गजेन्द्र ठाकुर- सहस्रजित्

𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩- 𑒮𑒯𑒮𑓂𑒩𑒖𑒱𑒞𑓂































𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩𑒏 𑒖𑒢𑓂𑒧 𑒦𑒰𑒑𑒪𑒣𑒳𑒩𑒧𑒹 𑒮𑒢𑓂 𑓑𑓙𑓗𑓑 𑒧𑒹 𑒦𑒹𑒪𑒢𑓂𑒯𑒱 𑒂 𑒂𑒃 𑒏𑒰𑒪𑓂𑒯𑒱 𑒍 𑒠𑒱𑒪𑓂𑒪𑒲𑒧𑒹 𑒩𑒯𑒻 𑒕𑒟𑒱।


























𑒮𑒯𑒮𑓂𑒩𑒖𑒱𑒞𑓂






𑒑𑒖𑒹𑒢𑓂𑒠𑓂𑒩 𑒚𑒰𑒏𑒳𑒩



𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢, 𑒢𑒄 𑒠𑒱𑒪𑓂𑒪𑒲


















Sahasrajit: A collection of different genres of Maithili Verse by Gajendra Thakur first published in 2012 by M/s Shruti Publications, India
Price: Rs.100
𑒮𑒩𑓂𑒫𑒰𑒡𑒱𑒏𑒰𑒩 © 𑒣𑓂𑒩𑒲𑒞𑒱 𑒚𑒰𑒏𑒳𑒩 2012
𑒣𑒯𑒱𑒪 𑒮𑓀𑒮𑓂𑒏𑒩𑒝 : 2012
ISBN : 978-93-80538-59-4
Gajendra Thakur asserts the moral right to be identified as the author of this work.
Every effort has been made to trace or contact all copyright holders. The publishers will be pleased to make good any omissions or rectify any mistakes brought to their attention at the earliest opportunity.
All rights reserved. This book is sold subject to the condition that it shall not, by way of trade or otherwise, be lent, resold, hired out, or otherwise circulated without the publisher’s prior written consent in any form of binding or cover other than that in which it is published and without a similar condition including this condition being imposed on the subsequent purchaser and without limiting the rights under copyright reserved above; no part of this publication may be reproduced, stored in or introduced into a retrieval system, or transmitted, in any form or by any means- photographic, electronic, mechanical, photocopying, recording, taping, information storage- or otherwise, without the prior written permission of both the copyright owner and the aforementioned publisher of this book or as expressly permitted by law.
𑒬𑓂𑒩𑒳𑒞𑒱 𑒣𑓂𑒩𑒏𑒰𑒬𑒢 :𑒩𑒖𑒱𑒮𑓂𑒙𑒩𑓂𑒛 𑒂𑒤𑒱𑒮: 𑓘/𑓒𑓑, 𑒦𑒴𑒞𑒪, 𑒢𑓂𑒨𑒴 𑒩𑒰𑒖𑒹𑒢𑓂𑒠𑓂𑒩 𑒢𑒑𑒩, 𑒢𑒄 𑒠𑒱𑒪𑓂𑒪𑒲-𑓑𑓑𑓐𑓐𑓐𑓘.𑒠𑒴𑒩𑒦𑒰𑒭-(𑓐𑓑𑓑) 𑓒𑓕𑓘𑓘𑓙𑓖𑓕𑓖-𑓕𑓘 𑒤𑒻𑒏𑓂𑒮- (𑓐𑓑𑓑)𑓒𑓕𑓘𑓘𑓙𑓖𑓕𑓗
Website:http://www.shruti-publication.com
e-mail: shruti.publication@shruti-publication.com
Designed by: Prity Thakur
Printed at: Ajay Arts, Delhi-110002
Distributor : Pallavi Distributors, Ward no- 6, Nirmali (Supaul), 𑒧𑒼.- 957245.4.5, 9931654742
Sahasrajit: A collection of different genres of Maithili Verse by Gajendra Thakur









𑒁𑒢𑒳𑒏𑓂𑒩𑒧
𑒒𑒵𑒝𑒰𑒏 𑒞𑒩𑒯𑒩𑒱𑒧𑒹/ 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒮𑓀𑒑 𑒁𑒕𑒱
𑒒𑒛𑓃𑒲 𑒣𑒴𑒖𑒰
𑒢𑒖𑒩𑒱 𑒪𑒰𑒑𑒱 𑒖𑒰𑒃 𑒕𑒻
𑒚𑒰𑒜𑓃 𑒪𑒞𑓂𑒞𑒲𑒏𑒹𑒿 𑒣𑒜𑓃𑒻𑒞 𑒕𑒲
𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱
𑒅𑒖𑒰𑒯𑒱𑒧𑒹 𑒅𑒣𑒪𑒰𑒃𑒞 𑒯𑒧 𑒂 𑒧𑒰𑒿𑒕
𑒥𑒏𑒕𑒳𑒕𑒩𑒳 𑒐𑒹𑒪𑒰𑒃𑒞 𑒯𑒧 𑒂 𑒦𑒲𑒐𑒴
𑒏𑒙𑒱𑒯𑒰𑒩𑒲
𑒦𑒰𑒑𑓂𑒨𑒬𑒰𑒪𑒲
𑒯𑒰𑒃𑒏𑒴/ 𑒬𑒹𑒢𑒩𑓂𑒨𑒴/ 𑒙𑒢𑒏𑒰/ 𑒯𑒻𑒥𑒴𑒢
𑒏𑒳𑒝𑓂𑒛𑒪𑒱𑒨𑒰 𑓑-𑓔




















𑒒𑒵𑒝𑒰𑒏 𑒞𑒩𑒯𑒩𑒱𑒧𑒹

𑒣𑓂𑒩𑒹𑒧
𑒧𑒳𑒮𑓂𑒏𑒲𑒮𑒿 𑒖𑒲𑒞𑒥 𑒒𑒵𑒝𑒰 𑒂 𑒄𑒩𑓂𑒭𑓂𑒨𑒰𑒏𑒹𑒿
𑒒𑒵𑒝𑒰𑒏 𑒞𑒩𑒯𑒩𑒱 𑒐𑒴𑒢𑓄 𑒠𑒱𑒨𑒾
𑒍𑒃 𑒞𑒩𑒯𑒩𑒱𑒧𑒹 𑒒𑒵𑒝𑒰𑒏𑒹𑒿 𑒑𑒰𑒩𑒱 𑒠𑒹𑒥𑒻
𑒁𑒣𑒢 𑒣𑓂𑒩𑒹𑒧𑒏 𑒬𑒏𑓂𑒞𑒱𑒮𑒿

𑒯𑒿𑒮𑒻𑒞- 𑒧𑒳𑒮𑓂𑒏𑒱𑒨𑒰𑒃𑒞 𑒏𑒩𑒥𑒻 𑒂𑒑𑓂𑒩𑒯
𑒖𑒞𑒹𑒏 𑒣𑒩𑒱𑒬𑓂𑒩𑒧
𑒒𑒵𑒝𑒰𑒏 𑒞𑒩𑒯𑒩𑒱 𑒥𑒢𑒥𑓄𑒧𑒹 𑒪𑒑𑒾𑒪𑒏
𑒏𑒯𑒥𑒻 𑒣𑓂𑒩𑒹𑒧𑒏 𑒣𑒼𑒐𑒩𑒱 𑒏𑒰𑒙𑓄
𑒖𑒃𑒧𑒹 𑒣𑓂𑒩𑒹𑒧𑒏 𑒣𑒰𑒢𑒱
𑒥𑒩𑒐𑒰 𑒧𑒰𑒮𑒧𑒹 𑒦𑒩𑒱 𑒖𑒰𑒋𑒞
𑒂 𑒦𑒩𑒪𑒹 𑒩𑒯𑒞
𑒞𑒞𑒹𑒏 𑒑𑒯𑒲𑓀𑒩 𑒏𑓄 𑒏𑒰𑒙𑒪 𑒩𑒯𑒞 𑒧𑒰𑒙𑒱
𑒍𑒃𑒧𑒹 𑒯𑒹𑒪𑒞 𑒣𑓂𑒩𑒹𑒧
𑒯𑒹𑒪𑒻𑒞 𑒩𑒯𑒞
𑒂 𑒥𑒯𑒱 𑒖𑒰𑒋𑒞, 𑒛𑒴𑒧𑒱 𑒖𑒰𑒋𑒞 𑒒𑒵𑒝𑒰 𑒂 𑒄𑒩𑓂𑒭𑓂𑒨𑒰
𑒛𑒴𑒧𑒱 𑒖𑒰𑒋𑒞 𑒂 𑒥𑒗𑒰 𑒏𑓄 𑒪𑓄 𑒖𑒹𑒞𑒻 𑒣𑒢𑒱𑒛𑒳𑒥𑓂𑒥𑒲 𑒍𑒏𑒩𑒰

𑒖𑒰𑒫𑒞 𑒯𑒧 𑒩𑒯𑒥
𑒢𑒻 𑒕𑒴𑒥𑒱 𑒮𑒏𑒞 𑒏𑓂𑒨𑒼 𑒣𑓂𑒩𑒹𑒧𑒏 𑒮𑒞𑓂𑒨𑒏 𑒣𑒳𑒞𑓂𑒩𑒏𑒹𑒿
𑒏𑒰𑒩𑒝 𑒬𑒏𑓂𑒞𑒱𑒮𑒿, 𑒆𑒩𑓂𑒖𑒰𑒮𑒿 𑒦𑒩𑒪 𑒁𑒕𑒱 𑒮𑒞𑓂𑒨𑒏 𑒣𑒳𑒞𑓂𑒩
𑒍𑒏𑒩 𑒔𑒰𑒩𑒴𑒏𑒰𑒞 𑒮𑓂𑒟𑒴𑒪-𑒣𑓂𑒩𑒹𑒧𑒏 𑒑𑒱𑒪𑒹𑒥𑒰𑒮𑒿 𑒚𑒰𑒜𑓃 𑒏𑒋𑒪 𑒒𑒹𑒩𑒰𑒥𑒰 𑒩𑒯𑒞
𑒢𑒻 𑒏𑒩𑒴 𑒔𑒱𑒢𑓂𑒞𑒰।

𑒂 𑒖𑒯𑒱𑒨𑒰 𑒯𑒧 𑒢𑒻 𑒩𑒯𑒥
𑒮𑒲𑒐𑒱 𑒖𑒰𑒋𑒥 𑒁𑒯𑒰𑒿 𑒮𑒦 𑒏𑒱𑒕𑒳
𑒯𑒧𑒩 𑒫𑒱𑒨𑒼𑒑 𑒥𑒢𑒰 𑒠𑒹𑒞 𑒮𑒏𑓂𑒏𑒞, 𑒞𑒲𑒫𑓂𑒩 𑒂 𑒏𑒚𑒼𑒩

𑒮𑒞𑓂𑒨𑒏 𑒫𑒱𑒩𑒼𑒡𑒲 𑒪𑒹𑒪
𑒍𑒃 𑒒𑒹𑒩𑒰𑒥𑒰𑒏𑒹𑒿 𑒞𑒼𑒛𑓃𑒥𑒰𑒏 𑒣𑓂𑒩𑒨𑒰𑒮
𑒁𑒯𑒰𑒿𑒏 𑒮𑓂𑒟𑒴𑒪-𑒣𑓂𑒩𑒹𑒧𑒲 𑒧𑒱𑒞𑓂𑒩 𑒮𑒦 𑒢𑒻 𑒯𑒹𑒧𑓄 𑒠𑒹𑒟𑒱𑒢𑓂𑒯 𑒮𑒤𑒪

𑒮𑒹 𑒯𑒧 𑒩𑒯𑒲 𑒫𑒰 𑒢𑒻 𑒩𑒯𑒲
𑒣𑓂𑒩𑒨𑒰𑒝 𑒟𑒧𑓂𑒯𑒞 𑒢𑒻
𑒥𑒞𑒯𑒣𑒢𑒰 𑒥𑒜𑓃𑒞 𑒢𑒻

𑒧𑒰𑒩𑒱 𑒠𑒹𑒥 𑒞𑒿 𑒧𑒰𑒩𑒱 𑒠𑒱𑒁
𑒧𑒳𑒠𑒰 𑒧𑒼𑒢 𑒩𑒰𑒐𑒴
𑒯𑒧𑒩𑒰 𑒮𑓀𑒑𑒹 𑒧𑒩𑒞 𑒂𑒩 𑒥𑒯𑒳𑒞 𑒩𑒰𑒮 𑒫𑒮𑓂𑒞𑒳
𑒧𑒳𑒠𑒰 𑒩𑒯𑒥𑒹 𑒏𑒩𑒞 𑒮𑓂𑒟𑒴𑒪-𑒣𑓂𑒩𑒹𑒧𑒲 𑒮𑒰𑒡𑒏 𑒮𑒦
𑒂 𑒏𑒩𑒞 𑒣𑒯𑒱𑒪 𑒢𑒵𑒞𑓂𑒨 𑒯𑒮𑓂𑒞 𑒮𑓀𑒔𑒰𑒪𑒢𑒮𑒿
𑒔𑒞𑒳𑒩𑒯𑒮𑓂𑒞

𑒂𑒢𑒢𑓂𑒠𑒮𑒿 𑒦𑒩𑒪 𑒧𑒼𑒢
𑒮𑒞𑓂𑒨, 𑒗𑒴𑒚 𑒂 𑒞𑒏𑒩 𑒢𑒱𑒩𑓂𑒝𑒨𑒏 𑒪𑒹𑒪
𑒮𑒢𑒑𑒼𑒯𑒱𑒏 𑒔𑒰𑒧𑒮𑒿 𑒕𑒰𑒩𑒪 𑒛𑒤-𑒐𑒖𑒳𑒩𑒲 𑒪𑓄 𑒏𑓄
𑒛𑒼𑒩𑒲𑒏 𑒏𑒧𑓂𑒣𑒢𑒮𑒿 𑒡𑓂𑒫𑒢𑒱 𑒢𑒱𑒏𑒰𑒪𑒞
𑒑𑒳𑒧𑒏𑒲, 𑒍𑒃 𑒐𑒖𑒳𑒩𑒲𑒏 𑒡𑓂𑒫𑒢𑒱
𑒂 𑒑𑒳𑒧𑒏𑒲, 𑒑𑒳𑒧.. 𑒑𑒳𑒧.. 𑒑𑒳𑒧𑒏𑒲...
𑒂 𑒞𑒐𑒢 𑒠𑒼𑒮𑒩 𑒢𑒵𑒞𑓂𑒨 𑒯𑒋𑒞 𑒣𑓂𑒩𑒰𑒩𑒧𑓂𑒦
𑒬𑒱𑒐𑒩𑒯𑒮𑓂𑒞
𑒣𑒩𑓂𑒫𑒞𑒬𑒱𑒐𑒩𑒮𑒢
𑒨𑒳𑒠𑓂𑒡𑒏 𑒂𑒫𑒰𑒯𑒢-𑒣𑓂𑒩𑒠𑒩𑓂𑒬𑒢 𑒪𑒹𑒪
𑒒𑒵𑒝𑒰𑒏 𑒞𑒩𑒯𑒩𑒱 𑒐𑒴𑒢𑓄 𑒠𑒱𑒨𑒾
𑒧𑒰𑒩𑒱 𑒠𑒹𑒞 𑒞𑒿 𑒧𑒰𑒩𑓄 𑒠𑒱𑒎

𑒧𑒼𑒢 𑒩𑒰𑒐𑒴 𑒧𑒳𑒠𑒰
𑒯𑒧𑒩𑒰 𑒮𑓀𑒑𑒹 𑒧𑒩𑒞 𑒂𑒩 𑒥𑒯𑒳𑒞 𑒩𑒰𑒮 𑒫𑒮𑓂𑒞𑒳
𑒧𑒳𑒠𑒰 𑒯𑒧𑒩 𑒫𑒱𑒨𑒼𑒑 𑒥𑒢𑒰 𑒠𑒹𑒞 𑒮𑒏𑓂𑒏𑒞, 𑒞𑒲𑒫𑓂𑒩 𑒂 𑒏𑒚𑒼𑒩
𑒩𑒏𑓂𑒞𑒥𑒲𑒖𑒲 𑒮𑒞𑓂𑒨𑒣𑒳𑒞𑓂𑒩 𑒮𑒦𑒏𑒹𑒿


























𑒥𑒳𑒜𑓃𑒱𑒨𑒰 𑒛𑒰𑒯𑒲 𑒮𑓀𑒑 𑒁𑒕𑒱

𑒏𑒧𑒪𑒏 𑒧𑒵𑒝𑒰𑒪, 𑒣𑒳𑒩𑒻𑒢𑒱, 𑒏𑒧𑒪𑒑𑒙𑓂𑒙𑒰, 𑒥𑒱𑒮𑒰𑒿𑒜𑓃𑒮𑒿 𑒦𑒩𑒪 𑒐𑒹𑒞
𑒍 𑒢𑒻 𑒕𑒟𑒱 𑒥𑒳𑒜𑓃𑒱𑒨𑒰 𑒛𑒰𑒯𑒲
𑒐𑒹𑒞 𑒖𑒹 𑒕𑒪𑒻 𑒮𑒢𑒑𑒩 𑒨𑒾
𑒂𑒥 𑒥𑒢𑒪 𑒣𑓂𑒩𑒹𑒧𑒏 𑒏𑒧𑒪𑒠𑒯
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒁𑒕𑒱 𑒯𑒧𑒩 𑒄 𑒥𑒳𑒜𑓃𑒱𑒨𑒰 𑒛𑒰𑒯𑒲

𑒤𑒹𑒩 𑒫𑒋𑒯 𑒑𑒣
𑒂𑒞𑓂𑒧𑒩𑒏𑓂𑒭𑒰𑒩𑓂𑒟
𑒮𑒞𑓂𑒨𑒏 𑒫𑒱𑒩𑒼𑒡𑒧𑒹
𑒔𑒼𑒩𑒥𑒰 𑒥𑒰𑒖𑒪 𑒤𑒹𑒩
𑒮𑒩𑓂𑒖𑒢𑒏 𑒮𑒳𑒐 𑒦𑒹𑒙𑒞 𑒔𑒼𑒩𑒱𑒧𑒹?

𑒠𑒼𑒮𑒩𑒰𑒏 𑒏𑒵𑒞𑒱 𑒁𑒣𑒢𑒰 𑒢𑒰𑒧 𑒏𑒹𑒪𑒰𑒮𑒿
𑒂𑒏𑒱 𑒠𑒼𑒮𑒩𑒰𑒏 𑒧𑒹𑒯𑒢𑒞𑒱𑒏𑒹𑒿 𑒁𑒣𑒢 𑒢𑒰𑒧 𑒠𑒹𑒪𑒰𑒮𑒿
𑒠𑒼𑒮𑒩𑒰𑒏 𑒣𑓂𑒩𑒞𑒱𑒦𑒰𑒏𑒹𑒿 𑒠𑒥𑒰 𑒏𑓄
𑒏𑒳𑒙𑒲𑒔𑒰𑒪𑒱 𑒏𑓄 𑒂𑒩
𑒦𑒰𑒿𑒑 𑒣𑒲𑒥𑒱 𑒒𑒴𑒩 𑒞𑒩 𑒏𑓄 𑒑𑒼𑒪𑒻𑒮𑒲

𑒏𑒼𑒢𑒰𑒏𑒹𑒿 𑒂𑒿𑒑𑒳𑒩 𑒏𑒰𑒙𑒥 𑒖𑒹 𑒪𑒱𑒐𑒥 𑒥𑒢𑓂𑒢 𑒏𑒩𑒞
𑒞𑒼𑒛𑓃𑒱 𑒠𑒱𑒨𑒾 𑒛𑒰𑒿𑒩, 𑒏𑒰𑒙𑒱 𑒠𑒱𑒨𑒾 𑒣𑒋𑒩
𑒂𑒿𑒐𑒱 𑒢𑒱𑒏𑒰𑒪𑒱 𑒪𑒱𑒁 𑒡𑓄 𑒠𑒱𑒨𑒾 𑒩𑒰𑒪𑒩𑒏 𑒢𑒲𑒔𑒰𑒿𑒧𑒹
𑒣𑒱𑒮𑒲𑒧𑒰𑒪 𑒅𑒚𑒰 𑒠𑒱𑒨𑒾
𑒥𑒛𑓃𑒏𑒰 𑒋𑒪𑒰𑒯𑒹𑒿 𑒮𑒩𑓂𑒖𑒢𑒏 𑒮𑒳𑒐 𑒣𑒹𑒥𑒰𑒪𑒹

𑒞𑒿 𑒏𑒲 𑒯𑒰𑒩𑒱 𑒖𑒰𑒃
𑒞𑒿 𑒏𑒲 𑒕𑒼𑒛𑓃𑒱 𑒠𑒱𑒌
𑒃𑒔𑓂𑒕𑒰 𑒖𑒲𑒞𑒞 𑒂𑒏𑒱 𑒖𑒲𑒞𑒞 𑒄𑒩𑓂𑒭𑓂𑒨𑒰
𑒮𑓀𑒏𑒪𑓂𑒣 𑒯𑒧𑒩 𑒖𑒹 𑒌 𑒡𑒰𑒩𑒏𑒹𑒿 𑒧𑒼𑒛𑓃𑒱 𑒠𑒹𑒥
𑒧𑒳𑒠𑒰 𑒏𑒱𑒕𑒳 𑒄𑒩𑓂𑒭𑓂𑒨𑒰 𑒁𑒕𑒱 𑒮𑒼𑒗𑒰𑒿 𑒁𑒥𑒻𑒞
𑒄𑒩𑓂𑒭𑓂𑒨𑒰 𑒖𑒹 𑒯𑒧 𑒡𑒰𑒩𑒏𑒹𑒿 𑒢𑒻 𑒧𑒼𑒛𑓃𑒱 𑒣𑒰𑒥𑒲
𑒥𑒯𑒻𑒞 𑒩𑒯𑒋 𑒍 𑒍𑒯𑒱𑒢𑒰
𑒍𑒯𑒱𑒢𑒰 𑒏𑒱𑒋, 𑒍𑒯𑒴𑒮𑒿 𑒦𑒨𑓀𑒏𑒩 𑒥𑒢𑒱

𑒮𑓀𑒏𑒪𑓂𑒣 𑒖𑒹 𑒯𑒧 𑒏𑒹𑒢𑒹 𑒕𑒲
𑒃𑒔𑓂𑒕𑒰 𑒖𑒹 𑒁𑒕𑒱 𑒯𑒧𑒩/ 𑒮𑒹 𑒯𑒰𑒩𑒱 𑒖𑒰𑒋
𑒂 𑒖𑒲𑒞𑒱 𑒖𑒰𑒋 𑒠𑓂𑒫𑒹𑒭/ 𑒖𑒲𑒞𑒱 𑒖𑒰𑒋 𑒄𑒩𑓂𑒭𑓂𑒨𑒰
𑒯𑒰 𑒯𑒰𑒩𑒥𑒼 𑒏𑒩𑒲 𑒞𑒹𑒢𑒰 𑒦𑓄 𑒏𑓄 𑒖𑒹 𑒪𑒼𑒏 𑒠𑒹𑒐𑒋!/ 𑒖𑒧𑒰𑒢𑒰 𑒠𑒹𑒐𑒋!!

𑒞𑒹𑒢𑒰 𑒏𑓄 𑒯𑒰𑒩𑒋 𑒮𑓀𑒏𑒪𑓂𑒣 𑒯𑒧𑒩/ 𑒃𑒔𑓂𑒕𑒰 𑒯𑒧𑒩

𑒡𑒰𑒩𑒏𑒹𑒿 𑒩𑒼𑒏𑒱 𑒠𑒹𑒥𑒰𑒏/ 𑒚𑒰𑒜𑓃 𑒦𑓄 𑒖𑒹𑒥𑒰𑒏
𑒮𑒼𑒗𑒰𑒿 𑒍𑒏𑒩
𑒂 𑒧𑒼𑒛𑓃𑒱 𑒠𑒹𑒥𑒰𑒏 𑒮𑓀𑒏𑒪𑓂𑒣 𑒍𑒃 𑒦𑒨𑓀𑒏𑒩 𑒅𑒠𑒝𑓂𑒛 𑒡𑒰𑒩𑒏𑒹𑒿

𑒧𑒳𑒠𑒰 𑒏𑒱𑒕𑒳 𑒂𑒩 𑒄𑒩𑓂𑒭𑓂𑒨𑒰 𑒁𑒕𑒱 𑒮𑒼𑒗𑒰𑒿 𑒁𑒥𑒻𑒞
𑒍 𑒠𑓂𑒫𑒹𑒭 𑒔𑒰𑒯𑒻𑒋 𑒖𑒹 𑒯𑒧𑒩 𑒣𑓂𑒩𑒨𑒰𑒮/ 𑒡𑒰𑒩𑒏𑒹𑒿 𑒧𑒼𑒛𑓃𑒥𑒰𑒏 𑒣𑓂𑒩𑒨𑒰𑒮
𑒧𑒼𑒛𑓃𑒪𑒰𑒏 𑒣𑓂𑒩𑒨𑒰𑒮𑒏 𑒥𑒰𑒠 𑒦𑓄 𑒖𑒰𑒋 𑒡𑒰𑒩 𑒂𑒩 𑒦𑒨𑓀𑒏𑒩

𑒣𑒳𑒩𑒰𑒢 𑒪𑒲𑒐𑒣𑒩 𑒔𑒪𑒻𑒞 𑒩𑒯𑒋 𑒦𑓄 𑒂𑒩 𑒁𑒞𑓂𑒨𑒰𑒔𑒰𑒩𑒲

𑒂 𑒯𑒧 𑒖𑒰𑒃 𑒯𑒰𑒩𑒱
𑒂 𑒯𑒰𑒩𑒲 𑒞𑒹𑒢𑒰 𑒦𑓄 𑒏𑓄 𑒖𑒹 𑒪𑒼𑒏 𑒩𑒰𑒐𑒋 𑒧𑒼𑒢
𑒧𑒼𑒢 𑒩𑒰𑒐𑒋 𑒖𑒹 𑒏𑒱𑒨𑒼 𑒠𑒳𑒮𑓂𑒮𑒰𑒯𑒮𑒲 𑒚𑒰𑒜𑓃 𑒦𑓄 𑒑𑒹𑒪 𑒕𑒪 𑒡𑒰𑒩𑒏 𑒮𑒼𑒗𑒰𑒿
𑒞𑒏𑒩 𑒦𑒹𑒪 𑒄 𑒦𑒨𑓀𑒏𑒩 𑒣𑒩𑒱𑒝𑒰𑒧
𑒖𑒹 𑒪𑒼𑒏 𑒛𑒩𑒰 𑒏𑓄 𑒢𑒻 𑒏𑒩𑒋 𑒤𑒹𑒩 𑒠𑒳𑒮𑓂𑒮𑒰𑒯𑒮
𑒠𑒳𑒮𑓂𑒮𑒰𑒯𑒮 𑒚𑒰𑒜𑓃 𑒯𑒹𑒥𑒰𑒏 𑒅𑒠𑒝𑓂𑒛-𑒁𑒞𑓂𑒨𑒰𑒔𑒰𑒩𑒲 𑒡𑒰𑒩𑒏 𑒮𑒼𑒗𑒰𑒿𑒧𑒹

𑒪𑓄 𑒪𑒲 𑒯𑒧 𑒣𑒞𑒢𑒳𑒏𑒰𑒢/ 𑒂 𑒮𑒹 𑒮𑒳𑒢𑒱 𑒟𑒩𑒟𑒩𑒲 𑒣𑒻𑒮𑒱 𑒖𑒰𑒋 𑒪𑒼𑒏𑒏 𑒯𑒵𑒠𑒨𑒧𑒹

𑒧𑒳𑒠𑒰 𑒯𑒧 𑒯𑒿𑒮𑒻 𑒕𑒲
𑒯𑒰𑒩𑒱 𑒞𑒿 𑒖𑒰𑒋𑒥 𑒯𑒧
𑒧𑒳𑒠𑒰 𑒯𑒧𑒩 𑒮𑒰𑒡𑒢𑒰𑒮𑒿 𑒖𑒹 𑒩𑒏𑓂𑒞𑒥𑒲𑒖 𑒐𑒮𑒞
𑒮𑒹 𑒋𑒏-𑒋𑒏𑒙𑒰 𑒚𑒼𑒣𑒏 𑒥𑒲𑒂 𑒥𑒢𑒱 𑒖𑒰𑒋𑒞 𑒮𑒯𑒮𑓂𑒩𑒥𑒰𑒜𑓃𑒢𑒱 𑒗𑒼𑒿𑒙𑒰𑒥𑒪𑒰
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒚𑒰𑒜𑓃𑒱 𑒁𑒕𑒱 𑒯𑒧𑒩 𑒄 𑒥𑒳𑒜𑓃𑒱𑒨𑒰 𑒛𑒰𑒯𑒲।

𑒏𑒧𑒪𑒏 𑒧𑒵𑒝𑒰𑒪, 𑒣𑒳𑒩𑒻𑒢𑒱, 𑒏𑒧𑒪𑒑𑒙𑓂𑒙𑒰, 𑒥𑒱𑒮𑒰𑒿𑒜𑓃𑒮𑒿 𑒦𑒩𑒪 𑒐𑒹𑒞 𑒥𑒢𑒞
𑒐𑒹𑒞 𑒖𑒹 𑒕𑒪𑒻 𑒮𑒢𑒑𑒩 𑒨𑒾, 𑒖𑒃𑒧𑒹 𑒒𑒵𑒝𑒰𑒏 𑒞𑒩𑒯𑒩𑒱 𑒐𑒳𑒢𑒹𑒪𑒾𑓀 𑒨𑒾
𑒒𑒵𑒝𑒰𑒏 𑒞𑒩𑒯𑒩𑒱 𑒐𑒴𑒢𑒪 𑒍𑒃 𑒐𑒹𑒞𑒧𑒹
𑒏𑒧𑒪𑒏 𑒧𑒵𑒝𑒰𑒪, 𑒣𑒳𑒩𑒻𑒢𑒱, 𑒏𑒧𑒪𑒑𑒙𑓂𑒙𑒰, 𑒥𑒱𑒮𑒰𑒿𑒜𑓃 𑒁𑒕𑒱 𑒦𑒩𑒱 𑒑𑒹𑒪
𑒣𑓂𑒩𑒹𑒧𑒏 𑒏𑒧𑒪 𑒁𑒕𑒱 𑒤𑒳𑒪𑒰 𑒑𑒹𑒪।
𑒥𑒳𑒜𑓃𑒱𑒨𑒰 𑒜𑒰𑒯𑒲𑒏𑒹𑒿 𑒖𑒲𑒫𑒱𑒞𑒹 𑒑𑒰𑒩𑒱 𑒠𑒹𑒢𑒹 𑒩𑒯𑒱𑒌
𑒍𑒏𑒩 𑒩𑒏𑓂𑒞 𑒮𑒢 𑒪𑒰𑒪 𑒁𑒩𑒯𑒳𑒪 𑒔𑒰𑒩𑒴 𑒏𑒰𑒞 𑒗𑒿𑒣𑒢𑒹
𑒮𑒯𑒮𑓂𑒩𑒥𑒰𑒜𑓃𑒢𑒱
𑒗𑒼𑒿𑒙𑒰𑒥𑒪𑒰 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒏𑒹𑒪𑒏 𑒄।

𑒂 𑒞𑒐𑒢
𑒤𑒻𑒮𑒪𑒰 𑒯𑒹𑒞𑒻 𑒂𑒥
𑒖𑒐𑒢
𑒅𑒢𑒙𑒱 𑒖𑒰𑒃𑒋 𑒪𑒼𑒏
𑒅𑒢𑒙𑒱 𑒖𑒰𑒃 𑒕𑒻 𑒥𑒼𑒪
𑒕𑒢𑒹-𑒕𑒢 𑒥𑒠𑒪𑒱 𑒖𑒰𑒃𑒋
𑒥𑒱𑒔𑒏𑒰𑒥𑒻𑒋 𑒚𑒼𑒩

𑒥𑒼𑒪𑒏 𑒧𑒡𑒳𑒩 𑒫𑒰𑒝𑒲
𑒥𑒼𑒪𑒲-𑒫𑒰𑒝𑒲
𑒥𑒠𑒪𑒱 𑒖𑒰𑒃 𑒕𑒻
𑒥𑒢𑒱 𑒖𑒰𑒃𑒋 𑒥𑒱𑒐𑒰𑒯
𑒑𑒼𑒥𑒩𑒗𑒰𑒩 𑒠𑓄 𑒔𑒧𑒏𑒰𑒥𑒻 𑒕𑒲 𑒮𑓂𑒧𑒵𑒞𑒱𑒏𑒹𑒿
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒚𑒰𑒜𑓃 𑒕𑒪𑒱 𑒞𑒯𑒱𑒨𑒼 𑒯𑒧𑒩 𑒄 𑒥𑒳𑒜𑓃𑒱𑒨𑒰 𑒛𑒰𑒯𑒲।

𑒡𑒰𑒩𑒏𑒹𑒿 𑒩𑒼𑒏𑒥𑒰𑒏 𑒯𑒱𑒮𑓂𑒮𑒏 𑒖𑒏𑒩𑒰 𑒪𑒰𑒑𑒱 𑒑𑒹𑒪 𑒕𑒻
𑒂 𑒍 𑒮𑒦 𑒞𑒏𑒩 𑒫𑒱𑒩𑒳𑒠𑓂𑒡 𑒚𑒼𑒏𑒱 𑒏𑓄 𑒙𑒰𑒪
𑒦𑓄 𑒖𑒰𑒋𑒞 𑒚𑒰𑒜𑓃
𑒂 𑒛𑒩𑒰 𑒖𑒰𑒋𑒞 𑒠𑓂𑒫𑒹𑒭 𑒮𑓂𑒧𑒩𑒝 𑒏𑓄
𑒖𑒹 𑒤𑒹𑒩 𑒩𑒏𑓂𑒞𑒥𑒲𑒖𑒮𑒿 𑒢𑒱𑒏𑒪𑒪 𑒌 𑒮𑒯𑒮𑓂𑒩𑒥𑒰𑒜𑓃𑒢𑒱 𑒮𑒦𑒏 𑒩𑒏𑓂𑒞𑒥𑒲𑒖
𑒋𑒏𑒩 𑒮𑒦𑒏 𑒥𑒲𑒂𑒏 𑒮𑒢𑓂𑒞𑒰𑒢 𑒤𑒹𑒩 𑒂𑒩 𑒥𑒜𑓃𑒱 𑒖𑒰𑒋𑒞 𑒂𑒏𑓂𑒩𑒧𑒝𑒮𑒿
𑒏𑒰𑒩𑒝 𑒮𑓀𑒏𑒪𑓂𑒣 𑒁𑒕𑒱, 𑒃𑒔𑓂𑒕𑒰 𑒁𑒕𑒱 𑒄 𑒮𑒦
𑒡𑒰𑒩𑒏𑒹𑒿 𑒩𑒼𑒏𑒥𑒰𑒏 𑒯𑒱𑒮𑓂𑒮𑒏 𑒖𑒏𑒩𑒰 𑒪𑒰𑒑𑒱 𑒑𑒹𑒪 𑒕𑒻
𑒒𑒵𑒝𑒰𑒏 𑒫𑒱𑒩𑒳𑒠𑓂𑒡 𑒁𑒕𑒱 𑒖𑒹
𑒖𑒏𑒩𑒰 𑒥𑒳𑒜𑓃𑒱𑒨𑒰 𑒛𑒰𑒯𑒲 𑒁𑒯𑒰𑒿 𑒏𑒯𑒻 𑒕𑒱𑒌।


















𑒒𑒛𑓃𑒲 𑒣𑒴𑒖𑒰
𑒌𑒿 𑒨𑒾,
𑒁𑒯𑒴𑒿 𑒮𑒦𑒧𑒹 𑒯𑒼𑒃𑒋 𑒒𑒛𑓃𑒲 𑒣𑒴𑒖𑒰
𑒄 𑒞𑒿 𑒯𑒼𑒃 𑒕𑒻 𑒕𑒼𑒙𑒏𑒰 𑒪𑒼𑒏 𑒮𑒦𑒧𑒹
𑒁𑒑𑒮𑓂𑒞 𑓑𑓘 𑓒𑓐𑓑𑓐 𑒏𑒹𑒿 𑒕𑒻 𑒒𑒛𑓃𑒲 𑒣𑒴𑒖𑒰 𑒌 𑒥𑒹𑒩
𑒡𑒩𑓂𑒧𑒩𑒰𑒖𑒏 𑒦𑒑𑒫𑒞𑒲 𑒒𑒩𑒧𑒹
𑒐𑒰 𑒏𑓄 𑒯𑒰𑒟 𑒡𑒼 𑒏𑓄 𑒑𑒰𑒩𑒱 𑒠𑒻 𑒕𑒱𑒌,
𑒢𑒻 𑒏𑒱𑒕𑒳 𑒥𑒯𑒩𑒰𑒋𑒞 𑒥𑒰𑒯𑒩

𑒒𑒛𑓃𑒲 𑒣𑒴𑒖𑒰.. 𑒏𑒯𑒪𑒏𑒻 𑒖𑒹
𑒒𑒛𑓃𑒲 𑒣𑒴𑒖𑒰 𑒏𑒼𑒢 𑒣𑒴𑒖𑒰?
𑒨𑒖𑓂𑒘 𑒢𑒻 𑒨𑒼𑒑
𑒧𑒲𑒧𑒰𑓀𑒮𑒰 𑒢𑒻 𑒞𑒩𑓂𑒏
𑒫𑒹𑒠𑒰𑒢𑓂𑒞𑒏 𑒂𑒑𑒰𑒿 𑒮𑒰𑓀𑒐𑓂𑒨
𑒥𑓂𑒩𑒰𑒯𑓂𑒧𑒝𑓂𑒨𑒏 𑒥𑒰𑒠 𑒥𑒾𑒠𑓂𑒡
𑒬𑓂𑒩𑒠𑓂𑒡𑒰𑒏 𑒂𑒑𑒰𑒿 𑒞𑒣
𑒥𑓂𑒩𑒯𑓂𑒧𑒏 𑒥𑒠𑒪𑒰 𑒂𑒞𑓂𑒧
𑒇𑒭𑒱 𑒢𑒻 𑒧𑒳𑒢𑒱
𑒠𑒹𑒫𑒞𑒰 𑒢𑒻 𑒑𑒳𑒩𑒳

𑒒𑒛𑓃𑒲 𑒣𑒰𑒥𑒢𑒱
𑒦𑒑𑒫𑒞𑒲𑒏 𑒣𑒰𑒞𑒩𑒱
𑒦𑒑𑒫𑒞𑒲 𑒒𑒩𑒮𑒿 𑒢𑒫𑒹𑒠 𑒥𑒰𑒯𑒩 𑒢𑒻 𑒖𑒹𑒞𑒻
𑒦𑒑𑒫𑒞𑒲 𑒒𑒩𑒧𑒹 𑒏𑒹𑒩𑒰 𑒣𑒰𑒞 𑒮𑒯𑒱𑒞 𑒌𑒿𑒚-𑒏𑒴𑒃𑒚 𑒑𑒰𑒩𑒱 𑒠𑒻 𑒕𑒲
𑒮𑒦 𑒐𑒱𑒮𑓂𑒮𑒰 𑒏𑒩𑒻𑒋- 𑒒𑒛𑓃𑒲 𑒣𑒰𑒥𑒢𑒱 𑒥𑓂𑒩𑒰𑒯𑓂𑒧𑒝𑒏 𑒒𑒩𑒧𑒹?
𑒄 𑒞𑒿 𑒬𑒼𑒪𑒏𑒢𑓂𑒯𑒏 𑒒𑒩𑒏 𑒣𑒰𑒥𑒢𑒱 𑒕𑒱𑒌
𑒄 𑒞𑒿 𑒏𑒞𑒰𑒏 𑒣𑒳𑒩𑒐𑒰𑒮𑒿 𑒯𑒼𑒃𑒞 𑒂𑒥𑒱 𑒩𑒯𑒪 𑒁𑒕𑒱
𑒢𑒰𑒧 𑒕𑒱𑒌 𑒦𑒑𑒫𑒞𑒲 𑒒𑒩 𑒧𑒳𑒠𑒰 𑒮𑓂𑒟𑒰𑒢 𑒕𑒱𑒨𑒢𑓂𑒯𑒱 𑒡𑒩𑓂𑒧𑒩𑒰𑒖 𑒥𑒰𑒥𑒰𑒏
𑒒𑒛𑓃𑒲 𑒣𑒰𑒥𑒢𑒱, 𑒮𑒰𑒍𑒢 𑒧𑒰𑒮, 𑒧𑒡𑒳𑒬𑓂𑒩𑒰𑒫𑒝𑒲𑒏 𑒥𑒰𑒠 𑒖𑒯𑒱𑒨𑒰 𑒥𑒳𑒡 𑒣𑒛𑓃𑒞, 𑒞𑒯𑒱𑒨𑒰
𑒤𑒹𑒩 𑒁𑒭𑒰𑒜𑓃𑒧𑒹 𑒒𑒛𑓃𑒲 𑒣𑒰𑒫𑒢𑒱
𑒢𑒫 𑒥𑒩𑓂𑒞𑒢, 𑒢𑒫 𑒔𑒳𑒪𑓂𑒯𑒰𑒧𑒹 𑒐𑒲𑒩, 𑒠𑒰𑒪𑒱 𑒦𑒩𑒪 𑒣𑒴𑒛𑓃𑒲, 𑒧𑒼𑒞𑒲𑒔𑒴𑒛𑓃𑒏 𑒪𑒛𑓂𑒛𑒴
𑒂𑒿𑒔𑒩, 𑒂 𑒦𑒑𑒫𑒞𑒲 𑒒𑒩𑒧𑒹 𑒦𑒑𑒫𑒞𑒲𑒏 𑒙𑒰𑓀𑒑𑒪 𑒧𑒾𑒛𑓃
𑒏𑒼𑒚𑒱𑒨𑒰𑒏 𑒧𑒰𑒪𑒱 𑒏𑒹𑒩 𑒥𑒢𑒰𑒋𑒪 𑒡𑒩𑓂𑒧𑒩𑒰𑒖𑒏 𑒑𑒼𑒪 𑒧𑒛𑓃𑒩𑒰𑒢𑒲
𑒧𑒛𑓃𑒩𑒰𑒢𑒲𑒣𑒩𑒮𑒿 𑒖𑒢𑒾 𑒙𑒰𑓀𑒑𑒪
𑒔𑒾𑒠𑒯𑒼 𑒠𑒹𑒫𑒰𑒢 𑒦𑒑𑒫𑒞𑒲 𑒒𑒩𑒧𑒹
𑒔𑒾𑒠𑒯𑒼 𑒠𑒹𑒫𑒰𑒢𑒏 𑒫𑒰𑒮
𑒔𑒾𑒠𑒯𑒙𑒰 𑒐𑒲𑒩-𑒣𑒴𑒛𑓃𑒲𑒏 𑒣𑒰𑒞𑒩𑒱
𑒪𑒛𑓂𑒛𑒴 𑒂 𑒐𑒹𑒩𑒯𑒲 𑒫𑒰 𑒏𑒹𑒩𑒰𑒍𑒏 𑒠𑒰𑒪𑒱𑒏 𑒠𑒪𑒱𑒣𑒴𑒩𑒲𑒮𑒿 𑒗𑒰𑒿𑒣𑒪
𑒤𑒹𑒩 𑒦𑒑𑒫𑒞𑒲 𑒒𑒩 𑒥𑒢𑓂𑒢 𑒏𑓄 𑒠𑒹𑒪 𑒖𑒰𑒃𑒋
𑒤𑒹𑒩 𑒟𑒼𑒣𑒛𑓃𑒲 𑒣𑒰𑒩𑒱 𑒏𑓄 𑒐𑒼𑒪𑒪 𑒖𑒰𑒃𑒋
𑒥𑒰𑒪𑒹-𑒥𑒔𑓂𑒔𑒹 𑒣𑓂𑒩𑒮𑒰𑒠 𑒐𑒰
𑒦𑒑𑒫𑒞𑒲 𑒒𑒩𑒧𑒹 𑒧𑒰𑒙𑒱 𑒏𑒼𑒛𑓃𑒱 𑒏𑓄 𑒑𑒰𑒛𑓃𑒱 𑒠𑒹𑒪 𑒖𑒰𑒃𑒋

𑒂𑓀𑒑𑒢𑒧𑒹 𑒮𑒹𑒯𑒼 𑒋𑒏𑒙𑒰 𑒣𑒴𑒖𑒰 𑒯𑒼𑒃𑒋 𑒯𑒧𑒩𑒰 𑒒𑒩𑒧𑒹
𑒐𑒰𑒡𑒱 𑒐𑒴𑒢𑒱 𑒏𑓄, 𑒜𑒹𑒏𑒰 𑒐𑒼𑒪𑒱 𑒏𑓄
𑒥𑒰𑒪𑒰𑒣𑒲𑒩𑒏 𑒣𑒴𑒖𑒰 𑒐𑒲𑒩-𑒣𑒴𑒩𑒲 𑒩𑒰𑒐𑒱
𑒡𑒴𑒣-𑒠𑒲𑒣 𑒠𑒹𑒐𑒰 𑒏𑓄 𑒯𑒼𑒃 𑒕𑒻
𑒂 𑒧𑒰𑒙𑒱𑒏𑒹𑒿 𑒤𑒹𑒩 𑒢𑒲𑒣 𑒠𑒹𑒪 𑒖𑒰𑒃 𑒕𑒻
𑒥𑒰𑒪𑒰𑒣𑒲𑒩....

𑒫𑒱𑒬 𑒫𑒰 𑒖𑒢
𑒖𑒢𑒮𑒿 𑒖𑒢𑒏
𑒖𑒢 𑒏𑒹𑒩 𑒖𑒢𑒏

𑒂 𑒋𑒧𑓂𑒯𑒩 𑒧𑒹𑓀𑒯𑒟𑒧𑒹
𑒥𑒰𑒪𑒰𑒣𑒲𑒩
𑒯𑒧𑒩 𑒁𑓀𑒑𑒢𑒰𑒧𑒹!
𑒂 𑒍𑒧𑓂𑒯𑒩...

𑒧𑒝𑓂𑒛𑒪𑒰𑒧𑒹
𑒑𑒳𑒩𑒴 𑒥𑒰𑒪𑒰𑒣𑒲𑒩 𑒮𑒰𑒯𑒥𑒏 𑒣𑓂𑒩𑒑𑒙𑓂𑒨 𑒠𑒱𑒫𑒮
𑒥𑒻𑒮𑒰𑒐 𑒬𑒳𑒏𑓂𑒪 𑒣𑒴𑒩𑓂𑒝𑒱𑒧𑒰
𑒮𑒠𑓂𑒑𑒳𑒩𑒴 𑒏𑒥𑒲𑒩 𑒮𑒰𑒯𑒥
𑒮𑒞𑓂𑒨𑒢𑒰𑒧 𑒡𑒳𑒢
𑒑𑒳𑒩𑒴 𑒧𑒯𑒱𑒧𑒰 𑒣𑒰𑒚
𑒣𑒴𑒢𑒧 𑒧𑒯𑒰𑒞𑓂𑒧 𑒣𑒰𑒚
𑒮𑒞𑒮𑓀𑒑 𑒦𑒖𑒢
𑒮𑒧𑒰𑒡𑒱 𑒠𑒩𑓂𑒬𑒢
𑒦𑒹𑓀𑒙 𑒥𑓀𑒠𑒑𑒲
𑒦𑒝𑓂𑒛𑒰𑒩𑒰, 𑒔𑒾𑒏𑒰 𑒂𑒩𑒞𑒲
𑒂
𑒥𑒰𑒮𑒢𑒲 𑒪𑒑 𑒑𑒰𑒧 𑒏𑒳𑒧𑓂𑒯𑒰𑒩𑒲
𑒯𑒮𑒢 𑒬𑒯𑒲𑒠 𑒥𑒰𑒪𑒰𑒣𑒲𑒩
𑒅𑒩𑓂𑒮 𑒧𑒹𑒪𑒰
𑒞𑒲𑒢 𑒠𑒱𑒢
𑒤𑒖𑓂𑒩𑒏 𑒢𑒧𑒰𑒖
𑒠𑒩𑒑𑒰𑒯𑒧𑒹 𑒧𑒖𑒰𑒩 𑒬𑒩𑒲𑒤𑒣𑒩 𑒑𑒳𑒮𑓂𑒪𑒏 𑒩𑒮𑓂𑒧
𑒔𑒰𑒠𑒩𑒱 𑒔𑒜𑓃𑒰
𑒁𑒏𑒲𑒠𑒞𑒏 𑒤𑒴𑒪 𑒠𑒹𑒪 𑒖𑒰𑒃𑒋
𑒏𑒳𑒩𑒰𑒢𑒐𑓂𑒫𑒰𑒢𑒲
𑒢𑒰𑒑𑒾𑒩𑒮𑒿 𑒏𑒳𑒧𑓂𑒯𑒰𑒩𑒲
𑒥𑒰𑒮𑒢𑒲𑒮𑒿 𑒏𑒳𑒧𑓂𑒯𑒰𑒩𑒲

𑒥𑒰𑒪𑒰-𑒣𑒲𑒩𑒏 𑒮𑓂𑒟𑒰𑒢
𑒥𑒰𑒪𑒰-𑒣𑒲𑒩 𑒁𑒥𑒻 𑒕𑒟𑒱 𑒞𑒿 𑒮𑒳𑒑𑒢𑓂𑒡 𑒣𑒮𑒩𑒻𑒋
𑒂
𑒮𑒲𑒫𑒢𑒧𑒹 𑒏𑒻𑒟𑒪-𑒣𑒙𑒱𑒨𑒰𑒪𑒰 𑒠𑒱𑒮
𑒥𑒰𑒪𑒰 𑒣𑒲𑒩𑒏 𑒠𑒩𑒑𑒰𑒯
𑒜𑒼𑒪-𑒥𑒰𑒖𑒰 𑒮𑓀𑒑 𑒔𑒰𑒠𑒩𑒱 𑒂𑒢𑒱
𑒔𑒰𑒠𑒩𑒱 𑒔𑒜𑓃𑒰
𑒦𑓀𑒛𑒰𑒩𑒰

𑒂 𑒧𑒹𑓀𑒯𑒟𑒧𑒹
𑒂𑓀𑒑𑒢𑒧𑒹 𑒮𑒹𑒯𑒼 𑒋𑒏𑒙𑒰 𑒣𑒴𑒖𑒰 𑒯𑒼𑒃𑒋 𑒯𑒧𑒩𑒰 𑒒𑒩𑒧𑒹
𑒐𑒰𑒡𑒱 𑒐𑒴𑒢𑒱 𑒏𑓄, 𑒜𑒹𑒏𑒰 𑒐𑒼𑒪𑒱 𑒏𑓄
𑒥𑒰𑒪𑒰𑒣𑒲𑒩𑒏 𑒣𑒴𑒖𑒰 𑒐𑒲𑒩-𑒣𑒴𑒩𑒲 𑒩𑒰𑒐𑒱
𑒡𑒴𑒣-𑒠𑒲𑒣 𑒠𑒹𑒐𑒰 𑒏𑓄 𑒯𑒼𑒃 𑒕𑒻
𑒂 𑒧𑒰𑒙𑒱𑒏𑒹𑒿 𑒤𑒹𑒩 𑒢𑒲𑒣 𑒠𑒹𑒪 𑒖𑒰𑒃 𑒕𑒻
𑒥𑒰𑒪𑒰𑒣𑒲𑒩....
𑒁𑒯𑒧𑒠𑒰𑒥𑒰𑒠-𑒧𑒳𑓀𑒥𑒄 𑒯𑒰𑒃𑒫𑒹 𑒢𑓀𑒥𑒩 𑒂𑒚 𑒣𑒩 𑒢𑓀𑒠𑒹𑒮𑒩𑒲 𑒑𑒰𑒿𑒫
𑒥𑒰𑒪𑒰𑒣𑒲𑒩𑒏 𑒠𑒩𑒑𑒰𑒯
𑒥𑒰𑒥𑒰𑒏 𑒬𑒰𑒢𑒧𑒹 𑒒𑒛𑓃𑒲𑒏 𑒔𑒜𑓃𑒾𑒂 !!!

𑒒𑒛𑓃𑒲 𑒣𑒴𑒖𑒰...
𑒒𑒛𑓃𑒲 𑒣𑒴𑒖𑒰.. 𑒏𑒯𑒪𑒏𑒻 𑒖𑒹
𑒏𑒼𑒢 𑒣𑒴𑒖𑒰
𑒣𑒴𑒖𑒰 𑒢𑒻 𑒨𑒖𑓂𑒘
𑒨𑒖𑓂𑒘 𑒢𑒻 𑒨𑒼𑒑
𑒧𑒲𑒧𑒰𑓀𑒮𑒰 𑒢𑒻 𑒞𑒩𑓂𑒏
𑒫𑒹𑒠𑒰𑒢𑓂𑒞𑒏 𑒂𑒑𑒰𑒿 𑒮𑒰𑓀𑒐𑓂𑒨
𑒥𑓂𑒩𑒰𑒯𑓂𑒧𑒝𑓂𑒨𑒏 𑒥𑒰𑒠 𑒥𑒾𑒠𑓂𑒡
𑒬𑓂𑒩𑒠𑓂𑒡𑒰𑒏 𑒂𑒑𑒰𑒿 𑒞𑒣
𑒥𑓂𑒩𑒯𑓂𑒧𑒏 𑒥𑒠𑒪𑒰 𑒂𑒞𑓂𑒧
𑒇𑒭𑒱 𑒢𑒻 𑒧𑒳𑒢𑒱
𑒠𑒹𑒫𑒞𑒰 𑒢𑒻 𑒑𑒳𑒩𑒳

𑒥𑓂𑒩𑒰𑒯𑓂𑒧𑒝𑒢𑒻 𑒫𑓂𑒩𑒰𑒞𑓂𑒨
𑒧𑒳𑒩𑒹𑒚𑒰 𑒥𑒢𑓂𑒯𑒢𑒹,
𑒯𑒰𑒟𑒧𑒹 𑒣𑒹𑒢𑒰
𑒡𑒢𑒳𑒭
𑒃𑒢𑓂𑒠𑓂𑒩𑒡𑒢𑒳𑒭
𑒣𑒢𑒱𑒮𑒼𑒐𑒰
𑒢𑒲𑒪 𑒣𑒹𑒙
𑒪𑒰𑒪-𑒪𑒼𑒯𑒱𑒞 𑒣𑒲𑒚
𑒫𑒱𑒖𑓂𑒘𑒰𑒢, 𑒞𑒩𑓂𑒏, 𑒥𑒳𑒠𑓂𑒡𑒱𑒏 𑒫𑒰𑒮
𑒏𑒰𑒩𑒲 𑒏𑒹𑒬, 𑒫𑒖𑓂𑒩, 𑒏𑒳𑒝𑓂𑒛𑒪
𑒏𑒰𑒩𑒲 𑒩𑒓𑒏 𑒏𑒣𑒛𑓃𑒰
𑒑𑒩𑒰𑒧𑒹 𑒔𑒰𑓀𑒠𑒲𑒏 𑒯𑒿𑒮𑒳𑒪𑒲
𑒏𑒰𑒩𑒲 𑒂 𑒅𑒖𑓂𑒖𑒩 𑒦𑒹𑒛𑓃𑒰𑒏 𑒔𑒧𑒛𑓃𑒰 𑒛𑒰𑒿𑒛𑓃𑒧𑒹
𑒪𑒰𑒪 𑒣𑒰𑒜𑓃𑒱
𑒂𑒿𑒔𑒩𑒧𑒹 𑒞𑒯 𑒢𑒻
𑒐𑒰𑒪𑒲 𑒣𑒋𑒩𑒹
𑒧𑒼𑒢𑒏 𑒩𑒟𑒣𑒩 𑒁𑒮𑒫𑒰𑒩
𑒏𑓂𑒭𑒝𑒣𑓂𑒩𑒦𑒰 𑒍𑒏𑒩 𑒔𑒰𑒥𑒳𑒏
𑒡𑒰𑒢𑒳𑒏𑒲 𑒫𑓂𑒩𑒰𑒞𑓂𑒨
𑒮𑒰𑓀𑒐𑓂𑒨𑒡𑒰𑒩𑒰𑒏 𑒫𑒰𑒯𑒏
𑒥𑓂𑒩𑒰𑒯𑓂𑒧𑒝𑒏 𑒮𑒼𑒧 𑒫𑓂𑒩𑒰𑒞𑓂𑒨𑒏 𑒮𑒳𑒩𑒰!!
𑒯𑒧 𑒫𑓂𑒩𑒰𑒞𑓂𑒨

𑒏𑒲𑒏𑒙, 𑒫𑒱𑒠𑒹𑒯𑒏 𑒁𑒠𑓂𑒦𑒳𑒞 𑒥𑓂𑒩𑒰𑒯𑓂𑒧𑒝
𑒭𑒛𑒫𑒱𑓀𑒬
𑒠𑒹𑒫 𑒣𑓂𑒩𑒞𑒱𑒧𑒰𑒏 𑒯𑒿𑒮𑒥, 𑒏𑒰𑒢𑒥, 𑒢𑒰𑒔𑒥
𑒣𑒱𑒣𑒢𑒲 𑒐𑒮𑒰𑒋𑒥, 𑒯𑒱𑒪𑒰𑒋𑒥
𑒠𑒹𑒫 𑒧𑒢𑓂𑒠𑒱𑒩𑒏 𑒟𑒩𑒟𑒩𑒲
𑒠𑒹𑒫 𑒣𑓂𑒩𑒞𑒱𑒧𑒰𑒏 𑒤𑒴𑒙𑒥


𑒒𑒛𑓃𑒲 𑒣𑒴𑒖𑒰.. 𑒏𑒯𑒪𑒏𑒻 𑒖𑒹
𑒒𑒛𑓃𑒲 𑒣𑒴𑒖𑒰 𑒏𑒼𑒢 𑒣𑒴𑒖𑒰?
𑒨𑒖𑓂𑒘 𑒢𑒻 𑒨𑒼𑒑
𑒨𑒖𑓂𑒘 𑒧𑒰𑒢𑒹 𑒂𑒫𑒰𑒯𑒢, 𑒮𑒧𑒩𑓂𑒣𑒝,
𑒨𑒼𑒑 𑒁𑒕𑒱 𑒧𑒳𑒠𑒰 𑒮𑒰𑒧𑒩𑓂𑒟𑓂𑒨
𑒧𑒲𑒧𑒰𑓀𑒮𑒰 𑒏𑒩𑒻𑒞, 𑒞𑒯𑒏 𑒞𑒯𑒧𑒹 𑒖𑒰𑒃
𑒧𑒳𑒠𑒰 𑒅𑒞𑓂𑒞𑒩 𑒞𑒩𑓂𑒏 𑒮𑒿 𑒁𑒥𑒻𑒋
𑒫𑒹𑒠𑒰𑒢𑓂𑒞𑒏 𑒧𑒱𑒟𑓂𑒨𑒰 𑒢𑒻 𑒮𑒰𑓀𑒐𑓂𑒨𑒏 𑒮𑒞𑓂𑒫, 𑒩𑒖𑒮, 𑒞𑒧𑒮𑓂
𑒥𑓂𑒩𑒰𑒯𑓂𑒧𑒝𑓂𑒨𑒏 𑒥𑒰𑒠 𑒥𑒾𑒠𑓂𑒡
𑒬𑓂𑒩𑒠𑓂𑒡𑒰 𑒧𑒰𑒞𑓂𑒩𑒮𑒿 𑒏𑒲 𑒯𑒋𑒞, 𑒣𑓂𑒩𑒰𑒣𑓂𑒞𑒱 𑒪𑒹𑒪 𑒞𑒣
𑒥𑓂𑒩𑒯𑓂𑒧𑒣𑒩 𑒕𑒼𑒛𑓃𑒪𑒰𑒮𑒿 𑒏𑒲 𑒯𑒋𑒞, 𑒮𑒦𑒙𑒰 𑒖𑒱𑒧𑓂𑒧𑒰 𑒁𑒕𑒱 𑒂𑒞𑓂𑒧𑒏
𑒇𑒭𑒱𑒏 𑒖𑓂𑒘𑒰𑒢𑒏 𑒢𑒻 𑒏𑒰𑒖
𑒖𑒹 𑒩𑒲𑒕 𑒮𑒢 𑒣𑒩𑓂𑒫𑒞 𑒏𑒢𑓂𑒠𑒩𑒰𑒧𑒹 𑒩𑒯𑒻 𑒕𑒟𑒱
𑒧𑒳𑒢𑒱𑒏 𑒩𑒰𑒑-𑒠𑓂𑒫𑒹𑒭-𑒞𑒰𑒧𑒮𑒮𑒿 𑒩𑒯𑒱𑒞
𑒪𑒼𑒏𑒏 𑒥𑒲𑒔 𑒩𑒯𑒢𑒰𑒃 𑒁𑒕𑒱 𑒣𑒮𑒱𑒢𑓂𑒢
𑒥𑒱𑒢𑒳 𑒠𑒹𑒐𑒪-𑒥𑒳𑒗𑒪 𑒠𑒹𑒫𑒞𑒰 𑒢𑒻
𑒑𑒳𑒩𑒳 𑒔𑒰𑒯𑒲, 𑒖𑒏𑒩𑒰𑒮𑒿 𑒏𑓄 𑒮𑒏𑒲 𑒫𑒰𑒩𑓂𑒞𑒰
𑒯𑒧 𑒫𑓂𑒩𑒰𑒞𑓂𑒨

𑒁𑒯𑒰𑒿 𑒞𑒰𑒏𑒻𑒞 𑒩𑒯𑒴
𑒏𑒰𑒩𑒝 𑒠𑒹𑒫 𑒣𑓂𑒩𑒞𑒱𑒧𑒰𑒏 𑒯𑒿𑒮𑒥𑒰𑒏, 𑒏𑒢𑒥𑒰𑒏, 𑒢𑒔𑒥𑒰𑒏
𑒣𑒱𑒣𑒢𑒲 𑒐𑒮𑒹𑒥𑒰𑒏, 𑒯𑒱𑒪𑒹𑒥𑒰𑒏
𑒠𑒹𑒫 𑒧𑒢𑓂𑒠𑒱𑒩𑒏 𑒟𑒩𑒟𑒩𑒹𑒥𑒰𑒏
𑒠𑒹𑒫 𑒣𑓂𑒩𑒞𑒱𑒧𑒰𑒏 𑒤𑒳𑒙𑒥𑒰𑒏

𑒯𑒧 𑒞𑒿 𑒞𑒰𑒏𑒱 𑒩𑒯𑒪 𑒕𑒲 𑒩𑒯𑒮𑓂𑒨
𑒥𑒰𑒪𑒰𑒣𑒲𑒩
𑒯𑒧𑒩 𑒁𑓀𑒑𑒢𑒰𑒧𑒹!
𑒂𑓀𑒑𑒢𑒧𑒹..
𑒐𑒰𑒡𑒱 𑒐𑒴𑒢𑒱 𑒏𑓄…, 𑒜𑒹𑒏𑒰 𑒐𑒼𑒪𑒱 𑒏𑓄 ..
𑒥𑒰𑒪𑒰𑒣𑒲𑒩𑒏 𑒣𑒴𑒖𑒰 𑒐𑒲𑒩-𑒣𑒴𑒩𑒲 𑒩𑒰𑒐𑒱
𑒡𑒴𑒣-𑒠𑒲𑒣 𑒠𑒹𑒐𑒰 𑒏𑓄 𑒏𑒱𑒋 𑒯𑒼𑒃𑒋
𑒂 𑒧𑒰𑒙𑒱𑒏𑒹𑒿 𑒤𑒹𑒩 𑒢𑒲𑒣 𑒠𑒹𑒪 𑒖𑒰𑒃𑒋

𑒒𑒛𑓃𑒲 𑒣𑒴𑒖𑒰𑒏 𑒏𑒰𑒩𑒝 𑒞𑒰𑒏𑒻 𑒕𑒲…
𑒒𑒛𑓃𑒲 𑒣𑒰𑒥𑒢𑒱
𑒦𑒑𑒫𑒞𑒲𑒏 𑒣𑒰𑒞𑒩𑒱
𑒦𑒑𑒫𑒞𑒲 𑒒𑒩𑒮𑒿 𑒢𑒫𑒹𑒠 𑒥𑒰𑒯𑒩 𑒢𑒻 𑒖𑒰𑒃𑒋 𑒏𑒱𑒋..
𑒦𑒑𑒫𑒞𑒲 𑒒𑒩𑒧𑒹 𑒏𑒹𑒩𑒰 𑒣𑒰𑒞 𑒮𑒯𑒱𑒞 𑒌𑒿𑒚-𑒏𑒴𑒃𑒚 𑒑𑒰𑒩𑒱 𑒠𑒻 𑒕𑒲 𑒏𑒱𑒋..
























𑒢𑒖𑒩𑒱 𑒪𑒰𑒑𑒱 𑒖𑒰𑒃 𑒕𑒻
𑒧𑒰𑒋 𑒏𑒯𑒻 𑒕𑒟𑒱
𑒖𑒹 𑒢𑒖𑒩𑒱 𑒪𑒰𑒑𑒱 𑒖𑒰𑒃 𑒕𑒻
𑒥𑒹𑒙𑒰𑒏𑒹𑒿 𑒠𑒹𑒐𑒱 𑒖𑒹 𑒪𑒰𑒑𑒻𑒋 𑒍 𑒂𑒃 𑒮𑒳𑒢𑓂𑒠𑒩
𑒮𑒰𑒿𑒗𑒧𑒹 𑒕𑒰𑒯 𑒣𑒛𑓃𑒱 𑒖𑒰𑒃 𑒕𑒻 𑒍𑒏𑒩 𑒧𑒳𑒿𑒯𑒣𑒩
𑒮𑒹 𑒞𑒿 𑒮𑒞𑓂𑒞𑒹! 𑒯𑒧𑒩𑒰 𑒮𑒢 𑒏𑒏𑒩 𑒥𑒹𑒙𑒰
𑒧𑒳𑒠𑒰 𑒧𑒼𑒢𑒧𑒹 𑒄 𑒁𑒥𑒱𑒞𑒹 𑒢𑒖𑒩𑒱 𑒪𑒰𑒑𑒱 𑒖𑒰𑒃 𑒕𑒻

𑒏𑒼𑒢𑒼 𑒏𑒰𑒖 𑒬𑒳𑒩𑒴 𑒏𑒩𑒻𑒋
𑒧𑒰𑒩𑒱𑒞𑒹 𑒩𑒰𑒮 𑒏𑒰𑒖 𑒋𑒏𑓂𑒏𑒹 𑒥𑒹𑒩
𑒐𑒞𑒧 𑒯𑒹𑒥𑒰 𑒡𑒩𑒱 𑒮𑒳𑒡𑒱 𑒢𑒻 𑒩𑒯𑒻 𑒕𑒻
𑒏𑒱𑒨𑒼 𑒏𑒯𑒻𑒋 𑒖𑒹 𑒏𑒞𑒹𑒏 𑒢𑒲𑒏 𑒁𑒕𑒱 𑒁𑒯𑒰𑒿𑒏 𑒥𑒹𑒙𑒰
𑒞𑒿 𑒧𑒰𑒋𑒏 𑒏𑒩𑒹𑒖 𑒡𑒏𑒮𑒿 𑒩𑒯𑒱 𑒖𑒰𑒃 𑒕𑒻
𑒏𑒩𑒹𑒖 𑒥𑒻𑒮𑓄 𑒪𑒑𑒻 𑒕𑒻
𑒏𑒲 𑒏𑒩𑒻 𑒕𑒻?
𑒏𑒼𑒢 𑒮𑒳𑒢𑓂𑒠𑒩 𑒕𑒻?
𑒧𑒳𑒠𑒰 𑒏𑒯𑒻𑒞 𑒩𑒯𑒻 𑒕𑒟𑒱 𑒧𑒰𑒋
𑒖𑒹 𑒢𑒖𑒩𑒱 𑒪𑒰𑒑𑒱 𑒖𑒰𑒃 𑒕𑒻
𑒥𑒰𑒞𑒹-𑒥𑒰𑒞𑒣𑒩 𑒯𑒧𑒩 𑒥𑒹𑒙𑒰𑒏𑒹𑒿
𑒏𑒢𑒱𑒨𑒰𑒿 𑒏𑒯𑒻 𑒕𑒟𑒱 𑒮𑒰𑒮𑒳𑒏𑒹𑒿
𑒧𑒰𑒿 𑒁𑒯𑒰𑒿𑒏 𑒥𑒹𑒙𑒰 𑒒𑒥𑒩𑒰𑒃 𑒥𑒪𑒰 𑒢𑒻 𑒁𑒕𑒱
𑒠𑒳𑒭𑓂𑒙𑒏 𑒢𑒖𑒩𑒱 𑒢𑒻 𑒪𑒑𑒻 𑒕𑒻 𑒁𑒯𑒰𑒿𑒏 𑒥𑒹𑒙𑒰𑒏𑒹𑒿

𑒧𑒰𑒋 𑒧𑒳𑒠𑒰 𑒬𑒢𑒱 𑒠𑒱𑒢, 𑒮𑒩𑒱𑒮𑒾-𑒞𑒼𑒩𑒲 𑒂 𑒧𑒹𑒩𑒔𑒰𑒃 𑒖𑒛𑓃𑒥𑒻 𑒕𑒟𑒱
𑒮𑒳𑒩𑒮𑒳𑒩𑒲 𑒪𑒰𑒑𑒱 𑒖𑒹𑒞𑒻 𑒍𑒏𑒩𑒰 𑒞𑒿 𑒥𑒳𑒗𑒥 𑒖𑒹 𑒢𑒖𑒩𑒱 𑒢𑒻 𑒪𑒰𑒑𑒪 𑒕𑒻
𑒂 𑒮𑒳𑒩𑒮𑒳𑒩𑒲 𑒖𑒹 𑒢𑒻 𑒪𑒰𑒑𑒞𑒻 𑒞𑒿 𑒥𑒳𑒗𑒥 𑒖𑒹 𑒢𑒖𑒩𑒱 𑒪𑒰𑒑𑒱 𑒖𑒰𑒃 𑒕𑒻

𑒏𑒢𑒹 𑒏𑒰𑒪 𑒮𑒳𑒩𑒮𑒳𑒩𑒲 𑒢𑒻 𑒪𑒑𑒪𑒰𑒣𑒩 𑒧𑒰𑒋 𑒯𑒼𑒃 𑒕𑒟𑒱 𑒔𑒱𑒢𑓂𑒞𑒱𑒞
𑒠𑒹𑒐𑒱𑒨𑒾 𑒢𑒹, 𑒯𑒧𑒩𑒰 𑒥𑒹𑒙𑒰𑒏𑒹𑒿 𑒢𑒖𑒩𑒱 𑒪𑒰𑒑𑒻 𑒕𑒻 𑒕𑒼𑒙𑒼-𑒕𑒼𑒙 𑒑𑒣𑒣𑒩..
𑒢𑒖𑒩𑒱 𑒪𑒰𑒑𑒱 𑒖𑒰𑒃 𑒕𑒻... 𑒥𑒰𑒞𑒹-𑒥𑒰𑒞𑒣𑒩 𑒯𑒧𑒩 𑒥𑒹𑒙𑒰𑒏𑒹𑒿...
𑒧𑒳𑒠𑒰 𑒞𑒐𑒢𑒹 𑒕𑒱𑒏𑒻𑒞 𑒕𑒢𑓂𑒯𑒱 𑒥𑒹𑒙𑒰, 𑒍𑒏𑒩𑒰 𑒮𑒳𑒩𑒮𑒳𑒩𑒲 𑒪𑒰𑒑𑒱 𑒖𑒰𑒃 𑒕𑒻
𑒧𑒰𑒋𑒏 𑒧𑒳𑒿𑒯𑒣𑒩 𑒁𑒥𑒻 𑒕𑒢𑓂𑒯𑒱 𑒧𑒳𑒮𑓂𑒏𑒲
𑒮𑒩𑒱𑒮𑒾-𑒞𑒼𑒩𑒲 𑒂 𑒧𑒹𑒩𑒔𑒰𑒃 𑒮𑒩𑒥𑒰𑒧𑒹 𑒏𑒢𑒹𑒏 𑒂𑒩 𑒠𑓄 𑒠𑒻 𑒕𑒟𑒱...
𑒏𑒯𑒪𑒱𑒨𑒢𑓂𑒯𑒱 𑒢𑒹 𑒧𑒰𑒿 𑒠𑒳𑒭𑓂𑒙𑒏 𑒢𑒖𑒩𑒱 𑒢𑒻 𑒪𑒑𑒻 𑒕𑒻 𑒁𑒯𑒰𑒿𑒏 𑒥𑒹𑒙𑒰𑒏𑒹𑒿

























𑒚𑒰𑒜𑓃 𑒪𑒞𑓂𑒞𑒲𑒏𑒹𑒿 𑒣𑒜𑓃𑒻𑒞 𑒕𑒲

𑒣𑒰𑒢𑒏 𑒖𑒛𑓃𑒱 𑒪𑒑 𑒑𑒰𑒩𑒪 𑒐𑒩𑒯𑒲 𑒠𑒹𑒐𑒻 𑒕𑒲
𑒂 𑒍𑒃𑒣𑒩 𑒚𑒰𑒜𑓃 𑒪𑒞𑓂𑒞𑒲𑒏𑒹𑒿 𑒣𑒜𑓃𑒻 𑒕𑒲
𑒩𑒰𑒛𑓃𑒲 𑒒𑒰𑒮𑒏 𑒙𑒳𑒏𑒛𑓃𑒲 𑒂 𑒏𑒰𑒃𑒮𑒮𑒿 𑒥𑒰𑒢𑓂𑒯𑒪 𑒯𑒧𑒩 𑒅𑒪𑓂𑒪𑒰𑒮
𑒮𑒩𑒣𑒞 𑒒𑒰𑒮𑒏 𑒙𑒳𑒏𑒛𑓃𑒲𑒣𑒩 𑒔𑒜𑓃𑒱 𑒑𑒹𑒪 𑒪𑒞𑓂𑒞𑒲 𑒖𑒹𑒏𑒰𑒿
𑒪𑒞𑓂𑒞𑒲 𑒖𑒹𑒏𑒰𑒿 𑒯𑒧 𑒁𑒣𑒢𑒰𑒏𑒹𑒿 𑒣𑒥𑒻 𑒕𑒲

𑒥𑒢𑓂𑒯𑒏𑒰𑒮𑒿 𑒥𑒰𑒢𑓂𑒯𑒪 𑒣𑒰𑒢𑒏 𑒜𑒼𑒪 𑒥𑒢𑒱 𑒑𑒹𑒪 𑒕𑒲
𑒧𑒼𑒛𑓃𑒪 𑒣𑒰𑒢𑒏𑒹𑒿 𑒮𑒲𑒏𑒲𑒮𑒿,
𑒥𑒰𑒿𑒮𑒏 𑒣𑒰𑒞𑒩 𑒬𑒪𑒰𑒏𑒰𑒮𑒿 𑒑𑒰𑒿𑒟𑒪 𑒁𑒕𑒱
𑒥𑒹𑒪 𑒢𑒱𑒏𑒪𑒪 𑒬𑒰𑒐𑒰 𑒏𑒢𑒰𑒩,
𑒃𑒏𑒩𑒲𑒮𑒿 𑒑𑒕𑒅𑒚𑒾𑒢𑒲
𑒣𑒰𑒢𑒏 𑒕𑒩𑓂𑒩𑒰 𑒪𑒞𑓂𑒞𑒲, 𑒑𑒲𑒩𑒯𑒮𑒿 𑒨𑒳𑒏𑓂𑒞 𑒕𑒩𑓂𑒩𑒰 𑒥𑒹𑒪 𑒥𑒢𑒱 𑒑𑒹𑒪 𑒕𑒲
𑒪𑒞𑓂𑒞𑒲𑒏 𑒕𑒲𑒣𑒏𑒹𑒿 𑒏𑒰𑒙𑒥, 𑒕𑒣𑒙𑒰 𑒏𑒩𑒥
𑒖𑒛𑓃𑒱 𑒪𑒑𑒏 𑒔𑒰𑒩𑒱-𑒣𑒰𑒿𑒔𑒙𑒰 𑒣𑒰𑒢𑒏 𑒣𑒰𑒞 𑒧𑒰𑒢𑒹 𑒒𑒰𑒮𑒢 𑒖𑒏𑒰𑒿
𑒆𑒣𑒩 𑒔𑒰𑒩𑒱-𑒣𑒰𑒿𑒔𑒙𑒰 𑒣𑒰𑒢𑒏 𑒣𑒰𑒞 𑒧𑒰𑒢𑒹 𑒏𑒴𑒙-𑒐𑒴𑒙 𑒏𑒔𑒪𑒹𑒫𑒰𑒩𑒱 𑒯𑒼𑒃𑒞
𑒕𑒲𑒣 𑒣𑒩𑒏 𑒣𑒰𑒞 𑒧𑒳𑒛𑓃𑒫𑒰𑒩𑒱 𑒦𑓄 𑒑𑒹𑒪 𑒕𑒲

𑒣𑒰𑒞 𑒞𑒼𑒛𑓃𑒥𑒰𑒏𑒰𑒪 𑒏𑒴𑒙𑒏 𑒋𑒏-𑒠𑒴𑒙𑒰 𑒣𑒰𑒞 𑒞𑒖𑓂𑒖𑒲𑒥𑒪𑒰 𑒏𑒚𑒼𑒩 𑒣𑒰𑒞
𑒏𑒱𑒕𑒳 𑒏𑒰𑒪 𑒪𑒹𑒪 𑒕𑒼𑒛𑓃𑒱 𑒠𑒹𑒪
𑒖𑒛𑓃𑒱𑒮𑒿 𑒕𑒲𑒣 𑒡𑒩𑒱 𑒠𑒳𑒣𑒢𑓂𑒢𑒰 𑒂 𑒪𑒹𑒫𑒰𑒩 𑒮𑒦
𑒗𑒪𑒧𑒰 𑒥𑒲𑒧𑒰𑒩𑒲 𑒦𑒹𑒢𑒹 𑒣𑒰𑒢 𑒏𑒛𑓃𑒴 𑒦𑒹𑒪
𑒤𑒳𑒙𑓂𑒙𑒰 𑒥𑒲𑒧𑒰𑒩𑒲 𑒦𑒹𑒢𑒹 𑒑𑒪𑒪 𑒣𑒰𑒞 𑒮𑒢 𑒯𑒧 𑒁𑒮𑒏𑒩𑒹 𑒒𑒳𑒧𑒻 𑒕𑒲
𑒞𑒳𑒥𑒻𑒞, 𑒞𑒹𑒪𑒑𑒑𑒩𑒰 𑒦𑒹𑒢𑒹 𑒂 𑒗𑒩𑒏𑒻𑒞; 𑒥𑒜𑓃𑒞𑒲 𑒦𑒹𑒢𑒹 𑒁𑒑𑓂𑒩𑒦𑒰𑒑 𑒗𑒩𑒻𑒞
𑒣𑒰𑒞𑒏𑒹𑒿 𑒤𑒹𑒩𑒤𑒰𑒩 𑒏𑓄 𑒧𑒵𑒞𑓂𑒨𑒳𑒏𑒹𑒿 𑒙𑒰𑒩𑒻 𑒕𑒲 𑒏𑒱𑒕𑒳 𑒏𑒰𑒪 𑒡𑒩𑒱, 𑒥𑒯𑒳𑒞𑒲!



𑒔𑒾𑒚𑒻𑒨𑓂𑒨𑒰, 𑒜𑒼𑒪𑒲, 𑒪𑒹𑒮𑒼, 𑒦𑒲𑒛𑓃𑒰 𑒥𑒢𑒱 𑒑𑒹𑒪 𑒕𑒲
𑒣𑒰𑒞𑒧𑒹 𑒥𑒰𑒢𑓂𑒯𑒪 𑒦𑒲𑒛𑓃𑒲, 𑒮𑒹 𑒣𑒞𑒾𑒩𑒰 𑒖𑒏𑒰𑒿 𑒞𑒻𑒨𑒰𑒩 𑒦𑒹𑒪 𑒏𑒪𑓂𑒪𑒰𑒧𑒹 𑒖𑒹𑒥𑒰 𑒪𑒹𑒪 𑒡𑒛𑓃𑒤𑒛𑓃𑒰𑒃𑒞
𑒛𑓀𑒙𑒲 𑒪𑒰𑒑𑒪 𑒮𑒾𑒿𑒮 𑒕𑒳𑒙𑓂𑒙𑒰 𑒣𑒰𑒢 𑒮𑒢 𑒣𑒴𑒖𑒰 𑒪𑒹𑒪 𑒢𑒱𑒯𑒳𑒕𑒪
𑒞𑒥𑒏 𑒮𑒢 𑒔𑒧𑒏𑒻𑒞 𑒣𑒢𑓂𑒢𑒲𑒧𑒹 𑒚𑒴𑒮𑒪 𑒥𑒖𑒰𑒩𑒏 𑒮𑒧𑒰𑒢 𑒥𑒢𑒱 𑒑𑒹𑒪 𑒕𑒲
𑒂 𑒞𑒐𑒢
𑒣𑒰𑒢𑒏 𑒖𑒛𑓃𑒱 𑒪𑒑 𑒑𑒰𑒩𑒪 𑒐𑒩𑒯𑒲 𑒠𑒹𑒐𑒻 𑒕𑒲
𑒂 𑒍𑒃𑒣𑒩 𑒚𑒰𑒜𑓃 𑒪𑒞𑓂𑒞𑒲𑒏𑒹𑒿 𑒣𑒜𑓃𑒻 𑒕𑒲























𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱

𑒂𑒿𑒔𑒥 𑒂 𑒣𑓂𑒩𑒖𑓂𑒫𑒪𑒱𑒞 𑒩𑒰𑒐𑒥, 𑒯𑒧𑓂𑒯𑒩𑒥 𑒂𑒑𑒱𑒏𑒹𑒿
𑒐𑒼𑒩𑒢𑒰𑒚𑒥 𑒧𑒳𑒠𑒰, 𑒞𑒐𑒢 𑒂𑒑𑒱 𑒐𑒮𑒞 𑒣𑒰𑒞𑒏 𑒜𑒹𑒩𑒲𑒣𑒩
𑒂 𑒣𑒮𑒰𑒯𑒲 𑒪𑒰𑒑𑒞
𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱𑒏𑒹𑒿

𑒧𑒐𑒰𑒢 𑒅𑒚𑒥𑒻𑒞 𑒕𑒪𑒾𑓀 𑒣𑒹𑒪𑒢𑒲𑒮𑒿
𑒑𑒴𑒛𑓃𑒲𑒮𑒿 𑒔𑒼𑓀𑒃𑒙𑒰 𑒯𑒙𑒥𑒻 𑒕𑒪𑒾𑓀
𑒥𑒰𑒓𑒏 𑒥𑒓𑒾𑒩𑒰, 𑒮𑒳𑒐𑒰𑒋𑒪 𑒁𑒕𑒱 𑒏𑒹𑒯𑒢 𑒄 𑒥𑒓𑒚𑒲
𑒎𑓀𑒙𑒱 𑒏𑓄 𑒢𑒱𑒏𑒰𑒪𑒲 𑒥𑒓𑒼𑒩,
𑒞𑒳𑒧𑒥 𑒂 𑒤𑒰𑒯𑒰𑒏 𑒣𑒵𑒟𑒏 𑒯𑒋𑒥, 𑒡𑒳𑒢𑒏𑒲𑒮𑒿 𑒡𑒳𑒢𑒻 𑒕𑒪𑒾𑓀
𑒪𑒰𑒩𑒢𑒱𑒮𑒿 𑒞𑒰𑒿𑒞𑒱𑒣𑒩 𑒏𑓄 𑒂𑒒𑒰𑒞, 𑒧𑒐𑒰𑒢 𑒅𑒚𑒥𑒻𑒞 𑒩𑒯𑒲 𑒣𑒹𑒪𑒢𑒲𑒮𑒿
𑒑𑒴𑒛𑓃𑒲𑒮𑒿 𑒔𑒼𑓀𑒃𑒙𑒰 𑒯𑒙𑒥𑒻𑒞 𑒩𑒯𑒲, 𑒩𑒯𑒲 𑒙𑒏𑒳𑒩𑒲 𑒏𑒙𑒻𑒞, 𑒧𑒛𑓃𑒱𑒋𑒥𑒻𑒞 𑒕𑒱𑒢𑓂𑒢𑒰𑒏𑒹𑒿
𑒣𑒰𑒑𑒻𑒞 𑒮𑒴𑒞, 𑒕𑒪 𑒄 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱

𑒢𑒢𑒑𑒱𑒪𑒰𑒙 𑒣𑒯𑒱𑒩𑒢𑒹 𑒥𑒴𑒜𑓃𑒲, 𑒮𑒼𑒗𑒰𑒿 𑒢𑒢𑓂𑒯𑒮𑒳𑒞𑒧𑒹 𑒧𑒪𑒏𑒱𑒢𑒲
𑒏𑒪𑒥𑒞𑓂𑒞𑒴 𑒣𑒃𑒮𑒰 𑒏𑓄 𑒑𑒰𑒿𑒟𑒻𑒞 𑒂𑒦𑒴𑒭𑒝 𑒧𑒼𑒢 𑒁𑒕𑒱
𑒏𑒱𑒩𑒧𑒱𑒔𑒲 𑒔𑒰𑒢𑒲𑒏 𑒣𑒰𑒢𑒱 𑒔𑒜𑓃𑒪, 𑒧𑒳𑒠𑒰 𑒫𑒋𑒯 𑒞𑒰𑒧
𑒂𑒥 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒧𑒰𑓀𑒑𑒻𑒞 𑒁𑒕𑒱
𑒣𑒰𑒑 𑒢𑒻 𑒔𑒰𑒯𑒲 𑒯𑒧𑒩𑒰 𑒧𑒾𑒛𑓃
𑒬𑓀𑒏𑒳𑒏 𑒂𑒏𑒰𑒩𑒏 𑒣𑒻𑒒,
𑒏𑒼𑒜𑓃𑒱𑒪𑒰𑒨𑒳𑒏𑓂𑒞
𑒣𑒰𑒑𑒏 𑒁𑒑𑓂𑒩𑒦𑒰𑒑𑒏 𑒣𑒹𑓀𑒔 𑒢𑒻
𑒂𑒥 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒧𑒰𑓀𑒑𑒻𑒞 𑒁𑒕𑒱
𑒔𑒱𑒩𑒞𑒢, 𑒚𑒱𑒏𑒩𑒲, 𑒪𑒯𑒹𑒩𑒱𑒨𑒰 𑒂 𑒖𑓀𑒑𑒪𑒰𑒞𑒲 𑒕𑒰𑒣
𑒂𑒥 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒧𑒰𑓀𑒑𑒻𑒞 𑒁𑒕𑒱
𑒣𑒙𑒼𑒩, 𑒑𑒳𑒪𑒥𑒠𑒢𑒰, 𑒢𑒲𑒪𑒰𑒧𑓂𑒥𑒩𑒲, 𑒮𑒼𑒃𑒩𑒲𑒏 𑒢𑒴𑒂
𑒏𑒪𑒤 𑒪𑒑𑒰 𑒏𑓄 𑒏𑒛𑓃𑒑𑒩 𑒏𑓄, 𑒦𑒹𑒪𑒰𑒮𑒿 𑒠𑓄 𑒔𑒹𑒢𑓂𑒯𑒰𑒮𑒲
𑒞𑒴𑒩𑒏 𑒤𑒰𑒯𑒰, 𑒣𑒼𑒐𑒩𑒱𑒨𑒰, 𑒪𑒯𑒹𑒩𑒱𑒨𑒰, 𑒥𑒠𑒰𑒧𑒲, 𑒔𑒰𑒢𑒣𑓀𑒐𑒰
𑒥𑒹𑒩𑒰𑒋𑒥 𑒂 𑒮𑒳𑒃𑒨𑒰 𑒣𑒻𑒮𑒰𑒋𑒥 𑒁𑒯𑒰𑒿
𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱𑒏𑒹𑒿

𑒪𑒐𑒱𑒨𑒰 𑒦𑒹𑒛𑓃 𑒖𑒏𑒰𑒿 𑒂𑒑𑒰𑒿-𑒂𑒑𑒰𑒿
𑒥𑒟𑒢𑒱𑒘𑒰𑒏 𑒥𑒟𑒢𑒰𑒋𑒥 𑒁𑒥𑒻𑒞 𑒏𑒰𑒪, 𑒂 𑒐𑒦𑒰𑒋𑒥 𑒖𑒰𑒃𑒞 𑒏𑒰𑒪
𑒥𑒲𑒮𑒙𑒰 𑒦𑒹𑒛𑓃𑒏 𑒪𑒹𑒯𑒛𑓃, 𑒋𑒏 𑒮𑒋 𑒦𑒹𑒛𑓃𑒏 𑒥𑒰𑒑
𑒔𑒰𑒩𑒱-𑒣𑒰𑒿𑒔 𑒮𑒋 𑒦𑒹𑒛𑓃𑒏 𑒑𑒿𑒯𑒹𑒛𑓃,
𑒦𑒹𑒛𑓃𑒏𑒹𑒿 𑒐𑒅𑒩𑒥, 𑒑𑒳𑒪𑒚𑒱𑒂𑒃𑒞 𑒞𑒴𑒩
𑒮𑒱𑒌𑒢 𑒁𑒡𑒪𑒰, 𑒐𑒳𑒙𑒱𑒨𑒰 𑒧𑒱𑒩𑒖𑒃 𑒍𑒕
𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒏𑒩𑒞
𑒄 𑒣𑒳𑒩𑒰𑒢 𑒪𑒼𑒯𑒗𑒰𑒧, 𑒪𑒼𑒯𑒓𑓂𑒑𑒩𑒏𑒹𑒿
𑒦𑒰𑒟𑒲𑒧𑒹 𑒣𑒻𑒮𑒻𑒞 𑒫𑒰𑒨𑒳 𑒖𑒐𑒢 𑒂𑒋𑒞 𑒞𑒐𑒢
𑒦𑒰𑒟𑒲 𑒮𑒰𑒪𑒥 𑒂 𑒣𑓂𑒩𑒖𑓂𑒫𑒪𑒱𑒞 𑒏𑒩𑒥 𑒁𑒑𑓂𑒢𑒱
𑒪𑓄 𑒏𑒪𑒧 𑒕𑒹𑒢𑒲, 𑒔𑒏𑒩𑒮𑒰𑒢𑒣𑒩 𑒣𑒱𑒖𑒥𑒻𑒞 𑒮𑒩𑒾𑒞𑒰

𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒮𑒳𑒢𑒻𑒞 𑒁𑒕𑒱
𑒏𑒥𑒱𑒩𑒰𑒯𑒰𑒏 𑒏𑒢𑒮𑒲𑒣𑒩 𑒅𑒚𑒻𑒞 𑒡𑒳𑒢
𑒠𑒹𑒐𑒻𑒞 𑒁𑒕𑒱, 𑒕𑒱𑒪𑒳𑒂 𑒣𑒯𑒪𑒠𑒰𑒩 𑒥𑒰𑒮𑒢
𑒂 𑒞𑒐𑒢 𑒯𑒧
𑒂𑒒𑒰𑒞𑒮𑒿 𑒧𑒚𑒰𑒩𑒥 𑒣𑒱𑒞𑓂𑒞𑒩𑒱, 𑒏𑒪𑒑𑒻𑒘𑒰 𑒪𑒼𑒙𑒰
𑒢𑒱𑒩𑓀𑒖𑒢𑒲𑒏 𑒠𑒲𑒣, 𑒖𑒪𑒡𑒩𑒲
𑒤𑒹𑒩 𑒠𑒲𑒨𑒚𑒱𑒧𑒹 𑒩𑒰𑒐𑒱 𑒠𑒲𑒣
𑒣𑒯𑒱𑒩𑒱 𑒙𑒳𑒧𑒙𑒰𑒧 𑒑𑒯𑒢𑒰, 𑒑𑒼𑒥𑒩𑒱𑒨𑒰𑒫 𑒮𑒼𑒢, 𑒖𑒼𑒏𑒚𑒲 𑒂 𑒠𑒮𑒏𑒪𑒧
𑒔𑒰𑒿𑒣𑒏𑒪𑒲 𑒣𑒯𑒱𑒩𑒢𑒹 𑒍 𑒪𑒹𑒢𑒹 𑒕𑒪𑒱 𑒯𑒪𑒳𑒧𑒰𑒢𑒲 𑒢𑒰𑒞𑒲𑒏 𑒪𑒹𑒪
𑒣𑒟𑒩𑒾𑒙𑒲 𑒣𑒯𑒱𑒩𑒱 𑒯𑒧, 𑒣𑒫𑒱𑒞𑓂𑒩𑒲 𑒖𑒢𑒅𑒧𑒹 𑒥𑒰𑒢𑓂𑒯𑒱
𑒬𑓂𑒩𑒰𑒠𑓂𑒡𑒏 𑒏𑒰𑒘𑓂𑒔𑒢𑒣𑒳𑒩𑒳𑒭 𑒖𑒏𑒰𑒿
𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒯𑒵𑒠𑒨𑒧𑒹 𑒪𑓄
𑒏𑒢𑒮𑒰𑒩𑒲𑒏 𑒦𑒳𑒖𑓂𑒖𑒰 𑒖𑒏𑒰𑒿
𑒠𑒰𑒥𑒰𑒣𑒩 𑒅𑒗𑒏𑒳𑒢 𑒍𑒃𑒣𑒩 𑒩𑒰𑒐𑒪 𑒥𑒰𑒮𑒢𑒧𑒹
𑒔𑒳𑒪𑓂𑒯𑒰𑒏 𑒣𑒾𑒩𑒲 𑒏𑒴𑒩𑒰𑒧𑒹 𑒡𑒱𑒣𑒰𑒍𑒪 𑒥𑒰𑒪𑒳 𑒠𑓄
𑒦𑒳𑒖𑒢𑒰𑒚𑒲𑒮𑒿 𑒪𑒰𑒛𑓃𑒻𑒞 𑒕𑒲
𑒁𑒣𑒢 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱

𑒧𑒏𑒃𑒏 𑒧𑒐𑒰𑒢𑒲
𑒮𑒼𑒢𑓂𑒯𑒑𑒩 𑒂 𑒗𑒴𑒩 𑒢𑒲𑒏 𑒮𑓂𑒫𑒰𑒠
𑒧𑒳𑒠𑒰 𑒂𑒥 𑒁𑒞𑒱𑒐𑒰𑒃𑒢 𑒯𑒼𑒃𑒞 𑒁𑒕𑒱
𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱

𑒁𑒠𑒯𑒢 𑒠𑒹𑒪 𑒣𑒰𑒢𑒱 𑒂𑒿𑒔 𑒠𑓄 𑒞𑒰𑒩𑒥
𑒅𑒮𑒲𑒢𑒥 𑒏𑒴𑒙𑒱 𑒏𑓄 𑒧𑒳𑒩𑒯𑒲𑒏 𑒔𑒰𑒅𑒩 𑒥𑒢𑒰𑒋𑒥
𑒢𑒼𑒢-𑒣𑒰𑒢𑒱𑒮𑒿 𑒧𑒼𑒁𑒥 𑒏𑒼𑒛𑓃𑒰𑒃, 𑒠𑒰𑒪𑒱𑒏 𑒐𑒼𑓀𑒃𑒔𑒰

𑒥𑒱𑒢𑒳 𑒖𑒧𑒪 𑒑𑒳𑒛𑓃 𑒕𑒰𑒪𑓂𑒯𑒲𑒏 𑒣𑒰𑒞𑒩 𑒧𑒧𑒳𑒩𑒲
𑒣𑒩𑒞𑒣𑒩𑒮𑒿 𑒏𑒰𑒕𑒱 𑒏𑓄 𑒢𑒱𑒏𑒰𑒪𑒥 𑒧𑒪𑒲𑒠𑒰
𑒞𑒹𑒥𑒰𑒮𑒱 𑒢𑒲𑒏, 𑒧𑒳𑒠𑒰 𑒥𑒮𑒱𑒨𑒰𑒢𑒱
𑒧𑒼𑒙𑒑𑒩 𑒦𑒻𑒮𑒰𑒚 𑒂 𑒣𑒰𑒞𑒩 𑒞𑒳𑒩𑓂𑒩𑒲 𑒠𑒯𑒲
𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱𑒏𑒹𑒿 𑒖𑒩𑒻𑒞 𑒩𑒯𑓄 𑒠𑒹𑒥
𑒍𑒯𑒱𑒢𑒰 𑒖𑒹𑒢𑒰 𑒏𑒼𑒃𑒨𑒰𑒮𑒿 𑒞𑒹𑒪 𑒢𑒱𑒏𑒰𑒪𑒻 𑒕𑒲।
𑒧𑒼𑒯𑒥 𑒂 𑒠𑓄 𑒂𑒋𑒥 𑒞𑒹𑒪𑒱𑒯𑒰𑒢𑒲
𑒞𑒹𑒪𑒲𑒏𑒹𑒿 𑒠𑓄 𑒥𑒯𑒞𑒾𑒢𑒲, 𑒒𑒰𑒢𑒲 𑒪𑒑𑒰𑒋𑒥 𑒂 𑒢𑒱𑒏𑒪𑒥 𑒡𑒹𑒢𑒳𑒂𑒩 𑒒𑒰𑒢𑒲
𑒒𑒰𑒢𑒲 𑒢𑒱𑒒𑒩𑒥, 𑒞𑒹𑒪𑒯𑒢𑒏 𑒁𑒫𑒬𑒹𑒭 𑒐𑒩𑒲
𑒅𑒖𑓂𑒖𑒩 𑒩𑓀𑒑𑒏 𑒩𑒹𑒯
𑒢𑒼𑒢𑒟𑒩𑒰, 𑒏𑒼𑒚𑒲𑒮𑒿 𑒢𑒱𑒏𑒪𑒪
𑒣𑒢𑒰𑒩𑒮𑒿 𑒔𑒳𑒥𑒻𑒞 𑒣𑒰𑒢𑒱, 𑒁𑒫𑒬𑒱𑒭𑓂𑒙 𑒮𑒱𑒙𑓂𑒚𑒲 𑒜𑒹𑒩 𑒢𑒼𑒢𑒤𑒩
𑒏𑒰𑒕𑒪 𑒤𑒹𑒢 𑒐𑒰𑒩𑒲𑒮𑒿 𑒐𑒩𑒱𑒂 𑒢𑒼𑒢
𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒮𑒳𑒔𑓂𑒔𑒰
𑒤𑒹𑒩 𑒁𑒫𑒬𑒱𑒭𑓂𑒙 𑒣𑒕𑒰𑒛𑓃𑒲, 𑒠𑒼𑒮𑒩 𑒐𑒹𑒣𑒧𑒹 𑒏𑒰𑒯𑒲 𑒬𑒼𑒩𑒰
𑒂 𑒣𑒏𑒫𑒰 𑒢𑒼𑒢, 𑒞𑒹𑒮𑒩 𑒐𑒹𑒣 𑒞𑒹𑒪𑒯𑒰 𑒬𑒼𑒩𑒰
𑒂 𑒢𑒲𑒧𑒏 𑒁𑒫𑒬𑒱𑒭𑓂𑒙 𑒖𑒩𑒰𑒚𑒲
𑒖𑒩𑒰𑒚𑒲 𑒂 𑒮𑒱𑒙𑓂𑒚𑒲𑒏 𑒧𑒱𑒬𑓂𑒩𑒝
𑒥𑒹𑒔𑒳𑒂, 𑒩𑒾𑒠𑒧𑒹 𑒮𑒳𑒐𑒰 𑒏𑓄 𑒖𑒩𑒳𑒂 𑒬𑒼𑒩𑒰-𑒂𑒥𑒲 𑒬𑒼𑒩𑒰
𑒏𑒔𑓂𑒔𑒰 𑒬𑒼𑒩𑒰 𑒣𑒩𑒱𑒬𑒳𑒠𑓂𑒡 𑒦𑓄 𑒏𑒪𑒧𑒲 𑒬𑒼𑒩𑒰
𑒢𑒼𑒢- 𑒩𑒰𑒧𑒩𑒮, 𑒏𑒧 𑒢𑒼𑒢𑒑𑒩- 𑒧𑒡𑒢𑒼𑒢
𑒏𑒙𑒱𑒨𑒰𑒧𑒹 𑒧𑒡𑒳 𑒩𑒰𑒐𑒱
𑒔𑒱𑒛𑓃𑒻 𑒧𑒰𑒩𑒥𑒰 𑒪𑒹𑒪 𑒢𑒩-𑒮𑒩
𑒢𑒰𑒪 𑒑𑒳𑒂𑒧𑒹 𑒣𑒻𑒮𑒪, 𑒢𑒩𑒏 𑒅𑒣𑒩𑒏𑒰 𑒮𑒱𑒩 𑒂 𑒢𑒲𑒔𑒰𑒿 𑒦𑒰𑒩𑒴
𑒮𑒩𑒧𑒹 𑒏𑒧𑒔𑒲 𑒮𑒦, 𑒣𑒏𑒛𑓃𑒥𑒰 𑒪𑒹𑒪 𑒔𑒱𑒛𑓃𑒻 𑒏𑒧𑓂𑒣𑒰
𑒧𑒢𑓂𑒞𑒳𑒩 𑒣𑒜𑓃𑒱 𑒕𑒞𑓂𑒞𑒰 𑒪𑒑 𑒖𑒰𑒋𑒥,
𑒞𑒳𑒢𑒏𑒰𑒩𑒲 𑒠𑓄 𑒥𑒱𑒖𑓂𑒖𑒲𑒏 𑒏𑒩𑒻𑒞 𑒁𑒕𑒱 𑒬𑒱𑒏𑒰𑒩
𑒄 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱
𑒂𑒿𑒔𑒥 𑒂 𑒣𑓂𑒩𑒖𑓂𑒫𑒪𑒱𑒞 𑒩𑒰𑒐𑒥
𑒧𑒳𑒠𑒰 𑒯𑒧𑓂𑒯𑒩𑒥 𑒂𑒑𑒱𑒏𑒹𑒿
𑒐𑒼𑒩𑒢𑒰𑒚𑒥 𑒧𑒳𑒠𑒰
𑒂𑒑𑒱𑒏 𑒐𑒮𑒥 𑒣𑒰𑒞𑒏 𑒜𑒹𑒩𑒲𑒣𑒩
𑒂 𑒣𑒮𑒰𑒯𑒲 𑒪𑒰𑒑𑒞
𑒧𑒳𑒠𑒰 𑒄
𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱𑒏𑒹𑒿 𑒞𑒿 𑒖𑒩𑒻𑒞 𑒩𑒯𑒻𑒋 𑒠𑒹𑒞

𑒔𑒰𑒿𑒣𑒏𑒪𑒲 𑒣𑒯𑒱𑒩𑒢𑒹 𑒍 𑒪𑒹𑒢𑒹 𑒕𑒪𑒱 𑒯𑒪𑒳𑒧𑒰𑒢𑒲 𑒢𑒰𑒞𑒲𑒏 𑒪𑒹𑒪
𑒯𑒪𑒳𑒧𑒰𑒢𑒲, 𑒥𑒪-𑒥𑒳𑒠𑓂𑒡𑒱-𑒁𑒦𑒨
𑒥𑒹𑒠𑒩𑒰𑒏 𑒩𑒏𑓂𑒭𑒰𑒩𑓂𑒟
𑒫𑒱𑒬𑓂𑒫𑒰𑒮, 𑒬𑓂𑒩𑒠𑓂𑒡𑒰
𑒏𑒩𑒞 𑒞𑒿 𑒮𑒦𑒙𑒰 𑒄 𑒥𑒹𑒠𑒩𑒰 𑒁𑒣𑒢𑒹
𑒧𑒳𑒠𑒰 𑒖𑒿 𑒣𑒯𑒱𑒩𑒢𑒹 𑒩𑒯𑒞 𑒯𑒪𑒳𑒧𑒰𑒢𑒲
𑒞𑒿 𑒯𑒢𑒳𑒧𑒰𑒢𑒖𑒲 𑒮𑓀𑒑 𑒕𑒟𑒱𑒢𑓂𑒯
𑒮𑒹 𑒦𑒩𑒼𑒮 𑒩𑒯𑒞𑒻 𑒧𑒻𑒿𑒨𑒰𑒏𑒹𑒿
𑒂 𑒯𑒪𑒳𑒧𑒰𑒢𑒲 𑒣𑒯𑒱𑒩𑒢𑒹 𑒍 𑒥𑒹𑒠𑒩𑒰
𑒪𑒑𑒰 𑒩𑒯𑒪 𑒁𑒕𑒱 𑒣𑒰𑒿𑒐𑒱 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱𑒏𑒹𑒿
𑒔𑒱𑒛𑓃𑒻 𑒥𑒢𑒪 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱 𑒥𑒯𑒞 𑒁𑒏𑒰𑒮𑒧𑒹
𑒂 𑒮𑒯𑒮𑓂𑒩𑒖𑒱𑒞𑓂 𑒥𑒢𑒞 𑒯𑒪𑒳𑒧𑒰𑒢𑒲 𑒣𑒯𑒱𑒩𑒢𑒹 𑒍 𑒥𑒹𑒠𑒩𑒰
𑒮 𑒣↑𑒫𑒮𑓂𑒫 𑒮𑒯𑒮𑓂𑒩𑒖𑒱𑒞𑓂 ॥
𑒯𑒖𑒰𑒩𑒏 𑒯𑒖𑒰𑒩𑒣𑒩 𑒫𑒱𑒖𑒨 𑒏𑒹𑒢𑒱𑒯𑒰𑒩
𑒋𑒯𑒱𑒢𑒰 𑒥𑒯𑒻𑒞 𑒩𑒯𑒞
𑒥𑒯𑒱𑒞𑒹 𑒩𑒯𑒞
𑒖𑒹𑒢𑒰 𑒥𑒯𑒱 𑒩𑒯𑒪 𑒁𑒕𑒱 𑒡𑒰𑒩
𑒂 𑒯𑒧𑒩 𑒂𑒏𑒰𑓀𑒏𑓂𑒭𑒰𑒏 𑒁𑒑𑓂𑒢𑒱

























𑒅𑒖𑒰𑒯𑒱𑒧𑒹 𑒅𑒣𑒪𑒰𑒃𑒞 𑒯𑒧 𑒂 𑒧𑒰𑒿𑒕

𑓑
𑒄 𑒢𑒧𑓂𑒧𑒰𑒡𑒑𑓂𑒑𑒲
𑒥𑒱𑒛𑓃𑒃𑒧𑒹 𑒯𑒼𑒃𑒞 𑒧𑒕𑒯𑒩
𑒛𑒏𑒯𑒲 𑒣𑒼𑒐𑒩𑒱𑒧𑒹 𑒦𑓄 𑒑𑒹𑒪 𑒥𑒢𑓂𑒢,
𑒛𑒏𑒯𑒲 𑒣𑒼𑒐𑒩𑒱 𑒧𑒐𑒰𑒢𑒏 𑒣𑒰𑒞𑒮𑒿 𑒕𑒰𑒛𑓃𑒪 𑒁𑒕𑒱 𑒂𑒥
𑒧𑒳𑒠𑒰 𑒋𑒞𑓄 𑒥𑒱𑒛𑓃𑒃𑒧𑒹 𑒯𑒼𑒃𑒞 𑒁𑒕𑒱 𑒧𑒕𑒯𑒩
𑒏𑒔𑓂𑒕𑒰𑒕𑒼𑒣, 𑒯𑒹𑒪𑒻𑒞 𑒏𑒥𑒃
𑒏𑒰𑒯𑒲 𑒒𑒳𑒧𑒻𑒞
𑒏𑒾𑒂𑒚𑒳𑒙𑓂𑒚𑒲 𑒑𑒰𑒕𑒏 𑒤𑒛𑓃 𑒪𑒑 𑒯𑒧 𑒚𑒰𑒜𑓃
𑒏𑒥𑒃𑒖𑒪𑓂𑒪𑒰 𑒪𑒑
𑒂 𑒯𑒧 𑒂𑒥𑒱 𑒖𑒰𑒃𑒞 𑒕𑒲
𑒐𑒲𑓀𑒔𑒱 𑒤𑒱𑒩𑒔𑒃 𑒣𑒏𑒛𑓃𑒱 𑒏𑓄
𑒕𑒲 𑒖𑒰𑒪 𑒐𑒱𑒩𑒥𑒻𑒞
𑒂 𑒤𑒹𑒩 𑒯𑒧 𑒒𑒳𑒩𑒧𑓄 𑒪𑒑𑒻 𑒕𑒲
𑒤𑒹𑒩 𑒙𑒰𑒣𑒲 𑒕𑒰𑒣𑒱,
𑒚𑒰𑒜𑓃 𑒦𑓄 𑒖𑒰𑒃 𑒕𑒲
𑒕𑒻 𑒅𑒖𑒰𑒯𑒱𑒧𑒹 𑒅𑒣𑒪𑒰𑒃𑒞 𑒧𑒰𑒿𑒕
𑒂 𑒤𑒹𑒩 𑒯𑒧 𑒖𑒰𑒪 𑒕𑒼𑒛𑓃𑒱 𑒠𑒻𑒞 𑒕𑒲
𑒮𑒯𑒠𑒮𑒿 𑒧𑒰𑒕𑒏 𑒏𑒩𑒻 𑒕𑒲 𑒬𑒱𑒏𑒰𑒩
𑒂 𑒂𑒥
𑒁𑒕𑒱 𑒃𑒕𑒰𑒃𑒢 𑒔𑒰𑒩𑒴 𑒏𑒰𑒞

𑓒
𑒖𑒰𑒪 𑒐𑒱𑒩𑒥𑒻𑒞
𑒒𑒳𑒩𑒧𑒰 𑒪𑒰𑒑𑒱 𑒖𑒰𑒃𑒞 𑒁𑒕𑒱
𑒮𑒼𑒔𑒢𑒲 𑒣𑒻𑒮𑒱 𑒖𑒰𑒃𑒞 𑒁𑒕𑒱
𑒃𑒕𑒰𑒃𑒢 𑒑𑒢𑓂𑒡 𑒥𑒢𑒱 𑒖𑒰𑒃𑒞 𑒁𑒕𑒱 𑒢𑒱𑒨𑒞𑒱
𑒖𑒲𑒫𑒢𑒏 𑒣𑓂𑒩𑒫𑒵𑒞𑓂𑒞𑒱
𑒧𑒰𑒿𑒕 𑒮𑓀𑒑𑒹 𑒅𑒣𑒪𑒰𑒨 𑒪𑒑𑒻𑒞 𑒕𑒲
𑒪𑒑𑒻𑒋 𑒖𑒰𑒪 𑒐𑒱𑒩𑒥𑒻𑒞 𑒯𑒧𑒩𑒰 𑒥𑒰𑒢𑓂𑒯𑒱 𑒏𑒱𑒨𑒼 𑒩𑒯𑒪 𑒁𑒕𑒱
𑒪𑒑𑒻𑒋 𑒬𑒯𑒠 𑒪𑒹𑒢𑒹 𑒕𑒰𑒞𑒲𑒧𑒹 𑒏𑒱𑒨𑒼 𑒜𑒳𑒏𑒪 𑒖𑒰 𑒩𑒯𑒪 𑒁𑒕𑒱।
𑒮𑒼𑒔𑒢𑒲 𑒣𑒻𑒮𑒱 𑒖𑒰𑒃𑒞 𑒁𑒕𑒱
𑒃𑒕𑒰𑒃𑒢 𑒑𑒢𑓂𑒡 𑒥𑒢𑒱 𑒖𑒰𑒋𑒞 𑒏𑒲 𑒯𑒧𑒩 𑒢𑒱𑒨𑒞𑒱
𑒯𑒧𑒩 𑒖𑒲𑒫𑒢𑒏 𑒣𑓂𑒩𑒫𑒵𑒞𑓂𑒞𑒱
𑒄 𑒢𑒧𑓂𑒧𑒰𑒡𑒑𑓂𑒑𑒲






















𑒥𑒏𑒕𑒳𑒕𑒩𑒳 𑒐𑒹𑒪𑒰𑒃𑒞 𑒯𑒧 𑒂 𑒦𑒲𑒐𑒴

𑓑
𑒥𑒿𑒮𑒏𑒩𑒧𑒏 𑒫𑒱𑒬𑓂𑒫𑒏𑒩𑓂𑒧𑒰
𑒦𑒲𑒐𑒴𑒏 𑒤𑒰𑒩𑒥 𑒂
𑒍𑒠𑒰𑒩𑒱 𑒏𑓄 𑒢𑒱𑒏𑒰𑒪𑒥
𑒅𑒖𑒩𑒰 𑒎𑒭𑒡𑒱 𑒫𑓀𑒬𑒪𑒼𑒔𑒢
𑒏𑒼𑒢𑒱𑒘𑒰 𑒮𑒴𑒣 𑒯𑒏𑒩𑒰 𑒣𑒟𑒱𑒨𑒰
𑒧𑒳𑒠𑒰 𑒐𑒖𑒳𑒩𑒱𑒨𑒰 𑒥𑒰𑒢𑓂𑒯𑒧𑒹 𑒥𑒰𑒢𑓂𑒯𑒪
𑒯𑒧𑒩 𑒂 𑒍𑒏𑒩 𑒫𑒩𑓂𑒞𑒧𑒰𑒢 𑒂 𑒦𑒫𑒱𑒭𑓂𑒨

𑒥𑒏𑒕𑒳𑒕𑒩𑒳 𑒐𑒹𑒪𑒰𑒃𑒞 𑒯𑒧 𑒂 𑒦𑒲𑒐𑒴
𑒛𑒼𑒧𑒰𑒮𑒲𑒏 𑒏𑒰𑒞𑒥𑒪𑒰 𑒣𑒼𑒐𑒩𑒱𑒏 𑒧𑒯𑒰𑒩𑒣𑒩
𑒟𑒳𑒟𑒳𑒢 𑒒𑒼𑒮𑒱𑒨𑒹𑒢𑒹 𑒧𑒰𑒿𑒙𑒱𑒧𑒹 𑒮𑒳𑒑𑒩𑒏 𑒗𑒳𑒝𑓂𑒛
𑒦𑒲𑒐𑒴𑒏 𑒦𑒰𑒋 𑒕𑒟𑒱 𑒂𑒥 𑒮𑒩𑒏𑒰𑒩𑒲 𑒁𑒡𑒱𑒏𑒰𑒩𑒲
𑒠𑒼𑒮𑒩 𑒦𑒰𑒋 𑒯𑒰𑒮𑓂𑒣𑒲𑒙𑒪𑒏 𑒫𑒰𑒩𑓂𑒛𑒥𑒰𑒨
𑒂 𑒦𑒲𑒐𑒴 𑒋𑒐𑒢𑒼 𑒛𑒼𑒧𑒰𑒮𑒲𑒧𑒹
𑒖𑒱𑒥𑒻𑒞 𑒫𑒩𑓂𑒞𑒧𑒰𑒢𑒏 𑒮𑓀𑒑 𑒦𑒫𑒱𑒭𑓂𑒨𑒏 𑒞𑒰𑒏𑒱𑒧𑒹

𑓒
𑒮𑓂𑒟𑒱𑒩 𑒍𑒃𑒚𑒰𑒧 𑒚𑒰𑒜𑓃,
𑒧𑒳𑒢𑓂𑒯𑒰𑒩𑒱 𑒮𑒰𑒿𑒗𑒧𑒹 𑒪𑒲𑒪𑒲𑒛𑒰𑒪𑒲 𑒯𑒰𑒟𑒧𑒹 𑒪𑒹𑒢𑒹
𑒥𑒖𑒻𑒞 𑒖𑒹 𑒦𑒰𑒋 𑒥𑒢𑒪 𑒁𑒕𑒱 𑒁𑒡𑒱𑒏𑒰𑒩𑒲
𑒧𑒳𑒠𑒰 𑒑𑒰𑒧 𑒕𑒳𑒙𑒪𑒹 𑒕𑒻 𑒥𑒳𑒗𑒴
𑒥𑒱𑒨𑒰𑒯𑒼 𑒣𑒻𑒒 𑒒𑒩𑒧𑒹 𑒍𑒏𑒩 𑒦𑒹𑒪 𑒕𑒻
𑒠𑒼𑒮𑒩 𑒦𑒰𑒋 𑒞𑒿 𑒑𑒰𑒧 𑒁𑒥𑒱𑒞𑒹 𑒁𑒕𑒱
𑒍𑒜𑓃𑒢𑒰 𑒣𑒯𑒱𑒩𑒢𑒰 𑒢𑒲𑒏 𑒧𑒳𑒠𑒰 𑒏𑒰𑒖 𑒫𑒋𑒯
𑒯𑒧𑒩𑒹 𑒢𑒻 𑒤𑒳𑒩𑒰𑒃𑒋 𑒏𑒩𑒴 𑒏𑒲?
𑒦𑒫𑒱𑒭𑓂𑒨 𑒞𑒿 𑒫𑒋𑒯 𑒥𑒳𑒗𑒰𑒃𑒞 𑒁𑒕𑒱।

𑒂𑒑𑒰𑒿, 𑒁𑒯𑒰𑒿 𑒋𑒪𑒾𑓀, 𑒏𑒼𑒢 𑒏𑒰𑒖 𑒏𑒯𑒴 ?
𑒧𑒳𑒿𑒯 𑒗𑒪𑒏𑒱 𑒑𑒹𑒪𑒻 𑒦𑒲𑒐𑒴𑒏
𑒍𑒃 𑒧𑒳𑒢𑓂𑒯𑒰𑒩𑒱 𑒮𑒰𑒿𑒗𑒧𑒹

𑒯𑒧 𑒔𑒳𑒣𑓂𑒣𑒹 𑒩𑒯𑒲 𑒞𑒰𑒫𑒞𑓂
𑒍𑒃 𑒗𑒝𑓂𑒛𑒲 𑒚𑒰𑒜𑓃 𑒑𑒰𑒕 𑒪𑒑
𑒚𑒰𑒜𑓃 𑒑𑒰𑒕 𑒏𑒳𑒏𑒰𑒚 𑒪𑒑
𑒥𑒰𑒖𑒱 𑒅𑒚𑒪 𑒦𑒲𑒐𑒴 𑒧𑒳𑒠𑒰 𑒏𑒰𑒖 𑒞𑒿
𑒏𑒰𑒖 𑒞𑒿 𑒯𑒧𑒩 𑒍 𑒯𑒰𑒏𑒱𑒧 𑒦𑒰𑒋 𑒢𑒯𑒱𑒨𑒹 𑒏𑒩𑒞
𑒧𑒳𑒠𑒰 𑒁𑒯𑒰𑒿𑒪𑒹 𑒏𑒯𑒥𑒻 𑒡𑒩𑒱 𑒁𑒥𑒮𑓂𑒮𑒹।

𑒂 𑒯𑒧 𑒏𑒯𑒻 𑒕𑒲, 𑒢𑒻 𑒦𑒲𑒐𑒴
𑒯𑒰𑒏𑒱𑒧 𑒞𑒿 𑒏𑒰𑒖 𑒏𑒃𑒨𑒹 𑒠𑒹𑒞
𑒧𑒳𑒠𑒰 𑒏𑒰𑒖 𑒁𑒕𑒱 𑒯𑒰𑒮𑓂𑒣𑒲𑒙𑒪𑒏
𑒣𑒱𑒞𑒰 𑒕𑒟𑒱 𑒦𑒩𑒞𑒲, 𑒖𑒞𑓄 𑒦𑒰𑒋 𑒁𑒯𑒰𑒿𑒏 𑒕𑒟𑒱 𑒏𑒰𑒖 𑒏𑒩𑒻𑒞।
𑒏𑒞𑒹𑒏 𑒠𑒱𑒢 𑒦𑒹𑒪𑒢𑓂𑒯𑒱 𑒦𑒩𑒞𑒲 𑒦𑒹𑒢𑒰
𑒧𑒳𑒠𑒰 𑒢𑒻 𑒂𑒃-𑒏𑒰𑒪𑓂𑒯𑒱 𑒯𑒼𑒃𑒞
𑒂𑒣𑒩𑒹𑒬𑒢𑒏 𑒞𑒱𑒟𑒱 𑒁𑒕𑒱 𑒥𑒜𑓃𑒹𑒢𑒹 𑒖𑒰𑒃𑒞
𑒂 𑒦𑒲𑒐𑒴𑒏 𑒧𑒳𑒿𑒯 𑒗𑒪𑒏𑒱 𑒅𑒚𑒪
𑒧𑒳𑒢𑓂𑒯𑒰𑒩𑒱 𑒮𑒰𑒿𑒗𑒧𑒹।

𑒯𑒿 𑒏𑒯𑒥𑒰𑒧𑒹 𑒖𑒹 𑒯𑒼𑒃 𑒕𑒻 𑒮𑓀𑒞𑒳𑒭𑓂𑒙𑒱
𑒧𑒠𑒞𑒱 𑒠𑒹𑒥𑒰𑒧𑒹 𑒖𑒹 𑒯𑒼𑒃 𑒕𑒻 𑒂𑒞𑓂𑒧𑒞𑒵𑒣𑓂𑒞𑒱
𑒞𑒃𑒮𑒿।
𑒥𑒿𑒮𑒏𑒩𑒧𑒏 𑒫𑒱𑒬𑓂𑒫𑒏𑒩𑓂𑒧𑒰 𑒦𑒲𑒐𑒴𑒏 𑒫𑓀𑒬𑒪𑒼𑒔𑒢𑒮𑒿
𑒞𑒵𑒣𑓂𑒞 𑒯𑒼𑒃 𑒕𑒲 𑒯𑒧 𑒮𑒹𑒯𑒼।
𑒍𑒃 𑒧𑒳𑒢𑓂𑒯𑒰𑒩𑒱 𑒮𑒰𑒿𑒗𑒧𑒹



𑒏𑒙𑒱𑒯𑒰𑒩𑒲

𑓑
𑒏𑒢𑒏𑒢𑒲 𑒕𑒻 𑒥𑒮𑒰𑒞𑒧𑒹
𑒯𑒰𑒛𑓃𑒧𑒹 𑒜𑒳𑒏𑒱 𑒖𑒰𑒋𑒞 𑒄 𑒏𑒢𑒏𑒢𑒲
𑒣𑒼𑒮𑓂𑒙𑒧𑒰𑒩𑓂𑒙𑒧 𑒏𑒋𑒪 𑒬𑒩𑒲𑒩 𑒖𑒹 𑒩𑒰𑒐𑒪 𑒁𑒕𑒱
𑒮𑒰𑒞𑒙𑒰 𑒧𑒼𑒙𑒏𑒰 𑒬𑒱𑒪𑓂𑒪𑒣𑒩, 𑒖𑒛𑓃𑒞 𑒏𑒢𑒲𑒏𑒰𑒪𑒧𑒹
𑒑𑒼𑒃𑒚𑒰𑒧𑒹 𑒂𑒑𑒱 𑒖𑒹 𑒁𑒢𑒪𑒢𑓂𑒯𑒱𑒯𑒹𑒿 𑒮𑒳𑒧𑒢𑒖𑒲
𑒩𑒰𑒐𑒱 𑒠𑒹𑒪 𑒢𑒲𑒔𑒰𑒿
𑒏𑒢𑒏𑒢𑒰𑒃𑒞 𑒣𑒰𑒢𑒱𑒧𑒹 𑒛𑒴𑒧 𑒠𑓄
𑒑𑒼𑒃𑒚𑒰𑒏 𑒂𑒑𑒱𑒮𑒿 𑒂𑒑𑒱 𑒪𑓄
𑒬𑒩𑒲𑒩𑒏𑒹𑒿 𑒑𑒞𑒱-𑒮𑒠𑓂𑒑𑒞𑒱 𑒠𑒹𑒥𑒰 𑒪𑒹𑒪
𑒏𑓄 𑒠𑒹𑒪𑒢𑓂𑒯𑒱 𑒁𑒑𑓂𑒢𑒱𑒏𑒹𑒿 𑒮𑒧𑒩𑓂𑒣𑒱𑒞
𑒞𑒵𑒝, 𑒏𑒰𑒚 𑒂 𑒒𑒵𑒞 𑒮𑒧𑒹𑒞
𑒒𑒳𑒩𑒱 𑒏𑓄 𑒖𑒹𑒞𑒰 𑒮𑒦
𑒪𑒼𑒯, 𑒣𑒰𑒟𑒩, 𑒂𑒑𑒱 𑒂 𑒖𑒪 𑒢𑒰𑓀𑒒𑒱, 𑒕𑒴𑒥𑒱
𑒛𑒹𑒜𑓃 𑒧𑒰𑒮𑒏 𑒥𑒔𑓂𑒔𑒰𑒏𑒹𑒿 𑒏𑒼𑒩𑒰𑒧𑒹 𑒪𑒹𑒢𑒹 𑒧𑒰𑒋𑒏𑒹𑒿 𑒕𑒼𑒛𑓃𑒱
𑒒𑒩 𑒮𑒦 𑒒𑒳𑒩𑒻 𑒕𑒟𑒱

𑒋𑒏𑓂𑒏𑒻𑒮𑒧 𑒬𑒞𑒰𑒥𑓂𑒠𑒲𑒏 𑒣𑒯𑒱𑒪 𑒠𑒬𑒏𑒏 𑒁𑒢𑓂𑒞𑒱𑒧 𑒩𑒰𑒞𑒱𑒏 𑒦𑒼𑒩𑒧𑒹
𑒧𑒳𑒠𑒰 𑒢𑒻 𑒕𑒻 𑒏𑒼𑒢𑒼 𑒁𑒢𑓂𑒞𑒩
𑒣𑒯𑒱𑒩𑒰𑒫𑒰 𑒂 𑒣𑒳𑒩𑒳𑒐𑒣𑒰𑒞𑒏𑒹𑒿 𑒕𑒼𑒛𑓃𑒱 𑒠𑒱𑒨𑒾
𑒧𑒯𑒱𑒪𑒰𑒏 𑒁𑒫𑒮𑓂𑒟𑒰 𑒠𑒹𑒐𑒴
𑒌 𑒏𑒢𑒏𑒢𑒰𑒃𑒞 𑒥𑒮𑒰𑒞𑒮𑒿 𑒥𑒹𑒬𑒲 𑒧𑒰𑒩𑒳𑒐
𑒯𑒰𑒛𑓃𑒧𑒹 𑒜𑒳𑒏𑒪 𑒖𑒰𑒃𑒞 𑒁𑒕𑒱
𑒏𑒧𑒪𑒰 𑒏𑒰𑒞 𑒢𑒻 𑒨𑒧𑒳𑒢𑒰𑒏 𑒏𑒰𑒞
𑒯𑒖𑒰𑒩 𑒧𑒰𑒃𑒪 𑒠𑒴𑒩 𑒑𑒰𑒧𑒮𑒿 𑒂𑒥𑒱
𑒧𑒱𑒖𑓂𑒗𑒩 𑒯𑒼𑒃𑒞 𑒁𑒕𑒱 𑒐𑒩𑒩𑒐𑒫𑒰𑒪𑒲 𑒏𑒰𑒏𑒲𑒏 𑒬𑓂𑒫𑒹𑒞 𑒫𑒮𑓂𑒞𑓂𑒩
𑒮𑒰𑒚𑒱 𑒮𑒰𑒪 𑒣𑒴𑒩𑓂𑒫𑒏 𑒫𑒋𑒯 𑒐𑒱𑒮𑓂𑒮𑒰
𑒫𑒋𑒯 𑒮𑒧𑒰𑒖
𑒧𑒰𑒞𑓂𑒩 𑒣𑒯𑒱𑒩𑒰𑒥𑒰 𑒥𑒠𑒪𑒱 𑒑𑒹𑒪
𑒧𑒰𑒞𑓂𑒩 𑒢𑒠𑒲-𑒡𑒰𑒩 𑒥𑒠𑒪𑒱 𑒑𑒹𑒪

𑒮𑒰𑒞𑒙𑒰 𑒬𑒱𑒪𑓂𑒪𑒣𑒩 𑒩𑒰𑒐𑒪 𑒍 𑒬𑒩𑒲𑒩
𑒁𑒑𑓂𑒢𑒱 𑒪𑒲𑒪𑒱 𑒩𑒯𑒪 𑒮𑒳𑒛𑓂𑒛𑒰𑒯 𑒏𑓄 𑒩𑒯𑒪
𑒋𑒏𑒙𑒰 𑒣𑒩𑒱𑒫𑒰𑒩 𑒤𑒹𑒩𑒮𑒿 𑒥𑒢𑒥𑒋 𑒣𑒛𑓃𑒞
𑒂 𑒞𑒲𑒮 𑒥𑒩𑓂𑒐𑒏 𑒥𑒰𑒠 𑒠𑒹𑒐𑒥 𑒍𑒏𑒩 𑒣𑒩𑒱𑒝𑒰𑒧
𑒞𑒰𑒡𑒩𑒱 𑒯𑒰𑒛𑓃𑒧𑒹 𑒜𑒳𑒏𑒪 𑒩𑒯𑒞 𑒄 𑒮𑒩𑓂𑒠 𑒏𑒢𑒏𑒢𑒲
𑒌 𑒥𑒮𑒰𑒞𑒏 𑒏𑒢𑒏𑒢𑒲𑒮𑒿 𑒥𑒛𑓂𑒛 𑒥𑒹𑒬𑒲 𑒮𑒩𑓂𑒠

𑓒
𑒑𑒼𑒣𑒲𑒔𑒰𑒢𑒢, 𑒑𑓀𑒑𑒾𑒙, 𑒧𑒰𑒪𑒰, 𑒅𑒖𑓂𑒖𑒩 𑒢𑒫 𑒫𑒮𑓂𑒞𑓂𑒩
𑒧𑒳𑒿𑒯𑒧𑒹 𑒞𑒳𑒪𑒮𑒲𑒠𑒪, 𑒮𑒳𑒫𑒩𑓂𑒝 𑒐𑒝𑓂𑒛 𑒑𑓀𑒑𑒰𑒖𑒪
𑒏𑒳𑒬 𑒣𑒮𑒰𑒩𑒪 𑒦𑒴𑒧𑒱 𑒞𑒳𑒪𑒮𑒲 𑒑𑒰𑒕 𑒪𑒑
𑒅𑒞𑓂𑒞𑒩 𑒧𑒳𑒿𑒯𑒹
𑒣𑒼𑒮𑓂𑒙𑒧𑒰𑒩𑓂𑒙𑒧 𑒏𑒋𑒪 𑒬𑒩𑒲𑒩
𑒮𑒳𑒧𑒢𑒖𑒲 𑒮𑒹𑒯𑒼 𑒢𑒫 𑒅𑒖𑓂𑒖𑒩 𑒫𑒮𑓂𑒞𑓂𑒩 𑒣𑒯𑒲𑒩𑒱
𑒖𑒢𑒾, 𑒅𑒞𑓂𑒞𑒩𑒲 𑒣𑒯𑒲𑒩𑒱, 𑒢𑒫 𑒧𑒰𑒙𑒱𑒏 𑒥𑒩𑓂𑒞𑒢𑒏 𑒖𑒪𑒮𑒿
𑒞𑒹𑒏𑒳𑒬𑒰𑒮𑒿 𑒣𑒴𑒥 𑒧𑒳𑒿𑒯𑒹 𑒧𑓀𑒞𑓂𑒩 𑒣𑒜𑓃𑒻 𑒕𑒟𑒱
𑒂 𑒍𑒃 𑒖𑒪𑒮𑒿 𑒧𑒵𑒞𑒏𑒏𑒹𑒿 𑒬𑒱𑒏𑓂𑒞 𑒏𑒩𑒻 𑒕𑒟𑒱
𑒫𑒰𑒧𑒰 𑒯𑒰𑒟𑒧𑒹 𑒆𑒏 𑒪𑓄 𑒑𑒼𑒃𑒚𑒰𑒏 𑒂𑒑𑒱𑒮𑒿 𑒡𑒡𑒏𑒥𑒻 𑒕𑒟𑒱
𑒞𑒲𑒢 𑒥𑒹𑒩 𑒧𑒵𑒞𑒏𑒏 𑒣𑓂𑒩𑒠𑒲𑒏𑓂𑒭𑒝𑒰 𑒏𑓄
𑒧𑒳𑒿𑒯𑒧𑒹 𑒂𑒑𑒱 𑒁𑒩𑓂𑒣𑒱𑒞 𑒯𑒼𑒃𑒞 𑒁𑒕𑒱
𑒏𑒣𑒰𑒮, 𑒏𑒰𑒚, 𑒒𑒵𑒞, 𑒡𑒴𑒧𑒢, 𑒏𑒩𑓂𑒣𑒴𑒩, 𑒔𑒰𑒢𑒢
𑒏𑒣𑒼𑒞𑒫𑒹𑒬 𑒧𑒵𑒞𑒏
𑒣𑒰𑒿𑒔-𑒣𑒰𑒿𑒔𑒙𑒰 𑒪𑒏𑒛𑓃𑒲 𑒮𑒦 𑒠𑒻 𑒕𑒟𑒱
𑒏𑒣𑒼𑒞𑒏 𑒠𑒑𑓂𑒡 𑒬𑒩𑒲𑒩𑒰𑒫𑒬𑒹𑒭 𑒮𑒢 𑒧𑒰𑓀𑒮𑒣𑒱𑒝𑓂𑒛 𑒦𑓄 𑒑𑒹𑒪𑒰𑒣𑒩
𑒮𑒞𑒏𑒚𑒱𑒨𑒰 𑒪𑓄 𑒮𑒰𑒞 𑒥𑒹𑒩 𑒣𑓂𑒩𑒠𑒏𑓂𑒭𑒱𑒝𑒰 𑒏𑓄
𑒏𑒳𑒩𑒯𑒩𑒱𑒮𑒿 𑒍𑒃 𑒆𑒏𑒏 𑒮𑒰𑒞 𑒕𑒾 𑒮𑒿 𑒐𑒝𑓂𑒛 𑒏𑓄
𑒮𑒰𑒞𑒼 𑒥𑒢𑓂𑒡𑒢𑒏𑒹𑒿 𑒏𑒰𑒙𑒱
𑒮𑒰𑒞𑒼 𑒮𑒞𑒏𑒚𑒱𑒨𑒰 𑒂𑒑𑒱𑒧𑒹 𑒤𑒹𑓀𑒏𑒱
𑒥𑒰𑒪-𑒫𑒵𑒠𑓂𑒡𑒏𑒹𑒿 𑒂𑒑𑒰𑒿 𑒏𑓄
𑒋𑒛𑓃𑒲-𑒠𑒾𑒛𑓃𑒲 𑒥𑒔𑒥𑒻𑒞
𑒢𑒯𑒰𑒃𑒪𑒹 𑒖𑒰𑒃 𑒕𑒟𑒱
𑒞𑒱𑒪𑒰𑒘𑓂𑒖𑒪𑒱 𑒧𑒼𑒛𑓃𑒰-𑒞𑒱𑒪-𑒖𑒪𑒮𑒿
𑒥𑒱𑒢𑒳 𑒠𑒹𑒯 𑒣𑒼𑒕𑒢𑒹
𑒂 𑒤𑒹𑒩 𑒧𑒵𑒞𑒏𑒏 𑒂𑓀𑒑𑒢𑒧𑒹
𑒠𑓂𑒫𑒰𑒩𑒣𑒩 𑒏𑓂𑒩𑒧𑒮𑒿 𑒪𑒼𑒯, 𑒣𑒰𑒟𑒩, 𑒂𑒑𑒱 𑒂 𑒣𑒰𑒢𑒱
𑒮𑓂𑒣𑒩𑓂𑒬 𑒏𑓄 𑒒𑒩 𑒒𑒳𑒩𑒱 𑒖𑒰𑒃 𑒕𑒟𑒱
























𑒦𑒰𑒑𑓂𑒨𑒬𑒰𑒪𑒲

𑓑
𑒯𑒰𑒩𑒱 𑒑𑒹𑒪 𑒕𑒲
𑒯𑒹𑒩𑒻𑒞 𑒍𑒃 𑒫𑒱𑒔𑒱𑒞𑓂𑒩 𑒖𑒲𑒫 𑒮𑒦𑒏𑒹𑒿
𑒢𑒻 𑒂𑒥 𑒂𑒩 𑒢𑒻
𑒤𑒰𑒙𑒱 𑒩𑒯𑒪 𑒁𑒕𑒱 𑒧𑒰𑒟
𑒤𑒳𑒪𑒰 𑒩𑒯𑒪 𑒁𑒕𑒱 𑒮𑒰𑒿𑒮 𑒄 𑒢𑒰𑒑𑒤𑒰𑒿𑒮
𑒫𑒱𑒔𑒱𑒞𑓂𑒩 𑒖𑒲𑒫 𑒮𑒦 𑒁𑒕𑒱
𑒋𑒏 𑒠𑒼𑒮𑒩𑒰𑒏 𑒫𑒱𑒩𑒳𑒠𑓂𑒡 𑒧𑒳𑒠𑒰
𑒮𑒦𑒙𑒰 𑒋𑒏𑒹 𑒮𑓀𑒑 𑒁𑒢𑓂𑒨𑒰𑒨𑒏 𑒣𑒏𑓂𑒭𑒧𑒹
𑒂 𑒮𑒞𑓂𑒨𑒏 𑒫𑒱𑒩𑒳𑒠𑓂𑒡,
𑒋𑒏 𑒠𑒼𑒮𑒩𑒰𑒏 𑒫𑒱𑒩𑒳𑒠𑓂𑒡 𑒧𑒳𑒠𑒰।

𑒏𑒹 𑒏𑒲 𑒥𑒰𑒖𑒱 𑒩𑒯𑒪 𑒁𑒕𑒱,
𑒏𑒐𑒢 𑒏𑒹 𑒣𑒪𑒙𑒱 𑒩𑒯𑒪 𑒁𑒕𑒱
𑒣𑒪𑒙𑒲 𑒧𑒰𑒩𑒱 𑒧𑒳𑒐𑒰𑒏𑒵𑒞𑒱 𑒥𑒠𑒪𑒱 𑒂𑒥𑒱 𑒖𑒰𑒃𑒋 𑒮𑒼𑒗𑒰𑒿
𑒯𑒧𑒩𑒼 𑒁𑒕𑒱 𑒂𑒏𑒰𑓀𑒏𑓂𑒭𑒰
𑒮𑒳𑒐𑒱𑒞 𑒩𑒯𑒥𑒰𑒏
𑒥𑒱𑒢 𑒫𑒱𑒫𑒰𑒠 𑒖𑒲𑒥𑒰𑒏
𑒧𑒳𑒠𑒰 𑒞𑒃𑒮𑒿 𑒢𑒱𑒮𑒦𑒹𑒩 𑒞𑒿 𑒦𑓄 𑒖𑒰𑒋𑒥,
𑒯𑒰𑒩𑒱 𑒏𑓄 𑒢𑒱𑒢𑓂𑒢 𑒂𑒥𑒱 𑒖𑒰𑒋𑒞 𑒏𑒲?

𑓒
𑒪𑒑𑒻𑒋 𑒖𑒹 𑒥𑒛𑓂𑒛 𑒦𑒰𑒑𑓂𑒨𑒬𑒰𑒪𑒲 𑒕𑒲 𑒯𑒧
𑒏𑒐𑒢𑒼 𑒖𑒹 𑒯𑒹𑒥𑓄 𑒪𑒰𑒑𑒻 𑒕𑒲 𑒯𑒞𑒼𑒞𑓂𑒮𑒰𑒯𑒱𑒞
𑒮𑓀𑒑𑒲 𑒮𑒦 𑒞𑒹𑒯𑒹𑒢, 𑒖𑒹 𑒖𑒼𑒬 𑒥𑒜𑓃𑒰 𑒠𑒻 𑒕𑒟𑒱
𑒖𑒹 𑒯𑒰𑒩𑓄 𑒪𑒰𑒑𑒻 𑒕𑒲, 𑒟𑒰𑒏𑒱 𑒖𑒰𑒃 𑒕𑒲
𑒞𑒿 𑒁𑒩𑒱 𑒏𑓄 𑒚𑒰𑒜𑓃 𑒦𑓄 𑒖𑒰𑒃 𑒕𑒟𑒱 𑒍
𑒞𑒹𑒯𑒹𑒢 𑒞𑒹𑒯𑒹𑒢 𑒑𑒣 𑒏𑒯𑒻 𑒕𑒟𑒱 𑒖𑒹 𑒟𑒏𑒢𑒲 𑒧𑒹𑒙𑒰 𑒖𑒰𑒃𑒋
𑒞𑒹𑒯𑒹𑒢 𑒞𑒹𑒯𑒹𑒢 𑒣𑓂𑒩𑒞𑒱𑒏𑒰𑒩 𑒏𑒩𑒻 𑒕𑒟𑒱
𑒖𑒹 𑒠𑒳𑒬𑓂𑒧𑒢 𑒯𑒰𑒩𑒱 𑒖𑒰𑒃𑒋

𑒏𑒢𑒱𑒨𑒰𑒿, 𑒧𑒰𑒋, 𑒥𑒯𑒱𑒢 𑒮𑒹𑒯𑒼 𑒮𑒦 𑒞𑒹𑒯𑒢𑒹 𑒦𑒹𑒙𑒪 𑒕𑒟𑒱
𑒧𑒳𑒿𑒯 𑒧𑒪𑒱𑒢 𑒦𑒹𑒪 𑒢𑒻 𑒂𑒏𑒱 𑒖𑒳𑒧𑒱 𑒖𑒰𑒃 𑒕𑒟𑒱 𑒮𑒦
𑒯𑒧𑒩𑒰 𑒯𑒿𑒮𑒹𑒥𑒰 𑒪𑒹𑒪
𑒏𑒱𑒨𑒼 𑒯𑒧𑒩 𑒧𑒼𑒢𑒏 𑒣𑒏𑒧𑒰𑒢 𑒥𑒢𑒰𑒥𑓄 𑒪𑒑𑒻 𑒕𑒟𑒱
𑒏𑒱𑒨𑒼 𑒯𑒧𑒩 𑒧𑒰𑒟 𑒡𑒼𑒥𑒻 𑒕𑒟𑒱
𑒂 𑒏𑒱𑒨𑒼 𑒮𑒳𑒢𑒥𑓄 𑒪𑒑𑒻 𑒕𑒟𑒱 𑒯𑒧𑒩 𑒣𑒳𑒩𑒰𑒢 𑒑𑒰𑒟𑒰
𑒮𑒞𑓂𑒨𑒏 𑒣𑒏𑓂𑒭𑒧𑒹 𑒪𑒛𑓃𑒥𑒰𑒏 𑒯𑒧𑒩 𑒂𑒏𑒰𑓀𑒏𑓂𑒭𑒰
𑒖𑒐𑒢 𑒥𑒻𑒮𑒰𑒐𑒲𑒣𑒩 𑒯𑒧 𑒔𑒪𑒻𑒞 𑒩𑒯𑒲 𑒞𑒞𑒹𑒏 𑒞𑒹𑒖𑒲𑒮𑒿
𑒖𑒞𑒹𑒏 𑒂𑒥 𑒯𑒧 𑒠𑒳𑒢𑒴 𑒣𑒋𑒩𑒣𑒩 𑒢𑒻 𑒔𑒪𑒱 𑒣𑒥𑒻𑒞 𑒕𑒲
𑒥𑒹𑒙𑒼-𑒥𑒹𑒙𑒲 𑒮𑒦 𑒞𑒹𑒯𑒢𑒹
𑒮𑓂𑒏𑒴𑒪𑒧𑒹 𑒣𑒳𑒕𑒻 𑒖𑒰𑒃 𑒕𑒢𑓂𑒯𑒱 𑒖𑒹 𑒁𑒯𑒰𑒿𑒏𑒹𑒿 𑒮𑓂𑒙𑒰𑒩 𑒦𑒹𑒙𑒪, 𑒞𑒏𑒩 𑒩𑒯𑒮𑓂𑒨 𑒏𑒲?
𑒞𑒿 𑒏𑒯𑒻 𑒖𑒰𑒃 𑒕𑒟𑒱
𑒖𑒹 𑒯𑒧 𑒮𑒦 𑒁𑒣𑒢 𑒣𑒱𑒞𑒰𑒮𑒿 𑒣𑒜𑓃𑒻 𑒕𑒲
𑒂 𑒯𑒧𑒩 𑒣𑒱𑒞𑒰 𑒠𑒳𑒢𑒱𑒨𑒰𑒿𑒧𑒹 𑒮𑒦𑒮𑒿 𑒥𑒹𑒮𑒲 𑒖𑒢𑒻 𑒕𑒟𑒱,
𑒩𑒯𑒮𑓂𑒨𑒼𑒠𑓂𑒒𑒰𑒙𑒢!
𑒯𑒧𑒩𑒰 𑒮𑒢 𑒦𑒰𑒑𑓂𑒨𑒬𑒰𑒪𑒲 𑒏𑒹!

𑒞𑒰𑒏𑒻 𑒕𑒲 𑒋𑒏 𑒞𑒿 𑒦𑒹𑒙𑒻 𑒕𑒟𑒱 𑒮𑒋
𑒥𑒹𑒬𑒲 𑒧𑒹𑒯𑒢𑒞𑒲
𑒥𑒹𑒬𑒲 𑒣𑓂𑒩𑒑𑒞𑒱𑒬𑒲𑒪
𑒮𑒯𑒨𑒼𑒑𑒲 𑒮𑒦
𑒣𑒰𑒚𑒏𑒼 𑒮𑒦 𑒞𑒹𑒯𑒢𑒹
𑒮𑒋 𑒣𑒢𑓂𑒢𑒰𑒧𑒹 𑒒𑒼𑒮𑒱𑒂𑒋𑒪 𑒋𑒏𑒙𑒰 𑒕𑒼𑒙𑒼 𑒑𑒣 𑒔𑒲𑒢𑓂𑒯𑒱 𑒖𑒰𑒃 𑒕𑒟𑒱
𑒢𑒻 𑒥𑒰𑒿𑒔𑒱 𑒣𑒥𑒻𑒋 𑒍 𑒯𑒱𑒢𑒏𑒰 𑒮𑒦𑒮𑒿।

𑒄 𑒮𑒦 𑒖𑒰𑒢 𑒪𑒑𑒰 𑒠𑒻 𑒕𑒟𑒱 𑒯𑒧𑒩𑒰 𑒪𑒹𑒪
𑒖𑒐𑒢 𑒏𑒐𑒢𑒼 𑒯𑒧𑒩 𑒧𑒳𑒿𑒯𑒣𑒩 𑒁𑒥𑒻𑒋 𑒩𑒹𑒐
𑒋𑒏𑒙𑒰 𑒕𑒼𑒙𑒼 𑒩𑒹𑒐
𑒯𑒧𑒩 𑒅𑒠𑓂𑒠𑒹𑒬𑓂𑒨𑒏𑒹𑒿 𑒥𑒜𑓃𑒹𑒥𑒰 𑒪𑒹𑒪
𑒯𑒧𑒩𑒰 𑒯𑒿𑒮𑒹𑒥𑒰 𑒪𑒹𑒪
𑒯𑒧𑒩𑒰 𑒔𑒪𑒹𑒥𑒰 𑒪𑒹𑒪, 𑒥𑒻𑒬𑒰𑒐𑒲𑒮𑒿 𑒠𑒳𑒢𑒴 𑒣𑒋𑒩𑒣𑒩
𑒧𑒳𑒠𑒰 𑒯𑒧 𑒥𑒻𑒬𑒰𑒐𑒲 𑒕𑒳𑒙𑒪𑒰𑒏 𑒥𑒰𑒠 𑒏𑒯𑒰𑒿 𑒔𑒪𑒱 𑒣𑒰𑒥𑒱 𑒩𑒯𑒪 𑒕𑒲 𑒍𑒞𑒹𑒏 𑒗𑒙𑒏𑒰𑒩𑒱 𑒏𑓄
𑒥𑒻𑒬𑒰𑒐𑒲 𑒡𑒹𑒢𑒹 𑒖𑒞𑒹𑒏 𑒗𑒙𑒏𑒰𑒩𑒻𑒞 𑒥𑒜𑓃𑒻𑒞 𑒩𑒯𑒲
𑒏𑒱𑒋 𑒞𑒿 𑒯𑒧 𑒥𑒛𑓂𑒛 𑒦𑒰𑒑𑓂𑒨𑒬𑒰𑒪𑒲 𑒕𑒲
𑒪𑒼𑒏𑒏 𑒣𑓂𑒩𑒹𑒧 𑒖𑒹 𑒏𑒩𑒥𑒰 𑒪𑒻𑒋 𑒯𑒧𑒩𑒰𑒮𑒿 𑒏𑒱𑒕𑒳 𑒏𑒰𑒖
𑒂 𑒠𑓄 𑒠𑒻𑒋 𑒫𑒱𑒬𑓂𑒩𑒰𑒧 𑒯𑒧𑒩 𑒢𑒱𑒩𑒰𑒬𑒰𑒏𑒹𑒿।

𑒖𑒲𑒞 𑒑𑒹𑒪 𑒕𑒲 𑒯𑒧!















𑒯𑒰𑒃𑒏𑒴/ 𑒬𑒹𑒢𑒩𑓂𑒨𑒴/ 𑒙𑒢𑒏𑒰/ 𑒯𑒻𑒥𑒴𑒢
𑓑
𑒣𑓂𑒩𑒏𑒵𑒞𑒱 𑒩𑒼𑒭
𑒏𑒳𑒬 𑒞𑒱𑒪 𑒖𑒪𑒮𑒿
𑒫𑒱𑒡𑒫𑒰 𑒥𑒢𑒱
𑒮𑒡𑒫𑒰 𑒏𑒲 𑒫𑒱𑒦𑒹𑒠
𑒠𑒴𑒥𑒱 𑒁𑒏𑓂𑒭𑒞 𑒖𑒪 (𑒙𑒢𑒏𑒰/ 𑒫𑒰𑒏𑒰)
𑒏𑒩𑒥𑒲𑒩𑒮𑒿
𑒒𑒩 𑒑𑒰𑒕 𑒣𑒯𑒰𑒛𑓃
𑒒𑒹𑒩𑒪 𑒁𑒕𑒱 (𑒯𑒰𑒃𑒏𑒴)
𑒥𑒢𑒻𑒨𑒰 𑒪𑒼𑒏
𑒒𑒩𑒏 𑒣𑒢𑒱𑒥𑒯
𑒥𑒱𑒠𑒞𑒱 𑒢𑒯𑒱 (𑒬𑒹𑒢𑒩𑓂𑒨𑒴)
𑒏𑒩𑒯𑒛𑓃 𑒅𑒣𑒰𑒩𑒱 𑒏𑓄 𑒐𑒰𑒅, 𑒣𑓂𑒩𑒏𑒵𑒞𑒱𑒏𑒹𑒿 𑒒𑒩𑒧𑒹 𑒥𑒮𑒰𑒅, 𑒤𑒳𑒪𑒫𑒰𑒩𑒲 𑒥𑒢𑒰𑒅, 𑒣𑒯𑒰𑒛𑓃𑒏 𑒤𑒼𑒙𑒼 𑒥𑒢𑒰 𑒏𑓄 𑒒𑒩𑒧𑒹 𑒪𑒙𑒏𑒰𑒅। 𑒂 𑒦𑓄 𑒖𑒰𑒅 𑒣𑓂𑒩𑒏𑒵𑒞𑒱 𑒣𑓂𑒩𑒹𑒧𑒲। 𑒑𑒰𑒧𑒏𑒹𑒿 𑒢𑒑𑓂𑒩𑒧𑒹 𑒪𑓄 𑒂𑒅, 𑒔𑒱𑒞𑓂𑒩𑒏𑒰𑒩𑒲𑒮𑒿, 𑒏𑒪𑒰𑒏𑒰𑒩𑒲𑒮𑒿, 𑒥𑒳𑒡𑒱𑒨𑒰𑒩𑒲𑒮𑒿।
𑒐𑒹𑒪𑒰𑒃 𑒯𑒧
𑒏𑒩𑒱𑒨𑒰𑒗𑒳𑒧𑓂𑒧𑒩𑒱𑒧𑒹
𑒢𑒲𑒔𑒰𑒿 𑒁𑒏𑒰𑒮
𑒋𑒏𑒣𑒹𑒛𑓃𑒱𑒨𑒰 𑒮𑒛𑓃𑒏 𑒏𑒞𑓄 𑒣𑒰𑒥𑒲 𑒂𑒥, 𑒂𑒥 𑒞𑒿 𑒔𑒰𑒩𑒱 𑒪𑒹𑒢 𑒮𑒹𑒯𑒼 𑒏𑒧 𑒔𑒏𑒩𑒑𑒩 𑒧𑒰𑒢𑒪 𑒖𑒰𑒃𑒋। 𑒕𑒯 𑒪𑒹𑒢, 𑒂𑒚 𑒪𑒹𑒢। 𑒁𑒏𑒰𑒮 𑒧𑒪𑒱𑒕𑒼𑓀𑒯, 𑒑𑒰𑒕𑒏 𑒯𑒩𑒱𑒨𑒩𑒲 𑒧𑒪𑒱𑒕𑒼𑓀𑒯। 𑒧𑒼𑒢 𑒧𑒪𑒱𑒕𑒼𑓀𑒯। 𑒧𑒳𑒠𑒰 𑒮𑒛𑓃𑒏, 𑒒𑒩 𑒮𑒦 𑒤𑒼𑒙𑒼 𑒮𑒢 𑒔𑒱𑒏𑓂𑒏𑒢 𑒔𑒳𑒢𑒧𑒳𑒢। 𑒪𑒱𑒐𑒲 𑒔𑒱𑒞𑓂𑒩𑒮𑒿
𑒒𑒩𑒏 𑒐𑒰𑒏𑒰 𑒂𑒃
𑒕𑒲 𑒖𑒓𑒪𑒰𑒯
(𑒯𑒻𑒥𑒴𑒢)


𑓒
𑓑.
𑒞𑒰𑒑𑒱 𑒣𑓂𑒩𑒏𑒵𑒞𑒱
𑒞𑒰𑒏𑒻𑒪𑒹 𑒦𑒹𑒪𑒾𑓀 𑒣𑒰𑒩
𑒮𑒳𑒐𑒪 𑒣𑒰𑒞
(𑒯𑒰𑒃𑒏𑒴)
𑓒.
𑒄 𑒤𑒴𑒪 𑒤𑒪
𑒔𑒜𑓃𑒻𑒞 𑒖𑒰𑒃 𑒂𑒑𑒰𑒿
𑒏𑒧 𑒯𑒼𑒃𑒋
𑒅𑒢𑒙𑒱 𑒠𑒹𑒐𑒲 𑒤𑒹𑒩
𑒪𑒑𑒧𑒹 𑒏𑒧 𑒠𑒴𑒩𑒹 𑒥𑒹𑒬𑒲
(𑒙𑒢𑒏𑒰/ 𑒫𑒰𑒏𑒰)
𑓓.
𑒩𑓀𑒑 𑒕𑒰𑒛𑓃𑒪
𑒣𑒯𑒰𑒛𑓃 𑒂𑒩 𑒑𑒰𑒕
𑒧𑒳𑒠𑒰 𑒖𑒲𑒫𑒢
(𑒬𑒹𑒢𑒩𑓂𑒨𑒴)
𑓔.
𑒗𑒗𑒰𑒨𑒪 𑒩𑓀𑒑 𑒏𑒞𑒹𑒏𑒼 𑒫𑒩𑓂𑒝𑒏। 𑒥𑒔𑓂𑒔𑒰𑒏 𑒏𑒱𑒞𑒰𑒥𑒼𑒮𑒿 𑒥𑒹𑒬𑒲 𑒔𑒧𑒏𑒻𑒋 𑒄 𑒣𑓂𑒩𑒏𑒵𑒞𑒱, 𑒤𑒴𑒪, 𑒣𑒰𑒞, 𑒥𑒰𑒙 𑒂 𑒁𑒏𑒰𑒮। 𑒂 𑒋𑒏𑒩𑒰 𑒮𑒦𑒏𑒹𑒿 𑒞𑒿 𑒕𑒼𑒛𑓃𑒴 𑒄 𑒥𑒩𑒤, 𑒖𑒹 𑒩𑒹𑒑𑒱𑒮𑓂𑒞𑒰𑒢𑒹 𑒢𑒹 𑒕𑒲, 𑒥𑒰𑒪𑒳𑒏 𑒥𑒠𑒪𑒰 𑒥𑒩𑒤। 𑒧𑒳𑒠𑒰 𑒢𑒻 𑒁𑒕𑒱 𑒂𑒏𑓂𑒮𑒲𑒖𑒢 𑒂 𑒢𑒯𑒱𑒨𑒹 𑒤𑒴𑒪-𑒣𑒰𑒞। 𑒧𑒳𑒠𑒰 𑒋𑒏𑒩 𑒮𑒹𑒯𑒼 𑒠𑒹𑒐𑒱𑒨𑒾 𑒬𑒰𑒢। 𑒖𑒃 𑒩𑒮𑓂𑒞𑒰𑒮𑒿 𑒁𑒥𑒻 𑒕𑒪𑒾𑓀 𑒮𑒹 𑒍𑒞𑒹𑒏 𑒏𑒯𑒰𑒿 𑒔𑒧𑒏𑒻 𑒕𑒪। 𑒖𑒐𑒢 𑒍𑒃 𑒣𑓂𑒩𑒏𑒵𑒞𑒱𑒏 𑒪𑒑 𑒕𑒪𑒾𑓀 𑒞𑒿 𑒏𑒯𑒰𑒿 𑒍𑒏𑒩 𑒩𑒴𑒣 𑒢𑒱𑒓𑒯𑒰𑒩𑒱 𑒣𑒰𑒥𑒻 𑒕𑒪𑒾𑓀। 𑒏𑒱𑒨𑒼 𑒠𑒴𑒩𑒮𑒿 𑒠𑒹𑒐𑒻𑒞 𑒯𑒋𑒞 𑒞𑒿 𑒢𑒱𑒓𑒯𑒰𑒩𑒱 𑒣𑒥𑒻𑒞 𑒯𑒋𑒞 𑒯𑒧𑒩𑒼, 𑒣𑓂𑒩𑒏𑒵𑒞𑒱𑒏 𑒥𑒲𑒔𑒧𑒹 𑒯𑒧𑒯𑒴𑒿 𑒣𑓂𑒩𑒏𑒵𑒞𑒱 𑒥𑒢𑒪 𑒯𑒋𑒥। 𑒧𑒳𑒠𑒰 𑒌 𑒬𑒱𑒐𑒩𑒣𑒩 𑒂𑒥𑒱 𑒖𑒹 𑒮𑒢𑒑𑒩 𑒪𑒑𑒻𑒋 𑒄 𑒣𑓂𑒩𑒏𑒵𑒞𑒱।
𑒑𑒰𑒕 𑒦𑒹𑒪 𑒕𑒻
𑒁𑒮𑒑𑒩𑒳𑒂 𑒥𑒾𑒂
𑒣𑒰𑒞 𑒦𑒹𑒪 𑒕𑒻
𑒐𑒱𑒪𑒾𑒢𑒰 𑒣𑓂𑒩𑒏𑒵𑒞𑒱𑒏
𑒬𑒱𑒐𑒩 𑒠𑒹𑒐𑒱

𑒧𑒳𑒠𑒰 𑒂𑒥 𑒌 𑒬𑒱𑒐𑒩𑒣𑒩 𑒋𑒪𑒰𑒏 𑒥𑒰𑒠 𑒪𑒑𑒻𑒋 𑒖𑒹 𑒥𑒹𑒏𑒰𑒩𑒹 𑒋𑒪𑒾𑓀 𑒋𑒞𑓄। 𑒌 𑒬𑒱𑒐𑒩𑒏𑒹𑒿 𑒍𑒃 𑒚𑒰𑒧𑒮𑒿 𑒠𑒹𑒐𑒻 𑒕𑒪𑒾𑓀 𑒞𑒿 𑒏𑒞𑒹𑒏 𑒮𑒳𑒢𑓂𑒢𑒩 𑒪𑒑𑒻 𑒕𑒪 𑒄 𑒬𑒱𑒐𑒩। 𑒧𑒳𑒠𑒰 𑒬𑒱𑒐𑒩𑒣𑒩 𑒋𑒪𑒰𑒏 𑒥𑒰𑒠 𑒂𑒥 𑒞𑒿 𑒫𑒋𑒯 𑒑𑒰𑒧 𑒢𑒲𑒏 𑒪𑒑𑒻𑒋। 𑒞𑒳𑒪𑒢𑒰 𑒞𑒐𑒢𑒹 𑒢𑒹 𑒯𑒋𑒞 𑒖𑒐𑒢 𑒑𑒰𑒧𑒏 𑒣𑓂𑒩𑒏𑒵𑒞𑒱𑒏𑒹𑒿 𑒬𑒱𑒐𑒩𑒮𑒿 𑒠𑒹𑒐𑒥𑒻। 𑒑𑒰𑒧𑒮𑒿 𑒬𑒱𑒐𑒩 𑒂 𑒬𑒱𑒐𑒩𑒮𑒿 𑒑𑒰𑒧। 𑒧𑒳𑒠𑒰 𑒪𑒱𑒪𑒮𑒰𑒮𑒿 𑒯𑒰𑒃 𑒩𑒹 𑒯𑒰𑒃। 𑒂𑒥 𑒔𑒪𑒻 𑒕𑒲 𑒬𑒱𑒐𑒩𑒏 𑒍𑒃 𑒣𑒰𑒩। 𑒠𑒹𑒐𑒻 𑒕𑒲 𑒍𑒃 𑒠𑒱𑒮𑒳𑒏𑒰 𑒪𑒼𑒏 𑒮𑒧𑒰𑒖। 𑒠𑒴𑒩𑒮𑒿 𑒪𑒑𑒻𑒋 𑒠𑒳𑒢𑒴 𑒏𑒰𑒞𑒏 𑒑𑒰𑒧 𑒢𑒲𑒏, 𑒞𑒩𑒰𑒅𑒣𑒛𑓃𑒲। 𑒧𑒳𑒠𑒰 𑒍𑒃 𑒏𑒰𑒞𑒏 𑒑𑒰𑒧𑒮𑒿 𑒬𑒱𑒐𑒩 𑒍𑒞𑒹𑒏 𑒮𑒳𑒢𑓂𑒢𑒩 𑒪𑒰𑒑𑒞 𑒖𑒞𑒹𑒏 𑒌 𑒣𑒰𑒩𑒏 𑒑𑒰𑒧𑒮𑒿 𑒪𑒑𑒻𑒋।
𑒢𑒻 𑒚𑒰𑒜𑓃 𑒯𑒼𑒅
𑒔𑒪𑒴 𑒔𑒪𑒲 𑒒𑒳𑒩𑒻𑒪𑒹
𑒥𑒢𑒱𑒖𑒰𑒩 𑒕𑒲
𑒪𑒼𑒏𑒏 𑒥𑒲𑒔𑒧𑒹 𑒕𑒲
𑒖𑒰𑒃𑒞 𑒒𑒳𑒩𑒻𑒞 𑒕𑒲
(𑒯𑒻𑒥𑒴𑒢)

𑓓
𑒔𑒞𑒩𑒪 𑒕𑒻/ 𑒪𑒞𑒩𑒪 𑒙𑒰𑒙 𑒄/ 𑒗𑒼𑒩𑒰 𑒏𑓄 𑒐𑒰𑒅
𑒄 𑒥𑒱𑒖𑒪𑒾𑒏𑒰/ 𑒖𑒛𑓃𑒱𑒏 𑒬𑒱𑒩𑒰 𑒮𑒢/ 𑒣𑒮𑒩𑒻𑒋
𑒖𑒛𑓃𑒱𑒮𑒿 𑒤𑒴𑒙𑒱 /𑒄 𑒏𑒛𑓃𑒏𑒛𑓃𑒰𑒃𑒞/ 𑒠𑒱𑒑 𑒠𑒱𑒑𑒢𑓂𑒞/ 𑒣𑒮𑒩𑒞 𑒮𑒑𑒩𑒹/ 𑒏𑒩𑒞 𑒂𑒔𑓂𑒕𑒰𑒠𑒱𑒞
𑒏𑒰𑒩𑒝 𑒢𑒻 𑒕𑒻/ 𑒯𑒰𑒩𑒱 𑒪𑒹𑒪, 𑒫𑒱𑒖𑒨/ 𑒪𑒹𑒪 𑒢𑒻 𑒑𑒩𑓂𑒫
𑒪𑒼𑒏 𑒣𑒞𑒰𑒪𑒲/ 𑒖𑒯𑒰𑒖 𑒁𑒏𑒰𑒮𑒧𑒹 / 𑒅𑒢𑒙𑒱 𑒑𑒹𑒪 / 𑒫𑒱𑒬𑓂𑒫 𑒪𑒼𑒏 𑒥𑓂𑒩𑒯𑓂𑒧𑒰𑒝𑓂𑒛 / 𑒥𑒰𑒞 𑒫𑒱𑒔𑒰𑒩 𑒮𑒦
𑒖𑒪 𑒠𑒳𑒢𑒱𑒨𑒰𑒿/ 𑒮𑒧𑒳𑒠𑓂𑒩 𑒞𑒪𑒣𑒩/ 𑒁𑒠𑓂𑒦𑒳𑒞 𑒩𑓀𑒑
𑒥𑒱𑒢𑒳 𑒯𑒩𑒠𑒱/ 𑒔𑒰𑒝𑒏𑓂𑒨𑒏 𑒥𑒱𑒐𑒰𑒯𑒱 / 𑒫𑒱𑒭𑒏𑒢𑓂𑒨𑒰 𑒍
𑒥𑒱𑒢𑒳 𑒯𑒩𑒠𑒱/ 𑒥𑒢𑒪𑒱 𑒥𑒱𑒐𑒰𑒯𑒱 𑒍 / 𑒫𑒱𑒭𑒏𑒢𑓂𑒨𑒰 𑒖𑒹/ 𑒣𑒰𑒪𑒱𑒞 𑒦𑒹𑒪 𑒕𑒪𑒱/ 𑒥𑒱𑒢𑒳 𑒯𑒩𑒠𑒱𑒏 𑒖𑒹
𑒯𑒩𑒠𑒱, 𑒑𑒳𑒝𑒹-𑒑𑒳𑒝, 𑒮𑒩𑓂𑒠𑒲 𑒦𑒹𑒪, 𑒠𑒴𑒡𑒧𑒹 𑒒𑒲 𑒂 𑒯𑒩𑒠𑒱 𑒠𑒱𑒨𑒾 𑒂 𑒂𑒿𑒐𑒱 𑒧𑒴𑒢𑒱 𑒒𑒼𑓀𑒙𑒱 𑒖𑒰𑒅। 𑒔𑒼𑒙 𑒪𑒰𑒑𑒪 𑒯𑒩𑒠𑒱𑒧𑒹 𑒛𑒼𑒏𑒰𑒥𑒪𑒰 𑒔𑒴𑒢 𑒧𑒱𑒪𑒰𑒅 𑒂 𑒪𑒹𑒣 𑒠𑒱𑒨𑒾। 𑒯𑒩𑒠𑒱 𑒥𑒱𑒢𑒰 𑒢𑒹 𑒠𑒰𑒪𑒱 𑒂 𑒢𑒹 𑒐𑒱𑒔𑓂𑒔𑒩𑒱 𑒪𑒰𑒑𑒞 𑒣𑒱𑒨𑒩𑒑𑒩। 𑒐𑒱𑒔𑓂𑒔𑒩𑒱 𑒦𑓄 𑒖𑒰𑒋𑒞 𑒧𑒩𑒮𑒙𑒏𑒰 𑒂 𑒠𑒰𑒪𑒱 𑒦𑒙𑒩𑓀𑒑। 𑒠𑒹𑒐𑒻𑒧𑒹 𑒪𑒑𑒻𑒋 𑒖𑒹𑒢𑒰 𑒫𑒻𑒖𑒨𑒢𑓂𑒞𑒲 𑒤𑒴𑒪𑒏 𑒑𑒰𑒕 𑒯𑒳𑒁𑒋, 𑒧𑒳𑒠𑒰 𑒄 𑒥𑒰𑒛𑓃𑒲𑒧𑒹 𑒯𑒼𑒃𑒋, 𑒫𑒻𑒖𑒨𑒢𑓂𑒞𑒲 𑒮𑒢 𑒣𑒼𑒐𑒩𑒱𑒏 𑒧𑒯𑒰𑒩𑒣𑒩 𑒢𑒻। 𑒯𑒩𑒠𑒱 𑒑𑒰𑒕/ 𑒢𑒳𑒏𑒾𑒢𑒹 𑒖𑒛𑓃𑒱𑒧𑒹 𑒄/ 𑒁𑒣𑒢 𑒑𑒳𑒝 (𑒯𑒻𑒥𑒴𑒢)

𑓔
𑒂𑒮𑒏 𑒁𑒕𑒱/ 𑒣𑒢𑒱𑒮𑒼𑒐𑒰 𑒅𑒑𑒪/ 𑒔𑒪𑒴 𑒥𑒜𑓃𑒻 𑒕𑒲 (𑒯𑒰𑒃𑒏𑒴)
𑒦𑒹𑒪 𑒅𑒥𑒹𑒩/ 𑒅𑒑𑒪 𑒣𑒢𑒱𑒮𑒼𑒐𑒰/ 𑒏𑒰𑒖 𑒏𑒩𑒻 𑒕𑒲/ 𑒥𑒯𑒩𑒰𑒃 𑒒𑒩𑒮𑒿/ 𑒥𑒰𑒙 𑒦𑒹𑒙𑒪 𑒁𑒕𑒱 (𑒙𑒢𑒏𑒰)
𑒣𑒢𑒱𑒮𑒼𑒐𑒰 𑒄/ 𑒅𑒑𑒪 𑒁𑒏𑒰𑒮𑒧𑒹/ 𑒅𑒣𑒩𑒹 𑒆𑒣𑒩! (𑒬𑒹𑒢𑒩𑓂𑒨𑒴)
𑒂𑒯, 𑒂𑒥 𑒯𑒋𑒞 𑒅𑒥𑒹𑒩, 𑒅𑒑𑒱 𑒑𑒹𑒪 𑒁𑒕𑒱 𑒣𑒢𑒱𑒮𑒼𑒐𑒰, 𑒐𑒳𑒖𑒱 𑒑𑒹𑒪 𑒁𑒕𑒱 𑒥𑒰𑒙, 𑒥𑒢𑒱𑒯𑒰𑒩 𑒥𑒱𑒠𑒰 𑒦𑒹𑒪 𑒥𑒢𑒱𑒖 𑒏𑒩𑒋, 𑒂 𑒏𑒱𑒮𑒰𑒢 𑒥𑒲𑒨𑒰 𑒅𑒐𑒰𑒩𑒱 𑒩𑒼𑒣𑒢𑒱 𑒪𑒹𑒪 𑒂 𑒯𑒧 𑒥𑒱𑒠𑒰 𑒦𑒹𑒪𑒾𑓀 𑒏𑒼𑒢𑒼 𑒁𑒏𑒰𑒖𑒏 𑒏𑒰𑒖 𑒪𑒹𑒪, 𑒁𑒢𑓂𑒞𑒯𑒲𑒢 𑒥𑒰𑒙𑒣𑒩, 𑒮𑒳𑒏𑒰𑒖𑒏 𑒏𑒰𑒖 𑒪𑒹𑒪 , 𑒠𑒱𑒬𑒰𑒯𑒲𑒢 𑒚𑒧𑒏𑒪 𑒔𑒾𑒥𑒙𑒱𑒨𑒰 𑒠𑒱𑒮।
𑒥𑒰𑒙 𑒞𑒏𑒻𑒞
𑒞𑒰𑒏𑒲 𑒁𑒏𑒰𑒮 𑒠𑒱𑒮
𑒫𑒱𑒔𑒱𑒞𑓂𑒩 𑒦𑓂𑒩𑒧
𑒖𑒹𑒢𑒰 𑒄 𑒣𑒢𑒱𑒮𑒼𑒐𑒰
𑒅𑒑𑒱 𑒐𑒼𑒪𑒞 𑒥𑒰𑒙

𑒞𑒐𑒢 𑒤𑒹𑒩𑒮𑒿 𑒞𑒰𑒏𑒥, 𑒯𑒹𑒩𑒥 𑒁𑒣𑒢 𑒮𑒧𑒰𑒢, 𑒂 𑒥𑒩𑓂𑒐𑒰 𑒯𑒼𑒃 𑒡𑒩𑒱 𑒔𑒪𑒻𑒞 𑒩𑒯𑒥। 𑒞𑒿 𑒄 𑒏𑒯𑒥 𑒖𑒹 𑒥𑒩𑓂𑒐𑒰 𑒯𑒼𑒃 𑒡𑒩𑒱 𑒔𑒪𑒻𑒞 𑒩𑒯𑒥 𑒏𑒼𑒢𑒼 𑒣𑒪𑒰𑒨𑒢 𑒞𑒿 𑒢𑒻। 𑒣𑒢𑒱𑒮𑒼𑒐𑒰 𑒅𑒑𑒪𑒹 𑒁𑒕𑒱, 𑒥𑒰𑒙 𑒐𑒳𑒖𑒪𑒹 𑒁𑒕𑒱 𑒂 𑒯𑒧 𑒥𑒰𑒙 𑒞𑒰𑒏𑒱 𑒩𑒯𑒪 𑒕𑒲 𑒂𑒥𑒻𑒥𑒪𑒰 𑒥𑒩𑓂𑒐𑒰𑒏?
𑒮𑒞𑒩𑓀𑒑𑒱𑒨𑒰
𑒁𑒕𑒱 𑒄 𑒂𑒮
𑒅𑒑𑒻𑒋 𑒂𑒮
𑒛𑒳𑒥𑒥𑒰𑒪𑒹 𑒁𑒏𑒰𑒮
𑒥𑒢𑒱 𑒑𑒹𑒪 𑒮𑓀𑒞𑓂𑒩𑒰𑒮
(𑒯𑒻𑒥𑒴𑒢 -𑒠𑒴 𑒙𑒰 𑒑𑒠𑓂𑒨 𑒂 𑒠𑒴𑒙𑒰 𑒙𑒢𑒏𑒰 𑒨𑒳𑒏𑓂𑒞)


𑒯𑒰𑒃𑒏𑒴/ 𑒬𑒹𑒢𑒩𑓂𑒨𑒴/ 𑒙𑒢𑒏𑒰

𑒯𑒩𑒱𑒞-𑒏𑒘𑓂𑒔/ 𑒪𑒰𑒪-𑒅𑒖𑓂𑒖𑒩 𑒚𑒼𑒣/ 𑒯𑒵𑒠𑒻 𑒮𑓀𑒑𑒼𑒩
𑒧𑒩𑒳𑒠𑓂𑒨𑒰𑒢 𑒢𑒻/ 𑒖𑒪𑒼𑒠𑒲𑒣𑒧𑒹 𑒠𑓂𑒫𑒲𑒣/ 𑒥𑒰𑒪𑒳 𑒢𑒻 𑒣𑒰𑒢𑒱
𑒍 𑒢𑒲𑒪 𑒧𑒹𑒒/ 𑒮𑒧𑒳𑒠𑓂𑒩 𑒣𑒵𑒟𑓂𑒫𑒲 𑒕𑒼𑒛𑓃𑒱/ 𑒦𑒹𑒪 𑒁𑒏𑒰𑒮𑒲
𑒣𑒰𑒞 𑒂 𑒔𑒱𑒛𑓃𑒻/ 𑒋𑒏 𑒠𑒼𑒮𑒩𑒰 𑒮𑒢/ 𑒮𑓂𑒏𑒱𑒢 𑒏𑒪𑒩
𑒁𑒏𑒰𑒮𑒲 𑒖𑒪/ 𑒣𑒰𑒢𑒱𑒏 𑒁𑒏𑒰𑒮𑒧𑒹/ 𑒩𑒮𑓂𑒞𑒰 𑒔𑒲𑒩𑒻𑒋
𑒄 𑒯𑒱𑒧𑒣𑒰𑒞/ 𑒯𑒱𑒧 𑒮𑒢 𑒁𑒏𑒰𑒮/ 𑒂 𑒡𑒩𑒰 𑒑𑒰𑒕
𑒮𑒴𑒩𑓂𑒨𑒏 𑒣𑒴𑒥/ 𑒂𑒬𑒰𑒏 𑒕𑒻 𑒏𑒱𑒩𑒝/ 𑒧𑒳𑒠𑒰 𑒩𑒏𑓂𑒞𑒰𑒦
𑒣𑓂𑒩𑒏𑒵𑒞𑒱 𑒣𑒰𑒢𑒱/ 𑒯𑒯𑒰𑒩𑒼𑒯𑒏 𑒥𑒰𑒠/ 𑒬𑒰𑓀𑒞 𑒣𑓂𑒩𑒬𑒰𑓀𑒞
𑒫𑓂𑒨𑒰𑒏𑒳𑒪 𑒔𑒱𑒛𑓃𑒻/ 𑒚𑒴𑒚 𑒑𑒰𑒕 𑒮𑒳𑒐𑒾𑓀𑒞/ 𑒕𑒻 𑒯𑒞𑒣𑓂𑒩𑒦
𑒣𑓂𑒩𑒏𑒵𑒞𑒱 𑒢𑒵𑒞𑓂𑒨/ 𑒣𑓂𑒩𑒏𑒵𑒞𑒱 𑒮𑓀𑒑 𑒖𑒲𑒥/ 𑒣𑓂𑒩𑒏𑒵𑒞𑒱 𑒦𑓄 𑒏𑓄
𑒣𑓂𑒩𑒏𑒵𑒞𑒱 𑒣𑓂𑒩𑒹𑒧/ 𑒣𑓂𑒩𑒏𑒵𑒞𑒱 𑒮𑓀𑒑 𑒖𑒲𑒥/ 𑒣𑓂𑒩𑒏𑒵𑒞𑒱 𑒦𑓄 𑒏𑓄
𑒁𑒪𑒻𑒔𑒜𑓃𑒪/ 𑒅𑒞𑓂𑒮𑒰𑒯 𑒯𑒧𑒩 𑒖𑒹/ 𑒠𑒹𑒐𑒲 𑒠𑒼𑒯𑒰𑒩𑒰
𑒁𑒧𑒩𑒪𑒞𑓂𑒞𑒲/ 𑒣𑒢𑒱𑒮𑒼𑒐𑒰 𑒖𑒏𑒰𑒿 𑒏𑒲/ 𑒕𑒴𑒞 𑒁𑒏𑒰𑒮
𑒏𑒖𑒩𑒰𑒋𑒥/ 𑒁𑒏𑒰𑒮𑒏 𑒄 𑒑𑒰𑒕/ 𑒧𑒹𑒒𑒏 𑒮𑓀𑒑
𑒠𑒹𑒫 𑒛𑒒𑒩/ 𑒁𑒏𑒰𑒮𑒮𑒿 𑒅𑒞𑒩𑒱/ 𑒣𑒵𑒟𑓂𑒫𑒲 𑒁𑒥𑒻𑒞
𑒡𑒳𑒩𑒱𑒨𑒰 𑒮𑒰𑒍𑒢/ 𑒤𑒹𑒩 𑒦𑒠𑒥𑒩𑒱𑒨𑒰/ 𑒩𑒹𑒞 𑒣𑒨𑒼𑒡𑒱
𑒏𑒔𑒾𑒂𑒥𑒡/ 𑒧𑒢𑒼𑒩𑒟 𑒑𑒰𑒧𑒏/ 𑒖𑒥𑒏𑒰 𑒧𑒰𑒩𑒪
𑒑𑒰𑒕 𑒥𑒵𑒔𑓂𑒕 𑒂/ 𑒔𑒱𑒛𑓃𑒻 𑒔𑒳𑒢𑒧𑒳𑒢𑒲𑒏/ 𑒥𑒲𑒔 𑒐𑒹𑒥𑒻 𑒕𑒲
𑒮𑓀𑒑𑒼𑒩 𑒩𑒰𑒞𑒱/ 𑒠𑒱𑒢 𑒩𑒰𑒞𑒱 𑒮𑒢-𑒋/ 𑒂 𑒩𑒰𑒞𑒱 𑒩𑒰𑒞𑒱
𑒠𑒴𑒩 𑒏𑓂𑒭𑒱𑒞𑒱𑒖/ 𑒧𑒳𑒿𑒯 𑒒𑒳𑒩𑒾𑒢𑒹 𑒮𑒦/ 𑒁𑒣𑒢𑒹 𑒦𑒹𑒩
𑒠𑒴𑒩 𑒏𑓂𑒭𑒱𑒞𑒱𑒖/ 𑒫𑒵𑒞𑓂𑒞𑒏 𑒢𑒯𑒱 𑒁𑓀𑒞/ 𑒪𑒑𑒏 𑒕𑒠𑓂𑒧
𑒧𑒹𑒒𑒏 𑒮𑒲𑒜𑓃𑒲/ 𑒁𑒏𑒰𑒮𑒏 𑒧𑒔𑒰𑒢/ 𑒯𑒱𑒧 𑒕𑒰𑒩𑒪
𑒁𑒢𑓂𑒯𑒰𑒩 𑒖𑒼𑒞𑒱/ 𑒏𑒋𑒪 𑒣𑓂𑒩𑒏𑒰𑒬𑒱𑒞/ 𑒁𑓀𑒞𑓁𑒣𑓂𑒩𑒏𑒰𑒬𑒹
𑒮𑒪𑒰𑒜𑓃 𑒂𑒥/ 𑒁𑒩𑒱𑒨𑒰𑒪𑒓𑓂𑒒𑒢𑒏/ 𑒥𑒰𑒠𑒏 𑒯𑒰𑒪
𑒁𑒑𑒩𑒖𑒱𑒞/ 𑒐𑒮𑒥 𑒢𑒻 𑒅𑒚𑒥/ 𑒍𑒞𑒻 𑒩𑒯𑒥
𑒮𑒰𑒿𑒣 𑒒𑒳𑒧𑒻𑒞/ 𑒣𑒯𑒳𑒿𑒔𑒻𑒋 𑒬𑒱𑒐𑒩/ 𑒩𑒮𑓂𑒞𑒰 𑒥𑒢𑒻𑒋
𑒖𑒪𑒣𑒻 𑒥𑒹𑒜𑓃𑒲/ 𑒥𑒼𑒢𑒰𑒚 𑒡𑒧𑒰𑒅𑒩/ 𑒅𑒣𑒙𑒰𑒋𑒥
𑒛𑒪𑒥𑒰𑒯 𑒢𑒻/ 𑒣𑓀𑒖𑒱𑒨𑒰𑒩 𑒦𑒑𑒞𑒰/ 𑒦𑒑𑒻𑒞𑒱𑒨𑒰 𑒢𑒻
𑒏𑒹𑒩𑒰𑒏 𑒥𑒲𑒩/ 𑒏𑒰𑒖 𑒏𑒩𑒥 𑒏𑒢𑒲/ 𑒐𑒰𑒋𑒥 𑒙𑒳𑒮𑓂𑒮𑒰
𑒒𑒳𑒧𑒾𑒂 𑒧𑒼𑒛𑓃/ 𑒔𑒾𑒥𑒙𑒱𑒨𑒰 𑒥𑒢𑒱 𑒏𑓄/ 𑒂𑒢𑒻𑒋 𑒂𑒮
𑒗𑒩𑒻𑒋 𑒣𑒰𑒢𑒱/ 𑒥𑒢𑒥𑒻𑒋 𑒡𑒰𑒩 𑒂/ 𑒥𑒜𑓃𑒻𑒋 𑒂𑒑𑒰𑒿
𑒅𑒑𑒻𑒞𑒼𑒏𑒹𑒿 𑒄/ 𑒏𑒳𑒬 𑒞𑒱𑒪 𑒁𑒏𑓂𑒭𑒞/ 𑒂 𑒛𑒳𑒧𑒻𑒞𑒼𑒏𑒹𑒿
𑒦𑒹𑒛𑓃𑒏 𑒖𑒹𑒛𑓃/ 𑒥𑒯𑒙𑒰𑒥𑒲 𑒍𑒏𑒩𑒰/ 𑒣𑒩𑒠𑒹𑒮𑒼𑒧𑒹
𑒮𑓀𑒮𑓂𑒏𑒵𑒞𑒱𑒏 𑒄/ 𑒑𑒪𑒘𑓂𑒖𑒩 𑒅𑒚𑒪/ 𑒏𑒲 𑒯𑒧 𑒔𑒪𑒲
𑒏𑒟𑒏𑒱𑒨𑒰 𑒏𑒱/ 𑒒𑒩𑒠𑒹𑒐𑒱𑒨𑒰 𑒏𑓂𑒨𑒼 𑒢𑒻/ 𑒁𑒥𑒻𑒋 𑒋𑒞𑓄
𑒠𑒹𑒐𑒻 𑒕𑒲 𑒯𑒧/ 𑒆𑒿𑒔𑒑𑒩𑒮𑒿 𑒥𑒢𑒱/ 𑒥𑓂𑒩𑒯𑓂𑒧𑒰-𑒧𑒯𑒹𑒬
𑒔𑒜𑓃𑒰𑒅𑒞𑒰𑒩/ 𑒢𑒻 𑒢𑒛𑓃𑒯𑒰 𑒤𑒾𑒠𑒰𑒩/ 𑒔𑒰𑒯𑒲 𑒣𑓂𑒩𑒏𑒵𑒞𑒱
𑒣𑒵𑒟𑓂𑒫𑒲𑒏 𑒁𑓀𑒞/ 𑒬𑒳𑒩𑒴 𑒦𑒹𑒪 𑒣𑓂𑒩𑒰𑒩𑒧𑓂𑒦/ 𑒁𑒏𑒰𑒮 𑒂𑒥
𑒪𑒼𑒏 𑒢𑒹 𑒑𑒰𑒕/ 𑒄 𑒂𑒿𑒐𑒱𑒏 𑒮𑒾𑒢𑓂𑒠𑒩𑓂𑒨/ 𑒞𑒹𑒿 𑒞𑒿 𑒁𑒕𑒱 𑒄
𑒛𑒑𑒯𑒩 𑒄/ 𑒌 𑒅𑒞𑒩𑒹 𑒠𑒕𑒱𑒢𑒹/ 𑒁𑒑𑒯𑒢 𑒕𑒲
𑒣𑒟 𑒢𑒦𑒧𑒹/ 𑒮𑒯𑒮𑓂𑒩𑒥𑒰𑒜𑓃𑒢𑒱𑒏/ 𑒁𑒏𑒰𑒮 𑒒𑒳𑒩𑒻
𑒣𑓂𑒩𑒏𑒵𑒞𑒱 𑒖𑒹𑒢𑒰/ 𑒏𑒪𑒧𑒔 𑒥𑒻𑒮𑒪/ 𑒮𑒲𑒙𑒪 𑒮𑒲𑒜𑓃𑒲
𑒫𑒵𑒞 𑒮𑒢 𑒄/ 𑒣𑒵𑒟𑓂𑒫𑒲 𑒣𑓂𑒩𑒏𑒵𑒞𑒱 𑒑𑒼𑒪/ 𑒁𑒢𑓀𑒞 𑒮𑓂𑒣𑒭𑓂𑒙
𑒕𑒰𑒯𑒏 𑒩𑓀𑒑/ 𑒏𑒋𑒏 𑒞𑒩𑒯𑒏/ 𑒞𑒯𑒱𑒂𑒋𑒪
𑒥𑒪𑒳𑒂 𑒛𑒼𑒯/ 𑒞𑒏𑒩 𑒍𑒃 𑒣𑒰𑒩/ 𑒣𑒰𑒢𑒱 𑒁𑒏𑒰𑒮
𑒥𑒰𑒜𑓃𑒱 𑒪𑒑𑒻𑒋/ 𑒮𑒧𑒳𑒠𑓂𑒩 𑒮𑒢 𑒬𑒰𑒢𑓂𑒞/ 𑒧𑒳𑒠𑒰 𑒄 𑒫𑒱𑒠𑓂𑒨𑒳𑒞𑓂
𑒣𑒢𑒱𑒠𑒳𑒠𑓂𑒠𑒳𑒩/ 𑒦𑒹𑒪 𑒣𑒢𑒱𑒔𑒯𑒙𑒰/ 𑒥𑒰𑒜𑓃𑒱𑒏 𑒠𑒹𑒮
𑒒𑒳𑒩𑒻𑒞 𑒐𑒹𑒞/ 𑒩𑒮𑓂𑒞𑒰 𑒮𑒢 𑒮𑒩𑓂𑒣𑒱𑒪/ 𑒣𑓂𑒩𑒏𑒵𑒞𑒱 𑒩𑒴𑒣
𑒃𑒢𑒰𑒩-𑒥𑒹𑓀𑒑/ 𑒃𑒢𑒰𑒩𑒼 𑒣𑒻𑒒, 𑒥𑒹𑓀𑒑𑒼𑓀/ 𑒮𑒲𑒧𑒰 𑒕𑒻𑒯𑒻 𑒏𑒲
𑒮𑒾𑓀𑒮𑒏 𑒮𑒲𑒙𑒲/ 𑒒𑒰𑒞 𑒏𑒩𑒻𑒋 𑒢𑒻 𑒞𑒹𑒿/ 𑒦𑒹𑒪 𑒐𑒞𑒧
𑒅𑒑𑒻𑒞 𑒔𑒰𑒢/ 𑒔𑒰𑒢𑒏 𑒃𑒖𑒼𑒩𑒱𑒨𑒰/ 𑒛𑒳𑒧𑒻𑒞 𑒔𑒰𑒢
𑒂𑒬𑒰𑒪𑒳𑒥𑓂𑒡𑒲 𑒕𑒲/ 𑒖𑒯𑒩𑒧𑒼𑒯𑒩𑒰 𑒕𑒲/ 𑒛𑒹𑒪𑒲𑒐𑒼𑒓𑒲 𑒢𑒻
𑒢𑒲𑒪 𑒮𑒧𑒳𑒠𑓂𑒩/ 𑒏𑒏𑒩 𑒁𑒕𑒱 𑒕𑒰𑒯/ 𑒢𑒲𑒪 𑒁𑒏𑒰𑒮
𑒠𑒱𑒥𑒛𑓃𑒐𑒾𑒏𑒴/ 𑒠𑒱𑒥𑒛𑓃𑒰𑒏 𑒦𑒲𑒛𑓃 𑒕𑒲/ 𑒧𑒳𑒠𑒰 𑒚𑒰𑒜𑓃 𑒕𑒲
𑒧𑒹𑒒 𑒆𑒣𑒩/ 𑒒𑒳𑒩𑒲 𑒐𑒠𑒥𑒠𑒰𑒃𑒞/ 𑒕𑒲 𑒥𑒛𑓃𑒏𑒻𑒞
𑒮𑒴𑒩𑓂𑒨 𑒕𑒰𑒯𑒏/ 𑒣𑒻𑒒𑒞𑓂𑒫 𑒠𑒰𑒑 𑒪𑒹𑒢𑒹/ 𑒏𑒩𑒹𑒖𑒣𑒩
𑒮𑒱𑓀𑒯 𑒮𑒱𑓀𑒯𑒱𑒢/ 𑒠𑒿𑒞𑒐𑒱𑒮𑓂𑒙𑒲 𑒏𑒩𑒻𑒋/ 𑒯𑒲𑒮 𑒧𑒿𑒑𑒻𑒋
𑒐𑒩𑒯𑒰 𑒞𑒹𑒖/ 𑒠𑒾𑒑𑒻𑒋 𑒢𑒳𑒏𑒰𑒃𑒋/ 𑒥𑒲𑒯𑒩𑒱 𑒥𑒢𑒰
𑒣𑒩𑒥𑒰 𑒣𑒰𑒿𑒐𑒱/ 𑒥𑒖𑒥𑒻 𑒕𑒲 𑒏𑒯𑒱 𑒏𑓄/ 𑒯𑒿, 𑒞𑒲 𑒞𑒲 𑒞𑒲 𑒞𑒲
𑒮𑒳𑒑𑓂𑒑𑒰 𑒥𑒖𑒻𑒋/ 𑒑𑒳𑒧𑓂𑒧 𑒦𑒹𑒪 𑒚𑒰𑒜𑓃 𑒕𑒲/ 𑒥𑒖𑒻𑒋 𑒮𑒳𑒑𑓂𑒑𑒰
𑒖𑒪𑒼𑒠𑒲𑒣 𑒕𑒻/ 𑒁𑒟𑒰𑒯 𑒧𑒳𑒠𑒰 𑒕𑒻 𑒢𑒻/ 𑒣𑒰𑒟𑒩 𑒏𑒯𑒻𑒋
𑒔𑒰𑒢𑒏 𑒩𑒴𑒣/ 𑒣𑒴𑒩𑓂𑒝𑒱𑒧𑒰𑒧𑒹 𑒁𑒢𑓂𑒯𑒰𑒩/ 𑒪𑒑𑒏 𑒮𑒞𑓂𑒨
𑒤𑒹𑓀𑒔 𑒏𑒰𑒜𑓃𑒢𑒹/ 𑒣𑓂𑒩𑒏𑒵𑒞𑒱𑒏 𑒑𑒧𑒪𑒰/ 𑒣𑒛𑓃𑒻𑒢 𑒩𑒼𑒏𑒴
𑒥𑒟𑒢𑒱𑒨𑒰𑒿 𑒕𑒲/ 𑒦𑒹𑒛𑓃𑒏𑒹𑒿 𑒯𑒏𑓂𑒏𑒰 𑒠𑒻𑒞/ 𑒍 𑒖𑒰𑒃 𑒕𑒻/ 𑒪𑒐𑒱𑒨𑒰 𑒦𑒹𑒛𑓃 𑒂𑒑𑒰𑒿/ 𑒦𑒹𑒛𑓃𑒱𑒨𑒰 𑒡𑒮𑒰𑒢 𑒢𑒻/
𑒠𑒹𑒐𑒻 𑒕𑒲 𑒚𑒰𑒜𑓃𑒹,/ 𑒁𑒥𑒻𑒞 𑒂 𑒖𑒰𑒃𑒞/ 𑒦𑒹𑒛𑓃 𑒔𑒩𑒻𑒪𑒹/ 𑒖𑒰𑒃𑒞𑒏𑒹𑒿 𑒐𑒦𑒰𑒅/ 𑒁𑒥𑒱𑒞𑒹 𑒥𑒟𑒢𑒰𑒅
𑒣𑓂𑒩𑒏𑒵𑒞𑒱 𑒢𑒵𑒞𑓂𑒨/ 𑒯𑓀𑒮𑓂𑒨𑒰𑒯𑒮𑓂𑒞 𑒢𑒵𑒞𑓂𑒨/ 𑒣𑓂𑒩𑒏𑒵𑒞𑒱 𑒩𑒧𑓂𑒦𑒰/
𑒆𑒣𑒩 𑒚𑒰𑒜𑓃/ 𑒟𑒪-𑒁𑒏𑒰𑒮 𑒥𑒱𑒔/ 𑒦𑒖𑒱𑒨𑒰𑒥𑒻𑒞
𑒮𑓂𑒫𑒮𑓂𑒞𑒱𑒏𑒯𑒮𑓂𑒞/ 𑒐𑒙𑒏𑒰𑒧𑒳𑒐𑒯𑒮𑓂𑒞/ 𑒧𑒏𑒩𑒯𑒮𑓂𑒞
𑒣𑓂𑒩𑒏𑒵𑒞𑒱 𑒍𑒜𑓃𑒻/ 𑒒𑒰𑒮𑒏 𑒔𑒠𑓂𑒠𑒩𑒱 𑒂/ 𑒞𑒰𑒏𑒻 𑒁𑒏𑒰𑒮
𑒁𑒯𑒩𑒰 𑒠𑒻𑒞/ 𑒠𑒹𑒢𑒯𑒰𑒩𑒏 𑒞𑒵𑒣𑓂𑒞𑒱/ 𑒠𑒹𑒐𑒥𑒻𑒕 𑒄
𑒑𑒼𑒩𑒯𑒰 𑒜𑒼𑒪/ 𑒕𑒲 𑒑𑒼𑒥𑒩𑒏𑒜𑓃𑒢𑒲/ 𑒑𑒼𑒢𑒾𑒩 𑒥𑒢𑒻/ 𑒫𑒰 𑒑𑒼𑒃𑒚𑒰𑒏 𑒜𑒼𑒪/ 𑒥𑒜𑓃𑒻𑒋 𑒆𑒿𑒔 𑒠𑒱𑒮
𑒐𑒙 𑒧𑒡𑒳𑒩/ 𑒯𑒩𑒱𑒨𑒩 𑒂 𑒪𑒰𑒪/ 𑒮𑓀𑒑𑒹-𑒮𑓀𑒑 𑒕𑒻
𑒋𑒏𑒣𑒹𑒛𑓃𑒱𑒨𑒰/ 𑒡𑓀𑒑𑒰𑒃𑒞 𑒜𑒯𑒻𑒞/ 𑒥𑒢𑒞 𑒩𑒮𑓂𑒞𑒰
𑒪𑒻𑒞 𑒜𑒳𑒃𑒮/ 𑒏𑒰𑒪𑒱𑒠𑒰𑒮𑒹 𑒪𑒛𑓃𑒻𑒋/ 𑒙𑒳𑒛𑓃𑒢𑒲𑒣𑒩
𑒧𑒰𑒕𑒏 𑒒𑒩/ 𑒮𑒯𑒟 𑒑𑒰𑒿𑒟𑒱 𑒂𑒢𑒲/ 𑒁𑒣𑒢𑒰 𑒒𑒩
𑒮𑒧𑒳𑒠𑓂𑒩 𑒟𑒪/ 𑒧𑒱𑒪𑒻𑒋 𑒁𑒏𑒰𑒮𑒧𑒹/ 𑒞𑓂𑒩𑒱𑒬𑓀𑒏𑒳 𑒦𑒹𑒪
𑒣𑓂𑒩𑒏𑒵𑒞𑒱 𑒌𑒢𑒰/ 𑒅𑒡𑒱𑒨𑒰𑒃𑒞 𑒠𑒵𑒬𑓂𑒨/ 𑒧𑒼𑒢𑒏 𑒌𑒢𑒰!
𑒢𑒱𑒔𑒳𑒏𑒰 𑒜𑒰𑒪𑒰/ 𑒅𑒣𑒩𑒏𑒰 𑒔𑒜𑓃𑒰𑒃/ 𑒠𑒳𑒢𑒴 𑒮𑒩𑒪
𑒑𑒼𑒛𑓃𑒰𑒏 𑒪𑒲𑒠/ 𑒒𑒼𑒛𑓃𑒹 𑒮𑒢 𑒩𑓀𑒑𑒏/ 𑒂 𑒩𑒴𑒣𑒏 𑒕𑒻
𑒒𑒩 𑒯𑒧𑒩/ 𑒢𑒰𑒩𑒏 𑒙𑒰𑒪 𑒮𑒢/ 𑒅𑒛𑓃𑒱𑒌𑒞 𑒢𑒻
𑒮𑒹𑒯𑒢𑓂𑒞𑒰 𑒪𑒹𑒢𑒹/ 𑒚𑒰𑒜𑓃 𑒕𑒲 𑒧𑒩𑒱𑒨𑒼 𑒏𑓄/ 𑒠𑒹𑒐𑒥𑒻 𑒠𑒱𑒢
𑒏𑒣𑒼𑒞 𑒢𑒵𑒞𑓂𑒨 /𑒑𑒖𑒠𑒢𑓂𑒞 𑒥𑒢𑒪/ 𑒕𑒲 𑒚𑒰𑒜𑓃 𑒮𑒼𑒗𑒰𑒿
𑒙𑒏𑒩𑒰𑒃𑒋 / 𑒯𑒯𑒰𑒩𑒼𑒯 𑒏𑒩𑒻𑒞/ 𑒙𑒴𑒙𑒱 𑒖𑒰𑒃𑒋
𑒁𑒧𑒩𑒪𑒞𑓂𑒞𑒲/ 𑒑𑒕𑒰𑒩𑒢𑒹 𑒑𑒰𑒕𑒏𑒹𑒿/ 𑒍𑒏𑒩𑒰 𑒧𑒰𑒩𑒱/ 𑒁𑒣𑒢𑒹 𑒥𑒢𑒱 𑒑𑒹𑒪/ 𑒁𑒕𑒱 𑒁𑒧𑒩𑒪𑒞𑓂𑒞𑒲
𑒑𑒩𑒖𑒻 𑒧𑒹𑒒/ 𑒔𑒧𑒏𑒻𑒋 𑒥𑒱𑒖𑒳𑒩𑒲/ 𑒣𑓂𑒩𑒏𑒵𑒞𑒱 𑒢𑒵𑒞𑓂𑒨
𑒥𑒱𑒖𑒳𑒩𑒲 𑒠𑒹𑒐𑒱/ 𑒧𑒼𑒢 𑒣𑒛𑓃𑒻𑒋 𑒣𑓂𑒩𑒹𑒧 / 𑒖𑒹 𑒢𑒻 𑒦𑒹𑒙𑒪 / 𑒯𑒱𑒪𑒼𑒩𑒻𑒋 𑒧𑒹𑒒 𑒄/ 𑒯𑓂𑒩𑒱𑒠𑒻 𑒦𑒲𑒞𑒩𑒡𑒩𑒱
𑒒𑒱𑒔𑒻 𑒕𑒲 𑒂𑒮/ 𑒥𑒩𑒤𑒣𑒩 𑒢𑒰𑒯/ 𑒥𑒱𑒢 𑒣𑓂𑒩𑒨𑒰𑒮/ 𑒧𑒼𑒢𑒏 𑒅𑒕𑒰𑒯𑒲 𑒂/ 𑒂𑒮𑒏 𑒣𑓂𑒩𑒨𑒰𑒮𑒧𑒹
𑒁𑒧𑓂𑒪 𑒥𑒩𑒐𑒰/ 𑒢𑒧𑒕𑒳𑒩𑒳𑒏 𑒁𑒕𑒱/ 𑒠𑒹𑒪𑒱𑒨𑒢𑓂𑒯𑒱 𑒏𑓄/ 𑒮𑒳𑒛𑓂𑒛𑒰𑒯 𑒮𑒹𑒯𑒼 𑒥𑒢𑒱/ 𑒥𑒢𑒱 𑒏𑒰𑒪-𑒥𑒩𑒐𑒰
𑒖𑒲𑒫𑒢-𑒥𑒩𑓂𑒐𑒰/ 𑒥𑒩𑓂𑒐𑒰 𑒠𑒻𑒋 𑒖𑒲𑒫𑒢/ 𑒁𑒧𑓂𑒪𑒏 𑒥𑒩𑓂𑒐𑒰/ 𑒕𑒠𑓂𑒧𑒫𑒹𑒬𑒲 𑒥𑒢𑒱 𑒏𑓄 / 𑒥𑒢𑒪 𑒧𑒵𑒞𑓂𑒨𑒳-𑒥𑒩𑓂𑒐𑒰
𑒖𑒩𑒱𑒨𑒼 𑒑𑒹𑒪/ 𑒞𑒻𑒨𑒼 𑒁𑒕𑒱 𑒚𑒰𑒜𑓃 𑒄/ 𑒧𑒳𑒿𑒯 𑒠𑒳𑒮𑒻𑒞
𑒮𑒖𑒲𑒫 𑒯𑒲𑒢 / 𑒮𑒵𑒭𑓂𑒙𑒱𑒫𑒱𑒯𑒲𑒢 𑒪𑒼𑒏/ 𑒁𑒮𑒑𑒩 𑒕𑒲/ 𑒏𑒪𑒰 𑒞𑒻𑒨𑒼 𑒧𑒩𑒪?/ 𑒢𑒵𑒞𑓂𑒨 𑒞𑒻𑒨𑒼 𑒩𑒳𑒏𑒪?
𑒧𑒐𑒰𑒢 𑒣𑒰𑒢/ 𑒠𑒱𑒢 𑒞𑒏𑒰 𑒦𑒹𑒙𑒻𑒋/ 𑒣𑒯𑒱𑒔𑒰𑒢 𑒖𑒹/ 𑒣𑒻𑒏𑒰𑒩𑒏 𑒯𑒰𑒟𑒧𑒹/ 𑒥𑒱𑒏𑒰 𑒩𑒯𑒪 𑒁𑒕𑒱
𑒁𑒯𑒩𑒰 𑒁𑒕𑒱/ 𑒣𑒱𑒩𑒰𑒩𑒏 𑒤𑒛𑓃 𑒄/ 𑒑𑒩𑒲𑒥𑒏 𑒨𑒾
𑒩𑒰𑒞𑒱𑒏 𑒗𑒼𑓀𑒗/ 𑒩𑒰𑒞𑒱 𑒁𑒣𑒢𑒹 𑒁𑒕𑒱/ 𑒏𑒲𑒛𑓃𑒰 𑒂 𑒔𑒱𑒛𑓃𑒻/ 𑒫𑒰𑒞𑒰𑒫𑒩𑒝 𑒁𑒕𑒱/ 𑒬𑒰𑒢𑓂𑒞 𑒂𑒏𑒱 𑒦𑒳𑒞𑒰𑒯
𑒥𑒾𑒂𑒔𑒾𑒩𑒲𑒧𑒹/ 𑒔𑒩𑒱 𑒣𑒹𑒙 𑒪𑒙𑒏𑒻/ 𑒒𑒩 𑒒𑒳𑒩𑒳 𑒢𑒹/ 𑒔𑒩𑒥𑒰𑒯𑒏𑒹𑒿 𑒞𑒰𑒏𑒻/ 𑒢𑒱𑒏𑒹𑒢𑒰 𑒞𑒿 𑒁𑒕𑒱 𑒍
𑒁𑒣𑒩𑒧𑓂𑒣𑒰𑒩/ 𑒧𑒰𑒃𑒏 𑒧𑒧𑒞𑒰𑒏/ 𑒫𑒱𑒪𑒏𑓂𑒭𑒝𑒞𑒰


















𑒏𑒳𑒝𑓂𑒛𑒪𑒱𑒨𑒰
𑓑
𑒮𑒞 𑒁𑒮𑒞 𑒧𑒹 𑒦𑒹𑒠 𑒏𑒩𑒴, 𑒩𑒰𑒐𑒴 𑒢𑒻 𑒏𑒱𑒕𑒳 𑒩𑒼𑒐
𑒞𑒞𑒧𑒞 𑒢𑒻 𑒏𑒩𑒴 𑒏𑒢𑒱𑒨𑒼, 𑒖𑒹 𑒕𑒻 𑒯𑒼𑒢𑒲 𑒪𑒹𑒐
𑒖𑒹 𑒕𑒻 𑒯𑒼𑒢𑒲 𑒪𑒹𑒐, 𑒯𑒳𑒋 𑒮𑒹 𑒢𑒲𑒏 𑒢𑒱𑒏𑒹𑒢𑒰
𑒮𑒞𑓂𑒨𑒏 𑒖𑒲𑒞 𑒯𑒋𑒞, 𑒖𑒿 𑒏𑒩𑒥𑒻 𑒁𑒏𑒮𑒞𑒱𑒏𑒮 𑒢𑒹
𑒛𑒩 𑒮𑓀𑒑 𑒁𑒮𑒞 𑒏𑒹𑒩, 𑒛𑒩 𑒜𑒰𑒯𑒴 𑒧𑒡𑓂𑒨 𑒯𑒵𑒠𑒨𑒏
𑒌𑒩𑒰𑒫𑒞𑒏 𑒥𑒳𑒗𑒻𑒞, 𑒨𑒋𑒯 𑒕𑒲 𑒁𑒮𑒞𑓂𑒨𑒏 𑒮𑒞

𑓒
𑒕𑒞𑓂𑒞𑒰 𑒒𑒳𑒩𑒕𑒰 𑒣𑒪𑓂𑒪𑒾𑒮𑒿, 𑒦𑒹𑒪 𑒠𑒱𑒢𑒹 𑒁𑒢𑓂𑒯𑒰𑒩।
𑒠𑒱𑒢 𑒥𑒱𑒞𑒪𑒰𑒣𑒩 𑒒𑒩 𑒒𑒳𑒩𑒲, 𑒏𑒰𑒪 𑒦𑒹𑒪 𑒫𑒱𑒏𑒩𑒰𑒪॥
𑒏𑒰𑒪 𑒦𑒹𑒪 𑒫𑒱𑒏𑒩𑒰𑒪, 𑒣𑒼𑒩𑒹-𑒣𑒼𑒩 𑒮𑒱𑒯𑒩𑒻𑒋।
𑒮𑒳𑒢𑒞 𑒏𑒹𑒍 𑒮𑒫𑒰𑒪, 𑒥𑒼𑒪 𑒥𑒑𑒯𑒰 𑒪𑒑𑒥𑒻𑒋।
𑒌𑒩𑒰𑒫𑒞 𑒥𑒹𑒯𑒰𑒪, 𑒥𑒼𑒪 𑒏𑒞𑓄 𑒦𑒹𑒪 𑒢𑒱𑒣𑒞𑓂𑒞𑒰।
𑒒𑒳𑒩𑒱𑒨𑒰𑒋 𑒥𑒢𑒱 𑒏𑒰𑒪, 𑒣𑒻𑒮𑒱 𑒥𑒱𑒔 𑒒𑒼𑒩𑒢 𑒕𑒞𑓂𑒞𑒰॥





𑓓
𑒫𑒱𑒖𑒨 𑒥𑒱𑒢 𑒑𑒩𑓂𑒫 𑒯𑒋𑒞 𑒖𑒿, 𑒥𑒳𑒗𑒴 𑒞𑒐𑒢 𑒄 𑒢𑒲𑒏
𑒯𑒰𑒩𑒱 𑒦𑒹𑒢𑒹 𑒒𑒥𑒩𑒰𑒅 𑒢𑒻, 𑒥𑒰𑒞 𑒥𑒳𑒗𑒴 𑒄 𑒧𑒲𑒞
𑒥𑒰𑒞 𑒥𑒳𑒗𑒴 𑒄 𑒧𑒲𑒞, 𑒯𑒳𑒁𑒋 𑒖𑒿 𑒋𑒏 𑒗𑒧𑒹𑒪𑒰
𑒯𑒰𑒩𑒱 𑒧𑒰𑒢𑒱 𑒥𑒜𑓃𑒱 𑒖𑒰𑒅, 𑒏𑒩𑒴 𑒢𑒹 𑒤𑒹𑒩 𑒥𑒐𑒹𑒩𑒰
𑒦𑒹𑒪 𑒏𑒰𑒖 𑒣𑓂𑒩𑒮𑒢𑓂𑒢 𑒖𑒞𑓄, 𑒢𑒲𑒏 𑒁𑒕𑒱 𑒙𑒰 𑒮𑒋𑒯
𑒧𑒼𑒢 𑒌𑒩𑒰𑒫𑒞 𑒥𑒳𑒗𑒱, 𑒠𑒹𑒐𑒱 𑒪𑒲 𑒯𑒰𑒩𑒱-𑒫𑒱𑒖𑒨
𑓔
𑒥𑒼𑒪 𑒫𑒔𑒢 𑒯𑒳𑒁𑒋 𑒢𑒲𑒏, 𑒥𑒴𑒗𑒱 𑒥𑒰𑒖𑒲 𑒖𑒿 𑒥𑒰𑒞
𑒑𑒳𑒧𑓂𑒧 𑒩𑒯𑒢𑒰𑒃𑒋 𑒚𑒲𑒏, 𑒯𑒳𑒋 𑒖𑒿 𑒢𑒧𑒯𑒩 𑒖𑒰𑒪
𑒯𑒳𑒋 𑒖𑒿 𑒢𑒧𑒯𑒩 𑒖𑒰𑒪, 𑒪𑒹𑒞 𑒍 𑒪𑒣 𑒠𑓄 𑒦𑒲𑒞𑒩
𑒯𑒪𑓂𑒪𑒰 𑒥𑒢𑒱 𑒖𑒰𑒋𑒞, 𑒢𑒻 𑒁𑒕𑒱 𑒖𑒿 𑒥𑒹𑒩 𑒅𑒔𑒱𑒞 𑒣𑒩
𑒮𑒳𑒢𑒴 𑒯𑒧𑒩 𑒄 𑒥𑒰𑒞, 𑒥𑒰𑒞 𑒯𑒼𑒃𑒋 𑒁𑒢𑒧𑒼𑒪
𑒌𑒩𑒰𑒫𑒞 𑒏𑒯𑒱 𑒖𑒰𑒨, 𑒏𑒯𑒴 𑒢𑒻 𑒍𑒪 𑒮𑒢 𑒥𑒼𑒪