒩𑒯𑒲𑓀।
-𑒧𑒰𑒧𑒰 𑒑𑒰𑒧 𑒩𑒯𑒻 𑒕𑒪 𑒍।
-𑒤𑒹𑒩 𑒧𑒰𑒧𑒰 𑒑𑒰𑒧 𑒒𑒳𑒩𑒱 𑒏𑓄 𑒞𑒿 𑒢𑒻 𑒔𑒪𑒱 𑒖𑒰𑒋𑒞।
-𑒢𑒻, 𑒮𑒹 𑒣𑒳𑒕𑒱 𑒪𑒹𑒪𑒱𑒌। 𑒂𑒥 𑒑𑒰𑒧𑒹𑒧𑒹 𑒩𑒯𑒞।
𑒣𑒾𑒩𑒳𑒏𑒰𑒿 𑒑𑒰𑒧𑒹𑒧𑒹 𑒧𑒱𑒞𑒴𑒏 𑒧𑒰𑒋𑒏 𑒠𑒹𑒯𑒰𑒢𑓂𑒞 𑒦𑓄 𑒑𑒹𑒪 𑒕𑒪𑒢𑓂𑒯𑒱।
𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏 𑒮𑒹𑒯𑒼 𑒐𑒙𑒥𑒞𑒰𑒯 𑒮𑒢 𑒦𑓄 𑒑𑒹𑒪 𑒕𑒟𑒱- 𑒄 𑒑𑒣 𑒯𑒳𑒢𑒏𑒩 𑒙𑒼𑒪𑒥𑒻𑒨𑓂𑒨𑒰 𑒮𑒦 𑒏𑒩𑒻𑒞 𑒕𑒪। 𑒞𑒰𑒪𑒣𑒞𑓂𑒩 𑒮𑒦𑒏 𑒣𑒩𑒱𑒩𑒏𑓂𑒭𑒝 𑒏𑒼𑒢𑒰 𑒯𑒋𑒞 𑒋𑒯𑒱 𑒮𑒱𑓀𑒯 𑒩𑒰𑒬𑒱𑒧𑒹? 𑒨𑒻𑒯 𑒔𑒱𑒢𑓂𑒞𑒰 𑒩𑒯𑒢𑓂𑒯𑒱 𑒬𑓂𑒩𑒲𑒏𑒩𑒏, 𑒂 𑒞𑒹𑒿 𑒍 𑒐𑒙𑒥𑒞𑒰𑒯 𑒮𑒢 𑒏𑒩𑒋 𑒪𑒰𑒑𑒪 𑒩𑒯𑒟𑒱.. 𑒄𑒯𑒼 𑒑𑒣 𑒯𑒳𑒢𑒏𑒩 𑒙𑒼𑒪𑒥𑒻𑒨𑓂𑒨𑒰 𑒮𑒦 𑒏𑒩𑒻𑒞 𑒕𑒪।
...
𑒯𑒱𑒩𑓂𑒩..𑒯𑒱𑒩𑓂𑒩…𑒯𑒱𑒩𑓂𑒩....
𑒛𑒼𑒧𑒰𑒮𑒲𑒮𑒿 𑒮𑒴𑒑𑒩𑒏 𑒣𑒰𑒕𑒴 𑒯𑒧 𑒂 𑒧𑒱𑒞𑒴 𑒯𑒱𑒩𑓂𑒩-𑒯𑒱𑒩𑓂𑒩 𑒏𑒩𑒻𑒞 𑒔𑒩𑓂𑒧𑒏𑒰𑒩 𑒙𑒼𑒪 𑒣𑒯𑒳𑒿𑒔𑒱 𑒖𑒰𑒃 𑒕𑒲। 𑒂𑒢𑒢𑓂𑒠𑒰 𑒧𑒳𑒠𑒰 𑒮𑒼𑒗𑒰𑒿𑒧𑒹 𑒦𑒹𑒙𑒱 𑒑𑒹𑒪𑒲𑒯। 𑒮𑒳𑒑𑓂𑒑𑒩 𑒮𑓀𑒑𑒹 𑒯𑒧 𑒂𑒑𑒰𑒿 𑒥𑒜𑓃𑒱 𑒖𑒰𑒃 𑒕𑒲। 𑒒𑒳𑒧𑒻 𑒕𑒲 𑒞𑒿 𑒂𑒢𑒢𑓂𑒠𑒰 𑒂 𑒧𑒱𑒞𑒴𑒏 𑒑𑒣 𑒮𑒳𑒢𑒻𑒪𑒹 𑒏𑒰𑒢 𑒣𑒰𑒟𑒻 𑒕𑒲।
𑒯𑒱𑒩𑓂𑒩..𑒯𑒱𑒩𑓂𑒩
𑒋𑒯𑒱 𑒥𑒹𑒩 𑒂𑒢𑒢𑓂𑒠𑒰 𑒯𑒱𑒩𑓂𑒩 𑒏𑒯𑒻𑒞 𑒁𑒕𑒱 𑒂 𑒯𑒧 𑒧𑒳𑒮𑓂𑒏𑒲 𑒠𑒻𑒞 𑒮𑒴𑒑𑒩𑒏 𑒂𑒑𑒰𑒿 𑒥𑒜𑓃𑒱 𑒖𑒰𑒃 𑒕𑒲।
𑒄 𑒒𑒙𑒢𑒰 𑒏𑒻𑒏 𑒥𑒹𑒩 𑒦𑒹𑒪 𑒂 𑒄 𑒑𑒣 𑒮𑒑𑒩𑒹 𑒣𑒮𑒩𑒱 𑒑𑒹𑒪। 𑒯𑒱𑒩𑒴 𑒏𑒞𑒰𑒏 𑒥𑒹𑒩 𑒯𑒧𑒩𑒰 𑒪𑒑 𑒂𑒋𑒪 𑒩𑒯𑒟𑒱।
𑒯𑒲𑒩𑒴 𑒅𑒠𑓂𑒫𑒹𑒪𑒱𑒞 𑒩𑒯𑒋 𑒪𑒰𑒑𑒪 𑒩𑒯𑒟𑒱। 𑒯𑒲𑒩𑒴𑒏 𑒣𑒞𑓂𑒢𑒲 𑒥𑒹𑒙𑒲𑒏 𑒦𑒰𑒑𑓂𑒨𑒏 𑒪𑒹𑒪 𑒑𑒼𑒯𑒰𑒩𑒱 𑒏𑒩𑒋 𑒪𑒑𑒪𑒲𑒯।
𑒏𑒋 𑒏𑒼𑒮 𑒧𑒰𑒿 𑒧𑒢𑓂𑒠𑒱𑒪𑒥𑒰
𑒏𑒋 𑒏𑒼𑒮 𑒪𑒳𑒏𑒹𑒮𑒩𑒲 𑒧𑒢𑓂𑒠𑒱𑒪𑒥𑒰
𑒏𑒋 𑒏𑒼𑒮 𑒣𑒛𑓃𑒪 𑒠𑒼𑒯𑒰𑒃
𑒏𑒢𑒲 𑒞𑒏𑒥𑒻 𑒯𑒹 𑒧𑒰𑒃
𑒏𑒋 𑒏𑒼𑒮 𑒣𑒛𑓃𑒪 𑒠𑒼𑒯𑒰𑒃
𑒏𑒢𑒲 𑒞𑒏𑒥𑒻 𑒯𑒹 𑒧𑒰𑒃
𑒠𑒳𑒃 𑒏𑒼𑒮 𑒧𑒢𑓂𑒠𑒱𑒪𑒥𑒰
𑒔𑒰𑒩𑒱 𑒏𑒼𑒮 𑒪𑒳𑒏𑒹𑒮𑒩𑒲 𑒧𑒢𑓂𑒠𑒱𑒪𑒥𑒰
𑒣𑒰𑒿𑒔𑒹 𑒏𑒼𑒮 𑒣𑒛𑓃𑒪 𑒠𑒼𑒯𑒰𑒃
𑒏𑒢𑒲 𑒞𑒏𑒥𑒻 𑒯𑒹 𑒧𑒰𑒃
𑒣𑒰𑒿𑒔𑒹 𑒏𑒼𑒮 𑒣𑒛𑓃𑒪 𑒠𑒼𑒯𑒰𑒃

𑒏𑒼𑒢 𑒤𑒴𑒪 𑒧𑒰𑒿 𑒧𑒢𑓂𑒠𑒱𑒪𑒥𑒰
𑒏𑒼𑒢 𑒤𑒴𑒪 𑒥𑒢𑓂𑒠𑒲 𑒧𑒢𑓂𑒠𑒱𑒪𑒥𑒰
𑒏𑒼𑒢 𑒤𑒴𑒪 𑒣𑒩 𑒣𑒛𑓃𑒪 𑒠𑒼𑒯𑒰𑒃
𑒏𑒢𑒲 𑒞𑒏𑒥𑒻 𑒯𑒹 𑒧𑒰𑒃
𑒏𑒼𑒢 𑒤𑒴𑒪 𑒣𑒩 𑒣𑒛𑓃𑒪 𑒠𑒼𑒯𑒰𑒃
𑒏𑒢𑒲 𑒞𑒏𑒥𑒻 𑒯𑒹 𑒧𑒰𑒃
𑒌𑒪𑒲 𑒤𑒴𑒪 𑒧𑒰𑒿 𑒧𑒢𑓂𑒠𑒱𑒪𑒥𑒰
𑒥𑒹𑒪𑒲 𑒤𑒴𑒪 𑒪𑒳𑒏𑒹𑒮𑒩𑒲 𑒧𑒢𑓂𑒠𑒱𑒪𑒥𑒰
𑒑𑒹𑒢𑓂𑒠𑒹 𑒤𑒴𑒪 𑒣𑒛𑓃𑒪 𑒠𑒼𑒯𑒰𑒃
𑒏𑒢𑒲 𑒞𑒏𑒥𑒻 𑒯𑒹 𑒧𑒰𑒃
𑒑𑒹𑒢𑓂𑒠𑒹 𑒤𑒴𑒪 𑒣𑒛𑓃𑒪 𑒠𑒼𑒯𑒰𑒃
𑒏𑒢𑒲 𑒞𑒏𑒥𑒻 𑒯𑒹 𑒧𑒰𑒃
.........
𑒯𑒱𑒩𑒴 𑒛𑒼𑒧𑒰𑒮𑒲 𑒂𑒥𑒋 𑒪𑒰𑒑𑒪 𑒩𑒯𑒟𑒱।
-𑒏𑒲 𑒯𑒹𑒞𑒻, 𑒏𑒼𑒢𑒰 𑒯𑒹𑒞𑒻।
-𑒗𑒳𑒙𑓂𑒚𑒹..
𑒯𑒧 𑒑𑒕𑒪𑒱𑒨𑒢𑓂𑒯𑒱 𑒖𑒹 𑒯𑒧 𑒯𑒱𑒩𑒳 𑒮𑓀𑒑𑒹 𑒬𑓂𑒩𑒲𑒏𑒩 𑒣𑓀𑒛𑒱𑒞 𑒪𑒑 𑒖𑒰𑒋𑒥।
𑒂 𑒯𑒧 𑒯𑒱𑒩𑒴𑒏𑒹𑒿 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏 𑒪𑒑 𑒪𑓄 𑒑𑒹𑒪 𑒩𑒯𑒱𑒨𑒢𑓂𑒯𑒱। 𑒬𑓂𑒩𑒲𑒏𑒩𑒏 𑒣𑒞𑓂𑒢𑒲𑒏 𑒧𑒵𑒞𑓂𑒨𑒳 𑒑𑒞 𑒥𑒩𑒐𑒏 𑒮𑒱𑓀𑒯 𑒩𑒰𑒬𑒱𑒏 𑒥𑒰𑒠 𑒦𑓄 𑒑𑒹𑒪 𑒕𑒪𑒢𑓂𑒯𑒱। 𑒂 𑒞𑒏𑒩 𑒥𑒰𑒠 𑒯𑒱𑒩𑒴 𑒧𑒲𑒧𑒰𑓀𑒮𑒏 𑒐𑒙𑒥𑒞𑒰𑒯 𑒦𑓄 𑒑𑒹𑒪 𑒕𑒟𑒱- 𑒪𑒼𑒏 𑒏𑒯𑒻𑒞 𑒕𑒪𑒢𑓂𑒯𑒱। 𑒪𑒼𑒏 𑒏𑒹? 𑒫𑒻𑒯 𑒙𑒼𑒪𑒥𑒻𑒨𑓂𑒨𑒰 𑒮𑒦। 𑒑𑒰𑒧𑒏 𑒪𑒼𑒏, 𑒣𑒩𑒼𑒣𑒙𑓂𑒙𑒰𑒏 𑒫𑒱𑒠𑓂𑒫𑒰𑒢 𑒪𑒼𑒏 𑒮𑒦 𑒞𑒿 𑒥𑒛𑓂𑒛 𑒃𑒖𑓂𑒖𑒞 𑒠𑒻 𑒕𑒪𑒢𑓂𑒯𑒱 𑒯𑒳𑒢𑒏𑒰। 𑒂𑒿𑒐𑒱𑒏 𑒠𑒹𑒐𑒪 𑒑𑒣 𑒏𑒯𑒻 𑒕𑒲..
“𑒂𑒅 𑒥𑒔𑒪𑒴। 𑒯𑒱𑒩𑒴, 𑒂𑒅 𑒥𑒻𑒮𑒴..। ”- 𑒑𑒳𑒧𑓂𑒧 𑒦𑓄 𑒖𑒰𑒃𑒞 𑒕𑒟𑒱 𑒬𑓂𑒩𑒲𑒏𑒩। 𑒣𑒞𑓂𑒢𑒲𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒋𑒯𑒱𑒢𑒰, 𑒩𑒯𑒻𑒞 𑒩𑒯𑒟𑒱, 𑒩𑒯𑒻𑒞 𑒩𑒯𑒟𑒱 𑒂𑒏𑒱 𑒑𑒳𑒧𑓂𑒧 𑒦𑓄 𑒖𑒰𑒃𑒞 𑒩𑒯𑒟𑒱।
“𑒏𑒏𑓂𑒏𑒰, 𑒂𑒿𑒑𑒢 𑒮𑒳𑒢𑓂𑒢 𑒩𑒯𑒻𑒞 𑒁𑒕𑒱। 𑒏𑒞𑒹𑒏 𑒠𑒱𑒢 𑒋𑒢𑒰 𑒩𑒯𑒞। 𑒧𑒱𑒞𑒴𑒏 𑒥𑒱𑒨𑒰𑒯 𑒏𑒱𑒋 𑒢𑒻 𑒏𑒩𑒰 𑒠𑒻 𑒕𑒱𑒨𑒢𑓂𑒯𑒱”?
“𑒧𑒱𑒞𑒴 𑒞𑒿 𑒥𑒱𑒨𑒰𑒯 𑒚𑒲𑒏 𑒏𑓄 𑒪𑒹𑒢𑒹 𑒕𑒟𑒱”।
“𑒏𑒞𑓂𑒞𑓄?” -𑒯𑒧 𑒒𑒥𑒛𑓃𑒰𑒃𑒞 𑒣𑒳𑒕𑒻 𑒕𑒱𑒨𑒢𑓂𑒯𑒱। 𑒯𑒱𑒩𑒴 𑒯𑒧𑒩𑒰 𑒠𑒱𑒮 𑒢𑒱𑒬𑓂𑒔𑒱𑒢𑓂𑒞 𑒦𑒰𑒫𑒮𑒿 𑒠𑒹𑒐𑒻 𑒕𑒟𑒱।
“𑒂𑒢𑒢𑓂𑒠𑒰𑒮𑒿, 𑒮𑒧𑒡𑒱 𑒯𑒲𑒩𑒴 𑒞𑒿 𑒁𑒯𑒰𑒿𑒏 𑒮𑓀𑒑 𑒂𑒋𑒪 𑒕𑒟𑒱𑒨𑒹।”
𑒯𑒰𑒨 𑒩𑒹 𑒬𑓂𑒩𑒲𑒏𑒩 𑒣𑓀𑒛𑒱𑒞।
𑒂 𑒥𑒰𑒯 𑒩𑒹 𑒧𑒱𑒞𑒴। 𑒣𑒯𑒱𑒢𑒯𑒱𑒨𑒹 𑒥𑒰𑒣𑒏𑒹𑒿 𑒣𑒙𑒱𑒨𑒰 𑒪𑒹𑒢𑒹 𑒕𑒪। 𑒧𑒳𑒠𑒰 𑒥𑒰𑒢𑓂𑒯𑒣𑒩 𑒖𑒰𑒃𑒞 𑒏𑒼𑒢𑒼 𑒙𑒼𑒪𑒥𑒻𑒨𑓂𑒨𑒰𑒏 𑒏𑒰𑒢 𑒋𑒯𑒱 𑒑𑒣𑒏𑒹𑒿 𑒁𑒏𑒰𑒢𑒱 𑒪𑒹𑒢𑒹 𑒕𑒪।
𑒯𑒧 𑒮𑒦 𑒥𑒻𑒮𑒪𑒹 𑒩𑒯𑒲 𑒂𑒏𑒱 𑒍 𑒏𑒱𑒕𑒳 𑒂𑒩 𑒑𑒼𑒙𑒹𑒏𑒹𑒿 𑒪𑓄 𑒏𑓄 𑒠𑒪𑒰𑒢𑒣𑒩 𑒖𑒳𑒧𑒱 𑒑𑒹𑒪 𑒕𑒪। 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏𑒮𑒿 𑒯𑒳𑒢𑒏𑒩 𑒮𑒦𑒏 𑒬𑒰𑒮𑓂𑒞𑓂𑒩𑒰𑒩𑓂𑒟 𑒬𑒳𑒩𑒴 𑒦𑒹𑒪। 𑒬𑒥𑓂𑒠𑒏 𑒏𑒰𑒙 𑒬𑒥𑓂𑒠𑒮𑒿।
“𑒬𑓂𑒩𑒲𑒏𑒩, 𑒁𑒯𑒰𑒿 𑒏𑒼𑒢 𑒏𑒼𑒙𑒱𑒏 𑒁𑒡𑒧 𑒏𑒰𑒖 𑒏𑓄 𑒩𑒯𑒪 𑒕𑒲”।
“𑒏𑒼𑒢 𑒁𑒡𑒧 𑒏𑒰𑒖”।
“𑒕𑒼𑒙-𑒣𑒻𑒒𑒏 𑒏𑒼𑒢𑒼 𑒫𑒱𑒔𑒰𑒩 𑒢𑒻 𑒩𑒯𑒪 𑒁𑒯𑒰𑒿𑒏𑒹𑒿 𑒧𑒲𑒧𑒰𑓀𑒮𑒏?”
“𑒫𑒱𑒠𑓂𑒫𑒰𑒢𑓂 𑒖𑒢। 𑒄 𑒕𑒼𑒙-𑒣𑒻𑒒 𑒏𑒲 𑒕𑒱𑒌? 𑒧𑒰𑒞𑓂𑒩 𑒬𑒥𑓂𑒠। 𑒋𑒯𑒱 𑒬𑒥𑓂𑒠𑒏𑒹𑒿 𑒮𑒳𑒢𑒪𑒰𑒏 𑒣𑒬𑓂𑒔𑒰𑒞𑓂 𑒍𑒏𑒩 𑒬𑒥𑓂𑒠𑒰𑒩𑓂𑒟 𑒁𑒯𑒰𑒿𑒏 𑒧𑒰𑒟𑒧𑒹 𑒋𑒏 𑒫𑒰 𑒠𑒼𑒮𑒩 𑒞𑒩𑒯𑒹𑒿 𑒜𑒳𑒏𑒱 𑒑𑒹𑒪 𑒁𑒕𑒱। 𑒣𑒠 𑒥𑒢𑒰 𑒏𑓄 𑒍𑒯𑒱𑒧𑒹 𑒁𑒣𑒢 𑒮𑓂𑒫𑒰𑒩𑓂𑒟 𑒧𑒱𑒖𑓂𑒗𑒩 𑒏𑓄...”।
“𑒧𑒰𑒢𑒹 𑒕𑒼𑒙-𑒣𑒻𑒒 𑒁𑒕𑒱 𑒬𑒥𑓂𑒠𑒰𑒩𑓂𑒟 𑒧𑒰𑒞𑓂𑒩। 𑒂 𑒞𑒏𑒩 𑒫𑒱𑒬𑓂𑒪𑒹𑒭𑒝 𑒖𑒹 𑒣𑒠 𑒥𑒢𑒰 𑒏𑓄 𑒏𑒹𑒪𑒯𑒳𑒿 𑒮𑒹 𑒦𑓄 𑒑𑒹𑒪 𑒮𑓂𑒫𑒰𑒩𑓂𑒟𑒣𑒩𑒏”।
“𑒫𑒱𑒬𑓂𑒫𑒰𑒮 𑒢𑒻 𑒯𑒼𑒋 𑒞𑒿 𑒍𑒯𑒱 𑒣𑒠𑒧𑒹 𑒮𑒿 𑒮𑓂𑒫𑒰𑒩𑓂𑒟𑒏 𑒮𑒧𑒩𑓂𑒣𑒝 𑒏𑓄 𑒏𑒋 𑒠𑒹𑒐𑒴। 𑒮𑒦 𑒦𑓂𑒩𑒧 𑒦𑒰𑒑𑒱 𑒖𑒰𑒋𑒞”।
“𑒧𑒰𑒢𑒹 𑒁𑒯𑒰𑒿 𑒧𑒱𑒞𑒴 𑒂 𑒂𑒢𑒢𑓂𑒠𑒰𑒏 𑒥𑒱𑒨𑒰𑒯 𑒏𑒩𑒹𑒥𑒰𑒪𑒹 𑒁𑒛𑒱𑒑 𑒕𑒲”।
“𑒫𑒱𑒠𑓂𑒫𑒰𑒢𑓂 𑒖𑒢। 𑒩𑒮𑓂𑒮𑒲𑒏𑒹𑒿 𑒮𑒰𑒿𑒣 𑒯𑒧 𑒁𑒯𑒲 𑒠𑓂𑒫𑒰𑒩𑒹 𑒥𑒳𑒗𑒻 𑒕𑒲 𑒖𑒹 𑒠𑒳𑒢𑒴𑒏 𑒣𑒵𑒟𑒏 𑒁𑒮𑓂𑒞𑒱𑒞𑓂𑒫 𑒕𑒻। 𑒂𑒿𑒐𑒱 𑒒𑒼𑒏𑒔𑒰 𑒏𑓄 𑒠𑒴𑒙𑒰 𑒔𑒢𑓂𑒠𑓂𑒩𑒧𑒰 𑒠𑒹𑒐𑒻 𑒕𑒲 𑒞𑒿 𑒞𑒐𑒢𑒼 𑒁𑒏𑒰𑒬𑒏 𑒠𑒴𑒙𑒰 𑒫𑒰𑒮𑓂𑒞𑒫𑒱𑒏 𑒦𑒰𑒑𑒧𑒹 𑒔𑒢𑓂𑒠𑓂𑒩𑒧𑒰𑒏𑒹𑒿 𑒣𑓂𑒩𑒞𑓂𑒨𑒰𑒩𑒼𑒣𑒱𑒞 𑒏𑒩𑒻 𑒕𑒲। 𑒦𑓂𑒩𑒧𑒏 𑒏𑒰𑒩𑒝 𑒫𑒱𑒭𑒨 𑒢𑒻 𑒮𑓀𑒮𑒩𑓂𑒑 𑒕𑒻, 𑒍𑒢𑒰 𑒅𑒠𑓂𑒠𑒹𑒬𑓂𑒨 𑒂 𑒫𑒱𑒡𑒹𑒨 𑒠𑒳𑒢𑒴 𑒮𑒞𑓂𑒨 𑒕𑒻। 𑒂 𑒋𑒞𑒋 𑒮𑒦 𑒫𑒱𑒭𑒨𑒏 𑒖𑓂𑒘𑒰𑒢 𑒮𑒹𑒯𑒼 𑒂𑒞𑓂𑒧𑒰𑒏 𑒖𑓂𑒘𑒰𑒢 𑒢𑒻 𑒠𑓄 𑒮𑒏𑒻𑒋। 𑒂𑒞𑓂𑒧𑒰𑒏 𑒫𑒱𑒔𑒰𑒩𑒮𑒿 𑒁𑒯𑓀𑒫𑒵𑒞𑓂𑒞𑒱- 𑒁𑒣𑒢 𑒫𑒱𑒭𑒨𑒏 𑒞𑒟𑓂𑒨𑒏 𑒥𑒼𑒡 𑒋𑒯𑒱𑒮𑒿 𑒯𑒼𑒃𑒞 𑒁𑒕𑒱। 𑒂𑒞𑓂𑒧𑒰 𑒖𑓂𑒘𑒰𑒢𑒏 𑒏𑒩𑓂𑒞𑒰 𑒂 𑒏𑒩𑓂𑒧 𑒠𑒳𑒢𑒴 𑒁𑒕𑒱। 𑒣𑒠𑒰𑒩𑓂𑒟𑒏 𑒁𑒩𑓂𑒟 𑒮𑓀𑒮𑒩𑓂𑒑𑒮𑒿 𑒦𑒹𑒙𑒻𑒞 𑒁𑒕𑒱। 𑒬𑒥𑓂𑒠 𑒮𑒳𑒢𑒪𑒰𑒏 𑒥𑒰𑒠 𑒍𑒏𑒩 𑒁𑒩𑓂𑒟 𑒁𑒢𑒳𑒧𑒰𑒢𑒮𑒿 𑒪𑒑 𑒯𑒼𑒃𑒞 𑒁𑒕𑒱”।
“𑒁𑒯𑒰𑒿 𑒬𑒥𑓂𑒠𑒏 𑒦𑓂𑒩𑒧 𑒅𑒞𑓂𑒣𑒢𑓂𑒢 𑒏𑓄 𑒩𑒯𑒪 𑒕𑒲। 𑒯𑒧 𑒮𑒦 𑒋𑒯𑒱𑒧𑒹 𑒧𑒱𑒞𑒴 𑒂 𑒂𑒢𑒢𑓂𑒠𑒰𑒏 𑒥𑒱𑒨𑒰𑒯𑒏 𑒁𑒯𑒰𑒿𑒏 𑒃𑒔𑓂𑒕𑒰 𑒠𑒹𑒐𑒻 𑒕𑒲”।
“𑒮𑓀𑒏𑒪𑓂𑒣 𑒦𑒹𑒪 𑒃𑒔𑓂𑒕𑒰 𑒂 𑒞𑒏𑒩 𑒣𑒴𑒩𑓂𑒞𑒱 𑒢𑒻 𑒯𑒼 𑒮𑒹 𑒦𑒹𑒪 𑒠𑓂𑒫𑒹𑒭”।
“𑒞𑒿 𑒄 𑒯𑒧 𑒮𑒦 𑒠𑓂𑒫𑒹𑒭𑒫𑒬 𑒏𑒯𑒱 𑒩𑒯𑒪 𑒕𑒲। 𑒁𑒯𑒰𑒿𑒏 𑒢𑒖𑒩𑒱𑒧𑒹 𑒖𑒰𑒞𑒱𑒏 𑒏𑒼𑒢𑒼 𑒧𑒯𑒞𑓂𑒫 𑒢𑒻?”
“𑒠𑒹𑒐𑒴, 𑒂𑒢𑒢𑓂𑒠𑒰 𑒮𑒩𑓂𑒫𑒑𑒳𑒝𑒮𑒧𑓂𑒣𑒢𑓂𑒢 𑒕𑒟𑒱 𑒂 𑒯𑒳𑒢𑒏𑒩 𑒂 𑒯𑒧𑒩 𑒋𑒏 𑒖𑒰𑒞𑒱 𑒁𑒕𑒱 𑒂 𑒮𑒹 𑒁𑒕𑒱 𑒁𑒢𑒳𑒫𑒵𑒞𑓂𑒞 𑒂 𑒮𑒩𑓂𑒫𑒪𑒼𑒏 𑒣𑓂𑒩𑒞𑓂𑒨𑒏𑓂𑒭। 𑒍 𑒯𑒧𑒩 𑒡𑒩𑒼𑒯𑒩𑒏 𑒩𑒏𑓂𑒭𑒝 𑒏𑓄 𑒮𑒏𑒞𑒲𑒯, 𑒮𑒹 𑒯𑒧𑒩 𑒫𑒱𑒬𑓂𑒫𑒰𑒮 𑒁𑒕𑒱। 𑒂 𑒄 𑒯𑒧𑒩 𑒢𑒱𑒩𑓂𑒝𑒨 𑒁𑒕𑒱”।
“𑒂 𑒄 𑒯𑒧𑒩 𑒢𑒱𑒩𑓂𑒝𑒨 𑒁𑒕𑒱।”- 𑒄 𑒬𑒥𑓂𑒠 𑒯𑒧𑒩 𑒂 𑒯𑒱𑒩𑒴𑒏 𑒏𑒰𑒢𑒧𑒹 𑒋𑒏𑓂𑒏𑒹 𑒥𑒹𑒩 𑒢𑒻 𑒣𑒻𑒮𑒪 𑒩𑒯𑒋। 𑒯𑒧 𑒞𑒿 𑒬𑓂𑒩𑒲𑒏𑒩 𑒂 𑒧𑒱𑒞𑒴𑒏𑒹𑒿 𑒔𑒱𑒢𑓂𑒯𑒻𑒞 𑒩𑒯𑒱𑒨𑒢𑓂𑒯𑒱, 𑒋𑒯𑒱𑒢𑒰 𑒁𑒢𑒔𑒼𑒏𑓂𑒏𑒹 𑒢𑒱𑒩𑓂𑒝𑒨 𑒮𑒳𑒢𑒥𑒰𑒏 𑒁𑒦𑓂𑒨𑒰𑒮𑒲 𑒦𑓄 𑒑𑒹𑒪 𑒩𑒯𑒲। 𑒧𑒳𑒠𑒰 𑒯𑒱𑒩𑒳 𑒏𑒢𑒹𑒏 𑒏𑒰𑒪𑒏 𑒥𑒰𑒠 𑒋𑒯𑒱 𑒬𑒥𑓂𑒠 𑒮𑒦𑒏 𑒣𑓂𑒩𑒞𑒱𑒡𑓂𑒫𑒢𑒱 𑒮𑒳𑒢𑒪𑒢𑓂𑒯𑒱 𑒖𑒹𑒢𑒰। 𑒯𑒳𑒢𑒏𑒩 𑒁𑒔𑒧𑓂𑒦𑒱𑒞 𑒢𑒖𑒩𑒱 𑒯𑒧𑒩𑒰 𑒠𑒱𑒮 𑒒𑒳𑒧𑒱 𑒑𑒹𑒪 𑒕𑒪𑒢𑓂𑒯𑒱।
𑒤𑒹𑒩 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏 𑒍𑒯𑒱 𑒬𑒰𑒮𑓂𑒞𑓂𑒩𑒰𑒩𑓂𑒟𑒲 𑒮𑒦𑒧𑒹𑒮𑒿 𑒋𑒏 𑒖𑓂𑒨𑒼𑒞𑒱𑒭𑒲 𑒠𑒱𑒮 𑒂𑓀𑒑𑒳𑒩 𑒠𑒹𑒐𑒥𑒻 𑒕𑒟𑒱-
“𑒖𑓂𑒨𑒼𑒞𑒱𑒭𑒲𑒖𑒲, 𑒁𑒯𑒰𑒿 𑒋𑒏𑒙𑒰 𑒢𑒲𑒏 𑒠𑒱𑒢 𑒞𑒰𑒏𑒴। 𑒁𑒯𑒲 𑒬𑒳𑒠𑓂𑒡𑒧𑒹 𑒄 𑒣𑒰𑒫𑒢 𑒫𑒱𑒫𑒰𑒯 𑒮𑒧𑓂𑒣𑒢𑓂𑒢 𑒦𑓄 𑒖𑒰𑒋। 𑒮𑒱𑓀𑒯 𑒩𑒰𑒬𑒱 𑒂𑒥𑒻𑒥𑒪𑒰 𑒕𑒻, 𑒍𑒯𑒱𑒮𑒿 𑒣𑒴𑒩𑓂𑒫। 𑒏𑒱𑒢𑒏𑒼 𑒏𑒼𑒢𑒼 𑒂𑒣𑒞𑓂𑒞𑒱?”
𑒮𑒦 𑒧𑒰𑒟 𑒗𑒳𑒏𑒰 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱। 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏𑒏 𑒫𑒱𑒩𑒼𑒡𑒧𑒹 𑒏𑒹 𑒚𑒰𑒜𑓃 𑒯𑒼𑒋𑒞?
“𑒯𑒧 𑒮𑒦 𑒞𑒿 𑒁𑒯𑒰𑒿𑒏𑒹𑒿 𑒥𑒳𑒗𑒥𑒋 𑒪𑒹𑒪 𑒂𑒋𑒪 𑒕𑒪𑒯𑒳𑒿। 𑒧𑒳𑒠𑒰 𑒖𑒐𑒢 𑒁𑒯𑒰𑒿 𑒢𑒱𑒩𑓂𑒝𑒨 𑒪𑒻𑒨𑒹 𑒪𑒹𑒢𑒹 𑒕𑒲 𑒞𑒐𑒢...।”
𑒧𑒲𑒧𑒰𑓀𑒮𑒏𑒖𑒲𑒏 𑒯𑒰𑒟 𑒅𑒚𑒻 𑒕𑒢𑓂𑒯𑒱 𑒂 𑒮𑒦 𑒤𑒹𑒩 𑒬𑒰𑒢𑓂𑒞 𑒦𑓄 𑒖𑒰𑒃 𑒕𑒟𑒱।
𑒯𑒧 𑒂 𑒯𑒲𑒩𑒴 𑒮𑒹𑒯𑒼 𑒍𑒞𑒋𑒮𑒿 𑒥𑒱𑒠𑒰 𑒦𑓄 𑒖𑒰𑒃 𑒕𑒲।
𑒯𑒲𑒩𑒴 𑒢𑒱𑒮𑒰𑒿𑒮 𑒪𑒹𑒢𑒹 𑒩𑒯𑒟𑒱, 𑒮𑒹 𑒯𑒧 𑒁𑒢𑒳𑒦𑒫 𑒏𑒹𑒢𑒹 𑒩𑒯𑒲।
...
𑒄 𑒢𑒻 𑒖𑒹 𑒏𑒼𑒢𑒼 𑒂𑒩 𑒥𑒰𑒡𑒰 𑒢𑒻 𑒂𑒋𑒪।
𑒧𑒳𑒠𑒰 𑒍 𑒐𑒙𑒥𑒞𑒰𑒯 𑒫𑒱𑒠𑓂𑒫𑒰𑒢 𑒞𑒿 𑒕𑒪𑒹। 𑒮𑒹 𑒂𑒢𑒢𑓂𑒠𑒰 𑒯𑒳𑒢𑒏𑒩 𑒣𑒳𑒞𑒼𑒯𑒳 𑒥𑒢𑒱 𑒑𑒹𑒪𑒲𑒯। 𑒂 𑒯𑒳𑒢𑒏 𑒕𑒳𑒁𑒪 𑒣𑒰𑒢𑒱 𑒯𑒧𑒩 𑒙𑒼𑒪 𑒂𑒏𑒱 𑒧𑒱𑒞𑒴𑒏 𑒙𑒼𑒪 𑒧𑒰𑒞𑓂𑒩 𑒢𑒻 𑒮𑒾𑒿𑒮𑒹 𑒣𑒩𑒼𑒣𑒙𑓂𑒙𑒰𑒏 𑒫𑒱𑒠𑓂𑒫𑒰𑒢𑒏 𑒥𑒲𑒔𑒧𑒹 𑒔𑒪𑒋 𑒪𑒰𑒑𑒪।
.....
𑒂𑒢𑒢𑓂𑒠𑒰𑒏 𑒢𑒻𑒯𑒩𑒧𑒹 𑒫𑒱𑒫𑒰𑒯 𑒮𑒧𑓂𑒣𑒢𑓂𑒢 𑒦𑒹𑒪 𑒕𑒪। 𑒍𑒞𑒳𑒏𑓂𑒏𑒰 𑒑𑒲𑒞𑒢𑒰𑒠 𑒯𑒧 𑒮𑒳𑒢𑒢𑒹 𑒩𑒯𑒲, 𑒅𑒪𑓂𑒪𑒰𑒮𑒣𑒴𑒩𑓂𑒝, 𑒋𑒐𑒢𑒼 𑒧𑒼𑒢 𑒁𑒕𑒱-
𑒣𑒩𑓂𑒫𑒞 𑒆𑒣𑒩 𑒦𑒧𑒩𑒰 𑒖𑒹 𑒮𑒴𑒞𑒪,
𑒧𑒰𑒪𑒱𑒢 𑒥𑒹𑒙𑒲 𑒮𑒴𑒞𑒪 𑒤𑒳𑒪𑒫𑒰𑒩𑒱 𑒯𑒹
𑒅𑒚𑒴 𑒧𑒰𑒪𑒱𑒢 𑒩𑒰𑒐𑒴 𑒑𑒱𑒩𑒱𑒧𑒪 𑒯𑒰𑒩 𑒯𑒹
𑒣𑒩𑓂𑒫𑒞 𑒆𑒣𑒩 𑒦𑒧𑒩𑒰 𑒖𑒹 𑒮𑒴𑒞𑒪,
𑒧𑒰𑒪𑒱𑒢 𑒥𑒹𑒙𑒲 𑒮𑒴𑒞𑒪 𑒤𑒳𑒪𑒫𑒰𑒩𑒱 𑒯𑒹
𑒅𑒚𑒴 𑒧𑒰𑒪𑒱𑒢 𑒩𑒰𑒐𑒴 𑒑𑒱𑒩𑒱𑒧𑒪 𑒯𑒰𑒩 𑒯𑒹

𑒏𑒼𑒢 𑒤𑒴𑒪 𑒍𑒜𑓃𑒥 𑒪𑒳𑒏𑒹𑒮𑒩𑒱 𑒏𑒹
𑒏𑒼𑒢 𑒤𑒴𑒪 𑒣𑒯𑒱𑒩𑒢
𑒏𑒼𑒢 𑒤𑒴𑒪 𑒥𑒰𑒢𑓂𑒡𑒱𑒏𑒹 𑒮𑒱𑓀𑒑𑒰𑒩 𑒯𑒹

𑒅𑒚𑒴 𑒧𑒰𑒪𑒱𑒢 𑒩𑒰𑒐𑒴 𑒑𑒱𑒩𑒱𑒧𑒪 𑒯𑒰𑒩 𑒯𑒹
𑒥𑒹𑒪𑒲 𑒤𑒴𑒪 𑒍𑒜𑓃𑒥 𑒥𑒢𑓂𑒠𑒲
𑒔𑒧𑒹𑒪𑒲 𑒤𑒴𑒪 𑒣𑒯𑒱𑒩𑒢
𑒁𑒩𑒯𑒳𑒪 𑒤𑒴𑒪 𑒪𑒳𑒏𑒹𑒮𑒩𑒱 𑒏𑒹 𑒮𑒱𑓀𑒑𑒰𑒩 𑒯𑒹
𑒅𑒚𑒴 𑒧𑒰𑒪𑒱𑒢 𑒑𑒰𑒿𑒟𑒴 𑒑𑒱𑒩𑒱𑒧𑒪 𑒯𑒰𑒩 𑒯𑒹
𑒅𑒚𑒴 𑒧𑒰𑒪𑒱𑒢 𑒑𑒰𑒿𑒟𑒴 𑒑𑒱𑒩𑒱𑒧𑒪 𑒯𑒰𑒩 𑒯𑒹
....
𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏 𑒂𑒢𑒢𑓂𑒠𑒰𑒏𑒹𑒿 𑒞𑒰𑒪𑒣𑒞𑓂𑒩 𑒮𑒦𑒏 𑒣𑒩𑒱𑒩𑒏𑓂𑒭𑒝𑒏 𑒦𑒰𑒩 𑒠𑓄 𑒢𑒱𑒬𑓂𑒔𑒱𑒢𑓂𑒞 𑒦𑓄 𑒑𑒹𑒪 𑒩𑒯𑒟𑒱। 𑒣𑒞𑓂𑒢𑒲𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒥𑒹𑒔𑒰𑒩𑒹 𑒂𑒬𑓀𑒏𑒱𑒞 𑒩𑒯𑒟𑒱।
𑒠𑒻𑒫𑒲𑒨 𑒯𑒮𑓂𑒞𑒏𑓂𑒭𑒹𑒣, 𑒂𑒢𑒢𑓂𑒠𑒰 𑒖𑒹𑒢𑒰 𑒍𑒯𑒱 𑒞𑒰𑒪𑒣𑒞𑓂𑒩 𑒮𑒦𑒏 𑒣𑒩𑒱𑒩𑒏𑓂𑒭𑒝 𑒪𑒹𑒪 𑒂𑒋𑒪 𑒩𑒯𑒟𑒱 𑒯𑒳𑒢𑒏𑒩 𑒒𑒩। 𑒁𑒢𑒔𑒼𑒏𑓂𑒏𑒹..
𑒧𑒱𑒞𑒴 𑒏𑒯𑒱 𑒠𑒹𑒪𑒏 𑒯𑒧𑒩𑒰 𑒖𑒹 𑒏𑒼𑒢𑒰 𑒍 𑒬𑓂𑒩𑒲𑒏𑒩 𑒣𑓀𑒛𑒱𑒞𑒏𑒹𑒿 𑒣𑒙𑒱𑒨𑒰 𑒪𑒹𑒢𑒹 𑒩𑒯𑒋। 𑒥𑓂𑒩𑒰𑒯𑓂𑒧𑒝𑒏 𑒥𑒹𑒙𑒲 𑒮𑒩𑒰𑒃 𑒏𑒙𑒼𑒩𑒰 𑒂 𑒧𑒰𑒙𑒱𑒏 𑒧𑒯𑒰𑒠𑒹𑒫 𑒥𑒢𑒥𑒻𑒞 𑒩𑒯𑒞 𑒂 𑒞𑒰𑒪𑒣𑒞𑓂𑒩 𑒮𑒦𑒧𑒹 𑒒𑒴𑒢 𑒪𑒰𑒑𑒱 𑒖𑒰𑒋𑒞..
𑒢𑒻 𑒒𑒴𑒢 𑒪𑒰𑒑𑒋 𑒠𑒹𑒟𑒱𑒢 𑒞𑒰𑒪𑒣𑒞𑓂𑒩 𑒮𑒦𑒧𑒹, 𑒂𑒢𑒢𑓂𑒠𑒰 𑒂𑒋𑒞 𑒋𑒯𑒱 𑒒𑒩। 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏 𑒢𑒱𑒩𑓂𑒝𑒨 𑒏𑓄 𑒪𑒹𑒢𑒹 𑒩𑒯𑒟𑒱।
𑒧𑒱𑒞𑒴 𑒞𑒿 𑒖𑒹𑒢𑒰 𑒖𑒲𑒫𑒢 𑒦𑒩𑒱 𑒁𑒣𑒢 𑒪𑒹𑒪 𑒋𑒯𑒱 𑒢𑒱𑒩𑓂𑒝𑒨𑒏 𑒣𑓂𑒩𑒞𑒱 𑒏𑒵𑒞𑒖𑓂𑒘 𑒕𑒪𑒰𑒯।
𑒬𑓂𑒩𑒲𑒏𑒩𑒏 𑒂𑒨𑒳 𑒖𑒹𑒢𑒰 𑒥𑒜𑓃𑒱 𑒑𑒹𑒪 𑒕𑒪𑒢𑓂𑒯𑒱। 𑒬𑓂𑒩𑒲𑒏𑒩 𑒂 𑒂𑒢𑒢𑓂𑒠𑒰𑒏 𑒧𑒡𑓂𑒨 𑒑𑒣 𑒯𑒼𑒃𑒞𑒹 𑒩𑒯𑒻 𑒕𑒪 𑒍𑒯𑒱 𑒒𑒩𑒧𑒹।
𑒂𑒢𑒢𑓂𑒠𑒰 𑒥𑒖𑒱𑒞𑒹 𑒩𑒯𑒻 𑒕𑒪𑒲𑒯 𑒂 𑒑𑒥𑒱𑒞𑒹 𑒩𑒯𑒻 𑒕𑒪𑒲𑒯।

𑒥𑒰𑒩𑒯𑒹 𑒥𑒩𑒱𑒮 𑒖𑒥 𑒥𑒲𑒞𑒪 𑒞𑒹𑒩𑒯𑒧 𑒔𑒜𑓃𑒱 𑒑𑒹𑒪 𑒯𑒹
𑒥𑒰𑒩𑒯𑒹 𑒥𑒩𑒱𑒮 𑒖𑒥 𑒥𑒲𑒞𑒪 𑒞𑒹𑒩𑒯 𑒔𑒯𑒩𑒱 𑒑𑒹𑒪 𑒯𑒹
𑒪𑒪𑒢𑒰 𑒮𑒰𑒮𑒳 𑒧𑒼𑒩𑒰 𑒏𑒯𑒟𑒱𑒢 𑒥𑒒𑒱𑒢𑒱𑒨𑒰𑒿
𑒥𑒒𑒱𑒢𑒱𑒨𑒰𑒿 𑒒𑒩𑒮𑒹 𑒢𑒱𑒏𑒰𑒪𑒥 𑒯𑒹
𑒪𑒪𑒢𑒰 𑒮𑒰𑒮𑒳 𑒧𑒼𑒩𑒰 𑒏𑒯𑒟𑒱𑒢 𑒥𑒒𑒱𑒢𑒱𑒨𑒰𑒿
𑒥𑒒𑒱𑒢𑒱𑒨𑒰𑒿 𑒒𑒩𑒮𑒹 𑒢𑒱𑒏𑒰𑒪𑒥 𑒯𑒹

𑒁𑓀𑒑𑒢𑒰 𑒖𑒹 𑒥𑒰𑒯𑒩 𑒞𑒼𑒯𑒱 𑒕𑒪𑒐𑒱𑒢 𑒩𑒱𑒢𑒱𑒨𑒰𑒿 𑒑𑒹
𑒪𑒪𑒢𑒰 𑒑𑒹 𑒂𑒢𑒱 𑒠𑒱𑒨𑒾 𑒂𑒏 𑒡𑒟𑒴𑒩 𑒤𑒩 𑒣𑒲𑒮𑒱 𑒯𑒧 𑒣𑒲𑒨𑒥 𑒩𑒹
𑒪𑒪𑒢𑒰 𑒩𑒹 𑒂𑒢𑒲 𑒠𑒱𑒨𑒾 𑒂𑒏 𑒡𑒟𑒴𑒩 𑒤𑒩 𑒣𑒲𑒮𑒱 𑒯𑒧 𑒣𑒲𑒨𑒥 𑒩𑒹
𑒥𑒯𑒩 𑒮𑒹 𑒂𑒍𑒪 𑒥𑒰𑒪𑒳𑒧 𑒣𑒪𑓀𑒑 𑒔𑒜𑓃𑒱 𑒥𑒻𑒮𑒪 𑒩𑒹
𑒥𑒯𑒩 𑒮𑒹 𑒂𑒍𑒪 𑒥𑒰𑒪𑒳𑒧 𑒣𑒪𑓀𑒑 𑒔𑒜𑓃𑒱 𑒥𑒻𑒮𑒪 𑒩𑒹
𑒪𑒪𑒢𑒰 𑒩𑒹 𑒏𑒯𑒱 𑒠𑒱𑒨𑒾 𑒠𑒱𑒪 𑒏𑒹𑒩 𑒥𑒰𑒞 𑒏𑒲 𑒞𑒥 𑒧𑒰𑒯𑒳𑒩 𑒣𑒲𑒨𑒥 𑒩𑒹
𑒪𑒪𑒢𑒰 𑒩𑒹 𑒏𑒯𑒱 𑒠𑒱𑒨𑒾 𑒠𑒱𑒪 𑒏𑒹𑒩 𑒥𑒰𑒞 𑒏𑒲 𑒞𑒥 𑒧𑒰𑒯𑒳𑒩 𑒣𑒲𑒨𑒥 𑒩𑒹

𑒥𑒰𑒩𑒯 𑒯𑒹 𑒥𑒩𑒱𑒮 𑒖𑒥 𑒥𑒲𑒞𑒪 𑒞𑒹𑒩𑒯 𑒔𑒯𑒩𑒱 𑒑𑒹𑒪 𑒩𑒹
𑒪𑒪𑒢𑒰 𑒩𑒹 𑒮𑒰𑒮𑒳 𑒧𑒼𑒩𑒰 𑒏𑒯𑒟𑒱𑒢 𑒥𑒒𑒱𑒢𑒱𑒨𑒰𑒿
𑒥𑒒𑒱𑒢𑒱𑒨𑒰 𑒒𑒩𑒮𑒹 𑒢𑒱𑒏𑒰𑒪𑒥 𑒩𑒹
𑒮𑒰𑒮𑒳 𑒧𑒼𑒩𑒰 𑒧𑒰𑒩𑒟𑒱𑒢 𑒁𑒢𑒴𑒣 𑒡𑒨 𑒢𑒢𑒠𑒼 𑒚𑒳𑒢𑒳𑒏 𑒡𑒨 𑒩𑒹
𑒮𑒰𑒮𑒳 𑒧𑒼𑒩𑒰 𑒧𑒰𑒩𑒟𑒱 𑒁𑒢𑒴𑒣 𑒡𑒨 𑒢𑒢𑒠𑒼 𑒚𑒳𑒢𑒳𑒏 𑒡𑒨 𑒩𑒹
𑒪𑒪𑒢𑒰 𑒩𑒹 𑒑𑒼𑒙𑒢𑒼 𑒐𑒳𑒬𑒲 𑒒𑒩 𑒖𑒰𑒍𑒪 𑒮𑒦 𑒡𑒢 𑒯𑒧𑒩𑒹 𑒯𑒹𑒞𑒻 𑒯𑒹
𑒪𑒪𑒢𑒰 𑒩𑒹 𑒑𑒼𑒙𑒢𑓄 𑒐𑒳𑒬𑒲 𑒒𑒩 𑒖𑒰𑒍𑒪 𑒮𑒦 𑒡𑒢 𑒯𑒧𑒩𑒹 𑒯𑒹𑒞𑒻 𑒯𑒹

𑒔𑒳𑒣 𑒩𑒯𑒴, 𑒔𑒳𑒣 𑒩𑒯𑒴 𑒡𑒢𑒲 𑒏𑒲 𑒞𑒼𑒯𑒲𑒿 𑒧𑒯𑒡𑒢𑒲 𑒕𑒱𑒁 𑒯𑒹
𑒔𑒳𑒣 𑒩𑒯𑒴, 𑒔𑒳𑒣 𑒩𑒯𑒴 𑒡𑒢𑒲 𑒏𑒲 𑒞𑒼𑒯𑒲𑒿 𑒧𑒯𑒡𑒢𑒲 𑒕𑒱𑒁 𑒯𑒹
𑒡𑒢𑒲 𑒯𑒹 𑒏𑒩𑒥𑒻 𑒯𑒹 𑒞𑒳𑒪𑒮𑒲 𑒏𑒹 𑒖𑒰𑒑, 𑒏𑒲 𑒡𑒢 𑒮𑒦 𑒪𑒳𑒙𑒰 𑒠𑒹𑒥𑓄 𑒯𑒹
𑒪𑒪𑒢𑒰 𑒯𑒹 𑒏𑒩𑒥𑒻 𑒧𑒹 𑒣𑒼𑒐𑒩𑒱 𑒏𑒹 𑒖𑒰𑒑, 𑒏𑒲 𑒮𑒦 𑒡𑒢 𑒪𑒳𑒙𑒰𑒋𑒥 𑒯𑒹

𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏 𑒯𑒿𑒮𑒲 𑒏𑒩𑒟𑒱𑒢- 𑒂𑒢𑒢𑓂𑒠𑒰, 𑒁𑒯𑒰𑒿𑒏𑒹𑒿 𑒞𑒿 𑒮𑒰𑒮𑒳 𑒁𑒕𑒱 𑒢𑒻, 𑒞𑒐𑒢 𑒍 𑒥𑒹𑒔𑒰𑒩𑒲 𑒁𑒯𑒰𑒿𑒏𑒹𑒿 𑒥𑒒𑒱𑒢𑒱𑒨𑒰𑒿 𑒏𑒼𑒢𑒰 𑒏𑒯𑒞𑒲𑒯?
-𑒞𑒹𑒿 𑒢𑒹 𑒑𑒥𑒻 𑒕𑒲, 𑒮𑒦 𑒔𑒲𑒖 𑒞𑒿 𑒦𑒩𑒪-𑒣𑒴𑒩𑒪 𑒧𑒳𑒠𑒰..।
𑒂𑒿𑒐𑒱 𑒢𑒼𑒩𑒰 𑒑𑒹𑒪 𑒕𑒪𑒢𑓂𑒯𑒱 𑒂𑒢𑒢𑓂𑒠𑒰𑒏। 𑒯𑒧𑒩𑒰 𑒁𑒐𑒢𑒼 𑒧𑒼𑒢 𑒁𑒕𑒱।
-𑒯𑒧 𑒁𑒯𑒰𑒿𑒏𑒹𑒿 𑒠𑒳𑓁𑒐 𑒠𑒹𑒪𑒯𑒳𑒿 𑒄 𑒑𑒣 𑒏𑒯𑒱 𑒏𑓄।
-𑒏𑒼𑒢 𑒠𑒳𑓁𑒐? 𑒮𑒰𑒮𑒳 𑒢𑒻 𑒕𑒟𑒱 𑒞𑒿 𑒮𑒮𑒳𑒩 𑒞𑒿 𑒕𑒟𑒱।
𑒬𑓂𑒩𑒲𑒏𑒩𑒏𑒹𑒿 𑒣𑓂𑒩𑒮𑒢𑓂𑒢 𑒠𑒹𑒐𑒱 𑒧𑒱𑒞𑒴𑒏𑒹𑒿 𑒂𑒞𑓂𑒧𑒞𑒼𑒭 𑒯𑒼𑒃𑒢𑓂𑒯।
.......
𑒂 𑒬𑓂𑒩𑒲𑒏𑒩 𑒧𑒲𑒧𑒰𑓀𑒮𑒏𑒏 𑒧𑒵𑒞𑓂𑒨𑒳𑒏 𑒥𑒰𑒠𑒼 𑒂𑒢𑒢𑓂𑒠𑒰 𑒞𑒰𑒪𑒣𑒞𑓂𑒩 𑒮𑒦𑒧𑒹 𑒖𑒰𑒢 𑒤𑒳𑒏𑒻𑒞 𑒩𑒯𑒻𑒞 𑒕𑒪𑒲𑒯।
𑒤𑒹𑒩 𑒧𑒱𑒞𑒴𑒏𑒹𑒿 𑒠𑒴𑒙𑒰 𑒥𑒹𑒙𑒲 𑒦𑒹𑒪𑒢𑓂𑒯𑒱 𑒫𑒪𑓂𑒪𑒦𑒰 𑒂 𑒧𑒹𑒡𑒰।
𑒂𑒢𑒢𑓂𑒠𑒰𑒏 𑒐𑒳𑒬𑒲 𑒯𑒧 𑒠𑒹𑒐𑒢𑒹 𑒕𑒲। 𑒢𑒻𑒯𑒩 𑒑𑒹𑒪 𑒩𑒯𑒟𑒱 𑒍। 𑒍𑒞𑒯𑒱 𑒠𑒳𑒢𑒴 𑒖𑒾𑒿𑒂 𑒥𑒹𑒙𑒲 𑒦𑒹𑒪 𑒕𑒪𑒢𑓂𑒯𑒱-

𑒪𑒰𑒪 𑒣𑒩𑒲 𑒯𑒹 𑒑𑒳𑒪𑒰𑒥 𑒣𑒩𑒲
𑒪𑒰𑒪 𑒣𑒩𑒲 𑒯𑒹 𑒑𑒳𑒪𑒰𑒥 𑒣𑒩𑒲
𑒯𑒹 𑒑𑒑𑒢𑒣𑒩 𑒢𑒰𑒔𑒞 𑒃𑒢𑓂𑒠𑓂𑒩 𑒣𑒩𑒲
𑒯𑒹 𑒑𑒳𑒪𑒰𑒥𑒣𑒩 𑒢𑒰𑒔𑒞 𑒃𑒢𑓂𑒠𑓂𑒩 𑒣𑒩𑒲

𑒂 𑒤𑒹𑒩 𑒦𑒹𑒪𑒢𑓂𑒯𑒱 𑒥𑒹𑒙𑒰। 𑒣𑒻𑒒 𑒦𑒹𑒪𑒰𑒣𑒩 𑒥𑒹𑒙𑒰 𑒧𑒹𑒒𑒏𑒹𑒿 𑒣𑒜𑓃𑒥𑒰 𑒪𑒹𑒪 𑒥𑒢𑒰𑒩𑒮 𑒣𑒚𑒹𑒢𑒹 𑒩𑒯𑒟𑒱 𑒧𑒱𑒞𑒴।
𑒂 𑒠𑒱𑒢 𑒥𑒱𑒞𑒻𑒞 𑒑𑒹𑒪, 𑒥𑒹𑒙𑒲 𑒮𑒦 𑒣𑒻𑒒 𑒦𑒹𑒪𑒢𑓂𑒯𑒱 𑒂 𑒠𑒳𑒢𑒴 𑒥𑒹𑒙𑒲, 𑒧𑒹𑒡𑒰 𑒂 𑒫𑒪𑓂𑒪𑒦𑒰𑒏 𑒥𑒱𑒨𑒰𑒯 𑒠𑒰𑒢 𑒏𑓄 𑒢𑒱𑒬𑓂𑒔𑒱𑒢𑓂𑒞 𑒦𑓄 𑒑𑒹𑒪 𑒕𑒪𑒰𑒯 𑒧𑒱𑒞𑒴।
𑒥𑒹𑒙𑒰𑒏 𑒣𑒩𑒫𑒩𑒱𑒬 𑒂 𑒥𑒱𑒨𑒰𑒯 𑒠𑒰𑒢 𑒮𑒹𑒯𑒼 𑒏𑒹𑒪𑒢𑓂𑒯𑒱। 𑒧𑒹𑒒 𑒥𑒢𑒰𑒩𑒮𑒧𑒹 𑒣𑒰𑒚𑒢 𑒏𑒩𑒋 𑒪𑒑𑒪𑒰𑒯। 𑒧𑒹𑒒, 𑒧𑒹𑒡𑒰 𑒂 𑒫𑒪𑓂𑒪𑒦𑒰 𑒞𑒲𑒢𑒴 𑒑𑒼𑒙𑒹 𑒮𑒰𑒪𑒧𑒹 𑒋𑒏 𑒧𑒰𑒮 𑒂𑒥𑒟𑒱 𑒡𑒩𑒱 𑒁𑒫𑒬𑓂𑒨।
𑒪𑒼𑒏 𑒥𑒱𑒮𑒩𑒱 𑒑𑒹𑒪 𑒧𑒰𑒩𑒞𑒹 𑒩𑒰𑒮 𑒑𑒣 𑒮𑒦।

II
𑒦𑒰𑒧𑒞𑒲 𑒣𑓂𑒩𑒮𑓂𑒟𑒰𑒢𑒧𑓂
𑒂𑒢𑒢𑓂𑒠𑒰 𑒧𑒱𑒞𑒴𑒏 𑒣𑒱𑒞𑒰𑒖𑒲𑒏 𑒋𑒯𑒱 𑒞𑒰𑒪𑒣𑒞𑓂𑒩 𑒮𑒦𑒏 𑒣𑒩𑒱𑒩𑒏𑓂𑒭𑒝 𑒧𑒢𑒼𑒨𑒼𑒑𑒮𑒿 𑒏𑓄 𑒩𑒯𑒪 𑒕𑒟𑒱। 𑒏𑒛𑓃𑒑𑒩 𑒩𑒾𑒠, 𑒧𑒱𑒞𑒴𑒏𑒹𑒿 𑒍𑒯𑒱𑒢𑒰 𑒧𑒼𑒢 𑒕𑒢𑓂𑒯𑒱।
𑒧𑒱𑒞𑒴 𑒮𑓀𑒑 𑒖𑒱𑒢𑒑𑒲 𑒥𑒲𑒞𑒱 𑒑𑒹𑒪𑒢𑓂𑒯𑒱 𑒂𑒢𑒢𑓂𑒠𑒰𑒏। 𑒂 𑒂𑒥 𑒖𑒐𑒢 𑒍 𑒢𑒻 𑒕𑒟𑒱 𑒞𑒐𑒢 𑒧𑒱𑒞𑒴𑒏 𑒖𑒲𑒫𑒢𑒏 𑒣𑒩𑒱𑒩𑒏𑓂𑒭𑒝 𑒏𑒼𑒢𑒰 𑒯𑒼𑒋𑒞।.. 𑒧𑒱𑒞𑒴 𑒣𑓂𑒩𑒫𑒔𑒢𑒏 𑒥𑒲𑒔𑒧𑒹 𑒏𑒞𑒯𑒳 𑒦𑒿𑒮𑒱𑒨𑒰 𑒖𑒰𑒃 𑒕𑒟𑒱।
𑒣𑓂𑒩𑒫𑒔𑒢 𑒔𑒪𑒱 𑒩𑒯𑒪 𑒁𑒕𑒱। 𑒧𑒱𑒞𑒴 𑒑𑒩𑒳𑒛𑓃 𑒣𑒳𑒩𑒰𑒝 𑒢𑒻 𑒮𑒳𑒢𑒞𑒰𑒯। 𑒧𑒱𑒞𑒴 𑒧𑓀𑒛𑒢𑒏 𑒥𑓂𑒩𑒯𑓂𑒧𑒮𑒱𑒠𑓂𑒡𑒱 𑒮𑒳𑒢𑒞𑒰𑒯, 𑒫𑒰𑒔𑒮𑓂𑒣𑒞𑒱𑒏 𑒦𑒰𑒧𑒞𑒲 𑒮𑒳𑒢𑒞𑒰𑒯, 𑒖𑒹 𑒮𑒳𑒢𑒥𑒼 𑒏𑒩𑒞𑒰𑒯 𑒞𑒿। 𑒖𑒿 𑒥𑒹𑒙𑒲 𑒮𑒦𑒏 𑒖𑒱𑒠𑓂𑒠 𑒕𑒢𑓂𑒯𑒱𑒨𑒹 𑒞𑒿 𑒂𑒞𑓂𑒧𑒰 𑒫𑒱𑒭𑒨𑒣𑒩 𑒏𑒳𑒧𑒰𑒩𑒱𑒪𑒏 𑒠𑒩𑓂𑒬𑒢 𑒮𑒳𑒢𑒞𑒰𑒯। 𑒂 𑒮𑒻𑒯 𑒣𑓂𑒩𑒫𑒔𑒢 𑒔𑒪𑒱 𑒩𑒯𑒪 𑒁𑒕𑒱।
𑒦𑓂𑒩𑒧। 𑒬𑒥𑓂𑒠𑒏 𑒦𑓂𑒩𑒧। 𑒏𑒯𑒻𑒞 𑒩𑒯𑒟𑒱 𑒬𑓂𑒩𑒲𑒏𑒩 𑒧𑒰𑒩𑒞𑒹 𑒩𑒰𑒮 𑒑𑒣 𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂 𑒣𑒩। 𑒦𑒰𑒧𑒞𑒲 𑒣𑓂𑒩𑒮𑓂𑒟𑒰𑒢𑒧𑓂 𑒣𑒩। 𑒬𑒥𑓂𑒠𑒏 𑒁𑒩𑓂𑒟 𑒯𑒧 𑒑𑒜𑓃𑒱 𑒪𑒻𑒞 𑒕𑒲। 𑒂 𑒤𑒹𑒩 𑒦𑓂𑒩𑒧 𑒬𑒳𑒩𑒴 𑒦𑓄 𑒖𑒰𑒃𑒞 𑒁𑒕𑒱।
-𑒑𑒳𑒩𑒳𑒖𑒲। 𑒯𑒧 𑒣𑒞𑓂𑒢𑒲𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒒𑒼𑒩 𑒢𑒱𑒩𑒰𑒬𑒰𑒧𑒹 𑒕𑒲। 𑒏𑒲 𑒕𑒱𑒌 𑒄 𑒖𑒲𑒫𑒢। 𑒏𑒞𑒋 𑒯𑒼𑒋𑒞 𑒂𑒢𑒢𑓂𑒠𑒰।
- 𑒧𑒱𑒞𑒴। 𑒡𑒲𑒩𑒖 𑒩𑒰𑒐𑒴। 𑒥𑓂𑒩𑒯𑓂𑒧𑒮𑒱𑒠𑓂𑒡𑒱𑒏 𑒯𑒧𑒩 𑒄 𑒣𑒰𑒚 𑒁𑒯𑒰𑒿𑒏 𑒮𑒦 𑒦𑓂𑒩𑒧𑒏 𑒢𑒱𑒫𑒰𑒩𑒝 𑒏𑒩𑒞। 𑒥𑓂𑒩𑒯𑓂𑒧𑒮𑒱𑒠𑓂𑒡𑒱𑒧𑒹 𑒔𑒰𑒩𑒱 𑒏𑒰𑒝𑓂𑒛 𑒕𑒻। 𑒥𑓂𑒩𑒯𑓂𑒧, 𑒞𑒩𑓂𑒏, 𑒢𑒱𑒨𑒼𑒑 𑒂 𑒮𑒱𑒠𑓂𑒡𑒱 𑒏𑒰𑒝𑓂𑒛। 𑒥𑓂𑒩𑒯𑓂𑒧𑒏𑒰𑒝𑓂𑒛𑒧𑒹 𑒥𑓂𑒩𑒯𑓂𑒧𑒏 𑒩𑒴𑒣𑒣𑒩, 𑒞𑒩𑓂𑒏𑒏𑒰𑒝𑓂𑒛𑒧𑒹 𑒣𑓂𑒩𑒧𑒰𑒝𑒣𑒩, 𑒢𑒱𑒨𑒼𑒑𑒏𑒰𑒝𑓂𑒛𑒧𑒹 𑒖𑒲𑒫𑒏 𑒧𑒳𑒏𑓂𑒞𑒱𑒣𑒩 𑒂 𑒮𑒱𑒠𑓂𑒡𑒱𑒏𑒰𑒝𑓂𑒛𑒧𑒹 𑒅𑒣𑒢𑒱𑒭𑒠𑒏 𑒫𑒰𑒏𑓂𑒨𑒏 𑒣𑓂𑒩𑒧𑒰𑒝𑒣𑒩 𑒫𑒱𑒫𑒹𑒔𑒢 𑒁𑒕𑒱।
- 𑒧𑒱𑒞𑒴। 𑒧𑒳𑒏𑓂𑒞𑒱 𑒖𑓂𑒘𑒰𑒢𑒮𑒿 𑒣𑒵𑒟𑒏𑓂 𑒏𑒼𑒢𑒼 𑒥𑒾𑒮𑓂𑒞𑒳 𑒢𑒻 𑒁𑒕𑒱। 𑒧𑒳𑒏𑓂𑒞𑒱 𑒮𑓂𑒫𑒨𑓀 𑒖𑓂𑒘𑒰𑒢 𑒦𑒹𑒪। 𑒧𑒰𑒢𑒫𑒏 𑒏𑓂𑒭𑒳𑒠𑓂𑒩 𑒥𑒳𑒠𑓂𑒡𑒱𑒏 𑒏𑒞𑒯𑒳 𑒅𑒣𑒹𑒏𑓂𑒭𑒰 𑒧𑓀𑒛𑒢 𑒢𑒻 𑒏𑒹𑒢𑒹 𑒕𑒟𑒱। 𑒏𑒩𑓂𑒧𑒏 𑒧𑒯𑒞𑓂𑒫 𑒍 𑒥𑒳𑒗𑒻𑒞 𑒕𑒟𑒱। 𑒧𑒳𑒠𑒰 𑒞𑒰𑒯𑒱𑒙𑒰 𑒮𑒿 𑒧𑒳𑒏𑓂𑒞𑒱 𑒢𑒻 𑒦𑒹𑒙𑒞। 𑒮𑓂𑒤𑒼𑒙𑒏𑒹𑒿 𑒡𑓂𑒫𑒢𑒱-𑒬𑒥𑓂𑒠𑒏 𑒩𑒴𑒣𑒧𑒹 𑒁𑒩𑓂𑒟 𑒠𑒻𑒞 𑒧𑓀𑒛𑒢 𑒠𑒹𑒐𑒪𑒢𑓂𑒯𑒱। 𑒮𑒹 𑒬𑓀𑒏𑒩𑒮𑒿 𑒍 𑒋𑒯𑒱 𑒁𑒩𑓂𑒟𑒹𑒿 𑒦𑒱𑒢𑓂𑒢 𑒕𑒟𑒱 𑒖𑒹 𑒋𑒯𑒱 𑒮𑓂𑒤𑒼𑒙𑒏 𑒞𑒰𑒠𑒰𑒞𑓂𑒧𑓂𑒨 𑒍 𑒥𑒢𑒥𑒻𑒞 𑒕𑒟𑒱 𑒧𑒳𑒠𑒰 𑒬𑓀𑒏𑒩 𑒥𑓂𑒩𑒯𑓂𑒧𑒮𑒿 𑒏𑒧 𑒏𑒼𑒢𑒼 𑒞𑒰𑒠𑒰𑒞𑓂𑒧𑓂𑒨 𑒢𑒻 𑒧𑒰𑒢𑒻 𑒕𑒟𑒱। 𑒮𑒹 𑒧𑓀𑒛𑒢 𑒬𑓀𑒏𑒩𑒮𑒿 𑒥𑒹𑒬𑒲 𑒬𑒳𑒠𑓂𑒡 𑒁𑒠𑓂𑒫𑒻𑒞𑒫𑒰𑒠𑒲 𑒦𑒹𑒪𑒰𑒯।
-𑒧𑒱𑒞𑒴। 𑒧𑓀𑒛𑒢 𑒏𑓂𑒭𑒧𑒞𑒰 𑒂 𑒁𑒏𑓂𑒭𑒧𑒞𑒰𑒏 𑒋𑒏 𑒮𑓀𑒑 𑒦𑒹𑒢𑒰𑒃𑒏𑒹𑒿 𑒫𑒱𑒩𑒼𑒡𑒲 𑒞𑒞𑓂𑒫 𑒢𑒻 𑒧𑒰𑒢𑒻𑒞 𑒕𑒟𑒱। 𑒄 𑒏𑒐𑒢𑒼 𑒁𑒩𑓂𑒟𑒏𑓂𑒩𑒱𑒨𑒰𑒏𑒵𑒞 𑒦𑒹𑒠 𑒯𑒼𑒃𑒞 𑒁𑒕𑒱, 𑒧𑒳𑒠𑒰 𑒍 𑒦𑒹𑒠 𑒧𑒴𑒪 𑒞𑒞𑓂𑒫 𑒏𑒼𑒢𑒰 𑒦𑓄 𑒑𑒹𑒪। 𑒮𑒹 𑒄 𑒥𑓂𑒩𑒯𑓂𑒧 𑒮𑒦 𑒦𑒹𑒠𑒧𑒹 𑒩𑒯𑒪𑒼𑒣𑒩 𑒮𑒦 𑒏𑒰𑒖 𑒏𑓄 𑒮𑒏𑒻𑒋।
-𑒠𑒹𑒐𑒴। 𑒫𑒰𑒔𑒮𑓂𑒣𑒞𑒱𑒏 𑒦𑒰𑒧𑒞𑒲 𑒣𑓂𑒩𑒮𑓂𑒟𑒰𑒢𑒏 𑒫𑒱𑒔𑒰𑒩 𑒧𑓀𑒛𑒢 𑒧𑒱𑒬𑓂𑒩𑒏 𑒫𑒱𑒔𑒰𑒩𑒮𑒿 𑒧𑒹𑒪 𑒐𑒰𑒃𑒞 𑒁𑒕𑒱। 𑒧𑓀𑒛𑒢 𑒧𑒱𑒬𑓂𑒩𑒏 𑒥𑓂𑒩𑒯𑓂𑒧𑒮𑒱𑒠𑓂𑒡𑒱𑒣𑒩 𑒫𑒰𑒔𑒮𑓂𑒣𑒞𑒱 𑒞𑒞𑓂𑒫𑒮𑒧𑒲𑒏𑓂𑒭𑒰 𑒪𑒱𑒐𑒢𑒹 𑒕𑒟𑒱। 𑒍𑒢𑒰 𑒞𑒞𑓂𑒫𑒮𑒧𑒲𑒏𑓂𑒭𑒰 𑒂𑒥 𑒅𑒣𑒪𑒥𑓂𑒡 𑒢𑒻 𑒕𑒻।
-𑒞𑒐𑒢 𑒞𑒞𑓂𑒫 𑒮𑒧𑒲𑒏𑓂𑒭𑒰𑒏 𑒔𑒩𑓂𑒔𑒰 𑒏𑒼𑒢𑒰 𑒂𑒋𑒪।
-𑒫𑒰𑒔𑒮𑓂𑒣𑒞𑒱𑒏 𑒦𑒰𑒧𑒞𑒲𑒧𑒹 𑒋𑒏𑒩 𑒔𑒩𑓂𑒔𑒰 𑒕𑒻।
-𑒧𑒳𑒠𑒰 𑒧𑓀𑒛𑒢𑒏 𑒫𑒱𑒔𑒰𑒩 𑒖𑒰𑒢𑒥𑒰𑒮𑒿 𑒣𑒴𑒩𑓂𑒫 𑒯𑒧𑒩𑒰 𑒧𑒼𑒢𑒧𑒹 𑒂𑒥𑒱 𑒩𑒯𑒪 𑒁𑒕𑒱 𑒖𑒹 𑒖𑒐𑒢 𑒍 𑒬𑓀𑒏𑒩𑒰𑒔𑒰𑒩𑓂𑒨𑒮𑒿 𑒯𑒰𑒩𑒱 𑒑𑒹𑒪𑒰𑒯 𑒞𑒐𑒢 𑒯𑒳𑒢𑒏𑒩 𑒯𑒰𑒩𑒪 𑒮𑒱𑒠𑓂𑒡𑒰𑒢𑓂𑒞𑒏 𑒣𑒰𑒩𑒰𑒨𑒝𑒮𑒿 𑒯𑒧𑒩𑒰 𑒧𑒼𑒢𑒏𑒹𑒿 𑒏𑒼𑒢𑒰 𑒬𑒰𑒢𑓂𑒞𑒱 𑒦𑒹𑒙𑒞।
-𑒠𑒹𑒐𑒱𑒨𑒾, 𑒧𑓀𑒛𑒢 𑒯𑒰𑒩𑒱 𑒑𑒹𑒪 𑒕𑒪𑒰𑒯 𑒞𑒏𑒩 𑒣𑓂𑒩𑒧𑒰𑒝 𑒧𑓀𑒛𑒢𑒏 𑒪𑒹𑒐𑒢𑒲𑒧𑒹 𑒢𑒻 𑒁𑒕𑒱। 𑒧𑓀𑒛𑒢 𑒮𑓂𑒤𑒼𑒙𑒫𑒰𑒠𑒏 𑒮𑒧𑒩𑓂𑒟𑒏 𑒩𑒯𑒟𑒱, 𑒧𑒳𑒠𑒰 𑒬𑓀𑒏𑒩𑒰𑒔𑒰𑒩𑓂𑒨 𑒮𑓂𑒤𑒼𑒙𑒫𑒰𑒠𑒏 𑒐𑒝𑓂𑒛𑒢 𑒏𑒩𑒻𑒞 𑒕𑒟𑒱। 𑒧𑓀𑒛𑒢 𑒏𑒳𑒧𑒰𑒩𑒱𑒪 𑒦𑒙𑓂𑒙𑒏 𑒫𑒱𑒣𑒩𑒲𑒞 𑒐𑓂𑒨𑒰𑒞𑒱𑒏 𑒮𑒧𑒩𑓂𑒟𑒏 𑒩𑒯𑒟𑒱, 𑒧𑒳𑒠𑒰 𑒬𑓀𑒏𑒩𑒰𑒔𑒰𑒩𑓂𑒨𑒏 𑒖𑒰𑒯𑒱 𑒬𑒱𑒭𑓂𑒨 𑒮𑒳𑒩𑒹𑒬𑓂𑒫𑒩𑒰𑒔𑒰𑒩𑓂𑒨𑒏𑒹𑒿 𑒪𑒼𑒏 𑒧𑓀𑒛𑒢 𑒧𑒱𑒬𑓂𑒩 𑒥𑒳𑒗𑒻 𑒕𑒟𑒱 𑒍 𑒋𑒏𑒩 𑒐𑒝𑓂𑒛𑒢 𑒏𑒩𑒻 𑒕𑒟𑒱।
-𑒮𑒹 𑒞𑒿 𑒚𑒲𑒏𑒹। 𑒧𑓀𑒛𑒢 𑒯𑒰𑒩𑒱 𑒑𑒹𑒪 𑒩𑒯𑒱𑒞𑒟𑒱 𑒞𑒿 𑒯𑒳𑒢𑒏𑒩 𑒠𑒩𑓂𑒬𑒢 𑒬𑓀𑒏𑒩𑒰𑒔𑒰𑒩𑓂𑒨𑒏 𑒁𑒢𑒳𑒏𑒩𑒝 𑒏𑒩𑒱𑒞𑒢𑓂𑒯𑒱।
-𑒂𑒥 𑒏𑒯𑒴 𑒖𑒹 𑒖𑒰𑒯𑒱 𑒮𑒳𑒩𑒹𑒬𑓂𑒫𑒩𑒰𑒔𑒰𑒩𑓂𑒨𑒏𑒹𑒿 𑒬𑓀𑒏𑒩𑒰𑒔𑒰𑒩𑓂𑒨 𑒬𑓂𑒩𑒵𑓀𑒑𑒹𑒩𑒲 𑒧𑒚𑒏 𑒧𑒚𑒰𑒡𑒲𑒬 𑒥𑒢𑒹𑒪𑒢𑓂𑒯𑒱 𑒮𑒹 𑒁𑒫𑒱𑒠𑓂𑒨𑒰𑒏 𑒠𑒴 𑒞𑒩𑒯𑒏 𑒯𑒹𑒥𑒰𑒏 𑒫𑒱𑒩𑒼𑒡𑒲 𑒕𑒟𑒱 𑒧𑒳𑒠𑒰 𑒧𑓀𑒛𑒢 𑒁𑒣𑒢 𑒑𑓂𑒩𑒢𑓂𑒟 𑒥𑓂𑒩𑒯𑓂𑒧𑒮𑒱𑒠𑓂𑒡𑒱𑒧𑒹 𑒁𑒑𑓂𑒩𑒯𑒝 𑒂 𑒁𑒢𑓂𑒨𑒟𑒰𑒑𑓂𑒩𑒯𑒝 𑒢𑒰𑒧𑒮𑒿 𑒁𑒫𑒱𑒠𑓂𑒨𑒰𑒏 𑒠𑒴𑒙𑒰 𑒩𑒴𑒣 𑒏𑒯𑒢𑒹 𑒕𑒟𑒱। 𑒧𑓀𑒛𑒢 𑒖𑒲𑒫𑒏𑒹𑒿 𑒁𑒫𑒱𑒠𑓂𑒨𑒰𑒏 𑒂𑒬𑓂𑒩𑒨 𑒂 𑒥𑓂𑒩𑒯𑓂𑒧𑒏𑒹𑒿 𑒁𑒫𑒱𑒠𑓂𑒨𑒰𑒏 𑒫𑒱𑒭𑒨 𑒏𑒯𑒻 𑒕𑒟𑒱 𑒧𑒳𑒠𑒰 𑒮𑒳𑒩𑒹𑒬𑓂𑒫𑒩𑒰𑒔𑒰𑒩𑓂𑒨 𑒮𑒹 𑒢𑒻 𑒧𑒰𑒢𑒻 𑒕𑒟𑒱। 𑒬𑓀𑒏𑒩𑒰𑒔𑒰𑒩𑓂𑒨𑒏 𑒫𑒱𑒔𑒰𑒩𑒏 𑒧𑓀𑒛𑒢 𑒫𑒱𑒩𑒼𑒡𑒲 𑒕𑒟𑒱 𑒧𑒳𑒠𑒰 𑒮𑒳𑒩𑒹𑒬𑓂𑒫𑒩𑒰𑒔𑒰𑒩𑓂𑒨 𑒯𑒳𑒢𑒏𑒩 𑒧𑒞𑒏 𑒮𑒧𑒩𑓂𑒟𑒢𑒧𑒹 𑒕𑒟𑒱।
.......
𑒥𑒰𑒢𑒩 𑒂 𑒥𑒢𑒑𑒠𑒯𑒰 𑒐𑒹𑒞 𑒮𑒦𑒏𑒹𑒿 𑒡𑒰𑓀𑒑𑒢𑒹 𑒁𑒕𑒱 𑒂 𑒣𑒰𑒩𑒰 𑒥𑒰𑒩𑒲𑒏𑒹𑒿। 𑒂𑒥 𑒯𑒧𑒩𑒰 𑒠𑒳𑒂𑒩𑒹 𑒑𑒰𑒧𑒏 𑒪𑒼𑒏 𑒧𑒯𑒲𑒮 𑒣𑒼𑒮𑒢𑒰𑒃 𑒞𑒿 𑒢𑒻 𑒕𑒼𑒛𑓃𑒱 𑒠𑒹𑒞। 𑒥𑒰𑒢𑒩 𑒂 𑒥𑒢𑒑𑒠𑒯𑒰 𑒥𑒛𑓂𑒛 𑒢𑒼𑒏𑒮𑒰𑒢 𑒏𑓄 𑒩𑒯𑒪 𑒁𑒕𑒱।
“𑒔𑒰𑒩𑒱𑒙𑒰 𑒥𑒰𑒢𑒩 𑒏𑒪𑒧𑒧𑒹 𑒁𑒕𑒱। 𑒡𑓄 𑒏𑓄 𑒂𑒧 𑒮𑒦𑒏𑒹𑒿 𑒠𑒏𑒛𑓃𑒱 𑒠𑒹𑒪𑒏। 𑒯𑒧 𑒑𑒹𑒪 𑒩𑒯𑒲। 𑒮𑒰𑒿𑒗 𑒦𑓄 𑒑𑒹𑒪𑒻 𑒞𑒿 𑒂𑒥 𑒮𑒦𑒙𑒰 𑒥𑒰𑒢𑒩 𑒑𑒰𑒕𑒏 𑒕𑒱𑒣𑓂𑒣𑒲 𑒡𑓄 𑒪𑒹𑒢𑒹 𑒁𑒕𑒱। 𑒮𑒰𑒿𑒗 𑒡𑒩𑒱 𑒠𑒳𑒢𑒴 𑒥𑒰𑒣𑒳𑒞 𑒏𑒪𑒧 𑒍𑒑𑒩𑒢𑒹 𑒩𑒯𑒲, 𑒗𑒚𑒯𑒰 𑒧𑒰𑒩𑒱 𑒦𑒑𑒹𑒪𑒯𑒳𑒿, 𑒧𑒳𑒠𑒰 𑒞𑒐𑒢 𑒁𑒯𑒰𑒿𑒏 𑒏𑒪𑒧 𑒠𑒱𑒮 𑒔𑒪𑒱 𑒑𑒹𑒪”।–- 𑒯𑒧 𑒧𑒱𑒞𑒴𑒏𑒹𑒿 𑒯𑒧 𑒏𑒯𑒻 𑒕𑒱𑒨𑒢𑓂𑒯𑒱।
“𑒮𑒦𑒙𑒰 𑒢𑒰𑒬 𑒏𑓄 𑒠𑒹𑒪𑒏𑒻 𑒥𑒔𑒪𑒴। 𑒩𑒰𑒞𑒱𑒧𑒹 𑒞𑒿 𑒢𑒘𑒱 𑒮𑒳𑒗𑒻 𑒕𑒻। 𑒦𑒼𑒩𑒹-𑒦𑒼𑒩 𑒏𑒪𑒧 𑒖𑒰 𑒏𑓄 𑒠𑒹𑒐𑒻 𑒕𑒲। 𑒥𑒢𑒑𑒠𑒯𑒰 𑒮𑒦𑒙𑒰 𑒤𑒮𑒱𑒪 𑒐𑒰 𑒪𑒹𑒪𑒏 𑒂𑒥 𑒄 𑒥𑒰𑒢𑒩 𑒂𑒧𑒏 𑒣𑒰𑒕𑒰𑒿 𑒪𑒰𑒑𑒪 𑒁𑒕𑒱। 𑒏𑒩𑓄 𑒠𑒱𑒨𑒾 𑒖𑒐𑒢...”।
“𑒥𑒢𑒑𑒠𑒯𑒰 𑒮𑒦 𑒞𑒿 𑒮𑒰𑒤 𑒏𑓄 𑒅𑒣𑒙𑒱 𑒑𑒹𑒪 𑒕𑒪𑒻। 𑒢𑒻 𑒖𑒰𑒢𑒱 𑒤𑒹𑒩 𑒏𑒞𑓂𑒞𑓄 𑒮𑒿 𑒂𑒥𑒱 𑒑𑒹𑒪 𑒕𑒻। 𑒑𑒖𑒣𑒙𑒯𑒰 𑒑𑒰𑒧𑒧𑒹 𑒖𑒰𑒑 𑒦𑒹𑒪 𑒕𑒪𑒻, 𑒍𑒧𑓂𑒯𑒩𑒹𑒮𑒿 𑒩𑒰𑒞𑒰-𑒩𑒰𑒞𑒲 𑒡𑒰𑒩 𑒙𑒣𑒰 𑒠𑒻 𑒑𑒹𑒪 𑒕𑒻”।
“𑒮𑒹 𑒢𑒻 𑒕𑒻। 𑒄 𑒥𑒢𑒑𑒠𑒯𑒰 𑒮𑒦 𑒡𑒰𑒩𑒧𑒹 𑒦𑒮𑒱𑒨𑒰 𑒏𑓄 𑒢𑒹𑒣𑒰𑒪 𑒠𑒱𑒮𑒢𑒮𑒿 𑒂𑒋𑒪 𑒕𑒻। 𑒂𑒥𑓄 𑒠𑒱𑒨𑒾 𑒖𑒐𑒢...”।
“𑒯𑒧 𑒥𑒰𑒢𑒩 𑒮𑒦 𑒠𑒱𑒨𑒰 𑒏𑒯𑒢𑒹 𑒩𑒯𑒲”।
“𑒮𑒹 𑒯𑒹𑒞𑒻”।
“𑒯𑒹𑒞𑒻 𑒦𑒰𑒃𑒖, 𑒞𑒐𑒢 𑒖𑒰𑒃 𑒕𑒲”। 𑒯𑒧𑒩𑒰 𑒥𑒳𑒗𑒪 𑒁𑒕𑒱 𑒖𑒹 𑒂𑒧𑒏 𑒧𑒰𑒮𑒧𑒹 𑒥𑒰𑒢𑒩 𑒂 𑒥𑒢𑒑𑒠𑒯𑒰 𑒍𑒯𑒱 𑒥𑒩𑒐 𑒋𑒏𑓂𑒏𑒹 𑒮𑓀𑒑 𑒢𑒱𑒣𑒞𑓂𑒞𑒰 𑒦𑓄 𑒑𑒹𑒪 𑒩𑒯𑒻 𑒖𑒰𑒯𑒱 𑒥𑒩𑒐 𑒂𑒢𑒢𑓂𑒠𑒰 𑒂 𑒧𑒱𑒞𑒴𑒏 𑒦𑒹𑒿𑒙 𑒦𑒹𑒪 𑒩𑒯𑒻। 𑒂 𑒂𑒢𑒢𑓂𑒠𑒰𑒏 𑒑𑒹𑒪𑒰𑒏 𑒥𑒰𑒠 𑒥𑒰𑒢𑒩 𑒂 𑒥𑒢𑒑𑒠𑒯𑒰 𑒢𑒻 𑒖𑒰𑒢𑒱 𑒏𑒞𑓂𑒞𑓄 𑒮𑒿 𑒤𑒹𑒩 𑒂𑒥𑒱 𑒑𑒹𑒪 𑒕𑒻, 𑒂𑒢𑒢𑓂𑒠𑒰𑒏 𑒧𑒵𑒞𑓂𑒨𑒳𑒏 𑒣𑒢𑓂𑒠𑓂𑒩𑒯𑒼 𑒠𑒱𑒢 𑒢𑒻 𑒥𑒲𑒞𑒪 𑒕𑒻...
.......
𑒥𑒔𑒪𑒴 𑒑𑒹𑒪𑒰𑒯 𑒂 𑒧𑒱𑒞𑒴𑒏 𑒏𑒣𑒰𑒩𑒣𑒩 𑒔𑒱𑒢𑓂𑒞𑒰𑒏 𑒧𑒼𑒙 𑒏𑒋𑒏𑒙𑒰 𑒩𑒹𑒐 𑒆𑒣𑒩 𑒢𑒲𑒔𑒰𑒿 𑒯𑒼𑒧𑒋 𑒪𑒑𑒪𑒢𑓂𑒯𑒱, 𑒯𑒱𑒪𑒏𑒼𑒩𑒏 𑒞𑒩𑓀𑒑 𑒮𑒢, 𑒋𑒏 𑒠𑒼𑒮𑒩𑒰𑒣𑒩 𑒂𑒔𑓂𑒕𑒰𑒠𑒱𑒞 𑒯𑒼𑒃𑒞, 𑒣𑒳𑒩𑒰𑒢 𑒞𑒩𑓀𑒑 𑒢𑒫 𑒥𑒢𑒻𑒞 𑒂 𑒥𑒜𑓃𑒻𑒞 𑒖𑒰𑒃𑒞। 𑒁𑓀𑒑𑒢𑒰𑒧𑒹 𑒮𑒼𑒩 𑒏𑒩𑒻 𑒕𑒟𑒱। “𑒥𑒳𑒔𑓂𑒔𑒲, 𑒥𑒳𑒔𑒱𑒨𑒰। 𑒖𑒨𑒏𑒩 𑒂 𑒫𑒱𑒬𑓂𑒫𑒢𑒰𑒟 𑒂𑒃 𑒑𑒰𑒕𑒲 𑒑𑒹𑒪 𑒩𑒯𑒋। 𑒂𑒥𑒱 𑒑𑒹𑒪 𑒁𑒕𑒱 𑒢𑒹 𑒠𑒳𑒢𑒴 𑒑𑒼𑒛𑓃𑒹। 𑒮𑒳𑒢𑒪𑒱𑒌 𑒢𑒻 𑒖𑒹 𑒥𑒰𑒢𑒩 𑒮𑒦𑒏 𑒅𑒣𑒠𑓂𑒩𑒫 𑒦𑓄 𑒑𑒹𑒪 𑒕𑒻। 𑒏𑒰𑒪𑓂𑒯𑒱𑒮𑒿 𑒢𑒻 𑒖𑒰𑒃 𑒖𑒰𑒋𑒞 𑒑𑒰𑒕𑒲, 𑒮𑒹 𑒏𑒯𑒱 𑒠𑒱𑒨𑒾। 𑒂𑒃 𑒥𑒰𑒢𑒩 𑒮𑒦 𑒏𑒪𑒧 𑒂𑒋𑒪 𑒕𑒪, 𑒮𑒹 𑒏𑒯𑒥𑒼 𑒢𑒻 𑒏𑒹𑒪𑒯𑒳𑒿। 𑒏𑒯𑒱𑒨𑒹 𑒏𑓄 𑒏𑒲 𑒯𑒼𑒋𑒞 𑒖𑒐𑒢...”।
“𑒏𑒯𑒱 𑒞𑒿 𑒩𑒯𑒪 𑒕𑒪𑒯𑒳𑒿 𑒥𑒰𑒥𑒴𑒖𑒲 𑒧𑒳𑒠𑒰 𑒁𑒯𑒰𑒿 𑒞𑒿 𑒁𑒣𑒢𑒹 𑒡𑒳𑒢𑒧𑒹 𑒩𑒯𑒻 𑒕𑒲, 𑒥𑒰𑒖𑒻𑒞 𑒧𑒳𑒿𑒯 𑒠𑒳𑒐𑒰 𑒑𑒹𑒪 𑒞𑒿 𑒔𑒳𑒣 𑒩𑒯𑒱 𑒑𑒹𑒪𑒯𑒳𑒿”।
𑒯𑒿, 𑒡𑒳𑒢𑒱𑒧𑒹 𑒞𑒿 𑒕𑒟𑒱𑒨𑒹 𑒧𑒱𑒞𑒴। 𑒄 𑒂𑒧 𑒮𑒹𑒯𑒼 𑒂𑒢𑒢𑓂𑒠𑒰𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒣𑒏𑒢𑒰𑒃 𑒬𑒳𑒩𑒴 𑒦𑓄 𑒑𑒹𑒪 𑒁𑒕𑒱। 𑒂 𑒋𑒞𑒹𑒏 𑒠𑒱𑒢𑒳𑒏𑒰 𑒥𑒰𑒠 𑒤𑒹𑒩 𑒄 𑒥𑒰𑒢𑒩 𑒂 𑒥𑒢𑒑𑒠𑒯𑒰 𑒏𑒼𑒢 𑒑𑒣 𑒧𑒼𑒢 𑒣𑒰𑒩𑒥𑒰 𑒪𑒹𑒪 𑒤𑒹𑒩𑒮𑒿 𑒖𑒳𑒧𑒱 𑒂𑒋𑒪 𑒁𑒕𑒱।
...
𑒖𑒨𑒏𑒩𑒏 𑒧𑒰𑒋 𑒫𑒪𑓂𑒪𑒦𑒰 𑒂 𑒫𑒱𑒬𑓂𑒫𑒢𑒰𑒟𑒏 𑒧𑒰𑒋 𑒧𑒹𑒡𑒰। 𑒠𑒳𑒢𑒴 𑒥𑒯𑒲𑒢 𑒏𑒞𑒹𑒏 𑒠𑒱𑒢𑒣𑒩 𑒂𑒋𑒪 𑒕𑒟𑒱 𑒢𑒻𑒯𑒩। 𑒏𑒞𑒹𑒏 𑒠𑒱𑒢𑒣𑒩 𑒦𑒹𑒿𑒙 𑒦𑒹𑒪 𑒕𑒢𑓂𑒯𑒱 𑒋𑒏 𑒠𑒼𑒮𑒩𑒰𑒮𑒿। 𑒂𑒢𑒢𑓂𑒠𑒰𑒏 𑒠𑒳𑒢𑒴 𑒥𑒹𑒙𑒲 𑒂 𑒠𑒳𑒢𑒴 𑒖𑒧𑒰𑒋 𑒂𑒋𑒪 𑒕𑒟𑒱। 𑒫𑒪𑓂𑒪𑒦𑒰𑒏 𑒣𑒞𑒱 𑒫𑒱𑒬𑒼 𑒂 𑒧𑒹𑒡𑒰𑒏 𑒣𑒞𑒱 𑒏𑒰𑒢𑓂𑒯। 𑒧𑒹𑒒 𑒁𑒣𑒢 𑒣𑒞𑓂𑒢𑒲 𑒂 𑒥𑒔𑓂𑒔𑒰 𑒮𑒦𑒏 𑒮𑓀𑒑𑒹 𑒂𑒋𑒪 𑒕𑒟𑒱।
𑒧𑒱𑒞𑒴 𑒣𑒞𑓂𑒢𑒲𑒏𑒹𑒿 𑒂𑒢𑒢𑓂𑒠𑒰 𑒏𑒯𑒱 𑒥𑒖𑒰 𑒩𑒯𑒪 𑒕𑒟𑒱। 𑒤𑒹𑒩 𑒧𑒼𑒢 𑒣𑒛𑓃𑒻 𑒕𑒢𑓂𑒯𑒱 𑒖𑒹 𑒍 𑒂𑒥 𑒏𑒞𑓂𑒞𑓄 𑒦𑒹𑒙𑒞𑒲𑒯। 𑒤𑒹𑒩 𑒏𑒞𑓂𑒞𑓄 𑒕𑒲 𑒫𑒪𑓂𑒪𑒦𑒰, 𑒏𑒞𑓂𑒞𑓄 𑒕𑒲 𑒧𑒹𑒡𑒰, 𑒖𑒨𑒏𑒩 𑒂 𑒫𑒱𑒬𑓂𑒫𑒢𑒰𑒟 𑒏𑒞𑒋 𑒕𑒟𑒱..𑒮𑒼𑒩 𑒏𑒩𑒋 𑒪𑒰𑒑𑒻 𑒕𑒟𑒱।
𑒫𑒪𑓂𑒪𑒦𑒰 𑒂 𑒧𑒹𑒡𑒰 𑒁𑒥𑒻 𑒕𑒟𑒱 𑒂 𑒧𑒱𑒞𑒴 𑒑𑒲𑒞 𑒑𑒥𑒋 𑒪𑒑𑒻 𑒕𑒟𑒱। 𑒂𑒢𑒢𑓂𑒠𑒰𑒏 𑒑𑒲𑒞। 𑒂𑒢𑒢𑓂𑒠𑒰 𑒖𑒹 𑒑𑒥𑒻 𑒕𑒪𑒲𑒯 𑒫𑒪𑓂𑒪𑒦𑒰 𑒂 𑒧𑒹𑒡𑒰 𑒪𑒹𑒪-
𑒪𑒰𑒪 𑒣𑒩𑒲 𑒯𑒹 𑒑𑒳𑒪𑒰𑒥 𑒣𑒩𑒲
𑒪𑒰𑒪 𑒣𑒩𑒲 𑒯𑒹 𑒑𑒳𑒪𑒰𑒥 𑒣𑒩𑒲
𑒯𑒹 𑒑𑒑𑒢𑒣𑒩 𑒢𑒰𑒔𑒞 𑒃𑒢𑓂𑒠𑓂𑒩 𑒣𑒩𑒲
𑒯𑒹 𑒑𑒳𑒪𑒰𑒥𑒣𑒩 𑒢𑒰𑒔𑒞 𑒃𑒢𑓂𑒠𑓂𑒩 𑒣𑒩𑒲

𑒩𑒏𑒞𑒧𑒰𑒪𑒰 𑒠𑒳𑒂𑒩𑒣𑒩 𑒢𑒱𑒩𑒡𑒢 𑒐𑒛𑓃𑒲
𑒯𑒹 𑒩𑒏𑒞𑒧𑒰𑒪𑒰 𑒠𑒳𑒂𑒩𑒣𑒩 𑒢𑒱𑒩𑒡𑒢 𑒐𑒛𑓃𑒲
𑒧𑒰𑒿 𑒯𑒹 𑒢𑒱𑒩𑒡𑒢𑒏𑒹𑒿 𑒡𑒢 𑒨𑒻 𑒠𑒹𑒢𑒹 𑒣𑒩𑒲
𑒧𑒰𑒿 𑒯𑒹 𑒢𑒱𑒩𑒡𑒢𑒏𑒹𑒿 𑒡𑒢 𑒖𑒹 𑒠𑒹𑒢𑒹 𑒣𑒩𑒲

𑒪𑒰𑒪 𑒣𑒩𑒲 𑒯𑒹 𑒑𑒳𑒪𑒰𑒥 𑒣𑒩𑒲
𑒧𑒰𑒿 𑒯𑒹 𑒩𑒏𑒞𑒧𑒰𑒪𑒰 𑒠𑒳𑒂𑒩𑒣𑒩 𑒁𑒢𑓂𑒡𑒩𑒰 𑒐𑒛𑓃𑒲
𑒧𑒰𑒿 𑒯𑒹 𑒁𑒢𑓂𑒡𑒩𑒰𑒏𑒹𑒿 𑒢𑒨𑒢 𑒠𑒱𑒨𑒾 𑒖𑒪𑒠𑒲
𑒧𑒰𑒿 𑒯𑒹 𑒁𑒢𑓂𑒡𑒩𑒰𑒏𑒹𑒿 𑒢𑒨𑒢 𑒠𑒱𑒨𑒾 𑒖𑒪𑒠𑒲

𑒥𑒰𑒣 𑒂 𑒠𑒳𑒢𑒴 𑒥𑒹𑒙𑒲 𑒦𑒼𑒏𑒰𑒩 𑒣𑒰𑒛𑓃𑒋 𑒪𑒑𑒻 𑒕𑒟𑒱।
...
-𑒧𑒱𑒞𑒴। 𑒂𑒢𑒢𑓂𑒠𑒰𑒏 𑒧𑒵𑒞𑓂𑒨𑒳 𑒁𑒯𑒰𑒿 𑒪𑒹𑒪 𑒫𑒱𑒣𑒠𑒰 𑒥𑒢𑒱 𑒂𑒋𑒪 𑒁𑒕𑒱। 𑒁𑒯𑒰𑒿 𑒥𑓂𑒩𑒰𑒯𑓂𑒧𑒝 𑒖𑒰𑒞𑒱𑒏 𑒂 𑒂𑒢𑒢𑓂𑒠𑒰 𑒔𑒩𑓂𑒧𑒏𑒰𑒩𑒱𑒝𑒲। 𑒧𑒳𑒠𑒰 𑒠𑒳𑒢𑒴 𑒑𑒼𑒙𑒹𑒏 𑒣𑓂𑒩𑒹𑒧 𑒁𑒞𑒳𑒪𑒢𑒲𑒨। 𑒯𑒳𑒢𑒏𑒩 𑒧𑒵𑒞𑓂𑒨𑒳 𑒪𑒹𑒪 𑒠𑒳𑓁𑒐𑒲 𑒢𑒻 𑒯𑒼𑒅। 𑒥𑓂𑒩𑒯𑓂𑒧 𑒥𑒱𑒢𑒰 𑒠𑒳𑒐𑒏 𑒕𑒟𑒱। 𑒥𑓂𑒩𑒯𑓂𑒧𑒏 𑒦𑒰𑒫𑒩𑒴𑒣 𑒂𑒢𑒢𑓂𑒠 𑒕𑒱𑒨𑒢𑓂𑒯𑒱। 𑒮𑒹 𑒂𑒢𑒢𑓂𑒠𑒰 𑒪𑒹𑒪 𑒁𑒯𑒰𑒿𑒏 𑒠𑒳𑓁𑒐𑒲 𑒯𑒼𑒋𑒥 𑒁𑒢𑒳𑒔𑒱𑒞। 𑒥𑓂𑒩𑒯𑓂𑒧 𑒠𑓂𑒩𑒭𑓂𑒙𑒰 𑒕𑒟𑒱। 𑒠𑒵𑒬𑓂𑒨 𑒞𑒿 𑒣𑒩𑒱𑒫𑒩𑓂𑒞𑒱𑒞 𑒯𑒼𑒃𑒞 𑒩𑒯𑒻𑒋, 𑒍𑒯𑒱𑒮𑒿 𑒠𑓂𑒩𑒭𑓂𑒙𑒰𑒏𑒹𑒿 𑒏𑒼𑒢 𑒮𑒩𑒼𑒏𑒰𑒩। 𑒄 𑒖𑒑𑒞-𑒣𑓂𑒩𑒣𑓀𑒔 𑒧𑒰𑒞𑓂𑒩 𑒦𑓂𑒩𑒧 𑒢𑒻 𑒁𑒕𑒱, 𑒋𑒏𑒩 𑒫𑓂𑒨𑒰𑒫𑒯𑒰𑒩𑒱𑒏 𑒮𑒞𑓂𑒞𑒰 𑒞𑒿 𑒕𑒻। 𑒧𑒳𑒠𑒰 𑒄 𑒫𑓂𑒨𑒰𑒫𑒯𑒰𑒩𑒱𑒏 𑒮𑒞𑓂𑒞𑒰 𑒮𑒞𑓂𑒨 𑒢𑒻 𑒁𑒕𑒱।
-𑒧𑒱𑒞𑒴। 𑒔𑒹𑒞𑒢 𑒂 𑒁𑒔𑒹𑒞𑒢𑒏 𑒥𑒲𑒔 𑒁𑒢𑓂𑒞𑒩 𑒕𑒻 𑒧𑒳𑒠𑒰 𑒮𑒹 𑒮𑒞𑓂𑒨 𑒢𑒻 𑒕𑒻। 𑒖𑒲𑒫𑒏 𑒏𑒋𑒏𑒙𑒰 𑒣𑓂𑒩𑒏𑒰𑒩 𑒕𑒻, 𑒂 𑒁𑒫𑒱𑒠𑓂𑒨𑒰𑒏 𑒮𑒹𑒯𑒼 𑒏𑒋𑒏𑒙𑒰 𑒣𑓂𑒩𑒏𑒰𑒩 𑒕𑒻। 𑒁𑒫𑒱𑒠𑓂𑒨𑒰 𑒋𑒏𑒙𑒰 𑒠𑒼𑒭 𑒦𑒹𑒪 𑒧𑒳𑒠𑒰 𑒞𑒏𑒩 𑒂𑒬𑓂𑒩𑒨 𑒥𑓂𑒩𑒯𑓂𑒧 𑒏𑒼𑒢𑒰 𑒯𑒼𑒋𑒞, 𑒣𑒴𑒩𑓂𑒝 𑒖𑒲𑒫 𑒏𑒼𑒢𑒰 𑒯𑒼𑒋𑒞। 𑒍𑒏𑒩 𑒂𑒬𑓂𑒩𑒨 𑒯𑒼𑒋𑒞 𑒋𑒏𑒙𑒰 𑒁𑒣𑒴𑒩𑓂𑒝 𑒖𑒲𑒫। 𑒁𑒫𑒱𑒠𑓂𑒨𑒰 𑒞𑒐𑒢 𑒮𑒞𑓂𑒨 𑒢𑒻 𑒁𑒕𑒱 𑒧𑒳𑒠𑒰 𑒐𑒴𑒥 𑒁𑒮𑒞𑓂𑒨 𑒮𑒹𑒯𑒼 𑒢𑒻 𑒁𑒕𑒱।
-𑒧𑒱𑒞𑒴। 𑒋𑒯𑒱 𑒁𑒫𑒱𑒠𑓂𑒨𑒰𑒏𑒹𑒿 𑒠𑒴𑒩 𑒏𑒩𑒴 𑒂 𑒞𑒏𑒩𑒹 𑒧𑒼𑒏𑓂𑒭 𑒏𑒯𑒪 𑒖𑒰𑒃𑒞 𑒁𑒕𑒱। 𑒫𑒻𑒯 𑒧𑒼𑒏𑓂𑒭 𑒖𑒹 𑒂𑒢𑒢𑓂𑒠𑒰 𑒣𑓂𑒩𑒰𑒣𑓂𑒞 𑒏𑒹𑒢𑒹 𑒕𑒟𑒱।
𑒂 𑒧𑒱𑒞𑒴𑒏 𑒧𑒳𑒐𑒣𑒩 𑒖𑒹𑒢𑒰 𑒬𑒰𑒢𑓂𑒞𑒱 𑒣𑒮𑒩𑒱 𑒖𑒰𑒃 𑒕𑒢𑓂𑒯𑒱।
........
𑒧𑒱𑒞𑒴 𑒖𑒹𑒢𑒰 𑒦𑒹𑒿𑒙 𑒏𑒩𑒥𑒰 𑒪𑒹𑒪 𑒖𑒰 𑒩𑒯𑒪 𑒕𑒟𑒱।
𑒧𑒼𑒢 𑒣𑒛𑓃𑒱 𑒖𑒰𑒃 𑒕𑒢𑓂𑒯𑒱 𑒂𑒢𑒢𑓂𑒠𑒰 𑒮𑓀𑒑 𑒣𑓂𑒩𑒹𑒧𑒰𑒪𑒰𑒣।
-𑒂𑒢𑒢𑓂𑒠𑒰। 𑒁𑒯𑒰𑒿𑒮𑒿 𑒑𑒣 𑒏𑒩𑒻𑒞-𑒏𑒩𑒻𑒞 𑒯𑒧𑒩𑒰 𑒏𑒢𑒲𑒙𑒰 𑒛𑒩 𑒧𑒼𑒢𑒧𑒹 𑒂𑒥𑒱 𑒑𑒹𑒪 𑒁𑒕𑒱। 𑒣𑒱𑒞𑒰𑒏 𑒮𑒦𑒮𑒿 𑒣𑓂𑒩𑒡𑒰𑒢 𑒏𑒧𑒖𑒼𑒩𑒲 𑒕𑒢𑓂𑒯𑒱 𑒯𑒳𑒢𑒏𑒩 𑒞𑒰𑒪𑒣𑒞𑓂𑒩 𑒮𑒦𑒏 𑒣𑒩𑒱𑒩𑒏𑓂𑒭𑒝। 𑒮𑒹 𑒄 𑒮𑒦 𑒧𑒼𑒢 𑒩𑒰𑒐𑒴। 𑒣𑒱𑒞𑒰 𑒖𑒹 𑒣𑒳𑒕𑒞𑒰𑒯 𑒖𑒹 𑒞𑒰𑒪 𑒣𑒞𑓂𑒩𑒏 𑒣𑒩𑒱𑒩𑒏𑓂𑒭𑒝 𑒏𑒼𑒢𑒰 𑒯𑒼𑒋𑒞 𑒞𑒿 𑒏𑒯𑒥𑒢𑓂𑒯𑒱- 𑒣𑒳𑒮𑓂𑒞𑒏𑒏𑒹𑒿 𑒖𑒪𑒮𑒿 𑒞𑒹𑒪𑒮𑒿 𑒂 𑒮𑓂𑒟𑒴𑒪 𑒥𑒢𑓂𑒡𑒢𑒮𑒿 𑒥𑒔𑒰 𑒏𑓄। 𑒕𑒰𑒯𑒩𑒱𑒧𑒹 𑒮𑒳𑒐𑒰 𑒏𑓄। 𑓕𑓐𑓐-𑓖𑓐𑓐 𑒣𑒰𑒞𑒏 𑒣𑒼𑒟𑒲 𑒮𑒦। 𑒯𑒧 𑒏𑒼𑒢𑒼 𑒠𑒱𑒢 𑒠𑒹𑒐𑒰 𑒠𑒹𑒥। 𑒋𑒏 𑒣𑒰𑒞 𑒋𑒏 𑒯𑒰𑒟 𑒢𑒰𑒧 𑒂 𑒔𑒰𑒩𑒱 𑒂𑓀𑒑𑒳𑒩 𑒔𑒰𑒏𑒩 𑒯𑒼𑒃 𑒕𑒻। 𑒆𑒣𑒩 𑒂 𑒢𑒲𑒔𑒰𑒿 𑒏𑒰𑒚𑒏 𑒑𑒞𑓂𑒞𑒰 𑒪𑒰𑒑𑒪 𑒩𑒯𑒻 𑒕𑒻। 𑒫𑒰𑒧 𑒦𑒰𑒑𑒧𑒹 𑒕𑒱𑒠𑓂𑒩 𑒏𑓄 𑒮𑒳𑒞𑒩𑒲𑒮𑒿 𑒥𑒰𑒢𑓂𑒯𑒪 𑒩𑒯𑒻 𑒕𑒻।
-𑒣𑒱𑒞𑒰 𑒧𑒰𑒢𑒞𑒰𑒯।
-𑒢𑒻 𑒧𑒰𑒢𑒞𑒰𑒯 𑒏𑒱𑒋𑒏। 𑒥𑓂𑒩𑒰𑒯𑓂𑒧𑒝𑒏 𑒥𑒹𑒙𑒲𑒮𑒿 𑒥𑒱𑒨𑒰𑒯 𑒏𑒩𑒰𑒥𑒻𑒏 𑒎𑒏𑒰𑒞𑒱 𑒕𑒢𑓂𑒯𑒱? 𑒯𑒧 𑒋𑒏 𑒑𑒼𑒙𑒹𑒏𑒹𑒿 𑒠𑒴 𑒙𑒰𑒏𑒰 𑒥𑒋𑒢𑒰 𑒠𑒹𑒢𑒹 𑒩𑒯𑒱𑒨𑒻 𑒐𑒹𑒞𑒱𑒯𑒩 𑒖𑒧𑒲𑒢 𑒏𑒱𑒢𑒥𑒰 𑒪𑒹𑒪। 𑒧𑒳𑒠𑒰 𑒣𑒱𑒞𑒰 𑒖𑒰 𑒏𑓄 𑒥𑒋𑒢𑒰 𑒒𑒳𑒩𑒰 𑒂𑒢𑒪𑒢𑓂𑒯𑒱। 𑒋𑒏-𑒋𑒏 𑒠𑒴-𑒠𑒴 𑒙𑒰𑒏𑒰 𑒖𑒧𑒰 𑒏𑓄 𑒩𑒯𑒪 𑒕𑒟𑒱। 𑓗𑓐𑓐 𑒙𑒰𑒏𑒰 𑒪𑒛𑓃𑒏𑒲𑒥𑒪𑒰𑒏𑒹𑒿 𑒠𑒹𑒞𑒰𑒯 𑒞𑒐𑒢 𑒥𑒹𑒙𑒰𑒏 𑒫𑒱𑒫𑒰𑒯 𑒯𑒹𑒞𑒢𑓂𑒯𑒱 𑒂 𑒣𑒰𑒿𑒖𑒱 𑒥𑒢𑒞𑒢𑓂𑒯𑒱। 𑒂 𑒮𑒹 𑒥𑓂𑒩𑒰𑒯𑓂𑒧𑒝𑒲 𑒁𑒍𑒞𑒢𑓂𑒯𑒱 𑒞𑒿 𑒞𑒰𑒪𑒣𑒞𑓂𑒩𑒏 𑒩𑒏𑓂𑒭𑒰 𑒏𑒩𑒞𑒢𑓂𑒯𑒱?
𑒧𑒱𑒞𑒴𑒏 𑒧𑒰𑒋𑒏 𑒧𑒵𑒞𑓂𑒨𑒳𑒏 𑒥𑒰𑒠 𑒬𑓂𑒩𑒲𑒏𑒩 𑒐𑒙𑒥𑒞𑒰𑒯 𑒦𑓄 𑒑𑒹𑒪 𑒕𑒪𑒰𑒯। 𑒙𑒼𑒪𑒥𑒻𑒨𑓂𑒨𑒰 𑒮𑒦 𑒏𑒯𑒻 𑒕𑒟𑒱।
𑒂 𑒤𑒹𑒩 𑒥𑒹𑒧𑒰𑒩𑒲 𑒁𑒋𑒪𑒻, 𑒣𑓂𑒪𑒹𑒑। 𑒑𑒰𑒧𑒏 𑒠𑒴𑒙𑒰 𑒙𑒼𑒪 𑒅𑒣𑒙𑒱𑒨𑒹 𑒑𑒹𑒪, 𑒧𑒱𑒮𑒩𑒙𑒼𑒪𑒲 𑒂 𑒣𑒕𑒱𑒧𑒰𑒙𑒼𑒪𑒲। 𑒣𑒩𑒼𑒣𑒙𑓂𑒙𑒰𑒏 𑒥𑒯𑒳𑒞 𑒩𑒰𑒮 𑒑𑒰𑒧𑒧𑒹 𑒏𑒞𑒹𑒏 𑒪𑒼𑒏 𑒧𑒳𑒃𑒪 𑒮𑒹 𑒢𑒻 𑒖𑒰𑒢𑒱।
𑒧𑒱𑒞𑒴 𑒣𑒱𑒞𑒰𑒏𑒹𑒿 𑒂𑒢𑒢𑓂𑒠𑒰𑒮𑒿 𑒦𑒹𑒿𑒙 𑒏𑒩𑒰 𑒠𑒹𑒪𑒐𑒱𑒢𑓂𑒯। 𑒬𑓂𑒩𑒲𑒏𑒩 𑒞𑒰𑒪𑒣𑒞𑓂𑒩 𑒣𑒩𑒱𑒩𑒏𑓂𑒭𑒝𑒏 𑒖𑓂𑒘𑒰𑒢𑒮𑒿 𑒣𑒩𑒱𑒣𑒴𑒩𑓂𑒝 𑒂𑒢𑒢𑓂𑒠𑒰𑒧𑒹 𑒢𑒻 𑒖𑒰𑒢𑒱 𑒏𑒲 𑒠𑒹𑒐𑒱 𑒪𑒹𑒪𑒢𑓂𑒯𑒱।
𑒧𑒱𑒞𑒴 𑒖𑒲𑒞𑒱 𑒑𑒹𑒪। 𑒢𑒻𑒨𑓂𑒨𑒰𑒨𑒱𑒏 𑒧𑒱𑒞𑒴 𑒧𑒲𑒧𑒰𑓀𑒮𑒏 𑒬𑓂𑒩𑒲𑒏𑒩𑒮𑒿 𑒖𑒲𑒞𑒱 𑒑𑒹𑒪 𑒂 𑒧𑒲𑒧𑒰𑓀𑒮𑒏 𑒬𑓂𑒩𑒲𑒏𑒩 𑒁𑒣𑒢 𑒙𑒼𑒪𑒥𑒻𑒨𑓂𑒨𑒰 𑒮𑒦𑒏𑒹𑒿 𑒣𑒩𑒰𑒖𑒱𑒞 𑒏𑓄 𑒠𑒹𑒪𑒢𑓂𑒯𑒱।
𑒂 𑒂𑒢𑒢𑓂𑒠𑒰 𑒂 𑒧𑒱𑒞𑒴𑒏 𑒫𑒱𑒫𑒰𑒯 𑒮𑒧𑓂𑒣𑒢𑓂𑒢 𑒦𑒹𑒪।
𑒧𑒼𑒢 𑒣𑒛𑓃𑒱 𑒖𑒰𑒃 𑒕𑒢𑓂𑒯𑒱 𑒂𑒢𑒢𑓂𑒠𑒰 𑒮𑓀𑒑 𑒣𑓂𑒩𑒹𑒧𑒰𑒪𑒰𑒣। 𑒧𑒱𑒞𑒴 𑒖𑒹𑒢𑒰 𑒦𑒹𑒿𑒙 𑒏𑒩𑒥𑒰 𑒪𑒹𑒪 𑒖𑒰 𑒩𑒯𑒪 𑒕𑒟𑒱। 𑒂𑒢𑒢𑓂𑒠𑒰𑒏 𑒧𑒵𑒞𑓂𑒨𑒳 𑒦𑓄 𑒑𑒹𑒪 𑒁𑒕𑒱। 𑒥𑒪𑒰𑒢𑒧𑒹 𑒣𑒋𑒩 𑒣𑒱𑒕𑒛𑓃𑒱 𑒑𑒹𑒪𑒢𑓂𑒯𑒱 𑒂𑒢𑒢𑓂𑒠𑒰𑒏। 𑒍𑒯𑒱𑒢𑒰 𑒣𑒱𑒕𑒛𑓃𑒻𑒏 𑒔𑒱𑒢𑓂𑒯𑒰𑒮𑒲 𑒠𑒹𑒐𑒥𑒰𑒧𑒹 𑒂𑒥𑒱 𑒩𑒯𑒪 𑒁𑒕𑒱।
𑒧𑒱𑒞𑒴 𑒍𑒯𑒱 𑒔𑒱𑒢𑓂𑒯𑒰𑒮𑒲𑒏𑒹𑒿 𑒠𑒹𑒐𑒻 𑒕𑒟𑒱 𑒂 𑒯𑒳𑒢𑒏𑒩 𑒧𑒼𑒢 𑒯𑒳𑒪𑒮𑒱 𑒖𑒰𑒃 𑒕𑒢𑓂𑒯𑒱, 𑒣𑒱𑒕𑒛𑓃𑒱 𑒖𑒰𑒃 𑒕𑒟𑒱 𑒦𑒰𑒫𑒢𑒰𑒏 𑒯𑒱𑒪𑒏𑒼𑒩𑒧𑒹..
𑒂𑒢𑒢𑓂𑒠𑒰 𑒂 𑒧𑒱𑒞𑒴𑒏 𑒋𑒏 𑒠𑒼𑒮𑒩𑒰𑒮𑒿 𑒦𑒹𑒿𑒙-𑒒𑒰𑒿𑒙 𑒥𑒜𑓃𑒋 𑒪𑒰𑒑𑒪 𑒕𑒪, 𑒐𑒹𑒞, 𑒏𑒪𑓂𑒪𑒧-𑒑𑒰𑒕𑒲, 𑒔𑒾𑒩𑒲 𑒂 𑒡𑒰𑒩𑒏 𑒏𑒰𑒞𑒏 𑒋𑒯𑒱 𑒮𑓂𑒟𑒪𑒣𑒩। 𑒂 𑒠𑒳𑒢𑒴 𑒑𑒼𑒙𑒹 𑒣𑒱𑒕𑒛𑓃𑒻𑒞 𑒕𑒪𑒰𑒯, 𑒐𑒹𑒞𑒧𑒹, 𑒏𑒪𑓂𑒪𑒧-𑒑𑒰𑒕𑒲𑒧𑒹, 𑒔𑒾𑒩𑒲𑒧𑒹 𑒂 𑒡𑒰𑒩𑒏 𑒏𑒰𑒞𑒧𑒹 𑒮𑒹𑒯𑒼।
𑒡𑒰𑒩𑒧𑒹 𑒤𑒰𑒿𑒑𑒻𑒞 𑒢𑒻 𑒕𑒪𑒰𑒯 𑒧𑒱𑒞𑒴। 𑒨𑒋𑒯 𑒜𑒪𑒳𑒂 𑒣𑒱𑒔𑓂𑒕𑒛𑓃 𑒮𑓂𑒟𑒪 𑒖𑒹 𑒂𑒃-𑒏𑒰𑒪𑓂𑒯𑒱𑒏 𑒕𑒾𑒛𑓃𑒰 𑒮𑒦 𑒥𑒢𑒹𑒢𑒹 𑒁𑒕𑒱, 𑒮𑒹 𑒧𑒱𑒞𑒴𑒏 𑒥𑒢𑒰𑒍𑒪 𑒁𑒕𑒱। 𑒋𑒯𑒱𑒣𑒩 𑒣𑒼𑒢 𑒩𑒼𑒣𑒻𑒞 𑒕𑒪𑒰𑒯 𑒂 𑒮𑒳𑒩𑓂𑒩𑒮𑒿 𑒧𑒱𑒞𑒴 𑒡𑒰𑒩𑒧𑒹 𑒣𑒰𑒢𑒱 𑒏𑒙𑒻𑒞 𑒂𑒑𑒰𑒿 𑒥𑒜𑓃𑒱 𑒖𑒰𑒃𑒞 𑒕𑒪𑒰𑒯।
“𑒯𑒹, 𑒏𑒢𑒹 𑒢𑒻 𑒣𑒱𑒕𑒛𑓃𑒱 𑒏𑓄 𑒞𑒿 𑒠𑒹𑒐𑒰।”
“𑒮𑒹 𑒏𑒼𑒢 𑒥𑒛𑓃𑒏𑒰 𑒑𑒣 𑒦𑒹𑒪𑒻।”
“𑒠𑒹𑒐𑒰 𑒞𑒐𑒢 𑒢𑒹 𑒥𑒳𑒗𑒥𑒻।”
𑒂𑒢𑒢𑓂𑒠𑒰 𑒁𑒮𑓂𑒟𑒱𑒩𑒮𑒿 𑒂𑒑𑒰𑒿 𑒥𑒜𑓃𑒥𑒰𑒏 𑒣𑓂𑒩𑒨𑒰𑒮 𑒏𑒩𑒟𑒱 𑒧𑒳𑒠𑒰..𑒯𑒹.𑒯𑒹..𑒯𑒹..
𑒢𑒻 𑒩𑒼𑒏𑒱 𑒮𑒏𑒪𑒟𑒱 𑒍 𑒁𑒣𑒢𑒰𑒏𑒹𑒿, 𑒢𑒯𑒱𑒨𑒹 𑒐𑒹𑒞𑒧𑒹, 𑒢𑒯𑒱𑒨𑒹 𑒏𑒪𑓂𑒪𑒧-𑒑𑒰𑒕𑒲𑒧𑒹, 𑒢𑒯𑒱𑒨𑒹 𑒔𑒾𑒩𑒲𑒧𑒹 𑒂 𑒢𑒯𑒱𑒨𑒹 𑒋𑒯𑒱 𑒡𑒰𑒩𑒏 𑒏𑒰𑒞𑒧𑒹..
𑒂 𑒏𑒲 𑒏𑒩𑒋 𑒂𑒋𑒪 𑒯𑒼𑒋𑒞𑒲𑒯 𑒂𑒢𑒢𑓂𑒠𑒰 𑒋𑒞𑒋..𑒖𑒹 𑒣𑒱𑒕𑒛𑓃𑒱 𑒑𑒹𑒪𑒲𑒯 𑒂 𑒛𑒴𑒧𑒱 𑒑𑒹𑒪𑒲𑒯..
𑒏𑒼𑒢𑒼 𑒮𑓂𑒧𑒵𑒞𑒱𑒏𑒹𑒿 𑒧𑒼𑒢 𑒣𑒛𑓃𑒥𑒰 𑒪𑒹𑒪 𑒂𑒋𑒪 𑒯𑒼𑒋𑒞𑒲𑒯..
-

𑒯𑒿 𑒂𑒢𑒢𑓂𑒠𑒰 𑒂𑒋𑒪 𑒁𑒕𑒱 𑒥𑒔𑒪𑒴। 𑒠𑒹𑒐𑒱𑒨𑒾 𑒄 𑒑𑒲𑒞 𑒮𑒳𑒢𑒴-

𑒒𑒩 𑒣𑒕𑒳𑒫𑒩𑒥𑒰𑒧𑒹 𑒁𑒩𑒯𑒳𑒪 𑒤𑒴𑒪 𑒑𑒕𑒱𑒨𑒰 𑒯𑒹
𑒤𑒩𑒹-𑒤𑒴𑒪𑒹 𑒪𑒳𑒥𑒳𑒡𑒪 𑒑𑒰𑒕 𑒯𑒹
𑒅𑒞𑒩𑒹 𑒩𑒰𑒖𑒮𑒋 𑒮𑒳𑒑𑒰 𑒋𑒏 𑒂𑒍𑒪
𑒥𑒻𑒮𑒪 𑒮𑒴𑒑𑒰 𑒁𑒩𑒯𑒳𑒪 𑒤𑒴𑒪 𑒑𑒰𑒕 𑒯𑒹
𑒤𑒩𑒥𑒼 𑒢𑒹 𑒐𑒰𑒃 𑒕𑓄 𑒮𑒳𑒑𑒥𑒰, 𑒤𑒳𑒪𑒯𑒼 𑒢𑒹 𑒐𑒰𑒃 𑒕𑓄 𑒯𑒹
𑒛𑒰𑒜𑓃𑒱-𑒣𑒰𑒞𑒱 𑒏𑒹𑒪𑒏 𑒏𑒔𑒴𑒢 𑒯𑒹
𑒤𑒳𑒪𑒥𑒼 𑒢𑒹 𑒐𑒰𑒃 𑒕𑓄 𑒮𑒳𑒑𑒥𑒰, 𑒤𑒩𑒯𑒳 𑒢𑒹 𑒐𑒰𑒃 𑒕𑓄 𑒯𑒹
𑒛𑒰𑒜𑓃𑒱-𑒣𑒰𑒞𑒱 𑒏𑒹𑒪𑒏 𑒏𑒔𑒴𑒢 𑒯𑒹
𑒒𑒩 𑒣𑒕𑒳𑒫𑒩𑒥𑒰𑒧𑒹 𑒥𑒮𑒻 𑒮𑒩 𑒢𑒜𑓃𑒱𑒂 𑒯𑒹
𑒥𑒻𑒮𑒪 𑒮𑒴𑒑𑒰 𑒠𑒱𑒁 𑒢𑒹 𑒥𑒗𑒰𑒃 𑒯𑒹

𑒋𑒏𑒮𑒩 𑒖𑒼𑒛𑓃𑒪 𑒮𑒼𑒢𑒩𑒱𑒨𑒰
𑒠𑒳𑒃𑒮𑒩 𑒖𑒼𑒛𑓃𑒪 𑒯𑒹
𑒞𑒹𑒮𑒩 𑒮𑒩 𑒮𑒴𑒑𑒰 𑒅𑒛𑓃𑒱 𑒖𑒰𑒃 𑒯𑒹
𑒮𑒳𑒑𑒥𑒼 𑒢𑒹 𑒕𑒱𑒌 𑒦𑒑𑒞𑒱𑒨𑒰
𑒞𑒱𑒞𑒱𑒩𑒼 𑒢𑒹 𑒕𑒱𑒌
𑒨𑒹𑒯𑒼 𑒕𑒱𑒌 𑒑𑒼𑒩𑒻𑒨𑓂𑒨𑒰 𑒏𑒹 𑒥𑒰𑒯𑒰𑒢 𑒯𑒹

-𑒦𑒰𑒃 𑒁𑒯𑒰𑒿 𑒄 𑒑𑒲𑒞 𑒢𑒻 𑒮𑒳𑒢𑒱 𑒣𑒰𑒥𑒱 𑒩𑒯𑒪 𑒕𑒲 𑒏𑒲?
-𑒦𑒰𑒃 𑒮𑒳𑒢𑒱 𑒩𑒯𑒪 𑒕𑒲। 𑒠𑒹𑒐𑒱𑒨𑒼 𑒩𑒯𑒪 𑒕𑒲। 𑒂𑒢𑒢𑓂𑒠𑒰 𑒦𑒾𑒖𑒲 𑒕𑒟𑒱।
𑒖𑒯𑒱𑒨𑒰 𑒍 𑒧𑒳𑒃𑒪 𑒕𑒪𑒲𑒯 𑒞𑒯𑒱𑒨𑒼 𑒮𑒳𑒢𑒢𑒹 𑒩𑒯𑒲- 𑒫𑒋𑒯 𑒩𑒯𑒟𑒱- 𑒑𑒰𑒥𑒻 𑒩𑒯𑒟𑒱-
𑒪𑒳𑒏𑒹𑒮𑒩𑒲 𑒁𑒿𑒑𑒢𑒰 𑒔𑒰𑒢𑒢 𑒒𑒢 𑒑𑒕𑒱𑒨𑒰
𑒞𑒯𑒱 𑒞𑒩 𑒏𑒼𑒃𑒪𑒲 𑒒𑓄𑒧𑒔𑒰𑒢 𑒯𑒹

-𑒬𑒥𑓂𑒠 𑒦𑓂𑒩𑒧 𑒢𑒻 𑒕𑒪 𑒍।
𑒧𑒰𑒿𑒕-𑒧𑒾𑒮 𑒂 𑒮𑒞𑓂𑒨𑒢𑒰𑒩𑒰𑒨𑒝 𑒣𑒴𑒖𑒰𑒏 𑒥𑒰𑒠 𑒁𑒑𑒱𑒪𑒹 𑒠𑒱𑒢𑒏 𑒑𑒣 𑒁𑒕𑒱। 𑒢𑒹 𑒔𑒰𑒢𑒢 𑒑𑒰𑒕 𑒏𑒙𑒹𑒢𑒹 𑒩𑒯𑒟𑒱 𑒂 𑒢𑒹 𑒁𑒿𑒑𑒢𑒰 𑒥𑒹𑒜𑓃𑒢𑒹 𑒩𑒯𑒟𑒱 𑒂𑒢𑒢𑓂𑒠𑒰।
𑒠𑒼𑒮𑒩 𑒠𑒱𑒢 𑒍𑒯𑒱 𑒔𑒰𑒢𑒢 𑒑𑒰𑒕𑒏 𑒢𑒲𑒔𑒰𑒿 𑒔𑒩𑓂𑒧𑒏𑒰𑒩𑒙𑒼𑒪𑒧𑒹 𑒑𑒾𑒂𑒿 𑒮𑒦 𑒠𑒳𑒢𑒴 𑒑𑒼𑒙𑒹𑒏 𑒪𑒯𑒰𑒬 𑒠𑒹𑒐𑒪𑒢𑓂𑒯𑒱। 𑒂 𑒄𑒯𑒼 𑒬𑒥𑓂𑒠 𑒑𑒑𑒢𑒧𑒹 𑒣𑒮𑒩𑒱 𑒑𑒹𑒪, 𑒮𑒾𑒿𑒮𑒹 𑒑𑒾𑒿𑒂 𑒮𑒳𑒢𑒪𑒏- 𑒂𑒢𑒢𑓂𑒠𑒰𑒏 𑒁𑒥𑒰𑒖𑒧𑒹-
𑒖𑒰𑒯𑒹 𑒥𑒼𑒢 𑒖𑒹𑒥𑓄 𑒏𑒼𑒃𑒪𑒲 𑒩𑒳𑒢𑒗𑒳𑒢𑒳 𑒥𑒰𑒪𑒧
𑒩𑒯𑒱 𑒖𑒹𑒞𑓄 𑒩𑒏𑒞𑒧𑒰𑒪𑒰 𑒏𑒹 𑒢𑒱𑒬𑒰𑒢 𑒯𑒹
𑒬𑒥𑓂𑒠 𑒦𑓂𑒩𑒧 𑒢𑒻 𑒕𑒪 𑒍।

(𑒄 𑒏𑒟𑒰 “𑒬𑒥𑓂𑒠𑒬𑒰𑒮𑓂𑒞𑓂𑒩𑒧𑓂” 𑒬𑓂𑒩𑒲 𑒅𑒧𑒹𑒬 𑒧𑓀𑒛𑒪 𑒑𑒰𑒧-𑒥𑒹𑒩𑒧𑒰 𑒪𑒹𑒪।)

𑒠𑒱𑒪𑓂𑒪𑒲
𑓑
𑒣𑒼𑒮𑓂𑒙𑒧𑒰𑒩𑓂𑒙𑒧 𑒏𑒋𑒪 𑒬𑒩𑒲𑒩, 𑒮𑒰𑒞𑒙𑒰 𑒧𑒼𑒙𑒏𑒰 𑒬𑒱𑒪𑓂𑒪𑒣𑒩, 𑒖𑒛𑓃𑒞 𑒏𑒢𑒲𑒏𑒰𑒪𑒧𑒹। 𑒑𑒼𑒃𑒚𑒰𑒧𑒹 𑒂𑒑𑒱 𑒖𑒹 𑒁𑒢𑒪𑒢𑓂𑒯𑒱𑒯𑒹𑒿 𑒮𑒳𑒧𑒢𑒖𑒲, 𑒩𑒰𑒐𑒱 𑒠𑒹𑒪𑒢𑓂𑒯𑒱 𑒢𑒲𑒔𑒰𑒿।
𑒏𑒢𑒏𑒢𑒰𑒃𑒞 𑒣𑒰𑒢𑒱𑒧𑒹 𑒛𑒴𑒧 𑒠𑓄 𑒑𑒼𑒃𑒚𑒰𑒏 𑒂𑒑𑒱𑒮𑒿 𑒂𑒑𑒱 𑒪𑓄 𑒬𑒩𑒲𑒩𑒏𑒹𑒿 𑒑𑒞𑒱-𑒮𑒠𑓂𑒑𑒞𑒱 𑒠𑒹𑒥𑒰 𑒪𑒹𑒪। 𑒂 𑒏𑓄 𑒠𑒹𑒪𑒢𑓂𑒯𑒱 𑒁𑒑𑓂𑒢𑒱𑒏𑒹𑒿 𑒮𑒧𑒩𑓂𑒣𑒱𑒞। 𑒞𑒵𑒝, 𑒏𑒰𑒚 𑒂 𑒒𑒵𑒞 𑒮𑓀𑒑।
𑒒𑒳𑒩𑒱 𑒑𑒹𑒪𑒰 𑒮𑒦। 𑒪𑒼𑒯, 𑒣𑒰𑒟𑒩, 𑒂𑒑𑒱 𑒂 𑒖𑒪 𑒢𑒰𑓀𑒒𑒱, 𑒕𑒴𑒥𑒱; 𑒛𑒹𑒜𑓃 𑒧𑒰𑒮𑒏 𑒥𑒔𑓂𑒔𑒰𑒏𑒹𑒿 𑒏𑒼𑒩𑒰𑒧𑒹 𑒪𑒹𑒢𑒹 𑒕𑒪𑒱 𑒧𑒰𑒋, 𑒞𑒏𑒛𑓃𑒰 𑒕𑒼𑒛𑓃𑒱।
𑒮𑒦 𑒒𑒩 𑒒𑒳𑒩𑒻𑒞 𑒕𑒟𑒱।
𑓒
𑒠𑒱𑒪𑓂𑒪𑒲।
𑓓𑓑 𑒠𑒱𑒮𑒧𑓂𑒥𑒩𑒏 𑒩𑒰𑒞𑒱। 𑒂𑒥 𑒋𑒏 𑒞𑒰𑒩𑒲𑒐 𑒦𑓄 𑒑𑒹𑒪𑒻। 𑒩𑒞𑒳𑒏𑒰 𑒬𑒱𑒤𑓂𑒙𑒧𑒹 𑒯𑒧 𑒕𑒲।
𑒏𑒼𑒩𑒱𑒨𑒰𑒮𑒿 𑒂𑒋𑒪 𑒋𑒏𑒙𑒰 𑒮𑓂𑒞𑓂𑒩𑒲 𑒯𑒧𑒩𑒰𑒮𑒿 𑒣𑒳𑒕𑒻𑒋, 𑒄 𑒢𑒫 𑒋𑒨𑒩𑒣𑒼𑒩𑓂𑒙 𑒁𑒕𑒱 𑒏𑒲? 𑒯𑒧 𑒏𑒯𑒻 𑒕𑒱𑒌- 𑒯𑒿। 𑒂 𑒣𑒳𑒕𑒻 𑒕𑒱𑒌- 𑒏𑒱𑒋?
𑒍 𑒮𑓂𑒞𑓂𑒩𑒲 𑒏𑒯𑒻𑒋- 𑒢𑒻, 𑒯𑒧𑒩𑒰 𑒪𑒰𑒑𑒪, 𑒏𑒱𑒋 𑒞𑒿 𑒕𑒯 𑒧𑒰𑒮 𑒣𑒯𑒱𑒢𑒹 𑒂𑒋𑒪 𑒩𑒯𑒲।
-𑒯𑒿 𑒣𑒯𑒱𑒢𑒹 𑒙𑒩𑓂𑒧𑒱𑒢𑒪 𑒠𑒴 𑒣𑒩 𑒁𑒯𑒰𑒿 𑒂𑒋𑒪 𑒯𑒋𑒥, 𑒄 𑒢𑒫 𑒙𑒩𑓂𑒧𑒱𑒢𑒪 𑒕𑒱𑒌, 𑒙𑒩𑓂𑒧𑒱𑒢𑒪- 𑒞𑒲𑒢। 𑒢𑒲𑒏 𑒪𑒰𑒑𑒪 𑒁𑒯𑒰𑒿𑒏𑒹𑒿?-– 𑒯𑒧 𑒣𑒳𑒕𑒻 𑒕𑒱𑒨𑒢𑓂𑒯𑒱।
-𑒥𑒛𑓂𑒛 𑒢𑒲𑒏 𑒪𑒰𑒑𑒪। 𑒋𑒨𑒩𑒣𑒼𑒩𑓂𑒙 𑒢𑒻, 𑒯𑒼𑒙𑒪 𑒮𑒢 𑒪𑒰𑒑𑒱 𑒩𑒯𑒪 𑒁𑒕𑒱। 𑒃𑒝𑓂𑒛𑒱𑒨𑒰 𑒂𑒥 𑒧𑒖𑒑𑒴𑒞 𑒦𑓄 𑒩𑒯𑒪 𑒁𑒕𑒱।-– 𑒧𑒯𑒱𑒪𑒰 𑒥𑒖𑒻 𑒕𑒟𑒱।
𑒩𑒞𑒳𑒏𑒰 𑒬𑒱𑒤𑓂𑒙𑒧𑒹 𑒯𑒧 𑒕𑒲। 𑒞𑒐𑒢𑒹 𑒑𑒰𑒧𑒮𑒿 𑒋𑒏𑒙𑒰 𑒤𑒼𑒢 𑒯𑒧𑒩 𑒧𑒼𑒥𑒰𑒃𑒪𑒣𑒩 𑒁𑒥𑒻𑒋। 𑒯𑒧𑒩 𑒧𑒯𑒱𑒪𑒰 𑒮𑒯𑒏𑒩𑓂𑒧𑒲 𑒯𑒿𑒮𑒲 𑒏𑒩𑒻 𑒕𑒟𑒱- 𑒑𑒰𑒧𑒮𑒿 𑒤𑒼𑒢 𑒂𑒋𑒪 𑒯𑒹𑒞𑒢𑓂𑒯𑒱, 𑒂𑒥 𑒤𑒹𑒩 𑒄 𑒧𑒻𑒟𑒱𑒪𑒲𑒧𑒹 𑒑𑒣 𑒏𑒩𑒞𑒰, 𑒯𑒧 𑒮𑒦 𑒦𑒰𑒭𑒰 𑒥𑒳𑒗𑒻 𑒢𑒻 𑒕𑒱𑒌, 𑒧𑒲𑒚 𑒦𑒰𑒭𑒰 𑒕𑒻, 𑒞𑒹𑒿 𑒯𑒧𑒩 𑒮𑒦𑒏 𑒐𑒱𑒡𑒰𑓀𑒬𑒼 𑒏𑒩𑒻𑒞 𑒯𑒋𑒞𑒰 𑒞𑒿 𑒯𑒧𑒩𑒰 𑒮𑒦𑒏𑒹𑒿 𑒣𑒞𑒰 𑒢𑒻 𑒔𑒪𑒻𑒋।
𑓓𑓑 𑒠𑒱𑒮𑒧𑓂𑒥𑒩𑒏 𑒩𑒰𑒞𑒱 𑒕𑒱𑒌। 𑒂𑒥 𑒋𑒏 𑒞𑒰𑒩𑒲𑒐 𑒦𑓄 𑒑𑒹𑒪𑒻। 𑒧𑒳𑒠𑒰 𑒠𑒳𑒩𑓂𑒒𑒙𑒢𑒰 𑒥𑒰𑒩𑒯 𑒥𑒖𑒹 𑒩𑒰𑒞𑒱𑒏 𑒣𑒯𑒱𑒢𑒹 𑒦𑒹𑒪 𑒕𑒪𑒻। 𑒪𑒯𑒰𑒬𑒏 𑒖𑒹𑒥𑒲𑒧𑒹 𑒧𑒼𑒥𑒰𑒃𑒪 𑒩𑒯𑒻। 𑒞𑒲𑒢 𑒔𑒰𑒩𑒱𑒙𑒰 𑒁𑓀𑒞𑒱𑒧 𑒥𑒹𑒩 𑒛𑒰𑒨𑒪 𑒏𑒋𑒪 𑒑𑒹𑒪 𑒤𑒼𑒢 𑒢𑒧𑓂𑒥𑒩𑒣𑒩 𑒣𑒳𑒪𑒱𑒮 𑒍𑒯𑒲 𑒧𑒼𑒥𑒰𑒃𑒪𑒮𑒿 𑒤𑒼𑒢 𑒏𑒹𑒪𑒏𑒻 𑒂 𑒮𑒴𑒔𑒢𑒰 𑒠𑒹𑒪𑒏𑒻 𑒖𑒹 𑒖𑒏𑒩 𑒤𑒼𑒢𑒮𑒿 𑒣𑒳𑒪𑒱𑒮 𑒤𑒼𑒢 𑒏𑓄 𑒩𑒯𑒪 𑒁𑒕𑒱, 𑒮𑒹 𑒂𑒥 𑒌 𑒠𑒳𑒢𑒱𑒨𑒰𑒿𑒧𑒹 𑒢𑒻 𑒩𑒯𑒪।
𑒧𑒡𑓂𑒨 𑒩𑒰𑒞𑓂𑒩𑒱। 𑒋𑒏𑓂𑒮-𑒩𑒹 𑒧𑒬𑒲𑒢 𑒂 𑒮𑓂𑒢𑒱𑒤𑒩 𑒛𑒰𑒑𑒏𑒹𑒿 𑒕𑒼𑒛𑓃𑒱 𑒂𑒤𑒱𑒮𑒮𑒿 𑒕𑒳𑒙𑓂𑒙𑒲 𑒪𑓄 𑒯𑒧 𑒥𑒱𑒠𑒰 𑒯𑒼𑒃 𑒕𑒲।
𑒄 𑒋𑒨𑒩𑒣𑒼𑒩𑓂𑒙 𑒥𑒰𑒯𑒩𑒮𑒿 𑒏𑒼𑒢𑒼 𑒮𑒖𑒪-𑒡𑒖𑒪 𑒢𑒫𑒏𑒢𑒱𑒨𑒰𑒿 𑒮𑒢 𑒪𑒰𑒑𑒱 𑒩𑒯𑒪 𑒁𑒕𑒱। 𑒩𑒰𑒞𑒱𑒧𑒹 𑒥𑒰𑒯𑒩𑒮𑒿 𑒯𑒧𑒯𑒴𑒿 𑒢𑒻 𑒠𑒹𑒐𑒢𑒹 𑒩𑒯𑒱𑒌 𑒌 𑒢𑒫𑒏𑒢𑒱𑒨𑒰𑒿𑒏𑒹𑒿। 𑒚𑒲𑒏𑒹 𑒏𑒯𑒻 𑒕𑒪 𑒍 𑒧𑒯𑒱𑒪𑒰। 𑒯𑒼𑒙𑒪𑒹 𑒪𑒰𑒑𑒱 𑒩𑒯𑒪 𑒁𑒕𑒱, 𑒣𑓂𑒩𑒏𑒰𑒬𑒧𑒹 𑒔𑒧𑒔𑒧𑒰𑒃𑒞।
𑒑𑒰𑒛𑓃𑒲 𑒂𑒑𑒰𑒿 𑒥𑒜𑓃𑒱 𑒩𑒯𑒪 𑒁𑒕𑒱। 𑒠𑒱𑒪𑓂𑒪𑒲𑒏 𑒩𑒼𑒛 𑒋𑒞𑒹𑒏 𑒔𑒰𑒏𑒩 𑒏𑒼𑒢𑒰 𑒦𑓄 𑒑𑒹𑒪𑒻। 𑒠𑒱𑒢𑒧𑒹 𑒞𑒿 𑒞𑒲𑒢 𑒧𑒱𑒢𑒙 𑒣𑓂𑒩𑒞𑒱 𑒏𑒱𑒪𑒼𑒧𑒲𑒙𑒩𑒏 𑒑𑒞𑒱 𑒩𑒯𑒻 𑒕𑒻 𑒌 𑒮𑒛𑓃𑒏𑒣𑒩। 𑒧𑒳𑒠𑒰 𑒩𑒰𑒞𑒱𑒧𑒹 𑒐𑒰𑒪𑒲 𑒩𑒯𑒢𑒹 𑒔𑒏𑒩𑒑𑒩 𑒪𑒰𑒑𑒱 𑒩𑒯𑒪 𑒁𑒕𑒱।
𑒧𑒳𑒠𑒰 𑒤𑒹𑒩 𑒖𑒧𑒳𑒢𑒰𑒣𑒰𑒩 𑒁𑒥𑒻𑒋, 𑒩𑒼𑒛 𑒣𑒰𑒞𑒩 𑒯𑒼𑒃𑒞 𑒖𑒰𑒃𑒋। 𑒦𑒖𑒢𑒣𑒳𑒩𑒰, 𑒐𑒖𑒴𑒩𑒲 𑒐𑒰𑒮। 𑒠𑒱𑒢𑒧𑒹 𑒞𑒿 𑒑𑒰𑒛𑓃𑒲 𑒋𑒞𑓄 𑒂𑒥𑒱𑒨𑒼 𑒢𑒻 𑒮𑒏𑒱𑒞𑒋। 𑒥𑒱𑒖𑒪𑒲 𑒮𑒹𑒯𑒼 𑒏𑒙𑒱 𑒑𑒹𑒪 𑒕𑒻। 𑒮𑒛𑓃𑒏𑒏 𑒠𑒳𑒢𑒴 𑒏𑒰𑒞 𑒑𑒢𑓂𑒠𑒰 𑒣𑒮𑒩𑒪।
𑒑𑒰𑒛𑓃𑒲 𑒑𑒪𑒲𑒏 𑒏𑒼𑒢𑒧𑒹 𑒪𑒑𑒰 𑒏𑓄 𑒂𑒑𑒰𑒿 𑒥𑒜𑓃𑒻 𑒕𑒲। 𑒑𑒪𑒲 𑒣𑒰𑒩 𑒏𑓄 𑒯𑒱𑒪𑒻𑒞 𑒮𑒱𑒩𑒯𑒲 𑒥𑒰𑒙𑒹 𑒁𑒧𑒩𑒖𑒲𑒏 𑒒𑒩 𑒣𑒻𑒮𑒻 𑒕𑒲। 𑒏𑒢𑓂𑒢𑒰𑒩𑒼𑒯𑒙 𑒅𑒚𑒪 𑒕𑒻। 𑒠𑒱𑒪𑓂𑒪𑒲.. 𑒃𑒝𑓂𑒛𑒱𑒨𑒰, 𑒧𑒖𑒑𑒴𑒞 𑒃𑒝𑓂𑒛𑒱𑒨𑒰𑒏 𑒩𑒰𑒖𑒡𑒰𑒢𑒲𑒏 𑒄𑒯𑒼 𑒋𑒏𑒙𑒰 𑒃𑒪𑒰𑒏𑒰 𑒁𑒕𑒱। 𑒏𑒼𑒩𑒱𑒨𑒢 𑒧𑒯𑒱𑒪𑒰 𑒋𑒞𑓄 𑒢𑒻 𑒂𑒥𑒱 𑒮𑒏𑒞, 𑒦𑒖𑒢𑒣𑒳𑒩𑒰, 𑒐𑒖𑒴𑒩𑒲 𑒐𑒰𑒮। 𑒦𑒖𑒢𑒣𑒳𑒩𑒰, 𑒐𑒖𑒴𑒩𑒲 𑒐𑒰𑒮, 𑒋𑒞𑒳𑒏𑓂𑒏𑒹 𑒪𑒼𑒏 𑒠𑒱𑒪𑓂𑒪𑒲𑒏 𑒔𑒧𑒔𑒧𑒰𑒃𑒞 𑒒𑒩, 𑒂𑒤𑒱𑒮, 𑒂 𑒫𑓂𑒨𑒰𑒣𑒰𑒩𑒏 𑒣𑒰𑒕𑒰𑒿 𑒁𑒕𑒱, 𑒋𑒏𑒩 𑒮𑒦𑒏 𑒁𑒑𑒱𑒪𑒰 𑒐𑒰𑒜𑓃𑒲 𑒦𑓄 𑒮𑒏𑒻𑒋 𑒤𑒋𑒠𑒰𑒧𑒹 𑒩𑒯𑒞𑒻.. 𑒞𑒻 𑒂𑒮𑒧𑒹 𑒖𑒰𑒢 𑒁𑒩𑒼𑒣𑒢𑒹 𑒁𑒕𑒱।
𑒣𑒞𑒰 𑒔𑒪𑒻𑒋 𑒖𑒹 𑒪𑒯𑒰𑒬 𑒑𑒳𑒩𑒳 𑒞𑒹𑒑 𑒥𑒯𑒰𑒠𑒳𑒩 𑒁𑒮𑓂𑒣𑒞𑒰𑒪𑒧𑒹 𑒩𑒰𑒐𑒪 𑒕𑒻।
𑒍𑒞𑓄 𑒮𑒿 𑒥𑒱𑒠𑒰 𑒯𑒼𑒃 𑒕𑒲। 𑒥𑒼𑒪 𑒦𑒩𑒼𑒮 𑒠𑒹𑒥𑒰 𑒨𑒼𑒑𑓂𑒨 𑒣𑒩𑒱𑒮𑓂𑒟𑒱𑒞𑒱 𑒢𑒻 𑒕𑒻।
𑒑𑒳𑒩𑒳 𑒞𑒹𑒑 𑒥𑒯𑒰𑒠𑒳𑒩 𑒁𑒮𑓂𑒣𑒞𑒰𑒪𑒏 𑒧𑒳𑒩𑓂𑒠𑒰𑒒𑒩𑒧𑒹 𑒧𑒼𑒯𑒱𑒞 𑒥𑒰𑒥𑒴𑒏 𑒥𑒹𑒙𑒰𑒏 𑒪𑒯𑒰𑒮 𑒍𑒏𑒩 𑒩𑒏𑓂𑒞𑒮𑒧𑓂𑒥𑒢𑓂𑒡𑒲𑒏𑒹𑒿 𑒠𑒹𑒪 𑒖𑒹𑒞𑒻। 𑒣𑒳𑒪𑒱𑒮 𑒏𑒯𑒢𑒹 𑒩𑒯𑒋- 𑒣𑒱𑒞𑒰 𑒖𑒲𑒫𑒱𑒞 𑒕𑒟𑒱𑒢𑓂𑒯 𑒞𑒐𑒢 𑒠𑒼𑒮𑒩𑒰𑒏𑒹𑒿 𑒠𑒹𑒥𑒰𑒏 𑒥𑒰𑒞𑒹 𑒢𑒻 𑒕𑒻, 𑒢𑒻 𑒖𑒱𑒥𑒻𑒞 𑒩𑒯𑒱𑒞𑒟𑒱𑒢𑓂𑒯 𑒞𑒐𑒢 𑒠𑒹𑒪 𑒖𑒰 𑒮𑒏𑒻 𑒕𑒪- 𑒅𑒔𑓂𑒔 𑒢𑓂𑒨𑒰𑒨𑒰𑒪𑒨𑒏 𑒂𑒠𑒹𑒬 𑒕𑒻। 𑒣𑒕𑒱𑒪𑒰 𑒥𑒹𑒩 𑒠𑓄 𑒠𑒹𑒪 𑒑𑒹𑒪 𑒩𑒯𑒻 𑒂 𑒖𑒐𑒢 𑒁𑒮𑒪𑒲 𑒩𑒏𑓂𑒞-𑒮𑒧𑓂𑒥𑒢𑓂𑒡𑒲 𑒂𑒥𑒱 𑒏𑓄 𑒏𑒹𑒮 𑒏𑓄 𑒠𑒹𑒪𑒏𑒻 𑒞𑒿 𑒞𑒲𑒢𑒙𑒰 𑒣𑒳𑒪𑒱𑒮𑒥𑒪𑒰 𑒢𑒱𑒪𑒧𑓂𑒥𑒱𑒞 𑒦𑓄 𑒑𑒹𑒪𑒻। 𑒂 𑒏𑒢𑒹 𑒏𑒰𑒪 𑒪𑒹𑒪 𑒧𑒰𑒢𑒱 𑒪𑒱𑒁 𑒖𑒹 𑒣𑒳𑒪𑒱𑒮 𑒠𑒻𑒨𑒼 𑒠𑒹𑒞, 𑒧𑒳𑒠𑒰 𑒛𑒰𑒏𑓂𑒙𑒩 𑒣𑒼𑒮𑓂𑒙𑒧𑒰𑒩𑓂𑒙𑒧𑒹 𑒢𑒻 𑒏𑒩𑒞।
𑓓
𑒁𑒧𑒼𑒠𑒏 𑒒𑒩𑒧𑒹 𑒯𑒩𑒥𑒱𑒩𑓂𑒩𑒼 𑒅𑒚𑒱 𑒑𑒹𑒪𑒻। 𑒠𑒱𑒪𑓂𑒪𑒲𑒮𑒿 𑒋𑒏 𑒥𑒖𑒹 𑒩𑒰𑒞𑒱𑒧𑒹 𑒤𑒼𑒢 𑒂𑒋𑒪 𑒕𑒻, 𑒧𑒼𑒯𑒱𑒞 𑒥𑒰𑒥𑒴𑒏 𑒥𑒹𑒙𑒰 𑒁𑒧𑒩 𑒧𑒩𑒱 𑒑𑒹𑒪𑒻। 𑒠𑒱𑒪𑓂𑒪𑒲𑒧𑒹 𑒮𑒛𑓃𑒏 𑒠𑒳𑒩𑓂𑒒𑒙𑒢𑒰𑒧𑒹 𑒧𑒩𑒱 𑒑𑒹𑒪𑒻।
𑒁𑒧𑒼𑒠𑒏 𑒤𑒼𑒢𑒣𑒩 𑒤𑒼𑒢 𑒂𑒋𑒪 𑒕𑒻। 𑒁𑒧𑒼𑒠 𑒧𑒼𑒯𑒱𑒞 𑒥𑒰𑒥𑒴𑒏𑒹𑒿 𑒏𑒼𑒢𑒰 𑒏𑒲 𑒏𑒯𑒞𑒻। 𑒞𑒞𑓂𑒞𑒰-𑒮𑒱𑒯𑒩 𑒏𑒙𑒰 𑒏𑓄 𑒋𑒏𑓂𑒏𑒹𑒙𑒰 𑒥𑒹𑒙𑒰 𑒧𑒼𑒯𑒱𑒞 𑒥𑒰𑒥𑒴𑒏𑒹𑒿, 𑒔𑒰𑒩𑒱𑒙𑒰 𑒥𑒹𑒙𑒲𑒣𑒩𑒮𑒿। 𑒣𑒩𑒳𑒏𑒹𑒿 𑒥𑒱𑒨𑒰𑒯 𑒦𑒹𑒪 𑒕𑒪𑒻।
𑒁𑒧𑒼𑒠 𑒧𑒼𑒯𑒱𑒞 𑒏𑒏𑒰𑒏 𑒠𑒩𑒥𑒖𑓂𑒖𑒰 𑒪𑒑 𑒣𑒯𑒳𑒿𑒔𑒻𑒋। 𑒯𑒰𑒏 𑒠𑒻𑒋। 𑒏𑒰𑒏𑒲 𑒁𑒥𑒻 𑒕𑒟𑒱। 𑒧𑒼𑒯𑒱𑒞 𑒥𑒰𑒥𑒴 𑒑𑒰𑒧𑒧𑒹 𑒕𑒟𑒱𑒨𑒹 𑒢𑒻। 𑒥𑒯𑒢𑒼𑒃𑒏 𑒧𑒵𑒞𑓂𑒨𑒳-𑒮𑓀𑒮𑓂𑒏𑒰𑒩𑒧𑒹 𑒦𑒰𑒑 𑒪𑒻𑒪𑒹 𑒑𑒹𑒪 𑒕𑒟𑒱। 𑒁𑒧𑒼𑒠𑒏𑒹𑒿 𑒄 𑒑𑒣 𑒏𑒰𑒏𑒲 𑒏𑒯𑒻 𑒕𑒟𑒱𑒢𑓂𑒯।
-𑒮𑒹 𑒏𑒲 𑒦𑒹𑒪𑒻 𑒋𑒞𑒹𑒏 𑒩𑒰𑒞𑒱𑒧𑒹?- 𑒏𑒰𑒏𑒲 𑒔𑒱𑒢𑓂𑒞𑒱𑒞 𑒦𑓄 𑒣𑒳𑒕𑒻 𑒕𑒟𑒱𑒢𑓂𑒯।
-𑒢𑒻 𑒦𑒼𑒩𑒧𑒹 𑒁𑒥𑒻 𑒕𑒲।–𑒏𑒰𑒖 𑒕𑒪।
𑒁𑒧𑒼𑒠 𑒧𑒼𑒯𑒱𑒞 𑒥𑒰𑒥𑒴𑒏 𑒒𑒩𑒮𑒿 𑒣𑒳𑒕𑒰𑒩𑒲 𑒏𑓄 𑒥𑒯𑒩𑒰 𑒖𑒰𑒃𑒋। 𑒁𑒧𑒼𑒠 𑒂𑒑𑒰𑒿 𑒥𑒜𑓃𑒱 𑒖𑒰𑒃𑒋।
𑒮𑒩𑒫𑒢𑒏 𑒠𑒩𑒥𑒖𑓂𑒖𑒰𑒣𑒩 𑒖𑒰𑒃𑒋। 𑒯𑒿 𑒋𑒏𑒩𑒹 𑒏𑒯𑒱 𑒠𑒻 𑒕𑒱𑒌, 𑒏𑒰𑒏𑒲𑒏𑒹𑒿 𑒦𑒼𑒩𑒧𑒹 𑒏𑒯𑒱 𑒠𑒹𑒞𑒢𑓂𑒯𑒱।
𑒮𑒩𑒫𑒢 𑒔𑒾𑒏𑒲𑒣𑒩 𑒮𑒴𑒞𑒪 𑒁𑒕𑒱। 𑒁𑒧𑒼𑒠 𑒍𑒏𑒩𑒰 𑒅𑒚𑒰𑒥𑒻𑒋 𑒂 𑒮𑒦 𑒑𑒣 𑒏𑒯𑒻𑒋। 𑒮𑒩𑒫𑒢 𑒦𑒼𑒩𑒧𑒹 𑒏𑒰𑒏𑒲𑒏𑒹𑒿 𑒏𑒯𑒱 𑒠𑒹𑒞𑒻 𑒂 𑒏𑒰𑒏𑒰𑒏𑒹𑒿 𑒮𑒹𑒯𑒼 𑒦𑒼𑒩𑒹𑒧𑒹 𑒤𑒼𑒢 𑒏𑓄 𑒠𑒹𑒞𑒻।
𑒦𑒼𑒩𑒧𑒹 𑒦𑒩𑒱 𑒑𑒰𑒧 𑒯𑒰𑒏𑓂𑒩𑒼𑒮 ….। 𑒏𑒰𑒏𑒲 𑒞𑒿 𑒥𑒞𑒰𑒯 𑒦𑒹𑒪 𑒖𑒰𑒃 𑒕𑒟𑒱। 𑒧𑒼𑒯𑒱𑒞 𑒥𑒰𑒥𑒴𑒏𑒹𑒿 𑒤𑒼𑒢 𑒑𑒹𑒪𑒢𑓂𑒯𑒱 𑒖𑒹 𑒖𑒯𑒱𑒢𑒰 𑒕𑒲 𑒞𑒯𑒱𑒢𑒰 𑒂𑒥𑒱 𑒖𑒰𑒅, 𑒏𑒰𑒏𑒲𑒏 𑒧𑒼𑒢 𑒥𑒛𑓂𑒛 𑒐𑒩𑒰𑒣 𑒕𑒢𑓂𑒯𑒱।
𑒧𑒼𑒯𑒱𑒞 𑒥𑒰𑒥𑒴 𑒑𑒰𑒧𑒣𑒩 𑒋𑒪𑒰𑒯 𑒞𑒿 𑒠𑒼𑒮𑒩𑒹 𑒑𑒣।
𑒠𑒱𑒪𑓂𑒪𑒲𑒧𑒹 𑒙𑒼𑒪𑒏 𑒥𑒛𑓂𑒛 𑒪𑒼𑒏 𑒕𑒻, 𑒧𑒳𑒠𑒰 𑒣𑒳𑒪𑒱𑒮 𑒪𑒯𑒰𑒮 𑒏𑒏𑒩𑒼 𑒢𑒻 𑒠𑒹𑒞𑒻। 𑒩𑒏𑓂𑒞-𑒮𑒧𑓂𑒥𑒢𑓂𑒡𑒲𑒏𑒹𑒿 𑒪𑒯𑒰𑒮 𑒦𑒹𑒙𑒞𑒻।
𑒧𑒼𑒯𑒱𑒞 𑒥𑒰𑒥𑒴 𑒠𑒱𑒪𑓂𑒪𑒲 𑒢𑒻 𑒖𑒹𑒞𑒰𑒯, 𑒮𑓀𑒞𑒰𑒣 𑒠𑒹𑒐𑒻𑒪𑒹 𑒢𑒻 𑒖𑒹𑒞𑒰𑒯।
𑒧𑒳𑒠𑒰 𑒣𑒳𑒪𑒱𑒮 𑒪𑒯𑒰𑒮 𑒠𑒼𑒮𑒩𑒰𑒏𑒹𑒿 𑒢𑒻 𑒠𑒹𑒞𑒻।
𑒧𑒼𑒯𑒱𑒞 𑒥𑒰𑒥𑒴𑒏𑒹𑒿 𑒣𑓀𑒛𑒱𑒞𑒖𑒲 𑒦𑒩𑒼𑒮 𑒠𑒻 𑒕𑒟𑒱𑒢𑓂𑒯। 𑒍𑒞𑓄 𑒏𑒹 𑒏𑒼𑒢𑒰 𑒠𑒰𑒯 𑒮𑓀𑒮𑓂𑒏𑒰𑒩 𑒏𑒩𑒞𑒻, 𑒮𑒹 𑒣𑒝𑓂𑒛𑒲𑒖𑒲 𑒮𑓀𑒑𑒹 𑒖𑒹𑒞𑒰𑒯।
𑒮𑒰𑒿𑒗𑒧𑒹 𑒣𑒙𑒢𑒰𑒮𑒿 𑒠𑒱𑒪𑓂𑒪𑒲𑒏 𑒙𑓂𑒩𑒹𑒢𑒧𑒹 𑒩𑒱𑒖𑒩𑓂𑒫𑒹𑒬𑒢 𑒦𑓄 𑒖𑒹𑒞𑒻। 𑒫𑒱𑒡𑒰𑒨𑒏 𑒖𑒲𑒮𑒿 𑒁𑒧𑒼𑒠 𑒑𑒣 𑒏𑓄 𑒪𑒹𑒢𑒹 𑒕𑒟𑒱, 𑒙𑒱𑒏𑒙 𑒏𑒙𑒰, 𑒩𑒱𑒖𑒩𑓂𑒫𑒹𑒬𑒢 𑒏𑒩𑒰 𑒏𑓄 𑒁𑒧𑒼𑒠𑒏 𑒦𑒰𑒞𑒱𑒖 𑒙𑒱𑒏𑒙𑒏 𑒮𑓀𑒑 𑒣𑒙𑒢𑒰 𑒖𑓀𑒏𑓂𑒬𑒢𑒣𑒩 𑒦𑒹𑒙𑒞। 𑒠𑒱𑒪𑓂𑒪𑒲𑒧𑒹 𑒣𑒲𑒁𑒩 𑒥𑒔𑓂𑒔𑒰𑒏 𑒥𑒹𑒙𑒰 𑒏𑒰𑒩 𑒪𑓄 𑒏𑓄 𑒮𑓂𑒙𑒹𑒬𑒢𑒣𑒩 𑒂𑒋𑒞, 𑒏𑒩𑒼𑒪𑒥𑒰𑒑𑒧𑒹 𑒏𑒻𑒏𑒙𑒰 𑒠𑒼𑒏𑒰𑒢 𑒕𑒻 𑒣𑒲𑒁𑒩 𑒥𑒔𑓂𑒔𑒰𑒏 𑒥𑒹𑒙𑒰𑒏। 𑒍 𑒮𑒼𑒗𑒹 𑒍𑒞𑓄𑒮𑒿 𑒧𑒼𑒯𑒱𑒞 𑒥𑒰𑒥𑒴𑒏𑒹𑒿 𑒧𑒳𑒩𑓂𑒠𑒰𑒒𑒩 𑒪𑓄 𑒁𑒢𑒞𑒢𑓂𑒯𑒱 …
𑒣𑒝𑓂𑒛𑒲𑒖𑒲 𑒂 𑒧𑒼𑒯𑒱𑒞 𑒥𑒰𑒥𑒴 𑒣𑒙𑒢𑒰𑒏 𑒥𑒮 𑒣𑒏𑒛𑓃𑒻 𑒕𑒟𑒱। 𑒮𑒰𑒿𑒗𑒧𑒹 𑒠𑒱𑒪𑓂𑒪𑒲𑒏 𑒙𑓂𑒩𑒹𑒢 𑒕𑒻। 𑒏𑒰𑒪𑓂𑒯𑒱 𑒦𑒼𑒩𑒧𑒹 𑒧𑒼𑒯𑒱𑒞 𑒥𑒰𑒥𑒴 𑒠𑒱𑒪𑓂𑒪𑒲 𑒣𑒯𑒳𑒿𑒔𑒱 𑒖𑒹𑒞𑒰𑒯 𑒂 𑒥𑒹𑒙𑒰 𑒖𑒹 𑒏𑒰𑒪𑓂𑒯𑒱 𑒡𑒩𑒱 𑒖𑒱𑒥𑒱𑒞𑒹 𑒩𑒯𑒻 𑒂 𑒂𑒃 𑒖𑒹 𑒪𑒯𑒰𑒮 𑒥𑒢𑒪 𑒠𑒱𑒪𑓂𑒪𑒲𑒏 𑒧𑒳𑒩𑓂𑒠𑒰𑒒𑒩𑒧𑒹 𑒩𑒰𑒐𑒪 𑒕𑒻- 𑒞𑒏𑒩 𑒧𑒵𑒞 𑒬𑒩𑒲𑒩𑒏𑒹𑒿 𑒪𑒹𑒞𑒰𑒯।
𑓔
𑒙𑓂𑒩𑒹𑒢 𑒂𑒬𑒰𑒏 𑒢𑒑𑒩𑒲 𑒠𑒱𑒪𑓂𑒪𑒲 𑒣𑒯𑒳𑒿𑒔𑒻𑒥𑒪𑒰 𑒕𑒻, 𑒔𑒱𑒧𑒢𑒲𑒏 𑒡𑒳𑒿𑒂 𑒂 𑒤𑒻𑒏𑓂𑒙𑓂𑒩𑒲 𑒮𑒦 𑒐𑒞𑒧 𑒦𑒹𑒪𑒻 𑒂 𑒥𑒛𑓃𑒏𑒰-𑒥𑒛𑓃𑒏𑒰 𑒮𑓂𑒙𑒹𑒛𑒱𑒨𑒧, 𑒣𑓂𑒩𑒑𑒞𑒱 𑒧𑒻𑒠𑒰𑒢 𑒂 𑒏𑒲-𑒏𑒲 𑒂𑒥𑒱 𑒑𑒹𑒪𑒻। 𑒧𑒼𑒯𑒱𑒞 𑒥𑒰𑒥𑒴𑒏𑒹𑒿 𑒄 𑒮𑒦 𑒥𑒾𑒮𑓂𑒞𑒳 𑒣𑒯𑒱𑒢𑒹 𑒢𑒲𑒏 𑒪𑒰𑒑𑒻 𑒕𑒪𑒢𑓂𑒯𑒱। 𑒠𑒱𑒪𑓂𑒪𑒲 𑒯𑒰𑒙𑒧𑒹 𑒑𑒧𑒻𑒂 𑒥𑒾𑒮𑓂𑒞𑒳 𑒮𑒦𑒏 𑒮𑓂𑒙𑒰𑒪𑒣𑒩 𑒥𑒛𑓃𑒏𑒰 𑒑𑒰𑒛𑓃𑒲𑒥𑒪𑒰 𑒮𑒦 𑒅𑒞𑒩𑒱 𑒏𑓄 𑒮𑒧𑒰𑒢 𑒏𑒲𑒢𑒻 𑒕𑒪। 𑒧𑒼𑒯𑒱𑒞 𑒥𑒰𑒥𑒴𑒏𑒹𑒿 𑒯𑒿𑒮𑒲 𑒪𑒰𑒑𑒻 𑒕𑒪𑒢𑓂𑒯𑒱। 𑒑𑒰𑒧𑒧𑒹 𑒄 𑒮𑒦 𑒥𑒾𑒮𑓂𑒞𑒳 𑒁𑒢𑒹𑒩𑒹 𑒣𑒛𑓃𑒪 𑒩𑒯𑒻 𑒕𑒻, 𑒏𑒱𑒨𑒼 𑒏𑒱𑒢𑒢𑒱𑒯𑒰𑒩 𑒢𑒻। 𑒌 𑒣𑒩𑒠𑒹𑒬𑒲 𑒮𑒦𑒏𑒹𑒿 𑒑𑒰𑒧𑒏 𑒪𑒼𑒏 𑒮𑒦 𑒋𑒞𑓂𑒞𑓄 𑒁𑒢𑒹𑒩𑒹 𑒚𑒏𑒻 𑒕𑒻।
𑒧𑒳𑒠𑒰 𑒂𑒃 𑒄 𑒠𑒱𑒪𑓂𑒪𑒲 𑒯𑒳𑒢𑒏𑒰 𑒪𑒹𑒪 𑒧𑒳𑒩𑓂𑒠𑒰𑒒𑒩𑒏 𑒣𑒞𑒰 𑒥𑒢𑒱 𑒑𑒹𑒪 𑒕𑒢𑓂𑒯𑒱। 𑒑𑒳𑒩𑒳 𑒞𑒹𑒑 𑒥𑒯𑒰𑒠𑒳𑒩 𑒁𑒮𑓂𑒣𑒞𑒰𑒪𑒏 𑒧𑒳𑒩𑓂𑒠𑒰𑒒𑒩𑒧𑒹 𑒯𑒳𑒢𑒏𑒩 𑒥𑒹𑒙𑒰𑒏 𑒪𑒯𑒰𑒮 𑒍𑒏𑒩 𑒩𑒏𑓂𑒞𑒮𑒧𑓂𑒥𑒢𑓂𑒡𑒲𑒏𑒹𑒿 𑒠𑒹𑒪 𑒖𑒹𑒞𑒻।
𑒣𑒱𑒞𑒰 𑒩𑒏𑓂𑒞𑒮𑒧𑓂𑒥𑒢𑓂𑒡𑒲 𑒥𑒢𑒱 𑒣𑒯𑒳𑒿𑒔𑒻𑒥𑒪𑒰 𑒕𑒟𑒱।
𑒧𑒼𑒯𑒱𑒞 𑒥𑒰𑒥𑒴 𑒧𑒳𑒩𑓂𑒠𑒰𑒒𑒩 𑒣𑒯𑒳𑒿𑒔𑒱 𑒖𑒰𑒃 𑒕𑒟𑒱, 𑒣𑒯𑒱𑒢𑒹 𑒥𑒳𑒗𑒪𑒼 𑒢𑒻 𑒕𑒪𑒢𑓂𑒯𑒱 𑒖𑒹 𑒠𑒱𑒪𑓂𑒪𑒲𑒧𑒹 𑒮𑒹𑒯𑒼 𑒧𑒳𑒩𑓂𑒠𑒰𑒒𑒩 𑒯𑒼𑒃 𑒕𑒻, 𑒥𑒱𑒖𑒪𑒲-𑒥𑒞𑓂𑒞𑒲𑒥𑒪𑒰 𑒬𑒯𑒩 𑒠𑒱𑒪𑓂𑒪𑒲𑒧𑒹.....
𑓕
𑒠𑒱𑒪𑓂𑒪𑒲। 𑒏𑒹 𑒥𑒮𑒹𑒪𑒏𑒻, 𑒏𑒼𑒢𑒰 𑒥𑒮𑒹𑒪𑒏𑒻। 𑒁𑓀𑒑𑓂𑒩𑒹𑒖 𑒖𑒯𑒱𑒨𑒰 𑒏𑒪𑒏𑒞𑓂𑒞𑒰𑒮𑒿 𑒠𑒱𑒪𑓂𑒪𑒲 𑒩𑒰𑒖𑒡𑒰𑒢𑒲 𑒥𑒢𑒹𑒥𑒰𑒏 𑒫𑒱𑒔𑒰𑒩 𑒏𑒹𑒪𑒏 𑒞𑒐𑒢 𑒞𑒿 𑒋𑒏𑒼𑒙𑒰 𑒑𑒰𑒧𑒏 𑒪𑒼𑒏 𑒋𑒞𑓄 𑒢𑒻 𑒯𑒹𑒞𑒻।
𑒂 𑒂𑒥 …
𑒧𑒼𑒯𑒱𑒞 𑒥𑒰𑒥𑒴 𑒣𑒯𑒳𑒿𑒔𑒱 𑒖𑒰𑒃 𑒕𑒟𑒱। 𑒯𑒥𑒼𑒜𑒹𑒏𑒰𑒩 𑒦𑓄 𑒏𑒰𑒢𑓄 𑒪𑒑𑒻 𑒕𑒟𑒱। 𑒯𑒧 𑒦𑒩𑒱-𑒣𑒰𑒿𑒖 𑒏𑓄 𑒣𑒏𑒛𑓃𑒱 𑒏𑓄 𑒥𑒻𑒮𑒱 𑒖𑒰𑒃 𑒕𑒱𑒨𑒢𑓂𑒯𑒱।
-𑒑𑒰𑒧𑒏 𑒕𑒼𑒛𑓃𑒴 𑒏𑒼𑒢 𑒙𑒼𑒪𑒏, 𑒏𑒼𑒢 𑒒𑒩 𑒪𑒼𑒏 𑒋𑒞𑓂𑒞𑓄 𑒢𑒻 𑒕𑒻। 𑒮𑒛𑓃𑒏 𑒠𑒳𑒩𑓂𑒒𑒙𑒢𑒰 𑒮𑒹𑒯𑒼 𑒦𑒹𑒪 𑒕𑒻। 𑒧𑒳𑒠𑒰 𑒥𑒔𑒱-𑒥𑒔𑒱 𑒖𑒰𑒃 𑒕𑒪𑒻। 𑒁𑒧𑒩𑒼 𑒥𑒔𑒱 𑒖𑒻𑒞𑒻 𑒞𑒿 𑒏𑒞𑓂𑒞𑒹 𑒢𑒲𑒏 𑒯𑒼𑒃𑒞𑒻। 𑒁𑒣𑓀𑒑𑒼 𑒦𑓄 𑒏𑓄 𑒩𑒯𑒱𑒞𑒻 𑒞𑒿 𑒠𑒹𑒐𑒥𑒼 𑒞𑒿 𑒏𑒩𑒱𑒞𑒱𑒌। 𑒯𑒹 𑒏𑒢𑒱𑒨𑒰𑒿𑒏𑒹𑒿 𑒂𑒑𑒱 𑒢𑒻 𑒠𑒹𑒥𑓄 𑒠𑒹𑒥𑒻, 𑒛𑒹𑒜𑓃𑒧𑒰𑒮𑒏 𑒥𑒔𑓂𑒔𑒰 𑒕𑒻। 𑒥𑒔𑓂𑒔𑒰 𑒪𑒲𑒪𑒼 𑒦𑓄 𑒖𑒰𑒋𑒞। 𑒢𑒻, 𑒯𑒧𑒯𑒲𑓀 𑒠𑒹𑒥𑒻 𑒂𑒑𑒱.. 𑒂𑒢 𑒠𑒹𑒥𑒼 𑒏𑒩𑒞𑒻 𑒞𑒿 𑒁𑒢𑓂𑒞𑒱𑒧 𑒠𑒱𑒢 𑒞𑒿 𑒅𑒞𑒩𑒲 𑒏𑒢𑒱𑒨𑒰𑒿𑒏 𑒑𑒩𑒰𑒧𑒹 𑒂𑒥𑒱𑒨𑒹 𑒖𑒹𑒞𑒻। 𑒞𑒹𑒿 𑒯𑒧𑒯𑒲𑓀 𑒠𑒹𑒥𑒻 𑒂𑒑𑒱।
-𑒋𑒯.. 𑒋𑒏𑓂𑒏𑒻𑒮𑒹 𑒥𑒩𑒐𑒏 𑒞𑒿 𑒕𑒻, 𑒕𑒾𑓀𑒏𑒲 𑒮𑒢 𑒬𑒩𑒲𑒩 𑒕𑒻 𑒏𑒢𑒱𑒨𑒰𑒿𑒏। 𑒔𑒰𑒩𑒱𑒙𑒰 𑒦𑒰𑒃 𑒕𑒻, 𑒮𑒦 𑒋𑒏𑒩𑒰𑒮𑒿 𑒣𑒻𑒒। 𑒍𑒏𑒩 𑒖𑒲𑒫𑒢 𑒏𑒼𑒢𑒰 𑒥𑒱𑒞𑒞𑒻। 𑒌 𑒥𑒴𑒜𑓃 𑒬𑒩𑒲𑒩𑒮𑒿 𑒥𑒔𑓂𑒔𑒰𑒏𑒹𑒿 𑒯𑒧 𑒏𑒼𑒢𑒰 𑒣𑒼𑒮𑒥𑒻। 𑒏𑒞𑒥𑒼 𑒡𑒢𑒲𑒏 𑒩𑒯𑒻 𑒕𑒻, 𑒢𑒼𑒏𑒩𑒲 𑒪𑒹𑒪 𑒣𑒚𑒥𑒻𑒞𑒹 𑒕𑒻.. 𑒣𑒲𑒁𑒩𑒼 𑒥𑒔𑓂𑒔𑒰 𑒞𑒿 𑒣𑒚𑒹𑒢𑒹 𑒕𑒟𑒱 𑒁𑒣𑒢 𑒥𑒔𑓂𑒔𑒰𑒏𑒹𑒿। 𑒍𑒏𑒩𑒰𑒮𑒿 𑒥𑒹𑒮𑒲 𑒏𑒹 𑒕𑒻 𑒡𑒢𑒲𑒏 𑒑𑒰𑒧𑒧𑒹? 𑒯𑒧𑒩𑒰 𑒞𑒿 𑒠𑒮 𑒏𑒙𑓂𑒚𑒰 𑒖𑒧𑒲𑒢𑒼 𑒢𑒻 𑒣𑒳𑒩𑒞... 𑒩𑒾 𑒠𑒻𑒥... 𑒏𑒯𑒻 𑒕𑒪𑒱𑒌 𑒖𑒹 𑒯𑒧 𑒢𑒻 𑒖𑒰𑒋𑒥 𑒠𑒱𑒪𑓂𑒪𑒲...... 𑒮𑓀𑒞𑒰𑒣 𑒠𑒹𑒐𑒻𑒪𑒹 𑒏𑒲 𑒖𑒰𑒋𑒥? 𑒧𑒳𑒠𑒰 𑒏𑒯𑒪𑒏𑒻 𑒖𑒹 𑒪𑒰𑒬𑒹 𑒢𑒻 𑒠𑒹𑒞। 𑒂 𑒂𑒥 𑒂𑒥𑒱 𑒑𑒹𑒪 𑒕𑒲 𑒞𑒿 𑒯𑒧𑒯𑒲𑓀 𑒠𑒹𑒥𑒻 𑒂𑒑𑒱।
-𑒢𑒻, 𑒮𑒹 𑒢𑒻 𑒯𑒋𑒞, 𑒥𑒰𑒣 𑒏𑒞𑒾 𑒂𑒑𑒱 𑒠𑒹𑒪𑒏𑒻𑒯𑒹𑒿... 𑒁𑒯𑒰𑒿𑒏𑒹𑒿 𑒁𑒬𑓂𑒧𑒮𑒰𑒢𑒒𑒰𑒙𑒼 𑒢𑒻 𑒖𑒹𑒥𑒰𑒏 𑒁𑒕𑒱। 𑒮𑒦 𑒣𑒳𑒩𑒢𑒰 𑒑𑒣 𑒥𑒱𑒮𑒩𑒱 𑒖𑒰𑒅... 𑒍𑒏𑒩 𑒣𑒱𑒞𑒱𑒨𑒾𑒞𑒏𑒹𑒿 𑒠𑒹𑒥𑒋 𑒠𑒱𑒨𑒾 𑒂𑒑𑒱... 𑒌 𑒣𑒩𑒱𑒮𑓂𑒟𑒱𑒞𑒱𑒧𑒹 𑒣𑒳𑒩𑒰𑒢 𑒑𑒣 𑒥𑒱𑒮𑒩𑒱 𑒖𑒰𑒅।
-𑒢𑒻, 𑒮𑒹 𑒦𑒰𑒞𑒱𑒖𑒏 𑒣𑓂𑒩𑒞𑒱 𑒯𑒧𑒩𑒰 𑒏𑒼𑒢𑒼 𑒞𑒹𑒯𑒢 𑒂𑒢 𑒦𑒰𑒫𑒢𑒰 𑒢𑒻 𑒁𑒕𑒱। 𑒚𑒲𑒏 𑒕𑒻... 𑒮𑒳𑒧𑒢𑒖𑒲 𑒠𑒾 𑒂𑒑𑒱।
𑓖
𑒋𑒏𑓂𑒏𑒻𑒮𑒧 𑒬𑒞𑒰𑒥𑓂𑒠𑒲𑒏 𑒣𑒯𑒱𑒪 𑒠𑒬𑒏𑒏 𑒁𑒢𑓂𑒞𑒱𑒧 𑒩𑒰𑒞𑒱𑒏 𑒒𑒙𑒢𑒰, 𑒂 𑒍𑒏𑒩 𑒥𑒰𑒠𑒏 𑒦𑒼𑒩। 𑒧𑒳𑒠𑒰 𑒢𑒻 𑒕𑒻 𑒏𑒼𑒢𑒼 𑒁𑒢𑓂𑒞𑒩। 𑒣𑒯𑒱𑒩𑒰𑒥𑒰 𑒂 𑒣𑒳𑒩𑒳𑒐𑒣𑒰𑒞𑒏𑒹𑒿 𑒕𑒼𑒛𑓃𑒱 𑒠𑒱𑒨𑒾। 𑒧𑒯𑒱𑒪𑒰 𑒞𑒿 𑒫𑒋𑒯…।
𑒌 𑒏𑒢𑒏𑒢𑒰𑒃𑒞 𑒥𑒮𑒰𑒞𑒮𑒿 𑒥𑒹𑒬𑒲 𑒧𑒰𑒩𑒳𑒐। 𑒯𑒰𑒛𑓃𑒧𑒹 𑒜𑒳𑒏𑒪 𑒖𑒰𑒃𑒞 𑒁𑒕𑒱। 𑒏𑒧𑒪𑒰 𑒏𑒰𑒞 𑒢𑒻 𑒨𑒧𑒳𑒢𑒰𑒏 𑒏𑒰𑒞। 𑒯𑒖𑒰𑒩 𑒧𑒰𑒃𑒪 𑒠𑒴𑒩 𑒑𑒰𑒧𑒮𑒿 𑒂𑒥𑒱। 𑒧𑒱𑒖𑓂𑒗𑒩 𑒯𑒼𑒃𑒞 𑒁𑒕𑒱 𑒐𑒩𑒛𑓃𑒐𑒫𑒰𑒪𑒲 𑒏𑒰𑒏𑒲𑒏 𑒬𑓂𑒫𑒹𑒞 𑒫𑒮𑓂𑒞𑓂𑒩। 𑒮𑒰𑒃𑒚 𑒮𑒰𑒪 𑒣𑒴𑒩𑓂𑒫𑒏 𑒫𑒋𑒯 𑒐𑒱𑒮𑓂𑒮𑒰, 𑒫𑒋𑒯 𑒮𑒧𑒰𑒖, 𑒧𑒰𑒞𑓂𑒩 𑒣𑒯𑒱𑒩𑒰𑒥𑒰 𑒥𑒠𑒪𑒱 𑒑𑒹𑒪, 𑒧𑒰𑒞𑓂𑒩 𑒡𑒰𑒩 𑒥𑒠𑒪𑒱 𑒑𑒹𑒪।
𑒑𑒼𑒣𑒲𑒔𑒰𑒢𑒢, 𑒑𑓀𑒑𑒾𑒙, 𑒧𑒰𑒪𑒰, 𑒅𑒖𑓂𑒖𑒩 𑒢𑒫 𑒫𑒮𑓂𑒞𑓂𑒩, 𑒧𑒳𑒿𑒯𑒧𑒹 𑒞𑒳𑒪𑒮𑒲𑒠𑒪, 𑒮𑒳𑒫𑒩𑓂𑒝 𑒐𑒝𑓂𑒛, 𑒑𑓀𑒑𑒰𑒖𑒪, 𑒏𑒳𑒬 𑒣𑒮𑒰𑒩𑒪 𑒦𑒴𑒧𑒱, 𑒞𑒳𑒪𑒮𑒲 𑒑𑒰𑒕 𑒪𑒑 𑒅𑒞𑓂𑒞𑒩 𑒧𑒳𑒿𑒯𑒹 𑒣𑒼𑒮𑓂𑒙𑒧𑒰𑒩𑓂𑒙𑒧 𑒏𑒋𑒪 𑒬𑒩𑒲𑒩 𑒂𑒢𑒪 𑒖𑒰𑒃𑒋। 𑒤𑒹𑒩 𑒍𑒞𑓄𑒮𑒿 𑒨𑒧𑒳𑒢𑒰 𑒏𑒰𑒞…
𑒏𑒢𑒏𑒢𑒲 𑒕𑒻 𑒥𑒮𑒰𑒞𑒧𑒹, 𑒯𑒰𑒛𑓃𑒧𑒹 𑒜𑒳𑒏𑒱 𑒖𑒰𑒋𑒞 𑒄 𑒏𑒢𑒏𑒢𑒲, 𑒣𑒼𑒮𑓂𑒙𑒧𑒰𑒩𑓂𑒙𑒧 𑒏𑒋𑒪 𑒬𑒩𑒲𑒩 𑒖𑒹 𑒩𑒰𑒐𑒪 𑒁𑒕𑒱, 𑒮𑒰𑒞𑒙𑒰 𑒧𑒼𑒙𑒏𑒰 𑒬𑒱𑒪𑓂𑒪𑒣𑒩, 𑒏𑒧𑒪𑒰 𑒏𑒰𑒞 𑒢𑒻 𑒨𑒧𑒳𑒢𑒰𑒏 𑒏𑒰𑒞, 𑒖𑒛𑓃𑒞 𑒏𑒢𑒲𑒏𑒰𑒪𑒧𑒹।
𑒮𑒳𑒧𑒢𑒖𑒲 𑒮𑒹𑒯𑒼 𑒢𑒫 𑒅𑒖𑓂𑒖𑒩 𑒫𑒮𑓂𑒞𑓂𑒩 𑒣𑒯𑒲𑒩𑒱, 𑒖𑒢𑒾, 𑒅𑒞𑓂𑒞𑒩𑒲 𑒣𑒯𑒲𑒩𑒱, 𑒢𑒫 𑒧𑒰𑒙𑒱𑒏 𑒥𑒩𑓂𑒞𑒢𑒏 𑒖𑒪𑒮𑒿, 𑒞𑒹𑒏𑒳𑒬𑒰𑒮𑒿 𑒣𑒴𑒥 𑒧𑒳𑒿𑒯𑒹 𑒧𑓀𑒞𑓂𑒩 𑒣𑒜𑓃𑒻 𑒕𑒟𑒱 𑒂 𑒍𑒃 𑒖𑒪𑒮𑒿 𑒧𑒵𑒞𑒏𑒏𑒹𑒿 𑒬𑒱𑒏𑓂𑒞 𑒏𑒩𑒻 𑒕𑒟𑒱, 𑒫𑒰𑒧𑒰 𑒯𑒰𑒟𑒧𑒹 𑒆𑒏 𑒪𑓄 𑒑𑒼𑒃𑒚𑒰𑒏 𑒂𑒑𑒱𑒮𑒿 𑒡𑒡𑒏𑒥𑒻𑒞 𑒕𑒟𑒱, 𑒞𑒲𑒢 𑒥𑒹𑒩 𑒧𑒵𑒞𑒏𑒏 𑒣𑓂𑒩𑒠𑒲𑒏𑓂𑒭𑒝𑒰 𑒏𑓄 𑒧𑒳𑒿𑒯𑒧𑒹 𑒂𑒑𑒱 𑒁𑒩𑓂𑒣𑒱𑒞 𑒯𑒼𑒃𑒞 𑒁𑒕𑒱। 𑒪𑒏𑒛𑓃𑒲 𑒏𑒼𑒢𑒰 𑒩𑒰𑒐𑒪 𑒖𑒰𑒋 𑒞𑒃𑒣𑒩 𑒠𑒴 𑒑𑒼𑒙𑒹𑒧𑒹 𑒥𑒯𑒮𑒰-𑒥𑒯𑒮𑒲 𑒦𑓄 𑒩𑒯𑒪 𑒁𑒕𑒱। 𑒪𑒑𑒻𑒋 𑒗𑒑𑒛𑓃𑒰 𑒦𑓄 𑒖𑒹𑒞𑒻। 𑒣𑒯𑒱𑒪 𑒑𑒼𑒙𑒹 𑒏𑒯𑒱 𑒩𑒯𑒪 𑒕𑒟𑒱- 𑒋𑒢𑒰 𑒪𑒏𑒛𑓃𑒲 𑒢𑒻 𑒞𑒼𑒣𑒪 𑒖𑒰𑒃 𑒕𑒻, 𑒏𑒞𑒥𑒼 𑒒𑒲 𑒏𑒩𑓂𑒣𑒴𑒩 𑒠𑒹𑒥𑒻 𑒂𑒑𑒱 𑒢𑒻 𑒡𑒩𑒞। 𑒧𑒳𑒠𑒰 𑒏𑒱𑒕𑒳 𑒏𑒰𑒪 𑒂𑒩। 𑒮𑒰𑒞𑒙𑒰 𑒬𑒱𑒪𑓂𑒪𑒣𑒩 𑒩𑒰𑒐𑒪 𑒍 𑒬𑒩𑒲𑒩, 𑒁𑒑𑓂𑒢𑒱 𑒪𑒲𑒪𑒱 𑒩𑒯𑒪 𑒮𑒳𑒛𑓂𑒛𑒰𑒯 𑒏𑓄 𑒩𑒯𑒪। 𑒋𑒏𑒙𑒰 𑒣𑒩𑒱𑒫𑒰𑒩 𑒤𑒹𑒩𑒮𑒿 𑒥𑒢𑒞 𑒂 𑒞𑒲𑒮 𑒥𑒩𑓂𑒐𑒏 𑒥𑒰𑒠 𑒠𑒹𑒐𑒥 𑒍𑒏𑒩 𑒣𑒩𑒱𑒝𑒰𑒧। 𑒞𑒰𑒡𑒩𑒱 𑒯𑒰𑒛𑓃𑒧𑒹 𑒜𑒳𑒏𑒪 𑒩𑒯𑒞 𑒄 𑒮𑒩𑓂𑒠 𑒏𑒢𑒏𑒢𑒲, 𑒌 𑒥𑒮𑒰𑒞𑒏 𑒏𑒢𑒏𑒢𑒲𑒮𑒿 𑒥𑒛𑓂𑒛 𑒥𑒹𑒬𑒲 𑒮𑒩𑓂𑒠। 𑒮𑒦 𑒠𑒱𑒪𑓂𑒪𑒲𑒨𑒹𑒧𑒹 𑒩𑒯𑒞𑒰, 𑒠𑒱𑒪𑓂𑒪𑒲𑒮𑒿 𑒪𑒛𑓃𑒥𑒰 𑒪𑒹𑒪, 𑒃𑒝𑓂𑒛𑒱𑒨𑒰𑒏𑒹𑒿 𑒧𑒯𑒰𑒬𑒏𑓂𑒞𑒱 𑒥𑒢𑒹𑒥𑒰 𑒪𑒹𑒪, 𑒁𑒣𑒢 𑒣𑓂𑒩𑒑𑒞𑒱𑒏 𑒂𑒬𑒰𑒧𑒹, 𑒁𑒑𑒱𑒪𑒰 𑒐𑒰𑒜𑓃𑒲 𑒪𑒹𑒪 𑒋𑒞𑒹𑒏 𑒞𑒿 𑒥𑒪𑒱𑒠𑒰𑒢 𑒠𑒹𑒥𑒻𑒋 𑒣𑒛𑓃𑒞, 𑒄 𑒮𑒼𑒔𑒻𑒞।
𑒏𑒣𑒰𑒮, 𑒏𑒰𑒚, 𑒒𑒵𑒞, 𑒡𑒴𑒧𑒢, 𑒏𑒩𑓂𑒣𑒴𑒩, 𑒔𑒰𑒢𑒢 𑒏𑒣𑒼𑒞𑒫𑒹𑒬 𑒧𑒵𑒞𑒏। 𑒣𑒰𑒿𑒔-𑒣𑒰𑒿𑒔𑒙𑒰 𑒪𑒏𑒛𑓃𑒲 𑒮𑒦 𑒠𑒻𑒞 𑒕𑒟𑒱।
𑒏𑒣𑒼𑒞𑒏 𑒠𑒑𑓂𑒡 𑒬𑒩𑒲𑒩𑒰𑒫𑒬𑒹𑒭 𑒮𑒢 𑒧𑒰𑓀𑒮𑒣𑒱𑒝𑓂𑒛 𑒦𑓄 𑒑𑒹𑒪𑒰𑒣𑒩, 𑒮𑒞𑒏𑒚𑒱𑒨𑒰 𑒪𑓄 𑒮𑒰𑒞𑒥𑒹𑒩 𑒣𑓂𑒩𑒠𑒏𑓂𑒭𑒱𑒝𑒰 𑒏𑓄, 𑒏𑒳𑒩𑒯𑒩𑒱𑒮𑒿 𑒍𑒯𑒱 𑒆𑒏𑒏 𑒮𑒰𑒞 𑒕𑒾 𑒮𑒿 𑒐𑒝𑓂𑒛 𑒏𑓄, 𑒮𑒰𑒞𑒼 𑒥𑒢𑓂𑒡𑒢𑒏𑒹𑒿 𑒏𑒰𑒙𑒱 𑒮𑒰𑒞𑒼 𑒮𑒞𑒏𑒚𑒱𑒨𑒰 𑒂𑒑𑒱𑒧𑒹 𑒤𑒹𑒏𑒱 𑒥𑒰𑒪-𑒫𑒵𑒠𑓂𑒡𑒏𑒹𑒿 𑒂𑒑𑒰𑒿 𑒏𑓄 𑒋𑒛𑓃𑒲-𑒠𑒾𑒛𑓃𑒲 𑒥𑒔𑒥𑒻𑒞 𑒢𑒯𑒰𑒃𑒪𑒹 𑒖𑒰𑒃 𑒕𑒟𑒱, 𑒞𑒱𑒪𑒰𑒘𑓂𑒖𑒪𑒱 𑒧𑒼𑒛𑓃𑒰-𑒞𑒱𑒪-𑒖𑒪𑒮𑒿, 𑒥𑒱𑒢𑒳 𑒠𑒹𑒯 𑒣𑒼𑒕𑒢𑒹, 𑒧𑒵𑒞𑒏𑒏 𑒂𑓀𑒑𑒢𑒧𑒹 𑒠𑓂𑒫𑒰𑒩𑒣𑒩 𑒏𑓂𑒩𑒧𑒮𑒿 𑒪𑒼𑒯, 𑒣𑒰𑒟𑒩, 𑒂𑒑𑒱 𑒂 𑒣𑒰𑒢𑒱 𑒮𑓂𑒣𑒩𑓂𑒬 𑒏𑓄 𑒮𑒦 𑒒𑒩 𑒒𑒳𑒩𑒱 𑒖𑒰𑒃 𑒕𑒟𑒱।






















𑒧𑒳𑒞𑒰𑒪𑒱𑒤
𑓑
𑒧𑒳𑒞𑒰𑒪𑒱𑒤𑒏 𑒣𑒻𑒒-𑒣𑒻𑒒 𑒂𑒿𑒐𑒱...
𑒖𑒹𑒪 𑒖𑒰𑒃𑒞 𑒏𑒼𑒩𑓂𑒙𑒏 𑒯𑒰𑒖𑒞𑒧𑒹, 𑒠𑒾𑒑𑒱 𑒏𑓄 𑒖𑒰 𑒩𑒯𑒪 𑒕𑒪। 𑒍𑒞𑒋 𑒮𑒱𑒣𑒰𑒯𑒲𑒏𑒹𑒿 𑒐𑒹𑒢𑒰𑒃𑒏 𑒣𑒻𑒏𑒹𑒙 𑒠𑒹𑒪𑒱𑒌𑒏, 𑒄 𑒂𑒫𑒬𑓂𑒨𑒏 𑒕𑒪, 𑒑𑒱𑒩𑒤𑓂𑒞𑒰𑒩𑒲𑒏 𑒩𑒰𑒞𑒱𑒏 𑒦𑒼𑒖𑒢 𑒑𑒱𑒩𑒤𑓂𑒞𑒰𑒩 𑒏𑒩𑒻𑒥𑒪𑒰 𑒂𑒤𑒱𑒮𑒩 𑒠𑒻 𑒕𑒻, 𑒖𑒹𑒪𑒩 𑒁𑒑𑒱𑒪𑒰 𑒠𑒱𑒢𑒮𑒿 𑒦𑒼𑒖𑒢 𑒠𑒹𑒞𑒻𑒏।
..𑒧𑒳𑒠𑒰 𑒞𑒐𑒢 𑒍𑒯𑒱𑒢𑒰 𑒠𑒹𑒢𑒹 𑒩𑒯𑒱𑒌𑒏, 𑒤𑒹𑒩 𑒋𑒏𑒙𑒰 𑒏𑒩𑓂𑒧𑒔𑒰𑒩𑒲 𑒏𑒻𑒠𑒲𑒏 𑒛𑒰𑒃𑒙 𑒮𑒹𑒯𑒼 𑒣𑒻𑒏 𑒏𑒩𑒥𑒰 𑒏𑓄 𑒪𑓄 𑒁𑒢𑒪𑒏। 𑒣𑒳𑒪𑒱𑒮 𑒐𑒹𑒢𑒰𑒃𑒏 𑒣𑒻𑒏𑒹𑒙 𑒧𑒳𑒞𑒰𑒪𑒱𑒤𑒏𑒹𑒿 𑒠𑒹𑒪𑒏𑒻।
𑒔𑒾𑓀𑒏𑒪 𑒍..
𑒌 𑒢𑒑𑓂𑒩𑒧𑒹 𑒏𑓂𑒨𑒼 𑒍𑒏𑒩 𑒢𑒻.. 𑒦𑒰𑒭𑒰 𑒮𑒹𑒯𑒼 𑒢𑒻 𑒍 𑒥𑒳𑒗𑒻𑒋 𑒏𑒏𑒩𑒼; 𑒂 𑒢𑒯𑒱𑒨𑒹 𑒍𑒏𑒩 𑒦𑒰𑒭𑒰 𑒏𑒱𑒨𑒼 𑒂𑒢 𑒥𑒳𑒗𑒻 𑒕𑒻। 𑒞𑒧𑒱𑒪 𑒁𑒕𑒱। 𑒠𑒱𑒪𑓂𑒪𑒲𑒏 𑒞𑒱𑒯𑒰𑒩 𑒖𑒹𑒪𑒧𑒹 𑒩𑒰𑒐𑒪 𑒖𑒹𑒞𑒻 𑒍𑒏𑒩𑒰, 𑒍𑒞𑒋 𑒞𑒧𑒱𑒪𑒢𑒰𑒛𑒳 𑒣𑒳𑒪𑒱𑒮𑒏 𑒋𑒏𑒙𑒰 𑒙𑒳𑒏𑒛𑓃𑒲 𑒕𑒻, 𑒔𑒰𑒩𑓂𑒪𑓂𑒮 𑒬𑒼𑒦𑒩𑒰𑒖𑒏 𑒖𑒹𑒪𑒮𑒿 𑒦𑒑𑒪𑒰𑒣𑒩 𑒌 𑒙𑒳𑒏𑒛𑓃𑒲𑒏𑒹𑒿 𑒥𑒖𑒰𑒍𑒪 𑒑𑒹𑒪 𑒕𑒪𑒻, 𑒌 𑒠𑒳𑒂𑒩𑒹 𑒖𑒹 𑒍 𑒮𑒦 𑒮𑓂𑒟𑒰𑒢𑒲𑒨 𑒦𑒰𑒭𑒰 𑒢𑒻 𑒥𑒳𑒗𑒻 𑒕𑒪𑒻 𑒮𑒹 𑒏𑒼𑒢𑒼 𑒁𑒣𑒩𑒰𑒡𑒲𑒮𑒿 𑒧𑒹𑒪-𑒣𑒹𑒿𑒔 𑒢𑒻 𑒏𑓄 𑒮𑒏𑒞𑒻। 𑒧𑒳𑒠𑒰 𑒤𑒹𑒩 𑒄 𑒯𑒰𑒪 𑒦𑒹𑒪𑒻 𑒖𑒹 𑒠𑒴 𑒧𑒰𑒮𑒧𑒹 𑒍 𑒮𑒦 𑒮𑒦 𑒑𑒼𑒙𑒹 𑒮𑓂𑒟𑒰𑒢𑒲𑒨 𑒦𑒰𑒭𑒰 𑒮𑒲𑒐 𑒖𑒰𑒃 𑒑𑒹𑒪𑒻।
𑒞𑒱𑒯𑒰𑒩𑒧𑒹 𑒧𑒳𑒞𑒰𑒪𑒱𑒤 𑒏𑒱𑒕𑒳 𑒥𑒰𑒖𑒱 𑒮𑒏𑒞, 𑒍𑒏𑒩𑒰 𑒮𑒦𑒏 𑒮𑓀𑒑। 𑒁𑒣𑒢𑒰 𑒪𑒹𑒪 𑒫𑒏𑒲𑒪 𑒩𑒐𑒥𑒰𑒏 𑒪𑒹𑒪 𑒥𑓂𑒨𑒼𑓀𑒞 𑒡𑒩𑒰 𑒮𑒏𑒞।
𑒔𑒾𑓀𑒏𑒪 𑒍.. 𑒍 𑒣𑒪𑒙𑒱 𑒏𑒹𑒿 𑒯𑒧𑒩𑒰 𑒠𑒱𑒮 𑒞𑒏𑒪𑒏 𑒖𑒹𑒢𑒰 𑒣𑒳𑒕𑒱 𑒩𑒯𑒪 𑒯𑒳𑒁𑒋 𑒖𑒹 𑒁𑒯𑒰𑒿 𑒠𑒹𑒢𑒹 𑒕𑒲 𑒄? 𑒯𑒧 𑒃𑒬𑒰𑒩𑒰𑒧𑒹 𑒏𑒯𑒪𑒱𑒌, 𑒯𑒰𑒟𑒮𑒿 𑒃𑒬𑒰𑒩𑒰𑒧𑒹.. 𑒩𑒰𑒐𑒱 𑒪𑒱𑒁.. 𑒠𑒳𑒢𑒴 𑒯𑒰𑒟 𑒖𑒼𑒛𑓃𑒱 𑒏𑓄 𑒍 𑒯𑒧𑒩𑒰 𑒣𑓂𑒩𑒝𑒰𑒧 𑒏𑒋𑒪𑒏।
𑒧𑒳𑒐𑓂𑒨 𑒁𑒣𑒩𑒰𑒡𑒲 𑒞𑒿 𑒕𑒻 𑒯𑒥𑒲𑒥𑒳𑒪𑓂𑒪𑒰𑒯..
𑒯𑒰𑒖𑒞𑒧𑒹 𑒋𑒏𑒙𑒰 𑒫𑒏𑒲𑒪 𑒠𑒾𑒑𑒪 𑒂𑒋𑒪। 𑒍 𑒯𑒧𑒩𑒰𑒮𑒿 𑒣𑒳𑒕𑒪𑒏 𑒖𑒹 𑒄 𑒏𑒼𑒢𑒼 𑒫𑒏𑒲𑒪 𑒏𑒹𑒢𑒹 𑒁𑒕𑒱 𑒥𑒰 𑒢𑒻। 𑒯𑒧 𑒏𑒯𑒪𑒱𑒌- 𑒢𑒻। 𑒍𑒏𑒩𑒰 𑒯𑒧 𑒁𑒢𑒳𑒩𑒼𑒡 𑒏𑒹𑒪𑒱𑒌 𑒖𑒹 𑒧𑒳𑒐𑓂𑒨 𑒁𑒣𑒩𑒰𑒡𑒲 𑒄 𑒢𑒻 𑒁𑒕𑒱, 𑒏𑒼𑒢𑒼 𑒞𑒧𑒱𑒪 𑒫𑒏𑒲𑒪𑒏𑒹𑒿 𑒣𑒏𑒛𑓃𑒴 𑒂 𑒍𑒏𑒩𑒰 𑒏𑒯𑒱𑒨𑒾 𑒖𑒹 𑒁𑒑𑒱𑒪𑒰 𑒖𑒧𑒰𑒢𑒞𑒏 𑒮𑒳𑒢𑒥𑒰𑒃𑒧𑒹 𑒋𑒏𑒩 𑒖𑒧𑒰𑒢𑒞 𑒏𑒩𑒥𑒹𑒞𑒻। 𑒍 𑒫𑒏𑒲𑒪 𑒞𑒧𑒱𑒪𑒹 𑒕𑒪, 𑒌 𑒞𑒩𑒯𑒏 𑒥𑒯𑒳𑒞 𑒧𑒳𑒏𑒠𑒧𑒰 𑒪𑒛𑓃𑒪 𑒁𑒕𑒱। 𑒐𑒰𑒮 𑒏𑓄 𑒍𑒃 𑒞𑒧𑒱𑒪 𑒮𑒦𑒏, 𑒖𑒹 𑒠𑒱𑒪𑓂𑒪𑒲𑒧𑒹 𑒤𑒿𑒮𑒱 𑒖𑒰𑒃 𑒕𑒟𑒱, 𑒖𑒱𑒢𑒏𑒰 𑒦𑒰𑒭𑒰𑒏 𑒮𑓀𑒏𑒙 𑒯𑒼𑒃 𑒕𑒢𑓂𑒯𑒱। 𑒍 𑒍𑒏𑒲𑒪 𑒯𑒧𑒩 𑒂𑒤𑒱𑒮-𑒒𑒩 𑒮𑒦 𑒚𑒰𑒧 𑒒𑒳𑒧𑒻𑒞 𑒩𑒯𑒻𑒞 𑒁𑒕𑒱। 𑒋𑒏𑒥𑒹𑒩 𑒋𑒏𑒙𑒰 𑒏𑒟𑒰𑒏 𑒣𑓂𑒪𑒰𑒙 𑒮𑒹𑒯𑒼 𑒍𑒏𑒩𑒰 𑒮𑒳𑒢𑒹𑒢𑒹 𑒩𑒯𑒲, 𑒏𑒱𑒕𑒳 𑒮𑒪𑒰𑒯 𑒮𑒹𑒯𑒼 𑒠𑒹𑒢𑒹 𑒩𑒯𑒋 𑒍𑒏𑒲𑒪।
𑓒

𑒏𑒞𑓄 𑒤𑒿𑒮𑒱 𑒑𑒹𑒪 𑒕𑒲।
𑒄 𑒁𑒣𑒩𑒰𑒡𑒲 𑒁𑒕𑒱𑒨𑒹 𑒢𑒻, 𑒏𑒼𑒢𑒼 𑒧𑒰𑒠𑒏 𑒣𑒠𑒰𑒩𑓂𑒟𑒏 𑒧𑒰𑒤𑒱𑒨𑒰 𑒤𑒿𑒮𑒰 𑒪𑒹𑒢𑒹 𑒕𑒪𑒻 𑒋𑒏𑒩𑒰।
𑒯𑒧𑒩 𑒮𑒯𑒨𑒼𑒑𑒲 𑒧𑒳𑒞𑒳𑒪𑒏𑓂𑒭𑓂𑒧𑒲 𑒧𑒻𑒛𑒧 𑒧𑒳𑒞𑒰𑒪𑒱𑒤𑒮𑒿 𑒮𑒴𑒔𑒢𑒰 𑒪𑒻 𑒕𑒟𑒱 𑒂 𑒯𑒧𑒩𑒰 𑒁𑒢𑒴𑒠𑒱𑒞 𑒏𑓄 𑒮𑒳𑒢𑒥𑒻 𑒕𑒟𑒱।
𑒯𑒥𑒲𑒥𑒳𑒪𑓂𑒪𑒰। 𑒮𑒴𑒔𑒢𑒰𑒏 𑒂𑒡𑒰𑒩𑒣𑒩 𑒍𑒏𑒩𑒰 𑒒𑒩𑒧𑒹 𑒔𑒹𑒢𑓂𑒢𑒻𑒧𑒹 𑒕𑒰𑒣𑒰 𑒣𑒛𑓃𑒪𑒻, 𑒏𑒱𑒕𑒳 𑒢𑒻 𑒦𑒹𑒙𑒪𑒻। 𑒥𑒩𑒰𑒧𑒠𑒲 𑒞𑒿 𑒧𑒳𑒞𑒰𑒪𑒱𑒤𑒮𑒿 𑒦𑒹𑒪𑒻। 𑒧𑒳𑒠𑒰 𑒄 𑒞𑒿 𑒬𑒞𑒩𑓀𑒖𑒏 𑒑𑒼𑒙𑒲 𑒁𑒕𑒱, 𑒣𑒰𑒿𑒫-𑒣𑒻𑒠𑒪 𑒮𑒱𑒣𑒰𑒯𑒲।
𑒣𑒰𑒿𑒫-𑒣𑒻𑒠𑒪।
𑒯𑒧𑒩𑒰 𑒑𑒰𑒧𑒏 𑒪𑒳𑒪𑓂𑒯𑒰 𑒣𑒰𑒿𑒫-𑒣𑒻𑒠𑒪 𑒮𑒦 𑒮𑒰𑒪 𑒥𑒰𑒥𑒰𑒡𑒰𑒧 𑒖𑒰𑒃𑒋। 𑒯𑒧𑒩𑒹 𑒑𑒰𑒧𑒏 𑒣𑒲𑒁𑒩 𑒥𑒔𑓂𑒔𑒰 𑒯𑒫𑒰𑒑𑒰𑒛𑓃𑒲𑒮𑒿 𑒮𑒦 𑒮𑒰𑒪 𑒥𑒰𑒥𑒰𑒡𑒰𑒧 𑒖𑒰𑒃 𑒕𑒟𑒱।
𑒠𑒳𑒢𑒴 𑒑𑒼𑒙𑒹 𑒥𑒲𑒮𑒼 𑒮𑒰𑒪𑒮𑒿 𑒪𑒑𑒰𑒞𑒰𑒩 𑒥𑒰𑒥𑒰𑒡𑒰𑒧 𑒖𑒰 𑒩𑒯𑒪 𑒕𑒟𑒱। 𑒪𑒳𑒪𑓂𑒯𑒰 𑒥𑒲𑒮𑒮𑒰𑒪𑒮𑒿 𑒧𑒯𑒲𑒮𑒹 𑒔𑒩𑒰 𑒩𑒯𑒪 𑒁𑒕𑒱 𑒂 𑒣𑒲𑒁𑒩 𑒥𑒔𑓂𑒔𑒰𑒏 𑒒𑒩𑒰𑒩𑒲𑒣𑒩 𑒌 𑒥𑒲𑒮 𑒮𑒰𑒪𑒧𑒹 𑒏𑒼𑒚𑒰-𑒏𑒼𑒚𑒰𑒧𑒹 𑒦𑒹𑒪𑒹 𑒖𑒰 𑒩𑒯𑒪 𑒕𑒢𑓂𑒯𑒱।
𑒧𑒳𑒠𑒰 𑒕𑒼𑒙𑒹 𑒦𑒰𑒃𑒏 𑒏𑒯𑒢𑒰𑒧 𑒕𑒢𑓂𑒯𑒱 𑒖𑒹 𑒥𑒰𑒥𑒴 𑒁𑒮𑒪 𑒤𑒪 𑒞𑒿 𑒣𑒰𑒿𑒫-𑒣𑒻𑒠𑒪 𑒑𑒹𑒪𑒹𑒮𑒿 𑒯𑒼𑒃 𑒕𑒻।
𑒣𑓂𑒩𑒫𑒲𑒝 𑒦𑒰𑒃 𑒙𑒲𑒣 𑒠𑒻 𑒕𑒟𑒱, 𑒯𑒿 𑒞𑒻𑒿 𑒢𑒹 𑒪𑒳𑒪𑓂𑒯𑒰 𑒥𑒲𑒮 𑒮𑒰𑒪𑒮𑒿 𑒧𑒯𑒲𑒮𑒹 𑒔𑒩𑒰 𑒩𑒯𑒪 𑒁𑒕𑒱।
𑒂𑒥 𑒕𑒼𑒙𑒹 𑒦𑒰𑒃𑒏𑒹𑒿 𑒢𑒻 𑒩𑒯𑒪 𑒯𑒼𑒃 𑒕𑒢𑓂𑒯𑒱। 𑒣𑒩𑒳𑒏𑒹𑒿 𑒮𑒰𑒪 𑒞𑒿 𑒍 𑒑𑒹𑒪 𑒩𑒯𑒟𑒱 𑒥𑒰𑒥𑒰 𑒡𑒰𑒧। 𑒣𑓂𑒩𑒤𑒳𑒪𑓂𑒪 𑒦𑒰𑒃 𑒑𑒰𑒧𑒏 𑒥𑒼𑒪𑒥𑒧 𑒣𑒰𑒩𑓂𑒙𑒲𑒏 𑒖𑒧𑒰𑒠𑒰𑒩 𑒕𑒟𑒱। 𑒮𑒦 𑒮𑒰𑒪 𑒣𑒰𑒿𑒫-𑒣𑒻𑒠𑒪 𑒖𑒰𑒃 𑒕𑒟𑒱। 𑒯𑒳𑒢𑒏𑒩 𑒥𑒰𑒥𑒴 𑒮𑒹𑒯𑒼 𑒖𑒧𑒰𑒠𑒰𑒩 𑒕𑒪𑒐𑒱𑒢𑓂𑒯। 𑒦𑒼𑒪𑒰 𑒦𑒰𑒃 𑒛𑒰𑒏𑒥𑒧 𑒕𑒟𑒱, 𑒞𑒲𑒢 𑒠𑒱𑒢𑒧𑒹 𑒮𑒳𑒪𑓂𑒞𑒰𑒢𑒣𑒳𑒩𑒮𑒿 𑒣𑒰𑒢𑒱 𑒦𑒩𑒱 𑒦𑒼𑒪𑒰𑒥𑒰𑒥𑒰𑒏𑒹𑒿 𑒔𑒜𑓃𑒰 𑒠𑒻 𑒕𑒟𑒱। 𑒣𑓂𑒩𑒤𑒳𑒪𑓂𑒪 𑒦𑒰𑒃 𑒮𑒦𑒏𑒹𑒿 𑒮𑓀𑒑 𑒪𑓄 𑒔𑒪𑒻 𑒕𑒟𑒱, 𑒖𑒹 𑒢𑒱𑒁𑒧 𑒦𑓀𑒑 𑒏𑒩𑒻𑒋 𑒞𑒏𑒩𑒰 𑒠𑒝𑓂𑒛 𑒪𑒑𑒥𑒻 𑒕𑒟𑒱। 𑒣𑒲𑒁𑒩 𑒥𑒔𑓂𑒔𑒰 𑒞𑒿 𑒞𑒞𑒹 𑒢𑒻 𑒧𑒼𑒙𑒰𑒋𑒪 𑒕𑒻 𑒖𑒹 𑒍𑒏𑒩𑒰𑒮𑒿 𑒣𑒰𑒿𑒫-𑒣𑒻𑒠𑒪 𑒖𑒰𑒋𑒪 𑒯𑒹𑒞𑒻 𑒯𑒾। 𑒯𑒹, 𑒮𑒹 𑒢𑒻 𑒏𑒯𑒱𑒨𑒾, 𑒞𑒐𑒢 𑒣𑓂𑒩𑒤𑒳𑒪𑓂𑒪 𑒦𑒰𑒃 𑒏𑒲 𑒏𑒼𑒢𑒼 𑒏𑒧 𑒧𑒼𑒙𑒰𑒋𑒪 𑒕𑒟𑒱। 𑒧𑒳𑒠𑒰 𑒥𑒰𑒥𑒴, 𑒪𑒼𑒏 𑒏𑒲 𑒁𑒣𑒢𑒹 𑒔𑒪𑒻𑒋, 𑒍𑒏𑒩𑒰 𑒞𑒿 𑒥𑒰𑒥𑒰 𑒔𑒪𑒥𑒻 𑒕𑒟𑒱𑒢𑓂𑒯।
𑒁𑒯𑒴𑒿 𑒕𑒼𑒙𑒹 𑒦𑒰𑒃 𑒑𑒣𑒏𑒹𑒿 𑒥𑒛𑓂𑒛 𑒢𑒧𑒰𑒩𑒻 𑒕𑒲। 𑒣𑒲𑒁𑒩 𑒥𑒔𑓂𑒔𑒰𑒏 𑒒𑒩𑒰𑒩𑒲𑒣𑒩 𑒌 𑒥𑒲𑒮 𑒮𑒰𑒪𑒧𑒹 𑒏𑒼𑒚𑒰-𑒏𑒼𑒚𑒰𑒧𑒹 𑒦𑒹𑒪𑒹 𑒖𑒰 𑒩𑒯𑒪 𑒕𑒢𑓂𑒯𑒱 𑒂 𑒪𑒳𑒪𑓂𑒯𑒰 𑒥𑒲𑒮 𑒮𑒰𑒪𑒧𑒹 𑒧𑒯𑒲𑒮𑒹 𑒔𑒩𑒰 𑒩𑒯𑒪 𑒁𑒕𑒱 𑒞𑒃𑒣𑒩 𑒁𑒯𑒰𑒿𑒏 𑒏𑒯𑒢𑒰𑒧 𑒕𑒪 𑒖𑒹 𑒁𑒮𑒪 𑒤𑒪 𑒣𑒰𑒿𑒫-𑒣𑒻𑒠𑒪 𑒑𑒹𑒪𑒹𑒮𑒿 𑒯𑒼𑒃 𑒕𑒻। 𑒣𑒲𑒁𑒩 𑒥𑒔𑓂𑒔𑒰 𑒞𑒿 𑒏𑒯𑒱𑒨𑒼 𑒣𑒰𑒿𑒫-𑒣𑒻𑒠𑒪 𑒥𑒰𑒥𑒰𑒡𑒰𑒧 𑒑𑒹𑒪𑒹 𑒢𑒻 𑒕𑒟𑒱, 𑒞𑒐𑒢 𑒏𑒱𑒋 𑒍 𑒏𑒼𑒚𑒰-𑒏𑒼𑒚𑒰𑒧𑒹 𑒏𑒹𑒢𑒹 𑒖𑒰 𑒩𑒯𑒪 𑒕𑒟𑒱 𑒂 𑒪𑒳𑒪𑓂𑒯𑒰 𑒞𑒿 𑒮𑒦 𑒮𑒰𑒪 𑒣𑒰𑒿𑒫-𑒣𑒻𑒠𑒪 𑒖𑒰 𑒩𑒯𑒪 𑒁𑒕𑒱 𑒞𑒐𑒢 𑒏𑒱𑒋 𑒍 𑒧𑒯𑒲𑒮𑒹 𑒔𑒩𑒰 𑒩𑒯𑒪 𑒁𑒕𑒱।
𑒕𑒼𑒙𑒹 𑒦𑒰𑒃 𑒐𑒱𑒮𑓂𑒮𑒰 𑒂𑒑𑒰𑒿 𑒥𑒜𑓃𑒥𑒻 𑒕𑒟𑒱।
𑒨𑒾, 𑒂𑒿𑒐𑒱𑒏 𑒠𑒹𑒐𑒪 𑒏𑒯𑒻 𑒕𑒲। 𑒏𑒼𑒚𑒰 𑒏𑒱𑒨𑒼 𑒥𑒰𑒢𑓂𑒯𑒱 𑒢𑒹 𑒪𑒱𑒌, 𑒥𑒰𑒥𑒴 𑒦𑒼𑒪𑒰 𑒥𑒰𑒥𑒰 𑒧𑒰𑒢𑒻 𑒕𑒟𑒱𑒢𑓂𑒯 𑒪𑒳𑒪𑓂𑒯𑒹𑒏𑒹𑒿।
-𑒮𑒹 𑒏𑒼𑒢𑒰 𑒨𑒾।
𑒂 𑒤𑒹𑒩 𑒫𑒋𑒯 𑒐𑒱𑒮𑓂𑒮𑒰। 𑒪𑒳𑒪𑓂𑒯𑒰 𑒩𑒮𑓂𑒞𑒰𑒧𑒹 𑒣𑒰𑒕𑒰𑒿 𑒕𑒳𑒙𑒱 𑒑𑒹𑒪। 𑒣𑓂𑒩𑒤𑒳𑒪𑓂𑒪 𑒦𑒰𑒃 𑒔𑒱𑒢𑓂𑒞𑒱𑒞 𑒕𑒪𑒟𑒱 𑒖𑒹 𑒁𑒖𑒬 𑒯𑒋𑒞। 𑒮𑒾𑒿𑒮𑒹 𑒡𑒩𑓂𑒧𑒬𑒰𑒪𑒰 𑒞𑒰𑒏𑒱 𑒪𑒹𑒪𑒢𑓂𑒯𑒱। 𑒪𑒳𑒪𑓂𑒯𑒰 𑒏𑒼𑒢𑒰 𑒣𑒯𑒱𑒢𑒯𑒱𑒨𑒹 𑒡𑒩𑓂𑒧𑒬𑒰𑒪𑒰 𑒂𑒥𑒱 𑒖𑒰𑒋𑒞? 𑒍 𑒞𑒿 𑒣𑒕𑒳𑒂 𑒖𑒰𑒃 𑒕𑒪। 𑒏𑒼𑒢𑒰 𑒑𑒰𑒧 𑒒𑒳𑒩𑒪𑒰𑒣𑒩 𑒪𑒼𑒏𑒏𑒹𑒿 𑒧𑒳𑒿𑒯 𑒠𑒹𑒐𑒹𑒥𑒻।
𑒧𑒳𑒠𑒰 𑒦𑒼𑒩𑒧𑒹 𑒠𑒹𑒐𑒻 𑒕𑒟𑒱 𑒖𑒹 𑒪𑒳𑒪𑓂𑒯𑒰 𑒡𑒩𑓂𑒧𑒬𑒰𑒪𑒰𑒏 𑒏𑒼𑒚𑒪𑒲𑒧𑒹 𑒤𑒼𑒿𑒤 𑒏𑒰𑒙𑒱 𑒩𑒯𑒪 𑒁𑒕𑒱।
𑒪𑒳𑒪𑓂𑒯𑒰 𑒐𑒱𑒮𑓂𑒮𑒰 𑒮𑒳𑒢𑒥𑒻 𑒕𑒢𑓂𑒯𑒱, 𑒔𑒰𑒩𑒴 𑒏𑒰𑒞 𑒥𑒼𑒢 𑒩𑒯𑒻। 𑒯𑒧 𑒯𑒥𑒼𑒜𑒹𑒏𑒰𑒩 𑒦𑓄 𑒏𑒰𑒢𑒱 𑒩𑒯𑒪 𑒕𑒪𑒾𑓀। 𑒞𑒐𑒢𑒹 𑒋𑒏𑒙𑒰 𑒠𑒰𑒜𑓃𑒲𑒥𑒪𑒰 𑒥𑒳𑒜𑓃𑒰 𑒂𑒋𑒪 𑒂 𑒔𑒳𑒣 𑒏𑒩𑒹𑒪𑒏। 𑒣𑒴𑒕𑒰-𑒣𑒴𑒕𑒲 𑒏𑒹𑒪𑒏 𑒂 𑒧𑒰𑒟𑒣𑒩 𑒯𑒰𑒟 𑒩𑒐𑒪𑒏। 𑒂 𑒪𑒑𑒻𑒋 𑒢𑒱𑒢𑓂𑒢 𑒂𑒥𑒱 𑒑𑒹𑒪। 𑒢𑒱𑒢𑓂𑒢 𑒐𑒳𑒖𑒻𑒋 𑒞𑒿 𑒠𑒹𑒐𑒻 𑒕𑒲 𑒖𑒹 𑒑𑒾𑓀𑒂 𑒮𑒦𑒏 𑒮𑓀𑒑 𑒡𑒩𑓂𑒧𑒬𑒰𑒪𑒰𑒧𑒹 𑒣𑒛𑓃𑒪 𑒕𑒲।
𑒁𑒯𑒲 𑒣𑒰𑒿𑒫-𑒣𑒻𑒠𑒪𑒏 𑒪𑒼𑒏 𑒮𑒦𑒏 𑒞𑒰𑒏𑒱𑒧𑒹 𑒥𑒼𑒢𑒹-𑒥𑒼𑒢 𑒤𑒱𑒩𑒥𑒰𑒏 𑒛𑓂𑒨𑒴𑒙𑒲 𑒯𑒧𑒩𑒰 𑒦𑒹𑒙𑒪 𑒁𑒕𑒱। 𑒧𑒲𑒚-𑒧𑒲𑒚 𑒥𑒰𑒖𑒴 𑒂 𑒣𑒰𑒿𑒫-𑒣𑒻𑒠𑒪 𑒔𑒪𑒻𑒥𑒪𑒰 𑒪𑒼𑒏 𑒮𑒦𑒏𑒹𑒿, 𑒧𑒳𑒞𑒰𑒪𑒱𑒤𑒏𑒹𑒿, 𑒪𑒳𑒪𑓂𑒯𑒰𑒏𑒹𑒿 𑒁𑒣𑒢 𑒧𑒲𑒚 𑒑𑒣𑒮𑒿 𑒥𑒗𑒰𑒥𑒲। 𑒍𑒏𑒩𑒰 𑒥𑒳𑒗𑒰𑒥𑒲 𑒖𑒹 𑒮𑒩𑒏𑒰𑒩 𑒠𑒹𑒬 𑒢𑒻 𑒕𑒱𑒌। 𑒍 𑒕𑒲 𑒄 𑒠𑒹𑒬। 𑒣𑒰𑒿𑒫-𑒣𑒻𑒠𑒪 𑒥𑒰 𑒬𑒞𑒩𑓀𑒖𑒏 𑒮𑒱𑒣𑒰𑒯𑒲। 𑒩𑒰𑒖𑒰-𑒩𑒰𑒢𑒲 𑒢𑒻 𑒕𑒲 𑒠𑒹𑒬।
𑒯𑒥𑒲𑒥𑒳𑒪𑓂𑒪𑒰 𑒢𑒻 𑒕𑒲 𑒠𑒹𑒬। 𑒠𑒹𑒬 𑒕𑒲 𑒧𑒳𑒞𑒰𑒪𑒱𑒤। 𑒠𑒹𑒬 𑒕𑒲 𑒪𑒳𑒪𑓂𑒯𑒰।
-𑒏𑒞𑓄 𑒮𑒿 𑒂𑒋𑒪 𑒕𑒲? 𑒠𑒱𑒪𑓂𑒪𑒲𑒮𑒿 𑒞𑒿 𑒢𑒻।
-𑒢𑒻, 𑒯𑒧 𑒦𑒰𑒩𑒞𑒏 𑒮𑒱𑒧𑒰𑒢𑒮𑒿 𑒂𑒋𑒪 𑒕𑒲।
-𑒔𑒲𑒢, 𑒞𑒱𑒥𑓂𑒥𑒞, 𑒣𑒰𑒏𑒱𑒮𑓂𑒞𑒰𑒢, 𑒥𑒰𑓀𑒑𑓂𑒪𑒰𑒠𑒹𑒬 𑒥𑒰 𑒧𑓂𑒨𑒰𑓀𑒧𑒰𑒩𑒏 𑒮𑒱𑒧𑒰𑒢𑒮𑒿।
-𑒢𑒻, 𑒢𑒹𑒣𑒰𑒪𑒏 𑒮𑒱𑒧𑒰𑒢𑒮𑒿। 𑒮𑒲𑒞𑒰𑒏 𑒠𑒹𑒬𑒮𑒿।
-𑒧𑒱𑒟𑒱𑒏𑒪 𑒐𑒱𑒮𑓂𑒮𑒰𑒥𑒪𑒰, 𑒤𑒴𑒮𑒱𑒥𑒪𑒰 𑒠𑒹𑒬𑒮𑒿।
-𑒢𑒻, 𑒄 𑒧𑒱𑒟𑒱𑒏𑒪 𑒢𑒻 𑒌𑒞𑒱𑒯𑒰𑒮𑒱𑒏 𑒦𑓄 𑒮𑒏𑒻𑒋। 𑒏𑒱𑒕𑒳 𑒐𑒱𑒮𑓂𑒮𑒰𑒧𑒹 𑒞𑒼𑒛𑓃-𑒧𑒩𑒼𑒛𑓃 𑒏𑒋𑒪 𑒑𑒹𑒪 𑒯𑒋𑒞, 𑒧𑒳𑒠𑒰 𑒃𑒞𑒱𑒯𑒰𑒮 𑒣𑓂𑒩𑒰𑒔𑒲𑒢 𑒁𑒕𑒱। 𑒞𑒹𑒿 𑒖𑒱𑒢𑒏𑒩 𑒃𑒞𑒱𑒯𑒰𑒮 𑒍𑒞𑒹𑒏 𑒣𑓂𑒩𑒰𑒔𑒲𑒢 𑒢𑒻 𑒞𑒱𑒢𑒏𑒰 𑒢𑒻 𑒁𑒩𑒒𑒻𑒞 𑒯𑒹𑒞𑒢𑓂𑒯𑒱।
-𑒥𑒯𑒮, 𑒥𑒯𑒮। 𑒯𑒟𑒱𑒨𑒰𑒩𑒏 𑒙𑓂𑒩𑒹𑒢𑒱𑓀𑒓 𑒁𑒯𑒰𑒿𑒏𑒹𑒿 𑒦𑒹𑒙𑒪 𑒁𑒕𑒱, 𑒩𑒱𑒫𑒰𑒪𑓂𑒫𑒩, 𑒣𑒱𑒮𑓂𑒙𑒪𑒮𑒿 𑒮𑓂𑒙𑒹𑒢𑒑𑒢 𑒡𑒩𑒱𑒏 𑒙𑓂𑒩𑒹𑒢𑒱𑒓। 𑒁𑒯𑒰𑒿𑒏 𑒏𑒰𑒩𑓂𑒨𑒰𑒪𑒨𑒮𑒿 𑒮𑒴𑒔𑒢𑒰 𑒦𑒹𑒙𑒪 𑒁𑒕𑒱। 𑒏𑒼𑒢𑒼 𑒮𑒴𑒔𑒢𑒰𑒏 𑒁𑒡𑒱𑒏𑒰𑒩𑒏 𑒁𑒢𑓂𑒞𑒩𑓂𑒑𑒞 𑒢𑒻, 𑒁𑒯𑒰𑒿𑒏 𑒮𑒦 𑒏𑒰𑒖𑒏 𑒮𑒴𑒔𑒢𑒰 𑒋𑒞𑓄 𑒂𑒥𑒱 𑒖𑒰𑒃𑒞 𑒁𑒕𑒱। 𑒯𑒧𑒩𑒼 𑒥𑒲𑒔 𑒁𑒯𑒰𑒿𑒏 𑒪𑒼𑒏 𑒕𑒟𑒱 𑒞𑒿 𑒁𑒯𑒴𑒿𑒏 𑒥𑒲𑒔𑒧𑒹 𑒯𑒧𑒩 𑒪𑒼𑒏 𑒕𑒟𑒱।
-𑒄 𑒞𑒿 𑒥𑒳𑒗𑒪𑒹 𑒑𑒣 𑒁𑒕𑒱।
-𑒧𑒳𑒠𑒰 𑒞𑒻𑒨𑒼 𑒁𑒯𑒰𑒿 𑒯𑒟𑒱𑒨𑒰𑒩 𑒪𑓄 𑒏𑓄 𑒢𑒻 𑒔𑒪𑒻 𑒕𑒲। 𑒧𑒱𑒖𑒼𑒩𑒧𑒏 𑒪𑒰𑒪𑒛𑒹𑓀𑒑𑒰 𑒞𑒿 𑒯𑒟𑒱𑒨𑒰𑒩 𑒪𑓄 𑒏𑓄 𑒔𑒪𑒻 𑒕𑒪𑒰 𑒂 𑒁𑒮𑒰𑒧𑒏 𑒣𑒩𑒹𑒬 𑒥𑒩𑒳𑒂 𑒧𑒳𑒠𑒰 𑒏𑒐𑒢𑒼 𑒯𑒟𑒱𑒨𑒰𑒩 𑒪𑓄 𑒏𑓄 𑒢𑒻 𑒔𑒪𑒻 𑒕𑒟𑒱। 𑒁𑒯𑒰𑒿𑒏 𑒠𑒹𑒬 𑒠𑒳𑒢𑒴𑒮𑒿 𑒮𑒧𑒗𑒾𑒞𑒰 𑒏𑒹𑒪𑒏।

-𑒢𑒻, 𑒣𑒩𑒹𑒬 𑒥𑒩𑒳𑒂𑒮𑒿 𑒮𑒧𑒗𑒾𑒞𑒰 𑒢𑒻 𑒦𑓄 𑒮𑒏𑒪 𑒁𑒕𑒱।
-𑒧𑒳𑒠𑒰 𑒯𑒳𑒢𑒏𑒩 𑒮𑓀𑒑𑒚𑒢𑒏 𑒞𑒿 𑒁𑒡𑒱𑒏𑒰𑓀𑒬 𑒑𑒼𑒙𑒹 𑒮𑒧𑒗𑒾𑒞𑒰 𑒪𑒹𑒪 𑒞𑒻𑒨𑒰𑒩 𑒕𑒟𑒱। 𑒧𑒳𑒠𑒰 𑒄 𑒣𑒩𑒹𑒬 𑒥𑒩𑒳𑒂 𑒖𑒹 𑒯𑒟𑒱𑒨𑒰𑒩 𑒪𑓄 𑒏𑓄 𑒢𑒻 𑒔𑒪𑒻𑒋 𑒫𑒋𑒯 𑒙𑒰 𑒞𑒻𑒨𑒰𑒩 𑒢𑒻 𑒁𑒕𑒱। 𑒞𑒐𑒢 𑒞𑒿 𑒯𑒟𑒱𑒨𑒰𑒩𑒥𑒪𑒰 𑒮𑒿 𑒥𑒱𑒢 𑒯𑒟𑒱𑒨𑒰𑒩𑒥𑒪𑒰 𑒥𑒹𑒬𑒲 𑒐𑒞𑒩𑒢𑒰𑒏 𑒦𑒹𑒪 𑒏𑒱𑒢𑒹। 𑒁𑒯𑒴𑒿 𑒯𑒧𑒩𑒰 𑒮𑒦 𑒪𑒹𑒪 𑒥𑒹𑒬𑒲 𑒐𑒞𑒩𑒢𑒰𑒏 𑒕𑒲।
-𑒠𑒹𑒐𑒴, 𑒋𑒏𑒙𑒰 𑒧𑒱𑒖𑒼𑒩𑒧𑒏 𑒕𑒰𑒞𑓂𑒩 𑒧𑒳𑒖𑒤𑓂𑒤𑒩𑒣𑒳𑒩𑒧𑒹 𑒃𑒢𑓂𑒖𑒲𑒢𑒱𑒨𑒩𑒱𑓀𑒑𑒧𑒹 𑒣𑒜𑓃𑒻𑒞 𑒕𑒪। 𑒍 𑒯𑒧𑒩𑒰 𑒏𑒯𑒢𑒹 𑒕𑒪 𑒖𑒹 𑒪𑒰𑒪𑒛𑒹𑓀𑒑𑒰 𑒧𑒯𑒰𑒢 𑒢𑒹𑒞𑒰 𑒕𑒟𑒱। 𑒍𑒃 𑒏𑒰𑒪 𑒪𑒰𑒪𑒠𑒹𑓀𑒑𑒰 𑒦𑒴𑒧𑒱𑒑𑒞 𑒩𑒯𑒟𑒱। 𑒠𑒹𑒬 𑒯𑒳𑒢𑒏𑒰 𑒂𑒞𑓀𑒏𑒲 𑒧𑒰𑒢𑒻 𑒕𑒪। 𑒧𑒳𑒠𑒰 𑒍 𑒋𑒪𑒰, 𑒠𑒹𑒬𑒏 𑒮𑒩𑒏𑒰𑒩𑒮𑒿 𑒮𑒧𑒗𑒾𑒞𑒰 𑒏𑒹𑒪𑒢𑓂𑒯𑒱। 𑒮𑒦 𑒯𑒟𑒱𑒨𑒰𑒩 𑒖𑒧𑒰 𑒏𑓄 𑒠𑒹𑒪𑒢𑓂𑒯𑒱। 𑒠𑒳𑒢𑒴 𑒣𑒏𑓂𑒭 𑒮𑒧𑒗𑒾𑒞𑒰𑒏 𑒃𑒧𑒰𑒢𑒠𑒰𑒩𑒲𑒮𑒿 𑒣𑒰𑒪𑒢 𑒏𑒹𑒪𑒏 𑒂 𑒂𑒃 𑒧𑒱𑒖𑒼𑒩𑒧 𑒅𑒞𑓂𑒞𑒩𑒣𑒴𑒩𑓂𑒫𑒲 𑒦𑒰𑒑𑒏 𑒋𑒏𑒧𑒰𑒞𑓂𑒩 𑒋𑒯𑒹𑒢 𑒮𑒧𑒗𑒾𑒞𑒰 𑒁𑒕𑒱 𑒖𑒹 𑒣𑒴𑒩𑓂𑒝 𑒩𑒴𑒣𑒮𑒿 𑒮𑒤𑒪 𑒁𑒕𑒱। 𑒧𑒵𑒞𑓂𑒨𑒳𑒏 𑒣𑒯𑒱𑒢𑒹 𑒪𑒰𑒪𑒛𑒹𑓀𑒑𑒰 𑒁𑒣𑒢 𑒩𑒰𑒖𑓂𑒨𑒏𑒹𑒿 𑒬𑒰𑒢𑓂𑒞𑒱𑒏 𑒣𑒟𑒣𑒩 𑒕𑒼𑒛𑓃𑒱 𑒑𑒹𑒪𑒰। 𑒍 𑒃𑒢𑓂𑒖𑒲𑒢𑒱𑒨𑒩𑒱𑒓𑒏 𑒕𑒰𑒞𑓂𑒩 𑒚𑒲𑒏𑒹 𑒏𑒯𑒻 𑒕𑒪, 𑒪𑒰𑒪𑒛𑒹𑓀𑒑𑒰 𑒧𑒯𑒰𑒢 𑒢𑒹𑒞𑒰 𑒕𑒟𑒱। 𑒧𑒯𑒰𑒢 𑒢𑒹𑒞𑒰 𑒁𑒣𑒢 𑒖𑒢𑒞𑒰𑒏𑒹𑒿 𑒥𑒲𑒔 𑒧𑒗𑒡𑒰𑒩𑒧𑒹 𑒢𑒻 𑒕𑒼𑒛𑓃𑒻 𑒕𑒻। 𑒛𑒳𑒥𑒻𑒞 𑒖𑒯𑒰𑒖𑒏 𑒏𑒣𑓂𑒞𑒰𑒢 𑒖𑒹𑒏𑒰𑒿 𑒍 𑒁𑒢𑓂𑒞𑒱𑒧 𑒮𑒧𑒋 𑒡𑒩𑒱 𑒖𑒯𑒰𑒖𑒣𑒩 𑒩𑒯𑒻𑒞 𑒁𑒕𑒱। 𑒖𑒐𑒢 𑒖𑒯𑒰𑒖𑒮𑒿 𑒮𑒦 𑒥𑒯𑒩𑒰 𑒖𑒰𑒃𑒋 𑒞𑒐𑒢 𑒍 𑒖𑒯𑒰𑒖𑒏 𑒧𑒮𑓂𑒞𑒴𑒪 𑒮𑓀𑒑𑒹 𑒮𑒧𑒳𑒠𑓂𑒩𑒧𑒹 𑒛𑒳𑒥𑒱 𑒖𑒰𑒃𑒋, 𑒖𑒯𑒰𑒖 𑒕𑒼𑒛𑓃𑒱 𑒢𑒻 𑒦𑒰𑒑𑒻𑒋। 𑒖𑒿 𑒪𑒰𑒪𑒛𑒹𑓀𑒑𑒰 𑒮𑒧𑒗𑒾𑒞𑒰 𑒏𑒹𑒪𑒢𑓂𑒯𑒱 𑒞𑒿 𑒍 𑒍𑒃 𑒖𑒢𑒞𑒰𑒏 𑒦𑒰𑒫𑒢𑒰𑒏 𑒁𑒢𑒳𑒩𑒴𑒣 𑒕𑒪, 𑒖𑒹 𑒯𑒳𑒢𑒏𑒰 𑒧𑒯𑒰𑒢 𑒥𑒳𑒗𑒻𑒋। 𑒖𑒿 𑒍 𑒧𑒵𑒞𑓂𑒨𑒳𑒮𑒿 𑒣𑒴𑒩𑓂𑒫 𑒬𑒰𑒢𑓂𑒞𑒱 𑒮𑒧𑒗𑒾𑒞𑒰 𑒢𑒻 𑒏𑒩𑒱𑒞𑒟𑒱 𑒞𑒿 𑒦𑓄 𑒮𑒏𑒻𑒋 𑒍 𑒃𑒢𑓂𑒖𑒲𑒢𑒱𑒨𑒩𑒱𑒓𑒏 𑒕𑒰𑒞𑓂𑒩 𑒯𑒳𑒢𑒏𑒰𑒣𑒩 𑒍𑒞𑒹𑒏 𑒑𑒩𑓂𑒫 𑒢𑒻 𑒏𑓄 𑒮𑒏𑒱𑒞𑒋। 𑒍 𑒖𑒐𑒢 𑒁𑒐𑒢𑒼 𑒦𑒹𑒙𑒻𑒋, 𑒯𑒧𑒩𑒰𑒮𑒿 𑒏𑒯𑒻𑒋- 𑒠𑒹𑒐𑒪𑒾𑓀, 𑒯𑒧 𑒏𑒯𑒻 𑒕𑒪𑒾𑓀 𑒢𑒹, 𑒪𑒰𑒪𑒛𑒹𑓀𑒑𑒰 𑒃𑒖 𑒁 𑒑𑓂𑒩𑒹𑒙 𑒪𑒲𑒛𑒩।
-𑒯𑒧𑒩𑒰 𑒑𑓂𑒩𑒹𑒙 𑒪𑒲𑒛𑒩 𑒥𑒢𑒥𑒰𑒏 𑒮𑒹𑒯𑒢𑓂𑒞𑒰 𑒢𑒻 𑒁𑒕𑒱। 𑒯𑒧 𑒮𑒦 𑒯𑒟𑒱𑒨𑒰𑒩 𑒮𑒧𑒩𑓂𑒣𑒝 𑒏𑓄 𑒠𑒲 𑒂 𑒞𑒐𑒢 𑒖𑒿 𑒮𑒩𑒏𑒰𑒩 𑒯𑒧𑒩𑒰 𑒮𑓀𑒑 𑒡𑒼𑒐𑒰 𑒏𑒩𑒋?
-𑒖𑒿 𑒪𑒰𑒪𑒛𑒹𑓀𑒑𑒰 𑒄 𑒮𑒼𑒔𑒱𑒞𑒟𑒱 𑒞𑒿 𑒏𑒲 𑒬𑒰𑒢𑓂𑒞𑒱 𑒮𑒧𑓂𑒦𑒫 𑒕𑒪? 𑒂 𑒮𑒩𑒏𑒰𑒩 𑒁𑒕𑒱 𑒏𑒲? 𑒖𑒹 𑒙𑒹𑒪𑒲𑒫𑒱𑒖𑒢𑒣𑒩 𑒁𑒯𑒰𑒿 𑒮𑒦 𑒠𑒹𑒐𑒻 𑒕𑒲, 𑒮𑒹 𑒁𑒕𑒱 𑒮𑒩𑒏𑒰𑒩? 𑒢𑒻, 𑒍𑒃𑒧𑒹 𑒮𑒿 𑒥𑒯𑒳𑒞𑒼𑒏𑒹𑒿 𑒥𑒳𑒗𑒪𑒼 𑒢𑒻 𑒕𑒻 𑒖𑒹 𑒠𑒹𑒬 𑒪𑒹𑒪 𑒏𑒹 𑒏𑒹, 𑒏𑒲 𑒏𑒲 𑒏𑓄 𑒩𑒯𑒪 𑒁𑒕𑒱। 𑒮𑒦 𑒫𑒱𑒦𑒰𑒑𑒧𑒹 𑒠𑒹𑒬𑒦𑒏𑓂𑒞 𑒮𑒦 𑒦𑒩𑒪 𑒕𑒻, 𑒠𑒮𑒹 𑒣𑓂𑒩𑒞𑒱𑒬𑒞 𑒏𑒱𑒋 𑒢𑒻 𑒯𑒼𑒅, 𑒂 𑒍𑒏𑒩𑒹 𑒦𑒩𑒼𑒮𑒹 𑒄 𑒠𑒹𑒬 𑒕𑒻। 𑒖𑒹 𑒙𑒹𑒪𑒲𑒫𑒱𑒖𑒢𑒣𑒩 𑒁𑒕𑒱, 𑒧𑓀𑒞𑓂𑒩𑒲-𑒮𑓀𑒞𑓂𑒩𑒲, 𑒍𑒃𑒧𑒹𑒮𑒿 𑒏𑒏𑒩𑒰 𑒏𑒲 𑒥𑒳𑒗𑒪 𑒕𑒻? 𑒁𑒯𑒰𑒿 𑒥𑒠𑒪𑒱 𑒮𑒏𑒻 𑒕𑒲, 𑒄 𑒧𑓀𑒞𑓂𑒩𑒲-𑒮𑓀𑒞𑓂𑒩𑒲 𑒥𑒠𑒪𑒱 𑒮𑒏𑒻 𑒕𑒟𑒱 𑒧𑒳𑒠𑒰 𑒠𑒹𑒬 𑒢𑒻 𑒥𑒠𑒪𑒞, 𑒮𑒩𑒏𑒰𑒩 𑒢𑒻 𑒥𑒠𑒪𑒞। 𑒍 𑒮𑒧𑒗𑒾𑒞𑒰𑒏 𑒣𑒰𑒪𑒢 𑒏𑒩𑒞।
𑒯𑒧𑒩 𑒧𑒰𑒟𑒣𑒩 𑒋𑒏𑒙𑒰 𑒦𑒰𑒩𑒲 𑒛𑒝𑓂𑒙𑒰 𑒥𑒖𑒩𑒻𑒋 𑒂 𑒯𑒧 𑒥𑒹𑒯𑒼𑒬 𑒦𑓄 𑒖𑒰𑒃 𑒕𑒲। 𑒯𑒧𑒩𑒰 𑒖𑒐𑒢 𑒯𑒼𑒬 𑒁𑒥𑒻𑒋 𑒞𑒿 𑒏𑒱𑒕𑒳-𑒏𑒱𑒕𑒳 𑒧𑒼𑒢 𑒣𑒛𑓃𑒻𑒋 𑒂 𑒪𑒑𑒻𑒋 𑒖𑒹 𑒯𑒧 𑒥𑒹𑒯𑒼𑒬 𑒦𑒹𑒪 𑒩𑒯𑒲 𑒂 𑒤𑒹𑒩𑒮𑒿 𑒯𑒼𑒬𑒧𑒹 𑒂𑒋𑒪 𑒕𑒲।
𑒧𑒳𑒞𑒰𑒪𑒱𑒤 𑒮𑒼𑒗𑒰𑒿 𑒁𑒕𑒱।
𑒄 𑒍𑒏𑒩 𑒮𑒰𑒧𑓂𑒩𑒰𑒖𑓂𑒨 𑒕𑒻। 𑒠𑒳𑒦𑒰𑒭𑒱𑒨𑒰𑒏 𑒧𑒰𑒡𑓂𑒨𑒧𑒮𑒿 𑒍 𑒯𑒧𑒩𑒰𑒮𑒿 𑒑𑒣 𑒏𑓄 𑒩𑒯𑒪 𑒁𑒕𑒱। 𑒏𑒼𑒩𑓂𑒙 𑒍𑒏𑒩𑒰 𑒥𑒹𑒪 𑒠𑓄 𑒠𑒹𑒪𑒏𑒻। 𑒍 𑒏𑒯𑒻𑒞 𑒁𑒕𑒱 𑒖𑒹 𑒥𑒱𑒢𑒰 𑒛𑓂𑒩𑒑𑒏 𑒡𑓀𑒡𑒰𑒏 𑒂𑒞𑓀𑒏𑒫𑒰𑒠 𑒮𑒧𑓂𑒦𑒫 𑒢𑒻 𑒕𑒻, 𑒌 𑒪𑒹𑒪 𑒖𑒞𑒹𑒏 𑒣𑒰𑒃 𑒔𑒰𑒯𑒲 𑒮𑒹 𑒛𑓂𑒩𑒑𑒏 𑒡𑓀𑒡𑒹𑒮𑒿 𑒁𑒥𑒻 𑒕𑒻।
-𑒞𑒿 𑒏𑒲 𑒁𑒯𑒰𑒿 𑒧𑒳𑒐𑓂𑒨 𑒐𑒱𑒪𑒰𑒛𑓃𑒲 𑒕𑒲? 𑒯𑒧𑒩𑒰 𑒞𑒿 𑒪𑒑𑒻 𑒕𑒪 𑒖𑒹 𑒁𑒯𑒰𑒿𑒏𑒹𑒿 𑒤𑒿𑒮𑒰𑒋𑒪 𑒑𑒹𑒪 𑒁𑒕𑒱।
-𑒏𑒲 𑒤𑒩𑓂𑒏 𑒣𑒛𑓃𑒻 𑒕𑒻। 𑒤𑒿𑒮𑒰𑒋𑒪 𑒑𑒹𑒪 𑒐𑒱𑒪𑒰𑒛𑓃𑒲 𑒥𑒰 𑒧𑒳𑒐𑓂𑒨 𑒐𑒱𑒪𑒰𑒛𑓃𑒲𑒧𑒹 𑒏𑒲 𑒤𑒩𑓂𑒏 𑒕𑒻। 𑒍𑒢𑒰 𑒠𑒹𑒐𑒥𑒻 𑒞𑒿 𑒌 𑒞𑒩𑒯𑒏 𑒮𑓀𑒑𑒚𑒢𑒧𑒹 𑒁𑒮𑓂𑒮𑒲 𑒣𑓂𑒩𑒞𑒱𑒬𑒞 𑒤𑒿𑒮𑒰𑒋𑒪 𑒪𑒼𑒏 𑒕𑒻, 𑒧𑒳𑒠𑒰 𑒞𑒹𑒢𑒰 𑒤𑒿𑒮𑒰𑒋𑒪 𑒕𑒻 𑒖𑒹 𑒧𑒳𑒐𑓂𑒨 𑒐𑒱𑒪𑒰𑒛𑓃𑒲𑒮𑒿 𑒥𑒹𑒬𑒲 𑒐𑒞𑒩𑒢𑒰𑒏 𑒫𑒋𑒯 𑒕𑒻। 𑒂𑒥 𑒁𑒯𑒰𑒿𑒏𑒹𑒿 𑒫𑒋𑒯 𑒏𑒩𑒥𑒰𑒏 𑒁𑒕𑒱 𑒖𑒹 𑒯𑒧 𑒏𑒯𑒥।
………
𑒯𑒧𑒩𑒰 𑒤𑒹𑒩𑒮𑒿 𑒯𑒼𑒬 𑒂𑒋𑒪 𑒁𑒕𑒱। 𑒮𑓂𑒟𑒰𑒢𑒲𑒨 𑒟𑒰𑒢𑒰𑒧𑒹 𑒯𑒧 𑒁𑒣𑒢 𑒣𑒯𑒔𑒰𑒢 𑒏𑒼𑒛 𑒥𑒞𑒥𑒻 𑒪𑒹𑒪 𑒋𑒏𑒙𑒰 𑒤𑒼𑒢 𑒏𑒩𑒥𑒰𑒏 𑒁𑒢𑒳𑒧𑒞𑒱 𑒧𑒰𑓀𑒑𑒻 𑒕𑒲। 𑒍 𑒏𑒱𑒕𑒳 𑒥𑒳𑒗𑒱 𑒢𑒻 𑒣𑒥𑒻𑒋 𑒧𑒳𑒠𑒰 𑒁𑒢𑒳𑒧𑒞𑒱 𑒠𑓄 𑒠𑒻𑒋। 𑒤𑒹𑒩 𑒏𑒱𑒕𑒳 𑒏𑒰𑒪𑒏 𑒥𑒰𑒠 𑒍𑒏𑒩 𑒯𑒰𑒏𑒱𑒧𑒏 𑒤𑒼𑒢 𑒍𑒏𑒩𑒰 𑒪𑒑 𑒁𑒥𑒻 𑒕𑒻। 𑒍 𑒯𑒧𑒩𑒰 𑒠𑒱𑒮 𑒢𑒖𑒩𑒱 𑒑𑒩𑒰 𑒏𑓄 𑒠𑒹𑒐𑒻𑒋।
𑒯𑒧 𑒒𑒩𑒣𑒩 𑒂𑒥𑒱 𑒑𑒹𑒪 𑒕𑒲।
𑒯𑒧𑒩 𑒣𑒯𑒱𑒪 𑒨𑒰𑒞𑓂𑒩𑒰 𑒢𑒱𑒩𑒩𑓂𑒟𑒏 𑒮𑒱𑒠𑓂𑒡 𑒦𑒹𑒪 𑒁𑒕𑒱।
𑒧𑒳𑒞𑒰𑒪𑒱𑒤 𑒯𑒧𑒩𑒰 𑒯𑒩𑒰 𑒠𑒹𑒪𑒏, 𑒯𑒧𑒩 𑒖𑒰𑒢 𑒥𑒏𑒮𑒱 𑒏𑓄 𑒍 𑒯𑒧𑒩𑒰 𑒯𑒩𑒰 𑒠𑒹𑒪𑒏।
𑒁𑒣𑒢 𑒒𑒩𑒧𑒹 𑒯𑒧 𑒂𑒥𑒱 𑒑𑒹𑒪 𑒕𑒲।
𑒥𑒱𑒢 𑒯𑒟𑒱𑒨𑒰𑒩𑒥𑒪𑒰 𑒮𑒻𑒢𑒱𑒏𑒏 𑒯𑒰𑒩𑒱, 𑒄 𑒥𑒱𑒡 𑒮𑒦 𑒮𑒱𑒐𑒢𑒹 𑒖𑒰 𑒩𑒯𑒪 𑒁𑒕𑒱।
𑒏𑒱𑒕𑒳 𑒧𑒼𑒢 𑒣𑒛𑓃𑒱 𑒩𑒯𑒪 𑒁𑒕𑒱। 𑒠𑒳𑒦𑒰𑒭𑒱𑒨𑒰𑒏𑒹𑒿 𑒧𑒳𑒞𑒰𑒪𑒱𑒤 𑒏𑒯𑒱 𑒩𑒯𑒪 𑒕𑒪 𑒂 𑒍 𑒯𑒧𑒩𑒰 𑒏𑒯𑒱 𑒩𑒯𑒪 𑒕𑒪। 𑒧𑒳𑒞𑒰𑒪𑒱𑒤 𑒏𑒯𑒱 𑒩𑒯𑒪 𑒕𑒟𑒱 𑒖𑒹 𑒁𑒯𑒰𑒿𑒏 𑒄 𑒨𑒰𑒞𑓂𑒩𑒰 𑒫𑓂𑒨𑒩𑓂𑒟 𑒢𑒻 𑒑𑒹𑒪 𑒁𑒕𑒱, 𑒁𑒯𑒰𑒿 𑒏𑒟𑒰 𑒪𑒱𑒐𑒻 𑒕𑒲 𑒮𑒹 𑒥𑒳𑒗𑒴 𑒌 𑒨𑒰𑒞𑓂𑒩𑒰𑒧𑒹 𑒋𑒏𑒙𑒰 𑒏𑒟𑒰𑒏 𑒣𑓂𑒪𑒰𑒙𑒹 𑒦𑒹𑒙 𑒑𑒹𑒪। 𑒧𑒳𑒠𑒰 𑒧𑒳𑒞𑒰𑒪𑒱𑒤 𑒏𑒯𑒱 𑒩𑒯𑒪 𑒕𑒟𑒱 𑒖𑒹 𑒍𑒃 𑒏𑒟𑒰𑒏 𑒢𑒰𑒨𑒏 𑒧𑒳𑒞𑒰𑒪𑒱𑒤 𑒩𑒯𑒞।














𑒯𑒧 𑒢𑒻 𑒖𑒰𑒋𑒥 𑒫𑒱𑒠𑒹𑒬
“𑒨𑒾 𑒦𑒻𑒨𑓂𑒨𑒰। 𑒏𑒢𑒹𑒏 𑒏𑒰𑒏𑒰𑒮𑒿 𑒦𑒹𑒿𑒙 𑒢𑒻 𑒏𑒩𑒰 𑒠𑒹𑒥”।
“𑒏𑒰𑒏𑒰 𑒕𑒟𑒱 𑒁𑒯𑒰𑒿𑒏। 𑒂 𑒦𑒹𑒿𑒙 𑒏𑒩𑒰 𑒠𑒱𑒁 𑒯𑒧?”
“𑒨𑒾। 𑒍 𑒞𑒿 𑒯𑒧𑒩𑒰 𑒮𑒦𑒏𑒹𑒿 𑒔𑒱𑒢𑓂𑒯𑒱𑒞𑒼 𑒢𑒻 𑒕𑒟𑒱। 𑒥𑒔𑓂𑒔𑒹𑒧𑒹 𑒑𑒰𑒧𑒮𑒿 𑒥𑒯𑒩𑒰 𑒑𑒹𑒪𑒟𑒱, 𑒮𑒹 𑒒𑒳𑒩𑒱 𑒏𑒋 𑒏𑒯𑒰𑒿 𑒁𑒋𑒪𑒰𑒯”।
“𑒥𑒹𑒮। 𑒞𑒐𑒢 𑒔𑒪𑒴 𑒦𑒹𑒿𑒙 𑒏𑒩𑒥𑒰 𑒠𑒻𑒞 𑒕𑒲। 𑒧𑒳𑒠𑒰 𑒏𑒼𑒢𑒼 𑒣𑒻𑒩𑒫𑒲 𑒂𑒏𑒱 𑒏𑒰𑒖 𑒯𑒼𑒁𑒋 𑒞𑒿 𑒣𑒯𑒱𑒢𑒹 𑒏𑒯𑒱 𑒠𑒻𑒞 𑒕𑒲, 𑒮𑒹 𑒍 𑒢𑒻 𑒏𑒩𑒞𑒰𑒯”।
“𑒢𑒻। 𑒏𑒼𑒢𑒼 𑒏𑒰𑒖 𑒢𑒻 𑒁𑒕𑒱। 𑒧𑒰𑒞𑓂𑒩 𑒦𑒹𑒿𑒙 𑒏𑒩𑒥𑒰𑒏 𑒃𑒔𑓂𑒕𑒰 𑒁𑒕𑒱। 𑒦𑒰𑒩𑒞 𑒫𑒩𑓂𑒭𑒧𑒹 𑒋𑒞𑒹𑒏 𑒢𑒰𑒧 𑒕𑒢𑓂𑒯𑒱, 𑒮𑒦 𑒔𑒱𑒢𑓂𑒯𑒻𑒞 𑒕𑒢𑓂𑒯𑒱 𑒧𑒳𑒠𑒰 𑒢𑒯𑒱𑒨𑒹 𑒯𑒧𑒩𑒰 𑒮𑒦 𑒔𑒱𑒢𑓂𑒯𑒻𑒞 𑒕𑒱𑒨𑒢𑓂𑒯𑒱 𑒂 𑒢𑒻 𑒫𑒻𑒯 𑒔𑒱𑒢𑓂𑒯𑒻𑒞 𑒕𑒟𑒱”।

𑒪𑒰𑒪 𑒑𑒹𑒪 𑒕𑒪𑒰𑒯 𑒠𑒮 𑒠𑒱𑒢 𑒣𑒯𑒱𑒢𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒖𑒲𑒏 𑒒𑒩 𑒣𑒩। 𑒖𑒰𑒃𑒞𑒹 𑒠𑒹𑒩𑒲 𑒪𑒰𑒪𑒏 𑒏𑒙𑒰𑒏𑓂𑒭 𑒬𑒳𑒩𑒴 𑒦𑓄 𑒖𑒰𑒃𑒞 𑒕𑒢𑓂𑒯𑒱।
-𑒑𑒰𑒧𑒏𑒹𑒿 𑒥𑒱𑒮𑒩𑒱 𑒑𑒹𑒪𑒱𑒨𑒻𑒏। 𑒒𑒳𑒩𑒱 𑒏𑓄 𑒠𑒹𑒐𑒥𑒼 𑒢𑒻 𑒏𑒋𑒪𑒯𑒳𑒿। 𑒐𑒼𑒣𑒛𑓃𑒲𑒏𑒹𑒿 𑒒𑒩 𑒞𑓄 𑒥𑒢𑒰 𑒪𑒻𑒞𑒯𑒳𑒿।
𑒂 𑒖𑒥𑒰𑒥𑒼 𑒦𑒹𑒙𑒢𑓂𑒯𑒱 𑒍𑒯𑒱𑒢𑒰 𑒥𑒢𑒪 𑒥𑒢𑒰𑒍𑒪।
-𑒏𑒲 𑒯𑒋𑒞 ? 𑒖𑒰 𑒏𑒋 𑒏𑒲 𑒏𑒩𑒥। 𑒋𑒏 𑒏𑒙𑓂𑒚𑒰𑒏 𑒒𑒩𑒰𑒩𑒲 𑒂 𑒞𑒰𑒯𑒱 𑒣𑒩 𑒥𑒰𑒥𑒴𑒏 𑒏𑒞𑒹𑒏 𑒦𑒰𑒿𑒋। 𑒂 𑒤𑒹𑒩 𑒫𑒰𑒧𑒣𑓀𑒟𑒲 𑒫𑒱𑒔𑒰𑒩𑒡𑒰𑒩𑒰𑒏 𑒔𑒱𑒢𑓂𑒞𑒢 𑒬𑒳𑒩𑒴 𑒦𑓄 𑒖𑒰𑒃𑒞 𑒕𑒪𑒢𑓂𑒯𑒱।
-𑒑𑒰𑒧 𑒁𑒕𑒱 𑒡𑒢𑒱𑒏𑒏 𑒪𑒹𑒪। 𑒨𑒰𑒫𑒞 𑒑𑒰𑒧𑒏 𑒖𑒢𑒮𑓀𑒐𑓂𑒨𑒰 𑒏𑒧 𑒢𑒻 𑒯𑒼𑒋𑒞 𑒞𑒰𑒫𑒞 𑒡𑒩𑒱 𑒞𑒿 𑒁𑒫𑒬𑓂𑒨𑒹। 𑒑𑒩𑒲𑒥𑒲𑒧𑒹 𑒪𑒼𑒏𑒏𑒹𑒿 𑒪𑒼𑒏 𑒢𑒻 𑒥𑒳𑒗𑒻𑒞 𑒁𑒕𑒱 𑒏𑓂𑒨𑒼। 𑒧𑒳𑒠𑒰 𑒢𑒑𑒩 𑒧𑒰𑒞𑓂𑒩 𑒠𑒱𑒪𑓂𑒪𑒲, 𑒏𑒪𑒏𑒞𑓂𑒞𑒰 𑒢𑒻 𑒁𑒕𑒱। 𑒨𑒰𑒫𑒞 𑒧𑒡𑒹𑒣𑒳𑒩, 𑒧𑒡𑒹𑒣𑒳𑒩𑒰, 𑒧𑒯𑒼𑒞𑓂𑒞𑒩𑒲, 𑒖𑒢𑒏𑒣𑒳𑒩, 𑒥𑒢𑒻𑒪𑒲 𑒂 𑒗𑓀𑒗𑒰𑒩𑒣𑒳𑒩𑒏 𑒫𑒱𑒏𑒰𑒮 𑒢𑒻 𑒯𑒼𑒋𑒞, 𑒬𑒼𑒭𑒱𑒞 𑒫𑒩𑓂𑒑 𑒩𑒯𑒥𑒹 𑒏𑒩𑒞।
𑒞𑒰𑒫𑒞 𑒠𑓂𑒫𑒱𑒖𑒹𑒢𑓂𑒠𑓂𑒩 𑒖𑒲𑒏 𑒏𑒢𑒱𑒨𑒰𑒿 𑒔𑒰𑒯 𑒩𑒰𑒐𑒱 𑒑𑒹𑒪𑒐𑒱𑒢𑓂𑒯।
𑒠𑓂𑒫𑒱𑒖𑒹𑒢𑓂𑒠𑓂𑒩𑒖𑒲 𑒑𑒰𑒧𑒹𑒧𑒹 𑒣𑓂𑒩𑒰𑒟𑒧𑒱𑒏 𑒬𑒱𑒏𑓂𑒭𑒰 𑒣𑓂𑒩𑒰𑒣𑓂𑒞 𑒏𑒋𑒪𑒢𑓂𑒯𑒱। 𑒗𑓀𑒗𑒰𑒩𑒣𑒳𑒩𑒧𑒹 𑒧𑒱𑒛𑓂𑒪 𑒮𑓂𑒏𑒴𑒪 𑒂 𑒯𑒰𑒃 𑒮𑓂𑒏𑒴𑒪 𑒣𑒋𑒩𑒹 𑒖𑒰𑒟𑒱। 𑒣𑒱𑒞𑒰𑒖𑒲 𑒩𑒰𑒿𑒔𑒲𑒧𑒹 𑒚𑒱𑒏𑒹𑒠𑒰𑒩𑒲 𑒏𑒩𑒻𑒞 𑒕𑒪𑒐𑒱𑒢𑓂𑒯। 𑒧𑒰𑒋 𑒣𑒜𑓃𑒪-𑒪𑒱𑒐𑒪 𑒕𑒪𑒐𑒱𑒢𑓂𑒯।
𑒪𑒼𑒏 𑒏𑒯𑒻𑒞 𑒕𑒪 𑒖𑒹 𑒅𑒣𑒢𑓂𑒨𑒰𑒮 𑒮𑒹𑒯𑒼 𑒣𑒜𑓃𑒻𑒞 𑒕𑒪𑒲𑒯।
𑒠𑒩𑒦𑓀𑒑𑒰𑒮𑒿 𑒮𑒼𑒗𑒹 𑒣𑓂𑒩𑒨𑒰𑒑 𑒣𑒯𑒳𑒿𑒔𑒱 𑒑𑒹𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩। 𑒣𑒱𑒞𑒰 𑒕𑒪𑒰𑒯 𑒢𑒥𑒏𑒰 𑒥𑒮𑒰𑒞𑒏 𑒪𑒼𑒏। 𑒐𑒴𑒥 𑒏𑒧𑒰𑒟𑒱 𑒂 𑒐𑒴𑒥 𑒐𑒩𑓂𑒔 𑒏𑒩𑒟𑒱। 𑒑𑒰𑒧𑒮𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒢𑒻। 𑒏𑒢𑒱𑒨𑒰𑒿𑒏 𑒐𑒼𑒖𑒼-𑒐𑒥𑒩𑒱 𑒢𑒻 𑒪𑒻𑒞 𑒕𑒪𑒰𑒯। 𑒪𑒼𑒏 𑒏𑒯𑒻𑒞 𑒕𑒪 𑒖𑒹 𑒠𑒼𑒮𑒩 𑒥𑒱𑒂𑒯 𑒏𑓄 𑒪𑒹𑒢𑒹 𑒕𑒪𑒰𑒯 𑒩𑒰𑒿𑒔𑒲𑒧𑒹। 𑒪𑒼𑒏 𑒄𑒯𑒼 𑒏𑒯𑒻𑒞 𑒁𑒕𑒱 𑒖𑒹 𑒨𑒰𑒫𑒞 𑒍 𑒑𑒰𑒧𑒧𑒹 𑒕𑒪𑒰𑒯 𑒞𑒯𑒱𑒨𑒼 𑒫𑒻𑒯 𑒯𑒰𑒪 𑒕𑒪𑒢𑓂𑒯𑒱। 𑒥𑒹𑒩𑒴 𑒣𑒯𑒩 𑒞𑒲𑒢 𑒥𑒖𑒹𑒮𑒿 𑒏𑒢𑒱𑒨𑒰𑒿 𑒯𑒳𑒢𑒏𑒰 𑒪𑒹𑒪 𑒦𑒰𑒓 𑒣𑒲𑒮𑒥 𑒣𑓂𑒩𑒰𑒩𑒧𑓂𑒦 𑒏𑓄 𑒠𑒻𑒞 𑒕𑒪𑒐𑒱𑒢𑓂𑒯। 𑒧𑒳𑒠𑒰 𑒥𑒛𑓃𑒏𑒰 𑒥𑒹𑒙𑒰𑒏𑒹𑒿 𑒐𑒴𑒥 𑒧𑒰𑒢𑒻𑒞 𑒕𑒪𑒰𑒯। 𑒏𑒰𑒩𑒝 𑒕𑒼𑒙𑒏𑒰 𑒥𑒹𑒙𑒰 𑒥𑒰𑒣𑒹𑒣𑒩 𑒑𑒹𑒪 𑒕𑒪, 𑒖𑒏𑒩 𑒢𑒰𑒧 𑒩𑒯𑒋 𑒯𑒩𑒹𑒢𑓂𑒠𑓂𑒩।
𑒂 𑒪𑒼𑒏 𑒏𑒯𑒻𑒞 𑒁𑒕𑒱 𑒖𑒹 𑒯𑒩𑒹𑒢𑓂𑒠𑓂𑒩 𑒣𑒙𑒢𑒰𑒏 𑒏𑒼𑒢𑒼 𑒑𑒻𑒩𑒰𑒖𑒧𑒹 𑒏𑒰𑒖 𑒏𑒩𑒻𑒞 𑒩𑒯𑒟𑒱। 𑒠𑓂𑒫𑒱𑒖𑒹𑒢𑓂𑒠𑓂𑒩 𑒑𑒳𑒩𑒳-𑒑𑒧𑓂𑒦𑒲𑒩, 𑒣𑒜𑓃𑒥𑒰𑒧𑒹 𑒞𑒹𑒖, 𑒮𑒦 𑒫𑒱𑒭𑒨𑒧𑒹 𑒣𑒱𑒞𑒰𑒮𑒿 𑒫𑒱𑒣𑒩𑒲𑒞 𑒂 𑒞𑒹𑒿 𑒣𑒱𑒞𑒰 𑒧𑒰𑒢𑒥𑒼 𑒏𑒩𑒻𑒞 𑒕𑒪𑒐𑒱𑒢𑓂𑒯। 𑒂 𑒞𑒰𑒯𑒱 𑒠𑓂𑒫𑒰𑒩𑒹 𑒣𑒱𑒞𑒰 𑒯𑒳𑒢𑒏𑒩 𑒐𑒩𑓂𑒔 𑒣𑒚𑒹𑒥𑒰𑒧𑒹 𑒏𑒼𑒢𑒼 𑒫𑒱𑒪𑒧𑓂𑒥 𑒢𑒻 𑒏𑒩𑒻𑒞 𑒕𑒪𑒰𑒯। 𑒋𑒯𑒱 𑒣𑒚𑒰𑒍𑒪 𑒣𑒰𑒃𑒮𑒿 𑒠𑓂𑒫𑒱𑒖𑒹𑒢𑓂𑒠𑓂𑒩 𑒕𑒼𑒙 𑒦𑒰𑒃𑒏𑒹𑒿 𑒮𑒹𑒯𑒼 𑒢𑒳𑒏𑒰𑒏𑒹𑒿 𑒣𑒰𑒃 𑒣𑒚𑒰 𑒠𑒻𑒞 𑒕𑒪𑒰𑒯। 𑒂 𑒪𑒼𑒏 𑒏𑒯𑒻𑒞 𑒁𑒕𑒱 𑒖𑒹 𑒧𑒰𑒋𑒏 𑒮𑒳𑒡𑒱 𑒧𑒳𑒠𑒰 𑒯𑒳𑒢𑒏𑒼 𑒢𑒻 𑒩𑒯𑒻𑒞 𑒕𑒪𑒢𑓂𑒯𑒱 𑒂𑒏𑒱 𑒦𑓄 𑒮𑒏𑒻𑒞 𑒁𑒕𑒱 𑒖𑒹 𑒍𑒞𑒹𑒏 𑒣𑒰𑒃 𑒂 𑒮𑒧𑒨 𑒢𑒻 𑒩𑒯𑒻𑒞 𑒯𑒼𑒋𑒞𑒢𑓂𑒯𑒱।
𑒧𑒰𑒋 𑒥𑒹𑒔𑒰𑒩𑒲𑒏𑒹𑒿 𑒏𑓂𑒨𑒼 𑒏𑒯𑒱 𑒠𑒻𑒢𑓂𑒯𑒱 𑒖𑒹 𑒥𑒹𑒙𑒰𑒏𑒹𑒿 𑒤𑒹𑒩 𑒤𑒩𑓂𑒮𑓂𑒙 𑒛𑒱𑒫𑒲𑒖𑒢 𑒦𑒹𑒪 𑒁𑒕𑒱 𑒂𑒏𑒱 𑒣𑒞𑒱𑒏𑒹𑒿 𑒯𑒰𑒃𑒫𑒹 𑒏𑒹𑒩 𑒚𑒹𑒏𑒰 𑒦𑒹𑒙𑒱 𑒑𑒹𑒪 𑒕𑒢𑓂𑒯𑒱, 𑒞𑒿 𑒍 𑒞𑒱𑒩𑒣𑒱𑒞 𑒦𑓄 𑒖𑒰𑒃𑒞 𑒕𑒪𑒲𑒯। 𑒑𑒰𑒧𑒧𑒹 𑒥𑒙𑒰𑒃𑒠𑒰𑒩 𑒮𑒦 𑒖𑒹 𑒏𑒱𑒕𑒳 𑒠𑓄 𑒠𑒻𑒢𑓂𑒯𑒱 𑒞𑒰𑒯𑒱𑒮𑒿 𑒏𑒼𑒢𑒼 𑒞𑒩𑒯𑒹𑒿 𑒑𑒳𑒖𑒩 𑒔𑒪𑒱 𑒖𑒰𑒃𑒞 𑒕𑒪𑒢𑓂𑒯𑒱। 𑒢𑒲𑒪 𑒩𑓀𑒑𑒏 𑒢𑒴𑒂, 𑒩𑒳𑒥𑒱𑒨𑒰 𑒫𑒰𑒃𑒪 𑒏𑒯𑒻𑒞 𑒕𑒪 𑒏𑒼𑒙𑒰𑒏 𑒠𑒼𑒏𑒰𑒢 𑒥𑒪𑒰 𑒮𑒦 𑒍𑒯𑒱 𑒢𑒴𑒂𑒏𑒹𑒿, 𑒮𑒹𑒯𑒼 𑒮𑒮𑓂𑒞𑒧𑒹 𑒦𑒹𑒙𑒱 𑒖𑒰𑒃𑒞 𑒕𑒪𑒢𑓂𑒯𑒱, 𑒍𑒯𑒱 𑒏𑒼𑒙𑒰 𑒥𑒪𑒰 𑒠𑒼𑒏𑒰𑒢𑒮𑒿। 𑒩𑒢𑒹-𑒥𑒢𑒹 𑒑𑒰𑒕𑒲𑒧𑒹 𑒒𑒳𑒧𑒋 𑒣𑒛𑓃𑒻𑒞 𑒕𑒪𑒢𑓂𑒯𑒱 𑒖𑒰𑒩𑒢𑒱𑒏 𑒪𑒹𑒪। 𑒑𑒰𑒧𑒧𑒹 𑒮𑒦𑒏 𑒑𑒳𑒖𑒩 𑒏𑒼𑒯𑒳𑒢𑒰𑒏𑒹𑒿 𑒦𑓄 𑒖𑒰𑒃𑒞 𑒕𑒻𑒏 ।
𑒂 𑒋𑒧𑓂𑒯𑒩 𑒚𑒹𑒏𑒹𑒠𑒰𑒩 𑒮𑒰𑒯𑒹𑒥 𑒣𑒻𑒒 𑒥𑒹𑒙𑒰𑒏𑒹𑒿 𑒮𑒧𑒨 𑒣𑒩 𑒣𑒰𑒃 𑒣𑒚𑒹𑒥𑒰𑒏 𑒁𑒞𑒱𑒩𑒱𑒏𑓂𑒞𑓂𑒞 𑒁𑒣𑒢 𑒮𑒦 𑒏𑒩𑓂𑒞𑓂𑒞𑒫𑓂𑒨 𑒥𑒱𑒮𑒩𑒱 𑒑𑒹𑒪 𑒕𑒪𑒰𑒯। 𑒏𑒧𑒰𑒅 𑒂 𑒐𑒰𑒅 𑒕𑒪 𑒧𑒰𑒞𑓂𑒩 𑒯𑒳𑒢𑒏𑒩 𑒧𑓀𑒞𑓂𑒩। 𑒑𑒰𑒧-𑒒𑒩𑒮𑒿 𑒏𑒼𑒢𑒼 𑒧𑒞𑒪𑒥𑒹 𑒢𑒻।
𑒠𑓂𑒫𑒱𑒖𑒹𑒢𑓂𑒠𑓂𑒩 𑒃𑒪𑒰𑒯𑒰𑒥𑒰𑒠 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒮𑒦𑒏 𑒂𑒠𑒩𑓂𑒬 𑒥𑒢𑒱 𑒑𑒹𑒪 𑒕𑒪𑒰𑒯। 𑒃𑒞𑒱𑒯𑒰𑒮 𑒫𑒱𑒭𑒨𑒏 𑒞𑒱𑒟𑒱 𑒮𑒦 𑒯𑒳𑒢𑒏𑒩 𑒮𑓀𑒑𑒲 𑒥𑒢𑒱 𑒑𑒹𑒪 𑒕𑒪। 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒣𑓂𑒩𑒟𑒧 𑒞𑒿 𑒁𑒥𑒱𑒞𑒹 𑒩𑒯𑒟𑒱, 𑒮𑓀𑒑𑒯𑒱 𑒯𑒳𑒢𑒏𑒩 𑒔𑒰𑒪𑒱-𑒔𑒪𑒢, 𑒑𑒳𑒩𑒳-𑒑𑒧𑓂𑒦𑒲𑒩 𑒮𑓂𑒫𑒦𑒰𑒫, 𑒣𑒩𑒱𑒣𑒏𑓂𑒫 𑒧𑒰𑒢𑒮𑒱𑒏𑒞𑒰 𑒋𑒯𑒱 𑒮𑒦𑒮𑒿 𑒮𑒦 𑒏𑓂𑒨𑒼 𑒣𑓂𑒩𑒦𑒰𑒫𑒱𑒞 𑒩𑒯𑒻𑒞 𑒕𑒪। 𑒮𑓀𑒑𑒲-𑒮𑒰𑒟𑒲 𑒮𑒹𑒯𑒼 𑒏𑒧𑓂𑒧𑒹 𑒕𑒪𑒢𑓂𑒯𑒱। 𑒋𑒏𑒙𑒰 𑒮𑓀𑒑𑒲 𑒕𑒪𑒢𑓂𑒯𑒱 𑒅𑒣𑒹𑒢𑓂𑒠𑓂𑒩 𑒂 𑒋𑒏𑒙𑒰 𑒂𑒪𑒼𑒏। 𑒧𑒯𑒱𑒪𑒰 𑒮𑓀𑒑𑒲 𑒏𑒼𑒢𑒼𑒙𑒰 𑒢𑒻।
𑒂 𑒮𑒹 𑒍 𑒮𑒦 𑒏𑒯𑒱𑒞𑒼 𑒕𑒪𑒲𑒯 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒞𑒿 𑒒𑒳𑒩𑒱 𑒞𑒏𑒱𑒞𑒼 𑒢𑒻 𑒕𑒟𑒱। 𑒍𑒯𑒱𑒧𑒹 𑒋𑒏𑒙𑒰 𑒕𑒪𑒲𑒯 𑒁𑒩𑒳𑒢𑓂𑒡𑒞𑒲।𑒣𑒜𑓃𑒥𑒰𑒧𑒹 𑒞𑒹𑒖, 𑒩𑒰𑒖𑒢𑒲𑒞𑒱 𑒫𑒱𑒖𑓂𑒘𑒰𑒢𑒏 𑒫𑒱𑒠𑓂𑒨𑒰𑒩𑓂𑒟𑒲। 𑒣𑓂𑒩𑒞𑒱𑒨𑒼𑒑𑒲 𑒮𑓂𑒫𑒦𑒰𑒫𑒏 𑒕𑒪𑒲𑒯। 𑒥𑒰𑒣𑒏 𑒠𑒳𑒪𑒰𑒩𑒴 𑒂 𑒣𑒱𑒞𑒰𑒏𑒹𑒿 𑒯𑒳𑒢𑒏𑒰 𑒣𑒩 𑒮𑒹𑒯𑒼 𑒁𑒮𑒲𑒧 𑒫𑒱𑒬𑓂𑒫𑒰𑒮 𑒕𑒪𑒢𑓂𑒯𑒱।𑒋𑒛𑒫𑒰𑒢𑓂𑒮 𑒏𑒯𑒱 𑒮𑒏𑒻𑒞 𑒕𑒲। 𑒠𑓂𑒫𑒱𑒖𑒹𑒢𑓂𑒠𑓂𑒩𑒮𑒿 𑒥𑒯𑒳𑒞 𑒥𑒱𑒢𑓂𑒠𑒳 𑒣𑒩 𑒮𑒳𑒗𑒰𑒫𑒏 𑒂𑒏𑒰𑓀𑒏𑓂𑒭𑒲 𑒕𑒪𑒲𑒯। 𑒧𑒳𑒠𑒰 𑒠𑓂𑒫𑒱𑒖𑒹𑒢𑓂𑒠𑓂𑒩 𑒞𑒿 𑒠𑒼𑒮𑒩𑒹 𑒪𑒼𑒏 𑒕𑒪𑒰𑒯। 𑒯𑒳𑒢𑒏𑒩 𑒒𑒩𑒏 𑒏𑒼𑒢𑒼 𑒑𑒣 𑒞𑒿 𑒏𑒏𑒩𑒼 𑒥𑒳𑒗𑒪 𑒢𑒻 𑒩𑒯𑒻𑒏। 𑒧𑒳𑒠𑒰 𑒮𑒹 𑒏𑒰𑒩𑒝 𑒕𑒪 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩 𑒮𑒦𑒏 𑒣𑓂𑒩𑒞𑒱 𑒢𑒱𑒩𑒣𑒹𑒏𑓂𑒭 𑒩𑒯𑒻𑒞 𑒕𑒪𑒰𑒯।
“𑒨𑒾 𑒅𑒣𑒹𑒢𑓂𑒠𑓂𑒩। 𑒩𑒰𑒖𑒢𑒲𑒞𑒱 𑒫𑒱𑒖𑓂𑒘𑒰𑒢𑒧𑒹 𑒞𑒿 𑒯𑒧𑒩𑒰 𑒏𑒼𑒢𑒼 𑒠𑒱𑒏𑓂𑒏𑒞 𑒢𑒻 𑒁𑒕𑒱 𑒧𑒳𑒠𑒰 𑒃𑒞𑒱𑒯𑒰𑒮𑒧𑒹 𑒞𑒱𑒟𑒱 𑒂 𑒠𑒵𑒭𑓂𑒙𑒱𑒏𑒼𑒝𑒮𑒿 𑒥𑒛𑓂𑒛 𑒠𑒱𑒏𑓂𑒏𑒞𑒱𑒧𑒹 𑒣𑒛𑓃𑒱 𑒑𑒹𑒪 𑒕𑒲”।𑒁𑒩𑒳𑒢𑓂𑒡𑒞𑒲 𑒅𑒣𑒹𑒢𑓂𑒠𑓂𑒩𑒮𑒿 𑒣𑒳𑒕𑒪𑒢𑓂𑒯𑒱।
𑒂 𑒠𑒳𑒢𑒴 𑒑𑒼𑒙𑒹 𑒃𑒞𑒱𑒯𑒰𑒮 𑒣𑒩 𑒁𑒣𑒢-𑒁𑒣𑒢 𑒠𑒵𑒭𑓂𑒙𑒱𑒏𑒼𑒝 𑒋𑒏 𑒠𑒼𑒮𑒩𑒏𑒹𑒿 𑒠𑒹𑒥𑒋 𑒪𑒑𑒪𑒟𑒱।𑒩𑒰𑒮𑒥𑒱𑒯𑒰𑒩𑒲 𑒥𑒼𑒮 𑒂𑒖𑒰𑒠 𑒯𑒱𑒢𑓂𑒠 𑒤𑒾𑒖𑒏 𑒮𑓂𑒟𑒰𑒣𑒢𑒰 𑒏𑒋𑒪𑒢𑓂𑒯𑒱 𑒮𑒳𑒦𑒰𑒭 𑒔𑒢𑓂𑒠𑓂𑒩 𑒥𑒼𑒮 𑒢𑒻 𑒂 𑒢𑒲𑒪𑒏 𑒐𑒹𑒞𑒲𑒏 𑒯𑒹𑒞𑒳 𑒮𑒩𑒐𑒹𑒖 𑒖𑒹 𑒑𑒳𑒖𑒩𑒰𑒞𑒧𑒹 𑒕𑒪 𑒥𑒛𑓂𑒛 𑒣𑓂𑒩𑒮𑒱𑒠𑓂𑒡 𑒕𑒪, 𑒡𑒼𑒪𑒰𑒫𑒲𑒩 𑒮𑒦𑒮𑒿 𑒣𑒻𑒒 𑒮𑒱𑒢𑓂𑒡𑒳 𑒒𑒰𑒙𑒲 𑒂𑒏𑒱 𑒮𑒩𑒮𑓂𑒫𑒞𑒲 𑒢𑒠𑒲 𑒮𑒦𑓂𑒨𑒞𑒰𑒏 𑒮𑓂𑒟𑒪 𑒕𑒪 𑒂 𑒠𑒰𑒩𑒰 𑒬𑒱𑒏𑒼𑒯𑒏𑒹𑒿 𑒮𑒦𑒮𑒿 𑒣𑒻𑒒 𑒧𑒢𑒮𑒥 𑒠𑒹𑒪 𑒑𑒹𑒪 𑒕𑒪 । 𑒅𑒣𑒹𑒢𑓂𑒠𑓂𑒩 𑒄 𑒮𑒦 𑒑𑒣 𑒠𑓂𑒫𑒱𑒖𑒹𑒢𑓂𑒠𑓂𑒩𑒮𑒿 𑒣𑒴𑒕𑒱 𑒏𑒋 𑒂𑒥𑒟𑒱 𑒂 𑒤𑒹𑒩 𑒁𑒩𑒳𑒢𑓂𑒡𑒞𑒲𑒮𑒿 𑒫𑒰𑒩𑓂𑒞𑓂𑒞𑒰𑒪𑒰𑒣 𑒏𑒩𑒟𑒱। 𑒋𑒯𑒱𑒧𑒹 𑒮𑒧𑒨𑒏 𑒯𑒰𑒢𑒱 𑒯𑒼𑒃𑒞 𑒕𑒪𑒢𑓂𑒯𑒱, 𑒮𑒹 𑒅𑒣𑒹𑒢𑓂𑒠𑓂𑒩 𑒏𑒯𑒪𑒢𑓂𑒯𑒱 𑒖𑒹 𑒏𑒱𑒋𑒏 𑒢𑒻 𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒮𑒹𑒯𑒼 𑒁𑒣𑒢 𑒮𑒧𑒴𑒯𑒧𑒹 𑒬𑒰𑒧𑒱𑒪 𑒏𑒋 𑒪𑒹𑒪 𑒖𑒰𑒨।
“𑒧𑒰𑒞𑓂𑒩 𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒬𑒰𑒧𑒱𑒪 𑒏𑒩𑒴। 𑒥𑒹𑒬𑒲 𑒑𑒼𑒙𑒹𑒏𑒹𑒿 𑒂𑒢𑒥 𑒞𑒿 𑒣𑒜𑓃𑒰𑒃 𑒏𑒧 𑒂 𑒑𑒣 𑒮𑒩𑒏𑓂𑒏𑒰 𑒥𑒹𑒬𑒲 𑒯𑒼𑒋𑒞”। 𑒁𑒩𑒳𑒢𑓂𑒡𑒞𑒲𑒏 𑒄 𑒫𑒱𑒔𑒰𑒩 𑒥𑒢𑒪।
𑒅𑒣𑒹𑒢𑓂𑒠𑓂𑒩𑒏 𑒏𑒯𑒪𑒰𑒮𑒿 𑒠𑓂𑒫𑒱𑒖𑒹𑒢𑓂𑒠𑓂𑒩 𑒂𑒥𑒋 𑒪𑒑𑒪𑒰𑒯, 𑒍𑒯𑒱 𑒮𑒰𑒧𑒴𑒯𑒱𑒏 𑒁𑒡𑓂𑒨𑒨𑒢𑒧𑒹।

𑒞𑒰𑒫𑒞 𑒋𑒏 𑒠𑒱𑒢 𑒮𑒧𑒰𑒔𑒰𑒩 𑒂𑒋𑒪 𑒖𑒹 𑒣𑒱𑒞𑒰𑒏 𑒧𑒼𑒢 𑒥𑒛𑓂𑒛 𑒐𑒩𑒰𑒥 𑒕𑒢𑓂𑒯𑒱। 𑒣𑒯𑒳𑒿𑒔𑒪𑒰𑒯 𑒞𑒿 𑒪𑒲𑒫𑒩 𑒐𑒩𑒰𑒥 𑒯𑒼𑒋𑒥𑒰𑒏 𑒮𑒧𑒰𑒔𑒰𑒩 𑒦𑒹𑒙𑒪𑒢𑓂𑒯𑒱। 𑒮𑒞𑒧𑒰𑒋𑒮𑒿 𑒮𑒹𑒯𑒼 𑒦𑒹𑒿𑒙 𑒦𑒹𑒪𑒢𑓂𑒯𑒱।𑒑𑒰𑒧-𑒒𑒩 𑒣𑒩 𑒏𑒼𑒢𑒼 𑒐𑒥𑒩𑒱 𑒢𑒻। 𑒤𑒹𑒩 𑓑𑓕 𑒠𑒱𑒢𑒧𑒹 𑒧𑒵𑒞𑓂𑒨𑒳 𑒦𑓄 𑒑𑒹𑒪𑒢𑓂𑒯𑒱 𑒣𑒱𑒞𑒰𑒏। 𑒑𑒰𑒧 𑒣𑒩 𑒞𑒐𑒢 𑒖𑒰 𑒏𑒋 𑒐𑒥𑒩𑒱 𑒦𑒹𑒪। 𑒢𑒻 𑒞𑒿 𑒏𑒼𑒢𑒼 𑒣𑒞𑒰, 𑒢𑒯𑒱𑒨𑒹 𑒏𑒼𑒢𑒼 𑒤𑒼𑒢। 𑒧𑒰𑒋 𑒥𑒹𑒔𑒰𑒩𑒲 𑒏𑒢𑒻𑒞 𑒩𑒯𑒱 𑒑𑒹𑒪𑒲𑒯। 𑒥𑒹𑒙𑒰 𑒠𑒰𑒯-𑒮𑓀𑒮𑓂𑒏𑒰𑒩𑒏 𑒥𑒰𑒠 𑒮𑒼𑒗𑒹 𑒣𑓂𑒩𑒨𑒰𑒑 𑒔𑒪𑒱 𑒑𑒹𑒪𑒰𑒯। 𑒑𑒰𑒧 𑒒𑒳𑒩𑒱𑒨𑒼 𑒏𑓄 𑒢𑒻 𑒑𑒹𑒪𑒰𑒯।
𑒧𑒰𑒋𑒏 𑒐𑒱𑒮𑓂𑒮𑒰 𑒨𑒻𑒯 𑒁𑒕𑒱 𑒖𑒹 𑒤𑒹𑒩 𑒍 𑒑𑒳𑒧-𑒬𑒳𑒧 𑒩𑒯𑒋 𑒪𑒑𑒪𑒲𑒯। 𑒏𑒼𑒢𑒼 𑒔𑒲𑒖𑒏 𑒚𑒹𑒏𑒰𑒢 𑒢𑒻 𑒩𑒯𑒢𑓂𑒯𑒱। 𑒋𑒏 𑒥𑒹𑒩 𑒞𑒿 𑒛𑒱𑒥𑒱𑒨𑒰 𑒮𑒿 𑒔𑒰𑒩𑒏 𑒒𑒩𑒧𑒹 𑒞𑒹𑒯𑒢 𑒂𑒑𑒱 𑒪𑒰𑒑𑒱 𑒑𑒹𑒪 𑒖𑒹 𑒮𑒾𑒿𑒮𑒹 𑒙𑒼𑒪 𑒖𑒩𑒱 𑒑𑒹𑒪। 𑒍𑒯𑒱 𑒮𑒧𑒨𑒧𑒹 𑒮𑒦𑒏𑒹𑒿 𑒔𑒰𑒩𑒏 𑒒𑒩 𑒩𑒯𑒻𑒏। 𑒮𑒦 𑒒𑒩 𑒋𑒏 𑒠𑒼𑒮𑒩𑒮𑒿 𑒮𑒙𑒪। 𑒮𑒹 𑒮𑒾𑓀𑒮𑒹 𑒙𑒼𑒪 𑒖𑒩𑒱 𑒑𑒹𑒪। 𑒮𑒦 𑒏𑒯𑒋 𑒂𑒏𑒱 𑒥𑒢𑒞𑒲 𑒥𑒢𑒰𑒥𑒋 𑒖𑒹 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒧𑒰𑒋 𑒅𑒣𑒢𑓂𑒨𑒰𑒮 𑒣𑒜𑓃𑒻𑒞-𑒣𑒜𑓃𑒻𑒞 𑒮𑒳𑒞𑒱 𑒑𑒹𑒪𑒲𑒯 𑒂 𑒛𑒱𑒥𑒱𑒨𑒰𑒧𑒹 𑒯𑒰𑒟 𑒪𑒰𑒑𑒱 𑒑𑒹𑒪𑒢𑓂𑒯𑒱।𑒮𑒾𑒿𑒮𑒹 𑒙𑒼𑒪 𑒖𑒩𑒻𑒞 𑒩𑒯𑒋 𑒂 𑒍 𑒦𑒹𑒩 𑒡𑒩𑒱 𑒮𑒴𑒞𑒪 𑒩𑒯𑒪𑒲𑒯। 𑒏𑒏𑒩𑒼 𑒤𑒳𑒩𑒹𑒪𑒃 𑒞𑒿 𑒯𑒳𑒢𑒏𑒰 𑒅𑒚𑒰-𑒣𑒳𑒚𑒰 𑒏𑓄 𑒥𑒰𑒯𑒩 𑒏𑒋𑒪𑒏। 𑒥𑒰𑒠𑒧𑒹 𑒯𑒳𑒢𑒏𑒩 𑒂𑒩𑒼 𑒁𑒫𑒯𑒹𑒪𑒢𑒰 𑒯𑒼𑒧𑒋 𑒪𑒑𑒪𑒢𑓂𑒯𑒱। 𑒪𑒼𑒏 𑒑𑒰𑒩𑒱 𑒮𑒹𑒯𑒼 𑒣𑒜𑓃𑒱 𑒠𑒹𑒢𑒹 𑒕𑒪𑒢𑓂𑒯𑒱 𑒏𑒞𑒰𑒏 𑒥𑒹𑒩।
𑒍𑒯𑒱𑒢𑒰𑒧𑒹 𑒋𑒏 𑒥𑒹𑒩 𑒖𑒰𑒛𑓃𑒏 𑒗𑒣𑒮𑒲𑒧𑒹 𑒑𑒳𑒖𑒩𑒱 𑒑𑒹𑒪𑒲𑒯। 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒣𑒞𑒰 𑒮𑒹𑒯𑒼 𑒢𑒻 𑒕𑒪𑒢𑓂𑒯𑒱 𑒏𑒏𑒩𑒼 𑒪𑒑। 𑒒𑒩𑒰𑒩𑒲𑒏 𑒪𑒼𑒦𑒧𑒹 𑒋𑒏 𑒑𑒼𑒙 𑒮𑒧𑒰𑒓 𑒂𑒑𑒱 𑒠𑒹𑒪𑒏𑒢𑓂𑒯𑒱।

𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒢𑒱𑒏𑒙𑒞𑒰 𑒁𑒩𑒳𑒢𑓂𑒡𑒞𑒲𑒮𑒿 𑒥𑒜𑓃𑒋 𑒪𑒑𑒪𑒢𑓂𑒯𑒱। 𑒅𑒣𑒹𑒢𑓂𑒠𑓂𑒩𑒏𑒹𑒿 𑒁𑒩𑒳𑒢𑓂𑒡𑒞𑒲 𑒋𑒏 𑒥𑒹𑒩 𑒏𑒯𑒱𑒨𑒼 𑒠𑒹𑒪𑒐𑒱𑒢𑓂𑒯 𑒖𑒹 𑒁𑒯𑒰𑒿 𑒮𑒲𑒜𑓃𑒲 𑒕𑒪𑒯𑒳𑒿 𑒯𑒧𑒩 𑒂 𑒠𑓂𑒫𑒱𑒖𑒹𑒢𑓂𑒠𑓂𑒩𑒏 𑒥𑒲𑒔𑒧𑒹।
𑒁𑒩𑒳𑒢𑓂𑒡𑒞𑒲𑒏 𑒧𑒰𑒋 𑒮𑒹𑒯𑒼 𑒥𑒔𑓂𑒔𑒹𑒧𑒹 𑒑𑒳𑒖𑒩𑒱 𑒑𑒹𑒪 𑒕𑒪𑒲𑒯। 𑒣𑒱𑒞𑒰𑒏 𑒠𑒳𑒪𑒩𑒲 𑒕𑒪𑒲𑒯𑒹 𑒍। 𑒁𑒩𑒳𑒢𑓂𑒡𑒞𑒲𑒏 𑒏𑒯𑒪𑒰 𑒣𑒩 𑒠𑓂𑒫𑒱𑒖𑒹𑒢𑓂𑒠𑓂𑒩 𑒂𑒥𑒱 𑒑𑒹𑒪𑒰𑒯 𑒯𑒳𑒢𑒏𑒰 𑒒𑒩 𑒣𑒩 𑒩𑒯𑒥𑒰𑒏 𑒪𑒹𑒪। 𑒮𑓀𑒑𑒹 𑒣𑒜𑓃𑒪𑒢𑓂𑒯𑒱 𑒂 𑒤𑒹𑒩 𑒠𑒳𑒢𑒴 𑒑𑒼𑒙𑒹 𑒣𑓂𑒩𑒨𑒰𑒑 𑒫𑒱𑒬𑓂𑒫𑒫𑒱𑒠𑓂𑒨𑒰𑒪𑒨𑒧𑒹 𑒣𑓂𑒩𑒼𑒤𑒹𑒮𑒩 𑒥𑒢𑒱 𑒑𑒹𑒪𑒰𑒯।𑒫𑒱𑒫𑒰𑒯 𑒮𑒹𑒯𑒼 𑒦𑓄 𑒑𑒹𑒪𑒢𑓂𑒯𑒱। 𑒧𑒰𑒞𑓂𑒩 𑒧𑒡𑒳𑒥𑒢𑒲𑒏 𑒋𑒏 𑒑𑒼𑒙 𑒣𑒲𑒮𑒰𑒏𑒹𑒿 𑒥𑒳𑒗𑒪 𑒕𑒪𑒢𑓂𑒯𑒱 𑒯𑒱𑒢𑒏𑒩 𑒫𑒱𑒫𑒰𑒯𑒏 𑒫𑒱𑒭𑒨𑒧𑒹।𑒣𑒲𑒮𑒰 𑒕𑒪𑒰𑒯 𑒣𑒞𑓂𑒩𑒏𑒰𑒩 𑒂 𑒧𑒡𑒳𑒥𑒢𑒲𑒏 𑒏𑒼𑒢𑒼 𑒯𑒰𑒮𑓂𑒣𑒲𑒙𑒪𑒧𑒹 𑒏𑒰𑒖 𑒏𑒹𑒢𑒯𑒰𑒩𑒱 𑒏𑒹𑒩𑒪𑒏 𑒢𑒩𑓂𑒮 𑒮𑒿 𑒞𑒰𑒯𑒱 𑒖𑒧𑒰𑒢𑒰𑒧𑒹 𑒫𑒱𑒫𑒰𑒯 𑒏𑒋𑒢𑒹 𑒕𑒪𑒰𑒯।𑒒𑒩 𑒣𑒩𑒱𑒫𑒰𑒩 𑒯𑒳𑒢𑒏𑒰 𑒮𑒹𑒯𑒼 𑒥𑒰𑒩𑒱 𑒖𑒹𑒏𑒰𑒿 𑒠𑒹𑒢𑒹 𑒕𑒪𑒢𑓂𑒯𑒱। 𑒧𑒳𑒠𑒰 𑒕𑒪𑒰𑒯 𑒥𑒛𑓂𑒛 𑒢𑒲𑒏 𑒪𑒼𑒏।
𑒠𑓂𑒫𑒱𑒖𑒹𑒢𑓂𑒠𑓂𑒩𑒏𑒹𑒿 𑒫𑒻𑒯 𑒥𑒹𑒩-𑒥𑒐𑒞 𑒣𑒩 𑒏𑒯𑒱𑒨𑒼 𑒏𑒰𑒪 𑒧𑒠𑒞𑒱 𑒏𑒩𑒻𑒞 𑒕𑒪𑒰𑒯।𑒧𑒳𑒠𑒰 𑒫𑒱𑒫𑒰𑒯𑒧𑒹 𑒍𑒯𑒼 𑒢𑒻 𑒁𑒋𑒪𑒰𑒯।𑒁𑒣𑒢 𑒮𑒪𑒰𑒯 𑒠𑒹𑒢𑒹 𑒕𑒪𑒰𑒯 𑒋𑒯𑒱 𑒫𑒱𑒫𑒰𑒯𑒏 𑒫𑒱𑒩𑒳𑒠𑓂𑒡। 𑒁𑒣𑒢 𑒅𑒠𑒰𑒯𑒩𑒝 𑒠𑒹𑒪𑒢𑓂𑒯𑒱 𑒖𑒹 𑒏𑒞𑒹𑒏 𑒠𑒱𑒏𑓂𑒏𑒞 𑒦𑒹𑒪𑒢𑓂𑒯𑒱। 𑒧𑒳𑒠𑒰 𑒮𑓀𑒑𑒧𑒹 𑒄𑒯𑒼 𑒏𑒯𑒪𑒢𑓂𑒯𑒱 𑒖𑒹 𑒁𑒯𑒰𑒿𑒏𑒹𑒿 𑒞𑒿 𑒥𑒰𑒯𑒩 𑒩𑒯𑒥𑒰𑒏 𑒁𑒕𑒱, 𑒮𑒹 𑒍𑒞𑒹𑒏 𑒠𑒱𑒏𑓂𑒏𑒞 𑒢𑒻 𑒯𑒼𑒋𑒞। 𑒯𑒧 𑒞𑒿 𑒧𑒡𑒳𑒥𑒢𑒲𑒧𑒹 𑒩𑒯𑒻𑒞 𑒕𑒪𑒯𑒳𑒿, 𑒏𑒯𑒱𑒨𑒼 𑒏𑒢𑒱𑒨𑒰𑒏𑒹𑒿 𑒑𑒰𑒧𑒼 𑒢𑒻 𑒪𑓄 𑒖𑒰 𑒮𑒏𑒪𑒯𑒳𑒿।
𑒠𑓂𑒫𑒱𑒖𑒹𑓀𑒢𑓂𑒠𑓂𑒩𑒏 𑒩𑒱𑒮𑒩𑓂𑒔 𑒣𑒩 𑒩𑒱𑒮𑒩𑓂𑒔 𑒣𑓂𑒩𑒏𑒰𑒬𑒱𑒞 𑒯𑒼𑒃𑒞 𑒑𑒹𑒪𑒢𑓂𑒯𑒱। 𑒠𑒹𑒬-𑒫𑒱𑒠𑒹𑒬𑒧𑒹 𑒮𑒹𑒧𑒲𑒢𑒰𑒩 𑒣𑒩 𑒖𑒰𑒟𑒱। 𑒁𑒩𑒳𑒢𑓂𑒡𑒞𑒲 𑒖𑒹𑒢𑒰 𑒥𑒹𑒩 𑒣𑒩 𑒧𑒠𑒞𑒱 𑒏𑒋𑒢𑒹 𑒕𑒪𑒲𑒯 𑒞𑒏𑒩𑒰 𑒥𑒰𑒠 𑒠𑓂𑒫𑒱𑒖𑒹𑒢𑓂𑒠𑓂𑒩 𑒁𑒣𑒢𑒰 𑒣𑒩 𑒦𑒩𑒼𑒮 𑒏𑒋𑒢𑒰𑒃 𑒕𑒼𑒛𑓃𑒱 𑒠𑒹𑒢𑒹 𑒕𑒪𑒰𑒯। 𑒫𑒰𑒧𑒣𑓀𑒟𑒲 𑒃𑒞𑒱𑒯𑒰𑒮𑒏𑒰𑒩𑒏 𑒩𑒴𑒣𑒧𑒹 𑒕𑒫𑒱 𑒥𑒢𑒰 𑒏𑒋 𑒧𑒰𑒞𑓂𑒩 𑒃𑒞𑒱𑒯𑒰𑒮 𑒂 𑒣𑒳𑒩𑒰𑒞𑒞𑓂𑒞𑓂𑒫 𑒮𑒿 𑒮𑒧𑓂𑒣𑒩𑓂𑒏 𑒥𑒢𑒍𑒢𑒹 𑒕𑒪𑒰𑒯। 𑒮𑒰𑒪𑒏-𑒮𑒰𑒪 𑒥𑒱𑒞𑒻𑒞 𑒑𑒹𑒪। 𑒑𑒰𑒧𑒏 𑒪𑒼𑒏𑒧𑒹 𑒧𑒰𑒞𑓂𑒩 𑒪𑒰𑒪 𑒕𑒪𑒰𑒯 𑒖𑒹 𑒍𑒯𑒱 𑒢𑒑𑒩𑒧𑒹 𑒩𑒯𑒻𑒞 𑒕𑒪𑒰𑒯 𑒂 𑒏𑒯𑒱𑒨𑒼 𑒏𑒰𑒪 𑒍 𑒦𑒹𑒿𑒙 𑒏𑓄 𑒁𑒥𑒻𑒞 𑒕𑒪𑒐𑒱𑒢𑓂𑒯।
𑒪𑒰𑒪𑒏 𑒑𑒣 𑒣𑒩 𑒁𑒢𑒳𑒞𑓂𑒞𑒩𑒱𑒞 𑒦𑓄 𑒖𑒰𑒃𑒞 𑒕𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩। 𑒧𑒰𑒋𑒏 𑒏𑒼𑒢𑒼 𑒔𑒩𑓂𑒔𑒰 𑒣𑒩 𑒢𑒼𑒩 𑒣𑒲𑒥𑒱 𑒖𑒰𑒃𑒞 𑒕𑒪𑒰𑒯। 𑒮𑒼𑒔𑒢𑒹 𑒩𑒯𑒟𑒱 𑒖𑒹 𑒏𑒱𑒕𑒳 𑒥𑒢𑒱 𑒖𑒋𑒞𑒰𑒯 𑒞𑒿 𑒧𑒰𑒋𑒏𑒹𑒿 𑒮𑓀𑒑 𑒂𑒢𑒱 𑒩𑒐𑒱𑒞𑒟𑒱 𑒂 𑒮𑒦 𑒣𑒰𑒣𑒏 𑒣𑒬𑓂𑒔𑒰𑒞𑒰𑒣 𑒏𑓄 𑒪𑒱𑒞𑒟𑒱। 𑒧𑒳𑒠𑒰 𑒨𑒰𑒫𑒞 𑒁𑒣𑒢 𑒐𑒩𑓂𑒔𑒰 𑒢𑒻 𑒖𑒳𑒧𑒢𑓂𑒯𑒱 𑒞𑒰𑒫𑒞 𑒞𑒿 𑒍 𑒖𑒲𑒫𑒱𑒞 𑒩𑒯𑒪𑒲𑒯 𑒂 𑒖𑒐𑒢 𑒏𑒱𑒕𑒳 𑒥𑒢𑒪𑒰𑒯 𑒞𑒿 𑒞𑒏𑒩 𑒣𑒯𑒱𑒢𑒯𑒱 𑒕𑒼𑒛𑓃𑒱 𑒑𑒹𑒪𑒲𑒯। 𑒏𑒼𑒢 𑒧𑒳𑒿𑒯 𑒏𑒏𑒩𑒰 𑒠𑒹𑒐𑒹𑒞𑒟𑒱।

𑒂 𑒖𑒐𑒢 𑒪𑒰𑒪 𑒣𑒯𑒳𑒿𑒔𑒪𑒰𑒯 𑒯𑒳𑒢𑒏𑒰 𑒪𑒑𑒧𑒹 𑒄 𑒥𑒖𑒻𑒞 𑒖𑒹 𑒪𑒱𑒨𑒯, 𑒦𑒰𑒞𑒱𑒖 𑒂𑒋𑒪 𑒕𑒟𑒱 𑒦𑒹𑒿𑒙 𑒏𑒩𑒥𑒰𑒏 𑒯𑒹𑒞𑒳, 𑒁𑒯𑒰𑒿 𑒞𑒿 𑒏𑒼𑒢𑒼 𑒮𑒩𑒼𑒏𑒰𑒩 𑒏𑒏𑒩𑒼𑒮𑒿 𑒩𑒐𑒥𑒹 𑒢𑒻 𑒏𑒋𑒪𑒯𑒳𑒿, 𑒞𑒿 𑒣𑒯𑒱𑒪 𑒥𑒹𑒩 𑒥𑒖𑒪𑒰𑒯 𑒠𑓂𑒫𑒱𑒖𑒹𑒢𑓂𑒠𑓂𑒩-
“𑒏𑒼𑒢 𑒮𑒩𑒼𑒏𑒰𑒩 𑒧𑒰𑒋𑒮𑒿 𑒣𑒻𑒒 𑒕𑒪 𑒨𑒾 𑒪𑒰𑒪 । 𑒖𑒹 𑒁𑒯𑒰𑒿 𑒏𑒯𑒻𑒞 𑒕𑒲 𑒖𑒹 𑒯𑒧 𑒏𑒏𑒩𑒼𑒮𑒿 𑒮𑒩𑒼𑒏𑒰𑒩 𑒢𑒻 𑒩𑒐𑒢𑒹 𑒕𑒲”।










𑒯𑒩𑒰𑒯𑒩𑒲
𑒬𑒰𑒢𑓂𑒞, 𑒡𑓂𑒨𑒰𑒢𑒧𑒑𑓂𑒢।
𑒁𑒮𑒑𑒩।
𑒍𑒃 𑒂𑒤𑒱𑒮𑒏 𑒏𑒼𑒚𑒪𑒲𑒧𑒹 𑒮𑒰𑒞 𑒑𑒼𑒙𑒹 𑒥𑒻𑒮𑒻𑒋। 𑒕𑒯 𑒑𑒼𑒙𑒹 𑒮𑓀𑒑𑒹-𑒮𑓀𑒑 𑒯𑒿𑒮𑒻𑒋, 𑒗𑒑𑒛𑓃𑒰 𑒏𑒩𑒻𑒋। 𑒧𑒳𑒠𑒰 𑒍 𑒁𑒮𑒑𑒩 𑒬𑒰𑒢𑓂𑒞 𑒩𑒯𑒻𑒋, 𑒢𑒯𑒱𑒨𑒹 𑒯𑒿𑒮𑒻𑒋, 𑒢𑒯𑒱𑒨𑒹 𑒗𑒑𑒛𑓃𑒰 𑒏𑒩𑒻𑒋। 𑒍𑒏𑒩 𑒕𑒥𑒼 𑒮𑒯𑒏𑒩𑓂𑒧𑒲 𑒍𑒏𑒩𑒰 𑒠𑒰𑒩𑓂𑒬𑒢𑒱𑒏 𑒏𑒯𑒻 𑒕𑒻, 𑒧𑒳𑒠𑒰 𑒣𑒩𑒼𑒏𑓂𑒭𑒧𑒹। 𑒁𑒯𑒰𑒿 𑒥𑒯𑒩𑒱𑒨𑒰 𑒕𑒲, 𑒖𑒿 𑒍𑒏𑒩𑒰𑒮𑒿 𑒏𑒱𑒕𑒳 𑒣𑒳𑒕𑒥𑒻 𑒞𑒿 𑒍 𑒖𑒫𑒰𑒥 𑒠𑒹𑒞, 𑒁𑒯𑒰𑒿𑒏 𑒮𑒧𑒮𑓂𑒨𑒰𑒏 𑒮𑒧𑒰𑒡𑒰𑒢 𑒏𑒩𑒞। 𑒧𑒳𑒠𑒰 𑒢𑒹 𑒯𑒿𑒮𑒞, 𑒢𑒹 𑒧𑒳𑒮𑓂𑒏𑒲 𑒠𑒹𑒞। 𑒡𑒢𑓂𑒨𑒫𑒰𑒠 𑒠𑒹𑒥𑒻 𑒞𑒿 𑒖𑒫𑒰𑒥𑒼 𑒢𑒻 𑒠𑒹𑒞।
𑒧𑒳𑒠𑒰 𑒖𑒐𑒢 𑒍 𑒡𑒢𑓂𑒨𑒫𑒰𑒠𑒏 𑒖𑒫𑒰𑒥 𑒢𑒻 𑒠𑒹𑒪𑒏 𑒞𑒐𑒢 𑒯𑒧 𑒠𑒩𑒥𑒖𑓂𑒖𑒰𑒮𑒿 𑒣𑒪𑒙𑒱 𑒑𑒹𑒪𑒾𑓀, 𑒍𑒏𑒩𑒰 𑒠𑒱𑒮 𑒑𑒯𑒱𑓀𑒏𑒲 𑒢𑒖𑒩𑒱𑒮𑒿 𑒠𑒹𑒐𑒪𑒾𑓀। 𑒣𑒳𑒕𑒪𑒱𑒌-
“𑒔𑒾𑒥𑒹𑒖𑒲! 𑒁𑒯𑒰𑒿 𑒔𑒾𑒥𑒹𑒖𑒲 𑒕𑒲 𑒏𑒱𑒢𑒹?”
“𑒯𑒿, 𑒁𑒯𑒰𑒿𑒮𑒿 𑒯𑒧𑒩 𑒦𑒹𑒿𑒙 𑒦𑒹𑒪 𑒁𑒕𑒱। 𑒧𑒳𑒠𑒰 𑒏𑒞𑓄 𑒮𑒹 𑒧𑒼𑒢 𑒢𑒻।”
“𑒮𑒱𑒫𑒱𑒪 𑒮𑒹𑒫𑒰𑒏 𑒧𑒳𑒐𑓂𑒨 𑒣𑒩𑒲𑒏𑓂𑒭𑒰𑒏 𑒯𑒰𑒪𑒧𑒹।”
“𑒯𑒿, 𑒯𑒿। 𑒧𑒼𑒢 𑒣𑒛𑓃𑒱 𑒑𑒹𑒪𑒾𑓀।”
“𑒡𑒢𑓂𑒨𑒫𑒰𑒠।”
“𑒢𑒻 𑒏𑒼𑒢𑒼 𑒑𑒣 𑒢𑒻।”
𑒏𑒼𑒚𑒪𑒲𑒏 𑒠𑒩𑒥𑒖𑓂𑒖𑒰𑒮𑒿 𑒥𑒯𑒩𑒰 𑒖𑒰𑒃 𑒕𑒲। 𑒍𑒏𑒩 𑒕𑒥𑒼 𑒮𑒯𑒏𑒩𑓂𑒧𑒲 𑒠𑒩𑒥𑒖𑓂𑒖𑒹𑒣𑒩 𑒚𑒰𑒜𑓃 𑒦𑒹𑒙𑒱 𑒖𑒰𑒃 𑒕𑒟𑒱।
“𑒁𑒯𑒰𑒿 𑒏𑒋𑒏 𑒧𑒰𑒮𑒧𑒹 𑒣𑒯𑒱𑒪 𑒪𑒼𑒏 𑒕𑒲 𑒖𑒹𑒏𑒩𑒰 𑒯𑒧𑒩𑒰 𑒠𑒰𑒩𑓂𑒬𑒢𑒱𑒏 𑒡𑒢𑓂𑒨𑒫𑒰𑒠𑒏 𑒅𑒞𑓂𑒞𑒩 𑒠𑓄 𑒏𑒵𑒞𑒰𑒩𑓂𑒟 𑒏𑒹𑒪𑒏।”- 𑒧𑒼𑒯𑒪𑒲𑒮𑒾𑓀𑒤 𑒔𑒱𑒥𑒥𑒻𑒞 𑒋𑒏𑒙𑒰 𑒮𑒯𑒏𑒩𑓂𑒧𑒲 𑒥𑒖𑒻𑒋 𑒂 𑒬𑒹𑒭 𑒣𑒰𑒿𑒔𑒴 𑒧𑒳𑒮𑓂𑒏𑒲 𑒠𑒻𑒋। 𑒯𑒧 𑒂𑒑𑒰𑒿 𑒥𑒜𑓃𑒱 𑒖𑒰𑒃 𑒕𑒲। 𑒮𑒩𑒏𑒰𑒩𑒲 𑒏𑒻𑒝𑓂𑒙𑒲𑒢𑒮𑒿 𑒣𑓂𑒩𑒰𑒨𑓁 𑒄 𑒮𑒦 𑒒𑒳𑒩𑒪 𑒁𑒕𑒱। 𑒔𑒾𑒥𑒹𑒖𑒲𑒏𑒹𑒿 𑒮𑒹𑒯𑒼 𑒖𑒰𑒃𑒪𑒹 𑒏𑒯𑒢𑒹 𑒯𑒋𑒞, 𑒧𑒳𑒠𑒰 𑒍 𑒢𑒻 𑒧𑒰𑒢𑒢𑒹 𑒯𑒋𑒞, 𑒖𑒫𑒰𑒥𑒹 𑒢𑒻 𑒠𑒹𑒢𑒹 𑒯𑒋𑒞। 𑒧𑒰𑒢𑒪𑒏 𑒂𑒏𑒱 𑒢𑒻 𑒧𑒰𑒢𑒪𑒏 𑒮𑒹𑒯𑒼 𑒌 𑒕𑒥𑒼𑒏𑒹𑒿 𑒢𑒻 𑒥𑒳𑒗𑒰𑒋𑒪 𑒯𑒹𑒞𑒻। 𑒂𑒏𑒱 𑒄 𑒮𑒦 𑒯𑒧𑒩 𑒏𑒪𑓂𑒣𑒢𑒰 𑒕𑒲। 𑒧𑒼𑒢𑒏 𑒮𑒞𑓂𑒨, 𑒮𑒋𑒯 𑒢𑒹 𑒕𑒲 𑒏𑒪𑓂𑒣𑒢𑒰। 𑒞𑒐𑒢 𑒯𑒧𑒩 𑒏𑒪𑓂𑒣𑒢𑒰 𑒫𑒰𑒮𑓂𑒞𑒫𑒱𑒏 𑒞𑒟𑓂𑒨 𑒯𑒳𑒁𑒋 𑒥𑒰 𑒢𑒻, 𑒏𑒲 𑒁𑒢𑓂𑒞𑒩 𑒣𑒛𑓃𑒻𑒋?
𑒧𑒳𑒠𑒰 𑒄 𑒖𑒹 𑒠𑒰𑒩𑓂𑒬𑒢𑒱𑒏 𑒁𑒕𑒱 𑒮𑒹 𑒞𑒿 𑒏𑒱𑒨𑒼 𑒂𑒢𑒹 𑒁𑒕𑒱।
𑒯𑒰𑒪𑒧𑒹 𑒣𑒩𑒲𑒏𑓂𑒭𑒰 𑒠𑒹𑒥𑒰𑒮𑒿 𑒣𑒴𑒩𑓂𑒫 𑒋𑒏𑒩𑒰𑒮𑒿 𑒦𑒹𑒿𑒙 𑒦𑒹𑒪 𑒩𑒯𑒋। 𑒑𑒹𑒙𑒣𑒩 𑒢𑒻 𑒖𑒰𑒢𑒱 𑒏𑒼𑒢𑒰 𑒄 𑒯𑒧𑒩𑒰 𑒩𑒼𑒏𑒱 𑒠𑒹𑒢𑒹 𑒩𑒯𑒋। 𑒍𑒃 𑒮𑒧𑒋 𑒯𑒧 𑒠𑒰𑒩𑓂𑒬𑒢𑒱𑒏 𑒦𑒹𑒪 𑒏𑒩𑒻 𑒕𑒪𑒾𑓀। 𑒬𑒰𑒢𑓂𑒞, 𑒡𑓂𑒨𑒰𑒢𑒧𑒑𑓂𑒢 𑒂 𑒁𑒮𑒑𑒩। 𑒂 𑒄 𑒖𑒹 𑒁𑒣𑒢 𑒢𑒰𑒧 𑒔𑒾𑒥𑒹 𑒏𑒯𑒢𑒹 𑒩𑒯𑒋, 𑒖𑒥𑒩𑒠𑒮𑓂𑒞𑒲 𑒯𑒧𑒩𑒰𑒮𑒿 𑒑𑒣 𑒏𑒩𑓄 𑒪𑒰𑒑𑒪 𑒩𑒯𑒋। 𑒢𑒻 𑒖𑒰𑒢𑒱 𑒏𑒲-𑒏𑒲? 𑒃𑒞𑒱𑒯𑒰𑒮, 𑒦𑒴𑒑𑒼𑒪 𑒮𑒿 𑒪𑓄 𑒏𑓄 𑒩𑒰𑒧𑒰𑒨𑒝 𑒂 𑒧𑒯𑒰𑒦𑒰𑒩𑒞 𑒡𑒩𑒱 𑒮𑒦 𑒑𑒣 𑒅𑒚𑒱 𑒑𑒹𑒪 𑒕𑒪। 𑒯𑒿𑒮𑒧𑒳𑒐 𑒕𑒪 𑒔𑒾𑒥𑒹। 𑒁𑒐𑒢 𑒖𑒏𑒰𑒿 𑒏𑒰𑒢𑓂𑒞𑒱𑒫𑒱𑒯𑒲𑒢, 𑒑𑒳𑒧𑒮𑒳𑒧 𑒢𑒻, 𑒞𑒹𑒯𑒹𑒢 𑒞𑒿 𑒯𑒧 𑒕𑒪𑒾𑓀।
𑒒𑒝𑓂𑒙𑒲 𑒥𑒰𑒖𑒪 𑒕𑒪। 𑒮𑒦 𑒑𑒼𑒙𑒹 𑒣𑒩𑒲𑒏𑓂𑒭𑒰 𑒏𑒏𑓂𑒭𑒧𑒹 𑒔𑒪𑒱 𑒑𑒹𑒪 𑒩𑒯𑒲। 𑒧𑒡𑓂𑒨𑒰𑒢𑓂𑒞𑒩 𑒥𑒰𑒠 𑒤𑒹𑒩 𑒣𑒩𑒲𑒏𑓂𑒭𑒰-𑒣𑒞𑓂𑒩 𑒕𑒪। 𑒧𑒡𑓂𑒨𑒰𑒢𑓂𑒞𑒩𑒧𑒹 𑒤𑒹𑒩 𑒋𑒏 𑒞𑒼𑒛𑓃 𑒑𑒣 𑒦𑒹𑒪। 𑒏𑒞𑒹𑒏 𑒑𑒣𑓂𑒣 𑒦𑒹𑒪, 𑒏𑒼𑒢 𑒑𑒣 𑒮𑒦 𑒦𑒹𑒪, 𑒮𑒹 𑒢𑒻 𑒖𑒰𑒢𑒱 𑒧𑒳𑒠𑒰 𑒯𑒩𑒰𑒯𑒩𑒲 𑒣𑒩𑒲𑒏𑓂𑒭𑒹𑒏 𑒮𑒧𑓂𑒥𑒢𑓂𑒡𑒧𑒹 𑒑𑒣 𑒦𑒹𑒪। 𑒠𑒼𑒮𑒩 𑒮𑒞𑓂𑒩𑒏 𑒣𑒩𑒲𑒏𑓂𑒭𑒰𑒏 𑒥𑒰𑒠 𑒍 𑒢𑒻 𑒦𑒹𑒙𑒪 𑒕𑒪। 𑒞𑒏𑒩 𑒕𑒯 𑒮𑒰𑒪𑒏 𑒥𑒰𑒠 𑒦𑒹𑒙𑒪। 𑒯𑒧 𑒍 𑒥𑒢𑒱 𑒑𑒹𑒪 𑒕𑒲 𑒂 𑒍 𑒯𑒧𑒩𑒰 𑒮𑒢 𑒥𑒢𑒱 𑒑𑒹𑒪 𑒁𑒕𑒱। 𑒍𑒏𑒩𑒰 𑒞𑒿 𑒯𑒧 𑒔𑒱𑒢𑓂𑒯𑒥𑒼 𑒢𑒻 𑒏𑒩𑒱𑒞𑒱𑒌 𑒖𑒿 𑒍 𑒡𑒢𑓂𑒨𑒫𑒰𑒠𑒏 𑒖𑒫𑒰𑒥 𑒢𑒻 𑒠𑒹𑒢𑒹 𑒩𑒯𑒱𑒞𑒋। 𑒏𑒰𑒩𑒝 𑒖𑒿 𑒍 𑒖𑒫𑒰𑒥 𑒠𑓄 𑒠𑒻𑒞𑒋 𑒞𑒿 𑒯𑒧 𑒒𑒳𑒩𑒱𑒞𑒾𑓀 𑒏𑒱𑒋?
………..
𑒞𑒰𑒫𑒰 𑒂𑒑𑒱𑒣𑒩𑒮𑒿 𑒅𑒞𑒩𑒱 𑒑𑒹𑒪 𑒁𑒕𑒱। 𑒂𑒑𑒰𑒿 𑒧𑒳𑒿𑒯𑒹 𑒦𑒲𑒞𑒣𑒩 𑒍𑓀𑒑𑒚𑒪 𑒚𑒰𑒜𑓃 𑒞𑒰𑒫𑒰𑒏 𑒂𑒑𑒱 𑒯𑒿𑒮𑒻𑒞 𑒁𑒕𑒱, 𑒧𑒳𑒠𑓂𑒠𑒻 𑒯𑒿𑒮𑒱 𑒩𑒯𑒪𑒋।
𑒔𑒾𑒥𑒹𑒖𑒲 𑒂𑒞𑓂𑒧𑒯𑒞𑓂𑒨𑒰 𑒏𑓄 𑒪𑒹𑒪𑒏।
𑒠𑒰𑒩𑓂𑒬𑒢𑒱𑒏 𑒮𑒦 𑒂𑒞𑓂𑒧𑒯𑒞𑓂𑒨𑒰 𑒏𑓄 𑒪𑒻𑒋?
𑒏𑒼𑒢𑒼 𑒣𑓂𑒩𑒹𑒧-𑒣𑓂𑒩𑒮𑓀𑒑 𑒩𑒯𑒻।
𑒠𑒰𑒩𑓂𑒬𑒢𑒱𑒏 𑒮𑒦 𑒣𑓂𑒩𑒹𑒧 𑒏𑒩𑒻𑒋?
𑒢𑒻, 𑒣𑓂𑒩𑒹𑒧-𑒞𑓂𑒩𑒹𑒧 𑒢𑒻 𑒩𑒯𑒻। 𑒯𑒞𑓂𑒨𑒰 𑒦𑒹𑒪 𑒕𑒻, 𑒯𑒞𑓂𑒨𑒰। 𑒥𑒱𑒨𑒰𑒯 𑒏𑓄 𑒏𑒋 𑒂𑒋𑒪 𑒩𑒯𑒋 𑒂 𑒩𑒰𑒞𑒱𑒧𑒹 𑒑𑒩𑒠𑒢𑒱𑒧𑒹 𑒛𑒼𑒩𑒲 𑒪𑒑𑒰 𑒣𑓀𑒐𑒰𑒮𑒿 𑒪𑒙𑒏𑒱 𑒑𑒹𑒪। 𑒥𑒱𑒨𑒰𑒯 𑒢𑒻 𑒏𑒩𑒋 𑒔𑒰𑒯𑒻 𑒕𑒪, 𑒧𑒳𑒠𑒰 𑒣𑒱𑒞𑒰𑒏 𑒑𑒣 𑒩𑒰𑒐𑒥𑒰𑒏 𑒩𑒯𑒻। 𑒪𑒛𑓃𑒏𑒲 𑒣𑒮𑒱𑒢𑓂𑒢 𑒢𑒻 𑒕𑒪𑒻।
𑒞𑒿 𑒯𑒞𑓂𑒨𑒰 𑒏𑒱𑒋 𑒯𑒹𑒞𑒻?
𑒪𑒼𑒏𑒏 𑒤𑒩𑒤𑒻𑒮𑒲।




𑒞𑒐𑒢, 𑒖𑒐𑒢
𑒯𑒧𑒩 𑒥𑒹𑒙𑒰 𑒥𑒹𑒙𑒲। 𑒢𑒻 𑒍 𑒢𑒻 𑒔𑒰𑒯𑒞। 𑒢𑒻, 𑒣𑒳𑒕𑒢𑒹 𑒢𑒻 𑒕𑒱𑒌। 𑒧𑒳𑒠𑒰 𑒥𑒳𑒗𑒪 𑒁𑒕𑒱 𑒯𑒧𑒩𑒰। 𑒑𑒣𑒬𑒣𑒧𑒹 𑒥𑒳𑒗𑓄𑒧𑒹 𑒂𑒥𑒱 𑒖𑒰𑒃 𑒕𑒻। 𑒠𑒳𑒢𑒴 𑒣𑓂𑒩𑒹𑒧 𑒏𑒩𑒻𑒋। 𑒯𑒧𑒩𑒼𑒮𑒿 𑒂 𑒁𑒣𑒢-𑒁𑒣𑒢 𑒣𑓂𑒩𑒹𑒧𑒱𑒏𑒰-𑒣𑓂𑒩𑒹𑒧𑒲𑒮𑒿। 𑒧𑒳𑒠𑒰 𑒯𑒧 𑒍𑒏𑒩𑒰 𑒮𑒦𑒏𑒹𑒿 𑒕𑒼𑒛𑓃𑒱 𑒏𑒏𑒩𑒼𑒮𑒿 𑒣𑓂𑒩𑒹𑒧 𑒏𑒩𑒲 𑒮𑒹 𑒍 𑒮𑒦 𑒢𑒻 𑒔𑒰𑒯𑒞।
𑒃𑒢𑓂𑒞𑒖𑒰𑒩 𑒏𑒩𑒴 𑒞𑒐𑒢, 𑒖𑒐𑒢।
……………..
𑒣𑒞𑒰 𑒢𑒻 𑒧𑒵𑒞𑓂𑒨𑒳 𑒩𑒯𑒻 𑒂𑒏𑒱…
𑒩𑒯𑒮𑓂𑒨𑒧𑒨 𑒧𑒵𑒞𑓂𑒨𑒳 𑒩𑒯𑒻। 𑒒𑒩𑒧𑒹 𑒏𑒱𑒨𑒼 𑒢𑒻। 𑒦𑒼𑒩𑒧𑒹 𑒧𑒳𑒃𑒪𑒹 𑒅𑒚𑒞 𑒪𑒼𑒏? 𑒮𑒹𑒯𑒼 𑓓𑓐 𑒥𑒩𑓂𑒐𑒏 𑒅𑒧𑒹𑒩𑒧𑒹?
𑒋𑒏𑒙𑒰 𑒥𑒹𑒙𑒰 𑒂 𑒋𑒏𑒙𑒰 𑒥𑒹𑒙𑒲, 𑒠𑒳𑒢𑒴 𑒖𑒾𑒿𑒂।
𑒮𑓀𑒑 𑒕𑒼𑒛𑓃𑒱 𑒏𑓄 𑒔𑒪𑒱 𑒑𑒹𑒪!